དཔལ་འཁོར་ལོ་སྡོམ་པ་དྲིལ་བུ་ལུགས་ཀྱི་ཕྱི་དཀྱིལ་ལྷ་ལྔའི་སྒྲུབ་ཐབས་ལོ་པཎ་ཞལ་ལུང་།
དཔལ་འཁོར་ལོ་སྡོམ་པ་དྲིལ་བུ་ལུགས་ཀྱི་ཕྱི་དཀྱིལ་ལྷ་ལྔའི་སྒྲུབ་ཐབས་ལོ་པཎ་ཞལ་ལུང་ཞེས་བྱ་བ་བཞུགས་སོ།།
ན་མྉྤརམ་གུ་རུ་ཤྩཙཀྲསེ་ཝ་རཱ་ཡ། དུས་གསུམ་རྒྱལ་བ་ཐམས་ཅད་ཀྱི་མཁྱེན་བརྩེ་ནུས་པའི་དབང་ཕྱུག་རིགས་དང་དཀྱིལ་འཁོར་ཀུན་གྱི་ཁྱབ་བདག་ཞ་ལུ་པ་ཆེན་པོ་རིན་ཅེན་བསོད་ནམས་མཆོག་གྲུབ་བསྟན་པའི་རྒྱལ་མཚན་དཔལ་བཟང་པོའི་ཞབས་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །ཟུང་འཇུག་རྡོ་རྗེ་འཛིན་པ་མ་ཐོབ་ཀྱི་བར་དུ་རྗེས་སུ་གཟུང་དུ་གསོལ། །གར་གུའི་ཉམས་ལྡན་ཨིནྡྲ་ནཱི་ལའི་རི། །མཛེས་སྡུག་འཚམས་སྤྲིན་མདངས་ཀྱིས་ཉེར་འཁྱུད་པ། །ཨེ་ཝཾ་ཟུང་འཇུག་བླ་མ་ཧེ་རུ་ཀཿ། །མཉམ་སྦྱོར་རྡོ་རྗེ་བཙུན་མོས་དེང་འདིར་སྐྱོངས། །ཨཽ་ཊི་བི་ཤཱའི་ནགས་སུ་འཇའ་ལུས་སྐུ། །བརྙེས་ནས་མངོན་སུམ་མཁའ་སྦྱོད་སར་གཤེགས་པས། །གྲུབ་པའི་འཁོར་ལོས་སྒྱུར་བ་དྲིལ་བུ་པ། ཁྱོད་ཞབས་བྱང་ཆུབ་བར་དུ་བསྙེན་ལ་སྤྲོ། །འཇིག་རྟེན་མིག་གཅིག་མལ་ལོ་བཞེད་པའི་གཞུང་། །ཤིང་རྟའི་སྲོལ་འབྱེད་བླ་ཆེན་ས་སྐྱ་བ། །སྒྲ་སྒྱུར་མར་དོ་ཆོས་ཀྱི་དབང་ཕྱུག་ལུགས། །འཛིན་མཁས་(༢ན)
གཟེ་བ་བློ་ལྡན་སེང་གེ་རྒྱལ། །བཀའ་བབས་དབང་ཆུའི་གངྒཱ་རྣམ་དཔྱོད་ལྟོར། །ལེགས་འཁྱིལ་ཀུན་མཁྱེན་བུ་སྟོན་ཛཧྣུ། །ཟབ་ལམ་གནད་ཀྱི་མདུད་འགྲོལ་བཙོང་ཁ་པ། །ཕྱོགས་འདིར་མཁས་ཤིང་གྲུབ་རྣམས་ཕྱག་གི་ཡུལ། །རང་རྒྱུད་ཐ་རྒོད་སྨིན་བྱེད་དྲོད་གཤེར་ཆུས། །གྲོལ་ནུས་རྟོག་པའི་ས་བོན་ཡོངས་སྦྲུམ་ནས། །ཟུང་འཇུག་སྙེ་མ་སྟེར་མཛད་རྡོ་རྗེ་འཆང་། །རིན་ཅེན་བསོད་ནམས་མཆོག་གྲུབ་རིགས་ཀྱི་བདག །མ་རྒྱུད་རྣལ་འབྱོར་གསང་མཐའི་སྙིང་པོའི་བཅུད། །དབང་དང་བྱིན་རླབས་དམར་འཁྲིད་ཟིལ་མངར་གྱིས། །རང་བློའི་བུམ་བཟང་འགེང་བའི་ཡོངས་འཛིན་ཚོགས། །བསམས་ཀྱིན་ལམ་ཟབ་ཉམས་ལེན་བསྒོམ་ལ་བྲོད། །སྔོན་རབས་མཁས་མང་བཞེད་གཞུང་ལ་བརྟེན་ནས། །མ་དག་རྙོག་དྲི་དཔྱད་གསུམ་ཀེ་ཏ་ཀས། །ཉེར་བགྲུངས་ཁྲག་འཐུང་ལྷ་ལྔ་སྒྲུབ་པའི་ཐབས། །འཁྲུལ་མེད་ལོ་པཎ་ཞལ་ལུང་དེང་འདིར་སྤེལ། །དེ་ལ་འདིར་གྲུབ་པའི་དབང་ཕྱུག་རྡོ་རྗེ་དྲིལ་བུ་པའི། །(༢བ)
བཞེད་སྲོལ་དཔལ་འཁོར་ལོ་སྡོམ་པའི་ཟབ་དོན་དྲིལ་བུ་བ་ཕྱི་དཀྱིལ་གྱི་སྒྲུབ་པའི་ཐབས་ཀྱི་རིམ་པ་ཉམས་སུ་བླང་བ་ལ་མཉམ་པར་བཞག་པ་དང་མ་བཞག་པའི་རྣལ་འབྱོར་གཉིས། དང་པོ་ལ་བསྐྱེད་རྫོགས་གཉིས་ལས། དང་པོ་ལ་སྔོན་འགྲོ་དང་དངོས་གཞི་གཉིས་ཀྱི། དང་པོ་ལ་སྐྱབས་སེམས། རྡོར་སེམས། དག་གསུམ། ཕུང་ཁམས་སྐྱེ་མཆེད་བརླབ་པ། ཚོགས་ཞིང་དང་ལྔའི། དང་པོ་ནི། སྲོད་ཐུན་གྱི་མཐར་ཆོས་ཐམས་ཅད་བསམ་གྱིས་མི་ཁྱབ་པའི་རྣལ་འབྱོར་གྱི་ངང་ལ་ཉལ་ཏེ། ཐོར་ཐུན་ལ་རྣལ་འབྱོར་མའི་གླུས་བསྐུལ་བའི་རྐྱེན་གྱིས་ཧེ་རུ་ཀའི་ང་རྒྱལ་གྱིས་ལངས་ནས་ཁྲུས་ཀྱི་རྣལ་འབྱོར་སྤྲོ་ན་བྱ། སྟན་བདེ་བ་ལ་བསམ་གཏན་གྱི་སྤྱོད་ལམ་དང་ལྡན་པས་སྐྱབས་ཡུལ་རྣམས་གསལ་བཏབ་སྟེ། བདག་དང་འགྲོ་བ་ནམ་མཁའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་ལན་གསུམ་གྱི་མཇུག་ཏུ། བླ་མ་དང་དཀོན་ཅོག་རིན་པོ་ཆེ་རྣམ་པ་གསུམ་ལ་ཕྱག་འཚལ་ཞིང་སྐྱབས་སུ་མཆིའོ། །ཁྱེད་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་དཔལ་འཁོར་ལོ་སྡོམ་པའི་ལམ་གྱི་རིམ་པ་བསྒོམ་པར་བགྱིའོ། །ཞེས་ལན་གསུམ་བརྗོད། གཉིས་(༣ན)
པ་རྡོར་སེམས་ནི། རང་གི་སྤྱི་བོར་བཾ་ལས་པདྨ་དང་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་དང་རྡོ་རྗེ་ལས་དཔལ་ཧེ་རུ་ཀཿསྐུ་མདོག་སྔོན་པོ་ཞལ་བཞི་ཕྱག་བརྒྱད་པ་གཡས་དམར། གཡོན་དཀར། སྟེང་ཞལ་སེར་པོ། རྩ་བའི་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། དེའི་འོག་མ་གཉིས་ཀྱིས་གླང་ལྤགས་བརྒྱངས་པ། གཡས་འོག་མ་གཉིས་ཀྱིས་ཐོད་པ་དང་ཁ་ཊཾ་ག །གཡོན་འོག་མ་གཉིས་ཀྱིས་ཞགས་པ་དང་ཚངས་མགོ་འཛིན་པ། ཞབས་གཡས་བརྐྱང་གཡོན་བསྐུམ་གྱིས་དུས་མཚན་དང་འཇིགས་བྱེད་མནན་པ། རང་འདྲའི་ཡུམ་རྩ་ཕྱག་གཉིས་ཀྱིས་རྡོ་དྲིལ་འཛིན་པས་ཡབ་ཀྱི་མགུལ་ནས་འཁྱུད་ཅིང་། དེ་འོག་གཉིས་རྡོ་རྗེ། ཕྱག་ལྷག་མ་ཡབ་དང་འདྲ་བ་ཞབས་གཉིས་ཡབ་ཀྱི་རྐེད་ལ་འཁྲིལ་བ། མཚན་ཉིད་ཐམས་ཅད་ཡོངས་སུ་རྫོགས་པའི་སྐུར་བསམ། དེའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། མཛུབ་མོ་གཉིས་མདུད། གུང་མོ་གཉིས་རྩེ་སྤྲད། །མཐེ་བོང་གཉིས་ཀྱང་རྩེ་སྦྱར་ཏེ་སོར་མོ་ལྷག་མ་བརྐྱང་བ་འབར་བའི་ཕྱག་རྒྱ་དཔྲལ་བར་བཞག་ནས་གཡོན་དུ་བསྐོར། མིག་གྱེན་དུ་བལྟ་བ་དང་བཅས་གདོང་བསྒྱུར་རྐང་པ་གཡས་པས་གཡོན་པ་མནན་ཏེ། ཕཾཻ། ཐུགས་ཀའི་ཧཱུྃ་ལས་འོད་ཟེར་འཕྲོས། ཡེ་ཤེས་པ་དང་དབང་གི་ལྷ་རྣམས་པད་ཀར་དང་བཅས་ཐུགས་ཀར་གཡས་སྟེང་དུ་བསྣོལ་བ་མཛུབ་མོ་ལྕགས་ཀྱུ་ལྟར་ཅུང་ཟད་གུག་པའི་རྡོ་རྗེ་བསྡུ་བའི་ཕྱག་རྒྱས་ཨོཾ་བཛྲས་མཱ་ཛཿས་སྤྱན་དྲངས། ཨོཾ་སརྦ་ཏ་ཐཱ་ག་ཏ་ས་པ་རི་ཝཱ་ར་ཨརྒྷཾ་ནས་ཤཔྟ་པྲཏཱི་ཙྪ་ཨཱཿཧཱུྃ་(༣བ)
གི་བར་གྱིས་མཆོད། ཛཿཧཱུྃ་བཾ་ཧོཿས་བསྟིམ། ཨོཾ་སརྦ་ཏ་ཐཱ་ག་ཏ་ཨ་བྷི་ཥཉྩི་ཏུ་མཾ། ཞེས་གསོལ་བ་བཏབ་པས། ཨོཾ་སརྦ་ཏཱ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ཞེས་དབང་བསྐུར། སྐུ་གང་། དྲི་མ་དག །ཆུ་ལྷག་མ་ཡར་ལུད་པ་ལས་ཡབ་ལ་མི་བསྐྱོད་པ་དང་ཡུམ་ལ་རྣམ་པར་སྣང་མཛད་ཀྱིས་དབུ་བརྒྱན་པར་བསམ། བཅོམ་ལྡན་འདས་ཀྱི་ཐུགས་ཀར་པདྨ་དང་ཉི་མའི་དཀྱིལ་འཁོར་སྟེང་དུ་ཧཱུྃ་སྔོན་པོའི་མཐར་ཡི་གེ་བརྒྱ་པའི་སྔགས་ཀྱི་འཕྲེང་བས་བསྐོར་བ་དེ་ལས་འོད་ཟེར་འཕྲོས་པས། དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་སྙིང་པོ་ཡེ་ཤེས་ཀྱི་བདུད་རྩི་སྤྱན་དྲངས་ཧཱུྃ་ལ་ཐིམ། བཅོམ་ལྡན་འདས་བདག་དང་སེམས་ཅན་ཐམས་ཅད་ཀྱིས་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ། ཞེས་གསོལ་བ་བཏབ་པས། ཧཱུྃ་ལས་བདུད་རྩི་བབས། ཧེ་རུ་ཀའི་སྐུ་གང་། སྐུའི་དབྱིབས་བརྒྱུད། ཡུམ་གྱི་སྐུ་གང་། ཡབ་ཡུམ་གྱི་སྦྱོར་མཚམས་ནས་བདུད་རྩི་བབས། བདག་གི་སྤྱི་གཙུག་ནས་ཞུགས་པ་ནད་གདོན་སྡིག་སྒྲིབ་ཐམས་ཅད་དུད་ཁུའམ་རྣག་ཁྲག་གི་རྣམ་པར་བཤང་གཅི་གཉིས་དང་རྐང་མཐིལ་གཉིས་ནས་མཐེན་ནས་ཤུལ་ཐམས་ཅད་བདུད་རྩིས་གང་བར་བསམ། ཧེ་རུ་ཀའི་ཡིག་བརྒྱ་ཅི་ནུས་སུ་བཟླ། བདག་ནི་མི་ཤེས་རྨོངས་པ་སྟེ། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། སྐུ་གསུང་ཐུགས་རྩ་བ་དང་ཡན་(༤ན)
ལག་གི་དམ་ཚིག་ཉམས་པ་ཐམས་ཅད་འཐོལ་ལོ། །བཤགས་སོ། །སྡིག་པ་དང་སྒྲིབ་པ་ཉེས་པ་དང་ལྟུང་བའི་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ། ཞེས་གསོལ་བ་བཏབ་པས། བཅོམ་ལྡན་འདས་དཔལ་ཧེ་རུ་ཀཿཡབ་ཡུམ་འོད་དུ་ཞུ་ནས་སྤྱ་བོ་ནས་རང་ལ་ཐིམ་པས་རང་གི་ལུས་ཤེལ་གོང་ལྟ་བུར་བསམ་མོ། །གསུམ་པ་དག་པ་གསུམ་གྱི་རྣལ་འབྱོར་ནི། ཤྲཱི་ཧེ་རུ་ཀཿཧེ་ནི་ཀུན་གྱི་འབྱུང་གནས་སུ་གྱུར་བའི་སེམས་ཏེ། རྒྱུའི་བདག་ཉིད་དུ་བརྟག་པར་བྱ་བས་སྟོང་པའི་ཆོས་ཀྱི་བདག་མེད་པ་དང་། རུ་ནི་གང་ཟག་གི་བདག་ཏུ་འཛིན་པའི་རྣམ་རྟོག་གི་དྲ་བས་བཀོད་པའི་བདག་དང་བྲལ་པའི་གང་ཟག་གི་བདག་མེད་པ་དང་། དེ་ཁོ་ན་ཉིད་ཀྱི་ཡུལ་ཡུལ་ཅན་གཉིས་མི་མཐུན་པར་སོ་སོར་གཉིས་སུ་མི་གནས་པ་དང་། ཤྲཱི་ནི་ཡུལ་སྟོང་པ་ཉིད་ཇི་འདྲ་བ་དེ་བཞིན་དུ་རྗེས་སུ་ཞུགས་པའི་གཉིས་སུ་མེད་པའི་ཡེ་ཤེས་ཨེ་ཝཾ་གྱི་དོན་ནོ། ཞེས་པས་ཡིད་དག་པར་བྱའོ། སྟོང་པའི་ངང་ལས་རང་ཉིད་སྐད་ཅིག་གི་ཧེ་རུ་ཀཿསྔོན་པོ་ཞལ་གཅིག་ཕྱག་གཉིས་པ་རྡོ་རྗེ་དང་དྲིལ་བུ་འཛིན་པ་གཡས་བརྐྱང་གིས་བཞུགས་པ་ལ། ཡུམ་རྡོ་རྗེ་ཕག་མོ་དམར་མོ་གྲི་གུག་དང་ཐོད་པ་འཛིན་པས་འཁྱུད་པར་བསམ། ཤྲཱི་ཧེ་རུ་ཀོ྅་ཧཾ། ཞེས་པས་ལུས་དག་པར་བྱའོ། ཨོཾ་ཨ་ཨཱ། ཨི་ཨི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ། ཀྵ། ཧཱུྃ་ཧཱུྃ་ཕཊ། ཡི་གེའི་འཕྲེང་བ་གཡོན་དུ་ལྟེ་བའི་(༤བ)
ཕྱོགས་སུ་ལན་གསུམ་བསྐོར་བ་ལས་འོད་ཟེར་ཁ་དོག་ལྔ་འཕྲོ་བ། དེ་དག་ལས་མཁའ་འགྲོ་མ་ལྔ་དཔག་ཏུ་མེད་པ་སྣ་བུག་གཡས་ནས་སྤྲོས་ཏེ་བགེགས་ཐམས་ཅད་བཅོམས། གཡོན་ནས་ནང་དུ་ཞུགས་སྔགས་འཕྲེང་ལ་ཐིམ་པར་བསམས་ཞིང་ཨཱ་དི་ཀཱ་དི་ལན་གསུམ་བརྗོད་པ་ནི་ངག་དག་བྱེད་དོ། །བཞི་པ་ཕུང་ཁམས་སྐྱེ་མཆེད་བྱིན་གྱིས་བརླབ་པ་ནི། རང་ཉིད་ཀྱི་ཕུང་ཁམས་སྐྱེ་མཆེད་ཐམས་ཅད་གདོད་མ་ནས་རྣམ་པར་དག་པ་ཡེ་ཤེས་ཀྱི་ལྷའི་རང་བཞིན་དུ་ཡོད་པ་སོ་སོའི་རྣམ་པ་ཇི་ལྟ་བར་བསམ། ལྔ་པ་ཚོགས་ཞིང་ནི། ཕྱག་རྒྱ་དང་བཅས་ཕེཾ། རང་གི་སྙིང་གར་པཾ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ་ཡིག་སྔོན་པོ་ལས་འཕྲོས་པའི་འོད་ཟེར་གྱིས། བླ་མ་དང་སངས་རྒྱས་བྱང་ཆུབ་སེམས་དཔའི་ཚོགས་རྣམས་དང་། འགྲོ་བ་དྲུག་གི་སེམས་ཅན་རྣམས་ཀྱང་ལྷར་བྱས་པ་ཕྱག་རྒྱ་དང་བཅས་ཨོཾ་བཛྲ་ས་མཱ་ཇཿས་སྤྱན་དྲངས།དེ་ཐམས་ཅད་དཀྱིལ་འཁོར་གྱི་འཁོར་ལོའི་ལྷ་ཚོགས་སུ་གྱུར་ཅིང་བླ་མ་རྣམས་གཅིག་ཏུ་འདུས་གཙོ་བོའི་རིགས་བདག་ཏུ་བཞུགས་པར་བསམ། །ཧེ་རུ་ཀཿདཔལ་དཔའ་བོ་ཆེ། །རྣམ་རྟོག་རྡོ་རྗེའི་དབང་ཕྱུག་དང་། །རྗེས་ཆགས་ཆགས་པ་ཆེ་རྣམས་ཀྱི། །རྡོ་རྗེ་ཕག་མོ་དེ་ལ་འདིར་། །དཔལ་ལྡན་རྡོ་རྗེ་མཁའ་འགྲོ་དང་། །མཁའ་འགྲོ་མ་ཡི་འཁོར་ལོ་སྒྱུར། །ཡེ་ཤེས་ལྔ་དང་སྐུ་གསུམ་ཉིད། །འགྲོ་བ་སྐྱོབ་ལ་ཕྱག་འཚལ་ལོ། །ཇི་སྙེད་རྡོ་རྗེ་མཁའ་འགྲོ་མ། །ཀུན་ཏུ་རྟོག་པའི་འཆིང་གཅོད་ཅིང་། །འཇིག་རྟེན་བྱ་བ་ལ་འཇུག་མ། །དེ་སྙེད་རྣམས་ལ་ཕྱག་འཚལ་ལོ། །སྙིང་གའི་ཧཱུྃ་ལས་སྤྲོས་པའི་མཆོད་པའི་ལྷ་མོ་(༥ན)
མཆོད་རྫས་ཐོགས་པ་རྣམས་ཀྱིས་མཆོད་པར་བསམ། ཨོཾ་སརྦ་བཱི་ར་ཡོ་གེ་ནཱི་ཨརྒྷཾ་པྲ་ཏཱིཙྪ་ཨཱཿཧཱུྃ། དེ་བཞིན་དུ། ཨརྒྷཾ་གྱི་གནས་སུ། པཱ་དྱཾ་ནས། ཤཔྟའི་བར་བཅུག །ཨོཾ་རུ་པ་བཛྲི་ཧཱུ་ཾཧཱུཾ་རཱུ་པའི་གནས་སུ། ཤཔྟ་ནས། སྤཪྴའི་བར་བཅུག །ཐུགས་ཀའི་ཧཱུྃ་ལས་བྱུང་བའི་སྙིང་པོའི་རྣལ་འབྱོར་མ་བཞིས་ཐོབ་པའི་ནང་གི་བདུད་རྩི་ལྔས་མཆོད་པར་བསམ་ཨོཾ་སརྦ་བཛྲ་ཀཱ་མ་ནི་སརྦ་བྷ་ཀྵཾ་ཤོ་དྷ་ཡ་གུ་ཧྱ་བཛྲི་ཎི་ཧཱུྃ་སྭཱ་ཧཱ། མཁའ་འགྲོ་མ་ལ་སོགས་པ་བཞི་ཕག་མོ་ལ་ཐིམ། ཕག་མོ་ཧེ་རུ་ཀཿ དང་སྙོམས་པར་ཞུགས་པར་ཞུགས་པའི་བདེ་བ་ཉམས་སུ་མྱོང་བར་བསམ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་པ་ཎ་རཱ་ག་ཎ་པཱུ་ཛ་བཛྲ་སྭ་བྷཱ་ཝ་ཨཱ་ཏྨ་ཀོ྅་ཧཾ། གུར་ལས་བྱུང་བའི་རྒྱུད་བཤགས་ལན་གསུམ་དང་། སེམས་ཅན་ཐམས་ཅད་ཀྱི་སྒྲིབ་པ་ཐམས་ཅད་བསལ་བའི་ཕྱིར་ནམ་མཁའི་མཐས་གཏུགས་པའི་སངས་རྒྱས་ཐམས་ཅད་ལ་ཆོས་ཀྱི་འཁོར་ལོ་སྐོར་བར་བསྐུལ་ལོ། །རྒྱལ་བ་མྱ་ངན་ལས་འདའ་བར་བཞེད་པ་རྣམས་འགྲོ་བ་ཀུན་ལ་ཕན་པ་དང་བདེ་བའི་དོན་དུ་བསྐལ་པ་ཞིང་གི་རྡུལ་སྙེད་དུ་བཞུགས་པར་གསོལ་བ་འདེབས་སོ། །བགྲོད་དཀའ་སྲིད་པའི་རྒྱ་མཚོ་ལས། །བདག་གིས་འགྲོ་རྣམས་བསྒྲལ་བའི་ཕྱིར། །རང་གི་བདག་ཉིད་སྐད་ཅིག་མར། །སངས་རྒྱས་རྣམས་ལ་དབུལ་བར་བགྱི། ཞེས་ཡན་ལག་བདུན་པའི་རྗེས་སུ་ཡིག་བརྒྱ་བརྗོད། །ཨོཾ་བཛྲ་མུཿས་ཚོགས་ཞིང་རང་བཞིན་གྱི་གནས་སུ་གཤེགས་པར་བསམ། སེམས་ཅན་ཐམས་ཅད་ཁྱད་པར་དུ་འཕགས་པའི་བདེ་བ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་ཐམས་ཅད་དང་བྲལ་བར་གྱུར་ཅིག །ཐོབ་ཟིན་པའི་བདེ་(༥བ)
བ་དང་མི་འབྲལ་བར་གྱུར་ཅིག །ཉོན་མོངས་པ་དང་ཉེ་བའི་ཉོན་མོངས་ཐམས་ཅད་དང་བྲལ་བར་གྱུར་ཅིག །ཅེས་ཚད་མེད་བཞི་བསྒོམ། གཉིས་པ་དངོས་གཞི་ལ་རྟེན་བརྟེན་པ་གཉིས་ཀྱི། དང་པོ་རྟེན་ལ་སྲུང་འཁོར། འབྱུང་བ། གཞལ་ཡས་ཁང་དང་གསུམ་གྱི་དང་པོ་ནི། ཨོཾསྭ་བྷཱ་ཝ་ཤུདྡྷཱཿསརྦ་དྷརྨཱཿ སྭ་བྷཱ་ཝ་ཤུདྡྷོ྅་ཧཾ། །ཆོས་ཐམས་ཅད་རང་བཞིན་གྱི་རྣམ་པར་དག་པ་གཟུང་འཛིན་དང་བྲལ་བ་སེམས་ཙམ་གྱི་ངོ་བོར་བསམ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ་྅ཧཾ། ཆོས་ཐམས་ཅད་སྟོང་པར་བསམ། དེའི་དགོས་པ་ནི་འཛམ་བུ་གླིང་པའི་མངལ་སྐྱེས་ཁམས་དྲུག་ལྡན་འཆི་བ་དང་ཆོས་མཐུན་པས་རང་ཉིད་ཀྱི་འཆི་བ་ཆོས་སྐུར་འཁྱེར་བའི་གནད་དོ། །སྟོང་པའི་ངང་ལས་རང་གི་སེམས་ཉིད་ནཱ་ད་ཤིན་ཏུ་དཀར་བ་ལ་དམར་བའི་མདངས་ཆགས་པར་ལངས་ནས་ནམ་མཁར་གནས་པར་བསམ་པ་ནི་གཞི་ལ་འཆི་བ་འོད་གསལ་གྱི་གཞོན་པའི་རླུང་སེམས་ལས་བར་དོ་གྲུབ་པ་ལྟར་རང་ཉིད་ཀྱི་བར་དོ་ལོངས་སྐུར་འཁྱེར་བའི་གནད་དོ། །དེའི་འོད་ཟེར་ལས་པཾ་ལས་སྣ་ཚོགས་པདྨའི་སྟེང་རཾ་ལས་ཉི་མའི་དཀྱིལ་འཁོར། དེའི་སྟེང་དུ་ཧཱུྃ་ལས་སྣ་ཚོགས་རྡོ་རྗེ་རྩེ་མོ་བཅུ་གཉིས་པ་ཤར་དཀར། བྱང་ལྗང་། ནུབ་དམར། ལྷོ་སེར། ལྟེ་བར་ཧཱུྃ་ཡོངས་སུ་གྱུར་པ་ལས་རང་ཉིད་ཧེ་རུ་ཀཿ སྔོན་པོ་ཞལ་གཅིག་ཕྱག་གཉིས་པར་བསམ། ཕྱོགས་གཡོན་དང་མཚམས་གཡས་སྐོར་དུ་གཡོན་པའི་མཐེ་བོས་མཛུབ་མོ་མནན་པ་མཛུབ་མོ་ཕྱིར་བཏད་པའི་སེ་གོལ་གཏོག་ཅིང་སུམྦྷ་སྔགས་ཚན་བཞིར་བཅད་པ་ལན་གཉིས་བཟླ། ཞེས་བརྗོད་ཅིང་སྤྲོ་བ་མཉམ་དུ་ཐུགས་ཀའི་ཧཱུྃ་ལས་(༦ན)
ཧཱུཾ་བཅུ་སྟེང་འོག་ཕྱོགས་མཚམས་སུ་འཕྲོས་པ་ལས། །ཤར་དང་སྟེང་དུ་ཁྭ་གདོང་མ་སྔོན་མོ། བྱང་དུ་འུག་གདོང་མ་ལྗང་གུ། །ནུབ་དང་འོག་ཏུ་ཁྱི་གདོང་མ་དམར་མོ། ལྷོར་ཕག་གདོང་མ་སེར་མོ། །ཤར་ལྷོར་གཤིན་རྗེ་བརྟན་མ་གཡས་སྔོ་གཡོན་སེར་བ། ལྷོ་ནུབ་ཏུ་གཤིན་རྗེ་ཕོ་ཉ་མ་གཡས་སེར་གཡོན་དམར་བ། ནུབ་བྱང་དུ་གཤིན་རྗེ་མཆེ་བ་མ་གཡས་དམར་གཡོན་ལྗང་བ། བྱང་ཤར་དུ་གཤིན་རྗེ་འཇོམས་མ་གཡས་ལྗང་གཡོན་སྔོ་བ། ཐམས་ཅད་ཀྱང་ཞལ་གཅིག་ཕྱག་གཉིས་ཀྱི་གཡས་རྡོ་རྗེ་ཐོ་བ་དང་གཡོན་རང་འདྲའི་ལྟེ་བ་མན་ཆད་ཕུར་བུའི་དཔལ་མདུང་རྩེ་གཅིག་པའི་རྣམ་པ་ཅན་ཐོགས་པ། ཉི་མའི་གདན་ལ་གཡོན་བརྐྱང་གིས་བཞུགས་པར་བསམ། འདིར་སྒྲུབ་ཐབས་སྤྱི་དང་ཆོས་ཀྱི་རྒྱལ་པོ་འཕགས་པའི་སྒྲུབ་ཐབས་ཀྱི་རྗེས་སུ་འབྲངས་པ་ཡིན་ཅིང་ལྭ་བ་པས་མཛད་པའི་བཅུ་གསུམ་མའི་སྒྲུབ་ཐབས་སུ་ཐམས་ཅད་སྐུ་མདོག་དམར་མོར་བཤད་པའང་ཡོད་པས་གང་བདེར་བྱའོ། །ཕོ་ཉ་བཅུ་ཞལ་ཕྱིར་ཕྱོགས་ཀྱི་མདུན་དུ་ཧཱུྃ་རིང་པོ་ལས་གྲུབ་པའི་དོང་གྲུ་གསུམ་པ། གཏིང་ཟབ་པ་བཅུའི་ནང་དུ་ཁྲོ་མོ་རྣམས་ཀྱི་སྐུའི་འོད་ཟེར་ལྕགས་ཀྱུ་ལྟ་བུས་ཕྱི་རོལ་གྱི་བགེགས་རྣམས་རང་དབང་མེད་པར་བཀུག་པར་བསམ། རང་ཉིད་ཁྲོ་བོའི་ལྟ་བ་དང་ལྡན་པས་བཀའ་བསྒོ་བ་ནི། ཨོཾ་གྷ་གྷ། གྷཱ་ཏ་ཡ། གྷཱ་ཏ་ཡ། སརྦ་དུཥྚཱཾ་བིགྷྣཱན་ཧཱུྃ་ཕཊ ཀཱི་ལཱ་ཡཱ་ཀཱི་ལཱ་ཡ་སརྦ་པཱ་པཾ་ཧཱུྃ་ཕཊ། ཧཱུྃ་ཧཱུྃ་ཧཱུྃ་བཛྲ་ཀཱི་ལཱ་ཡ་བཛྲ་དྷ་རོད་ཨཱཛྙཱ་པ་ཡ་ཏི་སརྦ་དུཥྚཾ་བིགྷྣཱན་ཀཱ་ཡ་ཝཱ་ཏྟ་བཛྲ་ཀཱི་ལཱ་ཡ་ཧཱུྃ་ཕཊ །ཅེས་བསྒོམ་ཤིང་ཕུར་བུ་བཙུགས་ཏེ་ཕོ་ཉ་(༦བ)
རྣམས་ཀྱིས། ཨོཾ་བཛྲ་མུདྒར་བཛྲ་ཀཱི་ལཱ་ཡ་ཨཀོཊཡ་ཧཱུྃ་ཧཱུྃ་ཕཊ་བགེགས་རྣམས་ཀྱི་སྤྱི་གཙུག་ནས་རྐང་མཐིལ་གྱི་བར་དུ་ཕུར་བུས་བཏབ་པས་བགེགས་རྣམས་ཀྱི་སེམས་འོད་གསལ་དུ་ཐིམ་ཞིང་ལུས་དང་སྒྲིབ་པ་ལྷན་ཅིག་ཏུ་བསྲེགས་བཅོས་ཐལ་བར་བསམ། སྔགས་བཞི་པའི་འོད་ཟེར་ལས་གྲུབ་པའི་རྡོ་རྗེའི་ར་བ་གྲུ་བཞི་པ་ཕྱོགས་ཀྱི་མདོག་ཅན། དེ་དང་དུས་མཉམ་དུ་སྣ་ཚོགས་རྡོ་རྗེའི་ཧཱུཾ་དང་བཅས་པ་ལས་སྐྱེས་པའི་སྣ་ཚོགས་རྡོ་རྗེའི་ས་གཞི། དེའི་འོད་ཟེར་སྟེང་དུ་འཕྲོས་པ་ལས་རྡོ་རྗེ་རྩེ་ལྔ་པ་ཕུར་བུའི་མདེའུ་ཅན་གྱི་མདོའི་དྲ་བ། དེའི་འོག་རྡོ་རྗེ་ར་བའི་སྟེང་དུ་རྡོ་རྗེའི་གུར། གུར་དང་ར་བའི་མཚམས་སུ་རྡོ་རྗེའི་བླ་བྲེ་རྣམས་སྲ་ཞིང་མཁྲེགས་པ་དུམ་བུ་གཅིག་ཏུ་གྲུབ་པར་བསམ། ཨོཾ་མེ་དཱི་ནི་བཛྲི་བྷ་ཝ་བཛྲ་བནྡྷ་ཧཱུྃ། གིས་རྡོ་རྗེའི་ས་གཞི་དང་། ཨོཾ་བཛྲ་པྲ་ཀཱ་ར་ཧཱུྃ་བཾ་ཧཱུྃ། རྡོ་རྗེ་ར་བ་དང་། ཨོཾ་བཛྲ་པ་ཉྩར་ཧཱུཾ། གིས་རྡོ་རྗེའི་གུར་དང་། ཨོཾ་བཛྲ་བི་དཱ་ནཱ་ཧཱུཾ། གིས་རྡོ་རྗེའི་བླ་བྲེ་དང་། ཨོཾ་བཛྲ་ས་ར་ཛཱ་ལ་ཏྲཱཾ། གིས་རྡོ་རྗེའི་མདོའི་དྲ་བ་རྣམས་སོ། །སྒོ་མཚམས་མ་རྣམས་རྡོ་རྗེ་ར་བ་ལ་ཐིམ་པས་ཆུ་ལ་ཆུ་ཐིམ་པའི་ཟེགས་མ་ཕྱིར་འཕྲོས་པ་ལྟར་རྡོ་རྗེ་ར་བའི་གུར་ཁང་དུ་བསམ། ཨོཾ་བཛྲ་པྲ་ཀཱ་ར་ཧཱུྃ། དེའི་ཕྱིར་རོལ་ཏུ་སྣ་ཚོགས་པདྨའི་གུར་ཁང་དུ་བསམ། ཨོཾ་པདྨ་པྲ་ཀཱ་ར་ཧཱུཾ། དེའི་ཕྱི་རོལ་ཏུ་འཁོར་ལོ་འབར་བའི་གུར་ཁང་དུ་བསམ། ཨོཾ་ཙཀྲ་པྲ་ཀཱ་ར་ཧཱུྃ། དེའི་ཕྱི་རོལ་ཏུ་རྡོ་རྗེ་མེ་བསྐལ་པ་འཇིག་པའི་མེ་དཔུང་ལྟ་བུར་བསམ། ཨོཾ་བཛྲ་ཛྭ་ལ་ཨ་ན་ལ་རྐ་ཧཱུྃ་ཧཱུྃ་ཧཱུྃ། ཞེས་བརྗོད་དོ། །གཉིས་(༧ན)
པ་འབྱུང་བ་བསྐྱེད་པ་ནི། རང་ཉིད་ལྷའི་སྐུ་སྒྱུ་མ་ལྟ་བུའི་ངང་ནས། སྲུང་འཁོར་གྱི་དབུས་ནམ་མཁའི་དབྱིངས་ཆོས་འབྱུང་གི་ནང་དུ་སྔར་གྱི་ནཱ་དའི་འོད་ཟེར་ལས་བྱུང་བའི་ཡཾ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ལྟ་བུ་རྒྱལ་མཚན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་འབར་བས་མཚན་པ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པས་མཚན་པ། དེའི་སྟེང་དུ་ལཾ་ལས་སའི་དཀྱིལ་འཁོར་སེར་པོ་གྲུ་བཞི་ཟུར་བཞིར་རྡོ་རྗེ་རྩེ་གསུམ་གྱིས་མཚན་པ། དེའི་སྟེང་དུ་སུ་ལས་རིན་པོ་ཆེ་སྣ་བཞིའི་རང་བཞིན་གྱི་ལྷུན་པོ་གྲུ་བཞི་པ་རྩེ་མོར་ལྕོག་བརྒྱད་ཀྱིས་མཛེས་པ། །གསུམ་པ་གཞལ་ཡས་ཁང་བསྐྱེད་པ་ནི། དེའི་སྟེང་དུ་པཾ་ལས་སྣ་ཚོགས་པདྨ་གསེར་དང་ལྡན་པའི་སྟེང་དུ་ཧཱུྃ་ལས་སྣ་ཚོགས་རྡོ་རྗེ་རྩེ་མོ་བཅུ་གཉིས་པ་ཕྱོགས་ཀྱི་མདོག་ཅན། དེའི་ལྟེ་བར་བྷྲཱུ་ལས་གཞལ་ཡས་ཁང་གྲུ་བཞི་པ་སྒོ་བཞི་པ་ཕྱི་ནས་རིམ་པ་བཞིན་དཀར་སེར་དམར་ལྗང་སྔོ་བའི་རིམ་པ་ལྔ་དང་ལྡན་པའི་རིམ་པོ་ཆེའི་རྩིག་པས་བསྐོར་བའི་སྟེང་ན། རིན་པོ་ཆེའི་ཕ་གུ་དམར་པོ་ལ་རིན་པོ་ཆེ་ཟུར་གསུམ་པ་དང་གྲུ་བཞི་པ་ལ་སོགས་པས་སྤྲས་པ། དེའི་སྟེང་ན་གནས་པའི་གསེེར་གྱི་སྐ་རགས་བཞིའི་ཕྱི་ངོས་སུ་ཆུ་སྲིན་གྱི་ཁར་མུ་ཏིག་གི་དོ་ཤལ་དང་དོ་ཤལ་ཕྱེད་པ་འཕྱང་བ། དེའི་ཕྱི་ངོས་སུ་བྱ་འདབ་ལ་འཕྱང་བའི་རིན་པོ་ཆེའི་ཤར་བུ། དེའི་སྟེང་དུ་པདྨ་འདབ་མ་ཕྱེད་པའི་དབྱིབས་ཅན་གྱི་མདའ་ཡབ་ལ་གནས་པའི་གསེར་གྱི་བུམ་པ་ནས་ཐོན་པའི་རྒྱལ་མཚན་(༧བ)
དང་བ་དན་བརྒྱད་བརྒྱད་ཀྱིས་མཛེས་པར་བྱས་པ། ཕྱིའི་སྟེང་གི་ཟུར་བཞི་ལ་གདུགས་བཞིས་བརྒྱན་པ། གཞན་ཡང་གོས་དང་། འཕན་དང་། མེ་ཏོག་གི་ཕྲེང་བ་དང་། ཟླ་བ་རླུང་གིས་བསྐྱོད་པ་དང་། རྔ་ཡབ་ནོར་བུའི་ཡུ་བ་ཅན་ལ་སོགས་པ་རྒྱན་དུ་མས་སྤྲས་པ། རྩིག་པའི་འགྲམ་ནས་འདོད་ཡོན་གྱི་སྣམ་བུ་དམར་པོས་བསྐོར་བ་ལ་བཞུགས་སྟངས་དང་ཁ་དོག་སྣ་ཚོགས་པའི་རིག་མ་བཅུ་དྲུག་གིས་མཆོད་པ་བྱེད་བཞིན་པ། སྒོ་དང་སྒོ་ཁྱུད་ཀྱི་མཚམས་དང་རྩིག་པའི་ཕྱི་ནང་གི་ཟུར་བཞིར་ཟླ་ཕྱེད་ལ་གནས་པའི་རིན་པོ་ཆེེ་དམར་པོའི་སྟེང་དུ་རྡོ་རྗེས་བརྒྱན་པ། ནང་ཀ་བ་བརྒྱད་ཀྱིས་གདུང་བཞི་བཏེག་ཅིང་དབུས་ཕྱུར་བུར་ཕུབ་པའི་རྩེ་མོར་རྡོ་རྗེ་ཕྱེད་པའི་ཏོག་གིས་མཚན་པ། སྒོ་བཞིའི་ཐད་སོར་ཀ་བ་བཞི་བཞིས་བཏེག་པའི་རྟ་བབས་བང་རིམ་བཞི་པ། པདྨ་དང་ཆོས་ཀྱི་འཁོར་ལོ་དང་། གདུགས་དང་། རི་དྭགས་གནས་པ། རྟ་བབས་ཀྱི་གཡས་གཡོན་དུ་བུམ་པ་བཟང་པོ་ལས་སྐྱེས་པའི་དཔག་བསམ་གྱི་ཤིང་ལ་རྒྱལ་སྲིད་རིན་པོ་ཆེ་སྣ་བདུན་དང་། བར་བར་དུ་གྲུབ་པ་དང་། སྤྲིན་གྱི་གསེབ་ནས་བྱུང་བའི་ལྷ་མེ་ཏོག་གི་འཕྲེང་བ་བཟུང་བ་རྣམས་ཀྱིས་ཀུན་ནས་མཛེས་པར་བྱས་པ། སྲུང་འཁོར་གྱི་ཕྱི་རོལ་དུར་ཁྲོད་བརྒྱད་དུ་ཕྱོགས་སྐྱོང་བརྒྱད། ཤིང་བརྒྱད། ཞིང་སྐྱོང་བརྒྱད། ཀླུ་བརྒྱད། སྤྲིན་བརྒྱད། མེ་བརྒྱད། རི་བརྒྱད། མཆོད་རྟེན་བརྒྱད། རྣལ་འབྱོར་པ་བརྒྱད། གཞན་ཡང་དུར་ཁྲོད་དུ་རྒྱུ་བ་རྣམས་ཀྱིས་གང་བའི་ནང་གི་ལྷོ་སྣམ་ཤར་དཀར། བྱང་ལྗང་། ནུབ་དམར། ལྷོ་སེར། དབུས་སྔོ་བའི་(༨ན)
སྟེང་དུ་སྣ་ཚོགས་པདྨ་འདབ་མ་བརྒྱད་པ་གེ་སར་དང་བཅས་པ། མུ་ཁྱུད་ལ་གྲི་གུག་གི་ཕྲེང་བས་བསྐོར་བ། དེའི་ལྟེ་བར་དུས་མཚན་དང་འཇིགས་བྱེད། ཕྱོགས་བཞི་རོ་དང་ཟླ་བ། མཚམས་བཞིར་ཟླ་བའི་གདན་རེ་རེ། གཉིས་པ་བརྟན་པ་ལྷ་ལ་མངོན་བྱེད་ལྔ་ལས་གཙོ་བོ་བསྐྱེད་པ། འཁོར་བསྐྱེད་པ། ཕུང་ཁམས་སྐྱེ་མཆེད་བརླབ་པ། གོ་ཆ། ཡེ་ཤེས་པ་དྲང་པ། དབང་བསྐུར་རྒྱས་གདབ། མཆོད་བསྟོད། དག་པ་དྲན་པ་དང་བརྒྱད་ཀྱི། དང་པོ་ནི། དབུས་ཀྱི་གདན་གྱི་སྟེང་དུ་སངས་རྒྱས་ཀྱི་མཚན་བཟང་པོ་སུམ་ཅུ་སོ་གཉིས་ཀྱི་ངོ་བོ་སྐར་མའི་རྣམ་པ་ལྟ་བུའི། ཨ་ཨཱ་ནས། །ཨཾ་ཨཿ ཕྲག་གཉིས་བརྗོད་ལ། །ཞུ་བ་ལས་བྱུང་བའི་ཟླ་བའི་དཀྱིལ་འཁོར་མེ་ལོང་ལྟ་བུའི་ཡེ་ཤེས། དེའི་སྟེང་དུ་དཔེ་བྱད་བཟང་པོ་བརྒྱད་ཅུའི་བདག་ཉིད་མར་མེའི་རྣམ་པ་ལྟ་བུའི། ཀ་ཁ་ནས། ཡ་ར་ལ་ཝ་ཌ་ཌྷ། ཕྲག་གཉིས་བརྗོད་དེ། ཞུ་བ་ལས་བྱུང་བའི་ཉི་མའི་དཀྱིལ་འཁོར་མཉམ་པ་ཉིད་ཀྱི་ཡེ་ཤེས། དེ་གཉིས་ཀྱི་བར་དུ་སྔར་གྱི་ནཱ་ད། དེ་ལས་ཧཱུཾ་དངུལ་ཆུའི་མདོག་ལྟ་བུ་ལས་རྡོ་རྡེ་དཀར་པོ་རྩེ་ལྔ་པ་ལྟེ་བ་ལ་ཧཱུཾ་གྱིས་མཚན་པ། བཾ་ལས་གྲི་གུག་བཾ་གྱིས་མཚན་པ་སོར་རྟོགས་ཡེ་ཤེས། དེ་ལས་དཀྱིལ་འཁོར་གྱི་ལྷ་ཚོགས་དཔག་ཏུ་མེད་པ་སྤྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། ལྷ་ལྔར་བྱས། དེ་དག་དང་གདོད་མ་ནས་གྲུབ་པའི་དཔའ་བོ་དང་རྣལ་འབྱོར་མ་རྣམས་སྤྱན་དྲངས། ཧཱུཾ་ལ་ཐིམ་པས་རྐྱེན་བྱས་ཏེ། ཉི་ཟླ་ཕྱག་མཚན་ས་བོན་དང་བཅས་པ་གཅིག་ཏུ་གྱུར་པ་བྱ་གྲུབ་ཡེ་ཤེས། དེ་ཡོངས་སུ་གྱུར་(༨བ)
པ་ལས་སྐུ་རྫོགས་པ་ཆོས་དབྱིངས་ཡེ་ཤེས་ཀྱི་ངོ་བོ་དཔལ་འཁོར་ལོ་བདེ་མཆོག་སྐུ་མདོག་སྔོན་པོ་ཞལ་བཞི་ཕྱག་བཅུ་གཉིས་པ། རྩ་ཞལ་སྔོན་པོ། གཡོན་ཞལ་དམར་པོ། རྒྱབ་ཞལ་ལྗང་ཁུ། གཡས་ཞལ་སེར་པོ། ཞལ་རེ་རེ་ལ་སྤྱན་གསུམ་གསུམ་དང་ལྡན་ཞིང་མཆེ་བ་གཙིགས་པ། དྲག་ཅིང་འཇིགས་སུ་རུང་བ། དབུ་སྐྲ་རལ་པ་ནག་པོ་ཐོར་ཚུགས་སུ་བཅིངས་པའི་རྩེ་མོར་ནོར་བུ་རིན་པོ་ཆེ། མཚོགས་མར་སྣ་ཚོགས་རྡོ་རྗེ། ལྟེ་བ་ལ་རིགས་ཀྱི་བདག་པོ། གཡོན་དུ་ཟླ་བ་ཕྱེད་པ། དབུ་རེ་རེ་ལ་རྡོ་རྗེ་ནག་པོའི་འཕྲེང་བས་སྟོད་སྨད་ནས་བརྒྱན་པའི་ཐོད་པ་སྐམ་པོ་ལྔ་ལྔས་བརྒྱན་པ། དེའི་འོག་ཏུ 
་རྡོ་རྗེའི་ཕྲེང་བ་དང་དཔའ་བོའི་དར་དཔྱངས་བཅིངས་པ། ཕྱག་བཅུ་གཉིས་ཀྱི་དང་པོ་གཉིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། །གཡས་གྱི་གཉིས་པ་ན་ཅང་ཏེའུ། གསུམ་པ་ན་རྩེ་གསུམ། བཞི་པ་ན་དགྲ་སྟ། ལྔ་པ་ན་གྲི་གུག །གཡོན་གཉིས་པ་ན་ཁ་ཊྭཱཾ་ག །གསུམ་པ་ན་ཐོད་པ་ཁྲག་གིས་གང་བ། བཞི་པ་ན་ཞགས་པ། ལྔ་པ་ན་ཚངས་པ་མགོ་གདོང་བཞི་པ་བསྣམས་པ། ཐ་མ་གཉིས་ཀྱིས་གླང་པོ་ཆེའི་པགས་པ་རློན་པ་ཁྲག་དང་བཅས་པའི་ན་བཟའ་ཕྱག་གཡས་པས་ལག་པ་གཡོན་པ་དང་། གཡོན་པས་རྐང་པ་གཡོན་པ་དང་བཅས་ཏེ་བརྐྱངས་ནས་བཟུང་པའི་སྡིགས་མཛུབ་ཀྱི་རྩ་གཉིས་སྨིན་མའི་ཐད་སོར་གནས་པ། མི་ལྤགས་ཀྱི་ན་བཟའ་གསོལ་བ། མིའི་རྒྱུ་མ་ལ་བརྒྱུས་པའི་མགོ་བོ་རློན་པ་ལྔ་བཅུའི་དོ་ཤལ་ཕྲག་པར་འཕྱང་བ། ཕྱག་རྒྱ་དྲུག་དང་ཉེ་བའི་ཕྱག་རྒྱས་བརྒྱན་ཅིང་གར་གྱི་ཉམས་དགུ་(༩ན)
དང་ལྡན་པ། མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བརྒྱད་ཅུས་བརྒྱན་པ། སྟག་གི་པགས་པའི་ཤམ་ཐབས་གྲོལ་བ། ཞབས་གཡས་བརྐྱང་བས་དུས་མཚན་མ་དམར་མོའི་ནུ་མ་དང་གཡོན་བསྐུམ་པས་འཇིགས་བྱེད་ནག་པོའི་མགོ་བོ་རྒྱབ་ཏུ་བསྟན་ནས་མནན་ཅིང་སྟེང་ཕྱོགས་སུ་གདུགས་དཀར་པོ་ཕུབ་པའོ། དེའི་པང་དུ་ཡུམ་རྡོ་རྗེ་ཕག་མོ་སྐུ་མདོག་དམར་མོ་ཞལ་གཅིག་ཕྱག་གཉིས་མ་སྤྱན་གསུམ་མཆེ་བ་གཙིགས་པ། གཅེར་མོ་དབུ་སྐྲ་སིལ་བུ་ཐུར་དུ་གྲོལ་ཞིང་ཐོད་པ་སྐམ་པོ་ལྔས་དབུ་ལ་བརྒྱན་པ། ཐོད་པའི་དུམ་བུས་སྤུད་པའི་སྐ་རགས་ཅན། ཕྱག་རྒྱ་ལྔས་སྤྲས་ཤིང་མིའི་རྒྱུ་མ་ལ་བརྒྱུས་པའི་མི་མགོ་སྐམ་པོ་ལྔ་བཅུའི་དོ་ཤལ་བྱས་པ། གཡས་གྲི་གུག་དང་བཅས་པའི་སྡིགས་མཛུབ་ཀྱིས་བདུད་ཐམས་ཅད་ལ་བསྡིགས་པར་མཛད་པ། གཡོན་པས་ཡབ་ཀྱི་མགུལ་ནས་འཁྱུད་པའི་ཐོད་པ་ཁྲག་དང་རྒྱུ་མས་གང་བ་བསྣམས་པ། ཞབས་གཡོན་བརྐྱང་ཞིང་གཡས་ཡབ་ལ་འཁྱུད་པ། གཉིས་ཀའང་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། ཡབ་ཀྱི་ཐུགས་ཀར་རང་འདྲའི་ཡེ་ཤེས་སེམས་དཔའ་ཞལ་གཅིག་ཕྱག་གཉིས་པའི་ཐུགས་ཀར་སྣ་ཚོགས་པདྨ་ལ་གནས་པའི་ཉི་མའི་དཀྱིལ་འཁོར་གྱི་སྟེང་དུ་ཏིང་ངེ་འཛིན་སེམས་དང་ཧཱུྃ་ཡིག་སྔོན་པོ་འོད་འཕྲོ་བར་བསམ། གཞི་ལ་ཕ་མའི་ཁུ་ཁྲག་གི་དབུས་སུ་བར་དོའི་རྣམ་ཤེས་ཞུགས་ཏེ་ཉིང་མཚམས་སྦྱར་ནས་སྐྱེ་བ་ལེན་པ་ལྟར་རང་ཉིད་ཀྱི་སྐྱེ་བ་སྤྲུལ་སྐུར་འཁྱེར་བའི་གནད་དོ། །གཉིས་པ་འཁོར་བསྐྱེད་པ་ནི། ཤར་གྱི་འདབ་མར་མཁའ་འགྲོ་(༩བ)
མ་སྔོན་མོ། བྱང་དུ་ལཱ་མ་ལྗང་གུ །ནུབ་ཏུ་དུམ་སྐྱེས་མ་དམར་མོ། །ལྷོར་གཟུགས་ཅན་མ་སེར་མོ། །ཐམས་ཅད་ཀྱང་ཞལ་གཅིག་ཕྱག་བཞི་མ་སྤྱན་གསུམ་དང་ལྡན་ཅིང་མཆེ་བ་གཙིགས་པ། གཅེར་མོ་སྐྲ་གྲོལ་ཞིང་ཐོད་པ་སྐམ་པོ་ལྔས་དབུ་བརྒྱན་པ། དུམ་བུ་ལྔ་བཅུའི་དོ་ཤལ་དང་ཕྱག་རྒྱ་ལྔས་བརྒྱན་པ། གཡས་གཉིས་གྲི་གུག་དང་ཌཱ་མ་རུ། གཡོན་གཉིས་ཐོད་པ་ཁྲག་གིས་གང་བ་དང་ཁ་ཊཾ་ག་བསྣམས་པ་ཐམས་ཅད་ཀྱང་ཞབས་གཡོན་བརྐྱང་གི་སྟབས་ཀྱིས་བཞུགས་པ། མཚམས་རྣམས་སུ་བུམ་པ་བདུད་རྩིས་གང་བའི་སྟེང་དུ་ཀ་པཱ་ལ་བྱང་ཆུབ་སེམས་ཀྱིས་གང་བ་བཞིས་ཁ་བརྒྱན་པའོ། ། གསུམ་པ་ཕུང་ཁམས་སྐྱེ་མཆེད་བྱིན་གྱིས་བརླབ་པ་ནི། ཨོཾ་ཨཱཿཧཱུྃ། ཨོཾ་སརྦ་བཱི་ར་ཡོ་གི་ནཱི་ནཱི་ཀཱ་ཡ་ཝཱ་ཏྟ་བཛྲ་སྭ་བྷཱ་ཝ་ཨཱ་ཏྨ་ཀོ་ཉ་ཧཾ། ཞེས་སྐད་ཅིག་མས་བསྐྱེད་པའི་སྔགས་བརྗོད། ལྷ་ཐམས་ཅད་ཀྱི་མིག་གཏི་མུག་རྡོ་རྗེ། རྣ་བ་ཞེ་སྡང་རྡོ་རྗེ། སྣ་ཕྲག་དོག་རྡོ་རྗེ། ལྕེ་འདོད་ཆགས་རྡོ་རྗེ། ལུས་སེར་སྣ་རྡོ་རྗེ། ཡིད་དབང་ཕྱུག་རྡོ་རྗེ། གཟུགས་ཀྱི་ཕུང་པོ་རྣམ་པར་སྣང་མཛད། ཚོར་བའི་ཕུང་པོའི་རྡོ་རྗེ་ཉི་མ། འདུ་ཤེས་ཀྱི་ཕུང་པོ་པདྨ་གར་གྱི་དབང་ཕྱུག །འདུ་བྱེད་ཀྱི་ཕུང་པོ་རྡོ་རྗེ་རྒྱལ་པོ། རྣམ་པར་ཤེས་པའི་ཕུང་པོ་རྡོ་རྗེ་སེམས་དཔའ། དེ་བཞིན་གཤེགས་པ་ཐམས་ཅད་གཅིག་པ་ཉིད་དཔལ་ཧེ་རུ་ཀཿ སའི་ཁམས་ལྟུང་བྱེད་མ། ཆུའི་ཁམས་གསོད་བྱེད་མ། མེའི་ཁམས་འགུགས་བྱེད་མ། རླུང་གི་ཁམས་གར་གྱི་དབང་ཕྱུག་མ། ནམ་མཁའི་ཁམས་པདྨའི་དྲ་བ་ཅན་མ། དཔྲལ་བར་ཨོཾ་དཀར་པོ། མགྲིན་པར་ཨཱཿ(༡༠ན)
དམར་པོ། སྙིང་གར་ཧཱུྃ་སྔོན་པོས་མཚན་པར་བསམ། བཞི་པ་གོ་ཆ་བགོ་བ་ནི། བཅོམ་ལྡན་འདས་ཀྱི་སྙིང་གར་རྡོ་རྗེ་སེམས་དཔའི་ངོ་བོ་ཨོཾ་ཧ་དཀར་པོ། མགོ་བོར་རྣམ་སྣང་གི་ངོ་བོ་ན་མ་ཧི་སེར་པོ། སྤྱི་གཙུག་ཏུ་པདྨ་གར་དབང་གི་ངོ་བོ་སྭཱ་ཧཱ་ཧུ་དམར་པོ། ཕྲག་པ་གཉིས་སུ་དཔལ་ཧེ་རུ་ཀའི་ངོ་བོ་ཥ་ཌ་ཧེ་ནག་པོ། མིག་གཉིས་སུ་རྡོ་རྗེ་ཉི་མའི་ངོ་བོ་ཧཱུྃ་ཧཱུྃ་ཧོ་དམར་སེར། ཡན་ལག་ཐམས་ཅད་ལ་རྟ་མཆོག་གི་ངོ་བོ་ཕཌ་ཧཾ་ལྗང་གུ །ཞེས་དཔའ་བོའི་གོ་ཆ་དང་། ཡུམ་རྣམས་ཀྱི་ལྟེ་བར་རྡོ་རྗེ་ཕག་མོའི་ངོ་བོ་ཨོཾ་བཾ་དམར་མོ། སྙིང་གར་གཤིན་རྗེ་མའི་ངོ་བོ་ཧཾ་ཡོཾ་སྔོན་མོ། ཁར་རྨོངས་བྱེད་མའི་ངོ་བོ་ཧྲི་མོཾ་དཀར་མོ། མགོ་བོར་སྐྱོང་བྱེད་མའི་ངོ་བོ་ཧྲཾ་ཧྲིཾ་སེར་མོ། སྤྱི་གཙུག་ཏུ་སྐྲག་བྱེད་མའི་ངོ་བོ་ཧཱུྃ་ཧཱུྃ་ལྗང་གུ་ཡན་ལག་ཐམས་ཅད་ལ་ཙཎྜི་ཀའི་ངོ་བོ་ཕཌ་ཕཌ་དུད་ཁས་མཚན་པར་བསམ་དཔའ་མོའི་གོ་ཆ་བཀོད་པས་གཙོ་བོ་ཡབ་ཡུམ་ཞལ་སྦྱོར་པའི་ཚེ་སྔགས་ཡིག་རྣམས་རྡོ་རྗེ་ལུ་གུ་རྒྱུད་དུ་བཅིངས་པའོ། །ལྔ་པ་ཡེ་ཤེས་པ་སྤྱན་དྲང་བ་ནི། ཕྱག་རྒྱ་དང་བཅས། ཕཻཾ། རང་གི་ཐུགས་ཀའི་ཧཱུྃ་ལས་འོད་ཟེར་འཕྲོས་པས། རང་བཞིན་གྱི་གནས་ནས་བསྒོམས་པ་དང་འདྲ་བའི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔའ་དང་དཔའ་བོ་དང་རྣལ་འབྱོར་མའི་ཚོགས་ཀྱིས་བསྐོར་བ་མདུན་གྱི་ནམ་མཁར་ཕྱག་རྒྱ་དང་བཅས་ཨོཾ་བཛྲ་ས་མཱ་ཛཿས་སྤྱན་དྲངས། ཨོཾ་སརྦ་བཱི་ར་ཡོ་གི་ནཱི་ཨརྒྷཾ་ནས་ཤཔྟའི་བར་གྱིས་མཆོད། ཛཿཧཱུྃ་བཾ་ཧོཿས་གཉིས་སུ་མེད་པར་བསམ། ཡོ་ག་ཤུཿསརྦ་དྷརྨཱཿཡོ་ག་ཤུདྡྷོ྅་ཧཾ། དྲུག་པ་དབང་བསྐུར་རྒྱས་(༡༠བ)
གདབ་ནི་ཕྱག་རྒྱ་དང་བཅས། ཕཻཾ། སླར་ཡང་ཐུགས་ཀའི་ཧཱུྃ་ལས་འོད་ཟེར་འཕྲོས་པས་དབང་གི་ལྷ་རྣམས་བསྡུ་རྒྱ་དང་བཅས་ཨོཾ་བཛྲ་ས་མཱ་ཛཿས་སྤྱན་དྲངས། ཨོཾ་སརྦ་བཱི་ར་ཡོ་གི་ནཱི་ཨརྒྷཾ་ནས་ཤཔྟའི་བར་གྱིས་མཆོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས་སྒོ་མཚམས་མ་རྣམས་ཀྱིས་བགེགས་བསྐྲད། དཔའ་བོ་རྣམས་ཀྱིས་ཤིས་པ་བརྗོད། དཔའ་མོ་རྣམས་ཀྱིས་རྡོ་རྗེའི་གླུ་ལེན། དེ་བཞིན་གཤེགས་པ་རྣམས་ཀྱིས་དབང་བསྐུར་བའི་དགོངས་པ་མཛད། ཡུམ་བཞི་ཕག་མོ་དང་བཅས་པས་རིན་པོ་ཆེའི་བུམ་པ་བདུད་རྩིས་གང་བ་ཐོགས་ནས། ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བགྱིའོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ཞེས་དབང་བསྐུར། སྐུ་གང་། དྲི་མ་དག །ཆུ་ལྷག་མ་ཡར་ལུད་པ་ལས་གཙོ་བོ་ལ་རྡོ་རྗེ་སེམས་དཔའ། ཡུམ་ལ་མི་བསྐྱོད་པ། མཁའ་འགྲོ་མ་ལ་རྟག་པ། ལཱ་མ་ལ་རྟ་མཆོག དུམ་སྐྱེས་མ་ལ་པདྨ་གར་དབང་། གཟུགས་ཅན་མ་ལ་རྡོ་རྗེ་ཉི་མས་དབུ་བརྒྱན་པར་བསམ། བདུན་པ་ལ་ཕྱི་མཆོད། ནང་མཆོད། གསང་མཆོད། དེ་ཁོ་ན་ཉིད་ཀྱིས་མཆོད་པ། བསྟོད་པ། དག་པ་དྲན་པ་དང་དྲུག་གི་དང་པོ་ནི། རང་གི་སྙིང་གའི་ས་བོན་ལས་སྤྲོས་པའི་མཆོད་པའི་ལྷ་མོ་རྣམས་ཀྱིས་མཆོད་པར་བསམ། སོ་སོའི་ཕྱག་རྒྱ་དང་བཅས། ཨོཾ་སརྦ་བཱི་ར་ཡོ་གི་ནཱི་ཨརྒྷཾ་སོགས་ཀྱིས་ཚོགས་ཞིང་(༡༡ན)
ལྟར་མཆོད། གཉིས་པ་ནང་མཆོད་ནི། བདུད་རྩི་རིལ་བུ་བཏབ་ན་བརླབ་མི་དགོས་ཤིང་མེད་ཚེ་འོག་ནས་འབྱུང་བའི་གཏོར་མ་ལྟར་བརླབ། བསྡུ་ན་ལག་པ་གཡོན་བསྟན་ལ་ཨོཾ། ཞེས་སྟོང་པར་བསམ། གཡས་བསྟན་ལ་ཨཱཿ ཞེས་ཐོད་པ་དཀར་པོ་ཡངས་ཤིང་རྒྱ་ཆེ་བ་དཔྲལ་བ་རང་ལ་བསྟན་པར་བསམ། །གཉིས་ཀ་བསྟན་ཏེ་ཧཱུྃ། ཞེས་ཤ་ལྔ་བདུད་རྩི་ལྔས་གང་བར་བསམ། ལག་གཉིས་བཀན་པའི་སྲིན་ལག་གཉིས་དཀྲིས་པའི་བར་ནས་གུང་མཐེབ་སྦྱར་བ་མཛུབ་མོ་གཉིས་ཀྱིས་མནན་པ་བྱ་ཁྱུང་གི་ཕྱག་རྒྱ་བསྟན་ལ། ཧ་ཧོ་ཧྲིཿ ཞེས་ལན་གསུམ་བརྗོད་པས་ཡེ་ཤེས་བདུད་རྩིར་བསམ་མོ། །ཨོཾ། མཆོད་དོ་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་རྒྱལ་བ་སྲས་དང་བཅས་པ་ཐམས་ཅད་ཀྱི་སྐུ་གསུང་ཐུགས་ཡེ་ཤེས་རྡོ་རྗེ་ངོ་བོ་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས་འཕགས་པའི་དགེ་འདུན་ཐམས་ཅད་ཀྱི་མངའ་བདག །སྐུ་བཞི་ཡེ་ཤེས་ལྔའི་བདག་ཉིད་དྲིན་ཅན་རྩ་བའི་བླ་མ་རིན་པོ་ཆེའི་ཞལ་དུ་ཨོཾ་ཨཱཿཧཱུྃ། སངས་རྒྱས་རྡོ་རྗེ་འཆང་ཆེན་པོའི་ཞལ་དུ་ཨོཾ་ཨཱཿཧཱུྃ། ཡེ་ཤེས་ཀྱི་མཁའ་འགྲོ་མའི་ཞལ་དུ་ཨོཾ་ཨཱཿཧཱུྃ། སློབ་དཔོན་རྡོ་རྗེ་དྲིལ་བུ་བའི་ཞལ་དུ་ཨོཾ་ཨཱཿཧཱུྃ། རུས་སྦལ་ཞབས་ཀྱི་ཞལ་དུ་ཨོཾ་ཨཱཿཧཱུྃ། ཛ་ལནྡྷ་ར་པའི་ཞལ་དུ་ཨོཾ་ཨཱཿཧཱུྃ། ནག་པོ་སྤྱོད་པའི་ཞལ་དུ་ཨོཾ་ཨཱཿཧཱུྃ། གུ་ཧྱ་པའི་ཞལ་དུ་ཨོཾ་ཨཱཿཧཱུྃ། རྣམ་རྒྱལ་ཞབས་ཀྱི་ཞལ་དུ་ཨོཾ་ཨཱཿཧཱུྃ། ཏཻ་ལོ་པའི་ཞལ་དུ་ཨོཾ་ཨཱཿཧཱུྃ། ནཱ་རོ་ཏ་པའི་ཞལ་དུ་ཨོཾ་ཨཱཿཧཱུྃ། བལ་པོ་ཕཾ་མཐིང་པ་གཅེན་འཇིགས་མེད་གྲགས་པའི་ཞལ་(༡༡བ)
དུ་ཨོཾ་ཨཱཿཧཱུྃ། གཅུང་ངག་གི་དབང་ཕྱུག་གི་ཞལ་དུ་ཨོཾ་ཨཱཿཧཱུྃ། ཀློག་སྐྱ་ཤེས་རབ་བརྩེགས་ཀྱི་ཞལ་དུ་ཨོཾ་ཨཱཿཧཱུྃ། མལ་གྱོ་ལོ་ཙཱ་བ་བློ་གྲོས་གྲགས་ཀྱི་ཞལ་དུ་ཨོཾ་ཨཱཿཧཱུྃ། ས་སྐྱ་པ་ཆེན་པོ་ཀུན་དགའ་སྙིང་པོའི་ཞལ་དུ་ཨོཾ་ཨཱཿཧཱུྃ། སློབ་དཔོན་བསོད་ནམས་རྩེ་མོའི་ཞལ་དུ་ཨོཾ་ཨཱཿཧཱུྃ། རྗེ་བཙུན་གྲགས་པ་རྒྱལ་མཚན་གྱི་ཞལ་དུ་ཨོཾ་ཨཱཿཧཱུྃ། ས་སྐྱ་པཎྜི་ཏ་ཀུན་དགའ་རྒྱལ་མཚན་ཀྱི་ཞལ་དུ་ཨོཾ་ཨཱཿཧཱུྃ། འགྲོ་བའི་མགོན་པོ་ཆོས་རྒྱལ་འཕགས་པའི་ཞལ་དུ་ཨོཾ་ཨཱཿཧཱུྃ། ཁྲོ་ཕུ་རིན་པོ་ཆེ་བསོད་ནམས་སེང་གེའི་ཞལ་དུ་ཨོཾ་ཨཱཿཧཱུྃ། ཡང་རྩེ་བ་རིན་ཆེན་སེང་གེའི་ཞལ་དུ་ཨོཾ་ཨཱཿཧཱུྃ། ཐམས་ཅད་མཁྱེན་པ་བུ་སྟོན་ལོ་ཙཱ་བའི་ཞལ་དུ་ཨོཾ་ཨཱཿཧཱུྃ། ཐུགས་སྲས་སྒྲ་ཚད་པ་རིན་ཆེན་རྣམ་རྒྱལ་ཞལ་དུ་ཨོཾ་ཨཱཿཧཱུྃ། རྗེ་ཀུན་དགའ་རིན་ཅེན་གྱི་ཞལ་དུ་ཨོཾ་ཨཱཿཧཱུྃ། བཟང་པོ་རིན་རྒྱལ་བའི་ཞལ་དུ་ཨོཾ་ཨཱཿཧཱུྃ། བྲག་ཐོག་པ་བསོད་ནམས་བཟང་པོའི་ཞལ་དུ་ཨོཾ་ཨཱཿཧཱུྃ། ཀུན་མཁྱེན་རྡོ་རྗེ་གདན་པའི་ཞལ་དུ་ཨོཾ་ཨཱཿཧཱུྃ། མདོ་ཁམས་པ་ཡོན་ཏན་རྒྱ་མཚོའི་ཞལ་དུ་ཨོཾ་ཨཱཿཧཱུྃ། རྗེ་ཤཱཀྱ་ཀུན་དགའི་ཞལ་དུ་ཨོཾ་ཨཱཿཧཱུྃ། ཀུན་བཟང་རྩེ་པ་དབང་ཕྱུག་རྒྱན་མཚན་གྱི་ཞལ་དུ་ཨོཾ་ཨཱཿཧཱུྃ། པཎ་ཆེན་བསོད་ནམས་མཆོག་ལྡན་གྱི་ཞལ་དུ་ཨོཾ་ཨཱཿཧཱུྃ། རྡོ་རྗེ་འཆང་རིན་ཅེན་བསོད་ནམས་མཆོག་གྲུབ་ཀྱི་ཞལ་དུ་ཨོཾ་ཨཱཿཧཱུྃ། དྲིན་ཅན་རྩ་བའི་བླ་མ་རིན་པོ་ཆེའི་ཞལ་དུ་ཨོཾ་ཨཱཿཧཱུྃ། གཞན་ཡང་དབང་བསྐུར་རྒྱུད་བཤད་མན་ངག་གནང་བའི་བླ་མ་དམ་པ་ཡབ་སྲས་བརྒྱུད་པ་དང་བཅས་པའི་ཞལ་དུ་ཨོཾ་ཨཱཿཧཱུྃ། ཡབ་ཀྱི་ཉེ་སྙིང་། ཡུམ་དང་མཁའ་འགྲོ་མ་བཞིའི་སྙིང་པོའི་མཐར་འབྲུ་གསུམ་བཏགས་ལ་ནང་མཆོད་དབུལ། བྱ་རྒྱུད། སྤྱོད་རྒྱུད། རྣལ་(༡༢ན)
འབྱོར་རྒྱུད། རྣལ་འབྱོར་བླ་ན་མེད་པ་སྟེ་རྒྱུད་སྡེ་ཆེན་པོ་བཞི་དང་འབྲེལ་བའི་ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱི་ཞལ་དུ་ཨོཾ་ཨཱཿཧཱུྃ། ཨོཾ་ཀཱ་ལི་དེ་ཝཻ། ཁྱད་པར་དཔལ་ལྡན་དམག་ཟོར་གྱི་རྒྱལ་མོ་འཁོར་དང་བཅས་པའི་ཞལ་དུ་ཨོཾ་ཨཱཿཧཱུྃ། ཤྲཱི་དྷརྨ་པཱ་ལ་ཙ་ཏུ་རྨུ་ཁ། མཐུ་སྟོབས་ཀྱི་དབང་ཕྱུག་དཔལ་མགོན་ཞལ་བཞི་པ་འཁོར་དང་བཅས་པ་རྣམས་ཀྱི་ཞལ་དུ་ཨོཾ་ཨཱཿཧཱུྃ། ཆོས་འཁོར་བསྲུང་ཞིང་བསྟན་པ་སྐྱོང་བར་ཞལ་གྱིས་བཞེས་པའི་བཀའ་སྡོད་ཆོས་སྐྱོང་སྲུང་མ་རྣམས་ཀྱི་ཞལ་དུ་ཨོཾ་ཨཱཿཧཱུྃ། གནས་དང་ཉེ་བའི་གནས། ཞིང་དང་ཉེ་བའི་ཞིང་། ཚནྡྷ་དང་ཉེ་བའི་ཚནྡྷོ། འདུ་བ་དང་ཉེ་བའི་འདུ་བ། དུར་ཁྲོད་དང་ཉེ་བའི་དུར་ཁྲོད། འཐུང་སྤྱོད་དང་ཉེ་བའི་འཐུང་སྤྱོད་དེ་ཡུལ་སུམ་ཅུ་རྩ་གཉིས། གནས་ཉི་ཤུ་རྩ་བཞི། དུར་ཁྲོད་ཆེན་པོ་བརྒྱད་ན་བཞུགས་པའི་དཔའ་བོ་དང་རྣལ་འབྱོར་མ་བསམ་གྱིས་མི་ཁྱབ་པ་སྤྲུལ་པའི་སྐུས་འགྲོ་བ་སེམས་ཅན་གྱི་དོན་མཛད་པ་རྣམས་ཀྱི་ཞལ་དུ་ཨོཾ་ཨཱཿཧཱུྃ། ཞིང་སྐྱོང་བཞི་བཅུ་རྩ་བརྒྱད། ཕོ་ཉ་གནས་ལས་སྐྱེས་པ། རིགས་ལས་སྐྱེས་པ། སྔགས་ལས་སྐྱེས་པ། ལས་ལས་སྐྱེས་པའི་མཁའ་འགྲོའི་ཚོགས་དང་། གནས་གསུམ་གྱི་རྡོ་རྗེ་མཁའ་འགྲོ་མ་རྣམས་ཀྱི་ཞལ་དུ་ཨོཾ་ཨཱཿཧཱུྃ། གནོད་སྦྱིན། སྲིན་པོ། འབྱུང་པོ། ཡི་དྭགས། ཤ་ཟ། སྨྱོ་བྱེད། བརྗེད་བྱེད་ཕོ་ཉ། འཕྲོག་མ། གྲུབ་པ་རྣམས་ཀྱི་ཞལ་དུ་ཨོཾ་ཨཱཿཧཱུྃ། བོད་ཁམས་སྐྱོང་བའི་བསྟན་མ་བཅུ་གཉིས་འཁོར་དང་བཅས་པ་དང་། གནས་བདག །གཞི་བདག །གྲོང་(༡༢བ)
བདག །ཡུལ་བདག་གཉུག་མར་གནས་པ་རྣམས་ཀྱི་ཞལ་དུ་ཨོཾ་ཨཱཿཧཱུྃ། འགྲོ་བ་རིགས་དྲུག །ལམ་རྒྱུད་ལྔ། སྐྱེ་གནས་རྣམ་པ་བཞིས་བསྡུས་པའི་སེམས་ཅན་ཐམས་ཅད་ཚིམ་ཞིང་ཟག་པ་མེད་པའི་བདེ་བས་རྒྱུད་གང་ནས་མྱུར་དུ་བླ་ན་མེད་པའི་བྱང་ཆུབ་ཐོབ་པའི་སྐལ་བ་དང་ལྡན་པར་གྱུར་ཅིག རང་གི་ལྕེ་ཐོག་ཏུ་བདུད་རྩི་མྱངས་ལ། རང་གི་ལུས་ལ་གནས་པའི་ལྷ་ཐམས་ཅད་ཀྱི་ཞལ་དུ་ཨོཾ་ཨཱཿཧཱུྃ། ཨོཾ་ཨ་མྲྀ་ཏ་སྭ་ད་ན་བཛྲས་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད། ། གསུམ་པ་གསང་བའི་མཆོད་པ་ནི། །ཡབ་ཀྱི་གསང་གནས་ཧཱུྃ་དཀར་པོ་ལས་བྱུང་བའི་རྡོ་རྗེ་ནག་པོ་ལ་བྱ་དམར་པོ་ལས་བྱུང་བའི་ནོར་བུ་དམར་པོ་བྱ་དམར་པོས་མཚན་པ། ཡུམ་གྱི་གསང་གནས་ཨཱཿལས་པདྨའི་འདབ་མ་གསུམ་པ་དྱཱ་སེར་པོ་ལས་བྱུང་བའི་ཟེའུ་འབྲུ་དཀར་པོ་དྱཱ་སེར་པོས་མཚན་པ། ཨོཾ་ཤྲཱི་མ་ཧཱ་སུ་ཁ་བཛྲ་ཧེ་ཧེ་རུ་རུ་ཀཾ་ཨཱཿཧཱུྃ་ཧཱུྃ་ཕཊ། ཡབ་ཀྱི་ཡུམ་ལ་ཙུམྤ་ན་དང་ཡུམ་གྱིས་ཀྱང་ཡབ་ལ་ཙུམྤ་ན་བྱས་ལ། ཕན་ཚུན་སྙོམས་པར་འཇུག་པའི་དགའ་བ་བརྩམས་ནས། །དགའ་བ་བཞི་ཉམས་སུ་མྱོང་ནས་ཟག་པ་མེད་པའི་བདེ་བས་མཉེས་པ་བསམ། བཞི་པ་དེ་ཁོ་ན་ཉིད་ཀྱི་མཆོད་པ་ནི། དེ་ལྟར་མཆོད་བྱ་མཆོད་བྱེད་མཆོད་པ་ཐམས་ཅད་སྐྱེ་མེད་མཉམ་པ་ཉིད་དུ་བསམ། ལྔ་པ་རྐང་བརྒྱད་ཀྱིས་བསྟོད་པ་ནི། ཨོཾ་ན་མོ་བྷ་ག་ཝ་ཏེ་ཝི་རེ་ཤཱ་ཡ་དུཾ་ཧཱུྃ་ཧཱུྃ་ཕཊ། ཨོཾ་མཧཱ་ཀལྤ་ཨགྣཾ་ས་ནྣ་བྷ་ཡ་ཧཱུྃ་ཧཱུྃ་ཕཊ། ཨོཾ་པ་ཊཱ་མུ་གུ་ཊེ་ཏྐ་ཊཱ་ཡ་ཧཱུྃ་ཧཱུྃ་ཕཊ། ཨོཾ་དཾ་ཥགྲྭ་ཀ་རཱ་ལོ་གྲ་བྷཱི་ཥ་ཎ་མུཁཱ་ཡ་ཧཱུྃ་ཧཱུྃ་ཕཊ། ཨོཾ་ས་ཧ་སྲ་བྷུ་ཛ་བྷུ་སུ་རཱ་ཡ་ཧཱུྃ་ཧཱུྃ་ཕཊ། ཨོཾ་པ་ར་ཤུ་པཱ་ཤོ་དྱ་ཏཾ་ཤཱུ་ལ་ཁ་ཊྭཱཾག་དྷ་རི་ཎི་ཧཱུྃ་ཧཱུྃ་ཕཊ། (༡༣ན)
ཨོཾ་བྱཱ་གཱ་ཛིཾ་ནཱཾ་པ་རི་དྷྱ་རཱ་ཡ་ཧཱུྃ་ཧཱུྃ་ཕཊ། ཨོཾ་མཧཱ་དྷཱུ་དྷུ་ནྡྷ་ཀཱ་ར་ལ་པུ་ཥཱ་ཡ་ཧཱུྃ་ཧཱུྃ་ཕཊ། རྣལ་འབྱོར་རོ་གཅིག་བདུད་རྩི་འཐུངས་པས་རྣམ་པར་དག་པའི་ཐུགས། །གནས་ལ་སོགས་པ་ཡུལ་དུ་བགྲོད་པས་རྣམ་པར་དག་པའི་སྐུ། །དཔལ་གྱི་གནས་ཀྱི་དབུས་མཆོག་དཀྱིལ་འཁོར་ལོའི་མགོན་པོ་དང་། བླ་མ་མཆོག་ལ་སྤྱི་བོས་བཏུད་དེ་རྟག་ཏུ་ཕྱག་འཚལ་ལོ། །དྲུག་པ་དག་པ་དྲན་པ་ནི། ལུས་དྲན་པ་ཉེ་བར་བཞག་པ་མཁའ་འགྲོ་མ། ཚོར་བ་དྲན་པ་ཉེ་བར་བཞག་པ་ལཱ་མ། ཆོས་དྲན་པ་ཉེ་བར་བཞག་པ་དུམ་སྐྱེས་མ། །སེམས་དྲན་པ་ཉེ་བར་བཞག་པ་གཟུགས་ཅན་མ། ཡང་དག་པའི་ཏིང་ངེ་འཛིན་ནི་དཔལ་ཧེ་རུ་ཀཿདང་རྡོ་རྗེ་ཕག་མོའོ། གཉིས་པ་རྫོགས་རིམ་ནི། ལུས་སྐྱིལ་ཀྲུང་ལག་པ་མཉམ་གཞག་བཅས་ལ་རླུང་ནང་དུ་འདྲེན་པ་དང་བསྟུན་ནས། ཕྱིའི་དཀྱིལ་འཁོར་མ་ལུས་པ་སྣ་བུག་གཉིས་ནས་སྙིང་གའི་ཧཱུྃ་ལ་བསྟིམ་མ། ཡུམ་ཡང་ལྟེ་བའི་ཨཾ་ལ་བསྟིམ། ཡབ་ཉིད་ཀྱང་ཞལ་གཅིག་ཕྱག་གཉིས་པར་གསལ་ཀྱང་རུང་ལ་རྒྱུན་གྱི་རྣལ་འབྱོར་ལ་དཀྱིལ་འཁོར་ཡོངས་རྫོགས་བསྒོམ་བཞིན་པའི་ངང་ནས་རང་གཙོ་བོར་གསལ་བའི་ལུས་ཀྱི་དབུས་སུ་ཨ་བ་དྷཱུ་ཏཱི་ཕྲ་ཞིང་དྲང་བ་རླུང་སེམས་འདྲེས་པས་གང་བ། གཡས་རོ་མ་མེའི་རང་བཞིན་ཀཱ་ལིའི་རྣམ་པའི་རཀྟས་གང་བ། གཡོན་རྐྱང་མཆུའི་རང་བཞིན་ཨཱ་ལིའི་རྣམ་པའི་ཐིག་ལེས་གང་བ། དབུ་མ་ལ་བརྟེན་པའི་ལྟེ་བ་སྤྲུལ་པའི་འཁོར་ལོ། འདབ་མ་དྲུག་ཅུ་རྩ་བཞི་པའི་སྙིང་པོར་ཕག་མོའི་ངོ་བོ་ཨ་དམར་པོ་མེའི་རང་བཞིན་(༡༣བ)
མགོ་གྱེན་དུ་ལྟ་བ། ནང་སྐོར་ལ་ཨ་ག་ཙ་ཊ་ཏ་པ་ལ་ཤ །ཕྱི་སྐོར་ལ་ཨཱ་ལི་ཀཱ་ལི་དང་། དབྱངས་ཀྱི་ཡི་གེ་རིང་པོ་དྲུག །སྙིང་ག་ཆོས་ཀྱི་འཁོར་ལོ་འདབ་མ་བརྒྱད་པའི་ལྟེ་བར་ཧེ་རུ་ཀའི་ངོ་བོ་ཧཱུྃ་དཀར་པོ་ཐིག་ལེའི་རྣམ་པ་མགོ་ཐུར་དུ་ལྟ་བ། ཕྱོགས་བཞིར། ཨོཾ་ཨཱཿཧྲི་ཏྲཾ། གཡོན་སྐོར་དང་མཚམས་བཞིར། ལཱཾ་མཱཾ་པཱཾ་ཏཱཾ་གཡས་སྐོར་དུ་གནས་པ། མགྲིན་པ་ལོངས་སྤྱོད་གྱི་འཁོར་ལོ་འདབ་མ་བཅུ་དྲུག་པའི་ལྟེ་བར། ཕག་མོའི་རང་བཞིན། ཨཾ་དམར་པོ་མགོ་གྱེན་དུ་ལྟ་བ། ནང་གི་འདབ་མ་ལ། ཡ་ར་ལ་ཝ། ཕྱི་སྐོར་རྀ་རཱྀ་ལྀ་ལཱྀ་ལཱ་སྤངས་པའི་ཨཱ་ལི་བཅུ་གཉིས། སྤྱི་བོ་བདེ་ཆེན་གྱི་འཁོར་ལོ་འདབ་མ་སུམ་ཅུ་རྩ་གཉིས་པའི་ལྟེ་བར་ཧེ་རུ་ཀའི་རང་བཞིན་ཧཾ་དཀར་པོ་མགོ་ཐུར་དུ་ལྟ་བ། འདབ་མ་ལ་ཨཱ་ལི་ཕྲག་གཉིས་གནས་པར་བསམས་ནས་ལྟེ་བའི་ཨཾ་གི་མེ་འབར་བ་དབུ་མའི་ནང་ནས་སོང་བས། ཧཱུྃ་ལ་བསྣུན་པས་བྱང་ཆུབ་ཀྱི་སེམས་ཀྱི་རྒྱུན་བབས་ནས། ཨཾ་གི་མེ་ཆེར་གསོས་འོག་གི་དཔྱིད་དང་ཐིག་ལེ་ཁ་སྦྱོར་དང་། མེའི་ནུས་པ་སྙིང་ག་ནས་ཀྱང་གྱེན་དུ་སོང་བས་མགྲིན་པའི་ཨཾ་བསྐུལ་བའི་མེས། སྤྱི་བོའི་ཧཾ་ལ་བསྣུན་དེ་ལས་ཀྱང་བྱང་ཆུབ་ཀྱི་རྒྱུན་བབས་པས་མགྲིན་པའི་མེ་ཆེར་གསོས་པ་སྟེང་གི་དཔྱིད་དང་ཐིག་ལེ་ཁ་སྦྱོར་དུ་བསྒོམ་མོ། །དེ་ལྟར་འབར་བས་རོ་མའི་ནུས་པ་འཕེལ་བས་ལུས་དྲོད་ཀྱིས་གང་། འཛགས་པས་རྐྱང་མའི་ནུས་པ་འཕེལ་བས་གང་། འབར་འཛག་དབུ་མར་འདྲེས་པས་སེམས་མི་རྟོག་པར་གྱུར་པར་བསམ་ཞིང་། དེ་(༡༤ན)
ལ་གོམས་པས་དུ་བ་ལ་སོགས་པའི་རྟགས་འབྱུང་ལ། དེ་ལས་སྐྱེས་པའི་ཡེ་ཤེས་དང་། བསྐྱེད་པའི་རིམ་པའི་རྣལ་འབྱོར་བསྲེས་ནས་བསྒོམས་པས། མཐོང་བའི་ལམ་གྱི་ཡེ་ཤེས་ཀྱང་མྱུར་དུ་སྐྱེ་བར་འགྱུར་རོ། །འདིར་འཕགས་པ་རིན་པོ་ཆེའི་སྒྲུབ་ཐབས་ལས་ཇི་ལྟར་འབྱུང་བ་བཞིན་བྲིས་པ་ཡིན་ཅིང་དྲིལ་བུ་རིམ་ལྔ་ཉམས་འཁྲིད་དུ་ཐོབ་པ་རྣམས་ཀྱིས་དེ་བཞིན་དུ་ཉམས་སུ་བླང་བར་བྱའོ། །གཉིས་པ་མཉམ་པར་མ་བཞག་པའི་རྣལ་འབྱོར་ལ་བཟླས་པ། ཉེར་བསྡུ། གཏོར་མ། ཉལ་བ། ལྡང་བ། ཁྲུས། ཟས་ཀྱི་རྣལ་འབྱོར་དང་བདུན་གྱི། དང་པོ་ནི། ཨོཾ་ཁཎྜ་རོ་ཧེ་ཧཱུྃ་ཧཱུྃ་ཕཊ། ཨོཾ་སྭ་བྷཱ་ཝ་ནས་ཀོ྅ཧཾ། སྟོང་པར་བསམ། སྟོང་པའི་ངང་ལས་ཕྲེང་རྡོག་རེ་རེའི་ངོ་བོ་ཡང་སྭ་ཧཱ་ཧུ་དམར་པོ་རེ་ཡོངས་སུ་གྱུར་པ་ལས་པདྨ་གར་གྱི་དབང་ཕྱུག་དམར་པོ་ཞལ་གཅིག་ཕྱག་བཞིའི། གཡས་གཉིས་པདྨ་དང་ཌཱ་མ་རུ། གཡོན་གཉིས་དྲིལ་བུ་ཐོད་པ་དང་བཅས་པའི་ཁ་ཊྭཱཾ་ག་ཐོགས་པ། ཉི་མ་ལ་གཡས་བརྐྱང་པས་བཞུགས་པ། སྤྱན་གསུམ་པ། ཕྱག་རྒྱ་ལྔས་བརྒྱན་པ་རྨོངས་བྱེད་མ་དཀར་མོས་འཁྱུད་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། དེ་ལས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་པ་ཕྱག་རྒྱ་དང་བཅས། ཨོཾ་བཛྲ་ས་མཱ་ཛཿས་སྤྱན་དྲངས། ཛཿཧཱུྃ་བཾ་ཧོཿས་བསྟིམ། ཨོཾ་ཨ་བྷི་ཥིཉྩ་མིས་དབང་བསྐུར། སྐུ་གང་། དྲི་མ་དག །ཆུ་ལྷག་མ་ཡར་ལུད་པ་ལས་འོད་དཔག་མེད་ཀྱིས་དབུ་བརྒྱན་པར་བསམ། ཨོཾ་བཛྲ་(༡༤བ)
ཨརྒྷཾ་ནས་ཤཔྟའི་བར་གྱིས་མཆོད། སྔགས་མཇུག་ཏུ། ཨོཾ་ཨཱཿཧཱུྃ་གིས་ནང་མཆོད་དབུལ། ཨོཾ་པདྨ་ནིརྟི་ཤྭ་ར་ཧཱུྃ་ཧཱུྃ་ཕཊ། ཅེས་བཟླ། ཡབ་ཡུམ་སྙོམས་པར་ཞུགས་ཏེ་འོད་གསལ་དུ་ཞུ་བ་ལས་བྱུང་བའི་ཕྲེང་བའི་རྣམ་པར་བསམ། རང་གི་ཐུགས་ཀའི་ས་བོན་ལས་སྔགས་ཀྱི་ཡི་གེ་རྣམས་རང་གི་ཐུགས་ཀའི་ཧཱུྃ་ལས་འོག་ཏུ་ཕྱུང་། རྡོ་རྗེའི་བུ་ག་ནས་ཡུམ་གྱི་བྷ་གར་ཐོན། དེ་ལས་བརྒྱུད་དེ་ཡུམ་གྱི་ཞལ་ནས་རང་གི་ཞལ་དུ་ཞུགས། ཐུགས་ཀའི་ས་བོན་ལ་ཐིམ་པར་བསམ། ཞལ་བཞི་དང་རྣལ་འབྱོར་མ་རྣམས་ཀྱིས་ཀྱང་ཟློས་པར་བསམ་ཞིང་། ཡབ་ཀྱི་སྙིང་པོ་ནི། ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུྃ་ཧཱུྃ་ཕཊ། ཌཱཀི་ནི་ཛཱ་ལ་སཾ་བ་རཾ་སྭཱ་ཧཱ། ཉེ་སྙིང་ནི། ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ། ཡུམ་གྱི་སྙིང་པོ་ནི། ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞ་ནཱི་ཡེ་ཧཱུྃ་ཧཱུྃ་ཕཊ། ཉེ་སྙིང་ནི ཨོཾ་བཛྲ་བཻ་རོ་ཙ་ནཱི་ཡེ་ཧཱུྃ་ཧཱུྃ་ཕཊ། དཔའ་མོ་བཞིའི་སྔགས་ནི། ཨོཾ་ཌཱ་ཀིཾ་ནཱི་ཡེ་ཧཱུྃ་ཧཱུྃ་ཕཊ། ཨོཾ་ལཱ་མེ་ཧཱུྃ་ཧཱུྃ་ཕཊ། ཨོཾ་ཁཎྜལ་རོ་ཧེ་ཧཱུྃ་ཧཱུྃ་ཕཊ། ཨོཾ་རཱུ་པི་ཎཱི་ཡེ་ཧཱུྃ་ཧཱུྃ་ཕཊ། ཅེས་བཟླའོ། ཕྱི་མཆོད་དང་རྣལ་འབྱོར་རོ་གཅིག་མས་བསྟོད། གཉིས་པ་ཉེར་བསྡུ་ནི། ཐུགས་ཀའི་ས་བོན་གྱི་འོད་ཀྱིས་སྣོད་བཅུད་ཐམས་ཅད་འོད་དུ་གྱུར་པ་དཀྱིལ་འཁོར་པ་ལ། དེ་དུར་ཁྲོད་ལ། དེ་གཞལ་ཡས་ཁང་ལ། དེ་ལྷ་མོ་བཞི་ལ། དེ་གཙོ་བོ་ཡབ་ཡུམ་ལ། ཡུམ་ཡབ་ལ། དེ་ཐུགས་ཀའི་ཡེ་ཤེས་སེམས་དཔའ་ལ། དེ་ཉི་བཅས་ཧཱུྃ་ལ། དེ་ཞབས་ཀྱུ་ལ། དེ་ཧའི་ཁོག་པ་ལ། དེ་མགོ་བོ་ལ། དེ་ཟླ་(༡༥ན)
ཚེས་ལ། དེ་ཐིག་ལེ་ལ། དེ་ནཱ་ད་ལ། དེ་ཡང་འོད་གསལ་དུ་གྱུར་པའི་ངང་ནས་རང་ཉིད་སྐད་ཅིག་གིས་ཧེ་རུ་ཀཿཞལ་གཅིག་ཕྱག་གཉིས་པ་ཡུམ་དང་བཅས་པའི་སྐུར་བསམ། དཔའ་བོ་དང་དཔའ་མོའི་གོ་ཆ་སྔར་བཞིན་བགོ་སྟེ་སེ་གོལ་ཕྱོགས་བཞིར་གཏོག་ཅིང་སུམྦྷ་བརྗོད་ལ་བསྲུང་། བྱང་ཆུབ་སེམས་ཀྱིས་ཟིན་པར་བྱས་ལ་དངོས་པོ་ཐམས་ཅད་བདེ་མཆོག་ཏུ་ཤེས་པར་བྱའོ། །གསུམ་པ་གཏོར་མ་ནི། སུམྦྷས་བསངས། སྭ་བྷཱ་བས་སྟོང་པར་བསམ། སྟོང་པའི་ངང་ལས་འོག་ཏུ་ཡཾ་ལས་རླུང་། རཾ་ལས་མེའི་དཀྱིལ་འཁོར། ཨ་ལས་ཐོད་པའི་སྒྱེད་བུ་གསུམ་གྱི་སྟེང་དུ་ཨ་ལས་སྐྱེས་པའི་ཐོད་པའི་ནང་དུ། དབུས་སུ་ཧཱུྃ་ལས་དྲི་ཆུ་ཧཱུྃ་གིས་མཚན་པ། ཤར་དུ་ཨོཾ་ལས་དྲི་ཆེན་ཨོཾ་གྱིས་མཚན་པ། ལྷོར་ཏྲཾ་ལས་རཀྟ་ཏྲཾ་གིས་མཚན་པ། ནུབ་ཏུ་ཨཾ་ལས་ཤུ་ཀྲ་ཨཾ་གིས་མཚན་པ། བྱང་དུ་ཁཾ་ལས་ཀླད་པ་ཁཾ་གིས་མཚན་པ། དབུས་སུ་བཱཾ་ལས་ཤ་ཆེན་བཱཾ་གྱིས་མཚན་པ། ཤར་དུ་མཱཾ་ལས་བ་ལང་གི་ཤ་མཱཾ་གྱིས་མཚན་པ། ལྷོར་ལཱཾ་ལས་གླང་པོ་ཆེའི་ཤ་ལཱཾ་གྱིས་མཚན་པ། ནུབ་ཏུ་པཱཾ་ལས་རྟའི་ཤ་པཱཾ་གྱིས་མཚན་པ། བྱང་དུ་ཏཱཾ་ལས་ཁྱིའི་ཤ་ཏཱཾ་གྱིས་མཚན་པ། རླུང་བསྐྱེད་པ་ལས་མེ་སྦར་ཏེ་སྐོལ་བས་ས་བོན་གྱི་ཡི་གེ་དང་བཅས་པ་ཞུ་ནས་ཁ་དོག་ཉི་མ་ལྟ་བུ། དེའི་རླངས་པ་ལས་གྲུབ་པའི་ཧཱུྃ་དཀར་པོ་ལས་བྱུང་བའི་ཁ་ཊྭཱཾ་ག་དཀར་པོ་བདུད་རྩིའི་རང་བཞིན་ཁ་
འོག་ཏུ་བལྟས་པ་ཞུ་བར་རྣམ་པར་བལྟ་ཞིང་དེའི ་(༡༥བ)
བཅུད་དང་རོ་མཉམ་དུ་བསམ། དེའི་སྟེང་དུ་ཨ་ཨཱ་ནས། ཧ་ཀྵ་ཡོངས་སུ་གྱུར་པ་ལས། ཨོཾ་ཨཱཿཧཱུྃ་གི་ཡི་གེ་སྟེང་ནས་སྟེང་དུ་གནས་པ་དེ་ལས་དཀྱིལ་འཁོར་གྱི་ལྷ་སྤྲོས། འགྲོ་དོན་བྱས། སྙོམས་པར་འཇུག་པ་སྔོན་དུ་འགྲོ་བས་ཞུ་བ་རྣམས་ཡི་གེ་གསུམ་ལ་ཐིམ། ཡི་གེ་གསུམ་ཡང་བདུད་རྩིར་ཞུ་ནས་ཐིམ་པས་ཇི་ལྟར་འདོད་པ་བཞིན་དུ་བསམ། ཨོཾ་ཨཱཿཧཱུྃ། ལན་གསུམ་བརྗོད། ཕྱག་རྒྱ་དང་བཅས། ཕཻཾ། རང་གི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་རང་བཞིན་གྱིས་གྲུབ་པའི་དཀྱིལ་འཁོར། སངས་རྒྱས་དང་། བྱང་ཆུབ་སེམས་དཔའ་དང་། ཡུལ་ཉི་ཤུ་རྩ་བཞིའི་དཔའ་བོ་དང་། རྣལ་འབྱོར་མ་དང་། ཆོས་སྐྱོང་སྲུང་མ་དང་། འཇིག་རྟེན་སྐྱོང་བ་དང་། མཁའ་འགྲོ་དང་། འབྱུང་པོའི་ཚོགས་ཐམས་ཅད་མདུན་གྱི་ནམ་མཁར་ཕྱག་རྒྱ་དང་བཅས། ཨོཾ་བཛྲ་ས་མཱ་ཛཿས་སྤྱན་དྲངས། པདྨ་ཀ་མ་ལ་ཡ་སྟྭཾ་གྱིས་གདན་ཕུལ། ཕྱི་ནང་གི་མཆོད་པས་མཆོད། ལྷ་རྣམས་ཀྱི་ལྗགས་ཧཱུྃ་དཀར་པོ་ལས་བྱུང་བའི་རྡོ་རྗེ་རྩེ་གསུམ་པ་དཀར་པོ་ནས་འབྲུ་ཙམ་འཁོད་པའི་འོད་ཟེར་གྱི་སྦུ་གུས་དྲངས་ཏེ་གསོལ་བར་བསམས་ལ་རྡོ་རྗེ་ཐལ་མོ་ཁ་ཕྱེ་ནས་ཨོཾ་བཛྲ་ཨ་ར་ལི་ཧོཿཛཿཧཱུྃ་བཾ་ཧོཿ བཛྲ་ཌཱ་ཀི་ནྱ་ས་མ་ཡ་སྟཾ། དྲྀ་ཤྱ་ཧོཿ དང་པོས་གཙོ་བོ། གཉིས་པས་ཡུམ། གསུམ་པས་རྣལ་འབྱོར་མ་བཞི་ལ་དབུལ། ཕྱི་ནང་གི་མཆོད་པས་མཆོད་ཅིང་། རྣལ་འབྱོར་རོ་གཅིག་མས་(༡༦ན)
བསྟོད་དེ་འདས་གཏོར་དབུལ། འཇིག་རྟེན་པ་ལ། ཨོཾ་ཁ་ཁ་ཁཱ་ཧི་ཁཱ་ཧཱུྃ། སརྦ་ཡཀྵ་རཱ་ཀྵ་ས། བྷཱུ་ཏ་པྲེ་ཧ། པི་ཤཱ་ཙ། ཨུནྨཱ་ད། ཨ་པ་སྨཱ་ར། བཛྲ་ཌ་ཀ་ཌཱ་ཀི་ནྱཱ་ད་ཡ། ཨི་མཾཾ་བཾ་ལཾ། གྲྀཧྞ་ནྟུ། ས་མ་ཡ་རཀྵ་ནྟུ་མ་མ་ས་རྦ་སིདྡྷི་མྨེ་པྲ་ཡཙྪནྟུ། ཡ་ཤྲཻ་བི། ཡཐེཥྚཾ། བྷུཾ་ཛ་ཐ། ཛི་གྷྲ་ཐ། པི་པ་ཐ། མཱ་ཏི་ཀྲ་མ་ཐ། མ་མ་སརྦཱ་ཀཱཏྲ། སཏྶུ་ཁཾ། བི་ཤུདྡྷ་ཡེ། ས་ཧ་ཡི་ཀ་བཱ་ཝནྟུ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་ལན་གསུམ་གྱིས་དབུལ། ཕྱི་ནང་གིས་མཆོད། ལྷ་ཡི་ཚོགས་རྣམས་མ་ལུས་དང་། །ཀླུ་ཡི་ཚོགས་རྣམས་མ་ལུས་དང་། །གནོད་སྤྱིན་ཚོགས་རྣམས་མ་ལུས་དང་། །སྲིན་པོའི་ཚོགས་རྣམས་མ་ལུས་དང་། །འབྱུང་པའི་ཚོགས་རྣམས་མ་ལུས་དང་། །ཡི་དྭགས་ཚོགས་རྣམས་མ་ལུས་དང་། །ཤ་ཟའི་ཚོགས་རྣམས་མ་ལུས་དང་། །སྨྱོ་བྱེད་ཚོགས་རྣམས་མ་ལུས་དང་། །བརྗེད་བྱེད་ཚོགས་རྣམས་མ་ལུས་དང་། །མཁའ་འགྲོའི་ཚོགས་རྣམས་མ་ལུས་དང་། །མ་མོའི་ཚོགས་རྣམས་མ་ལུས་དང་། །མ་ལུས་པ་ནི་ཐམས་ཅད་དག །འདིར་གཤེགས་བདག་ལ་དགོངས་སུ་གསོལ། །བསྟན་པ་བསྲུང་དང་འགྲོ་བའི་དོན་མཛད་ཕྱིར། །ཐུགས་དམ་བཅས་ཤིང་ཞལ་གྱིས་བཞེས་པ་རྣམས། །དཔལ་ཆེན་བཀའ་སྡོད་ཡིད་ལྟར་མགྱོགས་པ་ཡི། །འཇིགས་པའི་གཟུགས་ཅན་དྲག་གཏུམ་མི་བཟད་པ། །གདུག་པ་འདུལ་མཛད་ནག་(༡༦བ)
པོའི་ཕྱོགས་རྣམས་འཇོམས། །རྣལ་འབྱོར་ལས་ལ་འབྲས་བུ་སྟེར་མཛད་ཅིང་། །མཐུ་སྟོབས་བྱིན་རླབས་བསམ་གྱིས་མི་ཁྱབ་པའི། །གནོད་སྦྱིན་ཚོགས་སོགས་བརྒྱད་ལ་ཕྱག་འཚལ་ལོ། །སྡེ་བརྒྱད་བཙུན་མོ་སྲས་དང་གཡོག་བཅས་པས། །དངོས་གྲུབ་ཀུན་གྱི་བཀའ་དྲིན་བདག་ལ་སྩོལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་སྐལ་བ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །སྲུང་མས་རྟག་ཏུ་གྲོགས་མཛོད་ཅིག །དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཆོས་འཕེལ་དང་། །བདེ་ལེགས་ཐམས་ཅད་འབྱུང་བ་དང་། །ཡིད་ལ་འདོད་པ་ཀུན་འགྲུབ་ཤོག །ཨོཾ་ཡོ་ག་ཤུདྡྷཱཿསརྦ་དྷ་རྨཱ་ཡོ་ག་ཤུདྡྷོ྅ཧཾ། ཞེས་བརྗོད་དེ་པད་ཀར་གྱི་ཕྱག་རྒྱས་མཉེས་པར་བྱས་ལ་ཕྱག་རྒྱ་ཉེ་བར་སྡུད་པ་ན་འཁྱུད་པའི་ལྟང་ཀ །ཡིག་བརྒྱ་དང་མ་འབྱོར་བ་སོགས་ཀྱིས་ནོངས་པ་བཟོད་པར་གསོལ། མཐེ་བོང་དང་མིང་མེད་ཀྱིས་སེ་གོལ་གཏོགས་ལ། བཛྲ་མུཿས་ཡེ་ཤེས་པ་རང་བཞིན་གྱི་གནས་སུ་གཤེགས་པར་བསམ། རྨི་ལམ་ནི། སྲིད་པ་གསུམ་འབར་སྐུ་ནི་རྗེས་ཆགས་རྡུལ་(༡༧ན)
བར་ལྡན། །འོད་ཟེར་སྔོན་པོ་སྟོང་ལྡན་ཉི་མ་བརྒྱ་སྟོང་ལྡན། །རྣམ་མང་སྐུ་དང་ཆ་ལུགས་རྗེས་ཆགས་སེམས་པར་ལྡན། །ཧ་ེརུ་ཀ་དཔལ་དེ་དང་ལྷན་གཅིག་གར་བྱེད་ཤོག །ལྷ་མོ་ཚད་མ་དམ་ཚིག་ཚད་མ་དང་། །དེས་བརྗོད་གསུང་ཡང་མཆོག་ཏུ་ཚད་མ་སྟེ། །བདེན་པའི་འདི་དག་གིས་ནི་ལྷ་མོ་རྣམས། །བདག་ཅག་རྗེས་སུ་འཛིན་པའི་རྒྱུར་གྱུར་ཅིག །སེམས་ཅན་ཀུན་གྱི་དོན་གྱི་ཕྱིར། །བདག་ནི་ཧེ་རུ་ཀར་གྱུར་ནས། །སེམས་ཅན་ཐམས་ཅད་ཧེ་རུ་ཀའི། །གོ་འཕང་མཆོག་ལ་འགོད་པར་ཤོག །ཤིས་བརྗོད་ནི། ཕུན་སུམ་ཚོགས་པ་བྱའོ། །བཞི་པ་ཉལ་བའི་རྣལ་འབྱོར་ནི། །གོང་གི་བསྡུ་ཆོག་ལྟར་ལ་ནཱ་ད་ཡང་འོད་གསལ་ལ་ཐིམ་པའི་ངང་ལ་ཉལ་ལོ། ལྔ་པ་ལྡང་པའི་རྣལ་འབྱོར་ནི། ནང་པར་རྣལ་འབྱོར་མས་རྒྱུད་བསྐུལ་བས་ལངས་ཏེ་ཧེ་རུ་ཀཿཡབ་ཡུམ་དུ་གསལ་ལོ། །དྲུག་པ་ཁྲུས་ཀྱི་རྣལ་འབྱོར་ནི། །དབང་བསྐུར་པའི་ཆོ་ག་བཞིན་ནོ། །བདུན་པ་ཟས་ཀྱི་རྣལ་འབྱོར་ནི། སྐད་ཅིག་མའི་སྔགས་བརྗོད་ནས་ལུས་དཀྱིལ་གསལ་གདབ། ཁ་ཟས་གཏོར་མ་ལྟར་བྱིན་བརླབ་པའམ། དེ་ཙམ་མ་ནུས་ན་ཕྱག་རྒྱ་དང་བཅས། ཨོཾ་ཨཱཿཧཱུྃ་ཧ་ཧོ་ཧྲཱིཿ ཞེས་པས་བརླབས་ལ་གཡོན་པས་བཟའོ། གསང་ལས་ཡང་གསང་རྣལ་འབྱོར་མ་རྒྱུད་ཀྱི། །རྩེར་སོན་འཁོར་ལོ་བདེ་མཆོག་ཟབ་མོའི་ལམ། ཁྲག་འཐུང་ཁྱབ་བདག་རྡོ་རྗེ་དྲིལ་བུ་པའི། །ལུགས་འདི་སྐལ་བཟང་བསོད་ནམས་ཟོང་གིས་(༡༧བ)
བསྒྲུབས། །འཕགས་ཡུལ་གྲུབ་པའི་དབང་ཕྱུག་མཐའ་ཀླས་པ། །བཤུལ་ཉེར་གཤེགས་ནས་ཧེ་རུ་ཀཿདཔལ་གྱི། །གྲོང་ཁྱེར་ཆེར་བགྲོད་བཅུ་གསུམ་རྡོ་རྗེའི་ས། །མངོན་དུ་གྱུར་པའི་ལག་རྗེས་མང་ཞིག་བཞག །ལྗོངས་འདིར་འཇིག་རྟེན་མིག་གཅིག་བཀའ་དྲིན་ལས། །མི་འདྲའི་འཆད་ཉན་རྣམ་པ་བགྲངས་ཡས་ཀྱང་། །ཟབ་དོན་གནོད་ཀྱིས་ཟུང་འཇུག་སར་བརྙེས་པ། །ས་སྐྱའི་བླ་ཆེན་ཡབ་སྲས་ཙམ་དུ་འཁུམས། །རྩ་བཤད་ཆེ་མཐུན་དགོངས་པ་ཡོངས་བཀྲལ་པར། །འགྲན་མེད་མཁས་རྣམས་ཡང་རྩེར་ལེགས་སོན་པ། །ཀུན་མཁྱེན་བུ་སྟོན་འཇམ་མགོན་བཙོང་ཁ་པ། །ཐུབ་བསྟན་མཁའ་ལ་ཉི་ཟླ་ཟུང་བཞིན་མཛེས། །དེ་ཕྱིར་གོང་མའི་བཞེད་སྲོལ་ཕ་མཐའ་ཡས། །རྗེས་འབངས་དཔྱོད་ལྡན་འགྲེལ་ལུགས་དེ་བས་མང་། །བླུན་རྨོངས་རང་བཟོའི་མུན་མདའ་ཟད་པ་མེད། །མཐོང་ཚེ་བདག་འདྲའི་བློ་དམན་མགོ་བོ་འཁོར། །འོན་ཏེ་བདེ་མཆོག་འཁོར་ལོ་འཚམས་སྤྲིན་གོས། །རབ་མཛེས་དམ་པའི་ཞབས་པད་བསྟེན་པའི་མཐུས། །མ་འདྲེས་སོ་སོར་འབྱེད་ནུས་སྤོབས་པའི་མགྲིན། ཅུང་ཟད་བཏེག་ནས་སྨྲ་བའི་སྐལ་བཟང་ཐོབ། །མི་འཛད་དགེ་བའི་རྫིངས་ཀྱིས་འཁོར་བའི་མཚོ། །བསྒྲལ་ཏེ་མ་དང་མཁའ་འགྲོ་འདུ་བའི་གྲོང་། །མུ་མེད་འགྲོ་རྣམས་བསུས་ནས་བདེ་བ་ཆེ། །སྐུ་གསུམ་རིན་ཅེན་ནོར་ལ་སྤྱོད་པར་ཤོག །ཅེས་གྲུབ་པའི་དབང་ཕྱུག་རྡོ་རྗེ་དྲིལ་བུ་པའི་བཞེད་གཞུང་དཔལ་འཁོར་ལོ་སྡོམ་པ་ཕྱི་དཀྱིལ་(༡༨ན)
ལྷ་ལྔའི་སྒྲུབ་ཐབས་ལོ་པཎ་ཞལ་ལུང་ཞེས་བྱ་བ་འདི་ནི་དབུ་མཛད་བློ་བཟང་ཡོན་ཏན་གྱིས་བསྐུལ་བས་འཚམས་སྦྱར་བ་ལ་བརྟེན་ནས་ཐུགས་སྲས་ལོ་ཙཱ་བས་མཛད་པའི་མངོན་རྟོགས་ཀྱི་དགོངས་པ་གཙོ་བོར་བཟུང་སྟེ་རྩ་བའི་བླ་མ་ཁྱབ་བདག་ཞ་ལུ་པ་ཆེན་པོས་མཛད་པའི་མི་འགྱུར་བདེ་བ་ཆེན་པོའི་དཔལ་སྟེར་ལ་གཞི་བྱས། ཆོས་ཀྱི་རྒྱལ་པོ་འཕགས་པ། ཞ་ལུ་ཤར་ཆེན་ཡེ་ཤེས་རྒྱ་མཚོ། ཐམས་ཅད་མཁྱེན་པ་དགེ་འདུན་རྒྱ་མཚོ་གསུམ་གྱི་གསུང་རབ་ལའང་ཞིབ་མོར་དཔྱད་དེ་ཟ་ཧོར་གྱི་བནྡེས་ཀུན་དགའ་ཞེས་པ་ཤིང་སྟག་ཁྲུམས་ཀྱི་ཟླ་བའི་ཁྲག་འཐུང་རྣམ་པར་རོལ་བའི་ཚེས་ལ་ཕོ་བྲང་པོ་ཏ་ལར་སྦྱར་བའི་ཡི་གེ་པ་ནི་གནས་བརྟན་འཇམ་དབྱངས་གྲགས་པའོ། །མངྒ་ལཾ།། །།