དཔལ་རྡོ་རྗེ་འཇིགས་བྱེད་ཀྱི་རྒྱུན་འཁྱེར་གྱི་རྣལ་འབྱོར་རེག་ཟིག་བཀླགས་ཆོག་ཏུ་བཀོད་པ།
དཔལ་རྡོ་རྗེ་འཇིགས་བྱེད་ཀྱི་རྒྱུན་འཁྱེར་གྱི་རྣལ་འབྱོར་རེག་ཟིག་བཀླགས་ཆོག་ཏུ་བཀོད་པ་བཞུགས་སོ།།
ལྔ་ལྡན་ཡེ་ཤེས་གཤིན་རྗེའི་རིགས་ཀུན་གྱི། ཁྱབ་བདག་མ་ཧེའི་ཞལ་ཅན་གཞོན་ནུའི་སྐུ། །ལྕང་ལོའི་ཟུར་ཕུད་ངོམ་པ་མཚམས་སྤྲིན་གོས། །ལེགས་མནབས་བློ་བཟང་གྲགས་པའི་དཔལ་གྱིས་སྐྱོངས། །འཇིག་རྟེན་མིག་གཅིག་ལྔ་ཡི་བཞེད་སྲོལ་ལ། །བལྟོས་མིན་འཇམ་དཔལ་དབྱངས་ཀྱི་ཞལ་ལུང་བཅུད། །སྒྲུབ་ཐབས་ཐུགས་གསང་རིན་ཅེན་ཟ་མ་ཏོག །འཁྱིལ་བདེ་སྤྱོད་ལྡན་དགའ་བསྐྱེད་ལེགས་པའི་ལམ། །བཅུ་གསུམ་འཁོར་ལོའི་ཟ་འོག་ཐགས་རིས་ལ། །བྱིན་རླབས་དབང་གཞུའི་མདངས་ཚོན་བཀྲག་པོ་ཆེ། །ཀུན་གྱི་གཟིགས་མོར་ཡ་མཚན་རྣམ་འཕྲུལ་གྱིས། །སྒྱུ་མའི་ཁེངས་པ་ད་གདོད་བག་ལ་ཞ། །རྩེ་གཅིག་ཉམས་སུ་བསྟར་ན་སྐྱེད་རིམ་གྱི། །སྐུ་གསུམ་ལམ་བྱེད་ཏིང་འཛིན་རྟ་བདུན་པས། །ཉེར་དྲངས་རྫོགས་རིམ་མི་སློབ་ཟུང་འཇུག་གི །མཁའ་དབྱིངས་ས་དེར་བགྲོད་ལ་གཅིག་ཏུ་ཉེ། །དེ་ཕྱིར་བསྒོས་དོན་ཉ་ཕྱིས་ཁོག་པ་རུ། །ཟབ་བརླིང་མུ་ཏིག་ཕྱུར་བུར་སྤུངས་པའི་མིག །ཁ་སྐོང་མཚོན་གྱིས་ཕུག་པ་(༢ན)
བརྗོད་བདེ་ཡི། །སྲད་བུར་བརྒྱུས་པའི་འཕྲེང་རྒྱན་དེང་འདིར་སྤེལ། །དེ་ཡང་དགྲ་གདོང་འཇིགས་གསུམ་སོགས་གཤིན་རྗེ་ནག་པོའི་ཆོས་སྐོར་གྱི་ནང་ནས་གཙོ་བོར་གྱུར་པ་དཔལ་རྡོ་རྗེ་འཇིགས་བྱེད་ཀྱི་སྒྲུབ་དཀྱིལ་གཞུང་མན་ངག་ལ་པཎ་གྲུབ་ལོ་ཙཱ་བའི་བཞེད་སྲོལ་མི་འདྲ་བ་མང་དུ་བྱུང་བར་བོད་ཀྱི་བླ་མ་སྔ་ཕྱི་མང་པོས་འགྲེལ་ལུགས་ཐ་དད་ནའང་། རྒྱལ་བ་གཉིས་པ་ཤར་བཙོང་ཁ་པ་བློ་བཟང་གྲགས་པའི་དཔལ་གྱིས་ཡོངས་འཛིན་གཞན་ལ་མ་བལྟོས་པར་བླ་མ་འཇམ་དཔལ་དབྱངས་ཀྱི་བཀའ་དྲིན་ལ་བརྟེན་ནས་ཤིང་རྟའི་སྲོལ་ཕྱེ་བའི་སྒྲུབ་ཐབས་ཟ་མ་ཏོག་རྡོ་རྗེའི་ཚིག་རྐང་ལྟ་བུ་ལ་ནག་འགྲོས་སུ་བྲིས་པ་འགའ་ཞིག་སྣང་བར་རས་བྲིས་རྡུལ་ཚོན་སོགས་ཀྱི་དམིགས་རྟེན་གང་ཡང་མེད་པར་བདག་བསྐྱེད་ཀྱི་རྣལ་འབྱོར་ཙམ་ལ་བདག་མདུན་འཇུག་པ་གཅིག་པུ་ལ་ཁྱད་གཞི་མེད་པའི་ཁྱད་ཆོས་ངག་འདོན་གྱི་མཚམས་སྦྱོར་དང་མངོན་རྟོགས་ཀྱི་གསལ་བྱེད་ཁ་འགེང་དགོས་པ་རྣམས་མ་བཀང་བ། ཐུན་མོང་མ་ཡིན་པའི་སྲུང་འཁོར་མེད་ཀྱང་ཆད་ལྷག་ཏུ་མ་འགྱུར་བ་འབད་པས་བཅུག་པར་མཇུག་ཏུ་(༢བ)
འཁོར་ལོ་འཁོར་བ་དང་བཟློག་པ་སོགས་ཀྱི་ཤམ་བུ་གང་ཡང་མེད་པ་ཕྱོགས་སྐྱོང་གི་མངོན་རྟོགས་གཏོར་ཆོག་གི་སྐབས་དགོས་པ་ཆོ་གའི་དཀྱུས་སུ་འཇུག་པ་སོགས་རྗེ་བླ་མའི་དགོངས་པ་མ་ལོན་ཞིང་གསུང་འཕྲོས་མ་ཟིན་པ་འདྲ་སྙམ་པའི་དོགས་གནས་རྒྱུད་སྡེ་སྤྱི་ནས་གཞལ་ཚེ་ཀུན་རྟོག་མེ་ལོང་དུ་ཤར་བ་རྒྱུན་འཁྱེར་གྱི་རྣལ་འབྱོར་ཁོ་ནའི་རེག་ཟིག་ཆུ་འབབ་གྱི་ཚུལ་དུ་བཀོད་པར། དང་པོ། སྦྱོར་བའི་ཏིང་ངེ་འཛིན་ལ་སྐྱབས་འགྲོ་ན། བདག་དང་འགྲོ་བ་ནམ་མཁའ་དང་མཉམ་པའི་སེམས་ཐམས་ཅད་དུ་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། དམ་པའི་ཆོས་རྣམས་ལ་སྐྱབས་སུ་མཆིའོ། འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། ལན་གསུམ། བླ་མ་དང་དཀོན་ཅོག་རིན་པོ་ཆེ་རྣམ་པ་གསུམ་ལ་ཕྱག་འཚལ་ཞིང་སྐྱབས་སུ་མཆིའོ། །ཁྱེད་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། སེམས་བསྐྱེད་ནི། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་དཔལ་རྡོ་རྗེ་འཇིགས་བྱེད་ཆེན་པོ་བསྒོམ་པར་བགྱིའོ། ལན་གསུམ། རྡོར་སེམས་སྒོམ་བཟླས་ནི། རང་གི་སྤྱི་བོར་པཾ་ལས་པད་མ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ལས་རྡོ་རྗེ་དཀར་པོ་རྩེ་ལྔ་པ་ལྟེ་བ་ལ་ཧཱུཾ་གིས་མཚན་པ་དེ་ལས་འོད་འཕྲོས་འདུས་ཡོངས་སུ་གྱུར་པ་ལས་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པ། ཡུམ་རྡོ་རྗེ་སྙེམས་མ་དཀར་མོ་གྲི་གུག་དང་ཐོད་པ་འཛིན་པས་འཁྱུད་པ་གཉིས་ཀའང་རིན་པོ་ཆེའི་རྒྱན་སྣ་(༣ན)
ཚོགས་ཀྱིས་བརྒྱན་པ། རྡོ་རྗེའི་སྐྱིལ་མོ་ཀྲུང་གིས་བཞུགས་པ། དེའི་ཐུགས་ཀར་ཟླ་བའི་སྟེང་དུ་ཧཱུཾ་ཡིག་དཀར་པོ་དེ་ལས་འོད་ཟེར་འཕྲོས་རང་འདྲའི་ཡེ་ཤེས་པ་ཨོཾ་བཛྲ་ས་མཱ་ཛཿས་སྤྱན་དྲངས། ཨོཾ་བཛྲ་སཏྭ་ས་པ་རི་ཝཱ་ར་ཨརྒྷཾ་ནས་ཤཔྟ་པྲ་ཏཱིཙྪ་ཧཱུཾ་སྭཱཧཱ། ཛཿཧཱུཾ་བཾ་ཧོཿས་གཉིས་སུ་མེད་པར་བསམ། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས་པས་དབང་གི་ལྷ་རྣམས་ཨོཾ་བཛྲ་ས་མཱ་ཛཿས་སྤྱན་དྲངས། ཨོཾ་པཉྩ་ཀཱུ་ལ་ས་པ་རི་ཝཱ་ར་ཨརྒྷཾ་ནས་ཤཔྟའི་བར་གྱིས་མཆོད། དེ་བཞིན་གཤེགས་པ་ཐམས་ཅད་ཀྱིས་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས་དེ་རྣམས་ཀྱིས་ཡེ་ཤེས་ཀྱི་བདུད་རྩིས་གང་བའི་བུམ་པ་ཐོགས་ནས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཨཱཿཧཱུཾ། ཞེས་དབང་བསྐུར། སྐུ་ཡེ་ཤེས་ཀྱི་བདུད་རྩིས་གང་། མི་བསྐྱོད་པས་དབུ་བརྒྱན་པར་བསམ། བཅོམ་ལྡན་འདས་རྡོ་རྗེ་སེམས་དཔའ་བདག་གཞན་སེམས་ཅན་ཐམས་ཅད་ཀྱི་སྡིག་སྒྲིབ་དང་དམ་ཚིག་ཉམས་ཆགས་ཐམས་ཅད་བྱང་ཞིང་དག་པར་མཛད་དུ་གསོལ། ཞེས་གསོལ་བ་བཏབ་པས་ཐུགས་ཀའི་ཧཱུཾ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་དག །སངས་རྒྱས་སྲས་བཅས་ལ་མཉེས་པའི་མཆོད་པ་ཕུལ། དེ་རྣམས་ཀྱི་ཡོན་ཏན་ཐམས་ཅད་འོད་ཟེར་གྱི་རྣམ་པར་བསྡུས་ནས་ཐུགས་ཀའི་ཧཱུཾ་ཡིག་ལ་ཐིམ་པས་གཟི་བརྗིད་དང་མཐུ་སྟོབས་ཕུན་སུམ་ཚོགས་པར་བསམ། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་ཝ་སུ་ཏོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་(༣བ)
པོ་ཥྱོ་མེ་བྷ་ཝ། སརྦ་སིརྡྷི་མྨེ་པྲ་ཡ་ཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲིཡཾཿཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་ཝ་ན་སརྦ་ཏ་ཐཱ་ག་ཏ་བཛྲ་མཱ་མེ་མུ་ཉྩ། བཛྲཱི་བྷ་ཝ་མ་ཧཱ་ས་མ་ཡ་ས་ཏྭ་ཨཱཿ བདག་ནི་མི་ཤེས་རྨོངས་པ་ཡིས། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །གས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །རྡོ་རྗེ་སེམས་དཔའི་ཞལ་ནས་རིགས་ཀྱི་བུ། ཁྱོད་ཀྱི་སྡིག་སྒྲིབ་དང་དམ་ཚིག་ཉམས་ཆགས་ཐམས་ཅད་བྱང་ཞིང་དག་གོ །ཞེས་གསུངས་ནས་རང་ལ་ཐིམ་པས་རང་གི་སྒོ་གསུམ་དང་རྡོ་རྗེ་སེམས་དཔའི་སྐུ་གསུང་ཐུགས་དབྱེར་མི་ཕྱེད་པར་བསམ། ཚོགས་ཞིང་ནི། རང་ཉིད་འཇིགས་བྱེད་ཞལ་གཅིག་ཕྱག་གཉིས་པར་གསལ་བའི་ཐུགས་ཀར་པད་མ་དང་ཉི་མ་ལ་གནས་པའི་ཧཱུཾ་གི་འོད་ཟེར་གྱིས་འཇིག་རྟེན་གྱི་ཁམས་མུ་མེད་པ་གསལ་བར་བྱས་དེ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་དང་ཁྲོ་བོ་དང་རིག་པའི་ཚོགས་ཀྱིས་བསྐོར་བའི་རྡོ་རྗེ་འཇིགས་བྱེད་བླ་མ་དང་བཅས་པ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿས་སྤྱན་དྲངས། འོད་ཟེར་རང་གི་སྙིང་གར་བསྡུ། །གང་གི་དྲིན་གྱིས་བདེ་ཆེན་གནས། །སྐད་ཅིག་གིས་ནི་ཐོབ་འགྱུར་བ། །བླ་མ་རིན་ཅེན་ལྟ་བུ་ཡི། །རྡོ་རྗེ་ཅན་ཞབས་པད་ལ་འདུད། །གཟུགས་མཆོག་མཆོག་ཏུ་དྲག་པོ་ཆེ། །དཔའ་བོ་མཆོག་གི་སྤྱོད་ཡུལ་ཅན། །གདུལ་དཀའ་འདུལ་བའི་དོན་མཛད་པ། །རྡོ་རྗེ་འཇིགས་བྱེད་ལ་ཕྱག་འཚལ། ཞེས་བླ་མ་དང་ལྷ་ལ་ཕྱག་བྱ། རང་གི་སྙིང་གའི་ས་བོན་གྱི་འོད་(༤ན)
ཟེར་ལས་བྱུང་བའི་ཙ་རྩི་ཀཱ་དཀར་མོ། ཕག་མོ་སྔོན་མོ། དབྱངས་ཅན་མ་དམར་མོ། གཽ་རཱི་ལྗང་གུ །ཕྱག་ན་མཆོད་རྫས་སྣ་ཚོགས་པ་ཐོགས་པ་རྣམས་ཀྱིས་མཆོད་པར་བསམ། ཨོཾ་ཧྲཱིཿཥྚཱི་ཧས་མཆོད་ཡོན། ཨོཾ་ཧཱུཾ་ཧཱུཾ་ཕཊ་ཀྱིས་ཞབས་བསིལ། ཨོཾ་ཝི་ཀྲི་ཏཱ་ན་ན་དུ་ཥྚཾ་སཏྭ་ད་མ་ཀ་གཿགཿཡིས་དྲི། ཨོཾ་ཀུ་མཱ་ར་རཱུ་པི་ཎི་ཛཿཛཿཧཱུཾ་ཕཊ་ཀྱིས་མེ་ཏོག །ཨོཾ་ཧྲཱི་ཧཱཿཧཻ་ཕཊ་ཀྱིས་བདུག་སྤོས། ཨོཾ་དཱིཔྟ་ལོ་ཙ་ན་ཝི་ཀྲི་ཏཱ་ན་ན་མ་ཧཱ་ཨཊྚཊྚ་ཧ་ས་ན་དི་ནི་དཱིཔྟ་ཡེ་སྭཱཧཱས་མར་མེ། ཨོཾ་བཛྲ་ནཻ་ཝི་ཏྱ་ཨཱཿཧཱུཾ་སྭཱ་ཧཱས་ལྷ་བཤོས། ཨོཾ་བཛྲ་ཤཔྡ་ཨཱཿཧཱུཾ་གིས་རོལ་མོ་རྣམས་དབུལ་ལ་ལྷ་མོ་རྣམས་སླར་བསྡུ། སྡིག་པ་རྣམས་ནི་བཤགས་པར་བྱ། །སྐྱེས་ཤིང་བྱུང་བ་རྣམས་ནི་བསལ། །མི་བྱེད་པ་ཡང་སྤྱན་སྔར་བརྗོད། །དེ་བཞིན་བསོད་ནམས་རྗེས་ཡི་རང་། །བདག་གིས་བདེ་འགྲོར་ཡོངས་སུ་བསྔོ། །དཀོན་མཆོག་གསུམ་ལ་སྐྱབས་སུ་འགྲོ། སེམས་ཅན་ཐམས་ཅད་བདག་གིས་དགྲོལ། །བྱང་ཆུབ་གནས་ལ་འགོད་པར་བགྱི། །བྱང་ཆུབ་སེམས་ནི་ཡང་དག་བསྐྱེད། །ཡོན་ཏན་རྒྱ་མཚོ་ཁྱེད་རྣམས་ལ། །བདག་གི་ལུས་ནི་དབུལ་བར་བགྱི། །ཡང་དག་རྫོག་པའི་སངས་རྒྱས་དང་། །དེ་སྲས་ལམ་གྱུར་སྦྱིན་སོགས་ཚུལ། །སྐུ་གསུམ་ཡེ་ཤེས་ཐོབ་བྱའི་ཕྱིར། །རབ་ཏུ་དང་བས་བསྟེན་པར་བགྱི། །ཞེས་དེ་དག་གི་དོན་ཡིད་ལ་བསམ། །རིགས་ལྔ་སྤྱི་དང་སོ་སོའི་དམ་ཚིག་དང་སྡོམ་པ་སྔར་བཟུང་བ་རྣམས་བྱང་ཆུབ་མ་ཐོབ་ཀྱི་བར་དུ་བརྟན་པར་གཟུང་བར་བྱའོ་སྙམ་དུ་བསམས་ལ། །སངས་རྒྱས་བྱང་ཆུབ་སེམས་དཔའ་རྣམས། །བདག་ལ་དགོངས་པར་(༤བ)
མཛད་དུ་གསོལ། །ཡོངས་གྲགས་ཀྱི་མིང་ལས་གསང་མཚན་མི་བརྗོད། བདག་མིང་འདི་ཞེས་བགྱི་བ་ཡིས། །དུས་འདི་ནས་ནི་བཟུང་ནས་ནི། །བྱང་ཆུབ་སྙིང་པོར་མཆིས་ཀྱི་བར། །ཇི་ལྟར་དུས་གསུམ་ མགོན་པོ་རྣམས། །བྱང 
་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས། བསྐྱེད་པར་བགྱི། ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པོར་བདག་གིས་བཟུང་། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་ཅོག་གསུམ། །སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དེང་ནས་བདག་གིས་བཟུང་། །རྡོ་རྗེ་རིགས་མཆོག་ཆེན་པོ་ཡི། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་བཟུང་བར་བགྱི། །སློབ་དཔོན་དག་ཀྱང་བཟུང་བར་བགྱི། །རིན་ཅེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་ཡང་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པད་མའི་རིགས་ཆེན་དག་པ་ལ། །ཕྱི་དང་གསང་བ་ཐེག་པ་གསུམ། །དམ་ཆོས་སོ་སོར་བཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་སོ་སོར་བཟུང་། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང་། །མ་བསྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱིན་པ་དབུགས་(༥ན)
དབྱུང་ཞིང་། །སེམས་ཅན་མྱ་ངན་འདས་ལ་འགོད། །སེམས་ཅན་ཐམས་ཅད་བདེ་བ་དང་ལྡན་པར་གྱུར་ཅིག །སེམས་ཅན་ཐམས་ཅད་སྡུག་བསྔལ་དང་བྲལ་བར་གྱུར་ཅིག །སེམས་ཅན་ཐམས་ཅད་བདེ་བ་དང་མི་འབྲལ་བར་གྱུར་ཅིག །སེམས་ཅན་ཐམས་ཅད་འཇིག་རྟེན་གྱི་ཆོས་བརྒྱད་དང་གཟུང་འཛིན་གྱི་རྣམ་རྟོག་གིས་མི་བསྐྱོད་པའི་བཏང་སྙོམས་ལ་གནས་པར་བྱའོ་སྙམ་དུ་ཚད་མེད་བཞི་བསྒོམས་ཏེ་བསོད་ནམས་ཀྱི་ཚོགས་བསགས་པའོ། ཨོཾ་སྭ་བྷཱ་ཝ་ཤུངྔྷཱཿསརྦ་ངྷ་རྨཱཿསྭ་བྷཱ་ཝ་ཤུངྔྷ྅ཧཾ། ཨོཾ་ཤཱུ་ནྱ་ཏཱ་ཛྙ་ན་བཛྲ་སྭ་བྷཱ་ཝ་ཨཱདྨ་ཀོ྅ཧཾ། རང་དང་ཚོགས་ཞིང་གི་ལྷ་དང་དེ་དག་ལས་གཞན་པའི་ཆོས་ཐམས་ཅད་བརྟེན་ནས་བཏགས་པ་ཡིན་པའི་ཕྱིར། རྟག་ཆད་ལ་སོགས་པའི་མཐའ་བཞི་དང་བྲལ་བ་བདག་མེད་པའི་སྟོང་པ་ཉིད་དུ་བསམ་ཏེ་ཡེ་ཤེས་ཀྱི་ཚོགས་བསགས་པའོ། །དེ་ནས་སྔོན་གྱི་སྨོན་ལམ་དྲན་པར་བྱས་ལ། སྟོང་པའི་ངང་ལས་ཡཾ་ལས་རླུང་གི་དཀྱིལ་འཁོར་དུ་བའི་མདོག་ཅན་གཞུ་ལྟ་བུ་རྒྱལ་མཚན་གྱིས་མཚན་པ་དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་འབར་བའི་ཕྲེང་བས་མཚན་པ། དེའི་སྟེང་དུ་བཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པས་མཚན་པ། དེའི་སྟེང་དུ་ལཾ་ལས་སའི་དཀྱིལ་འཁོར་སེར་པོ་གྲུ་བཞིར་རྡོ་རྗེས་མཚན་པའི་སྟེང་དུ་ཧཱུཾ་ལས་སྣ་ཚོགས་རྡོ་རྗེ་ལྟེ་བ་ལ་ཧཱུཾ་གིས་མཚན་པ་ལས་འོད་ཟེར་འོག་ཏུ་འཕྲོས་པས་རྡོ་རྗེའི་ས་གཞི། ལོགས་སུ་འཕྲོས་པས་རྡོ་རྗེའི་རྭ་བ། སྟེང་དུ་འཕྲོས་པས་རྡོ་རྗེའི་གུར། གུར་གྱི་འོག་ར་བའི་སྟེང་དུ་རྡོ་རྗེའི་བླ་བྲེ་སྟེ་ཐམས་ཅད་ཀྱང་རྡོ་རྗེ་འབར་བའི་(༥བ)
རང་བཞིན་བར་མཚམས་མེད་པར་དུམ་བུ་གཅིག་ཏུ་གྱུར་པའི་ཕྱི་རོལ་ཏུ་བསྐལ་པ་འཇིག་པའི་མེ་ལྟ་བུའི་ཁ་དོག་སྣ་ལྔའི་མེ་དཔུང་ཕྱོགས་བཅུར་འཕྲོ་བར་བསམ་པ་སྲུང་འཁོར་ཐུན་མོང་བའོ། །རྭ་བའི་དབུས་སུ་རྡོ་རྗེ་སེམས་དཔའ་སྐུ་མདོག་དཀར་པོ་དཀར་མཐིང་དམར་བ་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་པ། ལྷག་མ་གཡས་གཉིས་རྡོ་རྗེ་དང་རལ་གྲི། གཡོན་གཉིས་རིན་པོ་ཆེ་དང་པད་མ་འཛིན་པ་ཡོངས་སུ་གྱུར་པ་ལས་ཆོས་འབྱུང་དཀར་པོ་གྲུ་གསུམ་པ་གྱེན་དུ་འགྲེང་བའི་འོག་ཏུ་ཕྲ་ཞིང་སྟོད་ཡངས་པ། འོག་ཟུར་ནས་བཾ་ལས་བྱུང་བའི་སྣ་ཚོགས་པད་མའི་ལྟེ་བར་ཧཱུཾ་ལས་སྣ་ཚོགས་རྡོ་རྗེ་ཤར་གྱི་རྭ་དཀར། ལྷོའི་རྭ་སེར། ནུབ་ཀྱི་རྭ་དམར། བྱང་གི་རྭ་ལྗང་། དབུས་ཀྱི་ལྟེ་བ་སྔོན་པོས་བརྒྱན་པ། ལྟེ་བའི་དབུས་སུ་བྷྲཱུཾ་ལས་འཁོར་ལོ་བྷྲཱུཾ་གིས་མཚན་པ་ལས་བྱུང་བའི་རྣམ་སྣང་དཀར་པོ་དཀར་མཐིང་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་པ། ལྷག་མ་གཡས་གཉིས་རྡོ་རྗེ་ལ་གནས་པའི་འཁོར་ལོ་དང་རལ་གྲི། གཡོན་གཉིས་རིན་པོ་ཆེ་དང་པད་མ་འཛིན་པ་ཡོངས་སུ་གྱུར་པ་ལས་གཞལ་ཡས་ཁང་གྲུ་བཞི་པ་སྒོ་བཞི་པ། ཕྱི་རོལ་ནས་རིམ་པ་བཞིན་དཀར་སེར་དམར་ལྗང་སྔོ་བའི་རྩིག་པ་ལྔ་དང་ལྡན་པ། རྩིག་པའི་སྟེང་ན་རིན་པོ་ཆེ་སྣ་ཚོགས་པས་མཛེས་པར་བྱས་པའི་རིན་པོ་ཆེའི་ཕ་གུས་བསྐོར་བའི་གཞལ་ཡས་ཁང་གི་ནང་དུ་རྡོ་རྗེའི་འཕྲེང་བས་ཟླུམ་པོར་བསྐོར་བ་ལ་བརྟེན་པའི་ཀ་བ་བརྒྱད་ཀྱིས་བཏེག་པའི་རྡོ་རྗེའི་གདུང་བཞིས་མཛེས་པར་ཕུབ་པ། རྩེ་མོར་རྡོ་རྗེ་ནོར་བུ་རིན་པོ་ཆེའི་ཏོག་གིས་མཛེས་པའི་ནང་གི་ཤར་དཀར་(༦ན)
ལྷོ་སེར་ནུབ་དམར་བྱང་ལྗང་དབུས་སྔོ་བ། ཕ་གུའི་སྟེང་ན་གསེར་གྱི་སྐ་རགས་བཞིའི་ཕྱི་ངོས་སུ་ཆུ་སྲིན་གྱི་ཁ་ནས་འཕྱང་བའི་རིན་པོ་ཆེའི་དྲ་བ་དང་དྲ་བ་ཕྱེད་པ་དང་རྔ་ཡབ་ལ་སོགས་པས་བརྒྱན་པ། དེའི་ཕྱི་ངོས་སུ་བྱ་འདབ་ལས་འཕྱང་བའི་རིན་པོ་ཆེའི་ཤར་བུ། དེའི་སྟེང་དུ་མདའ་ཡབ་པད་མ་འདབ་མ་ཕྱེད་པའི་དབྱིབས་ཅན་ལ་བ་དན་དང་རྒྱལ་མཚན་ལ་སོགས་པས་མཛེས་པར་བྱས་པ། རྩིག་པའི་མཐའ་ནས་འདོད་ཡོན་གྱི་སྣམ་བུ་དམར་པོས་འགྲམ་སྟེགས་ཀྱི་རྣམ་པར་བསྐོར་བ་ལ་ལྷ་མོ་མཆོད་རྫས་ཐོགས་པ་རྣམས་འཁོད་ནས་མཆོད་པ་བྱེད་པ། སྒོ་དང་སྒོ་འཁྱུད་ཀྱི་ཕྱིའི་མཚམས་དང་འོག་གི་ཕྱི་ནང་གི་གྲྭ་བཞིར་ཟླ་ཕྱེད་རྡོ་རྗེ་རིན་ཅེན་གྱིས་སྤྲས་པ། སྒོ་བཞི་སོ་སོའི་མདུན་དུ་ཀ་བ་བཞི་བཞིས་བཏེགས་པའི་རྟ་བབས་སྣམ་བུ་བཅུ་གཅིག་དང་ལྡན་པའི་སྟེང་དུ་ཆོས་ཀྱི་འཁོར་ལོ། དེའི་གཡས་གཡོན་དུ་རི་དྭགས་ཕོ་མོ་དང་བཅས་པ། རྡོ་རྗེའི་ར་བ་མེ་རི་དང་བཅས་པའི་ཕྱི་རོལ་ཏུ་གཏུམ་དྲག་ལ་སོགས་པའི་དུར་ཁྲོད་བརྒྱད་ན་ནཱ་ག་གེ་སར་གྱི་ཤིང་ལ་སོགས་པའི་ཤིང་བརྒྱད། དེའི་རྩ་བར་བརྒྱ་བྱིན་ལ་སོགས་པའི་ཕྱོགས་སྐྱོང་བརྒྱད། རྩེ་མོར་རྫུ་འཕྲུལ་ཆེན་པོ་བ་གླང་པོ་ཆེའི་གདོང་པ་ཅན་ལ་སོགས་པའི་ཞིང་སྐྱོང་བརྒྱད། ཐུགས་རྗེའི་ཆུ་བརྒྱད། དེ་ལ་གནས་པའི་ནོར་རྒྱས་ལ་སོགས་པའི་ཀླུ་བརྒྱད། དེ་དག་གི་སྟེང་གི་ནམ་མཁའ་ལ་སྒྲོགས་པ་ལ་སོགས་པའི་སྤྲིན་བརྒྱད། ཡེ་ཤེས་ཀྱི་མེ་བརྒྱད། མཆོད་རྟེན་བརྒྱད། གཞན་ཡང་ཀེང་རུས་དང་། གསལ་ཤིང་གིས་ཕུག་པའི་རོ་དང་། ཤིང་ལ་དཔྱངས་པ་དང་། སྐྱེས་བུ་ཟ་བ་དང་། མཚོན་གྱིས་ཕུག་པ་ལ་སོགས་པ་དང་། བྱ་(༦བ)
རོག་དང་། བྱ་རྒོད་དང་། ཁྱི་དང་། ཅེ་སྤྱང་དང་། སེང་གེ་དང་། སྟག་ལ་སོགས་པ་དང་། ཅ་ཅོ་སྒྲོག་པའི་རོ་ལངས་དང་། གནོད་སྦྱིན་དང་། སྲིན་པོ་ལ་སོགས་པ་རྣམས་ཀྱིས་འཇིགས་སུ་རུང་བ། གྲུབ་པ་དང་། རིག་པ་འཛིན་པ་དང་། དམ་ཚིག་སྤྱོད་པའི་རྣལ་འབྱོར་པ་བཅོམ་ལྡན་འདས་ལ་རྩེ་གཅིག་ཏུ་བལྟ་བ། གཅེར་བུ་སྐྲ་བཤིག་པ། ཕྱག་རྒྱ་ལྔས་བརྒྱན་པ། ཅང་ཏེའུ་དང་། ཐོད་པ་དང་། ཁ་ཊྭཱཾ་ག་འཛིན་པ། ཐོད་པས་སྤྱི་བོར་བརྒྱན་པ། རྒོད་ཅིང་དུར་ཁྲོད་དུ་འཇུག་པ་སོགས་ཀྱིས་ཤིན་ཏུ་ངོ་མཚར་བར་བྱེད་པའི་དུར་ཁྲོད་རྣམས་ཀྱིས་བསྐོར་བའི་གཞལ་ཡས་ཁང་གི་ནང་གི་རེ་མིག་དགུ་པའི་དབུས་སུ་ཡཾ་ལས་རླུང་གི་དཀྱིལ་འཁོར་ནག་ལ་ཅུང་ཟད་དམར་བའི་མདོག་ཅན་གྱི་སྟེང་དང་། ནང་གི་ཕྱོགས་གཞན་གསུམ་དང་སྒོ་བཞིར་སྣ་ཚོགས་པད་མ་དང་ཉི་མའི་གདན། ནང་གི་ཤར་དང་གྲྭ་བཞི་དང་ཕྱིའི་གྲྭ་བཞིར་སྣ་ཚོགས་པད་མ་དང་ཟླ་བའི་གདན་ཟུང་རེ་རེ་བསྒོམས་ཏེ་རྟེན་བསྐྱེད་པའོ། །གདན་དབུས་མའི་སྟེང་དུ་ཨ་ཡིག་དང་པོ་ལས་བྱུང་བའི་ཟླ་བའི་དཀྱིལ་འཁོར། དེའི་དབུས་སུ་ཆུ་ལས་ཆུ་བུར་གྱི་ཚུལ་དུ་ངྷཱིཿསེར་པོ་ལས་བྱུང་བའི་རལ་གྲིའི་དབུས་སུ་ངྷཱིཿས་མཚན་པ་ལས་འོད་འཕྲོས་པས་བདེ་བར་གཤེགས་པ་ཐམས་ཅད་ཨོཾ་བཛྲ་ས་མཱ་ཛཿས་སྤྱན་དྲངས་ཏེ་ཐིམ་པ་ཡོངས་སུ་གྱུར་པ་ལས་རང་ཉིད་རྒྱུ་རྡོ་རྗེ་འཛིན་པ་འཇམ་དཔལ་གཞོན་ནུར་གྱུར་པ་སྐུ་མདོག་སེར་པོ་ཡིད་ཙམ་ཁྲོས་པ་ཕྱག་གཡས་རལ་གྲི་འཕྱར་ཞིང་། གཡོན་གྱིས་གླེགས་བམ་ཐུགས་ཀར་བསྣམས་པ། ཞབས་རྡོ་རྗེ་སྐྱིལ་ཀྲུང་གིས་བཞུགས་པ། མཚན་སོ་གཉིས་དང་དཔེ་བྱད་བརྒྱད་ཅུས་(༧ན)
བརྒྱན་པ། རལ་པའི་ཟུར་ཕུད་ལྔ་དང་ལྡན་ཞིང་རྒྱན་ཐམས་ཅད་ཀྱིས་བརྒྱན་པར་བསམ། དེའི་ཐུགས་ཀར་ཨཱཿལས་བྱུང་བའི་ཉི་མའི་དཀྱིལ་འཁོར། དེའི་འོད་ཀྱིས་ཕྱོགས་བཅུ་ན་བཞུགས་པའི་རྣམ་སྣང་ལ་སོགས་པའི་སངས་རྒྱས་དང་། རྡོ་རྗེ་རྣོན་པོ་ལ་སོགས་པའི་བྱང་ཆུབ་སེམས་དཔའ་དང་། རྡོ་རྗེ་ལྕགས་ཀྱུ་ལ་སོགས་པའི་ཁྲོ་བོ་དང་། སེམས་མ་རྡོ་རྗེ་མ་ལ་སོགས་པའི་རིག་པ་རྣམས་ཨོཾ་བཛྲ་ས་མཱ་ཛཿས་སྤྱན་དྲངས་ཏེ་འཇམ་དཔལ་དང་བཅས་པ་ཉི་མ་ལ་ཞུགས་པས་འོད་ཟེར་གྱིས་དཔག་ཚད་སྟོང་ཕྲག་བརྒྱར་ཁྱབ་པའི་ཉི་མའི་དཀྱིལ་འཁོར་དུ་བསམ། དེའི་སྟེང་དུ་ཧཱུཾ་ཡིག་མཐིང་ཁ་འོད་ཟེར་ལྔ་དང་ལྡན་པ་ལས་འོད་ཟེར་འཕྲོས་པས་སངས་རྒྱས་དང་བྱང་ཆུབ་སེམས་དཔའ་དང་ཁྲོ་བོ་དང་རིག་པའི་ཚོགས་རྣམས་ཨོཾ་བཛྲ་ས་མཱ་ཛཿས་སྤྱན་དྲངས་ནས་ཧཱུཾ་ལ་ཞུགས་པ་ལས་ཁྲོ་བོའི་རྡོ་རྗེ་ཁ་དོག་ནག་པོ་རྩེ་དགུ་པ་རྭ་ཤིན་ཏུ་གདེངས་པ། འོད་ཟེར་ལྔ་དང་ལྡན་པ་ལྟེ་བ་ལ་ཧཱུཾ་གིས་མཚན་པ། དེ་ལས་རྡོ་རྗེ་ཕྲ་མོའི་གཟུགས་སྤྲོས་པས་སངས་རྒྱས་དང་བྱང་ཆུབ་སེམས་དཔའ་དང་། ཁྲོ་བོ་དང་རིག་པའི་ཚོགས་རྣམས་སྤྲོས་ཏེ། ནམ་མཁའི་ཁམས་ཐམས་ཅད་ཏིལ་གྱི་གང་བུ་བཞིན་དུ་གང་བ། ཉི་མ་ལ་གནས་པས་སེམས་ཅན་རྣམས་སྨིན་པར་བྱས་ནས་རྡོ་རྗེ་འཇིགས་བྱེད་ཐོབ་པར་བྱས་པ་དང་ལྷན་ཅིག་ཏུ་འདུས་ནས་རྡོ་རྗེ་ལ་ཐིམ་པར་བསམ། ཟླ་བ་ཉི་མ་རྡོ་རྗེ་ས་བོན་དང་བཅས་པ་ཡོངས་སུ་གྱུར་པ་ལས་རང་ཉིད་འབྲས་བུ་རྡོ་རྗེ་འཛིན་པ་དཔལ་རྡོ་རྗེ་འཇིགས་བྱེད་ཆེན་པོ་སྐུ་མདོག་མཐིང་ནག་ཞལ་དགུ་ཕྱག་སོ་བཞི་ཞབས་བཅུ་དྲུག་པ་གཡས་བསྐུམ་ཞིང་(༧བ)
གཡོན་བརྐྱང་པའི་སྟབས་ཀྱིས་བཞུགས་པ། ཁམས་གསུམ་པོ་ཟ་བར་ནུས་པ། ཧ་ཧ་ཞེས་སྒྲོག་ཅིང་ལྗགས་འདྲིལ་པ། མཆེ་བ་རྣམ་པར་གཙིགས་པ་ཁྲོ་གཉེར་ཅན་ཁྲོ་གཉེར་གྱི་འགྲམ་དུ་སྨིན་མ་དང་སྤྱན་འཇིག་པའི་དུས་ལྟར་འབར་བ། སྐྲ་ཁམ་སེར་གྱེན་དུ་བརྫེས་པ། འཇིག་རྟེན་དང་འཇིག་རྟེན་ལས་འདས་པའི་ལྷ་ལ་སྡིགས་མཛུབ་བྱེད་པ། འཇིགས་པ་རྣམས་ཀྱང་འཇིགས་པར་མཛད་པ། ཕཻཾ་ཀ་རའི་སྒྲ་ཆེན་པོ་འབྲུག་ལྟར་སྒྲོག་པ། མིའི་ཁྲག་དང་། ཞག་དང་། རྐང་དང་ཚིལ་བུ་ཟ་བ། འཇིགས་སུ་རུང་བའི་ཐོད་པ་སྐམ་པོ་ལྔས་ཐོད་བྱས་ཤིང་། མགོ་བོ་རློན་པ་ལྔ་བཅུའི་ཐོད་པའི་འཕྲེང་བས་བརྒྱན་པ། སྦྲུལ་ནག་པོའི་མཆོད་ཕྱིར་ཐོགས་དང་། མི་རུས་ཀྱི་འཁོར་ལོ་དང་རྣ་ཆ་ལ་སོགས་པའི་རུས་པའི་རྒྱན་རྣམས་ཀྱིས་བརྒྱན་པ། གསུས་པ་ཆེ་བ་གཅེར་བུའི་གཟུགས་ཅན་སྨིན་མ་དང་རྫི་མ་དང་སྨ་ར་དང་བ་སྤུ་རྣམས་དུས་མཐའི་མེ་ལྟར་འབར་ཞིང་རྩ་ཞལ་ནག་པོ་མ་ཧེའི་གདོང་ཅན་ཤིན་ཏུ་ཁྲོས་པ་རྭ་རྣོན་པོ་ཅན། དེའི་སྟེང་མ་རྭ་གཉིས་ཀྱི་དབུས་ཀྱི་ཞལ་དམར་པོ་རབ་ཏུ་འཇིགས་པའི་ཞལ་ནས་ཁྲག་འཛག་པ། དེའི་སྟེང་དུ་འཇམ་དཔལ་གྱི་ཞལ་སེར་པོ་ཡིད་ཙམ་ཁྲོས་པ། གཞོན་ནུའི་རྒྱན་གྱིས་བརྒྱན་པ། སྤྱི་བོར་རལ་པ་ལྔ་དང་ལྡན་པ། རྭའི་རྩ་བའི་གཡས་ཀྱི་ཞལ་དང་པོ་སྔོན་པོ། དེའི་གཡས་ཞལ་དམར་པོ། གཡོན་ཞལ་སེར་པོ། རྭའི་རྩ་བའི་གཡོན་གྱི་ཞལ་དང་པོ་དཀར་པོ། དེའི་གཡས་ཞལ་དུད་ཁ། གཡོན་ཞལ་ནག་པོ་ཞལ་རྣམས་ཤིན་ཏུ་ཁྲོས་པ། ཞལ་དགུ་པོ་ཐམས་ཅད་ཀྱང་སྤྱན་གསུམ་དང་ལྡན་པའོ། །ཕྱག་གཡས་གཡོན་གྱི་དང་པོ་གཉིས་(༨ན)
ཀྱིས་གླང་པོ་ཆེའི་པགས་པ་རློན་པ་མགོ་གཡས་དང་སྤུ་ཕྱིར་བསྟན་ཏེ་ལག་པ་དང་རྐང་པའི་པགས་པ་གཡོན་པ་ནས་བརྒྱངས་ཏེ་འཛིན་པ། ལྷག་མ་གཡས་ཀྱི་དང་པོ་ན་གྲི་གུག །གཉིས་པ་ན་བྷི་དྷི་པཱ་ལ། གསུམ་པ་ན་གཏུན་ཤིང་། བཞི་པ་ན་ཆུ་གྲི །དྲུག་པ་ན་དགྲ་སྟ། བདུན་པ་ན་མདུང་། བརྒྱད་པ་ན་མདའ། དགུ་པ་ན་ལྕགས་ཀྱུ། བཅུ་པ་ན་དབྱུག་ཏོ། བཅུ་གཅིག་པ་ན་ཁ་ཊྭཱཾ་ག །བཅུ་གཉིས་པ་ན་འཁོར་ལོ། བཅུ་གསུམ་པ་ན་རྡོ་རྗེ་རྩེ་ལྔ་པ། བཅུ་བཞི་པ་ན་རྡོ་རྗེ་ཐོ་བ། བཅོ་ལྔ་པ་ན་རལ་གྲི། །བཅུ་དྲུག་པ་ན་ཅང་ཏེའུ་བསྣམས་ཤིང་། ལྷག་མ་གཡོན་གྱི་དང་པོ་ན་ཁྲག་གིས་གང་བའི་ཐོད་པ། གཉིས་པ་ན་ཚངས་པའི་མགོ་བོ། གསུམ་པ་ན་ཕུབ། བཞི་པ་ན་རྐང་པ། ལྔ་པ་ན་ཞགས་པ། དྲུག་པ་ན་གཞུ། བདུན་པ་ན་རྒྱུ་མ། བརྒྱད་པ་ན་དྲིལ་བུ། དགུ་པ་ན་ལག་པ། བཅུ་པ་ན་དུར་ཁྲོད་ཀྱི་རས། བཅུ་གཅིག་པ་ན་སྐྱེས་བུ་གསལ་ཤིང་ལ་བཙུགས་པ། བཅུ་གཉིས་པ་ན་མེ་ཐབ། བཅུ་གསུམ་པ་ན་ཐོད་ཚལ། བཅུ་བཞི་པ་ན་སྡིགས་མཛུབ། བཅོ་ལྔ་པ་ན་འཕན་རྩེ་གསུམ་པ། བཅུ་དྲུག་པ་ན་རླུང་རས་བསྣམས་པའོ། །ཞབས་གཡས་ཀྱི་དང་པོས་མི། གཉིས་པས་མ་ཧེ། གསུམ་པས་གླང་། བཞི་པས་བོང་བུ། ལྔ་པས་རྔ་མོ། དྲུག་པས་ཁྱི། བདུན་པས་ལུག །བརྒྱད་པས་ཝ་དང་གཡོན་གྱི་དང་པོས་བྱ་རྒོད། གཉིས་པས་འུག་པ། གསུམ་པས་བྱ་རོག །བཞི་པས་ནེ་ཙོ། ལྔ་པས་ཁྲ། དྲུག་པས་བྱ་ཆེན་པོ། བདུན་པས་ཁྱིམ་བྱ། བརྒྱད་པས་བཞད་མནན་པ། ཚངས་(༨བ)
པ་དང་། དབང་པོ་དང་། ཁྱབ་འཇུག་དང་། དྲག་པོ་དང་། གཞོན་ནུ་གདོང་དྲུག་དང་། ལོག་འདྲེན་དང་། ཟླ་བ་དང་། ཉི་མ་རྣམས་ཁ་སྦུབ་ཏུ་བྱས་ཏེ་ཞབས་འོག་ཏུ་མནན་ནས་མེ་དཔུང་རབ་ཏུ་འབར་བའི་ཀློང་དཀྱིལ་ན་བཞུག་པར་བསམ། རང་ཉིད་དམ་ཚིག་སེམས་དཔའི་ཐུགས་ཀར་ཟླ་གདན་ལ་ཡེ་ཤེས་སེམས་དཔའ། འཇམ་དཔལ་གཞོན་ནུར་གྱུར་པ་སྐུ་མདོག་སེར་པོ་ཡིད་ཙམ་ཁྲོས་པ་ནས་རྒྱན་ཐམས་ཅད་ཀྱིས་བརྒྱན་པར་བསམ། དེའི་ཐུགས་ཀར་ཨཱཿལས་བྱུང་བའི་ཉི་མའི་དཀྱིལ་འཁོར་གྱི་དབུས་སུ་ཏིང་ངེ་འཛིན་སེམས་དཔའ་ཧཱུཾ་ཡིག་མཐིང་ཁ་འོད་ཟེར་ལྔ་འཕྲོ་བར་བསམ། དེའི་པང་ན་ཡུམ་རྡོ་རྗེ་རོ་ལངས་མ་སྔོན་མོ་ཞལ་གཅིག་ཕྱག་གཉིས་ཀྱི་གཡས་རྡོ་རྗེ་གྲི་གུག་འཕྱར་ཞིང་། གཡོན་ཐོད་པ་གདུག་པའི་ཁྲག་གིས་བཀང་བ་འཛིན་པས་ཡབ་ལ་འཁྱུད་པ། ཐོད་སྐམ་ལྔས་དབུ་བརྒྱན་ཅིང་། སྐམ་པོ་ལྔ་བཅུའི་དོ་ཤལ་ཅན། ཕྱག་རྒྱ་ལྔས་བརྒྱན་པ། ཞབས་གཡས་བརྐྱང་ཞིང་གཡོན་པས་ཡབ་ལ་འཁྱུད་པ། ཡབ་ཀྱི་གསང་གནས་མི་དམིགས་པ་ལས་ཧཱུཾ་ལས་བྱུང་བའི་རྡོ་རྗེ་སྔོན་པོ་རྩེ་ལྔ་པ། ཨོཾ་ལས་བྱུང་བའི་ནོར་བུའི་བུ་ག་ཕཊ་ཀྱིས་བཀག་པ། ཡུམ་གྱི་གསང་གནས་མི་དམིགས་པ་ལས་ཧཱུཾ་ལས་བྱུང་བའི་པད་མ་དམར་པོ་འདབ་མ་བརྒྱད་པ། ཨཱཿལས་བྱུང་བའི་ཟེའུ་འབྲུའི་བུ་ག་ཕཊ་ཀྱིས་བཀག་པ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱདྨ་ཀོ྅ཧཾ། ཞེས་འདུ་ཤེས་གསུམ་དྲན་པར་བྱས་པ། དཀྱིལ་འཁོར་རྒྱལ་མཆོག་གི་ཏིང་ངེ་འཛིན་ནི། རང་གི་ཐུགས་ཀའི་ཧཱུཾ་ཡིག་གི་འོད་ཟེར་གྱི་ལྕགས་ཀྱུས་མཁའ་ཁྱབ་ཀྱི་སངས་རྒྱས་ཐམས་ཅད་བཀུག་ནས་རང་(༩ན)
གི་ཞལ་དུ་བཅུག །ཐུགས་ཀར་འོད་དུ་ཞུ་བ་རྡོ་རྗེའི་ལམ་ནས་ཡུམ་གྱི་པད་མར་ཞུགས་པའི་ཐིག་ལེ་ཆ་གཅིག་ཧཱུྃཿདང་བཅས་པ་དེ་ཡོངས་སུ་གྱུར་པ་ལས་གཞལ་ཡས་ཁང་གྲུ་བཞི་པ་སྒོ་བཞི་པ་ལ་སོགས་པའི་མཚན་ཉིད་ཐམས་ཅད་ཡོངས་སུ་རྫོགས་པ་གདན་དང་བཅས་པར་བསམ། ཐིག་ལེ་ཆ་གཅིག་གདན་དེ་རྣམས་ཀྱི་སྟེང་དུ་ཆ་བཅུ་བདུན་དུ་བསམ། དེ་རྣམས་ཡོངས་སུ་གྱུར་པ་ལས། དབུས་སུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ། ནང་གི་ཤར་དུ་ཀྵེ་ལས་འཁོར་ལོ་ཀྵེས་མཚན་པ། ལྷོར་མ་ལས་རིན་པོ་ཆེ་མས་མཚན་པ། ནུབ་ཏུ་མེ་ལས་པད་མ་མེས་མཚན་པ། བྱང་དུ་ད་ལས་རལ་གྲི་དས་མཚན་པ། ཤར་སྒོར་ཡཾ་ལས་ཐོ་བ་ཡས་མཚན་པ། ལྷོ་སྒོར་ཙ་ལས་དབྱུག་པ་ཙས་མཚན་པ། ནུབ་སྒོར་ནི་ལས་པད་མ་ནིས་མཚན་པ། བྱང་སྒོར་རཱ་ལས་རལ་གྲི་རཱས་མཚན་པ། ནང་གི་ཤར་ལྷོར་ཛཱ་ལས་འཁོར་ལོ་ཛཱས་མཚན་པ། ལྷོ་ནུབ་ཏུ་ས་ལས་རྡོ་རྗེ་སས་མཚན་པ། ནུབ་བྱང་དུ་དོ་ལས་པད་མ་དོས་མཚན་པ། བྱང་ཤར་དུ་རུ་ལས་རལ་གྲི་རུས་མཚན་པ། ཕྱིའི་གྲྭ་བཞིར་ཎ་ཡོ་ནི་རའི་ཡི་གེ་བཞི་རྣམས་འོད་ཟེར་འཕྲོ་ཞིང་འདུ་བ་ཕྱག་མཚན་ས་བོན་གྱིས་མཚན་པ་ཡོངས་སུ་གྱུར་བ་ལས་དཔལ་རྡོ་རྗེ་འཇིགས་བྱེད་ལྷ་བཅུ་གསུམ་གྱི་སྐུ་ཡོངས་སུ་རྫོགས་པར་གྱུར་པ་ནི། དབུས་ཀྱི་གདན་ལ་དཔལ་རྡོ་རྗེ་འཇིགས་བྱེད་ཆེན་པོ་སྐུ་མདོག་མཐིང་ནག་ཞལ་དགུ་ཕྱག་སོ་བཞི་ཞབས་བཅུ་དྲུག་པ། ཞེས་པ་ནས་མེ་དཔུང་རབ་ཏུ་འབར་བའི་ཀློང་དཀྱིལ་ན་བཞུགས་པ། དེའི་པང་ན་ཡུམ་རྡོ་རྗེ་རོ་ལངས་མ་སྔོན་མོ་ཞལ་གཅིག་ཕྱག་གཉིས། ཞེས་པ་ནས་(༩བ)
གཡོན་པས་ཡབ་ལ་འཁྱུད་པ། ནང་གི་ཤར་དུ་གཏི་མུག་གཤིན་རྗེ་གཤེད་དཀར་པོ་དཀར་སྔོ་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་རང་འདྲའི་ཡུམ་ལ་འཁྱུད་པ། ལྷག་མ་གཡས་གཉིས་འཁོར་ལོ་དང་རལ་གྲི །གཡོན་གཉིས་ནོར་བུ་དང་པད་མ་འཛིན་པ། ལྷོར་སེར་སྣ་གཤིན་རྗེ་གཤེད་སེར་པོ་སེར་སྔོ་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་རང་འདྲའི་ཡུམ་ལ་འཁྱུད་པ། ལྷག་མ་གཡས་གཉིས་ནོར་བུ་དང་རལ་གྲི །གཡོན་གཉིས་འཁོར་ལོ་དང་པད་མ་འཛིན་པ། ནུབ་ཏུ་འདོད་ཆགས་གཤིན་རྗེ་གཤེད་དམར་པོ་དམར་སྔོ་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་རང་འདྲའི་ཡུམ་ལ་འཁྱུད་པ། ལྷག་མ་གཡས་གཉིས་པད་མ་དང་རལ་གྲི །གཡོན་གཉིས་ནོར་བུ་དང་འཁོར་ལོ་འཛིན་པ། བྱང་དུ་ཕྲག་དོག་གཤིན་རྗེ་གཤེད་ལྗང་གུ་ལྗང་སྔོ་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་རང་འདྲའི་ཡུམ་ལ་འཁྱུད་པ། ལྷག་མ་གཡས་གཉིས་རལ་གྲི་དང་འཁོར་ལོ། གཡོན་གཉིས་ནོར་བུ་དང་པད་མ་འཛིན་པ་ཤར་སྒོར་ཐོ་བ་གཤིན་རྗེ་གཤེད་སྔོན་པོ་སྔོ་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་རང་འདྲའི་ཡུམ་ལ་ལ་འཁྱུད་པ། ལྷག་མ་གཡས་གཉིས་ཐོ་བ་སྔོན་པོ་རྭ་ཉི་ཤུ་པ་དང་རལ་གྲི །གཡོན་གཉིས་ནོར་བུ་དང་པད་མ་འཛིན་པ། ལྷོ་སྒོར་དབྱུག་པ་གཤིན་རྗེ་གཤེད་དཀར་པོ་དཀར་སྔོ་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་རང་འདྲའི་ཡུམ་ལ་འཁྱུད་པ། ལྷག་མ་གཡས་གཉིས་དབྱུག་པ་དང་རལ་གྲི །གཡོན་གཉིས་པད་མ་དང་འཁོར་ལོ་འཛིན་པ། ནུབ་སྒོར་པད་མ་གཤིན་རྗེ་གཤེད་དམར་པོ་དམར་སྔོ་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་རང་འདྲའི་ཡུམ་ལ་འཁྱུད་པ། ལྷག་མ་གཡས་གཉིས་པད་མ་དང་རལ་གྲི །གཡོན་གཉིས་འཁོར་ལོ་དང་ནོར་བུ་འཛིན་པ། བྱང་སྒོར་རལ་གྲི་གཤིན་རྗེ་གཤེད་ལྗང་གུ་ལྗང་སྔོ་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་རང་འདྲའི་ཡུམ་ལ་འཁྱུད་པ། ལྷག་མ་གཡས་གཉིས་རལ་གྲི་དང་འཁོར་ལོ། གཡོན་གཉིས་ནོར་བུ་དང་པད་མ་འཛིན་པ། ཡབ་(༡༠ན)
བརྒྱད་པོ་ཐམས་ཅད་དབུ་སྐྲ་དང་སྨིན་མ་དང་སྨ་ར་དམར་སེར་གྱེན་དུ་འབར་བ། སྦོམ་ཞིང་ཐུང་ལ་གསུས་ཁྱིམ་ཆེ་བ་གླང་པོ་ཆེའི་ཀོ་བའི་སྟོད་གཡོགས་དང་སྟག་གི་པགས་པའི་ཤམ་ཐབས་གྲོལ་བ། རུས་པའི་རྭ་ལུགས་ཀྱི་མངོན་རྟོགས་ཡིད་བཞིན་ནོར་བུ། རྡོ་རྗེ་འཆང་སྒོ་རུམ་པས་དགྲ་ནག་གི་སྒྲུབ་ཐབས་ཞི་ཁྲོ་རྣམ་རོལ་སོགས་ནས་འཁོར་གྱི་ལྷའི་མངོན་རྟོགས་མི་གསལ་བ་ཁ་བཀང་། རྒྱན་དྲུག་དང་རྡོ་རྗེའི་ཕྲེང་བ་ཅན། ཐོད་པ་སྐམ་པོ་ལྔའི་དབུ་རྒྱན་དང་། ཁྲག་འཛག་པའི་མགོ་བོ་རློན་པ་ལྔ་བཅུའི་དོ་ཤལ་ཅན། ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་དང་ལྡན་ཞིང་། འབར་བའི་མཆེ་བ་རྣོན་པོ་བཞི་བཞི་རབ་ཏུ་གཙིགས་ནས། ལྗགས་རྣམ་པར་འདྲིལ་ཞིང་འོད་ཟེར་རབ་ཏུ་འཕྲོ་བ། མཐའ་ཡས་སྔོན་པོས་དབུ་སྐྲ་བཅིངས་ཤིང་འཇོག་པོ་དམར་པོས་རྣ་རྒྱན་བྱས་པ། རིགས་ལྡན་ཁྲ་བོས་དཔུང་པ་བརྒྱན་ཅིང་དུང་སྐྱོང་སེར་པོས་ལག་གདུབ་བྱས་པ། པད་མ་དཀར་པོས་མགུལ་རྒྱན་བྱས་ཤིང་སྟོབས་རྒྱུ་ལྗང་གུས་མཆོད་ཕྱིར་ཐོགས་བྱས་པ། ནོར་རྒྱས་ཀྲཾ་པ་བདུད་རྩིའི་ཁ་དོག་ལྟ་བུས་སྐ་རགས་བྱས་ཤིང་པད་མ་ཆེན་པོ་དཀར་པོས་ཞབས་གདུབ་བྱས་པ། ཀླུ་བརྒྱད་པོ་ཐམས་ཅད་ཀྱང་ཕུད་ཀྱི་སྒྲ་སྒྲོག་ཅིང་། ལྕེ་གཉིས་པ་དུག་དང་ལྡན་པའི་མཆེ་བའི་འཕྲེང་བ་ཅན། ཞབས་གཡས་བསྐུམ་ཞིང་གཡོན་བརྐྱང་སྟེ་ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བཞུགས་པའོ། །ནང་གི་ཤར་ལྷོར་ཙ་ཙི་ཀཱ་དཀར་མོ་ཤིན་ཏུ་སྐེམ་ཞིང་དྲག་ཏུ་ཁྲོས་པ་དཀར་སྔོ་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་རང་འདྲའི་(༡༠བ)
ཡབ་ལ་འཁྱུད་པ། ལྷག་མ་གཡས་གཉིས་འཁོར་ལོ་རལ་གྲི །གཡོན་གཉིས་ནོར་བུ་དང་པད་མ་འཛིན་པ། ལྷོ་ནུབ་ཏུ་ཕག་མོ་སྔོན་མོ་ཕག་གདོང་ཅན་སྦོམ་ཞིང་ཐུང་ལ་གསུས་པ་འཕྱང་བ་སྔོ་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་རང་འདྲའི་ཡབ་ལ་འཁྱུད་པ། ལྷག་མ་གཡས་གཉིས་རྡོ་རྗེ་དང་རལ་གྲི །གཡོན་གཉིས་འཁོར་ལོ་དང་པད་མ་འཛིན་པ། ནུབ་བྱང་དུ་དབྱངས་ཅན་མ་དམར་མོ་ཞི་བའི་ཆ་བྱད་ཅན་དམར་སྔོ་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་རང་འདྲའི་ཡབ་ལ་འཁྱུད་པ། ལྷག་མ་གཡས་གཉིས་པད་མ་དང་རལ་གྲི །གཡོན་གཉིས་ནོར་བུ་དང་འཁོར་ལོ་འཛིན་པ། བྱང་ཤར་དུ་གཽ་རཱི་ལྗང་གུ་སྦོམ་ཞིང་ཐུང་ལ་གསུས་པ་ཕྱང་བ་ལྗང་སྔོ་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་རང་འདྲའི་ཡབ་ལ་འཁྱུད་པ། ལྷག་མ་གཡས་གཉིས་རལ་གྲི་དང་འཁོར་ལོ། གཡོན་གཉིས་ནོར་བུ་དང་པད་མ་འཛིན་པ། ཡུམ་བཞི་ཀའང་ཐོད་སྐམ་ལྔའི་དབུ་རྒྱན་དང་སྐམ་པོ་ལྔ་བཅུའི་དོ་ཤལ་ཅན་གཅེར་མོ་ཕྱག་རྒྱ་ལྔས་བརྒྱན་པ། ཞབས་གཡས་སྐུམ་ཞིང་གཡོན་བརྐྱང་པའི་སྟབས་ཀྱིས་བཞུགས་པ། ཕྱིའི་དྲྭ་བཞིར་ཡི་གེ་བཞི་ཡོངས་སུ་གྱུར་པ་ལས་མིའི་ཐོད་པ་བདུད་རྩིས་གང་བ་བཞིར་བསམ། ཨོཾ་ཧྲཱི༔ཥྟི་ནས་ཧཱུྃ་ཕཊ། གཙོ་བོ་ཡབ་ཡུམ་བསྐུལ་དཔག་ཏུ་མེད་པར་གྱུར། ཡུམ་གྱི་བ་སྤུའི་སྒོ་ནས་ཕྱིར་འཕྲོས། ཕྱོགས་བཅུར་གཤེགས། སེམས་ཅན་རྣམས་ཀྱི་ཞེ་སྡང་སྦྱངས། ཆོས་ཀྱི་དབྱིངས་ཀྱི་ཡེ་ཤེས་ལ་བཀོད། གཅིག་ཏུ་འདུས་རང་དང་ཡུམ་ལ་ཐིམ་པར་བསམ། ཨོཾཛི་ན་ཛི་ཀ །གཏི་མུག་གཤིན་རྗེ་གཤེད་ཡབ་ཡུམ་བསྐུལ། དཔག་ཏུ་མེད་པར་གྱུར། གོང་དང་འགྲེའོ། ཡུམ་གྱི་བ་སྤུའི་སྒོ་ནས་ཕྱིར་འཕྲོས། ཕྱོགས་བཅུར་གཤེགས། སེམས་ཅན་རྣམས་ཀྱི་གཏི་མུག་སྦྱངས། མེ་ལོང་ལྟ་བུའི་ཡེ་ཤེས་ལ་བཀོད། གཅིག་ཏུ་འདུས་རང་དང་ཡུམ་ལ་ཐིམ་པར་བསམ། ནང་གི་ཤར་གྱི་གདན་ལ་འཁོད། ཨོཾ(༡༡ན)
རཏྣ་ངྷྀ་ཀ །སེར་སྣ་གཤིན་རྗེ་གཤེད་བསྐུལ། དཔག་ཏུ་མེད་པར་གྱུར། ཡུམ་གྱི་བ་སྤུའི་སྒོ་ནས་ཕྱིར་འཕྲོས། སེམས་ཅན་རྣམས་ཀྱི་ང་རྒྱལ་དང་སེར་སྣ་སྦྱངས། མཉམ་པ་ཉིད་ཀྱི་ཡེ་ཤེས་ལ་བཀོད། གཅིག་ཏུ་འདུས་རང་དང་ཡུམ་ལ་ཐིམ་པར་བསམ། ལྷོའི་གདན་ལ་འཁོད། ཨོཾ་ཨ་རོ་ལི་ག །འདོད་ཆགས་གཤིན་རྗེ་གཤེད་ཡབ་ཡུམ་བསྐུལ། དཔག་ཏུ་མེད་པར་གྱུར། ཡུམ་གྱི་བ་སྤུའི་སྒོ་ནས་ཕྱིར་འཕྲོས། ཕྱོགས་བཅུར་གཤེགས། སེམས་ཅན་རྣམས་ཀྱི་འདོད་ཆགས་སྦྱངས། སོ་སོར་རྟོག་པའི་ཡེ་ཤེས་ལ་བཀོད། གཅིག་ཏུ་འདུས་རང་དང་ཡུམ་ལ་ཐིམ་པར་བསམ། ནུབ་ཀྱི་གདན་ལ་འཁོད། ཨོཾ་པྲ་ཛྙཱ་ངྷཱྀ་ཀ །ཕྲག་དོག་གཤིན་རྗེ་གཤེད་ཡབ་ཡུམ་བསྐུལ། དཔག་ཏུ་མེད་པར་གྱུར། ཡུམ་གྱི་བ་སྤུའི་སྒོ་ནས་ཕྱིར་འཕྲོས། ཕྱོགས་བཅུར་གཤེགས། སེམས་ཅན་རྣམས་ཀྱི་ཕྲག་དོག་སྦྱངས། བྱ་བ་གྲུབ་པའི་ཡེ་ཤེས་ལ་བཀོད། གཅིག་ཏུ་འདུས་རང་དང་ཡུམ་ལ་ཐིམ་པར་བསམ། བྱང་གི་གདན་ལ་འཁོད། ཨོཾ་མུངྒ་ངྷྲྀ་ཀ །ཐོ་བ་གཤིན་རྗེ་གཤེད་ཡབ་ཡུམ་བསྐུལ། དཔག་ཏུ་མེད་པར་གྱུར། ཡུམ་གྱི་བ་སྤུའི་སྒོ་ནས་ཕྱིར་འཕྲོས། ཕྱོགས་བཅུར་གཤེགས། སེམས་ཅན་རྣམས་ཀྱི་ཕུང་པོའི་བདུད་བཅོམ། དད་པའི་སྟོབས་ལ་བཀོད། གཅིག་ཏུ་འདུས་རང་དང་ཡུམ་ལ་ཐིམ་པར་བསམ། ཤར་སྒོའི་དབུས་སུ་འཁོད། ཨོཾ་དཎྜ་ངྷྲྀཀ །དབྱུག་པ་གཤིན་རྗེ་གཤེད་ཡབ་ཡུམ་བསྐུལ། དཔག་ཏུ་མེད་པར་གྱུར། ཡུམ་གྱི་བ་སྤུའི་སྒོ་ནས་ཕྱིར་འཕྲོས། ཕྱོགས་བཅུར་གཤེགས། སེམས་ཅན་རྣམས་ཀྱི་ཉོན་མོངས་པའི་ལེ་ལོ་སྦྱངས། བརྩོན་འགྲུས་ཀྱི་ཡེ་ཤེས་ལ་བཀོད། གཅིག་ཏུ་འདུས་རང་དང་ཡུམ་ལ་ཐིམ་པར་བསམ། ལྷོ་སྒོའི་གདན་ལ་འཁོད། ཨོཾ་པདྨ་ངྷྲྀ་ཀ །པད་མ་གཤིན་རྗེ་ཤེད་ཡུམ་བསྐུལ། དཔག་ཏུ་མེད་པར་གྱུར། ཡུམ་གྱི་བ་སྤུའི་སྒོ་ནས་ཕྱིར་འཕྲོས། ཕྱོགས་བཅུར་གཤེགས། སེམས་ཅན་རྣམས་ཀྱི་འཆི་བདག་གི་བདུད་བཅོམ། དྲན་པའི་གཤིན་རྗེ་གཤེད་ཡབ་ཡུམ་བསྐུལ། གཅིག་ཏུ་འདུས་རང་དང་ཡུམ་ལ་ཐིམ་པར་བསམ། ནུབ་སྒོའི་གདན་ལ་འཁོད། ཨོཾ་ཁངྒ་ངྷྲྀ་ཀ །རལ་གྲི་གཤིན་གཤིན་རྗེ་གཤེད་ཡབ་ཡུམ་བསྐུལ། དཔག་དུ་མེད་པར་གྱུར། ཡུམ་གྱི་བ་སྤུའི་སྒོ་ནས་ཕྱིར་འཕྲོས། ཕྱོགས་བཅུར་གཤེགས། སེམས་ཅན་རྣམས་ཀྱི་ལྷའི་བུའི་ཞེ་སྡང་སྦྱངས། ཏིང་ངེ་འཛིན་གྱི་ཡེ་ཤེས་ལ་བཀོད། གཅིག་ཏུ་འདུས་རང་དང་ཡུམ་ལ་ཐིམ་པར་བསམ། བྱང་སྒོའི་གདན་ལ་འཁོད། ཨོཾ་མོ་ཧ་ར་ཏི། ཙ་ཙི་ཀ་ཡབ་ཡུམ་བསྐུལ། དཔག་དུ་མེད་པར་གྱུར། ཡུམ་གྱི་བ་སྤུའི་སྒོ་ནས་ཕྱིར་འཕྲོས། ཕྱོགས་བཅུར་གཤེགས། སེམས་ཅན་རྣམས་ཀྱི་སའི་ཁམས་སྦྱངས། བྱམས་པ་ཚད་མེད་ལ་བཀོད། གཅིག་ཏུ་འདུས་རང་དང་ཡུམ་ལ་ཐིམ་པར་བསམ། ནང་གི་ཤར་ལྷོའི་གྲར་གདན་ལ་འཁོད། ཨོཾ་དྭེ་ཥ་ར་ཏི། ཕག་མོ་ཡབ་ཡུམ་བསྐུལ། དཔག་ཏུ་མེད་པར་གྱུར། ཡུམ་གྱི་བ་སྤུའི་སྒོ་ནས་ཕྱིར་འཕྲོས། ཕྱོགས་བཅུར་གཤེགས། སེམས་ཅན་རྣམས་ཀྱི་ཆུའི་ཁམས་སྦྱངས། སྙིང་རྗེ་ཡེ་ཤེས་ལ་བཀོད། གཅིག་ཏུ་འདུས་རང་དང་ཡུམ་ལ་ཐིམ་པར་བསམ། ལྷོ་ནུབ་གོང་དང་འགྲེ། ཨོཾ་རྭ་ག་ར་ཏི། དབྱངས་ཅན་མ་ཡབ་ཡུམ་(༡༡བ)
བསྐུལ་དཔག་ཏུ་མེད་པར་གྱུར། ཡུམ་གྱི་བ་སྤུའི་སྒོ་ནས་ཕྱིར་འཕྲོས། ཕྱོགས་བཅུར་གཤེགས། སེམས་ཅན་རྣམས་ཀྱི་མེའི་ཁམས་སྦྱངས། དགའ་བ་ཡེ་ཤེས་ལ་བཀོད། གཅིག་ཏུ་འདུས་རང་དང་ཡུམ་ལ་ཐིམ་པར་བསམ། ནུབ་བྱང་གི་གདན་ལ་འཁོད། ཨོཾ་བཛྲ་ར་ཧི། གཽ་རི་ཡབ་ཡུམ་བསྐུལ། དཔག་ཏུ་མེད་པར་གྱུར། ཡུམ་གྱི་བ་སྤུའི་སྒོ་ནས་ཕྱིར་འཕྲོས། ཕྱོགས་བཅུར་གཤེགས། སེམས་ཅན་རྣམས་ཀྱི་རླུང་གི་ཁམས་སྦྱངས། བཏང་སྙོམས་ཡེ་ཤེས་ལ་བཀོད། གཅིག་ཏུ་འདུས་རང་དང་ཡུམ་ལ་ཐིམ་པར་བསམ། བྱང་ཤར་གདན་ལ་འཁོད། ཨོཾ་ཨཱཿཧཱུཾ། ཐོད་པ་བཞི་བསྐུལ། དཔག་དུ་མེད་པར་གྱུར། ཡུམ་གྱི་བ་སྤུའི་སྒོ་ནས་ཕྱིར་འཕྲོས། ཕྱོགས་བཅུར་གཤེགས། ཡུལ་དྲུག་གི་དྲི་མ་སྦྱངས། སླར་འདུས། ཕྱིའི་གྲྭ་བཞིར་འཁོད། ཨོཾ་ཨཱཿཧཱུཾ། གཞལ་ཡས་ཁང་བསྐུལ། དཔག་ཏུ་མེད་པར་གྱུར། ཡུམ་གྱི་བ་སྤུའི་སྒོ་ནས་ཕྱིར་འཕྲོས། ཕྱོགས་བཅུར་གཤེགས། སྣོད་ཀྱི་སྐྱོན་སྦྱངས། བདེ་བ་ལ་གནས་པ་རྣམས་བརྟན་པར་བྱས། གཅིག་ཏུ་འདུས་རང་དང་ཡུམ་ལ་ཐིམ་པར་བསམ། དམ་ཚིག་གི་གཞལ་ཡས་ཁང་ཐིམ་པར་བསམ། གཙོ་འཁོར་ཐམས་ཅད་ཀྱི་མིག་གཉིས་སུ་ཀྵིཾ་དང་འཁོར་ལོ་ལས་རྡོ་རྗེ་མིག་དཀར་པོ་དཀར་སྔོ་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱི་གྲི་གུག་དང་ཐོད་པ་ཐུགས་ཀར་འཛིན་ཅིང་། ལྷག་མ་གཡས་གཉིས་འཁོར་ལོ་དང་རལ་གྲི །གཡོན་གཉིས་ནོར་བུ་དང་པད་མ་འཛིན་པ། རྣ་བ་གཉིས་སུ་ཛྲིཾ་དང་རྡོ་རྗེ་ལས་རྡོ་རྗེ་རྣ་བ་ནག་པོ་ནག་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱི་གྲི་གུག་དང་ཐོད་པ་ཐུགས་ཀར་འཛིན་ཅིང་། གོང་ལྟར་འགྲེ། ལྷག་མ་གཡས་གཉིས་རྡོ་རྗེ་དང་རལ་གྲི །གཡོན་གཉིས་འཁོར་ལོ་དང་པད་མ་འཛིན་པ། སྣ་གཉིས་སུ་ཁཾ་དང་རིན་པོ་ཆེ་ལས་རྡོ་རྗེ་སྣ་སེར་སྔོ་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱི་གྲི་གུག་དང་ཐོད་པ་ཐུགས་ཀར་འཛིན་ཅིང་། ལྷག་མ་གཡས་གཉིས་ནོར་བུ་དང་རལ་གྲི །གཡོན་གཉིས་འཁོར་ལོ་དང་པད་མ་འཛིན་པ། ལྕེའི་རྩ་བར་རཾ་དང་པད་མ་ལས་རྡོ་རྗེའི་ལྕེ་དམར་པོ་དམར་སྔོ་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱི་གྲི་གུག་དང་ཐོད་པ་ཐུགས་ཀར་འཛིན་ཅིང་། ལྷག་མ་གཡས་གཉིས་པད་མ་དང་རལ་གྲི་དང་འཁོར་ལོ། གཡོན་གཉིས་ནོར་བུ་དང་འཁོར་ལོ་འཛིན་པ། དཔྲལ་བར་ཀཾ་དང་རལ་གྲི་ལས་རྡོ་རྗེའི་ལུས་ལྗང་ཁུ་ལྗང་སྔོ་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱི་གྲི་གུག་དང་ཐོད་པ་ཐུགས་ཀར་འཛིན་ཅིང་། ལྷག་མ་གཡས་གཉིས་རལ་གྲི་དང་འཁོར་ལོ། གཡོན་(༡༢ན)
གཉིས་ནོར་བུ་དང་པད་མ་འཛིན་པ། ལྟེ་བར་སཾ་དང་རྡོ་རྗེ་ལས་རྡོ་རྗེའི་ཡིད་དཀར་པོ་དཀར་སྔོ་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱི་གྲི་གུག་དང་ཐོད་པ་ཐུགས་ཀར་འཛིན་ཅིང་། ལྷག་མ་གཡས་གཉིས་རྡོ་རྗེ་དང་རལ་གྲི །གཡོན་གཉིས་འཁོར་ལོ་དང་པད་མ་འཛིན་པ་སྟེ། ཐམས་ཅད་ཀྱང་པད་ཟླ་ལ་གནས་པའོ། ལྷ་ཐམས་ཅད་ཀྱི་ཐུགས་ཀར་ཧཱུཾ་ལས་རྡོ་རྗེ་ལས་རྡོ་རྗེའི་ཡིད་དཀར་པོ་དཀར་སྔོ་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱི་གྲི་གུག་དང་ཐོད་པ་ཐུགས་ཀར་འཛིན་ཅིང་། ལྷག་མ་གཡས་གཉིས་རྡོ་རྗེ་དང་རལ་གྲི། གཡོན་གཉིས་འཁོར་ལོ་དང་པད་མ་འཛིན་པ། མགྲིན་པར་ཨཱཿལས་པད་མ་དམར་པོ་འདབ་མ་བརྒྱད་པའི་དབུས་སུ་ཨཱཿདང་པད་མ་ལས་གསུང་རྡོ་རྗེ་དམར་པོ་དམར་སྔོ་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱི་གྲི་གུག་དང་ཐོད་པ་ཐུགས་ཀར་འཛིན་ཅིང་། ལྷག་མ་གཡས་གཉིས་པད་མ་དང་རལ་གྲི། གཡོན་གཉིས་ནོར་བུ་དང་འཁོར་ལོ་འཛིན་པ། སྤྱི་བོར་ཨོཾ་ལས་འཁོར་ལོ་དཀར་པོའི་དབུས་སུ་ཨོཾ་དང་འཁོར་ལོ་ལས་སྐུ་རྡོ་རྗེ་དཀར་པོ་དཀར་སྔོ་དམར་པའི་ཞལ་གསུམ་ཕྱག་དྲུག་གི་དང་པོ་གཉིས་ཀྱི་གྲི་གུག་དང་ཐོད་པ་ཐུགས་ཀར་འཛིན་ཅིང་། ལྷག་མ་གཡས་གཉིས་འཁོར་ལོ་དང་རལ་གྲི། གཡོན་གཉིས་ནོར་བུ་དང་པད་མ་འཛིན་པ། ཐམས་ཅད་ཀྱང་ཁྲོ་བོའི་རྒྱན་ཆ་ལུགས་དང་ལྡན་པ་གཡོན་བརྐྱང་གིས་བཞུགས་པའོ། རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས་རྡོ་རྗེ་གསུམ་གྱི་ལྷ་ཚོགས་མདུན་གྱི་ནམ་མཁར་ཨོཾ་བཛྲ་ས་མཱ་ཛཿས་སྤྱན་དྲངས་པ་ལ་སྔར་བཞིན་མཆོད་ནས། འོད་ཟེར་གྱིས་བཀུག་སྟེ་ཐུགས་རྡོ་རྗེའི་ལྷ་ཚོགས་རྣམས་ལྷ་རྣམས་ཀྱི་ཐུགས་ཀའི་ཐུགས་རྡོ་རྗེ་ལ་ཐིམ་པར་བསམ། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱ་མ་ཀོ྅ཧཾ། འོད་ཟེར་གྱིས་བཀུག་སྟེ་གསུང་རྡོ་རྗེའི་ལྷ་ཚོགས་རྣམས་ལྷ་རྣམས་ཀྱི་མགྲིན་པའི་གསུང་རྡོ་རྗེ་ལ་ཐིམ་པར་བསམ། ཨོཾ་སརྦ་ཏ་ཐཱ་ག་ཝཱ་ཀ་བཛྲ་སྭ་བྷཱ་ཝ་ཨཱདྨ་ཀོ྅ཧཾ། འོད་(༡༢བ)
ཟེར་གྱིས་བཀུག་སྟེ་སྐུ་རྡོ་རྗེའི་ལྷ་ཚོགས་རྣམས་ལྷ་རྣམས་ཀྱི་སྤྱི་བོའི་སྐུ་རྡོ་རྗེ་ལ་ཐིམ་པར་བསམ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱདྨ་ཀོ྅ཧཾ། རྡོ་རྗེ་གསུམ་གྱི་ངོ་བོ་ང་ཡིན་སྙམ་དུ་ང་རྒྱལ་བྱ། ཛཿའཇམ་དཔལ་རང་བཞིན་ཆོས་རྣམས་ཀུན་གྱི་དངོས། །གནས་མེད་འགྲོ་འོང་བྲལ་བ་ནམ་མཁའ་བཞིན། །དུས་གྱི་ཁམས་བཞིན་ཐུགས་རྗེ་འགྲོ་འོང་བྲལ། །སྤྲུལ་པ་འགྲོ་དང་བྲལ་བའི་གཟུགས་བརྙན་བཞིན། །འགྲོ་དང་འོང་བའི་མཚན་ཉིད་མི་མངའ་ཡང་། །ཆུ་ཟླ་བཞིན་དུ་གར་དམིགས་དེར་སྣང་བས། །དེང་འདིར་སྤྱན་འདྲེན་གཤེགས་སུ་གསོལ་བའི་ལྷ། །སངས་རྒྱས་ཀུན་གྱི་ཡེ་ཤེས་འཇམ་དཔལ་དབྱངས། །གདུག་པ་འདུལ་ཕྱིར་འཇིགས་བྱེད་གཤིན་རྗེ་གཤེད། །ལས་བྱེད་སྤྲུལ་པ་གཤིན་རྗེ་འཁོར་དང་བཅས། །འདིར་གཤེགས་བདག་ལ་དགོངས་ཤིང་བཞུགས་སུ་གསོལ། ཨོཾ་ཧྲཱིཿཧ་བྷོ་མ་ཧཱ་ཀྲོ་ངྷ་ཨཱ་གཙྪ་ཨཱ་གཙྪ་ཨ་སྨ་ད་པཱུ་ཛ་པྲ་ཏི་གྲྀ་ཧྞ་པྲ་སཱ་ད་མེ་ངྷཱི་མཱན་ཀུ་རུ་སྭཱཧཱ། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་རང་བཞིན་གྱི་གནས་ནས་དཔལ་རྡོ་རྗེ་འཇིགས་བྱེད་ལྷ་བཅུ་གསུམ་གྱི་དཀྱིལ་འཁོར་རྟེན་དང་བརྟེན་པར་བཅས་པ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿས་སྤྱན་དྲངས། ཧྲཱིཿཥྚྲཱིཿས་ཁྲོ་བོ་སྤྲོས་ཏེ་ཕྱིར་འབྲང་གི་བགེགས་བསྐྲད་ལ་བསྲུངས་ཏེ་སྔར་བཞིན་མཆོད། ཨོཾ་མངྒ་ར་ཛཿ ཨོཾ་དཎྜ་ཧཱུཾ། ཨོཾ་པད་མ་བཾ། ཨོཾ་ཁངྒ་ཧོཿས་དགུག་གཞུག་བཅིང་མཉེ་བྱ། ཨོཾ་ཧྲཱིཿཧི་བྷོ་ཞེས་པ་ནས་ཀུ་རུ་སྭཱཧཱ། སླར་ཡང་ཐུགས་འཕྲོས་པས་རང་བཞིན་གྱི་གནས་ནས་དཔལ་རྡོ་རྗེ་འཇིགས་བྱེད་ལྷ་བཅུ་གསུམ་གྱི་དཀྱིལ་འཁོར་རྟེན་དང་བརྟེན་པར་བཅས་པ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿས་སྤྱན་དྲངས། ཧྲཱིཿཥྚྲཱིཿས་ཁྲོ་བོ་སྤྲོས་ཏེ་ཕྱིར་འབྲང་གི་བགེགས་བསྐྲད་ལ་བསྲུངས་ཏེ་སྔར་བཞིན་མཆོད། ཨོཾ་མངྒ་ར་ཛཿ ཨོཾ་དཎྜ་ཧཱུཾ། ཨོཾ་པད་མ་བཾ། ཨོཾ་ཁངྒ་ཧོཿས་དགུག་གཞུག་བཅིང་མཉེ་བྱ། ཨོཾ་ཧྲཱིཿཧི་བྷོ་ཞེས་པ་ནས་ཀུ་རུ་སྭཱཧཱ། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས། ཕྱོགས་བཅུ་ན་བཞུགས་པའི་སངས་རྒྱས་སྲས་དང་བཅས་པ་བདུན་གྱི་ནམ་མཁར་ཨོཾ་བཛྲ་ས་མཱ་ཛཿས་སྤྱན་(༡༣ན)
དྲངས་ལ་སྔར་བཞིན་མཆོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། དེ་རྣམས་ཀྱིས་སྤྲོས་པའི་ལྷ་མོ་ཙ་ཙི་ཀཱ་ལ་སོགས་པ་རྣམས་ཀྱིས་ཤིས་པ་བརྗོད་པ་སྔོན་དུ་འགྲོ་བས་ཟླ་བ་ལྟ་བུའི་བུམ་པ་དཀར་པོ་བདུད་རྩི་ལྔས་གང་བ་བཟུང་ནས། སངས་རྒྱས་རྣམས་ནི་ཐམས་ཅད་ཀྱིས། །སྐྱེ་བས་ཐོབ་པའི་དབང་བསྐུར་བ། །ཇི་ལྟར་དེ་བཞིན་བདག་གིས་ནི། །དག་པ་ལྷ་ཡིས་ཆུས་དབང་བསྐུར། ཞེས་གསུང་ཞིང་སྤྱི་བོ་ནས་དབང་བསྐུར་བས། དབང་གི་ཆུས་ལུས་ཐམས་ཅད་གང་། དྲི་མ་ཐམས་ཅད་དག །ཆུ་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་པ་ལས། གཙོ་བོའི་རྩ་ཞལ་གྱི་དབུ་ལ་མི་བསྐྱོད་པ། ལྷ་གཞན་ཤར་དང་ཤར་ལྷོ་བ་རྣམས་ལ་རྣམ་སྣང་། ལྷོ་དང་ལྷོ་ནུབ་པ་རྣམས་ལ་རིན་འབྱུང་། ནུབ་དང་ནུབ་བྱང་པ་རྣམས་ལ་འོད་དཔག་མེད། བྱང་དང་བྱང་ཤར་བ་རྣམས་ལ་དོན་གྲུབ་ཀྱིས་དབུ་བརྒྱན་ཅིང་། དབང་གི་ལྷ་རྣམས་རང་ཉིད་ལ་ཐིམ་པར་བསམ་སྟེ་ཡེ་ཤེས་པ་གཞུག་ཅིང་དབང་བསྐུར་བའོ། །ལས་རྒྱལ་མཆོག་གི་ཏིང་ངེ་འཛིན་ནི། མཆོད་པ་དངོས་སམ་བཤམས་ན་ཡིད་བྱུང་ཙམ་ལ་བྱིན་གྱིས་བརླབ་མི་དགོས་ཤིང་ཏིང་ངེ་འཛིན་གྱིས་སྤྲུལ་ལ། ཨོཾ་ཡ་མཱནྟ་ཀ་ས་པ་རི་ཝཱ་ར་ཨརྒྷཾ་ནས་ཤཔྟའི་བར་གྱི་སྔགས་ཀྱིས་མཆོད། ནང་མཆོད་ལ་བདུད་རྩི་རིལ་བུ་བཏབ་མི་དགོས་པས། མཆོད་དོ། ཕྱོགས་བཅུ་དུས་གསུམ་གྱི་དེབཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་འཕྲིན་ལས་ཐམས་ཅད་ཀྱི་ངོ་བོར་གྱུར་པ། ཆོས་ཀྱི་ཕུང་པོ་སྟོང་(༡༣བ)
ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག་དྲིན་ཅན་རྩ་བའི་བླ་མ་རིན་པོ་ཆེའི་ཞལ་དུ་ཨོཾ་ཨཱཿཧཱུཾ། དཔལ་རྡ་ོརྗེ་འཇིགས་བྱེད་ཆེན་པོའི་ཞལ་དུ་ཨོཾ་ཨཱཿ ཧཱུཾ། ཡེ་ཤེས་ཀྱི་མཁའ་འགྲོ་མའི་ཞལ་དུ་ཨོཾ་ཨཱཿཧཱུཾ། ལ་ལཱི་ཏ་བཛྲ་གྱི་ཞལ་དུ་ཨོཾ་ཨཱཿཧཱུཾ། ཨ་མོ་གྷ་བཛྲ་ཞལ་དུ་ཨོཾ་ཨཱཿཧཱུཾ། ཡེ་ཤེས་འབྱུང་གནས་སྦས་པའི་ཞལ་དུ་ཨོཾ་ཨཱཿཧཱུཾ། པད་མ་བཛྲའི་ཞལ་དུ་ཨོཾ་ཨཱཿཧཱུཾ། དཱི་པཾ་ཀ་ར་རཀྵི་ཏའི་ཞལ་དུ་ཨོཾ་ཨཱཿཧཱུཾ། རྭ་ལོ་ཙཱ་བ་རྡོ་རྗེ་གྲགས་ཀྱི་ཞལ་དུ་ཨོཾ་ཨཱཿཧཱུཾ། རྭ་ཆོས་རབ་ཀྱི་ཞལ་དུ་ཨོཾ་ཨཱཿཧཱུཾ། རྭ་ཡེ་ཤེས་སེང་གེའི་ཞལ་དུ་ཨོཾ་ཨཱཿཧཱུཾ། རྭ་འབུམ་སེང་གི་ཞལ་དུ་ཨོཾ་ཨཱཿཧཱུཾ། རྗེ་བཙུན་རྒ་ལོའི་ཞལ་དུ་ཨོཾ་ཨཱཿཧཱུཾ། རོང་པ་ཤེས་རབ་སེང་གེའི་ཞལ་དུ་ཨོཾ་ཨཱཿཧཱུཾ། བླ་མ་ཡེ་ཤེས་དཔལ་བའི་ཞལ་དུ་ཨོཾ་ཨཱཿཧཱུཾ། ཆོས་རྗེ་དོན་གྲུབ་རིན་ཅེན་གྱི་ཞལ་དུ་ཨོཾ་ཨཱཿཧཱུཾ། ཆོས་ཀྱི་རྒྱལ་པོ་བཙོང་ཁ་པ་ཆེན་པོའི་ཞལ་དུ་ཨོཾ་ཨཱཿཧཱུཾ། མཁས་གྲུབ་ཤེས་རབ་སེང་གེའི་ཞལ་དུ་ཨོཾ་ཨཱཿཧཱུཾ། རྒྱུད་པ་སྦྱིན་པ་དཔལ་བའི་ཞལ་དུ་ཨོཾ་ཨཱཿཧཱུཾ། རྩ་བ་ཤེས་རབ་བཟང་པོའི་ཞལ་དུ་ཨོཾ་ཨཱཿཧཱུཾ། རྡོ་རྗེ་འཆང་ཆོས་སྐྱོང་རྒྱ་མཚོའི་ཞལ་དུ་ཨོཾ་ཨཱཿཧཱུཾ། རྗེ་ནམ་མཁའ་གྲགས་པའི་ཞལ་དུ་ཨོཾ་ཨཱཿཧཱུཾ། ཆོས་རྗེ་ཉི་མ་བཀྲ་ཤིས་ཀྱི་ཞལ་དུ་ཨོཾ་ཨཱཿཧཱུཾ། མཁས་གྲུབ་བདེ་ལེགས་ཉི་མའི་ཞལ་དུ་ཨོཾ་ཨཱཿཧཱུཾ། ཤར་ཆེན་ནམ་མཁའ་རྒྱལ་མཚན་གྱི་ཞལ་དུ་ཨོཾ་ཨཱཿཧཱུཾ། རྡོ་རྗེ་འཆང་དཔལ་འབྱོར་ལྷུན་གྲུབ་ཀྱི་ཞལ་དུ་ཨོཾ་ཨཱཿཧཱུཾ། འཇམ་དབྱངས་དཔལ་འབྱོར་འཕྲིན་ལས་ཀྱི་ཞལ་དུ་ཨོཾ་ཨཱཿཧཱུཾ། དྲིན་ཅན་རྩ་བའི་བླ་མ་རིན་པོ་ཆེའི་ཞལ་དུ་ཨོཾ་ཨཱཿཧཱུཾ། གཞན་ཡང་དབང་བསྐུར་རྒྱུད་བཤད་མན་ངག་གནང་བའི་བླ་མ་དམ་པ་ཡབ་སྲས་བརྒྱུད་པ་དང་བཅས་པ་རྣམས་ཀྱི་ཞལ་དུ་ཨོཾ་ཨཱཿཧཱུཾ། ཨོཾ་ཨཱཿཥྚྲཱིཿནས་ཧཱུཾ་ཕཊ། ཨོཾ་ཨཱཿཧཱུཾ་ཨོཾ་བཛྲེ་བེཏྟ་ལཱི་ནས་ཧཱུཾ་ཛཿསྭཱ་ཧཱ་ཨོཾ་ཨཱཿཧཱུཾ། ཨོཾ་ཛི་ན་ཛི་ཀ་ཧཱུཾ་ཕཊ་ཨོཾ་ཨཱཿཧཱུཾ། ཞེས་པ་ནས། ཨོཾ་བཛྲ་ར་ཏི་ཧཱུཾ་ཕཊ་ཨོཾ་ཨཱཿཧཱུཾ། གཞན་ཡང་རྒྱུད་སྡེ་ཆེན་པོ་བཞི་དང་འབྲེལ་བའི་ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱི་ཞལ་དུ་ཨོཾ་ཨཱཿཧཱུཾ། སྔོན་སངས་རྒྱས་(༡༤ན)
མཐོང་བ་དམ་པའི་ཆོས་ཐོས་པ། འཕགས་པའི་དགེ་འདུན་ལ་བརྟེན་པ། བསྟན་པ་དང་འཁོར་རྣམ་བཞི་སྐྱོང་བར་ཞལ་གྱིས་བཞེས་པའི་བླ་མ་གོང་མ་རྣམས་ཀྱིས་བསྟེན་ཅིང་བསྒྲུབས་པའི་སྲུང་མ་དམ་ཚིག་ཅན་རྣམས་གྱི་ཞལ་དུ་ཨོཾ་ཨཱཿཧཱུཾ། ཡུལ་སུམ་ཅུ་རྩ་གཉིས། གནས་ཉི་ཤུ་རྩ་བཞི། དུར་ཁྲོད་ཆེན་པོ་བརྒྱད་ན་གནས་པའི་དཔའ་བོ་དང་དཔའ་མོ་དང་། རྣལ་འབྱོར་མ་དང་། ཕྱོགས་སྐྱོང་དང་ཞིང་སྐྱོང་ཀླུ་ལ་སོགས་པ་རྣམས་ཀྱི་ཞལ་དུ་ཨོཾ་ཨཱཿཧཱུཾ། གཞི་བདག་གཉུག་མར་གནས་པ་རྣམས་དང་། སེམས་ཅན་ཐམས་ཅད་ལྷར་གྱུར་པ་རྣམས་ཀྱི་ཞལ་དུ་ཨོཾ་ཨཱཿཧཱུཾ། ཕྱོགས་བཅུའི་རྒྱལ་བ་སྲས་དང་བཅས་པ་རྣམས་མདུན་གྱི་ནམ་མཁར་ཨོཾ་བཛྲ་ས་མཱ་ཛཿས་སྤྱན་དྲངས། རང་གི་ལུས་ལ་ཐིམ་པར་བསམ། ཨོཾ་ཡ་མཱནྟ་ཀ་ཧཱུཾ་ཕཊ། ཨོཾ་ཨཱཿཧཱུཾ། ཞེས་དབུལ་ལ་བདུད་རྩི་ལྕེ་ཐོག་ཏུ་མྱང་ཞིང་། རང་གི་ལུས་ལ་གནས་པའི་རྒྱལ་བ་རྣམས་ཡེ་ཤེས་ཀྱི་བདུད་རྩིས་མཉེས་ཤིང་ཚིམ་པར་བསམས་ལ། མཆོད་བྱ་མཆོད་བྱེད་མཆོད་པ་ཐམས་ཅད་རང་བཞིན་མེད་བཞིན་དུ་སྣང་བ་སྒྱུ་མ་བཞིན་དུ་བལྟས་ལ་འཁོར་རྣམས་ཀྱི་གཙོ་བོར་བྲག་ཅའི་དབྱངས་ལྟ་བུར་བསྟོད་པར་བསམས་ཏེ། གཉིས་མེད་ཐུན་མོང་མ་ཡིན་ཁྱབ་པའི་སྐུ། །ཀུན་ལ་སྙོམས་མཛད་རྒྱལ་བ་ཀུན་གྱི་ཡབ། །ཆོས་ཀྱི་དབྱིངས་གྱུར་རྒྱལ་བ་ཀུན་གྱི་ཡུམ། །ཡེ་ཤེས་སེམས་དཔའ་རྒྱལ་བ་ཀུན་གྱི་སྲས། །ཕྱག་འཚལ་འཇམ་དཔལ་དཔལ་གྱུར་རྫོགས་པ་ཁྱོད། །ཆོས་ཀྱི་སྐུ་ལ་བྱམས་སྡང་མི་མངའ་ཡང་། །སྲིད་གསུམ་གདུག་པ་མ་ལུས་འདུལ་བའི་ཕྱིར། །ཐུགས་རྗེ་ཐབས་ཀྱིས་ཁྲོ་རྒྱལ་སྐུར་སྟོན་པ། །(༡༤བ)
འཇིགས་བྱེད་གཤིན་རྗེ་གཤེད་ལ་ཕྱགས་འཚལ་ལོ། །གཙོ་བོས་ཀྱང་འཁོར་རྣམས་ལ། །གཤིན་རྗེ་གཤེད་པོ་རབ་འཇིགས་པ། །གཏི་མུག་རྡོ་རྗེའི་ངོ་བོ་ཁྱོད། །སྟོན་པ་སངས་རྒྱས་ཀུན་རང་བཞིན། །རྡོ་རྗེ་སྐུ་ལ་ཕྱག་འཚལ་བསྟོད། །གཤིན་རྗེ་གཤེད་པོ་རབ་འཇིགས་པ། ཕྲ་མ་རྡོ་རྗེའི་རང་བཞིན་ཁྱོད། །རྡོ་རྗེ་ཐུགས་དང་རབ་མཚུངས་པ། །རིན་ཅེན་རྡོ་རྗེ་༝། །འདོད་ཆགས་རྡོ་རྗེའི་ངོ་བོ་ཁྱོད། གཤིན་རྗེ་གཤེད་པོ་རབ་འཇིགས་པ། །རྡོ་རྗེ་གསུང་དང་རབ་མཚུངས་པ། རྡོ་རྗེ་གསུང་ལ་༝། །ཕྲག་དོག་རྡོ་རྗེའི་ངོ་བོ་ཁྱོད། །གཤིན་རྗེ་གཤེད་པོ་ལས་ཀུན་པ། །རྡོ་རྗེ་སྐུ་དང་རབ་མཚུངས་པ། །ཕྱག་ན་རལ་གྲི༝། །ཡང་འཁོར་རྣམས་ཀྱིས་མགྲིན་གཅིག་ཏུ་གཙོ་བོ་ལ། སངས་རྒྱས་ཀུན་གྱི་དངོས་པོ་ཁྱོད། །སངས་རྒྱས་ཐམས་ཅད་གཅིག་བསྡུས་པ། །སངས་རྒྱས་ཀུན་མཆོག་གཙོ་བོའི་གཙོ། །དཀྱིལ་འཁོར་གཙོ་ལ་༝། ཅེས་བསྟོད། དེ་ལྟར་རེ་རེ་ནས་གསལ་འདེབས་པའི་དཔྱད་ནས་བསྒོམ་པ་དང་རྣམ་པ་གསལ་བ་ལ་རྩེ་གཅིག་ཏུ་འཇོག་པའི་སྒོམ་པ་གཉིས་ཀྱིས་གསལ་སྣང་བསྒྲུབ་ཅིང་བདག་ཉིད་དཔལ་རྡོ་རྗེ་འཇིགས་བྱེད་དོ་སྙམ་དུ་ངེས་པ་ཤུགས་ཅན་ལ་ང་རྒྱལ་བརྟན་པར་བྱ་བ་ནི་རྒྱ་ཆེ་བ་ལ་བསླབ། སྒོམ་པ་པོ་དང་བསྒོམ་བྱ་དང་སྒོམ་རྣམས་བརྟགས་ན་ཡང་དག་པར་ཅིར་ཡང་མ་གྲུབ་བཞིན་དུ་སྣང་བ་སྒྱུ་མ་ལྟ་བུའི་དོན་ལ་འཇོག་པ་དམིགས་པ་ལྷ་སྐུར་དམིགས་ནས་རྣམ་པ་རང་བཞིན་མེད་པར་ངེས་པའི་རྒྱུན་སྐྱོང་བ་སྟེ་ཟབ་པ་ལ་བསླབ། དེ་ནས་སྟེང་དང་འོག་གི་སྣ་རྩེར་ཟླ་བ་ལ་གནས་པའི་རྡོ་རྗེ་སྔོན་པོ་ཡུངས་འབྲུ་ཙམ་ལ་སེམས་བཟུང་བ་བརྟན་པ་ན་དེ་ལས་(༡༥ན)
ཕྱག་མཚན་མང་པོ་སྤྲོ་ཞིང་སླར་ཡང་སྡུད་པའི་ཕྲ་མོ་ལ་སེམས་འཛིན། །དེ་ལྟར་བསྒོམས་པས་སྐྱོན་དག་པ་དྲན་པར་བྱ་སྟེ། ཞལ་དགུ་ནི་གསུང་རབ་ཡན་ལག་དགུ །རྭ་གཉིས་ནི་བདེན་པ་གཉིས། ཕྱག་སོ་བཞི་དང་སྐུ་གསུང་ཐུགས་ཏེ་སོ་བདུན་ནི་བྱང་ཕྱོགས་སོ་བདུན། ཞབས་བཅུ་དྲུག་ནི་སྟོང་ཉིད་བཅུ་དྲུག །ཡུམ་དང་སྦྱོར་བ་ནི་བདེ་བ་ཆེན་པོ་རྒྱས་པ། མི་ལ་སོགས་པ་ནི་དངོས་སྒྲུབ་བརྒྱད་དང་། བྱ་རྒོད་ལ་སོགས་པ་ནི་དབང་ཕྱུག་བརྒྱད་དག་པ་ཡིན་ལ། གཅེར་བུར་ནི་སྒྲིབ་གཡོགས་མེད་པ་དང་སྐྲ་གྱེན་དུ་བརྫེས་པ་ནི་མྱང་ངན་ལས་འདས་པའི་གོ་འཕང་སྟོན་པའོ། །དེ་དག་གི་དོན་མདོར་བསྡུ་ན་གཏན་ལ་དབབ་པའི་གཞི་གསུང་རབ་ཡན་ལག་དགུའི་བརྗོད་བྱ་ཀུན་རྫོབ་སྒྱུ་མ་དང་དོན་དམ་ནམ་མཁའ་ལྟ་བུ། ཁོང་དུ་ཆུད་པའི་ལམ་བྱང་ཕྱོགས་སོ་བདུན་ཡིན་ལ། ལམ་དེའི་གཙོ་བོ་དོན་དམ་རྟོགས་པ་ལ་ནི་སྟོང་ཉིད་བཅུ་དྲུག་གི་རྟོགས་པ་ཡོད་དེ། དེ་ཡང་ཐབས་བདེ་བ་ཆེན་པོ་དང་དབྱེར་མེད་པར་བཞུགས་པའོ། །ལམ་དེས་བགྲོད་པའི་འབྲས་བུ་དངོས་གྲུབ་ཐུན་མོང་བ་དང་ཐུན་མོང་མ་ཡིན་པ་གཉིས་ཀྱི་གཙོ་བོ་ནི་སྒྲིབ་པ་ཟད་པའི་མྱང་འདས་སོ། །ཞེས་རྡོ་རྗེ་འཇིགས་བྱེད་ཀྱི་རྣམ་པར་ཤར་བའི་སྐུས་དེ་ལྟར་མཚོན་པར་གོ་བར་བྱེད་པའོ། །འཕྲེང་བ་བྱིན་གྱིས་བརླབ་པ་ནི། ཧྲཱིཿཥྚྲཱིཿས་བསངས། སྭ་བྷཱ་ཝས་སྦྱངས། འཕྲེང་བ་མི་དམིགས་པ་སྟོང་པ་ཉིད་དུ་བསམ། སྟོང་པའི་ངང་ལས་མེ་ལས་པད་མ་མེས་མཚན་པ་དེ་ཡོངས་སུ་གྱུར་པ་ལས་འདོད་ཆགས་གཤིན་རྗེ་གཤེད་དམར་པོ་དམར་སྔོ་དཀར་བའི་ཞལ་(༡༥བ)
གསུམ་ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་པ་འཛིན་པས་རང་འདྲའི་ཡུམ་ལ་འཁྱུད་པ། ལྷག་མ་གཡས་གཉིས་པད་མ་དང་རལ་གྲི །གཡོན་གཉིས་ནོར་བུ་དང་འཁོར་ལོ་འཛིན་པ། དེའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས་པས་རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་ཨོཾ་བཛྲ་ས་མཱ་ཛཿས་སྤྱན་དྲངས། ཛཿཧཱུཾ་བཾ་ཧོཿས་གཉིས་སུ་མེད་པར་བསམ། ཨོཾ་ཨ་རོ་ལི་ག་ཧཱུཾ་ཕཊ ཅེས་བཟླ། གསུང་འདོད་ཆགས་གཤིན་རྗེ་གཤེད་ཡབ་ཡུམ་ཞུ་བ་ལས་བྱུང་བའི་ཁྲག་འཛག་པའི་མི་མགོའི་ཕྲེང་བ་བརྒྱ་རྩ་བརྒྱད་ཀྱི་རྣམ་པ་ཅན་དུ་བསམ། རང་གི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཏིང་ངེ་འཛིན་སེམས་དཔའི་མཐར་རྩ་སྔགས་ལ་སོགས་པ་དང་ལྷ་གཞན་རྣམས་ཀྱི་ཐུགས་ཀར་ཉི་གདན་ལ་རང་རང་གི་ཕྱག་མཚན་ལ་ས་བོན་བཀོད་པའི་མཐར་སྔགས་ཀྱི་ཡི་གེ་རྣམས་གཡས་སྐོར་དུ་འགྲེང་སྟེ་འོད་ཟེར་འབར་བའི་རྣམ་པ་ཅན་དུ་བལྟས་ལ། ཨོཾ་ཡ་མ་རཱ་ཛཱ་ས་དོ་མེ་ཡ་ཡ་མེ་དོ་རུ། ཎ་ཡོ་ད་ཡ་ཡ་ད་ཡོ་ནི་ར་ཡ་ཀྵེ་ཡ། ཡ་ཀྵེ་ཡ་ཙྪ་ནི་རཱ་མ་ཡ་ཧཱུཾ་ཧཱུཾ་ཕཊ་ཕཊ་སྭཱཧཱ། རྩ་སྔགས་སོ། །ཨོཾ་ཧྲཱིཿཥྚྲི་ཝི་ཀྲི་ཏཱ་ན་ན་ཧཱུཾ་ཕཊ། ཨོཾ་ཡ་མཱནྟ་ཀ་ཧཱུཾ་ཕཊ། སྙིང་པོའོ། །ཨོཾ་བཛྲ་བེཏྟ་ཝཱི་ཨཱ་གཙྪ་ཨཱ་གཙྪ་ཧཱུཾ་ཛཿསྭཱཧཱ། ཨོཾ་ཛི་ན་ཛི་ཀ་ཧཱུཾ་ཕཊ། ཨོཾ་རཏྣ་ངྷྲྀ་ཀ་ཧཱུཾ་ཕཊ། ཨོཾ་ཨ་རོ་ལི་ག་ཧཱུཾ་ཕཊ། ཨོཾ་མུངྒ་དྷྲི་ག་ཧཱུཾ་ཕཊ། ཨོཾ་དཎྜ་ངྷྲྀ་ཀ་ཧཱུཾ་ཕཊ། ཨོཾ་པད་མ་ངྷྲྀ་ཀ་ཧཱུཾ་ཕཊ། ཨོཾ་ཁངྒ་ངྷྲྀ་ཀ་ཧཱུཾ་ཕཊ། ཨོཾ་མོ་ཧ་ར་ཏི་ཧཱུཾ་ཕཊ། ཨོཾ་དྭེ་ཥ་ར་ཏི་ཧཱུཾ་ཕཊ། ཨོཾ་རྭ་ག་(༡༦ན)
ར་ཏི་ཧཱུཾ་ཕཊ། ཨོཾ་བཛྲ་ར་ཏི་ཧཱུཾ་ཕཊ། ཅེས་འཁོར་གྱི་སྔགས་རྣམས་བཟླ། ཐུན་མཐར་གཏོར་འབུལ་མི་བྱེད་ན་སླར་ཡང་མཆོད་བསྟོད་བྱ་ཞིང་གཤིན་རྗེ་གཤེད་ཀྱི་ཡིག་བརྒྱས་ལྷག་ཆད་ཁ་འགེང་ལ་གཏོར་འབུལ་བྱེད་ན་དེ་རྣམས་དོར་ནས། གཏོར་མ་བྱིན་གྱིས་བརླབ་པ་ནི། སྔར་བཞིན་བསངས་སྦྱངས། སྟོང་པ་ཉིད་དུ་བསམ། སྟོང་པའི་ངང་ལས། ཡཾ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ལྟ་བུ་བ་དན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་པ། དེའི་སྟེང་དུ་ཨཱཿལས་མི་མགོའི་སྒྱེད་བུ་གསུམ་གྱི་སྟེང་དུ་ཨཱཿལས་བྱུང་བའི་ཐོད་པ་དཀར་པོ། དེའི་ནང་གི་ཤར་དུ་བྷྲུཾ་ལས་བྱུང་བའི་བ་ལང་གི་ཤ་གོས་མཚན་པ། ལྷོར་ཨཾ་ལས་བྱུང་བའི་ཁྱིའི་ཤ་ཀུས་མཚན་པ། ནུབ་ཏུ་ཛྲཾ་ལས་བྱུང་བའི་གླང་པོ་ཆེའི་ཤ་དས་མཚན་པ། བྱང་དུ་ཁཾ་ལས་བྱུང་བའི་རྟའི་ཤ་ཧས་མཚན་པ། དབུས་སུ་ཧཱུཾ་ལས་བྱུང་བའི་མིའི་ཤ་ནས་མཚན་པ། ཤར་ལྷོར་ལཱཾ་ལས་བྱུང་བའི་དྲི་ཆེན་བིས་མཚན་པ། ལྷོ་ནུབ་ཏུ་མཱཾ་ལས་བྱུང་བའི་རཀྟ་རས་མཚན་པ། ནུབ་བྱང་དུ་པཱཾ་ལས་བྱུང་བའི་བྱང་སེམས་དཀར་པོ་ཤུས་མཚན་པ། བྱང་ཤར་དུ་ཏཱཾ་ལས་བྱུང་བའི་རྐང་མར་མས་མཚན་པ། དབུས་སུ་བཾ་ལས་བྱུང་བའི་དྲི་ཆུ་མཱུས་མཚན་པ། དེ་དག་གི་སྟེང་དུ་ཨོཾ་དཀར་པོ། ཨཱཿདམར་པོ། ཧཱུཾ་སྔོན་པོ་གསུམ་སྟེང་ནས་སྟེང་དུ་བརྩེགས་པར་བསམ། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་རླུང་ལ་ཕོག་པས་རླུང་གཡོས་མེ་སྦར་ཏེ་ཐོད་པའི་རྫས་རྣམས་ཞུ་ཞིང་ཁོལ་བར་བསམ། ཡི་གེ་གསུམ་ལས་འོད་ཟེར་རིམ་པ་(༡༦བ)
བཞིན་དུ་འཕྲོས་པས་སྐུ་རྡོ་རྗེ་གསུང་རྡོ་རྗེ་ཐུགས་རྡོ་རྗེ་རྣམས་བཀུག་ནས་ཡི་གེ་གསུམ་ལ་རིམ་གྱིས་ཐིམ་པ་རྣམས་ཐོད་པར་ལྷུང་ནས་ཞུ་བས་ཧཱུཾ་གིས་ཁ་དོག་དྲི་ནུས་ཀྱི་སྐྱོན་སྦྱངས། ཨཱཿས་བདུད་རྩིར་རྟོགས་པར་བྱས། ཨོཾ་གྱིས་མང་པོར་སྦར་ཞིང་སྤེལ་བར་བསམ། ཨོཾ་ཨཱཿཧཱུཾ། ལན་གསུམ་བརྗོད། གཏོར་མ་འབུལ་བ་རྒྱས་པར་སྤྲོ་ན། དཀྱིལ་འཁོར་རྟེན་བརྟེན་པའི་དམ་ཚིག་པ་བསྐྱེད་པ་ལ། ཡེ་ཤེས་པ་བསྟིམ། དེ་ནས་ཕྱོགས་སྐྱོང་བཅོ་ལྔ་བཀུག་པ་ལ་ཕུར་བུ་བཏབ་སྟེ་གནས་བསྒྱུར་གཙོ་འཁོར་རྣམས་ཀྱི་སྐྱེ་མཆེད་བརླབ་པ་ནས་བསྟོད་པའི་བར་སྔར་བཞིན་བྱ་བ་ཡོད་ཀྱང་རེ་ཞིག་བཞག་པའི་འཇུག་པ་བདེ་བ། རང་གི་སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་ཀྱི་འཁོར་ལོ་ལ་ཕྱོགས་སྐྱོང་རྣམས་ཀྱིས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿས་སྤྱན་དྲངས། པད་མ་ཀ་མ་ལཱ་ཡ་སྟཱཾ་གྱིས་གདན་ཕུལ། ཨོཾ་ཧྲཱིཿཥྚྲཱིཿཝི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ་ཧཱུཾ་སརྦ་དུ་ཥྚཾ་ནྡ་ཨ་དི་ན་ས་པ་རི་ཝཱ་རཱ་ན་ཀཱི་ལ་ཡ་ཧཱུཾ་ཕཊ་སྭཱ་ཧཱ། རང་གི་སྙིང་ག་ནས་ཁྲོ་བོ་གཤིན་རྗེ་གཤེད་ཕྱག་ན་ཕུར་བུ་ཐོགས་པ་སྤྲོས་ཏེ། ཕྱོགས་སྐྱོང་རྣམས་ཀྱི་སྙིང་ག་དང་མགྲིན་པ་དང་རྐང་མཐིལ་གྱི་བར་དུ་ཕུར་བུ་བཏབ་པས་གྲུབ་པའི་བཅུད་ལེན་གྲུབ་པ་བཞིན་དུ་སྐད་ཅིག་གིས་དཔལ་རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པ་ཡུམ་དང་བཅས་པར་བསམ། འཇིག་རྟེན་ལས་འདས་པའི་མགྲོན་རྣམས་ཀྱི་ལྗགས་ཧཱུཾ་ལས་སྐྱེས་པའི་རྡོ་རྗེ་རྩེ་གཅིག་པ་དཀར་པོ་འོད་ཀྱི་སྦུ་གུ་ཅན་གྱིས་གཏོར་མའི་བཅུད་ཐམས་ཅད་དྲངས་ཏེ་གསོལ་བར་བསམ། ཧྲཱིཿཥྚྲཱིཿའི་མཐར། ཨོཾ་(༡༧ན)
བཛྲ་བྷཻ་ར་ཝ་ཨ་ངྷི་པ་ཏི། བཛྲ་བེཏྟཱ་ལཱི་དཾ་བ་ལིཾ་ཏ་ཁ་ཁཱ་ཧི་ཁཱ་ཧི་ཧཱུཾ་ཕཊ་སྭཱ་ཧཱ། ཞེས་པ་བདུན་ནམ་ཉེར་གཅིག་གིས་གཙོ་བོ་ཡབ་ཡུམ་དང་། ཨོཾ་ཛི་ན་ཛི་ག །ཅེས་པ་ནས། བཛྲ་ར་ཏི་བ་ལིཾ་པྲ་ཏཱི་ཙྪ་སྭཧཱ། ལན་གསུམ་གྱིས་འཁོར་རྣམས་ལ་འབུལ། ཕྱི་ནང་གི་མཆོད་པས་མཆོད། གཟུགས་མཆོག་མས་བསྟོད། ཕྱོགས་སྐྱོང་འཁོར་དང་བཅས་པས་ལྗགས་ནས་སྦུ་གུ་ཅན་དུ་བསམ། ཡ་མ་རཱ་ཛ་བརྗོད། ཨོཾ་བྷུ་ཙ་ར་ནཾ། ཡ་པ་ཏཱ་ལ་ཙ་རཱ་ཡ། མཱན་ཁེ་ཙ་རཱ་ཡ། ཏ་པཱུ་ཝ་ཎི་གཱ་ཎཾ། ཀ་དཀྵི་ན་དཱི་ཀཱ་ཡ། ཧཱུཾ་པཤྩི་མ་ནཾ་ཕཊ་ཨུཏྟ་ར་ཏི་གཱ་ཡ། ཨོཾ། ཧྲཱིཿཡ། ཥྚྲཱིཿཝ། ཝི་ཀྵི། ཀྲི་ཀོ །ཏཱ་ཨེ། ན་ཨ། ན་དེ། ཧཱུཾ་བྷྱོ། ཕཊ་སརྦ་བྷུ་ཏེ་བྷྱཿ ཨོཾ་ད་ཤ་དི་ཀཱ་ལོ་ཀ་པཱ་ལ་ས་པ་རི་ཝཱ་ར་ཨརྒྷཾ་ནས་ཤཔྡ་པྲ་ཏཱི་ཙྪ་ཧཱུཾ་སྭཱ་ཧཱའི་བར་གྱིས་མཆོད། སྔགས་མཐར་འབྲུ་གསུམ་བཏགས་ལ་ནང་མཆོད་དབུལ། བཅོམ་ལྡན་ཆོས་རྗེ་འཇམ་དབྱངས་སྤྱན་ལམ་དུ། །བདུད་འདུལ་བསྟན་པ་བསྲུང་བར་ཞལ་བཞེས་པ། །ལས་ཀྱི་གཤེན་རྗེ་མ་མོ་མཁའ་འགྲོ་མ། །འབྱུང་པོ་རོ་ལངས་ཅི་བགྱི་བཀའ་ཉན་ཚོགས། །ཕྱི་ནང་སྐྱོང་བའི་དམ་ཅན་མ་ལུས་པ། །བདག་ནི་རེ་བའི་སེམས་ཀྱིས་འདུད་ཅིང་མཆིས། །ཕྱོགས་སྐྱོང་འཁོར་དང་བཅས་པ་རྣམས་ཀྱིས་བདག་གི་དགེ་བའི་བྱ་བ་རྣམས་མཐར་ཕྱིན་པ་དང་། དེའི་བར་ཆད་ཞི་བའི་འཕྲིན་ལས་མཛོད་ཅིག །ཨོཾ་ཡ་མཱནྟ་ཀ་ས་མ་ཡ། མ་ནུ་པཱ་ལ་ཡ། ཡ་མཱ་ནྟ་ཀ་ཏྭེ་ནོ་པ་ཏིཥྛ། ཌ་ིཌྷྲོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོ་ཥྱོ་མེ་བྷ་བ། སརྦྦ་སིངྷི་མྨེ་པྲ་ཡཙྪ། སརྦྦ་ཀརྨཱ་(༡༧བ)
སུ་ཙ་མེ། ཙིཏྟཾ་ཤྲི་ཡཾཿཀུ་རུ་ཧཱུཾ་ཧ་ཧ་ཧ་ཧ་ཧོཿབྷ་ག་ཝ་ན། ཡ་མཱནྟ་ཀ་མ་མེ་མུ་ཉྩ། ཡ་མཱནྟ་ཀ་བྷ་ཝ་མ་ཧཱ་ས་མ་ཡ་ས་ཏྭ་ཨཿཞེས་གཤིན་རྗེ་གཤེད་ཀྱི་ཡིག་བརྒྱ་བཟླ། མ་རྙེད་ཡོངས་སུ་མ་ཤེས་དང་། གང་ཡང་ནུས་པ་མ་མཆིས་པས། །འདིར་ནི་བྱ་བ་གང་བགྱིས་པ། །དེ་ཀུན་ཁྱེད་ཀྱིས་བཟོད་མཛད་རིགས། སོགས་བརྗོད། གཏོར་མགྲོན་གྱི་ལྷ་རྣམས་ཨོཾ་ཨཱཿཧཱུཾ་མུ༔ས་རང་གནས་སུ་གཤེགས་པར་བསམ། རྣམ་དག་བསམ་པས་ཚུལ་འདིར་འབད་པ་ལས། །བྱུང་བའི་དགེ་བས་མཐའ་ཡས་འགྲོ་བ་རྣམས། །སྐྱེ་ཞིང་སྐྱེ་བར་འཇམ་དབྱངས་ཞི་ཁྲོ་ཡིས། །འབྲལ་བ་མེད་པར་རྗེས་སུ་འཛིན་གྱུར་ཅིག །རྣམ་དག་ཡིད་ཀྱི་ཟླ་ཤེལ་རྩིག་ངོས་ལ། །བཅོམ་ལྡན་རྡོ་རྗེ་འཇིགས་བྱེད་དཀྱིལ་འཁོར་ནི། །ཏིང་འཛིན་པིར་གྱིས་དབང་པོའི་གཞུ་ལྟ་བུར། །རབ་བཀོད་བསྒོམ་དང་མཆོད་བསྟོད་བཟླས་སོགས་ཀྱིས། །རྣམ་དཀར་ཟླ་འོད་དུང་དང་ཀུནྡ་ལྟར། །མཆོག་ཏུ་དཀར་བ་གང་ཞིག་བསགས་པ་དེས། །ཐམས་ཅད་མཁྱེན་པ་དགེ་འདུན་རྒྱ་མཚོས་མཛད། དངོས་གྲུབ་རྩ་བ་ཐེག་མཆོག་དགེ་བའི་བཤེས། །མཚན་ཉིད་ལྡན་པས་རྗེས་སུ་འཛིན་པར་ཤོག །ཚེ་འདིའི་ཆོས་བརྒྱད་བྱིས་པའི་རོལ་རྩེད་དང་། །འཁོར་བའི་ཕུན་ཚོགས་དུག་སྦྲུལ་ཚང་ལྟ་བུར། །རིག་ནས་བྱང་ཆུབ་མཆོག་ཏུ་སེམས་བསྐྱེད་དེ། །ཕྱིན་དྲུག་སྤྱོད་པས་རྟག་ཏུ་འཚོ་བར་ཤོག །རྣམ་དག་དབང་བཞིའི་ཆུ་བོས་སྒོ་གསུམ་གྱི། །དྲི་མ་ཀུན་བཀྲུས་སྐུ་བཞིའི་ས་བོན་བཞག །དམ་ཚིག་སྡོམ་པ་མིག་གི་འབྲས་བུ་ལྟར། །བསྲུངས་པས་རིམ་གཉིས་ལམ་གྱི་སྣོད་གྱུར་ཅིག །སྐྱེ་ཤི་བར་དོའི་མུན་པ་ཀུན་སེལ་ཞིང་། །སྐུ་གསུམ་འོད་བརྒྱའི་དྲ་བ་འགྱེད་བྱེད་པ། །བསྐྱེད་རིམ་ཟབ་མོ་ཐུན་བཞིར་བསྒོམས་པ་ལས། །རྫོགས་རིམ་ཡོངས་རྫོགས་སྐྱེ་བའི་རྒྱུད་སྨིན་ཤོག །བླ་མ་གཤིན་རྗེ་གཤེད་ཀྱི་ལྷ་ཡི་ཚོགས། ནམ་(༡༨ན)
མཁའ་གང་བའི་བསོད་ནམས་ཞིང་མཆོག་ལ། །འཁོར་གསུམ་རྣམ་པར་དག་པའི་མཆོད་སྦྱིན་གྱིས། །རང་གི་རྒྱུད་ནི་ཡོངས་སུ་སྨིན་པར་ཤོག །སྔགས་གཉིས་དོན་ལྟར་གདོད་ནས་དག་པའི་དབྱིངས། །བདེ་ཆེན་རང་གི་སེམས་དང་རོ་གཅིག་པ། །ཡེ་ཤེས་ཚོགས་རྫོགས་འཆི་བའི་སྐྱོན་སྤངས་ཤིང་། །འོད་གསལ་ལམ་གྱིས་ཆོས་སྐུ་ཐོབ་པར་ཤོག །གཏུམ་ཆེན་གནོད་མཛེས་དཔལ་ལྡན་ཁྲོ་བོ་བཅུས། །ཡོངས་སུ་བསྐོར་བའི་ཏིང་འཛིན་ལ་གཞོལ་བས། །བདུད་དང་བགེགས་སོགས་ནག་པོའི་རྩ་ལག་ཀུན། །སྐད་ཅིག་ཉིད་ལ་དྲུང་ནས་འབྱིན་པར་ཤོག །རྣམ་མང་རིན་ཅེན་ཚོགས་འབར་གཞལ་མེད་ཁང་། །རྣམ་སྣང་རྣམ་པར་དག་པའི་བདག་ཉིད་ཅན། །རྣམ་པར་བསྒོམས་པས་མ་དག་ཞིང་སྦྱངས་ཏེ། །རྣམ་དག་ཡེ་ཤེས་གཞལ་ཡས་ཁང་འགྲུབ་ཤོག །དེར་ནི་གུར་གུམ་ལྷུན་པོ་བརྩེགས་པ་བཞིན། །རྒྱུ་ཡི་རྡོ་རྗེ་འཛིན་པའི་རྣལ་འབྱོར་གྱིས། །བར་དོའི་སྨིན་སྦྱངས་སྒྱུ་ལུས་སྣོད་གྱུར་ནས། །རྒྱལ་བའི་ལོངས་སྐུ་མྱུར་དུ་འགྲུབ་པར་ཤོག །ཟླ་ཉི་ས་བོན་ཕྱག་མཚན་སྐུ་རྫོགས་པའི། །རིམ་པས་ཡེ་ཤེས་ལྔ་ཡི་མངོན་བྱང་ལས། །འབྲས་བུ་རྡོ་རྗེ་འཛིན་པའི་རྣལ་འབྱོར་གྱིས། །སྐྱེ་སྲིད་སྦྱོང་ཞིང་སྤྲུལ་སྐུ་འགྲུབ་པར་ཤོག །འབུམ་ཕྲག་ཉི་འོད་སྤུངས་པའི་གཟི་བརྗིད་ཅན། །རང་ཉིད་སེམས་དཔའ་གསུམ་གྱི་བདག་ཉིད་དང་། །རང་རིག་ཕྱག་རྒྱར་སྦྱོར་བའི་རྣལ་འབྱོར་ཀྱིས། །སྤྲུལ་པའི་སྤྲིན་གྱིས་ས་གསུམ་ཁྱབ་བྱས་ནས། །མ་དག་སྣོད་བཅུད་དྲི་མ་ཀུན་སྦྱངས་ཏེ། །དག་པའི་རྟེན་དང་བརྟེན་པར་རྟག་འཆར་བའི། །གཞན་དོན་ཕུན་(༡༨བ)
སུམ་ཚོགས་པའི་བདག་ཉིད་ཅན། །དཀྱིལ་འཁོར་རྒྱལ་མཆོག་ཏིང་འཛིན་མཐར་ཕྱིན་ཤོག །ཕྱི་ནང་བཟླས་བརྗོ་མཐར་ཕྱིན་བསམ་གཏན་དང་། །རྫས་སོགས་རྟེན་འབྲེལ་འཁྲུལ་འཁོར་རིམ་པ་ལ། །བརྟེན་ནས་ཞི་སོགས་རབ་འབྱམས་ཀུན་འགྲུབ་པའི། །ལས་ཀྱི་རྒྱལ་པོ་མཆོག་ནི་འགྲུབ་པར་ཤོག །ཟབ་ལམ་རིམ་པ་ལྔ་ཡི་གནད་ཀྱི་དོན། །མ་ལུས་བསྡུས་པ་རྣལ་འབྱོར་རྣམ་པ་བཞི། །སྤྱོད་པ་གསུམ་དང་བཅས་པའི་ལམ་བཟང་གིས། །སྐུ་གསུམ་གོ་འཕང་ཚེ་འདིར་ཐོབ་པར་ཤོག །སྤྲུལ་པའི་འཁོར་ལོར་འདོད་ལྷ་ཡབ་ཡུམ་ལ། །སེམས་གཞོལ་རྗེས་གཞིག་སྡུད་རིམ་མཆོག་གིས་ནི། །ཟླ་ཉིའི་རྒྱུ་བ་སྒྲ་གཅན་ལམ་བཀག་པས། །ཡས་བབས་མས་བརྟན་དགའ་བཞི་སྐྱེ་བར་ཤོག །ཆོས་ཀྱི་འཁོར་ལོར་སྔགས་ཀྱི་རྣལ་འབྱོར་མཆོག །བུམ་པ་ཅན་དང་རྡོ་རྗེའི་བཟླས་པ་ཡིས། །སྙིང་གའི་རྩ་མདུད་མ་ལུས་གྲོལ་བྱས་ནས། །ལྷན་སྐྱེས་བདེ་བས་ཡིད་ལ་མྱོས་ཐོབ་ཤོག །སླར་ཡང་བྱིན་གྱིས་བརླབས་པའི་རྣམ་འབྱོར་གྱིས། །ནང་གི་རྗེས་གཞིག་བསམ་གཏན་རིམ་པ་དང་། །ཕྱག་རྒྱ་གཉིས་དང་སྦྱོར་བའི་ཐབས་མཁས་ལས། །སེམས་དབེན་མཐར་ཐུག་ཏིང་འཛིན་འདྲེན་པར་ཤོག །འཆི་རིམ་ཇི་བཞིན་རླུང་རྣམས་མ་ལུས་པ། །སྙིང་གར་ཐིམ་པའི་འོད་གསལ་དེ་ཉིད་ལས། །དབྱིབས་ཀྱི་རྣལ་འབྱོར་མཚན་དཔེའི་དྲ་བ་ཅན། །སྒྱུ་མ་ལྟ་བུའི་ཏིང་འཛིན་རྫོགས་པར་ཤོག །དབང་པོའི་གཞུ་ལྟར་དངས་པའི་སྐུ་དེ་ཉིད། །ནམ་མཁའི་དབྱིངས་སུ་ཆུ་འཛིན་ཞི་བ་བཞིན། །སྦྱངས་པའི་རྣམ་དག་ཡེ་ཤེས་རྣལ་འབྱོར་གྱིས། །བདེན་པར་འཛིན་པའི་ས་བོན་དྲུང་འབྱིན་ཤོག །དོན་གྱི་ལྷན་ཅིག་སྒོམ་པ་དེ་ཉིད་ལས། །མཚན་དཔེས་བརྒྱན་པའི་ཡོངས་སུ་དག་པའི་སྐུ། །དོན་དམ་འོད་གསལ་ཐུགས་དང་མཉམ་སྦྱོར་བའི། །ཟུང་དུ་འཇུག་པའི་རྣལ་འབྱོར་མཆོག་(༡༩ན)
འགྲུབ་ཤོག །ནམ་མཁའ་ཇི་སྲིད་སྐུ་ལྔའི་བདག་ཉིད་ཅན། ཁ་སྦྱོར་བདུན་ལྡན་གོ་འཕང་མངོན་གྱུར་ནས། །མཐའ་དག་འགྲོ་འདི་གོ་འཕང་དེ་ཉིད་ལ། །སྐད་ཅིག་ལ་ཉིད་ལ་བདེ་བླག་འགོད་པར་ཤོག །ཉེར་བསྡུ་ནི། དུར་ཁྲོད་སྲུང་འཁོར་དང་བཅས་པ་གཞལ་ཡས་ཁང་ལ། གཞལ་ཡས་ཁང་འཁོར་རྣམས་ལ། འཁོར་རྣམས་དང་ཡུམ་རང་ལ། རང་དམ་ཚིག་སེམས་དཔའ་ཡེ་ཤེས་སེམས་དཔའ་ལ། དེ་ཏིང་འཛིན་སེམས་དཔའ་ལ། དེ་ཡང་ཞབས་ཀྱུ་ཨུ་ནི་ཧ་ལ། ཧ་མགོ་བོ་ལ་དེ་ཟླ་ཚེས་ལ། དེ་ཐིག་ལེ་ལ། དེ་ནཱ་ད་ལ། དེ་ཡང་མི་དམིགས་པ་སྟོང་པ་ཉིད་ཀྱི་ངང་ལས་རང་ཉིད་སྐད་ཅིག་གིས་དཔལ་རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པ་ཡུམ་དང་བཅས་པའི་སྐུར་བཞེངས་པར་བསམ། ཤིས་བརྗོད་ནི་ཐམས་ཅད་མཁྱེན་པ་དགེ་འདུན་རྒྱ་མཚོས་མཛད། འཆི་མེད་ལམ་ཀུན་ཁྱབ་པའི་ཆུ་འཛིན་ནི། །བགྲང་ཡས་ཉི་འོད་རྩེ་དགས་རོལ་བ་བཞིན། །དཔལ་ལྡན་གཤིན་རྗེ་གཤེད་ཀྱི་དཀྱིལ་འཁོར་པ། །དགེ་ལེགས་མེ་ཏོག་སྣ་ཚོགས་ཆར་དུ་འབེབས། །ཤིས་པ་བརྗོད་པའི་འབྲུག་གི་གད་བརྒྱངས་ཅན། །མི་བཟད་མཐུ་སྟོབས་རྡོ་རྗེའི་གནམ་ལྕགས་ཀྱིས། །ནག་པོའི་རྩ་ལག་ཐལ་བར་བརླག་མཛད་པས། །ས་གསུམ་འགྲོ་འདི་ཤིས་པས་སྐྱོང་གྱུར་ཅིག །རྒྱལ་བ་ཀུན་གྱི་ཡེ་ཤེས་འཇམ་དཔལ་དབྱངས། །མ་རུངས་བདུད་དཔུང་འཇོམས་མཛད་གཤིན་རྗེ་གཤེད། །མི་ཡི་གཟུགས་ཀྱི་རྣམ་རོལ་བཙོང་ཁ་པ། །དབྱེར་མེད་བླ་མ་ཡི་དམ་ཁྱོད་ཕྱག་འཚལ། །རྒྱུད་རྒྱལ་སྡུད་མཛད་ཡེ་ཤེས་མཁའ་འགྲོ་མ། །ལམ་འདིས་གྲུབ་པ་མཆོག་བརྙེས་ལ་ལཱི་ཏ། །དོན་ཡོད་རྡོ་རྗེ་མར་མེ་མཛད་བསྲུང་བ། །བསྐྱེད་རིམ་མཐར་ཕྱིན་རྭ་ལོ་རྡོ་རྗེ་གྲགས། །ལ་སོགས་དངོས་དང་བརྒྱུད་པའི་བླ་མ་ནི། །དངོས་གྲུབ་ཀུན་གྱི་འབྱུང་གནས་ཁྱེད་རྣམས་ཀྱི། །བྱིན་རླབས་བདུད་རྩི་སྙིང་ལ་(༡༩བ)
ཞུགས་པ་ལས། །ཐུབ་བསྟན་ཕྱོགས་བཅུར་རྒྱས་པའི་བཀྲ་ཤིས་ཤོག །ཡེ་ཤེས་ལྔ་བདག་གཤིན་རྗེ་གཤེད་རྣམ་ལྔ། །བདུད་དཔུང་འཇོམས་མཛད་སྒོ་སྐྱོང་ཁྲོ་བོ་བཞི། །ཚད་མེད་བཞི་ཡི་དངོས་གྱུར་ཡུམ་ཆེན་བཞི། །མཚམས་ཀྱི་པད་མར་གནས་པའི་ཐོད་པ་ལ། །ལེགས་ཚོགས་ཇི་སྙེད་མཆིས་པའི་བཀྲ་ཤིས་དེས། །ཁྱེད་ཀྱི་མི་མཐུན་རྒུད་པ་ཀུན་ཟད་ཅིང་། །བདེ་ལེགས་ཡར་ངོའི་ཟླ་ལྟར་འཕེལ་གྱུར་ནས། །ཕུན་ཚོགས་དཔལ་ལ་རོལ་བའི་བཀྲ་ཤིས་ཤོག །རྡོ་རྗེ་འཆང་དབང་ཐུགས་བཅུད་བདུད་རྩིའི་ཕུལ། །དཔལ་ལྡན་རྒྱུད་རྣམས་ཀུན་གྱི་རྒྱལ་པོ་མཆོག །བཅོམ་ལྡན་རྡོ་རྗེ་འཇིགས་བྱེད་རྩ་བའི་རྒྱུད། །བཤད་པའི་རྒྱུད་དང་ཕྱོགས་མཐུན་རྒྱུད་རྣམས་ལ། །ལེགས་ཚོགས་ཇི་སྙིད་མཆིས་པའི་བཀྲ་ཤིས་དེས། ཁྱེད་ཀྱི་མི་མཐུན་རྒུད་པ་ཀུན་ཟད་ཅིང་། །བདེ་ལེགས་ཡར་ངོའི་ཟླ་ལྟར་འཕེལ་གྱུར་ནས། །ཕུན་ཚོགས་དཔལ་ལ་རོལ་བའི་བཀྲ་ཤིས་ཤོག །རབ་འབྱམས་ཞིང་ན་བཞུགས་པའི་དཔའ་བོ་དང་། །རྣམ་པར་དག་པའི་དཔའ་མོའི་དབང་ཕྱུག་མ། །རྒྱུད་ཀྱི་རྒྱལ་པོའི་ལུང་རྟོགས་དམ་ཆོས་ཀྱི། །ཕྱོགས་གཅིག་ཡན་ཆད་འཛིན་པ་ཐམས་ཅད་ལ། །ལེགས་ཚོགས་ཇི་སྙེད་མཆིས་པའི་བཀྲ་ཤིས་དེས། །ཁྱེད་ཀྱི་མི་མཐུན་རྒུད་པ་ཀུན་ཟད་ཅིང་། །བདེ་ལེགས་ཡར་ངོའི་ཟླ་ལྟར་འཕེལ་གྱུར་ནས། །ཕུན་ཚོགས་དཔལ་ལ་རོལ་བའི་བཀྲ་ཤིས་ཤོག །དུར་ཁྲོད་ཆེན་པོ་བརྒྱད་ཀྱིས་ཡོངས་བསྐོར་བའི། །སྣ་ཚོགས་རྡོ་རྗེའི་ལྟེ་བར་རབ་གནས་པའི། །ནོར་བུའི་ཏོག་མཛེས་རིན་ཅེན་བ་གམ་ཅན། །ཡེ་ཤེས་ལྔ་ཡི་རང་བཞིན་གཞལ་ཡས་ཁང་། །རྣམ་སྣང་རྣམ་པར་དག་པའི་བདག་ཉིད་ལ། །ལེགས་ཚོགས་ཇི་སྙེད་མཆིས་པའི་བཀྲ་ཤིས་དེས། །མ་དག་འཁོར་བའི་གནས་འདི་རབ་སྤངས་ནས། །དག་པའི་ཞིང་ལ་རོལ་པའི་བཀྲ་ཤིས་ཤོག །མཁས་པའི་དབང་པོ་ཞབས་བརྟན་ཅིང་། །རིག་འཛིན་བུ་སློབ་རྒྱས་པ་དང་། །བཤད་སྒྲུབ་ཉི་ཟླ་ལྟར་གསལ་བ། །རྒྱུན་མི་ཆད་པའི་བཀྲ་ཤིས་ཤོག །བསླབ་པ་སུམ་ལྡན་ངུར་སྨྲིག་འཛིན་པ་ཡི། །འདུས་པའི་ཚོགས་ཀྱི་གནས་འདི་ཡོངས་གང་(༢༠ན)
ཞིང་། །རྟག་ཏུ་བཤད་སྒྲུབ་བྱ་བས་སྲིད་མཐའི་བར། །ཐུབ་བསྟན་ཕྱོགས་བཅུར་རྒྱས་པའི་བཀྲ་ཤིས་ཤོག །ཐུན་གྱི་ངོ་བོ་ལ་དེ་ལྟར་ཉམས་སུ་བླངས་ནས་ཐུན་མཚམས་ལ་ཇི་ལྟར་བྱ་བ་སོགས་རིན་པོ་ཆེའི་ཟ་མ་ཏོག་བཞིན་བྱའོ། །རྙེད་དཀའ་དོན་ཆེ་རྡོ་རྗེ་ཐེག་མཆོག་རྩེ། །དུས་ཀྱི་དགྲ་བོའི་རྣལ་འབྱོར་ཆེན་པོའི་ལམ། །རྒྱལ་ཀུན་ཡབ་གཅིག་རྗེ་བཙུན་བཙོང་ཁ་པའི། །བཞེད་གཞུང་འདི་ཀོ་ཡོངས་འདུ་ས་བརྟོལ་དབང་། །ཚུལ་བཞིན་བསྟར་བའི་མཐུ་སྟོབས་ཐོག་མདའ་ཡིས། །དགྲ་བགེགས་བྲག་རི་ཕྱེར་འཐག་དེ་བས་ཀྱང་། །སྙིགས་དུས་ཚེ་ཐུང་ཡུན་དེར་བཅུ་གསུམ་གྱི། །རྡོ་རྗེའི་ས་ལ་བགྲོད་པ་གཅིག་ཏུ་རྨད། །དགེ་བས་དེང་ནས་ཚེ་རབས་ཐམས་ཅད་དུ། །འཇམ་དཔལ་སྙིང་པོའི་གསུང་རབ་ཟིལ་མངར་གྱིས། །ངེས་ལེགས་སྲོག་གི་ཀ་བ་རབ་ཚུགས་ཏེ། །བྱང་ཆེན་སུམ་རྩེན་དགའ་སྟོན་ལ་སྤྱོད་ཤོག །ཅེས་དཔལ་རྡོ་རྗེ་འཇིགས་བྱེད་ཆེན་པོའི་སྒྲུབ་ཐབས་ཟ་མ་ཏོག་གི་གསུང་འདོན་བྱར་དགོས་པ་རྣམས་རིས་སུ་མ་བོར་ཞིང་། ཁ་སྐོང་དང་མཚམས་སྦྱོར་ཚིག་ཕྲད་དགོས་ངེས་རྣམས་སྦྱར་བའི་རེག་ཟིག་བཀླགས་ཆོག་མ་འདི་ཡང་ཕན་བདེ་ལེགས་བཤད་གླིང་པ་རྣམས་ཀྱི་ཞལ་འདོན་དུ་ཟ་ཧོར་གྱི་བནྡེས་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ། །སརྦ་མངྒ་ལཾ།། །།