ཐུན་མོང་མ་ཡིན་པའི་རྣམ་མཁྱེན་གྱི་རྣམ་པ་བཤད་པ།
ཐུན་མོང་མ་ཡིན་པའི་རྣམ་མཁྱེན་གྱི་རྣམ་པ་བཤད་པ། གསུམ་པ་རྣམ་མཁྱེན་གྱི་རྣམ་པ་ལ། མདོར་བསྟན་པ། རྒྱས་པར་བཤད་པ། དོན་བསྡུ་བ་གསུམ། དང་པོ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། རྣམ་པ་ཐམས་ཅད་མཁྱེན་པ་ཉིད་ཀྱི་རྣམ་པ་སོ་དགུ་པོ་ནི་ཆོས་ཅན། འཕགས་པ་འོག་མ་རྣམས་དང་ཐུན་མོང་མ་ཡིན་པའི་ལམ་གཅིག་དུ་ཁོ་ན་ཡིན་ཏེ། དེ་ལས་བོགས་དབྱུང་དུ་མེད་པའི་ཤིན་ཏུ་ཕུལ་དུ་བྱུང་བའི་རྣམ་པ་ཡིན་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །རྣམ་མཁྱེན་གྱི་རྣམ་པ་གང་ཞིག །རང་གི་སྡེ་ཚན་མཚན་ཉིད་པ་འཕགས་པ་འོག་མའི་རྒྱུད་ལ་ཡོད་པ་དང་མེད་པའི་སྒོ་ནས་ཐུན་མོང་དང་ཐུན་མོང་མ་ཡིན་པའི་རྣམ་མཁྱེན་གྱི་རྣམ་པ་འཇོག་ཟེར་ན། མི་འཐད་པར་ཐལ། དེ་བཞིན་ཉིད་རྟོགས་པའི་རྣམ་མཁྱེན་དེ་ཐུན་མོང་མ་ཡིན་པའི་རྣམ་
མཁྱེན་གྱི་རྣམ་པ་གང་ཞིག །དེའི་སྡེ་ཚན་མཚན་ཉིད་པ་འཕགས་པ་འོག་མའི་རྒྱུད་ལ་ཡོད་པའི་ཕྱིར། དེར་ཐལ། དེ་བཞིན་ཉིད་རྟོགས་པའི་བྱང་སེམས་ཀྱི་མཁྱེན་པ་ཡོད་པའི་ཕྱིར། ཁ་ཅིག །རྣམ་མཁྱེན་གྱི་རྣམ་པ་གང་ཞིག །རང་གི་རིགས་འདྲ་མཚན་ཉིད་པ་འཕགས་པ་འོག་མའི་རྒྱུད་ལ་ཡོད་པ་དེ་ཐུན་མོང་བའི་རྣམ་མཁྱེན་གྱི་རྣམ་པའི་མཚན་ཉིད་ཟེར་ན། སྟོབས་བཅུ་པོ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། དེའི་ཉེར་ལེན་མཚན་ཉིད་པ་བྱང་འཕགས་ཀྱི་རྒྱུད་ལ་ཡོད་པའི་ཕྱིར། ཁ་ཅིག །རང་གི་ངོ་སྐལ་གྱི་མི་མཐུན་ཕྱོགས་འཇོམས་པ་ལ་ལྷའི་དབང་པོའི་རྡོ་རྗེ་རིན་པོ་ཆེ་དང་ཆོས་མཚུངས་པའི་ཐུན་མོང་མ་ཡིན་པའི་རྣམ་མཁྱེན་གྱི་རྣམ་པ་འདིར་བསྟན་སྟོབས་ཀྱི་མཚན་ཉིད་ཟེར་ན། སངས་འཕགས་ཀྱི་རྒྱུད་ཀྱི་གནས་དང་གནས་མ་ཡིན་པ་མཁྱེན་པའི་སྟོབས་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། རང་གི་ངོ་སྐལ་གྱི་མི་མཐུན་ཕྱོགས་ཡོད་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། ཁྱོད་ཀྱི་ངོ་སྐལ་གྱི་མི་མཐུན་ཕྱོགས་མེད་པར་ཐལ། ཁྱོད་རྣམ་མཁྱེན་ཡིན་པའི་ཕྱིར། ཁ་ཅིག །འཁོར་གྱི་དབུས་སུ་ང་ནི་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་སངས་རྒྱས་སོ་ཞེས་དམ་བཅས་པ་ལ་ཆོས་མཐུན་གྱི་རྒོལ་བ་མེད་པས་མི་འཇིགས་པའི་ཡེ་ཤེས་མཐར་ཐུག་དེ། འདིར་བསྟན་མི་འཇིགས་པའི་མཚན་ཉིད་ཟེར་ན། སངས་འཕགས་ཀྱི་རྒྱུད་ཀྱི་ལུས་དྲན་པ་ཉེར་གཞག་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། རྣམ་མཁྱེན་ཡིན་པའི་ཕྱིར། འདོད་ན། ཐུན་མོང་མ་ཡིན་པའི་རྣམ་མཁྱེན་གྱི་རྣམ་པ་ཡིན་པར་ཐལ། འདོད་པའི་ཕྱིར། འདོད་མི་ནུས། གཉིས་པ་རང་ལུགས་ནི། རྣམ་མཁྱེན་གྱི་རྣམ་པ་གང་ཞིག །རང་གི་སྡེ་ཚན་
མཚན་ཉིད་པ་འཕགས་པ་འོག་མའི་རྒྱུད་ལ་ཡོད་པའི་རིགས་སུ་གནས་པ་དེ། ཐུན་མོང་བའི་རྣམ་མཁྱེན་གྱི་རྣམ་པ་དང་། དེ་མེད་པ་དེ་ཐུན་མོང་མ་ཡིན་པའི་རྣམ་མཁྱེན་གྱི་རྣམ་པའི་མཚན་ཉིད། གསུམ་པ་རྩོད་པ་སྤོང་བ་ལ། ཁོ་ན་རེ། སེམས་ཅན་ཐམས་ཅད་འབད་མེད་དུ་གྲོལ་བར་ཐལ། སངས་འཕགས་ཀྱི་རྒྱུད་ཀྱི་སྟོབས་བཅུ་པོ་དེ་གདུལ་བྱའི་རྒྱུད་ཀྱི་མི་མཐུན་ཕྱོགས་འཇོམས་བྱེད་ཡིན་པའི་ཕྱིར་ཟེར་ན། མ་ཁྱབ། མ་གྲུབ་ན། དེར་ཐལ། དེ་ལྟར་འཇོམས་པར་བྱེད་པ་ལ་ལྷའི་དབང་པོའི་རྡོ་རྗེ་རིན་པོ་ཆེ་དང་ཆོས་མཚུངས་པ་ཡིན་པའི་ཕྱིར། འདོད་མི་ནུས། གཉིས་པ་ལ། ཡོན་ཏན་གྱི་དབྱེ་བ་དང་། ངོ་བོ་དང་། རྟེན་དང་། ཆེད་དུ་བྱ་བའོ། །དང་པོ་ལ། སྟོབས་བཅུ། མི་འཇིགས་པ་བཞི། སོ་སོ་ཡང་དག་པར་རིག་པ་བཞི། མ་འདྲེས་པའི་ཆོས་བཅོ་བརྒྱད་དང་བཞི་ལས། དང་པོ་ནི། ཤེས་བྱ་ཆོས་ཅན། རྣམ་མཁྱེན་གྱི་རྣམ་པ་དེ་ལ་ནི་སྟོབས་ཀྱི་རྣམ་པ་བཅུ་ཡོད་དེ། དགེ་མི་དགེ་ལས་འབྲས་བུ་བདེ་སྡུག་འབྱུང་བའི་གནས་དང་། དེ་ལས་བཟློག་པ་གནས་མ་ཡིན་པ་མཁྱེན་པའི་སྟོབས་དང་། ལས་ཀྱི་ཆ་ཕྲ་མོའི་རྣམ་པར་སྨིན་པ་མཁྱེན་པའི་སྟོབས་དང་། མངོན་མཐོ་དང་། ཐེག་གསུམ་ལ་མོས་པའི་མོས་པ་སྣ་ཚོགས་མཁྱེན་པའི་དེ་དང་། འཇིག་རྟེན་གྱི་ཁམས་ཀྱི་རང་བཞིན་དུ་གནས་པ་དང་། བསྒྲུབས་པ་ལས་གྱུར་པ་དུ་མ་མཁྱེན་པའི་སྟོབས་དང་། དད་པའི་དབང་པོ་རབ་འབྲིང་ཐ་གསུམ་གྱི་དབང་པོ་མཆོག་དང་མཆོག་མ་ཡིན་པ་མཁྱེན་པའི་དེ་དང་། མངོན་མཐོ་ངེས་ལེགས་ཐམས་ཅད་དུ་འགྲོ་བའི་ལམ་དང་། དེ་ལས་བཟློག་པ་ལ་ཆགས་ཐོགས་མེད་པར་མཁྱེན་པའི་དེ་དང་། བསམ་གཏན་དང་སྙོམས་འཇུག་གི་སྒྲིབ་པའི་ཀུན་ནས་ཉོན་མོངས་པ་དང་། དེ་ལས་ངེས་པར་འབྱུང་བའི་རྣམ་པར་བྱང་བ་མཁྱེན་པའི་དེ་དང་། རང་གཞན་གྱི་སྔོན་གྱི་གནས་རྗེས་སུ་དྲན་པ་མཁྱེན་པའི་དེ་དང་། སེམས་
ཅན་མཐའ་དག་གི་འཆི་འཕོ་བ་དང་། སྐྱེ་བ་མཁྱེན་པའི་དེ་དང་། ཉན་རང་དགྲ་བཅོམ་གྱི་ཉོན་སྒྲིབ་དང་། སངས་རྒྱས་ཀྱི་སྒྲིབ་པ་ཀུན་ཟད་པའི་ཟག་པ་ཟད་པ་མཁྱེན་པའི་དེ་རྣམས་སུ་ཡོད་པའི་ཕྱིར། གཉིས་པ་ནི། ཤེས་བྱ་ཆོས་ཅན། མི་འཇིག་པ་རྣམ་པ་བཞི་བཤད་དུ་ཡོད་དེ། རང་དོན་གྱི་དབང་དུ་བྱས་པས་འཁོར་གྱི་ནང་དུ་ང་ནི་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་སངས་རྒྱས་སོ་ཞེས། བདག་ཉིད་ཞལ་གྱིས་འཆེས་པ་ལ་ཆོས་མཐུན་གྱི་རྒོལ་བ་མེད་པས་རྟོགས་པ་དམ་བཅས་པ་ལ་མི་འཇིགས་པ་དང་། གཞན་དོན་གྱི་དབང་དུ་བྱས་པ་འདོད་ཆགས་ལ་སོགས་པའི་ཉོན་མོངས་དང་ཤེས་བྱའི་སྒྲིབ་པ་ཐར་པ་དང་ཐམས་ཅད་མཁྱེན་པའི་བར་ཆད་བྱེད་པ་ཉིད་དུ་བརྗོད་པ་ལ་རྒོལ་པ་མེད་པ་བར་དུ་གཅོད་པའི་ཆོས་བསྟན་པ་ལ་དེ་དང་། ཐམས་ཅད་ཤེས་པ་ཉིད་དང་ལམ་ཤེས་པ་ཉིད་ལ་སོགས་པའི་ལམ་ཐར་པ་དང་ཐམས་ཅད་མཁྱེན་པར་ངེས་པར་འབྱུང་བ་ཉིད་དུ་རབ་ཏུ་བསྟན་པ་ལ་རྒོལ་བ་མེད་པ་ངེས་འབྱུང་གི་ལམ་བསྟན་པ་ལ་དེ་དང་། བདག་ཉིད་ཟག་པ་མ་ལུས་པ་ཟད་པ་ཉིད་དུ་ཞལ་གྱིས་བཞེས་པ་ལ་རྒོལ་པ་པོ་མེད་པ་སྤངས་པ་ཕུན་ཚོགས་བསྟན་པའི་དེ་རྣམས་སུ་ཡོད་པའི་ཕྱིར། གསུམ་པ་ནི། ཤེས་བྱ་ཆོས་ཅན། སོ་སོ་ཡང་དག་པ་རིག་པ་རྣམ་པ་བཞི་ཡོད་དེ། ཆོས་རྣམས་ཀྱི་མིང་གི་རྣམ་གྲངས་ཆགས་ཐོག་མེད་པར་མཁྱེན་པས་ཆོས་སོ་སོ་ཡང་དག་པའི་རིག་པ་དང་། དེའི་རང་སྤྱིའི་མཚན་ཉིད་ཕྱིན་ཅི་མ་ལོག་པར་མཁྱེན་པ་དོན་གྱི་དེ་དང་། སེམས་ཅན་གྱི་ཡུལ་གྱི་སྐད་ཆགས་ཐོགས་མེད་པར་མཁྱེན་པ་ངེས་ཚིག་གི་དེ་དང་། ཆོས་རྣམས་ཀྱི་ངོ་བོ་དང་རྣམ་པའི་རབ་ཏུ་དབྱེ་བའི་ཡུལ་ལ་མཁྱེན་པ་ཆགས་ཐོགས་མེད་པར་འཇུག་པའི་ཏིང་ངེ་འཛིན་ཤེས་རབ་དང་བཅས་པ་དང་། སྤོབས་པ་སོ་སོ་ཡང་དག་
པའི་རིག་པ་རྣམས་སུ་ཡོད་པའི་ཕྱིར། བཞི་པ་ལ། སྤྱོད་པས་བསྡུས་པ་དྲུག །རྟོགས་པས་བསྡུས་པ་དྲུག །འཕྲིན་ལས་ཀྱིས་བསྡུས་པ་གསུམ། ཡེ་ཤེས་ཀྱིས་བསྡུས་པ་གསུམ་ལས། དང་པོ་ནི། ཤེས་བྱ་ཆོས་ཅན། སངས་རྒྱས་ཀྱི་སྤྱོད་པ་མ་འདྲེས་པའི་རྣམ་པ་དྲུག་ཡོད་དེ། སངས་རྒྱས་ལ་གླངཔོ་ཆེ་གཏུམ་པོ་དང་འགྲོགས་པ་སོགས་ཀྱི་སྐུའི་སྤྱོད་པ་འཁྲུལ་བ་དང་། དོན་མེད་དུ་ནགས་སུ་སྒྲ་འབྱིན་པ་ལྟ་བུ་གསུང་ལ་ཅ་ཅོ་དང་། བརྗེད་ངས་ཀྱི་བྱ་བ་ཤོར་བ་སོགས་དྲན་པ་ཉམས་པ་དང་། སྟོང་པ་ཉིད་ཀྱི་དོན་ལ་ཐུགས་མཉམ་པར་མ་བཞག་པ་དང་། འཁོར་འདས་ལ་བླང་དོར་བདེན་གྲུབ་ཐ་དད་པ་ཉིད་ཀྱི་འདུ་ཤེས་དང་། གདུལ་བྱ་འདུལ་བའི་དུས་ལ་བབ་མ་བབ་སོ་སོར་མ་བརྟགས་པའི་བཏང་སྙོམས་མི་མངའ་བའི་རྣམ་པ་དྲུག་ཡོད་པའི་ཕྱིར། གཉིས་པ་ནི། ཤེས་བྱ་ཆོས་ཅན། སངས་རྒྱས་ཀྱི་རྟོགས་པ་མ་འདྲེས་པ་རྣམ་པ་དྲུག་ཡོད་དེ་གདུལ་བྱའི་དོན་མཛད་པའི་དོན་གཉེར་གྱི་འདུན་པ་དང་། དེ་གང་ཡོད་དུ་གཤེགས་པར་སྤྲོ་བའི་བརྩོན་འགྲུས་དང་། དེའི་དོན་བྱ་བའི་ཐབས་མ་བརྗེད་པའི་དྲན་པ་དང་། དེ་བཞིན་ཉིད་ལ་རྩེ་གཅིག་པའི་ཏིང་ངེ་འཛིན་དང་། ཆོས་རྣམ་འབྱེད་ཀྱི་ཤེས་རབ་དང་། སྒྲིབ་པ་སྤངས་པའི་རྣམ་པར་གྲོལ་བ་ལས་ཉམས་པ་མི་མངའ་བའི་རྣམ་པ་དྲུག་ཡོད་པའི་ཕྱིར། གསུམ་པ་ནི། ཤེས་བྱ་ཆོས་ཅན། སངས་རྒྱས་ཀྱི་འཕྲིན་ལས་མ་འདྲེས་པའི་རྣམ་པ་གསུམ་ཡོད་དེ། སྤྱོད་ལམ་བཞིས་གདུལ་བྱ་འདུལ་པའི་སྐུ་དང་། དོན་ལྡན་གྱི་གཏམ་མཛད་པ་གསུང་གི་འཕྲིན་ལས་དང་བྱམས་པ་དང་སྙིང་རྗེ་སོགས་ཐུགས་ཀྱི་འཕྲིན་ལས་རྣམས་ཡེ་ཤེས་སྔོན་དུ་འགྲོ་ཞིང་། ཡེ་ཤེས་ཀྱི་རྗེས་སུ་འབྲང་བའི་རྣམ་པ་གསུམ་རྣམས་སུ་ཡོད་པའི་ཕྱིར། བཞི་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཤེས་བྱ་ཆོས་ཅན། སངས་རྒྱས་ཀྱི་ཡེ་ཤེས་མ་
འདྲེས་པ་གསུམ་ཡོད་དེ། འདས་པ་དང་། མ་འོངས་པ་དང་། ད་ལྟར་བྱུང་བ་ལ་བཞེད་པ་ཙམ་གྱིས་མཁྱེན་པ་འཇུག་པའི་མ་ཆགས་པ་དང་། རྣམ་པ་ཐམས་ཅད་མངོན་སུམ་དུ་མཁྱེན་པའི་མ་ཐོགས་པའི་ཡེ་ཤེས་ཀྱི་རྣམ་པ་གསུམ་ཡོད་པ་དེ་ལྟར་ཡིན་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །དངོས་པོ་ཡིན་ན། ཁྱོད་ཀྱི་སྐྱེ་གནས་འཇིག་གསུམ་དུས་མཉམ་དུ་གྲུབ་པས་ཁྱབ་ཟེར་ན། མྱུ་གུ་ཆོས་ཅན། དེར་ཐལ། དེའི་ཕྱིར། འདོད་ན། མྱུ་གུ་སྐྱེ་བའི་དུས་ཡིན་ན། དེ་འཇིག་པ་དང་གནས་པའི་དུས་ཡིན་དགོས་པར་ཐལ། འདོད་པའི་ཕྱིར། འདོད་ན། མྱུ་གུའི་དངོས་རྒྱུའི་རང་དུས་ཆོས་ཅན། དེར་ཐལ། དེའི་ཕྱིར། དེར་ཐལ། མྱུ་གུ་མྱུ་གུའི་དངོས་རྒྱུའི་དུས་སུ་སྐྱེ་བའི་ཕྱིར། དེར་ཐལ། མྱུ་གུ་སྐྱེ་བའི་དུས་སྲིད་པ་ནི་གང་ཞིག །མྱུ་གུ་མྱུ་གུའི་དུས་སུ་མི་སྐྱེ་བའི་ཕྱིར། མ་གྲུབ་ན། མྱུ་གུ་དེ་རང་དུས་སུ་རང་གི་རྒྱུ་ལས་སྐྱེ་བར་ཐལ། མ་གྲུབ་པ་དེའི་ཕྱིར། འདོད་ན། རང་དུས་སུ་རང་གི་རྒྱུ་ཡོད་པར་ཐལ། འདོད་པའི་ཕྱིར། འདོད་ན། མྱུ་གུ་ཆོས་ཅན། ཁྱོད་ཀྱི་དུས་སུ་ཁྱོད་ཀྱི་རྒྱུ་མེད་པར་ཐལ། ཁྱོད་འདུས་བྱས་ཡིན་པའི་ཕྱིར། རྩ་བར་འདོད་ན། མྱུ་གུའི་དངོས་རྒྱུའི་དུས་སུ་མྱུ་གུ་ཡོད་པར་ཐལ། དེའི་དུས་སུ་མྱུ་གུ་གནས་པའི་ཕྱིར། དེར་ཐལ། མྱུ་གུའི་རྒྱུའི་དུས་སུ་མྱུ་གུ་སྐྱེ་བར་འདོད་པ་དེའི་ཕྱིར། ཁ་ཅིག །མ་སླེབ་པ་མ་འོངས་པའི་མཚན་ཉིད། ཐལ་ཟིན་པ་འདས་པའི་མཚན་ཉིད། སྐྱེས་ལ་མ་འགགས་པ་ད་ལྟར་བའི་མཚན་ཉིད་ཟེར་ན། རི་བོང་རྭ་ཆོས་ཅན། མཚོན་བྱ་དང་པོ་དེར་ཐལ། མཚན་ཉིད་དེའི་ཕྱིར། དེར་ཐལ། སླེབ་པ་མ་ཡིན་པའི་ཕྱིར། རྩ་བར་འདོད་མི་ནུས་ཏེ། མེད་ངེས་ཡིན་པའི་ཕྱིར། བུམ་པའི་འདས་པ་ཆོས་ཅན། མཚན་ཉིད་གཉིས་པ་དེར་ཐལ། མཚོན་བྱ་དེའི་ཕྱིར། འདོད་ན། རང་
དུས་སུ་ཐལ་ཟིན་པར་ཐལ། འདོད་པ་གང་ཞིག །རང་དུས་སུ་འདས་པ་ཡིན་པའི་ཕྱིར། འདོད་ན། རང་དུས་སུ་མེད་པར་ཐལ། རང་དུས་སུ་ཐལ་ཟིན་པའི་ཕྱིར། འདོད་ན། རང་དུས་སུ་ཡོད་པར་ཐལ། གཞི་གྲུབ་པའི་ཕྱིར། མ་འོངས་པའི་བུམ་པ་ཆོས་ཅན། མཚོན་བྱ་གསུམ་པ་དང་དེར་ཐལ། མཚན་ཉིད་དེའི་ཕྱིར། དེར་ཐལ། སྐྱེས་པ་གང་ཞིག་མ་འགགས་པའི་ཕྱིར། འདོད་མི་ནུས། ཁ་ཅིག །སྐྱེས་ལ་འགགས་པ་འདས་པའི་མཚན་ཉིད། དཔེར་ན་མང་པོས་བཀུར་བའི་རྒྱལ་པོ་ལྟ་བུ། སྐྱེས་ལ་མ་འགགས་པ་ད་ལྟར་བའི་མཚན་ཉིད། དཔེར་ན་ད་ལྟར་བའི་མི་ལྟ་བུ། སྐྱེ་བའི་རྒྱུ་ཡོད་ཅིང་མ་སྐྱེས་པ་མ་འོངས་པའི་མཚན་ཉིད། དཔེར་ན་འཁོར་ལོས་བསྒྱུར་བའི་རྒྱལ་པོ་དུང་ལྟ་བུ་ཟེར་ན། མང་པོས་བཀུར་བའི་རྒྱལ་པོ་ཆོས་ཅན། སྐྱེས་པར་ཐལ། འདས་པ་ཡིན་པའི་ཕྱིར། འདོད་ན། དེ་ཆོས་ཅན། བྱས་པ་ཡིན་པར་ཐལ། འདོད་པའི་ཕྱིར། འདོད་ན། མི་རྟག་པ་ཡིན་པར་ཐལ། འདོད་པའི་ཕྱིར། འདོད་ན། མ་ཡིན་པར་ཐལ། འགགས་པ་ཡིན་པའི་ཕྱིར། དེར་ཐལ། འདས་པ་ཡིན་པའི་ཕྱིར། རྟགས་མཁས། འཁོར་ལོས་བསྒྱུར་བའི་རྒྱལ་པོ་དུང་ཆོས་ཅན། མ་སྐྱེས་པ་ཡིན་པར་ཐལ། མ་འོངས་པ་ཡིན་པའི་ཕྱིར། འདོད་ན། སྐྱེས་པར་ཐལ། བྱས་པ་ཡིན་པའི་ཕྱིར། ཁ་ཅིག །རང་ཉིད་དུས་གང་དུ་འཇོག་པ། དངོས་པོ་གང་གི་དུས་ལ་ལྟོས་ནས་གཞག་དགོས་པའི་ལྟོས་པར་གྱུར་པའི་དངོས་པོ་དེའི་རང་དུས་སུ་ཐལ་ཟིན་པ་དེ་འདས་པའི་མཚན་ཉིད། ཚིག་གོང་མ་རྣམས་སྔར་བཞིན་ལ། དེའི་དུས་སུ་མ་སླེབ་པའི་ཆ་དེ་མ་འོངས་པའི་མཚན་ཉིད། སྐྱེས་ལ་མ་འགགས་པ་ཡང་ཡིན། རང་ཉིད་ཀྱི་དོན་སྤྱི་འཆར་བ་འདས་མ་འོངས་གང་རུང་གྱི་དོན་སྤྱི་འཆར་བ་ལ་མི་ལྟོས་པ་ཡང་ཡིན་པའི་གཞི་མཐུན་དུ་དམིགས་པ་དེ་ད་ལྟར་བའི་མཚན་ཉིད་ཟེར་ན། འོ་ན། འདས་པ་ཡིན་པ་ཡོད་པར་ཐལ། འདོད་པའི་ཕྱིར། འདོད་ན། བུམ་པ་ཞིག་པ་དེ་
འདས་པ་ཡིན་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། མཚན་ཉིད་དེར་ཐལ། འདས་པ་ཡིན་པའི་ཕྱིར། འདོད་ན། དེ་བུམ་པའི་དུས་སུ་ཐལ་ཟིན་པར་ཐལ། འདོད་པའི་ཕྱིར། འདོད་ན། བུམ་པ་དེ་རང་ཉིད་ཀྱི་སྔོན་རོལ་ཏུ་ཞིག་ཟིན་པར་ཐལ། འདོད་པའི་ཕྱིར། འདོད་ན། མ་འོངས་པ་ཡིན་པ་ཡོད་པར་ཐལ། འདོད་པའི་ཕྱིར། འདོད་ན། བུམ་པ་མ་འོངས་པ་དེ་དེ་ཡིན་པར་ཐལ། འདོད་པའི་ཕྱིར། འདོད་ན། བུམ་པ་མ་འོངས་པ་ཆོས་ཅན། མཚན་ཉིད་དེར་ཐལ། མ་འོངས་པ་ཡིན་པའི་ཕྱིར། འདོད་ན། བུམ་པའི་དུས་སུ་མ་སླེབ་པར་ཐལ། འདོད་པའི་ཕྱིར། འདོད་ན། དེ་བུམ་པའི་དུས་སུ་ཐལ་ཟིན་པ་མ་ཡིན་པར་ཐལ། འདོད་པའི་ཕྱིར་། འདོད་ན། བུམ་པ་སྐྱེས་བཞིན་པ་དེ་བུམ་པའི་དུས་སུ་ཐལ་ཟིན་པ་མ་ཡིན་པར་ཐལ། འདོད་པའི་ཕྱིར། བུམ་པ་ཆོས་ཅན། ཁྱོད་སྐྱེ་བཞིན་པ་དེ་ཁྱོད་ཀྱི་དུས་སུ་ཐལ་ཟིན་པར་ཐལ། ཁྱོད་དངོས་པོ་ཡིན་པའི་ཕྱིར། གཉིས་པ་རང་ལུགས་ནི། དུས་དེར་ཞིག་ཟིན་པ་དུས་དེར་འདས་པའི་མཚན་ཉིད། དུས་དེར་སྐྱེས་པ་དང་དུས་དེར་མ་འགགས་པའི་གཞི་མཐུན་པ་དུས་དེར་ད་ལྟར་བའི་མཚན་ཉིད། དུས་དེར་དུས་གསུམ་པོ་གང་རུང་གང་ཞིག །དུས་དེར་མ་སྐྱེས་པ་དང་། དུས་དེར་མ་འགགས་པའི་གཞི་མཐུན་པ་དེ་དུས་དེར་མ་འོངས་པའི་མཚན་ཉིད། གསུམ་པ་རྩོད་པ་སྤོང་པ་ལ། ཁོ་ན་རེ། སྐྱེ་བཞིན་པ་མེད་པར་ཐལ། དངོས་པོ་ཡིན་ན་འགག་བཞིན་པ་ཡིན་དགོས་པའི་ཕྱིར། ཟེར་ན། འོ་ན། སྐྱེ་བ་མེད་པར་ཐལ། དངོས་པོ་ཡིན་ན་སྐྱེས་ཟིན་པས་ཁྱབ་པའི་ཕྱིར། འདོད་ན། སྐྱེ་རྒ་ན་འཆི་མེད་པར་ཐལ་ལོ། །ཡང་ཁོ་ན་རེ། འདས་པ་ཡིན་པ་ཡོད་པར་ཐལ། འདས་པ་ཡོད་པའི་ཕྱིར་ཟེར་ན། འོ་ན། ཤི་བ་ཡིན་པ་ཡོད་པར་ཐལ། ཤི་བ་ཡོད་པའི་ཕྱིར། འདོད་ན། བསྐལ་པ་དང་པོའི་མི་ཤི་བ་ཡིན་པར་ཐལ། འདོད་པའི་ཕྱིར། འདོད་ན།
དེ་ཆོས་ཅན། སྲོག་དབང་དང་མ་ལྡན་པར་ཐལ། འདོད་པའི་ཕྱིར། འདོད་ན། དེ་ཆོས་ཅན། སྲོག་དབང་དང་ལྡན་པར་ཐལ། མི་ཡིན་པའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། སྨྲས་པ། །ཕྲ་ཞིབ་རིགས་པའི་རྒྱ་ནང་དུ། །ཕས་རྒོལ་ཁས་བླངས་རི་དྭགས་ཀུན། །འཇུག་བྱེད་བློ་ཡི་ཤ་བ་རིས། །ཆོས་ཀྱི་གྲགས་པའི་སྙེམས་པ་འཕྲོགས། །མེ་ཏོག་བནྡྷཱུ་ཛི་ཝ་ཀ་ཡི་ཐོད། །འཆང་མིན་དུས་གསུམ་ཀུན་གྱི་གནས་ལུགས་དག །རིགས་པའི་རྩལ་གྱིས་གཏན་ལ་ཕབ་པ་ན། མངོན་ཤེས་ཕལ་ཆེར་རྫུན་གྱི་རང་མཚང་སྟོན། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་ངོ་བོ་ནི། སངས་རྒྱས་ཀྱི་རྒྱུད་ཀྱི་ཇི་ལྟ་བ་མཁྱེན་པའི་ཡེ་ཤེས་ཆོས་ཅན། ཁྱོད་ཀྱི་ངོ་བོ་ཡོད་དེ། སངས་རྒྱས་ཐམས་ཅད་ཀྱིས་བཤད་པའི་དེ་བཞིན་ཉིད་དྲི་མ་ཐམས་ཅད་དང་བྲལ་བ་ལ་སླར་མི་ལྡང་བའི་ཚུལ་གྱིས་མཉམ་པར་བཞག་པའི་ཡེ་ཤེས་དེ་ཡིན་པའི་ཕྱིར། གསུམ་པ་རྟེན་ནི། གཙོ་བོའི་ཤེར་ཕྱིན་ཆོས་ཅན། རང་བྱུང་གང་ཡང་རུང་བ་ལ་བརྟེན་པ་མ་ཡིན་ཏེ། ཆོས་ཐམས་ཅད་ལ་མངའ་བསྒྱུར་བའི་རང་བྱུང་ལ་བརྟེན་པའི་ཕྱིར། བཞི་པ་ནི། རྣམ་མཁྱེན་ཆོས་ཅན། སངས་རྒྱས་ཉིད་ཀྱི་རྣམ་པ་ཡིན་ཏེ། ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་བྱང་ཆུབ་པའི་སངས་རྒྱས་ཉིད་ཀྱི་རྣམ་པ་ཡིན་པའི་ཕྱིར། གསུམ་པ་དོན་བསྡུ་བ་ནི། སངས་རྒྱས་རྣམས་ཀྱི་རྣམ་པ་ཐམས་ཅད་མཁྱེན་པ་ཉིད་ཀྱི་ལམ་གྱི་རྟེན་ཅན་གྱི་རྣམ་པ་ནི་ཆོས་ཅན། ཁྱོད་ལ་སུམ་ཅུ་རྩ་དགུ་ཡོད་དེ། སྔར་བཤད་ཟིན་པ་དེ་ལྟར་ཡིན་པའི་ཕྱིར་རྩ་བའི་དོན་བསྡུ་འཆད་པ་ལ། ངོ་བོའི་དོན་བསྡུ་དང་། གྲངས་ཀྱི་དོན་བསྡུ་གཉིས་ལས། དང་པོ་ལ། ཚིག་དོན་དང་། མཐའ་དཔྱད་པ་གཉིས། དང་པོ་ནི། མཁྱེན་པ་གསུམ་པོ་དེ་ལས་ཐམས་ཅད་ཤེས་པ་ཉིད་ཀྱི་རྣམ་པ་ཉེར་བདུན་ནི་ཆོས་ཅན། ཁྱོད་ལ་རྣམ་པ་གཉིས་ཡོད་དེ། ཁྱོད་ལ་ཉན་ཐོས་དང་
བྱང་ཆུབ་སེམས་དཔའ་ལ་ཡོད་པའི་བྱེ་བྲག་གིས་གོ་རིམ་བཞིན་དུ་ཉོན་སྒྲིབ་སྤང་བྱའི་གཙོ་བོར་བྱེད་པས་ཟག་པ་མེད་པ་དང་། དེ་སྤང་བྱའི་གཙོ་བོར་མི་བྱེད་པས་ཉོན་མོངས་པའི་ཟག་པ་དང་བཅས་པ་གཉིས་དག་ཀྱང་ཡོད་པའི་ཕྱིར། ལམ་ཤེས་པ་ཉིད་ཀྱི་རྣམ་པ་སོ་དྲུག་ནི་ཁྱོད་རྣམ་གྲངས་ཀྱི་ཟག་བཅས་ཁོ་ན་ཡིན་ཏེ། བྱང་ཆུབ་སེམས་དཔའ་རྣམས་ཀྱིས་ཉོན་མོངས་པ་སྤང་བྱའི་གཙོ་བོར་བྱས་ནས་ཤིན་ཏུ་མ་སྤངས་པ་སྟེ་མི་སྤོང་བའི་ཕྱིར། རྣམ་པ་ཐམས་ཅད་མཁྱེན་པ་ཉིད་ཀྱི་ལམ་གྱི་རྣམ་པ་མཐར་ཐུག་པ་བརྒྱ་དང་བཅུ་ནི་ཆོས་ཅན། ཟག་པ་མེད་པའི་ལམ་གྱི་རྣམ་པ་ཁོ་ན་དག་ཡིན་ཏེ། ཡང་དག་པར་རྫོགས་པའི་སང་རྒྱས་ཀྱིས་ཉོན་མོངས་པ་དང་ཤེས་བྱའི་སྒྲིབ་པ་བག་ཆགས་དང་བཅས་ཏེ་རྣམ་པ་ཐམས་ཅད་དུ་སྤངས་པས་ཁྱོད་ཀྱིས་ཆོས་ཐམས་ཅད་ལ་མངའ་བསྒྱུར་བའི་ཕྱིར། གཉིས་པ་མཐའ་དཔྱད་པ་ལ། ཁ་ཅིག །རང་རྒྱལ་སློབ་པ་འཕགས་པས་ཉོན་སྒྲིབ་སྤང་བྱའི་གཙོ་བོར་བྱས་ནས་སྤོང་ཟེར་ན། རང་རྒྱལ་སློབ་པ་འཕགས་པས་གང་ཟག་གི་བདག་འཛིན་སྤང་བྱའི་གཙོ་བོར་བྱས་ནས་སྤོང་བར་ཐལ། འདོད་པའི་ཕྱིར། འདོད་ན། དེས་གང་ཟག་གི་བདག་མེད་བསྒོམ་བྱའི་གཙོ་བོར་བྱས་ནས་སྒོམ་པར་ཐལ། འདོད་པའི་ཕྱིར། འདོད་ན། ཉན་རང་གཉིས་ལྟ་བ་མཚུངས་པར་ཐལ། འདོད་པའི་ཕྱིར། འདོད་ན། ཉན་ཐོས་དང་སེམས་ཙམ་པ་གཉིས་ལྟ་བ་མཚུངས་པར་ཐལ། འདོད་པའི་ཕྱིར། འདོད་མི་ནུས། གཉིས་པ་ནི། ཤེས་བྱ་ཆོས་ཅན། རྣམ་པ་རྣམས་གཅིག་ཏུ་བསྡོམས་ན་བརྒྱ་བདུན་ཅུ་རྩ་གསུམ་ཡོད་དེ། དེ་ལྟར་སྔར་བཤད་ཟིན་པ་དེའི་ཕྱིར། གཉིས་པ་ལ་བདེན་འཛིན་དངོས་སུ་འཇོམས་བྱེད་ཀྱི་སྦྱོར་བ་ཁྱད་པར་ཅན་བཤད་པ་ལ་གཉིས། དགེ་རྩ་གསོག་པའི་རྟེན་གྱི་གང་ཟག་དང་། སྦྱོར་བ་དངོས་བཤད་པའོ། །དང་པོ་ལ། མཚམས་སྦྱར་བ། རྩ་བ། འགྲེལ་པ་
གསུམ་ལས། དང་པོ་ནི། ཤེས་བྱ་ཆོས་ཅན། སྔར་བཤད་པའི་སྦྱོར་བ་དེ་དག་ཀྱང་སྦྱོར་བ་བསྒོམས་པ་པོ་བསྟན་པ་མེད་པར་བརྗོད་པར་མི་ནུས་པས་ཉན་པ་ལ་སོགས་པའི་སྣོད་དང་། སྦྱོར་བ་སྒོམ་པ་པོའི་རྟེན་གྱི་གང་ཟག་དེ་འཆད་ཚུལ་ཡོད་དེ། འོག་ཏུ་འཆད་པར་འགྱུར་བའི་སྦྱོར་བ་ཁྱད་པར་ཅན་དག་གིས་རྣམ་པ་རྣམས་སྒོམ་དགོས་པས་ཚིག་འོག་མས་འཆད་པའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། བྱང་སེམས་ཚོགས་ལམ་པ་ཆོས་ཅན། གཞུང་ལམ་འབྲས་བུ་ཤེར་ཕྱིན་འདི་མཉན་པའི་སྣོད་ཡིན་ཏེ། སྔོན་སངས་རྒྱས་རྣམས་ལ་བཀུར་སྟི་ལྷག་པར་བྱས་པ་དང་། སངས་རྒྱས་དེ་ལ་བསོད་སྙོམས་འབུལ་བ་སོགས་དགེ་བའི་རྩ་བ་བསྐྲུན་པ་དང་། ཐེག་ཆེན་གྱི་དགེ་བའི་བཤེས་གཉེན་གྱི་མགོན་དང་བཅས་པ་ཡིན་པའི་ཕྱིར། དེ་ཆོས་ཅན་། ཡུམ་འདིའི་གཞུང་དོན་བློ་ལ་ལེན་པ་དང་། དོན་འཛིན་པ་ལ་སོགས་པའི་སྣོད་དུ་དམ་པ་རྣམས་བཞེད་པ་ཡིན་ཏེ། དེའི་ཆེད་དུ་སངས་རྒྱས་གྲངས་མེད་ཡོངས་འཛིན་དུ་བསྟེན་པ་དང་། ཚིག་དོན་ཀུན་འདྲི་བ་དང་། དྲིས་པའི་དོན་སྦྱིན་པ་དང་ཚུལ་ཁྲིམས་སོགས་ཕར་ཕྱིན་དྲུག་ཚུལ་བཞིན་དུ་སྤྱོད་པའི་སྒོ་ནས་སྒོམ་པར་བྱེད་པའི་གང་ཟག་ཡིན་པའི་ཕྱིར། གཉིས་པ་མཐའ་དཔྱད་པ་ལ། ཁ་ཅིག །སྦྱོར་བ་སྒོམ་པའི་ཕྱི་ནང་གི་རྐྱེན་གཉིས་དང་ལྡན་པའི་སེམས་དཔའ་དེ་སྦྱོར་བ་སྒོམ་པའི་རྟེན་གྱི་གང་ཟག་གི་མཚན་ཉིད་ཟེར་ན། ཉན་ཐོས་ཚོགས་ལམ་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཉན་ཐོས་ཀྱི་སྦྱོར་བ་སྒོམ་པའི་རྟེན་གྱི་གང་ཟག་ཡིན་པའི་ཕྱིར། ཁ་ཅིག །ཡུམ་ཉན་པའི་སྣོད་ཡིན་ན། ཡུམ་ཉན་པའི་སྣོད་རུང་ཡིན་པས་ཁྱབ་ཟེར་ན། སེམས་ཙམ་པར་གྱུར་བའི་བྱང་སེམས་ཚོགས་ལམ་པ་ཆོས་ཅན། དེར་ཐལ། དེའི་ཕྱིར། དེར་ཐལ། དེ་ཡོད་པའི་ཕྱིར། དེར་ཐལ། དེར་གྱུར་པའི་ཉན་
ཐོས་ཡོད་པའི་ཕྱིར། དེར་ཐལ། ཉན་ཐོས་རྣམས་རང་གི་སྟོན་པ་ལས་ཐེག་ཆེན་གྱི་ཆོས་ཐོས་ནས་གཞན་ལ་སྒྲོགས་པར་བྱེད་པ་ཙམ་ཡིན་པའི་ཕྱིར། དེར་ཐལ། དམ་ཆོས་པད་དཀར་ལས། མགོན་པོ་དེ་རིང་བདག་ཅག་ཐོས་སྒྲོགས་གྱུར། །བྱང ་ཆུབ་དམ་པ་ཡང་དག་བསྒྲག་པར་བགྱི། །བྱང་ཆུབ་པ་ཡི་སྒྲ་ཡང་རབ་ཏུ་བརྗོད། །དེ་བས་བདག་ནི་ཐོས་སྒྲོགས་མི་ཟད་འདྲ། །ཞེས་གསུངས་པའི་ཕྱིར། གཉིས་པ་རང་ལུགས་ནི། སྦྱོར་བ་སྒོམ་པའི་ཕྱི་ནང་གི་རྐྱེན་གཉིས་དང་ལྡན་པའི་སེམས་དཔའ་དེ། སྐབས་འདིར་དངོས་སུ་བསྟན་པའི་སྦྱོར་བ་སྒོམ་པའི་རྟེན་གྱི་གང་ཟག་གི་མཚན་ཉིད། གསུམ་པ་ནི། བྱང་སེམས་ཚོགས་ལམ་པ་རྣམས་ནི་ཆོས་ཅན། གོ་རིམ་ཇི་ལྟ་བར་ཤེས་རྣམ་བརྒྱ་བདུན་ཅུ་རྩ་གསུམ་གྱི་རྣམ་པའི་མཚན་ཉིད་ཅན་གྱི་ཡུམ་འདིའི་གཞུང་ཉན་པ་དང་། འཛིན་པ་དང་། དོན་མི་བརྗེད་པ་དང་། ཚུལ་བཞིན་ཡིད་ལ་བྱེད་པའི་སྣོད་ཉིད་ཡིན་པར་སངས་རྒྱས་ལ་སོགས་པ་བཞེད་པ་ཡིན་ཏེ། འདས་པ་དང་ད་ལྟར་བྱུང་བའི་སངས་རྒྱས་རྣམས་ལ་སྤྱིར་གཙུག་ལག་ཁང་འབུལ་བ་ལ་སོགས་པའི་དགེ་བའི་རྩ་བ་བསྐྲུན་ཅིང་སྦྱངས་པ་དང་། དེ་བཞིན་གཤེགས་པ་ལ་སོགས་པ་རྣམས་ལ་ལུས་ལ་སོགས་པའི་བསྙེན་བཀུར་གྱིས་མཉེས་པར་བྱ་བ་དང་། དེ་བཞིན་གཤེགས་པ་ལ་ཐེ་ཚོམ་གྱི་དོན་ཡོངས་སུ་འདྲི་བ་དང་། དྲིས་པའི་དོན་སྦྱིན་པ་ལ་སོགས་པའི་ཕ་རོལ་དུ་ཕྱིན་པ་བཅུ་སྒྲུབ་པ་དང་ལྡན་པ་དང་། ཐེག་ཆེན་གྱི་དགེ་བའི་བཤེས་གཉེན་དག་གིས་བྱིན་གྱིས་བརླབས་པའི་སེམས་དཔའ་ཡིན་པའི་ཕྱིར། གཉིས་པ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། དེ་ལྟར་སྦྱོར་བ་པོ་བསྟན་ནས། སྦྱོར་བ་དག་འཆད་ཚུལ་ཡོད་དེ། གཞུང་འོག་མས་འཆད་པའི་ཕྱིར། གཉིས་པ་ལ། སྦྱོར་བ་རང་
གི་ངོ་བོའི་སྒོ་ནས་དབྱེ་བ། རྟེན་གྱི་གང་ཟག་གི་སྒོ་ནས་དབྱེ་བ། སྦྱོར་བ་རྫོགས་པའི་ཐབས་ཀྱི་སྒོ་ནས་དབྱེ་བ། འབྲས་བུ་དང་དུས་ཀྱི་སྒོ་ནས་དབྱེ་བའོ། །དང་པོ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཤེས་བྱ་ཆོས་ཅན། འདིར་བསྟན་སྦྱོར་བ་ལ་ངོ་བོའི་སྒོ་ནས་དབྱེ་ན་ལྔ་ཡོད་དེ། ཡུལ་བདེན་ཞེན་འགོག་པ་གཟུགས་ལ་སོགས་ལ་མི་གནས་པའི་སྦྱོར་བ་དང་། ཡུལ་ཅན་དེ་ལ་བདེན་པར་སྦྱོར་བ་བཀག་པའི་སྦྱོར་བ་དང་། གཞི་དེ་ཡི་དེ་བཞིན་ཉིད་ཟབ་པའི་སྦྱོར་བ་དང་། ལམ་དེ་རྣམས་ཀྱི་ཆོས་ཉིད་གཏིང་དཔག་དཀའ་བའི་སྦྱོར་བ་དང་། རྣམ་པ་དེ་དག་གི་ཆོས་ཉིད་ཚད་ནི་མེད་པར་རྟོགས་པའི་སྦྱོར་བ་རྣམས་སུ་ཡོད་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་གཉིས་ལས། དང་པོ་ལ། ཁ་ཅིག །ཚེགས་ཆེན་ཡུན་རིང་རྟོགས་པའི་སྦྱོར་བ་ཡིན་ན། སྟོང་ཉིད་མ་རྟོགས་པས་ཁྱབ་ཟེར་ན། སྟོང་ཉིད་སྐྲག་པ་ཆེན་པོའི་སྒོ་ནས་རྟོགས་པའི་ཐེག་ཆེན་གྱི་ཚོགས་ལམ་ཆོས་ཅན། དེར་ཐལ། དེའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། རྩ་བར་འདོད་མི་ནུས། ཁ་ཅིག །ལུང་བསྟན་པའི་སྦྱོར་བ་ཡིན་ན། དངོས་སུ་ལུང་བསྟན་པའི་སྦྱོར་བ་ཡིན་པས་ཁྱབ་ཟེར་ན། དམན་ལམ་སྔོན་དུ་མ་སོང་པའི་ཐེག་ཆེན་གྱི་སྦྱོར་ལམ་དྲོད་ལ་གནས་པའི་ཡེ་ཤེས་ཆོས་ཅན། དེར་ཐལ། དེའི་ཕྱིར། འདོད་ན། དེ་འདྲའི་བྱང་སེམས་དེ་དངོས་སུ་ལུང་བསྟན་པ་ཐོབ་པའི་བྱང་སེམས་ཡིན་པར་ཐལ། འདོད་པའི་ཕྱིར། འདོད་ན། མ་ཡིན་པར་ཐལ། སོ་སྐྱེ་ཡིན་པའི་ཕྱིར། ཁ་ཅིག །སྟོང་ཉིད་རྟོགས་པའི་ཞི་ལྷག་ཟུང་འབྲེལ་གྱི་སེམས་དཔའི་རྣལ་འབྱོར་སེམས་པའི་སྦྱོར་བའི་མཚན་ཉིད་ཟེར་ན། སྟོང་ཉིད་མ་རྟོགས་པའི་བྱང་སེམས་ཚོགས་ལམ་པའི་མཁྱེན་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། ཆོས་ཅན་དེ་ཡིན་པའི་ཕྱིར། ཁ་ཅིག །ཡུལ་ཅན་
བདེན་སྟོང་སྤྲོས་བྲལ་དུ་སྒོམ་པའི་ཞི་ལྷག་ཟུང་འབྲེལ་གྱི་སེམས་དཔའི་རྣལ་འབྱོར་སྐབས་འདིར་དངོས་སུ་བསྟན་པའི་གཙོ་བོ་སྦྱོར་བའི་མཚན་ཉིད་ཟེར་ན། ཉན་ཐོས་དགྲ་བཅོམ་གྱི་རྟོགས་པ་སྔོན་དུ་སོང་བའི་ཐེག་ཆེན་གྱི་མཐོང་ལམ་སྡུག་བསྔལ་ཆོས་བཟོད་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། འདོད་མི་ནུས་ཏེ། ཉན་ཐོས་ཀྱི་རྟོགས་པ་སྔོན་སོང་ཡིན་པའི་ཕྱིར། གཉིས་པ་རང་ལུགས་ནི། ཡུལ་ཡུལ་ཅན་གཞི་ལམ་རྣམ་གསུམ་བདེན་སྟོང་སྤྲོས་བྲལ་དུ་སྒོམ་པའི་ཞི་ལྷག་ཟུང་འབྲེལ་ཐོབ་པའི་འདིའི་དངོས་བསྟན་གྱི་སེམས་དཔའི་རྣལ་འབྱོར་སྐབས་འདིར་དངོས་སུ་བསྟན་པའི་གཙོ་བོ་སྦྱོར་བའི་མཚན་ཉིད་། ས་མཚམས་ཐེག་ཆེན་གྱི་སྦྱོར་ལམ་དྲོད་ནས་ས་བཅུ་པའི་བར་དུ་ཡོད། གཉིས་པ་ནི། ཤེས་བྱ་ཆོས་ཅན། དེ་ལ་རྟེན་གྱི་སྒོ་ནས་དབྱེ་ན་བརྒྱད་ཡོད་དེ། ཚེགས་ཆེན་ཡུན་རིང་རྟོགས་པའི་སྦྱོར་བ། ལུང་བསྟན་ཐོབ་པའི་དེ། ཕྱིར་མི་ལྡོག་པ་ཉིད་ཀྱི་དེ། ངེས་འབྱུང་གི་དེ། བར་ཆད་མེད་བཅས་ཀྱི་དེ། བྱང་ཆུབ་ལ་ཉེ་བའི་དེ། སངས་རྒྱས་མྱུར་དུ་འཐོབ་བའི་དེ། གཞན་དོན་གྱི་དེ་དང་བརྒྱད་ཡོད་པའི་ཕྱིར། གསུམ་པ་ནི། ཤེས་བྱ་ཆོས་ཅན། དེ་ལ་སྦྱོར་བ་རྫོགས་པའི་ཐབས་ཀྱི་སྒོ་ནས་དབྱེ་ན་བཞི་ཡོད་དེ། འཕེལ་མེད་འགྲིབ་མེད་ཀྱི་སྦྱོར་བ། ཆོས་དང་ཆོས་མིན་སོགས་མི་མཐོང་བའི་དེ། གཟུགས་ལ་སོགས་བསམ་མི་ཁྱབ་མི་མཐོང་བའི་དེ། གཟུགས་སོགས་དང་གཟུགས་རུང་དེ་ཡི་མཚན་མ་དང་དེ་ཡི་མཚོན་བྱའི་ངོ་བོ་ཉིད་དུ་བདེན་པར་རྣམ་པར་མི་རྟོག་པའི་སྦྱོར་བ་རྣམས་སུ་ཡོད་པའི་ཕྱིར། བཞི་པ་ནི། འདིར་བསྟན་སྦྱོར་བ་དེ་ནི་ཆོས་ཅན། འབྲས་བུ་དང་དུས་ཀྱི་སྒོ་ནས་གསུམ་ཡོད་དེ། འབྲས་བུ་རིན་ཆེན་སྦྱིན་བྱེད་ཀྱི་སྦྱོར་བ། ཉེས་པ་སེལ་བ་དག་པའི་དེ། མྱུར་དུ་བསྒོམས་པས་ས་མཚམས་དང་བཅས་པའི་སྦྱོར་བ་རྣམས་སུ་ཡོད་
པའི་ཕྱིར། གསུམ་པ་འགྲེལ་པ་ནི། བྱང་སེམས་ཀྱི་སྦྱོར་ལམ་མཉམ་གཞག་ཡེ་ཤེས་ཆོས་ཅན། ཁྱོད་གྲངས་བཞིན་དུ་གཟུགས་ལ་སོགས་པ་དོན་དམ་པར་མི་གནས་པའི་སྦྱོར་བ་དང་། ཡུལ་ཅན་ལ་བདེན་ཞེན་འགོག་པ་མི་སྦྱོར་བ་དང་། ཟབ་པ་དང་། གཏིང་དཔག་དཀའ་བ་དང་། ཚད་མེད་པའི་སྦྱོར་བ་སྟེ་ལྔ་ཡིན་ཏེ། གཟུགས་ལ་སོགས་པ་ལ་ངོ་བོ་ཉིད་མེད་པ་ཉིད་ཀྱིས་མི་གནས་པ་དང་། གཟུགས་སོགས་དེ་དག་ལ་དོན་དམ་པར་མི་སྦྱོར་བ་ཉིད་གནས་ལུགས་ཀྱི་དོན་སྦྱོར་བ་ཡིན་པ་དང་། གཟུགས་སོགས་དེ་དག་ཉིད་བདེན་སྟོང་དེ་བཞིན་ཉིད་ཀྱི་ངོ་བོ་ཉིད་ཀྱི་གཞིའི་ཆོས་ཉིད་ཟབ་པ་དང་། ལམ་གྱི་ཆོས་ཉིད་གཏིང་དཔག་དཀའ་བ་དང་། རྣམ་པའི་ཆོས་ཉིད་ཚད་མེད་པ་ཞེས་བྱ་བ་དེ་ལྟར་རྟོགས་པ་རྣམས་ཀྱི་དེ་ལྟར་ཡོད་པའི་ཕྱིར། བྱང་སེམས་ཚོགས་ལམ་པ་དབང་རྟུལ་གྱི་མཁྱེན་པ་ཆོས་ཅན། ཚེགས་ཆེན་པོས་ཡུན་རིང་པོ་ཞིག་ནས་མངོན་པར་རྫོགས་པར་འཚང་རྒྱ་བའི་སྦྱོར་བ་ཡིན་ཏེ། གནས་ལུགས་ཀྱི་དོན་རྟོགས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྐྲག་པ་མངོན་གྱུར་ཤས་ཆེར་འབྱུང་བའི་ལས་དང་པོ་པའི་རྒྱུད་ཀྱི་སྦྱོར་བ་ཡིན་པའི་ཕྱིར། ཐེག་ཆེན་གྱི་སྦྱོར་ལམ་དྲོད་ནི་ཆོས་ཅན། ལུང་བསྟན་ཐོབ་པའི་སྦྱོར་བ་ཡིན་ཏེ། ཆོས་ཉིད་ལ་མི་སྐྲག་པ་དང་ལྡན་པས་ཁྱད་པར་དུ་བྱས་པའི་སྦྱོར་བ་ཡིན་པའི་ཕྱིར། ཐེག་ཆེན་གྱི་སྦྱོར་ལམ་རྩེ་མོ་ཆོས་ཅན། ཕྱིར་མི་ལྡོག་པ་ཉིད་ཀྱི་སྦྱོར་པ་ཡིན་ཏེ། དྲོད་ལས་ཁྱད་པར་དུ་འཕགས་ཤིང་། ཡུམ་དོན་ཐོས་སོགས་ཀྱིས་ཡང་དག་པར་འཛིན་པའི་སྦྱོར་བ་ཡིན་པའི་ཕྱིར། བཟོད་པ་ནི་ཆོས་ཅན། ངེས་པར་འབྱུང་བའི་སྦྱོར་བ་ཡིན་ཏེ། ཉན་རང་ཡིད་བྱེད་སོགས་བར་ཆད་ཀྱི་ཆོས་སྤོང་བའི་བྱང་སེམས་ཀྱི་སྒྲུབ་པ་ཡིན་པའི་ཕྱིར། ཆོས་མཆོག་ནི་ཆོས་ཅན། བར་ཆད་མེད་པའི་སྦྱོར་བ་ཡིན་ཏེ། མཐོང་ལམ་གྱི་དངོས་རྒྱུ་བྱེད་པས་རྟག་ཏུ་ཆོས་སྒོམ་པའི་ཐེག་ཆེན་
གྱི་ངེས་འབྱེད་ཆ་མཐུན་བཞི་པ་ཡིན་པའི་ཕྱིར། ཐེག་ཆེན་གྱི་མཐོང་ལམ་ཆོས་ཅན། ཡང་དག་པར་རྫོགས་པའི་བྱང་ཆུབ་ལ་ཉེ་བའི་སྦྱོར་བ་ཡིན་ཏེ། ཐེག་ཆེན་གྱི་ལམ་ཟག་པ་མེད་པའི་ཆོས་གསར་གྱི་རྟེན་ཡིན་པའི་ཕྱིར། གཉིས་པ་ནས་བདུན་པའི་བར་གྱི་ཡེ་ཤེས་ཆོས་ཅན། མྱུར་དུ་མངོན་པར་རྫོགས་པར་བྱང་ཆུབ་པའི་སྦྱོར་བ་ཡིན་ཏེ། འབྲས་བུ་ཆོས་ཀྱི་སྐུ་མྱུར་དུ་འགྲུབ་པའི་སྦྱོར་བ་ཡིན་པའི་ཕྱིར། བརྒྱད་པའི་ཡེ་ཤེས་ཆོས་ཅན། གཞན་དོན་གྱི་སྦྱོར་བ་ཡིན་ཏེ། རིགས་ཅན་གསུམ་ལ་ཆོས་ཀྱི་འཁོར་ལོ་རབ་ཏུ་བསྐོར་བའི་ནུས་པ་ཐོབ་པའི་དག་སའི་ཡེ་ཤེས་ཡིན་པའི་ཕྱིར། དེ་ཆོས་ཅན། འཕེལ་བ་དང་འགྲིབ་པ་མེད་པའི་སྦྱོར་བ་ཡིན་ཏེ། དོན་དམ་པར་འཕེལ་བ་དང་འགྲིབ་པ་མི་མཐོང་བའི་དག་སའི་ཡེ་ཤེས་ཡིན་པའི་ཕྱིར། དེ་ཆོས་ཅན། ཆོས་དང་ཆོས་མ་ཡིན་པ་ལ་སོགས་པ་དོན་དམ་པར་མི་དམིགས་པའི་སྦྱོར་བ་ཡིན་ཏེ། དོན་དམ་པར་ཆོས་གང་ཡང་འདོད་པའི་ཁམས་སུ་མི་དམིགས་པའི་དག་སའི་ཡེ་ཤེས་ཡིན་པའི་ཕྱིར། དེ་ཆོས་ཅན། ཁྱོད་གཟུགས་ལ་སོགས་པ་བསམ་གྱིས་མི་ཁྱབ་པའི་རྣམ་པ་འགོག་པའི་སྦྱོར་བ་ཡིན་ཏེ། ཁྱོད་གཟུགས་ལ་སོགས་པ་བསམ་གྱིས་མི་ཁྱབ་པའི་རྣམ་པར་བདེན་པར་རློམ་པ་མེད་པའི་དག་སའི་ཡེ་ཤེས་ཡིན་པའི་ཕྱིར། དེ་ཆོས་ཅན། གཟུགས་ལ་སོགས་པའི་དངོས་པོ་དོན་དམ་པར་རྣམ་པར་མི་རྟོག་པའི་སྦྱོར་བ་ཡིན་ཏེ། མཚན་གཞི་གཟུགས་དང་གཟུགས་རུང་དེའི་མཚན་མ་དང་མཚོན་བྱ་དེའི་ངོ་བོ་ཉིད་དུ་བདེན་པར་རྣམ་པར་མི་རྟོག་པའི་དག་སའི་ཡེ་ཤེས་ཡིན་པའི་ཕྱིར། དགུ་པ་ཡེ་ཤེས་ཆོས་ཅན། འབྲས་བུ་རིན་པོ་ཆེ་སྦྱིན་པར་བྱེད་པའི་སྦྱོར་བ་ཡིན་ཏེ། འབྲས་བུ་དང་པོ་རྒྱུན་ཞུགས་སོགས་མཐོང་བ་སྟེ། གདུལ་བྱ་གཞན་དེ་ལ་འགོད་པའི་དག་སའི་ཡེ་ཤེས་ཡིན་པའི་ཕྱིར། བཅུ་པའི་ཡེ་
ཤེས་ཆོས་ཅན། རྣམ་པར་དག་པའི་སྦྱོར་བ་ཡིན་ཏེ། གཟུགས་ནས་རྣམ་མཁྱེན་གྱི་བར་རྣམ་པར་དག་པ་སྒོམ་པའི་དག་སའི་ཡེ་ཤེས་ཡིན་པའི་ཕྱིར། ཡུམ་མྱུར་དུ་སྒོམ་པའི་སེམས་དཔའི་རྣལ་འབྱོར་ཆོས་ཅན། ས་མཚམས་ལ་སྦྱོར་བ་ཡིན་ཏེ། ཁྱོད་ཞག་དང་། ཟླ་བ་དང་། ལོ་སྐོར་དུ་མངོན་པར་བརྩོན་པ་མི་འདོར་བ་ཞེས་བྱ་བ་ལ་སོགས་པ་སྒྲུབ་པ་དང་ལྡན་པ་རྣམས་ཀྱི་སེམས་དཔའི་རྣལ་འབྱོར་ཡིན་པའི་ཕྱིར། ཤེས་བྱ་ཆོས་ཅན། འདིར་བསྟན་སྦྱོར་པ་ལ་ཉི་ཤུ་ཡོད་དེ། རང་བཞིན་གྱི་སྦྱོར་བ་ལྔ་དང་། གནས་སྐབས་ཀྱི་སྦྱོར་བ་རྣམ་པ་བཅོ་ལྔ་རྣམས་སུ་ཡོད་པའི་ཕྱིར།