བཀའ་བརྒྱད་བདེ་གཤེགས་འདུས་པའི་ལས་བྱང་ཁྲག་འཐུང་རོལ་བའི་གད་བརྒྱངས།
བཀའ་བརྒྱད་བདེ་གཤེགས་འདུས་པའི་ལས་བྱང་ཁྲག་འཐུང་རོལ་བའི་གད་བརྒྱངས་བཞུགས་སོ། །
ན་མཿཤནྟཤྩ་ཀྲོ་དྷཱ་ནཱཾ་དེ་ཝ་ས་མཱ་ཛ་སྱ་ཙཀྲཱ་ཡ། ཆོས་སྐུ་གདོད་ནས་འདུ་མ་བྱས་པ་ཀ་ནས་ཡོངས་དག་རིག་རྩལ་གདངས། །འགག་མེད་རྣམ་དག་མཁའ་དབྱིངས་ངོས་སུ་ཞི་ཁྲོའི་དཀྱིལ་འཁོར་ལོངས་སྤྱོད་རྫོགས། །གང་འདུལ་སྤྲུལ་པའི་སྒྱུ་འཕྲུལ་གར་མཁན་བདེ་བཤེགས་ཀུན་འདུས་བཀའ་བརྒྱད་ལྷ། །སྤྲོ་དང་སྡུད་མཛད་རིགས་བརྒྱའི་ཁྱབ་བདག་པདྨ་ཐོད་འཕྲེང་གཏན་གྱི་སྐྱབས། །ཆེ་མཆོག་བདུད་རྩིའི་བཀའ་བབས་གཉགས་བན་རྗེ། །གདུལ་དཀའི་འགྲོ་ལ་རྗེས་ཆགས་གཤེས་གཉེན་ཚུལ། །ཟུར་ཆེན་ཆོས་དབྱིངས་རང་གྲོལ་ཐམས་ཅད་མཁྱེན། །རྩ་བའི་བླ་མ་སྙིང་དབུས་པད་མཚོར་བཞུགས། །བག་ཡོད་ཞིག་པོར་མཚར་འཛིན་ཕག་རྒོད་ཁྱུ། །རིགས་མཐུན་རྨོངས་པའི་ནགས་སུ་རྒྱུ་མིན་པར། །ཆོས་ཀྱི་རྒྱལ་པོ་མངའ་བདག་ཉང་རལ་གཏེར། །ཐོས་བསམ་སྒོམ་པ་བསོད་ནམས་ཟོང་གི་བསྒྲུབས། །སྒྲུབ་ཆེན་སྐབས་ཀྱི་དུས་བཞིར་གྱེར་བ་དང་། ཁྲོ་བོ་རོལ་པ་སོགས་ལ་ཉེར་མཁོ་བ། །ལས་བྱང་གཏེར་བྱུང་དགོངས་དོན་མ་འཆུགས་པར། །ཚིག་ཉུང་དོན་རྒྱས་བློ་གསལ་མགུལ་པའི་རྒྱན། ཁོ་བོའི་བློ་གྲོས་ཕྲ་ཡང་བརྒྱུད་ལྡན་གྱི། །གསུང་འཕྲོས་ཅུང་ཟད་ཟིན་ཕྱིར་འདྲི་བ་ལ། །འབར་མ་སྡེ་དཔོན་སུམ་ཅུ་གཏེར་(༢ན)
སྲུང་སོགས། །དམ་ཅན་རྒྱ་མཚོ་དགྱེས་མགུར་གནང་བ་སྩོལ། །ལས་བྱང་འབྲིང་པོའི་དོན་བསྡུས་སྦྱོར་དངོས་རྗེས། །སྦྱོར་བ་སྐྱབས་སེམས་ཚོགས་བསག་རྡོར་བཟླས་དང་། །མཚམས་གཅོད་བརྡ་སྒོ་བརྡ་ཕྱག་བཤགས་དམ་བཅའ། །དབབ་བརླབ་རིམ་པའི་དང་པོ་སྐྱབས་འགྲོ་ནི། །བདག་དང་ནམ་མཁའི་མཐའ་མཉམ་སེམས་ཅན་རྣམས། །དེང་ནས་ཀུན་བཟང་རང་ངོ་མ་འཕྲོད་བར། །རྒྱལ་བ་དགོངས་རྒྱུད་རིགས་འཛིན་བརྡ་བརྒྱུད་དང་། །གང་ཟག་སྙན་བརྒྱུད་སྨོན་ལམ་དབང་བསྐུར་བརྒྱུད། །གཏད་རྒྱ་ལུང་བསྟན་ལས་འཕྲོ་གཏེར་གྱི་བརྒྱུད། །ཤོག་སེར་ཚིག་གི་བརྒྱུད་པ་ལ་སོགས་པའི། །དངོས་དང་བརྒྱུད་པའི་བླ་མ་མ་ལུས་པ། །བྱིན་རླབས་རྩ་བར་ངེས་པས་སྐྱབས་སུ་མཆི། །ཞི་བ་བཞི་བཅུ་གཤིན་རྗེ་དབང་ཆེན་དང་། །ཡང་དག་ཆེ་མཆོག་ཕུར་པ་མངོན་རྫོགས་རྒྱལ། །དྲེགས་འདུལ་སྟོབས་ལྡན་ཡི་དམ་ཞི་ཁྲོའི་ཚོགས། །དངོས་གྲུབ་རྩ་བར་ངེས་ནས་སྐྱབས་སུ་མཆི། །གནས་གསུམ་དཔའ་བོ་མཁའ་འགྲོ་མ་ལུས་དང་། །འབར་མ་ཆེན་མོ་དྲེགས་པའི་སྡེ་དཔོན་སོགས། །ཆོས་སྐྱོང་གཏེར་བདག་དམ་ཅན་རྒྱ་མཚོ་རྣམས། །བར་ཆད་སེལ་བར་ངེས་ནས་སྐྱབས་སུ་མཆི། །མདོར་ན་བསྐྱབ་(༢བ)
བྱ་སྐྱབ་བྱེད་མ་ལུས་པ། །རང་བྱུང་རང་ཤར་རིག་པའི་རང་རྩལ་ཏེ། །གནས་ལུགས་རང་ངོ་ཤེས་པའི་ངང་ཉིད་ནས། །དཀོན་མཆོག་རྩ་བ་གསུམ་ལ་སྐྱབས་སུ་མཆི། །གཉིས་པ་གཞན་དོན་བྱང་ཆུབ་སེམས་བསྐྱེད་པ། །ཡེ་ནས་ཆོས་སྐུ་རང་རིག་ཀུན་དུ་བཟང་། །རང་ངོ་མ་འཕྲོད་འཁོར་འཕྱན་འགྲོ་བ་རྣམས། །རྐང་འཁྱམས་རྒྱལ་བུ་རྒྱལ་སར་འདོན་པ་ལྟར། །རང་ངོ་སྤྲོད་ཕྱིར་བྱང་ཆུབ་སེམས་བསྐྱེད་དོ། །གསུམ་པ་བསོད་ནམས་ཚོགས་ཆེན་སྤེལ་བ་ནི། །རང་ཉིད་དཔལ་ཆེན་ཞལ་གཅིག་ཕྱག་གཉིས་པར། །གསལ་བའི་ཐུགས་ཀའི་ཧཱུཾ་ལས་འོད་འཕྲོས་པས། །བླ་མ་སྒྲུབ་སྡེ་བརྒྱད་ཀྱི་ལྷ་ཚོགས་རྣམས། །འདིར་གཤེགས་ཉི་ཟླ་པདྨའི་གདན་ལ་བཞུགས། །རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་ཞུགས་ལ་ཕྱག་འཚལ་ལོ། །མཆོག་གསུམ་སྟོན་པའི་ཞིང་གྱུར་ལ། །གཉིས་མེད་ཡིད་ཀྱི་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་བའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་བགེགས། །ཉེས་བྱས་མ་ལུས་བཤགས་པར་གྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་དབང་ཕྱུག་སེམས་ཅན་ལ། །དག་པ་གསུམ་གྱི་ལུས་འབུལ་ལོ། །ཚེ་རབས་བགྲངས་པའི་ལས་རྣམ་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། །སེམས་ཅན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་བར་ཤོག །བདེ་བ་རྟག་ཏུ་མི་འབྲལ་ཞིང་། །ཆོས་ཀུན་མཉམ་ཉིད་རྟོགས་པར་ཤོག །བཞི་པ་སྒྲིབ་སྦྱོང་རྡོར་སེམས་སྒོམ་བཟླས་ནི། །རང་ཉིད་ཐ་མལ་གནས་པའི་སྤྱི་བོ་རུ། །པད་ཟླའི་གདན་ལ་ཧཱུཾ་དཀར་ལས་བྱུང་བའི། །རྡོ་རྗེ་སེམས་དཔའ་ཡུམ་དང་མཉམ་སྦྱོར་བ། །རྡོ་རྗེ་དྲིལ་འཛིན་རིན་ཆེན་རུས་པའི་རྒྱན། །(༣ན)
དར་ཟབ་ལོངས་སྤྱོད་རྫོགས་སྐུའི་ཆ་ལུས་མཛེས། །ཐུགས་གར་ཟླ་སྟེང་ཧཱུཾ་དཀར་ཡིག་བརྒྱས་བསྐོར། །དེ་ལས་བདུད་རྩི་མུ་ཏིག་ཕྲེང་ལྟ་བུ། །སྦྱོར་མཚམས་ནས་བབས་སྤྱི་གཙུག་ལམ་བརྒྱུད་དེ། །རྐང་མཐིལ་འོག་ནས་འཐོན་ན་སྔོན་བསགས་ཀྱི། །སྡིག་ལྟུང་ནད་གདོན་ཉེས་ཚོགས་མ་ལུས་པ། །དུད་སོལ་ཁུ་བ་རྣག་ཁྲག་སྲོག་ཆགས་ཀྱི། །རྣམ་པ་ཀུན་བཀྲུས་དྭངས་ཤེལ་ལྟ་བུར་གྱུར། །ཧེ་རུ་ཀའི་ཡི་གེ་བརྒྱ་པ་ཅི་ནུས་བཟླས་པའི་མཐར། །མགོན་པོ་བདག་གི་སྡིག་སྒྲིབ་མ་ལུས་པ། །དག་པ་ཐུགས་རྗེ་བསྐུལ་བའི་གདུང་ཤུགས་ཀྱིས། །ཡབ་ཡུམ་འོད་ཞུ་སྤྱི་གཙུག་ནས་ཐིམ་པའི། །དབྱེར་མེད་ངོ་བོ་གཅིག་ཏུ་ས་མཱ་དྷི། །ལྔ་པ་མཚམས་གཅོད་སྔོན་འགྲོར་ང་རྒྱལ་བཟུང་། །བཀའ་བསྒོ་དངོས་བསྟན་གསུམ་གྱི་དང་པོ་ནི། །སྭ་བྷཱ་ཝས་སྦྱངས། སྟོང་པའི་ངང་ལས་པདྨ་ཉི་ཟླའི་སྟེང་རང་སེམས་ཧཱུཾ་ཡིག་མཐིང་ནག་ཡོངས་གྱུར་ལས། །ཞེ་སྡང་རྡོ་རྗེ་ཞལ་གསུམ་ཕྱག་དྲུག་པ། །གཡས་དཀར་གཡོན་དམར་རྩ་ཞལ་སྐུ་མདོག་ནག །གཡས་གསུམ་རྡོ་རྗེ་ལྕགས་ཀྱུ་ཞགས་པ་དང་། །གཡོན་གསུམ་ཐོད་ཁྲག་ལྕགས་སྒྲོག་དྲིལ་བུ་འཛིན། །དུར་ཁྲོད་ཆས་བརྒྱད་རུས་པ་སྦྲུལ་གྱི་བརྒྱན། ཁྲོ་གཏུམ་འཇིགས་རུང་བཟོད་དཀའི་དྲག་ཤུལ་ཅན། །ཞབས་བཞི་གཡས་བསྐུམ་གཡོན་བརྐྱང་ཚུལ་གྱིས་འགྱིང་། །ཡེ་ཤེས་མེ་དཔུང་འབར་བའི་ཀློང་ན་བཞུགས། །གཉིས་པ་བགེགས་གཏོར་གཏོང་ཞིང་བཀའ་བགོ་བ། །ཧཱུཾཿ ཉོན་ཅིག་བགེགས་དང་ལོག་འདྲེན་ཚོགས། །ང་ཡི་བཀའ་ལས་འདའ་མ་བྱེད། །རྡོ་རྗེ་གསང་བའི་བཀའ་ལས་ནི། །སྡིག་ཅན་གང་ཞིག་འདའ་བྱེད་པ། །སྟོབས་ཆེན་ཁྲོ་བོ་ཆེན་པོ་ཡི། །ཀླད་པ་ཚལ་པ་བརྒྱ་རུ་ཁོས། །དེ་བས་རང་རང་གནས་སུ་དེངས། །ཧཱུཾ། བཞིའི་(༣བ)
སྔགས་དང་ཧཱུཾ་ཧཱུཾ་ཧཱུཾ་བི་ཤྭ་བཛྲ་ཀྲོ་དྷ་ཛྭ་ལ་མཎྜལ་ཕཊ་ཕཊ་ཕཊ་ཧ་ལ་ཧ་ལ་ཧ་ལ་ཧཱུཾ་ཞེས་ཟླ་ཞིང་རོལ་མོ་དང་ཐུན་བྲབ་ཀྱི་ཚ་རྔམ་བྱ། གསུམ་པར་ཕྱི་ནང་གསང་ལས་དང་པོ་ནི། །རྒྱས་པར་སྒྲུབ་ཆེན་གཞུང་བཞིན་འཁྱེར་བདེ་བ། །རང་གི་ཐུགས་ཀའི་ཧཱུཾ་ལས་འོད་འཕྲོས་པས། །རྒྱལ་ཆེན་སྡེ་བཞི་བཙུན་མོ་སྲས་བློན་སོགས། །གྲངས་མེད་འཁོར་ཚོགས་མཐའ་དག་འདིར་བྱོན་ནས། །དགྱེས་པའི་གདན་ལ་བརྟེན་པར་བཞུགས་སུ་གསོལ། །ཨཱོཾ་དྷྀ་ཊ་ར་ཥྚ། བི་རུ་ཌྷ་ཀ །བི་རུ་པ་ཀྵ། །བཻ་ཤྲ་ཝ་ཎ་ས་པ་རི་ཝཱ་ར་ཨརྒྷཾ་ནས་ཤཔྟའི་བར་གྱིས་མཆོད་གོང་གི་སྔགས་གཤམ་དུ། ཨི་དཾ་བྷ་ལིནྟ་ཁ་ཁ་ཁཱ་ཧི་ཁཱ་ཧི་བཏགས་པ་ལན་གསུམ་གྱིས་ཕུལ། བདག་སོགས་འཕྲིན་ལས་རྣམ་བཞི་བསྒྲུབ་པ་ལ། །ཕྱི་ཡི་བར་ཆད་ནང་དུ་མི་གཏོང་ཞིང་། །ནང་གི་དངོས་གྲུབ་ཕྱི་རུ་མི་འཆོར་བའི། །སྲུང་བ་མཚམས་ཀྱི་ཕྲིན་ལས་མཛད་དུ་གསོལ། །གཉིས་པར་ལྔ་ལས་དང་པོ་ལྟ་སྟངས་མཚམས། །ཧཱུཾ། བདག་ཉིད་ལས་ཀྱི་ཧེ་རུ་ཀཿ། །རྔམ་བརྗིད་ཁྲོས་པ་རབ་བསྒོམ་ཏེ། །སྤྱན་མིག་གཡས་ གཡོན་ཉི་ཟླར་བསྐྱེད། །རྡོ་རྗེའི་འགྲོས་ཀྱི་རབ་བསྐོར་ཞིང་། ཁྲོ་བོའི་སྡང་མིག་རབ་ཏུ་བལྟ། །འགྱིང་བག་ཚུལ་དུ 
་རབ་ཏུ་བརྗིད། །ཞལ་ནས་ཧཱུཾ་ཕཌ་འབྲུག་སྒྲ་སྒྲོག །སྤྱན་ལས་འཕྲོས་པའི་འོད་ཟེར་གྱིས། །བར་ཆད་བགེགས་དཔུང་སྲེག་པར་བྱེད། །ཨཱོཾ་སཱུ་ཪྻ་ཙནྡྲ་ཛྭ་ལ་ཛྭ་ལ་ཧཱུཾ་ཕཌ། །གཉིས་པ་སྲུང་བ་འཁོར་ལོའི་མཚམས་གཅོད་ནི། ཧཱུཾ། བདག་ཉིད་དཔལ་གྱི་ཐུགས་ཀ་ནས། ཁྲོ་རྒྱལ་ཊཱཀྐི་རཱ་ཛ་འཕྲོས། །དམར་སྐྱ་ཞལ་གཅིག་ཕྱག་གཉིས་པ། །གཡས་གཡོན་ཐོ་བ་ལྕགས་ཀྱུ་ཐོགས། །འཕྲོས་པ་ཕྱོགས་བཅུར་རབ་འཕྲོས་པས། །ཆོས་སྐྱོང་བཅུ་པོ་བཀུག་ནས་ནི། །ཕྱོགས་བཅུ་ཀུན་ཏུ་གདན་དུ་(༤ན)
གཏིང་། །ཕོ་མོ་གན་རྒྱལ་ཁ་བུབ་བསྣོལ། །ཧཱུཾ་བཞིའི་སྔགས་མཐར། །ཨཱོཾ་ཨིནྡྲཱ་ཡ། ཨགྣ་ཡེ། ཡ་མཱ་ཡ། ནཻ་རི་ཏྱཻ། ཝ་རུ་ཎཱ་ཡ། ཝ་ཡ་ཝེ། །ཀུ་བེ་རཱ་ཡ། ཨཱི་ཤ་ནཱ་ཡ། སཱུཪྻ་ཙནྡྲ་པྲ་ཏི་བྷྱ་ཏིར་བཾ་ཛཿཧཱུཾ་བཾ་ཧོཿ ཧཱུཾ། བདག་ཉིད་དཔལ་གྱི་ཐུགས་ཀ་ནས། །ཕྱོགས་སྐྱོང་བཅུ་ཡི་གདན་སྟེང་དུ། །འབར་བའི་ཧཱུཾ་བཅུ་འཕྲོས་པ་ལས། །འཕྲོས་འདུས་ཁྲོ་བོ་བཅུ་རུ་གྱུར། །ཧཱུཾ་ཀར་རྣམ་རྒྱལ་དབྱུག་སྔོན་རྒྱལ། །གཤིན་རྗེ་མི་གཡོ་རྟ་འགྲིན་རྒྱལ། །འདོད་རྒྱལ་བདུད་རྩིི་ཁམས་གསུམ་རྒྱལ། །སྟོབས་པོ་ཆེ་རྣམས་རིམ་བཞིན་བསྒོམ། །ཀུན་ཀྱང་ཞལ་གསུམ་ཕྱག་དྲུག་པ། །སྐུ་མདོག་ཁྲོ་ཚུལ་མཚོན་ཆ་འཛིན། །དུར་ཁྲོད་ཆས་ཀྱིས་རབ་ཏུ་བརྒྱན། །སྐུ་སྨད་ལྕགས་ཕུར་ཟུར་གསུམ་འབར། །ཕྱོགས་སྐྱོང་བཅུ་ཡི་སྙིང་གར་བཏབ། །མེ་དཔུང་འབར་བའི་ཀློང་དཀྱིལ་ནས། །སྤྲུལ་པ་ཡང་སྤྲུལ་གྲངས་ལས་འདས། །བར་ཆད་བགེགས་དཔུང་མ་ལུས་པ། །རྡུལ་ཕྲན་བཞིན་དུ་བརླག་པར་བྱ། །ཨཱོཾ་བཛྲ་ཀྲོ་དྷ་ཧཱུཾ་ཀ་ར་ཧཱུཾ་བར་ཆད་འབྱུང་པོ་གྷ་རྫ་གྷ་རྫ་ཧཱུཾ་ཕཊ། །ཨཱོཾ་བཛྲ་ཀྲོ་དྷ་བི་ཛ་ཡེ་ཧཱུཾབར་ཆད་འབྱུང་པོ་ཧ་ན་ཧ་ན་ཧཱུཾ་ཕཊ། །ཨཱོཾ་བཛྲ་ཀྲོ་དྷ་ནཱི་ལ་དཎྜ་ཧཱུཾ་བར་ཆད་འབྱུང་པོ་ད་ཧ་ད་ཧ་ཧཱུཾ་ཕཌ། །ཨཱོཾ་བཛྲ་ཀྲོ་དྷ་ཡ་མཱནྟ་ཀ་ཧཱུཾ། །བར་ཆད་འབྱུང་པོ་པ་ཙ་པ་ཙ་ཧཱུཾ་ཕཊ། །ཨོཾ་བཛྲ་ཀྲོ་དྷ་ཨཱཪྻ་ཨ་ཙ་ལམ་ཧཱུཾ། །བར་ཆད་འབྱུང་པོ་བནྡྷ་བནྡྷ་ཧཱུཾཕཊ། །ཨོཾབཛྲ་ཀྲོ་དྷ་ཧ་ཡ་གྷྲཱིི་ཝ་ཧཱུཾ་ཕཊ། བར་ཆད་འབྱུང་པོ་ཧུ་ལུ་ཧུ་ལུ་ཧཱུཾ་ཕཊ། ཨོཾ་བཛྲ་ཀྲོ་དྷ་ཨ་པ་ར་ཙིཏྟ་ཧཱུཾ། བར་ཆད་འབྱུང་པོ་ཏིཥྛ་ཏིཥྛ་ཧཱུཾ་ཕཊ། ཨཱོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལི་ཧཱུཾ། བར་ཆད་འབྱུང་པོ་ཚིནྡྷ་ཚིནྡྷ་ཧཱུཾ་ཕཊ། ཨཱོཾ་བཛྲ་ཀྲོདྷ་ཏྲཻ་ལོ་ཀྱ་བི་ཛ་ཡེ་ཧཱུཾ། བར་ཆད་འབྱུང་པོ་བྷིནྡྷ་བྷིནྡྷ་ཧཱུཾ་ཕཊ། ཨཱོཾ་བཛྲ་ཀྲོདྷ་མཧཱ་བ་ལ་ཧཱུཾ། (༤བ)
བར་ཆད་འབྱུང་པོ་སྥོ་ཊ་སྥོ་ཊ་ཧཱུཾ་ཕཊ། གསུམ་པ་སྲེག་པར་བྱེད་པ་མེ་ཡི་མཚམས། །ཧཱུཾ། བདག་ཉིད་དཔལ་གྱི་ཐུགས་ཀ་ནས། །ཡེ་ཤེས་ལྔ་ཡི་མེ་འབར་བས། །སྟོང་གསུམ་ཕྱོགས་བཅུའི་འཇིག་རྟེན་ཀུན། །བསྐལ་པའི་མེ་དཔུང་ཆེན་པོ་བཞིན། །འུར་འུར་ཆེམ་ཆེམ་རབ་ཏུ་འབར། །རྡོ་རྗེའི་ཚ་ཚ་ཞུགས་སུ་འཕྲོ། །སྲིད་པ་གསུམ་ཡང་སྲེག་བྱེད་ན། །བར་གཅོད་བདུད་རྣམས་སྨོས་ཅི་དགོས། །ཨཱོཾ་བཛྲ་ཛྭ་ལ་རཾ་རཾ་ཀརྨ་རཾ་རཾ་ཛྭ་ལ་རཾ་རཾ། །བཞི་པ་མཚོན་ཆ་འཆོལ་བའི་མཚམས་གཅོད་པ། །ཧཱུཾ། ཐུགས་ལས་ཨཱོཾ་ཧཱུཾ་ཕཊ་ཨེ་ཛ༔། སྤྲོས་པའི་རྡོ་རྗེ་འཁོར་ལོ་དང་། །ཕུར་བུ་ཐོ་བ་རལ་གྲིར་གྱུར། །སྟེང་ཡང་མཚོན་ཆའི་བླ་བྲེ་ལ། །མཚོན་ཆའི་ཐོག་དང་སེར་ཆེན་འབེབས། །འོག་ཀྱང་མཚོན་ཆའི་ས་གཞི་ལ། །མཚོན་ཆའི་འཕྲོ་འདུ་མེ་ལྟར་འབར། །ཕྱོགས་མཚམས་མཚོན་ཆས་གཏམས་པ་ལ། །མཚོན་ཆའི་ཚ་ཚ་སྐར་ལྟར་འཕྲོ། །མཚོན་ཆ་རྣམ་ལྔས་མཚམས་བཅད་པས། །བར་གཅོད་བདུད་དཔུང་བརླག་པར་བྱ། །ཨོཾ་བཛྲ་ཙ་ཀྲ་ཀཱི་ལཱ་ཡ་མུངྒ་ར་ཨ་ཀོ་ཊ་ཡ་ཏིཀྵྞ་ཧཱུཾ་ཕཊ། །ལྔ་པ་ཁྲོ་བོ་རོལ་པའི་མཚམས་གཅོད་ནི། ཧཱུཾ། མི་བཟད་ཁྲོ་གཏུམ་རྔམ་པའི་ཚོགས། ཁྲོ་བོའི་སྤྲུལ་པས་ནམ་མཁའ་གང་། ཁྲོ་མོའི་སྤྲུལ་པས་ས་གཞི་གང་། །བར་སྣང་ཁྲོ་ཆུང་སྤྲུལ་པས་ཁྱབ། །ཕོ་ཉ་ལས་བྱེད་དུ་མར་བཅས། །ཕྱོགས་བཅུ་ཀུན་ཏུ་རབ་ཏུ་གཏམས། །ཨཱོཾ་ལོ་ཀ་སརྦ་མཧཱ་ཀྲོདྷ་ཡ་མཱནྟ་ཀ་པདྨཱནྟ་ཀྲྀཏ་ཀརྨ་ཀྲོདྷ་མ་མ་རུ་ལུ་སརྦ་དུཥྚཾ་ཧཱུཾ་ཕཊ། །གོང་གི་གསུམ་པ་གསང་བའི་མཚམས་གཅོད་ནི། ཧཱུཾ། མ་བཅོས་ཐིག་ལེ་ཀློང་ཡངས་ནས། །འཁོར་འདས་ཆོས་རྣམས་མ་ལུས་པ། །སེམས་ཉིད་བདེ་ཆེན་དག་པའི་ཀློང་། །དེ་ལྟར་གསལ་བར་རབ་རྟོག་ནས། །བགེགས་ཞེས་བྱ་བའི་མིང་ཡང་མེད། །མཚམས་(༥ན)
ཀྱི་དཀྱིལ་འཁོར་ལྷུན་གྱིས་གྲུབ། །ས་མ་ཡ་ཨ། དྲུག་པ་ཡེ་ཤེས་བརྡ་ཡི་སྒོ་དབྱེ་བ། ཧཱུཾ། སྣང་སྲིད་འཁོར་འདས་གདོད་མ་ནས། །རྣམ་དག་ལྷུན་གྲུབ་རྒྱལ་བའི་ཞིང་། །མ་རྟོགས་གཉིས་འཛིན་སྒྲིབ་གཡོགས་སྒོ། །རང་རིག་བརྡ་ཡིས་དབྱེ་བར་བྱ། །བྷྲཱུཾ་པྲ་ཝེ་ཤ་ཡ་ཕཊ། བདུན་པ་ཡེ་ཤེས་བརྡ་ཕྱག་འཚལ་བ་ནི། ཧཱུཾ། ཁམས་གསུམ་ཡེ་ནས་རང་བྱུང་བའི། །བདེ་གཤེགས་རྒྱལ་བའི་དཀྱིལ་འཁོར་ཉིད། །བརྡ་དང་གར་གྱིས་མཚོན་ནས་ཀྱང་། །གཉིས་སུ་མེད་པར་ཕྱག་བགྱིའོ། །ཨ་ལ་ལ་ཧོཿ ཨ་ཏི་པཱུ་ཧོཿ པྲ་ཏཱཙྪི་ཧོཿ བརྒྱད་པ་སྡིག་ལྟུང་ཉེས་ཚོགས་གཤགས་པ་ནི། ཧཱུཾ། བླ་མ་རིག་འཛིན་རྒྱལ་བ་ཞི་ཁྲོ་དང་། །ཕྱི་ནང་ཌཱ་ཀྐི་དམ་ཅན་མ་ལུས་པ། །རང་སྣང་དག་པའི་དཀྱིལ་འཁོར་ལྷ་ཚོགས་རྣམས། །རིག་འཛིན་སྒྲུབ་མཆོག་བདག་ལ་དགོངས་སུ་གསོལ། །རྣལ་འབྱོར་བདག་ཅག་མ་རིག་དབང་གྱུར་ནས། །ཐེག་མཆོག་གསང་བའི་ལྟ་སྤྱོད་དུ་མ་རྣམས། །གཞུང་བཞིན་མ་རྟོགས་དང་དུ་མ་བླང་པས་། །ཉམས་ཆག་འགལ་འཁྲུལ་གྱུར་བ་ཅི་མཆིས་པ། །སེམས་ཉིད་གནས་ལུགས་ངང་དུ་གཉིས་མེད་ཀྱང་། །ཀུན་རྫོབ་སྒྱུ་མ་ཙམ་གྱི་རོལ་པ་ལས། །རང་སྣང་འགྱོད་པའི་སེམས་ཀྱིས་མཐོལ་ལོ་བཤགས། །མཐོལ་བཤགས་བཟོད་པ་དམ་པ་ཞེས་ནས་ཀྱང་། །སྒྲིབ་མེད་ཚངས་པའི་དངོས་གྲུབ་སྩོལ་བ་དང་། །སྐུ་ལྔ་ཡེ་ཤེས་ལྔ་ཡི་འབྲས་བུ་མཆོག །འབད་རྩོལ་མེད་པར་དུས་འདིར་འགྲུབ་པར་མཛོད། །དགུ་པ་སྲོག་ཕྱིར་མི་གཏོང་དམ་བཅའ་ནི། །ཧོཿ ཁམས་གསུམ་སེམས་ཅན་མ་ལུས་པ། །ཡེ་ནས་སངས་རྒྱས་ཡིན་མོད་ཀྱང་། །ལོག་རྟོགས་དབང་གི་འཁོར་བར་འཁྱམས། །སྙིང་རྗེའི་ཡུལ་དུ་གྱུར་པ་རྣམས། །སངས་རྒྱས་(༥བ)
ས་ལ་འགོད་བྱའི་ཕྱིར། །སྒྲུབ་པ་བཀའ་བརྒྱད་ལྷ་ཚོགས་རྣམས། །སྔོན་ནས་བདག་གི་ཡི་དམ་ལྷ། །ད་ལྟ་བདག་དང་གཉིས་སུ་མེད། །སྲོག་གི་ཕྱིར་ཡང་མི་སྤོང་ཞིང་། །རྩེ་གཅིག་ཡིད་ཀྱིས་བསྒྲུབ་པར་བྱ། །ཨ་ལ་ལ་ཧོཿ ས་མ་ཡ་བྷོ་དྷི་ཙིཏྟ་ཨཿ བཅུ་པ་བདག་རྟེན་རྫས་ལ་བྱིན་དབབ་པ། ཧཱུཾ། དུས་གསུམ་བདེ་གཤེགས་རྒྱལ་བ་རྣམས། །ཆོས་སྐུ་སྐྱེ་བ་མེད་པ་ལས། །གཟུགས་སྐུ་འགྲོ་བའི་དོན་མཛད་ཕྱིར། །གཉིས་མེད་དབྱིངས་ནས་སྐུ་བཞེངས་ལ། །རྣལ་འབྱོར་རིག་འཛིན་སྒྲུབ་པ་པོ། །དངོས་གྲུབ་མ་ལུས་ཐོབ་བྱའི་ཕྱིར། །ལྷ་དང་རིག་འཛིན་སྲུང་མའི་ཚོགས། །སྤྲུལ་པ་འཁོར་དང་བཅས་པ་རྣམས། །མཁའ་ལ་སྤྲིན་ལྟར་གཏིབས་ནས་ཀྱང་། །དངོས་གྲུབ་མ་ལུས་ཆར་ལྟར་ཕོབ། །དབང་ཆོག་མ་ལུས་བདག་ལ་བསྐུར། །སྐུ་ཡི་གར་སྟབས་གློག་ལྟར་འཁྱུག །གསུང་གི་ང་རོ་འབྲུག་ལྟར་སྒྲོགས། །ཐུགས་ཀྱི་བརྩེ་བས་བདག་ལ་དགོངས། །དཀྱིལ་འཁོར་འདི་ལ་བྱིན་ཕོབ་ལ། །སྒྲུབ་མཆོག་བདག་ལ་དབང་ཞིག་བསྐུར། །སྒྲུབ་རྫས་འདི་ལ་བྱིན་ཕོབ་ལ། །གཞལ་ཡས་འདི་ལ་བརྟན་པར་བཞུགས། །མཐུ་དང་རྩལ་གྱི་ནུས་པ་ཐོན། །རྟགས་དང་མཚན་མ་བསྟན་དུ་གསོལ། །ཐུགས་དམ་གཉེན་པོའི་དུས་ལ་བབ། །ས་མ་ཡ་ཨ་ཝེ་ཤ་ཡ་ཧཱུཾ་ཧཱུཾ། །བཅུ་གཅིག་སྨན་རཀ་མཆོད་གཏོར་བརླབ་པ་ལ། །ནང་གསེས་བདུན་ལས་དང་པོ་ཕྱི་མཆོད་ནི། མཆོད་པའི་རྫས་ཀྱི་མ་དག་སྐྱོན་རྣམས་ཀུན། །ཐུགས་ཀའི་ཧཱུཾ་ལས་རཾ་བྱུང་མེ་ཡི་བསྲེགས། །ཡཾ་ལས་རླུང་གིས་གཏོར་ཞིང་ཁཾ་ཡིག་གི །ཆུས་བཀྲུས་མི་དམིགས་སྟོང་པའི་ངང་ཉིད་ལས། །ཨ་ལས་བྷནྡྷ་འབར་བའི་སྣོད་རྣམས་སུ། །ཧཱུཾ་ལས་ཆུ་གཉིས་ཉེར་སྤྱོད་རོལ་མོ་བཅས། །དབང་པོའི་ཡུལ་དུ་ཟག་མེད་བདེ་སྟེར་བ། །ནམ་མཁའ་(༦ན)
མཛོད་ཀྱི་སྒོ་འཕར་ཕྱེ་བར་གྱུར། །ཨཱོཾ་བཛྲ་ཨརྒྷཾ་ནས་ཤབྟའི་བར་བརྗོད། གཉིས་པ་བདུད་རྩི་སྨན་ཕུད་བརླབ་པ་ནི། ཡཾ་རཾ་ཀཾ་ལས་རླུང་མེ་ཐོད་སྐམ་གྱི། །སྒྱེད་བུའི་སྟེང་དུ་མ་ལས་ཐོད་པའི་ནང་། །གསེར་འཁོར་རྩིབས་བརྒྱད་སྟེང་དུ་ཉི་མ་ལ། །གྷོ་ཏ་ཀུ་ད་ཧ་ན་ལས་ཤ་ལྔ་དང་། །བི་ནུ་མ་ར་ཤུ་ལས་བདུད་རྩི་ལྔ། །དབྱངས་གསལ་གྱིས་མཚན་ཟླ་དཀྱིལ་ཁ་གཅོད་ཀྱི། །ལྟེ་བར་སྣ་ཚོགས་རྡོ་རྗེའི་ཁོང་སེང་དུ། །འབྲུ་གསུམ་གྱིས་མཚན་རླུང་གི་མེ་སྦར་ཏེ། །རྫས་འཁོལ་རླངས་པ་ཟླ་ཕྱེད་རྡོ་རྗེར་འཕོག །འོད་འཕྲོས་ཞི་ཁྲོ་རབ་འབྱམས་ཐུགས་རྒྱུད་བསྐུལ། །སླར་བཀུག་དམ་ཚིག་བདུད་རྩི་ལ་འདུས་པས། །ཨཱོཾ་ཨཱཿཧཱུཾ་སྭཱཧཱ་ལས་ཕྱག་མཚན་ལྔ། །དེ་ཡིས་ཡུ་བ་བྱས་པའི་དྲིལ་བཅས་གྱུར། །ཧཱུཾ་བཛྲ་དྷྲྀཀ །མཱུཾ་དྷཱ་ཏྭཱི་ཤྭ་རཱི། ཨཱོཾ་ཛི་ན་ཛི་ཀ །ལཱཾ་དེ་ཥ་ར་ཏི། སྭཱ་རཏྣ་དྷྲྀ་ཀ །མཱཾ་མོ་ཧ་ར་ཏི། ཨཱོཾ་ཨ་རོ་ལི་ཀ །པཱཾ་ར་ག་ར་ཏི། ཧཱ་པྲ་ཛྙཱ་དྷྲྀ་ཀ །ཏཱཾ་བཛྲ་ར་ཏི། བརྗོད་པས་རིགས་ལྔ་ཡབ་ཡུམ་མཉམ་སྦྱོར་གྱུར། ཨཱོཾ་ཨཱཿཧཱུཾ་སརྦ་པཉྩ་ཨ་མྲྀ་ཏ་ཧཱུཾ་ཧྲཱིཿཋ། ཞེས་པའི་སྒྲས་བསྐུལ་ཡབ་ཡུམ་སྙོམ་ཞུགས་པའི། །བདེ་བའི་འོད་ཀྱིས་སྲས་བཅས་སངས་རྒྱས་མཆོད། །འོད་ཞུ་ཞལ་དུ་ཞུགས་པའི་བྱང་ཆུབ་སེམས། །སྐུ་ཡི་དབྱིབས་བརྒྱུད་མཁའ་གསང་ནས་བབས་པ། །དམ་ཚིག་རྫས་དང་དབྱེར་མེད་བདུད་རྩིར་འཁྱིལ། །མཐེབ་སྲིན་སྦྱར་བས་རྡོ་རྗེའི་ལྟེ་བ་རུ། །ཧྲཱིཿམ་ལས་བྱུང་རྟ་མགྲིན་ཡབ་ཡུམ་གྱི། །གཙུག་ནས་བདུད་རྩི་ཀུན་འདུས་སྦྱོར་མཚམས་ནས། །བབས་པའི་ཐོད་པའི་ནང་ཀུན་བདུད་རྩི་ཡིས། །གང་བས་མུ་ཏིག་ཕྲེང་བ་ལྟ་བུར་གྱུར། །བདུད་རྩིའི་སྔགས་བདུན་བརྗོད་རྗེས་རཀྟ་ནི། །ཨོཾ་པདྨ་བྷ་ཝ་མཎྜལ་བྷྲུཾ། བརྗོད་པས་ཡུམ་གྱི་མཁའ་དབྱིངས་གྲུ་གསུམ་ནང་། །མ་(༦བ)
ལས་ཉི་དཀྱིལ་སྟེང་དུ་ར་ཡིག་ལས། །རཀྟཱའི་མཚོ་འཁྲུག་སྥ་ར་ཎ་ཕཊ་ཀྱིས། །ཆགས་པའི་འོད་འཕྲོས་སཾ་ཧ་ར་ཎ་ཧཱུཾ། །གདུག་ཅན་ཚུར་འདུས་ཧཱུཾ་ཧཱུཾཿབཛྲ་ཕཊ། །ཡབ་ཀྱི་གསང་གནས་རྡོ་རྗེའི་ཐོ་བ་ཡིས། །བརྡུངས་པས་ཉོན་མོངས་བག་ཆགས་མ་ལུས་པ། །སྦྱངས་ནས་ཞིང་གི་ལྷུ་དུམ་རབ་འཕྱོ་ཞིང་། །ཟེགས་མའི་ཚོགས་ལས་འདོད་ཡོན་ལྷ་མོ་ནི་། །མཁའ་ལ་སྤྲིན་ཕུང་ལྟ་བུར་གཏིབས་པར་གྱུར། །ཨཱོཾ་ཨཿཧཱུཾ་མ་ཧཱ་རཀྟ་ཛྭ་ལ་མཎྜལ་ཧཱུཾ་ཧྲཱིཿཋ། །ལན་བདུན་བརྗོད་རྗེས་གཏོར་མ་བརླབ་པ་ནི། །ཐོད་པར་གྷོ་ཀུ་ད་ཧ་ན་ལས་ཤ །བི་ནུ་མ་ར་ཤུ་ལས་བདུད་རྩི་ལྔ། །སྟེང་དུ་རིགས་ལྔ་ཡབ་ཡུམ་ས་བོན་མཚན། །དེ་ལས་འོད་འཕྲོས་རླུང་གི་མེ་སྦར་བས། །བདུད་རྩི་ཁོལ་བས་མ་དག་ཀུན་སྦྱང་ཏེ། །ཟག་མེད་རོ་བརྒྱ་ལྡན་པའི་ཕུང་པོར་གྱུར། །ཨོཾ་ཨཱཿཧཱུཾ་མ་ཧཱ་བྷ་ལིནྟ་ཏེ་ཛྭ་བྷ་ལིནྟ་བྷ་ལ་བྷ་ཏེ་གུ་ཧྱ་ས་མ་ཡ་ཧཱུཾ་ཧྲཱིཿཋ། སྔགས་ནི་བདུན་བཟླས་ཛ་གད་བརླབ་པ་ནི། ཛ་གད་བུམ་པ་གཞལ་ཡས་འོད་ཀྱི་ནང་། །མཱཾ་ལས་མཱ་མ་ཀི་སྔོན་བུམ་འཛིན་པས། །སྟོང་གསུམ་འབྱུང་ལྔའི་བཅུད་རྣམས་མ་ལུས་པ། །བསྡུས་ནས་ཛ་གད་ཉིད་ལ་ཐིམ་པར་གྱུར། །ཨཱོཾ་མཱ་མ་ཀི་རི་ཀི་རི་ཏིཥྛ་ཛྙཱ་ན་མཾ་སྭཱཧཱ། འཛབ་ནི་བཟླས་རྗེས་ཟླ་གམ་བརླབ་པ་ནི། ཧཱུཾ་མཱུཾ་གཉིས་ལས་ཐབས་ཤེས་ཉི་ཟླ་ཟུང་། །མཉམ་པར་སྦྱར་བས་བདེ་སྟོང་ཡེ་ཤེས་ཀྱི། །བྱང་སེམས་བདུད་རྩི་ཆེས་ཆེར་འཕེལ་བ་ཡི། །ཟག་མེད་དགའ་བཞི་རྒྱས་པའི་ནུས་ལྡན་གྱུར། །ཨཱོཾ་བོ་དྷི་ཙིཏྟ་མཧཱ་སུ་ཁ་ཧོཿ འཛབ་བཟླས་མཇུག་ཏུ་ཚེ་ཟན་བརླབ་པ་ནི། བྷྲཱུཾ་ལས་ཚེ་བུམ་རིན་ཆེན་གཞལ་ཡས་ཁང་། །འདབ་བརྒྱད་ལྟེ་བར་ཧྲཱིཿལས་ཚེ་དཔག་མེད། །དམར་པོ་མཉམ་གཞག་སྟེང་ན་ཚེ་བུམ་འཛིན། །བཀྲ་ཤིས་ལྷ་མོ་བརྒྱད་ཀྱིས་ཡོངས་བསྐོར་བ། །བཛྲ་ས་མཱ་ཛཿཡིས་སྤྱན་དྲངས་ནས། །ཛཿཧཱུཾ་བཾ་ཧོཿས་གཉིས་སུ་མེད་(༧ན)
པར་གྱུར། །ཐུགས་ཀའི་ཧྲཱིཿལས་འོད་འཕྲོས་འཁོར་འདས་ཀྱི། །ཚེ་བཅུད་ཀུན་བསྡུས་བུམ་ནང་བསྐྱིལ་བར་གྱུར །ཨཱོཾ་ཨཱ་ཡུ་ཛྙཱ་ན་ཚེ་བྷྲཱུཾ་ཧཱུཾ། །གཉིས་པ་དངོས་གཞིར་ཏིང་འཛིན་རྣམ་པ་གསུམ། །གཞལ་ཡས་གདན་ལྷ་དབང་བསྐུར་སྤྱན་དྲངས་བཞུགས། །ཕྱག་མཆོད་བསྟོད་པ་འཛབ་སྟེ་བཅུ་གསུམ་གྱི། །དང་པོ་དེ་བཞིན་ཉིད་ཀྱི་ཏིང་འཛིན་ནི། །ཧཱུཾ། རྣམ་དག་བྱང་ཆུབ་སེམས་ཀྱི་རང་བཞིན་ནི། །གདོད་ནས་མ་སྐྱེས་ཡེ་བརྡལ་གཏིང་མཐའ་མེད། །མི་གནས་མི་དམིགས་སྤྲོས་པ་མེད་པའི་ངང་། །བརྗོད་མེད་བསམ་འདས་མཉམ་ཉིད་དབྱིངས་སུ་རྫོགས། །ཨཱོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷ་ཝ་ཨཱཏྨ་ཀོ྅ཧཾ། གཉིས་པ་ཀུན་ཏུ་སྣང་བའི་ཏིང་འཛིན་ནི། །ཐམས་བཅད་སྙིང་པོ་བྱང་ཆུབ་སེམས་ཉིད་ལས། །གཟུང་འཛིན་མཚན་མ་རྡུལ་ཙམ་མི་དམིགས་ཀྱང་། །རྩོད་མེད་དབྱིངས་ལས་འགག་པ་མེད་པའི་ཕྱིར། །སྒྱུ་མའི་ཕྱག་རྒྱ་བྱེ་བྲག་ཅིར་ཡང་གསལ། །ཨཱཿདྷརྨཱ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། གསུམ་པ་དབྱེར་མེད་རྒྱུ་ཡི་ཏིང་འཛིན་ནི། །ཆོས་ཉིད་ཐམས་བཅད་དབྱིངས་སུ་སངས་རྒྱས་ཤིང་། །སྐྱེ་མེད་བདེ་ཆེན་ངང་དུ་རོ་གཅིག་ཀྱང་། །སྐྱེ་བའི་ཆོ་འཕྲུལ་འབར་བའི་བྱིན་རླབས་ཀྱིས། །རང་རིག་ཡེ་ཤེས་ཆོས་སྐུ་མངོན་དུ་ཤར། །ཧཱུཾ་བཛྲ་ཙིཏྟ་ཧཱུཾ། ཧཱུཾ་ལས་རཾ་ཡཾ་ཁཾ་འཕྲོས་སྣོད་བཅུད་སྦྱངས། །དངས་མའི་ཧཱུཾ་ཡིག་རྡོ་རྗེ་རྩེ་ལྔར་གྱུར། །དེ་ལས་རྒྱུ་ཡི་ཁྲག་འཐུང་ཡེ་ཤེས་སེམས། །མཐིང་གསལ་རང་སྣང་ཡུམ་བཅས་མཁའ་ལ་གསལ། །བཞི་པ་རྟེན་གྱི་གཞལ་ཡས་ཁང་བསྐྱེད་པ། །ནམ་མཁར་གནས་པའི་ཁྲག་འཐུང་ཐུགས་ཀ་ནས། །ཨེ་ཡཾ་རཾ་སུཾ་ཀཾ་རཾ་ཆད་པ་ལས། །ཨེ་ཨཱ་ཀཱ་ཤ་མཎྜ་ལ། །ཡཾ་ཝཱ་ཡུ་མཎྜ་ལ། རཾ་རཀྟ་མཎྜ་ལ། སུཾ་ཏི་ར་མཎྜ་ལ། ཀེཾ་ནི་རི་ཏི་མཎྜ་ལ། རཾ་ཛྭ་ལ་(༧བ)
མཎྜ་ལ། སྥ་ར་ཎ་ཕཊ། སཾ་ཧ་ར་ཎ་ཧཱུཾ། ཨེ་ལས་ནམ་མཁའ་མཐིང་ནག་འབྱམ་ཀླས་དབྱིངས། །ཡཾ་ལས་རླུང་དཀྱིལ་ལྗང་ནག་རྒྱ་གྲམ་གཡོ། །དེ་སྟེང་རཾ་ལས་ཁྲག་མཚོ་དམར་ཟླུམ་འཁྲུག །སུཾ་ལས་ཞིང་ཆེན་ས་གཞི་གྲུ་བཞིར་བརྡལ། །ཀེཾ་ལས་རུས་པའི་རི་རབ་བང་རིམ་བཞི། །རཾ་ལས་བསྐལ་པའི་མེ་ཆེན་འབར་བའི་ཀློང་། །བཾ་ལས་འདབ་སྟོང་པདྨའི་གེ་སར་ལ། །ཧཱུཾ་ལས་སྣ་ཚོགས་རྡོ་རྗེ་སྲ་ཞིང་བརྟན། །དེ་སྟེང་མཁའ་ལ་བྷྲུཾ་ཡིག་ལྔ་ལྡན་བབས། །བྷྲཱུཾ་བི་ཤྭ་བི་ཤུ་དྡྷ་རཏྣ་བྷཉྫཱ་ཛྙཱ་ན་ཙཀྲ་མཎྜལབྷྲུཾ། །བྷྲཱུཾ་ཡིག་ཡོངས་གྱུར་རིན་ཆེན་གཞལ་མེད་ཁང་། །གྲུ་བཞི་སྒོ་བཞི་ཤེལ་གསེར་རཱ་ག་དང་། །མརྒད་བཻཌཱུཪྻ་ཡི་རང་བཞིན་ཅན། །རྡོ་རྗེ་ནོར་བུའི་རྩིག་སྟེང་རིན་པོ་ཆེའི། །ཕ་གུ་སེར་པོ་དེ་སྟེང་མུ་ཏིག་གི །དྲ་བ་དྲ་ཕྱེད་ཤར་བུ་མདའ་ཡབ་མཛེས། ཁང་བརྩེགས་ཕྱུར་བུར་རྡོ་རྗེ་ནོར་བུའི་ཏོག །སྣ་ཚོགས་རིན་ཆེན་འོད་འཕྲོ་རྨང་གི་གཞིར། །འདོད་སྣམ་དམར་པོར་གཟུང་མ་བཅུ་དྲུག་འཁོད། །སྒོ་བཞིར་ཀ་བ་བཞིས་བཏེག་ཏོ་ར་ཎ། །བང་རིམ་བརྒྱད་ལྡན་ཆོས་འཁོར་རི་དྭགས་གདུགས། །ངོ་མཚར་ཀུན་ཏུ་བཟང་པོའི་རྒྱན་བཀོད་པའི། །གཞལ་མེད་ཁང་ནང་རྡོ་རྗེའི་གདུང་བཞི་ཡིས། །མིག་མང་རིས་བྲེས་སོ་སོའི་ནང་ཁོངས་སུ། །དུར་ཁྲོད་རོལ་པའི་གཞལ་མེད་ཁང་པ་དགུ། །རིམ་གསུམ་ཐོད་པའི་རྩིག་པར་ཁྲ་ཞག་འབབ། །ཤ་ཆེན་འདོད་སྣམ་ཕ་གུར་ཐོད་པས་དཀྲིགས། །རྐང་ལག་ཤར་བུ་སྒལ་ཚིགས་མདའ་ཡབ་ཅན། །རྒྱུ་རློན་རུས་པའི་དྲ་ཕྱེད་ཐོད་ཚལ་འཕྱང་། །མི་རོའི་རྒྱལ་མཚན་འཕན་གདུགས་ཙིཏྟཱའི་ཏོག །ལྷ་ཀླུའི་ཀ་གདུང་གཟའ་སྐར་དྲལ་ཕྱམ་བྱས། །ཞིང་ལྤགས་ཐོག་ཕུབ་ཉ་སྦྲུལ་ཟ་ར་ཚགས། །རབ་འཇིགས་ཕོ་བྲང་ཀུན་ནང་མཐིང་ནག་ཨེ། །རྩིབས་བཞི་མུ་(༨ན)
ཁྱུད་གྲུ་ཆད་ཁྱམས་དང་བཅས། །ཀུན་གྱི་ཕྱི་རོལ་དུར་ཁྲོད་ཆེན་པོ་བརྒྱད། །མཆོད་རྟེན་ཤིང་མེ་སྤྲིན་ཆུ་གྲུབ་པ་བརྒྱད། །ལྷ་ཀླུ་ཕྱོགས་སྐྱོང་མ་མོ་ཞིང་སྐྱོང་དང་། །ཤ་ཟ་རོ་ལངས་གསར་རྙིང་བམ་རོའི་ཚལ། །དེ་མཐར་གཞོམ་མེད་རྡོ་རྗེའི་སྲུང་བའི་གུར། །མི་ཕྱེད་རབ་འབར་ཕྲེང་བ་འཁྲིགས་པས་བསྐོར། །ལྔ་པ་ཕོ་བྲང་སོ་སོར་གདན་བསྐྱེད་པ། རུ་དྲ་ཀྲོ་དྷཱི་ཏི་ར་བཾ། བཾ་པདྨ་མཎྜལ། མ་སཱུཪྻ་མཎྜ་ལ། ཨ་ཙནྡྲ་མཎྜ་ལ། ཕོ་བྲང་ལྟེ་བར་བཻཌཱུར་རང་བཞིན་བྲག །འགྲོ་དྲུག་སྣ་ཚོགས་པདྨའི་གེ་སར་ལ། །རབ་འབར་ཉི་མ་དཀར་གསལ་ཟླ་བའི་དཀྱིལ། །དབང་པོ་ཚངས་པ་དབང་ཕྱུག་ཁྱབ་འཇུག་དང་། །ཉེ་དབང་གཞོན་ནུ་བྷྲྀང་གི་ཚོགས་བདག་དང་། །མཐའ་ཡས་འཇོག་པོ་དུང་སྐྱོང་སྟོབས་ཀྱི་རྒྱུ། །པདྨ་པད་ཆེན་ནོར་རྒྱས་རིག་ལྡན་ཀླུ། །བསྣོལ་མར་བརྫིས་སྟེང་སེང་གེ་སྟག་ཟིག་དོམ། །གླང་ཆེན་མ་ཧེེ་ཆུ་སྲིན་སྦྲུལ་གྱི་ཁྲིར། །གསེར་འཁོར་བཅུ་གཉིས་རྩིབས་ལྡན་ལྟེ་བ་རུ། །མ་ཧཱ་དེ་ཝ་ཨུ་མ་དེ་ཝིར་བཅས། །ཕྱོགས་མཚམས་བརྒྱད་པོར་པདྨ་ཉི་ཟླའི་སྟེང་། །ཤར་དུ་དྲག་པོ་ལྷོ་ཕྱོགས་མ་ཧེ་ནུབ། །ཆུ་བདག་བྱང་དུ་ལྷ་ཆེན་མེར་མ་མོ། །བདེན་བྲལ་དར་ཟབ་རླུང་དུ་དྲེགས་པ་དང་། །དབང་ལྡན་དགྲ་བགེགས་ཀུན་ཀྱང་ཆུང་མར་བཅས། །ཕོ་རྣམས་ཁ་སྦུབ་མོ་རྣམས་གན་རྐྱལ་བསྣོན། །དྲུག་པ་བརྟེན་པ་ལྷ་ཚོགས་བསྐྱེད་པ་ནི། །ནམ་མཁར་གནས་པའི་རྒྱུ་ཡི་ཧེ་རུ་ཀཿ། །ཡབ་ཡུམ་དཀྱིལ་འཁོར་དབུས་ཀྱི་གདན་ལ་འཁོད། །སྙོམ་པར་ཞུགས་པའི་དགའ་བས་འཕགས་པ་མཆོད། །སེམས་ཅན་དོན་བྱས་ཚུར་འདུས་སྐུ་ལ་འདུས། །བདེ་ཆེན་བྱང་སེམས་ངོ་བོར་གྱུར་པ་ལས། །དབྱིངས་ཕྱུག་མ་ཡིས་སྟོང་པའི་སྒྲས་བསྐུལ་ཏེ། །སྟོང་པ་(༨བ)
ཤིན་ཏུ་ཡོད་མེད་རྣལ་འབྱོར་མཐུས། །ནམ་མཁའ་བཞིན་ལས་དམ་ཚིག་ཉེ་བར་གནས། །བདེ་གཤེགས་བདེ་བར་གཤེགས་མཛད་དགོངས་སུ་གསོལ། །ཧེ་རུ་ཀཿདཔལ་ཁྱོད་བདག་སྐལ་བ་བཟང་། །བསྐུལ་བའི་རྐྱེན་གྱིས་ཐིག་ལེ་མཐིང་ནག་ཧཱུཾ། །ཡོངས་གྱུར་རྡོ་རྗེ་རྩེ་ལྔ་ཧཱུཾ་གིས་མཚན། །སྥ་ར་ཎ་ཕཊ་བརྗོད་པའི་འོད་ཟེར་འཕྲོས། །སྲས་བཅས་རྒྱལ་མཆོད་སེམས་ཅན་དོན་ཀུན་བྱས། །སཾ་ཧ་ར་ཎ་ཧཱུཾ་གིས་ཚུར་ལ་བསྡུས། །དེ་ཉིད་ཡོངས་གྱུར་བདག་ཉིད་ཁྲོ་རྒྱལ་ཀུན། །ཡོངས་འདུས་དཔལ་ཆེན་ཆེ་མཆོག་ཧེ་རུ་ཀཿ། །མཐིང་ནག་དབུ་དགུ་ཕྱག་ནི་བཅོ་བརྒྱད་གདེངས། །རྩ་གཞལ་གཡས་དཀར་གཡོན་དམར་དབུས་ཐིང་ནག །བར་མ་གཡས་དཀར་གཡོན་ལྗང་དབུས་ཞལ་སྔོ། །སྟེང་ཞལ་དབུས་གནག་གཡས་དཀར་གཡོན་པ་དམར། །ཞལ་དགུར་དམར་ལ་ཟླུམ་པའི་སྤྱན་གསུམ་ལྡན། །ཞལ་གདངས་མཆེ་གཙིགས་གློག་ལྟར་འཁྱུགས་པའི་ལྗགས། །རྡོ་རྗེའི་གད་རྒྱངས་ཁྲོ་གཉེར་བསྡུས་པ་ཡི། །ཤངས་བུག་རྣམས་ནས་དུས་མཐའི་རླུང་ཆེན་འཚུབ། །རྫི་མ་སྨིན་མ་སྨ་རར་མེ་ཆེན་འབར། །དབུ་སྐྲ་ཁམ་ནག་ནམ་མཁའི་སྤྲིན་ལྟར་གཏིབས། །སྐུ་ཆེ་ཡན་ལག་རགས་ཤིང་འགྱུར་བག་ལྡན། །བཅོ་བརྒྱད་ཕྱག་གི་དང་པོས་རྡོ་རྗེ་དང་། །དུང་ཁྲ་བཟུང་ནས་ཤེས་རབ་ཡུམ་ལ་འཁྱུད། །ལྷག་མ་གཡས་རྣམས་རིམ་བཞིན་ཁ་ཊྭཱཾ་ཀ །ཅང་ཏེ་འཁོར་ལོ་རིན་ཆེན་པདྨ་དང་། །རལ་གྲི་དགྲ་སྟ་ཞགས་པ་གཡོན་རྣམས་ཀྱིས། །ཞིང་དབྱུག་ཐོང་གཤོལ་ཉི་ཟླ་རི་རབ་དང་། ཁྲག་མཚོ་མེ་རླུང་རླུང་ནག་འཚུབ་མ་བསྣམས། །ཞབས་བརྒྱད་གཡས་བསྐུམ་གཡོན་བརྐྱང་དོར་སྟབས་ཀྱིས། །ལྷ་ཆེན་ཕོ་མོའི་མགོ་དང་ནུ་མ་བརྫིས། །ཐོད་སྐམ་དབུ་རྒྱན་སྐམ་རློན་རྙིང་པ་ཡི། །ཐོད་པ་རྒྱུ་མར་རྒྱུས་(༩ན)
པའི་དོ་ཤལ་འཕྱང་། །ཞིང་གླང་སྟོད་གཡོགས་སྟག་ཤམ་རུས་པའི་རྒྱན། ཁྲག་གི་ཐིག་ལེ་ཞག་གི་སོར་རིས་དང་། །ཐལ་ཆེན་ཚོམ་བུ་སྦྲུལ་ལྔའི་གདུ་བུ་ཅན། །རྡོ་རྗེའི་ཁྱུང་ཤོག་ལ་སོགས་དཔལ་གྱི་ཆས། །བཅུ་ལྡན་སྒེག་ཅིང་དཔའ་བ་མི་སྡུག་པ། །རྒོད་ཅིང་དྲག་ཤུལ་འཇིགས་རུང་སྙིང་རྗེ་དང་། །རྔམ་ཞི་གར་དགུ་རོལ་པས་བཞུགས་པའི་པང་། །གནམ་ཞལ་དབྱིངས་ཕྱུག་སྔོན་མོ་ཞལ་གཅིག་མ། །ཕྱག་གཉིས་ཁཊྭཱཾ་ཐོད་ཁྲག་འཛིན་པས་འཁྱུད། ཁྲོ་མོའི་ཆས་ཀུན་མ་ལུས་ཡོངས་རྫོགས་ཤིང་། །གཡས་བརྐྱང་གཡོན་བསྐུམ་ཡབ་ཀྱི་སྐུ་ལ་འཁྲིལ། །སྟོང་ཉིད་སྙིང་རྗེ་དབྱེར་མེད་ཟུང་འཇུག་པ། །ཡབ་ཡུམ་གཉིས་ཀ་ཉི་མ་འབུམ་ཕྲག་གི ། གཟི་འབར་བསྐལ་པའི་མེ་དཔུང་དབུས་ན་བཞུགས། །ཡབ་ཀྱི་གསང་གནས་ཧཱུཾ་ལས་རྩེ་ལྔ་པའི། །རྡོ་རྗེའི་དབྱིབས་ཅན་ཟླ་བར་ཨཱོཾ་གྱིས་མཚན། །ཡུམ་གྱི་མཁའ་གསང་པཾ་ལས་འདབ་བརྒྱད་ཀྱི། །པདྨའི་ཟེའུ་འབྲུར་ཉི་མར་མཱུཾ་གྱི་མཚན། །ཡབ་ཀྱིས་ས་མ་ཧོཿཡི་བརྡས་བསྐུལ་བ། །ཡུམ་གྱིས་ས་མ་ཡ་སྟཾ་ལན་བཏབ་པར། །ཡབ་ཀྱིས་རཱ་ག་ཡ་ཧོའི་བརྡ་སྦྱར་བ། །ཡུམ་གྱིས་རཱ་ག་ཡ་མིའི་བརྡ་ཡིས་བསྐུལ། །ཨ་ལ་ལ་ཧོཿ ཛཿཧ྄ཱུཾ་བཾ་ཧོཿ བོ་དྷི་ཙིཏྟ་སྥ་ར་ཎ་ཕཊ། ཨོཾ་ཨཱཿཧཱུཾ། བརྗོད་པས་ལྕགས་ཀྱུའི་ཕྱག་རྒྱས་དཔུང་ནས་བཟུང་། །ཞགས་པའི་ཕྱག་རྒྱས་ཕན་ཚུན་སྟོད་སྨད་འཁྱུད། །ལྕགས་སྒྲོག་ཕྱག་རྒྱས་དབང་པོའི་སྒོ་གཉིས་སྤྲས། །དྲིལ་བུའི་ཕྱག་རྒྱས་རྡོ་རྗེ་པདྨར་ཞུགས། །བྱང་སེམས་ལན་གཅིག་བབས་པའི་ཡུམ་གྱི་མཁར། །གཞལ་ཡས་ཁང་གྱུར་གཉིས་པས་གདན་གཏིང་ཞིང་། །གསུམ་པས་ས་བོན་ཧཱུཾ་ཡིག་སྤྲོད་པར་གྱུར། །རྡོ་རྗེ་པདྨ་བདེ་བ་རྒྱས་མཛད་ནས། །ཡབ་ཡུམ་གཉིས་མེད་སྦྱོར་(༩བ)
བས་དགྱེས་པར་ཚིམ། །བདུད་རྩི་བྱང་ཆུབ་སེམས་ཀྱི་སྤྲིན་སྤྲོས་པས། །སྟོང་གསུམ་ཁྲོ་བོའི་ཚོགས་ཀྱི་དཀྱིལ་འཁོར་སྤྲོ། །ཧཱུཾ་ཧཱུཾ་ཧཱུཾ་ཞེས་སྙོམ་པར་ཞུགས་པ་ཡི། །བྱང་སེམས་ཧཱུཾ་གི་རང་བཞིན་ཁྲོ་བོའི་ཚོགས། །སྟེང་འོག་ཕྱོགས་མཚམས་སྤྲོས་པས་དྲེགས་པ་ཅན། །སྡེ་དང་བཅས་པ་ཚར་བཅད་དབང་དུ་བསྡུས། །ཐམས་ཅད་དཔལ་དགུའི་དཀྱིལ་འཁོར་ལྷ་ཚོགས་སུ། །བཀོད་ནས་ཚུར་འདུས་སྙོམ་འཇུག་བདེ་བ་ཆེ། །ཞུ་བ་འབར་བའི་ཧཱུཾ་ཡིག་བརྒྱད་དུ་གྱུར། །ཧཱུཾ། འཇིག་རྟེན་སྟོང་ཁམས་གང་བའི་ཁྲག་འཐུང་རྣམས། །རང་ལ་བསྡུ་བའི་སྦྱོར་བས་ཀུན་བསྡུས་ཏེ། །དབྱིངས་སུ་ཐིམ་ནས་ཡིག་འབྲུ་ཕྱག་མཚན་དགུ། ཁྲོ་བོར་གྱུར་ཏེ་ཕྱོགས་འཚམས་ཀུན་ཏུ་འཁོད། །ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། དབུས་ཕྱོགས་མ་འགྱུར་མཐིང་ནག་ཨེ་དབྱིངས་སུ། །ཆེ་མཆོག་ཡབ་ཡུམ་མཁའ་ལས་ཕྱིར་སྤྲོད་ནས། །རྩིབས་བཞིར་རིགས་བཞིར་ཁྱམས་ལ་ཁྲོ་བོ་བཅུ། །སྒོ་བཞིར་མཐར་བྱེད་མུ་རན་ཅེ་སྤྱང་བརྒྱད། །ཨཱོཾ་བཛྲ་ཀྲོདྷ་མཧཱ་ཤྲཱི་ཧེ་རུ་ཀཿཧཱུཾ་ཕཊ། ཧཱུཾ། ཤར་ཕྱོགས་དཀྱིལ་འཁོར་དབུས་སུ་རུ་དྲའི་སྟེང་། །ཡང་དག་མཐིང་ནག་གཡས་དཀར་གཡོན་དམར་ཞལ། །ཕྱག་དྲུག་རྡོ་རྗེ་ཁ་ཊྭཱཾ་རྔེའུ་ཆུང་གཡས། །དྲིལ་བུ་བྷན་དམར་རྒྱུ་ཞགས་གཡོན་ན་བསྣམས། །ཀྲོ་ཏི་ཤྭ་རཱི་ཁ་ཊྭཱཾ་ཐོད་འཛིན་འཁྱུད། །རྩིབས་བཞིར་རིགས་བཞི་ཁྱམས་ལ་གཽ་རི་སོགས། །མ་མོ་བཅུ་དྲུག་སྒོ་བཞིར་གདོང་ཅན་བཞི། །མུ་རན་དབང་ཕྱུག་ཉི་ཤུ་རྩ་བརྒྱད་འཁོད། །ཨཱོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཧཱུཾ། ལྷོ་ཕྱོགས་དཀྱིལ་འཁོར་དབུས་སུ་ཆུ་གླང་སྟེང་། །གཤིན་རྗེ་སེར་ནག་གཡས་དཀར་གཡོན་དམར་ཞལ། །ཕྱག་དྲུག་བེ་ཅོན་རལ་གྲི་དགྲ་སྟ་གཡས། །བྷན་དམར་སྡིགས་འཛུབ་མདུང་ཐུང་གཡོན་ན་བསྣམས། །བཻ་ཏ་དགྲ་སྟ་བྷན་དམར་(༡༠ན)
སྟོབ་པས་འཁྱུད། །རལ་གཅིག་རྩེ་གསུམ་ཐོད་འཛིན་གཡས་སུ་འཁོད། །རྩིབས་བཞིར་གཤེད་བཞི་ཁྱམས་ལ་འཆི་བདག་ནི། །བཅུ་གཉིས་སྒོ་བཞིར་གདོང་ཅན་མུ་རན་ལ། །གིང་བདུད་རྩིས་པ་བཤན་པ་ལ་སོགས་འཁོད། །ཨཱོཾ་ཨ་ཀྲོ་ཏེ་ཀ་ཡ་མནྟ་ཀ་ཧ་ན་མ་བྷ་ཉྫ་ཧཱུཾ་ཕཊ། ཧཱུཾ། ནུབ་ཕྱོགས་དཀྱིལ་འཁོར་དབུས་སུ་ཀླུ་ཆེན་སྟེང་། །རྟ་མགྲིན་དམར་ནག་གཡས་དཀར་གཡོན་སྔོ་ཞལ། །ཕྱག་དྲུག་རྡོ་རྗེ་ཁ་ཊྭཱཾ་སྦྲུལ་ཞགས་གཡས། །དྲིལ་བུ་དུང་དམར་ལྕགས་སྒྲོག་གཡོན་ན་བསྣམས། །པདྨ་ཟིལ་གནོན་ཁ་ཊྭཱཾ་ཐོད་འཛིན་འཁྱུད། །གཡས་གཡོན་ཕྲ་མེན་བྱི་ལ་པུ་ཤུད་གདོང་། །རྩིབས་བཞིར་རིགས་བཞིར་ཁྱམས་ལ་ཟིལ་གནོན་བརྒྱད། །སྒོ་བཞི་ལས་བཞི་མུ་རན་ཁམ་རྒྱ་དྲུག །དམུས་ལོང་ཁྱི་སྤྱང་ཕོ་ཉ་འབྲུག་བཞིར་བཅས། །ཨཱོ་ཧྲཱིཿཔདྨཱནྟ་ཀྲི་ཏ་བཛྲ་ཀྲོདྡྷ་ཧ་ཡ་གྷཱི་ཝ་ཧུ་ལུ་ཧུ་ལུ་ཧཱུཾ་ཕཊ། ཧཱུཾ། བྱང་ཕྱོགས་དཀྱིལ་འཁོར་དབུས་སུ་ལྷ་ཆེན་སྟེང་། །ཕུར་པ་ལྗང་ནག་གཡས་དཀར་གཡོན་དམར་ཞལ། །ཕྱག་དྲུག་གཡས་གཉིས་རྩེ་དགུ་རྩེ་ལྔ་དང་། །གཡོན་གཉིས་མེ་དཔུང་ཁ་ཊྭཱཾ་མཐའ་གཉིས་ཀྱིས། །ཕུར་བུ་བསྒྲིལ་འདེབས་རྡོ་རྗེའི་གཤོག་པ་གདེངས། །འཁོར་ལོ་རྒྱས་འདེབས་ཁ་ཊྭཱཾ་ཐོད་འཛིན་འཁྱུད། །རྩིབས་བཞིར་སྲས་བཞི་ཁྱམས་ལ་ཁྲོ་བོ་བཅུ། །ཡབ་ཡུམ་ཟ་གསོད་སྒོ་བཞིར་སྒོ་སྲུང་བཞི། །མུ་རན་ཕུར་སྲུང་དམ་ཅན་བཅུ་དྲུག་འཁོད། །ཨཱོཾ་བཛྲ་ཀཱི་ལི་ཀཱི་ལ་ཡ་སརྦ་བི་གྷཱན་བཾ་ཧཱུཾ་ཕཊ། ཧཱུཾ། ཤར་ལྷོའི་དཀྱིལ་འཁོར་དབུས་སུ་མ་མོའི་སྟེང་། །བླ་མེད་ཁྲག་འཐུང་མཐིང་ནག་དཀར་དམར་ཞལ། །ཕྱག་དྲུག་རྡོ་རྗེ་ཁྱུང་ཆེན་སྦྲུལ་ཞགས་གཡས། །བྷན་དམར་ཞིང་དབྱུགས་ཐོད་པའི་གའུ་གཡོན། །མུ་ཁ་མཐིང་ནག་ཞལ་ལྔ་དཀར་སེར་(༡༠བ)
དམར། །ལྗང་གུ་མཐིང་ག་ཕྱག་དྲུག་རྡོ་རྗེ་དང་། །གྲི་ཞགས་བུམ་པ་གཡས་འཛིན་དྲིལ་བུ་དང་། །བྷན་དམར་གཡང་གཞིས་ཡབ་འཁྱུད་ཞབས་བརྒྱད་བགྲད། །རྩིབས་བཞིར་མ་ལྔ་འཁྱམས་ལ་རྗེ་མོ་ནི། །བཅུ་གཉིས་སྨན་མོ་ང་བརྒྱད་སྒོ་བཞི་རུ། །སྲིད་བཞི་མུ་རན་རོ་ཁ་མ་སོགས་འཁོད། །ཨཱོཾ་གུ་ཧྱ་ཛྙཱ་ན་ཤྲཱི་ཧེ་རུ་ཀཿགུ་ཧྱ་ཛྙཱ་ན་ཀྲོ་དྷཱི་ཤྭ་རཱི་སྟྭཾ་མ་མ་ཡོ་གི་ནི་རུ་ལུ་རུ་ལུ་ཧཱུཾ་བྷྱོ་ཧཱུཾ་ཕཊ། ཧཱུཾ། ལྷོ་ནུབ་དཀྱིལ་འཁོར་དབུས་ན་སེང་གེའི་ཁྲིར། །གསང་བའི་བདག་པོ་རིག་འཛིན་རྡོ་རྗེ་ཆོས། །དཀར་གསལ་ཕྱག་གཉིས་རྡོ་རྗེ་དྲིལ་བུ་འཛིན། །དབུ་སྐྲ་ཐོར་ཚུགས་རིན་ཆེན་ཅོད་པན་ཅན། །ཟི་ལྡིར་སྨད་གཡོགས་རུས་པའི་རྒྱན་དྲུག་གསོལ། །རྣལ་འབྱོར་མ་མོ་རང་འདྲའི་ཆས་ལྡན་འཁྱུད། །རྩིབས་བཞིར་རིགས་བཞི་ཁྱམས་ལ་རིགས་འཛིན་བརྒྱད། །སྒོ་བཞིར་སློབ་དཔོན་མུ་རན་མཁའ་འགྲོས་བསྐོར། །ཨཱོཾ་བཛྲ་མཧཱ་གུ་རུ་སརྦ་སིདྡྷི་ཧཱུཾ་ཕཊ། ཧཱུཾ། ནུབ་བྱང་དཀྱིལ་འཁོར་དབུས་སུ་དྲེགས་པའི་སྟེང་། །དྲེགས་འདུལ་མཐིང་ནག་གཡས་སེར་གཡོན་སྨུག་ཞལ། །ཕྱག་དྲུག་རྡོ་རྗེ་ལྷ་བརྒྱད་མགོ་བོ་གཡས། །བྷན་དམར་ཀླུ་བརྒྱད་མགོ་བོ་གཡོན་ན་བསྣམས། ཁམས་གསུམ་སྤྱི་འདུལ་ཁ་ཊྭཱཾ་ཐོད་འཛིན་འཁྱུད། །རྩིབས་བཞི་ཁྱམས་སྒོར་སྡེ་དཔོན་སུམ་ཅུ་དང་། །མུ་རན་སྣང་སྲིད་དྲེགས་པའི་ཚོགས་ཀུན་འཁོར་། །ཨཱོཾ་བཛྲ་ཙཎྜ་ས་རྦ་དུ་ཥྚཱཾ་ཧཱུཾ་ཕཊ། ཧཱུཾ། བྱང་ཤར་དཀྱིལ་འཁོར་དབུས་སུ་དགྲ་བགེགས་སྟེང་། །སྟོབས་ལྡན་ནག་པོ་ཞལ་གསུམ་མིག་སྨན་མདོག །ཕྱག་དྲུག་རྡོ་རྗེ་ལྷ་བརྒྱད་ཙིཏྟ་གཡས། །བྷན་དམར་ཀླུ་བརྒྱད་ཙིཏྟ་གཡོན་ན་བསྣམས། །འབྱུང་ལྔའི་བདག་མོ་མཐིང་ནག་ཕག་གཉིས་ཀྱིས། །གཟུགས་ཁམས་མཁར་འདེགས་འདོད་ཁམས་ས་གཞིར་གནོན། །རྩིབས་བཞི་ཁྱམས་སྒོར་སྡེ་དཔོན་(༡༡ན)
བཅོ་བརྒྱད་དང་། །མུ་རན་ལྷ་སྲིན་སྡེ་བརྒྱད་ཚོགས་རྣམས་འཁོར། །ཨཱོཾ་བཛྲ་སརྦ་དུ་ཋཱཾ་ཧཱུཾ་ཕཊ། རིགས་འཛིན་མ་གཏོགས་དཔལ་ཆེན་ཁྲག་འཐུང་ཀུན། །དབུ་གསུམ་ཕྱག་དྲུག་ཞབས་བཞི་མི་བཟད་གཟུགས། །གར་དགུའི་རྣམ་རོལ་ཞལ་གདངས་མཆེ་བ་གཙིགས། །དམར་ཟླུམ་སྤྱན་ལྡོག་སྨིན་མ་ཨག་ཚོམ་འབར། །ཞིང་ཆེན་གླང་ལྤགས་སྟོད་གཡོགས་སྟག་ཤམ་འཕྱང་། །ཚར་གསུམ་ཐོད་ཕྲེང་སྦྲུལ་བརྒྱད་ཕྱག་རྒྱ་དྲུག །རཀྟ་ཞག་དང་ཐལ་ཆེན་མཚན་མས་སྤྲས། །དཔལ་ཆེན་ཆས་རྫོགས་ཡུམ་རྣམས་ཁྲོ་ཆགས་ཚུལ། །རྔམ་བརྗིད་རྒྱན་ལྡན་རང་རང་ཡབ་དང་སྦྱོར། །གཙོ་འཁོར་ཐུགས་ཀར་རང་འདྲའི་ཡེ་ཤེས་སེམས། །དེ་ནང་ཉི་སྟེང་རྡོ་རྗེ་ལྟེ་བར་ཧཱུཾ། །སོ་སོའི་སྔགས་འཕྲེང་འབར་བས་གཡས་སུ་འཁོར། །དཀྱིལ་འཁོར་ཕྱི་ཁྱམས་ཤར་སོགས་ཕྱོགས་བཞི་རུ། །ཞི་རྒྱས་དབང་དྲག་མ་མོ་དྲུག་དྲུག་དང་། །སྒོ་བཞི་སྒོ་སྐྱོང་ཀུན་ཀྱང་ཕྱོགས་ཀྱི་མདོག །འཇིགས་གཟུགས་དུར་ཁྲོད་ཆས་ལྡན་རང་རྟགས་འཛིན། །ཕྱི་ཡི་མུ་ཁྱུད་མཁའ་འགྲོ་སུམ་ཅུ་གཉིས། །གིང་ཆེན་བཅོ་བརྒྱད་ལིངྒ་དྲུག་ཅུ་དང་། །འབར་མ་མ་བརྒྱད་ས་བདག་སུམ་ཅུ་གཉིས། །མ་བདུན་སྲིང་བཞི་ཕོ་ཉ་དྲུག་ཅུ་བཞི། མཁའ་འགྲོ་དྲེགས་བྱེད་ཕྱོགས་སྐྱོང་རྒྱལ་ཆེན་སོགས། །དཔལ་གྱིས་ཕོ་ཉ་བསམ་གྱི་མི་ཁྱབ་པ། །ཉི་དཀྱིལ་ལས་ནི་འོད་ཟེར་ཇི་བཞིན་དུ། །རབ་འབྱམས་ནམ་མཁའི་ཁམས་ཀུན་གང་བར་གྱུར། །ཨོཾ་བཛྲ་ཡ་ཀྵ་ས་མ་ཡ་ཧཱུཾ་ཕཊ། །བདུན་པ་བྱིན་རླབས་དབང་བསྐུར་རིམ་པ་ནི། ཧཱུཾ། བདག་ཉིད་དུས་གསུམ་སངས་རྒྱས་ཐམས་ཅད་ཀྱི། ཁྲོ་བོའི་རྒྱལ་པོ་ཡེ་ནས་ཡིན་པའི་ཕྱིར། །སྐུ་དང་གསུང་དང་ཐུགས་སུ་བྱིན་བརླབ་ཅིང་། །ཡེ་ཤེས་རྣམ་པ་ལྔ་ཡི་དབང་བསྐུར་རོ། །(༡༡བ)
ཨཱོཾ་སརྦ་ཏ་ཐཱ་ག་ཏ་མཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། །དེ་བཞིན་དུ་ཝཱ་ཀ་དང་ཙིཏྟ་ཡང་སྦྱར། །སྤྱི་བོར་ཟླ་བ་མགྲིན་པར་པདྨ་དང་། །སྙིང་གར་ཉི་སྟེང་ཨཱོཾ་དཀར་ཨཱཿདམར་ཧཱུཾ། །མཐིང་ག་ལས་འཕྲོས་འོད་ཀྱིས་བདེ་གཤེགས་ཀྱི། །རྒྱུད་བསྐུལ་རྡོ་རྗེ་གསུམ་གྱི་ལྷ་ཚོགས་རྣམས། །ནམ་མཁའི་ཁམས་ཀུན་གང་བ་སྤྱན་དྲངས་ནས། །ཡི་གེ་གསུམ་ལ་ཐིམ་པ་ཡོངས་གྱུར་པས། །རྣམ་སྣང་སྣང་མཐའ་མི་བསྐྱོད་ལོངས་སྤྱོད་རྫོགས། །རང་རྟགས་ཕྱག་མཚན་འཛིན་པའི་སྐུ་རུ་གྱུར། །ཨོཾ་མཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། །དེ་བཞིན་དུ་ཤཱུ་ནྱ་ཏཱའི་ཚབ་ཏུ་ཨཱོཾ་དར་ཤ་དང་མཧཱ་དང་ཕྲ་ཏྱ་བེཀྵ་ཎ་དང་ཀྲྀ་ཏྱ་ཨ་ནུ་ཥྛ་རྣམས་འབྱིན་འཇུག་བྱེད། །རིགས་ལྔ་རྗེས་ཆགས་ཀྱིས་ཞུ་ཡེ་ཤེས་ལྔའི། །ཆུ་ཡི་དབང་བསྐུར་ཉོན་མོངས་ལྔ་དག་ནས། །ཕུང་པོ་སངས་རྒྱས་ལྔ་རུ་གནས་གྱུར་ཏེ། །དབང་རྟགས་རྒྱལ་བ་རིགས་ལྔས་དབང་བསྐུར་གྱུར། །བརྒྱད་པ་ཡེ་ཤེས་ལྷ་ཚོགས་སྤྱན་དྲང་བ། ཧཱུཾ། ཐུགས་གའི་ཧཱུཾ་ལས་འོད་ཟེར་ལྕགས་ཀྱུ་ལྟར། །འཕྲོས་པས་ཡེ་དག་རིག་རྩལ་འོག་མིན་ནས། །སྒྲུབ་སྡེ་བརྒྱས་ཀྱི་དཀྱིལ་འཁོར་ལྷ་ཚོགས་ཀུན། །ཐོག་མེད་བཛྲ་ས་མཱ་ཡ་ཛ༔ཛ༔ ཧཱུཾ། འོག་མིན་ཆོས་དབྱིངས་དབུས་མཐའ་མེད་པ་ནས། །བདེ་གཤེགས་ཞི་བའི་ལྷ་ཚོགས་དབྱིངས་ནས་བཞེངས། །ཆོས་ཀྱི་དབྱིངས་ནས་འགྲོ་དོན་སྐུ་སྤྲུལ་པ། །ཡབ་ཡུམ་འཁོར་བཅས་གནས་འདིར་ཤེགས་སུ་གསོལ། །འོག་མིན་ཆོས་དབྱིངས་དབུས་ཕྱོགས་ཕོ་བྲང་ནས། །ཆེ་མཆོག་ཡོན་ཏན་ལྷ་ཚོགས་༝། །ཆོས་དབྱིངས་༝། །ཡབ་ཡུམ་༝། །འོག་མིན་ཆོས་དབྱིངས་ཕྱོགས་མཚམས༝། །སྒྲུབ་པ་བཀའ་བརྒྱད་ལྷ་ཚོགས༝། །ཆོས་ཀྱི་༝། །ཡབ་ཡུམ༝། །རབ་འབྱམས་ཕྱོགས་བཅུའི་ཞིང་ཁམས་རྒྱ་མཚོ་ནས། །བཀའ་སྡོད་ཕོ་ཉའི་ལྷ་ཚོགས་༝། །(༡༢ན)
ཆོས་ཀྱི་༝། །ཡབ་ཡུམ༝། །ཨཱོཾ་ཤྲཱི་བཛྲ་ཀྲོ་དྷ་ཧེ་རུ་ཀཿས་པ་རི་ཝཱ་ར་ཨེ་ཨ་ར་ལི་ཧྲི་ཧྲི་ཛཿཧཱུཾ་བཾ་ཧོཿ དགུ་པ་ལྷ་ཚོགས་བཞུགས་སུ་གསོལ་བ་ནི། ཧཱུཾ། ཕོ་བྲང་དགུའི་ཀློང་འབར་བའི་ཨེ་དབྱིངས་སུ། །ལྷ་བརྒྱད་ཀླུ་བརྒྱད་བྱོལ་སོང་གཙོ་བོ་བརྒྱད། །རུ་ཀྲ་གཤིན་རྗེ་ཆུ་བདག་ལྷ་ཆེན་པོ། །མ་མོ་དར་ཟབ་དྲེགས་པ་དགྲ་གེགས་གདན། །མ་ཆགས་པདྨ་ཐབས་ཤེས་ཉི་ཟླ་ལ། །དཔལ་ཆེན་གཙོ་དགུའི་ལྷ་ཚོགས་བཞུགས་སུ་གསོལ། །ས་མ་ཡ་ཨཱཿཝེ་ཤ་ཡ་ཏི་ཥྛ་ལྷན། །བཅུ་པ་དཀྱིལ་འཁོར་ལྷ་ལ་ཕྱག་ཚལ་བ། ཧཱུཾ། ཆོས་སྐུར་སྐྱེ་མེད་དབྱིངས་ལས་མ་གཡོས་ཀྱང་། །ཐུགས་རྗེས་གཟུགས་སྐུར་རྒྱུ་མའི་སྐུ་བཞེངས་པ། །ཞི་ཁྲོ་རབ་འབྱམས་དཀྱིལ་འཁོར་འཁོར་ལོའི་གཙོ། །དཔལ་ཆེན་བཀའ་བརྒྱད་ལྷ་ལ་ཕྱག་འཚལ་ལོ། །ཨ་ཏི་པུ་ཧོཿཔྲ་ཏི་ཙྪ་ཧོཿ བཅུ་གཅིག་མཆོད་པའི་སྨན་ཕུང་དངོས་གྲུབ་བླང་། །ཕྱི་མཆོད་ཕྱག་རྒྱ་དམ་རྫས་འདོད་ཡོན་ལྷ། །བདུད་རྩི་རཀྟ་སྦྱོར་སྒྲོལ་གཉིས་མེད་ལས། །དང་པོ་མྱོང་གྲོལ་བདུད་རྩིའི་སྨན་མཆོད་ནི། །ཧཱུཾ། རང་བྱུང་གདོད་ནས་རྣམ་པར་དག་པ་སྟེ། །རྩ་བརྒྱད་ཡན་ལག་སྟོང་ལས་སྦྱར་བའི་སྨན། །རིགས་ལྔ་དམ་ཚིག་རྣམ་པ་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས་ཆེན་པོ། །ཉོན་མོངས་གདུང་བ་སེལ་བའི་བདུད་རྩི་འདི། །རྩ་བ་གསུམ་གྱི་ལྷ་ཚོགས་རྣམས་ལ་འབུལ། །ཐུགས་རྗེ་བརྩེར་དགོངས་དབང་དང་དངོས་གྲུབ་སྩོལ། །སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། །ཀུན་ཏུ་བཟང་པོ་ཆེ་མཆོག་ཧེ་རུ་ཀཿ། །རྡོ་རྗེ་ཆོས་དང་ལས་ཀྱི་དབང་མོ་ཆེ། །རིགས་འཛིན་རྣམས་བརྒྱད་པདྨ་ཐོད་འཕྲེང་ལ། །སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ། །སརྦ་པཉྩ་ཨ་མྲྀ༝།རྗེ་འབངས་དགུ་དང་གཏེར་སྟོན་མངའ་(༡༢བ)
བདག་ཉང་། ཐུགས་སྲས་འགྲོ་བའི་མགོན་པོ་སྐུ་མཆེད་གཉིས། །རྫོགས་ཆེན་མཆེད་གཉིས་དེ་ཝ་པ་ཏྲི་ལ། །སྨན་མཆོད་འབུལ་༝། །སརྦ་༝། ཆོས་ཀྱི་རིན་ཆེན་སུམ་ལྡན་ཡབ་སྲས་དང་། །འཇམ་དབྱངས་རིན་ཆེན་ཟུར་ཧྭང་ཆོས་ཀྱི་རྗེ། །ཕ་ལ་ཤྲི་ཤཱཀྱ་བཤེས་གཉེན་ལ། །སྨན་མཆོད་འབུལ་ལོ་༝། །སརྦ་༝། རྒྱལ་སྲས་ཆོས་རྗེ་རྒྱུད་འཛིན་ལེགས་པ་དཔལ། །འཇམ་དབྱངས་རྒྱལ་མཚན་པཎ་ཆེན་པདྨ་དབང་། །ལེགས་ལྡན་རྡོ་རྗེ་གནམ་ལྕགས་མེ་འབར་ལ། །སྨན་མཆོད་འབུལ་ལོ་༝། །སརྦ་པཉྩ༝། །བཀྲ་ཤིས་རྒྱ་མཚོ་དུ་མ་རང་གྲོལ་རྗེ། །དེ་དབོན་ངག་གི་དབང་པོ་ཡེ་ཤེས་གྲུབ། །ཟུར་ཆེན་ཀུན་མཁྱེན་ཆོས་དབྱིངས་རང་གྲོལ་ལ། །སྨན་མཆོད་འབུལ་ལོ་༝། །སརྦ་༝། གནམ་ལྕགས་མེ་འབར་མན་ཁོ་བོས་ཐོབ་པ་ལྟར་བྲིས་པ་ཡིན་གྱིས། དེ་མན་འབྲི་གུང་དང་རྡོ་རྗེ་བྲག་སོགས་སེལ་མེད་ཀྱི་བརྒྱུད་པ་མི་དབར་ཁྱིས་མ་ཆོད་པ་ཞིག་བཙལ་ནས་དབྲི་བསྣན་བྱའོ། །ཆེ་མཆོག་ཡང་དག་གཤིན་རྗེ་པདྨ་དབང་། །ཕུར་པ་རྦོད་གཏོང་རིགས་འཛིན་དྲེགས་འདུལ་དང་། །དྲག་སྔགས་དཔལ་ཆེན་བཀའ་བརྒྱད་གཙོ་འཁོར་ལ། །སྨན་མཆོད་༝། །སརྦ་༝། ནག་པོ་ཆེན་པོ་ཡབ་ཡུམ་བཀའ་སྡོད་བརྒྱད། །གནས་གསུམ་མཁའ་འགྲོ་དམ་ཅན་གཏེར་བདག་དང་། །གནས་བདག་གཏེར་བདག་དཀར་ཕྱོགས་སྐྱོང་རྣམས་ལ། །སྨན་མཆོད་འབུལ་ལོ་༝། །སརྦ་༝། གཉིས་པ་བདུད་རྩིའི་དངོས་གྲུབ་བླང་བ་ནི། ཧཱུཾ། དོན་དམ་ཐིག་ལེ་བདེ་བ་ཆེན་པོ་ལས། །མཚུངས་པ་མེད་པ་བྷནྡྷའི་སྣོད་ནང་དུ། །ཡེ་ཤེས་ལྔ་རྫོགས་བདུད་རྩི་རིན་ཆེན་གཏེར། །དངོས་པོ་མེད་ལས་དངོས་གྲུབ་བླང་བར་བྱ། །ཀཱ་ཡ་སིདྡྷི་ཨཱོཾ། ཝཱ་ཀ་སིདྡྷི་ཨཱཿ ཙིཏྟ་སིདྡྷི་ཧཱུཾ། །གསུམ་པ་ཕྱི་ཡི་མཆོད་པའི་རིམ་པ་ནི། །ཧཱུཾ། (༡༣ན)
དངས་བསིལ་རྙོག་མེད་ཡིད་འོང་མཆོད་ཡོན་སྦྲེང་། །དག་བྱེད་ཞབས་བསིལ་དྲི་ལྡན་གངྒཱའི་རྒྱུན། །ཐང་སྐྱེས་ཆུ་སྐྱེས་རྣམ་བཀྲའི་མེ་ཏོག་ཚལ། །ལྷན་ཅིག་སྐྱེས་དང་ཡོངས་སྦྱར་བདུག་པའི་སྤྲིན། །མར་མེ་ཉི་མོར་བྱེད་པའི་གཟུགས་གསར་པ། །དྲི་ཆབ་དམ་པ་མཆོག་བསྐྱེད་རོལ་མཚོར་སྤེལ། །ཞལ་ཟས་ལྷ་ཡི་བདུད་རྩི་རོ་བརྒྱའི་བཅུད། །རོལ་མོ་སྙན་འཇེབས་ཡན་ལག་རྒྱ་མཚོའི་སྒྲ། །ངོ་མཚར་མཆོད་པའི་སྤྲིན་ཕུང་བསམ་ཡས་པས། །རམ་འབྱམས་ནམ་མཁའི་ཁྱོན་རྣམས་བཀང་སྟེ་འབུལ། །ཨཱོཾ་ཤྲཱི་བཛྲ་ཧེ་རུ་ཀ་ས་པ་རི་ཝཱ་ར་ཨརྒྷཾ་ནས་ཤཔྟཔཱུཛཿཧོཿ ཧཱུཾ།ཛམྦུའི་གསེར་འཁོར་ཡིད་བཞིན་ནོར་བུ་མཆོག །ཡིད་འོང་བཙུན་མོ་བློ་ལྡན་ཁྱིམ་བདག་སྟེ། །སྟོབས་ལྡན་གླང་པོ་ཅང་ཤེས་རྟ་ཡི་མཆོག །ཕས་རྒོལ་མཐར་བྱེད་དམག་དཔོན་རིན་ཆེན་བདུན། །མཛེས་སྡུག་གཟུགས་དང་སྙན་བརྗིད་རོལ་མོའི་སྒྲ། །དྲི་ཞིམ་ངད་ལྡང་བཅུད་ལྡན་བདུད་རྩིའི་ཟས། །འཇམ་གཉེན་རེག་བྱ་བཀྲ་ཤིས་རྟགས་རྫས་སོགས། །སྲིད་ཞིའི་འབྱོར་ཚོགས་ནམ་མཁའ་མཛོད་དུ་འབུལ། །ཨཱོཾ་ཤྲཱི་བཛྲ་ཧེ་རུ་ཀཿས་པ་རི་ཝཱ་ར་སཔྟ་མཧཱ་རཏྣ་པཉྩ་ཀཱ་མ་གུ་ཎ་པཱུ་ཛཿཧོ༔། བཞི་པ་ཕྱག་རྒྱ་གར་གྱི་མཆོད་པ་ནི། ཧཱུཾ། ཁྲག་འཐུང་རྒྱལ་པོ་གར་ལ་དགྱེས། །སྐུ་མདོག་ཞལ་ནི་རྣམ་པར་འགྱུར། །སྐུ་ཡི་གར་སྟབས་གློག་འཁྱུག་པའི། །ཕྱག་རྒྱ་གར་གྱི་མཆོད་པ་འབུལ། །མ་ཧཱ་མུ་དྲ་པཱུ་ཛ༔ཧོ༔། ལྔ་པ་དམ་རྫས་རྒྱུ་ཡི་མཆོད་པ་ནི། ཧཱུཾ། གདུག་པ་ཅན་རྣམས་ཚར་བཅད་པའི། །དབང་པོའི་མེ་ཏོག་ཕྲེང་བར་སྤེལ། །ཚིལ་ཆེན་གསུར་གྱི་དུད་པའི་སྤྲིན། །མི་བཟད་མུན་པ་ལྟ་བུར་འཚུབ། །ཞུན་མར་མཆོག་གི་སྒྲོན་མེ་ནི། །དུས་མཐའི་ཞུགས་ཀྱི་ཕུང་པོར་འབར། ཁྲག་མཁྲིས་(༡༣བ)
དྲི་དང་ཡོངས་སྦྱར་བའི། །ལྦུ་འཕྲེང་རབ་འཁྲུག་བྱུག་པའི་མཚོ། །ཤ་ཁྲག་རུས་པ་དོན་སྙིང་ཚོགས། །ལྷུན་པོར་སྤུངས་པའི་ཞལ་ཟས་མཆོག །ཐོད་ལྔ་རྐང་གི་གླིང་བུ་དང་། །རབ་འཇིགས་སྒྲ་དབྱངས་རྒྱ་མཚོར་བཅས། །དུར་ཁྲོད་མཆོག་གིས་མཆོད་སྤྲིན་འདི། །གཤིན་རྗེའི་འདུན་ས་བཞིན་དུ་འབུལ། །ཨོཾ་ཤྲཱི་བཛྲ་ཧེ་རུ་ཀ༔ས་པ་རིཝཱ་ར་མཧཱ་ཤྨ་ཤཱ་ན་པུཥྤཾ་དྷཱུ་པཾདཱིཔཾགྷནྡྷཾ་ནེ་ཝིདྱེ་ཤཔྟ་པཱུ་ཛཿཧོཿ། །དྲུག་པ་འདོད་ཡོན་ལྷ་མོའི་མཆོད་པ་ནི། ཧཱུཾ། རྡོ་རྗེ་སྒེག་མོ་གཟུགས་མཛེས་མ། །འཕྲེང་བ་མ་ནི་རྒྱན་འཕྲེང་འཛིན། །གླུ་མ་གླུ་ལེན་པི་ཝཾ་བརྡུང་། །གར་མ་མཛེས་པའི་གར་བསྒྱུར་མ། །བདུག་པ་མ་ནི་སྤོས་སྤྲིན་སྤྲོ། །མེ་ཏོག་མ་ནི་མེ་ཏོག་འཐོར། །མར་མེ་མ་ནི་སྣང་གསལ་འཛིན། །དྲི་མ་དྲི་མཆོག་བྱུག་པ་འབུལ། །བརྒྱད་ཀ་གཟུགས་མཛེས་ལྟ་ན་སྡུག །ཡིད་འོང་གར་བསྒྱུར་གླུ་ལེན་མ། །འཆི་མེད་བུ་མོ་ལྟ་བུ་ཡིས། །ཕྱོགས་བཅུའི་འཇིག་རྟེན་བཀང་སྟེ་འབུལ། །ཨོཾ་བཛྲ་ལཱ་སྱེ་ཧཱུཾ། དེ་བཞིན། མཱ་ལེ་ཏྲཾ། གཱི་ཏི་ཧྲཱིཿ། ནཱིརྟི་ཨཱཿ། པུཥྤེ་ཧཱུཾ། དྷཱུཔེཏྲཾ། ཨ་ལོ་ཀེ་ཧྲཱི། གྷནྡྷེ་ཨཱཿ། བདུན་པ་ཛ་གད་དཔའ་བོའི་མཆོད་པ་ནི། ཧཱུཾ། རྒྱུ་གཉིས་རྐྱེན་སྦྱར་བདུད་རྩི་འདི། །དུག་ལྔ་སྨན་བསྒྱུར་ཡེ་ཤེས་རྫས། །ཛ་གད་དཔའ་བོའི་ཕུད་ཀྱི་མཆོག །དཔལ་ཆེན་དཀྱིལ་འཁོར་ལྷ་ལ་འབུལ། །མཧཱ་པཉྩ་ཨ་མྲི་ཏ་ཁཱ་ཧི། བརྒྱད་པ་བྷ་ལིང་གཏོར་མའི་མཆོད་པ་ནི། དམ་རྫས་རྨད་བྱུང་གཏོར་ཆེན་པོ། །ཆོས་ཉིད་སྐྱེ་མེད་ཀློང་ནས་སྤྲུལ། །འདོད་ཡོན་རྣམས་ལྔས་རབ་ཏུ་སྤྲས། །དཔལ་ཆེན་དཀྱིལ་འཁོར་ལྷ་ལ་འབུལ། །མཧཱ་བྷ་ལིངྟ་ཁཱ་ཧི། དགུ་པ་དམར་ཆེན་རཀྟཱི་མཆོད་པ་ནི། ཉོན་མོངས་རྩ་བ་འཁོར་བའི་ཁྲག །ཁམས་གསུམ་འཁོར་བ་སྟོངས་བྱའི་ཕྱིར། །དུང་ཆེན་སྣོད་དུ་(༡༤ན)
དམར་ཆེན་བསྐྱིལ། །དཔལ་ཆེན་དཀྱིལ་འཁོར་ལྷ་ལ་འབུལ། མཧཱ་རཀྟ་ཁཱ་ཧི། བཅུ་པ་བདེ་ཆེན་སྦྱོར་བའི་མཆོད་པ་ནི། །འཁྲིལ་བའི་མཆོད་ཆེན་མཉམ་སྦྱོར་བས། །ཐབས་དང་ཤེས་རབ་གཉིས་སུ་མེད། །གཉིས་མེད་སྦྱོར་བ་བདེ་བའི་མཆོག །དཔལ་ཆེན་དཀྱིལ་འཁོར་ལྷ་ལ་འབུལ། །བྷོ་དྷི་ཙིཏྟ་མཧཱ་སུ་ཁ་ཨ་ནུ་ར་ག་ཡ་མི། །བཅུ་གཅིག་ལོག་འདྲེན་བསྒྲལ་མཆོད་ནི། །ཡང་དག་རྟོག་པའི་མཚོན་བྱ་ཡིས། །མ་རྟོགས་སེམས་ཅན་དབྱིངས་སུ་བསྒྲལ། །སྒྲོལ་བ་ལས་ཀྱི་མཆོད་པ་ཆེ། །དཔལ་ཆེན་དཀྱིལ་འཁོར་ལྷ་ལ་འབུལ། །སརྦ་ཤ་ཏྲཱུན་མཱ་ར་ཡ་རྦད། བཅུ་གཉིས་སྤྲོས་བྲལ་མཆོད་པ་ནི། །གདོད་ནས་རང་རིག་ལྷ་རུ་དག །མཆོད་བྱ་མཆོད་བྱེད་མཆོད་ཡུལ་ཀུན། །མི་དམིགས་སྤྲོས་པ་ཕྱག་རྒྱ་ཆེ། །དཔལ་ཆེན་དཀྱིལ་འཁོར་ལྷ་ལ་འབུལ། །དྷརྨ་དྷཱ་ཏུ་མ་ཧཱ་མུ་དྲ་པཱུ་ཛཿཧོཿ། །བཅུ་གཉིས་དཀྱིལ་འཁོར་ལྷ་ཚོགས་ལ་བསྟོད་པ། ཧཱུཾ། བདེ་གཤེགས་སྐུ་ལྔ་ཡོན་ཏན་རྫོགས་པའི་ལྷ། །འགྲོ་དྲུག་དུག་ལྔའི་བག་ཆགས་རྒྱུད་སྦྱོང་ཞིང་། །མཚན་དང་དཔེ་བྱད་འབར་བའི་སྐུར་སྣང་བ། །བདེ་གཤེགས་ཞི་བའི་ལྷ་ལ་ཕྱག་འཚལ་བསྟོད། །བདེ་གཤེགས་ཡོན་ཏན་མ་ལུས་རྫོགས་པའི་ལྷ། །འགྲོ་དྲུག་ཀུན་གཞིའི་བག་ཆགས༝། །ཆོས་ཀྱི་དབྱིངས་ཀྱི་ཡེ་ཤེས༝། །ཆེ་མཆོག་ཡོན་ཏན་ལྷ་ལ༝། །བདེ་གཤེགས་ཐུགས་ཀྱི་ཡོན་ཏན་རྫོགས་པའི་ལྷ། །འགྲོ་དྲུག་སེམས་ཀྱི་བག་ཆགས༝། །མེ་ལོང་ལྟ་བུའི༝། །ཡང་དག་ཐུགས་ཀྱི་ལྷ་ཡི༝། །བདེ་གཤེགས་སྐུ་ཡི༝། །འགྲོ་དྲུག་ལུས་ཀྱ༝། །མཉམ་པ་ཉིད་ཀྱི༝། །འཇམ་དཔལ་སྐུ་ཡི༝། །བདེ་གཤེགས་གསུང་གི༝། །འགྲོ་དྲུག་ངག་གི༝། །སོ་སོར་རྟོག་པའི༝། །པདྨ་(༡༤བ)
གསུང་གི༝། །བདེ་གཤེགས་འཕྲིན་ལས༝། །འགྲོ་དྲུག་སྒོ་ལྔའི༝། །བྱ་བ་གྲུབ་པའི༝། །ཕུར་པ་འཕྲིན་ལས༝། །བདེ་གཤེགས་རྦོད་གཏོང་ཡོན་ཏན་རྫོགས་པའི་ལྷ། །འགྲོ་དྲུག་སྒྲོལ་མཛད་ཡུམ་གྱི་བྷ་གའི་ཀློང་། །མ་དང་སྲིང་མོའི་ཚུལ་དུ་སྐུར་སྟོན་པ། །མ་མོ་རྦོད་གཏོང་༝། །བདེ་གཤེགས་ཕྱག་རྒྱའི༝། །འགྲོ་དྲུག་སེམས་ཅན་ཀུན་གྱི་དོན་ལ་དགོངས། །ཕྱག་རྒྱ་ཆེན་པོའི་ཚུལ་དུ༝། །རིགས་འཛིན་སློབ་དཔོན༝། །བདེ་གཤེགས་བཀའ་ཡི་བསྟན་པ་གསུང་བའི་ཕྱིར། །ང་ཉིད་ཆོས་ཀྱི་དབྱིངས་ལས་མ་གཡོས་ཀྱང་། །གཟུགས་སྐུ་དྲེགས་པའི་ཚུལ་དུ༝། །འཇིག་རྟེན་མཆོད་བསྟོད༝། །བདེ་གཤེགས་བསྟན་པའི་དགྲ་བགེགས་བསྒྲལ་བའི་ཕྱིར། །ཆོས་ཀྱི་དབྱིངས་ལས་སྒྱུ་མའི་སྐུར་བཞེངས་ནས། །སྔགས་བདག་དྲེགས་པའི་ཚུལ་དུ་སྐུར་སྟོན་པ། །དམོད་པ་དྲག་སྔགས༝། །བདེ་གཤེགས་སྤྱན་སྔར་ཁས་བླངས་དམ་བཅས་བཞིན། །ཞི་རྒྱས་དབང་དྲག་འཕྲིན་ལས་རྣམ་པ་བཞིས། །ཚར་གཅོད་རྗེས་འཛིན་མཐུ་སྟོབས་རྩལ་མངའ་བའི། །དཔལ་གྱི་བཀའ་སྡོད་འཁོར་དང་བཅས་ལ་བསྟོད། །བཅུ་གསུམ་བསྙེན་སྒྲུབ་འཛབ་འདས་རིམ་པ་ནི། །བདག་ཉིད་དཔལ་ཆེན་ཙི་ཏ་རིན་པོ་ཆེ། །མཆོང་སྨུག་གུར་ཁང་ཕུབ་པ་ལྟ་བུའི་ནང་། །པདྨ་ཉི་ཟླའི་སྟེང་ན་རང་འདྲ་བའི། །ཡེ་ཤེས་སེམས་པ་མཚོན་གང་ཐུགས་ཀ་རུ། །ཉི་ཟླར་རྡོ་རྗེ་སྔོན་པོ་ནས་འབྲས་ཙམ། །ལྟེ་བར་ཉི་མ་ཡུངས་འབྲུ་ཙམ་གྱི་སྟེང་། །ཧཱུཾ་ཡིག་སྦུ་ཤད་མཐའ་སྐོར་སྔགས་ཀྱི་བསྐོར། །ཀློག་ཚུལ་གྱིས་བཟླས་གཡས་སུ་འཁོར་བ་ལས། །འོད་ལྔའི་ཟེར་འཕྲོས་བ་སྤུའི་བུའི་གའི་མཐར། །ཧཱུཾ་ཡིག་གིས་ཁྱབ་དེ་ལས་ཁྲོ་བོའི་ཚོགས། །མཚོན་གང་ཙམ་གྱིས་བར་མཚམས་མེད་པར་གཏིབས། །སླར་ཡང་འོད་ལྔ་འཕྲོས་པས་སྣོད་བཅུད་(༡༥ན)
ཀུན། །རྟེན་དང་བརྟེན་པར་བསྒྱུར་ཞིང་རང་སྔགས་སྒྲས། །ཕྱི་ནང་ལྷ་ཚོགས་ཀྱིས་ཁྱབ་ཞལ་ནས་ཀྱང་། །འབྲུག་སྒྲ་ལྟར་སྒྲོག་འོད་ཀྱིས་བདེ་གཤེགས་རྣམས། །རྒྱུད་བསྐུལ་དབང་དང་དངོས་གྲུབ་བྱིན་རླབས་བསྡུས། །སེམས་ཅན་ལ་ཕོགས་སྡིག་སྒྲིབ་རབ་སྦྱངས་ནས། །ཞི་དང་ཁྲོ་བོའི་གོ་འཕང་དག་ལ་བཀོད། །སླར་ཡང་འོད་ཟེར་དཀར་ལྗང་དམར་པོ་དང་། །མཐིང་ནག་ཚ་ཞིང་རྩུབ་པར་དཔག་མེད་ཕྲོས། །བདག་དང་རྒྱུ་སྦྱོར་དམིགས་ཡུལ་བཅས་པ་ཡི། །ནད་གདོན་སྒྲིབ་སྦྱངས་ཚེ་དང་བསོད་ནམས་རྒྱས། །དགྲ་བགེགས་ཚར་བཅད་འཕྲིན་ལས་རྣམ་བཞི་ཀུན། །བསྒྲུབ་པའི་དམིགས་པ་དང་བཅས་འཛབ་བཟླ་བ། ཨཱོཾ་བོ་དྷི་ཙིཏྟ་མཧཱ་སུ་ཁ་ཛྙཱ་ན་དྷཱ་ཏུ་ཨཱཿ། ཨཱོཾ་བཛྲ་ཀྲོ་དྷ་མཧཱ་ཤྲི་ཧེ་རུ་ཀཿཧཱུཾ་ཕཊ། ཨཱོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ་ཕཊ། །ཨཱོཾ་ཨ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷ་ཉྫ་ཧཱུཾ་ཕཊ། ཨཱོཾ་ཧྲཱིཿཔདྨཱནྟ་ཀྲྀཏ་བཛྲ་ཀྲོ་དྷ་ཧ་ཡ་གྷི་ཝ་ཧཱུཾ་ཕཊ། ཨཱོཾ་བཛྲ་ཀཱི་ལི་ཀཱི་ལ་ཡཱ་སརྦ་བྷི་གྷྣཱན་བཾ་ཧཱུཾ་ཕཊ། ཨཱོཾ་གུ་ཡ་ཛྙཱ་ན་ཤྲི་ཧེ་རུ་ཀཿ གུ་ཡ་ཛྙཱ་ན་ཀྲོ་དྷི་ཤྭ་རི་སྟཾ་མ་མ་ཡོ་གི་ནི་རུ་ལུ་རུ་ལུ་ཧཱུཾ་བྷྱོ་ཧཱུཾ་ཕཊ། ཨཱོཾ་བཛྲ་མཧཱ་གུ་རུ་སརྦ་སིདྡྷི་ཧཱུཾ་ཕཊ། ཨཱོཾ་བཛྲ་ཙཎྜ་སརྦ་དུ་ཥཾ་ཧཱུཾ་ཕཊ། ཧཱུཾ་བཛྲ་སརྦ་དུ་ཥྚཱཾ་ཧཱུཾ་ཕཊ། ཨཱོཾ་བཛྲ་སརྦ་ཡཀྵ་ས་མ་ཡ་ཧཱུཾ་ཕཊ། ཨཱོཾ་བཛྲ་མ་ཧཱ་ཀྲོ་དྷ་པདྨ་ཀྲོ་དྷི་ཤྭ་རི་བཛྲ་ཀཱི་ལི་ཀཱི་ལཱ་ཡ་མཧཱ་ཡཀྵ་ཀཱ་ལ་རཱུ་པ་ཀརྨ་རཾ་རཾ་ཛྭ་ལ་རཾ་ཧཱུཾ་ཕཊ། སྟོང་ཚིག་གི་མཆོད་པ་ནི། ཧཱུཾ། ཡེ་ཤེས་ལྷ་ཚོགས་སྤྱན་འདྲེན་གཤེགས། །ཕྱི་ནང་གསང་བའི་མཆོད་པ་འབུལ། །སྐུ་གསུང་ཐུགས་ཡོན་འཕྲིན་ལས་བསྟོད། །བག་མེད་འགལ་འཁྲུལ་ཉམས་ཆགས་བཤགས། །མཧཱ་ཨ་མྲྀ་ཏ་བ་ལིཾ་ཏ་རཀྟ་ཁཱ་ཧི། །ཐིག་ལེའི་རྣལ་འབྱོར་སྙིང་གའི་འཁོར་ལོ་ལས། །སྔགས་འཕྲེང་ཕྱིར་འཕྲོས་ཡབ་ཀྱི་ཞལ་ནས་འཐོན། །ཡུམ་གྱི་ཞལ་ཞུགས་དབྱིབས་བརྒྱུད་པདྨ་ནས། །ནོར་བུའི་ལམ་བརྒྱུད་(༡༥བ)
མགལ་མེ་ལྟར་འཁོར་བའི། །ངང་ལས་བཟླས་པས་བདེ་སྟོང་དབྱེར་མེད་ཀྱི། །རྟོགས་པའི་བོགས་འབྱིན་བླ་ན་མེད་པའོ། །རྩ་བའི་གསུམ་པ་མཇུག་ལ་བརླབ་དྲང་མཆོད། །བཤགས་བསྒྲལ་ལྷག་མ་བསྐུལ་ཆད་བསྟན་མ་བྲོ། །དངོས་གྲུབ་མཆོད་བསྟོད་བཤགས་གཤེགས་རྒྱུན་སྤྱོད་སྲུང་། །སྨོན་ལམ་ཤིས་བརྗོད་བཅུ་བདུན་དང་པོ་ནི། ཧཱུཾ། རྡོ་རྗེ་ལྟ་བུའི་ཡེ་ཤེས་ཀྱིས། །ཆོས་ཀུན་སྒྱུ་མར་རིག་པ་ལས། །རིག་པའི་ཡེ་ཤེས་རཾ་ཡཾ་ཁཾ། །རཾ་ལས་མེ་འབར་དངོས་འཛིན་བསྲེགས། །ཡཾ་ལས་རླུང་གཡོས་བག་ཆགས་གཏོང་། ཁཾ་ལས་ཆུ་བྱུང་གཉིས་འཛིན་བཀྲུས། །རཾ་ཡཾ་ཁཾ་སྥ་ར་ཎ་ཕཊ། །སླར་ཡང་བྷྲཱུཾ་ཨཱོཾ་ཨཱཿཧཱུཾ་ཧྲཱིཿ། །འཕྲོས་པས་ཚད་ལྡན་ཀ་པཱ་ལར། །བྷྲཱུཾ་གྱིས་འདོད་ཡོན་ཚོགས་སུ་སྦྱར། །ཨཱོོཾ་གྱིས་དངོས་འཛིན་དྲི་མ་སྦྱངས། །ཨཱཿཡིས་ནམ་མཁའ་གང་བར་སྤེལ། །ཧཱུཾ་གྱིས་གང་མོས་དེ་ལྟར་བསྒྱུར། །ཧྲཱིཿཡིས་ཟག་མེད་བདུད་རྩིར་ཞུ། །ཕུན་ཚོགས་འདོད་ཡོན་ལོངས་སྤྱོད་ཚོགས། །བདེ་གཤེགས་རིགས་ལྔའི་དམ་ཚིག་རྫས། །རྒྱ་ཆེན་གཏིང་ཟབ་ལྷུན་སྡུག་པ། །ངོ་མཚར་མཆོད་སྤྲིན་ཆེན་པོར་གྱུར། །ཨཱོོཾ་ཨཱཿཧཱུཾ་ཧ་ཧོ་ཧྲཱིཿ གཉིས་པ་ཚོགས་ཀྱི་ཞིང་དུ་སྤྱན་དྲང་བ། ཧཱུཾ། ཆོས་དབྱིངས་འགྱུར་མེད་འོག་མིན་ཞིང་ཁམས་ནས། །བདེ་གཤེགས་ཞི་ཁྲོ་བཀའ་བརྒྱད་ལྷ་ཚོགས་རྣམས། །ཡེ་ཤེས་ཚོགས་ལ་སྤྱན་འདྲེན་གཤེགས་སུ་གསོལ། །འདོད་པའི་ཡོན་ཏན་ལྔ་ཡི་ཚོགས་མཆོད་འབུལ། །ཚོགས་ཀྱི་མཆོད་པ་དམ་པ་བཞེས་ནས་ཀྱང་། །ཚེ་དང་དབང་གི་དངོས་གྲུབ་སྩལ་དུ་གསོལ། །བཛྲ་ས་མ་ཡ་ཛཿཛཿཧཱུཾ་བཾ་ཧོཿ། གསུམ་པ་ལོངས་སྤྱོད་ཚོགས་མཆོད་ནི། བླ་མེད་མཆོག་གི་མཆོད་པ་དམ་པ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །ཐུགས་དམ་བཞིན་(༡༦ན)
ལས་ཅི་བདེར་བཞེས་སུ་གསོལ། ཨོཾ་གྷ་ན་ཙཀྲ་པཉྩ་ཀཱ་མ་གུ་ཎ་པྲ་ཏཱི་ཙྪ་སྭཱཧཱ། བཞི་པ་ཉེས་པའི་ཚོགས་རྣམས་རབ་བཤགས་པ། །བདག་ཅག་མ་རིག་ལུས་དང་ངག་སེམས་ཀྱིས། །བག་མེད་སྤྱོད་པས་དམ་ལས་འདས་གྱུར་ཏེ། །དཀྱིལ་འཁོར་ལྷ་ཚོགས་ཐུགས་དང་ཅི་འགལ་བ། །འདོད་ཡོན་ཚོགས་ཀྱི་མཆོད་པས་བསྐང་ཞིང་བཤགས། །ཡིག་བརྒྱ་བཟླ། ལྔ་པ་ཉ་བོ་བསྒྲལ་ཞིང་སྟོབ་པ་ནི། ཨེ་ལས་གནམ་ལྕགས་འབར་བའི་ཁང་སྒྲོམ་ནང་། །ནྲྀ་དང་ཏྲི་ལས་གནོད་བྱེད་དགྲ་བགེགས་རྣམས། །ཡན་ལག་ལྕགས་སྒྲོག་གིས་བཅིངས་ཉམ་ཐག་པ། །མངོན་གསུམ་ལྟ་བུར་གསལ་བ་ཉིད་དུ་གྱུར། །ན་མཿརྩ་བརྒྱུད་བླ་མ་སྒྲུབ་སྡེ་བརྒྱད་ཀྱི་ལྷ། ཁྱད་པར་སྡེ་དཔོན་སུམ་ཅུ་ལས་བྱེད་ཚོགས། །ཏིང་འཛིན་སྔགས་དང་ཕྱག་བརྒྱའི་ནུས་མཐུ་ཡིས། །དགྲ་བགེགས་ཐམས་ཅད་ཁུག་ཅིག་གཟུགས་ལ་ཕོབ། །ཨཱོཾ་བཛྲ་ཀྲོ་དྷ་མཧཱ་ཤྲཱི་ཧེ་རུ་ཀཿཧཱུཾ་ཕཊ། དགྲ་བགེགས་ནྲཱི་ཏྲེ་བཛྲ་ཨཾ་གུ་རུ་ཤ་ཛ༔། ཞེས་ལྕགས་ཀྱུའི་ཕྱག་རྒྱས་དགུག །བཛྲ་པཱ་ཤ་ཧོཿཞགས་པའི་ཕྱག་རྒྱས་གཞུག །བཛྲ་སྤོ་ཏྲ་བཾ། ལྕགས་སྒྲོག་གི་ཕྱག་རྒྱས་བཅིངས། བཛྲ་ཨ་ཝེ་ཤཱ་ཡ་ཨ་ཨཿ དྲིལ་བུའི་ཕྱག་རྒྱས་དབབ། དེ་བཞིན་ཡང་དག་གི་སྔགས་དང་། དགྲ་བགེགས་ནྲྀ་ཏྲི་སརྦ་ཨ་པ་ན་ཡ་ཧཱུཾ་ཕཊ། དབབ་པའི་ཕྱག་རྒྱས་མཐུ་དང་རྫུ་འཕྲུལ་ཕྲོགས། །འཇམ་དཔལ་རྩ་སྔགས་དང་འབྱེད་པའི་ཕྱག་རྒྱས། དགྲ་བགེགས་ནྲྀ་ཏྲི་ཧ་ས་ན་ཧྲི་དྷ་ཡ་ཧཱུཾ་ཕཊ། ཅེས་པས་ལྷ་དང་དབྱེ། རྟ་མགྲིན་གྱི་རྩ་སྔགས་དང་དབབ་པའི་ཕྱག་རྒྱས། དགྲ་བགེགས་ནྲྀ་ཏྲི་སརྦ་ཨ་ཝེ་ཤཱ་ཡ་ཨ་ཝེ་ཤཱ་ཡ་ཧཱུཾ་ཕཊ། ཕུར་པའི་རྩ་སྔགས་དང་། བཅིང་པའི་ཕྱག་རྒྱས། དགྲ་བགེགས་ནྲྀ་ཏྲི་ཏྲི་ཏྲི་ཧ་ན་ཧཱུཾ་ཕཊ། མ་མོའི་རྩ་སྔགས་དང་(༡༦བ)
བརྒྱལ་ཞིང་འཁྲུག་པའི་ཕྱག་རྒྱས། དགྲ་བགེགས་ནྲྀ་ཏྲི་ཛྭ་ལ་པ་ཡ་ཛྭ་ལ་པ་ཡ་ཧཱུཾ་ཕཊ། ཅེས་དྲན་མེད་སྨྱོས་སུ་བཅུག་པ། དྲག་པའི་རྩ་སྔགས་དང་བརྡུང་བའི་ཕྱག་རྒྱས། དགྲ་བགེགས་ནྲྀ་ཏྲི་ཏ་ཐ་ཡ་ཏ་ཐ་ཡ་ཧཱུཾ་ཕཊ། ཕུར་བུས་རྡུལ་དུ་བརླག་པའོ། །དེ་ནས་དྲེག་སྔགས་ཕུར་པས་ཉ་བོ་བསྒྲལ་ཏེ། དམོད་པ་དྲག་སྔགས་ཀྱི་རྩ་སྔགས་དང་ཕྱག་རྒྱས་སྟོན་པའི་ཚུལ་གྱིས། དགྲ་བགེགས་བཱི་ན་ཡ་བཱི་ན་ཡ་ཧཱུཾ་ཕཊ། ཕུང་པོ་ཤ་ཁྲག་ཏུ་དམིགས་ལ་སྟོབ་པ་ནི། དགྲ་བགེགས་གདུག་པ་བསྒྲལ་བའི་ཤ་ཁྲག་རུས། །དུག་གསུམ་དབྱིངས་སུ་སྦྱང་བ་མཆོད་པའི་སྤྲིན། །ཟག་མེད་བདུད་རྩིར་སྦར་ནས་འབུལ་ལགས་ན། །རྔམ་པའི་སྟབས་ཀྱིས་དགྱེས་པར་བཞེས་སུ་གསོལ། །མཾ་ས་རཀྟ་ཀིཾ་ནི་རི་ཏི་ཨ་མྲྀ་ཏ་པཱུ་ཛཿཁཱ་ཧི། དྲུག་པ་ཚོགས་ཀྱི་ལྷག་མ་བཏང་བ་ནི། ཧཱུཾ། དང་པོ་ཕུད་ཀྱིས་མི་མཆོད་དུ། །དཔལ་ཆེན་ལྷ་ཚོགས་ཕུད་ཀྱི་བདག །བར་དུ་སྤྲིན་ལྟར་མི་གཏིབ་ཏུ། །དགེ་བའི་བཤེས་གཉེན་གཉན་གྱི་བཀའ། །ཐ་མ་གཅིག་ཏུ་མི་བསྲེ་རུ། །མ་ཚོགས་དབང་ཕྱུག་ལྷག་མའི་གནས། །ལྷག་མ་ཁ་ཆུས་མིག་གདབ་ཏུ། ཁྱེད་དང་དེང་གཉིས་དམ་ཚིག་གཅིག །ཡེ་ནས་འདུ་འབྲལ་མེད་དོན་དུ། །འདུས་ལ་ལས་རྣམས་ཀུན་བྱོས་ཤིག །ཧཱུཾ། བདེ་གཤེགས་ཞི་ཁྲོ་དཔལ་ཆེན་དགུའི། །བཀའ་ཉན་རོལ་པའི་ཕོ་ཉ་ལྷག་སྡུད་རྣམས། །སྔགས་ཚིག་བཤུག་པའི་སྒྲ་ཡིས་མཚོན་ནས་ཀྱང་། །མ་ལུས་འཁོར་དང་བཅས་ཏེ་གཤེགས་སུ་གསོལ། །ཞིང་ཆེན་གཡར་མོའི་བརྡ་ཡིས་མཚོན་ནས་ཀྱང་། །མ་ལུས་འཁོར་དང་བཅས༝། །གླུ་གར་ཕྱག་རྒྱ་རོལ་མོས་མཚོན་ནས་ཀྱང་། །མ་ལུས༝། །དམར་ཆེན་ཁྲག་དང་བདུད་རྩིས་མཚོན་ནས་ཀྱང་། །མ་ལུས༝། །མཁའ་འགྲོ་གིང་ལང་དབང་ཕྱུག་མ། །མ་བདུན་སྲིང་བཞི་འབར་མ་བརྒྱད། །ཕོ་ཉ་ལ་(༡༧ན)
སོགས་ལྷག་སྡུད་ཚོགས། །དཔལ་གྱི་ཕམ་ཕབས་འདི་གསོལ་ལ། །སྔོན་ཚེ་དཔལ་གྱི་བཀའ་ལུང་བཞིན། །བཅོལ་བའི་འཕྲིན་ལས་སྒྲུབ་པར་མཛོད། །ཨཱོཾ་ཨུཙྪིཥྛ་བ་ལིཾ་ཏ་བྷཀྵ་སི་སྭཱཧཱ། བདུན་པ་ཞི་ཁྲོའི་ལྷ་ཚོགས་བསྐུལ་བ་ནི། ཧཱུཾ། མི་མངོན་དབྱིངས་ན་བཞུགས་པ་རྒྱལ་བ་ཞི་ཁྲོའི་ཚོགས། །བཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་བཞེངས། །བསྐུལ་ལོ་བསྐུལ་ལོ་སེམས་ཅན་དོན་ལ་བསྐུལ། །མཛོད་ཅིག་མཛོད་ཅིག་དྲག་པོའི་འཕྲིན་ལས་མཛོད། །ཆོས་སྐུ་ཞི་བའི་ངང་ལས་མ་གཡོས་ཀྱང་། །གཟུགས་སྐུ་འཇིགས་པའི་ཆ་ལུགས་རྫོགས་མཛད་པ། །ཕྱོགས་བཅུ་དུས་གསུམ་བདེ་གཤེགས་ཞི་ཁྲོ་དང་། །སྒྲུབ་པ་བཀའ་བརྒྱད་ལྷ་ཚོགས་ཐུགས་དམ་ཅན། །མི་མངོན་དབྱིངས་ནས་འདིར་གཤེགས་ཐུགས་དམ་བསྐུལ། །དྲག་པོའི་འཕྲིན་ལས་མཛད་པའི་དུས་ལ་བབ། །ཐུགས་དམ་ཐུགས་རྗེས་དགྲ་བགེགས་མྱུར་དུ་སྒྲོལ། །བརྒྱད་པ་སྔོན་གྱི་ཆད་མཐོ་སྒྲག་པ་ནི། བྷྱོ། སྔོན་ཚེ་འདས་དུས་བསྐལ་པའི་དང་པོ་ལ། །འོག་མིན་གསང་བ་མཆོག་གི་དཀྱིལ་འཁོར་དུ། །ཀུན་ཏུ་བཟང་པོ་ཆེ་མཆོག་ཧེ་རུ་ཀས། །བདེ་གཤེགས་སྒྲུབ་པ་བཀའ་བརྒྱད་བཤད་པའི་ཚེ། །རིགས་ལྔ་ཡབ་ཡུམ་སེམས་དཔའ་ལྕམ་དྲལ་གྱིས། །སོ་སོའི་སྐུ་གསུང་ཐུགས་སུ་བསྟན་ནས་ཀྱང་། །ཇི་ལྟར་ཁས་བླངས་དམ་བཅས་ཇི་བཞིན་དུ། །མཆོད་གཏོར་བཞེས་ལ་འཕྲིན་ལས་སྒྲུབ་པར་མཛོད། །དེ་འོག་བར་གྱི་བསྐལ་པའི་དབུས་མ་ལ། །མི་མངོན་རིག་པ་འཛིན་པའི་གནས་མཆོག་ཏུ། །རིགས་འཛིན་གཙོ་བོ་རྡོ་རྗེ་ཆོས་ཅན་གྱི། །རྒྱུད་ཀྱི་ཚིག་དོན་བསྡུ་བ་མཛད་པའི་ཚེ། །གསང་སྔགས་བཀའ་ཡི་སྲུང་མའི་ཚོགས་རྣམས་ཀྱིས། །སོ་སོའི་སྐུ་གསུང་ཐུགས་སུ༝། །ཇི་ལྟར་ཁས་བླངས༝། །(༡༧བ)
མཆོད་གཏོར་བཞེས༝། །དེ་འོག་བར་གྱི་བསྐལ་པའི་ཐ་མ་ལ། །ལྷ་གནས་གསུམ་དུ་དྲགས་པའི་གནས་མཆོག་ཏུ། །རིག་པ་འཛིན་པ་རིགས་འཛིན་མཆོག་རྣམས་ཀྱིས། །གསང་སྔགས་རྒྱུད་སྡེ་ཡི་གེར་བཀོད་པའི་ཚེ། །གསང་སྔགས་རྡོ་རྗེ་ཐེག་པའི་བཀའ་སྲུང་གིས། །སོ་སོའི་སྐུ་གསུང་ཐུགས་སུ༝། ཇི་ལྟར༝། །མཆོད་གཏོར༝། །དེ་རྗེས་རྩོད་པའི་དུས་ལ་སླེབ་པའི་ཚེ། །དུར་ཁྲོད་རོ་གླིང་བསིལ་བའི་ཚལ་ཆེན་དུ། །མཁའ་འགྲོ་ཆེན་མོ་ལས་ཀྱི་དབང་མོ་ཆེ། །གསང་སྔགས་རྒྱུད་སྡེ་གཏེར་དུ་སྦས་པའི་ཚེ། །བཀའ་ཡི་སྲུང་མ་ལྷ་སྲིན་སྡེ་བརྒྱད་ཀྱིས། །སོ་སོའི་གནས་ནས་རྫུ་འཕྲུལ༝། །ཇི་ལྟར༝། །མཆོད་གཏོར༝།དེ་རྗེས་སྙིགས་མའི་དུས་ལ་བབས་པའི་ཚེ། །མཆོད་རྟེན་ཆེན་པོ་བདེ་བྱེད་ལེགས་ཚལ་དུ། །གྲུབ་པ་བརྙེས་པའི་སློབ་དཔོན་བརྒྱད་རྣམས་ཀྱིས། །དགུང་འདུན་དགོངས་པ་མཛད་ནས་གཟིགས་པའི་ཚེ། །དྲེགས་པ་ཅན་གྱིས་གཏེར་སྒྲོམ་བཏོན་ནས་ཀྱང་། །སོ་སོའི་སྐུ་གསུང་༝། །ཇི་ལྟར༝། །མཆོད་གཏོར༝། །དེ་རྗེས་གདུལ་བྱ་དུས་ལ་བབ་པའི་ཚེ། །བོད་ཡུལ་ཁ་བ་ཅན་གྱི་ཡུལ་ལྗོངས་སུ། །སློབ་དཔོན་པདྨ་འབྱུང་གནས་བྱོན་པའི་ཚེ། །བོད་ཀྱི་ལྷ་སྲིན་གདུག་པ་ཅན་རྣམས་ཀྱིས། །རང་རང་མཐུ་རྩལ་ཆེ་བར་བསྟན་ནས་ཀྱང་། །སོ་སོའི༝། །ཇི་ལྟར༝། །མཆོད་གཏོར༝། །དེ་ལྟར་བསྒྲུབ་པའི་རྣལ་འབྱོར་བདག་ཅག་གིས། །མཁའ་འགྲོ་དམ་ཅན་འདུ་བའི་གནས་མཆོག་འདིར། །ཚེ་འདིར་སངས་རྒྱས་སྐུ་གསུང་བསྒྲུབས་པའི་ཚེ། །བཀའ་སྲུང་དམ་ཅན་རྒྱ་མཚོའི་ཚོགས་རྣམས་ཀྱིས། །སོ་སོའི༝། །ཇི་ལྟར༝། །མཆོད་གཏོར་བཞེས༝། །དགུ་པ་བསྟན་མ་བཅུ་གཉིས་སྐྱོང་བ་ནི། ཧཱུཾ། ཚོགས་དང་བཀའ་ཡི་ཚོགས་བཅས་ཉིད། ཁྲག་འཐུང་དེ་བཞིན་ནམ་མཁའི་སྐུ། །ཚུར་གཤེགས་ཚུར་གཤེགས་སྐྱོང་མ་རྣམས། །(༡༨ན)
འདིར་སྤྱོན་དམ་སྐོང་འཕྲིན་ལས་མཛོད། །བསྟན་མ་བཅུ་གཉིས་འཁོར་དང་བཅས། ཁྱེད་ཅག་སྔོན་གྱི་ཡལ་གམ་ཅན། །སློབ་དཔོན་པདྨ་ཐོད་འཕྲེང་དང་། །སློབ་མ་གླང་ཆེན་དཔལ་སེང་གིས། །མོན་ཁ་སྣ་རིང་རྫོང་གསུམ་དུ། །ཞིང་ཆེན་བསྒྲལ་བའི་གདན་སྟེང་དུ། །རྣལ་འབྱོར་གྲལ་ལ་བཞག་ནས་ནི། །ཐར་པ་ཐོབ་པའི་མཚན་ཡང་བཏགས། །སྒྲུབ་པ་པོ་ལ་ཕན་གདགས་ཕྱིར། །བྲན་གྱི་ཚུལ་དུ་ཁས་བླངས་ན། །དམ་ལས་མ་འདའ་ད་ཚུར་སྤྱོན། །བཀའ་ཡི་གཏོར་མ་འདི་ལོང་ལ། །བཅོལ་བའི་འཕྲིན་ལས་སྒྲུབ་པར་མཛོད། །བཅུ་པ་དམ་སྲི་མནན་ཅིང་རྟ་བྲོ་བརྡུང་། །ཧཱུཾ། ཡ་མ་བྱ་བའི་དམ་སྲི་ཁྱོད། །མནན་ནོ་རི་རབ་འོག་ཏུ་མནན། །བསྐྱུར་རོ་རྒྱ་མཚོའི་གཏིང་དུ་སྐྱུར། །བསྲེག་གོ་མེ་དཔུང་ཀློང་དུ་སྲེགས། །བསྐྱོན་ནོ་འཁོར་ལོའི་རྩིབས་ལ་བསྐྱོན། །གཏད་དོ་འཆི་བདག་ལག་ཏུ་གཏད། །བྱང་ཆུབ་སེམས་ནི་མ་སྐྱེས་བར། །ནམ་ཡང་བཏང་བར་མི་བྱའོ། །ཨཱོཾ་ལཾ་ཧཱུཾ་ལཾ་སྟཾ་བྷ་ཡ་ནན། ཧཱུཾ། དགྲ་བགེགས་བསྒྲལ་བའི་མ་རིག་སེམས། །ཕུང་ཁམས་སྐྱེ་མཆེད་བཅས་པ་ལ། །བདེ་གཤེགས་འདུས་པའི་བྲོ་བརྡུངས་པས། ཁྲོ་བོ་ཁྲོ་མོ་སྤྲིན་ལྟར་གཏིབས། ཁྲོ་ཆུང་ཚོགས་ནི་སྐར་ལྟར་འཁྲུག །བྲོ་ནི་བར་ཆད་མེད་པའི་བྲོ། །གླུ་ནི་འདུ་འབྲལ་མེད་པའི་གླུ། །ཚིག་ནི་སྙིང་པོ་འཛབ་ཏུ་བཟླ། །དགྲ་རྣམས་ཐལ་བར་བརླག་པའི་བྲོ། །བགེགས་རྣམས་ཕྱེ་མར་འཐག་པའི་བྲོ། །རྒྱུད་དྲུག་གནས་ནས་འདྲེན་པའི་བྲོ། །རིགས་དྲུག་གཡང་ས་གཅོད་པའི་བྲོ། །འཇིགས་པའི་བདུད་བཞི་འཇོམས་པའི་བྲོ། །གསང་བའི་དགྲ་གསུམ་གསོད་པའི་བྲོ། །བྲོ་ནི་སྐྱེ་བ་མེད་པར་བརྡུང་། །གླུ་ནི་འགག་པ་མེད་པར་ལེན། །ཚིག་ནི་སྙིང་པོ་འཛབ་ཏུ་བཟླ། །དགྲ་བགེགས་དུག་ལྔ་དབྱིངས་(༡༨བ)
སུ་དག །རྫོགས་པ་ཆེན་པོའི་ཀློང་དུ་ཐིམ། །བཅུ་གཅིག་མཆོག་ཐུན་དངོས་གྲུབ་ལེན་པ་ནི། ཧཱུཾ། དུར་ཁྲོད་གསང་བ་མཆོག་གི་དཀྱིལ་འཁོར་ནས། །དཔལ་ཆེན་ཆེ་མཆོག་སྒྲུབ་པ་བཀའ་བརྒྱད་ལྷ། །ཕོ་ཉ་བཀའ་སྡོད་འཁོར་དང་བཅས་པ་རྣམས། །ཐུགས་དམ་དབང་གིས་བདག་ལ་དགོངས་སུ་གསོལ། །བདག་ཅག་གསང་བའི་སྒོར་ཞུགས་དམ་ཚིག་ཅན། །བསྙེན་སྒྲུབ་མཐར་ཕྱིན་སྒྲུབ་པའི་ཞག་གྲངས་རྫོགས། །དང་བའི་ཤུགས་ཀྱིས་ཐུགས་དམ་རྒྱུད་བསྐུལ་ན། །དཔལ་ཆེན་ཧེ་རུ་ཀ་ཡི་གོ་འཕང་མཆོག །དཀའ་བ་མེད་པར་ཚེ་འདིར་གྲུབ་པ་དང་། །འཕྲིན་ལས་རྣམ་བཞིས་རིས་མེད་འགྲོ་བ་རྣམས། །ཕན་བདེའི་ལམ་ལ་འགོད་པའི་དངོས་གྲུབ་སྩོལ། །སརྦ་སིདྡྷི་ཕ་ལ་ཧོཿ། བཅུ་གཉིས་གཏང་རག་མཆོད་བསྟོད་རིམ་པ་ནི། ཧཱུཾ། མཆོད་ཡོན་མེ་ཏོག་བདུག་སྤོས་སྣང་གསལ་དྲི། །ཞལ་ཟས་སྒྲ་སྙན་ལ་སོགས་མཆོད་པའི་སྤྲིན། །དངོས་སུ་འབྱོར་དང་ཡིད་ཀྱིས་རྣམ་སྤྲུལ་ནས། །ཕྱི་ནང་གསང་བའི་མཆོད་སྤྲིན་རྒྱ་མཚོས་མཆོད། །ཨཱོཾ་ཤྲཱི་བཛྲ་ཧེ་རུ་ཀཿས་པ་རི་ཝཱ་ར་ཨརྒྷཾ་ནས་ཤཔྡ་པཱུ་ཛཿཧོཿ ཧཱུཾ། བདེ་གཤེགས་ཐམས་ཅད་མཉམ་ཉིད་ཐུགས་ཀྱི་ངང་། །ཆོས་སྐུ་སྐྱེ་མེད་ངང་ལས་མ་གཡོས་ཀྱང་། །ཐབས་ལ་མཁས་པས་སོ་སོར་སྐུར་སྟོན་པ། །སྒྲུབ་པ་བཀའ་བརྒྱད་ལྷ་ལ་ཕྱག་འཚལ་བསྟོད། །བཅུ་གསུམ་མ་རིག་ཉེས་ཚོགས་བཤགས་པ་ནི། ཧཱུཾ། དུས་གསུམ་བདེ་གཤེགས་ཡོན་ཏན་སྐུ་གསུང་ཐུགས། །འཕྲིན་ལས་མངོན་རྫོགས་ལྷུན་གྲུབ་མངོན་སྤྱོད་སྤྲུལ། །ཆོ་འཕྲུལ་བདེ་གཤེགས་འདུས་པའི་ལྷ་ཚོགས་ཤར། །མ་རིག་དབང་གིས་ཕྱོགས་རིས་སོ་སོར་བཟུང་། །སྐུ་གསུང་ཐུགས་དང་རྩ་བ་ཡན་ལག་གི །དམ་ཚིག་ཉམས་ཆགས་འགལ་འཁྲུལ་(༡༩ན)
གྱུར་པ་དང་། །ཏིང་འཛིན་མ་གསལ་སྔགས་དང་ཕྱག་རྒྱ་ནོར། །ལྟ་སྤྱོད་དགོངས་པ་ཀློང་དུ་མ་གྱུར་པས། །རྒྱལ་བའི་དགོངས་སྤྱོད་ཟབ་མོ་གཏིང་མ་ཕྱིན། །ཐབས་དང་ཤེས་རབ་ཡ་བྲལ་བླང་དོར་བཅད། །འབྲས་བུའི་འདོད་ཆེན་བསྒྲུབས་པའི་རྒྱུར་གྱུར་པ། །བདེ་གཤེགས་རྒྱལ་བའི་བཀའ་ལ་བཟོད་པར་གསོལ། །དབྱེར་མེད་མཉམ་པའི་ངང་ལ་མཐོལ་ལོ་བཤགས། །གཉིས་མེད་དོན་གྱི་འབྲས་བུ་སྩལ་དུ་གསོལ། །ཡི་གེ་བརྒྱ་པ་བཟླ། བཅུ་བཞི་ལྷ་ཚོགས་གཤེགས་ཤིང་བསྡུ་བ་ནི། ཧཱུཾ། འཁོར་གྱི་འཇིག་རྟེན་ལྷ་ཚོགས་རང་གནས་སུ། །བཛྲ་མུཿས་གཤེགས་སྟོབས་ལྡན་ནག་པོ་ནས། །རིམ་གྱིས་གཅིག་ལ་གཅིག་ཐིམ་གཙོ་བོ་ལ། །གཙོ་བོ་ཡེ་ཤེས་སེམས་དཔའ་དེ་ཧཱུཾ་ལ། །དེ་ཡང་ཞབས་ཀྱུ་ནས་བཟུང་ནཱ་དའི་བར། །མེ་ལོང་ཧས་བཏབ་རིམ་ཡལ་སྤྲོས་བྲལ་གྱུར། །བཅོ་ལྔ་རྒྱུན་སྤྱོད་སྲུང་བ་བྱ་བ་ནི། ཕཊ་ཕཊ་ཕཊ་ཅེས་བརྗོད་པའི་ངང་ཉིད་ལས། །བདག་ཉིད་ཆུ་ལས་ཉ་འཕར་ཚུལ་དུ་ནི། །ཆེ་མཆོག་ཁྲག་འཐུང་རྡོ་རྗེ་དུང་ཁྲག་འཛིན། །དཔལ་དང་དུར་ཁྲོད་ཆས་བརྒྱད་སྐུ་ལ་རྫོགས། །གནས་གསུམ་ཨཱོཾ་དཀར་ཨཱཿདམར་ཧཱུཾ་མཐིང་མཚན། །རྡོ་རྗེའི་བཞུ་བླུགས་ལུས་ཀུན་ཁྱབ་པར་གྱུར། །ཅིས་ཀྱང་མི་ཚུགས་མི་ཤིགས་པའི། །སྟོང་པའི་གོ་ཆ་བླ་ན་མེད། །མཚན་མའི་ཡུལ་ཀུན་བཅོམས་ནས་ནི། །ཐམས་ཅད་དུ་ནི་རྒྱས་པར་གནས། །ཨཱོཾ་བཛྲ་ཀཱ་ཝཱ་ཙི་རཀྵ་རཀྵ་ཧཱུཾ། བཅུ་དྲུག་སྨོན་ལམ་རྣམ་དག་གདབ་པ་ནི། ས་མཆོག་འོད་གསལ་རྡོ་རྗེ་རྩེ་མོ་རུ། །བདག་ཅག་དམ་ཆེན་རྣལ་འབྱོར་བཞུགས་སོ་འཚལ། །བར་ཆད་མེད་པར་བསྟན་པ་མཐར་ཕྱིན་ནས། །ཀུན་བཟང་ཆེ་མཆོག་ཧེ་རུ་ཀཿཐོབ་ཤོག །བཅུ་བདུན་བཀྲ་ཤིས་ཆར་དུ་དབབ་པ་ནི། ཧོ། སྐུ་ལྔ་ལྷུན་གྲུབ་དེ་(༡༩བ)
བཞིན་གཤེགས་པའི་སྐུ། །ཡེ་ཤེས་ལྔ་རྫོགས་མཚན་དཔེའི་འོད་ཀྱིས་སྤྲས། །འགྲོ་བའི་དུག་ལྔ་དབྱིངས་སུ་ཞི་མཛད་པའི། །བདེ་གཤེགས་ཞི་བའི་ལྷ་ཚོགས་བཀྲ་ཤིས་ཤོག །དུས་གསུམ་རྒྱལ་བའི་ཡོན་ཏན་བཞིར་གྱུར་ཏེ། །བདེ་ཆེན་ལྷུན་གྲུབ་ཆོས་དབྱིངས་ཡེ་ཤེས་སྐུ། །འགྲོ་བའི་གཏི་མུག་མུན་པ་སེལ་མཛད་པའི། །ཆེ་མཆོག་ཡོན་ཏན་ལྷ་ཚོགས༝། །དུས་གསུམ་བདེ་གཤེགས་ཐུགས་མཆོག་སྤྲོས་དང་བྲལ། །དྲི་བྲལ་གསལ་དག་མེ་ལོང་ཡེ་ཤེས་སྐུ། །འགྲོ་བའི་ཞེ་སྡང་མེ་ཚོགས་ཞི་མཛད་པ། །ཡང་དག་ཐུགས་ཀྱི་ལྷ་ཚོགས༝། །དུས་གསུམ་བདེ་གཤེགས་སྐུ་ཡི་བདག་ཉིད་མཆོག །རང་བཞིན་མི་འགྱུར་མཉམ་ཉིད་ཡེ་ཤེས་སྐུ། །འགྲོ་བའི་ང་རྒྱལ་རི་བོ་འཇོམས་མཛད་པ། །འཇམ་དཔལ་སྐུ་ཡི་ལྷ་ཚོགས་བཀྲ་ཤིས་ཤོག །དུས་གསུམ་བདེ་གཤེགས་གསུང་གི་དབང་ཕྱུག་གཙོ། །སོ་སོའི་ཀུན་ཏུ་རྟོག་པའི་ཡེ་ཤེས་སྐུ། །འགྲོ་བའི་འདོད་ཆགས་རྒྱ་མཚོ་སྐེམས་མཛད་པ། །པདྨ་གསུང་གི་ལྷ་ཚོགས༝། །དུས་གསུམ་བདེ་གཤེགས་འགྲོ་འདུལ་འཕྲིན་ལས་གཙོ། །ལྷུན་གྲུབ་བྱ་བ་གྲུབ་པའི་ཡེ་ཤེས་སྐུ། །འགྲོ་བའི་ཕྲག་དོག་རླུང་འཚུབ་ཞི་མཛད་པ། །ཕུར་པ་འཕྲིན་ལས་ལྷ་ཚོགས༝། །དུས་གསུམ་བདེ་གཤེགས་དབྱིངས་ཀྱི་མ་མོའི་གཙོ། །མངོན་རྫོགས་མི་འགྱུར་ཡེ་ཤེས་རྡོ་རྗེའི་སྐུ། །སྣང་སྲིད་འཁོར་འདས་འབྱུང་བ་མ་མོའི་ཡུམ། །མ་མོ་རྦོད་གཏོང་ལྷ་ཚོགས༝། །དུས་གསུམ་བདེ་གཤེགས་རིག་པ་འཛིན་པའི་གཙོ། །ལྷུན་གྲུབ་ཕྱག་རྒྱ་ཆེན་པོའི་ཡེ་ཤེས་སྐུ། །འགྲོ་རྣམས་བདེ་ཆེན་ས་ལ་འགོད་མཛད་པའི། །རིགས་འཛིན་སློབ་དཔོན་ལྷ༝། །དུས་གསུམ་བདེ་གཤེགས་དྲེགས་པ་ཀུན་འདུལ་གཙོ། །ཁྲོ་གཏུམ་རབ་འཇིགས་དཔའ་བོ་མཆོག་གི་སྐུ། །འཕྲིན་ལས་དྲག་པོས་སངས་རྒྱས་བསྟན་པ་བསྲུང་། །(༢༠ན)
འཇིག་རྟེན་མཆོད་བསྟོད་ལྷ་ཚོགས༝། །དུས་གསུམ་བདེ་གཤེགས་དྲག་སྔགས་ཀུན་འདུལ་གཙོ། །སྟོབས་ལྡན་ནག་པོ་འཇིགས་བྱེད་འབར་བའི་སྐུ། །ཞིང་བཅུ་སྒྲོལ་མཛད་སྔགས་ཀྱི་དངོས་གྲུབ་སྩོལ། །དམོད་པ་དྲག་སྔགས་ལྷ་ཚོགས༝། །དུས་གསུམ་བདེ་གཤེགས་རྣམས་ཀྱི་སྤྱན་སྔ་རུ། །སངས་རྒྱས་བསྟན་པ་བསྲུང་བར་ཞལ་བཞེས་པའི། །དམ་ཆེན་སྒྲུབ་པའི་གྲོགས་བྱེད་དམ་ཉམས་སྒྲོལ། །ཕོ་ཉ་བཀའ་སྡོད་སྲུང་མའི་བཀྲ་ཤིས་ཤོག །བཀའ་བརྒྱུད་བླ་མའི་བྱིན་རླབས་དང་། །བདེ་གཤེགས་འདུས་པའི་ཐུགས་རྗེ་དང་། །དཀོན་མཆོག་གསུམ་གྱི་བདེན་པ་དང་། །སྐལ་ལྡན་རྣལ་འབྱོར་སྨོན་ལམ་གྱིས། །སྒྲུབ་པར་བར་ཆད་མེད་པ་དང་། །དཀྱིལ་འཁོར་བཟང་པོར་བྱིན་ཆགས་ཏེ། །སློབ་དཔོན་སྐུ་ཚེ་རིང་བ་དང་། །མཆེད་ལྕམ་ནད་མེད༝། །ནད་གདོན་ཞི་བའི་བཀྲ་ཤིས་ཤོག །ཚེ་དཔལ་རྒྱས་པའ༝། །མོས་པ་དབང་སྡུད༝། །དགྲ་བགེགས་ཚར་གཅོད༝། །འདོད་དགུ་འབྱུང་ཞིང་བསམ་པ་འགྲུབ། །འཇིག་རྟེན་བདེ་ཞིང་ལོ་ལེགས་དང་། །སངས་རྒྱས་བསྟན་པ་དར་ཞིང་རྒྱས། །ཐམས་ཅད་མཁྱེན་ཐོབ་བཀྲ་ཤིས་ཤོག །ཁྲོ་མཁར་རྫོང་འཕྲང་གིས་མཚོན་བཀའ་མ་ཡིས། །གནུབས་གནགས་ཉང་སོགས་རིམ་བྱོན་བརྒྱུད་ཚུལ་དང་། །གོང་འོག་རྡོར་གླིང་ལྷ་བྲག་ལ་སོགས་པ། །གཏེར་བྱོན་བཀའ་བརྒྱད་ཆོས་ཚུལ་ཕ་མཐའ་ཡས། །བདེ་གཤེགས་འདུས་པ་འོ་མའི་རྒྱ་མཚོ་ཆེར། །སྲོལ་གཞན་གནད་ཀྱི་མར་བཅུད་ཚང་བའི་ཕྱིར། །རབ་འབྱམས་ཞི་ཁྲོའི་དཀྱིལ་འཁོར་མ་ལུས་པའི། །ཡང་རྩེ་མངའ་བདག་ཆོས་ཀྱི་རྒྱལ་པོའི་གཏེར། །བསྐྱེད་རྫོགས་ལས་བྱང་སྒྲུབ་ཁོག་རྒྱས་བསྡུས་འབྲིང་། །མང་ལས་དབང་དང་ལས་སྦྱོར་རྒྱུན་ཁྱེར་དིང་། །བསྟར་བར་(༢༠བ)
ཧ་ཅང་རྒྱས་དང་ཉུང་བའི་མཐར། །མ་ལྷུངས་དབུ་མར་གནས་པའི་ཀླུ་དབང་བཞིན། །ལུགས་མང་ཐོས་ཉུང་བློ་གྲོས་ན་ཕྲ་ཡང་། །རྡོ་རྗེ་འཆང་དངོས་ཡོངས་འཛིན་འགའ་བསྟན་མཐུས། །སྔ་འགྱུར་རྒྱུད་དང་རྒྱ་གཞུང་མན་ངག་ལ། །བལྟ་བའི་མིག་བུ་ཅུང་ཟད་ཡངས་པས་བཀོད། །དགེ་འདིས་རང་རིག་ཆེ་མཆོག་ཧེ་རུ་ཀཿ སྙིང་དབུས་འོག་མིན་ཞིང་དུ་སངས་རྒྱས་ནས། །སྣ་ཚོགས་ཐབས་ཀྱིས་འགྲོ་ཀུན་ཐར་པ་དང་། །ཐམས་ཅད་མཁྱེན་པའི་ས་ལ་འགོད་ནུས་ཤོག །དེ་ཡང་མངའ་རིས་པཎ་ཆེན་ཆོས་ཀྱི་རྒྱལ་པོའི་གསུང་ལས། རྙིང་མ་ཚད་ལྡན་ཞིག་བྱེད་ན་བཀའ་མས་ཁོག་ཕུག་གཏེར་མའི་མན་ངག་གིས་བརྒྱན་པ་ཞིག་དགོས་ཞེས་གསུང་བ་དང་། རྡོ་རྗེ་འཆང་ཕ་བོང་ཁ་པས་ཀྱང་བླ་མ་དམ་པ་བསོད་ནམས་རྒྱལ་མཚན་གྱི་མཛད་པའི་ཕུར་པ་འདི་ལ། སྦྱང་གཞི་སྦྱོང་བྱེད་སོགས་ལམ་གྱི་འགྲོས་རྣམས་སྔ་འགྱུར་གྱི་གསུང་རབ་གོང་མ་རྣམས་ཀྱི་དགོངས་པའི་གནད་ཚང་ཞིང་། གསར་མའི་རྒྱས་བཀབ་མ་ཡིན་པའི་རྙིང་ཉམས་ཆེན་པོ་ཞིག་ཡང་གསུང་པ་ཡང་ཡང་ཐོས་ཤིང་། བཀའ་མའི་རྒྱུད་དང་སྒྲུབ་ཐབས་རྣམས་ལ་བལྟས་ཀྱང་དེ་ཁོ་ན་ལྟར་སྣང་ལ། གཏེར་ཁ་གོང་འོག་གཉིས་ཀྱང་བཀའ་མ་དང་མཐུན་ཆས་ཆེ་བ་མང་། གྲུབ་ཐོབ་མེ་ལོང་རྡོ་རྗེའི་ཆོག་སྒྲིགས་དེར་མཁས་པ་མང་པོས་ལེགས་སོ་མཛད་མོད། ཨྱོན་ཆེན་པོས་དུས་གསུམ་བསྒྲིབས་མེད་དུ་གཟིགས་པས་གདུལ་བྱའི་བློ་མཆོག་དམན་བར་གསུམ་དང་བསྟུན་པའི་གཏེར་ཁ་སོ་སོར་དུས་སྐབས་དང་བསྟུན་པའི་རྒྱས་བསྡུས་སྣ་ཚོགས་ཡོང་བར་གོར་མ་ཆག་རུང་། དེང་སང་རྙིང་རློམ་རྒྱལ་ཁམས་མ་མཐོང་ཨ་མའི་གསང་གནས་ལ་མཚར་འཛིན་དུ་མས་གཏེར་གཞུང་ཚིག་ཉུང་ཚོ་དང་མཐུན་ན་རྙིང་མ་ཡིན་ལ། དེ་མིན་གསར་མ་ནས་ལྷད་བཅུག་གོ་སྙམ་པའི་ལོག་རྟོག་(༢༡ན)
དང་བགྲོས་གླེང་བ་མང་མོད། ལྷ་སྲས་རྣམ་སྤྲུལ་ཆོས་ཀྱི་རྒྱལ་པོ་འབྲི་གུང་པ་རིན་ཆེན་ཕུན་ཚོགས་ཀྱིས་པཎ་ཆེན་རིན་པོ་ཆེར་བདེ་འདུས་རྩ་བའི་དབང་ཙམ་དང་། མི་འགྱུར་ཀུན་དགའ་དཔལ་བཟང་ལ་ཁྲོ་རོལ་སོགས་ལས་ཚོགས་སྐོར་མང་ཙམ་ལས་ཚང་བར་གསན་མ་ཐུབ་པས་གཏེར་ཆེན་ཆོས་ཀྱི་རྒྱལ་པོ་ལེགས་ལྡན་རྡོ་རྗེའི་དྲུང་དུ་རྫོགས་པར་གསན་ཅིང་། དཔོན་སློབ་གཉིས་བཀའ་བགྲོས་པའི་ཐོག་ནས་བསྐྱེད་རྫོགས་འབྲིང་པོའི་ཐོག་ནས་བསྐྱེད་རྫོགས་འབྲིང་པོའི་ཆོག་སྒྲིགས་མཛད་པ་འདི་ཁུངས་བཙུན་ཀྱང་། སྒྲུབ་ཆེན་གྱི་དུས་བཞིར་ལས་བྱང་གྱེར་བ་དང་ཁྲོ་རོལ་སོགས་ཀྱི་སྐབས་ཅུང་ཟད་འཁྱོངས་དཀའ་བའི་སྐྱོན་སྣང་བས་དགོངས་དོན་གྱི་སྙིང་པོ་གཞིར་བཟུང་། ཆོས་རྒྱལ་གཏེར་བདག་གླིང་པས་མཛད་པའི་ལས་བྱང་བདེ་བ་ཆེན་པོའི་རྣམ་རོལ། གཏེར་གཞུང་གི་དགོངས་དོན་གྱི་གནད་རྣམས་བསྡུས་པ་ལས་ཐུགས་བཟོ་སོགས་གཏན་མེད་པས་ཟུར་བརྒྱན། ལས་བྱང་གྱེར་པ་ལ་ཚིགས་བཅད་སྟབས་བདེ་གཤིས་ཚིགས་ལྷུག་རྣམས་ཚིགས་བཅད་དུ་བསྡབས་པ་ཙམ་མ་གཏོགས་ཡིག་རྙིང་རྣམས་བྱིན་རླབས་ཀྱི་ཚན་ཁ་ཆེ་བས་རང་སོར་བཞག །བར་གྱི་མཚམས་སྦྱོར་དང་ལག་ལེན་བྱེད་ཚུལ་སོགས་གཞན་ནས་ཁོག་ཕུག་པའི་དབང་དུ་བཏང་སྟེ་མ་བྲིས་པའི་ལས་བྱང་ཁྲག་འཐུང་རོལ་པའི་གད་བརྒྱངས་འདི་ནི་འཕྱོང་རྒྱས་དཔལ་རི་སྒྲུབ་སྡེའི་སློབ་དཔོན་ལེགས་ལྡན་འོད་ཟེར་སོགས་སྤྱི་ཚོགས་ཀྱིས་འབད་པ་ཆེན་པོས་བསྐུལ་བ་དང་། རོང་ཆོས་སྡིངས་པ་རིགས་འཛིན་ཕུན་ཚོགས་གླིང་སོགས་བདེ་འདུས་བྱེད་པ་མང་པོར་ཕན་པའི་ལྷག་བསམ་གྱིས་ཀུན་ནས་བླངས་ཏེ་ཟུར་ཐམས་ཅད་མཁྱེན་པ་ཆོས་དབྱིངས་རང་གྲོལ་གྱི་དྲུང་དུ་གཏེར་ཁ་གོང་འོག་བྱང་གཏེར་གྱི་བཀའ་བརྒྱད་གསུམ་ཚང་བ་དང་། ཁྱབ་བདག་ཁྲ་(༢༡བ)
ཚང་པ་ཆེན་པོར་གསང་རྫོགས་བསྐྱར་བ་ལྡབས་ཤིན་ཏུ་རྒྱས་པ། ཆོས་རྒྱལ་གཏེར་བདག་གླིང་པར་རྒྱལ་སྲས་རྡོ་རྗེ་གླིང་པའི་གསང་རྫོགས་སོགས་ཀྱི་བཀའ་དྲིན་ནོས་ཤིང་ཡུལ་ལྷོ་རྒྱུད་དུ་སྐྱེས་པའི་ཟ་ཧོར་གྱི་སྔགས་འཆང་ཆེ་མཆོག་འདུས་པ་རྩལ་ལམ་ཨྱོན་ཡབ་ཡུམ་གྱི་བཏགས་པ་རྡོ་རྗེ་ཐོགས་མེད་རྩལ་དུ་འབོད་པས་རབ་བྱུང་བཅུ་གཅིག་པའི་དྲག་པོ་ཞེས་པ་ལྕགས་ཕོ་སྤྲེའུའི་ལོ་ཐ་སྐར་ཟླ་བའི་ཚེས་བཅུའི་དུས་དགེ་བར་ཕོ་བྲང་ཆེན་པོ་རྒྱལ་ཁབ་དམར་པོ་རིར་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་ཀྱིས་བགྱིས་པ་སྭསྟི་བྷ་ཝནྟུ། །སརྦ་མངྒ་ལཾ། །