འབྲུག་པ་སྤྲུལ་སྐུ་རིན་པོ་ཆེས་མཛད་པའི་ཚེ་བདག་གི་ཡིག་ཆར་རྣམ་པར་དཔྱད་པའི་ཡི་གེ་རི་ཐང་མཚམས་ཀྱི་ནད་བརྒྱ་འཇོམས་པའི་སྨན་གཅིག
འབྲུག་པ་སྤྲུལ་སྐུ་རིན་པོ་ཆེས་མཛད་པའི་ཚེ་བདག་གི་ཡིག་ཆར་རྣམ་པར་དཔྱད་པའི་ཡི་གེ་རི་ཐང་མཚམས་ཀྱི་ནད་བརྒྱ་འཇོམས་པའི་སྨན་གཅིག་བཞུགས་སོ།།
ན་མོ་མཉྫུ་བཛྲཱ་ཡ། ཅུང་ཟད་སེམས་གནས་ཙམ་ལ་གྲུབ་ཐོབ་ཅེས། །ཆེར་རློམ་མེ་ཁྱེར་མ་ཡིན་མཚན་དཔེའི་སྐུ། །འཇའ་ལུས་རྡོ་རྗེའི་སྣང་བས་སྲིད་ཞིའི་སྨག །མཐར་མཛད་པད་འབྱུང་ཉིན་བྱེད་རིགས་ཀྱི་བདག །མན་ངག་ཕྲ་མོའི་ཁྲོན་པར་ཁེངས་པའི་སྙིང་། །འགས་པའི་བན་སྔགས་སྦལ་ཆུང་མང་མཐོང་ཚེ། །ལས་བཞིའི་རྒྱ་མཚོར་མཐུ་སྟོབས་གདེངས་ཀ་ཅན། །གནུབས་ཆེན་ཀླུ་དབང་རྣམ་ཐར་ཡིད་ཀྱི་གསོས། །པད་གནུབས་གཤེད་སྐོར་བཀའ་གཏེར་མཐོ་རིས་ཆབ། །རྣམ་དཔྱོད་ལྟོར་གཏམས་རིགས་འཛིན་ཛཧྣུའི། །ལེགས་བཤད་ཞལ་སྐྱུགས་འཁྲུལ་མེད་གངྒཱའི་རྒྱུན། །སྔ་འགྱུར་འཛིན་མར་འབེབས་ཀུན་ཕྱག་གི་ཡུལ། ཁྱད་པར་སེ་སྟོན་པཎ་ཆེན་སྐུ་མཆེད་ཀྱི། །གདམས་པའི་བཀའ་བབས་ཆོས་རྒྱལ་དབང་པོའི་སྡེའི། །མན་ངག་མཁའ་འགྲོའི་ཞལ་རླངས་དྲོད་པོ་ཆེ། །སྩོལ་མཁས་ཆོས་དབྱིངས་རང་གྲོལ་སྙིང་དབུས་བཞུགས། །སྣང་བ་ལྷ་རུ་བལྟ་ཕྱིར་གང་ཟག་རྣམས། །དག་པར་མོས་ཀྱང་(༢ན)
དེ་ཡི་ཆོས་ཚུལ་ཆེར། །དཔྱོད་པ་མཁས་པའི་ལུགས་ཡིན་ཕྱོགས་འདི་ལ། །སྦྱངས་རྣམས་རྣ་བ་བླགས་ཏེ་དཔང་པོ་མཛོད། །དེ་ཡང་འབྲུག་ལུགས་པ་རྣམས་ཀྱི་ནང་ནས་མཁས་པའི་ཡང་རྩེར་སོན་པ་སྤྲུལ་པའི་སྐུ་རིན་པོ་ཆེ་པདྨ་དཀར་པོས་མཛད་པའི་འཇམ་དཔལ་ཕྱག་རྒྱ་ཟིལ་གནོན་གྱི་ཡིག་ཆ་འགའ་ཞིག་འདུག་པའི་བརྒྱུད་འདེབས་བྱ་ནག་རིགས་ཀྱི་ཞབས་དྲུང་གོང་མའི་ཕྱག་དཔེ་ཐམས་ཅད་མཁྱེན་པའི་ཕྱག་བྲིས་ཀྱི་བུ་ཡིག་མར། རྒྱ་ནག་རི་བོ་རྩེ་ལྔ་ནས། །སློབ་དཔོན་འཇམ་དཔལ་བཤེས་གཉེན་ལ། །ཞེས་གསུངས་པ་ནི། འཇམ་དཔལ་ཞེས་པའི་མཚན་ཙམ་ལ་འཁྲུལ་པའི་རྣམ་པར་མ་བརྟགས་པ་སྟེ་སློབ་དཔོན་འདི་ནི་སིངྒྷ་ལའི་པཎྜི་ཏ་ཡིན་ཞིང་རི་བོ་མེ་རི་འབར་བའི་རྩེ་མོར་གཤིན་རྗེ་གཤེད་ཀྱི་དངོས་གྲུབ་བརྙེས་པ་སོགས་རྣམ་ཐརཤིན་ཏུ་རྒྱས། རྒྱ་ནག་ཏུ་འབྱོན་བཞུགས་མ་མཛད་པའི་མཐའ་བཀག་པ་མིན་ཀྱང་འཕགས་ཡུལ་གྱི་པཎ་གྲུབ་ཏུ་གྲགས་ཆེ་བས། རི་བོ་རྩེ་ལྔ་གནས་ཀྱི་གཙོ་བོར་མཛད་པ་སྟག་ལུང་དུ་སེམས་ཅན་གྱི་ཁྲོད་ནས་མར་རྐྱལ་ཚོ་བ་དང་རྦབ་རྡོ་མགྱོགས་པ་གླེང་བར་(༢བ)
བསྔགས་པའི་ལོ་རྒྱུས་ལྟར་བཀའ་བརྒྱུད་པའི་ཐུགས་མོས་བརྟན་པོ་དེ་གའི་དཀྱུས་སུ་སོང་བ་འདྲ། ཨྱོན་སྤྲུལ་པའི་ཞིང་ཁམས་སུ། །རིགས་འཛིན་ཤྲཱི་སིངྷ་ལ། །ཞེས་གསུངས་པ་ཤྲཱི་སིངྷ་པཎ་གྲུབ་ཀུན་གྱི་གཙུག་གི་རྒྱན་ལྟ་བུ་ཡིན་ནའང་། བཀའ་འབྱེད་དུ། ཤྲཱི་སིངྷས་བྱས་པ་ལ། །སྔོན་འགྲོ་སྙིང་བྱང་སྒྲོན་མ་ཡོད། །སྒྲུབ་ཐབས་རྟག་རབ་བརྩེགས་པ་ཡོད། །པྲ་ཁྲིད་འཁོར་ལོའི་སྒྲིག་རིམ་ཡོད། །ཚེ་བདག་གསུམ་དུ་ཕྱེ་བ་ཡོད། །མཎྜལ་རྒྱ་མདུད་བརྩེགས་པ་ཡོད། །ཐུན་མོང་ཚེ་བདག་ལ་སོགས་པའི། །ཕྱི་ནང་རྟགས་ཀྱི་ངོས་འཛིན་ཡོད། །ལས་བཞིའི་མངོན་རྟོགས་མེད་པ་ཡོད། །འཁོར་ལོ་ཉི་ཤུ་ཐམ་པ་ཡོད། །ཅེས་གནམ་ལྕགས་སྡིག་པའི་ཆོས་སྐོར་དུ་སྒྲིག་ཏུ་མེད་པར་གསུངས་ཤིང་། བམ་ཆེན་གསང་བའི་དབང་གི་མཇུག་ཏུ་འཇམ་དཔལ་བཤེས་གཉེན་དེས་སྒྲུབ་ཐབས་ལག་ལེན་ཐམས་ཅད་མཛད་ནས་ཤྲཱི་སིངྷ་ལ་ཞེས་པ་ལྕགས་འདྲའི་སྐོར་འགའ་ཞིག་ལ་དགོངས་ཀྱི་ལྕགས་སྡིག་ཕྱོགས་ཀྱི་བརྒྱུད་པར་ཡེ་མི་བཞུགས་པས་དེའི་བླ་མའི་ཁྲོད་དུ་འདྲེན་པ་ནི་རྗེ་མར་པས་ལྟ་བ་མཻ་ཏྲི་བ་ལ་ཕུ་ཐག་བཅད་པ་གསུང་ལ་གསལ་ཡང་གནས་ལུགས་ཕྱག་རྒྱའི་བརྒྱུད་ཁུངས་ཀྱི་སྐབས་སུ། ནཱ་རོ་པ། མར་པ། ཞེས་གཡག་མགོ་ཤོ་བཞག་གིས་འདྲེན་པའི་རྣམ་ཐར་དེ་འདིར་ཡང་འགེབས་པར་མཛད་སྣང་། བཀའ་འབྱེད་དུ་སློབ་དཔོན་འཇམ་དཔལ་བཤེས་གཉེན་གྱིས་མཛད་པ་ཞིག་ཀྱང་བཤད་རུང་འཇམ་དཔལ་བཤེས་གཉེན་ལ་ལྕགས་སྡིག་གནམ་ལྕགས་ཐོག་མེ། ལྕགས་འདྲ་གནམ་ལྕགས་ཐོག་མེ། ཐུན་མོང་བསྲུང་མཚམས་ཀྱི་ཆོས་སོགས་མང་དུ་ཡོད་པས་ལྐུགས་པའི་རིགས་འགྲེ་མཛད་པར་མི་རིགས་སོ། །ཆོས་འདིའི་བརྒྱུད་པའི་བླ་མ་ནི་(༣ན)
ཆོས་སྐུ་ཀུན་ཏུ་བཟང་པོ། ལོངས་སྐུ་ཕྱག་རྒྱ་ཟིལ་གནོན། སྤྲུལ་སྐུ་གསང་བའི་བདག་པོ། ལྷའི་བུ་ཚངས་པ། ལྷའི་བུ་ཉི་མ། ལྷའི་བུ་བདེ་བ་མཆོག་ལྡན། མཁའ་འགྲོ་མ་ཟླ་བའི་འོད་ཟེར། འཇམ་དཔལ་བཤེས་གཉེན། གཙུག་ལག་དཔལ་དགེ །རོམ་བུ་གུ་ཧྱ་དེ་བ་ཙནྡྲ། ཤནྟིཾ་གརྦྷ། དྷ་ན་དྷ་ལ། ཁྲག་འཐུང་ནག་པོ། བྷ་སུ་དྷ་ར། ཇོ་བོ་གནུབས་བན་སངས་རྒྱས་རིན་པོ་ཆེ། གཏེར་སྟོན་རྒྱ་ཞང་ཁྲོམ་ཞེས་ཡོད་པས་བླ་མ་བརྒྱུད་པ་རྣམས་ཀྱང་ཕྱག་རྒྱ་ཆེན་པོའི་ཀློང་དུ་འཇམ་དར་ཡུག་གཅིག་ལ་སོང་བར་སྣང་། ལྕགས་སྡིག་གི་གླེགས་བམ་གཏེར་དུ་སྦས་པ་ལས་འདྲ་མིན་བཀའ་མར་བཞག་པ་མེད་པས་གཏེར་བརྒྱུད་ཁེ་རྐྱང་ཡིན་རུང་དབང་ལ་ཆུ་བོ་གཉིས་འདྲེས་སྟབས། གནུབས་ཆེན་ནས་གནུབས་ཡོན་ཏན་རྒྱ་མཚོ་སོགས་བཀའ་མའི་བརྒྱུད་ལུགས་རྒྱས་པར་ཡོད་པ་སྙན་གྱི་དབང་པོར་མ་སོན་པ་འདྲའོ། །རྒྱ་ཞང་ཁྲོམ་གྱི་རྗེས་སུ། གནུབས་ཆེན་གུ་རུ་མཆོག་ལྡན་དང་། །མཐུ་ཆེན་རྒྱལ་མཚན་ལྷུན་གྲུབ་ལ། །ཞེས་པའི་བརྒྱུད་ལུགས་འདི་འདྲ་ནི་བཀའ་བརྒྱུད་པ་དཔོན་སློབ་ཚོ་ཐུགས་ཁོག་ཡངས་དྲགས་པ་མིན་པ་གཞན་གྱི་བློར་མི་ཆུད་དེ། རྒྱུ་མཚན་སྤྲུལ་སྐུ་རྒྱ་ཞང་ཁྲོམ་གྱིས་ཕུང་པོ་རི་བོ་ཆེ་དང་ལྷོ་བྲག་མཁོ་མཐིང་ལྷ་ཁང་ནས་འཇམ་དཔལ་གཤིན་རྗེ་མེའི་སྤུ་གྲིའི་ཆོས་སྐོར་རྣམས་གདན་དྲངས་ཏེ་ལྷ་རྗེ་གནུབས་ཆུང་བ་ལ་གནང་། རྗེ་བཙུན་མི་ལ་རས་པས་གནུབས་ཁུ་ལུང་དུ་དྲག་སྔགས་གཟའ་གདོང་དམར་ནག་གསན་ནས་ཨ་ཁུ་དང་ཨ་ནེ་སོགས་ཉེ་བ་དགྲར་ལངས་རྣམས་ལ་མཐུ་མཛད་པ། རས་པ་ཞི་བ་འོད་ཀྱི་དྲི་ལན་དུ། འོ་ན་ཁྱེའུ་ཆུང་བཞིན་ལེགས་སོ། །ཁྱོད་རྟོགས་འདོད་ཅན་དེ་ཚུར་ཉོན་དང་། །མི་ང་ངོ་ཁྱོད་ཀྱིས་ཤེས་མ་ཤེས། །མི་ང་ངོ་(༣བ)
ཁྱོད་ཀྱིས་མ་ཤེས་ན། །མི་ང་རང་མི་ལ་རས་པ་ཡིན། །ལྟེ་བ་གུང་ཐང་སྨད་དུ་བཅད། །སློབ་གཉེར་དབུས་གཙང་མཐིལ་དུ་བགྱིས། །ཕ་དགེས་སྟོན་རྔོག་མིས་དབུ་མཛད་ནས། །རོང་སྟོན་ལྷ་དགའ་ཡན་ཆད་དུ། །ལར་དྲིན་ཅན་གྱི་བླ་མ་བཅུ་ཙམ་བཞུགས། །ཆོས་ནི་རྒྱུད་སྡེ་སྔ་འགྱུར་ཞུས། ཁོང་ལྟ་དགོངས་ཀྱི་ཆོས་ལ་མཁྱེན་པ་མཐོ། ཁྱད་པར་ལྷ་རྗེ་གནུབས་ཆུང་ལ། །དྲག་སྔགས་གཟའ་གདོང་དམར་ནག་ཞུས། །ཞེས་གསུངས་པས་གཏེར་སྟོན་རྒྱ་ཞང་ཁྲོམ་རྗེ་མི་ལ་ལས་ཅུང་ཞིག་སྔ། མི་ལ་དང་བླ་མ་བ་རི་ལོ་ཙཱ་བ་དུས་མཚུངས། བླ་མ་སྐུ་བསྲུང་པ་རྒྱལ་མཚན་ལྷུན་གྲུབ་དང་། སྒར་པ་ཆོས་གྲགས་རྒྱ་མཚོ། བྱ་འཇམ་དབྱངས་ཆོས་གྲགས། རྗེ་བཙུན་རྡོ་རིང་པ་ཆེན་པོ། དགའ་ལྡན་ཆོས་རྗེ་སྨོན་ལམ་དཔལ་བ་རྣམས་བགྲེས་གཞོན་ཙམ་མ་གཏོགས་ཐོག་མཉམ་པས་གནུབས་ཆུང་པ་ནས་བླ་མ་སྐུ་བསྲུང་པའི་བར་ལ། འདུས་པ་བདེ་དགྱེས་ཚེ་འཁྲིད་སོགས་བརྒྱུད་རིམ་མང་པོར་བླ་མ་སྐུ་ཚེ་ཐུང་བ་རྣམས་བོར་བའི་ཁ་གྲངས་ཉུང་ངུར་བསྡུས་ཀྱང་དྲུག་བདུན་མེད་ཐེབས་མི་འདུག་པས་དགོངས་འཚལ། རྗེ་བཙུན་མི་ལའི་རྣམ་ཐར་དུ་ང་ལ་མཐུ་གཟའ་གདོང་དམར་ནག་ཅེས་བྱ་བ་ཧཱུཾ་ཤི་དང་ཕཊ་འགྱེལ་ཐོངས་པ་ཞིག་ཡོད་པ་དེ། གཙང་རོང་གི་གནུབས་ཁུ་ལུང་བྱ་བ་ན་བླ་མ་ཁུ་ལུང་པ་ཡོན་ཏན་རྒྱ་མཚོ་བྱ་བ་སྨན་ཡང་ཤེས་སྔགས་ཀྱང་ཤེས་པ་ཞིག་ཡོད་པ་དེ་ལ་བྱིན། ཁོང་ལ་སེར་བ་མཛུབ་ཁྲིད་ཐོངས་པ་ཞིག་འདུག་པ་དེ་ང་ལ་བྱིན་ནས་ངེད་གཉིས་མཐུན་པའི་གྲོགས་པོ་བྱས་ཏེ་ང་ལ་མཐུ་སློབ་ཏུ་བྱུང་ཚད་ཁོང་དུ་གཏོང་བར་བྱས། ཁོང་ལ་སེར་བ་སློབ་ཏུ་བྱུང་ཚད་ང་ཅན་གཏོང་བར་བྱས་ཡོད་པས། ཞེས་པའང་གཙང་སྨྱོན་པས་བླ་མ་གནུབས་ཆུང་པ་(༤ན)
དང་ཡོན་ཏན་རྒྱ་མཚོ་གཉིས་ནོར་བའི་འཁྲུལ་གཞིར་འདུག །རྣམ་ཐར་ཆོས་འབྱུང་ལོ་རྒྱུས་ཁུང་མ་ཚོར་གནུབས་ཆེན་གྱི་སྲས་གཉིས་འབངས་ཀྱི་གྱེན་ལོག་གིས་འཁྲུག་པར་བཀྲོངས་པས་ཐུགས་ཆད་དེ་རྒྱ་དཔེ་རྣམས་སྟག་སྒྲོ་གཟིག་སྒྲོར་བཅུག་པ་རྒྱ་བོང་གྭ་པ་ཞིག་ལ་བཀལ་ཏེ་རྒྱ་གར་དུ་སྐྱེལ་བར་དགོངས་ཏེ་ལམ་དུ་ཆས་པ་ན། གཡས་བན་མ་བོན་དང་མཇལ་ནས་ཁྱིམ་དུ་གདན་དྲངས། བོན་པོས་ཆང་ཉོ་བར་ཕྱིན་པ་སོ་ཡེ་ཤེས་དབང་ཕྱུག་དང་ཕྲད་ནས་དྲིས་པ་རང་ལ་མཆོད་གནས་གནུབས་སངས་རྒྱས་ཡེ་ཤེས་ཡོད་སྨྲས་པས་སོས་མཇལ་པར་བྱོན་དེ་དང་དུས་མཚུངས་སུ་པ་ཀོར་འཕགས་པ་བློན་ཆེན། སྲུ་ལེགས་པའི་སྒྲོན་མ། དན་ཡོན་ཏན་མཆོག་བཞིས་རྒྱ་གར་དུ་མི་གཤེགས་པར་གསོལ་བ་བཞིན་བཞུགས་ནས་མདོ་སྒྱུ་སེམས་གསུམ། ཡང་དག་དང་བདུད་རྩིའི་ཆོས་རྣམས་གསུངས། སྣར་གྱི་ཤུག་པ་ནག་པོར་བཞུགས་པའི་ཚེ་གནུབས་ཡོན་ཏན་རྒྱ་མཚོ་ལོ་སུམ་ཅུ་ལོན་པ་ཞིག་ཁྱི་ར་ལ་བྱོན་པ་རི་དྭགས་མ་སོད་པར་ནུབ་མོ་འཁྱམས་ནས་འཁྱགས་ཤིང་ལྟོགས་པ་ལ་སྤོས་ཀྱི་དྲི་ཚོར་ཏེ་གནས་ཤིག་ཡོད་དམ་སྙམ་བཙལ་བས་རྙེད་དེ་གནུབས་ཆེན་གྱི་སར་བྱོན་དྲིས་པས་རུས་གནུབས་ཡིན་པར་མཁྱེན་ཏེ་ཆོས་སྒོར་བཅུག་ཇོ་མོ་འདྲེ་སྒོམ་དང་གཉིས་ལ་གཤིན་རྗེའི་དབང་བསྐུར། གཤིན་རྗེའི་མན་ངག་ལུང་རྫོད་ཕྲང་དང་མདོ་སྒྱུ་སེམས་ཕྱོགས་སོགས་ཆོས་མང་དུ་གསུངས། སྲས་ཀྱི་དམ་པ་ལྕམ་སྲིང་གཉིས་ཞེས་ཀྱང་གྲགས། བཀའ་ཤོག་རྒྱ་བོ་ཆེར། རྒྱ་གར་མཁས་པ་བི་མ་ལ་མི་ཏྲ་དང་། །ཨྱོན་མཁས་པ་པདྨ་འབྱུང་གནས་དང་། །བལ་པོའི་མཁས་པ་བྷ་སུ་དྷ་ར་དང་། །བོད་ཀྱི་མཁས་པ་ཛྙཱ་ན་ཀུ་མཱ་རས། །བདག་ལ་གནང་བའི་མན་ངག་འདི་རྣམས་ཡིན། །བྱང་ཆུབ་སེམས་ཀྱི་(༤བ)
ཡི་གེ་བཅོ་བརྒྱད་པོ། །དོན་ལ་དབྱེ་བ་མེད་ཀྱང་མན་ངག་སོ་སོའི་བཞེད། །རྩའགྲེལ་ཏི་ཀ་གཅེས་པའི་ཡིག་ཆུང་མ་བུ་རྣམས། །སོ་གནུབས་གཉིས་ལ་གཏད་ཀྱི་འགྲོ་དོན་གྱིས། །ཞེས་པ་སོ་ཡེ་ཤེས་དབང་ཕྱུག་དང་གནུབས་ཡོན་ཏན་རྒྱ་མཚོ་གཉིས་ཡིན་ལ། སེམས་ཅན་དོན་ལ་བྱེད་བའི་མན་ངག་བརྒྱ་བཅུ་གཉིས། །མཁས་པ་རྣམ་བཞིའི་མན་ངག་རྒྱུན་མ་བཅད། །བྱང་ཆུབ་སེམས་དོན་མན་ངག་ངོས་འཛིན་བྱེད་པའི་མཎྜི་ཀ །བུ་གཅིག་ཡོན་ཏན་རྒྱ་མཚོ་སེམས་ཀྱི་དཀྱིལ་དུ་བསྟིམ། །ཞེས་འབྱུང་བས་གནུབས་ཡོན་ཏན་རྒྱ་མཚོ་ནི་སངས་རྒྱས་ཡེ་ཤེས་ཀྱི་དངོས་སློབ་ཡིན། གནུབས་ཡོན་ཏན་རྒྱ་མཚོ་ལ་ཐོག་མར་སྲས་གསུམ་བྱུང་བ་བླ་མ་གཤེགས་སྐྱེལ་ལ་བཏང་བའི་དུས་སེར་སྣ་བྱས་ནས་ཆོས་རྣམས་མ་ཕུལ་བས་དམ་ཚིག་གི་སེལ་བྱུང་སྟེ་བླ་མའི་བཀའ་བཞིན་ཆོས་མང་དུ་བསྐུར་ནས་གཞན་དུ་སྤྱུགས། བླ་མས་མིང་དང་བཅས་ཏེ་ལུང་བསྟན་པའི་སྲས་གཉིས་བྱུང་བའི་ཆེ་བ་གནུབས་ཡེ་ཤེས་རྒྱ་མཚོ་དང་ཆུང་བ་གནུབས་པདྨ་དབང་རྒྱལ་དུ་གྲགས། གཅེན་ཡེ་ཤེས་རྒྱ་མཚོ་བོན་པོ་དང་འགྲས་པར་གཅུང་ལ་དབུས་སུ་འཕྲིན་བཏང་སྟེ་གདམས་པ་ཟབ་མོའི་དཔེ་ཁྱེར་བ་རྣམས་བསྐུར་གསུངས་པ་བཞིན་འབྱོར་ནས་ལས་སྦྱོར་མཛད་པས་བོན་པོ་རྣམས་ཁ་ཕུད་དུ་བཏང་། གཅུང་པདྨ་དབང་རྒྱལ་ལ་སྲས་གཅིག་དང་སྲས་མོ་བརྒྱད་ཡོད་པའི་སྲས་གནུབས་ལྷ་རྗེ་འཇམ་དཔལ་གྱིས་ཞང་པ་ཚབ་ཀྱི་ཇོ་མོ་ཁབ་ཏུ་བཞེས་པར་སྲས་ལྷ་རྗེ་གནུབས་ཆུང་པའམ་ཡེ་ཤེས་གཟུངས་སུ་གྲགས་པ་འཁྲུངས། གནུབས་ཡོན་ཏན་རྒྱ་མཚོ་དང་གནུབས་ཆུང་པའི་བར་མི་རབས་གཉིས་ཀྱིས་ཆོད་པས་འཁྲུལ་གཞི་ཆེ་ཞིང་གསོ་རིག་གི་ལོ་རྒྱུས་ཚོར་རྒྱལ་པོ་ཁྲི་སྲོང་ལྡེའུ་བཙན་གྱི་དབུ་སྐྲ་ལ་དར་ཡུག་བཏགས་པའི་སྣེ་ལ་མཐའ་བཞིའི་སྨན་པ་བཀུག་པ་རྣམས་བཞག་ནས་(༥ན)
བསྙེན་བཀུར་ཏེ། མགོ་ནག་ཡོངས་ཀྱི་ལྷ་ནི་བཙན་པོ་སྟེ། །དེས་ཀྱང་ཐོད་དུ་འཁུར་བས་ལྷ་རྗེར་ཐོགས། །ཞེས་རྒྱ་ཆེར་བསྔགས་པ་དང་ཆོས་མཚུངས་པ་བོན་གྱིས་མངའ་བདག་ལ་ཐོག་འབེབས་པའི་དུས་སྤར་བ་གུ་རུ་རིན་པོ་ཆེ་ཆོས་དབང་གི་ཡབ་མེས་སྤང་རྗེ་བཙན་ཁྲོམ་གྱིས་ཕོ་བྲང་གི་ཡང་ཐོག་ཏུ་བཞུགས་པའི་ཚེ་ཐོག་བར་སྣང་ལ་དམར་ཧྲིལ་ཧྲིལ་བྱུང་བ་སྡིགས་མཛུབ་ཀྱི་རྩེ་ལ་བླངས་ཏེ་བོན་པོའི་སྟེང་དུ་འཕངས་པས་སྔགས་པ་རྣམས་ལ་ཡང་སྨན་པ་དང་འདྲ་བར་ལྷ་རྗེར་བཏགས་པ་མ་གོ་བར་ལྷ་རྗེ་ཟེར་ན་འཚོ་བྱེད་ཅིག་ལས་འོས་མེད་སྙམ་ནས། སྨན་ཡང་ཤེས་སྔགས་ཀྱང་ཤེས་ཞེས་སྒྲ་དག་མདོག་བྱེད་པ་རྨོངས་པའི་རང་མཚང་དུ་གསལ། དྲག་སྔགས་གཟའ་གདོང་དམར་ནག་གནུབས་ཆུང་པས་གཡུང་སྟོན་ཁྲོ་རྒྱལ་ལ་ཞུས་ཟེར་བའང་ཐེ་ཚོམ་གྱི་གཞི་ཆེ་སྟེ་གཟའ་གདོང་དམར་ནག་ངོས་འཛིན་རྣམ་གྲངས་མངས་པའི་གནོད་སྦྱིན་བཤན་པ་དམར་པོ་ཡིན་པའི་ཕྱོགས་བྱེད་མཁན་མང་བའི་ལུགས་ལྟར་ནའང་། ཆོས་སྐོར་འདི་གནུབས་ལུགས་རང་ལ་ཤིན་ཏུ་རྒྱས་པས་གཞན་ལ་ཞུ་བའི་དོན་མ་བྱུང་། ལ་ལ་བསམ་གཏན་གླིང་པའི་ཨ་ཏིའི་ནང་གི་གཟའ་རྒོད་སྒྱིད་རེངས་ཡིན་པར་འདོད་མོད། གནུབས་ཆེན་དྲག་སྔགས་ཐམས་ཅད་ཀྱི་བདག་པོ་ཡིན་པས་ཆོས་སྐྱོང་འདིའི་སྐོར་མ་བཞུགས་པའི་མཐའ་ནི་ཅི་བཀག དེང་སང་བཀའ་གཏེར་ཚད་མར་གྲགས་ཆུང་ཞིང་རྗེ་བཙུན་བསམ་གཏན་གླིང་པའི་གསན་ཡིག་ལྟར་ན་ཨྱོན་ཆེན་པོ་ནས། ཅོག་རོ་དཔལ་གྱི་མཆོད་གནས། འཁོན་རྡོ་རྗེ་རིན་ཆེན། འཁོན་ཤེས་རབ་ཡོན་ཏན། འཁོན་ཡོན་ཏན་འབྱུང་གནས། འཁོན་ཚུལ་ཁྲིམས་རྒྱལ་པོ། འཁོན་རྡོ་རྗེ་གཙུག་ཏོར། འཁོན་དགེ་སྐྱབས། འཁོན་དགེ་མཐོང་། འཁོན་བལ་པོ། འཁོན་ཤཱཀྱ་བློ་གྲོས། འཁོན་ཤེས་རབ་(༥བ)
ཚུལ་ཁྲིམས། འཁོན་དཀོན་ཅོག་རྒྱལ་པོ་ཞེས་འབྱུང་བས་གནུབས་ལུགས་ལ་བརྒྱུད་པ་གཞན་ཞིག་ཡོད་ན་མ་གཏོགས་འཁོན་ནས་བརྒྱུད་པ་རང་ནི་ཐེ་ཚོམ་གྱི་གཞིར་མཆིས། ཆོས་རྒྱལ་འབྲི་གུང་པ་རིན་ཅེན་ཕུན་ཚོགས་ཡབ་སྲས་ཀྱི་བཞེད་པར་ཡང་བཟློག་མེའི་སྤུ་གྲིར་གཤིན་རྗེ་གཟའ་གདོང་དམར་ནག་ཏུ་ངོས་འཛིན་པས། རྒྱས་གཏེར་ནས་བཞེས་འཕྲལ་གྱི་གྲི་མགར་ལག་མ་དེ་ཨ་ཁུ་ཨ་ནེའི་མགོ་བོ་ལ་བསྣུན་པར་མངོན་མོད་ལུགས་གསུམ་པོ་གང་ཡིན་གཅིག་ཏུ་ཁ་ཚོན་མ་ཆོད་ཀྱང་གཡག་ཞར་པའི་རྩྭ་ལྟར་ཕྱོགས་རེའི་མིག་ཅན་དུ་མ་སོང་བ་ནི་གལ་ཆེ་བར་གདའ། རས་པ་བརྒྱད་བསྒྲིགས་དང་བཞི་བསྒྲིགས་ཟེར་བའི་མགུར་འབུམ་ལ་ལར་གནུབས་ཆུང་པ་བོན་པོ་ཡིན་ཁུལ་བྱས་འདུག་པ་གནག་རྫི་རྒན་པོ་ཆོས་སྒོར་ཞུགས་མ་ཐག་ནས་གྲུབ་པའི་དབང་ཕྱུག་ཆེན་པོར་སོང་བ་རྣམས་ཀྱིས་བན་བོན་དབྱེ་བ་མ་བྱེད་པ་ཐུགས་མད་ཅེས་བདེན་ཁ་འབུལ། བླ་མ་སྐུ་བསྲུང་པའི་འོག་ཏུ། སྐལ་ལྡན་རྡོ་རྗེ་རྒྱལ་པོ་དང་། །དྷརྨ་ཀེ་ཏུ་དཔོན་སློབ་ལ། །ཞེས་པ་པདྨ་ལས་འབྲེལ་རྩལ་གྱི་གཏེར་མའི་ཁྱབ་འཇུག་དང་གནོད་སྦྱིན་སོགས་ཀྱི་བརྒྱུད་པར། ལས་འབྲེལ་རྩལ། ལོ་སྟོན་རྡོ་རྗེ་འབུམ། མཐིང་མ་བྲག་འོད། སྐལ་ལྡན་རྡོ་རྗེ་རྒྱལ་པོ་ཞེས་འབྱུང་བས། ལས་འབྲེལ་རྩལ་གྱི་སྐུ་སྐྱེ་ཀུན་མཁྱེན་ཀློང་ཆེན་པ་ཡིན། དྲུང་ཆེན་རིན་པོ་ཆེ་ཏཱའི་སི་ཏུས་ཀློང་ཆེན་པ་འབྲི་གུང་པའི་བླ་མ་ཡིན་ཞེས་སྡང་བར་མཛད་པའི་ལོ་རྒྱུས་དེབ་སྔོན་དུ་ཡོད། རྒྱལ་བ་བཙོང་ཁ་པ་ཆེན་པོ་བོད་དུ་ཕེབས་སྐབས་དྲུང་ཆེན་རིན་པོ་ཆེ་གཤེགས་ཟིན། སྐལ་ལྡན་རྡོ་རྗེ་རྒྱལ་པོ་རྗེ་བཙུན་བཙོང་ཁ་པ་ཆེན་པོ་དང་དུས་མཚུངས་སུ་བྱུང་ཚོད་ནས། དེ་རྗེས་མི་ཐོག་གཉིས་ཙམ་སོང་ནས་བླ་མ་སྐུ་བསྲུང་པ་བྱུང་བ་གཏན་ཚིགས་ཀྱིས་བསྒྲུབ་ནུས། དྷརྨ་ཀེ་ཏུའི་(༦ན)
རྗེས་སུ། ལྕགས་གཏུན་ནག་པོ་ཆོས་ཀྱི་གྲགས། །གཏེར་སྟོན་བྱ་བྲལ་མཚན་ཅན་ལ། །ཞེས་སྣང་བའི་ལྕགས་གཏུན་ནག་པོ་ནི་གཏེར་སྟོན་རྒྱའི་དངོས་སློབ་ཡིན། དེའི་སློབ་མ་གནུབས་སྟོན་ཆོས་གྲགས་ཡིན། གནུབས་བྱ་བྲལ་བ་ཞེས་པ་ལས་གཏེར་སྟོན་ཡིན་པ་ཀུན་ལ་མ་གྲགས་པས་རྟོགས་ལྡན་ཕོ་མོ་རྣམས་ཀྱི་རྨི་ལམ་ལ་ཤར་བ་ཡིན་ཤས་ཆེ། འདིའི་སློབ་མ་སྐལ་ལྡན་རྡོ་རྗེ་རྒྱལ་པོ་ཡིན་པས་བླ་བརྒྱུད་འདི་སྔགས་སྡེབས་བཞིན་དཀྲུགས་པ་ནི་མིན་ལ་ཆེ། བརྒྱུད་འདེབས་མངོན་རྟོགས་ཀྱི་ཐོག་མར་འདོན་པ་སྔགས་གསར་རྙིང་ཀུན་གྱི་སྲོལ་ཡིན་རུང་ཁྱེད་དཔོན་སློབ་བསྟོད་པའི་མཇུག་ཏུ་གསུང་གི་ཡོད་གདའ་བ་ཁྱད་ཆོས་བླ་ན་མེད་པ་ཞིག་ཡིན་ནམ་སྙམ། སྨོན་འགྲོ་པཎ་ཆེན་གྱི་ཕྱག་དཔེའི་ཁྲོད་དུ་ལོ་ཆེན་སངས་རྒྱས་དཔལ་བཟང་གི་གསན་ཡིག་ནས་བཤུས་པའི་སྔགས་སྡེབས་སྙིང་གཟེར་ནག་པོའི་བརྒྱུད་པར། པདྨ་དཀར་པོ་ཡན་ཚེ་བདག་གི་བརྒྱུད་པ་བཤད་མ་ཐག་པ་བགྲངས་པའི་མཇུག་ཏུ་རིན་པོ་ཆེ་ལྷ་རྩེ་བ་ངག་དབང་བཟང་པོ། དེ་ལ་ལོ་ཆེན་གྱིས་གསན་ཟེར་བ་བྲིས་འདུག་པ་གསང་རྫོགས་བརྒྱུད་པ་དང་མཐུན་པའི་གུ་རུ་ཆོས་དབང་ནས་གདུང་བརྒྱུད་སློབ་བརྒྱུད་ཀྱི་རིགས་ཚིག་གཅིག་ཀྱང་མེད་པའི་གནུབས་ལུགས་ནས་བརྒྱུད་པའི་ཁུལ་དེ་འདྲེ་ཤར་སྒོ་ལ་གླུད་ནུབ་སྒོ་ཁོ་ནའི་ནང་ཁྲོལ་གྱི་ལྟད་མོ་ཕྱི་བསྟན་དུ་སྣང་ཡང་རྗེས་འཇུག་རྣམས་ཅི་མཛད་ལེགས་པར་མཐོང་བའི་མོས་གུས་བརྟན་དྲགས་པས་ཕྱག་མཛུབ་གང་གཏད་ཤར་ལས་འོས་ཅི་མཆིས། ལས་བྱང་དངོས་ཀྱི་སྐབས་ལྕགས་སྡིག་གི་ལས་བྱང་ཆེན་མོར། ངེས་པའི་མཆོག་མཐུན་བསྒྲུབ་འདོད་ན༔ ལུས་དང་མཆོད་རྟེན་དཀྱིལ་འཁོར་བསྒྲུབ༔ དེ་ཡི་ལག་ལེན་རིམ་པ་རྣམས༔ འདི་རུ་ལེགས་གསལ་བཀོད་པའོ༔ (༦བ)
ཞེས་གསུངས་པའི་དོན་བཀའ་འབྱེད་དུ། སྨད་ཀྱི་གཉེར་མ་གསུམ་པོ་ལས༔ བསྟོད་བསྐུལ་རྒྱས་འབྲིང་བསྡུས་གསུམ་བྱུང་༔ དེ་ཡང་གཅེས་པའི་ཆོས་ཚན་གཅིག༔ བར་གྱི་གཉེར་མ་གསུམ་པོ་ལས༔ མངོན་རྟོགས་ཆེ་འབྲིང་ཆུང་གསུམ་བྱུང་༔ དེ་ཡང་གཅེས་པའི་ཆོས་ཚན་གཅིག༔ ཅེས་ལས་བྱང་ཆེན་མོ་དང་འབྲེལ་བར་མངོན་རྟོགས་ཆེན་མོས་དཀྱིལ་འཁོར། ལས་བྱང་འབྲིང་པོ་དང་འབྲེལ་བར་མངོན་རྟོགས་འབྲིང་པོས་མཆོད་རྟེན་བཅས་ཆོག །ལས་བྱང་ཆུང་བ་དང་འབྲེལ་བར་མངོན་རྟོགས་ཆུང་བས་གཏོར་བཟློག་གམ་ལུས་དཀྱིལ་རྒྱུན་འཁྱེར་གྱི་ཉམས་ལེན་དུ་སྦྱར་ནས་མཛད་པ་སྤྱིར་བཏང་དང་བྱེ་བྲག་ལས་བྱང་དང་མངོན་རྟོགས་ཆེན་མོར་སྦྱར་བའི་གཏོར་བཟློག་མེད་ཅེས་མཐའ་བཀག་པ་མིན་རུང་གཞུང་གི་དངོས་བསྟན་དང་བསྟུན་པ་ནི་བསྟོད་བསྐུལ་ཆེན་མོར། བཀའ་འབྱེད་གསེར་གྱི་ལྡེ་མིག་བརྩམས༔ དེ་ལས་གྱེས་པའི་འཕྲིན་ལས་ཆེ་འབྲིང་ཆུང་གསུམ་ཡོད༔ དཀྱིལ་འཁོར་མཆོད་རྟེན་གཏོར་བཟློག་དོན༔ ལག་ལེན་དོན་དུ་གསལ་བར་བཀོད༔ ཅེས་སོགས་སྔ་ཕྱིའི་དགོངས་པའི་དབང་གིས་ལས་བྱང་གསུམ་དང་མངོན་རྟོགས་གསུམ་བྱུང་བ་ཡིན་པའི་ཤེས་བྱེད་མེད་པར། དཀྱིལ་འཁོར་གསུམ་ལས་ཨེ་ཐུང་ལ་ཞེས་པའང་མུན་ནག་འདོམ་འཇལ་དུ་ཟད། བསྟོད་བསྐུལ་ཆེན་མོར། ཧཱུཾ་ལས་འཕྲོས་པའི་ཁྲོ་བོ་བཅུ། །ཞེས་སོགས་བགེགས་སྐྲོད་ཀྱི་སྔོན་དུ་འདུག་པ་དང་འོག་ཏུ། སྟེང་ཡང་ཁྲོ་བོའི་རང་བཞིན་ལ་ཞེས་སྣང་བ་འཁྲུགས་སྡེབས་ཀྱི་དགོངས་པ་མ་ལོན་པར་ཐོག་མར་ཁྲོ་བོ་བཅུའི་བསྲུང་འཁོར་མཛད་ནས་དེ་རྗེས་བགེགས་གཏོར་བཏང་ཞིང་མཚམས་བཅད་པ་ནི་གོ་རིམ་འཆོལ་བར་མ་ཟད་དམིགས་པ་དང་ལག་ལེན་ཤིན་ཏུ་མི་བདེ་བའི་སྟེང་སྔ་འགྱུར་གྱི་སྒྲུབ་འཕྲིན་ཕལ་(༧ན)
ཆེར་དང་འགལ། འདི་གའི་བརྗོད་བྱ་ཡང་སྣང་སྲིད་འཁོར་ལོ་རྩིབས་བཅུར་འཕྲོ་ཟེར་བ་སྣང་སྲིད་ཐམས་ཅད་སྟོང་པ་ཉིད་དུ་སྦྱངས་པའི་ངང་ནས་ཡེ་ཤེས་ཀྱི་འཁོར་ལོ་བསྒོམ་དགོས་རྒྱུ་ལ་སྣང་སྲིད་ཐ་མལ་གྱི་སྣང་བ་དེ་ག་འཁོར་ལོ་རྩིབས་བཅུར་སོང་བ་དོན་དང་མ་འབྲེལ་ཞིང་བསྒོམ་ཚེ་དེ་ལྟར་ཡིན་ཞེ་ན་ཚིག་སྐྱོན་དངོས་སུ་ཞུགས་པའི་ཉེས་པ་གང་གིས་སེལ། ལྟེ་བར་བདག་ཉིད་ཟིལ་གནོན་སྐུ། །འཇིགས་བྱེད་ཀི་ལ་ཡ་སྒྲོག་པ། །ཞེས་པའི་ཀི་ལ་ཐུང་ངུ་ཅ་ཅོལ་བྱེད་ན་འཇིགས་བྱེད་ཅ་ཅོའི་སྒྲ་སྒྲོག་པར་ཡ་མཚན་རྒྱུ་མ་བྱུང་ཞིང་ཚིག་གྲོགས་ཀྱིས་ཡ་མ་ཐོབ་རྣམ་དབྱེ་སྟེར་ན་དྲུག་པ་འཇུག །རིང་པོར་བྱས་ཏེ་ཕུར་བུ་ལ་བྱེད་ན་གདབ་ལས་ཀྱི་སྐབས་མ་གཏོགས་གཤིན་རྗེ་ལ་ཕུར་པའི་སྒྲ་བཅུག་པའང་འབྲེལ་ཆགས་པར་མ་མངོན། བྱིན་འབེབས་ལ་དམ་རྫས་བྱིན་འབེབས་ཞེས་དམིགས་ཀྱིས་བཀར་བ་སྒྲུབ་པ་པོ་གནས་ཁང་དམ་རྫས་སོགས་ཐམས་ཅད་ལ་བྱིན་ཕབ་ཆོག་པས་དེ་འདྲའི་རྒྱ་ཆུང་བ་ཅི་ལ་དགོས། མཆོད་རྫས་བྱིན་བརླབ་ཀྱི་སྐབས་རཾ་ཡཾ་ཝཾ་ཞེས་ཆུའི་ས་བོན་ཝཾ་དུ་མཛད་པ་སྔགས་རྙིང་མ་ལ་ཁཾ་བྱེད་པ་མི་འཐད་པའི་དག་ཆ་ཡིན་འདུག་རུང་གསར་མ་དང་མི་མཐུན་པ་རྒྱུ་མཚན་དུ་བྱེད་ན་ཆོ་ག་ཕྱག་ལེན་གསང་སྔགས་མཐའ་དག་རྣམས་རྩ་བ་ནས་གྲ་སློག་པའི་བརྡ་ཆད་གསར་དུ་དགོས་ཡོང་བས་དེ་ལྟར་ན་ལྕགས་སྡིག་འཕྲིན་ལས་ལ་བརྟེན་པ་བས་དྲག་པོ་ཕུར་ཞབས་མ་ལྟར་ལྷའམ་བླ་མ་ཆེ་གེ་མོ་ཞིག་གིས་ཁོ་བོ་ལ་རྨི་ལམ་དུ་གནང་བ་ཡིན་ནོ་ཞེས་ཚེ་བདག་གསར་པ་ཆུ་ལས་ཆུ་ཝུར་རྡོལ་བ་ལྟ་བུ་མཛད་ཀྱང་ཅིས་མ་ཁྱབ། ཏིང་འཛིན་རྣམ་གསུམ་གྱི་སྐབས། སྣང་སྟོང་དབྱེར་མེད་ཡེ་ཤེས་སྒྱུ་མའི་སྐུ། །ཞེས་སྣང་སྟོང་ཟུང་དུ་འཇུག་པའི་སྒྱུ་མའི་རོལ་པ་ལྟ་བུར་འཆད་པ་ནི་ཆོས་སྐུ་དེ་བཞིན་ཉིད་ཀྱི་ཏིང་འཛིན་གྱི་ཕྱོགས་ཙམ་དུ་ཡང་མ་སོང་(༧བ)
སྟེ། དེ་ཏིང་གི་དོན་ཆོས་སྐུ་སྤྲོས་བྲལ་ཀ་དག་ཏུ་ངོ་འཕྲོད་པ་ཞིག་དགོས་པས། བསྟོད་བསྐུལ་དུ། གང་ལ་དངོས་པོའི་མཚན་མ་རྡུལ་ཙམ་མེད་ཅེས་འབྱུང་བས་སོ། །ལོངས་སྐུ་ཀུན་ཏུ་སྣང་བའི་ཏིང་ངེ་འཛིན་ལ། ཡོན་ཏན་ཡེ་ཤེས་མཚན་དང་དཔེ་བྱད་ལྡན། །ཞེས་རྣམ་པར་སྣང་མཛད་གངས་ཅན་མཚོ་ལྟ་བུའི་ཉམས་ཤར་བའང་ཕྱོགས་ཙམ་དུ་མ་སོང་སྟེ། དེ་ཏིང་གི་དུས་སྤྲོས་བྲལ་ནམ་མཁའ་ལྟ་བུའི་གདངས་ཀུན་ཏིང་ལ་འདིར་སྤྲོས་བྲལ་གྱི་དོན་དམ་རྟོགས་པའི་སེམས་ཅན་རྣམས་ལ་དམིགས་པའི་བརྩེ་བ་སྙིང་རྗེ་ཆེན་པོ་འགག་མེད་དུ་འཆར་བའི་གསལ་བ་ལ་འཛིན་པ་མ་ཞུགས་པ་ཞིག་དགོས་པ་ཡིན་པས། བསྟོད་བསྐུལ་ལས། སེམས་ཅན་ཡོངས་ལ་ཁྱབ་པ་ཡི། །སྙིང་རྗེའི་འོད་ཟེར་དམར་སྨུག་ནི། །རང་བཞིན་གསལ་བའི་ངང་དུ་བསྒོམ། །ཞེས་འབྱུང་བས་སོ། །རྒྱུའི་ཏིང་འཛིན་གྱི་ཚེ། སྐུ་ནི་སྒྱུ་མའི་ཕྱག་རྒྱ་ཅིར་ཡང་སྣང་། །གསུང་ནི་ཁྲོ་བོའི་རྔམ་སྒྲ་ལྔ་དང་ལྡན། །ཞེས་འདིའི་སྐབས་ནས་ཕྱག་རྒྱ་ཟིལ་གནོན་གྱི་སྤྲུལ་སྐུར་བཞེངས་པ་འདྲ་ཞིག་འདུག་ནའང་སྐུའི་རྣམ་པ་མ་ཡིན་པའི་རྒྱུའི་ས་བོན་སྟོང་པའི་ཆོ་འཕྲུལ་ཨེ་ཡིག་ནམ་མཁའ་ལས་སྤྲིན་བྱུང་བ་ལྟ་བུ་བསྒོམ་པ་ནི་ལུགས་འདི་ལ་བྱང་བའི་སྔགས་རྒན་རལ་པ་ཅན་རྣམས་ཀྱི་བཞེད་པ་ལགས་པས་རྩལ་བཤད་ཀྱི་ཐུགས་བཟོ་འདི་དག་བྱ་བྲལ་རྒན་པོ་རྣམས་ཀྱི་པང་དུ་ངལ་གསོ་བར་བྱོས་ཤིག །ཏིང་འཛིན་གསུམ་ནི། གནུབས་ཀྱི་ལས་རིམ་གསལ་སྒྲོན་དུ། ཧཱུཾ། རྟོག་པ་མེད་པའི་ཆོས་ཉིད་ལས། །དངོས་པོ་མེད་པའི་ངང་ཉིད་དུ། །སྟོང་པའི་ཡེ་ཤེས་ཅིར་ཡང་གསལ། །ཆོས་ཉིད་དུ་ནི་དབྱེར་མེད་གྱུར། །ཨཱོཾ་ཨ་ཏི་ས་མ་ཏི་ཧཱུཾ། ཧཱུཾ་གསལ་བའི་རང་བཞིན་དངོས་པོ་མེད། །ཀུན་གྱི་རང་བཞིན་གསལ་བ་ལས། །འཛིན་སེམས་མེད་(༨ན)
པར་ཅིར་ཡང་སྣང་། །གསལ་ཞིང་དག་པ་དབྱེར་མེད་གྱུར། །ཨཱོཾ་མ་ཧཱ་ས་པ་ཏ་ས་མ་ཏི་ཧཱུཾ། ཧཱུཾ་རིག་པའི་ཡེ་ཤེས་གསལ་བ་ལས། །ཆོས་རྣམས་ཀུན་གྱི་རྩ་བ་ནི། །བྱང་ཆུབ་སེམས་ཀྱི་རྩ་བ་ཡིན། །སྟོང་པའི་ཆོ་འཕྲུལ་ཅིར་ཡང་འཆར། །ཨཱོཾ་མ་ཧཱ་ཛྙཱ་ན་ས་མ་ཏི་ཧཱུཾ། ཞེས་བྱུང་ཞིང་སྒྲོལ་ཆེན་བསམ་གྲུབ་རྡོ་རྗེའི་ལས་བྱང་སོགས་ཁུངས་མ་མང་པོར་ཡང་དེ་ལྟར་ཡོད་པ་གཟུར་གནས་རྣམས་ཀྱི་སྙིང་ལ་བཅང་ངོ་། །གཞལ་ཡས་ཁང་གི་སྐབས། གྲུ་བཞི་སྒོ་བཞི་རྟ་བབས་མཆོད་རྟེན་དབྱིབས། །ཞེས་པ་སྒྲུབ་ཆེན་སོགས་དཀྱིལ་འཁོར་ལ་མཆོད་རྟེན་དབྱིབས་ཡོང་དོན་མེད། བཅས་ཆོག་བསྒྲུབ་པའི་ཚེ་གྲུ་བཞི་སྒོ་བཞིའི་བཤད་ཚོད་དང་བསྒོམ་ཐེབས་གཉིས་ཀ་མེད་པས་དེ་འདྲ་ལྷན་ཅིག་ཏུ་བསྒོམ་པའི་དཀྱིལ་འཁོར་ཡ་མ་ཟུང་དེ་གནུབས་ཀྱི་སྔགས་རྒན་རྣམས་ལ་བེད་མི་འདུག་པས་མགོན་མང་གི་སྣོན་མ་ལ་རྒྱག་པ་ཞུ། ཡང་རྟ་བབས་སྟེང་ཆོས་ཀྱི་འཁོར་ལོ་ཞེས་སྔགས་གསར་མ་ལ་གྲགས་པའི་འཁོར་ལོ་དཀྱུས་མའི་ཚབ་ལ་མཆོད་རྟེན་གྱི་བུམ་པ་ཡན་ཆད་མཛད་པ་རྟ་བབས་བུམ་མགོ་མ་ལ་ཐུགས་རྩེ་གཏད་ན་ནི་བཀའ་བརྒྱད་སོགས་གཞན་ལའང་མཆོད་རྟེན་བཅས་ཆོག་གི་རྣམ་གཞག་འཇོག་དགོས་པས་ཧ་ཅང་ཐལ་ལོ། །རྟ་བབས་མཆོད་རྟེན་དབྱིབས་ཞེས་པའི་ཚིག་རིས་ལ་དཔགས་ན་རྟ་བབས་དེ་མཆོད་རྟེན་གྱི་དབྱིབས་སུ་སོང་འདུག་པས་བང་རིམ་རྣམས་རྟ་བབས་ཀྱིས་ཡོང་བའི་བཀྲ་བཀྲ་ཞིག་ཤར་བ་འདྲ་རུང་། རྟ་བབས་སྣམ་བུ་བཞི་མ་ལ་གླང་རྒྱབ་མིག་གསུམ་མ་དགོས་པས་མཆོད་རྟེན་གྱི་ཐིག་རྩ་ལ་གླང་རྒྱབ་ཡོད་པ་མ་མཐོང་ལྷག་ཏུ་ཚེ་བདག་ལ་རྟ་བབས་སྣམ་བརྒྱད་མ་བཤད་པས་རྟོག་བཟོའི་དཔེ་འགེབས་ཐེབས་ཀྱང་མ་བྱུང་བས་དེ་བཞིན་གཤེགས་པའི་དུས་མཆོད་རྟེན་བརྒྱད་ལས་མ་གྲགས་རུང་(༨བ)
འབྲུག་དགོན་ཚོར་རྫ་གཅོག་མཆོད་རྟེན་དབྱར་གྱི་ལོ་མའི་ཅོད་པན་ཅན་ཞིག་གསར་དུ་བསྐྲུན་དགོས་པ་འདྲའོ། །གཙོ་བོ་བསྐྱེད་པའི་སྐབས། ཨེ་ཉིད་ཨེ་ཀ་ཛ་ཊི་འཕྲོས་འདུས་ཐིམ་ཞེས་རྒྱུད་དངོས་སུ་བཤད་ནས་དེ་མ་ཐག །རྒྱུ་མེད་ཀླུ་འབུམ་གཉན་ཁྲི་ས་བདག་སྟོང་། །ཞེས་སོགས་དངོས་འགལ་ལ་སོང་ཞིང་གནམ་ཐོག་ཆེན་མོའི་ལམ་སྲོལ་གྱི་སྐབས། རྒྱུ་དང་རྐྱེན་ལས་མ་བསྐྱེད་པར། །ཞེས་པའི་ཚིག་གསན་པར་བརྟེན་ཡོ་ག་གསུམ་གྱི་བསྒོམ་ལུགས་མ་དགོངས་པར་ཞལ་ནས་ར་འདོན་ལུག་འདོན་བྱུང་བ་འདྲ། ཁྱུང་གཤོག་ཙམ་མ་གཏོགས་དཔལ་གྱི་ཆས་བརྒྱད་སོ་སོར་བགྲངས་པ་དང་གཅིག་ཏུ་བསྡོམས་པའི་གསལ་ཁ་མ་མཛད་འདུག་པ་གཏེར་གཞུང་ཚོར་ཚིག་སྣ་ཐུང་བའི་མི་གསལ་ཞིང་རྣམ་བཤད་དང་གསུང་རྒྱུན་སྙན་དུ་མ་དངས་པའི་སྐྱོན་འདྲ་བས། སྔ་འགྱུར་གྱི་རང་སྐད་དུ། སྤྱི་གཙུག་མི་འགྱུར་རྡོ་རྗེ་ཕྱེད་པའི་ཆས། ཁམས་གསུམ་ཟིལ་གནོན་ལྕང་ལོ་རལ་པའི་ཆས། །རྫུ་འཕྲུལ་ཤུགས་ལྡན་ཐབས་ཤེས་གཤོག་པའི་ཆས། །ཕ་རོལ་དཔུང་འཇོམས་ཕྱག་མཚན་མཚོན་ཆའི་ཆས། །གཞན་གྱིས་མ་ཐུབ་བསྲུང་བ་གོ་ཁྲབ་ཆས། །ཉམ་ང་ཀུན་བྲལ་རྟོག་མེད་རོ་གདན་ཆས། །འཁོར་འདས་རོ་མཉམ་ཁྲག་ཞག་རྒྱ་མཚོའི་ཆས། །ཉོན་མོངས་ཀུན་བསྲེག་བསྐལ་པ་མེ་དཔུང་ཆས། །ཞེས་འབྱུང་བའང་རྗེས་འཇུག་ཐུལ་གོག་གཅིག་གི་འོག་ནས་སྤྲུལ་སྐུ་བ་དགུ་བཞེངས་མཁན་རྣམས་ཀྱི་ཐུགས་སུ་བཞུགས་འཚལ། ཚོགས་མཐའ་མའི་སྐབས་བཀའ་བརྒྱད་གསང་བ་ཡོངས་རྫོགས་ཀྱི་ཐུན་བདུན་པའི་ཚིག་དོན་བཛྲ་ས་མཱ་ཛཿས་སྤྱན་དྲངས་པར་སྣང་། བཀའ་བརྒྱད་གཙོ་བོ་འཕོ་བའི་དབང་དུ་མཛད་དེ་ཚེ་བདག་གི་བཀའ་གཞན་རྣམས་ལས་ལ་བསྐུལ་བ་པད་གནུབས་གཉིས་ཀྱི་ཕྱག་ཏུ་མ་ལོན་(༩ན)
པ་འདི་འདྲ་ཐུགས་ཉམས་སུ་བཞེས་ཐུབ་པ་རྟོགས་ལྡན་རྣམས་གང་ཡོད་འདིར་ཤོག་གི་བློ་ཤེད་ཆེ་བའི་ཞེ་མེད་སྒལ་རལ་གྱི་དཔའ་མཚན་དུ་འདུག་གོ །ཚོགས་ལྷག་གི་མཇུག་ཏུ་ཆད་མཐོ་སྦྲེལ་བ་ལས་བྱང་ཆེན་མོར་ཡང་མི་འདུག་ཅིང་འདི་ལ་གཏོར་མ་ཟུར་དུ་བཅས་ན་ཟོར་འཕངས་པའི་རྗེས་སུ་གཏོང་བའི་ལུགས་དང་གཏོར་མ་དངོས་གཞི་ལ་དམིགས་ན་ཟོར་འདོན་ཁར་མཛད་པས་མཚམས་འདིར་བྲིས་པ་བསྟོད་བསྐུལ་དཀྱུས་མའི་ཉམས་ཤར་བ་འདྲ། ལྕགས་སྡིག་ཏུ་སྡིག་དྲུག་ཡན་ལག་གི་གཏོར་བཟློག་ཤིན་ཏུ་རྒྱས་པ་ཟོར་ལས་བྱེད་ན་ཆ་ལག་ཏུ་ངེས་པར་དགོས་ཀྱང་གསན་གཟིགས་མ་བྱུང་བའམ་བྱུང་ཡང་འཁྲུགས་སྡེབས་ཀྱི་གནད་མ་དགོངས་པར་མཆིས། སྒོ་དབྱེ་གཏོང་བ་གཏོར་མ་བསྒུལ་བའི་ཚེ་ལྷ་འདྲེར་འཕོག་ཐུག་བྱུང་དོགས་སེལ་བྱེད་ཡིན་པ་དཔེར་ན་ནག་རྩིས་པའི་ཕུང་པོ་འདོན་མཚམས་ལོའི་སྒོ་ཕྲ་མོ་གཤག་པའི་གནད་དང་འདྲ་བ་མ་དགོངས་པར་གཏོར་མ་སྤགས་ནས་སྒོ་དབྱེ་བྱ་གསུང་བ་གསར་མ་བའི་བག་ཆགས་ངན་པའི་ཤོག་ཧྲིལ་བསྒྲིལ་མཆིས། ཤར་ཕྱོགས་སྒོ་མ་རྟ་གདོང་དཀར་སོགས་ཚེ་བདག་ལ་འཕྲོས་ཙམ་ཡང་མེད་པའི་བཀའ་བརྒྱད་ཀྱི་སྒོ་མ་བཞི་སླེབས་གདའ་བ་ཁོང་རྣམས་ལ་ཚེ་བདག་གི་ཁྲལ་འཁྲི་ཡི་མེད་པས་དགོངས་པ་ཞུ། སྒོ་དབྱེའི་རྗེས་སུ་བཟློག་གཞུང་གི་ཆལ་པ་ཞིག་འདྲི་བ་མཛད་པ་མཚམས་མ་ཕྱེས་པའི་འདྲེས་སྐྱོན་ལ་ཅི་ཞུ། ཟོར་གྱི་སྐབས་ཚེ་བདག་གི་རང་སྐད་ཐུན་མོང་མ་ཡིན་པའི་རྭ་ཟོར་མེད་པ་ལ་ཕུར་ཟོར་བསྣན་པ་དག་དུག་བསྡུས་པའི་བམ་པོ་དེ་ཕུག་པའི་སྦུག་ཏུ་དྲོ་པོ་ཡོང་ཤས་ཆེ། ཕྱོགས་འདི་ལ་ཚད་མར་གྱུར་པའི་གཤིན་རྗེ་མཁན་པོ་རྣམས་ནི་ལྕགས་སྡིག་ལྕགས་འདྲར་ཁ་མི་གསལ་བ་གང་ནས་ཁ་འགེང་ན་འདི་ལ་རྣ་ཆ་བརྒྱད་དུ་གྲགས་པའི་ཁྲོ་འདུས་བཟློག་པའི་(༩བ)
རྣ་ཆ། ཨུར་མོ་བསད་པའི་རྣ་ཆ། འཆར་ཀ་མདོས་ཟོར་གྱི་རྣ་ཆ། ཀིང་ཀང་མནན་པའི་རྣ་ཆ། ཁ་ཐུན་ཐོད་པའི་རྣ་ཆ། འཁྲུལ་འཁོར་རྒྱས་སྡེབ་སྡེབས་ཀྱི་རྣ་ཆ། རླུང་ནག་འབྱེད་པའི་རྣ་ཆ། ས་འཚོལ་གཏད་ཀྱི་རྣ་ཆའམ་ཡང་ན་རྣོན་པོ་ནད་གཅོད་བསྲུང་བའི་རྣ་ཆ། ཁྲོ་འདུས་བཟློག་པའི་རྣ་ཆ། འཁྲུལ་འཁོར་རྒྱས་སྡེབ་སྡེབས་ཀྱི་རྣ་ཆ། རླུང་ནག་འབྱེད་པའི་རྣ་ཆ། དུར་ཁ་མནན་པའི་རྣ་ཆ། འཆར་ཀ་མདོས་ཀྱི་རྣ་ཆ། སྲོག་དམར་ལེན་བསད་པའི་རྣ་ཆ། ཨུར་མོ་ངན་སྔགས་ཀྱི་རྣ་ཆ་ཞེས་འདྲེན་ལུགས་གཉིས་ཡོད་པའི་འཆར་ཀ་ནག་པོ་ནས་ཟོར་རྣམས་སྣོན་པ་ལ་འཆར་ཀ་ཕུར་ཟོར་ལོགས་སུ་བཤམ་སྲོལ་མེད། རྭ་ཟོར་ཡོད་ཕྱིན་ཐོད་ཟོར་མི་དགོས་པས་བཀའ་གཏེར་གྱི་གཞུང་སོ་སོར་གཟིགས་འཚལ། ཨེ་རིང་བསྙེན་པའི་མན་ངག་ཅེས་བྱ་བ་ཞིག་མཛད་འདུག་པར། མངོན་རྟོགས་ཆུང་བ་ལྟར་དཔྲལ་བར་ཡ་མ་ར་ཙ། མགྲིན་པར་རྟ་མགྲིན། ཐུགས་ཀར་ཕྱག་རྡོར། ལྟེ་བར་རུས་སྦལ། གསང་གནས་སུ་རྡོ་རྗེ་ཕུར་པ་བསྐྱེད་འདུག་པ་མངོན་རྟོགས་ཆུང་བ་འདི་རྒྱུན་འཁྱེར་དུ་བཤད་པ་ལ་བརྟེན་ནས་བསྙེན་པའི་དུས་ལས་བྱང་ཆེན་མོ་བསྲང་བ་མི་ལྕོགས་པ་གཞིར་བཞག་ཡིན་སྣང་བ་ཁྱེད་རང་བཀའ་བརྒྱུད་པ་དཔོན་སློབ་བསྙེན་པ་དབང་སྒྲུབ་སོགས་གང་ལའང་ཕྱག་རྒྱ་ཆེན་པོའི་ངང་ནས་བྱེད་པ་ཡིན་ཞེས་ལས་བྱང་མངོན་རྟོགས་ཅི་ཡང་མེད་པ་དེ་འདྲ་གོང་ར་ལོ་ཙཱ་བ་དབང་གི་དཀྱིལ་འཁོར་ཐིག་ཚོན་གྱི་ཆོ་ག་མེད་པར་མ་ཏྲཾ་གི་ལྟོ་བར་ལྷ་གནས་ཙམ་བཀོད་པའི་བཟློག་དཀྱིལ་དཀྱུས་མ་ལྷར་བྲིས་ཡོང་འདུག་པས་མཚོན་རྙིང་མ་བར་རློམ་པའི་ཟོག་པོའི་རིགས་འདྲས་བྱེད་མཁན་ནི་ཡོང་ཤས་ཆེ། མངའ་རིས་པཎ་ཆེན་སྐུ་མཆེད་ཀྱི་བརྒྱུད་འཛིན་སོགས་རྙིང་མ་བ་ཚད་ལྡན་རྣམས་ནི་རྨི་ལམ་དུ་ཡང་མི་འདོད། ཐུན་བཞིན་བྱས་(༡༠ན)
པའི་གཅིག་ལ་རྒྱས་པ་ངེས་པར་མཛད། གཞན་རྣམས་ལའང་སྔོན་འགྲོ་དང་མཆོད་བསྟོད་མདོར་བསྡུས་ལ། མངོན་རྟོགས་ཆུང་བ། མན་ངག་རྩ་བའི་གཞུང་རྐྱང་། མངའ་རིས་པཎ་ཆེན་རིན་པོ་ཆེས་མཛད་པའི་ཁྲོ་རྒྱལ་ལམ་བསྡུས་ལྟ་བུ་སྦྱོར་བ་ཡིན། ཁྱེད་ཀྱི་བསྙེན་ཡིག་འདིར་བསྲུང་འཁོར་ལྟར་བསྒོམ་ན་ཞེས་གཤིན་རྗེ་དྲེགས་པ་རུས་སྦལ་གསུམ་གཅིག་གི་ཐུགས་ཀར་གཅིག་གསལ་འདེབས་བདེ་ལ་ངོས་བཟུང་བ་བསྙེན་པའི་མན་ངག་གི་ཉམས་ལེན་ཕྱོགས་འགྲོ་ཡང་སྙན་དུ་མ་སོན་པར་གདའ། བསྙེན་ཡིག་ཅེས་པའི་མིང་ཙམ་ཐོས་སྐབས་དེར་བསྙེན་པ་སྒྲུབ་པ་སྒྲུབ་པ་ཆེན་པོའི་ཁྱད་པར་དང་དམིགས་པའི་ཟབ་གནད་རྣམས་བྲིས་ཡོད་དམ་སྙམ་ཙ་ན་དོན་དུ་མངོན་རྟོགས་ཉུང་ངུ་སྦྱོར་མཇུག་གང་ཡང་མེད་པའི་མཐར་བསྙེན་པ་གཞུང་བཞིན་བྱ་ཟེར་བ་ཞིག་ལས་མི་སྣང་བས་ཐམས་ཅད་སྟོང་པ་ཡིན་ནོ་ཞེས་པའི་ཧང་ཧང་གི་ལྟ་བ་དེ་ག་བསྙེན་ཡིག་ལ་ཡང་བྱུང་བས་སྒོ་ངའི་མཐིལ་ནི་ཧ་ཅང་མི་རིང་། བསྙེན་སྒྲུབ་འདི་འདྲའི་རིགས་བྱུང་ཙ་ན་ཞྭ་དམར་ནག་བསྒྲིལ་བའི་དམག་གིས་ཀོང་པོ་ཀླུ་སྡིངས་ནས་དབུ་ལ་ཕྱག་བཀབ་སྟེ་ཕེབས་འཇུག་པ་ལས་འོས་ཅི་མཆིས། སྙིང་གཟེར་ནག་པོའི་དཀྱིལ་འཁོར་གྱི་ཆོ་ག་ཁྲག་འཐུང་རོལ་པའི་དགའ་སྟོན་དུ་གྲགས་པ་ཞིག་མཛད་འདུག་པ། རྒྱུད། དགའ་རབ་རྡོ་རྗེ་དང་གནུབས་སངས་རྒྱས་ཡེ་ཤེས་ལ་སོགས་པའི་ལུང་གཅིག་ཏུ་བསྡུས་ཞེས་ཁུངས་དྲངས་པ། དཔལ་ཟླ་གསང་ནག་པོ་མེ་ལྕེ་འཕྲེང་བའི་རྒྱུད། གཤིན་རྗེ་ཟླ་གསང་ནག་པོ་ངན་སྔགས་ཐམས་ཅད་ཀྱི་རྩ་བའི་རྒྱུད། དཔལ་ཟླ་གསང་ནག་པོའི་རྒྱུད་དྲེགས་པ་ཚར་གཅོད། འཇམ་དཔལ་གཤིན་རྗེ་ཟླ་གསང་ནག་པོ་མན་ངག་གི་ཡིག་ཆུང་སྒྲུབ་ཐབས་ཀྱི་རྒྱུད་འཇམ་དཔལ་(༡༠བ)
གཤིན་རྗེ་གཤེད་པོའི་གསང་བ་དྲུག་ཅུ་པའི་རྒྱུད། འཇམ་དཔལ་གསང་བ་སུམ་ཅུ་པའི་རྒྱུད། སེང་གེ་འོ་མའི་རྒྱུད་ཕྱི་མ་དང་བཅས་པ། འཇམ་དཔལ་གཤིན་རྗེ་ཟླ་གསང་རིན་པོ་ཆེ་གསང་བའི་རྒྱུད། ཟླ་གསང་ནག་པོ་ཡན་ལག་གི་རྒྱུད། འཇམ་དཔལ་ཁྲོ་བོ་རིན་ཆེན་གསང་རྒྱུད། གཤིན་རྗེ་ནག་པོའི་སྔགས་རྒྱུད། གཤིན་རྗེ་དམར་ནག་གི་དམེ་རྒྱུད། གཤིན་རྗེ་ནག་པོ་ལས་སྣ་ཚོགས་པའི་རྒྱུད། ཡ་མ་ར་ཙ་ཁྲོས་པའི་རྒྱུད་ཅེས་པ་ངན་སྔགས་བཀོལ་བའི་ལས་རྒྱུད། འཁོར་ལོ་དྲག་པོ་རྡོ་རྗེ་ཨུར་མོ་ཞེས་བྱ་བ་རྟོགས་པ་བསྡུས་པའི་རྒྱུད། རྡོ་རྗེ་ཉི་མ་ཁྲག་འཐུང་གི་རྒྱུད། གཤིན་རྗེའི་གཤེད་ཁྲོ་བོ་ཊཀྐི་རཱ་ཛའི་རྒྱུད། ཁྲོ་བོ་རྣམ་པར་རྒྱལ་བའི་རྩ་རྒྱུད། གཤིན་རྗེ་ནག་པོའི་རྒྱུད་བསྐལ་པ་མེ་དཔུང་འབར་བ་ལས་ཕྱུང་བ། ཐོད་པ་རྡོ་རྗེ་འཇིགས་བྱེད་ཆེན་པོའི་རྒྱུད། ཟློག་བྱེད་འཆར་ཀ་ནག་པོའི་རྩ་རྒྱུད། སྲིན་པོ་མགོ་བརྡུང་གི་རྒྱུད། ཡ་མ་ར་ཙ་སྐུ་ཁྲོས་པའི་རྒྱུད། འཇོམས་བྱེད་འབར་བའི་རྒྱུད། མོན་པ་ནག་པོ་ཁྲོས་པ་ཙིཏྟ་བཾ་ལོག་གི་རྒྱུད། གཤིན་རྗེ་ནག་པོ་གསང་བ་དེ་ཁོ་ན་ཉིད་ཀྱི་སྙིང་པོ་འཁྲུལ་འཁོར་རིན་པོ་ཆེའི་རྒྱལ་མཚན་འཕྲུལ་གྱི་མེ་ལོང་ཁྲི་དྲུག་སྟོང་པ་ཞེས་བྱ་བའི་རྒྱུད། རྒྱལ་མཚན་མེ་ལོང་ཆུང་བའི་རྒྱུད། འཇམ་དཔལ་དྲི་མེད་གསང་རྒྱུད། གཤིན་རྗེ་ནག་པོའི་རྒྱུད། གཤིན་རྗེ་ནག་པོ་གསང་བ་དེ་ཁོ་ན་ཉིད་ཁ་ཐུན་གྱི་རྒྱུད། དེའི་ཕྱི་མའི་རྒྱུད། ཚེ་བདག་ནག་པོའི་དྲག་སྔགས་མངོན་དུ་ཕྱུང་བའི་རྒྱུད། ཚེ་བདག་ནག་པོའི་དགོངས་རྒྱུད། གཤིན་རྗེ་ནག་པོ་མེ་རླུང་སྐྱིན་ཐང་འཁྱུག་པའི་རྒྱུད། དྲག་སྔགས་ཟླ་གསང་ནག་པོའི་རྒྱུད། འཇམ་དཔལ་ཁྲོ་བོ་སྙིང་གཟེར་གསང་བའི་རྒྱུད། ཟླ་གསང་དྲག་སྔགས་ནག་པོ་(༡༡ན)
བཤན་པ་སྤུ་གྲིའི་རྒྱུད། འཇིག་རྟེན་གསུམ་གྱི་ཤེས་པ་བསྒྲལ་བའི་རྒྱུད། ངན་སྔགས་གཙུག་ལག་གི་རྒྱུད་ཕྱི་མའི་ཡང་ཕྱི་མ་སྡིག་པ་སྙིང་འཛིངས་གསང་བའི་རྒྱུད། སྡིག་པ་སྙིང་འཛིངས་སྙིང་པོ་དོན་གྱི་རྒྱུད། དྲག་སྔགས་མཚོན་ཆ་ནག་པོའི་རྒྱུད་སྲོག་དམར་ལན་གྱི་རྒྱུད། སྡིག་པ་སྟོབས་ཆེན་གསང་བའི་རྒྱུད། ཆུ་ཐིགས་སྔོན་མོའི་རྒྱུད། དེའི་རྒྱུད་ཕྱི་མ། དྲག་པོ་འཕུང་བྱེད་མཆོད་རྟེན་ནག་པོའི་རྒྱུད། འཇམ་དཔལ་ལས་བཞི་འཁོར་ལོ་གསང་བའི་རྒྱུད། པྲ་ཁོག་བླང་བའི་རྒྱུད། འཇམ་དཔལ་ཁྲོ་བོ་གཤིན་རྗེ་གསང་རྒྱུད་འཇམ་དཔལ་རྣམ་པར་རོལ་པ་རྣལ་འབྱོར་རྒྱལ་པོའི་ལེའུ་སྟོང་ཕྲག་ལྔ་བཅུ་རྩ་ལྔ་པ་ལས་ཏིང་འཛིན་གསང་བའི་རྒྱུད་ཁོལ་དུ་ཕྱུང་བ། གཤིན་རྗེ་ནག་པོ་ཁྲོས་པ་རྩ་བའི་རྒྱུད། གསང་རྒྱུད་ཕྱི་མ། དྲེགས་པ་ཕོ་མོ་འདུས་པའི་ལས་རྒྱུད། གཤིན་རྗེ་འཆར་ཀ་ནག་པོའི་རྒྱུད། གདོང་ཟོར་ནག་པོའི་བསྟོད་པའི་རྒྱུད། ཤ་ཕོ་རུ་འཛིངས་ཀྱི་རྒྱུད། འཇོམས་བྱེད་ནག་པོའི་རྒྱུད། དྲག་པོ་སྔགས་རྒོད་དེ་ཁོ་ན་ཉིད་ཀྱི་རྒྱ་སྡེབས་ཀྱི་རྒྱུད། དྲག་སྔགས་འཁོར་ལོ་གསང་བ་སྡེབས་ཀྱི་རྒྱུད། དམོད་པ་དྲག་སྔགས་གསང་བ་མཆོག་གི་སྤྱི་རྒྱུད། དྲག་པོ་སྔགས་རྒོད་དེ་ཁོ་ན་ཉིད་ཕྱིར་བཟློག་པའི་སྔགས་རྒྱུད། ཐོད་པ་ནག་པོ་ཞེས་བྱ་བ་སྤུ་གྲི་གཅོད་པའི་རྒྱུད། འཁྲུལ་འཁོར་རྒྱ་སྡེབས་ཀྱི་རྒྱུད། འཇམ་དཔལ་དངོས་གྲུབ་སྣ་ཚོགས་འབྱུང་བ་རླུང་ལས་བྱེད་འཁོར་ལོའི་རྒྱུད། འབྱུང་བ་རླུང་ནག་འཁྲུགས་པའི་རྒྱུད། རླུང་ནག་འཁྲུགས་པའི་བསྐལ་པ་དུམ་བུར་ཕྱུར་བའི་རྒྱུད། དྲགས་སྔགས་འདུས་པའི་འཁོར་ལོ་དྲག་སྔགས་གཅོད་པའི་རྒྱུད། རྣམ་གསུམ་དྲག་པོ་གཤིན་རྗེ་དྲག་སྔགས་གཅོད་པའི་རྒྱུད། གཤིན་རྗེ་ཡིད་བཞིན་ནོར་བུའི་རྒྱུད། (༡༡བ)
དེའི་རྒྱུད་ཕྱི་མ། འཁྲུལ་འཁོར་ནག་པོའི་སྔགས་རྒྱུད་ཕྱི་མའི་ཕྱི་མ་དང་བཅས་པ། གནོད་སྦྱིན་ཟླ་གསང་དམར་པོའི་རྒྱུད། སྒྲོལ་གིང་མ་རུ་ཙེ་བཤན་པ་སྤུ་གྲི་རེག་ཆོད་གནམ་ལྕགས་ཐོག་གི་སྟ་རེ་བསེ་མདུང་དམར་པོའི་དྲག་སྔགས་དུག་མདའ་ནག་པོ་དམོད་པའི་མཚོན་ཆ་འཕྲིན་ལས་ཀྱི་མདོ། གནོད་སྦྱིན་དམར་པོ་མ་ར་ཁྲག་སྐྱུག་གི་རྒྱུད། གནོད་སྦྱིན་གིང་དམར་པོ་སྒྲོལ་བ་སྲིན་པོའི་རྒྱུད། རྡོ་རྗེ་སྲིན་པོ་བསེའི་སྐྱེས་བུ་རྩ་བའི་རྒྱུད། གཤིན་རྗེ་དམར་པོ་བཤན་པ་སྲོག་གི་འཁོར་ལོའི་རྒྱུད། ཟ་བྱེད་བཤན་པའི་འཁོར་ལོ་གནོད་སྦྱིན་དྲ་བ་ནག་པོའི་རྒྱུད་ཕྱི་མ། གཤིན་རྗེ་ནག་པོ་མ་ར་ཁྲག་སྐྱུག་གསང་རྒྱུད་སྤུ་གྲི་རེག་ཆོད། འཇམ་དཔལ་དམར་པོའི་སྔགས་རྒྱུད། གཤིན་རྗེ་དམར་པོ་བཤན་པ་ལའི་སྤུ་གྲི་རེག་ཆོད་རུ་མཚོན་དམར་པོའི་རྒྱུད། མ་རུ་ཙེ་གསུང་གི་རྒྱུད། འཇམ་དཔལ་མཆེད་བཞིའི་རྒྱུད་ཕྱི་མའི་ཕྱི་མ་དང་བཅས་པ། ཟོར་བ་དམར་ནག་གི་རྒྱུད། མ་རུ་ཙེའི་སྔགས་རྒྱུད། མ་རུ་ཙེའི་ཐུགས་རྒྱུད། དཔའ་བོ་གར་མཁན་མཆོག་གི་རྒྱུད། འདི་རྣམས་ནས་རེ་གཉིས་མ་གཏོགས་ལྷུན་གྲུབ་ཕོ་བྲང་གི་རྙིང་མ་རྒྱུད་འབུམ་ཤིན་ཏུ་འཛོམ་ཆེ་བ་དེར་བཞུགས་པ་ཤ་སྟག་ཡིན། གནུབས་ཀྱི་བཀའ་ཤོག་རྒྱ་བོ་ཆེ་དང་རྒྱལ་སྲས་རྡོ་རྗེ་ཐུགས་མཆོག་རྩལ་གྱི་མཛད་པའི་ཆོས་འབྱུང་པཎ་ཆེན་སྐུ་མཆེད་ཀྱི་གསན་ཡིག་སོགས་སུ་གཤིན་རྗེ་དང་དྲག་སྔགས་ཀྱི་རྒྱུད་ཚོར་ཡང་སྙིང་གཟེར་ནག་པོ་ཟེར་བ་མ་རྙེད། དགའ་རབ་རྡོ་རྗེའི་ཡི་གེའི་ཁུངས་མེད་པའི་སྤོམ་ཡོར་འདི་འདྲ་གཞན་ལ་རྫུན་ཁག་བཀལ་བའི་ཟག་ཟོག་གི་གསུང་རབ་རིབ་ཅན་དུ་དོགས། ལྕགས་སྡིག་གི་སྒྲུབ་ཐབས་སྙིང་གཟེར་ནག་པོ་ལ་བསྙེག་ན། ཐོག་མར་ནུས་ལྡན་བརྩོན་པ་ཡིས༔ ས་ཆོག་དུས་བཟང་ལེགས་ལྡན་ལ༔ རྡུལ་(༡༢ན)
མེད་སྲོག་ཆགས་སྤངས་བྱས་ལ༔ ལྷོ་ཡི་ཕྱོགས་ནས་ས་བསླངས་ལ༔ དཀྱིལ་འཁོར་མདའ་གང་གྲུ་བཞི་པ༔ ཚད་དང་ལྡན་པ་རབ་ཏུ་བཞེངས༔ གཏོར་མ་མཆོད་པ་རྒྱས་པར་བཤམས༔ རྒྱལ་པོ་བཞི་ལ་བཀའ་ཡང་བསྒོ༔ ཁྲོ་བོ་བཅུ་ཡིས་མཚམས་ཀྱང་བཅད༔ དམ་སྲི་འདུལ་ཞིང་སྒོ་བྱང་གདགས༔ མ་ཏྲཾ་རུ་དྲ་བསྒྲལ་ལས་བྱ༔ དེ་ནས་ཐིག་སྐུད་ལྔ་ལྡན་ལ༔ ཞེས་བྱུང་བ་གནུབས་ཡེ་ཤེས་རྒྱ་མཚོས་མཛད་པའི་དཀྱིལ་ཆོག་ཏུ་སའི་ཆོ་གར། བརྟག་པ། བསླང་བ། སྦྱང་བ། བྱིན་གྱིས་བརླབས་པ། བསྲུང་བ་སྟེ་ལྔར་དབྱེ། སྟ་གོན་གྱི་སྐབས། ལྷ། བུམ་པ། སློབ་མ་གསུམ་དུ་དབྱེ་བའི་རྣམ་གཞག་མཛད། སེ་སྟོན་ཆེན་པོས་ངེས་དོན་བདེ་འཇུག་ཏུ་ཡོ་བྱད་བཤམ་ཞིང་གཏོར་མ་བཏང་བ། ཐིག་ཚོན་རབ་ཏུ་གནས་ཤིང་ཆག་ཆག་གདབ་པ། དཀྱིལ་འཁོར་བྲི་ཞིང་རྫས་དགོད་པ་སྟེ་སྔོན་འགྲོ་གསུམ་དུ་བསྡུས་ནས་འཇུག་པ་བདེ་བར་མཛད། སྒྲུབ་ཆེན་ཧ་ཅང་གི་སྤྲོས་པར་འདོད་ན་བཀའ་མའི་འདུས་པ་མདོ་དང་སྒྱུ་འཕྲུལ་གཏེར་མའི་བདེ་འདུས་གསང་རྫོགས་ལྟ་བུ་ནས་ཟུར་བརྒྱན་དུ་རུང་ནའང་དབང་ཆོག་འདིར་གཏེར་མ་བམ་ཆེན་གསང་བ་དང་མུ་ཏིག་འཕྲེང་བ། རྟ་ནག་སྒྲོལ་མ་དང་སེ་སྟོན་སོགས་ཕྱོགས་འདི་ལ་ཚད་མར་གྱུར་པའི་བླ་མ་རྣམས་ཀྱི་ཡིག་ཆ་གང་དང་ཡང་མི་མཐུན་པའི་རྒྱུ་མཚན་དཀར་གཏོར་སའི་ལྷ་མོས་གཙོས་པའི་གཞི་བདག་རྣམས་ལ་བསྔོ་ཞིང་དམར་གཏོར་ནག་ཕྱོགས་ཀྱི་འབྱུང་པོ་ལ་བྱིན་ནས་བགེགས་སྐྲོད་དགོས་རྒྱུར། སའི་ལྷ་མོ་མི་སྣང་བའི་ཁྲོད་དུ་མ་བཅུག་པར་མི་སྣང་བར་ས་བསླང་བའི་ཆོ་ག་ལོགས་སུ་བྱས། དེའི་འོག་ཏུ་ས་སྦྱང་བའི་ནང་ཚན་གྱི་ལྟོ་འཕྱེ་བརྟག་ཐབས་བྲིས། དེ་ནས་སའི་ལྷ་མོའི་ཆོ་ག་བཀོད་པ་གསང་སྔགས་གསར་རྙིང་ཐམས་(༡༢བ)
ཅད་དང་འགལ་བའི་དྭགས་བརྒྱུད་རྒན་པོའི་རྣམ་ཐར་ཟངས་ཐལ་དུ་སོང་། སྒྲུབ་ཐབས་སྙིང་གཟེར་ནག་པོའི་རྗེས་སུ་འབྲངས་ན་རྒྱལ་ཆེན་མཐོ་འཛུགས་ཀྱི་རྗེས་སུ་ཁྲོ་བཅུའི་སྐབས་ཕུར་གདབ་བྱ་རིགས། གནུབས་ཡེ་ཤེས་རྒྱ་མཚོའི་དབང་ཆོག་ལྟར་ན་ས་གཟུང་བ་དང་འབྲེལ་བར་བགེགས་བསྐྲད་ཅིང་སྲས་མཆོག་ཡ་མ་ར་ཙའི་ཕུར་པ་གདབ་པར་གསུངས། བཀའ་བརྒྱད་ཚོར་ས་གཟུང་བའི་མཇུག་ཏུ་ཕུར་པ་གདབ་པའི་རྣམ་གཞག་ཡོད་པས་དེ་དག་གང་དང་ཡང་ཡེ་མི་འདྲ་བའི་ས་ལྷའི་རྗེས་དེ་མ་ཐག་ཕུར་པ་འདེབས་པ་འཁྲུལ། ཕུར་པ་ཡང་པདྨ་ཀྲོ་ཏ་སོགས་རྟ་མགྲིན་གྱི་ཕུར་པ་བཏབ་འདུག་པ་གསེར་གར་བླུག་ལས་གྲུབ་པའི་དངུལ་སྐུ་མཐོང་བ་དོན་ལྡན་ཞིག་བཞེངས་སྣང་བ་བཀའ་བརྒྱུད་གོང་མའི་གདན་ས་ཆེ་བ་ཞིག་ཏུ་སྐྱེལ་བ་ཞུ། སྒྲུབ་ཐབས་སྙིང་གཟེར་ནག་པོར་མ་ཏྲཾ་གི་རྗེས་སུ་ཆག་ཆག་འདེབས་པར་གསུངས་པ་བཀའ་བརྒྱད་སོགས་དང་མཐུན་པར་འདིར་རྒྱལ་མཐོའི་སྔོན་དུ་ཆག་ཆག་གདབ་པ་གཞུང་དང་མ་འབྲེལ་ཆག་ཆག་གི་རྗེས་སུ་ཐིག་གདབ་དགོས་རྒྱུར་ས་གཟུང་བའི་སྟང་སྟབས་ཀྱི་གར་འཆམ་བཤད་པ་གསང་སྔགས་གསར་རྙིང་གི་ཕྱག་ལེན་བྱིངས་དང་ནི་མི་མཐུན། བཀའ་བརྒྱད་ཁྲག་འཐུང་གི་འཆམ་ལྟ་བུའི་རྒྱས་འགེབས་ན་མ་གཏོགས་ཚེ་བདག་ལ་འཆམ་ཡིག་དང་དེའི་རྒྱུན་ཟུར་པ་ཡོད་འཕྲོས་མི་འདུག་པས་ལས་བཞིའི་སྟང་སྟབས་ཙམ་མ་གཏོགས་རྩ་འཆམ་གྱི་ངལ་བ་ཆེད་གཉེར་མི་དགོས་པ་འདྲ་དགོས་ཀྱང་། བར་དུ་གང་བཤད་འཆམ་གྱིས་བསྒྲུབ། །གལ་ཏེ་མ་གྲུབ་འདི་ཡིས་བྱ། །རྡོ་རྗེ་རྒྱལ་པོ་དབུས་སུ་འདུག །རྒྱས་ཐེབས་བཞི་ནི་སྒོར་འཁོད་ལ། །ཞེས་པའི་ཞེ་འདོད་ལ་དཔགས་ན་འཆམ་མ་འགྲུབ་ཚེ། དེའི་ཚབ་ལ་རྡོ་རྗེ་སློབ་དཔོན་གཙོ་བོའི་ང་རྒྱལ་གྱི་དབུས་སུ་འདུག་(༡༣ན)
པར་སློབ་མ་རྣམས་ཕྱོགས་སུ་འཁོད་ནས་འཁོར་གྱི་རྣམ་པས་མཆོད་པ་འབུལ་ཞིང་གསོལ་བ་གདབ་པས་གོ་གཅོད་རྒྱུའི་ལུགས་དེ་ནི་ནམ་ཡང་མ་ཡིན་ཏེ་འཆམ་བྱེད་ཀྱང་དེའི་སྔོན་དུ་གསོལ་གདབ་ངེས་པར་འགྲོ་དགོས་པས་བླ་འཚོང་འདི་འདྲའི་ཅ་པོ་ཡོད་ན་ལྷ་ས་དང་རྩེས་དང་གི་ཚོང་འདུས་ཚོར་ཕེབས་པ་ཞུ། དེང་སང་ཡིག་ཆ་དང་ཕྱག་ལེན་ཕལ་ཆེར་ལས་ཆོག་མཛད་པ་ཤས་ཆེ་མོད་ལྕགས་སྡིག་གི་དབང་ཆོག་མུ་ཏིག་འཕྲེང་བར་སྣང་སྲིད་ཐམས་ཅད་ཀྱི་བདག་པོ་ཡིན་ཞིང་གཞན་ཐམས་ཅད་ཟིལ་གྱིས་གནོན་པའི་ཕྱིར་སའི་ཆོ་ག་བྱ་མི་དགོས་ཏེ། ཇི་ལྟར་རུང་བ་ལྟར་སྤྱད་པར་བྱའོ། །ཞེས་བཤད་པས་མཐའ་གཅིག་ཏུ་མ་བྱས་ཀྱང་སྐྱོན་དུ་མི་འགྱུར་བའི་ཕྱིར་ས་གཟུང་བའི་གར་འཆམ་སོགས་སྤྲོས་བཅས་དོན་དུ་གཉེར་བར་ཟད་ལ། ཡང་ན་མུ་ཏིག་འཕྲེང་བ་ཁུང་མ་མིན་པའི་སྒྲུབ་བྱེད་དམ་དགོངས་པ་འགྲེལ་ལུགས་གང་རུང་དགོས་པས་གཤིན་རྗེ་མཁན་པོ་ཡོད་ན་ལྗགས་རྐྱོང་བར་རིགས་སོ། །ཕུར་པའི་རྩ་འཆམ་གྱི་བམ་རྡེའུས་བརྟག་པ་ལ་གཞོགས་དྲུད། དེ་ལ་འཇམ་དཔལ་ཚེ་བདག་གི་ཐུན་མོང་མ་ཡིན་པའི་ཁྱད་ཆོས་གནུབས་ཆེན་གྱིས། སློབ་དཔོན་བལ་པོའི་རྒྱལ་པོ་ཡིས༔ ཡང་ལེ་ཤོད་ཀྱི་བྲག་ཕུག་ཏུ༔ གནུབས་ཀྱི་བན་ཆུང་འདིར་ཤོག་གསུངས༔ བམ་ཆེན་རོ་ཡི་དབང་བསྐུར་ནས༔ ལྷ་རུ་འཇམ་དཔལ་ཚེ་བདག་གཏད༔ ཅེས་གསུངས་པའི་བམ་ཆེན་གསང་བའི་དབང་གི་བམ་སྒྲུབ་གཉིས་ནོར་བའི། འགྲོས་བདུན་སྟང་སྟབས་བརྒྱད་དུ་གྲགས། །ཚུལ་དེ་ཕྱིན་ནས་ལེན་རྒྱུའི་རོ། །ཞེས་དབང་རྟེན་གྱི་བམ་རོར་ངོས་བཟུང་བ་ནི་ཉ་དང་ཉུང་མ་བསྲེ་བའི་གཏམ་ཁོ་ནར་མངོན། འདིར་ཕུར་པའི་འཆམ་ཕྲོགས་ནས་ཚེ་(༡༣བ)
བདག་གིས་བདག་གིར་མཛད་པ་བདེ་ཆེན་ཆོས་འཁོར་བས་རྐུན་མ་བརྒྱབ་ནས་མགོན་མང་ལ་ཤོར། ད་ནི་རྟོགས་ལྡན་རང་གྲོལ་རྣམས་ཀྱིས་ཕྱག་རྒྱ་ཆེན་པོའི་སྔོན་འགྲོར་རྩ་འཆམ་ཚར་རེ་རྒྱག་ཤས་ཁ་བ་རི་མཐོན་པོའི་བུ་ཆུང་ཐང་ལ་འཁྱམས་པའི་རྣམ་ཐར་ངོ་མཚར་ཅན་ནོ། །དམ་སྲིའི་སྐབས་མི་རྟ་ཁྱི་གསུམ་གྱི་མགོ་བོ་ཡོད་པ་དམིགས་ཀྱིས་བསལ་བ། དམ་སྲི་ལ་མཐའ་གཅིག་ཏུ་མ་ངེས་པས་མཚན་ལྟས་དང་བསྟུན་དགོས་པ་ཡིན། དམ་སྲི་དབུ་གསུམ་པ་འདི་ཞལ་གཟིགས་ཤིག་ཡིན་འདྲ་བ་མགོན་མང་དུ་དམ་སྲིའི་ མགོན་པོ་ཞིག་ཀྱང་ཞལ་འདེབས་སུ་ཡོང་བར་མཆིས། གསང་སྔགས་སྤྱི་ལ་ནི་ལིངྒ་བསྐྱེད་བསྟིམ་ཟིན་ནས་བྱང 
་ཐག་གིས་འཆིང་བ་ཡིན་པར་དེ་ལས་གོ་ལྡོག་པའང་ཁྱད་ཆོས་སུ་འདུག །ཡ་ཐེམ་ཤིང་བྱང་གི་གཤིན་རྗེ་མ་ཧེའི་གདོང་ཅན་དུ་མཛད་པ་སྤྱིར་ལས་ཀྱི་གཤིན་རྗེར་སྐུའི་རྣམ་འགྱུར་ལ་མཐའ་གཅིག་ཏུ་མ་ངེས་ཀྱང་སྔགས་རྙིང་མ་ཕྱོགས་ལ་སྲིན་ཞལ་ལས་མ་ཧེའི་ཞལ་གྱི་གསལ་ཁ་ཉུང་བ་ཁ་ཐུན་སོགས་གཞུང་ཁུང་མ་ཚོར་གཟིགས་འཚལ། གསར་མ་ལའང་རྭ་པོད་སོགས་སུ་མ་ཧེ་དང་སྲིན་ཞལ་འདམ་ཀ་མང་ཡང་དེང་སང་ས་དགེ་གཉིས་ལ་མ་ཧེའི་གདོང་ཅན་གྱི་གཏོར་ཆོག་གྲགས་ཆེ་བ་ལས། གཤིན་རྗེ་ཡིན་ན་མ་ཧེའི་གདོང་ཅན་ལས་འོས་མེད་དགོངས་པའི་གཞན་ཟེར་ཚིག་གི་འཁར་བ་ཙམ་ལ་བརྟེན་པ་རང་སྐྱ་མི་ཕེར་བ་ཀུན་གྱི་སྲོལ་ཡིན་པས་ཐུགས་དག །ནག་པོ་གསུམ་སྒྲིལ་གྱི་ལས་གཤིན་མ་ཧེའི་ཞལ་ཅན་སྣང་བ་ཤོག་སེར་ངོས་མ་མཐོང་བས་ཁྱེད་ཀྱི་མཆེད་ཟླ་ཡིན་མིན་གྱི་རྒྱུ་མཚན་འབུལ་ཚོད་མ་ཟིན། མ་ཏྲཾ་བསྒྲལ་བ་འདི་ལ་དོན་དམ་པ་བདག་འཛིན་གྱི་མ་ཏྲཾ་བསྒྲལ་བ་དང་ཀུན་རྫོབ་གདོན་བགེགས་ཀྱི་མ་ཏྲཾ་བསྒྲལ་བ་སོགས། (༡༤ན)
སོ་སོར་དབྱེ་བའི་རྣམ་གྲངས་ཡོད་ཀྱང་འདིར་ནི་མཉམ་པ་ཉིད་ཀྱི་ཏིང་ངེ་འཛིན་ལ་གནས་པར་གདའ། དཀྱིལ་འཁོར་རྒྱན་དགོད་ཀྱི་སྐབས་སྒྲུབ་ཆེན་ལ་སྒྲུབ་ཁྲིད་དང་ལྡིང་ཁྲི་བྱས་ན་ནི་དཀྱིལ་འཁོར་གྱི་སྟེང་དུ་ཡོང་བ་སྨོས་མ་དགོས་འཇུག་པ་བདེ་སྐབས་ཀྱང་དཀྱིལ་འཁོར་གྱི་དབུས་སུ་བུམ་པ། བམ་དབུས་སཾ་ལྷོ་གང་རིགས། ཚེ་ཟན་ནུབ། གསང་རྫས་བྱང་དུ་འགོད་དགོས་པར་འདིར་བུམ་པ་ཤར། ཚེ་ཟན་ལྷོ། གསང་རྫས་ནུབ། བམ་བྱང་དུ་བཀོད་པ་སོགས་སྔ་འགྱུར་ཁུངས་ཐུབ་རྣམས་དང་རྒྱབ་འགལ་དུ་སོང་བའི་འཁྲུལ་པའི་རང་བཞིན་དུ་སྣང་རུང་ཁྲོ་ཕུ་བའི་དགེ་བཤེས་ཆེ་ཆེ་མོ་གཅིག་གིས་ཁྱེད་དཔོན་སློབ་ཚོས་ཚེ་བདག་བཙུགས་ཡོད་འདུག་པ་རྙིང་ལུགས་ཡིན་ནམ་འབྲུག་ལུགས་ཡིན་ཞེས་དཔོན་ཚང་བྱང་ངོས་པར་དྲི་ལུགས་ལ་དཔགས་ན་འབྲུག་པ་ཞིག་གིས་རྒྱ་བལ་དུ་ཕྱིན་ཏེ་པཎ་གྲུབ་ལ་གཏུགས་ཚེ་བདག་གསར་དུ་བསྒྱུར་ནས་བླངས་པ་ལས་འོས་ཀྱང་མ་བྱུང་ཡིག་ཆ་འདི་ཚོའི་བབས་དང་བསྟུན་ན་པད་ལུགས་དང་གནུབས་ལུགས་ལ་ལྟོས་མི་དགོས་པའི་གདེང་ཡོད་པར་ངེས་པ་རྙེད། བཟློག་བསད་མ་ཏྲཾ་གཟུགས་སུ་བྱ་ཞེས་བསྒྲལ་དབང་གི་ལིངྒ་མ་ཏྲཾ་གི་གཟུགས་སུ་བྱས་ན་དགྲ་བོ་དེ་དབུ་གསུམ་ཕྱག་དྲུག་ཞབས་བཞི་ཅན་ཤིན་ཏུ་འཇིགས་པ་ཡོང་འདུག་པས་པ་རྣམ་ལྷུན་གྲུབ་རྩེ་ནས་རིན་སྤུངས་པས་དྲག་འབུད་བཏང་པའི་སྐབས་ཞབས་དྲུང་ངག་དབང་འཇིགས་གྲགས་དེ་རུ་དྲ་ཐར་པ་ནག་པོ་ལྟ་བུར་གཟིགས་ནས་བྱ་ཡུལ་དུ་བྲོས་ཕེབས་པ་འདྲ། བམ་ལ་ལུས་ཀྱི་ཆ་རྣམས་སུ་དཀྱིལ་འཁོར་བསྒོམ་པའི་ཟབ་གནད་གང་ཡང་མེད་པར། གསེར་གཡུ་དར་རྒྱན་སྙིང་ཐག་ནི། །ཞེས་རིན་ཆེན་རྒྱན་སྤྲོད་མཛད་པ་ནི་སྣེའུ་གདོང་རྩེ་དང་རྒྱལ་རྩེ་བ་གཉིས་དང་འབྲེལ་ཆེ་བའི་སྤྱན་ལྟོས་བྱུང་(༡༤བ)
བས་མི་ལ་སྤྲོད་པའི་ཚབ་རོ་ལ་སྤྲོད་པ་རྟོགས་ལྡན་ཚེ་བློས་བཏང་གི་རྣམ་ཐར་ཡིན་པ་འདྲ། སློབ་མ་ལྷག་གནས་ལ་བྱེད་ཀུན། བཾ་ལའང་བྱ་བ་ཤེས་པར་བྱ། །ཞེས་བཾ་ལ་ཀུ་ཤ་གཏད་ནས་རྨི་ལམ་སྒུག་བཅུག་པར་པ་རྣམ་གཡར་པོ་བདག་རེངས་རོང་པས་འཕྲོག་པའི་མཚན་མ་ཞིག་ཤར་ཡོད་དམ། དཀྱིལ་འཁོར་བཞི་དེ་རྡུལ་ཚོན་དང་། །ལུས་དང་བྷ་ཀ་བཾ་ཆེན་ནོ། །ཞེས་པའང་སྤྱི་བྱེ་བྲག་གཉིས་ཀ་དང་མ་མཐུན་ཏེ། རྡུལ་ཚོན། བྱང་སེམས། བྷ་ག །དོན་དམ་བྱང་ཆུབ་སེམས་ཀྱི་དཀྱིལ་འཁོར་བཞིའི་རྣམ་གཞག་འདིར་བྱེད་ཀྱང་བཾ་དེར་མི་འདྲེན། བྱེ་བྲག་འདི་ག་ཁྱད་ཆོས་ཆོས་རྒྱལ་བཀྲ་ཤིས་སྟོབས་རྒྱལ་གྱིས། བདེ་ཆེན་ཡེ་ཤེས་སྐུ་དང་མཆོག་གི་བམ། །མཚན་ལྡན་གཟུང་མ་ལུས་ཀྱི་དཀྱིལ་འཁོར་དུ། །རབ་འབྱམས་བགྲོད་པ་རྣམ་གསུམ་ལ་བརྟེན་ནས། །ཞེས་དཀྱིལ་འཁོར་གསུམ་དུ་བསྡུ་བ་ནི་རྒྱུད་དང་པད་གནུབས་ཀྱི་དགོངས་པ་ཡིན་ནོ། །ཚེ་རྫས་ཚེ་བདག་དམར་པོར་བསྒོམ་པར་གསུངས་པའང་ཚེ་དཔག་མེད་ལ་དམར་པོ་ལས་འོས་མེད་སྙམ་པའི་འབའ་ར་ལུགས་ཀྱི་ལྷ་གཅིག་བུམ་གཅིག་ལ་ཐུགས་ཧ་ཅང་ཞན་དྲགས་པར་སྣང་། གནུབས་ཡེ་ཤེས་རྒྱ་མཚོས་མཛད་པའི་དབང་ཆོག་ཏུ་ལྷ་ཚོགས་ཐམས་ཅད་སྐུ་མདོག་གངས་ལ་ཉི་མ་ཤར་བ་འདྲ་བ་ཞེས་ཡོད་པས་གཉའ་ནང་གྲོད་ཕུག་གི་རྒྱས་མི་ལ་རས་པ་རང་ཆེ་བ་ལས་འོས་ཅི་ཡོད། དབང་དངོས་གཞིའི་སྐབས། རིན་འབྱུང་བུམ་པའི་དབང་། འོད་དཔག་མེད་ཅོད་པན་གྱི་དབང་། མི་བསྐྱོད་པ་རྡོ་རྗེའི་དབང་བསྐུར་བའི་རྣམ་གཞག་འདུག་པ། རྣམ་སྣང་དང་མི་བསྐྱོད་པ་གཉིས་གོ་ས་འཕོ་བ་སྔ་འགྱུར་ལ་ཤིན་ཏུ་མང་ཞིང་གསར་མ་ཁུངས་ཐུབ་ལའང་ཡེ་ཤེས་གོ་ས་འཕོ་བ་ཡོད། གཞན་འདི་(༡༥ན)
འདྲའི་དཀྲུག་ལུགས་བྱས་པ་ནི་མ་མཐོང་། གཏེར་མའི་དབང་ཕལ་ཆེ་བར་རིག་པའི་དབང་ལྔའི་ལྷ་བསྒོམ་པ་སོགས་དོན་གྱིས་ཐོན་པ་ལས་ཚིག་གསལ་བ་མེད་པ་མང་། རྙིང་མ་བཀའ་མའི་རྒྱུད་དང་དཀྱིལ་ཆོག་ཚོར་ཚིག་སྣ་རིང་བ་གསར་མ་དང་ཆ་འདྲ་ཙམ་ཡོང་བ་བླ་མ་དམ་པའི་ཕུར་པའི་དཀྱིལ་ཆོག་ལྟ་བུ་ཡིན། མངའ་རིས་པཎ་ཆེན་ཀྱང་བཞེད་པ་བཀའ་མ་ལ་ཆེ་འོན་ཀྱང་ས་ལོ་འཇམ་དཔལ་རྡོ་རྗེའི་ཕུར་པ་ལ་དཀྱེ་རྡོར་འདོན་པ་བསྒྱུར་བ་དེ་འདྲ་ནི་མིན་པས་ཕོ་རོག་མ་ནག་ཅིང་སྐྱ་ཀ་མ་ཁྲས་པ་ཞིག་དགོས་པ་ལགས། ལྕགས་འདྲའི་བཾ་ཆེན་གསང་བའི་དབང་ཆོག་ཏུ། བུམ་པ་འདི་ཡི་དབང་བསྐུར་བས། །ཉོན་མོངས་ཞེ་སྡང་རྣམ་དག་ནས། །མེ་ལོང་ཡེ་ཤེས་རྟོགས་པར་ཤོག །ཅེས་དང་། དབུ་རྒྱན་འདི་ཡི་དབང་བསྐུར་བས། །ཉོན་མོངས་ང་རྒྱལ་རྣམ་དག་ནས། །ཞེས་སོགས་དང་། གནུབས་ཡེ་ཤེས་རྒྱ་མཚོའི་དབང་ཆོག་ཏུ་རྣམ་སྣང་དང་མི་བསྐྱོད་པ་བརྗེས་པ་མ་གཏོགས་གསང་སྔགས་སྤྱི་ཁྱབ་དང་མཚུངས། རྟ་ནག་སྒྲོལ་མ་བ་དང་སེ་སྟོན་ཆེན་པོའི་དབང་ཆོག་སོགས་ཀྱང་ཚིག་སྣ་མ་སྤྲོས་པ་མ་གཏོགས་དགོངས་པ་གཅིག་པས་ཉོན་མོངས་པའི་སྦྱང་གཞི་སྦྱོང་བྱེད་སྦྱངས་འབྲས་རྣམས་བསྲེ་ལུགས་དེ་འདྲ་མཛད་ན་འབྲི་གུང་དཔལ་འཛིན་གྱིས། ཀྱེ་མ་བླུན་པོ་སྙིང་ཁམས་ཅན། །ཐུབ་པའི་བསྟན་པ་འདི་འདྲར་དཀྲུག །ཅེས་པའི་མཆེད་ཟླ་བྱུང་གི་དོགས་སོ། །གསུང་དབང་གི་སྐབས། རྣམ་རྟོག་གདོད་ནས་ཆོས་སྐུ་ཡི། །སྣང་སྲིད་མ་བཅོས་ཕྱག་རྒྱ་བཞི། །ཞེས་དྭགས་བརྒྱུད་པ་རྣམས་ཀྱི་ཆོས་སྐད། རྣམ་རྟོག་ཆོས་སྐུ་དེ་ཕེབས་འདུག་ཀྱང་དེ་འདྲ་ལ་ལྟོས་མི་དགོས་པའི་སློབ་དཔོན་ཆེན་པོ་པདྨས་སྟག་ཚང་བཀྲ་ཤིས་དཔལ་ཕུག་ཏུ་རྒྱས་བཏབ་པའི་འཇམ་(༡༥བ)
དཔལ་རྫོགས་པ་ཆེན་པོ་སྤྲུལ་སྐུ་གསར་བན་ཕྱོགས་མེད་ཀྱིས་སྤྱན་དྲངས་པའི་མན་ངག་དང་ལྕགས་སྡིག་གི་སྟོང་དྲིལ་ཉི་མ་ཤར་བའི་གདམས་པ་ལ་བརྟེན་ནས་ཐེག་པའི་རྩེ་རྒྱལ་ཨ་ཏི་ཡོ་གས་གྲོལ་ལམ་ཉམས་སུ་ལེན་པ་ལ་རྟ་ལས་བབས་ནས་བོང་བུ་ཞོན་པ་ནི་ནམ་ཡང་མི་འདོད་པ་ལགས། དུར་ཁྲོད་ཆས་སོགས་མཐའ་རྟེན་གྱི་དབང་རྣམས་བུམ་དབང་གི་མཐར་མཛད་པ་ཤས་ཆེ་ཞིང་ཡང་དབང་བཞི་རྫོགས་པའི་མཇུག་ཏུ་མཛད་པའང་ཡོད། འདིར་གསང་དབང་གི་མཐའ་རྟེན་དུ་བྱུང་བའང་འབྲེལ་མ་ཆགས། བམ་དབང་དངོས་བསྐུར་བའི་དུས་རྟེན་བརྟེན་པར་བསྒྲུབས་ཟིན་པའི་དྭངས་མས་བྱིན་གྱིས་བརླབ་རྒྱུ་ལ། དྲག་པོས་བསྒྲལ་ཕྱིར་རལ་གྲི་གཏད། །གཤེད་ཆེན་མཐུ་སྟོབས་ཡོངས་རྫོགས་ལས། །ཞེས་སོགས་ཀྱིས་གཏུབས་པ་ནི་ལིངྒ་སྒྲོལ་བའི་ཉམས་ལྟ་བུ་ཤར་བས་ཆོས་འདིའི་དགོངས་པར་ནི་སྤུ་ཙམ་མ་སོང་རྟོགས་ལྡན་འཁྱམས་པོ་རོ་བཤའ་བའི་རྣམ་ཐར་ནི་ཡིན་ཤས་ཆེ། བམ་དབང་དངོས་བསྐུར་ཟིན་པའི་འོག་ཏུ་གསང་རྫས་དང་བསྲེ་བའི་ལག་ལེན་དང་དབང་དངོས་གཞི་ནོར་ཚོད་དུ་འདུག་པ་སྔགས་འཆང་ཚེ་བདག་བཀྲ་ཤིས་ཀྱིས་ལན་དེ་འཁྱོར་བོ་ཞིག་མ་བྱུང་སྣང་བས་དེ་རིགས་ལས་དུང་དཀར་རས་པས་ལུང་གིས་དབང་གི་གོ་གཅོད་པ་དོགས་ཅི་ལས་བདེ་བ་ཡོང་མཆིས་དྲག་པོ་མཐུ་དབང་རྡོ་རྗེ་ལས་རིམ་ནས་བཤད་ཀྱང་བསྒྲལ་དབང་སྒེར་དུ་མི་མཛད་པ་གོང་དུ་སྦྱོར་སྒྲོལ་གྱི་དབང་གི་དོད་སོང་ཟིན་པ་ལ་དགོངས། ཐུན་མོང་མ་ཡིན་པའི་ཁྱད་ཆོས་ཡོངས་རྫོགས་མཆོད་རྟེན་གྱི་དབང་ནི་སྙན་གྱི་བུ་གར་མ་ལྷོན་འདུག་པ་མེད་པ་ལ་ཁྱེར་ཤོག་གི་དཔེར་སོང་བས་རྩོད་པ་ཞུ་ཅི་འཚལ། ཆོས་རྒྱལ་བཀྲ་ཤིས་སྟོབས་རྒྱལ་མཉམ་(༡༦ན)
མེད་ནུབ་དགོན་པ་དང་རིགས་འཛིན་མངའ་རིས་པ་ཆེན་པོ་ཡོངས་འཛིན་དུ་བསྟེན་ནས་ཕྱོགས་འདི་ལ་མཁས་ཤིང་གྲུབ་བརྙེས་ཀྱི་རྩེར་སོན་པས་སོམ་ཉིར་གྱུར་ནས་དྲི་བ་ག་ལ་ཡིན་ཡང་ཚོད་བགམ་པའི་དྲི་བ་ཕུལ་བའི་ལན་འདེབས་སུ་བཀའ་འབྱེད་ཀྱི་ཨྱོན་པདྨས་མཛད་པ་ལ་ཞེས་པའི་ལུང་དྲངས་པའི་མཇུག་ཏུ། ཞེས་པ་སངས་རྒྱས་ཡེ་ཤེས་ཉིད་གསུང་ལགས། །དེ་བས་དང་པོ་པད་ལུགས་ཕྱི་མ་ལ། །གནུབས་ལུགས་ཞེས་སུ་དྲག་སྔགས་མཁས་པས་བསྒྲགས། །པདྨས་མི་མཁྱེན་གནུབས་ཀྱིས་ཤེས་སྨྲ་མིན། །དང་པོར་ཟབ་སྦས་ཕྱི་མར་གསལ་བསྟན་ཕྱིར། །ལུགས་ཕྱི་ལྷག་པ་དངོས་སུ་འཐོན་མིན་ནམ། །ཞེས་གསུང་བ་ལ་དཔགས་ན་བཀའ་འབྱེད་ནས་བཤད་པའི་ཤིན་ཏུ་མི་ཟབ་པའི་ཐུན་མོང་བསྲུང་མཚམས་ཀྱི་ཆོས་ཙམ་ལས་པད་ལུགས་ཟུར་པ་མེད་པར་ཐག་ཅད་ཅིང་། གནུབས་ལུགས་ཀྱང་ལྕགས་སྡིག་ཁོ་ནར་ངོས་བཟུང་བ་བླ་ཆེན་ཚོའི་རྣམ་པར་ཐར་པ་འབའ་ཞིག་ལྷུར་བླངས་པའི་འཇམ་དཔལ་ཚེ་བདག་གི་སྐོར་གསན་ནོ་མཁྱེན་ནོ་ཞེས་པའི་མིང་ཙམ་ལ་གཙོ་བོར་གཟུང་བླུན་པོ་དད་པ་ཅན་རྣམས་ཀྱིས་ཐལ་མོ་སྦྱར་ནས་སྨིན་མ་ཟངས་ཟངས་བྱས་པར་རློམ་པ་ཁོ་ནའི་སྐྱོན་ཏེ། ཞེ་འདོད་གནུབས་ཀྱིས་ཨྱོན་ཆེན་པོ་ལ་ཤིན་ཏུ་ཟབ་པ་ཞིག་ཞུས་པ་ལ་ལྕགས་སྡིག་སྦས་ནས་མ་གནང་བར་མི་ཟབ་པའི་ལྕགས་འདྲ་གནང་བར་བརྟེན་དེས་ཐུགས་མ་ཁེངས་པར་བལ་ཡུལ་དུ་རྒྱལ་པོ་བྷ་སུ་དྷ་ར་ལ་ལྕགས་སྡིག་གསན་པར་འདོད་པ་ནི། གནུབས་ཆེན་གཤིན་རྗེའི་བཀའ་བབས་ཡིན་པས། ལྕགས་སྡིག་ཞུས་ན་མི་གནང་བ་ག་ལ་སྲིད་རུང་། ཉང་གི་གཏེར་མའི་རྣམ་ཐར་ཟངས་གླིང་མར། ད་ལྟ་རྒྱལ་ཁྲིམས་གཉན་པས་སྲོག་སེར་གཏད་མི་(༡༦བ)
དགོས། །དུས་ངན་བྱུང་ན་དགོས་པས་གཏེར་དུ་སྦ། །ཞེས་བྱུང་བ་ལྟར་དུས་སྐབས་བཟང་བས་རྗེ་འབངས་རྣམས་ཀྱི་མངོན་སྤྱོད་ལ་ཧ་ཅང་རྩལ་འདོན་མ་བྱུང་། གླང་དར་མས་བསྟན་པ་གནུབས་པའི་དུས་གནུབས་ཆེན་གྱིས་སླར་ཡང་བསྟན་པ་བསྲུང་བའི་ཆེད་དུ་ལྕགས་སྡིག་ཁྲོ་ཆུ་དུག་སྡོང་དུ་བརླུང་ཞོན་སྲོག་སེར་གཏད་སེལ་སྡེབས་གཤོར་རླུང་བསྐྲད་སོགས་མངོན་སྤྱོད་ཀྱི་མཐའ་རྒྱ་གཅོད་པར་སྐྱེ་བ་སྔོན་མའི་སྤུན་ཟླ་བལ་པོ་བྷ་སུ་དྷ་རའི་སར་བྱོན་པ་ཡིན་པས་ཡུས་པོ་ཆེ་མི་མཛད་པར་ཞུ། པད་ལུགས་གནུབས་ལུགས་དང་ལྕགས་སྡིག་ལྕགས་འདྲའི་དབྱེ་བ། བཀའ་འབྱེད་ལས། བདག་འདྲ་སངས་རྒྱས་ཡེ་ཤེས་ཀྱི༔ དྲག་སྔགས་ཚེ་བདག་ནག་པོ་ལ༔ ཡང་གཅེས་ཟབ་པའི་སྐོར་གསུམ་ལས༔ ཕྱི་སྐོར་ལྕགས་འདྲའི་སྐོར་དང་གཅིག༔ ནང་སྐོར་ཐོག་འདྲའི་སྐོར་དང་གཉིས༔ གནམ་ལྕགས་ཐོག་མེའི་སྐོར་དང་གསུམ༔ ཞེས་ལྕགས་འདྲ་ཤིན་ཏུ་ཟབ་པ་ཡོད་པའི་ཚིག་འདི་ཕྱག་ཤན་རྣོན་པོ་ཞིག་གིས་འབྲད་དགོས་པ་ཡོང་ཞིང་སྤྱིར་ལྕགས་འདྲ་ལ་ཡང་ཕྱི་ནང་གསང་གསུམ་དུ་ཡོད་པས་པད་ལུགས་ཤིན་ཏུ་ཟབ་པ་གནམ་ཐོག་ཆེན་པོའི་སྐོར་སློབ་དཔོན་པདྨས་མཛད་པའི་མན་ངག་རྩ་བ་སྒྲོལ་མ་དྲུག་གི་གསལ་བྱེད་ཕག་སྟོན་གྱིས་མཛད་པའི་རིན་ཆེན་འོད་འཕྲོ། དེའི་འགྲེལ་པ་བྲག་སྟག་པ་རྡོ་རྗེ་རིན་ཆེན་གྱིས་མཛད་པའི་སྒྲོལ་མ་དྲུག་པ། མཆོད་རྟེན་གསལ་བྱེད་སྒྲོན་མ་སེ་སྟོན་ཆེན་པོས་མཛད་པ། མན་ངག་རྩ་བའི་ལེ་ལག་ཏུ་གཏོགས་པའི་གཏེར་གཞུང་སྤྲུལ་སྐུ་རྒྱས་ཕུང་པོ་རི་བོ་ཆེ་སོགས་ནས་སྤྱན་དྲངས་པ་ཁ་ཡར་སྣང་། གཞལ་ཡས་ཁང་ལྷུན་གྲུབ། ལྷ་ལྐོག་བཞེངས། སྔགས་ཐུག་ཕྲད་སོགས་གནམ་ཐོག་ཆེན་པོའི་ལམ་གྱི་ཟབ་གནད་སློབ་དཔོན་བྷ་སུ་དྷ་རའི་སྤྱི་གཅོད་(༡༧ན)
འཕྲུལ་གྱི་ལྡེ་མིག་ཏུ་གསུངས་པ་དང་མན་ངག་རྩ་བའི་དགོངས་པ་ཤིན་ཏུ་མཐུན། གནུབས་ལུགས་ལའང་ལྕགས་སྡིག་བཀའ་འབྱེད་ནས་བཤད་པའི་ཐེམས་ཅན་དང་དེར་མི་གསལ་བའི་ཐེམས་མེད་ཐོར་བུ་ཡོད། ཟབ་པའི་ཆོས་དྲུག་གི་དཀར་ཆག་ནས་བཤད་པ་རྣམས་ལྕགས་སྡིག་མིན་པས་གནུབས་ལུགས་ཡིན་ཚད་ལྕགས་སྡིག་ཏུ་བྱས་ན། དཀར་ཆག་ལས། གནུབས་ཀྱི་བན་ཆུང་སངས་རྒྱས་ངས༔ ལོ་ནི་བརྒྱ་དང་སུམ་ཅུ་ལོན༔ ཉོན་མོངས་བོད་ཡུལ་དབུས་སུ་ལངས༔ འཚོ་བའི་ཟས་རྣམས་འབངས་ཀྱིས་ཕྲལ༔ རྒྱ་གར་ཡུལ་དུ་ལན་བདུན་ཕྱིན༔ དཀར་ཆག་གནུབས་ཡུལ་རོང་དུ་བཏབ༔ རྩལ་ཆེན་རྡོ་རྗེ་སྒྲོམ་བུར་རྫོགས༔ བླ་མ་བཅུ་གཅིག་ཞབས་ནས་བཏེག༔ འོན་ཀྱང་མཁས་པ་བཞི་ལ་གཏུགས༔ སློབ་དཔོན་དཔལ་གྱི་སེང་གེ་དང་༔ རྒྱ་གར་ཁྲག་འཐུང་ནག་པོ་དང་༔ འཕུང་བྱེད་ཤནྟིཾ་གརྦྷ་དང་༔ བལ་པོ་བྷ་སུ་དྷ་ར་བཞི༔ མཁས་པ་བཞི་ཡི་ཐུགས་བརྟོལ་ནས༔ ཟབ་པའི་ཆོས་དྲུག་ཐུགས་ལ་བཅང༔ གཞན་ཡང་གདམས་ངག་རྩིས་ལས་འདས༔ ཞེས་པའི་ནང་གི་ཚེ་བདག་གི་ཆོས་སྐོར་རྣམས་གནུབས་ལུགས་ལྕགས་འདྲ་གནམ་ཐོག་ཆེ་བའི་ལམ་སྲོལ་གྱི་ཆོས་སྐོར་དུ་ངོས་འཛིན་པ་ལས་འོས་མེད། ད་ལྟ་རྙིང་རློམ་ཧྲུལ་པོ་རྣམས་ཀྱི་བསམ་ངོར་ལྕགས་སྡིག་ཟབ་ཅིང་ལྕགས་འདྲ་མི་ཟབ་པར་གླེང་བའི་ཁ་སྐྱུགས་ཀྱི་རྗེས་ཟློས་མཛད་པ། ལྕགས་འདྲ་ཐམས་ཅད་དེ་ལ་ནང་གསེས་ཀྱི་གསུམ་དུ་ཕྱེ་བའི་ཕྱི་སྐོར་མི་ཟབ་པ་ཁོ་ནར་ངོས་བཟུང་བའི་སྐྱོན་ཡིན། ཕྱི་སྐོར་ལྕགས་འདྲ་ནི་བཀའ་འབྱེད་ནས་བཤད་པའི་ཤོག་ལེ་གསུམ་ལ་ཚང་བ་སོགས་ཀྱི་རིགས་རྣམས་ཡིན། པད་གནུབས་ཀྱི་ལྕགས་འདྲ་(༡༧བ)
ཟབ་པ་ནི་གསང་སྐོར་ལྕགས་འདྲ་གནམ་ཐོག་ཆེན་པོའི་ལུགས་ཡིན་པས་ལྕགས་སྡིག་དང་མཆོད་རྟེན་བཅས་ཆོག་ལ་འཁོར་ལོའི་མང་ཉུང་ཙམ་མ་གཏོགས་ལམ་གྱི་གནད་ལ་ཟབ་མི་ཟབ་ཀྱི་ཁྱད་པར་ཅི་ཡང་མེད་པས་ཕྱོགས་འདི་ལ་འཁྲུལ་པའི་དྲི་མ་བྲལ་བ་སེ་སྟོན་ཆེན་པོའི་གསུང་ལས། དེ་ལྟར་ཚེ་བདག་ཕྱག་རྒྱ་ཟིལ་གནོན་ལམ། །པདྨའི་མན་ངག་རྩ་བ་སོར་བཞག་ལ། །པད་ལུགས་ཞེས་གྲགས་གནུབས་ཀྱི་ཡང་མཛོད་འདི། །སྒྲུབ་ཁོག་སོར་བཞག་གནུབས་ལུགས་ཞེས་གྲགས་མོད། །ལམ་གྱི་གནད་ལ་ཁྱད་པར་ཅི་ཡང་མེད། །འོན་ཀྱང་འཕྲིན་ལས་བྱང་བུའི་བརྗེད་བྱང་ལ། ཁྱད་པར་ཅུང་ཟད་ཡོད་པ་ལེགས་ཕྱེ་ནས། །འདི་ནི་པདྨའི་ལུགས་ཉིད་གསལ་བར་བྱས། །ཞེས་གསུངས་ཤིང་དེ་ལ་ཡིད་བརྟན་དུ་བྱེད་པའི་རྒྱུ་མཚན་ཅི་ཡིན་ན་ཆེན་པོའི་སྟོང་འུར་གྲགས་སྐམ་གྱི་མཁས་གྲུབ་མ་ཡིན་པའི་ཕྱོགས་འདི་ལ་ཕུལ་དུ་ཕྱིན་པས། གསུང་ལས། རྗེ་བཙུན་དམ་པའི་དྲིན་གྱིས་ལམ་སྲོལ་འདིར། །རིང་དུ་སྦྱངས་པས་བློ་གྲོས་མི་དམན་ཞིང་། །རྒྱུད་དང་གདམས་པའི་གནད་ལ་འདྲིས་པའི་ཕྱིར། །དོན་འདིའི་ཆེད་ལ་སྤྲོ་བ་ལྷོད་མ་གྱུར། །ཅེས་ལུགས་མགོ་ཚོས་ནས་རྣ་བ་བྲེགས་པ་ཡིན་འདུག་པ་དགོངས་དགོས། མཆོད་རྟེན་སྲོག་ཤིང་དབྱིབས་མདོར་གསུངས་པ་ལ། །ད་ལྟའི་མདའ་ཚད་དགོས་དགོངས་འཁྲུལ་པ་འདི། །བློ་ལྡན་ཁྱོད་ཐུགས་རྨོངས་པ་མི་སྲིད་ཀྱང་། །གཞན་ལ་ཅོ་འདྲིར་རྫུ་བ་ཡིན་ནམ་སྙམ། །ཞེས་པ་འོད་ཟེར་དྲི་མེད་དུ་མཆོད་རྟེན་གྱི་སྲོག་ཤིང་འཛུགས་པའི་སྐོར་ཤིན་ཏུ་རྒྱས་ཤིང་བུམ་གདན་གྱི་སྟེང་ནས་འཛུགས་པ་བཤད་པར་ཁུངས་ཆེ་ཡང་དེ་འདྲའི་རྒྱུན་ས་ཕྱོགས་དེ་ནས་ཙནྡན་འཁྲུངས་དོགས་མ་དགོས་ཤིང་རྣ་ཐོས་འདྲ་གསན་པས་འཁྲུལ་(༡༨ན)
བ་ཡིན་ཚེ་དེའི་ཕྱག་ལེན་ལུགས་འདི་ལ་མི་འགྲིག་པས་ཞྭ་དཔེ་ལྷམ་འགབས་སུ་འགྲོ་མོད་བླ་མ་ཞང་གི་དབུ་ཞྭ་ཡང་བླ་མའི་ཕྱགས་ཡིན་འདུག་པས་བཀའ་བརྒྱུད་པ་དཔོན་སློབ་ལ་དེ་འདྲའི་སྲོལ་ནི་ཡོད་ཤས་ཆེ། རྒྱུད་དུ། ནག་པོ་གྲུ་གང་བང་རིམ་བཞི༔ ཞེས་པའི་དགོངས་པ་མ་ལོན་པར་མཆོད་རྟེན་ལ་ཁྲུ་གང་ཙམ་ལས་མི་ཡོང་བའི་རྩིས་ཀྱི་སྲོག་ཤིང་གི་དབྱིབས་ལས་མདའ་ཚད་མི་དགོས་གསུང་བ་སྤྲུལ་སྐུ་རིན་པོ་ཆེ་རང་གྲུབ་མཐའི་སྟབས་ཀྱིས་ཕྱོགས་འདི་ལ་ཐུགས་འདྲིས་ཆུང་བའི་ཞལ་ལེན་གནང་ཡང་ཐུགས་མི་འཚེར་ཤས་ཁའང་བྱ་བ་སྐུ་བསྲུང་པ་ཡབ་སྲས་ཀྱི་ཞབས་ལ་ཐག་པ་འདོམ་པ་བཅོ་བརྒྱད་བཏགས་ནས་བྱ་བྲལ་ཕོ་མོ་བྱེ་བ་ཕྲག་བརྒྱས་ཤོ་གཅིག་ཤོ་གཉིས་ཀྱིས་འཐེན་པ་ལས་འོས་མི་འདུག །གཙོ་བོར་རྒྱུད་དུ། གྲི་མདའ་སྨྱུག་རྒོད་ཁྲག་ཅན་ལྡན། །ཞེས་ཤིན་ཏུ་གསལ་ཞིང་རྒྱ་བོད་ཀྱི་མཁས་གྲུབ་ཚོས་མཛད་པའི་གཏེར་གཞུང་དང་རྗེས་འབྲང་རྣམས་ཀྱིས་བཀྲལ་བའི་ཡིག་ཆ་ཁུངས་བཙུན་མང་པོར་གྲི་མདའ་ཁྲག་ཅན་དགོས་པར་བཤད། ལྕགས་འདྲར་སེང་ཁྲིའི་ནང་དང་ལྕགས་སྡིག་ཏུ་དེའི་འོག་ས་འཛིན་ལ་ཐོད་པ་ཞལ་དབྱེ་གཞུག་དགོས་པའི་འབྲུབ་ཁུང་རྒྱུད་ལས། མཎྜལ་མཐིང་ནག་གྲུ་གསུམ་དག༔ འཕུང་ས་གསུམ་དང་དུག་ཁྲག་སྦྲུས༔ བང་རིམ་གསུམ་ལ་ཁ་ཁྱེར་རྩང་༔ དུག་ཁྲག་སོལ་བས་ནག་པོར་བྱུགས༔ དཔའ་རྟུལ་ཅན་གྱི་སྔགས་པ་ཡིས༔ ཞིང་ལྤགས་དག་གམ་རོ་གོས་ལ༔ རྣོ་མྱུར་གདུག་བྱེད་ཕག་མོའི་ལྟོར༔ ཞེས་ཁ་བཤད་ཙམ་མིན་པའི་རྒྱུད་འགྲེལ་མན་ངག་ཞལ་ཤེས་ཕྱག་ལེན་ཤིག་མཛུབ་སྤྲོད་རྒྱུ་ཡོད་པས་དེ་ལྟར་ན་མཆོད་རྟེན་ཁྲུ་གང་ཙམ་གྱི་སེང་ཁྲི་དང་(༡༨བ)
ས་འཛིན་ནང་དུ་མི་མགོ་བམ་རིལ་ཅི་ལ་ཤོང་། འབྲུག་ལུགས་ཀྱི་འཆི་བདག་ཞལ་དབྱེ་དེ་ཚེ་ལོ་བཅུ་པའི་བུ་ཆུང་ཞིག་གི་ཐོད་པར་མཛད་དགོས་ཡོང་བ་འདྲ། ཕྱག་ལེན་དེ་ཚོ་གཙང་དྲགས་པས་དཔའ་བོ་གཙུག་ལག་འཕྲེང་བ་དང་རིན་སྤུངས་ཞབས་དྲུང་སྐུ་ཚེ་མཐར་ཕྱིན་པས་རྟག་བརྟན་སྤྲུལ་སྐུས་པཎ་ཆེན་སྨོན་འགྲོ་བར་མངོན་སྤྱོད་མཛད་པའི་དཔེར་སོང་། ཚེ་སྒྲུབ་དེ་རིགས་བྱུང་ན་མཛད་རོགས་ལ་རྔན་པ་འབུལ་དགོས་མཆིས། རྩ་བའི་ལྷ་དང་རྒྱན་ལྷ་རྣམས་འགོད་ལུགས་སློབ་དཔོན་སོ་སོའི་བཞེད་པ་གཙོ་བས་མཐའ་གཅིག་ཏུ་ངེས་པ་མི་དགོས་པས་ཆོས་ཅན་མི་གཅིག་ཞབས་ལ་གསོལ་བ་འདེབས་མི་འཚལ། ཞབས་དྲུང་བདག་པོས་མ་གསུངས་པའི་གཏམ་འཁྱམས་ལ་བདག་པོ་མཛད་ནས། ཐོད་སྐུ་གསར་མའི་རྒྱས་འགེབས་མིན་པའི་སྒྲུབ་བྱེད་ཅི་ལ་མཛད་དགོས། ཐོད་སྐུ་སྒྲུབ་པ་ལྕགས་སྡིག་ཏུ་ཤིན་ཏུ་གསལ་ཞིང་ཆོས་སྡེ་ཡོངས་སུ་རྫོགས་པ་ལ་སྟོད་བྱང་དུ་བཞུགས་སྐབས་གཏེར་ཆེན་ཆོས་ཀྱི་རྒྱལ་པོ་ལེགས་ལྡན་རྗེ་ལ་ཞིབ་ཏུ་གསན་སྣང་། པཎ་ཆེན་སྐུ་མཆེད་ཀྱིས་ཆོས་འདི་ལ་དཀའ་བ་སྤྱད་པའི་རྒྱུ་མཚན་གསུང་ལས། རྒྱལ་ཁམས་གཡེངས་པས་བླ་མ་རྙེད། །བསམ་ཡས་བསྐོར་ནས་འཕྲང་ཕུར་ཕྱིན། །བླ་མ་རྙེད་ནས་གདམས་ངག་ཞུས། །རྩ་རྒྱུད་སྡིག་པ་སྙིང་འཛིངས་ལས། །མན་ངག་ཟུར་ཆོས་བརྒྱན་པ་རྣམས། །ངལ་དུབ་སྤངས་ནས་ཞུ་གཏུགས་བྱས། །སྒྱུ་ལུས་ལྦུ་བར་སོང་སྙམ་འདུག །ཁོང་པ་ཁྲག་གིས་གང་སྙམ་བྱེད། །ལྷུ་གཟུགས་དུམ་བུར་ཕྲལ་སྙམ་བྱེད། །དེ་ལྟར་གྱུར་པ་ཁྱད་བསད་ནས། །སྲོག་དང་བསྡོས་པའི་དམ་ཆོས་འདིས། །སངས་རྒྱས་བསྟན་པ་བསྲུང་བར་ཤོག །ཅེས་ཆོས་ཕྱིར་དཀའ་བ་སྤྱད་པ་ལས་(༡༩ན)
ཁ་ངོམས་གྲོད་འགྲངས་ཀྱིས་ཐོས་བསམ་དང་མི་འདྲ་བར་གདའ། ཨེ་རིང་ལ་ཨོཾ་ཨཱཿཧཱུཾ་མི་སྣོན་པ་ལྕགས་འདྲ་ལུགས། སྣོན་པ་ལྕགས་སྡིག་ཏུ་བཞེད་ཅིང་དེར་མ་ཟད་པའི་ཡི་གེ་འབྱིན་འཇུག་གི་གསུང་རྒྱུན་ཡང་མཆིས། ཨེ་རིང་བསྣལ་བཟློག་དཀྲུག་གཤག་སོགས་ཉིད་ཀྱི་གསན་གཟིགས་ཙམ་བྱུང་བ་ལས་ཆོས་རྒྱལ་བཀྲ་ཤིས་སྟོབས་རྒྱལ་གྱིས་ཕྱག་ཏུ་བཞེས་ནས་གཙང་པ་ཞིང་ཤག་པ་ཕ་བུ་དང་རྗེས་འབྲང་བྱང་པ་དཔོན་བློན་མང་པོ་དང་པོའི་སངས་རྒྱས་འཇམ་དཔལ་གྱི་ཞིང་དུ་གདན་འདྲེན་མཛད་པ་ཡིན་པས་གཏེར་གཞུང་གི་སྐྱོར་ཟློས་ཁ་ཡར་གསུང་བ་ཞང་པོའི་མདུན་དུ་ཚ་བོའི་སྔར་གཏམ་མི་མཛད་པ་ཞུ། དབང་ཆོག་གི་མཛད་བྱང་དུ་འཇམ་དཔལ་རྡོ་རྗེ་ཉིད་ལས་ཆོས་ཐམས་ཅད་ལ་ཅི་དགའ་བར་སྤྱོད་པའི་ལུང་ཐོབ་གསུང་བ་ཤིན་ཏུ་ཐུགས་བདེན་པར་མཆིས་ཏེ། འཇམ་དཔལ་དབྱངས་ཀྱིས་ཁྱེད་རང་གི་ཐུགས་ལ་གང་དྲན་དྲན་ལག་ཐོག་ཏུ་ཁོལ་ཞེས་གནང་བ་བྱིན་པར་གོར་མ་ཆག་གོ །སྨྲས་པ། ཕྱོགས་འཛིན་མི་འདོད་རླུང་གིས་མ་བསྐྱོད་ཅིང་། །ཐོས་བརྩོན་རྣམ་དཔྱོད་ཡངས་པའི་གྲུ་རྫིངས་ལ། །བརྟེན་ནས་གཙུག་ལག་རྒྱ་མཚོའི་མཐའ་འཇལ་བའི། །གཟུར་གནས་དེད་དཔོན་བློ་གྲོས་གསལ་རྣམས་ཀྱི། །མ་དག་ཆུ་དོང་གཞན་འདྲིད་ཕུབ་མའི་ཟོལ། །བཀབ་པའི་རྣམ་ཐར་དངོས་པོའི་གནས་ཚུལ་ཙམ། །བརྗོད་ལས་ཡུལ་ལ་མ་བསྙོན་མཚང་འདྲུའི་གཏམ། །ཡིན་མིན་ནན་ཏན་དཔྱོད་ཅིག་ཤེས་ལྡན་ཚོགས། །ཆོས་རྣམས་མ་བསླབས་སྙིང་ནས་རང་རྡོལ་དུ། །ཡོང་བར་ལུང་བསྟན་གྱིས་བསྙེམས་འོལ་ཚོད་ཀྱི། །བསྒྲིགས་པའི་བསྟན་བཅོས་བྱེ་མའི་ཆངས་བུ་དེ། །(༡༩བ)
དཔྱད་བརྡར་གཤེར་གྱིས་འཇིག་པ་རང་གི་གཤིས། །ཐམས་ཅད་མཁྱེན་པ་པདྨ་དཀར་པོ་ཞེས། །སྙན་གྲགས་གཡུ་འབྲུག་སྔོན་པོའི་སྐད་ལ་ཟ། །སྟར་རྡོག་སྐམ་པོ་འདིས་ཀྱང་དེ་འདྲའི་མཚན། །འཛིན་པ་ཕལ་གྱི་སྒོང་མཐིལ་མཛུབ་མོས་ལོན། །མཁས་གྲུབ་གྲལ་སྙེག་སྙེ་མ་འཕང་མཐོའི་མགོ །རྣམ་དཔྱོད་འབྲས་བུ་མེད་པའི་ལང་ལོང་གིས། །སྟོན་གྱི་བྲེ་འཇལ་སྒུག་པའི་རྗེས་འཇུག་མཁན། །འདོད་ཅན་ཞིང་པའི་རྒྱུ་མ་ལེབ་མོར་གཏོང་། །སྒོམ་ཆེན་ཕོ་མོའི་འཁོར་ལ་སྨྲས་ཚད་གཏམ། །སོང་བའི་མགལ་དུམ་པད་གནུབས་དགོངས་པའི་དོན། །ཡིན་ན་སྣག་ཚ་བྱུགས་པས་གསེར་ཞུན་མདོག །གསལ་བར་འབྱུང་ངམ་ཟ་ཧོར་རིག་སྔགས་འཆང་། །རྒྱུད་དང་གདམས་པར་གོམས་སྟོབས་མི་ལྡན་པར། །རྩལ་བཤད་རང་བཟོའི་སྒྲུབ་འཕྲིན་སྔོན་བྱོན་གྱི། །རིགས་འཛིན་བཞེད་པར་དོགས་ན་ཁྱོད་ལས་གཞན། །བླུན་པོ་མ་མཆིས་ཟ་ཧོར་རིག་སྔགས་འཆང་། །འཁྲུལ་པའི་ལོག་རྟོག་ཟག་རྫས་མཐོར་བརྩེགས་པར། །འགྲིག་འགྲིག་ཚིག་གི་སྦྱོར་བའི་ས་གཡོགས་པ། །རོ་བརྒྱའི་ཟས་སུ་མངོན་ན་ཕག་རྒོད་ཀྱི། །སྤུན་ཟླར་ངེས་སོ་ཟ་ཧོར་རིག་སྔགས་འཆང་། །བླ་ཆེན་བཟང་རྫུ་མཁས་པའི་འཆལ་སྒྲ་ལ། །ཡིད་བརྟན་དལ་འབྱོར་སྟོང་ཟད་མཚོར་མཆོངས་ན། །མི་ལུས་དུད་འགྲོའི་འདུ་ཤེས་རང་མཚང་ལ། །མི་ཁྲེལ་སུ་ཞིག་ཟ་ཧོར་རིག་སྔགས་འཆང་། །འབྲི་བྱང་ཟིལ་གནོན་མན་ངག་བདུད་རྩིའི་ཆུས། །སྙིང་གི་བུམ་བཟང་གཏམས་བཞིན་ཟག་ཟོག་གི །དཔེ་ཧྲུལ་འཚོལ་བ་བློ་གྲོས་གྲོན་ཡིན་པས། །བག་ཡོད་སྟེན་ཅིག་ཟ་ཧོར་རིག་སྔགས་འཆང་། །བསམས་ཀྱིན་སྔགས་(༢༠ན)
རློམ་སྨིག་རྒྱུའི་རྒྱང་འོད་ལ། །ནམ་ཡང་མི་རེའི་སྨོན་ལམ་ལེགས་ཐེབས་བདག །ཁ་པོའི་ཅ་ཅོ་མི་སྒྲོག་ཟབ་མོའི་ཀླུང་། །བཏུངས་པས་ལོག་རྟོག་སྐོམ་པའི་གདུང་བབ་ཅིལ། ཁོ་བོ་བློ་གྲོས་གསེར་མིག་འཁྱིལ་མིན་ཡང་། །ལོག་བཤད་ཐན་སྐད་སྒྲོག་ལ་མི་བྲེལ་བར། །རྒྱུད་དང་གདམས་པར་རིང་སྦྱངས་གཤོག་པའི་རྩལ། །རྫོགས་པའི་བྱ་རྒོད་གནུབས་བསྟན་ནམ་འཕང་སྤྱོད། །བརྒྱུད་པའི་ཕྱག་བཞེས་སྲོག་ཕྲལ་ཐོ་ཅོའི་བམ། །རང་བཟོ་ལྷ་མིན་གདོན་བཏབ་ལངས་པའི་མགོར། །དགག་སྒྲུབ་རིག་སྔགས་རྡོ་རྗེ་བསྣུན་པའི་མོད། །འཇིགས་རྔམས་བཟང་རྫུའི་འབྱུང་པོ་ཕ་མཐར་བྲོས། །སྔ་འགྱུར་རིགས་དང་སྐྱེ་བས་བསྙེམས་རྣམས་ཀྱིས། །བསྟན་པའི་དག་ཐེར་མཛད་པར་རིགས་མོད་ཀྱང་། །སྡུག་ཁུག་བྷྱོ་ཕཊ་མཆིས་བྲང་ཆས་དང་ཆང་། །སྒྲ་ཚད་གསར་ཆོས་ངུར་སྨྲིག་ཟོལ་གྱིས་གཡེངས། །གཞུང་བརྒྱའི་མང་བཀུར་ཁྲི་ལ་རང་རིགས་མེས། །ཞྭ་སེར་ཅོད་པན་བཅིངས་ཀྱང་རིས་བྲལ་བསྟན། །གླིང་བཞིར་འཁོར་ལོས་སྒྱུར་བས་ཆོས་ཀྱི་ཁྲིམས། །བླང་དོར་འབྱེད་པའི་སྤོབས་པ་གཟེངས་སུ་མཐོ། །འདི་ལན་ལུང་དང་རིག་པས་ཚུལ་བཞིན་དུ། །འདེབས་པོ་ཡོད་ན་སྨྲ་བའི་སྒོ་ཕྱེ་དང་། །ལེགས་སོ་བརྗོད་ལས་བཞིན་རས་ཉེར་གནག་པའི། །གུ་དོག་ཟོག་པོའི་རང་གནོང་ཅི་ལ་སྟོན། །དགེ་འདིས་འཇམ་དཔལ་ཞི་ཁྲོའི་དཀྱིལ་འཁོར་ལ། །བརྟེན་ནས་བདུད་བཞིའི་དགྲ་ཡི་ཚོགས་བཅོམ་སྟེ། །རང་རིག་དོན་གྱི་ཀུན་བཟང་ཧེ་རུ་ཀ །འགྲོ་འདིས་མངོན་སུམ་(༢༠བ)
རང་ངོ་འཕྲོད་པར་ཤོག །ཅེས་སྒྲུབ་བརྒྱུད་པ་རྣམས་ཀྱི་དབུས་ན་མཁས་པའི་སྙན་གྲགས་ཉི་ཟླ་ལྟར་གསལ་བ་འབྲུག་གནས་སྤྲུལ་སྐུ་རིན་པོ་ཆེ་པདྨ་དཀར་པོས་མཛད་པའི་འཇམ་དཔལ་ཕྱག་རྒྱ་ཟིལ་གནོན་གྱི་ཡིག་ཆ་འགའ་ཞིག་སྣང་བ་འཁྲུལ་པ་མེད་པའི་རྡོ་རྗེའི་གསུང་ལས་འོས་ཅི་མཆིས་ཀྱང་བདག་སོགས་ཚུར་མཐོང་གི་སྐྱེ་བོ་ལས་ཉོན་གྱི་སྒྲིབ་པས་ཆེས་ཆེར་སྦགས་ཏེ་དག་སྣང་གི་ཉི་མ་མ་ཤར་བའི་ནམ་མཁར་ལོག་རྟོག་གི་རྒྱུ་སྐར་གོ་མཚམས་མེད་པར་བཀྲམས་པའི་དབང་གིས་རྣམ་པར་དཔྱད་པའི་ཡི་གེ་རི་ཐང་མཚམས་ཀྱི་ནད་བརྒྱ་འཇོམས་པའི་སྨན་གཅིག་འདི་ནི་རང་གཞན་གྱི་ཆོས་པར་རློམ་པ་མཐའ་དག་ཇ་ཆང་གི་གར་སླ། ཕྱེ་ཁའི་མཐོ་དམའ་ཚོང་དང་ཞིང་ལས་ཀྱི་ཁེ་སྤོགས་སོགས་འདི་སྣང་ཁོ་ནས་གཡེངས་ཏེ་བསྐུལ་བ་པོའི་རིགས་མ་བྱུང་ཡང་ཤེས་ལྡན་མང་པོ་བློ་མིག་ཡངས་པའི་རྐྱེན་དུ་འགྱུར་རམ་སྙམ་པས་ཀུན་ནས་བླངས་ཏེ་ཚུལ་འདིར་དང་པོར་མཁས་པ་གནུབས་དང་རྒྱ། བར་དུ་མཁས་པ་གངས་གཡུང་གཉིས། མཐའ་མར་མཁས་པ་སེ་སྟོན་ཆེན་པོ་རིན་ཆེན་རྒྱལ་མཚན་དང་གཏེར་ཆེན་ཆོས་ཀྱི་རྒྱལ་པོ་མངའ་རིས་པཎ་ཆེན་སྐུ་མཆེད་ཀྱི་གདམས་པའི་ཆུ་བོ་གཅིག་ཏུ་འདྲེས་པ་ཁྲི་སྲོང་ཡང་སྲིད་དཔལ་བཀྲ་ཤིས་སྟོབས་རྒྱལ་ལས་ཉེ་བར་བརྒྱུད་པའི་དབང་ལུང་བཤད་བཀའ་ཕྱག་བཞེས་མན་ངག་གི་ཟབ་གནད་ཕྲ་མོར་བཅས་པ་ཁྱབ་བདག་རྡོ་རྗེ་སེམས་དཔའི་ངོ་བོ་ཟུར་ཐམས་ཅད་མཁྱེན་པ་ཆོས་དབྱིངས་རང་གྲོལ་གྱི་བཀའ་དྲིན་ལས་བུམ་པ་གང་བྱོར་ཐོབ་ཅིང་། རིགས་འཛིན་མངའ་རིས་པ་ཆེན་པོ་ནས་འབྲི་གུང་ཆོས་རྒྱལ་རིན་ཆེན་ཕུན་ཚོགས་ལ་བརྒྱུད་པའི་ལྕགས་སྡིག་གི་ཕྱག་ལེན་མན་ངག་རྣམས་དཔལ་འབྲི་གུང་པ་ཆོས་ཀྱི་གྲགས་(༢༡ན)
པ་དང་རིགས་འཛིན་དཀོན་ཅོག་ལྷུན་གྲུབ་གཉིས་ཀྱི་དྲུང་དུ་ཞུན་ཐར་བཅད། བརྒྱུད་པ་དེ་ལས་འོངས་པའི་ལུང་རྒྱུན་ཡོངས་སུ་རྫོགས་པ་ཁྱབ་བདག་ཁྲ་ཚང་བ་ཆེན་པོར་ནོས་ཤིང་། འཇམ་དཔལ་གྱི་གནང་བ་ཐོབ་པ་སོགས་མིའི་ཆོས་བླ་མའི་རྫུན་སྨྲར་མ་ནུས་རུང་། བསྙེན་སྒྲུབ་ལས་གསུམ་ཚད་ལྡན་ལག་ཏུ་བླངས་པས་ལག་འདྲེན་ཁ་ཡར་ཆམ་ལ་ཕབ་པའི་ལག་རྗེས་ཀྱང་ཅུང་ཟད་བཞག་པ་ཟ་ཧོར་གྱི་སྔགས་པ་རྒན་པོ་ཟིལ་གནོན་བཞད་པ་རྩལ་གྱིས་ཡོངས་འཛིན་ཞེས་པ་ཆུ་ཕོ་བྱི་བའི་ལོ་རྒྱལ་བས་ཆོ་འཕྲུལ་བསྟན་པའི་དུས་དགེ་བར་རང་བྱུང་འཕགས་པ་འཇིག་རྟེན་དབང་ཕྱུག་གི་གཙུག་ལག་ཁང་རྒྱལ་ཁབ་ཆེན་པོ་པོ་ཏ་ལར་སྦྱར་བའི་ཡི་གེ་པ་ནི་སྡོམ་བརྩོན་རིག་པ་འཛིན་པ་འཇམ་དབྱངས་གྲགས་པས་བགྱིས་པ་ཛ་ཡནྟུ། ཞེས་པ་འདི་ཡང་པ་རི་དྷཱ་ར་ཞེས་པ་ཆུ་ཕོ་བྱི་བའི་ལོ་ཆུ་ཤེལ་དབང་པོ་རྒྱུ་སྐར་ཁྲུམས་སྟོད་ཀྱིས་ཉེ་བའི་དཀར་ཕྱོགས་ཀྱི་རྒྱལ་བ་གསུམ་པའི་ཉིན་ཟླ་བ་གྲོ་བཞིན་གྱི་འགྲུབ་སྦྱོར་ལ་བབས་པའི་ཚེ་དགའ་ལྡན་ཕུན་ཚོགས་གླིང་དུ་པར་དུ་གྲུབ་པར་བགྱིས་སོ། །མངྒ་ལཾ།།