བླ་མ་ཀརྨ་གུ་རུའི་གྱེར་སྒོམ་འཕྲིན་ལས་གཟི་འོད་སྟོང་འབར།
བླ་མ་ཀརྨ་གུ་རུའི་གྱེར་སྒོམ་འཕྲིན་ལས་གཟི་འོད་སྟོང་འབར་བཞུགས་སོ། །
ན་མཿཀརྨ་གུ་ར་ཝ། རྔ་ཡབ་གླིང་དབུས་ལངྐའི་ཕོ་བྲང་ན། །འབོད་གྲོགས་རྒྱལ་པོའི་རྣམ་པར་འཕྲུལ་པོ་ཆེ། འཕྲིན་ལས་རིགས་འཛིན་ཀརྨ་གུ་རུའི་གཟིས། །བདུད་བཞིའི་སྨག་རུམ་སྲིད་ཞིའི་ཕ་མཐར་སྐྲོད། །ཁྲི་སྲོང་ལྡེ་བཙན་ཟབ་གཏེར་བསྟན་པའི་སྒོ། །འབྱེད་ལ་སྐུ་གསུང་ཐུགས་སྤྲུལ་རིམ་བྱོན་ལྟར། །ཡོན་ཏན་སྒྱུ་འཕྲུལ་བཀྲ་ཤིས་སྟོབས་ཀྱི་རྒྱལ། །མཁའ་འགྲོ་འཕྲིན་ལས་ཡོངས་གྲུབ་རྩལ་དེ་བསྔགས། །ཆོས་བདག་བཀའ་བབས་ལུང་ཟན་དཔྲལ་རྨེ་ཅན། །མི་ཉག་བྱང་པ་རིགས་འཛིན་ངག་གི་དབང་། །རྒྱལ་ཀུན་ངོ་བོ་ཟུར་ཆེན་ཐམས་ཅད་མཁྱེན། །ཞབས་རྡུལ་བྱང་ཆུབ་བར་དུ་གཙུག་ན་བསྟེན། །ཨཽ་ཌི་ཡ་ནའི་སློབ་དཔོན་རྡོ་རྗེ་འཆང་། །རིགས་ལྔའི་རྣམ་པར་འབྱམས་སུ་ཀླས་པ་ལས། །བྱ་གྲུབ་ཡེ་ཤེས་རང་མདངས་དོན་གྲུབ་ཏུ། །ཡོངས་ཤར་འབྱུང་པོའི་དོན་སྙིང་འབིགས་པའི་མདའ། །དེ་ཕྱིར་ཀརྨ་མ་ཧཱ་གུ་རུ་ཡི། །གྱེར་སྒོམ་འཕྲིན་ལས་གཟི་འོད་སྟོང་འབར་བ། །ཚིག་གི་སྲད་བུར་ལེགས་བརྒྱུས་མར་གད་འཕྲེང་། །སྔགས་འཆང་ཡོངས་ཀྱིས་མགུལ་བའི་རྒྱན་དུ་ལོང་། །སྐྱབས་སེམས་ཚོགས་(༢ན)
ཞིང་མཚམས་གཅོད་དང་། །བྱིན་དབབ་མཆོད་རླབས་སྔོན་འགྲོའི་འཁྲིགས། །དང་པོ་སྐྱབས་འགྲོ་སེམས་བསྐྱེད་ནི། །སྙིགས་དུས་ཉོན་མོངས་དུག་ལྔ་དྲག །ཕུང་བྱེད་འདྲེ་སྲིན་འབྱུང་པོ་ལངས། །དེ་ཕྱིར་བར་གཅོད་རྐྱེན་རྣམ་མང་། །བར་གཅོད་རྐྱེན་ལས་སྐྱོབ་པའི་ཕྱིར། །བདུད་འདུལ་པདྨར་བདག་སྐྱབས་མཆི། །མཐའ་ཡི་དགྲ་བཞི་མང་བ་དང་། ཁྱད་པར་རང་རྒྱུད་ཉོན་མོངས་བདུད། །ནང་དུ་འཁྲུགས་པའི་ཕྱི་རོལ་བདུད། །རླུང་ལྟར་ལངས་ཚེ་བསྒྲུབ་པར་བགྱི། །ཞེས་ལན་གསུམ་བརྗོད། གཉིས་པ་བསོད་ནམས་ཚོགས་གསོག་པ། ཧཱུཾ། ཀརྨ་དྲག་རྩལ་ལྷ་ཚོགས་གཤེགས། །ཉི་ཟླ་པདྨའི་གདན་ལ་བཞུགས། །ལུས་ངག་ཡིད་གསུམ་གུས་ཕྱག་འཚལ། །ཕྱི་ནང་གསང་བའི་མཆོད་པ་འབུལ། །ཉམས་ཆགས་སྡིག་སྒྲིབ་ཐམས་ཅད་བཤགས། །གསང་སྔགས་བསྒྲུབ་ལ་རྗེས་ཡི་རང་། །སྨིན་གྲོལ་གསང་སྔགས་ཆོས་འཁོར་སྐོར། །མྱ་ངན་མི་འདར་གསོལ་བ་འདེབས། །སྙིང་པོ་སེམས་ཅན་དོན་དུ་བསྔོ། །ཡང་དག་རྡོ་རྗེའི་དོན་རྟོགས་ཤོག །གསུམ་པ་མཚམས་(༢བ)
གཅོད་རིམ་པ་ནི། ཧཱུཾ། རང་ཉིད་ཀརྨ་གུ་རུར་གསལ་བ་ཡི། །ཐུགས་ལས་ཁྲོ་མཚོན་མེ་དཔུང་རབ་ཏུ་འཕྲོས། །གནོད་བྱེད་བདུད་དཔུང་མ་ལུས་རྡུལ་དུ་རློག །ལྷག་མ་ཕྱིར་བསྐྲད་མེ་མཚོན་ཁྲོ་བོས་གཏམས། །རྩ་སྔགས་ཤམ་བུ་ཅན་གྱི་མཇུག་ཏུ། ཨཱོཾ་བཛྲ་ཀྲོ་དྷ་ཙཀྲ་ཛྭ་ལ་རཾ་རཀྵ་རཀྵ་ཧཱུཾ་ཕཊ། བཞི་པ་བྱིན་ཆེན་དབབ་པ་ནི། ཧཱུཾ། ཨ་ལ་ལ་ཧོ་བྷ་ག་ཝ་ན་མ་ཧཱ་ཀ་རུ་ཎི་ཀ་ས་མ་ཡ་ཧོཿ ས་མ་ཡ་སྟྭཾ། ཧཱུཾ། རྔ་ཡབ་གླིང་ཕྲན་སྲིན་པོའི་ཡུལ། །ཟངས་མདོག་དཔལ་རིའི་གཞལ་ཡས་ནས། །ཀརྨ་མ་ཧཱ་གུ་རུ་རྩལ། །ལྷ་ཚོགས་འཁོར་དང་བཅས་རྣམས་ཀྱིས། །རྣལ་འབྱོར་རྟེན་དང་སྒྲུབ་རྫས་ལ། །སྐུ་གསུང་ཐུགས་ཀྱི་བྱིན་ཆེན་ཕོབ། །དབང་ཆེན་བསྐུར་ལ་བྱིན་གྱིས་རློབས། །གཟི་མདངས་བཀྲག་ཕྱུང་བདུད་རྩིར་སྤེལ། །བདུད་དང་ལོག་འདྲེན་ཚར་གཅོད་པའི། །མཐུ་སྟོབས་ནུས་པའི་དངོས་གྲུབ་སྩོལ། །རྩ་སྔགས་མཇུག་ཏུ་ས་མ་ཡ་ཨ་བེ་ཤ་ཡ་ཨ་ཨཱཿ ལྔ་པ་མཆོད་གཏོར་བརླབ་པ་ནི། ཐུགས་ཀའི་ཧཱུཾ་ལས་རཾ་ཡཾ་ཁཾ་འཕྲོས་པས། མཆོད་པའི་ཚོགས་ཀྱི་ཉེས་སྐྱོན་བསྲེགས་གཏོར་བཀྲུས། །ཨཱོཾ་ཨཱཿཧཱུཾ་གིས་བདུད་རྩིར་བྱིན་གྱིས་བརླབས། །ཟེགས་མར་འདོད་ཡོན་ལྷ་མོ་དཔག་མེད་སྤྲོས། །ཨཱོཾ་ཨཱཿཧཱུཾ་བཛྲ་དྷཱུ་པེ་ཧཱུཾ། བཛྲ་པུཥྤེ་ཧཱུཾ། བཛྲ་ཨཱ་ལོ་ཀེ་ཧཱུཾ། བཛྲ་གྷནྡྷེ་ཧཱུཾ། བཛྲ་ནཻ་ཝི་དྱེ་ཧཱུཾ། བཛྲ་ཤཔྟ་ཧཱུཾ། བཛྲ་སརྦ་པཱུ་ཛ་མེགྷ་ཧཱུཾ། ཨཱོཾ་ཨཱཿཧཱུཾ་སརྦ་པཉྩ་ཨ་མྲྀ་ཏ་ཧཱུཾ་ཧྲཱིཿཋ། །ཨཱོཾ་ཨཱཿཧཱུཾ་མཧཱ་བ་ལིཾ་ཏ་ཏེ་ཛྭ་བ་ལིཾ་ཏ་བ་ལ་བ་ཏེ་གུ་ཧྱ་ས་མ་ཡ་སྭཱ་ཧཱ། ཨཱོཾ་ཨཱཿཧཱུཾ་མཧཱ་རཀྟ་ས་མནྟ་མཎྜལ་ཧཱུཾ་ཕཊ། རྟེན་བསྐྱེད་སྤྱན་འདྲེན་བཞུགས་གསོལ་ཕྱག །མཆོད་བསྟོད་འཛབ་(༣ན)
བཟླ་དངོས་གཞིའི་ཁྲིགས། །དང་པོ་རྟེན་དང་བརྟེན་པ་ནི། །རང་གི་རིག་པ་ཧཱུཾ་དུ་བསམ། །རྒྱུ་ལས་སྐྱེས་པའི་སྔགས་བརྗོད་པས། །དྲག་པོའི་གཞལ་ཡས་ལྷུན་གྱིས་གྲུབ། །གནམ་ལྕགས་འབར་བའི་གཞལ་ཡས་ནང་། །གདན་དུ་སྣ་ཚོགས་རྡོ་རྗེ་དང་། །ཆུ་སྐྱེས་སྟེང་དུ་ཉོན་མོངས་བདུད། །དཀར་སེར་དམར་ནག་བཞི་བསྣོལ་སྟེང་། །སྟང་སྟབས་ཁྲོས་པའི་ཚུལ་དུ་ནི། །ཧཱུཾ་ལས་ཀརྨ་དྲག་པོའི་སྐུ། །ལྗང་ནག་ དུ་བའི་མདོག་ལྟ་བུ། །ཕྱག་གཡས་སྣ་ཚོགས་རྡོ་རྗེ་འཕྱར། །ཕྱག་གཡོན 
་སེང་ལྡེང་ཕུར་བུ་བསྒྲིལ། །མཐིང་ནག་བེར་དང་ཆོས་གོས་བསྣམས། །སྣ་ཚོགས་རྡོ་རྗེའི་འཕྲེང་བ་དང་། །བདུད་ཀྱི་མགོ་འཕྲེང་དོ་ཤལ་འཆང་། །སྟང་སྟབས་ཁྲོས་པ་དྲག་པོའི་སྐུ། །དམ་ཚིག་སེམས་དཔའ་ཉིད་དུ་གསལ། །གཉིས་པ་ཡེ་ཤེས་སྤྱན་དྲང་པ། །ཧཱུཾ་ཧཱུཾ་ཧཱུཾ། ལངྐ་པུ་ར་སྲིན་པོའི་ཡུལ། །གཏུམ་དྲག་རྔམས་པའི་དུར་ཁྲོད་ནས། །སྲིན་པོའི་རྒྱལ་པོ་ཡལ་གམ་ཅན། །གུ་རུ་ཀརྨ་དྲག་པོ་རྩལ། །ལོག་འདྲེན་མ་རུངས་བསྒྲལ་སླད་དུ། །གནས་འདིར་མྱུར་བ་ཉིད་དུ་སྤྱོན། །མཧཱ་གུ་རུ་ཀརྨ་དྲག་པོ་རྩལ་བཛྲ་ས་མ་ཡ་ཛཿཛཿ ཛཿཧཱུཾ་བཾ་ཧོཿ གསུམ་པ་སྟན་ལ་བཞུགས་གསོལ་བ། འོག་གཞི་སྣ་ཚོགས་རྡོ་རྗེའི་སྟེང་། །པདྨའི་གདན་ལ་ཉོན་མོངས་བདུད། །དཀར་སེར་དམར་ནག་བཞི་བསྣོལ་སྟེང་། །སྟང་སྟབས་ཁྲོས་པའི་ཚུལ་དུ་བཞུགས། །མཧཱ་གུ་རུ་ཀརྨ་དྲག་པོ་རྩལ་བཛྲ་ས་མ་ཡ་ཏིཥྛ་ལྷན། བཞི་པ་གུས་པས་ཕྱག་འཚལ་བ། (༣བ)
དཔལ་ཆེན་ཐུགས་ཀྱི་སྤྲུལ་པ་མ་ཧཱ་གུ་རུ། །དྲག་པོའི་འཕྲིན་ལས་མཆོག་ལ་མངའ་བརྙེས་པའི། །མ་རུངས་དུས་མཐའི་དམག་དཔུང་འཇོམས་པའི་ལྷ། །ཁྲོ་རྒྱལ་འཕྲིན་ལས་རྫོགས་ལ་གུས་ཕྱག་འཚལ། །མ་ཧཱ་གུ་རུ་ཨ་ཏི་པུ་ཧོཿ པྲ་ཏིཙྪ་ཧོཿ ལྔ་པ་མཆོད་གཏོར་འབུལ་བ་ནི། སྒོ་ལྔའི་ལོངས་སྤྱོད་ཕྱི་ཡི་མཆོད་པ་དང་། །དུག་ལྔ་རྣམ་དག་རང་བྱུང་དག་པའི་རྫས། །བདེ་ཆེན་ཡོངས་གྲོལ་གསང་བའི་མཆོད་པ་རྣམས། །བདུད་འདུལ་པདྨའི་སྐུ་ལ་མཆོད་པར་འབུལ། །དགྱེས་པ་ཆེན་པོ་བསྐྱེད་ཕྱིར་བཞེས་སུ་གསོལ། །ཀརྨ་མཧཱ་གུ་རུ་མཾ་ས་རཀྟ་ཀེཾ་ནྲྀ་ཏི་ཨ་མྲྀ་ཏ་བ་ལིཾ་ཏ་མཧཱ་སརྦ་པཱུ་ཛ་ཁཱ་ཧི། དྲུག་པ་བསྟོད་པ་བྱ་བ་ནི། དུས་གསུམ་རྒྱལ་བའི་ཐུགས་རྗེ་འདུས་པའི་དཔལ། །མ་རུངས་འདུལ་མཛད་ཀརྨ་དྲག་པོ་རྩལ། །འགྲོ་བ་སྙིགས་མའི་སྡུག་བསྔལ་སྐྱོབ་པའི་ལྷ། །དྲག་པོའི་འཕྲིན་ལས་མཛད་ལ་ཕྱག་འཚལ་བསྟོད། །བདུན་པ་འཛབ་ཀྱི་རིམ་པ་ནི། ཐུགས་ཀར་མཐིང་ནག་རྡོ་རྗེའི་དབུས། །ཧཱུཾ་ཡིག་མཐའ་རུ་སྔགས་ཀྱིས་བསྐོར། །གནམ་ལྕགས་འབར་བའི་ཁང་སྒྲོམ་དབུས། །གསལ་བར་བསྒོམས་ལ་དྲག་སྔགས་བཟླས། །ཨཱོཾ་ཨཱཿཧཱུཾ་ཀརྨ་མཧཱ་གུ་རུ་ཀརྨ་སིདྡྷི་ཧཱུཾ། རྩ་སྒྲུབ་ལས། རྩ་བའི་སྙིང་པོ་འབུམ་ཕྲག་གསུམ། །བཟླས་པས་བདུད་བཞིའི་བར་ཆད་སེལ། །ཞེས་པ་ལྟར་བསྙེན་པ་བྱ། བརླབ་དྲངས་ཐོག་པར་ཐ་མ་ལྷག །མཐོ་སྐྱོང་བྲོ་གཏང་བསྡུ་སྨོན་ཤིས། །དང་པོ་ཚོགས་མཆོད་བྱིན་རླབས་ནི། ཚོགས་མཆོག་ལྗགས་སྒྲིགས་ལས། སྒྲུབ་པའི་ལས་རིམ་ཁ་སྐོང་ཕྱིར། །འདོད་ཡོན་ཚོགས་(༤ན)
ཀྱི་ཡོ་བྱད་རྣམས། །ཞིང་ལྤགས་དངོས་སམ་གཅན་གཟན་གྱི། །གཡང་གཞིའི་གདན་ལ་ལེགས་བཤམས་ཏེ། །ཨ་ལས་ཐོད་པའི་ནང་དུ་ནི། །འདོད་ཡོན་དཔག་མེད་ལེགས་བཤམས་ལ། །འབྱུང་བའི་ས་བོན་གསུམ་གྱིས་སྦྱངས། །ཞེས་པ་ལྟར། རཾ་ཡཾ་ཁཾ། འབྲུ་གསུམ་སྔགས་ཀྱིས་བྱིན་གྱིས་བརླབས། །ཨཱོཾ་ཨཱཿཧཱུཾ་ཧྲཱིཿ ཡིས་འདོད་ཡོན་སྣ་ཚོགས་སྤེལ། །གཉིས་པ་ཚོགས་ལ་སྤྱན་དྲང་བ། དུས་གསུམ་རྒྱལ་བ་ཞི་ཁྲོའི་ཚོགས། །མཁའ་འགྲོ་དཔའ་བོ་དམ་ཚིག་ཅན། །ཆོས་སྐྱོང་སྲུང་མ་གཏེར་བདག་རྣམས། །མ་ལུས་ཡུད་ཀྱིས་གནས་འདིར་སྤྱོན། །ལངྐ་པུ་ར་སྲིན་པོའི་ཡུལ། །ཟངས་མདོག་དཔལ་རིའི་གནས་མཆོག་ནས། །སྲིན་པོའི་རྒྱལ་པོ་ཡལ་གམ་ཅན། །འདོད་ཡོན་ཚོགས་ལ་སྤྱན་འདྲེན་གཤེགས། །དག་པའི་ཞིང་ཁམས་སོ་སོ་ནས། །སྤྲུལ་སྐུས་འགྲོ་བའི་དོན་མཛད་པའི། །རིགས་འཛིན་བླ་མའི་ཚོགས་བཅས་རྣམས། །ཐུགས་རྗེས་དགོངས་ལ་གནས་འདིར་གཤེགས། །ཆོས་དབྱིངས་དག་པའི་ཞིང་མཆོག་ནས། །མཁའ་འགྲོ་འཕྲིན་ལས་ཡོངས་གྲུབ་རྩལ། །ཆོས་བདག་བུ་མཆོག་ཉེར་གཅིག་རྣམས། །ཚོགས་ལ་སྤྱན་འདྲེན་གཤེགས་སུ་གསོལ། །ཀརྨ་མཧཱ་གུ་རུ་དེ་ཝ་ཌཱ་ཀི་ནི་སརྦ་ཀིངྒ་ར་ས་མ་ཡ་ཛཿཛཿ གསུམ་པ་ཐོག་མར་མཆོད་པ་ནི། ཧཱུཾ། ཐུགས་རྗེ་འཕྲིན་ལས་གཅིག་བསྡུས་མཧཱ་གུ་རུ། །ལོངས་སྤྱོད་རྫོགས་སྐུ་ཁྲག་འཐུང་ཞི་ཁྲོའི་ལྷ། །དཔའ་བོ་ཌཱ་ཀི་ཆོས་སྲུང་གཏེར་བདག་དང་། །རིགས་འཛིན་(༤བ)
བརྒྱུད་པ་རྣམས་ལ་མཆོད་པ་འབུལ། །མཆོག་ཐུན་དངོས་གྲུབ་བུ་མཆོག་བདག་ལ་སྩོལ། །ག་ཎ་ཙཀྲ་པཱུ་ཛ་ཁཱ་ཧི། བཞི་པ་བར་དུ་ཉམས་ཆགས་བཤགས། ཉོན་མོངས་དུག་ལྔའི་རྟོག་པའི་དབང་གྱུར་ཏེ། །ཚོར་དང་མ་ཚོར་མ་རིག་མུན་པས་བསྒྲིབས། །རྩ་བ་ཡན་ལག་དམ་ཚིག་ཉམས་ཆགས་ཀུན། །འདོད་ཡོན་ཚོགས་ཀྱི་མཆོད་པས་མཐོལ་ཞིང་བཤགས། །ཁྲག་འཐུང་ལྷ་ཚོགས་རྣམས་ཀྱིས་བཟོད་པར་བཞེས། །ཀརྨ་མཧཱ་གུ་རུ་སརྦ་ས་མ་ཡ་ཧཱུཾ། ལྔ་པ་ཐ་མར་བསྒྲལ་ཞིང་སྟོབ། །ཧཱུཾ་ནྲྀ་ཏྲི་ཛཿཛཿ མཆོག་གསུམ་སྐུ་གསུམ་བྱིན་རླབས་བདེན་པ་དང་། །དབང་ཕྱུག་འཇིག་རྟེན་དྲེགས་པའི་ནུས་མཐུ་ཡིས། །ཏིང་འཛིན་སྔགས་དང་ཕྱག་རྒྱར་ལྡན་བྱས་པས། །དཀོན་མཆོག་སྤྱི་དགྲ་རིགས་འཛིན་སྐུ་དགྲ་དང་། །སྐྱེ་འགྲོར་འཚེ་བྱེད་ཞིང་བཅུ་རུ་དྲ་དང་། །བོད་ཁམས་ཕུང་བྱེད་མཐའ་དམག་གདུག་པའི་ཚོགས། །གནོད་བྱེད་དགྲ་བགེགས་འབྱུང་པོ་དམ་སྲིའི་རིགས། །བསྒྲལ་བྱར་འོས་པའི་བླ་སྲོག་འདིར་ཁུག་ཅིག །བཛྲ་ཨཾ་ཀུ་ཤ་ཛཿ བཛྲ་པཱ་ཤ་ཧཱུཾ། བཛྲ་སྥོ་ཊ་བཾ། བཛྲ་གཎྜེ་ཧོཿ པྲ་བེ་ཤ་ཡ་ཕཊ། ཨ་བེ་ཤ་ཡ་ཨཱཿ ཕུང་བྱེད་དགྲ་བགེགས་ཀྱི་སྙིང་སྲོག་ལ་རཾ་རཾ་ཐུལ་ཐུལ། ཏྲིག་རྦད་ཏྲིག་རྦད། ཧ་ལ་པྲ་ཏི་ཏྲི་ག་ནན་རྦད། ཕུར་པ་བཏབ་ཅིང་མཚོན་ཆས་བསྒྲལ་ལོ། །མ་ལ་ཡ་ཡི་རི་བོ་དང་། །སྲིན་ཡུལ་གནས་ནས་གུ་རུའི་ཚོགས། །སྤྱན་དྲངས་ཞལ་དུ་གསོལ་བར་བསམ། །ཧཱུཾ། དཔལ་ཆེན་འཁོར་བཅས་ཞལ་ཕྱེ་ཞིག །(༥ན)
ཞལ་ནི་ཧོཾ་ཁུང་གདངས་པ་འདྲ། །ཚེམས་ནི་ཧོཾ་ཤིང་བཙུགས་པ་འདྲ། །ལྗགས་ནི་ཧོཾ་གཟར་བརྐྱང་པ་འདྲ། །དགྲ་བགེགས་བསྒྲལ་བའི་ཕུང་པོ་འདི། །དཔལ་ཆེན་འཁོར་བཅས་ཞལ་དུ་སྟོབ། །རྡུལ་ཕྲན་ཙམ་ཡང་མེད་པར་རོལ། །ཨཱོཾ་ཨཱཿཧཱུཾ་ཀརྨ་མཧཱ་གུ་རུ་ཀརྨ་སིདྡྷི་ཧཱུཾ། དགྲ་བགེགས་ཀྱི་ཤ་ཁྲག་རུས་པ་ལ་ཁ་རཾ་ཁཱ་ཧི། དྲུག་པ་མར་གནས་ལྷག་མ་བཏང་། ཧཱུཾ། དང་པོ་ཕུད་ཀྱིས་མི་མཆོད་དུ། །ཀརྨ་གུ་རུའི་ལྷ་ཚོགས་གཉན། །བར་དུ་ལྷག་མས་མི་མཆོད་དུ། །མ་དང་མཁའ་འགྲོ་ལྷག་ལ་དགྱེས། །ཐ་མ་གཅིག་ཏུ་མི་བསྲེ་རུ། །ཆོས་ཉིད་ཡེ་ནས་རྒྱུ་འབྲས་གཅིག །དཔལ་གྱི་བཀའ་ཉན་ལྷག་སྡུད་རྣམས། །འདིར་སྤྱོན་ཤ་ཁྲག་མཆོད་གཏོར་བཞེས། །སྔོན་གྱི་དམ་ཚིག་མ་གཡེལ་བར། །བཅོལ་བའི་འཕྲིན་ལས་སྒྲུབ་པར་མཛོད། །ཨཱོཾ་མཧཱ་ཤྲཱི་ཧེ་རུ་ཀ་ས་མ་ཡ་དེ་ཝི་ཀྲོདྷ་སརྦ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨཱོཾ་ཨཱཿཧཱུཾ་ཨུཙྪི་ཏ་བཛྲ་ཨ་དྷི་ཥྛ་ས་མུ་ཀྲ་མ་ས་མ་ཡ་ཧཱུཾ་ཕཊ། ཧཱུཾ་ཧཱུཾ་ཧཱུཾ། ཧྲཱིཿཧྲཱིཿཧྲཱིཿ བྷྱོ་བྷྱོ་བྷྱོ། ཨཱ་རཱ་རི་ཛཿ བདུན་པ་སྔོན་གྱི་ཆད་མཐོ་བསྒྲག །སྔོན་ཚེ་འདས་དུས་བསྐལ་པ་དང་པོ་ལ། །འོག་མིན་ཆོས་དབྱིངས་གནས་མཆོག་དམ་པ་རུ། །བཅོམ་ལྡན་དཔལ་ཆེན་ཧེ་རུ་ཀ་དཔལ་གྱིས། །སྣང་སྲིད་མ་མོ་དམ་ལ་བཏགས་པའི་ཚེ། །སོ་སོའི་གཟུགས་བསྟན་དམ་ཚིག་ཁས་བླངས་བཞིན། །མཆོད་གཏོར་འདི་བཞེས་བཅོལ་བའི་འཕྲིན་ལས་མཛོད། །བསྐལ་བ་བར་མ་རྒྱ་གར་གནས་ཆེན་དུ། །གྲུབ་པའི་རིགས་འཛིན་ཆེན་པོ་བརྒྱད་རྣམས་ཀྱིས། །ཞི་ཁྲོ་རང་རང་དཀྱིལ་འཁོར་ཞལ་(༥བ)
ཕྱེ་ནས། །བཀའ་སྐྱོང་ཕོ་རྒྱུད་མོ་རྒྱུད་དམ་བཏགས་ཚེ། །སོ་སོའི་གཟུགས་བསྟན་༴ མཆོད་གཏོར་འདི་བཞེས་༴ བསྐལ་བ་ཐ་མ་ཆོས་འཁོར་བསམ་ཡས་སུ། །པདྨ་འབྱུང་གནས་རྗེ་འབངས་གྲོགས་དགུ་ཡིས། །ཞི་དང་ཁྲོ་བོའི་དཀྱིལ་འཁོར་ཞལ་ཕྱེ་ནས། །སྣང་སྲིད་དྲེགས་པ་སྡེ་བརྒྱད་དམ་བཏགས་ཚེ། །སོ་སོའི་གཟུགས་བསྟན་༴ མཆོད་གཏོར་འདི་བཞེས་༴ ལྔ་བརྒྱ་ཐ་མ་ཟངས་མདོག་དཔལ་རི་རུ། །གཏེར་སྟོན་རིགས་འཛིན་མཁའ་འགྲོ་ཡོངས་གྲུབ་ཀྱིས། །འཕྲིན་ལས་དྲག་པོའི་དཀྱིལ་འཁོར་ཞལ་ཕྱེ་ནས། །དམ་ཅན་རྒྱ་མཚོ་དམ་ལ་བཏགས་པའི་ཚེ། །སོ་སོའི་གཟུགས་བསྟན་༴ མཆོད་གཏོར་འདི་བཞེས་༴ ཧཱུཾ། མ་ཉེས་དཔང་དུ་དཀོན་མཆོག་བཞུགས། །དགྲ་བགེགས་མ་གཏོགས་སྐུ་གཟུར་ཞིག །ཁྲག་འཐུང་དྲག་པོའི་དམག་དཔུང་བཀྱེ། །དགྲ་བོའི་སྟེང་དུ་གཏོར་ཟོར་རྒྱོབ། །མཐའ་ཡི་དམག་དཔུང་ཐམས་ཅད་མཱ་ར་ཡ་སོད། རྩ་བའི་སྔགས་དང་ལས་ཀྱི་སྔགས་མང་དུ་བཟླ་ཞིང་གནོད་ཕྱོགས་སུ་འཕང་། བརྒྱད་པ་བོད་སྐྱོང་བསྟན་མ་བརྔན་ཞེས་པ་སྤྱི་ལྟར་བྱེད། དགུ་པ་དམ་སྲིའི་སྟེང་དུ་བྲོ། བདུད་འདུལ་ཀརྨ་དྲག་པོའི་བྲོ། །དམ་སྲིའི་སྙིང་ལ་ཆེམས་སེ་ཆེམ། ཁྲོ་བོ་ཁྲོ་མོ་རོལ་པའི་བྲོ། །དགྲ་བགེགས་སྙིང་ལ་ཆེམས་སེ་ཆེམ། ཁྲོ་བོ་རྣམས་ཀྱིས་བྲོ་བརྡུངས་ལ། ཁྲོ་མོ་རྣམས་ཀྱིས་རྒྱས་འདེབས་སོ། །ཤར་དུ་ཞི་བའི་བྲོ་བརྡུངས་པས། །ནད་གདོན་བར་ཆད་ཞི་བར་ཤོག །ལྷོ་རུ་རྒྱས་པའི་བྲོ་བརྡུངས་པས། །ཚེ་དང་བསོད་ནམས་རྒྱས་པར་ཤོག །(༦ན)
ནུབ་ཏུ་དབང་གི་བྲོ་བརྡུངས་པས། །ལྷ་འདྲེེ་མི་གསུམ་དབང་སྡུད་ཤོག །བྱང་དུ་དྲག་པོའི་བྲོ་བརྡུངས་པས། །དགྲ་བགེགས་དམ་སྲི་ཞི་བར་ཤོག །སྔགས་མཇུག་ཏུ། ཤནྟིཾ། པུཥྚིཾ། པ་ཤཾ །མཱ་ར་ཡ་ཕཊ། དགུ་པ་བཤགས་ཤིང་བཏང་རག་གཏོང་། ཡིག་བརྒྱའི་མཇུག་ཏུ། ལྷ་མཆོག་ཀརྨ་དྲག་པོ་གཤེགས། །ཕྱི་ནང་གསང་བའི་ཚོགས་མཆོད་འབུལ། །ཉམས་ཆགས་འགལ་འཁྲུལ་མཐོལ་ལོ་བཤགས། །སྐུ་གསུང་ཐུགས་ཡོན་འཕྲིན་ལས་བསྟོད། །མཆོག་དང་ཐུན་མོང་དངོས་གྲུབ་སྩོལ། །མཧཱ་པཉྩ། མཧཱ་རཀྟ། མཧཱ་བ་ལིཾ་ཏ་ཁཱ་ཧི། ཧཱུཾ། དཔལ་ཆེན་ཐུགས་ཀྱི་སྤྲུལ་པ་འཕྲིན་ལས་བདག །ལོག་འདྲེན་གདུག་པ་ཀུན་འདུལ་མཧཱ་གུ་རུ། །བདུད་སྡེ་འདུལ་མཛད་ཀརྨ་དྲག་པོའི་སྐུ། །བྱིན་རླབས་མཐུ་སྟོབས་ནུས་པའི་རྩལ་ལྡན་པ། །མ་རུངས་ལོག་འདྲེན་འདུལ་ལ་ཕྱག་འཚལ་བསྟོད། །བཅུ་པ་དཀྱིལ་འཁོར་ཉེར་བསྡུ་བ། གནམ་ལྕགས་ཁང་སྒྲོམ་གདན་བཅས་སྐུ་ལ་ཐིམ། །སྐུ་ཡང་རྡོ་རྗེ་དེ་ཉིད་སྔགས་འཁོར་དང་། །སྔགས་འཕྲེང་ཧཱུཾ་ལ་དེ་ཡང་ཞབས་ཀྱུ་ནས། །ནཱ་དའི་བར་བསྡུས་ཀ་ནས་དབྱིངས་སུ་དག །བཅུ་གཅིག་སྨོན་ལམ་ལེགས་གདབ་པ། །དགེ་འདིའི་མཐུ་ཡིས་སྡེ་བརྒྱད་ཟིལ་གནོན་ཅིང་། །བདུད་བཞིའི་གཡུལ་ལས་རྣམ་པར་རབ་རྒྱལ་ནས། །རང་རིག་དོན་གྱི་ཀརྨ་དྲག་པོ་རྩལ། །མངོན་སུམ་རང་ཞལ་ཚེ་འདིར་འགྲུབ་གྱུར་ཅིག །བཅུ་གཉིས་ཤིས་པ་བརྗོད་པ་ནི། བླ་མ་ཡི་དམ་མཁའ་འགྲོ་ཆོས་སྐྱོང་ཀུན། །སྐྱབས་གནས་མ་ལུས་(༦བ)
འདུས་པའི་བདག་ཉིད་ཅན། །བླ་མ་རིགས་འཛིན་ཀརྨ་གུ་རུ་ཡིས། །ཕྱོགས་དུས་ཀུན་ཏུ་ཁྱབ་པའི་བཀྲ་ཤིས་ཤོག །ཅེས་སོགས་ཤིས་བརྗོད་ཀྱི་རིམ་པ་ཅི་རིགས་བྱའོ། །གདུལ་དཀའི་འགྲོ་ལ་ཚངས་པ་ལྷའི་མེ་ཏོག །སླར་བྱོན་བྱང་པ་རིགས་ལྡན་ཆོས་རྒྱལ་ཆེ། །སྔགས་འཆང་ཡོངས་ཀྱི་འཁོར་སྒྱུར་དབང་པོའི་སྡེས། །བཀའ་གཏེར་བསྟན་པའི་རྒྱལ་མཚན་སྲིད་རྩེར་བསྒྲེངས། །སྙིགས་དུས་འབྱུང་པོའི་གཉེན་པོར་ཆེར་ཁྲོས་པ། །ཀརྨ་གུ་རུའི་གཏུམ་དྲག་ཚ་བའི་དཔལ། །དུས་ཀྱི་མེ་དཔུང་ཁེངས་པ་ཐུང་ངུ་རུ། །བྱེད་པའི་ངད་དེ་སྡེ་བརྒྱད་སུ་ཡིས་བཟོད། །སྣ་ཚོགས་རྡོ་རྗེའི་ཕྱག་མཚན་ཉེར་གདེངས་པས། །ལས་བཞི་ཐོགས་མེད་བསྒྲུབ་ལ་དཀར་ཕྱོགས་རྣམས། །འཛུམ་དང་ཆབས་ཅིག་ཕུར་བུས་བདུད་བཞིའི་སྙིང་། །ཕུག་པར་ནག་པོའི་དཔུང་རྣམས་གདོང་པ་དམད། །གང་གི་རྣམ་འཕྲུལ་སྲིད་མེ་ཆུ་སྤུངས་ནས། །བསྐལ་པའི་མེ་ལྕེ་ཚངས་རིས་ཡུལ་ས་ཆེ། །བརྒལ་བས་ཉེས་བརྒྱ་གཞིལ་དང་ཅིག་ཅར་དུ། །བཀྲ་ཤིས་མི་ནོར་ཡོངས་འཕེལ་དེ་རྨད་བྱུང་། །དེ་ཕྱིར་འཕྲིན་ལས་གང་དཀྲུགས་འཐོར་པ་རྣམས། །བརྒྱུད་ལྡན་དམ་པའི་དགོངས་དོན་འཁྲུལ་མེད་དུ། །རབ་བསྡེབས་དགེ་བས་དུས་གསུམ་རྒྱལ་ཀུན་གྱི། །བདག་ཉིད་རྔ་ཡབ་གླིང་པས་རྗེས་འཛིན་ཤོག །ཅེས་བླ་མ་ཀརྨ་གུ་རུའི་གྱེར་སྒོམ་འཕྲིན་ལས་གཟི་འོད་སྟོང་འབར་ཞེས་པ་འདི་ནི་དཀོན་མཆོག་འབྱུང་གནས་ཐོག་ཆེན་མདའ་ལྟར་འཕེན་པ་སོགས་ལང་འགྲོའི་སྔགས་འཆང་རིམ་པར་བྱོན་པའི་གདུང་ལས་རྟ་(༧ན)
ནག་སྒྲོལ་མ་ཕུག་ནས་ཆེན་མོས་གསུང་གིས་བསྐུལ་ཞིང་ཆོས་རྒྱལ་གཏེར་བདག་གླིང་པས་ཀྱང་ལེགས་སོའི་རྒྱུ་མཚན་མཛད་པ་རྣམ་གཡེང་གིས་རིང་ཞིག་འགྱངས་པ་ཉེ་ཆར་ཕོ་བྲང་གནང་བྱུང་བ་སྔགས་བཙུན་ངག་དབང་མཁྱེན་རྩེས་བསྐུལ་བས་མཚམས་སྦྱོར་གྱི་རྐྱེན་བྱས་གཏེར་གཞུང་ལྗགས་སྒྲིགས་གཉིས་དང་བླ་མའི་གསུང་རྒྱུན་གྱིས་ལེགས་པར་བརྒྱན་ཏེ་ཟ་ཧོར་གྱི་སྔགས་སྨྱོན་ཟིལ་གནོན་བཞད་པ་རྩལ་གྱིས་དམར་སེར་ཅན་གྱི་ལོ་དབྱུ་གུ་ཟླ་བའི་གྲལ་ཚེས་ལ་སྦྱར་བའི་ཡི་གེ་པ་ནི་དཔལ་གྲོང་སྔགས་རམས་པ་ངག་དབང་དགེ་ལེགས་སོ།། །།སརྦ་མངྒ་ལཾ།།