གསུམ་པ་ཐེག་པ་ཐམས་ཅད་ཀྱི་རྩེ་རྒྱལ་རྫོགས་པ་ཆེན་པོ་ཨ་ཏི་ཡོ་ག

༈ གསུམ་པ་ཐེག་པ་ཐམས་ཅད་ཀྱི་རྩེ་རྒྱལ་རྫོགས་པ་ཆེན་པོ་ཨ་ཏི་ཡོ་ག་ལ། ཕྱི་སེམས་སྡེ། ནང་ཀློང་སྡེ། གསང་བ་མན་ངག་གི་སྡེ་དང་གསུམ་དུ་བཞུགས་པ་ལས། དང་པོ་སེམས་ཀློང་གི་སྡེ་གཉིས་ནི། མཁས་པ་བཻ་རོ་ཙཱ་ནའི་བཀའ་དྲིན་ལས་བྱོན་པ་ཡིན་ཏེ། དེ་ཡང་། ཡུལ་ཉང་ཆབ་དང་གཙང་ཆབ་འཛོམས་པའི་འགྲམ་དུ། ཡབ་པ་གོར་རྡོ་རྗེ་རྒྱལ་པོ་དང་། ཡུམ་བསྲུན་བཟའ་སྒྲོན་སྐྱིད་གཉིས་ཀྱི་སྲས། པ་གོར་གན་འཇགས་ཐང་ཏ་ཞེས་པ་སངས་རྒྱས་རྣམ་པར་སྣང་མཛད་ཀྱི་སྤྲུལ་པ། སྒྲ་བསྒྱུར་སུམ་བརྒྱ་དྲུག་ཅུ་མ་བསླབས་པར་མཁྱེན་པ། མངོན་ཤེས་ཐོགས་པ་མེད་པར་མངའ་ཞིང་རྫུ་འཕྲུལ་གྱིས་ནམ་མཁའ་ལ་འགྲོ་ནུས་པ་ཞིག་ཡོད་པ་དེ་ལོ་བརྒྱད་ནས་རྗེ་ཡི་སྤྱན་སྔར་བོས་ཏེ་ཕྱི་ནང་གི་བློན་པོ་ལོ་གསུམ། རྗེའི་གསོལ་ཇ་པ་ལོ་གསུམ་བྱས་ཏེ་ལོ་བཅོ་ལྔ་ལོན་པ་ན། རྩང་ཐེ་ལེན་དྲའི་བུ་ལེགས་སྒྲུབ་བྱ་བ་དང་གཉིས་རྗེ་ཡི་བཀས་བསྐུལ་ནས་རྒྱུ་འབྲས་ལས་འདས་པའི་ཆོས་འཚོལ་དུ་བཏང་བས། དིལ་ཤི་དིལ་ཆད་ཀྱི་དཀའ་བ་ཆེན་པོ་བཅུ་དྲུག་དཔྱད་ནས་རྒྱ་གར་འཕགས་པའི་ཡུལ་དུ་བརྟོལ། དྷ་ཧེ་ནཱའི་འདུ་ཁང་གི་སྤྲུལ་པའི་ཀེའུ་ཚང་གོང་མར་རིག་འཛིན་དགའ་རབ་རྡོ་རྗེ་དང་། ཀེའུ་ཚང་བར་མར་སློབ་དཔོན་འཇམ་དཔལ་བཤེས་གཉེན་མཇལ་ཏེ་སོ་སོར་གསེར་ཕྱེ་དང་གསེར་གྱི་པ་ཏྲ་ཕུལ་ནས། མན་ངག་ཞུས་པས་དབང་བསྐུར་བྱིན་གྱིས་རླབས། མན་ངག་གི་ཆོས་རྣམས་རྫོགས་པར་སློབ་དཔོན་ཤྲཱི་སིདྷ་ལ་ཉོན་ཅིག་པར་ལུང་བསྟན། ཀེའུ་ཚང་འོག་མར་སློབ་དཔོན་ཤྲཱི་སིང་ཧ་བཞུགས་པ་མཇལ་ནས་གསེར་སྲང་སྟོང་གི་མཎྜལ་ཕུལ་ནས་རྩོལ་མེད་ཨ་ཏིའི་ཆོས་ཞུས་པས། སློབ་དཔོན་གྱིས་བོད་དུ་རྩོལ་མེད་ཀྱི་བསྟན་པ་དར་བའི་དུས་ལ་བབས་པར་དགོངས་ནས། རྡོ་རྗེ་གདན་དུ་མན་ངག་གི་རྒྱུད་རྣམས་པཎྜི་ཏ་དང་རྒྱལ་པོས་རྒྱ་རུ་སྤྲོད་ཀྱིས་བཏབ་སྟེ་སྦས་ཡོད་པ་རྣམས་རྫུ་འཕྲུལ་གྱིས་བླངས་ནས་གཞན་གྱིས་མི་རྟོགས་པའི་ཐབས་དང་རྟེན་འབྲེལ་མཛད་ནས་སེམས་སྡེ་བཅོ་བརྒྱད་གཏད་རྒྱ་དཔེ་དང་བཅས་པ་རྫོགས་པར་གནང་བས་ལེགས་སྒྲུབ་ཚིམས་ནས་སྔོན་དུ་བྱོན་པས་ལམ་དུ་གཅན་འཕྲང་བས་བཀྲོངས། བཻ་རོ་མ་ཚིམས་ཏེ་ད་དུང་བཞུགས་པས། རྒྱུད་སྡེ་དྲུག་བཅུའི་དབང་དང་འབྲས་བུ་རང་ཆས་སུ་སྟོན་པ་ཀློང་དཀར་ནག་ཁྲ་གསུམ་རྣམས་བསྟན་པས་རང་གྲོལ་མངོན་སུམ་དུ་ངོ་འཕྲོད། མངོན་སུམ་གཉིས་ཀྱིས་ཚད་ལ་ཕེབས། བརྡ་ཕྲད་རང་གྲོལ་གྱི་ཕྱོགས་མེད་ཀློང་དུ་རང་གྲོལ། ཐིག་ལེ་དྲུག་གི་རྣམ་རྟོག་གི་སྤྲོས་པ་ཆོད། ཆེ་བ་ལྔའི་རང་སེམས་དོན་མངོན་དུ་གྱུར་ཏེ། སྣང་སྲིད་ཟིལ་གྱིས་ནོན། འཁོར་འདས་གཉིས་སུས་མེད་པར་དགོངས་པ་བདེ་བ་ཆེན་པོ་མངོན་དུ་གྱུར་ཏེ་གཏང་རག་ཕུལ། སློབ་དཔོན་གྱིས་ཀྱང་། རྒྱུད་ལུང་མན་ངག་རྫོགས་པའི་བཻ་རོ་ཁྱོད། །མངའ་རིས་བོད་དུ་བསྟན་པ་བསྒྲག་རེ་རན། །ཞེས་སོགས་བོད་དུ་བསྟན་པ་སྤེལ་ཅིག་པར་བསྐུལ་ཞིང་། གདམས་ངག་བཙལ་ལུགས་གསུམ། སྦྱིན་པའི་གནས་བཞི། མི་སྦྱིན་པའི་གནས་བཞི་རྣམས་གསུངས། འདི་རྣམས་ཡེ་ཤེས་ཀྱི་སྐུ་ཡིན་ཡང་རུང་སྟེ་སྐྱེ་འཆི་མེད་པའི་ཟུང་འཇུག་གི་སྐུས་མཁའ་ཁྱབ་ཏུ་བཞུགས་པའི་ཕྱིར་དུས་སྔ་ཕྱི་སོགས་སོ་སྐྱེ་ལྟར་མི་བསམ་སྟེ་དཔེར་ན་འཕགས་པ་ཀླུས་དཔལ་ལྡན་ཟླ་བ་རྗེས་སུ་བཟུང་བ་ལྟ་བུ་སྟེ་མཆོག་གཟིགས་རྣམས་ཀྱི་སྤྱོད་ཡུལ་ཡིན་པས་སོ། །དེར་བཻ་རོས་རྐང་མགྱོགས་བསྒྲུབས་ནས་བོད་དུ་བྱོན་པའི་ལམ་དུ་ལི་བཟའ་ཚུལ་ཁྲིམས་སྒྲོན་མ་རྗེས་སུ་བཟུང་། དེ་ནས་བསམ་ཡས་བྱོན་ཏེ་བཙད་པོའི་དབུའི་མཆོད་གནས་སུ་བཀུར་ཏེ། ཉིན་མོར་རྗེ་བློན་ཐུན་མོང་བ་རྣམས་ལ་མཚན་ཉིད་རྒྱུ་ཡི་ཐེག་པ་དང་གསང་སྔགས་ཐུན་མོང་བའི་སྐོར་རྣམས་གསུངས། ནུབ་མོར་མངའ་བདག་གཅིག་པུ་ལ་རྫོགས་པ་ཆེན་པོའི་སྐོར་རྣམས་ལྐོག་ཆོས་སུ་གསུངས་པས། སེམས་སྡེ་སྔ་འགྱུར་ལྔ་བསྒྱུར་ཟིན་པ་དང་། རྒྱ་གར་བའི་ཕྲ་མ་དང་། བཙུན་མོ་དང་བློན་པོ་ཆོས་ལ་གནག་པའི་དབང་གིས་སློབ་དཔོན་ཉིད་རྒྱ་མོ་ཚ་བའི་རོང་དུ་བྱོན་དགོས་བྱུང་། དེར་དགེ་སློང་པུརྣར་འཁྲུངས་པའི་དུས་ཀྱི་སྔོན་རབས་གསལ་བས་རིམ་གྱིས་ཡུལ་གྱི་རྒྱལ་བློན་འབངས་རྣམས་དད་ནས་ཀུན་གྱི་མཆོད་གནས་སུ་བཀུར། རྩང་ལེགས་སྒྲུབ་ཀྱི་སྐྱེ་བ་རྒྱལ་བུ་གཡུ་སྒྲ་སོགས་ལ་ཉིན་པར་རྒྱུ་མཚན་ཉིད་དང་སྔགས་ཕྱི་པའི་ཆོས་རྣམས་གསུངས། སྲོད་ལ་གསང་སྔགས་ནང་གི་ཆོས་རྣམས་གསུངས། ནམ་གུང་ལ་གཡུ་སྒྲ་སོགས་འཁོར་ཐུན་མིན་རྣམས་ལ་མན་ངག་གི་ཆོས་རྣམས་གསུངས་པས་གཡུ་སྒྲས་ཚར་རེ་རེས་ཁོང་དུ་ཆུད་པར་གྱུར་ཀྱང་། ད་དུང་ཐུགས་མ་ཚིམས་ནས་ནན་གྱིས་གསོལ་བ་བཏབ་པས་དབང་གི་ཆུ་བོ་བདུན་རྫོགས་སུ་བསྐུར་ནས་མན་ངག་གཏད་རྒྱ་དང་བཅས་པ་སྩལ་པས་དགོངས་པ་རྗེ་དང་མཉམ་པར་གྱུར་ཏོ། །དེའི་ཚེ་བསམ་ཡས་ན་པཎ་ཆེེན་བི་མ་ལ་སྤྱན་དྲངས་ཏེ་བཞུགས་པའི་སྤྱན་སྔར་གཡུ་སྒྲ་ཆོས་གཏུགས་སུ་བྱོན་པས་ཆོས་ཀྱི་ཆེ་བ་འདོན་ཆེད་ཤེས་རབ་དང་རྫུ་འཕྲུལ་གཉིས་ཀ་བི་མ་ལས་གཡུ་སྒྲ་ལྷག་པའི་ཚུལ་བསྟན་པས་བོད་ཀྱི་རྗེ་བློན་རྣམས་དད་ནས་བཻ་རོ་སྤྱུགས་པ་ལ་འགྱོད་པ་སྐྱེས། དེར་གཡུ་སྒྲས་ལམ་དུ། སྤང་སངས་རྒྱས་མགོན་པོ། རྒྱ་བློ་གྲོས་གཞོན་ནུ། སྦས་རྡོ་རྗེ་རྒྱལ་མཚན་སོགས་ལ་གདམས་པ་བཏབ་པས་རྟོགས་གྲོལ་དུས་མཉམ་དུ་གྱུར། དེར་རྗེ་ཨུ་པ་དེ་ཤ་ཐང་ཟང་དཔལ་གྱི་རྡོ་རྗེ། གླང་དཔལ་གྱི་སྙིང་པོ་གསུམ་སྤྱན་འདྲེན་དུ་སླེབས་པ་བཞིན་བཻ་རོ་ཡབ་སྲས་སླར་དབུས་སུ་བྱོན་ནས་གཉགས་ཛྙཱ་ན་ཀུ་མ་ར་སོགས་ལ་ཆོས་ཀྱི་འཁོར་ལོ་རྒྱ་ཆེན་པོ་བསྐོར་ཏེ་སྐལ་ལྡན་དཔག་ཏུ་མེད་པ་སྨིན་གྲོལ་ལ་བཀོད་ནས་སླར་ཚ་བ་རོང་དུ་ཕེབས་ཏེ་སྣོད་ལྡན་དུ་མ་སྨིན་གྲོལ་མཛད། ཁམས་འོད་དུ་བྱམས་ཆེན་གྱི་གཙུག་ལག་ཁང་དུ། བི་མ་ལ་སོགས་པའི་པཎྜི་ཏ་གསུམ་སྤྱན་དྲངས། བཻ་རོས་ལོ་ཙཱ་མཛད་ནས་རྒྱུད་སྡེའི་ཆོས་མང་དུ་བསྒྱུར། ཡང་བཻ་རོ། སྤང་། སྦས་གསུམ་དགོངས་པ་ལྷན་དུ་བཞུགས་མཛད་ནས་འཁོར་ཐུན་མིན་རྣམས་ལ་ཨ་ཏི་ཡོ་གའི་རྒྱུད་མན་ངག་དཔག་ཏུ་མེད་པ་གསུངས། སླར་ཡང་དབུས་སུ་བྱོན་ནས་བསམ་ཡས་ཧས་པོ་རིའི་ཁ་ལ་བཞུགས་ནས་གདུལ་བྱའི་བློ་རིགས་དང་མཐུན་པའི་དྲང་ངེས་རྒྱུ་འབྲས་ཐུན་མོང་ཐུན་མིན་གྱི་ཆོས་བཀའ་མང་དུ་གསུངས། མཐར་ལི་ཟ་ཚུལ་ཁྲིམས་སྒྲོན་གྱིས་སྤྱན་དྲངས་ཏེ་ནམ་མཁའ་ལ་གློག་འཁྱུག་པ་ལྟར་ལི་ཡུལ་དུ་བྱོན་ནས་དེར་གདུལ་བྱ་མང་པོའི་དོན་མཛད་ཅིང་། ཡུན་གྱིས་དགོངས་པ་ལ་བཞུགས་ནས་ལྕང་ར་སྨུག་པོར་རྣམ་པར་སྣང་མཛད་ཀྱི་རྡོ་སྐུ་རང་བྱོན་གཅིག་བཞུགས་པའི་ཐུགས་ཀར་དབྱེར་མེད་དུ་འདྲེས་ནས་ཕུང་པོ་ལྷག་མེད་དུ་སངས་རྒྱས་པར་གྱུར་ཏོ། །འདིར་རྣམ་ཐར་འདྲ་འབག་ཆེན་མོའི་དགོངས་པ་ལྟར་བཀོད་པ་ཡིན་གྱི་གཞན་རྡོ་རྗེ་ཟམ་པའི་ལོ་རྒྱུས་སོགས་འདྲ་མིན་རྒྱས་བསྡུས་ཅི་རིགས་འབྱུང་བ་དེ་དང་དེར་བལྟ་བར་བྱའོ། །དེ་ནས་གཉགས་ཀྱིས་སོག་པོ་དཔལ་ཡེ་ལ་གནང་། དེས་གནུབས་ཆེན་ཡབ་སྲས་ནས་རིམ་པར་ཟུར་མེས་དབོོན་སོགས་ལ་བརྒྱུད་པ་ལ་སེམས་སྡེ་ཉང་ལུགས་སུ་གྲགས། ཡང་ཁམས་ཀྱི་གླང་ཐང་སྒྲོལ་མ་བྱོན་པའི་མཁས་པ་ཆེན་པོ་ཨ་རོ་ཡེ་ཤེས་འབྱུང་གནས་ལ་བཻ་རོ་དང་གཉགས་གཉིས་ཀས་གདམས་པ་བསྟན་ཞིང་འདིས་རྫོགས་ཆེན་སེམས་སྡེའི་བསྟན་བཅོས་ཆེན་པོ་ཐེག་ཆེན་རྣལ་འབྱོར་བྱ་བ་མཛད་པ་ཕྱི་མ་པཎ་ཆེན་ཇོ་བོ་རྗེས་གཟིགས་ཚེ་ཚིག་དོན་གྱི་ཆ་ཕུན་སུམ་ཚོགས་པ་གངས་རིའི་ཁྲོད་ན་འགྲན་ཟླ་དང་བྲལ་བའི་བསྟན་བཅོས་སུ་བསྔགས་པར་མཛད། དེས་ཡ་ཟི་བོན་སྟོན་གྲུ་གུ་ཀློག་འབྱུང་སོགས་ལ་བརྒྱུད་པ་ལ་ཁམས་ལུགས་ཞེས་གྲགས། ཡང་ཨ་རོ་ནས་བོན་ཅོག་གཉིས་ལ་གནང་། དེ་གཉིས་ཀས་ཀུན་མཁྱེན་རོང་ཟོམ་པ་ཆེན་པོ་ལ་བཤད། དེ་ལས་བརྒྱུད་པ་ལ་རོང་ལུགས་སུ་གྲགས། གཞན་ཡང་བརྒྱུད་ཚུལ་མི་འདྲ་བ་མང་དུ་ཡོད་དོ། །ཡང་བཻ་རོའི་སློབ་མ་སྤང་མི་ཕམ་མགོན་པོའི་སློབ་བརྒྱུད་ལ་འཇའ་ལུས་འགྲུབ་པ་ཤ་སྟག་བྱུང་སྟེ། དེ་ཡང་སྤང་མི་ཕམ་མགོན་པོ་བྱ་བ་ལོ་བརྒྱད་བཅུ་རྩ་ལྔ་ལོན་པ་སྔར་གཞོན་པའི་དུས་སུ་ཆོས་མ་འགྲུབ་ཅིང་། རྒས་ཏེ་འཁོར་དང་གཉེན་འདུན་གྱིས་སྡང་བ་ཞིག་ལ། ཀློང་དགུ་བམ་པོ་ཉི་ཁྲིའི་བཅུད་ཕྱུང་བ་རྡོ་རྗེ་ཟམ་པའི་མན་ངག་རྣམས་གནང་ཞིང་། རྒས་ཆེས་པས་ལུས་ཀྱི་ཟུངས་མ་ཐུབ་པར་སྒོམ་ཐག་དང་སྒོམ་རྟེན་བཅས་ལུས་གནད་འཆར་བཅུགགདམས་པ་ཡིད་ལ་བཟུང་བདེ་བའི་ཕྱིར་ཚུལ་ཤིང་ལག་ཏུ་གཏད་དེ་སྒོམ་བཅུག་པས་སྐྱེ་བ་མེད་པའི་དོན་རྟོགས། དགའ་ཆེས་ཏེ་སློབ་དཔོན་གྱི་མགུལ་བ་ནས་འཁྱུད་ནས་ཞག་གཅིག་བར་མ་བཏང་། དེར་རྩེ་གཅིག་ཏུ་ཉམས་སུ་བླངས་པས་ལོ་ལྔ་བརྒྱ་ན་ཕུང་པོ་ལྷག་མེད་དུ་གཤེགས། དེས་ཡུལ་དབུ་རུ་ངན་ལམ་རལ་གསུམ་པ། རྟེན་དགེ་སློང་མིང་བྱང་ཆུབ་རྒྱལ་མཚན་བྱ་བ་ལོ་དྲུག་ཅུ་ལོན་པ་ཞིག་ལ་གདམས་པ་བཏབ་ནས་ཝ་སེངྒེ་བྲག་ལ་སྒོམ་དུ་བཅུག་པས། ལོ་བརྒྱ་དང་བདུན་ཅུ་རྩ་གཉིས་ལོན་ཚེ་ཕུང་པོ་ལྷག་མེད་དུ་གཤེགས། དེས་མདོ་ཁམས་སྟོང་པ་རྟེན་དགེ་སློང་ཟ་ངམ་རིན་ཆེན་དབྱིག་བྱ་བ་ལ་གདམས་པ་བཏབ་ཅིང་། དེ་བྲག་དེ་ཉིད་དུ་བསྒོམས་པས། ལོ་བརྒྱ་དང་ཞེ་བཞི་ལོན་ཚེ་ལྷག་མེད་དུ་གཤེགས། དེས་ཡར་ལུང་འཕྱོས་པ་རྟེན་དགེ་སློང་ཁུ་འགྱུར་གསལ་བའི་མཆོག་ཅེས་པ་ལོ་ལྔ་བཅུ་རྩ་བདུན་ལོན་པ་ཞིག་ལ་གདམས་ནས་གནས་དེར་བསྒོམས་པས། ལོ་བརྒྱ་དང་བཅུ་བདུན་ལོན་ཚེ་ལྷག་མེད་དུ་གཤེགས། དེ་ལྟར་དཔོན་སློབ་གསུམ་ཀ་ཝ་སེངྒེ་བྲག་ཅེས་བྱ་བར་སྦྲུལ་ལོ་གཅིག་གི་ཐོག་སྐུ་འཇའ་ཚོན་ནམ་ན་བུན་ཡལ་བ་བཞིན་དུ་གཤེགས་སོ། །ཁུ་འགྱུར་གྱིས་ཉང་གཡུ་འབྲུག་སྟོད་པ་དགེ་སློང་བྱང་ཆུབ་གྲགས་པ་ལོ་བཞི་བཅུ་རྩ་བཞི་ལོན་པ་ཞིག་ལ་གདམས་པ་སྩལ་པས། ཁོང་ཡར་ལོག་སྟེ་བསམ་ཡས་མཆིམས་ཕུ། ཕུག་པོ་ཆེ་དང་ཡང་རྫོང་རྣམས་སུ་བསྒོམས་ནས། རང་གི་སློབ་མ་དང་ཡང་སློབ་ལ་འབྱུང་བཞི་ཟད་པར་གྱི་སྤྲུལ་བསྒྱུར་སྣ་ཚོགས་པ་བསྟན་ནས། འབྱུང་བའི་སྙིགས་མ་དྭངས་ནས་དྭངས་མ་ཡལ་བའི་བར་དུ་དེ་ལྟར་འོང་བ་ཡིན། ཤེས་རབ་ཀྱིས་བསྒོམ་རྒྱུ་མེད་པའི་དོན་མཐོང་ཡང་བརྡ་ལ་ཡེངས་པ་མེད་པར་བསྐྱངས་ན་དེ་ལྟར་དུ་རང་དབང་ཐོབ་པ་ལ་ཚེགས་མེད་དེ། མ་ཡེངས་པར་སྐྱོང་བ་གལ་ཆེ་བ་ཡིན་གསུངས། མཐར་གཙང་རྒྱ་མ་ཉེ་དུ་ཁའི་ཕུང་པོ་རི་བོ་ཆེ་ལ་ད་ལྟ་འདུག་འཕྲོར་རི་ཟུར་ནས་ཡར་སྐུ་ལུས་སྤྲིན་ཆད་པ་བཞིན་ལྷག་མེད་དུ་གཤེགས། དེས་དབུ་རུ་ཞའི་ཉང་ཤེས་རབ་འབྱུང་གནས་བྱ་བའི་དགེ་སློང་བགྲེས་པོ་ཞིག་ལ་གདམས་པ་བཏབ་པས། དེས་ཀྱང་ཟད་པར་གྱི་སྐྱེ་མཆེད་ལ་དབང་བསྒྱུར་པའི་སྤྲུལ་བསྒྱུར་སྣ་ཚོགས་བསྟན་མཐར། ཕུག་པོ་ཆེ་ལྷ་རིའི་རྩེ་མོ་ན་ཡོད་པའི་ཤུག་པ་རྐང་གཅིག་ལ་ན་བཟའ་དང་ཕྲེང་བ་ཀ་པཱ་ལ་རྣམས་གཟར་ནས་སྐུ་ནམ་མཁའ་ལ་འཇའ་ཚོན་དེངས་པ་བཞིན་སོང་ངོ་། །འདི་རྣམས་ནི་རང་བཞིན་རྫོགས་པ་ཆེན་པོ་གཞི་ཀ་དག་ཁྲེགས་ཆོད་ཀྱི་ལམ་མཐར་ཕྱིན་པས་ལུས་རྡུལ་ཕྲན་དུ་དེངས་ཤིང་སེམས་ཆོས་ཉིད་ཀྱི་ཀློང་དུ་གྲོལ་བས་མི་སློབ་པའི་ཟུང་འཇུག་མངོན་དུ་མཛད་པ་ཡིན་གྱི་ཐུན་མོང་གི་གྲུབ་པ་ལྟར་ལུས་མི་སྣང་བར་གྱུར་པ་ཙམ་ནི་མ་ཡིན་ནོ། །དེས་ཡུལ་ལོ་མོ་པ་རྟེན་དགེ་བསྙེན་མཚན་ཡེ་ཤེས་བྱང་ཆུབ་བམ་སློབ་དཔོན་སྦ་སྒོམ་དུ་གྲགས་པ་ལ་གདམས་པ་བཏབ་པས་རྟོགས་པ་ཁྱད་པར་ཅན་མངའ། རྡོ་ལ་འདམ་རྫབ་ལྟར་མཛད་པ། བྲག་ལ་སྐུ་སྤར་འདེབས་པ་སོགས་གྲུབ་པའི་རྟགས་མཚན་མངོན་དུ་བརྙེས། དགུང་ལོ་དགུ་བཅུ་རྩ་བརྒྱད་ལོན་པའི་ཚེ་བསྙུན་མེད་པར་གཤེགས། ཇོ་མོ་གང་མོས་ཕྱི་རོལ་གྱི་མི་རྣམས་ལ་པུར་མཇལ་མ་བཏང་བར་མཆོད་ཁང་དུ་མེར་སྦྱངས་པས་འོད་རྫ་མ་ཙམ་ནམ་མཁར་འགྲོ་བ་ཕྱི་རོལ་གྱི་མི་ཀུན་གྱིས་མཐོང་། ཤུལ་དུ་གདུང་རུས་གཅིག་ཀྱང་མ་བྱུང་ངོ་། །དེས་འཛིང་དྷརྨ་བོ་དྷི་ལ་གདམས་པ་ཡིན་ཏེ། འདི་ནི་ཡབ་ཡར་ལུང་ཐང་ཆུང་བཙད་པོའི་བུ་ཆེ་བ་བཀྲ་ཤིས་གཡུང་དྲུང་ཞེས་ཕྱིས་རབ་ཏུ་བྱུང་ཞིང་རྡོ་རྗེ་ཕུར་པའི་སྒོ་ནས་གྲུབ་པ་ཐོབ་པ་དེ་དང་། ཡུམ་མཚར་དགུ་སྐྱིད་དེ་གཉིས་ཀྱི་སྲས་སུ་ཆུ་ཕོ་འབྲུག་གི་ལོ་ལ་འཁྲུངས། འདི་རྗེ་བཙུན་མི་ལའི་བཅུ་གསུམ་པ་དེ་ཡིན། ལོ་བཅུ་དྲུག་ལོན་པའི་ཚེ་དམ་པ་རྒྱ་གར་དང་མཇལ། ཟླ་བ་བཅུ་དྲུག་ཕྱག་ཕྱིར་འབྲང་གདམས་ངག་ཕྲན་ཚེགས་མང་དུ་ཐོབ། དམ་པས་རྡོ་རྗེ་ཟམ་པ་དང་མཇལ་བར་ལུང་བསྟན་ཅིང་བྱིན་གྱིས་བརླབས། དེ་ནས་དབུས་སུ་བྱོན་ནས་གསན་པ་ཅི་རིགས་མཛད། སོ་ལྔ་ལོན་ཚེ་སློབ་དཔོན་སྦ་སྒོམ་དང་མཇལ། རིམ་གྱིས་ཡོན་ཏན་ཅན་དུ་ཤེས་ནས་གདམས་པ་གནང་བར་ཞུས་པས། ང་ལ་མན་ངག་རྡོ་རྗེ་ཟམ་པ་ཞེས་བྱ་བ་སྐད་ཅིག་མར་དོན་རྟོགས་ནས་ཚེ་གཅིག་ལུས་གཅིག་ལ་ཕུང་པོ་ལྷག་མེད་དུ་སངས་རྒྱས་པའི་བརྒྱུད་པ་བྲེང་མ་ཆད་པ་ཞིག་ཡོང་། དེ་གོང་ཕན་ཆད་སུ་ལའང་མ་སྨྲས་པ་ཡིན། ད་ཁྱོད་ལ་སྦྱིན་ནོ་གསུངས་ནས་རིམ་བཞིན་གྲོལ་ལམ་གྱི་དབང་བཞི་རྫོགས་པར་བསྐུར། གདམས་ངག་མ་ལུས་པ་གནང་། ཕྱིས་ཀྱང་བྱིན་རླབས་ལན་བཞི་ཙམ་ཞུས། ཞབས་ཏོག་འབུལ་ཆེན་ལན་ལྔ་ཙམ་བསྐྱལ། སློབ་དཔོན་གྱི་སྣང་བ་འདི་ཀུན་རྫུན་མའི་ཆོས་ཅན་ཡིན་གསུངས་ནས་ངོ་མཚར་བའི་རྫུ་འཕྲུལ་དུ་མ་ཡང་བསྟན་ཅིང་གདམས་ངག་གཞན་ཡང་མང་དུ་གནང་། གཞན་གྲུབ་ཆེན་ཡུ་མོ་བ། དྭགས་པོ་ལྷ་རྗེ། མ་ལབ་སྒྲོན། ཁམས་པ་ལུང་པ་སོགས་གསར་རྙིང་རིས་མེད་ཀྱི་མཁས་གྲུབ་དུ་མ་ལས་གདམས་ངག་རྒྱ་མཚོ་ལྟ་བུ་གསན་ཅིང་དེ་དག་ཏུ་དཀའ་ཐུབ་མཛད་པའི་ཚུལ་ཡང་། ཕུག་པོ་ཆེར་རྡོ་རྗེ་ཟམ་པ་ཞུས་ནས་བདུད་རྩིའི་དཀའ་ཐུབ་མཛད་པས་རིམས་ཀྱིས་རྫི་མ་ནུས། གནུབས་ཤོད་པོ་ཆེའི་དྲུང་དུ་བླ་མའི་བྲན་གྱི་དཀའ་ཐུབ་བྱས་པ་གར་ཕྱིན་དུ་བླ་མའི་ཐུགས་ལ་འདོགས། དམ་པ་རྒྱ་གར་གྱི་དྲུང་དུ་རྟོག་དཔྱོད་ཀྱི་དཀའ་ཐུབ་མཛད་པས་ཆོས་ཐམས་ཅད་ལ་རང་བྱན་ཚུད། སྐྱིད་ལུང་དུ་ཕུར་པའི་བཟླས་པ་ལ་དཀའ་ཐུབ་བྱས་པས་འཇིག་རྟེན་ལྷ་འདྲེས་ཅི་སྨྲས་ཉན། ཇོ་བོ་བཀའ་གདམས་པའི་ས་རུ་ཞི་དུལ་གྱི་དཀའ་ཐུབ་བྱས་པས་གར་ཕྱིན་དུ་གཞན་གྱིས་བྱམས། ཡི་གེ་བཞི་ལ་མི་སྡོད་པ་གསུམ་གྱི་དཀའ་ཐུབ་བྱས་པས་བདེ་དྲོད་འབར་ནས་གཙང་དུ་གཅེར་བུ་ལོ་ལྔ་བྱས། དེ་ལ་ངེས་ཤེས་སྐྱེས་ནས་ཕག་མོ་མངོན་འབྱུང་ལ་སྒྲུབ་པའི་དཀའ་ཐུབ་བྱས་པས་མགུར་མོའི་ནུབ་ཕྱོགས་སུ་རྗེ་བཙུན་མའི་ཞལ་གཟིགས། བརྡ་མང་པོ་གནང་། གནུབས་ཡུལ་རོང་དུ་རྨི་ལམ་སྦྱངས་པས་སྣང་བ་ཐམས་ཅད་རྨི་ལམ་དུ་ཤེས། གཞོ་སྟོད་ཏི་སྒྲོའི་ཤེལ་ཕུག་ཏུ་ཁྲོ་བོ་བདུད་རྩི་འཁྱིལ་བའི་ཞལ་མཐོང་། མི་མ་ཡིན་གྱི་བསྙེན་བཀུར་ཆེར་བྱས། ལྷ་ཟུར་དུ་བཅུད་ལེན་གྱི་བསྒྲུབས་པ་བྱས་པས་ཚེ་དཔག་མེད་ཞལ་མཐོང་། ཆོས་མང་པོའི་རྣམ་གཞག་རྒྱུད་ལ་ཤར། ཨོ་དཀར་བྲག་ཏུ་སྒྲུབ་པ་མཛད་པས་བདེ་མཆོག་ཡབ་ཡུམ་ཞལ་གཟིགས། ལན་གཅིག་འགྲོ་འདོད་པ་ཞིག་བྱུང་ནས། མོན་མགར་གྲོང་མོ་ཆེ་བའི་མདུན་དུ་བྱོན་ནས། ཆུའི་རྫིང་མོ་ཞིག་ལ་ཐུབ་ཆོད་དུ་མཆོངས་པས། འཁྱགས་ཆག་ནས་ཆུར་བྱིང་། སྐྱེངས་པའི་རྣམ་རྟོག་ཅིག་ཤར་ཙ་ན། ཆུ་ལ་རླངས་པ་ནམ་མཁའ་མི་མཐོང་བ་ཙམ་བྱུང་། མི་རྣམས་ངོ་མཚར་སྐྱེས་ནས་དགུན་གྲང་བདོ་བ་ལ་དེ་ཙམ་ཚུགས་པ། ལྕགས་བསྲེགས་ཆུ་ལ་བཙུད་པ་འདྲ་བྱུང་ཟེར། རང་འཁྱགས་པའི་རྣམ་པ་ནི་བྱུང་གསུངས། གྲོགས་ཀྱང་ཨ་ཙ་ར་སྟག་ཤམ་ཅན་སོགས་རྣལ་འབྱོར་གྱི་དབང་པོ་ཤ་སྟག་དང་འགྲོགས་ཤིང་སྣང་བ་ལ་ཐོག་རྫིས་ཤིན་ཏུ་ཆེ་བས། དགུན་འཁྱགས་པའི་རུམ། དབྱར་ཆུ་བོའི་གཞུང་། མ་ངེས་པའི་གཡང་རོང་ཟབ་མོར་མཆོང་བ་དང་མགོ་བརྡབ་པ། མཚོན་བརྡེག་སོགས་སྤྱོད་པ་ཚན་པོ་ཆེ་མ་བྱས་པ་མེད་པས་དཔའ་བོ་འཛེང་ཆུང་བར་གྲགས། སོ་མང་བཙན་ལ་ཕྱག་རྒྱ་ཆེན་པོ་བཏབ་པས་འཁྲུལ་སྣང་ཡེ་ཤེས་སུ་གནས་འགྱུར། རི་ཁྲོད་རླུང་ཆུང་པ་དང་དངུལ་མོ་རྒྱ་ལེ་ལྕམ་ལ་ཡི་གེ་བཞི་པ་དང་རྫོགས་ཆེན་བཏབ་པས་འཁྲུལ་ཞིག་ཆེན་པོ་གྱུར་ཏེ་མཐར་ཕུང་པོ་ལྷག་མེད་དུ་དེངས། མ་ཇོ་དད་ཅན་དང་། ཁམས་པ་སྙིང་རུས་ཅན་ཞིག་ལ་རྡོ་རྗེ་ཟམ་པ་བསྟན་པས་ནམ་མཁའ་དང་མཁའ་འགྲོའི་འཆི་ལུགས་ཀྱིས་ཕུང་པོ་ལྷག་མེད་དུ་སོང་། རས་པ་སྒོམ་སྟག་ཤོ་རས། རྒྱ་རས། རླུང་རས་སོགས་ལ་གདམས་པ་བཏབ་པ་ཙམ་གྱིས་བདེ་དྲོད་འབར། དེ་བཞིན་དུ་ཆོས་ཉིད་བསྟན་པ་ཙམ་གྱིས་རྟོགས་གྲོལ་དུ་སོང་བ་ཤིན་ཏུ་མང་། རྫུ་འཕྲུལ་གྱི་བཀོད་པ་རྒྱ་མཚོ་ལྟ་བུ་ལ་དབང་འབྱོར་པས་རེས་སྐུ་ལུས་འཇའ་རུ་འཁྱིལ། རེས་ཞབས་ས་ལ་མི་རེག་པར་གཤེགས། སྣང་སེམས་རོ་གཅིག་ཏུ་འདྲེས་པས་བྲག་གཡང་ལ་བྱ་ལྟར་ལྡིང་བ་དང་། ཐག་རིང་པོའི་ས་ཡང་ཡུད་ཙམ་ལ་འཁོར་ཞིང་། གཞན་གྱི་སེམས་ཤེས་པ་སོགས་མངོན་པར་ཤེས་པ་ཐོགས་མེད་དུ་མངའ་བས་མ་འོངས་པ་ཐམས་ཅད་ལུང་སྟོན་པས་མཚོན་ངོ་མཚར་བའི་རྣམ་ཐར་བསམ་གྱིས་མི་ཁྱབ་ཅིང་མན་ངག་རྡོ་རྗེ་ཟམ་པ་གཙོ་བོར་གྱུར་པའི་ཟབ་པ་དང་རྒྱ་ཆེ་བའི་ཆོས་ཀྱི་བདུད་རྩིས་སྐལ་བ་དང་ལྡན་པའི་རེ་བ་ཡོངས་སུ་བསྐངས་ནས། རེ་ཞིག་ན། ངས་ལོ་མང་པོ་ལོན་ཏེ་ང་ལའང་ཏིག་པོ་བཤད་རྒྱུ་མེད་གསུངས། དེ་ནི་རྟོག་དཔྱོད་ལ་འཛིན་པ་དག་ནས་དགོངས་པ་ཟད་སར་འཁྱོལ་བའི་རྟགས་ཡིན། དེར་འཁོར་རྣམས་ཀྱིས་དགེ་རྩ་ཞིག་མཛད་པར་ཞུས་པས། འདུས་བྱས་ཀྱི་དགེ་རྩ་ལ་ཐུགས་མི་གཏོད། བཅུད་ལེན་ཞིག་མཛད་པར་ཞུས་པས་ཀྱང་། བཅུད་ལེན་བྱས་ན་ལོ་བཅུ་ཙམ་ཚེ་བསྲིང་ནུས་ཏེ། དུས་ངན་ལ་ཚེ་རིང་བས་དགོས་པ་མེད་གསུངས་ནས། དགུང་གྲངས་བརྒྱ་དང་བཅུ་བདུན་ལོན་པས་ས་ཕོ་བྱི་བའི་ལོ་ལ་སྐུ་གཤེགས། པུར་སྦྱངས་པས་ནམ་མཁར་འཇས་གང་། མཆོད་རྟེན་དང་རིང་བསྲེལ་ཡང་མང་དུ་བྱོན། འདི་ནི་ཚོགས་པ་བསྐྱངས་པས་སྙིགས་མ་འཇའ་ལུས་སུ་མ་དེངས་ཀྱང་། དོན་གྱི་ཀ་དག་ཆོས་ཟད་ཀྱི་ས་ལ་མྱ་ངན་ལས་འདས་པའི་རྟགས་མཐའ་དག་ཚང་ཞིང་སློབ་མ་ཡང་། འཛེང་ཇོ་སྲས། སློབ་དཔོན་ཀུན་བཟང་། ཉང་དྷརྨ་སེདྷ། གསེར་ལུང་པ། དུ་རྡོ་རྗེ་རྒྱལ་མཚན། གཟིག་ཡེ་ཤེས་དབང་པོ། གཡག་སྟོན་ཟླ་བ་འོད་ཟེར། སྐྱེ་ཚེ་ཡེ་ཤེས་དབང་ཕྱུག་སོགས་མཁས་པ་དང་གྲུབ་པའི་ཡོན་ཏན་གྱིས་མཐོ་ཞིང་། བཤད་སྒྲུབ་གཉིས་ཀྱི་སྒོ་ནས་ངེས་གསང་སྙིང་པོའི་བསྟན་པའི་གསལ་བྱེད་ཆེན་པོར་གྱུར་པའི་བཤེས་གཉེན་ཆེས་མང་ངོ་། །དེ་ལྟར་འཛེང་ཡབ་སྲས་རྣམས་ཀྱི་བཀའ་དྲིན་ལས་མན་ངག་རྡོ་རྗེ་ཟམ་པའི་སྐོར་རྣམས་བཤད་སྒྲུབ་གཉིས་ཀའི་སྒོ་ནས་ཕྱོགས་ཀུན་ཏུ་དར་ཞིང་རྒྱས་པར་གྱུར་ཏེ་ད་ལྟའི་དུས་ཀྱང་སྨིན་གྲོལ་གྱི་རྒྱུན་མ་ཉམས་པར་བཞུགས་སོ། །གསུམ་པ་མན་ངག་སྡེའི་མཆོག་ཏུ་ཟབ་པ་སྙིང་ཐིག་གི་སྐོར་ལའང་། སྤྱིར་སློབ་དཔོན་ཆེན་པོ་བི་མ་ལ་ནས་བརྒྱུད་པ་དང་། ཤྲཱི་སེང་ཧས་པདྨ་འབྱུང་གནས་ལ་གསུངས་ཤིང་དེ་ལས་བརྒྱུད་པ་དང་། བཻ་རོ་ཙཱ་ནས་སློབ་དཔོན་ཤྲཱི་སེང་ལས་གསན་ཏེ་བརྒྱུད་པ་དང་གསུམ་དུ་བྱུང་བ་ལས་ཕྱི་མ་གཉིས་ནི་ཟབ་གཏེར་ཁོ་ན་ལས་བྱུང་བ་ཡིན་པས་ལོ་རྒྱུས་རྣམས་གཏེར་འབྱུང་དག་ཏུ་གསལ། བི་མའི་བརྒྱུད་པ་རྣམས་བཀའ་གཏེར་གཉིས་སུ་བྱུང་བ་སྟེ། དེ་ཡང་ཉང་བན་ཏིང་འཛིན་བཟང་པོ་བྱ་བ་ལོ་བདུན་དང་ཟླ་བ་བདུན་དུ་ཏིང་ངེ་འཛིན་ཐུན་གཅིག་གི་གནས་ཤིང་ཤའི་སྤྱན་རྣམ་པར་དག་པས་གླིང་བཞི་དུས་གཅིག་ལ་གཟིགས་པ་ཞིག་བཞུགས་པ་དེས་ལུང་བསྟན་ཞིང་བསྐུལ་བས། ལྷ་བཙད་པོས་ལོ་ཙཱ་མཁས་པ་སྐ་ཅོག་རྨ་གསུམ་གསེར་ཕྱེ་བྲེ་དགུ་དང་གསེར་གྱི་པ་ཏྲ་བཞི་བཞིའི་སྐྱེས་དང་བཅས་པ་བརྫངས་ནས། འཕགས་ཡུལ་སེར་སྐྱའི་གྲོང་ཁྱེར་ནས། མགོན་པོ་བྱམས་པའི་སྤྲུལ་པ་ཆོས་སྐྱོང་བའི་རྒྱལ་པོ་ཨིནྡྲ་བོ་དྷིའི་མཆོད་གནས་པཎ་ཆེན་ལྔ་བརྒྱའི་གཙུག་རྒྱན་འཕོ་ཆེན་འཇའ་ལུས་རྡོ་རྗེའི་སྐུ་བརྙེས་པའི་སློབ་དཔོན་བི་མ་མི་ཏྲ་སྤྱན་དྲངས་པར་རྒྱ་གར་པས་ཕྲག་དོག་གི་དབྱེན་བཅོས་པས་བོད་རྣམས་ཐེ་ཚོམ་དུ་གྱུར་པ་ལ་ངོ་མཚར་བའི་ཆོ་འཕྲུལ་གྱིས་དད་པར་མཛད། རྒྱུ་འབྲས་ཀྱི་ཆོས་སྤྱི་དང་། བྱེ་བྲག་གཡུ་སྒྲས་ལོ་ཙཱ་མཛད་ནས་སེམས་སྡེ་ཕྱི་འགྱུར་བཅུ་གསུམ་བསྒྱུར། ཐུན་མིན་གསང་བ་སྙིང་ཐིག་གི་སྐོར་རྣམས་མངའ་བདག་དང་སྲས་མུ་ནེ་བཙན་པོ་ཉང་བན་སྐ་ཅོག་གཉིས་དང་ལྔ་ལ་ལྐོག་ཆོས་སུ་གནང་ཞིང་། མཆོག་ཏུ་ཟབ་པའི་གདམས་ངག་གི་དཔེ་རྣམས་བོད་ཡིག་ཏུ་བསྒྱུར་ནས་མཆིམས་ཕུའི་ཀེ་གོང་དུ་ཕྱི་རབས་བསྟན་པའི་བཙས་སུ་གཏེར་དུ་སྦས་ནས་སློབ་དཔོན་ཉིད་རྒྱ་ནག་རི་བོ་རྩེ་ལྔར་བྱོན་ཏེ་གནས་དེར་ཐུབ་བསྟན་ཇི་ཙམ་གནས་ཀྱི་བར་སྐུ་ལུས་དེ་ཉིད་ཀྱིས་བཞུགས་ནས། ལྗོངས་འདིར་སྤྲུལ་པ་རེ་ལོ་བརྒྱ་བརྒྱ་ན་འབྱོན་ཅིང་གསང་བ་སྙིང་ཐིག་གི་བསྟན་པ་སྤེལ་བ་ཞལ་གྱིས་བཞེས་སོ། །བི་མ་ལ་རྒྱ་ནག་ཏུ་གཤེགས་ནས་ལོ་ལྔ་བཅུ་རྩ་ལྔ་ན་ཉང་བན་ཏིང་འཛིན་བཟང་པོ་ཟག་པ་ཟད་པའི་ཕུང་པོར་གྱུར། རྡོ་རྗེ་ལེགས་པས་ཁམས་སུ་སེར་བ་ཕབ་པའི་ནས་རྔ་མོའི་རྒྱལ་ཁབ་ལྔ་བརྒྱ་ཕུལ་བ་ལ་བརྟེན་ནས་དབུ་རུ་ཞྭའི་ལྷ་ཁང་བཞེངས། གདམས་ངག་གི་དཔེ་རྣམས་ཀེའུ་ཚང་རིམ་གསུམ་གྱི་སྒོའི་ཀ་བའི་ཁོང་དུ་སྦས། སྙན་བརྒྱུད་རྣམས་འབྲོ་རིན་ཆེན་འབར་ལ་བཤད་དོ། །ཉང་བན་འོད་དུ་དེངས་ནས་ལོ་བརྒྱ་འདས་པ་ན། དབུ་རུ་གཞོའི་ལྡང་མ་བ་དགེ་མཆོག་གི་བུ་པཎ་ཆེེན་བི་མ་ལའི་རྣམ་འཕྲུལ་གནས་བརྟན་ལྡང་མ་བ་ལྷུན་གྱི་རྒྱལ་མཚན་ཞེས། རྟེན་སྔགས་བཙུན་ཅོ་བྲེག་གི་ཚུལ་གྱིས་དབུ་རུ་ཞྭའི་ལྷ་ཁང་གི་གནས་བརྟན་ཏེ་དཀོར་གཉེར་དཀྱུས་མའི་རྣམ་པར་ཡུན་རིང་དུ་བཞུགས་པ་ལ་ཞྭའི་མགོན་པོས་ལུང་བསྟན་ནས་སྔར་སྦས་པའི་གཏེར་རྣམས་ཕྱུང་ཞིང་། འབྲོའི་སློབ་མ་དབས་བློ་གྲོས་དབང་ཕྱུག་ལས་ཚིག་བརྒྱུད་ཀྱང་མཉན་ནས་ཆོས་ཉིད་ཡིད་དཔྱོད་དུ་མ་ལུས་པར་ཉམས་སུ་བླངས། མན་ངག་རྙེད་ནས་ལོ་བཅོ་ལྔ་པར་བཤད་རྒྱུད་བཞག་པའི་སྣོད་འཚོལ་དུ་བྱོན་པས་ཉང་སྟོད་ནས་ལྕེ་བཙུན་སེང་གེ་དབང་ཕྱུག་རྙེད་ནས་གདམས་པ་རིམ་པ་བདུན་བཏབ། དེ་དང་ཉེ་བར་ཁ་རག་གི་བལ་པོ་སྒོམ་ཆུང་ལའང་བཏབ་པས་ཁོང་ཡང་དེས་གྲོལ། ལྕེ་བཙུན་ལ་དཔེ་རྣམས་ཁྲའི་ཟླ་བ་ལ་སྐྱོལ་ཅིག་གསུངས། དེ་ནས་མི་རིང་བར་སྐུ་གཤེགས་པས་ནམ་མཁར་འཇས་ཁེངས། སྐུ་གདུང་དང་རིང་བསྲེལ་དཔག་ཏུ་མེད་པ་བྱོན་པ་སོགས་ཕུང་པོ་ལྷག་བཅས་ཀྱི་མངོན་པར་བྱང་ཆུབ་པའི་ཡེ་ཤེས་མངོན་དུ་མཛད། ཕྱིས་ལྕེ་བཙུན་གྱིས་འབུལ་བ་ཤིན་ཏུ་མང་པོ་ཁྱེར་ནས་བྱོན་པས་སྙེ་ཐང་དུ་མལ་གྲོའི་ཉང་བཀའ་གདམས་པ་དང་འཕྲད། དེས་གནས་བརྟན་གཤེགས་པའི་གཏམ་བཤད་པས། འབུལ་བ་རྣམས་དགེ་འདུན་པ་ལ་ཕུལ། དེར་ཉང་བཀའ་གདམས་པས་ལྕེ་བཙུན་ལ་གདམས་ངག་ཡོད་པར་ཤེས་ནས་ཞུས་པས་སློབ་དཔོན་གྱིས་སྣོད་ལྡན་དུ་མཁྱེན་པས་བསྩལ། དེས་གཞོའི་ཏི་སྒྲོའི་བྲག་ཏུ་ལོ་གཉིས་བསྒོམས་པས་ཕུང་པོ་ལྷག་མེད་དུ་གཤེགས། དེ་ལ་ལྕེ་བཙུན་ཆེན་པོ་ནི། ཡུལ་ཉང་རོ་གཉན་ཚོའི་ལྕེ་ཐུབ་པའི་དབང་པོའི་སྲས་གཞོན་ནུ་ནས་མང་དུ་ཐོས་པའི་ནོར་གྱིས་ཕྱུག་པ་ཞིག་ཡིན། རི་གཟར་རྒོད་པོ་ལུང་དུ་གནས་བརྟན་ལྡང་མ་བ་དང་མཇལ་ཞིང་ཁ་རག་ཏུ་གདམས་པ་རྫོགས་པར་ཐོབ། སློབ་དཔོན་གཤེགས་ནས་གཏེར་དཔེ་རྙིང་པ་རྣམས། ལང་གྲོ་འཆད་པ་སྟག་འདྲ་དང་། འོ་ཡུག་དང་བྱར་གྱི་ཕུ་སྟེ་གཏེར་ཁ་གསུམ་དུ་སྦས། འོ་ཡུག་ནས་ཤངས་མན་ཆོད་ཀྱི་རི་རྒྱུད་རྣམས་ལ་འཕོ་ཞིང་བསྒོམས་པའི་ཚེ། རྨི་ལམ་དུ་ཨ་ཙ་ར་གཅིག་བྱུང་ནས། བདག་ནི་བི་མ་མི་ཏྲ་མཁས་པ་སྟེ། །སྐལ་ལྡན་སྙིང་པོའི་ཡང་བཅུད་དོན་འདོད་ན། །མཆིམས་ཕུ་བྲག་དམར་ཀེ་གོང་ཡར་འདེབས་ལ། །གསང་བ་སྙིང་ཏིག་སྙིང་དང་འདྲ་བ་ཡོད། །དེ་དག་ཁྱེར་ལ་འོ་ཡུག་ཕྱི་གོང་དུ། །སུས་ཀྱང་མཐོང་བ་མེད་པ་ལོ་བདུན་སྒོམས། །ཟག་བཅས་ཕུང་པོ་སྣང་བ་མ་ཡིན་ནོ། །ཞེས་ལུང་བསྟན་པས་མཆིམས་ཕུར་བྱོན་ཏེ་ཟབ་པ་པོད་བཞིའི་གཏེར་དཔེ་རྣམས་གཏེར་སྲུང་གི་དངོས་སུ་སྤྲད་པ་ཁྱེར་ནས་འོ་ཡུག་ཕྱི་གོང་རྫིའི་ར་བར་བཞུགས་པའི་ཚེ་བི་མ་ལ་དངོས་སུ་བྱོན་ནས་ཟླ་བ་ཕྱེད་དུ་བཞུགས་ཤིང་དབང་ཁྲིད་གདམས་པ་མཐའ་དག་རྫོགས་པར་གནང་། དེ་ནས་ལྕེ་བཙུན་གྱིས་ལོ་བདུན་བསྒོམས་པས་ཕུང་པོ་ལྷག་མེད་གྲུབ། སྤྲུལ་པའི་སྐུ་ཞང་སྟོན་ལ་གདམས་ངག་རྫོགས་པར་བྱིན་ནས། དགུང་གྲངས་བརྒྱ་དང་ཉེར་ལྔ་བཞེས་པའི་སྟོན་ཟླ་ར་བའི་ཚེས་བཅུ་ལ་འོ་ཡུག་ཕྱི་གོང་རྫའི་ར་བར། ཨོ་རྒྱན་གྱི་ཌཱ་ཀིའི་གཙོ་མོ་དཔལ་གྱི་བློ་གྲོས་མ་སོགས་ཡེ་ཤེས་དང་ལས་དང་འཇིག་རྟེན་གྱི་མཁའ་འགྲོ་མ་སྤྲིན་བཞིན་དུ་གཏིབས་ནས་ཚོགས་ཀྱི་འཁོར་ལོའི་འདུ་བ་ལ་ལོངས་སྤྱོད་པའི་ཚེ། ལྕེ་བཙུན་ཆེན་པོ་ཉིད་དབྱིངས་ཀ་དག་གི་ཟང་ཐལ་གྱི་ཏིང་ངེ་འཛིན་ལ་བཞུགས་ནས་སྐུ་མི་སྣང་བའི་འོད་ཀྱི་རང་བཞིན་དུ་གྱུར་ཏོ། །དེའི་ཚེ་མཁའ་འགྲོ་མ་རྣམས་ཀྱིས། ཀྱེ་མ་ཀྱི་ཧུད་ཀྱེ་མ་བློང་། །སོགས་གདུང་ཚིག་བཏོན་པས་ལྷུན་གྲུབ་རིག་རྩལ་གྱི་ཏིང་ངེ་འཛིན་ལ་འཕོས་པའི་དེ་མ་ཐག་པར་ཡེ་ཤེས་ཀྱི་སྐུ་མངོན་དུ་སྣང་བར་མཛད་ནས་ཆོས་ཉིད་རྡོ་རྗེའི་རང་སྒྲས་འདས་རྗེས་གདམས་པའི་སྙིང་པོ་སྩལ་པ་རེ་ཞིག་ཌཱ་ཀི་རྣམས་ཀྱི་ཕྱག་ཏུ་བཟུང་བ། ཕྱིས་སྙིགས་མ་ལྔ་བདོའི་དུས་འདིར་དར་བ་ལུང་བསྟན་པ་བཞིན། སློབ་དཔོན་འཇམ་དཔལ་བཤེས་གཉེན་དང་། པཎ་ཆེན་བི་མ་ལའི་ཡེ་ཤེས་ཟུང་དུ་འཇུག་པའི་རྣམ་འཕྲུལ་ས་གསུམ་ན་འགྲན་ཟླ་དང་བྲལ་བའི་གྲུབ་པའི་སློབ་དཔོན་ཆེན་པོ་བཀའ་བབས་བདུན་གྱི་གསང་མཛོད་འཆང་བ་འོད་གསལ་སྤྲུལ་པའི་རྡོ་རྗེས་ཆུ་མོ་ཡོས་ཀྱི་ལོ་སྣྲོན་ཟླའི་ཡར་ཚེས་བརྒྱད་ཀྱི་ཉིན་རྗེས་སུ་དྲན་པའི་ཆོ་འཕྲུལ་གྱིས་གཏན་ལ་དབབ་པ་ལྕེ་བཙུན་ཟབ་ཏིག་ཏུ་གྲགས་པ་འདིའོ། །གཏེར་སྦས་པའི་ལོ་སུམ་ཅུ་ན་རོང་སྣར་མདའི་ལྕེ་སྒོམ་ནག་པོས་འོ་ཡུག་གི་གཏེར་བཏོན། དེ་བཞིན་དུ་ལང་གྲོ་འཆད་པ་སྟག་འདྲ་ནས་ཤངས་པ་རས་པས་ཀྱང་བཏོན་ནས་སོ་སོས་ཉམས་སུ་བླངས་ཤིང་གཞན་ལའང་རྒྱ་ཆེར་བཤད་དོ། །དེ་ལ་ཞང་སྟོན་བཀྲ་ཤིས་རྡོ་རྗེ་ནི། ཡུལ་ཡར་འབྲོག་སྒང་གི་སྒྲུབ་མཚོ་བླ་དོ་ཞེས་པར་ཡབ་ཞང་སྲས་རྡོ་རྗེ་དངོས་གྲུབ་དང་། ཡུམ་ཞུ་མོ་ཉེ་རེ་ལྕམ་གྱི་སྲས་སུ་མེ་མོ་གླང་གི་ལོ་ལ་འཁྲུངས། དགུང་ལོ་བཅུ་གཅིག་པར་ལྕེ་སྒོམ་ནག་པོ་ལས་གདམས་ངག་མང་དུ་གསན། དེ་ནས་ཉེར་གཅིག་བར་དུ་མཁས་གྲུབ་ཀྱི་བླ་མ་དུ་མ་ལས། སྡེ་སྣོད་རྒྱུད་སྡེ་གསར་རྙིང་ཀུན་ལ་སྦྱངས་པས་མཁྱེན་རབ་ཀྱི་པདྨོ་རྒྱས། ཉང་སྟོད་ཁུ་ཡུལ་ན་ཡོད་པའི་ཚེ། ནམ་མཁའ་ལས། བླ་མ་དང་ཐུགས་རྗེ་ཆེན་པོ། སྒྲོལ་མ་སོགས་ཀྱི་ཞལ་མཐོང་ཞིང་། ཀྱེ་ཀྱེ། ཨེ་མ། ཚེ་གཅིག་གིས་སངས་རྒྱས་པའི་མན་ངག་རྫོགས་པ་ཆེན་པོ་གསང་བ་བླ་ན་མེད་པའི་སྐོར་བྲག་སེངྒེ་དང་འདྲ་བ་ལ་ཡོད་ཀྱིས་ཐོན་ལ། སེམས་ཅན་དཔག་ཏུ་མེད་པའི་དོན་གྱིས་ཤིག་ཅེས་ལུང་བསྟན་ཐོབ། དམ་ཅན་མི་དཀར་ཞྭ་དཀར་ཅན་དུ་བྱས་ནས་དངོས་གྲུབ་བྱིན་གྱིས་འདེང་ཟེར་ནས་ཁྲིད། ཉང་སྨད་པ་ཚབ་ཏུ་ལྷ་གསོལ་བ་རྣམས་ཀྱིས་བཞེས་པ་དྲངས། སྟག་ཐབས་སུ་ཁང་སྟོང་ཞིག་ཏུ་ཉལ་བས་འདིར་མི་རུང་ཟེར། བྲག་ཕུག་ཅིག་ཏུ་བྱོན་ཙ་ན་ཁང་སྟོང་དེ་འགྱེལ། ཁོའི་སྤྲུལ་པས་བཟའ་བཏུང་བྱིན། འོ་ཡུག་མདའ་ན་འཁྲུགས་པ་ཆེན་པོ་ཡོད་པའང་རྡོ་རྗེ་ལེགས་པས་བསྒྲིབས་ནས་དམག་གིས་མ་མཐོང་། བྱར་གྱི་ཕུའི་བྲག་སེངྒེ་འདྲ་བའི་རྩེར་སླེབ་ཚེ་ཁོ་སྟོར། ལམ་མ་རྙེད་ནས་གཟིགས་པས་བྲག་ཕུག་ཁ་བྱང་བསྟན་སྒོ་རྩྭས་འགགས་པ་ཞིག་མཐོང་ནས་དེར་བྱོན་པས་ནང་ན་དཀྱིལ་འཁོར་ཞིག་འདུག་པ་དེ་བསལ་བས་དང་པོར་སྦལ་སྦྲུལ་ཤིག་ཤིག་སྣང་། དེ་ནས་ཁ་བྱང་རྙེད་དུས་མི་དཀར་དེས་སྒྲོན་མེ་བཏེགས། དར་ཅིག་ན་གདངས་དང་སྐད་ཤིན་ཏུ་མི་བསྲུན་པ་ཞིག་བྱུང་། ཁོས་བརྡ་སྦྱར་བས། ངས་ཨ་ཅེ་ཁྲིད་ནས་འོང་གི་ཟེར་བའི་མོད། ཨེ་ཀ་ཛ་ཊི་སྤྱན་ཁྲག་ཏུ་ཁོལ་བ། མཆེ་བ་གཙིགས་ཤིང་བལྟར་མི་བཟོད་པ་ཙམ་བྱུང་། ཁོས་འདི་ནི་ལུང་བསྟན་པ་དེ་ཡིན་ནོ་བྱས་པས། དེར་ན་རེ། ང་ནི་ཨེ་ཀ་ཛ་ཊི་ཡིན། །ཚོགས་འཁོར་བརྒྱ་དང་རྩ་བརྒྱད་ཐོངས། །ལོ་གསུམ་བར་དུ་མ་བཤད་ཅིང་། །གསུངས་ནས་བཞུད་དོ། །དེར་བྲག་ཕུག་གི་སྒོ་ནས་གཡུ་གཉིས་རྙེད་པ་ལ་རྒྱུ་བྱས་ནས་ཚོགས་འཁོར་རྣམས་བཏང། ལོ་ཉེར་ལྔ་པ་ལ་དབུས་སུ་བྱོན། མཆིམས་ཕུ་ནས་བི་མའི་ཆོས་གཏེར་ཡང་ཐོན། བི་མ་དངོས་དང་མཇལ་ནས་རྗེས་གནང་ཐོབ། སླར་ཤང་རྟ་ནག་ཏུ་བྱོན་པའི་ཟམ་ཁར་ལྕེ་བཙུན་ཆེན་པོ་དང་མཇལ། གསང་བ་སྙིང་ཐིག་གི་གདམས་པ་རྫོགས་པར་ཐོབ། སྐུ་ན་མཐོན་པོར་སོང་ནས་བརྒྱུད་འཛིན་དུ་སྲས་ཉི་འབུམ་དང་ཟླ་འབུམ་གཉིས་བསྐྲུན། ངས་ཚོགས་པ་མ་བསྐྱངས་ན་ཕུང་པོ་ལྷག་མེད་འོང་བ་ཡིན་གསུངས། ལུས་ཤིན་ཏུ་སྦྱངས་པ་བྱང་ཆུབ་ཀྱི་ཡན་ལག་ལ་དབང་ཐོབ་པས་རེས་འགའ་རྒྱལ་བ་རིགས་ལྔར་གསལ། སྐུ་ལུས་ལ་གྲིབ་མ་མི་མངའ། རྫོགས་ཆེན་ནམ་གསུང་ལ་འཇའ་གུར་འཁྱིལ་བ་སོགས་ངོ་མཚར་བའི་ལྟས་མང་པོ་ཡོད། དགུང་གྲངས་དོན་གཅིག་པ་མེ་ཕག་ས་ག་ཟླ་བའི་ཉེར་གཉིས་ལ་ཤར་ཕྱོགས་ཀྱི་མཁའ་ལ་སྒྲ་ཆེན་པོ་བདུན་གྲགས་ཤིང་། ས་གཡོ་བ་དང་། འཇའ་དང་། འོད་དང་། སིལ་སྙན་གྱི་སྒྲ་དང་། དྲི་ཞིམ་གྱི་ངད་སོགས་གདོད་མའི་ས་ལ་མངོན་པར་བྱང་ཆུབ་པའི་རྟགས་རྣམས་བསྟན་ཏེ་གཤེགས་སོ། །དེའི་ཕྱི་ནུབ་པུར་སྦྱངས་པས་གདུང་ཆེན་ལྔ་དང་། རིང་བསྲེལ་ཁ་དོག་ལྔ་པ་སྐུ་ལྔའི་རྒྱལ་ཚབ་ཏུ་བྱོན། འཇའ་གུར་དང་མེ་ཏོག་གི་ཆར་ལ་སོགས་པས་འགྲོ་བ་མང་པོ་དད་པའི་གནས་ལ་སྦྱར་ཞིང་དེར་གནས་པ་རྣམས་རང་བཞིན་གྱིས་བསམ་གཏན་ལ་གནས་པའང་འབྱུང་ངོ་། །དེ་ལྟར་གོང་སྨོས་གཏེར་སྟོན་ལྔས་སྤྱན་དྲངས་པ་བཅས་བཀའ་གཏེར་ཕྱོགས་སྡོམ་སྙིང་ཏིག་ཆེན་མོ་འདི་ལ། རྒྱུད་བཅུ་བདུན། བཀའ་སྲུང་ཁྲོས་མའི་རྒྱུད་དང་བཅོ་བརྒྱད་སོ་སོའི་དགོངས་འགྲེལ་དང་བཅས་པ། མན་ངག་གི་ཡི་གེ་བརྒྱ་བཅུ་དགུ་ཟབ་པ་པོད་བཞི་བཅས་ཕྱོགས་སྡོམ་པོད་བདུན་ཙམ་བཞུགས་པ་ལ། དེང་སང་། རྒྱུད་ཡོངས་རྫོགས། ཟབ་པ་པོད་བཞི། མན་ངག་གི་ཡི་གེ་ཐོར་བུ་བཞུགས་པ་ཡིན་ནོ། །དེའི་སློབ་མ་སྒྲ་ཐལ་འགྱུར་ནས་ཕྱག་རྡོར་སྤྲུལ་པ་བཛྲ་ཕ་ལར་ལུང་བསྟན་པའི་རང་སྲས་ཉི་མ་འབུམ་ནི། ཡུམ་རྒྱལ་མོ་གཡུང་དེའི་སྲས་སུ་འཁྲུངས། ལོ་ལྔ་ནས་རིམ་པར་ཡབ་ལས་གསང་བ་སྙིང་ཏིག་གི་དབང་ཁྲིད་གདམས་པ་རྣམས་ཉམས་འོག་ཏུ་ཆུད་པར་མཛད། བཅུ་པ་ལ་ཆེ་འདོན་བྱས་པའི་སྐབས་རྒྱུད་བཅུ་བདུན་ལ་བཤད་པ་མཛད་པས་བུ་སློབ་ཀུན་ངོ་མཚར་སྐྱེས། ཉི་ཤུའི་བར་དུ་སྒྲུབ་པ་ཁོ་ན་མཛད། དེ་ནས་རྗེས་ཐོབ་སྒྱུ་མ་ལྟ་བུ་དང་འགྲོགས་ནས་ས་སྐྱའི་གྲགས་རྒྱལ་སོགས་མཁས་གྲུབ་ཀྱི་བླ་མ་མང་པོ་བསྟེན་ནས་མདོ་རྒྱུད་ཀུན་ལ་ཐོས་བསམ་ཕྱོགས་མེད་མཛད། ཚིག་དོན་ཆེན་མོ་བྱ་བའི་བསྟན་བཅོས་ཀྱང་མཛད་ནས་ལྔ་བཅུ་རྩ་དྲུག་པར་གཤེགས། པུར་སྦྱངས་པས་གདུང་རིགས་ལྔ་བྱོན་འཇའ་ཚོན་གྱི་གུར་ཕུབ། ཆོ་འཕྲུལ་ཟླ་བ་ལ་ཁུག་ཆོས་མེ་ཏོག་སྐྱེས་པ་སོགས་བྱུང་ངོ་། །དེའི་སློབ་མ་ཆོས་བདག་གུ་རུ་ཇོ་འབེར་ནི། གཅུང་པོ་ཟླ་འབུམ་གྱི་སྲས་སུ་འཁྲུངས། ལོ་བརྒྱད་ནས་ཤེས་རབ་མེ་ལྟར་འབར། བཅོ་བརྒྱད་ཀྱི་བར་དུ་ཁུ་བོ་ཉི་འབུམ་དང་འགྲོགས་ནས་གསང་བ་སྙིང་ཐིག་གི་གདམས་པ་རྣམས་རྫོགས་པར་མཛད་ཅིང་བསམ་བསྒོམ་གྱིས་གཏན་ལ་ཕབ། བཅུ་དགུ་ནས་སུམ་ཅུ་རྩ་དྲུག་བར་རྗེ་ས་པཎ་ཁྲོ་ཕུ་ལོ་ཙཱ་བ་སོགས་རིས་མེད་བཤེས་གཉེན་དུ་མ་ལས་སྡེ་སྣོད་རྒྱུད་སྡེ་དང་བཅས་རྒྱ་ཆེར་གསན་པས་བློ་རྣོ་ཞིང་ཐོས་པ་མང་བར་གྲགས། ཚེ་དཔག་མེད་དང་། སྤྱན་རས་གཟིགས། ཕྱག་ན་རྡོ་རྗེ་སོགས་ཀྱི་ཞལ་གཟིགས་ཤིང་བྱིན་གྱིས་བརླབས། མཁྱེན་རབ་དང་ཐུགས་རྗེ་ཚད་མེད་པས་འགྲོ་བ་འདྲེན་པའི་དེད་དཔོན་དུ་གྱུར་ནས་དྲུག་བཅུ་པ་ལ་གཤེགས། ཞག་བདུན་དུ་འཇའི་དྲྭ་བས་འབྲེལ། སྐུ་གདུང་ལ་ༀ་ཨཱཿཧཱུྃ་དང་རིང་བསྲེལ་མང་དུ་བྱོན་ཏོ། །དེའི་སློབ་མ་འཁྲུལ་ཞིག་སེངྒེ་རྒྱབ་པ་ནི། གཡོ་རུ་གྲའི་ཕུ་གང་ཕྲེང་གི་གྲོང་དུ་ངོ་མཚར་བའི་ལྟས་དང་བཅས་འཁྲུངས། ལོ་དགུ་ནས་རིགས་སད་དེ་དག་སྣང་དང་མོས་གུས། འཁོར་བ་ལ་སྐྱོ་བ་ཚད་མེད་པ་སྐྱེས། འཕགས་པ་ཐུགས་རྗེ་ཆེན་པོས་ཞལ་བསྟན་ནས། ཚེ་གཅིག་གིས་གྲོལ་བ་སྙིང་ཏིག་གི་དོན་སྒོམས་ཤིག་གསུངས། དེ་ནས་བཟུང་སྙིང་རྗེ་ཕྱོགས་མེད་དུ་རྒྱས་ནས་འགྲོ་བ་ཀུན་ལ་བུ་གཅིག་པའི་མ་ལྟར་བརྩེ། བཅོ་བརྒྱད་ལ་སྣང་བ་བདེན་མེད་དུ་རྟོགས་ནས་སྨྱོན་པ་ཁྲོག་ལངས་པ་ལྟ་བུར་གྱུར། ཉེར་དགུ་ལ་མཁན་པོའི་ལེའུ་སྒང་བ་ལས་རབ་ཏུ་བྱུང་ཞིང་མཁས་གྲུབ་དུ་མ་ལས་གསང་སྔགས་གསར་རྙིང་གི་ཆོས་མང་དུ་གསན། ཁྱད་པར་གུ་རུ་ཇོ་འབེར་ལས་རྫོགས་ཆེན་ཐོས་པས་རྟོགས་པ་ཐོད་རྒལ་དུ་སྐྱེས། སྒྲུབ་པ་སྙིང་པོར་མཛད་པས་དགོངས་པ་ཀ་དག་གི་སར་གཤེགས། སྐལ་ལྡན་མང་པོ་སྨིན་གྲོལ་ལ་བཀོད་ནས་དྲུག་ཅུ་རྩ་བཞི་པར་ཐེག་པ་མཆོག་གི་འབྲས་བུ་ཐོབ་པའི་རྟགས་རྣམས་མངོན་དུ་བསྟན་ནས་གཤེགས། དེའི་སློབ་མ་སྣ་ནམ་རྡོ་རྗེ་བདུད་འཇོམས་ཀྱི་རྣམ་འཕྲུལ་གྲུབ་ཆེན་མེ་ལོང་རྡོ་རྗེ་ནི། སྒྲགས་ཕུར་རྣལ་འབྱོར་པ་བསམ་ཡེ་དང་ཡུམ་འབར་མ་གཉིས་ཀྱི་སྲས་སུ་འཁྲུངས། ལོ་དགུ་ནས་གྲུབ་ཐོབ་ཟྭ་ལུང་པ་ལས་རབ་ཏུ་བྱུང་། བརྒྱད་སྟོང་པ་བརྒྱ་ཚར་བསྒྲགས་པས་གནས་ལུགས་ཀྱི་དོན་རྟོགས། ཟང་མཚོར་བསྒོམས་པས་ཉམས་འབར་ཞིང་མངོན་ཤེས་ཕྲ་མོ་ཤར། དེ་ནས་ཕྱོགས་མེད་དུ་འགྲིམས་ཏེ། མཚུར་ཕུའི་དོ་བོ་རས་པ་སོགས་བླ་མ་མང་དུ་བསྟེན་ཅིང་སྒྲུབ་གནས་མང་པོར་དཀའ་ཐུབ་ཀྱི་འཕྲང་ལ་བཅུན་ནས་གདམས་ངག་རྣམས་ཉམས་སུ་བླངས། བཅོ་བརྒྱད་པར་སེངྒེ་རྒྱབ་པ་སངས་རྒྱས་དབོན་པོ་ལས་མན་ངག་སྙིང་ཐིག་གི་སྐོར་རྣམས་ཐོབ། བསྒོམས་པས་སྔོན་འགྲོའི་སྐབས་ཞག་དྲུག་ཏུ་ཉིན་མཚན་མེད་པར་རྡོ་རྗེ་སེམས་དཔའ་ཞལ་མཐོང་། དངོས་གཞིའི་སྐབས་རྨི་ལ་མ་དུ་བརྒྱུད་པའི་བླ་མ་རྣམས་མཇལ་ཞིང་བྱིན་གྱིས་རླབས། གཞན་ཡང་ཀུན་བཟང་རྡོར་སེམས་པད་འབྱུང་བི་མ་བདེ་མཆོག་རྟ་ཕག་སོགས་རྩ་གསུམ་རབ་འབྱམས་ལྷའི་ཞལ་མཐོང་། དོང་ལུང་དུ་ཡེ་ཤེས་ཌཱ་ཀིས་སྐྱེ་རྒྱུན་ཆོད་པར་ལུང་བསྟན། རྨི་ལམ་དུ་རྡོ་རྗེ་སེམས་དཔས་རྫོགས་པ་ཆེན་པོའི་དཀྱིལ་འཁོར་དུ་དབང་བཞི་རྫོགས་པར་བསྐུར་ཞིང་བརྡ་དོན་ངོ་སྤྲད། བརྟུལ་ཞུགས་ཤིན་ཏུ་ཆེ་བས་གསང་སྔགས་ཀྱི་དམ་ཚིགས་ཇི་བཞིན་པར་སྤྱོད་ནུས། ནམ་མཁའ་ལ་བྱ་ལྟར་འཕུར་བ། བྲག་ལ་འདམ་ལྟར་བྱེད་པ་སོགས་གྲུབ་པའི་རྟགས་མཚན་མངོན་དུ་མངའ། ཚེ་ཚད་སུམ་ཅུ་རྩ་བདུན་ཡིན་པ་ལ། སློབ་དཔོན་ཀུན་དགས་གསོལ་བ་ཐེབས་པས་དྲུག་ཅུ་རྩ་གཅིག་བར་བཞུགས་ནས་གཤེགས། སྐུ་ལྔ་ཐོབ་རྟགས་གདུང་རིགས་ལྔ་སོགས་རྒྱུད་ནས་ཇི་སྐད་བཤད་པ་བཞིན་བྱོན། དེའི་སློབ་མ་ཐལ་འགྱུར་ནས་དགེ་སློང་དཔལ་ལྡན་དུ་ལུང་བསྟན་ཅིང་པཎ་ཆེན་བི་མ་ལའི་རྣམ་འཕྲུལ་རིག་འཛིན་ཀུ་མཱ་རཱ་ཛ་ནི། གཡོ་རུ་འོན་གྱི་ནང་བར་གསར་རྫིང་ཁར་འཁྲུངས། ཆུང་ངུ་ནས་འཕགས་པའི་ནོར་གྱིས་འབྱོར་ཞིང་ཀློག་ཡིག་མ་བསླབས་པར་མཁྱེན། ལོ་དགུ་པར་དགེ་བསྙེན་དང་བཅུ་གཉིས་པར་ཕག་མོ་གྲུར་རབ་ཏུ་བྱུང་། ཡིག་དྲུག་བཟླས་པས་འཕགས་པའི་ཞལ་མཐོང་། ངར་ཕུག་ཏུ་མེ་ལོང་ལས་ཕྱག་ཆེན་གྱི་ཁྲིད་ཞུས་པས་སེམས་ངོ་འཕྲོད། ཚེས་བཅུར་ཨོ་རྒྱན་ཆེན་པོ་དང་མཇལ། ཨེ་མ་རིགས་ཀྱི་བུ། རྟག་ཏུ་ཆོས་གྱིས་ཤིག་གསུངས། གྲུབ་ཆེན་ཨོ་རྒྱན་པ་སོགས་ལས་གདམས་ངག་མང་དུ་ཞུས། སླར་ལྷོ་བྲག་མཁར་ཆུར་མེ་ལོང་ལས་གསང་བ་སྙིང་ཏིག་གི་དབང་ཁྲིད་གདམས་པ་བཅས་རྫོགས་པར་ཞུས། དབང་གྲལ་དུ་མགོན་པོ་ཕྱག་བཞི། ཨེ་ཀ་ཛ་ཊི། ལས་ཀྱི་མ་མོ་ཁྲག་རལ་ཅན་རྣམས་གཟིགས། ལོ་བརྒྱད་ཀྱི་བར་དུ་བླ་མ་འདུ་འབྲལ་མེད་པར་བསྟེན། སྙུག་ཚལ་སྦུག་ཏུ་རྡོ་རྗེ་ཕག་མོས་ཞལ་བསྟན། དེ་ནས་བཟུང་ཤེས་རབ་ཕྱོགས་མེད་དུ་རྒྱས། ཙཱ་རི་རྙིང་མའི་གཡུ་མཚོའི་འགྲམ་ན། གཅིག་པུར་ཟླ་བ་བརྒྱད་བཞུགས་པས། དང་པོར་ཆོ་འཕྲུལ་ཆེན་པོ་བྱུང་ཡང་གཤིས་ཐོག་ཏུ་རོ་སྙོམ་པས་གཞི་བདག་དབང་དུ་འདུས་ནས་ཁང་པར་གདན་དྲངས་ནས་བསྙེན་བཀུར་བྱས། ཛམ་བྷ་ལས་ནོར་བུ་བྱིན། མཚོ་ནང་དུ་འོད་ལྔའི་ལྦུ་བ་སེལ་པོ་ཙམ་ཐིམ་འགྲོ་བ་གཟིགས། ཐུགས་ངེས་འབྱུང་སྐྱོ་ཤས་ཀྱི་རྒྱུད་བརླན་པས་རྟག་པར་དབེན་པའི་རི་བོ་འབའ་ཞིག་ཏུ་སྒྲུབ་པ་སྙིང་པོར་མཛད་ཅིང་གཞན་ཡང་དེ་ལ་བསྐུལ། བྱང་ཆུབ་ཀྱི་སེམས་འབྱོངས་པས་འགྲོ་བ་མཐའ་དག་ལ་ཕན་པ་ལྷུར་ལེན་ཅིང་། འཇིགས་པས་ཉེན་པ་རྣམས་ལ་སྒོ་དུ་མ་ནས་སྐྱབས་ཀྱི་སྦྱིན་པ་སྩལ། སྔགས་བདག་གཟའ་དང་དམ་ཅན་རྣམས་ཀྱིས་བཀའ་ཉན་ཅིང་མི་དང་མི་ལབ་པ་པ་བཞིན་དུ་ཡོད། མངོན་པར་ཤེས་པས་གདུལ་བྱའི་བསམ་པ་མཁྱེན་པས་འདུལ་ལུགས་ལ་མཁས་ཤིང་གཞན་རྒྱུད་བྱིན་གྱིས་རླབས་པའི་ནུས་པ་ཁྱད་པར་ཅན་མངའ། མཐར་དགུང་ལོ་བདུན་ཅུ་རྩ་བརྒྱད་བཞེས་པ་ཆུ་ལུག་སྟོན་ཟླ་འབྲིང་པོའི་ཉེར་ལྔར་ངོ་མཚར་བའི་ལྟས་དང་བཅས་གཤེགས་པར་ཉེ་གནས་སྒོམ་དར་སོགས་ཀྱིས་མོས་གུས་ཀྱི་གདུང་བ་བྱས་པས་སླར་བཞེངས་ཏེ་ཞལ་འཛུམ་པ་དང་བཅས། ཁྱེད་རྣམས་མྱ་ངན་མ་བྱེད། ང་འཆི་བ་མིན་གསུངས་ནས་ཞལ་གདམས་དང་ཞལ་ཏ་ཅི་རིགས་མཛད། ཞག་བཅུ་གསུམ་སྐུ་ཚེ་སླར་ལ་བསྲིངས་ནས་ཟླ་བ་ཕྱི་མའི་ཚེས་བདུན་གྱི་ཉིན། ཁྱེད་རྣམས་ཆོས་ཀྱི་ཞུན་མཐར་མ་ཆོད་པ་ཡོད་ན་བླ་མ་ཀུན་མཁྱེན་པའི་དྲུང་དུ་སོང་། ཁ་ཏ་མང་པོ་སྔར་ནས་བྱས་ཟིན། ཅལ་ཅོལ་མ་སྨྲ་གསུངས་ནས། དྲང་སྲོང་ཙོག་པུའི་བཞུགས་སྟངས་དང་ཆོས་སྐུའི་གཟིགས་སྟངས་ཀྱི་ངང་ལས་འཛུམ་པར་མཛད་དེ། ཚེས་བརྒྱད་ཀྱི་ཐོ་རངས་ཁར་གདོད་མའི་གྲོང་ཁྱེར་དུ་གཤེགས། པུར་སྦྱངས་པས་དབུ་ཐོད་རིལ་པོར་བྱོན་པའི་ནང་ནས་རིགས་ལྔའི་ཚོམ་དཀྱིལ་དང་། སྙན་གོང་གཡས་ན་རྗེ་བཙུན་མའི་སྐུ་མཐིང་ཀ་ཚོན་གང་བ། གདུང་རིགས་ལྔ་དང་རིང་བསྲེལ་མང་དུ་བྱོན་ནོ། །དེ་ཉིད་ཀྱི་སློབ་མའི་གཙོ་བོ་ནི་རྒྱལ་དབང་རང་བྱུང་རྡོ་རྗེ་དང་། ཀུན་མཁྱེན་དྲི་མེད་འོད་ཟེར་གཉིས་ལས། སྔ་མ་ནི། འཕགས་པ་སྤྱན་རས་གཟིགས་འཇིག་རྟེན་དུ་བྱོན་པ་སྟེ། ཆོས་ཀྱི་དབྱིངས་ནས་ཡེ་ཤེས་ཀྱི་མཁའ་འགྲོ་མ་རྣམས་ཀྱི་རྡོ་རྗེའི་གླུས་བསྐུལ་ནས་སེམས་ཅན་རྣམས་ལ་ཚད་མེད་པའི་ཐུགས་རྗེས་གཟིགས་ཏེ་ཞིང་འདིར་སྲིད་པའི་མྱུ་གུ་བཟུང་། སྔོན་གནས་རྗེས་སུ་དྲན་པ་ལ་སྒྲིབ་བྱེད་སྐྲའི་རྩེ་མོ་ཙམ་ཡང་མེད་པས་མངལ་གྱི་དྲི་མས་གཏན་ནས་མ་གོས་པ་འཕགས་ཡུལ་ན་ཐུབ་པ་ཆེན་པོ་དང་། བོད་འདིར་སྐྱེས་བུ་ཆེན་པོ་འདི་ལས་མ་བྱུང་བར་གྲགས། གོང་མ་ཆེན་པོ་སོགས་ཆེ་དགུས་མཆོད་ཅིང་རྒྱ་བོད་གཉིས་ཀར་སངས་རྒྱས་བསྟན་པའི་སྲོག་ཤིང་ཆེན་པོར་བཞུགས། བི་མ་མི་ཏྲ་རང་གི་མཛོད་སྤུར་ཐིམ་པ་གཟིགས་པའི་མོད་ལ་གསང་བ་སྙིང་ཏིག་གི་དགོངས་པ་ཇི་ལྟ་བ་བཞིན་མངོན་དུ་གྱུར་ཏེ། ཉིད་ཀྱི་གསུངས་ལས། ཡི་གེ་རྣམས་ལ་བལྟས་པའི་རྟོག་དཔྱོད་མིན། །བདག་ནི་བི་མ་ལ་ཡིས་བྱིན་གྱིས་བརླབས། །ཀརྨའི་ཡང་དགོན་དབེན་པར་འདུག་པའི་ཚེ། །ནམ་ལངས་དུས་མཐར་ཤར་གྱི་ཕྱོགས་རོལ་ནས། །ལྟ་བས་མི་ངོམས་འོད་ཀྱིས་མཛེས་པ་ནི། །མངོན་སུམ་ལྟར་སྣང་བདག་གི་མཛོད་སྤུར་ཐིམ། །དེ་ནས་འབད་མེད་གནད་འདི་ཐམས་ཅད་གོ །ཞེས་གསུངས་པ་བཞིན་ལ་འོན་ཀྱང་སྔགས་ལ་རང་གར་འཇུག་པའི་ལོག་རྟོག་སེལ་སླད་རིག་འཛིན་ཀུ་མཱ་རཱ་ཛ་ལས་རྫོགས་པར་གསན། འདི་ཨོ་རྒྱན་ཆེན་པོ་ནས་བརྒྱུད་པ་ཞིག་ཡོད་ཐང་བ་ལ་དགོངས་པའི་ཚེ་ཨོ་རྒྱན་སངས་རྒྱས་གཉིས་པས་ཞལ་གཟིགས་ཤིང་མན་ངག་མཁའ་འགྲོ་སྙིང་ཐིག་གི་དོན་བརྒྱུད་ཐོབ། ཚིག་བརྒྱུད་རྣམས་ཤོའི་རྒྱལ་སྲས་ལེགས་པ་ལས་གསན་ཅིང་སྐལ་བ་དང་ལྡན་པའི་སློབ་མའི་ཚོགས་ལ་རྩལ་དུ་བཏོན་ནས་གསུངས། བཀའ་ལས། ཆོས་ཟབ་མོ་འདི་ལྟ་བུ་ནུབ་པར་ཕངས་པས་གཡུང་སྟོན་གྱིས་གཙང་ཡེ་རྒྱལ་བས་ཁམས་ཀོང་། ཡེ་ཤེས་རྒྱལ་མཚན་པས་ཧོར་དང་རྒྱ་ནགསྤྲུལ་སྐུ་བས་དབུས་སུ་དར་བར་གྱིས་ཞེས་སྨན་ལུང་བ་ཤཱཀྱ་གཞོན་སོགས་ལ་རྗེས་སུ་གདམས་པས། ས་ལ་གནས་པའི་བྱང་སེམས་ཀྱིས། །རྒྱ་མཚོའི་བར་དུ་སྤེལ་བར་བྱེད། །ཅེས་སྒྲ་ཐལ་འགྱུར་རྩ་བའི་རྒྱུད་ནས་ལུང་བསྟན་པའི་བདེན་དོན་མངོན་དུ་གྱུར། ཀུན་ཏུ་བཟང་པོ་ཐུགས་ཀྱི་ཀློང་ནས་རང་གསལ་བའི་དགོངས་པའི་གཏེར་མཛོད་ཆེན་པོ་ལ་དབང་བསྒྱུར་ནས་ཀརྨ་སྙིང་ཐིག་ཅེས་གྲགས་པའི་གདམས་པའང་བྱུང་སྟེ་ད་ལྟའི་བར་དུ་རྒྱུན་ཆགས་པར་བཞུགས་པ་ཡིན་ནོ། །ཀུན་མཁྱེན་ཆོས་ཀྱི་རྒྱལ་པོ་དྲི་མེད་འོད་ཟེར་རམ་ཀློང་ཆེན་རབ་འབྱམས་བཟང་པོ་ནི། ཐལ་འགྱུར་ལས། དེ་འོག་བློ་གྲོས་མཆོག་གིས་འཛིན། །ཞེས་ཤེས་བྱ་ཐམས་ཅད་ལ་ཆགས་ཐོགས་མི་མངའ་བའི་དོན་དང་། ཚུལ་ཁྲིམས་བློ་གྲོས་ཞེས་མཚན་གྱི་ཚིག་སྒྲས་ཀྱང་གསལ་བར་བསྟན་པ་སྟེ། དམ་པ་འདི་ནི་ངོ་བོ་རྒྱལ་བ་ཀུན་དང་རྣམ་དབྱེར་མ་མཆིས་ཀྱང་གནས་སྐབས་གདུལ་བྱའི་སྣང་ངོར། རིགས་ནི་སད་མི་མི་བདུན་གྱི་ནང་ཚན་པདྨ་གསུང་གི་བཀའ་བབས་ངན་ལམ་རྒྱལ་བ་མཆོག་དབྱངས་ཀྱི་དབོན་རབས་ཉེར་ལྔ་པ་བདུད་རྩིའི་བཅུད་ལེན་གྲུབ་པས་མི་ཡུལ་ན་ལོ་བརྒྱ་དང་ལྔ་བཞུགས་པ་སློབ་དཔོན་ལྷ་སྲུང་ཞེས་པའི་སྲས་སློབ་དཔོན་བསྟན་སྲུང་དང་། ཡུམ་ནི་འབྲོམ་སྟོན་རྒྱལ་བའི་འབྱུང་གནས་སོགས་སྐྱེས་ཆེན་དུ་མ་བྱོན་པའི་བརྒྱུད་པ་འབྲོམ་བཟའ་བསོད་ནམས་རྒྱན་གཉིས་ཀྱི་སྲས་སུ་ས་སྤྲེལ་དབོ་ཟླའི་ཚེས་བཅུར་གཡོ་རུ་གྲྭའི་ཕུ་སྟོད་གྲོང་ཞེས་པར་སྐུར་འཁྲུངས། སྐུ་འཁྲུངས་མ་ཐག་ནམ་གྲུ་རེ་མ་ཏིས་གཟུགས་དངོས་སུ་བསྟན་ནས་སྲུང་བ་དང་། གསུང་བྱེ་ཚེ་དད་པ་དང་སྙིང་རྗེ་བློ་གྲོས་ཀྱི་མཐུ་སོགས་སྐྱེས་ཐོབ་ཀྱི་ཡོན་ཏན་མཐའ་ཡས་ཤིང་འཕགས་ཆེན་བྱང་ཆུབ་སེམས་དཔའི་རྣམ་ཐར་སྒྲིབ་མེད་དུ་གསལ། ལོ་ལྔ་ནས་འབྲི་ཀློག་བརྡའ་བསྟན་པ་ཙམ་གྱིས་ཚེགས་མེད་པར་མཁྱེན། བདུན་ནས་བཟུང་ཡབ་ལས། བཀའ་བརྒྱད་བདེར་གཤེགས་འདུས་པ། རྟ་མགྲིན། ཕུར་པ། གུ་རུ་ཞི་དྲག་རྣམས་ཀྱི་དབང་ལུང་མན་ངག་ཕྱག་བཞེས་དང་བཅས་པ་དང་སྨན་རྩིས་ལ་སོགས་པའང་གསན་ཅིང་ཀུན་ཆུབ་པར་མཛད། དགུ་པ་ལ་གྲྭ་ཕྱི་ཚོང་འདུས་སུ་ཉི་ཁྲི་དང་བརྒྱད་སྟོང་པ་བརྒྱ་ཚར་སྒྲོགས་པས་ཚིག་དོན་ཐུགས་སུ་ཆུད། བཅུ་གཉིས་པ་ལ་བསམ་ཡས་སུ་མཁན་པོ་བསམ་འགྲུབ་རིན་ཆེན་དང་། སློབ་དཔོན་ཀུན་དགའ་འོད་ཟེར་ལས་རབ་ཏུ་བྱུང་། མཚན་ཚུལ་ཁྲིམས་བློ་གྲོས་སུ་གསོལ། འདུལ་བ་ལ་སྦྱངས་ཤིང་། བཅུ་བཞི་ལ་བཤད་གསར་མཛད་པས་མཁས་པའི་གྲགས་པ་ཐོན། བཅུ་དགུ་པ་ལ་གསང་ཕུ་ནེའུ་ཐོག་ཏུ་སློབ་དཔོན་བཙན་དགོན་པ་དང་། ཁྱད་པར་བླ་བྲང་བ་ཆོོས་དཔལ་རྒྱལ་མཚན་པ་དང་། ཆོས་གྲགས་གཉིས་པར་གྲགས་པ་གཞོན་ནུ་རིན་ཆེན་གཉིས་གཙོ་བོར་བསྟེན་ཅིང་། ཕར་ཚད་ཀྱི་གཞུང་འགྲེལ་མཐའ་དག་གསན་ནས་ཚིག་དོན་རྣམས་ལ་མཁས་པར་སྦྱངས། སློབ་དཔོན་གཞོན་ནུ་རྒྱལ་པོ་ལས་དབུ་མ་རྩ་འཇུག་སོགས་ཀྱི་གཞུང་འགྲེལ་མན་ངག་དཔང་ལོ་བློ་གྲོས་བསྟན་པ་ལས་མངོན་པ་དང་ཏིང་འཛིན་རྒྱལ་པོ་སོགས་ཟབ་མོ་མདོ་ལྔའི་བཤད་པ་དང་སྒྲ་དང་སྙན་ངག་མངོན་བརྗོད་ཟློས་གར་སོགས་ཐ་སྙད་ཀྱི་གཙུག་ལག་རྣམས་ཀྱང་གསན་ཅིང་། དེ་དག་གི་ཚིག་དོན་མཐའ་དག་ལོ་གསུམ་ལ་ཀུན་ཆུབ་པར་གྱུར་ཏེ། ལུང་རིགས་སྨྲ་བའི་སྡེ་རྣམས་སུ་གྲྭ་སྐོར་མཛད་པས། གཞུང་ཚོགས་ཀྱི་རྒྱ། མཁྱེན་རབ་ཀྱི་རྩལ། རིགས་པའི་རྣམ་འགྱུར་ཀུན་ལ་ཐོགས་པ་མི་མངའ་བས། འགྲན་ཟླ་དང་བྲལ་བར་ཐམས་ཅད་ཀྱིས་བསྔགས་པའི་ཡུལ་དུ་མཐུན་སྣང་གྲུབ་པས། བསམ་ཡས་ལུང་མང་པ་ཞེས་པའི་མཚན་གྱི་རྔ་གསང་ཐ་གྲུར་ཁྱབ། དེ་དག་གི་སྔ་ཕྱི་ཅི་རིགས་པར་དན་ཕག་པ་གཞོན་ནུ་དོན་གྲུབ་ལས། མདོ་སྒྱུ་སེམས་ཕྱོགས་ཀྱི་དབང་ཁྲིད་བཤད་བཀའ་ཐམས་ཅད་དང་། གསང་འདུས་སྦྱོང་རྒྱུད་ལ་སོགས་པ། སློབ་དཔོན་བཀྲ་ཤིས་རིན་ཆེན་ལས་བདེ་མཆོག་དང་ལམ་འབྲས། སྦྱོར་དྲུགཞི་བྱེད། རྫོགས་ཆེན་སེམས་ཕྱོགས་ཀྱི་སྐོར་སློབ་དཔོན་རྡོ་རྗེ་གཞོན་ནུ་ལས་སྤྱོད་འཇུག་དང་། བསླབ་བཏུས། བསྟན་རིམ་ལ་སོགས་པ། མྱོས་མཐིང་མ་བ་སངས་རྒྱས་གྲགས་འོད་ལས། བཀའ་བརྒྱད་བདེ་གཤེགས་འདུས་པ་སོགས་གསང་སྔགས་གཏེར་མ་མང་པོ་དང་། རྙིང་མ་རྒྱུད་འབུམ་གྱིས་གཙོས་མང་དག་གསན་པས་སྔ་འགྱུར་རྡོ་རྗེ་ཐེག་པའི་གྲུབ་མཐའ་ཆེན་པོར་གཅིག་ཏུ་འཇུག་པའི་རྟེན་འབྲེལ་ཤར། ཕྱིས་སྒྱུ་འཕྲུལ་གསང་སྙིང་ལ་སྙིང་ཏིག་དང་མཐུན་པའི་ཊཱི་ཀ་ཕྱོགས་བཅུའི་མུན་པ་ཐམས་ཅད་རྣམ་པར་སེལ་བ་ཉི་ཟླའི་སྤྲིན་གྱི་སྣང་བ་དང་། སྤྱིའི་ཁོག་དབུབ་གཉིས་མཛད། གཞན་ཡང་ཆོས་རྗེ་རང་བྱུང་རྡོ་རྗེ། ས་སྐྱའི་བླ་མ་བདག་ཉིད་ཆེན་པོ། སློབ་དཔོན་དབང་ཡེ། བླ་མ་འཇམ་དབྱངས་པ། རིན་པོ་ཆེ་ཁྲོ་ཕུ་པ། ཁང་དམར་པ། བླ་མ་ཚོང་འདུས་པ། ཟ་ལུང་རིན་པོ་ཆེ། ཤུག་གསེབ་རི་པ་སོགས་ཡོངས་འཛིན་ཉི་ཤུ་ལྷག་ཙམ་ལས་གསང་སྔགས་གསར་རྙིང་གི་དབང་བཀའ་རྗེས་གནང་། མདོ་སྔགས་ཀྱི་གཞུང་ཆེ་ཆུང་མང་པོའི་བཤད་བཀའ་ཟབ་ཁྲིད་གདམས་ངག་རྩིས་སོགས་ཐ་སྙད་ཀྱི་ཕྱག་ཁྲིད་སོགས་ཀྱིས་མཚོན་མདོར་ན་གངས་ཅན་གྱི་ལྗོངས་འདིར་བཞུགས་སོ་ཅོག་གི་ཐུན་མོང་དང་ཐུན་མོང་མ་ཡིན་པའི་ཤེས་བྱའི་ཆོས་ཚུལ་མཐའ་དག་གསན་ཅིང་ཐུགས་སུ་ཆུད་པར་མཛད། གསང་ཕུར་སྡེ་སྣོད་ཀྱི་གསན་པ་མཛད་སྐབས་དེ་རྣམས་སུ་མི་གཡོ་བ། འཇམ་དཔལ་དབྱངས་ཅན་མ། ཕག་མོ་ཤེས་རབ་གསལ་བྱེད་རྣམས་ཀྱི་བསྙེན་སྒྲུབ་མཛད་པས་ཐམས་ཅད་ཀྱིས་ཞལ་གཟིགས་ཤིང་། ཁྱད་པར་ལྷ་མོ་དབྱངས་ཅན་མས་ཕྱག་མཐིལ་དུ་བཞག་ནས་གླིང་བཞི་རི་རབ་དང་བཅས་པ་ཞག་བདུན་གྱི་བར་དུ་བསྟན་ཅིང་ལུང་བསྟན་ཐོབ་པས་ཐོགས་པ་མེད་པའི་བློ་གྲོས་ཀྱི་མཐུ་ཐོབ། གསང་ཕུར་བཞུགས་སྐབས། ཁམས་པའི་ཆགས་སྡང་གི་རྩོད་པས་ཐུགས་ཕྱུང་སྟེ་དབུར་སྟོད་རྒྱ་མ་ལྕོག་ལའི་བྲག་ཕུག་ཏུ་ཟླ་བ་བརྒྱད་མུན་པའི་རྣལ་འབྱོར་གྱིས་ཏིང་ངེ་འཛིན་ལ་རྩེ་གཅིག་ཏུ་མཉམ་པར་བཞག་པས་ཉམས་རྟོགས་ཁྱད་པར་ཅན་འཁྲུངས། དེའི་ཚེ་རྗེ་བཙུན་འཕགས་མ་མཛེས་སྡུག་མཚུངས་པ་མེད་པའི་ཡེ་ཤེས་ཀྱི་སྐུས་རིན་པོ་ཆེའི་ཅོ་པཎ་ཉིད་ཀྱི་དབུ་ལ་བཅིངས་ཏེ། རྟག་ཏུ་བྱིན་གྱིས་རློབ་ཅིང་དངོས་གྲུབ་སྩོལ་བར་དབུགས་དབྱུང་ཐོབ། དགུང་ལོ་ཉེར་བདུན་པ་ལ་ཡི་དམ་ལྷས་ལུང་བསྟན་པ་ལྟར་བླ་མ་རིག་འཛིན་ཆེན་པོ་ཀུ་མཱ་རཱ་ཛའི་སྤྱན་སྔར་ཕེབས། ཡར་སྟོད་སྐྱམ་གྱི་ཕུར་བཞུགས་པ་དང་མཇལ། མདང་ལྷ་ཡི་བྱ་ཡིན་ཟེར་བའི་བྱ་ཡ་མཚན་ཅན་གཅིག་ལ་བྱ་བྲན་མང་པོའི་ཚོགས་ཀྱིས་བསྐོར་བ་བྱུང་ནས་ངའི་དཔེ་ཆ་རྣམས་ཕྱོགས་མཚམས་ཐམས་ཅད་དུ་ཁྱེར་བ་རྨིས་པས་ངའི་ཆོས་ཀྱི་བརྒྱུད་པ་འཛིན་པར་འདུག་གསུངས་དགྱེས་པར་མཛད། སྤྱིར་དབང་དང་གདམས་ངག་མང་དུ་གསན། ཁྱད་པར་གསང་བ་བླ་མེད་གྱི་དབང་དང་གདམས་པ་རྣམས་ཉམས་ཁྲིད་དུ་གསན་ནས་ཟས་གོས་གནས་མལ་སོགས་ཀྱིས་བཀའ་སྤྱད་ལ་མི་ཞུམ་པའི་སྙིང་སྟོབས་ཀྱིས་ཉམས་ལེན་ཆིག་སྒྲིལ་དུ་མཛད་པས་རྫོགས་པ་ཆེན་པོ་རང་སྣང་རིས་མེད་ཀྱི་ཉམས་རྟོགས་མཐར་ཕྱིན། གཞན་ཡང་དེ་དག་གི་རྒྱུད་འགྲེལ་གདམས་ངག་ཕྲན་ཚེགས་དང་བཅས་པ་རྣམས་ཀྱང་རྫོགས་པར་གསན་ཅིང་གདམས་པའི་གཏད་རྒྱ་དང་བཅས་རྒྱལ་ཚབ་ཏུ་དབང་བསྐུར། མཆིམས་ཕུ་ལ་སོགས་པའི་དབེན་གནས་རྣམས་སུ་ལོ་གསུམ་མའི་དམ་བཅས་མཚོན་ལོ་བདུན་དུ་ཟབ་ལམ་གྱི་སྒྲུབ་པ་ལ་ནན་ཏན་དུ་མཛད། སྐབས་འགར་བླ་མའི་དྲུང་དུ་བསྙེན་ནས་ཉམས་རྟོགས་ཀྱི་མཐའ་རྒྱ་ལེགས་པར་བཅད་པ་ལས། གནས་ལུགས་ཟབ་མོའི་ལྟ་བའི་གནད། སྒོམ་པ་ཏིང་ངེ་འཛིན་གྱི་དྲོད་རྟགས། ཤེས་བྱ་རབ་འབྱམས་ལ་ཐོགས་མེད་ཀྱི་མཁྱེན་པ། སྲི་ཞུའི་སྤྱོད་ལམ་བསྟེན་ཚུལ། འཁོར་གསུམ་ཡོངས་དག་གི་འབུལ་བ་ལན་གྲངས་སོགས་སྒོ་དུ་མ་ནས་མཉེས་པ་བསྒྲུབས་པས་ཐུགས་ཀྱི་སྲས་གཅིག་པུར་གྱུར། མཆིམས་ཕུར་སྒྲུབ་པ་མཛད་སྐབས། གུ་རུ་ཞི་དྲགརྡོར་སེམས། དཔལ་ཆེན་གཙོ་འཁོར། རྗེ་བཙུན་སྒྲོལ་མ་སོགས་རྩ་གསུམ་གྱི་ལྷག་པའི་ལྷ་རབ་འབྱམས་ཀྱིས་ཞལ་གཟིགས། མ་མགོན་གཟའ་རྡོར་སོགས་དམ་ཅན་རྣམས་ཀྱིས་ཕྲིན་ལས་སྒྲུབ་པར་དམ་ནོས། ཁྱད་པར་སྒྲུབ་པ་བཀའ་བརྒྱད་ཀྱི་ལྷ་ཚོགས་དང་ཆོས་ཀྱི་བསྒྲོ་བ་མི་དང་མི་ལབ་པ་བཞིན་དུ་གྱུར། ལྷ་སར་ཇོ་ཤཱཀ་མཆེད་ལ་མཆོད་འབུལ་དང་གསོལ་འདེབས་མཛད་པས། ཇོ་བོའི་མཛོད་སྤུ་ནས་འོད་ཟེར་འཕྲོས་པ་རང་གི་མཛོད་སྤུར་ཐིམ་པའི་རྐྱེན་གྱིས། རྒྱ་གར་བྱ་རྒོད་ཕུང་རི་དང་ལི་ཡུལ་གྱི་བཀོད་པ་དང་། དེར་པཎྜི་ཏར་འཁྲུངས་པའི་སྔོན་གནས་རྗེས་དྲན་དང་། དེ་དུས་གསན་བསམ་མཛད་པའི་ཆོས་རྣམས་ཐུགས་ལ་རང་ཤར་དུ་གྱུར་པས་སྔོན་ལས་ཀྱང་མཁྱེན་རབ་རྒྱས་པར་གྱུར། ཡོས་ཀྱི་ལོར་མཆིམས་ཕུ་རི་མོ་ཅན་དུ་སྐལ་ལྡན་འགའ་ལ་སྙིང་ཐིག་གི་དབང་ལུང་ཁྲིད་བཀའ་ཐོག་མར་གསུངས་ཤིང་། དེ་དང་འབྲེལ་བར་སྔར་སྲོག་སྒྲུབ་མས་གླེགས་བམ་ཕུལ་བའི་བརྡ་དང་། རྣལ་འབྱོར་པ་འོད་ཟེར་གོ་ཆ་སོགས་ཀྱི་གསོལ་བ་བཏབ་པའི་ངོར། སྐལ་ལྡན་གྱི་རྣལ་འབྱོར་ཕོ་མོ་བརྒྱད་ལ་མཁའ་འགྲོ་སྙིང་ཐིག་གི་ཆོས་བཀའ་ཡང་གསར་དུ་ཕྱེས་པས། དེའི་ཚེ་ཨོ་རྒྱན་ཡབ་ཡུམ་གྱིས་དབང་བསྐུར་ཞིང་གདམས་པ་གཏད། མཚན་ཨོ་རྒྱན་དྲི་མེད་འོད་ཟེར་དང་རྡོ་རྗེ་གཟི་བརྗིད་དུ་གསོལ། ལས་འབྲེལ་རྩལ་གྱི་འོག་ཏུ་ལོངས་སྐུའི་ཞིང་ཉུལ་བར་གསུངས་པ་དེར་ངོས་འཛིན་གནང་། རྡོ་རྗེ་ཕག་མོའི་ཡེ་ཤེས་དངོས་སུ་ཕབ་པས་གདམས་པའི་གནད་བསྟན། དམ་ཅན་ཆོས་སྐྱོང་རྣམས་ཀྱིས་དངོས་སུ་སྟངས་ཕུལ་ཞིང་གཏོར་མ་ལེན་པ་སོགས་ངོ་མཚར་བའི་ཆོ་འཕྲུལ་བསམ་གྱིས་མི་ཁྱབ་པ་དེར་འདུས་ཀུན་གྱི་སྤྱོད་ཡུལ་དུ་གྱུར་པ་དང་། རྣལ་འབྱོར་པ་རྣམས་གཉིད་ལས་འདས་པའི་འོད་གསལ་འཁོར་ཡུག་ཏུ་འབྱམས་པ་སོགས་ཞིབ་པར་མཐོང་སྣང་འོད་ཀྱི་དྲྭ་བ་དང་། གཏེར་འབྱུང་ལོ་རྒྱུས་ཆེན་མོ་སོགས་ལས་གསལ་བ་ལྟར་དང་། དེ་ནས་གཡུ་སྒྲོན་མས་བསྐུལ་ནས་གངས་རི་ཐོད་དཀར་ཨོ་རྒྱན་རྫོང་འོད་ཟེར་སྤྲིན་གྱི་སྐྱེད་མོས་ཚལ་དུ་བྱོན། རྣལ་འབྱོར་པ་འོད་ཟེར་གོ་ཆས་གསོལ་བ་བཏབ་པའི་ངོར། ཀུན་ཏུ་བཟང་པོ་དགོངས་པའི་ཀློང་ནས་རང་འཁྲུངས་པའི་ཟབ་མོ་དགོངས་གཏེར་དུ་གྲགས་པ་ཀུན་གྱི་ནང་ནས་མཆོག་དང་རབ་ཏུ་གྱུར་པ་མཁའ་འགྲོ་ཡང་ཏིག་གི་ཆོས་སྐོར་གཏན་ལ་ཕབ། སློབ་དཔོན་བི་མ་ལས་ཞལ་གཟིགས་ནས། ངའི་སྙིང་ཐིག་འདིའི་དོན་བསྡུས་སྙིང་པོའི་བཅུད་ཕྱུང་ནས། ཀུ་མཱ་ཱརཱ་ཛའི་སྐྱེ་བ་ད་ལྟའི་སློབ་མ་གཞོན་ནུ་སངས་རྒྱས་ལ་སྟོན། དེས་ཀྱང་སྣ་རྩེར་ཨ་ཡིག་གི་མཚན་པའི་གཞོན་ནུའི་མིང་ཅན་བདུན་འབྱུང་བས་འཛིན་སྤེལ་བྱེད་པར་ལུང་བསྟན་ཅིང་རྗེས་སུ་བསྐུལ་བས་ཡང་ཏིག་ཡིད་བཞིན་ནོར་བུ་ཆོས་སྡེ་སུམ་ཅུ་རྩ་ལྔ་པར་གདམས། དེ་ལས་ཀྱང་ཟབ་པའི་གནད་བསྡུས་པ་ཟབ་མོ་ཡང་ཏིག་སོགས་དང་། རྒྱ་ཆེ་བརྒྱུད་ཀྱི་དགོངས་པ་གསལ་བར་བྱེད་པའི་བསྟན་བཅོས་མཛོད་ཆེན་བདུན། ངལ་གསོ་སྐོར་གསུམ་སོགས་གསུང་རབ་ཀྱི་རྩོམ་པ་ཕལ་ཆེར་ཡང་གནས་འདིར་གནང་། སྔགས་བདག་གཟའ་དང་དམ་ཅན་སོགས་ཀྱིས་དངོས་སུ་ཤོག་ལས་དང་སྣག་འདུལ་ཚུན་གྱི་ཅི་བགྱིས་ལས་སྒྲུབ། སྐབས་འདི་ནས་ལྷུན་གྲུབ་འོད་གསལ་གྱི་སྣང་བ་ཚད་ལ་ཕེབས་པས་སྣང་སྤྱོད་ཡེ་ཤེས་ཀྱི་རོལ་པར་ཤར་ཏེ་སངས་རྒྱས་ཀྱི་ཞིང་ཁམས་རྒྱ་མཚོ་དང་མཉམ་པ་ཉིད་དུ་ལོངས་སྤྱོད། ལྷ་རེང་བྲག་ཏུ་ཞི་ཁྲོའི་སྐོང་ཆོག་མཛད་པས་ཞི་ཁྲོའི་ལྷ་ཚོགས་ནམ་མཁར་བཞུགས་པ་དེར་འཚོགས་ཀུན་གྱིས་མཐོང་། རྒྱ་མའི་གནས་སུ་སྤྱན་དྲངས་དགེ་བའི་བཤེས་གཉེན་མང་དུ་འདུས་པ་ལ་སྙིང་ཐིག་གི་དབང་ཁྲིད་གསུངས། ཁེངས་པའི་བློ་ཅན་མང་པོས་བརྒལ་བརྟག་ཞུས་པ་རྣམས་ལུང་རིགས་ཟབ་མོས་སྤོོབས་པ་བཅོམ་སྟེ་དད་པའི་གནས་ལ་བཀོད། སྒོམ་པ་ཀུན་རིན་གྱིས་འབྲི་གུང་དུ་སྤྱན་དྲངས། གྲོགས་ཨོ་རྒྱན་གྱི་དགོན་པ་ཕུལ་དད་པས་བསྙེན་ཅིང་གདམས་པ་དུ་མས་ཐར་པའི་ལམ་བསྟན། བི་མས་ལུང་བསྟན་པ་བཞིན་ཞྭ་ཡི་ལྷ་ཁང་ཞིག་གསོ་མཛད་དུས། དབུ་རྩེའི་ཐད་ནས་གསེར་འགུ་ཙེ་གང་བཏོན་ནས་གཙུག་ལག་ཁང་གི་ཆ་རྐྱེན་དང་རྟེན་གྱི་ན་བཟར་གསོལ། གཏེར་མང་དུ་འདུག་པ་ལས་སྒྲུབ་ཐབས་ཟབ་པ་འགའ་ཞིག་བཞེས། དམ་ཅན་བྱིས་པར་བརྫུས་ནས་བཟོ་བོ་རྣམས་ཀྱི་གྲོགས་བྱས། རྡོ་རིང་ཆེན་མོ་གཉིས་འགྱེལ་བ་ཐབས་གང་གིས་ཀྱང་སློང་མ་ནུས་པར་ཆོས་རྗེ་ཉིད་ཀྱིས་བདེན་སྟོབས་བརྗོད་ནས་སྐུ་ཆོས་ཀྱི་གཡབ་མོ་མཛད་པས་མོད་ལ་སློང་། ས་རྡོ་བསལ་དུས་འཐོན་པའི་མནན་པ་རྣམས་སླར་གནོན་པར་བརྩམས་པ་ན་ཐུག་ཆོམ་གྱི་སྒྲ་དང་ས་རྡོའི་ཆར་ཕབ། འཐོར་རླུང་དྲག་པོ་དང་བཅས་ཏེ་མནན་ཐོད་རྣམས་ཕན་ཚུན་རྡེབ་ཅིང་མཁར་འཕག་སྟེ་ཡར་གྲབ་ཀྱི་ཆོ་འཕྲུལ་མི་བཟད་པས་འཁོར་རྣམས་ཅི་བྱ་རྟོལ་བྲལ་དུ་གྱུར་ཚེ་དྲག་ཤུལ་གྱི་ཏིང་ངེ་འཛིན་དང་ལྟ་སྟངས་ཀྱིས་བཀུག་ནས་ཞབས་འོག་ཏུ་བཙུད་པས་ཆོ་འཕྲུལ་རྣམས་མོད་ལ་ཞི། མནན་པ་རྣམས་ཕྲ་མེན་མཆོད་རྟེན་གྱི་འོག་ཏུ་མནན། རབ་གནས་ཀྱི་སྐབས་སུ་སྐུ་ཡི་བཀོད་པ་དུ་མ་བསྟན། སངས་རྒྱས་དང་ བྱང་སེམས་ནམ་མཁའ་གང་བས་ཤིས་བརྗོད་ཀྱི་མེ་ཏོག་འཐོར་བ་དང་། ཁྱད་པར་མགོན་པོ ་བྱམས་པས་ཕྱག་མཛུབ་གདེངས་ནས། ཁྱོད་སྐྱེ་བ་གཉིས་འདས་པའི་འོག་ཏུ་པདྨ་བརྩེགས་པའི་ཞིང་དུ་རྒྱལ་བ་རི་རབ་མར་མེའི་རྒྱལ་མཚན་ཞེས་བྱ་བར་འགྱུར་རོ། །ཞེས་ལུང་བསྟན་པ་གཟིགས། ཚེས་བཅུའི་མཆོད་པ་མཛད་ཚེ་གུ་རུ་མཁའ་འགྲོའི་འཁོར་དང་བཅས་པ་དངོས་སུ་བྱོན་ནས་བྱིན་གྱིས་བརླབས། ཏི་སྒྲོའི་མཁའ་འགྲོ་མ་རྣམས་ཀྱིས་བུམ་ཐང་དུ་འབྱོན་པར་ལུང་བསྟན། གནས་དེར་ཞི་ཁྲོའི་བསྐང་བཤགས་ཡུན་རིང་མཛད། མི་མི་ཐར་བའི་བྲག་གཡང་གཟར་པོ་ལ་རྒྱལ་མཚན་དང་བ་དན་བཙུགས། དེ་དག་ཏུ་འགྲོ་བ་མང་པོ་རྗེས་སུ་བཟུང་ནས་ཐར་པའི་ལམ་དུ་རིགས་སད་པར་མཛད། ཕྱིར་ལམ་ལྷ་སར་བྱོན་དུས་ཡར་ཀླུངས་པས་ཐོ་འཚམ་པར་བརྩམས་པ་ན་མི་སྣང་བའི་རྫུ་འཕྲུལ་གྱིས་ངན་པ་དེ་དག་དམུས་ལོང་དུ་གྱུར། ཇོ་བོ་ལ་མཆོད་ཅིང་གསོལ་བ་བཏབ་པའི་ཚེ་སྐུ་ལས་འོད་ཟེར་འཕྲོས་པའི་སྟེང་གི་ནམ་མཁར་སངས་རྒྱས་བྱང་སེམས་གྲངས་མེད་པ་བཞུགས་པས་བྱིན་གྱིས་བརླབས་པ་དང་། དམ་ཅན་མང་པོ་བྲན་བཞིན་དུ་དམ་ནོད། ཤུག་གསེབ་དུ་ཕེབས་དུས་ས་ཕག་གི་འཁྲུགས་པས་བོད་མི་བདེ་བའི་མཚན་མ་གཟིགས་ནས་ལྷོ་མོན་དུ་ཐེགས་པར་ཕྱོགས། མཁའ་རི་སོགས་གཞི་བདག་རྣམས་ཀྱིས་ཕོ་མ་ནས་བསུས། ལ་ཡག་མན་ཐང་གནས་སུ་མཁན་ཆེན་པས་དབུས་སྐལ་ལྡན་དུ་མས་གུས་པར་མཆོད་ཅིང་ཟབ་ལམ་གྱི་གདམས་པས་སྨིན་པར་མཛད། བུམ་ཐང་དང་རྔ་ལོང་སོགས་མཐའ་འཁོབ་མུན་པའི་གླིང་དུ་ཆོས་ཀྱི་སྒྲོན་མེ་སྦར། ཐར་འདོད་འབུམ་ཕྲག་ཙམ་འཚོགས་པ་ལ་ཐར་པའི་གླིང་དུ་མིང་བཏགས་ནས་རེ་ཞིག་བཞུགས། སླར་ལྷོ་བྲག་གི་ཆེ་དགུས་སྤྱན་དྲངས། ལ་ཡག་ལྷ་ལུང་དང་མན་ཐང་གནས་སུ་དགེ་འདུན་གཙོ་བོར་གྱུར་པའི་འདུས་པ་སྟོང་ཕྲག་ལོངས་པ་ལ་གསང་བ་སྙིང་ཐིག་གི་གདམས་ཁྲིད་སྤྱི་དང་། ཁྱད་པར་མཁན་ཆེན་པ་ལ་གདམས་པའི་བཀའ་སྲོལ་རྫོགས་པར་གནང་ནས་བསྟན་པ་གཉེར་དུ་གཏད། ཡར་འབྲོག་ཏུ་ཁྲི་དཔོན་རྡོ་རྗེ་རྒྱལ་མཚན་པས་དད་པས་མཆོད་ཅིང་ཆོས་འཁོར་རྒྱ་ཆེར་བསྐོར། མཁྱེན་རྟོགས་དང་ཕྲིན་ལས་ཀྱིས་ཕག་གྲུ་ཏཱ་སི་བྱང་ཆུབ་རྒྱལ་མཚན་ཡང་ཆེས་དད་པར་གྱུར་ནས་བོད་ཤིང་སྒོ་ཅན་གྱི་བདག་པོ་སེངྒེ་རྐང་པ་བརྒྱད་པའི་སྤྱི་བོར་ཞབས་སེན་ལེགས་པར་བཀོད་ནས། ཉིས་སྟོང་དུ་ལོངས་པའི་འདུས་པ་ལ་ཡང་གསང་བླ་ན་མེད་ཀྱི་ཆོས་འཁོར་བསྐོར། ས་སྐྱའི་བླ་མ་དམ་པ་དང་། གསང་ཕུའི་གྲགས་བཟང་གིས་ལྟ་གྲུབ་ཀྱི་གནད་ལ་ཐེ་ཚོམ་གཅོད་པའི་དྲི་ཡིག་ཕུལ་བ་ཆོས་དང་མཐུན་པའི་ལན་གྱིས་གུས་ཤིང་རངས་པར་མཛད། སྐྱི་ཤོད་གསང་མདར་གླིང་སྟོད་སློབ་དཔོན་ཡོན་རྒྱམ་པ་སོགས་འདུས་པའི་བསྙེན་བཀུར་དང་། ཆོས་ཀྱི་དྲི་བ་མང་དུ་བྱས་པ་ལུང་རིགས་དང་འབྲེལ་བའི་ལན་གྱིས་ཁེངས་པ་བསྙིལ། གསེར་སྲང་བཅུ་སོགས་ཆོས་དང་ཟང་ཟིང་གི་སྦྱིན་པས་ཚིམ་པར་མཛད། ལྷ་སར་བྱོན་དགེ་འདུན་མང་པོའི་སེར་ཕྲེང་གིས་བསུས། ལྷ་ར་གཉིས་ཀྱི་བར་དུ་ཆོས་ཀྱི་ཁྲི་བརྩེགས་པའི་སྟེང་ནས་སེམས་བསྐྱེད་སོགས་ཆོས་འཁོར་རྒྱ་ཆེར་བསྐོར། ཁེངས་པའི་བློ་ཅན་མང་པོ་ལུང་རིགས་ཀྱིས་བཏུལ་ནས་དད་པའི་གནས་ལ་བཀོད་པས་ཀུན་མཁྱེན་ཆོས་རྗེ་ཞེས་པའི་མཚན་གྱི་རྣ་ལུང་དཔྱངས། གནས་རྟེན་རྣམས་མཆོད་ཅིང་བཤད་སྒྲུབ་གྱི་སྡེ་མང་པོར་ཚོགས་གསོག་རྒྱ་ཆེར་སྤེལ་ནས་བསྟན་འགྲོའི་ཕན་བདེ་རྒྱས་པའི་རྒྱུར་བསྔོས། སྙེ་ཕུ་ཤུག་གསེབ་ཏུ་ཕེབས་སྐལ་ལྡན་འདུས་པ་སྟོང་ཕྲག་བརྒལ་བ་ཟབ་ལམ་རྫོགས་པ་ཆེན་པོར་སྨིན་པར་མཛད་ནས་དབུར་སྟོད་དུ་སྤྱན་དྲངས། མཁར་བ་རིར་སི་ཏུ་ཤཱཀྱ་བཟང་པོས་མཆོད། དབང་དང་གདམས་པ་དུ་མས་བྱིན་གྱིས་བརླབས། དབྱར་བཞུགས་ཀྱི་ཕོག་ཕུལ་ནས་གྲོག་ཨོ་རྒྱན་གྱི་དགོན་པའི་ཕུའི་རྫ་འདབས་ནས་མདའི་བྲག་རྩ་ཡན་གང་བའི་ཆོས་ཉན་འབྲི་གུང་པའི་མཁན་སློབ་སོགས་ཆོས་འཆད་ཀྱི་སློབ་དཔོན་བཞི་བཅུ་ཙམ་དང་མི་ཆེན་སྐྱ་བཙུན་མང་པོས་མཚོན་འདུས་པ་སུམ་སྟོང་དུ་ལོངས་པ་ལ་འོད་གསལ་རྡོ་རྗེ་སྙིང་པོའི་དབང་ཁྲིད་རྒྱབ་ཆོས་བཅས་གསུངས་ཤིང་ཡོ་བྱད་དུ་མའི་འགྱེད་ཆེན་གྱིས་ཀྱང་ཚིམ་པར་མཛད། སླར་ཡང་གཞན་དོན་ནུས་པ་བརྒྱ་ཕྲག་བརྒལ་བ་ལ་དབང་གོང་མ་སོགས་ཐུན་མོང་མིན་པའི་གདམས་པ་དང་རྒྱུད་འགྲེལ་མན་ངག་རྣམས་མཐའ་རྒྱས་སུ་སྩལ། ཆོས་འཐོན་པའི་ཚོགས་འཁོར་གྱི་ཚེ། རང་རེ་དཔོན་སློབ་ཆོས་འཁོར་བསྐོར་ནས་ཚོགས་མཆོད་བྱེད་པ་ད་རེས་ཙམ་དུ་གདའ། ཁྱེད་རྣམས་ཀྱིས་ཚེ་འདི་བློས་ཐོངས་ལ་ཟབ་མོའི་ལམ་གྱིས་གཏན་བདེའི་སྙིང་པོ་ལོངས་པར་གྱིས་ཤིག་ཅེས་ཞལ་བཀོད་ཀྱང་ནན་ཏན་དུ་མཛད། ཞྭ་ལྷ་ཁང་དུ་མཆོད་ཅིང་སྨོན་ལམ་མཛད། དེར་ཁྲོམ་ཆོས་གསུང་དུས་མེ་ཏོག་གི་ཆར་ངོ་མཚར་བ་བབས། བསམ་ཡས་དུང་གཏོང་དྲུག་གི་སྤྱན་འདྲེན་ལ་བརྟེན་རྒྱ་མར་དད་ཅན་དུ་མས་མཆོད་ཅིང་གདམས་པའང་ཅི་རིགས་བསྩལ་ནས་མཆིམས་ཕུ་དཔལ་གྱི་ནགས་ཁྲོད་དུ་ཕེབས། དེར་ཆོས་ཉན་པ་མང་དུ་འདུས་པ་ལ་གསང་བ་བླ་མེད་ཀྱི་ཁྲིད་ཚུགས། ཚོགས་པ་ཆེས་བས་སྤྲོས་མེད་ཀྱི་དབང་ཞག་དུ་མར་སྦྲེལ་བ་ཚེས་བཅུ་དྲུག་གི་བར་གསུངས་ནས་རེ་ཞིག་སྐུ་དངོས་ཀྱི་གདུལ་བྱ་དེ་ཙམ་དུ་དགོངས་ནས། ད་ནི་མི་སྡོད་པདྨ་ལས་འབྲེལ་རྩལ། །འཆི་མེད་བདེ་ཆེན་བཙན་ས་འཛིན་དུ་འགྲོ། །གཡུལ་ལས་རྣམ་པར་རྒྱལ་བའི་ལྷ་དབང་དང་། །རྒྱ་མཚོར་དོན་ཡོངས་གྲུབ་པའི་ཚོང་པ་དང་། །བསམ་གཏན་གྲུབ་པའི་དགའ་བས་ཆེ་ལྷག་གོ །ཞེས་སོགས་ཀྱི་ཞལ་ཆེམས་གསུངས་པ་བཞིན་དགུང་ལོ་ལྔ་བཅུ་རྩ་དྲུག་བཞེས་པ་ཆུ་མོ་ཡོས་ཀྱི་ལོ་རྒྱལ་ཟླའི་ཚེས་བཅོ་བརྒྱད་ཀྱི་གྲོ་ཁར་ཆོས་སྐུའི་བཞུགས་སྟངས་ཀྱིས་གདོད་མའི་ཟད་སར་གཤེགས་སོ། །དེ་ནས་བཟུང་སྐུ་གདུང་ཞག་ཉེར་ལྔའི་བར་བཞུགས་རིང་ལ་རྡུལ་བྲལ་གྱི་ནམ་མཁར་འཇའ་ཚོན་གྱི་གུར་དང་མེ་ཏོག་གི་ཆར་སོགས། ངོ་མཚར་བའི་ལྟས་རྒྱུན་ཆགས་པར་གནས་པ་དང་། རྒྱལ་དང་ཆོ་འཕྲུལ་གཉིས་ཀར་ས་དྲོས། འཁྱགས་ཞུ། སེ་བའི་མེ་ཏོག་རྒྱས། གདུང་བཞུ་བའི་ཚེའང་ས་ལན་གསུམ་དུ་གཡོས་ཤིང་སྒྲ་ཆེན་པོ་བདུན་གྲགས། ཐུགས་ལྗགས་སྤྱན་གསུམ་མེས་མ་རྨས་པ་དང་རིགས་ལྔའི་གདུང་དང་རིང་བསྲེལ་གྲངས་མེད་པ་བྱོན། ནང་རྟེན་སྐུ་འབག་དང་། ཕྱི་རྟེན་བྱང་ཆེན་མཆོད་རྟེན་ཡང་གནས་དེར་བསྒྲུབས་སོ། །སློབ་མ་ཡང་དུས་མཉམ་གྱི་སྐྱེས་ཆེན་ཕལ་མོ་ཆེས་གསང་བ་སྙིང་ཐིག་གི་ཆོས་འདི་དང་འབྲེལ་བའི་མན་ངག་ཅི་རིགས་པ་མ་གསན་པ་མེད་པ་ལྟ་བུ་དང་། དབང་ལུང་རྫོགས་པར་ཐོབ་པ་ནི་སྟོང་ཕྲག་མང་པོ་དང་། དབང་ཁྲིད་ཙམ་ཐོབ་པ་ནི་བགྲང་བའི་ཡུལ་ལས་འདས་ཤིང་། ཉམས་མྱོང་དྲོད་ཚད་ཐོབ་པའང་ཤིན་ཏུ་མང་བས་ལྗོངས་འདིའི་རི་སུལ་ཐམས་ཅད་རྫོགས་པ་ཆེན་པོའི་རྣལ་འབྱོར་གྱིས་ཁྱབ་པར་མཛད་དོ། །དེ་ལས་གཙོ་བོར་གྱུར་པ་ནི། མཁས་གྲུབ་ཁྱབ་བརྡལ་ལྷུན་གྲུབ། ཞོག་ཐར་གླིང་པ་མཁས་གྲུབ་བདེ་ལེགས་རྒྱ་མཚོ། མཁས་གྲུབ་ཆོས་ཀྱི་གྲགས་པ་སྟེ་གྲགས་པ་ཐོན་པའི་མཁས་གྲུབ་གསུམ། འདན་སྒོམ་ཆོས་གྲགས་བཟང་པོ་རྒྱལ་སྲས་བཟོད་པ་གྲགས། བླ་མ་དཔལ་མཆོགཤུག་གསེབ་པ་ཡེ་ཤེས་རབ་འབྱམས། གཞོན་ནུ་སངས་རྒྱས་ཏེ་ཐུགས་སྲས་ལྔ། ལྷུན་བདེ་རབ་འབྱམས་པ་སྤྲུལ་སྐུ་དཔལ་འབྱོར་རྒྱ་མཚོ། སློབ་དཔོན་སངས་རྒྱས་ཀུན་དགའ། སློབ་དཔོན་བློ་གྲོས་བཟང་པོ། སྟག་མགོ་བྱ་བྲལ་ཆོས་རྗེ་བཀྲ་ཤིས་འབྱུང་གནས་ཏེ་བསྟན་པ་སྤེལ་བའི་བཤེས་གཉེན་བཞི། ཕ་རྒོད་རྟོགས་ལྡན་རྒྱལ་པོ། རྣལ་འབྱོར་པ་འོད་ཟེར་གོ་ཆ། རིག་འཛིན་གུ་རུ་བ་འོད་གསལ་རང་གྲོལ། བྱ་བཏང་བསོད་ནམས་འོད་ཟེར་ཏེ་གྲུབ་པ་ཐོབ་པའི་རྣལ་འབྱོར་པ་བཞི་རྣམས་དང་། གཞན་ཡང་འཁྲུལ་ཞིག་སངས་རྒྱས་དབོན་པོ། གྲོགས་ཨོ་རྒྱན་ཆོས་རྗེ། གླུ་མཁན་བསོད་ནམས་སེང་གེ། གྲགས་པ་དཔལ། སངས་རྒྱས་དཔལ་རིན་སོགས་ཕྲིན་ལས་ཀྱི་རྒྱུན་རྒྱ་ཆེར་སྤེལ་བར་མཛད་པ་མང་། ཕྱིས་ཀྱང་འབྲི་གུང་ཟུར་པ་རིན་ཆེན་ཕུན་ཚོགས། སྨིན་གླིང་གཏེར་ཆེན་རིག་འཛིན་འགྱུར་མེད་རྡོ་རྗེ། གཡོ་རུ་རྫོགས་ཆེན་པ་མཁྱེན་བརྩེའི་འོད་ཟེར། ཁོ་བོའི་བླ་མ་རྡོ་རྗེ་གཟི་བརྗིད་སོགས་ལ་ཡེ་ཤེས་ཀྱི་སྐུ་དངོས་སུ་བསྟན་ཅིང་ཉེ་བརྒྱུད་གདམས་པས་རྗེས་སུ་བཟུང་བས་དོན་གྱི་རྒྱལ་ཚབ་ཆེན་པོར་གྲུབ་པ་ཡིན་ནོ། །དེ་ལས་མཁས་གྲུབ་ཁྱབ་བརྡལ་ལྷུན་གྲུབ་ནི། ལྷོ་བྲག་ཏུ་ཡབ་དཔལ་འདྲེན་དང་། ཡུམ་བསམ་འགྲུབ་སྐྱིད་ཀྱི་སྲས་སུ་འཁྲུངས། ཆུང་ངུ་ནས་དམ་པའི་རིགས་སད་ཅིང་ལོ་ལྔ་ནས་འབྲི་ཀློག་མཁྱེན། ལྷ་ལུང་སྟན་གཅིག་ལྡེར་རབ་ཏུ་བྱུང་ཞིང་། ཆོས་ལུང་མཁན་ཆེན་བསོད་ནམས་གྲགས་པ་ལས་བསྙེན་པར་རྫོགས། རྒྱལ་སྲས་ཐོགས་མེད། འཇམ་དབྱངས་ལེགས་ལྡན་པ་སོགས་ཡོངས་འཛིན་མཁས་གྲུབ་དུ་མ་ལས་མདོ་སྔགས་གསར་རྙིང་རིག་གནས་དང་བཅས་ཀུན་གསན་ཅིང་ཆུབ་པར་མཛད་ནས་ལུང་རིགས་སྨྲ་བའི་སྡེ་རྣམས་སུ་གྲྭ་སྐོར་མཛད་པས་མཁས་པའི་གྲགས་པ་ཐོན། ལྷ་ལུང་ཇོ་གདན་པའི་མཁན་པོ་མཛད་ཅིང་བསྡུ་བ་བཞིས་བསྟན་འགྲོའི་དོན་རླབས་པོ་ཆེ་སྒྲུབ། ཀུན་མཁྱེན་ཆེན་པོ་ལྷོ་མོན་དུ་ཕེབས་དུས་མན་ཐང་གནས་སུ་སྤྱན་དྲངས་ཤིང་མཉེས་པ་གསུམ་གྱིས་བསྙེན་ནས་གསང་བ་བླ་མེད་ཀྱི་དབང་ཁྲིད་སོགས་གདམས་པ་མང་དུ་གསན་ནས་ལྷ་ལུང་ཟེ་མཁར་དུ་ལོ་ལྔར་ཉམས་ལེན་སྙིང་པོར་མཛད་པས་རྫོགས་པ་ཆེན་པོ་རང་སྣང་རིས་མེད་ཀྱི་རྟོགས་པ་མཐར་ཕྱིན། ཡི་དམ་གྱི་ལྷ་དུ་མའི་ཞལ་གཟིགས། དམ་ཅན་ཆོས་སྐྱོང་རྣམས་ཀྱིས་དངོས་སུ་བཀའ་ནོད་ཅིང་ཕྲིན་ལས་སྒྲུབ་པ་བྱུང་། དུས་གསུམ་སྒྲིབ་མེད་དུ་གཟིགས་པས་ལྐོག་གྱུར་གྱི་ཆོས་རྣམས་ལུང་དུ་སྟོན་པ་སོགས་ཀྱིས་འགྲོ་བ་མཐའ་དག་དད་པར་མཛད། ཕྱིས་ཀུན་མཁྱེན་ཆེན་པོ་མོན་ནས་སྤྱན་འདྲེན་པའི་གཙོ་བོའང་མཛད་ནས་ལྷོ་བྲག་ཏུ་གུས་པས་མཆོད་ཅིང་ཆོས་འཁོར་རྒྱ་ཆེར་བསྐོར་བར་བསྐུལ། ཁྱད་པར་མཁའ་འགྲོ་སྙིང་ཏིག་གསན་ཅིང་སྔར་གསན་པ་རྣམས་ཀྱང་ཞུ་ཏིག་མཛད། ཆོས་རྗེ་ཤིན་ཏུ་མཉེས་པས་གདམས་པའི་གཏད་རྒྱ་བཅས་རྒྱལ་ཚབ་ཏུ་དབང་བསྐུར་བ་བཞིན་གསང་ཆེན་རྫོགས་པ་ཆེན་པོ་ཆོས་རྗེའི་བཀའ་སྲོལ་ཉིད་བཤད་སྒྲུབ་ཀྱི་སྙིང་པོར་མཛད་པས། སྤྲུལ་སྐུ་གྲགས་འོད། གཏེར་ཆེན་རྡོར་གླིང་སོགས་ཟླ་བྲལ་སྐྱེས་མཆོག་དུ་མས་མཚོན་སློབ་ཚོགས་མཐའ་ཡས་པ་སྨིན་གྲོལ་མཛད་ནས་དགུང་གྲངས་གོ་བདུན་པ་ལ་གཟུགས་སྐུ་བསྡུས་ཤིང་གདུང་སྦྱང་བའི་ཚེའང་གདུང་དང་རིང་བསྲེལ་མང་དུ་བྱོན་པ་སོགས་ངོ་མཚར་བའི་ཆོ་འཕྲུལ་ཆེན་པོས་འགྲོ་བ་མཐའ་དག་དད་པར་མཛད་དོ། །རྒྱལ་སྲས་སྤྲུལ་སྐུ་གྲགས་པ་འོད་ཟེར་ནི། མཁའ་འགྲོ་སྙིང་ཏིག་གི་ཞུ་ལེན་གསེར་ཕྲེང་ལས་ལུང་བསྟན་པ་ལྟར། ཀུན་མཁྱེན་ཆེན་པོ་ཉིད་ལྷུན་གྲུབ་འོད་གསལ་ཚད་ཕེབས་ཀྱི་སྣང་བ་ལོངས་སྐུའི་ཞིང་ཉུལ་བ་ལས་འགྲོ་བ་འདུལ་པའི་སྤྲུལ་སྐུ་སྲས་ཀྱི་ཚུལ་དུ་ཤར་བ་སྟེ། ཡུམ་མོན་མོ་སྐྱིད་པ་ཡགས་ཀྱི་སྲས་སུ་མེ་ཕོ་སྤྲེའུ་ལོ་ལ་འཁྲུངས། ཆུང་ངུ་ནས་དམ་པའི་བག་ཆགས་སད་ཅིང་ཡུམ་ལ་གྲོས་འདེབས་ཀྱི་མགུར་དང་འདུས་པ་རྣམས་ལ་བརྡས་ཆོས་སྟོན་པར་མཛད། སྔགས་སྲུང་མ་དང་དྲང་སྲོང་ཆེན་པོས་སྲི་ཞུ་སྒྲུབ་པ་ཀུན་གྱི་མཐོང་སྣང་དུ་གྲུབ། ཆོས་རྗེས་ལུང་བསྟན་པ་བཞིན་དགུང་གྲངས་ལྔ་པར་མཁས་གྲུབ་ཁྱབ་བརྡལ་ལྷུན་གྲུབ་ཀྱིས་ལྷ་ལུང་ཟེར་ཁར་དུ་གདན་དྲངས་ནས་ཆོས་དང་ཟང་ཟིང་གི་སྲི་ཞུས་བསྐྱངས། དགུང་ལོ་བརྒྱད་པར་མཁན་ཆེན་དེ་ཉིད་ལས་རབ་ཏུ་བྱུང་ཞིང་གསར་རྙིང་གི་ཆོས་བཀའ་མཐའ་ཡས་པ་དང་། ཁྱད་པར་འོད་གསལ་རྡོ་རྗེ་སྙིང་པོའི་དབང་ཁྲིད་མན་ངག་སོགས་ཆོས་རྗེའི་བཀའ་སྲོལ་མཐའ་དག་གསན་ཅིང་ཆུབ་པར་མཛད། དགུང་གྲངས་དགུ་པར་ཆོས་རྗེའི་བུ་སློབ་ཡོན་བདག་རྣམས་ཀྱིས་དབུས་སུ་སྤྱན་དྲངས་ཤིང་གུས་པས་མཆོད། གཡག་སྡེ་པཎ་ཆེན་གྱིས་ཀྱང་གུས་པས་ཞབས་ལ་བཏུད་ཅིང་སྐྱེས་ཐོབ་ཀྱི་བློ་གྲོས་རྨད་དུ་བྱུང་བར་ཆེད་དུ་བརྗོད་པས་ཀྱང་བསྔགས། དེ་དག་ཏུ་མཆོག་ཕལ་གྱི་འགྲོ་བ་མཐའ་དག་ལ་སྐལ་བ་དང་འཚམས་པའི་ཆོས་ཀྱི་འཁོར་ལོ་རྒྱ་ཆེར་བསྐོར་ནས་ལྷོ་རྒྱུད་དུ་ཕེབས། ཡར་འབྲོག་ཁྲི་དཔོན་རྡོར་རྒྱལ་བ་སོགས་འགྲོ་བ་མང་པོ་སྨིན་གྲོལ་ལ་བཀོད་ནས་ལྷ་ལུང་སོགས་བརྒྱུད་རིམ་བཞིན་མོན་དུ་བྱོན། གླང་མ་མཐིལ་གྱི་སྒྲུབ་སྡེ་བཏབ། བུམ་ཐང་རྡ་ལོང་མན་ལོག་སོགས་མཐའ་འཁོབ་ཀྱི་ཞིང་རྣམས་སུ་འོད་གསལ་རྡོ་རྗེ་སྙིང་པོའི་སྒྲོན་མེ་སྦར་བས་སྐལ་ལྡན་མཐའ་ཡས་པའི་དོན་མཛད་ནས། སླར་ཡང་བོད་ཀྱི་གདན་ས་རྣམས་ཀྱི་ཕྲིན་ལས་ཆེར་བསྐྱངས། ཁྱད་པར་ཐེག་མཆོག་རྫོགས་པ་ཆེན་པོའི་བཀའ་སྲོལ་རྣམས་དར་རྒྱས་སུ་མཛད་པས། རང་སྲས་སྐུ་མཆེད། འཁྲུལ་ཞིག་སངས་རྒྱས་དབོན་པོ་སོགས་རྒྱུད་པ་ཟིན་ངེས་ཀྱི་བུ་ཆེན་མཁས་གྲུབ་མང་པོ་དང་། ཀུན་མཁྱེན་ཆེན་པོའི་དངོས་སློབ་རྣམས་ཀྱིས་ཀྱང་ཆོས་ཀྱི་བདུད་རྩི་ཅི་ཐོབ་ཏུ་ནོད་པས་མཚོན་བརྒྱུད་འཛིན་གྱིས་ཕྱོགས་ཀུན་ཏུ་ཁྱབ་པར་མཛད་ནས་དགུང་གྲངས་ང་བཞི་པ་ལ་སྐལ་ལྡན་བྱམས་པ་ལྡིང་དུ་ཞི་བར་གཤེགས། གདུང་སྦྱངས་པས་ལྷ་སྐུ་དང་རིང་བསྲེལ་མང་དུ་འཕེལ། འཇའ་ཚོན་གྱི་གུར་ཁྱིམ་སོགས་ངོ་མཚར་བའི་ལྟས་ཀྱིས་ཀྱང་རྗེས་འཇུག་རྣམས་དད་པའི་གནས་ལ་བཀོད་དོ། །འཁྲུལ་ཞིག་སངས་རྒྱས་དབོན་པོ་ཤེས་རབ་རྒྱ་མཚོ་ནི། བསམ་ཡས་སེམས་བསྐྱེད་གླིང་གི་འདབས་སུ་འཁྲུངས། ཆུང་ངུ་ནས་རིགས་སད་ཅིང་བཅོས་མིན་གྱི་ངེས་འབྱུང་ཐུགས་ལ་འཁྲུངས། དགུང་ལོ་བདུན་པར་རབ་ཏུ་བྱུང་ནས་བསམ་ཡས་ཚོགས་སྡེར་བཞུགས། བར་སྐབས་མཛེ་གྲིབ་ཀྱིས་ཐུགས་རབ་མ་གསལ་བར་འཇམ་དཀར་གྱི་བསྙེན་སྒྲུབ་མཛད་པས་བྱིན་གྱིས་བརླབས་པའི་རྟགས་མཚན་དང་བཅས་ཤེས་རབ་ཀྱི་རྩལ་བྱེ་སྔ་ཕྱི་ཅི་རིགས་པར། ཆོས་རྗེ་རང་བྱུང་རྡོ་རྗེ། བླ་ཆེན་བསོད་རྒྱལ། རྒྱལ་སྲས་ཐོགས་མེད། བོ་དོང་ཕྱོགས་རྒྱལ། མཁས་པ་བུ་སྟོན། ཆོས་ལུང་མཁན་རབས་བཞི་སོགས་བཤེས་གཉེན་ལྔ་བཅུ་ལྷག་ཙམ་བསྟེན་ནས་མདོ་སྔགས་གསར་རྙིང་གི་དབང་ཁྲིད་བཤད་བཀའ་མཐའ་ཡས་པ་གསན་ཅིང་མཁྱེན་པར་མཛད་པས་མཁས་པའི་གྲགས་པ་ཐོན། གཞུང་གི་རི་བོར་ཀུན་མཁྱེན་ཆོས་རྗེ་མཇལ་བས་རྫོགས་ཆེན་གསང་སྐོར་སོགས་བཀའ་གཏེར་གྱི་དབང་ཁྲིད་མང་པོ་དང་བླང་དོར་གྱི་ཞལ་བསྒོས་རྟེན་གསུམ་གྱི་གནང་སྦྱིན་སོགས་རྒྱ་ཆེར་སྩལ་ཅིང་དོན་གྱི་རྒྱལ་ཚབ་ཏུ་དབང་བསྐུར། སླར་ཡང་ཐོས་བསམ་ཅི་རིགས་དང་དབེན་གནས་རྣམས་སུ་སྒྲུབ་པ་མཛད་པས་སྒོམ་བྱུང་གི་ཤེས་རབ་ཀློང་ནས་རྡོལ། སླར་ཡང་ཀུན་མཁྱེན་ཆེན་པོ་འབྲི་གུང་ནས་སྤྱན་དྲངས་ཏེ་མཆིམས་ཕུར་སྙིང་ཐིག་གི་དབང་ཁྲིད་གསན་སྐབས་ཁྲེགས་ཆོད་ཀྱི་ལམ་རྫོགས་མཚམས་ཆོས་རྗེ་ཞི་བར་གཤེགས་པས་སྐུ་གདུང་གི་ཞབས་ཏོག་དང་ཕྱི་ནང་གི་རྟེན་རྣམས་སྒྲུབ། གྲོགས་ལྷུན་གྲུབ་གླིང་དུ་བླ་མ་ཨོ་རྒྱན་པ་ལས་ཆོས་རྗེའི་བཀའ་སྲོལ་རྣམས་རྫོགས་པར་གསན། གནས་དེར་རྡོ་རྗེ་ཕག་མོས་རྗེས་སུ་བཟུང་། དབུར་སྨད་སོགས་ཀྱི་རི་ཁྲོད་རྣམས་སུ་སྒོམ་སྒྲུབ་སྙིང་པོར་མཛད་བཞིན་མཆིམས་ཕུར་བྱོན་ནས་གུ་རུ་འོད་གསལ་རང་གྲོལ་ལས་གསང་བ་སྙིང་ཐིག་གི་གདམས་པ་མཐའ་དག་གསན་པ་དང་སྒོམ་སྒྲུབ་སྤེལ་མ་ལོ་དྲུག་ཏུ་མཛད། ལྷོ་བྲག་ནས་རྒྱལ་སྲས་སྤྲུལ་སྐུ་རིན་པོ་ཆེ་ཕེབས་པ་གུས་པས་མཇལ་ཞིང་། འདི་བ་ཆོས་ཀྱི་བདག་པོར་ལུང་གིས་ཟིན་པའི་ཕྱིར་ཆོས་རྗེའི་བཀའ་སྲོལ་མཐའ་དག་བསྐྱར་ནས་གསན་ཏེ་བརྒྱུད་པའི་གཙོ་བོའང་འདི་ཉིད་མཛད། ཆོས་སྒོ་རིས་སུ་མ་ཆད་པ་ལ་དབང་འབྱོར་ཡང་ཆོས་རྗེ་ཀུན་མཁྱེན་པའི་བཀའ་སྲོལ་ཉིད་བཤད་སྒྲུབ་ཀྱི་མཐིལ་དུ་མཛད་པས་གླིང་སྨད་པ་ཤེས་རབ་དཔལ་ལྡན་སོགས་མཁས་གྲུབ་ཀྱི་བུ་སློབ་མཐའ་ཡས་པ་དང་། ཁྱད་པར་ཀུན་མཁྱེན་ཟླ་གྲགས། བྱ་བཏང་གྲགས་རྒྱལ་སོགས་སྙིང་པོའི་བསྟན་འཛིན་ཁྱད་པར་དུ་འཕགས་པ་དུ་མ་བསྐྲུན་པས་མཚོན་དོན་གཉིས་ལྷུན་གྱིས་གྲུབ་པའི་ཕྲིན་ལས་ནམ་མཁའ་དང་མཉམ་པའི་ངང་ནས་ཆུ་མིག་དཔལ་གྱི་རི་བོར་ཐེག་པ་མཆོག་གི་འབྲས་བུ་བརྙེས་པའི་རྟགས་རྣམས་མངོན་དུ་བསྟན་ནས་གཤེགས་སོ། །རྒྱལ་སྲས་ཀུན་མཁྱེན་ཟླ་བ་གྲགས་པ་ནི། སྤྲུལ་སྐུ་གྲགས་པ་འོད་ཟེར་གྱིས་མ་ཅིག་རྒྱན་འབུམ་ལས་རྒྱར་བཞེས་པ་ལས། སྲས་གཉིས་འཁྲུངས་པའི་ཆེ་བ་ཉི་མ་འོད་ཟེར་ནི་དབུ་རུ་བྱང་ཕྱོགས་ཀྱི་བུ་སློབ་རྣམས་ཀྱི་མགོན་དུ་སྤྱན་དྲངས་ཤིང་འདན་སྒོམ་ཆོས་གྲགས་བཟང་པོར་བླ་མར་བསྟེན་ནས་ཡབ་ཆོས་རྣམས་ཐོས་བསམ་སྒོམ་གསུམ་གྱིས་གཏན་ལ་ཕབ་ནས་ཕྱོགས་དེར་ཕྲིན་ལས་བསྐྱངས་པས་སྲས་ཆོས་དབྱིངས་གྲགས་པ་སྐུ་མཆེད་སོགས་གདུང་དང་ཆོས་ཀྱི་ཕྲིན་ལས་ཆེར་བྱུང་། གཅུང་ཟླ་བ་གྲགས་པ་ནི། ལུང་ཟིན་གྱིས་སྲས་ཡིན་ཏེ་གྲྭའི་སྐལ་ལྡན་བྱམས་པ་ལྡིང་དུ་འཁྲུངས། ཆུང་ངུ་ནས་དམ་པའི་མཚན་ཉིད་གསལ་ཞིང་དགུང་ལོ་ལྔ་པར་འབྲི་ཀློག་སྒྲུབ་ཕྲིན་སོགས་ཚེགས་མེད་པར་མཁྱེན། ཡབ་ལས་རྫོགས་པ་ཆེན་པོའི་དབང་ཁྲིད་ཆོས་བཀའ་རྣམས་གསན། རྩེས་ཐང་གི་ཆོས་གྲྭར་རབ་ཏུ་བྱུང་ཞིང་མཁན་ཆེན་བསོད་ནམས་བཟང་པོ་ལས་བསྙེན་པར་རྫོགས། སློབ་དཔོན་རྒྱལ་བཟང་བ། འཇམ་དབྱངས་ཙོང་ཁ་པ། མཁན་ཆེན་སེངྒེ་དཔལ་སོགས་མཁས་གྲུབ་མང་པོ་བསྟེན་ནས་ཐོས་བསམ་གྱི་སྒྲོ་འདོགས་བཅད་དེ་ཐམས་ཅད་མཁྱེན་པའི་གནས་ལ་བདག་གིར་མཛད། ཁྱད་པར་འཁྲུལ་ཞིག་སངས་རྒྱས་དབོན་པོ་ལས་ཀུན་མཁྱེན་ཆོས་རྗེའི་བཀའ་སྲོལ་གྱི་དབང་ཁྲིད་མན་ངག་མཐའ་དག་བུམ་པ་གང་བྱོར་གསན་ནས་བསམ་སྒོམ་གྱིས་གཏན་ལ་ཕབ། ཤུག་གསེབ་པ་ཡེ་ཤེས་རབ་འབྱམས་ལས་གཏེར་སྟོན་ནས་ལེགས་ལྡན་བར་བརྒྱུད་པའི་བཀའ་སྲོལ་ཡང་གསན་ནས་དགུང་གྲངས་བཅོ་བརྒྱད་པ་ནས་བརྩམས་སྐལ་ལྡན་འདུས་པ་རྣམས་ལ་སྙིང་ཐིག་རྣམ་གཉིས་ཀྱི་དུས་ཁྲིད་བསྟར་ཆགས་སུ་གསུངས། དབུས་གཡོར་ལྷོ་མོན་ཡུལ་གྱི་མཐར་ཐུག་བར་ཞབས་ཀྱིས་བཅགས་ནས་མཆོག་ཕལ་གྱི་འགྲོ་བ་མཐའ་ཡས་པ་རྗེས་སུ་བཟུང་ཞིང་བུམ་ཐང་བསམ་གཏན་གླིང་གི་སྒྲུབ་སྡེ་བཏབ། སྒྲུབ་མཚོ་པདྨ་གླིང་དུ་ལོ་སྒྲུབ་དང་། ཆོས་རྗེ་བྲག་ཏུ་ལོ་གསུམ་གྱིས་མཚོན་སྒྲུབ་གནས་རྣམས་སུ་འོད་གསལ་སྙིང་པོའི་ཉམས་བཞེས་གཙོ་བོར་མཛད་པས་ཉམས་རྟོགས་མཐར་ཕྱིན། ལྷག་པའི་ལྷ་དུ་མའི་ཞལ་གཟིགས། ལས་ཅན་མང་པོས་རྟ་མགྲིན་གྱི་སྐུར་མཐོང་བའང་མང་དུ་བྱུང་། ཐོགས་པ་མེད་པའི་མངོན་ཤེས་ཀྱི་ལྐོག་གྱུར་རྣམས་ལུང་སྟོན། ཆོས་བཀའ་ནམ་གསུང་གི་དུས་འཇའ་འོད་སོགས་ངོ་མཚར་བའི་ལྟས་མང་པོ་བརྒྱུད་མར་འོངས། གང་དུ་འབྱོན་བཞུགས་མཛད་པའི་ས་དེར་ལོ་ལེགས་ནད་མེད་པ་སོགས་གདུལ་བྱ་མཐའ་དག་ཕན་བདེ་ལ་འགོད་པའི་ཕྲིན་ལས་མཐའ་ཡས་པ་མངའ་བས་རྒྱ་གར་ཤར་ཕྱོགས་ཀྱི་རྒྱལ་པོ་ཆེན་པོ་གཉིས་སོགས་མཐའ་དབུས་ཀྱི་མི་ཆེན་རྣམས་དང་། གཏེར་ཆེན་རཏྣ་གླིང་པ། མགོན་པོ་རིན་ཆེན། སྤྲུལ་སྐུ་རྡོ་རྗེ་སེང་གེ། བྱམས་གླིང་པཎ་ཆེན། གླང་སྨད་ཁྲི་པ་སོགས་མཁས་བཙུན་གྲུབ་ཐོབ་ཆེས་མང་བ་དང་། གསུང་སྒྲོས་ཚུལ་བཞིན་སྐྱོང་བའི་བུ་ཆེན་གྲུབ་ཐོབ་ཀུན་བཟང་རྡོ་རྗེ། མཚུངས་མེད་ཤེས་རབ་བཟང་པོ། བླ་མ་མཐུ་ཆེན་སོགས་ཀྱིས་མཚོན་མཐའ་ཡས་པའི་གདུལ་བྱ་རྒྱ་མཚོ་སྨིན་གྲོལ་ལ་བཀོད་ནས། དགུང་གྲངས་བཞི་བཅུ་པ་ལ་བུམ་ཐང་བསམ་གཏན་གླིང་དུ་ངོ་མཚར་བའི་ཆོས་འཕྲུལ་མངོན་པར་འདུ་མཛད་ནས་གདོད་མའི་གྲོལ་སར་གཤེགས། གདུང་སྦྱངས་པས་རྣལ་འབྱོར་མའི་སྐུ་དང་རིང་བསྲེལ་མང་དུ་བྱོན་ནོ། །གྲུབ་ཆེན་ཀུན་བཟང་རྡོ་རྗེ་ནི། ལྷོ་མོན་མན་ལོག་ཏུ་འཁྲུངས། ཆུང་ནས་སྲིད་བདེ་འཁྲུལ་བར་ཤེས་པའི་ངེས་འབྱུང་དང་། རྒྱུ་འབྲས་ཡིད་ཆེས་ཀྱི་དད་པ་བརྟན་པོ་བཅོས་མིན་དུ་འཁྲུངས་ཤིང་དམ་པ་འགའ་ལས་ཆོས་བཀའ་ཅི་རིགས་གསན་ཏེ་དེ་དག་གི་ཉམས་ལེན་གཡེལ་མེད་གནང་བས་སྐྱེ་བོ་ཐམས་ཅད་དད་ཅིང་བསྔགས་པའི་གནས་སུ་གྱུར། དེའི་ཚེ་རྒྱལ་སྲས་ཀུན་མཁྱེན་པ་ལྷོ་མོན་དུ་ཕེབས་པ་མཇལ་ཞིང་། མཉེས་པ་གསུམ་གྱིས་ལོ་བདུན་དུ་བསྟན་ནས་ཀུན་མཁྱེན་ཆོས་རྗེའི་བཀའ་སྲོལ་གྱི་དབང་ཁྲིད་ལུང་མན་ངག་ཕྲིན་ལས་ཕྱག་བཞེས་དང་བཅས་པ་གསན་ཅིང་བསམ་སྒོམ་གྱིས་གཏན་ལ་ཕབ། ཐར་པ་གླིང་སྐུ་རྗེས་བྲག་སོགས་དབེན་པ་ཁོ་ནར་འདུ་འཛིའི་གཡེང་བ་ཐམས་ཅད་བཅད་ནས་དཀའ་སྤྱད་ཀྱི་ཉམས་བཞེས་སྙིང་པོར་མཛད་པས་རང་དོན་ཉམས་རྟོགས་མཐར་ཕྱིན། གཞན་དོན་གདུལ་བྱ་ཕན་བདེར་འགོད་པའི་ཕྲིན་ལས་ལ་མངའ་འབྱོར་བས། འབྲི་གུང་ཟུར་པ་སོགས་ཆེན་པོ་དུ་མས་ཀྱང་ཞབས་ལ་བཏུད། ཁྱད་པར་ཆོས་རྗེ་ཀུན་དགའ་རྒྱལ་མཚན། ལྕང་ལུང་པ་གཞོན་བློ་སོགས་མཁས་གྲུབ་ཀྱི་བཤེས་གཉེན་དུ་མས་མཚོན་གདུལ་བྱ་མཐའ་ཡས་པ་རྗེས་སུ་བཟུང་བ་སོགས་དམ་པའི་རྣམ་ཐར་གསེར་བཞིན་གསལ་བའི་ངང་ནས་བུམ་ཐང་གི་དབེན་པར་ངོ་མཚར་བའི་ལྟས་དང་བཅས་ཆོས་སྐུ་ཞི་བའི་དབྱིངས་སུ་གཤེགས་སོ། །ཆོས་རྗེ་ཀུན་དགའ་རྒྱལ་མཚན་དཔལ་བཟང་ནི། མོན་མཐར་མ་སང་ཨ་བ་སྤུན་བརྒྱད་ཀྱི་རིགས་སུ་མེ་སྦྲུལ་ལོར་འཁྲུངས་པ་དང་དུས་མཚུངས་ཆུ་མིག་གསར་དུ་རྡོལ་སྔོན་གནས་རྗེས་སུ་དྲན་ཞིང་བྲག་ལོགས་ལ་སོར་མོས་ཡིག་དྲུག་འདམ་ལ་བྲིས་པ་བཞིན་ཤར་བ་སོགས་དམ་པའི་མཚན་ཉིད་གསལ། དགུང་གྲངས་བཅུ་བཞི་པར་དབུས་སུ་བྱོན་ནས་སྤྱན་སྔ་ཆོས་ཀྱི་གྲགས་པ་ལས་རབ་ཏུ་བྱུང་། མཁན་ཆེན་དེ་ཉིད་ཀྱིས་གཙོས་བཤེས་གཉེན་དུ་མ་ལས་མདོ་སྔགས་ཐ་སྙད་བཅས་གསན་བསམ་གྱི་སྒྲོ་འདོགས་ཆོད་པར་མཛད་ནས་བཀྲ་ཤིས་དགེ་འཕེལ། ཉི་སྡེ། ལྷུན་གྲུབ་ཆོས་སྡེ་སོགས་བཟུང་ཞིང་ཕྲིན་ལས་ཆེར་བསྐྱངས་པའི་སྐབས་སྔར་གྱི་ཐོས་བསམ་དང་ཆོས་འཆད་རྣམས་ཕྱིའི་ཤུན་པ་ཙམ་དུ་དགོངས་ནས་གྲུབ་ཆེན་ཀུན་བཟང་རྡོ་རྗེ་ལས་སྙིང་ཐིག་ཡ་བཞི་སོགས་ཀུན་མཁྱེན་ཆེན་པོའི་བཀའ་སྲོལ་གྱི་གདམས་པ་ཆ་ལག་བཅས་གསན་ནས་ཉམས་བཞེས་སྙིང་པོར་མཛད་པས་ཉམས་རྟོགས་ཕུན་སུམ་ཚོགས་པ་འཁྲུངས་ཤིང་ཐུགས་དམ་འཆད་སྤེལ་གྱི་སྙིང་པོ་མཛད། གཞན་ཡང་གདུལ་བྱའི་བློ་དང་འཚམ་པར་རྒྱལ་བའི་བཀའ་འགྱུར་རིན་པོ་ཆེའི་གཙོས་ཆོས་སྒོ་མཐའ་ཡས་པ་གསུངས་པས། འབྲི་གུང་རིན་ཆེན་ཕུན་ཚོགས་སོགས་ཆེ་བཙུན་མཁས་པའི་བཤེས་གཉེན་མང་པོ་དང་། སྤྲུལ་སྐུ་སྣ་ཚོགས་རང་གྲོལ། རྫོགས་ཆེན་པ་བསོད་ནམས་རིན་ཆེན་སོགས་སྙིང་པོའི་བསྟན་འཛིན་མང་དུ་བསྐྲུན། སྐུ་ཚེའི་སྨད་ལ་གནས་ནང་དང་ཡངས་པ་ཅན་གྱི་གདན་ས་མཛད་པས་མཚོན་གཞན་ཕན་གྱི་ཕྲིན་ལས་ཕུན་སུམ་ཚོགས་པའི་ངང་ནས་བདུན་ཅུ་རྩ་གཉིས་པ་ལ་གཤེགས། སྤྲུལ་སྐུ་སྣ་ཚོགས་རང་གྲོལ་ནི། གཏེར་ཆེན་རཏྣ་གླིང་པའི་སྐུའི་སྐྱེ་བ་དེ་མ་ཐག་པ་སྟེ། ལྷོ་བྲག་མན་ཐང་དུ་ཤིང་སྟག་ལ་འཁྲུངས། ཆུང་ངུ་ནས་དམ་པའི་རྣམ་ཐར་གསལ། ལྷ་ལུང་མཁན་ཆེན་ལས་རབ་ཏུ་བྱུང་ཞིང་སྤོོས་ཁང་པ་ལས་བསྙེན་པར་རྫོགས། གཏེར་ཆེན་པདྨ་གླིང་པ་སོགས་ཡོངས་འཛིན་དྲུག་ཅུ་ཙམ་ལས་བཀའ་གདམས་ས་རྙིང་དྭགས་ཤངས་ཞི་གཅོད་ཇོ་ཞལ་བོ་དོང་སོགས་ཡོངས་སུ་གྲགས་པའི་ཆོས་བཀའ་མཐའ་དག་གསན། ཁྱད་པར་མཚུངས་མེད་ཀུན་དགའ་རྒྱལ་མཚན། མཁས་གྲུབ་མ་ཏི་དྷྭ་ཛ་སོགས་ལས་ཀུན་མཁྱེན་ཆེན་པོའི་བཀའ་སྲོལ་མཐའ་དག་དོན་གཉེར་ཆེན་པོས་གསན་ཅིང་བསམ་སྒོམ་གྱིས་གཏན་ལ་ཕབ། འཆིམས་ཕུ་ཤེལ་བྲག་སོགས་སྒྲུབ་གནས་དུ་མར་ཉམས་བཞེས་སྙིང་པོར་མཛད་པས་རྫོགས་པ་ཆེན་པོའི་ལྟ་སྒོམ་འབྲས་བུའི་དྲོད་ཚད་མཐར་ཕྱིན། ལྷག་པའི་ལྷ་དུ་མའི་ཞལ་གཟིགས་ཤིང་ལུང་བསྟན། ཆོས་བརྒྱད་ཀྱི་འཆིང་བས་མ་གོས་པའི་ཕྲིན་ལས་ལྷུན་གྲུབ་ཏུ་ཤར་ཏེ་གྲྭ་དར་རྒྱས་ཆོས་ལྡིང་གི་རི་ཁྲོད་བཏབ། ཐར་པ་དོན་གཉེར་གྱི་ཚོགས་པའང་བརྒྱར་ལོངས་པ་འདུས། ཕྱོགས་ཀྱི་དད་ལྡན་རྣམས་ཀྱི་ངོར་དབུས་གཙང་ལྷོ་མོན་ཀུན་ཏུ་ཞབས་ཀྱིས་བཅགས་ཤིང་ཆོས་བཀའ་རིས་སུ་མ་ཆད་པའི་འཁོར་ལོ་བར་མེད་དུ་བསྐོར་བས། ཞྭ་དམར་པ་དཀོན་མཆོག་འབངས། འབྲི་གུང་ཟུར་པ། སྣང་རྩེ་གཏེར་ཆེན། དཔལ་ཁང་ལོ་ཙཱ་བ། གྲུབ་ཆེན་ཀུན་བཟང་དཔལ་འབྱོར། ཤ་མི་དཔལ་འབྱོར་རྒྱ་མཚོ། རྒྱལ་དབང་བསྟན་འཛིན་གྲགས་པ་སོགས་ཆེ་བཙུན་གཏེར་འབྱིན་མཁས་གྲུབ་མང་པོས་མཚོན་བརྒྱུད་འཛིན་གྱི་སློབ་མས་དབུས་གཙང་མངའ་རིས་ཁམས་ཀོང་ལྷོ་མོན་ཡུལ་གྱི་མཐའ་ཚུན་ཁྱབ་པར་མཛད་ནས་དགུང་གྲངས་དོན་བདུན་པ་ལ་གཡོ་རུ་ཁྲ་འབྲུག་གི་གཙུག་ལག་ཁང་གི་ཉེ་འདབས་སུ་ངོ་མཚར་བའི་ལྟས་བཅས་གཤེགས་སོ། །སྤྲུལ་སྐུ་བསྟན་འཛིན་གྲགས་པ་ནི། མེ་ཕོ་སྤྲེའུ་ལོ་ལ་མོན་དུ་འཁྲུངས། གཏེར་ཆེན་པདྨ་གླིང་པའི་བག་ཆགས་གསལ་བར་སད་པས། དགུང་ལོ་བཞི་པར་གཏེར་སྲས་རྣམས་ཀྱིས་བུམ་ཐང་དུ་སྤྱན་དྲངས་ནས་རང་རང་གི་གདན་སར་ཆོས་དང་ཟང་ཟིང་གི་སྲི་ཞུས་མཆོད། བཅུ་གཉིས་པ་ལ་སྤྲུལ་སྐུ་སྣ་ཚོགས་རང་གྲོལ་གྱིས་དབུས་སུ་སྤྱན་དྲངས་ཤིང་ཀུན་མཁྱེན་ཆེན་པོ་དང་པད་གླིང་གཏེར་སྐོར་རྣམས་ཀྱི་གཙོས་གསར་རྙིང་གི་ཆོས་བཀའ་མཐའ་དག་བུམ་པ་བུམ་པ་གང་འབྱོར་སྩལ་ཅིང་། ཕྱིས་དགོན་གནས་རྟེན་གསུམ་བཅས་ཕོག་ནས་གདན་སར་དབང་བསྐུར། གཞན་ཡང་སྣང་རྩེ་གཏེར་ཆེན། རྗེ་བཙུན་གྲོལ་མཆོགཐུགས་སྲས་ཟླ་བ། གྲུབ་པ་ཀུན་འདུས་སོགས་ལས་གསན་པ་མཐའ་ཡས་པ་མཛད་ཅིང་འཆིམས་ཕུ་སོགས་སུ་བསྐྱེད་རྫོགས་རྫོགས་པ་ཆེན་པོའི་ལམ་ལ་ཉམས་བཞེས་སྙིང་པོར་མཛད་པས་ལྟ་དགོངས་ཚད་རྫོགས། ཡི་དམ་གྱི་ལྷ་དུ་མས་རྗེས་སུ་བཟུང་ཞིང་ལུང་བསྟན་པ་ཐོབ། བྱང་བདག་དབང་པོའི་སྡེ་སོགས་ཆེ་བཙུན་མཁས་གྲུབ་དུ་མས་མཚོན་གདུལ་བྱ་མཐའ་ཡས་པ་སྨིན་གྲོལ་མཛད། རིགས་སྲས་པདྨ་ཕྲིན་ལས་ལ་བཀའ་བསྒོས་ཏེ་སྒང་སྟེང་གསང་སྔགས་ཆོས་གླིང་བཏབ། སྤྲུལ་སྐུ་མདོ་སྔགས་བསྟན་འཛིན་གདན་སར་སྤྱན་དྲངས་ཤིང་དབང་ལུང་མན་ངག་མཐའ་རྒྱས་སུ་སྩལ་ནས་བསྟན་པའི་བདག་པོར་མངའ་གསོལ་བས་མཚོན་འཁོར་ལོ་གསུམ་གྱི་ཕྲིན་ལས་རྨད་དུ་བྱུང་བའི་ངང་ནས་དྲུག་ཅུ་རེ་གཉིས་པ་ལ་དར་རྒྱས་ཆོས་ལྡིང་གི་དབེན་པར་ངོ་མཚར་བའི་ལྟས་དང་བཅས་ཏེ་གཤེགས་སོ། །འདིའི་སྐྱེ་བ་དེ་མ་ཐག་པ་གསུང་སྤྲུལ་ཚུལ་ཁྲིམས་རྡོ་རྗེ་ལ་ལྷ་ལུང་གི་གདན་ས་ལྔ་པ་རིན་པོ་ཆེས་སྩལ་པ་ནས་བཟུང་དེང་སང་གི་བར་སྐྱེ་སྤྲུལ་བར་མ་ཆད་དུ་བྱོན་པ་ལྷོ་བྲག་ལྷ་ལུང་གི་གདན་སར་བཞུགས་ནས་སྙིང་པོའི་བསྟན་ལ་བྱ་བ་ཆེར་མཛད་དོ། །མཁས་གྲུབ་མདོ་སྔགས་བསྟན་འཛིན་ནི། གཡོ་རུ་དོལ་དུ་ཡབ་མྱོས་རྡོ་རྗེ་ཚེ་དབང་དང་། ཡུམ་བསོད་ནམས་བུ་ཁྲིད་ཀྱི་སྲས་སུ་མེ་ཕོ་བྱི་བའི་ལོ་ལ་འཁྲུངས། རྗེ་སྣ་ཚོགས་རང་གྲོལ་གྱི་སྔོན་རབས་གསལ་བས་མཚོན་དམ་པའི་བག་ཆགས་སད། དགུང་ལོ་དྲུག་པར་གོང་མའི་གདན་སར་སྤྱན་དྲངས། ཞྭ་དམར་དཀོན་མཆོག་འབངས་ལས་དགེ་བསྙེན་དང་རྒྱལ་དབང་བསྟན་འཛིན་གྲགས་པ་ལས་རབ་ཏུ་བྱུང་། དམ་པ་དེ་ཉིད་ལས་ཀུན་མཁྱེན་ཀློང་ཆེན་པ་དང་པད་གླིང་གི་ཆོས་སྐོར་ཡོངས་རྫོགས་ཀྱི་དབང་ཁྲིད་ལུང་མན་ངག་ཕྱག་བཞེས་དང་བཅས་པ་མཐའ་རྒྱས་སུ་གསན། གཞན་ཡང་། རྒྱལ་དབང་ཀརྨ་པ། ས་སྐྱ་ཁྲི་ཆེན། ཐུགས་སྲས་ཀུན་དགའ་གྲགས་པ། གྲུབ་ཆེན་ཀུན་དགའ་རྡོ་རྗེ། བྱང་བདག་དབང་པོའི་སྡེ། འབུམ་རམས་པ་ཐར་པ་རྒྱལ་མཚན་སོགས་བཤེས་གཉེན་དུ་མ་ལས་གསར་རྙིང་གི་དབང་ཁྲིད་བཤད་བཀའ་ཕལ་མོ་ཆེ་དང་སྒྲ་ཚད་བཟོ་གསོ་ནང་རིགས་ཡན་ལག་དང་བཅས་པ་ནན་ཏན་ཆེན་པོས་གསན་ཅིང་ཐུགས་སུ་ཆུད་པར་མཛད། དགུང་ལོ་ཉེར་ལྔ་པ་ལ་ཀརྨ་པ་དགུ་པ་མཁྱེན་པས་ཐུགས་ཕྲོགས་ཏེ། སྒར་ཆེན་གྱི་འབེལ་གཏམ་གླིང་བར་བཀས་བསྐུལ་བ་ལས་ལོ་གསུམ་དུ་མདོ་སྔགས་རིག་གནས་ལོ་རྒྱུས་དང་བཅས་པའི་གསུང་རབ་འབེལ་མཆིད་ཀྱིས་འཆད་པ་དང་། རྩོད་ངག་གིས་རྒོལ་ཅིང་ལན་འདོན་པ་སོགས་གང་ལའང་ཐོགས་པ་མེད་པའི་རྣམ་དཔྱོད་ཀྱིས་བློ་ལྡན་རྣམས་ཀྱིས་བསྔགས་པའི་གནས་སུ་གྱུར། སྐབས་གཞན་དུ་གདན་ས་ཕན་ཚུན་དང་མཆིམས་ཕུ་མཁར་ཆུ་སོགས་དབེན་གནས་དུ་མར་ཡི་དམ་གྱི་བསྙེན་སྒྲུབ་དང་། རང་བཞིན་རྫོགས་པ་ཆེན་པོའི་རྣལ་འབྱོར་ལ་སྙིང་པོར་མཛད་པས་བསྐྱེད་རྫོགས་ཟབ་མོའི་ཉམས་རྟོགས་མཐར་ཕྱིན། གུ་རུ་རིན་པོ་ཆེ་དང་། རྗེ་བཙུན་སྒྲོལ་མ་སོགས་ཡི་དམ་དུ་མའི་ཞལ་གཟིགས་ཤིང་དབུགས་དབྱུང་བ་ཐོབ། ལྷོ་དབུས་ཀྱི་གདན་ས་དང་དད་པའི་ཞིང་དུ་མར་སྒྲུབ་ཆེན་སྒྲུབ་ཕྲན་དང་། དབང་ཁྲིད་ལུང་གསུམ་དུས་དང་དུས་མེད་དུ་གསུངས་པས། རིགས་སྲས་གསང་བདག་ཆེན་པོ། རྫོགས་ཆེན་པ་ནམ་མཁའ་འབྲུག་སྒྲ། མངའ་བདག་བསྟན་འཛིན་ཆོས་དབང་། སྤ་གྲོ་ཆོས་དབང་ལྷུན་གྲུབ། རྦ་ཁ་སྤྲུལ་སྐུ་རིག་འཛིན་རྒྱ་མཚོ། མང་ཐོས་དམ་ཆོས་བཟང་པོ་སོགས་བཀའ་སྲོལ་སྐྱོང་བ་དུ་མ་དང་། ལུང་རིགས་སྨྲ་བའི་སྟོན་ཆེན། ཐ་སྙད་འཛིན་པའི་མཁས་པ། སྒོམ་ཉམས་ཅན་གྱི་རྣལ་འབྱོར་ཕོ་མོ་སོགས་དམ་པའི་ཆོས་ཀྱིས་བསྡུས་པའི་བུ་སློབ་དབུས་གཙང་ལྷོ་མོན་གྱི་ཕྱོགས་ཐམས་ཅད་ཁྱབ་པ་དང་། ས་སྐྱོང་སྐུ་རབས་པ་སོགས་མི་ཆེན་རྣམས་ཀྱིས་ཀྱང་བཏུད། ལྐོག་གྱུར་གྱི་གནས་ལུང་བསྟན་པ་རྣམས་ཀྱང་ཇི་ལྟ་བ་བཞིན་མངོན་དུ་གྱུར་པས་བླང་དོར་གྱི་མིག་ཕྱེ། ལྷོ་བྲག་བཀྲ་ཤིས་སྒང་དུ་ངང་ཚུགས་ཅན་གྱི་འདུས་སྡེ་བཏབ་པ་དང་སྐུ་གསུང་ཐུགས་རྟེན་གྲངས་མང་བཞེངས། ཆོས་འཁོར་རྣམ་གསུམ་ལ་མཆོད་འབུལ་སྨོན་ལམ་རྒྱ་ཆེར་མཛད་པས་མཚོན་འཁོར་ལོ་གསུམ་གྱི་ཕྲིན་ལས་རྒྱ་ཆེར་བསྐྱངས་ནས་མཐར། ཁྱད་པར་རྒྱུད་འཛིན་བུ་ལ་དབང་ལུང་དང་། །མན་ངག་ཁྲིད་ལུང་མང་པོ་བར་མེད་བཤད། །གསང་ཆེན་བསྟན་པ་འཛིན་པའི་རྟེན་འབྲེལ་འགྲིགས། །ད་ནི་བྱ་བ་ཟིན་གྱིས་འགྱོད་པ་མེད། །འཆི་བར་དགའ་བའི་མདོ་སྔགས་བསྟན་འཛིན་ང་། །གདོད་མའི་ས་ལ་གཏན་སྲིད་འཛིན་དུ་འགྲོ། །ཞེས་སོགས་དོན་བསྡུས་ཞལ་གདམས་བསྩལ་ནས་དགུང་གྲངས་ང་གསུམ་པར་དར་རྒྱས་ཆོས་ལྡིང་དུ་ངོ་མཚར་བའི་ཆོ་འཕྲུལ་དང་བཅས་ཏེ་སྤྲུལ་པ་བསྡུས། དེས་རང་སྲས་གསང་བདག་ཕྲིན་ལས་ལྷུན་གྲུབ། དེ་ལས་གཏེར་ཆེན་རིན་པོ་ཆེས་གསན་ཏེ་ཡབ་སྲས་དམ་པ་འདི་གཉིས་ཀྱི་རྣམ་ཐར་ས་བོན་ཙམ་འོག་ཏུ་གསལ་ལོ། །ཡང་ཆོས་རྗེ་རང་བྱུང་བ་ནས་བརྒྱུད་པའི་མན་ངག་རྣམས་ནི། དེ་ཉིད་ནས་སྨན་ལུང་པ་ཤཱཀྱ་གཞོན། སྤྲོ་ལུང་པ་ཀུན་དགའ་སྨོོན་ལམ། རིན་པོ་ཆེ་ཤཀ་འབུམ། མཚུར་ཕུ་པ་དོན་གྲུབ་འོད་ཟེར། ལོ་ཆེན་བསོད་ནམས་རྒྱ་མཚོ། སྨན་ཆུ་ཁ་པ་ནམ་མཁའ་རིན་ཆེན། སྣང་རྩེ་གཏེར་ཆེན་གར་དབང་ཞིག་པོ་གླིང་པ། མཁས་གྲུབ་སོག་བཟློག་པ་བློ་གྲོས་རྒྱལ་མཚན། གང་ར་ལོ་ཆེན་གཞན་ཕན་རྡོ་རྗེ། བོན་ལུང་བ་ཚུལ་ཁྲིམས་རྒྱལ་མཚན། ཡབ་རྗེ་གསང་བདག་ཆེན་པོ་ལས་གཏེར་ཆེན་གྱིས་གསན་ཏོ། །དེ་ནས་སྲས་སློབ་བརྒྱུད་པའི་ཁྱད་པར་མང་ཡང་གཙོ་བོར་གྱུར་པ་གཏེར་ཆེན་ནས། བི་མའི་རྣམ་འཕྲུལ་རྒྱལ་སྲས་རིན་ཆེན་རྣམ་རྒྱལ། གཡུ་སྒྲའི་རྣམ་འཕྲུལ་མཁན་ཆེན་བསྟན་འཛིན་རྡོ་རྗེ། ཁྲི་ཆེན་འགྱུར་མེད་ཕྲིན་ལས་རྣམ་རྒྱལ། རྗེ་བཙུན་མ་ཕྲིན་ལས་ཆོས་སྒྲོན་ལས། ཀློང་ཆེན་གཉིས་པ་རྡོ་རྗེ་གཟི་བརྗིད་རྩལ་གྱིས་གསན། དེ་ལས་ཀུན་མཁྱེན་པདྨ་གར་དབང་གིས་གསན་ནས། སྙིང་ཐིག་མ་བུའི་བཀའ་སྲོལ་མཐའ་དག་གཅིག་ཏུ་དྲིལ་བའི་ཁྲིད་ཡིག་དང་འཆད་སྤེལ་སྒོམ་གྲྭ་འཛུགས་པ་སོགས་ཕྲིན་ལས་ཆེར་བསྐྱངས་པ་ཡིན་ནོ། །ཡང་ཉེ་བརྒྱུད་ཐུན་མོང་མ་ཡིན་པའི་ལུགས་ལྟར་ན། ཀུན་མཁྱེན་ཆེན་པོ་ནས་གཡོ་རུ་རྫོགས་ཆེན་པ་ཀུན་མཁྱེན་འཇིགས་མེད་གླིང་པ་ལ་བརྒྱུད་དེ། འདི་ནི་པཎ་ཆེན་བི་མ་ལ། འཇམ་མགོན་ཁྲི་ལྡེ། རྒྱལ་སྲས་ལྷ་རྗེ་ཟུང་དུ་འཇུག་པའི་ཡེ་ཤེས་ཀྱི་ཟློས་གར་ཏེ། གུ་རུ་ཆོས་དབང་སོགས་ཀྱི་གཏེར་ལུང་ལས་གསལ་བ་ལྟར། འཕྱང་རྒྱས་སྲོང་བཙན་བང་སོའི་ལྷོ་ཕྱོགས་དཔལ་རི་དགོན་གྱི་ཉེ་འདབས་སུ་སྐྱེ་བའི་མྱུ་གུ་བཟུང་། ཆུང་ངུ་ནས་གཏེར་ཆེན་ཆོས་རྗེ་གླིང་པའི་སྔོན་རབས་གསལ་བར་སད། དགུང་གྲངས་དྲུག་པ་ནས་དཔལ་རིའི་ཆོས་གྲྭར་ཞུགས། མཚོ་རྒྱལ་སྤྲུལ་སྐུ་ལ་གཙུག་ཕུད་ཕུལ་བས་མཚན་པདྨ་མཁྱེན་བརྩེའི་འོད་ཟེར་དུ་གསོལ། སྔ་ཕྱི་ཅི་རིགས་པར་སྨིན་གཏེར་སྐུ་མཆེད་ཀྱི་དངོས་སློབ་ཀོང་པོ་ཐང་འབྲོག་སྤྲུལ་སྐུ་པདྨ་རིག་འཛིན། རིག་འཛིན་ཐུགས་མཆོག་རྡོ་རྗེ། གཏེར་ཆེན་དྲི་མེད་གླིང་པ། རིགས་ཞང་སྒོམ་ཆེན་དྷརྨ་ཀིརྟི། སྨིན་གླིང་པ་གྲུབ་དབང་དཔལ་མགོན། ལྕགས་ཟམ་པ་བསྟན་འཛིན་ཡེ་ཤེས་ལྷུན་གྲུབ། གནས་བརྟན་ཀུན་བཟང་འོད་ཟེར། གནས་གསར་པ་ཀུན་དགའ་ལེགས་འབྱུང་། མོན་རྫ་དཀར་བླ་མ་དར་རྒྱས་སོགས་ཡོངས་འཛིན་དུ་མ་ལས་སྨིན་གླིང་ནས་བརྒྱུད་པའི་མདོ་དང་སྒྱུ་འཕྲུལ་སོགས་སྔ་འགྱུར་བཀའ་གཏེར་གཙོོར་གྱུར་གསན་སྦྱངས་ཅི་རིགས་མཛད་ཅིང་གཙོ་བོར་སྙིང་པོའི་སྒྲུབ་པ་ལ་ཐུགས་གཞོལ་བས། དགུང་ལོ་ཉེར་བརྒྱད་པའི་ཆོ་འཕྲུལ་ཆེན་པོ་ནས་བརྩམས། རང་དགོན་དཔལ་རིའི་སྒོམ་ཁང་ཐིག་ལེ་ཉག་གཅིག་ཏུ་ལོ་གསུམ་གྱི་དམ་བཅའ་བརྟན་པོས། གྲོལ་ཏིག་གཙོ་བོར་གྱུར་པའི་ལྷག་པའི་ལྷ་རབ་འབྱམས་ཀྱི་བསྙེན་སྒྲུབ་མཛད་པས་རྣམ་སྨིན་རིག་འཛིན་གྱི་ལྡང་ཚད་བརྙེས། རྩ་རླུང་ཐིག་ལེའི་རྣལ་འབྱོར་ལ་དབང་འབྱོར་པས་མགྲིན་པ་ལོངས་སྤྱོད་ཀྱི་འཁོར་ལོའི་རྩ་ཁམས་ཡི་གེའི་སྤྲིན་དུ་གྲོལ་བས་སྣང་བ་དཔེ་ཆར་ཤར་ཏེ་ཆོས་ཐམས་ཅད་མ་བསླབས་པར་ཤེས་པའི་པཎྜི་ཏར་གྱུར། ཨོ་རྒྱན་ཆེན་པོ་དང་འཇམ་དཔལ་བཤེས་གཉེན་གྱིས་བྱིན་གྱིས་བརླབས་པ་ལ་བརྟེན་ཧེ་རུ་ཀའི་རྟགས་ཀྱིས་བརྗིད་པའི་བརྟུལ་ཞུགས་ཀྱི་སྤྱོད་པ་བསྐྱངས། ཁྱད་པར་འོད་གསལ་གྱི་སྣང་ཆར་མཆོད་རྟེན་བྱ་རུང་ཁ་ཤོར་གྱི་འདབས་སུ་ཆོས་སྐུ་ཡེ་ཤེས་ཀྱི་མཁའ་འགྲོ་མས། ཀློང་བྱང་མཁའ་འགྲོའི་བརྡའ་རིས་མངོན་དུ་སྩལ་པ་ལ་བརྟེན། བཀའ་འདུས་རྫོགས་པ་ཆེན་པོའི་ཆོས་མཛོད་ལ་དབང་འབྱོར། དེ་འཕྲལ་བསམ་ཡས་མཆིམས་ཕུར་བྱོན་ནས་གསང་ཆེན་མེ་ཏོག་ཕུག་ཏུ་ལོ་གསུམ་སྙིང་པོ་དོན་གྱི་སྒྲུབ་པ་ལ་གཞོལ་སྐབས་སྤྱིར་དག་སྣང་མཐའ་ཡས་པ་དང་། ལྷག་པར་ཀུན་མཁྱེན་ཆེན་པོའི་ཡེ་ཤེས་ཀྱི་སྐུས་ལན་གསུམ་དུ་རྗེས་སུ་བཟུང་ཞིང་སྐུ་གསུང་ཐུགས་ཀྱི་བྱིན་རླབས་འཕོས་པ་ལ་བརྟེན་འཕགས་ལམ་དོན་གྱི་ཡེ་ཤེས་རྫོགས་པ་ཆེན་པོའི་བདེན་པ་མཐོང་། ཐུགས་གཏེར་ཆེན་མོའང་གཏན་ལ་ཕབ་སྟེ་ཀློང་ཆེན་སྙིང་གི་ཐིག་ལེར་མཚན་གསོལ་ནས་སྐལ་ལྡན་བཅོ་ལྔ་ལ་ཆོས་སྒོ་ཐོག་མར་ཕྱེས། རྩེ་ལེ་ཆེན་པོའི་ཡེ་ཤེས་ཀྱི་སྐུས་བརྡ་བསྟན་པ་བཞིན་དོན་མཁར་ཕུར་ཚེ་རིང་ལྗོངས་ཀྱི་རི་ཁྲོད་རྟེན་དང་བརྟེན་པར་བཅས་པ་གསར་དུ་བསྐྲུན། ཕྱོགས་འདུས་ཀྱི་སྐལ་ལྡན་རྣམས་ལ་སྙིང་ཐིག་གསར་རྙིང་གཙོ་བོར་གྱུར་པའི་ཆོས་འཁོར་བར་མེད་དུ་བསྐོར། རླང་དཔལ་སེང་གི་བྱིན་གྱིས་བརླབས་ཤིང་གདམས་པ་སྩལ་པ་ལ་བརྟེན་རྡོ་རྗེ་ཕུར་པའི་བཀའ་བསྡུ་མཛད། བྱང་ཐེག་གླིང་དུ་ཞི་ཁྲོ། དཔལ་རིར་འདུས་མདོའི་སྒྲུབ་མཆོད་གསར་འཛུགས་གནང་། ཆོས་འཁོར་རྣམ་གསུམ་ལ་ཁྲི་མཆོད། བསམ་ཡས་བྱང་ཆུབ་ཆེན་མོར་གསེར་གྱི་འཁོར་ལོ་ཕུལ། རྒྱལ་བ་བྱམས་པའི་དངུལ་སྐུ། གསེར་དངུལ་སོགས་ཀྱིས་སྔ་འགྱུར་རྒྱུད་འབུམ་སོགས་བཞེངས་པ་དང་། འཆི་ངེས་ཀྱི་སྲོག་བསླུ་གྲངས་མང་སོགས་འདུས་བྱས་ཀྱི་དགེ་རྩའང་མཐའ་ཡས་པར་སྒྲུབ། ནུས་པས་བོད་ཕུང་བར་བྱེད་པའི་མཐའ་དམག་གདུག་པ་ཅན་ཚར་བཅད། ཁྱད་པར་བསྟན་པ་ཡུན་དུ་གནས་པར་བྱ་བའི་ཕྱིར་དགོངས་གཏེར་བསྟན་བཅོས་ཀྱི་ཚུལ་དུ་བཀོད་པ་བསྟན་པ་ཡོངས་ཀྱི་ལམ་རིམ་ཡོན་ཏན་རིན་པོ་ཆེའི་མཛོད་རྩ་འགྲེལ་གྱིས་མཚོན་ཕུལ་དུ་བྱུང་བའི་བཀའ་རྩོམ་ཐུགས་གཏེར་ཕྱོགས་བསྡོམས་པོད་ཆེན་དགུར་ལོངས་པ་སོགས་འཁོར་ལོ་གསུམ་གྱི་ཕྲིན་ལས་ནམ་མཁའ་དང་མཉམ་པའི་ངང་ནས་དགུང་གྲགས་བདུན་བཅུར་སོན་པ་ས་རྟ་དབྱུག་ཟླའི་ཚེས་གསུམ་གྱི་ཉིན་ངོ་མཚར་བའི་ལྟས་དང་བཅས་པདྨ་འོད་དུ་གཤེགས་ཏེ་སྐུའི་སྐྱེ་བ་དེ་མ་ཐག་པ་ནི་རྗེ་བླ་མ་འཇིགས་མེད་མཁྱེན་བརྩེའི་ཟློས་གར་རོ། །དམ་པ་དེ་ཉིད་ཀྱི་གསུང་གི་བདུད་རྩི་བཞེས་པའི་སློབ་ཚོགས་མཐའ་ཡས་ཀྱང་གཙོ་བོར། དཔལ་ལྡན་ས་སྐྱ་པ་བདག་ཆེན་ངག་དབང་དཔལ་ལྡན་ཆོས་སྐྱོང་སྐུ་མཆེད། རྒྱལ་བ་འབྲི་གུང་པའི་སྤྲུལ་སྐུ་རྣམ་གཉིས། རྡོར་བྲག་རིག་འཛིན་མཆོག་སྤྲུལ། ལྷོ་བྲག་གསུང་སྤྲུལ་དང་ཐུགས་སྲས། བོ་དོང་པ་སྦྱོར་ར་སྤྲུལ་སྐུ། དགའ་ལྡན་ཤར་བྱང་རྣམ་གཉིས། མོན་མཚོ་སྣ་དགོན་རྩེ་སྤྲུལ་སྐུ། རྫོགས་སྤྲུལ་ངེས་དོན་བསྟན་བཟང་། ཞེ་ཆེན་རིག་འཛིན་དཔལ་འབྱོར་རྒྱ་མཚོ། ཀཿཐོག་དགེ་ཕྱག་རྣམ་གཉིས་སོགས་གསར་རྙིང་སྐྱེས་ཆེན་མཐའ་ཡས་པ་དང་། ཁྱད་པར་ནང་ཐུགས་ཀྱི་སྲས་གཅིག་གྲུབ་དབང་འཇིགས་མེད་ཕྲིན་ལས་འོད་ཟེར། འཇིགས་མེད་རྒྱལ་བའི་མྱུ་གུ། མོན་གྲུབ་དབང་འཇིགས་མེད་ཀུན་གྲོལ། ལ་སྟོད་ཆོས་རྗེ་བྲག་ཕུག་པ། འབར་ཆུང་འཇིགས་མེད་གོ་ཆ་སོགས་ངེས་གསང་སྙིང་པོའི་གྲུབ་མཐའ་འཁྱོང་ངེས་ཆེས་མང་དུ་བྱོན། དེ་ཡི་ནང་ནས་མཆོག་ཏུ་གྱུར་པ་རྡོ་གྲུབ་ཆེན་རིན་པོ་ཆེ་ནི། བླ་མ་དགོངས་འདུས་ནས་ལུང་བསྟན་པ་ལྟར་ཤིང་མོ་གླང་གི་ལོ་ལ་རྡོ་ཁོག་ཏུ་འཁྲུངས། ཟེ་ཆེན་རབ་འབྱམས་གཉིས་པ་ལ་གཙུག་ཕུད་ཕུལ་བས་མཚན་ཀུན་བཟང་གཞན་ཕན་དུ་གསོལ། དམ་པ་དེ་ཉིད་དང་། ཀཿཐོག་ཞིང་སྐྱོང་། རྫོགས་སྤྲུལ་གསུམ་པ། དཔལ་ཡུལ་ཀརྨ་བཀྲ་ཤིས་སོགས་ཡོངས་འཛིན་ཉི་ཤུ་བསྟེན་ནས་གསན་སྦྱངས་མཛད། གངས་ཁྲོད་དུ་ལོ་བདུན་སོགས་སྙིང་པོའི་སྒྲུབ་པ་མཛད་པས་གྲུབ་པའི་ས་མཐོར་གཤེགས། ཁྱད་པར་རིག་འཛིན་འཇིགས་མེད་གླིང་པས་ཐུགས་གཏེར་རྒྱ་མཚོའི་རྩ་བའི་ཆོས་བདག་ཏུ་ངོས་འཛིན་གནང་ནས་དོན་གྱི་བསྟན་པ་གཏད་པས། ཡང་གསང་རྫོགས་པ་ཆེན་པོ་ཀུན་མཁྱེན་ཡབ་སྲས་ཀྱི་བཞེད་པའི་གྲུབ་མཐའི་རྐང་བཟུང་ནས་སྙིང་ཐིག་གསར་རྙིང་དང་། རྒྱུད་འབུམ་རིན་པོ་ཆེའི་བཀླག་ལུང་སོགས་ཀྱིས་མཚོན་ཆོས་ཀྱི་འཁོར་ལོ་རྒྱ་ཆེར་བསྐོར་བས་ཀཿརྫོགས་ཞེ་གསུམ་གྱི་བླ་སྤྲུལ་རྣམས་ཀྱིས་གཙོས་མདོ་ཁམས་རྒྱ་སོག་རྒྱལ་རོང་ཡན་གྱི་སློབ་ཚོགས་མཐའ་ཡས། ཁྱད་པར་རིག་འཛིན་གྲུབ་ཐོབ་ཡོངས་ཀྱི་སྤྱི་དཔལ་མཁྱེན་རྩེ་ཡེ་ཤེས་རྡོ་རྗེ། གཟུང་འཛིན་འཁྲུལ་སྣང་གི་བདེན་འཛིན་ཞིག་པའི་རྫོགས་ཆེན་པ་མི་འགྱུར་ནམ་མཁའི་རྡོ་རྗེ། སྔ་འགྱུར་བསྟན་པའི་ཉི་མ་ལོ་ཆེན་བཻ་རོའི་རྣམ་འཕྲུལ་རྒྱལ་སྲས་རིག་པའི་རྡོ་རྗེ་སོགས་ཁྱད་འཕགས་མང་དུ་བྱོན། དེ་ལས་རྒྱལ་སྲས་གཞན་ཕན་མཐའ་ཡས་ནི། སྨིན་གླིང་གཏེར་ཆེན་རིན་པོ་ཆེའི་རྣམ་འཕྲུལ་དུ་ལུང་གིས་ཟིན་ཅིང་། གྲུབ་དབང་བྱང་ཆུབ་རྡོ་རྗེ། འཇིགས་མེད་རྒྱལ་བའི་མྱུ་གུ་མི་འགྱུར་ནམ་མཁའི་རྡོ་རྗེ། སེང་ཕྲུག་པདྨ་བཀྲ་ཤིས། སྨིན་གླིང་ཁྲི་མཁན་གཙོར་གྱུར་གསར་རྙིང་རིས་མེད་ཀྱི་སྐྱེས་ཆེན་དུ་མ་བསྟེན་ནས་གསན་བསམ་གྱི་སྒྲོ་འདོགས་བཅད། སྟོད་ཀྱི་གངས་ཏི་སེ་ནས། སྨད་རྒྱ་ནག་གླང་ཆེན་འགྱིང་རི་ཡན་གྱི་སྒྲུབ་གནས་རྣམས་སུ་སྒྲུབ་པ་ཉམས་སུ་བཞེས་པས་འགྲན་ཟླ་དང་བྲལ་བའི་མཁས་གྲུབ་ཆེན་པོར་གྱུར། བླ་མས་ལུང་བསྟན་པ་བཞིན་དུ་དཔལ་གྱི་སེང་གེ་རིའི་ཆོས་གྲྭར་བཞུགས་ནས་བཤད་སྒྲུབ་ཀྱི་ཕྲིན་ལས་མཁའ་དང་མཉམ། མཁན་ཆེན་པདྨ་དམ་ཆོས་འོད་ཟེར་སོགས་བརྒྱུད་པ་ཟིན་ངེས་ཀྱི་སློབ་མ་མང་དུ་བསྐྲུན། ཁྱད་པར་སྨིན་གླིང་ཁྲི་ཆེན་སངས་རྒྱས་ཀུན་དགའ་དང་། པད་སྤྲུལ་པདྨ་དབང་རྒྱལ་ཟུང་གིས་རྗེས་སུ་བསྐུལ་བ་བཞིན། སྔ་འགྱུར་བཀའ་མའི་ཆོག་ཕྲིན་ཕལ་ཆེར་གྱི་གླེགས་བམ་བཀའ་བསྡུ་མཛད་ནས་སྤར་དུ་བསྒྲུབས། འདུལ་བ་གཞི་གསུམ་གྱི་ཕྱག་ལེན་རྣམ་པར་དག་པ་དང་། སྔ་འགྱུར་བཀའ་མའི་སྒྲུབ་ཕྲིན་གྱིས་མདོ་སྨད་ཕལ་ཆེར་ཁྱབ་པ་ནི་དམ་པ་འདི་ཡབ་སྲས་ཀྱི་བཀའ་དྲིན་ལས་བྱུང་། འཕགས་པ་སྤྱན་རས་གཟིགས་ཀྱི་རྣམ་འཕྲུལ་འཇིགས་མེད་རྒྱལ་བའི་མྱུ་གུས། སེམས་དཔའ་ཆེན་པོ་ཤཱནྟ་དེ་ཝ་བསམ་བཞིན་སྲིད་པ་ཉེ་བར་བཟུང་བ་དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོ་དང་། ཀུན་མཁྱེན་གཉིས་པ་འཇིགས་མེད་མཁྱེན་བརྩེའི་ཟློས་གར་སོགས་ལ་བསྩལ་པའི་རྒྱུན་ལས་ཐུགས་གཏེར་གྱི་ཕྲིན་ལས་ཀྱིས་ཤར་ནུབ་རྒྱ་མཚོའི་མཐའ་ཚུན་ཁྱབ་པར་གྱུར་ཏོ། །ད་ནི་ཀུན་མཁྱེན་རོང་ཀློང་གཉིས་ཞེས་མཚན་ཉི་ཟླ་ལྟར་ཡོངས་སུ་གྲགས་པའི་རོང་ཟོམ་པ་ཆོས་ཀྱི་བཟང་པོའི་གཏམ་བརྗོད་པར་བྱ་སྟེ། འདི་ནི་སློབ་དཔོན་ཆེན་པོའི་དངོས་སློབ་ཚེ་ཡི་རིག་འཛིན་བརྙེས་པས། དགུང་ལོ་སུམ་བརྒྱ་བར་མི་ཡུལ་དུ་འགྲོ་དོན་མཛད་པའི་རོང་བན་དཔལ་གྱི་ཡོན་ཏན་གྱི་སྲས། རོང་བན་རིན་ཆེན་ཚུལ་ཁྲིམས་ཞེས་དགུང་ལོ་ཕྱེད་དང་ཉིས་བརྒྱར་བཞུགས་པའི་གྲུབ་ཐོབ་ཆེན་པོ་དེས། རྒྱུའི་དུས་ཀྱི་མངོན་བྱང་ལྔའི་ཆོོ་གས། ཕྱོགས་ཀྱི་གླང་པོའི་ཤེས་རབ། དབྱིག་གཉེན་ཞབས་ཀྱི་ཐོས་པ། ཙནྡྲ་གོ་མའི་བརྗོད་པ། ཆོས་ཀྱི་གྲགས་པའི་བརྒལ་བརྟགསློབ་དཔོན་དཔའ་བོའི་རྩོམ་པ་སྟེ་ཕུན་སུམ་ཚོགས་པ་ལྔའི་ངོ་བོར་བྱང་ཆུབ་པའི་སྐྱེ་བའི་མྱུ་གུ་གཙང་རུ་ལག་གི་སའི་ཆ་སྣ་སྣར་ལུང་རོང་དུ་བཟུང་། པཎྜི་ཏ་སྨྲྀ་ཏི་དང་། ཕྲ་ལ་རིང་མོའི་སྐྱེ་བར་ངོས་འཛིན། བྱིས་པའི་དུས་ཨ་ཙ་ར་བྱུང་ཚད་ལ་དགྱེས་། སཾ་ཀྲྀ་ཏིའི་སྐད་མ་འབད་པར་མཁྱེན། སྐུ་གཞོན་ནུས་ནས་ལྷུན་གྱིས་གྲུབ་པའི་ཤེས་རབ་ཆེན་པོ་མངའ་བས་ཉང་སྨད་དུ་མགར་སྟོན་ཚུལ་ཁྲིམས་བཟང་པོ་ལས་གསན་སྦྱོང་མཛད། དེར་ཡབ་རྒྱགས་སྐྱེལ་དུ་བྱོན་པར་མཆེད་གྲོགས་དག་གིས། ཁྱོད་ཀྱི་བུ་འདི་བློ་བྲེད། ཐོ་ཅོ་ཆེ་བས་ངེད་ཅག་སུན་པར་བྱེད་ན་ད་རེས་ཕར་ཁྲིད་པ་འཐད་ཟེར། དེ་ཡབ་ཀྱིས་སློབ་དཔོན་ལ་གསོལ་ནས་ཁྲིད་དམ་ཞུས་པས། ཁྱོད་དེ་སྐད་མ་ཟེར། ཆོས་ཐམས་ཅད་ཁོས་གོ་ནས་ཡོད་གསུངས། དགུང་ལོ་བཅུ་གཅིག་པར་མཚན་ཉིད་གསན། ཆོས་བར་དུ་བྱིས་པའི་རྩེ་སར་ཡང་སློབ་དཔོན་གྱི་གསུངས་ཚད་ཤར་རེ་འོང་བས། ཆོས་ཐམས་ཅད་ཚར་རེ་གསན་པ་ཁོ་ནས་ཚིག་གཅིག་ཀྱང་མ་ནོར་བར་ཐུགས་སུ་ཆུད་པས་འཇམ་དཔལ་གྱི་སྤྲུལ་པར་གྲགས། བཅུ་གསུམ་ལོན་ཚེ་གསན་པ་རྫོགས་པ་དང་འདྲ་བར་བྱུང་ཞིང་། ཤེས་བྱ་ཐམས་ཅད་ལ་མ་རྨོངས་པར་གྱུར། ཉིད་ཀྱི་ཞལ་ནས་ཀྱང་། བདག་ཐོས་པ་ཆུང་བའང་མ་ཡིན་ཏེ། ཆོས་ཐམས་ཅད་མ་ཐོས་པ་མེད་དོ། །ཐོས་པ་ཆེ་བའང་མ་ཡིན་ཏེ་ཆོས་ཐམས་ཅད་ཚར་རེ་ལས་མ་ཐོས་སོ་གསུངས་སྐད། སྐྱེས་བུ་ཆེན་པོ་འདི་ནི་ཤེས་རབ་མྱུར་ལ་ཟབ་པ། རྒྱ་ཆེ་ལ་དྲི་མ་དང་བྲལ་བའི་སྤོབས་པ་མཆོག་ཏུ་དགེ་བས་རྒྱུད་དང་བསྟན་བཅོས་ལ་སོགས་པའི་རྒྱ་གཞུང་བརླིང་པོ་སྔར་མ་གཟིགས་པ་མཐའ་དག་ཚར་རེ་རེའམ་གཉིས་ཚུན་ཆད་གཟིགས་པས་ཚིག་དང་དོན་གྱི་ཆ་མཐའ་དག་ཐུགས་ལ་ཟིན་ཅིང་གཙུག་ལག་ཐམས་ཅད་ལ་ཐོགས་པ་མེད་པའི་བློ་གྲོས་རྣོ་བས། སྒྲ་དང་རྟོག་གེ་དང་། སྙན་ངག་དང་། སྡེབ་སྦྱོར་དང་། དོན་དུ་འགྱུར་བའི་ཚིགས་བཅད་སོགས་བོད་དུ་འགྱུར་བའི་གཞུང་ཉི་ཚེ་བ་རེ་གཉིས་ལ་མ་ལྟོས་པར་དེ་ཉིད་སྟོན་པའི་གཞུང་ལུགས་རྒྱ་ཆེན་པོ་མང་པོའི་དོན་མཁྱེན། སྐད་ཀྱི་རིགས་ཐམས་ཅད་ལ་མ་རྨོངས་ཤིང་ཐ་ན་དུད་འགྲོའི་སྐད་དང་བརྡ་ཡི་རིམ་པའང་མཁྱེན་པར་གྲགས། བསྟན་བཅོས་བརྩམས་པ་ན་གླེགས་བམ་བསྡུ་ཞིང་གཟིགས་པ་སོགས་རྟོག་དཔྱོད་ཀྱི་སྒྲོ་འདོགས་མི་དགོས་པར། ཆོས་ཀྱི་ཚིག་དོན་ལ་ཐོགས་རྡུགས་{ཐོག་སྡུག}མེད་པར་འཇུག་པའི་སྤོབས་པའི་གཏེར་ཆེན་པོ་བརྒྱད་གྲོལ་ཞིང་། བསྟན་བཅོས་རྣམས་ཀྱང་དོན་བཟང་པོ། ཚིག་འབྲུ་བཟང་པོ། བརྗོད་པ་མ་འདྲེས་པ་ཤ་སྟག་འབྱུང་བས་ལེགས་པར་གསུངས་པའི་བཀའ་དང་རྗེས་སུ་མཐུན་པས་མཁས་པར་གྲགས་པས་གང་གིས་ཀྱང་རྩོད་མི་ནུས། དེས་མཛད་པའི་གསང་སྔགས་ཀྱི་མན་ངག་རྣམས་ལ་སློབ་པའི་རྒྱུད་དུ་བྱུང་བའི་གང་ཟགལུང་མ་ཐོབ་ཀྱང་ཡི་གེ་ལས་བྱུང་བ་བཞིན་སྦྱར་བ་ལས་བྱིན་རླབས་མ་བྱུང་བ་མེད་པས་བདེ་བར་གཤེགས་པའི་སྤྲུལ་པར་ཡང་གླེང་། དུས་དེ་ཙམ་ན་རྒྱ་གར་ཤར་ནུབ་གཉིས་ན་འགྲན་ཟླ་དང་བྲལ་བ་ཤྲཱི་ནཱ་ལེནྡྲའི་མཁན་པོ་ཇོ་བོ་ཨ་ཏི་ཤས་ཀྱང་། འདི་རྒྱ་གར་གྱི་ཨཱ་ཙཱརྱ་ནག་པོ་སྤྱོད་པ་ཚེ་འཕོས་མ་ཐག་པ་དེ་ཡིན་པས། ཁོ་བོས་ཆོས་གཏམ་ག་ལ་སྤོབས་ཤེས་རྩོད་མེད་དུ་གྲགས་པར་གསུངས། སྤྱིར་བླ་མ་མང་པོ་མདོ་སྔགས་སོ་སོའི་རྒྱུད་པ་བྲེང་ཆགས་མཐུད་པ་ཙམ་ཡོད་མོད་ཀྱི། ཁྱད་པར་སྔ་འགྱུར་རྡོ་རྗེ་ཐེག་པའི་ཆོས་སྐོར་ལས། སློབ་དཔོན་པདྨའི་གདམས་པ་རྣམས་ནི་སྣ་ནམ་རྡོ་རྗེ་བདུད་འཇོམས། མཁར་ཆེན་དཔལ་གྱི་དབང་ཕྱུགངོམ་ཨ་ཙར་དཔལ་མེ་ཏོགསྒྲོ་རྡོ་རྗེ་གཞོན་ནུ། ཞང་ཞུང་ཡོན་ཏན་གྲགས། རོང་བན་ཡོན་ཏན། རོང་བན་ཚུལ་ཁྲིམས་རིན་ཆེན་ལས་ཉིད་ཀྱིས་གསན་ནོ། །བཻ་རོ་ཙ་ནའི་མན་ངག་རྣམས། གཡུ་སྒྲ། བླ་ཆེན་དགོངས་པ་གསལ། གྲུམ་ཤིང་གླག་ཅན། གནུབས་དཔའ་བརྟན། ཡ་ཟི་བོན་སྟོན། དེས་ཀུན་མཁྱེན་རོང་ཟོམ་ལ་བཤད་དེ་སེམས་སྡེའི་བརྒྱུད་པ་གཅིག་གོ །ཡང་ཀློང་ཐང་སྒྲོལ་མར་ཨ་རོ་ཡེ་ཤེས་འབྱུང་གནས་ཞེས་བྱ་བའི་གྲུབ་པའི་སྐྱེས་བུ་གཅིག་བྱུང་སྟེ། དེ་ལ་རྒྱ་གར་མཁས་པ་བདུན་བརྒྱུད་དང་། རྒྱ་ཡི་སློབ་དཔོན་བདུན་བརྒྱུད་ཀྱི་གདམས་པ་མངའ་ཞིང་། དེས་ཅོག་རོ་ཟངས་དཀར་མཛོད་ཁུར་དང་། ཡ་ཟི་བོན་སྟོན། དེས་ཉིད་ལའོ། །འདི་ལ་རྫོགས་ཆེན་ཁམས་ལུགས་ཞེས་ཟེར། ཡང་བི་མས་ཉང་བན་ལ་གསུངས་པ་དང་། རྨ་གཉགས་གཉིས་ལ་གསུངས་པའི་མན་ངག་ཀྱང་། ཁུ་བྱང་ཆུབ་འོད། ཁྱུང་པོར་དབྱིག་འོད་ལ་བརྒྱུད་ནས་རིམ་གྱིས་རོང་ཟོམ་པ་ལ་མངའ་བས་གསང་སྔགས་སྔ་འགྱུར་གྱི་བསྟན་པའི་བདག་པོ་འགྲན་ཟླ་སྤངས་པ་ཞིག་སྟེ་འདི་ཉིད་ལའང་བསྟན་པའི་ཆུ་མགོ་གཅིག་གནས་སོ། འདིས་རྒྱ་གར་གྱི་མཁན་པོ་མཉྫུ་ཤྲཱི་ཝརྨ་དང་། བུདྡྷ་ཨཱ་ཀ་ར་བྷ་དྲ་དང་། ཨ་མོ་གྷ་བཛྲ་སོགས་པཎྜི་ཏ་མང་པོའི་ལོ་ཙཱ་མཛད་ནས་ཆོས་མང་དུ་བསྒྱུར། འགྱུར་ཤིན་ཏུ་བཟང་བས་གསར་འགྱུར་གྱི་དཔེར་འོས། པཎྜི་ཏ་ཀུན་ན་རེ། དྷརྨ་བྷ་དྲ་ཁྱོད་ཀྱི་ཆོས་མང་པོ་རྩོམས་ལ་འགྲོ་བ་རྣམས་སྐྱོོངས་ཤིགཁྱོད་ཀྱི་ཡོན་ཏན་གཞན་ལྟ་ཞོགསྒྲ་ཚད་ཀྱི་ལུགས་འདིའི་སུམ་ཆ་ཙམ་ལས་མི་ཤེས་པས་ཀྱང་ངེད་རྒྱ་གར་ནས་ཆོས་རྩོམ་ན་ཁྱོད་ཀྱི་ཅིའི་ཕྱིར་མི་བརྩམ་གསུངས། སྔོན་སྐུ་ན་ཆུང་དུས་མདོ་སྟོན་སེངྒེ་རྒྱལ་མཚན་ལས་སྔ་འགྱུར་གསན་སྐབས་མནལ་ལམ་དུ། གསང་བ་སྙིང་པོས་ཟན་བྱས། སངས་རྒྱས་མཉམ་སྦྱོར་གྱི་ཚོད་མ་བྱས་ནས་གསོལ་བ་རྨིས། དེ་སློབ་དཔོན་ལ་ཞུས་པས། ཤིན་ཏུ་ངོ་མཚར་ཆེ། ཆོས་ཐམས་ཅད་ཁོང་དུ་ཆུད་པའི་རྟགས་ཡིན། ཁྱོད་ཀྱི་འགྲེལ་བ་རེ་གྱིས་གསུངས་པས། བླ་མའི་དགོངས་པ་རྫོགས་སླད། བསླབ་པ་གསུམ་ལ་ལྟོས་པའི་མན་ངག་གསུམ་མཛད་དེ། ལྷག་པ་ཚུལ་ཁྲིམས་བསླབ་པའི་དོན་གྱི་ངེས་བརྗོད་དམ་ཚིག་མདོ་རྒྱས། ལྷག་པ་ཏིང་ངེ་འཛིན་གྱི་བསླབ་པ་སྟོན་པའི་འགྲེལ་བ་ཚུལ་འདི་ལ་མཆོད་བརྗོད་ཀྱི་ཚིག་ལས་མཚན་དཀོན་མཆོག་འགྲེལ་ཡང་ཟེར་མཆན་བཞི་ཡན་ལག་བཅོ་ལྔ་པ། ལྷག་པ་ཤེས་རབ་གྱི་བསླབ་པ་སྟོན་པ་རྫོགས་ཆེན་ལྟ་སྒོམ་མན་ངགསངས་རྒྱས་མཉམ་སྦྱོར། ངན་སོང་སྦྱོང་རྒྱུད། འཇིགས་བྱེད་སྨྲ་སྒོ་ལ་སོགས་པའི་འགྲེལ་པ་མང་པོ། དེ་དག་གི་ནང་ནས་ཀྱང་ཐེག་ཆེན་ཚུལ་ལ་འཇུག་པའི་བསྟན་བཅོས་སོགས་གཞུང་གཏིང་ཟབ་ལ་གོ་དོན་སློང་ཆེ་བ་བརྗོད་ཀྱིས་མི་ལང་བ་དང་། མདོར་ན་མདོ་རྒྱུད་བསྟན་བཅོས་ཀྱི་བྱེ་བྲག་ལ་ཐུགས་སུ་མི་ཆུད་པ་བྱ་བ་ཤེས་བྱ་ལ་སྲིད་པར་མ་གྱུར་པས་ཐམས་ཅད་མཁྱེན་པའི་གནས་ལ་རང་གིར་མཛོད་དེ་ཐ་ན་འཇིག་རྟེན་པའི་ཞིང་ལས་དང་ཕྱུགས་སྐྱོང་བ་དང་། དཀར་ཤེ་ཇི་ལྟར་སྒྲུབ་པ་ཚུན་གྱི་བསྟན་བཅོས་མཛད་པས། ཤབ་ཀྱི་ཡང་ཁྱེད་བླ་མ། མར་པ་དོ་བོ། འུ་ཡུག་པ་མདའ་སྟོན། མདོའི་ཁྱུང་པོ་ཧཱུྃ་སྙིང་། སེ་ཁྲོམ་རྒྱ་མཚོ་འབར། མཚམས་སྟོན་གོ་ཆ། སྦང་ཀ་དར་ཆུང་། འགོས་ལྷས་བཙས། རྒྱ་རྒྱ་ཚུལ་སོགས་བོད་རུ་བཞིའི་མཁས་པ་ཀུན་གྱི་དཔྱད་གདགས་པ་དང་། རྩོད་པའི་བྱ་བ་ལ་མངོན་པར་ལྷགས་པས། ལུང་གི་འཐད་པ་དང་རིགས་པས་དཔྱད་བཟོད་པ་དང་གཏན་ཚིགས་དང་བླ་མས་ཉེ་བར་བསྟན་པ་དང་མི་འགལ་ཞིང་། སྒྲ་སྐྱོན་དང་དོན་སྐྱོན་ལ་སོགས་པ་འགལ་ཟླའི་ཕྱོགས་ཐམས་ཅད་རྣམ་པར་སྤངས་པའི་མཁྱེན་རབ་ཀྱི་སྤོོབས་པས་ཚར་བཅད། བསྟན་བཅོས་རེ་མཐོང་ཞིང་དེའི་ཚིག་དོན་ལ་རོ་མྱོངས་བས་ཐམས་ཅད་ངོ་མཚར་སྐྱེས་ནས། བསྟི་སྟང་དང་རི་མོར་མཛད་ནས་བླ་མར་ཁུར་བ་ཤ་སྟག་ཡིན་པར་གྲགས། དེ་སྐད་དུ། གོ་རུབ་ལོ་ཙཱ་བ་ཞེས་མང་དུ་ཐོས་པའི་གཟུངས་འཛིན་པ་དེས་ཀྱང་དང་པོར་དཔྱས་འདོགས། བར་དུ་ཐེག་ཆེན་ཚུལ་འཇུག་གི་གླེགས་བམ་དེ་གཟིགས་པས་གུས་པ་ཆེན་པོ་སྐྱེས། ཐ་མ་ཟང་ཟིང་མང་པོའི་བསྙེན་བཀུར་དང་བཅས་ཉེས་པ་བཤགས་ཤིང་རྗེས་སུ་བཟུང་བར་གསོལ་བ་བཏབ། འཇམ་དཔལ་གསང་རྒྱུད་སོགས་ཆོས་མང་དུ་གསན། གསང་རྒྱུད་སྐབས། འོ་སྐོལ་ལ་རྒྱ་དཔེ་ཡོད་ན་འདི་ལྟར་འགྱུར་བ་ཡིན་ཏེ། རྒྱ་དཔེ་མེད་པས་ད་ལྟ་བཅོས་སུ་མེད་གསུངས་པ་རྣམས་གོ་རུབ་པས་བློ་ལ་བཟུང་སྟེ། ཕྱིས་ཇོ་བོ་ཀྲྀཥྞ་ལས་དཔེ་བྱུང་ནས་དེ་ལ་མཉན་པས་རོང་ཟོམ་པཎྜི་ཏའི་གསུངས་ཇི་ལྟ་བར་བྱུང་བས་ཤིན་ཏུ་ཡང་མོས་པ་ཐོབ་སྟེ། ཀྲིཥྞའི་རྒྱ་དཔེ་རོང་པར་ཕུལ་ནས་སླར་གསན་སྐད། གྲུབ་པའི་རྣམ་ཐར་ལ་གཞལ་ན། བྲག་ཆེན་གཟར་པོ་མེ་ལོང་ལྟ་བུའི་ངོས་ལ་རྫུ་འཕྲུལ་གྱི་སྤྱོད་པས་གཤེགས་པ་དང་། བྲག་ལ་ཕུར་པ་འདེབས་པ། ནམ་མཁའ་ལ་འཕུར་བ། ལྷ་འདྲེ་རྣམས་བྲན་དུ་ཁོལ་བ། མངོན་པར་ཤེས་པ་རྒྱ་མཚོ་ལྟ་བུ་ལ་དབང་བསྒྱུར་པ་སོགས་མང་དུ་ཡོད་མོད་ཀྱི། འདི་ལྟ་བུའི་ལྟ་བ་མཆོག་ཏུ་གྱུར་ཅིང་། སོ་སོ་ཡང་དག་རིག་བཞིའི་ས་ཐོབ་པ་དག་ལ་སྐྱེ་བོ་ཕལ་པ་ཡིད་བརྟན་པར་བྱེད་པའི་མངོན་རྟགས་གྱི་ན་བ་ཡི་གེའི་ལམ་དུ་འདྲེན་པ་ངོ་མཚར་བ་མ་ཡིན་ནོ། །དེ་ལྟ་བུའི་ཡོན་ཏན་ཕུན་སུམ་ཚོགས་པ་དང་ལྡན་ཡང་། བདག་བསྟོད་ལ་སོགས་པའི་དྲི་མ་དང་བྲལ་ཅིང་། གཞན་གྱི་ཆོས་ལུགས་དང་སྤྱོད་པ་དམན་ཡང་དོན་དུ་འགྱུར་ན་མ་གཏོགས་ཁྱད་གསོད་དང་ངག་རྩུབ་གཏན་ནས་མི་གསུངས། ཆོས་ལ་མོས་པ་དང་ཆོས་ཀྱི་གང་ཟག་དང་། ཁྱད་པར་རྡོ་རྗེ་ཐེགས་པ་ལ་ཞུགས་ནས་གསང་སྔགས་ཀྱི་ལས་དང་དངོས་གྲུབ་སྒྲུབ་པར་འདོད་པ་དག་ལ་ཕན་གདགས་པའི་ཐུགས་དགོངས་ཟབ་མོ་མངའ་བས་ཕྱིན་ཅི་མ་ལོག་པའི་གདམས་པ་ནན་ཏན་དུ་འདོམས་ཤིང་ཕན་འདོགས་པར་མཛད། མངོན་པར་ཤེས་པ་དང་ལྡན་པས་གདུལ་བྱ་འདུལ་བའི་དུས་དང་ཚད་ལ་མཁས་པས་འགྲོ་བ་ཕལ་པ་རྣམས་བློ་བསྒྱུར་ཞིང་། ཆོས་ལ་གནས་པ་རྣམས་དེའི་འགལ་ཟླར་གྱུར་པ་ལས་བློ་ལྡོག་པའི་ཕྱིར། འབྱར་ཞིང་འགྲིགས་པའི་བསྟན་བཅོས་ཞལ་སྒོ་ལས་ཕྱུང་སྟེ་ཕན་འདོགས་པ་ལ་རྟག་ཏུ་སྐྱོ་བ་མི་མངའ། ཆོས་ཀྱིས་བློ་མ་བསྒྱུར་པའི་ཐ་མལ་པ་ལའང་། ཟང་ཟིང་གི་སྦྱིན་པས་རེ་བ་སྐོང་བ་དང་། ལོག་སྒྲུབ་བཟོད་པས་སྙིང་རྗེའི་ཡུལ་དུ་མཛད་ནས་ཞི་བདེ་ལ་འགོད། སྡོམ་པའི་གནས་དང་ཐུགས་དམ་ལ་སྲོག་གི་དབང་པོ་ལྟར་གཅེས་སྤྲས་མཛད་ཅིང་གཞན་ཡང་དེ་ལ་འགོད་པ་སོགས་སྒོ་དུ་མ་ནས་བསྟན་པ་དང་སེམས་ཅན་གྱི་དོན་རླབས་པོ་ཆེ་མཛད་པའི་རྣམ་ཐར་རྨད་དུ་བྱུང་བ་དང་ལྡན་ཞིང་སྤྲུལ་པའི་སྐུར་རྩོད་པ་དང་བྲལ་བའི་པཎྜི་ཏ་ཆེན་པོ་དེ་ལ་གནས་སྐབས་དེ་ཙམ་ན་བྱོན་པའི་མཁས་པ་ཐམས་ཅད་ཀྱིས་མངོན་པར་བསྟོད་ཅིང་སྤྱི་བོས་བཏུད་པར་གྱུར་ལ། དགུང་ལོ་བརྒྱ་དང་བཅུ་དགུ་བཞུགས་ཏེ་བསྙུན་མེད་པར་གཤེགས་པར་གྲགས། བོད་གངས་ཅན་གྱི་ལྗོངས་འདིར་འདི་དང་མཉམ་པ་ནི་སུ་ཡང་མ་བྱུང་ངོ་ཞེས་འགོས་ལོ་ཙཱ་བ་གཞོན་ནུ་དཔལ་གྱིས་ཀྱང་བསྔགས་ཤིང་ཡོངས་སུ་གྲགས་སོ། །འདི་ལ་སྲས་བརྒྱུད་དང་སློབ་བརྒྱུད་གཉིས་ཀྱི་དང་པོ། སྲས་གཟི་བརྗིད་འབར་དང་འབུམ་འབར་གཉིས་ལས་སྲས་བརྒྱུད་ཡུན་རིང་བྱུང་བ་ཐམས་ཅད་ཀྱང་རྡོ་རྗེ་ཕུར་པའི་སྒོ་ནས་གྲུབ་པ་བརྙེས་པ་ཤ་སྟག་ཡིན། སློབ་བརྒྱུད་ནི། གོ་རུབ་ལོ་ཙཱ་བ་ཆོས་ཀྱི་ཤེས་རབ། མར་པ་ཆོས་ཀྱི་དབང་ཕྱུག་སོགས་ལོ་ཙཱ་བ་ཆེན་པོ་བཅུ་བདུན། གཡག་རྡོ་རྗེ་འཛིན་པ་སོགས་གྲུབ་ཐོབ་ཆེན་པོ་སུམ་ཅུ་རྩ་ལྔ། མ་ཅིག་ཞ་མའི་མིང་པོ་རྗེ་འཁུན་བུ་པ་སོགས་སྒོམ་ཆེན་རྣལ་འབྱོར་གྱི་དབང་པོ་བརྒྱ་བརྒྱད་ཅུ། ཡོལ་ལྕགས་དགེ་བསྙེན་རྡོ་རྗེ་དབང་ཕྱུག་དང་། ཡང་ཁྱེད་བླ་མ་སོགས་གདུགས་ཐོགས་ཀྱི་བཤེས་གཉེན་ལྔ་བརྒྱ་ལ་སོགས་པ་བྱོན་ཏོ།། །།