བརྡ་སྟོན་པའི་མགུར་མ།
༄༅། །བརྡ་སྟོན་པའི་མགུར་མ་བཞུགས་སོ། །
༄༅། །རྗེ་རྫོགས་པའི་སངས་རྒྱས་མི་གཟུགས་ཅན། །མགོན་ཁྱབ་བདག་དྲིན་ཅན་བླ་མ་མཁྱེན། །བུ་བདག་གི་སྙིང་དབུས་འབྲལ་མེད་བཞུགས། །དུས་འདི་ནས་བྱང་ཆུབ་སྙིང་པོའི་བར། །སྐྱབས་དྲིན་ཅན་ཁྱེད་ལས་བསམ་རྒྱུ་མེད། །དགུང་སྔོན་གྱི་གནམ་འཕང་མཐོན་པོ་ནས། །སྤྲིན་དཀར་གྱི་ལང་ལིང་གཡོ་བ་ན། །རྗེ་ཁྱེད་ཀྱི་
གསང་གསུམ་ཡིད་ལ་དྲན། །བུ་ངནི་མདོ་ཁམས་སྨད་དུ་ལུས། །ཕ་ཁྱེདནི་ལྷོ་མོན་ཕྱོགས་སུ་བྱོན། །དུས་ད་ལྟ་གནས་ནི་གང་བཞུགས་སྙམ། །འཕྲལ་སྐད་ཅིག་སྐྱོ་སྣང་ཅུང་ཤར་ཡང་། །སྐུ་སྣང་སྟོང་ཡེ་ཤེས་སྒྱུ་མའི་འོད། །གསུང་གྲགས་སྟོང་བརྗོད་བྲལ་ཁྱབ་བརྡལ་ཆེ། །ཐུགས་མི་གཡོ་སྤྲོས་མཐའ་བྲལ་བས་
ན། །འདིར་བཞུགས་དང་འདིར་བྱོན་གྱི་གཏད་སོ་མེད། །ཅོལ་ཆུང་གི་རི་དྭགས་ཉམས་ཆུང་ང་། །གཉིས་འཛིན་གྱི་སྨིག་རྒྱུས་བསླུས་ནས་ཐལ། །དེ་ལྟར་ཡང་སྐད་ཅིག་རེ་ཟུང་ལས། །རྗེས་ཤེས་དང་རྗེས་མཐུད་ང་ལ་མེད། །ཤར་བ་དང་གྲོལ་བ་དུས་མཉམ་པས། །ཁང་སྟོང་དུ་རྐུན་མ་འཛུལ་བ་འདྲ། །རེ་དོགས་ཀྱི་ཕན་གནོད་མི་འདུག་པས། །ཅི་ལྟར་དུ་ཤར་ཀྱང་ཆོག་པར་གདའ། །འཛིན་མེད་ཀྱི་ནམ་མཁའ་ཡངས་པ་ལ། །དམིགས་གཏད་ཀྱི་ཡུལ་དུ་བླ་མཆེ། །བླ་མ་༠ ཚདང་རང་སེམས་དབྱེར་མེད་འདྲེས། །མྱ་ངན་གྱི་མུན་པ་དབྱིངས་སུ་སོང་། །འདི་ཡིན་གྱི་གཏད་སོ་མི་འདུག་པས། །འདི་མིན་གྱི་རྣམ་རྟོག་བོརནས་ཐལ། །ཧ་ཧ། མཚན་ལྡན་གྱི་གཟུངས་མ་བཀའ་དྲིན་ཅན། །ལྷན་སྐྱེས་ཀྱི་ཡེ་ཤེས་བོགས་འདོན་མཁན། །རྣམ་བཅས་ཀྱི་པད་མོ་འཛུམ་པ་ན། །རྣམ་མེད་ཀྱི་སྟོང་
གཟུགས་འཆར་ནས་བྱུང་། །བདེ་སྟོང་གི་འཕྲུལ་ཐབས་ལ་མཁས་པས། །ཚེ་ལམ་གྱི་དར་ཐག་བརྐྱང་ནས་ཐལ། །རྟེན་འབྲེལ་གྱི་ཨུཏྤལ་བཞད་པན། །བདེ་ལེགས་ཀྱི་དྲི་བསུང་འཐུལ་ནས་བྱུང་། །བརྗོད་བྲལ་གྱི་ཨ་མ་སྟོང་པ་ཆེ། །བརྗོད་པ་ཡིརོལ་རྩལ་མ་འགགས་པས། །ཐབས་ཤེས་ཀྱི་གུ་ཧྱ་ཟབ་མོ་འདི། །དྲིན་ལྡན་གྱི་བླ་མས་གདམས་ནས་བྱུང་། །ཚེ་སྔོན་ནས་འབྲེལ་བའི་ཏཱ་རེ་མ། །བུ་བདག་གི་ཡི་དམ་ལྷརུཐོབ། །ཐང་གཅིག་གི་རྨི་ལམ་ནང་ཤེདན། །མཛེས་སྡུག་གི་ལང་ཚོ་ངོམ་ནས་སུ། །ཞིམ་མངར་གྱི་ལ་དུ་ལྕག་ཕྲན་ཕོན། །རོ་བཅུད་ཀྱི་བདུད་རྩི་བཏབ་ནས་སུ། །དམ་ཚིག་གི་རྟེན་དུ་གནང་བ་དེ། །ཆགས་ཆེན་གྱི་ཧར་ཐོབ་ཟོས་པའི་ཚེ། །སྒྱུ་ལུས་ལ་བདེ་སྟོང་གིས་ཁྱབ་ནས་བྱུང་། །ཟླ་གསུམ་དུ་དགའ་བཞིའི་གྲོགས་སུ་གྱུར། །རྩ་འདབ་ཏུ་འཕོ་
མེད་བརྟན་པོར་གནས། ཤརཀཐོག་རྡོ་རྗེ་གདན་ཕྱིན་ནས། །དྲིན་ལྡན་གྱི་བླ་མ་དངོས་དང་མཇལ། །ཉམས་མྱོང་གི་རྟོགས་པས་མཆོད་པ་ཕུལ། །ཐུགས་དགྱེས་པའི་གཟི་བྱིན་ངོམ་ནས་སུ། །བྱིན་རླབས་ཀྱི་ཆར་རྒྱུན་ཕབས་ནས་བྱུང་། །རྟོག་ཚོགས་ཀྱི་མུན་པ་ཅུང་ཡལ་ཚེ། །སྔོན་གནས་ཀྱི་བག་ཆགས་དྲན་ངོར་ལ། །རྗེ་མར་པས་མི་ལ་བཞད་པ་དེ། །ས་ཆོས་ལ་སྒང་དུ་བསྐྱལ་པའི་ཚེ། །ཡབ་སྲས་ཀྱི་མགུར་བཞེས་གནང་བ་དྲན། ཤར་སྒམ་པོ་བརྡལ་གྱི་རི་ཟུར་ཚོ་ནས། །ཕ་མཉམ་མེད་དྭགས་པོ་ལྷ་རྗེ་ཡིས། །བུ་སློབ་ཀྱི་ཚོགས་པ་སྐྱོང་བའི་ཚེ། །ཚོགས་ཆོས་སུ་རིན་ཆེན་ཕྲེང་བའི་གཏམ། །ཐོས་འཛིན་གྱི་རྣ་བར་ལྷོང་ལྷོང་དབབ། །རྗེ་སི་ཏུ་པདྨ་ཉིན་བྱེད་དང་། །མགོན་ཁྱབ་བདག་བློ་གྲོས་མཐའ་ཡས་གཉིས། །ཐུགས་གཅིག་འདྲེས་གསུང་གླེང་མང་གནང་བ། །བུ་ང་ཡི་
ཡིད་ལ་ཤར་ཤར་དྲན། །དེ་དུས་ཀྱི་རྣམ་རྟོག་ཧྲུལ་པོ་ལ། །སེམས་སྐྱོ་བའི་ཉམས་ཤིག་ཤར་ནས་སུ། །ཤར་དཔལ་སྤུངས་ཀྱི་གདན་ས་ཡང་ཡང་དྲན། །འདྲེན་བྱེད་དུ་མཆིམས་རྒྱན་པ་ན། །ཉེ་གནས་ཀྱི་མཆེད་རྣམས་ཅུང་ཟད་སྒྲག །དེ་རྗེས་སུ་ར་འཛམ་ནང་ཕྱིན་ཚེ། །དེ་ནུབ་ཀྱི་རྨི་ལམ་གསལ་ཐུབ་ན། །བསྒྲེས་ཉམས་ཀྱི་ཕྱིང་གོས་མནབས་པ་ཞིག །དགྱེས་བརྩེ་བའི་ཞལ་ད་མང་གནངནས། །བུ་སློབ་ཀྱི་ཚོགས་པ་མང་པོ་ཞིག །འུར་འུར་དུ་འདུས་ནས་འཚོགས་ཚེ་བྱུང་། འདི་ང་ཡི་གདུལ་བྱའི་ལྷག་མ་ཡིན། །བུ་ཁྱོད་ལ་མ་བཅོལ་ཐབས་མེད་པས། །དེང་ཕྱིན་ཆད་ང་ཡི་བསྟན་པ་སྤེལ། །ངའི་བསྟན་པ་འཕེལ་འགྲིབ་ཁྱོད་ལ་རག །ནན་ཏན་དུ་ཡང་ཡང་གསུངས་པའི་མཐར། །ནམ་མཁའ་ནས་ཁ་བ་ཐུ་ལུ་ལུ་།བར་སྣང་ནས་འབྲུག་སྒྲས་ཁྱབ་པར་བྱུང་། །ཕྱི་ཉིན་དུ་
རྫོང་ཤོད་གནས་མཇལ་སོང་། །ཕ་བླ་མའི་འདྲ་ཞལ་མཇལ་བའི་ཚེ། །མདོང་ཕྱིང་གོས་མནབས་པའི་བན་རྒན་དེ། །དེ་འཕྲད་དུ་ཡིད་ལ་དྲན་པ་བྱུང་། །ནམ་མཁའནས་ཁུ་འཕངས་རིལ་བུ་བོབས། །འབྲུག་སྒྲ་ཡི་ངར་སྐད་འདོན་པ་དང་། །དར་གཅིག་ཏུ་རྟོག་ཚོགས་རང་འགག་ནས། །གཏད་མེད་དུ་རིག་སྟོང་རྗེན་པར་གནས། །དགེ་མཚན་གྱི་རྟེན་འབྲེལ་འགའ་རེ་འགྲིག །དུས་དེ་ཡི་ཡར་ཚེས་ཟླ་བ་ལ། །གླིང་ལེགས་བཤད་ཉི་ཟླའི་ཕོ་བྲང་དུ། །མགོན་ཁྱབ་བདག་དྲིན་ཅན་རྗེ་དང་མཇལ། །ལུགས་གཉིས་ཀྱི་གསུང་གླེང་མང་གནང་ཚེ། །གློ་བུར་དུ་རླུང་འཚུབ་ལྡང་བ་དང་། །ཁུ་འཕངས་ཀྱི་ཟེར་མཐོ་ར་ར། །གཡུ་འབྲུག་གི་ངར་སྐད་ལྡིར་ནས་བྱུང་། །དུས་སྔ་ཕྱི་བར་གྱི་བརྡ་བརྟག་གསུམ། །མགོན་བློ་གྲོས་མཐའ་ཡས་རོལ་གར་ཆེ། །བློ་ཐེ་ཚོམ་བྲལ་བའི་གདེང་ཞིག་རྙེད། །གླིང་
དེ་རུ་བསྡད་པའི་ཞག་འགའ་ན། །ལྷ་བདུད་ཀྱི་ཆོ་འཕྲུལ་ཆེར་ལངས་ནས། །སྲོག་དབུགས་ཀྱི་དྭངས་མ་འཕྲོག་པར་ཙམ། །དུས་དང་པོར་གཅེས་འཛིན་གཟེབ་ཚུད་ནས། །ལུས་ལྷ་ཡི་སྐྱེད་རིམ་སྒོམམདོག་བྱས། །འཁོར་ལྷ་བདུད་ཚུར་ཚུར་དཔའ་ནས་སུ། །ཚེ་མི་བརྟན་རླུང་སེམས་སྡུད་པའི་མཚམས། །དངངས་སྐྲག་གི་ཤེས་པ་དར་གཅིག་བྱུང་། །དེ་འཕྲལ་དུ་རིག་ངོ་སྐྱོང་བ་ན། །རྣམ་རྟོག་གི་སྤྲིན་ཕུང་དེངས་ནས་སུ། །རེ་དོགས་ཀྱི་ཐག་པ་ཆད་– ནས་ཐལ། །གཏད་མེད་ཀྱི་རིག་པ་དྭངས་པ་ལ། །རྐྱེན་གང་གིས་མི་ཚུགས་གདེང་རྙེད་ཚེ། །རིག་རྩལ་གྱི་ཆོ་འཕྲུལ་ཀློང་དུ་ཐིམ། །དེ་རྗེས་ནས་ཉམས་དགའ་རིག་པ་དྭངས། །ཤེས་རབ་ཀྱི་རྩ་ཁ་ཅུང་བྱེ་ནས། །སྙིང་རྗེ་དང་མོས་གུས་རང་ཤུགས་འབར། །རྟག་འཛིན་གྱི་བློ་ཆེན་ཆུང་ངུར་སོང་། །འདིར་སྣང་ལ་སྙིང་པོ་
མེད་པར་གོ། །དེ་ཚུན་ནས་ཆོས་བརྒྱད་ཀྱི་མགོ་བོ་དམའ། །རང་འདོད་ཀྱི་འཁྲི་བ་ཇེ་ཞིར་ལས། །རྩིས་གདབ་ཀྱི་སྙེམ་པ་འཕེལ་མ་ཐལ། །དེ་འབྲེལ་གྱི་ཟླ་བ་ཕྱི་མ་ལ། །རྗེ་འཇམ་མགོན་རྒྱལ་སྲས་རིན་པོ་ཆེ། །ཐུགས་དགོངས་པ་ཆོས་དབྱིངས་སུ་གཏད་པའི་རྟགས། །དངོས་ཉམས་དང་རྨི་ལམ་ཅུང་ཟད་གསལ། །དེ་མ་མཇལ་སྙམ་ནས་གདུང་སེམས་ཀྱིས། །གསོལ་བཏབ་ཀྱི་དབང་བཞི་ཡང་ཡང་བླང་། །ཐུགས་ཀློང་དུ་མཉམ་པར་ཅུང་བཞག་མཐར། །ཡེ་ཤེས་ཀྱི་སྐུ་ཡི་འོད་ཟེར་ངོམ། །བྱིན་རླབས་ཀྱི་མཚན་མ་ཅིར་ཡང་མཐོང་། །སྔོན་གསལ་ཀྱི་བརྡ་རྟགས་དུ་མ་རྣམས། །གཅིག་པུ་དང་དུ་མ་བྲལ་བ་ཡིས། །མགོན་ཁྱབ་བདག་བློ་གྲོས་མཐའ་ཡས་ཀྱི། །ཐུགས་ཟག་བྲལ་ཡེ་ཤེས་བརྩེ་འཇོར་གོ། །ཡང་ཐང་གཅིག་སེང་གེ་གནམ་རྫོང་ནས། །རྗེ་བི་ཛ་ཡབ་སྲས་གཟིམས་སྐྱིལ་
དང་། །རི་ཁྱུང་ཆེན་གདེང་འདྲའི་གཡས་ཟུར་གཉིས། །འདབ་འབྲེལ་དུ་ཕན་ཚུན་འཆགས་པའི་ཚེ། །རྟེན་འབྲེལ་གྱི་མགོ་བོ་ཡིན་ནའང་། །རང་བྱས་ཀྱི་སྔར་བསགས་དམན་པ་དང་། །བྱུར་སེར་གྱི་གེགས་ཆགས་ཆེ་དབང་གིས། །འདུ་འཕྲོད་ཀྱི་ལམ་སྲང་ཅུང་འཕྱུག་པས། །གདན་ས་དེའི་བསྟན་ལ་ཕན་ཆ་ཆུང་། །དེ་འདྲ་སོགས་ཀུན་གྱི་ཆོ་འཕྲུལ་ལ། །རྫུན་རིས་ཀྱི་འཇའ་ཟེར་བརྡོལ་ན་ཡང་། །འབྲེལ་མེད་ཀྱི་ངག་འཆལ་སྒྲོག་མི་མཛེས། །མི་ གཙང 
་བའི་ཁ་དེ་བཙུམ་ན་ལེགས།། །།