ཕར་ཕྱིན་སྐབས་བཞི་པའི་བསྡུས་དོན།
ཕར་ཕྱིན་སྐབས་བཞི་པའི་བསྡུས་དོན་རྒྱལ་མཁན་པོ་གྲགས་པ་རྒྱལ་མཚན་ལ་གནང་བ་བཞུགས་སོ། །
སྦྱོར་བཞིའི་རིན་ཆེན་རྡུལ་བརྩེགས་རི་བོའི་སྤོར། །སྒྲིབ་བྲལ་དབྱིངས་རིག་དབྱེར་མེད་ལྡིང་ཁང་ན། །ལྔ་ལྡན་ལོངས་སྤྱོད་རྫོགས་པའི་འཆི་མེད་གཙོ། །སྣང་བརྙན་བྱེ་བ་བརྒྱར་འགྱེད་དེས་སྐྱོངས་ཤིག །གཞི་ཤེས་མཇུག་སྡུད་མདོ་ཚན་བཅུ་དགུ་སོགས། །སྤྱོད་པ་ཁྱད་པར་ཅན་གྱི་ལེ་འུ་ཡི། །མདོ་ཚན་གསུམ་གྱི་མཁྱེན་གསུམ་རྗོད་བྱེད་སྐབས། །གསུམ་པོ་རྫོགས་པ་ཡིན་པར་བསྟན་ཟིན་ནས། །དེ་ཡང་ཐོས་ཙམ་མིན་པར་བསྒོམ་དགོས་ཕྱིར། །དབང་དུ་བྱ་ཕྱིར་ཡང་ཞེས་གསུངས་པ་ལས། །གཞུང་ལ་སྦྱར་ནས་ཡང་སྒྲ་རྗེས་གཅོད་འཁྲུལ། །ལོ་ཆེན་མཚམས་སྦྱོར་གཞུང་ཚིག་སྔ་ཕྱི་ལ། །ཤེས་དང་སྒོམ་པའི་སྒྲ་ལས་མ་བྱུང་ཕྱིར། །དེ་དེ་ཙམ་ཕྱིར་ཡིན་པས་མི་ཟློས་ལོ། །གང་ཐོས་དེ་ཉིད་བསྒོམ་བྱར་གཞུང་བརྒྱས་འགྲུབ། །ལ་ལ་དང་པོ་གསུམ་དུ་མཁྱེན་གསུམ་གྱི། །རྣམ་པ་མི་གསལ་
ཕྱིར་ན་མི་ཟློས་ཟེར། །རྒྱུ་འབྲས་ལ་སོགས་དོན་དང་ལམ་གསུམ་སོགས། །ཤེས་རྣམ་ཅི་རིགས་དེར་ཡང་གསལ་ཕྱིར་མིན། །༈ རང་ལུགས་ཡུལ་ངོ་བྱེད་ལས་གསུམ་ཕྱིར་ཏེ། །ཐོར་བུ་ཕྱེ་བ་འདིར་བསྡུས་བསྡུས་བསྒོམ་ཕྱིར། །སྐབས་འདིས་ལྷན་ཅིག་གསུངས་ལ་ཐོར་བུའི་དོན། །ཚང་བ་ལས་ཀྱང་ལྷག་ཕྱིར་འདིས་ཆོག་གོ །མ་ཡིན་མཁྱེན་གསུམ་སོ་སོའི་མཚན་ཉིད་དང། །སྒོམ་བྱེད་སྦྱོར་ཤེས་དགོས་པ་གཞན་ཕྱིར་ཏེ། །ལྡོག་ཆ་ཙམ་དང་སྒོམ་བྱེད་ཀྱིས་བསྙད་ཕྱིར། །གསུམ་པ་བྱེད་ལས་སྒོས་ཀྱང་མི་མཚུངས་ཏེ། །དེ་ཞི་བ་དང་གཉེན་པོའི་སྒྲས་བསྟན་ཕྱིར། །རིམས་ནད་ཞི་དང་ཞི་བའི་ཐབས་བརྗོད་བཞིན། །དང་པོ་བསྡུས་སྒོམ་དོན་ཡང་ལོ་ཆེན་གྱིས། །གཞི་ཡི་ཉེར་བདུན་ལམ་གྱི་སུམ་ཅུ་དྲུག །རྣམ་ཐར་རྣམ་གསུམ་བར་ཆད་མེད་ལམ་བཞི། །དེ་བཞིན་ཉིད་བཅས་དོན་དམ་དོན་གཅིག་ལས། །སྟོང་དང་བདག་མེད་གཞི་ལམ་དབྱེ་བས་བཞི། །
སེམས་དཔར་རྗེས་མཐུན་རྣམ་མཁྱེན་རྣམ་པའི་སྟོང། །ལྔ་པོ་སྟོང་པ་ཉིད་ཀྱི་རྣམ་པ་འོ། །གཞི་ལམ་དབྱེ་བས་འགོག་ལམ་ཞེ་གཉིས་དང། །རྣམ་པའི་མཚན་མེད་འགོག་ལམ་བར་ཆད་མེད། །ཞེ་ལྔ་མཚན་མེད་དོ་སྨོན་མེད་བཅོ་བརྒྱད་དེ། །སྡུག་ཀུན་གཞི་ལམ་དབྱེ་བས་བཅུ་དྲུག་སྟེང། །ཀུན་འབྱུང་བར་ཆད་མེད་དང་སྨོན་མེད་དོ། །སྟོང་སྨོན་ཐུན་མོང་སྡུག་བསྔལ་དངོས་ཉིད་མེད། །གསུམ་གའི་ཐུན་མོང་དེ་བཞིན་ཉིད་རྣམ་སྟེ། །ཐུན་མོང་རྣམ་ཐར་ཀྱང་བསྡུས་གཙོ་བོ་ནི། །ལྷག་མ་ཆོས་ཅན་རྣམ་པ་བརྒྱ་གཉིས་བཅས། ངོ་བོ་རྒྱུ་འབྲས་བདེན་སྟོང་སྤྲོས་བྲལ་དུ། །བསྡུས་ནས་བསྒོམ་པ་བསྡུས་སྒོམ་དོན་དུ་འདོད། །དོན་གཅིག་བདེན་མེད་ཡིན་པའི་ཕྱིར་བསམ་ན། །ལྷག་ལ་ཐལ་བར་འགྱུར་ཞེས་ལམ་སྒྲིག་གསུངས། །མདོ་སྒྲ་ཙམ་ལ་བརྟེན་ནས་མི་རྟག་སོགས། །རང་ལྡོག་མི་འདྲེན་ཆོས་ཉིད་འདྲེན་ན་ཡང། །རང་ལྡོག་ཇི་སྙེད་རྣམ་པར་འདོད་དགོས་ཤིང། །གྲངས་ཕན་ཀུན་རྫོབ་རྣམ་པ་བརྒྱ་དང་གཉིས། །དངོས་སུའང་ཁྱེད་འདོད་དེ་དག་སྒོམ་མམ་མིན། །བསྒོམ་ན་སྒོམ་ཚུལ་འཆད་ཚེ་འཆད་དགོས་ཕྱིར། །འགྲེལ་ཚིག་བསྒྱུར་ནས་སྟོང་ཙམ་བསྒོམ་གསུངས་འགལ། །མི་སྒོམ་རྟག་འཛིན་གཉེན་པོར་མི་རྟག་སོགས། །རིམ་གསུངས་རྩ་བ་འགྲེལ་པ་ཀུན་དང་འགལ། །ཁ་ཅིག་ཞི་ལྷག་ཡུལ་དུ་བསྡུས་འདོད་འཁྲུལ། །སེམས་བསྐྱེད་ཞི་གནས་ལ་རག་ཧ་ཅང་ཕྱིར། །རང་ལུགས་མཁྱེན་གསུམ་རྣམ་ཀུན་རྣམ་རྫོགས་ཀྱི། །འཛིན་སྟངས་ཡུལ་དུ་སྡུད་
པ་བསྡུས་སྒོམ་དོན། །སྒྲ་དོན་མ་ངེས་རྣམ་རྫོགས་སྦྱོར་བ་བཞིན། ། ༈ གཞུང་གི་དོན་ལ་རྣམ་རྫོགས་སྤྱི་དོན་དང། །ཐར་ཆ་ནས་བཟུང་རྒྱུད་ལ་སྐྱེ་རིམ་གཉིས། །དང་པོ་སྦྱར་ས་རྣམ་པ་སྦྱོར་མཁན་རྟེན། །སྦྱོར་བའི་ངོ་བོ་སྐྱོན་ཡོན་མཚན་ཉིད་དྲུག །རྒྱས་བཤད་དོན་དང་མདོར་བསྟན་ཤེས་རྣམ་བདུན། །དེར་ཡང་དངོས་དང་སྒོམ་བྱེད་སྦྱོར་རྣམ་གཉིས། །དེ་ཕྱིར་མདོར་བསྟན་རྐང་པ་དང་པོ་ཡིས། །ཟློག་ཕྱོགས་འགལ་ཟླའི་རྣམ་ལྡན་ཤེས་རྣམ་བསྟན། །རྣམ་པའམ་བྱེ་བྲག་ཅེས་པས་རྟག་འཛིན་དང། །བདེར་འཛིན་ལ་སོགས་སོ་སོའི་བྱེ་བྲག་གི །ངོས་སྐལ་གནོད་བྱེད་འཛིན་སྟངས་འགལ་བ་བསྟན། །མཚན་ཉིད་ཅེས་པས་འཛིན་སྟངས་འགལ་བ་དེ། །གོང་དུ་བཤད་པའི་ཤེས་རྣམ་སྦྱོར་རྣམ་གཉིས། །གཉེན་པོར་འཇོག་བྱེད་མཚན་ཉིད་ཡིན་པར་གསུངས། །ཁ་ཅིག་རྣམ་པའི་མཚན་ཉིད་འཆད་བྱེད་དུ། །བྱེད་པ་རྣམ་བཤད་ལས་ནི་བཀག་གོ་ཟེར། །བདེན་བཞིའི་སྟེང་དུ་རྟག་འཛིན་ལ་སོགས་པ། །འཇོམས་བྱེད་གཉེན་པོར་འགྱུར་ཚུལ་མ་སྦྱར་བར། །རྣམ་པ་ཤེས་རབ་བོ་ཞེས་འདྲ་ཁ་ཡན་ཙམ། །བཤད་ན་དགོས་པ་སྟོར་བ་དེ་དོན་ཡིན། །དེ་ཕྱིར་གཞི་མེད་རྣམ་པར་མ་སོང་བར། །རྣམ་པའི་དོན་དུ་མཛད་པ་ཡབ་སྲས་མཐུན། །ཚིག་གསལ་གཞི་ཡིས་གཞི་ཤེས་ཤེས་པ་ཞེས། །ལམ་དང་རྣམ་པས་རྣམ་མཁྱེན་བསྟན་ནོ་ཟེར། །རྣམ་པ་དེ་ལ་ ཀུན་མཁྱེན་ཉིད་གསུམ་གྱི། །ཤེས་རྣམ 
་རྩ་བར་གསུངས་ཕྱིར་མཐའ་རྐྱང་
མིན། །རྗེ་སོགས་ལས་དང་བྱེད་པའི་རྣམ་པ་ལ། །དོན་རྣམ་ཤེས་རྣམ་ཐ་སྙད་རིམ་སྦྱར་བ། །གསུང་རབ་ཐ་སྙད་མིན་ཞེས་ཁ་ཅིག་ཟེར། །རྩ་བར་འཕགས་པའི་བདེན་པ་བཞི་དག་གི །རྣམ་པ་ཞེས་པས་དོན་རྣམ་གསལ་བར་གསུངས། །དེ་བཞིན་ཤེས་པའི་རྣམ་པའང་ཡེ་ཤེས་ཀྱི། །རྣམ་པ་ཞེས་ནི་རིག་བྱིན་གསུངས་ཕྱིར་རོ། །དོན་རྣམ་ཤེས་རྣམ་གཉིས་ལས་བསྒོམ་བྱ་དངོས། །གང་ཡིན་ཁ་ཅིག་རྩོད་པ་དོན་ཆུང་སྟེ། །མི་རྟག་སྒོམ་པས་དེ་བློ་བསྒོམ་འགྱུར་ཞིང། །སྟོང་ཉིད་སྒོམ་ལ་ཤེར་ཕྱིན་བསྒོམ་གསུངས་ཕྱིར། །ཁ་ཅིག་མཐོང་ལམ་བར་ཆད་མེད་ལམ་གྱིས། །ཡེ་ཤེས་བསྒོམས་ན་ཤེས་པ་བསྒོམ་འགྱུར་ཟེར། །མ་ངེས་དེ་ལྟ་མིན་ན་ཡེ་ཤེས་དེར། །མཉམ་པར་བཞག་བློ་མེད་པར་ཐལ་བར་འགྱུར། །ཁྱེད་ཅག་བསྒོམ་བྱར་བྱས་ན་འཛིན་སྟངས་སུ། །བྱེད་དགོས་སྙམ་པ་འདི་ཡིས་ནོངས་པའི་ཕྱིར། །སྒོམ་ཚུལ་སྣ་ཚོགས་དབྱེ་བ་ཤེས་དགོས་ཏེ། །སྟོང་དང་བདེན་བཞི་འཛིན་སྟངས་ཡུལ་བྱས་བསྒོམ། །བྱམས་སོགས་ཡུལ་ཅན་ངོ་བོར་བསྐྱེད་ནས་བསྒོམ། །ཚོགས་ལ་དབང་སྟོབས་རྗེས་མཐུན་རྣམ་པས་བསྒོམ། །སོ་སྐྱེས་མཁྱེན་གསུམ་རྟོགས་རིགས་སྒོ་ནས་བསྒོམ། །ཕལ་པས་དངོས་བརྒྱད་མཚན་ཉིད་རྗེས་དཔྱོད་བསྒོམ། །རྒྱལ་ཀུན་གསང་གསུམ་སྨོན་ལམ་རྣམ་པས་བསྒོམ། །ལ་སོགས་འཕྲོས་དོན་སྣ་ཚོགས་ཤེས་པར་བྱ། །རང་ལུགས་འཛིན་སྟངས་ཡུལ་རྣམ་ཤར་བའི་སྒོས། །རང་གི་མི་མཐུན་ཕྱོགས་ལ་གནོད་བྱེད་ཀྱི། །ཆ་གཞག་རིག་པ་གཉེན་པོའི་མཚན་ཉིད་དེ། །ཆ་བཞག་འཛིན་སྟངས་མི་གསལ་ཁ་ཅིག་དང། །རང་གི་མི་མཐུན་ཕྱོགས་མེད་རྣམ་མཁྱེན་སྡུད། །འདིར་བསྟན་དེ་ནི་འདིར་བསྟན་གཉེན་པོའི་དོན། །ཆ་བཞག་མ་སྨོས་སྦྱོར་རྣམ་གཙོ་ཕྱིར་དཔྱད། །
གཉེན་པོ་ལམ་ཞུགས་ཁོ་ནར་འདོད་མི་རིགས། །སྤོང་གཉེན་ཙམ་མིན་གཉེན་པོ་སྣ་ཚོགས་ཏེ། །གང་གང་སྐྱོན་མཐོང་རྣམ་པར་སུན་འབྱིན་གཉེན། །རྐུན་པོ་འབྱིན་འདྲའི་སྤོང་གཉེན་བར་ཆད་མེད། །བྲལ་ཐོབ་འཛིན་པའི་གཞི་གཉེན་རྣམ་གྲོལ་ལམ། །དེ་ཡན་ཁྱད་པར་ལམ་རྣམས་ཐག་བསྲིང་གཉེན། །བྱེ་སྨྲ་རྣམ་གྲོལ་ལམ་ཡང་འདིར་འདོད་ལོ། །གཞན་ཡང་ཚུལ་ཁྲིམས་སྐྱེས་བུ་ཆུང་ངུར་ཡང། །ཡོད་ཕྱིར་གཉེན་པོ་མིན་ན་མཛོད་སོགས་ལས། །མཚན་ཉིད་མི་མཐུན་ཕྱིར་རིང་འབྱུང་བཞི་དང། །མི་མཐུན་གཉེན་པོས་རིང་བ་ཁྲིམས་དང་འཆལ། །ཤར་ནུབ་ཡུལ་གྱིས་རིང་ཞིང་འདས་མ་འོངས། །དུས་ཀྱིས་རིང་སྟེ་བཞི་གསུངས་གཉིས་པར་འགལ། །ཁ་ཅིག་གཉེན་པོ་ཡིན་ན་སྤང་བྱ་དེར། །འཛིན་སྟངས་དངོས་འགལ་དགོས་འདོད་འཁྲུལ་བ་སྟེ། །འདུ་ཤེས་ཀུན་མཆོག་མི་རྟག་འདུ་ཤེས་སུ། །གསུངས་ཕྱིར་བདེན་འཛིན་གཉེན་པོར་གཞོལ་ཕྱིར་དང། །བདག་མེད་རྣམ་གཉིས་རྟོགས་པའི་ཡེ་ཤེས་གཉིས། །ཆགས་པར་དངོས་འགལ་ཡིན་པ་ཆགས་པ་དེ། །འཛིན་པ་གཉིས་ཕྱིར་སྒྲིབ་པ་གཉིས་ཀར་འགྱུར། །ཁ་ཅིག་མདོ་ཡིས་དོན་རྣམ་ཙམ་བསྟན་ཟེར། །མ་མཆིས་ཞེས་པས་དོན་དང་ཤེར་ཕྱིན་ཞེས། །ཤེས་རྣམ་གསུངས་ཤིང་གཞན་ཡང་ཅི་རིགས་པར། །རྒྱལ་དང་རབ་འབྱོར་གཉིས་ཀྱིས་དོན་ཤེས་ཀྱི། །རྣམ་པ་གཉིས་ཀ་གསུངས་ཕྱིར་མི་འཐད་དོ། །ལ་ལ་རྒྱས་བཤད་ཤེས་རྣམ་གཙོར་བསྟན་ཏེ། །ལམ་གྱི་རྣམ་པ་དེ་སྙེད་བསྟན་ཕྱིར་ཟེར། །ཤེས་རྣམ་ཡིན་ཀྱང་སྐབས་འདིར་ཤེས་རྣམ་དུ། །བྱས་ཏེ་མ་བསྟན་ཕྱིར་ན་མི་འགལ་ལོ། །ཁ་ཅིག་གཉེན་པོར་འཛིན་
སྟངས་རྣམ་འཆར་ན། །བར་ཆད་མེད་ལ་འཛིན་སྟངས་འཆར་འགྱུར་ཞིང། །འདོད་ན་རང་ཡུལ་འཆར་རམ་ཞེ་ན་མིན། །ཡུལ་ལ་དམིགས་ཡུལ་ལ་སོགས་སྣ་ཚོགས་ཤིང། །འཛིན་སྟངས་བདག་མེད་ཕྲ་རགས་གང་རུང་ཕྱིར། །ཚིག་ལ་གཟབ་ཅིང་ཤུགས་ཡུལ་གསུངས་པ་དཔྱད། །རྒྱས་པར་བཤད་གསུམ་དང་པོ་གཞི་ཤེས་ལ། །གྲུབ་འཕྲལ་འགྱུར་ལྡོག་མི་རྟག་མེད་པའི་དོན། །དོན་དམ་རྨོངས་པའི་ཉེར་ལེན་སྡུག་བསྔལ་ཏེ། །ཡང་ན་སྐད་ཅིག་ལས་ལྷག་མི་སྐྱེས་དང། །བདག་དབེན་བདག་གི་བ་ཡིས་མི་བརྫི་བཞི། །སྲེད་པ་བདེན་མེད་ཀུན་འབྱུང་ནམ་མཁའ་འདྲ། །རབ་ཏུ་སྐྱེད་བྱེད་ཚུལ་བཞིན་མ་ཡིན་པའི། །ཡིད་བྱེད་རྟོག་དཔྱོད་ལ་སོགས་བརྗོད་དུ་མེད། །ཡང་ན་རྟོག་དཔྱོད་མེད་ཕྱིར་རྗོད་བྱེད་མེད། །ཡང་སྲིད་རྐྱེན་གྱིས་ཚོར་སོགས་མིང་བཞི་མེད། །འགོག་པ་གཞན་གྱི་རྒྱུད་དུ་འགྲོ་བ་མེད། །གཏན་དུ་ཞི་ཕྱིར་རྐྱེན་གྱིས་མི་འཕྲོག་སྟེ། །དག་སྙིང་གཟུང་མེད་ལ་སྦྱར་གསེར་འཕྲེང་བཞེད། །ཆོས་དབྱིངས་ཉིད་ཕྱིར་ཐར་པ་མི་ཟད་དེ། །ཆོས་ཉིད་དྲི་བྲལ་འགོག་པ་སྐྱེ་བ་མེད། །ལམ་ལ་ཉོན་སྒྲིབ་གཉེན་པོ་རྣམ་བཞི་སྟེ། །ལམ་སྒོམ་བྱེད་པོ་དོན་དམ་རིག་པ་པོ། །གོང་མར་འཕོ་བོ་ཉོན་མོངས་འདུལ་བ་པོ། །བདག་མེད་རྟོགས་པའི་མཐོང་ལམ་ཟག་མེད་བཞི། །འཕོ་བ་རྒྱན་བཟང་འཆི་འཕོར་བཤད་ཀྱང་མིན། །ཉོན་མོངས་གཉེན་པོ་རྫོགས་ཕྱིར་ལྷག་བཅུ་གཅིག །འོས་མེད་རིགས་པས་ཤེས་སྒྲིབ་གཉེན་པོར་འགྲུབ། །དེ་སྤང་དཀའ་ཕྱིར་མཐོང་སྒོམ་གཉིས་ཕྱེ་བར། །མཉམ་གཞག་གཙོ་དང་མཉམ་རྗེས་སྤེལ་མ་རུ། །དུས་རིང་འབྱུང་ཕྱིར་ཟག་མེད་ཟག་བཅས་འབྱེད། །སློབ་དཔོན་ལམ་འདིས་རང་རྒྱལ་སྡུད་པའི་ཕྱིར། །ཤེས་སྒྲིབ་གཉེན་པོ་གསུངས་
ལ་ལོ་ཆེན་གྱིས། །རང་རྒྱལ་སྡུད་དགོས་ཞེས་པ་ཤེས་རྣམ་གྱི། །དབང་བྱས་ཡིན་ན་དོན་རྣམ་བཤད་སྐབས་འཆོལ། །དོན་རྣམ་ཡིན་ན་དེར་འདུ་ག་ལ་དགོས། །བདེན་པ་དང་པོ་གསུམ་དང་མཚུངས་ཞེས་ཟེར། །རྒྱལ་བས་སྡུག་ཀུན་སྤོང་ཕྱིར་ལམ་བསྒོམ་ཞེས། །གདམས་ཏེ་བསྐྱེད་བྱར་ཡིན་གྱི་ཤེས་བྱར་མིན། །འདིར་ཡང་གཞི་ཤེས་འབའ་ཞིག་སྐབས་ཡིན་ཕྱིར། །ལམ་འདིས་གཞི་ཤེས་རང་གི་ངོ་བོའི་སྒོས། །མཚོན་སླད་རང་ཡིན་ཚུལ་གྱིས་བསྡུས་པས་ན། །དམིགས་པར་བསྡུས་པའི་ཚུལ་དང་ག་ལ་མཚུངས། །གལ་ཏེ་ཁྱོད་ལྟར་དམིགས་པའི་དབང་བྱས་ཀྱང། །ཉན་རང་རང་རྒྱུད་ལུས་ཚོར་སེམས་ཆོས་ཙམ། །དམིགས་ཕྱིར་དམན་ཞེས་དབུས་མཐའི་འགྲེལ་པར་གསུངས། །འཕགས་པས་འདིའོ་ཞེས་དགག་ཚིག་མ་མཛད་ཕྱིར། །ཐེག་པ་གཉི་གའི་ཤེས་སྒྲིབ་གཉེན་པོ་ཀུན། །བཞེད་ཀྱི་སློབ་དཔོན་ལྟར་མིན་གསུངས་པ་ཡང། །མི་རིགས་དེས་ཀྱང་མཐོང་སྒོམ་ཉིད་གསུངས་ཕྱིར། །ཚིག་གསལ་ཕྱི་མ་འདི་གཉིས་སྒོམ་གཅིག་པུར། །གསུངས་པ་འགྲེལ་ཆུང་འགྱུར་ལ་བདེ་འདྲ་ཡང། །སྣང་བ་གཉིས་དང་མི་མཐུན་ཕྱིར་ན་དོར། །དེ་ཡང་སྒོམ་ལ་ངོ་བོ་ཉིད་མེད་ལྔ། །མཐོང་ལ་ཕྱི་དོན་ཀུན་ཉོན་རྣམ་བྱང་དང། །བག་ཆགས་དབྱེ་བའི་སྤྲོས་དང་རྟོགས་པའི་རློམ། །ཕྱི་དོན་རྟོགས་པ་ཐོབ་ཟིན་ཉམས་མེད་དྲུག །ཐ་མར་གསེར་འཕྲེང་སྟོང་ཉིད་མི་གཡོ་གསུངས། །འདི་དག་ལེགས་ལྡན་འདོད་ཚུལ་ལམ་སྒྲིག་གསལ། །འདིར་བསྟན་གཙོ་བོ་རྣམ་གཞག་རྟེན་ཤེས་ནས། །རྗེས་སུ་གཟུང་ཕྱིར་སེམས་དཔའི་བསྐྱེད་བྱ་ཙམ། །ཡིན་ཕྱིར་དམན་ལ་མིན་ཞིང་རྒྱལ་ལའང་མིན། །སྐབས་འདིར་གཙོར་བསྟན་ལམ་ཤེས་འང་གཞི་ཤེས་ཉིད། །
ཁ་ཅིག་བདག་མེད་མངོན་སུམ་རྟོགས་པའི་བློས། །ཟིན་པའི་ཐེག་དམན་ཤེས་རབ་རྟོགས་རིགས་དེ། །གཞི་ཤེས་དམིགས་ལ་ལོག་ཞུགས་གཉེན་པོར་འདོད། །གཞི་ཤེས་དམིགས་པར་ལོག་ཞུགས་བདེན་འཛིན་ཡང། །ཡོད་ཅིང་མི་རྟག་རྟོགས་བློ་དེའི་གཉེན་པོར། །མི་རིགས་འདིར་བསྟན་གཉེན་པོ་རྣམ་པའི་དོན། །སྔར་བཤད་བཞིན་དུ་འཛིན་སྟངས་འགལ་དགོས་ཤིང། །གཉེན་པོ་ཙམ་ལ་བསམ་ན་སྐབས་འཆོལ་ཕྱིར། །གང་གི་གཉེན་པོ་བྱ་ཡུལ་སྒྲིབ་པ་ལ། །མཚན་ཉིད་ཟུར་དུ་ཆ་བཞག་མ་སྨོས་པར། །ཐར་དང་ཐམས་ཅད་མཁྱེན་ལ་བར་གཅོད་སྒྲིབ། །རིམ་བཞིན་སྒྲིབ་གཉིས་དོན་དུ་ཁ་ཅིག་འདོད། །གཞན་དག་སྔ་མའི་སྐྱོན་དུ་བདེན་འཛིན་འཕེན། །འཇིག་ཚོགས་ལྟ་བའི་གདོན་གྱིས་བྱང་ཆུབ་མཆོག །ཐོབ་ལ་བར་དུ་གཅོད་ཕྱིར་སྔ་མ་ཞིག །དགྲ་བཅོམ་བདེན་འཛིན་ལྡན་ཕྱིར་གནོད་ཙམ་གྱིས། །བར་གཅོད་མི་དགོས་ཕྱིར་ན་གཞན་དེའང་ཁེགས། །སྒྲིབ་དེ་གཉིས་སུ་ངེས་ཀྱང་མ་ཁྱབ་སྟེ། །སྟོབས་ཀྱི་སྒྲ་དོན་དབང་པོའི་རྡོ་རྗེ་བཞིན། །གང་ལ་ཐོགས་པ་མེད་ཚུལ་འཆད་པའི་སྐབས། །གནས་དང་གནས་མིན་མཁྱེན་པ་ལ་སོགས་དྲུག །ཤེས་སྒྲིབ་གོ་ཆས་འཐུམས་པ་འབིགས་བྱེད་དང། །བསམ་གཏན་རྣམ་ཐར་མཁྱེན་སོགས་ཁམས་གཅོད་པའི། །སྙོམས་འཇུག་སྒྲིབ་པའི་རྩིག་པ་གཞིག་བྱེད་གསུམ། །སྲིད་པའི་འདབ་རྒྱས་ཉོན་མོངས་ལྗོན་ཤིང་ཆེ། །གཅོད་བྱེད་ཟག་ཟད་སྟོབས་སུ་རྒྱུད་བླར་གསུངས། །འོན་ཀྱང་བྱིང་ཕྲ་དགེ་ལ་རགས་པ་ནི། །མ་སྒྲིབ་ལུང་མ་བསྟན་དུ་བཤད་པའི་ཕྱིར། །སྒྲིབ་གཉིས་ལས་གཞན་སྙོམས་འཇུག་སྒྲིབ་གང་དཔྱད། །སྙོམས་འཇུག་སྒྲིབ་ལ་སྒྲིབ་པས་ཁྱབ་གསུངས་ཤིང། །ལས་སྒྲིབ་དེ་ལས་བཟློག་ཕྱིར་དེ་ཉིད་ལ། །ངོ་ཚ་ཁྲེལ་མེད་དང་ལྡན་མེད་དམ་དཔྱད། །གཞན་ཡང་
སྒྲིབ་པའི་འཇོག་ཚུལ་དུ་མ་སྟེ། །དབུས་མཐའ་རྩ་འགྲེལ་སྒྲིབ་པའི་ལེ་འུ་ལས། །སྒྲིབ་པ་ཆེན་པོ་ནས་བཟུང་ཕར་ཕྱིན་དང། །ཁྱད་པར་འགྲོ་ལ་སྒྲིབ་བཅས་བཅུ་གསུངས་ཤིང། །དེ་ཡི་ཐ་མ་གཉིས་ཀྱིས་བསྡུས་པ་ཡི། །ཀུན་རྨོངས་ཉེར་གཉིས་བཅུ་གཅིག་གནས་ངན་ལེན། །སྒྲིབ་གཉིས་ལས་གཞན་ཁ་ཅིག་ཆགས་སྒྲིབ་དང། །ཐོགས་སྒྲིབ་གཉིས་ཀྱང་སྒྲིབ་གཉིས་ལས་གཞན་ཟེར། །མི་འཐད་ཇི་ལྟ་ཇི་སྙེད་ལ་རྨོངས་པའི། །ཆ་ནས་ཕྱེ་ཡང་ཤེས་སྒྲིབ་དང་གཅིག་ཕྱིར། །ཁ་ཅིག་འདོད་ཆེན་ཆོས་ལ་སྡང་བ་དང། །མུ་སྟེགས་བདག་ལྟ་ཉན་ཐོས་འཇིགས་སྲེད་དང། །རང་རྒྱལ་བརྩེ་མེད་སྒྲིབ་བཞིའང་གཉིས་མིན་ཟེར། །སྔ་གཉིས་སྲིད་མཐར་ལྟུང་བྱེད་ཉོན་སྒྲིབ་དང། །ཕྱི་གཉིས་ཞི་མཐར་ལྟུང་བྱེད་བདེན་འཛིན་གཙོ། །གཉེན་པོ་མོས་པ་ལ་སོགས་བཞི་ཡི་འབྲས། །གཙང་བདེ་རྟག་བདག་དམ་པའི་ཕར་ཕྱིན་བཞི། །གཞི་ཤེས་བཞིན་དུ་རང་གི་དམིགས་རྣམ་གཅིག །བྱས་ནས་ཉམས་ལེན་གཞི་ཤེས་སྦྱོར་བའི་དོན། །དམིགས་པ་བདེན་བཞི་རྣམ་པ་གཞི་ཤེས་ཀྱི། །འཛིན་སྟངས་ཉེར་བདུན་གང་རུང་སྒོམ་པ་ཡི། །རབ་ཕྱེ་སེམས་དཔའི་སྦྱོར་བ་འདིར་དངོས་སུ། །གཙོར་བསྟན་སེམས་དཔའི་གཞི་ཤེས་སྦྱོར་བའི་དོན། །དེ་དག་དོན་ལ་ཁ་ཅིག་ཤེས་སྒྲིབ་རགས། །ཤེས་སྒྲིབ་མིན་ཏེ་རགས་པ་ཡིན་པའི་ཕྱིར། །བདག་འཛིན་རགས་པ་བདག་འཛིན་མིན་བཞིན་ཟེར། །ཤེས་སྒྲིབ་ཡིན་པ་རྣམ་དག་སྐབས་ཀྱིས་འགྲུབ། །ཁ་ཅིག་བྱེད་པོ་བདག་མེད་རྟོགས་སོགས་བཞི། །བཅོ་ལྔར་དབྱེ་བའི་དོན་རྣམ་མ་ཡིན་ཏེ། །ལམ་གྱི་རྣམ་པ་སྒོམ་བྱེད་ཡིན་ཕྱིར་ཟེར། །མ་ངེས་ལམ་སྟེང་འདིར་བསྟན་དོན་རྣམ་ལ། །ལམ་དེའི་འཛིན་སྟངས་
ཡུལ་ཞིག་མི་དགོས་ཕྱིར། །དེ་ལྟར་མེད་པ་ནས་བཟུང་མི་གཡོའི་བར། །གཞི་ལ་སྦྱར་ཕྱིར་ལམ་ལ་མཚམས་འབྱེད་བྱེད། །དངོས་སུ་མེད་ཀྱང་འདོད་ཆགས་བྲལ་རྣམ་ནས། །དངོས་མེད་དངོས་ཉིད་བར་ཞེས་དོན་གྱིས་འཐོབ། །རྒྱུད་བླར་མངོན་རྟོགས་རིམ་དང་འདིར་གསུངས་པ། །རྒྱུ་འབྲས་དོན་རིམ་ཕྱིར་ན་འགལ་བ་མེད། །ཀུན་འབྱུང་སྤོང་གཉེན་སྒོ་ནས་རྣམ་པ་བརྒྱད། །ལམ་ལ་དམ་བཅའ་འཐད་པའི་སྒོ་ནས་བདུན། །སྡུག་བདེན་རང་སྤྱིའི་སྒོས་ལྔ་འགོག་བདེན་ལ། །སྟོང་ཉིད་སྒོ་ནས་རྣམ་པ་བཅུ་དྲུག་སྟེ། །རྣམ་བཤད་ལྟར་ན་ཕན་ཡོན་རྣམ་པས་སོ། །དང་པོ་བདག་མེད་མངོན་མཐོང་ཡེ་ཤེས་དེ། །མ་འོངས་ལ་འདུན་མི་འབྲལ་འདོད་ཆགས་དང། །ཡང་སྲིད་ལ་དགའ་གསུམ་གྱི་གཉེན་པོ་སྟེ། །ཐོབ་འདོད་ཆགས་བྲལ་ཞེན་པས་མི་གནས་དང། །སྲེད་པ་ཞི་བའི་ཡེ་ཤེས་གསུམ་ཡིན་ཕྱིར། །གསེར་ཕྲེང་འདུན་པ་ཡུལ་ངེས་ལ་གསུངས་དཔྱད། །དེ་བཞིན་ཆགས་སྡང་རྨོངས་གསུམ་གཉེན་པོ་སྟེ། །དེ་ཡི་ཞེན་ཚུལ་མེད་པའི་རྣམ་ཅན་ཕྱིར། །བདག་འཛིན་གྱུར་བའི་ཞེ་སྡང་འདི་ཡིས་འགྲུབ། །གཙང་བདེ་སོགས་གསུམ་ཀུན་རྟོག་གཉེན་པོ་སྟེ། །ཀུན་ནས་ཉོན་མོངས་ཞེན་ཡུལ་མེད་རྟོགས་ཕྱིར། །རང་དབང་སེམས་ཅན་ཉིད་དུ་མངོན་ཞེན་པའི། །གཉེན་པོ་ཡིན་ཏེ་དེ་མེད་མཐོང་ཕྱིར་རོ། །དེ་ལྟར་མདོ་ལས་ཀུན་འབྱུང་སྤང་བྱ་རུ། །ཤེས་ཕྱིར་དངོས་སུ་མ་བསྟན་གཉེན་པོ་བརྒྱད། །བསྟན་ཏེ་འདིར་ནི་སྤོང་གཉེན་སྦྱར་ནས་གསུངས། །ལམ་སོགས་གསུམ་གྱི་དངོས་དང་འཐད་པ་ནི། །སེམས་ཅན་ཚད་མེད་ཐར་པའི་གོ་འབྱེད་དེ། །སྲིད་ཞིའི་མཐའ་དང་མ་འབྲེལ་འབྱེད་ཕྱིར་རོ། །ཆོས་དབྱིངས་ངོ་བོ་ཐ་དད་མེད་རྟོགས་ཏེ། །གཞན་མཆོག་མི་འཛིན་རྫོགས་བྱང་སྒྲུབ་ཕྱིར་རོ། །ཡོན་ཏན་
སྒྲུབ་ཀྱང་རྣམ་པར་མི་རྟོག་སྟེ། །ཐོབ་དང་མ་ཐོབ་གཞལ་དུ་མེད་རྟོགས་ཕྱིར། །འདིའི་མདོར་ཚད་མའི་ཐ་སྙད་གསུངས་པར་ནི། །ཉི་སྣང་དྲངས་ཕྱིར་ཤེས་རབ་རིན་ཆེན་སོགས། །ཚད་མ་ཕྱོགས་གླང་ཡབ་སྲས་བློས་བྱས་ལས། །རྒྱལ་བས་མ་གསུངས་ཐལ་རང་མི་འདོད་ཅེས། །སྨྲ་བ་ཁེགས་སོ་འོན་ཀྱང་བརྒྱད་སྟོང་དང། །ཉི་ཁྲི་རྒྱན་སྣང་སོགས་སུ་ཚད་མེད་ལ། །བསྒྱུར་ཅིང་ཉི་སྣང་ལས་ནི་འདི་ལྟར་གསུངས། །ཆགས་མེད་རྣམ་པར་མངོན་མཐོང་ངེས་འབྱིན་ཏེ། །འཐད་པ་མ་གསུངས་གདུལ་བྱ་ཉེ་བའི་དབང། །འོ་ན་གསེར་ཕྲེང་རྣམ་པ་ཉེར་བདུན་དང། །སོ་དྲུག་དག་ལ་དམ་བཅའ་འཐད་པའི་མདོ། །གྲངས་མཉམ་ཡོད་ཅིང་རྣམ་མཁྱེན་རྣམ་པ་ཡི། །བྱང་ཕྱོགས་སྡེ་ཚན་བདུན་ལ་མདོ་བདུན་དང། །སོ་བཞིའི་རྣམ་ཐར་སྙོམས་འཇུག་སྤོང་ལམ་ལ། །རེ་རེ་ལྷག་མ་བཅུ་གསུམ་རེ་རེ་སྟེ། །སོ་དགུའི་སྡེ་ཚན་བཞི་དང་ཐ་མ་གསུམ། །སོ་སོར་བྱས་པའི་བདུན་གསུངས་ཅི་ཞེ་ན། །མདོ་ལས་ནམ་མཁའི་རང་བཞིན་ཉིད་ཕྱིར་ཞེས། །འཐད་པ་གསུངས་ཀྱང་དེར་བསྟན་རྣམ་པ་ནི། །དམ་བཅའི་རྣམ་པར་གཅིག་སྟེ་བརྒྱད་སྟོང་ལས། །ཆགས་པ་མ་མཆིས་སླད་དུ་ཆགས་མེད་ཅེས། །གསུངས་ཕྱིར་སྔ་ཕྱིའི་ལུང་ལ་འགལ་བ་མེད། །སྡུག་བསྔལ་རང་མཚན་བཞི་དང་སྤྱི་ཡི་གཅིག །འཇིག་ཕྱིར་མི་རྟག་འཕགས་དང་མི་མཐུན་སྡུག །རྟེན་བྱེད་བདག་སྟོང་རང་ཉིད་བདག་མ་ཡིན། ། ༈ སྒྲུབ་པའི་དམ་བཅའ་དང་འཐད་པའི་མདོ་ནི། ཉི་ཁྲི་ལས། བཅོམ་ལྡན་འདས་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་གཞལ་དུ་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས་ཀྱིས་བཀའ་སྩལ་པ། ཆོས་ཐམས་ཅད་ཀྱི་ཚད་དམིགས་སུ་མེད་པའི་ཕྱིར་རོ། །ཞེས་ཚད་ཅེས་པ་ལས་ཚད་མ་ཞེས་མི་འབྱུང་ཡང། ཉི་སྣང་དུ་ཇི་ལྟར་དེ་
ལ་བྱ་བའི་རྣམ་པར་རྟོག་པ་མེད་ཅེས་བྱ་ཞེ་ན། གཞལ་དུ་མེད་པའི་རྣམ་པས་ཆོས་ཐམས་ཅད་ཀྱི་ཚད་མ་དམིགས་སུ་མེད་པའི་ཕྱིར་རོ་ཞེས་གསུངས་པ་ཡིན་ནོ། །ཞེས་མདོ་དྲངས་པར་ཡིག་ཆར་ཡང་སོར་བཞག་མཛད་པས་སྔ་མ་འགྱུར་སྐྱོན་ཡིན་ནམ་དཔྱད་གཞི་ཡོད་དེ། འདིའི་བརྒྱད་སྟོང་པར་ཡང་བཅོམ་ལྡན་འདས་ཆོས་ཉིད་ཚད་མ་མཆིས་པ་ཉིད་ཀྱི་སླད་དུ་འདི་ནི་གཞལ་དུ་མ་མཆིས་པའི་ཕ་རོལ་ཏུ་ཕྱིན་པའོ། །ཞེས་གསུངས་ཤིང། འདིར་སླད་དུ་ཞེས་པ་ཕྱིར་ན་ཞེས་འཐད་པའམ་རྒྱུ་མཚན་དུ་སྟོན་བྱེད་ཡིན་ནོ། །རྒྱན་སྣང་ལས་ཀྱང། གཞལ་དུ་མེད་པ་ཞེས་བྱ་བ་གསུངས་ཏེ་ཆོས་ཉིད་ཚད་མ་མཆིས་པའི་སླད་དུ་ཐོབ་པ་ཡོངས་སུ་ཉམས་པ་དང། ཞེས་སོགས་གསུངས་སོ། །ངེས་འབྱིན་ལའང་དམ་བཅའ་དང་འཐད་པའི་མདོ་སྔར་ལྟར་སོ་སོར་ཡོད་དེ། ཉི་ཁྲི་ལས། གསོལ་བ། བཅོམ་ལྡན་འདས་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཆགས་པ་མ་མཆིས་པའི་ཕ་རོལ་ཏུ་ཕྱིན་པའོ། །བཅོམ་ལྡན་འདས་ཀྱིས་བཀའ་སྩལ་པ། ཆོས་ཐམས་ཅད་ནམ་མཁའི་རང་བཞིན་ཡིན་པའི་ཕྱིར་རོ། །ཞེས་གསུངས། འོན་ཀྱང་ལམ་རིག་སྒྲུབ་པ་གསུམ་གྱི་སྐབས་སུ་བསྟན་པ་དང་མི་འདྲ་སྟེ། དེ་དག་གི་དམ་བཅའ་དང་འཐད་པས་བསྟན་པའི་རྣམ་པ་གཉིས་ལ་དོན་མི་འདྲ་བ་དང། བློར་འཆར་ཚུལ། འཛིན་སྟངས་སོ་སོ་བ་ཡོད་ལ་འདིར་ནམ་མཁའི་རང་བཞིན་ཞེས་པའང་ཆགས་པ་མ་མཆིས་པ་ལས་ལོགས་སུ་གོ་རྒྱུ་དང་སྒོམ་ཚུལ་མེད་དེ། བརྒྱད་སྟོང་པར། བཅོམ་ལྡན་འདས། ཆོས་ཐམས་ཅད་ཆགས་པ་མ་མཆིས་པའི་སླད་དུ་ཆགས་པ་མ་མཆིས་པའི་ཕ་རོལ་ཏུ་ཕྱིན་པའོ། །ཞེས་གསུངས་པའི་ཕྱིར། ཁྱབ་སྟེ། འདིའི་འང་སླད་དུ་ཞེས་པ་རྒྱུ་མཚན་སྟོན་བྱེད་ཡིན་པ་སྔར་དང་འདྲ་བས། དམ་བཅའ་དང་འཐད་པ་གཉིས་བསྐྱར་ནས་གསུངས་པ་ཙམ་ལས་མི་འདྲ་བ་མེད་པས་ཤེས་སོ། །དེའི་ཕྱིར་ལུང་སྔ་ཕྱི་འགལ་བ་མེད་ཚུལ་ཤེས་སོ། །བདེན་པས་སྟོང་པ་སྤྱི་ཡི་མཚན་ཉིད་དོ། །ཕྱི་དང་ནང་སོགས་བདེན་འཛིན་སྤངས་པ་ཡི། །འགོག་པ་བཅུ་དྲུག་སྟེང་གི་སྟོང་ཉིད་རྣམས། །འདིར་བསྟན་འགོག་བདེན་རྣམ་པ་བཅུ་དྲུག་
ཕྱིར། །དེ་རྟོགས་སྦྱོར་བ་དོན་དམ་རྣམ་ཅན་གསུངས། །ཁ་ཅིག་ལམ་ཤེས་སྐབས་གསུངས་སྦྱོར་བ་ཀུན། །དོན་དམ་རྣམ་ཅན་འདོད་པ་མི་རིགས་ཏེ། །མ་འོངས་སྲིད་པའི་ཞེན་ཡུལ་མེད་པ་དེ། །དོན་དམ་མིན་ཡང་དེ་ཡི་འཛིན་སྟངས་ཕྱིར། །གཞན་དུ་སེམས་དཔའི་ལམ་ཤེས་སྦྱོར་བ་ལ། །ཐེག་པ་གསུམ་གྱི་རྟོགས་རིགས་མེད་འགྱུར་ཕྱིར། །གཉེན་པོའི་རབ་དབྱེ་ཤེས་པར་མི་འགྱུར་རོ། །ཐེག་ཆེན་རྟོགས་རིགས་འདིར་བསྟན་སྦྱོར་བར་ཡང། །ཀུན་རྫོབ་རྣམ་ཅན་ལམ་གྱི་གཉིས་སོགས་མང། །སྲིད་ཞིའི་མཐའ་གཉིས་སེལ་བར་བྱེད་པའི་ཕྱིར། །སྡུག་བདེན་སྟེང་གི་གཞི་ཤེས་སྦྱོར་བཞི་ཡང། །སེམས་དཔའི་རྒྱུད་ལ་ལམ་ཤེས་སྦྱོར་བར་གནས། །ཁ་ཅིག་ལམ་དེས་རྟོགས་བྱ་དེ་ཉིད་ཀྱི། །རྣམ་པའི་དོན་དུ་འདོད་ཀྱང་མཉམ་གཞག་བློ། །རང་གི་ཤེས་རྣམ་ཡིན་ཕྱིར་མི་རུང་ངོ་། ། ༈ རང་ལུགས་ལམ་ཤེས་དོན་རྣམ་གང་ཡང་རུང། །ཤར་ནས་སྒོམ་པའི་སེམས་དཔའི་སྦྱོར་བ་དེ། །འདི་ཡི་དངོས་བསྟན་ལམ་ཤེས་སྦྱོར་བའི་དོན། །འདིར་བསྟན་ལམ་ཤེས་འདོད་སྲེད་མ་སྤངས་ཤིང། །གཙོ་བོར་མི་སྤོང་རྒྱུད་ཀྱིས་བསྡུས་པས་ན། །ཟག་བཅས་སྒྲས་བསྟན་རྣམ་གྲངས་ཟག་བཅས་ཕྱིར། །རྒྱུ་ཡི་ལམ་ཤེས་ཁོ་ན་ཡིན་པར་གསུངས། ། ༈ རྣམ་མཁྱེན་རྣམ་པར་ཉན་ཐོས་བྱང་སེམས་ལ། །ཡོད་དང་རྗེས་མཐུན་རྣམ་མཁྱེན་རྣམ་པ་དང། །སངས་རྒྱས་ཁོ་ནའི་ཐུན་མོང་མིན་རྣམ་གསུམ། །འདི་ལ་ཁ་ཅིག་རྣམ་མཁྱེན་ཁོ་ན་དང། །རྟེན་ཡང་སངས་རྒྱས་ཁོ་ནར་བཤད་སྐབས་ཕྱིར། །གང་ཟག་གསུམ་ལ་ཡོད་ཅིང་མཁྱེན་གསུམ་དུ། །དབྱེ་བ་མི་རུང་ཞེས་རྩོད་ལན་ལ་ཡང། །ཁ་ཅིག་འཕགས་ཚོགས་ཡོན་ཏན་ཡར་ལྡན་དུ། །བསྡུས་ཕྱིར་གཞི་ཤེས་ལམ་ཤེས་བཏགས་
པ་ཟེར། །ཁ་ཅིག་རྒྱུར་བཤད་ཙམ་ལས་རྣམ་མཁྱེན་གྱི། །མ་ཡིན་གཞི་ལམ་རྣམ་པར་གོང་བགྲང་ཟེར། །དང་པོ་མི་འཐད་ཁྱོད་ཀྱིས་རྩ་བ་ལས། །ལམ་གྱི་བདེན་པའི་རྗེས་མཐུན་གསུངས་ཕྱིར་རོ། །བསམ་ན་འགལ་ཁྱབ་ཡིན་ཏེ་དེ་ཡི་དོན། །ཆ་འདྲར་མི་བྱེད་དེ་ལ་ཡོད་པ་དང། །མཐུན་པར་རྒྱལ་ལ་ཡོད་པའི་དོན་ཕྱིར་ཏེ། །ཆོས་སྐུའི་སྐབས་སུ་འདི་ལ་ཞལ་འཕངས་ཕྱིར། །གཉིས་པ་རྒྱུར་བཤད་པ་ཡང་མི་རིགས་ཏེ། །མཁྱེན་གསུམ་ཕྱེད་པའི་དོན་དང་རང་རང་གི །རིགས་འདྲ་གར་བསྐྱེད་ཇི་ལྟར་སྒོམ་ཚུལ་སོགས། །ཤེས་ཕྱིར་རྣམ་མཁྱེན་ཉིད་ལ་སོ་བདུན་སོགས། །ཕྱེ་བར་ཚིག་གསལ་མཁན་པོ་ཉིད་ཀྱང་བཞེད། །དེ་ཕྱིར་བར་ཆད་མེད་དང་དྲོད་སོགས་ཀྱང། །གསུངས་པ་རྒྱུན་ལ་དགོངས་ཕྱིར་འགལ་བ་མེད། །གསེར་འཕྲེང་ལྟར་ན་ཡུལ་དུ་བསྡུས་པ་སྟེ། །སྔ་མར་མི་ཟློས་དེར་ནི་མཁྱེན་པ་གཉིས། །རྟོགས་བྱེད་དང་འདིར་རྟོགས་བྱར་བསྟན་ཕྱིར་དང། །འདིར་ནི་དེར་བསྟན་རྣམ་ཀུན་ཡུལ་ཅན་ཕྱིར། །ཡུལ་ལ་བདེན་གསུམ་ཡོད་ཀྱང་ལམ་བསྡུས་ན། །ཤེས་རྣམ་རྐྱང་པ་མིན་ཕྱིར་དེ་བསྡུས་འགྱུར། །དེར་ཡོད་དང་མཐུན་ཐུན་མོང་ཞེས་བྱ་ཡི། །འཕགས་པ་འོག་མར་ཐུན་མོང་རྣམ་མཁྱེན་ཞེས། །མི་སྨོས་དམན་མཆོག་ཡོན་ཏན་འགལ་ཕྱིར་གསུངས། །ཁ་ཅིག་ཆུང་འབྲིང་ཐུན་མོང་ལམ་བཞིན་ཟེར། །སོ་བདུན་སོ་བཞི་ཉན་ཐོས་བྱང་སེམས་དང། །ཐུན་མོང་གསུངས་པ་རྟོགས་རིགས་ཕྱིར་མིན་ཏེ། །རིགས་ཅན་གསུམ་དོན་སྒྲུབ་སླད་སེམས་དཔའི་དེར། །རྣམ་ཐར་གསུམ་སོགས་དམན་པའི་རྟོགས་རིགས་མང། །དེ་བཞིན་འདིར་བསྟན་བྱང་ཕྱོགས་སོ་བདུན་ཡང། །དམན་པའི་རྟོགས་རིགས་མིན་ཏེ་འདིར་བསྟན་གྱི། །དྲན་ཉེ་སེམས་དཔའི་བསྒོམ་བྱ་གཙོ་ཞིང་དེ། །དམན་པའི་དེ་ལས་བཅུ་བཞིས་.....མདོ་སྡེ་རྒྱན་ལས། རྟེན་དང་
གཉེན་པོ་དག་དང་ནི། །དེ་བཞིན་དུ་ནི་འཇུག་པ་དང། །དམིགས་པ་དང་ནི་ཡིད་བྱེད་དང། །ཐོབ་པའི་སྒོམ་པ་ཁྱད་པར་འཕགས། །མཐུན་དང་རྗེས་སུ་འཇུག་པ་དང། །ཡོངས་སུ་ཤེས་དང་སྐྱེས་པ་དང། །ཆེན་པོ་དང་ནི་མཆོག་ཉིད་དང། །བསྒོམ་དང་ཡང་དག་འགྲུབ་པ་གཞན། །ཞེས་གསུངས། ཁྱད་འཕགས་ཏེ། །ཐེག་མཆོག་ཤེས་རབ་གསུམ་རྟེན་མཚན་འཛིན་གཉེན། །གཞན་བདེན་བཞིར་འཇུག་སེམས་ཅན་ཀུན་ལུས་དམིགས། །མི་དམིགས་ཡིད་བྱེད་དེ་བཞིན་ཐོབ་པའི་སྟེ། །ལུས་བྲལ་ཕྱིར་མིན་མི་འབྲལ་ཕྱིར་ཡང་མིན། །ཁ་ཅིག་ཆོས་སྐུ་ཟག་ཕུང་གཉིས་ལ་སྦྱར། །ལ་ལ་ཞིར་འཇུག་མིན་ཡང་འདོད་ལ་སྦྱར། །ཕར་ཕྱིན་དང་མཐུན་ཉན་རང་རྗེས་སུའང་འཇུག །སྒྱུ་འདྲར་ཡོངས་ཤེས་བསམ་བཞིན་སྲིད་པར་སྐྱེ། །རང་བཞིན་རྣོ་བས་བསྒོམ་པ་ཆུང་ངུའང་ཆེ། །དག་སར་འདྲེས་པ་ཉེ་བར་སྒོམ་ཕྱིར་མཆོག །ཤིན་ཏུ་བསྒོམ་པས་ལྷག་མེད་ཟད་མི་འགྱུར། །བཅུ་པའི་ས་དང་སངས་རྒྱས་ཡང་དག་འགྲུབ། །ཁ་ཅིག་སྟོབས་བཅུ་ཐུན་མོང་ཟེར་ཡང་མིན། །ངོ་བོ་ཐུན་མོང་མིན་ཏེ་སེམས་དཔར་མེད། །བསྒོམ་བྱར་ཡང་མིན་རྒྱལ་བས་མི་སྒོམ་ཕྱིར། །སོ་རིག་ཐོབ་ལ་ཆགས་ཐོགས་སྒྲིབ་པ་སྤངས། །དགོས་ཕྱིར་དགུ་བར་རྒྱན་གསུངས་རྗེས་མཐུན་ཙམ། །རང་ལུགས་ཐུན་མོང་དོན་ནི་རང་ཉིད་གར། །གཏོགས་པའི་སྡེ་ཚན་འཕགས་པ་འོག་མ་ལ། །ཡོད་པའོ་རང་གི་སྡེ་ཚན་ཞེས་བརྗོད་ན། །ཐུབ་པའི་བྱང་ཕྱོགས་སྡེ་ཚན་ཟག་མེད་ཀྱི། །ཡེ་ཤེས་སྡེ་ཚན་ཡིན་ཕྱིར་ཚིག་གིས་གནོད། །རྒྱས་བཤད་སོ་བདུན་སོ་བཞི་སོ་དགུ་པས། །དང་པོར་སྤྱི་དང་སོ་སོའི་རྣམ་གཞག་གཉིས། །དང་པོར་སྡེ་ཚན་དབྱེ་བས་རྣམ་པ་བདུན། །སྒོམ་ཚུལ་ཚོགས་ལམ་ཆུང་འབྲིང་ཆེ་གསུམ་དང། །སྦྱོར་ལམ་གཉིས་གཉིས་མཐོང་
སྒོམ་རིམ་བཞིན་གཙོ། །དང་པོར་འཕྲུལ་དང་མཐོང་ལའང་ལམ་མེད་མིན། །བྱེ་སྨྲ་ཚོགས་གཅིག་སྦྱོར་བཞི་སྒོམ་མཐོང་ལ། །རིམ་སྦྱར་བྱང་ལག་སྔར་སྨོས་གྲངས་བསྟུན་ཟེར། །ཚུལ་འདི་ཉན་ཐོས་ལ་སྦྱོར་རྨོངས་གཏམ་མོ། །མིང་གི་ལྡོག་ཆས་སོ་བདུན་རྫས་སུ་བཅུ། །དད་བརྩོན་དྲན་དང་ཤེས་རབ་ཏིང་འཛིན་དགའ། །བཏང་སྙོམས་རྟོག་དང་ཤིན་སྦྱངས་ཚུལ་ཁྲིམས་ཏེ། །ངག་དང་ལས་མཐའ་འཚོ་གསུམ་ཐ་མས་བསྡུས། །བསྡུ་བར་བྱང་ཕྱོགས་ལ་ནི་དད་སོགས་ལྔས། །མ་བསྡུས་ཚུལ་ཁྲིམས་གསུམ་དང་ཤིན་སྦྱངས་དགའ། །བཏང་སྙོམས་དྲུག་གམ་ཚུལ་ཁྲིམས་བསྡོམས་ན་བཞི། །གསུངས་ཏེ་རྟོག་པ་ཤེས་རབ་རྫས་ཕྱིར་བཀོལ། །དེ་ལྟར་བྱས་ན་སོ་བདུན་རྫས་དགུར་འདུས། །རྫུ་འཕྲུལ་ཏིང་འཛིན་འདུན་སོགས་རྐང་པ་རུ། །བྱེ་སྨྲ་འདོད་ཕྱིར་འདུན་སེམས་དཔྱོད་པའི་རྫས། །བསྣན་པས་བཅུ་གསུམ་ཉིད་དུ་འགྱུར་རམ་དཔྱད། །གྲུབ་མཐའ་གོང་མས་རྫུ་འཕྲུལ་སྤྲུལ་བསྒྱུར་དང། །རྐང་པ་ཏིང་འཛིན་འདུན་སོགས་དེའི་རྒྱུར་བཞེད། །དྲན་ཉེ་ངོ་བོ་ལུས་ཚོར་སེམས་ཆོས་བཞི། །གང་རུང་ལ་དམིགས་རང་སྤྱི་ཅི་རིགས་སུ། །སེམས་པའི་ཤེས་རབ་རིགས་གནས་མཁྱེན་པ་འོ། །ཁ་ཅིག་ཏིང་འཛིན་ཤེས་རབ་མཚུངས་ལྡན་འདོད། །རྫས་མཚུངས་ཉམས་ཕྱིར་རང་བཞིན་དྲན་ཉེ་དང། །ཤེས་རབ་ལྡན་མིན་ཏིང་འཛིན་ཏིང་འཛིན་དང། །མི་ལྡན་འང་འབྲེལ་བའི་དྲན་ཉེ་ཡིན་ཞིང་འདིར། །དམིགས་པ་དྲན་ཉེ་མ་གཏོགས་དངོས་ཡིན་ཏེ། །སྦྱོར་བྱུང་ཡོན་ཏན་ཀུན་ཀྱང་ཡིན་གསུངས་ཕྱིར། །ལུས་སོགས་བཞིར་དམིགས་རང་སྤྱིའི་མཚན་ཉིད་དུ། །རྟོགས་བྱེད་དྲན་ཉེའི་དོན་དུ་ཁ་ཅིག་སྨྲ། །མི་འཐད་ལམ་མ་ཞུགས་ན་ཡོད་ཕྱིར་དང། །ལུས་ཙམ་ལ་དམིགས་
དྲན་ཉེ་གསུངས་ཕྱིར་ཏེ། །རང་ལུས་སེམས་ཅན་ཀུན་གྱི་ལུས་སུ་དང། །དེ་ཉིད་རྒྱལ་སྐུའི་གནས་སུ་སེམས་པ་ཡི། །དྲན་ཉེ་གཙུག་ན་རིན་ཆེན་མདོ་ལས་སོ། །མདོ་དོན་འགྲོ་བའི་སྡུག་བསྔལ་རང་བླངས་ཏེ། །དེ་ལུས་བདེ་ཆེན་ཟག་མེད་སྐུར་མོས་ཞེས། །ཁ་ཅིག་འདོད་ཀྱང་ལུང་དེའི་མཇུག་ཐོགས་སུ། །ཆོས་ཉིད་རྣམ་པར་གསུངས་ཏེ་གཙུག་ན་རིན་ཆེན་གྱི་ལུང་དེའི་འཕྲོར་ཇི་ལྟར་དེ་བཞིན་གཤེགས་པའི་སྐུ་ཟག་པ་མེད་པ་ལྟར། རང་གི་ལུས་ཀྱི་ཆོས་ཉིད་ལའང་དེ་བཞིན་དུ་རྟོག་གོ །དེ་ཟག་པ་མེད་པའི་ཆོས་ལ་མཁས་པས་སེམས་ཅན་ཐམས་ཅད་ཀྱི་ལུས་ཀྱང་དེའི་མཚན་ཉིད་དུ་རབ་ཏུ་ཤེས་སོ། །ཞེས་གསུངས། བསླབ་བཏུས་ལྟོས། །ཡིག་ཆར་སྤྱི་མཚན་གསུངས་པའི་དགོངས་པའང་ཡིན། །དམིགས་པ་ལུས་ཚོར་སེམས་ཆོས་བཞི་ག་ལ། །ཕྱི་ནང་གཉིས་ཀའི་དབྱེ་བས་གསུམ་གསུམ་སྟེ། །རང་གི་མིག་དབང་སོགས་དང་ཕྱི་ཡི་ཡུལ། །གཞན་གྱི་ལུས་ལ་དམིགས་པའི་ཚོར་བ་གསུམ། །རིམ་བཞིན་ཡིན་ཏེ་གཞན་གསུམ་ལ་ཡང་མཚུངས། །ལུས་ནི་གནས་ངན་ལེན་གྱིས་རབ་ཕྱེ་ཞིང། །ཚོར་བ་ཀུན་འབྱུང་གཙོ་བོ་སྲེད་པའི་རྒྱུ། །བདག་མེད་ན་ཡང་སྐྲག་པར་མི་འགྱུར་ཏེ། །སེམས་ཉིད་འགོག་པ་ཐོབ་པའི་གཞིར་ཡོད་ཕྱིར། །ཆོས་ཚུལ་བླང་དོར་ཤེས་པའི་ལམ་བསྒོམ་སྟེ། །དེ་ལྟར་རིམ་བཞིན་བདེན་པ་བཞིར་འཇུག་ཅིང། །མི་རྟག་སྡུག་བསྔལ་ལ་སོགས་གཞིར་མང་འཇུག །དགོས་པ་བདག་གི་གནས་དང་ལོངས་སྤྱོད་དང། །དངོས་དང་ཀུན་བྱང་གཞིར་ལྟ་སྤོང་ཕྱིར་གསུངས། །སྒོམ་ཚུལ་ལུས་ལ་ལུས་རྗེས་ལྟ་སོགས་ཏེ། །རང་ལུས་འང་རྟོག་པའི་གཟུགས་བརྙན་ཀེང་རུས་ཀྱི། །རྗེས་སུ་ལྟ་བར་རྒྱལ་སྲས་མ་ལས་གསུངས། །སྒོམ་ཚུལ་གཞན་ཡང་ཐོག་མར་འཇུག་པའི་རྒྱུ། །འདུན་དང་
མ་སྐྱེས་སྐྱེད་བྱེད་བརྩོན་དང་རྩོལ། །སྐྱེས་པ་མི་ཉམས་བྱེད་རྒྱུ་རང་ལ་བརྟེན། །སྤྲོ་དང་གཞན་འཚེས་མི་སྐྱོ་མཐུན་པ་འོ། །ཁྱད་པར་བྱེད་རྒྱུ་ཡོན་ཏན་ཆུང་ངུས་ཀྱང། །རློམ་པས་ཆོག་འཛིན་ཕྱིར་ནུར་མེད་སོགས་བཞི། །རྩོལ་བ་འདི་ཡང་བྱིང་རྒོད་སྤོང་བྱེད་ཕྱིར། །རྫུ་འཕྲུལ་རྐང་པའི་སྒོམ་དང་ཁྱད་མེད་པས། །མཉམ་བསྒོམ་མཉམ་ཐོབ་ཡོད་དེ་རྒྱུ་མཚུངས་ཕྱིར། །དོན་སྤྱི་ཆགས་པའི་ལྟད་མོ་འདི་ཡིན་ནོ། །དེ་བཞིན་སྤོང་བ་སྒོམ་ཚེ་འབད་བརྩོན་གཉིས། །གསུངས་པའང་རིམ་བཞིན་བྱིང་རྒོད་གཉེན་པོར་སྦྱར། །འདི་ཡི་སྒོམ་ཚུལ་ཁྱད་པར་གསེར་ཕྲེང་གསལ། །དྲན་ཉེའི་སྒྲ་དོན་བྱེ་བྲག་སྨྲ་བ་རྣམས། །ཤིང་གཤག་ཁྱེའུ་འམ་འཛེར་པས་འཛིན་པ་ལྟར། །དྲན་པའི་སྟོབས་ཀྱིས་ཤེས་རབ་དམིགས་པ་ལ། །འཇོག་པར་འདོད་ཀྱང་སློབ་དཔོན་ཤེས་རབ་ཀྱིས། །རྣམ་པར་ཕྱེ་སྟེ་དྲན་པས་འཇོག་པར་གསུངས། །སྤོང་གཉེན་བླང་དོར་ལ་སྤྲོ་བརྩོན་འགྲུས་ཀྱི། །ཆ་ནས་བཞག་མཁྱེན་ཡང་དག་སྤོང་བ་སྟེ། །ཡང་དག་འཇོག་པ་ཞེས་ཀྱང་མཛོད་འགྲེལ་གསུངས། །ཁ་ཅིག་སྤང་གཉེན་བླང་དོར་ལ་བརྩོན་ཙམ། །དེ་དོན་སྨྲ་བ་མི་འཐད་ལམ་མིན་ཕྱིར། །ཁ་ཅིག་ཡང་དག་སྤོང་བར་ཉེར་ལེན་གྱི། །དྲན་ཉེ་སྔོན་སོང་དགོས་པར་འགྲེལ་གསུངས་ལོ། །ངོ་བོ་ཉིད་ཀྱི་དེ་གཉིས་རྒྱུན་གཅིག་ཏུ། །མི་རུང་བརྩོན་དང་ཤེས་རབ་རྫས་གཞན་ཕྱིར། །སྤྱི་ཙམ་ཡིན་ཡང་མཉམ་དུ་ཐོབ་རུང་བ། །གོང་དུ་སྒོམ་ཚུལ་བཤད་པས་ཤེས་ཕྱིར་རོ། །སྤོང་བཞི་གཉེན་པོ་སྟོབས་བཞིར་སྡུད་ཚུལ་ཡང། །སྡིག་སྐྱེས་སྤོང་བ་རྟེན་དང་སུན་འབྱིན་སྟོབས། །མ་སྐྱེས་མི་སྐྱེད་ཉེས་ལས་ལྡོག་པའི་སྟོབས། །སྐྱེད་དང་སྤེལ་བ་གཉེན་པོ་ཀུན་སྤྱོད་སྟོབས། །ཞེས་སུ་མཆིམས་གསུངས་ལམ་
རིམ་མཆན་བུ་ལས། །སྡིག་སྐྱེས་སྤོང་བ་ལྡོག་དང་སུན་འབྱིན་སྟོབས། །མ་སྐྱེས་མི་སྐྱེད་རྟེན་དང་གཉེན་པོའི་སྟོབས། །གསུངས་ཀྱང་སྔ་མ་ལེགས་པས་གཟུང་བར་བྱ། །བྱ་བ་སྒྲུབ་པའི་ཡུལ་དམིགས་ཏིང་ངེ་འཛིན། །དོན་གཉིས་སོགས་ཀྱི་འབྱོར་བའི་གནས་བྱེད་པའི། །ཆ་བཞག་མཁྱེན་པ་རྫུ་འཕྲུལ་རྐང་པའི་དོན། །རྫུ་འཕྲུལ་འབྱོར་པའོ་རྐང་པ་གནས་ཡིན་ཏེ། །དབུས་མཐར་དེར་གནས་ལས་སུ་རུང་བ་ཉིད། །དོན་རྣམས་ཐམས་ཅད་འབྱོར་པར་འགྱུར་ཞེས་གསུངས། །དེ་ནི་ར་དྷི་པཱ་དའི་དོན་ཡང་ཡིན། །ཁ་ཅིག་ཉེས་ལྔའི་གཉེན་པོ་འདུ་བྱེད་བརྒྱད། །ལྡན་པའི་ཏིང་འཛིན་འདི་ཡི་དོན་དུ་འདོད། །བྱིས་པར་ཡོད་ཅིང་རྒྱལ་ལ་མེད་ཕྱིར་འཁྲུལ། །ལམ་ཞུགས་སློབ་པ་གཅིག་ལའང་འདུ་བྱེད་བརྒྱད། །མི་ལྡན་ཞི་ཚེ་རྩོལ་བ་སྐྱོན་ཡིན་ཕྱིར། །གུས་སྦྱོར་འདུན་དང་རྟག་སྦྱོར་བརྩོན་འགྲུས་དང། །སེམས་ཀྱི་ས་བོན་གདམས་དོན་དཔྱོད་བཞི་ལས། །འདུན་བརྩོན་སེམས་དང་དཔྱོད་པའི་ཏིང་འཛིན་བཞི། །སྒྲུབ་པའི་འདི་བྱེད་བསྡུས་ན་ཐབས་བཞི་སྟེ། །དད་འདུན་རྩོལ་གསུམ་འབད་པར་བྱེད་པའི་ཐབས། །ཤིན་ཏུ་སྦྱངས་པ་ཕན་འདོགས་ཐབས་ཡིན་ཞིང། །དྲན་དང་ཤེས་བཞིན་གཏོད་པར་བྱེད་པའི་ཐབས། །ཤེས་བཞིན་འཕྲོ་བ་ཤེས་པར་དབྱིག་འགྲེལ་གསུངས། །ཏིང་འཛིན་ནོར་དང་བྱིང་རྒོད་རྐུན་པོ་གཉིས། །གང་ལ་དམིགས་ཀྱང་རུང་སྟེ་སྲུང་མ་བཞིན། །འདུ་བྱེད་དང་ནི་བཏང་སྙོམས་གཉེན་པོའི་ཐབས། །སྒྲུབ་པ་དྲུག་སྟེ་མཐོང་བ་སྤྱན་ལྔ་འོ། །གདམས་ངག་མངོན་ཤེས་དྲུག་གིས་འདོམས་པར་གསུངས། །གནས་པའམ་ཏིང་ངེ་འཛིན་གྱི་སྤྲུལ་པས་རྩེ། །
སེམས་དཔའི་སྨོན་ལམ་མཆོག་དང་དབང་བཅུ་དང། །རྒྱལ་བའི་མ་འདྲེས་ཆོས་རྣམས་སྒྲུབ་པར་བྱེད། །བདེན་བཞིར་ཡིད་ཆེས་སོགས་ཀྱིས་དབང་བྱེད་པའི། །དད་སོགས་གཙོར་གྱུར་རིགས་གནས་མཁྱེན་པ་དེ། །དབང་པོའི་དོན་ནོ་ཁ་ཅིག་འཕགས་པའི་ལམ། །སྐྱེད་ལ་རང་དབང་གྱུར་བའི་མཁྱེན་པར་འདོད། །ཉན་ཐོས་སྦྱོར་ལམ་པ་དེ་གཞན་རྐྱེན་གྱིས། །འགྲོ་བར་གསུངས་ཕྱིར་རང་དབང་ཅན་མིན་ནོ། །རྣམ་བྱང་དབང་པོ་དད་སོགས་ལྔར་མ་ངེས། །མཚུངས་ལྡན་རྣམ་བྱང་དབང་པོ་གསུངས་ཕྱིར་རོ། །བྱེ་སྨྲས་ལམ་མ་ཞུགས་ཀྱི་དད་བརྩོན་གཉིས། །དབང་པོར་འདོད་དོ་དགེ་བ་གཞན་གསུམ་ཡང། །སྒྲ་དོན་རྒྱན་བཟང་དབང་པོ་ལྔ་ཡི་སྟེང། །འཕགས་ཆོས་བསྣན་ཏེ་རིམ་རིམ་དབང་བྱེད་ཟེར། །རང་ལུགས་འཕགས་ལམ་འགྲུབ་ལ་དབང་བྱེད་པའོ། །མངོན་གྱུར་མི་མཐུན་ཕྱོགས་བཅོམ་རབ་ཕྱེ་བའི། །བཟོད་པ་ཡན་གྱི་དད་སོགས་མཁྱེན་པ་དེ། །སྟོབས་ཀྱི་དོན་ནོ་ཁ་ཅིག་དབང་པོ་ལྔ། །སྟོབས་སུ་འདོད་ཀྱང་དྲོད་རྩེའི་རྗེས་ཐོབ་ཏུ། །མི་མཐུན་ཕྱོགས་ཀྱི་མ་དད་འབྱུང་སྲིད་ཕྱིར། །སྟོབས་མིན་མི་མཐུན་ཕྱོགས་དང་འདྲེས་ཕྱིར་རོ། །ཁྱབ་སྟེ་སྟོབས་ནི་གཉེན་པོ་འབའ་ཞིག་ཕྱིར། །དེ་ལ་ཁ་ཅིག་མ་དད་ཉོན་མོངས་ཀྱི། །ས་ཕྱིར་འཕགས་པར་ཡོད་ཅིང་དཀོན་མཆོག་ལ། །དྲོད་དུའང་མ་དད་ལྟ་ཅི་ཐེ་ཚོམ་ཡང། །ཟད་པར་འོག་ནས་གསུངས་ཕྱིར་མི་འཐད་ཟེར། །གང་ལས་དྲོད་སོགས་འཇོག་པའི་བདག་མེད་དེར། །ཡིན་ཏེ་མི་མཐུན་ཕྱོགས་ཞེས་བཀོལ་ཕྱིར་དང། །རང་གི་ངོས་སྐལ་མ་དད་མ་བཅོམ་ན། །བཟོད་པའི་དབང་པོར་སྟོབས་ཀྱིས་མ་ཁྱབ་གསུངས། །དབང་སྟོབས་གཉིས་ཀས་མངོན་པར་རྟོགས་པ་ལ། །སྦྱོར་ཞིང་འབྲེལ་ཡང་རིང་སྦྱོར་ཉེར་འབྲེལ་ལོ། །དེ་ཉིད་མངོན་སུམ་རྟོགས་
པའི་དྲན་སོགས་ཀྱིས། །བསྡུས་པའི་མཐོང་ལམ་ཡན་གྱི་མངོན་རྟོགས་དེ། །ཟད་མི་སྐྱེ་ཤེས་བྱང་ཆུབ་ཡན་ལག་དོན། །ཡན་ལག་རྒྱུ་འོ་རྫོགས་བྱེད་ལ་ཡང་འཇུག །བདེན་བཞིའི་གནས་ལུགས་མཐར་ཐུག་མངོན་མཐོང་ཞེས། །ཁ་ཅིག་འདོད་ཀྱང་ཉན་ཐོས་ལམ་གྱིས་ཁེགས། །བསྡུ་བར་དེ་ལ་རྟོག་པའང་གསུངས་ཕྱིར་རོ། །འོ་ན་དེ་ཉིད་རྟོགས་པའང་མི་རིགས་ཏེ། །དེ་ཉིད་མཐོང་ལ་སྟོང་ཉིད་དགོས་ཕྱིར་ཏེ། །རྫས་ཡོད་བདག་མེད་དེ་ཉིད་མིན་ཕྱིར་ཟེར། །བདག་མེད་རྫུན་པ་ཡིན་ཕྱིར་ཐེག་དམན་གྱི། །འཕགས་རྣམས་བདེན་པ་མ་མཐོང་ཐལ་བར་འགྱུར། །མི་རྟོག་ཤེས་རབ་གཙོ་ཕྱིར་རང་བཞིན་དང། །དྲན་པས་མི་གཡེང་གནས་ཀྱི་ཡན་ལག་སྟེ། །བརྩོན་པས་སོ་སྐྱེ་ས་ལས་ངེས་པར་འབྱུང། །དགའ་བ་ལུས་སེམས་ཕན་འདོགས་ཡན་ལག་གོ །ཉོན་མོངས་མེད་པའི་ཡན་ལག་རྣམ་གསུམ་སྟེ། །ཉོན་མོངས་མེད་གཞིའི་ཡན་ལག་ཤིན་ཏུ་སྦྱངས། །ཉོན་མོངས་མེད་གནས་ཡན་ལག་ཏིང་ངེ་འཛིན། །ཉོན་མོངས་མེད་པའི་ངོ་བོ་བཏང་སྙོམས་སོ། །རྒྱུན་གྱི་རྒྱལ་བྱེད་དྲན་པ་འཁོར་ལོ་སྟེ། །ཤེས་རབ་མཚན་འཛིན་འཇོམས་པས་གླང་པོ་ཆེ། །མྱུར་དུ་རྟོགས་པར་བྱེད་པས་བརྩོན་འགྲུས་རྟ། །ཆོས་ཚུལ་སྣང་བས་རབ་དགའ་ནོར་བུའི་འོད། །འདི་གཉིས་གོ་རིམ་ཐལ་འཕྲེང་ཡི་གེ་ནོར། །ཤིན་སྦྱངས་ཟག་མེད་བདེ་སྟེར་བཙུན་མོ་སྟེ། །མཁོ་དགུའི་འབྱུང་གནས་ཏིང་འཛིན་ཁྱིམ་བདག་མཆོག །བཏང་སྙོམས་འདོར་ལེན་བྱེད་པས་བློན་པོ་འོ། །རང་འབྲས་འཕགས་ལམ་སྐྱེད་པའི་རིགས་གནས་ཀྱི། །མཁྱེན་པ་འཕགས་ལམ་ཡན་ལག་མཚན་ཉིད་དོ། །སྒྲ་དོན་འཕགས་པའི་ལམ་གྱི་གཞིར་གྱུར་པའོ། །ཁ་ཅིག་འཕགས་
ལམ་ཡན་ལག་སྒོམ་ལམ་དང། །སྦྱར་བ་མི་འཐད་མཐོང་ལ་ཡོད་ཕྱིར་ཟེར། །མ་ཁྱབ་དབྱིག་གཉེན་གྱིས་ཀྱང་སྦྱར་ཕྱིར་དང། །དེ་ཚེ་སོ་བདུན་ཐོབ་པར་རྒྱན་གསུངས་ཕྱིར། །འོན་ཀྱང་རྒྱུན་ཞུགས་ཞུགས་པས་མ་ཐོབ་སྟེ། །མི་ལྕོགས་མེད་ན་དགའ་བ་མེད་གསུངས་ཕྱིར། །མཐོང་དོན་རྗེས་སུ་དཔྱོད་པའི་ལྟ་བ་དང། །དེ་དོན་གཞན་ལ་སྟོན་བྱེད་རྟོག་པ་སྟེ། །ངག་ལུས་ཁྲིམས་དག་ངག་དང་ལས་ཀྱི་མཐའ། །ཡང་དག་འཚོ་བ་ལུས་ངག་གཉིས་གའི་སྟེ། །ཚུལ་འཆོས་ཁ་གསག་གཉིས་སོགས་སྤོང་ཕྱིར་རོ། །རྙེད་འདོད་ཡིད་གཅུགས་སྨྲ་བ་ཁ་གསག་སྟེ། །ནོར་བསྔགས་གཞོག་སློང་ངོ་སྦྱིན་བདག་དྲུང་ཕྱིན་ཏེ། །ཁྱོད་དྲུང་དགྲ་བཅོམ་བྱིན་པ་བསོད་ནམས་ཆེ། །ཞེས་བརྗོད་ཐོབ་ཀྱིས་འཇལ་བར་ཉི་སྣང་གསུངས། །བྱེ་སྨྲ་རྣམ་རིག་མ་ཡིན་གཟུགས་མེད་ན། །ཡན་ལག་བརྒྱད་པོ་མ་ཚང་འགྱུར་ཞེས་སྨྲ། །དེ་ཉིད་གཟུགས་སུ་མི་འདོད་སྡེ་དག་གིས། །སྒོམ་ཚེའང་ངག་དེས་དངོས་སུ་བརྗོད་དམ་ཅི། །ཞེས་རྩོད་ལན་དུ་བྱེ་སྨྲ་དེ་མིན་ཡང། །མཉམ་གཞག་དེ་ལས་ལངས་པའི་རྗེས་ཐོབ་ཏུ། །ལོག་པའི་ངག་ལ་མི་འཇུག་རྒྱུ་མཚན་ཅན། །དངོས་སུ་མཐོང་ཕྱིར་དེ་ཡི་རྒྱུ་མཚན་གྱིས། །རིག་མིན་སྡོམ་པ་ཐོབ་པར་བཞག་གོ་ཟེར། །འོ་ན་སེམས་པའི་ཁྱད་པར་ཐོབ་པས་ཀྱང། །རུང་སྟེ་དངོས་སུ་བརྗོད་པ་མི་དགོས་ཤིང། །དེ་ཡང་རྒྱུ་མཚན་ཡིན་ཕྱིར་མགོ་མཚུངས་སོ། །སྒོམ་སྤང་རིམ་པ་དུ་མ་སྤོང་དགོས་ཀྱང། །མི་སྐྱོ་གཉེན་པོ་སྒོམ་ལ་ཡང་དག་རྩོལ། །རྒྱུ་མཚན་རྣམ་གསུམ་མི་བརྗེད་དྲན་པ་སྟེ། །ཞི་གནས་རྒྱུ་མཚན་རྒོད་ཚེ་མི་སྡུག་པ། །བསྒོམས་པའོ་རབ་ཏུ་འཛིན་པའི་རྒྱུ་མཚན་ནི། །བྱིང་ཚེ་སྡུག་པའི་མཚན་མ་ཡིད་ལ་བྱེད། །བཏང་སྙོམས་རྒྱུ་མཚན་ལྷུན་གྲུབ་འཇུག་པའི་ཚེ། །རྒྱུན་བསྲིང་བ་ལ་
དབུས་མཐའི་འགྲེལ་བཤད་གསུངས། །མངོན་ཤེས་སོགས་སྒྲུབ་ཡང་དག་ཏིང་འཛིན་ནོ། །དེ་བརྒྱད་བསྡུ་ན་བཞི་སྟེ་ལྟ་བ་ནི། །མཉམ་གཞག་མཐོང་དོན་ཡོངས་གཅོད་ཡན་ལག་དང། །རྟོག་པ་དེ་དོན་གོ་བྱེད་ཡན་ལག་སྟེ། །ལས་གསུམ་ལྟ་ཁྲིམས་ཡོ་བྱད་བསྙུངས་པ་ལ། །གཞན་ཡིད་ཆེས་པར་བྱེད་པའི་ཡན་ལག་གོ །གཉེན་པོའི་ཡན་ལག་རྩོལ་དྲན་ཏིང་འཛིན་ཏེ། །སྒོམ་སྤོང་དང་ནི་བྱིང་རྒོད་རྣམ་གཉིས་དང། །ཁྱད་འཕགས་ཡོན་ཏན་གེགས་རྣམས་འཇོམས་ཕྱིར་རོ། །ངག་སོགས་གཟུགས་སུ་འདོད་རྣམས་ལུས་ངག་ལས། །རྫས་གཞན་ཕྱིར་ན་བཅུ་གཅིག་རྫས་སུ་འགྱུར། །སེམས་དཔར་ཡོད་པ་དང་མཐུན་གཉེན་པོའི་ལམ། །སྤྲུལ་པའི་ལམ་དང་མཐོང་ཆོས་བདེར་གནས་ལམ། །འདས་ལམ་སྤོང་ལམ་སངས་རྒྱས་ལམ་དྲུག་ལས། །རྣམ་ཐར་སྒོ་གསུམ་མདོ་ལས་བསྟན་ཚུལ་ནི། །ལྟ་བའི་བྱས་པའི་རྣམ་པ་དམིགས་མེད་ཅེས། །སྟོང་པའི་རྣམ་པ་སྟོང་དང་བདག་མེད་གཉིས། །མཚན་མེད་སྟོན་པར་རྣམ་རྟོག་དམིགས་མེད་ཅེས། །མཚན་འཛིན་ཞི་དང་ཞི་བྱེད་འགོག་ལམ་བསྟན། །རྒྱུ་མཚན་ཅན་ཞེས་བསྒྱུར་དགོས་གསེར་ཕྲེང་གསལ། །སྨོན་ལམ་དམིགས་སུ་མེད་ཅེས་སྨོན་མེད་དེ། །སྲིད་སྨོན་སེལ་ཕྱིར་སྡུག་ཀུན་རྣམ་པ་དྲུག །འདི་ལ་འཆད་ཚུལ་གཞན་ཡང་དུ་མ་སྟེ། །བསྡུ་བར་སྟོང་མཚན་སྨོན་མེད་སྒྲས་བསྟན་དེར། །ཐོས་བསམ་སྒོམ་གསུམ་མོ་སྟོང་ཉིད་ལ་སོགས་ཀྱི། །ཏིང་འཛིན་སྒྲས་བསྟན་སྐྱེ་འཕགས་སྒོམ་བྱུང་གཉིས། །རྣམ་ཐར་སྒྲས་བསྟན་འདས་ལམ་སྒོམ་བྱུང་ཉིད། །སྔ་སྔ་སྤྱི་དང་ཕྱི་མ་བྱེ་བྲག་ཕྱིར། །མཆིམས་མཛོད་དང་པོར་སྒོམ་དང་གཉིས་པ་ལ། །སྒོམ་བྱུང་འདས་ལམ་མ་བཞག་
འཐད་པར་དཀའ། །བྱེ་སྨྲ་ལམ་ཡང་སུན་འབྱིན་ལམ་གསུམ་གྱིས། །གཅོད་ཕྱིར་སྨོན་མེད་ལ་བསྣན་གཞན་རྣམས་མཚུངས། །རྒྱན་ལས་སྟོང་པར་བདག་མེད་རྣམ་གཉིས་དང། །སྨོན་མེད་དམིགས་པ་སྡུག་བསྔལ་ཕུང་པོ་སོགས། །དེ་དག་ཉེ་བར་ཞི་བ་མཚན་མེད་ཕྱིར། །བཅུ་དྲུག་སོགས་ལ་དངོས་སུ་མ་སྦྱར་ཞིང། །ཐུན་མོང་ཐུན་མོང་མ་ཡིན་གཉིས་ཀ་ཡང། །བསྡུས་ཕྱིར་སྟོང་པ་རྫས་ཡོད་བཀག་ཙམ་མིན། །བཀར་བཏགས་ཕྱག་རྒྱ་གཉིས་ཀྱིས་སྨོན་མེད་དང། །གསུམ་པས་སྟོང་པ་བཞི་བས་མཚན་མེད་འགྲུབ། །རྣམ་ཐར་བརྒྱད་ལས་སྤྲུལ་པའི་ལམ་གསུམ་སྟེ། །རྟེན་གྱི་གང་ཟག་ཐེག་ཆེན་ཚོགས་ལམ་ཆེ། །ཐེག་དམན་ལུས་མངོན་བྱེད་དང་རྒྱན་བཅས་སོ། །ཁ་ཅིག་མཛོད་ལྟར་མི་ཉིད་ཁོ་ན་ཟེར། །བྱང་སེམས་གཟུགས་དང་འདོད་ལྷར་སྐྱེས་པའང་ཡོད། །སེམས་རྟེན་མཛོད་ལས་རྣམ་ཐར་གསུམ་པ་ནི། །བཞི་པར་བརྟེན་ཡང་རྣམ་ཐར་དང་པོ་གཉིས། །བསམ་བཏན་དང་པོ་གཉིས་པོ་ཅི་རིགས་ཏེ། །འདོད་དང་དང་པོའི་སས་བསྡུས་ཁ་དོག་ལ། །ཆགས་བྲལ་གཉེན་པོར་མི་སྡུག་བསྒོམ་པར་འདོད། །གོང་དེར་ཆགས་དང་བྲལ་ཕྱིར་མིག་ཤེས་འང་མེད། །གྲུབ་མཐའ་གོང་མས་རྣམ་ཐར་གསུམ་ག་ཡང། །རབ་མཐའི་བསམ་གཏན་བཞི་པར་བརྟེན་པར་གསུངས། །ཉི་སྣང་གཟུགས་མེད་གསུངས་པ་དེ་ཐོབ་ན། །གཟུགས་ཀྱི་འདུ་ཤེས་གཞིག་པ་སླ་བར་དགོངས། །ཡིག་ཆར་བསམ་གཟུགས་གང་རུང་གསུངས་པའང་དེ། །གཞན་དུ་བསམ་གཏན་གཟུགས་མེད་པར་འགལ་བྱེད། །འདོད་ནས་སྲིད་རྩེའི་བར་དུ་སོང་འོང་གཉིས། །སླར་ཡང་འདོད་ནས་བཞི་པའི་བར་སོང་སྟེ། །མཐུན་པར་བྱ་བ་རབ་ཀྱི་དོན་ཡིན་ཞིང། །མཐའ་ནི་བསམ་གཏན་བཞི་པར་བྱེ་སྨྲ་འདོད། །གོང་མས་དེ་དོན་རབ་ཀྱིས་
མཐར་ཕྱིན་ཅེས། །བསྡོམས་ཏེ་དེར་གྱུར་བསམ་གཏན་བཞི་ག་འདོད། །གཟུགས་ཀྱི་འདུ་ཤེས་བཞག་དང་གཞིག་པ་ནི། །འབྲས་དུས་གཞན་དོན་སྒྲུབ་ཚུལ་སྣ་ཚོགས་ཕྱིར། །སྡུག་དང་མི་སྡུག་སྤྲུལ་འདོད་མི་འདོད་ཀྱི། །གཉེན་པོར་རོ་མཉམ་སྡུག་པའི་རྣམ་ཐར་ཏེ། །དགའ་དང་མི་དགའ་གསུངས་ཀྱང་བསམ་གཏན་བཞི། །ཐོབ་སྟེ་དགའ་བ་སྤངས་ཕྱིར་འདོད་ལ་དགོངས། །དམིགས་ཡུལ་ཆེ་ཆུང་བཟང་ངན་སྣ་ཚོགས་སོ། །སྒྲ་དོན་འབྱུང་ཆ་སྙོམས་ཕྱིར་སྙོམས་འཇུག་དང། །རང་སའི་ཀུན་དཀྲིས་མ་འདྲེས་རྣམ་ཐར་རོ། །རྣམ་ཐར་སྔ་མ་ཕྱི་མའི་སྔོན་འགྲོ་བར། །གསུངས་ཕྱིར་དང་པོ་གསར་ཐོབ་ལུས་མངོན་བྱེད། །བཞག་པར་དཀའ་ཕྱིར་རྟེན་གྱི་ས་མཚམས་དཔྱད། །འདས་ལམ་བསམ་གཏན་གཟུགས་མེད་འགོག་སྙོམས་དགུ། །རིམ་གྱིས་ཐོབ་ཕྱིར་མཐར་གྱི་སྙོམས་འཇུག་གོ །འགོག་སྙོམས་རྟེན་ལ་ཁ་ཅིག་མིར་ངེས་ཟེར། །ལ་ལ་གཟུགས་མེད་རྟེན་ལ་གསར་སྐྱེ་འདོད། །ཕྱི་ནས་གཟུགས་སུའང་བསྒོམ་ལ་གསར་ཐོབ་མིར། །མཛོད་ལས་གསུངས་ཕྱིར་གཉིས་ཀ་རིམ་བཞིན་ཁེགས། །གསེར་ཕྲེང་ལ་བརྟེན་རྒྱལ་ལ་མེད་ཅེས་ཟེར། །མི་འཐད་ཆོས་སྐུར་སྙོམས་འཇུག་དགུ་གསུངས་ཤིང། །མྱང་འདས་ལ་སོགས་མདོ་སྡེ་དུ་མར་གསུངས། །སེམས་རྟེན་རྩོམ་པ་དང་པོར་སྲིད་རྩེ་དང། །ཕྱི་ནས་ས་དགུར་བརྟེན་པ་ཡུམ་ལས་གསུངས། །ཡིད་ལ་བྱེད་པ་ཏིང་འཛིན་རྩལ་སྦྱོང་ཕྱིར། །དགག་བྱ་ཚོར་འདུ་རགས་པ་འགོག་པ་སྟེ། །ངོ་བོ་ཟླ་གྲགས་ས་བཅུའི་མདོར་བརྟེན་ནས། །གཙོ་བོ་ཆོས་ཉིད་སྟེང་དུ་ཚོར་འདུ་སོགས། །བཀག་པའི་ཟག་མེད་ཡེ་ཤེས་ལ་འདོད་ཅིང། །འཕགས་སེང་ཚོར་འདུ་རགས་
པ་བཀག་ཆ་དང། །དེ་ལ་མཉམ་གཞག་ཡུལ་ཅན་གཉིས་ཆར་བཞེད། །མདོ་སེམས་ཚོར་འདུ་རགས་པ་བཀག་ཙམ་གྱི། །ལྡན་མིན་ལ་འདོད་འདི་ལ་ཁ་ཅིག་གིས། །རྒྱལ་ཚབ་དེ་ལ་འདས་ལམ་མི་བཞེད་དེ། །འདས་ལམ་སྟོབས་ཀྱིས་ཐོབ་པའི་འདས་ལམ་དུ། །བཞག་ཅེས་རྣམ་བཤད་ལས་ནི་གསུངས་ཕྱིར་ཟེར། །དེ་མཐུས་ཐོབ་པ་ཙམ་ལ་དགོངས་ཕྱིར་ཏེ། །རྣམ་ཐར་སྐབས་སུ་དེ་ལ་ཚོར་བ་དང། །འདུ་ཤེས་རགས་པ་ཞི་བར་གནས་པའི་ལམ། །གསུངས་ཕྱིར་ཁྱབ་སྟེ་རགས་པ་སྨོས་དོན་ཕྱིར། །དེ་དང་འགོག་སྙོམས་མི་འདྲའང་མ་ཡིན་ཏེ། །འཕགས་པས་འགོག་སྙོམས་ཟུར་དུ་མ་གསུངས་པ། །རྣམ་ཐར་སྐབས་དང་གཅིག་པའི་རྒྱུ་མཚན་ཕྱིར། །གཞན་ཡང་དེ་ལ་འདས་ལམ་ཡོད་མིན་ན། །ཡེ་ཤེས་སྡེ་ཚན་ཉེར་གཅིག་མེད་པར་འགྱུར། །དེ་བཞིན་ཟླ་བས་ཆོས་ཉིད་མཉམ་གཞག་བློ། །འཕགས་སེང་ཚོར་འདུ་རགས་བཀག་ལྡན་མིན་ལ། །བཞེད་ཅེས་རྣམ་བཤད་ཚིག་ཟིན་ལ་གསུངས་ཀྱང། །དེ་བསྐྱེད་ངོ་བོར་བསྐྱེད་པ་ལ་དགོངས་སོ། །སྔ་མ་རྗེས་ཐོབ་པ་ལ་ཡོད་མེད་དཔྱད། །གཞན་ཡང་འཕགས་ལམ་མིན་ན་ཞིར་གནས་ལམ། །གསུངས་པར་འགལ་ཏེ་ཞི་དང་རྣམ་ཐར་སྒྲས། །བསྟན་པ་འདས་ལམ་ཉིད་དུ་བསྡུས་པས་འགྲུབ། །མཛོད་ལས་ཕྲ་བ་ཕྲ་བའི་མཇུག་ཐོགས་སུ། །གསུངས་ཕྱིར་ཕྲ་མོ་ཡོད་དེ་གཞན་དུ་ན། །སེམས་ལྡན་གྲངས་སུ་མི་འགྲོ་དེའི་ལུས་ཀྱང། །རུལ་བར་འགྱུར་ཞིང་ལུང་ཡང་མཆོད་སྦྱིན་མས། །ཞུས་པར་དགེ་སློང་འགོག་ལ་སྙོམས་འཇུག་དེའི། །རྣམ་ཤེས་ལུས་དང་མ་བྲལ་གསུངས་པར་འགལ། །རང་གི་གྲུབ་མཐའི་གང་ཟག་ངོས་འཛིན་མདོ། །གྲུབ་མཐའ་བཞི་ག་མཐུན་གྲུབ་དེ་ལས་ཀྱང། །ཇི་ལྟར་ཡན་ལག་ཚོགས་རྣམས་ཞེས་སོགས་ཀྱིས། །
ཕུང་པོ་བཞི་ཚོགས་དགོས་གསུངས་དེར་ཡང་འགལ། །དེ་ཕྱིར་དེ་ཚེ་སེམས་ཡོད་འདོད་པ་ནི། །ས་ཡི་སྙིང་པོ་འཁོར་ལོ་བཅུ་པ་སོགས། །ཐེག་པ་ཆེ་ཆུང་མདོ་སྡེ་དུ་མར་གསུངས། །སྤྱོད་འཇུག་འགགས་པ་སླར་ཡང་སྐྱེ་འགྱུར་ཏེ། །འདུ་ཤེས་མེད་པའི་སྙོམས་འཇུག་བཞིན་ཞེས་དང། །ཉན་སར་ཚིག་རིས་དེ་མཚུངས་གསུངས་མོད་ཀྱང། །དགོངས་པ་ཚོར་འདུ་རགས་པ་བཀག་པར་མངོན། །དོན་གསང་ལས་གསུངས་འདོད་ཚུལ་གསུམ་ཡོད་དེ། །ཁ་ཅིག་ཚོར་འདུ་བཀག་ཙམ་བརྟག་འགོག་ཟེར། །ཐལ་འགྱུར་བ་ཡི་འགོག་སྙོམས་ཡུལ་དང་མཚུངས། །ལ་ལས་དེ་བཀག་ཆ་ཡི་ལྡན་མིན་ཟེར། །གཞན་དག་དེ་བསྒོམ་སེམས་ཀྱི་བག་ཆགས་ཏེ། །ལངས་པའི་ཚེ་ཡང་དེ་དང་ལྡན་ཕྱིར་ཟེར། །དང་པོ་མི་འཐད་མ་མཐའང་ཀུན་བཏུས་ལྟར། །འདུ་བྱེད་ཕུང་པོར་འཐད་ཀྱི་རྟག་པར་མིན། །རང་ལུགས་འཐད་ལྡན་གཉིས་པ་ཡང་མིན་ཏེ། །རྣམ་པར་ཐར་པ་ཡིན་ཕྱིར་ཤེས་པ་ཉིད། །གསེར་འཕྲེང་དེ་ཚེ་དབྱིག་བཤེས་སེམས་འདོད་པ། །ཐེག་བསྡུས་སོགས་ལས་བཀག་ཅིང་སྐུ་མཆེད་ཀྱི། །གཞུང་ལས་གཞན་དུ་མཁས་པས་མ་བཀྲལ་ཕྱིར། །ཐེག་ཆེན་སྤྱི་ཡི་སེམས་མེད་འདོད་ཕྱིར་ཏེ། །རྟག་ཏུ་ཡིད་ཤེས་འབྱུང་ཞེས་སྤྱིར་བསྟན་ནས། །སེམས་མེད་གཉིད་དང་བརྒྱལ་རྣམས་བསལ་ཕྱིར་དང། །འཇུག་ཤེས་ཡོད་ན་ཀུན་གཞི་མེད་ཀྱང་དེ། །ཤི་བར་ཐལ་བའི་སྐྱོན་བརྗོད་འབྲེལ་མེད་དོ། །དེ་ཕྱིར་སེམས་མེད་ཡིན་ཀྱང་སྙོམས་འཇུག་ཏུ། །གསུངས་པ་རྒྱུ་མིང་འབྲས་ལ་བཏགས་པ་འམ། །འདི་ཡིས་འབྱུང་བ་སྙོམས་པ་ལ་དགོངས་ཤིང། །རྒྱལ་བའི་ཡེ་ཤེས་ཆོས་སྐུར་བཤད་པ་ཡང། །མངོན་དུ་བྱེད་པར་ནུས་པ་ལ་དགོངས་ཞེས། །རྒྱས་པར་གསུངས་པའི་དགོངས་པ་བཙལ་བར་བྱ། །མདོ་
ལས་དྲུག་པར་འགོག་པ་ཐོབ་གསུངས་པ། །ལུགས་འདིར་དུས་ལ་སྦྱོར་གྱི་འཛིན་སྟངས་མིན། །ཉི་མའི་སྙིང་པོར་ཞག་བདུན་ལས་ལྷག་འདིར། །ཞུགས་ན་སེམས་དཔའི་སྤྱོད་ལས་ཉམས་གསུངས་པ། །ཐེག་དམན་ལྟ་བུ་ཞི་བདེར་ཞེན་པ་ཡིས། །ཞུགས་ལ་དགོངས་ཏེ་པད་དཀར་སོགས་ཀྱིས་ཤེས། །སྤོང་བའི་ལམ་ལ་བར་ཆད་མེད་ལམ་བཞི། །ཆོས་ཤེས་རྒྱུན་མཐར་སྦྱར་ཡང་ཐུབ་དགོངས་ལས། །མཐོང་ལམ་ལ་གསུངས་འཕགས་སེང་དགོངས་པར་མཐུན། །སངས་རྒྱས་ལམ་ལ་སྦྱིན་སོགས་ཕར་ཕྱིན་བཅུ། །གང་དུ་གཏོགས་པའི་སྡེ་ཚན་མཚན་ཉིད་པ། །འོག་མར་མེད་པའི་རིགས་གནས་མཁྱེན་པ་དེ། །ཐུན་མོང་མ་ཡིན་རྣམ་མཁྱེན་རྣམ་པའི་དོན། །དབྱེ་ན་མི་མཐུན་ཕྱོགས་ཀུན་ལས་རྒྱལ་ཞིང། །དེ་ཡིས་བརྫི་བར་མི་ནུས་རིགས་གནས་སྟོབས། །གནས་དང་གནས་མིན་མཁྱེན་པ་ལ་སོགས་བཅུ། །འཁོར་དབུས་སྤངས་རྟོགས་ཆོས་སྟོན་འཇིགས་མེད་པའི། །ཆ་བཞག་མཐར་ཐུག་མཁྱེན་པ་མི་འཇིགས་པའོ། །ཆ་བཞག་མེད་ན་མཐར་ཐུག་གཞི་ཤེས་ཀྱང། །དེར་འགྱུར་དགོས་ལ་ཐེག་དམན་རྟོགས་རིགས་ཕྱིར། །ཐུན་མོང་མ་ཡིན་རྣམ་པར་འགལ་ཕྱིར་རོ། །འོན་ཀྱང་སངས་རྒྱས་ཁོ་ནའི་རྟོགས་རིགས་སུ། །མི་འཐད་དེ་བཞིན་ཉིད་རྣམ་སེམས་དཔའི་ཡིན། །རིགས་འདྲ་སྔ་མ་འཕགས་པ་འོག་མར་མེད། །སྨྲ་བའང་མི་རུང་ཉེར་ལེན་ལས་སྐྱེས་ཕྱིར། །རང་དོན་སྤངས་རྟོགས་གཉིས་དང་གཞན་གྱི་དོན། །བར་གཅོད་ཆོས་དང་ངེས་འབྱུང་ལམ་སྟེ་བཞི། །དམ་བཅས་པ་ལ་རྒོལ་མེད་མི་འཇིགས་བཞི། །འཆད་བྱ་འཆད་བྱེད་སྤོབས་པ་སོ་སོར་ནི། །ཆགས་ཐོགས་མེད་པར་སོ་སོར་གཟིགས་པ་ཡི། །རིགས་གནས་མཁྱེན་པ་སོ་སོར་ཡང་དག་རིག །རང་གི་སྡེ་ཚན་འཕགས་པ་
འོག་མ་དང། །ཅུང་ཟད་ཙམ་ཡང་མ་འདྲེས་རིགས་གནས་ཀྱི། །མཐར་ཐུག་མཁྱེན་པ་སངས་རྒྱས་མ་འདྲེས་ཆོས། །དབྱེ་ན་རྟོགས་པ་སྤྱོད་པ་འཕྲིན་ལས་དང། །ཡེ་ཤེས་མ་འདྲེས་དྲུག་དྲུག་གསུམ་གསུམ་མོ། །སྟོབས་བཅུ་མི་འཇིགས་བཞི་དང་དྲན་ཉེ་གསུམ། །ཐུགས་རྗེ་ཆེ་དང་བཅོ་བརྒྱད་བྱེ་སྨྲའི་ལུགས། །ཡེ་ཤེས་ལས་འཕྲོས་དུས་གསུམ་རྣམ་གཞག་ལ། །ཆོས་སྐྱོབ་དངོས་འགྱུར་གསེར་བུམ་བཅོམ་བཞིན་ཟེར། །དབྱངས་སྒྲོགས་མཚན་ཉིད་ཤས་ཆེ་ཆགས་བཞིན་ཟེར། །དབྱིག་བཤེས་གནས་སྐབས་རྩིས་ཀྱི་རྡེའུ་བཞིན་འགྱུར། །མ་བུ་གཞན་གཞན་འགྱུར་འདོད་སངས་རྒྱས་ལྷ། །དང་པོ་མི་འཐད་གྲངས་ཅན་ལུགས་ཕྱིར་རོ། །གཉིས་པ་མི་འཐད་མཚན་ཉིད་འཆོལ་ཕྱིར་རོ། །བཞི་པ་མི་འཐད་གསུམ་གར་ཐལ་ཕྱིར་རོ། །གསུམ་པ་ཅུང་བཟང་འོན་ཀྱང་བྱ་བ་སོགས། །བྱེད་དང་མི་བྱེད་གནས་སྐབས་མེད་པར་འགྱུར། །ཁ་ཅིག་དུས་གསུམ་དངོས་པོར་འདོད་བཞིན་དུ་། །སྐྱེས་ལ་འགགས་དང་སྐྱེས་ལ་མ་འགག་པ། །སྐྱེ་རྒྱུ་ཡོད་ཀྱང་མ་སྐྱེས་དུས་གསུམ་ཟེར། །དེ་དག་དངོས་པོ་རང་ལ་མ་བརྩིས་པར། །སྨྲ་མཁན་དེ་ལ་ལྟོས་ཏེ་བཞག་པའི་ཕྱིར། །འགགས་ཟིན་ང་ལས་ནུ་དང་མ་སྐྱེས་པའི། །འཁོར་སྒྱུར་དུང་སོགས་ཡོད་མིན་མེད་མིན་འགྱུར། །རང་ལུགས་དངོས་པོ་གཞན་ཞིག་འགག་ཆ་དང། །དངོས་གཞན་སྐྱེ་རྒྱུ་ཡོད་ཀྱང་མ་སྐྱེས་ཆ། །འདས་དང་མ་འོང་ངོ་གཉིས་ཀ་མེད་དགག་ཉིད། །ཁ་ཅིག་སྐྱེ་གནས་འཇིག་གསུམ་མཉམ་གྲུབ་ཟེར། །སྐྱེ་བ་རྒྱུ་དུས་ཡིན་ལ་གཞན་གཉིས་ནི། །དེ་ཡི་ཁྱད་ཆོས་ཡིན་ཡང་ཚིག་ལ་གཟབ། །སྐད་ཅིག་གསུངས་པའང་རྫོགས་པར་གྲུབ་ཟིན་ནས། །སྐད་ཅིག་ལས་ལྷག་
མི་སྡོད་དོན་ཡིན་ཏེ། །རབ་བྱུང་ལོ་ནི་མགོ་ཟླའི་ཚེས་གཅིག་དང། །མཉམ་གྲུབ་བཅུ་གཉིས་ཟླ་བར་སྡོད་ཕྱིར་རོ། །ཁ་ཅིག་འདས་པའི་མི་ཡོད་དྲན་ཕྱིར་ན། །མ་ཁྱབ་དྲན་མཁན་དེ་ལ་ལྟོས་ཕྱིར་རོ། །བུམ་པ་ཞིག་པ་བུམ་པའི་འདས་པ་སྟེ། །འོན་ཀྱང་བུམ་པའི་དུས་སུ་མ་འོང་ངོ་། །སྐབས་དོན་འདས་དང་མ་འོངས་ད་ལྟར་ཡང། །གཟིགས་ཚུལ་ད་ལྟར་བྱུང་བར་གཟིགས་མིན་ཡང། །ད་ལྟའི་དུས་སུ་སྔ་ཕྱིའི་བྱུང་ཚུལ་ཀུན། །མངོན་སུམ་གཟིགས་ཕྱིར་ཡེ་ཤེས་མ་འདྲེས་པའོ། །དེ་བཞིན་ཉིད་དང་རང་བྱུང་སངས་རྒྱས་ཀྱི། །རྣམ་པ་གསུམ་ལ་ཤེས་རྣམ་སྦྱོར་དགོས་ཏེ། །རྣམ་མཁྱེན་བདེན་སྟོང་དང་ནི་རང་རྒྱལ་དང། །སངས་འཕགས་མིག་ཤེས་གསུམ་གྱིས་མ་ངེས་ཕྱིར། །དེ་གསུམ་དོན་ནི་རིམ་བཞིན་ཡང་དག་མཐར། །མི་ལྡང་ཚུལ་གྱིས་མཉམ་གཞག་ཡེ་ཤེས་དང། །སློབ་དཔོན་གཞན་ལ་མ་ལྟོས་རང་བྱུང་གི །ཆོས་རྣམས་ཀུན་ལ་མངའ་བསྒྱུར་ཡེ་ཤེས་དང། །ཆོས་ཀུན་རྣམ་པ་མ་ལུས་མངོན་སུམ་དུ། །རྟོགས་པའི་རིགས་གནས་མཐར་ཐུག་མཁྱེན་པ་འོ། །རྣམ་གྲངས་ཟག་བཅས་ཟག་མེད་སྒྲས་བརྗོད་ཙམ། །ཡིན་གྱི་ཟག་བཅས་དངོས་མིན་སྔར་བཤད་དོ། །བདག་འཛིན་དངོས་སུ་འཇོམས་པའི་སྦྱོར་བའི་རྟེན། །ཁ་ཅིག་བྱང་སེམས་ཐམས་ཅད་ཤེར་ཕྱིན་གྱི། །སྣོད་རུང་ཟེར་ཞིང་ལ་ལ་ཕྱི་ནང་གི །བཤེས་གཉེན་གཉིས་ལྡན་བྱང་སེམས་ཐམས་ཅད་ཟེར། །བྱེ་སྨྲར་གྱུར་པའི་བྱང་སེམས་དང་པོའི་སྐྱོན། །འདི་ནི་དམན་སྒྲིབ་ལ་གནས་གསུངས་པ་དཔྱད། །ཉན་སྣོད་སེམས་ཙམ་བྱང་སེམས་གཉིས་པའི་སྐྱོན། །འདིར་བསྟན་སྦྱོར་བ་བསྒོམ་པའི་ཉན་ཐོས་ཀྱང། ཡོད་ཕྱིར་དེ་ནི་སེམས་དཔར་མ་ངེས་སོ། །རང་ལུགས་རྒྱལ་བསྟེན་དེ་ལས་དགེ་རྩ་བསྐྲུན། །ཐེག་ཆེན་
བཤེས་ཀྱིས་ཟིན་པ་གསུམ་ཚང་བའི། །འདིར་བསྟན་གདུལ་བྱ་འདིར་བསྟན་ཉན་པའི་སྣོད། །ཐོས་བསམ་སྒོམ་གསུམ་ལམ་གྱི་སྔོན་འགྲོ་ཕྱིར། །ལམ་ཞུགས་ལམ་མ་ཞུགས་དང་རིགས་ཅན་གསུམ། །ཉན་སྣོད་ཉན་ཐོས་དེ་ཡང་སྣོད་རུང་མིན། །ཚིགས་བཅད་གཉིས་པས་བསྟན་པ་རྣམ་བཞི་སྟེ། །སངས་རྒྱས་བསྙེན་བཀུར་དེ་ལ་ཐེ་ཚོམ་དྲི། །སྦྱིན་སོགས་སྤྱོད་དང་བཤེས་ཀྱིས་བྱིན་བརླབ་བཞིས། །རིམ་བཞིན་ཉན་དང་ཚིག་འཛིན་དོན་མི་བརྗེད། །ཚུལ་བཞིན་ཡིད་བྱེད་སྣོད་དེ་གཙོར་བྱས་ཀྱང། །དང་པོ་ཀུན་ལ་དགོས་ཕྱིར་སྤྱིར་ཞེས་གསུངས། །ཐ་མ་ཀུན་ལ་དགོས་པ་གཞུང་ཀུན་མཐུན། །ཉན་འཛིན་ཐོས་པའོ་བསམ་སྒོམ་ཐ་མ་གཉིས། །༈ དེ་ནས་བསྒོམ་བྱ་སྦྱོར་བའི་ངོ་བོ་ནི། །གཞི་ལམ་རྣམ་གསུམ་བདེན་སྟོང་སྤྲོས་བྲལ་དུ། །བསྒོམ་པའི་རིགས་གནས་སེམས་དཔའི་རྣལ་འབྱོར་རོ། །ཁ་ཅིག་དེ་འདྲའི་ཞི་ལྷག་ཟུང་འབྲེལ་ཟེར། །མི་འཐད་ཚོགས་ལམ་ལ་ཡང་ཡོད་ཕྱིར་རོ། །འདིས་ནི་མངོན་སུམ་མཐོང་བར་འདོད་པའང་ཁེགས། །དབྱེ་ན་གཟུགས་སོགས་ཡུལ་ལ་གནས་བཀག་དང། །སྦྱོར་བ་དེར་ཡང་མ་ཞེན་རྣལ་འབྱོར་བཀག །ཟབ་དཀའ་ཚད་མེད་གསུམ་སྟེ་ངོ་བོས་ལྔ། །ཚོགས་ལམ་ནས་བཟུང་རྒྱུན་མཐའི་བར་དུ་འཇུག །དེ་ཕྱིར་ཁ་ཅིག་དེ་ལྔའི་གནས་སྐབས་ལ། །ལྷག་མ་བཅུ་བཞི་བཞག་ཅིང་ཐ་མ་ནི། །སྦྱོར་བ་དེ་དག་འགྲུབ་པའི་རྒྱུ་འོ་ཟེར། །ཚེགས་ཆེན་ཡུན་རིང་རྟོགས་པའང་དང་པོ་ལྔའི། །གནས་སྐབས་ཡིན་པ་མི་རུང་སྟོང་ཉིད་ལ། །སྐྲག་པས་སྤངས་ཏེ་ངན་འགྲོར་འགྲོ་གསུངས་ཕྱིར། །མཐའ་གསུམ་རིམ་བཞིན་གཞི་ལམ་རྣམ་གསུམ་གྱི། །ཆོས་ཉིད་ཟབ་
དཀའ་ཚད་མེད་རྟོགས་པ་སྟེ། །གསེར་ཕྲེང་གཞི་ཤེས་ཐ་མལ་ལས་ལྷག་ཟབ། །ལམ་ཤེས་ཉན་རང་ཐུན་མོང་མ་ཡིན་དཀའ། །རྣམ་མཁྱེན་ཁྱད་པར་འགྲོར་མེད་གསུམ་རྟོགས་གསུངས། །ཤཱནྟིས་གསུམ་ལ་གནས་དང་རྣལ་འབྱོར་བཀག །གཉིས་གཉིས་དབྱེ་བས་སྦྱོར་བ་ཉེར་གསུམ་འདོད། །རྟེན་གྱི་སྒོ་ནས་ཚེགས་ཆེན་ལ་སོགས་བརྒྱད། །འཕེལ་འགྲིབ་མེད་སོགས་སྦྱོར་བའི་རྟོགས་ཐབས་བཞི། །སྟོན་བྱེད་མདོར་ཡང་ཤེར་ཕྱིན་ལ་སྤྱོད་ཚེ། །གསུངས་ཕྱིར་ཐབས་ཤེས་ཟུང་དུ་འབྲེལ་ཚུལ་ལོ། །རིན་ཆེན་སྦྱིན་སོགས་འབྲས་གཉིས་དུས་ཀྱིས་གཅིག །རིམ་བཞིན་ཚོགས་གཅིག་ངེས་འབྱེད་ཆ་ལ་བཞི། །ལྗོན་གསར་དཔེ་ཡིས་མཐོང་ལམ་བྱང་ཆུབ་ཉེ། །མ་དག་ས་ལ་སྦྲུམ་མ་ཉེ་བའི་དཔེའི། །སངས་རྒྱས་མྱུར་དེ་ས་བདུན་དྲི་མ་ནི། །མངལ་སྦུབ་འདྲ་བར་རྒྱུད་བླར་གསུངས་ཕྱིར་དང། །དེ་གྲོལ་ས་བརྒྱད་པ་ལ་གཞོན་ནུར་གྲགས། །དེར་ལྔ་ཆོས་འཁོར་བསྐོར་བའི་སྦྱོར་བའི་ནུས། །ཐོབ་ཕྱིར་གཞན་གྱི་དོན་དང་འཕེལ་འགྲེབ་མེད། །ཁམས་གསུམ་ཆོས་དང་ཆོས་མིན་སོགས་མི་མཐོང། །བསམ་མི་ཁྱབ་དང་རྣམ་པར་མི་རྟོག་པའོ། །འབྲས་བུའི་སྒོ་ནས་གཉིས་དེ་དགུ་པ་ལ། །སོ་རིག་བཞི་ཡིས་སེམས་ཅན་སྨིན་བྱེད་ཕྱིར། །རྒྱུན་ཞུགས་ནས་བཟུང་བླ་མེད་བྱང་ཆུབ་བར། །སྟེར་བའི་འབྲས་བུ་རིན་ཆེན་སྦྱིན་བྱེད་དང། །བཅུ་བར་ཉེས་སེལ་རྣམ་དག་སྦྱོར་བ་འོ། །དུས་ཀྱི་སྒོ་ནས་ས་མཚམས་སྦྱོར་བ་སྟེ། །བརྒྱད་པར་རྩོལ་མེད་འཇུག་ཕྱིར་ལོ་ཟླའི་མཚམས། །མི་དགོས་ཕྱིར་ན་ཚོགས་ནས་བདུན་པའི་བར། །འདི་དག་དོན་ལ་ཁ་ཅིག་ཚེགས་ཆེན་གྱི། །སྦྱོར་བར་སྟོང་ཉིད་རྟོགས་པ་མེད་ཅེས་ཟེར། །མི་འཐད་དབང་རྟུལ་ཚོགས་ལམ་ཆེན་པོ་ཡི། །སྟོང་
ཉིད་རྟོགས་པའི་ཞི་གནས་དེ་ཡིན་ཕྱིར། །ཁ་ཅིག་དབང་རྣོན་རྒྱུད་ལ་འདོད་ཀྱང་མིན། །ཁ་ཅིག་ལུང་བསྟན་ཐོབ་པའི་སྦྱོར་བ་ཡིས། །ཐོབ་གསུངས་གཅིག་ཏུ་ཐོབ་ཟིན་ཁོ་ན་ཟེར། །ལ་ལས་རྒྱལ་ལས་དངོས་ཐོབ་ཁོ་ནར་འདོད། །གཞན་དག་དེ་གཉིས་བཀག་ནས་འཐོབ་ཅེས་པ། །མ་འོངས་ཚིག་སྟེ་ཉི་སྣང་དགོངས་པར་སྨྲ། །གསུམ་ག་མི་འཐད་དངོས་སུ་ཐོབ་པ་འམ། །དུས་དེར་སངས་རྒྱས་མེད་ཀྱང་སྔར་ཐོབ་མཐུས། །མི་རིང་གཞན་གྱིའང་ལུང་སྟོན་རྒྱན་སྣང་གསུངས། །༈ སྤྲོ་ཕྱིར་སྦྱོར་བའི་མཇུག་ཏུ་ཡོན་ཏན་ཏེ། །ཐེག་ཆེན་སྦྱོར་བ་བསྒོམས་སྟོབས་ཀྱིས་ཐོབ་པའི། །ཐེག་ཆེན་ལམ་ཞུགས་རྒྱུད་ཀྱི་ཡོན་ཏན་ནོ། །སྦྱོར་ལམ་བཞི་དང་ས་བཅུར་གཞོན་ནུ་དཔལ། །སྦྱར་ཡང་བཅུ་བཞི་ཚོགས་ནས་སངས་རྒྱས་བར། །ཁ་ཅིག་སྐྱོན་རྣམས་སྐྱེ་བའི་གེགས་ཡིན་ཕྱིར། །ཡོན་ཏན་འདི་རྣམས་སྦྱོར་བའི་རྒྱུ་འོ་ཟེར། །དེ་རྒྱུ་ལྟ་ཞོག་ནུས་དང་ནུས་ཅན་ཡང། །མིན་ཏེ་ཕན་ཡོན་གསུངས་ཕྱིར་འབྲས་བུ་འོ། །ཁ་ཅིག་སྦྱོར་བ་སྒོམ་རྟེན་ཡོན་ཏན་ཏེ། །ཐེག་ཆེན་སྦྱོར་བའི་ཡོན་ཏན་དོན་དུ་འདོད། །ལ་ལ་ཐེག་ཆེན་སྦྱོར་བ་བསྒོམ་སྟོབས་ཟེར། །དང་པོ་མི་འཐད་ཐེག་དམན་ལ་ཡོད་ཕྱིར། །གཉིས་པ་ཡང་མིན་སྦྱོར་བ་གསར་བསྒོམ་ཚེ། །རྒྱལ་ཀུན་བསྲུང་ཕྱིར་བདུད་ཀྱིས་མི་ཚུགས་ཀྱང། །སྦྱོར་བསྒོམ་སྔོན་སོང་མིན་ཕྱིར་ཡོན་ཏན་མིན། །ཁ་ཅིག་སེམས་དཔའ་ཁོ་ནར་འདོད་ཀྱང་འདིས། །ཡོན་ཏན་ལྔ་པར་ཆེན་པོ་གསུམ་གསུངས་སོ། །གསེར་གླིང་པ་དང་ཨར་སོགས་ཚན་པ་གཉིས། །རིམ་བཞིན་རྒྱུ་དང་འབྲས་བུའི་ཡོན་ཏན་འདོད། །ཁ་ཅིག་སྔ་ཕྱི་མིང་དོན་སྦྱོར་དགོས་ཟེར། །རང་ལུགས་
རིམ་བཞིན་བསྒྲུབ་བྱ་སྒྲུབ་བྱེད་དེ། །ཚེ་འདིར་རྒྱལ་བས་བྱིན་གྱིས་བརླབས་པའི་ཕྱིར། །ཚེ་རབས་གཞན་དུ་བདུད་བཅོམ་ཡོན་ཏན་འབྱུང། །ཚེ་འདིར་བསྒོམ་པ་རྒྱལ་བའི་དགོངས་ཐོབ་ཕྱིར། །ཚེ་རབས་གཞན་དུ་དགོངས་ཤིང་མཁྱེན་ཉིད་འབྱུང། །ཚེ་འདིར་བསྒོམ་པ་ཡེ་ཤེས་ཀྱིས་གཟིགས་ཕྱིར། །གཞན་ཚེ་རྒྱལ་བས་མངོན་སུམ་མཛད་པར་འགྱུར། །འདི་གསུམ་རིམ་བཞིན་དགྲ་ཡི་མཚོན་བཅག་དང། །གཉེན་ལ་གོ་བསྐོན་ལག་ཏུ་མཚོན་གཏད་བཞིན། །སྦྱོར་བའི་ནུས་པ་ཆུང་འབྲིང་ཆེ་གསུམ་མོ། །ལྷག་ཀྱང་དེ་ལྟར་བསྒྲུབ་བྱ་སྒྲུབ་བྱེད་སྦྱར། །དྲུག་པར་འཕྲོས་ཏེ་བསྟན་པའི་གནས་ཚད་དཔྱད། །ཐེག་ཆེན་སྦྱོར་བ་སྐྱེ་གནས་གོང་འཕེལ་གསུམ། །ཅི་རིགས་གེགས་བྱེད་ཆ་ནས་བདུད་ལས་སུ། །བཤད་དེ་སྦྱོར་བའི་སྐྱོན་གྱི་མཚན་ཉིད་དོ། །འོན་ཀྱང་བདུད་ལས་དངོས་སུ་མ་ངེས་ཏེ། །ཆ་འདྲའམ་བདུད་ལས་རྒྱུ་ཕྱིར་བཤད་པ་མང། །ཁ་ཅིག་སྐྱེ་གནས་གེགས་སུ་འདོད་མོད་ཀྱང། །མ་ཡིན་སྦྱོར་བ་རྒྱུན་ལྡན་ལ་ཡོད་ཕྱིར། །སྐྱོན་གྱི་དབྱེ་བ་འགལ་རྐྱེན་ཉེར་གསུམ་སྟེ། །དོན་ཤེས་བར་གཅོད་སྤོབས་པའི་དབང་བྱ་བ། །ཚེགས་ཆེན་བུལ་དང་མྱུར་ཆེས་མི་བརྟན་གཉིས། །སྒོ་གསུམ་གནས་ངན་ལེན་གྱི་དབང་བྱས་གསུམ། །ཐེག་ཆེན་ཉམས་བྱེད་རྒྱུ་བདུན་ཡུལ་མང་ལ། །རྟོག་སོགས་གཡེང་བའི་རྒྱུ་བརྒྱད་རང་བརྟེན་ཞིང། །བདུད་ཀྱིས་འབྱེད་སོགས་མཐའ་གསུམ་གཞན་བརྟེན་ནོ། །མཐུན་རྐྱེན་མ་ཚང་སྙོམས་ལས་ཀྱིས་ཉམས་སོགས། །གཉིས་བརྟེན་ཉེར་གཅིག་རང་བརྟེན་འགྲོ་གཉིས་སོ། །ཡང་ན་རིམ་བཞིན་རང་གཞན་ཐུན་མོང་དང། །རང་དང་གཞན་བརྟེན་བཅུ་བཞི་གཉིས་བདུན་ནོ། །ཉམས་བྱེད་རྒྱུ་བདུན་ཚོགས་ལམ་མན་ཆད་དང། །གཞན་ཡང་ཕལ་ཆེར་སྦྱོར་ལམ་མན་ཆད་དེ། །ཕྲ་མོ་མ་དག་ས་
བདུན་བར་དུ་ཡོད། །ཚོགས་པའི་ཆོས་སྤྱོད་སྐབས་སུ་དཔོན་སློབ་གཉིས། །མ་མཐུན་སྟོབས་ཀྱིས་མི་སྦྱོར་སྐྱོན་ཡིན་གྱི། །སློབ་དཔོན་མཁས་པས་སློབ་མ་མི་མཁས་ཀྱང། །འཁྲིད་པ་སྐྱོན་མིན་དམ་པའི་ལུགས་སྲོལ་ལོ། །༈ དེ་ལྟར་སྐྱོན་ཡོན་བླང་དང་དོར་བའི་སྒོས། །སྦྱོར་བ་སྒོམ་ལ་མཚན་ཉིད་ཤེས་དགོས་ཕྱིར། །མདོ་ལས་ཤེས་མཚན་ལ་སོགས་རྣམ་བཞི་ལས། །ཕྱེ་བས་གོ་གཅིག་གསུངས་པ་རྗེ་བཙུན་གྱིས། །བསྡུས་ཏེ་བྱེད་སྒྲུབ་ལས་སྒྲུབ་གཉིས་སུ་མཛད། །གཞོན་ནུ་དཔལ་གྱིས་ཤེས་མཚན་ལ་སོགས་བཞི། །རིམ་བཞིན་ཕྱོགས་ཆོས་རྗེས་ཁྱབ་ལྡོག་ཁྱབ་དང། །དཔག་བྱར་འདོད་ཀྱང་ཡིན་འགོད་ཡོད་འགོད་གཉིས། །གང་གི་དབང་དུ་བྱས་ཀྱང་མ་ངེས་ཏེ། །སངས་རྒྱས་ལ་ཡང་ཤེས་མཚན་ཡོད་ཕྱིར་དང། །སྦྱོར་བའི་ངོ་བོ་ཉིད་མཚན་མེད་ཕྱིར་རོ། །འོན་ཀྱང་འདིར་བསྟན་ཤེས་མཚན་སངས་རྒྱས་ལ། །མེད་དེ་འདི་ནི་སྦྱོར་བའི་ཤེས་མཚན་ཕྱིར། །ཁ་ཅིག་ཀུ་མཱ་ར་ཡི་དེ་འཐད་དེ། །བྱེད་པའི་ནུས་དང་མི་ལྡན་རྣམ་བཅད་ནས། །ངོ་བོ་ཉིད་ལ་ནུས་ལྡན་རྗེས་འགྲོ་བསྒྲུབས། །ཁྱད་མཚན་གྱིས་ནི་ཉན་རང་ལ་སོགས་ལ། །ལྡན་པ་གཅོད་པས་ལྡོག་ཁྱབ་འགྲུབ་ཕྱིར་ཟེར། །དེ་ཙམ་རྗེས་ལྡོག་ཁྱབ་པའི་དོན་མིན་ཞིང། །ངོ་བོ་ཉིད་དུ་སྒྲུབ་ཕྱིར་སློབ་པར་ངེས། །དེ་ལ་མཁྱེན་གསུམ་མེད་ཕྱིར་ཆོས་ཅན་ཉམས། །གཽ་མིའི་དགོངས་པར་མཛད་དེ་ལོ་ཆེན་གྱིས། །སྦྱོར་བ་ཉི་ཤུའམ་རང་བཞིན་སྦྱོར་བ་ལྔ། །མཚན་གཞི་ངོ་བོ་ཉིད་ནི་མཚོན་བྱ་དང། །བྱེད་མཚན་ཁྱད་མཚན་གཉིས་ནི་མཚན་ཉིད་དེ། །མེ་ནི་མཚན་གཞི་སྲེག་བྱེད་མཚན་ཉིད་དང། །མེ་ཡི་ཐ་སྙད་བྱ་རུང་མཚོན་བྱ་དང། །མཚན་མཚོན་གཞི་གསུམ་
ཡོངས་གཅོད་ཚད་མ་ལ། །མཚོན་པར་བཤད་བཞིན་འདིར་ཡང་ཤེས་མཚན་གྱིས། །སྦྱོར་བ་དེ་དག་བྱེད་པ་ཁྱད་པར་དང། །ལྡན་པར་རྟོགས་ཕྱིར་མཚོན་པ་ཞེས་བྱ་ལ། །འོན་ཀྱང་འདིར་བསྟན་བཅུ་དྲུག་ཕྲག་གསུམ་གྱི། །བྱེད་མཚན་ཁྱད་མཚན་གཉིས་ལ་མ་དམིགས་ཕྱིར། །མཚོན་པ་དངོས་མིན་དོན་ཡང་དེ་ཡི་ཡུལ། །ཡིན་ཕྱིར་ཡུལ་གྱི་སྒོ་ནས་བསྟན་ཏོ་ཟེར། །མི་འཐད་དེ་བཞིན་གཤེགས་འབྱུང་ཞེས་སོགས་ཀྱིས། །ཤེས་མཚན་ཞེ་བརྒྱད་དངོས་སུ་ཚིག་ཟིན་ལ། །བསྟན་པ་རྩ་འགྲེལ་ཀུན་གྱིས་འགྲུབ་པའི་ཕྱིར། །ཡུལ་གྱིས་ཡུལ་ཅན་འཕངས་ཙམ་ག་ལ་ཡིན། །ཤེར་འབྱུང་སྔར་བཤད་མཁྱེན་གསུམ་ལ་བརྟེན་པའི། །བདེན་རྣམ་བཅུ་དྲུག་རྟོགས་པ་ཤེས་མཚན་དང། །དེ་གསུམ་ཐབས་ཤེས་གྲོགས་ཀྱིས་ཟིན་པའི་སྒོས། །སྐྱེད་ཕྱིར་སྐྱོན་རྣམས་ཀུན་བྲལ་རྣམ་དག་ཏུ། །འབྱུང་བའི་ལྡོག་ཆ་ནས་ནི་ཁྱད་མཚན་ཟེར། །རྣམ་པའི་སྐབས་དང་འདི་ཡི་མཁྱེན་གསུམ་སྦྱོར། །མིང་ཙམ་འདྲ་ཡང་སྐྱེད་ཚུལ་མི་མཚུངས་ཏེ། །སྔ་མ་བཅུ་དྲུག་བདེན་རྣམ་མཁྱེན་ཆ་དང། །འདི་ནི་དེ་བཞིན་གཤེགས་པ་འབྱུང་སོགས་ཡུལ། །ཞེ་བརྒྱད་མཁྱེན་པའི་ཆ་ནས་འཇོག་ཕྱིར་དང། །ཁྱད་མཚན་ཀུན་མཁྱེན་གསུམ་ལ་སྦྱར་བ་ཡང། །ནོར་ཏེ་སློབ་དཔོན་གཞི་ཤེས་བསལ་ཕྱིར་རོ། །བྱེད་མཚན་སྦྱོར་རྣམས་སངས་རྒྱས་སྐྱེད་བྱེད་དུ། །མཚོན་ཏེ་འདི་ཡི་མཚན་ཉིད་བྱེད་ཚུལ་ཟེར། །དོན་དུ་སངས་རྒྱས་སྐྱེད་བྱེད་ཡིན་མོད་ཀྱང། །འདིར་ནི་མཚོན་ཚུལ་དེ་ལྟར་མ་ཡིན་ཏེ། །གཞུང་ལམ་འབྲས་བུའི་ཤེར་ཕྱིན་གསུམ་ཤེས་ཏེ། །འབྲས་བུ་དོན་གཉེར་ཇི་བཞིན་སྐྱེ་བ་ལ། །ལམ་གྱི་མཚན་ཉིད་ལེགས་པར་ཤེས་དགོས་ཕྱིར། །ལམ་ཉིད་རང་གི་བྱེད་པ་ལ་སོགས་ལ། །སྦྱོར་བའི་མཚན་ཉིད་མིང་གིས་
བསྟན་ཕྱིར་རོ། །༈ རང་ལུགས་ལ་ཡང་མཚོན་ཚུལ་དུ་མ་སྟེ། །མེ་ཡི་ཚ་བ་ལྟ་བུ་རང་མཚན་དང། །མི་རྟག་བདག་མེད་ལ་སོགས་སྤྱི་མཚན་དང། །བྱས་དང་མི་རྟག་ལ་ཡང་མ་བྱས་དང། །རྟག་སོགས་ལྡོག་ཆས་དབྱེ་བའི་མཚན་ཉིད་དང། །མ་ཁྱབ་ཁྱབ་ཆེས་གཉིས་བཀག་རིགས་མཐུན་ཙམ། །དེར་བསྒྲུབ་རིགས་མི་མཐུན་སེལ་མཚན་ཉིད་དང། །དོན་ལ་མི་དགོས་འང་ལོག་རྟོག་སེལ་བའི་ཕྱིར། །སྨོས་པ་ལོག་རྟོག་སེལ་བའི་མཚན་ཉིད་སོགས། །ཡོད་ཀྱང་འདིར་ནི་རིགས་མི་མཐུན་སེལ་དང། །ལྡོག་ཆའི་མཚན་ཉིད་གཙོ་སྟེ་སྦྱོར་བ་ལ། །ཤེས་ཁྱད་བྱེད་དོ་ལྡོག་པས་དབྱེ་ཕྱིར་ཏེ། །སྦྱོར་བ་རྟོགས་དང་འཕྲིན་ལས་མཐར་ཐུག་སྟེ། །དོན་གཉིས་ཕུན་ཚོགས་སྐྱེད་པའི་ནུས་ལྡན་པར། ཤེས་བྱེད་གཉིས་ཀྱིས་མི་ལྡན་རྣམ་གཅོད་དུ། །མཚོན་ཞིང་ནུས་པ་དེ་གཞན་ལ་ཡོད་ན། །ཐེག་ཆེན་ལམ་གྱི་དཀའ་སྤྱད་མི་དགོས་ཀྱང། །ཁྱད་མཚན་གྱིས་ནི་ཉན་རང་ལ་སོགས་པ། །གཞན་ལ་ལྡན་པ་རྣམ་བཅད་ཚུལ་གྱིས་མཚོན། །ཁྱད་མཚན་འདི་ཡིས་ཤེས་མཚན་སོ་གཉིས་ནི། །ཉན་རང་སྦྱོར་བ་ལས་ནི་རང་ལྡོག་སྒོས། །ཁྱད་པར་ཞུགས་པར་བསྟན་ཀྱང་གཞི་ཤེས་ཀྱིས། །བཅུ་དྲུག་དེ་ལྟར་མ་བསྟན་དེ་དག་ནི། །ཟིན་བྱེད་དབང་གིས་ནུས་པའམ་རྫས་ཀྱི་ཁྱད། །ཞུགས་ཀྱང་རང་ལྡོག་སྒོ་ནས་འཕགས་མིན་ཕྱིར། །ཁ་ཅིག་སྐབས་གསུམ་པར་བསྟན་ཟིན་དབང་བྱས་ཟེར། །སྒོམ་ལམ་གྱིས་བསྡུས་སྦྱོར་བའི་ཁྱད་མཚན་ནི། །འོག་ཏུ་འཆད་འགྱུར་ཕྱིར་ཞེས་མཁས་གྲུབ་གསུངས། །བར་བ་མཐོང་ལམ་སྨོས་པས་དེ་ཉིད་ཀྱིས། །རྒྱུ་འབྲས་སྦྱོར་སྒོམ་གཉིས་ཀྱང་མཚོན་པར་གསེར་ཕྲེང་གསུངས། །ངོ་བོ་ཉིད་ཀྱང་མཚན་
ཉིད་ཡིན་མོད་ཀྱི། །དང་པོ་གསུམ་ལ་ལྟོས་ནས་ཐ་མ་འདི། །རང་བཞིན་ནམ་མཚོན་བྱར་བཤད་ཅེས་གསེར་ཕྲེང་གསུངས། །མཚན་མཚོན་ཚུལ་ཡང་བྱ་རོག་བབ་པ་ཡི། །ཁང་བཟང་དེ་ཉིད་བྱ་རོག་དེ་བསྟན་ནས། །ཤེས་ལ་མཚོན་པར་བཤད་པ་ཙམ་ཡིན་གྱི། །རྣམ་པར་བཞག་འཇོག་མཚན་མཚོན་དངོས་མིན་ཕྱིར། །སྦྱོར་བར་མ་ཟད་སྦྱོར་བའི་ནུས་པ་ཡང། །མཚོན་བྱར་བཤད་ལ་འགལ་བ་ཡོད་མིན་ཏེ། །ནུས་དང་ནུས་ཅན་ངོ་བོ་གཅིག་ཕྱིར་རོ། །དབྱེ་ན་འདིར་བསྟན་ཤེས་མཚན་སྦྱོར་བའི་དོན། །མཁྱེན་གསུམ་དམིགས་པ་གང་རུང་ལ་དམིགས་ནས། །དེ་བཞིན་གཤེགས་པ་འབྱུང་བ་ཤེས་པ་སོགས། །གཙོ་བོར་གྱུར་པའི་འདིར་བསྟན་ཤེར་ཕྱིན་ནོ། །དེ་ལ་གཞི་ལམ་རྣམ་མཁྱེན་སྦྱོར་བ་གསུམ། །དོན་ནི་གཞི་ཤེས་དམིགས་པ་ལྟར་དམིགས་ནས། །དེ་བཞིན་གཤེགས་འབྱུང་ཤེས་སོགས་བཅུ་དྲུག་གི །ཆ་ནས་བཞག་པའི་འདིར་བསྟན་ལམ་ཤེར་ཕྱིན། །དང་པོའོ་དེ་བཞིན་ལམ་ཤེས་ལྟར་དམིགས་ནས། །སྟོང་ཉིད་མཚན་མེད་ཤེས་སོགས་རྣམ་མཁྱེན་ལྟར། །དམིགས་ནས་སངས་རྒྱས་ཉིད་ཀྱི་ཆོས་ཤེས་སོགས། །བཅུ་དྲུག་ཆ་བཞག་འདིར་བསྟན་ལམ་ཤེར་ཕྱིན། །རྣམ་མཁྱེན་སྦྱོར་བའོ་སྦྱོར་དང་ཤེས་མཚན་གཉིས། །འཆོལ་བར་མི་སེམས་སྦྱོར་བར་བྱེད་ལས་སྒོས། །ཤེས་མཚན་ལ་སོགས་མིང་གིས་བསྟན་ཙམ་ལས། །མཚན་ཉིད་སྦྱོར་ལས་གཞན་གྱུར་ཡོད་མིན་ཕྱིར། །མཚོན་བྱ་ལྟ་བུར་མཚོན་ཞེས་གསུངས་ཕྱིར་རོ། །འདིར་བསྟན་གཞི་ཤེས་ཤེས་མཚན་བཅུ་དྲུག་པོ། །གཞི་ཤེས་སྦྱོར་བ་ཡིན་ཀྱང་གཞི་ཤེས་ཀྱི། །ཤེས་མཚན་འཆད་བྱེད་དངོས་བསྟན་མ་ངེས་ཏེ། །འཇིག་རྟེན་འཇིག་མེད་ཅེས་པའི་དངོས་བསྟན་གྱི། །ཟིན་བྱེད་བདེན་མེད་
རྟོགས་པའི་ལམ་གསུངས་ཕྱིར། །རྒྱ་ཆེ་ཞེས་བྱ་སེམས་ཀྱི་གནས་ལུགས་ཏེ། །ཐ་སྙད་ཡོན་ཏན་འགྲུབ་རུང་ཆེན་པོར་མྱུར། །གྲངས་ཀྱིས་གཞལ་བར་མི་ནུས་ཚད་མེད་དང། །སེམས་དེ་དབང་ཤེས་ལ་ནི་བསྟན་མེད་པར། །མ་ཟད་སངས་རྒྱས་སྤྱན་ལྔས་བལྟར་ཡང་མེད། ། ༈ གཡོ་བ་སོགས་ཏེ་འདུ་བཀྲམ་བཅུམ་པ་བཞི། །དེ་ལས་ལུང་མ་བསྟན་ལྟ་བཅུ་བཞི་སྟེ། །སྔོན་མཐར་བརྟེན་པ་འཇིག་རྟེན་རྟག་སོགས་བཞི། །ཕྱི་མཐར་བརྟེན་པ་མཐའ་ལྡན་ལ་སོགས་བཞི། །མྱང་འདས་ལ་བརྟེན་གྲོལ་བདག་གྲོངས་ཕན་ཆད། །འབྱུང་དང་མི་འབྱུང་གཉིས་ཀ་གཉིས་མིན་བཞི། །ལུས་སྲོག་ལ་བརྟེན་རྫས་གཅིག་ཐ་དད་གཉིས། །སྒྲུབ་པ་མི་རུང་དགག་པ་དེར་མི་འོས། །དེ་ཕྱིར་ལུང་མ་བསྟན་པར་རྣམ་བཤད་གསུངས། །རྩ་ཤེས་ཊཱིཀ་ཆེན་གསུངས་ཚུལ་དེ་ལས་གཞན། །གྲོལ་བདག་ལེགས་ལྡན་སངས་རྒྱས་ཉིད་ལ་གསུངས། །གསེར་ཕྲེང་བདག་གམ་སེམས་ཅན་ཙམ་ལ་སྦྱར། །མཐའ་དང་མི་ལྡན་རྟག་དང་གྲོལ་བདག་འབྱུང། །གྲངས་ཅན་ལ་བརྟེན་གཡོ་བའི་ལྟ་བ་གསུམ། །ཟློག་ཕྱོགས་རྒྱང་འཕེན་ལ་བརྟེན་འདུ་བ་གསུམ། །གསེར་ཕྲེང་མཐའ་ལྡན་མཐའ་ནི་ཕྱི་མའི་ཆར། །མཛད་དེ་གྲངས་ཅན་པ་ལ་མཐའ་ལྡན་སྦྱར། །གཅེར་བུ་བ་དག་བུམ་པའི་གནས་སྐབས་ནི། །ཞིག་ཀྱང་རང་བཞིན་མི་འཇིག་སྨྲ་བའི་ཕྱིར། །དགག་སྒྲུབ་ཆ་མཉམ་བཀྲམ་པའི་ལྟ་བ་གསུམ། །གནས་མ་བུར་བརྟེན་ཟློག་ཕྱོགས་བཅུམ་པ་གསུམ། །བདག་འཛིན་མིན་ཡང་ཁྱད་གཞི་བཏགས་བདག་ལ། །བརྟེན་ཕྱིར་ཁྱད་ཆོས་འཛིན་པ་ལོག་ཞུགས་སོ། །རྣམ་མཁྱེན་ཤེས་མཚན་སྟོན་བྱེད་གཞུང་ཚིག་དེར། །དེ་བཞིན་ཉིད་ཀྱི་ཆོས་བརྟེན་ཞེས་གསུངས་སོ། །བརྗོད་དང་
ཤེས་མཛད་མངོན་སུམ་མཛད་གསུམ་དོན། །ཁ་ཅིག་ཐོས་བསམ་སྒོམ་གསུམ་དབང་བྱས་ཟེར། །ཡང་ན་ཉན་ཐོས་བྱང་སེམས་སངས་རྒྱས་གསུམ། །ཡང་ན་གདུལ་བྱ་སྤྱི་ལ་བརྗོད་མཛད་ཅིང། །སྨིན་པ་རྣམས་ལ་སྒོམ་པས་ཤེས་པར་མཛད། །རྣམ་གྲོལ་གདུལ་བྱས་མངོན་སུམ་མཐོང་མཛད་དོ། །བསམ་མི་ཁྱབ་སོགས་བཅུ་དྲུག་ཅི་རིགས་ཀྱིས། །ཐེག་དམན་ལས་འཕགས་ཆ་བཞག་ལམ་ཤེར་ཕྱིན། །སེམས་དཔའི་ཁྱད་མཚན་སྦྱོར་བའི་མཚན་ཉིད་དོ། །གཞན་ལ་ཕན་བདེ་སྐྱོབ་སོགས་བྱེད་པའི་ཆོས། །བཅུ་གཅིག་ཆ་བཞག་འདིར་བསྟན་ལམ་ཤེར་ཕྱིན། །འདིར་བསྟན་སེམས་དཔའི་བྱེད་མཚན་སྦྱོར་བ་སྟེ། །དང་པོ་དགུ་དང་མཐའ་གཉིས་རིམ་པ་བཞིན། །འགྲེལ་ཆེན་གཉིས་ལས་སྦྱོར་བ་གསུམ་དང་སྦྱར། །འགྲེལ་ཆུང་གཞི་ཤེས་ཙམ་གྱི་ལྡོག་པ་ནས། །གསུམ་ལས་མི་ནུས་ཕྱིར་ན་གོང་གསུམ་སྨོས། །གླིང་ལ་རྣམ་པ་གསུམ་སོགས་གསེར་འཕྲེང་གསལ། །མཚན་གཞིའི་སྦྱོར་བའི་དོན་ནི་ཤེས་ཁྱད་བྱེད། །གསུམ་གྱིས་མཚོན་པས་ལས་སྒྲུབ་ཀྱིས་བསྟན་པའི། །སྦྱོར་བའི་དངོས་ཉིད་སེམས་དཔའི་ཡེ་ཤེས་སོ། །གཞི་ཤེས་སྦྱོར་བཞི་གསུམ་གྱིས་མཚོན་ནམ་དཔྱད། །དགོས་ཏེ་རྩོད་སྤོང་དོན་ཡང་འདི་ཡིན་ནོ། །འདི་བཞིའང་གཞུང་གི་དངོས་བསྟན་ཟིན་བྱེད་གཙོ། །འདིར་བསྟན་མཚན་ཉིད་གོ་གཅིག་ཚོགས་ལམ་ནས། །རྒྱུན་མཐའི་བར་རོ་གཞན་དུ་རྒྱལ་བར་འབྱུང། །༈ ཐར་ཆ་ནས་བཟུང་རྒྱུད་ལ་སྐྱེ་རིམ་ལ། །གྲངས་མེད་གསུམ་གྱི་ཐོག་མ་ངོས་བཟུང་སྟེ། །རྒྱན་གྱི་ཆེད་བྱའི་གདུལ་བྱ་ངོས་འཛིན་དང། །དེ་ནས་སྨིན་བྱེད་ལམ་གྱི་སྐྱེ་རིམ་དང། །མངོན་རྟོགས་ཁྱད་པར་ཅན་གྱི་སྐྱེ་རིམ་གསུམ། །དང་པོ་སྔར་བཤད་མཁྱེན་གསུམ་རྣམ་པ་དང། །མཚན་ཉིད་བཞི་སོགས་བསྒོམས་
མཐུས་འགའ་ཞིག་ལ། །ཐར་ཆ་གྲངས་མེད་ཚོགས་དང་མཉམ་འབྱུང་སྟེ། །དད་དང་དྲན་པར་མཁས་ཕྱིར་མི་ལྡོག་ཅིང། །བརྩོན་འགྲུས་མཁས་པས་འཇུག་སེམས་བསྐྱེད་ཕྱིར་དང། །ཏིང་འཛིན་ཤེས་རབ་མཁས་ཕྱིར་ལྟ་བ་ཡི། །དཔྱད་པ་རྫོགས་ཕྱིར་རོ་དེ་ལས་དང་པོ་གཉིས། །ཐེག་ཆེན་འཇུག་སྒོའི་སྔོན་འགྲོ་དངོས་གཞི་སྟེ། །དེ་ནས་གསུམ་པས་སྤྱོད་པ་སྤྱི་བསླབ་དང། །ཕར་ཕྱིན་མཐའ་གཉིས་སློབ་ཚུལ་མཐའ་གཉིས་སོ། །མདོ་ཡི་ཚིག་ཟིན་དད་སོགས་ཆུང་འབྲིང་དང། །དབང་པོ་རྟུལ་འབྲིང་ཉན་རང་ལ་ཡིན་ཕྱིར། །བྱང་སེམས་མིང་གིས་བཏགས་ནས་གསུངས་པ་ལས། །བྱང་སེམས་ཉིད་ལ་རིགས་ཅན་གསུམ་འདོད་འཁྲུལ། །ཁ་ཅིག་རྩ་བར་བཤད་པའི་རྣོ་རྟུལ་ཡང། །ཐེག་དམན་ལ་འདོད་མི་རིགས་དེ་གཉིས་ནི། །རྫོགས་བྱང་དོན་དུ་གཉེར་བར་མཚུངས་པ་ལ། །རྣོ་རྟུལ་དབང་གིས་དཀའ་སླ་གསུངས་ཕྱིར་རོ། །ཁ་ཅིག་རྣོ་རྟུལ་གཉིས་སུ་མ་ངེས་ཏེ། །འབྲིང་པོའོ་ཟེར་ཡང་དེ་ནི་རྟུལ་པོས་བསྡུས། །དད་སོགས་ལྔ་ལ་མཁས་པའི་རིགས་གནས་ཀྱི། །ཐབས་ཤེས་ཁྱད་པར་ཅན་གཉིས་ཀྱིས་ཟིན་པའི། །རང་བཞིན་གྱིས་ནི་དབང་རྣོན་ཆོས་མངོན་རྟོགས། །འདི་ཡི་དངོས་བསྟན་ཐར་པ་ཆ་མཐུན་དོན། །གཞན་ནི་ཐབས་ཤེས་ཉི་ཚེས་ཟིན་པ་དང། །རང་བཞིན་དབང་འབྲིང་དབང་རྟུལ་མངོན་རྟོགས་སོ། །ཐར་པའི་ཆ་ལ་ཕན་ཕྱིར་ཐར་ཆ་སྟེ། །ལུས་རྟེན་སེམས་རྟེན་གཉིས་ནི་སེམས་བསྐྱེད་བཞིན། །རྒྱན་བརྟེན་ཡུལ་ལྔ་གང་རུང་རྟོགས་དགོས་ཀྱི། །ཐེག་ཆེན་རིགས་ཅན་དེ་ནི་བསྟན་བཅོས་འདིའི། །ཆེད་དུ་བྱ་བའི་གདུལ་བྱའི་དོན་གསུངས་ཤིང། །གདམས་དང་རྗེས་བསྟན་གང་རུང་དབང་བྱས་ན། །དེར་གྱུར་འཕགས་པ་ཡོད་
གསུངས་དཔྱད་བྱ་སྟེ། །བདེན་པ་མངོན་སུམ་མཐོང་ཚེ་ལུང་གི་ཆོས། །གཟིངས་དང་འདྲ་ཕྱིར་ཆེད་དུ་མི་བརྟེན་པས། །རྒྱན་ལས་རྟོག་གེར་ཆེད་དུ་བརྟེན་པ་དང། །དམ་བཅའ་གཞན་དུ་འགྱུར་ཕྱིར་མ་ངེས་དང། །ཆོས་ཀུན་ཡུལ་དུ་མི་བྱེད་མ་ཁྱབ་དང། །ཀུན་རྫོབ་ཙམ་ལས་དོན་དམ་མ་མཐོང་དང། །སྤོབས་པ་ཡོངས་སུ་གཏུགས་པའི་སྐྱོ་བ་ཅན། །འདི་ལྔ་སོ་སྐྱེ་ཁོ་ནར་སྦྱར་ཕྱིར་རོ། །བློ་བརྟན་རྟོག་གེའི་གཞུང་ལ་སྦྱར་ཏེ་བཤད། །༈ གཉིས་པ་སྨིན་བྱེད་ལམ་ལ་དངོས་དང་ནི། །མངོན་རྟོགས་གོ་རིམ་ལོག་རྟོག་སྤངས་པ་གཉིས། །མཉམ་གཞག་ཤེས་རབ་སྒོམ་ཚུལ་སྔར་བཤད་ནས། །རྗེས་ཐོབ་བརྩེ་སོགས་ཐབས་ཀྱི་རྟོགས་རིགས་རྣམས། །འདིར་གསུངས་བསྡོམས་པས་སྦྱོར་ལམ་ཡོངས་རྫོགས་འགྱུར། །འདིར་ནི་རྩ་བའི་ཚིག་དང་སྒོ་བསྡུར་ཏེ། །དྲོད་སོགས་སྤྱི་ལ་སྦྱར་ཡང་སྣང་བ་གཉིས། །ཕྱི་སྟེ་མཉམ་བྱམས་གཉིས་དང་ཕན་སོགས་གསུམ། །ཕ་མའི་སེམས་སོགས་ལྔ་དང་དྲོད་གསུམ་སྦྱར། །ཚིག་གསལ་སེམས་མཉམ་ཁོ་ནར་དྲོད་ཆུང་སྦྱར། །སྡིག་ལས་ལྡོག་ཅིང་གཞན་དགོད་བསྔགས་བརྗོད་དང། །སྦྱིན་སོགས་ལ་གནས་གཞན་འགོད་བསྔགས་པ་བརྗོད། །ནང་སྟོང་ཉིད་ལ་གནས་སོགས་རྩེ་མོ་གསུམ། །བདེན་བཞིར་ཤེས་སྤོང་སོགས་བྱེད་གཞན་འགོད་དང། །རྒྱུན་ཞུགས་འབྲས་སོགས་ཤེས་ཀྱང་མངོན་མི་བྱེད། །མཐོང་སོགས་ལ་གནས་གཞན་འགོད་བཟོད་པ་གསུམ། །སེམས་ཅན་སྨིན་དང་མངོན་ཤེས་བསྐྱེད་པ་དང། །རྣམ་མཁྱེན་བསྐྱེད་ཅིང་གཞན་འགོད་ཆོས་མཆོག་གསུམ། །ཁ་ཅིག་རྩ་བར་སེམས་ཅན་དམིགས་པ་དང། །བདེན་ཤེས་རྣམ་པར་གསུངས་ཀྱང་སློབ་དཔོན་གྱིས། །བདེན་
ཤེས་དམིགས་པར་བྱས་ཏེ་དམིགས་པ་ཡི། །སེམས་ཅན་ཆད་པའི་ཕྱིར་ན་མི་འཐད་ཟེར། །སློབ་དཔོན་རྩེ་མོ་བཞིན་དུ་གཞན་ལ་ཡང། །སྦྱོར་གསུངས་ཕྱིར་ན་སེམས་ཅན་ཆད་པ་དང། །བདེན་པ་དམིགས་པར་གསུངས་པའི་སྐབས་མེད་དོ། །རྩོད་ཚུལ་འདི་ནི་སྤྱི་ལ་མི་རུང་ངམ་དཔྱད། །རང་ལུགས་གཙོ་བོར་ཐབས་ཆས་ཁྱད་པར་དུ། །བྱས་པའི་སེམས་དཔའི་རྒྱུད་ཀྱི་དོན་མངོན་རྟོགས། །ཐེག་ཆེན་ངེས་འབྱེད་ཆ་མཐུན་དོན་ཡིན་ནོ། །མངོན་རྟོགས་གོ་རིམ་ལོག་རྟོག་སྤོང་ཚུལ་ནི། །ཁ་ཅིག་སྦྱོར་མཐོང་སྒོམ་གསུམ་སྐབས་དྲུག་ཏུ། །གསུངས་ཀྱང་མི་ཟློས་དང་པོ་གསུམ་གྱི་དེ། །བསྒོམ་བྱ་མི་མཚུངས་ཕྱིར་ན་མི་ཟློས་ཤིང། །བཞི་པར་ས་བརྒྱད་ཡེ་ཤེས་ཆེ་ཆུང་གསུམ། །ལྔ་པར་དགུ་དང་བཅུ་པའི་སྟོད་ཆ་དང། །དྲུག་པར་བཅུ་པའི་སྨད་ཆར་སྦྱོར་མཐོང་སོགས། །མིང་གིས་བཏགས་པའི་ཕྱིར་ན་མི་ཟློས་སོ། །ཕྱི་མ་འདི་ལ་ཡིག་ཆར་སྟོད་ཆ་གསུངས། །དེ་དག་དེ་ཡི་རྒྱུ་མཚན་རྩ་བ་ལས། །བག་ལ་ཉལ་ཀུན་འཇོམས་ཞེས་གསུངས་ཕྱིར་དང། །ཀུན་མཁྱེན་ཉིད་གསུམ་ཆོས་རྣམས་ཡོངས་རྫོགས་པར། །གསུངས་ཕྱིར་ཞེ་ན་མཚུངས་ཏེ་སྐབས་དང་པོར། །སྦྱོར་ལམ་སྐབས་སུ་དག་པ་ལྔ་གསུངས་དང། །དཔའ་བར་འགྲོ་དང་རློམ་ཟད་གསུངས་ཕྱིར་རོ། །དེ་དག་མོས་སྒོམ་ཙམ་དང་རྒྱུར་གནས་ལ། །འདོད་ན་ཁྱོད་ཀྱིས་དེ་ཡང་དེ་དང་འདྲ། །དེ་ཕྱིར་རྐྱང་པའི་དབང་བྱས་མི་རིགས་ཏེ། །ཕྱིར་མི་ལྡོག་རྟགས་རྫོགས་རྗེས་སློབ་པའི་ཆོས། །བཤད་ཟིན་ད་ནི་མི་སློབ་དགེ་འདུན་ཞེས། །གཉིས་སུ་ཕྱེ་ཕྱིར་ས་བརྒྱད་གཅིག་པུར་འགལ། །སྡུད་འགྲེལ་སློབ་དཔོན་སྔ་མའི་ཕྱོགས་བཟུང་སྟེ། །གསུངས་ཀྱང་རང་ལུགས་ཁུག་པའི་དབང་བྱེད་
པ། །འགྲེལ་ཆེན་བཞིན་ནོ་དེ་ཡང་སྐབས་དྲུག་ལས། །དང་པོ་གསུམ་ནི་བླང་བྱའི་དབང་བྱས་ཤིང། །གཞན་གསུམ་ཉམས་སུ་ལེན་བྱེད་དབང་བྱས་ལ། །ནང་གསེས་ཀྱི་ཡང་མི་འདྲ་སྦྱོར་བ་གསུམ། །རིམ་པས་རེ་རེ་ཙམ་ཞིག་བསྒོམ་སྙམ་པའི། །ལོག་རྟོག་བསལ་ནས་མཉམ་དུ་འཇུག་ཕྱིར་རོ། །༈ གསུམ་པ་མངོན་རྟོགས་གོང་མ་སྐྱེ་རིམ་ལ། །སྦྱོར་མཐོང་སྒོམ་གྱི་ཕྱིར་མི་ལྡོག་རྟགས་དང། །སྐུ་གསུམ་འགྲུབ་བྱེད་ལམ་གསུམ་བཤད་པ་གཉིས། །ཁ་ཅིག་རྟགས་ནི་ལུས་ངག་མཚན་མ་ཟེར། །དེར་གྱུར་བདེན་ཞེན་མངོན་གྱུར་ལོག་ཆ་དང། །ཐེ་ཚོམ་མི་ཁོམ་ཟད་ཆ་བྱམས་ཡིད་སོགས། །ལུས་ངག་མཚན་མ་མིན་ཕྱིར་མི་འཐད་དོ། །གཞན་དག་རྟགས་ནི་གཞན་གྱིས་དཔོག་པའི་དུས། །ཁོ་ནར་བསམས་ཏེ་སྦྱོར་ལམ་ཐོབ་མ་ཐག །མེད་ཅེས་སྨྲ་བ་དག་ཀྱང་འདིས་ཁེགས་སོ། །ཁ་ཅིག་རྟགས་འདི་འབྲས་རྟགས་ཁོ་ན་དང། །ལ་ལ་རང་བཞིན་རྟགས་འདོད་གཞན་དག་ནི། །གཏན་ཚིགས་སྒོ་ནས་དཔོག་པ་མེད་ཅེས་ཟེར། །གསུམ་ག་མི་འཐད་མདོ་ལས་འབྲས་རང་གཉིས། །ཅི་རིགས་སྒོ་ནས་རྟོགས་པ་གསུངས་ཕྱིར་རོ། །གཡོ་ཅན་སེམས་དང་ལུས་ངག་མི་མཐུན་ཀྱང། །ལུས་ངག་སྒོ་ནས་དཔོག་པ་མི་འགལ་ཏེ། །དམ་པ་རྣམས་ནི་དགོས་དབང་མ་གཏོགས་པ། །ནང་གི་སེམས་དང་སྤྱོད་པ་མཐུན་ཕྱིར་རོ། །ཁ་ཅིག་གཟུགས་ལས་ལྡོག་སོགས་རྟགས་ཞེ་བཞི། །གང་རུང་ཐོབ་པའི་སེམས་དཔའ་ཕྱིར་མི་ལྡོག །དགེ་འདུན་དོན་དུ་འདོད་པ་རྒྱལ་བས་ཁེགས། །སློབ་པའི་དབང་བྱས་ན་ཡང་མཐོང་ལམ་པ། །དབང་རྟུལ་དེ་ཡིས་རྟགས་རྣམས་མ་ཐོབ་ཀྱང། །སློབ་དང་ཕྱིར་མི་ལྡོག་གཉིས་ཡིན་ཕྱིར་འགལ། །རོང་སྟོན་མ་དག་ས་ལ་སྦྱོར་བའི་སྒོས། །ཕྱིར་མི་ལྡོག་རྟགས་ཐོབ་ཀྱང་བསམ་
པས་མིན། །རང་ཙམ་དོན་དུ་ཐར་པ་འདོད་ཕྱིར་ཏེ། །ལུང་ལས་ཇི་སྲིད་ས་བརྒྱད་མ་ཐོབ་པ། །དེ་སྲིད་ཐེག་པ་དམན་པས་འཇིགས་གསུངས་ཕྱིར། །ཞེས་ཟེར་སེམས་བསྐྱེད་ཉམས་པའི་བྱང་འཕགས་མཚར། །ལུང་འདི་རྒྱུད་བླ་དང་ནི་ལང་གཤེགས་ཞེས། །མང་པོ་འཁྲུལ་ཡང་རྡོ་རྗེ་རྩེ་མོའི་ཡིན། ། ༈ རང་ལུགས་བསམ་སྦྱོར་གཉིས་སྒོས་གཟུགས་སོགས་ལ། །བདེན་ཞེན་མངོན་གྱུར་ལྡོག་སོགས་རྟགས་ཞེ་བཞི། །གང་རུང་ཐོབ་པའི་སེམས་དཔའ་ཕྱིར་མི་ལྡོག །རྟགས་ཐོབ་བྱང་ཆུབ་སེམས་དཔའི་དོན་དུ་འདོད། །སྦྱོར་མཐོང་སྒོམ་ལ་ཉི་ཤུ་བཅུ་དྲུག་བརྒྱད། །སྦྱོར་ལམ་བཞིར་ཡང་བཅུ་གཅིག་དྲུག་གཉིས་གཅིག །མཐོང་ལམ་སྐད་ཅིག་བཅུ་དྲུག་གསུངས་པ་ནི། །ཤེས་བཟོད་བཅུ་དྲུག་ལག་རྗེས་ལུས་ངག་གི །བྱ་བར་རྒྱུ་ཡི་མིང་གིས་བཏགས་པ་འོ། །རེ་རེར་རྣམ་པ་རྟགས་དང་མཚན་མ་གསུམ། །དེ་ཡི་ཁྱད་པར་འགྲེལ་ཆེན་གཉིས་ལ་ལྟོས། །མཐོང་ལམ་ལས་འཕྲོས་དབང་པོ་ཉེར་གཉིས་ལ། །ཀུན་བཏུས་བསྡུ་བ་མཛོད་ཀྱི་བཤད་ཚུལ་མང། །སྒོམ་ལམ་ཁྱད་ཆོས་ངོ་བོ་དབྱེ་བ་གསུམ། །དབྱེ་བ་ལས་འཕྲོས་གྲངས་དང་བྱེད་པ་ལ། །རྩོད་པ་སྤོང་ཚུལ་གཉིས་སོ་དང་པོ་ནི། །གྲངས་མེད་ལ་སོགས་བསྟན་པ་ཞེས་སོགས་གསུངས། །འདི་ཡི་བདེན་པ་དབུ་མ་རང་ལུགས་ཀྱི། །བདེན་པ་གཉིས་ལ་འགྲེ་སོགས་འདོད་ཀྱང་མིན། །རྫས་སམ་དངོས་པོ་རང་མཚན་དོན་དམ་དང། །ལྡོག་པ་སྤྱི་མཚན་ཀུན་རྫོབ་བདེན་པ་སྟེ། །དངོས་པོ་གཅིག་ཀྱང་ལྡོག་པ་ཐ་དད་ཕྱིར། །བྱེད་པར་དོན་དམ་ཐ་སྙད་ལ་ལྟོས་པའི། །རྩོད་པ་གཉིས་སོ་བྲི་འཕེལ་དོན་དམ་པར། །མེད་པར་ཐལ་བ་འདོད་པ་
ཁོ་ན་དང། །ཐ་སྙད་དུ་ནི་རེ་རེ་བ་སོགས་ཀྱི། །མིན་ཡང་མ་ངེས་རྟེན་འབྲེལ་ཚོགས་པས་སོ། །ཆོས་སྐུ་འགྲུབ་བྱེད་སྲིད་ཞི་མཉམ་ཉིད་སྦྱོར། །ངོ་བོ་རྗེས་ཐོབ་སོགས་ཀྱི་སྐབས་སུ་ཡང། །བདེན་འཛིན་མངོན་གྱུར་སྐྱེ་བའི་སྐབས་བཅོམ་པའི། །ཆ་ནས་བཞག་པའི་དག་སའི་ཡེ་ཤེས་སོ། །ཁ་ཅིག་སྟོང་ཉིད་རྟོགས་པ་ཁོ་ནར་འདོད། །དག་སའི་བདག་མེད་ཕྲ་རགས་གསུམ་རྟོགས་པའི། །ཡེ་ཤེས་གསུམ་ཡང་ཤེས་རབ་ཆ་ཡིན་ཞིང། །ཆོས་སྐུའི་ལག་རྗེས་གཙོ་བོར་འཇོག་བྱེད་ཕྱིར། །འདིར་གསུངས་རྟགས་འདིས་ཤེས་རབ་ཆ་ཀུན་འགྲུབ། །གསེར་འཕྲེང་ཚོགས་ལམ་ལ་ཡང་སྦྱོར་བ་གསུམ། །སྒོམ་ཚུལ་གསུངས་པར་འཁྲུལ་ནས་ཐོབ་བོ་ཞེས། །ཁ་ཅིག་འདོད་ཀྱང་མི་འཐད་རྗེས་ཀྱི་ཚེ། །བདེན་འཛིན་མངོན་གྱུར་གོ་སྐབས་མ་བཅོམ་ཕྱིར། །རྩོད་ཚུལ་འདི་དག་ཁ་ཅིག་དབུ་སེམས་དང། །ཁ་ཅིག་ཐལ་རང་ཁོ་ནའི་རྩོད་ཚུལ་ཟེར། །ལ་ལ་དེ་གཉིས་མི་འཐད་འདི་དག་ནི། །མདོ་ལས་དངོས་བསྟན་རྩོད་པ་ཡིན་ཕྱིར་ཟེར། །གསུམ་ག་མི་འཐད་འདི་ལ་དོན་སྨྲ་དང། །སེམས་ཙམ་རང་རྒྱུད་པ་ཡིས་རྩོད་ཚུལ་ཏེ། །ཐལ་རང་སེམས་ཙམ་གསུམ་གྱིས་ལན་རེ་ཡང། །ཡོད་པའི་ཕྱིར་ཏེ་གྲུབ་མཐའ་རང་རང་གི །བདེན་གཉིས་འཇོག་མཚམས་ཕྲ་རགས་མི་མཚུངས་ཕྱིར། །མདོར་གསུངས་གྲུབ་མཐའི་རྩོད་ཚུལ་མིན་དགོས་ན། །གྲུབ་མཐའི་རྩོད་ཚུལ་མདོ་དོན་མིན་པར་འགྱུར། །ཁ་ཅིག་གཞན་གསོད་རྨིས་པ་མངོན་ཞེན་གྱིས། །བསད་པས་སྲོག་གཅོད་ལས་ལམ་རྫོགས་པར་སྨྲ། །རྨི་ལམ་མི་ལ་སེམས་མེད་ཕྱིར་ན་དེ། །མི་འཐད་ཕ་མ་བསད་པར་ཐལ་བར་འགྱུར། །དེ་ཕྱིར་ཕྱི་ནས་ལས་ལམ་རྫོགས་གསུངས་པ། །གནོད་སེམས་བྱས་བསགས་ཚང་བ་ཡིན་ནམ་དཔྱད། །རོང་སྟོན་དེར་སྡིག་
གསོག་ན་ཕམ་པ་ཡང། །འབྱུང་ཞེས་རྩོད་དེ་བཅས་དབང་མ་དགོངས་སོ། །འདི་ལས་འཕྲོས་ཏེ་མདོར་གསུངས་ཀླན་ཀ་ནི། །ལས་མེད་ལས་འབྲས་དོན་དམ་ཐལ་བ་དང། །ལུང་འགལ་རྨི་ལམ་ལས་གསོག་ཐལ་བ་བཞི། །ཉིན་ཡང་ལས་མེད་ཀླན་ཀ་དང་པོ་འོ། །དོན་དམ་དུ་འདོད་ཀུན་རྫོབ་ཏུ་ན་དཔེ། །མ་གྲུབ་ཞེན་པས་གསོས་ན་བྲི་འཕེལ་ཕྱིར། །འོ་ན་རྨི་ལམ་ལས་ཀྱང་བྲི་འཕེལ་དུ། །འགྱུར་ཕྱིར་དོན་དམ་ཐལ་བ་གཉིས་པ་འོ། །ལས་ནི་དམིགས་བཅས་སྐྱེ་ཕྱིར་མངོན་ཞེན་གྱིས། །འཕེལ་བ་བདེན་ཕྱིར་མ་ཡིན་རྫུན་ཕྱིར་མིན། །གཉིས་པར་བརྒྱད་སྟོང་བདེ་གཤེགས་ལས་གསོག་འཕངས། །དམིགས་བཅས་སྐྱེ་ན་མདོ་ལས་ཆོས་རྣམས་ཀུན། །དབེན་གསུངས་ལུང་འགལ་ཀླན་ཀ་གསུམ་པ་འོ། །དབེན་པ་དོན་དམ་སྐྱེ་བ་རྫུན་ཕྱིར་རུང། །རྨི་ལམ་ལས་ལམ་རྫོགས་འགྱུར་བཞི་པ་སྟེ། །རབ་འབྱོར་མ་འོངས་རྒྱལ་འབྱུང་དོན་ཡོད་ཕྱིར། །བྱམས་པར་ཁ་འཕངས་དེས་ཀྱང་ཀླན་ཀ་ཡི། །འཁོར་གསུམ་མི་དམིགས་གསུངས་ཏེ་དོན་གྱི་ལན། །དེ་ནས་ལོངས་སྤྲུལ་འགྲུབ་བྱེད་ཞིང་དག་དང། །ཐབས་མཁས་གཙོར་བསྟན་ཀུན་ཀྱང་ཚོགས་གཉིས་འབྲས། །ཁྱད་པར་ཐབས་མཁས་འབྲས་བུ་བདུད་ལས་རྒྱལ། །བདུད་ཀྱང་བཞི་སྟེ་གང་ཞིག་འཆི་བ་ནི། །ཉེ་བར་ལེན་པའི་ཕུང་པོ་ཕྲ་རགས་དང། །གང་གིས་འཆི་བ་ཉོན་མོངས་བག་ཆགས་བཅས། །འཆི་བའི་ངོ་བོ་ཕྲ་རགས་འཆི་བདག་བདུད། །དེ་ལས་འདའ་བའི་བར་གཅོད་འདོད་ལྷ་དང། །དེ་ཡི་བྱེད་པ་ཅི་རིགས་ལྷའི་བུའི་བདུད། །ཁ་ཅིག་བདུད་བཞི་རྒྱུན་ཆད་མི་རིགས་ཏེ། །འདོད་ལྷ་དེ་ནི་སངས་རྒྱས་འགྱུར་ཕྱིར་ཟེར། །མ་ཁྱབ་ངན་འགྲོ་རྒྱུན་ཆད་གསུངས་
ཕྱིར་རོ། །བདུད་བཞི་རགས་པ་ཙམ་ལས་འདའ་ཚུལ་ནི། །ཐེག་དམན་ལྷག་མེད་ཚེ་དང་དགྲ་བཅོམ་ཚེ། །གཉིས་ལས་རྣམ་གྲོལ་ཚེ་དང་མཐོང་ལམ་ཚེ། །རིམ་བཞིན་ཕྱི་མ་ཐེག་ཆེན་སྦྱོར་ལམ་དུས། །གཞན་གསུམ་ས་བརྒྱད་ཚེ་འོ་ཁ་ཅིག་གིས། །རགས་པ་མི་སྦྱོར་ཐེག་དམན་གང་ཟག་བཞིར། །སྔར་བཞིན་བཤད་པ་མི་རིགས་བདུད་བཞིའི་གཡུལ། །གཅིག་ཅར་བཅོམ་དང་ལྷུན་གྲུབ་འཕྲིན་ལས་ཀྱི། །གཏེར་མངའ་སྐུ་གསུམ་མངོན་གྱུར་དུས་མཉམ་ཕྱིར། །ཚུལ་འདིར་འབད་པ་ལས་བྱུང་ལེགས་བྱས་མཐུས། །ཐོས་པའི་རྗེས་འཇུག་སྒྲུབ་པ་མཐར་ཕྱིན་ཅིང། །ཁྱད་པར་བྱམས་མགོན་ཉིན་བྱེད་ཤར་བའི་ཚེ། །གསུང་གི་བདུད་རྩིའི་རོ་ཡིས་ཚིམ་པར་ཤོག ། ༈ ཤེས་བྱའི་འཁོར་ལོ་ཡངས་པའི་འཆི་མེད་ལམ། །བགྲོད་པའི་མཁྱེན་དཔྱོད་ཟླ་ཤེལ་འཛུམ་རླབས་ཅན། །ལེགས་བཤད་ག་བུར་ཐིགས་པ་འབུམ་གཡོ་བ། །དཔལ་ལྡན་བླ་མ་སྙིང་གི་མུན་སེལ་རྒྱལ། །སྐབས་བཞི་པའི་ཚིག་དོན་ཀུན་ཚང་ཞིང། དཀའ་གནད་རྣམས་གསལ་བར་ཕྱེ་སྟེ་མདོར་བསྡུས་པ་འདི་ལྟ་བུ་ཞིག་དགོས་ཞེས་གསོལ་བ་ཡང་ཡང་བཏབ་པ་བཞིན། ༸རྗེ་བླ་མ་མཚན་བརྗོད་པར་དཀའ་བ་དཀོན་མཆོག་བསྟན་པའི་སྒྲོན་མེ་དཔལ་བཟང་པོ་ཉིད་དགུང་ལོ་ཉེར་ལྔ་བཞེས་པ་མེ་རྟའི་ལོར་ལྷ་ལྡན་མཚན་བཏགས་གནང་ནས་མདོ་སྨད་དུ་ཕེབས་ཁར་ཕེབས་རྒྱུའི་གྲ་སྒྲིག་དང། དོན་གཉེར་བ་གྲངས་མེད་པ་ལ་འདོད་ཆོས་མང་པོ་གནང་དགོས་པས་བྲེལ་བ་ཤིན་ཏུ་ཆེ་སྟབས་ཕྱག་དཔེ་ལ་གསར་དུ་གཟིགས་ལོང་མ་བྱུང་ཡང་འཕྲལ་དུ་ཐུགས་ལ་གང་བཞུགས་རྣམས་སྒོ་མང་བླ་མ་སངས་རྒྱས་རྡོ་རྗེའི་སྐུ་སྐྱེ་གྲགས་པ་རྒྱལ་མཚན་བདག་ལ་དཔལ་ལྡན་འབྲས་སྤུངས་ཆོས་སྡེ་ཆེན་པོར་འཛིན་ཆོས་སུ་བརྩེ་བས་རྗེས་སུ་གནང་བ་ཡིན་ནོ། །རྒྱལ་བསྟན་སྤྱི་
དང་འཇམ་མགོན་བཤད་སྒྲུབ་བསྟན། །འཕེལ་རྒྱས་འགྲོ་ལ་བདེ་སྐྱིད་འབྱུང་བའི་སླད། །དགའ་བ་བརྒྱ་ལྡན་ཕོ་བྲང་གན་མཛོད་ནས། །ཆོས་སྦྱིན་འཛད་མེད་གངྒའི་རྒྱུན་འདི་སྤེལ། །སརྦ་མངྒ་ལཾ།། །།