བསྟན་འབར་མའི་འགྲེལ་པ་ལེགས་བཤད་བསྟན་པའི་སྒྲོན་མེ།
བསྔོ་བའི་རྒྱལ་པོ་བསྟན་འབར་མའི་དགོངས་དོན་རྒྱ་ཆེར་འགྲེལ་པ་ལེགས་བཤད་བསྟན་པའི་སྒྲོན་མེ་ཞེས་བྱ་བ་བཞུགས་སོ། །
རྨད་བྱུང་ཐུགས་རྗེ་ཆེན་པོའི་དབང་གྱུར་ཏེ། །ཕྱིན་དྲུག་བསྡུ་བཞིའི་སྤྱོད་པ་མཐར་སོན་པས། །མི་འཇིགས་བཞི་ལྡན་གོ་འཕང་མཆོག་བརྙེས་པ། །སྟོན་པ་མཉམ་མེད་དེ་ལ་མགོས་ཕྱག་འཚལ། །གང་གིས་མཐའ་ཡས་བསྐལ་པར་རབ་བསྒྲུབས་པ། །མཁའ་མཉམ་འགྲོ་བའི་སྡུག་བསྔལ་མུན་སེལ་ཞིང། །མངོན་མཐོ་ངེས་ལེགས་ལམ་བཟང་གསལ་བྱེད་མཆོག །བསྟན་པ་རིན་ཆེན་སྒྲོན་མེ་འདི་ཁོ་ན། །དེ་ཉིད་རིང་དུ་འབར་བར་སྨོན་པ་ནི། །དུས་གསུམ་རྒྱལ་བའི་བཞེད་དགོངས་མཐར་ཐུག་དང། །རྣམ་དག་སྨོན་པའི་ཆུ་བོ་མ་ལུས་པ། །གཅིག་ཏུ་འཁྱིལ་པའི་ཡིད་བཞིན་རྒྱ་མཚོ་ཡིན། །དེ་ཕྱིར་ལྷ་མིའི་སྟོན་པ་མཆོག་དེ་ཡི། །དཔལ་གྱི་མགུར་ནས་ལེགས་གསུང་སྨོན་ཚིག་གི །དཔག་བསམ་མྱུ་གུ་དོན་གྱི་ཡལ་གའི་ཕྱོགས། །རྫོགས་པའི་དགེ་མཚན་ཀུན་ཏུ་སྤྲོ་བར་བྱ། །དེའང་
བསྐལ་བཟང་རྣམ་འདྲེན་བཞི་པ་མཉམ་མེད་ཤཱཀྱའི་རྒྱལ་པོ་དེ་ཉིད་ཀྱིས་བསྐལ་པ་ཆེན་པོ་གྲངས་མེད་པ་དུ་མར་བྱ་དཀའ་བའི་སྤྱོད་པ་དཔག་ཏུ་མེད་པ་ཉམས་སུ་བཞེས་ཏེ། བླ་ན་མེད་པའི་བྱང་ཆུབ་ཀྱི་གོ་འཕང་མངོན་དུ་མཛད་པའང། ཉན་རང་རྣམས་ཀྱིས་ཞི་བདེ་བསྒྲུབས་པ་བཞིན་དུ་རྒྱུ་དང་འབྲས་བུའི་གནས་སྐབས་གང་དུའང་རང་དོན་ཡིད་བྱེད་ཀྱི་དྲི་མ་ཕྲ་མོ་ཙམ་ཡང་མེད་པར་སེམས་ཅན་གྱི་དོན་འབའ་ཞིག་ཡིན་ལ། སེམས་ཅན་གྱི་དོན་ཡང་ཉི་ཚེ་བ་ཙམ་གྱིས་མི་ཆོག་པས་ཐབས་ཀྱི་རྣམ་པ་ཡོངས་སུ་རྫོགས་པ་ནི་རྒྱལ་བའི་སྲས་པོ་ཞི་བ་ལྷས། འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་ཞེས་དང་། སྔགས་རིམ་ཆེན་མོ་ལས། བསྟན་པ་ཁོ་ན་ལྷར་བཅས་འགྲོ་བ་ཡི། །བདེ་ལེགས་ཀུན་གྱི་རྩ་བར་ཡིད་ཆེས་ནས། །ཞེས་
གསུངས་པ་ལྟར། སངས་རྒྱས་ཀྱི་བསྟན་པ་ཁོ་ན་སེམས་ཅན་མཐའ་དག་གི་སྡུག་བསྔལ་མ་ལུས་པ་སེལ་བའི་ཐབས་དང་། བདེ་བ་མ་ལུས་པ་སྒྲུབ་པའི་ཐབས་སུ་གྱུར་པ་ཡིན་ཏེ། འགྲོ་བ་རྣམས་ཐོག་མེད་ནས་ལྷན་སྐྱེས་སུ་གོམས་པ་ནི་དུག་གསུམ་གྱི་ཕྱོགས་ཁོ་ན་ཡིན་པས། དེའི་དབང་གིས་སྡུག་བསྔལ་འབའ་ཞིག་ལས་མི་འབྱུང་ལ། འབྲས་བུ་བདེ་བའི་ཆ་ཐམས་ཅད་ནི་རྒྱུ་དགེ་བ་འབའ་ཞིག་ལས་འབྱུང་ཞིང་། དེའི་སྒྲུབ་ཚུལ་རང་སྟོབས་ཀྱིས་ཤེས་མི་ནུས་པས། སངས་རྒྱས་ཀྱི་བསྟན་པ་འབའ་ཞིག་ལ་བརྟེན་ནས་བླང་དོར་གྱི་རྣམ་དབྱེ་ཤེས་ཤིང་ལག་ཏུ་བླང་དགོས་པའི་ཕྱིར་རོ། །དེས་ན་རྒྱལ་བ་ཀུན་གྱི་དགོངས་བཞེད་མཐར་ཐུག་པ་དང། ལུས་ཅན་ཀུན་གྱི་འདོད་དོན་མ་ལུས་པ་འགྲུབ་པའི་སྒོ་གཅིག་པུར་གྱུར་པ་ཐུབ་པའི་བསྟན་པ་རིན་པོ་ཆེ་ཡུན་དུ་གནས་པའི་ཕྱིར་སྨོན་པའི་ཚིགས་སུ་བཅད་པ་བསྟན་འབར་མ་ཞེས་ཡོངས་སུ་གྲགས་པ་འདི་ཉིད་ཀྱི་དོན་འཆད་པ་ལ་གསུམ། རྟོགས་ལྡན་འཇུག་པའི་ཡན་ལག་ཏུ་བསྔོ་བའི་དགོས་པ་བཤད་པ། དགོས་པ་དེ་ལྡན་གྱི་བསྔོ་བ་ཇི་ལྟར་མཛད་ཚུལ་བཤད་པ། བསྔོ་བའི་གཞུང་གི་ཚིག་དོན་དངོས་བཤད་པའོ། །དང་པོ་ལ་བསྔོ་བ་སྤྱིའི་དགོས་པ་དང་། ཁྱད་པར་དུ་བསྟན་པ་རྒྱས་པའི་ཕྱིར་བསྔོ་བའི་དགོས་པ་བཤད་པ་གཉིས། དང་པོ་ནི། བརྒྱད་སྟོང་འགྲེལ་ཆེན་ལས། ཡོངས་སུ་བསྔོ་བ་ནི་ཆུད་མ་ཟོས་པ་ཡིན་ཏེ། ཆོས་ཀྱི་དབྱིངས་དང་འདྲ་བར་ཟད་པ་མེད་པའི་ཕྱིར་རོ། །ཞེས་
དང་། འགྲེལ་ཆུང་དོན་གསལ་ལས། བསྔོ་བ་ཡིད་ལ་བྱེད་པས་ནི་གསེར་མགར་གྱིས་རྒྱན་ལ་སོགས་པ་བཞིན་དུ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཡན་ལག་ཏུ་བྱེད་དོ། །ཞེས་དགེ་བའི་རྩ་བ་ཆུད་མི་ཟ་ཞིང་གོང་དུ་འཕེལ་བའི་ཐབས་བླ་ན་མེད་པར་བསྔགས་ལ། མདོ་ལས་ཀྱང། ཇི་ལྟར་རྒྱ་མཚོ་ཆེ་ནང་ཆུ་ཐིགས་ལྷུང། །རྒྱ་མཚོ་མ་ཟད་བར་དུ་དེ་མི་འཛད། །དེ་བཞིན་བྱང་ཆུབ་ཡོངས་བསྔོས་དགེ་བ་ཡང། །བྱང་ཆུབ་མ་ཐོབ་བར་དུ་དེ་མི་འཛད། །ཅེས་གསུངས་སོ། །ལུང་འདི་ཉིད་བློ་གྲོས་རྒྱ་མཚོས་ཞུས་པའི་མདོ་ལས་འབྱུང་བར་གྲགས་ཆེའང་། བོད་དུ་འགྱུར་བའི་མདོ་དེར་མི་སྣང་ལ། བློ་གྲོས་མི་ཟད་པའི་མདོར་དོན་དེ་ཇི་ལྟ་བ་ཚིག་ལྷུག་ཏུ་འབྱུང་བས་བརྟག་དགོས། སྤྱིར་དགེ་བ་སྒྲུབ་ཚུལ་ཕྱི་རོལ་པའི་གཞུང་དུའང་བཤད་མོད་ཀྱང་། སེམས་ཅན་གྱི་དོན་དུ་བསྔོ་བས་ཁ་བསྒྱུར་བའི་ཐབས་མཁས་འདི་ནི་རྒྱལ་བའི་བསྟན་པ་འབའ་ཞིག་གི་ཁྱད་ཆོས་ཡིན་ཏེ། ཁྱད་པར་འཕགས་བསྟོད་ལས། བསོད་ནམས་ཞེས་པའི་ཚོགས་དག་ནི། །སེམས་ཅན་རྣམས་ལ་ཡོངས་བསྔོ་བར། །བཅོམ་ལྡན་ཁྱོད་ཀྱིས་གང་གསུངས་པ། །དེ་གཞན་བསྟན་བཅོས་ལས་མ་བཤད། །ཅེས་འབྱུང་བ་ལྟར་རོ། །དེར་མ་ཟད་རང་དོན་གྱི་འཁྲི་བ་མེད་པར་གཞན་དོན་འབའ་ཞིག་ཏུ་བསྔོ་བ་ནི་ཐེག་ཆེན་ཁོ་ནའི་སྒོས་ཆོས་ཡིན་པས། ཉན་ཐོས་ཐེག་པ་དེ་
ལས་ནི། །བྱང་ཆུབ་སེམས་དཔའི་སྨོན་ལམ་དང། །སྤྱོད་པ་ཡོངས་བསྔོ་མ་བཤད་དེས། །བྱང་ཆུབ་སེམས་དཔའ་ག་ལ་འགྱུར། །ཞེས་གསུངས་ལ། སྤྱོད་འཇུག་ཏུ། བདོག་པ་ཐམས་ཅད་འབྲས་བཅས་ཏེ། །སྐྱེ་བོ་ཀུན་ལ་བཏང་སེམས་ཀྱིས། །སྦྱིན་པའི་ཕ་རོལ་ཕྱིན་གསུངས་ཏེ། །ཞེས་ལུས་ལོངས་སྤྱོད་གཏོང་བར་མ་ཟད། དེ་དག་བཏང་བའི་དགེ་བའང་གཞན་དོན་ཁོ་ནར་བསྔོས་ཏེ་ཡིད་ཀྱིས་སེམས་ཅན་ལ་གཏོང་བ་ནི་སྦྱིན་པའི་ཕར་ཕྱིན་ཡོངས་སུ་རྫོགས་པའི་སྒོ་བླ་ན་མེད་པར་བསྔགས་པའང་རྩ་བ་འདི་ལ་ཐུག་གོ །འོ་ན་བསྔོ་བ་དང་སྨོན་ལམ་ལ་ཁྱད་པར་ཅི་ཡོད། འདི་དེ་གཉིས་ཀྱི་གང་ཡིན་སྙམ་ན། གཙང་ཆུང་ཆོས་གྲགས་སོགས་ཀྱིས། གང་གིས་བསྔོ་བའི་རྒྱལ་པོ་འདི་ཐོས་ནས། །ཞེས་སོགས་ལ་བརྟེན་ཏེ་དེ་གཉིས་དོན་གཅིག་པར་འདོད་ཀྱང་། དབུས་མཐའ་ལས། མི་ཟད་པ་དང་རྟག་འཇུག་དང། །ཞེས་པའི་ཐད་ཀྱི་དབྱིག་འགྲེལ་ལས། ཡོངས་སུ་བསྔོ་བས་སྦྱིན་སོགས་ཀྱི་དགེ་བ་མི་ཟད་པར་བྱེད་དོ། །སྨོན་ལམ་གྱིས་ནི་སྦྱིན་སོགས་བྱེད་པ་དང་མཐུན་པའི་སྐྱེ་བ་ཡོངས་སུ་འཛིན་པས་ཚེ་རབས་ཐམས་ཅད་དུ་སངས་རྒྱས་འབྱུང་བ་མཉེས་པར་བྱེད་ཅིང་སྦྱིན་སོགས་ཀྱི་བྱ་བ་ལ་རྟག་ཏུ་འཇུག་པ་འཐོབ་བོ། །ཞེས་བསྔོ་བས་སྔར་བྱས་ཀྱི་དགེ་བ་སྤེལ་བ་དང་། སྨོན་ལམ་ནི་སླར་དགེ་བ་ལ་འཇུག་པའི་རྒྱུར་འགྱུར་བས་བྱེད་ལས་ཀྱི་སྒོ་ནས་སོ་སོར་གསུངས་པ་དང་། སྤྱོད་འཇུག་དར་ཊཱིཀ་ལས། བསྔོ་བ་དང་སྨོན་ལམ་ཁྱད་པར་ཆེར་མེད་མོད་ཀྱི། འདོད་བྱའི་འབྲས་བུ་དོན་གཉེར་གྱི་འདུན་པས་ཁྱད་པར་དུ་བྱས་པ་སྨོན་ལམ་དང་། རྒྱུའི་དགེ་བ་རྣམས་འབྲས་བུ་དེའི་རྒྱུར་འགྱུར་
བའི་འདུན་པས་ཁྱད་པར་དུ་བྱས་པ་བསྔོ་བའོ། །ཞེས་སོགས་ཁུངས་ཐུབ་དུ་མས་སྨོན་ལམ་ལ་བསྔོ་བྱའི་རྫས་ཁྱད་གཞིར་བྱས་པས་མ་ཁྱབ་ཅིང། བསྔོ་བ་ལ་བསྔོ་བྱའི་རྫས་དེ་ཉིད་ཁྱད་པར་གྱི་གཞིར་བཟུང་ནས། དེའི་སྟོབས་ཀྱིས་འདི་དང་འདི་ལྟར་གྱུར་ཅིག་ཅེས་སྨོན་པ་ཞིག་དགོས་པས། སྨོན་ལམ་དང་བསྔོ་བ་གཉིས་སྤྱི་དང་བྱེ་བྲག་གི་ཚུལ་ལྟ་བུར་གསུངས་པ་དེ་དག་གང་ལྟར་ནའང་། གཞུང་འདི་ནི་བསྔོ་སྨོན་གཉི་གར་འཇོག་དགོས་པར་མངོན་ནོ། །གཉིས་པ་ཁྱད་པར་དུ་བསྟན་པ་རྒྱས་པའི་ཕྱིར་བསྔོ་བའི་དགོས་པ་ནི། བུ་མོ་དཔལ་ཕྲེང་གིས་ཞུས་པའི་མདོ་ལས། བཅོམ་ལྡན་འདས་བྱང་ཆུབ་སེམས་དཔའི་སྨོན་ལམ་གངྒཱའི་ཀླུང་གི་བྱེ་མ་སྙེད་གང་ལགས་པ་དེ་ཐམས་ཅད་ཀྱང་འདི་ལྟར་དམ་པའི་ཆོས་ཡོངས་སུ་གཟུང་བའི་སྨོན་ལམ་ཆེན་པོ་གཅིག་གི་ཁོངས་སུ་འདུས་ཤིང་ཁོངས་སུ་ཆུད་དེ། བཅོམ་ལྡན་འདས་དམ་པའི་ཆོས་ཡོངས་སུ་འཛིན་པ་ནི་དེ་ལྟར་ཡུལ་ཆེ་བ་ལགས་སོ། །ཞེས་དང། བཅོམ་ལྡན་འདས་དམ་པའི་ཆོས་ཡོངས་སུ་འཛིན་པ་ནི་ཆོས་ཀྱི་སྒོ་བརྒྱད་ཁྲི་བཞི་སྟོང་སྡུད་པ་ལགས་སོ། །ཞེས་སོགས་གསུངས་པ་ལྟར། གང་སྨོན་པའི་ཡུལ་དུ་གྱུར་པ་དེ་ཐམས་ཅད་སངས་རྒྱས་ཀྱི་བསྟན་པ་ལུང་དང་རྟོགས་པའི་ཆོས་ཁོ་ན་ལ་བརྟེན་ནས་འབྱུང་དགོས་པས། རྩ་བ་དེ་ཉིད་རྒྱས་པའི་དོན་དུ་བསྔོས་ན་ཡན་ལག་གཞན་ཐམས་ཅད་འགྲུབ་པས། དོན་འདི་ལ་དགོངས་ནས་རྗེ་བདག་ཉིད་ཆེན་པོས་ཀྱང་། རྒྱལ་སྲས་སྨོན་ལམ་གངྒཱའི་ཀླུང་རྣམས་ནི། །དམ་ཆོས་འཛིན་པའི་སྨོན་ལམ་ནང་འདུས་
པར། །གསུངས་ཕྱིར་དགེ་རྩ་ཇི་སྙེད་བསགས་པ་ནི། །ཀུན་ཀྱང་ཐུབ་བསྟན་རྒྱས་པའི་རྒྱུ་རུ་བསྔོས། །ཞེས་གསུངས་སོ། །ལུང་དང་རྟོགས་པའི་དམ་ཆོས་འཛིན་པ་ནི་དེ་ལྟར་དོན་ཆེ་བའི་རྒྱུ་མཚན་གྱིས་ཕན་ཡོན་ཡང་དགེ་བའི་རྩ་བ་གཞན་ཐམས་ཅད་ལས་ལྷག་པར་གསུངས་ཏེ། དེ་བཞིན་གཤེགས་པའི་སྐུའི་གསང་བའི་མདོ་ལས། སེམས་ཅན་ཀུན་གྱི་བསོད་ནམས་ཀྱི། །ཕུང་པོ་ཇི་སྙེད་ཡོངས་བཟུང་བ། །དེ་སྙེད་བྱང་ཆུབ་སེམས་དཔའ་ཡི། །བྱང་ཆུབ་སེམས་ལ་རབ་ཏུ་འབྱུང། །བྱང་ཆུབ་སེམས་ཀྱི་བསོད་ནམས་ཀྱི། །ཕུང་པོ་ཇི་སྙེད་བརྗོད་པ་བས། །དམ་པའི་ཆོས་ནི་ཡོངས་འཛིན་ན། །དེ་ནི་བསོད་ནམས་ཆེས་མང་ངོ་། །དམ་ཆོས་འཛིན་པའི་བསོད་ནམས་ནི། །སངས་རྒྱས་ཀུན་གྱིས་ནན་ཏན་དུ། །བསྐལ་པ་བྱེ་བར་བརྗོད་མཛད་ཀྱང། །མཐའ་མར་ཕྱིན་པར་འགྱུར་མ་ལགས། །ཞེས་ཕན་ཡོན་ཚད་ལས་འདས་པར་གསུངས་པའི་ཚུལ་ལ་ཡིད་ཆེས་བསྐྱེད་དེ་འདུན་པ་ཤུགས་དྲག་པོའི་སྒོ་ནས་སྨོན་པ་ཚུན་ཆད་ཀྱིས་དེའི་རྗེས་སུ་སློབ་པར་བྱ་དགོས་སོ། །གཉིས་པ་དགོས་པ་དེ་ལྡན་གྱི་བསྔོ་བ་ཇི་ལྟར་མཛད་པའི་ཚུལ། ཐུབ་དབང་ཐུགས་རྗེའི་བདག་ཉིད་ཆེན་པོ་དང་ལྡན་པ་དེ་ཉིད་ཀྱིས་སློབ་པའི་གནས་སྐབས་སུ་ཚོགས་གཉིས་ཀྱི་སྤྱོད་པ་མཐའ་ཡས་པ་བསྒྲུབས་པ་རྣམས་བསྟན་པ་རྒྱས་པའི་ཕྱིར་བསྔོས་པར་མ་ཟད། སྟོན་པ་རང་ཉིད་སྐྱེ་དགུ་ཚེ་ལོ་བརྒྱ་པའི་དུས་སུ་བྱོན་ནའང་། དགུང་ལོ་བརྒྱད་ཅུ་ལས་མ་བཞུགས་པར་སྐུ་ཚེའི་ལྷག་མའང་བསྟན་པ་གནས་པའི་རྒྱུར་བྱིན་གྱིས་བརླབས་ནས་དེའི་དོན་དུ་བསྟན་འབར་མ་གཟུངས་དང་བཅས་པ་འདི་ཉིད་གསུངས་པ་ཡིན་ཏེ། ཟླ་བ་སྙིང་པོའི་མདོར། འདི་ནས་
སངས་རྒྱས་ཟླ་བ་ཞེས་སོགས་ཀྱིས་བསྟན་པའི་གནས་ཚད་དང་འཇིག་ཚུལ་སོགས་དྲིས་པ་ལ། ང་ལ་ལྷན་ཅིག་ཚོགས་ཉོན་ས་གསུམ་ནི། །ཞེས་སོགས་ཀྱིས་དགེ་སྦྱོང་ཁྱིམ་པའི་ལས་ལ་བརྩོན་པ་སོགས་བསྟན་པ་ཉམས་པ་དང་། དེའི་དབང་གིས་འཇིག་རྟེན་རྒུད་པར་འགྱུར་བའི་རྒྱུ་མང་དུ་གསུངས་ལ། མི་བཟད་དེ་ཡི་ཚེ་ན་ནི། །ཆོས་གནས་ཞི་བས་བདེ་འགྱུར་ཞིང། །ཞེས་པ་ནས། བྱང་ཆུབ་མྱུར་དུ་འཐོབ་པར་འགྱུར། །ཞེས་བསྟན་པ་སླར་གསོ་བ་དོན་ཆེ་ཚུལ་དང། བྱམས་པ་ལ་སོགས་སྐལ་བ་ནི། །ཞེས་སོགས་ཀྱིས་སེམས་དཔའ་ཆེན་པོ་དེ་དག་གིས་སྙིགས་མའི་དུས་བསྟན་སླར་གསོ་བ་དཀའ་འང་ཅི་ནུས་སུ་སྤེལ་བར་ཞལ་གྱིས་བཞེས་ལ། སླར་ཡང་བཅོམ་ལྡན་འདས་ཀྱིས། སྣང་བ་འཛིན་ཅིང་དཔལ་གྱུར་པ། །ཞེས་པ་ནས། བཏང་སྙོམས་ཅན་དག་འགྲེ་བར་འགྱུར། །ཞེས་པའི་བར་གྱིས་སྤྱིར་བསྟན་པ་ཉམས་པའི་རྒྱུ་དུ་མ་དང་། ཁྱད་པར་དུ་ཀཽ་ཤམྦིའི་རྒྱལ་པོ་བཟོད་དཀའ་དང་། འཛམ་གླིང་གི་རྒྱལ་པོ་གཞན་གསུམ་འཐབ་པའི་རྐྱེན་གྱིས་བསྟན་པ་ནུབ་ཚུལ་སོགས་གསུངས་ལ། དེ་ནས། སྔོན་གྱི་རྒྱལ་བའི་མཛད་པ་བཞིན། །ང་ཡིས་ཕྱི་དུས་བགོས་པར་བྱ། །དོན་དུ་འཚོ་བ་བཏང་བྱས་ནས། །གཟི་མདངས་གསུམ་པོ་བསྲིང་བར་བྱ། །ང་ཡི་ཚེ་འདིའི་ཆ་གསུམ་པ། །སེམས་ཅན་རྒྱུར་ཡང་གཏང་བར་བྱ། །ཞེས་པ་ནས། དེ་ཕྱིར་སྣོད་མིན་སྣོད་འགྱུར་ཕྱིར། །ཆ་གསུམ་པ་ཡི་སྲོག་བཏང་བྱས། །དེ་དག་བདེ་བར་འགྱུར་བ་དང། །ལྷ་དང་མི་རྣམས་འཕེལ་གྱུར་ཅིག །ཅེས་པའི་བར་གྱིས་སྐུ་ཚེའི་ལྷག་མའང་བསྟན་པའི་འཕེལ་རྒྱས་ཀྱི་དོན་དུ་བསྔོས་
ལ། དེ་ནས། སེམས་ཅན་དོན་དུ་བདག་གིས་སྔོན། །ཞེས་སོགས་བསྟན་འབར་མ་ཡོངས་རྫོགས་སྔགས་དང་བཅས་པ་གསུངས་ཏེ། དང་པོ་ཐུགས་བསྐྱེད་པ་ནས་བཟུང་དཀའ་བ་སྤྱད་པ་མཐའ་དག་ཀྱང་བསྟན་པ་རྒྱས་པའི་རྒྱུར་བསྔོ་བར་མཛད་དོ། །འདི་ནི་སྟོན་པའི་མཛད་པ་ཐམས་ཅད་ཀྱི་ནང་ནས་ཀྱང་ངོ་མཚར་རྨད་དུ་བྱུང་བའི་ཁྱད་ཆོས་བླ་ན་མེད་པ་ཞིག་ཡིན་ཏེ། རྟོག་གེ་འབར་བ་ལས། ཆོས་ཀྱི་འཁོར་ལོ་བསྐོར་བ་དང་། ཡོངས་སུ་མྱ་ངན་ལས་འདས་པ་ཆེན་པོ་དང་། དམ་པའི་ཆོས་གནས་པ་ལ་སོགས་པ་སྐལ་བ་དང་ལྡན་པའི་གདུལ་བྱ་རྣམས་ལ་སྟོན་པར་མཛད་དོ། །ཞེས་དང་། ཀུན་མཁྱེན་འཇམ་དབྱངས་བཞད་པའི་སྐབས་བརྒྱད་པའི་མཐའ་དཔྱོད་དུ། འདིར་ཤིང་དྲུང་དུ་གཤེགས་པ་མ་བགྲངས་པར་དམ་པའི་ཆོས་གནས་པ་མཛད་ཆེན་དུ་བགྲང་བའི། ཞེས་པ་ནས། བསྟན་འབར་མ་དང་བསྟན་པ་འབར་བའི་སྔགས་གསུངས་པའི་ཕྱིར། ཞེས་འབྱུང་བ་ལྟར་རོ། །འོན་ཀྱང་རྟོག་གེ་འབར་བའི་སྐབས་གཞན་དུ། དཀའ་བ་སྤྱད་པ་དང་། བྱང་ཆུབ་ཀྱི་སྙིང་པོར་གཤེགས་པ་དང་། བདུད་འདུལ་བ་དང་ཞེས་ལན་དུ་མར་འབྱུང་བས། མཐའ་གཅིག་ཏུ་ཤིང་དྲུང་དུ་གཤེགས་པ་མི་འདྲེན་པར་བཞེད་པའང་མིན་པར་སྣང་སྟེ། མཛད་པ་བཅུ་གཉིས་ཀྱི་འདྲེན་ཚུལ་ལ་ཡོངས་གྲགས་རྒྱུད་བླ་མའི་དངོས་ཟིན་ལྟར་དང་། དེར་ཅུང་ཟད་མི་འདྲ་བ་རིན་ཆེན་ཕྲེང་བ་ལས། ཆོས་ཀྱི་འཁོར་ལོ་བསྐོར་བ་དང། །ལྷ་རྣམས་ཀུན་ལས་བབས་པ་དང། །དེ་བཞིན་དུ་ནི་མྱ་ངན་ལས། །འདས་པ་སྟོན་པའི་མཛད་པ་ཡིན། །ཞེས་ལྷ་ལས་བབས་པ་གཅིག་ཏུ་བགྲང་བ་དང། ཐེག་
བསྡུས་ལས། བཟོའི་གནས་ལ་སྦྱངས་པ་དང་། བདུད་འདུལ་བ་གཉིས་དངོས་སུ་མ་བགྲང་བར། མུ་སྟེགས་ཅན་གྱི་གན་དུ་གཤེགས་པ་དང་། ཞེས་དེ་དག་གི་ལྟ་བ་སུན་དབྱུང་བའི་ཕྱིར་མུ་སྟེགས་ལྷག་སྤྱོད་སོགས་ཀྱི་དྲུང་དུ་ཕེབས་ནས་ཐར་ལམ་ཚོལ་བའི་ཚུལ་བསྟན་པ་གཅིག་ཏུ་བགྲང་། མདོ་འགའ་ཞིག་ཏུ་བསྟན་པ་གནས་པ་གཅིག་ཏུ་བགྲང་ལ། ལ་ལར་བསྟན་པ་ནུབ་པའང་གཅིག་ཏུ་བགྲང་སྟེ། བུ་སྟོན་ཆོས་འབྱུང་ལས། ཐབས་ལ་མཁས་པ་ཞེས་པ་ལ་སོགས་པའི་མདོ་ལས། དམ་པའི་ཆོས་ནུབ་པ་ལ་མཁས་པ་ཞེས་ཆོས་ནུབ་པ་ལའང་མཛད་པ་གཅིག་ཏུ་གསུངས་ཏེ། ཆོས་དོན་དུ་མི་འགྱུར་བ་ན་ནུབ་པར་བསྟན་པས། སེམས་ཅན་ལ་ཆོས་སྤོང་གི་ལས་མི་འབྱུང་བར་བྱ་བའི་ཕྱིར་ཡིན་ཏེ། ཞེས་པ་ལྟ་བུ་ཅི་རིགས་ཡོད་ཅིང། མཆོག་གི་སྤྲུལ་སྐུ་སོ་སོ་ལའང་རང་རང་གི་མཛད་པ་སྟོན་ཚུལ་མི་འདྲ་བ་དུ་མ་གསུངས་པས། རྣམ་པ་གཅིག་ཁོ་ནར་ཁ་ཚོན་གཅོད་མི་དགོས་སོ། །ད་ལྟ་བཀའ་འགྱུར་གྱི་གྲངས་སུ་བཞུགས་པའི་ཟླ་བའི་སྙིང་པོས་ཞུས་པའི་མདོ་འདི་ནི་མགོ་མཇུག་ཏུའང་། ཟླ་བའི་སྙིང་པོས་ཞུས་པའི་མདོ་ལས་བསྟན་པ་གནས་པ་དང་འཇིག་པའི་ཚུལ་ལུང་བསྟན་པ་ཞེས་འབྱུང་བས། མདོ་དེའི་ནང་ནས་ཁོལ་བུར་བཏོན་པ་མ་གཏོགས། མདོ་ཡོངས་རྫོགས་མིན་པར་ཤེས་ལ། འདིར་ཉུང་ངུ་ཞིག་ལས་མེད་ཀྱང་། བུ་སྟོན་ཆོས་འབྱུང་དུ་བམ་པོ་གཉིས་ཞེས་འབྱུང་བས། སྔར་འདི་ལས་མང་བ་ཞིག་ཀྱང་འགྱུར་ཡོད་པར་སྣང་ངོ་། །ཇོ་བོས་མདོ་ཀུན་བཏུས་སུ་མདོ་དེའི་ལུང་བམ་པོ་གཅིག་ལྷག་པའི་ཚོད་ཙམ་དྲངས་ཡོད་པས།
བསྟན་འབར་མ་སྔགས་དང་བཅས་པ་དེའི་ནང་ནས་བླངས་པ་ཡིན་ལ། རྒྱལ་པོ་བཞིས་གཡུལ་བཀྱེ་ཚུལ་སོགས་ཕྱོགས་ཙམ་འདྲའང་མི་མཐུན་པ་མང་བར་སྣང་བས། གཉིས་ཀ་ཚིགས་བཅད་ལྷུག་སོགས་ཀྱི་འགྱུར་ཁྱད་ཙམ་ཡིན་ནམ། མདོ་མི་གཅིག་པ་གང་ཡིན་དཔྱད་དགོས་པར་སྣང་ངོ་། །གསུམ་པ་གཞུང་དངོས་ཀྱི་དོན་ལ། དང་པོར་ཐུགས་བསྐྱེད་པའི་སྐབས་ལས་བརྩམས་ཏེ་མདོར་བསྟན་པ། བར་དུ་ཚོགས་བསགས་པའི་སྐབས་ལས་བརྩམས་ཏེ་རྒྱས་པར་བཤད་པ། མཐར་སངས་རྒྱས་པའི་སྐབས་ལས་བརྩམས་ཏེ་དོན་བསྡུ་བ་གསུམ། དང་པོ་ནི། སེམས་ཅན་དོན་དུ་བདག་གིས་སྔོན། །དཀའ་བ་གང་ཞིག་སྤྱད་གྱུར་དང། །བདག་གི་བདེ་བ་བཏང་བ་ཡིས། །བསྟན་པ་ཡུན་རིང་འབར་གྱུར་ཅིག །ཅེས་བྱུང་། དེའང་སངས་རྒྱས་བཅོམ་ལྡན་འདས་ཉིད་ཀྱིས་སྔོན་སློབ་པའི་གནས་སྐབས་སུ་བསྐལ་པ་ཆེན་པོ་གྲངས་མེད་པ་དུ་མར་ཤིན་ཏུ་བྱ་དཀའ་ཞིང་བཟོད་གླགས་མེད་པའི་གདུང་བ་དྲག་པོ་དུ་མ་རང་གི་སྟེང་དུ་བླངས། ཆེས་ཡིད་དུ་འོང་ཞིང་ཉམས་སུ་བདེ་བའི་ཟས་ནོར་ལོངས་སྤྱོད་གཉེན་འཁོར་འབངས་ལ་སོགས་པའི་བདེ་འབྱོར་ཐམས་ཅད་ལྟོས་པ་མེད་པར་གཞན་ལ་གཏོང་བར་མཛད་པ་ནི་སྙིང་རྗེའི་རྩ་བ་ཅན་གྱི་བྱང་ཆུབ་ཀྱི་སེམས་རིན་པོ་ཆེའི་སྟོབས་ཡིན་ཏེ། དད་པའི་སྟོབས་བསྐྱེད་པའི་མདོ་ལས། སྙིང་རྗེ་ཆེན་པོ་ནི་སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཆེད་དུ་སྡུག་བསྔལ་སྐྱེ་བ་མི་ལེན་པ་ཅིའང་མེད་དོ། །བདེ་བ་མི་འདོར་བ་ཅིའང་མེད་དོ། །ཞེས་གསུངས་སོ། །བྱང་ཆུབ་ཏུ་སེམས་བསྐྱེད་ཚུལ་གྱི་ནང་ནས་ཀྱང་། སྤྱོད་འཇུག་ལས་གསང་བའི་དམ་
པ་ཞེས་བྱང་སེམས་དབང་པོ་ཡང་རབ་ཀྱི་ཆོས་སུ་བསྔགས་པ་བདག་གཞན་མཉམ་བརྗེའི་བསམ་པ་ཁྱད་པར་ཅན་གྱི་བྱེད་ལས་ཁོ་ན་ཡིན་ཏེ། རྗེ་བདག་ཉིད་ཆེན་པོས། གང་ཟག་གཞན་ཕལ་མོ་ཆེས་སྙིང་ཐག་པ་ནས་རྗེས་སུ་ཡི་རང་བ་ཙམ་ཡང་བྱ་བར་དཀའ་ལ། འཇིག་རྟེན་ཐམས་ཅད་དང་མི་མཐུན་པའི་གཏམ་གྱི་གཞིར་གྱུར་པ་བདག་པས་གཞན་གཅེས་པའི་བྱང་ཆུབ་ཀྱི་སེམས་ཞེས་སྐབས་དུ་མར་གསུངས་ལ། མཉམ་མེད་ཇོ་བོ་ཆེན་པོས་ཀྱང། སྤྱོད་པའི་མཆོག་འཇིག་རྟེན་དང་མི་མཐུན་པ་ཡིན་ཞེས་གསུངས་ཏེ། འཇིག་རྟེན་ཕལ་པ་རྣམས་ཀྱིས་གང་དོན་དུ་གཉེར་བྱར་བྱེད་པའི་བདེ་དགའ་ཐམས་ཅད་མཆིལ་མའི་ཐལ་བ་བཞིན་དུ་འདོར་ཞིང་། གཞན་གྱིས་ཐོས་ནའང་སྐྲག་པ་སྐྱེ་བའི་དཀའ་ཐུབ་ཀྱི་སྤྱོད་པ་དུ་མར་བུང་བ་པངྨའི་ཚལ་ལ་འཇུག་པ་བཞིན་དུ་དགྱེས་དགུར་གཞོལ་བ་ནི་བདག་པས་གཞན་གཅེས་པའི་བསམ་པ་ཁྱད་པར་ཅན་གྱི་གཞན་དབང་དུ་གྱུར་པ་འབའ་ཞིག་གི་མཐུ་ཡིན་ནོ། །འོ་ན་མདོར་བསྟན་ནི་རྒྱས་བཤད་ཀྱི་དོན་ཐམས་ཅད་ལ་ཁྱབ་པ་ཞིག་དགོས་ལ། དང་པོར་ཐུགས་བསྐྱེད་པ་དེ་ཉིད་གྲངས་མེད་གསུམ་གྱི་ཚོགས་ལ་སོགས་པ་ས་ལམ་གོང་མ་ཐམས་ཅད་ཀྱི་སྔོན་འགྲོ་ཡིན་ཀྱང་ཁྱབ་བྱེད་མ་ཡིན་པས་མདོར་བསྟན་དུ་མི་འཐད་དོ་སྙམ་ན་སྐྱོན་མེད་དེ། དེ་ཐེག་ཆེན་ལམ་གྱི་འཇུག་སྒོ་ཡིན་ཀྱང་ཐོག་མར་འཇུག་པའི་སྒོ་ཙམ་དུ་བྱས་པས་མི་ཆོག་པར། ལམ་གྱི་མགོ་མཇུག་ཐམས་ཅད་དུ་བསམ་པ་ཁྱད་པར་ཅན་དེ་ཉིད་ཁོ་ན་གཞུང་ཤིང་ངམ་གཞིར་བྱས་ནས་འགྲོ་དགོས་པས། རྗེ་བླ་མའི་ཉམས་མགུར་ལས། སེམས་བསྐྱེད་ཐེག་
མཆོག་ལམ་གྱི་གཞུང་ཤིང་སྟེ། །ཞེས་གསུངས་ཤིང་། པཎ་ཆེན་ཐམས་ཅད་མཁྱེན་པས་ཕྱག་ཆེན་རྩ་བ་ལས་ཀྱང་། འཇུག་པའི་སྒོ་དང་གཞུང་ཤིང་ཕྱིར། །ཞེས་ཁྱད་པར་གཉིས་ཀ་གསུངས་སོ། །དེས་ན་མདོར་བསྟན་རྒྱས་བཤད་ཀྱི་ཚུལ་འདི་ལྟར་སྦྱོར་བ་རྒྱལ་བ་བྱམས་པའི་མན་ངག་ཡིན་ཏེ། མདོ་སྡེ་རྒྱན་ལས། གང་ཕྱིར་དང་པོར་ངེས་པར་བྱ་བ་འདི་དཀའ་སྟེ། །དེ་ནི་བསྐལ་པ་སྟོང་ཕྲག་དུ་མར་བསྒྲུབ་པར་དཀའ། །ཞེས་དང་པོ་སེམས་བསྐྱེད་ཀྱི་ས་བོན་འདེབས་པ་དང། བར་དུ་ཚོགས་གཉིས་ཀྱི་སྤྱོད་པས་དང་པོར་བཏབ་པའི་ས་བོན་དེ་ཉིད་སྨིན་ཅིང་རྒྱས་པར་བྱེད་པར་གསུངས་ལ། མངོན་རྟོགས་རྒྱན་ལས་ཀྱང། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་མདོར་བསྟན་གྱི་སྐབས་སུ་སྤྱོད་པའི་རྟེན་གྱི་དབང་དུ་བྱས་པའི་སེམས་བསྐྱེད་གསུངས་ཀྱང་། རྒྱས་བཤད་ཀྱི་ཚེ་སློབ་མི་སློབ་ཀྱི་སྐབས་ཐམས་ཅད་བསྡུས་ཏེ་འགྲེལ་པ་དོན་གསལ་ལས། སེམས་བསྐྱེད་པའི་རབ་ཏུ་དབྱེ་བ་ནི་ལས་དང་པོ་པའི་ས་ནས་བརྩམས་ཏེ་སངས་རྒྱས་ཀྱི་སའི་བར་གྱིས་བསྡུས་པ་ཡིན་ནོ། །ཞེས་གསུངས་པ་ལྟར་རོ། །དེ་ལྟར་ཐུབ་པ་སངས་རྒྱས་བཅོམ་ལྡན་འདས་ཉིད་ཀྱིས་དང་པོར་བྱང་ཆུབ་ཏུ་ཐུགས་བསྐྱེད་པ་ནས་བཟུང་བསྐལ་པ་མཐའ་ཡས་པའི་བར་དུ་རང་གི་སྡུག་བསྔལ་ཁྱད་དུ་བསད་ནས་དཀའ་ཐུབ་ཆེན་པོ་ཉམས་སུ་བཞེས། རང་བདེའི་ཞེན་པ་རྩད་ནས་ཕྱུངས་ཏེ་ལུས་སྲོག་ལོངས་སྤྱོད་ཐམས་ཅད་གཞན་ལ་གཏོང་བར་མཛད་པ་ནི་སེམས་ཅན་རྣམས་འཁོར་བ་ལས་སྒྲོལ་བའི་ཐབས་ཁོ་ན་ཡིན་ཅིང། འགྲོ་བ་འཁོར་བ་ལས་
སྒྲོལ་བྱེད་ཆོ་འཕྲུལ་གཞན་གཉིས་ནི་གནས་སྐབས་སུ་དད་པ་བསྐྱེད་པའི་སྨིན་བྱེད་ཙམ་དུ་འགྱུར་ཡང་གྲོལ་བྱེད་དངོས་གཞིར་མི་འགྲོ་ལ། གྲོལ་བྱེད་དངོས་གཞི་རྗེས་སུ་བསྟན་པའི་ཆོ་འཕྲུལ་གྱི་སྒོ་ནས་གདུལ་བྱའི་རྒྱུད་ལ་ཡང་དག་པའི་ལམ་ཁྱད་པར་ཅན་སྐྱེད་པ་འབའ་ཞིག་ཡིན་པས། དེས་ན་བསྐལ་པ་དུ་མར་ཐུགས་ལ་བརྣག་པའི་དགོངས་པ་མཐར་ཐུག་པ་གདུལ་བྱའི་དོན་སྒྲུབ་པའི་ཐབས་ཀྱི་མཆོག་སྲིད་པའི་འཆིང་བ་འགྲོལ་བྱེད་ལྷག་པའི་བསླབ་པ་གསུམ་དང་། དེ་བརྗོད་བྱར་བྱེད་པ་སྡེ་སྣོད་གསུམ་གྱིས་བསྡུས་པའི་བསྟན་པ་རིན་པོ་ཆེ་འདི་ཉིད་འཁོར་བ་ཇི་སྲིད་གནས་ཀྱི་བར་དུ་རྒྱུན་ཆད་མེད་པར་འབར་ཞིང་གནས་པར་གྱུར་ཅིག །ཅེས་དང་པོར་ཐུགས་བསྐྱེད་པའི་ཚུལ་གྱི་བསམ་པ་ཕུན་སུམ་ཚོགས་པས་བདེན་པ་བདར་ཏེ་སྨོན་ལམ་མཛད་ཅིང་ཤིས་པར་བརྗོད་པ་ཡིན་ནོ། །མཁས་པའི་དབང་པོ་རིན་ཆེན་དོན་གྲུབ་ཀྱིས་བསྟན་འབར་མའི་ཊཱིཀྐར་རྒྱ་འགྲེལ་གྱི་ལུགས་བཞིན་ཚིག་རེ་རེ་ནས་གཏོར་ཏེ་འབྲུ་གཉེར་བའི་བཤད་པ་གནང་འདུག་པས། སེམས་ཅན་ནི་རྣམ་པར་རྟོག་པས་སེམས་པར་བྱེད་ཅིང་དེའི་དབང་དུ་གྱུར་པ་ལས་བཏགས་སོ། །ཞེས་གསུངས་འདུག་ནའང། འཕགས་པའི་ཉི་ཁྲི་སྣང་བར། ཞུམ་པའི་བདག་ཉིད་ཅན་ཡིན་པས་ན་སེམས་ཅན་ནོ། །ཞེས་དང་། རྒྱན་སྣང་ལས། འཇིགས་པའི་བདག་ཉིད་ཅན་ཡིན་པས་ན་སེམས་ཅན་ནོ། །ཞེས་གསུངས་ཤིང་། རྒྱུད་བླ་མར། མ་དག་མ་དག་དག་པ་དང། །ཤིན་ཏུ་རྣམ་དག་གོ་རིམ་བཞིན། །སེམས་ཅན་བྱང་ཆུབ་སེམས་དཔའ་དང། །དེ་བཞིན་གཤེགས་པ་
ཞེས་བརྗོད་དོ། །ཞེས་རིགས་ཀྱི་དྲི་མ་དག་མ་དག་གི་སྒོ་ནས་ཀྱང་སེམས་ཅན་གྱི་སྒྲ་འཇུག་ཚུལ་ཞིག་གསུངས་པས། ངེས་ཚིག་གི་བཤད་པ་དུ་མ་ཞིག་བྱར་ཡོད་པར་སྣང་ངོ་། །ཐུབ་པའི་དབང་པོ་ཉིད་ཀྱིས་ཐོག་མར་ཐུགས་བསྐྱེད་ཚུལ་ཡང། བསྐལ་བཟང་ལས་རྫ་མཁན་གྱི་ཁྱེའུ་སྣང་བྱེད་དུ་གྱུར་པའི་ཚེ་ཤཱཀྱ་ཐུབ་པ་ཆེན་པོའི་དྲུང་དུ་ཐུགས་བསྐྱེད་པ་དང་། ཕུང་པོ་གསུམ་པའི་མདོར་ཚོང་དཔོན་གྱི་བུ་མངོན་དགར་གྱུར་པའི་ཚེ་དེ་བཞིན་གཤེགས་པ་མཛེས་པ་ཆེན་པོའི་དྲུང་དུ་ཐུགས་བསྐྱེད་པ་དང་། པད་དཀར་ལས་བྲམ་ཟེ་རྒྱ་མཚོའི་རྡུལ་དུ་འཁྲུངས་པ་ན་སངས་རྒྱས་རིན་ཆེན་སྙིང་པོའི་དྲུང་དུ་ཐུགས་བསྐྱེད་པ་དང་། གསང་བ་བསམ་གྱིས་མི་ཁྱབ་པར་འཁོར་ལོས་སྒྱུར་བ་ཡུལ་འཁོར་སྲུང་གི་སྲས་དོན་ཀུན་གྲུབ་པར་འཁྲུངས་པའི་ཚེ་དེ་བཞིན་གཤེགས་པ་རིན་ཆེན་སྣ་ཚོགས་བཀོད་པའི་རྒྱལ་པོའི་དྲུང་དུ་བསྐྱེད་པ་དང་། འཁྲི་ཤིང་ལས་རྒྱལ་པོ་རབ་གསལ་དུ་གྱུར་པའི་ཚེ་ཐུགས་བསྐྱེད་པར་གསུངས་པ་བཞིན་དུ་ཨ་བྷྱཱ་ཀ་རས་ཀྱང་བཤད་པ་སོགས་ཚུལ་མི་འདྲ་བ་དུ་མ་ཞིག་འབྱུང་བ་དང། ཐམས་ཅད་ལ་ཐུན་མོང་དུ་གྲགས་ཆེ་བ་ནི་དྲིན་ལན་བསབ་པའི་མདོར་དམྱལ་བའི་ཤིང་རྟ་འདྲེན་པའི་གྱད་དུ་འཁྲུངས་པ་ན་རང་གི་གྲོགས་སྡུག་བསྔལ་གྱིས་མནར་བ་མ་བཟོད་པར། དེའི་སྡུག་བསྔལ་གྱི་སྐལ་བའང་རང་ཐོག་ཏུ་ལེན་པར་དགོངས་པའི་སྒོ་ནས་ཐུགས་བསྐྱེད་པར་བཤད་པ་འདི་ཉིད་ཡིན་ལ། དེ་ནི་འདིའི་དངོས་ཟིན་ལྟར་སེམས་ཅན་གཞན་དོན་དུ་དཀའ་བ་དང་དུ་ལེན་ཅིང། རང་གི་བདེ་དགའ་དེ་ལ་གཏོང་བ་བདག་གཞན་བརྗེ་བའི་སྒོ་ནས་སེམས་བསྐྱེད་ཚུལ་དང་ཤིན་ཏུ་འབྲེལ་ལོ། །གཉིས་པ་བར་དུ་ཚོགས་
བསགས་པའི་སྐབས་ལས་བརྩམས་ཏེ་རྒྱས་པར་བཤད་པ་ལ། རང་རྒྱུད་སྨིན་བྱེད་ཕ་རོལ་ཏུ་ཕྱིན་པ་དྲུག་ལ་བསླབ་ཚུལ་ལས་བརྩམས་པ་དང་། གཞན་རྒྱུད་སྨིན་བྱེད་བསྡུ་བ་བཞི་ལ་བསླབ་ཚུལ་ལས་བརྩམས་པ་གཉིས། དང་པོ་ཕར་ཕྱིན་དྲུག་ཏུ་དབྱེ་བའི་རྒྱུ་མཚན་ལ། རྒྱལ་ཚབ་བྱམས་པ་མགོན་པོས། མངོན་མཐོ་ལ་ལྟོས་པའི་གྲངས་ངེས། དོན་གཉིས་སྒྲུབ་པ་ལ་ལྟོས་པའི་གྲངས་ངེས། གཞན་དོན་རྣམ་པ་ཐམས་ཅད་ལ་ལྟོས་པའི་གྲངས་ངེས། ཐེག་ཆེན་མཐའ་དག་སྡུད་པ་ལ་ལྟོས་པའི་གྲངས་ངེས། ཐབས་ཀྱི་རྣམ་པ་ཡོངས་སུ་རྫོགས་པ་ལ་ལྟོས་པའི་གྲངས་ངེས། བསླབ་པ་གསུམ་ལ་ལྟོས་པའི་གྲངས་ངེས་ཏེ་དྲུག་གསུངས་པ་རེ་རེས་ཀྱང་ལམ་གྱི་གནད་ལ་ངེས་པ་སྟེར་བའི་དགོས་པ་ཆེན་པོ་ཡོད་ལ། དེའི་ནང་ནས་སྐབས་འདིར་ནི་བསླབ་པ་གསུམ་ལ་ལྟོས་པའི་གྲངས་ངེས་ཀྱི་སྟེང་ནས་བཤད་དགོས་ཏེ། ཐུབ་པའི་དབང་པོ་ཉིད་ཀྱིས་གང་གི་དོན་དུ་བསྔོ་བ་མཛད་པའི་བསྟན་པ་རིན་པོ་ཆེ་དེའང་རྟོགས་པའི་བསྟན་པ་བསླབ་པ་གསུམ་དང། དེ་བརྗོད་བྱར་བྱེད་པ་སྡེ་སྣོད་གསུམ་སྟེ་ལུང་རྟོགས་ཀྱི་དམ་ཆོས་དེ་གཉིས་ལས་མ་འདས་པས། རྒྱལ་བ་ཉིད་ཀྱིས་སྔོན་སློབ་པའི་གནས་སྐབས་སུ་བསླབ་པ་གསུམ་པོ་དེ་དག་ལ་ནན་ཏན་དུ་བསླབ་པའི་རྒྱུ་འབྲས་རྟེན་འབྱུང་གི་བདེན་པ་མི་བསླུ་བས། དེ་དང་རྗེས་སུ་མཐུན་པར་རྗེས་འཇུག་གདུལ་བྱ་རྣམས་ཀྱི་རྒྱུད་ལའང་གཙོ་བོ་བསླབ་པ་གསུམ། དེ་བརྗོད་བྱར་བྱེད་པ་སྡེ་སྣོད་གསུམ་དང་བཅས་པའི་ལུང་རྟོགས་ཀྱི་བསྟན་པ་རྒྱས་པའི་ཕྱིར་དུ་བསྔོ་བ་མཛད་པ་ཡིན་པའི་ཕྱིར་རོ། །དེས་ན་མདོ་སྡེ་རྒྱན་ལས།
བསླབ་གསུམ་དབང་དུ་མཛད་ནས་ནི། །རྒྱལ་བས་ཕ་རོལ་ཕྱིན་པ་དྲུག །ཡང་དག་བཤད་དེ་དང་པོ་གསུམ། །ཐ་མ་གཉིས་ནི་རྣམ་པ་གཉིས། །གཅིག་ནི་གསུམ་ཆར་ལ་ཡང་གཏོགས། །ཞེས་པ་ལྟར། ཚུལ་ཁྲིམས་ཀྱི་བསླབ་པའི་ཁོངས་སུ་བསྡུས་ཏེ་ཕར་ཕྱིན་དང་པོ་གསུམ་ལ་བསླབ་ཚུལ། བསླབ་པ་གསུམ་གར་ཁྱད་མེད་དུ་གལ་ཆེ་བ་བརྩོན་འགྲུས་ལ་བསླབ་ཚུལ། ཏིང་ངེ་འཛིན་གྱི་བསླབ་པའི་ངོ་བོ་བསམ་གཏན་ལ་བསླབ་ཚུལ། ཤེས་རབ་ཀྱི་བསླབ་པའི་ངོ་བོ་ཤེས་རབ་ཀྱི་ཕར་ཕྱིན་ལ་བསླབ་ཚུལ་དང་བཞི། དང་པོ་ལ་ཚུལ་ཁྲིམས་ཀྱི་ཚོགས། ཚུལ་ཁྲིམས་ཀྱི་ངོ་བོ། ཚུལ་ཁྲིམས་ཀྱི་འཁོར་རམ་གྲོགས་ལ་བསླབ་ཚུལ་གསུམ་དུ་ཡོད་དེ། རྒྱན་གྱི་དབྱིག་འགྲེལ་ལས། ལྷག་པའི་ཚུལ་ཁྲིམས་ཀྱི་བསླབ་པ་ནི་ཕ་རོལ་ཏུ་ཕྱིན་པ་དང་པོ་གསུམ་སྟེ། ཚོགས་དང་བཅས་པ་དང་། འཁོར་དང་བཅས་པ་གཟུང་བའི་ཕྱིར་རོ། །ཞེས་དང་། ལམ་རིམ་ཆེན་མོ་ལས། ཚུལ་ཁྲིམས་ཀྱི་བསླབ་པའི་ངོ་བོ་ནི་ཚུལ་ཁྲིམས་ཡིན་ལ། དེའང་ལོངས་སྤྱོད་ལ་མི་ལྟ་བའི་སྦྱིན་པ་ཡོད་ན་ཡང་དག་པར་ལེན་པས་དེ་ནི་ཚུལ་ཁྲིམས་ཀྱི་ཚོགས་སོ། །ཡང་དག་པར་བླངས་པའང་གཤེ་བ་ལ་སླར་མི་གཤེ་བ་ལ་སོགས་པའི་བཟོད་པས་བསྲུང་བས་དེ་ནི་དེའི་འཁོར་རོ། །ཞེས་གསུངས་སོ། །རིན་ཆེན་དོན་གྲུབ་ཀྱི་འགྲེལ་པར་ཚུལ་ཁྲིམས་ཀྱི་ཚོགས་ཀྱི་རྗེས་སུ། ཚུལ་བཞིན་སྒྲུབ་པའི་རྒྱུ་ཐོས་པ་དང་ཞེས་ཐོས་པ་བཙལ་ཚུལ་གྱི་ས་བཅད་དེ་ལས་ལོགས་སུ་མཛད་སྣང་ཡང་། འདིར་དེའི་ཚོགས་ཀྱི་ཁོངས་སུ་བྱས་ན་བདེ་སྟེ། ཚོགས་ཀྱི་སྐད་དོད་སམ་བྷ་ར་ཞེས་པ་ཡང་དག་པར་འགྲུབ་བྱེད་ལ་འཇུག་ཅིང་།
སྦྱིན་པའི་སྟོབས་ཀྱིས་ཚུལ་ཁྲིམས་རྣམ་པར་དག་པ་འབྱུང་ཚུལ་གོང་དུ་དྲངས་པ་བཞིན་ཡིན་ལ། ཐོས་པའི་སྟོབས་ཀྱིས་ཚུལ་ཁྲིམས་རྣམ་པར་དག་པ་འབྱུང་ཚུལ་ནི་སྐྱེས་རབས་ལས། ཐོས་པས་ཆོས་རྣམས་ཤེས་པར་འགྱུར། །ཐོས་པས་སྡིག་ལས་བཟློག་པར་འགྱུར། །ཐོས་པས་དོན་མ་ཡིན་པ་སྤོངས། །ཐོས་པས་མྱ་ངན་འདས་པ་འཐོབ། །ཅེས་གསུངས་པ་བཞིན། བཅས་རང་གི་ཉེས་པས་མ་གོས་པའི་ཚུལ་ཁྲིམས་རྣམ་པར་དག་པ་འབྱུང་བ་ལ་ལྟུང་བའི་སྒོ་དང་པོ་ནི་མི་ཤེས་པ་ཡིན་པས། དེ་ཉིད་ཐོས་པའི་སྒྲོན་མེས་བསལ་ཏེ་བླང་དོར་གྱི་ཆོས་རྣམས་ལེགས་པར་ཤེས་ན་སྒོ་གསུམ་མི་དགེ་བའི་ཕྱོགས་ལས་བཟློག་ཅིང། སྤྱོད་པ་མཐའ་དག་ཚུལ་དང་མཐུན་པ་མྱང་འདས་ཀྱི་རྒྱུར་འགྲོ་བ་ཞིག་འབྱུང་བས། ཚུལ་ཁྲིམས་ཀྱི་ཚོགས་ལ་སྦྱིན་པ་ལས་ཀྱང་ཐོས་པ་གཙོ་བོ་ལྟ་བུ་ཡིན་ཏེ། ལྷག་བསམ་བསྐུལ་བའི་མདོ་ལས། མང་དུ་ཐོས་པ་ཡོངས་སུ་ཚོལ་བ་མེད་པ་དེ་དག་ནི་དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་བ་མ་ཡིན་ནོ། །ཞེས་དང་། རིན་པོ་ཆེ་སྣ་བདུན་གྱི་མཆོད་རྟེན་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་བཀང་ན་དེས་ནི་ང་མཉེས་པར་བྱ་བ་མ་ཡིན། རི་མོར་བྱས་པ་མ་ཡིན། བཀུར་སྟིར་བྱས་པ་མ་ཡིན་གྱི། བྱམས་པ་གལ་ཏེ་བྱང་ཆུབ་སེམས་དཔའ་ཐ་ན་ཕ་རོལ་ཏུ་ཕྱིན་པ་དྲུག་དང་ལྡན་པའི་ཚིག་བཞི་པའི་ཚིགས་སུ་བཅད་པ་གཅིག་ཙམ་འཛིན་ཏམ། འཆང་ངམ། ཀློག་གམ། ཀུན་ཆུབ་པར་བྱེད་དམ། འཆང་བ་དེ་ནི་ང་ལ་བཀུར་སྟིར་བྱས། བླ་མར་བྱས། རི་མོར་བྱས། མཆོད་པར་
བྱས་པར་འགྱུར་རོ། །དེ་ཅིའི་ཕྱིར་ཞེ་ན། བྱམས་པ་དེ་བཞིན་གཤེགས་པ་རྣམས་ཀྱི་བྱང་ཆུབ་ནི་མང་དུ་ཐོས་པ་ལས་བྱུང་བ་ཡིན་གྱི། དངོས་པོ་ཡོངས་སུ་འཛིན་པ་ལས་བྱུང་བ་ནི་མ་ཡིན་པའི་ཕྱིར་རོ། །ཞེས་ངེས་པར་འབྱུང་བ་ཐར་པའི་རྒྱུ་ཚོགས་ལ་སྦྱིན་པ་ལས་ཐོས་པ་གཙོ་བོར་གསུངས་པའི་ཤུགས་ཀྱིས་ངེས་པར་འབྱུང་བའི་ཚོགས་ལ་ཐོས་པ་གཙོ་ཆེ་བར་འགྲུབ་སྟེ། ཐོས་པ་གནད་དུ་འགྲོ་བ་ཞིག་མེད་ན་རབ་བྱུང་གི་སྡོམ་པ་སོགས་བླངས་ཀྱང་རྣམ་པར་དག་པ་ཞིག་མི་འབྱུང་བ་གསལ་བར་གསུངས་པའི་ཕྱིར་རོ། །དེས་ན་འདིར་ཚུལ་ཁྲིམས་ཀྱི་ཚོགས་ལ་གཉིས། སྦྱིན་པ་ལ་བསླབ་ཚུལ་དང་། ཐོས་པ་ལ་བསླབ་ཚུལ་ལོ། །དང་པོ་ལ་གཉིས། ཡུལ་དམན་པ་ལ་སྦྱིན་པ་དང་། ཡུལ་ཁྱད་པར་ཅན་ལ་མཆོད་པའི་ཚུལ་ལོ། །དང་པོ་ལའང་དམན་པ་ལ་ལྷག་པར་བརྩེ་བ་བསམ་པ་ཕུན་སུམ་ཚོགས་པའི་ཚུལ་དང་། ཡོད་དགུ་མཐའ་དག་གཏོང་བ་སྦྱོར་བ་ཕུན་སུམ་ཚོགས་པའི་ཚུལ་གཉིས། དང་པོ་ནི། ངས་སྔོན་ནད་པའི་ཆེད་དག་ཏུ། །རང་གི་འཚོ་བ་ཡོངས་བཏང་བས། །སེམས་ཅན་ཕོངས་པ་བསྐྱབ་པའི་ཕྱིར། །བསྟན་པ་ཡུན་རིང་འབར་གྱུར་ཅིག །ཅེས་བྱུང་། དེའང་སྦྱིན་པའི་ཞིང་ཁྱད་པར་ཅན་དུ་འགྱུར་ཚུལ་ལ། འགྲོ་དང་སྡུག་བསྔལ་ཕན་འདོགས་དང། །ཡོན་ཏན་རྣམས་ཀྱི་ཞིང་ཁྱད་འཕགས། །ཞེས་དབྱེ་བ་གཉིས་གསུངས་ཤིང་། ཉམ་ཐག་པའི་ཞིང་གི་ནང་ནས་ཀྱང་ནད་པ་ནི་ལྷག་པར་སྙིང་རྗེའི་ཡུལ་དུ་གྱུར་པ་ལ་དགོངས་ཏེ། འདུལ་བའི་མདོར། ནད་པ་དང་ཕ་མ་དག་ནི་ཁྱིམ་པ་ཡིན་ན་ཡང་ངོ་། །ཞེས་རྟེན་རབ་བྱུང་གིས་ཀྱང་བཀུར་སྟི་རིམ་
གྲོ་བྱ་བའི་ཡུལ་དུ་གསུངས་ལ། འོད་ལྡན་ལས་ཀྱང། ནད་པ་སྙིང་བརྩེ་འཁོར་ནི་དག་པ་དང། །ཞེས་བླ་མ་བརྩེ་བའི་བདག་ཉིད་ཅན་དུ་དཔོག་བྱེད་ཀྱི་གཙོ་བོ་ནད་པར་སྙིང་བརྩེ་བ་ལ་གསུངས་སོ། །ཁྱད་པར་བྱང་ཆུབ་སེམས་དཔའི་སྦྱིན་པ་ནི་ཡུལ་གྱི་ནང་ནས་ཀྱང་གང་ཉམ་ཐག་པ་དེ་གཙོ་བོར་བྱེད་པ་ཞིག་དགོས་ཀྱི། རྣམ་སྨིན་མཆོག་ལ་རེ་བས་ཡུལ་གང་བཟང་བ་གཙོ་བོར་བྱེད་པ་ནི་རྒྱལ་སྲས་ཀྱི་སྦྱིན་པའི་མི་མཐུན་ཕྱོགས་སུ་འགྱུར་ཏེ། དེ་ནི་ཕ་རོལ་པོ་ལ་ཐབས་ཀྱིས་བུ་ལོན་བཀལ་བ་དང་འདྲ་བས། བྱ་ཤིང་རྟ་མོའི་སྐྱེས་རབས་ལས། དེ་སྟེ་ཕན་བཏགས་ལན་འདོད་ན། །བུ་ལོན་ཆགས་བྱས་ཕན་མ་བཏགས། །ཞེས་དང་། བཞི་བརྒྱ་བར། འདི་བྱིན་པ་ཡི་སྦྱིན་པ་ལ། །འབྲས་བུ་ཆེན་པོ་འབྱུང་འགྱུར་ཞེས། །སྦྱིན་དང་ལེན་པར་བྱེད་པ་ནི། །ཚོང་སོགས་བཞིན་དུ་སྨད་པར་འགྱུར། །ཞེས་གསུངས་ལ། ཡོན་ཏན་མཐའ་ཡས་པར་བསྟོད་པ་ལས། གང་ཞིག་སྐྱེ་བ་དམན་དང་ཕོངས་པ་རེ་བའི་བསམ་ལྡན་མཐོང་ན་ཡང། །བརྩེ་མེད་འབྲས་བུ་འདོད་པས་སྣོད་ལྡན་ཡོན་ཏན་དག་དང་ལྡན་འཚོལ་བ། །བསམ་བརླག་དེ་ནི་སྦྱིན་པ་བྱེད་ཀྱང་སློང་བ་དག་དང་མཚུངས་སོ་ཞེས། །དེ་སླད་ཁྱོད་ནི་ཐུགས་རྗེས་སློང་བ་རྣམས་ལ་སྦྱིན་པར་བྱེད་ལ་ཞུགས། །ཞེས་གསུངས་ཤིང་། དཔལ་ལྡན་ཟླ་བས་ཀྱང། སྣོད་དམ་སྣོད་མིན་དེ་དག་ལ། །མཉམ་པར་སེམས་སྙོམས་པས་གཏོང་བའི། །ཞེས་གསུངས་སོ། །བྱང་སེམས་ཀྱི་བསླབ་བྱར་ཡང། ནད་པའི་རིམ་གྲོ་བྱ་བ་སྤོང། །ཞེས་ནད་ཀྱིས་
ཉམ་ཐག་པ་ཡལ་བར་དོར་ན་ཉེས་པ་ལྕི་བ་ཞིག་འབྱུང་བར་བཤད་ལ། སྟོན་པ་ཐུགས་རྗེ་ཅན་ཉིད་ཀྱིས་ཀྱང་དགེ་སློང་བྲོ་འཚལ་བ་མི་གཙང་བའི་ཁྲོད་དུ་བྱིང་བ་གཟིགས་ཏེ་རང་གིས་ཕྱག་བསྟར་ནས་རིམ་གྲོ་མཛད་ཚུལ་འདུལ་བ་ལུང་སོགས་ལས་འབྱུང་ངོ་། །སྔོན་སློབ་པའི་དུས་ནའང་རྒྱལ་པོ་ཡེ་ཤེས་སྟོབས་ཀྱི་སྲས་མོ་ཡེ་ཤེས་ལྡན་དུ་གྱུར་པའི་ཚེ། བསྟན་པའི་ཐ་མ་ལ་ཆོས་སྨྲ་བའི་མཆོག་ཏུ་གྱུར་པ་དགེ་སློང་ཡང་དག་བློ་གྲོས་བྱ་བ་ཞིག་བཞུགས་པ་དེ་འབྲུམ་བུ་མེ་དཔལ་ནག་པོའི་ནད་གསོ་དཀའ་བས་ཐེབས་པའི་ཚེ། རྒྱལ་བོའི་རྨི་ལམ་དུ་མིའི་ཤ་གསར་པ་དང་ཁྲག་གིས་སྨན་བྱས་ན་འཚོ་བར་འགྱུར་རོ་ཞེས་ལྷས་ལུང་བསྟན་པའི་ཚུལ་འཁོར་གྱི་ཚོགས་སུ་བསྒྲགས་ཀྱང་དང་དུ་ལེན་པ་མ་བྱུང་བ་ན། ཡེ་ཤེས་ལྡན་གྱིས་རང་གི་ཤ་དང་ཁྲག་ཕངས་པ་མེད་པར་བཏང་སྟེ་དགེ་སློང་གི་ནད་གསོ་བར་མཛད་པ་དང། ཚོང་དཔོན་གྱི་བུ་ཆུ་འབེབས་སུ་གྱུར་པའི་ཚེ་རང་གི་ཕའི་དྲུང་ནས་གསོ་རིག་བསླབ་སྟེ་སྐྱེ་བོ་དཔག་མེད་ནད་ལས་ཐར་པར་བྱས་ཤིང། འཆི་ལ་ཐུག་པའི་ཉ་ཁྲི་ཕྲག་གཅིག་གི་སྲོག་བསྐྱབས་པ་སོགས་སེམས་ཅན་ཕོངས་པ་ལས་བསྐྱབས་པ་དང་། བརྒྱ་བྱིན་མིག་བཟད་བྱ་བར་འཁྲུངས་པའི་ཚེ་འཛམ་བུའི་གླིང་དུ་ནད་ཀྱི་བསྐལ་པ་ཆེན་པོ་བྱུང་ནས་མི་རྣམས་སྡུག་བསྔལ་གྱིས་གཟིར་བ་ན། བརྒྱ་བྱིན་གྱིས་ནམ་མཁའ་ནས་ཀུ་རུའི་གྲོང་དང་ཉེ་བར་སྲོག་ཆགས་དེས་པ་བྱ་བ་ཡོད་པས། དེའི་ཤ་ལ་སུས་ཟོས་པ་དེ་ནད་ལས་ཐར་པར་འགྱུར་རོ་ཞེས་བསྒྲགས་ནས་རང་ཉིད་དེར་བསམ་བཞིན་སྐྱེ་བ་བཞེས་ཏེ། སྨོན་ལམ་གྱི་དབང་གིས་སྐུ་ཤ་མི་ཟད་པར་བྱིན་གྱིས་བརླབས་ནས་དེ་དག་གི་ནད་ཞི་བར་བྱས་པ་དང་། གཞན་
ཡང་སེང་གེ་རལ་པ་ཅན་དུ་འཁྲུངས་པའི་ཚེ་ཚོང་པ་ལྔ་བརྒྱ་དུག་སྦྲུལ་གྱིས་བསྐོར་ནས་འཆི་ལ་ཐུག་པའི་སྲོག་བསྐྱབས་པ་སོགས་གང་སྡུག་བསྔལ་གྱིས་གཟིར་བ། མགོན་དང་སྐྱབས་མེད་པ་རྣམས་ཀྱི་ཆེད་དུ་རང་གི་འཚོ་བའི་དངོས་པོ་སྲོག་དང་། དེའི་རྟེན་ལུས་ཀྱི་ཤ་ཁྲག །བརྟེན་པའི་རྐྱེན་ལོངས་སྤྱོད་འཁོར་གཡོག་ལ་སོགས་པ་མཐའ་དག་ཕངས་པ་མེད་པར་ཡོངས་སུ་བཏང་སྟེ་སེམས་ཅན་རྣམས་ཕོངས་པ་ལས་བསྐྱབ་པར་བྱས་པ་དེའི་བདེན་པའི་སྟོབས་ཀྱིས་འགྲོ་བ་མ་ལུས་པའི་ཕོངས་པ་སེལ་བའི་སྨན་གཅིག་པུ་བསྟན་པ་རིན་པོ་ཆེ་འཕེལ་ཞིང་རྒྱས་པར་སྨོན་ལམ་མཛད་པ་ཡིན་ནོ། །ཡང་ན་རྐང་པ་གསུམ་པའི་དོན་འགྲེལ་ཚུལ། ནད་པ་སོགས་ཀྱི་དོན་དུ་རང་གི་སྲོག་ཀྱང་གཏོང་བར་མཛད་པ་དེའང་ལན་དང་རྣམ་སྨིན་ལ་རེ་བ་མེད་པར་སྦྱིན་ཡུལ་དེ་ཉིད་ཀྱིས་ཐོག་དྲངས་པའི་མཁའ་མཉམ་སེམས་ཅན་ཐམས་ཅད་ཕོངས་པ་མ་ལུས་པ་ལས་བསྐྱབ་པའི་ཕྱིར་དུ་ཡིན་པས། བདོག་པ་འབྲས་བུ་དང་བཅས་པ་གཏོང་བའི་དོན་དུ་སྦྱར་ན་ལེགས་ཏེ། དཔལ་ལྡན་ཟླ་བས། བརྩེ་བས་སྦྱིན་དང་སྦྱིན་པའི་འབྲས། །གཉི་ག་གཅིག་ཅར་དོན་གཉེར་ལ། །གཏོང་བའི་སྦྱིན་གང་སེར་སྣ་མེད། །ཅེས་དང་། སྤྱོད་འཇུག་ལས། བདོག་པ་ཐམས་ཅད་འབྲས་བཅས་ཏེ། །སྐྱེ་བོ་ཀུན་ལ་བཏང་སེམས་ཀྱིས། །ཞེས་གསུངས་པ་ལྟར་རོ། །གཉིས་པ་ཡོད་དགུ་མཐའ་དག་གཏོང་བ་སྦྱོར་བ་ཕུན་སུམ་ཚོགས་པའི་ཚུལ་ནི། བུ་དང་བུ་མོ་ཆུང་མ་དང། །ནོར་དང་གླང་ཆེན་ཤིང་རྟ་དང། །རིན་ཆེན་བྱང་ཆུབ་ཕྱིར་བཏང་བས། །བསྟན་པ་ཡུན་རིང་
འབར་གྱུར་ཅིག །ཅེས་བྱུང་། དེའང་ཐུབ་པའི་དབང་པོ་ཉིད་རྒྱལ་བུ་ཐམས་ཅད་སྒྲོལ་དུ་གྱུར་པ་ན་གླང་པོའི་མཆོག་སྦྱིན་པར་བཏང་ཞིང། དེའི་རྐྱེན་གྱིས་རྒྱལ་པོས་ཡུལ་ནས་སྤྱུགས་པའི་ལམ་དུའང་ཤིང་རྟ་དང་། མཐར་སྲས་སྲས་མོ་བཙུན་མོའི་བར་དུ་སློང་མཁན་བྱུང་བ་རྣམས་ལ་ཞུམ་པ་མེད་པར་དེ་ཐམས་ཅད་གང་འདོད་དུ་སྩལ་བ་དང་། འཁོར་ལོས་བསྒྱུར་བ་ནམ་མཁའི་སྐྱེ་བ་བཞེས་པའི་ཚེ་བང་མཛོད་མཐའ་དག་སྲས་དང་བཙུན་མོར་བཅས་པ་སྦྱིན་པར་བཏང་བ་དང་། རྒྱལ་པོ་དཔལ་གྱི་སྡེར་གྱུར་པའི་ཚེ་བྲམ་ཟེ་ཁྱེའུས་བསླངས་པ་ལ་བཙུན་མོ་རྒྱལ་བའི་འོད་གནང་ཞིང་། གཞན་ཡང་ཀླུའི་རྒྱལ་པོ་གཏེར་སྟོན་དུ་གྱུར་པའི་ཚེ་ལོ་བྱེ་བ་ཁྲག་ཁྲིག་འབུམ་ཕྲག་བདུན་ཅུ་རྩ་བདུན་གྱི་བར་དུ་རིན་པོ་ཆེའི་གཏེར་དཔག་ཏུ་མེད་པ་སེམས་ཅན་རྣམས་ལ་བྱིན་ནས་དབུལ་བའི་སྡུག་བསྔལ་བསལ་བ་དང་། ཚོང་དཔོན་ཟིལ་གྱིས་མི་ནོན་པར་སྐྱེས་པའི་ཚེ་ཕྱི་ནང་གི་ནོར་རྫས་རླབས་ཆེ་བ་ཐམས་ཅད་སྦྱིན་པར་བཏང་ནས་མཐར་ཐག་པ་གཅིག་དང་ཟོར་བ་གཅིག་ལས་མ་ལུས་ཀྱང་། ད་དུང་ཞུམ་པ་མེད་པར་ཉིན་རེ་བཞིན་རྩྭ་བརྔས་ནས་དེའི་རིན་སྦྱིན་པར་བཏང་ཞིང་། རི་བོང་དུ་གྱུར་པའི་ཚེ་རྩྭ་དང་འབྲས་བུ་ཚུན་ཆད་སྦྱིན་པར་བཏང་བ་སོགས་བདོག་པའི་དངོས་པོ་མཆོག་དམན་གང་ལའང་ཀུན་འཛིན་གྱི་འཆིང་བ་མེད་པར་གཞན་ལ་གཏོང་བར་མཛད་ཅིང། དེ་ལྟར་གཏོང་བའི་དགོས་པའང་སེམས་ཅན་ཐམས་ཅད་སྲིད་ཞིའི་རྒུད་པ་མ་ལུས་པ་ལས་སྐྱོབ་པའི་དོན་དུ་བླ་ན་མེད་པའི་བྱང་ཆུབ་བསྒྲུབ་པའི་ཕྱིར་ཁོ་ན་ཡིན་ཏེ། ལུང་ལས། བསོད་ནམས་འདི་ཡིས་ཐམས་ཅད་གཟིགས་པ་ཡི། །གོ་འཕང་ཐོབ་
ནས་སྐྱོན་གྱི་དགྲ་བཏུལ་ཏེ། །རྒ་དང་ན་དང་འཆི་བའི་རླབས་འཁྲུགས་པའི། །སྲིད་པའི་མཚོ་ལས་འགྲོ་བ་སྒྲོལ་བར་ཤོག །ཅེས་སྨོན་པ་མཛད་ཚུལ་ཡང་ཡང་འབྱུང་བ་བཞིན་ཡིན་ནོ། །བྱང་ཆུབ་ཀྱི་སྒྲ་དོན་ནི། མཛོད་ལས། ཟད་དང་མི་སྐྱེ་ཤེས་པ་ནི། །བྱང་ཆུབ་ཅེས་པའི་དངོས་ཟིན་ཙམ་ཞིག་ཐུན་མོང་བ་ལ་སྦྱར་དུ་རུང་ཡང། དེའི་འདོད་ཚུལ་དངོས་གཞི་ནི་འགྲེལ་པ་དོན་གསལ་ལས། གང་དག་དངོས་པོ་འཇིགས་པའི་བསམ་པས་ཟད་པ་ལ་ཟད་དོ་སྙམ་པའི་ཤེས་པ་དང་། ཞེས་པ་ནས། བྱང་ཆུབ་ཀྱང་ཟད་པ་དང་མི་སྐྱེ་བ་ཤེས་པ་ཡིན་པར་བརྗོད་པ་དེ་དག་ལ་ཞེས་པའི་ཕྱོགས་སྔ་མ་ཡིན་པས་རང་ལུགས་སུ་མི་རུང་ངོ་། །དེས་ན་སྐབས་འདིའི་བྱང་ཆུབ་ཆེན་པོ་དངོས་ཀྱི་དོན་ནི། རྒྱུད་བླ་མར། སངས་རྒྱས་ཉིད་ནི་དབྱེར་མེད་པ། །དག་པའི་ཆོས་ཀྱིས་རབ་ཕྱེ་བ། །ཉི་མཁའ་བཞིན་ཏེ་ཡེ་ཤེས་དང། །སྤངས་པ་གཉིས་ཀྱི་མཚན་ཉིད་དོ། །ཞེས་དང། དེའི་དར་ཊཱིཀ་ལས། བྱང་ཆུབ་ཉིད་ནི་སངས་རྒྱས་ཀྱི་ཡོན་ཏན་ཐམས་ཅད་དང་རང་གི་ངོ་བོའི་སྒོ་ནས་དབྱེར་མེད་པའི་ཡེ་ཤེས་དང་རང་བཞིན་གྱིས་དག་པ་དང་གློ་བུར་གྱི་དྲི་མས་དག་པའི་ཆོས་ཀྱིས་རབ་ཏུ་ཕྱེ་བ་སྟེ། སྤངས་པ་དང་རྟོགས་པ་ཞེས་གསུངས་པ་ལྟར། མཉམ་རྗེས་དབྱེར་མེད་པས་བདེན་གཉིས་ཅིག་ཅར་མངོན་སུམ་དུ་གཟིགས་པ་རྣམ་པ་ཐམས་ཅད་མཁྱེན་པའི་ཡེ་ཤེས་རྟོགས་པ་བྱང་ཆུབ་དང་། སྒྲིབ་གཉིས་ཟད་པར་སྤངས་པའི་དག་པ་གཉིས་ལྡན་གྱི་དབྱིངས་སྤངས་པ་བྱང་ཆུབ་གཉིས་སུ་ཡོད་ལ། སྔ་མ་ནི་
མངོན་རྟོགས་རྒྱན་ལས་ཀྱང་། དྲི་མ་ཟད་དང་མི་སྐྱེ་བས། །ཡེ་ཤེས་བྱང་ཆུབ་ཅེས་བརྗོད་དོ། །ཞེས་གསལ་བར་གསུངས་སོ། །རྡོ་རྗེ་ཐེག་པར་དེ་ལྟ་བུའི་ཡེ་ཤེས་དང་དག་པའི་སྒྱུ་མའི་སྐུ་དབྱེར་མི་ཕྱེད་པ་ལ་བྱང་ཆུབ་རྡོ་རྗེ་ཞེས་ཟུང་འཇུག་གི་རྣམ་གྲངས་སུ་གསུངས་པ་སོགས་མང་དུ་ཡོད་ཀྱང་མ་སྤྲོས་པས། བྱང་ཆུབ་ཀྱི་རྣམ་བཞག་འདི་དག་དཔྱིས་ཕྱིན་པར་ཤེས་འདོད་ན་རྡོ་རྗེའི་གནས་ལྔ་པ་བྱང་ཆུབ་ཀྱི་ལེའུའི་ཐད་ཀྱི་རྒྱུད་བླ་རྩ་འགྲེལ་སོགས་ལས་ཤེས་པར་བྱའོ། །དེའང་ཤོ་ལོ་ཀ་སྔ་མའི་སྐབས་སུ། སེམས་ཅན་ཕོངས་པ་བསྐྱབ་པའི་ཕྱིར། །ཞེས་དགོས་པའི་གཙོ་བོ་གཞན་དོན་ལ་དམིགས་པར་བསྟན་ཅིང། གཞན་དོན་ཕུན་སུམ་ཚོགས་པ་སྒྲུབ་པ་ལ་ཐོག་མར་རང་གིས་བྱང་ཆུབ་མངོན་དུ་བྱེད་དགོས་པས། འདིར་བྱང་ཆུབ་ཕྱིར་བཏང་ཞེས་རང་དོན་བྱང་ཆུབ་ལ་དམིགས་པར་གསུངས་པ་འདི་གཉིས་ནི་གཞན་ཐམས་ཅད་ཀྱི་སྐབས་སུའང་སྦྱར་དགོས་སོ། །དེ་ལྟར་གཞན་དོན་དུ་བྱང་ཆུབ་ཐོབ་པར་འདོད་པའི་བསམ་པ་སེམས་བསྐྱེད་དེ་ཉིད་སྤྱོད་པ་མཐའ་དག་གི་གཞི་རྟེན་དུ་འབྱུང་བས། དེ་ལ་རྟེན་དམ་པ་ཞེས་ཐེག་བསྡུས་སུ་བཤད་ཅིང། འགྱུར་ལ་ལར་གནས་དམ་པ་ཞེས་ཀྱང་འབྱུང་ངོ་། །བདེ་དགེ་མཐའ་དག་འབྲས་བུ་དང་བཅས་ཏེ་གཏོང་བ་ནི་ཐེག་བསྡུས་ལས། དངོས་པོ་དམ་པ་ཡིན་ཏེ་མཐའ་དག་ཀུན་ཏུ་གཏོང་བའི་ཕྱིར་རོ། །ཞེས་དམ་པ་དྲུག་གི་ནང་ནས་དངོས་པོ་དམ་པའི་དོན་དུ་གསུངས་ལ། དེ་ནི་སྦྱིན་སོགས་ཕར་ཕྱིན་དྲུག་ལྡན་དུ་བྱེད་ཚུལ་གྱི་ནང་ནས། སྦྱིན་པའི་སྦྱིན་པའི་ཕར་ཕྱིན་ནས། སྦྱིན་པའི་སྦྱིན་པའི་གོ་སྒྲུབ་ཀྱི་དོན་ཡིན་ཏེ། གོ་སྒྲུབ་ཀྱི་མདོ་ལས། བྱང་ཆེན་ཤེར་
ཕྱིན་ལ་སྤྱོད་པའི་ཚེ་སྦྱིན་པ་གང་ཡོངས་སུ་གཏོང་བ་དེ་དག་རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་ཡིད་ལ་བྱ་བས་ཡོངས་སུ་གཏོང་སྟེ། ནས། སྦྱིན་པ་ཡོངས་སུ་གཏོང་བའི་སྦྱིན་པའི་ཕ་རོལ་ཏུ་ཕྱིན་པའི་གོ་ཆའོ། །ཞེས་གསུངས་པ་ལྟར་རོ། །གཉིས་པ་ཡུལ་ཁྱད་པར་ཅན་ལ་མཆོད་པའི་ཚུལ་ནི། བདག་གིས་སངས་རྒྱས་རང་སངས་རྒྱས། །ཉན་ཐོས་ཕ་དང་མ་དང་ནི། །དྲང་སྲོང་དག་ལ་མཆོད་བྱས་པས། །བསྟན་པ་ཡུན་རིང་འབར་གྱུར་ཅིག །ཅེས་བྱུང། དེའང་ཡུལ་ཁྱད་པར་ཅན་ལ་སྦྱིན་པ་མཛད་པའི་རྣམ་གྲངས་མང་ཡང། འདིའི་དངོས་ཟིན་གྱི་གོ་རིམ་དང་སྦྱར་ན། བྲམ་ཟེ་ཁྱེའུ་སྤྲིན་དུ་འཁྲུངས་པའི་ཚེ་སངས་རྒྱས་མར་མེ་མཛད་ལ་རལ་པ་གདན་དུ་བཏིང་སྟེ་བཀུར་སྟི་བྱས་པའི་ཚེ་བྱང་ཆུབ་ཏུ་ལུང་བསྟན་ཅིང་མི་སྐྱེ་བའི་ཆོས་ལ་བཟོད་པ་ཐོབ་པ་དང། བྲམ་ཟེ་སྒྲ་རྣམ་པར་གྲག་པར་སྐྱེས་པའི་ཚེ་སངས་རྒྱས་སྒྲིབ་མེད་ལ་གསེར་གྱི་ཁང་བརྩེགས་ཁྱད་དུ་འཕགས་པ་ཕུལ་ནས་སྨོན་ལམ་བཏབ་པ་དང། བྲམ་ཟེ་ཟླ་དགས་སངས་རྒྱས་མྱ་ངན་ཐམས་ཅད་དང་བྲལ་བ་ལ་མཆོད་ཅིང་འགྲོ་བ་ཀུན་གྱི་དོན་དུ་སྨོན་ལམ་བཏབ་པས། དེས་འོད་ཀྱིས་སྟོང་གསུམ་ཁྱབ་པར་མཛད་དེ། སེམས་ཅན་དཔག་ཏུ་མེད་པ་བྱང་ཆུབ་ལས་ཕྱིར་མི་ལྡོག་པར་མཛད་པ་སོགས་མདོར་ན། རྣམ་གཟིགས་མར་མེ་རིན་ཆེན་གཙུག །གྲངས་མེད་གསུམ་གྱི་ཐ་མར་བྱུང། །ཞེས་མཛོད་ལས་གསུངས་པ་དང། ལུང་སྨན་གྱི་གཞི་ལས་འབྱུང་བ་སོགས་ཐེག་པ་ཆེ་ཆུང་གི་སྡེ་སྣོད་ཀུན་ལས་གྲངས་མེད་གསུམ་དུ་སངས་རྒྱས་གངྒཱའི་ཀླུང་གི་བྱེ་མ་སྙེད་ལ་རིམ་གྲོ་བྱས་ཚུལ་
མཐའ་ཡས་པ་གསུངས། དེ་བཞིན་དུ་རྒྱལ་པོ་གསེར་མདོག་གིས་བང་མཛོད་མཐའ་དག་སྦྱིན་པར་བཏང་ནས་རང་གིས་གསོལ་རྒྱུ་བྲེ་གང་ཙམ་ལུས་པའང་རང་སངས་རྒྱས་ལ་ཕུལ་བ་དང། ཚོང་དཔོན་སྦྱིན་པ་ལ་དཔའ་བས་རང་སངས་རྒྱས་ལ་བསོད་སྙོམས་དབུལ་བའི་ལམ་ཁར་བདུད་ཀྱིས་དམྱལ་བ་སྤྲུལ་ནས་བཀག་ཀྱང་བཟློག་མ་ནུས་པར་དེ་ལ་ཕུལ་བ་ལྟ་བུ་རང་སངས་རྒྱས་ལ་བསྙེན་བཀུར་བྱས་པ་དང། སངས་རྒྱས་ཉན་ཐོས་དང་བཅས་པ་ལ་བསྙེན་བཀུར་བའི་རྣམ་གྲངས་ལུང་ལས་གསུངས་པ་མང་ཞིང། དགེ་སྦྱོང་བཞི་ལ་ཟན་ཆངས་ཤིག་ཕུལ་བས་རྒྱལ་སྲིད་ཀྱི་དཔལ་འབྱོར་ཐོབ་སྟེ་སྦྱིན་པ་ལ་དགྱེས་པའི་ཚུལ་ཟན་དྲོན་ཆངས་པ་ཕུལ་བའི་སྐྱེས་རབས་ལྟ་བུ་དང། ཐ་ན་ཉན་ཐོས་ཀྱི་ཆ་ལུགས་འཛིན་པའི་རྔོན་པ་ལའང་གུས་པར་བྱས་ཚུལ་སེང་གེ་ཡི་དམ་བརྟན་པའི་སྐྱེས་རབས་ལྟར་ཡིན་ལ། དེ་བཞིན་དུ་རྒྱལ་བུ་སུ་ཤ་དེ་བར་གྱུར་པའི་ཚེ་རང་གི་ལུས་ཀྱི་ཤ་ཐམས་ཅད་ཀྱིས་ཕ་མ་ལ་བསྙེན་བཀུར་བྱས་པ་དང། རི་བོང་དུ་སྐྱེས་པའི་ཚེ་དྲང་སྲོང་བསམ་གཏན་བསྒོམ་པ་ལ་མཆོད་པའི་དོན་དུ་རང་གི་ལུས་བཏང་བ་སོགས་རེ་རེ་ནས་སྨོས་ཀྱིས་མི་ལང་ངོ་། །དེ་ལྟར་སངས་རྒྱས་བཅོམ་ལྡན་འདས་རྣམས་དང། བསེ་རུ་ལྟ་བུའམ་ཚོགས་སྤྱོད་ཆེ་ཆུང་གི་རང་སངས་རྒྱས། ཞུགས་གནས་བརྒྱད་ཀྱིས་བསྡུས་པའི་ཉན་ཐོས་སོགས་ཡོན་ཏན་གྱི་ཞིང། ཕ་མ་སོགས་ཕན་འདོགས་པའི་ཞིང། བདེན་ཚིག་གྲུབ་པ་ལྷ་མིའི་དྲང་སྲོང་ལ་སོགས་པ་བསོད་ནམས་ཀྱི་ཞིང་གོང་མར་གྱུར་པ་རྣམས་ལ་སྒོ་གསུམ་གུས་པའི་སྒོ་ནས་མཆོད་ཅིང། དེའང་གོང་དུ་སྨོས་པ་བཞིན་གཞན་དོན་དང་བྱང་ཆུབ་ལ་དམིགས་པའི་བསམ་པ་ཁྱད་པར་ཅན་གྱི་རྩིས་ཟིན་པ་ཁོ་
ན་ཡིན་པས་དེས་ན་ཐེག་པ་གསུམ་དང་འཇིག་རྟེན་གསུམ་སོགས་འཇིག་རྟེན་དང་འཇིག་རྟེན་ལས་འདས་པའི་ཡོན་ཏན་མ་ལུས་པ་འབྱུང་བའི་སྒོ་གཅིག་པུ་རྒྱལ་བའི་བསྟན་པ་རིན་པོ་ཆེ་འཕེལ་ཞིང་རྒྱས་པར་སྨོན་པ་སྔར་བཞིན་ནོ། །དེ་དག་སོ་སོའི་སྒྲ་དོན་ཅུང་ཟད་བཤད་ན། སངས་རྒྱས་བཅོམ་ལྡན་འདས་ནི་སྐྱབས་འགྲོ་བདུན་ཅུ་པ་ལས། ཤེས་བྱ་ལ་ནི་བློ་རྣམ་རྒྱས། །རྨོངས་པའི་ཟུམ་པ་བཅོམ་པས་ན། །སངས་རྒྱས་པདྨ་ལྟར་རྣམ་རྒྱས། །ཞེས་དང། གང་ཞིག་རྣམ་སད་དེ་སངས་རྒྱས། །སྐྱེས་བུ་གཉིད་སངས་ཇི་བཞིན་ནོ། །ཞེས་མ་རིག་པ་བག་ཆགས་དང་བཅས་པ་ཟད་པར་སྤངས་པས་ན་སངས་པ་དང། མཁྱེན་པའི་སྐད་ཅིག་མ་གཅིག་གིས་ཀྱང་ཇི་ལྟ་ཇི་སྙེད་མཐའ་དག་ལ་ཁྱབ་པས་ན་རྒྱས་ཞེས་བྱའོ། །བཅོམ་ལྡན་འདས་ནི་རྒྱུད་བརྟག་གཉིས་ལས། དབང་ཕྱུག་ལ་སོགས་ཡོན་ཏན་དང། །ལྡན་ཕྱིར་བཅོམ་ལྡན་འདས་ཞེས་བྱ། །ཡང་ན་ཉོན་མོངས་ལ་སོགས་བདུད། །བཅོམ་ཕྱིར་བཅོམ་ལྡན་འདས་ཞེས་བརྗོད། །ཅེས་བདུད་བཞི་བཅོམ་པས་ན་བཅོམ་ཞེས་བྱ་ལ། དབང་ཕྱུག་སོགས་ཡོན་ཏན་དྲུག་དང་ལྡན་པས་ལྡན་ཞེས་བཤད་དེ། ཡོན་ཏན་དྲུག་ནི་སམྦུ་ཊ་ལས། དབང་ཕྱུག་དང་ནི་གཟུགས་བཟང་དང། །དཔལ་དང་གྲགས་དང་ཡེ་ཤེས་དང། །བརྩོན་འགྲུས་ཕུན་སུམ་ཚོགས་པ་སྟེ། །དྲུག་པོ་རྣམས་ལ་སྐལ་ཞེས་བྱ། །ཞེས་པ་ལྟར་རོ། །འདས་ཞེས་པ་འཇིག་རྟེན་པའི་ལྷ་ཆེན་པོ་དག་ལས་ཁྱད་པར་དུ་བྱས་པའི་ཕྱིར་ལོ་ཙཱ་བས་བླ་ཐབས་སུ་བསྣན་པར་གྲགས་ལ། ཏཱ་ར་ནཱ་ཐས་ཚེ་མདོའི་ཊཱིཀྐར་བྷ་ག་ཞེས་
པའི་ག་ལ་ཡི་གེ་བསྣན་ནས། ག་ཏི་ཞེས་པ་འཇིག་རྟེན་པའི་ས་ལས་རིང་དུ་སོང་བ་ལ་འཇུག་པས་འདས་པའི་དོན་ཡང་ཡོད་པར་བཤད་དོ། །སྡོམ་གསུམ་རབ་དབྱེ་ལས། དེ་ནས་ཚིག་ལ་འཁྲུལ་པ་ཡི། །རྣམ་དབྱེ་ཅུང་ཟད་བཤད་ཀྱིས་ཉོན། །བཅོམ་ལྡན་འདས་ཀྱིས་བཤད་པ་ལ། །བཞི་བཅོམ་དྲུག་ལྡན་བཤད་པ་དང། །ཞེས་བཅོམ་པ་དང་ལྡན་པའི་དོན་སོ་སོར་བཤད་པ་ལ་དགག་པ་མཛད་ཅིང། མཁས་འཇུག་ཏུའང་དེའི་སྐད་དོད་བྷ་ག་ཝན་ཞེས་པ་བདུད་བཞི་བཅོམ་པ་དང་སྐལ་བ་དྲུག་དང་ལྡན་པ་གཉི་ག་ལ་འཇུག་ཀྱང། བོད་སྐད་ཀྱི་མིང་ནི་དེ་གཉི་གར་མི་འཇུག་ལ། གལ་ཏེ་འཇུག་ན་མིང་རིལ་པོ་གཉི་ག་ལ་འཇུག་དགོས་ཀྱི། མིང་གཏོར་ནས་སོ་སོར་བཤད་པ་ནི་སྒྲ་ཤེས་པ་ཞིག་གིས་མཐོང་ན་བཞད་གད་ཀྱི་གནས་སུ་འགྱུར་ཞེས་དགག་པ་མཛད་འདུག་ནའང། བོད་སྐད་ལ་རྒྱ་སྐད་དང་འདྲ་བའི་ནུས་པ་མེད་པས་ཚིག་གཅིག་གིས་དོན་གཉིས་ཀ་གོ་མི་ཐུབ་ལ། བཅོམ་པ་ཞེས་སམ་ལྡན་པ་ཞེས་པ་ཙམ་ཞིག་ཏུ་བསྒྱུར་ན་ནུས་པ་ཆུང་བས། བྷ་ག་ཝན་གྱི་སྒྲ་འཇུག་པའི་དོན་དེ་གཉིས་ཀ་གོ་བའི་ཕྱིར་མིང་གཅིག་གི་སྒྲ་ཟུར་ནང་དུ་གཉི་གའི་སྒྲ་ཟུར་ཚང་བ་བྱས་ཏེ་བཅོམ་ལྡན་ཞེས་བསྡུས་ནས་བསྒྱུར་བ་ལོ་པཎ་གྱི་བཀས་བཅད་ལྟར་ཡིན་པས་འགལ་བ་མེད་དོ། །དེ་བཞིན་དུ་བུདྡྷ་ཡང་སངས་པ་དང་རྒྱས་པ་གཉིས་ཀ་ལ་འཇུག་པས་ལོ་པཎ་རྣམས་ཀྱིས་མུན་པ་སངས་པའམ། པདྨའི་འདབ་མ་རྒྱས་པ་ལྟ་བུ་ལ་བུདྡྷའི་སྒྲ་བྱུང་བའི་ཚེ། སྐབས་ཐོབ་དེ་ཉིད་དུ་སངས་པའམ་རྒྱས་པ་ཞེས་སོ་སོར་བསྒྱུར་ཀྱང། སངས་རྒྱས་ལ་སྒྲ་འདི་བྱུང་བའི་ཚེ་དེ་སངས་པ་
དང་རྒྱས་པ་གང་རུང་ཞིག་ཁོ་ནར་བསྒྱུར་ན་གོ་རྒྱུ་ཆུང་ཞིང་གཞན་དུ་ནོར་ས་འབྱུང་བས། ངེས་ཚིག་གི་དོན་གཉིས་ཀའི་ཟུར་ཚང་བ་བྱས་ནས་སངས་རྒྱས་ཞེས་བསྒྱུར་བ་ཡིན་ཏེ། གསེར་འཕྲེང་ལས། སངས་རྒྱས་ལ་དེ་གཉིས་ཀའི་སྒྲ་དོན་བཤད་དུ་ཡོད་པ་རྒྱུ་མཚན་དུ་བྱས་ནས་སངས་རྒྱས་ཞེས་བསྡོམས་ནས་བསྒྱུར་རོ། །ཞེས་གསུངས་པའི་ཕྱིར། རང་སངས་རྒྱས་ནི་མཛོད་འགྲེལ་ལས། ལུང་མེད་པར་བདག་གཅིག་པུའི་ཕྱིར་སངས་རྒྱས་པས་རང་སངས་རྒྱས་ཞེས་གསུངས་པ་བཞིན། ལུང་ལ་མ་བརྟེན་པར་བདག་ཉིད་གཅིག་པུའི་ཕྱིར་སངས་རྒྱས་པ་སྟེ། དེ་ཁོ་ན་ཉིད་ཁོང་དུ་ཆུད་པས་ན་རང་སངས་རྒྱས་ཞེས་བཤད་དེ། དེའི་སྐད་དོད་པྲ་ཏྱེ་ཀ་བུདྡྷ་ཞེས་པའི་བུདྡྷ་སངས་རྒྱས་དང་དེ་ཉིད་ཁོང་དུ་ཆུད་པ། དེ་ཐམས་ཅད་རྟོགས་པ་སོགས་དུ་མར་འཇུག་པས། ཉན་ཐོས་སངས་རྒྱས་འབྲིང་རྣམས་ཐུབ་དབང་སྐྱེས། །ཞེས་པའང་ཉན་ཐོས་དེ་ཉིད་རྟོགས་འབྲིང་ཞེས་བསྒྱུར་ན་ལེགས་པར་གསུངས་པ་བཞིན་ནོ། །ཡང་པྲ་ཏྱེ་ཀ་བུདྡྷ་ཞེས་པའི་པྲ་ཏི་རྐྱེན། ཨེ་ཀ་གཅིག །བུདྡྷ་རྟོགས་པ་བྱས་ཏེ། དུར་ཁྲོད་ཀྱི་རུས་གོང་ལྟ་བུ་ལ་དམིགས་ནས་རྟེན་འབྲེལ་ལུགས་འབྱུང་ལུགས་ལྡོག་སོགས་ཀྱིས་རྐྱེན་རྣམས་རྟོགས་པས་ན་རྐྱེན་རྟོགས་ཞེས་ཀྱང་གསུངས་ཏེ། གཟུངས་རྒྱལ་གྱིས་ཞུས་པའི་མདོ་ལས། རང་སངས་རྒྱས་རྣམས་ཀྱི་རྣམ་པར་གྲོལ་བ་ནི་རྐྱེན་ཁོང་དུ་ཆུད་པའོ། །ཞེས་སོ། །དགོངས་པ་ལུང་སྟོན་ལས། རྐྱེན་དང་ཉན་ཐོས་རྣམས་ཀྱི་དང། །མདོ་དང་གསང་སྔགས་སྤྱོད་རྣམས་ཀྱི། །ཞེས་དང། རྐྱེན་དང་ཉན་ཐོས་ཀྱིས་གཞིག་དཀའི། །བཛྲ་
ཡང་ནི་བཞི་པར་འགྱུར། །ཞེས་པ་ལྟ་བུ་རང་རྒྱལ་ལ་རྐྱེན་གྱི་སྒྲ་ཙམ་སྦྱར་ནས་གསུངས་པའང་མང་ངོ་། །ཉན་ཐོས་ནི་པད་དཀར་ལས། མགོན་པོ་དེ་རིང་བདག་ཅག་ཉན་ཐོས་གྱུར། །བྱང 
་ཆུབ་དམ་པ་ཡང་དག་བསྒྲགས་པར་བགྱི། །བྱང་ཆུབ་པ་ཡི་སྒྲ་ཡང་རབ་ཏུ་བརྗོད། །དེ་བས་བདག་ཅག་མི་བཟད་ཉན་ཐོས་འདྲ། །ཞེས་བྱང་ཆུབ་མཆོག་གི་ལམ་དང་འབྲས་བུ་རྣམས་སངས་རྒྱས་ལས་མཉན་ནས་རང་གི་ཆེད་དུ་ཉམས་སུ་མི་ལེན་པར་གཞན་ལ་སྒྲོག་པར་བྱེད་པས་ཐོས་སྒྲོག་གམ་ཉན་ཐོས་ཞེས་གཙོ་བོར་ལུང་ལ་ཆེད་དུ་བརྟེན་པའི་ཆ་ནས་ཀྱང་བཏགས་པ་ཡིན་ཏེ། གཟུངས་རྒྱལ་གྱི་མདོ་ལས། ཉན་ཐོས་རྣམས་ཀྱི་རྣམ་གྲོལ་སྒྲ་ཕྱིར་འགྲོ། །ཞེས་སོ། །ཕ་མ་ནི་གང་ཟག་གཞན་ལ་ཞིང་ཁྱད་པར་ཅན་དུ་མི་འགྱུར་ཡང། རང་ལ་ཆོས་སྒྲུབ་པའི་ལུས་སྦྱིན་པའི་བཀའ་དྲིན་གྱི་སྒོ་ནས་ཞིང་ཁྱད་པར་ཅན་དུ་འགྱུར་ཏེ། སྔོ་བསངས་ཅན་གྱི་ཡལ་འདབ་ལས། དགེ་བའི་གནས་སུ་གྱུར་པ་ལུས་དག་གི །རྒྱུར་གྱུར་ཕ་མ་དག་ནི་མཁས་རྣམས་ཀྱིས། །བླ་མ་ཡིས་ཀྱང་མཆོད་འོས་ཞེ་སར་འོས། །ཞེས་པ་ལྟར་རོ། །དྲང་སྲོང་ནི་སྤྱིར་ལུང་ལས། དྲང་སྲོང་གསུངས་པའི་ལམ་ནི་ཐོབ་པར་འགྱུར། །ཞེས་དང། རྒྱུད་བླ་མར། དྲང་སྲོང་རྣམས་ཀྱི་བརྡ་ཡི་སྐུ། །ཕ་རོལ་ཕུན་སུམ་ཚོགས་པའི་གནས། །ཞེས་སངས་རྒྱས་སོགས་ཐེག་པ་གསུམ་གྱི་འཕགས་པ་རྣམས་ལའང་དྲང་སྲོང་གི་སྒྲ་འཇུག་ལ། དེའི་དབང་དུ་བྱས་ཏེ་ཟླ་བའི་ཚིག་གསལ་ལས། དོན་དམ་པ་ཐུགས་སུ་ཆུད་པས་ན་དྲང་སྲོང་ངོ་། །ཞེས་གསུངས་ཀྱང། འདིར་སྐབས་ཐོབ་ཀྱི་དབང་གིས་འཇིག་རྟེན་པའི་དྲང་སྲོང་བདེན་ཚིག་གྲུབ་པ་རྣམས་
ལ་བཤད་ཅིང། དེའང་ཁྱིམ་གྱི་འདུ་འཛི་དང་གཡེང་བ་སྤངས་ཏེ་དབེན་པར་སོང་ནས་ཏིང་ངེ་འཛིན་བསྒོམས་པས་བསམ་གཏན་ལ་སོགས་པའི་ཡོན་ཏན་གོང་མ་ཐོབ་པ། སྨོན་པའི་ཚིག་གིས་ཀྱང་གཞན་གྱི་དགོས་པ་སྒྲུབ་ནུས་ལ། ངན་པའི་སྤྱོད་པ་གཡོ་སྒྱུ་སོགས་མེད་པར་ཤེས་རྒྱུད་དྲང་པོར་སྲོང་བས་ན་དྲང་སྲོང་ཞེས་བྱ་སྟེ། ཇི་སྐད་དུ། འཁོར་བས་སྐྱོ་སྟེ་ནགས་སུ་སོང། །བསམ་གཏན་ཐོབ་སྟེ་མངོན་ཤེས་འཆར། །དེ་ལ་མི་ཡི་དྲང་སྲོང་ཟེར། །བསམ་གཏན་མ་ཐོབ་གྲོང་དུ་བབས། །སྙན་ངག་སོགས་འཚོ་བྲམ་ཟེའི་རིགས། །ཞེས་འབྱུང་བ་ལྟར་རོ། །གཉིས་པ་ཐོས་པ་ལ་བསླབ་ཚུལ་ནི། བསྐལ་པ་བྱེ་བ་དུ་མར་བདག །སྡུག་བསྔལ་སྣ་ཚོགས་མྱོང་གྱུར་ཅིང། །བྱང་ཆུབ་དོན་དུ་ཐོས་བཙལ་བས། །བསྟན་པ་ཡུན་རིང་འབར་གྱུར་ཅིག །ཅེས་བྱུང། དེའང་སྔོན་རྒྱལ་པོ་ཁ་དོག་དམ་པར་གྱུར་པའི་ཚེ་ཚིགས་བཅད་གཅིག་གི་དོན་དུ་སྲས་དང་བཙུན་མོ་ལ་སོགས་པ་བཏང་བ་དང། རྒྱལ་པོ་ག་ན་ཤ་པ་ལིར་གྱུར་པའི་ཚེ་ཚིགས་བཅད་གཅིག་གི་དོན་དུ་སྐུ་ལ་མར་མེ་སྟོང་བཙུགས་པ་དང། རྒྱལ་པོ་བྱི་ལིང་གར་ལི་ཏར་གྱུར་པའི་ཚེ་ཚིགས་བཅད་གཅིག་གི་དོན་དུ་སྐུ་ལ་ལྕགས་གཟེར་སྟོང་བཏབ་པ་དང། རྒྱལ་བུ་ད་མ་གམ་ཆོས་ཀྱི་དོན་དུ་མེ་འོབས་སུ་མཆོང་བ་དང། དྲང་སྲོང་གི་སྟོན་པ་ཨུཏ་ཏ་ལིས་རང་གི་པགས་པས་ཤོག་བུ་དང། རུས་པས་སྨྱུ་གུ། ཁྲག་སྣག་ཚར་བྱས་ཏེ་ཆོས་ཉན་ཅིང་བྲིས་པ་སོགས་དཔེར་ན་འཕགས་པ་རྟག་ངུས་ཀྱང་ཤེར་ཕྱིན་ཉན་པའི་དོན་དུ་རང་གི་ཤ་ཁྲག་ཐམས་ཅད་བཏང་བ་སོགས་ཐོས་པའི་དོན་དུ་ཆེས་བྱ་དཀའ་བའི་
སྤྱོད་པ་དཔག་ཏུ་མེད་པ་སྤྱད་ཚུལ་ཤེར་མདོར་འབྱུང་བ་ལྟ་བུ་འདུལ་བ་ལུང་དང་མདོ་སྡེ་མཛངས་བླུན་སོགས་ལས་རྒྱ་ཆེར་འབྱུང་ལ། མདོར་ན་སློབ་དཔོན་དཔའ་བོས་སྐྱེས་རབས་ཕལ་ཆེར་གྱི་དོན་བསྡུས་པའི་སྐབས་སུ། དེ་ལྟར་བཅོམ་ལྡན་འདས་དེས་བདག་ཅག་གི་ཕྱིར་བྱ་དཀའ་བ་མང་པོས་དམ་པའི་ཆོས་འདི་བསྒྲུབས་པ་ཡིན་པས་རིམ་གྲོ་བསྐྱེད་དེ་དམ་པའི་ཆོས་མཉན་པར་བྱའོ། །ཞེས་གསུངས་པ་ལྟར། བྱང་ཆུབ་སྒྲུབ་པ་ལ་ཐོས་པ་གཙོ་ཆེ་བར་དགོངས་ནས་བསྐལ་པ་དཔག་ཏུ་མེད་པར་དེའི་དོན་དུ་དཀའ་སྤྱད་མཐའ་ཡས་པ་ཞིག་ལྷུར་བཞེས་ཤིང། ཐོས་དོན་སྒྲུབ་པ་ལ་སྦྱར་བས་ཉིང་དགོས་མཐར་ཐུག་པ་མངོན་དུ་མཛད་པ་དེའི་བདེན་པའི་སྟོབས་ཀྱིས་ཀྱང་རྗེས་འཇུག་གི་གདུལ་བྱ་རྣམས་རྙེད་བཀུར་སྙན་གྲགས་སོགས་ལ་རེ་བ་མ་ཡིན་པར། ཐེག་པ་གསུམ་གྱི་བྱང་ཆུབ་དོན་དུ་གཉེར་བ་ངེས་འབྱུང་གི་བསམ་པ་ཁྱད་པ་ཅན་གྱི་རྩིས་ཟིན་པའི་ཚུལ་ཁྲིམས་རྣམ་པར་དག་པ་གཞིར་བཟུང། ཐོས་བསམ་སྒོམ་གསུམ་ཡ་མ་བྲལ་བར་བྱས་ཏེ། ཀློག་པ་ཐོས་བསམ་དང་སྤོང་བ་བསམ་གཏན་གཉིས་ཀྱི་སྒོ་ནས་རྒྱལ་བའི་བསྟན་པ་རིན་པོ་ཆེ་འཕེལ་ཞིང་རྒྱས་པར་གྱུར་ཅིག་ཅེས་སྨོན་པ་མཛད་པ་ཡིན་ནོ། །དེའང་འདིའི་བསྐལ་པ་ནི་བར་བསྐལ་ཙམ་ལ་བྱེད་པ་མ་ཡིན་གྱི། མངོན་པ་མཛོད་ལས། དེ་ལྟར་འཇིག་རྟེན་ཆགས་པ་འདི། །བར་གྱི་བསྐལ་པ་ཉི་ཤུར་གནས། །ཆགས་པ་དང་ནི་འཇིག་པ་དང། །ཞིག་ནས་འདུག་པ་དག་མཉམ་མོ། །ཞེས་པ་ལྟར། གནས་བསྐལ་ལ་ཡ་ཐོག་རིང་མོ། མ་ཐོག་རིང་མོ། བར་གྱི་ཁུག་པ་བཅོ་བརྒྱད་དེ་
བར་བསྐལ་ཉི་ཤུ་འབྱུང་བ་བཞིན། འཆགས་བསྐལ། འཇིག་བསྐལ། སྟོང་བསྐལ་རེ་རེ་ལ་ཡང་བར་བསྐལ་ཉི་ཤུ་རེ་སྟེ། བར་བསྐལ་བརྒྱད་ཅུ་པོ་གཅིག་ཏུ་བསྡོམས་པ་ནི་བསྐལ་ཆེན་གཅིག་ཡིན་ནོ། །དེ་ལྟ་བུའི་བསྐལ་ཆེན་བྱེ་བ་དུ་མ་སྟེ། འདིའི་བྱེ་བ་ནི་འབུམ་ཕྲག་བརྒྱ་ལ་བྱེ་བར་བྱེད་པ་དེ་ཙམ་མ་ཡིན་གྱི། བྱེ་བའི་སྐད་དོད་ཀོ་ཊི་ཞེས་པ་རབ་དང་རྩེ་མོ་སོགས་ལ་འཇུག་པས། འདིར་གྲངས་ཀྱི་རྩེ་མོའམ་ཡ་མཐར་སོན་པ་གྲངས་མེད་ལ་བྱ་སྟེ། དཔེར་ན་ནོར་རིན་ཐང་འདི་ཙམ་རི་ཞེས་ཚད་གཟུང་དུ་མེད་པ་ལ་རྒྱ་གར་ན་བྱེ་བ་རི་ཞེས་འདོགས་པར་རྣ་བ་བྱེ་བ་རིའི་རྟོགས་བརྗོད་ལས་འབྱུང་བ་བཞིན་ནོ། །སྡུག་བསྔལ་གྱི་སྒྲ་དོན་ནི་པྲ་སྟི་དགེ་བཤེས་ཀྱི་ཊཱིཀྐར། སྡུག་པ་ནི་ཡིད་དུ་འོང་བ་དང། བསྔལ་བ་ནི་ངལ་བར་བྱས་པ་སྟེ་ཆད་པས་གཏུགས་པའི་དོན་ནོ། །ཞེས་འབྱུང་ལ། འོན་ཀྱང་སྡུག་བསྔལ་གྱི་སྐད་དོད་དུཿ ཁ་ཞེས་པའི་དུར྄་ནི་ངན་པ་ཐོབ་པ་སོགས་དོན་ལྔ་ལ་འཇུག་པར་ཉེར་བསྒྱུར་ཉི་ཤུའི་འགྲེལ་པར་བཤད་ཅིང། ཏཱ་ར་ནཱ་ཐས་བགྲོད་དཀའ་སོགས་དོན་དགུ་ལ་འཇུག་པར་བཤད། ཁ་ནི་ཀུན་མཁྱེན་འཇམ་དབྱངས་བཞད་པའི་ཀ་ལཱ་པའི་ཊཱིཀ་ཆེན་ལས། ཁད྄་འཚེ་བ་ལ་འོས། ཁད྄་བཞག །ཊ་བྱིན། ཊ་ལ་དབྱི་འོས་ཊི་ཕྱིས། ཊ྄་ཡིག་དེའི་ཁྱད་དོན། ཉེར་བསྒྱུར་དུར྄་སྔོན་དུ་བཞག། །དུཿ ཁ་ཞེས་འཚེ་བའམ། ཡོངས་སུ་འཇོམས་པ་དང། མྱོང་བའམ་ཟ་བ་སོགས་ལ་འཇུག་པར་གསུངས་པས། དེ་དག་བསྡོམས་ན་དུཿ ཁ་
ཞེས་པ་ངན་པ་སྟེ། མི་འདོད་པའི་གདུང་བས་ཉེ་བར་འཚེ་ཞིང་ཡོངས་སུ་འཇོམས་པའམ། ངན་མྱོང་སྟེ་གདུང་བ་ཉམས་སུ་མྱོང་བ་ལ་འཇུག་གོ །དེས་ན་བོད་སྐད་ཀྱི་དབང་དུ་བྱས་པའི་སྒྲ་བཤད་ཚུལ་ཡང། སྡུག་ཅེས་པ་སིམ་གདུང་གཉིས་ལ་བདེ་སྡུག་ཏུ་བཤད་པའི་སྐབས་བཞིན་བྱས་ཏེ། བསྔལ་ཞེས་པ་གདུང་བ་དེ་ཉིད་ཀྱིས་བཅོམ་ཞིང་ཉམ་ཐག་པར་བྱས་པ་ལ་སྦྱར་ན་རྒྱ་སྐད་ཀྱི་ངེས་ཚིག་དང་ཡང་མཐུན་པས་ལེགས་སམ་སྙམ་སྟེ་དཔྱད་པར་བྱའོ། །དཀའ་སྤྱད་ཀྱི་སྡུག་བསྔལ་ཁྱད་དུ་བསད་ནས་ཐོས་པ་བཙལ་བ་དེའང་ཐོས་པ་རྣམ་དག་ཏུ་འགྲོ་མི་འགྲོ་རྩ་བའི་ཀུན་སློང་ལ་རག་ལས་པས། འདིར་བྱང་ཆུབ་དོན་དུ་ཐོས་བཙལ་ཞེས་གསུངས་པ་དོན་དང་དགོས་པ་ཤིན་ཏུ་ཆེ་སྟེ། ཐོག་མར་ཐོས་པ་ལ་འཇུག་པའི་ཚུལ་འབྲས་བུ་བྱང་ཆུབ་ཐོབ་འདོད་ཀྱི་འདུན་པ་ཤུགས་དྲག་པོ་སྐྱེ་བ་ན། དེ་འཐོབ་པ་ལ་དེའི་རྒྱུ་ཀུན་བྱང་གི་བླང་དོར་ཕྱིན་ཅི་མ་ལོག་པ་ཞིག་བྱེད་དགོས་ཤིང། བླང་དོར་གོ་མ་ལོག་པ་ཞིག་འབྱུང་བའང་དཀོན་བརྩེགས་ལས། དགེ་བ་དང་ནི་སྡིག་པའི་ཆོས། །ཐོས་པ་མེད་པར་ཤེས་མི་འགྱུར། །ཞེས་གསུངས་པ་བཞིན་ཐོས་པ་ལ་རག་ལས་པས། དེ་ལྟ་བུའི་སྒྲུབ་པ་ལྷུར་ལེན་གྱི་ཕྱིར་དུ་ཐོས་པ་བཙལ་དགོས་ཀྱི། ནང་གི་ཉོན་མོངས་པའི་གཉེན་པོར་ཅུང་ཟད་ཀྱང་མི་འགྲོ་བར་རྙེད་བཀུར་དང་མཁས་པའི་གྲགས་པ་ཙམ་ཞིག་གི་ཕྱིར་ཐོས་པ་ཚོལ་བ་ནི་བཙལ་ཚུལ་ཕྱིན་ཅི་ལོག་ཏུ་གྱུར་པ་ཡིན་ཞིང། དེ་ལྟ་བུའི་སྒོ་ནས་གཞུང་གི་ཚིག་རིས་ཙམ་ཤེས་ཀྱང། ཐོས་དོན་རྒྱུད་ལ་སྦྱར་བའི་ཉམས་ལེན་བྱེད་རྒྱུ་ཞིག་མེད་ན་མང་དུ་ཐོས་པའི་དོན་མ་ཚང་ཞིང། དེ་ནི་ཆོས་ཤེས་པ་དང་
མཁས་པའི་གྲངས་སུ་མི་འགྲོ་སྟེ། འོད་སྲུང་གིས་ཞུས་པའི་མདོ་ལས། ཐོས་དང་ལྡན་ཡང་ཚུལ་བཞིན་མ་ཡིན་པའི། །ཉོན་མོངས་འབྱུང་བའི་ནད་ནི་མི་སེལ་ན། །དེ་ཡིས་ཐོས་ལ་བརྩོན་པ་དོན་མེད་ཡིན། །ཞེས་དང། ལང་གཤེགས་ལས། མང་དུ་ཐོས་པ་ཞེས་བྱ་བ་ནི་དོན་ལ་མཁས་པ་ཡིན་གྱི། ཚིག་ལ་མཁས་པ་ནི་མ་ཡིན་ནོ། །ཞེས་དང། ཆོས་ཐམས་ཅད་འབྱུང་བ་མེད་པའི་མདོ་ལས། ཚིག་དང་སྨྲ་ལ་མཁས་ཤིང་མི་མཁས་དེ། །ཆོས་ཀྱི་རང་བཞིན་ཡོངས་སུ་མ་ཤེས་ན། །ཚིག་གི་དག་པས་བྱང་ཆུབ་འཚང་མི་རྒྱ། །ཞེས་གསུངས་ལ། མདོ་སྡེ་རྒྱན་ལས་ཀྱང། ཐོས་པས་ཆོག་པར་འཛིན་སྤོང་བ། །དེ་ནི་ཆོས་ཤེས་པ་ཞེས་བརྗོད། །ཅེས་གཞུང་གི་ཚིག་ཐོས་པ་ཙམ་གྱིས་ཆོག་མི་ཤེས་པར། གང་ཐོས་པ་དེ་ཐམས་ཅད་བྱང་ཆུབ་སྒྲུབ་པའི་ཡན་ལག་ཏུ་ཉམས་སུ་ལེན་དགོས་པར་གོ་བ་ནི་ཆོས་ཀྱི་གནད་ཤེས་པ་ཡིན་པར་གསུངས་སོ། །ཚུལ་དེ་ལྟ་བུ་ཞིག་བྱུང་ན་རྒྱལ་བ་བྱམས་པ་མགོན་པོས། འདི་ན་དང་པོར་ཐོས་ལ་བརྟེན་ནས་ཚུལ་བཞིན་ཡིད་ལ་བྱེད་པ་འབྱུང། །ཚུལ་བཞིན་ཡིད་ལ་བྱེད་ལས་ཡང་དག་དོན་ཡུལ་ཡེ་ཤེས་འབྱུང། །ཞེས་དང། སྐྱེས་རབས་ལས། ཐོས་པའི་རྗེས་འཇུག་སྒྲུབ་པ་སྙིང་པོར་བྱེད། །སྐྱེ་བའི་རྫོང་ལས་ཚེགས་ཆུང་ཐར་པར་འགྱུར། །ཞེས་སོགས་དང། མཁས་མཆོག་དབྱིག་གི་གཉེན་པོས་ཀྱང། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་གསུངས་པ་ལྟར་གྱི་རྒྱལ་བའི་བསྟན་པ་ལ་སློབ་པའི་རིམ་པ་རྒྱལ་
བའི་དགོངས་པ་མ་ནོར་བ་དེ་བྱུང་བ་ཡིན་ལ། དེའི་ནང་ནས་ཀྱང་མཉམ་མེད་ཇོ་བོ་ཆེན་པོ་དང། རྗེ་བླ་མའི་མན་ངག་གི་གནད་བླ་ན་མེད་པའི་ཐབས་མཁས་ཀྱི་འཕྲུལ་འདེགས་ལ་བརྟེན་ནས་ཐོས་བསམ་སྒོམ་གསུམ་ཅིག་ཅར་དུ་སྒྲུབ་པ་ཞིག་འབྱུང་སྟེ། བཀའ་གདམས་གླེགས་བམ་ལས། ང་ཐོས་དུས་ཚེ་ན་བསམ་སྒོམ་བསྡོ། །ང་བསམ་དུས་ཚེ་ན་ཐོས་སྒོམ་བསྡོ། །བསྒོམ་དུས་ཚེ་ན་ཐོས་བསམ་བསྡོ། །ང་གཅིག་ཏུ་མ་ལུས་བསྡོམས་བྱས་ནས། །ཆོས་ལམ་དུ་ཁྱེར་ནས་འགྲོ་ཤེས་པ། །ང་བཀའ་གདམས་ཕྱོགས་ཆར་མ་ལྷུང་བས། །དོན་རྒྱ་འབག་བཞིན་དུ་འཕྲུལ་ཤེས་པས། །ལེགས་ཀུན་ཏུ་གཏོགས་ཏེ་བཀའ་གདམས་ཡིན། །ཞེས་གསུངས་པ་ལྟར། གསུམ་ག་གདན་ཐོག་གཅིག་ཏུ་འདྲིལ་བ་ཞིག་འབྱུང་བས། ཁ་ཅིག་ཐོས་པའི་ཕྱོགས་ཙམ་བཟུང་སྟེ་སྒོམ་པ་ལ་བླུན་སྒོམ་ཞེས་སྨོད་པ་དང། ལ་ལ་སྒོམ་པའི་ཕྱོགས་ཙམ་བཟུང་སྟེ་ཐོས་པ་ལ་ཕྱིའི་གོ་རྒྱ་གཅོད་པ་ཙམ་དང་ཤགས་འགྱེད་པ་ཞེས་སྨོད་པ་སོགས་ཆོས་སྤོང་གི་སྒོ་ཁེགས་ཏེ་བསྟན་པ་ཐམས་ཅད་གྲུ་བཞི་ལམ་གྱིས་འཁྱེར་ཤེས་པ་ཞིག་འབྱུང་ངོ་། །དེ་དག་གི་དོན་ཧྲིལ་གྱིས་དྲིལ་ན་ལམ་རིམ་ཆེན་མོ་ལས། སངས་རྒྱས་ཐོབ་པ་ལ་འཐོབ་བྱེད་ཀྱི་ལམ་ལ་སློབ་དགོས། སློབ་པ་ལ་ཤེས་དགོས། ཤེས་པ་ལ་ཐོས་དགོས་ཞེས་ཐབས་དང་ཐབས་བྱུང་དུ་འབྲེལ་བའི་ཚུལ་འདི་མང་དུ་ཐོས་པ་འཚོལ་བ་རྣམས་ཀྱིས་སྙིང་ལ་འཆང་བར་རིགས་སོ། །གཞན་ཡང་གང་ལ་ཐོས་པ་བྱ་བའི་ཡུལ་དང། ཇི་ལྟར་ཐོས་པ་བྱེད་པའི་ཚུལ་སོགས་མཐའ་ཆོད་པར་ཤེས་འདོད་ན། མདོ་སྡེ་རྒྱན་གྱི་མོས་པ་དང་ཆོས་ཚོལ་བ།
ཆོས་བཤད་པ། སྒྲུབ་པ། གདམས་ངག་གི་ལེའུ་ལྔ་རྩ་འགྲེལ། དེའི་ཐད་ཀྱི་བྱང་ས་དང་བཅས་པ། རྣམ་པར་བཤད་པའི་སྒོ་བསྡུ་བ་དང། ཀུན་ལས་བཏུས་པ་ཐ་མ། རྣམ་བཤད་རིགས་པ་སོགས་ལས་ཤེས་པར་བྱའོ། །གཉིས་པ་ཚུལ་ཁྲིམས་ཀྱི་ངོ་བོ་ལ་བསླབ་པའི་ཚུལ་ནི། བདག་གི་ཚུལ་ཁྲིམས་བརྟུལ་ཞུགས་དང། །དཀའ་ཐུབ་ཡུན་རིང་བསྟེན་བྱས་ཤིང། །ཕྱོགས་བཅུའི་སངས་རྒྱས་ངས་མཆོད་པས། །བསྟན་པ་ཡུན་རིང་འབར་གྱུར་ཅིག །ཅེས་བྱུང། དེའང་ཚུལ་ཁྲིམས་ཀྱི་ཕར་ཕྱིན་ལ་ལྷག་པར་བསླབ་ཚུལ་ནི་སྲོག་གཅོད་ཀྱི་ལས་ལས་གཏན་དུ་ལོག་ཅིང། དེའི་བདེན་སྟོབས་ཀྱིས་ཕྱི་ནང་གི་གནོད་པ་ཞི་བ། ལེགས་པར་ཕ་རོལ་ཏུ་ཕྱིན་པ་དང། ཉའི་རྒྱལ་པོ། སྲེག་པའི་ཕྲུ་གུ་སོགས་ཀྱི་སྐྱེས་པའི་རབས་དང། བརྒྱ་བྱིན་དུ་གྱུར་པའི་ཚེ་ལྷ་མིན་གྱི་དཔུང་གིས་བདས་ཀྱང། ཤིང་ཤལ་མ་ལའི་སྟེང་གི་མཁའ་ལྡིང་གི་ཕྲུ་གུ་ལ་གནོད་ཀྱིས་དོགས་ནས་རང་སྲོག་ལ་མ་གཟིགས་པར་ཕྱིར་ལོག་པ་ལྟ་བུ་དང། བྲམ་ཟེའི་སློབ་དཔོན་གྱིས་རྐུ་བ་ཆོས་སུ་བསྟན་ཀྱང་དེར་གཏན་ནས་མ་ཞུགས་པ་ལྟ་བུ་མ་བྱིན་ལེན་སྤངས་ཚུལ། ལོག་གཡེམ་སྤངས་ཚུལ་མྱོས་བྱེད་མའི་སྐྱེས་རབས་དང། གཞན་ཡང་ཁྱིམ་ནི་བཙོན་ར་དང་འདྲ་བར་གཟིགས་ཏེ་དཔལ་འབྱོར་མཐའ་དག་མཆིལ་མའི་ཐལ་བ་བཞིན་དུ་སྤངས་ནས་ཚངས་པར་སྤྱོད་པའི་བརྟུལ་ཞུགས་ལྷུར་བཞེས་པའི་ཚུལ། སྟོན་པ་ལྐུག་འཕྱེའི་སྐྱེས་རབས། རྒྱལ་རིགས་ཕྱུག་པོའི་སྐྱེས་རབས།
ཚོང་དཔོན་དུ་སྐྱེས་པའི་རབས་སོགས་མཐའ་ཡས་སོ། །དེ་ལྟར་དུས་ཤིན་ཏུ་རིང་པོར་དཀའ་སྤྱད་དྲག་པོ་བཟོད་པར་བྱས་ཏེ། ཡང་དག་པའི་ཚུལ་ཁྲིམས་དང་བརྟུལ་ཞུགས་ལས་ཆ་ཙམ་ཡང་མི་འདའ་བར་བསྲུངས་ནས། སྔོན་གྱི་རྒྱལ་བ་རྣམས་མཉེས་པར་བྱས་པ་དེའི་སྟོབས་ཀྱིས་སྒོ་གསུམ་གྱི་ཉེས་སྤྱོད་སྡོམ་པའི་ཚུལ་ཁྲིམས་དང། དེ་བརྗོད་བྱར་བྱེད་པ་འདུལ་བའི་སྡེ་སྣོད་ལ་སོགས་པ་ལུང་རྟོགས་ཀྱི་བསྟན་པ་རྒྱས་པར་སྨོན་ལམ་མཛད་པའོ། །དེའང་ཚུལ་ཁྲིམས་ཀྱི་སྒྲ་དོན་མདོ་སྡེ་རྒྱན་གྱི་དབྱིག་འགྲེལ་ལས། བསིལ་བ་ཐོབ་པར་བྱེད་པས་ན་ཚུལ་ཁྲིམས་ཏེ། དེ་དང་ལྡན་པ་ལ་ཡུལ་གྱི་མཚན་མའི་ཉོན་མོངས་པས་ཡོངས་སུ་གདུངས་པ་མེད་པའི་ཕྱིར་རོ། །ཞེས་དང། བློ་བརྟན་གྱི་འགྲེལ་བཤད་ལས། ཤཱི་ལ་ཞེས་འབྱུང་སྟེ། ཤཱི་ནི་བསིལ་བའི་དོན་ལ། ལ་ནི་ཐོབ་པའམ་ལེན་པའི་དོན་ཏོ། །ཚུལ་ཁྲིམས་དང་ལྡན་པ་རྣམས་ཚེ་འདིར་ཡུལ་ལ་ཆགས་པའི་དོན་དུ་འདོད་ཆགས་དང་ཞེ་སྡང་ལ་སོགས་པའི་རྒྱུས་ལུས་དང་ངག་གི་སྒོ་ནས་བྱ་བ་སྣ་ཚོགས་ཀྱི་སྡུག་བསྔལ་བའི་གདུང་བར་བྱེད་པ་མི་འཐོབ་པར་འགྱུར་བ་དང་། དེའི་རྒྱུས་ཚེ་རབས་གཞན་དུའང་ངན་སོང་གི་གནས་སུ་མི་མྱོང་ཞིང། ལྷ་དང་མིའི་བསིལ་བའི་བདེ་བ་འཐོབ་པར་འགྱུར་བ་དང། མཇུག་ཏུ་མྱ་ངན་ལས་འདས་པའི་བདེ་བའི་བསིལ་བ་འཐོབ་པར་བྱེད་པས་ན་ཚུལ་ཁྲིམས་ཞེས་བྱའོ། །ཞེས་སོ། །འདི་ནི་ཤཱི་ལ་ཞེས་པར་ཡི་གེ་བསྣན་པའི་ངེས་ཚིག་གི་བཤད་ཚུལ་ཡིན་ལ། བོད་སྐད་ལྟར་ཚུལ་དང་ཁྲིམས་ཞེས་སོ་སོར་བཤད་ན་ཚུལ་ནི་རྣམ་བཤད་རིགས་པ་ལས། ཚུལ་གྱི་སྒྲ་ནི་བདེན་པ་དང། །ལམ་དང་འབྲེལ་འབྱུང་རིག་པ་དང། །ངེས་
འབྱེད་ཆ་དང་མྱ་ངན་འདས། །ཐབས་དང་རིགས་པ་ཉིད་ལ་ཡོད། །ཅེས་པ་ལྟར་དོན་བརྒྱད་དང། སྨྲ་སྒོ་ལྟར་དོན་བཅུ་ལ་འཇུག་ཀྱང། འདིར་གཙོ་བོ་རྒྱུད་རྡོ་རྗེ་རྩེ་མོ་ལས། ཚུལ་ཞེས་བྱ་བ་དོན་ཅི་ཡིན། །གང་དུ་དྲི་མ་མེད་གྱུར་པ། །དེ་ནི་དེ་ཡི་ཚུལ་དུ་བརྗོད། །ཅེས་དྲི་མ་ཟད་པའི་མྱང་འདས་ཀྱི་གོ་འཕང་སྒྲུབ་པ་དང་རྗེས་སུ་མཐུན་པའི་སྤྱོད་པ་ལ་ཚུལ་ཞེས་བྱ་སྟེ། མངོན་པ་མཛོད་སོགས་སུ་ཚངས་པའི་ཚུལ་ཞེས་བཤད་པ་དང་དོན་གཅིག་གོ །ཁྲིམས་ནི་རྒྱལ་པོའི་བཀའ་ཁྲིམས་ལས་ཡུལ་གྱི་སྐྱེ་བོ་རྣམས་འདའ་མི་ནུས་པ་བཞིན། ཐར་པ་དོན་དུ་གཉེར་བ་རྣམས་ཚུལ་དེ་ལས་འདར་མི་རུང་བའི་དོན་ནོ། །བརྟུལ་ཞུགས་ནི། པྲ་སྟི་དགེ་བཤེས་ཀྱི་ཊཱིཀྐར། བརྟུལ་བ་ནི་བསྡུས་པ་སྟེ། ལུས་ངག་གི་འཇུག་པ་གཅིག་ཏུ་ངེས་པར་བྱས་པའོ། །ཞུགས་པ་ནི་དེ་ལྟར་ངེས་པར་བྱས་པ་དེ་ཉིད་ལས་མི་འདའ་བར་ཞུགས་པའོ། །དེའང་ནང་པ་ལ་གྲགས་པ་ནི་ཚུལ་ཁྲིམས་དང། ཕྱི་རོལ་པ་ལ་གྲགས་པ་ནི་བརྟུལ་ཞུགས་ཞེས་པའོ། །ཞེས་གསུངས་པས། སྒྲ་བཤད་དེ་ལྟར་བྱས་ཆོག་ཀྱང། ཚུལ་ཁྲིམས་བརྟུལ་ཞུགས་ཞེས་པ་ཕྱི་ནང་གཉིས་ལ་སོ་སོར་སྦྱར་བ་དཔྱད་དགོས་ཏེ། དཔུང་བཟང་གི་རྒྱུད་ལས། དེ་ཡི་བརྟུལ་ཞུགས་དང་པོར་ངས་བཤད་དོ། །ཞེས་དང། དེ་བཞིན་ཕྱག་བཅས་བཟླས་དང་བརྟུལ་ཞུགས་ཀྱི། །ཞེས་པ་ལྟ་བུ་ཚུལ་ཁྲིམས་ཀྱང་བརྟུལ་ཞུགས་སུ་བསྡུས་ནས་གསུངས་པ་དང། མིག་རྣམ་པར་སྦྱོང་བའི་གཟུངས་ལས། ཚུལ་ཁྲིམས་ཀྱི་བདེན་པ་དང། བརྟུལ་ཞུགས་ཀྱི་བདེན་པ་དང། ཞེས་སོ་
སོར་གསུངས་པ་དང། བླ་མ་ལྔ་བཅུ་པར། བརྟུལ་ཞུགས་ཅན་གྱིས་ཀུན་བྱ་སྟེ། །ཞེས་པ་ལྟ་བུ་ནང་པའི་གཞུང་ལས་བརྟུལ་ཞུགས་ཀྱི་སྒྲས་བསྟན་པ་མཐའ་ཡས་ཤིང། ཕྱི་རོལ་བའི་གཞུང་མཛོད་འགྲེལ་དུ་དྲངས་པ་ལས། གང་དག་སྐྱེས་བུ་གང་ཟག་གང་ཞིག་བ་ལང་གི་ཚུལ་ཁྲིམས་དང། རི་དྭགས་ཀྱི་ཚུལ་ཁྲིམས་དང། བྱ་གག་གི་ཚུལ་ཁྲིམས་ཡང་དག་པར་བླངས་ཏེ་གནས་པ་དེ་ནི། ཞེས་པ་ལྟ་བུ་ཚུལ་ཁྲིམས་ཀྱི་སྒྲས་བཤད་པའང་མང་བས་བརྡ་འདོགས་ཚུལ་ཕྱི་བ་དང་ནང་པའི་ཁྱད་མིན་ནོ། །འོ་ན་ཚུལ་ཁྲིམས་བརྟུལ་ཞུགས་ཞེས་གཉིས་ཀ་སྨོས་པ་ཅི་ཡིན་ཞེ་ན། ཚུལ་ཁྲིམས་ནི་སྒོ་གསུམ་གྱི་ཉེས་སྤྱོད་སྡོམ་པས་སྤྱི་ཡིན་ལ། བརྟུལ་ཞུགས་ནི་དེ་དང་མཐུན་པར་འཇུག་པ་ལུས་ངག་གི་ཀུན་སྤྱོད་ལ་གཙོ་བོར་བྱེད་པས་བྱེ་བྲག་ལྟ་བུ་ཡིན་ཏེ། དཔེར་ན་ཚུལ་ཁྲིམས་བརྟུལ་ཞུགས་མཆོག་འཛིན་གྱི་ལྟ་བ་ཞེས་པའི་ཚུལ་ཁྲིམས་དེ་ལུས་ངག་ཡིད་གསུམ་གའི་སྒོ་ནས་ལྟ་བ་ངན་པའི་རྗེས་སུ་སློབ་པའི་བསམ་སྦྱོར་གཉིས་ཀ་དང། བརྟུལ་ཞུགས་གཙོ་བོར་ལུས་ངག་གི་ཀུན་སྤྱོད་དང་ཆ་ལུགས་སོགས་ལ་བཞག་པ་བཞིན་ཡིན་པའི་ཕྱིར། ཀུན་བཏུས་དར་ཊཱིཀ་ལས། ལྟ་ངན་གྱིས་ཀུན་ནས་བསླང་བའི་ཚུལ་ཁྲིམས་དང། ཐ་མལ་པའི་སྤྱོད་པ་སྤངས་ནས་གཡང་གཞི་འཆང་བ་སོགས་ལུས་ངག་གི་འཇུག་པ་ངེས་པར་བྱེད་པའི་བརྟུལ་ཞུགས། ཞེས་སོ། །དཀའ་ཐུབ་ཅེས་པའི་དཀའ་བ་བྱ་དཀའ་བའི་སྤྱོད་པ་ལ་བྱས་ཏེ། དེར་འཇུག་ཕོད་ཅིང་སྒྲུབ་ནུས་པ་ཐུབ་པའི་དོན་དུ་བཤད་པའང་མི་རུང་བ་མེད་ཀྱང། ཁྱད་པར་འཕགས་བསྟོད་ཀྱི་འགྲེལ་པ་སོགས་སྔོན་གྱི་གཞུང་
མང་པོའི་ཚིག་གི་ནུས་པར་བརྟགས་ན་ཆགས་སྡང་སོགས་ཉོན་མོངས་སྐྱེ་བའི་རྐྱེན་དྲག་པོས་གདུངས་ཏེ་བཟོད་དཀའ་བ་ནི་འདིའི་དཀའ་བའི་དོན་དང། དེའི་དབང་དུ་མི་འཆོར་བས་དྲན་ཤེས་བཞིན་བག་ཡོད་དང་བཟོད་པ་ལ་སོགས་པས་དེ་ཉིད་ཕར་ཟིལ་གྱིས་གནོན་པ་ནི་ཐུབ་པའི་དོན་དུ་བྱས་ན་ལེགས་ཏེ། རྗེ་བླ་མའི་ཉམས་མགུར་དུ། ཉོན་མོངས་གདུང་བའི་དཀའ་ཐུབ་ཀུན་གྱི་ཕུལ། །ཞེས་ལུང་ལས་བཟོད་པ་དཀའ་ཐུབ་ཀྱི་མཆོག་ཏུ་གསུངས་པའི་དོན་དེ་ལྟར་བཀྲལ་ཞིང། སྔོན་ཤཱཀྱའི་གཞོན་ནུ་རིགས་གཟུགས་འབྱོར་པས་ཁེངས་པའི་གདུག་རྩུབ་ཅན་གདུལ་དཀའ་བ་རྣམས་གཞོན་ནུ་དོན་ཐམས་ཅད་གྲུབ་པས་ཟིལ་གྱིས་མནན་པས་ཤཱཀྱ་ཐུབ་པར་བཏགས་པ་བཞིན་ནོ། །དེ་ལྟ་བུའི་དཀའ་ཐུབ་ཀྱི་སྤྱོད་པ་དེའང་དུས་ཉི་ཚེ་བ་ཙམ་མ་ཡིན་པར་བསྐལ་པ་ཆེན་པོ་དུ་མའི་བར་གྱི་ཡུན་ཤིན་ཏུ་རིང་པོར་བསྟེན་པར་བྱས་ཤིང་ཕྱོགས་བཅུའི་རྒྱལ་བ་ཐམས་ཅད་མཆོད་པར་མཛད་དོ། །འདིར་བསྟེན་བྱས་ཤིང་ཞེས་པའི་དོན་པྲ་སྟི་དགེ་བཤེས་ཀྱི་ཊཱིཀྐར། ཤིང་ཞེས་བྱ་བ་ནི་སྡུག་པ་སོགས་དང། ལྷན་ཅིག་པ་དང་ལྷག་བཅས་སོགས་ལ་འཇུག་པ་ལས་འདིར་ནི་ལྷན་ཅིག་པའི་དོན་ཅན་ཏེ། བསྟེན་པར་བྱས་པ་དང་ལྷན་ཅིག་ཏུའམ། བསྟེན་པར་བྱས་བཞིན་དུ་ཞེས་བྱ་བའོ། །ཞེས་དཔེར་ན་འགྲོ་བཞིན་དུ་ཁ་ཏོན་བྱེད་ཅེས་པ་ལྟ་བུ། བྱ་བ་ངོ་བོ་ཐ་དད་པ་གཉིས་ལྷན་ཅིག་ཏུ་བསྒྲུབ་པ་ལ་བཤད་ཅིང། མཆོད་པའང་བསྙེན་བཀུར་སོགས་ལ་གཙོ་བོར་
བཤད་དོ། །འདིའང་ཅུང་ཟད་དཔྱད་དགོས་ཏེ། རྙེད་པ་དང་བཀུར་སྟིས་མཆོད་ཚུལ་ནི། གོང་དུ། བདག་གིས་སངས་རྒྱས་རང་སངས་རྒྱས། །ཉན་ཐོས་ཕ་དང་མ་དང་ནི། །དྲང་སྲོང་དག་ལ་མཆོད་བྱས་པས། །ཞེས་སྦྱིན་པའི་སྐབས་སུ་བཤད་ཟིན་པས་འདིར་སྒྲུབ་པའི་མཆོད་པ་ལ་བྱས་ན་འབྲེལ་གྱི། སྔ་མ་དང་ཁྱད་མེད་ན་ཟློས་སྐྱོན་དུ་འགྱུར་རོ། །སངས་རྒྱས་ལ་མཆོད་ཅེས་སྨོས་ཚད་མཆོད་པའི་ཡོ་བྱད་ཅིག་ཕུལ་བ་ཁོ་ནར་གོ་མི་དགོས་ཏེ། མཆོད་པའི་སྐད་དོད་པཱུ་ཛ་ཞེས་པ་མཉེས་པར་བྱེད་པའི་དོན་ཡིན་པས། རྒྱལ་བ་རྣམས་ཀྱིས་ཇི་ལྟར་གསུངས་པ་བཞིན་དུ་ཚུལ་ཁྲིམས་ཡང་དག་པར་བླངས་ནས་ཉམས་པ་མེད་པར་བསྲུངས་ཏེ་རང་གི་སེམས་རྒྱུད་འདུལ་ཞིང་བྱང་ཆུབ་ཀྱི་སྤྱོད་པ་ལས་ལྷག་པའི་མཆོད་པ་མེད་པའི་ཕྱིར་ཏེ། ཡབ་སྲས་མཇལ་བའི་མདོ་ལས། སྤྱད་པ་སྤྱོད་ཡུལ་གང་མོས་པ། །དེ་དག་སྟོན་པ་མཆོད་པ་སྟེ། །མཆོད་པ་དེ་ནི་བླ་ན་མེད། །ཅེས་དང། བདུད་རྩི་གསང་བའི་རྒྱུད་ལས། མཉེས་པའི་དོན་གྱིས་མཆོད་པ་སྟེ། །སྤོས་སོགས་ཕུལ་བས་མཉེས་པ་མེད། །རང་སེམས་ལས་སུ་རུང་བ་དག །མཉེས་པའི་མཆོད་པ་ཆེན་པོ་འོ། །ཞེས་དང། སེམས་ཅན་མགུ་བར་བྱེད་པའི་བསྟོད་པ་ལས། དེས་ན་སེམས་ཅན་ཕན་པ་བྱས་ན་ང་ལ་མཆོད་པའི་མཆོག །གང་གི་ཡིད་ནི་མགུ་བར་བྱེད་པ་མཆོད་པ་ཡིན་པས་སོ། །ཞེས་སོགས་དང། སྐྱེས་རབས་ལས་ཀྱང། ཕན་པའི་ལན་དུ་མཆོད་པ་བྱ་བ་ནི། །བསྒོ་བའི་ཚིག་བཞིན་ཉམས་སུ་ལེན་པ་ཡིན། །ཞེས་གསུངས་པ་ལྟར་རོ། །དེས་ན་ཚུལ་ཁྲིམས་བསྲུངས་པ་དེ་ཉིད་རྐང་པ་གསུམ་པའི་སྐབས་ཀྱི་མཆོད་པ་ལའང་
བཞག་སྟེ་གཉིས་ཀ་དོན་གཅིག་ཏུ་བྱས་ན་ལེགས་སོ། །གསུམ་པ་ཚུལ་ཁྲིམས་ཀྱི་འཁོར་རམ་གྲོགས་བཟོད་པ་ལ་བསླབ་ཚུལ་ནི། བཟོད་བརྟུལ་རྟག་ཏུ་བསྟེན་བྱས་ཤིང། །སེམས་ཅན་ཉོན་མོངས་སྙིགས་མ་ཡི། །སེམས་ཅན་ངན་བཟོད་བྱས་གྱུར་པས། །བསྟན་པ་ཡུན་རིང་འབར་གྱུར་ཅིག །ཅེས་བྱུང། དེའང་ཐུབ་པའི་དབང་པོ་ཉིད་སྔོན་དྲང་སྲོང་བཟོད་པར་སྨྲ་བའི་སྐྱེ་བ་བཞེས་པའི་ཚེ་རྒྱལ་པོ་གདུག་པས་ཕྱག་ཞབས་ཐམས་ཅད་རིམ་པ་བཞིན་བཅད་ཀྱང་ཁྲོ་བའི་སེམས་ཅུང་ཟད་ཙམ་ཡང་མ་སྐྱེས་པ་དང། བྲམ་ཟེའི་རིགས་ཤིག་ཏུ་འཁྲུངས་ཏེ་དབེན་པར་གཤེགས་པ་ན་སྔོན་གྱི་ཆུང་མའང་རབ་ཏུ་བྱུང་ནས་རྗེས་སུ་འབྲངས་པ་རྒྱལ་པོ་ཞིག་གིས་ཕྲོགས་ཏེ་བསྙས་ཐབས་དུ་མ་སྨྲས་ཀྱང་ཁྲོ་བའི་སེམས་མ་སྐྱེས་པ་དང། སྤྲེའུ་དང་། བྱ་ཤིང་རྟ་མོ། རི་དྭགས་ཤ་ར་བྷ། རི་དྭགས་རུ་རུ་རྣམས་སུ་གྱུར་པའི་ཚེ་རང་གིས་ཕར་བསྐྱབས་པ་ལ་དྲིན་གཟོ་མེད་པར་གནོད་པ་བྱེད་པ་ལའང་མི་ཁྲོ་ཞིང། ཕར་གནོད་ལན་དུ་ཕན་པ་བསྒྲུབ་པ་དང། ཁྱུ་མཆོག་ཏུ་འཁྲུངས་པའི་ཚེ་སྤྲེའུ་མི་བསྲུན་པས་རྟག་ཏུ་མཐོ་བརྩམས་ཀྱང་ལན་ཡེ་མི་མཛད་པ་སོགས་ཤིན་ཏུ་སྙིགས་མ་བདོ་བའི་དུས་ཀྱི་སེམས་ཅན་སྤྱོད་པ་ངན་པ། ཉོན་མོངས་པའི་གདོན་གྱིས་བརླམས་པ་རྣམས་ཀྱིས་མི་འཚམ་པའི་བྱ་བ་དུ་མས་སྒོ་མཐའ་དག་ནས་ཡང་དང་ཡང་དུ་གཙེས་ཀྱང་བཟོད་པའི་གོ་ཆ་རྟག་ཏུ་བསྟེན་ནས་ཁྲོ་བ་སྐད་ཅིག་ཀྱང་མ་ཤོར་བར། དེ་ཐམས་ཅད་ལ་མ་བུ་གཅིག་པ་ལྟ་བུའི་བྱམས་པའི་ཐུགས་ཀྱིས་དགོངས་པར་མཛད་པ་དེའི་བདེན་པའི་སྟོབས་ཀྱིས་ལུས་
ཅན་ཡོངས་ལ་ཕན་པ་མ་ལུས་པ་འབྱུང་བའི་སྒོ་གཅིག་པུ་བསྟན་པ་རིན་པོ་ཆེ་དར་ཞིང་རྒྱས་པར་སྨོན་པའོ། །དེའང་གཞུང་ལས་བཟོད་པའི་སྔོན་འདིར་བརྩོན་འགྲུས་འབྱུང་བ་ནི་སྤྱོད་འཇུག་ལས། བརྩོན་གང་དགེ་ལ་སྤྲོ་བ་འོ། །ཞེས་པ་ལྟར་བརྩོན་འགྲུས་ཀྱི་ངོ་བོ་དགེ་བ་ལ་སྤྲོ་བ་ཡིན་ཞིང། སྦྱིན་སོགས་གང་ལ་སློབ་ཀྱང་དེ་དང་དེར་སྤྲོ་བ་ཞིག་མེད་མི་རུང་དུ་དགོས་པས། གཅིག་ནི་གསུམ་ཆར་ལ་ཡང་གཏོགས། །ཞེས་པ་ལྟར། བརྩོན་འགྲུས་ནི་དེ་ཐམས་ཅད་ལ་ཁྱབ་བྱེད་ལྟ་བུར་འགྲོ་བ་ལ་དགོངས་ནས་གོ་རིམ་འཆོལ་ཏེ་གསུངས་པ་ཡིན་ལ། སྤྱིར་ཕྱིན་དྲུག་གི་རིམ་པ། སྐྱེ་རིམ་དང། དམན་མཆོག །རགས་ཕྲ་གསུམ་གྱི་སྒོ་ནས་ངེས་ཚུལ་རྒྱན་ལས་འབྱུང་བ་བཞིན། འདིར་ཡང་སྤྱི་བབ་དང་བསྟུན་ནས་བཤད་པ་ཡིན་པས་སྐྱོན་དུ་མི་འགྱུར་ཏེ། དགོས་པ་དེ་འདྲ་ཡོད་ན་ལྟག་འོག་བསྣོར་ནས་འཆད་དུ་རུང་བར་སྤྱན་རས་གཟིགས་བརྟུལ་ཞུགས་སོགས་ཀྱིས་བཤད་དོ། །དེའང་བཟོད་བརྟུལ་ནི་བཟོད་པའི་བརྟུལ་ཞུགས་སམ་གོ་ཆ་ཡིན་ལ། དེའང་གནོད་པ་ལན་རེ་ཙམ་བཟོད་པ་མ་ཡིན་པར་རྟག་ཏུ་བཟོད་པའི་གོ་ཆ་མི་ལྷོད་པས་ན་རྟག་ཏུ་བསྟེན་བྱས་ཞེས་སྨོས་སོ། །སེམས་ཅན་ཉོན་མོངས་སྙིགས་མ་ཡི། །ཞེས་པ་ནི། ཉོན་མོངས་ཤིན་ཏུ་རགས་ཤིང་རྒྱས་པའི་སེམས་ཅན་ནམ། ཉོན་མོངས་པའི་སྙིགས་མ་བདོ་བའི་དུས་ཀྱི་སེམས་ཅན་ཞེས་པ་ཡིན་ལ། ཉོན་མོངས་པའི་དོན་ནི་ཀུན་བཏུས་ལས། ཆོས་གང་འབྱུང་བ་ན་རབ་ཏུ་མ་ཞི་བའི་མཚན་ཉིད་དུ་འབྱུང་སྟེ། དེ་བྱུང་བས་སེམས་ཀྱི་རྒྱུད་རབ་ཏུ་མ་ཞི་བར་འབྱུང་བ་དེ་ཉོན་མོངས་པའི་མཚན་ཉིད་
དོ། །ཞེས་གསུངས་ལ། མ་ཞི་བར་བྱེད་ཚུལ་རྒྱལ་སྲས་མ་ལས། དེའང་རྣམ་པ་དྲུག་སྟེ། འདི་ལྟར་རྣམ་པར་གཡེང་བས་རབ་ཏུ་མ་ཞི་བ་དང། ཕྱིན་ཅི་ལོག་གིས་རབ་ཏུ་མ་ཞི་བ་དང། རྒོད་པས་རབ་ཏུ་མ་ཞི་བ་དང། རྨུགས་པས་རབ་ཏུ་མ་ཞི་བ་དང། བག་མེད་པས་རབ་ཏུ་མ་ཞི་བ་དང། འཛེམ་པ་མེད་པས་རབ་ཏུ་མ་ཞི་བའོ། །ཞེས་ཡང་དག་པའི་ལམ་ལ་འཇུག་ཏུ་མི་སྟེར་ཞིང། ཕྱིན་ཅི་ལོག་གི་ཡུལ་ལ་རང་དབང་མེད་པར་སྦྱོར་བས་ན་སེམས་ལས་སུ་མི་རུང་བར་བྱེད་དོ། །མདོར་ན་སེམས་ཉོན་མོངས་པའི་གཞན་དབང་དུ་སོང་བ་ནི་སྡུག་བསྔལ་གྱི་བདེན་པའི་དོན་ཡིན་ཞིང། ཉོན་མོངས་ཀྱི་རྙོག་པ་དང་བཅས་པ་དེ་ཉིད་མ་ཞི་བའམ་འཁོར་བའི་དོན་ཡང་ཡིན་ལ། སེམས་ཉོན་མོངས་ཀྱི་རྙོག་པ་དང་བྲལ་བ་ནི་ཞི་བའམ་ཐར་པ་དང་འགོག་པའི་བདེན་པའི་དོན་ཡིན་ཏེ། འཁོར་བ་དང་མྱང་འདས་ཞེས་པ་རང་གི་སེམས་འདི་ཉིད་ཉོན་མོངས་དང་བྲལ་མ་བྲལ་ཙམ་ལ་འཇོག་གི། གཞན་སྡེའི་འདོད་པ་བཞིན་རྟག་པ་རང་བྱུང་གི་དབང་ཕྱུག་ལྟ་བུའི་འཁོར་རྩ་དང། ཐར་པ་གཟུགས་ཅན་ལྟ་བུ་ལོགས་ཤིག་ན་མེད་པའི་ཕྱིར། རྡོ་རྗེ་གུར་ལས། རིན་ཆེན་སེམས་ལས་ཕྱིར་གྱུར་པའི། །སེམས་ཅན་མེད་ཅིང་སངས་རྒྱས་མེད། །ཅེས་དང། ས་ར་ཧས། སེམས་བཅིངས་ན་ནི་འཆིང་འགྱུར་ཏེ། །དེ་ཉིད་གྲོལ་ན་ཐེ་ཚོམ་མེད། །ཅེས་གསུངས་སོ། །སྤྱོད་འཇུག་ལས་ཀྱང། གང་གིས་ཆོས་ཀྱི་གཙོ་བོ་མཆོག །སེམས་ཀྱི་གསང་འདི་མ་ཤེས་ན། །བདེ་འཐོབ་སྡུག་བསྔལ་གཞོམ་འདོད་ཀྱང། །
དེ་དག་དོན་མེད་གྱི་ནར་འཁྱམས། །ཞེས་གསུངས་ཏེ། དེ་དག་གི་དགོངས་པའི་གནད་དྲིལ་བ་ཀུན་བཏུས་དར་ཊཱིཀ་ལས། སེམས་ཀྱི་རྒྱུད་རབ་ཏུ་མ་ཞི་བར་བྱེད་པས་རབ་ཏུ་ཕྱེ་བའོ། །རྒྱུད་ཞི་བ་ནི་འགོག་བདེན་ཡིན་ལ། དེ་བྱེད་པ་ནི་ལམ་བདེན་དང། སེམས་རྒྱུད་རབ་ཏུ་མ་ཞི་བ་ནི་སྡུག་བསྔལ་བདེན་པ་ཡིན་ལ། དེ་བྱེད་པའི་གཙོ་བོ་ནི་ཉོན་མོངས་སོ། །ཞེས་གསུངས་ཏེ་ལེགས་བཤད་བླ་ན་མེད་པར་སྣང་ངོ་། །སྙིགས་མ་ཞེས་པ་སྐབས་ཐོབ་ཀྱི་དབང་གིས་ཆེས་ཉག་ཕྲ་བ་ལ་འཇུག་པ་དང། ཆེས་རགས་ཤིང་ལྷག་པར་བདོ་བ་ལ་འཇུག་ཚུལ་གཉིས་ཡོད་དེ། པད་དཀར་ལས། བསྐལ་པའི་སྙིགས་མ་ལས་བྱུང་ངམ། སེམས་ཅན་གྱི་སྙིགས་མའམ། ཉོན་མོངས་པའི་སྙིགས་མའམ། ལྟ་བའི་སྙིགས་མའམ། ཚེའི་སྙིགས་མ་ཞེས་སྙིགས་མ་ལྔ་བཤད་པས། བསྐལ་བའམ་དུས་ཀྱི་སྙིགས་མ་དང་ཚེའི་སྙིགས་མ་ནི་དཔེར་ན་ཆུ་མིག་སྐམ་པའི་ལྷག་མ་ཅུང་ཟད་ཅིག་ལུས་པ་ལ་སྙིགས་མ་ཟེར་བ་བཞིན། ཟད་པའི་མཐར་ལུས་པ་ལ་བཤད། ཉོན་མོངས་པ་དང་ལྟ་བའི་སྙིགས་མ་ནི། དཔེར་ན་ཚོན་བཏུལ་བའི་ནང་ནས་རྡོ་དང་བྱེ་མ་སོགས་རགས་པ་བསལ་བ་ལ་སྙིགས་མ་ཟེར་བ་བཞིན་དུ་ཤིན་ཏུ་རགས་ཤིང་ལྷག་པར་བདོ་བ་ལ་བྱེད་དོ། །དེ་དག་སོ་སོའི་ཁྱད་པར་ནི་སློབ་དཔོན་མ་ཏི་ཙི་ཏྲའི་རྩོད་པའི་དུས་ཀྱི་གཏམ་ལས། བཅུད་རྣམས་སས་འཐུང་དངོས་རྣམས་སྟོབས་ཆུང་ལྷ་རྣམས་ཆར་ནི་འབེབས་མི་བྱེད། །རླུང་རྣམས་རབ་ཏུ་དྲག་ལྡང་ལོ་ཏོག་རྣམས་ནི་མི་སྨིན་སྐྱེ་མི་འགྱུར། །སྐྱེས་ལ་སེར་འབབ་ས་རྣམས་རྩོད་པའི་དུས་ཀྱིས་དབང་བསྒྱུར་འབྲས་བུ་མེད། །ཅེས་པ་ལྟར་
སྣོད་བཅུད་མཐའ་དག་གི་བཀྲག་མདངས་དང་བཅུད་ཉམས་ཤིང་། ཕྱི་ནང་གི་ཉེར་འཚེ་དུ་མ་རུ་འཛིང་བས་དུས་ཀྱི་སྙིགས་མ་དང། ཡང་དེ་ཉིད་ལས། ཡོན་ཏན་མཁས་ལ་མི་བཀུར་ནོར་ལྡན་རྣམས་ནི་མཆོད་བྱ་མིན་པར་མཆོད། །སྐྱེ་རྨོངས་མཆོད་བྱེད་གཤིན་རྗེའི་འཇིག་རྟེན་སྡུག་བསྔལ་ངེས་འཁྲིད་གང་གིས་བཟློག །ཅེས་པ་ལྟར། སྐྱེ་བོ་རྣམས་རང་བཞིན་གྱིས་དམ་པ་མ་ཡིན་པའི་ཕྱོགས་ལ་དགའ་ཞིང། དམ་པ་རྣམས་ཀྱི་རྗེས་སུ་མི་འཇུག་པར་གདུལ་དཀའ་བ་སེམས་ཅན་སྙིགས་མའི་དོན་དང། ཡང། སྡིག་ལ་དགའ་ཞིང་སྟོབས་ལྡན་གཡོ་ཅན་རྣམས་ཀྱིས་དམ་ཆོས་བསྣུབ་པར་འགྱུར། །ཞེས་སོགས་ལྟར་ཆགས་སྡང་གཡོ་སྒྱུ་ཕྲག་དོག་སོགས་ཉོན་མོངས་པ་ཤིན་ཏུ་རགས་པས་སྡིག་པ་མི་བཟད་པ་ལ་ཚམ་ཚོམ་མེད་པར་འཇུག་པ་ཉོན་མོངས་སྙིགས་མ་དང། ཉོན་མོངས་པའི་ནང་ནས་ཀྱང་བདེ་ལེགས་ཐམས་ཅད་ཀྱི་རྩ་བ་གཅོད་བྱེད་ལས་འབྲས་ལ་སྐུར་བ་འདེབས་པའི་ལྟ་ངན་རྒྱས་པ་ནི་ལྟ་བ་སྙིགས་མའི་དོན་ཡིན་ཏེ། སྤྱིར་རྟག་ཆད་ཀྱི་ལྟ་བ་གཉིས་ཀ་ལྟ་ངན་ཡིན་ཀྱང། རྟག་ལྟས་དགེ་རྩ་མི་གཅོད་པར་མ་ཟད། བཞི་བརྒྱ་པར། དམ་པ་མིན་ལ་བདག་འཛིན་མཆོག། །ཅེས་པ་ལྟར། ལས་འབྲས་ལ་ཡིད་ཆེས་བསྐྱེད་པ་དང། དགེ་བའི་ལས་ཀྱི་རྐྱེན་བྱེད་པའང་སྲིད་ཅིང། ཆད་ལྟ་ནི་མཛོད་ལས། མེད་པར་ལྟ་བས་རྩ་བ་གཅོད། །ཅེས་པ་ལྟར། དགེ་རྩ་གཅོད་བྱེད་ཡིན་པས་ལྟ་བའི་སྙིགས་མའང་གཙོ་བོར་དེ་ལ་འཇོག་དགོས་སོ། །མཁན་པོ་བོ་དྷི་སཏྭའི་ཞལ་ཆེམས་ལའང། སྙིགས་མ་ལྔའི་
ནང་ནས་ལྟ་བའི་སྙིགས་མ་ཞེས་བྱ་བ་སྟོང་ཉིད་ལ་དགའ་བ་ཡོང་བར་མདོ་ལས་གསུངས། ཞེས་པའང། སྟོང་ཉིད་ཅེས་པའི་སྒྲ་ཙམ་ལ་ཞེན་ནས་འཁོར་འདས་བཅིངས་གྲོལ་མཐའ་དག་རི་བོང་གི་རྭ་བཞིན་གཏན་མེད་དུ་འཛིན་ཅིང། ཐ་སྙད་པའི་ཤེས་པ་ཐམས་ཅད་འཁྲུལ་བ་ཡིན་པས་དེའི་ངོར་ཡོད་པས་ཡོད་གོ་མི་ཆོད་པར་སྨྲ་བ་དང། ཁ་ཅིག་ལྟ་བ་བསྒོམ་པའི་ཚེ་ཅི་ཡང་ཡིད་ལ་མི་བྱེད་པར་སྟོང་སང་ཧད་པོ་ཙམ་ལ་འཇོག་ཅིང། དེ་ཉིད་ལྟ་བའི་ཡང་རྩེར་རློམ་པ་སོགས་སྤྱོད་ཕྱོགས་རས་སུ་བོར་ནས་ལྟ་བ་ལྟར་སྣང་རེ་ཙམ་གཙོ་བོར་བྱེད་པ་དང་དེའི་རྗེས་སུ་མོས་པ་མང་དུ་འབྱུང་བ་ནི་ལྟ་བ་སྙིགས་མར་སོང་བའི་དོན་ཡིན་ནོ། །ཚེ་སྙིགས་མ་ནི་ཚེ་ལོ་མར་འགྲིབ་པས་མི་རྣམས་ཚེ་ཚད་ཐུང་ཞིང། ནད་རིམས་གདོན་བགེགས་ལ་སོགས་པ་དུས་མ་ཡིན་པའི་འཆི་རྐྱེན་ཤིན་ཏུ་མང་བས་ཚེ་ཚད་དེར་ཡང་སྡོད་པ་ཉུང་སྟེ། མ་ཏི་ཙི་ཏྲས། འགྲོ་ལ་ནད་འཕེལ་བ་ནི་དེ་དང་དེ་དག་འབྱུང་པོ་རྣམས་ཀྱིས་བཏང། །ཞེས་དང། སྨན་རྣམས་གང་ཡང་ནུས་མེད་དེ་བཞིན་ཁྱད་པར་རྣམས་ནི་རབ་ཏུ་ཉམས། །ཀྱེ་ཧུད་སྡུག་བསྔལ་རྩོད་པའི་དུས་ནི་ཉེར་གནས་བསོད་ནམས་གཉེར་བ་ནགས་སུ་སོང། །ཞེས་པ་ལྟར་རོ། །དེ་ལྟར་རྩོད་ལྡན་སྙིགས་མ་ལྔ་བདོ་བའི་དུས་ཡིན་ཀྱང་། རྩ་བ་ཉོན་མོངས་སྙིགས་མ་ལ་ཐུག་པས། འདིར་དེ་ཉིད་དངོས་སུ་བསྟན་ཏེ་གཞན་བཞི་ཤུགས་ལ་འཕངས་སོ། །སེམས་ཅན་ངན་བཟོད་ཅེས་པ་ནི། ཇི་ལྟར་བྱས་ཀྱང་མགུ་བར་མི་ནུས་པའི་སེམས་ཅན་གདུག་པའི་རང་བཞིན་ཤིན་ཏུ་བྱེད་པ་ངན་པའམ། ཡང་ན་ཕ་རོལ་པོ་ཤིན་ཏུ་དམན་ཞིང་
ཉམ་ཆུང་བས་རང་ལ་གནོད་པ་བསྐྱལ་བ་ན་དཀའ་ཚེགས་མེད་པར་ཕྱིར་བཟློག་ནུས་བཞིན་དུ་དམན་ཆ་བླངས་ནས་ཁུར་བའི་དོན་ཏེ། ཤེས་རབ་སྡོང་བུ་ལས། མཐུ་ཆེན་བཅོས་སུ་མི་རུང་ལ། །བཟོད་པ་བྱར་ཡང་ཅི་ཞིག་ཡོད། །དུལ་བ་ཞི་བའི་སྤྱོད་པ་ལ། །བཟོད་པ་བྱ་ཡང་ཅི་ཞིག་དགོས། །ཞེས་དང། མ་ཧེའི་སྐྱེས་རབས་ལས། མཐུ་ཆེན་བཅོས་སུ་མི་རུང་ལ། །བཟོད་པ་ཅི་ཞིག་བྱར་ཡོད་མོད། །མཐུ་ཆུང་འཁྲུལ་པ་དག་ལ་ནི། །མཐུ་ཡོད་བཞིན་དུ་བཟོད་ན་རུང། །ཞེས་དང་། མཐུ་སྟོབས་ཆུང་བས་བརྙས་ཐབས་བྱས་པ་ལ། །དང་དུ་ལེན་པ་ཡོན་ཏན་རྣམས་ཀྱི་མཆོག །ཅེས་གསུངས་པ་ལྟར་རོ། །གཉིས་པ་བསླབ་པ་གསུམ་གར་ཁྱད་མེད་དུ་གལ་ཆེ་བ་བརྩོན་འགྲུས་ལ་བསླབ་ཚུལ་ནི། བདག་སྔོན་བརྩོན་འགྲུས་དང་ལྡན་པས། །རྟག་ཏུ་བརྟན་ཅིང་ཕ་རོལ་གནོན། །སེམས་ཅན་ཐམས་ཅད་བསྒྲལ་དོན་དུ། །བསྟན་པ་ཡུན་རིང་འབར་གྱུར་ཅིག །ཅེས་བྱུང་། དེའང་དགེ་སློང་གྲགས་པའི་འོད་དུ་འཁྲུངས་པའི་ཚེ་སངས་རྒྱས་དོན་ཡོད་གཤེགས་ཀྱི་སྤྱན་སྔར་ཚིགས་སུ་བཅད་པས་བསྟོད་བཞིན་དུ་རང་ལུས་སྒྲོན་མེར་བྱས་ནས་ཕུལ་བ་དང། ཡང་སྐྱེ་བ་གཅིག་གི་ཚེ་དེ་བཞིན་གཤེགས་པ་སྐར་རྒྱལ་མེའི་ཁམས་ལ་སྙོམས་པར་ཞུགས་པ་མཐོང་ནས་ཞག་བདུན་གྱི་བར་ཞབས་ཡ་གཅིག་གིས་འགྲེང་སྟེ། སྐྱེས་བུ་ཁྱུ་མཆོག་ཁྱོད་འདྲ་ཞེས་སོགས་ཀྱིས་བསྟོད་པ་མཛད། གྲུབ་མཐའ་འོག་མ་རྣམས་ཕྱིན་དྲུག་རིམ་ཅན་དུ་རྫོགས་པར་འདོད་པས། མཛོད་ལས། སྐར་རྒྱལ་བསྟོད་པའི་བརྩོན་འགྲུས་
ཀྱིས། །ཞེས་དེའི་ཚེ་བརྩོན་འགྲུས་ཀྱི་ཕར་ཕྱིན་རྫོགས་པར་བཤད་དོ། །གཞན་ཡང་མདོ་ལས་མ་ཕམ་པ་བདག་ཅག་གི་སྟོན་པ་ལས་བསྐལ་པ་དྲུག་ཅུས་ཐུགས་བསྐྱེད་པ་སྔའང། སྟོན་པ་ཉིད་སློབ་པའི་གནས་སྐབས་སུ་བརྩོན་འགྲུས་ཧ་ཅང་ཤུགས་དྲག་པས་དེའི་སྔོན་དུ་སངས་རྒྱས་པར་གསུངས་པ་དང་། འཇམ་པའི་དབྱངས་ཀྱི་བཀའ་བཞིན་རྗེ་བླ་མས་སྨོན་ལམ་མཛད་པའི་སྐབས་སུའང། རླབས་པོ་ཆེའི་བརྩོན་འགྲུས་ཀྱི་སྒོ་ནས་བྱང་ཆུབ་ཆེན་པོ་བརྙེས་པ་མཉམ་མེད་ཤཱཀྱའི་རྒྱལ་པོ་ཞེས། སློབ་པའི་གནས་སྐབས་སུ་རྒྱལ་སྲས་ཀུན་གྱི་ཁྲོད་ན་བརྩོན་འགྲུས་ཁྱད་དུ་འཕགས་པའི་དཔེར་མཛད་པ་བཞིན་ནོ། །དེ་ལྟར་བྱ་བ་ངན་ཞེན་གྱི་ལེ་ལོ་སོགས་སྤངས་ཏེ་རྒྱལ་སྲས་ཀྱི་སྤྱོད་པ་རླབས་པོ་ཆེ་ལ་འཇུག་པར་སྤྲོ་བའི་བརྩོན་འགྲུས་དང་ལྡན་ཞིང། སྙིང་སྟོབས་ཤིན་ཏུ་བརྟན་པ་རྡོ་རྗེ་རྒྱལ་མཚན་གྱི་མདོ་ལས་གསུངས་པ་བཞིན་ཕ་རོལ་མི་མཐུན་པའི་ཕྱོགས་ཉོན་མོངས་སོགས་ཟིལ་གྱིས་གནོན་པའི་ང་རྒྱལ་གྱི་གདེང་དང་ལྡན་པས་སྐད་ཅིག་ཙམ་ཡང་སྒྱིད་ལུག་དང་ཞུམ་པ་མེད་པར་བྱ་དཀའ་བའི་སྤྱོད་པ་མཐའ་དག་ལ་སློབ་པར་མཛད་དེ། དེ་ཐམས་ཅད་ཀྱང་རང་དོན་ཡིད་བྱེད་ཀྱིས་མ་བསླད་པར། སེམས་ཅན་ཐམས་ཅད་འཁོར་བའི་རྒྱ་མཚོ་ལས་བསྒྲལ་བའི་དོན་འབའ་ཞིག་ཏུ་བྱས་པ་ཡིན་པས། དེའི་བདེན་པའི་སྟོབས་ཀྱིས་ཐར་པའི་གླིང་དུ་བགྲོད་པའི་གྲུ་གཟིངས་བསྟན་པ་རིན་པོ་ཆེ་འཕེལ་ཞིང་རྒྱས་པར་སྨོན་པའོ། །དེའང་བརྩོན་འགྲུས་ཀྱི་མི་མཐུན་ཕྱོགས་ནི་སྤྱོད་འཇུག་ལས། ལེ་ལོ་ངན་ལ་ཞེན་པ་དང། །སྒྱིད་ལུག་བདག་ཉིད་བརྙས་པ་འོ། །ཞེས་པ་ལྟར་བྱ་བ་ངན་པ་ལ་ཞེན་ནས་ཡང་དག་པའི་སྒྲུབ་པ་ལ་འཇུག་འདོད་མེད་པ་དང།
དེར་འཇུག་འདོད་ཀྱང་བདག་ལྟ་བུས་ག་ལ་ནུས་སྙམ་དུ་བདག་ཉིད་བརྙས་ཤིང་སྒྱིད་ལུག་པ་གཉིས་ཡིན་པས། དང་པོའི་གཉེན་པོར་དགེ་བ་ལ་འབད་དགོས་པའི་རྒྱུ་མཚན་སྒོ་དུ་མ་ནས་བསམས་ཏེ་དེ་ལ་འཇུག་པར་སྤྲོ་བའི་བརྩོན་འགྲུས་བསྐྱེད་དགོས་པར་གསུངས་པ་རྐང་པ་དང་པོའི་དོན་དང་གཅིག་ལ། དེ་བརྩོན་འགྲུས་བསྐྱེད་པའི་ཐབས་སུ་སྟོབས་བཞི་གསུངས་པའི་ནང་ནས་དང་པོ་མོས་པའི་སྟོབས་ཡིན་ནོ། །རྐང་པ་གཉིས་པའི་སྐབས་སུ་ཞུམ་ཞིང་སྒྱིད་ལུག་པའི་གཉེན་པོ་བརྟན་པའི་སྟོབས་ཀྱི་སྒོ་ནས་སྒྲུབ་པ་མཐར་འབྱིན་ཚུལ་གསུངས་པ་ཡིན་ཞིང། སྟོབས་འདིར་ང་རྒྱལ་གྱི་སྟོབས་ཞེས་ཀྱང་བཤད་དེ། ཇི་སྐད་དུ་བྱང་ཆུབ་ལམ་རིམ་ཆེན་མོ་ལས། མོས་པའི་སྟོབས་ཀྱིས་བརྩོན་འགྲུས་མ་སྐྱེས་པ་བསྐྱེད་ཅིང། སྐྱེས་ཟིན་མི་ལྡོག་པའི་རྒྱུར་བརྟན་པའི་སྟོབས་སམ་ང་རྒྱལ་གྱི་སྟོབས་བསྒྲུབ་ནས་ཞེས་དང། བརྟན་པའི་སྟོབས་ནི་གང་ལ་བརྩོན་འགྲུས་བརྩམས་པ་དེ་ལས་མི་ལྡོག་པར་མཐར་འབྱིན་པའོ། །ཞེས་དང་། དམ་བཅའ་མཐར་ཕྱིན་པར་འདོད་པས་ང་རྒྱལ་གསུམ་བསྒོམ་པར་བྱ་སྟེ། ཞེས་གསུངས་སོ། །འདིར་ཕ་རོལ་གནོན་ཞེས་གསུངས་པ་དང། སྤྱོད་འཇུག་དང་ལམ་རིམ་གྱི་ང་རྒྱལ་བསྒོམ་པར་གསུངས་པ་དོན་གཅིག་སྟེ། ང་རྒྱལ་ནི་ཕ་རོལ་ཟིལ་གྱིས་གནོན་པ་ཁེངས་པའི་རྣམ་པར་འཇུག་ལ། འདིར་ཡང་སྤྱོད་པ་བྱ་དཀའ་བ་ཅི་འདྲ་ཞིག་ཡིན་ཀྱང་བདག་གིས་ཅིའི་ཕྱིར་མི་ནུས་སྙམ་པ་དང། སེམས་ཅན་གཞན་གྱིས་མ་ནུས་ཀྱང་བདག་གིས་ངེས་པར་ནུས་སྙམ་པ་དང་། ཉོན་མོངས་སོགས་མི་མཐུན་པའི་ཕྱོགས་མཐའ་
དག་ཀྱང་བདག་གིས་ཅིའི་ཕྱིར་དྲུངས་ནས་འབྱིན་མི་ནུས་སྙམ་དུ་རང་གིས་རང་ཉིད་གཟེངས་བསྟོད་ནས་དཔའ་བསྐྱེད་པ་སྐབས་འདིའི་ཕ་རོལ་གནོན་ཚུལ་དང་ང་རྒྱལ་སྒོམ་ཚུལ་ཡིན་པའི་ཕྱིར་ཏེ། སྤྱོད་འཇུག་ལས། རྡོ་རྗེ་རྒྱལ་མཚན་ཆོ་ག་ཡིས། །བརྩམས་ནས་ང་རྒྱལ་བསྒོམ་པར་བྱ། །ལས་དང་ཉོན་མོངས་ནུས་པ་སྟེ། །གསུམ་པོ་དག་ལ་ང་རྒྱལ་བྱ། །ཞེས་དང། བདག་གིས་ཀུན་ལས་རྒྱལ་བྱ་སྟེ། །བདག་ལས་སུ་ཡང་རྒྱལ་མི་བྱ། །རྒྱལ་བ་སེང་གེའི་སྲས་བདག་གི །ང་རྒྱལ་འདི་ལ་གནས་པར་བྱ། །ཞེས་དང། ལམ་རིམ་ལས། གཞན་ལ་རེ་བ་བཀག་ནས་རང་གཅིག་པུས་བྱེད་པར་གོ་བགོ །དེའང་གཞན་གྱིས་རང་ལྟར་བྱ་བར་མི་ནུས་ཀྱི། རང་གིས་ནུས་སོ་སྙམ་དུ་གདེང་འཆའ། དེ་ལྟར་མཐོང་ནས་སྒྲུབ་པའི་ཚེའང་ཉོན་མོངས་ཕར་ལ་གཞོམ་གྱི། དེས་ཚུར་ལ་ནམ་ཡང་འཇོམས་མི་ནུས་པར་བྱེད་པའི་བློའི་བརྟན་པ་བསྐྱེད། ཅེས་སོ། །དེ་ལྟར་རྩ་བའི་ཚིག་གི་བརྟན་པ་ཞེས་པས་ལས་དང་ནུས་པའི་ང་རྒྱལ་གཉིས་བསྟན། ཕ་རོལ་གནོན་ཞེས་པས་ཉོན་མོངས་ལས་ང་རྒྱལ་བ་བསྟན་པ་ཡིན་ནོ། །སྤྱིར་བརྩོན་འགྲུས་བསྐྱེད་ཚུལ་ལ་སྟོབས་བཞི་གསུངས་ཀྱང། འདིར་མོས་པ་དང་བརྟན་པའི་སྟོབས་གཉིས་སུ་བསྡུས་ནས་གསུངས་པ་ཡིན་ཏེ། མངོན་རྟོགས་རྒྱན་ལས། མ་ཞེན་ཡོངས་སུ་མི་ངལ་དང། །ཞེས་སྒྲུབ་པ་མི་ཉམས་པ་དང་འཕེལ་བའི་རྒྱུ་གཉིས་སུ་བསྡུས་ནས་གསུངས་པ་བཞིན་ནོ། །པྲ་སྟི་དགེ་བཤེས་ཀྱི་ཊཱིཀྐར། སེམས་ཅན་ཐམས་ཅད་བསྒྲལ་བྱས་པས། །ཞེས་འགྱུར་བཅོས་ནས་གསུང་སྣང་ཡང། གོང་དུ་། སེམས་ཅན་ཕོངས་པ་བསྐྱབ་པའི་ཕྱིར། །ཞེས་པ་དང་འདྲ་བར་ཀུན་སློང་གི་ཁྱད་པར་ལ་
སྦྱར་ཏེ། བསྒྲལ་དོན་ཞེས་པ་རང་སོར་བཞག་ན་ལེགས་སམ་སྙམ་མོ། །གསུམ་པ་ཏིང་ངེ་འཛིན་གྱི་བསླབ་པའི་ངོ་བོ་བསམ་གཏན་ལ་བསླབ་ཚུལ་ནི། བསམ་གཏན་རྣམ་ཐར་གཟུགས་མེད་དང། །ཏིང་འཛིན་གངྒཱའི་བྱེ་སྙེད་པ། །བསྒོམས་པས་དེ་མཐུས་བདག་གི་ནི། །བསྟན་པ་ཡུན་རིང་འབར་གྱུར་ཅིག །ཅེས་བྱུང་། དེའང་སྔོན་གྱི་གླིང་བཞི་ལ་དབང་བའི་རྒྱལ་པོ་བརྟན་པས་བྱིན་ཞེས་བྱ་བར་འཁྲུངས་པའི་ཚེ། དེ་བཞིན་གཤེགས་པ་གཟི་བརྗིད་ཚོགས་ཀྱི་རྒྱལ་པོའི་སྤྱན་སྔར་ཏིང་ངེ་འཛིན་རྒྱལ་པོའི་མདོ་ཐོས་ནས་རྒྱལ་སྲིད་ཀྱི་འབྱོར་པ་རླབས་པོ་ཆེ་སྤངས་ཏེ་རབ་ཏུ་བྱུང་ནས་དབེན་པར་བསམ་གཏན་བསྒྲུབས་པ་དང། སྟོབས་ཀྱི་འཁོར་ལོས་བསྒྱུར་བ་སྒྲོན་མ་སྣང་བྱེད་དང། རྒྱལ་པོ་འཇིག་རྟེན་སྣ་ཚོགས་ལ་མངོན་པར་དགའ་བ་སོགས་སུ་གྱུར་པའི་ཚེའང་རྒྱལ་སྲིད་སྤངས་ཏེ་དཀའ་ཐུབ་ཀྱི་ནགས་སུ་བསམ་གཏན་དང་ཚད་མེད་བཞི་རྣམས་བསྒོམས་པ་དང། རྒྱལ་པོ་ཀུན་ཏུ་གོ་བྱེད་དུ་གྱུར་པའི་ཚེ་ཁྱིམ་ལ་གནས་བཞིན་དུའང་འདོད་པ་ལ་འདུན་པ་སོགས་སྤངས་ཏེ། བུད་མེད་བརྒྱད་ཁྲིའང་བསམ་གཏན་དང་ཚད་མེད་ལ་བཀོད་པ་དང། བྲམ་ཟེ་གནག་ལྷས་སྐྱེས་ཀྱིས་རྒྱལ་པོ་རྒྱལ་ཕྲན་འབངས་ལ་སོགས་པ་ཐམས་ཅད་རིམ་གྱིས་བསྡུས་ཏེ་རབ་ཏུ་བྱུང་ནས་ཏིང་ངེ་འཛིན་བསྒོམ་པ་ལ་སྦྱར་བ་སོགས་མཐའ་ཡས་སོ། །དེ་ལྟར་གཟུགས་ཀྱི་ཁམས་ཀྱི་བསམ་གཏན་བཞི་དང་རྣམ་པར་ཐར་པ་བརྒྱད། གཟུགས་མེད་པའི་སྙོམས་པར་འཇུག་པ་བཞི་ལ་སོགས་པ་འཇིག་རྟེན་དང་འཇིག་རྟེན་ལས་འདས་པའི་ཏིང་ངེ་འཛིན་གངྒཱའི་ཀླུང་གི་བྱེ་མའི་རྡུལ་གྲངས་དང་མཉམ་པ་བརྗོད་
ཀྱིས་མི་ལང་བ་རང་གིས་ཉམས་སུ་བླངས་ནས་གོམས་པར་བྱས་ཤིང། གཞན་དག་ཀྱང་ཚུལ་དེ་ལ་འགོད་པར་མཛད་པ་དེའི་བདེན་པའི་སྟོབས་ཀྱིས་ཁམས་གསུམ་གྱི་ཉོན་མོངས་མངོན་གྱུར་དང་ས་བོན་ཅི་རིགས་པར་སྤོང་བའི་གཉེན་པོ་ལྷག་པའི་ཏིང་ངེ་འཛིན་དང། དེ་བརྗོད་བྱར་བྱེད་པ་མདོ་སྡེའི་སྡེ་སྣོད་ལ་སོགས་པ་ལུང་རྟོགས་ཀྱི་བསྟན་པ་འཕེལ་ཞིང་རྒྱས་པར་སྨོན་པའོ། །དེའང་བསམ་གཏན་གྱི་སྒྲ་དོན། བོད་སྔ་མ་ཁ་ཅིག་བསམ་པ་བརྟན་པར་བྱེད་པས་བསམ་གཏན་ཞེས་ཟེར་བ་ནི། ཡི་གེའི་དོན་ལའང་མ་ཞུགས་པར་རྗེ་བདག་ཉིད་ཆེན་པོས་གསུངས་པ་བཞིན་རྟོགས་སླ་ལ། རིན་ཆེན་དོན་གྲུབ་ཀྱི་ཊཱིཀྐར་བསམ་པ་ནི་དམིགས་པ་ཡིད་ལ་བྱེད་ཅིང་གཏོད་པའི་སེམས་དང། གཏན་ཞེས་པ་རྒྱུན་ལ་འཇུག་པས། སེམས་དམིགས་པ་ལ་གཏད་པའི་རྒྱུན་དེ་ཉིད་ལས་མི་གཡེལ་བའོ། །ཞེས་འབྱུང་བའང་དཔྱད་པར་བྱ་བའི་གནས་ཏེ། འདིའི་སྐད་དོད་དྷྱཱ་ན་ཞེས་པ་ངེས་ཚིག་དང་བྱིངས་སྒྲུབ་ཀྱི་བཤད་ཚུལ་གཉིས་ཡོད་པས། སྔ་མ་ལྟར་ན། དྷ་ལ་ར་བསྣན་པས་དྷཱ་ར་འཛིན་པ་དང། ན་ལ་མ་གོང་དུ་བསྣན་པས་མཱ་ན་ཡིད་ལ་འཇུག་པས། ཡིད་འཛིན་པས་ན་བསམ་གཏན་ཞེས་བཤད་དགོས་ཏེ། བློ་གྲོས་བརྟན་པའི་རྒྱན་གྱི་འགྲེལ་བཤད་ལས། བསམ་གཏན་གྱི་སྒྲ་རྒྱ་གར་སྐད་དུ་དྷྱཱ་ན་ཞེས་འབྱུང་སྟེ། དྷ་ལ་ཡ་བཏགས་ཡོད་པ་རའི་དོན་དུ་དྲངས་ན་འཛིན་པའི་དོན་དུ་འགྲོ་སྟེ། སེམས་ཕྱི་རོལ་ཏུ་གཡེང་བ་ནང་དུ་འཛིན་པར་བྱེད་པས་ན་བསམ་གཏན་ཞེས་བྱའོ། །ཞེས་རྒྱན་རྩ་འགྲེལ་གྱི་སྐབས་སུ་ངེས་ཚིག་གི་བཤད་པ་གཙོ་བོར་མཛད་དོ། །བྱིངས་སྒྲུབ་ཀྱི་དབང་དུ་མཛད་ན་བྱིངས་མདོར། དྷྱཻ་སེམས་པ་
ལའོ་ཞེས་པ་ལྟར། སེམས་པའི་བྱིངས་ལས་སྒྲུབ་པའི་ཚེ། འདིས་སེམས་པར་བྱེད་པའམ་དྲན་པ་གཏོད་པས་ན་བསམ་གཏན་ཞེས་བཤད་དགོས་ཏེ། ཉན་ས་ལས། དམིགས་པ་ལ་ཡང་དག་པར་གཏོད་པ་དང། དྲན་པ་རྩེ་གཅིག་ཏུ་གཏོད་པའི་ཕྱིར་བསམ་གཏན་ཞེས་བྱའོ། །ཞེས་དང། མཛོད་འགྲེལ་ལས། བསམ་གཏན་ཞེས་བྱ་བའི་དོན་ཅི་ཞེ་ན། འདིས་སེམས་པར་བྱེད་པས་ན་བསམ་གཏན་ཏེ། ཞེས་སྐུ་མཆེད་གཉིས་ཀས་གཙོ་བོར་བྱིངས་སྒྲུབ་ཀྱི་དབང་དུ་བྱས་ནས་གསུངས་སོ། །དེས་ན་བསམ་གཏན་ཞེས་པ་རྒྱུན་ལ་བྱས་ནས་བསམ་པ་རྒྱུན་ཆགས་པ་ཞེས་བཤད་པ་ནི་བཤད་ཚུལ་གང་དང་ཡང་མི་འབྲེལ་བས། གཏན་པའམ་གཞི་ལ་བྱས་ན་ལེགས་སམ་སྙམ་སྟེ། འདུལ་བའི་མདོར་གོས་ཕྱི་རོལ་ཏུ་མི་ལྟུང་བར་གང་དུ་བཞག་ནས་དྲས་ཤིང་དྲུབ་པའི་གཞི་ལ་དེའི་གཏན་པ་དང། སྒོ་གླེགས་ཀྱི་འཁོར་ཤིང་འཛིན་བྱེད་ལ་འཁོར་གཏན་ཞེས་བཏགས་པ་ལྟར། བསམ་པའམ་ཡིད་ཕྱི་རོལ་ཏུ་མི་གཡེང་བར་ནང་དུ་འཛིན་པར་བྱེད་པ་ལ་བྱས་ན་ངེས་ཚིག་གི་བཤད་ཚུལ་དང་འགྲིག་གོ །རྣམ་ཐར་ནི། སྤྲུལ་པའི་ལམ་གཟུགས་ཅན་གཟུགས་ལ་ལྟ་བ། གཟུགས་མེད་གཟུགས་ལ་ལྟ་བ། གཟུགས་སྡུག་པའི་རྣམ་ཐར་ཏེ་གསུམ། མཐོང་ཆོས་བདེ་གནས་ཀྱི་ལམ་གཟུགས་མེད་བཞིའི་རྣམ་ཐར་བཞི། འགོག་པའི་རྣམ་ཐར་ཏེ་བརྒྱད་དོ། །འདི་དག་ལ་རྣམ་ཐར་ཞེས་པ་ནི་རྣམ་ཐར་སྒོ་གསུམ་གྱི་སྒྲ་དོན་དང་མི་མཚུངས་ཏེ། གསེར་འཕྲེང་ལས། རང་སའི་ཀུན་དཀྲིས་ལས་ཐར་ཞིང་དེ་དང་མི་འདྲེས་པའི་ཆ་ནས་རྣམ་ཐར་དུ་
འཇོག་གོ །ཞེས་པ་ལྟར། རང་སའི་ཀུན་དཀྲིས་ཀྱི་བསླད་པས་མ་གོས་པ་ཙམ་ལ་བྱེད་དོ། །གཟུགས་མེད་ནི། ནམ་མཁའ་མཐའ་ཡས། རྣམ་ཤེས་མཐའ་ཡས། ཅི་ཡང་མེད། སྲིད་རྩེའི་སྙོམས་འཇུག་རྣམས་སོ། །ཏིང་ངེ་འཛིན་ནི་མངོན་པ་གོང་འོག་གཉིས་ཀར་སེམས་རྩེ་གཅིག་པ་ཞེས་མཐུན་པར་གསུངས་ཀྱང། ཀུན་བཏུས་ལས། ཤེས་པའི་རྟེན་བྱེད་པའི་ལས་ཅན་ནོ། །ཞེས་ཡང་དག་པའི་ཤེས་རབ་འདྲེན་བྱེད་དགེ་སེམས་ཁོ་ནའི་འཁོར་དུ་འབྱུང་བས་ཡུལ་ངེས་སུ་གསུངས་ལ། མཛོད་ལས་དགེ་མི་དགེའི་སེམས་ཐམས་ཅད་ཀྱི་འཁོར་དུ་འཇུག་པས་སེམས་ཀྱི་ས་མང་དུ་གསུང་སོ། །འདིའི་སྒྲ་དོན་ནི། ས་མཱ་དྷིཿ ཞེས་པ་ཡང་དག་པར་འཛིན་པའི་དོན་ཡིན་ལ། བྲ་སྟི་དགེ་བཤེས་ཀྱི་ཊཱིཀྐར། ཏིང་ངེ་འཛིན་ནི་དམིགས་པ་གཅིག་སེམས་སྦྲེངས་ཆགས་སུ་ཚུག་གེ་འཛིན་པ་སྟེ། ཏིང་ངེ་ཞེས་བྱ་བ་ནི་དམིགས་པ་ལ་སེམས་གནས་ཚུལ་གཏན་ཆགས་པའི་ཉམས་ཀྱི་མིང་ཡིན། ཏིང་ངེ་། སྦྲེང་ངེ་། ཚུག་གེ་ཞེས་བྱ་བ་རྣམས་རྣམ་གྲངས་ཡིན་ཞིང། དོན་དུ་དམིགས་པ་དེ་གར་སྡོད་པའི་ངང་དུ་སྟར་ཆགས་པ་དང། རྒྱུན་ཆགས་པ་དང། བར་མ་ཆད་པ་ཞེས་བྱ་བ་ཡིན་ནོ། །ཞེས་གསུངས་སོ། །གངྒཱ་ནི་རིག་བྱེད་ཀྱི་གཞུང་ལས་སྐལ་ལྡན་ཤིང་རྟས་ཚངས་པ་དཀའ་ཐུབ་ཀྱིས་མཉེས་པར་བྱས་ཏེ་དེའི་རལ་པ་ནས་ཕབ་པར་གྲགས་ཀྱང། དངོས་པོ་ལ་མཚོ་མ་དྲོས་པ་ནས་བབས་པ་སྟེ། དེའང་རྗེ་བཙུན་མི་ལས་གངས་ཏེ་སེ་རི་བོ་གངས་ཅན་དང་། མཚོ་མ་ཕམ་མ་དྲོས་པ་ཡིན་པར་གསུངས་ཤིང། བཅོམ་རལ་སོགས་ཀྱིས་ཀྱང་དེ་བཞིན་དུ་བཤད་པ་ལྟར་ན། ཡར་ཆབ་གཙང་པོའི་རྒྱུན་ལ་གངྒཱར་
བྱེད་དགོས་ཤིང། ས་པཎ་སོགས་ཀྱིས་དེར་མདོ་ལས་གསུངས་པའི་ཁྱད་པར་རྣམས་མ་ཚང་བ་དང། གངས་ཅན་དང་ཏེ་སེ་ལ་སྐད་དོད་ཀྱང་སོ་སོར་འབྱུང་བས་མི་འཐད་ཅེས་དགག་པ་མཛད་པ་གཅིག་ཏུ་ཁ་ཚོན་གཅོད་དཀའ་འང། ཏེ་སེ་ལས་གཞན་སྤོས་ངད་ལྡང་དང་རྒྱ་མཚོའི་འགྲམ་ཚུན་ཆད་དུ་རི་བོ་གངས་ཅན་གྱི་མཚན་གཞི་ཞིག་སྟོན་རྒྱུ་དཀའ་བར་སྣང་ངོ་། །དེའི་བྱེ་མ་སྙེད་གསུངས་པ་ནི་མཐའ་ཡས་པའི་དོན་ཏེ། བྱང་ཆུབ་སེམས་དཔའི་ཏིང་ངེ་འཛིན་སྤྱི་ཙམ་དུ་མ་ཟད། བསམ་གཟུགས་བརྒྱད་ཀྱི་ནང་ནས་རེ་རེ་ལ་བརྟེན་པའི་ཏིང་ངེ་འཛིན་གྱི་སྒོའང་མཐའ་ཡས་པས། ཉན་རང་སོགས་ཀྱི་བློ་ཡུལ་ལས་འདས་པའི་ཕྱིར། ཀུན་བཏུས་ལས། བསམ་གཏན་དང་པོས་བསྡུས་པའི་ཏིང་ངེ་འཛིན་ཇི་སྙེད་པ་སངས་རྒྱས་དང་བྱང་ཆུབ་སེམས་དཔའ་རྣམས་སྙོམས་པར་འཇུག་པ་དེ་དག་གི་མིང་ཡང་ཉན་ཐོས་དང་རང་སངས་རྒྱས་རྣམས་ཀྱིས་མི་ཤེས་སོ། །བསམ་གཏན་དང་པོས་བསྡུས་པ་ཇི་ལྟ་བར་བསམ་གཏན་ལྷག་མ་རྣམས་དང། ཞེས་པ་ནས་དེ་ནི་བསམ་གཏན་གྱི་ཕ་རོལ་ཏུ་ཕྱིན་པ་ལ་བརྟེན་ནས་སོ། །ཞེས་གསུངས་པའི་ཕྱིར། དེའི་རྒྱུ་མཚན་ཕར་ཕྱིན་ཐེག་པའི་ལུགས་ཀྱི་གཟུགས་སྐུ་སྒྲུབ་པ་ལ་སེམས་ཅན་གྱི་ཁམས་མཐའ་ཡས་པ་བཞིན་དུ་དེའི་དོན་སྒྲུབ་པའི་གཟུགས་སྐུའི་བཀོད་པའང་མཐའ་ཡས་པ་ཞིག་དགོས་ལ། དེ་དང་རྣམ་པ་མཐུན་པར་རྒྱུ་བསོད་ནམས་ཀྱི་ཚོགས་དང་ཏིང་ངེ་འཛིན་གྱི་སྒོའང་མཐའ་ཡས་པ་ཞིག་དགོས་པས། དེ་ལ་རྒྱ་ཆེ་བའི་ལམ་ཞེས་བཤད་ཅིང། སྐུའི་ཡོན་ཏན་བརྗོད་པ་ནའང། ཕུན་ཚོགས་དགེ་ལེགས་བྱེ་བས་བསྐྲུན་
པ་ཞེས་མང་ཚིག་སྨོས་པ་ཡིན་ནོ། །རྡོ་རྗེ་ཐེག་པའི་སྐབས་སུ་ཁ་སྦྱོར་ལས། དེ་ཕྱིར་དེ་རྒྱས་ཅི་ཞིག་བྱ། །མདོར་བསྡུས་པས་ནི་སངས་རྒྱས་ཉིད། །ཅེས་པ་ལྟར་ཏིང་ངེ་འཛིན་གྱི་སྒོ་དེ་སྙེད་སོ་སོར་བསྒོམ་པ་ལ་མ་ལྟོས་པའི་ཐབས་མཁས་ཀྱི་སྒྲུབ་ཚུལ་ཞིག་ཡོད་པར་སྣང་ཡང་སྐབས་མ་ཡིན་པས་མ་སྤྲོས། གོམས་པ་ཞེས་པ་དང་བསྒོམ་ཞེས་པ་ཁྱད་པར་མེད་དེ། འགྲེལ་བཤད་ཚིག་གསལ་ལས། སྒོམ་པར་བྱེད་པ་ཞེས་བྱ་བ་ནི་ཡིད་དེའི་སྐལ་བ་ཅན་དུ་བྱེད་པའམ། དེའི་ངོ་བོ་བྱེད་པའོ། །ཞེས་ཡིད་ལ་འདྲིས་པར་བྱེད་པའི་དོན་ཡིན་པས། ལོ་ཙཱ་བ་རྣམས་ཀྱིས་རེས་འགའ་བསྒོམ་པའི་ལམ་ཞེས་བསྒྱུར་ཅིང། མཐོང་དང་གོམས་པའི་ལམ་དག་ལ། །ཞེས་པ་ལྟ་བུ་སྐབས་ལ་ལར་གོམས་པའི་ལམ་དུའང་བསྒྱུར་རོ། །བཞི་པ་ཤེས་རབ་ཀྱི་བསླབ་པའི་ངོ་བོ་ཤེས་རབ་ཀྱི་ཕར་ཕྱིན་ལ་བསླབ་ཚུལ་ནི། ཡེ་ཤེས་དོན་དུ་བདག་གིས་སྔོན། །དཀའ་ཐུབ་ནགས་དག་བསྟེན་བྱས་ཤིང། །བསྟན་བཅོས་དུ་མ་ཉེར་བསྟེན་པས། །བདག་གི་བསྟན་པ་འབར་གྱུར་ཅིག །ཅེས་བྱུང་། དེའང་བྲམ་ཟེ་ཤེས་རབ་སྣ་ཚོགས་སུ་གྱུར་པའི་ཚེ་ཇི་ལྟ་ཇི་སྙེད་ཀྱི་གནས་ལ་བློ་གྲོས་ཐོགས་པ་མེད་པས་འཇིག་རྟེན་གྱི་བཟོའི་བསྟན་བཅོས་ཚུན་ཆད་ནས། མཐའ་བྲལ་གྱི་ལྟ་བའི་བར་རང་གི་ཐུགས་སུ་ཆུད་ཅིང་གཞན་ལ་འདོམས་པས་རྗེས་སུ་བཟུང་བ་དང། དགེ་སློང་སྡེ་སྦྱིན་གྱིས་ཤེས་རབ་ཕུན་སུམ་ཚོགས་པའི་དོན་དུ་རང་གི་ལག་པ་སྒྲོན་མེར་སྦར་ནས་སངས་རྒྱས་ལ་ཕུལ་བས་ཆོས་ཀྱི་རང་བཞིན་མཉམ་པ་ཉིད་ཀྱི་ཏིང་ངེ་འཛིན་ཐུགས་ལ་འཁྲུངས་པ་དང། དྲང་སྲོང་ཕྱི་མའི་མཐའ་སྒྲུབ་པ་ལ་མཁས་པས་རྟེན་འབྱུང་གི་དེ་ཁོ་ན་ཉིད་རྟོགས་ཏེ་སོ་
སོའི་སྐལ་བ་བཞིན་དུ་བསྟན་པས། སེམས་ཅན་དཔག་ཏུ་མེད་པ་མི་སྐྱེ་བའི་ཆོས་ལ་བཟོད་པ་ཐོབ་པ་དང། གཞོན་ནུ་ཞི་བའི་བློ་གྲོས་ཀྱིས་དེ་བཞིན་གཤེགས་པ་ཁྲིད་མཛད་ལ་སྟོང་པ་ཉིད་ཀྱི་དོན་ལས་བརྩམས་ཏེ་དྲི་བ་མང་དུ་ཞུས་ནས་གཏན་ལ་ཕབ་པས་སྲོག་ཆགས་བྱེ་བ་ཕྲག་དྲུག་གིས་ཆོས་ཉིད་ཟབ་མོ་ཁོང་དུ་ཆུད་པ་སོགས་ཡང་དག་པའི་ཤེས་རབ་ལ་བསླབ་ཚུལ་གྱི་སྐྱེས་པའི་རབས་ཀྱང་རྣམ་གྲངས་ཤིན་ཏུ་མང་ངོ་། །དེ་ལྟར་ཡང་དག་པའི་ལྟ་བ་ཚོལ་བའི་རྒྱུའང། ལྟ་བ་ལ་ཤེས་འདོད་ཡོད་པ་ཙམ་གྱིས་མོས་མནོའི་ཨུ་ཚུགས་དང། རྟོག་གེའི་རིགས་པས་དཔྱད་པ་ཁོ་ནས་རྟོགས་མི་ནུས་པས། དེའི་རྒྱུ་ཚོགས་ཚང་བར་བསྒྲུབས་པ་སྔོན་དུ་གཏོང་དགོས། ཚོགས་ཀྱི་དབྱེ་བ་མང་དུ་གསུངས་ཀྱང་མདོར་བསྡུ་ན། ལྷན་ཅིག་བྱེད་རྐྱེན་དཀའ་ཐུབ་ཀྱི་ནགས་སུ་འདོད་ཆུང་ཆོག་ཤེས་བག་ཡོད་པའི་བརྟུལ་ཞུགས་ལ་གནས་ཏེ་ཚོགས་གསོག་སྒྲིབ་སྦྱོང་ལ་འབད་པ་དང། ཉེར་ལེན་གྱི་རྒྱུ་ཟབ་མོའི་ལྟ་བ་སྟོན་པའི་གསུང་རབ་དགོངས་འགྲེལ་དང་བཅས་པ་སོགས་ཡང་དག་པའི་བསྟན་བཅོས་དུ་མ་ལ་ཐོས་བསམ་ཚུལ་བཞིན་དུ་བྱེད་པ་གཉིས་ཡ་མ་བྲལ་བ་དགོས་པས། ཐུབ་པའི་དབང་པོ་ཉིད་ཀྱིས་རྒྱུ་ཚོགས་མ་ཚང་བ་མེད་པ་དེ་ལྟ་བུའི་སྒོ་ནས་རྟག་ཆད་སྤྲོས་པའི་མཐའ་དང་བྲལ་བ་ཟབ་མོ་དབུ་མའི་ལྟ་བ་བཙལ་ཏེ་གོམས་པ་མཐར་ཕྱིན་པར་མཛད་པ་དེའི་བདེན་པའི་སྟོབས་ཀྱིས་ལྷག་པ་ཤེས་རབ་ཀྱི་བསླབ་པ་དང། དེ་བརྗོད་བྱར་བྱེད་པ་མངོན་པའི་སྡེ་སྣོད་ལ་སོགས་པ་ལུང་རྟོགས་ཀྱི་བསྟན་པ་དར་ཞིང་རྒྱས་པར་སྨོན་པའོ། །དེའང་ཡེ་
ཤེས་ཀྱི་སྒྲ་དོན་ནི། བྲ་སྟི་དགེ་བཤེས་ཀྱི་ཊཱིཀྐར། ཡེ་ནི་ཐོག་མ་དང་གཞི་དང་ཇི་ལྟ་བའི་དོན་ལ་འཇུག་གོ །ཤེས་ནི་ཡེ་ནས་ཤེས་པ་སྟེ་ཞེས་གསུངས་ལ། བོད་སྔ་མ་མང་པོས་ཀྱང་དེ་ལྟར་ཐོག་མའམ་གདོད་མའི་ཤེས་པ་ལ་ཡེ་ཤེས་སུ་བཤད་པས། སྡོམ་གསུམ་རབ་དབྱེར། ཡེ་ཤེས་ཀྱི་ནི་བཤད་པ་ལ། །གདོད་མའི་ཤེས་པར་འཆད་པ་དང། །ཞེས་ཚིག་ལ་འཁྲུལ་བའི་གྲངས་སུ་གསུངས་ནས་དགག་པ་མཛད་དོ། །རྒྱ་སྐད་དུ་ཛྙཱ་ན་ཞེས་པའི་ཛྙཱ་རྟོག་པ་དང། ན་དགག་སྒྲར་བྱས་ཏེ་རྟོག་བྲལ་གྱི་རིག་པར་སྒྲོན་གསལ་ལས་གསུངས་ལ། ལག་སྨིས་ཛྙཱ་རྟོག་པ་དང་ན་དགག་སྒྲར་བྱས་ཀྱང་འགོག་ཚུལ་དེ་དང་མི་འདྲ་བར། སེམས་ཙམ་པས་འདོད་པའི་ཡེ་ཤེས་རང་རིག་པ་དེ་འདྲ་མེད་པའི་དོན་དུ་བཤད་པར་རྗེས་རིམ་པ་གཉིས་པའི་ཟིན་བྲིས་སུ་གསུངས། དེ་ལྟར་བྱས་ཀྱང་ཡེ་དང་ཤེས་ལ་སོ་སོར་སྦྱར་བ་མི་འཐོབ་པས། ཀུན་མཁྱེན་འཇམ་དབྱངས་བཞད་པས་ཀ་ལཱ་པའི་ཊཱིཀ་ཆེན་དུ་ཡེ་ཤེས་ཀྱི་སྐད་དོད་བྱིངས་སྒྲུབ་མཛད་པར་ཡང། ཤེས་པའི་དོན་གྱི་ཁོང་དུ་ཆུད་པ་ཙམ་ལས། ཡེ་ཞེས་པའི་དོན་ཟུར་པ་མ་བྱུང་ལ། མཁས་འཇུག་ཏུའང་ཡེ་ཤེས་དང། ཕྱག་རྒྱ་དང། གོ་རིམ་ལ་སོགས་པ་ལ་རྒྱ་གར་ན་ཡེ་དང། ཕྱག་དང། གོ་ལ་སོགས་པའི་སྒྲ་མེད་ཀྱང། བོད་ལ་ཚིག་སྦྱར་བ་བདེ་བའི་དོན་དུ་བསྣན་ནས་བསྒྱུར། ཞེས་གསུངས། རྒྱན་སྣང་ལས། ཡོངས་སུ་ཤེས་པའི་ཕ་རོལ་ཏུ་ཕྱིན་པ་ནི་ཡེ་ཤེས་ཀྱི་ཕ་རོལ་ཏུ་ཕྱིན་པའོ། །ཞེས་མ་ལུས་པའམ་རྫོགས་པའི་དོན་དུ་གསུངས་ཀྱི། གདོད་མའི་དོན་དུ་མ་གསུངས་པས། སྒྲ་དོན་གང་འཐད་བློ་ལྡན་རྣམས་ཀྱིས་དཔྱད་པར་བྱའོ། །རྒྱ་སྐད་ལ་ཡེ་དང་ཕྱག་སོགས་ཀྱི་སྐད་
དོད་མེད་ན། ཕྱག་ཆེན་ཐིག་ལེ་ལས། ཕྱག་ནི་སྟོང་པའི་ཡེ་ཤེས་ཏེ། །རྒྱ་ནི་འཁོར་བའི་ཆོས་ལས་གྲོལ། །ཞེས་འབྱུང་བ་ཅི་ཡིན་ཞེ་ན། འདི་དང་རྣམ་སྣང་མངོན་བྱང་ལས། དཀྱིལ་ནི་སྙིང་པོའོ། །འཁོར་ལོ་ནི་ལེན་པའོ། །ཞེས་པ་ལྟ་བུ་དག་ལོ་ཙཱ་བ་རྣམས་ཀྱིས་གོ་བདེ་བའི་ཐབས་ཙམ་དུ་དགོངས་ནས་ཅུང་ཟད་བསྒྱུར་ཆེས་པར་སྣང་སྟེ། འདི་འདྲའི་སྐབས། མུ་ནི་སྟོང་པའི་ཡེ་ཤེས་ཏེ། །དྲ་ནི་འཁོར་བའི་ཆོས་ལས་གྲོལ། །ཞེས་དང། མཎྜ་ནི་སྙིང་པོའོ། །ལ་ནི་ལེན་པའོ། །ཞེས་སྐད་དོད་རང་སོར་བཞག་ན་ཚིག་དོན་གཉི་ག་ལ་འགྲིག་པར་སྣང་ངོ་། །ཤེས་རབ་ཕུན་སུམ་ཚོགས་པ་སྒྲུབ་ཚུལ་གསུངས་པའི་སྐབས་འདིར་དཀའ་ཐུབ་ཀྱི་ནགས་བསྟེན་པ་དང། མང་དུ་ཐོས་པ་གཉིས་གསུངས་པའི་རྒྱུ་མཚན་ནི། འབྲས་བུ་ལྷག་མཐོང་སྒྲུབ་པ་ལ་རྒྱུ་དེ་གཉིས་གཙོ་ཆེ་བའི་དབང་གིས་ཡིན་ཏེ། དཔེར་ན་ལོ་ཏོག་ཕུན་སུམ་ཚོགས་པ་སྐྱེ་བ་ལ། ཚྭ་སྒོ་ཅན་དང་གསེག་མ་ལྟ་བུ་མ་ཡིན་པའི་ཞིང་ས་གཤིན་པ་དང། ཆུ་ལུད་དྲོད་གཤེར་སོགས་ཀྱི་རྐྱེན་འཛོམ་པ། དེར་ས་བོན་གྲུང་པོ་བཏབ་པ་གསུམ་ཚང་དགོས་པ་བཞིན། ལྷག་མཐོང་གི་རྟོགས་པ་སྐྱེ་བ་ལ་རྙེད་བཀུར་འདུ་འཛི་སོགས་ཀྱི་གཡེང་བ་མེད་པས་སེམས་ལས་སུ་རུང་བ་དང་། ཚོགས་བསགས་སྒྲིབ་སྦྱོང་སོགས་ཀྱི་རྐྱེན་འཛོམ་པ། ཟབ་མོའི་དོན་ལ་ཐོས་བསམ་གྱིས་དཔྱད་པ་ཚུལ་བཞིན་དུ་བྱེད་པ་གསུམ་དགོས་པས། ལྷན་ཅིག་བྱེད་རྐྱེན་དང་པོ་གཉིས་ནི་དཀའ་ཐུབ་ཅེས་སོགས་ཀྱིས་བསྟན་ཅིང། གསུམ་པ་ཉེར་ལེན་གྱི་རྒྱུ་ནི་བསྟན་
བཅོས་དུ་མ་ཞེས་སོགས་ཀྱིས་བསྟན་ཏོ། །དང་པོའི་དོན་བཞིན་རྗེ་བཙུན་འཇམ་དབྱངས་ཀྱིས་རྗེ་བླ་མར་གདམས་པ་ལས་ཀྱང། དེ་ཡི་གྲོགས་རྣམས་ཀུན་ལ་འབད། །བསེ་རུ་ལྟ་བུར་གནས་པར་བྱ། །འདུ་འཛི་དག་ཀྱང་སྤང་བར་བྱ། །ནང་དུ་མཉམ་པར་གཞག་པར་བྱ། །ཞེས་གསུངས་ཤིང། བསླབ་བཏུས་སུའང། བཟོད་བྱ་ཐོས་པ་བཙལ་བར་བྱ། །དེ་ནས་ནགས་སུ་གནས་པར་བྱ། །ཞེས་གསུངས་ཏེ། འདི་བྱུང་ན་སྒོམ་རིམ་ལས་བཤད་པའི་ཞི་གནས་ཀྱི་ཚོགས་དྲུག་ཀྱང་ཚང་བར་འགྱུར་ལ། ཞི་གནས་ཀྱི་ཚོགས་དེ་དག་ནི་ལྷག་མཐོང་གི་སྐབས་སུའང་མེད་མི་རུང་གི་རྒྱུ་ཡིན་ནོ། །ངེས་དོན་གྱི་བསྟན་བཅོས་རྣམས་ལ་ཐོས་བསམ་དང་དཔྱད་པ་མང་དུ་བྱེད་པ་ནི་ལྟ་བའི་ཐུན་མོང་མ་ཡིན་པའི་ཉེར་ལེན་ཡིན་པས། དེ་མེད་པར་གནས་ལུགས་མཐར་ཐུག་གི་དོན་རྟོགས་པར་འདོད་པ་ནི། ས་བོན་མ་བཏབ་པར་སྟོན་ཐོག་རེ་བ་བཞིན་ཕྱིན་ཅི་ལོག་ཁོ་ན་ཡིན་ཏེ། བོད་འདིར་དེ་ལྟ་བུའི་ཚུལ་གྱིས་ལྟ་བ་ཚོལ་བ་དང་རྙེད་པར་རློམ་པ་མང་དུ་བྱུང་བ་རྣམས་འཇམ་མགོན་བླ་མས་རིགས་ལམ་དྲི་མ་མེད་པ་བརྒྱ་ཕྲག་གི་སྒོ་ནས་དགག་པར་མཛད་དོ། །ཚུལ་འདི་ནི་རྒྱལ་བ་བྱམས་པ་མགོན་པོས་ཀྱང་གསལ་བར་གསུངས་ཏེ། རྒྱུད་བླ་མ་ལས། གང་ཕྱིར་སྦྱིན་པས་ལོངས་སྤྱོད་དག་ནི་སྒྲུབ་བྱེད་ཅིང། །ཁྲིམས་ཀྱིས་མཐོ་རིས་བསྒོམ་པས་ཉོན་མོངས་སྤོང་བྱེད་ལ། །ཤེས་རབ་ཉོན་མོངས་ཤེས་བྱ་ཀུན་སྤང་དེ་ཡི་ཕྱིར། །འདི་མཆོག་ཉིད་དེ་དེ་ཡི་རྒྱུ་ནི་འདི་ཐོས་ཡིན། །ཞེས་དང། ཤེས་རབ་མཆོག་ཡིན་དེ་གཞི་ནི། །ཐོས་པ་དེ་ཕྱིར་ཐོས་པ་མཆོག །ཅེས་ཕྱིན་དྲུག་དང། གཞི་གསུམ་དང། བསླབ་པ་གསུམ་སོགས་ཀྱི་ནང་ནས་མཆོག་
དང་གཙོ་བོར་གྱུར་པ་ཤེས་རབ་ཡིན་ལ། དེའི་རྒྱུའི་གཙོ་བོ་ཐོས་པ་ཡིན་པར་གསུངས་པ་དང། གཞུང་འདིར་ཤེས་རབ་ཀྱི་སྐབས་སུ་བསྟན་བཅོས་དུ་མ་ལ་ཐོས་པ་གཙོ་བོར་གསུངས་པ་གཉིས་དགོངས་པ་གཅིག་ཏུ་སྣང་ངོ་། །གཉིས་པ་གཞན་རྒྱུད་སྨིན་བྱེད་བསྡུ་བ་བཞི་ལ་བསླབ་ཚུལ་ལས་བརྩམས་ཏེ་བསྔོ་བ་ལ་གཉིས། བསྡུ་བ་བཞི་སོ་སོར་བསླབ་ཚུལ་དང། བསྡུ་བ་བཞིའི་སྒོ་ནས་སློབ་ལམ་སྤྱིའི་དོན་བསྡུ་བའོ། །དང་པོ་ནི། བསྡུ་བ་བཞི་པོ་འདི་དག་བྱང་ཆུབ་སེམས་དཔས་གཞན་དོན་སྒྲུབ་ཚུལ་གྱི་ཐབས་རྨད་དུ་བྱུང་བ་ཡིན་ཏེ། མདོ་སྡེ་རྒྱན་ལས། དང་པོས་སྣོད་གྱུར་དངོས་པོ་སྟེ། །གཉིས་པ་ཡིས་ནི་མོས་པ་ཡིན། །གསུམ་པ་ཡིས་ནི་བསྒྲུབ་པ་སྟེ། །བཞི་པས་རྣམ་པར་སྦྱོར་བ་འོ། །ཞེས་ཐོག་མར་སྦྱིན་པའི་གཡབ་མོས་འཁོར་དུ་བསྡུས་ནས་ཆོས་ཉན་པའི་སྣོད་རུང་དུ་བྱེད། སྙན་སྨྲས་ཆོས་ཉན་པ་སོགས་ལ་མོས་པར་བྱེད། དོན་སྤྱོད་ཀྱིས་ཉན་བཤད་བྱས་པའི་ཆོས་བསྒྲུབ་ཏུ་གཞུག། །དོན་མཐུན་པས་ཕ་རོལ་པོ་ལ་ཡིད་ཆེས་བསྐྱེད་དེ་ཡུན་རིང་པོར་སྒྲུབ་པ་ལས་ཕྱིར་མི་ལྡོག་པར་འབད་པས་སྒྲུབ་པ་མཐར་ཕྱིན་པར་བྱེད་དོ། །ཆོས་ཡང་དག་པར་སྡུད་པ་ལས། བྱང་ཆུབ་སེམས་དཔའ་རྣམས་ཀྱིས་དགའ་བར་བྱེད་པའི་ཆོས་བཞི་སྟེ། བཞི་གང་ཞེ་ན། ལན་དུ་ཕན་འདོགས་པ་ལ་མི་རེ་བའི་སྦྱིན་པ་དང། སེམས་ཅན་ཐམས་ཅད་ལ་མཉམ་པའི་སེམས་ཀྱིས་སྙན་པར་སྨྲ་བ་དང། སེམས་ཅན་ཐམས་ཅད་ཀྱི་དོན་མ་ལགས་པ་སེལ་ཅིང་དོན་སྒྲུབ་པས་དོན་སྤྱོད་པ་དང། སེམས་ཅན་ཐམས་ཅད་
ལ་དགའ་བའི་བདག་ཉིད་ཀྱིས་དོན་མཐུན་པ་སྟེ། བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱིས་དགའ་བར་བགྱི་བའོ། །ཞེས་དགའ་བར་བྱེད་པའི་ཆོས་སུ་གསུངས་པའང་བསྡུ་བའི་དོན་ཡིན་ཏེ། རྣམ་བཤད་རིགས་པ་ལས་བསྡུ་བའི་སྒྲ་འཇུག་ཚུལ་དུ་མ་ཞིག་གསུངས་པའི་ནང་ནས། དགའ་བ་ལ་འཇུག་པ་བསྡུ་བའི་དངོས་པོ་བཞི་ལྟ་བུར་གསུངས་པའི་ཕྱིར་རོ། །བསྡུ་བ་བཞི་པོ་དེའང་ཚུར་བསྡུས་ན། ཟང་ཟིང་གིས་སྡུད་པ་དང། ཆོས་ཀྱིས་སྡུད་པ་གཉིས་སུ་འདུ་སྟེ། རྒྱན་ལས། ཟང་ཟིང་དང་ནི་ཆོས་ཀྱིས་ཏེ། །དམིགས་པས་ཆོས་ལ་སོགས་པ་ཡི། །བསྡུ་བ་གཉིས་ཀྱི་སྒོ་ནས་ནི། །བསྡུ་བའི་དངོས་པོ་བཞི་འདོད་དོ། །ཞེས་དང་པོ་ཟང་ཟིང་གིས་སྡུད་པ་དང། ཕྱི་མ་གསུམ་ཆོས་ཀྱིས་སྡུད་ཚུལ་ཡིན་པས། བྱང་ཆུབ་སེམས་དཔས་དེ་གཉི་གའི་སྒོ་ནས་སློབ་མ་བསྡུ་བ་ཞིག་དགོས་སོ། །འོན་ཀྱང་སློབ་མའི་ངོས་ནས་ཆོས་ཀྱིས་སྡུད་པ་གཙོ་བོར་བྱེད་ཀྱི། ཟང་ཟིང་གི་སྡུད་པ་ལ་ཆེར་མི་ལྟོས་པ་ཞིག་དགོས་ཏེ། རྒྱན་ལས། དེ་ཆོས་བགོ་སྐལ་ལ་སྤྱོད་ཡོན་ཏན་ལྡན། །བཤེས་གཉེན་རབ་ཏུ་སྟེན་བྱེད་ཟང་ཟིང་མིན། །ཞེས་གསུངས་པ་ལྟར་རོ། །གོང་དུ་རྒྱལ་སྲས་ཀྱི་སྤྱོད་པ་ཐམས་ཅད་ཕར་ཕྱིན་དྲུག་ཏུ་བསྡུས་པར་བཤད་པས། བསྡུ་བ་བཞི་ལོགས་སུ་མི་དགོས་སྙམ་ན་སྐྱོན་མེད་དེ། བསྡུ་བ་བཞིའང་ཕར་ཕྱིན་དྲུག་པོ་དེར་མ་འདུས་པ་མིན་པའི་ཕྱིར། ལམ་རིམ་ལས། བསྡུ་བ་བཞིའང་དེར་འདུ་སྟེ་སྦྱིན་པ་འདུ་བ་ནི་སླ་ལ། ཚིག་སྙན་པ་ནི་ཕྱིན་དྲུག་ལས་བརྩམས་ཏེ་གདུལ་བྱ་ལ་འདོམས་པ་ཡིན་ཞིང། དོན་སྤྱོད་པ་ནི་གདམས་པའི་དོན་དེ་ལ་གཞན་བཀོད་པ་ཡིན་ལ་
དོན་མཐུན་པ་ནི་རང་གིས་ཀྱང་གདུལ་བྱ་དང་འདྲ་བར་སྒྲུབ་པ་ཡིན་པའི་ཕྱིར་རོ། །ཞེས་གསུངས་ཤིང་། བློ་གྲོས་མི་ཟད་པའི་མདོར་མཁོ་བ་སྦྱིན་པ་སྦྱིན་པས་བསྡུས། སྙན་སྨྲ་ཚུལ་ཁྲིམས་དང་བཟོད་པས་བསྡུས། དོན་སྤྱོད་པ་བརྩོན་འགྲུས་ཀྱིས་བསྡུས། དོན་མཐུན་པ་གཞན་གཉིས་ཀྱིས་བསྡུས་པར་ཡང་གསུངས་སོ། །འོན་ཀྱང་བསྡུ་བ་བཞིའི་ས་བཅད་ལོགས་སུ་བྱེད་པའི་རྒྱུ་མཚན་ནི། དཔེར་ན་གྲུ་གཟིངས་གཅིག་གིས་རང་ཉིད་ཆུ་བོ་ལས་བརྒལ་བ་དང། གཞན་སྒྲོལ་བའི་བྱ་བ་གཉིས་བྱེད་པ་ལྟར། ལམ་གྱི་ལུས་གཅིག་པོ་དེ་ཉིད་ཀྱིས་རང་རྒྱུད་སྨིན་པར་བྱེད་ཚུལ་ཕར་ཕྱིན་དྲུག་གི་རིམ་པས་བསྟན་ལ། གཞན་སྨིན་པར་བྱེད་ཚུལ་བསྡུ་བ་བཞིའི་རིམ་པས་བསྟན་པའི་ཕྱིར་ཏེ། བྱང་ས་ལས། ཕ་རོལ་ཏུ་ཕྱིན་པ་རྣམས་ཀྱིས་ནི་བདག་གི་སངས་རྒྱས་ཀྱི་ཆོས་ཡོངས་སུ་སྨིན་པར་བྱེད་དོ། །བསྡུ་བའི་དངོས་པོ་རྣམས་ཀྱིས་ནི་སེམས་ཅན་ཐམས་ཅད་ཡོངས་སུ་སྨིན་པར་བྱེད་དོ། །ཞེས་སོ། །དེས་ན་ཐོག་མར་རང་རྒྱུད་ལེགས་པར་བཏུལ་བའི་སྒོ་ནས་གཞན་རྗེས་སུ་འཛིན་པར་འདོད་པ་རྣམས་ཀྱིས་གཞན་དོན་སྒྲུབ་པའི་ཐབས་ཉི་ཚེ་བ་ཙམ་མ་ཡིན་པར་བསྡུ་བ་བཞི་ག་ཚང་དགོས་ཏེ། རྒྱན་གྱི་དབྱིག་འགྲེལ་ལས། འཁོར་སྡུད་པ་ལ་ཞུགས་པ་དེ་དག་ཐམས་ཅད་ཀྱིས་ནི་འདི་ལྟ་སྟེ། བསྡུ་བའི་དངོས་པོ་བཞིའི་ཐབས་ཁོ་ན་ལ་ཡང་དག་པར་བརྟེན་ཏེ་འདི་ནི་ཐམས་ཅད་ཀྱི་དོན་ཀུན་འགྲུབ་པར་བྱེད་པ་དང། ཐབས་བཟང་པོ་ཡིན་པར་སངས་རྒྱས་རྣམས་ཀྱིས་རབ་ཏུ་བསྔགས་སོ། །ཞེས་འབྱུང་བ་བཞིན་ནོ། །དེས་ན་བསྡུ་བའི་
དངོས་པོ་ལ་བསླབ་པའི་ཚུལ་ལ་བཞི་ལས། དང་པོ་མཁོ་བ་སྦྱིན་པ་ནི། བརྩེ་བའི་རྒྱུ་ཡིས་ཤ་ཁྲག་དང། །འཚོ་བ་ཡོངས་སུ་བཏང་གྱུར་ཅིང། །ཡན་ལག་ཉིང་ལག་བཏང་བ་ཡིས། །ཆོས་ཚུལ་རྣམ་པར་འཕེལ་གྱུར་ཅིག །ཅེས་བྱུང་། དེའང་སྔོན་འཁོར་ལོས་བསྒྱུར་བ་ནོར་ཅན་དུ་གྱུར་པའི་ཚེ་སྨོན་ལམ་གྱི་མཐུས་རང་གི་ཤ་ཁྲག་འཛད་མེད་དུ་བྱས་ནས་ལོ་ཁྲིའི་བར་དུ་སེམས་ཅན་རྣམས་ལ་སྦྱིན་པར་བཏང་བ་དང། འཁོར་སྒྱུར་དཔལ་གྱི་སྡེས་བྲམ་ཟེ་ལ་ལུས་ཀྱི་ཕྱེད་བྱིན་པ། སྙིང་སྟོབས་ཆེན་པོས་སྟག་མོ་ལ་ལུས་བྱིན་པ། རྒྱལ་པོ་ཟླ་འོད་ཀྱིས་བྲམ་ཟེ་དྲག་པོའི་མིག་ལ་དབུ་བྱིན་པ། བསོད་ནམས་སྟོབས་ཀྱིས་རྒྱལ་པོའི་ཆད་པས་ཕོག་པའི་མི་འགའ་ཞིག་ལ་རང་གི་ཡན་ལག་རྣམས་བཅད་ནས་གནང་སྟེ་བདེན་སྟོབས་ཀྱིས་སྦྱོར་བར་མཛད་པ། བྲམ་ཟེ་སྐར་མ་ལ་དགའ་བས་བྲམ་ཟེ་འགའ་ཞིག་ལ་རང་གི་མིག་དང་རྣ་བ་སོགས་སྩལ་བ། བྱམས་པའི་སྟོབས་ཀྱིས་གནོད་སྦྱིན་ལ་ཤ་ཁྲག་སྩལ་བ། གླང་པོ་ཆེར་འཁྲུངས་པའི་ཚེ་ལུས་སྦྱིན་པར་བཏང་བ་སོགས་མཐའ་ཡས་སོ། །དེ་ལྟར་འདོད་པའི་འདམ་དུ་བྱིང་ཞིང་སྡུག་བསྔལ་གསུམ་གྱིས་མནར་བའི་འགྲོ་བ་རྣམས་ལ་བརྩེ་བ་སྙིང་རྗེ་ཆེན་པོའི་གཞན་དབང་དུ་གྱུར་པའི་རྒྱུའམ་བྱེད་པ་ལ་བརྟེན་ནས་རང་གི་ལུས་ཀྱི་ཤ་དང་ཁྲག །འཚོ་བའི་དངོས་པོ་སྲོག་དང། དེའི་རྐྱེན་ཡོ་བྱད་དང་བཅས་པ་ཐམས་ཅད་ཕངས་པ་མེད་པར་ཡོངས་སུ་བཏང་ཞིང། ཐ་ན་ཕྱག་ཞབས་ལ་སོགས་པའི་ཡན་ལག་འདོད་པ་ལ་ཡན་ལག །སོར་མོ་ལྟ་བུའི་ཉིང་ལག་འདོད་པ་ལ་ཉིང་ལག་སོགས་གང་འདོད་དུ་བྱིན་ནས་རེ་བ་ཚིམ་པར་མཛད་དེ། རང་གི་འཁོར་དུ་བསྡུས་ནས་ཞི་བ་འདོད་ཆགས་དང་
བྲལ་བའི་ཆོས་ལ་བཀྲི་བར་མཛད་པའི་རྒྱུ་ཕུན་སུམ་ཚོགས་པ་དེའི་བདེན་པའི་སྟོབས་ཀྱིས་འབྲས་དུས་སུའང་ཆོས་ཀྱི་ཚུལ་ཏེ། ལམ་སྲོལ་བཟང་པོ་ཕྱོགས་དུས་ཀུན་ཏུ་མི་ཉམས་པར་འཕེལ་ཞིང་རྒྱས་པར་སྨོན་པའོ། ། འདིར་བརྩེ་བའི་རྒྱུ་ཡིས་ཞེས་སྨོས་པ་ནི། རྒྱན་ལས། རྩ་བ་སྙིང་རྗེ་མེད་གྱུར་ན། །དཀའ་སྤྱད་བཟོད་པ་ཉིད་མི་འགྱུར། །ཞེས་པ་ལྟར། སྙིང་རྗེ་བཟོད་གླགས་མེད་པ་ཞིག་མེད་ན་མགོ་དང་རྐང་ལག་གཏོང་བ་ལྟ་བུའི་དཀའ་སྤྱད་ལ་འཇུག་མི་ནུས་པར་ཤེས་པ་དང་། ཀུན་སློང་གི་གཙོ་བོ་ངོས་བཟུང་བའི་ཕྱིར་ཡང་ཡིན་ཏེ། སྤྱིར་གཏོང་སེམས་ཀྱི་ཀུན་སློང་ལ་ཡོན་ཏན་མཐོང་བའི་དད་པ་དང། བཀའ་དྲིན་དྲན་པའི་གུས་པ། ཕན་ཡོན་ལ་དམིགས་པའི་འདུན་པ་སོགས་དུ་མ་ཡོད་ཀྱང། བྱང་ཆུབ་སེམས་དཔའ་རྣམས་ལ་བརྩེ་བས་ཀུན་ནས་བསླང་བ་གཙོ་ཆེ་ལ། དེའི་རྒྱུ་མཚན་གྱིས་གང་ཟག་གཞན་དང་ཐེག་པ་གཞན་ལ་ལྟོས་ཏེ་དམན་པའི་ཞིང་ལས་ཡོན་ཏན་གྱི་ཞིང་མཆོག་ཏུ་བསྔགས་ཀྱང་། བྱང་སེམས་ལ་དེ་ལས་བཟློག་སྟེ་གསུངས་པའི་ཕྱིར། བློ་གྲོས་བརྟན་པའི་རྒྱན་གྱི་འགྲེལ་བཤད་ལས། ཉན་ཐོས་དང་འཇིག་རྟེན་པའི་ཚུལ་གྱིས་ནི་སློང་བའི་ཞིང་པས་སྡུག་བསྔལ་གྱི་ཞིང་དམ་པ་ནས། ལོག་པར་སྤྱོད་པའི་ཞིང་པས་ཡོན་ཏན་དང་ལྡན་པའི་ཞིང་དམ་པར་བཞག་གོ །དེ་ལྟ་མོད་ཀྱི་བྱང་ཆུབ་སེམས་དཔའ་ནི་སླར་བཟློག་པ་སྟེ། ཡོན་ཏན་དང་ལྡན་པའི་ཞིང་པས་ལོག་པར་སྤྱོད་པའི་ཞིང་དམ་པ་ཡིན་པ་ནས། སྡུག་བསྔལ་བའི་ཞིང་པས་ཀྱང་སློང་བའི་
ཞིང་དམ་པ་ཡིན་ཏེ། དེ་བས་ན་བྱང་ཆུབ་སེམས་དཔའ་རྣམས་ནི་ཞིང་གོང་མ་བཞི་པོ་རྣམས་ལ་གཏོང་བར་བྱེད་དོ། །གལ་ཏེ་གོང་མ་བཞི་པོ་མེད་ན་ལྔ་པ་སྟེ་ཡོན་ཏན་གྱི་ཞིང་ལ་གཏོང་བར་བྱེད་དོ། །ཞེས་གསུངས་སོ། །འདིའི་སྐོར་གྱི་སྐྱེས་རབས་རྣམས་ཀྱང་སློང་བའི་ཞིང་དང་སྡུག་བསྔལ་གྱི་ཞིང་ལ་བརྟེན་པ་ཤས་ཆེ་ལ། མདོ་སྡེ་རྒྱན་ལས་ཚད་མེད་ཀྱི་སྐབས་སུ་སྙིང་རྗེ་དང་སྦྱིན་པ་གཉིས་ཤས་ཆེར་སྦྱར་ནས་གསུངས་པའང་དགོངས་པ་འདི་དང་གཅིག་པར་སྣང་ངོ་། །དེར་མ་ཟད་འདིར་མཁོ་བ་སྦྱིན་པའི་སྐབས་སུ་སྙིང་རྗེ་དང། སྙན་སྨྲའི་སྐབས་སུ་བྱམས་པ་ཚིག་ཟིན་ལ་ཐོན་ཅིང། ཐེག་པ་གསུམ་གྱི་བྱང་ཆུབ་ཟག་མེད་ཀྱི་བདེ་བ་ལ་འགོད་པས་དགའ་བ་ཚད་མེད་དང། རྣམས་ཞེས་པའི་མང་ཚིག་གིས་བཏང་སྙོམས་ཚད་མེད་ཀྱང་དོན་གྱིས་འཐོབ་པས། འདི་དག་ལ་ཚད་མེད་བཞིའི་བཤད་པའང་བྱར་ཡོད་པར་སྣང་ནའང་མང་གིས་དོགས་པས་མ་བྲིས། བརྩེ་བའི་སྒྲ་དོན་རྒྱ་སྐད་ལ་ཀ་རུ་ཎ་ཞེས་པ་བདེ་འགོག་ལ་འཇུག་པས་ཐུན་མོང་དང་ཐུན་མོང་མ་ཡིན་པའི་བཤད་ཚུལ་སྣ་ཚོགས་ཡོད་ལ། སྐབས་ལ་ལར་བདེ་སྡོམ་དུའང་བཤད་དོ། །བོད་སྐད་སོར་བཞག་གི་ཚེ་ལྕགས་སྲེག་ལྟ་བུ་ལེན་མི་ཕོད་པར་སྐྱི་གཡའ་བ་ལ་ཤ་བརྩེ་བའམ་ལུས་བརྩེ་བ་ཟེར་བ་བཞིན། སེམས་ཅན་སྡུག་བསྔལ་གྱིས་མནར་བ་མཐོང་བ་ན་མི་བཟོད་པ་སྐྱེས་པ་ལ་སེམས་སམ་སྙིང་བརྩེ་བ་ཞེས་ཟེར་བར་བཤད་དོ། །ལྷག་མའི་ཚིག་དོན་རྣམས་ནི་གོ་སླ། གཉིས་པ་སྙན་སྨྲ་ནི། བདག་སྔོན་སྡིག་པའི་སེམས་ཅན་རྣམས། །བྱམས་པས་གསལ་བར་སྨིན་བྱས་ཤིང། །ཞེས་དང།
དོན་སྤྱོད་པ་སྟོན་པར། ཐེག་པ་གསུམ་ལ་རབ་བཀོད་པས། །ཆོས་ཀྱི་མཆོད་སྦྱིན་རྒྱས་གྱུར་ཅིག །ཅེས་བྱུང། དེའང་སྔོན་ཀླུའི་རྒྱལ་པོ་རྔ་ཞེས་བྱ་བར་འཁྲུངས་པའི་ཚེ་རང་གི་ནུ་བོ་ཉེ་རྔ་དང་ལྷན་ཅིག་ཏུ་བྱོན་པ་ན། ཀླུའི་རྒྱལ་པོ་རྔ་སྒྲས་ཡང་དང་ཡང་དུ་བརྙས་སྨོད་དང་ཚིག་རྩུབ་དྲག་པོས་སྤྱོས་པ་ཉེ་རྔས་མ་བཟོད་པར་དེ་དང་འཁོན་པར་བརྩམས་པ་ན། རྔས་འཇམ་ཞིང་ཡིད་དུ་འཐད་པའི་ཚིག་དུ་མས་གྲོས་བཏབ་ནས་ཞི་ཞིང་དུལ་བར་བྱས་པ་དང། རྒྱལ་བུ་ཟླ་བར་གྱུར་པའི་ཚེ་སྲིན་པོ་རྐང་ཁྲ་ཞེས་བྱ་བ་སྐྱེ་བོ་སྟོང་ཕྲག་དུ་མའི་སྲོག་འཕྲོག་པར་བྱེད་པ་ཤིན་ཏུ་རྔམ་ཞིང་རྩུབ་པའི་གདུག་པ་ཅན་ལའང་ཐབས་མཁས་ཀྱི་སྒོ་ནས་གསུང་གླེང་མཛད་པས་ཕ་རོལ་པོ་བློ་སྣ་འགྱུར་ཏེ། སྔར་བྱས་ཀྱི་ལས་ལ་འགྱོད་པ་དྲག་པོ་སྐྱེས་ནས་ཆོས་ཀྱི་སྣོད་དུ་གྱུར་ཅིང། གསོད་པའི་ཕྱིར་གོ་རར་བཅུག་པའི་རྒྱལ་རིགས་མང་པོའང་སྲོག་ཐར་པར་མཛད་པ་ལྟ་བུ་ཐབས་མཁས་ཀྱིས་སྙན་པར་སྨྲ་བའི་སྒོ་ནས་གདུག་པ་ཅན་རྣམས་སྨིན་པར་བྱས་པའི་རྣམ་ཐར་དང། བྱང་ཆུབ་སེམས་དཔའ་དཔའ་བའི་སྟོབས་ཀྱིས་བདུད་ཤུགས་འཆང་རྫུ་འཕྲུལ་གྱིས་བཏུལ་ཏེ་ལྷ་མི་དཔག་ཏུ་མེད་པ་བླ་མེད་བྱང་ཆུབ་ལ་བཀོད་པ་དང། རྒྱལ་པོ་བསོད་ནམས་སྟོབས་ཀྱིས་སེམས་ཅན་བགྲང་ལས་འདས་པ་དགེ་བ་བཅུ་དང་བྱང་ཆུབ་གསུམ་ལ་བཀོད་པ། བརྒྱ་བྱིན་ལེགས་པར་སྣང་བྱེད་ཀྱིས་གནོད་སྦྱིན་འཇིགས་སུ་རུང་བར་སྤྲུལ་ནས་སྤྲུལ་པའི་མི་སྡིག་པ་བྱེད་པ་རྣམས་ཟ་བ་སོགས་ཀྱི་འཇིགས་པ་དུ་མ་བསྟན་ཏེ་འཛམ་བུ་གླིང་པ་མཐའ་དག་བཙན་ཐབས་སུ་དགེ་བ་བཅུ་ལ་སྦྱོར་བར་
མཛད་པ་སོགས་དོན་སྤྱོད་པའི་རྣམ་ཐར་དང་འབྲེལ་བའི་སྐྱེས་རབས་མཐའ་ཡས་སོ། །དེ་ལྟར་བཅོམ་ལྡན་འདས་ཉིད་ཀྱིས་སྔོན་སྡིག་པ་མི་དགེ་བའི་ཕྱོགས་ལ་ཞེན་པའི་སེམས་ཅན་ཤིན་ཏུ་གདུལ་དཀའ་བ་རྣམས་ཀྱང་རང་རང་གི་ཁམས་དང་མཐུན་པར་ཐོག་མར་འཇིག་རྟེན་གྱི་གཏམ་སྙན་པོ་ཚུན་ཚད་ཀྱི་སྒོ་ནས་བློ་བྲིད་དེ། རང་དང་སེམས་མཐུན་པར་གྱུར་པ་ན་ཐབས་མཁས་ཀྱིས་རིམ་པས་ཆོས་ཀྱི་ཕྱོགས་སུ་ཁ་ལོ་བསྒྱུར་ཏེ། དོན་སྤྱོད་པ་དངོས་གཞིའི་ཚེ་སོ་སོའི་སྐལ་བ་དང་འཚམ་པར་ཉན་རང་བྱང་སེམས་ཀྱི་ཐེག་པ་གསུམ་ལ་འགོད་པར་མཛད་པ་དེའི་བདེན་པའི་སྟོབས་ཀྱིས་ཐར་འདོད་ཀུན་གྱི་རེ་བ་ཚིམ་པར་བྱེད་པའི་ཆོས་ཀྱི་མཆོད་སྦྱིན་དམ་པ་རྒྱལ་བའི་བསྟན་པ་རིན་པོ་ཆེ་དར་ཞིང་རྒྱས་པ་སྨོན་པའོ། །དེའང་སྡིག་པའི་སེམས་ཅན་ཞེས་པ་རིན་ཆེན་དོན་གྲུབ་ཀྱི་ཊཱིཀྐར་སྡིག་པའི་ལྟ་བ་ལ་ཞེན་པའི་སེམས་ཅན་ལ་བཤད་ཀྱང། རྣམ་བཤད་རིགས་པ་ལས། སྡིག་པ་ནི་ཐ་ཆད་ཀྱི་དོན་གྱིས་ན་ཉེས་པར་སྤྱད་པ་ཡིན་ཏེ་ཞེས་པ་ལྟར། སྒོ་གསུམ་བག་མེད་པས་ཉེས་སྤྱོད་ལ་ཞུགས་པའི་སེམས་ཅན་ལ་བྱས་ན་བདེའམ་སྙམ། བྱམས་པས་གསལ་བར་སྨིན་ཞེས་པ་བདེ་བ་ལྡན་འདོད་ཀྱི་ཀུན་སློང་བསྟན་ལ། རྣམ་པ་གཅིག་ཏུ་ཡིད་འོང་གི་བྱམས་པ་ནི་མས་བུ་གཅིག་པ་མཐོང་བ་བཞིན་སེམས་ཅན་ཐམས་ཅད་ཡིད་འོང་གི་རྣམ་པར་ལྟ་བ་ཡིན་ཞིང། ནང་གི་ཀུན་སློང་དེའི་རང་མདངས་ཀྱིས་ཕྱིའི་རྣམ་འགྱུར་ལའང་ཁྲོ་གཉེར་མེད་པར། བཞིན་གྱི་མདངས་གསལ་ཞིང་འཛུམ་པ་ཞིག་འབྱུང་བ་ཆོས་ཉིད་ཡིན་པས། གཞན་ལ་གཏམ་སྨྲ་བའི་དུས་ཀྱི་རྣམ་པའང་བསྟན་པ་ཡིན་ཏེ། ལམ་རིམ་ལས། སྙན་སྨྲ་ནི་ཁྲོ་གཉེར་མེད་ཅིང་བཞིན་གྱི་མདངས་
གསལ་བར་འཛུམ་པ་སྔོན་དུ་བཏང་སྟེ། ཞེས་སོ། །དེས་ན་གཞན་དང་གཏམ་སྨྲ་བ་སོགས་ཀྱི་ཀུན་སྤྱོད་ཀྱང་ཕ་རོལ་པོའི་ཡིད་དང་མཐུན་ཞིང་དོན་དུ་འགྱུར་བ་ཞིག་གལ་ཆེ་བས། གནས་འདི་ལ་གཟབ་པར་བྱ་དགོས་ཏེ། ས་སྐྱའི་ལེགས་བཤད་ལས། རྨ་གཞན་མཁས་ན་འཚོ་སྲིད་ཀྱི། །ཉེས་པའི་ཚིག་རྨ་འདྲུད་པ་མེད། །ཁྭ་ཡིས་འུག་པ་དམའ་ཕབ་པས། །བསྐལ་པའི་བར་དུ་འགྲས་ལ་ལྟོས། །ཞེས་དང། སྨྲ་མང་ཉེས་པ་འཛིན་པའི་རྒྱུ། །མི་སྨྲ་ཉེས་པ་སྤོང་བའི་གཞི། །ནེ་ཙོ་སྨྲ་བས་གཟེབ་ཏུ་བཅུག །འདབ་ཆགས་ལྐུག་པ་བདེ་བར་རྒྱུ། །ཞེས་པ་ལྟར་ཚིག་ངན་གྱིས་དོན་མེད་པར་གཞན་དང་འཁོན་ཞུགས་ཏེ་དགྲར་སྡང་བ་དང། རང་ཉིད་ལ་ཕྱི་མར་རྣམ་སྨིན་ལྕི་ཞིང་ཚེ་འདིར་ཡང་སོས་མི་བདེ་བ་སྣ་ཚོགས་འབྱུང་བས་རང་གཞན་གཉིས་ཀ་ཕུང་བྱེད་ཀྱི་རྒྱུར་འགྲོའོ། །ཚུལ་འདི་དག་ནི་ཇོ་བོ་ཡབ་སྲས་ཀྱི་ཞུས་ལན་ནོར་བུའི་འཕྲེང་བའི་ལེའུ་ཉེར་གསུམ་ལས། ངག་གི་ཉེས་པས་དགྲ་བོ་འགུག །ངག་གི་ཉེས་པས་བཤེས་དང་འབྲལ། །ངག་གི་ཉེས་པས་ལྕེ་དག་ལ། །རྨོ་འདོར་སྟོང་གིས་རྨོད་ཅེས་ཐོས། །ལ་ལ་དག་ལ་བསྟོད་བྱས་ཀྱང། །དོགས་པ་བསླད་ནས་མཚང་ལ་འཕོག །ཅེས་དང། ཀུ་རེའི་ཐ་མ་འཐབ་མོར་འགྲོ། །ངག་གི་ཐ་མ་ལུས་གཉིས་རྩོད། །ལུས་ཀྱི་ཐ་མ་སྲོག་དང་འབྲལ། །སྲོག་གི་ཐ་མ་ངན་འགྲོར་འགྲོ། །ཞེས་སོགས་ཀྱིས་འཕྲལ་ཕུགས་ཀུན་ཏུ་ཉེས་དམིགས་ཆེ་ཚུལ་དང། གཉིས་པ་གཞན་ལ་སྨྲ་བའི་ཚེ། །ངག་དེ་མགྲིན་པར་བསྐྱིལ་བྱས་ནས། །དེ་
ལ་རེ་ལྟོས་འདུག་མི་འདུག །ཅེས་པ་ནས། དོན་དང་ལྡན་ནམ་མི་ལྡན་ལྟ། །འགྲོ་ན་སྨྲ་སྒོར་བཏང་བར་བྱ། །མི་འགྲོ་མགྲིན་པའི་ཨཱཿ ལ་བསྟིམ། །ཞེས་དྲན་ཚད་འཕྲལ་དུ་ཁར་མི་འདོན་པར་ཚིག་གི་སྐྱོན་ཡོན་དང། དགོས་པ་ཡོད་མེད་སོགས་བརྟག་ནས་སྨྲ་དགོས་པ་དང། རྣམ་གཡེང་བདུད་ཀྱིས་བྱིན་བརླབས་ནས། །མང་པོའི་ནང་དུའང་ལྷང་ངེར་ལབ། །དེར་འཚོགས་ཐམས་ཅད་ཐུགས་ཁྲེལ་ནའང། །འཕྲལ་ནི་བཞད་གད་བསླུ་ཞིང་བསྟོད། །ཅེས་འགའ་ཞིག་མང་པོའི་ནང་དུ་ཅོལ་གཏམ་སྨྲས་པ་ན། ཕ་རོལ་པོ་རྣམས་ཞེ་ཁྲེལ་ཡང་འཕྲལ་ལ་ངོ་བསྟོད་དང་བཞག་གད་ཐེག་གེ་བྱས་པས། ཁོས་གཏམ་དེ་ལམ་དུ་སོང་སྙམ་ནས་ང་རྒྱལ་སྐྱེས་ཏེ། ཕྱིར་ཡང་སྨྲ་བ་ཇེ་མང་གིས་ཤིན་ཏུ་འཆལ་བར་འགྱུར་བ་སྲིད་པས། དེ་འདྲ་ལ་ལྷག་པར་ཟོན་བྱེད་དགོས་པ་སོགས་གཏམ་སྨྲ་ཚུལ་ལེགས་ཉེས་ཀྱི་རྣམ་དབྱེ་ཤིན་ཏུ་ཞིབ་པར་གསུངས། སྤྱོད་འཇུག་ལས་ཀྱང། རྟག་ཏུ་འཛུམ་པའི་བཞིན་དུ་གྱིས། །ཁྲོ་གཉེར་ངོ་ཟུམ་ཡོངས་ཐོངས་ཏེ། །འགྲོ་བའི་བཤེས་དང་གསོང་བོར་གྱིས། །ཞེས་དང། སོར་མོའི་བརྡ་ནི་མི་བྱ་སྟེ། །གུས་དང་བཅས་པའི་གཡས་པ་ཡི། །ལག་པ་དག་ནི་ཀུན་གྱིས་ཀྱང། །ལམ་ཡང་དེ་ལྟར་བསྟན་པར་བྱ། །ཞེས་གཞན་དང་ཕྲད་པ་ན་རྟག་ཏུ་བཞིན་འཛུམ་བག་དང་བཅས་ཤིང། ཕ་རོལ་པོ་ལམ་གར་འགྲོ་ལྟ་བུ་དྲིས་པ་ལ་སྟོན་པའི་ཚེའང་མཛུབ་མོ་ཀེར་ནས་སྟོན་པ་ལྟ་བུ་མ་གུས་པའི་རྣམ་འགྱུར་མི་བྱེད་པར། ལག་པ་གཡས་པའི་ཐལ་མོ་བཀན་ཏེ་གུས་པའི་རྣམ་འགྱུར་དང་བཅས་སྟོན་པ་ལྟ་བུ་སྤྱོད་ལམ་གྱི་ཆ་མཐའ་དག་ནས་གཞན་གྱི་སེམས་མགུ་བ་ཞིག་བྱེད་
དགོས་པ་བྱང་ཆུབ་སེམས་དཔའ་རྣམས་ཀྱི་དམ་ཚིག་ཡིན་ནོ། །སེམས་ཅན་སྡུད་པར་བྱེད་པའི་ཐབས་ཀྱང་ཟས་ནོར་སོགས་བྱིན་ནས་ཀུན་གྱི་རེ་བ་སྐོང་བ་ཤིན་ཏུ་དཀའ་ལ། སྙན་པར་སྨྲ་བ་ནི་བྱ་སླ་ཞིང་དོན་ཆེ་བས་ཐབས་མཁས་རྨད་དུ་བྱུང་བ་ཡིན་ཏེ། ས་པཎྚི་ཏས། བྱམས་པས་ཁྱབ་པའི་ཚིག་སྨྲ་བ། །བསྒྲུབ་སླ་གཞན་དགའ་སྡུད་པའི་མཆོག །ནོར་གྱིས་མགུ་བར་སུ་ཡིས་ནུས། །ལུས་སྲོག་བཏང་ཡང་ཕྱེད་མི་ཚིམ། །ཞེས་གསུངས་པ་ལྟར་རོ། །བྱམས་པས་གསལ་བར་སྨིན་བྱས་ཞེས་པ་ལ། སྨིན་པའི་དོན་དང་སྨིན་པ་བརྒྱད་ཀྱི་དབྱེ་བ་སོགས་རྒྱན་གྱི་ཡོངས་སུ་སྨིན་པའི་ལེའུ་ལས་འབྱུང་བ་དེར་བལྟ་ཞིང། འདིར་སྐབས་དོན་ནི་ཆོས་ཉན་པའི་སྣོད་རུང་དུ་གྱུར་པ་ལ་བྱའོ། །ཐེག་པ་གསུམ་ལ་རབ་བཀོད་ཅེས་པའི་ཐེག་པའི་སྒྲ་དོན་ནི། འགའ་ཞིག་གིས་ཐེག་མི་ཐེག་སྒོམ་པ་པོའི་བློའི་སྟོབས་དང་འཚམ་པའི་ཁུར་ཆེ་ཆུང་ལྟ་བུ་ཞིག་ལ་བཤད་པ་དང། ལ་ལ་ཐེག་པ་མཆོག་དམན་གྱི་འབྱེད་བྱེད་མཐའ་བྲལ་རྟེན་འབྱུང་གི་དེ་ཁོ་ན་ཉིད་རྟོགས་པའི་ལྟ་བ་གོ་ནུས་མི་ནུས་ཀྱི་སྒོ་ནས་འབྱེད་པར་འདོད་པ་མི་འཐད་དེ། དང་པོ་སྒྲ་དོན་བཤད་ཚུལ་མི་འཐད་པ་ནི། འདུལ་བའི་གོས་གཞིའི་སྐབས་སུ་ཐེག་པ་ཞེས་པ་ཁྱོགས་དང་ཤིང་རྟ་སོགས་ལ་བཤད། ཐུབ་དགོངས་ལས་འཇུག་སྒྲུབ་ཀྱི་ཐད་དུ་གླང་པོ་ཆེ་སོགས་ལ་བཤད་པ་གང་ལྟར་ཡང་དེ་ལ་ཞོན་ནས་སྒྲོད་བྱེད་ཅིག་ལ་འཇུག་པས། སྡུད་པ་ལས་ཀྱང། དགའ་སྐྱིད་བདེ་བ་མངོན་པར་ཐོབ་བྱེད་ཐེག་པའི་མཆོག །གང་ཞིག་ཞོན་ནས་ཕྱོགས་སུ་འགྲོ་བ་དམིགས་སུ་མེད། །ཅེས་དང། སྤྱོད་འཇུག་ལས། བྱང་ཆུབ་
སེམས་ཀྱི་རྟ་ཞོན་ནས། །བདེ་ནས་བདེ་བར་འགྲོ་བ་ལ། །ཞེས་པ་ལྟར། ཐེག་པ་དེ་ལ་ཕར་ཞོན་ནས་རང་གི་བྱང་ཆུབ་ཏུ་སྒྲོད་པར་བྱེད་དགོས་ཀྱི། ཚུར་རང་གིས་ཁུར་ནས་འགྲོ་བར་མ་བཤད་དོ། །དེས་ན་སྔགས་རིམ་ལས། ཐེག་པ་ནི་འདིར་འདོང་བ་འབྲས་བུ་དང། འདིས་འདོང་བ་རྒྱུའི་ཐེག་པ་སྟེ་བགྲོད་པས་ན་ཐེག་པའོ། །ཞེས་གསལ་བར་གསུངས་པ་ཉིད་ཚད་མར་བྱ་ཡི། ཡོད་པ་བཞག་ནས་མེད་པ་ལས་བཙལ་བར་མི་བྱའོ། །ཐེག་པའི་འབྱེད་ཆོས་ལྟ་བའི་སྒོ་ནས་བཞག་པའང་ཤིན་ཏུ་མི་འཐད་དེ། དཔལ་ལྡན་ཟླ་བས་ལུང་བདུན་དང་རིགས་པ་གསུམ་གྱི་སྒོ་ནས་ཐེག་པ་གསུམ་པོ་གང་གིའང་འཕགས་པའི་གང་ཟག་ལ་རྟེན་འབྱུང་གི་དེ་ཁོ་ན་ཉིད་མངོན་སུམ་དུ་རྟོགས་པས་ཁྱབ་པར་གསུངས་པ་ནི་རྒྱལ་བའི་དགོས་པ་མཐར་ཐུག་པ་ཡིན་པས། དེ་ཐེག་པ་ཆེན་པོར་འཇོག་བྱེད་ཡིན་ན་ཉན་རང་འཕགས་པ་ཐམས་ཅད་ཀྱང་ཐེག་ཆེན་པར་འགྱུར་ལ། དེ་འདོད་ན་ཐེག་དམན་འཕགས་པ་མི་སྲིད་པས། ཐེག་པ་གསུམ་གྱི་དབྱེ་བ་འབྱེད་བྱེད་ཀྱང་མི་དགོས་པར་འགྱུར་རོ། །དེས་ན་ལྟ་བས་འབྱེད་ཅེས་པ་ནི་གྲུབ་མཐའི་རྣམ་དབྱེ་ཡིན་པས། གྲུབ་མཐའ་དང་ཐེག་པའི་རྣམ་དབྱེ་མ་ནོར་བ་དགོས་ཏེ། ཐེག་པ་ཆེ་ཆུང་གི་དབྱེ་བ་ནི་བསམ་པ་སེམས་བསྐྱེད་སོགས་ཐབས་ཀྱི་སྒོ་ནས་འབྱེད་པ་མ་གཏོགས། ཤེས་རབ་ལྟ་བའི་སྒོ་ནས་འབྱེད་པར་ཚད་ལྡན་སུས་ཀྱང་མ་བཤད་ལ། ཁྱད་པར་དུ་རྗེ་བླ་མའི་སྔགས་རིམ་ལས། སྤྱིར་ཐེག་པ་ཆེ་ཆུང་སྟོང་པ་ཉིད་ཀྱི་ཤེས་རབ་ཀྱིས་མི་འབྱེད་པར་ཐབས་ཀྱིས་འབྱེད་དགོས་ལ། ཁྱད་པར་དུ་ཐེག་པ་ཆེན་པོ་ལ་གཉིས་སུ་ཕྱེ་བའང་ཟབ་མོ་རྟོགས་པའི་ཤེས་རབ་
ཀྱིས་མི་འབྱེད་ཀྱི། ཐབས་ཀྱིས་དབྱེ་དགོས་ཤིང། ཞེས་གསུངས་པའི་ཕྱིར་རོ། །ཆོས་ཀྱི་མཆོད་སྦྱིན་རྒྱས་གྱུར་ཅིག །ཅེས་པ། སྤྱིར་མཆོད་སྦྱིན་གྱི་སྒྲ་དོན་ཡོན་ཏན་གྱི་མགྲོན་ལ་མཆོད་པ་དང། སྙིང་རྗེའི་མགྲོན་ལ་སྦྱིན་པར་བཤད་པ་ལྟར་འདིར་ཡང་དམ་པའི་ཆོས་བཤད་སྒྲུབ་གཉིས་ཀྱི་སྒོ་ནས་འཕེལ་བས་རྒྱལ་བ་རྣམས་ལ་མཆོད་པ་དང། སེམས་ཅན་ལ་ཕན་བདེ་སྟེར་བས་སྦྱིན་པར་འགྲོ་བ་ལ་བཤད་པའང་མི་རུང་བ་མེད་ལ། རྒྱན་སྣང་ལས། རྣམ་པར་གསལ་བ་ཉིད་དུ་ཤེས་པར་བྱ་བས་ན་ཆོས་ཀྱི་མཆོད་སྦྱིན་སྦྱིན་པའོ། །ཞེས་པ་ལྟར། མཆོད་སྦྱིན་རྒྱ་ཆེན་པོའི་ཚེ་ནོར་བཟང་དགུ་ཐམས་ཅད་ལྷུག་པར་གཏོང་བ་བཞིན། འདིར་ཡང་ཆོས་ཀྱི་དོན་ཟབ་ཅིང་རྒྱ་ཆེ་བ་མཐའ་དག་མ་སྦས་ཤིང་དཔེ་མཁྱུད་མེད་པར་སྙན་པར་སྨྲ་བའི་སྒོ་ནས་གདུལ་བྱ་ལ་གསལ་བར་སྟོན་པའི་དོན་དུ་བྱས་ན་སྐབས་ཀྱི་དོན་དང་ཡང་འབྲེལ་བས་ཤིན་ཏུ་ལེགས་སམ་སྙམ། བཞི་པ་དོན་མཐུན་པ་ནི། བདག་སྔོན་ཐབས་ཤེས་གྱུར་པ་ན། །སེམས་ཅན་ལྟ་ངན་ལས་བསྒྲལ་ཅིང། །ཡང་དག་ལྟ་ལ་བཀོད་བྱས་པས། །ཆོས་ཚུལ་རྣམ་པར་འཕེལ་གྱུར་ཅིག །ཅེས་བྱུང། བྲ་སྟི་དགེ་བཤེས་ཀྱི་ཊཱིཀྐར། ཐེག་པ་གསུམ་ལ་རབ་བཀོད་ཅེས་པའང་སྙན་སྨྲའི་ཁོངས་སུ་བསྡུས་ནས་ཤོ་ལོ་ཀ་འདི་དོན་སྤྱོད་པ་ལ་སྦྱར་ཏེ། དོན་མཐུན་པ་ཤུགས་ཀྱིས་འཐོབ་པ་ལས་གཞུང་དང་དངོས་སུ་སྦྱར་རྒྱུ་མེད་པར་གསུངས། སྤྱིར་སྙན་སྨྲ་ལ་འཇིག་རྟེན་དང་ལྡན་པ་དང། ཆོས་བསྟན་པ་དང་ལྡན་པ་གཉིས་གསུངས་པས་ཐེག་པ་གསུམ་གྱི་ཆོས་སྟོན་པ་སྙན་སྨྲའི་ཁོངས་སུ་མི་
འདུ་བ་མིན་ཡང། དེར་ཐེག་པ་གསུམ་ལ་བཀོད་ཅེས་པའི་ཚིག་གི་ནུས་པ་དོན་སྤྱོད་པ་ལ་སྦྱར་ན་བདེ་བ་དང། འདིར་ཐབས་ཤེས་གྱུར་པ་ན་ཞེས་པའང། གཞན་གྱི་དོན་བྱེད་པ་ལ་ཐོག་མར་དོན་དེ་ཉིད་རང་གིས་བསླབ་ནས་ཁོང་དུ་ཆུད་པའམ་མངོན་དུ་བྱས་པ་དགོས་པའི་དོན་དུ་གསལ་ལ། དེ་ནི་དོན་མཐུན་ཚུལ་ཡིན་པས་འདི་བཞིན་བཤད་པར་བྱའོ། །དེའང་སྔོན་ཀུན་ཏུ་རྒྱུ་བྱང་ཆུབ་ཏུ་གྱུར་པའི་ཚེ་རྒྱལ་པོ་ཞིག་གི་མཆོད་གནས་སུ་གྱུར་ནས་རྒྱལ་པོ་དེ་ཉིད་ཆོས་ལ་བཙུད་པ་སྡིག་བློན་རྣམས་ཀྱིས་མ་བཟོད་པར་ཕྲ་མ་བྱས་པའི་རྐྱེན་གྱིས་རྒྱལ་པོའི་གུས་པ་ལྷོད་པར་གྱུར་པ་ན། དེ་ལ་ཁྲོས་པ་མིན་ཡང་དེ་དག་འདུལ་བ་ལ་ཐོག་མར་རང་ཉིད་ཀྱིས་ཡོན་ཏན་ཁྱད་པར་ཅན་མངོན་དུ་བྱེད་དགོས་པར་གཟིགས་ནས་ཡུལ་དེར་མ་བཞུགས་པར་དབེན་པར་གཤེགས་ཏེ་བསམ་གཏན་བཞི་དང་མངོན་ཤེས་ལྔ་བསྒྲུབ་པར་མཛད། དེ་ནས་དུས་ལ་བབས་པ་ན་སྤྲུལ་བའི་སྤྲེའུའི་པགས་པ་གྱོན་ནས་ཕེབས་པར་བློན་པོ་རྣམས་ཀྱིས་སྨད་པའི་ཚེ། རྐྱེན་དེ་ཉིད་ལས་བརྩམས་ཏེ་རིགས་པ་སྣ་ཚོགས་པའི་སྒོ་ནས་རྒྱུ་མེད་པར་སྨྲ་བ་དང། དབང་ཕྱུག་རྒྱུར་ལྟ་བ་དང། ལས་ཁོ་ན་ལས་བྱུང་བར་ལྟ་བ་དང། རྒྱལ་རིགས་ཀྱི་གཞུང་ལ་བརྟེན་པ་སོགས་ཀྱི་ལྟ་བ་ངན་པ་ཐམས་ཅད་སོ་སོར་སུན་ཕྱུངས་ཏེ་རྒྱལ་བློན་འཁོར་བཅས་ཡང་དག་པའི་ལྟ་བ་ལ་བཀོད་པ་དང། ཚངས་པའི་འཇིག་རྟེན་དུ་ལྷའི་དྲང་སྲོང་ཆེན་པོར་འཁྲུངས་པའི་ཚེ། ཡུལ་ལུས་འཕགས་པོའི་རྒྱལ་པོ་ཡན་ལག་སྦྱིན་ཞེས་བྱ་བ་ཆད་ལྟ་ལ་ཞུགས་ནས་སྡིག་པ་སྣ་ཚོགས་སྤྱོད་པ་རྫུ་འཕྲུལ་གྱིས་བཏུལ་ཏེ་ལྟ་བ་ཕུན་
སུམ་ཚོགས་པ་ལ་སྦྱར་བ་དང། འཕགས་པ་ཤཱ་རིའི་བུ་མུ་སྟེགས་ཀུན་ཏུ་རྒྱུར་གྱུར་པའི་ཚེ། ཐུབ་པའི་སྐུ་ཚེ་སྔ་མ་ཞིག་གིས་དེ་ལྟ་ངན་ལས་བསྒྲལ་བར་པད་དཀར་ལས་གསུངས་པ་སོགས་སྐྱེ་བ་དུ་མར་གདུལ་བྱ་རྣམས་འཇིག་རྟེན་དང་འཇིག་རྟེན་ལས་འདས་པའི་ཡང་དག་པའི་ལྟ་བ་ལ་བཀོད་ཚུལ་མདོ་སྡེ་རྣམས་སུ་རྒྱ་ཆེར་འབྱུང་ངོ་། །ལྟ་ངན་འགོག་པ་དང་ལྟ་བ་རྣམ་དག་ལ་འགོད་པ་འདི་ནི་ཚད་མ་རྣམ་འགྲེལ་ལས། ཐབས་བྱུང་དེ་རྒྱུ་ལྐོག་གྱུར་པས། །དེ་འཆད་པ་ནི་དཀའ་བ་ཡིན། །ཞེས་དང། རང་ཉིད་ངེས་ཤིང་གཞན་དག་ལ། །ངེས་པ་སྐྱེད་པར་འདོད་པ་ཡི། །ཞེས་གསུངས་པ་བཞིན། སྦྱིན་གཏོང་སོགས་དང་མི་འདྲ་བར། དོན་དེ་ཉིད་རང་གིས་ལེགས་པར་རྟོགས་པ་སྔོན་དུ་སོང་བའི་སྒོ་ནས་གཞན་ལ་སྟོན་དགོས་པས། འདིར་ཡང། བདག་སྔོན་ཐབས་ཤེས་གྱུར་པ་ན། །ཞེས་གསུངས་ཏེ་དོན་མཐུན་པའི་ཚུལ་དང་ཤིན་ཏུ་མཐུན་ནོ། །དེ་ལྟར་རིགས་པ་བཞི་སོགས་ཀྱི་སྒོ་ནས་ལས་རྒྱུ་འབྲས་དང། རྟེན་འབྱུང་གི་རྣམ་གཞག་སོགས་ཡང་དག་པའི་ལྟ་བ་ཕྲ་རགས་ཐམས་ཅད་ལ་ཐེ་ཚོམ་མེད་པའི་ངེས་པ་རྙེད་ཅིང། ཇི་ལྟར་རྟོགས་པའི་དོན་དེ་ཉིད་ཡང་དང་ཡང་དུ་གོམས་པར་མཛད་དེ། རང་གིས་ཇི་ལྟར་ངེས་པ་བཞིན་དུ་གདུལ་བྱ་རྣམས་ལ་བསྟན་པ་ན་ལུང་དང་རིགས་པའི་སྒོ་ནས་ངེས་པ་རྙེད་ཅིང། ལྷག་པར་སློབ་དཔོན་རང་ཉིད་ཀྱིས་སྒྲུབ་པ་ནན་ཏན་དུ་བྱེད་པའི་ཚུལ་མཐོང་ནས། འདི་ལས་འབྲས་བུ་ཕུན་སུམ་ཚོགས་པ་ཞིག་འབྱུང་བར་གདོན་མི་ཟའོ་སྙམ་དུ་ཡིད་ཆེས་རྙེད་དེ། སློབ་དཔོན་གྱི་རྣམ་ཐར་བཞིན་བརྩོན་པ་རྒྱུན་
ཆགས་སུ་བསྟེན་པས་དེ་དག་ཀྱང་སྨིན་ཅིང་གྲོལ་བར་གྱུར་པ་དེའི་བདེན་པའི་སྟོབས་ཀྱིས་རྒྱལ་བའི་ཆོས་ཚུལ་ཕུན་སུམ་ཚོགས་པ་གོང་ནས་གོང་དུ་འཕེལ་ཞིང་རྒྱས་པར་གྱུར་ཅིག་ཅེས་སྨོན་པ་མཛད་པའོ། །དེའང་ཐབས་ཤེས་ཞེས་པ་ནི། ཐབས་དེ་ཉིད་ཚད་མའི་སྒོ་ནས་ཤེས་པ་ཁོ་ན་ལ་མི་བྱེད་དེ། རྒྱན་ལས་སྐྱབས་འགྲོའི་ཐུན་མོང་མ་ཡིན་པའི་ཁྱད་ཆོས་བཞིའི་ནང་ནས་རྟོགས་པའི་དོན་ས་གོང་མ་གོང་མ་ལ་རིམ་གྱིས་བགྲོད་པ་ལ་གསུངས་པ་དང། རྣམ་འགྲེལ་དུའང། གཤེགས་པ་རྟོགས་པའི་དོན་ཕྱིར་ཞེས་ལམ་གོང་མ་མངོན་དུ་མཛད་པ་ལ་རྟོགས་པའི་སྒྲ་འཇུག་པར་གསུངས་པ་བཞིན། སྐབས་འདིའི་ཤེས་ཞེས་པའང་ཐབས་ཁྱད་པར་ཅན་དེ་དག་མངོན་དུ་མཛད་པ་ལའང་བྱར་རུང་ངོ་། །དེ་ལྟར་ན་སྦྱིན་སོགས་ཀྱི་སྤྱོད་པ་ལ་བསླབ་ཚུལ་དེ་ཐམས་ཅད་དོན་མཐུན་པའི་རྣམ་ཐར་ཡིན་ཏེ། ཡོན་ཏན་མཐའ་ཡས་པར་བསྟོད་པ་ལས། འགའ་ཞིག་རང་ཉིད་མ་དུལ་བཞིན་དུ་རིགས་པར་ལྡན་པའི་ཚིག་སྨྲ་ཡང། །རང་གི་ཚིག་དང་འགལ་བར་བྱེད་པས་གཞན་དག་འདུལ་བར་མི་ནུས་ཞེས། །ཁྱོད་ཀྱིས་དགོངས་ནས་དེ་སླད་འགྲོ་བ་མཐའ་དག་ཐུགས་ལ་བཞག་མཛད་ནས། །རེ་ཞིག་བདག་ཉིད་མ་དུལ་བ་ཉིད་འདུལ་བར་མཛད་ཕྱིར་རྩོམ་པ་ལགས། །ཞེས་རང་རྒྱུད་འདུལ་བར་མཛད་པ་དེ་ཉིད་དོན་མཐུན་པའི་གཙོ་བོར་གསུངས་པས། སེར་སྣ་སྤངས་ཏེ་སྦྱིན་པ་གཏོང་བར་མཛད་པ་ནི་གཞན་སྦྱིན་པ་ལ་འགོད་པའི་སྐབས་ཀྱི་དོན་མཐུན་པ་དང། ཉེས་སྤྱོད་སྤངས་ནས་ཚུལ་ཁྲིམས་བསྲུང་བ་ནི་གཞན་ཚུལ་ཁྲིམས་ལ་འགོད་པའི་
སྐབས་ཀྱི་དོན་མཐུན་པ་ཡིན་པ་སོགས་ཀུན་ལ་འདྲ་བའི་ཕྱིར་རོ། །འདིའི་སྐབས་ཀྱི་ལྟ་ངན་ནི་ལས་རྒྱུ་འབྲས་སོགས་ལ་སྐུར་པ་འདེབས་པའི་ཆད་ལྟ་ལ་གཙོ་བོར་བྱེད་ཅིང། ཡང་དག་པའི་ལྟ་བའང་དེ་དང་འཛིན་སྟངས་དངོས་སུ་འགལ་བ་ལས་འབྲས་ཀྱི་རྣམ་གཞག་སོགས་ངེས་པའི་ལྟ་བ་ལ་བྱའོ། །ཁ་ཅིག་ཡང་དག་པའི་ལྟ་བ་བྱས་ཚད་སྟོང་ཉིད་ཀྱི་ལྟ་བ་ཁོ་ན་ལ་བྱེད་པ་མི་འཐད་དེ། བཤེས་སྤྲིངས་ལས། གལ་ཏེ་མཐོ་རིས་ཐར་པ་མངོན་བཞེད་ན། །ཡང་དག་ལྟ་ལ་གོམས་པ་ཉིད་དུ་མཛོད། །གང་ཟག་ལོག་པར་ལྟ་བ་དགེ་སྤྱད་ཀྱང། །ཐམས་ཅད་རྣམ་པར་སྨིན་པ་མི་བཟད་ལྡན། །ཞེས་མཐོ་རིས་ཐོབ་པ་ལ་ཡང་དག་པའི་ལྟ་བ་མེད་མི་རུང་དུ་གསུངས་ཤིང། དེ་ལ་སྟོང་ཉིད་ཀྱི་ལྟ་བ་དགོས་པ་ཧ་ཅང་ཐལ་བས། ལས་འབྲས་ལ་ཡིད་ཆེས་ཀྱི་དད་པ་དང་མཚུངས་པར་ལྡན་པའི་ལྟ་བ་ལ་བྱའོ། །རེད་མདའ་བའི་བཤེས་སྤྲིངས་ཊཱིཀྐ་ལས་ཀྱང་། འདིར་ཡང་དག་པའི་ལྟ་བ་ནི་གཉིས་ཏེ། ཀུན་རྫོབ་ཀྱི་ཡུལ་ཅན་དང། དོན་དམ་པའི་ཡུལ་ཅན་ནོ། །དང་པོ་ནི་ཕྱི་མར་ལས་དང་འབྲས་བུའི་འབྲེལ་བ་ལ་ཡིད་ཆེས་པའོ། །གཉིས་པ་ནི་ཆོས་རྣམས་ཀྱི་དེ་ཁོ་ན་ཉིད་སྟོང་པ་ཉིད་རྟོགས་པའི་ཤེས་རབ་བོ། །ཡང་དག་པའི་ལྟ་བ་དང་པོ་ནི་མཐོ་རིས་ཀྱི་རྒྱུ་ཡིན་ལ། གཉིས་པ་ནི་ཐར་པའི་རྒྱུ་ཡིན་ནོ། །ཞེས་གསུངས་ཤིང། དེར་མ་ཟད་འདུལ་བའི་མདོར་ཚུལ་ཁྲིམས་དང་ཆོ་ག་དང་ལྟ་བ་ཕུན་སུམ་ཚོགས་པ་ཞེས་པའི་ལྟ་བའང། ལས་དང་འབྲས་བུའི་འབྲེལ་བ་ལ་ཡིད་ཆེས་པ་ལ་བྱེད་པས།
དེ་མེད་པར་ཚུལ་ཁྲིམས་རྣམ་པར་དག་པའང་འབྱུང་ཐབས་མེད་དེ། འཇམ་དཔལ་རྩ་རྒྱུད་ལས། ཇི་ལྟར་ཡང་དག་པའི་ལྟ་བ་མེད་པ་ལ་སྡོམ་བརྩོན་མེད་པ་དང་ཞེས་གསུངས་པ་བཞིན་ནོ། །དེས་ན་འདིར་ཡང་དག་པའི་ལྟ་བ་ཚུལ་ཁྲིམས་ཀྱི་རྒྱུའི་གཙོ་བོར་བཤད་པ་དང། བཤེས་སྤྲིངས་ལས་མཐོ་རིས་ཀྱི་རྒྱུའི་གཙོ་བོར་བཤད་པ་གནད་གཅིག་ཏུ་སྣང་ངོ་། །གདུལ་བྱ་ལ་ཡང་དག་པའི་ལྟ་བ་སྟོན་པའི་ཚེ་ལུང་རིགས་ཀྱིས་བསྒྲུབ་ནས་ངེས་པ་རྙེད་པར་བྱར་ཡོད་ཀྱང། ད་དུང་རང་ཉིད་ཀྱིས་ནན་ཏན་དུ་གོམས་པར་མཛད་པ་ནི་གདུལ་བྱ་ལ་ཡིད་ཆེས་བསྐྱེད་པའི་ཐབས་དང། སྒྲུབ་པ་ལ་སྐུལ་བྱེད་ཀྱི་མཆོག་ཏུ་གྱུར་པ་ཡིན་ཏེ། ཆེད་དུ་བརྗོད་པའི་ཚོམས་ལས། བདག་ཉིད་དང་པོར་རིགས་པར་གནས་བྱས་ནས། །ཕྱི་ནས་བདག་བཞིན་གཞན་དག་གདུལ་བར་བྱ། །བདག་ཉིད་དང་པོར་རིགས་པར་གནས་བྱས་ན། །ཕྱི་དུས་འདུལ་ཚེ་མཁས་པ་ཉོན་མི་མོངས། །ཞེས་དང། ལམ་རིམ་ཆེན་མོ་ལས། དེའང་རང་གིས་མ་བསྒྲུབས་ན་གཞན་ལ་འཇུག་ལྡོག་འདི་ལྟར་བྱ་དགོས་སོ་ཞེས་བཤད་པ་ན། ཁྱོད་རང་ཡང་དོན་དེ་མ་སྒྲུབས་ན་གཞན་ལ་དེ་སྒྲུབས་ཞེས་ཅིའི་ཕྱིར་སྨྲ། ཁྱོད་ཀྱང་ད་དུང་གཞན་གྱིས་བཅོས་དགོས་སོ་ཞེས་ཟེར་ནས་བསྒྲུབ་ཏུ་མི་ཉན་ལ། རང་གིས་བསྒྲུབས་པ་ཞིག་ཡིན་ན་བདག་ཅག་གང་ལ་བཙུད་པའི་དགེ་བ་དེ་ལ་ཁོང་རང་ཡང་གནས་པར་བྱེད་པས་ན། འདི་བསྒྲུབས་ན་བདག་ཅག་ལ་ཕན་པ་དང་བདེ་བར་འགྱུར་ངེས་སྙམ་ནས་གསར་དུ་འཇུག་ཅིང། ཞུགས་ཟིན་པ་རྣམས་ཀྱང་མི་ལྡོག་པར་བརྟན་པར་འགྱུར་ཞེས་གསུངས་ཏེ། གོང་དུ་དྲངས་པ་བཞིན་མདོ་སྡེ་རྒྱན་གྱི། བཞི་པས་རྣམ་པར་སྦྱོང་
པའོ། །ཞེས་པའི་སྦྱོང་ཚུལ་ཡང་དེ་ཡིན་ནོ། །པོ་ཏོ་བ་ཆེན་པོའི་ཞལ་ནས་ཀྱང། ངས་ད་ལྟ་རི་རྩེ་ཡ་ཀི་ན་གསེར་གྱི་ཁྲོན་པ་བརྡོལ་ནས་ཡོད་ཀྱི། ཁྱེད་རང་ལེན་དུ་སོང་བྱས་ཀྱང་ངའི་ངག་འཁྱལ་དུ་གོ་ནས་ཁྱེད་འགྲོར་མི་ཉན་ང་རང་གིས་རིངས་པར་ཕྱིན་ན་ཁྱོད་ཚོ་ངའི་གཞུག་ན་ཡར་དྲིལ་ཡོང། དེ་བཞིན་དུ་བླ་མ་རང་ཆོས་བཞིན་མི་བྱེད་པར་གཞན་ལ་ཆོས་བཤད་ཀྱང་ལག་ལེན་བྱེད་མཁན་མི་ཡོང་ལ། བླ་མ་རང་གིས་ཆོས་བཞིན་བྱས་ན་གཞན་ཡང་རྗེས་སུ་སློབ་པ་བག་རེ་ཡོང། ཞེས་གསུངས་པས། ཆོས་སྟོན་པ་པོའི་དགེ་བའི་བཤེས་གཉེན་དུ་འཇོག་པའང་ངག་གིས་བཤད་པ་ཁོ་ན་ལ་མི་བྱེད་པར། ལག་ལེན་དུ་འདེབས་པ་བཟང་པོའི་མིག་ལྟོས་ཀྱི་ཡུལ་དུ་འགྲོ་བ་ཞིག་གལ་ཆེ་སྟེ། མདོ་མྱང་འདས་ལས། བདག་བྱང་ཆུབ་ལ་ནན་ཏན་དུ་བྱེད་པས་གཞན་ཡང་བྱང་ཆུབ་ལ་ནན་ཏན་བྱེད་དུ་འཇུག་པ་སྟེ། དེ་བས་ན་དགེ་བའི་བཤེས་གཉེན་ཞེས་བྱའོ། །ཞེས་གསུངས་པའི་ཕྱིར། དེ་ལྟར་དོན་མཐུན་པའི་སྒོ་ནས་གདུལ་བྱ་རྣམས་ཆོས་སྒྲུབ་པའི་ཕན་ཡོན་ལ་ཡིད་ཆེས་བསྐྱེད་པ་དེ་ཉིད་སྐབས་འདིར་གང་ལ་འགོད་རྒྱུའི་ཡང་དག་པའི་ལྟ་བའི་གཙོ་བོ་ཡིན་ནོ། །གཉིས་པ་བསྡུ་བ་བཞིའི་སྒོ་ནས་སློབ་ལམ་སྤྱིའི་དོན་བསྡུ་བ་ནི། བདག་གིས་སེམས་ཅན་བསྡུ་དངོས་བཞིས། །ཉོན་མོངས་མེ་ལས་ཐར་བྱས་ཤིང། །བདག་གིས་འཕེལ་སྡིག་ཕམ་བྱས་པས། །བདག་འཁོར་ཡུན་རིང་གནས་གྱུར་ཅིག། །ཅེས་བྱུང། དེའང་སྐྱེས་པའི་རབས་ཀྱི་མཚན་གཞི་གོང་དུ་སྨོས་པ་རྣམས་དང་
གཞན་ཡང་མདོ་སྡེ་དང་འདུལ་བའི་སྡེ་སྣོད་དག་ལས་རྒྱ་ཆེར་འབྱུང་བ་བསྐལ་པ་ཆེན་པོ་གྲངས་མེད་པ་དུ་མར་སྙིང་རྗེ་དང། སྨོན་ལམ་དང། ཏིང་ངེ་འཛིན་དང། དབང་འབྱོར་པ་སོགས་ཀྱི་སྒོ་ནས་སྐྱེ་བའི་ཕྲེང་བ་དཔག་ཏུ་མེད་པ་བཞེས་ཏེ། རྒྱལ་སྲས་ཀྱི་སྤྱོད་པ་མ་ལུས་པའི་སྤྱི་སྡོམ་ཆེན་པོ་ཕ་རོལ་ཏུ་ཕྱིན་པ་དྲུག་ལ་ལེགས་པར་བསླབ་པས་རང་རྒྱུད་སྨིན་པར་བྱས། རང་གིས་གང་ལ་བསླབ་པར་བྱས་པ་དེ་དང་དོན་མཐུན་པར་གདུལ་བྱ་རྣམས་ཀྱང་སྤྱོད་དུ་གཞུག་པའི་ཕྱིར་ཐོག་མར་སྦྱིན་པས་འཁོར་དུ་བསྡུས་ཏེ་སོ་སོའི་སྐལ་བ་དང་འཚམ་པའི་ཆོས་ཀྱི་བདུད་རྩིས་དེ་དག་གི་རྒྱུད་ཀྱི་ཉོན་མོངས་པའི་མེ་དཔུང་མངོན་གྱུར་ཤུགས་དྲག་པོ་དང། ཆེས་སྟོབས་འཔེལ་བའི་སྡིག་སྤྱོད་ཚན་པོ་ཆེ་བཟློག་དཀའ་བ་རྣམས་ཉམས་སྨད། དེ་ནས་རྣམ་པར་མི་རྟོག་པའི་ཡེ་ཤེས་སྐྱེ་བའི་སྣོད་རུང་དུ་སྒྲུབ་པ་སྨིན་བྱེད་ཀྱི་ལམ་དང། ལས་དང་ཉོན་མོངས་པ་དེ་དག་ས་བོན་དང་བཅས་ཏེ་སྤོང་བ་གྲོལ་བྱེད་ཀྱི་ལམ་ལ་རིམ་པ་བཞིན་བཀོད་དེ། གཞན་དོན་རྣམ་པ་ཐམས་ཅད་མ་ཚང་བ་མེད་པར་བསྒྲུབས་པ་དེའི་བདེན་པའི་སྟོབས་ཀྱིས་གང་ཞིག་སྨིན་གྲོལ་གྱི་ལམ་ལ་བཀོད་པའི་གདུལ་བྱ་དེ་དག་གིས་ཐོས་བསམ་སྒོམ་པའི་བྱ་བ་རྣམས་གེགས་མེད་དུ་མཐར་ཕྱིན་ཅིང། དེ་དག་གིས་ཀྱང་གདུལ་བྱ་གཞན་དང་གཞན་སྨིན་གྲོལ་གྱི་ལམ་ལ་བཀོད་དེ། སྟོན་པའི་རྗེས་སུ་སློབ་པའི་གདུལ་བྱའི་བརྒྱུད་པ་འཁོར་བ་མ་སྟོངས་ཀྱི་བར་ཡུན་དུ་གནས་ཤིང་འཕེལ་བར་གྱུར་ཅིག་ཅེས་སྨོན་པ་མཛད་པའོ། །བསྡུ་བ་བཞིའི་རིམ་པས་སེམས་ཅན་རྣམས་འཁོར་དུ་བསྡུས་ནས་སྨིན་ཅིང་གྲོལ་བར་བྱེད་པ་ནི་སློབ་པའི་ལམ་
གྱིས་བྱ་བ་ཐམས་ཅད་མདོར་བསྡུས་པའི་སྡོམ་ཡང་ཡིན་ཏེ། ཤེར་ཕྱིན་གྱི་མདོར། དེ་དག་གི་ལམ་གྱི་བྱ་བའང་བྱ་ལ་ཞེས་པའི་ཐད་ཀྱི་འགྲེལ་ཆུང་ལས། འབྲས་བུ་སེམས་ཅན་མ་བསྡུས་པ་སྡུད་པ་ཅན་ཞེས་དང། གསེར་འཕྲེང་ལས། མ་བསྡུས་པ་སྡུད་པ་དང། སོགས་པས་བསྡུས་པ་སྨིན་པ་དང། སྨིན་པ་གྲོལ་བ་དང། གྲོལ་བ་མཐར་ཕྱིན་པར་བྱེད་པ་ཅན་ནོ། །ཞེས་གསུངས་པའི་ཕྱིར། ལམ་རིམ་ལས་ཀྱང། བྱང་སེམས་ཀྱི་སྤྱོད་པ་ལ་མཐའ་ཡས་ཀྱང་སྡོམ་ཆེ་བ་ནི་ཕར་ཕྱིན་དང་བསྡུ་བཞི་ཡིན་ཏེ། བྱང་སེམས་ལ་རང་གི་རྒྱུ་ཚོགས་སྨིན་པར་བྱ་བ་དང། སེམས་ཅན་གྱི་རྒྱུད་སྨིན་པར་བྱ་བ་གཉིས་ལས་མེད་ལ། དེ་གཉིས་ཕར་ཕྱིན་དང་བསྡུ་བས་བསྒྲུབ་པའི་ཕྱིར། ཞེས་སོ། །དེ་གཉིས་ཀ་རྒྱལ་སྲས་ཀྱི་སྤྱོད་པའི་སྡོམས་སུ་གསུངས་པའང། གོང་མའི་སྙོམས་འཇུག་རྣམས་བསམ་གཏན་བཞི་དང་གཟུགས་མེད་བཞིས་བསྡུས་ཞེས་པ་ལྟ་བུ་དོན་སོ་སོ་བའི་སྡེ་ཚན་གཉིས་མ་ཡིན་ཀྱི། གཉི་གས་ཀྱང་ཕན་ཚུན་གཅིག་གིས་གཅིག་བསྡུས་སོ། །བསྡུ་བཞི་ཕྱིན་དྲུག་གིས་བསྡུས་ཚུལ་གོང་དུ་བཤད་པ་བཞིན་ཡིན་ལ། ཕྱིན་དྲུག་བསྡུ་བཞིས་བསྡུ་ཚུལ་ནི། བློ་གྲོས་མི་ཟད་པའི་མདོ་ལས་བསྡུ་བ་བཞི་མི་ཟད་པའི་སྐབས་སུ་སྦྱིན་པའི་བསམ་སྦྱོར་སོགས་དེའི་ཉམས་ལེན་མཐའ་དག་བསྡུ་བ་བཞི་ལས་མ་འདས་ཚུལ་རྣམ་གྲངས་དུ་མར་གསུངས་པ་དེ་ཕར་ཕྱིན་གཞན་ལྔ་ལའང་འདྲའོ། །ཉོན་མོངས་པ་མེ་དང་དཔེ་སྦྱར་བ་ནི། བྱེ་བྲག་ཁོང་ཁྲོ་ལྟ་བུ་ལ་སྦྱར་བའི་ཚེ་དགེ་རྩ་སྲེག་པ་སོགས་ཀྱི་ཆ་ནས་ཡིན་ལ། འདི་ནི་
ཉོན་མོངས་སྤྱི་ལ་སྦྱོར་ཚུལ་དཔེར་ན་མེ་དང་ཉེ་བར་གནས་ན་དེའི་འོད་ཀྱིས་གདུངས་ཏེ་མི་བཟོད་པ་བཞིན། ཆགས་སྡང་སོགས་ཀྱི་ཉོན་མོངས་པ་གང་མངོན་དུ་གྱུར་ཀྱང། དེས་ཤེས་རྒྱུད་གདུངས་ཤིང་མི་བཟོད་པར་བྱེད་པས་མེ་དང་འདྲ་ལ། སངས་རྒྱས་ཀྱི་གསུང་ནི་གདུང་བ་དེ་ཐམས་ཅད་སེལ་བའི་ཆུ་ལྟ་བུར་བཤད་དེ། དབུ་མ་སྙིང་པོ་ལས། ཙན་དན་པས་ལྷག་གསུང་གི་ཆུས། །ལུས་ཅན་ཡིད་ཀྱི་ཉོན་མོངས་མེས། །རབ་ཏུ་གདུངས་པ་ཞི་བར་བྱེད། །ཅེས་དང། རྟོག་གེ་འབར་བ་ལས། བདེ་བར་གཤེགས་པའི་གསུང་གིས་ཤིན་ཏུ་ཞི་བར་བྱས་པས་ཉོན་མོངས་པའི་མེའི་གདུང་བ་ནི་གཏན་མི་འབྱུང་བའི་ཆོས་ཅན་དུ་འགྱུར་ཏེ། ཞེས་གསུངས་པ་ལྟར་རོ། །རྐང་པ་གསུམ་པར། བདག་གིས་འཕེལ་སྡིག་ཕམ་ཞེས་པའི་སྡིག་པའང། དགེ་སྡིག་གཉིས་སུ་ཕྱེ་བའི་སྡིག་པ་ཁོ་ན་ལ་བྱེད་མི་དགོས་ཀྱི། འཁོར་བར་འཕེན་པའི་ཟག་བཅས་ཀྱི་ལས་དགེ་མི་དགེ་ཐམས་ཅད་ལ་བྱར་རུང་སྟེ། དཔེར་ན། ཐུབ་རྣམས་སྡིག་པ་ཆུ་ཡིས་མི་འཁྲུ་ཞིང། །ཞེས་སོགས་རྐང་པ་བཞིས་སྡུག་ཀུན་སྤོང་ཚུལ་དང། འགོག་ལམ་མངོན་དུ་བྱ་ཚུལ་རིམ་བཞིན་བསྟན་པར་གསུངས་པ་ལྟ་བུ། འབྲས་བུ་སྡུག་བསྔལ་བའི་རང་བཞིན་ཅན་གྱི་འཁོར་བ་འགྲུབ་པར་བྱེད་པའི་རྒྱུ་རྣམས་ལ་སྡིག་པ་དང་མི་དགེ་བའི་སྒྲས་བསྟན་པའི་སྐབས་མང་ལ། དེར་མ་ཟད་འཁོར་བ་རང་ཉིད་ལའང་མི་དགེ་བའི་སྒྲ་འཇུག་པའི་ཕྱིར་ཏེ། མཛོད་འགྲེལ་ལས། འཁོར་བ་ནི་སྡུག་བསྔལ་ཐམས་ཅད་འཇུག་པའི་བདག་ཉིད་ཀྱིས་མཆོག་ཏུ་མི་བདེ་བའི་ཕྱིར་དོན་དམ་པར་མི་དགེ་བ་ཡིན་ནོ། །ཞེས་གསུངས་པའི་ཕྱིར། དེ་ལྟར་ཀུན་
འབྱུང་བདེན་པ་སྤྱི་ལ་བྱས་ན་དེའི་འཕེལ་བ་ཕམ་པར་བྱས་ཚུལ་ཡང་རྐང་པ་སྔ་མའི་ཉོན་མོངས་མེ་ལས་ཐར་བྱས་ཞེས་པ་དང་ཤིན་ཏུ་འགྲིག་སྟེ། མཛོད་ལས། དེ་བཞིན་ཤུན་པ་བཞིན་དུ་འདོད། །ལས་ནི་ཤུན་བཅས་འབྲས་དང་འདྲ། །ཞེས་ཉོན་མོངས་པ་ཤུན་པ་དང། ལས་ནི་དེའི་ནང་གི་འབྲས་དང་འདྲ་བས། འབྲས་ཤུན་པ་དང་མ་བྲལ་ན་སྐྱེ་ཞིང་འཕེལ་བར་ནུས་ལ། དེ་དང་བྲལ་ན་འཕེལ་མི་ནུས་པ་བཞིན། ལས་ཀྱང་ཉོན་མོངས་དང་མ་བྲལ་ན་འཕེལ་ཞིང་སྐྱེ་སྲིད་འཕེན་པར་ནུས་ལ། གྲོགས་ཉོན་མོངས་དང་བྲལ་ན་དེ་ལྟར་མི་ནུས་པའི་ཕྱིར་ཏེ། མཛོད་འགྲེལ་ལས། ཉོན་མོངས་ཐོབ་པའི་ཤུན་པ་དང་བཅས་པའི་ལས་སྐྱེ་བ་གཞན་དུ་སྐྱེ་བར་ནུས་ཀྱི། འབའ་ཞིག་ནི་མ་ཡིན་ནོ། །ཞེས་དང། རྣམ་འགྲེལ་ལས། སྲིད་པའི་སྲེད་ལས་རྣམ་བརྒལ་བའི། །ལས་གཞན་འཕེལ་ནུས་མ་ཡིན་ཏེ། །ལྷན་ཅིག་བྱེད་པ་ཟད་ཕྱིར་རོ། །ཞེས་གསུངས་པའི་ཕྱིར། གསུམ་པ་མཐར་སངས་རྒྱས་པའི་སྐབས་ལས་བརྩམས་ཏེ་དོན་བསྡུ་བ་ནི། བདག་གིས་མུ་སྟེགས་ཅན་གཞན་དག །ལྟ་བའི་ཆུ་ལས་བསྒྲལ་བྱས་ཤིང། །ཡང་དག་ལྟ་ལ་བཀོད་བྱས་པས། །བདག་འཁོར་རྟག་ཏུ་གུས་གྱུར་ཅིག །ཡུན་རིང་བསྟན་པ་འབར་གྱུར་ཅིག །ཅེས་བྱུང། དེའང་ཆེས་སྙིགས་མ་བདོ་ཞིང་ཁྱད་པར་དུ་ལྟ་བའི་སྙིགས་མར་གྱུར་ཏེ། མུ་སྟེགས་ཀྱི་སྟོན་པ་དྲུག་ལ་སོགས་པས་ལྟ་ངན་སྣ་ཚོགས་པ་བཟུང་ནས་སྐྱེ་བོ་རྣམས་ལམ་མ་ཡིན་པ་ལ་སྦྱར་ཏེ་ཤིན་ཏུ་གདུལ་དཀའ་བར་གྱུར་པའི་དུས་སུ། ལྷའི་བུ་དམ་པ་ཏོག་དཀར་པོ་འཛམ་གླིང་དུ་འབྱོན་པར་
བརྩམས་པའི་ཚེ། ལྷ་རྣམས་ཀྱིས་ད་ལྟ་འཛམ་བུ་གླིང་ན་མི་མཐུན་པའི་ལྟ་ངན་སྣ་ཚོགས་པ་བཟུང་སྟེ་ཤིན་ཏུ་གདུལ་དཀའ་བས་འབྱོན་པའི་དུས་མིན་ཞེས་བཤོལ་བཏབ་པ་ལ། ཇི་ལྟར་དུང་གི་སྒྲས་རོལ་མོ་གཞན་ཐམས་ཅད་ཟིལ་གྱིས་གནོན་པ་ལྟར། སྨྲ་བ་ངན་པ་དེ་དག་ཐམས་ཅད་ཕམ་པར་བྱའོ་ཞེས་འཇིགས་པ་མེད་པ་སེང་གེའི་སྒྲ་བསྒྲགས་ཏེ། འཇིག་རྟེན་དུ་བྱོན་ནས་ཇི་ལྟར་ཞལ་གྱིས་བཞེས་པ་དེ་བཞིན་དུ་མི་འཇིགས་པ་བཞིའི་སྒོ་ནས་ཆོས་ཀྱི་འཁོར་ལོ་རང་དབང་དུ་བསྐོར་ཏེ། མུ་སྟེགས་ཅན་ལ་སོགས་པའི་ལྟ་བ་ངན་པ་ཐམས་ཅད་ཕམ་པར་མཛད་ཅིང། སོ་སོའི་སྐལ་བ་དང་འཚམ་པར་གང་ཟག་དང་ཆོས་ཀྱི་བདག་མེད་པའི་ལྟ་བ་ཕྲ་རགས་རྣམས་ལ་རིམ་པ་བཞིན་དུ་འགོད་པར་མཛད། འཁོར་བར་འཆིང་བྱེད་ཀྱི་ལས་དང་ཉོན་མོངས་པའི་དྲ་བ་ཡང་དག་པའི་ཡེ་ཤེས་ཀྱི་རལ་གྲིས་བཅད་ནས། སྔོན་བསྐལ་པ་ཆེན་པོ་གྲངས་མེད་པ་ཇི་སྙེད་ཅིག་ཏུ་འགྲོ་བ་རྣམས་འཁོར་བའི་རྒྱ་མཚོ་ལས་བསྒྲལ་བར་བྱའོ་ཞེས་དམ་བཅས་ཤིང། ཐུགས་ལ་བརྣག་པའི་དོན་དེ་ཉིད་ཇི་ལྟར་དགོངས་པ་བཞིན་དུ་བསྒྲུབ་པར་མཛད་པ་དེའི་བདེན་པའི་མཐུས་ཐུབ་པའི་དབང་པོ་ཉིད་ཀྱི་རྗེས་སུ་སློབ་པའི་འཁོར་རྣམས་ལྟ་བའི་དབང་གིས་མི་མཐུན་པ་མེད་པར། སྟོན་པ་དང་བསྟན་པ་གཅིག་ཏུ་ཡིད་ཆེས་པའི་སྒོ་ནས། སྟོན་པས་ཇི་ལྟར་གསུངས་པ་བཞིན་དུ་གུས་པས་བསྒྲུབ་པ་དང། དེ་ལ་བརྟེན་ནས་བསྟན་པ་རིན་པོ་ཆེ་ཡུན་རིང་དུ་གནས་པར་སྨོན་པའོ། །མདོ་རང་ལ་ཤོ་ལོ་ཀ་འདིའི་མཐར་ཡུན་རིང་བསྟན་པ་ཞེས་སོགས་མེད་ཀྱང། དགོས་པའི་གཙོ་བོ་ཡིན་པས་དགོངས་པ་བླངས་ཏེ་དམ་
པ་རྣམས་ཀྱིས་སྦྱར་བར་མཛད་པ་བཞིན་བྱས་པ་ལེགས་སོ། །རིན་ཆེན་དོན་གྲུབ་ཀྱི་ཊཱིཀྐར། ལྟ་བའི་མུ་དང་ཐར་པའི་སྟེགས་སམ། ཡང་དག་པའི་ལྟ་བའི་སྟེགས་ལ་གནས་པས་ན་མུ་སྟེགས་ཞེས་པའང་འཐད་པ་འདྲའོ། །ཞེས་བཤད་པ་དང། སྟག་ལོའི་གྲུབ་མཐའ་ཀུན་ཤེས་ཀྱི་རང་འགྲེལ་ལས། ཐར་པའི་མུ་དང་སྟེགས་ལ་གནས་པས་མུ་སྟེགས་ཞེས་བྱ་བས་ན་འཇིག་རྟེན་ཕལ་པ་ལས་ནི་ཆེས་མཆོག་ཏུ་གྱུར་ཏེ། ཞེས་བཤད་པ་རྣམས་ཀྱི་ཁུངས་རྟེན་ས་ནི། ཁྱད་པར་འཕགས་བསྟོད་ཀྱི་འགྲེལ་པ་ལས། མུ་སྟེགས་ནི་ཐར་པ་དང་མཐོ་རིས་ཀྱི་ལམ་སྟེ། དེ་སྟོན་པར་བྱེད་པའི་བསྟན་བཅོས་ལ་མུ་སྟེགས་ཞེས་བྱ་ལ། དེ་བྱེད་པས་ན་མུ་སྟེགས་བྱེད་དོ་ཞེས་པ་འདི་ཉིད་ཡིན་སྣང་ཡང། དེ་ནི་ཤེས་བྱེད་དུ་མི་འགྲོ་སྟེ། དེས་འཇུག་ངོགས་སུ་ཁྲུས་བྱེད་པ་སོགས་ཐར་པའི་ལམ་ཡིན་པར་བསྟན་པ་མ་ཡིན་གྱི། དེ་དག་གིས་དེ་ཐར་པའི་ལམ་དུ་བྱེད་པའམ་ཁས་ལེན་པར་བསྟན་པ་ཡིན་ལ། དེ་ཐར་ལམ་དུ་བྱེད་མཁན་ཡོད་པས་ཐར་ལམ་ཡིན་དགོས་པ་ཧ་ཅང་ཐལ་བའི་ཕྱིར་དང། ཐར་པའི་རྒྱུར་འདོད་ཅེས་པའི་ཐར་པའང་ཉོན་མོངས་ཟད་པའི་ཐར་པ་དངོས་གནས་པ་ཁོ་ན་ལ་བྱེད་མི་དགོས་ཀྱི། ལང་གཤེགས་ལས་གཞན་སྡེ་རྣམས་ཀྱིས་ཐར་པ་འཇོག་ཚུལ་རིགས་མང་པོ་ཞིག་གསུངས་པ་བཞིན། བདེ་འགྲོའི་རྒྱུར་འགྲོ་བ་ལ་བསམ་ནས་ཐར་པའི་རྒྱུ་ཞེས་བཤད་པའང་ཡོད་པའི་ཕྱིར། གྲུབ་མཐའ་ཆེན་མོ་ལས། དེར་ཞུགས་པ་ཐར་པ་སྟེ་བདེ་འགྲོའི་རྒྱུར་སྨྲ་
བདེ་བྱེད་པས་མུ་སྟེགས་བྱེད་ཅེས་བྱ་ཡི། ཞེས་གསུངས་པའི་ཕྱིར། འདིར་སྨྲ་བ་ཞེས་པས། ཁྱད་པར་འཕགས་བསྟོད་ཀྱི་འགྲེལ་པར། དེ་བྱེད་པས་མུ་སྟེགས་ཞེས་པ་དེའི་དོན་གསལ་བར་མཛད་པ་ཡིན་ནོ། །འདི་ལྟར་བྱས་ན་གཞི་འགྲེལ་ལས་གང་དག་ལ་ཆུ་ཀླུང་དུ་འཇུག་པའི་ཐར་ལམ་ཡོད་པ་འདི་དག་ནི་མུ་སྟེགས་ཅན་ནོ། །ཞེས་དང། སྤྱན་རས་གཟིགས་བརྟུལ་ཞུགས་ཀྱིས། མུ་སྟེགས་བྱེད་ཅེས་བྱ་བ་ནི། གང་དག་ཆོས་ཀྱི་ཕྱིར་འཇུག་ངོགས་སུ་འཇུག་པར་བྱེད་པ་སྟེ། ཞེས་གསུངས་པ་སོགས་ཀྱི་དགོངས་པའང་ཆུ་ཀླུང་དུ་འཇུག་པ་ལ་ཐར་ལམ་ཡོད་པར་སྨྲ་བ་དང། དེ་ནི་དྷརྨཱ་ཞེས་པ་མྱང་འདས་སམ། ཐར་པ་དང་བསོད་ནམས་སོགས་གང་དུའང་སྦྱར་ཆོག་པས་མ་ཕྱེ་བར་ཆོས་ཀྱི་རྒྱུར་སྨྲ་བ་ཞེས་བཤད་པ་ཡིན་ཏེ། དགོངས་པ་ཤིན་ཏུ་མཐུན་ནོ། །ཡང་ཁ་ཅིག་དེ་ཐར་པར་འཇུག་པའི་སྟེགས་མིན་ན། སྒྲ་སྦྱོར་བམ་གཉིས་ལས། ཏཱིརྠ་ཀ་ནི། ཏཱིརྠཾྱབིངྱ་ཏེ་ཏཱི་ནྲ་ཀཿ ཞེས་བྱ་སྟེ། མཚོའི་འགྲམ་ནི་མཚོར་འཇུག་པའི་སྟེགས་འཆའ་བ་དང་འདྲ་བར། དཀའ་ཐུབ་དང་རྣལ་འབྱོར་སོགས་སྣ་ཚོགས་སྤྱོད་ཅིང་མྱང་འདས་ཀྱི་རྒྱ་མཚོར་འཇུག་པའི་སྟེགས་འཆའ་བས་ན་མུ་སྟེགས་ཅན་ཞེས་བྱ། ཞེས་གསུངས་པ་ཇི་ལྟར་དྲང་ཞེ་ན། དེ་ནི་ཐུན་མོང་གི་གྲགས་པ་དང་སྒོ་བསྟུན་པའི་སྒྲ་བཤད་ཙམ་ཡིན་པས། སྒྲ་བཤད་པའི་ཚེ་དེ་ལྟར་བཤད་ཀྱང་དོན་ངོ་བོ་ལ་དེ་བཞིན་ཁས་ལེན་མི་རུང་བ་དུ་མ་ཡོད་པའི་ཕྱིར། ཚངས་པ་ལ་བྱེད་པོ་དང། འཕྲོག་བྱེད་ལ་ཁྱབ་འཇུག་ཅེས་སྒྲ་བཤད་པའི་ཚེ་འཇིག་རྟེན་གྱི་བྱེད་པ་པོ་ཡིན་པ་དང། སྣོད་བཅུད་ཐམས་ཅད་ལ་ཁྱབ་པ་ཞེས་བཤད་ཀྱང་
ངོ་བོ་ལ་དེ་ལྟར་མ་ཡིན་པ་བཞིན་ནོ། །འོ་ན་སྟག་ལོ་དང་འདི་གཉིས་ཀྱིས་བཤད་ཚུལ་ཡང་སྒྲ་བཤད་ཙམ་ཡིན་མོད་སྙམ་ན། དེ་མ་ཡིན་ཏེ། ཡང་དག་པའི་ལྟ་བ་གོ་བའི་དབང་གིས། འཇིག་རྟེན་ཕལ་པ་ལས་ཁྱད་པར་དུ་གྱུར་ཅེས་དང། ཕལ་པ་ལས་ནི་ཆེས་མཆོག་ཏུ་གྱུར་ཏེ། ཤེས་བྱའི་གནས་ལུགས་ལ་དཔྱོད་པ་ལ་སོགས་པས་སོ། །ཞེས་ཐར་པའི་སྟེགས་སུ་འགྱུར་བའི་རྒྱུ་མཚན་དང་བཅས་བསྒྲུབས་པས་ཁོ་རང་རྣམས་རང་ལུགས་སུ་བཞེད་པར་མངོན་ནོ། །ཡང་ཕྱི་རོལ་པའི་ལྟ་བ་དག་ཡང་དག་པའི་ལྟ་བ་གོ་བའི་སྟེགས་སུ་མི་འགྱུར་ན། མདོ་དང་བསྟན་བཅོས་རྣམས་སུ་དེའི་ཚུལ་མང་དུ་གསུངས་པ་དགོས་མེད་དུ་ཐལ་ལོ་ཞེ་ན་སྐྱོན་མེད་དེ། ལས་ཉོན་རྣམས་ཐར་པར་བགྲོད་པའི་གྲོགས་མིན་ཡང་ཐར་པར་སྒྲོད་ཚུལ་སྟོན་པ་ལ་སྤང་བྱ་དེ་དག་སྔོན་དུ་བཤད་དགོས་པ་ལྟར། ཕྱི་བའི་ལྟ་བ་རང་གི་ངོ་བོའི་སྒོ་ནས་དེའི་སྟེགས་མིན་ཡང། ཡང་དག་པའི་ལྟ་བར་འཇུག་པ་ལ་གོལ་ས་དེ་དག་ངོ་ཤེས་པར་བྱས་ནས་སྤངས་ཏེ། ལམ་ཡང་དག་པ་འཚོལ་དགོས་པའི་རྒྱུ་མཚན་གྱིས་མང་དུ་གསུངས་པ་ཡིན་པའི་ཕྱིར། ཀུན་མཁྱེན་འཇིགས་མེད་དབང་པོའི་གྲུབ་མཐའ་རིན་ཆེན་ཕྲེང་བ་ལས། ལྟ་བ་ངན་པའི་མུ་ལ་སྟེགས་འཆའ་བའི། །ཕྱི་རོལ་གྲུབ་མཐའི་རང་བཞིན་མ་ལུས་པ། །ལེགས་པར་ཤེས་ཏེ་སྤོང་བར་བྱེད་པ་ནི། །ཐར་པའི་གྲོང་དུ་འཇུག་པའི་ཐེམ་སྐས་སོ། །ཞེས་དང། རྗེ་བཙུན་བློ་བཟང་ཆོས་ཀྱི་ཉི་མའི་གྲུབ་མཐའ་ཤེལ་གྱི་མེ་ལོང་ལས། དེ་ཕྱིར་ལྟ་ངན་མུ་ལ་སྟེགས་འཆའ་བའི། །ཕྱི་རོལ་
གྲུབ་མཐའི་རྣམ་གཞག་ལེགས་ཤེས་ནས། །སྤོང་བར་བྱེད་པར་ཐར་པའི་གྲོང་ཁྱེར་དུ། །འཇུག་པའི་ཐེམ་སྐས་ཉིད་ཅེས་མཁས་རྣམས་གསུངས། །ཞེས་པ་ལྟར་རོ། །དེར་མ་ཟད་ཆོས་ཀྱི་དེ་ཉིད་འབྱེད་པའི་རྣམ་དཔྱོད་ཅན་རྣམས་ཀྱིས་གཞན་སྡེའི་གཞུང་ལ་ཇི་ཙམ་དཔྱད་པ་བཞིན་གྱིས་མི་གཙང་བའི་ཁྲོན་པ་རློག་པ་ལྟར་ཞེན་པ་ལྡོག་ཅིང། སངས་རྒྱས་ཀྱི་བསྟན་པ་ལ་གུས་པར་འགྱུར་ཏེ། ཁྱད་པར་འཕགས་བསྟོད་ལས། མུ་སྟེགས་གཞན་གྱི་གཞུང་ལུགས་ལ། །ཇི་ལྟ་ཇི་ལྟར་རྣམ་བསམ་པ། །དེ་ལྟ་དེ་ལྟར་མགོན་ཁྱོད་ལ། །བདག་གི་སེམས་འདི་དད་པར་གྱུར། །ཅེས་སོ། །དེ་བཞིན་དུ་རྗེ་བླ་མའི་གསུང་དང་མི་མཐུན་པ་རྣམས་ལ་བལྟས་པ་ན། བློ་གྲོས་ཕུལ་ཏུ་ཕྱིན་པ་ཞིག་ཡོད་ཚེ་རྗེའི་གསུང་ལ་ལྷག་པར་ཡིད་ཆེས་སྐྱེ་བས་གཞན་ལ་འགྲམ་ཆུ་མི་ལྡང་བ་ཞིག་འབྱུང་ཡང། ད་ལྟ་ཐམས་ཅད་གཟུགས་བརྙན་ཁོ་ནར་སོང་བས་ཆོས་ཀྱི་ཆེ་བ་འདོན་ཚུལ་ཀུན་བྱང་གི་འཇུག་ལྡོག་ལས་བརྩམས་ཏེ་དཔྱད་པ་གསུམ་དང་རིགས་པ་བཞིའི་རྣམ་དབྱེ་ཅི་ཡང་མི་དགོས་པར། བཤད་པ་པོས་ངའི་འདི་ཟབ་མོ་ཁྱད་ཆོས་ཅན་ཞིག་ཡིན་ནོ་ཞེས་དམ་བཅས་པ་ཁོ་ནས་ཆོག་པ་དག་ལ་ལུང་རིགས་རྣམ་དག་གིས་དགོས་པ་ཅི་ཡང་སྒྲུབ་ཏུ་མེད་དོ། །ཡང་རིན་ཆེན་དོན་གྲུབ་ཀྱི་ཊཱིཀྐར་ཤོ་ལོ་ཀ་འདིའང་སློབ་པའི་གནས་སྐབས་དང། དེའི་ནང་ནས་ཀྱང་བསྡུ་བཞིའི་དོན་སྤྱོད་ལ་སྦྱར་བར་གོང་དུ། བདག་སྔོན་ཐབས་ཤེས་གྱུར་པ་ན། །སེམས་ཅན་ལྟ་ངན་ལས་བསྒྲལ་ཅེས་པ་དེ་ཉིད་དོན་སྤྱོད་པར་སྦྱར་ཡོད་པ་དང་ཟློས་ཀྱིས་དོགས་ནས། ཟློས་སྤོང་དུ་སྔ་མ་ནི་གྲུབ་མཐའ་ལ་མ་ཞུགས་པའི་འཇིག་རྟེན་ཕལ་པའི་རྒྱུད་ཀྱི་ལྟ་ངན་
ལས་བསྐྱབ་པ་དང། ཕྱི་མ་མུ་སྟེགས་ཀྱི་གྲུབ་མཐས་བསླད་པའི་ལྟ་ངན་ལས་བསྐྱབ་པ་ལ་བཤད་དོ། །དེ་ནི་བཤད་པའི་རིམ་པ་དང། དོན་གྱི་རིམ་པ་གང་བྱས་ཀྱང་མི་འཐད་དེ། བཤད་ཚུལ་སྔར་བསྡུ་བཞི་སོ་སོར་རྒྱས་པར་བཤད་པ། མཇུག་དོན་བསྡུ་བ་དང་བཅས་སོང་ཟིན་ནས། ཡང་རྒྱས་བཤད་ལ་འཇུག་ན་གོང་འོག་འཆོལ་བ་ཡིན་པའི་ཕྱིར་དང། དོན་གྱི་དབང་དུ་བྱས་ནའང་མུ་སྟེགས་ཀྱི་གྲུབ་མཐས་བསླད་པའི་བདག་ཏུ་ལྟ་བ་ནི་གནས་སྐབས་སུ་སྒྲོ་བཏགས་པ་ཙམ་ཡིན་པས་སྤོང་སླ་ལ་སྤང་བྱ་ཀུན་བཏགས་དང་མཐོང་སྤང་ཡིན། གྲུབ་མཐས་བཏགས་པ་ལ་མ་ལྟོས་པར་འཇིག་རྟེན་རང་དགའ་བ་ལ་འབྱུང་བའི་བདག་ལྟ་ནི་ལྷན་སྐྱེས་འཁོར་བའི་རྩ་བ་མཐར་ཐུག་ཡིན་པས་སྤོང་དཀའ་ཞིང་སྒོམ་སྤང་ཡིན་པའི་ཕྱིར། འཇུག་པ་ལས། གང་དག་དུད་འགྲོར་བསྐལ་མང་བསྐྱལ་གྱུར་པ། །དེས་ཀྱང་མ་སྐྱེས་རྟག་འདི་མ་མཐོང་ལ། །ངར་འཛིན་དེ་དག་ལ་ཡང་འཇུག་མཐོང་སྟེ། །ཞེས་པ་རྩ་འགྲེལ་ཐམས་ཅད་དང། ལམ་རིམ་ལས། ཀུན་བཏགས་ཀྱི་མ་རིག་པ་ནི་གྲུབ་མཐའ་སྨྲ་བ་དེ་དག་ཁོ་ན་ལ་ཡོད་པས་འཁོར་བའི་རྩ་བར་མི་རིགས། ཞེས་གསུངས་པའི་ཕྱིར། དེས་ན་སྔར་ཀུན་བཏགས་ལས་བསྐྱབས་ནས། དེ་རྗེས་ལྷན་སྐྱེས་ལས་སྐྱོབ་དགོས་ཀྱི། གོ་རིམ་བཟློག་མི་རིགས་སོ། །རང་ལུགས་སྔ་མ་སློབ་པའི་སྐབས་དང། ཕྱི་མ་སངས་རྒྱས་ནས་ཀྱང་ལྟ་ངན་ཐམས་ཅད་ཟིལ་གྱིས་མནན་པ་ལ་སྦྱར་ཏེ། གཉིས་ཀར་ཀུན་བཏགས་ལྷན་སྐྱེས་ཐམས་ཅད་བཞག་ཆོག་པས་ཟློས་སྤོང་གི་ངལ་བ་མི་དགོས་སོ། །ཁོང་གིས། མུ་སྟེགས་ཅན་གཞན་དག་ཅེས་པའི་གཞན་གྱི་སྒྲས་སེམས་ཅན་ཕལ་
པ་ལས་གཞན་དུ་བསྟན་གསུངས་པའང། ཁོང་དུས་ཕྱིས་ཡི་གེའི་རྣམ་དབྱེ་སོགས་ལ་རྩོད་མེད་ཀྱི་པཎྚི་ཏར་བྱེད་ཀྱིན་འདུག་པས་གོ་ཚུལ་གཅིག་ཡོད་ལས་ཆེའང། གཞུང་སྤྱི་སྐད་དུ་མུ་སྟེགས་ཅན་ལ་གཞན་དང་གཞན་སྡེ་སོགས་སུ་བཤད་པ་དེ། ནང་པ་ལ་ལྟོས་ཏེ་གཞན་དུ་བཞག་པ་ལས་སེམས་ཅན་ཕལ་པ་ལ་ལྟོས་ཏེ་གཞན་དུ་བཞག་པ་ཞིག་མ་མཐོང་བར་མ་ཟད། ཕལ་པ་ལ་ལྟོས་ཏེ་གཞན་དུ་འཇོག་ན་དམ་པར་འགྱུར་རམ་ཡང་སྙམ་མོ། །ཡང་ཁ་ཅིག་འདི་སྐད་ཅེས། འདི་སངས་རྒྱས་ཀྱི་མཛད་པ་དང་སྦྱོར་ན། སངས་རྒྱས་ཀྱི་མཛད་པ་ལ་མཛད་པ་བཅུ་གཉིས་སོགས་མང་དུ་ཡོད་པས། གཞན་མ་སྨོས་པར་མུ་སྟེགས་སོགས་ཀྱི་ལྟ་བ་ངན་པ་ལས་བསྐྱབ་པ་ཁོ་ན་ཅིའི་ཕྱིར་སྨོས་ཤེ་ན། འདི་གནད་ཤིན་ཏུ་ཆེ་སྟེ། བསྔོ་བ་འདིའི་ལུས་ཡོངས་སུ་རྫོགས་པའི་བརྗོད་དོན་ནི་བསྟན་པ་རྒྱས་པ་ཁོ་ནའི་ཕྱིར་ཡིན་ལ། བསྟན་པ་དེ་ཉིད་བསྟན་པ་སྐྱོན་མེད་འགྱུར་བའི་རྩ་བ་སྟོན་པ་པོ་ལ་རག་ལས་ཤིང། སྟོན་པའང་སྟོན་པར་འཇོག་པ་བསྟན་པའི་སྲོལ་ཐོག་མར་ཕྱེ་བ་དེའི་སྒོ་ནས་འཇོག་དགོས་པའི་ཕྱིར། སྟོན་པའི་མིང་གིས་བཏགས་པ་ནི་བདག་ཅག་གི་སྟོན་པ་གཅིག་པུ་མ་ཡིན་གྱི། བདག་ལྟའི་ཞེན་ཡུལ་སྒྲུབ་པའི་སྟེང་ནས་རང་གི་རྗེས་འཇུག་ལ་ཐར་ལམ་ལྟར་སྣང་སྟོན་པ་མུ་སྟེགས་པའི་སྟོན་པ་དང། བདག་ལྟའི་ཞེན་ཡུལ་འགོག་པའི་སྒོ་ནས་སོ་སོའི་སྐལ་བ་དང་འཚམ་པར་བདེན་པ་བཞི་དང་སྟོང་པ་རྟེན་འབྱུང་སོགས་ཀྱི་ཐར་ལམ་སྟོན་པ་བདག་ཅག་གི་སྟོན་པ་གཉིས་སུ་ཡོད་ཀྱང། བདག་ཅག་གི་སྟོན་པས་མི་འཇིགས་པ་བཞིའི་སྒོ་ནས་དམ་པའི་ཆོས་ཀྱི་སེང་གེའི་སྒྲ་བསྒྲགས་པ་ན། མུ་སྟེགས་ཀྱི་སྟོན་པས་བཤད་པ་ཐམས་ཅད་བྱིས་པའི་རྡོལ་གཏམ་
བཞིན་སྙིང་པོ་མེད་པ་དང་མ་འབྲེལ་བ་ཁོ་ནར་གྱུར་ཏེ། ཉི་མའི་འོད་ཀྱིས་མེ་ཁྱེར་བཞིན་དུ་སྨྲ་བ་ངན་པའི་ལྟ་བ་ཐམས་ཅད་ཟིལ་གྱིས་གནོན་པས་ན་བདག་ཅག་གི་སྟོན་པ་གཅིག་པུ་ངེས་པ་དོན་གྱི་སྟོན་པ་དང། ཚད་མའི་སྐྱེས་བུ། སྨྲ་བའི་དམ་པ་སོགས་སུ་འགྲུབ་ལ། དེ་གྲུབ་ན་དེའི་བསྟན་པ་ཁོ་ན་ཐར་འདོད་ཀྱི་འཇུག་ངོགས་སུ་གྲུབ་པའི་ཕྱིར། རྩ་ཤེ་ལས། རྫོགས་པའི་སངས་རྒྱས་སྨྲ་རྣམས་ཀྱི། །དམ་པ་ཞེས་དང། བུདྡྷ་པཱ་ལི་ཏ་ལས། བཅོམ་ལྡན་འདས་ཀྱིས་ཕྱི་རོལ་པ་ཕས་ཀྱི་རྒོལ་བ་ཐམས་ཅད་བྱིས་པ་བསླུ་བ་དང་འདྲ་བར་ཐུགས་སུ་ཆུད་ནས། ཞེས་པ་ནས། སྨྲ་བ་རྣམས་ཀྱི་དམ་པ་ཞེས་དང་། ཚིག་གསལ་ལས། དེ་བཞིན་གཤེགས་པ་ཉག་གཅིག་དོན་ཕྱིན་ཅི་མ་ལོག་པར་གསུངས་པ་ཉིད་དུ་གཟིགས་ཤིང་། ཕ་རོལ་པའི་སྨྲ་བ་ཐམས་ཅད་བྱིས་པའི་རྡོལ་ཐབས་སྨྲ་བ་དང་འདྲ་བར་ཞེས་སོགས་དང། རིགས་པ་དྲུག་ཅུ་པའི་འགྲེལ་པར་ཡང། སངས་རྒྱས་བཅོམ་ལྡན་འདས་ཉིད་ནི་རྟེན་ཅིང་འབྲེལ་བར་འབྱུང་བ་གསུང་བ་ཉིད་ལ་རྒྱུ་ཡིན་ཅིང། རྟེན་ཅིང་འབྲེལ་བར་འབྱུང་བ་གསུང་བ་ཉིད་ནི་སངས་རྒྱས་བཅོམ་ལྡན་འདས་ཉིད་ལ་རྒྱུ་ཡིན་ཏེ། ཞེས་གསུངས་ཤིང། དེ་དག་གི་དོན་བསྡུས་ནས་རྗེ་བླ་མས། སྟོན་པ་ཞེས་བྱ་ཁྱོད་ཉིད་དེ། །ཝ་སྐྱེས་ལ་ནི་སེང་གེ་བཞིན། །མུ་སྟེགས་ཅན་ལའང་གཅམ་བུའི་ཚིག །ཅེས་གསུངས་ལ། མདོ་དང་རྣམ་འགྲེལ་གྱིས་ཀྱང་ལུགས་འབྱུང་ལུགས་ལྡོག་གཉིས་ཀྱིས་བདེན་བཞིའི་བླང་དོར་རང་དབང་དུ་སྟོན་པའི་སྒོ་ནས་གདུལ་བྱ་ཡང་དག་པའི་ལམ་མ་ནོར་བ་ལ་འཁྲིད་པ་ཁོ་ན་སྟོན་པ་ཚད་མའི་སྐྱེས་བུ་མཐར་ཐུག་པར་འཇོག་
བྱེད་དུ་གསུངས་སོ། །འདིས་མཛད་པ་གཞན་རྣམས་མ་བསྡུས་པའི་སྐྱོན་མེད་དེ། སྨྲ་ངན་མཐའ་དག་ཟིལ་གྱིས་གནོན་པའི་ཆོས་འཁོར་བསྐོར་བའི་མཛད་པ་བསྟན་པ་ན། བྱང་ཆུབ་པའི་མཛད་པ་ཡན་ཆད་ནི་ཆོས་འཁོར་བསྐོར་བའི་སྦྱོར་བ་ཡིན་པའི་ཕྱིར་དང། མཛད་པ་ཐམས་ཅད་ལས་མཆོག་དང་གཙོ་བོར་གྱུར་པ་གསུང་གི་མཛད་པ་ཡིན་པའི་ཕྱིར་རོ། །མུ་སྟེགས་ཀྱི་ལྟ་བའི་དབྱེ་བའང་ལེགས་ལྡན་ཆེ་ཆུང་སོགས་ཀྱིས་བཤད་པ་ལྟར་ལྟ་བ་ལྔ་བརྒྱ་བདུན་ཅུ་དང་། སུམ་བརྒྱ་དྲུག་ཅུ་རྩ་གསུམ། ལྟ་བའི་རྩ་བ་བརྒྱ་རྩ་བཅུ། ཡ་མཚན་གྱི་ལྟ་བ་གོ་དྲུག །ལྟ་ངན་རེ་གཉིས། དམ་པ་མ་ཡིན་པའི་ལྟ་བ་ཉེར་བརྒྱད། འཇིག་ལྟ་ཉི་ཤུ། འཇིག་རྟེན་ཕ་རོལ་སྨྲ་བ་བཅུ་དྲུག །ལུང་མ་བསྟན་གྱི་ལྟ་བ་བཅུ་བཞི་ལ་སོགས་པ་རྣམ་གྲངས་ཤིན་ཏུ་མང་ཡང། དེ་ཐམས་ཅད་ལམ་ལོག་པར་ཞུགས་པའི་དབང་གིས་འཁོར་བའི་རྒྱ་མཚོར་འཁྱེར་བྱེད་ཡིན་པས་ཆུ་བོ་ཞེས་བཤད་དེ། ཀུན་བཏུས་ལས། ཆུ་བོ་ནི་བཞི་སྟེ། འདོད་པའི་ཆུ་བོ་དང། སྲིད་པའི་ཆུ་བོ་དང། ལྟ་བའི་ཆུ་བོ་དང། མ་རིག་པའི་ཆུ་བོའོ། །ཞེས་པ་ནས། ལོག་པས་ཚངས་པར་སྤྱོད་པ་ཚོལ་བ་ལ་ཞུགས་པ་ནི་ཐ་མ་གཉིས་ཏེ། ཞེས་དང། མཛོད་རང་འགྲེལ་ལས། འཁྱེར་བར་བྱེད་པའི་ཆུ་བོ་དག་ཡིན་ནོ། །ཞེས་གསུངས་པའི་ཕྱིར། དེ་ལྟར་ལྟ་བ་ངན་པའི་ཆུ་བོ་བསྒྲལ་ནས་གང་ལ་འགོད་པར་བྱ་བ་ཡང་དག་པའི་ལྟ་བའི་གཙོ་བོ་ནི་སྟོང་པ་རྟེན་འབྱུང་དང། རྟེན་འབྱུང་སྟོང་པའི་དོན་དུ་མཐོང་བ་རྟག་ཆད་སྤྲོས་པའི་མཐའ་བརྒྱད་དང་བྲལ་བའི་དབུ་མའི་ལྟ་བ་མཐར་ཐུག་པ་ཡིན་ཀྱང། ཐོག་མ་ཁོ་ན་ནས་དེ་ལ་བཀོད་པ་མ་ཡིན་གྱི། སོ་སོའི་བློ་ཚོད་དང་སྦྱར་ཏེ། རིན་ཆེན་འཕྲེང་བ་ལས།
བརྡ་སྤྲོད་པ་དག་ཇི་ལྟ་བུར། །ཡི་གེ་ཕྱི་མོ་ཀློག་འཇུག་ལྟར། །དེ་བཞིན་སངས་རྒྱས་སེམས་ཅན་ལ། །ཅི་ཙམ་བཟོད་པའི་ཆོས་སྟོན་ཏོ། །ཁ་ཅིག་ལ་ནི་སྡིག་པ་ལས། །རྣམ་པར་བཟློག་ཕྱིར་ཆོས་སྟོན་ཏེ། །ཁ་ཅིག་བསོད་ནམས་འགྲུབ་བྱའི་ཕྱིར། །ཁ་ཅིག་ལ་ནི་གཉིས་བསྟེན་པ། །ཁ་ཅིག་ལ་ནི་གཉིས་མི་བསྟེན། །ཟབ་མོ་ཁུ་འཁྲིག་ཅན་འཇིགས་པ། །སྟོང་ཉིད་སྙིང་རྗེའི་སྙིང་པོ་ཅན། །བྱང་ཆུབ་སྒྲུབ་པ་ཁ་ཅིག་ལའོ། །ཞེས་དང། བཞི་བརྒྱ་པ་ལས། བསོད་ནམས་མིན་པ་དང་པོར་བཟློག །བར་དུ་བདག་ནི་བཟློག་པ་དང། །ཐ་མ་ལྟ་ཞིག་ཀུན་བཟློག་པ། །ཞེས་སོགས་ཀྱི་དོན་བསྡུས་ཏེ་ཀུན་མཁྱེན་འཇམ་དབྱངས་བཞད་པས། དང་པོར་ལས་འབྲས་སོགས་ཀྱིས་བསོད་མིན་བཟློག །བར་དུ་མི་རྟག་སོགས་ཀྱིས་བདག་གཉིས་བཟློག །ཐ་མར་དེ་ཉིད་མངོན་དུ་གྱུར་རིམ་གྱིས། །ལྟ་ཀུན་དྲི་བཅས་འཇོམས་པར་མདོ་སྔགས་བཞེད། །ཅེས་གསུངས་པ་ལྟར་ཡིན་པས། དེ་བཞིན་བྱས་ན་ཡང་དག་པའི་ལྟ་བ་ལ་འགོད་པར་གསུངས་པའི་ཁོངས་འདིར་དགོངས་འགྲེལ་ལྟར་ན་འཁོར་ལོ་གསུམ་དང། གཟུངས་རྒྱལ་གྱི་མདོ་ལས་ནོར་བུ་སྦྱོང་བའི་དཔེས་གདུལ་བྱ་བཀྲི་བའི་རིམ་པ་གསུམ་དུ་བཤད་པ་ལྟར། ཆོས་ཀྱི་ཕུང་པོ་ཇི་སྙེད་ཅིག་གསུངས་པ་ཐམས་ཅད་བསྡུས་ཏེ་བསྟན་པ་ཡིན་ནོ། །བཅོམ་ལྡན་འདས་ཀྱི་གཞན་ལ་ཕན་པའི་མཛད་པ་ཆོ་འཕྲུལ་རྣམ་པ་གསུམ་གྱིས་བསྡུས་པ་མཐའ་ཡས་པ་ཞིག་ཡོད་ཀྱང། སྙིང་པོར་གྱུར་པ་ནི་འགྲོ་བ་རྣམས་ཀྱི་སྲིད་པའི་ཟུག་རྔུ་མ་ལུས་པ་རྒྱུན་གཅོད་བྱེད་ཀྱི་ཡང་དག་པའི་ལྟ་བ་འདི་ཉིད་ཡིན་ལ། སྟོན་པར་འཇོག་བྱེད་ཀྱི་གཙོ་
བོའང་འདི་ཡིན་པས། གདུལ་བྱ་གང་ལ་ལྟ་བ་དེ་ཉིད་ལེགས་པར་བསྟན་པ་ན། དེ་ལ་སྟོན་པའི་བྱ་བ་བྱས་ཟིན་པ་ཡིན་ཏེ། མདོ་ལས། སྲིད་པའི་ཟུག་རྔུ་གཅོད་བྱེད་ལམ། །ངས་ནས་ཁྱེད་ཅག་རྣམས་ལ་བསྟན། །ཁྱེད་ཅག་རྣམས་ཀྱིས་བསྒྲུབ་བྱ་སྟེ། །དེ་བཞིན་གཤེགས་པ་སྟོན་མཛད་ཡིན། །ཞེས་སོ། །དེ་ལྟར་སྟོན་པ་ཐུགས་རྗེ་ཅན་གྱིས་ཐུགས་བརྩེ་བའི་སྒོ་ནས་སྟོན་པའི་བྱ་བ་མཛད་པ་དེའི་རྟེན་འབྲེལ་ལམ་བདེན་པས། རྗེས་འཇུག་རྣམས་སློབ་མའི་བྱ་བ་དེས་གསུངས་པའི་ཆོས་ཚུལ་བཞིན་དུ་སྒྲུབ་པར་སྨོན་པ་ནི། བདག་འཁོར་རྟག་ཏུ་གུས་གྱུར་ཅིག །ཅེས་སོ། །དད་པ་དང་གུས་པ་ནི་ལག་པ་ཐལ་མོ་སྦྱར་ཏེ་མིག་ཟིམ་ཟིམ་བྱས་པ་ཙམ་ལ་མི་འཇོག་གི། དད་གུས་རྣལ་མ་སྐྱེས་པའི་ཚད་ནི་རྐྱེན་ཅི་འདྲ་ཞིག་ཐོག་ཏུ་བབས་ཀྱང་ཆོས་མི་གཏོང་བ་ཞིག་དགོས་པའི་ཕྱིར་ཏེ། རིན་ཆེན་འཕྲེང་བ་ལས། འདུན་དང་ཞེ་སྡང་འཇིགས་པ་དང། །རྨོངས་པས་གང་ཞིག་ཆོས་མི་འདའ། །དེ་ནི་དད་པ་ཅན་ཞེས་བྱ། །ཞེས་འགྲོ་བ་བཞིས་ཆོས་ལས་མི་འདའ་བ་དང་། ཐེག་ཆེན་ལྟར་ན་ཅི་བྱས་གཞན་དོན་དུ་འགྲོ་བ་ཞིག་བྱུང་བའི་ཚེ་སངས་རྒྱས་ལ་མཆོག་ཏུ་གུས་པའི་ཚད་ཡིན་ཏེ། བྱང་ཆུབ་སེམས་དཔའི་སྡེ་སྣོད་དུ་གནས་བརྟན་བཅུ་དྲུག་ལ་སངས་རྒྱས་ཀྱིས་བཀའ་སྩལ་པ་རྣམས་ཀྱི་དོན་མགོན་པོ་ཀླུ་སྒྲུབ་ཀྱིས་མདོར་བསྡུས་པ་སེམས་ཅན་མགུ་བར་བྱེད་པའི་བསྟོད་པ་ལས། ང་ལ་གུས་པ་སེམས་ཅན་དོན་ཏེ་གུས་པ་གཞན་དག་མིན། །གང་གིས་སྙིང་རྗེ་མ་བཏང་དེ་ཡིས་ང་ལ་གུས་པ་སྟེ། །ཞེས་གསུངས་པ་བཞིན་ནོ། །དེ་ལྟར་སྟོན་པ་དང་བསྟན་པ་ལ་གཅིག་ཏུ་གུས་ཤིང་ཡིད་ཆེས་པར་གྱུར་པ་ན། ལྟ་བ་དང་
སྤྱོད་པ་མི་མཐུན་པ་མེད་པར་དགེ་འདུན་ཞེས་བྱ་བའི་མཚན་དང་དོན་མཐུན་པ་ཞིག་འབྱུང་ཞིང། དེ་ལ་བརྟེན་ནས་བཤད་སྒྲུབ་ཀྱི་བསྟན་པའི་བྱ་བ་རྣམས་གོང་དུ་འཕེལ་བ་དང། དེའི་སྟོབས་ཀྱིས་སྐྱེ་དགུའི་ཕན་བདེ་མ་ལུས་པ་རྒྱས་པར་འགྱུར་བ་ནི། སོ་སོར་ཐར་པའི་མདོ་ལས། དགེ་འདུན་མཐུན་པ་བདེ་བ་སྟེ། །མཐུན་པ་རྣམས་ཀྱི་དཀའ་ཐུབ་བདེ། །ཞེས་དང། མཁས་གྲུབ་སྨྲ་བའི་ཉི་མས། སྐྱེ་དགུ་རྣམས་ཀྱི་ཕན་བདེ་ནི། །མ་ལུས་རྒྱལ་བའི་བསྟན་ལས་འབྱུང། །བསྟན་པའི་ཆུ་བོ་འཕེལ་བའི་གཞི། །དགེ་འདུན་ཆུ་གཏེར་ཆེན་པོ་སྟེ། །ཞེས་གསུངས་པ་ལྟར་རོ། །དེ་ལྟ་བུའི་དགེ་འདུན་རྣམས་ཐུགས་མཐུན་ཞིང་བར་ཆད་མེད་པར་འཁོར་ལོ་གསུམ་གྱི་བྱ་བ་ལ་བརྩོན་པ་ནི་ལེགས་ཚོགས་ཀུན་གྱི་གཞི་རྟེན་ཡིན་པ་ལ་དགོངས་ཏེ། རྒྱལ་སྲས་ཞི་བ་ལྷས་ཀྱང། གཙུག་ལག་ཁང་རྣམས་ཀློག་པ་དང། །ཁ་ཏོན་གྱིས་རྒྱས་ལེགས་གནས་ཤོག། །རྟག་ཏུ་དགེ་འདུན་མཐུན་པ་དང། །དགེ་འདུན་དོན་ཡང་འགྲུབ་པར་ཤོག །ཅེས་གསུངས་སོ། །སྨྲས་པ། བསྟན་པའི་བདག་པོ་སྟོན་པ་རྫོགས་སངས་རྒྱས། །བསྟན་པའི་བདག་ཉིད་ལུང་རྟོགས་དམ་པའི་ཆོས། །བསྟན་པའི་སྲོལ་འཛིན་འཕགས་པའི་དགེ་འདུན་རྣམས། །བསྟན་འགྲོའི་དགེ་ལེགས་སྤེལ་བའི་ཤིས་པ་སྩོལ། །རྒྱལ་བས་གང་ལ་བསྟན་པ་གཏད་པའི་ཡུལ། །སྤྲུལ་པའི་དགྲ་བཅོམ་འཕགས་པའི་གནས་བརྟན་རྣམས། །བསྟན་འདི་འཛིན་སྐྱོང་སྤེལ་བའི་ཐབས་མཁས་ཀྱི། །འཕྲིན་ལས་སྒོ་བརྒྱ་དབྱེ་བའི་དུས་ལ་བབས། །ཐུབ་པའི་
ཉི་མ་དངོས་ཀྱི་གདུལ་བྱའི་མཐའ། །རྫོགས་པས་ཆོས་དབྱིངས་ནུབ་རིར་གཞོལ་བ་ན། །སྙིགས་མའི་འགྲོ་ལ་རྗེས་ཆགས་ཕྱི་བཞིན་དུ། །གཟིགས་པའི་གསུང་གི་འོད་དམར་འདི་སྤྲོས་སོ། །བསྔོ་བའི་རྒྱལ་པོ་འདི་ནི་ཕྱོགས་ཀུན་ཏུ། །རླུང་ལྟར་གྲགས་པས་ཐོས་པ་དོན་ལྡན་ཡང། །བརྗོད་དོན་ལེགས་པར་སེམས་པ་དང་བཅས་ན། །ལྷག་པར་བསོད་ནམས་མི་ཟད་གཏེར་དུ་འགྱུར། །དེ་ཕྱིར་བདག་གིས་འདིར་འབད་དགེ་བའི་མཐུས། །མཁའ་མཉམ་འགྲོ་བའི་མ་རིག་མུན་སེལ་ཞིང། །མངོན་མཐོ་ངེས་ལེགས་ལམ་བཟང་སྣང་བྱེད་པ། །བསྟན་པའི་སྒྲོན་མེ་ཡུན་དུ་གསལ་གྱུར་ཅིག །བསྟན་པའི་བདག་པོ་རྒྱལ་བ་ཡབ་སྲས་ཀྱི། །ཕུལ་བྱུང་མཛད་འཕྲིན་གྲགས་པས་ས་ཁྱབ་ཅིང། །སྐྱེས་སྤྲུལ་མཐའ་དག་དམ་པའི་མཚན་དོན་དང། །མཐུན་པར་སྤྱོད་པས་ས་སྟེང་མཛེས་གྱུར་ཅིག །མཐའ་དབུས་ཕྱོགས་ཀྱི་དགེ་འདུན་སྡེ་རྣམས་ཀུན། །བག་ཡོད་ཆོས་མཐུན་འཚོ་བས་ཆོག་ཤེས་ཤིང། །གེགས་མེད་བཤད་སྒྲུབ་ལས་ལ་གཞོལ་བ་ཡིས། །ལྷག་བསམ་རྣམ་དཔྱོད་འགྲན་བཞིན་འཕེལ་བར་ཤོག །བདག་ཀྱང་མ་འོངས་སྐྱེ་བའི་འཕྲེང་བ་རུ། །དཀོར་རྫས་གཞལ་བའི་སྲང་དུ་མི་འགྱུར་བར། །འཁོར་ལོ་གསུམ་གྱིས་རྒྱལ་བསྟན་འཛིན་བཟོད་པ། །ཀུན་མཁྱེན་བླ་མའི་རྣམ་ཐར་སྐྱོང་གྱུར་ཅིག །དུས་མཐའ་འདིར་ཡང་ཐུབ་བསྟན་རྫོགས་པའི་ཁུར། །རང་ཉིད་གཅིག་པུས་འཁྱེར་ལ་མི་ངལ་བ། །ཡབ་རྗེ་འཇིགས་མེད་དབང་པོར་སྙིང་ནས་འདུད། །བརྩེ་ལྡན་དེ་ཡི་བཞེད་པ་འགྲུབ་གྱུར་ཅིག །ཅེས་བསྔོ་བའི་རྒྱལ་པོ་བསྟན་འབར་མའི་དགོངས་དོན་རྒྱ་ཆེར་འགྲེལ་པ་ལེགས་བཤད་བསྟན་
པའི་སྒྲོན་མེ་ཞེས་བྱ་བ་འདི་ནི། སྔ་སོར་དགོན་པའི་ཁྲིར་སྡོད་སྐབས་ཀུན་མཁྱེན་མཆོག་གི་བཀས་བཅད་ལྟར་ལོ་རེ་བཞིན་གླིང་བསྲེའི་སྐབས་སུ་བཀའ་པོད་ལྔའི་སྟེང་ནས་བཤད་པ་བྱེད་དགོས་པས། ལོ་དང་པོར་ས་བཅད་ཞིབ་རྒྱས། གཉིས་པ་དང་ལྔ་བར་དཀའ་གནད་དོགས་གཅོད་དང་བཅས་པའི་གཟབ་བཤད། གསུམ་པར་བཀའ་པོད་སོ་སོའི་ཆོས་འབྱུང་དང་སྦྲགས་པ། བཞི་པར་བཀའ་པོད་ལྔ་ཀ་ལམ་གྱི་ལུས་གཅིག་ཏུ་དྲིལ་བ། དྲུག་པར་བསྟན་འབར་མའི་བརྗོད་དོན་བསླབ་པ་གསུམ་དུ་བསྡུས་ཤིང། དེ་སྟོན་པ་མདོ་འདུལ་གཉིས་དང་ལུང་གི་མངོན་པ་གོང་འོག་རིགས་པའི་མངོན་པ་སྟེ་བཀའ་པོད་ལྔར་འགྱུར་ཚུལ་གྱི་སྟེང་ནས་བཤད་པ་བྱས་པར་བརྟེན། རྣམ་དཔྱོད་ཅན་འགའ་ཞིག་གིས་དེའི་ནང་ནས་བསྟན་འབར་མ་རང་རྐྱང་གི་བཤད་པ་རྣམས་ལོགས་སུ་བཀོལ་བའི་ཊཱིཀྐ་ཞིག་དགོས་ཞེས་བསྐུལ་མ་བྱུང་ཡང་རིམ་འགྱངས་སུ་ལུས་པ་ཉེ་ཆར་པ་རོན་སུ་ཉིད་ཤོག་ནས་གཞུང་བརྒྱ་སྨྲ་བའི་དབང་པོ་རྡོ་རམས་པ་ངག་དབང་རབ་བརྟན་དང། ཧལ་ཧ་དར་ཧན་པཻ་ལིའི་ཤོག་ནས་ལྷག་བསམ་དང་རྣམ་དཔྱོད་ཕུལ་དུ་བྱུང་བ་ཏཱ་བླ་མ་དཀོན་མཆོག་ཆོས་འཛིན་གཉིས་ཀྱིས་ནན་ཏན་དུ་བསྐུལ་བའི་ངོར། དབུས་འགྱུར་བསྟན་པའིསྲོག་ཤིང་སྙན་བརྒྱུད་མན་ངག་གི་མཛོད་འཛིན་པ་དམིགས་པ་མེད་པའི་ཐུགས་རྗེ་ཅན་༸རྗེ་བཙུན་ཡེ་ཤེས་རྒྱལ་མཚན་དཔལ་བཟང་པོ་དང། མདོ་སྨད་སྲིན་པོའི་ཡུལ་ལྟ་བུ་འདིར་ཡང་ཐུགས་བསྐྱེད་ཀྱི་གོ་ཆ་བཙན་པོ་བགོས་ཏེ་ཐུབ་བསྟན་ཡོངས་སུ་རྫོགས་པ་འཁོར་ལོ་གསུམ་གྱི་སྒོ་ནས་འཛིན་སྐྱོང་སྤེལ་བར་བྱེད་པ་ལ་སའི་སྟེང་
ན་འགྲན་པའི་ཟླ་དང་བྲལ་བ་ངེས་པ་དོན་གྱི་ཐམས་ཅད་མཁྱེན་པ་ཆེན་པོ་༸རྗེ་བཙུན་དཀོན་མཆོག་འཇིགས་མེད་དབང་པོ་རྣམ་གཉིས་ཀྱི་ཞབས་རྡུལ་སྤྱི་བོར་བསྟེན་པའི་༸བཙུན་པ་དཀོན་མཆོག་བསྟན་པའི་སྒྲོན་མེས་རབ་བྱུང་བཅུ་བཞི་པའི་བགྲང་བྱ་གཉིས་པ་ས་ཕོ་འབྲུག་གི་ལོ་ཁྲུམས་སྟོད་ཀྱི་ཟླ་བར་དབེན་གནས་ཡིད་དགའ་ཆོས་འཛིན་ནས་མཚམས་ཀྱི་ཐུན་གསེང་དུ་སྦྱར་བའི་ཡི་གེ་པ་ནི་གཙུག་ལག་ལྟ་བའི་བློ་མིག་དང་ལྡན་པ་དགེ་སློང་དཀོན་མཆོག་ཀུན་དགས་བགྱིས་པ་འདིས་ཀྱང་བསྟན་པ་རིན་པོ་ཆེ་ཡུན་རིང་དུ་འབར་བར་གྱུར་ཅིག། །།དགེའོ། །