རྗེ་བཙུན་ཚུལ་ཁྲིམས་བསྟན་པའི་ཉི་མའི་རྣམ་ཐར།
ཨབདནམཎིཀརྠཀནཱམགུརུབྷཊྚརཀོཏྟམཤཱིལཤཱསནསྱསཱུརྻྻཤྲཱིབྷདྲོབིཧརཏིསྨཿ
རྗེ་བཙུན་བླ་མ་དམ་པ་ཚུལ་ཁྲིམས་བསྟན་པའི་ཉི་མ་དཔལ་བཟང་པོའི་རྣམ་པར་ཐར་པ་ནོར་བུའི་དོ་ཤལ་ཞེས་བྱ་བ་བཞུགས་སོ། །
ནམོགུརུབུདྡྷབོདྷིསཏྭསརབྷྱ།
བླ་མ་དང་སངས་རྒྱས་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །
སརྦལོཀསུཁསུཁིཿ ཀཱརཀུརུམཾ། །
འཇིག་རྟེན་ཀུན་ཏུ་བདེ་སྐྱིད་འབྱུང་བར་མཛད་དུ་གསོལ།
བུདྡྷསྤཱུརྞྈྐོཤོཏྲྀཏེགམེརུཿ
སྤངས་རྟོགས་སྤོ་མཐོའི་ལྷུན་པོ་རྫོགས་སངས་རྒྱས། །
སདྡྷརྨྨསྱཱབིཏྶཱུརྻྻནཱཤཡཱནྡྷཿ
མ་རིག་མུན་སེལ་ཉི་མ་དམ་པའི་ཆོས། །
སངྒྷོརཏྣཀཱརསྟབིངྱམུཀྟིཿ
རིག་གྲོལ་རིན་ཆེན་འབྱུང་གནས་དགེ་འདུན་ཏེ། །
བོདྷྱནྟཾཀཱརུཎྚིྲཤྴརཱཎཔཱཏུཾ། །
སྐྱབས་གསུམ་ཐུགས་རྗེས་བྱང་ཆུབ་བར་དུ་སྐྱོངས། །
རྒྱལ་བའི་ཆོས་ཚུ༷ལ་ཡོངས་ལ་མངའ་འབྱོར་ཅིང༌། །ཁྲི༷མས་ལྡན་དགེ་འདུན་འདུས་པའི་གཙུག་གི་རྒྱན། །ལུང་རྟོགས་བསྟ༷ན་པ༷འི་པད་ཚལ་རྒྱས་མཛད་པ། །སྨྲ་བའི་ཉི༷་མ༷་ལུས་ཅན་གཙུག་ན་རྒྱལ། །ཡོན་ཏན་སྒྲོལ་བའི་དབྱིངས་ཀྱི་ས་བོན་སྙིང་རྗེའི་རླན་གྱིས་བསྒོས་པ་ལས། །རིན་ཆེན་སེམས་ཀྱི་སྡོང་བུ་དར་དྲགས་ཚོགས་གཉིས་ཡལ་གའི་ཁྱོན་ཡངས་ཤིང༌། །ཕྱིན་དྲུག་བསྡུ་བཞིའི་མེ་ཏོག་རྣམ་བཀྲ་བདེ་ཆེན་སྐུ་བཞིའི་འབྲས་བུ་སྨིན། །ལྷུན་གྲུབ་འཕྲིན་ལས་གྲིབ་བསིལ་སྣུམ་པོས་འགྲོ་ལ་ཕན་བདེ་ཅི་ཡང་སྩོལ། །ཟླ་ཤེལ་གཅིག་ལས་ཡངས་པའི་འཇིག་རྟེན་དུ། །རང་འདྲ་རྒྱ་མཚོའི་རྡུལ་སྙེད་འཆར་བ་བཞིན། །མི་བཟད་རྒྱན་གྱི་འཁོར་ལོའི་གསང་གསུམ་གྱི། །རོལ་པ་ཡིད་ཀྱི་རྭ་བ་ལས་འདས་ཀྱང་། །དུས་མཐར་ཐུན་མོང་གདུལ་བྱའི་མོས་ངོ་དང་། །འཚམ་པར་བསྟན་པ་སྐྱེ་བའི་ཟློས་གར་ལ། །ཚུལ་གནས་ཐོས་བསམ་སྒོམ་པའི་རིམ་པ་ཡིས། །དོན་གཉིས་ལྷུན་གྱིས་གྲུབ་པའི་རྟོགས་པ་ནི། །སྡོམ་གསུམ་ཚུ༷ལ་ཁྲི༷མས་རྨང་གཞི་རབ་བརྟན་ལྷག་བསམ་ཤེལ་གྱི་རྭ་བས་བསྐོར། །མདོ་སྔགས་བསྟ༷ན་པ༷འི་གཞལ་མེད་ཁང་ཆེན་བཤད་སྒྲུབ་ཀ་བ་འབུམ་ལྡན་ཞིང༌། །འཕྲིན་ལས་ཉི༷་མ༷་སྟོང་གི་གཟི་འབར་གསེར་གྱི་རྒྱ་ཕིབས་མངོན་མཐོ་བ། །སྐལ་བཟང་ལྷ་བརྒྱའི་བསྟི་གནས་དེ་འདིར་དགའ་དད་སྤྲོ་བའི་འཇུག་ངོགས་ཡིན། །མཁའ་དང་འཛིན་མའི་དཀྱིལ་འཁོར་
དབྱར་གྱི་ལང་ཚོས་བསྟེན་པ་ན། །ཡིད་འོང་མདོངས་མཐའི་རྒྱལ་མོ་འཇོ་སྒེག་ཉམས་ཀྱིས་རོལ་པ་བཞིན། །རྒྱལ་བསྟན་འཛིན་སྐྱོང་སྤེལ་བའི་ཡོན་ཏན་ལྷུན་གྱིས་རྫོགས་མཐོང་ཚེ། །མཛངས་ཤིང་དེས་པ་རྣམས་ནི་བསྟོད་བཀུར་བསྔགས་ལ་སྤྲོ་བ་འཛིན། །ལྕེ་རྐན་གཙུབ་ཤིང་བརྡར་བའི་མོད་ཉིད་ལ། །ཆགས་སྡང་དུ་བ་འཐུལ་བའི་གཤིས་མིན་པར། །དམ་པའི་ཡོན་ཏན་ཟླ་ཤེལ་དང་འགྲོགས་པས། །ལེགས་བྱས་བདུད་རྩིའི་རྒྱུན་འབེབས་ཆུ་ཤེལ་དངོས། །མཁས་བཙུན་བཟང་པོའི་རྣམ་ཐ༷ར་ཐ༷ར་འདོད་བུང་བའི་ཉེར་འཚོ་མཆོག །ཕྱོགས་ལྷུང་སྐྱོན་གྱི་ཚེར་མ༷་མ༷་འདྲེས་ཉེ་བར་ཞི་བའི་གཏམ། །སྙན་ཚིག་འདབ་འཕྲེང་སྡེབ་ལེ༷གས་ལེ༷གས་བཤད་པདྨའི་དགའ་ཚལ་འདིར། །གཟུ་བོར་གནས་པའི་མཁས་ཀུ༷ན་ཀུ༷ན་དགའི་གར་གྱིས་རྩེན་པར་བྱོས། །དེའང་སྒོ་གསུམ་བག་ཡོད་པའི་བརྟུལ་ཞུགས་ལ་གནས་པས་ཉེས་ལྟུང་གི་དྲི་མ་རིང་དུ་སྤངས་ཏེ་ཚུལ་ཁྲིམས་རྣམ་པར་དག་པའི་བདུད་རྩིས་ཐུགས་རྒྱུད་ཡོངས་སུ་གཏམས་པའི་གནས་བརྟན་འདུལ་བ་འཛིན་པ། རྟག་སྦྱོར་གུས་སྦྱོར་གྱི་བརྩོན་པ་དང་སྐྱེས་ཐོབ་སྦྱངས་ཐོབ་ཀྱི་ཤེས་རབ་ཟུང་དུ་འཇུག་པའི་གྲུ་གཟིངས་ཀྱིས་མདོ་སྔགས་རིག་གནས་རྒྱ་མཚོའི་ཕ་རོལ་ཏུ་སོན་པའི་སྨྲ་བའི་ཁྱུ་མཆོག །བདག་པས་གཞན་གཅེས་པའི་བྱང་ཆུབ་ཀྱི་སེམས་རིན་པོ་ཆེའི་གོ་ཆ་བགོས་ཏེ་ཚུལ་ཁྲིམས་གསུམ་གྱིས་བསྡུས་པའི་
སྤྱོད་པ་བྱ་དཀའ་བ་མཐའ་དག་ལ་ཞུམ་པ་མེད་པར་སློབ་པའི་རྒྱལ་སྲས་དཔའ་བོ། དཀྱིལ་འཁོར་རྒྱ་མཚོའི་བསྙེན་སྒྲུབ་མཐར་སོན་ཅིང་མཚན་བཅས་མཚན་མེད་དང་རིམ་གཉིས་ཟབ་མོའི་རྟོགས་པ་ཀློང་དུ་གྱུར་པའི་རྣལ་འབྱོར་གྱི་དབང་ཕྱུག་དཔལ་ལྡན་བླ་མ་དམ་པ་ཚུལ་ཁྲིམས་བསྟན་པའི་ཉི་མ་དཔལ་བཟང་པོའི་རྣམ་པར་ཐར་པ་ཆེ་ལོང་ཙམ་ཞིག་བསྙད་པར་བྱ་བ་ནི། སྐུ་ཚེ་སྔ་མར་གྲུབ་པའི་འཁོར་ལོས་སྒྱུར་བ་ཆེན་པོ་སྤྱོད་འཆང་དབང་པོའམ་ནག་པོ་པ་ཞེས་མགོན་པོ་མངོན་འབྱུང་གི་རྒྱུད་ལས་གང་དུ་འཁྲུངས་པའི་ཡུལ་དང་མཛད་པ། བུ་ཆེན་བཟང་པོའི་ཞབས་དང་དགེ་ཚུལ་ཚེམས་བུ་པ་སོགས་འཇའ་ལུས་རྡོ་རྗེའི་སྐུ་བརྙེས་པའི་སློབ་མ་དྲུག་དང་བཅས་པ་ལུང་བསྟན་ཅིང༌། དུས་འཁོར་གྱི་རྒྱུད་ཕྱི་མ་འགྱུར་རྙིང་ལས་ཀྱང་མཚན་སྒྲ་གསལ་བར་ལུང་བསྟན་པ་དེ་ཉིད་དང༌། རྗེ་བླ་མའི་ཐུགས་སྲས་འཕྲིན་ལས་ནམ་མཁའ་དང་མཉམ་པ་བདུན་གྱི་ནང་ཚན་འཇམ་དབྱངས་ཆོས་ཀྱི་རྗེ་བཀྲ་ཤིས་དཔལ་ལྡན་པ་ཞེས་གཞུང་ཆེན་བརྒྱ་དང་སུམ་ཅུ་ཐུགས་ལ་བཟུང་སྟེ་བཤད་པ་གནང་ཞིང༌། དཔལ་ལྡན་འབྲས་སྤུངས་ཀྱི་ཆོས་སྡེ་ཆེན་པོ་ཕྱག་བཏབ་པས་དགེ་ལྡན་རིང་ལུགས་མི་ནུབ་པའི་རྒྱལ་མཚན་འཛུག་པར་མཛད་པ་དེ་ཉིད་སོགས་རྒྱ་བོད་གཉིས་ཀར་མཁས་པ་དང་གྲུབ་པའི་སྐྱེ་འཕྲེང་ནམ་མཁའི་ཉི་ཟླ་ལྟ་བུ་དུ་མ་རིམ་པར་བརྒྱུད་པའི་ཚུལ། རྗེ་བླ་མའི་སྙན་བརྒྱུད་མན་ངག་གི་བདག་པོ་བ་སོ་ཆོས་ཀྱི་རྒྱལ་མཚན་གྱི་སྐྱེ་མཐའ་རྟ་ཚག་རྗེ་དྲུང་ཡེ་ཤེས་བློ་བཟང་བསྟན་པའི་མགོན་པོས་མཛད་པའི་འཁྲུངས་རབས་སུ་གསལ་བ་དང༌། གཞན་ཡང་འཁྲུལ་བྲལ་ཡེ་ཤེས་ཀྱི་སྤྱན་
དང་ལྡན་པའི་ལྷ་བླ་མ་དུ་མའི་ལུང་གིས་ཟིན་པ་ལྟར་རོ། །འོ་ན་ཏཱ་ར་ནཱ་ཐ་ཡན་གྱི་སྐུ་འཕྲེང་གོང་མ་རྣམས་རྗེ་བཙུན་དམ་པའི་འཁྲུངས་རབས་སུའང་བཞུགས་པས་འདི་དང་མི་འབྲེལ་སྙམ་པ་ནི་བློ་གྲོས་དམན་ཞིང་མཐོང་རྒྱ་ཆུང་བའི་སྐྱོན་ཏེ། མཁན་ཆེན་ངག་དབང་གྲགས་པ་དང་ཞྭ་ལུ་བ་ལེགས་པ་རྒྱལ་མཚན་ལྟ་བུ་དམ་པ་སོ་སོའི་འཁྲུངས་རབས་ན་ཡོད་པ་ཤིན་ཏུ་མང་ཞིང་འཁྲུངས་རབས་ཆེ་བ་ཕལ་ཆེར་གྱི་ཕུགས་རིགས་གསུམ་མགོན་པོ་གང་རུང་ལ་ཐུག་ཅིང༌། རིགས་གསུམ་མགོན་པོ་ངོ་བོ་གཅིག་པར་བཀའ་གདམས་གླེགས་བམ་ལས་འབྱུང་བ་དང༌། ཁྱད་པར་དུ་ཐེག་པ་ཆེན་པོ་མདོ་སྡེ་རྒྱན་ལས། ཇི་ལྟར་ཉི་མའི་དཀྱིལ་འཁོར་གྱི། །འོད་ཟེར་དཔག་ཏུ་མེད་འདྲེས་ཤིང༌། །རྟག་ཏུ་བྱ་བ་གཅིག་ལ་འཇུག །འཇིག་རྟེན་ལ་ཡང་སྣང་བ་བྱེད། །དེ་བཞིན་ཟག་མེད་དབྱིངས་ན་ཡང༌། །སངས་རྒྱས་དཔག་ཏུ་མེད་འདྲེས་ཤིང༌། །མཛད་པ་གཅིག་ནི་མཛད་པ་ལ། །ཡེ་ཤེས་སྣང་བར་མཛད་པར་འདོད། །ཅེས་ཉི་མའི་ཆ་ཤས་ཀུན་གྱི་འོད་ཟེར་འདྲེས་ནས་འཇིག་རྟེན་སྣང་བར་བྱེད་པ་དང༌། ཡང༌། ཀླུང་དག་ས་ཡི་འོག་ཏུ་མ་སོང་བ། །ཞེས་པ་ནས། རྒྱ་མཚོར་སོང་བར་གྱུར་ན་ཐམས་ཅད་ཀྱང༌། །གནས་རྣམས་གཅིག་ཅིང་ཆུ་ཡང་ཆེ་ལ་གཅིག །བྱ་བ་གཅིག་ཅིང་ཆུ་ལ་གནས་པ་ཡི། །སྲོག་ཆགས་མང་བོའི་རྟག་ཏུ་ཉེར་སྤྱད་ཆེ། །སངས་རྒྱས་ཉིད་དུ་མ་ཞུགས་བརྟན་པ་རྣམས། །རྟེན་ཀྱང་ཐ་དད་བློ་གྲོས་ཐ་དད་ཅིང༌། །རྟོགས་ཆུང་རང་གི་བྱ་བ་ཐ་དད་ལ། །སེམས་ཅན་ཉུང་དོན་རྟག་ཏུ་ཉེར་སྤྱད་
འགྱུར། །སངས་རྒྱས་ཉིད་དུ་ཞུགས་ན་དེ་དག་ཀུན། །རྟེན་ཀྱང་གཅིག་ཅིང་རྟོགས་པ་ཆེ་ལ་གཅིག །མཛད་པ་གཅིག་ཏུ་འདྲེས་ཤིང་རྟག་པར་ཡང༌། །སེམས་ཅན་ཚོགས་ཆེའི་ཉེ་བར་སྤྱད་པ་ཆེ། །ཞེས་ཆུ་ཀླུང་མཐའ་དག་རྒྱ་མཚོར་འདྲེས་ན་རོ་གཅིག་ཏུ་འགྱུར་བ་བཞིན། སངས་རྒྱས་པ་ན་ངའོ་སྙམ་པས་ཕྱེ་བས་རྒྱུད་ཐ་དད་ཀྱི་རྣམ་གཞག་མེད་ལ། གདུལ་བྱའི་སྔོན་གྱི་འབྲེལ་བའི་དབང་གིས་ཐ་དད་སྣང་རྒྱུའང་ཡོད་པ་མི་འགལ་བས། དེ་ཉིད་ལས། ཟག་མེད་དབྱིངས་ན་སངས་རྒྱས་རྣམས། །མཁའ་ལྟར་ལུས་ནི་མེད་ཕྱིར་དང༌། །སྔོན་གྱི་ལུས་རྗེས་འབྲང་བའི་ཕྱིར། །གཅིག་མིན་མང་པོ་ཉིད་མ་ཡིན། །ཞེས་དང༌། རིགས་ཐ་དད་ཕྱིར་དོན་ཡོད་ཕྱིར། །རྫོགས་ཕྱིར་ཐོག་མ་མེད་པའི་ཕྱིར། །སངས་རྒྱས་གཅིག་མིན་དྲི་མེད་གནས། །ཐ་དད་མེད་ཕྱིར་མང་པོའང་མིན། །ཞེས་གསུངས་སོ། །འདི་ནི་མངོན་པ་ཀུན་བཏུས་ལས་བསམ་མི་ཁྱབ་བཞིར་གསུངས་པའི་ནང་ནས་ཀྱང༌། མི་མཉམ་པ་ནམ་མཁའ་དང་མཉམ་པའི་བསམ་མི་ཁྱབ་ཀྱི་མཐར་ཐུག་ཏུ་གསུངས་པས་བློར་ཤོང་དཀའང༌། དམ་པའི་གསུང་ལ་ཡིད་ཆེས་ཀྱི་དད་པ་བསྐྱེད་ན་ཕན་ཡོན་ཤིན་ཏུ་ཆེ་བ་ནི། འཆི་མེད་རྔ་སྒྲའི་གཟུངས་ལས། བསམ་མི་ཁྱབ་ལ་དད་བྱས་ན། །རྣམ་པར་སྨིན་པའང་བསམ་མི་ཁྱབ། །ཅེས་གསུངས་པ་ལྟར་རོ། །དེར་མ་ཟད་ས་དང་པོར་སྤྲུལ་བ་བརྒྱ་འགྱེད་པ་ནས་བཟུང་གོང་མ་གོང་མར་སྟོང་གསུམ་འབུམ་ཕྲག་དུ་མའི་རྡུལ་སྙེད་ཀྱི་སྤྲུལ་བ་སྟོན་པར་གསུངས་པ་རང་གིས་ཁས་ལེན་ཅིང༌། དེའི་སྒོ་ནས་བསྔགས་པ་བརྗོད་བཞིན་དུ་ཕྱོགས་གཉིས་ནས་སྤྲུལ་བ་གཉིས་
བྱུང་ན་འགལ་བར་རྩི་བ་ནི་རང་ཚིག་དངོས་སུ་འགལ་བ་ཡིན་པས། དོན་མེད་པའི་གནས་ལ་རྟོག་གེའི་རིགས་པ་འཚང་སྟེ་ལོག་རྟོག་གི་འཕྲེང་བ་མི་སྤེལ་བར། རང་རང་ལ་གང་འཚམ་དུ་བསྟན་ཅིང་གདམས་པའི་ངོ་སྐལ་དེ་ཉིད་བདག་གིར་བྱས་ཏེ་མོས་གུས་སྦྱངས་ན་སྨན་ཡོན་དུ་འགྱུར་རོ། །ཚོན་བརྒྱའི་མདངས་དང་འགྲོགས་པའི་དྭངས་ཤེལ་བཞིན། །མཐའ་ཡས་གདུལ་བྱའི་སྐལ་བའི་རྗེས་འགྲོ་བ། །གཅིག་མིན་གཞན་མིན་ཡེ་ཤེས་འབྱུང་ལྔའི་མདངས། །གཟུགས་སྐུའི་འཇའ་ཚོན་རི་མོ་ཅིར་ཡང་སྣང༌། །ལྷ་བུ་ཉི་མ་དངོས་སམ་གཞལ་ཡས་སུ། །རྩོད་པར་མི་ལྟོས་གྲགས་པའི་གདུང་སེལ་བཞིན། །རྟོག་གེའི་འཁྲུལ་པར་མི་འཕྱན་གང་འདུལ་གྱི། །བཀོད་པར་མོས་པས་སྨིན་ཅིང་གྲོལ་བ་འཐོབ། །དེའང་སྐུ་འཕྲེང་གོང་མ་དེ་དག་ལས་འགའ་ཞིག་ལ་རྣམ་ཐར་ལོ་རྒྱུས་རྒྱས་ཀྱང་ཆ་ཚང་བ་ཞིག་མ་རྙེད་པས་རེ་ཞིག་བཏང་སྙོམས་སུ་བཞག །གདན་ས་འདི་ཉིད་ཀྱི་དབང་དུ་བྱས་པའི་སྐུ་གོང་མ་རྗེ་མི་ཉག་བློ་གྲོས་དར་རྒྱས་དཔལ་བཟང་པོ་ནས་བརྩམས་ཏེ་གླེང་བ་ལ། རྗེ་གོང་མ་དེ་ཉིད་གང་དུ་འཁྲུངས་པའི་ཡུལ་ནི། རྗེ་ཙོང་ཁ་པ་ཆེན་པོ་སྐུ་བལྟམས་པའི་གནས་ཁྱད་པར་ཅན་དང་མི་རིང་བའི་སའི་ཆ་བུམ་པར་རྟེའུ་ཆུང་ཞེས་པར་རབ་བྱུང་བཅུ་གཅིག་པའི་ཤིང་ཡོས་ལ་ངོ་མཚར་བའི་ལྟས་དུ་མ་དང་བཅས་ཏེ་སྐུ་འཁྲུངས། དེ་ནས་རིང་པོ་མ་ལོན་པ་ན་སྔོན་གྱི་བག་ཆགས་ཡོངས་སུ་སད་པས་ཁྱིམ་གྱི་གནས་ནི་དུག་སྦྲུལ་གྱི་ཚང་ལྟ་བུར་གཟིགས་ཏེ། སྐུ་འབུམ་དུ་བྱོན་ནས་རྒྱུད་པ་བླ་མ་སྙེ་ཀྱཱ་དགེ་ལེགས་དཔལ་ལྡན་ལས་ཡོངས་རྫོགས་
དགེ་བསྙེན་གྱི་སྡོམ་པ་དང་རབ་བྱུང་གི་ཚུལ་ཁྲིམས་ཡང་དག་པར་བླངས་ནས་ཀློག་པ་དང་ཐོས་བསམ་སོགས་ལ་བརྩོན་པར་མཛད། རིང་པོར་མ་ལོན་པར་དབུས་གཙང་དག་པའི་ཞིང་དུ་ཕེབས་ནས་དཔལ་ལྡན་འབྲས་སྤུངས་བཀྲ་ཤིས་སྒོ་མང་གི་ཆོས་གྲྭར་ཞུགས་ཏེ་༸རྒྱལ་དབང་ཡབ་སྲས་སོགས་སྐྱེས་ཆེན་དམ་པ་དུ་མའི་ཞབས་ལ་བསྟེན། ཁྱད་པར་མཁས་གྲུབ་ཀུན་གྱི་གཙུག་རྒྱན་ཀུན་མཁྱེན་འཇམ་དབྱངས་བཞད་པའི་རྡོ་རྗེའི་ཞབས་ལ་གཏུགས་ནས་མདོ་སྔགས་ཀྱི་གདམས་པ་མཐའ་ཡས་པ་གསན། བཀའ་པོད་ཆེན་པོ་རྣམས་ལ་སྦྱངས་པ་མཐིལ་ཕྱིན་པ་མཛད། གསང་ཕུར་ཕེབས་ནས་བཀའ་བཅུའི་མིང་བཏགས་གནང༌། གསང་ཆེན་གདམས་པའི་གཏེར་མཛོད་བྲག་དཀར་སྔགས་རམས་པ་སོགས་དགེ་བའི་བཤེས་གཉེན་དུ་མ་བསྟེན་ནས་དབང་རྗེས་གནང་ཁྲིད་མན་ངག་སོགས་ཟབ་ཆོས་མང་དུ་གསན་པ་དང༌། ཇོ་ཤཱཀ་སོགས་ལ་མཆོད་འབུལ་ཕྱག་སྐོར། དབུས་གཙང་ཀུན་ཏུ་གནས་མཇལ་སོགས་དབུས་ཕེབས་ཀྱི་དགོངས་དོན་མཐའ་དག་ལྷུན་གྱིས་གྲུབ་ནས་སླར་མདོ་སྨད་དུ་ཕེབས། མཁས་བཙུན་བཟང་པོའི་སྙན་གྲགས་ཆེ་ཞིང་སྔོན་གྱི་ལས་འབྲེལ་གྱིས་བསྐུལ་ནསཀུན་གྱིས་བླ་མར་བཀུར་ཏེ། མཚོ་སྔོན་ཕྱོགས་ཀྱི་ཝང་པཻ་ལི་ཇ་སག་སོགས་བླ་དཔོན་ཕལ་ཆེར་སྦྱིན་བདག་ཏུ་གྱུར་པས་དེ་དག་ལ་འདོད་མོས་བཞིན་ཆོས་ཀྱི་ཆར་ཕབ། ཉིད་ཀྱི་སྐུ་གོང་མའི་འཁྲུངས་ཡུལ་ཁྲི་ག་གསེར་མོ་ལྗོངས་སུ་བསྟན་འགྲོའི་ཕན་བདེར་དམིགས་བོད་ཁ། སྐེ་བ་ཞེས་གྲགས་པའི་སར་དགོན་པ་དགའ་ལྡན་དར་རྒྱས་གླིང་དང༌། ཁྲི་ཀའི་མཁར་གྱི་ཐག་ཉེར་སྔོན་རྗེ་བཙུན་སྒྲོལ་བའི་
མགོན་པོའི་སྐུ་ཚེ་རྗེས་མར་སྔགས་ཆེན་འཕྲིན་ལས་འབུམ་དུ་སྐྱེ་བ་བཞེས་སྐབས་སྒྲུབ་པ་བྱེད་པའི་གནས་དེར་གསང་སྔགས་བདེ་ཆེན་ཆོས་འཕེལ་གླིང་དང་བཀྲ་ཤིས་ཆོས་གླིང་ཞེས་པའི་རི་ཁྲོད་གཉིས་བཏབ། ཧོར་ཀྱཱའི་གྲྭ་ཚང་བསམ་གཏན་རབ་རྒྱས་གླིང་ཞེས་པའང་འདེབས་པར་མཛད་དེ་བཤད་སྒྲུབ་རྣམ་པར་དག་པའི་དགེ་འདུན་གྱི་སྡེ་མང་དུ་བཙུགས། གསང་སྔགས་བདེ་ཆེན་ཆོས་འཕེལ་གླིང་དེར་ཡུན་རིང་པོའི་བར་དུ་སྒྲུབ་པ་ནན་ཏན་གནང༌། རྒྱ་བོད་ཧོར་སོག་གིས་མཚོན་ཕྱོགས་མཐའ་དག་ནས་ཡོང་བའི་དད་ལྡན་སེར་སྐྱ་དྲག་ཞན་མང་པོ་ལ་རང་རང་གི་སྐལ་བ་དང་འཚམ་པར་དམ་པའི་ཆོས་ཀྱི་བདུད་རྩིས་ཡིད་ཚིམ་པར་མཛད། དེ་ནས་སྐུ་འབུམ་ཆོས་སྡེ་ཆེན་པོར་ཕེབས་སྐབས་ལས་སྣེ་ཐུན་མོང་ནས་བསྟན་པ་སྤྱི་དང༌། ལྷག་པར་དགོན་པ་འདིའི་བཤད་སྒྲུབ་ཀྱི་བྱ་བ་འཕེལ་བ་ལ་བར་དུ་གཅོད་པའི་གེགས་སེལ་བའི་ཆེད་དུ་ཞབས་བརྟན་རིམ་གྲོ་ཞིག་སྒྲུབ་དགོས་ཚུལ་ཞུས་པ་བཞིན་རྒྱུད་གྲྭའི་འདུ་ཁང་གི་ཁྱམས་རར་རྗེ་ཉིད་སྒྲུབ་གྲོགས་དགེ་འདུན་གྱི་ཚོགས་དང་བཅས་པས་འཇིགས་བྱེད་ཀྱི་བསྙེན་པ་རྒྱུན་རིང་གནང་སྟེ་མཇུག་ཏུ་ཞི་བའི་སྦྱིན་སྲེག་མཛད་པས་དགེ་བའི་བཤེས་གཉེན་རྣམས་དང་མཇལ་བ་སེར་སྐྱ་མཐའ་དག་ལ་ངོ་མཚར་བའི་མཐོང་སྣང་མི་འདྲ་བ་སྣ་ཚོགས་བྱུང༌། དེ་དག་ལ་བརྟེན་ནས་སྐྱེ་བོ་ཀུན་ལྷག་པར་དད་དེ་འདི་ནི་ངེས་པར་མཁས་ཤིང་གྲུབ་པ་བརྙེས་པའི་རྣལ་འབྱོར་པ་ཆེན་པོ་ཞིག་གོ་ཞེས་ཕྱོགས་ཀུན་ཏུ་གྲགས། དེ་ནས་རྒྱུད་པའི་སེང་ཁྲིར་བཞུགས་ནས་སྔགས་ཀྱི་འཆད་ཉན་ལ་ཐུགས་ཁུར་ཆེ་བཞེས་མཛད། གྲྭ་པ་
ཆོས་འགྲིམ་པ་རྣམས་ལ་སྒོ་དུ་མ་ནས་ཆོས་ལ་སྦྱོར་བའི་རྟིང་བསྐུལ་དང་གང་དྲག་གནང༌། ལྷག་པར་རྒྱུད་གྲྭ་འདིར་སྔར་པཎ་ཆེན་ཐམས་ཅད་མཁྱེན་པའི་གཏོར་ཆོག་མཚོན་ཆ་འབར་བའི་འཁྲུལ་འཁོར་ལྟར་གྱི་ལྕགས་མཁར་ཟུར་བཅུ་དྲུག་པ་མ་གཏོགས་ལྕགས་མཁར་ཟུར་དགུ་བའི་ཕྱག་ལེན་མ་དར་བས། རྗེ་འདིས་ལྕགས་མཁར་ཟུར་དགུ་བའི་ཕྱག་ལེན་བཙུགས། སྔ་མ་འགའ་ཞིག་བུ་སྟོན་གྱི་གསུང་ཟིན་སོགས་ལ་བརྟེན་ནས་དྲུག་ཅུ་པ་བརྩེགས་པའི་སྔོ་ཚུལ་མི་འཐད་པར་སྨྲ་བ་བྱུང་ཡང༌། འདི་ནི་རྟོག་བདུན་གྱི་རྟོག་པ་གཉིས་པ། བཤད་རྒྱུད་རྟོག་གསུམ་གྱི་རྟོག་པ་དང་པོ་དང་གསུམ་པ་སོགས་འཕྲུལ་འཁོར་གྱི་རྣམ་བཞག་སྟོན་པའི་གཤེད་སྐོར་ཀུན་གྱི་དགོངས་པ་གཏོར་མ་ལ་བརྟེན་པའི་འཕྲུལ་འཁོར་ཡིན་ཞིང༌། ལྷག་པར་ཟུར་དགུ་པ་འདི་ནི་རྭ་ལོའི་གཏོར་ཆོག་ལས། དྲུག་ཅུ་རྩ་བཞི་བརྩིག་ཚུལ་ནི། །ཕྱི་ཡི་ཟུར་དགུ་ཉིས་བརྩེགས་དང༌། །ཞེས་སོགས་ཀྱིས་འཇིགས་བྱེད་དཔའ་བོ་གཅིག་པ་དང་ལས་གཤིན་སྦྲགས་སྒྲུབ་ལ་བརྟེན་པའི་ལྕགས་མཁར་ཟུར་དགུ་བའི་རྣམ་གཞག་གསུངས་པ་ཀུན་གཟིགས་ལྔ་པ་ཆེན་པོས་གཏོར་ཆོག་སྲིད་གསུམ་རྣམ་རྒྱལ་དུ་གསལ་བར་མཛད་པ་ཡིན་པས། སྔགས་འཆང་རྣམས་ཀྱིས་བསྟན་པ་སྲུང་པའི་ལག་ཆ་རྨད་དུ་བྱུང་བར་གཟིགས་ནས་བསྟན་པའི་ལྕགས་རི་ལྟ་བུར་བཙུགས་པ་ཡིན་ལ། གྲྭ་པ་རྣམས་སྔར་རྒྱུས་མེད་པའི་ཐིག་དང་བརྩིགས་ཚུལ་སོགས་སྦྱོར་དངོས་རྗེས་ཀྱི་ཕྱག་ལེན་ཆ་ཚང་བ་ཉིད་ནས་ཞིབ་ཁྲིད་མཛད། དེའི་ངག་འདོན་དང་ཀུན་སྤྱོད་སོགས་ཀྱི་རིམ་པ་ཡི་གེར་བཀོད་ནས་མཁར་ཐབས་གཉིས་པོ་ལོ་རེ་བཞིན་རེས་
མོས་ཀྱིས་སྒྲུབ་པའི་སྲོལ་བཙུགས་ནས་ཐུགས་བསྐྱེད་ཀྱི་དབང་གིས་ད་ལྟའི་བར་གོང་འཕེལ་དུ་གནས། དེ་ནས་རྒྱུད་ཁྲིའི་དགོངས་པ་ཞུས་ཏེ་སླར་ཡང་ཁྲི་ཀར་ཕེབས་ནས་ཐུགས་དམ་ལ་གཞོལ་བར་མཛད། སྐབས་ཤིག་ཏུ་སྦྱིན་བདག་ཅིག་གིས་གདན་དྲངས་པ་བཞིན་ཕེབས་པ་དང་ལམ་དུ་ཆིབས་པ་འདྲོག་སྟེ་ཆིབས་གོང་ནས་བསྐྱུར་བས། ཞབས་གྲས་པ་རྣམས་ལ་འདིར་ཁལ་ཕོག་སྟེ་རས་གུར་ཕུབ་ཅེས་གསུང༌། དེ་ནས་ཉིད་རས་གུར་དུ་བཞུགས་ཏེ་ཁྱོད་ཚོ་ཐག་རིང་ལ་སོང༌། ངས་བརྡ་མ་བྱས་པར་དུ་སྡོད་ཅིག་ཅེས་གསུང༌། ཡུན་རིང་ཙམ་སོང་བ་དང་ཞབས་གྲས་པ་རྣམས་ལ་བོས་ནས་མདུན་དུ་སོང་བས། སེམས་ཅན་ལ་གནོད་པ་བྱེད་མཁན་གྱི་མི་མ་ཡིན་མ་རུང་བ་གསུམ་འདུག་པས་བཟུང་བ་ཡིན་ཀྱང་གཉིས་ཤོར་སོང༌། གཅིག་འདིའོ་ཞེས་ཐེའུ་རང་རྐང་གཅིག་གི་གཟུགས་ཤིག་མདུན་ན་འདུག་པ་བསྟན་པས་ཞབས་གྲས་པ་རྣམས་ཀྱང་ཡ་མཚན་པར་གྱུར། རྗེ་ཉིད་ལ་ད་འདིས་ཅི་བྱེད་ཞུས་པས། བྱེད་རྒྱུ་གཞན་མེད་སྲུང་མའི་སྤྱན་གཟིགས་ལ་ཕུལ་གསུང་སྟེ། དེང་སང་ཡང་ཀུན་གྱིས་མངོན་སུམ་དུ་རེག་རྒྱུ་དང་མཐོང་རྒྱུ་ཡོད་དོ། །རབ་བྱུང་བཅུ་གསུམ་པའི་ས་སྦྲུལ་ལོར་རྒྱལ་བ་གཉིས་པའི་གདན་ས་སྐུ་འབུམ་ཆོས་སྡེ་ཆེན་པོའི་ཁྲི་ལ་བཞུགས་ཏེ་དགེ་འདུན་འདུས་པ་རྒྱ་མཚོར་ཟབ་ཅིང་རྒྱ་ཆེ་བའི་དམ་པའི་ཆོས་ཀྱི་ཆར་ཕབ། ལོ་དེར་སྐྱབས་མགོན་དམ་པ་ལྕང་སྐྱ་རོལ་པའི་རྡོ་རྗེ་རྒྱ་ནག་ནས་མདོ་སྨད་དུ་བྱོན་སྐབས་རྗེའི་གསེར་གདུང་སོགས་མཇལ་བཞེད་ཀྱིས་གདན་ས་སྐུ་འབུམ་ཆོས་སྡེ་འདིར་ཕེབས། གདན་ས་པ་དམ་པ་འདི་ཉིད་རྗེ་རོལ་པའི་རྡོ་རྗེའི་དྲུང་དུ་ཕྱག་དབང་ཞུ་བར་ཕེབས་
སྐབས། རྗེ་ལྕང་སྐྱ་རིན་པོ་ཆེ་ཐུགས་ཤིན་ཏུ་དགྱེས་པའི་སྒོ་ནས་མདོ་སྔགས་ཀྱི་དྲི་བ་མང་དུ་གནང་ཞིང༌། ཁྱད་པར་ཟབ་མོ་དབུ་མའི་ལྟ་བའི་སྐོར་ནས་དཀའ་གནས་ཀྱི་དྲི་བ་མང་དུ་མཛད་པས། ཞུ་ལན་ལུང་རིགས་ཀྱིས་མཐའ་ཆོད་པ་ཐོགས་མེད་དུ་ཕུལ་བས། ལྕང་སྐྱ་ཐམས་ཅད་མཁྱེན་པ་ཐུགས་གཏིང་ནས་ཚིམ་པས་ཕྱག་ཐལ་མོ་སྦྱར་ཏེ་བསྔགས་བརྗོད་མཛད། རྗེ་འདི་ལ་ཕྱག་ཆེན་གྱི་ཁྲིད་ཅིག་གནང་རྒྱུའི་སྙན་གསན་ཕུལ་ཡང༌། ལྕང་སྐྱ་རིན་པོ་ཆེའི་ཞབས་ཕྱི་ལ་རྒྱ་མིའི་དཔོན་པོ་ཆེ་དྲག་མང་པོ་ཡོང་ནས་སྐུ་ལ་བཅར་སྡོད་བྱས་ཡོད་པས་གདན་ས་འདིར་གནང་སྟབས་མ་འགྲིག་པར་བརྟེན། རྗེ་ལྕང་སྐྱ་རིན་པོ་ཆེ་དང་རྗེ་འདི་པ་གཉིས་ཞབས་གྲས་ཉུང་ངུར་བྱས་ནས་ཆོས་སྡེ་ཆེན་པོ་བྱ་ཁྱུང་དུ་ཕེབས་ཏེ་དེར་དགའ་ལྡན་ཕྱག་རྒྱ་ཆེན་པོའི་ཁྲིད་ལུང་རིགས་ཀྱི་ལམ་ནས་དྲངས་པའི་ལེགས་བཤད་ཀྱི་དགའ་སྟོན་གཞན་ལས་ཁྱད་དུ་འཕགས་པའི་གསུང་བཤད་ཤིན་ཏུ་རྒྱས་པར་ཕུལ་ཅིང༌། ལྷག་པར་ལྟ་བའི་སྐོར་ལ་བོད་ཀྱི་ལྟ་སྒོམ་མི་འདྲ་བ་སོ་སོ་དང༌། དེ་ལས་རྗེ་བླ་མའི་རང་ལུགས་འདི་ཁྱད་པར་འཕགས་ཚུལ་སོགས་མ་འདྲེས་པར་ཕྱེ་སྟེ་ཞིབ་ཏུ་བཀྲོལ་བས་རྗེ་ལྕང་སྐྱ་རིན་པོ་ཆེའི་ཐུགས་ཤིན་ཏུ་འཕྲོག་སྟེ་རྗེ་འདི་ལ་གུས་པ་ཆེར་མཛད་ཅིང་བསྔགས་བརྗོད་ཡང་ཡང་གནང་བའི་སྟོབས་ཀྱིས་མཁས་པའི་གྲགས་པ་མཐའ་དབུས་ཀྱི་ཕྱོགས་ཀུན་ཏུ་ཁྱབ་པར་གྱུར། དེའི་སྐབས་སུ་གདན་ས་འདིར་བཞུགས་ཀྱི་དགེ་བའི་བཤེས་གཉེན་སུམ་ཅུ་ལྷག་གིས་ཀྱང་བཀའ་ཆོས་མང་དུ་ཞུས་ཤིང་མདོ་སྔགས་ཀྱི་དཀའ་གནས་ལས་བརྩམས་ཏེ་དྲི་བ་མང་དུ་ཞུས་པར་བཀའ་ལན་ཐོགས་
མེད་དུ་གནང༌། རྗེ་ལྕང་སྐྱ་རིན་པོ་ཆེ་འདི་ག་ནས་ཕེབས་ཁར་ཉིད་ལ་རྗེ་ཙོང་ཁ་པའི་འཁྲུངས་གནས་ཁྱད་པར་ཅན་འདིར་རྗེ་ཉིད་དང་དགེ་བའི་བཤེས་གཉེན་དམ་པ་འདི་རྣམས་དང་ལྷན་རྒྱས་སུ་འདུག་འདོད་ཆེའང༌། གོང་མའི་བཀའ་བཞིན་འཕྲལ་དུ་བསྐྱོད་དགོས་པར། སླར་མཇལ་ནས་ཆོས་ཀྱི་དགའ་སྟོན་མྱོང་བའི་འདུན་པ་བྱེད་ཅེས་ཐུགས་འཕྲེང་བའི་རྣམ་པ་མཛད། ལྕགས་རྟའི་ལོ་རྒྱ་ཡག་མཁན་པོ་ཨེར་ཏི་ནི་ཆ་གན་ཧུ་ཐོག་ཐུས་རྗེ་རིན་པོ་ཆེའི་གསེར་སྐུ་ཆེ་བ་ཞིག་གདན་དྲངས་ཏེ་ཚོགས་ཆེན་གྱི་འདུ་ཁང་ཆེན་མོར་བཞུགས་བཅུག་ནས་རྗེ་འདི་པས་རབ་གནས་མཛད་པས་ལེགས་ཚོགས་རྟེན་འབྲེལ་ཆེ་བ་བྱུང༌། དགེ་བའི་བཤེས་གཉེན་མང་པོ་དང་དོན་གཉེར་བ་རྣམས་ལ་བདེ་གསང་འཇིགས་གསུམ། སྤྱན་རས་གཟིགས། ཚེ་དཔག་མེད་སོགས་ཀྱི་དབང་དང༌། སྣར་ཐང་བརྒྱ་རྩའི་རྗེས་གནང༌། ལམ་རིམ་དང་སྔགས་རིམ་ཆེན་མོ། པཎ་ཆེན་གསུང་འབུམ། ལྕང་སྐྱ་རིན་པོ་ཆེའི་གསུང་འབུམ་སོགས་ཀྱི་ལུང་བཅས་ཟབ་པ་དང་རྒྱ་ཆེ་བའི་མདོ་སྔགས་ཀྱི་ཆོས་མང་དུ་སྩལ་ནས་ཀུན་གྱི་ཡིད་ཚིམ་པར་བྱས། དེའི་སྐབས་སུ་གཟུར་གནས་བུ་སློབ་རྣམས་ཀྱིས་མི་ཉག་རྡོ་རྗེ་འཆང་ཞེས་བསྔགས་བརྗོད་ཀྱི་རོལ་མོ་འཁྲོལ་བ་ལ་བརྟེན་ནས་ཕྱོགས་ཀུན་ཏུའང་རྗེ་འདིའི་མཚན་ལ་མི་ཉག་རྡོ་རྗེ་འཆང་ཞེས་གྲགས་པ་བྱུང༌། སྐྱེས་རབས་སོ་བཞི་བའི་སྟོད་ཆ་ལ་འགྲེལ་པ་ཞིག་མཛད་པའང་ཚིག་དོན་གྱི་ཆ་མཐའ་དག་ནས་མཁས་པ་ཀུན་གྱི་ཡིད་འཕྲོག་པས་བསྔགས་བརྗོད་ཀྱི་གནས་སུ་གྱུར། ས་སྦྲུལ་ནས་བཟུང་
ཆུ་སྤྲེལ་གྱི་ལོའི་བར་དུ་སྨོན་ལམ་གསུང་ཆོས་སྐབས་སྔ་དྲོའི་ཆ་ལ་སངས་རྒྱས་ཀྱི་སྐྱེས་རབས་དང་ལམ་རིམ་གཉིས་རེས་མོས་ཀྱིས་འཆད་པ་དང༌། ཕྱི་དྲོའི་ཆར་སྨོན་ལམ་ལ་ཆག་མེད་དུ་ཕེབས་ཏེ་བསྟན་པ་རྒྱས་པའི་ཐུགས་སྨོན་ནན་ཏན་མཛད། སྨོན་ལམ་དུས་དེར་ཕྱོགས་ཀུན་ནས་འདུས་པའི་དད་ལྡན་སེར་སྐྱ་ཆེ་ཕྲ་རྣམས་ལའང་སོ་སོའི་འདོད་པ་བཞིན་ཕྱག་དབང་དང་དབང་ལུང་རྗེས་གནང་སོགས་ལྷུག་པར་སྩལ། རྒྱུན་དུ་གདན་ས་འདི་གའི་འཆད་ཉན་ལ་གཟིགས་རྟོག་སྟར་ཆགས་སུ་མཛད་དེ། ཆོས་ཐོག་སྐབས་བརྩི་བཞག་རྒྱུན་པར་སྩལ་ཅིང༌། ཚིག་རྒྱུགས་དང་དོན་རྒྱུགས་རེས་མོས་ཀྱིས་བཞེས། གྲྭ་པ་ཆོས་འགྲིམ་པ་རྣམས་ལ་གཟེངས་བསྟོད་གསོལ་རས་སོགས་བདག་རྐྱེན་གནང་བ་དང༌། གཞན་རྣམས་ལའང་ཆགས་ཞེན་དུ་མ་སོང་བའི་འདི་དང་ཕྱི་མའི་དགོས་དོན་གཙོར་འདོན་གྱི་རྟིང་བསྐུལ་གནང་བས་མཁས་བླུན་ཀུན་ཡི་རང་བར་གྱུར་ཏེ་ཉིན་མཚན་ཁོར་ཡུག་ཏུ་ཐོས་བསམ་ཆིག་དྲིལ་དུ་མཛད་ཅིང༌། ལྷག་པར་ཆོས་གྲྭ་པ་རྣམས་ཀྱིས་རྗེ་འདི་པའི་གསུང་དང་དུ་བླངས་ཏེ། རྒྱལ་བ་གཉིས་པའི་གསུང་སོགས་ཡིག་ཆ་ཁུངས་ཐུབ་རྣམས་ཚད་མར་བཟུང་ནས་རྩོད་པའི་དུས་སུ་ཚིག་འཁྲི་ཙམ་མིན་པར། རྒྱལ་བའི་དགོངས་པ་ཕྱིན་ཅི་མ་ལོག་པ་རང་གི་རྒྱུད་སྟེང་དུ་གོ་རྒྱུ་ཞིག་བྱུང་ན་སྙམ་པའི་བསམ་པ་འབའ་ཞིག་གིས་སློབ་གཉེར་ལ་བརྩོན་པ་དང༌། ང་རྒྱལ་དང་ཕྲག་དོག་སོགས་ཡེ་མི་བྱེད་པར་གཞན་ཡོན་ཏན་ཅན་ལ་ཤིན་ཏུ་གུས་པས་ཡ་རབས་ཀྱི་ངང་ཚུལ་ལ་གནས་པ་ཤ་སྟག་བྱུང༌། རྒྱུན་རིང་བསྟེན་ནས་ཞལ་སློབ་ཏུ་གྱུར་པར་མ་ཟད་རྗེ་འདིའི་
ཞལ་མཐོང་ནས་ཆོས་ཚིགས་སུ་བཅད་པ་བཞི་ཙམ་ཉན་པས་ཀྱང་ཤེས་རྒྱུད་ཇེ་འཇམ་དུ་འགྲོ་ཞིང་གཞན་ལ་གུས་པ་དང༌། རྟག་ཏུ་བག་ཡོད་ལ་གནས་པ་བྱུང་ཚུལ་ཀུན་ལ་མཐུན་པར་གྲགས། སྤྲེལ་ལོར་ཁྲིའི་དགོངས་པ་ཞུས་ནས་རྗེ་ཆུ་བཟང་རིན་པོ་ཆེ་ངག་དབང་ཐུབ་བསྟན་དབང་ཕྱུག་གདན་ས་འདིའི་ཁྲིར་བསྐོ་བཞག་མཛད། དེ་ནས་སྐུ་བསྙུན་བཞེས་པའི་ཚུལ་གནང་སྐབས། ཕྱག་གཉེར་སོགས་ཀྱིས་ཞབས་བརྟན་ཕོན་ཆེར་བསྒྲུབས། གདན་ས་འདིའི་རྒྱུད་སྨན་བླ་མ་གཉིས་དང་ཚོགས་ཆེན་ཞལ་ངོས་གཙོས་པའི་ལས་སྣེའི་རིགས་དང་དགེ་བའི་བཤེས་གཉེན་རྣམས་ཀྱིས་གཞི་བཟུང་དགེ་འདུན་འདུས་ཚོགས་ཡོངས་ནས་ཞབས་བརྟན་ཕུལ་བར། བཀའ་ལན་དུ་ད་རེས་སྐྱོན་ཆེར་མི་འདུག་མོད། འོན་ཀྱང་ལོ་ཧ་ཅང་རྒས་པས་ངེས་པ་ཅི་མཆིས། དེ་བས་བདག་གི་ཆོས་ལྡན་གྱི་བགྱི་བ་རྣམས་བསམ་པ་བཞིན་འགྲུབ་པའི་སྐྱབས་འཇུག་དགེ་འདུན་འདུས་ཚོགས་ཡོངས་ནས་ཐུགས་བརྩེ་བས་གཟིགས་པ་མཁྱེན་མཁྱེན་མཁྱེན་ཞེས་ཞུ་བ་མཛད། འཕྲལ་དུ་སྐུའི་ཁམས་དྭངས་ཤིང་ཁྲི་ཀའི་ཕྱོགས་སུ་ཆིབས་བསྒྱུར་གནང༌། ཕེབས་ཁའི་ཚེ་རྗེ་ཉིད་ཀྱི་ཐུགས་སྲས་འགའ་ཞིག་དང་རིག་པའི་གནས་ལ་མཁས་པའི་པཎྚི་ཏ་ཆེན་པོ་ཆེ་ཤོས་ལྷ་བཟོ་བས་གཙོས་དགེ་བའི་བཤེས་གཉེན་མང་པོར་ཆོས་སྲིད་ཀྱི་བསླབ་སྟོན་སྩལ་ཅིང༌། ཁྱད་པར་ཁྱོད་ཚོས་རང་རང་གི་བློ་ནུས་དང་མཐུན་པར་རྒྱལ་བསྟན་ཡོངས་རྫོགས་ལ་བག་ཆགས་ཅི་ཐེབས་ཀྱི་དགེ་སྦྱོར་ལ་རེམ་རེམ་གྱིས། ད་ཕྱིས་སུ་ངེད་རང་རྣམས་ཡང་བསྐྱར་ཐུག་མི་ཐུབ་པ་འདྲ་ཞེས་གསུང༌།
དེ་ལྟར་མདོ་སྨད་དང་མཚོ་སྔོན་ཕྱོགས་ཀྱི་དཔོན་འབངས་ཆེ་ཕྲ་ཕལ་ཆེར་དང༌། རྨ་ཆུའི་འགྲམ་གྱི་རྒྱ་བོད་མ་ལུས་པ་སྦྱིན་བདག་ཏུ་གྱུར་ཅིང༌། དེ་དག་ལ་ཐུགས་བརྩེ་བས་ཉེ་བར་དགོངས་ཏེ་མཐོང་ཐོས་དྲན་རེག་གི་འབྲེལ་བ་ཐོགས་པར་མཛད་ནས་སྐུ་དངོས་ཀྱི་གདུལ་བྱ་རྫོགས་པ་ན་ཁྲི་ཀའི་མཆོད་རྟེན་བླ་བྲང་དུ་དགུང་ལོ་བདུན་ཅུ་རྩ་དགུ་པ་ཆུ་བྱ་ལོའི་ཧོར་ཟླ་བརྒྱད་པའི་ཚེས་བརྒྱད་ཀྱི་ཉིན་མྱ་ངན་ལས་འདས་པའི་ཚུལ་བསྟན། ཐུགས་དམ་ལ་རྒྱུན་རིང་ཙམ་བཞུགས་ཤིང་ཐུགས་དམ་གྲོལ་རྟགས་སུ་ཤངས་བུག་གཡས་གཡོན་ནས་བྱང་སེམས་གཉིས་ཀྱི་རྒྱུན་བབས་པ་སོགས་རྒྱུད་སྡེ་ནས་བཤད་པ་ལྟར་གྱི་ངོ་མཚར་བའི་ལྟས་མང་དུ་བྱུང༌། ཞབས་གྲས་པ་རྣམས་ཀྱིས་གདན་ས་འདིས་མཚོན་ཕྱོགས་སོ་སོའི་དགེ་འདུན་གྱི་སྡེ་ལ་མཆོད་འབུལ་དང༌། ཉིད་ཀྱི་བླ་བྲང་དུའང་མཆོད་ཚོགས་རྒྱ་ཆེན་པོ་བསྟར་ཏེ་སྡེ་སྣོད་འཛིན་པ་དུ་མས་གཙོས་དགེ་འདུན་བརྒྱ་ཕྲག་གཉིས་ལྷག་གིས་བདེ་གསང་འཇིགས་གསུམ་སོགས་རྒྱུད་སྡེ་གོང་འོག་གི་བདག་འཇུག་བཞེས་པ་རྣམས་ལ་མང་འགྱེད་གྱ་ནོམ་པ་དང༌། དབུལ་ཕོངས་ལ་སྦྱིན་པ་སོགས་རྣམ་དཀར་གྱི་ཕུང་པོ་གང་རྒྱས་སྒྲུབ་པར་བྱས་སོ། །འཕྲིན་ལས་སྣང་བ་འབུམ་གྱི་རྩེ་དགའ་ཅན། །བློ༷་གྲོ༷ས་འོད་བརྒྱས་རྒྱ་མཚོའི་གོས་ཅན་འདིར། །བགྲང་ཡས་དགེ༷་འདུ༷ན་སྦྲང་རྩིའི་རྒྱལ་མཚ༷ན་ཚོགས། །སྐྱོང་བའི་ཉིན་བྱེད་རིམ་པར་ཤར་བ་ལས། །རྒྱ་ཆེན་མདོ་སྔགས་གཞུང་ལུགས་རྒྱ་མཚོའི་དོན། །རྣམ་པར་འབྱེད་པའི་བློ༷་གྲོ༷ས་རྣམ་བཀྲ་ཞིང༌། །རྒྱལ་ཀུན་ཐུགས་བཅུད་བློ་བཟང་རྒྱལ་བའི་བསྟན། །ད༷ར་ཞིང་རྒྱས་མཛད་འཕྲིན་ལས་དར་
ལ་བདས། །ཞེས་བྱ་བ་ནི། བར་སྐབས་ཀྱི་ཚིགས་སུ་བཅད་པའོ།། །།༈ དམ་པ་དེ་ཉིད་སླར་ཡང་ལྗོངས་འདིར་གདུལ་བྱ་རྣམས་ལ་ཐུགས་བརྩེ་བ་ཆེན་པོས་ཉེ་བར་དགོངས་ཏེ་ཡང་སྲིད་གསར་པའི་ཟློས་གར་མངོན་པར་བསྒྱུར་བ་ནི། འཇམ་མགོན་བསྟན་པའི་སྲོག་ཤིང་མཚུངས་ཟླ་མ་མཆིས་པ་དཀྱིལ་འཁོར་རྒྱ་མཚོའི་མངའ་བདག་དཔལ་ལྡན་བླ་མ་དམ་པ་ཚུལ་ཁྲིམས་བསྟན་པའི་ཉི་མ་དཔལ་བཟང་པོ་འདི་ཉིད་ཡིན་ལ། མགོན་པོ་འདི་ཉིད་འཁྲུངས་པའི་ཡུལ་ནི། འཇམ་མགོན་ཙོང་ཁ་པ་ཆེན་པོ་སྐུ་བལྟམས་པའི་གནས་ཁྱད་པར་ཅན་མཁས་གྲུབ་བྱེ་བའི་རོལ་མཚོ་ཆོས་སྡེ་ཆེན་པོ་སྐུ་འབུམ་བྱམས་པ་གླིང་གི་ནུབ་ཕྱོགས་ཧ་ཅང་མི་རིང་བའི་ཡུལ་མཚོ་སྔོན་གྱི་སའི་ཆར། དགེ་མཚན་དུ་མས་མངོན་པར་སྤྲས་ཤིང་ཕྱོགས་ཀུན་ནས་རི་དང་བྲག་སོགས་གུས་པའི་ཚུལ་གྱིས་མངོན་པར་འདུད་པའི་རྣམ་པ་ཅན་གྱི་དབུས་རི་ཆེན་པོ་ཨུ་མ་ཙོས་ཨོ་བོ་ཞེས་འབོད་པ། གཞི་བདག་དཀར་ཕྱོགས་སྐྱོང་བའི་ལྷ་མཐུ་རྩལ་ཅན་གནས་ཤིང༌། གཡས་གཡོན་ནས་མུ་ཏུ་ཟེར་བའི་ལུང་པ་གཉིས་ཀྱི་གཤར་ཆུ་རི་དེའི་མདུན་དུ་འདྲེས་ནས་ཡོན་ཆབ་ཀྱི་ཚུལ་དུ་འཁྱིལ་བ་སོགས་དཔལ་འབྱོར་འདུ་བའི་ས་དཔྱད་ཅན་གྱི་གནས་ཁྱད་པར་ཅན་ཞིག་ཡིན་པར་སྣང༌། གདུང་བརྒྱུད་ནི། བཛྲ་པཱ་ཎིའི་སྤྲུལ་བའི་རྒྱལ་པོ་ཞིག །ཅེས་སོགས་གཏེར་གཞུང་དུ་མ་དང༌། འཇམ་དཔལ་རྩ་རྒྱུད་ལས། ཡི་གེ་ཧ་མིང་སླར་ལོག་ནས། །ཀླ་ཀློའི་རྒྱལ་པོས་རབ་ཏུ་མཆོད། །ཡི་གེ་ཧ་བྱ་དགེ་དང་ལྡན། །ཞེས་གསུངས་ཏེ།
ཨོས་ལོད་རྣམས་ཀེ་ཀེན་ཧན་ཞེས་ཟེར་ལ། ཡོངས་གྲགས་ཀཽ་ཤི་ཧན་ཞེས་ཟེར་བའི་མཚན་སྒྲ་དང་རི་བོ་དགའ་ལྡན་པའི་སྦྱིན་བདག་གི་རྩ་བར་འགྱུར་བར་ལུང་བསྟན་ལ། རྒྱལ་བརྒྱུད་རྣམས་ཀྱང་ཆབ་སྲིད་ཡར་ལྡན་གྱི་རྟེན་འབྲེལ་མ་འཆུག་པའི་རིང་ལ་ཞྭ་སེར་གྱི་སྦྱིན་བདག་ཐུན་མོང་མ་ཡིན་པར་གྱུར་པའི་གདུང་བརྒྱུད་ཀྱི་དཔོན་ཁག་དུ་མ་མཆིས་པ་ལས། བསྟན་པའི་སྦྱིན་བདག་ས་སྐྱོང་མི་དབང་དམ་པ་ཝང་དཀོན་མཆོག་བཀྲ་ཤིས་ཀྱི་ཆབ་འོག་ཏུ་གཏོགས་པ་ཏ་ལེའི་ཧུང་ཐེ་ཇི་ཟེར་བའི་སྐྱེ་རྒྱུད་ཡིན་ཞིང༌། གསོ་རིག་རྒྱུད་བཞིའི་སྲོལ་འབྱེད་ཆེན་པོ་གཡུ་ཐོག་ཡོན་ཏན་མགོན་པོ་གཉིས་པ་དར་མོ་སྨན་རམས་པའང་གདུང་བརྒྱུད་འདི་ཉིད་ཡིན་པར་གྲགས་སོ། །རིགས་ཕུན་སུམ་ཚོགས་པ་ནི་རྣམ་སྨིན་གྱི་ཡོན་ཏན་བརྒྱད་ཀྱི་གཙོ་བོ་ཞིག་ཡིན་པས། མདོ་ལས། ཡ་རབས་རིགས་ལྡན་གུས་ཤིང་བག་ཡོད་སྤྱོད། །ངང་ཚུལ་བཟང་ལ་གཙང་ཞིང་དེས་པར་འགྱུར། །ཞེས་ཡོན་ཏན་དུ་མ་གསུངས་ཤིང༌། རྒྱན་ལས་ཀྱང༌། རིགས་དང་རུས་དང་ཆོ་འབྲང་དང༌། །ཞེས་སའི་ཡོངས་སྦྱོང་གི་སྐབས་སུ་གསུངས་སོ། །སྨན་མདོ་བརྒྱད་བརྒྱ་པར། རྒྱལ་རིགས་ཤིང་སཱ་ལ་ཆེན་པོ་ལྟ་བུའི་ཁྱིམ་དག་ཏུ་སྐྱེ་བར་འགྱུར། བྲམ་ཟེ་ཤིང་སཱ་ལ་ཆེན་པོ་ལྟ་བུའི་ཁྱིམ་བདག་ཏུ་སྐྱེ་བར་འགྱུར། ཁྱིམ་བདག་ཤིང་སཱ་ལ་ཆེན་པོ་ལྟ་བུའི་ཁྱིམ་དང༌། ནོར་དང༌། འབྲུ་དང༌། མཛོད་དང༌། བང་བ་མང་པོ་འབྱོར་བའི་ཁྱིམ་དུ་སྐྱེ་བར་འགྱུར། ཞེས་རིགས་བཟང་བའི་སྟེང་དུ་འབྱོར་པ་ཆེ་བ་ལ་བསྔགས་པ་ནི་སྦྱིན་པའི་རྒྱུ་དང་འབྲས་བུའི་དབང་དུ་བྱས་པ་ཡིན་ལ། པང་ནས་སྐྱེས་དང་ཉེ་རྒྱལ་
གྱི་བྱུང་བའི་ཐད་ཀྱི་འདུལ་བ་ལུང་ལས། ཧ་ཅང་ཕྱུག་པོའི་ཁྱིམ་དང་ནི། །དབུལ་པོའི་ཁྱིམ་དུ་མི་སྐྱེ་བར། །བར་མའི་ཁྱིམ་དུ་སྐྱེ་འགྱུར་ཞིང༌། །རྟག་ཏུ་རབ་བྱུང་མང་བར་ཤོག །ཅེས་བསྔགས་པ་རབ་ཏུ་འབྱུང་སླ་བ་དང་ཚུལ་ཁྲིམས་ཀྱི་དབང་དུ་བྱས་པ་ཡིན་ཞིང༌། འདི་ནི་གཉིས་པོ་གང་གི་དབང་དུ་བྱས་ཀྱང་ཆོག་པ་ཞིག་གོ །ཡབ་བསོད་ནམས་དར་རྒྱས་ཟེར་བ་རང་བཞིན་བཟང་བ། བླ་མ་མཆོག་གསུམ་ལ་དད་གུས་ཆེ་ཞིང་ཐ་ན་ལྷན་པ་སེར་པོ་ཡན་ཆད་ལ་སྐྱབས་ཀྱི་འདུ་ཤེས་འཛིན་པ། སྙིང་རྗེ་ཆེ་ཞིང་སྦྱིན་གཏོང་ལ་དགའ་བ། ཁ་ཏོན་དགེ་སྦྱོར་དང་ཕྱག་སྐོར་སོགས་དམ་པའི་ལྷ་ཆོས་སྒྲུབ་པ་ལ་གཞོལ་བ། འདོད་ཆུང་ཆོག་ཤེས་བསྟེན་ཅིང་དུས་རྟག་ཏུ་བག་དང་ལྡན་པ་ཞིག་གོ་ཞེས་ཀུན་ལ་གྲགས། ཡུམ་ནི་སྒྲོལ་མ་སྐྱིད་བྱ་བ་བུད་མེད་ཀྱི་རྟེན་ལ་གཡོ་སྒྱུ་མེད་ཅིང་དད་པ་དང་གཙང་སྦྲ་ཆེ་བ། སྒྲོལ་དཀར་ལྗང་མ་ཎི་སོགས་ཁ་ཏོན་ལ་རྒྱུན་དུ་འབད་ཅིང༌། ཉེ་རིང་མེད་པར་ཀུན་ལ་ཕན་ཅི་ཐོགས་བྱེད་པ་ཞིག་གོ་ཞེས་གླེང༌། ཡབ་ཡུམ་དེ་གཉིས་ལ་སྲས་སྲས་མོ་གསུམ་ཡོད་པའི་དང་པོ་ནི་ཅོ་ནེ་ཆོས་རྗེ་བློ་བཟང་ཉི་མའི་སྤྲུལ་སྐུ་དང༌། གཉིས་པ་ནི་རྗེ་འདི་ཉིད་ཡིན་ལ། དེའང་དམ་པ་འདི་ཉིད་ལྷུམས་སུ་ཞུགས་པ་ནས་ཇི་སྲིད་སྐུ་མ་བལྟམས་ཀྱི་བར་དུ་ཡུམ་གྱི་ལུས་ལྷག་པར་བདེ་ཞིང༌། ཤེས་རྒྱུད་སྔར་ལས་ཇེ་འཇམ་ཇེ་གསལ་དུ་འགྲོ་བ་དང༌། རྨི་ལམ་དང་ཉམས་སྣང་ཅི་རིགས་པར་འཇའ་ཚོན་ཤར་བ་སོགས་ངོ་མཚར་བ་མང་དུ་བྱུང༌། ལྷག་པར་ཡབ་ཀྱི་རྨི་ལམ་དུ་རྗེ་ཙོང་ཁ་པའི་གསེར་སྐུ་ཆེ་བ་ཞིག་ལ་རང་ཉིད་ཀྱིས་མཆོད་པ་ཕུལ་
ནས་ཕྱག་འཚལ་བ་དང༌། གཞན་དགེ་ཚུལ་སློང་མང་པོ་གྲལ་བསྒྲིགས་ནས་དུང་འབུད་ཅིང་མཆོད་པའི་ཡོ་བྱད་སྣ་ཚོགས་ཀྱིས་མཆོད་པ་བྱེད་པ་སོགས་རྨི་ལྟས་ཡ་མཚན་པ་སྣ་ཚོགས་བྱུང༌། རབ་བྱུང་བཅུ་གསུམ་པའི་བགྲང་བྱ་དགུ་པ་བདེ་མཆོག་སྟོད་འགྲེལ་ལྟར་ན་ན་ཚོད་ལྡན་དང༌། མཧཱ་ཙི་ནའི་ཡུལ་དུ་ཡི་ཧའི་ཞེས་གྲགས་ཤིང༌། སྤོར་ཐང་དང་བསྟུན་པ་ཤིང་མོ་ཕག་གི་ལོར་རྒྱལ་ཕུར་འཛོམ་ཞིང་འཕྲོད་སྦྱོར་ཕུན་སུམ་ཚོགས་པའི་ཉིན་ཞིག་ཉིན་བྱེད་དབང་པོ་ཤར་རིའི་རྩེར་མངོན་པར་འཕགས་པ་དང་དུས་མཚུངས་པར་གཞོན་ནུ་མདངས་གསལ་ཞིང༌། ཡན་ལག་དང་ཉིང་ལག་རྣམ་པར་འབྱེས་པ། སྐྱེ་བོ་ཀུན་གྱི་མིག་གི་བདུད་རྩི་ལྟ་བུ་ཞིག་ཡུམ་ལ་གནོད་པ་མེད་པར་མངོན་དུ་བལྟམས་སོ། །དེའང་སྐུ་འཁྲུངས་མ་ཐག་ནས་སྔོན་གྱི་བག་ཆགས་བཟང་པོའི་མཐུ་ཉེ་བར་སད་དེ་ངུ་བ་འཚེག་པ་སོགས་བྱིས་པའི་རྒུད་པ་རིང་དུ་སྤངས་ཏེ། སུ་མཐོང་ཡང་དགྱེས་པའི་རྣམ་འགྱུར་གྱིས་འཛུམ་པ་མཛད་པས་ཡུལ་མི་རྣམས་བུ་ཆུང་མཐོང་ན་དགའ་བ་ཨང་ཞེས་གླེང་བ་བྱུང༌། ཡབ་ཡུམ་གཉིས་ཀྱིས་ཀྱང་བབ་ལ་བརྟགས་ཏེ་གཞོན་ནུ་འདི་ཕལ་བ་ཞིག་མིན་ངེས་སྙམ་ནས་དུས་རྒྱུན་གཙང་སྦྲ་དང༌། རྣམ་འཇོམས་བྱབས་ཁྲུས་སོགས་བྱེད་དུ་བཅུག་སྟེ་བསྐྱེད་བསྲིངས། གསུང་ཕྱེ་མ་ཐག་མི་མི་ཞེས་ཟློས་པ་ཞིག་བྱུང་བ་སྐབས་དེར་དཔྱད་མ་ཤེས་ཀྱང༌། རྗེས་ནས་དཔྱོད་ལྡན་རྣམས་དེ་མི་ཉག་པ་ཡིན་གསུང་འདོད་པར་འདུག་ཅེས་ཟེར་བ་དོན་ལ་གནས་པར་མངོན། སྐབས་དེར་སྐུ་གོང་མའི་ཕྱག་གཉེར་མི་རྩ་སོགས་དང༌། མཚོ་སྔོན་ཤོག་གི་ས་སྐྱོང་དམ་པ་ཝང་དཀོན་
མཆོག་བཀྲ་ཤིས། པཻ་ཟི་ཚེ་རིང་རྣམ་རྒྱལ། ཇ་སག་སོགས་དཔོན་ཁག་མང་པོ་བཅས་ནས་དམ་པ་དེའི་ཡང་སྲིད་ལ་ཕྱོགས་ཀུན་ཏུ་ཨང་ཉན་བྱས་ཤིང་ཕལ་ཆེར་འདི་པ་ཨེ་ཡིན་སྙམ་པའི་དོགས་པ་ཡོད་ཐོག །ྋགོང་ས་རྒྱལ་བ་ཡབ་སྲས་དང་འབྲས་སྤུངས་གནས་ཆུང་སོགས་ལ་བརྟག་ཞུས་ཕུལ་བའི་བཀའ་ལན་ཕྱིར་འབྱོར་ཏེ་གུང་བསྒྲིགས་ནས་བལྟས་པས་ཐམས་ཅད་ལས་དགོངས་པ་གཅིག་གིས་འདི་པར་བབས། རྣམ་འཇོམས་བྱབས་ཁྲུས་དང་སྒྲོལ་མ་རྒྱུན་འདོན་སོགས་རིམ་གྲོ་མང་དུ་བབས་པའང་གནད་སྨིན་བསྒྲུབས་ཏེ། དགུང་ལོ་གསུམ་པའི་སྐབས་སུ་ཕྱག་གཉེར་དང་མི་རྩ་འབྲུག་རྩེ་སོགས་ཞབས་གྲས་པ་རྣམས་ཀྱིས་སྐུ་གོང་མའི་ཕྱག་ཏུ་རྒྱུན་པར་བསྣམས་པའི་འཕྲེང་བ་དང་དེ་དང་རིགས་འདྲའི་ཕྲེང་བ་ཁ་ཤས། ཕྱག་ཌར་དང་ཡང་དེ་མཚུངས་ཀྱིས་ཌཱ་མ་རུ་ཁ་ཤས་ཁྱེར་ནས་ངོས་འཛིན་ཞུས་པས་ཚམ་ཚོམ་མེད་པར་སྐུ་གོང་མའི་ཕྱག་ཕྲེང་ངོ་མ་དེ་ཕྱག་གིས་འཐེན་ནས་བླངས། ཕྱག་ཌར་ཡང་ངོ་ཐོག་གི་ལུང་བུ་འཐེན་ནས་ཏབ་ཏོབ་ཅེས་ཌཱ་མ་རུའི་སྐད་ཀྱི་རྣམ་པ་དང་འདོན་པ་མང་པོ་འདོན་ཚུལ་མཛད་པ་སོགས་ངོས་འཛིན་ཡང་འཁྲུལ་མེད་བྱུང་བས་གྲྭ་སློབ་སྦྱིན་བདག་ཐམས་ཅད་ཡིད་ཆེས་ལྷག་པར་སྐྱེས་ནས་རྗེ་གོང་མ་དེ་དང་དངོས་སུ་མཇལ་བ་ལྟ་བུའི་སྤྲོ་དགའ་ཚད་མེད་པ་རྙེད་དོ། །ཚུ༷ལ་བཟང་རྒྱལ་པོའི་ཁྲི༷མས་ཀྱིས་ནོན་པའི་ཡུལ། །ཞྭ་སེར་བསྟ༷ན་པ༷འི་སྦྱིན་བདག་གཙང་མའི་རིགས། །བསོད་ནམས་བདེ་སྐྱིད་དཔལ་འཛོམས་ཤར་རིའི་རྩེར། །
མཆོག་སྤྲུལ་ཉི༷་མ༷་གཞོན་ནུ་མངོན་པར་ཤར། །དམ་པའི་རང་བཞིན་པདྨོ་ཁ་འབུས་པས། །ངོ་མཚར་ལྟས་ཀྱི་དྲི་བཟང་འཐུལ་བ་ན། །དགེ་ལེགས་སྦྲང་རྩི་རེ་བའི་བྷྲ་མ་རཿ །རབ་དགའི་མུ་ཅོར་དྲི་ཟའི་དབྱངས་སུ་སྒྲོགས། །དེ་ཚེ་དཀར་ཕྱོགས་སྐྱོང་བའི་ལྷ་རྣམས་ཀྱང༌། །ནོར་འཛིན་དཔལ་མོའི་བཅུད་ཀྱིས་བལྟམས་སོ་ཞེས། །དགའ་བའི་འཕྲིན་ཡིག་སྤྲིངས་པ་འོག་མིན་ན། །སྲས་བཅས་རྒྱལ་བ་མཆོད་པའི་རོལ་མོར་གྱུར། །ཅེས་དགེ་ལྡན་བསྟན་པའི་རྩ་ལག །མཁས་ཤིང་གྲུབ་པའི་དབང་ཕྱུག་རྗེ་བཙུན་བླ་མ་དམ་པ་ཚུལ་ཁྲིམས་བསྟན་པའི་ཉི་མ་དཔལ་བཟང་པོའི་རྣམ་པར་ཐར་པ་ནོར་བུའི་དོ་ཤལ་ལས་སྐུ་བལྟམས་པའི་ཚུལ་གྱི་དྲ་བ་ཕྱེད་པ་སྟེ་དང་པོའོ།། །།དགུང་ལོ་དྲུག་པ་རྣམ་གནོན་ཞེས་པ་ལྕགས་འབྲུག་ལོའི་སྟོན་ག་གཟའ་སྐར་ལེགས་པའི་ཉིན་མཚོ་སྔོན་ཝང་དཀོན་མཆོག་བཀྲ་ཤིས། པཻ་ཟི་རྣམ་རྒྱལ་ཚེ་རིང༌། ཇ་སག །ཐུ་ས་ལཀྖི་སོགས་དཔོན་ཁག་མང་པོ་དང༌། གཞན་ཧོ་ཤོའུ་སོ་སོའི་སྦྱིན་བདག་རྣམས་དང༌། སྐུ་འབུམ་བྱམས་པ་གླིང་ནས་བླ་མ་ལས་སྣེའི་རིགས། ཚོ་དྲུག་གི་རྒན་པ། གཞན་གྲྭ་རྒན་རྣམས་དང་བཅས་པས་བསུ་སྐྱེལ་གྱི་བཀོད་པ་རྒྱ་ཆེན་པོ་དང་བཅས་ཏེ་སྐུ་འབུམ་ཆོས་སྡེ་ཆེན་པོའི་རང་སྒར་དུ་འཇིགས་བྲལ་གདོང་ལྔས་བཏེག་པའི་ཁྲི་འཕང་མཐོན་པོར་ཞབས་པད་མངོན་པར་བཀོད་ནས་བདེ་དགའི་དགའ་སྟོན་གསར་འཛུམ་གྱི་མགོ་ཚུགས་པར་མཛད། ཕེ་ཀྱཱ་ཤོག་གི་དགེ་བའི་བཤེས་གཉེན་ཆེན་པོ་བློ་གྲོས་མཆོག་ལྡན་དགེ་རྒན་དུ་བསྟེན་ཏེ་ཀ་ཁ་
དང་ཀློག་རྣམས་ཐོག་མར་སློབ་ཏུ་བཅུག་པས་རིང་པོར་མ་ཐོགས་པར་ཀློག་རབ་ཏུ་བྱང་བ་བྱུང༌། དེའི་ཞར་ལ་རྒྱུན་གྱི་སྤྱོད་ལམ། ན་བཟའ་མནབ་ཚུལ། བཞེས་པ་བཞེས་ལུགས། ཕེབས་ཚུལ་བཞུགས་ཚུལ་སོགས་ཆོས་དང་མཐུན་པའི་དང་བ་འདྲེན་པ་དགོས་ཚུལ་ཡང་ཡང་བསླབ་སྟེ་མ་མཛངས་ཀྱིས་བུ་སྐྱོང་བ་བཞིན་བྱས་པས་བཤེས་གཉེན་པ་དེ་བཀའ་དྲིན་ཤིན་ཏུ་ཆེ་ཞེས་རྗེ་ཉིད་ཀྱིས་ཡང་དང་ཡང་དུ་གསུངས་ཚུལ་སྐུ་འཁོར་རྣམས་གླེང་བ་ནི། དེང་དུས་སྐུ་སྐྱེས་ཀྱི་མིང་རེ་བཏགས་ཏེ། གཅེས་ཕྲུག་གོས་དར་གྱིས་བཏུམ་ཞིང་ཆུང་དུས་ནས་ལང་ཤོར་ལ་བཏང་བས་བསྟན་པའི་མིག་ལྟོས་བསླད་པ་རྣམས་འགོག་ཆེད་ཀྱི་དགོངས་གཞི་ཟབ་པར་སྣང༌། དགུང་ལོ་བདུན་པ་ཁྱུ་མཆོག་ཅེས་པ་ལྕགས་སྦྲུལ་ལོའི་ས་ག་ཟླ་བའི་ཡར་ངོའི་དུས་ཆེན་གསུམ་འཛོམ་གྱི་ཉིན་བརྟན་མཁས་ཀྱི་ཡོན་ཏན་གཉིས་དང་ལྡན་པའི་གནས་བརྟན་འདུལ་བ་འཛིན་པ་ཆེན་པོ་རྗེ་བཙུན་བླ་མ་བུམ་པར་ཚུལ་ཁྲིམས་རྒྱ་མཚོའི་དྲུང་ནས་རབ་བྱུང་དང་ཚིགས་སྔ་མ་དགེ་ཚུལ་གྱི་སྡོམ་པ་བཞེས་པས་མཚན་ལ་ཚུལ་ཁྲིམས་བསྟན་པའི་ཉི་མ་ཞེས་འདོགས་པར་མཛད། སྐུ་ཚེ་ཡུན་རིང་བརྟན་པའི་རྟེན་འབྲེལ་དུ་དགོངས་ཏེ་བཀའ་ཆོས་ཀྱི་ཐོག་མར་མ་ཅིག་གྲུབ་རྒྱལ་ལུགས་ཀྱི་ཚེ་དབང་དང་སྒྲོལ་དཀར་ཡིད་བཞིན་འཁོར་ལོའི་རྗེས་གནང་སོགས་བཀའ་དྲིན་དུ་སྩལ། དེ་ནས་བརྩམས་ཏེ་བཞི་བཅུས་བསྡུས་པའི་བསླབ་བྱའི་བསྲུང་མཚམས་རྣམས་ལེགས་པར་རྩད་བཅད་དེ་མིག་གི་འབྲས་བུ་བཞིན་དུ་བསྲུང་བར་མཛད་དོ། །འདུལ་འཛིན་ཆེན་པོ་ཚུ༷ལ་ཁྲི༷མས་རྒྱ་མཚོ་ཡིས། །རྣམ་དག་ཆོ་གས་
བསྟ༷ན་པ༷འི་སྒོར་བཅུག་སྟེ། །སྟོན་པ་ཉི༷་མ༷འི་གཉེན་གྱི་གདུང་འཚོབ་ཏུ། །དབང་བསྐུར་ཐར་པའི་རྒྱལ་མཚན་སྲིད་རྩེར་བསྒྲེངས། །ཚུ༷ལ་ཁྲི༷མས་དག་ཀྱང་རྒྱལ་བའི་བསྟ༷ན་པ་ལ། །ཐོས་དང་བསམ་པ༷འི་རྩོལ་བ་མ་བརྟན་ན། །སོམ་ཉི༷་རྨོངས་པའི་དྲི་མ༷་མི་སེལ་བས། །ཀློག་པ་ཐོས་བསམ་སྦྱོར་བ་ལ་ཞུགས་སོ། །དེ་ནས་ཆོས་སྤྱོད་ཀྱི་རིམ་པ། སྨོན་ལམ། གདུགས་ཤེར་སྒྲོལ་མ་སོགས་དང༌། མངོན་རྟོགས་རྒྱན། དབུ་མ་འཇུག་པ། སྤྱོད་འཇུག །གཏོར་མ་བརྒྱ་རྩ། ཀུན་རིག་གི་ཆོ་ག །འཇིགས་བྱེད་མངོན་རྟོགས་བསྐང་གསོ་སོགས་ཐུགས་འཛིན་གནང་སྟེ། དཔེ་འཛིན་སོགས་ཀྱི་ཞབས་བསྐུལ་གང་ཞུས་དང་དུ་བཞེས་པས་དགེ་རྒན་ཐུགས་མཉེས། རྒྱུན་གྱི་ཞལ་འདོན་གནང་ལུགས་ཀྱང་ཐོག་མར་ཕྱག་མཆོད་ཀྱི་རིམ་པ་དགའ་ལྡན་ལྷ་བརྒྱ་མ། རྒྱན་འཇུག །བསྟོད་སྤྲིན་རྒྱ་མཚོ། བླ་མཆོད། འཇིགས་བྱེད་ལྷ་བཅུ་གསུམ་མ། གསེར་ཞུན་མ། བརྒྱ་རྩ་སོགས་ཆག་མེད་ཀྱི་བཀོད་པ་མཛད་པ་བཞིན་ཉམས་སུ་བཞེས། དགུང་ལོ་དགུ་པ་ཉི་མ་ཞེས་པ་ལྕགས་ལུག་ལོར་འཇམ་མགོན་རྒྱལ་བ་གཉིས་པའི་གདན་ས་སྐུ་འབུམ་ཆོས་ཀྱི་སྡེ་ཆེན་པོར་མང་བསྐོལ་སོགས་ཀྱི་དགའ་སྟོན་དང་བཅས་པའི་སྒོ་ནས་ཆོས་གྲྭར་ཞུགས། བསྡུས་གྲྭའི་བརྩི་བཞག་ཐུགས་ལ་གཟུང་སྟེ་དགེ་རྒན་གྱི་དྲུང་ནས་དཔེ་ཁྲིད་ཀྱང་ཚུལ་བཞིན་གནང་ནས་བསླབ་སྦྱང་ལ་བརྩོན་པས་ཆོས་ཐོག་གཅིག་གཉིས་ཙམ་གྱི་རིང་ལ་བསྡུས་གྲྭའི་རྟགས་གསལ་ལེགས་པར་ཆགས། གྲྭ་ཚང་དགེ་བསྐོས་ནས་བསྡུས་གྲྭའི་ཚོགས་གླེང་ཕུལ་བ་བཞིན་ཚོགས་ཆེན་གྱི་དགེ་འདུན་འདུས་པ་རྒྱ་མཚོའི་དབུས་སུ་བགྲོ་གླེང་མཛད་པས། ཐལ་སྐད་དང་རྣམ་
འགྱུར། རྩོད་པའི་སྤོབས་པ། ལུང་རིགས་ཀྱི་ངར་སོགས་གཞན་ལས་ཆེས་ཁྱད་པར་དུ་འཕགས་པ་ཞིག་བྱུང་བས། དགེ་བཤེས་རྒན་གཞོན་དུ་མ་ནས་སྤྲུལ་སྐུ་འདི་པ་རྡོ་རྗེ་འཆང་གོང་མ་དེ་ཉིད་ཀྱི་སྐུ་ཡོན་མ་བརྗེད་པར་འདུག་ཅེས་གླེང་བ་བྱུང༌། ལོ་ཁ་ཤས་ཀྱི་རིང་བསྡུས་གཞུང་རྣམས་ལ་ཚུལ་བཞིན་དུ་སྦྱང་བ་མཐར་ཕྱིན་པར་མཛད། དེ་ནས་འཛིན་གྲྭ་གཞུང་དུ་ཕེབས་པ་ན་ཉ་ཀྱཱ་ཤོག་གི་དགེ་བའི་བཤེས་གཉེན་གཞུང་བརྒྱ་སྨྲ་བའི་དབང་པོ་རྒྱལ་མཚན་དཔལ་འབྱོར་ཡང་བསྐྱར་དགེ་རྒན་དུ་བསྟེན་ཏེ། རྗེ་འཇམ་དབྱངས་བཞད་པའི་བློ་རྟགས་དང༌། རྒྱས་པའི་བསྟན་བཅོས་ཚད་མ་རྣམ་འགྲེལ། དེའི་དགོངས་འགྲེལ་རྒྱལ་ཚབ་རྗེས་མཛད་པའི་རྣམ་བཤད་ཐར་ལམ་གསལ་བྱེད་རྣམས་ཐུགས་ལ་བཟུང་ཞིང༌། ཞར་བྱུང་དུ་དེའི་སྐོར་གྱི་གཞུང་འགྲེལ་སོགས་ལ་དཔེ་གཟིགས་དང་མཛུབ་ཁྲིད་ཀྱི་སྒོ་ནས་དཀའ་གནས་རྣམས་ལ་རིང་དུ་འདྲིས་པར་བྱས། མཁས་མང་འདུས་པའི་དབུས་སུ་རྩོད་པའི་བདར་ཤ་བཅད་ནས་མཐའ་ཆོད་པར་སྦྱངས་ཤིང༌། གཞུང་དེ་རྣམས་ཀྱི་ཚོགས་རྒྱུགས་ཀྱང་འབུལ་བར་མཛད། ཕར་ཕྱིན་གྱི་སྐབས་ཆོས་འབྱུང་གི་ཕར་ཕྱིན་སྐབས་དང་པོ་ཟུར་བཀོལ་བཅས་དང༌། རྗེ་འཇམ་དབྱངས་བཞད་པའི་ཕར་ཕྱིན་སྐབས་དང་པོ་ནས་བརྒྱད་པའི་བར་ཟུར་བཀོལ་གསུམ་དང་བཅས་ཆ་ཚང༌། ལེགས་བཤད་གསེར་འཕྲེང༌། དབུ་མའི་སྐབས་སེ་ར་རྗེ་བཙུན་ཆོས་ཀྱི་རྒྱལ་མཚན་གྱི་དབུ་མ་དང་རྣམ་བཤད་དགོངས་པ་རབ་གསལ། མཛོད་ལ་རྒྱལ་དབང་རིན་པོ་ཆེའི་མཛོད་སོགས་ཐུགས་ལ་གཟུང་སྟེ་གཤར་
སྦྱངས་ཐང་ལྷོད་མེད་པ་ཆུ་བོའི་རྒྱུན་བཞིན་གནང༌། དབྱར་དང་སྟོན་དུས་སྐབས་འགར་གཤར་སྦྱང་གིས་མཚན་ཕུད་པའང་ལན་མང་པོ་མཛད། པོ་ཏི་སོ་སོའི་རྩ་བ་དང་ཕྱོགས་གཏོགས་རྒྱ་བོད་ཀྱི་གཞུང་མཐའ་དག་དང་གུང་བསྒྲིགས་ནས་གཟིགས་རྟོག་མཛད་དེ་རྩོད་པའི་ཐོག་ཏུ་བློ་སྐྱེད་ཐོན་པ་བྱས། དགུང་ལོ་ཉི་ཤུ་བ་རྒྱལ་བ་ཞེས་པ་ཤིང་ཕོ་རྟའི་ལོར་ཐུབ་བསྟན་ཡོངས་རྫོགས་ཀྱི་མངའ་བདག་རྗེ་ངག་དབང་ཐུབ་བསྟན་དབང་ཕྱུག་དཔལ་བཟང་པོས་མཁན་སློབ་སྦྲགས་མ་མཛད། ཁ་སྐོང་གི་ཆོས་རྣམས་ཚང་བའི་དད་པའི་དགེ་འདུན་གྲངས་ཚང་བའི་དབུས་སུ་བསྟན་པའི་རྩ་བ་ཡོངས་སུ་རྫོགས་པའི་དགེ་སློང་གི་དངོས་པོ་ཡང་དག་པར་བཞེས་ཏེ། ཚུལ་ཁྲིམས་ཀྱི་ཕུང་པོ་མ་ཚང་བ་མེད་པའི་ཡིད་བཞིན་ནོར་བུས་ཐུགས་ཀྱི་བང་མཛོད་ཕྱུར་བུར་གཏམས། ལྟུང་བ་སྡེ་ལྔ་སོ་སོའི་བསྲུང་མཚམས་ཟིན་པར་བྱས་ཏེ་འདུལ་བའི་ཕྱག་ལེན་གྱི་ཆ་ཕྲ་མོ་རྣམས་ཀྱང་ཉམས་བཞེས་སུ་ཐེབས་པར་གནང༌། བརྒྱ་ལ་རྐྱེན་དབང་གིས་ཉེས་པ་ཕྲ་མོ་རེའི་དོགས་པ་བྱུང་ཚེ་འཕྲལ་དུ་ཕྱིར་བཅོས་སོགས་ཀྱིས་སྦྱོང་བར་མཛད། འཚོ་བའི་ཡོ་བྱད། ལྷག་པའི་ཡོ་བྱད། མཁོ་བའི་ཡོ་བྱད་རྣམས་སོ་སོར་བྱིན་གྱིས་རློབས་པ་དང་རྣམ་བརྟག་བྱས་ཏེ་འཆང་ལུགས་ཟས་ལ་བྱིན་ལེན་བྱ་ཚུལ། རུང་ཆུ་འདེབས་ལུགས་ཚུན་ཆོད་ཀྱི་བཅས་མཚམས་ཕྲ་ཞིང་ཞིབ་པར་བསྲུང་བ་ཉིད་སྒྲུབ་པ་ཉམས་ལེན་གྱི་གཙོ་བོར་གནང་བ་ནི་ལུང་གཞི་ལས། གང་ན་ལས་ཀྱང་ཡོད། ནན་ཏན་བྱེད་པའང་ཡོད་པ་དེ་ནི་དམ་པའི་ཆོས་གནས་
པ་ཞེས་བྱའོ། །གང་ན་ལས་ཀྱང་མེད། ནན་ཏན་བྱེད་པའང་མེད་པ་དེ་ནི་དམ་པའི་ཆོས་ཞིག་པ་ཞེས་བྱའོ། །ཞེས་བསྟན་པ་གནས་མི་གནས་ཆོས་འདུལ་བ་ཡོད་མེད་ཀྱི་རྗེས་སུ་འགྲོ་བར་གསུངས་པ་སོགས་བསྟན་པའི་གནད་མཁྱེན་པའི་རྣམ་པར་ཐར་པ་སྟེ་རྗེ་བླ་མས་ཀྱང་། བསྟན་པའི་རྩ་བ་སོ་སོར་ཐར་པ་ལ། །སྒྲུབ་པ་སྙིང་པོར་བྱེད་པར་བྱིན་གྱིས་རློབས། །ཞེས་གསུངས་པའི་དགོངས་པའོ། །དེ་ནས་དཀྱིལ་འཁོར་རྒྱ་མཚོའི་མངའ་བདག་རྡོ་རྗེ་འཆང་ཆེན་པོ་རྗེ་ཆུ་བཟང་རིན་པོ་ཆེའི་ཞལ་སྔ་ནས་གཙུག་ཏོར་གདུགས་དཀར་ལྷ་བཅུ་བདུན་མའི་དབང་བྱད་གྲོལ་དང་བཅས་པ། དཔལ་རྡོ་རྗེ་འཇིགས་བྱེད་དཔའ་བོ་གཅིག་པ་བདུད་ལས་རྣམ་རྒྱལ་གྱི་དབང་བཞི་ཡོངས་རྫོགས་དང་བཅས་པ་གསན་ཏེ། གསང་སྔགས་རྡོ་རྗེ་ཐེག་པའི་སྒོར་སྨིན་པར་མཛད། དབང་བཀའ་སོགས་ཐོབ་པ་ཙམ་གྱིས་ཆོག་ཤེས་མི་མཛད་པར་དབང་དུས་སུ་ཁས་བླངས་པའི་དམ་ཚིག་དང་སྡོམ་པ་རྣམ་པར་དག་པ་གལ་ཆེ་བར་དགོངས་ཏེ་རྩ་བ་དང་ཡན་ལག་གི་དམ་ཚིག་མཐའ་དག་ཚུལ་བཞིན་དུ་བསྲུང་བར་མཛད། ཀུན་མཁྱེན་འཇམ་དབྱངས་བཞད་པའི་འདུལ་བ་གཞི་སྟོད་སྨད་ཆ་ཚང་བར་ཐུགས་ལ་གཟུང་སྟེ་རྩོད་པས་སྒྲོ་འདོགས་བཅད་ཅིང༌། གཙོ་བོར་ལག་ལེན་གྱི་དབང་དུ་མཛད་དེ་དགག་སྒྲུབ་གནང་གསུམ་གྱི་གནད་མཐའ་དག་ཇི་ལྟ་བ་བཞིན་དུ་གཏན་ལ་ཕབ། ཡིག་ཆ་ཐུགས་འཛིན་གྱི་སྐབས་ཉིན་རེ་བཞིན་ཤོག་བུ་མདའ་ཚད་མ་བདུན་རེ་ཙམ་མ་ཆད་པར་ཐུགས་ལ་འཛིན་ཐུབ་ཅེས་ཉེ་གནས་རྣམས་དང་གྲྭ་ཐོག་མཉམ་པའི་གྲྭ་རྒན་ཕལ་ཆེར་གྱིས་རྒྱུན་པར་གླེང༌། སྐབས་ཤིག་མཁས་མང་འདུས་པ་རྒྱ་མཚོའི་
དབུས་སུ་སྒྲུབ་པའི་མཆོད་སྤྲིན་དམ་པར་དམིགས་ཏེ་ཚོགས་རྒྱུགས་ལོ་ཕྱེད་དང་གཉིས་ཀྱི་རིང་ལ་བར་མ་ཆད་པར་ཕུལ་བས་མཚོན་སྔ་ཕྱིར་གཞུང་ཆེན་མོ་ཐུགས་ལ་གཟུང་བ་དེ་ཐམས་ཅད་སྒྲ་དག་གསལ་གསུམ་གྱི་སྒོ་ནས་ཚོགས་རྒྱུགས་འབུལ་བར་མཛད་པ་ནི། སྐུའི་གསང་བའི་མདོ་ལས། དམ་ཆོས་འཛིན་པའི་བསོད་ནམས་ནི། །སངས་རྒྱས་ཀུན་གྱིས་ནན་ཏན་ཏུ། །བསྐལ་པ་བྱེ་བར་བརྗོད་མཛད་ཀྱང༌། །ཐ་མར་ཕྱིན་པར་འགྱུར་མ་ལགས། །ཞེས་གསུངས་པ་དང༌། བུ་མོ་དཔལ་ཕྲེང་གིས་ཞུས་པ་བཞིན་དམ་ཆོས་འཛིན་པའི་ཕན་ཡོན་གྱིས་ཐུགས་ཕྲོགས་ཏེ། བྱང་ཆུབ་སེམས་དཔའ་རྟག་ ཏུ་ངུ་གཞོན་ནུ་ནོར་བཟང 
་ལྟར་ཆོས་ཚོལ་བ་ལ་ངོམས་པ་མེད་པའི་རྣམ་པར་ཐར་པ་ཐར་འདོད་ཀུན་གྱི་སྨོན་པའི་གནས་ཤིག་ཡིན་པས་སྙིགས་དུས་ཀྱི་སྐྱེ་སྤྲུལ་མཐོ་དམན་ཀུན་ཀྱང་རྣམ་ཐར་འདི་དག་གི་རྗེས་སུ་སྤྱན་མིག་ཡར་གཟིགས་ན། གཞུང་ཆེན་འདི་སྙེད་འཛིན་སྐྱོར་མཛད་པ་ཡ༷ང༌། །ཡ༷ང་དག་དོན་གྱི་རྣམ་ཐར་ཟླ་མེད་དེ༷། །དེ༷་ནི་འཇམ་དབྱངས་ཆོས་རྗེའི་རྣམ་ཐར་ཉི༷ད། །ཉི༷ད་ཀྱིས་སླར་ཡང་བདག་གིར་མཛད་པར་ངེས། །ཀྱེ་མ༷་མ༷་ལས་སྐྱེས་པས་སྐུ་སྐྱེས་རྣམས། །བླ་མ༷་མ༷་བཅོས་ལྷུན་གྲུབ་ཡིན་མོད་ཀྱང༌། །སྔ་མ༷་མ༷་བརྗེད་བཞུགས་པ་ཅུང་དཀའ་བས། །སློབ་མ༷་མ༷་བསླུ་དང་པོར་ཐོས་པ་མཛོད། །ཚུལ་འདི་འདྲ་ལ་དགོངས་ནས་སྐྱབས་མཆོག་ཐུའུ་བཀྭན་རིན་པོ་ཆེ་བློ་བཟང་ཆོས་ཀྱི་ཉི་མའི་ཞལ་ནས། དེེང་དུས་དམ་པའི་སྐྱེས་སྤྲུལ་འདི་དག་ནི། །སྔོན་སྦྱངས་ཡོན་ཏན་སྙིགས་དུས་གཟུང་དཀའ་བར། །དགོངས་ནས་དག་ཞིང་བཅོལ་ཏེ་སྐུ་རྐྱང་གིས། །ཕྱིན་པ་ཤ་སྟག་ཕྱིར་
ན་ཐུགས་ལས་ཆུང༌། །ཁྱོད་ནི་ད་ལྟའི་ངང་ཚུལ་འདིར་དཔག་ན། །ལུང་རྟོགས་ནོར་ལ་ཧ་ཅང་སྲེད་དྲགས་པས། །སྔ་མའི་དུས་ཀྱི་གསང་མཛོད་གོད་མེད་དུ། །བསྣམས་ནས་བྱོན་པའི་ངོ་མཚར་ཅན་དུ་ངེས། །ཞེས་གསུངས་ཏེ་འཕྲལ་ཉམས་མཚར་ལྟ་བུ་ལ་ཕུགས་གོ་རྒྱུ་ཆེན་པོ་ཞིག་འདུག་གོ །དགུང་ལོ་ཉེར་གཉིས་པ་གདོང་ངན་ཞེས་པ་མེ་སྤྲེལ་ལོར་གདན་སའི་མཁན་རིན་པོ་ཆེ་དང་གྲྭ་ཚང་ཐུན་མོང་ནས་སྨོན་ལམ་གྲྭ་སྐོར་གྱི་མཚན་བཏགས་ཕུལ་བ་བཞིན་དགུན་ཆོས་ཆེན་མོར་གྲྭ་ཚང་རང་གི་དམ་བཅའ་དང༌། དགུང་ལོ་ཉེར་གསུམ་པ་གསེར་འཕྱང་ཞེས་པ་མེ་བྱའི་ལོའི་ཆོ་འཕྲུལ་སྨོན་ལམ་གྱི་དམ་བཅའ་མཛད་དེ་ལེགས་བཤད་གཏམ་གྱི་དགའ་སྟོན་སྤེལ་བས་དགེ་བའི་བཤེས་གཉེན་མཐའ་དག་ཤིན་ཏུ་མགུ་ནས་བསྔགས་པའི་མེ་ཏོག་གིས་མངོན་པར་མཆོད་པར་གྱུར་ཏོ། །དེ་ནས་སྐྱབས་མགོན་རྡོ་རྗེ་འཆང་ཆེན་པོ་རྗེ་བཙུན་དཀོན་མཆོག་འཇིགས་མེད་དབང་པོའི་ཞབས་དྲུང་ནས་བདེ་གསང་འཇིགས་གསུམ་གྱི་དབང་སྟ་གོན་དང་བཅས་པ། འཇིགས་བྱེད་དང་བདེ་མཆོག་སྔགས་བཏུའི་རྗེས་གནང༌། བླ་མཆོད་དང་དགའ་ལྡན་ལྷ་བརྒྱ་མའི་ཁྲིད་སོགས་གསན། སྐྱབས་མགོན་དེ་ཉིད་ནས། ཁྱོད་ཀྱིས་མདོ་ཕྱོགས་གསན་སྦྱོང་ལེགས་པོ་བྱུང་འདུག་འཚང་རྒྱ་བ་ལ་མདོ་སྔགས་ཡ་མ་བྲལ་བ་དགོས་པས། ད་ནི་སྔགས་ལ་སྦྱང་བ་ཧུར་ཐག་ཅིག་ཅིས་ཀྱང་མཛོད། ཅེས་བཀའ་ནན་ཆེར་ཕེབས་པར་བརྟེན་གསང་སྔགས་རིག་པ་འཛིན་པའི་འདུས་སྡེ་རྒྱུད་པ་གྲྭ་ཚང་དུ་ཕེབས། ལོ་ཁ་ཤས་ཀྱི་རིང་
ལ་དཔལ་གསང་བ་འདུས་པའི་བསྐྱེད་རྫོགས་དང༌། ལེགས་པར་བཤད་པའི་རྒྱལ་པོ་འགྲེལ་པ་བཞི་སྦྲགས། རིམ་ལྔ་གསལ་སྒྲོན་སོགས་ལ་སྦྱངས་པས་གསང་ཆེན་རྒྱུད་སྡེ་རྒྱ་མཚོའི་གནད་ལ་ངེས་པ་བདེ་བླག་ཏུ་རྙེད། རྒྱུད་པའི་ཆོས་ཐོག་ཤོག་ལ་ཕེབས་སྐབས་སུ་གྲྭ་རྐྱང་གི་ལུགས་བཞིན་དམན་ཆ་བཟུང་སྟེ་འདུས་སྡེའི་བསྒྲིག་ལམ་དང་མཐུན་པར་རང་གི་བླ་གོས་སྣམ་སྦྱར། ཤོ་ཀ་ལི། ལྷུང་བཟེད། ཞྭ་ཟླམ་སོགས་ཉེར་མཁོའི་ཡོ་བྱད་རྣམས་རང་ཉིད་ཀྱིས་ཁུར་ནས་ཕེབས་པས་ཐམས་ཅད་ངོ་མཚར་ཞིང་དཔྱོད་ལྡན་རྣམས་རྗེས་སུ་ཡི་རང་བར་གྱུར། རྒྱུད་གྲྭའི་རྒན་གཞོན་མཐའ་དག་ནས་ཀྱང་སྤྲུལ་སྐུ་རིན་པོ་ཆེའི་ན་བཟའ་ངས་འཁུར་ངས་འཁུར་ཞེས་ཧབ་ཐོབ་ཀྱིས་རྩོད་པ་བྱས་པས་དེ་མི་དགོས་གསུངས་ཀྱང་ནན་གྱིས་འཁྱེར་བ་སོགས་དད་གུས་རྨད་དུ་བྱུང་བས་བཀུར་སྟི་ཇེ་ཆེར་འགྲོ་བ་ཞིག་ཡོད་ཅེས་ངག་རྒྱུན་ད་ལྟའང་འདུག་པ་ནི་རྒྱུ་མཐུན་པའི་འབྲས་བུ་སྟེ། བུད་བསྙེགས་ཐོབ་གསུམ་མམ། དམན་ས་བཟུང་བས་རྒྱལ་ས་ཐོབ་པའི་དཔེ་དམ་པ་རྣམས་ཀྱི་ངང་ཚུལ་རྨད་དུ་བྱུང་བའོ། །ངང་ཚུ༷ལ་བཟང་པོས་འདུས་སྡེའི་བཅའ་ཁྲི༷མས་ཀུན། །བཀུར་བའི་རྣམ་ཐར་བསྟན༷་པ༷འི་མཛེས་རྒྱན་ཏེ། །མེ་ཁྱེར་ཉི༷་མ༷འི་འོད་ཀྱི་ང་རྒྱལ་ཅན། །སྙིགས་དུས་ཆེར་རློམ་རྣམས་ལ་འཕྱ་བ་བཞིན། །དགུང་ལོ་ཉེར་ལྔ་པ་སྒྱུར་བྱེད་ཅེས་པ་ས་ཕག་ལོར་པཎ་ཆེན་ཐམས་ཅད་མཁྱེན་པ་ཆེན་པོ་རྗེ་བཙུན་བློ་བཟང་དཔལ་ལྡན་ཡེ་ཤེས་དཔལ་
བཟང་པོ་གསེར་གྱི་རྒྱལ་ཁབ་ཏུ ་ཆིབས་ཀྱི་ཁ་ལོ་བསྒྱུར་བའི་ལམ་ཞོར་དུ་སྐུ་འབུམ་ཆོས་སྡེ་ཆེན་པོ་འདིར་ཕྱག་ཕེབས་ནས་དགུན་གྱི་རིང་བཞུགས་པའི་སྐབས་ལམ་རིམ་བདེ་ལམ་གྱི་ཁྲིད་ཤིན་ཏུ་ཟབ་ཅིང་
རྒྱས་པ། མཇུག་ཏུ་སེམས་བསྐྱེད་ཀྱི་ཆོ་ག་དང་བཅས་པ། རྒྱན་འཇུག་གཉིས། སྤྱོད་འཇུག་སོགས་ཀྱི་ལུང་དུ་མ་དང་བཅས་བཀའ་ཆོས་མང་དུ་གསན། གནས་ལྔ་རིག་པའི་དབང་ཕྱུག་དགེ་བའི་བཤེས་གཉེན་ངག་དབང་ཉི་མའི་སྤྱན་སྔར་འཕགས་བོད་ཀྱི་སྐད་རིགས་སྒྱུར་ཚུལ། སྒྲ་དང་སྙན་ངག །མིང་གི་མངོན་བརྗོད། རྩིས་དཀར་ནག་སོགས་ལ་སྦྱངས་པས་དཀའ་ཚེགས་མེད་པར་མཁྱེན། གཟུར་གནས་བློ་དང་ལྡན་པ་རྣམས་རྗེ་མི་ཉག་རིན་པོ་ཆེའི་སྤྲུལ་སྐུ་འདི་པ་མདོ་སྔགས་ཀྱི་ཡོན་ཏན་མ་ལུས་པ་རྫོགས་འདུག་པས། རྗེ་རིན་པོ་ཆེའི་བསྟན་པ་ལ་ཕན་ངེས་ཤིག་འོང་བར་འདུག་ཅེས་དགའ་བའི་ཅ་ཅོ་སྒྲོགས་པ་བྱུང༌། དམ་པ་ཉིད་ནས་ཀྱང་གོང་སྨོས་ལྟར་གྱི་ཐེག་པ་ཆེན་པོའི་དགེ་བའི་བཤེས་གཉེན་དེ་རྣམས་རིགས་ཀྱི་ཅོད་པན་དུ་བཞེས་ཏེ་ཡོན་ཏན་རྣམས་ཐུགས་སུ་ཆུད་པས་དགའ་དད་སྤྲོ་གསུམ་གྱི་སྒོ་ནས་རང་གི་རྟོགས་པ་མགུར་དུ་བཞེས་པ་ནི། རྗེ་བླ་མ་རྣམས་ལ་གུས་བཏུད་དེ། །དུས་ད་རེས་ཐོབ་པའི་དལ་འབྱོར་ལ། །དོན་ཆེན་པོ་སྒྲུབ་པའི་གཏམ་སྙན་གྱི། །དྲིལ་ཆུང་དེ་ཅུང་ཟད་དཀྲོལ་བར་བྱ། །སྔོན་བསགས་པའི་རྣམ་དཀར་ལས་ཀྱི་དབང༌། །དེང་དལ་འབྱོར་ཚང་བའི་རྟེན་ བཟང་ཐོབ། །མཆོག་རྒྱལ་བའི་བསྟན་གྱི་སྒོར་ཞུགས་ནས། །སྡོམ་ཚུལ་ཁྲིམས་ཡང་དག་རབ་ཏུ ་བླངས། །འདི་བསམ་ན་ཁོ་བོ་སྐལ་ལྡན་ཡིན། །མཚན་ལྡན་གྱི་བཤེས་གཉེན་ལེགས་བསྟེན་ནས། །བཤད་སྒྲུབ་ཀྱི་བྱ་བར་བློ་གཞོལ་ཏེ། །ཆུང་འབྲིང་དང་ཆེན་པོའི་རིགས་ལམ་ལ། །གང་ཐུབ་ཚོད་སྦྱངས་པའི་སྐལ་ལྡན་ཡིན། །
གཞུང་ཕར་ཕྱིན་དབུ་མ་ལ་སོགས་པ། །ནང་བལྟས་ཀྱིས་བློ་ཡིས་གང་ནུས་སྐྱོར། །དེ་རྣམས་ཀྱི་དམ་བཅའི་ཁུར་ཡང་བཟུང༌། །ཆོས་གཏན་ཚིགས་རིག་པའི་བག་ཆགས་བཞག །དེ་བསམ་ན་ཁོ་བོ་སྐལ་ལྡན་ཡིན། །མཆོག་གསང་སྔགས་རིག་འཛིན་འདུས་པ་ཡི། །གྲྭར་ཞུགས་ཏེ་སྔགས་ལམ་ལ་བརྟེན་ནས། །འཚང་རྒྱ་བར་སླ་བའི་སྨོན་ལམ་བཏབ། །དེ་ཚུལ་བཞིན་བསམ་ན་བདག་སྐལ་ལྡན། །མཆོག་དམ་པའི་དོན་དེ་རྟོགས་པའི་ཕྱིར། །ཐ་སྙད་པའི་རིག་གནས་ཀུན་ལ་ཡང༌། །བློས་གཞལ་ཚུལ་ཙམ་གྱིས་སྦྱང་བའི་ཚུལ། །འདི་བསམ་ན་ཉམ་ཆུང་བདག་སྐལ་ལྡན། །དད་གུས་དང་སྤྲོ་བ་རྣམ་གསུམ་གྱིས། །དུས་ནམ་ཡང་བདག་ཡིད་རབ་འགེངས་ཤིང༌། །ཉམ་ཆུང་ཞིང་ཞི་དུལ་ཆོག་ཤེས་པ། །འདི་མཚན་ལྡན་གྱི་བླ་མའི་བྱིན་རླབས་ཡིན། །འདི་བསམ་ན་ཁོ་བོ་སྐལ་ལྡན་ཡིན། །མཆོག་དགེ་བའི་བཤེས་ཀྱིས་རྗེས་བཟུང་ནས། །མཆོག་དམ་པའི་མཚན་གྱིས་བྱིན་བརླབས་ཤིང༌། །མཆོག་ཐར་པའི་ལམ་བཟང་སྟོན་མཛད་པ། །འདི་བསམ་ན་ཁོ་བོ་མཆོག་སྐལ་ལྡན། །སྐྱེས་སྦྱངས་པའི་རྣམ་དཔྱོད་རབ་དམན་ཀྱང༌། །མགོན་དགེ་བའི་བཤེས་ཀྱི་དྲིན་ལས་ནི། །འཆད་རྩོད་དང་རྩོམ་པའི་ཁུར་ལྕི་བ། །འདེགས་ནུས་པ་འདི་ཡང་སྐལ་བ་ལྡན། །དེང་འཁོར་བའི་གནས་སུ་རབ་ལྷུང་ཡང༌། །མཆོག་དགེ་བའི་སྙིང་སྟོབས་ཆེར་བསྐྱེད་དེ། །བློའི་གཏད་སོ་ཆོས་ལ་བགྱིས་པ་འདི། །དུས་ཀུན་ཏུ་བསམ་ན་སྐལ་བ་ལྡན། །ཚེ་འདི་ཡི་དལ་འབྱོར་དོན་ལྡན་གྱུར། །ཚེ་ཕྱི་མར་དགེ་བའི་སྐལ་ལྡན་གྱུར། །མཆོག་དགེ་བའི་བཤེས་དང་འབྲལ་མེད་གྱུར། །མཆོག་རྒྱལ་བའི་གོ་འཕང་ཐོབ་གྱུར་ཅིག །ཅེས་རང་
བསྟོད་སྐལ་ལྡན་བཅུའི་གླུ་སྙན་དབྱངས་ཅན་ཕང་འགྲོའི་སྲིང་མོའི་རྣ་བའི་བཅུད་ལེན་ཞེས་བྱ་བ་འདིའང་བཤེས་གཉེན་དུ་མའི་ཞབས་རྡུལ་སྤྱི་བོས་བསྟེན་པའི་ཤཱཀ་བཙུན་མི་ཉག་སྐུ་སྐྱེ་ཤཱི་ལ་ཤཱ་ས་ན་སུརྻྻས་དད་གདུང་སྤྲོ་གསུམ་གྱི་སྒོ་ནས་སྐུ་འབུམ་དུ་རང་ལོ་ཉེར་ལྔའི་ཐོག་སྦྱར་བ་ཛ་ཡནྟུ། ཞེས་གསུངས་ཏེ་ལེགས་པར་བརྟགས་ན་དོན་ཟབ་ལ་གོ་བདེ་ཞིང་འདུས་ཆེ་བར་སྣང་ངོ༌། །དེ་ནས་མཚོ་སྔོན་ཤོག་ནས་དད་སྟོབས་ཀྱི་དབང་ཕྱུག་ཝང་དཀོན་མཆོག་བཀྲ་ཤིས་ཀྱིས་མཁས་གྲུབ་བྱེ་བའི་གཙུག་རྒྱན་རྗེ་འཇམ་དབྱངས་བཞད་པ་དཀོན་མཆོག་འཇིགས་མེད་དབང་པོའི་ཞལ་སྔ་ནས་གདན་དྲངས་ཏེ་བཀའ་ཆོས་ཞུས་སྐབས། ཝང་དེ་ཉིད་ཀྱིས་རྗེ་འདི་པའང་གདན་དྲངས་ནས་དབང་གྲལ་ལ་བཞུགས་སུ་བཅུག་པས། རྗེ་འཇམ་དབྱངས་བཞད་པ་རིན་པོ་ཆེའི་དྲུང་ནས་ངོ་མཚར་བའི་རྣམ་ཐར་བཅོ་བརྒྱད་དམ་ཉི་ཤུ་དང་ལྡན་པ་གྲུབ་ཆེན་མི་ཏྲ་ཛོ་ཀི་ལ་འཕགས་མཆོག་རྒྱལ་བ་རྒྱ་མཚོས་དངོས་སུ་གནང་བའི་མི་ཏྲ་བརྒྱ་རྩའི་དབང༌། སློབ་དཔོན་ཨ་བྷྱཱ་ཀཱ་ར་ལ་རྡོ་རྗེ་རྣལ་འབྱོར་མས་དངོས་སུ་སྩལ་བ་རྡོ་རྗེ་འཕྲེང་བའི་དབང༌། དུས་ཀྱི་འཁོར་ལོའི་བྱིས་པ་འཇུག་པའི་དབང་བདུན་གོང་མ་གོང་ཆེན་དང་བཅས་པ། ཐུགས་རྗེ་ཆེན་པོ་བཅུ་གཅིག་ཞལ་གྱི་དབང༌། གཅོད་ནམ་མཁའ་སྒོ་འབྱེད་ཀྱི་དབང༌། འཇིགས་བྱེད་དཔའ་གཅིག་གི་རྗེས་གནང༌། ཆོས་རྒྱལ་ཕྱི་ནང་གསང་གསུམ་དང་སེང་གདོང་མའི་རྗེས་གནང༌། མན་ངག་ལྷན་ཐབས་ཀྱི་ལུང༌། ཐང་སག་པའི་འཇིགས་བྱེད་བསྐྱེད་རྫོགས་དང་དྭགས་པོའི་བསྐྱེད་རྫོགས་གཉིས་ཀྱི་
ལུང༌། འཕོ་ཁྲིད། ཚེ་དཔག་གྲུབ་རྒྱལ་མའི་རྗེས་གནང་སོགས་མདོ་སྔགས་ཟབ་རྒྱས་ཀྱི་གདམས་པ་ཟད་མི་ཤེས་པའི་བཀའ་དྲིན་ནོད་པར་མཛད། དེ་ནས་སྔ་ཕྱིར་གསན་པའི་བཀའ་ཆོས་ཐམས་ཅད་ལ་ཡང་བསྐྱར་གཟིགས་རྟོག་མཛད་དེ་དབང་རྗེས་གནང་སོགས་ཀྱི་སྒྲུབ་དཀྱིལ་མངོན་རྟོགས། རྗེས་གནང་གི་ཆིངས་མི་འདྲ་བ་སོགས་གང་གི་སྟེང་ནས་གནང་བ་དང་གནང་ཚུལ་རྒྱས་བསྡུས་ཀྱི་ཕྱག་ལེན། དེ་དག་ལ་ཉེ་བར་མཁོ་བའི་ཙཀ་ལི་ཐིག་གདན་སོགས་ཀྱིས་མཚོན་གང་དགོས་པའི་ཡོ་བྱད་སླ་ཆོས་སུ་མ་སོང་བའི་ཚད་ལྡན་ཡང་གྲ་སྒྲིག་མཛད། ཆུ་རྒྱུ་ཁ་པ་རྗེ་བཙུན་བསྟན་པ་དར་རྒྱས་ཀྱི་དྲུང་ནས་མགོན་པོ་བཀའ་བཅུ་གསུམ་གྱི་རྗེས་གནང༌། རྗེ་དགེ་འདུན་རྒྱ་མཚོའི་ཡི་དམ་སྒྲུབ་སྐོར་གྱི་རྗེས་གནང༌། ལྷོ་བྲག་བཀའ་འབུམ་གྱི་ལུང༌། རྟ་མགྲིན་གསང་སྒྲུབ་ཀྱི་དབང་བཞི་ཡོངས་སུ་རྫོགས་པ། གཡུ་ཐོག་སྙིང་ཐིག་གི་ཆོས་སྐོར་དབང་ཆོག་བདེ་ཆེན་ཀློང་ཡངས་ཀྱི་སྟེང་ནས་ཐོབ་པ་སོགས་བཀའ་ཆོས་ཀྱི་རིམ་པ་མཐའ་ཡས་པ་གསན། སྐབས་སྐབས་སུ་ཟླ་རེ་ཙམ་ལ་བཅད་རྒྱ་དམ་པོ་གནང་ནས་ཡི་དམ་ལྷའི་ལྗགས་བསྙེན་ཁ་སྐོང་གི་སྦྱིན་སྲེག་དང་བཅས་པ་ལ་འགྲུས་པར་མཛད། རྒྱུན་དུའང་ཡན་ལག་བདུན་པ་སོགས་དང་ཐུན་དྲུག་གི་རྣལ་འབྱོར་འཇིགས་བྱེད་བཅས་ལ་ཞལ་འདོན་གཙོ་བོར་མཛད། དེའང་རྗེ་ཉིད་དང་ཨ་ཀྱཱ་རིན་པོ་ཆེ་རྣམ་གཉིས་སྐུ་འཕྲེང་སྔ་མ་རྣམས་ནས་བཟུང་ད་ལྟའི་བར་ཆོས་དམ་ཚིག་གི་འབྲེལ་ཟབ་ཅིང་གཙང་བར་བརྟེན། འཇམ་མགོན་བསྟན་པའི་རྩ་ལག་དམ་པ་ཨ་ཀྱཱ་རིན་པོ་ཆེ་འཇམ་དབྱངས་གོང་མའི་
བཀའ་བཞིན་ཕོ་བྲང་དུ་ཉེ་བར་འབྱོན་དགོས་པས་རྗེ་ཉིད་ལ་ཉེར་མཁོའི་རྗེས་གནང་ལུང་ཁྲིད་མང་པོ་ཞུས་པ་རྣམས་ཐུགས་ཀྱི་བཞེད་པ་བཞིན་གནང༌། མདོ་སྔགས་ཀྱི་དཀའ་གནས་རྣམས་ལ་དྲི་བ་མང་དུ་ཞུ་བར་ཡང་དོགས་ལན་ནོར་འཁྲུལ་མེད་པར་རྗེ་ཡབ་སྲས་ཀྱི་གསུང་ལ་ཁུངས་གཏུགས་ཏེ་ཞིབ་རྒྱས་སུ་ཕུལ་ནས་བཞེད་པའི་ཡོལ་གོ་ཕྱུར་བུར་བཀང༌། ཨ་ཀྱཱ་རིན་པོ་ཆེ་སྐུ་འབུམ་ནས་ཕོ་བྲང་དུ་ཕེབས་ཉིན་ཉིད་དང་མཇལ་ཕྲད་གནང་སྟེ་སྐྱབས་འཇུག་ཞུས་སྐབས་ཀྱང་ཞལ་ནས། ཁྱེད་ཀྱི་སྐུ་གོང་མ་དེ་ཉིད་བྱང་ཆུབ་ཀྱི་ཐུགས་འབྱོངས་ཤིང་སྐུ་ཡོན་ཡང་ཤིན་ཏུ་ཟབ་ལ་བསྟན་འགྲོར་ཕན་པ་ཚད་ལས་འདས་པ་ཞིག་ཡིན། ཁྱད་པར་ངེད་རང་ལ་བཀའ་དྲིན་ཤིན་ཏུ་ཆེ། ད་ལམ་ཁྱེད་ཉིད་ཀྱང་མཁྱེན་རྒྱ་ཡངས་ཤིང་རྒྱལ་བའི་གསུང་རབ་ལ་ཐོས་བསམ་སོགས་ཀྱིས་སྒྲོ་འདོགས་ཆོད་པ་འདི་གཞིར་བྱས་ནས། ད་དུང་སྨད་ཕྱོགས་སུ་ཕེབས་ནའང་ལུགས་གཉིས་ཀྱི་སྐུ་དོན་རྒྱ་ཆེན་པོ་འོང་ཡང་གཙོ་བོར་གཞུང་ལུགས་ཐམས་ཅད་གདམས་པར་ཤར་བའི་ཉམས་ལེན་དང་གར་ཕེབས་ཀྱི་སར་འཇམ་མགོན་བླ་མའི་མདོ་སྔགས་ཀྱི་རིང་ལུགས་སྤེལ་བའི་ཐབས་མཁས་གང་ཆེར་གནང་བ་དང༌། དད་ལྡན་སྐྱེ་བོ་མཆོག་དམན་མཐའ་དག་ལ། གང་ལ་གང་འཚམ་གྱི་འཕྲལ་ཕུགས་སུ་ཕན་པའི་མཛད་པ་རླབས་ཆེན་པོས་དམ་པ་གོང་མའི་རྣམ་ཐར་བདག་གིར་བཞེས་པ་གལ་ཆེ། ངེད་ཀྱིས་ཀྱང་ཉིད་ཀྱི་ཐུགས་བཞེད་ཇི་བཞིན་འགྲུབ་ཆེད་དུ་མཆོག་གསུམ་གྱི་ཐུགས་རྗེ་བསྐུལ་ཏེ་གསོལ་འདེབས་དང་ཆོས་
སྲུང་ལ་འཕྲིན་བཅོལ་སོགས་བྱེད། ཅེས་སོགས་ཀྱིས་མཚོན་ཞལ་ཏ་མང་དུ་གནང༌། སྐབས་ཤིག་མཚོ་སྔོན་ཆིང་ཝང་བསོད་ནམས་རྡོ་རྗེ་དང༌། པཻ་ཟི་མི་འགྱུར་སོགས་དཔོན་ཁག་དུ་མས་གདན་དྲངས་པ་བཞིན་དེ་ཕྱོགས་སུ་ཕེབས། ཝང་གིས་ཞུས་ངོར་སྒྲོལ་དཀར་ལྗང་སོགས་ཀྱི་རྗེས་གནང༌། སྒྲོལ་དཀར་གྱི་ཚེ་སྒྲུབ་སོགས་གནང་ཞིང་ཕྱོགས་འདུས་ཀྱི་དད་ལྡན་མཆོག་དམན་མཐའ་དག་ལ་ཁྲུས་དབང་བཀའ་བསྒོ་སོགས་འདོད་མོས་བཞིན་སྩལ། དེ་ནས་པཻ་ཟི་མི་འགྱུར་གྱི་ཨུརྒེར་ཕེབས་ཏེ་དཔོན་པོའི་མོས་འདུན་བཞིན་སྨན་བླའི་ལུང༌། དགའ་ལྡན་ལྷ་བརྒྱ་མའི་ཁྲིད་འཕོ་ཁྲིད་སོགས་དང༌། སྡེ་འབངས་ནས་ཀྱང་སོ་སོའི་འདོད་མོས་ཀྱི་བཀའ་ཆོས་མང་པོ་ཞུས་པ་རྣམས་སྩལ་ཏེ་དད་ལྡན་ཀུན་གྱི་རྒྱུད་ལ་ཐར་པའི་ས་བོན་ཁྱད་པར་ཅན་བསྐྲུན་པར་མཛད། སླར་སྐུ་འབུམ་དུ་ཕེབས་ཏེ་སྐྱབས་མགོན་དམ་པ་ཆུ་བཟང་རིན་པོ་ཆེའི་དྲུང་ནས་ལྕང་སྐྱ་ངག་དབང་བློ་བཟང་ཆོས་ལྡན་གྱི་གསུང་འབུམ། ཆོས་ཆུང་བརྒྱ་རྩ་སོགས་ཀྱི་ལུང་མང་པོ་དང༌། སྣར་ཐང་བརྒྱ་རྩའི་རྗེས་གནང༌། གདུགས་དཀར་གྱི་དབང་ལེགས་ལྡན་མཆེད་གསུམ་གྱི་རྗེས་གནང་དང་བཅས་པ། ཚེ་དཔག་གྲུབ་རྒྱལ་མའི་རྗེས་གནང༌། ཐུགས་རྗེ་ཆེན་པོ་དང་བཀའ་གདམས་ཐིག་ལེ་བཅུ་དྲུག་གི་དབང༌། འཇིགས་བྱེད་སྔགས་བཏུའི་རྗེས་གནང་སོགས་ཟབ་ཅིང་རྒྱ་ཆེ་བའི་བཀའ་ཆོས་ཀྱི་རིམ་པ་ཟླ་བ་གཉིས་ཀྱི་རིང་ལ་ལེགས་པར་གསན། ཆོས་ཡོན་དུ་བདོག་པའི་མཆོད་སྤྲིན་གཟབ་རྒྱས་ཞུས། དེ་ནས་ཁྲི་ཀ་གསེར་མོ་ལྗོངས་ཀྱི་སེར་སྐྱ་ཀུན་ནས་
གསོལ་བ་བཏབ་པ་བཞིན། དེ་ཀའི་ཆོས་སྡེ་ཐོས་བསམ་དར་རྒྱས་གླིང་གི་ཁྲིར་བཞུགས། དགོན་པའི་བསྒྲིག་ལམ་ཀུན་སྤྱོད་ཀྱི་རིམ་པ་གོང་མས་ཇི་ལྟར་ཚུགས་པ་བཞིན་ཅུང་ཟད་ཀྱང་གྲྭ་མ་ཉམས་པར་བསྐྱངས། དགོན་པ་རང་གི་གྲྭ་པ་རྣམས་དང་ཕྱོགས་ནས་ཀྱང་སེར་སྐྱ་མཆོག་དམན་དུ་མ་ལྷགས་པ་རྣམས་ལ་དབང་ལུང་རྗེས་གནང་སོགས་ལྷུག་པར་སྩལ་ཏེ་ཞུ་མཁན་ཐམས་ཅད་ཀྱི་རེ་བ་སྐོང་བར་མཛད། སྤྱིར་རྒྱལ་བསྟན་རིན་པོ་ཆེར་གུས་འདུད་བཀུར་སྟི་སོགས་ལ་བརྩོན་པ་དང༌། ལྷག་པར་རང་རང་ཐད་ཀའི་དགེ་སྦྱོར་ལ་འགྲུས་ཤིང་དགེ་བཅུ་ཅི་ལྕོགས་སྒྲུབ་པ། ཡིག་དྲུག་དང་སྨྱུང་གནས་སོགས་ལ་འབད་ན་ཡུལ་ཕྱོགས་སུ་དགེ་མཚན་འབྱུང་ཞིང༌། རང་རང་སོ་སོའི་འདི་ཕྱིའི་དགོས་དོན་འགྲུབ་པས་དེ་དག་ལ་འབད་པ་གལ་ཆེ་ཚུལ་སོགས་སོ་སོའི་ཁམས་དང་འཚམ་པའི་ཞལ་ཏ་མཛད་ནས་སྐྱེ་བོ་མཆོག་དམན་ཐམས་ཅད་ཕན་བདེའི་ལམ་ལ་སྦྱར། ཉིད་ཀྱི་ཐུགས་རྗེ་དང་འཕྲིན་ལས་ཀྱི་ལྕགས་ཀྱུས་ལུས་ཅན་ཀུན་གྱི་ཡིད་རང་དབང་མེད་པར་འཕྲོག་པས་དགོན་དེ་ཉིད་ལ་མང་འགྱེད་སོགས་སྔར་ལས་ཆེས་ལྷག་པ་བྱུང་བས། དགེ་འདུན་རྣམས་བཤད་སྒྲུབ་ཡར་ལྡན་དུ་སོང་བའི་ཞར་ལ་ཆོས་སྒྲུབ་པའི་མཐུན་རྐྱེན་ཡང་འདོད་དགུར་འབྱོར། འཕྲལ་དང་ཡུན་གྱི་ལེགས་ཚོགས་ལྷུན་གྱིས་གྲུབ་སྟེ། ས་པཎྚི་ཏས། དམ་པ་དཔོན་དུ་བསྐོས་གྱུར་ན། །དོན་གྲུབ་པ་དང་བདེ་སྐྱིད་འཐོབ། །ནོར་བུ་རྒྱལ་མཚན་རྩེར་མཆོད་ན། །ཡུལ་ཕྱོགས་དགེ་ཞེས་མཁས་རྣམས་སྒྲོགས། །ཞེས་པའི་ངང་ཚུལ་མངོན་དུ་གྱུར་ཏོ། །རེ་ཞིག་ནས་དེའི་ཁྲི་ཁུར་བཞག་སྟེ་མཆོད་རྟེན་མི་ཉག་གྲྭ་
ཚང་བཀྲ་ཤིས་ཆོས་འཕེལ་གླིང་གི་བླ་བྲང་དུ་ལོ་ཕྱེད་ཙམ་གྱི་རིང་ཟབ་ལམ་རྡོ་རྗེའི་རྣལ་འབྱོར་ལ་ཉིན་མཚན་འཁོར་མོ་ཡུག་ཏུ་གཞོལ་ཏེ་ཡི་དམ་གྱི་ལྷ་དུ་མའི་ལྗགས་བསྙེན། མཇུག་ཏུ་སྦྱིན་སྲེག་ཚོགས་འཁོར་སོགས་གང་རྒྱས་གནང༌། དེ་ནས་སྒོ་མེའི་ཤོག་གི་མཆོད་རྟེན་སྐེད་ཅེས་གྲགས་པའི་དགོན་གྱི་ཁྲིར་བཞུགས་ཏེ་ཆོས་འགྲིམ་པ་རྣམས་ལ་བརྩི་བཞག་རྒྱུན་པར་ཐུགས་ནས་གནང་ཞིང་ཚིག་དོན་གཉིས་ཀྱི་རྒྱུགས་ཞིབ་མོར་བཞེས། འཆད་ཉན་གྱི་རྟིང་བསྐུལ་དང་བསྒྲིག་ལམ་ཀུན་སྤྱོད་སོགས་བླ་མ་གོང་མས་བཙུགས་པའི་ཕྱག་སྲོལ་བཞིན་བསྐྱང་བར་མཛད། ཐམས་ཅད་སྤྲོ་བ་སྐྱེས་ཏེ་གྲྭ་པ་རྒན་གཞོན་གང་ས་ནས་བསླབ་སྦྱང་སོགས་ལ་བརྩོན་མཁན་ཁ་མིག་ཡར་ལྟ་བ་མང་དུ་བྱུང་བས་བསྟན་པའི་དམིགས་རྐྱེན་ལ་ཤིན་ཏུ་ཕན་པ་བྱུང༌། དེར་བཞུགས་རིང་དགོན་པའི་གྲྭ་པ་རྣམས་དང་མཆོད་གཞིའི་སེར་སྐྱ་བཅས་ལ་མདོ་སྔགས་ཀྱི་ལུང་ཁྲིད། དབང་རྗེས་གནང་སོགས་འདོད་མོས་བཞིན་སྩལ་ཏེ་རྒྱུད་སྨིན་པར་མཛད། ཁྲི་མཐར་ཕྱིན་ནས་སྐུ་འབུམ་དུ་ཕེབས། ཀུན་མཁྱེན་ཆེན་པོ་རྗེ་འཇམ་དབྱངས་བཞད་པ་དཀོན་མཆོག་འཇིགས་མེད་དབང་པོའི་ཞལ་སྔ་ནས་ཀྱི་སྤྱན་སྔར། ལྷོ་བྲག་གྲུབ་ཆེན་ལས་ཀྱི་རྡོ་རྗེ་ནི་ངེས་པའི་དོན་དུ་གསང་བའི་བདག་པོ་དང་ངོ་བོ་དབྱེར་མེད་ཀྱང༌། རྒྱུད་བརྟག་པ་གཉིས་པར། འཆད་པ་པོ་ང་ཆོས་ཀྱང་ང༌། །རང་གི་ཚོགས་ལྡན་ཉན་པོ་ང༌། །ཞེས་པ་ལྟར་ཐུན་མོང་གདུལ་བྱའི་ངོ་བོར་དེ་ཉིད་ཡི་དམ་གྱི་ལྷར་བརྟེན་ནས་རྩེ་གཅིག་ཏུ་བསྒྲུབ་པས་ཞལ་དངོས་སུ་བསྟན་ཏེ་སྩལ་བའི་སྙན་བརྒྱུད་ཀྱི་མན་ངག་དོན་དམ་སེམས་བསྐྱེད་ཀྱི་རྗེས་གནང་
ངམ་སྟོན་པ་ཉེ་སྲས་དང་བཅས་པའི་རྗེས་གནང༌། ཚེ་དཔག་མེད་དང་རྣམ་འཇོམས་ཀྱི་དབང༌། ཕྱག་རྡོར་སྐུ་ལྔའི་རྗེས་གནང༌། ཕྱག་རྡོར་སེམས་དཔའ་སུམ་བརྩེགས་ཀྱི་རྗེས་གནང༌། ཕྱག་རྡོར་བདུད་རྩི་ཐིགས་པ། ཕྱག་རྡོར་གཏུམ་པོ་མེ་འབར་དྲག་པོ། དྲག་པོ་སུམ་དྲིལ་སོགས་སྙན་བརྒྱུད་ཀྱི་དབང་དང་རྗེས་གནང་ཆ་ཚང་བ། ཕྱག་རྡོར་འཁོར་ཆེན་གྱི་དབང་དང་མི་འཁྲུགས་པ་ལྷ་དགུའི་དབང༌། སྒྲུབ་ཐབས་རིན་འབྱུང་གི་རྗེས་གནང་རིགས་གཏད་སྒོམ་ལུང་སོགས་བསྡོམས་པ་སུམ་བརྒྱ་དང་གཅིག །དེའི་གཞུང་གི་ལུང་དང་བཅས་པ། མཁས་གྲུབ་རིན་པོ་ཆེའི་གསུང་ཐོར་བུའི་ལུང༌། དམིགས་བརྩེ་མའི་ལས་ཚོགས་ཀྱི་ལུང༌། རྒྱན་འཇུག་གཉིས་ཀྱི་ལུང༌། སྒྲོལ་དཀར་ལྗང་བླ་མེད་རྡོར་སེམས། སེང་གདོང་མ་གཙོ་འཁོར་གསུམ། འཇམ་དཔལ་ནཱ་ག་རཀྴ། འཇམ་དཀར། རྣམ་སྲས། མགོན་དཀར། ཕྱག་རྡོར་གོས་སྔོན་ཅན་སོགས་ཀྱི་རྗེས་གནང༌། ནཱ་རོ་མཁའ་སྤྱོད་མའི་དབང་སོགས་དང༌། གཞན་ཡང་ལུང་ཁྲིད་མན་ངག་ཞལ་ཤེས་ཀྱིས་རིགས་མཐའ་ཡས་པ་གསན་ཏེ། དེད་དཔོན་ནོར་བུའི་གླིང་དུ་སོན་པ་བཞིན་ཐུགས་རྒྱུད་ཟབ་རྒྱས་ཀྱི་གདམས་པས་ཕྱུག་པར་མཛད། དེ་ནས་ཡང་ཕལ་ཆེར་བཅད་རྒྱ་མཛད་ནས་ཡི་དམ་གྱི་ལྷ་དེ་རྣམས་ཀྱི་བསྙེན་པ་དང༌། ཁ་སྐོང་སྦྱིན་སྲེག་སོགས་ཀྱང་རྒྱས་པར་གནང་སྟེ་གསན་པའི་དགོས་དོན་ཕྱག་ལེན་དུ་ཐེབས་པར་མཛད། དེའི་བར་མཚམས་རྣམས་སུ་ཕྱོགས་སོ་སོ་ནས་ཡོང་བའི་མཆོག་དམན་དོན་གཉེར་ཅན་རྣམས་འདོད་ཆོས་ཀྱིས་ཚིམ་པར་བྱས་ཤིང༌།
ལས་ཀྱི་ཆོ་ག་རྣམ་པར་དག་པའི་སྒོ་ནས་བསྒྲུབ་བྱ་ཉིས་བརྒྱ་ལྷག་ལ་དགེ་བསྙེན། དགེ་ཚུལ། དགེ་སློང་གི་སྡོམ་པ་སོགས་སྩལ་ཏེ་ཐར་པའི་ས་བོན་གྲུང་པོ་འདེབས་པར་མཛད། ཝང་བསོད་ནམས་རྡོ་རྗེས། རྗེ་འཇམ་དབྱངས་བཞད་པ་རིན་པོ་ཆེར་དུས་འཁོར་གྱི་དབང་ཞུས་སྐབས་དེར་ཕེབས་ཏེ་དུས་འཁོར་གྱི་དབང་དང༌། ལྷ་མོ་ཤྲ་མ་ཎ། རྟ་མགྲིན་གསང་སྒྲུབ། མི་གཡོ་བ་དཀར་པོ། མ་ཏི་ལུགས་ཀྱི་འཇམ་དཀར། ཁྲོ་བོ་སྨེ་བརྩེགས། ལྷ་མོ། ཀླུ་དབང་རྒྱལ་པོ། ཕྱག་རྡོར་གཏུམ་ཆུང༌། སོར་འབྲང༌། གཙུག་ཏོར་རྣམ་རྒྱལ་ལྷ་དགུ །ལོ་མ་གྱོན་མ་སོགས་ལྷག་ལྷ་མང་པོའི་རྗེས་གནང༌། རྡོ་རྗེ་ཕག་མོ་ཤེས་རབ་གསལ་བྱེད་མའི་སྒྲུབ་ཐབས་ཀྱི་ལུང༌། མགོན་པོའི་བསྐང་བཤགས་ཀྱི་ལུང་། གསོ་དཔྱད་རྒྱུད་བཞིའི་ལུང༌། འཇམ་དབྱངས་ཆོས་སྐོར་གྱི་ལུང་དང་དེ་ལས་གསུངས་པའི་རྗེས་གནང་གི་རིམ་པ་ཕལ་ཆེར། བསྙུང་གནས་ཆོ་གའི་ལུང༌། འདུལ་བ་རྒྱ་མཚོའི་སྙིང་པོ། དགེ་སློང་གི་བསླབ་བྱ། སྔགས་བྱང་སེམས་ཀྱི་བསླབ་བྱ། སྒྲོལ་དཀར་མངོན་རྟོགས་དང་དེའི་སྦྱིན་སྲེག །མཁའ་སྤྱོད་མའི་མངོན་རྟོགས། དམ་ཅན་མངོན་རྟོགས། བདེ་གསང་གཉིས་ཀྱི་རྒྱུད། དྭགས་པོ་བསྐྱེད་རིམ། འཇམ་དཀར་སྦྱིན་སྲེག །འཇམ་དབྱངས་དམར་སེར་གྱི་མངོན་རྟོགས། བཅུ་གཅིག་ཞལ་གྱི་མངོན་རྟོགས་སོགས་ཀྱི་ལུང་དང་གཞན་བཀའ་ཆོས་ཀྱི་རིམ་པ་ཐོར་བུའང་མཐའ་ཡས་གསན། དེ་ནས་སྐུ་འབུམ་དུ་ཕེབས་ཏེ་སླར་ཡང་རྗེ་དེ་ཉིད་ཀྱི་ཞབས་དྲུང་ནས་ཉིད་ཀྱི་གསུང་འབུམ་གྱི་སྐོར་དང༌། གཞན་འཕོ་ཁྲིད་སོགས་ཁྲིད་འགའ་ཞིག །ལམ་རིམ་གྱི་ཁྲིད་སོགས་བཀའ་ཆོས་ཀྱི་རིམ་པ་སྤྱི་སྒེར་ལ་གང་གནང་བ་
ཐམས་ཅད་ལ་མ་ལུས་པར་ཕེབས་ཏེ་གསན། རེས་འགའ་གཞན་གྱིས་ཞུས་པ་མ་གསན་པར་ལུས་པའི་ཚེ། རྗེ་འཇམ་དབྱངས་བཞད་པ་རིན་པོ་ཆེས་གཟིགས་པ་ཆེ་བཞེས་ཀྱིས་འདི་པ་བོས་ནས་བཞུགས་སུ་བཅུག་པས་བཀའ་དྲིན་ཤིན་ཏུ་ཆེ་བ་བྱུང་ཚུལ་དམ་པ་ཉིད་ནས་ཀྱང་ཡང་ཡང་གསུང་ཚུལ་རྒྱུས་ཡོད་རྣམས་གླེང༌། རྗེ་བཙུན་བླ་མ་དམ་པ་སྐུ་ཞབས་ཐུའུ་བཀྭན་རིན་པོ་ཆེའི་སྤྱན་སྔར་རྗེ་དེ་ཉིད་ཀྱི་གསུང་འབུམ་སྐོར་པོ་ཏི་བདུན་ལྷག་དང༌། གཞན་ཆོས་ཚན་མང་པོའི་ལུང་གསན། རྒྱར་རྩང་སྒོམ་ཆེན་རིན་པོ་ཆེ་བློ་བཟང་རྒྱལ་མཚན་གྱི་དྲུང་ནས་ཀྱང་ལམ་རིམ་གྱི་ཁྲིད་དང་ལུང་ཁ་ཤས་གསན། སྒོམ་ཆེན་རིན་པོ་ཆེ་དང་རྗེ་འདི་པ་གཉིས་ཞབས་ཐང་ལ་མར་ཚང་བླ་ཆེན་དུ་མཇལ་བར་ཕེབས། རྟེན་ལ་མཆོད་པ་གང་རྒྱས་ཕུལ་ཏེ་ཉིན་ཁ་ཤས་ཀྱི་རིང་བཞུགས་ནས་སྐྱབས་སེམས། ཐུན་དྲུག་གི་རྣལ་འབྱོར་ཡན་ལག་བདུན་པ། སྤྱན་འདྲེན་ཁྲུས་གསོལ། བསྟན་པ་རྒྱས་པའི་ཐུགས་སྨོན་སོགས་ནན་ཏན་གནད་དུ་སྨིན་པ་མཛད། ཕྱག་སྐོར་ཡང་གྲངས་ཚད་ལོང་ངེས་བྱས། དེ་ལྟར་དགེ་བའི་བཤེས་གཉེན་དུ་མ་དང༌། ཁྱད་པར་རྗེ་འཇམ་དབྱངས་བཞད་པ་རིན་པོ་ཆེ། རྗེ་ཆུ་བཟང་རིན་པོ་ཆེ། ཆུ་རྒྱུ་ཁ་པ་རིན་པོ་ཆེ་སོགས་རིགས་ཀྱི་ཅོད་པན་དུ་བཞེས་ཏེ་མདོ་སྔགས་ཀྱི་གསན་སྦྱོང་རྒྱ་ཆེར་མཛད་པས་མདོ་སྔགས་རིག་གནས། དབང་ལུང་ཁྲིད་མན་ངག་སོགས་གདམས་པ་ཟད་མི་ཤེས་པའི་གཏེར་དུ་གྱུར་ཅིང་འཕྲིན་ལས་ཀྱི་སྒོ་བརྒྱ་ཕྱེ་ནས་ཕན་ཚུན་གྱི་དགོན་སྡེ་དུ་མར་འཛིན་སྐྱོང་དང་ཆོས་ཀྱི་མཆོད་སྦྱིན་འདོད་དགུར་སྩལ་བའི་གྲགས་སྙན་གྱི་
རྔ་སྒྲས་ཕྱོགས་ཀུན་ཏུ་ཁྱབ་པར་གྱུར་ཏོ། །བཤེས་གཉེན་གངས་ཀྱི་རི་བོའི་འཕྲེང་བ་ལས། །དལ་འབབ་ཆོས་ཀྱི་ཀླུང་བརྒྱ་ཆབས་ཅིག་ཏུ། །འཁྱིལ་བའི་གདམས་པ་མི་ཟད་ཆུ་བོའི་གཏེར། །ཐར་འདོད་ངང་པའི་རོལ་གནས་གཅིག་པུར་གྱུར། །ཚུ༷ལ་མཐུན་བག་ཡོད་ཁྲི༷མས་ལྡན་འདུས་སྡེ་སོགས། །དད་ལྡན་གདུལ་བྱའི་བསོད་ནམས་མཁའ་དབྱིངས་ནས། །ཟབ་རྒྱས་གདམས་པའི་འོད་ཟེར་འབུམ་འགྱེད་པ། །བཤེས་གཉེན་བསྟན༷་པ༷འི་ཉི༷་མ༷་འོད་པོ་ཆེ། །ཕྱོགས་ཀྱི་འཁོར་ལོའི་གླིང་དང་གླིང་ཕྲན་དུ། །གང་འཚམས་ཆོས་ཀྱི་སྣང་བའི་མཆོག་བྱིན་ཏེ། །སླར་ཡང་སྐུ་འབུམ་ཆོས་སྡེ་པདྨའི་མཚོར། །འཕྲིན་ལས་གསེར་ཞུན་ཁུ་བ་བཅུད་དུ་འཁྱིལ། །ཞེས་དགེ་ལྡན་བསྟན་པའི་རྩ་ལག་མཁས་ཤིང་གྲུབ་པའི་དབང་ཕྱུག་རྗེ་བཙུན་བླ་མ་དམ་པ་ཚུལ་ཁྲིམས་བསྟན་པའི་ཉི་མ་དཔལ་བཟང་པོའི་རྣམ་པར་ཐར་པ་ནོར་བུའི་དོ་ཤལ་ལས་བསྟན་པའི་སྒོར་ཞུགས་ཤིང་མང་དུ་ཐོས་པ་རྒྱ་ཆེར་བཙལ་བའི་ཚུལ་གྱི་དྲ་བ་སྟེ་གཉིས་པའོ།། །།དགུང་ལོ་སོ་གཉིས་པ་ཟིལ་གནོན་ཞེས་པ་མེ་ཕོ་རྟའི་ལོར་སྐུ་འབུམ་སྨན་པ་གྲྭ་ཚང་གི་ཁྲིར་བཞུགས། གྲྭ་ཚང་རང་གི་འཆད་ཉན་ལ་རྟིང་བསྐུལ། ལམ་རིམ་སོགས་བཀའ་ཆོས་ཀྱི་རིམ་པ། ཆོས་ཐོག་སྐབས་ཀྱི་བརྩི་བཞག་རྣམས་ཆག་མེད་དུ་སྩལ། དུས་བཟང་སོ་སོར་ཡང་ཆག་མེད་ཕེབས་ཤིང་འདོན་པའི་དལ་བྲེལ་དབྱངས་རྟ་སོགས་བསྒྲིག་ལམ་གྱི་རིམ་པ་མཐའ་དག་ལ་ཞི་དྲག་གང་འོས་ཀྱི་དོ་དམ་གང་དྲག་དང་ཚོགས་གཏམ་བསླབ་བྱ་དང་འབྲེལ་བ་ལེགས་ཉེས་སྐྱོན་ཡོན་གྱི་ཤན་ཕྱེད་པའི་རྒྱུ་མཚན་ཡིད་ལ་འབབ་ངེས་བཅས་སྐྱོ་ངལ་མེད་པར་ཡང་ཡང་གནང༌། གྲྭ་པ་ཆོས་
འགྲིམ་པ་རྣམས་ལ་ཐད་ཀ་ཐད་ཀའི་ཡིག་ཆའི་རྒྱུགས་བླངས་ཏེ་འཆད་ཉན་ལ་འགྲུས་པར་མཛད་པས་ཀུན་གྱིས་གསུང་དང་བླང་གིས་ཐོས་བསམ་སོགས་ལ་འབད་པ་ལྷུར་བླངས་པས་ཆོས་ཐོག་རེ་རེ་ལས་རེ་རེར་སྐྱེད་ཐོན་ཏེ་འཆད་ཉན་ཡར་ཚེས་ཀྱི་ཟླ་ལྟར་འཕེལ། གྲྭ་ཚང་འདིར་ལོ་རེ་བཞིན་དབྱར་ཆོས་ཀྱི་སྐབས་ཀུན་རིག་གི་སྒྲུབ་མཆོད་རས་བྲིས་ཀྱི་དཀྱིལ་འཁོར་སྟེང་ནས་གནང་གིན་ཡོད་པས་དེ་ལ་རྡུལ་ཚོན་གྱི་དཀྱིལ་འཁོར་བཞེངས་རྒྱུ་ཞིག་ཚུགས་ན་སྙམ་པའི་ཐུགས་བཞེད་ཡོད་པའི་ཐོག །རྗེ་འཇམ་དབྱངས་བཞད་པ་རིན་པོ་ཆེ་ནས་སྐབས་ལ་བབ་པར་གཟིགས་ཏེ་རྗེ་འདི་པར་ཁྱེད་ཀྱིས་ཁྲི་ཁུར་འཛིན་བཞིན་པའི་ཐོག་རྡུལ་ཚོན་གྱི་དཀྱིལ་འཁོར་བཞེངས་རྒྱུའི་རྒྱུན་འཛུག་ཐུབ་ན་བསྟན་པའི་ཞབས་འདེགས་ལ་ཤིན་ཏུ་ཕན་ངེས་པས་མྱུར་དུ་བཙུག་ན་ལེགས་གསུང་བའི་བཀའ་སྩལ་མེ་ཏོག་གི་འཕྲེང་བ་སྤྱི་བོར་བཅིངས་ཏེ་རྡུལ་ཚོན་གྱི་དཀྱིལ་འཁོར་ཕྱག་ལེན་རྣམས་རྒྱུད་སྡེའི་དགོངས་པ་དང་མཐུན་པར་ཆ་ལག་ཚང་མ་བཙུགས་ཏེ་སྒྲུབ་མཆོད་མཛད་པས་དགེ་འདུན་གྱི་ཆོས་ཀྱི་འཕྲིན་ལས་རྒྱས་པའི་རྟེན་འབྲེལ་ངོ་མཚར་བའི་མཚན་མ་མང་དུ་བྱུང༌། དེའང་གྲུབ་ཆེན་དྲིལ་བུ་པས། རི་མོར་བྲིས་པའི་ལས་དང་ནི། །ཐིག་ལས་ཚོན་དགྱེའི་རིམ་པ་དང༌། །འགྲོ་བ་འདི་དག་རང་བཞིན་གྱི། །གྲུབ་པའི་དཀྱིལ་འཁོར་གཉིས་མེད་པའོ། །བཅོས་མ་གཉིས་ཀྱི་ངོ་བོ་གང༌། །དེ་ནི་གདུལ་བྱའི་དབང་ལས་འདོད། །ཅེས་མ་བཅོས་པ་ལུས་དཀྱིལ་སོགས་ལ་སྔོན་དུ་བཅོས་མའི་དཀྱིལ་འཁོར་དགོས་པ་དང༌། དེའང་རི་མོར་བྲིས་པ་ཞེས་རས་བྲིས་དང༌། ཐིག་ལས་ཚོན་དགྱེ་
ཞེས་རྡུལ་ཚོན་གཉིས་སུ་ཕྱེ་བ་གདུལ་བྱའི་དབང་གིས་ཡིན་པར་གསུངས་ལ། དེ་ཡིན་ཚུལ་ནི་རྡོ་རྗེ་མཁའ་འགྲོ་ལས། དཀྱིལ་འཁོར་ལ་སོགས་ལས་གང་ནི། །བཅོས་མའི་སེམས་ཀྱིས་གང་བྱེད་པ། །ཕྱི་རོལ་ལས་རྣམས་གསལ་བྱེད་པས། །དང་པོའི་ལས་ཅན་རྣམས་ལ་བསྔགས། །ཞེས་གསུངས་ཏེ་རང་གིས་བསྒོམ་པ་ལ་དཀྱིལ་འཁོར་གྱི་མཚན་ཉིད་ཤེས་དགོས་ཤིང༌། རྡོ་རྗེ་སློབ་དཔོན་བྱེད་པ་ལ་དེ་ཉིད་བཅུའི་ནང་དུ། དཀྱིལ་འཁོར་དྲི་བའི་ལས་ལ་མཁས། །ཞེས་ནན་ཏན་དུ་གསུངས་པ་དང༌། རྡུལ་ཚོན་གྱི་ཕྱེ་མའི་གྲངས་སྙེད་ཀྱི་བསོད་ནམས་ཚད་མེད་ཐོབ་པས་སློབ་མའི་ཚོགས་རྫོགས་ཚབས་ཆེ་བ་སོགས་རྡུལ་ཚོན་གྱི་སྲོལ་བཙུགས་པ་འདི་ལ་དགོངས་གཞི་དང༌། དགོས་པ་བསམ་ལས་འདས་པ་ཞིག་ཡོད་སྣང་སྟེ། དབང་དོན་དེ་ཉིད་རབ་གསལ་ལས། ཨ་བྷྱཱ་ཀཱ་ར་ལ་སོགས་པས་རས་བྲིས་ཀྱི་དཀྱིལ་འཁོར་གྱི་ཆོ་གའང་བཤད་པས་ཐོག་མའི་དབང་ལ་དེའང་རུང་མོད་ཀྱང་སློབ་དཔོན་གྱི་མཚན་ཉིད་དུ་དཀྱིལ་འཁོར་བྲི་བའི་ལས་ལ་མཁས་པ་མང་དུ་གསུངས་ཤིང༌། སློབ་མའི་ངོས་ནས་དཀྱིལ་འཁོར་གྱི་ཕྱོགས་སུ་ཟང་ཟིང་གཏོང་བའི་སྒོ་མང་ལ་དེས་ཀྱང་རྒྱུད་སྣོད་རུང་དུ་སྒྲུབ་པ་ལ་ཁྱད་པར་ཤིན་ཏུ་ཆེ་བས། རྒྱུད་དང་གྲུབ་ཆེན་གྱི་གཞུང་རྣམས་ནས་རྡུལ་ཚོན་གྱི་ཆོ་ག་བསྔགས་པས་འདི་ནི་གཙོ་བོའོ། །ཞེས་གསུངས་པ་ལྟར་རོ། །རྒྱལ་བའི་དམ་ཆོས་འཛིན་པའི་ཐུགས་བསྐྱེད་སྨོན་ལམ་གྲུབ་པའི་དབང་གིས་དུས་དེ་ནས་བཟུང་ད་ལྟའི་བར་ལ་རྡུལ་ཚོན་གྱི་དཀྱིལ་འཁོར་བཞེངས་པའི་ཕྱག་ལེན་མཐའ་དག་མ་ཉམས་པར་དར་རྒྱས་སུ་བཞུགས་སོ། །དམ་པ་ཉིད་ནས་
ཚད་ལྡན་སྐྱེས་ཆེན་དུ་མའི་ཞབས་ལ་བསྟེན་ཏེ་གསན་རྒྱ་ཆེ་བ་ཆོས་ཀྱི་མཛོད་ལྟ་བུར་བཞུགས་པའི་དབང་གིས་ཕྱོགས་མཐའ་དག་ནས་བླ་མ་དགེ་བའི་བཤེས་གཉེན། དཔོན་པོ་ཆེ་ཆུང་སེར་སྐྱ་དྲག་ཞན་མཐའ་ཡས་པ་པདྨའི་ཚལ་ལ་བུང་བ་བཞིན་དུ་འདུས་ནས་བཀའ་ཆོས་གང་དགོས་ཞུས་པ་རྣམས་ལ་སོ་སོའི་འདོད་མོས་བཞིན་ཆོས་ཀྱི་ཆར་ཕབ། དགུང་ལོ་སོ་ལྔ་པ་ས་བྱིའི་ལོར་སྐྱབས་མགོན་ཐམས་ཅད་གཟིགས་པ་ཆེན་པོ་རྗེ་བཙུན་འཇམ་དབྱངས་བཞད་པའི་རྡོ་རྗེའི་སྤྱན་སྔར་ཁམས་གསུམ་ཆོས་ཀྱི་རྒྱལ་པོ་ཙོང་ཁ་པ་ཆེན་པོའི་བཀའ་འབུམ་ཡོངས་རྫོགས་ཀྱི་ལུང་རྗེ་ཐུའུ་བཀྭན་རིན་པོ་ཆེ་ནས་ཞུས་ཏེ་ཁོང་དང་འདི་པ་རྣམ་གཉིས་ཀྱིས་གཙོས་གྲྭ་སློབ་ཐུན་མོང་ནས་གསན་སྐབས་དེར། སྟོན་པ་དང་འཁོར་དང་གནས་དུས་སོགས་ཕུན་སུམ་ཚོགས་པ་ལྔ་ལྡན་དུ་གྱུར་པས་སྤྲོ་དགའ་དང་སྐྱོ་ཤས་སྤེལ་མའི་ཉམས་ཀྱིས་ཐུགས་གཡོས་ཏེ། སྐྱབས་མགོན་ཐུའུ་བཀྭན་རིན་པོ་ཆེ་དང་རྗེ་འདི་པ་གཉིས་ཀྱིས་སློབ་དཔོན་དཔའ་བོ་དང་ཕྱོགས་གླང་གི་སྤེལ་མར་བསྟོད་པའི་ལུགས་བཞིན་གསུང་སྦྲགས་ནས་སྨོན་ཚིག་ཉམས་མགུར་དུ་བཞེས་པ་རྗེ་འདིས་ཕྱག་བྲིས་སུ་མཛད་པ་ནི། རྗེ་ཐུའུ་བཀྭན་རིན་པོ་ཆེའི་གསུང། པདྨ་ཁོ་དྲི་བསུང་ཆེ་དང་གཅིག །བུང་བ་རྣམས་མངར་དད་ཆེ་དང་གཉིས། །དུས་ཚོད་དེ་དབྱར་ལ་སླེབ་དང་གསུམ། །དེ་གསུམ་པོ་འཛོམ་པའི་དུས་ཚོད་ན། །རྐང་དྲུག་ཀུན་ཚོགས་པ་ཆོས་ཉིད་ཡིན། །སྦྲང་རྩི་ཡི་དགའ་སྟོན་རྒྱས་གྱུར་ཅིག །བླ་མ་རྗེ་བྱིན་རླབས་ཆེ་དང་གཅིག །སློབ་མ་རྣམས་དད་པ་བཟང་དང་གཉིས། །ལས་སྨོན་གྱི་དུས་ལ་སླེབ་དང་གསུམ། །དེ་གསུམ་པོ་
འཛོམ་པའི་དུས་ཚོད་ན། །སྐལ་ལྡན་ཀུན་ཚོགས་པ་ཆོས་ཉིད་ཡིན། །དམ་ཆོས་ཀྱི་དགའ་སྟོན་རྒྱས་གྱུར་ཅིག །སློབ་བུ་མི་ཉག་ཞབས་དྲུང་གིས། སྤྱིར་རྒྱལ་བའི་བསྟན་ལ་མཇལ་དང་གཅིག །སྒོས་ནང་བལྟས་ཤེས་རྒྱུད་དྲང་དང་གཉིས། །མགོན་དགེ་བའི་བཤེས་གཉེན་བསྟེན་དང་གསུམ། །དེ་གསུམ་པོ་འཛོམ་པའི་དུས་ཚོད་ན། །ལེགས་ལམ་ཀུན་གྲུབ་པ་ཆོས་ཉིད་ཡིན། །སྐྱེ་ཀུན་ ཏུ་ཆོས་ལ་སྤྱོད་གྱུར་ཅིག །མཆོག་མཁས་བཙུན་བཟང ་པོའི་རྣམ་པར་ཐར། །སྒོས་བསྟན་པའི་གནད་དུ་ལེགས་རྟོགས་ཏེ། །ཡིད་དམའ་བའི་མལ་དུ་བག་ཕེབ་པའི། །སྐལ་ བཟང་པོ་རྟག་ཏུ ་འཛོམ་གྱུར་ན། །ལས་གང་སྨོན་གྲུབ་པ་ཆོས་ཉིད་ཡིན། །དགྲ་གཉེན་གྱིས་བསླུ་བ་མེད་གྱུར་ཅིག །རྗེ་ཐུའུ་བཀྭན་རིན་པོ་ཆེའི་གསུང༌། དགུང་སྔོན་གྱི་ནམ་མཁའ་དྭངས་དང་གཅིག །ཁྲི་གདུགས་ཀྱི་ཉི་མ་ཤར་དང་གཉིས། །འོད་ཟེར་གྱིས་ཕྱོགས་ཀུན་གསལ་དང་གསུམ། །དེ་གསུམ་པོ་འཛོམ་པའི་དུས་ཚོད་ན། །མུན་པ་ལ་མི་སངས་རང་དབང་མེད། །སྣང་བ་ལ་ཕྱོགས་ཀུན་སྤྱོད་གྱུར་ཅིག །བླ་མ་དང་དཀོན་མཆོག་མཐུ་དང་གཅིག །རང་ཅག་གི་ལྷག་བསམ་སྟོབས་དང་གཉིས། །འགྱུར་མེད་ཀྱི་ཆོས་དབྱིངས་བདེན་པ་གསུམ། །དེ་གསུམ་པོ་གཅིག་ཏུ་ཚོགས་གྱུར་ན། །གང་སྨོན་ལ་མི་འགྱུར་རང་དབང་མེད། །བཀྲ་ཤིས་ཀྱི་དགེ་མཚན་རྒྱས་གྱུར་ཅིག །སློབ་བུ་མི་ཉག་ཞབས་དྲུང་གིས། ཚུལ་དེ་ལྟའི་སྨོན་ཚིག་འོད་སྟོང་ཅན། །བདག་དགའ་དད་སྤྲོ་བའི་རྟ་བདུན་གྱིས། །ལས་མཁའ་དབྱིངས་དག་པར་ཉེར་དྲངས་ཏེ། །ལམ་བཟང་པོའི་ཉིན་མོ་རྩོམ་པ་ཡིས། །མཆོག་དགེ་ལེགས་དཔལ་དང་ལྡན་གྱུར་ཅིག །ཅེས་པ་འདི་ནི་ས་བྱ་ལོར་སྐྱབས་
མགོན་དམ་པ་འཇམ་དབྱངས་བཞད་པའི་དྲུང་ནས། རྗེ་རིན་པོ་ཆེའི་བཀའ་འབུམ་གྱི་ལུང་གྲྭ་སློབ་ཐུན་མོང་ནས་གསན་དུས་ཕུན་སུམ་ཚོགས་པ་ལྔ་ལྡན་དུ་གྱུར་ཚུལ་གྱིས་ཡིད་དྲངས་ཏེ། མཚུངས་བྲལ་ཐུའུ་བཀྭན་རིན་པོ་ཆེ་ནས་མགོ་བརྩམས། ཉམ་ཆུང་མི་ཉག་སྐུ་སྐྱེས་ཀྱིས་མཚམས་སྦྱར་ཏེ་དགེ་ལེགས་ཀྱི་བྱ་བ་འདིས་ཐོག་དྲངས་ནས་བསྐལ་པའི་བར་དུ་བླ་སློབ་ཆོས་དང་འབྲེལ་བའི་རྒྱུན་ལྷ་ཆུའི་ཚུལ་ལྟར་གནས་པའི་རྟེན་འབྱུང་གི་སྨོན་ཚིག་ཏུ་བགྱིས་པའོ། །ཞེས་གསུངས། དེ་སྐབས་སྐྱབས་མགོན་མཆོག་ནས་ཞིང་ཁམས་གཞན་དུ་དགོངས་པ་གཏད་པར་ཉེ་བའི་དབང་གིས་དུས་རྒྱུན་དང་མི་འདྲ་བར་བུ་སློབ་རྣམས་ལ་བསྟན་པའི་ཁུར་བཞེས་དགོས་ཚུལ་ཡང་ཡང་གསུངས་ཤིང༌། ལྷག་པར་ཉིན་གཅིག་རྗེ་འདི་ཉིད་གཅིག་པུར་མདུན་དུ་བྱོན་པའི་ཚེ། འོ། དེང་སང་སངས་རྒྱས་ཀྱི་བསྟན་པ་འདི་ཤིན་ཏུ་ཉམས་དམས་འདུག །ཆོས་རྒྱུན་ཐམས་ཅད་ཀྱང་ཉག་ཇེ་ཕྲར་འགྲོ་གི་འདུག་ཀྱང་སུས་མཉམ་མི་འཇོག་པར་སྣང༌། ཁྱེད་ཀྱིས་ཐུགས་སྟོབས་བསྐྱེད་ནས་བླ་མ་དགེ་བའི་བཤེས་གཉེན་རྣམས་ཀྱི་སྤྱན་སྔར་དབང་ལུང་ཁྲིད་རྗེས་གནང་སོགས་གང་ཐོབ་པ་ཐམས་ཅད་དང༌། ངོས་ཀྱི་རྩ་ནས་ཀྱང་མདོ་སྔགས་ཀྱི་ཆོས་མང་དུ་ཐོབ་ཡོད་པས་སྤེལ་གང་ཐུབ་ཀྱིས་ངས་བཤད་པ་དོན་ལྡན་དུ་འགྱུར་བ་ཞིག་མཛད་དགོས། ལྷག་པར་ད་ལན་བྲེལ་བ་ཆེ་བཞག་ཆུང་བཞག་གིས་བརྩོན་པ་བསྐྱེད་ནས་རྗེ་བླ་མའི་བཀའ་འབུམ་གྱི་ལུང་ཕུལ་བ་འདི་བརྒྱུད་པ་ཁུངས་དག་ཅིང་བཙུན་པ་ཡིན། ཆོས་བདག་པོར་འཕྲོད་པ་ཡིན་པས་
ཐུགས་ལ་བཅངས་ཏེ་ཕྱོགས་མཐའ་དག་ནས་དོན་གཉེར་བ་མང་པོ་བྱུང་ན་ཁྱེད་ཉིད་ནས་དཀའ་ཚེགས་མེད་པར་སྤེལ་ཅི་ཐུབ་གྱིས། འཇམ་མགོན་བླ་མའི་བསྟན་པ་སྤྲིན་བར་གྱི་ཉི་མ་ལྟ་བུ་འདི་ཐབས་སྣ་ཚོགས་ཀྱི་སྒོ་ནས་དར་རྒྱས་སུ་འགྲོ་བའི་ཐུགས་སྟོབས་ཆེར་བསྐྱེད་དགོས་ཞེས་སོགས་ཕྱི་ནང་གསང་བའི་གསུང་གི་ལུང་བསྟན་མང་དུ་གནང༌། ལུང་གསན་མཁན་གྱི་ཁྲོད་དེ་ནས་རྒྱུན་མང་དུ་སྤེལ་མཁན་ཉིད་ལྟ་བུ་མ་བྱུང་བ་འོག་ཏུ་གསལ་བས་གསུང་དེའང་འབྱུང་འགྱུར་མངོན་སུམ་དུ་གཟིགས་པའི་འབྲས་རྟགས་སུ་སྣང་ངོ༌། །དེའི་སྐབས་སུ་རྗེ་འཇམ་དབྱངས་བཞད་པ་རིན་པོ་ཆེས་འདི་པར་ཁྱེད་ལོ་ཁ་ཤས་ཀྱི་རིང་ལ་ངའི་དགོན་པ་བཀྲ་ཤིས་འཁྱིལ་དུ་ཕེབས་ནས་བཞུགས་དགོས་ཚུལ་མང་དུ་གསུངས་ཏེ་དགོངས་གཞི་ཁྱད་པར་ཅན་ཞིག་ཡོད་པར་སྣང༌། ཡང་ཁྱེད་ཀྱིས་སྐུ་གོང་མས་མཛད་པའི་སྐྱེས་རབས་ཀྱི་འགྲེལ་པ་རྩོམ་འཕྲོ་མ་དེ་ཧ་ཅང་འགངས་ཆེ་བས། འཕྲོ་འདི་ཁྱེད་ལ་སྐལ་བར་བཞག་པ་ལྟ་བུ་ཡིན་པས་མཇུག་རྫོགས་པ་ཞིག་བྱུང་ན་ལེགས་གསུང༌། གཞན་སྤྲུལ་སྐུ་ཆེ་ཕྲ་དུ་མ་དང༌། དབང་ཕྱོགས་ཀྱི་ཏཱ་རའི་གང་གའི་མེར་གན་པཎྚི་ཏ་བླ་མ་སོགས་མང་པོས་ཀྱང་རྩོམ་འཕྲོ་བསྐུལ་མ་མཛད་འདུག་ཀྱང་དུས་ལ་མ་སླེབ་པ་ལྟ་བུས་གནང་རྒྱུར་མ་སོང་སྣང༌། སྨན་པ་བླ་མ་མཛད་མཁན་ཕལ་ཆེར་མདོ་སྔགས་ཀྱི་སྐུ་ཡོན་བཟང་ཡང་སྨན་ལ་འདྲེས་ཆུང་བས་ལམ་རིམ་སོགས་བཀའ་སྤྱི་འགྲོ་ཙམ་ལས་མི་འོང་ལ། རྗེ་ཉིད་གསོ་རིག་ལའང་མཁྱེན་པ་རྒྱས་པར་གྲྭ་ཁྲོད་ནས་སྨན་གྱི་ལག་ལེན་གཤའ་མ་སློབ་འདོད་པ་རྣམས་ལ་སོ་སོའི་བློ་དང་འཚམ་པར་ཚེའི་རིག་བྱེད་ཀྱི་གནད་
མཐའ་དག་གནས་དྲུག་ཏུ་བསྡུས་ཏེ་སྟོན་པ་དཔའ་བོའི་ཡན་ལག་བརྒྱད་པ་དང༌། དཔལ་ལྡན་རྒྱུད་བཞི་རྩ་འགྲེལ་གསུམ་སོགས་སྨན་གྱི་གཞུང་ཆེ་བ་རྣམས་དང༌། ཆ་ལག་བཅོ་བརྒྱད། ཉམས་ཡིག །བྱེ་བ་རིང་བསྲེལ། ལག་ལེན་བདུད་རྩིའི་བུམ་པ་ཆེ་ཆུང་སོགས་གཞུང་མང་པོ་གུང་བསྒྲིགས་ཏེ་དོགས་སློང་དང་དམར་ཁྲིད་ལག་ལེན་དུ་འདེབས་ཚུལ་གྱི་བློ་སྐྱེད་མང་དུ་གནང་བས་ཕན་ཐོགས་བླ་ན་མེད་པ་བྱུང༌། དེ་ལྟར་ཆོས་སྲིད་ཟུང་འབྲེལ་གྱི་འཛིན་སྐྱོང་གཞན་འགྲན་མེད་པའི་ངང་ནས་ལོ་དྲུག་གི་རིམ་པར་གསོ་རིག་གྲྭ་ཚང་གི་བྱ་བ་གང་རྒྱས་མཛད་དེ། དགུང་ལོ་སོ་བདུན་པ་འགལ་བྱེད་ཅེས་པ་ལྕགས་ཕག་ལོར་ཁྲིའི་དགོངས་པ་ཞུས་ནས་ཟུར་བཞུགས་མཛད། ཆ་ཧར་ཤོག་གི་དར་ཧན་རབ་འབྱམས་པ་ངག་དབང་ཆོས་དར་གྱིས་གཙོས་སེར་སྐྱ་ཉི་ཤུ་ལྷག་གིས། འཇམ་དཀར། ཛཾ་བྷ་ལ། ཐུགས་རྗེ་ཆེན་པོ་ཕྱག་བཞི་པའི་རྗེས་གནང་ཞུས་པ་བཞིན་སྩལ། རབ་འབྱམས་པ་དེའི་མོས་འདུན་ལྟར་བསྟན་སྲུང་འགའ་ཞིག་ལ་མཆོད་གཏོར་འབུལ་ཚུལ་དངོས་གྲུབ་གཏེར་མཛོད་ཅེས་བྱ་བའང་ལྗགས་རྩོམ་གནང༌། གྲོང་པའི་སྐྱེ་བོ་འགའ་ཞིག་ལ་བསྙེན་གནས་དང༌། བསྒྲུབ་བྱ་དུ་མར་དགེ་ཚུལ་སློང་གི་སྡོམ་པ་སྩལ། ལ་ཀྱཱ་ཞབས་དྲུང་ངོ་གཡོག་ནས་གསོལ་བ་རྩེ་གཅིག་ཏུ་བཏབ་སྟེ་རྗེ་རིན་པོ་ཆེའི་གསུང་འབུམ་གྱི་ལུང་ཞུས་པ་ལྟར་ཁོང་དཔོན་གཡོག་དང་གདན་སའི་དགེ་བའི་བཤེས་གཉེན་མང་པོ་གཞན་སེར་སྐྱ་སུམ་བརྒྱ་ལྷག་ཙམ་དང་བཅས་ལ་ལྗགས་ལུང་ཆ་ཚང་བར་སྩལ། དེ་ནས་ཆོས་ཀྱི་རྗེ་དོན་གྲུབ་རིན་པོ་ཆེའི་གདན་ས་བྱ་
ཁྱུང་དགོན་པར་ཕེབས། བླ་གྲྭ་ཐུན་མོང་ནས་ཚོགས་ཆེན་གྱི་ཆོས་ཁྲིར་གདན་དྲངས་ནས་གསོལ་བ་བཏབ་པ་བཞིན་འདུས་ཚོགས་ཡོངས་ལ། ལམ་གྱི་གཙོ་བོ་རྣམ་གསུམ་གྱི་ཁྲིད་མདོ་རྒྱུད་བསྟན་བཅོས་ཀྱི་ལུང་གི་ཁུངས་དང་བཅས་པ་ཤིན་ཏུ་རྒྱས་པ་ཞིག་སྩལ། ཆོས་སྡེར་མང་འགྱེད་ཀྱི་བསྙེན་བཀུར་ཞུས་ཤིང༌། ནང་རྟེན་སོགས་ལ་མཆོད་འབུལ་གྱ་ནོམ་པ་དང་བཅས་སྐྱབས་སེམས་ཐུན་དྲུག་གི་རྣལ་འབྱོར་སོགས་དང་སྤྱན་འདྲེན་ཁྲུས་གསོལ། བསྟན་པ་རྒྱས་པའི་སྨོན་ལམ་སོགས་སྤྱན་དམིགས་ནན་ཏན་གྱི་སྒོ་ནས་གང་རྒྱས་མཛད། དེར་ཡུན་རིང་པོར་བཅད་རྒྱ་གང་དམ་གནང་ནས་ཡི་དམ་ལྷའི་ལྗགས་བསྙེན་དང་གཙོ་བོར་བསག་སྦྱང་ལ་འགྲུས་པར་མཛད། དགུང་ལོ་སོ་དགུ་པ་བྲ་མཱ་དཱི་ཞེས་པ་ཆུ་གླང་གནམ་ལོ་གསར་བཞད་ཀྱི་ཟླ་བ་དང་པོའི་ཚེས་བཅུ་གཉིས་ཀྱི་ཉིན་སྐུ་འབུམ་ཆོས་སྡེ་ཆེན་པོར་དཔལ་ལྡན་སྨད་རྒྱུད་གྲྭ་ཚང་གི་སེང་ཁྲིར་བཞུགས། དེ་སྐབས་མཚོ་སྔོན་གྱི་ཆིང་ཝང་བསོད་ནམས་རྡོ་རྗེ་དང་པཻ་ཟི་མི་འགྱུར་སོགས་ཆེ་དྲག་མང་པོ། སྨད་ཕྱོགས་ཀྱི་སྦྱིན་བདག་ཆེ་ཕྲ་དུ་མ། ཁྲི་ཀའི་ཕྱོགས་ནས་སེར་སྐྱ་བརྒྱ་ཕྲག་ལྷག་བཅས་ཀྱིས་སྤོས་འདྲེན་ཁྲི་དར་དངོས་འབུལ་སོགས་བཏེག་ནས་ཁྲི་ཁར་གདན་དྲངས་ཏེ་རྟེན་འབྲེལ་གང་ལེགས་བསྒྲིགས། རྒྱུད་གྲྭའི་འདུས་ཚོགས་སུ་བཀའ་ཆོས་སྩལ་ཅིང་མང་འགྱེད་ཀྱི་བསྙེན་བཀུར་དང༌། ཚོགས་ཆེན་གྱི་དགེ་འདུན་སུམ་སྟོང་བརྒྱ་ཕྲག་དྲུག་ལྷག་ལའང་མང་འགྱེད་སོགས་རྒྱ་ཆེར་ཕུལ། དེ་ནས་ལོ་རེ་བཞིན་གྲྭ་ཚང་རང་གི་ཐུན་མོང་མ་ཡིན་པའི་སྒྲིག་ལམ་བཞིན་བླ་མ་རྒྱུད་མཆོད་སྔོན་དུ་འགྲོ་བའི་སྒོ་ནས་རྒྱུད་ཐམས་
ཅད་ཀྱི་རྒྱལ་པོ་དཔལ་གསང་བ་འདུས་པའི་རྩ་རྒྱུད་ཀྱི་དགོངས་དོན་མཐའ་དྲུག་ཚུལ་བཞིས་རྒྱས་བཏབ་པའི་གནད་རྣམས་བཤད་རྒྱུད་ཆེན་པོ་དྲུག་གི་སྒོ་ནས་ལེགས་པར་བཤད་པའི་ལམ་སྲོལ་ཆེན་པོ་དཔལ་ལྡན་ཟླ་བའི་འགྲེལ་པ་སྒྲོན་གསལ་དང་བཅས་པ། རྗེ་རིན་པོ་ཆེས་མཛད་པའི་བསྡུས་དོན། ཟུར་མཆན། དཀྱུས་མཆན། མཐའ་དཔྱོད་རྣམས་སྦྲགས་ནས་གཏན་ལ་འབེབས་པའི་བཤད་རྒྱུན་དྲི་མ་མེད་པ་འཇམ་མགོན་ཙོང་ཁ་པ་ཆེན་པོ་ནས་རིམ་པར་བརྒྱུད་པ་དཔལ་ལྡན་སྨད་རྒྱུད་པའི་སྲོལ་ཇི་ལྟ་བ་བཞིན་ལ། རྗེའི་གསུང་རབ་གཞན་རྣམས་དང་རྒྱ་བོད་ཀྱི་མཁས་པ་དུ་མའི་གཞུང་ཁུངས་ཐུབ་མང་པོ་གུང་བསྒྲིགས་པའི་བཤད་པ་དང༌། དཀའ་བའི་གནས་མཐའ་དག་ལ་དགག་གཞག་བསྐྱངས་ཏེ་དོགས་པའི་མཐའ་ཆོད་ངེས་སུ་མཛད་པས། དགེ་བའི་བཤེས་གཉེན་རྣམས་རྒྱུད་སྡེ་རྒྱ་མཚོའི་ཡང་སྙིང་གསང་བ་བླ་ན་མེད་པའི་བདུད་རྩིས་ངོམས་པར་གྱུར་ཏེ། རྒྱུད་དོན་ལམ་གྱི་རིམ་པར་བསྒྲིག་ཚུལ་གྱི་གནད་ངེས་པ་གཏིང་ཚུགས་པ་བྱུང༌། མཐའ་དྲུག་ཚུ༷ལ་བཞིས་རྒྱས་བཏབ་རྒྱུད་དོན་བཤད་རྒྱུད་ཀྱིས་དགྲོལ་བཀའ་ཁྲི༷མས་བཞིན། །གསང་ཆེན་བསྟ༷ན་པ༷འི་སྙིང་པོ་གསལ་བྱེད་དཔལ་ལྡན་ཟླ་བ་གྲགས་པའི་གཞུང༌། །གནམ་ལ་ཉི༷་ཟླ་རྣམ་གཉིས་ས་ལ་གསལ་བ་གཉིས་ཞེས་གྲགས་པ་ལས། །སྒྲོན་མ༷་རབ་ཏུ་གསལ་བའི་དགོངས་དོན་ཡིད་བཞིན་ནོར་བུའི་གཏེར་མཛོད་ཕྱེས། །གཞན་ལའང་ཕྱིན་ཅི་མ་ལོག་པར་འཆད་ཐུབ་པའི་དགེ་བཤེས་མང་དུ་ཐོན་པས་བསྟོད་བསྔགས་ཀྱི་རོལ་མོ་
སྐལ་བཟང་རྣ་བའི་རྒྱན་དུ་གྱུར། སུ་ཉིད་ཕྱོགས་ནས་འོངས་པ་མཁྱེན་དཔྱོད་ཡངས་པ་ཞབས་དྲུང་སྐལ་བཟང་བསྟན་པའི་སྒྲོན་མེས་ཞུས་ངོར་འཇིགས་བྱེད་ཀྱི་དབང་དང་ཐུགས་རྗེ་ཆེན་པོའི་དབང་སྟ་གོན་བཅས་ཚེ་དཔག་མེད་གྲུབ་རྒྱལ་མའི་རྗེས་གནང༌། སྒྲོལ་མའི་རྗེས་གནང༌། གསང་འདུས་རྩ་རྒྱུད་ཀྱི་ལུང༌། ལམ་རིམ་གྱི་ཁྲིད། སྨན་ཆོག་རྒྱས་བསྡུས་ཀྱི་ལུང་སོགས་བཀའ་ཆོས་དུ་མ་སྩལ། ཁོ་རང་གི་འདོད་མོས་བཞིན་ལམ་རིམ་གྱི་དམིགས་རྣམ་ཆ་ཚང་བར་སྐྱོང་ཚུལ་དང་འབྲེལ་བའི་གསོལ་འདེབས་མགུར་དབྱངས་སུ་བྱས་པ་ཞིག་ལྗགས་རྩོམ་མཛད། དགེ་བསྙེན་གྱི་སྡོམ་པ་ཞུ་བ་འགའ་ཞིག་བྱུང་བའི་འདུན་པ་བསྐངས། ཚོགས་ཆེན་གྱི་སྨོན་ལམ་གསུང་ཆོས་སོགས་ལ་ཆག་མེད་དུ་ཕེབས་ཏེ་བསྟན་པ་རྒྱས་པའི་ཐུགས་སྨོན་གང་ལེགས་མཛད་ཅིང་བདག་གཞན་གཉིས་ཆར་གྱི་དགེ་བ་རྫོགས་བྱང་དུ་བསྔོ་བ་གནང༌། དགོན་པའི་ནང་དང་ཕྱོགས་གཞན་ནས་འོང་བའི་བསྒྲུབ་བྱ་བརྒྱ་དང་ལྔ་བཅུ་ལྷག་ལ་དགེ་ཚུལ་སློང་གི་སྡོམ་པ་ཕོག་སྟེ་ལྷག་པ་ཚུལ་ཁྲིམས་ཀྱི་བསླབ་པའི་བདུད་རྩིས་ཡིད་ཀྱི་བུམ་བཟང་གང་བར་མཛད། ཆོས་མཚམས་ཕལ་ཆེར་བཅད་རྒྱར་བཞུགས་ནས་ཡི་དམ་ལྷ་དུ་མའི་ལྗགས་བསྙེན་མཛད། རྒྱུད་པ་གྲྭ་ཚང་ནས་ལོ་རེ་བཞིན་ཟླ་ཟད་སྐབས་བསྟན་པ་སྤྱིའི་རིམ་གྲོར་དམིགས་ནས་ཆོས་རྒྱལ་ལྕགས་མཁར་ཟུར་དགུ་པ་དང་བཅུ་དྲུག་པ་གཉིས་རེས་མོས་ཀྱིས་སྒྲུབ་སྲོལ་ཉིད་ཀྱི་སྐུ་གོང་མའི་དུས་བཙུགས་པ་མ་ཉམས་པར་གནས་པས་ལོ་སྔ་ཕྱིར་གཉི་གའི་ཚོགས་དབུར་བཞུགས་ཏེ་སྒྲུབ་པ་ཚད་ལྡན་བྱས་ནས་མཇུག་ཏུ་གཏོར་རྒྱག་སྐབས་རྒྱུད་པའི་གཏོར་རྒྱག་དང་སྦྲགས་ཏེ་གྲྭ་ཚང་ཕན་ཚུན་གྱི་གཏོར་མའང་སྡེབ་པའི་སྲོལ་
བཞིན། རྗེ་འདི་པས་གྲྭ་ཚང་སོ་སོའི་གཏོར་མ་དང་སྒོས་ཀྱི་རྒྱུད་པའི་ཟོར་དང་ལྕགས་མཁར་རིམ་པ་བརྡབ་པའི་ཚེ་རླུང་ཁ་ཕར་ལྡོག་ཅིང་མེ་ལྕེ་དུམ་བུ་དུམ་བུར་ཆད་ནས་འགྲོ་བ་སོགས་ཟིལ་ཆེ་བ་ཚམ་རྔམ་དཀྱུས་དང་མི་འདྲ་བར་ཤིན་ཏུ་འཇིགས་པ་བྱུང༌། གནམ་ལོ་གསར་ཚེས་ཀྱི་ཉིན་རྒྱུད་པའི་བླ་བྲང་གི་སྲོལ་བཞིན་དཔལ་ལྡན་འདོད་ཁམས་དབང་མོའི་གཏོར་སྐྱོང་མངའ་གསོལ་སོགས་ཕྱག་ལེན་ལྟར་གནང༌། སྨད་རྒྱུད་གྲྭ་ཚང་གི་བླ་མ་དབུ་མཛད་སྐེ་རྒྱ་ཞབས་དྲུང༌། དགེ་བསྐོས་དཀའ་བཅུ་བློ་བཟང་དར་རྒྱས། བྱིང་འདྲེན་ཤེས་རབ་རིག་འཛིན། སྤྱི་གཉེར་རབ་འབྱམས་པ་བསྟན་འཛིན་རྣམ་རྒྱལ། དགེ་སློང་བློ་གྲོས་མཆོག་ལྡན། དགེ་རྒན་དཀའ་བཅུ་བློ་བཟང་བཀྲ་ཤིས། སྔགས་རམས་པ་འཇིགས་བྱེད་རྣམ་རྒྱལ། སྔགས་རམས་པ་ཚུལ་ཁྲིམས་བཟང་པོ་སོགས་གྲྭ་ཚང་རང་གི་ལས་སྣེའི་རིགས་དང༌། ཚོགས་ཆེན་ཞལ་ངོ་རབ་འབྱམས་པ་ཡོན་ཏན་དར་རྒྱས་སོགས་ལས་སྣེ་ཐུན་མོང་ནས་དཔལ་རྡོ་རྗེ་འཇིགས་བྱེད་ཀྱི་གཏོར་ཆེན་ལྕགས་མཁར་ཟུར་བཅུ་དྲུག་པར་ཉེ་བར་མཁོ་བའི་ཞལ་འདོན་གྱི་རིམ་པ་འགའ་ཞིག་དང༌། ལས་རིམ་རྣམས་དགོས་ཞེས་བསྐུལ་བ་བཞིན། དཔལ་རྡོ་རྗེ་འཇིགས་བྱེད་ཀྱི་གཏོར་ཆོག་འཁྲུལ་འཁོར་གྱི་ལུགས་སུ་བྱས་པ་ལྕགས་མཁར་ཟུར་བཅུ་དྲུག་པ་ལ་ཉེ་བར་མཁོ་བའི་ལས་རིམ་དྲག་པོ་ཕོ་ཉ་བཞད་པའི་སྒྲ་དབྱངས་ཞེས་པ་དང༌། ཡང་ཟུར་དགུ་པའི་སྐབས་སུ་ཉེ་བར་མཁོ་བའི་ལས་རིམ་ཞལ་འདོན་གྱི་རིམ་པ་འགའ་ཞིག་དང༌། ཀུན་སྤྱོད་ཀྱི་གོ་རིམ་ལག་ཏུ་བླང་
བདེ་བ་ཡི་གེར་བཀོད་པ་དངོས་གྲུབ་ཀུན་འབྱུང་ཞེས་བྱ་བ་སོགས་ལྗགས་རྩོམ་མཛད། གྲྭ་ཚང་གི་ཐུན་མོང་མ་ཡིན་པའི་བསྒྲིགས་ལམ་ཀུན་སྤྱོད་ཀྱི་རིམ་པ་འགའ་ཞིག་ཅུང་ཟད་བག་ཡངས་སུ་སོང་ཡོད་པ་ཇེ་དམ་དུ་བཏང་སྟེ། ཆོས་འདུལ་བའི་དགོངས་པ་བཞིན་བཅའ་ཡིག་གི་སྟེང་ནས་ཅུང་ཟད་ཀྱང་མ་འདས་པ་དང༌། ལྷག་པར་འཆད་ཉན་གྱི་རྟིང་བསྐུལ་ནན་ཏན་མཛད་པ་ལ་བརྟེན་ནས་གྲྭ་པ་རྒན་གཞོན་མཐའ་དག་འདུན་པ་ཇེ་ཆེར་སོང་སྟེ། བསྐྱེད་རྫོགས་ཀྱི་རིམ་པ་བློ་ལ་གཟུང་ཞིང་རྗེ་ཉིད་ལ་རྒྱུགས་ཕུལ་ནས་ཁྲིད་སོགས་ཞུ་མཁན་དང༌། འགྲེལ་པ་བཞི་སྦྲགས་ཀྱི་སྐོར་ནས་དོགས་གཅོད་ཞུ་མཁན་ཆེས་མང་པོ་བྱུང་བས། སོ་སོའི་དོགས་ལན་ཞིབ་མོར་བཀྲོལ་བས་བློ་གསལ་རྣམས་སྔོན་མེད་ལེགས་བཤད་ཀྱིས་ཚིམ་པར་གྱུར་ཏེ་དད་པའི་སྙིམ་པ་སྤྱི་བོའི་རྒྱན་དུ་བཀོད་ཅིང་བསྔགས་པའི་མེ་ཏོག་གིས་མཆོད་པ་ལྷུར་ལེན་པ་བྱུང་བས་བསྒྲིག་ལམ་འཆད་ཉན་གཉི་ག་འགྲན་པ་བཞིན་གོང་འཕེལ་དུ་གྱུར་ཏོ། །རྒྱུན་གྱི་སྤྱོད་ལམ་ཚོགས་ཆོས་འགྲིམ་ཚུ༷ལ་སོགས། །འདུལ་བའི་བཅས་ཁྲི༷མས་མཚམས་ལས་མི་འདའ་བས། །བསྟ༷ན་པ༷འི་དམིགས་རྐྱེན་ཁོ་ནར་ཕན་པའི་ཐབས། །ཉི༷་མ༷་རེ་རེ་བཞིན་ཡང་བརྩོན་པར་མཛད། །དེ་ལྟར་ཚུ༷ལ་ཁྲི༷མས་གཙང་མའི་ཀ་ལཱ་ཤ། །བསྟ༷ན་པ༷འི་བྱ་བ་བཤད་སྒྲུབ་བདུད་རྩིའི་ཆུས། །ཡོངས་སུ་བཀང་སྟེ་འགྲོ་རྣམས་ཚིམ་མཛད་པ། །ཀུན་མཁྱེན་ཉི༷་མ༷འི་གཉེན་གྱི་གདུང་འཚོབ་གྱུར། །སྐབས་ཤིག་ཨར་ཚ་ཐུའི་དགོན་དགའ་ལྡན་བཀྲ་ཤིས་ཆོས་གླིང་གི་གྲྭ་པ་དགེ་སློང་ངག་དབང་སྙན་གྲགས་ཀྱིས་ཕྱོགས་དེའི་གཞི་བདག་ལ་གསོལ་མཆོད་ཅིག་
ཞུས་པའང་རྩོམ་པ་མཛད། ཆ་ཧར་ཕྱོགས་ཀྱི་ཆོས་སྤྱན་ཡངས་པའི་བཀའ་འགྱུར་བ་ཆོས་རྗེ་བློ་བཟང་བཀྲ་ཤིས། དད་ལྡན་བློ་བཟང་ཉི་མ་ངོ་གཡོག་བཅས་ལ་འཇིགས་བྱེད་ཀྱི་དབང༌། སྒྲོལ་དཀར་དང་རྟ་མགྲིན་གྱི་རྗེས་གནང་སོགས་སྩལ། ཆོས་རྗེ་བློ་བཟང་བཀྲ་ཤིས་ཀྱིས་བསྐུལ་ངོར་སྐྱེས་བུ་ཆེན་པོ་དམ་ཅན་རྡོ་རྗེ་ལེགས་པ་དང་སྐུ་ལྔའི་གསོལ་མཆོད་བྱ་ཚུལ་ལེགས་ཚོགས་འཕྲིན་ལས་དཔལ་འབར་ཞེས་བྱ་བ་ལྗགས་རྩོམ་མཛད། གྲྭ་ཚང་དང་ལྷན་དུ་དབྱར་ཞལ་བཞེས་གནང་སྟེ་དབྱར་གྲོལ་རྗེས་བསྟན་པའི་གསལ་བྱེད་ཨ་ཀྱཱ་རིན་པོ་ཆེ་བློ་བཟང་འཇམ་དབྱངས་རྒྱ་མཚོ་དབུས་གཙང་ནས་ཕྱིར་ཕེབས་པས། རྗེ་འདི་པར་བཀའ་ཆོས་མང་པོའི་སྙན་གསན་ཕུལ་བ་བཞིན་བ་རི་བརྒྱ་རྩ་དང༌། སྒྲུབ་ཐབས་རྒྱ་མཚོ་སོགས་ཀྱི་རྗེས་གནང་དང༌། གཞན་ལུང་ཁྲིད་མང་པོ་བཅས་སྩལ་ཏེ་བཞེད་པ་ཡོངས་སུ་བསྐངས། དགེ་ཚུལ་སློང་གི་སྡོམ་པ་ཞུ་མཁན་བརྒྱ་ལྷག་ཙམ་བྱུང་བ་རྣམས་སོ་སོར་བསླབ་པའི་གཞི་ལ་བཀོད། དགུང་ལོ་ཞེ་གཅིག་པ་སྲིན་པོ་ཞེས་པ་ཤིང་ཡོས་ལོར་དབྱར་ཁ་ཐན་ཆེན་བྱུང་ནས་བླ་སྔགས་མང་པོས་ཆར་འབེབ་ལན་མང་པོ་བྱས་ཀྱང་གཏན་མ་བབ་པས་མི་ཕྱུགས་ལོ་ཏོག་སོགས་ལ་གནོད་ཚབས་ཆེ་བར་བརྟེན་ཚོགས་ཆེན་ཞལ་ངོ་སོགས་ལས་སྣེ་ཐུན་མོང་ནས་ཆོས་སྐྱོང་ལ་ལུང་བསྟན་ཞུས་པས་རྒྱུད་པ་དཔོན་སློབ་ཀྱིས་གཙོས་དགེ་འདུན་པ་ཉི་ཤུ་རྩ་གཅིག་གིས་ཆུ་མིག་སྦལ་ཁའི་ཆུ་མགོར་ཕེབས་ཏེ་ཆར་འབེབ་བྱེད་དགོས་ཚུལ་བབས་པ་བཞིན་ཉིན་བདུན་གྱི་རིང་ལ་དམིགས་
བརྩེ་མའི་ལས་ཚོགས་ནང་གི་ཆར་འབེབ་ཚུལ་དེ་བཞིན་བསྒྲུབས་པ་ན་ཆར་རྒྱུན་འཇམ་པོ་ཉིན་ཞག་དྲུག་ཏུ་མ་ཆད་པར་བབས་ཏེ་ལོ་ཏོག་རྣམས་ལེགས་པར་གསོས་ཤིང་མི་ཕྱུགས་ཀུན་དབུགས་ཕྱུང་སྟེ་བདེ་དགའི་དཔལ་ལ་བཀོད། རྒྱ་བོད་མཐའ་དག་ནས་ད་རེས་སྤྱིར་དཀོན་མཆོག་གི་བཀའ་དྲིན་དང༌། ལྷག་པར་རྗེ་འདི་པའི་ཐུགས་རྗེ་ཁོ་ན་ཡིན་པར་ཐེ་ཚོམ་མེད། དེ་མིན་ན་མི་ཕྱུགས་ཀུན་ལ་ཉམ་ཉེས་ཆེན་པོ་ཞིག་ཡོང་ཐག་ཆོད་དུ་འདུག་ཅེས་བཀའ་དྲིན་རྗེས་སུ་དྲན་པ་བྱུང༌། ཤེར་ག་ལ་དག་ཐོ་ཡོན་ནས་རྗེ་རིན་པོ་ཆེའི་གསུང་འབུམ་གྱི་ལུང་ཞུས་པ་བཞིན་དགེ་འདུན་བརྒྱ་ལྷག་ཙམ་ལ་ལྗགས་ལུང་ཚང་བར་སྩལ་ཏེ་དགེ་ལྡན་རིང་ལུགས་རྒྱས་པའི་རྒྱུར་བསྔོ་བའི་མཚམས་སྦྱར་ཤུགས་དྲག་མཛད། དམ་པ་འདི་ཉིད་ནས་གྲྭ་ཚང་གི་འཛིན་སྐྱོང་གནང་ཚུལ་ས་བཅད་མ་སྟོངས་ཙམ་གྱིས་ཁྲིར་བཞུགས་པའི་མིང་ལེན་ཐབས་མ་ཡིན་པར་རྒྱལ་བསྟན་རིན་པོ་ཆེའི་ཡང་སྙིང་རྗེ་ཙོང་ཁ་པའི་བསྟན་པ་དྲི་མ་མེད་པ་འདི་ཉིད་ཐུགས་ལ་དགོངས་ཏེ་ཆོས་སྲིད་གང་གི་ཐད་ནས་ཀྱང་ཐུགས་ཁུར་ཚད་མེད་པ་བཞེས་ཏེ་ཐབས་མཁས་ཀྱི་སྒོ་དུ་མ་ནས་བསྐྱངས་པས་ཆོས་འབྱོར་རྫོགས་ལྡན་གྱི་དཔལ་ལ་རེག་པར་གྱུར། དགུང་ལོ་ཞེ་གཉིས་པ་མེ་འབྲུག་ལོར་དཔྱིད་ཀ་རྒྱུད་པའི་ཁྲིའི་ལས་ཁུར་གྱི་དགོངས་པ་ཞུས་ཏེ། རེ་ཞིག་བཅད་རྒྱ་དམ་པོས་ལམ་གྱི་གཙོ་བོ་རྣམ་གསུམ་གྱི་ཉམས་ལེན་དང་ལྷག་ལྷ་དུ་མའི་བསྙེན་པ་ལ་བརྩོན་པར་མཛད། སྐབས་ཤིག་མཚོ་སྔོན་གྱི་ཆིང་ཝང་བསོད་ནམས་རྡོ་རྗེ། པཻ་ཟི་མི་འགྱུར་སོགས་ཀྱིས་གདན་དྲངས་པ་བཞིན་དེ་ཕྱོགས་སུ་ཕེབས། ཝང་
ལ་ཚེ་དཔག་གྲུབ་རྒྱལ་མའི་རྗེས་གནང་སྩལ་ཅིང་ཞག་ཤས་ཚེ་སྒྲུབ་གནང༌། འཇིགས་བྱེད་ཀྱི་བསྙེན་པ་རྒྱུན་རིང་སྔོན་དུ་བཏང་སྟེ་ཞི་བའི་སྦྱིན་སྲེག་མཛད། ཕྱོགས་ཀུན་ནས་ལྷགས་པའི་མཇལ་བ་མང་པོར་ཁྲུས་དབང༌། ལྗགས་བསྔོ། བཀའ་བསྒོ་སོགས་ཆོས་སྦྱིན་སྩལ། རབ་བྱུང་དང་དགེ་ཚུལ་སློང་གི་དངོས་པོ་དོན་དུ་གཉེར་མཁན་བཞི་བཅུ་ལྷག་ལ་སྡོམ་པ་སྩལ། དེ་ནས་པཻ་ཟིའི་ཨུར་གེར་ཕེབས་ཏེ་དཔོན་པོའི་མོས་འདུན་བཞིན་སྒྲོལ་དཀར་གྱི་ཚེ་སྒྲུབ་དང་ཡི་དམ་ཆོས་སྲུང་ལ་གསོལ་མཆོད་ཞུས་ཤིང༌། ཀུན་རིག །ཚེ་དཔག་མེད། ཐུགས་རྗེ་ཆེན་པོ་རྣམས་ཀྱི་དབང་སྟ་གོན་དང་བཅས་པ་སྩལ། བསྒྲུབ་བྱ་སུམ་ཅུ་ཙམ་ལ་དགེ་ཚུལ་སློང་གི་སྡོམ་པ་གནང༌། དེ་ནས་སྐུ་འབུམ་དུ་ཕེབས། སྨད་སོག་པ་དགེ་སློང་ངག་དབང་བརྩོན་འགྲུས་ངོ་གཡོག་ནས་ཞུས་པ་བཞིན་འཇིགས་བྱེད་ཀྱི་དབང༌། སེང་གདོང་མའི་རྗེས་གནང༌། མགོན་པོ་བར་ཆད་ཀུན་སེལ་གྱི་རྗེས་གནང༌། གཞན་ལུང་ཐོར་བུ་སྣ་ཚོགས་བཅས་སྩལ། དེས་བསྐུལ་ངོར་རྡོ་རྗེ་རྣམ་འཇོམས་ཀྱི་སྒྲུབ་ཐབས་དངོས་གྲུབ་ཀུན་འབྱུང་ཞེས་པ་ལྗགས་རྩོམ་མཛད། དེ་ནས་ཁྲི་ཀའི་ཕྱོགས་སུ་ཕེབས་ཏེ་མཆོད་རྟེན་གྱི་བླ་བྲང་རང་དུ་ཡུན་རིང་པོའི་བར་སྐུ་མཚམས་ལ་བཞུགས་ནས་ཟབ་ལམ་རྡོ་རྗེའི་རྣལ་འབྱོར་སྐྱོང་བར་མཛད། བདེ་གསང་འཇིགས་གསུམ་གྱི་བདག་འཇུག་ལན་མང་དུ་བཞེས་ཤིང་བསག་སྦྱང་ལའང་ཤིན་ཏུ་འགྲུས་པར་མཛད། ཁྲི་ཀའི་རྟེན་གྱི་གཙོ་བོ་གྲེན་བྲུའི་ལྷ་ཁང་ཞེས་གྲགས་པར་དཀར་ཆག་ཅིག་དགོས་ཞེས་རོང་པོ་དགེ་སློང་དོན་གྲུབ་
རྒྱལ་མཚན་གྱིས་གཙོས་དཔྱོད་ལྡན་འགའ་ཞིག་གིས་ཞུས་ངོར་ལྗགས་རྩོམ་མཛད། དེ་ནས་གྲྭ་ཚང་ཐོས་བསམ་དར་རྒྱས་གླིང་དུ་ཕེབས་ནས་གྲྭ་པ་ལྔ་བརྒྱ་ལྷག་ལ་ཀུན་རིག་དང་གསང་འདུས་གཉིས་ཀྱི་དབང་སྟ་གོན་དང་བཅས་པ། སྨན་ཆོག་རྒྱས་པ་དང་བླ་མཆོད་ཀྱི་ལུང་སོགས་སྩལ། སླར་སྐུ་འབུམ་དུ་ཕེབས། ཆེ་ཤོས་རིན་པོ་ཆེའི་ཡབ་སྔགས་ཆེན་གྱིས་ཞུས་ནས་རྟ་མགྲིན་གསང་སྒྲུབ་དང་ཡང་གསང་གི་དབང་སོགས་གནང༌། ཆེ་ཤོས་ངག་དབང་བསྟན་པའི་སྤྲུལ་སྐུ་རིན་པོ་ཆེའི་གཙུག་ཕུད་བཞེས་ཏེ་རབ་བྱུང་དང་དགེ་ཚུལ་གྱི་སྡོམ་པ་སྩལ་ནས་མཚན་ངག་དབང་བཤད་སྒྲུབ་ཉི་མ་ཞེས་འདོགས་པར་མཛད། སུ་ཉིད་གཡས་རུའི་མཁན་པོ་བླ་མ་སངས་རྒྱས་བཀྲ་ཤིས་ཀྱིས་རྗེའི་གསུང་འབུམ་གྱི་ལུང་ཞུས་པར། ཀུན་མཁྱེན་བླ་མ་མཆོག་ལ་སྒྲུབ་པའི་མཆོད་པར་དགོངས་ཏེ་སྐྱོ་ངལ་མེད་པར་དགྱེས་བཞིན་པའི་སྒོ་ནས་ལུང་ཆ་ཚང་བ་དགེ་འདུན་པ་སུམ་བརྒྱ་ལྷག་ལ་སྩལ། ཆོ་འཕྲུལ་སྨོན་ལམ་གྱི་དུས་སུ་ཕྱོགས་ཀུན་ནས་ཡོང་བའི་དད་ལྡན་རྒྱ་བོད་ཧོར་སོགས་ལ་ཐུགས་རྗེ་ཆེན་པོའི་དབང་སྟ་གོན་དང་བཅས་པ། རྣམ་འཇོམས་ཀྱི་རྗེས་གནང་བྱབས་བསྲུང་བཅས་དང༌། མ་ཎི་དང་དམིགས་བརྩེ་མའི་བཟླས་ལུང་སོགས་གནང་སྟེ་ཡིད་ཚིམ་པར་མཛད། བསྒྲུབ་བྱ་ཉིས་བརྒྱ་དང་དྲུག་ཅུ་ལྷག་ལ་དགེ་ཚུལ་དང་དགེ་སློང་གི་སྡོམ་པ་སྩལ་ཏེ་ཐར་པའི་རྒྱལ་མཚན་སྲིད་རྩེར་བསྒྲེངས། དེ་རྗེས་ཟླ་བ་ཁ་ཤས་ཀྱི་རིང་སྐུ་མཚམས་ལ་བཞུགས་ནས་བསྙེན་པ་དང་བསག་སྦྱང་ལྷུར་བཞེས། རྗེ་བཙུན་རྡོ་རྗེ་རྣལ་འབྱོར་མའི་བདག་འཇུག་ཀྱང་ལན་མང་དུ་བཞེས་ཏེ་རྣལ་འབྱོར་གསང་
མཐའི་ལམ་གྱི་ཉམས་ལེན་བསྐྱངས། དེ་ནས་མཚོ་སྔོན་པཻ་ལི་ཡེ་ཤེས་འཇིགས་མེད་ཀྱིས་གདན་དྲངས་པ་བཞིན་ཕེབས། དཔོན་པོས་བསྟན་པ་དང་ཡང་སྒོས་ངེད་ལྟོས་བཅས་ལ་ཕྱི་ནང་གེགས་འཚུབ་ཆེ་སྟབས། དེ་དག་སེལ་ཕྱིར་དུ་ཅིས་ཀྱང་ཆོས་རྒྱལ་གྱི་གཏོར་སྒྲུབ་ཅིག་མཛད་དགོས་ཞེས་ནན་ཏན་གསོལ་བ་བཞིན་སྒྲུབ་གྲོགས་དགེ་འདུན་དང་བཅས་པས་གནད་སྨིན་བསྒྲུབས་ཏེ་གཏོར་རྒྱག་བྱས་པས། གེགས་འཚུབ་སོགས་ཞི་བའི་ལྟས་མིག་མཐོང་ལག་བཟུང་ལྟ་བུ་བྱུང༌། སླར་སྐུ་འབུམ་དུ་ཕེབས་ཏེ་ཟླ་ལྷག་ཙམ་ལ་འཇིགས་བྱེད་ཀྱི་བསྙེན་པ་ཚད་ལྡན་ཁ་སྐོང་ཞི་བའི་སྦྱིན་སྲེག་དང་བཅས་པ་མཛད། མཁས་གྲུབ་ཆེན་པོ་རྗེ་བཙུན་བླ་མ་ཨ་རིག་དགེ་བཤེས་རྒྱལ་མཚན་འོད་ཟེར་གྱི་ཞབས་དྲུང་དུ་ཕེབས་ཏེ་ལམ་གྱི་གཙོ་བོ་རྣམ་གསུམ་གྱི་ཁྲིད་རྒྱས་པར་གསན། དགུང་ལོ་ཞེ་བརྒྱད་ལ་ཕེབས་པ་སྟོད་འགྲེལ་ལུགས་ཀྱི་རྔ་ཆེན་ཏེ་ལེགས་པར་སྦྱར་བ་སཾ་སྐྲྀ་ཏའི་སྐད་དུ་དུནྡུ་བྷིཿ མཧཱ་ཙ་ནའི་སྐད་ཀྱིས་ཞིང་ཟུའི་ཞེས་འབོད་པ། སྤོར་ཐང་དང་བསྟུན་པ་ཆུ་ཕོ་ཁྱི་ལོ་ཧོར་ཟླ་གཉིས་པ་ཆུ་ཤེལ་དབང་པོ་དོན་ཐམས་ཅད་འབྲས་བུར་བྱེད་པས་ཕལྒུ་ནཱི་སྟེ་རྒྱུ་སྐར་གྱི་ལྷ་མོ་དབོས་ཉ་བའི་ཚེས་གསུམ་རྒྱལ་བ་དང་པོའི་ཉིན། སྐུ་འབུམ་ཆོས་སྡེ་ཆེན་པོའི་དཔལ་ལྡན་སྨད་རྒྱུད་དཔོན་སློབ་ལྷ་རམས་པ་བསོད་ནམས་བསྟན་འཛིན་དང་སྨན་པ་དཔོན་སློབ་གཉིས་ཀྱིས་གཙོས་ཚོགས་ཆེན་ཞལ་ངོ༌། བླ་བྲང་ཕྱག་མཛོད། སྤྱི་གཉེར། སྐུ་རྟེན་ཆོས་རྗེ། ཚོ་པ་དྲུག་གི་རྒན་པ། སྒར་པ་ཁག་དང་བཅས་ནས་གདན་ས་ཆེན་པོའི་ཆོས་ཁྲིར་ཕེབས་དགོས་ཀྱི་
གསོལ་བ་བཏབ་པར། རྗེ་རིན་པོ་ཆེའི་འཁྲུངས་གནས་ཁྱད་པར་ཅན་འདིར་འཆད་ཉན་བྱེད་རྒྱུ་བྱུང་ན་ཤིན་ ཏུ་སྐལ་བ་བཟང ་ཚུལ་དང་བཅས་ཞལ་བཞེས་མཛད་པས། དཔོན་སློབ་རྣམ་གཉིས་དང་ལས་སྣེ་ཐུན་མོང་ནས་དགའ་དར་བཀྲ་ཤིས་ལྷ་རྫས་མཎྜལ་བཅས་ཕུལ། སེང་ཁྲིར་བཞུགས་རྒྱུའི་སྔར་ཉིན་རྒྱ་མིའི་དཔོན་པོ་ཟི་ལིང་ཤཱན་དགོན་པར་འོངས་ནས་རྗེ་འདི་པར་ཐུག་སྐབས། ཁྱེད་དགོན་པ་འདིའི་ཁྲི་ལ་གསར་དུ་བཞུགས་རྒྱུ་ཡིན་ཟེར་བ་བདེན་ནམ་ཞུས་པར། ཡིན་ཚུལ་གསུང་བས། ཤིན་ཏུ་དགའ་བའི་རྣམ་པས་ཁྱེད་བླ་མ་ཡག་པོ་རེད། ཁྱེད་ཀྱིས་དགོན་པ་འདི་ལ་དོ་དམ་ཡག་པོ་གྱིས། ཁྱེད་ཀྱི་གསུང་མི་ཉན་མཁན་དེ་འདྲ་ཡོད་ཚེ་དཔོན་པོ་ང་ལ་སྤྲོད། ཁྱེད་བླ་མ་ཆོས་བྱེད་མཁན་ཡིན༌། ངེད་དཔོན་པོ་ཚོས་ཆོས་དང་མི་མཐུན་པའི་བྱ་བ་བྱེད་མཁན་ཚར་གཅོད་པ་པོ་ཡིན། དཔེར་ན་བསྟན་པ་བསྲུང་བའི་ཆོས་སྐྱོང་ལྟ་བུ་ཡིན་ཞེས་ཞུས་ཏེ་སྲུང་མས་རྒྱུད་བསྐུལ་བའི་རྟེན་འབྲེལ་ཅན་གྱི་གཏམ་དུ་སྣང༌། དེ་ནས་ཧོར་ཟླ་གསུམ་པ་ཙཻ་ཏྲི་ཀཿ སྟེ་ནག་པ་ཅན་གྱི་ཟླ་བ་ཞེས་སྟོན་པས་བྱ་རྒོད་ཕུང་པོའི་རིར་ཤེར་མདོ་དང་དཔལ་ལྡན་འབྲས་སྤུངས་སུ་དང་པོའི་སངས་རྒྱས་དུས་ཀྱི་འཁོར་ལོའི་རྒྱུད་གསུངས་པའི་དུས་ཆེན་ཁྱད་པར་ཅན་གྱི་ཡར་ཚེས་གསུམ་པ་གཟའ་སྐར་འཕྲོད་སྦྱོར་ཐམས་ཅད་ཕུན་སུམ་ཚོགས་པའི་ཉིན། ཉི་མ་ཤར་རིའི་རྩེར་མངོན་པར་འཕགས་པ་དང་དུས་མཚུངས་སུ་ཚོགས་ཆེན་ཞལ་ངོ་སོགས་ལས་སྣེ་ཐུན་མོང་ནས་ཆེན་པོར་འོས་པའི་ཡོ་བྱད་མཆོད་རྫས་ཀྱི་བྱེ་བྲག་དུ་མ་བསྒྲེངས་པ་དང་བཅས་པའི་སྒོ་ནས་ཆོས་ཀྱི་ཁྲི་འཕང་མཐོན་པོར་མངའ་གསོལ་བར་མཛད་པས་དགེ་ལེགས་ཀྱི་འོད་སྣང་
འཇིག་རྟེན་ཀུན་ཏུ་ཁྱབ་པར་གྱུར་ཏོ། །སྣོད་བཅུད་དཔལ་འབྱོར་བདེ་སྐྱིད་ལྷ་དང་ཚུ༷ལ་མཚུངས་མདོ་སྨད་ཙོང་ཁའི་ཡུལ། །རྒྱལ་ཁྲི༷མས་རྭ་བ་བཙན་པོས་བསྐོར་བས་འཐབ་རྩོད་རྒུད་པའི་མིང་ཡང་མེད། །བློ་བཟང་བསྟ༷ན་པ༷འི་ཉི༷་འོད་ཆེར་གསལ་སྐུ་འབུམ་ཆོས་ཀྱི་སྡེ་ཆེན་པོར། །འཇིགས་བྲལ་ཆོས་ཀྱི་ཁྲི་ལ་དབང་བསྐུར་དཔལ་ལྡན་བླ་མ༷་རྒྱལ་གྱུར་ཅིག །ཉིན་འདིར་ཚོགས་ཆེན་གྱི་དགེ་འདུན་སུམ་སྟོང་བརྒྱད་བརྒྱ་བརྒལ་བ་ལ་ཕྱག་དབང་དང༌། ལམ་རིམ་ཆེན་མོའི་མགོ་ནས་ཆོས་ཐུན་གཅིག་གནང་སྟེ་མཇུག་ཏུ་བསྟན་འབར་མ་གསུངས་ནས་རྒྱལ་བསྟན་རིན་པོ་ཆེ་རྒྱས་པའི་ཐུགས་སྨོན་དང་ཕན་བདེའི་ལེགས་ཚོགས་འཕེལ་བའི་རྟེན་འབྲེལ་ཡང་དག་བསྒྲིགས། གདན་ས་རང་གི་བླ་སྤྱི་ཐུན་མོང་དང༌། དགོན་ལུང་ནས་སྐྱབས་མགོན་ཐུའུ་བཀྭན་རིན་པོ་ཆེས་ཆེད་མངགས་ཀྱི་མི་སྣ་སོགས་ཕྱོགས་གཞན་གྱི་དགོན་པ་དང་སྦྱིན་བདག་དུ་མས་ཁྲི་འབུལ་རྒྱ་ཆེ་བ་རིམ་པར་བཏེག །སྨད་རྒྱུད་དཔོན་སློབ་སེར་བྱེས་ལྷ་རམས་པ་བསོད་ནམས་བསྟན་འཛིན་གྱིས་སྐྱེས་རབས་དང་འབྲེལ་བའི་ཆེ་བརྗོད། བསྟན་པ་རྒྱས་ཤིང་འགྲོ་བ་ལ་དགེ་མཚན་འབྱུང་བ་དང༌། ཟབ་གསང་ཆོས་འཁོར་བསྐོར་ནས་བརྟན་པར་བཞུགས་དགོས་ཚུལ་སོགས་ཞུ་འབུལ་རྒྱས་ཤིང་སྙན་འཇེབས་འབྲེལ་ཆགས་པ་ཞུས། ཁྲི་སྟོན་དུ་ཚོགས་ཆེན་ལ་མང་འགྱེད་དང་ཚྭ་སྦྲ་སོགས་ཀྱི་བསྙེན་བཀུར་རྒྱས་པ་ཞུས། ཟི་ལིང་ཤཱན་སྐུ་མདུན་དུ་ཡོང་ནས་ལེགས་དར་དང༌། རིན་ཆེན་གཉིས་པ་སྲང་འགའ་ཕུལ་ཏེ་གུས་ཆེར་བྱས། གཟའ་སྐར་ལེགས་པའི་ཉིན་ནས་བརྩམས་ཆོས་གྲྭར་བརྩི་
གཞག་ཆག་མེད་ཐུགས་ཐོག་ནས་གནང་བས་བློ་གསལ་དོན་གཉེར་བ་རྣམས་ངང་པའི་ཁྱུ་ཚོགས་ཡིད་བཞིན་གྱི་མཚོ་ལ་སླེབས་པ་བཞིན་དགའ་དད་སྤྲོ་གསུམ་གྱིས་མགྲིན་པའི་རྫ་རྔ་བརྡུང་བ་ལ་བརྩོན་པར་གྱུར་ཏོ། །དེ་ནས་ས་ག་ཟླ་བའི་སྨོན་ལམ་སྐབས་སྔ་དྲོ་གསུང་ཆོས་ལ་རྒྱུད་འཁུལ་ངེས་པའི་གསུང་བཤད་རྒྱས་པ་དང་ཕྱི་དྲོའི་ཆར་སྨོན་ལམ་ལ་ཆག་མེད་དུ་ཕེབས་ནས་ཐུགས་སྨོན་རྒྱ་ཆེན་པོ་མཛད། ལོ་སྔོན་མ་རྣམས་སུ་མཚོ་སྔོན་དང་ནང་ལོགས་རྣམས་ལ་དགྲ་ཇག་གི་གནོད་པ་ཆེར་བྱུང་བར་བརྟེན་རྒྱའི་དམག་ཆེན་བུད་དེ་རྨ་ཆུ་ཕ་རིར་འགྲོ་བའི་སྐབས་ཡིན་པས། ལན་ཇུའི་ཙུན་ཏུ། ཆིན་ཚེའི་ཏཱ་ཞིན། ཟི་ལིང་ཨམ་བྷན། ཏོ་འུ་ཡེ། ཤཱན་སོགས་རྒྱའི་དཔོན་པོ་ཆེས་དྲེགས་པ་མང་པོ་ལམ་ཞོར་ལ་སྐུ་འབུམ་དུ་ཕེབས་པར། དགོན་པའི་ཉེ་འདབས་སུ་རྗེའི་གདན་ས་པ་འདི་པས་གཙོས་དགེ་འདུན་མང་མས་བསུ་བ་བྱེད་སྐབས་རྗེ་འདིས་རྒྱང་རིང་པོ་ནས་ཆིབས་བཤོལ་ཏེ་རྒྱའི་ལུགས་སྲོལ་གྱིས་བཀུར་གཟོས་བྱེད་རྩིས་གནང་བར། འཇམ་དབྱངས་གོང་མའི་ཞིང་ས་གཅིག་གི་བདག་པོ་ཆེན་པོ་ལན་ཇུའུ་ཙུན་ཏུས་འདི་པ་མཐོང་མ་ཐག་འགྱོག་བྱང་ནས་བབས་ཏེ་ཁ་དར་ཕུལ་ནས་མཇལ་ཕྲད་གནང༌། ཁྱེད་རྟ་ཆིབས་ནས་གཟིམས་ཤག་ཏུ་ཕེབས་ཞེས་བཀུར་གཟོས་ཆེན་པོ་ཞུས། ཨམ་བྷན་ཆིན་ཚེའི་ཏཱ་ཞིན་ཡང་དགོན་པར་ཕེབས་འཕྲལ་ཁོ་བོ་ཁྲི་པ་བླ་མ་ལ་ཐུག་རྒྱུ་ཡིན་གསུང་སྟེ་གཟིམས་ཆུང་དུ་ཕེབས། ཞབས་ཕྱི་རྣམས་ལ་ཁྱོད་ཚོས་ཁང་པ་ལོགས་ཤིག་ཏུ་ཡུད་ཙམ་སྡོད། ངེད་གཉིས་པོ་འགོལ་པོ་བྱས་ནས་གཏམ་གླེང་རྒྱུ་ཡོད་ཅེས་བཤད་དེ། དཔོན་པོས་སྐྱེས་བུ་གསུམ་གྱི་ལམ་སྤྱི་ཁོག་དང༌། ལྷག་པར་
ཞི་ལྷག་གི་ཐད་ནས་དཀའ་གནས་མང་པོ་དྲིས་པར། རྗེ་འདི་པས་བྱང་ཆུབ་ལམ་རིམ་ཆེན་མོ་ཁུངས་སུ་མཛད་ནས་དོགས་ལན་མཐའ་ཆོད་ཅིང་གོ་བདེ་བའི་ཡིད་ཚིམ་ངེས་པ་ཐོགས་མེད་དུ་སྩལ། དཔོན་པོ་དེ་སྔོན་གྱི་བག་ཆགས་ཀྱིས་ཆོས་ལ་མཁས་ངེས་ཤིག་ཡིན་འདུག་པས་ལྷག་པར་དད་དེ་བསྔགས་བརྗོད་ཆེར་མཛད་ཅིང༌། ཁོང་རང་བཞུགས་སར་ཕེབས་འཕྲལ་དཔོན་ཆུང་ཞིག་བཏང་སྟེ། མཛོད་གོས་དམར་པོ་ཡུག །རིན་ཆེན་གཉིས་པ་ཐུར་སྲང་བཞི་བཅུ། ཇ་སྦག་བཞི་བཅས་ཆོས་ཀྱི་བཀའ་དྲིན་ཞུས་པའི་ཡོན་དུ་ཕུལ། དེ་སྐབས་སྐུ་འབུམ་གྱི་ས་ཐོག་ཏུ་ཧོས་ཟིའམ་ཧོ་ཧུའུ་མང་པོས་ལྷ་ཁང་གསར་པ་ཕུབ་པའི་སྟེང་ནས་དགོན་པ་དང་མ་འགྲིགས་པར་རྩོད་གླེང་བྱེད་འཕྲོ་ཡིན་པས་ཧོ་ཧུའུ་རྣམས་ལྐོག་གྲོས་ཀྱིས་ཁ་འཆམ་བྱས་ཏེ། ད་རེས་རྒྱུ་ཅི་ཤོར་ཡང་ལམ་བཅོས་ཏེ་ཙུན་ཏུ་ལ་ཞུས་ནས་རྒྱལ་ཁ་ཨེ་ལོན་བལྟ་དགོས་ཞེས་ཐག་བཅད་ཡོད་ཀྱང་ཙུན་ཏུ་དང་ཨམ་བྷན་སོགས་ནས་བཀུར་གཟོས་ཆེན་པོ་བྱས་པ་མཐོང་བས་དཔའ་ཞུམ་ཞིང༌། རེ་བ་སྟོང་པར་སོང་བས་ཁོ་ཐག་ཆད་དེ་ལོག་པའི་བསམ་སྦྱོར་མཐའ་དག་བྱེ་མའི་ཆངས་བུའམ་སྦྲུལ་གྱི་མདུད་པ་ལྟར་རང་ཞིག་ཏུ་གྱུར་ཏོ། །གནས་ཚུ༷ལ་དྲང་བོར་སྤྱོད་པ་ལ། །ཁྲི༷མས་ཀྱི་དྲང་ཐིག་ཡོ་མེད་ཅིང༌། །བསྟ༷ན་བསྲུང་ཁྲོས་པ༷འི་དཔུང་གིས་ཀྱང༌། །དགྲ་སྡེ་ཉི༷་མ༷ས་མུན་བཞིན་བཅོམ། །གྲྭ་པ་རྒན་གཞོན་ཀུན་ནས་མགྲིན་གཅིག་ཏུ་རྗེ་མི་ཉག་རིན་པོ་ཆེ་འདི་སྐུ་བསོད་ཆེན་པོ་ཡ་མཚན་རེད། གཞན་དཔོན་པོ་ཆེན་པོ་དེ་དག་གིས་བཀུར་སྟི་འདི་འདྲ་བྱེད་པ་དཀའ་ཞེས་གླེང་བ་བྱུང།
རྒྱ་ཆེར་རོལ་པར། བསོད་ནམས་ལྡན་པའི་མི་ཡི་བསམ་པ་རྣམས་ཀྱང་འགྲུབ། །ཅེས་གསུངས་པས་དེའང་ཡིན་མོད་ཀྱང༌། གཙོ་བོར་ནི་ཆེད་དུ་བརྗོད་པའི་ཚོམས་ལས། རང་གི་དོན་ནི་མེད་པ་ལ། །འདི་ལྟར་གཞན་རྣམས་དགའ་འགྱུར་ཞིང༌། །མཐོང་བའི་ཆོས་ལ་བསྔགས་པ་དང༌། །ཕ་རོལ་ཏུ་ཡང་བདེ་འགྲོར་འགྱུར། །ཞེས་པ་ལྟར་བདག་པས་གཞན་གཅེས་པའི་བྱང་ཆུབ་ཀྱི་སེམས་རིན་པོ་ཆེའི་མཐུ་ཡིན་ནོ། །དེ་ནས་དབྱར་ཆོས་ཚུགས་པར་གུང་ཞོགས་གཉིས་ཀྱི་ཆོས་གྲྭར་རེས་མོས་ཀྱིས་བརྩི་བཞག་ལྷུག་པར་སྩལ་བས་རྩོད་གྲྭ་མེ་ལྟར་འབར་བ་བྱུང༌། དྲུག་པའི་སྨོན་ལམ་སྐབས་ཕྱོགས་གཞན་གྱི་དད་འདུས་པ་རྣམས་དང༌། དགོན་པ་རང་ཉིད་ཀྱི་དགེ་འདུན་འདུས་པ་རྒྱ་མཚོར་སྔ་དྲོའི་ཆར་སྐྱེས་རབས་དང་ལམ་རིམ་རེས་མོས་ཀྱིས་གསུང་བཤད་འབྱམས་ཀླས་ཤིང་ལུང་རིགས་ཀྱིས་བརྒྱན་པ་དོན་གྱི་སྙིང་པོ་རྒྱུད་ཐོག་ ཏུ་འདྲིལ་ངེས་པ་དང༌། སྨོན་ལམ་ལ་ཕེབས་ཏེ་རྒྱལ་བསྟན་རིན་པོ་ཆེའི་ཡང་སྙིང་དགེ་ལྡན་ལུགས་བཟང ་རྒྱས་པའི་ཐུགས་སྨོན་ཡང་དག་གནང༌། མཇལ་བ་སུམ་སྟོང་ཙམ་ལ་ཕྱག་དབང༌། བཀའ་བསྒོ། བཟླས་ལུང་སོགས་འདོད་མོས་བཞིན་གནང་སྟེ་ཡིད་ཚིམ་པར་བྱས། དབྱར་གནས་ཚུགས་ཏེ་གཞི་གསུམ་ལག་ལེན་ཕྲ་ཞིབ་དག་ཐེར་གནང་སྟེ་ཆོས་འདུལ་བའི་དགོངས་པ་ཇི་ལྟ་བ་བཞིན་མཛད། བརྩི་བཞག་ཆག་མེད་གནང་སྟེ་འཕྲོས་པ་མཛད་ཅིང་བློ་སྐྱེད་ཀྱི་སྩོལ་བ་དང༌། ཞི་དྲག་གི་སྒོ་སྣ་ཚོགས་པས་འཆད་ཉན་རྟིང་བསྐུལ་ཆེས་ཆེར་མཛད། སྐབས་དེར་སྐྱབས་མགོན་དམ་པ་ཐུའུ་བཀྭན་རིན་པོ་ཆེ་གཟུགས་སྐུ་ཆོས་ཀྱི་དབྱིངས་སུ་བསྡུ་ཚུལ་བསྟན་པ་གསན་མ་ཐག་གཅེས་པའི་མ་དང་བྲལ་བའི་བུ་
སྡུག་བཞིན་ཐུགས་ངལ་ཚད་མེད་པ་གནང་ཞིང༌། ཀྱེ་མ་ཀྱེ་ཧུད་འཇམ་མགོན་བསྟན་པའི་ཉི་མ་ནི་ནུབ་སྟེ། སྙིགས་དུས་ཀྱི་སྐྱེ་བོ་རྣམས་མགོན་སྐྱབས་དང་བྲལ་ཚུལ་འདི་ཅི་འདྲ་རང་ཞེས་སོགས་ཐུགས་སྐྱོ་བའི་གསུང་མང་དུ་མཛད་ཅིང༌། དངོས་བཤམས་ཡིད་སྤྲུལ་གྱི་མཆོད་པས་མཆོད་པ་དང༌། ཁྲུས་གསོལ་སྨོན་ལམ་སོགས་རྗེ་དེ་ཉིད་ཀྱི་ཐུགས་ཀྱི་དགོངས་པ་རྫོགས་ཏེ་ཡང་སྲིད་མྱུར་འབྱོན་གྱི་སྨོན་པ་མཛད། མྱུར་འབྱོན་གསོལ་འདེབས་རྩོམ་འདུན་ཡོད་ཐོག་ཚོགས་ཆེན་ཞལ་ངོ་དགེ་བཤེས་བློ་གྲོས་ཡར་འཕེལ་དང༌། གྲྭ་ཚང་དགེ་བསྐོས་དཀའ་བཅུ་མཁས་མཆོག་གཉིས་དང༌། ཕྱོགས་གཞན་ནས་ཀྱང་ཞུ་མཁན་མང་པོ་བྱུང་བཞིན་ལྗགས་རྩོམ་མཛད་དེ་མང་འགྱེད་སོགས་ཀྱི་བསྙེན་བཀུར་དང་བཅས་ཚོགས་ཆེན་དུ་འཛུག་པར་མཛད། དེ་ནས་སྟོན་ཆོས་ཀྱི་འཆད་ཉན། དགུ་བའི་སྨོན་ལམ་གྱི་གསུང་ཆོས་སྨོན་ལམ་སོགས་སྔར་རྒྱུན་བཞིན་མཛད། སྨོན་ལམ་སྐབས་སྟོད་སྨད་ཀྱི་མཇལ་བ་མང་པོ་འདུས་པའང་འདོད་ཆོས་ཀྱིས་ཚིམ་པར་བྱས། དགའ་ལྡན་ལྔ་མཆོད་ཆེན་མོར་ཚོགས་ཆེན་དུ་ཇ་ཐུག་ཚ་སྦྲ་སོགས་སྔ་མའི་སྲོལ་གང་ཡོད་ཡར་རྒྱས་ཀྱི་ཚུལ་དུ་ཕུལ་ནས་དགེ་འདུན་རྣམས་མཉེས་པར་བསྒྲུབས། དེའི་ཉིན་ཉིད་ཀྱིས་གཙོས་དགེ་བའི་བཤེས་གཉེན་སུམ་བརྒྱ་ཙམ་གྱིས་གསེར་གདུང་ཆེན་མོའི་དྲུང་དུ་དངོས་བཤམས་ཡིད་སྤྲུལ་གྱི་མཆོད་སྤྲིན་སྤྲོས་ཏེ་ཁྲུས་གསོལ་རྒྱས་པ། རྣམ་དག་གངས་རི་མ་སོགས་སྐུ་བསྟོད་ཀྱི་རིམ་པ། བསྟན་འབར་མ་སོགས་གསུང་སྟེ་སྤྱི་བྱེ་བྲག་གི་བསྔོ་བས་རྒྱས་བཏབ། དགུན་ཆོས་ཆེན་མོར་བརྩི་བཞག་ཆག་མེད་དུ་སྩལ་ཅིང་འཆད་ཉན་ལ་གཟིགས་རྟོག་ཞིབ་
མོར་གནང༌། སོ་ཀྱཱ་ཆོས་རྗེ་ངག་དབང་ཕུན་ཚོགས་དང་སྨན་རམས་པ་བློ་བཟང་ཡོན་ཏན་བཅས་ཀྱིས་གསོལ་བ་བཏབ་པ་བཞིན་དོན་གཉེར་ཅན་དུ་མ་ལ་འཇིགས་བྱེད་ཀྱི་དབང་སྟ་གོན་དང་བཅས་པ། མགོན་པོ་བཀའ་བཅུ་གསུམ་གྱི་རྗེས་གནང༌། དཔལ་ལྡན་ས་སྐྱའི་གསེར་ཆོས་བཅུ་གསུམ་གྱི་རྗེས་གནང་སོགས་ཆོས་ཀྱི་མཆོད་སྦྱིན་བསྟར། སྦྱིན་བདག་འགའ་ཞིག་གིས་ལན་དུ་མར་དགའ་ལྡན་རིལ་སྒྲུབ་ཚོགས་ཆེན་དུ་སྒྲུབ་པའི་ཚོགས་དབུར་གདན་དྲངས་ནས་འབུལ་ནོད་གཟབ་རྒྱས་ཞུས། ལོ་མཇུག་ཏུ་གྲྭ་ཚང་གི་ཞབས་བརྟན་ཉིན་བདུན་གྱི་བསྙེན་བཀུར་གང་ལེགས་བསྟབས། དགུང་ལོ་ཞེ་དགུ་པ་ཆུ་ཕག་ལོའི་ལོ་གསར་དགའ་སྟོན་དང་འདོད་ཁམས་དབང་མོའི་དུས་གཏོར་སོགས་སྔར་འཁྱུད་བཞིན་བསྒྲུབས། ཆོ་འཕྲུལ་སྨོན་ལམ་སྐབས་གསུང་ཆོས་སྨོན་ལམ་སྔར་བཞིན་དང༌། ཚེས་བཅོ་ལྔའི་ཉིན་རྗེའི་མཆོད་རྟེན་དྲུང་དུ་བརྒྱ་མཆོད་གང་རྒྱས། ཁྲུས་གསོལ་དང་སྐུ་བསྟོད་ཀྱི་རིམ་པ་བསྟན་འབར་མ་བཅས་གསུང་སྟེ། བསྟན་པ་རྒྱས་པའི་ཐུགས་སྨོན་མཛད། དགོན་པའི་གྲྭ་པ་དགེ་ཚུལ་བསྒྲུབ་བྱ་ཉིས་བརྒྱ་དང་ལྔ་བཅུ་ལྷག །དགེ་སློང་གི་དངོས་པོ་དོན་དུ་གཉེར་བ་སུམ་བརྒྱ་ཉི་ཤུ་སྐོར་བསྟན་པའི་གཞི་མ་སོ་ཐར་གྱི་སྡོམ་པའི་དཔལ་ལ་བཀོད་དེ་ཕན་བདེའི་རྩ་བ་ཚུགས་པར་མཛད་དོ། །དགེ་ཚུ༷ལ་སློང་བསྒྲུབ་བྱ་བརྒྱ་ཕྲག་མང༌། །ཁྲི༷མས་ཉིས་བརྒྱ་ལྔ་བཅུ་སོགས་ལ་བཀོད། །ཆོས་འདུལ་བསྟ༷ན་རྒྱས་པ༷འི་དགེ་མཚན་ནི། །ཉི༷་འོད་ཀྱིས་རེག་པའི་པད་མ༷་བཞིན། །ཆ་ཧར་གུ་ལུ་ཤ་རའི་ཤོག་དགའ་ལྡན་བཀྲ་ཤིས་ཆོས་འཕེལ་གླིང་གི་སྤྲུལ་སྐུ་གུ་ཤྲི་མེར་གེན་པཎྚི་ཏ་བསོད་ནམས་བསྟན་
པའི་རྒྱལ་མཚན། ཕྱག་མཛོད་དགེ་བཤེས་ཆོས་རྗེ་སོགས་ནས་དབང་ལུང་རྗེས་གསུམ། ཁྲིད་བཅས་མང་དུ་ཞུས་པ་རྣམས་འདུན་པ་བཞིན་སྩལ། བླ་མ་དེས་བསྐུལ་ཏེ་བླ་མ་རྣམས་ལ་གསོལ་བ་འདེབས་ཚུལ་དང༌། གཞི་བདག་སྤྱི་ལ་བསང་མཆོད་བྱ་ཚུལ་སོགས་ལྗགས་རྩོམ་མཛད། གནས་ལྔ་མཁྱེན་པའི་དབང་ཕྱུག་ལྕང་ལུང་པཎྚི་ཏ་ཕེབས་ནས་བཀའ་ཆོས་མང་དུ་ཞུས་པའི་ཐུགས་འདུན་བསྐངས། འཇམ་མགོན་བསྟན་པའི་རྩ་ལག་ཨ་ཀྱཱ་ནོ་མིན་ཧན་རིན་པོ་ཆེ་རྒྱ་ནག་ནས་མདོ་སྨད་རང་ཡུལ་དུ་ཕྱག་ཕེབས་པར་བསུ་བ་གནང་ཞིང་ཡབ་སྲས་ཞལ་འཛོམས་པའི་དགའ་སྟོན་བསྟར། ཨ་ཀྱཱ་རིན་པོ་ཆེས་ཞུས་ནས་འཇིགས་བྱེད་སོགས་ཀྱི་དབང་དང་ལུང་ཁྲིད་མང་པོ་སྩལ། དཔྱིད་ཆོས་ཆེན་མོར་བརྩི་བཞག་སྔར་ལྟར་སྩལ་ཅིང་ཚིག་རྒྱུགས་སོགས་བཞེས་རྩིས་ཀྱིས་ཚུལ་མཐུན་སྤྲོ་བ་བསྐྱེད་ཅིང་དམུ་རྒོད་དཔའ་བཀོང་བའི་ཚོགས་གཏམ་བཙན་བརྗིད་བརླིང་ཞིང་བློ་འཁུལ་ངེས་ཡང་ཡང་གནང་བས་འཆད་ཉན་ལྷག་པར་འཕེལ་ཞིང༌། གྲྭ་འཚོགས་ཀྱང་ཚོགས་ཆེན་ལ་དགེ་འདུན་སུམ་སྟོང་དགུ་བརྒྱ་ལྷག་དང༌། གྲྭ་ཚང་བཤད་སྒྲུབ་གླིང་རང་ལའང་དགེ་འདུན་ཆིག་སྟོང་ལྔ་བརྒྱར་ཉེ་བ་བྱུང་སྟེ་འདུས་ཚོགས་ཤིན་ཏུ་རྒྱས་པས་ཕྱོགས་མཐའ་དག་ནས་འོངས་པའི་མཆོག་དམན་ཐམས་ཅད་ཡིད་ཁེངས་ཏེ་གདན་སའི་བསྔགས་བརྗོད་ཕྱོགས་ཀུན་ཏུ་སྒྲོགས་པ་བྱུང༌། རྒྱུད་པའི་ཁྲི་བ་སྔ་མས་དགོངས་པ་ཞུས་ཏེ། བུམ་པར་ཚུལ་ཁྲིམས་རྒྱ་མཚོའི་མཆོག་སྤྲུལ་རྒྱུད་པའི་དཔོན་སློབ་ཏུ་བསྐོ་བཞག་དང༌། སྨན་པའི་
དཔོན་སློབ་ནས་དགོངས་པ་ཞུས་པར་ཉ་ཀྱཱ་དགེ་བཤེས་རྒྱལ་མཚན་ནོར་བུ་སྨན་པའི་ཁྲིར་བསྐོས་ཏེ། དེའི་ཚབ་ཏུ་རྒྱ་རྩང་དགེ་བཤེས་རྒྱལ་མཚན་ནོར་བུ་བླ་མ་གཞུང་ལས་པར་བསྐོས། རྒྱ་རྩང་སྒོམ་ཆེན་རིན་པོ་ཆེས་ལམ་ཁྲིད་སོགས་ཞུས་པ་ལྟར་ཕུལ། དཔྱིད་ཆོས་རྗེས་མ་ནས་བཟུང་དབྱར་ཆོས་སོགས་ཆོས་ཐོག་གི་རིགས་ལ་བརྩི་བཞག་དང་རྩོད་གྲྭའི་རྟིང་བསྐུལ་སོགས་ཆུ་ལམ་ཞུགས་ཀྱི་ཚུལ་དུ་གནང༌། དེ་སྐབས་སྐུ་འབུམ་ཆོས་སྐྱོང་ཆེན་མོའི་གཙང་ཁང་འཕྱམ་ར་གསར་བཞེངས་གྲུབ་ཟིན་པས། ཞལ་ངོ་སོགས་ལས་སྣེ་ཐུན་མོང་ནས་རབ་གནས་ཀྱི་སྙན་གསན་ཕུལ་བའི། ཡར་ཚེས་ཕུན་སུམ་ཚོགས་པར་ཉིད་ཀྱིས་རྡོ་རྗེ་སློབ་དཔོན་མཛད་དེ་རྒྱུད་སྨད་ཀྱི་དཔོན་སློབ་རྣམ་གཉིས་དང་བཅས་བཤེས་གཉེན་དམ་པ་ཉེར་གཅིག་གི་ཚོགས་ཀྱིས་རབ་གནས་དགེ་ལེགས་ཆར་འབེབས་ཀྱི་སྒོ་ནས་སྤྱན་དབྱེའི་ཆོ་ག་ཕྱག་ལེན་བཞིན་མཛད། སྐུ་གསུང་ཐུགས་རྟེན་ཐོག་མར་བྱུང་ཚུལ། རབ་གནས་དགོས་པའི་རྒྱུ་མཚན། དེའི་ཕན་ཡོན། བརྟག་གཉིས་ཀྱི་དོན་རྗེ་བཙུན་གྲགས་པས་བཀྲལ་བ་བཞིན་བཟང་པོ་དྲུག་གི་སྒོ་ནས་བྱེད་ཚུལ་སོགས་རབ་གནས་ཀྱི་བཤད་པ་ཟབ་ལ་རྒྱས་པ། རབ་གནས་ཀྱི་རྒྱུད་སོགས་རྒྱུད་སྡེ་དང་དགོངས་འགྲེལ་མང་པོའི་ལུང་གི་རྒྱབ་རྟེན་བཅས་སྙན་ཞིང་འཇེབས་པ་སྩལ་བས། མཁས་པ་ལེགས་བཤད་གཏམ་གྱིས་མགུ། །གསུངས་པ་བཞིན་གཟུར་གནས་མཁས་པའི་ཚོགས་ཀྱིས་བསྔགས་བརྗོད་ཀྱི་མེ་ཏོག་འཐོར། འཕྱམ་ར་དེར་དཀར་ཆག་རྒྱས་པ་ཞིག་དགོས་ཞེས་བསྐུལ་བའང་ལྗགས་རྩོམ་བཀའ་དྲིན་བསྐྱངས། དགུ་པའི་སྨོན་ལམ་དང་ལྔ་མཆོད་ཆེན་མོ་སོགས་ལ་ཆོས་སྲིད་ཀྱི་
མཛད་སྒོ་གང་ཡོད་ཡར་ལྡན་དུ་གནང༌། རྒྱ་ཡག་རིན་པོ་ཆེའི་སྤྲུལ་སྐུའི་གཙུག་ཕུད་བཞེས་ཏེ། མཚན་བློ་བཟང་བསྟན་པའི་ཉི་མ་ཞེས་འདོགས་པར་མཛད། ཏཱ་རི་གངྒཱའི་མེར་གན་པཎྚི་ཏ་བླ་མ་བསྟན་འཛིན་རྒྱལ་མཚན་གྱིས་གཙོས་དཔོན་གཡོག་རྣམས་ལ་སྒྲོལ་དཀར་རྗེས་གནང་སོགས་རྗེས་གནང་མང་པོ་དང༌། ལུང་ཁྲིད་སོགས་ཀྱང་འདོད་མོས་བཞིན་སྩལ། བླ་མ་དེས་བསྐུལ་ངོར་དམ་ཅན་གྱི་སྒྲུབ་ཐབས་བསྐང་གསོ་དང་བཅས་པ་ལྗགས་རྩོམ་མཛད། ཟླ་ཟད་སྐབས་ཉིན་ཁ་ཤས་ཀྱི་རིང་ཚོགས་དབུར་ཕེབས་ཏེ་ཆོས་སྲུང་རྣམས་ལ་འཕྲིན་བཅོལ་སོགས་གང་དྲག་གནང་ཞིང༌། འདུས་ཚོགས་སུ་ཉིན་རེ་བཞིན་ཇ་ཐུག་དང༌། འགྱེད་ཚྭ་སྦྲ་སོགས་གང་རྒྱས་ཀྱིས་བསྙེན་བཀུར་ཞུས། དགུང་ལོ་ལྔ་བཅུ་པ་མིག་དམར་ཞེས་པ་ཤིང་བྱིའི་ལོ་གསར་གྱི་ཉིན་མ་གཅིག་འདོད་ཁམས་དབང་ཕྱུག་མའི་གཏོར་སྐྱོང་སོགས་རྒྱས་པར་མཛད། ཚོགས་དབུར་ཕེབས་ནས་ཕྱག་དབང་སྩལ་ཅིང༌། ཆོ་འཕྲུལ་སྨོན་ལམ་སྐབས་ཀྱི་གསུང་ཆོས་སྨོན་ལམ་སོགས་སྔར་བཞིན་གནང༌། དེ་སྐབས་ཕྱོགས་ནས་ཡོང་བ་དང་དགོན་པའི་དགེ་འདུན་བཅས་བསྒྲུབ་བྱ་བརྒྱ་དང་བཅུ་གཉིས་དགེ་ཚུལ་དང༌། ཉིས་བརྒྱ་ཞེ་ལྔར་དགེ་སློང་གི་སྡོམ་པ་འབོག་པར་མཛད། དད་འདུས་ཀྱི་སེར་སྐྱ་མང་པོར་འདོད་མོས་བཞིན་བཀའ་ཆོས་ཀྱི་ཆར་ཕབ། དེ་ལྟར་སྨོན་ལམ་གསུང་ཆོས་ཀྱི་སྐབས་དང་ཆོས་ཐོག་གི་སྐབས་ཀུན་ཏུ་གཙོ་ཆེར་འཆད་ཉན་ལ་རྟིང་བསྐུལ་ཆེར་མཛད་པས་རྩོད་པ་ཡར་ཟླ་བཞིན་འཕེལ་ཞིང༌། དེ་མིན་རྒན་གཞོན་ཀུན་ལ་ལམ་རིམ་བློ་སྦྱོང་དང་མཐུན་པའི་དགེ་སྦྱོར་གྱི་བསྐུལ་མ་གནང་
བར་ཀུན་གྱིས་གསུང་དང་བླང་གིས་ཉིན་མཚན་ཁོར་ཡུག་ཏུ་བསླབ་སྦྱང་ལ་བརྩོན་པས། མཚན་ཕུད་དེ་བརྩི་བཞག་སྐྱོར་མཁན་ཆེས་མང་བ་དང༌། རྗེ་ཉིད་ལ་རྒྱུགས་འབུལ་མཁན་དང༌། དབུ་ཕར་ཚོགས་རྒྱུགས་འབུལ་མཁན་མང་པོ། སྨོན་ལམ་དང་གླིང་བསྲེའི་དམ་བཅའ་བཞག་ནས་མིང་བཏགས་བྱེད་མཁན་ཆེས་མང་པོ་བྱུང་བ་སོགས་སྒོ་གང་ཐད་ནས་ཉིན་སྐྱེད་ཞག་སྐྱེད་ཐོན་པ་བྱུང༌། གསེར་ཏོག་ནོ་མིན་ཧན་རིན་པོ་ཆེའི་སྤྲུལ་སྐུ་ཡེ་ཤེས་ཐུབ་བསྟན་རྒྱ་མཚོ་ལའང་རིག་གནས་ཀྱི་སྐོར་འགའ་ཞིག་འཁྲིད་པར་མཛད། ཆོས་སྡེ་ཆེན་པོ་འདིའི་ནང་རྟེན་གྱི་གཙོ་བོ་གསེར་གདུང་བཞུགས་པའི་ལྷ་ཁང་ཆེན་མོ་རྩིག་པ་སོགས་ལ་སྐྱོན་ཞུགས་ཏེ་ཅུང་ཟད་ཉམས་ཆག་ཏུ་སོང་ཡོད་པས་གསར་བཞེངས་བྱས་ན་ལེགས་པར་དགོངས་ཏེ་འཇམ་མགོན་བསྟན་པའི་རྩ་ལག་ཨ་ཀྱཱ་རིན་པོ་ཆེར། ཉིད་ཀྱིས་གཙོས་ཚོགས་ཆེན་གྱི་ལས་སྣེའི་རིགས། ཚོ་བ་དྲུག་གི་རྒན་པ་སོགས་ཐུན་མོང་ནས་རྒྱུ་མཚན་ཞུས་ཏེ་གཏད་གཉེར་མཛད་པས། ཨ་ཀྱཱ་རིན་པོ་ཆེས། ཁོ་བོ་ལ་འདི་འདྲིའི་ཁ་སྟབས་མ་མཆིས་རུང་བླ་མ་རྡོ་རྗེ་འཆང་གི་བཀའ་ལས་འདའ་མི་ཉན་པས། གང་ཡིན་ཀྱང་རྟེན་འབྲེལ་གྱི་ཁྱད་དུ་ཁས་ལེན་བྱེད། བླ་མ་གྲྭ་ཚང་གི་ཞལ་གཡང་བཞིན་འགྲུབ་པའི་སྐྱབས་འཇུག་བླ་མ་རྡོ་རྗེ་འཆང་ནས་མཛད་དགོས་གསུང༌། མགོན་པོ་དེ་ཉིད་ཀྱི་འཕྲིན་ལས་ཉིན་བྱེད་སྣང་བས་བྱ་བ་ལས་ཀྱི་འཁོར་ལོའི་པད་ཚལ་བཞད་པའི་དགེ་མཚན་དང་པོར་འདྲེན་བྱེད་ཀྱང་རྗེ་འདིའི་ཐུགས་བསྐྱེད་རྟ་ལྗང་ཤིང་རྟ་ཁོ་ནའི་བཀའ་དྲིན་ཡིན་ནོ། །དེ་ལྟར་ལེགས་བྱས་སྒོ་བརྒྱ་ལྷུན་གྱིས་གྲུབ་སྟེ་ཆོས་སྡེ་ཆེན་པོའི་སེང་ཁྲིའི་དགོངས་
པ་ཞུས་ནས་བསྟན་པའི་གསལ་བྱེད་དམ་པ་ཏ་ལའི་ཧུ་ཐོག་ཐུ་བསྐལ་བཟང་ཐུབ་བསྟན་རབ་རྒྱས་ཆོས་སྡེ་འདིའི་ཁྲི་ལ་བསྐོ་བཞག་མཛད། ཚེས་གྲངས་དགེ་བའི་ཉིན་གྲྭ་ཚང་བཤད་སྒྲུབ་གླིང་དང༌། ཚོགས་ཆེན་གྱི་དགེ་འདུན་འདུས་པ་རྒྱ་མཚོར་ཕྱག་དབང་དང་ཆོས་སྟོན་སོགས་རྒྱས་པར་ཕུལ་ཏེ། ཕུན་ཚོགས་འདོད་པ་འཇོ་བའི་རང་སྒར་དུ་ཟུར་བཞུགས་མཛད་དོ། །མདོར་ན་ཀུན་མཁྱེན་འཇིགས་མེད་དབང་པོའི་གསུང་ལས། མདོ་སྨད་ཙོང་ཁ་སྤྲུལ་བའི་སྐུ་འབུམ་ཞེས། །གྲགས་སྙན་རོལ་མོ་ས་གསུམ་རྣ་རྒྱན་གྱུར། །ནོར་འཛིན་ཐིག་ལེ་གང་དེར་ཡབ་རྗེ་ཡི། །ཐུགས་བསྐྱེད་ལ་བརྟེན་ངུར་སྨྲིག་འཛིན་པའི་སྡེ། །ཚར་དུ་དངར་བའི་ཡིད་འོང་ཟུར་ཕུད་ཀྱིས། །གུས་པས་བཏུད་པའི་མི་འཇིགས་ཆོས་ཀྱི་ཁྲིར། །ཡོངས་འཛིན་ནོར་བུའི་ཅོད་པན་གཙུག་ཐོགས་ནས། །ལུང་རྟོགས་དབྱིག་འཛིན་ཁྱོན་ལ་དབང་བསྒྱུར་བ། །མཚུངས་བྲལ་སྨྲ་བའི་རྒྱལ་པོ་ཁྱོད་འཁོད་པས། །དཀར་ཕྱོགས་སྐྱོང་རྣམས་འཛུམ་དཀར་རྒོད་པས་བྲེལ། །ཞེས་པ་ནས། མདོར་ན་ཆོས་སྡེ་ཆེན་པོའི་ལུགས་གཉིས་ཀྱི། །འཕེལ་རྒྱས་ཇི་ལྟ་ཇི་ལྟར་གནང་འོས་པ། །དེ་ལྟ་དེ་ལྟར་ཐུགས་ཁུར་ལྷུར་བཞེས་ཏེ། །དབྱར་གྱི་ཆུ་གཏེར་དཔལ་ལ་འགྲན་པར་མཛོད། །ཅེས་གསུངས་པ་དང་ཚུལ་མཚུངས་པར་ཁྲིར་བཞུགས་ནས་རྣམ་པ་ཀུན་ཏུ་བསྒྲིག་ལམ་དང་འཆད་ཉན་ཁོ་ན་ཐུགས་ལ་བཅངས་ཏེ་རྟིང་བསྐུལ་མཛད་ལ། མཛད་ཚུལ་ཡང་འཇིག་རྟེན་གྱི་ཁ་འཛིན་ལྟ་བུ་མ་ཡིན་པར་ཆོས་ཁོ་ན་དང་མཐུན་པ། དེའི་ནང་ནས་ཀྱང་བསྟན་པའི་རྩ་བ་འདུལ་བ་དང་མཐུན་པ་
ཞིག་ཅིས་ཀྱང་ནས་བྱེད་དགོས་ཚུལ། གཞན་ཕྱོགས་ལྟ་གྲུབ་མི་གཙང་ཞིང་སྤྱོད་པ་མ་དག་པ་རྣམས་ཀྱི་རྗེས་སུ་འབྲང་ན་འདི་ཕྱིའི་ལེགས་ཚོགས་སྟོར་ཉེན་ཆེ་ལུགས་སོགས་སྐྱོན་མཚང་ལ་རེག་པའི་ཤ་ཚའི་བསླབ་བྱ་བློ་སྣ་རང་དབང་མེད་པར་བསྒྱུར་ནུས་པའི་གསུང་ནུས་པ་ཅན་ཚོགས་གཏམ་གྱི་ཚུལ་དུ་ཡང་ཡང་སྩལ་བས། དགེ་བའི་བཤེས་གཉེན་རྣམས་དང་ཆོས་འགྲིམ་དོན་གཉེར་བ་རྣམས་མགྲིན་གཅིག་ཏུ་འདི་ལས་ལྷག་པའི་བསླབ་བྱ་དང་ལམ་རིམ་འཆད་ཚུལ་མེད་ཅེས་གསུང་ཚད་མར་བཟུང་སྟེ་གྲྭ་པ་རྒན་གཞོན་མཐའ་དག་རང་རང་གི་བློ་ནུས་དང་མཐུན་པའི་དམ་ཆོས་སྒྲུབ་པ་ལ་གཅིག་ཏུ་གཞོལ་བར་གྱུར་ཏེ། ཇོ་བོ་བཀའ་གདམས་པ་རྣམས་ཀྱི་གསུང་སྒྲོས་ལས། བཤེས་གཉེན་གྱི་མཆོག་མཚང་ལ་རྒོལ་བ་ཡིན། ཞེས་གསུངས་པ་ལྟར་རོ། །གཏོང་སྒོའི་སྐོར་ཡང་ཟླ་ཟད་སྐབས་གྲྭ་ཚང་བཤད་སྒྲུབ་གླིང་ལ་ཉི་མ་བདུན་གྱི་བསྙེན་བཀུར་དང༌། ཚོགས་ཆེན་དུ་དགའ་ལྡན་ལྔ་མཆོད་སྐབས་དགེ་འདུན་གྱི་སྡེར་ཚྭ་སྦྲ་དང་ཇ་ཐུག །རྣམ་གཞག །འགྱེད་སོགས་ཀྱི་བསྙེན་བཀུར་ཡང་ཡང་ཕུལ་བ་སོགས་ཤིན་ཏུ་རྒྱ་ཆེ་བ་གནང་འདུག་པ་ནི། འདུལ་བའི་མདོར་གནས་ཀྱི་སློབ་དཔོན་ཆོས་དང་ཟང་ཟིང་གཉི་གས་སྡུད་པ་མཆོག་ཏུ་བསྔགས་པ་ལྟར་ཡིན་མོད་ཀྱང༌། གཙོ་བོ་ནི་མདོ་སྡེ་རྒྱན་ལས། དེ་ཆོས་བགོ་སྐལ་ལ་སྤྱོད་ཟང་ཟིང་མིན། །གསུངས་པ་དེ་དགོས་སོ། །དམ་པ་རྣམས་ལ་ཡོན་ཏན་གྱི་མཐུས་མཐུན་པའི་རྐྱེན་ཐམས་ཅད་ཕུན་སུམ་ཚོགས་པར་འགྱུར་ཞིང༌། དེའི་ཞབས་ལ་བརྟེན་པ་རྣམས་ཀྱང་ལེགས་བྱས་ཀྱི་དཔལ་ཆེན་པོ་འཐོབ་པ་ནི་སྐྱེས་རབས་ལས། དེ་ལ་འཁོར་
གསུམ་རྗེས་མཐུན་ཡོན་ཏན་ཚོགས། །ཕན་ཚུན་འགྲན་པ་བཞིན་དུ་གནས་པར་གྱུར། །ཅེས་དང༌། འཁྲི་ཤིང་གི་སེར་སྐྱའི་རྟོགས་པ་བརྗོད་པའི་ཡལ་འདབ་ལས། མཁས་པའི་ཡོན་ཏན་ཁྱད་འཕགས་ཀྱིས། །བསྒྲུབས་པའི་དཔལ་ནི་རྣམ་པར་མཛེས། །ཞེས་དང༌། འཁྲི་ཤིང་ཡལ་འདབ་བཅུ་དྲུག་པ་ལས་ཀྱང༌། ཆེན་པོ་ཉིད་ལ་བརྟེན་པའི་སྦྱོར་བ་ལས། །གང་ཕྱིར་ཐམས་ཅད་ཆེན་པོ་ཉིད་དུ་འགྱུར། །ཞེས་གསུངས་པ་བཞིན་ནོ། །ཆོས་སྲིད་ཟུང་གིས་ཚུ༷ལ་བཞིན་བསྐྱངས་པས་ཁྲི༷མས་ལྡན་འདུས་སྡེ་བགྲང་ཡས་འཕེལ། །བཤད་སྒྲུབ་འཆད་ཉན་བསྟ༷ན་པ༷འི་བྱ་བ་དབྱར་གྱི་ཆུ་གཏེར་བཞིན་དུ་རྒྱས། །ཡངས་པའི་རྒྱལ་ཁམས་བཀྲ་ཤིས་བདེ་སྐྱིད་ཕུན་སུམ་ཚོགས་པའི་དཔལ་ལ་རོལ། །རྫོགས་ལྡན་སླར་ཡང་འོང་སྙམ་སོམ་ཉི༷་ལ་འགོད་ཨེ་མ༷་སྐལ་བ་བཟང༌། བསིལ་ལྡན་ལྗོངས་ཀྱི་ལུམ་བི་ནཱི་ཡི་ཚལ། །མྱ་ངན་མེད་པ་ཙན་དན་ལྗོན་པའི་དྲུང༌། །ལུགས་ཟུང་གོམ་པའི་པདྨ་བསྟར་བ་ཡིས། །དོན་ཀུན་གྲུབ་པའི་མཚན་སྙན་ངང་གིས་བསྒྲགས། །རྨད་བྱུང་ཐུགས་བསྐྱེད་ཡུ་བ་དྲང་ཞིང་ལྡེམ། །རྒྱལ་བསྟན་འཛིན་སྐྱོང་ཤམ་བུ་རིམ་པར་བཀྲ། །བསླབ་གསུམ་ཡིད་བཞིན་ནོར་བུའི་ཏོག་མཛེས་པའི། །བསྟན་པའི་རྒྱལ་མཚན་སྲིད་པའི་རྩེ་མོར་བསྒྲེངས། །ཞེས་དགེ་ལྡན་བསྟན་པའི་རྩ་ལག་མཁས་ཤིང་གྲུབ་པའི་དབང་ཕྱུག་རྗེ་བཙུན་བླ་མ་དམ་པ་ཚུལ་ཁྲིམས་བསྟན་པའི་ཉི་མ་དཔལ་བཟང་པོའི་རྣམ་པར་ཐར་པ་ནོར་བུའི་དོ་ཤལ་ལས་གདན་ས་ཆེན་པོ་སྐུ་འབུམ་བྱམས་པ་གླིང་དུ་གྲྭ་ཚང་སྤྱི་སྒོས་ཀྱི་འཛིན་སྐྱོང་
གཙོ་བོར་མཛད་ཚུལ་གྱི་དྲ་བ་སྟེ་གསུམ་པའོ།། །།དེ་ནས་བཅད་རྒྱ་གནང་སྟེ་ཉམས་བཞེས་ལ་རྩེ་གཅིག་ཏུ་གཞོལ་བར་མཛད་ཅིང༌། ཐུན་མཚམས་སུ་རྒྱ་བོད་ཀྱི་མདོ་རྒྱུད་བསྟན་བཅོས་སོགས་ལ་གཟིགས་རྟོག་རྒྱ་ཆེར་གནང༌། སྐབས་ཤིག་ཏུ་བསྟན་པའི་གསལ་བྱེད་ཏ་ལེའི་ཧུ་ཐོག་ཐུ་སྐུ་བསྙུན་ཅུང་ཟད་བཞེས་པར་རྣམ་འཇོམས་ཀྱི་རྗེས་གནང་བྱབས་ཁྲུས་བཅས་ཞུས་པ་བཞིན་སྩལ་བས་སྐུ་ཁམས་འཕྲལ་དུ་དྭངས། དེ་ནས་ཡི་དམ་རྡོ་རྗེ་འཇིགས་བྱེད་ལྗགས་བསྙེན་ཁ་སྐོང་གི་སྦྱིན་སྲེག་བཅས་མཛད། ཨ་ཀྱཱ་རིན་པོ་ཆེའི་དྲུང་ནས་རྒྱལ་བ་བསྐལ་བཟང་རྒྱ་མཚོའི་གསུང་འབུམ་པོ་ཏི་འགའི་ལུང་གསན། དགུང་ལོ་ང་གསུམ་པ་རབ་བྱུང་བཅུ་བཞི་པའི་ཐོག་མའི་མེ་ཡོས་ལོར་ཉིད་ཀྱི་གདན་ས་དགོན་པ་དགའ་ལྡན་དར་རྒྱས་གླིང་དང་མི་ཉག་གྲྭ་ཚང་གཉིས་བདག་གིར་མཛད་པའི་ཐོག །མཆོད་རྟེན་དཀར་པོའི་མི་ཉག་གྲྭ་ཚང་གི་གྲྭ་པ་རྒན་གཞོན་རྣམས་དང༌། མཆོད་གཞིས་སོགས་ནས་དད་འདུས་རྩེ་གཅིག་གིས་ས་ག་ཟླ་བ་འདིར་གྲྭ་ཚང་རང་དུ་བཞི་པའི་སྨོན་ལམ་གསར་འཛུགས་གནང་དགོས་ཚུལ་ནན་ཆེར་ཞུས་པ་ལྟར། སྨོན་ལམ་བཙུགས་ནས་ཞལ་འདོན་ལ་གཏན་ཆགས་སུ་ཀུན་རིག་གི་སྒྲུབ་མཆོད་དབྱངས་རྟ་འདུར་གསུམ་སྐུ་འབུམ་སྨན་པ་གྲྭ་ཚང་གི་ཕྱག་ལེན་བཞིན་བཙུགས། དེ་ནས་དགའ་ལྡན་དར་རྒྱས་གླིང་དུ་ཕེབས་ཏེ་སྨོན་ལམ་སོགས་སུ་བྱོན་ནས་བསྟན་པ་རྒྱས་པའི་ཐུགས་སྨོན་གང་ལེགས་མཛད། ཕྱོགས་འདུས་ཀྱི་མཇལ་བ་རྣམས་ལ་ཕྱག་དབང༌། ལྗགས་ལུང་སོགས་ཀྱིས་རེ་འབྲས་སྨིན་པར་བྱས། ཨ་ཀྱཱ་རིན་པོ་ཆེས་སྒོ་མེའི་ཧོར་ཀྱའི་རང་གཞི་
ལྷུན་གྲུབ་རྩེར་གདན་དྲངས་པ་བཞིན་ཕེབས། བསྟན་པའི་རྩ་ལག་ཨ་ཀྱཱ་རིན་པོ་ཆེའི་ཐུགས་བཞེད་བཞིན་ཁོང་གིས་དབུ་མཛད་པའི་སེར་སྐྱ་སུམ་བརྒྱ་ལྷག་ཙམ་ལ་གདུགས་དཀར་གྱི་དབང་ཆེན་དང༌། རྗེའི་གསུང་འབུམ་ནང་གི་ལེ་ཚན་འགའ་ཞིག་གི་ལུང་སོགས་སྩལ། གཞན་དད་ལྡན་རྣམས་ཀྱི་མོས་འདུན་ལྟར་ཕྱག་དབང་དང་རིག་གསུམ་མགོན་པོའི་བཟླས་ལུང༌། བཀའ་བསྒོ། ལྗགས་བསྔོ་སོགས་ཀྱིས་ཡིད་ཚིམ་པར་བྱས། སྐུ་འབུམ་དུ་ཕེབས་ཏེ་མཁས་པའི་དབང་པོ་ཨ་བ་ག་ལྷ་རམས་པ་ངག་དབང་འོད་ཟེར་ལ་རྟ་མགྲིན་གསང་སྒྲུབ་ཀྱི་དབང་དང༌། གཡུ་ཐོག་སྙིང་ཐིག་གི་དབང་བཅས་བཀའ་ཆོས་ཀྱི་སྐོར་མང་དུ་སྩལ། བླ་མ་དེས་མཆོད་རྟེན་ཆེན་མོའི་མདུན་དུ་སྔར་བླངས་པའི་དགེ་སློང་གི་སྡོམ་པ་ཕུལ་ཏེ། འདི་འདུལ་བ་རང་སྐད་ལ་ཆེར་མེད་ཀྱང༌། ལོ་རྒྱུས་དེ་འདྲ་མང་དུ་སྣང༌། ཡང་བསྐྱར་བསྙེན་རྫོགས་ཀྱི་སྡོམ་པ་ལེན་རྒྱུར་ཨ་ཀྱཱ་རིན་པོ་ཆེ་དང་ཉིད་རྣམ་གཉིས་ལ་ཨུ་ཚུགས་ཀྱིས་ཞུས་པ་བཞིན། རྗེ་རིན་པོ་ཆེའི་གསེར་གདུང་ཆེན་མོའི་མདུན་དུ་ཐུབ་དབང་གི་སྐུ་བྱིན་རླབས་ཅན་བཞུགས་སུ་བཅུག་སྟེ། རྗེ་ཨ་ཀྱཱ་རིན་པོ་ཆེས་མཁན་པོ་དང་རྗེ་འདི་པའི་ལས་སློབ་མཛད་དེ་བསྙེན་རྫོགས་ཀྱི་སྡོམ་པ་སྩལ། རྗེ་འཇམ་དབྱངས་བཞད་པའི་མཆོག་སྤྲུལ་རིན་པོ་ཆེ་སྐུ་འབུམ་དུ་ཆིབས་བསྒྱུར་སྐབས། ཉིད་ཀྱི་བླ་བྲང་དུ་བླ་མཆོད་དུས་བཟང་གི་ཚོགས་དབུར་གདན་དྲངས་ཏེ། ལམ་གྱི་གཙོ་བོ་རྣམ་གསུམ་གྱི་ཁྲིད་གསན་ནས་བླ་མཆོད་དང་འབྲེལ་བའི་ཞབས་བརྟན་གྱི་ཞུ་བ་གནད་ཅན་ཕུལ། རྗེ་ཨ་ཀྱཱ་རིན་པོ་ཆེས་རྒྱུད་པའི་འདུ་ཁང་གསར་བཞེངས་བྱས་
པར། རྒྱུད་གྲྭའི་ལས་སྣེ་ཐུན་མོང་ནས་དཀར་ཆག་རྒྱས་པ་ཞིག་དགོས་ཞེས་རྗེ་ཉིད་ལ་བསྐུལ་མ་ཞུས་པ་ལྟར་ལྗགས་རྩོམ་མཛད། སྐྱབས་མགོན་ཆུ་བཟང་རིན་པོ་ཆེའི་མཆོག་སྤྲུལ་སྐུ་འབུམ་དུ་ཕེབས་པར། ཉིད་ཀྱི་བླ་བྲང་དུ་གདན་དྲངས་ནས་ཆོས་འབྲེལ་ཞུས་ཏེ་ཞབས་བརྟན་ཞུ་འབུལ་གང་རྒྱས་བསྟར། མཚོ་སྔོན་ཆིང་ཝང་བསོད་ནམས་རྡོ་རྗེས་ཁོ་རང་གི་སྡེ་པའི་དྲུག་པའི་སྨོན་ལམ་ལ་གདན་དྲངས་པ་བཞིན་མཚོ་སྔོན་ཏུ་ལན་གོལ་གྱི་དགོན་པར་ཕེབས་ནས་ཏ་ལེ་ཧུ་ཐོག་ཐུ་དང་རྣམ་གཉིས་ཞལ་འཛོམ་སྟེ་སྨོན་ལམ་སོགས་སུ་བྱོན་ནས་དགེ་ལྡན་རིང་ལུགས་རྒྱས་པའི་ཐུགས་སྨོན་མཛད། མི་རྗེ་ཝང་དེར་འཚོགས་སེར་སྐྱ་དྲག་ཞན་ཀུན་ནས་གསོལ་བ་བཏབ་པ་བཞིན་ཐུགས་རྗེ་ཆེན་པོ་བཅུ་གཅིག་ཞལ་གྱི་དབང༌། གསང་འདུས་ཀྱི་དབང༌། གཞན་ལུང་སྣ་ཚོགས་བཅས་སེར་སྐྱ་ཆིག་སྟོང་དང་བརྒྱ་ཕྲག་གསུམ་ལྷག་ལ་སྩལ། ཉིན་གཅིག་གི་རིང་དུས་འཁོར་གྱི་ཚོགས་དབུར་བཞུགས་ནས་བསྟན་པ་རྒྱས་པའི་ཐུགས་སྨོན་མཛད། དེ་ནས་ཝང་གི་ཨུརྒེར་ཕེབས། དཔོན་ཚང་ནས་གསོལ་བ་བཞིན་ཐེན་ཙིན་བྲག་དཀར་གྱི་རྫོང་དུ་དབང་གི་ལྷ་མོ་ཀུ་རུ་ཀུ་ལླེའི་བསྙེན་སྒྲུབ་ཉིན་བདུན་གྱི་རིང་ལ་མཛད་དེ་དབང་གི་སྦྱིན་སྲེག་གནང་བས་རྟགས་མཚན་དང་རྟེན་འབྲེལ་སྣ་ཚོགས་རང་འགྲིག་ཏུ་བྱུང༌། ཝང་ཆོལ་གྷན་ནས་ཕྱིར་ཕེབས་ཏེ་རྗེ་འདི་པར་མཇལ་དུས། ལགས་ད་རེས་ངེད་ཆོལ་གྷན་ལ་སོང་བས་དོན་ཐམས་ཅད་གྲུབ་ཅིང༌། ལྷག་པར་ཕ་རོལ་གྱི་མི་དྲག་དབང་ཆེ་བ་མང་པོ་ཚུར་མགོ་སྒུར་ཏེ་དབང་དུ་འདུས་བྱུང་བ་རྗེ་ཉིད་ཀྱི་བྱིན་རླབས་ཡིན་ཞུས་པར། ང་ལ་བྱིན་རླབས་ག་ན་མཆིས། དཀོན་མཆོག་གསུམ་དང་ལྷག་པའི་ལྷའི་བྱིན་
རླབས་ཁོ་ན་ཡིན་གསུང༌། སུ་རུ་ཐོ་ལིའི་ཕྱོགས་ཆིབས་བསྒྱུར་གནང༌། དད་ལྡན་རྣམས་ཀྱི་འདོད་མོས་ལྟར་སེར་སྐྱ་ལྔ་བརྒྱ་སྐོར་ལ་ཀུན་རིག་གི་དབང་ལུང་སྣ་ཚོགས་བཅས་སྩལ། གཞན་སྦྱིན་བདག་སོ་སོའི་འདོད་མོས་བཞིན་བཀའ་བསྒོ། ལྗགས་བསྔོ་སོགས་ཀུན་གྱི་ཡིད་ཚིམ་པ་གནང༌། ཨུལ་ཅི་ཐུ་དའི་ཆིང་རྡོ་རྗེ་ཇ་སག་གིས་གདན་དྲངས་པ་བཞིན་ཕེབས། དཔོན་པོས་ཞུས་ངོར་འཇིགས་བྱེད་ཀྱི་བསྙེན་སྒྲུབ་ཚད་ལྡན། ཞི་བའི་སྦྱིན་སྲེག་གནད་སྨིན་བཅས་བསྒྲུབས། འཇིགས་བྱེད་ཀྱི་དབང་དང་གཞན་ལུང་འགའ་ཞིག་ཞུས་པ་བཞིན། དཔོན་པོ་སེར་མོ་བ་ཉིས་བརྒྱ་ལྷག་དང་བཅས་ལ་སྩལ། ཡང་བསྐྱར་ཝང་གི་ཨུར་གེར་ཕེབས་ཏེ་ཝང་ཡབ་སྲས་ཀྱི་ཞབས་བརྟན་དུ་སྒྲོལ་དཀར་ཚེ་སྒྲུབ་ཉིན་བདུན་གནང༌། བུམ་པའི་ནང་དུ་རིལ་བུ་སུམ་ཉིས་ཙམ་བླུགས་ཏེ་ཚེ་སྒྲུབ་གྲོལ་ཉིན་གང་སྟེ་འཕྱུར་བྱུང་བས་ཝང་ཐུགས་དགྱེས་ཤིང་དད་པ་ཆེར་སྐྱེས་ནས་མཆོད་འབུལ་གཟབ་རྒྱས་ཞུས། ཨུར་གེ་ནས་ཕྱིར་ཕེབས་སྐབས་ཝང་གིས་སྤྱི་སྒེར་གྱི་སྐྱབས་འཇུག་ཞུས་ཤིང༌། ཁྱད་པར་ད་ནི་ང་རང་ལོའང་མཐོ་བས་འཆི་བ་ལ་ངེས་པ་ཅི་ཡོད། ངའི་བུ་འདི་ཐུགས་བརྩེ་བས་མ་བོར་བར་ཆོས་སྲིད་གང་ཐད་ཀྱི་བསླབ་སྟོན་སྦ་གསང་མེད་པར་ལྷུག་སྩོལ་དགོས་ཞེས་སོགས་ཀྱི་ཞུ་བ་མཛད། དེ་ནས་པཻ་ཟི་མི་འགྱུར་གྱི་ཨུརྒེར་ཕེབས། དཔོན་པོའི་འདོད་མོས་ལྟར་ཡོངས་རྫོགས་དགེ་བསྙེན་གྱི་སྡོམ་པ་སྩལ་ནས་ཐར་པའི་ས་བོན་བསྐྲུན་པར་མཛད། མི་རིང་བར་ཝང་བསོད་ནམས་རྡོ་རྗེ་སྐུ་གཤེགས་པའི་སྔས་མགོར་གདན་དྲངས་པ་བཞིན་ཕེབས་ཏེ། བཅོམ་
ལྡན་འདས་ཀུན་རིག་རྣམ་པར་སྣང་མཛད་ཀྱི་ཆོ་ག་རྣམ་དག་སྔོན་དུ་འགྲོ་བའི་སྒོ་ནས་དབང་བསྐུར་ཕྱག་ལེན་བཞིན་མཛད་དེ་འཁོར་བ་སྤྱི་བྱེ་བྲག་གི་དུཿ ཁ་ལས་བསྒྲལ་ནས་མངོན་མཐོ་ངེས་ལེགས་ཀྱི་དཔལ་ལ་བཀོད། སླར་སྐུ་འབུམ་དུ་ཕེབས། ཟླ་བ་ཁ་ཤས་ཀྱི་རིང་ལ་བཅད་རྒྱ་བསྡམས་ནས་རྡོ་རྗེ་རྣལ་འབྱོར་མའི་ལྗགས་བསྙེན་མཛད་ཅིང༌། མཇུག་ཏུ་ཉིན་ཉི་ཤུ་རྩ་གཅིག་གི་རིང་ལ་བདག་འཇུག་བཞེས་ཏེ་ཚོགས་ཀྱི་འཁོར་ལོར་ཚིམ་པ་དྲུག་ལྡན་དུ་རོལ་བར་མཛད། བྱང་ཕྱོགས་ཀྱི་སྦྱིན་བདག་སོགས་དད་ལྡན་མང་དུ་འདུས་པ་རྣམས་ལ་དམ་པའི་ཆོས་ཀྱི་ཆར་ཕབ་ཅིང་བྱང་ཆུབ་མཆོག་གི་ས་བོན་བསྐྲུན་པར་མཛད། བསྒྲུབ་བྱ་བརྒྱ་དང་བཞི་བཅུ་ལྷག་ལ་སོ་ཐར་གྱི་སྡོམ་པ་སྩལ། སྐབས་ཤིག་ཏུ་དབང་ཕྱོགས་ཀྱི་སྦྱིན་བདག་ས་ཡི་དབང་ཕྱུག་དམ་པ་སུ་ཉིད་གཡས་རུའི་དུའུ་རེངས་ཝང་རཏྣ་སིདྡྷིའི་སྐུ་མཆེད་བསྟན་པའི་གསལ་བྱེད་མཁན་པོ་བླ་མ་སངས་རྒྱས་བཀྲ་ཤིས་ནས་བྱང་ཕྱོགས་སུ་ཆིབས་སྒྱུར་གནང་དགོས་ཚུལ་གྱི་སྙན་གསན་སྔར་ནས་ནན་ཆེར་ཡང་ཡང་ཕུལ་ཡོད་པ་ལྟར་གདན་འདྲེན་བྱེད་མི་ཁལ་རྟ་བཅས་འབྱོར། དགུང་ལོ་ང་ལྔ་པ་དཀར་པོ་ཞེས་པ་ས་སྦྲུལ་ལོའི་དཔྱིད་ཀ་ཆོས་སྡེ་ཆེན་པོ་སྐུ་འབུམ་བྱམས་པ་གླིང་ནས་བྱང་ཕྱོགས་ཆེན་པོ་ཧོར་གྱི་ཡུལ་དུ་ཆིབས་ཀྱི་ཁ་ལོ་བསྒྱུར། ཕེབས་ལམ་དུའང་དགོན་སྡེ་སྒྲུབ་སྡེ་སོགས་ཀྱིས་མཚོན་དད་ལྡན་སོ་སོའི་ཞུ་འབུལ་ལྟར་བསྒྲུབ་བྱ་འདུས་ཐེབས་མང་པོ་ལ་དགེ་ཚུལ་སློང་གི་སྡོམ་པ་སྩལ། ཕྱོགས་འདུས་ཀྱི་དད་ལྡན་མཐའ་ཡས་པ་ལ་ཕྱག་དབང་དང་དམ་པའི་ཆོས་ཀྱི་ཆར་པ་འདོད་མོས་ལྟར་ཕབ་སྟེ་ཀུན་གྱི་ཡིད་ཚིམ་པར་བྱས། དེ་ནས་རིམ་པར་
བརྒྱུད་དེ་སུ་ཉིད་དང་དུར་བེད་གཉིས་ཀྱི་ས་མཚམས་པཱ་ཡན་ཟེར་བའི་ས་ནས་གདན་འདྲེན་ཞུ་མི་གཙོ་བོ་སུ་ཉིད་གཡས་རུའི་ཝང་རཏྣ་སིདྡྷི་དང༌། སྐུ་མཆེད་མཁན་པོ་བླ་མ་སངས་རྒྱས་བཀྲ་ཤིས། ཏཱ་བླ་མ་བསོད་ནམས་ཉི་མ་སོགས་ཀྱིས་གཙོས་འབངས་བློན་སེར་སྐྱ་མང་པོས་ཆིབས་བསུ་ཞུས། ཧོ་ཤོས་ཀྱི་དགོན་པ་བདེ་སྐྱིད་གླིང་དུ་ཕེབས་ཏེ་རྟེན་འབྲེལ་གྱི་ཐོག་མར་བཀྲ་ཤིས་གསོ་སྦྱོང་མཛད། དོན་གཉེར་བ་མང་པོར་འདོད་ཆོས་གནང༌། མཁན་པོ་བླ་མའི་དགོན་པར་ཡང་ཐོག་མར་བཀྲ་ཤིས་གསོ་སྦྱོང་མཛད། རིམ་བཞིན་དཔོན་པོ་རྣམས་ཀྱིས་མཆོད་སྤྲིན་རྒྱས་པར་ཕུལ། བསྟན་པའི་གསལ་བྱེད་མཁན་པོ་བླ་མ་སངས་རྒྱས་བཀྲ་ཤིས། དུའུ་རེང་ཝང་རཏྣ་སིདྡྷི། ཏཱ་བླ་མ་བསོད་ནམས་ཉི་མ་སོགས་སྐུ་མཆེད་རྣམས་ཀྱིས་མགྲིན་གཅིག་ཏུ་བཀའ་ཆོས་ཀྱི་སྙན་གསན་ཕུལ། དེ་ནས་དགོན་པའི་བདེ་སྐྱིད་གླིང་དུ་ཕེབས་ཏེ། སོ་སོའི་འདོད་མོས་བཞིན་བླ་དཔོན་སེར་སྐྱ་དྲག་ཞན་སུམ་སྟོང་དྲུག་བརྒྱ་ལྷག་པར་ཉིན་བཅུ་གཅིག་གི་རིང་གསང་བདེ་འཇིགས་གསུམ་ཀུན་རིག་རྣམས་ཀྱི་དབང་སྟ་གོན་དང་བཅས་པ། གྲུབ་རྒྱལ་ལུགས་ཀྱི་ཚེ་དབང༌། འཕོ་ཁྲིད། གཞན་ལུང་སྣ་ཚོགས་བཅས་སྩལ་ནས་དགེ་མཚན་གྱི་དཔལ་ལ་སྦྱོར་བར་མཛད། བསྒྲུབ་བྱ་བརྒྱ་དང་ལྔ་བཅུ་དགེ་ཚུལ་སློང་གི་དངོས་པོར་བསྒྲུབས། ཆ་གན་ཨོ་བོའི་དགོན་པ་དགེ་འདུན་དར་རྒྱས་གླིང་དུ་ལམ་རིམ་བསྡུས་དོན། དགའ་ལྡན་ལྷ་བརྒྱ་མ། བཟླས་ལུང་མང་པོ། དུར་བེད་སཱོ་ནེའི་དགོན་པར་བླ་མ་མཆོད་པ། ཐོག་མཐའ་བར་སོགས་རྗེའི་གསུང་འགའ་ཞིག་གི་ལུང༌། སྔགས་རམས་པ་བླ་མས་ཞུས་ངོར་དམིགས་བརྩེ་
མའི་འཕོ་ཁྲིད། གདུགས་དཀར་གྱི་རྗེས་གནང༌། སྒྲོལ་དཀར་དང་སྐུ་ལྔའི་རྗེས་གནང༌། རབ་འབྱམས་པ་བློ་བཟང་ཉི་མས་ཞུས་ངོར་སྒྲོལ་དཀར་གྱི་རྗེས་གནང་ལུང་སྣ་ཚོགས། ཀིརྟི་བླ་མའི་འདོད་མོས་བཞིན་བདེ་མཆོག་དཀར་པོ་དང་སྒྲོལ་མའི་རྗེས་གནང་སོགས་གནང༌། དུར་བེད་ཐུ་ས་ལཀྖི་མེརྒེན་ཏཱ་ཆིང་ནས་གདན་དྲངས་པར་མི་འཁྲུགས་པ་ལྷ་དགུའི་དབང་སྟ་གོན་བཅས། ཐུགས་རྗེ་ཆེན་པོའི་དབང༌། འོད་དཔག་མེད་ཀྱི་འཕོ་ཁྲིད་བཅས་སྩལ། ཐུ་ས་ལཀྖིས་ཆོས་རྒྱལ་གྱི་གཏོར་སྒྲུབ་ཅིག་བྱེད་དགོས་ནན་ཏན་ཞུས་པ་ལྟར་བསྟན་པའི་ཞབས་བརྟན་ལ་དམིགས་ནས་གཏོར་སྒྲུབ་མཛད། དཔོན་པོ་ཚེ་དཔག་སྐྱབས་དང་ཨེམ་ཆི་ཆོས་རྗེ་རྣམས་ཀྱི་འདོད་མོས་བཞིན་བརྒྱ་རྩའི་ལུང་སོགས་དང་། ཨམྖི་བློ་བཟང་ཚུལ་ཁྲིམས་ཀྱིས་ཞུས་ངོར་ཚེ་བདག་མགོན་པོ་དང་ཕྱག་རྡོར་སོགས་ཀྱི་རྗེས་གནང༌། སེང་གདོང་མའི་གཏོར་ཆོག །འཇིགས་བྱེད་བསྐྱེད་རིམ་སོགས་ཀྱི་ལུང༌། དུར་བེད་ཇ་ཁི་རོག་ཆི་ལ། སྒྲོལ་དཀར་དང་ལྷ་མོའི་རྗེས་གནང༌། བླ་མཆོད་ཀྱི་ལུང༌། ཆ་ཧར་ཙམ་པ་ཀ་ནང་སོ་བཅས་ལ་གྲུབ་རྒྱལ་ལུགས་ཀྱི་ཚེ་དབང༌། སྒྲོལ་མ་དཀར་ལྗང་གི་ལུང༌། སོ་ཉིད་བོ་དྷི་ཅ་ཁི་རོག་ཆིར་ཚེ་དཔག་གི་རྗེས་གནང༌། རིགས་གསུམ་མགོན་པོའི་སྙིང་པོའི་བཟླས་ལུང་བཅས་གནང༌། ཡང་སྔར་གྱི་སོ་ཉིད་དགོན་པ་བདེ་སྐྱིད་གླིང་དུ་ཕེབས། བླ་མ་མཆོད་པའི་དུས་བཟང་ཚོགས་འཁོར་སོགས་ཆ་ལག་ཚང་བ་མཛད། གུ་ཤྲཱི་བླ་མའི་དགོན་པ་བཀྲ་ཤིས་རབ་རྒྱས་གླིང་དུ་ཕེབས་ཏེ་སྐུ་སྐྱེ་ཞབས་དྲུང་ལ་ལྷ་མོའི་རྗེས་གནང༌། ཉིད་ཀྱི་གསུང་གི་བླ་མའི་རྣལ་འབྱོར་སོགས་ཀྱི་ལུང་གནང༌། དེ་ནས་སོ་ཉིད་ཨུ་
རྫིང་མེ་རིན་གྱིས་མཆོད་པའི་གྲྭ་ཚང་ལ་ཕེབས། འདུས་ཚོགས་ཉིས་བརྒྱ་ཙམ་ལ་དགའ་ལྡན་ལྷ་བརྒྱ་མའི་ཁྲིད་ལུང་སྩལ། མཚོ་བདུན་དུ་ཆིབས་ཁ་བསྒྱུར་བའི་ལམ་དུའང་བླ་དཔོན་སེར་སྐྱ་དྲག་ཞན་ཉིས་སྟོང་བརྒལ་བ་ལ་ཕྱག་དབང་དང༌། སོ་སོའི་མོས་པ་ལྟར་དབང་རྗེས་གནང་ལུང་ཁྲིད་སོགས་སྩལ་ཏེ་སྐྱེ་བོ་ཀུན་གྱི་ཡིད་ཚིམ་པར་བྱས་ནས་མཚོ་བདུན་ཨ་ཀྱཱ་རིན་པོ་ཆེའི་བླ་བྲང་དུ་ཕྱག་ཕེབས། བྱང་ཕྱོགས་བསྟན་པའི་མངའ་བདག་ཆེན་པོ་ཧལ་ཧ་རྗེ་བཙུན་དམ་པ་དང་བསྟན་པའི་རྩ་ལག་རྗེ་ཨ་ཀྱཱ་ནོ་མོན་ཧན་རིན་པོ་ཆེ་རྣམ་གཉིས། འཇམ་དབྱངས་གོང་མ་ཆེན་པོར་མཇལ་ཕྲད་གནང་རྒྱུར་མཚོ་བདུན་བརྒྱུད་ནས་ཕེབས་སྐབས། རྗེ་བཙུན་དམ་པ་རིན་པོ་ཆེར་ལྷ་རྫས་དངུལ་གྱི་མཎྜལ། སྐུ་གསུང་ཐུགས་རྟེན། དངུལ་སྲང་ལྔ་བཅུ་སོགས་ཕུལ་ཏེ་མཇལ་ཁ་ཞུས་ཤིང༌། ཉིད་རྣམ་པ་གསུམ་པོ་ཉིན་ཁ་ཤས་ཀྱི་རིང་ལ་ལྷན་རྒྱས་སུ་བཞུགས་ནས་ཟབ་ཆོས་ཀྱི་གླེང་བ་རྒྱ་ཆེར་མཛད། ཉིད་ལ་རྗེ་བཙུན་དམ་པ་རིན་པོ་ཆེས་རྣམ་འཇོམས་ཀྱི་རྗེས་གནང་བྱབས་ཁྲུས་དང་བཅས་པ་གནང་དགོས་ཞེས་བཀའ་ཕེབས་པ་ལྟར་རྗེས་སུ་གནང་བ་སྤྱིའི་ཆོས་བཤད་གང་རྒྱས་ཀྱིས་བརྒྱན་ནས་ཕུལ་བས་ཐུགས་ཤིན་ཏུ་དགྱེས་ཏེ། ཁོ་བོ་གཏན་ཆག་པར་ཁྱེད་ཉིད་དང་ལྷན་རྒྱས་སུ་འདུག་འདོད་ཆེ་ནའང༌། ཡུལ་གྱིས་བསྐལ་པའི་དབང་གིས་བསམ་པ་བཞིན་མི་ཡོང་འདུག །ད་རེས་རང་ཅག་གི་སྐྱེ་བ་སྔོན་མའི་སྨོན་ལམ་རྣམ་པར་དག་པའི་མཐུས་དངོས་སུ་ཕྲད་དེ་དམ་པའི་ཆོས་ཀྱི་འབྲེལ་བ་ཤིན་ཏུ་ཟབ་པ་བྱུང་བས། དམ་པ་ཉིད་ནས།
ཚེ་རབས་ཀུན་ཏུ་རྗེས་སུ་འཛིན་པའི་སྐྱབས་འཇུག་ཅེས་གནས་ཚུལ་རྣམས་ཞིབ་རྒྱས་གསུངས། ཉིད་ནས་ཀྱང་ལྷ་རྫས། དངུལ་མཎ། སྐུ་གསུང་ཐུགས་རྟེན་སོགས་ཕུལ་ཏེ་སྐྱབས་འཇུག་ནན་ཏན་ཞུས། དེ་ནས་རྗེ་ཐམས་ཅད་མཁྱེན་པ་ལྕང་སྐྱ་རོལ་པའི་རྡོ་རྗེའི་མཆོག་སྤྲུལ་རིན་པོ་ཆེར་མཇལ་བར་ཕེབས་པས། ལྕང་སྐྱ་རིན་པོ་ཆེས་གཟིགས་པ་ཆེ་བཞེས་ཀྱིས་བཀའ་མཆིད་མང་དུ་སྩལ། སླར་མཚོ་བདུན་གྱི་ཨ་ཀྱཱ་བླ་བྲང་དུ་ཕེབས་ནས་ཡུན་རིང་ཙམ་བཞུགས། བསྟན་པའི་གསལ་བྱེད་ལྕང་ལུང་པཎྚི་ཏ་མཇལ་བར་ཕེབས་པ་ལ་ཟབ་ཆོས་ཀྱི་བགྲོ་བ་རྒྱ་ཆེར་མཛད། ཧོའུ་ཆིད་གཡས་རུའི་ཝང་གིས་ཞུས་པ་བཞིན་དམ་ཅན་སྐྱེས་བུ་ཆེན་པོའི་རྗེས་གནང་དང༌། ཨོར་དུ་སུ་ཅཱུན་གར་ཏཱ་པེ་ཟི་ལ་སྒྲོལ་དཀར་གྱི་རྗེས་གནང་སྩལ། དུར་བེད་ཏཱ་ཝང་ཞེ་ཧོར་ལ་གོང་མར་མཇལ་དུ་ཕེབས་ཞོར་ལ་རྗེ་འདི་མཇལ་བར་བྱོན་ནས་ཕྱག་དབང་དང་ཆོས་འབྲེལ་ཞུས། མཚོ་སྔོན་དང་སྨད་ཕྱོགས་ཀྱི་དཔོན་པོ་མང་པོས་མཇལ་བར་འདོད་ཆོས་སྩལ། མཇལ་བ་བླ་དཔོན་སེར་སྐྱ་དྲག་ཞན་ཆིག་ཁྲི་ལྔ་སྟོང་བརྒལ་བ་ལ་ཕྱག་དབང་དང་ཆོས་འབྲེལ་སྩལ་ཅིང༌། ལྷག་པར་རིགས་གསུམ་མགོན་པོའི་བཟླས་ལུང་ལྗགས་བསྔོ་སོགས་གནང་སྟེ་ཀུན་གྱི་རྒྱུད་ལ་ཐར་པའི་ས་བོན་བསྐྲུན། ཨ་ཀྱཱ་རིན་པོ་ཆེའི་ཞབས་བརྟན་དུ་ཡི་དམ་གྱི་བསྙེན་པ་དང་ཆོས་སྲུང་སྤྱི་ལ་མཆོད་གཏོར་གང་རྒྱས་འཕྲིན་བཅོལ་སོགས་གནང༌། ཧལ་ཧ་རྗེ་བཙུན་དམ་པ་རིན་པོ་ཆེ་དང༌། ཨ་ཀྱཱ་རིན་པོ་ཆེ་རྣམ་གཉིས་ནས་འཇམ་དབྱངས་གོང་མར་མཇལ་ཕྲད་གྲུབ་ནས་ཡང་བསྐྱར་མཚོ་བདུན་དུ་ཕེབས། ཉིན་ཁ་ཤས་ཀྱི་རིང་ལྷན་དུ་བཞུགས་ནས་མདོ་སྔགས་ཆོས་ཀྱི་བཀའ་མཆིད་མང་དུ་མཛད། ཁྱད་པར་དཀའ་
གནས་མང་པོ་བཀྲོལ་བས་ཆོས་ཀྱི་དགའ་བས་རོལ་པར་གྱུར། སྐབས་ཤིག་ཏུ་ཨོར་དུ་སུ་ཅཱུན་གར་ཏཱ་པཻ་ཟིའི་སྲས་མོ་གཉིས་ལ་གདོན་གྱིས་ཟིན་ཏེ་ཅི་བྱ་གཏོལ་མེད་དུ་གྱུར་ནས་མགོན་སྐྱབས་སུ་གདན་དྲངས་པ་བཞིན་ཕེབས། ཕྱག་དབང་བཀའ་བསྒོ། སྲུང་མདུད་སོགས་སྩལ་བས་བུ་མོ་གཉིས་དྲན་མེད་དུ་བརྒྱལ་ཞིང༌། བརྒྱལ་སངས་ནས་ཁོ་རང་གཉིས་ཀྱི་སྲོག་སྐྱོབ་དགོས་ཚུལ་གྱི་སྐྱབས་འཇུག་ཞུས་པས་ནད་ལས་རིམ་གྱིས་གྲོལ་ཏེ་དཔོན་འབངས་ཚང་མས་ཉིན་མཚན་ཁོར་ཡུག་ཏུ་རྗེ་འདི་ལ་གསོལ་བ་འདེབས་པ་བྱུང༌། དུར་བེད་ཏཱ་ཝང་ཕུན་ཚོགས་བསམ་འགྲུབ་གོང་མར་མཇལ་ནས་རང་ཡུལ་དུ་ལྡོག་སྐབས་ལམ་དུ་བསྙུན་གཞི་དྲག་པོ་ཞིག་གིས་ཐེབས་ཏེ་གཞན་གྱི་ས་ཆར་མགོན་སྐྱབས་ཡེ་མ་མཆིས་པར་བཞུགས་པས། ཉིད་ལ་སྐྱབས་བཙལ་ནས་གསོལ་བ་བཏབ་པར་ཐུགས་བརྩེ་བས་ཉེ་བར་གཟིགས་ཏེ་ཕྱག་སྨན་དང་བཀའ་བསྒོ་སོགས་སྩལ་ཅིང་རིམ་གྲོ་འགའ་ཞིག་བསྒྲུབས་པས། ཞག་གཅིག་ནས་སྐུ་བསྙུན་ལས་གྲོལ་ཏེ་དད་པ་ལྷག་པར་སྐྱེས་ནས་རྟ་མགྲིན་གསང་སྒྲུབ་ཀྱི་རྗེས་གནང་ཞུས་ཤིང་དཔོན་པོ་རང་གི་ཨུརྒེར་གདན་འདྲེན་གྱི་སྙན་གསན་ཕུལ། དེ་ནས་སྟོན་མཇུག་མཚོ་བདུན་ནས་ཆ་ཧར་གྱི་སྡེ་ཚོ་བརྒྱུད་དེ་ཆིབས་ཁ་ཡར་བསྒྱུར། ཕེབས་ལམ་དུ་དད་ལྡན་སེར་སྐྱ་ལྔ་སྟོང་བརྒལ་བ་ལ་ཕྱག་དབང་མ་ཎིའི་བཟླས་ལུང་སོགས་སྩལ་ནས་ཀུན་གྱི་རེ་བ་བསྐང་བར་མཛད་དེ་ཨ་ཏོ་ཆིན་ཧ་ཡ་གྲི་ཝའི་དགོན་པར་ཕེབས། དགེ་འདུན་འདུས་ཚོགས་ཡོངས་ལ་དགའ་ལྡན་ལྷ་བརྒྱ་མའི་ཁྲིད་ལུང༌། འཕོ་བའི་མན་ངག་བཅས་སྩལ། དེ་ནས་རིམ་པར་
བརྒྱུད་དེ་གླང་ཆེན་དལ་འགྲོས་ཀྱིས་ཕེབས་པའི་ལམ་ཞོར་དུ་ཆ་ཧར་ཀུ་ལུ་ཨོ་ལཱན་ཤོག་གི་དཔོན་པོ་བཀྲ་ཤིས་ཙུན་ཏཱ་མི་སྡེ་བཅས་ལ་སྒྲོལ་དཀར་དང་སྒྲོལ་ལྗང་སོགས་ཀྱི་རྗེས་གནང༌། སེང་གདོང་མའི་སྒྲུབ་ཐབས་ཀྱི་ལུང༌། བཟླས་ལུང་འགའ་ཞིག་བཅས་སྩལ། དེ་ནས་ཆ་ཧར་ཀུ་ལུ་ཨོ་ལཱན་ཤོག་གི་སཱོ་ཉིག་དགོན་པ་བསྟན་པ་དར་རྒྱས་གླིང་དུ་ཕེབས། དད་ལྡན་རྣམས་ལ་ཕྱག་དབང་སོགས་སྩལ། དེར་ཁལ་རྟ་དང་ཆིབས་པ་རྣམས་བཞག་ནས་འཛམ་གླིང་གི་གནས་ཆེན། ཤར་རི་བོ་རྩེ་ལྔ། ལྷོར་རི་བོ་གྲུ་འཛིན། ནུབ་ཨོ་ཌི་ཡ་ན། བྱང་ཤམྦྷ་ལ། དབུས་རྡོ་རྗེ་གདན་ཏེ་ལྔར་གསུངས་པའི་ནང་ནས། རྗེ་བཙུན་འཇམ་པའི་དབྱངས་ཀྱི་ཞིང༌། འཇམ་དཔལ་རྩ་རྒྱུད། མདོ་སྡེ་ཕལ་བོ་ཆེ། ཡི་གེ་བརྒྱད་པའི་ཆོ་ག་ཞིབ་མོ་སོགས་ལས་ལུང་བསྟན་པ་གནས་མཆོག་རི་བོ་རྩེ་ལྔར་མཇལ་བར་ཕེབས། རྟ་ཞོན་ཁལ་བཀལ་ནས་འགྲོ་བ་གཞན་ལ་གནོད་པ་ལས་མ་ལོག་པས་དཀར་ནག་འདྲེས་མའི་སྐྱོན་གྱིས་སྦགས་ཏེ་གནས་མཇལ་ཚུལ་མཐུན་མི་ཡོང་བར་དགོངས་ནས་རྟག་ངུ་ཆོས་འཕགས་མཇལ་བར་ཕེབས་ཚུལ་བཞིན་དཔོན་གཡོག་ཐམས་ཅད་ཞབས་ཐང་ལ་ཕེབས། ལམ་དུ་ཡིན་གྲུའུ་མཁར་གྱི་ལྷ་ཁང་མཆོད་རྟེན་མར་མཆོད་མཇལ་གནང༌། རི་བོ་དྭངས་བསིལ་གྱི་རི་ལྔ་ལས་དོན་ཡོད་གྲུབ་པ་འཕྲིན་ལས་ཀྱི་གནས་བྱང་རིའི་རྩེ་མོར་བཞུགས་པའི་ལྷ་ཁང་གི་རྟེན་རྣམས་དང༌། རིའི་ཕྱོགས་ཕྱོགས་སུ་ཡོད་པ་འཇམ་དཔལ་དང་གནས་བརྟན་གྱི་ཁྲི། བརྟུལ་ཞུགས་སྤྱོད་པའི་མཆོད་རྟེན་སོགས་ལ་མཇལ་ཏེ། ལྟུང་བཤགས། སྐྱབས་སེམས། ཡན་ལག་བདུན་པ་མཎྜལ་བཅས། ཐུན་དྲུག་
གི་རྣལ་འབྱོར་སོགས་ལམ་ཐུན་མོང་དང་ཐུན་མོང་མ་ཡིན་པའི་ཉམས་བཞེས་ཆ་ཚང་བ། མཇུག་ཏུ་སྨོན་ལམ་རྣམ་ལྔ་བསྟན་འབར་མ་སོགས་གསུང་སྟེ་བསྟན་འགྲོའི་དོན་དུ་བསྔོ་བའི་སྤྱན་དམིགས་ནན་ཏན་མཛད་ཅིང་ཕྱག་མཆོད་སྐོར་བ་སོགས་གང་རྒྱས་གནང༌། དེ་ནས་དུན་ཐེའམ་ཝང་ཧེ་སྤུང་ཞེས་ཐུགས་མི་བསྐྱོད་པའི་གནས་ཤར་རིའི་རྩེར་བྱོན། རྟེན་རྣམས་ལ་མཆོད་མཇལ་གནང་ཞིང་ཕྱག་མཆོད་ཞལ་འདོན་གྱི་རིམ་པ་ཐམས་ཅད་གོང་བཞིན་སྤྱན་དམིགས་ཤུགས་དྲག་པོའི་སྒོ་ནས་གནང་སྟེ། མཇལ་ལོ་ཙམ་མ་ཡིན་པར་རྟེན་ཆེ་བ་ཐམས་ཅད་ཀྱི་དྲུང་དུ་དེ་དག་ཆག་མེད་ཕྱག་ལེན་ལ་འདེབས་པར་མཛད། སྲེད་མེད་ཀྱི་བུའི་ཕུག་དང༌། ཚག་ཞྭའི་མཆོད་རྟེན། སྤྱན་རས་གཟིགས་ཀྱི་ཁྲི། སྡོང་པོ་བཀོད་པའི་ཕུག་སོགས་ཞིབ་མཇལ་དང་བསག་སྦྱངས་གང་རྒྱས་གོང་བཞིན་གནང༌། རྒྱ་གར་གྱི་སློབ་དཔོན་བདུན་ཕེབས་ནས་ཏིང་ངེ་འཛིན་ལ་ཞུགས་ཏེ་མ་ལངས་པའི་སྟེང་དུ་བཞེངས་པ་སངས་རྒྱས་རབས་བདུན་གྱི་ལྷ་ཁང་དུ་ཕྱག་བཏེག་བསག་སྦྱང་རྒྱས་པ་སྔར་ལྟར་མཛད། དེ་ནས་འཇམ་དབྱངས་གོང་མའི་བ་ཡར་གྱི་ཉིན་དང་དུས་འཛོམས་པར། གོང་མའི་གཟིམས་ཆུང་ལ་མཆོད་མཇལ་རྒྱས་པ་ཞུས་ཧྭ་ཤང་གི་ལྷ་ཁང་མང་པོ་བརྒྱུད་དེ་ལྕང་སྐྱ་ཐམས་ཅད་མཁྱེན་པའི་གཟིམས་ཆུང་དང༌། དཔལ་ལྡན་རིགས་བརྒྱའི་ཁྱབ་བདག་རྗེ་བཙུན་རོལ་པའི་རྡོ་རྗེའི་སྐུ་གདུང་མཆོད་རྟེན་ལ་མཇལ། ཉེར་སྤྱོད་ཀྱི་མཆོད་པ་དང་མཆོད་མེ་བརྒྱ་ཕྲག་མང་པོ་ཕུལ་ཏེ། ལྟུང་བཤགས། སྐྱབས་སེམས། ཡན་ལག་བདུན་པ་མཎྜལ་བཅས། ཐུན་དྲུག་གི་རྣལ་འབྱོར་སོགས་དཀྱུས་མའི་
སྟེང་དུ་བླ་མཆོད་དང་ཁྲུས་གསོལ་སོགས་བསྣན་ཏེ་སྨོན་ལམ་རྣམས་དང་བསྟན་འབར་མ་བཅས་གསུང་ཞིང་བསྟན་པ་རྒྱས་པའི་ཐུགས་སྨོན་རྒྱ་ཆེར་མཛད། དཔོན་པོ་ཏེམ་མཆི་བླ་མ་དང་གྲྭ་རིགས་རྣམས་ཀྱི་འདོད་མོས་བཞིན་དགའ་ལྡན་ལྷ་བརྒྱ་མ་དང་རིགས་གསུམ་མགོན་པོའི་སྙིང་པོའི་ལུང་སོགས་སྩལ། ཇིང་ཧེ་ཟི་ཟེར་བའི་ལྷ་ཁང་དང༌། ཁྱུད་ས་རིའི་མཆོད་རྟེན་ཆེ་བ་དང༌། གཞན་ཡང་མཆོད་རྟེན་འགའ་ཞིག་བཅས་པར་མཆོད་འབུལ་ཞུས། དེ་ནས་ཧྭ་ཤང་གི་ལྷ་ཁང༌། གོང་མའི་གཟིམས་ཆུང༌། གནམ་གང་གི་ཟླ་བ་མཐོང་བའི་ཆུ་མིག་མིང་ཡྭེ་ཋེ་ཟེར་བ་བཅས་ལ་མཇལ། དེའི་མདུན་གྱི་མཆོད་རྟེན་དང༌། དེའི་གཤམ་གྱི་ཧྭ་ཤང་གི་ལྷ་ཁང་བཅས་ལ་མཇལ། དེ་ནས་ཆུའི་ཚུར་ཁའི་ཧྭ་ཤང་ཆིན་ཡེ་སེན་གྱི་ལྷ་ཁང་སོགས་ལ་མཆོད་མཇལ་ཞུས། དེ་ནས་ཆིན་ཧོ་དུན་ཟེར་བའི་ལྷ་ཁང་དང༌། བྲག་གི་ཕུགས་མིག་སོགས་ལ་མཇལ། དེ་ནས་ལྷོ་རི་ཡོངས་གྲགས་ནན་ཐེ་ཟེར་ཞིང་ཀྱིན་ཤེའུ་ཕུང་སྟེ་མདོག་བཟང་བཀྲ་བའི་སྤོ་ཞེས་གྲགས་པའི་རྩེར་བཞུགས་པའི་ཀུན་བཟང་མཆོད་རྟེན་དང་ལྷ་ཁང་ཆི་ལང་ཤི་སྟེ་མདོ་ལས་གསུངས་པའི་དྭངས་བསིལ་རྡོ་དང་དེར་ཡོད་པའི་ཧ་ཤང་གི་དགོན་རྣམས་མཇལ། དེ་ནས་ལོ་ཧན་དུན། གུ་ཆི་ལེང༌། ཅིན་ག་ལིན། གྲུ་རིན་ཟི། ཚི་ཕོའམ་བན་ཤུ་ཟི་ཟེར་བ་རྣམས་དང་མཆོད་རྟེན་སྔོན་པོ་རི་མོ་ཅན་རྣམས་ལ་མཇལ། དེ་ནས་ཆིང་ལེགས་ཆོ་ཟེར་བའི་ཟམ་བརྒྱུད་དེ་ཞག་བབ་ཀྱི་སར་ལྷ་ཁང་ཞིག་ཏུ་རྒྱའི་ཆིན་ཡེ་སེན་ཟེར་བའི་ཧྭ་ཤང་ཞེན་ཅན། ཧྭ་ཤང་ཐུང་ཤུན་ཧྭ་ཤང་ཞིན་མིན་ཏེ་ཧྭ་ཤང་གསུམ་བཞུགས་ཡོད་པ་དེ་གསུམ་གྱིས་ཁོ་རང་ཚོའི་འདུག་སའི་ཁང་བ་ལ་བྱི་
དོར་ལེགས་པར་བྱས་ནས་རྗེ་འདི་པ་གདན་དྲངས་ཏེ་བཞུགས་སུ་བཅུག །དེའི་མཚན་གྱི་རིང་ཡོངས་རྫོགས་ལ་རྗེ་ཉིད་དང་ཧྭ་ཤང་གསུམ་ག་ལྷན་དུ་བཞུགས། ཞབས་གྲས་རྣམས་ཁང་བ་ལོགས་ཤིག་ཏུ་བཞག་སྟེ། རྣམ་པ་བཞི་པོས་ཆོས་ཀྱི་བགྲོ་བ་འབའ་ཞིག་གིས་དུས་འདའ་བར་མཛད། སྐབས་ལ་ལར་རྣམ་པ་བཞི་གས་རྒྱ་སྐད་ཀྱི་མ་ཎི་གསུང་གིན་འདུག་པ་འགའ་ཞིག་གིས་ཐོས་ནས་ཡ་མཚན་ཏེ་མདུན་དུ་སོང་བས། ཞལ་ཏའི་མཚམས་བཅད་དེ་རྗེ་འདི་པས་རང་གའི་ཞལ་འདོན་ཞིག་དང༌། ཧྭ་ཤང་གསུམ་པོས་རྒྱ་སྐད་ཀྱི་མ་ཎི་གསུང་བའི་ཚུལ་ཙམ་ལས་གཞན་རྣམས་སྦས་པའི་ཚུལ་གནང༌། སང་ཞོགས་གསོལ་དཔོན་དགེ་སློང་བསྟན་འཛིན་ཆོས་འཕེལ་གྱིས་གསོལ་ཇ་ཁྱེར་དུས་རྣམ་པ་བཞི་ག་སྔར་དགུང་ཇི་ལྟར་བཞུགས་པའི་ཚུལ་དེ་ལས་ཅུང་ཟད་ཀྱང་མ་གཡོས་པར་བཞུགས་འདུག་པས་ཁོ་ཤིན་ཏུ་ངོ་མཚར་སྐྱེས། འོན་ཀྱང་དེ་ནས་ཕེབས་ཀར་ཧ་ཅང་དགྱེས་དྲགས་པའི་ཉམས་ཀྱིས་ཞབས་ཕྱི་ནང་མ་འགའ་ཞིག་ལ་ཞལ་རྩེད་ཀྱི་ཚུལ་དུ་མདངས་རྗེ་བཙུན་འཇམ་དབྱངས་ཀྱི་སྤྲུལ་བ་ཧྭ་ཤང་གསུམ་དང་ཞག་གཅིག་ལྷན་དུ་བསྡད་པས་སྐལ་བ་ཤིན་ ཏུ་བཟང ་ཞེས་གསུང༌། དེའི་ཚེ་མགུར་གྱི་ཚུལ་དུ། ཟླ་༡༠ ཚེས་༨ བཟང་ཉིན་འཇམ་དབྱངས་ཀྱི། །གནས་མཆོག་རི་བོ་རྩེ་ལྔ་ཡི། །ཆིང་ལིང་ཆོ་རུར་འཇམ་དབྱངས་ཀྱི། །སྤྲུལ་བ་ཧྭ་ཤང་གསུམ་དང་ཕྲད། །བཙུན་པ་མི་ཉག་སྤྲུལ་མིང་བདག །འཇམ་དབྱངས་གོ་འཕང་མཉམ་ཐོབ་ཤོག །ཅེས་ཚིགས་བཅད་འགའ་འཐེན་པ་ཞབས་གྲས་པ་ཤེས་ལྡན་ཞིག་གིས་ཐོས་ཏེ་དགོངས་གཞི་ཅན་གྱི་གསུང་ཡིན་པར་གོ་ནས་ཤིན་ཏུ་དད་དེ་ཚིགས་
བཅད་དེ་དག་ཤིན་ཏུ་བསྒྲིམ་ནས་བློར་གཟུང་སྟེ་བརྗེད་ཐོར་བྲིས། དེ་ནས་ཕེབས་ཏེ་གོམ་པ་ལྔ་བཅུ་ཙམ་སོང་དུས་གྲྭ་པ་ཞིག་གིས་ཁ་ཏོན་གྱི་དཔེ་ལུས་པ་དྲན་ནས་ཕྱིར་ལེན་རྒྱུར་སོང་ཚེ་ཧྭ་ཤང་གསུམ་ག་མི་འདུག་པར་མ་ཟད་བསྡད་ཤུལ་སོང་རྗེས་ཅི་ཡང་མེད་པར་ཁང་སྟོང་དུ་སྣང་ཞེས་ཚུར་འོང་ནས་བཤད་པས། གྲྭ་པ་ཐམས་ཅད་ཀྱིས་གཞི་བཟུང་ནས་གཏན་ཆགས་སུ་བསྡད་ཡོད་པའི་རྣམ་པ་ལས་འཕྲལ་དུ་ཆས་ནས་འགྲོ་བའི་ཚོད་མིན། འགྲོ་ནའང་བར་དེར་ལོང་ཡོད་ས་མེད་པས་ངེས་པར་འཇམ་དབྱངས་ཀྱི་སྤྲུལ་བ་ཡིན་པར་གོར་མ་ཆག་གོ་ཞེས་མགྲིན་གཅིག་ཏུ་གླེང༌། དེ་ནས་ཀྭ་ཡྭེའི་སྤུང་ངམ་ཡོངས་གྲགས་ཞི་ཐེ་ཟེར་བ་ནུབ་རིའི་རྩེར་ཕེབས། ཁྲོ་སྐུ་དང་མཆོད་རྟེན་ཆེན་པོ་ཞིག་ལ་མཆོད་མཇལ་ཞུས། དེ་ནས་གྲུ་ཐེ་ཟེར་བའི་དབུས་རི་མཚར་སྡུག་ལྷུན་པོའི་རྩེར་ཕེབས། མཆོད་རྟེན་ཆེ་ཆུང་ལྔ་དང་ཡང་མཆོད་རྟེན་ཆེ་བ་ཞིག་དང་རྡོའི་སྐུ་ཆེ་བ་བཅས་ལ་མཆོད་མཇལ་གནང༌། དེ་ནས་དགྲ་བཅོམ་པ་ལྔ་བརྒྱའི་ལྷ་ཁང་དུ་ཕེབས་ཏེ་བརྒྱ་མཆོད་དང་སྙན་ཤལ་གང་རྒྱས་ཕུལ། ལྟུང་བཤགས་སོགས་སྔར་བཞིན་མཛད། དེ་ནས་དབྱར་གནས་ཀྱི་ལྷ་ཁང་དང༌། འཇམ་དབྱངས་བགྲེས་པའི་ལྷ་ཁང༌། སྒྲོལ་མའི་ལྷ་ཁང་རྣམས་སུ་བྱོན་ནས་ཕྱག་མཆོད་རྒྱས་པར་མཛད་ཅིང༌། ནང་རྟེན་དུ་སྒྲོལ་མའི་བྲིས་ཐང་ཞིག་གདན་དྲངས་པར་མཛད། སླར་སངས་རྒྱས་རབས་བདུན་དུ་ཕྱག་བཏེག །རིམ་པར་བདེ་མཆོག་ལྷ་ཁང་དང༌། རྗེ་ལྕང་སྐྱ་རིན་པོ་ཆེའི་རི་ཁྲོད་དང་བླ་བྲང༌། རྡོ་རྗེའི་ཕུག་སོགས་ལ་མཆོད་མཇལ་རྒྱས་པར་བྱས་ནས་བྱ་རྒོད་ཕུང་པོའི་རི་དང་མཚུངས་པར་གསུངས་པ་ཕུ་ས་ཏིང་ཟེར་བ་དང༌། ལོ་ཧོ་ཐི་ཟེར་བ་གཉིས་ཀྱི་རྟེན་རྣམས་ཞིབ་མཇལ་བར། གྲྭ་ཚང་དུ་མང་ཇ་སོགས་
ཀྱིས་བསྙེན་བཀུར་ཞུས། དེ་ནས་རྒྱབ་ཀྱི་འཇམ་དབྱངས་རང་བྱོན་གྱི་ལྷ་ཁང་འཇམ་དཔལ་སྡེ་ཆེན་ཟེར་བ་དང༌། ཕུ་ས་ཏིང་གི་མདུན་ན་ཆོས་རྒྱལ་མྱ་ངན་མེད་ཀྱིས་བཞེངས་པར་དགྲ་བཅོམ་པ་མ་ཏིང་གིས་ལུང་བསྟན་པ་གནས་ཆེན་འདིའི་ལྟེ་བ་དང་རྟེན་གཙོ་ནོར་བུ་ཆེན་པོའི་མཆོད་རྟེན་བྱ་བའི་མཆོད་རྟེན་དཀར་པོ་ཆེན་པོ་བཅས་ལ་མཇལ་ནས་སྐོར་ཕྱག་མཆོད་པ་ཞལ་འདོན་སོགས་གང་རྒྱས་གནང༌། སོག་སྐད་ཀྱིས་ཁུ་རི་ལ་སུ་མི་ཞེས་འབོད་པ་ཟངས་ཀྱིས་བཞེངས་པའི་ལྷ་ཁང་དང༌། ལྕང་སྐྱ་ཐམས་ཅད་མཁྱེན་པས་བཞེངས་པའི་མཆོད་རྟེན་དཀར་པོ་ཆུང་བ་དང༌། ནོར་བཟང་ཕུག །འཇམ་དབྱངས་རིགས་ལྔའི་ལྷ་ཁང༌། འཇམ་དབྱངས་ཀྱི་སྒྲུབ་ཁང་བྲག་སོགས་ལ་མཆོད་མཇལ་ཞུས། དེ་ནས་སྤྱན་རས་གཟིགས་ཀྱི་སྒྲུབ་ཕུག་ཏུ་མཇལ་ཞིང་དར་རྒྱས་ནོ་མོན་ཧན་གྱི་ལྷ་ཁང་དུ་ཕྱག་བཏེགས་སོ། །མདོར་ན་གོང་གསལ་གྱི་རྟེན་རྣམས་དང་བྱང་རིའི་རྩེ་ནས་གཡས་སྐོར་དུ་མཇལ་སྐབས་ཐ་ན་ལམ་དུ་ཡོད་པའི་རྡོ་དང་བོང་བ་ཡན་ཆད་ལ་འཇམ་དབྱངས་དངོས་ཀྱི་འདུ་ཤེས་ཀྱིས་དག་སྣང་སྦྱངས་པ་ལས་ཧབ་རྒྱུག་མི་མཛད། རྟེན་གང་གཟིགས་ཀྱི་རྩར་ལྟུང་བཤགས་སོགས་དང་འབྲེལ་བའི་ཕྱག་གང་མང༌། སྐྱབས་སེམས། ཡན་ལག་བདུན་པ་མཎྜལ་བཅས་དང༌། ཐུན་དྲུག་གི་རྣལ་འབྱོར། བླ་མ་མཆོད་པ། སྨོན་ལམ་རྣམ་ལྔ། བསྟན་འབར་མ་སོགས་གསུངས་ཤིང་ཐུགས་སྨོན་གང་དྲག་མཛད། ལམ་ཐག་རིང་བ་སོགས་ཀྱིས་ཇི་ཙམ་བྲེལ་དགོས་པ་ཡོད་ཀྱང་ཞལ་འདོན་ཁྲལ་རྒྱུག་ཏུ་མ་སོང་བའི་དལ་བུར་སྤྱན་དམིགས་གཏད་ནས་གསུང༌། སོ་སོའི་དཀོན་
གཉེར་ལ་མཆོད་སྒྲོན་ཐེབས་དང༌། མཆོད་པ་ཐམས་ཅད་ཤིན་ཏུ་གཙང་སྦྲ་ཐོན་ངེས་དང་མགོ་མཇུག་སྙོམས་པ་རྒྱ་གང་ཆེ་བསྟར། གནས་དེར་བཞུགས་པའི་གྲྭ་ཚང་ཆེ་ཕྲ་སོ་སོར་མང་ཇའི་དོད་དངུལ་སྲང་བཅུ་ཡན་ཆད་ཀྱིས་བསྙེན་བཀུར་ཞུས། དེ་ནས་འཇམ་དབྱངས་གོང་མའི་གསེར་གྱི་རྒྱལ་ཁབ་ཆེན་པོར་ཕེབས་ཡུང་ཧྭའ་གུང་གི་ཨ་ཀྱཱ་བླ་བྲང་དུ་བཞུགས་གནས་མཛད། ནང་རྟེན་ཙན་དན་ཇོ་བོ། གདུགས་དཀར་ལྷ་ཁང༌། བདེ་བ་ཅན། མཆོད་རྟེན་དཀར་པོ། ཡུང་ཧྭའ་གུང་གི་ལྷ་རྟེན་སོགས་ལ་མཆོད་སྒྲོན་རྒྱས་པར་ཕུལ་ཏེ་སོ་སོའི་མདུན་དུ་བསག་སྦྱང་གི་རིམ་པ་རྒྱ་ཆེན་པོ་སྔ་མ་བཞིན་སྟར་ཆགས་སུ་མཛད། དེ་ནས་ལྕང་སྐྱ་ཐམས་ཅད་མཁྱེན་པའི་མཆོག་སྤྲུལ་རིན་པོ་ཆེ་དང༌། ཁྲི་ཆེན་རྒྱ་ནག་པའི་མཆོག་སྤྲུལ་རིན་པོ་ཆེ། ཟམ་ཚ་གསེར་ཁྲི་རིན་པོ་ཆེ་རྣམས་ལ་རིམ་བཞིན་མཇལ་ཕྲད་ཞུས། ཕོ་བྲང་དུ་བཞུགས་པའི་སྒྲུབ་སྡེ་སོ་སོར་མང་ཇའི་བསྙེན་བཀུར་མཛད། སླར་ཡང་རི་བོ་རྩེ་ལྔར་ཕེབས། ཞབས་གྲྭ་པ་མང་མང་ཆ་ཧར་ལ་བཏང་སྟེ། རྗེ་ཉིད་གསོལ་དཔོན་དང་དགེ་བཤེས་གཉིས་བཅས་དཔོན་གཡོག་བཞི་བཀྭའ་ཡིན་དུན་ཟེར་བ་སྤྱན་རས་གཟིགས་ཀྱི་སྒྲུབ་ཁང་ཞེས་གྲགས་པར་བྱོན་ཏེ། བླ་མཆོད་དུས་བཟང་ཚོགས་འཁོར་བཅས་ཆོ་གའི་ཡན་ལག་ཚང་བར་མཛད། ཡུན་རིང་ཙམ་བཅད་རྒྱ་བསྡམས་ནས་ཡི་དམ་ལྷའི་ལྗགས་བསྙེན་མཛད་སྐབས་ཉམས་རྟོགས་ཁྱད་པར་ཅན་འཁྲུངས་ནས་ཐུགས་སྤྲོ་བའི་ཚུལ་གྱིས་ཉམས་མགུར་བཞེས་པ་ནི། ༈ དུས་གསུམ་རྒྱལ་བ་ཀུན་གྱི་བདག་ཉིད། །བླ་མ་འཕགས་པ་སྤྱན་རས་གཟིགས་དབང༌། །བདེ་ཆེན་འཁོར་ལོར་འབྲལ་མེད་བཞུགས་ལ། །ལུས་ངག་ཡིད་གསུམ་
བྱིན་གྱིས་རློབས་ཤིག །བདག་ནི་ཐག་རིང་ཡུལ་གྱིས་བསྐལ་ཡང༌། །སྔོན་བསགས་དགེ་བའི་རླུང་གིས་བསྐྱོད་དེ། །ཕྱི་དང་ནང་གི་ཉེར་འཚེ་མེད་པར། །ཞིང་མཆོག་འདི་རུ་བདེ་བར་འབྱོར་རོ། །ཨ་ལ་ལ་དགའ་བའི་སྐྱིད་གླུ་ལེན་ནོ། །བརྩེ་བའི་གཏེར་ཆེན་ཐུགས་རྗེ་ལས་འོངས། །ཡན་ལག་བརྒྱད་ལྡན་བདུད་རྩིའི་བཅུད་ཅན། །བཀྲ་ཤིས་དགེ་མཚན་ཆགས་པའི་གནས་སུ། །ལམ་བཟང་སྒྲུབ་པའི་གོ་སྐབས་རྙེད་དོ། །ཨ་ལ་ལ༝ གཡེང་བའི་དྲན་པ་ནང་དུ་བཀུག་ནས། །ཁྱོད་གསུང་སྙིང་པོ་ཡིག་དྲུག་བགྲང་བས། །རང་གི་ཤེས་རྒྱུད་འདུལ་དང་ཆབས་ཅིག། །རིགས་དྲུག་སྡུག་བསྔལ་ཀུན་ཀྱང་སྦྱངས་སོ། །ཨ་ལ་ལ་༝ བརྒྱད་ལྡན་ཆུ་ལ་བསྐོལ་བའི་ཇ་ནི། །ཡང་ཡང་བཏུང་ཡང་རོ་ཞིམ་ལྡན་པས། །ཡིད་ཀྱི་བུ་ཆུང་ཚིམ་དང་ལྷན་ཅིག། །དྲན་ཤེས་ཨ་མ་བརྟན་པར་ཆགས་སོང་། །ཨ་ལ་ལ་༝ ཡིད་འོང་བལྟ་ན་སྡུག་པའི་བྲག་རིར། །དྲི་ལྡན་རྩི་ཤིང་ཐོ་རེས་བརྒྱན་ཅིང་། །སྣ་ཚོགས་བྱ་སྐད་སྙན་པར་སྒྲོགས་པར། །དམུ་རྒོད་སེམས་རྟ་ཁ་ལོ་བསྒྱུར་སོང་། །ཨ་ལ་ལ་༝ ས་བཀྲ་བཟང་ཞིང་མཐོ་ཁྱད་དབང་གིས། །རང་གི་སེམས་ཀྱི་གཟེངས་ཀྱང་མཐོ་ཞིང་། །ཞེ་སུན་ཞུམ་པ་ཅི་ཡང་མེད་པར། །ཡིད་ནི་དགེ་ལ་མཆོག་ཏུ་སྦྱོར་སོང་། །ཨ་ལ་ལ་༝ མཐོན་པོའི་གནས་ལས་ཀུན་ ཏུ་བལྟས་ཚེ། །བཟང ་ངན་སྣ་ཚོགས་མཐོང་བ་ཇི་བཞིན། །ནང་བལྟས་ཤེས་པས་རྒྱུད་ལ་བལྟས་ན། །བདག་ཏུ་འཛིན་པས་བསླད་པ་མཐོང་ངོ༌། །ཨ་ལ་ལ་༝ རྡོ་ཡི་འགྲམ་དང་ཆུ་ལ་བརྒལ་ཏེ། །གནས་འདིར་གྱེན་དུ་བགྲོད་པ་བཞིན་དུ། །སྲིད་བདེ་འདོད་པའི་ཆུ་ལས་
བརྒལ་ཏེ། །ཐར་པའི་ཐེམ་སྐས་མཆོག་ཏུ་འཛེག་གོ །ཨ་ལ་ལ་༝ ནང་གི་སེམས་དང་ཕྱི་ཡི་གནས་ཀྱི། །ཁྱད་པར་མཐུན་པ་དེ་ལྟ་ལགས་ན། །མགོན་ཁྱོད་ཐུགས་རྗེ་ཅིར་ཡང་འགྱུ་བས། །འགྲོ་རྒྱུད་སྨིན་པར་མཛད་པ་ཡིན་ནོ། །ཨ་ལ་ལ་༝ བདག་གི་སྔོན་བསགས་ལས་སྨོན་བཟང་ཞིང༌། །དེང་འདིར་མོས་གུས་ཁ་ཞེ་མེད་པ། །གནས་ཀྱི་ཁྱད་པར་ཕྱི་ནང་མཐུན་པས། །ངོ་མཚར་དགེ་སྦྱོར་ཡིད་ལ་སྨན་ནོ། །ཨ་ལ་ལ་༝ བརྩེ་ལྡན་འཕགས་མཆོག་ཐུགས་རྗེའི་སྤྲིན་ལས། །བྱིན་རླབས་གྲུ་ཆར་འདོད་པ་འཇོ་བས། །བདག་རྒྱུད་ཞིང་ས་བརླན་པར་མཛད་དེ། །དགེ་སེམས་མྱུ་གུ་འཁྲུངས་པར་བྱས་སོ། །ཨ་ལ་ལ་༝ སྤྱིར་ན་གངས་ཅན་ཡོངས་ཀྱི་ལྷ་སྐལ། །སྒོས་སུ་ཉམ་ཆུང་བདག་གི་སྐྱབས་གཅིག །བཤེས་གཉེན་བླ་མའི་རྣམ་པར་བྱོན་ཏེ། །གཏན་བདེའི་ལམ་བཟང་གསལ་བར་སྟོན་ཅིག །ཨ་ལ་ལ་༝ བླ་མ་ལྷ་ལ་གསོལ་བ་འདེབས་པ། །འདིས་མཚོན་དགེ་ཚོགས་རྒྱ་མཚོ་ཅི་མཆིས། །མཁར་མཉམ་མར་གྱུར་འགྲོ་བ་ཀུན་ཀྱང༌། །བླ་མེད་བྱང་ཆེན་འཐོབ་པའི་རྒྱུར་བསྔོ། །ཨ་ལ་ལ་༝ དགའ་བའི་སྐྱིད་གླུ་ལེན་ནོ། །ཚུལ་བཞིན་སྒྲུབ་པའི་དགེ་བ་འདིས་ཀྱང༌། །བསྟན་འཛིན་དམ་པའི་མཛད་འཕྲིན་རྒྱས་ཤིང༌། །རྒྱལ་བསྟན་དབྱར་མཚོ་བཞིན་དུ་འཕེལ་ངོས། །འཇིག་རྟེན་ཁམས་སུ་དགེ་མཚན་ཁྱབ་གྱུར། །ཅེས་ཉམས་མགུར་འདི་ནི་གནས་མཆོག་རི་བོ་རྩེ་ལྔའི་སྤྱན་རས་གཟིགས་ཀྱི་སྒྲུབ་ཕུག་ཏུ་མི་ཉག་ཚུལ་ཁྲིམས་བསྟན་པའི་ཉི་མས་དགའ་བའི་སྐྱིད་གླུར་བླངས་པའོ། །ཞེས་པ་སྟེ་དཔྱོད་ཤེས་པ་ཞིག་གིས་དཔྱད་ན་རྣམ་ཐར་ཞིག་ལ། རང་གི་ཤེས་རྒྱུད་འདུལ་དང་ཆབས་
ཅིག །རིགས་དྲུག་སྡུག་བསྔལ་ཀུན་ཀྱང་སྦྱངས་སོ། །ཞེས་པ་འདི་གཅིག་པུས་ཆོག་པ་ལྟ་བུར་སྣང༌། བྱང་ཆུབ་མཆོག་ཏུ་གཞོལ་བའི་རྒྱུད་གཅིག་པུ། །ཉམས་དགུར་དྲི་ཟའི་འཕང་འགྲོ་བརྡུང་བའི་སྒྲས། །སྲིད་ཞིའི་མཐའ་ལ་བརྟེན་པའི་གྲུ་གཟིངས་ནི། །དུམ་བུར་གཞིག་པའི་ངང་ཚུལ་ཨེ་མ་རྨད། །ཅེས་ཀྱང་གཏམ་དུ་བྱའོ། །ཡང་འདི་སྐད་གསུངས་ཏེ། ཞིང་རབ་འབྱམས་རྒྱལ་བ་རྒྱ་མཚོའི་བདག །ལྷ་སྙིང་རྗེའི་གཏེར་ཆེན་སྤྱན་རས་གཟིགས། །གནས་སྤྱི་བོར་ཞབས་ཟུང་པདྨ་དཀར། །དུས་རྟག་ཏུ་འབྲལ་མེད་བཞད་བཞིན་བཞུགས། །བདག་བན་ཆུང་ཡུལ་གྱིས་བསྐལ་གྱུར་ཀྱང༌། །སྔོན་དགེ་བའི་འཕགས་པའི་རླུང་ཤུགས་ཀྱིས། །ཞིང་དམ་པ་དགེ་ལེགས་འབྱུང་གནས་འདིར། །ཕྱི་ནང་གི་ཉེར་འཚེ་མེད་པར་འབྱོར། །སྒོས་ལྷ་ཁྱོད་ཐུགས་རྗེས་བྱིན་བརླབས་ཤིང༌། །འགྲོ་ཤེས་རྒྱུད་དྲི་མ་མངོན་བཀྲུས་ཕྱིར། །ཆུ་ཡན་ལག་བརྒྱད་ལྡན་དངོས་སྟོན་པ། །གནས་བཀྲ་ཤིས་དགེ་མཚན་འཁྱིལ་བ་འདིར། །ཡིད་དགེ་ལ་སྦྱོར་འདྲའི་བརྩོན་པ་ཡིས། །ལམ་བཟང་པོ་སྒྲུབ་སྐལ་ཞག་འགའ་རྙེད། །མགོན་ཐུགས་རྗེའི་འོད་སྣང་འབུམ་འགྱེད་པས། །བདག་མ་རིག་འཁྲུལ་པ་ཅུང་སངས་ཏེ། །ལར་རང་གི་སྤྱོད་ཚུལ་བརྟགས་པ་ན། །བློ་བདག་འཛིན་འདི་ཡིས་ཆེས་བསླད་མཐོང༌། །ད་སྒོ་གསུམ་ཉེས་སྤྱོད་ཅི་བགྱིས་པ། །མགོན་ཐུགས་རྗེ་ཉིན་བཞིན་མངོན་མཐོང་ནས། །སྤྱིར་འདུས་བྱས་ཐམས་ཅད་མི་རྟག་ཅིང༌། །སྒོས་རང་ཉིད་མྱུར་དུ་འཆི་བའི་ཚུལ། །དུས་ཉིན་མཚན་མེད་པར་བསམ་པའི་ངོས། །མཆོག་ལམ་བཟང་སྒྲུབ་ལ་བསྐུལ་བར་མཛད། །སྐྱབས་
བསླུ་བ་མེད་པའི་ཐུགས་རྗེ་དང༌། །བདག་ལྷག་བསམ་དག་པའི་མོས་ཚོགས་ལས། །ལྷ་ཐུགས་རྗེ་ཆེན་པོའི་བྱིན་རླབས་རྒྱུན། །བདག་ཡིད་ལ་འབྲལ་མེད་ཆགས་གྱུར་ཅིག །ཅེས་པ་འདི་ནི་གནས་མཆོག་རི་བོ་རྩེ་ལྔར་སྤྱན་རས་གཟིགས་ཀྱི་སྒྲུབ་ཁང་དུ་ཞག་འགའ་བསྡད་སྐབས་བྲིས་པའོ། །ཞེས་གསུངས། ཡང་སྐབས་ཤིག་ཐུགས་ལ་བཟོད་གླགས་མེད་པའི་སྐྱོ་ཤས་ཀྱི་ཉམས་ཆེན་པོ་བྱུང་སྟེ་སྐྱོ་མགུར་བཞེས་པ་ནི། །གནས་སྤྱི་གཙུག་སེང་ཁྲི་པད་ཟླའི་སྟེང༌། །སྐྱབས་ཀུན་འདུས་བླ་མ་འཇམ་པའི་དབྱངས། །དུས་རྟག་ཏུ་འབྲལ་མེད་དགྱེས་བཞུགས་ལ། །ཉམ་ཐག་པའི་གདུང་དབྱངས་འདི་ལ་གསོན། །བདག་ཐག་རིང་ཡུལ་གྱིས་བསྐལ་ན་ཡང༌། །སྔོན་བསགས་པའི་རྣམ་དཀར་ལས་ཀྱི་དབང༌། །ཞིང་མཆོག་འདིར་ཉེ་ཞོ་མེད་པར་འབྱོར། །དགེ་ཡུད་ཙམ་སྒྲུབ་པའི་གོ་སྐབས་རྙེད། །ལར་རང་གི་སྤྱོད་ཚུལ་བརྟགས་པ་ན། །སྐྱབས་དམ་པའི་དྲུང་ན་ཡ་རེ་ང༌། །ན་གཞོན་ནུའི་དུས་ནས་སྐྱེས་ཆེན་གྱི། །མིང་གྲགས་སྙན་ལང་ཚོས་མཛེས་ན་ཡང༌། །ནང་ཡོན་ཏན་དམ་པ་མ་བྱུང་བས། །བསྟན་འགྲོ་ལ་ཕན་བསམ་ངོ་རེ་གནོང༌། །མགོན་བཤེས་གཉེན་དུ་མའི་ཞབས་ལ་གཏུགས། །ཟབ་རྒྱས་ཀྱི་གདམས་པ་མང་བསྟན་ཀྱང༌། །དོན་ཉམས་ལེན་གནད་དུ་མ་ཁེལ་བས། །རྒྱུད་ཐ་མལ་དུ་ལུས་པ་འདི་ལ་གཟིགས། །མཚན་ལྡན་གྱི་མཁན་སློབ་དམ་པའི་དྲུང༌། །སོ་ཐར་སོགས་སྡོམ་གསུམ་ལེགས་མནོས་ཀྱང༌། །དམ་ཚིག་དང་སྡོམ་ཁྲིམས་ཡལ་བོར་བས། །ཉེས་ལྟུང་གི་གོང་བུ་བདག་ལ་གཟིགས། །ཐོས་བསམ་སྒོམ་འབད་ལོ་བྱས་ལེགས་ཀྱང༌། །བདག་འཛིན་གྱི་འཁྲི་བས་དམ་དུ་བཅིངས། །རྒྱུད་ཆོས་ལས་གོལ་ཡང་ཆོས་བཤད་མཁན། །ཕྱི་བླ་མའི་
གཟུགས་བརྙན་བདག་ལ་གཟིགས། །དོན་སྒྲ་སྤྱིར་སོང་བའི་དགེ་སྦྱོར་གྱིས། །རང་གཞན་ལ་ཕན་པར་རེ་ན་ཡང༌། །རང་རྒྱུད་ལ་ཉམས་མྱོང་མ་མཆིས་པས། །ནང་བླ་མ་རུལ་བ་འདི་ལ་གཟིགས། །སྐྱེས་མཐོ་མཉམ་དམན་པ་སུ་ལ་ཡང༌། །ཡིད་དག་སྣང་སྐད་ཅིག་ཙམ་མ་འབྱོངས། །རང་ཆེར་རློམ་འགྲན་སེམས་ང་རྒྱལ་གྱིས། །རྒྱུད་རུལ་བར་བྱས་པ་འདི་ལ་གཟིགས། །སྐྱོན་སྣ་མང་རང་ལ་མཆིས་པ་དག །མགོན་ཁྱོད་ལ་རེ་རེར་ངོ་བགྲངས་ཏེ། །སྙིང་ཁོང་ནས་གསོལ་བ་བཏབ་ལགས་ན། །བདག་བློ་ཁ་ཆོས་ལ་མྱུར་དུ་སྒྱུར། །ཚེ་མཇུག་འདི་ཆོས་སུ་གཏོང་བ་ཡིས། །སྐྱབས་སྨོན་འདུན་སྙིང་ནས་བཙལ་བྱེད་ན། །མགོན་ཐུགས་རྗེ་བསླུ་བ་མི་མངའ་བས། །བདག་ཐར་ལམ་སྒྲུབ་པར་བྱིན་གྱིས་རློབས། །ཞིང་དམ་པ་རི་བོ་རྩེ་ལྔ་ཡི། །གནས་ཏིང་འཛིན་རོལ་པ་ཞེས་བྱ་བར། །ང་མི་ཉག་བན་རྒན་སྤྱོད་ཚུལ་དབྱངས། །མགོན་འཇམ་པའི་དབྱངས་ཀྱི་དྲུང་དུ་ལེན། །ཞེས་པའོ། །ཉམས་དང་རྟོགས་པའི་ཆུ་བོ་ནང་ནས་རྡོལ། །ལོངས་སྤྱོད་འཁོར་ལོའི་མདུད་པ་རང་སར་གྲོལ། །ཟབ་རྒྱས་གདམས་པའི་གླུ་དབྱངས་ལེན་པ་དེ། །མི་ལ་བཞད་པའི་རྡོ་རྗེ་མ་ཡིན་ནམ། །དེ་ནས་ལྕང་སྐྱ་ཐམས་ཅད་མཁྱེན་པའི་རི་ཁྲོད་དུ་ཕེབས། གསོ་སྦྱོང་བླ་མ་བློ་བཟང་དར་རྒྱས་ཀྱིས་གཙོས་རི་ཁྲོད་པ་རྣམས་ལ་བླ་མཆོད་སོགས་ཁྲིད་ལུང་མང་པོ། གཅོད་ནམ་མཁའ་སྒོ་འབྱེད་ཀྱི་དབང་སོགས་སྩལ་ནས་དགེ་བའི་ས་བོན་ཁྱད་པར་ཅན་བསྐྲུན་པར་མཛད། གསོ་སྦྱོང་བླ་མས་བསྐུལ་ངོར་རྗེ་བཙུན་འཇམ་དབྱངས་དང་འབྲེལ་བའི་བླ་མའི་རྣལ་འབྱོར་ཉམས་སུ་ལེན་ཚུལ་དངོས་གྲུབ་ཀུན་འབྱུང༌།
རི་ཁྲོད་པ་དགེ་སློང་བློ་བཟང་རིན་ཆེན་གྱིས་བསྐུལ་ངོར་མ་ཅིག་ལབ་སྒྲོན་ལ་བརྟེན་པའི་བླ་མའི་རྣལ་འབྱོར། ཧལ་ཧ་བློ་བཟང་དར་རྒྱས་ཀྱིས་བསྐུལ་ངོར་རྗེ་ཉིད་ཀྱི་མཚན་སྔགས་བཟླ་ཚུལ། པ་རིང་དཔོན་པོ་རིན་ཆེན་ཕུན་ཚོགས་ཀྱིས་བསྐུལ་ངོར་ལྷ་མོའི་གསོལ་མཆོད་རྣམས་ལྗགས་རྩོམ་མཛད། གཞན་ཡང་དེར་འདུས་པའི་དད་ལྡན་སེར་སྐྱ་དྲག་ཞན་ཐམས་ཅད་ལ་སོ་སོའི་འདོད་མོས་བཞིན་དམ་པའི་ཆོས་ཀྱི་ཆར་ཕབ་སྟེ་ཀུན་གྱི་ཡིད་ཚིམ་པར་བྱས། དེ་ནས་དགུན་མཇུག་ཏུ་སྔར་གྱི་ཆ་ཧར་སོ་ཉིག་དགོན་པ་བསྟན་པ་དར་རྒྱས་གླིང་དུ་བྱོན། ལྕགས་རྟའི་གནམ་ལོ་གསར་བཞད་ཀྱི་ཐོ་རངས་དཔལ་ལྡན་དམག་ཟོར་རྒྱལ་མོའི་ཚེས་གཏོར་ཕྱག་ལེན་བཞིན་མཛད། དགོན་པ་དེའི་བདག་པོ་སྤྲུལ་སྐུ་ལ་རབ་བྱུང་གི་སྡོམ་པ་སྩལ་ཏེ་མཚན་བློ་བཟང་ཚུལ་ཁྲིམས་ཉི་མ་ཞེས་བཏགས། སྤྲུལ་བའི་སྐུ་དང་ཏཱ་བླ་མ་དམ་ཆོས་བཟང་པོ། དགེ་རྒན་རབ་འབྱམས་པ་བློ་བཟང་དངོས་གྲུབ་རྣམས་ཀྱིས་གཙོས་འདུས་ཚོགས་ཡོངས་ནས་གསོལ་བ་བཏབ་པ་བཞིན་བླ་གྲྭ་ཉིས་བརྒྱ་ལྷག་ལ་འཇིགས་བྱེད་སྔགས་བཏུ། རྟ་འགྲིན་གསང་སྒྲུབ། སྒྲོལ་དཀར། དབྱངས་ཅན་མ་དཀར་དམར། ནོར་རྒྱུན་མ། སྨན་བླ་སོགས་ཀྱི་རྗེས་གནང༌། གནས་བརྟན་ཆོ་ག །རྗེ་རིན་པོ་ཆེས་མཛད་པའི་བསྟོད་ཆེན་བཞི། འཇམ་དཔལ་མཚན་བརྗོད། ཚེ་དཔག་གི་ཆོ་ག །རྡོ་རྗེ་གཅོད་པ། སྨན་ཆོག །འཇིགས་བྱེད་ཀྱི་མངོན་རྟོགས་ཟ་མ་ཏོག །དེའི་བསྐྱེད་རིམ་གྱི་ལུང་བཅས་སྩལ། ཡང་དགོན་པ་དེའི་བླ་མ་དགེ་འདུན་བཅས་དང་མཆོད་གཞི་ཐུན་མོང་ནས་ཞུས་ངོར་སེར་སྐྱ་བརྒྱད་བརྒྱ་སྐོར་ལ་ཐུགས་རྗེ་ཆེན་པོ་བཅུ་གཅིག་ཞལ། རྡོ་རྗེ་རྣམ་འཇོམས་སོགས་ཀྱི་རྗེས་གནང༌། འོད་དཔག་
མེད་ཀྱི་འཕོ་བའི་ཁྲིད་ལུང་སོགས་སྩལ། ཕྱོགས་གཞན་ནས་དད་ལྡན་སེར་སྐྱ་ཉིས་སྟོང་ལྷག་འདུས་པར་སོ་སོའི་འདོད་མོས་བཞིན་ཕྱག་དབང༌། བཀླག་ལུང༌། ལྗགས་བསྔོ་སོགས་སྩལ་ཏེ་ཀུན་གྱི་ཡིད་ཚིམ་པར་མཛད། རབ་བྱུང༌། དགེ་ཚུལ། དགེ་སློང་བཅས་བསྒྲུབ་བྱ་བཅུ་ཕྲག་གཉིས་ལ་སྡོམ་པ་ཕོག །དེ་ནས་ཆ་ཧར་གུ་ལུ་ཨོ་ལན་གྱི་ཨལ་ཐན་བུ་སིའི་དགོན་པར་གདན་དྲངས་པ་ལྟར་ཕེབས། ཐེར་གུན་ཏཱ་བླ་མ། དགེ་བསྐོས་དྷརྨ་རིན་ཆེན། དགེ་བསྐོས་ཤེས་རབ། སྤྱི་གཉེར་སོགས་ལས་སྣེའི་རིགས་དང་འདུས་ཚོགས་ཡོངས་ནས་ཞུས་པ་བཞིན་སེར་སྐྱ་སྟོང་ཕྲག་ལྷག་ལ་རྣམ་འཇོམས་ཀྱི་དབང་རྗེས་གནང་གཉིས། ཐུགས་རྗེ་ཆེན་པོ་བཅུ་གཅིག་ཞལ་གྱི་དབང༌། ལུང་ཐོར་བུ་སྣ་ཚོགས་བཅས་སྩལ། དགེ་བསྐོས་བླ་མ་ལྔ་པའི་ལམ་དུ་སོང་བར་བརྩེ་བས་དགོངས་ཏེ་བསྔོ་སྨོན་གྱི་རྒྱས་འདེབས་ནན་ཏན་མཛད། དགེ་འདུན་སྤྱི་ནས་བླ་མཆོད་ཀྱི་ཁྲིད་ཞུས་པར་ཉིན་ཁ་ཤས་ཀྱི་རིང་ལ་གཟབ་བཤད་ཉམས་མྱོང་གིས་བརྒྱན་པ་རྒྱས་པར་སྩལ། ཨོར་དུ་སུ་ཤོག་གི་གུ་ཤྲི་ཆོས་རྗེ་བླ་མ་ཡེ་ཤེས་དཔལ་ལྡན་གྱིས་ཞུས་ངོར་སེར་སྐྱ་ལྔ་བརྒྱ་ཙམ་ལ་ཚེ་ལྷ་རྣམ་གསུམ་གྱི་རྗེས་གནང༌། སྨན་བླ་རིང་པོའི་ལུང་བཅས་སྩལ། བླ་མ་དེའི་འདོད་མོས་བཞིན་ཕྱག་རྡོར་གཏུམ་ཆེན་གྱི་མངོན་རྟོགས་དམིགས་རིམ་བཅས་ལྗགས་རྩོམ་མཛད། ཙུན་ཏཱ་བཀྲ་ཤིས་ཡར་འཕེལ་གྱི་མོས་འདུན་ལྟར་སྒྲོལ་དཀར་གྱི་རྗེས་གནང་དང༌། འཇམ་དབྱངས་གོང་མའི་ཞབས་བརྟན་སོགས་ལྗགས་རྩོམ་མཛད། སོར་ག་སུ་ཏུའི་དགོན་པར་བྱོན་ཏེ་བླ་དཔོན་སེར་སྐྱ་ཐུན་མོང་ནས་ཞུས་པ་བཞིན་སྒྲོལ་དཀར་དང་གཙུག་ཏོར་
རྣམ་རྒྱལ་གྱི་རྗེས་གནང༌། ལུང་འགའ་ཞིག་བཅས་སྩལ། ཆ་གན་ཆོས་རྗེ་བླ་མ་དགེ་འདུན་བཀྲ་ཤིས་ཀྱི་དད་མོས་ལྟར་ནམ་མཁའ་སྒོ་འབྱེད་ཀྱི་དབང༌། གསང་འདུས་སྨོན་ལམ་གྱི་ལུང༌། ཉིད་ཀྱི་ལྗགས་རྩོམ་འཇམ་དབྱངས་བླ་མའི་རྣལ་འབྱོར་གྱི་ལུང་སོགས་གནང༌། ཆ་ཧར་གུ་ལུ་ཤ་རའི་ཇ་ལན་དབང་མཆོག་ལ་གཙུག་ཏོར་རྣམ་རྒྱལ་མའི་རྗེས་གནང༌། གདུགས་དཀར་གྱི་ལུང༌། དད་ལྡན་རང་རང་གི་ཡུལ་ཕྱོགས་ཀྱི་གཞི་བདག་སོགས་ལ་བསང་མཆོད་འཕྲིན་བཅོལ། གཡང་འབོད་སོགས་ལྗགས་རྩོམ་ཐོར་བུ་མང་པོ་ཞུས་པའི་རེ་བ་བསྐངས། མཛོ་དགེ་ཕྱོགས་ཀྱི་ཞབས་དྲུང་ཞིག་གིས་ཛཾ་དཀར་ལྷ་ལྔ་སོགས་རྗེས་གནང་འགའ་ཞིག །ཛཾ་དཀར་མངོན་རྟོགས་ཀྱི་ལུང་སོགས་ཞུས་པ་ལྟར་གནང༌། དེ་ནས་བསྒྲུབ་བྱ་བསྙེན་གནས་དྲུག །རབ་བྱུང་བཅོ་ལྔ། དགེ་ཚུལ་ཉི་ཤུ་ལྷག །དགེ་སློང་ཉི་ཤུ་རྩ་བཞི་བཅས་སོ་ཐར་གྱི་སྡོམ་པའི་དཔལ་ལ་བཀོད་དེ་ཐར་པའི་རྒྱལ་མཚན་བསྒྲེངས། ཨོར་དུ་སུ་ཙུན་གར་ཏཱ་པཻ་ཟིའི་སྲས་ཆུང་བ་དཀོན་མཆོག་མཇལ་དུ་འོངས་ཏེ་གཞིའི་གསུང་བརྟག་ཞུས་པའི་ལན་སྩལ། ཁོ་རིང་ཕྱོགས་སུ་གདན་འདྲེན་གྱི་སྙན་གསན་ཡང་ཕུལ། དེ་ནས་ཆ་ཧར་གུ་ལུ་ཨུ་ལན་གྱི་དགོན་པ་བདེ་ལྡན་བཀོད་པ་གླིང་གི་འདུས་སྤྱི་ནས་ཏཱ་བླ་མ་བློ་བཟང་ཆོས་གྲགས་ངོ་གཡོག་ཆེད་མངགས་བཏང་སྟེ་དགོན་པར་གདན་དྲངས་པ་ལྟར་ཕེབས། ཨེར་ཏི་ནི་མེར་གེན་སློབ་དཔོན་ཏའི་ཆིང་ཆོས་རྗེ་བླ་མ་ཧུ་ཐོག་ཐུ་བློ་བཟང་བསྟན་པའི་རྒྱལ་མཚན་གྱིས་གཙོས་རབ་འབྱམས་པ་བློ་བཟང་དབང་རྒྱལ། ཀུན་པེ་ལིག་ཐུ་ཏཱ་བླ་མ་བློ་བཟང་ཆོས་གྲགས། ཨེར་ཏི་ནི་ཆོས་རྗེ་བློ་བཟང་འཇིགས་མེད། ཨེར་ཏི་ནི་མེ་གེན་ནང་སོ་དགེ་བསྐོས། སློབ་དཔོན་
གུ་ཤྲི་བདེ་ལེགས་ཉི་མ་སོགས་དགེ་བཤེས་མང་པོ་བཅས་འདུས་ཚོགས་ནས་མཁས་གྲུབ་སངས་རྒྱས་ཡེ་ཤེས་ཀྱི་བཀའ་འབུམ་དང༌། པཎ་ཆེན་བློ་བཟང་ཆོས་ཀྱི་རྒྱལ་མཚན་གྱི་གསུང་འབུམ་གྱི་ལུང༌། བླ་མཆོད་ཀྱི་ཁྲིད་སོགས་ཞུས་པ་ལྟར། བླ་མ་ལས་སྣེས་གཙོས་འདུས་ཚོགས་ཡོངས་ལ་སྨིན་རྒྱས་སུ་སྩལ། ཡང་བླ་མ་བློ་བཟང་བསྟན་པའི་རྒྱལ་མཚན་ནས་འཇིགས་བྱེད་རོ་ལངས་བརྒྱད་སྐོར་དང་ཞེ་དགུ་མ་གཉིས་ཀྱི་དབང་ཞུས་པས། བླ་མ་དེ་ཉིད་དང་ཆོས་རྗེ་བློ་བཟང་འཇིགས་མེད། གུ་ཤྲི་བདེ་ལེགས་ཉི་མ། རྗེ་ཉིད་ཀྱི་མཆོད་དཔོན་དྲུང་ཡིག་པ་དགེ་སློང་ཚུལ་ཁྲིམས་བསྟན་འཛིན་བཅས་སློབ་མ་བཞི་ལ་འགོལ་པོ་བྱས་ནས་བཀའ་དྲིན་དུ་སྩལ། ཡང་བླ་མ་དེ་ཉིད་ཀྱིས་གཙོས་པའི་འདུས་ཚོགས་ཡོངས་ལ་རྟ་མགྲིན་གསང་སྒྲུབ་ཀྱི་དབང་སྟ་གོན་དང་བཅས་པ། དགའ་ལྡན་ཕྱག་རྒྱ་ཆེན་པོའི་ཁྲིད་རྒྱས་པ། སེམས་བསྐྱེད་ཆོ་ག་ཆ་ལག་ཚང་མ། དད་འདུས་ཀྱི་སེར་སྐྱ་སྟོང་ཕྲག་ལྷག་ལ་གྲུབ་རྒྱལ་ལུགས་ཀྱི་ཚེ་དབང༌། རིགས་གསུམ་མགོན་པོའི་སྙིང་པོའི་བཟླས་ལུང་བཅས་ཆོས་སྦྱིན་མི་ཟད་པའི་གཏེར་གྱི་སྒོ་འཕར་ཕྱེ་སྟེ་དེ་ཐམས་ཅད་དགའ་མགུ་རངས་པའི་དཔལ་ལ་བཀོད། གྲྭ་ཚང་འདུས་སྤྱི་ནས་བླ་མ་མཆོད་པའི་དུས་བཟང་ཞིག་གསར་འཛུག་གནང་དགོས་ཚུལ་ནན་ཆེར་ཞུས་པ་ལྟར། གདན་ས་ཆེན་པོ་སྐུ་འབུམ་བྱམས་པ་གླིང་གི་བླ་མ་མཆོད་པའི་དུས་བཟང་གི་ཕྱག་ལེན་ཇི་ལྟ་བ་བཞིན་དང༌། རྗེ་བཙུན་བླ་མ་དམ་པ་ཡོངས་འཛིན་རིན་པོ་ཆེས་མཛད་པའི་བླ་མཆོད་ཁྲིད་ཡིག་རྒྱས་པའི་ནང་ལྟར་འཛུག་རྒྱུའི་ཞལ་བཞེས་མཛད། ཉེ་གནས་པ་གསོལ་དཔོན་དགེ་སློང་བློ་བཟང་ཉི་མས་དབྱངས་
རྟ་འདུར་གསུམ་ལེགས་པར་ཁྲིད་དེ་བསྟན་འགྲོའི་ཕན་བདེའི་གསོས་སུ་དམིགས་ནས་བཙུག །བཀྲ་ཤིས་གསོ་སྦྱོང་སོགས་ཀྱང་རྒྱུན་གྱི་ཕྱག་ལེན་ལྟར་མཛད། བསྒྲུབ་བྱ་ལྔ་བཅུ་ལྷག་ལ་རབ་བྱུང༌། དགེ་ཚུལ། དགེ་སློང་གི་སྡོམ་པ་བཅས་སྩལ། དགོན་པ་དེའི་བཤད་སྒྲུབ་ཀྱི་བྱ་བ་འཕེལ་རྒྱས་སུ་དམིགས་ཏེ། སྒྲོལ་མ་མཎྜལ་བཞི་ཆོག །ཡི་དམ་ཆོས་སྲུང་རྣམས་ལ་གཏོར་འབུལ་ཕྲིན་བཅོལ་སོགས་གནད་སྨིན། ཆོས་རྒྱལ་གྱི་དྲུག་ཅུ་པ། ལྷ་མོའི་གཤེགས་གཏོར་སོགས་བསྔོ་བར་མཛད་ཅིང༌། ཀླུ་བུམ་ཡང་ཚད་ལྡན་བསྒྲུབས་ནས་གནང༌། ཆ་ཧར་ཁུ་བེ་ཐུ་ཨུ་ལན་གྱི་རྩིས་རམས་པ་བླ་མའི་དགོན་པའི་མཆོག་སྤྲུལ་བསྙུན་བཞེས་པའི་དོན་དུ་གདན་དྲངས་པ་བཞིན་ཕེབས། ཁྲོ་བོ་སྨེ་བརྩེགས་ཀྱི་བྱབས་ཁྲུས། རྣམ་འཇོམས་ཀྱི་བྱབས་ཁྲུས་བཅས་སྩལ། ཡི་དམ་ཆོས་སྲུང་ལ་གཏོར་འབུལ་ཕྲིན་བཅོལ་གནང༌། བསྒྲུབ་བྱ་སུམ་ཅུ་ཙམ་ལ་དགེ་ཚུལ་སློང་གི་སྡོམ་པ་སྩལ། ཆ་ཧར་ཧ་ཡ་གྲི་ཝའི་དགོན་པའི་དཀའ་བཅུ་ཡེ་ཤེས་རྒྱལ་མཚན་ལ་སྐུ་ལྔའི་རྗེས་གནང་དང་ལུང་ཁ་ཤས། ཆ་ཧར་གུ་ལུ་ཨུ་ལན་ཤོག་གི་དཔོན་པོ་བློ་བཟང་དབང་པོ་ལ་སྒྲོལ་དཀར་གྱི་རྗེས་གནང༌། ཨལ་ཐན་བུ་སིའི་དགོན་པའི་བླ་མ་ཐོ་ཡོན་ཧུ་ཐོག་ཐུ་ལ་ཚོགས་བདག་དམར་པོ་དང་དབྱངས་ཅན་མ་དམར་མོ་སོགས་ཀྱི་རྗེས་གནང༌། གུ་ལུ་ཁུ་ཁོའི་ཛང་གི་དབང་འཕེལ་ལ་སེང་གདོང་མ་དང་གདུགས་དཀར་གྱི་རྗེས་གནང༌། འཆི་མེད་ཛང་གི་ལ་སྒྲོལ་དཀར་དང་རྣམ་འཇོམས་ཀྱི་རྗེས་གནང༌། ཙུན་ཏཱ་དཔོན་པོ་མགོན་པོ་ལ་རྣམ་འཇོམས་ཀྱི་རྗེས་གནང་སོགས་རང་རང་གི་འདུན་པ་ལྟར་གནང༌། ཨུ་ལན་དགེ་བསྐོས་བློ་བཟང་གིས་རྟེན་ལ་རབ་གནས་བསྡུས་པ་དང་ཀླུ་གཏོར་བཏང་ཞིང་སྒྲོལ་དཀར་
གྱི་རྗེས་གནང༌སྩལ། སུ་ཉིད་སློབ་དཔོན་བླ་མའི་སྒར་ཐོག་ཏུ་ཕེབས་ཏེ་དགེ་མཚན་སྤེལ་བའི་ཆོ་ག་གསུང་བར་མཛད། དེ་ནས་སླར་ཡང་སུ་ཉིད་དུས་རེང་ཝང་སྐུ་མཆེད་ཀྱི་ཐོག་ཏུ་ཕེབས། ཝང་གི་ཐུགས་འདུན་ལྟར་ཡི་དམ་ཆོས་སྲུང་ལ་གཏོར་འབུལ་ཕྲིན་བཅོལ་སོགས་གཟབ་རྒྱས་མཛད་ཅིང་མཇུག་ ཏུ་གཡང་འབོད་བྱས། ཚེ་དཔག་གྲུབ་རྒྱལ་མའི་རྗེས་གནང་སྩལ། ཧུ་ཐོག་ཐུ་བླ་མ་སྐལ་བཟང ་བསོད་ནམས་ཀྱིས་ཞུས་ཏེ་སྒྲོལ་དཀར་དང་རྟ་མགྲིན་གསང་སྒྲུབ་ཀྱི་རྗེས་གནང༌། ལམ་རིམ་བདེ་ལམ་བླ་མཆོད་སོགས་ཀྱི་ལུང་སྩལ། ཆ་ཧར་ཨ་དོ་ཆི་ཤོག་གི་རབ་འབྱམས་པ་ཉི་མ་རྡོ་རྗེ་ལ་རྗེས་གནང་དང་ལུང་འགའ་ཞིག་དང༌། ཐོ་གོ་ཆི་ཙུན་ཏ་ལའང་འདོད་ཆོས་ཅི་རིགས་སྩལ་ཅིང་གཡང་འབོད་གནང༌། སུ་ཉིད་མཁན་པོ་བླ་མས་མ་ཅིག་གྲུབ་རྒྱལ་ལུགས་ཀྱི་རྗེས་གནང་ཞུས་པའི་རེ་བ་བསྐངས། སུ་ཉིད་སུ་མི་ཐུ་ཏཱ་བླ་མའི་དགོན་པར་གདན་དྲངས་པ་ལྟར་ཕེབས། བླ་མ་ལས་སྣེ་སོགས་ཚོགས་ཡོངས་ནས་དགོན་དེའི་འདུ་ཁང་རྟེན་དང་བརྟེན་པར་བཅས་པ་ལ་རབ་གནས་བཀའ་དྲིན་སྐྱོང་དགོས་ཚུལ་ནན་ཆེར་ཞུས་པ་ལྟར། ཉིན་གསུམ་གྱི་རིང་ལ་རབ་གནས་དགེ་ལེགས་རྒྱ་མཚོའི་ཆར་འབེབས་ཀྱི་དགོངས་དོན་བཞིན་སྤྱན་དབྱེའི་ཆོ་ག་ཤིན་ཏུ་རྒྱས་པ། ལྷ་ཚིམ་པར་བྱེད་པ་རྒྱས་པའི་སྦྱིན་སྲེག་དང༌། ཉམས་ཆག་སྐོང་བ་ཞི་བའི་སྦྱིན་སྲེག་བཅས་དམ་པ་གོང་མའི་ཕྱག་བཞེས་ཅུང་ཟད་ཀྱང་མ་ཉམས་པར་གནང་སྟེ་ཡུལ་ཕྱོགས་མཐའ་དག་དགེ་མཚན་གྱི་སྣང་བས་ཁྱབ་པར་མཛད། དེ་ནས་དུར་བེད་ཏཱ་ཝང་ཕུན་ཚོགས་བསམ་འགྲུབ་ཀྱིས་སྔར་གདན་འདྲེན་གྱི་སྙན་
གསན་ཕུལ་ཡོད་པའི་རྟིང་གནོན་ཆེད་མངགས་ཀྱི་མི་སྣ་འབྱོར་བས་དེར་ཆིབས་ཁ་བསྒྱུར། དཔོན་པོས་རྟ་མགྲིན་གཏོར་ཟློག་ནན་སྒྲུབ་དགོས་ཚུལ་ནན་ཆེ་བ་ལྟར་མཛད། དེ་ནས་ཧོ་ཤུས་དགོན་པ་བདེ་ལྡན་གླིང་གི་འདུ་ཁང་ལོགས་རིས་བཅས་གསར་བཞེངས་ལ་རབ་གནས་དགོས་ཚུལ་ཞུས་པར་སྔ་མ་བཞིན་དགེ་ལེགས་ཆར་འབེབས་ཀྱི་སྟེང་ནས་རྒྱས་པར་མཛད་དེ་དམ་ཡེ་དབྱེར་མི་ཕྱེད་པའི་བྱིན་རླབས་ཀྱི་གཟི་འོད་འབར་བར་མཛད། རབ་གནས་ཀྱི་བཤད་པ་རྒྱབ་རྟེན་མདོ་རྒྱུད་བསྟན་བཅོས་ཀྱི་ལུང་དང་བཅས་པ་དོན་ཟབ་ཅིང་གོ་བདེ་བ་མཁས་པའི་ཡིད་འཕྲོག་པ་ཞིག་གནང༌། རྟ་མགྲིན་གསང་སྒྲུབ་དང་གདུགས་དཀར་གྱི་དབང་སོགས་ཀྱང་འདུས་ཚོགས་ཡོངས་ལ་སྩལ། མགོན་དཀར་གྱི་ནོར་སྒྲུབ་བྱེད་དགོས་ཚུལ་ཞུས་པའི་རེ་བའང་བསྐངས། དེ་ནས་ཐུ་ས་ལག་ཆི་མེརྒེན་ཏཱ་ཆིང་བཀྲ་ཤིས་རྣམ་རྒྱལ་གྱིས་གདན་དྲངས་པ་བཞིན་ཕེབས། ཁོ་རང་གིས་ཚོགས་གསོག་པའི་ཞིང་དུ་དགེ་འདུན་གྱི་སྡེ་གདན་དྲངས་ནས་བཀའ་འགྱུར་གསུང་དུ་བཅུག་ཅིང་སྨོན་ལམ་ཡང་འཚོགས་འདུག་པར། དེའི་དབུར་སྤྱན་དྲངས་པ་ལྟར་བྱོན་ཏེ་དགེ་ལྡན་ལུགས་བཟང་རྒྱས་པའི་ཐུགས་སྨོན་གང་རྒྱས་མཛད། བཀའ་ཆོས་ཀྱང་མང་དུ་གནང༌། ཐེའི་ཇི་ཚེ་དཔག་སྐྱབས་ཀྱི་མོས་པ་བཞིན་སྒྲོལ་དཀར་གྱི་རྗེས་གནང་སྩལ། ཨུ་རྫིང་ཐུ་ས་ལག་ཆི་དང༌། བུ་བཀྲ་ཤིས་རྣམ་རྒྱལ་སོགས་ཀྱི་ངོར་སྒྲོལ་དཀར་ཚེ་སྒྲུབ་དང༌། སྤྱན་རས་གཟིགས་ཕྱག་བཞི་པའི་རྗེས་གནང་ཡང་སྩལ། དུར་བེད་སྨན་རམས་པ་ངག་དབང་འོད་ཟེར་གྱིས་གདན་དྲངས་ཐོག །ཁོ་རང་གི་གྲྭ་ཚང་གི་སྨོན་ལམ་ཚོགས་དབུར་གདན་དྲངས་ཏེ་གསུང་ཆོས་སྨོན་ལམ་སོགས་ཕྱག་ལེན་
ལྟར་གནང༌། བླ་མ་དེ་དང་འདུས་ཚོགས་ཡོངས་ལ་གདུགས་དཀར་གྱི་དབང་སྟ་གོན་དང་བཀའ་སྲུང་ལེགས་ལྡན་མཆེད་གསུམ་གྱི་རྗེས་གནང་དང་བཅས་པ། ལུང་སྣ་ཚོགས་བཅས་སྩལ། བསྒྲུབ་བྱ་དྲུག་ཅུ་སྐོར་ལ་དགེ་ཚུལ་སློང་གི་སྡོམ་པ་ཕོག་སྟེ་ཚངས་སྤྱོད་ཀྱི་བརྟུལ་ཞུགས་ཡོངས་སུ་རྫོགས་པ་ལ་བཀོད། དུར་བེད་ཤོག་གིས་ཆོས་སྡེ་ཆེན་པོ་བཀྲ་ཤིས་ཕན་བདེ་གླིང་གི་དགོན་པར་གདན་དྲངས་ཏེ། ཚོགས་ཆེན་གྱི་ཁྲིར་ཕེབས་ནས་ཕྱག་དབང་དང་ལམ་གཙོའི་ཁྲིད་རྒྱས་པར་སྩལ། མཚན་ཉིད་གྲྭ་ཚང་གི་ཚོགས་དབུར་ཕེབས། བོད་ཀྱི་ལྷ་རམས་པ་ཞིག་དང་གྲྭ་པ་གཞན་ཞིག་དང་གཉི་གས་དམ་བཅའ་བཞག །ཉིད་ཀྱི་ཞབས་ཕྱི་སློབ་གཉེར་བ་ཁ་ཤས་ཀྱིས་བགྲོ་གླེང་བྱས་ཏེ་ཆོས་ཀྱི་འབེལ་གཏམ་ཟབ་རྒྱས་བསྟན་པའི་ལ་རྒྱར་ཕན་ངེས། སྐལ་ལྡན་དང་བ་འདྲེན་པའི་དམིགས་རྐྱེན་དུ་འགྱུར་བ་བྱེད་དུ་བཅུག །ཉིད་ནས་མཚན་ཉིད་གྲྭ་ཚང་ལ་བརྩི་བཞག་སྩལ། བླ་མ་ལས་སྣེ་ཐུན་མོང་གིས་མཚན་ཉིད་གྲྭ་ཚང་ལ་མཚན་དགོས་ཚུལ་ཞུས་པ་བཞིན། ཐོས་བསམ་དར་རྒྱས་གླིང་ཞེས་འདོགས་པར་མཛད། འདུས་ཚོགས་ཡོངས་ནས་ཞུས་ངོར་དགེ་འདུན་ལྔ་བརྒྱ་སྐོར་ལ་དཔལ་གསང་བ་འདུས་པའི་དབང་སྟ་གོན་དང་བཅས་པ་དབང་དོན་དེ་ཉིད་ཡང་གསལ་གྱི་དགོངས་པ་ལྟར་ལ་ཞལ་ཤེས་ཉམས་མྱོང་གི་མན་ངག་དུ་མས་བརྒྱན་པའི་བཤད་པ་སྔགས་ལམ་གྱི་གནད་མཐའ་དག་ཐོན་པའི་འགྲན་ཟླ་མེད་པ་དང༌། གཅོད་ནམ་མཁའ་སྒོ་འབྱེད་ཀྱི་དབང་སོགས་སྩལ་བས་མཁས་པ་མཐའ་དག་མགྲིན་གཅིག་ ཏུ་བསྔགས་པ་བརྗོད་ཅིང་གསོལ་འདེབས་ལ་བརྩོན་པར་གྱུར། ཏཱ་བླ་མ་བློ་བཟང ་བསོད་
ནམས། མཚན་ཉིད་བླ་ཟུར་ངག་དབང་མཆོག་ལྡན། རྒྱུད་པ་བླ་ཟུར་ཚུལ་ཁྲིམས་ཡོན་ཏན་སོགས་ལ་འཇིགས་བྱེད་སྔགས་བཏུའི་རྗེས་གནང་སོགས་སྩལ། རྒྱུད་པའི་ཚོགས་དབུར་ཕེབས་ཏེ་ཉིན་གཅིག་གི་རིང་ཡི་དམ་ཆོས་སྲུང་ལ་གཏོར་འབུལ་ཕྲིན་བཅོལ་གང་དྲག་མཛད། འདུ་ཁང་ཆེན་མོའི་ནང་རྟེན་གྱི་མདུན་དུ་སྒྲོལ་མ་མཎྜལ་བཞི་ཆོག་མཆོད་སྤྲིན་རྒྱ་ཆེན་པོ་དང་བཅས་བསྒྲུབས། ཚོགས་ཡོངས་ལ་མང་ཇ་སོགས་ཀྱི་བསྙེན་བཀུར་ཞུས་ཤིང་གྲྭ་ཚང་སོ་སོར་སྤྱི་འཇོག་གཏོས་ཆེ་བ་སྩལ། ཨེར་ཏི་ནི་དར་ཧན་མཁན་པོའི་སྤྲུལ་བའི་སྐུའི་གཙུག་ཕུད་བཞེས་ཏེ་མཚན་ངག་དབང་ཐུབ་བསྟན་ཉི་མ་ཞེས་འདོགས་པ་གནང༌། བླ་མ་དེའི་ཞབས་བརྟན་གསོལ་འདེབས་ཤིག་དགོས་ཚུལ་འདུས་སྤྱི་ནས་བསྐུལ་བ་ལྟར་ལྗགས་རྩོམ་མཛད། ཕྱོགས་འདུས་ཀྱི་སེར་སྐྱ་ཉིས་སྟོང་བརྒལ་བར་འདོད་ཆོས་ཅི་རིགས་སྩལ་ཏེ་ཡིད་ཚིམ་པར་བྱས། དེ་ནས་དགོན་པ་དགའ་ལྡན་དར་རྒྱས་གླིང་དུ་ཕེབས། འདུས་ཚོགས་ཡོངས་ནས་ཞུས་ངོར་སེར་སྐྱ་བདུན་བརྒྱ་ལྷག་ལ་སྒྲོལ་དཀར་རྗེས་གནང༌། བླ་མཆོད། སྨོན་ལམ་སོགས་ཀྱི་ལུང་གནང༌། བཻ་ཐུང་ཏཱ་ཚེ་རིང་རྡོ་རྗེ་ལ་སྨན་བླའི་རྗེས་གནང་སྩལ། དེ་ནས་དུར་བེད་ཏཱ་ཝང་གི་ཨུརྒེར་ཡང་བསྐྱར་གྱིས་ཕེབས། དཔོན་ཡུམ་སྲས་ནས་བཀའ་ཆོས་འགའ་ཞིག་ཞུས་པ་བཀའ་དྲིན་སྩལ། བླ་མཆོད་དུས་བཟང་ཚོགས་འཁོར་བཅས་ཕྱག་ལེན་ལྟར་མཛད། དེ་ནས་སྔར་གྱི་སྦྱིན་བདག་སུ་ཉིད་དུའུ་རིང་ཝང་གི་སྐུ་མཆེད་མཁན་པོ་བླ་མའི་དགོན་དུ་ཕེབས། ཟླ་བ་གཅིག་གི་རིང་ལ་བཅད་རྒྱ་དམ་པོ་གནང་ནས་རྡོ་རྗེའི་རྣལ་འབྱོར་བརྟན་པོས་ཡི་དམ་གྱི་ལྗགས་བསྙེན་མཛད། སྐབས་ཤིག་ ཏུ་བླ་མཆོད་དུས་བཟང ་གི་ངག་འདོན་
གྱི་རིམ་པ་པར་དུ་འཕུད་རྒྱུའི་ཐུགས་འདུན་ཡོད་ཐོག །ཉེ་གནས་ཕྱག་མཛོད་ཆེ་ཆིང་ཆོས་རབ་འབྱམས་པ་ཚུལ་ཁྲིམས་ཆོས་འཛིན། གསོལ་དཔོན་མགྲོན་གཉེར་དར་ཧན་རབ་འབྱམས་པ་ངག་དབང་བསྟན་འཛིན་གཉིས་ཀྱིས་མཐུན་རྐྱེན་སྦྱར་ཏེ་པར་དུ་བསྒྲུབས། པར་ཡིག་པ་ཨོར་དུ་སུ་ཆོས་རྗེ་ཡེ་ཤེས་དཔལ་ལྡན་དང༌། ཆ་ཧར་གུ་ལུ་ཨུ་ལན་གྱི་གུ་ཤྲི་བདེ་ལེགས་ཉི་མ་གཉིས་ཀྱིས་པར་བྱང་སྨོན་ཚིག་བསྐུལ་བ་བཞིན་ལྗགས་རྩོམ་མཛད། སུ་ཉིད་དུས་རེད་ཝང་ནས། འཇམ་དབྱངས་གོང་མའི་ཕོ་བྲང་དུ་ཙི་ཤཱ་ལ་བསྐྱོད་སྐབས་གྲུབ་རྒྱལ་མའི་ཚེ་དབང་ཞུས་པ་ལྟར་སྩལ། མཚོ་སྔོན་ཕྱོགས་ཀྱི་བསྟན་པའི་སྦྱིན་བདག་ཝང་ཚེ་རིང་དོན་གྲུབ་དང༌། ཨུལ་ཅུ་ཐུ་དའི་ཆིང་ཛ་སག་རྡོ་རྗེ་གཉིས་ཀྱིས་ཆེད་མངགས་ཀྱི་མི་སྣ་བཏང་བ་འབྱོར་ཏེ་ཞུ་ཡིག་རྒྱས་པ། རང་ཡུལ་དུ་མ་འགྱང་བར་འབྱོན་དགོས་ཚུལ་ནན་ཏན་ངག་མ་བཅས་ཞུས། དེ་ནས་ཡང་ཡུན་རིང་པོའི་བར་དུ་བཅད་རྒྱ་གནང་ཞིང༌། མཚམས་མཚམས་སུ་བླ་མཆོད་ཀྱི་དུས་ བཟང་ཆ་ལག་ཚང་བ་ཕྱག་ཏུ ་བསྟར། དགུང་ལོ་ང་བདུན་པ་ལྕགས་ལུག་ལོའི་གནམ་ལོ་གསར་བཞད་ཀྱི་ཉིན་ཡི་དམ་ཆོས་སྲུང་ལ་གཏོར་འབུལ་ཕྲིན་བཅོལ་མཛད། སུ་ཉིད་ཝང་དང་མཁན་པོ་བླ་མ། ཏཱ་བླ་མ་སོགས་སྐུ་མཆེད་ཐུན་མོང་ནས་ལྷ་རྫས། མཎྜལ། སྐུ་གསུང་ཐུགས་རྟེན་སོགས་ཕུལ་ནས་ཞབས་བརྟན་རྒྱས་པར་ཕུལ། མཁན་པོ་བླ་མས་སྒེར་དུ་བླ་མཆོད་དུས་བཟང་དང་འབྲེལ་བའི་ཞབས་བརྟན་གང་ལེགས་ཕུལ། ཏཱ་བླ་མའི་འདོད་མོས་བཞིན་བླ་མཆོད་དུས་བཟང་དང་སྨན་བླའི་ཆོ་ག་གསུང༌། ལོ་གསར་སྐབས་ཕྱོགས་སོ་སོ་ནས་
འདུས་པའི་དད་ལྡན་སེར་སྐྱ་མང་པོར་ཕྱག་དབང་དང་བཀའ་ཆོས་ཀྱི་སྐོར་རྣམས་འདོད་མོས་བཞིན་སྩལ། སྐབས་ཤིག་རྗེ་ཉིད་སྐུ་བསྙུན་ཅུང་ཟད་བཞེས་པར། ཝང་སྐུ་མཆེད་ནས་དགེ་འདུན་གྱི་སྡེར་བཀའ་འགྱུར། གདུགས་ཤེར་སྒྲོལ་མ་སོགས་གསུང་དུ་བཅུག་ཅིང་ཞབས་བརྟན་ཡང་ཕུལ། ཕྱག་གཉེར་སོགས་ཀྱིས་ཞབས་བརྟན་རྒྱ་ཆེར་བསྒྲུབས་ཤིང༌། དུར་བེད་སྨན་པ་བློ་བཟང་ཚུལ་ཁྲིམས་ཀྱིས་ཕྱག་རྩ་ཞུས་སྨན་ཕུལ་བས་སྐུ་བསྙུན་ལེགས་པར་དྭངས། ཐོ་ཡོན་དགེ་སློང་ཆོས་དར་གྱི་འདོད་མོས་ལྟར་གཡང་འབོད་དང༌། རྟེན་ལ་རབ་གནས་མཛད་ཅིང་སྒྲོལ་དཀར་གྱི་རྗེས་གནང་སྩལ། ཨ་རོ་ཧོར་ཆིན་གུ་ཤྲི་དགེ་སློང་དཀོན་མཆོག་ཡར་འཕེལ་གྱིས་འདུལ་བའི་སྐོར་ནས་དྲི་བ་འགའ་ཞུས་པར། དྲིས་ལན་དོགས་པ་ཆོད་ངེས་སུ་སྩལ། མདོ་སྨད་ཁྲི་ཀའི་ཕྱོགས་ནས་རྗེ་རང་གི་གདན་ས་དགའ་ལྡན་དར་རྒྱས་གླིང་དང༌། མི་ཉག་གྲྭ་ཚང་བཀྲ་ཤིས་ཆོས་གླིང་གཉིས་ནས་ཆེད་མངགས་ཀྱི་མི་སྣ་རབ་འབྱམས་པ་ངག་དབང་ཉི་མ། གཉེར་ཤེས་རབ་ཉི་མ་ངོ་གཡོག་བཅས་སླེབ་པར་འབྱོར་ཕྱག་སྩལ། རང་ཡུལ་དུ་གདན་འདྲེན་གྱི་ཞུ་བ་ནན་ཏན་གྱིས་ཕུལ། ཏི་ཡན་ཆི་བླ་མའི་དགོན་པར་ཕེབས། བླ་མ་ལས་སྣེ་སོགས་འདུས་ཚོགས་ཡོངས་ནས་ཞུས་པ་ལྟར་བཀྲ་ཤིས་གསོ་སྦྱོང་མཛད་ཅིང༌། སྒྲོལ་མ་མཎྜལ་བཞི་ཆོག །བླ་མཆོད་དུས་བཟང་སོགས་ཕྱག་ལེན་བཞིན་གསུང༌། སྨན་བླའི་རྗེས་གནང༌། སྐྱབས་འགྲོའི་ཁྲིད། ལུང་མང་པོ་བཅས་སྩལ། དུར་བེད་ཐུ་ས་ལགྖི་བཀྲ་ཤིས་རྣམ་རྒྱལ་དུས་ཆོས་སུ་གྱུར་པར། དེའི་སྲས་ཐའི་ཇི་བློ་བཟང་དོན་གྲུབ་ཀྱི་འདོད་མོས་བཞིན་ཕེབས།
ངན་སོང་སྦྱོང་བའི་ཆོ་ག་ལྷོ་སྒོ་དང་བཅས་པ་བསྔོ་སྨོན་སོགས་གནང་སྟེ་མཐོ་རིས་ཀྱི་ལམ་དུ་དྲངས། སྲས་བློ་བཟང་དོན་གྲུབ་ལ་གྲུབ་རྒྱལ་མའི་ཚེ་དབང་སྩལ། དེ་ནས་དུར་བེད་ཧོ་ཤོའི་དགོན་པར་ཕེབས། ཡུལ་ཕྱོགས་ལ་བཀྲ་མི་ཤིས་པའི་མཚན་མས་ཐན་པ་ཆེས་ཆེར་བྱུང་སྟེ་སྐྱེ་འགྲོ་ཉམ་ཐག་པར་བརྟེན། དུར་བེད་ཝང་ནས་ཆར་འབེབས་ཞུས་པར། ཡི་དམ་རྡོ་རྗེ་འཇིགས་བྱེད་བཀའ་སྡོད་བཅས་ལ་གཏོར་འབུལ་ཕྲིན་བཅོལ་གང་རྒྱས་ཞུས་ཤིང༌། གཞི་བདག་སོགས་ལ་དཀར་གཏོར་སོགས་བསྔོ་བར་མཛད་དེ་ཉིན་ལྔའི་རིང་ལ་དམིགས་བརྩེ་མའི་ལས་ཚོགས་སྒྲུབ་པས་དགོན་པ་དེའི་ཐད་ཀའི་ནམ་མཁར་གློ་བུར་དུ་ཆར་སྤྲིན་དཀར་སྐྱ་ཞིག་བྱུང་སྟེ་རིམ་གྱིས་ཇེ་ཆེར་སོང་ཞིང་ཕྱོགས་ཀུན་ཏུ་ཁྱབ་ནས་ཆར་གྱི་རྒྱུན་ཉིན་མཚན་ཁོར་ཡུག་ཏུ་བབས་ཏེ་སྲོག་ཆགས་ཐམས་ཅད་ཀྱི་དབུགས་གསོས་པར་གྱུར་པས། ཕྱོགས་དེའི་སེར་སྐྱ་མཐའ་དག་ཤིན་ཏུ་ངོ་མཚར་ཞིང་མགྲིན་གཅིག་ཏུ་གསོལ་འདེབས་ལ་བརྩོན་པ་བྱུང༌། དེ་ནས་སུ་ཉིད་མཁན་པོ་བླ་མའི་དགོན་པར་ཕེབས། བླ་མས་མོས་པ་ལྟར་བཀའ་ཆོས་ཀྱི་རིམ་པ་མང་དུ་སྩལ། ཡི་དམ་ཆོས་སྐྱོང་ལ་གཏོར་འབུལ་ཕྲིན་བཅོལ་མཛད། ཏཱ་བླ་མའི་སྒར་དུ་ཕེབས་ནས་མགོན་པོའི་གཏོར་སྒྲུབ་དང་རྣམ་སྲས་ཀྱི་གཏེར་བུམ་སྒྲུབ་གནང་མཛད། དུས་རེང་ཝང་གི་ཨུར་གེར་ཕེབས། ཝང་གི་ཨ་ཆེ་ལ་དགེ་བསྙེན་མའི་སྡོམ་པ་དང༌། ཝང་གི་སྲས་ཆུང་བའི་གཙུག་ཕུད་བཞེས་ཏེ་མིང་བསྟན་པ་དར་རྒྱས་ཞེས་བཏགས། དཔོན་པོའི་མོས་འདུན་བཞིན་རྣམ་སྲས་བུམ་སྒྲུབ་དང་གཡང་འབོད་གནང༌། ཝང་སྐུ་
མཆེད་ནས་ཞུས་པ་ལྟར་ས་བཅུད་དང་ཀླུ་བུམ་སོགས་ཕྱག་ལེན་བཞིན་བསྒྲུབས་ཏེ་འགའ་ཞིག་གནས་གཙང་སར་གཏེར་དུ་སྦས། པེ་ཧར་ཁོག་ཞུགས་ཀྱི་ཆོས་སྐྱོང་ཞིག་གིས་འདི་པའི་གསང་རྣམ་ལུང་སྟོན་རྒྱུ་མང་པོ་ཡོད་ཟེར་བས་ཞབས་གྲས་རྣམས་ཀྱིས་ལྐོག་ཏུ་ཞུས་པར་ཡ་མཚན་ཆེ་བ་མང་པོ་གསུང༌། ཆ་ཧར་ཁུ་བེ་ཐུ་ཨོ་ལན་གྱི་དགོན་པ་བཤད་སྒྲུབ་དར་རྒྱས་གླིང་གི་ཆོས་རྗེ་བློ་བཟང་ལྷུན་གྲུབ་ཀྱིས་གཅོད་ཁྲིད་ཞུས་པ་རྒྱས་པར་སྩལ། མགོན་པོའི་གཏོར་ཆོག་བསྡུས་པ་ཞིག་ཀྱང་ལྗགས་རྩོམ་ཞུས། མདོ་སྔགས་ཀྱི་དྲི་བ་མང་དུ་ཞུས་པར་དོགས་པའི་མཐའ་སེལ་ངེས་སྩལ་ཏེ་ཚིམ་པར་བྱས། ཆ་ཧར་གུ་ལུ་ཨུ་ལན་གྱི་སྤྲུལ་བའི་སྐུ་ཚུལ་ཁྲིམས་ཉི་མས་ཞུས་ངོར་འཇམ་དབྱངས་ལ་བརྟེན་པའི་བླ་མའི་རྣལ་འབྱོར་ལྗགས་རྩོམ་མཛད། དེ་ནས་ཏ་རི་གང་གའི་ཤོག་གི་མེརྒེན་པཎྚི་ཏ་བླ་མ་བསྟན་འཛིན་རྒྱལ་མཚན་གྱིས་གདན་འདྲེན་ཞུས་ནས་དེར་ཆིབས་བསྒྱུར་བའི་ལམ་ཞོར་དུ་དར་ཧན་པཻ་ལིའི་ཧོའུ་ཤོས་དང་། སུ་ཉིད་གཡོན་རུ་སོགས་ཀྱི་དད་ལྡན་སེར་སྐྱ་བཞི་སྟོང་ལྷག་ལ་ཕྱག་དབང་། བཟླས་ལུང་སོགས་ཡིད་ཚིམ་པར་སྩལ། པཎྚི་ཏ་བླ་མའི་སྒར་ཐོག་ ཏུ་འབྱོར་ནས་ཧལ་ཧ་ཇུ་ནང་པཻ་ཟེའི་ནུ་བོ་ཐོ་ཡོན་བློ་བཟང ་རང་གྲོལ་གྱིས་སྐུ་ལྔ་དང་ལྕམ་སྲིང་སོགས་ཀྱི་རྗེས་གནང་ཞུས་པ་སྩལ། གཞན་བརྒྱད་སྟོང་སོགས་ལུང་མང་པོ་གནང༌། དེའི་ཤོག་གི་ཨུལ་ཇུས་ཇོ་རིག་ཐུ་བླ་མ་བློ་བཟང་རིན་ཆེན་ལ་སྒྲོལ་ལྗང༌། སྤྱན་རས་གཟིགས་ཕྱག་བཞི་པ། མི་འཁྲུགས་པ་སོགས་ཀྱི་རྗེས་གནང་པཎྚི་ཏ་བླ་མ་ཉིད་ནས་ཐུགས་རྗེ་ཆེན་པོ་བཅུ་གཅིག་ཞལ། ཚེ་དཔག །མི་འཁྲུགས་པ་བཅས་ཀྱི་དབང་ཞུས་པ་རྣམས་སེར་སྐྱ་
སྟོང་ལྷག་ལ་གནང༌། བསྒྲུབ་བྱ་དགེ་ཚུལ་སློང་བརྒྱད་ཅུ་ལྷག་ལ་སོ་ཐར་གྱི་སྡོམ་པ་སྩལ་ནས་ཐར་པའི་ས་བོན་བསྐྲུན། རྗེ་ཉིད་ཀྱིས་དབུ་མཛད། པཎྚི་ཏ་བླ་མ་བསྟན་འཛིན་རྒྱལ་མཚན་དགེ་བཤེས་ཆོས་རྗེ་བསྟན་འཛིན་བཟང་པོ་སོགས་ནས་རྗེ་བཙུན་རྡོ་རྗེ་རྣལ་འབྱོར་མའི་ཆོ་ག་བདག་འཇུག་བཅས་གསུང་བར་མཛད། ཡང་སྐུ་བསྙུན་བཞེས་ཚུལ་མཛད་པས་ཞབས་བརྟན་གང་མང་བསྒྲུབས་ཏེ། དུར་བེད་ཨེམྖི་བློ་བཟང་ཚུལ་ཁྲིམས་ཀྱིས་བཞེས་སྨན་ཕུལ་བས་སྐུ་ཁམས་འཕྲལ་དུ་དྭངས། ཧལ་ཧ་རྗེ་བཙུན་དམ་པ་དང༌། ཨ་ཀྱཱ་རིན་པོ་ཆེ་རྣམ་གཉིས་ལ་མཚམས་ཞུར་མགྲོན་གཉེར་རབ་འབྱམས་པ་ངག་དབང་བསྟན་འཛིན་མངགས་པའི་གདོང་སོ་སོར་ཞུ་ཡིག་རྒྱས་པ་ཕུལ། མགྲོན་གཉེར་སོང་སྟེ་རྗེ་བཙུན་དམ་པ་རིན་པོ་ཆེར་ཕྱག་དབང་ཞུས་ནས་ཞུ་ཡིག་ཕུལ་བས་སྐུའི་མཚམས་འདྲི་དང་གར་བཞུགས་སོགས་བཀའ་འདྲི་ཞིབ་ཏུ་གནང༌། ཨ་ཀྱཱ་ནོ་མིན་ཧན་རིན་པོ་ཆེར་ཡང་ཞུ་ཡིག་དང་རྒྱུ་མཚན་གྱི་མོལ་མཆིད་རྒྱུན་རིང་ཞུས། མགྲོན་གཉེར་ཕྱིར་ལྡོག་ཁ་རྗེ་བཙུན་དམ་པ་རིན་པོ་ཆེར་ཐོན་ཕྱག་ཞུས་པར། ཞལ་ནས་དྲིན་ཅན་རྩ་བའི་བླ་མ་མི་ཉག་རིན་པོ་ཆེའི་དྲུང་དུ་བཀའ་ཆོས་ཀྱི་སྐོར་མང་པོ་ཉན་རྒྱུ་ཡོད་ཀྱང་ད་ལྟ་བྲེལ་གཡེང་ཆེ་ཞིང༌། ས་ཐག་རིང་བའི་སྟབས་ཀྱིས་མི་ཐོབ་པ་འདྲ། ཕྱིས་སུ་ཞལ་མཇལ་ཏེ་དམ་པའི་ཆོས་ཀྱི་བདུད་རྩིར་ལོངས་སྤྱོད་པ་དང་ཞབས་པད་བརྟན་པའི་ཕྱིར་ཡིན་གསུང་སྟེ། ལྷ་རྫས། མཎྜལ། སྐུ་གསུང་ཐུགས་རྟེན། གོས་ཆེན་ཡུག་སོགས་དང་ཕྱག་རིས་རྒྱས་པ་སྩལ་ནས་ཁྱོད་ཀྱིས་དེ་དག་ལེགས་པར་ཞུས་གསུངས། ཨ་ཀྱཱ་ནོ་མིན་ཧན་རིན་པོ་ཆེས་ཀྱང༌། སྟོན་མཇུག་འདིར་མཚོ་བདུན་དུ་བསྐྱོད་རྩིས་ཡིན་པས་ལམ་
ཞོར་དུ་རང་གི་དྲིན་ཅན་རྩ་བའི་བླ་མ་རྡོ་རྗེ་འཆང་གི་ཞལ་དངོས་སུ་མཇལ་ནས་ཆོས་བཀའ་ཞུ་རྒྱུ་མང་པོ་ཡོད། ཁྱོད་ཀྱིས་ངས་ཕུལ་བའི་ཞུ་ཡིག་དང་རྒྱུ་མཚན་རྣམས་ཞུ་དགོས་གསུངས། མགྲོན་གཉེར་ཕྱིར་འབྱོར་འཕྲལ་སྐུ་མདུན་དུ་མཇལ་ཏེ་རྒྱུ་མཚན་ཞིབ་རྒྱས་ཞུས་ཤིང་ཞུ་ཡིག་རྣམས་སྤྱན་ལམ་དུ་བསྟར། ཏ་རི་གངྒཱའི་བཱ་ཐུར་ག་ལི་ཏཱ་སྒྲོལ་མ་སྐྱབས་ལ་གྲུབ་རྒྱལ་ལུགས་ཀྱི་ཚེ་དབང༌། རྟ་མགྲིན་གསང་སྒྲུབ་ཀྱི་རྗེས་གནང༌། འཕོ་ཁྲིད་སོགས་དང༌། དགེ་སློང་དྷརྨ་ལ་མགོན་པོའི་རྗེས་གནང་བཅས་སྩལ། ཏཱ་བླ་མ་ངག་དབང་ཡོན་ཏན་གྱི་འདོད་པ་ལྟར་གཡང་འབོད་གནང༌། དེ་ནས་པཱ་ཤིང་ཐུའི་དགོན་པར་ཕེབས། འདུས་ཚོགས་ཡོངས་ནས་སྨན་ཆོག་དང་སྨོན་ལམ་སོགས་ཀྱི་ལུང་ཞུས་པའི་འདུན་པ་བསྐངས། ཧོར་ ཏུ་ཏི་ཡན་ཆི་བླ་མའི་སྤྲུལ་སྐུ་བློ་བཟང ་མཁས་མཆོག་གྲགས་པ་ལ་བཀའ་ཆོས་འགའ་ཞིག་སྩལ། ཨོན་པོ་ཏཱ་བླ་མ་ཆོས་རྗེ་ཐུབ་བསྟན་ངག་དབང་གིས་གདན་དྲངས་པའི་འདོད་མོས་བཞིན་རྟེན་ལ་རབ་གནས་བསྡུས་པ་མཛད། འཇིགས་བྱེད་ཀྱི་ལྗགས་བསྙེན་སྔོན་དུ་འགྲོ་བས་ཞི་བའི་སྦྱིན་སྲེག་མཛད། སྒྲོལ་མའི་རྗེས་གནང་ཡང་སྩལ། པོ་དར་གྷ་ནའི་དགོན་པར་ཕེབས། འདུས་ཚོགས་ཡོངས་ནས་ཞུས་པ་ལྟར་སྤྱན་རས་གཟིགས་ཀྱི་རྗེས་གནང་སོགས་ཆོས་བཀའ་མང་དུ་སྩལ། དེ་ནས་པཎྚི་ཏ་བླ་མའི་སྒར་ཐོག་ ཏུ། ཉིད་ཀྱིས་དབུ་མཛད་པཎྚི་ཏ་བླ་མ། སྤྲུལ་སྐུ་བློ་བཟང ་མཁས་མཆོག །ཁྲི་པ་མགོན་པོ་ཤེས་རབ་སོགས་གྲྭ་པ་མང་པོས་བླ་མཆོད་དུས་བཟང་ཕྱག་ལེན་བཞིན་གསུངས། དགེ་བསྙེན། དགེ་ཚུལ་སློང་གི་སྡོམ་པ་ཞུ་མཁན་བདུན་ཅུ་ལྷག་ཅིག་བསླབ་པའི་གཞི་སོ་སོར་
བཀོད། མེརྒེན་ཧུ་ཐོག་ཐུ་བླ་མའི་ཞུར་ལ་དུ་ཕེབས་ཏེ་ཇེ་སང་བླ་མ་བློ་བཟང་སྐལ་ལྡན་ལ་ཚོགས་བདག་དང་སྒྲོལ་དཀར་གྱི་རྗེས་གནང༌དང་། འདུས་ཚོགས་སྤྱི་ལ་སྨན་བླ་རིང་ཐུང་གི་ལུང་སྩལ། གཞན་དོན་གཉེར་ཅན་མང་པོར་ལམ་རིམ་ཆེན་མོའི་ལུང༌། བྱང་ཆུབ་བདེ་ལམ་གྱི་ལུང་སོགས་གནང༌། སླར་ཡང་མེརྒེན་པཎྚི་ཏ་བླ་མའི་སྒར་ཐོག་ཏུ་ཕེབས་ནས་བཞུགས་སྐབས་ཧལ་ཧ་ནས་ཨ་ཀྱཱ་རིན་པོ་ཆེ་མཚོ་བདུན་དུ་ཆིབས་བསྒྱུར་བའི་ལམ་ཞོར་དུ་རྗེ་འདི་མཇལ་ཕྱིར་ཕེབས། ཨ་ཀྱཱ་རིན་པོ་ཆེས་སྣར་ཐང་བརྒྱ་རྩའི་རྗེས་གནང་ཞུས་པ་དགྱེས་བཞིན་སྩལ། ཉིད་ལ་ཨ་ཀྱཱ་རིན་པོ་ཆེས་བླ་མཆོད་དང་འབྲེལ་བའི་ཞབས་བརྟན་ཞུ་འབུལ་ཟབ་ཅིང་བརླིང་བ་ཞུས་ཏེ་ལྷ་རྫས། མཎྜལ། སྐུ་གསུང་ཐུགས་སོགས་བདོག་པའི་མཆོད་སྤྲིན་སྤྲོས། རྣམ་པ་གཉིས་ཉིན་ཁ་ཤས་ཀྱི་རིང་ལྷན་དུ་བཞུགས་ཏེ་ཟབ་རྒྱས་ཆོས་ཀྱི་བགྲོ་བ་བྱམས་འཇམ་དབྱངས་ཞལ་འཛོམ་པ་ལྟ་བུ་གནང༌། དད་ལྡན་གྱི་སེར་སྐྱ་བཞི་སྟོང་བརྒལ་བར་རྣམ་པ་གཉི་གས་རེས་མོས་ཀྱིས་ཕྱག་དབང་དང་ཆོས་བཀའ་སྩལ་ཏེ་ཀུན་གྱི་ཡིད་ཚིམ་པར་མཛད། དེ་ནས་རྣམ་པ་གཉིས་ལྷན་དུ་ཉིན་ཁ་ཤས་ལ་ཕེབས་སྐབས་ཞག་ས་ཐམས་ཅད་དུ་མཚན་མོའི་རིང་ལ་ཨ་ཀྱཱ་རིན་པོ་ཆེའི་ཐུགས་བཞེད་བཞིན་བཀའ་ཆོས་དཀོན་པའི་རིགས་ཀྱི་ལུང་ཁྲིད། རྗེས་གནང་མན་ངག་ཞལ་ཤེས་རྣམས་སྩལ་ཏེ་ཐུགས་ཀྱི་བུམ་བཟང་གང་བར་མཛད། ཁོང་གི་གསོལ་དཔོན་ཧོར་ཚ་པི་ལིག་ཐུ་འཇམ་དབྱངས་ཉི་མས་བསྐུལ་ངོར་དྲག་པོ་སུམ་དྲིལ་གྱི་སྒྲུབ་ཐབས་ལྗགས་རྩོམ་མཛད། དེ་ནས་ལམ་གྱེས་ནས་སོ་སོར་ཕེབས་ཁ་ཐུགས་ཉེ་བས་འབྲལ་མི་ཕོད་པ་ལྟ་བུའི་ངང་
ནས་སྐྱབས་འཇུག་ཞུས་ཏེ་སོ་སོར་ཕེབས། རྗེ་ཉིད་སླར་ཡང་སུ་ཉིད་ཝང་སྐུ་མཆེད་ཀྱི་སྒར་ཐོག་ཏུ་ཕེབས། མཁན་པོ་བླ་མའི་དགོན་པར་རྗེ་ཙོང་ཁ་པའི་དུས་མཆོད་ཀྱི་ཉིན་མཆོད་སྤྲིན་བླ་མེད་སྤྲོས་ཏེ་ལྟུང་བཤགས་ཕྱག་དང་འབྲེལ་བ། ཡན་ལག་བདུན་པ། ཐུན་དྲུག་རྣལ་འབྱོར། བསྟན་འབར་མ་སོགས་གསུང་སྟེ་རྒྱལ་བ་གཉིས་པའི་བསྟན་པ་ཕྱོགས་མཐར་རྒྱས་པའི་ཐུགས་སྨོན་མཛད། ཝང་གི་སྲས་མོ་ལ་དགེ་བསྙེན་མའི་སྡོམ་པ་སྩལ་མིང་ལྷ་བཙུན་ཉི་མ་ཞེས་བཏགས། དེ་ནས་སུ་ཉིད་ཝང་སྐུ་མཆེད་སོ་སོའི་སྒར་ཐོག་ཏུ་གདན་དྲངས་པས་སོ་སོ་ལ་འདོད་ཆོས་ལྷུག་པར་སྩལ། ཝང་གི་དཔོན་མོ་ཨུ་དུམྦ་རིས་བསྐུལ་ནས་རྗེས་འཛིན་སྨོན་ཚིག་དང༌། མཁན་པོ་བླ་མ། དུས་རེང་ཝང༌། ཏཱ་བླ་མ། ཐུ་ས་ལགྖི་བ་ཐུ་སོགས་སྐུ་མཆེད་ནས་བསྐུལ་བ་ལྟར། དགྲ་ལྷ་ཆེན་པོ་མཆེད་དགུའི་གསོལ་མཆོད་རྒྱས་པ་ཞིག་ལྗགས་རྩོམ་མཛད། དེ་ནས་དགུན་ཟླ་འབྲིང་པོའི་ཡར་ཚེས་དགེ་བའི་ཉིན་སོ་ཉིད་གཡས་རུ་ནས་སྐུ་འབུམ་ཆོས་སྡེ་ཆེན་པོར་ཆིབས་ཀྱི་ཁ་ལོ་མངོན་པར་བསྒྱུར། ལམ་ཞོར་དུ་དད་འདུས་ཀྱི་སེར་སྐྱ་བདུན་སྟོང་བརྒྱ་ཕྲག་གཉིས་ལྷག་དང༌། ཨོར་དུ་སུ་ཙཱུན་གར་ཏཱ་པཻ་ཟིའི་སྲས་དང་སྲས་མོ་སོགས་ཀྱང་མཇལ་བར་ཕྱག་དབང་འདོད་ཆོས་སོགས་ཀྱིས་ཚིམ་པར་མཛད་དོ། །དེ་ལྟར་བྱང་ཕྱོགས་ཆེན་པོ་ཧོར་གྱི་ཡུལ་དུ་བྱོན་ཏེ་གདུལ་བྱ་སོ་སོའི་ཁམས་དང་བསམ་པ་དང་བག་ལ་ཉལ་དང་མོས་པ་ཇི་ལྟ་བ་བཞིན་གཟིགས་ཏེ། ལ་ལ་ནི་སོ་ཐར་གྱི་བསླབ་པའི་གཞི་ཅི་རིགས་ལ་བཀོད་དེ་ཐར་པའི་ས་བོན་བསྐྲུན། ལ་ལ་ནི་བྱང་ཆུབ་ལམ་གྱི་རིམ་པའི་ཁྲིད་དང་སེམས་བསྐྱེད་ཆོ་ག་སོགས་ཀྱི་སྒོ་ནས་ཐེག་ཆེན་
ཐུན་མོང་བའི་ལམ་དུ་བཅུག །ལ་ལ་ནི་དབང་བསྐུར་རྣམ་པར་དག་པས་གསང་སྔགས་ཀྱི་སྒོར་བཅུག་སྟེ་སྐུ་བཞིའི་ས་བོན་སྨིན་པར་མཛད། གཞན་ཡང་སོ་སོའི་མོས་པ་བཞིན་དུ་གཏན་པ་མེད་པའི་ཆོས་ཀྱི་མཆོད་སྦྱིན་རྒྱ་ཆེན་པོས་རེ་འབྲས་རྫོགས་པར་མཛད་ཅིང་མཐོང་ཐོས་དྲན་རེག་ཐམས་ཅད་དོན་ལྡན་དུ་འགྱུར་བའི་རྒྱལ་སྲས་ཀྱི་ཐབས་མཁས་པའི་སྤྱོད་པ་མཐའ་ཡས་པའི་སྒོ་ནས་དད་ལྡན་གྱི་སྐྱེ་བོ་འབུམ་ཕྲག་དུ་མ་ཞིག་མངོན་མཐོ་ངེས་ལེགས་ཀྱི་དཔལ་ལ་སྦྱོར། དམ་པ་ནང་ཕན་ཚུན་ཆོས་ཀྱི་བགྲོ་བས་བསྟན་པའི་བྱི་དོར་མཛད། གནས་ཆེན་ལ་མཇལ་སྐོར་དང་ཐུགས་དམ་བསག་སྦྱང་ཚད་ལས་འདས་པ་གནང༌། དེ་ཐམས་ཅད་ཕན་བདེའི་འབྱུང་གནས་རྒྱལ་བསྟན་རིན་པོ་ཆེ་རྒྱས་པའི་རྒྱུ་འབའ་ཞིག་ཏུ་བསྔོས་ཏེ། བསྟན་འགྲོ་ཡོངས་ལ་དགེ་ལེགས་ཀྱི་གོ་སྐབས་ཡངས་པོར་འབྱེད་པའི་འཕྲིན་ལས་ཉིན་བྱེད་སྣང་བས་ཤར་ཕྱོགས་རྒྱ་མཚོའི་མཐའི་བར་དུ་ཁྱབ་པར་གྱུར་ཏོ། །དགེ་སྦྱོང་ཚུ༷ལ་གྱི་འབྲས་བུ་འདོད་རྣམས་གཏན་ཁྲི༷མས་ལྔ་སོགས་སོ་ཐར་དང༌། །ཐེག་ཆེན་གཉིས་ཀྱི་བསྟན༷་པའི༷་འཇུག་སྒོ་སེམས་བསྐྱེད་པ་དང་དབང་བསྐུར་གྱིས། །གདུལ་བྱ་རང་རང་སྐལ་བ་ཇི་བཞིན་བྱང་ཆུབ་མཆོག་ཏུ་སྨིན་མཛད་དེ། །འཕྲིན་ལས་ཉི༷་ཟེར་ལི་ཁྲིའི་རྡུལ་གྱིས་བྱང་ཕྱོགས་འཛིན་མ༷འི་ཁྱོན་ཀུན་ཁྱབ། །དེ་ཚེ་ཐུགས་རྗེ་བྱིན་རླབས་སྤྲིན་ཕུང་དང༌། །དད་ལྡན་བདོག་པའི་ཆུ་འཛིན་ལྷན་ཅིག་གཏིབས། །མཁའ་མཉམ་འགྲོ་བའི་བདེ་སྐྱིད་རྒྱ་མཚོ་དང༌། །སངས་རྒྱས་བསྟན་པའི་ཆུ་གཏེར་ལྷན་ཅིག་འཕྱུར། །མཁས་པའི་ཚོགས་ལ་བཤད་པའི་དགའ་སྟོན་
སྤེལ། །གནས་ཆེན་རྣམས་སུ་སྒྲུབ་པའི་རྒྱལ་མཚན་བཙུགས། །མཆོག་གསུམ་རྟེན་ལ་མཆོད་པའི་བྱ་བ་སྟེ། །འཁོར་ལོ་གསུམ་གྱི་རོལ་གར་ཅིག་ཅར་བསྒྱུར། །ཞེས་དགེ་ལྡན་བསྟན་པའི་རྩ་ལག་མཁས་ཤིང་གྲུབ་པའི་དབང་ཕྱུག་རྗེ་བཙུན་བླ་མ་དམ་པ་ཚུལ་ཁྲིམས་བསྟན་པའི་ཉི་མ་དཔལ་བཟང་པོའི་རྣམ་པར་ཐར་པ་ནོར་བུའི་དོ་ཤལ་ལས་བྱང་ཕྱོགས་ཆེན་པོ་ཧོར་གྱི་ཡུལ་དུ་བསྟན་འགྲོའི་དོན་མཛད་ཚུལ་གྱི་དྲ་བ་སྟེ་བཞི་པའོ།། །།དགུང་ལོ་ལྔ་བཅུ་རྩ་བརྒྱད་པ་ཨངྒིར་ཞེས་པ་ཆུ་སྤྲེལ་ལོའི་དཔྱིད་ཟླ་དང་པོར་རྒྱལ་བའི་གདན་ས་ཆེན་པོ་སྐུ་འབུམ་ཆོས་སྡེའི་རྒྱུད་སྨན་དཔོན་སློབ་དང༌། ཚོགས་ཆེན་ཞལ་ངོ་སྤྱི་གཉེར་སོགས་ལས་སྣེའི་རིགས་དང་ཆེན་པོའི་ཡོ་བྱད་རྣམས་བསྒྲེངས་ཏེ་དགེ་འདུན་སུམ་སྟོང་ལྷག་གི་སེར་སྦྲེང་དང་བཅས་ཕུན་ཚོགས་འདོད་པ་འཇོ་བའི་རང་སྒར་དུ་སེང་ཁྲིར་གདན་དྲངས་ཏེ་ཆོས་སྟོན་རྒྱས་པར་བྱས་སོ། །དེ་ནས་སྐུ་འབུམ་ཚོགས་ཆེན་དུ་དགེ་འདུན་སུམ་སྟོང་བརྒྱད་བརྒྱ་ལྷག་ལ་ཞོ་ལྔ་རེའི་སྐུ་འགྱེད་དང་མང་ཇ་རྣམ་བཞག །གསེར་སྡོང་ཆེན་མོའི་ལྷ་ཁང་གསར་བཞེངས་སུ་དམིགས་ཏེ་དངུལ་རྟ་རྨིག་མ་ཟུང་བཅས་ཕུལ། བཤད་སྒྲུབ་གླིང་དང༌། རྒྱུད་སྨན་གྲྭ་ཚང་སོ་སོར། སྐུ་འགྱེད་ཞོ་གང་ཕུན་རེ་བཅས་ཕུལ། མཆོད་རྟེན་མཐོང་བ་དོན་ལྡན་གྱི་མདུན་དུ་སྟོང་མཆོད་དང༌། གཞན་ལྷ་ཁང་སོ་སོར་མཆོད་སྒྲོན་གང་རྒྱས་བསྟར། དེ་ནས་ཆུ་བཟང་སྤྲུལ་བའི་སྐུ་རིན་པོ་ཆེར་མཇལ་བར་ཕྱག་བཏེག་སྟེ་ལྷ་རྫས་མཎྜལ། སྐུ་གསུང་ཐུགས་རྟེན། མཛོད་གོས་ཡུག །དངུལ་རྟ་རྨིག་མ་སོགས་ཕྱག་རྟེན་དུ་ཕུལ། ཆུ་བཟང་དགོན་པར་མང་འགྱེད་བཏང་དགོན་ལུང་དུ་བྱོན་ཏེ་མང་ཇ་སོགས་
ཀྱི་བསྙེན་བཀུར་དང༌། ཐུའུ་བཀྭན་སྤྲུལ་བའི་སྐུ་རིན་པོ་ཆེར་ལྷ་རྫས། དངུལ་མཎ། སྐུ་གསུང་ཐུགས་རྟེན། མཛོད་གོས་སྤྲིན་རིས་མ་ཡུག །དངུལ་རྡོ་ཚད་སོགས་ཕྱག་རྟེན་དུ་ཕུལ། ཐུའུ་བཀྭན་རིན་པོ་ཆེའི་སྐུ་གདུང་མཆོད་རྟེན་གྱི་དྲུང་དུ་མཆོད་སྒྲོན་གང་རྒྱས་ཕུལ་ཏེ་སྐྱབས་སེམས། ཡན་ལག་བདུན་པ་མཎྜལ་བཅས། ཐུན་དྲུག་རྣལ་འབྱོར་ཁྲུས་གསོལ་སོགས་བྱས་ཤིང༌། སྨོན་ལམ་བསྟན་འབར་མ་བཅས་གསུང་སྟེ་གསོལ་བ་ཤུགས་དྲག་ཏུ་བཏབ་ནས་བསྔོ་སྨོན་གྱི་མཚམས་སྦྱར། དེ་ནས་ཁྲི་ཀ་སེར་མོ་ལྗོངས་སུ་ཕེབས། མཆོད་རྟེན་བླ་བྲང་རང་དུ་བཞུགས་ནས་བཅད་རྒྱ་གནང༌། སྐུ་མཚན་གྲོལ་ནས་མཆོད་རྟེན་མི་ཉག་གྲྭ་ཚང་དང་དགའ་ལྡན་དར་རྒྱས་གླིང་གི་བཞི་པའི་སྨོན་ལམ་ལ་རེས་མོས་ཀྱིས་ཕེབས། གྲྭ་ཚང་འདི་གཉིས་ལ་མང་འགྱེད་གང་རྒྱས་དང་སྤྱི་འཇོག་དངུལ་རྡོ་ཚད་རེ་གནང༌། གསོལ་དཔོན་ཉི་མའི་ཨ་ཁུ་གཤེགས་སར་ཕེབས་ནས་བསྔོ་སྨོན་གྱི་མཚམས་སྦྱོར་གནང༌། ཁྲི་ཀའི་ཕྱོགས་ཀྱི་སྒྲུབ་སྡེ་རྣམས་ལ་བསྙེན་བཀུར་གྱ་ནོམ་པ་མཛད། དེ་ནས་དབྱར་ཐོག་མཚོ་སྔོན་དུ་ཕེབས། སྨད་ནས་ཅུང་ཟད་འགྱང་བར་ཡུལ་ལྷ་འཕྲེང་བའི་རྣམ་པ་ཞིག་བྱུང་སྟབས། ཉིད་ཀྱི་འཁྲུངས་ས་ཨུལ་ཆུས་ཨོ་བོ་ཞེས་འབོད་པའི་ལབ་རྩེ་བསྟོད་དེ་གཞི་བདག་ལ་བསང་མཆོད་སོགས་གང་རྒྱས་གནང་བས་ཆར་ཆེན་པོ་ཞིག་བབ་ནས་རྟེན་འབྲེལ་རང་འགྲིག་ཏུ་བྱུང༌། ཝང་ཚེ་རིང་དོན་གྲུབ་ཀྱི་ཨུརྒེར་ཕེབས། ལྷ་སྲུང་ལ་གསོལ་མཆོད་འདོད་ཆོས་སོགས་སྩལ། པཻ་ཟི་རཏྣ་སིདྡྷིའི་ཨུརྒེར་ཕེབས། མགོན་པོ་ཕྱག་དྲུག་པའི་
མཆོད་གཏོར་གང་རྒྱས་མཛད། ཨུལ་ཅུས་ཐུ་དའི་ཆིང་ཇ་སག་གི་ཨུརྒེར་ཕེབས། ཡི་དམ་ཆོས་སྐྱོང་སོགས་ལ་གཏོར་འབུལ་དང༌། ཧོ་ཤུའི་དྲུག་པའི་སྨོན་ལམ་ཚོགས་པར་སྨོན་ལམ་གྲོལ་བར་དུ་བཞུགས་ནས་གསུང་ཆོས་སྨོན་ལམ་གྱི་དབུར་ཕེབས་ཏེ་བསྟན་པ་རྒྱས་པའི་ཐུགས་སྨོན་མཛད། འདུས་ཚོགས་ལ་དགའ་ལྡན་ལྷ་བརྒྱ་མའི་ཁྲིད་དང་ལུང་འགའ་ཞིག་ཀྱང་སྩལ། དེ་ནས་པཻ་ལི་འཇམ་དཔལ་གྱི་ཨུརྒེར་ཕེབས། དཔོན་སྲས་བཅས་ལ་ཆོས་བཀའ་དང་གཏོར་འབུལ་གཡང་འབོད་ཀྱང་བྱས། སླར་སྐུ་འབུམ་དུ་ཕེབས། ཨོར་དུ་སུ་ཐོ་དོ་ཐུ་ས་ལཀྖིས་ཞུས་ངོར། བསྟན་པའི་གསལ་བྱེད་ཆེ་ཤོས་སྤྲུལ་བའི་སྐུ་ངག་དབང་བཤད་སྒྲུབ་བསྟན་པའི་ཉི་མ། བྱ་བཏང་སྒོམ་པ་ངག་དབང་སྨོན་ལམ་སོགས་དགེ་འདུན་ལྔ་བརྒྱ་སྐོར་ལ་རྟ་མགྲིན་གསང་སྒྲུབ་ཀྱི་དབང་སྟ་གོན་དང་བཅས་པ། ལྷ་མོ་དང་སེང་གདོང་མ་སོགས་ཀྱི་རྗེས་གནང་བཅས་སྩལ། དེ་ནས་ཁྲི་ཀ་གསེར་མོ་ལྗོངས་སུ་བྱོན། ཡུལ་ཕྱོགས་དེའི་རྟེན་བྱིན་རླབས་ཅན་མཆོད་རྟེན་དཀར་པོར་གྲགས་པ་ཞིག་རལ་དུ་སོང་ཡོད་པས། རྗེ་ཉིད་ཀྱིས་ཕྱག་མཛོད་ཆོས་རྗེ་ལ་ཞིག་གསོས་གསར་བཞེངས་ལྟ་བུ་ཞིག་བྱེད་དགོས་ཞེས་བཀའ་ཕེབས་པ་ལྟར་གྲུབ་ནས་རྩེར་དངུལ་སྲང་ཉིས་བརྒྱ་དང་ལྔ་བཅུ་ལས་གྲུབ་པའི་གསེར་ཟངས་ཀྱི་ཉི་ཟླ་མཆོད་རྟེན་དེ་ལ་རན་པ་གཟི་འོད་འཕྲོ་ཞིང་ཐིག་ཚད་དང་ལྡན་པ་ཕུལ། ནང་དུ་གཟུངས་དང་རྟེན་སྣ་དུ་མ་སོགས་གཟུངས་གཞུག་རྒྱས་པར་བཞག་ནས། ཉིད་དཔལ་རྡོ་རྗེ་འཇིགས་བྱེད་ཀྱི་སྐུར་བཞེངས་ཏེ་སྒྲུབ་གྲོགས་དང་བཅས་པས་རབ་གནས་རྒྱས་པ་མཛད། དེ་ནས་ཕྱག་མཛོད་ཆེ་ཆིང་ཆོས་རྗེ། མགྲོན་གཉེར་རབ་འབྱམས་པ་ངག་དབང་བསྟན་འཛིན། སོ་ཀྱཱ་རབ་འབྱམས་
པ་དགེ་ལེགས་རྒྱ་མཚོ། དབུ་མཛད་བློ་བཟང་དོན་གྲུབ། དྲུང་ཡིག །གསོལ་དཔོན་སོགས་ནས། རྗེ་ཉིད་ཀྱི་སྐུ་གོང་མ་སྔགས་ཆེན་འཕྲིན་ལས་འབུམ་གྱི་སྒྲུབ་ཁང་གསང་སྔགས་བདེ་ཆེན་ཆོས་འཕེལ་གླིང་གི་གཟིམས་ཆུང་ཧ་ཅང་རྙིང་པར་བརྟེན་མཐུན་རྐྱེན་སོ་སོའི་འབྱོར་པ་དང་བསྟུན་པར་སྒྲུབ་རྒྱུར་ཁས་བླངས་ནས། དེམྖི་གཉེར་པ་དགེ་སློང་ཤེས་རབ་ཉི་མས་ལས་དཔོན་བྱས་ཏེ། ས་ལས་དང་ཚོན་རྩི་སོགས་གང་ལེགས་དཀའ་ཚེགས་མེད་པར་བཞེངས་གྲུབ་ནས་ལས་དཔོན་གྱིས་རྗེ་ཉིད་གདན་དྲངས་ཏེ་ལྷ་རྫས་མཎྜལ་སྐུ་གསུང་ཐུགས་རྟེན་སོགས་རྟེན་འབྲེལ་གྱི་ཞབས་བརྟན་ཕུལ་ཞིང་ཆོས་སྟོན་རྒྱས་པར་ཞུས། དེ་ནས་སྐུ་འབུམ་དུ་ཕེབས། ཡུན་རིང་པོའི་བར་དུ་ཐུགས་དམ་བཅད་རྒྱ་དམ་པོས་རྗེ་བཙུན་རྡོ་རྗེ་རྣལ་འབྱོར་མའི་ལྗགས་བསྙེན་མཛད་ཅིང་བདག་འཇུག་ཀྱང་མང་དུ་བཞེས། བདེ་གསང་འཇིགས་གསུམ་གྱི་དཀྱིལ་འཁོར་བསྒྲུབས་ཤིང་བདག་འཇུག་བཞེས། སྨད་ཕྱོགས་ཀྱི་བླ་དཔོན་དུ་མས་གཙོས་སེར་སྐྱ་མང་པོ་ལ་ཀུན་རིག །ཚེ་དཔག །ཐུགས་རྗེ་ཆེན་པོ་བཅུ་གཅིག་ཞལ་གྱི་དབང་སྟ་གོན་བཅས་སྩལ། བླ་བྲང་ཉིད་དུ་སེང་གདོང་མའི་གཏོར་ཟློག་ཀྱང་སྒྲུབ་པ་མཛད། དེ་ནས་ཟླ་བ་ཁ་ཤས་ཀྱི་རིང་ལ་འཇིགས་བྱེད་ཀྱི་ལྗགས་བསྙེན་ལ་གཅིག་ཏུ་འགྲུབ་པར་མཛད། ཡང་ཁྲི་ཀའི་ཕྱོགས་སུ་ཕེབས། མཆོད་རྟེན་བླ་བྲང་དུ་བཅད་རྒྱའི་ངང་དུ་བཞུགས། ཁྲི་ཀའི་ཡུལ་གྱི་རྟེན་གཙོ་གྲོན་གྲུའི་ལྷ་ཁང་ས་སྐྱ་པཎ་ཆེན་གྱིས་བཞེངས་པར་གྲགས་པ་དེའི་ནང་རྟེན་དུ་སྨན་འདམ་ལས་གྲུབ་པའི་ཐུབ་དབང་གི་སྐུ་ཤིན་ཏུ་ཆེ་བ་ཞིག་བཞུགས་པ་ལ།
གསེར་ཟངས་ལས་གྲུབ་པའི་དབུ་རྒྱན་སྤུས་གཙང་རིན་ཐང་ཅན་ཞིག་འབུལ་དགོངས་ཏེ་འཕྲོད་ལམ་ཡོད་མེད་ཡུལ་ལྷའི་དྲུང་དུ་མཚན་དང་མོ་བཏབ་པར་གང་ལེགས་ཆུད་ཅིང༌། ཆོས་སྲུང་འགའ་ཞིག་ལ་ལུང་བསྟན་ཞུས་པའང་ཡུལ་ལྷའི་ལུང་དང་མཐུན་པར་བབས་པས། འཇམ་མགོན་བླ་མས་ཇོ་བོར་དབུ་རྒྱན་ཕུལ་བའི་རྣམ་ཐར་བཞིན། གཟའ་སྐར་ཕུན་སུམ་ཚོགས་པར་ཐུབ་དབང་རིན་པོ་ཆེར་དབུ་རྒྱན་ཕུལ་ཏེ་མཆོད་སྒྲོན་གང་རྒྱས་སྤེལ། སྤྱན་འདྲེན་ཁྲུས་གསོལ་སོགས་དང༌། ཐུབ་བསྟན་ཡང་སྙིང་དགེ་ལྡན་རིང་ལུགས་ཕྱོགས་མཐར་རྒྱས་ཤིང༌། སྐྱེ་འགྲོ་ཡོངས་ལ་བདེ་སྐྱིད་འབྱུང་བའི་ཐུགས་སྨོན་གང་དྲག་མཛད་པས། ཡུལ་ཕྱོགས་སུ་བཀྲ་ཤིས་པའི་དགེ་མཚན་དུ་མ་མངོན་སུམ་དུ་བྱུང༌། དེ་ནས་དབུས་གཙང་ལ་ཕེབས་རྒྱུའི་ཐུགས་བཞེད་སྔ་མོ་ནས་ཡོད་ཐོག །ལྷ་བླ་མ་སོགས་ལ་ལུང་ཞུས་ཕུལ་བར་ཆོས་ཀྱི་མཛད་འཕྲིན་ཉིད་ཀྱི་ཐུགས་འདུན་ལྟར་འགྲུབ་ཚུལ་དང༌། ཆོས་སྐྱོང་རྣམས་ཀྱིས་གྲོགས་མཛད་པར་ཞལ་གྱིས་བཞེས་པས་ཕེབས་རྒྱུར་ཐུགས་ཐག་བཅད་དེ། ཕྱག་མཛོད་ལ་མ་འགྱངས་པར་དབུས་གཙང་ལ་འགྲོ་རྒྱུ་ཡིན། དེར་མ་ཟད་སོང་ནས་ཆོས་ཉན་དང་གནས་མཇལ་སོགས་བྱ་བ་མང་པོ་ཡོད་པས་ལོ་ཁ་ཤས་ཀྱི་རིང་ལ་འདུག་དགོས་ཞེས་གསུང་ཕེབས་པར། ཕྱག་མཛོད་ཆེ་ཆིང་ཆོས་རྗེ་རབ་འབྱམས་པ་ཚུལ་ཁྲིམས་ཆོས་འཛིན་རང་གི་བསམ་པར་ཡང་མདོ་སྨད་དང་སོག་ཡུལ་གྱི་དད་ལྡན་སྦྱིན་བདག་རྣམས་ཀྱིས་ཕུལ་བའི་ཕྱག་རྫས་ཀྱི་སྐོར་འདི་ཆུད་མ་ཟོས་པར་ཆོས་ཕྱོགས་གཏོང་རྒྱུ་ཞིག་བྱུང་ན་སྙམ་པའི་འཕེན་པ་ཡོད་པའི་ཐོག་ཏུ་བབ་ནས་དགའ་དད་སྤྲོ་གསུམ་གྱིས་སྤྱིར་དབུས་ལ་
ཕེབས་རྒྱུ་བཀའ་དྲིན་ཆེ། ཕེབས་ཆས་སོགས་མྱུར་དུ་གྲ་འགྲིག་པ་བྱེད། འོན་ཀྱང་དེར་ཡུན་རིང་བཞུགས་རྒྱུའི་ཐུགས་དགོངས་གནང་མི་ཉན། དགུང་ལོ་ཉུང་བའི་སྐབས་ཡིན་ན་ཐུགས་གཉེར་གྱི་ཆེད་ལ་བཞུགས་དགོས་མོད། ད་ལྟ་ཉིད་དགུང་ལོ་མཐོ་བས་ཡུན་རིང་བཞུགས་ན་ས་ཆུ་སོགས་མི་འཕྲོད་པས་མཇལ་སྐོར་གཏོང་སྒོ་སོགས་གྲུབ་ཕྲལ་རང་ཡུལ་ལ་ཕེབས་དགོས་ཞེས་ནན་ཆེར་ཞུས། དེ་ནས་ཕྱག་མཛོད་ཆོས་རྗེས་རྗེ་ཉིད་ཀྱི་གསུང་དང་བླང་གིས། ཇོ་ཤཱཀ་རྣམ་གཉིས་སོགས་རྟེན་ལ་མཆོད་འབུལ་དང༌། རྒྱལ་བ་ཡབ་སྲས་ཀྱི་འབུལ་བ། སེར་འབྲས་དགའ་གསུམ་བཀྲས་ལྷུན་ཏེ་གདན་ས་ཆེན་པོ་བཞིས་མཚོན་ཆོས་སྡེ་ཆེ་ཕྲ་ཐམས་ཅད་ལ་མང་འགྱེད་གང་རྒྱས་འདེང་ངེས་གྲ་སྒྲིག་གང་ལེགས་བྱས་ཏེ། དགུང་ལོ་ལྔ་བཅུ་རྩ་དགུ་པ་དཔལ་གདོང་ཞེས་པ་ཆུ་བྱའི་ལོའི་སྟོན་ཀའི་དུས་གཟའ་སྐར་ཕུན་ཚོགས་ཀྱི་ཉིན། གདན་ས་ཆེན་པོ་སྐུ་འབུམ་ནས་དབུས་གཙང་དག་པའི་ཞིང་དུ་ཆིབས་ཀྱི་ཁ་ལོ་སྒྱུར་བར་མཛད། ལམ་ཞོར་དུ་བསྟན་པའི་སྦྱིན་བདག་ཝང་ཚེ་རིང་དོན་གྲུབ། པཻ་ལི་འཇམ་དཔལ། པཻ་ཟི་རཏྣ་སིདྡྷི། ཇ་སག་དའི་ཆིང་རྡོ་རྗེ། ཚྭ་འདམ་ཛ་སག་ཨེང་ཁི་པཱི་ཡར། ཛ་སག་རབ་བརྟན་སོ་སོས་ཨུརྒེར་གདན་དྲངས། དད་ལྡན་ཀུན་ལ་ཕྱག་དབང་ལྗགས་བསྔོ། འདོད་ཆོས་ཅི་རིགས་ཀྱིས་རེ་བ་བསྐངས། བྱང་ལམ་རིམ་པར་བརྒྱུད་ཉེ་ཞོ་མེད་པར་བྱོན་ཏེ་དགུན་ཟླ་དང་པོའི་ནང༌། ཐོག་མར་འབྲོམ་སྟོན་རྒྱལ་བའི་འབྱུང་གནས་ཀྱི་གདན་ས་བྱང་རྭ་སྒྲེང་རྒྱལ་བའི་དབེན་གནས་སུ་ཕེབས། ཇོ་བོ་དབུ་ཡོན་མ་སོགས་རྟེན་ལ་མཆོད་སྒྲོན་གང་རྒྱས་ཕུལ་ཏེ། ལྟུང་བཤགས་ཕྱག་དང་སྦྲགས་པ། སྐྱབས་སེམས། ཐུན་དྲུག་
གི་རྣལ་འབྱོར། བསྟན་འབར་མ་སོགས་གསུང་སྟེ་བསྟན་པ་རྒྱས་པའི་ཐུགས་སྨོན་མཛད། དགེ་འདུན་གྱི་སྡེར་མང་ཇ་དང་འགྱེད་སྐར་ལྔ་རེ་ཕུལ། དེ་ནས་ལྷ་སར་ཕེབས། ཇོ་ཤཱཀ་རྣམ་གཉིས་སོགས་ལ་མཆོད་མཇལ་གནང་སྟེ། ལྷ་ལྡན་སྤྲུལ་བའི་གཙུག་ལག་ཁང་གི་འཁྱམ་རྭའི་ཐོག་ ཏུ་༸རྒྱལ་དབང་ཐམས་ཅད་མཁྱེན་པ་བློ་བཟང ་བསྟན་པའི་འབྱུང་གནས་ངག་དབང་ལུང་རྟོགས་རྒྱ་མཚོ་དཔལ་བཟང་པོར། ལྷ་རྫས་ནང་མཛོད། རྒྱ་དངུལ་སྲང་བཅུ་ལས་གྲུབ་པའི་མཎྜལ་དར་ཚོན་གྱི་སྣེ་འདོགས་ཅན། སྐུ་རྟེན་ཐུབ་དབང་གི་སྐུ་ཚག་གྲུབ། གསུང་རྟེན་ཚེ་མདོ་གསེར་བྲིས། ཐུགས་རྟེན་རྣམ་རྒྱལ་མཆོད་རྟེན། བྱུར་དམར་གྱི་ཕྱག་འཕྲེང་གསེར་གྱི་བཅུ་ཤད་ཅན། དྲིལ་གདན། ཅོད་པན་བཅས་ཐོག་མའི་ཕྱག་རྟེན་ཏུ་ཕུལ་ནས་ཕྱག་དབང་ཞུས་པར། ༸རྒྱལ་དབང་རིན་པོ་ཆེས་ཐུགས་བརྩེ་གཟིགས་ཆེན་པོས་ལམ་སྐབས་ཀྱི་བཀའ་འདྲི་སོགས་མང་དུ་ཕེབས། རྒྱལ་ཚབ་དེ་མོ་ནོ་མིན་ཧན་རིན་པོ་ཆེར། ལྷ་རྫས་ནང་མཛོད། སྲང་ལྔ་ལས་གྲུབ་པའི་མཎྜལ་དར་གྱིས་སྤྲས་པ། སྐུ་གསུང་ཐུགས་རྟེན། དྲིལ་གདན། ཅོད་པན་བཅས་ཕུལ་ནས་མཇལ་ཕྲད་མཛད། བསྟན་པའི་སྲོག་ཤིང་དགའ་ལྡན་ཁྲི་རིན་པོ་ཆེར། ལྷ་རྫས་ནང་མཛོད། དངུལ་གྱི་མཎྜལ། དྲིལ་གདན། ཅོད་པན་སོགས་ཕྱག་རྟེན་དུ་ཕུལ་ནས་མཇལ། ཁྲི་རིན་པོ་ཆེས་ཁྱེད་ད་ལམ་དབུས་གཙང་འདིར་ཕེབས་པ་བཀའ་དྲིན་ཆེ། ཉིད་ཀྱི་སྐུ་ཚེ་གོང་མ་དེ་ཉིད་ཀྱི་ཆོས་སྲིད་ཟུང་གི་མཛད་སྤྱོད་ཕུན་སུམ་ཚོགས་པ་གང་ཡོད་བོད་ཡུལ་འདིར་ཁྱད་པར་དུ་འཕགས་པ་ཞིག་བྱུང་བའི་གནས་ཚུལ་མཐའ་ཡས་པ་གསུངས། དེ་ནས་འཇམ་མགོན་བླ་མའི་དུས་མཆོད་ཆེན་
མོའི་ཉིན་ཇོ་ཤཱཀ་རྣམ་གཉིས་ཀྱིས་གཙོས་རྟེན་ཐམས་ཅད་ལ་ཞལ་ཟས། མཆོད་མེ། མེ་ཏོག །སྤོས་རིང་སོགས་སྟོང་ཚར་རེ་བཅས་སྟོང་མཆོད་རྒྱས་པར་ཕུལ་ཏེ་སྤྱན་འདྲེན་ཁྲུས་གསོལ། རྣམ་དག་གངས་རི་མ། སྨོན་ལམ་བསྟན་འབར་མ་བཅས་གསུང་སྟེ་ཐུབ་བསྟན་རིན་པོ་ཆེའི་ཡང་སྙིང་བློ་ བཟང་འཇམ་དཔལ་སྙིང་པོའི་རིང་ལུགས་རྣམ་པར་དག་པ་ཕྱོགས་མཐའ་དག་ཏུ ་རྒྱས་པའི་ཐུགས་སྨོན་ཤུགས་དྲག་པོ་མཛད། པོ་ཏ་ལར་ཕེབས་ཏེ་༸རྒྱལ་དབང་ཐམས་ཅད་མཁྱེན་པར་ལྷ་རྫས་ནང་མཛོད། དངུལ་སྲང་ཉི་ཤུའི་མཎྜལ། སྐུ་གསུང་ཐུགས་རྟེན། གོས་ཚོན་བསྒྲིགས་པའི་རྟེན་ཁེབས་ཆེ་བ་སྤུས་གཙང༌། མཛོད་གོས་དམར་པོ་སྤྲིན་རིས་མ་ཡུག །རྒྱ་དངུལ་རྟ་རྨིག་མ། ཨོ་ཏུ་སུའི་མེ་ཡོལ། ཆིབས་ཆེན་རྟ་དང༌། དྲེའུ། ཤིང་ཐོག་ཨ་མྲ་སྒམ་གང༌། ཤེལ་དཀར་རྟ་སོ་མ་སྒམ་གང་སོགས་ཀྱི་དངོས་འབུལ་བཏེག་ནས་ཕྱག་དབང་ཞུས་པར། རྒྱལ་བའི་ཞལ་ནས། སྔོན་འཇམ་མགོན་བླ་མ་ཙོང་ཁ་པ་ཆེན་པོ་མདོ་སྨད་ནས་གངས་རིའི་ལྗོངས་འདིར་ཕེབས་ཏེ་སངས་རྒྱས་ཀྱི་བསྟན་པ་དར་བར་མཛད་པ་བཞིན་ད་རེས་ཀྱང་མདོ་སྨད་ཀྱི་རྗེ་བླ་མའི་གདན་ས་ཆེན་པོ་རྗེའི་སྐུ་འབུམ་གྱི་མཁན་ཟུར་མི་ཉག་ཧུ་ཐོག་ཐུ་ཉིད་ཡུལ་གྱིས་བསྐལ་ཡང་སྔོན་གྱི་ཐུགས་བསྐྱེད་སྨོན་ལམ་བཟང་པོའི་མཐུས་བདེ་བར་འདི་ཕྱོགས་སུ་བྱོན་ནས། རང་ཅག་ལྷན་ཅིག་ ཏུ་འཛོམ་པ་སྐལ་བ་བཟང ་ཞེས་སོགས་ཀྱི་བཀའ་མང་དུ་ཕེབས་ཏེ་ཐུགས་བརྩེ་བས་གཟིགས་པ་ཆེ་བཞེས་གནང༌། ཡོངས་འཛིན་དགའ་ལྡན་ཁྲི་རིན་པོ་ཆེ་པོ་ཏ་ལར་བཞུགས་པ་ལ་ལྷ་རྫས་ནང་མཛོད་དངུལ་མཎ། སྐུ་གསུང་ཐུགས་
རྟེན། གོས་མཚལ་ཁ་ཡུག །གོས་ཀྱི་ཞབས་ཆག །བཀྭའ་མིན་སྒམ་གང་བཅས་ཕུལ། དེ་ནས་བསྟན་རྒྱས་གླིང་དུ་རྒྱལ་ཚབ་དེ་མོ་ནོ་མོན་ཧན་རིན་པོ་ཆེར་ལྷ་རྫས་ནང་མཛོད། དངུལ་མཎ། སྐུ་གསུང་ཐུགས་རྟེན། མཛོད་གོས་སྨྱུག་མདོག་ཡུག །རྒྱ་དངུལ་རྟ་རྨིག་མ། ཨོ་ཏུ་སུའི་མེ་ཡོལ་བཅས་སྒེར་འབུལ་བཏེག །རྩེ་མགྲོན་དཔལ་མགོན་ལ་ལྷ་རྫས་བར་མཛོད། བུ་ལ་གྷ་རས་བཅས་གནང༌། རྭ་སྒྲེང་ཁྲི་ཆེན་རྡོ་རྗེ་འཆང་རིན་པོ་ཆེར་ལྷ་རྫས་ནང་མཛོད། དངུལ་མཎ། དྲིལ་གདན་ཅོད་པན་སོགས་ཕུལ་ནས་མཇལ། རྗེ་འདི་པ་འཇིག་རྟེན་གྱི་འར་འུར་ཟང་ཟིང་དང་ཚེ་འདིའི་གྲགས་འདོད་སོགས་ཡེ་མི་མངའ་བའི་སྟབས་ངོ་གཡོག་ཉུང་ཤས་དང་བཅས་ནས་ཉམ་ཆུང་གནས་མཇལ་བའི་ཚུལ་བྱས་ཏེ་ཨུ་ལཱ་སོགས་མ་ཞུས་པར་ལྷ་སར་འབྱོར་ནས་མཇལ་ཁ་ཞུས་རྗེས་གཞུང་ས་ནས་མཁྱེན་ཏེ་ཆེ་དྲག་མང་པོས་ཁྱེད་འདྲ་བའི་བླ་ཆེན་ཉམ་ཆུང་བ་གནས་མཇལ་བའི་ཚུལ་དུ་ཕེབས་པ་མཛེས་པོ་མ་རེད་ཅེས་ཞུས་ཤིང༌། ཕྱག་གཉེར་སོགས་ལ་ཁྱེད་རང་ཚོས་གཞུང་ས་ལ་ཞུས་ན་སྲོལ་བཞིན་ཨུ་ལཱ་སོགས་གནང་ཆོག །སྔར་ཅི་ལ་མ་ཞུས་པ་ཡིན་ཟེར་ནས་བཀྱོན་པར། ཕྱག་གཉེར་སོགས་ནས་རྗེ་འདི་པ་འཇིག་རྟེན་གྱི་སྤྲོས་པ་ཐུགས་ལ་མ་བཞེད་པའི་སྟབས་སྔོན་ལ་རྒྱུ་མཚན་མ་ཞུས་པའི་གནས་ཚུལ་བཤད། གཞུང་ས་རང་ནས་གཟིགས་པ་ཆེ་བཞེས་ཀྱིས་ཕོགས་སོགས་རྒྱ་གང་ཆེ་བཀའ་དྲིན་སྩལ་བར་དེ་འདྲ་གནང་མི་ཉན་ཞེས་ཞུས་ཀྱང་ནན་ཏན་གྱིས་གནང་སྟེ་བཞེས་དགོས་པ་བྱུང༌། ཆོས་སྡེ་ཆེན་པོ་དཔལ་ལྡན་འབྲས་སྤུངས་སུ་ཕེབས། རྟེན་ཀུན་ལ་མཆོད་སྒྲོན་གང་རྒྱས་ཕུལ་ཏེ་མཆོད་མཇལ་ཞུས་ཤིང་བསྟན་པ་རྒྱས་པའི་ཐུགས་སྨོན་མཛད། ཚོགས་ཆེན་དུ་
དགེ་འདུན་དྲུག་སྟོང་ཉེ་བ་ལ་མང་ཇ་ཁ་ཤས། སྐུ་འགྱེད་དངུལ་སྐར་ལྔ་རེ་ཕུལ། དཔལ་ལྡན་བཀྲ་ཤིས་སྒོ་མང་ལ་གྲྭ་ཇ་དང་སྐུ་འགྱེད་དངུལ་ཊམ་རེ་བཅས་པས་བསྙེན་བཀུར་ཞུས། སོ་སོར་སྤྱི་འཇོག་ཀྱང་གཟབ་རྒྱས་གནང༌། སྔགས་པ་གྲྭ་ཚང་གི་འཇིགས་བྱེད་ཀྱི་མདུན་དུ་བརྒྱ་མཆོད་དང༌། སྔར་རྒྱུན་ཞལ་འདོན་གྱི་རིམ་པ། འཇིགས་བྱེད་སྨོན་ལམ། བསྟན་འབར་མ་བཅས་གསུངས་ནས་ཐུན་མོང་མ་ཡིན་པའི་གསོལ་འདེབས་ཐུགས་སྨོན་སོགས་གདུང་བ་ཤུགས་དྲག་གིས་མཛད། དེ་ནས་པོ་ཏ་ལར་ཕེབས། ༸རྒྱལ་དབང་ཐམས་ཅད་མཁྱེན་པ་ལ་ལྷ་ལྡན་སྨོན་ལམ་གྱི་ཚོགས་དབུར་གདན་འདྲེན་གྱི་སྙན་གསན་ཕུལ། གཙང་དུ་ཕེབས་རྒྱུའི་གནས་ཚུལ་ཞུས་པར་༸རྒྱལ་དབང་རིན་པོ་ཆེས་གཟིགས་པ་ཆེ་བཞེས་ཀྱིས་བཀའ་ཁྱབ་སྩལ། རྒྱལ་ཚབ་རིན་པོ་ཆེར་ཡང་ལྷ་ལྡན་སྨོན་ལམ་གྱི་མང་འགྱེད་འབུལ་རྒྱུའི་གནས་ཚུལ་དང་ཚོགས་དབུར་གདན་འདྲེན་གྱི་སྙན་གསན་ཕུལ། དེ་ནས་གཞུང་གི་མི་སྣ་དང་ཕྱག་གཉེར་གྱིས་གཙོས་ཞབས་ཕྱི་བ་ནང་མ་རྣམས་ནས་ལྷ་ས་སྨོན་ལམ་གྱི་ཇ་ཐུག་གི་ཐེབས་དང༌། སྐུ་འགྱེད་རྒྱུའི་རྒྱ་དངུལ་རྣམས་བསྟན་གླིང་ཛ་སག་ལ་སྤྲད་ནས་བོད་དངུལ་ལ་བརྗེས། དེ་ནས་གཙང་བཀྲ་ཤིས་ལྷུན་པོར་ཕྱག་བཏེག །ཕེབས་ལམ་དུ་སྙེ་ཐང༌། རྒྱལ་རྩེ་དཔལ་འཁོར་ཆོས་སྡེ་སོགས་ལ་མཆོད་མཇལ་ཞིབ་རྒྱས་དང་མང་འགྱེད་སོགས་ཀྱང་ཕུལ། བཀྲ་ཤིས་ལྷུན་པོར་འབྱོར་ནས་པཎ་ཆེན་ཐམས་ཅད་མཁྱེན་པར་ལྷ་རྫས་ནང་མཛོད། དངུལ་སྲང་བཅོ་ལྔ་ལས་གྲུབ་པའི་མཎྜལ། སྐུ་གསུང་ཐུགས་རྟེན། གོས་ཆེན་སེར་པོ་ཡུག །དྲིལ་གདན། ཅོད་པན། རི་
བོ་དྭངས་བསིལ་གྱི་རྩད་པའི་འཕྲེང་བ། རྒྱ་དངུལ་རྟ་རྨིག་མ། ཆིབས་ཆེན་སོགས་ཕུལ་ནས་མཇལ་ཁ་ཞུས་པར་ཐུགས་བརྩེ་བས་ཉེ་བར་གཟིགས་ཏེ་བཀའ་མཆིད་མཐའ་ཡས་པ་སྩལ། ཕྱག་མཛོད་ཆེན་མོར། ལྷ་རྫས་བར་མཛོད། མཛོད་གོས་ཡུག། །ཞབས་ལྷམ་སྤུས་གཙང་བཅས་ཕུལ། ༸པཎ་ཆེན་གོང་མ་གསུམ་གའི་སྐུ་གདུང་མཆོད་རྟེན་རྣམས་ལ་མཆོད་སྒྲོན་གང་རྒྱས་ཕུལ་ཏེ། ཞལ་འདོན་གྱི་རིམ་པ་ཆ་ཚང་བར་མཛད། དེ་ནས་འདུ་ཁང་ཆེན་མོའི་སྟེང་གི་ནང་རྟེན་ཐམས་ཅད་ལ་རྟེན་མཇལ་ཞུས་ཤིང་མཆོད་སྤྲིན་གང་རྒྱས་ནས་ཐུགས་སྨོན་སོགས་སྔར་ལྟར་གནང་ནས་ཕེབས་པ་དང་དུས་མཚུངས་སུ་ཚོགས་དུང་བུས་པས་རྟེན་འབྲེལ་ལེགས་པོ་བྱུང་གསུང༌། དེ་ནས་པཎ་ཆེན་ཐམས་ཅད་མཁྱེན་པ་གསོ་སྦྱོང་གི་མགོན་དུ་ཕེབས་པའི་ཞབས་ཕྱིར་བྱོན་ཏེ་ལས་དང་གདམས་ངག་ཉམས་སུ་མྱོང་བར་མཛད། དེ་ནས་པཎ་ཆེན་ཐམས་ཅད་མཁྱེན་པ་ཚོགས་དབུར་སྤྱན་འདྲེན་གྱི་སྙན་གསན་ཕུལ་བར་དགྱེས་གཟིགས་ཀྱིས་ཉི་སྐར་སོགས་ཀྱང་གོང་ནས་བཀོད་ཁྱབ་སྩལ། གཟའ་སྐར་ཕུན་སུམ་ཚོགས་པའི་ཉིན་དེར་ཚོགས་ཆེན་གྱི་དགེ་འདུན་སུམ་སྟོང་བརྒྱད་བརྒྱ་ལྷག་ལ་མང་ཇ་ཁ་ཤས། སྐུ་འགྱེད་དངུལ་སྐར་ཕྱེད་བརྒྱད་རེ་དང་སྤྱི་འཇོག་བཅས་ཀྱི་བསྙེན་བཀུར་ཞུས་ཐོག །པཎ་ཆེན་ཐམས་ཅད་མཁྱེན་པ་ཚོགས་དབུར་སྤྱན་དྲངས་ཏེ། ཉིད་ནས་དངུལ་སྲང་ཉི་ཤུ་ལས་གྲུབ་པའི་མཎྜལ་དར་ཚོན་གྱི་སྣེ་འདོགས་ཅན། ནང་མཛོད་སེར་པོ་སྲིད་དུ་འདོམ་དོ་ལྷག་པ་ཕྱག་ཏུ་བསྣམས་ཏེ། ཤིས་བརྗོད་ཀྱི་སྔུན་བསུས་ནས་སྐྱེས་རབས་ཀྱི་ཕྲེང་བའི་རྟོགས་བརྗོད། ལྷག་པར་པཎ་ཆེན་གོང་མ་ཐམས་ཅད་མཁྱེན་པ་བློ་བཟང་དཔལ་ལྡན་ཡེ་ཤེས་དཔལ་ བཟང་པོ། འཇམ་དབྱངས་གོང་མའི་རྒྱལ་
ཁབ་ཏུ ་ཆིབས་ཁ་བསྒྱུར་བའི་ལམ་ཞོར་དུ་འཇམ་མགོན་རྒྱལ་བ་གཉིས་པའི་འཁྲུངས་གནས་ཆོས་སྡེ་ཆེན་པོ་སྐུ་འབུམ་བྱམས་པ་གླིང་གི་ཆོས་ཁྲིར་ཟླ་བ་ཁ་ཤས་ཀྱི་རིང་ལ་བཞུགས་ཏེ་དགེ་འདུན་གྱི་སྡེ་ལ་འཆད་ཉན་མཛད། ཕྱོགས་མཐའ་དག་ནས་ཡོང་བའི་བླ་དཔོན་སེར་སྐྱ་བགྲང་ལས་འདས་པ་ལ་ཆོས་འཁོར་རྒྱ་ཆེར་བསྐོར་བའི་ཚུལ་རྣམས་ཞིབ་རྒྱས་དང༌། སྐུ་ཚེ་འདིའི་ཡང་སྐུ་གསུང་ཐུགས་ཀྱི་ཡོན་ཏན་རྣམས་རྒྱས་པར་ཞུས་པའི་ཐོག །ཞབས་བརྟན་གྱི་རྟེན་འབྱུང་དུ། ཆོས་དུང་དཀར་པོ་དར་ཚོན་གྱིས་བརྒྱན་པ། སྐུའི་རྟེན་རྒྱལ་བ་ཚེ་མཐའ་ཡས་པའི་སྐུ་བརྙན། གསུང་རྟེན་ཚེ་མདོ་གསེར་བྲིས། ཐུགས་རྟེན་གསེར་ཟངས་ཀྱི་བྱང་ཆུབ་མཆོད་རྟེན། དངུལ་སྲང་བཅུ་ལས་གྲུབ་པའི་ཚེ་བུམ་ཕྲ་ལྡན་ཁ་རྒྱན་བཅས། དངུལ་གྱི་འཁོར་ལོ་དཔངས་ཁ་གང་བ། དུང་དཀར་དངུལ་གཤོག་མ་ཆ། བཀྲ་ཤིས་རྫས་བརྒྱད། དངུལ་སྲང་ཉེར་གཅིག་ལས་གྲུབ་པའི་རྒྱལ་སྲིད་སྣ་བདུན་པད་འདབ་ཅན། སྐུའི་ཉེར་སྤྱད་མི་འདྲ་བ་བཅུ་གསུམ། རྡོར་དྲིལ་སོགས་མཆོད་རྫས་སྣ་ཚོགས། གོས་ཚག་གྲུབ་མའི་དྲིལ་གདན་ཅོད་པན། ཐེག་ཆེན་གླང་པོའི་མཆེ་བ། ནོར་བུ་བསེ་རུའི་རྭ། བྱུར་འཕྲེང་ཆེ་བ་མུ་ཏིག་གི་བཅུ་ཤད་སུམ་ལྡན་ཅན། མུ་ཏིག་གི་འཕྲེང་བ། རི་བོ་དྭངས་བསིལ་གྱི་འཕྲེང་སེར་ཉི་ཤུ། རྒྱ་དངུལ་རྟ་རྨིག་མ་བཅུ། མཛོད་གོས་སྣ་ཚོགས་སྤུས་གཙང་ཡུག་ཆེན་བཅུ་གསུམ། རྒྱ་ཟམ་བཅུ། ས་གདན་མཐིང་ག་མེ་ཏོག་གི་རི་མོ་ཅན་གཅིག །གོས་ལྗང་གུའི་ས་གདན་མེ་ཏོག་མ་གཅིག །ཁེ་བི་སུའི་སྒ་ཁེབས་དམར་ཁྲ་དང༌། གདན་རྡོ་རྗེ་རྒྱ་གྲམ་གྱི་རི་མོ་ཅན། ཇ་བག་དང་ཤིང་ཐོག་སྒམ་ཁ་ཤས། སྣམ་
དཀར་ཡུག་བཅས་རྣམ་གྲངས་དྲུག་བརྒྱ་དང་ལྔ་བཅུ་ལྷག་ཕུལ་ཏེ། དགོས་དོན་གྱི་གཙོ་བོ་རྒྱལ་བསྟན་རིན་པོ་ཆེའི་ཡང་སྙིང་རྗེ་ཙོང་ཁ་པའི་བསྟན་པ་རྒྱས་ཤིང་འགྲོ་བ་ཡོངས་ལ་བདེ་སྐྱིད་འབྱུང་བ་དང༌། དེའི་རྩ་བ་རྒྱལ་བ་ཡབ་སྲས་ནས་བསྟན་པ་ཕྱོགས་དུས་ཀུན་ཏུ་རྒྱས་པའི་ཐུགས་བསྐྱེད་དང་འཕྲིན་ལས་རྒྱ་གང་ཆེ་མཛད་རྒྱུ་ལ་རག་ལས་ཚུལ་མདོ་རྒྱུད་ཀྱི་ལུང་ཁུངས་སུ་དྲངས་ནས་ཞུས་ཤིང༌། ཞར་བྱུང་ཉིད་འབྲེལ་ཐོགས་དང་བཅས་པའི་འཕྲལ་ཡུན་གྱི་སྐྱབས་འཇུག་ཞུས་པར། པཎ་ཆེན་མཆོག་ཐུགས་ཤིན་ཏུ་དགྱེས་ཏེ་འདུ་ཁང་གི་རབ་གསལ་དུ་པཎ་ཆེན་གོང་མའི་སྐུ་བཞུགས་པ་ལ་ཡང་ཡང་གཟིགས་ཏེ། རྗེ་འདི་པར་ཁྱེད་ཀྱིས་པཎ་ཆེན་དཔལ་ལྡན་ཡེ་ཤེས་ཀྱི་རྣམ་ཐར་སྐུ་གསུང་ཐུགས་ཀྱི་བསྟོད་ཚོགས་གཞན་ལས་ཁྱད་འཕགས་བརྗོད་བྱུང་ཞེས་སོགས་ཀྱི་བཀའ་ལུང་རྒྱ་ཆེར་སྩལ། དེར་ཚོགས་མཁས་པ་རྣམས་ཀྱང་རྗེ་འདིའི་སྐུ་ཡོན་མཐོང་སྟེ་དེ་ལས་བརྩམས་པའི་བསྔགས་བརྗོད་ཕྱོགས་ཀུན་ཏུ་སྒྲོགས་པ་བྱུང༌། པཎ་ཆེན་རིན་པོ་ཆེའི་དྲུང་ནས་གྲུབ་རྒྱལ་ལུགས་ཀྱི་ཚེ་དབང་དང་ཤམྦྷ་ལའི་སྨོན་ལམ་གྱི་ལུང་གསན། སྣང་ཐང་དུ་ཕེབས། སྒྲོལ་མ་གསུང་འབྱོན་མ། འབྲོམ་གྱི་ཤེལ་གྱི་མཁར་བ། གནས་བཅུའི་ཞབས་ཆག་སོགས་རྟེན་ལ་མཆོད་མཇལ་ཞིབ་རྒྱས། ཚོགས་ལ་མང་འགྱེད་ཀྱི་དོད་རྒྱ་དངུལ་སྲང་ཉི་ཤུ་ལྷག་ཕུལ། མཆོད་དོད་རྒྱ་དངུལ་སྲང་བདུན་ཕུལ། བཀྲས་ལྷན་དུ་ཕེབས། རྗེའི་གསུང་འབུམ་ཡོངས་རྫོགས། རྒྱལ་ཚབ་མཁས་གྲུབ་རྣམ་གཉིས་ཀྱི་གསུང་འབུམ། པཎ་ཆེན་སྐུ་ཚེ་ན་རིམ་གྱི་གསུང་འབུམ། མི་ལ་བཞད་པའི་རྡོ་རྗེའི་རྣམ་མགུར་སོགས་ཕྱག་དཔེ་པུ་ཏི་བརྒྱ་ལྷག་ཙམ་གདན་དྲངས། དེ་ནས་སྐུ་འབུམ་ཆོས་སྡེ་ཆེན་པོའི་
ཆོས་སྲིད་རྒྱས་པའི་དོན་ལ་དམིགས་པཎ་ཆེན་རིན་པོ་ཆེར་ལུང་བསྟན་ཞུས་པར་བཀའ་ལན་དུ། འདུས་ཚོགས་སྤྱི་ལ་བསླབ་བྱ་དང༌། དགེ་འདུན་གྱི་སྡེ་རྒྱས་ཤིང་བཤད་སྒྲུབ་འཕེལ་ཆེད་དུ་ཞབས་བརྟན་གང་རྒྱས་སྩལ། རྗེ་འདི་པས་ཕྱིས་སུའང་གོང་ས་ནས་ཐུགས་བརྩེ་བས་ཉེ་བར་གཟིགས་ཏེ་གང་ཅིའི་བཀའི་བསླབ་བྱ་ལྷུག་པར་སྩལ་རྒྱུའི་ཞུ་བ་ཕུལ་བར་ཐུགས་དགྱེས་པའི་ཞལ་བཞེས་གནང༌། པཎ་ཆེན་རིན་པོ་ཆེ་ཐོན་ཕྱག་ཞུས་པར་ཚེ་མཐའ་ཡས་པའི་སྐུ་བརྙན་བཀྲ་ཤིས་ལི་མ། སྤྱན་རས་གཟིགས་ཀྱི་ཞིང་བཀོད། སྟོན་པའི་བྲིས་ཐང༌། པཎ་ཆེན་སྐུ་སྔ་ཕྱི་རྣམས་ཀྱི་གསུང་འབུམ་ཆ་ཚང༌། པཎ་ཞྭ་སྣེ་རིང༌། སྐུའི་ཉེར་སྤྱད་ཡོངས་རྫོགས། ཆེན་པོའི་ཉེར་སྤྱད་དབུ་གདུགས་སེར་པོ། རྟ་དར་ཆ། བཀའ་ཤོག་ཐམ་ག་གྲུབ་སྒོར་བཅས་གནང༌། ཐུགས་དགྱེས་པ་ཆེན་པོས་འཕྲལ་ཕུགས་ཀྱི་བཀའ་མཆིད་རྒྱས་པར་སྩལ་ཅིང་ལྷག་པར་མདོ་སྨད་དུ་བསྟན་འགྲོའི་བྱ་བ་ལ་སྔར་ལྟར་གཡེལ་མེད་མཛད་དགོས་ཚུལ་གསུང་སྟེ་ཐུགས་བརྩེ་བས་གཟིགས་པ་ཆེ་བཞེས་གནང༌། ཕྱག་མཛོད་ཆེན་མོས། ལྷ་རྫས། སྤྱན་རས་གཟིགས་ཀྱི་སྐུ་བརྙན་བོད་ལི། སྣམ་ཡུག་སྤུས་གཙང་ཆོས་སྣ་ཚོགས་བཅས་གནང༌། དེ་ནས་རྒྱལ་བ་དབེན་ས་པའི་གདན་སར་མཇལ་ཕྱིར་ཕྱག་བཏེག །འདུས་ཚོགས་ནས་རྗེ་འདི་པའི་སྙན་པ་གསན་ཏེ་སེར་སྦྲེང་བཅས་བསུ་བ་མཛད། རྒྱལ་བ་དབེན་ས་པའི་མཆོད་རྟེན། མཁས་གྲུབ་སངས་རྒྱས་ཡེ་ཤེས་ཀྱི་འདྲ་སྐུ། སྟོན་པའི་ཚེམས་བཞུགས་པའི་མཆོད་རྟེན་སོགས་རྟེན་རྣམས་ལ་མཆོད་མཇལ་དང་སྐྱབས་སེམས་སོགས་
ཞལ་འདོན་གྱི་རིམ་པ་སྔར་རྒྱུན་ལྟར་མཛད། འདུས་ཚོགས་སུ་མང་ཇ་སྐུ་འགྱེད་སོགས་ཀྱི་བསྙེན་བཀུར་ཞུས། དེ་ནས་རོང་བྱམས་ཆེན་དུ་ཕེབས། མཆོད་དོད་ལ་རྒྱ་དངུལ་སྲང་ལྔ་ཕུལ་ཏེ་ཞལ་འདོན་མཆོད་མཇལ་སོགས་སྔར་རྒྱུན་ལྟར་གནང༌། ངུར་སྨྲིག་ཅེས་པར་སྒྲོལ་མ་མཎྜལ་བཞི་ཆོག་གསུང༌། དེ་ནས་ལྕགས་ཟམ་ཆུ་བོ་རིའི་དབེན་གནས་དང་རྟེན་ཀུན་ལ་མཆོད་མཇལ། མང་ཇ་སོགས་ཀྱི་དོད་རྒྱ་དངུལ་སྲང་བཅུ་ཕུལ། རྭ་བ་སྟོད་དུ་བྱོན། རྟེན་ལ་མཆོད་སྒྲོན་ཕུལ་ནས་མཆོད་མཇལ་ཞུས། ཚོགས་སུ་མང་ཇ་སྐུ་འགྱེད་དངུལ་སྐར་རེ་ཕུལ། སྒྲོལ་མའི་ཞབས་རྗེས་མཇལ། སེམས་བསྐྱེད་སོགས་སྔར་བཞིན་མཛད། རྗེ་བཙུན་བླ་མ་ཀློང་རྡོལ་རིན་པོ་ཆེའི་གཟིམས་ཆུང་དུ་རྗེ་དེའི་འདྲ་སྐུ་བཞུགས་པར་མཇལ། མཆོད་སྒྲོན་གང་རྒྱས་ཕུལ་ཏེ་སྐྱབས་སེམས་སོགས་དཀྱུས་ཀྱི་ཕྱག་བཞེས་སྟར་ཆགས་ཐུགས་སྨོན་རྒྱ་གང་ཆེ་བཅས་གནང་། རི་ཁྲོད་པ་རྣམས་ལ་མང་འགྱེད་དོད་རྒྱ་དངུལ་སྲང་བདུན་ཕུལ། དེ་ནས་ལྷ་ལྡན་དུ་འབྱོར་རྗེས་སེ་རའི་ཕུར་མཇལ་ཞུས། པོ་ཏ་ལར་ཕེབས། ཡང་བསྐྱར་༸རྒྱལ་དབང་ཐམས་ཅད་མཁྱེན་པ་ལྷ་ལྡན་སྨོན་ལམ་གྱི་ཚོགས་དབུར་གདན་འདྲེན་བྱེད་རྒྱུའི་སྙན་གསན་ཕུལ་བས་ཞལ་བཞེས་དང༌། ཐུགས་བརྩེ་བའི་བཀའ་སྩལ་མང་དུ་གནང༌། དེ་ནས་རྟེན་ཐམས་ཅད་ལ་མཆོད་མཇལ་ཞུས་ཤིང༌། རྒྱུན་པར་ལྷ་ལྡན་གཙུག་ལག་ཁང་ལ་ཕྱག་སྐོར་མཛད། དེ་ནས་དགུན་ཟླ་ཐ་མའི་ཉེར་དགུའི་ཉིན་པོ་ཏ་ལར་ཕེབས། རྣམ་རྒྱལ་གྲྭ་ཚང་གི་འཆམ་དང་གཏོར་རྒྱག་སོགས་ལ་གཟིགས་པར་མཛད། དགུང་ལོ་དྲུག་ཅུ་དངོས་པོ་ཞེས་པ་ཤིང་ཁྱི་གནམ་ལོ་གསར་བཞད་ཀྱི་ཉིན་ཐོ་རངས་ཡི་དམ་ཆོས་སྲུང་ལ་མཆོད་གཏོར་ཕུལ་ཞིང་
འཕྲིན་བཅོལ་མཛད་ནས་ཇོ་ཤཱཀ་རྣམ་གཉིས་སོགས་རྟེན་རྣམས་ལ་མཆོད་མཇལ་གནང༌། ཉི་མ་རྩེ་ཤར་ལ་འཕགས་མཆོག་ཕྱག་ན་པད་དཀར་འཆང་བའི་ཕོ་བྲང་པོ་ཏ་ལར་ཕེབས། ༸རྒྱལ་དབང་རིན་པོ་ཆེར་ནང་མཛོད་སེར་པོ། དྲིལ་གདན་ཅོད་པན་སོགས་ཕུལ་ཏེ་ལོ་གསར་གྱི་མཇལ་ཁ་ཞུས། བཞུགས་གྲལ་གྱི་གསོལ་སྟོན་རྒྱས་པའི་ཐོག་གྲལ་འཕྲོས་དང་ཚོགས་གླེང་གར་ཕྲུག་འཁྲབ་པ་སོགས་ལ་གཟིགས་པ་མཛད། རྒྱལ་ཚབ་རིན་པོ་ཆེར་ནང་མཛོད། དྲིལ་གདན། ཅོད་པན་བཅས་ཕུལ་ནས་མཇལ། ཡོངས་འཛིན་ཁྲི་རིན་པོ་ཆེར་ཡང་ལྷ་རྫས་ནང་མཛོད། བཞུགས་གདན་བཅས་ཕུལ་ནས་ཕྱག་དབང་ཞུས། ཕྱི་ཉིན་པོ་ཏ་ལར་རྒྱལ་པོ་ལོ་གསར་དུ་གྲགས་པའི་བཞུགས་གྲལ་ལ་ཡང་བསྐྱར་ཕེབས་ཏེ་༸རྒྱལ་དབང་ཐམས་ཅད་མཁྱེན་པར་ཕྱག་དབང་ཞུས་པས། རྒྱལ་བའི་ཞལ་ནས། སྐུ་འབུམ་མཁན་ཟུར་མི་ཉག་ཧོ་ཐོག་ཐུ་བདག་གི་ཉེ་སར་བཞུགས་དགོས་གསུང་སྟེ་ཁྲིའི་མདུན་དུ་བཞུགས་གདན་བརྒྱབ་ནས་དེར་བཞུགས་སུ་བཅུག་སྟེ་དཔེ་མེད་པའི་དགྱེས་ཉམས་མཛད། གསོལ་སྟོན་གང་རྒྱས་ཐོག་རིན་ཆེན་རྒྱན་ཆ་བ་དང་གར་མཆོད་སོགས་ལ་གཟིགས་པ་གནང༌། གསོལ་སྟོན་གྲོལ་ནས་༸རྒྱལ་དབང་རིན་པོ་ཆེས་རྗེ་འདི་པའི་ཕྱག་ནས་བཟུང་སྟེ་ཁྲིད་ནས་གཟིམས་ཆུང་དུ་ཕེབས་པར་དེར་ཚོགས་ཀུན་ཡ་མཚན་པར་གྱུར། ཉིན་རེ་བཞིན་ལྷ་སའི་གླིང་སྐོར་དང༌། ལྷ་ལྡན་གཙུག་ལག་ཁང་གི་སྐོར་བ་ལ་རེས་མོས་ཀྱིས་བྱོན་ཞིང་བརྒྱ་ཕྱག་མཆོད་འབུལ་སོགས་ཀྱིས་དུས་འདའ་བར་མཛད། དེ་ནས་ཆོ་འཕྲུལ་སྨོན་ལམ་གྱི་བཅོ་ལྔའི་ཉིན་སྐྱབས་མགོན་ཕྱག་ན་
པད་དཀར་འཆང་བ་ལུང་རྟོགས་རྒྱ་མཚོ་ནས། བོད་ཡུལ་དུ་སེར་འབྲས་དགའ་གསུམ་སོགས་ལ་བཀའ་ཆོས་ཐོག་མར་སྩལ་སྐབས། རྗེ་འདི་པས་ཚེ་རབས་ཀྱི་ཕྲེང་བར་ཞིང་ཁམས་གང་དུ་བྱོན་པའི་འཁོར་གྱི་དང་པོ་དང༌། གསུང་གི་གསང་བ་འཛིན་པའི་སྲས་ཀྱི་ཐུ་བོར་འགྱུར་བའི་རྟེན་འབྲེལ་དུ། གསུང་ཆོས་རྭ་བ་ནས་ལྷ་རྫས་ནང་མཛོད་སེར་པོ། རྒྱ་དངུལ་སྲང་ཉིས་བརྒྱ་ལས་གྲུབ་པའི་མཎྜལ་ཆེ་བ་དབུས་སུ་རི་རབ་དང་གླིང་བཞི་གླིང་ཕྲན་དང་བཅས་ཚོམ་བུར་བཀོད་པ་བཟོ་ཁྱད་ཅན། སྐུའི་རྟེན་གསེར་ཟངས་ལས་གྲུབ་པའི་རྗེའི་སྐུ་བརྙན། གསུང་རྟེན་ཐར་མདོ་གསེར་བྲིས་གོས་སེར་པོའི་ན་བཟའ་ཅན། ཐུགས་རྟེན་འཆི་བདག་གི་བདུད་ལས་རྣམ་པར་རྒྱལ་བའི་མཆོད་རྟེན་རིན་ཆེན་དང་པོ་སྲང་ལྔ་ལས་གྲུབ་པའི་ཆོས་ཀྱི་འཁོར་ལོ། རྒྱ་དངུལ་སྲང་བཅུ་བདུན་ལས་གྲུབ་པའི་རྒྱལ་སྲིད་སྣ་བདུན་པད་འདབ་ཅན། དྲིལ་གདན། ཅོད་པན་བཅས་ཕུལ། དེ་ནས་ཉིད་ཀྱིས་སྤོས་འདྲེན་བྱས་ཏེ་༸རྒྱལ་དབང་ཐམས་ཅད་མཁྱེན་པ་ཚོགས་དབུར་གདན་དྲངས། རྗེ་འདི་པས་ཡན་ལག་ལྔ་ལྡན་གྱི་གུས་ཕྱག་སྔོན་དུ་བཏང་སྟེ། ལྷ་རྫས་ནང་མཛོད་སེར་པོ་སྲིད་དུ་འདོམ་པ་གསུམ་ལྷག་ཡོད་པ་དང༌། རྒྱ་དངུལ་སྲང་ཉེར་ལྔ་ལས་གྲུབ་པའི་མཎྜལ་རི་རབ་གླིང་བཞི་ཉི་ཟླ་དང་བཅས་པའི་ཚོམ་བུ་ཅན་དར་ཚོན་སྣ་ལྔས་བརྒྱན་པ་ཕྱག་ཏུ་བསྣམས་ནས། སྙན་དངགས་ཀྱི་ལམ་ནས་དྲངས་པའི་བདེན་ཚིག་དང་བསྔགས་བརྗོད་ཀྱིས་ཞུ་ལམ་ཡངས་པོར་བྱས་ཏེ། སྤྱན་རས་གཟིགས་དབང་སྤྲུལ་བའི་ཟློས་གར་ནམ་མཁའི་མཐའ་ཀླས་པའི་སྐྱེས་རབས་ཀྱི་ཕྲེང་བ་དང་འབྲེལ་བའི་རྟོགས་བརྗོད་དང་ཁྱད་པར་༸རྒྱལ་དབང་ཐམས་ཅད་མཁྱེན་པ་གོང་མ་སྐུ་ན་རིམ་གྱིས་འཇམ་མགོན་བླ་མའི་མདོ་
སྔགས་ཟུང་འབྲེལ་གྱི་བསྟན་པ་ཁོ་ན་བདག་གིར་མཛད་ཅིང༌། ཡང་སྒོས་རྗེ་ཙོང་ཁ་པའི་འཁྲུངས་གནས་སྐུ་འབུམ་ཆོས་སྡེ་ཆེན་པོར་ཕེབས་ནས་བཤད་སྒྲུབ་ཆོས་ཀྱི་མཛད་པ་རླབས་ཆེ་བ་གནང་ཚུལ་གྱི་བཀའ་དྲིན་བརྗོད་པ་དང༌། སྐབས་དོན་སྐུ་ཕྲེང་འདི་ཉིད་དུའང་བསྟན་འགྲོའི་མགོན་དུ་ཞབས་ཟུང་པདྨོ་འཇིགས་བྲལ་གདོང་ལྔས་བཏེག་པའི་ཁྲི་འཕང་མཐོན་པོར་བསྐལ་པ་རྒྱ་མཚོའི་བར་དུ་ལྷུན་ཆགས་ཏེ་ཟབ་རྒྱས་ཆོས་འཁོར་སྐོར་དགོས་ཚུལ་རྣམས་རྒྱས་པར་ཞུས་ཏེ་རྟེན་འབྱུང་དུ་སྐུའི་རྟེན་གསེར་ཟངས་ཀྱི་ཚེ་མཐའ་ཡས་བའི་སྐུ་བརྙན་ཁྲུ་གང་ལྷག །གསུང་གི་རྟེན་ཚེ་མདོ་གསེར་བྲིས། ཐུགས་རྟེན་གསེར་ཟངས་ཀྱི་བྱང་ཆུབ་མཆོད་རྟེན་ཁ་གང་ལྷག །སྐུའི་ཉེར་སྤྱད་ཀྱི་སྐོར་ཆ་ཚང༌། རྒྱ་རྔ་དབྱུག་བཅས། ནོར་བུ་བསེ་རུའི་རྭ། ཁྱུ་མཆོག་མ་ཧེའི་རྭ་ཆ། ཐེག་ཆེན་གླང་པོའི་མཆེ་བ། ཁྲི་སྙན་ས་ལའི་པགས་པ་རྭ་བཅས། སྟག་ལྤགས་སྡེར་བཞི་ཆེ་ཚང༌། དངུལ་སྲང་བཅུ་དགུ་ལྷག་ལས་གྲུབ་པའི་ཚེ་བུམ་ཞབས་སྟེགས་ཚ་གསེར་མ། ཁ་རྒྱན་གྱི་དཀྱིལ་དུ་ཚེ་མཐའ་ཡས་པའི་སྐུ་བརྙན་བཞུགས་པ། མེ་དམ་ཚ་གསེར་ཅན་ནང་དུ་དངུལ་ལས་གྲུབ་པའི་མེ་ཏོག་སྲང་གསུམ་རེ་ཅན་ཆ། ཚ་གསེར་གྱི་རྡོ་རྗེ་རྩེ་ལྔ་པ། དངུལ་སྲང་བདུན་རེ་ཡོད་པའི་དངུལ་སྐོང་ཆ། དངུལ་སྲང་བཞི་བཅུ་ལས་གྲུབ་པའི་རྒྱ་གླིང་ཕྲ་ལྡན་ཆ། ཛབ་ཡའི་མཆོད་ཞལ་ཆེ་བ་ནང་དུ་དངུལ་ཤན་དབུས་སུ་བྱུ་རུའི་ཕྲ་ཡོད་པ། བྷེ་དའི་མཆོད་ཞལ་བྱུར་བུར་ཇུས་བསྐོས་མ་ནང་དུ་དངུལ་ཤན་ཅན། དངུལ་སྲང་བཅོ་ལྔ་ལས་གྲུབ་པའི་གསོལ་ལྟིར་ནང་དུ་རི་བོ་དྭངས་བསིལ་གྱི་མེ་ཏོག་གིས་བཀང་བ། བྱུར་དམར་གྱི་
ཕྲེང་བ་ཆེ་བ་གསེར་གྱི་བཅུ་ཤད་སུམ་ལྡན། གཡང་ཌིའི་ཕྲེང་བ་མ་ན་ཧུས་བརྒྱན་པ་ཁྱུང་རྒྱ་སྨུག་གི་བཅུ་ཤད་སུམ་ལྡན། རི་བོ་རྩེ་ལྔའི་ཕྲེང་སེར་ཉི་ཤུ། རྒྱ་དངུལ་རྟ་རྨིག་མ་ཉི་ཤུ་ལ་སྲང་ཆིག་སྟོང་ལྷག་ཙམ། མཛོད་གོས་མང་ནུག་བཅས་གོས་ཆེན་སྣ་ཚོགས་ཡུག་བཅུ་དགུ །ཇུས་ཆེན་སྣ་ཚོགས་ཡུག་ཉེར་ལྔ། གོས་སྤུ་ཚོན་རིས་ཅན་ཁ་གསུམ་རེ་ཡོད་པ་གཉིས། གོས་ཆེན་ལྕགས་སྒྲོག་མའི་སོག་ལྭ་ལིང་སྔོན་གྱི་ནང་ཤ་ཅན་སྤུས་ལེགས། རིགས་ལྔ་དཀྱིལ་དུ་རིགས་ལྔའི་ས་བོན་ཡོད་པ་མཐའ་སྐོར་གྱི་པ་ཏྲ་རྣམས་དངུལ་ལས་འབུར་མར་བཅོས་པ། གཙུག་ཏོར་ཏོག་ཚ་གསེར་མ་དངུལ་སྐུད་དང་བྱུ་རུས་བརྒྱན་པ། གོས་ཚོན་གྱིས་གྲུབ་པའི་སྟོད་གཡོགས་དང་སྨད་གཡོགས། དྲིལ་གདན་ཆེ་ལེགས། ཅོད་པན་ཆ། འགོ་སྣམ་སྐྱ་བ་གྱོན་འདེང༌། སྨན་རྙིང་ཡུག །བུ་ལ་གན་བཞི། ཝ་དམར་སྤུས་གཙང༌། བུ་ལ་གྷ་རི་བུབ་བཅུ། ཏཱ་དཀར་ཡུག་དྲུག་ཅུ། རྒྱ་ཟམ་ལྔ་བཅུ། ཁེ་བི་སུའི་ས་གདན་ལེགས་པ་གསུམ་དང་ཁྲི་ཤོའུ་ཙེ་གཅིག །ཁེ་བི་སུའི་མལ་སྟན་སྤུས་ལེགས་གཅིག །ཤེལ་དཀར་རྟ་སོ་མ་སྒམ་གང༌། བྱེ་ཀར་སྒམ་གཉིས། རྒུན་འབྲུམ་དཀར་པོ་སྒམ་གཉིས། སོག་པོ་རྒུན་འབྲུམ་སྒམ་བཞི། ཨ་མྲ་སྒམ་གང༌། གོ་ར་སྒམ་གང༌། ཆི་བ་ག་ལྟང་གསུམ། ལྦ་ཀོ་བཞི། ཟིང་སྦག་སྒམ་བདུན། འབྲུ་དཀར་ལྟང་གཅིག །སྣམ་དཀར་ཡུག་བཅས་རྣམ་གྲངས་ཆིག་སྟོང་ཉིས་བརྒྱ་དང་བཅུ་གཅིག་གི་འབུལ་ལམ་ཞུས་ཏེ་རྨུགས་འཛིན་བང་མཛོད་ཕྱེ་བ་བཞིན་རྒྱ་ཆེ་ལ་དངོས་གཙང་ཞིང་གྱ་ནོམ་པའི་བདོག་པ་དངོས་འབྱོར་གྱི་སྟེང་རྣམ་དཀར་དགེ་ཚོགས་དང་བཅས་པ་བློས་
བླངས་ཏེ་ཀུན་ ཏུ་བཟང ་པོའི་མཆོད་སྤྲིན་ནམ་མཁའི་མཐའ་ཀླས་པའི་ཕྱོགས་བཅུའི་རྒྱལ་བ་ཀུན་དང་ལྷན་ཅིག་དགྱེས་པ་སྐྱེད་པར་མཛད། ཚྭ་དོར་ནོ་མོན་སོགས་ཀྱི་དུས་རྒྱལ་ཚབ་ལ་རྒྱལ་བའི་འབུལ་བའི་སུམ་ཆའམ་བཞི་ཆ་ལས་མི་དགོས་ཀྱང༌། དེ་མོ་གོང་མའི་སྐུ་དུས་ཧལ་ཧ་འགའ་ཞིག་གིས་རྒྱལ་བ་ལས་ཆེ་བར་བྱེད་པའང་བྱུང་བས། འདི་སྐབས་ཕྱེད་ཆག་བྱེད་ཀྱིན་འདུག་པའི་ཡུལ་ལུགས་དང་བསྟུན་ཏེ། རྒྱལ་ཚབ་དེ་མོ་ནོ་མིན་ཧན་རིན་པོ་ཆེར་ལྷ་རྫས་ནང་མཛོད། དངུལ་སྲང་བཅོ་ལྔ་ལས་གྲུབ་པའི་མཎྜལ། སྐུ་གསུང་ཐུགས་རྟེན། སྐུའི་ཉེར་སྤྱད་ཡོངས་རྫོགས། ཚ་གསེར་གྱི་འཁོར་ལོ། རྒྱ་དངུལ་སྲང་ལྔ་བརྒྱ། མཛོད་གོས་མང་ལྷུག་དང་འཇམ་རིས་སྣ་ཚོགས་ཡུག་ཆེན་ལྔ། ཇུས་ཆེན་སྣ་ཚོགས་ཡུག་བཅུ། རྒྱན་བཞི་སྔོན་པོའི་སོག་གོས་ནང་ཤ་ཅན། དྲིལ་གདན་ཆ། ཅོད་པན་ཆ། རི་བོ་རྩེ་ལྔའི་ཕྲེང་སེར་བཅུ། ཏཱ་དཀར་ཡུག་བཞི། རྒྱ་ཟམ་ཡུག་བཅོ་ལྔ། བུ་ལ་གན་བུབ། ཝང་དམར་སྐྱ་བུབ། བུལ་ཧ་རི་དྲུག །ཁེ་བི་སུའི་ས་སྟན་དང་མཱ་ཁྲང་ཙི། ཁེ་བི་སུའི་མལ་སྟན། ཤེལ་དཀར་རྟ་སོ་མ་དང་བྱེ་ཀར་སྒམ་ཆ། རྒུན་དཀར་སྒམ་གང༌། སོག་རྒུན་སྒམ་གཉིས། ཆི་བ་ག་ལྟང་ཆ། རྒུན་ནག་ལྟང་ཡ། ཟིང་སྦགས་སྒམ་ཆ། གོས་དཀར་ཡུག་བཅས་རྣམ་གྲངས་ལྔ་བརྒྱ་དང་གྱ་དགུའི་མཆོད་སྤྲིན་སྤྲོས་ཤིང༌། ལྷ་སའི་སྨོན་ལམ་གྱི་དགེ་འདུན་ཉི་ཁྲི་སུམ་སྟོང་ལྷག་ལ་ལག་འདོན་མང་ཇ་དང་ཐུག་པ། དངུལ་ཊཾ་རེ་རེའི་སྐུ་འགྱེད་བཅས་ཕུལ། ༸གོང་ས་༸རྒྱལ་དབང་ཐམས་ཅད་མཁྱེན་པ་ཡབ་སྲས་བསྟན་འགྲོའི་མགོན་
དུ་ཞབས་པད་བརྟན་ཅིང་ཆོས་སྲིད་ཀྱི་འཕྲིན་ལས་ཕྱོགས་བཅུར་རྒྱས་པ་དང༌། འཇིག་རྟེན་གྱི་ཁམས་ཀུན་ཏུ་དགེ་མཚན་རྫོགས་ལྡན་བཞིན་འབྱུང་ཞིང༌། ཁྱད་པར་ཕྲན་མི་ཉག་ཧོ་ཐོག་ཐུའི་སྒོ་གསུམ་གྱི་བགྱི་བ་མཐའ་དག་རྗེའི་བསྟན་པ་འབའ་ཞིག་གི་ཞབས་འདེགས་སུ་འགྱུར་བ་སོགས་ཀྱི་སྐྱབས་འཇུག་དང་ཞུ་འབུལ་རྣམས་མདོ་རྒྱུད་ཀྱི་ལུང་གི་རྒྱབ་རྟེན་བཅས་ཞུས་པ་ན། ༸རྒྱལ་དབང་མཆོག་ནས་ཐུགས་ཤིན་ཏུ་དགྱེས་ཏེ། ཁྱེད་ཉིད་ནས་འབྲོམ་སྟོན་རྒྱལ་བའི་འབྱུང་གནས་ཀྱི་རྟོགས་བརྗོད་གང་རྒྱས་བརྗོད་བྱུང༌། ཞེས་སོགས་ཀྱི་བཀའ་ལུང་སྩལ། སྨོན་ལམ་གྱི་ཚོགས་སུ་བྱོན་པས་སེར་འབྲས་དགའ་གསུམ་སོགས་ཀྱི་མཁན་པོ་རྣམས་དང་དགེ་བའི་བཤེས་གཉེན་མཁས་པ་མང་ནས་མགྲིན་གཅིག་ཏུ། སྐུ་འབུམ་མཁན་ཟུར་མི་ཉག་ཧུ་ཐོག་ཐུའི་ཞུ་འབུལ་ཚིག་སྙན་ལ་དོན་ཟབ་པ་རྒྱས་བསྡུས་རན་པ་བཤད་པ་འགངས་ཆེན་ཟེར་ནས་ངོ་མཚར་དུ་རྩི་ཞིང༌། དེའི་སྒོ་ནས་སྐུ་ཡོན་ཟབ་ཅིང་བརླིང་བའི་མཁས་པ་ཆེན་པོ་རེད་ཅེས་བསྔགས་བརྗོད་ཀྱི་དབྱངས་སྙན་སྒྲོགས་པ་བྱུང་སྟེ། ས་པཎྚི་ཏས། མཁས་པ་མཁས་པའི་དྲུང་ན་མཛེས། །བླུན་པོས་མཁས་པ་ཇི་ལྟར་གོ །ཞེས་གསུངས་པའི་དཔེའོ། །དེ་ནས་༸རྒྱལ་དབང་ཐམས་ཅད་མཁྱེན་པ་གཟིམས་ཆུང་དུ་བྱོན་ནས་རྗེ་འདི་པར་ལྷ་རྫས་ནང་མཛོད། ཙན་དན་ལས་གྲུབ་པའི་ཇོ་བོ་ལོ་ཀི་ཤྭ་རའི་སྐུ་བརྙན། རིན་རིལ་སོགས་རྙེད་དཀའི་རྟེན་གྱི་སྐོར་དང༌། ཆོས་ཀྱི་གཎྜི་གཎ་གཡོག་དང་བཅས་པ། སྐུའི་ཉེར་སྤྱད་བླ་ཆས་སྐོར་ཆ་ཚང་སོགས་ཀྱིས་སྲིད་ལུགས་དང་མཐུན་པའི་བདག་རྐྱེན་སྩལ་ཏེ་ཐུགས་མཉེས་པའི་ཚུལ་གྱིས། ཀྱེ་སྐུ་འབུམ་མཁན་ཟུར་ཞེས་མདུན་དུ་བོས་ནས།
དེང་ངེད་ཅག་ལྷན་རྒྱས་ནས་སྨོན་ལམ་ལ་འགྲོ་གསུང་བ་སོགས་ཐུགས་བརྩེ་བའི་གསུང་ལྷུག་པར་གནང༌། རྒྱལ་བའི་མདུན་དེར་རྗེ་འདི་པ་ལ་རྒྱལ་ཚབ་རིན་པོ་ཆེ་དང༌། བཀའ་བློན་རྣམས་དང༌། སྐུ་མདུན་མཁན་པོ་སོགས་མི་དྲག་ཐམས་ཅད་ནས་ཆོས་ལྡན་གྱི་ཐུགས་བཞེད་གྲུབ་པའི་རྟེན་འབྲེལ་དུ་ལྷ་རྫས་མཛོད་བཏགས་རེ་སྩལ། དེ་ནས་༸རྒྱལ་དབང་ཐམས་ཅད་མཁྱེན་པའི་ཞབས་ཕྱི་ཞུས་ནས་སྨོན་ལམ་ལ་ཕེབས། ཐུབ་བསྟན་རིན་པོ་ཆེའི་ཡང་སྙིང་འཇམ་མགོན་སྙན་བརྒྱུད་ཀྱི་མན་ངག་རྣམས་ཕྱོགས་ཀུན་ཏུ་རྒྱས་པའི་ཐུགས་སྨོན་མཛད། སྨོན་ལམ་གྲོལ་ནས་༸རྒྱལ་དབང་མཆོག་ནས་རྗེ་འདི་པའི་ཕྱག་ནས་བཟུང་སྟེ། སྐུ་ན་ཧ་ཅང་ཕྲ་བའི་ཉམས་ཀྱིས་ད་འགྲོ་འགྲོ་ཞེས་འཁྲིད་པའི་རྣམ་པ་མཛད་དེ་ཇོ་བོ་ཤཱཀྱ་མུ་ནེ་དང་ཉེ་སྐོར་རྟེན་རྣམས་ལ་མཆོད་མཇལ་གནང༌། མཆོད་མཇལ་གྲུབ་པ་དང༌། ༸རྒྱལ་དབང་རིན་པོ་ཆེའི་ཞལ་ནས། ཁྱེད་དགུང་ལོ་བགྲེས་པས་གཟིམས་ཤག་ཏུ་ཕེབས་ལ་བདེ་བར་བཞུགས་ཞེས་བརྩེ་བའི་བཀའ་སྩལ་ཏེ་རྩེ་དྲུང་གཅིག་ལ་འདི་པ་སྐྱེལ་དུ་བཅུག །དེ་ནས། གསང་བ་སྤྱི་རྒྱུད་ལས། ཉི་མ་ཟླ་བ་གཟས་ཟིན་དང༌། །ཡ་མཚན་ཆེ་ལྟས་བྱུང་བ་དང༌། །ཆོ་འཕྲུལ་གྱི་ནི་ཟླ་བ་ལ། །བསྒྲིམས་ཏེ་དཀྱིལ་འཁོར་བསྒྲུབ་པར་བྱ། །གསུངས་ཀྱང༌། མཎྜ་སྙིང་པོ་དང༌། ལ་ལེན་པའི་དོན་ཡིན་པས་འགྱུར་ཁྱད་ཀྱིས་ཤིན་ཏུ་སྙིང་པོ་ལེན་དགོས་པའི་དུས་སུ་གཟིགས་ནས་སྐྱོ་ངལ་གྱི་རྣམ་པ་ཕྲ་མོ་ཙམ་ཡང་མི་མཛད་པར་གཉིད་དང་སྙོམ་ལས་མཐའ་དག་རྒྱང་རིང་དུ་སྤངས་ཏེ་ལོང་སྐབས་གང་བྱུང་ཐམས་ཅད་ལ་དུས་རྒྱུན་དུ་ཇོ་ཤཱཀ་རྣམ་གཉིས་ལ་ཕྱག་སྐོར་མཛད་ཅིང༌། ༸རྒྱལ་དབང་
རིན་པོ་ཆེའི་ཞལ་ཉིན་ལྟར་མཇལ། ལྷ་ལྡན་སྨོན་ལམ་གྱི་མཆོད་པ་དང༌། གཏོར་རྒྱག །བང་རྩལ་འགྲན་པ་སོགས་ཀྱི་ལྟད་མོ་སྣ་ཚོགས་ལའང་གཟིགས། ༸རྒྱལ་དབང་ཐམས་ཅད་མཁྱེན་པ་པོ་ཏ་ལར་ཆིབས་ཁ་བསྒྱུར་དུས་ཆིབས་སྐྱེལ་དུ་ཕེབས་རྩིས་བྱས་པར་ཁྱེད་དགུང་ལོ་བགྲེས་པས་འོ་བརྒྱལ་བར་འདུག །བསྐྱོད་མི་དགོས་ཞེས་བཀའ་ནན་ཕེབས། དེ་ནས་སེ་ར་ཐེག་ཆེན་གླིང་དུ་ཕེབས། འདུས་ཚོགས་སུ་མང་ཇ་འགྱེད་སོགས་གང་རྒྱས་དང༌། རྟེན་རྣམས་ལ་མཆོད་འབུལ་ཞུས། གླིང་སྐོར་ལ་བྱོན་ཞོར་དུ། རྗེ་བླ་མས་དབྱར་ཞལ་བཞེས་ཀྱི་ཁུངས་ནས་རྩ་ཤེ་ཊཱིཀ་ཆེན་བཀའ་རྩོམ་མཛད་པའི་གནས་སེ་ར་ཆོས་སྡིངས་སུ་ཕེབས། སྐྱབས་སེམས། ཐུན་དྲུག་གི་རྣལ་འབྱོར། བསྟན་འབར་མ་སོགས་གསུང་སྟེ་རྒྱལ་བའི་ཡུམ་ཕ་རོལ་ཏུ་ཕྱིན་པའི་དངོས་བསྟན་སྦས་དོན་གྱི་རྟོགས་པ་རྣམས་རྒྱུད་ལ་སྐྱེ་བའི་གསོལ་འདེབས་དང༌། བསྟན་པའི་སྙིང་པོ་དེ་ཉིད་རྒྱས་པའི་ཐུགས་སྨོན་ནན་ཆེར་མཛད། དེ་ནས་འབྲས་སྤུངས་ཀྱི་དབེན་གནས་དགེ་འཕེལ་དུ་ཕེབས། བདུན་ཕྲག་དུ་མར་བཅད་རྒྱ་བསྡམས་ནས་ཡི་དམ་ལྷའི་ལྗགས་བསྙེན་མཛད། ཐུན་མཚམས་སུ་རྗེ་བླ་མས་མཛད་པའི་ཐོག་མཐའ་བར་དུ་དགེ་བའི་སྨོན་ལམ་གྱི་འདོན་ཐབས་ཐར་པའི་ལམ་སྟོན་ཞེས་བྱ་བ་ལྗགས་རྩོམ་མཛད། དེ་ནས་དགའ་ལྡན་རྣམ་པར་རྒྱལ་བའི་གླིང་དུ་བྱོན། རྗེ་རིན་པོ་ཆེའི་སྐུ་གདུང་མཆོད་རྟེན་ཡིད་བཞིན་གྱི་ནོར་བུའི་དྲུང་དུ་མཆོད་སྒྲོན་སྣ་ཚོགས་སྤྲོས་ཏེ་ཉིན་གསུམ་གྱི་རིང་ལ་ཞལ་འདོན་བཤགས་སྦྱང་སོགས་གང་རྒྱས་མཛད་དེ་རྗེའི་བསྟན་པ་ཕྱོགས་མཐར་རྒྱས་པའི་ཐུགས་སྨོན་གནང༌། གླིང་སྐོར་ལ་བྱོན་སྐབས་ཀླུ་འབུམ་ཁམས་ཚན་གྱི་གྲྭ་རྒན་
དགེ་བཤེས་ཤིག་ཞབས་ཕྱིར་སོང་བས་སྐོར་ལམ་གྱི་སངས་རྒྱས་བྱང་སེམས་མང་པོའི་སྐུ་རང་བྱོན་དང༌། ཕྱག་ཞབས་ཀྱི་རྗེས་སོགས་འདུག་པའི་རྒྱུ་མཚན་ཞུས་པ་ལྟར་གྱི་ཐོ་ཡིག་དང་ལོ་རྒྱུས་ཕྱག་བྲིས་སུ་མཛད། འདུས་ཚོགས་སུ་མང་ཇ་ཁ་ཤས་དང་སྐུ་འགྱེད་དངུལ་སྐར་ཕྱེད་བརྒྱད་རེ་ཕུལ། བྱང་རྩེ་གྲྭ་ཚང་དང་ཤར་རྩེ་གྲྭ་ཚང་སོ་སོར་ཡང་མང་ཇའི་བསྙེན་བཀུར་ཞུས། ནང་རྟེན་ཐམས་ཅད་ལ་མཆོད་པ་སྙན་ཤལ་བཅས་ཕུལ་ཏེ་མཇལ་ཁ་ཞུས། ཆོས་རྒྱལ་གྱི་མདུན་དུ་བརྒྱ་མཆོད་ཕུལ། བརྐྱང་བསྐུམ་མ་སོགས་གསུང་སྟེ་རྡོ་རྗེའི་གཡར་དམ་བསྐུལ་བའི་ཕྲིན་བཅོལ་མཛད། དེ་ནས་བདེ་ཆེན་རྫོང་དུ་བྱོན། གསང་སྔགས་མཁར་གྱི་ནང་རྟེན་མགོན་པོ་ལ་མཇལ་རྒྱུ་ཡིན་བྱས་པར། དཀོན་གཉེར་དེས་སོག་པོ་བླ་མ་ག་རི་བྱེད་ཀི་ཡིན་ཟེར་བ་སོགས་བརྙས་ཐབས་ཀྱི་རྣམ་པ་དང་བཅས་དལ་གྱིས་སོང་སྟེ་སྒོ་ཕྱེ་བར་མཇལ་ཁ་ཞུས་ནས་མགོན་པོའི་མདུན་དུ་མཆོད་སྒྲོན་རྒྱ་ཆེར་ཕུལ་ཏེ། སྐྱབས་སེམས། ཡན་ལག་བདུན་པ། མྱུར་མཛད་མ་སོགས་གསུང་ཞིང༌། བླ་མ་མགོན་པོ་དབྱེར་མི་ཕྱེད་པའི་གདུང་ཤུགས་དྲག་པོ་དང་བཅས་ཕྲིན་བཅོལ་མཛད་པ་ན། དཀོན་གཉེར་གྱི་མཐོང་སྣང་ལ་མགོན་པོའི་སྐུ་བརྙན་དེས་སྤྱན་རྗེ་འདི་པ་གར་ཕེབས་ལ་གཟིགས་པའི་ཉམས་ཤིག་ཤར་ཏེ། དཀོན་གཉེར་སྐྲག་ནས་སྔར་མ་གུས་པ་བྱས་པ་ལ་འགྱོད་ནས་མཐོལ་བཤགས་དང༌། ཁྱེད་ཉིད་སྐྱེས་བུ་དམ་པ་འགང་ཆེན་རེད་ཅེས་སྐྱབས་འཇུག་ཀྱང་ནན་གྱིས་ཞུས་པ་བྱུང༌། དེ་ནས་བྲག་ཡེར་པའི་དགོན་པར་ཕེབས་ཏེ་སྒྲུབ་ཕུག་སོ་སོ་དང༌། བྱམས་པ་ལོ་ཀེ་ཤྭ་ར་སོགས་
ལ་རྟེན་མཇལ་མཛད། འདུས་ཚོགས་ལ་སྐུ་འགྱེད་དང་མང་ཇའི་དོད་ཕུལ། དེ་ནས་ལྷ་སར་བྱོན། ཡོངས་འཛིན་དགའ་ལྡན་ཁྲི་རིན་པོ་ཆེ་མཁས་གྲུབ་བྱེ་བའི་གཙུག་རྒྱན་དམ་པ་བསྟན་པའི་སྲོག་ཤིང་རྗེ་ངག་དབང་སྙན་གྲགས་ཞལ་སྔ་ནས་ཀྱི་དྲུང་ནས་ལམ་རིམ་མཆན་བཞི་མའི་ཁྲིད་ཉིན་ཉི་ཤུ་ལྷག་ཙམ་གྱི་རིང་ལ་གསན། ཡང་གསང་འདུས་དང་བདེ་མཆོག་སྔགས་བཏུ་གཉིས་ཀྱི་རྗེས་གནང༌། ཡོངས་འཛིན་ཡེ་ཤེས་རྒྱལ་མཚན་དཔལ་བཟང་པོས་མཛད་པའི་རིགས་གསུམ་སྤྱི་སྒྲུབ་ཀྱི་ཁྲིད། ས་བཅུད་བུམ་སྒྲུབ་ཀྱི་ལུང་བཅས་གསན་ནས་བཀའ་དྲིན་གསོབ་བྱེད་དུ། ནང་མཛོད་སེར་པོ། དངུལ་མཎ། སྐུ་གསུང་ཐུགས་རྟེན། ན་བཟའི་རྒྱུའི་གོས་ཆེན་རྒྱུ་བཟང་ཡུག་ཁ་ཤས། རྒྱ་དངུལ་རྟ་རྨིག་མ་ཟུང༌། གཞན་དངོས་པོ་གྱ་ནོམ་པའི་འབུལ་བ་སྣ་ཚོགས་བཅས་ཕུལ། དེ་ནས་ཡོངས་འཛིན་ཁྲི་རིན་པོ་ཆེ་དང༌། སྟག་ལུང་དགེ་བཤེས་དཔོན་གཡོག་གཉིས་ཀྱིས་རྗེ་འདི་པའི་དྲུང་ནས་ཉིན་ཁ་ཤས་ལ་གཏོར་ཆེན་ཟུར་དགུ་པའི་གཏོར་ཆོག །རྗེ་རང་གིས་མཛད་པའི་ཐོག་མཐའ་བར་གྱི་འདོན་ཐབས་སོགས་བཀའ་ཆོས་ཀྱི་སྐོར་མང་ཙམ་གསན། ཚོགས་མཆོད་ཚུགས་ནས་རྟེན་མཇལ་ཚོགས་མཇལ་ཕྱག་སྐོར་སོགས་ལ་འགྲུས་པར་མཛད། སེར་སྦྲེང་གི་མཆོད་པ་དང་གར་མཆོད་སོགས་ལའང་ཞིབ་གཟིགས་གནང༌། སློང་མོ་བ་ཉིས་སྟོང་ལྷག་ལ་ཇ་མར་གྱི་སྦྱིན་པ་བཏང་ནས་ཡིད་དགའ་བར་བྱས། པོ་ཏ་ལའི་རྣམ་རྒྱལ་གྲྭ་ཚང་གི་དུས་འཁོར་སྒྲུབ་མཆོད་ཚུགས་རྒྱུར་སྔོན་འགྲོ་རྡུལ་ཚོན་གྱི་དཀྱིལ་འཁོར་བཞེངས་རྒྱུའི་ས་ཐིག་ཆོག་སྐབས་ཀྱི་གར་ཐིག་སོགས་ཕྱག་ལེན་ཕྲ་ཞིབ་ཀུན་ལ་ལེགས་
པར་གཟིགས་རྟོག་མཛད། དཀྱིལ་འཁོར་བཞེངས་གྲུབ་ནས་སྒྲུབ་མཆོད་དངོས་གཞིའི་ཉིན་གཅིག་༸རྒྱལ་དབང་ཐམས་ཅད་མཁྱེན་པ་ཚོགས་དབུར་ཕེབས་སྐབས་རྗེ་འདི་པས་སྤོས་སྣ་བྱས་ཏེ་ཕེབས་པས། རྒྱལ་བའི་དབང་པོ་མཆོག་གིས་ཀྱེ་སྐུ་འབུམ་མཁན་ཟུར་ཞེས་འབོད་པ་གནང་ཞིང༌། འདི་པའི་ཕྱག་ནས་ཁྲིད་དེ་བརྩེ་བའི་གསུང་མང་དུ་བྱོན་ཞིང་མཐར། ངེད་ཅག་ལྷན་དུ་སྨོན་ལམ་འདེབས་གསུང་སྟེ་ཚོགས་གྲལ་གྱི་མགོར་བཞུགས་སུ་བཅུག །ཡོངས་འཛིན་ཁྲི་རིན་པོ་ཆེའང་ཕེབས་པས། ༸རྒྱལ་དབང་ཐམས་ཅད་གཟིགས་པ་ཆེན་པོས་དབུ་མཛད། ཡོངས་འཛིན་ཁྲི་རིན་པོ་ཆེ། རྗེ་འདི་པ། རིག་པ་འཛིན་པའི་དགེ་འདུན་འདུས་ཚོགས་དང་བཅས་པས་ཉིན་འཁྱོང་གི་རིང་ལ་ཞལ་འདོན་དང་ཐུགས་སྨོན་རྒྱ་གང་ཆེ་མཛད། ཚོགས་གྲོལ་ནས། ༸རྒྱལ་དབང་རིན་པོ་ཆེ་གཟིམས་ཁང་དུ་ཕེབས་ཁར་རྗེ་འདི་པ་མདུན་དུ་བོས་ཏེ་ཕྱག་གཡས་ཀྱིས་རྗེ་འདི་པའི་ཕྱག་གཡས་ནས་བཟུང་སྟེ། འཽ། མདོ་སྨད་རྗེ་ཙོང་ཁ་པའི་འཁྲུངས་གནས་གདན་ས་ཆེན་པོ་སྐུ་འབུམ་བྱམས་པ་གླིང་ནས་བོད་ཡུལ་འདིར་བྱོན་པའི་བླ་མ་ཁྱེད་ནི་རྗེ་རིན་པོ་ཆེའི་རྣམ་འཕྲུལ་དངོས་ཡིན་ཞིང༌། ངེད་ལའང་སྐུ་དྲིན་ཤིན་ཏུ་ཆེ། དེང་འདིར་ངེད་ཅག་ལྷན་ཅིག་ཏུ་སྨོན་ལམ་ལེགས་པར་བཏབ་པ་ཡིན་པས། ཕྱིས་སུའང་ཁྱེད་ཀྱིས་ང་རང་ཐུགས་ནས་མ་བརྗེད་ཅེས་གསུང་གི་གསང་བ་ཆེས་ཆེར་སྩལ་བས་གཞལ་བར་དཀའ་བའི་གནས་སུ་གྱུར། སྤྱིར་འདི་པ་དགུང་ལོ་སྨིན་པས་ལོ་རྗེས་མར་དབྱར་འགྲོས་ཀྱིས་བདེ་བར་ཕེབས་ཆོག་རྒྱུ་ལ། དེ་ལྟར་བྱས་ཚེ་ཕག་ལོའི་སྨོན་
ལམ་ཚོགས་དབུ་སོགས་བྱེད་དགོས་པས་དགའ་སྟོན་མཐར་ཕྱིན་པ་ཞིག་མི་འོང་ཞིང༌། ལྷག་པར་ནག་ཟླའི་དུས་ཆེན་ལ་གཉིས་མེད་དུས་ཀྱི་འཁོར་ལོའི་སྒྲུབ་མཆོད་དང་འབྲེལ་བའི་ཐུགས་སྨོན་རླབས་ཆེན་འདི་ཚོ་མཛད་རྒྱུའི་སྟེང་དུ་མི་ཁེལ་བས། དགུན་དུས་ཚ་དྲག་གིས་མི་སྔ་མི་འཕྱི་བར་དུས་ཐོག་འདི་རང་ལ་ཕེབས་པ་དང༌། ༸རྒྱལ་དབང་མཆོག་ནས་ཀྱང་སྐྱེ་བའི་འཕྲེང་བ། མིང་གོ་ས། སྟོབས་འབྱོར་སྙན་གྲགས་ཅན་གྱི་འཛམ་གླིང་གི་བླ་ཆེན་ཇི་སྙེད་ཅིག་མདུན་དུ་བྱོན་པ་ལ་འདིའི་བཅུ་ཆ་ཙམ་ཡང་གནང་བའི་བགྲོས་མེད་པ། ཕ་བུ་ཕྲད་པ་ལྟ་བུའི་དགྱེས་གཟིགས་ཚད་མེད་པ་དང་ནང་སྦྱར་གྱི་གསུང་ལྷུག་པ་སྩོལ་ཚུལ། ཆོས་ཀྱི་མཛད་འཕྲིན་ལྷན་ཅིག་གནང་བ། གཙོ་ཆེའི་མཐའ་མ་དུས་ཀྱི་འཁོར་ལོའི་སྒྲུབ་པའི་ཐོག་ཏུ་བབ་པ་སོགས་སྒོ་དུ་མ་ནས་དཔྱད་ན། ཀུན་མཁྱེན་རྒྱལ་བའི་དབང་པོ་སྐུ་འཕྲེང་འདི་ཉིད་ཀྱི་ཐུན་མོང་མ་ཡིན་པའི་དངོས་སྐལ་དུ་གྱུར་པའི་སྔོན་གྱི་རྟེན་འབྲེལ་ཞིག་དང༌། དྲག་པོ་འཁོར་ལོ་ཅན་ཚུན་ཆད་ཕྱི་མའི་རྟེན་འབྲེལ་གྱི་སྒོ་དུ་མ་ཞིག་ཡོད་པར་སྣང་ངོ༌། །རྒྱ་མཚོའི་རླབས་བཞིན་མི་ཡོལ་ཐུགས་བསྐྱེད་མཐའ། །དུས་སུ་སྨིན་པ་ཡོངས་འདུའི་ས་བོན་ལས། །དགེ་ལེགས་དཔག་བསམ་སྲིད་པའི་རྩེར་བསྙེགས་པ། །ཕལ་བའི་འཁྲི་ཤིང་ཚོགས་ཀྱི་མཚོན་བྱ་མིན། །ཡབ་སྲས་ཟུང་གི་འཕྲིན་ལས་འདབ་མའི་གར། །རྣམ་ཀུན་མཆོག་ལྡན་དབྱིངས་སུ་བསྒྱུར་བ་ཡི། །དམིགས་མེད་བདེ་བའི་རྫ་རྔ་བཞད་པའི་སྒྲས། །ཀུན་རྨོངས་གཉིད་ཀྱི་གོ་སྐབས་འཕྲོག་གྱུར་ཅིག །དེ་ནས་རྗེ་ཉིད་གཟིམས་ཤག་ཏུ་བྱོན་ཏེ་ཞབས་ཕྱི་བ་རྣམས་ལ་དེ་རིང་༸རྒྱལ་དབང་ཐམས་ཅད་མཁྱེན་པ་ཐུགས་རྗེ་ཅན་དང༌། ཡོངས་
འཛིན་ཁྲི་རིན་པོ་ཆེ། དགེ་འདུན་འདུས་པའི་ཚོགས་དང་ལྷན་ཅིག་ཏུ་ངེད་རང་གིས་ཀྱང་སྨོན་ལམ་ལེགས་པར་བཏབ། དེར་མ་ཟད་༸རྒྱལ་དབང་རིན་པོ་ཆེས་ཐུགས་མཉེས་པའི་གསུང་རྡོ་རྗེའི་ཚིག་བསམ་གྱིས་མི་ཁྱབ་པ་ལྷུག་པར་སྩལ་བས་བཀའ་དྲིན་ནི་འཁོར་མཐའ་མ་མཆིས་པ་བྱུང༌། རང་གི་འབྱོར་ཚོད་ཀྱིས་ཇོ་ཤཱཀ་རྣམ་གཉིས་སོགས་རྟེན་ཀུན་ལ་མཆོད་པ། རྒྱལ་བ་ཡབ་སྲས་ལ་འབུལ་བ། སེར་འབྲས་དགའ་གསུམ་བཀྲ་ཤིས་ལྷུན་པོ་བཅས་དགོན་སྒྲུབ་སྡེ་ཆེ་ཕྲ་ཐམས་ཅད་ལ་བསྙེན་བཀུར་ལེགས་པར་གྲུབ་ཚར་བ་ཡིན་ཀྱང༌། རབ་བྱུང་ན་སྔོན་གྱི་སྐྱེས་བུ་དམ་པ་རྣམས་ཀྱི་རྣམ་ཐར་བཟང་པོ་སྨོན་པའི་ཡུལ་དུ་བྱས་ཏེ། ཚེ་ལྷག་འདི་དོན་དང་ལྡན་པ་ཞིག་ཨེ་ཡོང་སྙམ་པའི་འཕེན་པ་ཡོད། གལ་ཏེ་དེ་ལྟར་མ་བྱུང་ཡང་བཀའ་ཆོས་ཀྱི་སྐོར་དུ་མ་ཉན་རྒྱུ་སོགས་ཆོས་ཀྱི་བྱ་བ་མང་པོ་ཡོད་པས་ངེད་རང་གྲྭ་པ་གསུམ་ཙམ་བྱས་ཏེ། བོད་ཆོས་ཡུལ་འདིར་ལོ་ཁ་ཤས་ཀྱི་རིང་ལ་ཅིས་ཀྱང་འདུག་རྒྱུ་ཡིན་གསུང་བར། ཕྱག་གཉེར་དང་དྲུང་གསོལ་ངོ་གཡོག་བཅས་ནས་སྔ་སོར་ཆོས་རྗེས་ཀྱང་ཞུས་ཡོད་པ་བཞིན་སྐུ་ན་མཐོ་བས་ཡུན་རིང་བཞུགས་ན་ས་ཆུ་སོགས་ཨེ་འཕྲོད་མི་ཤེས་སྟབས་ངེད་ཅག་གི་བློས་མི་ལོང་ལ། ངེད་ཅག་ཀྱང་ལོང་བ་ཐང་སྐྱུར་བཞིན་དུ་གནང་ལུགས་མེད་པར་མ་ཟད། མདོ་སྨད་ཀྱི་གྲྭ་སློབ་སྦྱིན་བདག་རྣམས་ཀྱང་ཐུགས་ཀྱིས་འདོར་མི་རུང་བས་ཅིས་ཀྱང་འདི་ལོ་ཕྱིར་ཕེབས་དགོས་ཞེས་ཕྱག་མང་དུ་བཙལ་ཏེ་ངུ་ངག་གིས་གསོལ་བ་ཡང་ཡང་བཏབ་པས་དཀའ་དཀའ་ཞིག་ལ་མཐར་སྙིང་རྗེའི་གཞན་དབང་དུ་གྱུར་པས་ངོ་མ་ཆོག་པར་ཕེབས་རྒྱུའི་ཞལ་
བཞེས་གནང༌། གནས་ཚུལ་དེ་ཐོས་ནས་དཔྱོད་ལྡན་མང་པོས། ཁོང་མདོ་སྨད་དུ་ཆོས་སྲིད་རླབས་ཆེན་དེ་འདྲ་ལ་ཐུགས་ཀྱིས་རྦད་ཆོད་མཛད་དེ། རྡོ་རྗེ་གསུམ་དང་གཏད་པ་བཞི་བུད་བསྙེགས་ཐོབ་གསུམ་གྱི་རྣམ་ཐར་བཀའ་གདམས་གོང་མའི་མཛད་སྲོལ་གྱི་བཞེད་པ་དེ་འདྲ་བྱུང་བ་འཆིང་བ་ནང་ནས་གྲོལ་བའི་ཁྱད་ཆོས་སུ་འདུག་ཅེས་ཆོས་ཀྱི་རྗེས་སུ་འབྲང་བའི་བསྔགས་པའི་ཚིག་གི་མེ་ཏོག་ཀུན་ཏུ་འཐོར་བ་བྱུང༌། རྒྱུ་མཚན་དེ་གསན་ནས་ཡོངས་འཛིན་ཁྲི་རིན་པོ་ཆེས་ཀྱང༌། རྗེ་འདི་པ་བོད་ཡུལ་དུ་ལོ་ཁ་ཤས་ལ་བཞུགས་རྒྱུ་བྱུང་ན་བསྟན་པ་ལ་ཕན་རྒྱུ་རེད་ཅེས་མང་པོ་ལ་གསུང་སྣང་ངོ༌། །རྒྱལ་ཚབ་དེ་མོ་ནོ་མོན་ཧན་བློ་བཟང་འཇིགས་མེད་རྒྱ་མཚོའི་དྲུང་ནས་འཆི་མེད་རྡོ་རྗེའི་སྲོག་ཤིང་གི་རྗེས་གནང་སོགས་གསན། འབྲས་སྤུངས་སུ་ཕེབས་ཏེ། ཀླུ་འབུམ་ཁམས་ཚན་གྱི་དགེ་འདུན་རྣམས་ནས་བཀའ་ཆོས་ཞུས་པར། སྐྱབས་འགྲོའི་ཁྲིད་ཤིན་ཏུ་རྒྱས་པ་སྩལ། ཁམས་ཚན་ལ་ཚོམ་ཇ་དང་འགྱེད་སྤྱི་འཇོག་སོགས་གང་རྒྱས་ཀྱིས་བསྙེན་བཀུར་ཞུས། ༸རྒྱལ་དབང་ཐམས་ཅད་མཁྱེན་པའི་ཞབས་པད་ནས་གསང་བདེ་འཇིགས་གསུམ་གྱི་སྨོན་ལམ་གྱི་ལུང་དང༌། ཡོངས་འཛིན་རིན་པོ་ཆེའི་དྲུང་ནས་དགའ་ལྡན་ལྷ་བརྒྱ་མའི་ཁྲིད་ལུང༌། རྒྱལ་བའི་ཡོངས་འཛིན་ཆུང་བ་ཤར་པ་ཆོས་རྗེའི་དྲུང་ནས་ཀྱང་དགའ་ལྡན་ལྷ་བརྒྱ་མའི་ཁྲིད་བསྡུས་པ་ཞིག་གསན། སེར་འབྲས་ཀྱི་དགེ་བཤེས་ཉི་ཤུ་ལྷག་ལ་སྐྱབས་འགྲོ་དང་དགའ་ལྡན་ལྷ་བརྒྱ་མའི་ཁྲིད། ལམ་རིམ་བདེ་ལམ་སོགས་ལུང་གི་སྐོར་མང་པོ་སྩལ། དེ་ནས་པོ་ཏ་ལར་རྒྱལ་བ་རིན་པོ་ཆེར་ཐོན་ཕྱག་ཞུས་པར། ཐུབ་དབང་གི་སྐུ་བརྙན་བོད་ལི་ལྷ་རྫས་ནང་མཛོད་
བཅས་སྲིད་ན་རྙེད་དཀའི་རྟེན་གྱི་སྐོར་ཕལ་ཆེར། རྒྱལ་བའི་ཡུམ་རྒྱས་པ་དུམ་པ་བཅུ་གཉིས། དགའ་ལྡན་བསྟན་པའི་གསལ་བྱེད་ཤ་ཅིན་ས་རིག་ཆི་ཨེར་ཏི་ནི་མཁན་པོ་ཞེས་གཟེངས་བསྟོད་ཀྱི་ཆོ་ལོ་དང་བཀའ་ཤོག་ཐམ་ག་གྲུབ་སྒོར་དང་བཅས། ཆེན་པོའི་ཉེར་སྤྱད་རྟ་དར་ཆ་སོགས་དང༌། ན་བཟའི་སྐོར་ཆ་ཚང་བཅས་བདག་རྐྱེན་སྤམ་མཐོ་བ་སྩལ། ༸རྒྱལ་དབང་རིན་པོ་ཆེས་གསོལ་འཕྲོ་ཤེལ་ཀར་རྟ་སོ་མ་གསོལ་ཕོར་གང་གནང་སྟེ་ཐུགས་འཕྲེང་བའི་རྣམ་པས་ནང་ལུགས་ཀྱི་གསུང་གནད་ཅན་མང་དུ་ཕེབས། སྐུ་འབུམ་ཆོས་སྡེ་ཆེན་པོར་སྐབས་སྐབས་སུ་མེ་སྐྱོན་བཀྲ་མི་ཤིས་པའི་མཚན་མ་ཕྲན་ཚོགས་འབྱུང་བ་ཞིག་འདུག་པས། དེ་དག་སེལ་ཞིང་བཤད་སྒྲུབ་ཟུང་གི་བྱ་བ་གོང་འཕེལ་དུ་རྒྱས་ཕྱིར་དང༌། དགེ་འདུན་གྱི་སྡེ་འཕེལ་རྒྱས་སུ་འགྲོ་བའི་ཆེད་དུ་བརྟག་ཞུས་ཕུལ་བ་སོགས་སྤྱི་སྒོས་ཀྱི་ལུང་བསྟན་གྱི་སྐོར་རྣམས་ཀྱི་ལན་ཞིབ་རྒྱས་སུ་སྩལ། སྐུ་འབུམ་སྤྱི་ལ་རྟེན་ཞིག་གནང་དགོས་ཞུས་པ་ལྟར་ཐུབ་དབང་གི་སྐུ་ཁྱད་འཕགས་ཤིག་གནང༌། ཡོངས་འཛིན་ཁྲི་རིན་པོ་ཆེར་ཐོན་ཕྱག་ཞུས་པར། ཉིད་ཀྱི་དབུ་ཞྭ་དང་སྐུ་གཟན་སེར་པོ་བཅས་སྩལ་ཏེ་འཕྲལ་ཕུགས་ཀྱི་གསུང་ཡང་མང་དུ་ཕེབས། རྒྱལ་ཚབ་རིན་པོ་ཆེའི་དྲུང་ནས་ཀྱང་སྲིད་ལུགས་ཀྱི་བདག་རྐྱེན་རྒྱ་ཆེན་དང་ཕྱི་ནང་གསང་བའི་བཀའ་ལྷུག་པར་གནང༌། རྗེ་ཉིད་བོད་ཡུལ་དུ་བཞུགས་རིང་དེར་དད་ལྡན་རྣམས་ནས་ཆོས་འབྲེལ་ཞུ་བ་དང་བརྟག་ཞུས། སྐྱབས་འཇུག་ཞུ་མཁན་སོགས་ཆེས་མང་པོ་བྱུང་བས་སོ་སོའི་འདོད་པ་ཚིམ་པར་བྱས། རྒྱུད་སྟོད་སྨད་གཉིས་ལ་མང་ཇ་དང་སྐུ་འགྱེད་སོགས་ཀྱི་བསྙེན་བཀུར་ཞུས། །
མདོ་སྨད་དུ་གདན་འདྲེན་བྱེད་རྒྱུའི་ཐུགས་བཞེད་བཞིན་འཕགས་ཡུལ་གྱི་བསྟན་བཅོས་བོད་དུ་འགྱུར་རོ་ཅོག་ཆ་ཚང་བ་སྣག་ཤོག་སྤུས་ལེགས། སྐུའི་རྟེན་སྟོན་པ་ཐུགས་རྗེ་ཅན་གྱི་རྟོགས་བརྗོད་དཔག་བསམ་འཁྲི་ཤིང་གི་བྲིས་ཐང་བཅོ་ལྔ་གོས་ཆེན་ཁྱད་མཚར་གྱི་གོང་བཤམ་བཅས། ༸རྒྱལ་དབང་ཐམས་ཅད་མཁྱེན་པའི་སྐྱེས་རབས་ཞལ་ཐང་བཅུ་ལྷག་གོང་མཚུངས། རྗེ་གླིང་འཕུལ་མའི་སྐུ་བརྙན་ཁ་ཤས། ཐུབ་པ་རྡོར་གདན་མ་རྒྱ་གར་ལི་མ་ཁ་ཤས། ཇོ་བོ་རྗེ་སོགས་རྟེན་རྙིང་གི་སྐོར་རྣམ་པ་མང་པོ། གཞན་ཡང་འཇིགས་བྱེད་སོགས་ཡི་དམ་གྱི་སྐོར་དང་ཆོས་སྐྱོང་དུ་མ། བླ་སྐུ་ཅི་རིགས། སྒྲོལ་དཀར་ལྗང་སོགས་བྲིས་འབུར་གྱི་རྟེན་མཐའ་ཡས་པ་གདན་དྲངས། དེ་ནས་དབྱར་ཟླ་དང་པོའི་ནང་དུ་གཟའ་སྐར་དགེ་བའི་ཉིན་གཞུང་ས་ནས་ལུགས་སྲོལ་དང་མཐུན་པའི་སྐྱེལ་མི་སྣེ་ཤན་པ་དང་རྟ་འུལ་སོགས་ལྷ་ས་ནས་ནག་ཆུའི་བར་སྩལ་ཏེ་མདོ་སྨད་དུ་ཆིབས་ཀྱི་ཁ་ལོ་སྒྱུར་བར་མཛད་དོ། །རྨུགས་འཛིན་གཏེར་ཁ་ཕྱེ་བའི་ཚུ༷ལ་གྱིས་ཁྲི༷མས་ལྡན་འདུས་པ་རྒྱ་མཚོ་དང༌། །བསྟ༷ན་པ༷འི་རྩ་ལག་རྒྱལ་དབང་ཡབ་སྲས་དཔག་ཡས་མཆོད་པའི་སྤྲིན་གྱིས་མཆོད། །ས་ཡི་ཉི༷་ཟླ་ཇོ་ཤཱཀ་གཉིས་སོགས་རྟེན་ལ་ཕྱག་མཆོད་སྐོར་བར་བཅས། །བྱ་དཀའི་ཚོགས་གཉིས་སྤྱོད་པ་མ༷་ལུས་ཕྱོགས་ཅན་འགའ་ཡིས་རྫོགས་པར་མཛད། །དེང་དུས་ཐབས་མཁས་ཐུགས་ཀའི་འོད་ཟེར་གྱིས། །ཕྱོགས་བཅུའི་དཔལ་འབྱོར་ལོངས་སྤྱོད་ཀུན་བསྡུས་ཏེ། །སྙིང་གར་ཕྱག་རྒྱ་བཞི་ཡིས་རྒྱས་འདེབས་པ། །དེ་དག་རྣམ་ཐར་ཁྱོད་ཀྱིས་རིང་དུ་སྤངས། །ཟང་ཟིང་དངོས་པོ་ཚོགས་གཉིས་སྙིང་པོར་བསྒྲུབས། །ལེགས་བཤད་དགའ་སྟོན་ཕན་ཚུན་སྐྱེས་སུ་
སྤེལ། །སྲས་བཅས་རྒྱལ་བའི་འཁོར་ལོ་བསྙེན་པ་ཡིས། །དངོས་གྲུབ་གཉིས་ཀྱི་དགའ་སྟོན་མགྲོན་དུ་ཁུགས། །ཞེས་དགེ་ལྡན་བསྟན་པའི་རྩ་ལག་མཁས་ཤིང་གྲུབ་པའི་དབང་ཕྱུག་རྗེ་བཙུན་བླ་མ་དམ་པ་ཚུལ་ཁྲིམས་བསྟན་པའི་ཉི་མ་དཔལ་བཟང་པོའི་རྣམ་པར་ཐར་པ་ནོར་བུའི་དོ་ཤལ་ལས། དབུས་འགྱུར་གྱི་ལྗོངས་སུ་བསྟན་འགྲོའི་དོན་མཛད་ཚུལ་གྱི་དྲ་བ་སྟེ་ལྔ་པའོ།། །།དེ་ནས་ནག་ཆུ་ལྡང་ལ་སོགས་རིམ་པར་བརྒྱུད་དེ་དུང་བུ་རེར་སླེབས་པ་ན་བསམ་སྦྱོར་ལོག་པར་འཆང་བའི་འཕྲོག་བཅོམ་བྱེད་མི་མགོ་ལོག་དང་། སྐེ་རྩི་རི་ཤོར་བ་མི་གྲངས་ཉིས་བརྒྱ་དང་སུམ་ཅུ་ལྷག་ཙམ་གྱིས་མེ་མདའ་སོགས་མཚོན་ཆའི་རིགས་བརྡར་ཏེ་ཚམ་རྔམ་གྱི་རྣམ་པ་དང་བཅས་ཚུར་གཟས་ནས་འོངས་པ་ན། ཞབས་ཕྱི་བ་རྣམས་ཀྱིས་འཐབ་ཡ་ཞིག་དགོས་རྒྱུ་རེད་སྙམ་སྟེ་མཚོན་ཆ་སྟ་གོན་བྱས་པར། རྗེ་ཉིད་ནས་གྲྭ་པ་རྣམས་ལ་དེ་འདྲ་བྱེད་མི་དགོས་སྐྱོན་མེད། ངས་ཆོས་སྲུང་ལ་ཕྲིན་བཅོལ་བྱེད། སྤྱིར་འཕྲོག་བཅོམ་བྱེད་མི་འདི་ཚོ་རྒྱགས་ཆེས་པ་མ་རེད། རང་རང་གི་ཁ་མ་སོས་པས་སྡུག་ཐུག་ཅིང་ལས་ཀྱིས་མནར་བ་ཡིན་པས་སྙིང་རེ་རྗེ། བཟའ་བཏུང་སོགས་ཀྱི་གསོལ་རས་ཞེ་ཚིམ་པ་ཞིག་སྟེར་དགོས་གསུང་སྟེ་དམུ་རྒོད་ཀྱི་སྤྱོད་ཚུལ་དེ་གཟིགས་པས་ལྷག་པར་སྙིང་རྗེ་བ་ནི། བཞི་བརྒྱ་པ་ལས། ནད་ཐེབས་བུ་ལ་གདུང་འགྱུར་བ། །དེ་བཞིན་བྱང་ཆུབ་སེམས་དཔའི་བརྩེ། །དམ་པ་མིན་ལ་ཁྱད་པར་དུའོ། །ཞེས་དང༌། དཔལ་སྦས་ཀྱི་རྟོགས་པ་བརྗོད་པའི་ཡལ་འདབ་ལས། བསམ་པ་རིགས་པ་རྣམས་ཀྱི་ཐུགས་དང་ནི། །གནོད་པ་བྱེད་པ་ལ་ཡང་སྙིང་རྗེ་རྒྱས། །དྲག་པོར་གྱུར་པ་
ལ་ཡང་འདབ་ལྟར་མཉེན། །ཞེ་སྡང་ཚ་གདུང་ལ་ཡང་ཤིན་ཏུ་བསིལ། །ཞེས་གསུངས་པ་བཞིན་ནོ། །འོན་ཀྱང་ཆོས་སྲུང་རྣམས་ཀྱི་མཐུས་སྐད་ཅིག་དེ་ཉིད་དུ་ནམ་མཁའ་གཡའ་དག་པ་ལ་གློ་བུར་དུ་རླུང་དམར་དྲག་པོ་འཚུབ་པ་དང་ལྷན་ཅིག་པར་སྤྲིན་ཤིན་ཏུ་མདོག་ནག་ཅིང་མི་སྡུག་པ་འཁྲིགས་ནས་མུན་སྲོས་པ་བཞིན་གྱུར། འབྲུག་སྒྲ་བཟོད་དཀའ་བ་སྒྲོགས་ཤིང་ཕྱོགས་ཀུན་ཏུ་གློག་གི་ཀ་བ་ཟུག་ནས་ཐོག་འཕེན་པ་དང༌། སེར་བ་དྲག་པོ་རྒྱུན་རིང་ཙམ་བབས་པས་ཇག་མི་རྣམས་འཇིགས་ཤིང་དཔའ་ཞུམ་སྟེ་ལུས་སེམས་གཉི་ག་བག་འཁུམ་ནས་ཚུར་འཕྲོག་བཅོམ་བྱེད་རྒྱུ་ལྟ་ཞོག །རང་རང་གར་འགྲོའི་གཏོལ་ཡང་མེད་པས། དཔག་བསམ་འཁྲི་ཤིང་ལས། སྐབས་དེར་གནོད་སྦྱིན་ལག་ན་རྡོ་རྗེས་ཟད་བྱེད་པ་རྣམས་ནི། །བདག་ཉིད་ཀུན་གྱིས་རྟག་ཏུ་བཅོམ་ལྡན་འདས་ཀྱི་མི་མཐུན་ཕྱོགས། །ཡིན་པར་ཤེས་ནས་དྲག་པོའི་རླུང་གིས་དཀྲིས་པའི་ཆར་དག་སྤྲོས། །རྣམ་པར་རྨོངས་ནས་ས་ཡི་ཁུང་བུར་སྐྱབས་པ་དག་ཏུ་བྱས། །ཞེས་པའི་ངང་ཚུལ་དེ་ཁོ་ན་བཞིན་དུ་གྱུར། དེའི་མཚམས་སུ་ཁོ་རང་ཚོའི་ནང་ཕན་ཚུན་ལའང་དོན་མེད་པར་གཅིག་གིས་སྙད་བཙལ་ཏེ་ནང་འཁྲུག་བྱུང་ནས་འཐབ་རེས་བྱས། སྲུང་མས་རྒྱུད་བསྐུལ་བས་བསམ་ཤེས་འགའ་ཞིག་ལ་དོགས་པ་སྐྱེས་ཏེ། ང་ཚོ་ལ་བར་འདིར་དོན་མེད་པར་མི་འགྲིག་པ་ཁོ་ན་ཡོང་བ་འདིའི་རྐྱེན་ད་རེས་ཀྱི་འགྲུལ་པ་འདི་རེག་མི་ཉན་པ་ཞིག་ཡིན་ཚོད་རེད་བྱས་པ་ཀུན་གྱིས་བློར་བབ་སྟེ་ཐམས་ཅད་ཀྱིས་ཁྱེད་རང་ཚོ་བདེ་བར་སོང༌། ཁྱེད་རྣམས་ལ་གནོད་འཚེའི་རིགས་མི་བྱེད་ཅེས་ཞུས་ཤིང་མནའ་བསྐྱལ་ནས་ཕྱིར་ལོག་སྟེ་ཉེར་འཚེ་ཅི་ཡང་མ་བྱུང་བ་
ནི་བྱང་ཆུབ་ཀྱི་སེམས་རིན་པོ་ཆེའི་གཟི་བྱིན་ཡིན་ཏེ། བྱང་ཆུབ་ཆེན་པོའི་སྐྱེས་པའི་རབས་ལས། བསོད་ནམས་གཞི་ལས་འབར་བའི་ཡོན་ཏན་རྣམས། །ནན་ཏན་སྒྲུབ་པའི་བྱིན་གྱིས་དགའ་བར་འགྱུར། །དགྲ་ཡང་རང་གི་གྲགས་པ་བསྲུང་བའི་ཕྱིར། །ལྷག་པར་བཀུར་སྟི་བྱེད་པ་ཉིད་དུ་གྱུར། །ཅེས་གསུངས་པ་བཞིན་ནོ། །ཕ་རོལ་གྱི་གནོད་པ་བརྩམ་པའང་གྲོགས་སུ་འཁྱེར་ནུས་པའི་བདག་ཉིད་ཆེན་པོ་རྣམས་ནི་བློ་སྦྱོང་རྩ་ཚིག་ལས། ཡིད་བདེ་འབའ་ཞིག་རྒྱུན་དུ་བསྒོམ། །གསུངས་པ་ལྟར་ཅི་བྱས་རྒྱན་དུ་འགྲོ་བས་ནམ་ཡང་གནོད་པས་བརྫི་བའི་གོ་སྐབས་མེད་དེ། འཁྲི་ཤིང་ལས། རྣམ་སྔང་སྐྱོན་གྱི་དུག་གིས་ཡིད་ནི་སུན་ཕྱུང་གྱུར་རྣམས་ཀྱིས། །དམ་པ་དག་ལ་གནོད་པ་སྒྲུབ་ལ་འབད་པ་རབ་རྣོ་གང༌། །དེ་ཉིད་གལ་ཏེ་དེ་ཡི་ཡོན་ཏན་རབ་འབར་རྗེས་བྱེད་པར། །གྱུར་ན་སྲིད་འདིར་སུ་ཞིག་རྒྱ་ཆེར་གནོད་དང་ལྡན་པར་འགྱུར། །ཞེས་གསུངས་པ་ལྟར་རོ། །རྩེ་མགྲོན་ཤད་སྡེ་མཁན་པོ་ངག་དབང་མགྲོན་གཉེར་དང༌། ཞབས་གྲས་རྣམས་ནས་ངེད་ཚོ་ངོ་གཡོག་ཉི་ཤུ་རྩ་བདུན་ལས་མེད། ཁོ་རང་ཚོ་གྲངས་ཉིས་བརྒྱ་ལྷག་འདུག་པས། ད་ལམ་སྐྱབས་རྗེ་དམ་པ་སྐུ་ཞབས་རིན་པོ་ཆེའི་ཐུགས་རྗེ་ཁོ་ན་ལ་བརྟེན་ནས་ངེད་རྣམས་ལ་གནོད་པ་མ་བྱུང་བ་མ་གཏོགས། རྒྱུ་ནོར་ཕར་བཞག་སྲོག་ཀྱང་ཐར་དཀའ་བ་འདུག་ཅེས་ཞེ་ཐག་པ་ནས་བཀའ་དྲིན་དང་ཐུགས་རྗེ་དྲན་པའི་ལེགས་སོས་ཆེད་དུ་བརྗོད་པ་དང་གསོལ་བ་འདེབས་པས་དུས་འདའ་བ་བྱུང༌། དེ་ནས་རིམ་པར་བརྒྱུད་དེ་ཉེ་ཞོ་ཅུང་ཟད་ཀྱང་མེད་པར་ཚ་འདམ་རབ་བརྟན་ཛ་སག་
གི་ཨུ་གེར་འབྱོར་ཕྱོགས་དེའི་དད་ལྡན་རྣམས་ལ་ཕྱག་དབང་དང་བྱིན་རླབས་སོགས་མོས་པ་བཞིན་སྩལ། དེ་ནས་བུ་ཧའི་ཆུ་ཁར་བྱོན་དུས་ཕྱག་མཛོད་ཆེ་ཆིང་ཆོས་རྗེ་རབ་འབྱམས་པ་ཚུལ་ཁྲིམས་ཆོས་འཛིན་ངོ་གཡོག་རྣམས་བསུ་བར་འབྱོར་ཏེ་གཞི་བྱེས་ཞལ་འཛོམས་པའི་དགའ་སྟོན་མངོན་དུ་གྱུར། དེ་ནས་ཝང་ཚེ་རིང་དོན་གྲུབ། པེ་ཟི་རཏྣ་སིདྡྷི། ཛ་སག་དའི་ཆིང་རྡོ་རྗེ་བཅས་ཀྱི་ཨུ་རྒེ་རྣམས་ནས་ཕེབས་ལམ་གྱི་ཞོར་ལ་ཇ་འདྲེན་ཞུས་པར་བྱོན་ནས་འདོད་ཆོས་ཀྱང་སྩལ། སྟོན་ཟླ་འབྲིང་བོའི་ཡར་ཚེས་བཅུ་གསུམ་འཕྲོད་སྦྱོར་དགེ་བའི་ཉིན་བསྟན་པའི་གསལ་བྱེད་ཆེ་ཤོས་སྤྲུལ་བའི་སྐུ་ངག་དབང་བཤད་སྒྲུབ་བསྟན་པའི་ཉི་མས་གཙོས་སྐུ་འབུམ་བླ་སྤྱི་ཐུན་མོང་ནས་རྟ་བསུ་དང༌། བསྟན་པའི་སྣང་བྱེད་སྟག་མཚེར་སྤྲུལ་བའི་སྐུ་བློ་བཟང་མཁས་གྲུབ་ཉི་མ་སེར་སྦྲེང་གི་མགོར་བཞུགས་ཤིང༌། ཚོགས་ཆེན་ཞལ་ངོ༌། བླ་བྲང་ཕྱག་མཛོད། སྐུ་རྟེན་ཆོས་རྗེ། སྤྱི་གཉེར་ཚོ་པ་དྲུག་གི་རྒན་པ་སོགས་ལས་སྣེའི་རིགས་དང་ཆེན་པོའི་ཡོ་བྱད་བསྒྲེངས་པའི་མཆོད་རྫས་འཛིན་པ་རྣམས་དང༌། དགེ་འདུན་སུམ་སྟོང་ལྷག་གི་སེར་སྦྲེང་དང་བཅས་ཆོས་སྡེ་ཆེན་པོ་སྐུ་འབུམ་བྱམས་པ་གླིང་གི་ཕུན་ཚོགས་འདོད་པ་འཇོ་བའི་རང་སྒར་དུ་འཇིགས་བྲལ་གདོང་ལྔས་བཏེག་པའི་ཁྲི་འཕང་མཐོན་པོར་ཞབས་སེན་བཀོད། སྐུ་འབུམ་སྤྱི་ནས་འདུ་ཁང་ཆེན་མོར་ཚོགས་ཆེན་གྱི་ཚོགས་དབུར་གདན་དྲངས། དགེ་འདུན་སུམ་སྟོང་བརྒྱད་བརྒྱ་ལྷག་ལ་ཕྱག་དབང་དང་ལམ་གཙོའི་ཁྲིད་རྒྱས་པ་ཞིག་སྩལ། བསྟན་པའི་སྒྲོན་མེ་རྒྱུད་པ་བླ་ཟུར་ཆེ་ཤོས་སྤྲུལ་བའི་སྐུ་རིན་པོ་ཆེས་མཎྜལ་བཤད་པ་འབུལ་བ་དང་བཅས་འདུས་ཚོགས་
ཡོངས་ནས་བརྟན་བཞུགས་ཕུལ། ཉིད་ནས་སྐུ་འབུམ་འདུས་སྤྱིའི་རྟེན་དུ་༸རྒྱལ་དབང་ཐམས་ཅད་མཁྱེན་པར་ཞུས་ནས་གདན་དྲངས་པའི་ཐུབ་དབང་གི་སྐུ་བརྙན་འདུ་ཁང་ཆེན་མོར་བཞུགས་སུ་བཅུག །པཎ་ཆེན་རིན་པོ་ཆེར་ཞུས་ནས་འདུས་སྤྱིར་བསླབ་བྱ་གནང་བའང་དགེ་འདུན་མང་གི་སྙན་ལམ་དུ་སྒྲོགས་སུ་བཅུག །དེ་ནས་ཁྲི་ཀའི་ཕྱོགས་སུ་བྱོན་ཏེ་རྟེན་ལ་མཆོད་འབུལ་དང༌། ཆོས་སྲུང་རྣམས་ལ་དབུས་ཕེབས་ཀྱི་འཕྲིན་ལས་ཚུལ་བཞིན་སྒྲུབ་པའི་བཀའ་དྲིན་གཏང་རག་གི་མཆོད་སྒྲོན་སླད་ཀྱིའང་འཕྲིན་ལས་བཅོལ། མཆོད་རྟེན་དཀར་པོའི་བླ་བྲང་དུ་ཟླ་བ་གཅིག་གི་རིང་ལ་བཞུགས་ཏེ་སྐུ་ངལ་བསོ་ཞིང་ཉམས་བཞེས་ཀྱི་རྒྱུན་བསྐྱངས། དེ་ནས་སྐུ་འབུམ་དུ་ཕེབས། ཨོར་དུ་སུའི་ཤོག་གི་ཐོ་ཡོན་ངོ་གཡོག་བཅས་ནས་ཞུས་པ་བཞིན་དགེ་འདུན་ལྔ་བརྒྱ་ལྷག་ཙམ་ལ་གསང་འདུས་ཀྱི་དབང་སྟ་གོན་དང་བཅས་པ། འཇམ་དབྱངས་ནག་པོ། ཤྲ་མ་ཎ། སེང་གདོང་མ་ནག་མོ་གཙོ་འཁོར་གསུམ་པ་དང་དམར་པོ་གཉིས། གཙུག་ཏོར་རྣམ་རྒྱལ། ཛམྦྷ་ལ་སེར་པོ་སོགས་ཀྱི་རྗེས་གནང༌། བྱང་ཆུབ་བདེ་ལམ་གྱི་ལུང་ཁྲིད་བཅས་སྩལ། རྗེ་རིན་པོ་ཆེའི་དུས་མཆོད་དགའ་ལྡན་ལྔ་མཆོད་ཆེན་མོའི་སྐབས་ཉིན་བདུན་གྱི་རིང་ལ་ཚོགས་ཆེན་འདུ་ཁང་གི་རབ་གསལ་དུ་བླ་མཆོད་དུས་བཟང་གི་ཚོགས་མགོར་ཕེབས་ཏེ་བསྟན་འགྲོ་མཐའ་དག་ལ་དགོངས་པའི་ཐུགས་ཀྱི་དགོངས་པ་གང་ལེགས་མཛད། དེ་ནས་འཇམ་མགོན་བསྟན་པའི་རྩ་ལག་དམ་པ་ཨ་ཀྱཱ་ནོ་མིན་ཧན་རིན་པོ་ཆེ་རྒྱལ་ཁབ་པཻ་ཅིང་ནས་མདོ་སྨད་དུ་བྱོན་པའི་བསུ་བ་ལ་
ཕེབས་ཏེ་ཟི་ལིང་དུ་མཇལ་ཕྲད་གནང་ཞིང་སྐུ་འབུམ་ཆོས་སྡེར་ལྷན་དུ་ཕེབས། དེ་སྐབས་རྗེ་འདི་པའི་སྐུ་ཅུང་ཞིག་བསྙུང་ཚུལ་བསྟན་པར་བརྟེན་ཨ་ཀྱཱ་བླ་བྲང་ཉིད་དུ་རྗེ་འདི་པ་གདན་དྲངས་ནས་ཨ་ཀྱཱ་རིན་པོ་ཆེས་བླ་མཆོད་དུས་བཟང་དང་འབྲེལ་བའི་ཞབས་བརྟན་གནད་སྨིན་ཕུལ་བས་རྟེན་འབྲེལ་གྱི་ཞལ་བཞེས་བཟང་པོ་གནང༌། ཡང་བསྐྱར་ཨ་ཀྱཱ་བླ་བྲང་ནས་ཚོགས་ཆེན་འདུ་ཁང་གི་རབ་གསལ་དུ་རྗེ་རིན་པོ་ཆེ་གསུང་འབྱོན་མའི་མདུན་ལ་རྗེ་འདི་པ་བླ་མཆོད་དུས་བཟང་གི་ཚོགས་དབུར་གདན་དྲངས་པ་བཞིན་ཕེབས་ཏེ་བསྟན་པ་རྒྱས་པའི་ཐུགས་སྨོན་མཛད། ཨ་ཀྱཱ་རིན་པོ་ཆེས་རྗེ་འདི་པའི་མཛད་སྤྱོད་དང་གསུང་འབྱོན་ལུགས་སོགས་སྔར་ལས་ཆེས་འགྱུར་འདུག་ཅིང༌། ཁྱད་པར་འཁོར་བ་ལ་སྐྱོ་བའི་ཚུལ་གནང་སྟེ་ཐུགས་ཀྱི་བཞེད་པ་ཞིང་གཞན་ལ་གཏད་པ་མཁྱེན་ནས་འཕྲལ་དུ་གསོལ་དཔོན་འཇམ་དབྱངས་ཉི་མ་ལ་ལྷ་རྫས་མཛོད་བཏགས་དྲི་མ་མེད་པ་སྲིད་དུ་རིང་བ་ཞིག་གནང་ནས་རྗེ་འདི་པའི་སྐུ་མདུན་དུ་མངགས་ཏེ་སྙིགས་མའི་ངང་ཚུལ་ལ་སྐྱོ་ངལ་གྱི་རྣམ་པ་མི་མཛད་པར་བསྟན་འགྲོའི་མགོན་དུ་རླབས་ཆེན་ཐུགས་བསྐྱེད་ཀྱི་གོ་ཆ་ལྷག་པར་བགོས་ཏེ་ཞབས་པད་ཡུན་རིང་བརྟན་པའི་ཞལ་བཞེས་བཟང་པོ་སེམས་ལ་འཛིན་རྒྱུ་ཡོད་པ་ཞིག་ཅིས་ཀྱང་ནས་གནང་དགོས་ཚུལ་སྐུ་ཕྲེང་སྔ་ཕྱིའི་ཐུགས་འབྲེལ་དམ་ཚིག་ཚུན་ཆད་ལ་བཀར་བའི་ཞུ་བ་དམར་འབྱིན་ཨུ་ཚུགས་མཐར་སྐྱེལ་གྱིས་ཞིབ་རྒྱས་སུ་ཞུས་པར། ཉིད་ནས་གསོལ་དཔོན་ལ་ཐུན་མོང་གི་གསུང་ལན་རྒྱས་པ་ཞིག་སྩལ་ཅིང༌། ནང་སྦྱར་ཐུན་མོང་མ་ཡིན་པའི་དགོངས་གཞི་དགོས་པ། འོན་ཀྱང་ཉིད་ཀྱི་ཐུགས་ཐག་པས་གསུང་ནན་མཛད་
པ་ཟློག་ཚུལ་མེད་པས་ལོ་ཁ་ཤས་ལ་བཞུགས་རྒྱུའི་གནས་ཚུལ་རྣམས་རང་ཉིད་ཀྱིས་ཕྱག་བྲིས་མཛད་དེ་རྒྱས་བཏབ་ནས་མགྲོན་གཉེར་རབ་འབྱམས་པ་ངག་དབང་བསྟན་འཛིན་ལ་གནང་སྟེ། རྗེ་ཨ་ཀྱཱ་རིན་པོ་ཆེའི་དྲུང་དུ་ཕུལ་བར། ཁོང་གིས་གཟིགས་ཏེ་ཕྱག་ཐལ་མོ་སྦྱར་ནས་ཕ་བླ་མ་རྡོ་རྗེ་འཆང་ཆེན་པོ་ཞབས་པད་བརྟན་པར་བཞུགས་པའི་ཞལ་བཞེས་བློ་གདེང་ཐུབ་པའི་གསུང་རྡོ་རྗེ་ཚིག་འདི་འདྲ་སྩལ་བ་ནི་བཀའ་དྲིན་ངེས་པར་བསམ་གྱིས་མི་ཁྱབ་འདུག་འདི་རྨི་ལམ་མིན་ནམ་གསུང་སྟེ། དང་པོར་མཛད་སྤྱོད་ལ་ཡིད་མ་ཆེས་པས་བློ་འཁུལ་བྱུང་ཚུལ། དེ་ནས་གདུང་ཤུགས་ཀྱིས་གསོལ་བ་བཏབ་པས་བརྩེ་བས་གཟིགས་ཏེ་ཞལ་བཞེས་ཡིད་ཚིམ་པ་གནང་བ་ལ་སྤྲོ་དགའ་ཚད་མེད་པ་སྐྱེས་པའི་ཆེད་དུ་བརྗོད་པ་རྣམས་མགུར་དབྱངས་ཀྱི་ཚུལ་དུ་ཞུས་པ་ནི། རྗེ་དུས་གསུམ་གྱི་སངས་རྒྱས་འདུས་པའི་སྐུ། །ཕ་དྲིན་ཅན་གྱི་བླ་མ་རྡོ་རྗེ་འཆང༌། །འབངས་དད་གདུང་གི་ཤུགས་ཀྱིས་གསོལ་འདེབས་ན། །ཕ་བརྩེ་ཆེན་གྱི་ངང་ནས་ཡུད་ཙམ་དགོངས། །མགོན་རྡོ་རྗེ་འཆང་ཆེན་རང་གཤིས་ལ། །བགྲེས་རྒུད་ཀྱི་སྤྲོ་བ་མ་མཆིས་ཀྱང༌། །དེང་རང་རེ་སྙིགས་དུས་སློབ་འབངས་ཀྱི། །ཆུ་བུར་གྱི་མིག་གི་སྣང་ངོ་ལ། །སྐུ་བགྲེས་ཤིང་བསྙུན་པའི་ཚུལ་ཞིག་མཛད། །ཚུལ་འདིས་ཀྱང་ཅུང་ཟད་ཡིད་མ་ཆེས། །གསུང་ཚངས་དབྱངས་འགག་པ་མ་མཆིས་ཀྱང༌། །གསུང་ཞན་ཅིང་གྲེ་བབ་སྙུང་ཚུལ་བསྟན། །ཡོངས་འབེལ་གཏམ་ཉུང་ཞིང་སྐྱོ་ཚིག་མང༌། །ཚུལ་འདིས་ཀྱང་ཅུང་ཟད་ཡིད་མ་ཆེས། །ཐུགས་རྣམ་ཀུན་མཁྱེན་པའི་ཡེ་ཤེས་ལ། །སྐྱོ་འཁྲུལ་དང་རྣམ་རྟོག་མི་སྲིད་
མོད། །ཡོངས་སྐྱོ་ཤས་ཁོ་ནས་འདའ་བར་མཛད། །ཚུལ་འདིས་ཀྱང་ཅུང་ཟད་ཡིད་མ་ཆེས། །དོན་དེ་སླད་སློབ་བུའི་ཐ་ཤལ་བདག །སེམས་ལས་ཀྱི་ཁུར་བོས་ནོན་ན་ཡང༌། །ཅི་བྱེད་ཀྱི་བློ་ལྷུས་མ་ཐིངས་པར། །ཞག་ཤས་ཤིག་འགྱང་ཞིང་ཐལ་བར་གྱུར། །དེ་རྗེས་སུ་དབེན་པའི་རི་སུལ་འདིར། །གཅིག་པུ་རང་མནོ་བསམ་བཏང་བའི་ཚེ། །འཛེམ་མེད་དུ་ཞུ་དགོས་སྤོབས་པ་སྐྱེས། །རིང་འདྲིས་ཀྱི་ཉེ་གནས་ཉི་མ་ལ། །སྙིང་གཏམ་གྱི་ཚིག་གསུམ་རྗེན་འབུལ་ཞུས། །ཕྲིན་ལས་ཀྱི་བྱེད་པོ་རྣམས་ལ་ཡང༌། །ནང་ཉམས་ཀྱི་དྲང་གཏམ་ལྷུག་པར་སྨྲས། །གང་ཞུས་ཀྱི་དོན་འདིར་བརྩེར་དགོངས་ནས། །སྐྱོ་ངལ་གྱི་ཐུགས་འདུན་རྒྱང་བསྲིངས་ཏེ། །བསྟན་འགྲོ་ཡི་ཕན་བདེ་རླབས་པོ་ཆེ། །ཡུན་མཛད་ཀྱི་རྡོ་རྗེའི་བཀའ་བཞེས་དང༌། །བདེན་གཏམ་གྱི་ཕྱག་རིས་སྤྱི་བོར་འབྱོར། །ཚུལ་འདི་ལྟའི་རབ་དགའི་བདེ་བ་འདི། །མངོན་སུམ་མམ་འོན་ཏེ་རྨི་ལམ་ལགས། །ཡོངས་རྨི་ལམ་ལགས་ཀྱང་མི་སད་སྙམ། །དོན་འགྱུར་མེད་ཀྱི་རྡོ་རྗེའི་ཐ་ཚིག་འདིས། །བདག་སྙིང་ལ་བདེ་དགའ་མངོན་དུ་བྱིན། །དད་གདུང་གི་རླབས་ཀྱིས་ཆེར་བསྐྱོད་དེ། །ཞུ་ཚིག་གི་སྙིང་པོ་དགུང་དུ་འཕྱུར། །ཕྱག་ཟུང་གི་སྙིམ་པས་བཟུང་ནས་ཀྱང༌། །ཟབ་བརླིང་གི་རྒྱ་མཚོར་སིམ་པ་མཁྱེན། །ཞེས་ཐོལ་བྱུང་དུ་གསོལ་བ་འདེབས་པའི་ཞུ་ཚིག་དད་གུས་ཀྱི་སྙིང་པོ་མུ་ཏིག་གི་ཕྲེང་བ་ཞེས་པ་འདི་ཟླ་༡༡ ཚེས་༢༡ དགེ་བའི་ཉི་དྲོས་ལ་དབེན་པའི་རི་སུལ་སེང་གེའི་རི་ཁྲོད་ནས་སློབ་བུའི་ཐ་ཤལ་སྣང་མཛད་དགྱེས་བཞད་རྡོ་རྗེས་བཀྲ་ཤིས་པའི་ལྷ་རྫས། བཀྲ་ཤིས་རི་མོས་སྤྲས་པའི་ཌམ་རྫར། འགྱུར་མེད་རྡོ་རྗེས་མཚན་པའི་
རྟེན་ཁེབ་བཅས་གུས་ཕྱག་དང་བཅས་གསོལ་བ་བཏབ་པ་ལགས། ཞེས་པའོ། །ཁྱི་ཕག་གཉིས་ཀྱི་ལོ་གསར་རྙིང་གི་མཚམས་འདིར་ལྷག་པར་ཐུགས་སྣ་བསྟུང་བའི་རྣམ་པ་མཛད་པ་ནི། རྗེས་མའི་ལོ་མགོར་ཡང་དབུས་ནས་༸རྒྱལ་དབང་ཐམས་ཅད་མཁྱེན་པ་དག་ཞིང་དུ་ཕེབས་འདུག་པས་དུས་ཚོད་དེ་འདྲ་ཞིག་ལ་རྗེ་འདིའང་ཞིང་ཁམས་གཞན་དུ་འབྱོན་རྒྱུའི་དགོངས་བཞེད་ཡིན་འདུག་ནའང༌། སྔོན་སྟོན་པས་སྐུ་ཚེའི་འདུ་བྱེད་བཏང་བའི་རྗེས་སུ། གསོལ་བ་བཏབ་པས་ཟླ་བ་གསུམ་དུ་སྐུ་ཚེའི་འདུ་བྱེད་བྱིན་གྱིས་བརླབས་ནས་བཞུགས་པ་བཞིན། ཨ་ཀྱཱ་རིན་པོ་ཆེས་ཞུ་ནན་ཧ་ཅང་ཆེ་བའི་ཞལ་ངོ་མ་བཟློག་པར་ཁོང་བཞུགས་རིང་གི་ལོ་ཆ་ཤས་ལ་ཉིད་ཀྱིས་ཀྱང་ཐུགས་འཕེན་ཕྱིར་བསྣུར་བ་ཡིན་པར་གདོན་མི་ཟའོ། །ལོ་མཇུག་ལ་སྐུའི་ཁམས་ཧ་ཅང་སེང་དྭངས་ཤིག་མེད་ཀྱང་དེ་ལ་ཐུགས་སྣང་མི་མཛད་པར་བཅད་རྒྱ་དམ་པོའི་སྒོ་ནས་ཡི་དམ་གྱི་ལྗགས་བསྙེན་མཛད་ཅིང༌། རྗེ་བཙུན་རྡོ་རྗེ་རྣལ་འབྱོར་མའི་དཀྱིལ་འཁོར་བསྒྲུབ་པ་དང་དབང་ལེན་པ་སོགས་ཀྱང་གནད་སྨིན་མཛད། དེ་ནས་དགུང་ལོ་རེ་གཅིག་པ་ན་ཚོད་ལྡན་ཞེས་པ་ཤིང་ཕག་གི་གནམ་ལོ་གསར་བཞད་ཀྱི་ཉིན་སྐུ་ཚ་ཞབས་དྲུང་སྐལ་བཟང་བསྟན་འཛིན་རྒྱ་མཚོ་དང༌། ཕྱག་མཛོད་ཆེ་ཆིང་ཆོས་རྗེ་གཉིས་ཀྱིས་གཙོས་པའི་གྲྭ་རིགས་ཐུན་མོང་ནས་མཁའ་འགྲོའི་བརྟན་བཞུགས་དང་འབྲེལ་བའི་སྒོ་ནས་ཞབས་བརྟན་ཕུལ། རྒྱར་རྩང་སྒོམ་ཆེན་ཨ་ཀྱཱ་བླ་མ་དགེ་ལེགས་ཀྱི་སྤྲུལ་སྐུའི་གཙུག་ཕུད་བཞེས་ནས། མཚན་བློ་བཟང་དགེ་ལེགས་ཉི་མ་ཞེས་འདོགས་པར་མཛད། རྗེ་ཨ་ཀྱཱ་རིན་པོ་ཆེ་བྱོན་ནས་ལོ་གསར་གྱི་
མཇལ་ཁ་ཞུས་ཤིང་བརྟན་བཞུགས་རྒྱས་པ་ཕུལ། དེ་ནས་རྣམ་པ་གཉི་ག་དབེན་གནས་དགའ་ལྡན་ཆོས་སྡིངས་སུ་ཕེབས་ཏེ་ཞག་ཁ་ཤས་བཞུགས། དེའི་རིང་ལ་ཨ་ཀྱཱ་རིན་པོ་ཆེར་ནཱ་རོ་མཁའ་སྤྱོད་མའི་དབང་དང་གཞན་བཀའ་ཆོས་མང་པོ་ཐུགས་ཀྱི་བཞེད་པ་བཞིན་དུ་སྩལ། ཨ་ཀྱཱ་རིན་པོ་ཆེས་སླར་ཡང་བླ་མཆོད་ཀྱི་དུས་བཟང་དང་འབྲེལ་བའི་ཞབས་བརྟན་ཞིག་ཀྱང་འབུལ་བར་མཛད། ཨ་ཀྱཱ་བླ་བྲང་དུ་ལྷ་མོའི་རྟེན་མདོས་བཞེངས་རྒྱུར་རྫས་དང་བཅས་ཤོམ་སོགས་ཇི་ལྟར་བྱེད་དགོས་པ་ཐམས་ཅད་ལ་ཉིད་ནས་ལྗགས་བཀོད་ཞིབ་མོ་བཀའ་དྲིན་སྐྱོང་དགོས་ཚུལ་ཞུས་པ་ལྟར་ཁུར་བཞེས་ཀྱིས་བཀོད་ཁྱབ་མཛད་ནས་བཞེངས་ཏེ་ནང་རྟེན་དུ་བཞུགས་སུ་བཅུག་པར་རབ་གནས་སོགས་ཀྱང་མཛད། དུས་རྒྱུན་པར་ཡང་ཨ་ཀྱཱ་རིན་པོ་ཆེས་ཆོས་སྲིད་ཀྱི་སྐུ་དོན་གལ་ཆེ་བ་གང་གི་ཐད་དུའང་རྗེ་འདི་པར་དགོངས་བསྟུན་གྱིས་གནང་བ་མ་གཏོགས། བཀའ་གྲོས་མེད་པར་ཉིད་ཀྱི་ཐུགས་བཞེད་རྐྱང་པ་ལྟར་ཡེ་མི་མཛད་པས། དེའི་རྒྱུ་མཚན་ཨ་ཀྱཱ་རིན་པོ་ཆེ་ཉིད་ཀྱི་ཞལ་ནས། བདག་གི་བྱ་བ་ཐམས་ཅད་རྗེ་མི་ཉག་རྡོ་རྗེ་འཆང་ཆེན་པོར་ཞུས་ནས་སྒྲུབ་ན་བླ་མའི་གསུང་གི་བྱིན་རླབས་དང་ཐུགས་རྗེས་ལས་དོན་དེ་དཀའ་ཚེགས་མེད་པར་འགྲུབ་ཡོང་བར་འདུག་གསུང༌། ཕྱིན་ཆད་ཀྱང་བློ་གཏད་ས་སྐྱབས་མགོན་ཉིད་ལས་གཞན་མ་མཆིས་པས་ཐུགས་ལ་འཛིན་དགོས་ཞེས་ཡང་ནས་ཡང་དུ་ཞུ་བ་གནང༌། དེ་ནས་རྗེ་ཨ་ཀྱཱ་རིན་པོ་ཆེ་རྒྱ་ནག་ཏུ་འབྱོན་ཁར། རྗེ་འདི་པས་ལྷ་རྫས་ནང་མཛོད། མཎྜལ། སྐུ་གསུང་ཐུགས་རྟེན། སྐུའི་ཉེར་སྤྱད་ཆ་ཚང༌། སྣམ་ཐེར་བུབ་དུ་མ་སོགས་ཀྱི་དངོས་འབུལ་དང་བཅས་བརྟན་བཞུགས་ཕུལ། རྗེ་ཨ་ཀྱཱ་རིན་པོ་ཆེས་
ཉིད་ལ་འཕྲལ་ཕུགས་ཀྱི་གནས་ཚུལ་རྣམས་ཞིབ་ཏུ་ཞུས་ཤིང་ཚེ་རབས་ཀྱི་ཕྲེང་བར་འབྲལ་མེད་རྗེས་འཛིན་གྱི་སྐྱབས་འཇུག་ཞུས། རྗེ་འདི་པས་དམ་པ་ཉིད་ཀྱི་སྐུ་ཚེ་མཛད་ཕྲིན་སོགས་ཀྱི་ཆེད་དུ་དམིགས་ཏེ་དཀོན་མཆོག་ལ་གསོལ་འདེབས་དང་ཆོས་སྲུང་ལ་ཕྲིན་བཅོལ་སོགས་བྱེད། རྒན་བུ་ང་ལའང་ཚེ་རབས་ཀུན་ཏུ་ཐུགས་ནས་མ་བོར་བའི་སྐྱབས་འཇུག་གནང་དགོས་ཞེས་ཕན་ཚུན་སྐྱབས་འཇུག་ཞུ་རེས་མཛད་དེ་ཨ་ཀྱཱ་རིན་པོ་ཆེ་རྒྱ་ནག་ཏུ་ཆིབས་ཁ་བསྒྱུར། དེ་རྗེས་ཉིད་ཨ་ཀྱཱ་བླ་བྲང་དུ་བྱོན་ཏེ་ནང་རྟེན་སྒྲོལ་མ་གསུམ་གྱི་སྐུ་བརྙན་ལ་གཟུངས་འབུལ་ཉིད་ཀྱིས་གནང་དགོས་པའི་རྒྱུ་མཚན་སྔར་ཞུས་ཡོད་པ་ལྟར་རིང་བསྲེལ་རྣམ་བཞིས་བསྡུས་པའི་གཟུངས་གཞུག་རྒྱུད་སྡེའི་དགོངས་པ་བཞིན་ལེགས་པར་ཕུལ་ཏེ་རབ་གནས་ཀྱང་མཛད། ཨོར་དུ་སུ་ཤོག་གི་སྨན་པ་བླ་མ་དཀོན་མཆོག་རབ་རྒྱས་ཀྱིས་ཞུས་པ་ལྟར། མ་ཎི་བཀའ་འབུམ། རྒྱུད་བཞི། མན་ངག་བཀའ་རྒྱ་མ་སོགས་ཀྱི་ལུང་དགེ་འདུན་བརྒྱ་ལྷག་ཙམ་ལ་སྩལ། དེ་ནས་གསེར་སྐུ་ཆེ་ཆུང་མང་པོ་དང་ཞལ་ཐང་མང་པོ། བཀའ་འགྱུར་ཆ་ཚང༌། རྗེ་ཡབ་སྲས་ཀྱི་བཀའ་འབུམ་སོགས་གླེགས་བམ་བརྒྱ་དང་དགུ་བཅུ་ལྷག །བཀའ་གདམས་མཆོད་རྟེན་སོགས་སྐུ་གསུང་ཐུགས་རྟེན་དུ་མ་སྐུ་འབུམ་མི་ཉག་བླ་བྲང་ནས་ཁྲི་ཀའི་མཆོད་རྟེན་མི་ཉག་བླ་བྲང་དུ་མཆོད་པའི་རྟེན་ལ་གདན་དྲངས། དབྱར་ཟླ་འབྲིང་པོའི་ནང་དུ་ཧལ་ཧའི་ཕྱོགས་ཀྱི་བླ་མ་འགའ་ཞིག་གིས་ཞུས་པ་ལྟར། རྗེ་ཐུའུ་བཀྭན་རིན་པོ་ཆེའི་གསུང་འབུམ་པུ་ཏི་བརྒྱད་ཙམ་གྱི་ལུང་དགེ་འདུན་ལྔ་བཅུ་སྐོར་ལ་སྩལ། །རི་ཁྲོད་པ་དཀོན་མཆོག་སྙན་གྲགས་ཀྱིས་གཏོར་མ་
བརྒྱ་རྩའི་ཁྲིད་ཞུས་པ་ལྟར་ལག་ལེན་དམིགས་རྣམ་ཕན་ཡོན་དང་བཅས་གསུང་བཤད་ཞིབ་རྒྱས་སུ་སྩལ་བས། ལྷ་རྫས། བཀའ་གདམས་མཎྜལ། སྐུ་བརྙན། ལམ་རིམ། བློ་སྦྱོང༌། འདུལ་བའི་སྐོར་དང༌། བདེ་ལམ་ཟིན་བྲིས་སོགས་གསུང་རབ་པུ་ཏི་བཅུར་ཉེ་བ། ཐུགས་རྟེན། འཚོ་བའི་ཡོ་བྱད་ལྷུང་བཟེད་སོགས་བདོག་པ་ཅི་འབྱོར་ཡོད་འབུལ་ལྟ་བུ་བྱས་ཏེ་སྙིང་ཁུང་རུས་པས་ཞབས་བརྟན་གྱི་ཞུ་བ་རྣམ་དག་ཕུལ། སྐྱེ་ཞིང་སྐྱེ་བར་རྗེ་ཉིད་དང་མི་འབྲལ་བའི་སྐྱབས་འཇུག་ཀྱང་ནན་ཏན་ཞུས་པར་བརྩེ་བའི་ཞལ་བཞེས་བཟང་པོ་གནང༌། འཇམ་མགོན་བསྟན་པའི་གསལ་བྱེད་ཆེ་ཤོས་སྤྲུལ་བའི་སྐུ་རིན་པོ་ཆེས་ཀུན་རིག་རྒྱུད་དོན་གསལ་བའི་སྟེང་ནས་ཕྱག་རྒྱའི་སྐོར་དང་དཀའ་གནད་ཀྱི་དོགས་གནས་ཅི་རིགས་ཞུས་པ་རྣམས་ཞིབ་ཏུ་ཁྲིད་པ་གནང༌། སྐུ་འབུམ་རྒྱུད་གྲྭའི་འདུ་ཁང་ཁྱམས་ཀྱི་ལོགས་རིས་སྟོན་པའི་སྐྱེས་རབས་ཀྱི་བཀོད་པ་རྣམས་བགྲེས་སྐྱོན་ཆེར་ཞུགས་པ་ལ། བསྟན་པའི་སྲོག་ཤིང་ཨ་ཀྱཱ་རིན་པོ་ཆེས་གསར་བཞེངས་ཀྱི་མཐུན་རྐྱེན་སྩལ་ཏེ། ཕྱག་མཛོད་ཆི་ཆིང་ཆོས་རྗེ་རབ་འབྱམས་པ་ཚུལ་ཁྲིམས་ཆོས་འཛིན་དང་བྱིང་འདྲེན་ཟུར་བ་དགེ་སློང་ཤེས་རབ་རིག་འཛིན་གཉིས་ལས་དཔོན་དུ་བསྐོས་ནས། བཞེངས་ལུགས་ཀྱི་ས་བཅད་གོ་རིམ་སོགས་ཉིད་ཀྱིས་ཞལ་བཀོད་གནང་དགོས་ཞེས་ཞུས་པ་ལྟར་ལྷ་བཟོ་བ་རྣམས་ལ་སྔར་རྒྱུན་དང་བསྟུན་པའི་གོ་རིམ་མ་འཆོལ་ཞིང་སྐུའི་བབ་ཚོན་གྱི་མདངས་སོགས་ཐིག་ལྡན་གང་མཛེས་དགོས་པའི་བཀོད་ཁྱབ་སྩལ་ཏེ་བཞེངས་སུ་བཅུག །གཙོ་སྐུ་ཆེ་བ་རྣམས་ལ་ཁ་བྱང་གསོལ་འདེབས་ཀྱི་ཚིགས་བཅད་ཀྱང་ལྗགས་རྩོམ་མཛད། དབྱར་ཟླ་ཐ་མ་ནས་སྟོན་ཟླ་འབྲིང་
པོའི་བར་ཐན་པ་མེ་འབར་བ་ལྟ་བུས་མི་ཕྱུགས་དང་ལོ་ཏོག་ཀུན་ལ་གནོད་ཚབས་ཆེ་བ་བྱུང་བས། ཚོགས་ཆེན་ཞལ་ངོ་སོགས་ལས་སྣེའི་རིགས་ནས་ཆོས་སྐྱོང་ལ་ལུང་ཞུས་བྱས་པ་ལྟར། རྒྱུད་སྨན་གཉིས་ཀྱི་དཔོན་སློབ་ལས་ཐོག་པ་དང་ཟུར་བ་སོགས་དགེ་འདུན་ཉེར་གཅིག་རེ་བཅས་ལན་དུ་མར་ལྷ་ཁང་ཆེན་མོའི་ནང་དང་ཆུ་མགོ་སོགས་སུ་བྱོན་ནས་དམིགས་བརྩེ་མའི་ལས་ཚོགས་ནང་གི་ཆར་འབེབས་ཀྱི་སྒྲུབ་པ་བྱས་ཤིང༌། དགེ་འདུན་སུམ་སྟོང་བརྒལ་བས་ཀྱང་རྒྱབ་སྐྱོར་གྱི་རིམ་གྲོ་དང༌། སྤྱན་འདྲེན་ཁྲུས་གསོལ། དམིགས་བརྩེ་མ་སོགས་རྒྱ་ཆེར་བསྒྲུབས་ནའང་སེམས་ཅན་སྤྱི་མཐུན་གྱི་ལས་དབང་བཙན་པས་ཆར་མ་བབས་ཤིང༌། ཚ་བས་གདུངས་པས་རི་ཀླུང་ཐམས་ཅད་དམར་ཧང་ངེ་བ་སེར་སྐྱའི་གྲོང་ལྟ་བུར་གྱུར་པས། རྗེ་ཉིད་ནས་ཀྱང་ཐན་པ་འདིས་ལོ་ཕྱུགས་ཀུན་ལ་གནོད་པ་ཆེ་བར་འདུག །ཆར་འབེབས་ཤིག་བྱས་ན་དགོངས་པའི་ཐོག་ཏུ། ཚོགས་ཆེན་ཞལ་ངོ་དང་བླ་སྤྱིའི་ཕྱག་གཉེར་སོགས་ནས་ཡང་བསྐྱར་ཆོས་སྐྱོང་ལ་ལུང་ཞུས་བྱས་པར། རྗེ་འདི་པས་ཆར་འབེབ་གནང་དགོས་ལུང་བསྟན་སྩལ་བ་ལྟར། ཐམས་ཅད་འདུན་པ་ཆིག་དྲིལ་གྱིས་ཉིད་ལ་ཆར་འབེབས་ཀྱི་སྙན་གསན་ཕུལ་ནས་གསོལ་བ་བཏབ་པས་འཕྲལ་རང་ལ་ཚོགས་ཆེན་འདུ་ཁང་གི་རབ་གསལ་དུ་རྗེ་གསུང་འབྱོན་མའི་མདུན་དུ་ཕེབས། སྒྲུབ་གྲོགས་དགེ་བཤེས་བཞི་དང་བཅས། སྐྱབས་སེམས་ཡན་ལག་བདུན་པ་མཎྜལ་དང་བཅས་པ། ཐུན་དྲུག་གི་རྣལ་འབྱོར། བླ་མའི་རྣལ་འབྱོར་སོགས་ཀྱིས་ཐོག་དྲངས་ཡི་དམ་རྡོ་རྗེ་འཇིགས་བྱེད་ཀྱི་མངོན་རྟོགས་
བཟླས་པ་དང་བཅས་པ་སྔོན་དུ་འགྲོ་བས་དམ་ཅན་ཆོས་ཀྱི་རྒྱལ་པོའི་བསྐང་བཤགས་ཚར་ཁ་ཤས་གསུང་ནས་ཕྱོགས་བཞིར་དྲུག་ཅུ་པ་བསྔོས། གཞི་བདག་ལ་བསང་དང་གཏོར་བསྔོ་གནང༌། དངོས་གཞི་དམིགས་བརྩེ་མའི་ལས་ཚོགས་ལྟར་དང༌། རྒྱབ་ཆོས་གཏོར་མ་བརྒྱ་རྩ། ཀླུ་གཏོར། འབྱུང་གཞི་གཏོར་མ་བཅས་ཉིན་གསུམ་གྱི་རིང་ལ་བསྒྲུབས་པས་ཆར་གྱི་རྒྱུན་འཇམ་པོ་ཟད་མི་ཤེས་པ་ཉིན་མཚན་ཁོར་ཡུག་ཏུ་བབས་ནས་མི་འཇིགས་པ་སྐྱབས་ཀྱི་སྦྱིན་པས་མི་ཕྱུགས་ལོ་ཏོག་སོགས་ཀུན་གྱི་དབུགས་གསོས་པར་མཛད་དེ་ཐུགས་རྗེ་དང་བཀའ་དྲིན་གཞལ་བར་དཀའ་བའི་གནས་སུ་གྱུར། དེ་ནས་ཡུན་རིང་པོའི་བར་དུ་བཅད་རྒྱ་དམ་པོས་ལམ་ཐུན་མོང་དང་ཐུན་མོང་མ་ཡིན་པའི་ཉམས་བཞེས་ཏིང་འཛིན་བདུད་རྩིའི་ཟིལ་མངར་ལ་གཅིག་ཏུ་རོལ་བར་མཛད། དགུན་ཟླ་དང་པོར་རྗེ་རིན་པོ་ཆེའི་དུས་མཆོད་སྐབས་ལོ་ལྟར་འཆར་ཅན་གྱི་ཕྱག་བཞེས་བཞིན་ཚོགས་ཆེན་འདུ་ཁང་གི་རབ་གསལ་དུ་རྗེ་གསུང་འབྱོན་མའི་མདུན་དུ་བླ་མཆོད་དུས་བཟང་གི་ཚོགས་དབུར་ཕེབས་ཏེ་ཉིན་ཁ་ཤས་ཀྱི་རིང་ལ་བསྟན་འགྲོར་སྨན་པའི་ཐུགས་བསྐྱེད་རླབས་པོ་ཆེ་གནང༌། དགུན་ཟླ་འབྲིང་པོའི་ཡར་ངོའི་ཚེས་བཅུ་ནས་མར་ངོའི་ཚེས་བཅུའི་བར་ལ་རྗེ་བཙུན་རྡོ་རྗེ་རྣལ་འབྱོར་མའི་དཀྱིལ་འཁོར་སྒྲུབ་ཅིང་དབང་བླངས་པ། ཚོགས་ཀྱི་འཁོར་ལོར་ཚིམ་པ་དྲུག་ལྡན་དུ་རོལ་པས་དམ་ཚིག་སྐོང་ཞིང་གནས་གསུམ་དཔའ་བོ་མཁའ་འགྲོའི་ཚོགས་ཀུན་དགྱེས་པ་བསྐྱེད། དེ་ནས་སྐུ་མཚམས་གནང་སྟེ་ཐུན་དངོས་གཞིར་ཟབ་ལམ་རྡོ་རྗེའི་རྣལ་འབྱོར་བསྐྱངས་ཤིང༌། ཐུན་མཚམས་སུ་ལྟུང་བཤགས་དང་འབྲེལ་བའི་ཕྱག་སྦྱང་ནན་ཆེར་མཛད། སྐབས་
ཤིག་སྐུ་བསྙུང་ཅུང་ཟད་བཞེས་པར་ཕྱག་གཉེར་སོགས་ཞབས་གྲས་ཐུན་མོང་ནས་ཞབས་བརྟན་ཅི་འདྲ་སྒྲུབ་རྒྱུ་རྗེ་ཉིད་ལ་ཞུས་པར། སྨན་བླའི་ཆོ་ག་མཆོད་པ་གང་རྒྱས་ཀྱི་སྟེང་ནས་ཚོགས་ཆེན་དུ་གསུང་ན་ལེགས་ཞེས་བཀའ་ཕེབས་པ་བཞིན་བསྒྲུབས། ཡང་ཞབས་གྲས་ཐུན་མོང་ནས་སྐུ་འབུམ་ཆོས་སྐྱོང་ལ་ལུང་བསྟན་ཞུས་པར། རྣམ་རྒྱལ་མའི་སྟོང་མཆོད་གང་མང་དང་སྒྲོལ་དཀར་གྱི་ཚེ་སྒྲུབ་དགོས་ཞེས་སྩལ་བའང་གནད་སྨིན་བྱས་ཏེ་བསྒྲུབས། མཚོ་སྐྱིད་པཻ་ཟེའི་ཤོག་གི་སྨན་པ་ལོ་ལོན་མཁས་པ་ཞིག་འདུག་པ་གདན་དྲངས་པར་ཁོང་གིས་ཕྱག་རྩ་བརྟག་ནས་སྨན་ཕུལ་བས་སྐུ་ཁམས་ཅུང་ཞིག་དྭངས་པ་བྱུང༌། ཞབས་གྲས་ཐུན་མོང་ནས་ཞབས་པད་བརྟན་པའི་སྙན་ཞུས་ནན་ཏན་དུ་ཕུལ་བར། ཞལ་ནས་ད་ལྟ་གང་ཡིན་ཀྱང་བཟང༌། ཚེ་འདིར་དགེ་བའི་བྱ་བ་གང་བསམ་ཡིད་སྨོན་ལྟར་འགྲུབ་པས་འགྱོད་པ་མེད། ལོའང་རྒས་པས་ངེས་པ་ཅི་ཡོད་ཅེས་གསུང་བས་ཞབས་ཕྱི་བ་རྣམས་གསུང་དེ་ཅི་འདྲ་ཡིན་སྙམ་ཐེ་ཚོམ་དུ་གྱུར་ལ། ད་ནི་པཎ་ཆེན་བློ་བཟང་ཆོས་རྒྱན་གྱིས། ཚེ་རིང་དུ་གནས་ན་རྣམ་དཀར་གྱི། །ལས་བཟང་པོ་སྒྲུབ་པོ་ཤི་ཡང་སླ། །སེམས་བག་ཆགས་བཟང་པོའི་ངང་དུ་འཆི། །ཨ་ལ་ལ་གསོན་ཤི་སེམས་ལ་སྙོམ། །ཚེ་སྒྲུབ་ཀུན་ཇི་ལྟར་དགྱེས་དགྱེས་མཛོད། །གསུངས་པ་ལྟར་གདེང་ཐོབ་པའི་གསུང་ཞར་ལ་གོ་རྒྱུ་མང་པོ་ཅན་གནད་ཟབ་མོ་ཞིག་གོ །ཏ་རི་གངྒཱའི་རབ་འབྱམས་པ་ངག་དབང་བསྟན་འཛིན་ནས། ལྷ་རྫས། མཎྜལ། སྐུ་གསུང་ཐུགས་རྟེན། གོས་ཀྱི་ཞབས་ཆག་སོགས་ཀྱིས་ཐོག་དྲངས་ནས་ཞབས་བརྟན་
ཕུལ་ཏེ་འདིའང་རྟེན་འབྲེལ་གྱི་དབང་ཞིག་ ཏུ་ཐལ་བར་སྣང༌། ཞབས་ཕྱི་བ་དགེ་ཚུལ་བློ་བཟང ་དོན་གྲུབ་ཀྱིས་ཀྱང་བདོག་བའི་ཚན་གྲངས་དང་བཅས་ཞབས་བརྟན་ཕུལ། མེར་གེན་དཀའ་བཅུ་སྨོན་ལམ་རིན་ཆེན་དང༌། དུར་བེད་ཐཻ་ཇི་བློ་བཟང་དོན་གྲུབ་ཀྱི་བུ་ཆུང་བཀྲ་ཤིས་ཚེ་བརྟན། ཐོ་ཡོན་འཇིགས་མེད་སོགས་ནས་ཕྱག་དབང་ཞུས། གྲུབ་རྒྱལ་ལུགས་ཀྱི་ཚེ་དབང་དང་གཞན་ཆོས་བཀའ་མང་ཙམ་གནང༌། བསྒྲུབ་བྱ་ལྔ་བཅུ་ལྷག་དགེ་ཚུལ་དང༌། སུམ་ཅུ་བརྒལ་བ་ལ་དགེ་སློང་གི་སྡོམ་པ་སྩལ། དེ་ནས་དགུང་ལོ་རེ་གཉིས་པ་འཛིན་བྱེད་ཅེས་པ་བྱི་བའི་གནམ་ལོ་གསར་ཚེས་ཉིན་སྐུ་ཚ་ཞབས་དྲུང་དང་ཕྱག་མཛོད་ཆེ་ཆིང་ཆོས་རྗེ་གཉིས་ཀྱིས་གཙོས་གྲྭ་རིགས་ཐུན་མོང་ནས་མཁའ་འགྲོའི་བསུན་བཟློག་དང་འབྲེལ་བའི་ཞབས་བརྟན་ཕུལ་ནས་རྟེན་འབྲེལ་གང་ལེགས་བསྒྲིགས། ཆོ་འཕྲུལ་སྨོན་ལམ་ལ་འདུས་པ་སེར་སྐྱ་ཆེ་ཕྲ་ཆིག་སྟོང་བརྒལ་བ་ལ་ཕྱག་དབང་འདོད་ཆོས་སྩལ་ནས་ཡིད་ཚིམ་པར་བྱས། ཕེ་ཀྱཱ་ཞབས་དྲུང་གོ་འཕང་ཧུ་ཐོག་ཐུས་འཇིགས་བྱེད་དཔའ་གཅིག །གསང་འདུས། རྟ་མགྲིན་གསང་སྒྲུབ་སོགས་ཀྱི་དབང་སྟ་གོན་དང་བཅས་ཞུས་པར། ཆེ་ཤོས་སྤྲུལ་བའི་སྐུ་རིན་པོ་ཆེས་གཙོས་སྤྲུལ་སྐུའི་རིགས་དང༌། མཚོ་སྔོན་མཚོ་སྐྱེས་པཻ་ཟི། དུར་བེད་ཐོ་ཡོན་འཇིགས་མེད། ཐའི་ཇི་བཀྲ་ཤིས་ཚེ་བརྟན། དགེ་བཤེས་མང་པོ་བཅས་དགེ་འདུན་དྲུག་བརྒྱ་ལྷག་ལ་སྩལ། བསྒྲུབ་བྱ་བརྒྱ་དང་བདུན་ཅུ་ལྷག་ལ་དགེ་ཚུལ་སློང་གི་སྡོམ་པ་སྩལ་ཏེ་ཐར་པའི་རྒྱ་མཚོར་འཇུག་པའི་གྲུ་གཟིངས་འཇུག་པར་མཛད། མེརྒེན་དཀའ་བཅུ་སྨོན་ལམ་རིན་ཆེན་ལ་བཀའ་ཤོག་དང་གཟེངས་བསྟོད་ཀྱིས་མེརྒེན་པཎྚི་ཏའི་ཆོ་ལོ་བཅས་སྩལ། ཟླ་
བ་གཅིག་གི་རིང་ལ་སྐུ་མཚམས་བསྡམས། མཚམས་གྲོལ་རྗེས་བསྟན་པའི་སྦྱིན་བདག་པཻ་ཟི་རཏྣ་སིངྡྷི་དང་ཛ་སག་དའི་ཆིང་རྡོ་རྗེ་གཉིས་ནས་ལྷ་རྫས་མཎྜལ། སྐུ་གསུང་ཐུགས་རྟེན་བཅས་ཞབས་བརྟན་རིམ་བཞིན་ཕུལ། པཻ་ཟིས་འདོད་མོས་བཞིན་ཡི་དམ་ཆོས་སྲུང་ལ་གཏོར་བསྔོས་ཕྲིན་བཅོལ་མཛད། སྐབས་དེར་ངེད་ཀྱིས་བྲིས་པའི་དགའ་ལྡན་བསྟན་པ་རྒྱས་པའི་སྨོན་ཚིག་གི་དཔེ་ཞིག་ཕྱག་ཏུ་འབྱོར་བས་དགྱེས་ཚོར་ཆེར་མཛད་ཅིང༌། སྦྱར་བྱང་གི་ཐད་དུ། དེང་དུས་རྗེ་བླ་མའི་བསྟན་པ་འདི་ཟུངས་ཟད་ཀྱི་ནད་པ་སྨན་པས་བོར་བ་བཞིན་བདག་ཏུ་འཛིན་པ་མི་འདུག་ཅེས་པ་དེ་ཤིན་ཏུ་བདེན་པར་འདུག་གསུངས་ནས་ཐུགས་ཤིན་ཏུ་སྐྱོ་བས་སྤྱན་ཆབ་བསིལ། དེ་སྐབས་ཆེ་ཤོས་སྤྲུལ་བའི་སྐུ་རིན་པོ་ཆེ་སྐུ་འབུམ་གྱི་མཁན་ཁྲིར་བཞུགས་རྒྱུའི་སྟ་གོན་གྱི་སྐབས་ཡིན་པས། ཁོང་ལ་ཁྱེད་ཁྲིར་བཞུགས་རྒྱུ་དང་སྨོན་ཚིག་འདི་འབྱོར་རྟེན་འབྲེལ་འགྲིག་པས་ཚོགས་སུ་བཙུགས་ན་ལེགས་གསུངས་ཏེ། རྣམ་པ་གཉི་ག་དགོངས་མཐུན་གྱིས་ཚོགས་ཆེན་དང་བཤད་སྒྲུབ་གླིང་གཉི་གར་བཙུགས། དེའི་ཐུགས་དགོངས་ནི་ཁོང་ཁྲི་འདོན་ལ་རྟེན་འབྲེལ་འགྲིག་པར་མ་ཟད། ཉིད་ཀྱི་སྐུ་ཚེ་ཧྲིལ་པོར་བསྟན་པའི་བྱ་བ་ཁོ་ན་མཛད་དེ་རྗེ་བླ་མས། དང་པོར་རྒྱ་ཆེན་ཐོས་པ་མང་དུ་བཙལ། །བར་དུ་གཞུང་ལུགས་ཐམས་ཅད་གདམས་པར་ཤར། །ཐ་མར་ཉིན་མཚན་ཀུན་ཏུ་ཉམས་སུ་བླངས། །ཀུན་ཀྱང་བསྟན་པ་རྒྱས་པའི་ཆེད་དུ་བསྔོས། །གསུངས་པ་ལྟར་བསྟན་པ་རྒྱས་པའི་རྒྱུ་འབའ་ཞིག་ ཏུ་བསྔོ་བའི་ཐུགས་འདུན་ནར་མར་ཡོད་པ་དང་ངོ་འཕྲོད་པར་མངོན་ཏེ། ཉིད་ནས་བླ་མཆོད་ཀྱི་དུས་བཟང ་ཞིག་སྔར་ནས་འཛུག་པར་
གནང་ཡོད་པ་དེའི་སྐབས་སུའང་སྨོན་ཚིག་འདི་ཆག་མེད་དགོས་པའི་ཞལ་ཏ་ནན་ཆེར་སྩལ། གྲྭ་པ་བགྲེས་གཞོན་ཚང་མས་ཀྱང་ཐུགས་འདུན་རྩེ་གཅིག་གིས་དང་དུ་བཞེས་པས་རྟེན་འབྲེལ་ལེགས་ཚོགས་ཆེ་བ་བྱུང༌། དེ་ནས་དཔྱིད་ཟླ་གསུམ་པར་ཁྲི་ཀའི་ཕྱོགས་སུ་ཕྱག་བཏེག །ཉིད་ཀྱི་དགོན་པ་དགའ་ལྡན་དར་རྒྱས་གླིང་གི་འདུ་ཁང་སྟེང་དུ་ཚ་གསེར་གྱི་གཉྫི་ར་ཆེ་བ་གཟུངས་གཞུག་བཅས་འཇོག་པ་གནང་ནས་རབ་གནས་ཀྱང་མཛད། དེ་ནས་མཆོད་རྟེན་མི་ཉག་གྲྭ་ཚང་བཀྲ་ཤིས་ཆོས་གླིང་དུ་ཕེབས། རྒྱ་བོད་སོགས་ནས་ལོ་ཏོག་གི་དོན་དུ་ཆར་འབེབས་ཞུས་པར་ཉིན་གསུམ་གྱི་རིང་ལ་སྤྱན་འདྲེན་ཁྲུས་གསོལ། བརྒྱ་རྩ། ཀླུ་གཏོར། འབྱུང་བཞི་དང་ལན་ཆགས་གཏོར་མ་སོགས་བསྔོ་བ་གནང་བར་བརྟེན་ཉིན་ཁ་ཤས་ལ་ཆར་གྱི་རྒྱུན་ཆེན་པོ་བབས་པས་ལུས་ཅན་རྣམས་ཀྱི་རེ་བ་བསྐངས། རེ་ཞིག་ཕྱི་མཚམས་ཀྱི་ཁོངས་ནས་རྒྱ་བོད་ཀྱི་མཁས་གྲུབ་པཎྚི་ཏ་རྣམས་ཀྱི་གསུང་དང༌། རྗེ་ཡབ་སྲས་ཀྱི་ལེགས་བཤད་སོགས་ཕྱག་དཔེའི་སྐོར་ལ་གཟིགས་རྟོག་ཞིབ་རྒྱས་གནང༌། དེ་ནས་ཕྱག་གཉེར་སོགས་གྲྭ་རིགས་ཐུན་མོང་ནས་སྐུ་གོང་མའི་སྒྲུབ་གནས་བྱིན་ཅན་གསང་སྔགས་བདེ་ཆེན་ཆོས་འཕེལ་གླིང་དུ་དབྱར་གནས་ཤིག་འཛུག་རྒྱུའི་གནས་ཚུལ་ནན་ཆེར་ཞུས་ཤིང༌། རྗེ་ཉིད་ལའང་སྔ་སོར་༸རྒྱལ་དབང་ཐམས་ཅད་མཁྱེན་པ་ནས་དབྱར་གནས་དང་གསོ་སྦྱོང་བྱེད་རྒྱུར་དགོངས་ནས་གཎྜི་གནང་འདུག་པས། ད་ལམ་བསྟན་འགྲོའི་ཕན་བདེར་དམིགས་དབྱར་གནས་ཤིག་འཛུག་རྒྱུ་བྱུང་ན་དགོངས་ཡོད་པར་བརྟེན། དབྱར་ཟླ་དྲུག་པ་ནས་རྗེ་འདི་པས་གཙོས་ཚད་ལྡན་དགེ་བའི་བཤེས་གཉེན་རྣམས་ཀྱིས་
གཞི་གསུམ་གྱི་ཉམས་ལེན་ཆོས་འདུལ་བའི་དགོངས་པ་ཇི་ལྟ་བ་བཞིན་ཕྱག་བཞེས་ལ་ཐེབས་ངེས་བྱས་ཏེ་བཙུགས། དུས་རྒྱུན་གྱི་ཞལ་འདོན་ལ་མདོ་སྔགས་ཟུང་གི་ཉམས་ལེན་གྱི་གནད་ཡོངས་སུ་རྫོགས་པ་བླ་མཆོད་ཆོ་གའི་ངག་འདོན་གྱི་རིམ་པ་རྣམས་མ་ལུས་པར་མཛད་སྲོལ་བཏོད་པས་ཡུལ་ཕྱོགས་བཀྲ་ཤིས་པའི་རྟེན་འབྲེལ་སྒོ་དུ་མ་ནས་འགྲིགས། སྟོན་ཟླ་འབྲིང་པོ་ནས་སྔར་གྱི་ཁྲག་རླུང་གི་བསྙུན་གཞི་ཆེར་འཕར་ཏེ་སྐུ་ཁམས་ཤིན་ཏུ་མི་དྭངས་པའི་ཚུལ་མཛད་པས། ཕྱག་གཉེར་སོགས་ནས་སྐུ་འབུམ་ཆོས་སྐྱོང་རྣམ་གཉིས་ཀྱིས་གཙོས་ལྷ་དང་བླ་མ་ཐམས་ཅད་ལ་ལུང་བསྟན་ཞུས་པར། ཞབས་བརྟན་རིམ་གྲོ་རྒྱ་ཆེར་ཕབ་ཅིང་། ལུང་བསྟན་རྣམས་སུ་སྐུའི་བསྙུང་གཞི་དྭངས་མི་དྭངས་གཙོ་ཆེར་རྗེ་ཉིད་ཀྱི་དགོངས་པ་ལ་རག་ལས་ཚུལ་རྗེན་པར་གསུངས། མི་ཉག་གྲྭ་ཚང་དུ་སྨན་བླ་གསུང་བ་དང་བཀའ་འགྱུར་གསུང་སྒྲོགས་བྱས། དགའ་ལྡན་དར་རྒྱས་གླིང་གི་དགེ་འདུན་སུམ་ཅུ་ཙམ་གྱིས་སྨན་བླའི་ཆོ་ག་དང་ཆོས་རྒྱལ་གྱི་གཏོར་སྒྲུབ་བཙུགས། བླ་མ་ཨ་ལག་ཤེས་རབ་ནས་ཀྱང་རྣམ་འཇོམས་བུམ་སྒྲུབ་དང་བྱབས་ཁྲུས་ཞུས། བདེ་ཆེན་དཔོན་སློབ་རིན་པོ་ཆེས་ཀྱང་ཞབས་བརྟན་གྱི་སྐོར་མང་དུ་བསྒྲུབས། སྐུ་འབུམ་ཚོགས་ཆེན་དུ་སྨན་བླའི་སྟོང་མཆོད་ཚར་འགའ། བཀའ་འགྱུར། གདུགས་དཀར་སོགས་གསུངས་པ་དང༌། རྒྱུད་སྨན་གྲྭ་ཚང་སོ་སོར་ཞབས་བརྟན་གྱི་སྐོར་རྣམས་རྒྱ་ཆེར་བསྒྲུབས། བླ་བྲང་རང་དུ་གདུགས་དཀར་ཟློག་ཆེན། གཙུག་ཏོར་རྣམ་རྒྱལ་མའི་སྟོང་མཆོད་ཚར་ལྔ། སྒྲོལ་དཀར་གྱི་ཚེ་སྒྲུབ་སོགས་སྤྱི་སྒེར་ཀུན་ནས་ཞབས་བརྟན་ཚད་
མེད་པ་བསྒྲུབས། མུ་རི་ཝང་གི་ཤོག་ནས་སྨན་པ་མཁས་པ་ཞིག་བོས་ཏེ་སྨན་ཕུལ་ཡང་ཕན་ཆེར་མ་ཐོགས། འོན་ཀྱང་ཞབས་གྲས་ཐུན་མོང་ནས་སྐུའི་རིམ་གྲོ་རྒྱ་ཆེར་བསྒྲུབས་ཏེ་ཞབས་བརྟན་གནད་དུ་སྨིན་པ་ཞིག་ཕུལ་བས། ཐུགས་རྗེས་ཉེ་བར་གཟིགས་ཏེ་སྐུ་ཅུང་ཟད་དྭངས་པའི་ཚུལ་གནང༌། དེ་ནས་སྐུ་འབུམ་དུ་ཕེབས། བསྙུན་གྱི་མཇུག་མ་དྭངས་པས་སྐུ་ཁམས་སྔར་དང་མི་འདྲའང་སྙིང་རྗེའི་གོ་ཆ་མི་ལྷོད་པས་དོན་གཉེར་བ་མང་པོར་རྣམ་རྒྱལ་ལྷ་དགུ །འཇམ་དབྱངས་དམར་སེར། ཐུབ་པ་དམ་ཚིག་གསུམ་བཀོད། ལྷ་མོ་འོད་ཟེར་ཅན་མ། རི་ཁྲོད་ལོ་མ་གྱོན་མ། ནོར་རྒྱུན་མ། སོར་འབྲང་སོགས་ཀྱི་རྗེས་གནང་དང༌། བླ་མཆོད་དང་ལམ་རིམ་བདེ་ལམ་སོགས་ཀྱི་ལུང་བཅས་སྩལ་ཏེ་རང་རང་གི་རེ་བ་ཡོངས་སུ་སྐོང་བར་མཛད། དགུན་ཟླ་འབྲིང་པོར་ཆོས་སྡེ་ཆེན་པོའི་གདན་ས་བ་བསྟན་པའི་གསལ་བྱེད་ཆེ་ཤོས་མཁན་རིན་པོ་ཆེས་གཙོ་མཛད། སྨན་པ་བླ་ཟུར་ཉ་ཀྱཱ་དགེ་བཤེས་རྒྱལ་མཚན་ནོར་བུ་སོགས་བླ་མཆོད་ཀྱི་དུས་བཟང་བ་ཚོགས་ཡོངས་ནས་གནས་བརྟན་ཆོ་ག་དང་འབྲེལ་བའི་བརྟན་བཞུགས་ཕུལ་བའི་ཐོག །ཆེ་ཤོས་མཁན་རིན་པོ་ཆེས་དུས་ཀྱི་ཐ་མ་འདིར་ཐུབ་བསྟན་འཛིན་སྐྱོང་སྤེལ་བའི་རྒྱུ་ཚོགས་མ་ཚང་བ་མེད་པའི་སྐྱབས་མགོན་ཉིད་ལྟ་བུ་ཞབས་པད་བརྟན་དགོས་ཚུལ་ཚིག་གི་ན་ཡམ་ཙམ་མ་ཡིན་པར་ཐུགས་རྗེ་འཁུལ་ནུས་པའི་ཞུ་འབུལ་གནད་སྨིན་བཅས་ཕུལ། དེ་ནས་བཅད་རྒྱ་བསྡམས་ནས་ཡི་དམ་རྡོ་རྗེ་རྣལ་འབྱོར་མའི་ལྗགས་བསྙེན་ལ་རོལ་ཞིང༌། བདག་འཇུག་ཀྱང་ཡུན་རིང་པོའི་བར་དུ་བཞེས་པར་མཛད། བཅད་རྒྱ་གྲོལ་ཏེ་གསེར་སྐུ་ལི་མ་ཆེ་ཆུང་ལྔ་བཅུ་བརྒལ་བ་ལ་གཟུངས་གཞུག་ཚུལ་བཞིན་དུ་
ཕུལ་ཞིང་ནང་རྟེན་གསར་རྙིང་ཐམས་ཅད་ལ་རབ་གནས་མཛད། དཔལ་ལྡན་སྨད་རྒྱུད་གཉིས་པ་གསང་ཆེན་སྔགས་ཀྱི་གྲྭ་ཚང་གི་དཔོན་སློབ་གྲོ་ཚང་ཞབས་དྲུང་སྐལ་བཟང་བཀྲ་ཤིས་རྒྱ་མཚོས་གཙོས་དགེ་འདུན་འདུས་ཚོགས་ཡོངས་ནས་བདེ་མཆོག་དཀར་པོའི་ཚེ་སྒྲུབ་མཛད་པའི་མཇུག་ཏུ་དཔོན་སློབ་རིན་པོ་ཆེས་ཞུ་འབུལ་གནད་སྨིན་གྱི་སྒོ་ནས་ལྷ་རྫས་མཎྜལ། ཚེ་བུམ་བཅས་ཕྱག་ཏུ་ཕུལ་ཏེ་རྒྱུད་པ་གྲྭ་ཚང་འདུས་ཚོགས་ཡོངས་ནས་ཞབས་བརྟན་ཕུལ་བར། རྗེ་ཉིད་ཀྱིས་ཕྱག་ཐལ་མོ་སྦྱར་ཏེ་གུས་པ་ཆེན་པོས་བདག་སོ་སོ་སྐྱེ་བོ་འཆིང་བ་ཀུན་ལྡན་ལ་སྐྱེས་ཆེན་དམ་པ་རྣམས་དང་འདྲ་བའི་རང་དབང་ནི་ག་ལ་མཆིས། དམ་པ་གོང་མ་རྗེ་མི་ཉག་རྡོ་རྗེ་འཆང་དེ་ཉིད་ཀྱི་མཚན་རྣམ་པར་དག་པས་བྱིན་གྱིས་བརླབས་པའི་ཕྲན་བདག་ལ། དེང་དགེ་བའི་ཉིན་འདིར་དཔལ་ལྡན་སྨད་རྒྱུད་ཀྱི་དཔོན་སློབ་རིན་པོ་ཆེས་གཙོས་དགེ་འདུན་འདུས་ཚོགས་ཡོངས་ནས་ཆོས་དམ་ཚིག་གི་འབྲེལ་བ་ཟབ་མོ་ཐུགས་ལ་དགོངས་ཏེ་རྟེན་འབྲེལ་གྱི་ཁྱད་དེ་ལྟར་གནང་བ་ནི་བཀའ་དྲིན་ཤིན་ཏུ་གཞལ་དཀའ་བའི་གནས་ལགས། རྡོ་རྗེ་འཆང་དངོས་སུ་ཕེབས་ནས་འཆི་མེད་ཚེའི་དངོས་གྲུབ་མངོན་གྱུར་དུ་གནང་བ་དང་ཁྱད་མེད། གང་ཡིན་ཀྱང་ཕྲན་རང་ངོས་ནས་ཚེ་ཡུན་རིང་གནས་པའི་ཆེད་དུ་ཟླ་མེད་མཆོག་གསུམ་དམ་པར་གསོལ་འདེབས་བགྱིད། དཔོན་སློབ་རིན་པོ་ཆེ་དང་དགེ་འདུན་འདུས་ཚོགས་ཡོངས་ནས་ཀྱང་བདག་གི་ཆོས་ལྡན་གྱི་བགྱི་བ་གེགས་མེད་འགྲུབ་པའི་སྐྱབས་འཇུག་དང་ཤིས་བརྗོད་ཅིག་གནང་བར་ཞུ་གསུང༌། དེའི་ཕྱི་ཉིན་ནས་སྐུ་ཁམས་སྔར་ལས་
ཆེར་དྭངས་ཤིང་ཞལ་འདོན་གྱི་སྐོར་ཡང་བསྙུན་མེད་དུས་ལྟར་མཛད་པས་གྲྭ་སློབ་རྣམས་ཀྱིས་སྐྱེས་བུ་དམ་པའི་ཁྱད་ཆོས་གཞན་དང་མི་འདྲ་བ་རེད། ཁ་སང་རྒྱུད་པ་གྲྭ་ཚང་བྱོན་ནས་ཞབས་བརྟན་ཕུལ་བས་སྐུ་བསྙུན་གྲོལ་ཞིང་མཛད་སྤྱོད་ཐམས་ཅད་སྔར་ལྟར་འདུག་ཅེས་དགའ་བའི་ཅ་ཅོ་སྒྲོགས་པར་གྱུར། དེ་ནས་བསྟན་པའི་སྦྱིན་བདག་མཚོ་སྔོན་ཝང་ཚེ་རིང་དོན་འགྲུབ་སྐུ་འབུམ་དུ་ཕེབས། རྗེ་འདི་པར་མཇལ་ཞིང་སྐུ་མདུན་དུ་ཉིན་ཁ་ཤས་བཞུགས་སྐབས་དཔོན་པོ་ལ། ད་ནི་ངེད་རང་ལོའང་རྒས་ཤིང་ཁྲག་རླུང་སྟོད་འཚང་ལྟ་བུས་འབྱུང་བཞི་ཆེར་མི་སྙོམས་པ་ཡང་ཡང་འོང་ཚུལ་ལ་བལྟས་ན་འཆི་བ་ནམ་ཡོང་མི་ཤེས། དྲིན་ཅན་རྩ་བའི་བླ་མ་རྡོ་རྗེ་འཆང་རྗེ་འཇམ་དབྱངས་བཞད་པ་རིན་པོ་ཆེ་དང་། སྐྱབས་མགོན་ཆུ་བཟང་རིན་པོ་ཆེ་སོགས་ཀྱི་སྐུ་གོང་མ་དེ་དག་ཞིང་གཞན་དུ་གཤེགས་ནས་བདག་ཅག་རྣམས་མགོན་མེད་དུ་གྱུར་པ་སོགས་བསམས་ནའང༌། བདག་ལྟ་བུའི་སོ་སོ་སྐྱེ་བོ་ལྟ་ཅི་སྨོས་ཞེས་སོགས་དུས་ཀྱི་འཕོ་འགྱུར། འཁོར་བ་ལ་ཡིད་བརྟན་མེད་ཚུལ་སོགས་དང་ལེགས་ཉེས་ཀྱི་བླང་དོར་རྣམས་མང་དུ་གསུངས། ལྷག་པར་ངེད་སྔོན་གྲྭ་རྐྱང་ཡིན་དུས་སུ་ཁྱེད་ཀྱི་ཡབ་མེས་སོགས་ཀྱིས་མཐུན་རྐྱེན་བསྒྲུབས་ཏེ་ཆོས་སྡེ་འདིའི་ཆོས་གྲྭར་ཞུགས་སུ་བཅུག་པ་དང༌། དེར་མ་ཟད་ཀུན་མཁྱེན་འཇམ་དབྱངས་བཞད་པ་ཨུརྒེར་གདན་དྲངས་ནས། དུ་ལན་གོལ་གྱི་དགོན་པར་མི་ཏྲ་བརྒྱ་རྩའི་དབང༌། དུས་འཁོར་སོགས་ཀྱི་དབང་གཞན་མང་པོ། རྗེས་གནང་མཐའ་ཡས་པ་སོགས་གནང་དུས། ཝང་ནས་མགོ་འདྲེན་བྱས་ཏེ་སྡེ་ཐོག་ནས་ཁལ་རྟ་ཁྱེར་འོངས་ནས་ངེད་ལ་དབང་ཉན་རྒྱུར་ཡོང་དགོས་གསུང་སྟེ་བཀའ་ཆོས་ཀྱི་སྐོར་ཚང་མ་ཉན་དུ་
བཅུག་པ་སོགས་གང་ཐད་ནས་བསམ་ནའང་བདག་ལ་དྲིན་ཅན་གྱི་ཕ་མ་ལས་ཀྱང་དྲིན་ཤིན་ཏུ་ཆེ། ཡབ་མེས་ཀྱི་འབྲེལ་བ་དེ་ཚོ་ཐུགས་ལ་བཞག་སྟེ་ཕྱིས་སུ་བདག་གི་ཆོས་ལྡན་གྱི་བྱ་བ་གང་ཡོད་ཐམས་ཅད་དཔོན་པོ་ཉིད་ནས་ཐུགས་ལ་འཛིན་དགོས། སླར་ཡང་བསྐྱར་ཨེ་ཐུག་མི་ཤེས་པས་ངས་གང་ཞུས་ཐམས་ཅད་ཐུགས་ནས་མ་བརྗེད་ཅེས་གསུངས་པས། དཔོན་པོས་ཀྱང་རང་གི་དྲིན་ཅན་རྩ་བའི་བླ་མའི་བཀའ་ལས་འདའ་མི་ཉན་པའི་ཚུལ་ཞིབ་རྒྱས་ཞུས་ཏེ། གསུང་ལྟར་རང་གིས་གང་ལྕོགས་ཀྱི་ཞབས་འདེགས་བྱས་ཆོག་ཅེས་ཞུས། ཝང་གིས་ལྷ་རྫས་མཎྜལ། སྐུ་གསུང་ཐུགས་རྟེན་སོགས་ཀྱི་མཆོད་སྤྲིན་དང་བཅས་བརྟན་བཞུགས་དང་ཞུ་འབུལ་རྒྱས་པ་ཕུལ། དཔོན་པོའི་མངའ་འོག་གི་སྨན་པ་མཁས་པ་བྱམས་པ་ཨེམྖི་ལ་དཔོན་རིན་པོ་ཆེས་བཀའ་ཕེབས་ཏེ་སྐུ་མདུན་དུ་འདུག་ཏུ་བཅུག་ནས་དེས་ཀྱང་སྐུ་ཁམས་དང་བསྟུན་ཏེ་སྨན་ཕུལ། དེ་ནས་བཅད་རྒྱའི་ངང་ལ་ཕྱག་མཆོད་ཡན་ལག་བདུན་པ་མཎྜལ་དང་བཅས་པ་སོགས་གཙོར་འདོན་གྱིས་ཡུན་རིང་པོའི་བར་དུ་བཞུགས། བླ་བྲང་རང་ནས་ཞབས་བརྟན་དུ་རྣམ་རྒྱལ་མའི་སྟོང་མཆོད་དང་བཀའ་འགྱུར་ཀློག་འདོན་སོགས་གནད་སྨིན་བསྒྲུབས་ཏེ་ཡོན་འབུལ་ཡང་གཟབས། དགུང་ལོ་དྲུག་ཅུ་རེ་གསུམ་པ་དབང་ཕྱུག་ཅེས་པ་མེ་གླང་གནམ་ལོ་གསར་བཞད་ཀྱི་ཉིན་ཞབས་དྲུང་དང་ཕྱག་མཛོད་ཆེ་ཆིང་ཆོས་རྗེ་གཉིས་ཀྱིས་གཙོས་གྲྭ་རིགས་ཐུན་མོང་ནས་མཁའ་འགྲོའི་བརྟན་བཞུགས་དང་འབྲེལ་བར་ལྷ་རྫས་མཎྜལ། སྐུ་གསུང་ཐུགས་རྟེན་བཅས་ཕུལ་ཏེ་ཞབས་བརྟན་གྱི་རྟེན་འབྲེལ་ལེགས་པར་བསྒྲིགས། སྟོད་སྨད་
ཀྱི་སྦྱིན་བདག་སེར་སྐྱ་དྲག་ཞན་ལྔ་བརྒྱ་བརྒལ་བ་ལ་ཕྱག་དབང༌། རྗེས་གནང༌། ལུང་ཁྲིད་སོགས་སོ་སོའི་འདོད་པ་ལྟར་ཡིད་ཚིམ་ངེས་བཀའ་དྲིན་བསྐྱང༌། ཨོར་དུ་སུ་ཤོག་གི་ཞབས་དྲུང་ངག་དབང་དཔལ་ལྡན་ཉི་མ་སོགས་བསྒྲུབ་བྱ་སུམ་ཅུ་ལྷག་ལ་དགེ་སློང་གི་སྡོམ་པ་སྩལ་ནས་ཐར་པའི་ས་བོན་བསྐྲུན། ཆ་ཧར་ཤོག་གི་ཐོ་ཡོན་རྣམ་རྒྱལ་ཟླ་བ་དང༌། ནེ་མན་ཤོག་གི་དགེ་བཤེས་ངག་དབང་བསྟན་འཛིན་གཉིས་ནས་དབྱངས་ཅན་མ་དཀར་དམར་ནོར་རྒྱུན་མ་སོགས་ཀྱི་རྗེས་གནང་ཞུས་པའི་འདུན་པ་བསྐངས། དྲུང་ཡིག་མཆོད་དཔོན་དགེ་སློང་ཚུལ་ཁྲིམས་བསྟན་འཛིན་གྱིས་འཇམ་དབྱངས་དཀར་པོའི་རྗེས་གནང་དང་དེའི་མངོན་རྟོགས་ཀྱི་ལུང་ཞུས་པ་ལྟར་བཀའ་དྲིན་དུ་སྩལ། མཚན་སྒྲོགས་མཁན་ཆེན་བློ་བཟང་དར་རྒྱས་ཀྱི་སྤྲུལ་སྐུ་ལ་བསྙེན་རྫོགས་ཀྱི་སྡོམ་པ་གནང་ནས་ངུར་སྨྲིག་གི་རྒྱལ་མཚན་བསྒྲེངས། དེ་ནས་ཕྱག་དཔེའི་སྐོར་ལ་ཡུན་རིང་དུ་གཟིགས་རྟོག་རྒྱ་ཆེར་གནང་ཞིང་འཐོར་བསྡེབས་ཆད་བསབ་ཐོ་གསལ་སོགས་ཞིབ་ཏིག་མཛད། ཚོགས་ཆེན་འདུ་ཁང་གསར་བསྐྲུན་གྱི་མཁར་ལས་ལ་བརྟེན་ཚོགས་ཆེན་རྒྱུད་གྲྭའི་འདུ་ཁང་དུ་ཚོགས་ཤིང༌། རྒྱུད་པ་གྲྭ་ཚང་གི་དཔྱིད་ཆོས་རྣམས་རྗེ་རང་གི་བླ་བྲང་དུ་བཙུགས་པ་ལ་བསྙེན་བཀུར་གཟབ་རྒྱས་ཞུས། དབྱར་ཟླ་དང་པོའི་ནང་ནས་སྔར་གྱི་བསྙུན་གཞི་ཆེས་ཆར་འཕར་ཏེ་ཕྱག་གཉེར་ཐུན་མོང་ནས་སྐུ་འབུམ་ཆོས་སྐྱོང་སོགས་ལྷ་བླ་མ་ཐམས་ཅད་ལ་ལུང་བསྟན་ཞུས་པར། གཙོ་ཆེར་སྐུ་ཞབས་ཉིད་ཀྱི་ཐུགས་བསྐྱེད་ལ་རག་ལས་ཚུལ་རྗེན་པར་གསུང་ཞིང་ཞབས་བརྟན་རིམ་འགྲོའང་རྒྱ་ཆེར་བབས། རྗེ་ཉིད་ལ་ཞུས་པར། ང་ལ་རིམ་གྲོ་སྨན་བླའི་ཆོ་ག་མཆོད་པ་
རྒྱ་གང་ཆེ་དང་བཅས་གནད་དུ་འགྲོ་ངེས་པ་ཆེས་མང་པོ་བསྒྲུབ་ན་དེས་ཆོག་ཅེས་གསུངས་པས། ཚོགས་ཆེན་དུ་གཙང་ཞིང་གྱ་ནོམ་པའི་མཆོད་པ་ཤིན་ཏུ་རྒྱ་ཆེན་པོ་དང་བཅས་སྨན་བླའི་སྟོང་མཆོད་ཚར་མང་པོ་བསྒྲུབས་ཤིང་དགེ་འདུན་རྣམས་ལ་བསྙེན་བཀུར་ཡང་ཕུལ་དུ་ཕྱིན་པ་ཞུས། ཞབས་ཕྱི་བ་རྣམས་ནས་སྤྱི་བསྡུས་ཀྱིས་ཚོགས་ཆེན་དང་གྲྭ་ཚང་སོ་སོར་མང་ཇ། གྲྭ་ཇ། སྤོམ་བཏེག་རྒྱ་གང་ཆེ་ཕུལ་ཏེ་བཀའ་འགྱུར་དང་བསྟན་འགྱུར་དག་ཚར། གདུགས་ཤེར་སྒྲོལ་མ་སོགས་འགྲོ་གང་ཆེ་དང༌། བླ་བྲང་རང་དུ་རྣམ་རྒྱལ་མའི་སྟོང་མཆོད་ཚར་ལྔ་ཙམ། སེང་གདོང་མའི་གཏོར་ཟློག །གཙུག་ཏོར་ཟློག་ཆེན། སྒྲོལ་དཀར་གྱི་ཚེ་སྒྲུབ། སྒྲོལ་མ་མཎྜལ་བཞི་ཆོག་ཚར་བརྒྱ་ཕྲག་སོགས་ཞབས་བརྟན་གྱི་སྐོར་རྒྱ་ཆེན་པོ་བསྒྲུབས། དར་རྒྱས་གུང་གི་སྡེ་ཐོག་ནས་སྨན་པ་མཁས་པ་ཞིག་བོས་ཏེ་སྨན་ཕུལ་ཡང་ཕན་མ་ཐོགས་པས། ཉིད་ཀྱི་ཞལ་ནས་སྨན་པའི་སྨན་གྱིས་ཕན་མི་ཐོགས། དེ་བས་དཀོན་མཆོག་ལ་བློ་བཀལ་ན་སྐྱོན་མེད་འགྲོ་གསུང་ཞིང་སྐུ་ཁམས་ཅུང་ཟད་བདེ་ཉམས་བྱུང༌། དེའི་མཚམས་སུ་ཧལ་ཧའི་ཕྱོགས་ཀྱི་རི་ཁྲོད་པ་ཐོ་ཡོན་ཚེ་རིང་སྐྱབས་ནས་གཅོད་ནམ་མཁའ་སྒོ་འབྱེད་ཀྱི་དབང་ཞུས་པར། སྤྱིའི་ཆོས་བཤད་མདོ་རྒྱུད་ཁུངས་དང་གཞུང་བཤད་དངོས་གཞི་ལ་མན་ངག་ཞལ་ཤེས་སོགས་རྗེན་པར་སྩལ་ཏེ་དགྱེས་ཉམས་དང་བཅས་བཤེས་གཉེན་བཅུ་ལྷག་ཙམ་ལ་གནང༌། དེ་དུས་སྐུ་བསྙུན་བཞེས་ཚུལ་ཡེ་མེད་པར་ཁམས་བདེ་སྐབས་བཞིན་དུ་སྩལ་བས་བཀའ་ཆོས་ཀྱི་ཐ་མ་འདི་ཡིན་འདུག་ལ། ཆོས་མཇུག་
འདིར་ཁེལ་བ་རྟེན་འབྲེལ་གྱི་དབང་ཞིག་ཏུ་ཐལ་བར་མངོན། དེ་ནས་རྒྱུད་པ་གྲྭ་ཚང་གི་དབྱར་གྱི་ཆོས་ཐོག་ཀྱང་འདི་གའི་བླ་བྲང་དུ་ཚུགས་ཡོད་སྟབས། ཉིད་ཀྱི་ཐུགས་བཞེད་ལ་གྲྭ་ཚང་རིན་པོ་ཆེའི་ཁྲུས་དབང་གསན་འདུན་བྱུང་བ་ལྟར། རྒྱུད་པའི་དཔོན་སློབ་གསེར་ཏོག་ནོ་མོན་ཧན་རིན་པོ་ཆེའི་སྤྲུལ་བའི་སྐུ་ཡེ་ཤེས་ཐུབ་བསྟན་རྒྱ་མཚོའི་ཞལ་སྔ་ནས་ཀྱིས་དབུ་མཛད་འདུས་ཚོགས་ཡོངས་ལ་ཉིན་བདུན་གྱི་རིང་བསྙེན་བཀུར་གྱ་ནོམ་པ་ཞུས་པའི་སྟེང་ནས་ཁྲུས་དབང་གསན། ཞལ་ནས། གྲྭ་ཚང་བྱིན་རླབས་ཅན་འདི་འདྲ་བའི་དྲུང་ནས་ཁྲུས་དབང་ཉན་རྒྱུ་ཕར་ཞོག་ཡང་ཡང་མཇལ་རྒྱུའང་དཀའ་བས་ད་ལན་སྐལ་བ་བཟང་ཞེས་གསུངས་ཏེ། སྐྱེ་བོ་རྣམས་བསོད་ནམས་ཀྱི་ཞིང་ལ་གུས་པ་བསྐྱེད་པའི་ཐབས་མཁས་དང་དགོངས་གཞི་གཞན་ཡང་ཡོད་པར་མངོན། དགེ་བའི་བཤེས་གཉེན་ཨ་ལག་ཤེས་རབ་ཀྱིས་རྣམ་འཇོམས་བུམ་སྒྲུབ་ཡུན་རིང་མཛད་ནས་བཀྲུས་བྱབས་སྲུང་བའི་རིམ་པ་སོགས་ཀྱང་ཡང་ཡང་ཞུས། དེ་ནས་ཁྲི་གའི་ཕྱོགས་ཀྱི་རྟེན་གྲུའི་ལྷ་ཁང་ཡུལ་ཕྱོགས་དེའི་དད་ལྡན་ཚང་མས་ཁུར་བླང་གིས་གསར་བཞེངས་བྱས་པའི་སྟེང་དུ་རྗེ་ཉིད་ནས་ཕུན་སུམ་ཚོགས་པའི་གཟི་བརྗིད་ཀྱི་འོད་ཟེར་ཕྱོགས་ཐམས་ཅད་དུ་འཕྲོ་ཞིང༌། བཀྲ་ཤིས་པའི་དཔལ་གྱིས་ཀུན་ནས་ལྷམ་མེར་བྱས་པ་རིན་པོ་ཆེ་ས་ལེ་སྦྲམ་གྱི་གཉྫི་ར་མཐོ་ཁྱད་དང་ལྡན་པ་གཟུངས་འབུལ་རབ་གནས་སོགས་ཀྱིས་བྱིན་རླབས་མི་ཟད་པའི་གཏེར་དུ་བསྒྲུབས་པ་འཛུག་པར་མཛད། དེའང་གཉྫི་ར་ཞེས་པ་ནི་བོད་ཀྱི་སྐད་དུ་མཛོད་ལྡན་ཞེས་པ་ཡིན་པས། ཆོས་སྲིད་དཔལ་འབྱོར་གྱི་བང་མཛོད་ཟད་མི་ཤེས་པའི་དགའ་སྟོན་ལ་འདོད་དགུར་ལོངས་སྤྱོད་པའི་རྟེན་
འབྲེལ་གྱི་སྒོ་འཕར་ཕྱེ་བ་ཡིན་པར་མངོན། ལེགས་བྱས་དགེ་མཚན་དེ་ཉིད་སུ་པྲ་ཏིཥྛ་བཛྲ་ཞེས་རབ་ཏུ་བརྟན་པའི་རྡོ་རྗེའི་རང་བཞིན་དུ་བྱ་བའི་ཕྱིར། ཁྲི་ཚབ་དགེ་བའི་བཤེས་གཉེན་ཤེས་རབ་དབང་ཕྱུག་ལ་གསུང་ཡིག་བསྐུར་ཏེ། ཡང་བསྐྱར་དུའང་རབ་གནས་སོགས་དགེ་ལེགས་སྤེལ་བའི་ཆོ་ག་རྒྱ་ཆེར་བྱེད་དུ་བཅུག །དེ་བཞིན་དུ་བཤད་སྒྲུབ་བསྟན་པའི་འབྱུང་གནས་ཆོས་གྲྭ་ཆེན་པོ་སྐུ་འབུམ་བྱམས་པ་གླིང་གི་རིག་གྲོལ་འཕགས་ཚོགས་འདུ་བའི་བསྟི་གནས་འདུ་ཁང་ཆེན་མོ་གསར་བསྐྲུན་གྱི་སྟེང་དུའང་གསེར་གྱི་འཁོར་ལོ་ཤིན་ཏུ་ཆེ་བ་ཉིན་བྱེད་གཞོན་ནུའི་གཟི་འོད་མངོན་པར་འཕྲོ་ཞིང༌། བྱིན་རླབས་རྟེན་གྱིས་གཏམས་པས་མི་ཤིས་རྒུད་པའི་མུན་པ་དྲུངས་ནས་འབྱིན་ནུས་པ། གཡས་གཡོན་དུ་དེ་ལས་དམའ་བའི་རི་དྭགས་ཕོ་མོའི་གཟུགས་དང་བཅས་པ་འཇོག་པར་མཛད། འདི་ནི་དཀྱིལ་འཁོར་གྱི་འཁོར་ལོ་ཐམས་ཅད་ལ་འབྱུང་ཞིང༌། དེའི་རྒྱུ་མཚན་སངས་རྒྱས་བཅོམ་ལྡན་འདས་མི་འཇིགས་པ་བཞི་ལ་མངའ་བརྙེས་ཏེ་སེང་གེའི་སྒྲ་བསྒྲགས་པ་ན་སྨྲ་བ་ངན་པའི་རི་སྐྱེས་མཐའ་དག་ཟིལ་གྱིས་གནོན་པ་ལ་བཤད་པ་དང༌། ཡང་རི་དྭགས་རྣམས་སྒྲ་ལ་དགའ་བས་ཆོས་ཀྱི་སྒྲ་དབྱངས་སྙན་པར་བསྒྲགས་ཏེ་ཐར་འདོད་ཀྱི་གདུལ་བྱ་མ་ལུས་པ་མགྲོན་དུ་འགུག་པ་ལ་བཤད་པ་དང༌། དངོས་གནས་ལའང་བཅོམ་ལྡན་འདས་ཀྱིས་ཝ་ར་ཎཱ་སིར་ཆོས་ཀྱི་འཁོར་ལོ་བསྐོར་བའི་ཚེ་རི་དྭགས་རུ་རུ་གསེར་གྱི་མདོག་ཅན་གཉིས་དེར་འོངས་ནས་ཆོས་ཉན་པའི་རྟེན་འབྲེལ་ལ་བཤད་པ་སོགས་གང་ལྟར་ཡང་སྐུ་འཕྲེང་ཕྱི་མ་རྣམས་སུ་གདན་ས་ཆེན་པོ་འདིས་མཚོན་ཡངས་པའི་
འཇིག་རྟེན་ཀུན་ ཏུ་ཆོས་ཀྱི་འཁོར་ལོ་བརྒྱུད་མར་བསྐོར་ཏེ་བློ་བཟང ་རྒྱལ་བའི་བསྟན་པ་ལ་ལོག་པར་འཁུ་བ་རྣམས་ཟིལ་གྱིས་གནོན་ཅིང་ཐར་འདོད་ཡོངས་ཀྱི་རེ་བ་སྐོང་བའི་རྟེན་འབྲེལ་རྨད་དུ་བྱུང་བ་བསྒྲིག་པར་མཛད་པ་ཡིན་ནོ། །དེའང་རྣམ་པར་ཐར་པའི་སྤྱིའི་ཁོག་འབུབ་ལུགས་ནི། བཀའ་གདམས་གོང་མ་རྣམས་བསྟན་པ་ཐམས་ཅད་འགལ་མེད་དང༌། གསུང་རབ་མ་ལུས་གདམས་པར་ཤར་བ་གཅིག་ལ་དྲ་ཕད་དུ་བལ་བཅུག་པ་རེ་མིག་གང་ནས་དྲངས་ཀྱང་རྫོགས་པར་ཐོན་པ་བཞིན་རང་གིས་ཉམས་སུ་ལེན་ནའང་དམིགས་སྐོར་གཅིག་གི་ནང་དུ་སྦྱོར་བའི་བསྒོམ་བྱའི་རྣམ་པ་མཐའ་དག་མ་ཚང་བ་མེད་པར་བསྡུས་སྒོམ་དུ་བྱས་ཆོག་པ་དང༌། གཞན་ལ་སྟོན་པ་ནའང་གང་ནས་བཤད་ཀྱང་རུང་བ། ཅི་ཙམ་བཤད་ཀྱང་རན་པ། ཇི་ལྟར་བཤད་ཀྱང་འབྲེལ་བ་ཞིག་འོང་བར་གསུང་བ་ལྟར། དམ་པའི་རྣམ་པར་ཐར་པའང་ཆེན་པོ་བདུན་དུ་བསྡུས་ཏེ་བཤད་པའམ། ཕར་ཕྱིན་དྲུག་ཏུ་བསྡུས་ཏེ་བཤད་པའམ། སྟོབས་ལྔར་བསྡུས་ཏེ་བཤད་པའམ། བསྡུ་བའི་དངོས་པོ་བཞིར་བསྡུས་ཏེ་བཤད་པའམ། བསླབ་པ་གསུམ་དུ་བསྡུས་ཏེ་བཤད་པའམ། ཚོགས་གཉིས་ཀྱི་སྤྱོད་པ་དང་ལམ་ཐུན་མོང་དང་ཐུན་མོང་མ་ཡིན་པའི་ཉམས་ལེན་གཉིས་སུ་བསྡུས་ཏེ་བཤད་པའམ། བྱང་ཆུབ་ལམ་གྱི་རིམ་པའི་ལུས་གཅིག་ཏུ་དྲིལ་ཏེ་བཤད་པ་སོགས་གང་བྱས་ཀྱང་རྣམ་ཐར་ཐམས་ཅད་དེའི་ཁུངས་སུ་འདུ་ཞིང་འབྲེལ་ཆགས་པ་ཞིག་འབྱུང་མོད། ད་ལྟ་ཡོངས་སུ་གྲགས་པའི་ས་བཅད་ལེན་ལུགས་མཁས་བཙུན་བཟང་གསུམ། ལྟ་སྒོམ་སྤྱོད་གསུམ། མཁྱེན་བརྩེ་ནུས་གསུམ། བསླབ་པ་གསུམ་སོགས་ལ་སྦྱོར་བ་རྣམས་གཙོ་བོར་བྱེད་པར་སྣང་
ལ། དེ་རྣམས་ཀྱང་ཚད་མ་རྣམ་འགྲེལ་ལས། ཤེས་ལ་ཡོད་པའི་དོན་དེ་རྣམས། །འདི་ལྟར་ལྡོག་པའི་དངོས་པོ་ཅན། །ཞེས་དང༌། བྱང་ཆུབ་སེམས་འགྲེལ་ལས། བྱས་དང་མི་རྟག་དག་བཞིན་ནོ། །ཞེས་པ་ལྟར་ལྡོག་པ་ཐ་དད་ལ་ལྟོས་པ་དང་དགོས་ནུས་ཀྱིས་ཕྱེ་བའི་ལྡོག་ཆ་ཐ་དད་ཙམ་གྱི་གོ་བ་སྟེར་ལུགས་མི་འདྲ་བ་རེ་ཡོད་ཀྱང༌། རྗེ་བླ་མས་བྱང་ཆུབ་ལམ་རིམ་ཆེན་མོར་བཤེས་གཉེན་གྱི་མཚན་ཉིད་སྟོན་པའི་རིམ་པ་ཐམས་ཅད་ལས་བསྟན་པ་སྤྱི་བབ་དང་མཐུན་པའི་རྒྱུད་འདུལ་ལུགས་ཤིག་གལ་ཆེ་བས་མདོ་སྡེ་རྒྱན་གྱིས་བསླབ་པ་གསུམ་དང་སྦྱར་བའི་རྒྱུད་འདུལ་ཚུལ་འདི་གཙོ་བོར་བྱེད་དགོས་པར་གསུངས་པ་བཞིན་ཡིན་ཏེ། དེའི་རྒྱུ་མཚན་ནི་སངས་རྒྱས་ཀྱིས་ཆོས་ཕུང་ཇི་སྙེད་ཅིག་གསུངས་པ་ཐམས་ཅད་གདུལ་བྱའི་རྒྱུད་འདུལ་བའི་ཐབས་སུ་གསུངས་པ་ཤ་སྟག་ཡིན་ལ། རྒྱུད་འདུལ་ཚུལ་ཉོན་མོངས་པའི་འཆིང་བ་དྲུངས་ནས་འབྱིན་བྱེད་ལྷག་པའི་ཤེས་རབ་ཡིན་ཀྱང༌། དེ་ལ་སྔོན་དུ་མངོན་གྱུར་པ་མགོ་གནོན་པའི་ཏིང་ངེ་འཛིན་དང༌། དེ་ལ་ཉེས་སྤྱོད་རགས་པ་བཟློག་པའི་ཚུལ་ཁྲིམས་སྔོན་དུ་འགྲོ་བས་བརྗོད་བྱ་རྟོགས་པའི་བསྟན་པ་ཐམས་ཅད་བསླབ་པ་གསུམ་དུ་ངེས། དེའི་རྒྱུ་མཚན་གྱིས་རྗོད་བྱེད་ལུང་གི་བསྟན་པ་ཐམས་ཅད་སྡེ་སྣོད་གསུམ་དུ་འདུ་བ་དང༌། དེ་འཛིན་པའི་ཚུལ་ཡང་བཤད་པ་དང་སྒྲུབ་པ་གཉིས་སུ་ཁ་ཚོན་ཆོད་པར་གསུང་སྟེ། མཛོད་ལས། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །དེ་འཛིན་བྱེད་པ་སྨྲ་བྱེད་པ། །སྒྲུབ་པར་བྱེད་པ་ཁོ་ན་ཡིན། །ཞེས་གསུངས་སོ། །དེ་ལྟར་བྱས་ན་དོན་ཚན་གཞན་རྣམས་ཀྱང་འདིའི་
ཁོངས་སུ་འདུ་སྟེ། མཁས་བཙུན་བཟང་གསུམ་ཞེས་པའི་མཁས་པ་ནི་ལྷག་པ་ཤེས་རབ་ཀྱི་བསླབ་པའི་ཡོན་ཏན་དང༌། བཙུན་པ་ནི་ལྷག་པ་ཚུལ་ཁྲིམས་ཀྱི་བསླབ་པའི་ཡོན་ཏན་ཡིན། བཟང་པོ་ཞེས་པ་བྱང་ཆུབ་ཀྱི་སེམས་དང་དེས་ཟིན་པའི་སྤྱོད་པའི་མིང་ཡིན་ཞིང༌། ཐུན་མོང་མ་ཡིན་པའི་ཏིང་ངེ་འཛིན་ནི་གཙོ་བོ་བྱང་ཆུབ་ཀྱི་སེམས་ལ་བྱེད་དགོས་པས་སྤྱོད་འཇུག་ཏུ་བསམ་གཏན་གྱི་ལེའུར་བྱང་ཆུབ་ཀྱི་སེམས་བསྐྱེད་ཚུལ་རྒྱས་པར་གསུངས་པ་དང༌། རྒྱན་སྣང་ལས་ཀྱང༌། ཐེག་པ་གཞན་དང་མ་འདྲེས་པའི་སེམས་རྩེ་གཅིག་པ་དང༌། ཞེས་བསམ་གཏན་གྱིས་རྩེ་གཅིག་ཏུ་བྱེད་ཚུལ་བྱིང་རྒོད་ཁེགས་པ་ཙམ་ལ་མི་བྱེད་པར་ཉན་རང་གི་ཡིད་བྱེད་སོགས་དང་མ་འདྲེས་པ་གལ་ཆེ་བར་གསུངས་པས་ཤེས་སོ། །ལྟ་སྒོམ་སྤྱོད་གསུམ་ནི་བོད་ཀྱི་བརྡ་སྦྱོར་ཚུལ་ཙམ་མ་གཏོགས། ལྟ་བ་ཤེས་རབ་སྒོམ་པ་ཏིང་འཛིན། སྤྱོད་པ་ཚུལ་ཁྲིམས་ལས་གཞན་དུ་མེད་དོ། །འཆད་རྩོད་རྩོམ་གསུམ་ནི་མཁས་པའི་ཡོན་ཏན་ཤེས་རབ་ཀྱི་བསླབ་པའི་ཁོངས་སུ་བསྡུས་སོ། །མཁྱེན་བརྩེ་ནུས་གསུམ་ཡང༌། མཁྱེན་པ་ཤེས་རབ་ཀྱི་བསླབ་པ་དང༌། བརྩེ་བ་གོང་དུ་སྙིང་རྗེའི་སྙིང་པོ་ཅན་གྱི་བྱང་ཆུབ་ཀྱི་སེམས་ཏིང་འཛིན་གྱི་བསླབ་པའི་གཙོ་བོར་བཤད་པ་དེ་བཞིན་ཡིན་ལ། ནུས་པ་ནི། ཏིང་ངེ་འཛིན་ལས་བསམ་པའི་དོན། །འབྱོར་པ་ཐམས་ཅད་སྐྱེ་བར་འགྱུར། །ཞེས་མི་འདོད་པ་སེལ་བ་དང༌། འདོད་དོན་སྒྲུབ་པའི་ནུས་པ་ཐམས་ཅད་ཏིང་ངེ་འཛིན་ལས་འབྱུང་བར་གསུངས་པས་དེར་ཡང་སྦྱར་ཆོག་མོད། འོན་ཀྱང་གསང་སྔགས་ཀྱི་ལས་རབ་འབྱམས་འགྲུབ་པའི་ནུས་པ་འབྱུང་བ། དང་པོ་ཚུལ་ཁྲིམས་ཀྱི་རྩ་བ་ཚུགས་པ་ལ་རག་ལས་
པའི་ཚུལ་དཔུང་བཟང་གི་རྒྱུད་ལས། སྔགས་ཀྱི་རྩ་བ་དང་པོར་ཚུལ་ཁྲིམས་ཏེ། །ཞེས་དང༌། འཇམ་དཔལ་རྩ་རྒྱུད་ལས། ཚུལ་ཁྲིམས་འཆལ་ལ་ཐུབ་དབང་གིས། །སྔགས་འགྲུབ་པར་ནི་མ་གསུངས་ཏེ། །ཞེས་གསུངས་པའི་ཕྱིར། འདིར་ནུས་པའི་ཡོན་ཏན་གཙོ་བོར་ཚུལ་ཁྲིམས་ཀྱི་ལག་རྗེས་ལ་སྦྱར་ནས་བཤད་ན་འབྲེལ་ཆེའོ། །དེས་ན་དང་པོ་ལྷག་པ་ཚུལ་ཁྲིམས་ཀྱི་བསླབ་པའི་ཡོན་ཏན་ནི་སྟོན་པའི་གདུང་འཚོབ་འདུལ་བ་འཛིན་པ་ཆེན་པོ་བུམ་པར་ཚུལ་ཁྲིམས་རྒྱ་མཚོ་དང༌། དགེ་ལྡན་བསྟན་པའི་མངའ་བདག་སྐྱབས་མགོན་ཆུ་བཟང་རིན་པོ་ཆེ་རྣམས་ཀྱི་དྲུང་ནས་སོ་ཐར་གྱི་ཚིགས་སྔ་ཕྱིའི་སྡོམ་པ་བཞེས་ཏེ་བསྟན་པའི་སྒོར་ཞུགས། རིགས་བརྒྱའི་ཁྱབ་བདག་ཀུན་མཁྱེན་འཇམ་དབྱངས་བཞད་པའི་རྡོ་རྗེ་དང༌། དཔལ་ལྡན་རྡོ་རྗེ་འཛིན་པ་ཆེན་པོ་ཆུ་རུ་ཁ་པ་སོགས་ཕྱི་ནང་གི་དེ་ཉིད་ཉི་ཤུ་དང་ལྡན་པའི་རྡོ་རྗེ་སློབ་དཔོན་དུ་མའི་དྲུང་ནས་དབང་བསྐུར་རྣམ་པར་དག་པས་གསང་བ་སྔགས་ཀྱི་ལམ་དུ་སྨིན་པར་མཛད། དེ་ནས་བཟུང་སྟེ་སྒོ་གསུམ་བག་མེད་པའི་དབང་དུ་སྐད་ཅིག་ཙམ་ཡང་མི་གཏོང་བར། དྲན་ཤེས་ཀྱི་བྱ་ར་གཡེལ་བ་མེད་པས་སྡོམ་པ་གསུམ་གྱི་བཅས་མཚམས་ལས་ཅུང་ཟད་ཀྱང་མི་འདའ་བར་མིག་གི་འབྲས་བུ་བཞིན་དུ་བསྲུང་བ་ཁོ་ན་སྒྲུབ་པའི་སྙིང་པོ་དང་ཉམས་ལེན་གྱི་མཐིལ་དུ་མཛད་པར་སྣང་སྟེ། ཐུགས་དམ་བཅད་རྒྱ་མཛད་པའི་སྐབས་ཐམས་ཅད་ལའང་དབང་སྡུད་ཚེ་སྒྲུབ་སོགས་མི་གནང་བར་ལམ་ཐུན་མོང་དང་ཐུན་མོང་མ་ཡིན་པའི་ཁྲིད་དམིགས་སྐྱོང་བ་དང༌། ལྷག་པར་བདག་ཉིད་འཇུག་ཅིང་དབང་བླངས་པའི་སྒོ་ནས་དམ་ཚིག་
གསོ་བ་རྩལ་འདོན་མཛད། བརྒྱ་ལ་ཉེས་པ་ཕྲ་མོ་རེས་གོས་ནའང་ལྟུང་བཤགས་དང་སྡོམ་པ་སོ་སོའི་ཕྱིར་བཅོས་ཚུལ་བཞིན་མཛད་དེ་རྒྱ་མཚོ་རོ་དང་མི་འགྲོགས་པ་ལྟར་ལྟུང་བ་དང་ཞག་ཏུ་མི་འགྲོགས་པ་ཇོ་བོ་ཨ་ཏི་ཤའི་རྣམ་ཐར་བསྐྱངས། རྒྱུན་ཁྱེར་ཆག་མེད་ཀྱི་ཐུགས་དམ་མཛད་ཚུལ་ཡང༌། དགུང་ལོ་ཉེར་གསུམ་གྱི་སྐབས་ནས་བཟུང་སྐུ་ཚེ་ཧྲིལ་བོར་དུས་རྒྱུན་ཞོགས་ཀ་སྔ་བར་བཞེངས་ནས་ལྟུང་བཤགས་དང་སྤྱི་བཤགས་ཚར་ཉེར་གཅིག་གི་རིང་ལ་ཕྱག་སྦྱང་མཛད་པའི་མཐར་ཡན་ལག་བདུན་པ་མཎྜལ་བཅས་པ་ཕུལ་ཏེ་ལམ་རིམ་གྱི་ཁྲིད་དམིགས་ཆ་ཚང་བ་རྒྱས་བསྡུས་ཅི་རིགས་དང༌། དཔལ་རྡོ་རྗེ་འཇིགས་བྱེད་ཆེན་པོའི་བསྐྱེད་རྫོགས་ཀྱི་དམིགས་རིམ་གཙོ་བོར་གྱུར་པའི་སྔགས་ཀྱི་ཟབ་ཁྲིད་མང་པོ་སྐྱོང་བར་མཛད། ནངས་ཇ་བཞེས་ནས་དྲོས་ཇའི་བར་ལ། བླ་མའི་རྣལ་འབྱོར་དང་རྗེའི་གསུང་གི་བསྟོད་ཆེན་བཞི། ས་གསུམ་མ། རྒྱན་འཇུག་དང་བརྒྱད་སྟོང་གང་འགྲོ། བླ་མཆོད་ཆོ་ག །ཕྱག་ཆེན་རྩ་བ་སོགས་གསུང་སྟེ་ཟབ་རྒྱས་ཀྱི་ལམ་ལ་ཤར་སྒོམ་རྩལ་འདོན་གནང༌། དུས་མཚམས་སོ་སོར་ཐུན་དྲུག་གི་རྣལ་འབྱོར་ཡོལ་བ་མེད་པར་སྐྱོང་ཞིང་སྐབས་གང་བདེར་རྗེ་བཙུན་རྡོ་རྗེ་རྣལ་འབྱོར་མའི་བསྐྱེད་རིམ་ཟབ་གནད་ཚང་བའི་ཉམས་བཞེས་གཙོར་འདོན་གྱི་སྒོ་ནས་ཨོཾ་གསུམ་མའི་བཟླས་པ་མང་ཉུང་གང་ལྕོགས་དང་འདུས་པའི་རྩ་རྒྱུད་ཀྱང་ཞལ་འདོན་མཛད། ཕྱི་དྲོའི་ཆར་སྒྲོལ་འདོན་རྒྱས་བསྡུས་ཅི་རིགས་དང༌། ཡི་དམ་རྡོ་རྗེ་འཇིགས་བྱེད་ཀྱི་བདག་བསྐྱེད་བཟླས་པ་གང་འགྲོ་དང་བཅས་པའི་མཐར་ཆོས་སྲུང་སྤྱིའི་གཏོར་འབུལ་གང་རྒྱས་དང་གཅོད་ཀྱི་ཉམས་བཞེས། གཟིམ་ཁར་ཡང་ཐུན་དྲུག་རྣལ་འབྱོར་གྱི་
ཁོངས་ནས་ལྟུང་བའི་བསྔོ་བགྲང་དང་ཕྱིར་བཅོས་གནད་སྨིན་སོགས་མཛད་དེ་ཉིན་རེ་བཞིན་བྲེལ་གཡེང་ཇི་ལྟར་བྱུང་ཡང་ཐུགས་དམ་ཞལ་འདོན་གྱི་རིགས་དེ་རྣམས་ཆག་མེད་གནང༌། ཕྱོགས་གཞན་དུ་ཕེབས་པའི་ཚེའང་ཐུབ་དབང་གི་སྐུ་བརྙན་ལི་མ། སྒྲོལ་དཀར་ལྗང་གཉིས་ཀྱི་སྐུ་བོད་ལི། སྨན་འདམ་ལས་གྲུབ་པའི་ཇོ་བོ་རྗེའི་སྐུ། སྐུ་འབུམ་ཙན་དན་ལས་གྲུབ་པའི་རྗེ་ཙོང་ཁ་པའི་སྐུ་དང་རྗེ་གླིང་འཕུར་མ། རྗེ་འཇམ་དབྱངས་བཞད་པ་རིན་པོ་ཆེ་དང་སྐྱབས་མགོན་ཆུ་བཟང་རིན་པོ་ཆེ་རྣམ་གཉིས་ཀྱི་འཁྲུངས་རབས་སྐུ་ཐང༌། གསུང་གི་རྟེན་བརྒྱད་སྟོང་པ། མདོ་སྡེ་མཛངས་བླུན། རྒྱན་འཇུག །འདུལ་བ་མདོ་རྩ། བྱང་ཆུབ་ལམ་སྒྲོན། རྗེ་རིན་པོ་ཆེ། པཎ་ཆེན་བློ་བཟང་ཆོས་རྒྱན། རྗེ་འཇམ་དབྱངས་བཞད་པ་སྐུ་སྔ་ཕྱི། ཡོངས་འཛིན་ཡེ་ཤེས་རྒྱལ་མཚན་དཔལ་བཟང་པོ་རྣམས་ཀྱི་གསུང་འབུམ། གྲུབ་ཆེན་སྐལ་ལྡན་རྒྱ་མཚོའི་མགུར་འབུམ། ལམ་རིམ་མཆན་མ་སོགས་གླེགས་བམ་པུ་ཏི་བརྒྱད་ཅུ་ཙམ་དང༌། ཐུགས་རྟེན་བཀའ་གདམས་མཆོད་རྟེན་རྣམས་འབྲལ་མེད་བསྣམས་ནས་གནས་གར་བཞུགས་སུ་དེ་དག་བཀོད་པ་གང་མཛེས་སུ་བཀྲམ་པའི་མདུན་དུ་ཕྱག་འཚལ་བ་མཆོད་པ་གང་རྒྱས་མཎྜལ་དང་བཅས་པ་དབུལ་བ། ཉེས་ལྟུང་ཕྲ་མོ་ཙམ་ཡང་བཏང་སྙོམས་སུ་མི་འཇོག་པར་བཤགས་ཤིང་སྡོམ་པ་སོགས་ཇོ་བོ་ཆེན་པོས་འབྲལ་སྤངས་མཆོད་རྟེན་གྱི་དྲུང་དུ་ཇི་ལྟར་མཛད་པ་བཞིན་གནང༌། ལྷག་པར་སྟོན་པ་ཐུགས་རྗེ་ཅན་གྱི་སྐུ་བརྙན་བྱིན་ཅན་ཆུང་ངུ་ཞིག་དང༌། སྐུ་གོང་མའི་མགུལ་ཕུར་ཞིག་ཡོད་པ་རྒྱུན་དུ་སྐུ་ལ་བསྣམས་
ཤིང༌། ཁམས་བསངས་སོགས་ཀྱི་ཚེ་གཙང་སར་འཇོག །གཞན་ཡང་ཡི་དམ་གྱི་གསང་ཐང༌། རྒྱུད་ཀྱི་གླེགས་བམ། རྡོར་དྲིལ། ཌཱ་མ་རུ། ཁ་ཊྭཱཾ་ག །རྒྱན་དྲུག །ཀ་པཱ་ལ། བུམ་པ་སོགས་དངོས་དང་ཙཀ་ལི་ཅི་རིགས་པའི་དམ་ཚིག་གི་རྫས་རྣམས་འབྲལ་སྤངས་སུ་མཛད་ཅིང༌། དེ་དག་གཞན་སུས་ཀྱང་ལག་མི་བརྒྱུད་པ་དང་མཐོང་ཡུལ་དུ་མི་འཇོག་པར་ཆེས་སྦ་བ་གནང་སྟེ་བསྲུང་བསྟེན་བཟའ་བའི་དམ་ཚིག་གི་ཆ་ཕྲ་མོ་ཙམ་ལས་ཀྱང་མི་འདའ་བས་ངེས་པ་དོན་གྱི་རིག་པ་འཛིན་པའི་རྗེ་བོར་གྱུར། ལྷ་ཁང་ཆུང་ངུ་ཞིག་ཏུ་མཆོད་མཇལ་གནང་ནའང་བཤགས་སྦྱང་གཙོ་བོར་གྱུར་པའི་ཡན་ལག་བདུན་པ་མཎྜལ་དང་བཅས་པ་ཕུལ་ཏེ་ལམ་ཐུན་མོང་བའི་ལུས་ཡོངས་རྫོགས། ཐུན་དྲུག་རྣལ་འབྱོར་གྱི་སྒོ་ནས་སྔགས་ཀྱི་དམ་ཚིག་གཙང་མར་མཛད་དེ་ལམ་ཐུན་མོང་མ་ཡིན་པའི་ཉམས་ལེན་སྐྱོང་བ་ལས་རིགས་འདྲ་མི་འདྲ་མང་པོ་མི་མཛད། གཞན་ཕན་འཕྲིན་ལས་སྐྱོང་བའི་དུས་དང་ཐ་ན་ཆར་འབེབས་གཅོད་ཅིག་ཚུན་ཆད་ཀྱི་སྐབས་སུའང་དེའི་དམིགས་བསལ་གྱི་ཞལ་འདོན་རེ་ཡོད་ཀྱང་ཚང་མའི་སྔོན་འགྲོ་དང་རྨང་གཞི་ལྟ་བུ་ལ་དམ་ཚིག་གསོ་བའི་རིམ་པ་སོགས་རྒྱུན་གྱི་འཆར་ཅན་དེ་རྣམས་ཆག་མེད་ཡིན་ལ། དེར་མ་ཟད་ཟབ་ཟབ་མོ་ཞིག་རྗེས་ན་ཡོད་མདོག་གིས་འདི་རྣམས་ཁྲལ་རྒྱུག་ལྟ་བུའི་སབ་སུབ་བྲེལ་དབང་དུ་མི་གཏོང་བར་གང་རྒྱས་གནད་སྨིན་ཁོ་ན་མཛད་པས། སྦྱིན་བདག་ལ་ལའི་བསམ་པར་ཁོས་ཞུས་པའི་རིམ་གྲོ་གལ་ཆེན་མི་གནང་བར་ཁོང་རང་གི་ཞལ་འདོན་ཞིག་གནང་གི་འདུག་སྙམ་པ་འཆར་ཡང༌། གནད་ཤེས་ན་ཉམས་ལེན་དང་ལོག་གནོན་ཐམས་ཅད་གཅིག་གིས་གོ་ཆོད་པར་བློ་སྦྱོང་རྩ་ཚིག་ལས་གསུངས་པ་བཞིན།
གཅིག་ཤེས་ཀུན་གྲོལ་རྣམས་ཀྱིས་མཛད་ལུགས་འདི་འདྲ་ཞིག་ཡིན་དགོས་ཏེ། གླང་རི་ཐང་པས། ཆོས་ཟབ་མི་ཟབ་མིན། བློ་ཟབ་མི་ཟབ་ཡིན་གསུངས་པ་དང༌། འགྲོ་མགོན་སངས་རྒྱས་དབོན་གྱིས་ཀྱང༌། མི་རྟག་རྒྱུད་ལ་མ་སྐྱེས་ན། །གསང་བ་འདུས་པ་མི་ཟབ་སྟེ། །འཆི་བ་མི་རྟག་དྲན་པ་ན། །སྐྱབས་འགྲོ་ཚིག་གསུམ་ཟབ་པ་ཡིན། །གསུངས་པ་ལྟར། ལམ་ཐུན་མོང་བའི་ཀུན་སློང་དང་དམ་ཚིག་རྣམ་པར་དག་པས་དངོས་གྲུབ་གཉིས་ཀྱི་གཏེར་སྒོ་ཕྱེས་པ་ཞིག་ལ་ལས་གང་བྱེད་ཀྱང་འགྲུབ་སླ་ལ་ཚེགས་མེད་པ་ཆོས་ཉིད་ཡིན་པས། ཁྱ་དགེ་བློ་གྲོས་རྒྱ་མཚོས། ཆོས་ཉམས་ལེན་ཤེས་ན་ཐམས་ཅད་ཟབ། །ལྷ་སྒྲུབ་ཚུལ་ཤེས་ན་ཐམས་ཅད་མྱུར། །གསུངས་པ་ལྟར་རོ། །སྤྱི་མཐུན་གྱི་ལས་ཀྱིས་བསྐྱེད་པའི་ཐན་ཁྱེར་ཆེན་པོ་མཐའི་བསྐལ་པ་མངོན་དུ་འོང་བ་ལྟ་བུའི་སྐབས་དུ་མར་ཡང་གོང་སྨོས་བཞིན་ཆར་འབེབས་ཀྱི་རིམ་པ་རེ་མཛད་པ་ཙམ་གྱིས་བདེ་བླག་ཏུ་བབས་པ་ན། ཚང་མས་འདོན་རྒྱུའི་ཆོ་ག །བསགས་རྒྱུའི་རྫས། བྱེད་རྒྱུའི་ལག་ལེན་ཐམས་ཅད་འདྲའང་འབྲས་བུ་མི་འདྲ་བ་ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པའི་སྟོབས་མི་འདྲ་བའི་ཁྱད་ཡིན་ཏེ། འདི་འདྲ་ལའང་ཚུལ་ཁྲིམས་གཙང་བ་ཁོ་ན་གལ་ཆེ་བ་བློ་སྦྱོང་མཚོན་ཆ་འཁོར་ལོ་ལས། སད་སེར་ལ་སོགས་མི་འདོད་བྱུང་བའི་ཚེ། །དམ་ཚིག་ཚུལ་ཁྲིམས་ཚུལ་བཞིན་མ་བསྲུང་བའི། །ལས་ངན་མཚོན་ཆ་རང་ལ་འཁོར་བ་ཡིན། །ད་ནི་ཚུལ་ཁྲིམས་ལ་སོགས་གཙང་བར་བྱ། །ཞེས་གསུངས་ལ། འདུལ་བ་ལུང་ལས། ཚུལ་ཁྲིམས་ལྡན་པ་སྨོན་པས་འགྲུབ། །གསུངས་པ་བཞིན་ཚུལ་ཁྲིམས་རྣམ་པར་དག་པའི་བདེན་ཚིག་
བརྗོད་ན་ཤིང་སྐམ་ལའང་མེ་ཏོག་བདུན་རེ་འཁྲུངས་ན། ཆར་ཆུ་དུས་སུ་འབེབས་པ་དང༌། རབ་གནས་སོགས་མཛད་པའི་ཡུལ་དུ་དགེ་མཚན་རྒྱ་ཆེན་པོ་འབྱུང་བ་རྣམས་དེའི་ནུས་པའི་ཆ་ཤས་ཕྲ་མོ་ཙམ་ཞིག་ཡིན་པར་མངོན་ནོ། །དེང་དུས་ཕལ་མོ་ཆེ་ལམ་ཐུན་མོང་བ་ལ་སྣ་མི་ཕེབས་པར་སྔགས་ལ་མཐོ་སྙེགས་བྱེད། སྔགས་ཀྱི་འཇུག་སྒོ་དབང་དང་དམ་ཚིག་ལ་རྩལ་དུ་མི་འདོན་པར་ལག་ལེན་ལ་རྔམས། ལག་ལེན་ཡང་བསྙེན་སྒྲུབ་བཞག་ནས་ལས་སྦྱོར་ལ་འཇུག་པ་ནི་ཤོག་བུའི་མེ་ཏོག་དང་རི་མོའི་མར་མེ་བཞིན་དགོས་ནུས་ཅི་ཡང་མེད་པའི་གཟུགས་བརྙན་ཙམ་དུ་འགྱུར་རོ། །དམ་པ་འདིས་ནི་དེ་ལས་བཟློག་སྟེ་བསྟོད་པ་བརྒྱ་ལྔ་བཅུ་པ་ལས། ཁྱོད་ནི་ཡོན་ཏན་རྒྱུ་རྣམས་ལ། །མངོན་དགྱེས་འབྲས་བུ་རྣམས་ལ་མིན། །སྒྲུབ་པ་བཟང་པོ་འདི་ཉིད་ཀྱིས། །ཁྱོད་ཀྱི་ཡོན་ཏན་ཕུན་སུམ་ཚོགས། །གསུངས་པ་བཞིན། འབྲས་བུ་དེ་དང་དེ་འགྲུབ་པ་ལ་རྒྱུ་གང་དང་གང་གཙོ་བ་དེ་ཉིད་ནན་ཏན་དུ་བསྒྲུབས་ཏེ་མཆོད་རྟེན་གྱི་བང་རིམ་བཞིན་མས་རིམ་ནས་བརྟན་པར་བྱས་པའི་མཐུས། འབྲས་བུ་གྲུབ་པའི་ཚེ་ན་ཟོ་ཆུན་གྱི་འཕྲུལ་འཁོར་བཞིན་དུ་སྟབས་གཅིག་ལ་དོན་ཐམས་ཅད་ཕུན་སུམ་ཚོགས་པར་འགྱུར་ཏེ། ནད་གདོན་སོགས་ཀྱིས་གཙེས་པའི་ཤིན་ཏུ་ཉམ་ཐག་པ་རྣམས་སྲུང་མདུད་བུམ་ཆུ་ཙམ་གྱིས་ཞི་བར་བྱས་པ་དང༌། ནོར་ལོངས་སྤྱོད་ཀྱི་དབུལ་བས་གདུངས་པ་རྣམས་ཞལ་གཡང་ཙམ་གྱིས་སྟོབས་འབྱོར་རྒྱས་པ་དང༌། སྐྱེ་བོ་ཁེངས་དྲེགས་ཅན་དུ་མ་ཞལ་མཐོང་བ་ཙམ་གྱིས་དབང་དུ་གྱུར་པ་དང༌། བསྟན་པ་ལ་ལོག་པར་འཁུ་བ་མང་པོ་ཐུགས་མ་མཉེས་པ་ཙམ་གྱིས་ནུས་པ་ཟད་དེ་སྤ་བཀོང་བའི་ཚུལ་གོང་དུ་ཟུར་ཙམ་སྨོས་པ་དང༌། གཞན་ཡང་ཉིད་ལ་ལོག་པར་འཁུ་བའི་བསམ་
སྦྱོར་ཅན་དུ་མ་ཟློག་པ་སོགས་མཛད་ཀྱང་རང་ཉེས་སུ་སོང་བའི་ལོ་རྒྱུས་མང་དུ་ཡོད་པར་སྣང་ངོ༌། །དེ་ལྟར་ཐུགས་རྗེ་དང་བྱིན་རླབས་མངོན་ཚན་ཤིན་ཏུ་ཆེ་བའི་དབང་གིས་མཐོང་ཐོས་ཀྱི་སྐྱེ་བོ་རིགས་མི་གཅིག་པ་ཚང་མས་བླ་མར་བཀུར་ཞིང་ཞབས་ཀྱིས་རེག་པའི་རྡུལ་ཙམ་ཡང་དད་པའི་རྟེན་དུ་བྱེད་པ་དང༌། ཁེངས་དྲེགས་དོར་ཏེ་ཉིད་ཀྱི་སློབ་མ་དང་སྦྱིན་བདག་གི་གྲངས་སུ་ཨེ་ཆུད་བལྟས་ནས་པདྨའི་མཚོ་ལ་བུང་བ་འདུ་བ་བཞིན་བྱེད་པ་དེ་ཐམས་ཅད་ཀྱང་ལྷག་པའི་ཚུལ་ཁྲིམས་རྣམ་པར་དག་པའི་འབྲས་བུ་ཡིན་ཏེ། ཕར་ཕྱིན་བསྡུས་པ་ལས། རྐང་པས་བཀྲ་ཤིས་གྱུར་པའི་རྡུལ་དག་ཀྱང༌། །ཕྱག་འཚལ་མགོས་གཏུགས་ཐོབ་པ་ཀུན་ཏུ་འཁྱེར། །ཞེས་དང༌། རྗེ་བདག་ཉིད་ཆེན་པོས། ཚུལ་ཁྲིམས་ཉེས་སྤྱོད་དྲི་མ་འཁྲུད་པའི་ཆུ། །ཉོན་མོངས་ཚ་གདུང་སེལ་བའི་ཟླ་བའི་འོད། །སྐྱེ་དགུའི་དབུས་ན་ལྷུན་པོ་ལྟ་བུར་བརྗིད། །སྟོབས་ཀྱིས་བསྡིགས་པ་མེད་པར་འགྲོ་ཀུན་འདུད། །ཅེས་གསུངས་པ་བཞིན་ནོ། །གཉིས་པ་ལྷག་པ་ཏིང་ངེ་འཛིན་གྱི་བསླབ་པའི་ཡོན་ཏན་ནི། འདི་ལ་ཐུན་མོང་བ་ཞི་ལྷག་ཟུང་འབྲེལ་གྱི་ཏིང་ངེ་འཛིན་དང༌། ཐུན་མོང་མ་ཡིན་པ་ཕར་ཕྱིན་ཐེག་པ་ནས་བཤད་པ་གཞན་དོན་ལ་རྩེ་གཅིག་པའི་བྱང་ཆུབ་ཀྱི་སེམས་དང་མཚུངས་པར་ལྡན་པའི་ཏིང་ངེ་འཛིན་དང༌། རྡོ་རྗེ་ཐེག་པ་ནས་བཤད་པ་བདེ་སྟོང་གི་ཏིང་ངེ་འཛིན་གསུམ་ཡོད་པས། དང་པོ་མངའ་ཚུལ་ནི། ཞུས་ལན་ནོར་བུའི་ཕྲེང་བར། བདག་གི་ཡོན་ཏན་སྦ་བྱ་ཞིང༌། །ཞེས་པ་ལྟར། དམ་པ་འདི་ནི་ཡོན་ཏན་ཐམས་ཅད་བུམ་ནང་གི་མར་མེ་ལྟར་སྦས་པ་བཀའ་གདམས་གཙང་མའི་བརྟུལ་ཞུགས་ཁོ་ན་ལྷུར་བཞེས་པས་དེ་ཙམ་ཡང་
ཡོད་པའི་རྣམ་པ་ཞལ་གྱིས་མི་བཞེས་མོད། འོན་ཀྱང་དེ་ཡོད་པར་རྒྱུ་དང་འབྲས་བུ་གཉིས་ཀྱི་སྒོ་ནས་རྗེས་སུ་དཔོག་ནུས་ཏེ། ཞི་གནས་ཀྱི་ཚོགས་ལ་ཉན་ས་དང་སྒོམ་རིམ་བྱང་ཆུབ་བཟང་པོ་ཇོ་བོའི་ཏིང་ངེ་འཛིན་གྱི་ཚོགས་ཀྱི་ལེའུ་གཉིས་སོགས་ལས་ཆེས་མང་དུ་གསུངས་ནའང༌། བེའུ་བུམ་སྔོན་མོ་ལས། ཏིང་འཛིན་བསྐྱེད་ཕྱིར་ཡན་ལག་ལ་གནས། །དེ་ཡི་གཙོ་བོའི་ཡན་ལག་ཚུལ་ཁྲིམས། །ཞེས་སོགས་ལྟར། ཐམས་ཅད་ཀྱི་སྡོམ་དང་རྩ་བ་ལྟ་བུ་ཚུལ་ཁྲིམས་རྣམ་པར་དག་པ་དང་དྲན་ཤེས་མི་ལྷོད་པ་གཉིས་ཡིན་པས། དང་པོ་གོང་དུ་བསྒྲུབས་ཟིན་ཅིང་དྲན་ཤེས་གཡོ་བ་མེད་པའི་ཚུལ་ནི་ཉིད་ཀྱི་མགུར་ལས། གཡེང་བའི་དྲན་པ་ནང་དུ་བཀུག་ནས། །ཞེས་དང༌། ཡིད་ཀྱི་བུ་ཆུང་ཚིམ་དང་ལྷན་ཅིག །དྲན་ཤེས་ཨ་མ་བརྟན་པར་ཆགས་སོང༌། །ཞེས་སོགས་ཀྱིས་གོ་ནུས་ཏེ། ཚོགས་ཀྱི་སྐད་དོད་སམྦྷ་ར་ཞེས་པ་ཡང་དག་པར་འགྲུབ་པའི་དངོས་པོ་ཞེས་པ་ཡིན་པས་ཚིག་གི་ནུས་པས་ཀྱང་ཤེས་ལ། ཚད་མ་རྣམ་འགྲེལ་ལས་ཀྱང༌། རྒྱུ་ཚོགས་པ་ལས་འབྲས་སྐྱེས་པར། །རྗེས་སུ་དཔོག་པ་གང་ཡིན་པ། །དོན་གཞན་ལ་ནི་མི་ལྟོས་ཕྱིར། །དེ་ནི་རང་བཞིན་ཡིན་པར་བརྗོད། །ཅེས་གསུངས་སོ། །འབྲས་བུའི་སྒོ་ནས་ཀྱང་རྗེས་སུ་དཔོག་ནུས་ཏེ། བྱང་སེམས་ཀྱི་ཞི་གནས་སྒྲུབ་པའི་དགོས་པའི་གཙོ་བོ་གཅིག་ནི། ལམ་སྒྲོན་ལས། མྱུར་དུ་རྫོགས་པའི་བྱང་ཆུབ་ཚོགས། །ཡོངས་སུ་རྫོགས་པར་འདོད་གྱུར་པ། །དེས་ནི་འབད་བྱས་མངོན་ཤེས་དག །འགྲུབ་པར་འགྱུར་གྱི་ལེ་ལོས་མིན། །ཞི་གནས་གྲུབ་པ་མ་ཡིན་པར། །མངོན་ཤེས་འབྱུང་བར་མི་འགྱུར་ལ། །ཞེས་གཞན་དོན་རང་རང་གིས་སྐལ་བ་བཞིན་བྱེད་པ་ལ་མངོན་ཤེས་དགོས་པ་དང༌། མངོན་ཤེས་
མཚན་ཉིད་པ་འགྲུབ་པ་ལ་ཞི་གནས་སྔོན་དུ་འགྲོ་དགོས་པར་གསུངས་སོ། །བདག་ཉིད་ཆེན་པོ་འདི་ནི་སྙིགས་དུས་ཀྱི་སྐྱེས་སྤྲུལ་ལ་ལ་ལྟར་ལྷ་མཐོང་འདྲེ་མཐོང་གི་རྣམ་པས་ཡིན་མིན་ཐམས་ཅད་ཕྱོགས་གཅིག་ཏུ་བཤད་ནས་རེ་རེའི་ཐོག་ཏུ་ཁེལ་བ་ན་མངོན་ཤེས་ཀྱི་ཁ་བོ་སྒྲོགས་པ་དེ་འདྲ་མི་མཛད་ཀྱང༌། རང་ལ་བློ་གཏད་པའི་གྲྭ་སློབ་ཡོན་བདག་གི་རིགས་ལ་ཆོས་སྲིད་རྣམ་དཀར་གྱི་བྱ་བ་གང་བསྒོ་བ་དེ་གསུང་བཞིན་དུ་བསྒྲུབས་ན་རྒྱ་མཚོའི་རླབས་བཞིན་དུས་ལས་མི་ཡོལ་བར་འགྲུབ་ངེས་པ་དང༌། དེ་འདྲ་མ་བྱེད་ཅེས་བཀག་པའམ། དངོས་སུ་མ་བཀག་ཀྱང་དང་པོ་ནས་ཐུགས་ལ་མི་བཞེད་པ་རྣམས་མི་འགྲུབ་པའམ། འགྲུབ་ཀྱང་སྐྱོན་དང་བཅས་པར་འགྲོ་བ་ཨ་ཀྱཱ་རིན་པོ་ཆེས་གསུངས་ཚུལ་གོང་དུ་བཀོད་པ་དེས་མཚོན་ཏེ་རྒྱུས་ཡོད་ཐམས་ཅད་ལ་མཐུན་སྣང་དུ་གྲུབ་པ་ནི་མངོན་ཤེས་ཀྱི་གཟིགས་པ་སྒྲིབ་པ་མེད་པའི་འབྲས་རྟགས་ཡང་དག་ཡིན་ནོ། །དེའང་ཆོས་ཟབ་པ་རྒྱུ་མཚན་དུ་བྱས་པའམ། གང་ཟག་གཅིག་ལ་ཕན་པ་རྒྱུ་མཚན་དུ་བྱས་ཏེ་ཐམས་ཅད་པར་གཅིག་ཏུ་བཏབ་ན་གདུལ་བྱ་སོ་སོའི་སྐལ་བ་མཆོག་དམན། དབང་པོ་རྣོ་རྟུལ། ཁམས་དང་མོས་པ་མི་འདྲ་བས་མཐའ་གཅིག་ཏུ་ཕན་དཀའ་ལ། རྗེ་འདིས་ནི་སོ་སོར་གཟིགས་ཏེ། ལ་ལ་ནི་མདོ་སྔགས་ཀྱི་ལུས་ཡོངས་སུ་རྫོགས་པའི་ཟབ་གནད་ཀྱི་སྒྲུབ་པ་ལ་སྦྱོར། ལ་ལ་ནི་འཕགས་བོད་ཀྱི་གཞུང་ཆེན་མོར་མཐའ་རྒྱ་ཆོད་པའི་ཐོས་བསམ་ལ་སྦྱོར། ལ་ལ་ནི་བསག་སྦྱང་དང་ཁ་འདོན་བཟླས་བརྗོད་སོགས་ལ་སྦྱོར། ལ་ལ་ནི་སྨན་རྩིས་སྒྲ་སྙན་ངག་སོགས་ཐ་སྙད་རིག་གནས་ཀྱི་བསླབ་སྦྱང་ལ་སྦྱོར། ལ་ལ་ནི་གར་ཐིག་
དབྱངས་གསུམ་སོགས་ཆོ་ག་ཕྱག་ལེན་གྱི་རིམ་པ་ལ་སྦྱོར། ལ་ལ་ནི་སུམ་རྟགས་དང་གཟབ་གཤར་གྱི་ཡི་གེ་འདྲི་ཀློག་གཏོར་མའི་བཅའ་བཟོ་ཚུན་ཆད་སློབ་ཏུ་བཅུག་སྟེ། རང་རང་གི་བློ་ནུས་དང་མཐུན་པའི་དགོས་དོན་འདི་འགྲུབ་སྙམ་དུ་སེམས་ལ་འཛིན་རྒྱུ་དང༌། དེའི་སྒོ་ནས་བླ་མའི་བཀའ་དྲིན་དྲན་རྒྱུ་རེ་ངེས་ཅན་དུ་འོང་རྒྱུ་ཡོད་པས། མཐོང་ཐོས་དྲན་རེག་ཐམས་ཅད་དོན་དང་ལྡན་ཞིང༌། སྒོ་མཐའ་དག་ནས་འགྲོ་བའི་རྒུད་པ་སེལ་ཐབས་དང༌། འཕྲལ་ཡུན་གྱི་ཕུན་ཚོགས་འགྲུབ་པའི་ཐབས་མ་ཚང་བ་མེད་པར་འགྱུར་བ་བསྔགས་འོས་བསྔགས་བསྟོད་ལས། ཁྱོད་ཀྱིས་གང་ལས་འགྲོ་བ་དག །མ་དྲངས་རྒུད་པ་དེ་གང་མཆིས། །གང་དང་འཇིག་རྟེན་མ་སྤྲད་པའི། །ཕུན་ཚོགས་དེ་ཡང་གང་ཞིག་མཆིས། །ཞེས་གསུངས་པ་ལྟར་རོ། །གཉིས་པ་བྱང་ཆུབ་སེམས་དཔའི་ཐུན་མོང་མ་ཡིན་པའི་བསམ་གཏན་གྱི་བསླབ་པའི་གཙོ་བོ་གཞན་དོན་ལ་རྩེ་གཅིག་ཏུ་གྱུར་པའི་ཚུལ་ནི། མ་བརྟག་བཏང་སྙོམས་སོགས་ཀྱི་དབང་དུ་ཅུང་ཟད་ཙམ་ཡང་འབྱུང་བ་མི་སྲིད་པར་གདུལ་བྱའི་ཁམས་དང་དབང་པོའི་རིམ་པ་སྔོན་དང་ཕྱི་མའི་གནས་སྐབས་ཐམས་ཅད་གཟིགས་ནས་གང་ཕན་གྱི་ཐབས་ལ་སྦྱོར་ཚུལ་བཤད་མ་ཐག་པ་དེ་ཉིད་བྱང་ཆུབ་ཀྱི་སེམས་ཀྱི་བྱེད་པས་གཞན་དོན་ལ་རྩེ་གཅིག་ཏུ་གཞོལ་ཚུལ་ཡང་ཡིན་ཏེ། བུ་སྟོན་ཐམས་ཅད་མཁྱེན་པས། གཞན་དོན་ཆོས་ཀྱི་གཙོ་བོར་གསུངས་པ་ཡང༌། །གདུལ་བྱའི་དབང་པོ་ཁམས་དང་བག་ལ་ཉལ། །ཚོགས་དང་སྔོན་དང་ཕྱི་མའི་མཐའ་ཤེས་ཤིང༌། །རང་དོན་མ་ཆགས་གདུལ་བྱ་འདུལ་ལ་དགོངས། །ཞེས་སོ། །དེར་མ་ཟད་བསྔོ་བ་ཚིག་བཞི་པ་གཅིག་མཛད་ནའང་བསྟན་འགྲོ་སྤྱིའི་དོན་དུ་བསྔོ་ཚུལ་རྣམ་ཐར་གྱི་དཀྱུས་སུ་ཡང་
ཡང་སྨོས་པ་དེ་དག་ཀྱང༌། དབུ་མ་བཞི་བརྒྱ་པར། དབུགས་ཀྱང་སེམས་ཅན་རྣམས་ལ་ནི། །སྨན་སླད་ཁོ་ནར་འབྱུང༌། གསུངས་པ་བཞིན་སྤྱོད་ལམ་ཐམས་ཅད་གཞན་དོན་ཁོ་ནར་གཞོལ་བའི་མཚན་མ་ཡིན་ལ། སྦྱིན་བདག་ལས་ནོར་ལོངས་སྤྱོད་སོགས་བསོད་པ་ལ་གཞན་དོན་གྱི་མིང་བཏགས་པའང༌། དེང་དུས་ཕལ་མོ་ཆེ་ཚོལ་བའི་སྐབས་སུ་མིང་ལ་གཞན་དོན་ཟེར་ཡང༌། ལག་ཏུ་ཚུད་པ་ན་རྣམ་དཀར་ཕྱོགས་སུ་ཅུང་ཟད་ཀྱང་མི་གཏོང་བར། གཉེན་བཤེས་བདུན་རྒྱུད་ཚུན་ཆད་ཀྱི་དོན་ལ་མཛོད་ཕུགས་སུ་རྒྱ་རིམ་པ་བདུན་གྱིས་བཏབ་ནས་འཇོག་པ་རྣམས་ནི་གཞན་དོན་གྱི་དྲི་མི་བྲོ་བར་མ་ཟད། ལེགས་པར་བརྟགས་ན་རང་གིས་རང་བསླུས་པ་ཁོ་ན་ཡིན་པས་རང་དོན་ཡང་མེད་དེ། མཁས་གྲུབ་ཐམས་ཅད་མཁྱེན་པས། དབང་ཁྲིད་ལུང་གིས་ཟས་ནོར་ཚོལ་བ་དང༌། །ལྟོ་ཕྱིར་རྫུན་གྱི་ཆོ་ག་བྱུང་རྒྱལ་གྱིས། །ཕན་སེམས་མེད་པར་གྲོང་ཆོག་བརྩོན་པ་ནི། །བདག་གཞན་བསླུ་བའི་གཞན་དོན་གཟུགས་བརྙན་ཡིན། །གསུངས་པ་ལྟར་རོ། །འདི་པས་གནས་སྐབས་དེར་སྦྱིན་བདག་གིས་ཕུལ་བ་ལེན་པའི་རྣམ་པ་ཙམ་མཛད་ཀྱང་ཞལ་ཏ་བའི་འདུ་ཤེས་ཙམ་གྱིས་དེའི་དད་རྫས་དེ་ཅུང་ཟད་ཙམ་ཡང་ཆུད་མ་ཟོས་པར་དཀོན་མཆོག་གི་རྟེན་བཞེངས་པ་དང༌། སྡེ་འདིས་མཚོན་པའི་ཆོས་སྡེ་ཆེ་ཆུང་དུ་མར་བཤད་སྒྲུབ་ཀྱི་རྒྱུན་སྐྱོང་བའི་འཛིན་ཐེབས་སུ་གཏོང་བ། དབུས་ཀྱི་རྒྱལ་བ་ཡབ་སྲས་སོགས་དམ་པ་རྣམས་ལ་དངོས་འབུལ། ཇོ་ཤཱཀ་སོགས་རྟེན་ལ་མཆོད་པ། གདན་ས་ཆེན་པོ་བཞིས་མཚོན་པའི་དགེ་འདུན་ལ་བསྙེན་བཀུར། རི་བོ་རྩེ་ལྔ་སོགས་རྒྱ་བོད་ཀྱི་གནས་ཆེན་ཀུན་ལ་མཆོད་འབུལ་
དང་གཏོང་ཐེབས་སོགས་སུ་སྦྱར་ཏེ་སྤྱོད་རྒྱུད་ཚེ་དཔག་མེད་ཀྱི་སྐབས་ལས་གསུངས་པ་བཞིན་རྣམ་དཀར་གོང་འཕེལ་གྱི་ཚོགས་སུ་འགྲོ་ངེས་མཛད་པ་ནི་ངེས་དོན་གྱི་གཞན་དོན་ཡིན་ནོ། །རྒྱལ་སྲས་བདག་ཉིད་ཆེན་པོ་རྣམས་དབེན་པར་ཏིང་ངེ་འཛིན་བསྒྲུབ་པ་ལས་ཀྱང་འདི་བཞིན་མཛད་ན་སྒྲུབ་པའི་མཆོག་ཏུ་འགྱུར་བའི་ཚུལ་དང༌། དེ་ཉིད་དེའི་དབེན་པའི་དོན་དུ་འགྱུར་བའི་ཚུལ། ཉི་ཁྲི་ལས། ཉན་ཐོས་དང༌། རང་སངས་རྒྱས་ཀྱི་ཡིད་ལ་བྱ་བ་དང་མ་འདྲེས་ན། བྱང་ཆུབ་སེམས་དཔའ་ཆེན་པོ་དེ་ནི་དབེན་པར་རྣམ་པར་སྤྱོད་པ་ཡིན་ནོ། །ཞེས་གསུངས་པའི་དོན། ཡོན་ཏན་རིན་པོ་ཆེ་སྡུད་པ་ལས། གང་ཞིག་གྲོང་ངམ་འོན་ཏེ་དགོན་པར་གནས་ཀྱང་རུང༌། །ཐེག་པ་གཉིས་ཀྱི་སེམས་བྲལ་བྱང་ཆུབ་མཆོག་ངེས་ན། །འདི་ནི་འགྲོ་དོན་ཞུགས་པ་རྣམས་ཀྱི་དབེན་པ་སྟེ། །ཞེས་དང༌། དབེན་པ་འདི་མི་ཤེས་པའི་ཞེས་སོགས་ཀྱིས་རང་དོན་ཡིད་བྱེད་ཀྱིས་དབེན་ཚུལ་འདི་མ་ཤེས་པར་རི་སུལ་སྟོང་པར་ལོ་བརྒྱ་སྟོང་དུ་བསྒོམས་ཀྱང་བྱང་སེམས་ཀྱི་དབེན་པའི་དོན་མ་ཚང་བར་གསུངས། ༸རྒྱལ་དབང་བསྐལ་བཟང་རྒྱ་མཚོས་ཀྱང༌། དོན་བྱ་བ་ཉུང་བ་ལྷུར་བྱེད་པ། །སྤྱིར་དམ་པས་བསྔགས་འོས་མཆོག་ཡིན་ཀྱང༌། །ཁྱེད་སེམས་དཔའ་ཆེ་ལ་མཛེས་མ་ཡིན། །ཞེས་གསུངས་སོ། །གཞན་ཡང་སྡུད་པ་ལས། གལ་ཏེ་བྱང་ཆུབ་སེམས་དཔའི་ཏིང་འཛིན་བསམ་གཏན་གནས། །དགྲ་བཅོམ་རང་རྒྱལ་ཐེག་པར་འདོད་པའི་བློ་སྐྱེད་ན། །མཉམ་པར་མ་བཞག་རྒོད་ཅིང་སེམས་གཡེང་གྱུར་པ་སྟེ། །ཞེས་བྱང་སེམས་ཐུན་མོང་མ་ཡིན་པའི་ཏིང་ངེ་འཛིན་གྱི་བསླབ་པའི་མི་མཐུན་ཕྱོགས་སྤོང་བ་ལ། སྤྱིར་བཏང་གི་བྱིང་རྒོད་དང་རྣམ་གཡེང་བཀག་པ་ཙམ་གྱིས་མི་ཆོག་
པར། ཉན་ཐོས་འཇིག་སྲེད་ཀྱི་སྒྲིབ་པ་དང༌། རང་རྒྱལ་བརྩེ་མེད་ཀྱི་སྒྲིབ་པ་སོགས་རང་དོན་ཡིད་བྱེད་ཀྱི་མཚན་མ་རྣམས་འདིའི་ལྡོག་ཟླའི་རྣམ་གཡེང་གི་གཙོ་བོ་ཡིན་པས་དེ་སྤོང་དགོས་པར་གསུངས་ཏེ། རྣམ་གཡེང་གི་གཙོ་བོ་དེར་ངོས་བཟུང་བའི་ཤུགས་ལ་བསམ་གཏན་གྱི་གཙོ་བོ་གཞན་དོན་ཁོ་ནར་གཞོལ་བའི་བྱང་ཆུབ་ཀྱི་སེམས་སུ་གོ་ནུས་ལ། བསམ་གཏན་གྱི་ཕར་ཕྱིན་དང་བྱང་སེམས་ཀྱི་ཐུན་མོང་མ་ཡིན་པའི་ཏིང་ངེ་འཛིན་གྱི་བསླབ་པ་གཉིས་དོན་གཅིག་པ་ཐེག་པ་ཆེན་པོའི་སྤྱི་སྐད་ཡིན་ནོ། །གསུམ་པ་བདེ་སྟོང་དབྱེར་མེད་ཀྱི་ཏིང་ངེ་འཛིན་བརྙེས་ཚུལ་ནི། སྐུ་ཚེ་ཧྲིལ་བོར་གཙོ་བོ་རྡོ་རྗེ་འཇིགས་བྱེད་དང་རྗེ་བཙུན་རྣལ་འབྱོར་མའི་རིམ་གཉིས་ཉམས་ལེན་གྱི་མཐིལ་དུ་མཛད་དེ་སྐྱེས་སྦྱང་གི་ཤེས་རབ། རྟག་སྦྱོར་གུས་སྦྱོར་གྱི་བརྩོན་པ། དམ་ཚིག་སྡོམ་པའི་བསྲུང་མཚམས། ལྷ་སྔགས་ལ་ཡིད་ཆེས་སོགས་བྱང་ཆུབ་རྡོ་རྗེས་ཇི་ལྟར་གསུངས་པའི་ཐབས་ཀྱི་རྣམ་པ་མ་ཚང་བ་མེད་པར་སྒྲུབ་པ་མཛད་འདུག་པས་འབྲས་བུ་རྟོགས་པ་ཁྱད་པར་ཅན་འཁྲུངས་ཡོད་མེད་ལ་དོགས་པའི་གནས་ཙམ་ཡང་ག་ལ་མཆིས། འོན་ཀྱང་སྦས་པའི་བརྟུལ་ཞུགས་ཀྱིས་དངོས་སུ་ཞལ་གྱིས་འཆེས་པ་མ་མཛད་པས་རྒྱ་ཆེར་སྨྲ་བ་དཀའང་ཟུར་ཙམ་བརྗོད་ན། མཚན་མོའི་རིང་ལ་གཟིམ་དང་ཏིང་ངེ་འཛིན་བསྲེས་ནས་དགེ་སྦྱོར་སྐྱོང་བ་ཞིག་ཡོད་ཅེས་རྒྱུས་ཡོད་རྣམས་གླེང་བས། ཕལ་པ་གཉིད་ལོག་པ་བཞིན་ལུས་སེམས་ཐམས་ཅད་ལྷོད་ལྷོད་པོ་དང་ཤིག་ཤིག་པོར་སོང་བ་དེ་འདྲ་མིན་པར། ཤ་ཚུགས་ཀྱི་སྒྲིམ་ཆ་དང༌། མདངས་ཀྱི་གསལ་ཆ་སོགས་གང་ལ་བལྟས་ནའང་ནང་དུ་ཏིང་ངེ་འཛིན་ཞིག་ལ་
མཉམ་པར་བཞག་ཡོད་པའི་ཉམས་ཤེས་རྒྱུ་ཡོད་པ་ཞིག་ཡིན་པར་སྣང༌། དེ་ལྟ་ན་གཟིམ་དང་བསྲེས་ནས་སྐྱོང་རྒྱུའི་དགེ་སྦྱོར་ཡང་དགེ་སེམས་གང་ཡང་རུང་བ་ཙམ་ཞིག་མ་ཡིན་པར་ངེས་ཏེ། ཁྲུས་ལྡང་ཁ་ཟས་ཀྱི་རྣལ་འབྱོར་སོགས་བླ་མེད་ཀྱི་རྒྱུད་དོན་ལྟར་རྣམ་པ་ཀུན་ཏུ་མཛད་བཞིན་པ་མངོན་སུམ་གྱིས་གྲུབ་པས། དེ་ལ་དཔག་ན་འདིའི་སྐབས་སུའང་ཉལ་བ་གཉིད་ཀྱི་རྣལ་འབྱོར་ཞེས་བྱ་བ་ལྷོ་བྲག་མར་པའི་ཐུགས་བཅུད། བསྲེ་བ་སྐོར་དགུའི་མན་ངག་གི་སྙིང་པོ་དེ་ཉིད་ཡིན་པ་གོར་མ་ཆག་གོ །དེའི་སྐྱོང་ཚུལ་ནི་གཉིད་དུ་འགྲོ་བའི་ཚེ་སྡུད་རིམ་གྱི་དམིགས་པ་བསྐྱངས་ཏེ། སྟོང་བཞི་རིམ་པར་ཤར་བའི་འོད་གསལ་གྱི་དུས་ན་དེ་དང་སྟོང་པ་ཉིད་སྦྱར་བའི་བདེ་སྟོང་དབྱེར་མེད་ཀྱི་ཏིང་ངེ་འཛིན་ལ་མཉམ་པར་འཇོག་པ་གཙོ་བོ་ཡིན་ལ། སྤྱོད་བསྡུས་ལས། ས་མཐུག་གྱུར་པས་རབ་ཏུ་རིང་གཉིད་ལོག །ཅེས་སོགས་ཀྱིས་ཕལ་བ་ལའང་རྣམ་པ་སྣ་ཚོགས་འབྱུང་རྒྱུ་ཡོད་པ་བཞིན། བདག་ཉིད་ཆེན་པོ་རྣམས་ལ་ཚོགས་རླབས་པོ་ཆེ་རྫོགས་པར་བྱེད་པའི་རྗེས་ཐོབ་ཀྱི་ཉམས་ལེན་ངོ་མཚར་བ་མང་པོའང་སྐྱོང་རྒྱུ་ཡོད་པར་སྣང་བས་དེ་འདྲ་ཞིག་ཡིན་པར་མངོན་ནོ། །གསུམ་པ་ལྷག་པ་ཤེས་རབ་ཀྱི་བསླབ་པའི་ཡོན་ཏན་ནི། གནས་ལུགས་རིགས་པ་དོན་དམ་རྟོགས་པའི་ཤེས་རབ། གནས་ལྔ་རིགས་པ་ཀུན་རྫོབ་རྟོགས་པའི་ཤེས་རབ། སེམས་ཅན་གྱི་དོན་སྣ་ཚོགས་སྒྲུབ་ཚུལ་ཤེས་པའི་ཤེས་རབ་གསུམ་དང༌། ཡང་ན་ལྟ་བ་རིགས་པ། ཇི་སྙེད་པ་རིགས་པ། གནས་ལྔ་རིག་པའི་ཤེས་རབ་གསུམ་ཟབ་པ་མྱུར་བ་གསལ་བ་རྒྱ་ཆེ་བའི་ཤེས་རབ་བཞི། འཆད་རྩོད་རྩོམ་པའི་ཤེས་རབ། སྐྱེས་སྦྱང་གི་ཤེས་རབ་གཉིས། ཐོས་བསམ་སྒོམ་པའི་ཤེས་རབ་གསུམ་
སོགས་ཇི་ལྟར་དུ་བྱས་ཏེ་བཤད་ཀྱང་རུང་མོད། འདིར་ཤེས་རབ་ཕུན་སུམ་ཚོགས་པའི་རྒྱུ་དང་འབྲས་བུ་གཉིས་ཀྱི་དབང་དུ་བྱས་ཏེ་བརྗོད་ན། དང་པོ་ལ་ལྷན་ཅིག་བྱེད་པའི་རྐྱེན་དགེ་བའི་བཤེས་གཉེན་བསྟེན་པའི་ཚུལ་དང༌། ཉེར་ལེན་གྱི་རྒྱུ་ཚུལ་བཞིན་ཡིད་ལ་བྱེད་པས་གཞུང་ལུགས་རྒྱ་མཚོར་སྦྱངས་ཚུལ་གཉིས། དང་པོ་ནི། བསྟན་པ་སྤྱི་དང་བྱེ་བྲག་གི་སྒོར་འཇུག་པའི་བཤེས་གཉེན་གོང་དུ་སྨོས་པ་རྣམས་དང༌། ཁྱད་པར་མདོ་སྔགས་ཟབ་རྒྱས་ཀྱི་གདམས་པ་ཟད་མི་ཤེས་པ་རྒྱ་མཚོ་ལས་ཆུ་བཅུ་པ་བཞིན་མནོས་ཏེ་བསྟན་པའི་གནད་ལ་ངེས་པ་སྟེར་བའི་བཀའ་དྲིན་མཚུངས་པ་མེད་པ་ནི་ཀུན་མཁྱེན་འཇམ་དབྱངས་བཞད་པའི་རྡོ་རྗེ་ཡིན་ལ། གཞན་ཡང་དགེ་ལྡན་བསྟན་པའི་སྲོག་ཤིང་དགའ་ལྡན་ཁྲི་རིན་པོ་ཆེ། དཔལ་ལྡན་རིགས་བརྒྱའི་ཁྱབ་བདག་རྗེ་ཐུའུ་བཀྭན་རིན་པོ་ཆེ། ཆོས་བརྒྱད་ཀྱི་འཆིང་བ་རྩད་ནས་ཆོད་པ་ཀུན་སྤངས་བློ་བཟང་རྒྱལ་མཚན། རིགས་པའི་དབང་ཕྱུག་ངག་དབང་ཉི་མ་སོགས་བཤེས་གཉེན་དམ་པ་དུ་མ་རིགས་ཀྱི་ཅོད་པན་དུ་བཀུར་ཏེ། གསུང་གི་བདུད་རྩི་མནོས་ནས་གོད་པ་མེད་པར་ཐུགས་རྒྱུད་ལ་གཏམས་པས་ཡོན་ཏན་མི་ཟད་པའི་གཏེར་དུ་གྱུར་པ་ཡིན་ནོ། །གཉིས་པ་ཉེར་ལེན་གྱི་རྒྱུ་གཞུང་ལུགས་ལ་སྦྱང་བ་མཛད་ཚུལ་ཡང་རྒྱས་པར་གོང་དུ་བརྗོད་ཟིན་པ་ལྟར་རྒྱལ་བའི་བསྟན་པ་འཛིན་པ་ལ་ཐོག་མར་མང་དུ་ཐོས་པ་གལ་ཆེ་བར་གཟིགས་ནས། ཆེན་པོའི་མིང་དང་གོ་ས་སོགས་ཀྱིས་ཆོག་ཤེས་རློམ་སེམས་མ་མཛད་པར་ཁེངས་དྲེགས་དོར་ཞིང་དཀའ་བ་ཁྱད་དུ་བསད་དེ་ཉིན་མཚན་ཁོར་མོ་ཡུག་ཏུ་དཔེ་འཛིན་སྐྱོར་སྦྱང༌། དེའི་དོན་ལ་དཔྱོད་པ། བརྒལ་བརྟགས་ཀྱིས་རྩོད་པ།
གཞུང་གི་དཔེ་ཁྲིད། དཀའ་གནད་ལ་དྲི་རྨེད་སོགས་ཕྱོགས་སྒོར་མོ་ནས་གསན་སྦྱོང་རྡོ་རུས་ཐུག་པ་མཛད། ཁྱད་པར་དུ་གཞུང་ཆེན་མོ་པོ་ཏི་བཅུ་ཕྲག་ལྷག་པ་འཛིན་སྐྱོར་གནང་སྟེ་ཚོགས་རྒྱུགས་ཕུལ་ཚུལ་སོགས་སྔར་བཤད་ཟིན་ལ། རྒྱུད་གྲྭར་ཕེབས་ནས་མདོ་སྡེ་ཀུན་གྱི་ཟ་མ་ཏོག་དང་རྒྱུད་སྡེ་ཀུན་གྱི་རྒྱལ་པོ་དཔལ་གསང་བ་འདུས་པའི་རྩ་བའི་རྒྱུད་ཀྱི་སྦས་པའི་གནད་རྣམས་བཤད་རྒྱུད་ཆེན་པོ་དྲུག་ལ་བརྟེན་ནས་འགྲེལ་ཚུལ་དཔལ་ལྡན་ཟླ་བ་དང་རྗེ་བླ་མའི་ལེགས་བཤད་རྣམས་ཀྱིས་གཙོས་གསང་ཆེན་རྒྱུད་སྡེ་ཀུན་གྱི་གནད་དོན་ལམ་རིམ་པ་གཉིས་སུ་བསྡུས་ནས་ཉམས་སུ་ལེན་ཚུལ། ཞལ་ཤེས་ཀྱི་མན་ངག །ཆོ་ག་ཕྱག་ལེན་སོགས་མཐའ་དག་ལ་སྦྱང་བ་མཐིལ་ཕྱིན་པ་དང༌། ཞར་བྱུང་རིག་གནས་ཀུན་ལའང་སྦྱངས་ཚུལ་སོགས་ཀྱང་གོང་དུ་སོང་ཟིན་པས་བསྐྱར་མི་དགོས། གཉིས་པ་རྒྱུ་རྐྱེན་དེ་དག་གི་འབྲས་བུ་འཆད་རྩོད་རྩོམ་གསུམ་ལ་མཚུངས་ཟླ་མེད་པའི་མཁས་པའི་གོ་འཕང་མངོན་དུ་མཛད་ཚུལ་ལ། འཆད་པའི་ཡོན་ཏན་ནི། རྣམ་པར་བཤད་པའི་སྒོ་བསྡུ་བ་དང༌། དབྱིག་གཉེན་གྱི་རྣམ་བཤད་རིགས་པ་སོགས་ནས་བྱུང་བ་ལྟར་བཤད་ཚུལ་གྱི་སྐྱོན་ཐམས་ཅད་དང་བྲལ་ཞིང༌། ཡོན་ཏན་ཚང་བའི་ཚུལ་བརྗོད་བྱའི་རྣམ་གྲངས་མང་ཡང་སྙིང་པོ་བསྡུས་ན། དང་པོར་ཆོས་སྟོན་པའི་ཀུན་སློང་བྱམས་སྙིང་རྗེ་དང་བསྟན་པ་རིང་དུ་གནས་པའི་འདུ་ཤེས་སོགས་ཀྱི་སྒོ་ནས། སྟོན་ཚུལ་བརྗོད་དོན་གྱི་སྙིང་པོ་མི་གསལ་བ། གོང་འོག་འཁྲུགས་པ། ཧ་ཅང་རྒྱ་འབྱམས་པས་གནད་དུ་མི་འདྲིལ་བ། ཟེར་ཟློས་ཀྱི་རྣམ་གྲངས་མང་པོས་ཉི་མ་འཕུལ་བ། གཞན་ལ་བསྙད་འདོགས་ཟུར་ཟ་མང་པོས་དྲི་མ་ཅན་དུ་བྱེད་པ། ལུང་
རིགས་ཀྱི་གཏད་སོ་མེད་པར་ཚོད་འཇོག་བྱེད་པ་སོགས་ཀྱི་སྐྱོན་དང་བྲལ་བར་མདོ་རྒྱུད་བསྟན་བཅོས་ཚད་མ་དང༌། ལྷག་པར་རྗེ་ཡབ་སྲས་ཀྱི་གསུང་དྲི་མ་མེད་པ་རེ་གཞིར་བཞག་སྟེ། འབྲེལ་དང་མཚམས་སྦྱོར་མདོར་རྒྱས་སྤྲོད་ཚུལ་གྱིས་གོ་བདེ་བ། གནད་འགག་གི་སྤྱི་སྡོམས་ནས་བཟུང་སྟེ་གསུང་བས་འདུས་ཆེ་བ། ལུང་རིགས་ཀྱི་ཟུར་ཕྱིན་པས་ངེས་ཤེས་བརྟན་པོ་སྐྱེད་པ། རྟོགས་སླའི་དཔེ་དང་སྦྱར་བས་ཉན་སྤྲོ་བ། ཁྱད་པར་དུ་གང་གསུང་ཐམས་ཅད་ཆོས་ཀྱི་མདེའུ་སྣེ་ནང་དུ་བསྐོར་ཏེ་རྒྱུད་འདུལ་ཐབས་འབའ་ཞིག་ཏུ་མཛད་པས་ཕན་ཆེ་བ་སོགས་ཁྱད་ཆོས་བསམ་ལས་འདས་པ་ཞིག་ཡོད་པའི་སྟོབས་ཀྱིས་ཉན་པ་པོ་མིང་དང་གོ་སས་རློམ་པ། རྟོག་གེའི་ང་རྒྱལ་གྱིས་དྲེགས་པ། སྟོབས་འབྱོར་མངའ་ཐང་གིས་ཁེངས་པ། རིགས་རུས་ཀྱིས་སྙེམས་པ་ཐམས་ཅད་ཀྱང་རྟ་དམུ་རྒོད་སྲབ་ཀྱིས་ཁ་ལོ་བསྒྱུར་བ་བཞིན་བློ་སྣ་རང་དབང་མེད་པར་བསྒྱུར་ཐུབ་པ་དང༌། སླར་ཡུན་རིང་འགོར་ཡང་དེའི་ཚེ་འདི་གསུངས་པ་ཡིན་སྙམ་དུ་སེམས་ལ་གཟེར་བཏབ་པ་བཞིན་མི་བརྗེད་པར་འཛིན་རྒྱུ་ཡོད་པས་ཡིད་དང་རྣ་བས་སྐྱེལ་མཁས་པ་སྟེ། མདོར་ན་པོ་ཏོ་བའི་རྣམ་ཐར་མཛེས་པའི་པདྨོ་ལས། བརྒལ་ལན་སུན་འབྱིན་ཆོས་དམག་ཟེར་མཆུ་ཉུང༌། །དབང་ཟ་རང་བཟོས་བསྡུས་དོན་མི་མཛད་ཅིང༌། །དོན་གྱི་མཐའ་ཆོད་ཚིག་ཉུང་དོན་ཀུན་གོ །མང་ཐོས་ལུང་ལྡན་དོན་གྱི་ས་མཚམས་ཕྱེད། །གྲུབ་མཐའ་མ་འདྲེས་ཆོས་སྐད་བཟང་ལ་བརྟེན། །ཅི་བཤད་སྒོམ་དོན་བློ་སྣ་བསྒྱུར་ལ་མཁས། །ཉམས་པ་ཟུར་གསོ་ཚིག་འབྲུ་དམ་པ་བཀྲོལ། །འཁྲུགས་པ་ཀུན་བསྡེབས་འབྱམས་པ་ངག་ཏུ་འདྲིལ། །
ཞེས་གསུངས་པ་ཇི་ལྟ་བ་བཞིན་ཚང་ངོ༌། །དེའི་གནད་ཀྱིས་ཆོས་དོན་དུ་གཉེར་བའི་མཁས་པ་གཟུ་བོར་གནས་པ་ཐམས་ཅད་སློབ་མར་གྱུར་ཏེ་གསུང་ལས་སྐྱེས་པའི་བུ་སློབ་ཀྱིས་རྒྱ་བོད་ཧོར་གསུམ་གྱི་ཡུལ་ཐམས་ཅད་དུ་ཁྱབ་པ་བྱུང་བ་ནི། བསྟོད་པ་བརྒྱ་ལྔ་བཅུ་པ་ལས། ཁྱོད་ཀྱིས་སློབ་མ་བཟང་པོའི་ཤིང༌། །དགེ་བའི་མེ་ཏོག་གིས་བརྒྱན་པ། །དཔྱིད་ཀྱི་ཤིང་ནི་མེ་ཏོག་གིས། །བརྒྱན་པ་ལྟ་བུར་མཛེས་པ་ལགས། །ཞེས་པ་འདིའི་ཚིག་རིས་ལྟར་བྱས་ན་སློབ་མ་དེ་ཉིད་ཡོན་ཏན་གྱི་རྒྱན་གྱིས་མཛེས་པའི་དོན་ལྟ་བུར་འགྲོའང༌། འདི་སློབ་མ་བླ་མའི་རྒྱན་དུ་སོང་ནས་ཆེ་བ་འདོན་ཚུལ་ཡིན་པས། འགྱུར་ཡང༌། སློབ་མ་དགེ་བའི་མེ་ཏོག་གིས། །བཟང་པོའི་ཤིང་ཁྱོད་བརྒྱན་གྱུར་པ། །དཔྱིད་ཀྱི་ཤིང་ནི་མེ་ཏོག་གིས། །བརྒྱན་པ་ལྟ་བུར་མཛེས་པ་ལགས། །བྱས་ན་ཤིང་ལས་སྐྱེས་པའི་མེ་ཏོག་གིས་ཤིང་བརྒྱན་པ་བཞིན། བླ་མའི་གསུང་ལས་སྐྱེས་པའི་སློབ་མས་བླ་མ་བརྒྱན་པའི་དཔེ་དོན་གཉིས་ཤིན་ཏུ་འབྲེལ་ལོ། །ས་པཎ་གྱིས་ཐུབ་པའི་བསྟོད་པ་ལས་ཀྱང༌། ཁྱོད་ཀྱི་ཡོན་ཏན་སྨོས་ཅི་འཚལ། །སྲས་ཀྱི་ཡོན་ཏན་མཐོང་བས་ཁུམས། །སྐྱ་རེངས་ཤར་བའི་གཟི་བརྗིད་ཀྱིས། །པདྨོའི་གཉེན་གྱི་འོད་ཟེར་གོ །ཞེས་གསུངས་པ་ལྟར། བླ་མའི་སྐུའི་ཆེ་བ་འདོན་པའི་མཛེས་རྒྱན་ཡིན་ཀྱང་ཞིབ་པར་བགྲང་གིས་མི་ལང་ལ། རགས་རིམ་ཙམ་ཞིག་སྨོས་ན། ཉིད་ཀྱི་བླ་མའི་ཁྲོད་ན་ཚུར་ཡང་ཆོས་གསན་པའི་བླ་སློབ་གཉི་གར་གྱུར་པ་དབུས་འགྱུར་བསྟན་པའི་སྲོག་ཤིང་དགའ་ལྡན་ཁྲི་རིན་པོ་ཆེ་ངག་དབང་སྙན་གྲགས། ངེས་དོན་གྱི་རྣལ་འབྱོར་དབང་ཕྱུག་རྒྱ་རྩང་སྒོམ་ཆེན་བློ་བཟང་རྒྱལ་མཚན་རྣམ་པ་གཉིས་དང༌། ཨ་ཀྱཱ་རིན་པོ་ཆེའི་མདུན་ནས་
ཀྱང་ཆོས་ལུང་འགའ་ཞིག་གསན་ལ། འོན་ཀྱང་བསྟན་པའི་རྩ་ལག་ཨ་ཀྱཱ་རིན་པོ་ཆེ་བློ་བཟང་འཇམ་དབྱངས་རྒྱ་མཚོ་ནི་རྗེ་འདི་ཉིད་ལས་མདོ་སྔགས་ཟབ་རྒྱས་ཀྱི་གདམས་པའི་ཐུགས་བཅུད་མ་ཚང་མེད་པར་བུམ་པ་གང་བྱོའི་ཚུལ་དུ་བཞེས་པའི་ནང་གི་ཐུགས་སྲས་གཙོ་བོ་ཡིན་ནོ། །གཞན་ཡང་འགྲོ་བ་མཐའ་ཡས་པའི་འདྲེན་མཆོག་མཚུངས་ཟླ་མེད་པ་བྱང་ཕྱོགས་བསྟན་པའི་མགོན་པོ་ཧལ་ཧ་རྗེ་བཙུན་དམ་པ་དབང་ཕྱུག་འཇིགས་མེད་རྒྱ་མཚོ། ཏ་ལེའི་ཧུ་ཐོག་ཐུ་བསྐལ་བཟང་ཐུབ་བསྟན་རབ་རྒྱས། དགོན་ཀྱཱ་དམ་ཆོས་བསྟན་འཛིན་རྒྱ་མཚོ། གསེར་ཏོག་སྤྲུལ་བའི་སྐུ་ཡེ་ཤེས་ཐུབ་བསྟན་རྒྱ་མཚོ། སྟག་མཚེར་སྤྲུལ་བའི་སྐུ་བློ་བཟང་མཁས་གྲུབ་ཉི་མ། ཆེ་ཤོས་སྤྲུལ་བའི་སྐུ་ངག་དབང་བཤད་སྒྲུབ་བསྟན་པའི་ཉི་མ། གྲོ་ཚང་རྒྱུད་པ་བླ་ཟུར་སྐལ་བཟང་བཀྲ་ཤིས་རྒྱ་མཚོ། མཚན་སྒྲོགས་མཁན་ཆེན་དགེ་འདུན་དོན་གྲུབ་ཀྱི་སྤྲུལ་སྐུ། རྒྱ་ཡག་སྤྲུལ་སྐུ་བློ་བཟང་བསྟན་པའི་ཉི་མ། སྐེ་ཀྱཱ་ཞབས་དྲུང་། སྒོམ་ཆེན་རིན་པོ་ཆེའི་སྤྲུལ་སྐུ་བློ་བཟང་དགེ་ལེགས་ཉི་མ། སྨན་པ་བླ་ཟུར་ཉ་ཀྱཱ་རྒྱལ་མཚན་ནོར་བུ། སྨན་པ་བླ་ཟུར་གྲོ་ཚང་སྤྲུལ་སྐུ། དེའི་བླ་ཟུར་སོ་ཉིད་ངག་དབང་དམ་ཆོས། སྨན་པའི་ཁྲི་བ་གྲོ་ཀྱཱ་བསྟན་འཛིན་རྒྱ་མཚོ། ཅོ་ནེ་ཞབས་དྲུང་སྐལ་བཟང་བསྟན་འཛིན་རྒྱ་མཚོ། ཨ་རིག་ཞབས་དྲུང་བསོད་ནམས་བསྟན་པའི་རྒྱལ་མཚན། བསྟན་པའི་གསལ་བྱེད་ལྕང་ལུང་པཎྚི་ཏ། མཁས་དབང་པཱ་རིན་ཐོ་ཡོན་བློ་བཟང་དགེ་ལེགས་བསྟན་འཛིན། ཨ་བག་ལྷ་རམས་པ་ངག་དབང་ཡར་འཕེལ། དུར་བེད་ཨེརྟི་ནི་དར་ཧན་མཁན་པོའི་སྤྲུལ་སྐུ་ངག་དབང་ཐུབ་བསྟན་ཉི་མ། ཏ་རེ་གངྒཱའི་
པཎྚི་ཏ་བླ་མ་བསྟན་འཛིན། ཧོར་ཏུན་ཏཱ་ཡན་ཆིའི་སྤྲུལ་སྐུ་བློ་བཟང་མཁས་མཆོག་གྲགས་པ། མུར་གུ་ཆིག་བདེ་ལྡན་བཀོད་པ་གླིང་གི་མེར་གེན་ཏའི་ཆིང་ཆོས་རྗེ་བློ་བཟང་བསྟན་པའི་རྒྱལ་མཚན། ཆ་ཧར་ཁུ་བེ་ཐུ་ཨུ་ལན་གྱི་ཆོས་རྗེ་བློ་བཟང་དགེ་ལེགས། ཞབས་དྲུང་འཇིགས་མེད་བསྟན་འཛིན་ཉི་མ། སོ་ཉིག་བསྟན་པ་དར་རྒྱས་གླིང་གི་སྤྲུལ་སྐུ་བློ་བཟང་ཚུལ་ཁྲིམས་ཉི་མ། མེརྒེན་པཎྚི་ཏ་ཆོས་རྗེ་བསོད་ནམས་བསྟན་པའི་རྒྱལ་མཚན། སུ་ཉིད་གཡས་རུའི་ཝང་གི་སྐུ་མཆེད་མཁན་པོ་བླ་མ་སངས་རྒྱས་བཀྲ་ཤིས་རྒྱ་མཚོ། སུ་ཉིད་གཡོན་རུ་ཏི་ལེ་བི་ཤྲི་རུ་ཆོས་རྗེའི་སྤྲུལ་སྐུ་བློ་བཟང་དཔལ་ལྡན་ཆོས་འབྱོར། ཨ་བ་ག་ཞབས་དྲུང༌། ཨོར་དུ་སུ་ཨེར་ཏི་ནི་ཆོས་རྗེའི་ཞབས་དྲུང་ངག་དབང་དཔལ་ལྡན་ཉི་མ། ཨོར་དུ་སུ་སྨན་པ་བླ་ཟུར་དཀོན་མཆོག་རབ་རྒྱས། ཨོར་དུ་སུ་ཧང་གིན་ཞབས་དྲུང་རིན་ཆེན་འབྱུང་གནས། གྲོ་ཀྱཱ་ཞབས་དྲུང་སོགས་དམ་པའི་སྐྱེ་འཕྲེང་འཛིན་པའི་སྤྲུལ་སྐུ་དང་ཆོས་ཀྱི་གདན་ཁྲི་འཛིན་པའི་བླ་མ་མང་པོ་དང༌། གཞན་ཡང་ཨོར་དུ་སུ་ཤོག་གི་སྦས་པའི་རྣལ་འབྱོར་པ་ཆེན་པོ་ངག་དབང་སྨོན་ལམ། ཨོར་དུ་སུ་ཝང་གི་ཤོག་ནས་སྒྲུབ་པའི་རྒྱལ་མཚན་འཛིན་པ་རི་ཁྲོད་པ་དཀོན་མཆོག་སྙན་གྲགས། ཨོར་དུ་སུ་གླིང་བསྲེས་དཀའ་བཅུ་མཐུ་སྟོབས། ཨུ་རད་སྨོན་རམས་པ་དཔལ་འབྱོར་སོགས་གཞུང་ལུགས་རྒྱ་མཚོར་བློ་གྲོས་ཀྱི་གྲུ་གཟིངས་འདོད་དགུར་འཇུག་པའི་དགེ་བཤེས། ཆོས་བརྒྱད་ཀྱི་འཆིང་བ་དོར་ཏེ་སྤོང་བ་བསམ་གཏན་ལ་གཅིག་ཏུ་གཞོལ་བའི་རི་ཁྲོད་པ་སོགས་བགྲང་གིས་མི་ལང་ངོ༌། །མཆོད་ཅིང་བསྙེན་བཀུར་བའི་སྦྱིན་བདག་གི་རིམ་པ་ནི། ཐོག་མཐའ་བར་གསུམ་དུ་མཛད་འཕྲིན་གྱི་གདུགས་དཀར་འདེག་པའི་ཡུ་བ་ལྟ་བུ་མི་རྗེ་མཚུངས་པ་མེད་པ་
ཆིང་ཝང་བསོད་ནམས་རྡོ་རྗེ། དེའི་སྲས་ས་སྐྱོང་མིའི་དབང་ཕྱུག་དམ་པ་ཝང་ཚེ་རིང་དོན་གྲུབ། མུ་རིང་ཝང་ཕྱག་རྡོར། པཻ་ལི་འཇིགས་མེད། དེའི་སྲས་པཻ་ལི་འཇམ་དཔལ། པཻ་ལི་འཕྲིན་ལས་དཔལ་འབྱོར། པེ་ཟི་མི་འགྱུར། དེའི་སྲས་པེ་ཟི་རཏྣ་སིངྡྷི། པེ་ཟི་མཚོ་སྐྱེས། དར་རྒྱས་གུང༌། ཇ་སག་ཨུལ་ཅུས་ཐུ་དའི་ཆིང་རྡོ་རྗེ། སྲས་ཇ་སག་དའི་ཆིང་དབང་ཆེན་དོན་གྲུབ། ཚྭ་འདམ་ཇ་སག་ཨེང་ཁི་བ་ཡར། ཇ་སག་བསྟན་སྐྱོང༌། དེའི་སྲས་ཇ་སག་རབ་བརྟན་སོགས་མཚོ་སྔོན་གྱི་སའི་ཆར་གཏོགས་པའི་དཔོན་རིགས་ཆེས་མང་པོ་དང༌། བྱང་ཕྱོགས་ཧོར་གྱི་ཡུལ་ནས་ས་སྐྱོང་དམ་པ་སུ་ཉིད་གཡས་རུའི་དུའི་རེད་ཝང་རཏྣ་སིདྡྷི་སྐུ་མཆེད་བཅས། དུར་བེད་ཏཱ་ཝང་ཕུན་ཚོགས་བསམ་འགྲུབ། ཧོའུ་ཆིང་ཝང༌། ཨོར་དུ་སུ་ཇུན་གར་ཏཱ་བེ་ཟི་སོགས་དད་པའི་ལང་ཚོ་གཏོང་བའི་རྒྱན་གྱིས་མཛེས་པའི་དཔོན་པོ་ཆེ་ཆུང༌། མི་བཟང་སེ་དོད། ཁྱིམ་བདག་འབྱོར་ལྡན་སོགས་མཐའ་ཡས་སོ། །དགེ་ཚུལ་སློང་བསྙེན་གནས་དགེ་བསྙེན་སོགས་ཀྱི་སྡོམ་པ་མནོས་ཏེ་བྱང་ཆུབ་གསུམ་གྱི་ཁང་བཟང་དུ་འཇུག་པའི་ནོར་བུའི་ཐེམ་སྐས་བཙུགས་པ་ཁྲི་ཕྲག་ལས་ལྷག་ལ། ཆོས་འབྲེལ་ཙམ་མནོས་ཏེ་མཐོ་རིས་དང་ཐར་པའི་ས་བོན་བསྐྲུན་པ་ཚུན་ཆད་ནི་བགྲང་གིས་མི་ལང་ངོ༌། །རྩོད་པའི་ཡོན་ཏན་ནི། སྤྱིར་ད་ལྟ་བཤད་སྒྲུབ་ཀྱི་བསྟན་པའི་བྱ་བ་ཀུན་གྱི་ནང་ན་མདོ་དབུས་ཡོངས་ལ་དར་རྒྱས་ཆེ་བ་རྩོད་པ་ཡིན་པར་གྲགས་མོད་ཀྱང༌། ཕལ་མོ་ཆེ་ཞིག་གིས་རྩོད་ཚུལ་ནི། མཁས་གྲུབ་ཐམས་ཅད་མཁྱེན་པས། རྙེད་བཀུར་འཁོར་དང་གྲགས་པ་དོན་གཉེར་བའི། །འགྲན་སེམས་ཕྲག་དོག་བདག་བསྟོད་གཞན་སྨོད་ཀྱིས། །ངེས་
ཤེས་གྲངས་དང་ཤག་སྦྱོང་ལྷུར་ལེན་པ། །ཉོན་མོངས་སོ་ནམ་ཐོས་པའི་གཟུགས་བརྙན་ཡིན། །གསུངས་པ་ལྟ་བུར་སོང་བ་མང་ལ། དེ་མིན་ཡང་རྐུན་པོ་སྡར་མ་ནོར་ལ་འཇབ་པ་བཞིན་དུ་རང་གི་ཞེ་འདོད་ཕ་རོལ་པོས་ཤེས་ཀྱིས་དོགས་པའི་ཚིག་སུབ་སུབ་བོས་མིང་ཟུར་རེའི་སྟེང་ནས་ཡིན་ཀྱང་མགོ་སྐོར་ཅི་ཐུབ་དང༌། ཕྱི་རྒོལ་གྱི་ཁ་ནོར་བ་ཙམ་ལའང་དངོས་འགལ་གྱི་རྒྱང་འབོད་ཨེ་ཐུབ་ལྟ་བ་སོགས་རེ་དོགས་མང་པོ། དཔལ་ཆོས་ཀྱི་གྲགས་པའི་རྩོད་རིགས་དང༌། ས་པན་གྱི་མཁས་འཇུག་སོགས་ལས་རྩོད་པ་རྣམ་དག་གི་འགལ་ཟླར་གསུང་བ་ཁོ་ན་ལས། ཆོས་ཀྱི་དེ་ཉིད་རིགས་པ་གསུམ་གྱིས་གཏན་ལ་ཕབ་སྟེ་མ་རྟོགས་ལོག་རྟོག་གི་དྲི་མ་དྲུངས་ནས་འབྱིན་པས་རང་གཞན་གཉི་གར་སྨན་པ་དེ་ལྟ་བུ་དཀོན་ཡང། དམ་པ་འདིས་ནི་གཞུང་ཆེན་མོའི་གོ་དོན་གཞིར་བཟུང་སྟེ་རང་གཞན་གཉི་ག་ཆོས་ཀྱི་གནད་ལ་ངེས་པ་སྣ་རེ་ཡིན་ཀྱང་སྐྱེད་ཅི་ཐུབ། ལོག་རྟོག་རེ་རེའང་སེལ་ཅི་ཐུབ་ཀྱི་ཕན་སེམས་དང་འདུན་པ་རྣམ་པར་དག་པ་ལས། མཁས་གྲགས་ཀྱི་རེ་བ་དང༌། ཕྱི་རྒོལ་སྨ་འབེབ་ཀྱི་བསམ་པ་སོགས་ནམ་ཡང་མི་མཛད་པས། རྩོད་ཟླ་རྣམས་ཀྱང་ཅི་ཙམ་འགྲོགས་པ་བཞིན་ཇེ་གུས་སུ་འགྲོ་བ་ཞིག་ཡོད་པ་གྲྭ་ཐོག་མཉམ་པའི་རྒྱུས་ཡོད་རྣམས་གླེང་ངོ༌། །རྩོམ་པའི་ཡོན་ཏན་ནི་དཀོན་མཆོག་རྗེས་དྲན་གྱི་མདོར། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ་ཞེས་སོགས་དང༌། མདོ་སྡེ་རྒྱན་ལས། གཟུགས་རྒྱན་རང་བཞིན་ཡོན་ཏན་ལྡན་པ་མེ་ལོང་ནང་སོང་ན། །ཞེས་སོགས་ཀྱིས་རང་བཞིན་གྱི་རྒྱན་ཟབ་རྒྱས་ཀྱི་ལུས་བཟང་པོའང་རྗོད་བྱེད་ཕུན་སུམ་ཚོགས་པའི་གསལ་བྱེད་ཀྱི་རྒྱན་གྱིས་མཛེས་པར་བྱེད་དགོས་
པར་གསུངས་ལ། རྗེ་བླ་མའི་རིན་པོ་ཆེ་གསུམ་གྱི་གཏམ་གྱི་སྦྱོར་བར་ཡང་དེ་བཞིན་དུ་གསུངས་ཏེ། བསྟན་བཅོས་ཀྱི་སྤྱི་ཁོག་ཤིན་ ཏུ་བཟང ་བའི་ནང་དུའང་སྦྱོར་ཚུལ་ཉེས་པ་རེ་རེ་བྱུང་ན་རྒྱན་མང་ན་ཆུང་སྣ་བཅད་པ་བཞིན་དུ་མཛེས་པ་དམན་པར་བྱེད་པར་དཎྜིས་གསུངས་སོ། །དེ་ལྟར་ཚིག་དོན་ཕུན་སུམ་ཚོགས་པ་འབྱུང་བ་ལ་སྙན་ངག་གི་གཞུང་སོགས་ལ་སྦྱང་དགོས་པར་གཟིགས་ཏེ་ཐ་སྙད་པའི་རིག་གནས་རྣམས་ལའང་ཐོས་བསམ་ཚུལ་བཞིན་དུ་མཛད་པ་ན་སྐྱེས་སྦྱང་གི་བློ་གྲོས་ཕུན་སུམ་ཚོགས་པས་དཀའ་ཚེགས་མེད་པར་སྨྲ་བའི་དབང་ཕྱུག་ཏུ་གྱུར་པར་ངེས་ཏེ། སྔོན་ཀུན་མཁྱེན་འཇམ་དབྱངས་བཞད་པ་རིན་པོ་ཆེའི་བཀས་བསྐུལ་ནས་ཐ་སྙད་རིག་གནས་རྣམས་ལ་སྦྱང་བ་མཛད་པའི་ཚེ་རྗེ་དེ་ཉིད་ཀྱིས་སྩལ་བའི་ཆབ་ཤོག་ལས། ཡིད་འཕྲོག་ཆུས་སྐྱེས་ལྟེ་བར་འཇོ་སྒེག་མཁན། །བཻ་ཌཱུར་རྒྱུད་མངས་སྒྲ་ལས་ཆོས་ཕུང་ཀུན། །གླུར་ལེན་སྨྲ་མཁས་འདོད་པ་རྣམས་ཀྱི་ལྷ། །ཚངས་པའི་བུ་མོས་དགེ་ལེགས་སྩོལ་གྱུར་ཅིག །ཐ་སྙད་རིག་གནས་ཤེས་བྱའི་ཐང་ཆེན་དུ། །བློ་གྲོས་ཅང་ཤེས་གོམ་སྟབས་བསྒྱུར་མཁས་ཤིང༌། །ལེགས་བཤད་ངོ་མཚར་ལྟད་མོས་ཚིམ་གྱུར་པ། །དམ་པའི་རང་རྟགས་གསལ་བའི་བློ་ལྡན་ཁྱོད། །ཅེས་ཐུགས་ཤིན་ཏུ་མགུ་བའི་བཀའ་ཕེབས་པ་དང༌། རྗེ་ཐུའུ་བཀྭན་རིན་པོ་ཆེས་སྩལ་བའི་ཆབ་ཤོག་ལས་ཀྱང༌། རྨོངས་ཆེན་གླང་པོའི་མཆེ་བ་ཉེར་ཕྱུང་ནས། །སྣ་ཚོགས་རིག་གནས་སྒྲོ་མདངས་མཚར་སྡུག་ཅན། །རྒྱ་ཆེན་ཐོས་པའི་རྨ་བྱ་ཞོན་ནས་སུ། །མཁས་མང་འཆི་མེད་གྲལ་དུ་ཉེར་སླེབ་སྟེ། །མ་རིག་མུན་སེལ་རིག་གཞུང་གསེར་གྱི་སྒྲོན། །རྣམ་
དཔྱོད་སུག་པར་ཐོགས་པས་དུས་མཐའ་འདིའི། །སྐྱེ་སྤྲུལ་བཟང་རྫུའི་མུན་ཁུང་འདོད་སྲེད་ཀྱི། །གཉིད་དུ་ཡུར་བ་རྣམས་ལ་ཅོ་འདྲི་ཞིང༌། །ཞེས་དང༌། དར་ཟབ་ཀྱིས་དཀྲིས་ལྡེར་བཟོའི་རྣམ་པར་ཐར། །འཛིན་མིན་ལྗགས་མཉེན་གློག་གི་གར་བསྒྱུར་བས། །ལེགས་བཤད་སྒྲ་བརྒྱ་སྒྲོགས་པའི་ཆོས་ཀྱི་སྤྲིན། །ཁྱོད་ཀོ་ཐུབ་བསྟན་ལྷ་ལམ་མཛེས་རྒྱན་ཉིད། །ཅེས་གཅམ་བུ་ཙམ་མ་ཡིན་པར་གནས་ཚུལ་གྱི་རང་བཞིན་དྲང་པོར་འདོམས་པའི་གསུང་གིས་བསྔགས་པ་བརྗོད་པས་ཤེས་སོ། །འོན་ཀྱང་བར་སྐབས་ཤིག་ནས་ཇོ་བོ་ཆེན་པོས། ངང་པའི་ཆུ་ལས་འོ་མ་ལེན་པ་ལྟར། །རང་གི་འདོད་པ་དང་དུ་བླང་བར་བྱ། །ཞེས་དང༌། སྙིང་པོ་ངེས་པར་བསྡུ་བ་ལས་ཀྱང་གསུངས་པ་ལྟར་བེའུ་བུམ་སྔོན་མོར་ཡང༌། བསྒོམས་པས་ཚེ་འདི་དོན་ཡོད་བྱས་ལ། །རིག་པའི་གནས་ལྔ་སྨོན་ལམ་གྱིས་སྦྱང༌། །ཞེས་གསུངས་པ་བཞིན་ནང་དུ་ཡང་དག་འཇོག་ལ་རྩེ་གཅིག་ཏུ་གཞོལ་བར་གྱུར་ཏེ། དེ་ལ་ལྟོས་ནས་ཐ་སྙད་རིག་གནས་ཀྱི་སྤྲོས་པ་དང་རྩོམ་པའི་རྣམ་གྲངས་མང་པོ་གཡེང་བའི་རྒྱུར་གཟིགས་ནས་ཆེར་མ་མཛད་ཀྱང༌། དད་ལྡན་རྣམས་ཀྱིས་ནན་ཏན་ཆེན་པོས་ཡང་ཡང་བསྐུལ་ཏེ་སྔ་ཕྱིར་གསུང་རྩོམ་ཐོར་བུ་གནང་བ་ཕྱོགས་གཅིག་ཏུ་བསྡེབས་ན་པོ་ཏི་གཅིག་ལྷག་ཙམ་ཡོད་པ་རྣམས་ནི། དོན་ཟབ་ཅིང་ཚིག་སྦྱོར་ལེགས་པ། གོ་བདེ་ལ་འདུས་ཆེ་བ་སོགས་མཁས་པ་མགུ་བའི་ལེགས་བཤད་འབའ་ཞིག་ཏུ་ཡོད་དོ། །དེ་ལྟར་ཤེས་བྱ་རིག་པའི་གནས་ལྔ་ལ་མཁས་པས་འཆད་རྩོད་རྩོམ་གསུམ་ལ་ཐོགས་པ་མེད་པ་ཁྱུ་མཆོག་རླབས་པོ་ཆེའི་གནས་ཐོབ་པའི་ཚུལ་དེ་རྣམས་ཀྱང་ལྷག་པ་ཤེས་རབ་ཀྱི་བསླབ་པའི་ཡོན་ཏན་ཡིན་ལ། འོན་ཀྱང་མདོ་སྡེ་རྣམས་ལས་
ལྷག་པ་ཤེས་རབ་ཀྱི་བསླབ་པའི་དབྱེ་བ་གཙོ་བོར་དངོས་སུ་གསུངས་པ་ནི། རྣམ་བཤད་དགོངས་པ་རབ་གསལ་ལས། ལྷག་པའི་ཤེས་རབ་ཀྱི་བསླབ་པ་གསུམ་འཇོག་པ་ལ། ས་འདིར་བྱང་ཕྱོགས་སོ་བདུན་རགས་པ་དང་ཕྲ་བ་ལ་ཆེས་མཁས་པའི་ཤེས་རབ་ཀྱི་བསླབ་པ་ཞེས་སོགས་ཀྱི་དོན་དབུ་མ་འཇུག་པར། བྱང་ཆུབ་ཕྱོགས་ལྷག་བསྒོམ་པ་ལས་སྐྱེས་པའི། །ཞེས་བྱང་ཕྱོགས་སོ་བདུན་སོགས་ལམ་ལ་མཁས་པའི་ཤེས་རབ་ཀྱི་བསླབ་པ་དང༌། བདེན་རང་བཞིན། ཞིབ་མོར་རྟོགས་ལའང་ཤིན་ཏུ་མཁས་པ་འཐོབ། །ཅེས་བདེན་བཞི་ལ་མཁས་པའི་ལྷག་པ་ཤེས་རབ་ཀྱི་བསླབ་པ་དང༌། འདི་བརྟེན་འབྱུང་བའི་དེ་ཉིད་མཐོང་བ་དེ། །ཤེས་རབ་གནས་པས་འགོག་པ་ཐོབ་པར་འགྱུར། །ཞེས་རྟེན་འབྱུང་གི་དེ་ཁོ་ན་ཉིད་རྟོགས་པའི་ལྷག་པ་ཤེས་རབ་ཀྱི་བསླབ་པ་གསུམ་དུ་གསུངས་པ་དེ་དག་ཐུགས་རྒྱུད་ལ་འཁྲུངས་པར་ཚུལ་འདི་ཉིད་ཀྱིས་ཤེས་དགོས་ཏེ། ཉིད་ཀྱི་རྟོགས་བརྗོད་སྐལ་ལྡན་མ་ལས། གཞུང་ཕར་ཕྱིན་དབུ་མ་ལ་སོགས་པ། །ནང་བལྟས་ཀྱི་བློ་ཡིས་གང་ནུས་སྦྱོར། །ཞེས་བཀའ་པོད་ཆེན་པོ་ལྔ་ལ་སྦྱང་བ་མཛད་པ་དེའང་ཁ་ཕྱིར་བལྟས་ཀྱི་རྩོད་པའི་ཡན་ལག་ཙམ་མ་ཡིན་པར་ཐུགས་རྒྱུད་ལ་ནང་དུ་བསྐོར་ཏེ་དེ་དང་དེའི་དོན་གྱི་རྟོགས་པ་ཁྱད་པར་ཅན་འཁྲུངས་པ་འབའ་ཞིག་གི་ཕྱིར་དུ་མཛད་ངེས་པ་དང༌། དེ་ལྟར་ན་ཕར་ཕྱིན་གྱི་གཞུང་ལ་སྦྱངས་པས་གཞུང་ཕ་རོལ་ཏུ་ཕྱིན་པའི་སྦས་དོན་མངོན་པར་རྟོགས་པ་མཐའ་དག །མཚན་མེད་རབ་ཏུ་སྦྱིན་ལ་སོགས། །ཞེས་སོགས་ཀྱིས་མདོར་བསྟན་པ་བཞིན་དུ་སྐྱེས་བུ་གསུམ་གྱི་ལམ་གྱི་རིམ་པར་བསྡུས་ཏེ་རྣལ་འབྱོར་བ་གཅིག་གི་ཉམས་ལེན་གྱི་ལུས་གཅིག་ཏུ་འདྲིལ་བས་ལམ་ཕྲ་རགས་
ཀྱི་གནད་ཐམས་ཅད་ལ་ངེས་པ་རྙེད་དེ་ལྷག་པའི་ཤེས་རབ་དང་པོ་ཐུགས་ལ་སྐྱེས་པར་འགྲུབ། མངོན་པ་མཛོད་ལ་སྦྱངས་པའང་གནས་དང་པོ་གསུམ་གྱིས་ཁམས་ཀྱི་རབ་དབྱེ་མཐའ་ཡས་དང་སྣོད་བཅུད་ཀྱི་འཇིག་རྟེན་མཐའ་དག་གིས་བསྡུས་པའི་ཤེས་བྱ་སྡུག་བསྔལ་གྱི་བདེན་པ་གཏན་ལ་འབེབས། གནས་བཞི་པ་ལྔ་པ་གཉིས་ཀྱིས་ལས་ཀྱི་དབྱེ་བ་དང་དེའི་རྩ་བ་ཕྲ་རྒྱས་དྲུག་སོགས་སྤང་བྱ་ཀུན་འབྱུང་གི་བདེན་པ་གཏན་ལ་འབེབས། གནས་ཕྱི་མ་གསུམ་གྱིས་འགོག་ལམ་གྱི་བདེན་པ་གཏན་ལ་འབེབས་པས་ལྷག་པའི་ཤེས་རབ་གཉིས་པ་ཐུགས་ལ་འཁྲུངས་པར་འགྲུབ། དབུ་མའི་གཞུང་ལ་ནང་དུ་བསྐོར་ཏེ་སྦྱངས་པས་སྲིད་པའི་ནད་བརྒྱ་སེལ་བའི་སྨན་མཆོག །ཉེས་བརྒྱའི་འཆིང་བ་གཅོད་པའི་རལ་གྲི། བསྟན་པའི་སྙིང་པོ་དཔལ་མགོན་ཀླུ་སྒྲུབ་ཡབ་སྲས་དང་འཇམ་མགོན་ཙོང་ཁ་པ་ཡབ་སྲས་ཀྱི་ཐུགས་བཅུད་ཟབ་མོ་རྟེན་འབྱུང་གི་དེ་ཁོ་ན་ཉིད་གཟིགས་པས་ལྷག་པའི་ཤེས་རབ་གསུམ་པ་ཐུགས་ལ་འཁྲུངས་པར་འགྲུབ་ཅིང༌། རྣམ་འགྲེལ་ནི་དབུ་ཚད་སེང་གེ་མཇིང་བསྣོལ་ཞེས་དབུ་མའི་ལྟ་བ་གཏན་ལ་འབེབས་པའི་རིགས་པར་ངར་འདོགས་བྱེད་ཀྱི་ཡན་ལག་དང་། འདུལ་བ་ནི་དེ་དག་ཐམས་ཅད་ཀྱི་གཞི་རྟེན་དུ་དགོངས་པས། མདོར་ན་རྒྱུ་ཐོས་བསམ་མཛད་ཚུལ་ཚིག་གི་ན་ཡམ་དང་ཤགས་འགྱེད་པ་ཙམ་དུ་མ་སོང་བའི་རྣམ་པར་དག་པ་འདི་ཉིད་ཀྱི་སྒོ་ནས་འབྲས་བུ་ལྷག་པའི་ཤེས་རབ་ཕུན་སུམ་ཚོགས་པ་ཐུགས་རྒྱུད་ལ་འཁྲུངས་ཚུལ་རྗེས་སུ་དཔོག་པར་བྱེད་དགོས་པ་ཡིན་ནོ། །མདོར་ན་ཕྱིན་དྲུག་བསྡུ་བཞི་སོགས་རྒྱལ་སྲས་ཀྱི་སྤྱོད་པ་མཐའ་དག་ལ་གོམས་པ་ངང་དུ་གྱུར་པས་སྐུ་གསུང་ཐུགས་ཀྱི་མཛད་པ་མཐའ་དག་བསྟན་འགྲོའི་གསོས་སྨན་དུ་འགྱུར་ཞིང༌། རང་དོན་ཡིད་བྱེད་ཀྱིས་བསླད་པ་ཅུང་ཟད་ཀྱང་མེད་
པར་དེ་ཐམས་ཅད་གཞན་དོན་འབའ་ཞིག་ཏུ་བསྔོ་བར་མཛད་པའི་སྟབས་ཀྱིས་སླད་མར་ཡང་ནམ་མཁའ་ཇི་སྲིད་གནས་ཀྱི་བར་དུ་ཚོགས་གཉིས་ཀྱི་སྤྱོད་པ་རླབས་པོ་ཆེ་ཅུང་ཟད་ཙམ་ཡང་མི་ཉམས་པར་གོང་ནས་གོང་དུ་འཕེལ་ཞིང༌། འགྲོ་བ་མ་ལུས་པའི་མགོན་དང་སྐྱབས་སུ་འགྱུར་བ་སོགས་གསང་བ་གསུམ་གྱི་ཡོན་ཏན་མི་ཟད་པའི་གཏེར་དུ་གྱུར་པ་ཡིན་ཏེ། མདོ་སྡེ་རྒྱན་ལས། ཐབས་མཆོག་ཤེས་པ་གང་ཞིག་བསོད་ནམས་ཡང་དག་བསྡུས་པ་ཤིན་ཏུ་རྒྱ་ཆེན་ཀུན། །གཞན་དང་ཐུན་མོང་བྱས་ནས་ཉིན་གཅིག་བཞིན་དུ་རྫོགས་པའི་བྱང་ཆུབ་ཡོངས་བསྔོ་ཞིང༌། ། བཟང་པོའི་གནས་སུ་སྐྱེས་པས་རྟག་ཏུ ་དགེ་བྱེད་མངོན་ཤེས་ཡོན་ཏན་རྣམས་ཀྱིས་རྩེན། །སངས་རྒྱས་སྲས་དེ་ཀུན་གྱི་བླ་ན་འདུག་པ་ཡོན་ཏན་གཏེར་དུ་ཤེས་པར་བྱ། །ཞེས་གསུངས་པ་བཞིན་ནོ། །རྣམ་དག་ཚུ༷ལ་ཁྲི༷མས་ཆུ་གཏེར་ལས་འཁྲུངས་ཏིང་འཛིན་ཤེས་རབ་འོད་སྟོང་འབར། །མདོ་མངོན་འདུལ་བསྟ༷ན་ཆ་ཤས་ཡོངས་གང་འཆད་རྩོད་རྩོམ་པ༷འི་བསིལ་ཟེར་འགྱེད། །བཤད་སྒྲུབ་ཉི༷་ཟླ་ཟུང་དུ་འཇུག་པས་ས་གསུམ་མུན་པའི་བླ་གོས་ཕྲོགས། །དཔལ་ལྡན་བླ་མ༷་མཁྱེན་བརྩེའི་བདག་ཉིད་ཀུན་བཟང་སྤྱོད་པའི་ཕ་རོལ་སོན། །འབྲེལ་མེད་ཕྱེ་བསྡུས་བཤད་པས་མགོ་སྐོར་དང༌། །གནད་དོན་མ་ཕིག་ཁ་འཆལ་རྩོད་པ་དང༌། །གཞན་ལས་བརྐུས་ཏེ་རྩོམ་པའི་ཁུར་འཛིན་རྣམས། །རེ་ཞིག་ཐུགས་ངལ་སྤངས་ཏེ་བདེ་བར་མནོལ། །ཁྱོད་གསུང་ཚད་མར་གྱུར་པ་ཚངས་པའི་ཐིག །སྡེ་སྣོད་མཚམས་ལས་མི་འདའ་རྒྱལ་གསུང་ཀུན། །མདོ་དང་སྔགས་ཀྱི་ལམ་ བཟང་ལུས་གཅིག་ཏུ ། །གནོན་པའི་རྒྱལ་ཐབས་ཁྱབ་འཇུག་གོམ་པ་
བཞིན། །གང་གི་ཡོན་ཏན་ཉི་འོད་གསེར་ཞུན་གྱིས། །བྲིས་པའི་ཡི་གེ་བཀླག་པས་གང་དུ་རྫོགས། །འོན་ཀྱང་རྨད་བྱུང་རྣམ་ཐར་བདུད་རྩིའི་རྒྱུན། །ཅི་ཙམ་མྱང་བས་གདུང་སེལ་བདེ་བ་སྟེར། །ཞེས་དགེ་ལྡན་བསྟན་པའི་རྩ་ལག་མཁས་ཤིང་གྲུབ་པའི་དབང་ཕྱུག་རྗེ་བཙུན་བླ་མ་དམ་པ་ཚུལ་ཁྲིམས་བསྟན་པའི་ཉི་མ་དཔལ་བཟང་པོའི་རྣམ་པར་ཐར་པ་ནོར་བུའི་དོ་ཤལ་ལས་སྐུ་ཚེའི་མཇུག་གི་མཛད་པ་རྣམ་ཐར་སྤྱིའི་དོན་བསྡུ་དང་བཅས་པའི་དྲ་བ་སྟེ་དྲུག་པའོ།། །།དེ་ནས་སྐུ་བསྙུན་ཤིན་ཏུ་ལྕི་བའི་ཚུལ་བཞེས་ཤིང༌། གསོལ་བའང་ཆེར་མི་མཛད་པར་ཤས་ཆེར་མཉམ་གཞག་ལྟ་བུ་ཞིག་གི་ངང་དུ་བཞུགས་པ་ན། ཞབས་ཕྱི་བ་ནང་མ་རྣམས་ཀྱིས་ད་ནི་བསྙུན་གཞི་དང་སྐུའི་བབ། གསུང་གི་ཤུགས་གང་ལ་དཔྱད་ནའང་དགོངས་པ་གཞན་དུ་གཏད་ཚར་འདུག་སྙམ་དུ་ཁོ་ཐག་ཆད་པའི་མྱ་ངན་གྱི་ཤུགས་དང་བཅས་ཏེ་འཕྲལ་ཐུགས་ཀྱི་གནས་ཚུལ་དུ་མ་དང༌། ལྷག་པར་སྤྱིར་བསྟན་འགྲོ་དང༌། སྒོས་ངེད་ཅག་རྣམས་ཀྱི་མགོན་དུ་སྤྲུལ་བའི་སྐུ་དྭངས་གསལ་མྱུར་འབྱོན་གྱི་བཀའ་དྲིན་དུས་ལས་མི་ཡོལ་བ་ཐུགས་རྗེས་གཟིགས་དགོས་ཚུལ་དང་སྐུ་གདུང་ཇི་ལྟར་བྱེད་རྒྱུའི་སྐོར་རྣམས་ཞུས་པར། བླ་མ་དང་དཀོན་མཆོག་རིན་པོ་ཆེའི་ཐུགས་རྗེ་ཁོ་ན་ལ་རག་ལས་གཙོ་ཆེར་རིམ་གྲོ་ལ་འབད་པ་གལ་ཆེ། ཁྱོད་ཚོ་རང་རང་སོ་སོ་ནས་ལེགས་ཉེས་ཅི་བྱུང་ཡང་མཆོག་གསུམ་དམ་པར་གསོལ་འདེབས་ལེགས་པོ་གྱིས་ཞེས་སོགས་ཀྱི་བསླབ་བྱ་དང༌། གདུང་ཞུགས་འབུལ་བྱས་ན་དངོས་གཙང་བ་ཡོང་ཚུལ་སོགས་འབྱུང་འགྱུར་གྱི་སྐོར་རྣམས་བརྩེ་བས་ཉེ་བར་གཟིགས་ཏེ་ཞིབ་རྒྱས་སུ་གསུངས། ལྷ་རྟེན་དང་ཕྱག་དཔེ་དོ་དམ་བྱེད་རྒྱུ་དང༌། རེ་ཞིག་ཞལ་འདོན་གྱི་སྐོར་ཆ་བགོས་ཏེ་མདུན་
ནས་འདོན་རྒྱུ་སོགས་སྐུ་ཚ་ཞབས་དྲུང་སྐལ་བཟང་བསྟན་འཛིན་རྒྱ་མཚོ་དང༌། གཞན་གྲྭ་པ་གཉིས་ལ་གཏད་པ་གནང་བས་ཁོང་རྣམས་ཀྱིས་བཏོན་པའི་ཚེ་ཞལ་འདོན་བགོས་སྐལ་གྱི་ཆ་ཤས་རེ་དེའང་ཚར་དཀའ་བ་བྱུང་བས་ལྷག་པར་ཡ་མཚན་དུ་གྱུར། ཞབས་ཕྱི་བ་ནང་མ་གཉིས་ལ་ཉིན་རེ་བཞིན་ཁྲུས་གསོལ་དང་མནོལ་བསང་བདུག་རྒྱུའི་བཀོད་པ་གནང་བ་འདའ་ཀ་མའི་ཐུགས་དམ་གསལ་ཆེད་ཡིན་པར་སྣང༌། ཆོས་སྡེ་ཆེན་པོའི་གདན་ས་པ་ཆེ་ཤོས་མཁན་རིན་པོ་ཆེ་གཙོས་འདུས་སྤྱི་ནས་ཞབས་བརྟན་འབུལ་རྒྱུའི་སྙན་གསན་ཞུས་པར། བཀའ་དྲིན་འཁོར་མཐའ་མ་མཆིས་པ་ལགས། འོན་ཀྱང་དུས་ཚོད་སྟོན་ཟླ་འབྲིང་པོའི་ཚེས་མགོ་ལ་ཕུལ་ན་ལེགས་ཞེས་རྗེས་ཀྱི་རྟེན་འབྲེལ་དུ་སྒྱུར་བར་མཛད་དོ། །དེ་ལྟར་དགུང་ལོ་རེ་གསུམ་གྱི་བར་དུ་བསྟན་པ་དང་འགྲོ་བའི་དོན་བསམ་གྱིས་མི་ཁྱབ་པ་མཛད་དེ་ཞིང་འདིའི་སྐུ་དངོས་ཀྱི་གདུལ་བྱ་རྫོགས་པས། མེ་མོ་གླང་གི་ལོ་ཧོར་ཟླ་བརྒྱད་པའི་ཚེས་གཅིག་གི་སྔ་དྲོའི་ཆར། ཞལ་འདོན་གྱི་སྐོར་རྣམས་སྔར་རྒྱུན་ལྟར་གསུང་ཞིང་ཁམས་ཤིན་ཏུ་དྭངས་པ། བསྙུན་གྱི་ཚུལ་ཡང་ཡེ་མེད་པར་བཞུགས་པ་ལ། ཉིན་གུང་གི་སྔོན་ཙམ་རྟའི་དུས་ཚོད་ལ་སླེབས་པ་ན་གློ་བུར་དུ་སྔར་བཤམས་པའི་ཁྲི་ཁར་ཞབས་གཉིས་སྐྱིལ་ཀྲུང༌། ཕྱག་གཉིས་སྡིགས་མཛུབ་བསྣོལ་ཐབས་སུ་བྱས་པ་རྡོ་རྗེ་འཆང་གི་ཕྱག་རྒྱ་མཛད་དེ་གདུལ་བྱ་རྟག་འཛིན་ཅན་རྣམས་ཆོས་ལ་བསྐུལ་བའི་ཕྱིར་དུ་གཟུགས་སྐུའི་བཀོད་པ་ཆོས་དབྱིངས་སུ་བསྡུས་པའི་ཚུལ་བསྟན་ཏོ། །མི་ཤིགས་རྟག་པའི་ངང་ཚུ༷ལ་རྡོ་རྗེ་སྐུ། །འཕོ་འཇིག་དུས་ཀྱི་བཀའ་ཁྲི༷མས་ལས་འདས་ཀྱང༌། །ཞིང་
གཞན་བསྟ༷ན་འགྲོར་ཕན་པ་ཡངས་པ༷འི་རླབས། །གཟིགས་པའི་ཉི༷་མ༷་ནུབ་རིའི་ཕག་ ཏུ་འཚལ། །ཞལ་བཟང ་མཐོང་བ་ཙམ་གྱིས་དངོས་གྲུབ་ཀུན། །སྩོལ་མཛད་ནོར་བུ་དྲན་པའི་ཡུལ་དུ་གྱུར། །སྲིད་ཞིའི་གདུང་བ་མ་ལུས་སེལ་བ་ཡིན། །གསུང་སྙན་དེ་ཡང་ཐོས་པའི་ལམ་ལས་འདས། །ཀྱེ་ཧུད་བུས་པ་མྱ་ངམ་ཐང་བསྐྱུར་བཞིན། །མགོན་མེད་སྐྱབས་མེད་གྱུར་པའི་གདུལ་བྱ་རྣམས། །ཐུགས་རྗེས་ནམ་ཡང་འདོར་བ་མི་རིགས་པས། །སླད་ཀྱང་བརྩེ་བས་རྗེས་འཛིན་བཀའ་དྲིན་མཛོད། །དེའི་མོད་ལ་སྐུ་མདངས་སྔར་ལས་ཇེ་གསལ་དུ་སོང་ཞིང་སྐུ་བོངས་ཇེ་ཆུང་དང་གཉེར་མ་སོགས་ཡེ་མེད་པར་གཞོན་ཤ་ཆགས་པའི་འོད་ཕུང་གི་རང་བཞིན་ཅན། ཡ་མཚན་པའི་དྲིས་ཉེ་སྐོར་ཀུན་ལ་ཁྱབ་པ་བྱུང༌། ནང་གི་རྟོགས་པའི་རྟེན་འབྲེལ་གྱིས་ཕྱི་རོལ་ཏུ་ནམ་མཁའི་དཀྱིལ་ཤིན་ ཏུ་གཡའ་དག་ཅིང་རྒྱ་མཐིང་བཟང ་པོ་ལྟར་སྔོ་བ་དང༌། མཐའ་སྐོར་གྱི་ཕྱོགས་ཀུན་ནས་མཆོད་ལྷ་རྣམས་ཀྱིས་གདུགས་རྒྱལ་མཚན་སོགས་མཆོད་རྫས་སྣ་ཚོགས་ཐོགས་ནས་མཆོད་པ་ཕུལ་བའི་རྣམ་པ་ལྟ་བུའི་སྤྲིན་དཀར་གྱི་ཕྲེང་བ་ཉེ་བར་འཁྲིགས། རླུང་བསེར་བུའི་རྒྱུ་བ་ཕྲ་མོ་ཙམ་ཡང་མེད་པས་ཉིན་ཞག་གསུམ་གྱི་བར་དུ་གཟིམས་ཆུང་གི་ཁྱམས་སུ་མཆོད་པ་སྣ་ཚོགས་དང༌། ཁྱད་པར་དུ་མཆོད་མེ་སྟོང་ཕྲག་བརྒལ་བ་ཕུལ་བ་རེ་རེའང་རླུང་གིས་མི་བསྐྱོད་པ་སོགས་ངོ་མཚར་བའི་རྟགས་མང་དུ་བྱུང་བས་སྐྱེ་བོ་རྣམས་བཤེས་གཉེན་དམ་པའི་དམིགས་བུ་དང་བྲལ་བའི་མྱ་ངན་གྱིས་ནོན་བཞིན་དུའང་ཡ་མཚན་གྱིས་ལྟས་ཀྱིས་ཡིད་འཕྲོག་སྟེ་ཆེད་དུ་བརྗོད་པའང་བྱུང་ངོ༌། །ཚོགས་ཆེན་གྱི་དགེ་འདུན་ཚང་མས་གདུང་མདུན་དུ་ཁྲུས་གསོལ་དང་སྨོན་ལམ་སོགས་གསུངས་ཏེ་ཞལ་མཇལ་ཞུས་ཤིང་
བཤད་སྒྲུབ་གླིང་སོགས་གྲྭ་ཚང་སོ་སོ་ནས་སྒེར་དུའང་ཁྲུས་གསོལ་དང་སྨོན་ལམ་བཅས་གསུངས་ཏེ་ཚེ་རབས་རྗེས་འཛིན་དང་ཡང་སྲིད་མྱུར་འབྱོན་སོགས་ཀྱི་གསོལ་འདེབས་ནན་ཏན་ཞུས། ཞག་གསུམ་གྱི་མཚམས་ནས་འོད་གསལ་ཆོས་དབྱིངས་སུ་བཞུགས་པའི་ཐུགས་དམ་གྲོལ་བའི་རྟགས་ཤངས་བུག་སོགས་ནས་བྱང་སེམས་དཀར་དམར་གྱི་རྒྱུན་བབས་པ་སོགས་བྱུང༌། དེ་ནས་སླར་ཡང་ཚད་ལྡན་གྱི་གཞུང་དང་ཕྱག་བཞེས་ཇི་ལྟ་བ་བཞིན་དྲི་བཟང་གི་ཆུས་ཁྲུས་གསོལ་ལེགས་པར་བྱས་ཤིང་གནས་ཡིག་སྦྱོར་བ་དང༌། ན་བཟའ་དབུ་རྒྱན་སོགས་ཕུལ་ནས་བཞུགས་སུ་བཅུག་སྟེ། མཆོད་པའི་ཡོ་བྱད་སྣ་ཚོགས་པ་བཀོད་པ་གང་མཛེས་ཀྱིས་མཐའ་བསྐོར། ཕྱོགས་ཉེ་རིང་གི་སློབ་མ་ཆེ་ཕྲ་མང་པོ་དང༌། ལྷག་པར་ཞབས་ཕྱི་བ་རྣམས་ཀྱིས་ཉིན་མཚན་ཁོར་ཡུག་ཏུ་བླ་མཆོད་དང་ཁྲུས་གསོལ། གསོལ་འདེབས་མང་པོ། སྨོན་ལམ་གྱི་རིགས་ཕྱག་དང་མཆོད་པ་ཅི་འབྱོར་ཡང་ཡང་བཤམས་པ་སོགས་རྗེ་བཙུན་བླ་མ་དམ་པ་དེ་ཉིད་ཀྱི་ཐུགས་ཟག་པ་མེད་པའི་དགོངས་པ་ཡོངས་སུ་རྫོགས་པའི་ཐབས་ལ་སྒོ་དུ་མ་ནས་གཞོལ་བར་གྱུར། དགེ་བའི་བཤེས་གཉེན་དམ་པ་ཁ་ཤས་ཀྱིས་གདུང་ཆོག་གནད་སྨིན་གསུངས། ཆེ་ཤོས་མཁན་རིན་པོ་ཆེས་དབུ་མཛད་བླ་མ་མཆོད་པའི་དུས་བཟང་པ་ཚོགས་ཡོངས་ནས་ཉིན་བཅོ་བརྒྱད་ཀྱི་རིང་ལ་དུས་བཟང་གི་འདོན་ཆ་དཀྱུས་བཞིན་གསུང༌། གཞན་ཆོག་གྲྭ་པ་སོ་སོ་ནས་གསང་འདུས། འཇིགས་བྱེད། བདེ་མཆོག །དུས་འཁོར། ཀུན་རིག་སོགས་རྒྱུད་
སྡེ་སོ་སོའི་དཀྱིལ་འཁོར་བསྒྲུབས་ཤིང་དབང་ལེན་མཁན་གྱི་དགེ་འདུན་ཁྱོན་བསྡོམས་ལྔ་བརྒྱ་ལྷག་དང༌། དཔལ་ལྡན་སྨད་རྒྱུད་ནས་ཀྱང་སྐུ་གདུང་གི་མདུན་དེར་བདེ་གསང་འཇིགས་གསུམ་གྱི་དཀྱིལ་འཁོར་བསྒྲུབས་ནས་བདག་འཇུག་བཞེས་ཤིང༌། སྨན་པ་གྲྭ་ཚང་ནས་ཀྱང་དེ་བཞིན་གནང་བ་སོགས་དམ་པ་དེ་ཉིད་ཀྱི་ཐུགས་དགོངས་རྫོགས་པའི་དགེ་བ་རླབས་ཆེན་ཞག་ཞེ་དགུའི་བར་དུ་བསྒྲུབས་པ་ལ་ཕྱག་གཉེར་སོགས་ནས་ཁུར་བླང་གིས་བསྙེན་བཀུར་ཞབས་ཏོག་གྱ་ནོམ་པས་མཉེས་པར་བྱས། སྐུ་འབུམ་ཆོས་སྡེ་ཆེན་པོའི་དགེ་འདུན་སུམ་སྟོང་བརྒལ་བ་ལ་མང་ཇ་བཅུ་ཕྲག་ལྷག་དང༌། སྐུ་འགྱེད་ཞོ་དོ་སྐར་ལྔ། བཤད་སྒྲུབ་གླིང་སོགས་ལ་སྐུ་འགྱེད་ཞོ་རེ། སྨད་རྒྱུད་གྲྭ་ཚང་ལ་ཞོ་ལྔ་སོགས་འཚེམ་མེད་དུ་ཕུལ། ཆུ་བཟང༌། གསེར་ཁོག །དགོན་ལུང༌། བཀྲ་ཤིས་འཁྱིལ་སོགས་དགོན་སྡེ་ཆེ་ཆུང་མང་པོ་ལའང་མང་འགྱེད་ཀྱི་བསྙེན་བཀུར་ཕུན་སུམ་ཚོགས་པ་ཞུས། རྗེ་ཆུ་བཟང་སྤྲུལ་བའི་སྐུ་རིན་པོ་ཆེར་ཁ་བཏགས། མཎྜལ་འགྱོག་བྱང༌། དངུལ་གོས་སོགས་དང༌། རྗེ་འཇམ་དབྱངས་བཞད་པའི་མཆོག་སྤྲུལ་རིན་པོ་ཆེ། རྗེ་ཐུའུ་བཀྭན་རིན་པོ་ཆེའི་སྤྲུལ་བའི་སྐུ། ཁོ་བོ་ཅག་སོགས་ལའང་ལྷ་རྫས་མཛོད་བཏགས། གོས་ཆེན་ཡུག །དངུལ་སོགས་བདོག་པ་རྒྱ་ཆེར་བསྟར། སྐུ་འབུམ་དུ་བཞུགས་པའི་བླ་མ་གདན་ཟུར། སྤྲུལ་སྐུ་ཆེ་ཕྲ་མཐའ་དག་གཅིག་ཀྱང་མ་ལུས་པ་ལ་ཕྱག་རྟེན་གྱ་ནོམ་པ་ཕུལ། རྗེ་ཉིད་ཀྱི་གྲྭ་ཚང་བཀྲ་ཤིས་ཆོས་གླིང༌། དགའ་ལྡན་དར་རྒྱས་གླིང་སོགས་ཀྱིས་མཚོན་དགོན་སྒྲུབ་སྡེ་རྣམས་ལ་མང་འགྱེད་གང་རྒྱས་བཅས་དགོངས་རྫོགས་ཀྱི་ཞག་གྲངས་ཁོངས་སུ་ཕུལ་
ཞིང་སླར་རིམ་པ་བཞིན། དབུས་སུ་པཎ་ཆེན་ཐམས་ཅད་མཁྱེན་པར་ལྗགས་བསྔོ་ཞུ་རྟེན་ལྷ་རྫས་གོས་དར་སོགས་གྱ་ནོམ་པ་དང༌། ཡོངས་འཛིན་དགའ་ལྡན་ཁྲི་རིན་པོ་ཆེར་ལྷ་རྫས་གོས་དར་སོགས་རྒྱ་ཆེ་བ་ཕུལ། ལྷ་ས་སྨོན་ལམ་གྱི་ཚོགས་ལ་མང་ཇ་སོགས་ཀྱི་བསྙེན་བཀུར། རྒྱལ་ཚབ་དེ་མོ་ནོ་མོན་ཧན་སོགས་དབུས་གཙང་གི་སྤྲུལ་སྐུ་ཆེ་ཕྲ་མང་པོ་དང༌། མདོ་སྨད་ཀྱི་བླ་མ་གདན་ཟུར་སྤྲུལ་སྐུའི་རིགས་མང་པོ་ལའང་འོས་བསྟུན་གྱི་ཕྱག་རྟེན་རིམ་པར་བསྟར། རྗེ་ཉིད་ལ་དད་པ་ཐོབ་པའི་བླ་དཔོན་ཆེ་ཕྲ་དང་སེར་སྐྱ་མཐའ་དག་གིས་གདུང་འབུལ་གྱི་ཞལ་འདེབས་ཀྱང་སོ་སོའི་འབྱོར་འཁོས་དང་བསྟུན་པའི་གང་ལེགས་བགྱིས་ཏེ་སྐྱེ་བའི་ཕྲེང་བར་མཉེས་པ་གསུམ་གྱིས་མཉེས་པར་བྱེད་པའི་རྟེན་འབྲེལ་བསྒྲིགས། གཟའ་ཚེས་དགེ་བའི་ཉིན་སྨད་རྒྱུད་དཔོན་སློབ་གསེར་ཏོག་སྤྲུལ་བའི་སྐུ་ཡེ་ཤེས་ཐུབ་བསྟན་རྒྱ་མཚོ་དགེ་འདུན་རིག་པ་འཛིན་པའི་ཚོགས་དང་བཅས་པས་དཔལ་རྡོ་རྗེ་འཇིགས་བྱེད་ཀྱི་ཆོ་ག་ལ་བརྟེན་ནས་སྐུ་གདུང་རིན་པོ་ཆེ་ཞུགས་འབུལ་མཛད། དེའི་ཚེ་ནམ་མཁའ་གཡའ་དག་ཅིང༌། ནུབ་ཕྱོགས་བྱམས་པ་ལུང་པ་ཟེར་བ་ནས་འཇའ་ཚོན་ཞིག་ཤར་ཏེ་པུར་ཁང་གི་སྟེང་དུ་ཟུག་པ་མང་པོས་མཐོང་ཞིང༌། དུ་བའི་མདོག་ཀྱང་ལྷ་བྲིས་མཁས་པས་ཚོན་མདངས་སྤེལ་པ་ལྟ་བུར་ཤིན་ཏུ་བཀྲ་བའི་ཡ་མཚན་པ་པུར་ཁང་གི་སྟེང་དུ་ཡིད་ཙམ་འཁོད་ནས་ཐོག་མར་ནུབ་བྱང་དང༌། དེ་ནས་ཕྱོགས་ཀུན་ཏུ་སོང༌། ཞུགས་འབུལ་མཛད་མཁན་གྱི་བླ་མ་དགེ་འདུན་རྣམས་ལ་ཡོན་འབུལ་དང་ཞབས་ཏོག་གཟབ་རྒྱས་ཞུས། པུར་ཁང་ལ་ཉིན་ཞག་དྲུག་གི་རིང་མཆོད་པ་རྒྱ་ཆེར་ཕུལ་ཏེ། ནང་
སློབ་འགའ་ཞིག་དང་ཞབས་ཕྱི་བ་རྣམས་པུར་ཁང་གི་སྒོ་ཕྱེ་བར། ས་པཎ་གྱི་སྡོམ་གསུམ་རབ་དབྱེ་ལས། འཕགས་པ་གསུམ་གྱི་རིང་བསྲེལ་ནི། །ཡོན་ཏན་སྟོབས་ཀྱིས་བྱུང་བ་སྟེ། །སྐྱེ་བོ་རྣམས་ཀྱི་བསོད་ནམས་རྟེན། །ཞེས་དང༌། ཀརྨ་ཆགས་མེད་ཀྱིས། དབུ་བུམ་རི་ལ་དུང་དཀར་གཡས་འཁྱིལ་སོགས། །དེ་བྱུང་ན་མཆོག་སྟེ་ནོར་འཁྲུལ་མེད། །ཅེས་པ་ལྟར་དབུ་ཐོད་རིལ་པོར་བཞུགས་པའི་ནང་དུ་ཐུགས་ལྗགས་སྤྱན་གསུམ་བབས་ཤིང༌། རིང་བསྲེལ་མང་དུ་བྱོན་པ་དེར་འཁོད་ཐམས་ཅད་ཀྱིས་མངོན་སུམ་དུ་མཇལ་བས་ལྷག་པར་དད་པའི་གསོས་སུ་གྱུར། གདུང་རུས་བཏུ་ཚུལ་དང་ཤུལ་དུ་ཇི་ལྟར་བྱ་བ་རྣམས་ཀྱང་ཕྱག་ལེན་ལྟར་བྱས། སྐུ་ཚ་ཞབས་དྲུང་དང་ཕྱག་མཛོད་ཆེ་ཆིང་ཆོས་རྗེ་སོགས་ཞབས་ཕྱི་བ་རྣམས་ནས་ཁུར་བླང་བགྱིས་ཏེ་སྐུ་གདུང་རིན་པོ་ཆེ་བཞུགས་ཡུལ་གྱི་མཆོད་རྟེན་ཕྱག་ཚད་དང་ལྡན་ཞིང་གསེར་མདངས་གཟི་འོད་འབར་བ། རིན་པོ་ཆེ་དུ་མའི་ཕྲ་ཚོམ་གྱིས་མཛེས་པའི་བཀོད་པ་ཕུན་སུམ་ཚོགས་པ་ཆེ་ལེགས་གཉིས་བསྒྲུབས་པའི་ནང་དུ་ཐུགས་ལྗགས་སྤྱན་གསུམ་དང་སྐུ་གདུང་གི་རིང་བསྲེལ་རྣམས་བཞུགས་སུ་གསོལ། གཞན་ཡང་རྟེན་སྣ་དུ་མ་དང་གཟུངས་གཞུག་ཆ་ཚང་བ་སོགས་དམ་པ་གོང་མའི་ཕྱག་ལེན་དང་མཐུན་པར་ཕུལ་ནས་ཁྲི་ཀའི་གདན་ས་བཀྲ་ཤིས་ཆོས་གླིང་བླ་བྲང་དང༌། སྐུ་འབུམ་ཆོས་སྡེ་ཆེན་པོའི་ཉིད་ཀྱི་བླ་བྲང་ཕུན་ཚོགས་འདོད་པ་འཇོ་བའི་གཟིམ་ཆུང་གཉིས་སུ་སྐྱེ་དགུའི་བསོད་ནམས་བསགས་པའི་ཞིང་ས་དམ་པར་བཞུགས་པ་ལ་རབ་གནས་ཀྱི་ཆོ་ག་རྒྱས་པར་བྱས་ཏེ་བྱིན་རླབས་ཀྱི་གཟི་འོད་འབར་ཞིང་དགེ་མཚན་གྱི་དཔལ་
ཆེན་པོ་བརྒྱུད་མ་ནས་བརྒྱུད་མར་འབྱུང་བའི་རྟེན་འབྲེལ་ཕུན་སུམ་ཚོགས་པ་དུ་མའང་ལྷུན་གྱིས་གྲུབ་པར་གྱུར་ཏོ། །དཔག་བསམ་ཤིང་དང་རྫོགས་ལྡན་སྤྲིན་བཞིན་དུ། །གཏན་པ་མེད་པའི་མཆོད་སྦྱིན་རླབས་པོ་ཆེས། །དཔལ་ལྡན་བླ་མའི་ཟག་མེད་དགོངས་པ་དང༌། །གདུལ་བྱའི་བསོད་ནམས་ཚོགས་ཆེན་ལྷན་ཅིག་རྫོགས། །མྱ་ངན་གདུང་བའི་རྣོ་རྩུབ་ཆབ་རོམ་ཡང༌། །ཐུགས་རྗེའི་འོད་ཀྱིས་ཆུ་རུ་ཞུ་བ་ལས། །རྣམ་དཀར་འདུ་བྱེད་ལྦུ་བའི་འཕྲེང་བར་བཅས། །རྟག་འཛིན་རྒྱུད་ཀྱི་ཞིང་སྐམ་རླན་པར་བྱེད། །ཧ་རི་ཙན་དན་བཅད་གཏུབས་བསྲེགས་པས་ཀྱང༌། །བསུང་ཞིམ་ངད་ཀྱི་དྲི་བཟང་འཐུལ་བ་ལྟར། །ཀུན་ བཟང་སྤྱོད་པའི་སྒྱུ་འཕྲུལ་ཇི་ལྟར་དུ། །བསྟན་ཡང་འགྲོ་བའི་ཉེར་འཚོ་མཆོག་ཏུ ་འགྱུར། །ཞེས་དགེ་ལྡན་བསྟན་པའི་རྩ་ལག་མཁས་ཤིང་གྲུབ་པའི་དབང་ཕྱུག་རྗེ་བཙུན་བླ་མ་དམ་པ་ཚུལ་ཁྲིམས་བསྟན་པའི་ཉི་མ་དཔལ་བཟང་པོའི་རྣམ་པར་ཐར་པ་ནོར་བུའི་དོ་ཤལ་ལས་སྐུ་མྱ་ངན་ལས་འདས་པའི་མཛད་པ་དགོངས་རྫོགས་ཀྱི་རྣམ་དཀར་སྒྲུབ་ཚུལ་དང་བཅས་པའི་དྲ་བ་ཕྱེད་པ་སྟེ་བདུན་པའོ།། །།སྨྲས་པ། མི༷་འགྱུར་ལྷན་སྐྱེས་བདེ་ཆེན་ཉ༷ག་གཅིག་གཟུགས་སྐུའི་གར་རོལ་རྡོ༷་རྗེ༷་འཆ༷ང༌། །སླར་ཡང་ཐ་མལ་ཚུ༷ལ་གྱིས་ཁྲི༷མས་ལྡན་ངུར་སྨྲིག་འཆང་བའི་སྐུར་བཞེངས་ཏེ། །མ་ནོར་ལམ་བཟང་ཇི་བཞིན་བསྟ༷ན་ནས་ཐར་པར་འཁྲིད་པ༷འི་དེད་དཔོན་མཆོག །སྙིང་དབུས་ཉི༷་ཟླའི་
གདན་ལ་རྟག་བཞུགས་མཆོག་ཐུན་དངོས་གྲུབ་མ༷་ལུས་སྩོལ། །མཁའ་མཉམ་སེམས་ཅན་རྒྱ་མཚོ་བསྒྲལ་བའི་ཕྱིར། །ཕྱོགས་བཅུའི་ཞིང་ཁམས་རྒྱ་མཚོར་དུས་ཀུན་ཏུ། །བྱ་དཀའི་སྤྱོད་པ་རྒྱ་མཚོར་བསླབ་པའི་ཚུལ། །བགྲང་ཡས་བསྐལ་པ་རྒྱ་མཚོར་བརྗོད་མི་ནུས། །འོན་ཀྱང་རྒྱས་སྲས་སྤྱོད་པའི་ཆ་ཤས་ཙམ། །རྙོག་བྲལ་དྭངས་པའི་ཡིད་ཀྱིས་བསྔགས་པ་ཡང༌། །བསོད་ནམས་མི་ཟད་གཏེར་དུ་འདོམས་པ་ཡི། །རྒྱལ་གསུང་ཚད་མས་ཡིད་ནི་སྤྲོ་བས་དྲངས། །རྒ་བས་ནོན་པའི་མི་སྡུག་སྤྲིན་ནག་ལས། །དར་བབ་ལྕེ་ཡི་འཁྲུལ་འཁོར་གློག་དམར་གྱི། །རྗེས་འགྲོ་ལེགས་བཤད་སྙན་འགྱུར་འབྲུག་གི་སྒྲས། །སྐལ་ལྡན་མདོངས་མཐའ་དད་པའི་གཏོས་བཟང་འཛིན། །རྙེད་བཀུར་བུང་བའི་གླུ་དང་མི་འགྲོགས་ཤིང༌། །ཕྱོགས་ལྷུང་ཚ་བའི་གདུང་བ་རིང་དུ་སྤངས། །རྣམ་དག་དད་པའི་ཆུ་གཏེར་རྒྱས་བྱེད་པ། །ཕུལ་བྱུང་རྟོགས་པ་བརྗོད་པའི་ཟླ་ཟེར་འདིས། །ཁམས་གསུམ་འབྱོར་པར་རྔམ་པའི་ཁ་གདངས་ཤིང༌། །ཆགས་སྡང་རིས་སུ་གཅོད་པའི་མཆེ་བ་གཙིགས། །ཆོས་མིན་ངར་སྐད་མཐོན་པོར་སྒྲོགས་རྣམས་ཀྱི། །ཞལ་གྱི་པདྨོ་པདྨོ་བཞིན་དུ་བྱེད། །རྣམ་འབྱེད་ཤེས་རབ་མིག་གིས་མཐོང་བའི་ལམ། །དད་བརྩོན་གོམ་པས་བགྲོད་པའི་གཟུར་གནས་རྣམས། །དེད་དཔོན་མཆོག་གི་བཤུལ་འདི་མ་བོར་བར། །མི་གནས་ཞི་བའི་གྲོང་ཁྱེར་བསྙེགས་པར་མཛོད། །སྒྲ་དོན་ཕུན་སུམ་ཚོགས་པའི་རྣམ་ཐར་གྱི། །རྒུན་འབྲུམ་ཡོངས་སྨིན་མངར་བའི་རོ་བདའ་བ། །ཕྱོགས་འཛིན་
མཆུ་དང་བྲལ་བའི་མགྲོན་ཀུན་ལ། །ཕན་དང་བདེ་བའི་དགའ་སྟོན་མཆོག་ཏུ་སྤེལ། །ཚུ༷ལ་འདིར་འབད་པའི་རྣམ་དཀར་ལས་ཀྱིས་མཚོན། །སྦྱིན་དང་ཁྲི༷མས་བྱུང་བསྒོམ་པའི་དགེ་ཚོགས་མཐུས། །བསྟ༷ན་པ༷འི་སྙིང་པོ་ཉི༷་ལྟར་གསལ་བ་ཡིས། །མ༷་ལུས་འགྲོ་ལ་ཐར་ལམ་མཚོན་གྱུར་ཅིག །སླར་ཡ༷ང་ཡ༷ང་སྲིད་འཁྲུལ་བྲལ་ཀུན་དའི་གཉེན། །མ་ལུ༷ས་ལུ༷ས་ཅན་མགོན་དུ་མྱུར་གསལ་ཞིང༌། །ལེགས་གསུ༷ང་གསུ༷ང་གི་བསིལ་ཟེར་འབུམ་ཕྲག་གིས། །འགྲོ་ཀུ༷ན་ཀུ༷ན་དགའི་དཔལ་ལ་སྦྱོར་གྱུར་ཅིག །བླ་མ་ཡི་དམ་མཆོག་གསུམ་རྒྱ་མཚོའི་མཐུས། །བསྟན་དང་བསྟན་འཛིན་བསྟན་པའི་སྦྱིན་བདག་ཀུན། །ཆོས་སྲིད་དཔལ་འབྱོར་རྒྱས་བའི་དགེ་མཚན་གྱི། །རྫོགས་ལྡན་སྣང་བས་རྟག་ཏུ་རྩེན་གྱུར་ཅིག །ཅེས་དགེ་ལྡན་བསྟན་པའི་རྩ་ལག་མཁས་ཤིང་གྲུབ་པའི་དབང་ཕྱུག་རྗེ་བཙུན་བླ་མ་དམ་པ་ཚུལ་ཁྲིམས་བསྟན་པའི་ཉི་མ་དཔལ་བཟང་པོའི་རྣམ་པར་ཐར་པ་ནོར་བུའི་དོ་ཤལ་ཞེས་བྱ་བ་འདི་ནི་སྐུ་ཚ་ཅོ་ནེ་ཞབས་དྲུང་སྐལ་བཟང་བསྟན་འཛིན་རྒྱ་མཚོ། བོ་ཀྱཱ་ཆོས་རྗེའི་སྤྲུལ་སྐུ་ངག་དབང་ཕུན་ཚོགས། ཕྱག་མཛོད་རྒན་པ་ཆེ་ཆིང་ཆོས་རྗེ་རབ་འབྱམས་པ་ཚུལ་ཁྲིམས་ཆོས་འཛིན། ཁྲི་ཚབ་བླ་མ་རབ་འབྱམས་ཤེས་རབ་དབང་ཕྱུག །སྒོམ་པ་ངག་དབང་སྨོན་ལམ། ཕྱག་མཛོད་གཞོན་པ་དར་ཧན་རབ་འབྱམས་པ་ངག་དབང་བསྟན་འཛིན། ཆོས་རྗེ་བསྟན་འཛིན་བཟང་པོ། རབ་འབྱམས་པ་ཚུལ་ཁྲིམས་བསྟན་འཛིན། རབ་འབྱམས་པ་མི་འཇིགས་
རྡོ་རྗེ། རབ་འབྱམས་པ་ངག་དབང་ཕུན་ཚོགས། ཧོར་ཀྱཱའི་རི་ཁྲོད་པ་གྲགས་པ་དོན་གྲུབ། ཨོར་དུ་སུ་དགེ་སློང་དཀོན་མཆོག་སྙན་གྲགས། དབུ་མཛད་དགེ་སློང་བློ་བཟང་དོན་གྲུབ། དྲུང་ཡིག་དགེ་སློང་ཚུལ་ཁྲིམས་བསྟན་འཛིན། གསོལ་དཔོན་དགེ་སློང་བློ་བཟང་ཉི་མ། དེམྖི་དགེ་སློང་ཤེས་རབ་ཉི་མ། དགེ་ཚུལ་རྒྱལ་མཚན་དོན་གྲུབ། དགེ་ཚུལ་བློ་བཟང་དོན་གྲུབ། དགེ་ཚུལ་བློ་བཟང་ཚུལ་ཁྲིམས། དགེ་ཚུལ་ཤེས་རབ་དར་རྒྱས། དགེ་ཚུལ་རིན་ཆེན་ཟླ་བཟང༌། དགེ་ཚུལ་བློ་བཟང་དཔལ་འབྱོར། དགེ་ཚུལ་བློ་བཟང་སྐལ་ལྡན། བསྟན་པ་དར་རྒྱས་སོགས་ཞལ་སློབ་སྐུ་འཁོར་ཐུན་མོང་ནས་གསེར་གྱི་མཎྜལ་སོགས་བདོག་པ་རྒྱ་ཆེན་པོ་དང་བཅས་ནན་ཏན་དུ་བསྐུལ་ཞིང༌། ཉིད་ཀྱི་རྩ་བའི་སྦྱིན་བདག་ས་སྐྱོང་མིའི་དབང་པོ་ཝང་ཚེ་རིང་དོན་གྲུབ། པཻ་ལི་འཇམ་དཔལ་དོན་གྲུབ། པཻ་ཟེ་རཏྣ་སིངྡྷི། ཇ་སག་ཨུལ་ཇོས་ཐུ་དའི་ཆིང་རྡོ་རྗེ་སོགས་ནས་ཀྱང་དངུལ་གྱི་མཎྜལ། གོས་ཆེན་ཡུག་ཁ་ཤས་སོགས་ཀྱི་སྐྱེས་དང་བཅས་སྔ་ཕྱིར་བསྐུལ་བ་བཞིན། ྋབཙུན་པ་དཀོན་མཆོག་བསྟན་པའི་སྒྲོན་མེས་རྩོམ་གདན་གྱི་ས་བོན་གསལ་ཞིང་ལེགས་པར་འདུག་པས་དེ་ཉིད་གཞིར་བཟུང༌། ངག་རྒྱུན་ཁུངས་དག་འགའ་ཞིག་རང་གིས་ཐོས་པ་དང༌། གོང་འོག་བསྒྲིགས་ཏེ་དཔྱད་པས་གོ་བ་རྙེད་པ་རྣམས་ཀྱིས་ཟུར་བརྒྱན་གལ་ཆེ་བ་རྣམས་ཚད་མའི་ལུང་དང་སྦྱར་ཏེ། རབ་བྱུང་བཅུ་བཞི་པའི་བགྲང་བྱ་བཅུ་གཉིས་སོང་བ་འབྲུ་མང་ཞེས་པ་ས་ཕོ་སྟག་གི་ལོར། རྒྱལ་བའི་ལུང་གིས་ཟིན་པའི་
ཆོས་གྲྭ་ཆེན་པོ་བཀྲ་ཤིས་འཁྱིལ་དུ་དགུན་མཚམས་ཀྱི་སྐབས་ཐུན་གསེང་ལ་སུག་བྲིས་སུ་བགྱིས་པ་ལས། དཔེ་ཤོག་ཏུ་འབེབས་པ་པོ་ནི་གཙུག་ལག་འབྱེད་པའི་བློ་མིག་ཅན་སྔགས་རམས་པ་དཀོན་མཆོག་ཀུན་དགས་བགྱིས་པ་འདིས་ཀྱང་མཉྫུ་ནཱ་ཐ་དྭི་ཏཱི་ཡ་ཛ་ཡ་སྱ་ཤཱ་ས་ན་སརྦ་དིཀྐཱ་ལོ་ད་ཡ་ཙ་པུཥྚཾ་དཱི་རྒྷ་སྠཱསྟུཿ །།