རིག་བྱེད་མའི་བསྟོད་འགྲེལ་རྡོ་རྗེ་གསུམ་གྱི་སྣང་བ།
ཏྲིབཛྲཨཱལོཀབྷགབཏཱིདེཝཱིཀུརུཀུལླེསྟུདཿ ཊཱིགྣཱམབིཛཧཱར།
བཅོམ་ལྡན་འདས་མ་ལྷ་མོ་རིག་བྱེད་མ་ལ་བསྟོད་པའི་རྒྱ་ཆེར་འགྲེལ་པ་རྡོ་རྗེ་གསུམ་གྱི་སྣང་བ་ཞེས་བྱ་བ་བཞུགས་སོ། །
ནམོགུརུཙབྷགབཏཱིནྟྲསྱདེབིཀུརུཀུལླེཏཱབྷེདསྱཔདཾམཏཱ། བརམདཡ སྱཙིཏྟེནཱནུདྷརཏུ།
བླ་མ་དང་བཅོམ་ལྡན་འདས་མ་དབང་གི་ལྷ་མོ་རིག་བྱེད་མ་ངོ་བོ་དབྱེར་མ་མཆིས་པའི་ཞབས་ལ་གུས་པས་ཕྱག་འཚལ་ལོ། །མཆོག་ཏུ་བརྩེ་བའི་ཐུགས་ཀྱིས་རྗེས་སུ་བཟུང་དུ་གསོལ།
སིདྡྷིརྐཱམསྱསམནྱཾ སུགནྡྷིཿ བྷརངྒཾམནྡྲིཏིཀཽཥུརྵུབྷཱགཿ
ཐུན་མོང་འདོད་པའི་དངོས་གྲུབ་དྲི་བཟང་གིས། །མགྲོན་དུ་བཀུག་པའི་སྐལ་བཟང་བུང་བའི་ཚོགས། །
ཤྱཱཡརྵྭཱདུརྨདྷུནིརྴྲེཡསཱརཿ ཤྲེཡཿ ཏྲིཔྟིརྦྷ གབཱནིཔྲཡཙྪཿ
ངེས་ལེགས་སྙིང་པོ་སྦྲང་རྩིའི་ཟིལ་མངར་གྱིས། །ཚིམ་མཛད་བཅོམ་ལྡན་མ་ཡིས་དགེ་ལེགས་སྩོལ། །
མཉམ་ཉིད་གསུམ་གྱི་དབྱེར་མེད་ངོ་བོ་སྒྲིབ་བྲལ་དབྱིངས་ཀྱི་ཨ་དརྴ། །འཕྲིན་ལས་རྣམ་བཞིའི་སྐལ་བའི་རང་གཟུགས་ཅིར་ཡང་འཆར་བ་སྒྱུ་མའི་འཕྲུལ། །སྣང་བའི་དངོས་ཀུན་ལྷན་སྐྱེས་བདེ་ཆེན་འོད་དུ་འབར་བའི་གཟུགས་ཅན་མ། །བཅོམ་ལྡན་མ་ཁྱོད་སྙིང་དབུས་བཞུགས་ལ་དེ་ཉིད་འབྱེད་པའི་བློ་གྲོས་སྩོལ། །རྒྱལ་ཀུན་སོར་རྟོག་ཡེ་ཤེས་ལི་ཁྲིའི་རྡུལ། །ཚོགས་པའི་སྣང་བ་མཐའ་ཡས་ཉིན་མོར་བྱེད། །དབང་འབྱོར་ཚ་ཟེར་ཕྲེང་བའི་ཉག་ཕྲན་གྱིས། །སྐལ་བཟང་འདབ་བརྒྱ་ཕྱེ་བས་མ་ཚིམ་པར། །གསུམ་ལྡན་ངུར་སྨྲིག་འཆང་བའི་སྐུར་བཞེངས་ནས། །འགྲོ་བའི་མགོན་མཛད་དཔལ་ལྡན་ཡེ་ཤེས་ཞེས། །གྲགས་པའི་སྤྲིང་ཡིག་སྲིད་རྩེ་ལས་བརྒལ་བ། །ཟླ་མེད་བླ་མ་དེ་ལ་མགོས་ཕྱག་འཚལ། །གང་ཐུགས་བདེན་པ་གཉིས་སུ་རོ་གཅིག་པ། །དེས་གསུངས་བརྒྱད་ཁྲི་བཞི་སྟོང་ཆོས་ཀྱི་སྒོ། །ཟབ་ཅིང་རྒྱ་ཆེའི་རྒྱ་
མཚོའི་གཏིང་དང་མཐའ། །སྨྲ་བསམ་བརྗོད་ལས་འདས་ཤིང་ཁྱད་པར་དུ། །གཅམ་བུའི་སྙན་ཚིག་པིར་གྱིས་བྲིས་མིན་པར། །ཡེ་ཤེས་ལྔ་བདག་ལྷན་སྐྱེས་དབང་གཞུའི་མདངས། །ཆེར་ངོམ་ཉིད་ཀྱི་གསུང་གསུམ་འཁོར་ལོའི་གཏམ། །བློ་ཆུང་བདག་འདྲས་དཔོག་ནུས་ག་ལ་ཞིག །འོན་ཀྱང་འཛམ་གླིང་འཛིན་མའི་ཁོར་ཡུག་འདིར། །ཐུབ་བསྟན་ལང་ཚོ་ཡོལ་བའི་སྐལ་དབང་གིས། །ཆོས་སྨྲའི་གཡར་ཁྲལ་ཕོག་པ་བདག་འདྲ་ཡང༌། །དབང་མེད་དབྱུག་གུས་བསྐུལ་བའི་རྔ་བཞིན་སྒྲོགས། །གང་ལས་བདེ་བར་གཤེགས་པ་འབྲས་བུའི་སར། །སྒྲོད་བྱེད་ཡང་དག་ལམ་གྱི་རིམ་པར་བཅས། །མཐོང་སྟེ་དང་བའི་ཡིད་ཀྱིས་སློབ་འདོད་རྣམས། །ལེགས་བཤད་སྣང་བའི་དགའ་སྟོན་འདིར་ཞུགས་ཤིག །དེ་ཡང་ནུབ་ཕྱོགས་བདེ་ལྡན་ཞིང་གི་མགོན་པོ་སྣང་བ་མཐའ་ཡས་ངུར་སྨྲིག་འཆང་བའི་སྐུར་བཞེངས་པ་པཎ་ཆེན་ཐམས་ཅད་མཁྱེན་ཅིང་གཟིགས་པ་ཆེན་པོ་རྗེ་བཙུན་བློ་བཟང་དཔལ་ལྡན་ཡེ་ཤེས་ཞེས་གྲགས་པའི་གདུགས་དཀར་སྲིད་པ་གསུམ་གྱི་བླ་ན་འཁོར་ཞིང༌། ས་སྟེང་གི་མཁས་པ་དང་གྲུབ་པའི་བསྟན་འཛིན་གྱི་སྐྱེས་བུ་མ་ལུས་པའི་གཙུག་གི་རྒྱན་དམ་པར་གྱུར་པ་དེ་ཉིད་ཀྱིས་མཛད་པའི་བཅོམ་ལྡན་རིག་བྱེད་མའི་བསྟོད་པ་སྙན་དངགས་མཁན་པོའི་སྒྲོ་བཏགས་ཀྱིས་ཟོལ་སྦྱོར་དང༌། ཕྱིའི་རྣམ་འགྱུར་ཙམ་ལ་མངོན་བརྗོད་སྣ་ཚོགས་དང་བསྲེས་ཏེ་དཔེ་རྒྱན་དུ་མས་བསྔགས་པའི་ཚིག་གི་སྦྱོར་བ་གང་ལེགས་
ཀྱིས་རྣ་བར་སྙན་པ་ཙམ་མ་ཡིན་པར་ལམ་དང་འབྲས་བུའི་གནས་སྐབས་ཀྱི་རྡོ་རྗེ་ཐེག་པའི་ཟབ་གནད་མཐའ་དག་དང་འབྲེལ་ཞིང༌། སོ་སོ་རང་གི་རིག་པའི་སྤྱོད་ཡུལ་དུ་གྱུར་པའི་གསང་བ་གསུམ་གྱི་རོལ་པ་རྨད་དུ་བྱུང་བའི་གནས་ཚུལ་མ་ལུས་པ་རྗེན་པར་སྟོན་པའི་རྡོ་རྗེ་ཚིག་གི་དོན་རྒྱུད་དང་གྲུབ་ཆེན་སོ་སོའི་མན་ངག་འཇམ་མགོན་བླ་མ་ཡབ་སྲས་ཀྱི་ལེགས་བཤད་རྣམས་གུང་བསྒྲིགས་ཏེ་འཆད་པ་ལ་གསུམ། ཀླད་ཀྱི་དོན། གཞུང་དངོས། མཇུག་གི་དོན་ནོ། །དང་པོ་ལ་ལེགས་སྦྱར་གྱི་སྐད་དུ་ཕྱག་འཚལ་བ། མཚན་གྱི་དོན། མཆོད་བརྗོད་དངོས་དང་གསུམ། དང་པོ་ནི། འདིའི་ཐོག་མའི་ཕྱག་འཚལ་བ་ལེགས་སྦྱར་གྱི་སྐད་དུ་སྨོས་པའི་དགོས་པ་གང་ཞེ་ན། སྤྱིར་མདོ་སྡེ་ཕལ་བོ་ཆེ་ལས། ལྷ་ཡི་སྐད་དང་ཀླུ་དང་གནོད་སྦྱིན་སྐད། །ཅེས་སོགས་ལྟར་སངས་རྒྱས་རྣམས་ཀྱི་འཕྲིན་ལས་གདུལ་བྱའི་སྐལ་བ་བཞིན་དུ་འཇུག་པས་འགྲོ་བ་གང་གི་སྐད་དུ་ཆོས་སྟོན་པ་མཐའ་གཅིག་ཏུ་མ་ངེས་ཤིང༌། ཁྱད་པར་དུ་སྒྲ་ཙམ་ལ་ཞེན་པ་རྣམས་ཀྱང་ཚིག་ལ་མི་རྟོན་དོན་ལ་སྟོན་དགོས་ཞེས་བཀྲི་བའི་ཕྱིར་ཀླ་ཀློའི་སྐད་དང༌། ཨ་བ་བྷྲཾ་ཤ་ཟུར་ཆག་གི་སྐད་དུ་རྒྱུད་གསུངས་པ་འགྲེལ་ཆེན་དྲི་མེད་འོད་སོགས་ལས་འབྱུང་བ་ལྟར་ཡིན་ཀྱང༌། གདུལ་བྱ་ཐུན་མོང་བའི་སྣང་ཚུལ་གཙོ་ཆེ་བའི་དབང་དུ་བྱས་ན་མཆོག་གི་སྤྲུལ་སྐུས་མི་ཡུལ་དུ་ཆོས་འཁོར་བསྐོར་བའི་གནས་རྒྱ་གར་དང༌། སྐད་ཀྱང་
སཾ་སྐྲྀ་ཏའི་སྐད་དུ་གསུངས་ལ། སྐད་དེ་ཉིད་ངེས་ཚིག་གི་སྟེང་ནས་བཤད་ན་བརྗོད་བྱ་སྟོན་པའི་ནུས་པ་གཞན་ལས་ཤིན་ཏུ་ཆེ་བས། རང་གིས་སླར་དེའི་སྐད་དུ་ཆོས་འཁོར་བསྐོར་བའི་རྟེན་འབྲེལ་བསྒྲིགས་ཤིང་སྐད་ལ་བག་ཆགས་འཇོག་པ་དང༌། སྔོན་གྱི་ཆོས་རྒྱལ་ལོ་པཎ་རྣམས་ཀྱིས་བསྟན་པའི་སྲོལ་ཕྱེ་བའི་ཚེ། ཐར་པ་དོན་དུ་གཉེར་བའི་སྐྱེ་བོ་བློ་གྲོས་ཀྱི་ནོར་དང་ལྡན་པ་དག་གིས་གང་ལ་ཐོས་བསམ་སྒོམ་པ་བྱ་བའི་ཡུལ་ནི་དང་པོ་བསྟན་པའི་བདག་པོ་ཐུབ་པ་སངས་རྒྱས་བཅོམ་ལྡན་འདས་ཀྱིས་མདོ་རྒྱུད་དྲི་མ་མེད་པ་ནས་གསུངས། པཎྚི་ཏ་ཆེན་པོ་རྣམས་ཀྱིས་ལུང་དང་རིགས་པས་ལེགས་པར་གཏན་ལ་ཕབ། གྲུབ་པའི་དབང་ཕྱུག་རྣམས་ཀྱིས་ཉམས་སུ་བཞེས་ཏེ་རྟོགས་པ་མངོན་དུ་གྱུར། ལོ་པཎ་རྣམས་ཀྱིས་ཀྱང་དཀའ་བ་བརྒྱ་ཕྲག་གི་སྒོ་ནས་བསིལ་ལྡན་གྱི་ལྗོངས་སུ་གདན་དྲངས་པའི་ཁུངས་དང་འབྲེལ་བ་ཞིག་མ་གཏོགས། རྒྱ་ནག་མདོ་རྩོམ་པའི་ཕྱག་ལེན་ལྟ་བུ་དྲི་མ་ཅན་དུ་མི་འགྱུར་ཞིང༌། སྐད་དོད་མི་ཤེས་པ་རྣམས་ཀྱིས་ཐོག་མའི་ཚིག་དེ་ཙམ་ཡང་གོ་མི་ཐུབ་ལ། དེ་བོད་སྐད་དུ་བསྒྱུར་ནས་ཀློག་པ་ཙམ་གྱིས་གཞུང་ངོས་ཟིན་པར་མཐོང་ནས་ལོ་པཎ་རྣམས་ཀྱི་བཀའ་དྲིན་དྲན་པ་དང༌། ད་ལྟ་དཀའ་བ་མེད་པར་གཞུང་དེ་རྣམས་ལ་ཐོས་བསམ་བྱར་ཡོད་པ་སྐལ་བ་བཟང་སྙམ་དུ་སྤྲོ་བས་འཇུག་པ་སོགས་དགོས་པ་དུ་མར་གཟིགས་ནས་གཞུང་གི་ཀླད་དུ་རྒྱ་གར་གྱི་སྐད་སྨོས་པར་བཀས་བཅད་པ་དང་བསྟུན་ཏེ་གསུངས་པ་ཡིན་ནོ། །དེ་ཡང་ན་མོ་ཌཱ་ཀཱི་ཀུ་རུ་ཀུལླེ་ཡ་ཞེས་པའི་ན་མོ་ནི་ཕྱག་འཚལ། ཌཱ་ཀཱི་ནི་མཁའ་འགྲོ། ཀུ་རུ་ཀུལླེ་ཡ་ནི་རིག་བྱེད་མ་ལའམ། རིག་བྱེད་
མའི་ཆེད་དུ་ཞེས་པ་ཡིན་ཞིང༌། བསྡུས་ན་མཁའ་འགྲོ་རིག་བྱེད་མ་ལ་ཕྱག་འཚལ་ལོ། །ཞེས་པའོ། །དེ་དག་ངེས་ཚིག་གིས་བཤད་ན། ཎ་མ་རབ་ཏུ་འདུད་པ་དང་སྒྲ་ལའོ། །ཞེས་པའི་བྱིངས་བཞག །དང་པོའི་ཥ་ཎ་ནི་ས་ནའོ། །ཞེས་པས་ཎ་ནར་བསྒྱུར། རྐྱེན་ཨ་སུ་ན྄་བྱིན་ཨུ་དང་ན་རྗེས་འབྲེལ་ཡིན་པས་ཕྱིས་ཏེ་ན་མས྄་ཞེས་གྲུབ། དེ་ཚིག་ཏུ་བསྒྲུབ་པ་ལ། དང་པོའི་གཅིག་ཚིག་སི་བྱིན། ཧ་ས་ཨཱི་པ྄་ལ་སི་འཇིག་གོ །ཞེས་པས་སི་ཕྱིས། ས་ར་དག་གི་རྣམ་བཅད་དོ། །ཞེས་པས་ན་མས྄་ཀྱི་ས྄་རྣམ་བཅད་བྱས་ཧ་བ་ལའོ་ཞེས་པས་རྣམ་བཅད་ཨུ་རུ་བསྒྱུར། མའི་སྲོག་གི་ཨ་ཕྲལ། ཨ་ཨུ་ལ་ཨོའོ་ཞེས་ཨ་དང་ཨུ་གཉིས་འདུས་པས་ཨོ། དབྱངས་ཀྱིས་དམན་པ་ཕ་རོལ་ཏུ་ཡང་དག་པར་སྦྱོར། ཞེས་མ྄་སྲོག་མེད་ཨོ་ལ་དྲངས་པས་ན་མོ་ཞེས་ཚིག་ཏུ་གྲུབ་ཅིང་འདུད་པའི་དོན་ཡིན་ནོ། །དེ་ཐོག་མ་ཁོ་ནར་སྨོས་པ་ནི། རྒྱན་ལས། ལྷ་རྣམས་རུང་བར་བྱ་བའི་ཕྱིར། །འོད་ཀྱིས་མོག་མོག་པོར་མཛད་དང༌། །ཞེས་གསུངས་པ་བཞིན་སྐྱབས་ཡུལ་དམ་པ་རྣམས་ཀྱི་འདུལ་བའི་ཞིང་དུ་འགྱུར་བ་ལ་གེགས་ཀྱི་གཙོ་བོ་ཤེས་རྒྱུད་ང་རྒྱལ་གྱིས་དྲེགས་པ་ཡིན་པས་དེ་ཉིད་མགོ་མནན་ནས་དམན་ས་འཛིན་དགོས་པའི་རྒྱུ་མཚན་གྱིས་ཡིན་ཏེ། འབྲོམ་སྟོན་གྱི་ཞལ་ནས། ང་རྒྱལ་གྱི་སྒང་བུ་ལ་ཡོན་ཏན་གྱི་ཆུ་མི་འབབ་པས། སྐ་འགོ་སྨོད་དགོས་གསུངས་པ་ལྟར་རོ། །དེས་ན་གཞུང་ཆེན་མོ་ཀུན་གྱི་མགོར་མཆོད་བརྗོད་མཛད་པ་དང༌། ཡན་ལག་བདུན་པའི་ཐོག་མར་ཕྱག་བྱས་པ་ཡང༌། དེ་བདུན་ཉོན་མོངས་པ་
སོ་སོའི་གཉེན་པོར་སྦྱར་བའི་ཚེ། ཕྱག་འཚལ་བ་ང་རྒྱལ་གྱི་གཉེན་པོར་གསུངས་པ་རྣམས་དང་གནད་གཅིག་གོ །ཌཱ་ཀཱི་ནིའི་ཌཱ་ནི་ཌ་ཞེས་པ་ནམ་མཁའ་སྟེ་སྐད་ཀྱི་བྱིངས་ལས་བསྒྱུར་བ་དང༌། ཨ་ཀི་ནི་གྱ་གྱུར་འགྲོ་བ་སྟེ་ནམ་མཁའ་ལ་ཁྱབ་པར་འགྲོ་བས་ན་ཌ་ཀི་ནི་ཞེས་མཁའ་འགྲོར་བཤད་པའམ། ཀ་ལཱ་པ་ལས། ཌཱིད྄་ནམ་མཁའ་ལ་ཀུན་ཏུ་འགྲོ་བ་ལའོ་ཞེས་པའི་བྱིངས་བཞག །རྐྱེན་ཌ་བྱིན། ཌའི་སྲོག་གི་ཨཱིད་ཕྱིས། རྐྱེན་གྱི་ཌྲ་དེའི་དོན་ཡིན་པས་སོང༌། དེའི་སྲོག་གི་ཨ་བཞག །ཌ྄་སྲོག་མེད་རྐྱེན་གྱི་ཨ་ལ་དྲངས་པས་ཌ་ཞེས་གྲུབ་ཅིང༌། དེ་ཕན་གྱི་རྐྱེན་ཀ་བྱིན། འཕེལ་བ་བྱས་པས་ཌཱ་ཀ་དང༌། དེ་ལ་མོ་རྐྱེན་ཨཱི་པ྄་བྱིན། རྗེས་འབྲེལ་གྱི་པ྄་དང་ཀའི་སྲོག་གི་ཨ་ཕྱིས་པས། ཌཱ་ཀ྄་ཨཱི་ཞེས་གྲུབ། རྣམ་དབྱེ་དང་པོའི་གཅིག་ཚིག་སི་བྱིན། སི་ཕྱིས། ཀ྄་སྲོག་མེད་ཨཱི་ལ་དྲངས་པས། །ཌཱ་ཀཱི་ཞེས་དོན་གྱིས་མཁའ་ལ་རྒྱུ་བར་བྱེད་པས་ན་མཁའ་འགྲོ་མ་ཞེས་བཤད་པ་དང༌། ཨུ་ཙ་ཚོགས་ཀྱི་བྱིངས་དང་ལ་ཌ་རོལ་པའི་བྱིངས་ལས་སྒྲུབ་ན་ཚོགས་དང་རོལ་པ་སོགས་ལ་ཡང་བཤད་དུ་རུང་མོད་ཀྱང་གཙོ་བོ་ནི་སྔ་མ་ཡིན་ཏེ། དེ་ཁོ་ན་ཉིད་གསལ་བ་ལས། ཌེ་ནི་ནམ་མཁར་འགྲོ་བ་ཞེས། །སྐད་ཀྱི་བྱིངས་ལས་རྣམ་པར་བརྟག །ནམ་མཁའ་ཀུན་ཏུ་འགྲོ་བས་ན། །མཁའ་འགྲོ་མ་ཞེས་བྱ་བར་བརྗོད། །མཁའ་འགྲོ་མ་ནི་ཐམས་ཅད་ཀྱི། །རང་བཞིན་ཡིན་ཕྱིར་དེ་ཡི་དངོས། །ཞེས་སོ། །འདིའི་རྐང་པ་ཕྱི་མ་གཉིས་ནི་ངེས་དོན་གྱི་དབང་དུ་མཛད་པ་ཡིན་ཏེ། རྫོགས་རིམ་དངོས་གྲུབ་སྙེ་མ་ལས། ངེས་དོན་ནི་ནམ་མཁའ་ཤེས་རབ་སྟོང་པ་ཉིད་ལ་ཁྱབ་པར་འགྲོ་བའི་ལྷན་སྐྱེས་སོ། །ཞེས་གསུངས་ཏེ། དེ་ནི་
བདེ་མཆོག་རྩ་རྒྱུད་ལས། གསང་བ་མཆོག་གིས་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཞེས་པའི་ངེས་དོན་གྱི་བཤད་པ། མངོན་བརྗོད་ལས། ཐམས་ཅད་མཁྱེན་པ་ཞེས་བྱར་བཤད། །རྡོ་རྗེ་ཅན་ནི་དེར་བཞུགས་པ། །ཞེས་གསུངས་པ་དང་གནད་གཅིག་གོ །ཀུ་རུ་ཀུལླེ་ནི་བྱིངས་མདོ་ལས། ཌུཀྲྀཉ྄་བྱེད་པ་ལའོ་ཞེས་པའི་བྱིངས་བཞག །རྗེས་འབྲེལ་ཌུཉ྄་ཕྱིས། རྐྱེན་ཧི་དང་ཨུ་བྱིན། ཀའི་སྲོག་གི་རྀ་ཨར་དུ་བསྒྱུར། ཀ་སྲོག་མེད་ཨ་དང་ར྄་སྲོག་མེད་རྐྱེན་གྱི་ཨུ་ལ་དྲངས་པས་ཀ་རུ་དང༌། བྱིངས་ཐམས་ཅད་པ་ཡོན་ཏན་མེད་པ་ལ་ཨའི་ཨུ་སྦྱར། ཨུ་ཡིག་ལས་ཀྱང་ངོ་ཞེས་པས་ཧི་ཕྱིས་ཏེ་ཀུ་རུ་ཞེས་གྲུབ། ཡང་ཀུ་ལ་ཆགས་པ་ལའོ་ཞེས་པའི་བྱིངས་བཞག་ཀྟ་སོགས་ཀྱིས་རྐྱེན་ཀྟ་བྱིན། ཀ་ཡོན་ཏན་འགོག་པའི་དོན་དང༌། བྱིངས་མཐའི་ཨ་བརྗོད་དོན་ཡིན་པས་ཕྱིས། ཚིག་ཕྲད་ལས་ཏ་ལར་བསྒྱུར་མོ་རྐྱེན་ཨཱི་པ྄་བྱིན། པ྄་ཕྱིས། ལའི་སྲོག་གི་ཨ་དང་ཨཱི་གཉིས་འདུས་པས་ཨེ། རིམ་པར་དྲངས་པས་ཀུ་རུ་ཀུ་ལླེ་ཞེས་གྲུབ་ཅིང༌། ཆགས་པར་བྱེད་པས་ན་རིག་བྱེད་མ་ཞེས་པར་འགྱུར་ཏེ། སྲིད་གསུམ་མཐའ་དག་དགའ་བའི་རྣམ་པས་དབང་དུ་བྱེད་པ་ལ་སྦྱར་ཏེ། དོན་གྱི་ཆ་ནས་བཤད་པ་ཡིན་ཞིང༌། རིག་བྱེད་ཀྱི་རི་ཕུག་ཏུ་བཞུགས་པའི་སྒོ་ནས་མཚན་གསོལ་བའི་ལོ་རྒྱུས་ལྟར་ན་ངེས་ཚིག་གིས་བཤད་དགོས་པའི་ངེས་པ་མེད་དམ་སྙམ་མོ། །དེར་མ་ཟད་རྡོ་རྗེ་སྙིང་འགྲེལ་ལས། ཀུ་ནི་བདེ་བ་ཆེན་པོའོ། །རུ་ནི་ལོངས་སྤྱོད་རྫོགས་པའོ། །ཀུ་ནི་ཆོས་སོ། །ལེ་ནི་སྤྲུལ་བ་ཡིན་པར་ཤེས་པར་བྱའོ། །ཞེས་གསུངས་པ་སོགས་
ལ་དཔགས་ན་རྡོ་རྗེ་འཆང་རང་ཉིད་ཀྱིས་ཐུན་མོང་མ་ཡིན་པར་སྦྱར་བའི་རྡོ་རྗེའི་ཚིག་གི་བརྡ་དོན་འགྲེལ་ཚུལ་གཞན་ཡང་ཡོད་པར་མངོན་ནོ། །གཉིས་པ་མཚན་དོན་ནི། བཅོམ་ལྡན་འདས་མ་ཁམས་གསུམ་དབང་སྡུད་ཀྱི་ལྷ་མོ་རིག་བྱེད་མ་ཀུ་རུ་ཀུལླེ་ལ་བསྟོད་པའི་གླུ་དབྱངས་སྲིད་གསུམ་འགུགས་པའི་ལྕགས་ཀྱུ་ཞེས་བྱ་བ་ཞེས་བྱུང༌། དེ་ཡང་འཇིག་རྟེན་དང་འཇིག་རྟེན་ལས་འདས་པའི་ལྷ་དུ་མའི་སྒོ་ནས་ལས་སྣ་ཚོགས་སྒྲུབ་ཚུལ་ཡང་དག་དང་ལྟར་སྣང་ཅི་རིགས་ཤིག་ཡོད་ཅིང༌། དེ་གང་གི་སྐབས་སུ་ལྷ་དང་སྔགས་ཀྱི་ཆེ་བ་དབྱུང་བའི་ཁ་ཟིན་རེ་འབྱུང་བ་སྤྱི་ལུགས་ཡིན་པས་མཁས་པ་བློ་གསལ་ཞིང་གཟུ་བོར་གནས་པ་རྣམས་ཀྱིས་དེ་དང་དེའི་ཆེ་བ་བརྗོད་པའི་ཚིག་ཙམ་ལ་མ་བརྟེན་པར་སྐྱོན་ཡོན་ལེགས་པར་བརྟག་དགོས་ཏེ། སྤེལ་མར་བསྟོད་པ་ལས། གང་ལ་ཉེས་པ་ཐམས་ཅད་ཀུན། །གཏན་ནས་ཡོང་ཡེ་མི་མངའ་ཞིང༌། །གང་ཞིག་ལ་ནི་ཡོན་ཏན་ཀུན། །རྣམ་པ་ཐམས་ཅད་གནས་གྱུར་པ། །གལ་ཏེ་སེམས་ཤིག་ཡོད་ན་ནི། །དེ་ཉིད་ལ་ནི་སྐྱབས་འགྲོ་ཞིང༌། །དེ་བསྟོད་དེ་ནི་བཀུར་བ་དང༌། །དེ་ཡི་བསྟན་ལ་གནས་པའི་རིགས། །ཞེས་ཡུལ་དེ་ཉིད་སྐྱབས་གནས་ཡང་དག་ཏུ་ངེས་པ་རྙེད་ནས། དེ་ལ་བསྟོད་པ་དང་བཀུར་སྟི་བྱེད་ཅིང༌། དེའི་རྗེས་སུ་སློབ་དགོས་པར་གསུངས་སོ། །དེ་ཡང་མཐའ་ཆོད་པར་བྱེད་ན། བཞི་བརྒྱ་པ་ལས། སངས་རྒྱས་ཀྱིས་གསུངས་ལྐོག་གྱུར་ལ། །གང་ཞིག་ཐེ་ཚོམ་སྐྱེ་འགྱུར་བ། །དེ་ཡིས་སྟོང་པ་ཉིད་བསྟེན་ཏེ། །འདི་ཉིད་ཁོ་ནར་ཡིད་ཆེས་བྱ། །ཞེས་དང༌། རྣམ་འགྲེལ་ལས། བླང་དང་དོར་བྱའི་དེ་ཉིད་ནི། །ཐབས་བཅས་རབ་ཏུ་ངེས་པ་
ཡིས། །གཙོ་བོའི་དོན་ལ་མི་བསླུའི་ཕྱིར། །གཞན་ལ་རྗེས་སུ་དཔག་པ་ཡིན། །ཞེས་གསུངས་པ་དང་དོན་མཐུན་པར་རྒྱུད་སྡེ་རྣམས་ལ་ཡང་དེ་ནས་བཤད་པའི་སྦྱང་བྱ་སྦྱོང་བྱེད་ཀྱི་གནད་གོང་འོག་ཀུན་ལ་དངོས་སྟོབས་ཀྱི་རིགས་པ་དྲི་མ་མེད་པས་ཚུལ་བཞིན་དུ་དཔྱད་དེ་འགལ་བ་མེད་པར་ངེས་པ་བརྟན་པོ་རྙེད་ནས་རྒྱུད་སྡེ་རྣམ་དག་ཏུ་ཡིད་ཆེས་པ་དགོས་ལ། ད་ལྟའི་གདུལ་བྱ་ཕལ་མོ་ཆེས་བློ་སྟོབས་ཀྱིས་དེ་ལྟར་བྱེད་པ་དཀའ་ཡང༌། རྒྱལ་བའི་བསྟན་པ་ལ་ཚད་མར་གྱུར་པའི་སྐྱེས་ཆེན་གོང་མ་རྣམས་ཀྱིས་རྒྱུད་སྡེ་རྣམ་དག་ཏུ་མཛད་པ་ལས་ཟིན་སོ་ཡོད་མེད་ལེགས་པར་བརྟགས་ནས་ལྷག་པའི་ལྷར་བཟུང་དགོས་ཀྱི། དེ་ལྟར་མ་བྱས་ན་བསྟན་པའི་སྙིང་པོ་གསང་ཆེན་བླ་མེད་ཀྱི་ཉམས་ལེན་བྱེད་པར་རློམ་ཡང་མཁའ་ལ་རྒྱུ་བའི་མི་མ་ཡིན་རེ་ལ་སྐྱབས་གནས་མཐར་ཐུག་ཏུ་འཁྲུལ་པའི་དབང་གིས་བསྟན་པའི་འཇུག་སྒོ་སྐྱབས་འགྲོ་ལས་ཀྱང་ཆེས་རིང་དུ་འགྱུར་བའི་ཉེན་ཆེ་བས། སྙིགས་མའི་གདུལ་བྱ་རྣམ་དཔྱོད་ཀྱི་རྩལ་ཞན་ཞིང་འདོད་ཐག་ཉེ་བ་རྣམས་ཀྱིས་དེ་འདྲའི་རིགས་ལ་བག་ཟོན་ཤིན་ཏུ་བྱ་དགོས་སོ། །དེས་ན་ཐོག་མར་རྒྱུད་གང་ནས་བྱུང་བའི་ཁུངས་དགོད་པ་ལ། གུར་དང༌། སམྦུ་ཊའམ་ཁ་སྦྱོར། འཇམ་དཔལ་དཔའ་བོ་གཅིག་གྲུབ་ཀྱི་རྒྱུད། གཤིན་རྗེའི་གཤེད་ཀྱི་རྒྱུད། སྒྲོལ་མ་འབྱུང་བ་སོགས་ལས་ཀྱང་འདིའི་ལས་ཚོགས་ཅི་རིགས་གསུངས་པ་ཡོད་ན་ཡང༌། གཙོ་བོ་ནི་དགྱེས་པ་རྡོ་རྗེའི་རྒྱུད་བརྟག་པ་གཉིས་པ་ལས་གསུངས་ཏེ། དེ་ཡང་བརྟག་པ་དང་པོའི་རབ་བྱེད་བཅུ་གཅིག་པ་ལས། ཀུ་རུ་ཀུལླེའི་སྒྲུབ་ཐབས་བཤད་པར་བྱ་སྟེ། གོང་དུ་བརྟག་པ་
བཅུ་གཉིས་པར། །རྒྱས་པར་གསུངས་པ་མདོ་རུ་བསྡུ། །ཧྲཱིཿ ལས་བྱུང་བའི་ལྷ་མོ་ནི། །ཁ་དོག་དམར་ཞིང་ཕྱག་བཞི་མ། །མདའ་དང་གཞུ་ཡི་ལག་པ་མ། །ཨུཏྤ་ལ་དང་ལྕགས་ཀྱུ་འཛིན། །འདི་ནི་བསྒོམས་པ་ཙམ་གྱིས་ནི། །འཇིག་རྟེན་གསུམ་པོ་དབང་དུ་བྱེད། །འབུམ་ཕྲག་གཅིག་གིས་རྒྱལ་པོ་རྣམས། །ཁྲི་ཡིས་འཇིག་རྟེན་ཕལ་བ་ཉིད། །བྱེ་བས་ཕྱུག་དང་གནོད་སྦྱིན་སོགས། །འབུམ་ཕྲག་བདུན་གྱིས་ལྷ་མ་ཡིན། །འབུམ་ཕྲག་གཉིས་ཀྱིས་ལྷ་རྣམས་ཉིད། །བརྒྱ་ཕྲག་གཅིག་གིས་སྔགས་པ་ཉིད། །ཅེས་དང༌། བརྟག་པ་དང་པོའི་ལེའུ་གཉིས་པ་ལས། ཨོཾ་ཀུ་རུ་ཀུལླེ་ཧྲཱིཿ སྭཱཧཱ། ཀུ་རུ་ཀུལླེའི་སྔགས་སོ། །རབ་ཏུ་མྱོས་མ་དབང་དུ་བྱ་བར་འདོད་པས་མྱ་ངན་མེད་པའི་འོག་ཏུ་སོང་སྟེ། གོས་དམར་པོ་བགོས་ནས་མྱོས་བྱེད་ཀྱི་འབྲས་བུ་ཟ་ཞིང༌། ཀ་ཀཱ་མ་ཙི་ཀའི་ཁུ་བས་ཐིག་ལེ་བྱས་ནས་སྔགས་བཟླས་ཏེ། ཨོཾ་ཨ་མ་གུ་ཡེ་ཧྲཱིཿ སི་བྷ་ཝ་ཏུ་སྭཱཧཱ། ཁྲིས་འོང་བར་འགྱུར་རོ་ཞེས་དང༌། ཡང་བརྟག་པ་གཉིས་པའི་ལེའུ་དགུ་པ་ལས། དང་པོ་རྣམ་པར་སྣང་མཛད་བཞག །དང་པོ་ཉིད་ཀྱི་དང་པོ་ལ། །རྡོ་རྗེ་མཁའ་འགྲོ་མ་དང་སྦྱར། །མཐར་གནས་པ་ཡི་གཉིས་པ་ལ། །རྡོ་རྗེ་མཁའ་འགྲོ་མ་དང་ལྡན། །ཡང་ནི་དང་པོའི་རྩེ་མོ་ལ། །རྡོ་རྗེ་མཁའ་འགྲོ་མ་དང་ལྡན། །མཐར་གནས་པ་ཡི་གསུམ་པ་ལ། །ཡང་ནི་དེ་ཉིད་ཡང་དག་ལྡན། །སྟེང་དུ་ཆོམ་རྐུན་མ་ཡིས་བརྒྱན། །དེ་རྗེས་ཧྲཱིཿ ཡི་རྣམ་པ་སྦྱར། །མཐར་ནི་སྭཱཧཱ་ཡོད་པ་ཉིད། །ཀུ་རུ་ཀུལླེའི་སྔགས་སོ། །ཞེས་པ་རྣམས་སོ། །དེ་དག་གི་ཚིག་དོན་ལ་མཁས་པ་སོ་སོས་འགྲེལ་ཚུལ་ཅུང་ཟད་མི་འདྲ་བ་འགའ་ཞིག་ཡོད་དེ། གྲུབ་ཆེན་མཚོ་སྐྱེས་ཀྱི་དཀའ་འགྲེལ་པདྨ་ཅན་དུ་བརྟག་པ་བཅུ་གཉིས་
ཞེས་པ་མེད་པར་སྔར་བསྟན་ཞེས་གསུངས་པའི་རྒྱུད་ཀྱི་རྒྱ་དཔེ་ལ་ཡང་མི་འདྲ་བ་གཉིས་ཡོད་པར་མངོན་ལ། འོན་ཀྱང་ཞུ་བ་པོ་རྡོ་རྗེ་སྙིང་པོའི་འགྲེལ་པ་དང་། རཏྣ་ཨ་ཀ་ར་ཤནྟིའི་དཀའ་འགྲེལ་མུ་ཏིག་ཕྲེང་བ། མི་ཐུབ་ཟླ་བའི་འགྲེལ་པ་ཀུ་མུ་ཊ་རྣམས་སུ་རྒྱུད་རྒྱས་པའི་བརྟག་པ་བཅུ་གཉིས་པར་རྒྱས་པར་གསུངས་པའི་དོན་འདིར་བསྡུས་པ་ལ་བཤད་དོ། །དེས་ན་རྔོག་ལུགས་པ་ཁ་ཅིག །རྡོ་རྗེ་སྙིང་འགྲེལ་ལས། འབུམ་ཕྲག་ལྔ་ཡི་རྒྱུད་ཆེན་ལས། །ཉུང་ངུའི་རྒྱུད་འདི་ལེགས་བྱུང་བ། །ཞེས་རྒྱུད་རྒྱས་པའི་ནང་ནས་ཁོལ་དུ་བྱུང་བར་གསུངས་པ་དང་། དེར་མ་ཟད་གུར་ལས། རྡོ་རྗེ་སྙིང་པོ་མངོན་བྱང་ཆུབ། །བརྟག་པའི་རྒྱལ་པོ་དང་པོ་སྟེ། །སྒྱུ་འཕྲུལ་བརྟག་པ་གཉིས་པ་འོ། །ཞེས་གསུངས་ཤིང་། འདིའི་བརྟག་པ་དང་པོའི་མཇུག་ཏུ། རྡོ་རྗེ་སྙིང་པོ་མངོན་པར་བྱང་ཆུབ་པ་ཞེས་བྱ་བའི་བརྟག་པ་དང་པོ་རྫོགས་སོ། །ཞེས་དང་། གཉིས་པའི་མཇུག་ཏུ། སྒྱུ་མ་བརྟག་པ་གཉིས་པ་རྫོགས་སོ། །ཞེས་གསུངས་པ་རྣམས་མིང་མཐུན་ཞིང་། འདིའི་མགོར་འདི་སྐད་བདག་ཐོས་སོགས་འབྱུང་བས་བརྟག་གཉིས་འདི་འབུམ་ལྔའི་རྒྱུད་ལས་ཟུར་དུ་བཏོན་པ་ཡིན་ཟེར་བ་ཡང་། གོང་དུ་བརྟག་པ་བཅུ་གཉིས་པར་རྒྱས་པར་གསུངས་ཞེས་པ་འདིས་ཁེགས་པར་མཁས་གྲུབ་རྗེས་བརྟག་གཉིས་རྣམ་བཤད་དུ་གསུངས་སོ། །འདིའི་འགལ་སྤོང་དུ་རྔོག་ལུགས་ཀྱི་གསུང་རྒྱུན་འགའ་ཞིག་ཏུ། མཁའ་འགྲོ་མ་ཀུ་ཀུ་ཀུལླེའི་རྒྱུད་བརྟག་པ་བཅུ་གཉིས་པ་བྱ་བ་ཞིག་ཨུ་རྒྱན་ན་བཞུགས་པ་དེ་ཡིན་ཞེས་ཟེར་ཡང་ཁུངས་མེད་པས་འདོད་པ་ཙམ་དུ་ཟད་ལ། ཊཱིཀྐ་ནོར་བུའི་སྒྲོན་མེ་སོགས་བོད་
འགྲེལ་འགའ་ཞིག་ཏུ་རྒྱས་པར་བརྟག་པ་བཅུ་གཉིས་ལས། གོང་དུ་གསུངས་པ་མདོ་རུ་བསྡུ་ཞེས་གོང་འོག་བསྡེབས་ནས། སྤྱིར་བརྟག་པ་བཅུ་གཉིས་པ་ཡན་ཆད་དུ་ཐོར་བུ་ཐོར་བུར་གསུངས་ལ། གོང་དུ་ལེའུ་གཉིས་པར་འདིའི་སྔགས་གསུངས་པ་དེ་ཉིད་ཀྱི་སྒྲུབ་ཐབས་སྐབས་འདིར་བསྟན་ཞེས་འཆད་པ་ཡང་རྟོག་བཟོ་འབའ་ཞིག་ཏུ་སྣང་ངོ༌། །དེས་ན་རང་གི་ལུགས་ནི་འབུམ་ལྔའི་བརྟག་པ་བཅུ་གཉིས་པ་དངོས་གྲུབ་བརྟག་པ་ལས་འདིའི་ལས་ཚོགས་རབ་འབྱམས་རྒྱས་པར་གསུངས་པའི་ནང་ནས་འདིར་དབང་གི་ལས་སྒྲུབ་ཙམ་ཞིག་མདོར་བསྡུས་ཏེ་སྟོན་ཞེས་པ་ཡིན་ལ། གུར་ལས། དགུ་པ་མཁའ་འགྲོ་ཀུ་རུ་ཀུལླེ་ཞེས་གསུངས་པ་ལ་དཔགས་ན་ལེའུ་དེར་ཡང་འདིའི་སྐོར་མང་དུ་བསྟན་ཡོད་པར་མངོན་ནོ། །རྒྱུད་ཀྱི་ཚིག་ལྷག་མ་འགའ་ཞིག་ལ་ཡང་དོགས་པ་གཅོད་དགོས་པ་རྣམས་འོག་ཏུ་སྟོན་ཞིང༌། དེ་ལྟར་རྩོད་མེད་ཀྱི་རྒྱུད་སྡེ་རྣམས་ལས་ལན་གཅིག་མ་ཡིན་པར་གསུངས་པའི་ལྷ་མཆོག་ཁྱད་པར་ཅན་འདི་ཉིད་ལ་སྐུ་གསུང་ཐུགས་ཀྱི་ཡོན་ཏན་བླ་ན་མེད་པ་ལས་བརྩམས་པའི་བསྟོད་པ་མཛད་པར་མཚན་འདོགས་ཚུལ་ཡང་སྲིད་གསུམ་འགུགས་པའི་ལྕགས་ཀྱུ་ཞེས་གསུངས། སྤྱིར་གཞུང་གི་མིང་འདོགས་ལ་བརྗོད་བྱ་དང༌། གཞུང་ཚད་དང༌། ཞུ་བ་པོ་དང༌། གནས་དང༌། བྱེད་ལས་ཀྱི་སྒོ་ནས་བཏགས་པ་སྣ་ཚོགས་ཡོད་ཀྱང་འདིར་དགོས་པའི་ཆ་ནས་ཡིན་ཏེ། བརྗོད་བྱ་བཅོམ་ལྡན་འདས་མའི་གསང་བ་གསུམ་གྱི་ཡོན་ཏན་དང༌། དེ་ལ་བསྔགས་པས་འཕགས་མ་མཉེས་ཏེ་སྐྱེ་འགྲོ་དབང་དུ་བྱེད་པའི་དངོས་གྲུབ་འགྲུབ་པ་དགོས་པ་ཡིན་ལ།
མཐར་རང་གཞན་ཐམས་ཅད་ལྷན་སྐྱེས་ཀྱི་ཡེ་ཤེས་མངོན་དུ་བྱས་ཏེ་མི་སློབ་པའི་ཟུང་འཇུག་ཐོབ་པ་ཉིང་དགོས་ཡིན་ཞིང༌། དེ་དག་སྔ་ཕྱིའི་རིམ་པར་འབྱུང་བ་འབྲེལ་བ་ཡིན་པས་མཚན་གྱི་སྟེང་ནས་དགོས་སོགས་ཆོས་བཞི་ཡང་གོ་བར་ནུས་སོ། །གཉིས་པ་མཆོད་བརྗོད་ནི། བཅོམ་ལྡན་འདས་མ་དཔལ་ཀུ་རུ་ཀུལླེ་ལ་ཕྱག་འཚལ་ལོ། །ཞེས་བྱུང༌། དེ་ཡང་བཅོམ་ལྡན་འདས་མའི་དོན་ནི། བརྟག་པ་དང་པོའི་ལེའུ་ལྔ་པ་ལས། སངས་རྒྱས་འདི་ལ་བྷ་ག་མངའ། །བཅོམ་ལྡན་འདས་ཞེས་བརྗོད་པར་བྱ། །བྷ་ག་རྣམ་པ་དྲུག་ཏུ་བརྗོད། །དབང་ཕྱུག་ལ་སོགས་ཡོན་ཏན་ཀུན། །ཡང་ན་ཉོན་མོངས་ལ་སོགས་བདུད། །འཇོམས་ཕྱིར་བཅོམ་ལྡན་འདས་ཞེས་བྱ། །གང་ཕྱིར་སྐྱེ་འགྲོ་སྐྱེད་པ་ཡི། །ཤེས་རབ་མ་ཞེས་བརྗོད་པར་བྱ། །ཞེས་གསུངས་ཏེ། བཅོམ་ལྡན་འདས་ཀྱི་སྐད་དོད་བྷ་ག་སྐལ་བ་དང་ཝན་ལྡན་པ་ལ་འཇུག་ཅིང༌། སྐལ་བ་ཡང་སམྦྷུ་ཊ་ལས། དབང་ཕྱུག་དང་ནི་གཟུགས་བཟང་དང༌། །དཔལ་དང་གྲགས་དང་ཡེ་ཤེས་དང༌། །བརྩོན་འགྲུས་ཕུན་སུམ་ཚོགས་པ་སྟེ། །དྲུག་པོ་རྣམས་ལ་སྐལ་ཞེས་བྱ། །ཞེས་སྒྲིབ་པ་མཐའ་དག་སྤངས་ཏེ་གཞན་ལ་རག་མ་ལས་པའི་དབང་ཕྱུག །མཚན་དཔེས་བརྒྱན་པའི་གཟུགས། ཕུན་ཚོགས་ཀུན་གྱིས་བརྟེན་པའི་དཔལ། ཡོན་ཏན་གྱི་མཐུས་ཀུན་ཏུ་ཁྱབ་པའི་གྲགས་པ། ཆགས་ཐོགས་མེད་པའི་ཡེ་ཤེས། གདུལ་བྱའི་དོན་ལས་མི་གཡེལ་བའི་བརྩོན་འགྲུས་ཕུན་སུམ་ཚོགས་པ་དྲུག་དང་ལྡན་པ་ལ་བཤད་ཚུལ་གཅིག་དང༌། ཡང་ངེས་ཚིག་གིས་བཤད་ཚུལ་གཅིག་ལ། བདུད་བཞི་
སྒྲིབ་པ་གཉིས། ཉོན་མོངས་གསུམ་སོགས་བཅོམ་པས་བཅོམ་ལྡན་འདས་ཞེས་བཤད་པ་གཉིས་ཀ་བྷ་ག་ཝན་ཞེས་པའི་དོན་གྱི་རྣམ་གྲངས་ཡིན་ལ། བོད་སྐད་སོར་བཞག་གི་ཚེ་བཞི་བཅོམ་དྲུག་ལྡན་ཞེས་ཕྲལ་ནས་བཤད་པ་ལ་འགལ་བ་མེད་དོ། །འདས་ཞེས་པ་འཇིག་རྟེན་པའི་ལྷ་ཆེན་པོ་དག་ལས་ཁྱད་པར་དུ་བྱ་བའི་ཕྱིར་ལོ་ཙཱ་བས་བླ་ཐབས་སུ་བསྣན་པར་གསུངས་ལ་ཏཱ་ར་ན་ཐའི་ཚེ་མདོའི་ཊཱིཀྐར་བྷ་ག་ཞེས་པའི་ག་ལ་ཡི་གེ་བསྣན་ཏེ་ག་ཏི་སོང་བ་ལ་འཇུག་པས་འཇིག་རྟེན་པའི་ས་ལས་རིང་དུ་སོང་པའམ་འདས་པར་སྟོན་ཅིང༌། དེས་ན་དེའི་སྐད་དོད་རྒྱ་སྐད་ལ་གཏན་མེད་པ་མིན་གསུངས་སོ། །མའི་དོན་ནི་བདེ་ཆེན་གྱི་ཤེས་རབ་དེ་ཉིད་གང་དང་རོ་གཅིག་ཏུ་གྱུར་པའི་སྟོང་པ་ཉིད་དེ་སྐྱེ་འགྲོ་སྣོད་བཅུད་ཀུན་གྱི་རང་བཞིན་དུ་སོང་བས་དེ་ལ་བརྟེན་ནས་ཆོས་ཅན་མཐའ་དག་འཇོག་ཅིང༌། དེའི་ཕྱིར་དེ་ཉིད་དང་དབྱེར་མེད་པའི་བདེ་ཆེན་གྱི་ཤེས་རབ་ལ་ཡང་མ་ཞེས་བཤད་དེ། ཕར་ཕྱིན་ཐེག་པའི་སྐབས་སུ་ཡང་ཡུལ་དང་ཡུལ་ཅན་གྱི་དོན་དམ་གཉིས་ལ་རྒྱལ་བའི་ཡུམ་གྱི་མིང་གིས་བཏགས་པ་བཞིན་ནོ། །དེས་ན་སྐབས་འདིར་ཡང་དཀྱིལ་འཁོར་པའི་ལྷ་ཐམས་ཅད་ཡེ་ཤེས་དེའི་རྣམ་འཕྲུལ་ཡིན་ཀྱང༌། ནང་གསེས་ཀྱིས་ཡབ་རྣམས་ཐབས་དང་ཡུམ་ཤེས་རབ་ཀྱི་ལྡོག་ཆ་ནས་བཤད་པས་འདིར་ཡང་དེའི་དབང་དུ་བྱས་སོ། །དཔལ་གྱི་དོན་ནི་བརྟག་གཉིས་དང་ཀུན་སྤྱོད་གཉིས་ཀ་ལས། ཤྲཱི་ནི་གཉིས་མེད་ཡེ་ཤེས་ཏེ། །ཞེས་ཡུལ་བདག་མེད་གཉིས་དང༌། ཡུལ་ཅན་ཡེ་ཤེས་ཏེ་ཡི་གེ་གསུམ་གྱི་དོན་དབྱེར་མི་ཕྱེད་པ་ལ་བྱེད་པས། རྒྱུད་གཞན་ལས་ཤཱུ་ནྱ་ཏའི་སྔགས་དོན་སྐབས་ཀྱི་བཛྲ་
དང་དོན་གཅིག་སྟེ། འདོད་འཇོ་ལས། ཤྲཱིའི་དོན་ནི་བཛྲ་སྟེ་རྡོ་རྗེ་ལྟར་མི་ཕྱེད་པའི་དོན་ཡིན་པས། ཞེས་གསུངས་པའི་ཕྱིར། གཞན་ཡང་མཁའ་འགྲོ་རྒྱ་མཚོ་ལས། ཨེ་ཝཾ་ལ་སོགས་གཉིས་མེད་པའང༌། །ཤྲཱི་ཞེས་བྱ་བའི་ཡིག་དེས་བརྗོད། །ཅེས་པ་ལམ་དང་འབྲས་བུའི་ཨེ་བཾ་ཐབས་ཤེས་དབྱེར་མེད་པ་ལ་སྦྱོར་ཚུལ་དང་བརྟག་གཉིས་རྣམ་བཤད་མཁའ་འགྲོའི་གསང་མཛོད་ལས། ཡི་གེ་གསུམ་པོ་དེའི་དོན་རྣམ་པར་ཐར་པའི་སྒོ་གསུམ་ཡིན་ལ། ཤྲཱིའི་དོན་ནི་ཡུལ་ཡི་གེ་གསུམ་གྱི་དོན་སྟོང་པ་ཉིད་དང༌། ཡུལ་ཅན་ཉིན་མོ་བཅོམ་ལྡན་རྡོ་རྗེ་ཅན། །ཞེས་སོགས་ཀྱིས་བསྟན་པའི་ཕྱག་རྒྱའི་ཐབས་དེས་དྲངས་པའི་བདེ་ཆེན་ལྷན་སྐྱེས་ཀྱི་དགའ་བ་གཉིས་དབྱེར་མེད་པར་སྦྱོར་བའི་ཡེ་ཤེས་དེ། ཞེས་ཡི་གེ་གསུམ་གའི་དོན་ཡུལ་སྟོང་ཉིད་ལ་སྦྱར་བ་སོགས་ཟུར་ཅུང་ཟད་མི་འདྲ་བའི་བཤད་ཚུལ་མང་ཡང་གནད་ཀྱི་དོན་བདེ་སྟོང་དབྱེར་མེད་ལ་འབབ་པར་འདྲའོ། །དེ་ལྟར་ན་སྤང་བྱ་མ་ལུས་སྤངས་ཤིང༌། ཡོན་ཏན་ཐམས་ཅད་དང་ལྡན་ལ། ཁྱད་པར་དུ་བདེ་སྟོང་དབྱེར་མེད་པའི་ཡེ་ཤེས་ཀྱི་ནུས་པ་ཡོངས་སུ་རྫོགས་ཏེ། གདུལ་བྱ་རྣམས་ལམ་དེ་ལ་སྦྱོར་བར་མཛད་པས་ན་བཅོམ་ལྡན་འདས་མ་དཔལ་ཀུ་རུ་ཀུལླེ་ཞེས་ཡོན་ཏན་བརྗོད་དེ། དེ་ལ་མི་ཕྱེད་པའི་དད་པ་ཤུགས་དྲག་ཏུ་བསྐྱེད་པ་ཡིད་ཀྱི་ཕྱག་དང༌། དེའི་ཡོན་ཏན་ལས་བརྩམས་ཏེ་བསྔགས་པ་བརྗོད་པ་ངག་གི་ཕྱག །ཐལ་སྦྱར་མེ་ཏོག་ཁ་འབུས་པ་ལྟ་བུ་སྤྱི་བོར་བཀོད་དེ་ཡན་ལག་ལྔ་ས་ལ་གཏུགས་པའི་ཕྱག་བྱ་བ་ལུས་ཀྱི་ཕྱག་དང༌། རྒྱས་པར་བཟང་པོ་སྤྱོད་པ་ལས་གསུངས་པ་ལྟར་ལུས་དང་དབྱངས་ཀྱི་
ཡན་ལག་བྱེ་བ་བརྒྱ་སྟོང་སོགས་སུ་སྤྲུལ་བའི་ཕྱག་དང༌། གསང་སྔགས་ཀྱི་ཐུན་མོང་མ་ཡིན་པ་ནི། ཀུན་མཁྱེན་འཇམ་དབྱངས་བཞད་པའི་གསང་འདུས་བསྐྱེད་རིམ་ལས། ཕྱག་འཚལ་བ་ལ་གཡས་ཀྱི་སོར་མོ་ལྔས་རྩ་བའི་རླུང་དང༌། གཡོན་གྱི་སོར་མོ་ལྔས་ཡན་ལག་གི་རླུང་དང༌། དེ་བཅུ་སྙིང་གར་ཐལ་མོ་སྦྱར་བས་རླུང་བཅུ་སྙིང་གའི་རྩ་འཁོར་གྱི་དབུས་སུ་འདུས་པ་མཚོན་པ་དང༌། ཡང་གཡས་ཀྱི་སོར་མོ་ལྔས་དབང་པོ་ལྔ་དང༌། གཡོན་གྱི་སོར་མོ་ལྔས་ཡུལ་ལྔ་དང༌། རྡོ་རྗེ་ཐལ་མོས་ཡུལ་དབང་རྣམས་འོད་གསལ་དུ་འདུས་པ་མཚོན་པ་དང༌། ཡང་གཡས་ཀྱི་སོར་མོས་སྒྱུ་ལུས་དང༌། གཡོན་གྱི་སོར་མོས་འོད་གསལ་དང༌། རྡོ་རྗེ་ཐལ་མོས་སྒྱུ་ལུས་འོད་གསལ་དངོས་པོ་གཅིག་པའི་ཟུང་འཇུག་གི་དོན་དྲན་པར་བྱས་ནས་ཐལ་མོ་སྦྱར་ལ་ཞེས་དགོངས་པ་ལུང་སྟོན་གྱི་དོན་རྣམ་བཞག་རིམ་པར་བཀྲལ་བའི་གནད་བསྡུས་ཏེ་གསུངས་པ་ལྟ་བུ་ཡིན་པས། རྒྱུད་དོན་གདམས་པར་ཤར་བ་རྣམས་ལ་ཕྱག་འཚལ་ཞེས་པའི་ཚིག་ཙམ་ལ་ཡང་གོ་རྒྱུ་རྒྱ་ཆེ་ཞིང་དེའི་ཁུངས་སུ་རྒྱུད་དོན་མ་ལུས་པ་ཉམས་སུ་བླང་དུ་ཡོད་པས་ཤིན་ཏུ་དོན་ཆེན་པོ་དང་ལྡན་པ་ཤེས་པར་བྱའོ། །གནད་མ་གོ་བ་དག་ཐལ་མོའི་ངེས་དོན་དེ་ལྟར་བྱས་ན་རང་གིས་ལམ་བསྒོམ་པར་འགྲོ་ཡང༌། སྐྱབས་ཡུལ་རྣམས་ལ་ཕྱག་འཚལ་བར་ཅིའི་ཕྱིར་འགྲོ་སྙམ་ན་ཐེག་ཆེན་གྱི་ཐུན་མོང་མ་ཡིན་པའི་སྐྱབས་སུ་འགྲོ་ཚུལ་ནི། ཕར་ཕྱིན་བསྡུས་པ་ལས། བདེ་གཤེགས་ཡོན་ཏན་ཐོབ་མོས་ན། །དེ་བཞིན་གཤེགས་པ་ཐམས་ཅད་ལ། །མདོར་བསྡུས་སྐྱབས་སུ་སོང་བ་ཡིན། །ཞེས་དང༌། མདོ་སྡེ་རྒྱན་ལས། འདི་ནི་དེ་དངོས་འདོད་པ་ལས་
ཡིན་དེ་ཡང་སྙིང་བརྩེ་ལས་རིག་བྱ། །ཞེས་འབངས་ཀྱིས་རྒྱལ་པོར་ཞུ་བ་ལྟ་བུ་མ་ཡིན་པར་སྐྱབས་ཡུལ་དེའི་གོ་འཕང་རང་གིས་མངོན་དུ་བྱེད་པར་འདོད་ནས་དེའི་ལམ་སྒོམ་པ་འབྲས་སྐྱབས་ཀྱི་དབང་དུ་བྱས་པའི་སྐྱབས་འགྲོ་གཙོ་བོ་ཡིན་པས། རྒྱུད་བླ་མར། ཐེག་པ་གསུམ་དང་བྱེད་གསུམ་ལ། །ཞེས་སོགས་ཀྱིས་སངས་རྒྱས་ལ་སྐྱབས་སུ་འགྲོ་བ་ཐེག་ཆེན་དང་སྦྱར་བ་ཡིན་ནོ། །གསང་སྔགས་ཀྱི་སྐབས་སུ། དེ་ལས་ཀྱང་ལྷག་པ་སྐྱབས་ཡུལ་དེའི་ངོ་བོར་ང་རྒྱལ་བཞག་སྟེ་འབྲས་བུ་ལམ་བྱེད་ཀྱི་ཚུལ་དུ་སྒོམ་དགོས་པས། ཐལ་མོའི་ངེས་དོན་དེ་ལྟར་བྱེད་པ་ནི་ལུགས་འདིའི་ཐུན་མོང་མ་ཡིན་པའི་ཕྱག་འཚལ་ཞིང་སྐྱབས་སུ་འགྲོ་ཚུལ་རྨད་དུ་བྱུང་བ་ཡིན་ནོ། །སྔོན་མཐའ་མི་མངོན་སྲིད་པ་མཚན་མོའི་སྨག །གཅོད་པའི་བྱིན་རླབས་འོད་རྣོན་གདེངས་ཀ་ཅན། །བསྟོད་ཚིག་ཉིན་མོར་བྱེད་པའི་ཁ་ལོ་པ། །བཤད་ཐབས་སྐྱ་རེངས་སྣང་བ་དང་པོར་ཤར། །ཞེས་པ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་གཞུང་དོན་ལ། ཇི་ལྟར་བསྟོད་པའི་ཚུལ། བསྟོད་པའི་ཚིག་དོན་དངོས་བཤད་པ། དེ་ལྟར་བསྟོད་པའི་དགེ་བ་བསྔོ་བ་འདོད་གསོལ་དང་བཅས་པ་གསུམ། དང་པོ་ནི། སྤྱིར་སངས་རྒྱས་ཀྱི་ཡོན་ཏན་ཚད་མེད་པས་ཆ་ཤས་གང་ལས་བརྩམས་ཏེ་བསྟོད་པ་བྱས་ཀྱང་ཕན་ཡོན་རླབས་པོ་ཆེ་འབྱུང་མོད། འོན་ཀྱང་བདག་ཉིད་ཆེན་པོ་རྣམས་ཀྱིས་རྒྱུ་དང་འབྲས་བུའི་ཡོན་ཏན་གྱི་རྩ་བ་མཐར་ཐུག་པ་དེ་ཉིད་ཀྱི་སྟེང་ནས་བསྔགས་པ་བརྗོད་པ་གཙོ་བོར་མཛད་དེ། དཔེར་ན་རིགས་ཚོགས་ལས། གང་གིས་སྐྱེ་དང་འཇིག་པ་དག །ཚུལ་འདི་ཡིས་ནི་སྤངས་གྱུར་པ། །རྟེན་
ཅིང་འབྲེལ་བར་བྱུང་གསུངས་པའི། །ཐུབ་དབང་དེ་ལ་བདག་ཕྱག་འཚལ། །ཞེས་དང༌། རྗེ་བླ་མས། གང་ཞིག་གཟིགས་ཤིང་གསུངས་པ་ཡི། །མཁྱེན་དང་སྟོན་པ་བླ་ན་མེད། །ཅེས་དོན་གང་ཞིག་གཟིགས་པ་མཐར་ཕྱིན་པའི་སྟོབས་ཀྱིས་ཤེས་བྱ་མཐའ་དག་ལ་ཡེ་ཤེས་ཀྱི་སྣང་བ་རྒྱས་ཤིང༌། རྨོངས་པའི་མུན་པ་རྩད་ནས་ཕྱུང་བའི་རང་དོན་སྤངས་རྟོགས་ཕུན་ཚོགས་དང༌། གཟུགས་སྐུ་གཉིས་སུ་བསྟན་ནས་དོན་དེ་གདུལ་བྱ་རྣམས་ལ་སྟོན་པའི་གཞན་དོན་འཕྲིན་ལས་ཕུན་ཚོགས་ཏེ་དོན་གཉིས་ལྷུན་གྱིས་གྲུབ་པའི་རྩ་བ་ནི་སྟོང་པ་དང་རྟེན་འབྱུང་འགལ་མེད་ཟུང་འཇུག་ཏུ་ཤར་བ་འདི་ཡིན་པས་དེ་ཉིད་གཟིགས་ཤིང་འདོམས་པའི་སྒོ་ནས་བསྟོད་ན་བསྟོད་པའི་མཆོག་ཏུ་འགྲོ་ལ། དེ་ལས་གཞན་དུ་བསྟོད་ཀྱང་བསྟོད་ཚུལ་མཐར་ཐུག་ཏུ་མི་འགྲོ་བས། ཚུལ་འདིས་ཁྱོད་ལ་བསྟོད་ན་ནི། །བསྟོད་པར་འགྱུར་གྱི་གཞན་དུ་མིན། །ཞེས་གསུངས་སོ། །དེ་ནི་ཕར་ཕྱིན་ཐེག་པའི་དབང་དུ་བྱས་པ་ཡིན་ལ། གསང་སྔགས་ཀྱི་སྐབས་སུ་སྔགས་རང་ལམ་དང་སྦྱར་ནས་བསྟོད་ཚུལ་དེ་ལས་ཀྱང་ཁྱད་པར་དུ་འཕགས་པ་ཞིག་དགོས་སོ། །དེའི་ཚུལ་ཇི་ལྟར་ཡིན་ཞེ་ན། ལུགས་འདི་ལ་ཡང་ཡུལ་བདག་མེད་ཕར་ཕྱིན་ཐེག་པ་ནས་བཤད་པ་དེ་ལས་ཕྲ་བ་ཞིག་མི་བཞེད་པས་ཆོས་སྐུ་གྲུབ་པ་ལ་ཟབ་མོའི་ལྟ་བ་དེ་ཉིད་ལམ་གྱི་སྲོག་ཏུ་འདོད་དགོས་ཀྱང་ཡུལ་ཅན་བདེ་བ་ཆེན་པོའི་ཡེ་ཤེས་ཀྱི་ཆ་ནས་ཁྱད་ཞུགས་པ་དང༌། གཟུགས་སྐུའི་རིགས་འདྲའི་རྒྱུ་ལྷའི་རྣལ་འབྱོར་མདོ་ཕྱོགས་སུ་གཏན་མེད་པས་སྔགས་ལ་མ་བརྟེན་ན་མདོ་ཙམ་གྱིས་སྐུ་གཉིས་གང་ཡང་འགྲུབ་མི་ནུས་སོ། །དེས་ན་དུས་གསུམ་
གྱི་སངས་རྒྱས་ཐམས་ཅད་ཀྱི་གསང་བ་གསུམ་གྱི་ཡོན་ཏན་མ་ལུས་པ་གསང་སྔགས་ཀྱི་ལམ་བཟང་འདི་ཉིད་ཉམས་སུ་བཞེས་པའི་ལག་རྗེས་ཤ་སྟག་ཡིན་ཏེ། རྣམ་སྣང་མངོན་བྱང་ལས། སྐུ་གསུང་ཐུགས་ཀྱི་རྡོ་རྗེ་ཅན། །དུས་གསུམ་འབྱུང་བའི་སངས་རྒྱས་རྣམས། །རྡོ་རྗེ་སྔགས་ཀྱི་མཐུ་ཡིས་ནི། །ཡེ་ཤེས་མཉམ་མེད་ཡང་དག་བརྙེས། །གང་གི་ཤཱཀྱ་སེང་གེ་སོགས། །མཆོག་རྣམས་ཀྱིས་ནི་བདུད་ཀྱི་སྡེ། །མི་བཟད་ཆེན་པོ་སྟོབས་ཆེན་བཅོམ། །ཞེས་དང་། ཇི་ལྟར་འདས་པའི་སངས་རྒྱས་ཀྱིས། །བྱང་ཆུབ་སྲས་རྣམས་དབང་བསྐུར་བ། །ཞེས་དང་། རྒྱུད་རྡོར་ཕྲེང་ལས། འདས་པའི་རྡོ་རྗེ་འཆང་སོགས་ཀྱིས། །ཇི་ལྟར་སངས་རྒྱས་སྲས་དབང་བསྐུར། །ཞེས་གསུངས་པ་བཞིན་གསང་སྔགས་ལ་མ་བརྟེན་པར་སངས་རྒྱས་པ་གཅིག་ཀྱང་མི་སྲིད་པས་ད་ལྟར་བཞུགས་པའི་དཀྱིལ་འཁོར་གྱི་ལྷ་ཚོགས་འདི་ཐམས་ཅད་ཀྱང་རང་རང་གི་སྔོན་དུ་བྱོན་པའི་འདས་པའི་སངས་རྒྱས་རྣམས་ཀྱིས་དབང་བསྐུར་ཏེ་ལམ་ཉམས་སུ་བླངས་པ་ལ་བརྟེན་ནས་ཟུང་འཇུག་གི་གོ་འཕང་ཐོབ་པ་ཤ་སྟག་ཡིན་གྱི། སྔགས་ལ་མ་བརྟེན་པར་སངས་རྒྱས་པ་ཡོད་ན། དེའི་ཐུགས་རྒྱུད་ལ་བདེ་སྟོང་དབྱེར་མེད་ཀྱི་ཡེ་ཤེས་མེད་པས་སངས་རྒྱས་གཞན་ལས་དམན་པར་འགྱུར་བའམ། ཡང་ན་རིགས་མཐུན་གྱི་རྒྱུ་སྔོན་དུ་མ་སོང་བར་བྱུང་བའི་ཡེ་ཤེས་དེ་རྟག་པ་རང་བྱུང་གི་དབང་ཕྱུག་གི་ཡོན་ཏན་ལྟ་བུར་འགྱུར་ཞིང༌། ནང་པའི་ལུགས་ཀྱི་སངས་རྒྱས་པའི་ཡོན་ཏན་ཐམས་ཅད་ནི་རྒྱུ་མེད་དང་མི་མཐུན་པའི་རྒྱུ་ལས་མི་འབྱུང་བར་རིགས་མཐུན་གྱི་ལམ་སྦྱངས་
སྟོབས་ཁོ་ན་ལས་སྐྱེ་དགོས་པས་ན། ཚད་མ་རྣམ་འགྲེལ་ལས། མ་སྐྱེས་པ་ནི་བཟློག་དོན་དུ། །གྱུར་པ་ཉིད་གསུངས་དེ་ཡི་ཕྱིར། །ཞེས་འདོམས་པར་མཛད་དོ། །དེ་ལྟར་སྔགས་ལ་མ་བརྟེན་པར་སངས་རྒྱ་བ་མི་སྲིད་པར་བཤད་པ་ན། ཁ་ཅིག་མདོ་ལུགས་ཀྱི་ལམ་དེ་སངས་རྒྱས་ཀྱི་སར་བགྲོད་པའི་ལམ་གཏན་ནས་མ་ཡིན་པར་གོ་སྟེ་ཆོས་སྤོང་གི་ལས་ཚན་པོ་ཆེ་གསོག་ཅིང་། གཞན་དག་ནི་མདོ་ཕྱོགས་སུ་རང་ལམ་རྐྱང་པས་འཚང་རྒྱ་ཚུལ་བཤད་པ་དེ་སྒྲ་ཇི་བཞིན་པར་བཟུང་ནས་སྔགས་ལ་ཐུན་མོང་མ་ཡིན་པའི་མོས་པ་མི་སྐྱེའོ། །དེས་ན་མདོ་སྔགས་གཉིས་ཀ་སངས་རྒྱས་ཀྱི་སར་བགྲོད་པའི་ལམ་དུ་འདྲ་ཡང་། མདོ་ལ་སྔགས་ལྟ་བུའི་མྱུར་ཁྱད་མེད་པ་དང་། མདོ་ལུགས་ཀྱི་སློབ་པའི་ལམ་ཐམས་ཅད་བགྲོད་པའི་མཐར་ཡང་སྔགས་ཀྱིས་སྣོན་པ་འདེབས་དགོས་པའི་ཚུལ་འདི་གོ་ན་སྔ་མའི་ལོག་རྟོག་གཉིས་ཀ་ཁེགས་པར་འགྱུར་རོ། །འོ་ན་མདོ་ལུགས་ཀྱི་ས་བཅུའི་མཐར་ཐུག་པར་བགྲོད་ནས་སྔགས་ལ་འཇུག་ཚུལ་ཇི་ལྟར་ཡིན་ཞེ་ན། བྱ་སྤྱོད་གཉིས་སུ་དེ་འདྲ་བའི་བཤད་སྲོལ་མ་བྱུང་ཞིང་། རྒྱུད་རྡོ་རྗེ་རྩེ་མོ་ལས། དེའི་ཚེ་རྡོ་རྗེ་སེམས་དཔའ་དང་། རྡོ་རྗེ་ཆོས་སོགས་ཀྱིས་དབང་བསྐུར་ཏེ་མངོན་བྱང་ལྔས་སངས་རྒྱ་ཚུལ་ཞིག་གསུངས་ལ། དེའི་དགོངས་པ་ཤཱཀྱ་བཤེས་གཉེན་དང་། ཀུན་དགའ་སྙིང་པོས་འགྲེལ་ཚུལ་གཉིས་བྱུང་བ་དང་། བླ་མེད་ཀྱི་ལུགས་སུ་བྱས་ཏེ་ཨ་ལཾ་ཀ་ཀ་ལ་ཤ་སོགས་ཀྱིས་དེའི་ཚེ་དབང་བཞི་ག་བསྐུར་ཏེ་བསྐྱེད་རིམ་ནས་བགྲོད་དགོས་པར་བཤད་པ་རྣམས་སྒྲ་ཇི་བཞིན་དུ་ཁས་བླངས་མི་རུང་ངོ་། །རང་ལུགས་འཐད་ལྡན་གང་གི་རྗེས་སུ་འབྲང་སྙམ་ན། བདེ་དགྱེས་དུས་འཁོར་སོགས་རྒྱུད་གཞན་ལས་རྒྱས་པར་མ་
གསུངས་ཀྱང་། འདུས་པ་ལུགས་གཉིས་སུ་གསལ་བར་མཛད་དེ། སྤྱོད་བསྡུས་ལས། རིམ་པ་འདི་ཉིད་ཀྱིས་བཅོམ་ལྡན་འདས་དཔལ་ཤཱཀྱ་ཐུབ་པ་ལ་དེ་བཞིན་གཤེགས་པ་ཐམས་ཅད་ཀྱིས་སེ་གོལ་གྱི་སྒྲས་བསྐུལ་བར་གྱུར་པས་མི་གཡོ་བའི་ཏིང་ངེ་འཛིན་ལས་བཞེངས་ཏེ། བྱང་ཆུབ་ཀྱི་ཤིང་དྲུང་དུ་བཞུགས་ནས་ནམ་ཕྱེད་ཀྱི་དུས་སུ་འོད་གསལ་མངོན་དུ་མཛད་དེ་སྒྱུ་མ་ལྟ་བུའི་ཏིང་ངེ་འཛིན་གྱིས་བཞེངས་ནས་གདུལ་བྱའི་སྐྱེ་བོ་རྣམས་ལ་ཆོས་ཀྱི་འཁོར་ལོ་རབ་ཏུ་བསྐོར་བ་ཡིན་ནོ། །ཞེས་གསུངས་སོ། །ཡེ་ཤེས་ཞབས་ལུགས་ཀྱང་འཇམ་དཔལ་ཞལ་ལུང་ཆེ་བ་ལས་གསུངས་པ་འདི་དང་ཤིན་ཏུ་མཐུན་ཞིང་། དེ་དག་གི་དོན་བསྡུས་ཏེ་སྟོན་པ་ཐུབ་པའི་དབང་པོ་འདི་ཉིད་ལ་མཚོན་ན། དང་པོར་གྲངས་མེད་གསུམ་དུ་ཚོགས་བསགས་ཏེ་ས་བཅུ་བགྲོད་ཅིང་སྲིད་པ་ཐ་མའི་ཚེ་ལོ་དྲུག་དཀའ་བ་སྤྱད་མཐར་ཆུ་བོ་ནེ་རཉྫ་ནའི་འགྲམ་དུ་མི་གཡོ་བའི་ཏིང་ངེ་འཛིན་ལ་བཞུགས་པའི་ཚེ་སངས་རྒྱས་རྣམས་ཀྱིས་བསླངས་ཏེ། དབང་གསུམ་པ་དང་བཞི་པ་བསྐུར་བས་ནམ་ཕྱེད་ན་དོན་གྱི་འོད་གསལ་མངོན་དུ་མཛད་པའི་མཐར་དག་པའི་སྒྱུ་མའི་སྐུར་བཞེངས་ཤིང་། ཐོ་རངས་མི་སློབ་པའི་ཟུང་འཇུག་མངོན་དུ་བྱས་ནས་ཆོས་འཁོར་བསྐོར་བར་གསུངས་པ་ཡིན་ཏེ། གྲོལ་བའི་ཐིག་ལེ་ལས། ཅི་ཕྱིར་ཤཱཀྱ་ཐུབ་པ་ཡིས། །གྲངས་མེད་བར་དུ་ཚོགས་བསགས་ཀྱང་། །དེ་དོན་མ་རྟོགས་ནེ་རཉྫ་ན། །ཅི་ཡང་མ་ཡིན་ཏིང་འཛིན་གནས། །ཞེས་སོགས་གསུངས་སོ། །དབང་བསྐུར་བའི་ཚུལ་དེ་ནི། བརྟག་གཉིས་ལས། འབར་བའི་ཕྲེང་བས་འཁྲུགས་པ་ཡི། །དཀྱིལ་འཁོར་རབ་ཏུ་བཞེངས་ནས་
ནི། །རྡོ་རྗེ་སྙིང་པོ་དབང་སྦྱིན་ཕྱིར། །ཐིག་ལེ་མཆོག་ནི་བཀུག་པ་ཉིད། །ཅེས་པའི་དགོངས་པ་ཡང་ཡིན་ལ། འདིར་བདག་ཅག་གི་སྟོན་པ་ནི་མཚན་གཞི་སྨོས་པ་ཙམ་ཡིན་པས་ས་བཅུ་པ་ནས་སྔགས་ལ་འཇུག་པ་ཐམས་ཅད་དེ་དང་འདྲའོ། །དེ་ལྟར་ན་རིགས་ངེས་པ་དང་མ་ངེས་པ་ཐམས་ཅད་འབྲས་བུ་ཟུང་འཇུག་སྐུ་བཞིའི་གོ་འཕང་དེར་བགྲོད་པ་ལ་མེད་མི་རུང་དུ་སྔགས་ལ་བརྟེན་དགོས་པས་གསང་སྔགས་ཀྱི་ལམ་འདི་ནི་དུས་གསུམ་གྱི་རྒྱལ་བ་ཐམས་ཅད་ཀྱི་བགྲོད་པ་གཅིག་པའི་ལམ་དུ་ངེས་པ་གཏིང་ཕྱིན་པར་རྙེད་པ་ན་ལྷག་པའི་ལྷ་ལ་བསྟོད་པ་སྨོས་པས་ལམ་རིམ་གཉིས་ཀྱི་བགྲོད་ཚུལ་ལ་ངེས་པ་ཇེ་བརྟན་དུ་འགྲོ་ཞིང༌། ལམ་རིམ་གཉིས་ཀྱི་རྣམ་གཞག་གཏན་ལ་ཕབ་པས་ཀྱང་ལྷག་པའི་ལྷ་ལ་ཡིད་ཆེས་ཀྱི་དད་པ་གོང་དུ་འཕེལ་བ་སོགས་ཕན་ཚུན་གཅིག་གིས་གཅིག་ལ་གོ་བ་སྐྱེད་ཅིང་བོགས་འབྱིན་པ་ཞིག་འབྱུང་སྟེ། དཔེར་ན་བསྟན་བཅོས་མངོན་རྒྱན་གྱི་སྐབས་སུ་མཁྱེན་གསུམ་ལ་དང་བའི་དད་པ་དང༌། ཆུང་འབྲིང་གི་ཐུན་མོང་གི་རགས་པའི་མི་རྟག་སོགས་རྟོགས་པ་ནས་བཟུང་སྟེ་རྣམ་མཁྱེན་གྱི་བར་ལ་མཆོད་བརྗོད་བྱས་པས་དེ་དག་རྗེ་བཙུན་གྱི་ཐུགས་ལ་འཁྲུངས་ཚུལ་དང་གདུལ་བྱའི་རྒྱུད་ལ་སྐྱེ་རིམ་གྱི་རྗེས་འགྲོ་དང་ལྡོག་འགྲོའི་རིམ་པ་གཉིས་ཀ་བསྟན་པའི་ཚུལ་རྣམ་བཤད་སྙིང་པོ་རྒྱན་ལས། དེ་དག་གིས་ནི་ལམ་གྱི་རིམ་པ་རྗེ་བཙུན་གྱི་ཐུགས་རྒྱུད་ལ་འཁྲུངས་པའི་རྗེས་འགྲོ་དངོས་སུ་བསྟན་ནས་ལྡོག་པ་ཤུགས་ལ་འཕེན་པར་བྱེད་པ་ཡིན་ནོ། །ཞེས་དང༌། རྒྱན་གྱི་ཆེད་དུ་བྱ་བའི་གདུལ་བྱ་ཉིད་ལམ་ལ་འཇུག་པའི་རིམ་པ་དང་མཐུན་པར་བསྟོད་པ་ཡིན་ནོ། །ཞེས་གསུངས་ཤིང༌། ཚད་མ་མདོའི་མཆོད་བརྗོད་ལས། ཚད་
མར་གྱུར་པ་འགྲོ་ལ་ཕན་བཞེད་པ། །སྟོན་པ་བདེ་གཤེགས་སྐྱོབ་ལ་ཕྱག་འཚལ། ཞེས་པའི་ཚིག་རྐང་པ་གཉིས་ཀྱི་དོན་དཔལ་ཆོས་ཀྱི་གྲགས་པས་ལུགས་འབྱུང་ལྡོག་གི་སྒོ་ནས་རྒྱས་པར་གཏན་ལ་ཕབ་པས་ཐར་འདོད་ཡོངས་ཀྱི་ཐར་ལམ་ལྟ་བའི་བློ་མིག་གསལ་བར་ཕྱེ་བ་ལྟ་བུ་ཡིན་ཏེ། སྐྱེས་རབས་ལས་ཀྱང༌། བདེ་བར་གཤེགས་གྱུར་ལམ་རྣམས་གང་ཡིན་བསྟན་པར་འགྱུར། །ཞེས་གསུངས་པ་ལྟར་རོ། །༈ གཉིས་པ་བསྟོད་པའི་ཚིག་དོན་དངོས་བཤད་པ་ལ། མདོར་བསྟན་རྒྱས་བཤད་གཉིས། དང་པོ་ནི། རབ་འབྱམས་ཉི་འོད་རྩེ་དགས་རབ་རྒོད་པ། །ཆུ་ལྷའི་ངོགས་སུ་ཕྱོགས་པའི་ལྷུན་པོ་བཞིན། །དཔེར་མཚོན་མེ་ལོང་ནང་གཟུགས་ཤར་བའི་དབྱིབས། །ཇི་བཞིན་སྒྱུ་འཕྲུལ་གར་གྱིས་རོལ་དེར་འདུད། །ཅེས་བྱུང༌། དེ་ཡང་ཚིག་གི་དངོས་ཟིན་ཙམ་ལ་འཕྲལ་དུ་བརྟགས་པའི་ཚེ་པདྨ་རཱ་གའི་ལྷུན་པོ་ཉི་འོད་བྱེ་བས་འཁྱུད་པ་ལྟ་བུའི་གཟི་བྱིན་ཅན། མེ་ལོང་ནང་གི་གཟུགས་བརྙན་བཞིན་དུ་དྭངས་ཤིང་གསལ་བའི་སྐུ་ཁོ་ན་ལ་བསྟོད་པ་ལྟར་སྣང་ཡང༌། དེ་ཙམ་ཞིག་མ་ཡིན་ཏེ། རྐང་པ་དང་པོ་གཉིས་ཀྱིས་ཐུན་མོང་མ་ཡིན་པ་དབང་གི་འཕྲིན་ལས་གཙོ་བོར་གྱུར་པའི་ཚུལ་དང༌། ཕྱི་མ་གཉིས་ཀྱིས་དེའི་རྩ་བའམ་འབྱུང་ཁུངས་ལྟ་བུ་སྐུ་གསུང་ཐུགས་ཀྱི་ཡོན་ཏན་མ་ཚང་བ་མེད་པར་སྟོན་པས་མདོར་བསྟན་གྱི་གཞུང་ཤིན་ཏུ་ཟབ་ཅིང་བརླིང་བ་ཞིག་ཡིན་ནོ། །དེ་ལ་རབ་འབྱམས་ཞེས་པ་ནི། སྟོང་གསུམ་བྱེ་བ་ཕྲག་བརྒྱ་ལ་རབ་འབྱམས་ཀྱི་མཚམས་སྦྱོར་དང༌། དེ་བྱེ་བ་ཕྲག་བརྒྱ་ལ་རབ་འབྱམས་ཀྱི་རྒྱུད།
དེ་བྱེ་བ་ཕྲག་བརྒྱ་ལ་རབ་འབྱམས་ཀྱི་རྒྱུད་བར་མ། དེ་བྱེ་བ་ཕྲག་བརྒྱ་ལ་མེ་ཏོག་གི་གཞིའི་སྙིང་པོས་བརྒྱན་པའོ། །ཞེས་བཤད་ཅིང༌། དེ་ཐམས་ཅད་རྣམ་སྣང་ཐུབ་པ་གངས་ཅན་མཚོའི་ཕྱག་མཐིལ་གྱི་རྡུལ་ཕྲ་རབ་གཅིག་ལ་གནས་པར་ཕལ་བོ་ཆེ་ལས་བཤད་དོ། །དེས་མཚོན་ཏེ་སྐུའི་རྡུལ་ཕྲ་རབ་མཐའ་དག་ལ་དེ་ལྟར་གནས་ཤིང༌། དེ་ཐམས་ཅད་གཅིག་ཏུ་བསྡོམས་པ་ལ་རབ་འབྱམས་ཞེས་པ་ཡིན་ཏེ། འདུལ་འཛིན་པའི་ཀུན་རིག་ཊཱིཀ་ཆེན་ལས། རྣམ་སྣང་ལོངས་སྤྱོད་རྫོགས་པའི་སྐུ་ཡིན་ཞིང༌། དེས་ན་དེ་ཉིད་རབ་འབྱམས་རྒྱ་མཚོ་ཡིན་ནོ། །ཞེས་གསུངས་པའི་ཕྱིར། འདིར་རབ་འབྱམས་དང་རྒྱ་མཚོ་གཉིས་ཀ་སྨོས་པ་ཡང༌། གྲངས་མེད་དཔག་ཏུ་མེད་པ་ཞེས་པ་ལྟ་བུའི་ཟློས་སྒྲ་ཡིན་གྱི། དོན་སོ་སོ་བ་མ་ཡིན་ཏེ། ཀོ་ས་ལར། རྒྱ་མཚོའི་སྒྲས་ནི་གྲངས་མཐའ་མེད་པ་ཉིད་དུ་སྟོན་ཏེ་ཞེས་སོ། །དེ་ལྟར་བགྲང་ལས་འདས་པའི་ཉིན་བྱེད་ཀྱི་འོད་ཟེར་ནམ་མཁའི་དབྱིངས་ཐམས་ཅད་ཁྱབ་པར་སྤྲོ་བ་ནི། འདིར། རབ་འབྱམས་ཉི་འོད་རྩེ་དགས་རབ་རྒོད་པ། །ཞེས་པའི་སྐབས་ཀྱི་དཔེའི་འགྲེལ་ཚུལ་ཡིན་ལ། སྤྱིར་སྙན་དངགས་ཀྱི་ཚིག་རྒྱན་ལ་འབྲུ་གཉེར་བའི་བཤད་པ་འཇུག་པའི་ངེས་པ་མེད་ཀྱང༌། བླ་མ་མཆོད་པས། སྟོང་གསུམ་མུན་སེལ་འོད་ཟེར་རྩེ་དགའ་རྒོད། །ཅེས་པའི་ཐད་དུ་ཡོངས་འཛིན་ཡེ་ཤེས་རྒྱལ་མཚན་དཔལ་བཟང་པོ་སོགས་ཀྱིས། བྱིས་པ་རྩེད་མོ་བྱེད་པའི་ཚེ། གཅིག་གིས་གཅིག་ལ་འཆིང་ནས་ལག་འཛིངས་པ་ལྟར་འོད་ཟེར་ཕན་ཚུན་དུ་ཕོག་པའི་བཤད་པ་མཛད་པ་ལྟར་ན། འདི་ཡང་ཉི་འོད་ཕན་ཚུན་དུ་འདྲེས་པའི་དོན་
ལ་བཤད་དུ་རུང་ཞིང༌། དེ་ལྟར་ན་དོན་གྱི་སྐབས་སུ་དཔག་ཏུ་མེད་པའི་འཕྲིན་ལས་དང་སྤྲུལ་བའི་བཀོད་པ་ཕྱོགས་བཅུའི་ཞིང་ཁམས་ཀུན་ཏུ་ཁྱབ་པར་སྤྲོ་བ་དང༌། ཞིང་སོ་སོའི་གདུལ་བྱའི་དོན་ཟིན་ནས་སྤྲུལ་བ་ཚུར་སྡུད་པ་སོགས་རྒྱལ་པོ་ཆེན་པོའི་ཕོ་ཉ་མང་པོའི་འགྲོ་འོང་གོ་མཚམས་མེད་པར་རུ་འཛིངས་པ་ལྟ་བུ་ལ་སྦྱར་དུ་རུང་ངོ༌། །འདིར་འཕྲིན་ལས་འཕྲོ་བ་ལ་འོད་ཟེར་འཕྲོ་བའི་མིང་གིས་བསྟན་པ་ནི་ཤིང་རྟ་ཆེན་པོ་རྣམས་ཀྱི་གསུང་ཚུལ་ཡིན་ཏེ། རྣམ་འགྲེལ་ལས། ཀུན་ཏུ་བཟང་པོའི་འོད་ཟེར་དག །ཀུན་ནས་འཕྲོ་ཞེས་དང་། རྒྱུད་བླ་མར། རྫོགས་སངས་སྐུ་ནི་འཕྲོ་ཕྱིར་དང་། །ཞེས་གསུངས་པ་ལྟར་རོ། །དེ་ནས་བསམ་གྱིས་མི་ཁྱབ་པའི་འཕྲིན་ལས་གདུལ་བྱ་མཐའ་དག་གི་རྒྱུད་ལ་འཇུག་ཚུལ་རྐང་པ་དང་པོས་བསྟན་ཅིང༌། དེའི་ནང་ནས་ཀྱང་དབང་གི་འཕྲིན་ལས་གཙོ་བོར་གྱུར་པའི་ཚུལ་ནི་རྐང་པ་གཉིས་པ། ཆུ་ལྷའི་ངོགས་སུ་ཕྱོགས་པའི་ལྷུན་པོ་བཞིན། །ཞེས་པས་སྟོན་ནོ། །དེ་ཡང་མཛོད་ལས། ལྷུན་པོ་རིན་ཆེན་བཞིའི་རང་བཞིན། །ཞེས་པའི་དོན་རང་འགྲེལ་གྱིས་ནུབ་ཤེལ་དུ་གསུངས་ཀྱང༌། འགྲེལ་བཤད་རྣམས་ཀྱིས་ཤེལ་དམར་པོ་དང་པདྨ་རཱ་ག་ཞེས་གསུངས་པ་ལྟར་རི་རབ་ཀྱི་ནུབ་ཕྱོགས་པདྨ་རཱ་ག་ལས་གྲུབ་པས་རང་མདངས་དམར་པོ་ཡིན་ཅིང༌། དེའི་འོད་ཀྱིས་བ་ལང་སྤྱོད་ཀྱི་ནམ་མཁའ་ཡང་དམར་པོར་སྣང་ངོ༌། །དེ་བཞིན་དུ་བཅོམ་ལྡན་འདས་མ་འདི་ཡང་སྔོན་གྱི་ཐུགས་བསྐྱེད་དང་སྨོན་ལམ་གྱི་མཐུས་དབང་གི་ལྷ་མོའི་རྣམ་པར་བསྟན་ཏེ། དེའི་སྒོ་ནས་གདུལ་བྱ་འདུལ་བའི་ཐབས་ལ་ལྷག་པར་མངོན་དུ་ཕྱོགས་ཤིང་དགྱེས་པས་ན་ནུབ་
ཕྱོགས་ལ་ཕྱོགས་བདག་གི་ཆ་ནས་ཆུ་ལྷའི་ཕྱོགས་ཞེས་གྲགས་ཀྱང༌། ལས་བཞིའི་ནང་ནས་དབང་གི་ཕྱོགས་ཡིན་པས་དེའི་ངོགས་སུ་ཕྱོགས་པ་ཞེས་ཚིག་གི་ནུས་པ་འདོན་དགོས་སོ། །དེར་མ་ཟད་ལྷུན་པོའི་ནུབ་ཕྱོགས་ཀྱི་ངོས་བཞིན་ཞེས་བརྗོད་ན་གོ་བདེ་བ་ལྟར་འབྱུང་ཡང༌། འདིར་དེའི་ངོགས་སུ་ཕྱོགས་པའི་ལྷུན་པོ་ཞེས་གསུངས་པའི་དགོས་པ་ཡང་བ་ལང་སྤྱོད་ནས་བལྟས་པའི་ཚེ་དམར་པོར་སྣང་བའི་ལྷུན་པོ་དེ་ཡང་སྤྱིར་རིན་ཆེན་བཞིའི་རང་བཞིན་ཅན་གྱི་ལྷུན་པོའི་མཚན་ཉིད་ཚང་བར་འདོད་དགོས་པ་བཞིན་ལྷ་མཆོག་འདི་ཡང་སྤྱིར་ལས་བཞི་ལྷུན་གྱིས་གྲུབ་པའི་འཕྲིན་ལས་ལ་མངའ་བརྙེས་པ་དང༌། ཁྱད་པར་དུ་ཐུན་མོང་མ་ཡིན་པའི་གདུལ་བྱ་ལ་དབང་གི་དངོས་གྲུབ་འཇུག་པ་མྱུར་བ་སོགས་སྤྱི་དང་བྱེ་བྲག་གི་ཡོན་ཏན་གོ་བར་ནུས་པས་ཚིག་སྔ་ཕྱིའི་གོ་རིམ་ཙམ་གྱི་སྟེང་ནས་ཀྱང་གོ་བ་ཚོལ་ཚུལ་གནད་ཤིན་ཏུ་ཆེ་བར་ཡོད་དོ། །དེ་ནས་འཕྲིན་ལས་ཕུན་སུམ་ཚོགས་པ་དེ་དག་གང་ལས་འབྱུང་བའི་བྱེད་པ་པོ་ནི། ལྷ་མོའི་སྐུ་གསུང་ཐུགས་གང་རུང་ལས་མ་འདས་པས་དེའི་ཡོན་ཏན་བསྡུས་ཏེ་སྟོན་པ་ལ། དཔེར་མཚོན་ཞེས་སོགས་རྐང་པ་གཉིས་བྱུང་བས་འདིའི་དཔེ་དོན་གྱི་ཁྱད་པར་ཞིབ་ཏུ་ཤེས་པ་ལ་མདོ་སྔགས་ཀྱི་གནད་དུ་མ་ཞིག་གོ་དགོས་སོ། །དེ་ཡང་རྒྱན་སྣང་དང་འགྲེལ་ཆུང་དོན་གསལ་གཉིས་ཀར་ཀུན་རྫོབ་ཏུ་ཡེ་ཤེས་ཁོ་ན་ལོངས་སྤྱོད་རྫོགས་པའི་སྐུ་ལ་སོགས་པར་སྣང་བ་བསྐྱེད་པའི་ཞེས་སོགས་ཚིག་ཟིན་སྔགས་དང་མཐུན་པ་ཙམ་བྱུང་ཡང་དོན་ཉི་མའི་དཀྱིལ་འཁོར་ལས་འོད་ཟེར་འབྱུང་བ་ལྟར་ཡེ་ཤེས་ཀྱིས་བདག་རྐྱེན་བྱས་པ་ལ་བརྟེན་ནས་གཟུགས་སྐུ་འབྱུང་བ་ཙམ་མ་གཏོགས་ངོ་བོ་ཡེ་ཤེས་
ཡིན་པ་ལ་རྣམ་པ་གཟུགས་སྐུར་ཤར་བ་མདོ་ལུགས་ལ་མེད་དོ། །དེའི་རྒྱུ་མཚན་ཡང་ལམ་དུས་ན་སྟོང་ཉིད་བསྒོམ་པའི་ཚེ་གཉིས་སྣང་གི་སྤྲོས་པ་མཐའ་དག་བཀག་སྟེ། དགག་བྱ་བཅད་ཙམ་གྱི་སྟོང་པ་ཁོ་ནར་ཆིག་དྲིལ་དུ་དམིགས་པ་མ་གཏོགས་ལྷའི་རྣལ་འབྱོར་དང་ཟུང་འབྲེལ་དུ་བྱེད་པ་མེད་པའི་དབང་གིས་ཡིན་ལ། སྔགས་ཀྱི་སྐབས་སུ་སྟོང་ཉིད་བསྒོམ་པའི་ཚེ་ཡང་ངེས་པ་སྟོང་ཉིད་ལ་དྲངས་ཤིང༌། དེའི་གཟུང་རྣམ་ལྷའི་སྐུར་བསྒོམ་པའི་སྟོབས་ཀྱིས་འབྲས་དུས་ན་སྐུ་ཐུགས་ཟུང་དུ་འཇུག་པ་ཞེས་ཡེ་ཤེས་དེ་ཉིད་རྟེན་བརྟེན་པ་མཐའ་དག་གི་རྣམ་པར་འཆར་བ་ཡིན་ཏེ་རྒྱས་པར་འོག་ཏུ་འཆད་དོ། །འདིར་ཚིག་དོན་བསྡུས་ཏེ་འཆད་པ་ལ། དཔེར་ན་མེ་ལོང་གཡའ་མེད་པ་ཤིན་ཏུ་དྭངས་ཤིང་གསལ་བ་དེ་ཉིད་གཟུགས་ཅན་གྱི་དངོས་པོ་སྣ་ཚོགས་པ་དང་ཉེ་བར་བཞག་པ་ན་དབྱིབས་དང་ཁ་དོག་མི་འདྲ་བའི་ཁྱད་པར་དུ་མ་ཞིག་མེ་ལོང་གི་ངོས་ནས་ཚུར་འཆར་དུ་ཡོད་ཀྱང༌། དེ་ཐམས་ཅད་མེ་ལོང་གི་བདག་ཉིད་དུ་གནས་པ་མ་གཏོགས་དེ་ལས་ལོགས་སུ་བསལ་དུ་མེད་པ་བཞིན་ཐུགས་གཉིས་སུ་མེད་པའི་ཡེ་ཤེས་དེ་ཉིད་ཀྱང་དག་པ་གཉིས་ལྡན་གྱི་དབྱིངས་དང་རོ་གཅིག་ཏུ་གྱུར་ཏེ་འགོག་པ་ཡང་དག་པའི་མཐའ་ལ་འཁོར་བ་མ་སྟོངས་ཀྱི་བར་དུ་སླར་མི་ལྡང་བའི་ཚུལ་གྱིས་སྙོམས་པར་ཞུགས་ཀྱང༌། ཐུན་མོང་དང་ཐུན་མོང་མ་ཡིན་པའི་སྙིང་རྗེ་ཆེན་པོའི་དབང་གིས་གདུལ་བྱ་མ་ལུས་པའི་ཁམས་དང་བསམ་པ་སོ་སོར་གཟིགས་ཏེ་རང་རང་དང་འཚམ་པའི་སྐུའི་རྣམ་པར་བསྟན་ནས་དེ་དག་གི་དོན་མཛད་པ་ཡང་ཡེ་ཤེས་ཀྱི་རང་
མདངས་ལས་གྲུབ་པའི་སྣང་བ་ཙམ་མ་གཏོགས་ཐ་མལ་པའི་སྣོད་བཅུད་དང་གཟུགས་ཕུང་ལྟ་བུ་གདོས་བཅས་ལོགས་སུ་གྲུབ་པ་མེད་པ་ནི། སྒྱུ་མ་སྤྲུལ་བའི་ཚེ་རྟ་གླང་དངོས་གནས་སུ་མེད་ཀྱང་སྔགས་ཀྱི་ནུས་པས་དེ་དག་གི་སྣང་བ་འབྱུང་བ་དང་འདྲའོ། །དེ་ལྟར་ན་སྒྲིབ་པ་མཐའ་དག་ཟད་དེ་ཡང་དག་པའི་མཐའ་མངོན་དུ་བྱས་པའི་ཐུགས་ཀྱི་ཡོན་ཏན་དང༌། དེའི་ཐབས་ཀྱི་གཙོ་བོ་རྟོག་པ་ལྡོག་པའི་རྒྱུ་ལས་རླུང་མ་ལུས་པ་སྦྱངས་པའི་གསུང་གི་ཡོན་ཏན་དང༌། ཡེ་ཤེས་དེ་ཉིད་གདུལ་བྱའི་སྐལ་བའི་དབང་ལས་གཟུགས་སྐུ་སྣ་ཚོགས་སུ་འཆར་བ་སྐུའི་ཡོན་ཏན་གསུམ་རིམ་པ་བཞིན། མེ་ལོང་གི་ངོས་གསལ་བ་དང་། གཡའ་མེད་པ། གཟུགས་བརྙན་སྣ་ཚོགས་ཀྱི་མདངས་བཀྲ་བ་གསུམ་གྱིས་མཚོན་ནས་མདོར་བསྟན་པ་ཡིན་ནོ། །དེ་ལྟར་སྐུ་གསུང་ཐུགས་རྡོ་རྗེ་གསུམ་དབྱེར་མི་ཕྱེད་པའི་བདག་ཉིད་འདི་ནི་གསང་བ་གསུམ་གྱི་འཁོར་ལོ་མཐའ་དག་གི་སྤྱིའི་ཆིངས་ཡིན་ཏེ། འདུས་པའི་རྩ་རྒྱུད་ལེའུ་གཉིས་པ་ལས། ཁྱེད་ཀྱི་སེམས་ལུས་ལྟ་བུ་དང༌། ལུས་སེམས་ལྟ་བུ་དང༌། སེམས་ཚིག་ཏུ་བརྗོད་པ་ལྟ་བུར་སྐྱེད་ཅིང༌། ཅེས་དང༌། བསྐྱེད་རིམ་དངོས་གྲུབ་རྒྱ་མཚོ་ལས། རང་གི་སེམས་ཚིག་ཏུ་བརྗོད་པ་སྟེ་གསུང་རྡོ་རྗེ་ཞེས་སོགས་དང༌། ཐམས་ཅད་བདག་ཉིད་བྱ་ཞེས་པ་ནི་རྡོ་རྗེ་གསུམ་པོ་ཐམས་ཅད་དབྱེར་མི་ཕྱེད་པའི་བདག་ཉིད་རྡོ་རྗེ་འཆང་ཞེས་སོགས་གསུངས་ལ། སྤྱོད་བསྡུས་ལས། གསང་ཆེན་རིགས་གཅིག་གི་ལུས་དབེན་ལ་སྦྱར་ཏེ་དགོངས་པའི་གནད་གཅིག་ཏུ་འབབ་བོ། །༈ གཉིས་པ་རྒྱས་པར་བཤད་པ་ལ། སྐུ་ལ་བསྟོད་པ། གསུང་ལ་བསྟོད་པ། ཐུགས་
ལ་བསྟོད་པ། ཐུན་མོང་དུ་བསྟོད་པ་དང་བཞི། དང་པོ་ལ་སྤྱིའི་དོན་དང༌། ཡན་ལག་གི་དོན་གཉིས། དང་པོ་ནི་འདིར་ལྷག་པའི་ལྷའི་སྐུ་གསུང་ཐུགས་ཀྱི་ཡོན་ཏན་ཐམས་ཅད་ཀྱང་སྔགས་ལམ་ལ་བསླབ་པའི་འབྲས་བུར་གསུངས་པ་དེ་ལམ་གོང་འོག་ཐམས་ཅད་ཀྱི་འབྲས་བུར་ཁྱད་མེད་དུ་བཞག་པ་ཡིན་ནམ། རང་རང་འགྲུབ་བྱེད་ཀྱི་ལམ་ཐུན་མོང་མ་ཡིན་པ་སོ་སོའི་འབྲས་བུར་བཞག་པ་ཡིན་ཞེ་ན། སྤྱིར་གསང་སྔགས་རྡོ་རྗེ་ཐེག་པར་མ་ཟད་ཐེག་པ་ཆེན་པོ་ཙམ་ལ་ཡང༌། དྲི་མ་མེད་པར་གྲགས་པའི་མདོ་ལས། ཐབས་དང་བྲལ་བའི་ཤེས་རབ་ནི་འཆིང་བའོ། །ཤེས་རབ་དང་བྲལ་བའི་ཐབས་ནི་འཆིང་བའོ། །ཞེས་གསུངས་པ་ལྟར་ལམ་གྱི་ཆ་ཤས་ཐམས་ཅད་ཐབས་ཤེས་ཡ་བྲལ་དུ་མ་སོང་བར་ཕན་ཚུན་རྩིས་ཟིན་པ་དགོས་པས་ཆོས་གཟུགས་གཉིས་དང་སྐུ་གསུང་ཐུགས་གསུམ་གའི་རྒྱུར་འགྲོ་བ་ཤ་སྟག་ཡིན་ཀྱང༌། རྒྱུ་འབྲས་ཐུན་མོང་མ་ཡིན་པའི་ངོས་སྐལ་སོ་སོར་འཇོག་པ་མི་འགལ་ཏེ། རིན་ཆེན་འཕྲེང་བ་ལས། སངས་རྒྱས་རྣམས་ཀྱི་གཟུགས་སྐུ་འདི། །བསོད་ནམས་ཚོགས་ལས་འཁྲུངས་པ་ཡིན། །ཆོས་ཀྱི་སྐུ་ནི་མདོར་བསྡུས་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །ཞེས་རྒྱུ་ཚོགས་གཉིས་ཀྱིས་འབྲས་བུ་སྐུ་གཉིས་སོ་སོར་འགྲུབ་ཚུལ་གསུངས་པ་ལྟར་རོ། །འོན་ཀྱང་མདོ་ལུགས་ལ་བསོད་ནམས་ཀྱི་ཚོགས་ཀྱི་གཙོ་བོ་སེམས་བསྐྱེད་སོགས་ཐབས་ཀྱི་ཆ་རྣམས་ཡིན་ཀྱང༌། སྔགས་ཀྱི་ཐབས་ཁྱད་པར་ཅན་ལྷའི་རྣལ་འབྱོར་འདི་ལྟ་བུ་མེད་ལ། ལུགས་འདི་ལ་གཟུགས་སྐུའི་རྒྱུའི་གཙོ་བོར་
གྱུར་པའི་ཐབས་བླ་ན་མེད་པ་ཡོད་པས་ཕར་ཕྱིན་ཐེག་པ་ལས་ལོགས་སུ་སྔགས་ཀྱི་ཐེག་པ་ཕྱེ་བ་ཡིན་ཏེ། ཐེག་པ་གོང་འོག་ཐམས་ཅད་ཤེས་རབ་ཀྱི་ཆས་མི་འབྱེད་པར་ཐབས་ཀྱི་ཆ་ནས་འབྱེད་པའི་ཕྱིར། རྡོ་རྗེ་གུར་ལས། སངས་རྒྱས་ང་རྒྱལ་རྣལ་འབྱོར་གྱིས། །སངས་རྒྱས་ཉིད་ཡུན་རིང་མི་འགྱུར། །སྟོན་པ་སུམ་ཅུ་རྩ་གཉིས་མཚན། །མངའ་བདག་དཔེ་བྱད་བརྒྱད་ཅུར་ལྡན། །དེ་ཕྱིར་ཐབས་དེས་བསྒྲུབ་བྱ་སྟེ། །ཐབས་ནི་སྟོན་པའི་གཟུགས་ཅན་ནོ། །ཞེས་དང༌། མཐའ་དཔྱོད་མྱུ་གུ་ལས། ཐབས་ཀྱི་གཙོ་བོ་ཡང་གཟུགས་སྐུ་སྒྲུབ་པའི་ཆ་ནས་ཡིན་ལ། གཟུགས་སྐུ་སྒྲུབ་བྱེད་ཀྱི་ཐབས་ནི་དེ་དང་རྣམ་པ་འདྲ་བར་བསྒོམ་པའི་ལྷའི་རྣལ་འབྱོར་ཉིད་ཐེག་པ་གཞན་གྱི་ཐབས་ལས་མཆོག་ཡིན་པས། ཞེས་གསུངས་པ་ལྟར་རོ། །དེ་ལྟ་བུའི་ལྷའི་རྣལ་འབྱོར་དེ་ཡང་རིམ་པ་གཉིས་ཀའི་ལམ་གྱི་སྲོག་ཡིན་གྱིས། རྣམ་པར་བཞག་འཇོག་གི་ཚེ་གཙོ་བོ་བསྐྱེད་རིམ་ལ་སྦྱར་ནས་བསྐྱེད་རིམ་སངས་རྒྱས་ཀྱི་སྐུ་འགྲུབ་བྱེད་དང༌། རྫོགས་རིམ་སངས་རྒྱས་ཀྱི་ཐུགས་འགྲུབ་བྱེད་ལ་འཇོག་དགོས་ཏེ། སྔགས་རིམ་ལས། ཐུགས་དངོས་པོའི་དེ་ཁོ་ན་ཉིད་ལ་ཞུགས་པ་ནི་རྫོགས་རིམ་གྱིས་སྒྲུབ་ལ། ལུས་གཟུགས་ཀྱི་སྐུར་གནས་པ་ནི་བསྐྱེད་རིམ་གྱིས་སྒྲུབ་ཅིང༌། ཞེས་གསུངས་པའི་ཕྱིར། ཚུལ་འདི་ནི་རྒྱལ་བ་རྡོ་རྗེ་འཆང་རང་ཉིད་ཀྱིས་གསལ་བར་གསུངས་ཏེ། བརྟག་གཉིས་ཀྱི་བརྟག་པ་ཕྱི་མའི་ལེའུ་གཉིས་པ་ལས། རྫོགས་པའི་རིམ་པའི་རྣལ་འབྱོར་ཉིད། །དེ་ཡིས་བདེ་བ་བདེ་ཆེན་བརྗོད། །རྫོགས་པ་བསྒོམ་པ་མེད་པ་སྟེ། །བསྐྱེད་རིམ་ཡི་ནི་ཅི་ཞིག་འཚལ། །ཞེས་རྡོ་རྗེ་སྙིང་པོས་ཕྱི་རབས་ཀྱི་ལོག་རྟོག་
དགག་པའི་ཕྱིར་སངས་རྒྱས་འགྲུབ་པ་ལ་རྫོགས་རིམ་གྱིས་ཆོག་མོད། བསྐྱེད་རིམ་ཅི་ལ་དགོས་ཞེས་དོགས་པ་ཞུས་པའི་ལན་དུ་བཅོམ་ལྡན་འདས་ཀྱིས། ཨེ་མ་བྱང་ཆུབ་སེམས་དཔའ་ཆེ། །དད་པའི་ཤུགས་ཀྱིས་རབ་ཏུ་ཉམས། །ལུས་ཀྱི་དངོས་མེད་ག་ལ་བདེ། །བདེ་བ་སྨྲ་བར་མི་ནུས་སོ། །ཁྱབ་དང་ཁྱབ་བྱེད་ཚུལ་གྱི་ནི། །བདེ་བས་འགྲོ་བ་ཁྱབ་པ་ཉིད། །ཇི་ལྟར་མེ་ཏོག་ལ་གནས་དྲི། །མེ་ཏོག་དངོས་མེད་ཤེས་མི་འགྱུར། །དེ་བཞིན་གཟུགས་སོགས་དངོས་མེད་པས། །བདེ་བ་ཉིད་ཀྱང་དམིགས་མི་འགྱུར། །ཞེས་རྟེན་མེ་ཏོག་མེད་ན་བརྟེན་པ་དྲི་མི་འབྱུང་བ་ལྟར། རྟེན་གཟུགས་སྐུ་མེད་ན་བརྟེན་པ་བདེ་ཆེན་གྱི་ཐུགས་ཀྱང་མི་འབྱུང་ལ། རྟེན་དེ་ནི་གཙོ་བོར་བསྐྱེད་རིམ་གྱིས་སྒྲུབ་དགོས་པས། རྫོགས་རིམ་ཁོ་ན་ལ་ཞེན་ནས་བསྐྱེད་རིམ་དོར་བ་ནི་དད་པའི་ཤུགས་ཀྱིས་ཉམས་པ་ཡིན་པར་གསུངས་སོ། །དེས་ན་བྲམ་ཟེ་སྟོང་ཉིད་བློ་དང༌། ཨ་ནནྟ་བཛྲ་སོགས་རྒྱ་གར་བ་དང་། ཧྭ་ཤང་གི་ལྟ་བས་རྒྱུད་བསླད་པའི་བོད་སྔ་མ་མང་པོ་ཡང་མཆོག་འགྲུབ་པའི་རྒྱུ་ལ་རྫོགས་རིམ་མ་གཏོགས་བསྐྱེད་རིམ་མི་འོང་བར་སྨྲ་བ་ནི་རྡོ་རྗེ་འཆང་གི་དགོངས་པ་ལས་རྒྱབ་ཀྱིས་ཕྱོགས་པ་ཡིན་ཏེ། བསྐྱེད་རིམ་སངས་རྒྱས་ཀྱི་རྒྱུར་མི་འགྲོ་ན་དེའི་སྣོད་རུང་དུ་བྱེད་པའི་བུམ་དབང་སངས་རྒྱས་ཀྱི་རྒྱུ་མ་ཡིན་པར་འགྱུར་ལ། རིག་པའི་དབང་ལྔས་རྒྱལ་བ་ལྔ་དང་ཡེ་ཤེས་ལྔ་འགྲུབ་པར་གསུངས་པ་ཐམས་ཅད་དང་འགལ་ཞིང༌། ཕྱག་མཆོད་བཟླས་བརྗོད་སོགས་དེ་བས་ཀྱང་སངས་རྒྱས་ཀྱི་རྒྱུར་མི་འགྲོ་བས་བསོད་ནམས་ཀྱི་ཚོགས་ཐམས་ཅད་སྐུར་འདེབས་སུ་འགྱུར་རོ། །
དེར་མ་ཟད་རྒྱུད་སྡེ་འོག་མ་གསུམ་ལ་རྫོགས་རིམ་མེད་ཅིང་ལྷའི་རྣལ་འབྱོར་སོགས་སངས་རྒྱས་ཀྱི་རྒྱུ་མ་ཡིན་པས་ཕར་ཕྱིན་ཐེག་པ་དང་མི་འདྲ་བའི་ཁྱད་པར་གང་ཡོད་ནང་པའི་ཆོས་མ་ཡིན་པར་འགྱུར་ལ། བྱེ་སྨྲ་བཞིན་གཟུགས་སྐུ་ཡང་སངས་རྒྱས་མ་ཡིན་པར་འདོད་དགོས་པས་བེམ་རིག་རྒྱུན་ཆད་ཁས་བླངས་ཏེ་ཁ་སྦྱོར་ཡན་ལག་བདུན་ལྡན་གྱི་ཟུང་འཇུག་གི་སྐུ་ཡང་མེད་པར་སྨྲ་དགོས་ཤིང༌། རྒྱལ་བ་རྡོ་རྗེ་འཆང་དང་རྒྱུད་སྡེ་བཞི་ལ་སྐུར་བ་འདེབས་པའི་སྔགས་འཆང་གི་གཟུགས་བརྙན་དེ་དག་ནི་རྐུ་ཐབས་སུ་གནས་པ་ཁོ་ནའོ། །གཞན་ཡང་དབང་བཞིའི་ནང་ནས་བུམ་དབང་གིས་སངས་རྒྱས་ཀྱི་གཟུགས་སྐུ་དང༌། གསང་དབང་གིས་ལོངས་སྤྱོད་རྫོགས་པའི་སྐུའམ་སངས་རྒྱས་ཀྱི་གསུང་དང༌། ཤེར་དབང་གིས་ཐུགས་བདེ་སྟོང་གི་ཡེ་ཤེས་དང༌། དབང་བཞི་པས་ཟུང་འཇུག་གི་གོ་འཕང་འགྲུབ་པའི་ནུས་པ་བཞག་པར་བླ་མེད་ཀྱི་དབང་ཐམས་ཅད་ཀྱི་དག་པའི་སྐབས་ལས་ཀྱང་ཤེས་ལ། རང་རང་གི་ནུས་པ་འཇོག་པའི་རིམ་པ་དང་མཐུན་པར་དབང་སོ་སོ་དང་འབྲེལ་བའི་ལམ་བསྐྱེད་རིམ་དང༌། ཀུན་རྫོབ་སྒྱུ་མའི་རྫོགས་རིམ་དང༌། དོན་དམ་འོད་གསལ་གྱི་རྫོགས་རིམ་དང༌། དབྱེར་མེད་ཟུང་འཇུག་གི་རྫོགས་རིམ་རྣམས་ཀྱང་རིམ་པ་བཞིན་སྐུ་གསུང་ཐུགས་གསུམ་སོ་སོ་དང༌། སྐུ་ཐུགས་ཟུང་འཇུག་གི་གོ་འཕང་སྒྲུབ་བྱེད་ཐུན་མོང་མ་ཡིན་པ་ལ་སོ་སོར་སྦྱོར་དགོས་ཏེ། རྡོ་རྗེ་ཐེག་པའི་ལམ་གྱི་གནད་ཐམས་ཅད་སྨིན་བྱེད་རྒྱུའི་དབང༌། གྲོལ་བྱེད་ལམ་གྱི་དབང༌། གྲོལ་བ་འབྲས་བུའི་དབང་གསུམ་དུ་བསྡུས་ཏེ་བསྒྲུབ་བྱ་སྒྲུབ་བྱེད་མ་འཆོལ་བར་ཤན་སྦྱར་ནས་ས་སྐྱ་གོང་མ་རྣམས་
ཀྱིས་ལམ་འབྲས་སུ་གསུངས་པ་ལ་རྗེ་བདག་ཉིད་ཆེན་པོས་བསྔགས་བརྗོད་ཤིན་ཏུ་ཆེ་བར་མཛད་དོ། །ཡང་ཁ་ཅིག །བདེ་དགྱེས་ལྟ་བུ་དཀྱིལ་འཁོར་གྱི་གཙོ་བོ་རྣམས་ལ་རིམ་གཉིས་ཀྱི་འབྲས་བུ་དེ་ལྟར་འབྱུང་ཡང༌། དེ་འདི་ལྟ་བུའི་ལྷ་བྱེ་བྲག་པ་ཐམས་ཅད་ལ་སྦྱོར་མི་རུང་སྙམ་ན། དེ་ལྟར་དོགས་པ་འབྱུང་ཉེན་ཆེ་བས་དཔྱད་དགོས་ཏེ། བརྟག་གཉིས་ལས། རྡོ་རྗེ་སྙིང་པོས་གསོལ་བ། ནམ་མཁའ་ལྟ་བུའི་ཆོས་ཀུན་ལ། །རྒྱ་མཚོར་ཀུ་བ་ཇི་ལྟ་བར། །རང་འདོད་ལྷ་ཡི་གཟུགས་ཀྱིས་ནི། །སེམས་ཅན་ཇི་ལྟར་འགྲུབ་པར་འགྱུར། །ཞེས་སྔར་ལྷ་ཚོགས་མང་དུ་གསུངས་པ་དེ་དག་གང་གི་རིམ་གཉིས་ཀྱི་རྣལ་འབྱོར་ལ་བརྟེན་ནས་མཆོག་འགྲུབ། ཅེས་ཞུས་པའི་ལན་དུ། བཅོམ་ལྡན་འདས་ཀྱིས་བཀའ་སྩལ་པ། །བདག་མེད་རྣལ་འབྱོར་ལྡན་པ་འམ། །ཡང་ན་ཧེ་རུ་ཀ་དཔལ་བརྩོན། །གཞན་པའི་སེམས་ཀྱིས་སྐད་ཅིག་ཀྱང༌། །དངོས་གྲུབ་འདོད་པས་མི་གནས་སོ། །ཞེས་གསུངས་པའི་དོན་དུ་བསམ་ནས་ཡུམ་བཀའི་རིམ་གཉིས་བསྒོམ་པ་ལ་བདག་མེད་མ་མ་གཏོགས་ཀུ་རུ་ཀུལླེ་སོགས་མི་འོང་བ་དང༌། ཡབ་བཀའི་རིམ་གཉིས་ལ་ཧེ་རུ་ཀ་ཕྱག་བཅུ་དྲུག་པ་མ་གཏོགས་གཞན་གསུམ་མི་འོང་བར་འདོད་པ་མང་ཡང༌། རང་ལུགས་གཙོ་ཆེ་ཆུང་ཙམ་ཡོད་ཀྱང་ལྷ་དེ་ཐམས་ཅད་ཀྱི་རིམ་གཉིས་ལ་བརྟེན་ནས་མཆོག་འགྲུབ་པ་ཁྱད་མེད་དུ་བཞེད་དེ། མཁས་གྲུབ་རྗེའི་བརྟག་གཉིས་རྣམ་བཤད་ལས། དེ་ཡང་ཧེ་རུ་ཀ་བཞི་དང༌། བདག་མེད་མ་དང༌། ཀུ་རུ་ཀུལླེ་སོགས་ལྷ་མང་དུ་གསུངས་པ་དེ་རྣམས་ཀྱི་ནང་ནས་ལྷ་གང་གིས་འགྲུབ་པར་འགྱུར། ཞེས་པ་
ནས། རྫོགས་རིམ་གྱི་རྟོགས་པ་རྫོགས་པར་སྐྱེད་པའི་རྒྱུད་སྨིན་བྱེད་དུ་འགྲོ་བའི་བསྐྱེད་རིམ་ལ་བདག་མེད་མ་དང༌། ཧེ་རུ་ཀས་གཙོ་བྱས་པའི་དཀྱིལ་འཁོར་གྱི་འཁོར་ལོ་གཙོ་བོ་ཡིན་པ་ལ་དགོངས་ནས་དེ་གཉིས་གསུངས་ཀྱང༌། ཞེས་དང༌། སྒམ་པོ་མངྒ་ལའི་ཊཱིཀྐར། འདིར་ཁ་ཅིག་ཕྱག་བཅུ་དྲུག་པ་མིན་པའི་ཧེ་རུ་ཀ་དང༌། ཀུ་རུ་ཀུལླེ་སོགས་ཀྱིས་མཆོག་སྒྲུབ་པའི་ལྷའི་རྣལ་འབྱོར་མི་རུང་བ་དང༌། ལྷ་དེ་དག་ཡེ་ཤེས་དང་བྲལ་བ་དང༌། དེ་ལས་འབྲས་བུ་མི་འབྱུང་བར་འཆད་པ་ཤིན་ཏུ་མི་འཐད་དེ། ཞེས་སོ། །དོགས་པ་སྐྱེ་ཚུལ་དང་ལན་གྱི་རྣམ་གཞག་འདི་རྣམས་ཀྱང་འགྲེལ་པ་ཀུ་མུ་ཊིའི་བཤད་ཚུལ་སོར་བཞག་ཡིན་གྱི། དཀའ་འགྲེལ་པདྨ་ཅན་ལྟར་ན་དྲིས་ལན་གྱི་རྣམ་གཞག་ལོགས་ཤིག་ཡིན་ནོ། །ཡང་ཁ་ཅིག་འདི་སྙམ་དུ་སངས་རྒྱས་ཀྱི་གཟུགས་སྐུའི་ཉེ་རྒྱུའི་གཙོ་བོ་དག་པའི་སྒྱུ་མའི་སྐུ་སོགས་ཡོད་བཞིན་དུ། བསྐྱེད་རིམ་དེའི་རྒྱུའི་གཙོ་བོར་བཤད་པ་མི་འཐད་སྙམ་ན། སྐྱོན་མེད་དེ། ཀུན་མཁྱེན་འཇམ་དབྱངས་བཞད་པའི་ཕར་ཕྱིན་མཐའ་དཔྱོད་ལས། རྐང་པ་དང་པོས་དད་སོགས་ཆུང་འབྲིང་ཐུན་མོང་དང༌། ཕྱི་མས་ཆེན་པོའི་རྣམ་མཁྱེན་བར་བསྟན་པས། ཞེས་གསུངས་པ་ལྟར། སངས་རྒྱས་སའི་གཞི་ཤེས་ཀྱི་ཉེ་རྒྱུའི་གཙོ་བོ་དག་སའི་མི་རྟག་སོགས་རྟོག་པའི་མཁྱེན་པ་རྣམས་ཡོད་ཀྱང་འབྲིང་དང་ཐུན་མོང་བའི་ལམ་ལ་སྦྱར་བ་ལྟ་བུ་རང་གི་རིགས་འདྲའི་གཙོ་བོའི་ལམ་ས་མཚམས་གང་ནས་ཐོག་མར་སྐྱེས་པ་དེའི་དབང་དུ་མཛད་པ་ཡིན་ཏེ། རྒྱན་ལས། ལམ་གྱི་བདེན་པའི་རྗེས་མཐུན་པར། །ཀུན་མཁྱེན་གསུམ་དུ་ཕྱེ་བས་ན། །ཞེས་གསུངས་པ་ལྟར་རོ། །དེར་མ་
ཟད་གུར་གྱི་བཅུ་བཞི་པ་ལས། ཐ་མལ་རྣམ་པ་གཞོམ་དོན་དུ། །ཡང་དག་བསྒོམ་པ་རབ་བསྒྲགས་ཀྱི། །ཞེས་དང༌། སྤྱོད་བསྡུས་ལས། འདི་ལྟར་ཕུང་པོ་དང༌། ཁམས་དང༌། སྐྱེ་མཆེད་རྣམས་ཀྱི་ཐོག་མ་མེད་པ་ནས་ཐ་མལ་པའི་ང་རྒྱལ་གྱིས་གནས་པ་རྣམས་ནི། འདི་ལྟར་དེ་བཞིན་གཤེགས་པ་ཐམས་ཅད་ཀྱི་རྡུལ་ཕྲ་རབ་ལས་སྒྲུབ་པའི་ངོ་བོ་ཉིད་དུ་བསྟན་ཏེ། ཞེས་སྤང་བྱ་ཐ་མལ་གྱི་སྣང་ཞེན་དང༌། ཕུང་ཁམས་སོགས་སྦྱོང་བའི་རྒྱུའི་གཙོ་བོ་བསྐྱེད་རིམ་དུ་གསུངས་པས། བསྒྲུབ་བྱ་སངས་རྒྱས་ཀྱི་སྐུ་འགྲུབ་པའི་རྒྱུའི་གཙོ་བོར་ཡང་བདེ་བླག་ཏུ་འགྲུབ་བོ། །དེ་ལྟ་བུའི་གཟུགས་སྐུ་སྒྲུབ་བྱེད་ཀྱི་རྒྱུའི་གཙོ་བོ་རྫོགས་རིམ་གྱི་སྨིན་བྱེད་དུ་འགྱུར་བའི་བསྐྱེད་རིམ་དེ་ལ་མཚན་ཉིད་ཇི་འདྲ་བ་ཞིག་ཚང་དགོས་ཤེ་ན། མར་ལུགས་པ་ཁ་ཅིག །ལས་ཚོགས་སྒྲུབ་པ་ལ་དཀྱིལ་འཁོར་འཁོར་ལོ་བསྒོམ་དགོས་ཀྱང༌། རྫོགས་རིམ་གྱི་སྔོན་འགྲོ་ལ་དཀྲོང་བསྐྱེད་ཙམ་གྱིས་ཆོག །ཅེས་སྨྲ་བ་སོགས་ནི་གཏན་མི་འཐད་པར་མཐའ་དཔྱོད་མྱུ་གུར་གསུངས། དེ་དག་གིས་དེའི་མིང་ལ་ཡང་རྫོགས་པའི་རྣལ་འབྱོར་གཅིག་པུ། ཞེས་བསྐྱེད་རིམ་གྱི་ཆིངས་ཤིག་ཏུ་འདོད་པས་རྗེ་ས་པཎ་གྱིས་ཀྱང༌། ཡི་དམ་བསྒོམ་པ་དཀྲོང་བསྐྱེད་དང༌། ཞེས་དགག་པ་མཛད་དོ། །དེས་ན་སྔགས་རིམ་ལས། རིམ་པ་དང་པོའི་ཆིངས་རྨད་དུ་བྱུང་བ་རྣམས་ལ་གཞི་བྱས་ནས་དཔྱད་ན་རིམ་པ་དང་པོའི་གནད་རྫོགས་མ་རྫོགས་ཀྱི་མཚམས་རྣམས་ཤེས་པར་འགྱུར་རོ། །ཞེས་གསུངས་པ་ལྟར། རྒྱལ་བ་རྡོ་རྗེ་འཆང་རང་ཉིད་ཀྱིས་མཛད་པའི་སྤྱི་ཆིངས་རེ་དང་མ་སྦྱར་ན་ལམ་གྱི་
གནད་ཆད་ལྷག་ཏུ་གྱུར་ཏེ་བོགས་མི་ཐོན་པས་རྗེ་བཙུན་འཇམ་པའི་དབྱངས་ཀྱིས་རྗེ་བླ་མ་ལ་གདམས་པའི་ཚེ། ངོ་བོ་མ་ནོར་བ། གྲངས་མ་ཆད་པ། གོ་རིམ་མ་འཆོལ་བ། ཞེས་ནན་ཏན་དུ་གསུངས་ཤིང༌། རྒྱལ་བ་བྱམས་པས་ཀྱང༌། དེ་རབ་དེ་ཡི་གོ་རིམ། ཞེས་སོགས་གསུངས་པ་དང༌། སྒོམ་རིམ་ལས་ཀྱང་ཚང་ལ་མ་ནོར་བ་དགོས་ཚུལ་དཔེ་དང་བཅས་ཏེ་རྒྱས་པར་གསུངས་པ་ལམ་རིམ་ཆེན་མོར་དྲངས་པ་བཞིན་ནོ། །བསྐྱེད་རིམ་སྡུད་པར་བྱེད་པའི་སྤྱིའི་ཆིངས་ཀྱི་དབྱེ་བ་ཡང༌། འདུས་པ་ཕྱི་མ་ལས། བསྙེན་པའི་ཆོ་ག་དང་པོ་སྟེ། །ཉེ་བར་སྒྲུབ་པ་གཉིས་པ་ཡིན། །བསྒྲུབ་པ་ཡང་ནི་གསུམ་པ་ཡིན། །སྒྲུབ་པ་ཆེན་པོ་བཞི་པ་འོ། །ཞེས་གཙོ་བོ་ལྷག་མོས་འོད་གསལ་དུ་སྡུད་པ་དང༌། དེའི་ཡན་ལག་ཡེ་ཤེས་ཀྱི་ས་སྒོམ་པ་མན་ཆད་ཡུལ་སྟོང་ཉིད་ལ་བསྙེན་ཅིང་རོ་གཅིག་ཏུ་ཞུགས་པའི་སྒོ་ནས་དམིགས་པས་ན་ཡན་ལག་དང་པོ་བསྙེན་པ་ཡིན་ལ། དེ་ནས་དང་པོའི་མགོན་པོ་བསྐྱེད་པའི་བར་ནི་བསྐྱེད་རིམ་གྱི་ལོངས་སྐུའི་སྒོ་ནས་རླུང་སེམས་ཙམ་ལས་གྲུབ་པའི་ལོངས་སྤྱོད་རྫོགས་པའི་ཡེ་ཤེས་ཀྱི་སྐུ་ཉེ་བར་སྒྲུབ་བྱེད་ཡིན་པས་གཉིས་པ་ཉེར་སྒྲུབ་དང༌། སྒོ་གསུམ་བྱིན་རླབས་ནས་རིགས་བདག་གིས་དབང་བསྐུར་བའི་བར་གྱིས་སྒོ་གསུམ་རྡོ་རྗེ་གསུམ་གྱི་བདག་ཉིད་དུ་བསྒྲུབ་པས་གསུམ་པ་བསྒྲུབ་པ་དང༌། རིག་མ་འདུ་བྱས་ཏེ་དཀྱིལ་འཁོར་རྒྱལ་མཆོག་གི་ལྷ་སྤྲོ་བ་ནས་ལས་རྒྱལ་མཆོག་རྫོགས་པའི་བར་རྣམས་གཞན་དོན་རྒྱ་ཆེན་པོ་སྒྲུབ་པས་བཞི་པ་སྒྲུབ་ཆེན་དུ་སྒྲོན་གསལ་ལས་གསུངས་སོ། །འདི་ལྟར་ན་ཡན་ལག་དང་པོ་གསུམ་ག་དང་པོ་སྦྱོར་བའི་ཁུངས་སུ་འདུ་ཞིང༌། ཡེ་ཤེས་ཞབས་ལུགས་
ལ་གཙོ་བོ་ཡབ་ཡུམ་དཀྱིལ་འཁོར་རྒྱལ་མཆོག་གི་ལྷ་དང་བཅས་པ་རེ་རེ་བཞིན་ཡན་ལག་བཞི་བཞི་ཚང་བར་སྦྱོར་ཚུལ་ཞིག་མཛད་དེ་འོག་ཏུ་འཆད་དོ། །དགྲ་ནག་ལས། དང་པོར་བསྒོམ་པ་རྣལ་འབྱོར་ཏེ། །གཉིས་པ་རྗེས་སུ་རྣལ་འབྱོར་ཡིན། །གསུམ་པ་ཤིན་ཏུ་རྣལ་འབྱོར་ཏེ། །བཞི་པ་རྣལ་འབྱོར་ཆེན་པོ་འོ། །ཞེས་རྒྱུ་རྡོ་རྗེ་འཛིན་པ་བསྐྱེད་པ་རྣལ་འབྱོར། འབྲས་བུ་རྡོ་རྗེ་འཛིན་པ་བསྐྱེད་པ་རྗེས་སུ་རྣལ་འབྱོར། རིག་མ་འདུ་བྱས་ཏེ་ལྷ་སྤྲོ་བ་ཤིན་ཏུ་རྣལ་འབྱོར། སྐྱེ་མཆེད་བྱིན་རླབས་མན་ཆད་རྣལ་འབྱོར་ཆེན་པོར་གསུངས་ཤིང༌། དམར་པོའི་རྒྱུད་ལེའུ་དགུ་པར་ཡང་དེ་བཞིན་དུ་གསུངས་པས་གཤེད་སྐོར་རྣམས་ལ་གྲུབ་ཆེན་དཔལ་འཛིན་སོགས་ཀྱིས་ཆིངས་འདི་གཞིར་མཛད་དོ། །སྦྱོར་ཚུལ་དེ་ནི་སྒྲུབ་ཐབས་ཡོངས་རྫོགས་ཀྱི་ཆིངས་བྱས་པ་ཡིན་ལ། མདོར་བྱས་སུ་དང་པོ་སྦྱོར་བ་གཅིག་པུ་ལ་རྣལ་འབྱོར་བཞིར་མཛད་པ་ནི་སྔ་མ་དང་མིང་འདྲ་ཡང་དོན་མི་གཅིག་སྟེ། འདི་ནི་རྡོར་འཕྲེང་ལས། རྣལ་འབྱོར་རྗེས་སུ་རྣལ་འབྱོར་དང༌། །ཤིན་ཏུ་རྣལ་འབྱོར་རྣལ་འབྱོར་ཆེ། །དང་པོའི་སྦྱོར་བ་མདོར་བསྡུས་པ། །ཞེས་པའི་དགོངས་པའོ། །ཡང་འདུས་པའི་ལེའུ་བཅུ་གཉིས་པར་ཡན་ལག་བཞིའི་སྒོ་ནས་བསྐྱེད་རིམ་རྒྱས་པར་བསྒོམ་ཚུལ་གསུངས་པའི་རྗེས་སུ། ཡང་ན་རྡོ་རྗེ་བཞི་དག་གིས། །བརྟུལ་ཞུགས་བརྟན་པས་བསྙེན་པ་བྱ། །ཞེས་བསྐྱེད་རིམ་མདོར་བསྡུས་ཀྱི་ཆིངས་ཤིག་ཀྱང་གསུངས་ལ། དེ་ནི་རྒྱུད་ཕྱི་མ་ལས། དང་པོ་སྟོང་ཉིད་བྱང་ཆུབ་སྟེ། །གཉིས་པ་ས་བོན་བསྡུས་པ་འོ། །གསུམ་པ་གཟུགས་ཉིད་རྫོགས་
པ་སྟེ། །བཞི་པ་ཡི་གེ་འགོད་པ་འོ། །ཞེས་ཡེ་ཤེས་ཀྱི་ས་ནས་མཁའ་གསང་དུ་ཡི་གེ་འགོད་པའི་བར་དང་པོ་སྦྱོར་བ་གཅིག་པུ་ཆ་བཞིར་མཛད་པ་ཡིན་ཞིང༌། ནཱ་རོ་པས་དེའི་སྟེང་དུ་དཀྱིལ་འཁོར་རྒྱལ་མཆོག་བསྣན་པས་རྡོ་རྗེ་བཞིས་སྐྱེད་རྒྱས་པ་ཞིག་ཀྱང་གསུངས་སོ། །བརྟག་གཉིས་ཀྱི་ལྷའི་ལེའུ་ལས། ཡང་ནི་སྟོང་པའི་བྱང་ཆུབ་སྟེ། །གཉིས་པ་ལ་ནི་ས་བོན་བསྡུ། །གསུམ་པ་ལ་ནི་གཟུགས་བརྙན་རྫོགས། །བཞི་པ་ལ་ནི་ཡིག་འབྲུ་དགོད། །ཅེས་གསུངས་པ་ཡང་འདུས་པ་ཕྱི་མའི་རྡོ་རྗེ་བཞིས་སྐྱེད་དང་གཅིག་ལ། སྐབས་འདིར་འགྲེལ་པ་རྣམས་སུ་ཡན་ལག་བཞིའི་མིང་གིས་བཏགས་སོ། །ལེའུ་འདི་དང༌། ལེའུ་བརྒྱད་པ་རྣལ་འབྱོར་མའི་འཁོར་ལོ། བརྟག་པ་ཕྱི་མའི་ལྔ་པ་མངོན་པར་འབྱུང་བའི་ལེའུ་རྣམས་སུ་བསྐྱེད་རིམ་གྱི་ལམ་ཐོར་བུར་གསུངས་པའི་གནད་བསྡུས་ཏེ། བཤད་རྒྱུད་རྡོ་རྗེ་གུར་ལས། སངས་རྒྱས་གནས་གཞི་རྫོགས་བྱས་ལ། །ཀུན་ཏུ་བཟང་པོ་བདེན་པའི་དངོས། །རྣམ་པ་ལྔ་པོ་བསྒོམས་བྱས་ཏེ། །རང་ལྷག་ལྷ་ཡི་སྒྲུབ་ཐབས་བྱ། །དེ་བཞིན་དཀྱིལ་འཁོར་རྣམ་བཀོད་ལ། །མཆོད་བསྟོད་བདུད་རྩི་ལ་སོགས་པར། །རིམ་པ་འདི་ཡིས་བསྒོམ་བྱས་ན། །ཡན་ལག་དྲུག་གི་སྦྱོར་བར་འདོད། །ཅེས་ཡན་ལག་དྲུག་གི་ཆིངས་མཛད་དེ། དང་པོ་སངས་རྒྱས་ཀྱི་གནས་གཞལ་ཡས་ཁང་བསྐྱེད་པ། གཉིས་པ་དེར་མངོན་བྱང་ལྔ་ལས་རྒྱུ་རྡོར་འཛིན་བསྐྱེད་ཅིང་རྗེས་ཆགས་ཀྱི་ལྷའི་འཁོར་ལོ་སྤྲོ་བསྡུ་སོགས་ལྷ་རྫོགས་པར་བསྐྱེད་པ། གསུམ་པ་དབང་བསྐུར་རྒྱས་གདབ། བཞི་པ་བདུད་རྩི་མྱང་བ། ལྔ་པ་མཆོད་པ། དྲུག་པ་བསྟོད་པ་རྣམས་སུ་གསུངས་སོ། །དེའི་རྒྱུ་
མཚན་ཡང་རྒྱལ་བ་རིགས་དྲུག་གི་སྒོས་ཆོས་ཐ་དད་པའི་ཆ་ནས་ཡིན་ཏེ། མི་ཐུབ་ཟླ་བས། ཕོ་བྲང་སངས་རྒྱས་རྣམ་སྣང་མཛད། །དབང་ནི་མི་བསྐྱོད་དེ་བཞིན་གཤེགས། །བདུད་རྩི་མྱང་བ་འོད་དཔག་མེད། །བསྟོད་པ་རིན་ཆེན་འབྱུང་ལྡན་དཔལ། །མཆོད་པ་དོན་ཡོད་ཡང་དག་མཆོད། །རྗེས་ཆགས་རྡོ་རྗེ་སེམས་དཔའ་འོ། །ཞེས་གསུངས་པ་ལྟར་རོ། །ཐུན་མོང་གི་བཤད་རྒྱུད་རྡོ་རྗེ་འཕྲེང་བར། དང་པོ་སྦྱོར་བ་མདོར་བསྡུས་པས། །དེ་བཞིན་དཀྱིལ་འཁོར་རྒྱལ་པོ་མཆོག །ལས་ཀྱི་རྒྱལ་མཆོག་རྣལ་འབྱོར་མཆོག །ཅེས་དང་པོར་གཙོ་བོ་ཡབ་ཡུམ་བསྐྱེད་དེ་ཐབས་ཤེས་གཉིས་མེད་དུ་སྦྱོར་བས་དང་པོ་སྦྱོར་བ། དེའི་བྱང་སེམས་ལས་ལྷ་རྫོགས་པར་སྤྲོས་ཏེ་འཁོར་ལོ་ལ་དགོད་པ་དཀྱིལ་འཁོར་རྒྱལ་མཆོག །དེ་ནས་ཞིང་སྦྱོང་བ་སོགས་ཀྱི་མཛད་པ་སྟོན་པས་ལས་རྒྱལ་མཆོག་སྟེ་ཏིང་ངེ་འཛིན་གསུམ་གྱི་ཆིངས་མཛད་པ་འདི་ནི་ཕ་རྒྱུད་མ་རྒྱུད་གཉིས་ཀ་ལ་ཁྱད་མེད་དུ་གྲགས་ཆེ་ཞིང༌། ཡན་ལག་དྲུག་ཏུ་དབྱེ་བ་མ་རྒྱུད་ཀྱི་རང་སྐད་ཡིན་ལ། གཞན་རྣམས་ཕ་རྒྱུད་ཀྱི་བཤད་པ་གཙོ་ཆེའོ། །འོན་ཀྱང་རྒྱུད་རང་རང་གི་ཐ་སྙད་དང༌། ས་བཅད་ལེན་ཚུལ་མི་འདྲ་བ་ཙམ་མ་གཏོགས་དོན་གྱི་འགྲོས་ཕལ་ཆེར་མཚུངས་ཏེ། སྔགས་རིམ་ལས། རྣལ་འབྱོར་རྒྱུད་དང༌། མ་རྒྱུད་དང༌། ཐུན་མོང་གི་རྒྱུད་ནས་ཐ་སྙད་དེ་དག་དངོས་སུ་སྦྱར་བའི་དབང་དུ་བྱས་ཀྱི། བསྙེན་སྒྲུབ་བཞི་དང་ཡན་ལག་དྲུག་ལ་སོགས་པའི་དོན་རྣམས་ཕན་ཚུན་རྗེས་སུ་མི་འགྲོ་བ་ནི་མ་ཡིན་ནོ། །ཞེས་གསུངས་པའི་ཕྱིར། དཔེར་ན་སྐབས་སུ་བབས་པ་རིག་བྱེད་མའི་ཆོ་ག་འདི་ལ་ཡང་དེ་དག་
ཕལ་ཆེར་ཚང་སྟེ། བསྙེན་སྒྲུབ་ཡན་ལག་བཞི་ཡེ་ཤེས་ཞབས་ལུགས་ཀྱིས། དམ་ཚིག་པ་བསྐྱེད་པ། སྐྱེ་མཆེད་བྱིན་རླབས། སྐུ་གསུང་ཐུགས་བྱིན་རླབས། དབང་བསྐུར་རྒྱས་གདབ་བཞི་ལ་འདོད་པས་གཞན་གསུམ་ཚང་བ་གོ་སླ་ལ། སྐྱེ་མཆེད་བྱིན་རླབས་མངོན་རྟོགས་རྣམས་སུ་ཆེར་མི་འབྱུང་ཡང༌། གནས་གསུམ་བྱིན་རླབས་སུ་གནད་འདུས་པའི་དབང་དུ་བྱས་པ་ཆོ་ག་བསྡུས་པའི་ལུགས་ཡིན་ལ། རྒྱས་པར་བྱེད་ཚེ་ཀྱཻ་རྡོར་གྱི་ཆོ་ག་ལྟར། མཾ་ཌཾ་སཾ་རཾ་ཨཾ་ནཾ་རྣམས་ལས་གནས་སོ་སོར་གཏི་མུག་རྡོ་རྗེ་མ་ནས་བདག་མེད་མའི་བར་བསྐྱེད་པའམ། ལྷ་དེ་དག་གི་ངོ་བོའི་ཡིག་འབྲུ་བསམ་དགོས་ལ། འདིའི་གནས་གསུམ་གྱི་ཨོཾ་ཨཱཿ ཧཱུཾ་གསུམ་ཡང་ཡོངས་གྲགས་ཙམ་མ་ཡིན་པར་རིམ་པ་བཞིན་ས་འོག་སྤྱོད་མ་དང༌། ས་སྤྱོད་མ་དང༌། མཁའ་སྤྱོད་མའི་ངོ་བོར་བསམ་དགོས་སོ། །འཕགས་ལུགས་ཀྱི་དེ་བཞིའི་ཕྱི་མ་གསུམ་གའི་གནད་ཚང་བར་རྟོགས་སླ་ཡང༌། བསྙེན་པ་དངོས་ཟིན་གཙོ་བོ་ནི་ལྷག་མོས་འོད་གསལ་དུ་བསྡུས་པའི་དེ་བཞིན་ཉིད་ལས་བྱང་ཆུབ་པ་ལ་བཞེད་པས། དེ་ལུགས་འདིར་སྦྱར་དུ་མི་རུང་ཡང༌། མཐའ་གཅིག་ཏུ་དེ་ཇི་ལྟ་བ་བཞིན་བྱེད་མི་དགོས་ཏེ། སྔགས་རིམ་ལས། འདི་དང་བསྟུན་ནས་གཞུང་གཞན་ལ་སྦྱོར་ན་སྙིང་པོ་སྟོང་ཉིད་བསྒོམ་པ་ནས་གཞལ་ཡས་ཁང་གདན་བཅས་བསྐྱེད་པའི་བར་ནི་བསྙེན་པའི་ཡན་ལག་གོ །ཞེས་གསུངས་ཤིང་དེ་ནི་འདི་ལ་ཡང་ལེགས་པར་ཚང་ངོ༌། །དེར་མ་ཟད་རྡོ་རྗེ་སྙིང་འགྲེལ་དུ་རྩ་རྒྱུད་རྒྱས་པ་འབུམ་ལྔའི་ལུང་དྲངས་པ་ལས། ལུས་བསྐྱེད་པ་ནི་བསྙེན་པ་སྟེ། །སྲོག་ཞུགས་པ་ནི་སྒྲུབ་པ་ཡིན། །སྐྱེ་གཉིས་སོགས་པར་ཡང་སྐྱེས་ལ། །ཉེ་བའི་བསྙེན་པ་ཞེས་བྱར་བརྗོད། །
ཐབས་དང་ཤེས་རབ་སྙོམས་འཇུག་པ། །སྒྲུབ་ཆེན་པོ་སྟེ་ཐ་མ་འོ། །འདི་དག་བསྐྱེད་པའི་རིམ་པ་སྟེ། །ཞེས་བསྙེན་སྒྲུབ་ཡན་ལག་བཞི་གསུངས་པ་རྡོ་རྗེ་སྙིང་འགྲེལ་གྱི་དངོས་ཟིན་ལྟར་ན་རྒྱུ་རྡོ་རྗེ་འཛིན་པ་བསྐྱེད་པ། སྐྱེ་མཆེད་བྱིན་རླབས་སོགས་ལ་སྦྱོར་བ་ལྟར་སྣང་ཡང༌། བརྟག་གཉིས་ཀྱི་སྟོང་ཉིད་བྱང་ཆུབ་སོགས་བཞི་དང་མཚུངས་པར་བཀྲལ་པ་མང་བས་དཔྱད་དགོས་སོ། །འོ་ན་འདིར་རྩ་བའི་གཞུང་ལྟ་བུ་བརྟག་གཉིས་ཡིན་པས་དེའི་སྐབས་ནས་གསུངས་པའི་ཡན་ལག་བཞི་པོ་དེ་ཚང་ངམ་མ་ཚང་ཞེ་ན། དེ་བཞིའི་དངོས་ཟིན་ལ་ཡང་ལུགས་ཐ་དད་པ་མང་དུ་ཡོད་དེ། ས་སྐྱ་གོང་མ་རྣམས་ནི། སྟོང་ཉིད་བྱང་ཆུབ་ཅེས་པས་སྟོང་པའི་ངང་ལས་དམ་ཚིག་པ་བསྐྱེད་པ་དང༌། ས་བོན་བསྡུ་ཞེས་པས་སྐུ་གསུང་ཐུགས་བྱིན་རླབས་དང༌། གཟུགས་བརྙན་རྫོགས་ཞེས་པས་ཡེ་ཤེས་པ་གཞུག་པ་དང༌། ཡིག་འབྲུ་དགོད་ཅེས་པས་དབང་བསྐུར་རྒྱས་གདབ་བསྟན་པར་བཞེད། ཤཱནྟི་པ་སོགས་སྟོང་ཉིད་བསྒོམ་པ། ས་བོན་གསལ་འདེབས་པ། དེ་ལས་ལྷའི་སྐུ་སྐྱེད་པ། ཐུགས་ཀར་ཧཱུཾ་ཡིག་བསྒོམ་པ་བཞིར་འཆད་དོ། །རང་ལུགས་ནི་བརྟག་གཉིས་ལས། ཡང་ནི་སྟོང་པའི་བྱང་ཆུབ་སྟེ། །ཞེས་པས་ཡེ་ཤེས་ཀྱི་སའམ་སྟོང་ཉིད་བསྒོམ་པ་འཆི་བ་ཆོས་སྐུའི་ལམ་འཁྱེར་བསྟན། གཉིས་པ་ལ་ནི་ས་བོན་བསྡུ། །ཞེས་པས་ས་བོན་ལས་བྱང་ཆུབ་པས་བསྡུས་པའམ་མཚོན་ཏེ་མངོན་བྱང་ལྷག་མ་གསུམ་ཡང་བསྟན་ལ། ས་བོན་གཙོ་བོར་སྨོས་པས་བར་དོ་ལོངས་སྐུའི་ལམ་འཁྱེར་བསྟན། གསུམ་པ་ལ་ནི་གཟུགས་བརྙན་རྫོགས། །ཞེས་པས་སྐུ་རྫོགས་པ་ལས་བྱང་ཆུབ་པ་
བསྟན། བཞི་པ་ལ་ནི་ཡིག་འབྲུ་དགོད། །ཅེས་པས་སྐྱེ་མཆེད་དང་སྐུ་གསུང་ཐུགས་མཁའ་གསང་སོགས་བྱིན་རླབས་ཀྱི་ཡི་གེ་དགོད་པ་བསྟན་ལ། ལྷག་པར་ཉམས་ལེན་ཚང་བར་བྱེད་པའི་ཚེ་གནས་གསུམ་དང་ལྟེ་བའི་རྩ་འཁོར་གྱི་ཡི་གེ་བཞི་བསྒོམ་པ་ཡང་བསྟན་ཏེ། ཡན་ལག་བཞི་པོ་དེ་དག་འདི་ལ་ཚང་ངོ༌། །དེ་ལ་འདི་སྐད་ཅེས་གཉིས་པ་ས་བོན་བསྡུ་ཞེས་པ། ས་བོན་ལས་འོད་འཕྲོས། ཚུར་འདུས་པ་ལས་བསྐྱེད་པའི་དོན་ཡིན་ན་རུང་ཡང་མངོན་བྱང་ལྷག་མ་བསྡུ་བའི་དོན་ཡིན་ན་འདིར་ཟླ་ཉི་ས་བོན་ཐམས་ཅད་བསྐྱེད་པ་མ་གསུངས་པའི་ཕྱིར་དང༌། བཞི་པ་ཡི་གེ་དགོད་པ་རྡོ་རྗེ་དང་པདྨར་ཡི་གེ་འགོད་པ་ལ་གསུངས་ཤིང་དེ་འདི་ལ་མི་འགྲིག་པའི་ཕྱིར་སྙམ་ན། བཤད་པར་བྱ་སྟེ་ཡན་ལག་བཞི་པོ་འདི་ཆོ་ག་གསུམ་སྐྱེད་དང༌། མངོན་བྱང་ལྔ་སྐྱེད་གཉིས་ཀ་ལ་སྦྱར་དུ་རུང་བར་གསུངས་པས། ས་བོན་བསྡུ་ཞེས་པ་ལ་ཡང་འགྲེལ་ཚུལ་གཉིས་དགོས་ཏེ། དཀའ་འགྲེལ་པདྨ་ཅན་ལས། བསྡུས་པ་ནི་ཉེ་བར་བསྐྱེད་པ་བསྡུས་པ་སྟེ་ཧཱུཾ་ལ་སོགས་པ་ལས་སྐྱེས་པ་ཞེས་པའི་དོན་ཏོ། །ཡང་ན་ས་བོན་གྱིས་བསྡུས་པ་ནི་མངོན་པར་བྱང་ཆུབ་པ་བཞི་པའོ། །ཞེས་གསུངས་པའི་ཕྱིར་དང༌། རིག་བྱེད་མའི་ཆོ་ག་ཡང་དཔྱིས་ཕྱིན་པར་བྱེད་ན་ས་བོན་དང་ཕྱག་མཚན་སོགས་ཟུར་ཅུང་ཟད་མ་གཏོགས་གཞལ་ཡས་ཁང་དང༌། དེར་ཡེ་ཤེས་ལྔའམ་མངོན་བྱང་ལྔ་སྐྱེད་སོགས་ཀྱཻ་རྡོར་གྱི་མངོན་རྟོགས་ཇི་ལྟ་བ་བཞིན་བྱེད་དགོས་པའི་ཕྱིར། རྡོ་རྗེ་སྙིང་འགྲེལ་ལས། བསྲུང་བའི་འཁོར་ལོ་དང༌། གཞལ་ཡས་ཁང་དང༌། བདུན་པོ་སྦྱངས་པ་དང༌། ཡེ་ཤེས་ལྔས་བསྐྱེད་པ་རྣམས་སྔོན་དུ་ཀྱཻ་རྡོར་ཉིད་སྒྲུབ་པའི་དུས་སུ་ཇི་སྐད་བཤད་པ་
བཞིན་སྒྲུབ་པ་ལ་གནས་པ་ཡིན་ལ། འདིར་ནི་ལྷ་མོའི་ས་བོན་དང༌། མདོག་དང༌། ཕྱག་མཚན་དང༌། གནས་ཀྱི་གནད་ཙམ་ཞིག་བསྟན་པར་ཤེས་པར་བྱའོ། །ཞེས་པ་ནས་ཀྱཻ་རྡོ་རྗེ་བསྐྱེད་པའི་ས་བོན་ཧཱུཾ་ཡིག་ལ། དེ་བཞིན་དུ་བདག་མེད་མ་ལ་སོགས་པ་བསྐྱེད་པ་ཨཾ་གི་ཡི་གེ་ཡིན་ཏེ། འདིར་ནི་ཧྲཱིཿ ལས་བསྐྱེད་ཅིང་ཞལ་ནས་ཧྲཱིཿ འི་སྒྲ་སྒྲོག་པའི་བདག་ཉིད། ཅེས་སོགས་གསུངས་པའི་ཕྱིར་རོ། །མངོན་བྱང་ལྔ་སྐྱེད་བྱེད་ན་ཡང་ཟླ་ཉི་གཉིས་ཆར་དགོས་པའི་ངེས་པ་མེད་དེ། སྤྱིར་བརྟག་གཉིས་ལས། ཟླ་བ་མེ་ལོང་ཡེ་ཤེས་ལྡན། །བདུན་གྱི་བདུན་པ་མཉམ་ཉིད་ལྡན། །རང་ལྷའི་ས་བོན་ཕྱག་མཚན་ནི། །སོ་སོར་རྟོག་པར་བརྗོད་པར་བྱ། །ཐམས་ཅད་གཅིག་གྱུར་བྱ་ནན་ཏན། །རྫོགས་པ་ཆོས་དབྱིངས་དག་པ་སྟེ། །མཁས་པས་ཆོ་ག་གསུངས་པ་ཡིས། །རྣམ་པ་ལྔ་པོ་བསྒོམ་པ་ཉིད། །ཅེས་བདུན་པ་ཕྱི་མ་བདག་སྒྲར་སྦྱོར་བའམ། རྟ་བདུན་རེས་དྲངས་པའི་ཤིང་རྟ་བདུན་པ་ཞེས་ཉི་མ་ལ་བྱས་ནས་མངོན་བྱང་གཉིས་པ་བསྟན་པས་ཟླ་ཉི་གཉིས་ཀ་ཡོད་པ་མང་ཡང་། དེ་དང་ཟླ་ཉི་ཡང་དབྱངས་གསལ་ལས་བསྐྱེད་པ་སོགས་ནི་རྒྱས་པའི་ལུགས་ཡིན་ལ། མ་ཏངྒི་པས་མཛད་པའི་རིག་བྱེད་མའི་སྒྲུབ་ཐབས་སུ། བྷྲུཾ་གྱུར་གཞལ་ཡས་དབུས་སུ་ཆུ་སྐྱེས་དམར། །ཟླ་བ་ཉི་མས་བརྒྱན་པ་ལ། །ཞེས་གཞལ་ཡས་ཁང་དང་ཟླ་ཉི་ཐམས་ཅད་གསུངས་སོ། །ཨ་ཡིག་ཙམ་ལས་ཟླ་བ་གཅིག་པུ་བསྐྱེད་པ་བསྡུས་པའི་ལུགས་ཡིན་ཞིང༌། འདི་ཡང་རྒྱུད་ཀྱི་དགོངས་པ་ཡིན་ཏེ། འདི་དང་བདེ་མཆོག་ཐུན་མོང་གི་བཤད་རྒྱུད་ཁ་སྦྱོར་གྱི་བརྟག་པ་གསུམ་པ་ལས། ཟླ་བ་མེ་ལོང༌། ཞེས་པ་ནས། ལྔ་པོ་
བསྒོམ་པ་ཉིད། །ཅེས་པའི་བར་རྐང་པ་གཞན་རྣམས་བརྟག་གཉིས་ལྟར་ལ། བདུན་གྱི་ཞེས་སོགས་རྐང་པ་གཉིས་པའི་ཐད་དུ། དེ་བཞིན་མཉམ་ཉིད་ཡེ་ཤེས་ཉིད། །ཅེས་ཉི་མ་མ་བཤད་པར་ཟླ་བས་མེ་ལོང་ཡེ་ཤེས་མཚོན་པ་བཞིན་ཆ་གཅིག་གིས་མཉམ་ཉིད་ཡེ་ཤེས་ཀྱང་མཚོན་པར་གསུངས་སོ། །དེ་ཡང་ཟླ་བའི་ཁ་དོག་དཀར་བས་མེ་ལོང་ཡེ་ཤེས། དེ་ལ་ཧྲཱིཿ འི་མདངས་ཕོག་པའི་དམར་ཆས་མཉམ་ཉིད་ཡེ་ཤེས། ས་བོན་གྱིས་སོར་རྟོག་ཡེ་ཤེས། དེ་ལས་འོད་འཕྲོས། དོན་གཉིས་བྱས་ཚུར་འདུས་ཏེ་ཟླ་བ་དང་ས་བོན་གཅིག་ཏུ་འདྲེས་པས་བྱ་བ་ནན་ཏན་ནམ་བྱ་གྲུབ་ཡེ་ཤེས། དེ་ལས་ལྷའི་སྐུ་རྫོགས་པས་ཆོས་དབྱིངས་ཡེ་ཤེས་ལས་བྱང་ཆུབ་པ་ཡིན་ལ། མཁའ་སྤྱོད་མའི་རིམ་གཉིས་སྟག་ཕུ་རིན་པོ་ཆེའི་གསུང་ལས། འོད་ཟེར་སྤྲོ་བསྡུ་ནི་བྱ་གྲུབ་ཡེ་ཤེས་ལས་བྱང་ཆུབ་པ། ཐམས་ཅད་གཅིག་ཏུ་འདྲེས་པ་ལས་ལྷའི་སྐུར་རྫོགས་པར་བསྐྱེད་པ་ནི་ཆོས་དབྱིངས་ཡེ་ཤེས་ལས་བྱང་ཆུབ་པ་ཞེས་གསུངས་སོ། །སྤྱིར་ཟླ་ཉི་སོགས་ཀྱི་མངོན་བྱང་ལྔ་སྐྱེད་རྣལ་འབྱོར་རྒྱུད་ལ་ཡང་ཡོད་ཀྱང༌། འདིར་ཐབས་ཤེས་མཉམ་པར་སྦྱོར་བའི་བདེ་ཆེན་མཚོན་ནུས་པ་གལ་ཆེ་བས་དེ་བྱུང་ན་ཟླ་ཉི་གཉིས་ཀ་ཡོད་མེད་ལ་ཁྱད་མེད་དེ། བསྐྱེད་རིམ་འདོད་འཇོ་ལས། ཟླ་ཉི་གཉིས་དང༌། ཟླ་བ་དཀར་དམར་གཉིས་དང༌། ཟླ་བ་གཅིག་བྱེད་པའང་དཀར་ལ་དམར་བའི་མདངས་ཆགས་པར་དཔའ་བོ་རྡོ་རྗེས་བཤད་པ་ལྟར་བྱེད་ལ། ཞེས་པ་ནས། དགོས་པ་གལ་ཆེ་ཤོས་ནི་སྔར་བཤད་པ་ལྟར་རྫོགས་རིམ་གྱི་སྐབས་ཀྱི་བྱང་སེམས་དཀར་དམར་གྱི་འདུ་འཕྲོད་ལས། ངེས་དོན་གྱི་ཧེ་རུ་ཀ་ལྷན་སྐྱེས་ཀྱི་བདེ་ཆེན་འདྲེན་པ་ཡིན་པས། ཞེས་དང༌། སྦས་
དོན་ཀུན་གསལ་ལས། ཟླ་བ་གཅིག་ལས་མེད་ནའང་དཀར་ལ་དམར་བའི་མདངས་ཆགས་པ་བསྟན་པའི་དགོས་པ་ནི་ཁམས་དཀར་དམར་གྱི་འདུ་འཕྲོད་ལས་བདེ་ཆེན་སྐྱེད་པ་མཚོན་པའི་དོན་དུ་ཡིན་ནོ། །ཞེས་སོ། །འདིའི་སྒྲུབ་ཐབས་རྣམས་སུ་ཡང་ཟླ་ཉིའི་གདན་འགོད་ཚུལ་གཅིག་ཏུ་མ་ངེས་ཏེ། ཀླུ་སྒྲུབ། ཀུ་མ་ར་བོ་དྷི། ལྷན་སྐྱེས་སྒེག་པ་གསུམ་གྱི་སྒྲུབ་ཐབས་སུ་པད་ཟླ་ལ་ཧྲཱིཿ ལས་བསྐྱེད་པར་བཤད། ཀུ་རུ་ཀུལླེའི་རྟོགས་པ་རིམ་པ་ལྔ་པ། དྭགས་པོ་བཀྲ་ཤིས་རྣམ་རྒྱལ་གྱི་སྒྲུབ་ཐབས་སོགས་དུ་མར་པད་ཉི་ལ་ཧྲཱིཿ ལས་བསྐྱེད་པར་བཤད། ཌོམྦྷི་ཧེ་རུ་ཀས་སྟེང་འོག་བསྣོལ་ཏེ་ཉི་མའི་སྟེང་དུ་པདྨ་ལ་ཧྲཱིཿ ལས་ཨུཏྤལ་ཧྲཱིཿ ས་མཚན་པས་བསྐྱེད་པར་བཤད། རྗེ་བཙུན་གྲགས་པ་རྒྱལ་མཚན་དང་ཚར་ཆེན་གྱི་སྒྲུབ་ཐབས་སུ་པད་ཉི་རོ་གདན་ལ་ཧྲཱིཿ ལས་ཨུཏྤལ་ཧྲཱིཿ ས་མཚན་པས་བསྐྱེད་པར་བཤད། མ་ཏངྒི་པས་གཞལ་ཡས་ཁང་དུ་པད་ཟླ་ཉི་མའི་གདན་ལ་བསྐྱེད་པར་བཤད་པ་སོགས་ཤིན་ཏུ་མང་བ་ཐམས་ཅད་ཀྱང་བླ་མའི་མན་ངག་གིས་རྒྱུད་དོན་ལེགས་པར་ཕྱེ་བས་ཁུངས་ཐུབ་ཡིན་ཀྱང༌། འདིར་ལྷན་སྐྱེས་ཀྱི་གཞུང་ཉིད་གཙོ་བོར་བྱེད་དགོས་ལ། དེ་ཉིད་ལས། ནམ་མཁར་ཉི་མའི་དཀྱིལ་འཁོར་བལྟས་ལ། དེའི་དབུས་སུ་ཡི་གེ་ཧྲཱིཿ ལས་ཨུཏྤལ་དམར་པོའི་ལྟེ་བར་ཉི་མ་ལ་ས་བོན་དེ་ཉིད་དོ། །དེ་ལ་སྤྲོ་བ་དང་བསྡུ་བ་བྱས་ནས་དེ་ཉིད་དུ་རབ་ཏུ་བསྟིམས་ཏེ། དེ་ཡོངས་སུ་གྱུར་པ་ལས་ཞེས་གསུངས་ཤིང༌། འཕགས་པས་མཛད་པའི་སྒྲུབ་ཐབས་ཀྱི་དཔེ་དག་པ་རྣམས་ལས། དབུས་སུ་པདྨ་དམར་པོ་འདབ་མ་བརྒྱད་པའི་ལྟེ་བ་ལ་གནས་པའི་རོའི་གདན་གྱི་
སྙིང་གར་རཾ་ལས་ཉི་མའི་དཀྱིལ་འཁོར་གྱི་དབུས་སུ་ཧྲཱིཿ དམར་པོ་ལས་ཨུཏྤལ་དམར་པོའི་ལྟེ་བ་ལ་ཨ་ལས་ཟླ་བ་དམར་པོ་ཧྲཱིཿ ཡིག་གིས་མཚན་པ་དང་བཅས་པ་ལས་འོད་ཟེར་དུ་མ་འཕྲོས། ཞེས་སོགས་གསུངས་པ་འདིས་ལྷན་སྐྱེས་ཀྱི་སྒྲུབ་ཐབས་དེའི་དགོངས་པ་གསལ་བར་བྱས་པ་ཡིན་ཏེ། དེར་ཉི་མ་གཉིས་གསུངས་ཀྱང་འདིར་ཕྱི་མའི་དོད་དུ་ཟླ་བ་དམར་པོ་ཞེས་གསུངས་པ་ཡིན་ནོ། །དེ་ལྟར་ཟླ་བ་དམར་མདངས་ཅན་དུ་བྱེད་པ་ལ་དཔགས་ན་མངོན་བྱང་ལྔ་དང་སྦྱོར་བའི་ཚེ་ཧྲཱིཿ ལས་ཨུཏྤལ་བསྐྱེད་པ་མན་ཆད་མངོན་བྱང་དང་སྦྱོར་བ་མ་གཏོགས། འོག་གི་པདྨ་རོ་དང་ཉི་གདན་གསུམ་གང་དུ་བསྐྱེད་པའི་གཞི་ཡིན་པས་དེའི་སྟེང་དུ་འོད་ཟེར་སྤྲོ་བསྡུ་སོགས་ཀྱི་མཐར་ཟླ་བ་ས་བོན་ཕྱག་མཚན་གསུམ་གཅིག་ཏུ་འདྲེས་པ་ལས་ལྷའི་སྐུར་བཞེངས་ཏེ་འགོད་དགོས་པ་ཡིན་ནོ། །དེ་ལྟར་བྱས་ན་མཁས་གྲུབ་རྗེའི་བརྟག་གཉིས་རྣམ་བཤད་ལས། སྲུང་འཁོར་གྱི་དབུས་སུ་གཞལ་ཡས་ཁང་བསྐྱེད་པ་བདག་མེད་མ་ཇི་ལྟ་བར་བྱས་ནས་དེའི་དབུས་སུ་ཧྲཱིཿ ལས་པདྨ་དམར་པོ་དང་ཉི་མའི་སྟེང་དུ་མངོན་བྱང་ལྔ་ལས་བསྐྱེད་པར་བྱ་སྟེ། ཞེས་གསུངས་པ་ཡང་གཞལ་ཡས་ཁང་པད་ཉིའི་གདན་དང་བཅས་པ་ལྷ་སྐྱེད་པའི་གནས་སུ་བྱས་ནས་གདན་དེའི་སྟེང་དུ་སྐྱེད་པའི་དོན་ཡིན་པས། འདིའི་ཉི་མ་འོག་གི་ལྷའི་གདན་དུ་གོ་བར་བྱ་ཡི། རྒྱུ་གང་ལས་ལྷ་བསྐྱེད་པར་བྱ་བའི་གཞིའི་མངོན་བྱང་གི་གྲངས་སུ་ནམ་ཡང་འཁྲུལ་བར་མི་བྱའོ། །དེ་དག་གིས་དོགས་པ་དང་པོའི་ལན་འཕྲོས་དང་བཅས་པ་བཤད་ཟིན་ཏོ། །རྩ་བའི་དོགས་པ་གཉིས་པ་ཡི་གེ་འགོད་པ་ཡང་མཁའ་གསང་བྱིན་རླབས་ཀྱི་ཡི་གེ་ཁོ་ན་ལ་སྦྱོར་མི་དགོས་ཏེ། བསྡུས་རྒྱུད་ལས་ཀྱང་དང་པོ་སྟོང་ཉིད་བྱང་ཆུབ་སོགས་
བརྟག་གཉིས་ཇི་ལྟ་བ་བཞིན་གསུངས་ལ། དེའི་ཡི་གེ་འགོད་ཅེས་པའི་ཐད་ཀྱི་དྲི་མེད་འོད་ལས། དེ་ནས་རབ་མཆོག་རོ་ཡི་རིགས་རྣམས་དག་གི །ཞེས་པ་ཕུང་པོ་དྲུག་པོ་རྣམས་ཀྱི་མིག་ལ་སོགས་པ་རྣམས་ཀྱི་ཡི་གེ་འགོད་པ་སྟེ་གཟུགས་ལ་སོགས་པའི་ཡུལ་ལ་རབ་ཏུ་འཇུག་པའོ། །ཞེས་སྐྱེ་མཆེད་བྱིན་རླབས་ཀྱི་ཡི་གེ་ལ་གསུངས་པ་ལྟར། སྒྲུབ་ཐབས་མཚོ་སྐྱེས་ཀྱི་འགྲེལ་པ་ཛ་ལན་དྷ་རིས་མཛད་པར་ཡང་སྐྱེ་མཆེད་དང་སྐུ་གསུང་ཐུགས་བྱིན་རླབས་ཀྱི་ཡི་གེར་བཤད་ལ། པདྨའི་མྱུ་གུ་རྡོ་རྗེའི་བརྟག་གཉིས་འགྲེལ་པར། བསྙེན་པའི་ཉེ་བའི་སྒྲུབ་པའི་ཡན་ལག་དང༌། ཞེས་གསུངས་པ་བཞིན་བྷ་ཝ་བྷ་དྲ་སོགས་དུ་མས་བཤད་དོ། །དེས་ན་ལས་ཚོགས་ཀྱི་གཞིར་མངོན་རྟོགས་བསྒོམ་པ་ལ་ཡི་གེ་དེ་ཙམ་བྱས་པས་ཆོ་ག་ཆད་པར་མི་འགྲོ་བ་ཡིན་གྱི། འདིའི་རིམ་གཉིས་ལ་འབད་པ་ཆིག་དྲིལ་བྱས་ཏེ་མཆོག་སྒྲུབ་པའི་སྐབས་ཀྱི་སྨིན་བྱེད་བསྐྱེད་རིམ་ཡིན་ན་མཁའ་གསང་གི་ཡི་གེ་འགོད་པ་ཡང་ངེས་པར་ཡན་ལག་ཏུ་འོང་ངོ༌། །དེའི་ཚུལ་ནི་བརྟག་གཉིས་ལས་གསལ་བར་གསུངས་ཏེ། བརྟག་པ་ཕྱི་མའི་ལེའུ་གཉིས་པ་ལས། བདག་མེད་རྣལ་འབྱོར་ལྡན་པ་ཡིས། །ཕྱག་རྒྱ་ཉིད་ཅེས་ཇི་ལྟར་བརྗོད། །ཕྱག་རྒྱ་ཕྱག་རྒྱ་གཉིས་དག་གིས། །ཕྱག་རྒྱའི་དངོས་གྲུབ་ཇི་ལྟར་འགྱུར། །ཞེས་ལུགས་འདིར་ཕྱག་རྒྱ་ལ་བརྟེན་ནས་བདེ་ཆེན་སྐྱོང་བ་དངོས་གྲུབ་ཀྱི་རྩ་བར་བཤད་ན། བདག་མེད་མ་དང་རྡོ་རྗེ་ཕག་མོ་ཀུ་རུ་ཀུལླེ་སོགས་གཙོ་བོར་བྱས་པའི་ཚེ་རིག་མ་དང་སྦྱོར་བ་མེད་པས་དངོས་གྲུབ་མི་འགྲུབ་བོ་ཞེས་དོགས་པ་ཁོངས་ནས་བསླངས་ཏེ། ལན་དུ། བུད་མེད་གཟུགས་ནི་སྤངས་ནས་གཞན། །བཅོམ་ལྡན་འདས་ཀྱི་གཟུགས་སུ་བྱ། །
ནུ་མ་སྤངས་པ་བོ་ལར་འགྱུར། །ཀཀྐོ་ལ་དབུས་ཡང་དག་གནས། །འགྲམ་གཉིས་དྲིལ་བུ་ཉིད་དུ་འགྱུར། །ཟེའུ་འབྲུ་བོ་ལ་ཅན་དུ་འགྱུར། །ལྷག་མ་བདག་ཉིད་ཆེན་པོ་ཉིད། །དགའ་ཆེན་ཧེ་རུ་ཀ་ཡི་གཟུགས། །ཞེས་དཔའ་བོའི་སྐུར་བསྒོམ་དགོས་པ་དང༌། ཇི་ལྟར་བསྒོམ་པའི་ཚུལ་གསལ་བར་གསུངས་སོ། །ཁ་ཅིག་འདི་རྟེན་བུད་མེད་ཀྱིས་ལྷ་ཕོ་བསྒོམ་པའི་སྐབས་ཡིན་ཟེར་བ་མི་འཐད་དེ། དེ་ལྟར་ན་སྐྱེས་པས་ལྷ་མོ་བསྒོམ་པ་ལ་ཡང་དོགས་པ་གཅོད་དགོས་ལ། འདིའི་བུད་མེད་ཅེས་པ་བསྒོམ་རྒྱུའི་ལྷ་མོ་ལ་བྱེད་ཀྱི། སྒོམ་པ་པོ་ལ་མི་བྱེད་པའི་ཕྱིར་ཏེ། ཤཱནྟི་པའི་འགྲེལ་པ་ལས། བུད་མེད་ནི་བདག་མེད་མའོ། །ཞེས་གསུངས་སོ། །དེར་མ་ཟད་འདིའི་ཆོ་ག་འཕགས་པས་མཛད་པ་སོགས་ཁུངས་ཐུབ་དུ་མར། དཀར་མོ་རི་དྭགས་མཚན་མ་འཛིན། །ཞེས་པ་ནས། གཡུང་མོའི་སྐུ་ལ་འཁྱུད་པ་ཉིད། །ཅེས་པའི་བར་ལྷ་མོ་བརྒྱད་ཀྱིས་ཕྱི་ནང་གསང་བའི་མཆོད་པ་འབུལ་ཚུལ་ཀྱཻ་རྡོར་ལྟར་གསུངས་པས། དེ་འདྲའི་སྐབས་སུ་སྐད་ཅིག་དེ་ལ་ཡབ་ཀྱི་རྣམ་པར་བསམ་དགོས་པ་ལྟ་བུ་གསང་དབང་ཤེར་དབང་སོགས་ཀྱི་ཚེ་ཡང་དམིགས་བསལ་ཅན་མང་ངོ༌། །འོ་ན་མཁས་གྲུབ་རྗེའི་བརྟག་གཉིས་རྣམ་བཤད་དུ། འཁོར་གྱི་ལྷ་རྣམས་མཚན་བསྒྱུར་བ་དང༌། མཚན་གཉིས་པར་བྱེད་པར་འདོད་པ་སོགས་ཅ་ཅོ་དུ་མ་བསྒྲགས་སོ། །ཞེས་མཚན་མི་བསྒྱུར་བར་བཤད་པ་ཅི་ཞེ་ན། དེ་ན་བོད་སྔ་མ་མང་པོས་ཀྱཻ་རྡོར་ལྷ་དགུ་ལྟ་བུ་ལ་བསང་མཆོད་འབུལ་བའི་ཚེ་འཁོར་གྱི་ལྷ་མོ་བརྒྱད་མཚན་བསྒྱུར་བར་བཤད་པ་བཀག་སྟེ། གཙོ་འཁོར་ཐུགས་རྒྱུད་གཅིག་པས་གཙོ་བོ་དང་སྙོམས་འཇུག་བྱས་པ་ན་འཁོར་རྣམས་ཀྱང་དེས་ཚིམ་པར་འགྱུར་ཞེས་པ་ཡིན་ཞིང༌། འདིར་ལྷ་གཅིག་པུ་ལ་དེ་འདྲའི་
རྣམ་གཞག་བྱར་མེད་པས་བསྒྱུར་དགོས་པ་ལུང་དེ་ཉིད་ཀྱིས་གྲུབ་པ་ཡིན་ནོ། །དེ་ལྟར་ལྷ་མོ་བརྒྱད་ཀྱིས་མཆོད་པ་འདི་ནི་མ་རྒྱུད་ཀྱི་སྐབས་འདིར་ཤིན་ཏུ་གཙོ་ཆེ་སྟེ། གུར་ལས། རིག་མ་བརྒྱད་རྣམས་ཀྱིས་དབང་བསྐུར། །བདུད་རྩི་ཡང་ནི་མྱང་བྱ་ཞིང༌། །ལྷ་མོ་བརྒྱད་རྣམས་ཀྱིས་མཆོད་ཉིད། །འཁོར་ལོས་འདྲེན་པ་ལ་བསྟོད་བྱ། །ཞེས་སོ། །ཡན་ལག་ཕྱི་མ་འདི་བཞི་དང༌། དང་པོ་གནས་བསྐྱེད་པ། གཉིས་པ་དེར་མངོན་བྱང་ལྔ་ལས་དམ་ཚིག་པ་བསྐྱེད་ནས་ཡེ་ཤེས་པ་གཞུག་པ་བཅས་ཡན་ལག་དྲུག་གི་གནད་རྣམས་ཀྱང་འདི་ལ་ལེགས་པར་ཚང་བ་ནི་མངོན་རྟོགས་ཀློག་པ་ཙམ་གྱིས་ཤེས་པར་ནུས་སོ། །ཀརྨ་པ་ཀུན་དགའ་དོན་གྲུབ་ཀྱི་ཀྱཻ་རྡོར་བསྐྱེད་རིམ་དུ། སྒྲུབ་ཐབས་ཀྱི་ཆོ་གའི་དོན་ཚན་ཡན་ལག་དྲུག་བསྐྱེད་རིམ་གྱི་རྣམ་གཞག་དང་དོན་ཚན་དུ་ནོར་བར་མི་བྱའོ། །ཞེས་ཡན་ལག་དྲུག་གི་ཆིངས་མ་རྒྱུད་ལ་སྦྱར་བ་བཀག་ཅིང༌། ཡན་ལག་དྲུག་རིགས་དྲུག་ལ་སྦྱོར་ཚུལ་སྔགས་རིམ་གྱི་གསུང་ཟིན་ལ་ཡང་ཟུར་ཟ་བྱས་འདུག་ཀྱང༌། བླ་མེད་ཀྱི་སྒྲུབ་ཐབས་ཆེན་པོ་རྣམས་བསྐྱེད་རིམ་ལས་དོན་གཞན་ཞིག་ཏུ་གོ་བ་ནི་ནོར་བ་ཆེ་ཤོས་སོ། །གལ་ཏེ་སྔ་མ་རྣམས་ལ་དོགས་པ་མེད་ཀྱང་མཆོད་བསྟོད་སོགས་བསྐྱེད་རིམ་གྱི་ཡན་ལག་ཏུ་མི་འོང་སྙམ་པ་ཡིན་ན། དགྲ་ནག་ལས། མཆོད་དང་བསྟོད་པ་ཆེན་པོ་ནི། །རྣལ་འབྱོར་ཆེན་པོ་ཞེས་བྱ་འོ། །ཞེས་གསུངས་པས་རྣལ་འབྱོར་བཞིའི་ཆིངས་ཀྱང་བསྐྱེད་རིམ་གྱི་མ་ཡིན་པར་འགྱུར་རོ། །ཏིང་ངེ་འཛིན་གསུམ་ལ་ཡང༌། ཤཱནྟི་པ། བྷ་ཝ་བྷ་དྲ། ཉིན་མོ་འབྱུང་གནས་སོགས་ཀྱིས་དང་པོར་རང་ཉིད་སངས་རྒྱས་པ་དང༌། དེ་ནས་གཟུགས་སྐུར་བཞེངས་
པ་དང༌། ཕྱོགས་བཅུར་འགྲོ་དོན་མཛད་པའི་ཆོས་ལོངས་སྤྲུལ་གསུམ་དུ་བཞག་པ་རྣམས་ཚང་སླ་ཡང༌། རང་ལུགས་ཀྱིས་དཀྱིལ་འཁོར་རྒྱལ་མཆོག་དོད་ཐུབ་བརྩི་དགོས་ལ། དང་པོར་སྦྱོར་བ་དང༌། ལས་རྒྱལ་མཆོག་ནི་ལེགས་པར་ཚང༌། དེའི་ནང་ནས་ཀྱང་དང་པོ་སྦྱོར་བའི་སྐབས་ཀྱི་དམིགས་སྐོར་གཙོ་བོ་རྣམས་ནི་མར་སྦྱང་གཞི་དང་རྣམ་པ་མཐུན་པ། ཡར་འབྲས་བུ་དང་རྣམ་པ་མཐུན་པ། བར་གྱི་རྫོགས་རིམ་དང་རྣམ་པ་མཐུན་པ་གསུམ་གའི་གཞི་མཐུན་དུ་གྱུར་པས་སྨིན་བྱེད་གཙོ་བོ་ཡིན་ཏེ། སྔགས་རིམ་ལས། དང་པོ་སྦྱོར་བ་ཡན་ཆད་ལ་སྐུ་གསུམ་བསྐྱེད་ཆོག་རྒྱས་པར་ཡོད་པས་རང་གི་དོན་ཕུན་ཚོགས་སུ་གསུངས་ཏེ། བསྙེན་སྒྲུབ་ཡན་ལག་བཞིའི་དང་པོ་གསུམ་ཡང་དེར་བསྡུས་སོ། །ཞེས་གསུངས་པ་ལྟར་སྐུ་གསུམ་ལམ་འཁྱེར་ནི་བསྐྱེད་རིམ་པའི་ལམ་གྱི་སྲོག་ཡིན་ལ། རྒྱུ་དེ་ལ་བརྟེན་ནས་འབྲས་བུ་སྐུ་གསུམ་དངོས་གནས་འགྲུབ་པའི་ཚུལ་ནི་འདིར་བཤད་བྱའི་དོན་གྱི་ལུས་ཡིན་ནོ། །༈ གཉིས་པ་ཡན་ལག་གི་དོན་ལ་གསུམ། དང་པོ་སྦྱོར་བའི་ཏིང་ངེ་འཛིན་ལ་བརྟེན་ནས་རང་དོན་ཕུན་ཚོགས་སྐུ་གསུམ་མངོན་དུ་བྱས་ཚུལ། དཀྱིལ་འཁོར་རྒྱལ་མཆོག་གི་ཏིང་ངེ་འཛིན་ལ་བརྟེན་ནས་དཀྱིལ་འཁོར་གྱི་འཁོར་ལོ་སྤྲོ་ཞིང་སྡུད་པའི་བདག་པོར་གྱུར་ཚུལ། ལས་རྒྱལ་མཆོག་གི་ཏིང་ངེ་འཛིན་ལ་བརྟེན་ནས་ཞི་སོགས་རབ་འབྱམས་ལས་ཀྱི་དངོས་གྲུབ་ལ་དབང་འབྱོར་ཚུལ་ལོ། །དང་པོ་ལ་ཡང་ཆོས་སྐུ་མངོན་དུ་བྱས་ཚུལ། ལོངས་སྐུ་མངོན་དུ་བྱས་ཚུལ། སྤྲུལ་སྐུ་མངོན་དུ་བྱས་ཚུལ་གསུམ། དང་པོ་ནི། མཐའ་བྲལ་མཁའ་དབྱིངས་འདྲ་བའི་འོད་གསལ་ལས། །འོངས་པའི་གསལ་རྫོགས་དབྱིངས་སུ་དག་པ་ཡི། །སྐྱེ་འགག་
གནས་གསུམ་བྲལ་བའི་ཆོས་ཉིད་ལས། །ཞེས་བྱུང༌། དེ་ཡང་དབྱིངས་ཀྱི་སྐད་དོད་དྷ་ཏུ་ཞེས་པ་རྒྱུའམ་འབྱུང་ཁུངས་ལ་འཇུག་ཅིང༌། སེམས་ཀྱི་རང་བཞིན་འོད་གསལ་གྱི་དབྱིངས་དེ་ལས་བཅིངས་གྲོལ་ཐམས་ཅད་འབྱུང་བས། འདུས་པ་ཕྱི་མར་དེ་ཉིད་ལ་རང་བཞིན་གྱི་རྒྱུད་དམ་རྒྱུའི་རྒྱུད་དུ་གསུངས་སོ། །ཀུན་མཁྱེན་འཇམ་དབྱངས་བཞད་པའི་འཁོར་ཆེན་གྱི་སྨོན་ལམ་དུ་ཡང༌། ལྷན་སྐྱེས་བདེ་སྟོང་ཆོས་སྐུ་མཁའ་འདྲ་ལ། །ཞེས་ནམ་མཁས་ཐམས་ཅད་ལ་གོ་འབྱེད་པ་དང་དཔེ་དོན་འདྲ་བར་བཤད་པ་འདི་ཤིན་ཏུ་གནད་ཆེ་ལ། དེའི་ཕྱིར་འདི་ཉིད་དུ། མཁའ་དབྱིངས་འདྲ་བའི་འོད་གསལ་ལས་འོངས། ཞེས་པས་སྦྱང་གཞི་སྦྱོང་བྱེད་འབྲས་བུ་ཐམས་ཅད་གོ་ནུས་ཏེ། གཞི་ལ་འཆི་ཀའི་ཚེ་སྣང་མཆེད་ཐོབ་གསུམ་རིམ་གྱིས་ཤར་བའི་མཐར་ཉེར་ཐོབ་ཀྱི་དྲན་མེད་དེ་སངས་ནས་གཉིས་སྣང་རགས་པ་མཐའ་དག་དང་བྲལ་བ་སྟོན་གྱི་ནམ་མཁའ་ལ་སློད་བྱེད་ཀྱི་རྐྱེན་གང་ཡང་མེད་པ་དང་འདྲ་བའི་སྟོང་གསལ་ཤིན་ཏུ་དྭངས་པ་ཞིག་འབྱུང་བ་ལ་འཆི་བ་འོད་གསལ་ཞེས་ཟེར་ཞིང༌། དེ་ལས་སྣང་མཆེད་ཐོབ་གསུམ་ལུགས་ལྡོག་ཏུ་ཤར་ཏེ་སྲིད་པ་སྣ་ཚོགས་འཛིན་པས་འགྲོ་བ་རྣམས་ཀྱི་སྐྱེ་བ་ཡང་འཆི་བའི་འོད་གསལ་གྱི་སེམས་འདིའི་དབང་གིས་བྱུང་བ་ཡིན་ཏེ། རིམ་ལྔ་ལས། འགྲོ་ཀུན་རང་དབང་མེད་པ་སྟེ། །རང་དབང་དུ་ནི་བྱུང་མ་ཡིན། །དེ་ཡི་རྒྱུ་ནི་འོད་གསལ་ཏེ། །འོད་གསལ་ཐམས་ཅད་སྟོང་པ་འོ། །ཞེས་སོ། །ལམ་ལ་རྫོགས་རིམ་གྱི་ཚེ་གཞི་དུས་ཀྱི་འཆི་བ་འོད་གསལ་འཆར་བའི་རིམ་པ་ཇི་ལྟ་བ་བཞིན་ལམ་བསྒོམས་ནས་རླུང་ཐམས་ཅད་ཞུགས་
གནས་ཐིམ་གསུམ་བྱས་པ་ལས་འཆི་བ་འོད་གསལ་དང་རྣམ་པ་མཚུངས་པར་དངོས་གནས་སུ་སོང་བའི་ལམ་གྱི་འོད་གསལ་འགྲུབ་ལ། དེ་ནི་ཟུང་འཇུག་པའི་ལྷ་ཐམས་ཅད་གང་ལས་འོངས་པའི་གནས་ཡིན་ཏེ། མདོར་བྱས་ལས། འདི་ནི་དོན་དམ་དཀྱིལ་འཁོར་ཏེ། །སྣང་བ་མེད་ཅིང་མཚན་ཉིད་མེད། །དོན་དམ་བདེན་པ་ཞེས་བྱ་བ། །དེ་བཞིན་གཤེགས་པ་ཀུན་གྱི་གནས། །ཞེས་སོ། །བསྐྱེད་རིམ་གྱི་ཚེ་གཞི་དུས་ཀྱི་འཆི་བ་འོད་གསལ་དང་རྣམ་པ་མཚུངས་པར་དངོས་སུ་མ་སོང་ཡང་ཡིད་ངོར་མཚུངས་པ་དང༌། ཆོས་སྐུར་དངོས་སུ་བསྒྱུར་མི་ཐུབ་ཀྱང༌། ཐ་མལ་གྱི་འཆི་བའི་སྣང་ཞེན་མངོན་གྱུར་མགོ་མནན་ཏེ་ཆོས་སྐུར་མོས་པ་ལམ་བྱེད་ཀྱི་སྒོ་ནས་རྫོགས་རིམ་གྱི་སྨིན་བྱེད་དུ་འགྲོ་ལ། དེའི་མུ་ནས་སྔོན་གྱི་སྨོན་ལམ་དྲན་པར་བྱས་ཏེ་མོས་ངོར་གཟུགས་ཀྱི་སྐུར་ལྡང་དགོས་པས། བསྐྱེད་རིམ་པའི་ལོངས་སྤྲུལ་གཉིས་ཀྱང་འཆི་བ་ཆོས་སྐུའི་ལམ་འཁྱེར་འདི་ལས་འབྱུང་སྟེ། ཌོམྦྷི་ཧེ་རུ་ཀས། རང་བཞིན་སྟོང་པ་ཉིད་དུ་རྣམ་བསྒོམ་སྔོན་གྱི་ནི། །རྣལ་འབྱོར་པས་ནི་སྨོན་ལམ་རྗེས་སུ་དྲན་པར་བྱ། །ཞེས་དང༌། གྲུབ་ཆེན་མཚོ་སྐྱེས་ཀྱིས། ངོ་བོ་ཉིད་དང་བྲལ་བར་བསྒོམ་པར་བྱའོ། །དེ་ནས་སྔོན་གྱི་སྨོན་ལམ་རྗེས་སུ་དྲན་པ་ལས་ནམ་མཁར་རཾ། དེ་ལས་བྱུང་བའི་ཉི་མའི་དཀྱིལ་འཁོར། ཞེས་སོ། །འབྲས་བུའི་གནས་སྐབས་སུ་ཆོས་སྐུ་ལས་གཟུགས་སྐུར་ལྡང་བ་ཙམ་ཞིག་ནི། རྒྱུད་བླ་མར། ཆོས་ཀྱི་སྐུ་ལས་མ་གཡོས་པར། །སྤྲུལ་བའི་རང་བཞིན་སྣ་ཚོགས་ཀྱིས། །ཞེས་སོགས་མདོ་ཕྱོགས་ལ་ཡང་མང་མོད་ཀྱང༌། མདོ་ལུགས་ཀྱི་ཆོས་སྐུ་དེའི་རིགས་འདྲ་སྒྲུབ་ཚུལ་ནི། སྟོང་ཉིད་རིགས་པའི་
རྣམ་གྲངས་དུ་མས་གཏན་ལ་ཕབ། བྱམས་སྙིང་རྗེ་སོགས་ཀྱི་རྩིས་ཟིན་པར་བྱས་ཏེ་རྒྱུ་མང་པོ་ཞིག་སྒྲུབ་རྒྱུ་ཡོད་ཀྱང༌། ཆོས་སྐུ་སྤྲོས་པའི་མཚན་མ་གང་གིས་ཀྱང་མི་གཡོ་བར་འཁོར་བའི་ཕྱི་མཐའི་བར་བདེ་བ་ཆེན་པོའི་བདག་ཉིད་དུ་བཞུགས་ཀྱང༌། སྔོན་གྱི་སྨོན་ལམ་གྱི་དབང་གིས་གཟུགས་སྐུ་སྣ་ཚོགས་ཀྱི་རྣམ་པར་ འཆར་བ་དེ་དང་རྣམ་པ་མཐུན་པར་ཀུན་རྟོག་གི་རྒྱུ་བ་བཀག་སྟེ་འོད་གསལ་དུ་བཅུག་ནས་གཉུག་སེམས 
་བདེ་བ་ཆེན་པོའི་རང་བཞིན་དུ་བསྐྱེད་པ་དེ་ཉིད་ཀྱིས་ཆོས་དབྱིངས་ལ་མཉམ་པར་འཇོག་ཅིང༌། དེའི་གཟུང་རྣམ་ལྷའི་སྐུར་བསྒོམ་པ་མེད་པས། ཆོས་སྐུ་ལས་གཟུགས་སྐུར་ལྡང་བའི་ཐབས་རྣལ་མ་མ་ཚང་ངོ༌། །དེས་ན་ཕར་ཕྱིན་ཐེག་པ་ལ་རྒྱུ་ལམ་བྱེད་ཅེས་བཤད་ཅིང༌། སྔགས་བླ་མེད་ཀྱི་སྐབས་འདིར་སྐུ་གསུམ་གའི་ཉེ་རྒྱུ་མཐར་ཐུག་པའི་རྩ་བ་དེ་ཉིད་ནས་བཟུང་སྟེ་སློབ་པས་འབྲས་བུ་ལམ་བྱེད་ཅེས་གསུངས་ཏེ། ཀུན་མཁྱེན་འཇམ་དབྱངས་བཞད་པའི་གསུང་ལས་ཀྱང༌། སྔགས་བླ་མེད་ཀྱི་ལམ་འདིས་སྐུ་གསུམ་ལ་དམར་འཇུས་སུ་བྱེད་པ་ཡིན། ཞེས་གསུངས་སོ། །དེས་ན་འབྲས་དུས་ཀྱི་དག་པའི་རྟེན་བརྟེན་པ་ཐམས་ཅད་འོད་གསལ་གྱི་དབྱིངས་ལས་འོངས་པ་ནི། འདུས་པའི་ལེའུ་གསུམ་པ་ལས། ནམ་མཁའི་དབྱིངས་ཀྱི་དབུས་གནས་པར། །ཞེས་དང༌། གླེང་གཞིའི་སྐབས་སུ། རྡོ་རྗེ་བཙུན་མོའི་བྷ་ག་ལ་བཞུགས་སོ། །ཞེས་གསུངས་པ་ཐམས་ཅད་ཀྱིས་ངེས་དོན་ཆོས་སྐུ་བདེ་སྟོང་གི་ཡེ་ཤེས་ལས་ལྷའི་འཁོར་ལོ་སྤྲོ་བའི་དོན་དུ། མདོར་བྱས་དང༌། རྡོ་རྗེ་སེམས་དཔའི་སྒྲུབ་ཐབས། སྒྲོན་གསལ་སོགས་ཀྱིས་གསུངས་
ཤིང༌། ལྷའི་དབང་པོས་ཞུས་པ་ལས། ཨེ་ཝཾ་ཡིག་གཉིས་སྒྱུ་མ་ལ། །ཐམས་ཅད་མཁྱེན་པ་འདིར་བཞུགས་པས། །ཞེས་དང༌། གསང་བ་གྲུབ་པ་ལས། སྤྲོས་པ་མེད་ཅིང་དག་པ་ལས། །འདི་དག་ཐམས་ཅད་རྣམ་པར་སྤྲུལ། །ཞེས་གསུངས་པ་རྣམས་དོན་གཅིག་གོ །དེ་འདྲ་བའི་ཆོས་སྐུ་དེ་ཡང་རང་གི་རིགས་འདྲའི་རྫོགས་རིམ་ལས་འབྱུང་ལ། དེ་ཡང་བསྐྱེད་རིམ་གྱི་ཐོག་མ་ནས་སྟོང་ཉིད་བསྒོམ་པ་འདི་ལ་ལྟོས་པས། འདི་ནི་རྟོགས་པ་གོང་མ་ཐམས་ཅད་ཀྱི་རྨང་གཞི་ལྟ་བུ་ཡིན་ནོ། །དེ་ལྟར་ཡང་རིམ་ལྔ་ལས། འདིར་ནི་མང་དུ་བཤད་ཅི་དགོས། །རྡོ་རྗེ་ཐེག་པར་རྣལ་འབྱོར་པས། །དེ་ཉིད་གང་གང་དམིགས་བྱ་བ། །དེ་དེ་སྒྱུ་མ་ཁོ་ནར་གསུངས། །ཞེས་དང༌། བརྟག་གཉིས་གོང་དུ་དྲངས་པ་ལྟར་དང་པོར་སྟོང་ཉིད་བྱང་ཆུབ་གསུངས་ལ། སམྦྷུ་ཊ་ལས་ཀྱང༌། དེ་ནས་བསམ་གཏན་གནས་འདུག་ནས། །ཆོས་རྣམས་ཐམས་ཅད་བདག་མེད་པར། །ཡང་དག་རྗེས་སུ་བལྟ་བར་བྱ། །ཞེས་སོགས་ཤིན་ཏུ་མང་ངོ༌། །འོན་ཀྱང་ཚིག་གི་ན་ཡམ་ཙམ་མ་ཡིན་པར་ལྷའི་རྣལ་འབྱོར་ལ་ཡང་དག་པའི་ལྟ་བའི་འཛིན་ཚུལ་ཚང་བ་མེད་མི་རུང་ཡིན་ཚུལ་དཔྱིས་ཕྱིན་པར་མ་གོ་ན་བསྐྱེད་རིམ་གྱི་འགངས་མི་གཤོག་པས་ཅུང་ཟད་བཤད་ན། སྔོན་ཡང་མང་པོ་ཞིག་གིས་བསྐྱེད་རིམ་ནི་ལྷ་སྐུ་བཞིན་ལག་གི་རྣམ་པ་ལ་གསལ་སྣང་འདོན་བྱེད་ཙམ་མ་གཏོགས་སྟོང་ཉིད་ཀྱི་འཛིན་ཚུལ་མེད་ལ། འཁོར་བའི་རྩ་བ་བདག་འཛིན་ནི་རང་དང་འཛིན་སྟངས་འགལ་བའི་ལམ་གྱིས་སུན་འབྱིན་དགོས་པར་རིག་པའི་དབང་ཕྱུག་གིས་གསུངས་པ་ལྟར་ཡིན་པས། བསྐྱེད་རིམ་ནི་འཁོར་བ་ལས་གྲོལ་བའི་རྒྱུར་མི་འཐད་སྙམ་དུ་ལོག་པར་རྟོག་ཅིང་དེ་སྐད་སྨྲ་བ་མང་དུ་
བྱུང་ངོ༌། །སྤྱིར་རང་ལ་སྟོང་ཉིད་ཀྱི་འཛིན་སྟངས་མེད་ཀྱང་གྲོགས་སྟོབས་ཀྱིས་ཐར་པའི་རྒྱུར་འགྲོ་བ་སེམས་བསྐྱེད་ལྟ་བུ་མང་བས་ཁྱབ་པ་མ་ངེས་པའི་ལན་ཡང་བྱས་ཆོག་མོད། འོན་ཀྱང་དེ་ལ་ལམ་གྱི་གོ་བ་སྐྱེད་ཕུལ་ཆུང་བས་བདག་ཉིད་ཆེན་པོ་རྣམས་ཀྱིས་བསྐྱེད་རིམ་ལ་སྟོང་ཉིད་ཀྱི་འཛིན་ཚུལ་མེད་པ་རྟགས་མ་གྲུབ་པའི་ལན་མཛད་དེ། སློབ་དཔོན་ཡེ་ཤེས་ཞབས་ཀྱི་སྒྲུབ་ཐབས་ཀུན་བཟང་ལས། ཐ་མལ་རྣམ་རྟོག་རྒྱུན་ལས་གཞན་པ་ཡི། །སྲིད་པའི་སྡུག་བསྔལ་གཞན་ནི་ཡོད་མ་ཡིན། །དེ་དང་རྣམ་པ་འགལ་བར་གྱུར་པའི་སེམས། །འདི་ནི་མངོན་སུམ་ཉིད་དུ་རྟོགས་པར་འགྱུར། །ཟབ་ཅིང་རྒྱ་ཆེ་བ་ཡི་བདག་ཉིད་ཅན། །གང་ཡིན་དེར་ནི་ཀུན་རྟོག་སྣང་མི་འགྱུར། །ཞེས་རྐང་པ་དང་པོ་གཉིས་ཀྱིས་བདག་འཛིན་འཁོར་བའི་རྩ་བ་ཡིན་པ་དང༌། དེ་ནས་གཉིས་ཀྱིས་གཟུང་རྣམ་ལྷའི་སྐུར་བསྒོམ་པའི་བསྐྱེད་རིམ་གྱི་རྣལ་འབྱོར་དེས་ངེས་པ་སྟོང་ཉིད་ལ་དྲངས་ཡོད་པས་བདག་འཛིན་དང་འཛིན་སྟངས་འགལ་བར་གནས་ལ། འོན་ཀྱང་ཚུལ་དེ་འདྲ་ཕར་ཕྱིན་ཐེག་པ་བ་རྣམས་ཀྱི་བློར་མི་ཤོང་ཡང༌། སྔགས་ཀྱི་རྣལ་འབྱོར་པ་རང་གིས་ཉམས་མྱོང་གིས་མངོན་སུམ་དུ་འགྲུབ་ཚུལ་དང༌། རྐང་པ་ཕྱི་མ་གཉིས་ཀྱིས་དེའི་དཔེ་དང་རྒྱུ་མཚན་བསྟན་ཏེ། ཕར་ཕྱིན་ཐེག་པར་ཡང་མ་དག་པའི་སྣོད་བཅུད་བདེན་སྟོང་སྒྱུ་མ་ལྟ་བུའི་རྟེན་ཅིང་འབྲེལ་བར་འབྱུང་བ་བསྒོམ་ན་ཟབ་རྒྱས་གཉིས་ཀ་ཚོགས་པས་མཐའ་གཉིས་ཅིག་ཅར་དུ་སེལ་བ་ཞེས་ཟེར་ན་འདིར་རྒྱ་ཆེ་བ་ལྷའི་རྣལ་འབྱོར་གྱིས་དམིགས་ཡུལ་ཁྱད་པར་ཅན་དག་པའི་སྣོད་བཅུད་ལ་དམིགས་ཤིང༌། ཟབ་པ་སྟོང་ཉིད་ཀྱི་རྣམ་པར་
བསྒོམ་སྟེ་བློ་གཅིག་ལ་ཚོགས་གཉིས་ཅིག་ཅར་དུ་ཚང་བའི་ཐབས་མཁས་ཀྱི་ལམ་འདི་ལྟ་བུས་འཁོར་བ་ལས་གྲོལ་བ་ཅིའི་ཕྱིར་མི་འཐད་ཅེས་པའི་དོན་ནོ། །འདིའི་ཐ་མལ་ལ་རྣམ་རྟོག་ཅེས་པའི་དོན་སྔ་མ་ཁ་ཅིག །ལས་མཐའ་རྣམ་འབྱེད་ལས། མགོ་དང་རིན་ཆེན་སོགས་སྦྱིན་པས། །སྣང་བ་རྣམ་པར་མ་དག་ཕྱིར། །བྱང་ཆུབ་འབྲས་བུ་འཐོབ་མི་ནུས། །ཞེས་པ་དང་འདྲ་བར་ཐ་མལ་གྱི་སྣང་ཞེན་ལ་བྱེད་ཀྱང༌། རང་ལུགས་བདག་འཛིན་ལ་བྱེད་དེ། འདིའི་འགྲེལ་པ་ཐ་ག་ནས་མཛད་པ་ལས། ཐ་མལ་པའི་རྣམ་པར་རྟོག་པ་ནི། བདག་དང་བདག་གིར་རྣམ་པར་རྟོག་པའོ། །ཞེས་གསུངས་ལ། ཤཱནྟི་པས་ཀྱང་འདི་བདག་འཛིན་ལ་བྱས་ནས་སྲིད་པའི་རྩ་བར་འགྲོ་ཚུལ་སོགས་གསལ་བར་གསུངས་སོ། །གལ་ཏེ་ཐ་མལ་གྱི་སྣང་ཞེན་ལ་བྱས་ནས་དེ་ཉིད་འཁོར་བའི་རྩ་བར་འདོད་ན། ཉན་རང་གི་ལམ་གྱིས་འཁོར་བའི་རྩ་བ་སྤོང་མི་ནུས་པར་སྨྲ་དགོས་པས། སློབ་པའི་ཐེག་པས་ཆགས་ལ་སོགས། །སྤོང་བར་འགྱུར་བ་མིན་ཞེས་འཛིན། །ཞེས་པའི་རྩ་ལྟུང་གིས་གོས་པར་འགྱུར་རོ། །འདི་ཐུན་མོང་བའི་འཁོར་རྩའི་དབང་དུ་བྱས་པའོ། །དེ་ཡང་ལམ་འཁྱེར་དང་པོའི་སྐབས་འདིར་སྟོང་ཉིད་བསྒོམ་པ་ཙམ་མ་ཡིན་པར་དེ་དང་ཡེ་ཤེས་དབྱེར་མི་ཕྱེད་པའི་ཆོས་སྐུ་ལ་ང་རྒྱལ་འཇོག་པ་གལ་ཆེ་སྟེ། གཟུགས་སྐུའི་རྒྱུར་དེ་དང་རྣམ་པ་མཐུན་པ་དང་ང་རྒྱལ་འཇོག་པ་གཉིས་ཀ་དགོས་ན་ཆོས་སྐུ་ལ་ཡང་མཚུངས་པས་སོ། །འོན་ཏེ་གཟུགས་སྐུ་ནི་རང་གི་ཕུང་པོ་བསྟན་དུ་ཡོད་པ་འདིས་མཚོན་ཏེ་ང་རྒྱལ་འཛིན་པའི་དམིགས་པ་འཆར་བདེ་ལ། ཆོས་སྐུ་ལ་དེ་ལྟར་མི་ནུས་སྙམ་ན། དེ་ནི་ཐོག་མེད་ནས་གོམས་པའི་མ་དག་པའི་སྣང་ཞེན་གྱིས་བསླད་པའི་གཏམ་
ཡིན་པས། དེ་འདྲ་བ་དེས་གཟུགས་སྐུར་ང་རྒྱལ་བཞག་པར་རློམ་པའི་ཚེ་ཡང་ང་ཡི་བར་འཛིན་པའི་འཇིག་ལྟ་ནན་གྱིས་གསལ་བཏབ་སྟེ་བསྒོམ་པར་སྣང་ལ། ལས་ཉོན་གྱི་དབང་གིས་འཕྲལ་དུ་བླངས་པའི་ཟག་བཅས་ཀྱི་ཕུང་པོ་མི་རིང་བར་འདོར་དགོས་པ་འདི་ལ་ཡང་ངའོ་སྙམ་པ་སྐྱེ་ན། གསང་བ་གྲུབ་པ་ལས། ཇི་ལྟར་བུར་ཤིང་ཁུ་བ་དང༌། །ཏིལ་ལ་ཏིལ་མར་ཇི་ལྟ་བར། །དེ་བཞིན་ལུས་ལ་ཐམས་ཅད་དུ། །ཤེས་རབ་ཕ་རོལ་ཕྱིན་པ་གནས། །ཞེས་པ་ལྟར། ཐོག་མེད་ནས་སེམས་ཀྱི་རང་བཞིན་དུ་ཞུགས་པའི་ཆོས་ཀྱི་དབྱིངས་རྣམ་པ་ཐམས་ཅད་པ་དང་གཉུག་མའི་སེམས་རོ་གཅིག་ཏུ་ཞུགས་པ་འདི་ལ་ཅིའི་ཕྱིར་ངའོ་སྙམ་པ་མི་སྐྱེ། སྔ་མ་ལ་ངའོ་སྙམ་དུ་བཟུང་བས་འཁོར་བར་འཁྱམས་པ་ཡིན་ཞིང༌། ཕྱི་མ་ལ་ངའོ་སྙམ་དུ་ང་རྒྱལ་བཞག་ན་ཆོས་ཀྱི་སྐུར་འཕོ་བར་ནུས་སོ། །དེས་ན་སྤྱོད་འཇུག་ལས། གོམས་པ་ཡིས་ནི་གཞན་དག་གི །ཁུ་བ་ཁྲག་གི་ཐིགས་པ་ལ། །ང་འོ་ཞེས་ནི་ཤེས་པ་ལྟར། །དེ་བཞིན་གཞན་གྱི་ལུས་ལ་ཡང༌། །བདག་ཅེས་ཅི་ཡི་ཕྱིར་མི་རྟོག །བདག་གི་ལུས་ནི་གཞན་དག་ཏུའང༌། །བཞག་པ་དེ་ལྟར་དཀའ་བ་མེད། །ཅེས་གསུངས་པ་བཞིན་སྔར་ཕྱོགས་དེ་ལ་བློ་ཁ་མ་ཕྱོགས་པ་ཡིན་པས་གོམས་ན་ངེས་པར་བསྐྱེད་ནུས་སོ། །འདིར་ཡེ་ཤེས་ཀྱི་ས་ཞེས་སྟོང་ཉིད་བསྒོམ་པ་གཙོ་བོར་གསུངས་པས་བློའི་ཤུགས་སྐྱེད་ཚུལ་ཁྱད་པར་ཅུང་ཟད་རེ་ཡོད་ཀྱང༌། བསྐྱེད་རིམ་གྱི་ཐོག་མཐའ་བར་གསུམ་དུ་སྣང་ཕྱོགས་ལྷའི་འཁོར་ལོ་ཡན་ལག་དང་བཅས་པ་གང་བསྒོམ་
གྱི་སྐབས་སུ་སྟོང་ཉིད་ངེས་པར་བསྒོམས་ནས་དེའི་གཟུང་རྣམ་རྟེན་བརྟེན་པ་དེ་དང་དེར་མོས་དགོས་པས་སྟོང་ཉིད་བསྒོམ་པ་འདི་དང་པོ་སྦྱོར་བ་སོགས་ཏིང་ངེ་འཛིན་གསུམ་གའི་སྤྱི་འགྲོར་དཔལ་འབྲས་རྡོ་རྗེས་བཤད་དོ། །དོན་དེ་ལ་དགོངས་ཏེ་འདི་ཉིད་ལས་ཀྱང༌། འོངས་པའི་གསལ་རྫོགས་དབྱིངས་སུ་དག་པ་ཡི། །ཞེས་གསུངས་ཏེ། དེ་ཡང་གསལ་ཞེས་པ་རང་བཞིན་རྣམ་དག་གི་ཆ་སྟོང་ཉིད་ལ་རང་བཞིན་འོད་གསལ་ཞེས་པ་ལྟ་བུ་མདོ་སྔགས་གཉིས་ཀར་མང་ཞིང༌། ཁྱད་པར་དུ་གུར་ལས། དཔེར་ན་ཆུ་ནང་ཟླ་བ་ནི། །གྲོགས་དག་བདེན་མིན་རྫུན་པའང་མིན། །དེ་བཞིན་དཀྱིལ་འཁོར་འཁོར་ལོ་འདིར། །དྭངས་ཤིང་གསལ་བའི་རང་བཞིན་ནོ། །ཞེས་གསལ་བའི་དོན་སྟོང་ཉིད་ལ་བཤད་པ་མང་བས་དེ་དང༌། རྫོགས་པ་ལྷའི་འཁོར་ལོ་ཞེས་སྦྱར་དགོས་པའི་སྐབས་ཡོད་ཀྱང༌། འདི་གོང་དུ། མཐའ་བྲལ་མཁའ་དབྱིངས་འདྲ་བའི་འོད་གསལ་ལས། །འོངས། ཞེས་སྟོང་ཉིད་ཀྱི་ལྟ་བས་ཟིན་ཚུལ་སྨོས་ཟིན་པས་འདིར་དེའི་སྟོབས་ཀྱིས་རྣམ་པར་དག་རྒྱུའི་འོག་གི་ལྷའི་རྣལ་འབྱོར་རྣམས་ལ་གསལ་རྫོགས་གཉིས་ཀ་སྦྱོར་དགོས་སོ། །དེའི་ཚུལ་ནི་སྔགས་རིམ་ལས། ཐམས་ཅད་ལ་ཆ་མཉམ་དུ་བྱས་ནས་སྦྱངས་པ་ན་གསལ་སྣང་ཐམས་ཅད་ཕྱོགས་གཅིག་ཏུ་སྐྱེ་བ་དེ་ཉིད་སྟོབས་ཆེ་སྟེ། ཞེས་གསུངས་པ་བཞིན་ལྷའི་སྐུ་ལ་གསལ་སྣང་སྦྱོང་བ་ཡང་སྐུའི་ཆ་རེ་རེ་ཙམ་ལ་གསལ་སྣང་སྒྲུབ་པ་ལྟ་བུ་མ་ཡིན་པར་ཆ་མཉམ་དུ་རྟེན་བརྟེན་པ་ཡོངས་སུ་རྫོགས་པ་ལ་སྦྱང་དགོས་པས་གསལ་བ་དང་རྫོགས་པ་གཉིས་ཀ་སྨོས་སོ། །དབྱིངས་སུ་དག །ཅེས་པ་ནི་བསྐྱེད་རིམ་གྱི་སྐབས་འདིར་
དང་པོར་སྣོད་བཅུད་སྔ་མ་སྟོང་པ་དང་ཆོས་མཐུན་པར་ཐམས་ཅད་འོད་གསལ་དུ་བཅུག་ནས་ཡེ་ཤེས་ཀྱི་ས་བསྒོམ་ཞིང་འོག་གི་ཉམས་ལེན་ཐམས་ཅད་ཀྱང་སྟོང་ཉིད་ཀྱི་འཛིན་སྟངས་མ་ཤོར་བའི་སྒོ་ནས་བྱེད་པའི་དོན་ཡིན་ལ། དེ་ཉིད་གོམས་པར་བྱས་པ་ལས་རྫོགས་རིམ་གྱི་ཚེ་སྒྱུ་མའི་སྐུ་དྭངས་གསལ་འོད་ཀྱི་རང་བཞིན་ཅན། ཆ་ཤས་ཐམས་ཅད་ཡོངས་སུ་རྫོགས་པའི་གསལ་རྫོགས་དེ་ཉིད་རིལ་འཛིན་དང་རྗེས་གཞིག་གཉིས་པོ་རེ་རེ་ལ་ཡང་སྐུ་གསུང་ཐུགས་རྡོ་རྗེ་གསུམ་གསུམ་དུ་བསྒོམ་པའི་སྡུད་རིམ་གྱིས་ཡང་ཡང་འོད་གསལ་དུ་བཅུག་སྟེ་གོམས་པས་དེ་ཉིད་འོད་གསལ་དུ་དག་པ་ནི་རྫོགས་རིམ་ལ་ལྟོས་པའི་དབྱིངས་སུ་དག་ཚུལ་ཡིན་ནོ། །དེ་དག་གིས་རིམ་པ་བཞིན་དུ་བསྒྲུབས་པའི་ལག་རྗེས་མཐར་ཐུག་པ་བཅོམ་ལྡན་འདས་མ་འཕགས་མ་རིག་བྱེད་མའི་ཐུགས་རྒྱུད་ཀྱི་དག་པ་གཉིས་ལྡན་གྱི་དབྱིངས་དང་རྣམ་པ་ཐམས་ཅད་མཁྱེན་པའི་ཡེ་ཤེས་དབྱེར་མེད་པ་རང་དོན་ཕུན་ཚོགས་ཆོས་ཀྱི་སྐུ་ནི་འདིར་གང་གི་སྒོ་ནས་བསྟོད་པའི་འབྲས་བུའི་ཡོན་ཏན་དངོས་ཡིན་པས་དེ་ཉིད་སྟོན་པ་ལ། སྐྱེ་འགག་གནས་གསུམ་བྲལ་བའི་ཆོས་ཉིད་ལས། །ཞེས་བྱུང༌། དེ་ཡང་རྩ་ཤེས་ལས། འགག་པ་མེད་པ་སྐྱེ་མེད་པ། །ཞེས་སྟོང་ཉིད་སྤྲོས་པའི་མཐའ་བརྒྱད་དང་བྲལ་བར་གསུངས་པ་དང༌། མདོ་སྡེ་རྒྱན་ལས། སྐྱེ་དང་འཇིག་མེད་འབྲི་བར་མི་འགྱུར་ཏེ། །ཞེས་དོན་དམ་བདེན་པ་ཁྱད་ཆོས་ལྔ་ལྡན་དུ་གསུངས་པས་སྟོང་ཉིད་སྐྱེ་འགག་མེད་པར་གསུངས་པ་ཙམ་ལ་ཡང་ལམ་བསྒོམ་པ་འབྲས་བུ་དང་བཅས་ཤིང་འཁོར་བ་ལས་གྲོལ་དུ་རུང་
བ་སོགས་གོ་རྒྱུ་ཤིན་ཏུ་ཟབ་མོ་ཞིག་ཡོད་ལ། སངས་རྒྱས་སའི་རང་བཞིན་རྣམ་དག་གི་དབང་དུ་བྱས་ཏེ། རྒྱུད་བླ་མ་ལས། ཐོག་མ་དབུས་མཐའ་མེད་པ་ཡི། །རང་བཞིན་ཡིན་ཕྱིར་འདུ་མ་བྱས། །ཞེས་དང༌། སྲས་སྒྲ་གཅན་འཛིན་གྱིས་རང་གི་མ་གྲགས་འཛིན་མ་ལ་བསྟོད་པ་ལས། མ་སྐྱེས་མ་འགག་ནམ་མཁའི་ངོ་བོ་ཉིད། །ཅེས་གསུངས་པ་ལྟ་བུ་ཡོད་ཀྱང༌། འདིར་ཐེག་པ་ཆེན་པོའི་ལམ་ཐུན་མོང་དང་ཐུན་མོང་མ་ཡིན་པ་ལ་བརྟེན་ནས་བསྒྲུབ་པའི་རང་དོན་སྤངས་རྟོགས་ཀྱི་བྱང་ཆུབ་དེ་ནི་ཐེག་པ་གཞན་གྱི་བྱང་ཆུབ་ལས་ཁྱད་པར་དུ་འཕགས་པ་གོ་བའི་ཕྱིར་ཡིན་ནོ། །དེ་སྐད་དུ་ཡང་མངོན་རྟོགས་རྒྱན་ལས། ཚུ་རོལ་ཕ་རོལ་མཐའ་ལ་མིན། །དེ་དག་བར་ན་མི་གནས་པ། །ཞེས་མི་གནས་པའི་མྱང་འདས་བསྟན་པས། དེ་དང་འདི་གཉིས་དོན་གཅིག་སྟེ། སྐྱེ་བ་དང་བྲལ་ཞེས་ཚུ་རོལ་འཁོར་མཐའ་ལ་མི་གནས་པ་དང༌། འགག་པ་དང་བྲལ་ཞེས་ཕ་རོལ་ཞི་མཐའ་ལ་མི་གནས་པ་དང༌། གནས་པ་དང་བྲལ་ཞེས་དོན་དམ་བར་གྱི་མཐའ་ལ་མི་གནས་པ་བསྟན་ནོ། །དེ་ལྟར་སྦྱོར་བ་ཡང་ཤིན་ཏུ་འཐད་དེ། དང་པོ་སྐྱེ་བ་འཁོར་བ་ལ་སྦྱར་བ་ནི། རྒྱན་གྱི་ངེས་འབྱེད་ཆ་མཐུན་སྐབས་སུ། དེ་དག་སྐྱེ་མེད་ངེས་འབྱུང་མེད། །ཅེས་པའི་དོན་འཆད་པར། གསེར་ཕྲེང་ལས། སྐྱེ་བ་འཁོར་བ་དང༌། ངེས་འབྱུང་མྱང་འདས་ཀྱི་ཆོས། ཞེས་སྐྱེ་བ་འཁོར་བ་ལ་སྦྱར་ཞིང༌། དབུས་མཐའ་ལས་ཀྱང༌། ཡང་དག་མ་ཡིན་ཀུན་རྟོག་ནི། །སེམས་དང་སེམས་བྱུང་ཁམས་གསུམ་པ། །ཞེས་གཞན་དབང་གཙོ་བོར་ཁམས་གསུམ་གྱི་འཁོར་བས་བསྡུས་པར་བཤད་ཅིང༌། འཕགས་པ་ཆོས་ཀུན་འགྲོ་བའི་མདོ་སོགས་
ལས། སངས་རྒྱས་བཅོམ་ལྡན་འདས་ནི་འདུས་མ་བྱས་ཀྱིས་རབ་ཏུ་ཕྱེ་བར་གསུངས་པས། འདུས་བྱས་འཁོར་བ་ལ་སྦྱོར་བ་དོན་གྱིས་འགྲུབ་བོ། །ཞི་མཐའ་ཐེག་དམན་གྱི་མྱང་འདས་ལ་འགག་པའི་སྒྲས་བསྟན་པ་ནི། རྣམ་བཤད་རིགས་པ་ལས། མཐའ་ནི་ཟད་དང་མཇུག་ཆ་དང༌། །ཞེས་པ་ལྟར་རགས་པའི་སྡུག་ཀུན་ཟད་ཙམ་ལས་དོན་གཉིས་ཕུན་སུམ་ཚོགས་པའི་ཡོན་ཏན་གྱི་རྟེན་བྱེད་མི་ནུས་པས། ཟད་པ་དང་འགག་པ་ཙམ་གྱི་ཆ་ནས་བཏགས་ཏེ་མྱང་འདས་ཀྱི་ནང་ནས་དམན་པར་བཤད་པ་ཡིན་ལ། རྒྱུད་བླ་མར་ཡང༌། མེད་ཕྱིར་འཇིག་དང་བཅས་པའི་ཕྱིར། །ཞེས་མེད་པ་ཙམ་གྱི་མིང་གིས་བསྟན་ནོ། །གནས་པ་དང་བྲལ་ཞེས་པ་བར་གྱི་མཐའ་བདེན་གྲུབ་ཏུ་ལྟ་བ་ལ་མི་གནས་པ་ནི་གྲགས་ཆེ་ཞིང༌། སྡུད་པར་ཡང༌། དེ་ལྟར་བྱང་ཆུབ་སེམས་དཔའ་གནས་ལ་གནས་པ་མེད། །གནས་མེད་གནས་ཡིན་འདི་ནི་རྒྱལ་བས་གནས་པར་གསུངས། །ཞེས་པ་ལྟར་རོ། །དེ་ལ་ཕར་ཕྱིན་ཐེག་པའི་སྐབས་སུ་མི་རྟག་སྡུག་བསྔལ་སོགས་རྟོགས་པའི་བློ་དང༌། སྙིང་རྗེ་ཆེན་པོ་དང༌། བདེན་མེད་རྟོགས་པའི་ཤེས་རབ་གསུམ་གྱིས་མཐའ་དེ་གསུམ་འགོག་པར་གསུངས་ལ། སྔགས་ཀྱི་སྐབས་སུ་ཐོག་མར་ལམ་ཐུན་མོང་བས་རྒྱུད་སྦྱངས་ཏེ། ལམ་དེ་གསུམ་ཚང་བར་ཡོད་པའི་སྟེང་དུ་འཁོར་བར་འཁོར་བ་པོ་གཉུག་མའི་སེམས་རང་ཉིད་འགྲོ་བ་སྡུག་བསྔལ་ལས་སྐྱོབ་པའི་ཐབས་ལ་གང་འདོད་དུ་བསྒྱུར་ཐུབ་པའི་ངེས་དོན་གྱི་སྙིང་རྗེ་བདེ་བ་ཆེན་པོའི་ངོ་བོར་བསྐྱེད་དེ་གནས་ལུགས་དོན་དམ་པའི་བདེན་པ་དང་རོ་གཅིག་ཏུ་གྱུར་
པས་ཤེས་པ་སྐད་ཅིག་མ་གཅིག་ལ་མཐའ་དེ་གསུམ་ག་འགོག་པའི་ཟབ་གནད་མདོ་ལུགས་ལས་བརྒྱ་འགྱུར་གྱི་ལྷག་དང་བཅས་པར་ཡོད་དོ། །དེ་ལྟར་ན་ཕར་ཕྱིན་ཐེག་པར་འབྲས་བུ་མི་གནས་པའི་མྱང་འདས་སམ་རང་དོན་ཆོས་སྐུ་དངོས་སུ་བསྟན་ཀྱང་དེའི་རྒྱུ་ཆ་ཚང་བ་སྦས་པའི་ཚུལ་དུ་ཡོད་ལ། དེ་ཉིད་སྔགས་ལས་གསལ་བར་གསུངས་པ་བཞིན་ཉམས་སུ་བླངས་ནས་ཆོས་ཀྱི་སྐུ་མངོན་དུ་མཛད་དོ། །ཞེས་བསྟོད་པས་རྒྱུ་དང་འབྲས་བུའི་ཡོན་ཏན་ཐམས་ཅད་ལ་ཆོས་ཀྱི་རྗེས་སུ་འབྲང་བའི་དད་པ་བརྟན་པོ་རྙེད་པར་འགྱུར་རོ། །༈ གཉིས་པ་ལོངས་སྐུ་མངོན་དུ་བྱས་ཚུལ་ནི། ཆུ་ལས་ཆུ་བུར་ཚུལ་གྱིས་ཉེ་བར་མཚོན། །ཞེས་བྱུང་། འདི་ཡང་སྦྱང་གཞི་སྦྱོང་བྱེད་འབྲས་བུ་གསུམ་གྱི་སྒོ་ནས་ཤེས་དགོས་ལ། ཐོག་མར་སྦྱང་གཞིའི་ཁྱད་པར་ལེགས་པར་ཁོང་དུ་ཆུད་ན་དེས་ལམ་དང་འབྲས་བུའི་གནད་ཀྱང་རྟོགས་ནུས་ཏེ། སྡོམ་འབྱུང་གི་ལེའུ་གཉིས་པ་ལས། སྦྱང་གཞི་གསུམ་གསལ་བར་བསྟན་པའི་མཐར། སྲིད་པ་སྐྱེས་པའི་རིམ་ཤེས་པས། །རྫོགས་པའི་སངས་རྒྱས་ཐོབ་བྱའི་ཕྱིར། །འདི་ནི་ཕུང་པོ་ཡོངས་མཁྱེན་པའི། །དེ་ཉིད་གསུངས་པ་རྣམས་ཀྱིས་བཤད། །ཅེས་སྦྱང་གཞི་གོང་དུ་བཤད་པ་དེ་དང་མཐུན་པར་ལམ་བསྒོམས་ནས་སངས་རྒྱས་ཀྱི་གོ་འཕང་སྐུ་གསུམ་མངོན་དུ་བྱེད་དགོས་སོ་ཞེས་གསུངས་ཏེ། དེ་ལྟར་སྒོམ་བྱེད་ཀྱི་བསྐྱེད་རིམ་དངོས་ནི་ལེའུ་བཅུ་གསུམ་པར་གསུངས་སོ། །དེ་ཡང་གཞི་ལ་སྦྱར་ན་བར་དོའི་ལུས་ནི། རྡོ་རྗེ་ཕྲེང་བ་ལས། སྲིད་པ་བར་མར་གནས་པ་སྟེ། །ཇི་སྲིད་འཇིག་རྟེན་གྱིས་བརྟག་པ། །སེམས་ཀྱི་རླུང་གི་རྣམ་འཕྲུལ་
ལོ། །ཞེས་དང༌། དགོངས་པ་ལུང་སྟོན་ལས། དེ་རྣམས་རླུང་ལས་བྱུང་བ་སྟེ། །རླུང་ལས་སླར་ཡང་འགག་པ་ཡིན། །ཞེས་སོགས་དང༌། སྒོམ་སྡེ་ནམ་མཁའ་རྒྱལ་མཚན་གྱི་འཇིགས་བྱེད་བསྐྱེད་རིམ་ལས། གཞི་ལ་འཆི་བ་འོད་གསལ་གྱི་བཞོན་པར་གྱུར་པའི་རླུང་འོད་ཟེར་ལྔ་པས་ཉེར་ལེན་དང༌། དེའི་སེམས་ཀྱིས་ལྷན་ཅིག་བྱེད་རྐྱེན་བྱས་པ་ལ་བརྟེན་ནས་གང་དུ་སྐྱེ་འགྱུར་གྱི་བཞིན་ལག་གི་རྣམ་པ་ཅན་གྱི་བར་དོ་རླུང་གི་ལུས་ཅན་རྣམ་སྨིན་གྱི་ཕུང་པོ་རྙིང་པ་ལས་གོ་ས་ལོགས་སུ་ཕྱེ་ནས་དངོས་གནས་ལ་གྲུབ་པ་ཡིན་ལ། ཞེས་གསུངས་པ་ལྟར་བར་དོའི་ལུས་ནི་འབྱུང་ལུས་རགས་པ་འདི་ལྟ་བུ་མ་ཡིན་པར་རླུང་སེམས་ཙམ་གྱི་བདག་ཉིད་ཤིན་ཏུ་ཕྲ་བ་ཞིག་ཡིན་པ་དང༌། ཆུ་བུར་ཡང་ཆུའི་ནང་ནས་རླུང་གི་བྱེད་པས་ཐོལ་གྱིས་བྱུང་བ་ཤེལ་རྡོག་བཞིན་དུ་དྭངས་ཤིང་རླུང་གིས་བུས་པས་བཟུང་དུ་ཡོད་ཡོད་འདྲ་ཡང་སྟོང་པའི་དབུགས་ཙམ་ཞིག་ཡིན་པ་གཉིས་དཔེ་དོན་ཤིན་ཏུ་མཚུངས་སོ། །ལམ་གྱི་གནས་སྐབས་ལ། བརྟག་གཉིས་ལས། ཇི་ལྟར་སྒྱུ་མ་རྨི་ལམ་དང༌། །ཇི་ལྟར་བར་མའི་སྲིད་ཡིན་པ། །ཞེས་སོགས་ཀྱི་དོན་འཆད་པར། གུར་གྱི་ལེའུ་བཅུ་བཞི་པ་ལས། ཆུ་རྒྱུས་དྲ་བ་དང་བཅས་བཞིན། །ཡན་ལག་ཀུན་ལྡན་བུ་ག་ཅན། །ལུས་དེ་མེད་པར་སྣང་བར་འགྱུར། །དེ་ཡིས་སྐད་ཅིག་དེ་ཉིད་ལ། །དགྱེས་པ་རྡོ་རྗེའི་སྐུ་འཛིན་འགྱུར། །ཞེས་གཞིའི་འཆི་བ་འོད་གསལ་འགགས་ནས་ལུགས་ལྡོག་གི་ཉེར་ཐོབ་གྲུབ་མ་ཐག་སྲང་མདའི་མཐོ་དམན་བཞིན་དུ་འོད་གསལ་གྱི་རླུང་སེམས་ཙམ་ལས་བར་དོའི་ལུས་འགྲུབ་པ་དང་
འདྲ་བར་ལྷན་སྐྱེས་ཀྱི་བདེ་བ་ཆེན་པོའི་ཡེ་ཤེས་དཔེ་དང་དོན་གྱི་འོད་གསལ་འཆི་རིམ་བཞིན་མངོན་དུ་བྱས་ནས་དེ་ལས་ལུགས་ལྡོག་གི་ཉེར་ཐོབ་གྲུབ་པ་དང་མཉམ་དུ་རྨི་ལམ་གྱི་ལུས་དང་འདྲ་བར་རླུང་སེམས་ཙམ་ལས་གྲུབ་ཅིང་ཆུ་རྒྱུས་ཤ་ཁྲག་སོགས་བེམ་ཆོས་རགས་པ་མེད་ཀྱང་ཡོད་ཡོད་འདྲ་བར་དབང་པོ་ཀུན་ཚང་བ་དྭངས་ཤིང་གསལ་བའི་མེ་ལོང་ངོས་ཀྱི་གཟུགས་བརྙན་ལྟ་བུ་དག་མ་དག་གི་སྒྱུ་མའི་སྐུ་དངོས་གནས་ལ་བར་དོ་བཞིན་དུ་གྲུབ་པ་འབྱུང་ངོ༌། །བསྐྱེད་རིམ་གྱི་ཚེ་འོད་གསལ་འཆི་རིམ་བཞིན་འཆར་མི་ཐུབ་པས། དེ་ལས་ལྡང་བའི་སྒྱུ་མའི་སྐུ་བར་དོ་བཞིན་དངོས་གནས་སུ་འགྲུབ་མི་ནུས་ཀྱང་མོས་ངོར་དེ་བཞིན་དུ་བྱས་པས་གཞིའི་བར་དོ་སྦྱོང་བ་དང༌། ལམ་གྱི་བར་དོ་སྒྱུ་ལུས་འགྲུབ་པའི་སྨིན་བྱེད་དུ་འགྲོ་བ་དང༌། འབྲས་བུའི་སྒྱུ་མ་ལོངས་སྤྱོད་རྫོགས་པའི་སྐུ་འགྲུབ་པའི་བག་ཆགས་འཇོག་པས་ན་བར་དོ་ལོངས་སྐུའི་ལམ་འཁྱེར་ཞེས་བཤད་དོ། །དེ་ཡང་འདོད་འཇོ་ལས། བར་དོ་མཚོན་བྱེད་དུ་ཤིན་ཏུ་གསལ་བ་མངོན་བྱང་ལྔ་ལས་རྡོ་རྗེ་འཆང་བསྐྱེད་པ་མདོར་བྱས་སོགས་གསང་འདུས་འཕགས་ལུགས་ནས་གསལ་བར་གསུངས་ཀྱང༌། རྒྱུད་གཞན་བདེ་མཆོག་དང་ཀྱཻ་རྡོར་སོགས་ཀྱི་སྐོར་ནས་བར་དོ་མཚོན་པ་ཅུང་ཟད་མི་གསལ་བ་ཡི་གེས་མཚོན་པར་བཤད་ལ། ཞེས་གསུངས་པ་ལྟར་རྒྱུད་དང་གྲུབ་ཆེན་གྱི་ལུགས་མི་འདྲ་བ་སྣ་ཚོགས་ཤིག་ཡོད་དེ། འདུས་པ་འཕགས་ལུགས་དང༌། རྟོག་བདུན་སོགས་ཀྱིས་ལྷ་སྐུའི་རྣམ་པ་བསྒོམ་པར་གསུངས་པ་ནི། མཛོད་ལས། སྔོན་དུས་སྲིད་འབྱུང་ཤ་ཚུགས་ཅན། །དེ་ནི་འཆི་བའི་སྔོན་རོལ་ཏེ། །སྐྱེ་བའི་
སྐད་ཅིག་ཕན་ཆད་དོ། །རིགས་མཐུན་ལྷ་མིག་དག་པས་མཐོང༌། །ལས་ཀྱི་རྫུ་འཕྲུལ་ཤུགས་དང་ལྡན། །དབང་པོ་ཀུན་ཚང་ཐོགས་མེད་རྒྱུ། །ཞེས་གཞི་ལ་བཤད་པ་དང་དབྱིབས་མཐུན་པས་མཚོན་ཚུལ་གསལ་ཞིང༌། ཡེ་ཤེས་ཞབས་སོགས་དུ་མས་ཧོ་གཉིས་ཀྱི་བར་དུ་ཆུད་པའི་ཨོཾ་ཨཱཿ ཧཱུཾ་གསུམ་ལས་བསྐྱེད་པར་བཤད་ལ། མ་རྒྱུད་ལས་ཤས་ཆེར་ནཱ་ད་དང་ཡི་གེ་ཙམ་འཇོག་པར་གསུངས་པ་མང་སྟེ། སམ་ཌིར། འདི་ནི་ཨ་སོགས་གཟུགས་ཀྱིས་ནི། །སངས་རྒྱས་ཡོན་ཏན་འཇུག་པར་འགྱུར། །ཞེས་དང༌། མངོན་བརྗོད་ལས། སྙིང་གར་ཟླ་བའི་དཀྱིལ་འཁོར་ལ། །ས་བོན་གྱི་ནི་ཡི་གེ་མཾ། །སྔོན་གྲུབ་པ་ནི་རྗེས་སུ་བསམ། །ཞེས་བདེ་མཆོག་འཇམ་རྡོར་གྱི་སྐབས་སུ་གསུངས་ཤིང༌། སྔོན་གྲུབ་པ་ནི་རྒྱུ་རྡོ་རྗེ་འཛིན་པའམ་ལོངས་སྐུ་ལ་བྱའོ། །མངོན་བྱང་ལ་རྒྱུ་རྡོ་རྗེ་འཛིན་པ་ལྷ་སྐུ་མེད་པར་ཡི་གེ་ཙམ་བསྒོམ་པའི་ཚེ་ཡི་གེའི་སྐད་དོད་ཨཀྵ་ར་མི་འགྱུར་བ་སྟེ་ལུགས་གཞན་གྱི་ལྷ་ཡབ་ཡུམ་མཉམ་སྦྱོར་ལྟར་ཐིག་ལེ་འགྱུར་བ་མེད་པས་དེ་འགོག་བྱེད་མཁའ་གསང་གི་ཧཱུཾ་དང་ཕཊ་སོགས་འགོད་མི་དགོས་པའི་ཚུལ་དང་བཅས་ཤིན་ཏུ་གསལ་བར། བརྟག་གཉིས་ལས། ཡི་གེ་ལས་བྱུང་གོང་བུ་ལ། །ཧཱུཾ་ཕཊ་རྣམ་པའང་འདོད་མི་བྱ། །ཞེས་སོ། །ཡི་གེ་འགོད་པ་ལ་ཡང་བཤད་ཚུལ་མི་འདྲ་བ་མང་བ་ནི་རྒྱས་བསྡུས་ཙམ་ཡིན་གྱི། དོན་མི་འགལ་ཏེ་མན་ངག་སྙེ་མ་ལས། ཧོ་ཡིག་དམར་པོ་གཉིས་ཀྱི་ནང་དུ་ཆུད་པའི་ས་བོན་གྱི་ཡི་གེའི་གནས་སྐབས་སམ། ཡི་གེ་གསུམ་གྱི་གནས་སྐབས་སམ། ཁ་ཅིག་ཏུ་ནཱ་ད་ཙམ་སྟེ་
ཞེས་སོགས་གསུངས་པ་བཞིན་འདིར་ཡང་ཧྲཱིཿ ཡིག་ཙམ་ཞིག་བསྒོམ་པ་ཡིན་ལ། འདིར་རྒྱུ་རྡོ་རྗེ་འཛིན་པའི་དོད་རང་ལྷའི་ས་བོན་གྱི་ཡི་གེར་བྱེད་པའི་རྒྱུ་མཚན་ནི་ཞལ་ལུང་ལས། རིམ་པ་དང་པོ་བ་རྣམས་ལ། །ཡི་གེའི་གཟུགས་སུ་རང་སྣང་བ། །གཞོམ་དུ་མེད་པ་རང་ལྷ་ཡི། །ས་བོན་འོད་ཟེར་ལྔ་འཕྲོ་བ། །ཞེས་གསལ་བར་བསྟན་ཏེ། ཤིན་ཏུ་ཕྲ་བའི་རླུང་འོད་ཟེར་ལྔ་པ་ནི་གཞི་དུས་སུ་བར་དོའི་གདགས་གཞི་དང༌། ལམ་རྫོགས་རིམ་གྱི་དུས་སྒྱུ་མའི་སྐུའི་སྒྲུབ་གཞི་དང༌། འབྲས་བུའི་ཚེ་ལོངས་སྐུའི་སྒྲུབ་གཞི་ཡིན་པས་དེ་ཉིད་འདིར་ལྷའི་ས་བོན་གྱི་རྣམ་པར་བསྒོམས་ནས་རླུང་སྔགས་དབྱེར་མེད་དུ་བྱས་པས་སྔ་མ་སྦྱོང་ཞིང་ཕྱི་མ་སྨིན་པའི་གནད་མང་དུ་ཡོད་དོ། །དེ་ལྟར་ཡང་སྔགས་རིམ་ལས། སྔགས་ཀྱི་ཐེག་པར་རྟེན་དང་བརྟེན་པ་བསྐྱེད་པ་ཕལ་ཆེ་བའི་རྒྱུར་ཡི་གེ་རེ་བསྒོམ་པའི་གནད་ཀྱང་འདིས་ཤེས་པར་བྱའོ། །ཞེས་གསུངས་ཤིང༌། དོན་འདི་ཉིད་གསལ་བར་མཁས་གྲུབ་རྗེའི་ཡིག་ཆུང་ལས། འབྱུང་བ་རྣམས་དང་པོར་སྙིང་ག་ནས་ཆགས་ལ་མཐར་ཡང་སྙིང་གར་སྡུད་པ་དང་འདྲ་བར་ལམ་བསྐྱེད་རིམ་གྱི་སྐབས་སུ་སྙིང་གའི་ཏིང་ངེ་འཛིན་སེམས་དཔའ་ལ་སྤྲོ་བསྡུ་མང་དུ་བྱས་ཏེ། ཞེས་པ་ན། རྫོགས་རིམ་གྱི་སྐབས་སུ་བོགས་འདོན་ཚུལ་གཞན་དང་ཡེ་མི་འདྲ་བ་ལ་དགོངས་པ་ཡིན་ནོ། །ཞེས་གསུངས་སོ། །མདོར་ན་གཞི་ལམ་འབྲས་བུའི་ལོངས་སྐུ་གསུམ་ཆར་རྒྱུ་ཡང་ཕྲ་བའི་རླུང་ལས་གྲུབ་ཅིང༌། ངོ་བོ་ཡང་རླུང་གི་ལུས་ཅན་ཡིན་པར་གོ་བའི་ཕྱིར་འདི་ཉིད་དུ། ཆུ་ལས་ཆུ་བུར་ཚུལ་གྱིས། ཞེས་གསུངས་ཏེ། རིམ་ལྔ་གསལ་སྒྲོན་
ལས། སྟོང་པའི་ངང་ལས་ཐོལ་གྱིས་བཞེངས་པ་ནི་ཤིན་ཏུ་དྭངས་པའི་ཆུ་ལས་ཆུ་བུར་རྡོལ་བ་ལྟ་བུའོ། །ཞེས་དང་། རྗེ་བླ་མས། འཇིགས་བྱེད་ཀྱི་མངོན་རྟོགས་སུ་ཡང་རྒྱུ་རྡོ་རྗེ་འཛིན་པ་བསྐྱེད་པའི་སྐབས། ཆུ་ལས་ཆུ་བུར་གྱི་ཚུལ་དུ། ཞེས་གསུངས་པའི་དགོངས་པ་རྨ་མེད་པ་ཡིན་ཚུལ་ཁོ་བོས་ལེགས་བཤད་སྔ་ན་མེད་པ་ཡིན་ནོ། །ཉེ་བར་མཚོན་ཞེས་པའི་དོན་ནི། འདུས་པའི་རྩ་རྒྱུད་ལས། ཉེ་བར་སྒྲུབ་པ་གྲུབ་མཆོག་ལ། །ཞེས་དང༌། བརྟག་གཉིས་ལས། གཉིས་པ་ས་བོན་བསྡུ་བའོ། །ཞེས་པའི་ཐད་དུ་གྲུབ་ཆེན་མཚོ་སྐྱེས་ཀྱིས། བསྡུས་པ་ནི་ཉེ་བར་བསྐྱེད་པ་བསྡུས་པ་སྟེ། ཞེས་གསུངས་པ་རྣམས་དང་དོན་གཅིག་སྟེ། དངོས་གྲུབ་རྒྱ་མཚོ་ལས། ཉེར་སྒྲུབ་ཀྱི་སྒྲ་དོན་ནི། གང་ལ་ཉེ་བའི་ཡུལ་རླུང་སེམས་ཙམ་ལས་གྲུབ་པའི་ལོངས་སྤྱོད་རྫོགས་པའི་ཡེ་ཤེས་ཀྱི་སྐུ་ཡིན་ལ། ཞེས་པ་ལྟར་འདུས་པའི་ལུང་དེས་གྲུབ་པ་མཆོག་ལོངས་སྐུ་དང་ཉེ་བར་སྒྲུབ་པས་ན་ཉེར་སྒྲུབ་ཏུ་བཤད་པ་ཡིན་ལ། བརྟག་གཉིས་རྩ་འགྲེལ་གྱིས་ཀྱང་ལོངས་སྐུ་ཉེ་བར་སྐྱེད་བྱེད་ས་བོན་འགོད་པ་ཡན་ལག་གཉིས་པར་གསུངས་པ་བཞིན་ཡིན་ཏེ། འདིས་མཚོན་ཞེས་པ་ཡང་དཔེར་བྱེད་པ་ལྟ་བུ་མ་ཡིན་པར། རྣམ་ཐར་སྒོ་གསུམ་བཤད་པའི་ཚེ་རྒྱུ་ལ་མཚན་མར་བཤད་པ་དང༌། སྒྲུབ་བྱེད་ལ་རྒྱུ་མཚན་ཞེས་རྒྱུ་དང་མཚོན་བྱེད་རྣམ་གྲངས་སུ་སྨོས་པ་དུ་མ་ཡོད་པས། སྐབས་འདིར་ཉེ་བར་སྒྲུབ་པ་ལ་བྱས་ན་རྒྱུད་ཀྱི་དགོངས་པ་ལྟར་ཆོ་གའི་ཆིངས་ཀྱི་སྐབས་དོན་ལ་འབྱོར་ཞིང༌། སྔ་ཕྱིའི་གནད་
མང་དུ་རྟོགས་པར་འགྱུར་རོ། །དེ་ལྟར་ན་ཕ་རོལ་ཏུ་ཕྱིན་པ་ལ་འདིར་ཕྱིན་པ་དང་འདིས་ཕྱིན་པ་ཞེས་ལས་སྒྲུབ་དང་བྱེད་སྒྲུབ་ཀྱི་སྒྲས་བསྟན་པ་གཉིས་ཡོད་པར་གསུངས་པ་བཞིན། འདིར་ཡང་ཆ་གཉིས་སུ་ཕྱེ་སྟེ་གང་གིས་ཉེ་བར་སྒྲུབ་པ་རིམ་པ་དང་པོའི་སྐབས་ཀྱི་ལོངས་སྐུའི་ལམ་འཁྱེར་དང༌། དེའི་རྒྱུན་གོང་དུ་འཕེལ་ཏེ་སྣང་གསུམ་དག་པའི་འོད་གསལ་ལས་བཞེངས་པའི་སྒྱུ་མའི་སྐུ་གཉིས་ནི་ཐོབ་བྱེད་རྒྱུའི་ཡོན་ཏན་ཡིན་ལ། བཅོམ་ལྡན་འདས་མ་ཉིད་ཀྱིས་ཀྱང་སྔོན་དེ་ལྟར་བསླབ་པ་ལ་བརྟེན་ནས་ལོངས་སྤྱོད་རྫོགས་པའི་སྐུ་ཐ་མལ་པའི་མིག་གིས་མཐོང་བར་མི་ནུས་པ་དྭངས་གསལ་འོད་ཀྱི་རང་བཞིན་ཅན་ཡེ་ཤེས་ལྔའི་རང་མདངས་ཀྱི་འོད་ཟེར་ཁ་དོག་ལྔ་ལྡན་ནམ་མཁའི་མཐའ་ཁྱབ་ཀྱི་འཇིག་རྟེན་ཁམས་སུ་མུ་མཐའ་མེད་པར་སྤྲོ་བ་དེ་ལྟ་བུ་མངོན་དུ་མཛད་པ་ནི་གང་ཉེ་བར་སྒྲུབ་པ་སྟེ་འདིར་བསྟོད་པའི་ཡུལ་གྱི་གཙོ་བོ་ཡིན་ནོ། །༈ གསུམ་པ་སྤྲུལ་སྐུ་མངོན་དུ་བྱ་ཚུལ་ནི། ནང་གི་ཕག་མོ་ཞལ་གཅིག་ཕྱག་བཞི་མ། །ཞེས་པ་ནས། བགྱིད་པར་འགྱུར་ལ་མྱོང་ལྡན་ཐེ་ཚོམ་བྲལ། །ཞེས་བྱུང༌། དེ་ལ་ཐོག་མར་ཆོས་མཐུན་ཡུལ་གཞིའི་སྐྱེ་སྲིད་ལེན་ཚུལ་ནི། མངལ་འཇུག་གི་མདོ་ལས། ཕ་མ་ཆགས་པར་གྱུར་ཅིང་ཕྲད་པ་དང༌། མ་ཡང་རུང་བར་གྱུར་ཅིང་ཟླ་མཚན་དང་ལྡན་པ་དང༌། དྲི་ཟ་ཡང་ཉེ་བར་གནས་པར་གྱུར་ཅིང་འཇུག་པར་འདོད་ནའོ། །ཞེས་གསུངས་པ་མངོན་བྱང་ལྔ་སྐྱེད་རྒྱས་པའི་སྐབས་སུ་དོན་ཚན་གསུམ་དུ་བྱས་ནས་སོ་སོར་སྦྱར་བ་ཡིན་ཀྱང༌། བསྡུས་ན་བར་དོའི་རྣམ་ཤེས་གང་དུ་འཇུག་པའི་ཡུལ་ཕ་མའི་ཁམས་དཀར་དམར་འདུས་པ་དང༌། བར་དོ་བ་དེ་བདག་ཆད་ཀྱིས་དོགས་
ནས་སྐྱེ་གནས་སུ་འཇུག་འདོད་པ་གཉིས་སུ་འདུས་པས། དང་པོ་ནི་འདིར་ཟླ་བ་གཅིག་བྱེད་ཚེ་ཟླ་བ་དཀར་ལ་དམར་མདངས་ཆགས་པས་མེ་ལོང་ཡེ་ཤེས་དང་མཉམ་ཉིད་ཡེ་ཤེས་གཉིས་ལས་བྱང་ཆུབ་པ་མངོན་བྱང་དང་པོ་གཉིས་འདུས་པ་དེ་དང་འདྲ་ལ། ཕྱི་མ་ནི་རང་ཉིད་རྒྱུ་རྡོ་རྗེ་འཛིན་པའི་ངོ་བོ་ཧྲཱིཿ ཡིག་གི་རྣམ་པར་ནམ་མཁའ་ལ་གནས་པ་དེས་བདག་ཐ་མལ་པ་རྣམས་ཀྱིས་མཐོང་བར་མི་ནུས་པའི་སྒྱུ་མའི་ལུས་འདི་ཙམ་ལ་གནས་ནས་སེམས་ཅན་གྱི་དོན་བྱ་མི་ནུས་པས་རགས་པའི་སྤྲུལ་སྐུ་གཟུང་བར་བྱའོ་སྙམ་དུ་འཕེན་པ་གཏོང་བ་དང་འདྲའོ། །དེས་མཚོན་ཏེ་སོར་རྟོག་ཡེ་ཤེས་ལས་བྱང་ཆུབ་པ་ཧྲཱིཿ ཡིག་བསྒོམ་པ་ནི་མངལ་དུ་འཇུག་པ་པོའི་དྲི་ཟ་དང་། བྱ་སྒྲུབ་ཡེ་ཤེས་ལས་བྱང་ཆུབ་པ་འོད་ཟེར་སྤྲོ་བསྡུ་ནི་མངལ་གྱི་གནས་སྐབས་ལྔའི་ལུས་རིམ་གྱིས་གྲུབ་པ་དང་། རོ་གཅིག་ཏུ་འདྲེས་པ་ཆོས་དབྱིངས་ཡེ་ཤེས་ལས་བྱང་ཆུབ་པ་ནི་མངལ་གྱི་གནས་སྐབས་རྫོགས་ནས་ཕྱིར་བཙས་པ་དང་ཆོས་མཐུན་ནོ། །འོ་ན་རྒྱུ་རྡོ་རྗེ་འཛིན་པ་ཧྲཱིཿ ཡིག་བསྒོམ་པ་ལམ་འཁྱེར་གཉིས་པའི་སྐབས་སུ་སོང་ཟིན་པས་འདིར་ཟླ་བ་བསྐྱེད་པ་སོགས་མངོན་བྱང་གཉིས་ཀྱི་རྗེས་སུ་བཤད་པ་སྐབས་འཆོལ་བར་འགྱུར་རོ་སྙམ་ན་སྐྱོན་མེད་དེ། འདིར་ནི་ཟླ་བའི་སྟེང་དུ་འགོད་དགོས་པས་རྗེས་སུ་སྨོས་པ་བཤད་པའི་རིམ་པ་ཙམ་ཡིན་ཞིང༌། བསྒོམ་དོན་ལ་ཆོས་སྐུའི་ལམ་འཁྱེར་གྱི་འོད་གསལ་ལས་ལངས་མ་ཐག་རང་སེམས་ཧྲཱིཿ ཡིག་གི་རྣམ་པར་ནམ་མཁའ་ལ་བཞག་ནས་བློའི་ཟུར་གཅིག་གིས་གཟོད་སྲུང་བའི་འཁོར་ལོ་དང༌། པད་ཉིའི་གདན་དེའི་སྟེང་གི་ཟླ་བ་སོགས་གསལ་
བཏབ་སྟེ་གོང་དུ་བཤད་པའི་ཀུན་སློང་དང༌། ཐ་མལ་གྱི་བར་དོ་ནས་ལས་དབང་གིས་རགས་པའི་སྐྱེ་སྲིད་འཛིན་པ་དེ་སྦྱང་བར་བྱའོ་སྙམ་པ་ཟུང་འབྲེལ་གྱི་སྒོ་ནས་ངག་ཏུ་ཧྲཱིཿ ཞེས་བརྗོད་པ་དང་མཉམ་དུ་སངས་རྒྱས་ཡབ་ཡུམ་གྱི་བྱང་སེམས་དཀར་དམར་འདུས་པའི་ངོ་བོ་ཟླ་བ་དཀར་དམར་དེ་ལ་འཁོད་པར་བསམ་དགོས་པས་ཚིག་གི་བརྗོད་རིམ་སྔ་ཕྱི་ཙམ་གྱིས་དམིགས་པ་དེ་ཁོ་ན་ལྟར་བྱེད་དགོས་པའི་ངེས་པ་མེད་དེ། འདོད་འཇོ་ལས། རླུང་ནས་པདྨ་དང་སྣ་ཚོགས་རྡོ་རྗེའི་བར་དུ་བསྒོམ་པ་རྣམས་ལ་ནི་བར་དོ་དང་མཐུན་པར་བསྒོམ་པ་མེད་ལ། དེ་ཕྱིན་ཆད་ལ་བཞག་ཀྱང་དབང་པོ་ཤིན་ཏུ་རྣ་ོན་མ་གཏོགས། རྟོགས་པར་ཤིན་ཏུ་དཀའ་བ་དང༌། འཆི་སྲིད་རྫོགས་མ་ཐག་བར་སྲིད་འགྲུབ་པའི་སྦྱང་གཞི་དང་ཤིན་ཏུ་མཐུན་ལ། རྟོགས་པར་ཡང་ཅུང་སླ་བས། ལྭ་བའི་ན་བཟའ་ཅན་གྱིས་མཛད་པ་ལྟར་སྟོང་ཉིད་ལས་ལངས་མ་ཐག་ནཱ་ད་སོགས་ནམ་མཁར་འཇོག་པ་ནི་ཤིན་ཏུ་ལེགས་སོ། །ཞེས་ཟླ་བ་ཙམ་དུ་མ་ཟད་ཆོ་གའི་ཚིག་མང་པོ་བར་ན་ཡོད་ཀྱང་བསྒོམ་དོན་ལ་གོང་དུ་འབྱུང་བར་གསུངས་པ་བཞིན་ནོ། །འོན་ཀྱང་ཟླ་བའི་སྟེང་དུ་བབས་མ་ཐག་གཅིག་ཏུ་འདྲེས་པ་མ་ཡིན་པར་འོད་ཟེར་སྤྲོ་བསྡུས་དོན་གཉིས་བྱེད་པར་མོས་པའི་མཐར་གཅིག་ཏུ་འདྲེས་ནས་སྐུ་རྫོགས་པར་གསལ་འདེབས་དགོས་སོ། །དེ་ལྟར་གཞིའི་སྐྱེ་བ་འགྲུབ་ཚུལ་དང་མཐུན་པར་བསྒོམ་པའི་བསྐྱེད་རིམ་དེ་ལ་བརྟེན་ནས་རྫོགས་རིམ་གྱི་ཚེ་དག་མ་དག་གི་སྒྱུ་ལུས་པ་དེ་ཕྲ་བའི་ཡིད་ལུས་ཙམ་ལ་མི་གནས་པར་ཁམས་དཀར་དམར་འདུས་པའི་བདག་ཉིད་ཅན་གྱི་ཕུང་པོ་རྙིང་པ་ལ་ཞུགས་ནས་ལམ་ལྷག་མ་
བསྐྱེད་ཅིང་སེམས་ཅན་གྱི་དོན་བྱེད་པ་འབྱུང་ལ། དེ་གཉིས་རིམ་གྱིས་བསྒྲུབས་པས་མཐར་འབྲས་དུས་སུ་བདེ་སྟོང་དབྱེར་མེད་པའི་ཨེ་ཝཾ་ཆོས་འབྱུང་གཞལ་ཡས་ཁང་དང་བཅས་པའི་ནང་དུ་སྤྲུལ་བའི་སྐུའི་རྣམ་པར་བཞེངས་ནས་ཆོས་ཀྱི་འཁོར་ལོ་བསྐོར་བ་སོགས་གདུལ་བྱའི་དོན་མཛད་པར་འགྱུར་རོ། །དེ་ལྟ་བུའི་ཚུལ་གྱིས་སྐུ་གསུམ་མངོན་དུ་མཛད་དེ་སྔོན་གྱི་ཐུགས་བསྐྱེད་དང་སྨོན་ལམ་ལ་བརྟེན་ནས་མཐའ་ཡས་པའི་འཇིག་རྟེན་གྱི་ཁམས་སུ་གདུལ་བྱའི་སྐལ་བ་དང་འཚམ་པར་སྤྲུལ་བའི་བཀོད་པ་བྱེ་བ་ཐེར་འབུམ་གྲངས་མེད་པ་སོགས་སུ་ཤར་བ་ལས། འདིར་དབང་གི་ལྷ་མོའི་རྣམ་པར་བསྟན་པའི་སྐུའི་བཀོད་པ་འདི་ཉིད་ཀྱི་དབང་དུ་བྱས་ཏེ་བསྟོད་པ་ལ་གསུམ། སྐུ་སྤྱི་ཙམ་དང་འབྲེལ་བར་གདུལ་བྱ་དབང་དུ་བྱེད་ཚུལ་ལ་སྦྱར་ཏེ་བསྟོད་པ། ཕྱག་མཚན་སོ་སོའི་སྒོ་ནས་གདུལ་བྱ་དབང་དུ་བྱེད་ཚུལ་ལ་སྦྱར་ཏེ་བསྟོད་པ། མཚན་ཙམ་གྱིས་ཀྱང་གདུལ་བྱ་དབང་དུ་བྱེད་ཚུལ་ལ་སྦྱར་ཏེ་བསྟོད་པའོ། །དང་པོ་ནི། ནང་གི་ཕག་མོ་ཞལ་གཅིག་ཕྱག་བཞི་མ། །ལྡེམ་ཀྱོག་སྒེག་པའི་ཞི་འཛུམ་བཞིན་རས་ཀྱིས། །སྲིད་གསུམ་འདི་དག་ཡིད་ཀྱི་བརྟན་པ་ཡང༌། །ཅིག་ཅར་འཕྲོག་པའི་སྦྱོར་བས་རྣམ་པར་འགྱིངས། །ཞེས་བྱུང་། དེ་ལ་ཐོག་མ་ཁོ་ནར་འདི་སྙམ་དུ། ནང་གི་ཕག་མོ་ཞེས་པ་དེ། ཁ་སྦྱོར་ལས། རྒོད་མ་ཁ་ནི་མེ་ཡི་གཟུགས། །ཕག་མོ་ཏི་ལ་ཀ་ཞེས་བརྗོད། །ཅེས་ལྟེ་བའི་དམར་ཆ་གཏུམ་མོའི་མེ་ནི་ལུས་དཀྱིལ་གྱི་ཕག་མོ་སྒྲུབ་པའི་གཞི་ཡིན་པས་ནང་གི་ཕག་མོར་བཤད་པ་ལྟ་བུ་འདིར་འོང་དོན་མེད་པས་ཇི་ལྟར་ཡིན་ཞེ་ན། སྔགས་ཀྱི་སྐབས་འདིར་ཕྱི་ནང་ཞེས་
པ་རྒྱུད་ཀྱིས་བསྡུས་མ་བསྡུས་ཙམ་ལ་མི་བྱེད་པར་དམན་མཆོག་དང་གསང་མ་གསང་ལ་སྦྱོར་ཚུལ་སྣ་ཚོགས་ཤིག་ཡོད་དོ། །དཔེར་ན་བདེ་མཆོག་རྩ་རྒྱུད་ཀྱི། གསང་བ་མཆོག་གིས་དགྱེས་པ་ན། །ཞེས་སོགས་བསྐྱེད་རིམ་དང་སྦྱར་བ་ལ་ཕྱི་རྫོགས་རིམ་དང་སྦྱར་བ་ལ་ནང་གི་ཐ་སྙད་བྱས་ཏེ། དངོས་གྲུབ་སྙེ་མ་ལས། དེ་ལྟར་ན་ཕྱི་བསྐྱེད་རིམ་ལ་སྦྱར་ན་འབྱུང་བཞི་རིམ་བརྩེགས་དང༌། ནང་རྫོགས་རིམ་ལ་སྦྱར་ན་རྡོ་རྗེའི་ལུས་སྟོན་ཏེ། ཞེས་དང་། སྦས་དོན་ཀུན་གསལ་ལས། ནག་པོ་སྤྱོད་པས་ལུས་ཀྱི་དཀྱིལ་འཁོར་ལ་ཕྱི་ནང་གཉིས་བཤད་པས། ཞེས་རིམ་གཉིས་ལ་དམན་མཆོག་གི་ཆ་ནས་ཕྱི་ནང་དང་དྲང་ངེས་སུ་བཤད་པ་ལྟ་བུའོ། །གསང་མ་གསང་གི་ཆ་ནས་བཏགས་པ་ནི། ཕྱི་དང་གསང་བ་ཐེག་པ་གསུམ། །ཞེས་རྒྱུད་སྡེ་གོང་མ་གཉིས་ལ་རིག་འཛིན་གྱི་སྡོམ་པའི་བསྲུང་བྱ་མཐའ་ཡས་ཤིང༌། དེའི་སྣོད་རུང་གི་གདུལ་བྱ་ཆེས་དཀོན་པ་དང༌། ཁྱད་པར་དུ་བླ་མེད་ཀྱི་རྒྱུད་སྡེ་རྣམས་ལ་གྱ་ཚོམ་དུ་ཞུགས་ན་ཁེ་ལས་ཉེན་ཤིན་ཏུ་ཆེ་བས་མཐའ་དྲུག་དང་ཚུལ་བཞིའི་རྒྱས་བཏབ་བོ། །དེ་ལ་ལྟོས་ཏེ་བྱ་སྤྱོད་ཀྱི་སྣོད་རུང་མང་བས་དེའི་ལམ་རྣམས་ཁྱབ་གདལ་དུ་བསྟན་པས་ན་ཕྱི་ཞེས་གསུངས་ཤིང༌། དེའི་ཟླས་དྲངས་ན་གོང་མ་ལ་ནང་གི་ཐ་སྙད་ཀྱང་འཇུག་གོ །འཇིག་རྟེན་གྱི་གྲགས་པ་ལ་ཡང་རྒྱལ་པོའི་བློན་པོ་ཤིན་ཏུ་གཅེས་པ་ལ་ནང་གི་བློན་པོ་ཟེར་བ་བཞིན་ལྷ་མོ་རིག་བྱེད་མ་འདི་ཡང་དོན་གྱི་ངོ་བོ་རྡོ་རྗེ་ཕག་མོ་དང་བདག་མེད་མ་སོགས་སུ་གཅིག་ཀྱང༌། དེ་དག་རྒྱུད་ལས་ཤིན་ཏུ་གསལ་བར་བསྟན་ལ། འདི་ནི་གོང་འོག་ཏུ་ཐོར་བུ་རེ་ཙམ་བསྟན་ནས་ཤིན་ཏུ་སྦས་པར་མཛད་པའི་གཅེས་ནོར་ལྟ་བུ་ཡིན་པས་ནང་གི་ཕག་མོ་ཞེས་གསུངས་སོ། །
རྒྱུད་གོང་འོག་ལ་སྦས་མ་སྦས་ཀྱི་ཁྱད་པར་ཡོད་དུ་ཆུག་ཀྱང༌། རྡོ་རྗེ་ཕག་མོ་དང་རིག་བྱེད་མ་གཉིས་གང་ལས་བསྟན་པའི་རྒྱུད་དང་ལམ་རིམ་གཉིས་ལ་ཁྱད་པར་ཅུང་ཟད་ཀྱང་མེད་པས་དེ་འདྲའི་དབྱེ་བ་མི་རུང་སྙམ་ན། སྐྱོན་མེད་དེ། སྙིགས་མའི་གདུལ་བྱ་བསོད་ནམས་དམན་ཞིང་འདོད་ཐག་ཉེ་བ་རྣམས་ལམ་གྱི་ཡན་ལག་ཐམས་ཅད་དོར་ཏེ་ཐོག་མ་ནས་དབང་དང་མངོན་སྤྱོད་སོགས་ཀྱི་ལས་སྦྱོར་ཁོ་ནར་ཞུགས་ནས་ཚེ་འདིའི་ལག་ཆར་བྱས་ཏེ་ཆོས་བཟང་པོ་ཆུད་གཟོན་པ་འཇམ་དཔལ་རྩ་རྒྱུད་ལས། ཙ་ནཀྵ་ཡི་དགེ་སློང་བཞིན། །ཞེས་པའི་དཔེར་འགྲོ་བ་མང་བས་རྒྱལ་བ་རྡོ་རྗེ་འཆང་གིས་ཀྱང་འདི་འདྲའི་རིགས་ལ་དམ་དོགས་ཆེ་བར་མཛད་པ་རྗེས་འཇུག་རྣམས་ཀྱིས་ཤེས་དགོས་སོ། །ཞལ་གཅིག་ཕྱག་བཞི་མ་ཞེས་པ་རྟོགས་པར་སླ་ཞིང༌། འདིར་སྐུའི་རྣམ་པ་ཆ་ཚང་བ་རང་རང་གི་ཐུན་མོང་མ་ཡིན་པའི་དག་པ་དང་བཅས་ཏེ་བསམ་ན་སྐུའི་ཆ་ཤས་རེ་རེའི་དོན་སྤྱི་བློ་ལ་ཤར་བས་ཀྱང་མི་འགྱུར་བའི་དད་པ་སྐྱེ་ཞིང་འབྲས་བུ་ལམ་བྱེད་ཀྱི་དགོས་པ་མང་དུ་ཡོད་པའི་ཚུལ། བརྟག་གཉིས་ལས། མ་དག་པས་ནི་དུག་ཏུ་འགྲོ། །དག་པས་བདུད་རྩི་ལྟ་བུར་འགྱུར། །འཁོར་བའི་རྣམ་པ་ཧེ་རུ་ཀ། །འགྲོ་བ་སྒྲོལ་བའི་གཙོ་བོ་ཉིད། །གང་གི་གཟུགས་ཀྱི་འགྱུར་བ་ཉིད། །ཅེས་གསུངས་པ་ལྟར་ལྷའི་གཟུགས་ཀྱི་དག་པ་ཤེས་པ་གལ་ཆེ་བས་ཆ་ཚང་བར་བརྗོད་ན། ལྷན་སྐྱེས་རོལ་པའི་སྒྲུབ་ཐབས་ལས། པདྨ་དམར་པོ་འདབ་མ་བརྒྱད་པའི་དབུས་སུ་རོའི་སྙིང་གར་ཉི་མ་ལ་སྐྱིལ་ཀྲུང་བྱེད་པའི་གར་གྱིས་གནས་པ། ཉི་མའི་དཀྱིལ་འཁོར་ལྟ་བུའི་འོད་ཀོར་
ཅན། ཕྱོགས་མཚམས་རྣམས་སུ་དུར་ཁྲོར་བརྒྱད་ཀྱིས་བསྐོར་བ། སྐུ་མདོག་དམར་པོ་བརྒྱད་གཉིས་ལོན་མ། དབུ་སྐྲ་ཁམ་ནག་གྱེན་དུ་བརྫེས་པ། དབུ་ལ་རྒྱལ་བ་རིགས་ལྔའི་རང་བཞིན་གྱི་ཐོད་པ་ལྔ་འཛིན་པ། མི་མགོ་རློན་པའི་དོ་ཤལ་ཅན། ཞལ་མཆེ་བ་གཙིགས་ཤིང་ལྗགས་འདྲིལ་བ། དམར་ལ་ཟླུམ་པོའི་སྤྱན་གསུམ་གཡོན་དུ་གཡོ་བ། ཁྲོ་བ་དང་སྒེག་པའི་ཉམས་ཅན། མིའི་རུས་པའི་འཁོར་ལོ་དང༌། རྣ་རྒྱན་དང༌། མགུལ་རྒྱན་དང༌། གདུ་བུ་དང༌། སྐ་རགས་དང༌། དཔུང་རྒྱན་དང༌། ཞབས་གདུབ་ཀྱིས་བརྒྱན་པ། རྩ་བའི་ཕྱག་གཉིས་ཀྱིས་རྣ་བའི་དྲུང་དུ་ཨུཏྤལ་ལའི་མྱུ་གུ་ཅན་གྱི་མདའ་དང་མེ་ཏོག་དམར་པོའི་གཞུ་འགེངས་མ། ཕྱག་ལྷག་མ་དག་གིས་ཨུཏྤལ་དམར་པོའི་ཞགས་པ་དང་ལྕགས་ཀྱུ་བསྣམས་པ་བསམ་པར་བྱའོ། །ཞེས་གསུངས་པའི་སྟེང་ནས་བརྗོད་པར་བྱའོ། །དེ་ཡང་མངོན་བརྗོད་ལས། ཆགས་པའི་དངོས་པོ་ཁྱོད་མ་གྱུར། །ཞེས་པའི་དོན། རྗེ་བླ་མས། འདམ་གྱི་དབུས་སུ་སྐྱེས་པའི་པདྨ་བཞིན། །ཆགས་ལས་སྐྱེས་ཀྱང་ཆགས་པའི་སྐྱོན་མ་གོས། །ཞེས་པ་ལྟར་པད་གདན་གྱིས་སྲིད་པའི་སྐྱོན་གྱིས་མ་གོས་པ་མཚོན། རོ་གདན་ནི། འདོད་འཇོ་ལས། རོ་གདན་བཤད་པའི་ངེས་དོན་ཡང་དེ་ལྟར་ཡིན་པས་ལམ་འདིར་བདག་མེད་པའི་དེ་ཁོ་ན་ཉིད་གཏན་ལ་ཕབ་ནས་བསྒོམ་པ་གཅིག་ངེས་པར་དགོས་སོ། །ཞེས་དུར་ཁྲོད་ལ་ཞལ་འཕངས་མཛད་པ་བཞིན་སླར་འཆད་དོ། །ཉི་མ་ནི་སྤྱིར་ཤེས་རབ་ཀྱི་ཆ་ལ་སྦྱར་བ་མང་ཡང༌། འདིར་ས་ར་ཧས། བདེ་ཆེན་ཉི་མ་འབར་བས་རབ་སྨིན་པ། །ཞེས་དང༌། སྟག་ཕུ་རིན་པོ་ཆེའི་མཁའ་སྤྱོད་མའི་རིམ་གཉིས་ལས། ཉི་མའི་དྲོད་ཀྱིས་རྩི་ཤིང་ལོ་ཏོག་སྨིན་པ་ལྟར་སྒྲུབ་
པ་པོའི་རྒྱུད་ཀྱི་ཀུན་རྫོབ་བྱང་ཆུབ་ཀྱི་སེམས་ཀྱི་མྱུ་གུ་སྨིན་ཞིང་འཕེལ་བ་མཚོན། ཞེས་པ་ལྟར་རང་གཞན་སྨིན་པར་བྱེད་པའི་ཆ་ནས་ཐབས་ལྷན་སྐྱེས་ཀྱི་བདེ་བ་ཆེན་པོ་མཚོན་དགོས་པ་སྔ་མ་ཤེས་རབ་ལ་སྦྱར་ཟིན་པས་འོས་མེད་ཀྱི་རིགས་པས་འགྲུབ་བོ། །གདན་དེ་ལ་སྐྱིལ་ཀྲུང་ཕྱེད་པའི་གར་སྟབས་ཀྱི་ཚུལ་དུ་བཞུགས་པའི་ཞབས་གཉིས་ནི་བདེན་པ་གཉིས་མཚོན་པར་བྱས་པ་ལྟར་ན་བརྐྱངས་པས་ཀུན་རྫོབ་བདེན་པ་དང༌། བསྐུམས་པས་འོད་གསལ་དུ་སྡུད་པ་དོན་དམ་བདེན་པ་མཚོན་པས་མཐའ་གཉིས་སྤོང་བ་མཚོན་པར་ཡང་འགྲོའོ། །ལྭ་བ་པས་འགྲོ་བ་སྟོང་པ་ཉིད་ཀྱིས་སྡུད་པར་གསུངས་པའི་དོན། པྲཛྙཱ་རཀྵི་ཏས། འགྲོ་བ་ཐམས་ཅད་སྟོང་པ་ཉིད་ཀྱིས་གནོན་པའི་ཞེས་སྟོང་པ་ཉིད་གཅིག་པུ་ཞབས་ལ་ཐུན་མོང་དུ་སྦྱར་བ་ལྟར་ན་འོག་གི་ཐབས་ཤེས་ཀྱི་ཉམས་ལེན་ཐམས་ཅད་ལ་ལྟ་བས་རྒྱས་བཏབ་ནས་གནས་པ་མཚོན་ནོ། །ཉི་མའི་དཀྱིལ་འཁོར་ལྟ་བུའི་འོད་ཀོར་ཅན་ནི། བདེ་མཆོག་གི་མངོན་རྟོགས་སུ་ཤིན་ཏུ་དག་པའི་ཡེ་ཤེས་ཀྱི་སྣང་བ་དང་ལྡན་པས་ཉི་མའི་འོད་ཅན་གྱི་གཟི་བརྗིད་ཆེ་བ། ཞེས་རྡོ་རྗེ་ཕག་མོའི་ཐད་དུ་གསུངས་པ་ལྟར་ཡུམ་ནི་ཐབས་ཤེས་གཉིས་ཀྱི་ནང་ནས་ཤེས་རབ་ཀྱི་ཆ་ལ་འཇོག་དགོས་པས་གཙོ་བོར་ཤེས་རབ་ཀྱི་སྣང་བ་མཚོན་ལ། སྒྲོན་གསལ་ལས། སངས་རྒྱས་འབར་བའི་འོད་དང་མཉམ། །ཞེས་བྱ་བ་ནི་རང་གི་བདག་པོའི་སྐུ་མདོག་དང་འདྲ་བའོ། །ཞེས་ཁ་དོག་ལ་ཡང་འོད་དུ་བཤད་པའི་སྐབས་ཡོད་པས་རང་མདངས་ཀྱི་འོད་ཟེར་དམར་པོ་འཕྲོ་བ་ཡང་གོ་དགོས་སོ། །ཕྱོགས་མཚམས་རྣམས་སུ་དུར་ཁྲོད་བརྒྱད་ཀྱིས་
བསྐོར་ཞེས་པ་ནི། སྡོམ་འབྱུང་ལས། གཏུམ་དྲག་དེ་བཞིན་ཚང་ཚིང་དང༌། །ཞེས་སོགས་ལྟར་ཡིན་ལ་དེའི་བརྒྱད་ཚན་སོ་སོས་བདེན་པ་གཉིས་དང་རྩ་རླུང་ཐིག་ལེ། ལམ་ཐུན་མོང་བ་ཕྱིན་དྲུག་བསྡུ་བཞི། ཐུན་མོང་མ་ཡིན་པ་རིམ་གཉིས་མཆོག་ཐུན་གྱི་འབྲས་བུ་དང་བཅས་པ་མཚོན་ཚུལ་རྒྱས་པར་བཤད་དུ་ཡོད་ཀྱང་མ་སྤྲོས་སོ། །གཙོ་བོ་ནི་མན་སྙེ་ལས། ཇི་ལྟར་དུར་ཁྲོད་ན་རོ་རྣམས་བདག་མེད་པ་དེ་ལྟར་ཐམས་ཅད་ལའོ། །ཞེས་པས་བདག་མེད་པར་སེམས་ཅན་ཐམས་ཅད་གནས་པ་ནི་དུར་ཁྲོད་དེ། ཞེས་གསུངས་པ་ལྟར་གང་ཟག་དང་ཆོས་ཀྱི་བདག་ཏུ་འཛིན་པ་མ་ལུས་པ་དང་བྲལ་བ་མཚོན་ལ། དུར་ཁྲོད་ཀྱི་སྐད་དོད་ཤྭ་ས་ཏི་ལ་ཡི་གེ་བསྣན་པས་ཤྭ་བ་ནི་རོ་དང༌། བ་ས་ཏི་གནས་ཏེ་རོའི་གནས་དང༌། ཡང་སྒྲུབ་ཚུལ་གཅིག་གིས་ཤྨ་སཱ་ན་ཞེས་རོས་གནས་པའི་བྱ་བ་བྱེད་པར་གོ་ཞིང་གནས་པའི་བྱ་བ་སྤྱོད་ལམ་བཞི་དང་སྦྱོར་ཚུལ་སོགས་གཞན་དུ་གསལ་ལོ། །སྐུ་མདོག་དམར་བ་ནི་འདི་ཉིད་ཀྱི་བསྟོད་པ་ཌོམྦྷི་ཧེ་རུ་ཀས་མཛད་པ་ལས། སོ་སོར་རྟོགས་པས་འགྲོ་བའི་དོན་མཛད་པས། །དམར་བའི་འོད་འཕྲོ་ཉི་མ་སྟོང་གི་གཟི། །ཞེས་པ་ལྟར་སོར་རྟོག་ཡེ་ཤེས་ཀྱི་རང་མདངས་སུ་མཚོན་ཏེ་འདི་ནི་གཞལ་ཡས་ཁང་གི་ཕྱོགས་མདོག་དང་རིགས་ལྔའི་སྐབས་སོགས་ཀུན་ཏུ་གྲགས་ཆེའོ། །འཕགས་པ་རིན་པོ་ཆེས་མཛད་པའི་བསྟོད་པ་ལས། བརྩེ་བའི་རྗེས་ཆགས་པདྨ་རཱ་གའི་མདོག །ཅེས་པ་ལྟར་ན་འགྲོ་བ་ལ་རྗེས་སུ་ཆགས་པ་མཚོན་པའི་སྐུ་མདོག་དམར་བ་ཞེས་ཀྱང་བཤད་དགོས་སོ། །བརྒྱད་གཉིས་ལོན་མ་ཞེས་པ་ནི་ལྭ་བ་པའི་འགྲེལ་པ་ལས། སྤུ་ལྡང་བདེ་བ་བསྐྱེད་པ་
ཡི། །ཞེས་པ་ལྟར་བཅུ་དྲུག་ནི་ལང་ཚོ་གསར་པའི་བདེ་བ་ཤིན་ཏུ་རྒྱས་པའི་དུས་ཡིན་པས་དེ་དང་འདྲ་བར་ལྷན་སྐྱེས་ཀྱི་བདེ་བ་ཆེན་པོ་དགའ་བ་བཅུ་དྲུག་རྒྱས་པ་མཚོན། དབུ་སྐྲ་ཁམ་ནག་གྱེན་དུ་བརྫེས་པ་ནི་ཌོམ་བྷི་ཧེ་རུ་ཀས་འཕགས་མའི་ཞལ་གཟིགས་དུས་བསྟོད་པ་མཛད་པ་ལས། འཁོར་བ་ལས་གྲོལ་དབུ་སྐྲ་བརྫེས། །ཞེས་པ་ལྟར་འཁོར་བའི་འཆིང་བ་ལས་རིང་དུ་འདས་པ་མཚོན་པས་རྡོ་རྗེ་གྲུབ་པའི་འགྲེལ་པར་མྱ་ངན་ལས་འདས་པའི་གོ་འཕང་སྟོན་པ། ཞེས་བཤད་པ་དང་གཅིག་གོ །དབུ་ལ་རིགས་ལྔའི་རང་བཞིན་གྱི་ཐོད་པ་ལྔ་འཛིན་པ་ཞེས་པ་ནི། བརྟག་པ་དང་པོའི་ལེའུ་དྲུག་པ་ལས། སངས་རྒྱས་ལྔ་ཡི་ཐོད་པ་རྣམས། །རྣལ་འབྱོར་སྤྱོད་པས་རྣམ་པར་འཛིན། །ཐོད་པ་སོར་ལྔ་པ་ཡི་ཚད། །བྱས་པའི་ཅོད་པན་འཛིན་པར་བྱེད། །ཅེས་ཕུང་པོ་ལྔ་དག་སྟེ་རིགས་ལྔའི་གོ་འཕང་མངོན་དུ་བྱས་ལ། རིགས་ལྔ་པོ་རེ་རེ་ནས་ཀྱང་ཡེ་ཤེས་ལྔའི་བདག་ཉིད་ཅན་དུ་གནས་པ་མཚོན་པའམ། པྲཛྙཱ་རཀྵི་ཏའི་འགྲེལ་པར་བཤད་པ་བཞིན་ཐོད་པ་སྐམ་པོས་ཆོས་ཀྱི་དབྱིངས་དང༌། གྱེན་དུ་ལངས་པས་དེའི་ངང་ལས་བཞེངས་པར་སྟོན་ནོ། །མི་མགོ་རློན་པའི་དོ་ཤལ་ཅན་ཞེས་པ་ནི། རྣལ་འབྱོར་རོལ་པའི་དགའ་སྟོན་ལས། མགོ་འཕྲེང་ལྔ་བཅུ་ཨཱ་ལི་ཀཱ་ལི་ལྔ་བཅུ་དག་པར་བདེ་མཆོག་སོགས་ཀྱི་རྒྱ་གཞུང་དུ་མ་ལས་གསུངས་ལ། ཞེས་པ་ལྟར་དབྱངས་གསལ་ལྔ་བཅུའི་མིང་གིས་བསྟན་པའི་བྱང་སེམས་དཀར་དམར་འགྲོ་འོང་གི་འཕེལ་འགྲིབ་འགག་པ་མཚོན་ཞིང༌། ཡང་ན་ཌོམ་བྷི་ཧེ་རུ་ཀས། མི་དགེ་བཅུ་པོ་རྣམ་དག་དཔལ། །སྐུ་ལ་བརྒྱ་ཕྱེད་ཕྲེང་བས་
བརྒྱན། །ཞེས་པ་ལྟར་སྲོག་གཅོད་སོགས་མི་དགེ་བཅུ་དག་པར་སྟོན་པའི་ཕྱིར་བསད་མ་ཐག་པ་ལྟ་བུ་ཁྲག་འཛག་བཞིན་པའི་མགོ་འཕྲེང་འཕྱང་བ་ལ་བཤད་དུ་རུང་ངོ༌། །ཞལ་མཆེ་བ་གཙིགས་པ་ནི་འདོད་འཇོ་ལས། བདུད་བཞི་འཇོམས་པའི་མཆེ་བ་གཙིགས་ཤིང་འཇིགས་སུ་རུང་བའོ། །ཞེས་གསུངས་པ་ལྟར། ཕུང་པོ། ཉོན་མོངས། འཆི་བདག།།ལྷའི་བུའི་བདུད་བཞི་ལས་རྒྱལ་བ་ཡིན་ལ། བསོད་ནམས་ལྷུན་གྲུབ་ལེགས་པའི་འབྱུང་གནས་ཀྱི་རིག་བྱེད་མའི་བསྟོད་པར་ཡང༌། བདུད་བཞི་སྐྲག་མཛད་མཆེ་བ་ཅུང་ཟད་གཙིགས། །ཞེས་བཤད་དོ། །ལྗགས་འདྲིལ་བ་ནི། འདོད་འཇོ་ལས་ཟུར་དུ་མ་གསུངས་ཀྱང་སྔ་མའི་མཇུག་གི་འཇིགས་སུ་རུང་བ་ཞེས་པས་བསྟན་པ་ཡིན་ཏེ། ཞི་བ་ཡེ་ཤེས་ཀྱིས། ལྗགས་འདྲིལ་ཚེམས་ཆེན་གཙིགས་པ་ཁྲག་གིས་མྱོས། །ལྷ་དང་བཅས་པའི་འཇིག་རྟེན་ཞལ་དུ་གསོལ། །ཞེས་མཆེ་བ་གཙིགས་པས་ལྷའི་བུའི་བདུད་སོགས་གདུག་པ་ཅན་རྣམས་ཕྱེ་མར་འཐག་ཅིང༌། ལྗགས་འདྲིལ་བས་དེ་དག་གི་ཁྲག་རྣམས་བདེ་བ་ཆེན་པོའི་རང་བཞིན་དུ་མྱོང་ཞེས་གཉིས་ཀ་འབྲེལ་མར་གསུངས་པ་ལྟར་ཁྲག་དམར་ཆིལ་ཆིལ་གསོལ་བས་གདུག་པ་ཅན་རྣམས་འཇིགས་པར་བྱེད་པའི་དོན་ནོ། །དམར་ལ་ཟླུམ་པའི་སྤྱན་གསུམ་གཡོན་དུ་གཡོ་བ། ཞེས་པའི་ཟུར་དང་པོ་དམར་བ་ནི། བརྟག་གཉིས་ལས། སྙིང་རྗེའི་སྤྱན་ནི་དམར་བ་ལ། །ཞེས་པ་ལྟར་སྙིང་རྗེ་ཆེན་པོས་ལུས་ཅན་ཀུན་ལ་རྟག་ཏུ་གཟིགས་པ་མཚོན། ཟུར་གཉིས་པ་སྤྱན་གསུམ་དང་ལྡན་པ་ནི། འདོད་འཇོ་ལས། ཇི་སྙེད་པ་ཐམས་ཅད་གཟིགས་པ་ནི་སྤྱན་གསུམ། ཞེས་གསུངས་ཤིང༌།
ཌོམ་བྷི་ཧེ་རུ་ཀས། ཡོན་ཏན་རྒྱན་ལྡན་སྐུ་གསུང་ཐུགས། །དག་པའི་ཕྱིར་ན་སྤྱན་གསུམ་མོ། །ཞེས་གསུངས་པ་ནི། བརྟག་པ་དང་པོའི་ལེའུ་དགུ་པ་ལས། རྡོ་རྗེ་གསུམ་གྱི་དག་པའི་སྤྱན། །ཞེས་པའི་དགོངས་པ་རྨ་མེད་པ་ཡིན་ཞིང༌། དུས་གསུམ་མཁྱེན་པའི་སྤྱན་གསུམ་ཞེས་ཀྱང་བཤད་དོ། །ཟུར་ཕྱི་མ་གཡོན་དུ་གཡོ་བ་ནི། མ་རྒྱུད་ཀྱི་སྒོས་ཆོས་གཙོ་བོ་ཞིག་ཡིན་ཏེ། ཧེ་རུ་ཀ་མངོན་འབྱུང་ལས། དཔལ་ལྡན་ཁྲག་འཐུང་གཡོན་པས་སྤྱོད། །ཅེས་དང༌། བདེ་མཆོག་རྩ་རྒྱུད་ལས། རྣལ་འབྱོར་པ་རྟག་གཡོན་ནས་སྤྱོད། །ཅེས་བལྟ་རེག་འགྲོ་བ་སོགས་ཀྱི་ཀུན་སྤྱོད་ཐམས་ཅད་ལ་གཡོན་གཙོ་བོ་དང་ཐོག་མར་བྱ་བར་གསུངས་སོ། །དེས་ཇི་ལྟར་མཚོན་ཚུལ་ནི། རྣམ་སྣང་མངོན་བྱང་ལས། གསང་བའི་བདག་པོ་བྱང་ཆུབ་སེམས་དཔས་ཨ་ཡིག་ལ་གནས་པས་བྱ་བ་ཐམས་ཅད་བསྒྲུབ་པར་བྱའོ། །ཞེས་ཨའི་མཚོན་དོན་སྟོང་ཉིད་ལ་གནས་དགོས་པར་གསུངས་པ་བཞིན། མངོན་བརྗོད་ལས། གཡོན་པའི་སྤྱོད་པ་ཤེས་རབ་སྟེ། །གཡས་པ་དེ་བཞིན་ཐབས་ཡིན་ནོ། །ཞེས་པའི་ཤེས་རབ་ཀྱང་སྟོང་ཉིད་ལ་བྱས་ན་དག་མ་དག་གི་སྣོད་བཅུད་རྒྱུ་འབྲས་ཐམས་ཅད་དེའི་ངང་ལས་འགྲུབ་པར་འགྱུར་ཞིང༌། ཡུལ་ཅན་ཡེ་ཤེས་ཁྱད་པར་ཅན་ལ་བྱས་ན་དག་པའི་སྣོད་བཅུད་ཐམས་ཅད་དེ་ལས་འབྱུང་བ་ནི་སྐབས་འདིའི་མཚོན་དོན་ཡིན་ནོ། །སྣོད་བཅུད་མཐའ་དག་དེ་ལས་འབྱུང་བར་གསུངས་པ་ནི་གཡོན་པའི་ཀུན་སྤྱོད་བྱེད་པའི་རྒྱུ་མཚན་ཡང་ཡིན་ཏེ། རྡོ་རྗེ་མཁའ་འགྲོ་ལས། བརྟན་པ་དང་ནི་གཡོ་བ་ཡི། །འགྲོ་ཀུན་གཡོན་ལས་
བྱུང་བས་ན། །གཡོན་གྱིས་བཟའ་ཞིང་གཡོན་མཆོད་བྱ། །ཞེས་སོ། །ཁྲོ་བ་དང་སྒེག་པའི་ཉམས་ཅན་ཞེས་པ་ནི། བརྟག་གཉིས་ལས། སྒེག་ཅིང་དཔའ་བ་མི་སྡུག་པ། །རྒོད་ཅིང་དྲག་ཤུལ་འཇིགས་རུང་བ། །སྙིང་རྗེ་རྔམ་དང་ཞི་བ་ཡི། །གར་དགུའི་རོ་དང་ལྡན་པ་ཉིད། །ཅེས་ཉམས་དགུ་གསུངས་ཀྱང་ཞི་དྲག་གི་ཉམས་གཉིས་སུ་འདུ་བས། འདིར་ཁྲོ་བ་དང་སྒེག་པ་གཉིས་ཀྱིས་གཞན་རྣམས་བསྡུས་པ་ཡིན་ལ། མཚོན་ཚུལ་ནི། འདོད་འཇོ་ལས། རྣམ་སྣང་ལ་སོགས་པའི་རིགས་ལྔ། སྤྱན་མ་ལ་སོགས་པའི་ཡུམ་བཞིའི་རང་བཞིན་གྱི་ཞི་གནས་དང༌། ལྷག་མཐོང་གི་ཤིན་ཏུ་དག་པའི་ཉམས་དང་ལྡན་པས་སྒེག་པ་ལ་སོགས། ཞེས་པ་ལྟར་ཐུན་མོང་མ་ཡིན་པའི་ཞི་ལྷག་ཟུང་འབྲེལ་གྱི་མཐུས་ཕུང་ཁམས་ཐམས་ཅད་སྦྱངས་པས་གཟུགས་སྐུ་གང་འདོད་དུ་བསྒྱུར་བ་མཚོན། དེ་ཡང་གར་གྱི་ཉམས་སོ་སོའི་ཁྱད་པར་ནི། ཁ་ཆེའི་རིན་ཆེན་རྡོ་རྗེའི་བདེ་མཆོག་གི་གཞུང་ལས། དབང་ཕྱུག་ཆེན་པོ་སྒེག་པའི་ཉམས་བཅོམ་ནས། །གཉིས་མེད་ཡུམ་ལ་འཁྱུད་ནས་འགྱིངས་བག་བཞུགས། །གཞོན་ནུ་གདོང་དྲུག་དཔའ་བའི་ཉམས་བཅོམ་ནས། །འཇིགས་བྱེད་དུས་མཚན་གཡས་བརྐྱངས་ཞབས་ཀྱིས་མནན། །ཁྱབ་འཇུག་ཞལ་གསུམ་འཇིགས་པའི་ཉམས་བཅོམ་ནས། །ཞལ་བཞི་མངའ་ཞིང་བཅུ་གཉིས་ཕྱག་དང་ལྡན། །ལྷ་ཆེན་ཚངས་པ་རྒོད་པའི་ཉམས་བཅོམ་ནས། །གཡས་ཞལ་སེར་པོ་བཞད་པའི་ཚུལ་དུ་གནས། །ཚོགས་ཀྱི་བདག་པོ་གཤེ་བའི་ཉམས་བཅོམ་ནས། །གླང་ཆེན་ལྤགས་བསྣམས་རྒྱན་བྱས་མཆེ་བ་གཙིགས། །ལྷ་མིན་སྒྲ་གཅན་ཉི་ཟླ་ཁར་བཅུག་ནས། །རྔམ་པའི་ཉམས་བཅོམ་
ཚངས་པའི་མགོ་བོ་བསྣམས། །བརྒྱ་བྱིན་སྤྱན་མང་ཞི་བའི་ཉམས་བཅོམ་ནས། །སྐུ་ལ་སྤྱན་གསུམ་གཟི་བརྗིད་ལྡན་པ་པོ། །མེ་ལྷ་ཚངས་པ་ཞི་བའི་ཉམས་བཅོམ་ནས། །ཐལ་བའི་ཚོམ་བུས་སྐུ་ལ་བརྒྱན་པ་འོ། །ཀླུ་ཆེན་བེ་ཤ་རྨད་བྱུང་ཉམས་བཅོམ་ནས། །མི་མགོ་ལྔ་བཅུ་དག་གིས་དོ་ཤལ་བྱས། །ཞེས་ལྷ་ཆེན་རེ་རེ་འདུལ་ཚུལ་དང་གར་གྱི་ཉམས་རེ་སྦྱར་ནས་གསུངས་ལ་ཉམས་སོ་སོའི་རྣམ་གཞག་ཞིབ་པར་ནི་དྲང་སྲོང་རྒྱས་པའི་བསྟན་བཅོས་སུ་བཤད་པ་རྒྱུད་འགྲེལ་རྣམས་སུ་དྲངས་པ་ལྟར་རོ། །མིའི་རུས་པའི་འཁོར་ལོ་དང༌། རྣ་རྒྱན་དང་མགུལ་རྒྱན་དང༌། གདུ་བུ་དང༌། སྐ་རགས་དང༌། དཔུང་རྒྱན་དང༌། ཞབས་གདུབ་ཀྱིས་བརྒྱན་མ། ཞེས་པས་ཕྱག་རྒྱ་ལྔ་བསྟན་ལ། དེ་ཡང་སྤྱིར་ཕྱག་རྒྱ་དྲུག་གི་འདྲེན་ཚུལ་ལ། ལཱུ་ཨི་པས། མགུལ་རྒྱན། གདུ་བུ། རྣ་ཆ། གཙུག་གི་ནོར་བུ། མཆོད་ཕྱིར་ཐོགས། ཐལ་ཆེན་རྣམས་ལ་བཤད། མངོན་བརྗོད་ལས་གཙུག་གི་ནོར་བུ་མ་བགྲངས་པར་མགོ་འཕྲེང་བགྲང༌། སྒྲུབ་ཐབས་འཁྲུལ་སྤོང་ལས་གཙུག་གི་ནོར་བུ་དང་མཆོད་ཕྱིར་ཐོགས་ཀྱི་དོད་ལ་རིམ་བཞིན་འཁོར་ལོ་དང་རྐེད་རྒྱན་བཞག་གོ །རྣལ་འབྱོར་རོལ་པའི་དགའ་སྟོན་ལས་ལཱུ་ཨི་པའི་ལུགས་དེ་ཀུན་སྤྱོད་དང་མཐུན་པར་གསུངས་ཀྱང༌། ཀུན་སྤྱོད་ལས་རྒྱན་དང་པོ་ལྔ་གསུངས་པའི་མཇུག་ཐོགས་སུ། འོག་པག་སྲོག་ཤིང་བརྒྱད་ཉིད་དེ། །ཞེས་གསུངས་པས་ཐལ་ཆེན་མི་འདྲེན་པར་འོག་པག་བགྲང་དགོས་ཞེས་ཀྱང་སྔ་མ་མང་པོས་བཤད་དོ། །དེ་ལྟར་ལུགས་མང་ཡང་འདིར་གཙོ་བོ་ཀྱཻ་རྡོར་གྱི་རྒྱུད་ལ་བརྟེན་དགོས་པས་དེས་གསུངས་ཚུལ་ནི། བརྟག་པ་དང་པོའི་
ལེའུ་དྲུག་པ་ལས། རྣ་བ་དག་ལ་རྣ་ཆ་བཟང༌། །སྤྱི་བོར་འཁོར་ལོ་རྣམ་པར་འཛིན། །ལག་པ་དག་ལ་ལག་གདུབ་གཉིས། །རྐེད་པ་ལ་ཡང་སྐ་རགས་ཉིད། །རྐང་པར་དེ་བཞིན་རྐང་གདུབ་བོ། །ལག་པའི་རྩ་བར་དཔུང་རྒྱན་ཉིད། །མགྲིན་པར་རུས་པའི་ཕྲེང་བ་སྟེ། །ཞེས་གསུངས་པ་དང་སྐབས་འདིའི་མངོན་རྟོགས་ཀྱི་ཚིག་ཟིན་དུ་མཐུན་ཞིང༌། གཉིས་ཀར། ཕྱག་གདུབ། ཞབས་གདུབ། དཔུང་རྒྱན་གསུམ་སོ་སོར་བགྲང་ཡང་ཕྱག་རྒྱ་ལྔ་འདྲེན་པའི་ཚེ་དེ་གསུམ་གདུ་བུ་ཞེས་གཅིག་ཏུ་བྱེད་དགོས་པ་དག་པའི་སྐབས་ཀྱིས་ཤེས་སོ། །ཐལ་ཆེན་གྱི་བཤད་པ་འོག་ནས་འབྱུང་ཡང་དཀྱུས་གཅིག་ཏུ་བཤད་ཚུལ་ཕྱག་རྒྱ་ལྔ་ཁོ་ནའི་དབང་དུ་བྱས་སྣང་བས་ལུགས་འདི་གཞིར་བཞག་ལ་ཡབ་ཡུམ་གྱི་ཕྱག་རྒྱར་གྲངས་མི་མཚུངས་པའི་རྒྱུ་མཚན་སྤྲོ་མི་དགོས་སམ་སྙམ་མོ། །སྐབས་དོན་དེ་དག་གི་དག་པ་སྦྱོར་ཚུལ་ནི། ཁ་ཅིག་བརྟག་པ་ཕྱི་མའི་ལེའུ་དྲུག་པ་ལས། བླ་མ་སློབ་དཔོན་འདོད་ལྷ་ལ། །ཕྱག་འཚལ་དོན་དུ་འཁོར་ལོ་འཛིན། །བླ་མ་རྡོ་རྗེ་འཛིན་པ་ལ། །སྨོད་ཚིག་མི་ཉན་པ་ཡི་ཕྱིར། །རྣ་བ་དག་ལ་རྣ་ཆ་འཛིན། །སྔགས་ཀྱི་བཟླས་པའང་མགུལ་རྒྱན་ཉིད། །གདུ་བུ་སྲོག་ཆགས་གསོད་པ་སྤངས། །ཕྱག་རྒྱ་བསྟེན་པ་སྐ་རགས་ཉིད། །ཅེས་པ་དང་སྦྱར་བ་དེ་འདྲའི་ཉམས་ལེན་མཐར་ཕྱིན་པ་ལ་བྱས་ན་ཕྱིན་དྲུག་གི་དག་པ་དང་སྦྱར་རུང་ཙམ་ཡོད་ཀྱང་འདི་གཙོ་བོ་རྗེས་འཇུག་གི་དྲན་པ་གསོ་བའི་དགོས་པ་སྟོན་བྱེད་ཡིན་ལ། དག་པ་དངོས་ནི་བརྟག་པ་དང་པོའི་ལེའུ་བརྒྱད་པ་ལས། སངས་རྒྱས་ལྔ་ནི་རྣམ་དག་པས། །འདི་ལྔ་ཕྱག་རྒྱ་དག་པ་འོ། །ཞེས་དང༌། ལེའུ་དགུ་པར། གུག་སྐྱེད་ཀྱི་ནི་སངས་རྒྱས་ལྔ། །ཞེས་པ་ཡང་མཁས་གྲུབ་ཀྱི་
རྣམ་བཤད་ལས། མནྡྲ་ལ་ཨུའི་རྐྱེན་བྱིན་པས་མུ་ཏྲ་སྟེ་དེ་ཉིད་ཕྱག་རྒྱ་ཞེས་པར་འགྱུར་རོ། །ཞེས་སོ། །དེ་དག་གི་རྣམ་གཞག་རྒྱས་པར་ལེའུ་དྲུག་པ་ལས། འཁོར་ལོའི་གཟུགས་ཀྱིས་མི་བསྐྱོད་པ། །རྣ་ཆའི་བདག་ཉིད་འོད་དཔག་མེད། །མགུལ་གྱི་ཕྲེང་བ་རིན་ཆེན་བདག །ལག་པར་རྣམ་པར་སྣང་མཛད་བརྗོད། །སྐ་རགས་ལ་ནི་དོན་ཡོད་གནས། །ཞེས་སོགས་དང༌། འདིའི་བསྟོད་པར་ཌོམ་བྷི་ཧེ་རུ་ཀས། རྒྱལ་བ་རྣམ་རྒྱལ་ཕྱག་རྒྱ་ཉིད། །ཅེས་སོགས་ཀྱིས་ལྷའི་དག་པ་གཙོ་བོར་གསུངས་ལ། དུས་འཁོར་དང་བདེ་མཆོག་རྩ་རྒྱུད་སོགས་ལས་ཕར་ཕྱིན་དྲུག་ལ་སྦྱར་ཏེ་ལམ་གྱི་དག་པ་དང༌། ཀུན་སྤྱོད་ལས། དཔའ་བོའི་གོ་ཆ་དྲུག་གི་ནི། །རྒྱ་འདིས་ལུས་ནི་མཛེས་པ་ཡིན། །ཞེས་པའི་དོན་བཞིན་ལོ་ཧི་པས། དཔའ་བོའི་རྩ་བའི་སྔགས་སོགས་གང༌། །ཚངས་པའི་སྐུད་པ་སོགས་སུ་བརྟག །ཅེས་པ་སྔགས་ཀྱི་དག་པ་སོགས་ཤིན་ཏུ་མང་ཞིང་རྒྱན་སོ་སོའི་དབྱིབས་སོགས་བཤད་ན་ཆེས་མང་བར་འགྱུར་བས་མ་སྤྲོས་སོ། །ཌོམ་བྷི་ཧེ་རུ་ཀས་མཛད་པའི་འདིའི་སྒྲུབ་ཐབས་ཀྱི་དཔེ་རྣམས་སུ། ཕྱག་རྒྱ་དྲུག་དང་ཡང་དག་ལྡན། །ཞེས་འབྱུང་བ་མ་དག་པར་མངོན་ཏེ། དེས་མཛད་པའི་བསྟོད་པར། དྲག་ཆེན་ཕྱག་རྒྱ་ལྔ་ཡིས་བརྒྱན། །ཞེས་གསུངས་ཤིང༌། དེ་བརྟག་པ་དང་པོའི་ལེའུ་བརྒྱད་པའི་ཚིག་མ་བཅོས་པར་བཀོད་པ་ཡིན་འདུག་པས་སོ། །རྩ་བའི་ཕྱག་གཉིས་ཀྱིས་རྣ་བའི་དྲུང་དུ་ཨུཏྤ་ལའི་མྱུ་གུ་ཅན་གྱི་མདའ་དང་བཅས་པའི་གཞུ་འགེངས་མ། ཕྱག་ལྷག་མ་དག་གིས་ཨུཏྤ་ལ་དམར་པོའི་ཞགས་པ་དང་ལྕགས་ཀྱུ་བསྣམས་པ། ཞེས་པའི་དོན་
ལ། ཕྱག་བཞི་ནི་ཌོམྦྷི་ཧེ་རུ་ཀས། བདུད་དག་ཕྱག་བཞི་མ་ལ་འདུད། །ཅེས་པ་བརྟག་གཉིས་ལས། ཕྱག་གི་དག་པ་སྟོང་པ་ཉིད། །བདུད་དག་པ་ལས་ཞབས་རྣམས་ཉིད། །ཅེས་གཙོ་བོ་ཕྱག་བཅུ་དྲུག་དང་ཞབས་བཞི་པ་ཡིན་པས་ཕྱག་སྟོང་ཉིད་བཅུ་དྲུག་དང༌། ཞབས་བདུད་བཞི་དག་པ་ལ་སྦྱར་ཡང༌། འདིར་ཞབས་སྟོང་ཉིད་ལ་སྦྱར་བས་ཕྱག་གྲངས་ཀྱི་ཆ་ནས་བདུད་བཞི་དག་པ་ལ་སྦྱར་བ་རྒྱུད་དོན་མན་ངག་གིས་རྒྱས་འགེབས་ཚུལ་ཞིག་ཡིན་པར་མངོན། དེ་ལྟར་ན་དད་བརྩོན་དྲན་པ་ཏིང་ངེ་འཛིན་གྱི་སྟོབས་བཞི་དག་པ་ལ་ཡང་སྦྱར་རུང་ལ། མི་འཇིགས་ཕྱག་གིས་འགྲོ་རྣམས་དབུགས་འབྱིན་ཞིང༌། །ཡིད་འོང་ཨུཏྤལ་དམར་པོས་བདེ་མཛད་མ། །ཚད་མེད་བཞི་ལྡན་ཕྱག་བཞི་མངའ་བ་ཡི། །ཡུམ་མཆོག་ཁྱོད་ལ་གུས་པས་ཕྱག་འཚལ་ལོ། །ཞེས་ཟེར་བ་དང༌། དེ་ལ་བརྟེན་ནས་ཚད་མེད་བཞིས་འགྲོ་བའི་དོན་བྱེད་པས་ཕྱག་བཞི་པ། ཞེས་ཟེར་བ་རྣམས་ལ་རྒྱུད་ཀྱི་ཁུངས་ཡོད་མེད་དཔྱད་དགོས་སོ། །མདའ་གཞུའི་མཚོན་དོན་ནི་ཌོམྦྷི་ཧེ་རུ་ཀས། ཉོན་མོངས་འབིག་ཕྱིར་མདའ་གཞུ་ཐོགས། །ཞེས་པ་ཐུན་མོང་དུ་སྦྱར་ལ། རྡོ་རྗེ་གྲུབ་པའི་འགྲེལ་པར། མདས་རྣམ་རྟོག་གི་ཟུག་རྔུ་ལ་བསྣུན་པ། གཞུས་འཇིག་རྟེན་གསུམ་ལས་རྒྱལ་བ། ཞེས་སོ་སོར་སྦྱར་རོ། །ལྕགས་ཀྱུ་ནི་ཌོམ་བྷི་ཧེ་རུ་ཀས། ལྕགས་ཀྱུས་ཉོན་མོངས་འདམ་ནས་འདྲེན། །ཞེས་པ་གོ་སླ་ཞིང༌། ཡང་དེ་ཉིད་ཀྱིས། སྟོང་པ་ཉིད་ལས་མི་གཡོའི་ཕྱིར། །གཡས་འོག་ལྕགས་ཀྱུ་དག་གིས་མཛེས། །ཞེས་གསུངས་པ་དང༌། རྡོ་རྗེ་གྲུབ་པའི་འགྲེལ་པར། ལྕགས་ཀྱུས་ཡེ་ཤེས་ཀྱི་འཁོར་ལོ་དང་གདུག་པ་ཅན་རྣམས་འགུགས་པར་
བྱེད་པ་ཞེས་གསུངས་པ་གནད་གཅིག་སྟེ་ཡེ་ཤེས་པ་དགུག་ཅིང་དངོས་གྲུབ་ལེན་པ་ཐམས་ཅད་གོང་དུ་བཤད་པ་ལྟར་དམིགས་མེད་ཀྱི་ངང་ནས་བྱེད་ཅིང༌། གདུག་ཅན་དགུག་པ་དང་སྒྲོལ་བ་སོགས་ཀྱང་དེའི་ངང་ནས་བྱེད་དགོས་པའི་དོན་ནོ། །དེ་ལྟར་ཡང་མི་གཡོ་བའི་རྟོག་པ་ལས། བྱང་ཆུབ་སེམས་ནི་བརྟེན་བྱས་ནས། །སྔགས་ཀྱི་དངོས་གྲུབ་གསུངས་པ་སྟེ། །གཞན་དུ་སྔགས་གྲུབ་ཆོ་ག་ཡི། །བྱ་བ་ཐམས་ཅད་འབྲས་བུ་མེད། །ཅེས་གསུངས་ཤིང་། འདིའི་བྱང་ཆུབ་ཀྱི་སེམས་ནི་སྟོང་ཉིད་ཀྱི་ལྟ་བ་ལ་སྦས་དོན་ཀུན་གསལ་ལས་གསུངས་སོ། །ཞགས་པ་ནི་ཌོམ་བྷི་ཧེ་རུ་ཀས། ཨུཏྤ་ལས་ནི་དབང་དུ་མཛད། །ཅེས་པ་ཁམས་གསུམ་དབང་དུ་བསྡུ་བ་ལ་སྦྱར་རུང་ཡང༌། དེའི་དགོངས་པ་གཙོ་བོ་ནི་བསྟོད་པ་ཅིག་ཤོས་སུ། དབྱིངས་ལས་རྒྱལ་བ་ཨུཏྤ་ལ། །རབ་ཏུ་རྒྱས་པ་བསྣམས་མཛད་ཅིང༌། །ཞེས་པ་འདི་ཡིན་ཏེ། རྡོ་རྗེ་གྲུབ་པའི་འགྲེལ་པར། ཞགས་པས་ཡང་དག་པའི་ཡེ་ཤེས་ཀྱིས་རྒྱུད་འཆིངས་པ། ཞེས་དང༌། ཀུན་མཁྱེན་འཇམ་དབྱངས་བཞད་པའི་རྟོག་བདུན་མཆན་འགྲེལ་ལས། ཡང་དག་པའི་ཡེ་ཤེས་སུ་འཆིང་བས་ཞགས་པ། ཞེས་གསུངས་ལ། འདོད་འཇོར། ཡང་དག་པའི་ཡེ་ཤེས་ཀྱིས་བཅིངས་པས་རྡོ་རྗེའི་ཞགས་པ། ཞེས་གསུངས་པས་རྒྱལ་བ་རྣམས་བདེ་སྟོང་གི་ཡེ་ཤེས་ཀྱིས་བཅིངས་ནས་དབང་དུ་བྱེད་པའི་དོན་ནོ། །གཞན་ཡང་ལྷན་སྐྱེས་རོལ་པའི་མངོན་རྟོགས་འདིར་ཁྱད་གཞི་དངོས་སུ་མ་སྨོས་པ་འཁོར་འདས་མཐའ་དག་ཆོས་ཀྱི་དབྱིངས་སུ་རོ་གཅིག་པས་ཞལ་གཅིག་པ། ཐུགས་
རྒྱུད་ཟག་མེད་ཀྱི་བདེ་བས་གང་བས་ཆུ་འཛིན་དང་འོ་འཛིན་རྒྱས་པ། ཆགས་སོགས་ཉོན་མོངས་སྦྱོང་བས་སྟག་ཤམ་སོགས་ཀྱང་དྲན་པར་བྱ་དགོས་ལ། རྡོ་རྗེ་སྙིང་འགྲེལ་གྱི་དཔེ་རྣམས་སུ་ཐོར་ཚུགས་ལ་ཟླ་ཕྱེད་ཅེས་འབྱུང་བ་དཔྱད་དགོས་ཏེ་ཐལ་ཆེན་མ་བཤད་པའི་རྒྱུ་མཚན་ལྟར་རོ། །གཞན་ཡང་བརྟག་གཉིས་ཀྱི་ལེའུ་དགུ་པ་རྣམ་དག་གི་ལེའུ་ལས། གཟུགས་ཕུང་རྡོ་རྗེ་མ་ཡིན་ཏེ། །ཞེས་སོགས་ཕུང་པོ་ལྔའི་དག་པ། གཟུགས་ལ་དཀར་མོར་རྟག་ཏུ་བཤད། །ཅེས་སོགས་ཡུལ་དྲུག་གི་དག་པ། ས་ནི་བུཀྐ་སི་ཞེས་བཤད། །ཅེས་སོགས་ཁམས་བཞིའི་དག་པ། ཞེ་སྡང་ཞེས་བཤད་རྡོ་རྗེ་མ། །ཞེས་སོགས་ཉོན་མོངས་ལྔའི་དག་པ་རྣམས་བསྐྱེད་རིམ་གྱི་ལག་རྗེས་འཇོག་ཚུལ་གྱི་དབང་དུ་མཛད་དེ་རྒྱས་པར་གསུངས་ལ། རྫོགས་རིམ་གྱི་ལག་རྗེས་འཇོག་ཚུལ་ལ་སྦྱར་ནས་བརྟག་པ་ཕྱི་མའི་ལེའུ་དགུ་པ་སྔགས་བཏུ་བའི་ལེའུ་ལས། ཤ་ཡི་བུཀྐ་སི་ཞེས་བྱ། །ཞེས་སོགས་ལུས་ཀྱི་ཁམས་ཕྲ་རགས་ཀྱི་དག་པ་ཁ་བསྐང་སྟེ་གསུངས་སོ། །མདོར་བསྡུ་ན་དག་པ་ཞེས་པའི་དོན་འདི་ལྟར་ཡིན་ཏེ། འཁོར་བའི་ཉེས་པ་ཐམས་ཅད་ཀྱི་རྩ་བ་ནི་འཇིག་ཚོགས་ལ་ལྟ་བ་ཡིན་ཞིང༌། དེས་གང་ཟག་གི་གདགས་གཞི་ཕུང་ཁམས་སྐྱེ་མཆེད་འབྱུང་བཞི་སོགས་ཆ་ཤས་དུ་མ་ཞིག་ཚོགས་པ་ལ་ཕྱིན་ཅི་ལོག་ཏུ་སྒྲོ་བཏགས་ནས་ངའོ་སྙམ་དུ་བཟུང་སྟེ། དེའི་དབང་གིས་ཆགས་སོགས་ཉོན་མོངས་དང་ཉེས་པ་ཐམས་ཅད་འདྲེན་པར་བྱེད་དོ། །དེ་ཉིད་ཡང་དག་པའི་ཡེ་ཤེས་ཀྱིས་དྲུངས་ཕྱུངས་པ་ན། ཆ་རེ་རེ་ལ་ཡང་བདེན་པར་ཞེན་པ་བག་ཆགས་དང་བཅས་པ་ཟད་པའི་ལག་རྗེས་ལྡོག་པ་
ཐ་དད་པའི་ཚུལ་དུ་རིགས་ལྔ་ཡུམ་བཞི་སོགས་བརྟེན་པ་ལྷ་དང་རྟེན་གཞལ་ཡས་ཁང་རྒྱན་ཆ་ལུགས་ཕྱག་མཚན་ཁ་དོག་ཕྲ་མོ་ཚུན་ཆད་དག་པའི་སྣོད་བཅུད་ཀྱི་ཡོན་ཏན་ཐམས་ཅད་འབྱུང་ངོ༌། །དེར་མ་ཟད་གཟུགས་ཅན་རྣམས་ཆ་ཤས་དང་གཟུགས་ཅན་མ་ཡིན་པ་རྣམས་དུས་སྔ་ཕྱི་དུ་མའི་རྒྱུན་ཚོགས་པ་ལ་བདེན་པར་ཞེན་པ་སྐྱེ་ཞིང་ད་ལྟར་ཕུང་པོ་ལྔ་དང་ཁམས་བཞི་སོགས་སྦྱོང་བ་གྲགས་ཆེ་བ་ཙམ་དུས་ཞག་དང་ཐུན་ཚོད་སོགས་སྦྱོར་བ་གྲགས་མི་ཆེ་ཡང༌། གཟུགས་ཅན་རྣམས་ཡུལ་ལྔ་གང་རུང་ལས་མ་འདས་པ་ལྟར་དུས་ཀྱང་ཆ་ཤས་སུ་ཕྱེ་ན་ལོ་ཟླ་ཞག་དང་དབྱུ་གུ་སྐད་ཅིག་ཚུན་ཆད་ལས་མ་འདས་པས། དཔལ་དུས་ཀྱི་འཁོར་ལོ་ལས། ཕྱི་ནང་གཞན་གསུམ་ཞེས་ཐམས་ཅད་དུས་ཀྱི་ཆ་ཤས་ལ་སྦྱར་བ་དང༌། འཇིགས་བྱེད་ཀྱི་སྐབས་སུ། དུས་ནི་དཔའ་བོ་ཆེན་པོའི་གཟུགས། །ཞེས་སོགས་ཀྱིས་ཞལ་ཕྱག་ཐམས་ཅད་དུས་ཀྱི་ཆ་རྣམས་དག་པར་བཤད་ལ། དེས་གདུལ་བྱའི་གཙོ་བོ་གཤིན་རྗེ་ལ་དུས་དང༌། འདུལ་བ་པོ་ལ་དུས་དགྲར་གསུངས་སོ། །དེ་ཡང་ནང་གི་གཤིན་རྗེ་བདེན་འཛིན་ལ་བརྟེན་ནས་ཕྱིའི་གཤིན་རྗེ་ཚེ་སྲོག་ལ་རྒོལ་བའི་ཉེར་འཚེ་འབྱུང་བ་ཡིན་ཞིང༌། གང་ལ་བདེན་ཞེན་སྐྱེ་བའི་ཡུལ་ཡང་ངས་སྔར་འདི་བྱས་སླར་འདི་བྱེད་སྙམ་པ་ལྟ་བུ་ཆ་མ་ཕྱེ་བར་ལོ་ཟླ་ཞིག་གི་དབྱུ་གུའི་དུས་ཚོད་སྔ་ཕྱི་མང་པོ་ཚོགས་ཙམ་ཞིག་ལ་ཆ་མེད་ཚུགས་ཐུབ་ཀྱི་ང་གཅིག་ཏུ་བཟུང་བ་ཡིན་པས། རྩ་ཤེས་ཀྱི་དུས་བརྟག་པའི་རབ་བྱེད་ནས་གསུངས་པ་ལྟར་ལེགས་པར་དཔྱད་དེ་སྔ་ཕྱི་ཀུན་ཏུ་ཁྱབ་པའི་ང་རང་དབང་བ་དེ་འདྲ་མེད་
ཀྱང༌། སྔ་ཕྱིའི་རྒྱུ་འབྲས་ཀྱི་རྟེན་ཙམ་ཞིག་སྒྱུ་མ་ལྟ་བུར་ཡོད་ཚུལ་མཐོང་ནས་ནང་གི་གཤིན་རྗེ་སྒོ་ཐམས་ཅད་ནས་ཁེགས་ན་ཕྱིའི་བགེགས་ཞར་ལ་བཟློག་པར་འགྱུར་རོ། །དྲུག་ཅུ་པ་འཕེན་པ་ཡང་གནད་དེ་འདྲ་རེ་མ་མཐའ་མོས་པ་ཚུན་ཆད་ཀྱིས་ཚང་དགོས་ཀྱི། དབྱུ་གུའི་གྲངས་ཀྱི་དགོངས་པ་མ་ཤར་བར། རྔ་གཤང་དྲག་བརྡུང་གིས་ཟན་ལེབ་བརྩི་གང་ཐུབ་བྱས་པ་ལ་རྒྱུད་ཀྱི་དགོངས་པ་དང་མཐུན་པའི་ལག་རྗེས་འོང་དཀའ་འོ། །དག་པ་འདིའི་ཕྱོགས་མཐུན་ཙམ་ཞིག་ནི་སྡུད་པ་ལས། གཟུགས་ཀྱི་དག་པ་འབྲས་བུ་དག་པར་རིག་པར་བྱ། །ཞེས་སོགས་རྒྱས་འབྲིང་བསྡུས་གསུམ་དང་རྒྱན་རྩ་འགྲེལ་ལས་གསུངས་ལ། དག་པ་བསྒོམ་པ་གལ་ཆེ་བའི་རྒྱུ་མཚན་ནི་བརྟག་གཉིས་ལས། གང་དང་གང་གིས་འཇིག་རྟེན་འཆིང་གྱུར་པ། །དེ་དང་དེས་ནི་འཆིང་བ་ལས་གྲོལ་ཏེ། །ཞེས་ཕུང་ཁམས་སྐྱེ་མཆེད་དུས་སྔ་ཕྱི་སོགས་རྒྱུན་དང་ཡན་ལག་གི་ཚོགས་པ་གང་ལ་བདེན་པར་ཞེན་ནས་ཉེས་པ་ཐམས་ཅད་བསྐྱེད་པའི་དམིགས་པ་དེ་ཉིད་ལ་དམིགས་ཏེ་སྒྱུ་མ་ལྟ་བུར་བསྒོམ་པས་ཡོན་ཏན་ཐམས་ཅད་སྐྱེ་བར་གསུངས་སོ། །དེ་དག་འཕྲོས་དོན་ལྟ་བུ་ཡིན་ཀྱང་ཤིན་ཏུ་གལ་ཆེ་ལ་རྟོགས་དཀའ་བར་སྣང་བས་ཞིབ་ཏུ་བཤད་པ་ཡིན་ཞིང་ངོས་ཟིན་ཞལ་ཕྱག་གི་ཐད་འདི་རྣམས་རྟོགས་སླ་བར་སྣང་བས་ཅུང་ཟད་བསྡུས་ཏེ་བརྗོད་པར་བྱའོ། །དེ་ཡང་ལྡེམ་ཀྱོག་སྒེག་པའི་ཞི་འཛུམ་བཞིན་རས། ཞེས་སོགས་ཀྱི་དོན་ནི་གསར་སྐྱེས་ཆུ་ཤིང་གཞོན་ནུའི་ལྕུག་ཕྲན་བཞིན་དུ་སྐུའི་ཡན་ལག་དང་ཉིང་ལག་ཐམས་ཅད་གཞོན་ཤ་ཆགས་པ། ཤིན་ཏུ་དྲང་ཞིང་གང་འདོད་ལྟར་བཀོལ་དུ་རུང་བས་མཉེན་ཞིང་ལྡེམ་པ། རྐེད་
སྐབས་མན་ཆད་གཡོན་དུ་འགྱིང་ཚུལ་དང༌། སྐུ་སྟོད་གཡས་སུ་ཕྱོགས་ཤིང་དབུ་ཡང་ཅུང་ཟད་གཡོན་དུ་ཡོ་བས་སུམ་འཁྱོག་གི་ཚུལ་དུ་བཞུགས་པས་ན་སྒེག་པ་སྟེ། ལི་ལའམ་ལཱ་ལི་ཏ་ཞེས་པ་སྒེག་པ་སྙེམས་པ་རོལ་པ་སོགས་ལ་འཇུག་ཅིང༌། སྒེག་པའི་ཉམས་སུམ་ཁུག་ལྟ་བུའི་ཚུལ་གྱིས་འགྱིང་བ་ལ་བཤད་པས། ལྡེམ་ཀྱོག་ཅེས་པ་ཡང་ཕྱི་མའི་ཉམས་གསལ་བར་འཆད་བྱེད་ཡིན་གྱི། དོན་སོ་སོ་བ་མ་ཡིན་ཏེ། ཁྱ་དགེ་བློ་གྲོས་རྒྱ་མཚོའི་བདེ་མཆོག་བསྐྱེད་རིམ་ལས། སྐུའི་ཉམས་གསུམ་ནི། སྐུ་འགྱིང་བག་དང་ལྡན་པ། ཞེས་དང༌། ཀརྨ་འཕྲིན་ལས་གཉིས་པའི་དབང་ཊཱིཀ་ལས། གར་གྱི་ཉམས་དགུའི་སྒེག་པ་ནི། ལུས་གཡས་གཡོན་བར་གསུམ་དུ་འགྱིང་ཞིང་འདུད་པ་དང༌། ཞེས་བཤད་ཅིང༌། ཨ་ཝ་ཏ་ར་ལས། རྡོ་རྗེ་ཁུ་ཚུར་གཉིས་མཁལ་ལྟག་གཉིས་སུ་སྙེམས་པའི་ཚུལ་དང་བཅས་པར་བཞག་ལ། ཇི་ལྟར་མོས་པའི་བྱང་ཆུབ་ཀྱི་སེམས་ཀྱི་ཕན་ཡོན་དྲན་པར་བྱས་ནས། དེ་ལ་དགའ་བ་བསྐྱེད་ཅིང་དད་པ་སྤེལ་བ་དང༌། བ་སྤུ་ལྡང་བ་ལ་སོགས་པ་སྔར་བྱས་ཏེ་ལྡེམ་བག་ཅན་དུ་སྤྱི་བོ་གཡོན་དུ་འདུད་པར་བྱའོ། །ཞེས་སྒེག་མོའི་ཉམས་གསུངས་པ་ཡང་ཕལ་ཆེར་ཕྱོགས་གཅིག་གོ །དེ་ལྟར་སྐུའི་ཆ་ཐམས་ཅད་ནས་སྒེག་པའི་ཉམས་ཀྱིས་ཡིད་འཕྲོག་པར་བྱེད་ཅིང༌། ཁྱད་པར་དུ་ཞལ་གྱི་དཀྱིལ་འཁོར་བྱི་རུའི་མེ་ལོང་ཕྱིས་པ་ལྟར་གཙང་ཞིང་འོད་འཚེར་བ། ཅུང་ཟད་གཙིགས་པའི་ཚེམས་དཀར་ཟླ་བའི་མྱུ་གུའི་མཛེས་པ་སྟོན་ཅིང་དཀར་ནག་གི་ཆ་མ་འདྲེས་པའི་སྤྱན་རས་པདྨའི་འདབ་མ་ལྟར་
ཡངས་ཤིང་ཆགས་པའི་ཉམས་ཀྱིས་འཛུམ་པ་དང་བཅས་ཏེ་སྒྲུབ་པ་པོ་ལ་གཟིགས་པ། སྲིད་པ་གསུམ་གྱི་སྐྱེ་བོ་གང་གིས་མཐོང་ཡང་སྔ་ཕྱི་མེད་པར་མཐོང་ཙམ་ཉིད་ནས་ཡིད་ཀྱི་བརྟན་པ་རང་དབང་མེད་པར་འཕྲོག་ནུས་པ་སྟེ། སྐུའི་རང་བཞིན་གྱི་མཛེས་སྡུག་ཡོངས་སུ་རྫོགས་པ། བལྟ་བས་མི་ངོམས་པའི་སྟེང་དུ་སྤྱན་གྱིས་གཟིགས་ཚུལ་དང༌། སྐུའི་འགྱིང་སྟབས་ཕྲ་མོ་ཚུན་ཆད་ཀྱིས་ཀྱང་ཡིད་ལ་བདེ་དགའ་དཔག་ཏུ་མེད་པ་སྐྱེད་པར་བྱེད་པའི་དོན་ཡིན་ཏེ། བརྟག་གཉིས་ལས། འདིས་ནི་བསྒོམ་པ་ཙམ་གྱིས་ནི། །འཇིག་རྟེན་གསུམ་པོ་དབང་དུ་བྱེད། །ཅེས་སོ། །འདུས་པ་ཕྱི་མ་ལས། གཙོ་བོ་ལ་ཟུང་འཇུག་གམ་བྱང་ཆུབ་ཀྱི་སེམས་སུ་བཤད་པ་དང་སྦྱར་ཏེ། དཔའ་བོའི་བརྟན་པ་ཅིག་ཅར་འཕྲོག་པ་བཞིན་ཞེས་གསུངས་པ་དང་དོན་མཐུན་པའི་བཤད་པ་ཞིག་བྱར་ཡོད་ཀྱང་འདིར་མ་སྤྲོས་སོ། །༈ གཉིས་པ་ཕྱག་མཚན་སོ་སོ་དང་འབྲེལ་བར་གདུལ་བྱ་དབང་དུ་བྱེད་ཚུལ་གྱི་སྒོ་ནས་བསྟོད་པ་ལ། རྩ་ཕྱག་གི་ཕྱག་མཚན་ལ་སྦྱར་བ་དང༌། ཕྱག་ལྷག་མའི་ཕྱག་མཚན་ལ་སྦྱར་བ་གཉིས། དང་པོ་ནི། ཨུཏྤལ་ཉག་ཕྲན་ཆགས་བྱེད་རྒྱུད་ལྡན་ལ། །ཐབས་ཤེས་གོ་བའི་རྣ་བའི་ཕྱིར་སྦྱར་ནས། །ལྷ་མི་གནོད་སྦྱིན་ཀླུ་དང་གྲུལ་བུམ་སོགས། །གང་སྙིང་བསྣུན་ཏེ་མེ་ཡི་བུང་བ་བཞིན། །ཞེས་བྱུང༌། དེ་ཡང་མངོན་བརྗོད་ཀྱི་གཞུང་ལས། ཉག་ཕྲན་དྲང་འགྲོ་མི་འཁྱོག་འགྲོ། །ཞེས་ཉག་ཕྲན་མདའི་མིང་དུ་བཤད་ཅིང༌། རྒྱུད་ལྡན་ནི་ལ་ལར་པི་ཝང་གི་མིང་བྱས་ཀྱང་འདིར་གཞུ་ལ་བྱེད་པ་མངོན་ནོ། །དེས་ན་མདའ་གཞུའི་མཚན་དོན་གོང་དུ་སྨོས་པ་ལྟར་ཉོན་མོངས་འབིགས་
པ་ཡང་ཡིན་ལ། ཁྱད་པར་དབང་གི་མཚོན་བྱེད་དུ་ཡང་འགྲོ་སྟེ། ཀུན་མཁྱེན་འཇམ་དབྱངས་བཞད་པའི་རྟོག་བདུན་མཆན་འགྲེལ་ལས། རྨོངས་པའི་ཟུག་རྔུ་འབིགས་པས་སམ་དབང་གི་ལས་བྱེད་པས་མདའ་ཞེས་གསུངས་ཤིང༌། དེ་ཉིད་བསྡུས་པ་ལས་ཀྱང༌། རྡོ་རྗེ་ཆགས་པ་བདེ་ཆེན་པོ། །རྡོ་རྗེའི་མདའ་ནི་དབང་བྱེད་པ། །བདུད་ཀྱི་འདོད་པ་རྡོ་རྗེ་ཆེ། །ཞེས་གསུངས་སོ། །འདིར་བདུད་ཀྱི་འདོད་པ་ཞེས་པའི་དོན་སློབ་དཔོན་ཀུན་སྙིང་གིས་དེ་ཉིད་སྣང་བར། ཉན་ཐོས་དང་རང་སངས་རྒྱས་ཀྱི་སེམས་གསོད་པས་ན་བདུད་དོ། །དེ་ཉིད་ནི་བྱང་ཆུབ་ཀྱི་སེམས་ཀྱི་ངོ་བོ་ཉིད་ཡིན་པས་ན་འདོད་པ་སྟེ། ཞེས་འདོད་ཆགས་ལམ་དུ་བྱེད་པའི་ཐབས་མཁས་དང་བྲལ་བའི་ཉན་རང་རྣམས་ཟིལ་གྱིས་མནན་ཏེ། ཆགས་པའི་ཆོས་ཀྱི་སྒོ་ནས་ཟག་མེད་ཀྱི་བདེ་ཆེན་འདྲེན་པར་བཤད་དོ། །དེ་ལྟར་ན་བདེ་མཆོག་གི་རྒྱུད་ལས་གནས་ཉེར་བཞིའི་དཔའ་བོ་དཔའ་མོ་རྣམས་གདུལ་བྱ་འདུལ་བྱེད་རྣམ་པ་མཐུན་པར་སྦྱར་བ་བཞིན། འདིར་ཡང་དགའ་རབ་དབང་ཕྱུག་ལ་མེ་ཏོག་མདའ་ཅན་དུ་གྲགས་ཤིང༌། དེས་རེངས་བྱེད་བརྒྱལ་བྱེད་སོགས་ཀྱི་མདའ་ལྔས་ཡིད་བསྒྱུར་ཏེ་འཁོར་བའི་གནས་སུ་འཆིང་བར་བྱེད་ལ། འཕགས་མ་འདིས་ནི་ཨུཏྤལ་གྱི་མདས་གང་ལ་བསྣུན་པ་དེ་ཉིད་འཁོར་བ་ལས་དྲངས་ནས་ལྷན་སྐྱེས་ཀྱི་བདེ་ཆེན་ལ་སྦྱོར་བར་བྱེད་པས། སྦྱང་བྱ་སྦྱོང་བྱེད་མཐུན་ཚུལ་ཞིག་ཀྱང་ཡོད་དམ་སྙམ་མོ། །ཐབས་ཤེས་གོ་བའི་རྣ་བའི་ཕྱིར་སྦྱར་ཏེ། །ཞེས་པ་མདའ་གཞུ་འགེངས་ཚུལ་ཡིན་ལ། དེ་ཡང་ཕྱག་བཞི་ཐུན་མོང་གི་དག་པ་གོང་དུ་བཤད་པ་ལྟར་ཡིན་
ཀྱང༌། ནང་གསེས་སུ་རྩ་ཕྱག་གཉིས་ཀྱི་མཚོན་དོན། འདིའི་བསྟོད་པ་ཞིག་ཏུ། ཐབས་ཤེས་རང་བཞིན་རྩ་བའི་ཕྱག་གཉིས་ཀྱིས། །ཨུཏྤལ་སྤྲོས་པའི་མདའ་གཞུ་ལེགས་བསྣམས་ནས། །མཐའ་གཉིས་འཛིན་པའི་རྣམ་རྟོག་འབིགས་མཛད་མ། །ཞེས་པ་དང་སྒོ་བསྟུན་ན། ཐབས་ཤེས་གོ་བར་བྱེད་པའམ་མཚོན་པར་བྱེད་པའི་ཕྱག་གིས་ཞེས་པའི་དོན་ཡིན་པས་གོ་བས་ཞེས་བྱེད་ཚིག་བྱ་དགོས་ལ། འདིའི་དཔེ་རྣམས་སུ་གོ་བའི་ཞེས་འབྲེལ་སྒྲ་བྱས་པ་ལྟར་ན། མདའ་འཕེན་པ་པོ་ལ་མདའ་བ་ཟེར་བ་བཞིན་ཐབས་ཤེས་ཟུང་འབྲེལ་གྱི་གོ་བཀྱེ་ནས་སྒྲིབ་པའི་གཡུལ་ངོ་གཞོམ་པའི་ལྷ་མོ་རིག་བྱེད་མ་ལ་ཐབས་ཤེས་གོ་བ་ཞེས་བཏགས་ཏེ། དེའི་རྣ་ལྟག་གི་བར་དུ་རྒྱུད་དྲངས་ནས་འཕེན་པའི་དོན་དུ་འགྱུར་རོ། །ལྷ་མི་གནོད་སྦྱིན་ཀླུ་དང་གྲུལ་བུམ་སོགས། །ཞེས་པ་འདིས་འཇིག་རྟེན་ན་མཐུ་ཆེ་བར་གྲགས་པ་སྡེ་བརྒྱད་མཐའ་དག་དབང་དུ་འདུ་བའི་ཚུལ་སྟོན་པར་བཞེད་འདུག་ཀྱང༌། མི་ནི་ལྷའི་ཟླར་དྲངས་ཏེ་གོང་འདིར་སྨོས་པའི་དགོས་པ་ནི། བརྒྱད་སྟོང་འགྲེལ་ཆེན་ལས། སངས་རྒྱས་བཅོམ་ལྡན་འདས་སྤྱིར་འགྲོ་བ་ཐམས་ཅད་ཀྱི་སྟོན་པ་ཡིན་ཀྱང་འབྲས་བུ་བཞི་སོགས་ལ་འགོད་རྒྱུའི་གདུལ་བྱའི་གཙོ་བོ་ལྷ་མི་གཉིས་ལས་མ་འདས་པས། ལྷ་དང་མི་རྣམས་ཀྱི་སྟོན་པ་ཞེས་སྨོས་པར་གསུངས་པ་བཞིན། གདུལ་བྱ་གཙོ་བོའི་དབང་དུ་བྱས་པ་ཡིན་ནོ། །སྡེ་བརྒྱད་འདྲེན་ཚུལ་ཡང༌། ལྷ་འདྲེ་སྟོང་རའི་རྗེས་སུ་འབྲང་སྟེ། བཙན། བདུད། རྒྱལ་པོ། མ་མོ། སྲིན་པོ། གཟའ། དམུ། གནོད་སྦྱིན་རྣམས་ལ་བཤད་པ་ནི་རྒྱུད་དང་མི་མཐུན་པའི་འཇིག་རྟེན་པ་ལ་གྲགས་པའི་
སྡེ་བརྒྱད་ཅེས་ཟེར་རོ། །འདིར་ནི་དཔུང་བཟང་གིས་ཞུས་པའི་རྒྱུད་ལས། ལྷ་དང་ལྷ་མིན་གནོད་སྦྱིན་ལྟོ་འཕྱེ་གྲུལ། །ནམ་མཁའ་ལྡིང་དང་འདབ་བཟང་ལུས་སྲུལ་པོ། །དྲི་ཟ་སྲིན་པོ་ཞེས་གདོན་སྨོས་པའི་ཞར་ལ་སྡེ་བརྒྱད་གསུངས་པ་འདི་དང་ཚིག་འགྲོས་བསྟུན་པར་སྣང་ལ། དེ་ཡང་ལྷ་མིན་ནི་འདུལ་བའི་མདོར། འགྲོ་བ་ལྔ་དག་གོ་ཞེས་ལྷ་མིན་ལྷ་དང་དུད་འགྲོ་ཅི་རིགས་སུ་འདུས་པར་གསུངས་པ་བཞིན་མ་བགྲང་ལ། གནོད་སྦྱིན་ནི་རི་རབ་ཀྱི་བྱང་དུ་གནས་པ་རྣམ་ཐོས་སྲས་ཀྱི་སྡེར་གཏོགས་པ་རྣམས་སོ། །ཀླུ་དང་ལྟོ་འཕྱེ་གཉིས་སྡེ་བརྒྱད་འདྲེན་པའི་ཚེ་སོ་སོར་བྱས་ཀྱང་། འདུལ་འཛིན་ཊཱི་ཀ་ལས། ལྟོ་འཕྱེ་ནི་ཀླུའི་གདོན་དང་ཞེས་པ་ལྟར་ཀླུའི་རིགས་སུ་གཏོགས་པས། འདིར་ཀླུ་སྨོས་ཏེ་ལྟོ་འཕྱེ་ཁོངས་སུ་སྡུད་དོ། །རྒྱུད་ཚིག་དང་པོ་འདིའི་མཇུག་ཏུ་གྲུལ་ཞེས་པ་དང་། གྲུབ་ཅེས་པའི་དཔེ་རྒྱུན་གཉིས་ཡོད་པར་འདུག་ཀྱང༌། འདིར་སྔ་མའི་དབང་དུ་བཏང་ནས་གྲུལ་བུམ་སོགས་ཞེས་གསུངས་ཏེ། དེ་ནི་འབྲས་བུ་བུམ་པའི་རྣམ་པ་འདྲ་བ་ཡི་དྭགས་ཀྱི་སྡེར་གཏོགས་ཤིག་ཏུ་འདུལ་འཛིན་པས་གསུངས་སོ། །འདི་སྡེ་བརྒྱད་ཀྱི་ཁོངས་སུ་འདུ་ཡང་གྲངས་འདྲེན་ལ་མེད་པས་དེའི་གྲངས་འདྲེན་ཚུལ་དངོས་ནི། ལྷ་དང་ཀླུ་དང་གནོད་སྦྱིན་དང༌། །དྲི་ཟ་དང་ནི་ལྷ་མ་ཡིན། །ནམ་མཁའ་ལྡིང་དང་མིའམ་ཅི། །ལྟོ་འཕྱེ་ཆེན་པོ་ལ་སོགས་པ། །ཞེས་པཎ་ཆེན་དགེ་འདུན་གྲུབ་ཀྱི་གཏོར་མའི་རྣམ་བཤད་དུ་དྲངས་པ་ལྟར་རོ། །གང་སྙིང་བསྣུན་དེ་མེ་ཡིས་བུང་བ་བཞིན། །ཞེས་པ་ནི་དཔེར་ན་མཚན་མོ་མེ་སྦར་བའི་ཚེ། དེའི་འོད་
མཐོང་བས་ཤ་སྦྲང་དང༌། ཕྱེ་མ་ལེབ་ལ་སོགས་པ་རྒྱང་རིང་བོ་ནས་དེའི་དྲུང་དུ་བསྙེགས་ནས་འོངས་ཏེ་ཚམ་ཚོམ་མེད་པར་ནང་དུ་མཆོང་བ་བཞིན། དབང་དུ་བྱེད་པའི་འོད་ཟེར་གྱི་ཉག་ཕྲན་ཕོག་པ་ན་ས་འོག་ས་སྟེང་ས་བླ་མཐའ་དག་ནས་སྡེ་བརྒྱད་འབྱུང་པོ་མཐུ་ཆེན་ཐམས་ཅད་རང་དབང་མེད་པར་འདུས་ཏེ་སྒྲུབ་པ་པོའི་དབང་དུ་འགྱུར་རོ། །འདིར་བུང་བ་ཞེས་གསུངས་པ་ལ་སྤྱོད་འཇུག་ལས། སྦྲང་བུ་ཤ་སྦྲང་བུང་བ་དང༌། །ཞེས་པ་ལྟར་བུང་བ་དང་སྦྲང་མ་འགལ་ལོ་སྙམ་ན། མངོན་བརྗོད་མཁས་པའི་རྣ་རྒྱན་དུ། སྦྲང་བུ་སྦྲང་མ་བུང་བ་འོ། །ཞེས་སྤྱི་མིང་དང༌། ཤ་སྦྲང་ནགས་ཀྱི་སྦྲང་མ་སོགས་བྱེ་བྲག་ཏུ་བཤད་པ་ལྟ་བུའང་ཡོད་ལ། རྣམ་འགྲེལ་ལས། སྒྲ་ནི་བརྗོད་འདོད་རྗེས་འབྲང་ཕྱིར། །མ་བརྗོད་ན་ཡང་འདོད་པས་ཁྱབ། །ཅེས་པ་ལྟར། དེ་འདྲ་ལ་བརྗོད་དོན་གོ་ཐུབ་ན་འགངས་འཆུག་འགྲོ་རྒྱུ་ཅི་ཡང་མེད་དོ། །དེ་ལྟར་འགྲོ་བ་སྣ་ཚོགས་དབང་དུ་བྱེད་པའི་ཚུལ། བརྟག་པ་དང་པོའི་མཇུག་ཏུ། འབུམ་ཕྲག་གཅིག་གིས་རྒྱལ་པོ་རྣམས། །ཁྲི་ཡིས་འཇིག་རྟེན་ཕལ་བ་ཉིད། །བྱེ་བས་ཕྱུག་དང་གནོད་སྦྱིན་སོགས། །འབུམ་ཕྲག་བདུན་གྱིས་ལྷ་མ་ཡིན། །འབུམ་ཕྲག་གཉིས་ཀྱིས་ལྷ་རྣམས་ཉིད། །བརྒྱ་ཕྲག་གཅིག་གིས་སྔགས་པ་ཉིད། །ཅེས་གསུངས། འདིར་ཕྱུག་ཅེས་པ་ཀླུ་ལ་བྱེད་པར་བཤད་ཅིང༌། སྒྲུབ་ཐབས་རྒྱ་མཚོའི་རྒྱ་གཞུང་དུ་ནམ་མཁའ་ལྡིང་དང༌། གླང་པོ་ཆེ་ས་སྲུང་སོགས་ལྷའི་དུད་འགྲོ་ལ་བཤད་དོ། །དེས་ན་ལྷན་སྐྱེས་རོལ་པའི་བཙུན་མོས་ཀླུ་དབང་དུ་བསྡུས་ཚུལ་སོགས་ལོ་རྒྱུས་དང་སྦྱར་ན་ཡིད་ཆེས་སྐྱེ་བའི་དགོས་པ་ཡོད་ཀྱང་མང་གིས་དོགས་པས་མ་སྤྲོས་སོ། །
གཉིས་པ་ནི། འདབ་ལྡན་ལྕགས་ཀྱུ་ཞགས་པས་རེག་ཙམ་གྱིས། །ཚངས་དང་བརྒྱ་བྱིན་ཐོས་སྒྲོག་ལ་སོགས་ཀྱང༌། །རླུང་གི་ཤུགས་ཀྱིས་རིངས་པར་འོངས་པ་ནི། །རྒྱ་མཚོའི་རླབས་བཞིན་དུས་ལས་ཡོལ་བ་མེད། །ཅེས་འབྱུང༌། དེ་ལ་འདབ་ལྡན་ཞེས་པ་མེ་ཏོག་གི་མིང་ཡིན་པས། དེ་སྨོས་པའི་དགོས་པ་ནི། རྒྱུད་ལས་ཨུཏྤལ་དང་ལྕགས་ཀྱུ་འཛིན། ཞེས་ཅུང་ཟད་སྦས་པའི་ཚུལ་དུ་གསུངས་ཀྱང༌། ལྷན་སྐྱེས་ཀྱི་སྒྲུབ་ཐབས་སུ། ཨུཏྤལ་དམར་པོའི་ཞགས་པ་དང་ལྕགས་ཀྱུ་ཞེས་རྒྱུ་ཨུཏྤལ་ལས་བཅོས་པར་གསུངས་པ་བཞིན། ལྕགས་ཀྱུ་ནི་ཨུཏྤལ་དམར་པོའི་འདབ་མ་རྣོན་པོ་རྩེ་མོ་ནང་དུ་གུག་པ་དང༌། ཞགས་པ་ཨུཏྤལ་དམར་པོ་ཡུ་བ་ཤིན་ཏུ་རིང་ཞིང་མཉེན་པའི་ཡུ་བའི་རྩ་བ་ཞགས་མིག་ཏུ་བྱས་པ་གཉིས་ཀ་ཡང༌། སྲིད་པ་གསུམ་གྱི་སྣོད་བཅུད་མཐའ་དག་གང་འདོད་དུ་འགུག་ཅིང་འཆིང་བའི་ནུས་པ་ཅན། དེ་ལྟ་བུར་བསམ་དགོས་པའི་དོན་ནོ། །ཚངས་དང་བརྒྱ་བྱིན་ཞེས་སོགས་དངོས་ཟིན་འདི་ཙམ་ཞིག་ཡིན་ན་ཤིན་ཏུ་སླ་ཞིང༌། གོང་དུ་ལྷ་རྣམས་དབང་དུ་བསྡུ་བར་གསུངས་པས་འདི་ལ་དགོས་པ་ལྷག་པོ་ཆེར་མེད་དོ། །འོ་ན་ཇི་ལྟར་ཡིན་ཞེ་ན་བཤད་པར་བྱ་སྟེ། ནང་གི་ཕག་མོ་ཞེས་སོགས་ཤོ་ལོ་ཀ་དང་པོས་འཇིག་རྟེན་དང་འཇིག་རྟེན་ལས་འདས་པ་ཐམས་ཅད་དབང་དུ་བསྡུ་ཚུལ་མདོར་བསྟན། ཨུཏྤལ་ཉག་ཕྲན་ཞེས་པའི་ཤོ་ལོ་ཀ་གཉིས་པས་འཇིག་རྟེན་པ་མཐུ་བོ་ཆེ་རྣམས་དབང་དུ་བསྡུ་ཚུལ་རྒྱས་པར་བཤད་པས། ཤོ་ལོ་ཀ་འདིར་འཇིག་རྟེན་ལས་འདས་
པ་རྣམས་དབང་དུ་སྡུད་ཚུལ་རྒྱས་པར་བཤད་པ་དོན་གྱིས་འགྲུབ་བོ། །དེ་ཡང་མཛོད་ལས། དེ་ཉིད་ཚངས་ཚུལ་ཚངས་པ་ཡི། །འཁོར་ལོ་ཚངས་པས་བསྐོར་ཕྱིར་རོ། །ཞེས་དང༌། བྱང་ས་ལས། ཚངས་པ་ཞེས་བྱ་བ་དང༌། ཞི་བ་ཞེས་བྱ་བ་དང་བསིལ་བར་གྱུར་པ་ཞེས་བྱ་བ་ནི་དེ་བཞིན་གཤེགས་པའི་ཚིག་བླ་དྭགས་ཡིན་པའི་ཕྱིར་ཞེས་དང༌། མཚན་བརྗོད་འགྲེལ་ཆེན་ལས། ཚངས་པའི་གནས་པ་བཞི་སྟེ། ཚངས་པ་ནི་མྱ་ངན་ལས་འདས་པའོ། །དེའི་དོན་དུ་གནས་པ་ན་ཚངས་པའི་གནས་པ་བཞིའོ། །ཞེས་མི་གནས་པའི་མྱང་འདས་དང༌། དེའི་རྟེན་སངས་འཕགས་གཉིས་ཀ་ལ་ཚངས་པའི་སྒྲ་འཇུག་པར་གསུངས་ཤིང༌། ཐུབ་དགོངས་ལས། བྱང་ཆུབ་སེམས་དཔའ་རྣམས་ནི་སངས་རྒྱས་ཀྱི་མྱུ་གུ་ཐ་སྙད་པའི་སངས་རྒྱས་ཏེ། རྒྱུའི་ངོ་བོར་རྒྱུན་གཅིག་པའི་ཕྱིར་རོ། །ཞེས་བྱང་སེམས་རྣམས་ཐ་སྙད་པའི་སངས་རྒྱས་སུ་གསུངས་པ་ལྟར་ན་ཚངས་པའི་སྒྲ་འདི་ཡང་དེ་ལ་ཕལ་བའི་ཚུལ་དུ་འཇུག་པས། འདིར་ཚངས་པ་ཐེག་པ་ཆེན་པོའི་གང་ཟག་སྤྱི་ལ་བྱའོ། །ཁོ་ན་རེ། ཐོགས་མེད་ཅེས་བཏགས་ཚད་འཕགས་པ་ཐོགས་མེད་ཀྱི་མིང་བཏགས་པ་མིན་པ་ལྟར། འདིར་ཚངས་པ་ཞེས་བཏགས་པ་ཐམས་ཅད་སྟོང་གསུམ་གྱི་བདག་པོ་ཚངས་པའི་མིང་གིས་བཏགས་པར་མི་འགྲོ་སྙམ་ན། འདི་ནི་ལྷ་ཚངས་པའི་མིང་གིས་བཏགས་པར་བྱེད་དགོས་ཏེ། རྗེ་བཙུན་ཡེ་ཤེས་རྒྱལ་མཚན་གྱི་བྱ་རྒྱུད་དོན་གསལ་ལས། འཇིག་རྟེན་འདི་ན་ཚངས་པ་གཙོ་བོར་གྲགས་པ་ལྟར། ཆོས་ཐམས་ཅད་ཀྱི་གཙོ་བོའམ་སྙིང་པོ་མཐར་ཐུག་མི་གནས་པའི་
མྱང་འདས་ཡིན་ལ། ཞེས་དཔེ་དོན་སྦྱོར་ཚུལ་གྱིས་ཤེས་པའི་ཕྱིར་རོ། །དེར་མ་ཟད་རྒྱུད་རང་རང་ལས་སྦས་པའི་བརྡ་སྦྱོར་ལུགས་མི་འདྲ་བ་སྣ་ཚོགས་ཤིག་འོང་བས། ཀྱཻ་རྡོར་གྱི་སྐོར་འདིར་གཞན་སྡེ་དང་བྱེ་སྨྲ་སྡེ་བཞི་སོགས་ཀྱི་ཐ་སྙད་དུ་མ་སྔགས་ཀྱི་གཞི་ལམ་འབྲས་བུ་སོ་སོ་ལ་སྦྱར་བ་མང་ཞིང༌། ཁྱད་པར་དུ་བརྟག་པ་དང་པོའི་ལེའུ་ལྔ་པ་ལས། ཚངས་པ་སྒྲིབ་བྲལ་སངས་རྒྱས་ཉིད། །འཇུག་ཕྱིར་ཁྱབ་འཇུག་བརྗོད་པར་བྱ། །རྟག་ཏུ་དགེ་བས་ཞི་བ་ཉིད། །ཅེས་སོགས་ཀྱིས་སངས་རྒྱས་རྣམས་ལ་སྒྲིབ་པ་དང་བྲལ་བས་ཚངས་པ། ཆོས་ཐམས་ཅད་ཀྱི་རང་བཞིན་དེ་ཁོ་ན་ཉིད་ལ་འཇུག་པས་ཁྱབ་འཇུག སེམས་ཅན་ཐམས་ཅད་རྟག་ཏུ་དགེ་བ་ལ་སྦྱོར་བས་ཞི་བའམ་དབང་ཕྱུག་ཆེན་པོར་བཤད་པ་བཞིན་ནོ། །དེས་ན་བརྒྱ་བྱིན་ཞེས་པ་རང་རྒྱལ་ལ་བྱེད་དེ། སྤྱིར་རང་རྒྱལ་ལ་བསེ་རུ་ལྟ་བུ་དང་ཚོགས་སྤྱོད་ཆེ་ཆུང་གཉིས་ཏེ་རིགས་གསུམ་ཡོད་ཀྱང་གཙོ་བོ་ནི་བསེ་རུ་ལྟ་བུ་ཡིན་ལ། དེ་ནི་མཛོད་ལས། བསེ་རུ་བསྐལ་པ་བརྒྱ་ཡི་རྒྱུས། །ཞེས་བསྐལ་པ་བརྒྱའི་ཚོགས་ལ་བརྟེན་ནས་དགྲ་བཅོམ་ཐོབ་པར་གསུངས་ཤིང༌། བརྒྱ་བྱིན་ཡང་མཆོད་སྦྱིན་བརྒྱ་ལ་བརྟེན་ནས་སྐྱེས་པར་གསུངས་པས་སྒྲ་བཤད་དུ་ཡོད་པ་ལ་དགོངས་ནས་མིང་བཏགས་པ་ཡིན་ཏེ། བརྟག་པ་ཕྱི་མའི་ལེའུ་བཞི་པ་ལས། །གང་ཕྱིར་སྤྲུལ་བ་གནས་བརྟན་ཕྱིར། །སྤྲུལ་བའི་འཁོར་ལོ་གནས་བརྟན་ཉིད། །ཅེས་སོགས་ཀྱིས་བདེ་ཆེན་འདྲེན་བྱེད་གཏུམ་མོའི་གནས་སུ་བརྟན་པས་ན་གནས་བརྟན་པ་དང༌། ཆོས་སྨྲའི་ཀུན་སློང་གི་སེམས་སྙིང་གར་གནས་པས་དེའི་རྩ་འཁོར་ལ་
ཐམས་ཅད་ཡོད་པར་སྨྲ་བ་དང༌། མགྲིན་པའི་གཏུམ་མོ་ལྟེ་བའི་གཏུམ་མོ་སོགས་ཀྱིས་བཀུར་བའམ་གྱེན་དུ་མཆོད་པར་བྱེད་པས་ན་མང་བཀུར་བ་དང༌། སྤྱི་བོར་བདེ་བ་ཕལ་ཆེ་བའི་རྟེན་ཧཾ་ཡིག་གནས་པས་ཕལ་ཆེན་པ་སྟེ། རྩ་འཁོར་བཞི་ལ་སྡེ་པ་བཞིའི་མིང་བཏགས་པ་ལྟ་བུ་མིང་དོན་ཆོས་མཐུན་གྱི་ཟུར་འདྲ་བ་སྦྱར་རུང་བའི་སྒོ་ནས་བརྡ་འདོགས་ཚུལ་གཞུང་གཞན་དང་མི་འདྲ་བར་རྒྱུད་འདི་ལས་མང་དུ་གསུངས་པས། འདིར་ཡང་རྒྱུད་ཀྱི་ལུགས་སྲོལ་དང་མཐུན་པར་བསྐལ་པ་བརྒྱའི་ཚོགས་དང༌། མཆོད་སྦྱིན་བརྒྱ་ལས་བྱུང་བ་གཉིས་འདྲ་ཆོས་སྦྱར་བ་ཡིན་ནོ། །འདི་ལྟར་བྱས་པ་རྟོག་བཟོར་འགྱུར་བས་མི་འཐད་སྙམ་དུ་མི་གཟུང་སྟེ། རྒྱུད་ཀྱི་གསུངས་ཚུལ་དེ་དག་ལ་བརྟེན་ནས་རིགས་པས་རྒྱས་འགེབས་པ་དམ་པ་མང་པོའི་བཞེད་སྲོལ་ལ་ཡོད་པས་ཐམས་ཅད་ཚིག་གིས་དངོས་སུ་ཐོན་མི་དགོས་ཤིང༌། རྣམ་པ་གཅིག་ཏུ་ན་སྙན་དངགས་ཀྱི་སྦྱོར་ཚུལ་ལ་ཡང་ཁྱད་ཆོས་ཕྱོགས་མཐུན་བསྡེབས་ཏེ་ཁྱད་གཞི་མཉམ་དུ་གོ་བར་བྱེད་པ་སྦྱར་བའི་རྒྱན་དང་གབ་ཚིག་གི་སྐབས་སུ་ཡང་དེ་འདྲ་མང་བས་སྦུག་འཐུམ་མི་དགོས་སོ། །དེར་མ་ཟད་འདིའི་ཚངས་པ་དང་བརྒྱ་བྱིན་སོགས་དེ་དག་དངོས་ལ་བྱེད་ན། ཚངས་དང་བརྒྱ་བྱིན་ཁྱབ་འཇུག་ལ་སོགས་པ། །ཞེས་པ་ལྟ་བུ་འབྲེལ་གྱི། དེའི་མཇུག་ཏུ་ཉན་ཐོས་སྦྱར་བ་མི་བདེ་ལ། ཉན་ཐོས་བཤད་ན་ཉན་རང་བྱང་སེམས་ཞེས་པ་ལྟ་བུ་ཞིག་དགོས་ཀྱི། ཐེག་པ་གསུམ་གྱི་ནང་ནས་ཉན་ཐོས་གཅིག་པུ་བཤད་པའི་རྒྱུ་མཚན་འདིའོ་ཞེས་སུས་ཀྱང་བསྟན་དུ་མེད་དོ། །དེས་ན་ཐོས་སྒྲོག་ཉན་ཐོས་ལ་བྱེད་པ་ཀུན་གྱིས་
ཤེས་ཤིང༌། ཚངས་པ་སངས་རྒྱས་སོགས་ཐེག་ཆེན་ལ་སྦྱོར་བ་ཡང་ཅུང་ཟད་གྲགས་ཆེ་བས། བར་ནས་བརྒྱ་བྱིན་ཞེས་པ་རང་རྒྱལ་ལ་འཇུག་ཚུལ་དོན་གྱིས་གོ་བར་དགོངས་ཏེ་འདི་ལྟར་གསུངས་པར་ཤེས་པར་བྱའོ། །ཉན་ཐོས་ལ་ཐོས་སྒྲོག་ཅེས་བཤད་པའི་རྒྱུ་མཚན་ནི། དམ་ཆོས་པད་དཀར་ལས། མགོན་པོ་དེ་རིང་བདག་ཅག་ཉན་ཐོས་གྱུར། །བྱང་ཆུབ་དམ་པ་ཡང་དག་བསྒྲགས་པར་བགྱི། །བྱང་ཆུབ་པ་ཡི་སྒྲ་ཡང་རབ་ཏུ་བསྒྲགས། །དེ་བས་བདག་ཅག་མི་བཟད་ཉན་ཐོས་འདྲ། །ཞེས་ཐེག་པ་ཆེན་པོའི་ལམ་དང་འབྲས་བུ་རྣམས་སངས་རྒྱས་ལས་ཐོས་ནས། རང་གིས་ཉམས་སུ་མི་ལེན་པར་གཞན་ལ་སྒྲོག་པས་ན་དེ་ལྟར་བཤད་པ་ཡིན་ནོ། །རླུང་གི་ཤུགས་ཀྱིས་རིངས་པར་འོངས་པ་ནི། །རྒྱ་མཚོའི་རླབས་བཞིན་དུས་ལས་ཡོལ་བ་མེད། །ཅེས་པ་ནི། བདེ་མཆོག་རྩ་རྒྱུད་ལེའུ་ཞེ་ལྔ་པར། རླུང་གི་ཤུགས་ཀྱིས་འོངས་ནས་ནི། །ཞེས་དང༌། རླུང་གི་ཤུགས་ཀྱིས་འོངས་པར་འགྱུར། །ཞེས་ཡང་ཡང་གསུངས་པ་དང་ཚིག་གི་འགྲོས་བསྟུན་པ་ཡིན་ལ། དོན་ནི་དཔེར་ན་རྒྱ་མཚོ་ཆེན་པོའི་རླབས་དུས་མིན་དུ་མི་འབྱུང་ཞིང༌། ཉི་མ་བདུན་རེའི་མཚམས་སུ་འབྱུང་བ་དེ་རླུང་ལ་སོགས་པའི་རྐྱེན་གང་གིས་ཀྱང་བཟློག་ཏུ་མེད་པར་དཔག་ཚད་མང་པོའི་བར་དུ་འགྲོ་བ་བཞིན། ལྷ་མོའི་ཕྱག་མཚན་ལྕགས་ཀྱུ་དང་ཞགས་པས་རེག་པ་ཙམ་གྱིས་ཐེག་པ་གསུམ་གྱི་སློབ་པ་དང་མི་སློབ་པ་ཐམས་ཅད་ཀྱང་ཐོགས་པ་མེད་པར་དབང་དུ་སྡུད་ནུས་ན་གཞན་འཇིག་རྟེན་པ་རྣམས་སྨོས་ཀྱང་ཅི་དགོས་ཞེས་པའོ། །འོ་ན་དེ་
ལྟར་འགུག་པ་ལ་གཟུགས་ཕུང་དེ་མ་ཐག་ཉ་ལྕགས་ཀྱུས་བཟུང་བ་བཞིན་དྲང་དུ་མེད་ཅིང༌། རྣམ་ཤེས་ཐོགས་མེད་ཡིན་པས་ཇི་ལྟར་འགུག་ཅེ་ན། དེ་ལ་ཁྱབ་པ་མ་ངེས་ཏེ། རིམ་ལྔ་ལས། སེམས་ཅན་ཀུན་གྱི་སྲོག་གྱུར་པའི། །རླུང་ཞེས་བྱ་བས་ལས་ཀུན་བྱེད། །དེ་ནི་རྣམ་ཤེས་བཞོན་པ་སྟེ། །ཞེས་གསུངས་པ་ལྟར། རྣམ་ཤེས་ཐོགས་མེད་ཡིན་ཀྱང་དེ་གང་ལ་བརྟེན་པ་རང་གི་བཞོན་པའི་རླུང་ནི་གཟུགས་ཅན་ཡིན་པས་འདིར་ཡང་རླུང་གི་ཤུགས་ཀྱིས་ཞེས་དམིགས་པ་གསལ་འདེབས་པའི་ཚེ་གཙོ་བོར་དེ་ལ་བརྟེན་ནས་འགུག་པར་གསུངས་པ་ཡིན་ནོ། །དེའི་ཚུལ་གསལ་བར་ཀུ་རུ་ཀུལླེའི་རྟོག་པ་རིམ་པ་ལྔ་པ་དང༌། གསང་སྒྲུབ་ཀྱི་མན་ངག་ཌོམ་བྷི་ཧེ་རུ་ཀའི་གདམས་པ་བསྙེན་སྒྲུབ་ལས་གསུམ་གཅིག་ཏུ་དྲིལ་བ་སོགས་ལས་གསུངས་པ་ལྟར་བུང་བའི་སྦྱོར་བ་གཙོ་བོ་ཡིན་ནོ། །དེ་ཡང་ཅུང་ཟད་བཤད་ན། རང་གི་སྙིང་གར་པདྨ་ལ་དབྱངས་རིང་པོ་བརྒྱད། བསྒྲུབ་བྱའི་སྙིང་གར་པདྨ་འདབ་བརྒྱད་ལ་དབྱངས་ཐུང་ངུ་བརྒྱད་དང༌། ལྟེ་བར་མིང་ཡིག་བསམ། རང་གི་སྙིང་གའི་དབྱངས་ལས་སྤྲོས་པའི་བུང་བ་བརྒྱད་སོང་ནས་དེའི་སྙིང་གའི་པདྨའི་བཅུད་དྲངས་ཤིང༌། རང་གི་སྙིང་གའི་འོད་ཀྱི་ལྕགས་ཀྱུ་དང་མདས་དེའི་མིང་ཡིག་དྲངས་པ་ན་བུང་བ་སོ་སོས་དབྱངས་ཡིག་རེ་བཟུང་ནས་འོངས་པ་རང་གི་དབྱངས་ཡིག་སོ་སོ་ལ་བསྟིམ་པར་མོས་པ་ནི་དམིགས་པ་སྐྱོང་ཚུལ་ཡིན་ལ། དེ་ལྟར་བྱས་པའི་དགོས་པ་ནི་བསྒྲུབ་བྱའི་རླུང་དང་ཁམས་ཀྱི་བཅུད་དྲངས་ན་རྣམ་ཤེས་ཀྱང་དབང་དུ་འདུ་བས། དེའི་ཕྱིར་ཡིན་ཏེ་བསྙེན་བསྒྲུབ་གཅིག་ཏུ་དྲིལ་བའི་མན་ངག་
ལས། རྣམ་ཤེས་ཀྱི་རྟེན་ཐིག་ལེ་དང༌། རླུང་གི་དྭངས་མ་དང༌། མིང་གི་ཡི་གེ་ཡོད་པ་བླངས་ཏེ་ཞེས་སོ། །འདི་ནི་རྒྱུད་ཀྱི་དགོངས་པ་ཡིན་ཏེ། བརྟག་གཉིས་ལས། སྟོན་པ་སུམ་ཅུ་རྩ་གཉིས་མཚན། །གཙོ་བོ་དཔེ་བྱད་བརྒྱད་ཅུ་ལྡན། །ཁུ་བ་ཞེས་བྱའི་རྣམ་པར་གནས། །ཞེས་པའི་ཐད་ཀྱི་རྡོ་རྗེ་སྙིང་འགྲེལ་དུ་རྩ་རྒྱུད་དྲངས་པ་ལས། ཡིད་ཀྱི་མེ་ཏོག་མདའ་ཅན་འདི། །རླུང་གིས་ཡོངས་སུ་མི་འདའ་བར། །བཅིངས་པས་དཔེ་བྱད་ལྡན་པར་འགྱུར། །ཞེས་སེམས་ཀྱི་བྱེད་པ་ཐམས་ཅད་རླུང་ལ་རག་ལས་པ་དང༌། དེའི་རང་གདངས་དབྱངས་གསལ་གྱི་རང་བཞིན་དུ་གནས་པས་ན། རླུང་དེས་བསྐྱེད་པའི་ཁམས་དཀར་དམར་གཉིས་ལ་ཡང་དབྱངས་གསལ་གྱི་སྒྲས་བསྟན་ཅིང༌། རགས་པའི་ཕུང་ཁམས་ཐམས་ཅད་ཀྱང་དེ་ལ་བརྟེན་ནས་གནས་སོ། །དེས་ན་འགུག་པ་བསད་པ་གསོ་བ་སོགས་ཕན་གནོད་གང་བྱེད་ཐམས་ཅད་རྩ་བ་འདི་ལ་རག་ལས་ཏེ། སྡོམ་འབྱུང་ལྟར་འབྱུང་བཞིའི་རླུང་གི་ཕྱེད་པས་ནང་དུ་དབྱངས་སོ་སོའི་རང་བཞིན་ཁམས་གནས་སོ་སོར་བགྲོད་པ་ལ་སྨན་གྱི་བསྟན་བཅོས་སུ་འཁྱམས་པའི་བླ་གནས་ཞེས་བཤད་ཅིང༌། དེའི་རྟེན་འབྲེལ་གྱི་དབང་གིས་ཕྱི་རོལ་ཏུ་ཟླ་བའི་ཆ་འཕེལ་འགྲིབ་ཀྱི་ཚེས་འཆར་བའི་ཚུལ། དུས་འཁོར་འགྲེལ་ཆེན་ལས། འདི་རྣམས་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་པོ་རྣམས་ཏེ། ཟླ་བའི་ཡན་ལག་དང་མངལ་འཛིན་པའི་ཁུ་བའི་ཁམས་ལའོ། །ཞེས་གསུངས་ཤིང༌། དབང་ཕྱུག་གི་དབྱངས་འཆར་ལས་ཀྱང་དེ་དང་ཕྱོགས་
མཐུན་པར་བཤད་དོ། །འདིས་དབང་སྡུད་ཀྱི་ཙཀྲ་དང་མངོན་སྤྱོད་ཀྱི་ལིངྒ་སོགས་སུ་མིང་རུས་བྲི་བ་ཐམས་ཅད་ཀྱང་རླུང་དང་ཐིག་ལེ་སོགས་ཀྱི་མཚོན་དོན་ཡིན་པ་ཤེས་པར་གྱིས་ཤིག །བློ་ཆུང་ཁ་ཅིག་སངས་རྒྱས་རྣམས་ལ་ལྕགས་ཀྱུས་འདེབས་པ་དང༌། དབང་དུ་བྱེད་པ་སོགས་མི་རུང་སྙམ་ན་སྐྱོན་མེད་དེ། འོད་ཟེར་གྱི་ལྕགས་ཀྱུས་མཁའ་ཁྱབ་ཀྱི་སངས་རྒྱས་ཐམས་ཅད་བཀུག་ནས་ཞེས་ཟེར་བཞིན་པ་ཡིན་ཞིང༌། ཆོ་ག་རྒྱས་བསྡུས་གང་ལ་ཡང་ཛཿ ཧཱུཾ་བཾ་ཧོཿ རེ་ཡོད་པ་དེའི་ཚེ་དམིགས་པ་ཅི་ཞིག་ཡིད་ལ་བྱེད་དགོས་པ་ལེགས་པར་སོམས་ཤིག །དེར་མ་ཟད་ཡེ་ཤེས་འབེབས་པ་སོགས་ཀྱི་ཚེ་སངས་རྒྱས་རྣམས་ཀྱི་གཉིས་སུ་མེད་པའི་ཡེ་ཤེས་ཧཱུཾ་ལ་སོགས་པ་ས་བོན་གྱི་རྣམ་པར་སྤྱན་འདྲེན་པ་ཡང་རླུང་འོད་ཟེར་ལྔ་པའི་རྟེན་གྱི་དབང་དུ་བྱས་པ་ཡིན་ནོ། །༈ གསུམ་པ་མཚན་ཙམ་གྱིས་ཀྱང་གདུལ་བྱ་དབང་དུ་བྱེད་ཚུལ་ལ་སྦྱར་ཏེ་བསྟོད་པ་ནི། ཆེ་ཞིང་འགྱིང་བའི་དྲེགས་པ་མཐའ་དག་ཀྱང༌། །ཁྱོད་ཀྱི་མཚན་ཙམ་ཡིད་ལ་དྲན་བྱེད་པའི། །དབུལ་པོའི་མདུན་སར་རིམ་གྲོའི་སྦྱོར་བ་དག །བགྱིད་པར་འགྱུར་ལ་མྱོང་ལྡན་ཐེ་ཚོམ་བྲལ། །ཞེས་བྱུང༌། དེ་ཡང་དེ་བཞིན་གཤེགས་པའི་གསང་བ་བསྟན་པའི་མདོ་ལས། སངས་རྒྱས་བཅོམ་ལྡན་འདས་རྣམས་ནི་ཆོས་ཀྱི་སྐུས་རབ་ཏུ་ཕྱེ་བས་མཐོང་བས་ཀྱང་སེམས་ཅན་རྣམས་ཀྱི་དོན་བྱེད་དོ། །ཐོས་པ་དང་རེག་པས་ཀྱང་སེམས་ཅན་རྣམས་ཀྱི་དོན་བྱེད་དོ། །ཞེས་གསུངས་པ་ལྟར། དང་པོ་ཐུགས་བསྐྱེད་པ་ནས་བཟུང་སྟེ་སྒོ་གསུམ་གྱི་སྤྱོད་པ་མཐའ་དག་གཞན་དོན་ཁོ་ནར་
དམིགས་པའི་དབང་གིས་སྐུ་མཐོང་ཙམ་དང༌། མཚན་ཐོས་པ་ཙམ་གྱིས་ཀྱང་འགྲོ་བའི་དོན་རླབས་པོ་ཆེ་འབྱུང་ལ། དེ་ལྟར་ཕན་ཡོན་ཆེ་བའི་དབང་གིས་སོ་སོར་ཐར་པའི་མདོ་ལས། སངས་རྒྱས་ཞེས་བྱའི་སྒྲ་འདི་ཡང༌། །འཇིག་རྟེན་དག་ན་ཤིན་ཏུ་དཀོན། །ཞེས་གསུངས་སོ། །བྱེ་བྲག་གསང་སྔགས་ཀྱི་སྐབས་འདིར་མིང་དབང་གི་ནུས་པ་ཡོངས་སུ་རྫོགས་པ་ལ་བརྟེན་ནས་མཚན་གྱི་སྒྲ་ཙམ་རྣ་བར་ཐོས་པས་ཀྱང་འཁོར་བའི་སྡུག་བསྔལ་རྩད་ནས་ཕྱུང་བའི་བདེ་ཆེན་སངས་རྒྱས་ཀྱི་སྐུ་འགྲུབ་པའི་བག་ཆགས་འཇོག་པ་སོགས་ནི་སངས་རྒྱས་ཐམས་ཅད་ཀྱི་ཐུན་མོང་གི་ཆེ་བ་ཡིན་ལ། ཁྱད་པར་དུ་རང་རང་གི་ཐུན་མོང་མ་ཡིན་པའི་འཕྲིན་ལས་ཀྱི་བཀའ་བབས་བདེ་བར་གཤེགས་པ་མཆེད་བརྒྱད་ཀྱི་མཚན་གྱི་ཕན་ཡོན་སོ་སོར་གསུངས་པ་ལྟ་བུ་མདོ་ཆོག་དང༌། གཟུངས་དང་རྟོག་པ་རྣམས་ལས་ལྷ་རང་རང་གི་ཆེ་བ་བརྗོད་ཚུལ་མི་འདྲ་བ་མང་དུ་ཡོད་པ་ལྟར། བཅོམ་ལྡན་འདས་མ་འདི་ཡང་དབང་གི་ལས་ལ་བརྟེན་ནས་ལུས་ཅན་གྱི་དོན་མཛད་པའི་ཐུགས་བསྐྱེད་གོམས་པ་ཡོངས་སུ་རྫོགས་ཤིང༌། དུས་ལ་བབས་པའི་དབང་གིས་གདུལ་བྱའི་སྐྱེ་བོ་ཡིད་ཆེས་དང་ལྡན་པ་རྣམས་ཀྱིས་འདིའི་མཚན་ལན་གཅིག་བརྗོད་དེ་གསོལ་བ་བཏབ་ན་ཡང༌། འཇིག་རྟེན་གྱི་རྒྱལ་བློན་སོགས་རིགས་རུས་དང་སྟོབས་འབྱོར་མངའ་ཐང་སོགས་ཀྱི་སྒོ་ནས་ཆེ་ཞིང༌། རང་ཡང་སྲིད་ན་མཐོ་བའི་མངོན་རློམ་གྱིས་འགྱིང་བ། སུ་ལ་ཡང་གུས་པས་འདུད་པར་མི་བྱེད་པའི་དྲེགས་ལྡན་རྣམས་ཀྱང་སྒྲུབ་པ་པོ་དེ་ཉིད་རིགས་
རུས་ལོངས་སྤྱོད་མངའ་ཐང་སོགས་དམན་པའི་སྤྲང་པོ་ལྟ་བུར་གནས་པ་ལ་ཡང་ལྟོས་པ་མེད་པར་གུས་པས་བཏུད་ནས་ལུས་ངག་གིས་བསྙེན་བཀུར་དང་རིམ་གྲོ་བདོག་པའི་ཚོགས་ཀྱིས་མཆོད་པ་སོགས་རང་དབང་མེད་པར་བསྒྲུབ་པར་འགྱུར་རོ། །འདི་ལ་ཡང་བསོད་ནམས་དམན་པ་རྣམས་ཀྱིས་དེ་ལྟར་འོང་བ་མི་སྲིད་སྙམ་དུ་ལོག་པར་རྟོག་པའི་དབང་གིས་ཅི་ཙམ་བསྒྲུབ་ཀྱང་བྱིན་རླབས་མི་འབྱུང་བ་ན་ལྷ་ལ་ནུས་པ་མེད་པ་མིན་གྱི་རང་གི་བློའི་སྐྱོན་ཡིན་ཏེ། རྒྱུད་རྟོག་པ་གསུམ་པ་ལས། ཡང་ན་བླུན་པོ་དད་པ་བརྟན། །དེ་ལ་སྦྱོར་བའི་དངོས་གྲུབ་ཉེ། །རྟོག་ཅིང་དཔྱོད་པའི་རྟོག་གེ་པ། །དེ་ལ་སྦྱོར་བའི་དངོས་གྲུབ་རིང༌། །ཞེས་གསུངས་སོ། །དེ་ཡང་དཔེར་ན་མེ་ལྕགས་དང་མེ་རྡོ་ལས་མེ་འབྱུང་བ་བདེན་ཡང༌། དེ་གཉིས་མ་ཕྲད་པར་ཇི་ཙམ་བརྡེག་པའི་སྟངས་ཀ་བྱས་ཀྱང་མེ་མི་འབྱུང་བ་ལྟར། རང་རེ་ལ་ཆོས་ནས་གསུངས་པའི་ཕན་ཡོན་མངོན་དུ་འབྱུང་མི་ཐུབ་པ་ནི། ཆོས་བྱེད་པའི་སྟངས་ཀ་ཙམ་ལས་དོན་དུ་ཆོས་དང་སེམས་མ་ཕྲད་པའི་རྟགས་ཡིན་ཏེ། སྐྱེས་རབས་ལས། ནམ་མཁའ་དང་ནི་ས་གཞིའི་བར་ཡང་རིང༌། །རྒྱ་མཚོའི་ཕ་རོལ་ཚུ་རོལ་འགྲམ་ཡང་རིང༌། །ཤར་ནུབ་གཉིས་ཀྱི་རི་བར་དེ་བས་རིང༌། །ཕལ་དང་དམ་པའི་ཆོས་ཀྱང་དེ་བས་རིང༌། །ཞེས་གསུངས་སོ། །དེས་ན་འདི་ཉིད་དུ་ཡང༌། མྱོང་ལྡན་ཐེ་ཚོམ་བྲལ། །ཞེས་གསུངས་ཏེ། བྱིན་རླབས་འཇུག་པའི་རྒྱུ་ཚོགས་རྣམས་ཚུལ་བཞིན་དུ་མི་སྒྲུབ་པར་འབྲས་བུ་ལ་རྟོག་གེའི་རིགས་པའི་སྒོ་ནས་འཐད་མི་འཐད་ཀྱི་དཔྱད་པ་མང་དུ་བྱེད་པའི་རྟོག་གེ་པ་རྣམས་
ལ་ཐེ་ཚོམ་དེ་ལྟར་སྐྱེ་ཡང༌། ཉམས་མྱོང་ཅན་གྱི་རྣལ་འབྱོར་པ། རྒྱུད་སྡེ་ནས་གསུངས་པ་ལྟར་གྱི་བསྙེན་སྒྲུབ་ལས་སྦྱོར་ཚད་དུ་ཕྱིན་པར་བྱས་པའི་ལག་རྗེས་སུ་གང་འདོད་པའི་དངོས་གྲུབ་ཐམས་ཅད་བླ་མ་གོང་མ་རྣམས་ཀྱིས་གསུངས་པ་ལྟར་ལག་ཏུ་ལོན་པ་རྣམས་ལ་ཐེ་ཚོམ་ཅུང་ཟད་ཙམ་ཡང་སྐྱེ་བའི་གོ་སྐབས་མེད་དོ།། །།༈ གཉིས་པ་དཀྱིལ་འཁོར་རྒྱལ་མཆོག་གི་ཏིང་ངེ་འཛིན་ལ་བརྟེན་ནས་དཀྱིལ་འཁོར་གྱི་འཁོར་ལོ་སྤྲོ་ཞིང་སྡུད་པའི་བདག་པོར་གྱུར་ཚུལ་ནི། དེ་ལྟ་མོད་ཀྱི་ཚུལ་འདི་ཕྲ་མོའི་གཏམ། །ཧེ་རུ་ཀ་དཔལ་སྙོམས་འཇུག་བདེ་བའི་རོས། །དགྱེས་དགུར་འགུགས་པའི་རྣལ་འབྱོར་སྙིང་གི་དབུས། །ཁྲག་འཐུང་དཔལ་དེ་ཅི་དགར་རོལ་མིན་ནམ། །ཞེས་བྱུང༌། དེ་ལ་དཀྱིལ་འཁོར་རྒྱལ་མཆོག་མན་ཆད་ནི་སངས་རྒྱས་པའི་རྗེས་ཀྱི་མཛད་པ་དང་རྣམ་པར་མཐུན་པའི་སྒོམ་ཚུལ་ཡིན་པས་མར་སྦྱང་གཞི་དང་སྦྱོར་མི་དགོས་ལ། ལམ་དུས་སུ་སློབ་པའི་ཟུང་འཇུག་ཐོབ་ནས་ཟུང་འཇུག་པས་དཀྱིལ་འཁོར་རྒྱལ་མཆོག་དངོས་སུ་སྤྲུལ་ཏེ་གཞན་དོན་སྒྲུབ་པའི་སྨིན་བྱེད་དང༌། འབྲས་དུས་སུ་སྐུ་གསུམ་མངོན་དུ་མཛད་ནས་སྙོམས་འཇུག་གི་སྦྱོར་བས་དཀྱིལ་འཁོར་གྱི་འཁོར་ལོ་སྤྲུལ་ཏེ་གདུལ་བྱ་རྣམས་ཀྱི་མ་དག་པའི་སྣོད་བཅུད་ཕུང་ཁམས་ཐམས་ཅད་སྦྱོར་ཞིང༌། རྫོགས་པའི་བྱང་ཆུབ་ཏུ་འགོད་པའི་མཛད་པ་རྣམས་འབྲས་བུ་ལམ་བྱེད་ཀྱི་ཚུལ་དུ་སྦྱོང་དགོས་སོ། །དེས་ན་གཞུང་གཞན་ལས་འགྲོ་བ་དག་པའི་རྣལ་འབྱོར་ཞེས་འོད་ཟེར་སྤྲོ་བསྡུའི་སྒོ་ནས་རིགས་དྲུག་གི་གནས་རྣམས་གཞལ་ཡས་ཁང་དང༌། འགྲོ་བ་
རྣམས་ལྷའི་སྐུར་མོས་པ་ཡང་དཀྱིལ་འཁོར་རྒྱལ་མཆོག་གི་དོད་དུ་གསུངས་ལ། འོན་ཀྱང་འདིར་ནི་ཚིག་རྐང་ཕྱེད་གསུམ་གྱིས་ཐོག་མར་ཧེ་རུ་ཀ་དང་མཉམ་པར་སྦྱོར་བའི་ཚུལ་དང༌། དེ་ནས་རྐང་པ་ཕྱེད་དང་གཉིས་ཀྱིས་དཀྱིལ་འཁོར་ལྷ་ཚོགས་སྤྲོ་བའི་ཚུལ་གཉིས་སུ་བྱས་ཏེ་དཀྱིལ་འཁོར་རྒྱལ་མཆོག་སྤྱིའི་འགྲོས་དང་མཐུན་པར་གསུངས་སོ། །དེ་ལ་ཚིག་གི་དོན་ནི། འཕགས་མ་རིག་བྱེད་དབང་མོ་ཁྱོད་ལ་གསོལ་བ་བཏབ་པས། འཇིག་རྟེན་གྱི་དྲེགས་ལྡན་ཆེ་དགུ་མ་ལུས་པ་དབང་དུ་འདུ་བའི་ཚུལ་གོང་དུ་གསལ་བ་དེ་ལྟ་བུ་ལགས་མོད་ཀྱི། འོན་ཀྱང་ཚུལ་འདི་ནི་ཕལ་བའི་སྐྱེ་བོ་རྣམས་ཀྱིས་ངོ་མཚར་མཆོག་ཏུ་བྱེད་ཀྱང༌། ཁྱོད་ཀྱི་ནུས་མཐུའི་དབང་དུ་བགྱིས་ན་ཡོན་ཏན་ཆ་ཤས་ཤིན་ཏུ་ཕྲ་མོའི་ཟུར་གཅིག་གི་བསྔགས་པ་བརྗོད་པའི་གཏམ་ཙམ་དུ་འགྱུར་ཏེ། ཁྱོད་ཀྱི་ཡོན་ཏན་བསམ་གྱིས་མི་ཁྱབ་པའི་ནུས་པས་བཅོམ་ལྡན་འདས་དཔལ་ཧེ་རུ་ཀ་ཡང་འདོད་དགུར་འགུགས་པར་ནུས་ན་གཞན་ཐམས་ཅད་ལྟ་སྨོས་ཀྱང་ཅི་དགོས། ཞེས་པའོ། །འོ་ན་འདིས་དཔལ་ཧེ་རུ་ཀ་ཡང་འགུགས་པར་ནུས་པའི་རྒྱུ་མཚན་དང༌། ཐབས་གང་གི་སྒོ་ནས་འགུགས་པའི་ཚུལ་སོགས་ཇི་ལྟར་ཡིན་སྙམ་ན། སྙོམས་འཇུག་བདེ་བའི་ངོས། །དགྱེས་དགུར་འགུགས། ཞེས་གསུངས་ཏེ། དེ་ཡང་ཆགས་པའི་ཀུན་རྟོག་དང༌། ཚོར་བ་བདེ་བས་དྲངས་ཏེ་ཕོ་མོ་ལྷན་ཅིག་འདུས་པ་ལྟ་བུ་མ་ཡིན་པར་སློབ་པའི་གནས་སྐབས་ནས་རྣལ་འབྱོར་གསང་མཐའི་ལམ་གྱི་སྙིང་པོ་ཉམས་སུ་བསྟར་བའི་ལག་རྗེས་སུ་ཕྱི་ནང་གི་རྟེན་འབྲེལ་མ་འཆོལ་བར་ཇི་ལྟ་བ་བཞིན་འབྱུང་བའི་གནད་ངོ་མཚར་བ་ཞིག་གོ །དེའི་
ཚུལ་ཡང་མངོན་བརྗོད་ལས། རྣལ་འབྱོར་མ་ཡིས་ཉེར་བསྟེན་པའི། །རྣལ་འབྱོར་ཆེན་པོ་འདི་གསལ་འགྱུར། །ཡེ་ཤེས་འོད་ཟེར་མཆོག་མཐོང་ནས། །རྣལ་འབྱོར་མ་རྣམས་ལེགས་འདུ་སྟེ། །པདྨའི་འབྱུང་གནས་ཉམས་དགའ་བར། །ངང་པའི་ཚོགས་འདུ་ཇི་བཞིན་ནོ། །ཞེས་བཅོམ་ལྡན་འདས་མའི་བྱིན་རླབས་སྙིང་ལ་ཞུགས་པ་ན། དཔལ་ཧེ་རུ་ཀ་ཡང་ཡིད་ལ་འཇུག་ཅིང་དེ་གཉིས་ཀ་སྒྲུབ་པ་པོའི་སྙིང་གར་ཡབ་ཡུམ་ཟུང་དུ་འཇུག་པའི་འོད་ཟེར་གྱིས་དཔའ་བོ་དང་མཁའ་འགྲོའི་ཚོགས་སྤྲོ་བ་དང༌། གནས་གསུམ་གྱི་དཔའ་བོ་མཁའ་འགྲོ་ཐམས་ཅད་སྡུད་པ་སོགས་དཀྱིལ་འཁོར་གྱི་འཁོར་ལོའི་སྤྲོ་བསྡུ་པདྨའི་མཚོ་ལ་ངང་པའི་འདུ་འགོད་བཞིན་དུ་འབྱུང་བར་གསུངས་སོ། །དེ་ཡང་བསྐྱེད་རིམ་གྱི་སྐབས་སུ་ཚུལ་དེ་ཉིད་མོས་པ་ཡིད་བྱེད་ཀྱིས་གོམས་པ་ལ་བརྟེན་ནས་རྫོགས་རིམ་གྱི་ཚེ་རོ་རྐྱང་གི་རླུང་དྷཱུ་ཏཱིར་བཙུད་དེ་ཐོག་མར་གཏུམ་མོ་ལ་གནད་དུ་བསྣུན་པ་ན་དེ་ཉིད་དབུ་མའི་ལམ་ནས་གྱེན་དུ་འབར་ཞིང༌། དེའི་སྟོབས་ཀྱིས་སྤྱི་བོའི་བྱང་སེམས་ཞུ་བ་ཐུར་དུ་བབས་ཏེ། གཉིས་ཀ་སྙིང་གའི་གནས་སུ་ཕྲད་ནས་དཔྱིད་དང་ཐིག་ལེ་སྙོམས་པར་ཞུགས་པ་ལས་ལྷན་སྐྱེས་བདེ་ཆེན་འདྲེན་ཞིང༌། བདེ་བ་ལྷ་སྐུར་འཆར་བ་སོགས་གྲུབ་ཆེན་དྲིལ་བུ་ཞབས་ཀྱིས་རིམ་པ་དང་པོ་ནས་གསུངས་པ་ལྟར་རྨོངས་པའི་རབ་རིབ་རྩད་ནས་གཅོད་པའི་ངེས་དོན་གྱི་ཧེ་རུ་ཀ་ལྷན་ཅིག་སྐྱེས་པའི་ཡེ་ཤེས་འོད་གསལ་མངོན་པར་བྱང་ཆུབ་པའི་རིམ་པ་སོགས་སྐྱེ་བའི་ཐབས་ཁྱད་པར་ཅན་དུ་འགྱུར་རོ། །ཚུལ་དེ་ལ་དགོངས་ནས་རྗེ་བདག་ཉིད་ཆེན་
པོས། བདེ་བའི་མཆོག་གྱུར་ལྷན་སྐྱེས་གཅིག་པུ་ཉིད། །དམ་ཚིག་སྐུ་གསུང་ཐུགས་དང་ཡེ་ཤེས་ཀྱི། །རབ་འབྱམས་འཁོར་ལོ་ལྔ་ཡི་ལྷ་ཚོགས་སུ། །སྤྲུལ་མཛད་ཧེ་རུ་ཀ་དཔལ་ཞབས་ལ་འདུད། །ཅེས་དཀྱིལ་འཁོར་རྒྱལ་མཆོག་གི་རྩ་བ་ཧེ་རུ་ཀ་ལྷན་སྐྱེས་ཉིད་དུ་གསུངས་པ་བཞིན་ནོ། །གཞན་དག་ན་རེ། དཔྱིད་དང་ཐིག་ལེ་མཉམ་སྦྱོར་དུ་འགྲུབ་པ་འཐད་མོད་ཀྱང༌། དེ་སྐབས་འདིར་མི་འབྲེལ་སྙམ་པ་ནི། བདེ་མཆོག་གི་ཆོ་གའི་ངག་འདོན་ཙམ་བྱང་ཡང་རྒྱུད་དོན་མན་ངག་གིས་འབྱེད་མ་ནུས་པའི་གཏམ་ཡིན་ཏེ། བདེ་མཆོག་གི་སྐབས་སུ་དེ་ལྟར་བྱེད་པ་ཡང་རྩ་རྒྱུད་ལས་ལུས་དཀྱིལ་གྱི་རྣམ་གཞག་ཤིན་ཏུ་སྦས་པའི་ཚུལ་གྱིས་ཟུར་ཙམ་ལས་མ་གསུངས་ཀྱང༌། དེ་ཉིད་བདེ་དགྱེས་ཐུན་མོང་གི་བཤད་རྒྱུད་སམ་བྷུ་ཊ་དང༌། ཕ་རྒྱུད་དང་ཐུན་མོང་བ་རྡོ་རྗེ་ཕྲེང་བ། མངོན་བརྗོད། ཀུན་སྤྱོད་སོགས་ལ་དེ་གསུངས་པ་རྣམས་ཀྱིས་ཁ་བསྐང་སྟེ་གསལ་བར་མཛད་པ་ཡིན་པས་ཐམས་ཅད་དང་པོ་ནས་དངོས་ཟིན་ལ་ཡོད་མི་དགོས་སོ། །དེ་ཡང་བརྟག་གཉིས་ལས། རྣལ་འབྱོར་མ་ལུས་དབུས་སུ་ནི། །ཨ་ཡི་རྣམ་པ་སྡོམ་པའི་གནས། །ཇི་ལྟར་ཕྱི་རོལ་དེ་བཞིན་ནང༌། །སྡོམ་པའི་དེ་ཉིད་རབ་ཏུ་ཕྱེ། །ཞེས་རྣལ་འབྱོར་མའི་ངོ་བོ་ལྟེ་བའི་གཏུམ་མོ་ཨ་ཐུང་གིས་དཔའ་བོའི་རང་བཞིན་གྱི་བྱང་སེམས་དྲངས་པའི་བདེ་ཆེན་སྐྱེད་པ་དང༌། རྣལ་འབྱོར་མ་དང་དཔའ་བོ་དངོས་སུ་འདུས་པའི་བདེ་ཆེན་སྐྱེད་པ་གཉིས་ཕྱི་ནང་དུ་སྦྱར་ཏེ་གསུངས་པའི་དོན། སམྦྷུ་ཊར་རྣལ་འབྱོར་མ་བདག་མེད་མ་ལ་བྱས་ནས་གསུངས་ཀྱང༌། དཀྱིལ་འཁོར་སོ་སོའི་སྐབས་སུ་མིང་འདོགས་
ཐ་དད་པ་ཙམ་ལས་དོན་ངོ་བོ་གཅིག་པས་མན་ངག་གིས་རྒྱས་བཀབ་སྟེ། དཔྱིད་ཐིག་ལས། ཕག་མོ་ཏི་ལ་ཀ་ཞེས་བརྗོད། །ལས་ཀྱི་རླུང་གིས་བསྐྱོད་ནས་སུ། །ལྟེ་བའི་དཀྱིལ་འཁོར་ནས་ནི་འབར། །བ་སནྟ་དད་ཕྲད་པས་མཉེས། །སྙོམས་པར་འཇུག་པས་ཡང་དག་བཞུགས། །ཞེས་དོན་སྔ་མ་དང་མཚུངས་ཀྱང༌། མིང་ཕག་མོ་ལ་འདོན་པ་སྤོས་པ་བཞིན་དུ་སྐབས་འདིར་ཡང་སྦྱར་རུང་སྟེ། གོང་དུ་ནང་གི་ཕག་མོ་ཞེས་གསུངས་པའི་དགོངས་པ་མཐར་ཐུག་པ་ཡང་འདི་ཡིན་ནོ། །དེ་ལྟར་དགྱེས་དགུར་འགུགས་པས་ཞེས་བྱེད་ཚིག་བྱ་དགོས་ཏེ། ཡབ་ཡུམ་སྙོམས་པར་ཞུགས་པ་ལས་དཀྱིལ་འཁོར་གྱི་འཁོར་ལོ་རྫོགས་པར་སྤྲོ་བའི་དོན་ཡིན་ལ། དེའི་ཚུལ་ནི། རྣལ་འབྱོར་སྙིང་གི་དབུས། །ཁྲག་འཐུང་དཔའ་བོ་ཅི་དགར་རོལ་མིན་ནམ། །ཞེས་པས་བསྟན་ཏེ། ཅི་དགར་རོལ་པའི་དོན་ནི་ཡབ་ཡུམ་ཟུང་གཅིག་སྙིང་གར་བཞུགས་པ་ཙམ་མ་ཡིན་པར་གནས་ལུས་ལོངས་སྤྱོད་འཁོར་ཕུན་སུམ་ཚོགས་པ་སྟེ་དག་པ་བཞིས་བསྡུས་པའི་དཀྱིལ་འཁོར་གྱི་འཁོར་ལོའི་བཀོད་པ་བསམ་གྱིས་མི་ཁྱབ་པའི་རོལ་པ་དང་བཅས་ཏེ་བཞུགས་པའི་དོན་ནོ། །ཁོ་ན་རེ། འདི་འདྲ་བའི་དཀྱིལ་འཁོར་དེ་ལུས་དཀྱིལ་གྱི་དབང་དུ་བྱས་པ་ཡིན་ན། ཀྱཻ་རྡོར་ལུགས་ཀྱི་ལྷ་བརྒྱ་དང་ང་བདུན་གནས་སོ་སོར་འགོད་དགོས་ཤིང༌། བདེ་མཆོག་དང་འབྲེལ་བར་བྱེད་ན་ཡང་ལྷ་དྲུག་ཅུ་གནས་སོ་སོར་འགོད་དགོས་རྒྱུ་ལ། འདིར་སྙིང་ག་ཁོ་ནར་བཤད་པས་དེ་དང་མི་མཐུན། ཕྱི་དཀྱིལ་གྱི་དབང་དུ་བྱས་ན་ཡང་དཔྱིད་
དང་ཐིག་ལེ་ལས་གཙོ་བོ་ཡབ་ཡུམ་བསྐྱེད་པ་ཕྱི་དཀྱིལ་སྒོམ་ཚུལ་གྱི་བཤད་པ་དང་མི་མཐུན་པས་མི་འཐད་སྙམ་ན། སྤྱིར་ལུས་ཀྱི་ནང་དུ་བསྒོམ་པ་ཙམ་གྱིས་ལུས་དཀྱིལ་དུ་མི་འགྲོ་ཞིང༌། ཁམས་ཀྱི་འདུ་འཕྲོད་ལས་ལྷའི་སྐུ་དེ་འགྲུབ་པའི་ནུས་པ་སྨིན་པ་ཙམ་གྱིས་ཁམས་དེ་ལས་བསྐྱེད་པར་འགྲོ་བའི་ངེས་པ་ཡང་མེད་ལ། ལུས་དཀྱིལ་གྱི་ལུགས་སུ་བྱས་ཀྱང་ལུས་ཀྱི་ཆ་སྟོད་སྨད་ཐམས་ཅད་ལ་སྐྱེད་དགོས་པའི་ཁྱབ་པ་མེད་དེ། ཚར་ཆེན་གྱི་མཁའ་སྤྱོད་མའི་ལུས་དཀྱིལ་ཡིད་བཞིན་ནོར་བུ་ལས། རྡོ་རྗེའི་ལུས་ལ་ཡུལ་ཆེན་པོ་སོ་བདུན་གྱི་རྩ་ཁམས་ཡི་གེ་ཚང་བར་གནས་ལ། དེ་དག་གི་ནུས་པ་སྙིང་དབུས་ན་གནས་པའི་རྩ་ཁམས་ལ་ཚང་བས། ཞེས་སྙིང་གའི་རྩ་འཁོར་གཅིག་པུ་ལ་ལུས་དཀྱིལ་ཆ་ཚང་བ་འགོད་རུང་བར་གསུངས་ཤིང༌། དེ་ནི་རྡོར་འཕྲེང་ལས། གཙོ་བོ་ཡང་ནི་བསྡུས་པ་ལས། །གནས་རྣམས་ཀྱི་ནི་གྲངས་སུ་འགྱུར། །ཞེས་རྩ་སྟོང་ཕྲག་དོན་གཉིས་བསྡུས་པ་རྩ་ཉེར་བཞི་དང༌། སླར་ཡང་བསྡུས་ནས་འགྲོ་བ་ནི། །གསུམ་དང་རྣམ་བརྒྱད་དབྱེ་བ་ཡིས། །ཞེས་སྙིང་གའི་རྩ་འདབ་བརྒྱད་དང༌། དེ་ཡང་དབུ་མ་རོ་རྐྱང་གསུམ་དུ་འདུ་ལ། གཙོ་བོ་གསུམ་པོ་སླར་ཡང་ནི། །སྦྱོར་བས་གཅིག་པ་ཉིད་དུ་འགྲོ། །ཞེས་དྷཱུ་ཏཱིར་འདུས་པར་གསུངས་པའི་དགོངས་པའོ། །སྐབས་དོན་གྱི་ལན་ནི། འདིར་བཤད་པའི་དཀྱིལ་འཁོར་གྱི་རྣམ་གཞག་དེ་སྒྲུབ་པ་པོས་ཕྱི་དཀྱིལ་དང་ལུས་དཀྱིལ་གང་རུང་སྒོམ་ཚུལ་གྱི་དབང་དུ་བྱས་པ་མ་ཡིན་པར། ཡི་དམ་ལྷའི་བྱིན་རླབས་རྒྱུད་ལ་ཞུགས་པ་ལ་བརྟེན་ནས་དག་པའི་རང་སྣང་གི་རྟེན་དང་བརྟེན་པའི་དཀྱིལ་འཁོར་
འཆར་ཚུལ་ཙམ་ཡིན་པས། ཕྱི་ནང་གི་ལུས་འདི་ཙམ་དུ་མ་ཟད་གངྒཱའི་ཀླུང་གི་རྡུལ་ཕྲ་རབ་ཇི་སྙེད་པ་དེ་སྙེད་ཀྱི་སྟེང་དུ་རེ་རེ་འབྱུང་ཡང་འགལ་བ་མེད་པས་ཐེ་ཚོམ་བྱ་མི་དགོས་སོ། །ད་ལྟའི་རྗེས་འཇུག་གི་གདུལ་བྱའི་རྒྱུད་ལ་འཕགས་མའི་བྱིན་རླབས་ཀྱིས་ཧེ་རུ་ཀའི་དཀྱིལ་འཁོར་རྟེན་དང་བརྟེན་པར་བཅས་པ་དེ་ལྟ་བུ་འགྲུབ་པ་ཡང་འཕགས་མ་རང་ཉིད་ཀྱིས་སྔོན་རིམ་པ་གཉིས་ཀའི་དཀྱིལ་འཁོར་རྒྱལ་མཆོག་ལ་བསླབ་པའི་འབྲས་བུ་ཡིན་པས། རྒྱུ་དང་འབྲས་བུ་གཉིས་ཀའི་ཆ་ནས་བསྟོད་པར་འགྱུར་རོ། །བཅོམ་ལྡན་འདས་མ་འདི་ཉིད་དང༌། བདག་མེད་མ་དང༌། རྡོ་རྗེ་ཕག་མོ་རྣམས་དོན་ངོ་བོ་གཅིག་པས། བདེ་དགྱེས་གཉིས་གང་དང་འབྲེལ་བར་ཉམས་སུ་བླང་ཡང་རུང་ལ། ཁ་ཅིག་ཁྲག་འཐུང་ཞེས་པ་བདེ་མཆོག་ཁོ་ནར་བྱེད་པ་དོན་མིན་ཏེ། དེ་གཉིས་ཀར་རང་རང་གི་རྒྱུད་ལས་ཧེ་རུ་ཀ་ཞེས་བཏགས་ཤིང༌། ཡི་གེ་གསུམ་གྱི་དོན་དང་བཅས་གསལ་བར་གསུངས་པའི་ཕྱིར་དང༌། ཁྲག་འཐུང་ཞེས་པ་ནི་དེ་ཉིད་བོད་སྐད་དུ་བསྒྱུར་བ་ཡིན་པས་སོ། །དེའི་ཚུལ་ཡང་ཧེ་དང་རུ་དང་ཀ་གསུམ་ལ་ཡི་གེ་བསྣན་པས་རིམ་བཞིན། ཧེ་ལ་ཞེས་པ་རོལ་པ་དང༌། རུ་ཏི་ར་ཁྲག་དང༌། ཀ་པཱ་ལ་ཐོད་པ་སྟེ་མཉམ་དུ་བསྒྱུར་ན་ཐོད་ཁྲག་ལ་རོལ་ཞེས་པར་འགྲོ་ཡང༌། བསྡུས་ནས་ཁྲག་འཐུང་དུ་བསྒྱུར་བ་ཡིན་པའི་ཕྱིར་ཏེ། སྦས་དོན་ཀུན་གསལ་ལས། མར་དོའི་ལུགས་འཛིན་པ་དག་ཡི་གེ་གསུམ་ལ་ཡི་གེ་བསྣན་པའི་ངེས་ཚིག་གི་བཤད་པ་བྱས་པས་ཁྲག་འཐུང་དུ་སོང་བར་བཤད་པ་ལེགས་
སོ། །ཞེས་གསུངས་པ་ལྟར་རོ། །༈ གསུམ་པ་ལས་རྒྱལ་མཆོག་གི་ཏིང་ངེ་འཛིན་ལ་བརྟེན་ནས་ཞི་སོགས་རབ་འབྱམས་ལས་ཀྱི་དངོས་གྲུབ་ལ་དབང་འབྱོར་བའི་ཚུལ་ནི། ཞི་དང་རྒྱས་དབང་མངོན་སྤྱོད་ལས་རབ་འབྱམས། །གྲུབ་ཆེན་བརྒྱད་དང་ཟུང་འཇུག་ཕྱག་རྒྱ་ཆེ། །མ་ལུས་བདེ་བླག་སྩོལ་མཛད་བཅོམ་ལྡན་མ། །ཁྱོད་ལ་ཡོན་ཏན་བརྗོད་ནས་བསྟོད་པ་ལགས། །ཞེས་བྱུང༌། དེ་ཡང་རྐང་པ་དང་པོ་གཉིས་ཀྱིས་འདི་ལ་བརྟེན་ནས་འགྲུབ་པའི་དངོས་གྲུབ་ཀྱི་དབྱེ་བ་དམན་འབྲིང་མཆོག་གསུམ་དུ་ཕྱེ་ནས་བསྟན་ཏེ། རྐང་པ་དང་པོས་ཆུང་ངུ་དང༌། གྲུབ་ཆེན་བརྒྱད་ཅེས་པས་འབྲིང༌། ཟུང་འཇུག་ཕྱག་རྒྱ་ཆེ། །ཞེས་པས་ཆེན་པོ་བསྟན་པ་ཡིན་ནོ། །དེ་ལྟར་སྒྲོན་གསལ་ལས་ཀྱང༌། དགོས་པ་ཡང་ནི་བཤད་བྱ་སྟེ། །ཞི་སོགས་བྱ་བའི་ཆོ་ག་དང༌། །དེ་བཞིན་གྲུབ་པ་བརྒྱད་དང་ནི། །སངས་རྒྱས་ཀྱང་ནི་མཆོག་ཡིན་ནོ། །ཞེས་དང༌། སྔགས་རིམ་ལས། རབ་སངས་རྒྱས་ཀྱི་གོ་འཕང་དང༌། འབྲིང་གྲུབ་པ་བརྒྱད་དང༌། ཐ་མ་ཞི་རྒྱས་དབང་དྲག་གི་འཕྲིན་ལས་འགྲུབ་པ་གསུམ། ཞེས་སོ། །ཁ་ཅིག་འདི་རིམ་པ་གཉིས་ཀའི་འབྲས་བུའི་དབང་དུ་བྱས་པ་ཡིན་པས། སོ་སོར་བྱེད་ན་མཆོག་གི་དངོས་གྲུབ་རྫོགས་རིམ་གྱི་འབྲས་བུ་ཡིན་ལ། བསྐྱེད་རིམ་གྱི་འབྲས་བུར་ཐུན་མོང་བའི་དངོས་གྲུབ་སྔ་མ་གཉིས་པོ་དེ་མ་གཏོགས་མི་འབྱུང་སྟེ། འདུས་པ་ཕྱི་མ་ལས། ཐུན་མོང་མཆོག་གི་དབྱེ་བ་ཡིས། །བསྙེན་པ་རྣམ་པ་གཉིས་སུ་འདོད། །ཐུན་མོང་བ་ནི་རྡོ་རྗེ་བཞི། །མཆོག་ནི་ཡན་ལག་དྲུག་གིས་སོ། །ཞེས་བསྐྱེད་རིམ་ཡན་ལག་བཞི་ཐུན་མོང་བའི་
དངོས་གྲུབ་སྒྲུབ་བྱེད་དུ་གསུངས་ཤིང༌། དྲི་མེད་འོད་ལས། གཟུགས་ལ་སོགས་པ་རྟོགས་པ་དཀྱིལ་འཁོར་གྱི། །འཁོར་ལོ་བསྒོམ་པ་གོམས་པར་གྱུར་པས་ནི། །གྲུབ་པ་འཇིག་རྟེན་པ་དག་འགྲུབ་འགྱུར་ཏེ། །འདོད་པའི་དངོས་གྲུབ་ཆེན་པོ་ག་ལ་ཞིག །ཅེས་བསྐྱེད་རིམ་གྱིས་མཆོག་གི་དངོས་གྲུབ་སྒྲུབ་མི་ནུས་པ་གསལ་བར་གསུངས་པའི་ཕྱིར་རོ་སྙམ་ན། སྐྱོན་མེད་དེ། ཐུན་མོང་བའི་དངོས་གྲུབ་གཉིས་པོ་དེ་བསྐྱེད་རིམ་ཙམ་གྱིས་སྒྲུབ་ནུས་ལ། མཆོག་གི་དངོས་གྲུབ་ནི་བསྐྱེད་རིམ་གཅིག་པུས་སྒྲུབ་མི་ནུས་པས། བསྐྱེད་རིམ་གྱིས་རྒྱུད་སྨིན་པར་བྱས་ནས་དེའི་སྟེང་དུ་རྫོགས་རིམ་བསྒོམ་དགོས་པའི་དོན་ཡིན་ཏེ། སྒྲོན་གསལ་ལས། དགེ་བའི་རྩ་བ་ཡོངས་སུ་སྨིན་པས་རྡོ་རྗེ་ལྟ་བུའི་ཏིང་ངེ་འཛིན་མངོན་པར་རྟོགས་ནས་ཚེ་འདི་ཉིད་ལ་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་རོ། །ཞེས་དང༌། དུས་འཁོར་འགྲེལ་ཆེན་ལས། བསྒོམ་པ་གོམས་པའི་དབང་གིས་ཕུང་པོ་དང་ཁམས་དང་སྐྱེ་མཆེད་ལ་སོགས་པ་དཀྱིལ་འཁོར་གྱི་འཁོར་ལོའི་རྣམ་པར་འགྱུར་ཏེ། ཞེས་མཆོག་འགྲུབ་ཚུལ་གསུངས་པའི་ཕྱིར་རོ། །དེར་མ་ཟད་བརྟག་གཉིས་ཀྱི་བརྟག་པ་ཕྱི་མའི་གཉིས་པ་ལས། བསྐྱེད་པའི་རིམ་པའི་རྣལ་འབྱོར་གྱིས། བརྟུལ་ཞུགས་ཅན་གྱི་སྤྲོས་པ་བསྒོམ། །སྤྲོས་པ་རྨི་ལམ་ལྟར་བྱས་ནས། །སྤྲོས་པ་ཉིད་ནི་སྤྲོས་མེད་བྱ། །ཞེས་དང༌། རྡོ་རྗེ་སྙིང་འགྲེལ་དུ་འབུམ་ལྔའི་ལུང་དྲངས་པ་ལས། ཐོག་མར་རྟོག་པའི་ཆོ་ག་བསྟན། །རྣམ་རྟོག་རང་བཞིན་ཤེས་པ་ན། །མི་རྟོག་པ་ལ་རྣམ་འཇུག་བྱ། །ཞེས་དང༌། སྤྱོད་བསྡུས་
ལས། སེམས་ཅན་དང་པོའི་ལས་ཅན་རྣམས། །དམ་པའི་དོན་དུ་འཇུག་པ་ལ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་བཞག །ཅེས་སོགས་ཀྱིས་བསྐྱེད་རིམ་ནི་རྫོགས་རིམ་ལ་འཇུག་པའི་ཐབས་མེད་མི་རུང་དུ་གསུངས་ཤིང༌། རྡོ་རྗེ་སྙིང་འགྲེལ་ལས། དང་པོར་ཞིང་རྣམས་སྦྱང་དོན་དུ། །གོ་ཌ་བ་རྣམས་འདེབས་བྱེད་ཅིང༌། །ཕྱི་ནས་སྦྱངས་པའི་ཞིང་ལ་ནི། །ས་ལུའི་ས་བོན་འདེབས་པ་ཡིན། །ཞེས་བསྐྱེད་རིམ་གྱིས་རྒྱུད་སྣོད་རུང་དུ་སྒྲུབ་ཚུལ་དཔེ་དང་བཅས་པ་རྒྱས་པར་བཤད་དོ། །འོན་ཀྱང་ཧྭ་ཤང་གི་ལྟ་བའི་བག་ཆགས་ཀྱིས་རྒྱུད་བསླད་པ་ཁ་ཅིག་རྡོ་རྗེ་སྙིང་འགྲེལ་དུ། རྣམ་རྟོག་ས་བོན་ལས་བྱུང་བའི། །འབྲས་བུ་རྣམ་རྟོག་བཅས་པར་འགྱུར། །རྣམ་པར་མི་རྟོག་ལས་སྐྱེས་པའི། །འབྲས་བུ་རྣམ་པར་མི་རྟོག་འགྱུར། །ཞེས་ལྷའི་རྣལ་འབྱོར་དེ་ཉིད་མི་རྟོག་ཡེ་ཤེས་ཀྱི་ཉེར་ལེན་མིན་པར་གསུངས་པའི་ཚིག་རིས་ཙམ་ལ་བརྟེན་ནས་བསྐྱེད་རིམ་རྟོག་བཅས་ཡིན་པས་རྣམ་པར་མི་རྟོག་པའི་ཡེ་ཤེས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པའི་རྒྱུར་མི་རུང་ཞེས་སྨྲ་བ་ནི། མདོ་སྡེ་རྒྱན་ལས། གང་ཕྱིར་ཡོད་པ་མི་མཐོང་མེད་མཐོང་བ། །དེ་འདྲའི་མུན་ནག་རྣམ་པ་དེ་གང་ཞིག །ཅེས་པ་ཁོ་ནར་སྣང་སྟེ། དེ་ལྟར་ན་རྫོགས་རིམ་གྱི་རྩ་རླུང་བསྒོམ་པ་ཐམས་ཅད་ཀྱང་འདོར་དགོས་པས་སྣང་ཕྱོགས་མཐའ་དག་ལ་སྐུར་འདེབས་མི་བཟད་པའོ། །ད་ནི་གཞུང་དངོས་ཀྱི་དོན་འཆད་པ་ལ། དངོས་གྲུབ་ཐ་མ་འཕྲིན་ལས་བཞི་ཙམ་འགྲུབ་པ་ནི། རང་གཞན་གྱི་ནད་གདོན་ཞི་བ་དང༌། ཚེ་བསོད་ཤེས་རབ་སོགས་རྒྱས་པ་
དང༌། རྒྱལ་བློན་ཕྱག་རྒྱ་སོགས་དབང་དུ་འདུ་བ་དང༌། ཞི་བས་འདུལ་མི་ནུས་པའི་གདུག་པ་ཅན་རྣམས་བསད་སྐྲད་དབྱེ་རེངས་སོགས་ཀྱིས་ཚར་གཅོད་ནུས་པ་རྣམས་ཡིན་ལ། དེ་དག་གི་རྣམ་གཞག་རྒྱས་པར་ཕྱེ་ན། གང་དུ་བལྟ་བ་ཕྱོགས་ཀྱི་ཁྱད་པར། གང་ཚེ་བྱེད་པ་དུས་ཀྱི་ཁྱད་པར། ལུས་ལ་བགོ་བའི་ཆས་ཀྱི་ཁྱད་པར། ཇི་ལྟར་དམིགས་པ་བསམ་པའི་ཁྱད་པར་བཞི་བཤད་རྒྱུད་རྡོ་རྗེ་ཕྲེང་བ་དང་འོད་སྙེ་ལས་གསལ་བར་གསུངས་ལ། དེའི་སྟེང་དུ་གང་ལ་བྱ་བ་ཡུལ་གྱི་ཁྱད་པར། གང་དུ་བྱེད་པ་གནས་ཀྱི་ཁྱད་པར། གང་གིས་བྱེད་པ་ཆོ་གའི་ཁྱད་པར། དེའི་ཚེ་བཟའ་བ་སོགས་ཇི་ལྟར་བརྟེན་པའི་ཁྱད་པར་བཞི་སྒྲོན་གསལ་སོགས་ལས་ཅི་རིགས་པར་འབྱུང་ངོ༌། །དངོས་གྲུབ་འབྲིང་པོ་གྲུབ་ཆེན་བརྒྱད་ནི་ལྷ་མོ་བཞིས་ཞུས་ལས། རྫས་བརྒྱད་ཡན་ལག་སྒྲུབ་པ་བརྒྱད། །རིལ་བུ་མིག་སྨན་དངོས་གྲུབ་དང༌། །ས་འོག་རལ་གྲིའི་དངོས་གྲུབ་དང༌། །ནམ་མཁར་འཕུར་དང་མི་སྣང་དང༌། །ཤི་བ་མེད་དང་ནད་འཇོམས་སོ། །ཞེས་པ་ལྟར་ལ། རིལ་བུའི་དངོས་གྲུབ་ནི། རིལ་བུ་ཚུལ་བཞིན་དུ་བསྒྲུབ་སྟེ་ཉིན་རེ་བཞིན་ཟོས་ན། ལུས་འོད་ཀྱི་གཟི་བརྗིད་དང་ལྡན་པ། གསེར་གྱི་མདངས་དང་ལྡན་པ། སྲེད་མེད་བུའི་སྟོབས་དང་ལྡན་པ། དགེ་བ་ལ་སྤྲོ་བའི་ཤུགས་དང་ལྡན་པ། ཇི་ལྟར་སྨོན་པའི་འབྲས་བུ་འགྲུབ་པ། མངོན་ཤེས་ལྔ་ཐོབ་པ་སྟེ་ཕན་ཡོན་དྲུག་འབྱུང་བར་ལྷ་མོ་བཞིས་ཞུས་ཀྱི་རྒྱུད་ལས་གསུངས་ཤིང༌། དུས་ཀྱི་འཁོར་ལོའི་རྒྱུད་ལས་ཀྱང༌། གང་ཞིག་ཟླ་བ་དྲུག་ཏུ་ཉིན་
ཞག་སོ་སོའི་དུས་སུ་ཊཾ་ཀའི་རྐང་པའི་ཚད་ནི་ཟ་བྱེད་པ། །དེ་ནི་མཛེ་ལ་སོགས་པའི་ནད་ལས་གྲོལ་ཞིང་སྐྲ་དཀར་གཉེར་མ་དང་བྲལ་བརྒྱད་གཉིས་ལོ་ལོན་དབྱིབས། །ཞེས་རྒས་འཁོགས་པ་རྣམས་ཀྱང་གཞོན་ནུ་ལང་ཚོ་ཅན་གྱི་ལུས་སུ་འགྱུར་བར་བཤད་དེ། གྲུབ་པའི་བཅུད་ལེན་གྲུབ་པ་བཞིན་དུ་ཞེས་དཔེར་བྱེད་པའི་ཚུལ་ཡང་དེ་ཡིན་ནོ། །མིག་སྨན་ནི་སྒྲོན་གསལ་ལས་བཤད་པ་ལྟར། དུད་པའི་མིག་སྨན་སྒྲུབ་པ་ལ་བརྟེན་ནས་རབ་མི་སྣང་བ་དང༌། འབྲིང་ས་འོག་གི་གཏེར་མཐོང་བ་དང༌། ཐ་མ་བལྟས་པ་ཙམ་གྱིས་གཞན་དབང་དུ་བྱེད་པར་འགྱུར་རོ། །ས་འོག་གི་དངོས་གྲུབ་ནི་སའི་འོག་ཏུ་དཔག་ཚད་དུ་མར་ཆུ་ལ་ཉ་བཞིན་དུ་འགྲོ་བའོ། །རལ་གྲིའི་དངོས་གྲུབ་ནི་སྒྲུབ་པའི་ཕྱག་མཚན་ལག་ཏུ་བཟུང་སྟེ་ལྷ་གནས་རྣམས་དང༌། མཁའ་སྤྱོད་སོགས་སུ་བགྲོད་ནུས་པའོ། །བྱ་བཞིན་དུ་འཕུར་བ་དང༌། གཟུགས་མི་སྣང་བར་བསྒྱུར་བ་དང༌། ཚེ་བསྲིང་བ། ནད་སེལ་བ་བཞི་ནི་གོ་སླ་ལ། གཞུང་དུ་མར་རྐང་མགྱོགས་དང་བུམ་པ་བཟང་པོའི་དངོས་གྲུབ་བགྲང་བ་ཡང་ཡོད་དོ། །ཐུན་མོང་བའི་དངོས་གྲུབ་འདི་དག་སྒྲུབ་པའི་ཚུལ་རྒྱས་པར་ནི་བརྟག་གཉིས་ཀྱི་བརྟག་པ་དང་པོའི་ལེའུ་གཉིས་པ་དང་བཅུ་གཅིག་པ། ཕྱི་མའི་དགུ་པ་རྣམས་ནས་གསུངས་ལ། བདེ་མཆོག་གི་དགུ་པ་ནས་བཅུ་བཞི་པའི་བར་དང༌། ཞེ་གསུམ་པ་ནས་ལྔ་བཅུ་པའི་བར་གྱིས་རྒྱས་པར་གསུངས་སོ། །དངོས་གྲུབ་དེ་དག་ཀྱང་སྔགས་ལ་གཞོལ་བའི་བསྐྱེད་རིམ་པས་བཟླས་པ་དང་སྦྱིན་སྲེག་འཁྲུལ་འཁོར་སོགས་ཀྱི་སྒོ་ནས་སྒྲུབ་དགོས་ལ། ནང་ལ་གཞོལ་བའི་བསྐྱེད་རིམ་པས་ནི་དེ་དག་ལ་ལྟོས་པ་
མེད་པར་བསྒོམ་པའི་རིལ་བུ་དང་ཕྱག་མཚན་ལ་བརྟེན་ནས་བསམ་གཏན་གྱིས་ཐམས་ཅད་བསྒྲུབ་ནུས་ཏེ། བདེ་མཆོག་རྩ་རྒྱུད་ལས། གསང་སྔགས་ཟློས་པའི་བཟླས་བརྗོད་དང༌། །བསམ་གཏན་གྱིས་ཀྱང་འགྲུབ་པར་འགྱུར། །ཞེས་ཀྱང་སྒྲས་རྫས་སྔགས་ལ་མ་བརྟེན་པའི་བསམ་གཏན་གཅིག་པུས་འགྲུབ་ཚུལ་གསུངས་པ་ཡིན་ནོ། །དེས་ན་རྗེ་བླ་མས། དེ་ནས་རྫས་སྔགས་འཁྲུལ་འཁོར་བསམ་གཏན་ལ། །བརྟེན་ནས་གྲུབ་པ་ཆེན་པོ་བརྒྱད་དང་ནི། །ཞི་སོགས་རབ་འབྱམས་ལས་ཀུན་འགྲུབ་པ་ཡི། །ལས་ཀྱི་རྒྱལ་པོ་མཆོག །ཅེས་གསུངས་པ་ཡང་སོ་སོར་སྦྱོར་དགོས་པ་སྨོན་ལམ་འདིའི་ཊཱི་ཀ་བྱེད་རྣམས་ཀྱིས་དགོངས་པར་མཛོད་ཅིག །ཐུན་མོང་བའི་དངོས་གྲུབ་འདི་དག་གཙོ་བོར་སྒྲུབ་པའི་གདུལ་བྱ་ཡང༌། ཀུན་མཁྱེན་འཇམ་དབྱངས་བཞད་པའི་གསང་འདུས་བསྐྱེད་རིམ་ལས། དངོས་གྲུབ་ཐ་འབྲིང་གཉིས་ནི་གདུལ་བྱ་གཞན་བཞིས་དོན་དུ་གཉེར་ལ། ཞེས་གསུངས་པ་ལྟར་པདྨ་ལྟ་བུ་ལ་སོགས་པ་གང་ཟག་བཞིས་ནི་རྫོགས་རིམ་གྱི་རྟོགས་པ་མྱུར་དུ་སྐྱེ་བའི་ཐབས་སུ་བོགས་འབྱིན་གྱི་སྤྱོད་པ་བྱས་ཏེ་དངོས་གྲུབ་འདི་རྣམས་ནན་ཏན་དུ་སྒྲུབ་པར་བྱེད་ལ། རིན་པོ་ཆེ་ལྟ་བུའི་གང་ཟག་ནི་དེ་འདྲ་ལ་མ་ལྟོས་པར་རྫོགས་རིམ་གྱི་རྟོགས་པ་སྐྱེད་ནུས་པས་དངོས་གྲུབ་འདི་དག་སྒྲུབ་པ་གཙོ་བོར་མི་བྱེད་དོ། །དངོས་གྲུབ་མཆོག་ཟུང་འཇུག་གི་གོ་འཕང་ནི་སྔ་ཕྱི་ཀུན་ཏུ་འཆད་པས་འདིར་མ་སྤྲོས་སོ། །དེ་ལྟ་བུའི་ལས་རབ་འབྱམས་ཀྱི་དངོས་གྲུབ་ཐམས་ཅད་གདུལ་བྱ་སོ་སོའི་
སྐལ་བ་དང་འཚམ་པར་བདེ་བླག་ཏུ་སྩོལ་བར་མཛད་པ་ཡང༌། སྔོན་དེ་དང་དེའི་རྒྱུ་མཐུན་པའི་ལམ་གྱི་དབྱེ་བ་སྤྱི་དང༌། ཁྱད་པར་ལས་རྒྱལ་མཆོག་གི་ཏིང་ངེ་འཛིན་ལ་གོམས་པ་ཡོངས་སུ་རྫོགས་པར་མཛད་པའི་ལག་རྗེས་ཡིན་པས། ཚུལ་དེ་ལྟར་དུ་བསམ་ན་འཕགས་མའི་ནུས་མཐུ་ལ་ཡིད་ཆེས་དང༌། སྔོན་སློབ་པའི་གནས་སྐབས་ནས་བཟུང་སྟེ་འགྲོ་བའི་མགོན་སྐྱབས་འདི་ལྟར་མཛད་པར་འདུག་སྙམ་དུ་དད་པ་དང༌། རང་གིས་ཀྱང་འབྲས་བུ་བླ་ན་མེད་པ་དེ་ལྟ་བུའི་ཕྱིར་དུ་ལམ་འདི་ལ་སློབ་སྙམ་པའི་འདུན་པ་སྟེ། དད་པ་གསུམ་ཕན་ཚུན་འགྲན་པ་བཞིན་དུ་འཕེལ་བར་འགྱུར་རོ། །དེ་ལྟར་ཚུལ་དེ་ལྟ་བུའི་སྒོ་ནས་བསྟོད་ན་འཕགས་མའི་ཐུགས་ལ་ཟག་པ་མེད་པའི་དགྱེས་པ་ཁྱད་པར་ཅན་བསྐྱེད་པ་དང༌། སྐལ་བ་མཆོག་དང་ལྡན་པའི་གདུལ་བྱ་ཆོས་ཀྱི་རྗེས་སུ་འབྲང་བ་རྣམས་ཀྱི་ཡིད་རང་དབང་མེད་པར་འཕྲོག་པར་འགྱུར་བས་བསྟོད་པ་བྱེད་ཚུལ་མཆོག་ཏུ་གྱུར་པ་ནི། ངེས་དོན་གྱི་ཡོན་ཏན་ཁྱད་པར་ཅན་རྣམས་རྒྱུ་འབྲས་ངོ་བོ་ཆ་ཚང་བར་བརྗོད་པའི་སྒོ་ནས་བསྟོད་པ་འདི་ལྟ་བུ་ལགས་ཀྱི། དེ་ལས་གཞན་དུ་བྱིས་པ་ཁ་འཁྲིད་པ་ལྟར། གསལ་ལོ། །མཛེས་སོ། །ངོ་མཚར་རོ། །བལྟ་བས་ཆོག་མི་ཤེས་པའོ། །སྲིད་ཞིའི་མཛེས་སྡུག་གཅིག་ཏུ་བསྡུས་པ་འདྲའོ། །ཡ་མཚན་པའི་དཔེ་འདི་དང་འདི་ལྟ་བུ་ཞིག་གོ །ཞེས་སྙན་ཅིང་དཔེ་དོན་འབྲེལ་ལ། མངོན་བརྗོད་སྣ་ཚོགས་ཀྱིས་བཅིངས་ཏེ་འགངས་ཆེ་ཆེ་འདྲ་བ་ཇི་ཙམ་སྨྲས་ཀྱང་འདིའི་ཆ་ཙམ་དུ་ཡང་མི་འགྲོའོ། །ཞེས་གོ་བའི་ཕྱིར་དུ། ཁྱོད་ལ་ཡོན་ཏན་བརྗོད་ནས་བསྟོད་པ་ལེགས། །ཞེས་གསུངས་
ཏེ། ད་ལྟ་གཞུང་སྤྱིའི་གོ་བ་ཕྱོགས་འགྲོ་ཙམ་ཡང་མ་ཆགས་པར་གཞན་གྱི་ཟེར་ཟློས་དང༌། པདྨ་བུང་བ་ན་ཆུང་སོགས་དཔེ་སླ་བ་རེ་གཉིས་དང་སྦྱར་ནས་གྲོང་པའི་གླུ་ངག་འདྲ་བའི་ཚིགས་བཅད་དམ་དུམ་རེ་བསྒྲིགས་པ་ལ་སྔོན་མེད་ཀྱི་ལེགས་བཤད་སྤེལ་བའི་མཁས་པ་ཆེན་པོའི་གོ་འཕང་ཐོབ་པ་ལྟ་བུའི་མངོན་རློམ་འཆང་བ་རྣམས་ཀྱིས་གནད་འདི་གོ་བར་བྱས་ནས་སྣག་ཤོག་གྲོན་དུ་བྱེད་པའི་ངལ་བ་སྤངས་ཏེ་ནང་དོན་གྱི་གཞུང་ཆེན་མོ་རྣམས་ལ་བག་ཆགས་ཅི་ཐེབས་རེ་བྱས་ན་ལེགས་སོ། །མོས་པའི་སྐུ་གསུམ་སྒྱུ་མའི་སྔགས་ཀྱི་གཟུགས། །ལྷན་སྐྱེས་བདེ་བ་མཆོག་གི་སྲོག་ཐོབ་སྟེ། །ཟུང་འཇུག་དང་པོའི་མགོན་དུ་བཞེངས་པའི་སྐུ། །མཁའ་ཁྱབ་འཕྲིན་ལས་ཟློས་པའི་གར་གྱིས་རྩེན། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །༈ གཉིས་པ་གསུང་ལ་བསྟོད་པ་ལ་གཉིས། ཕར་ཕྱིན་ཐེག་པ་དང་ཐུན་མོང་བའི་དབང་དུ་བྱས་པ་དང༌། སྔགས་ཀྱི་ཐུན་མོང་མ་ཡིན་པའི་དབང་དུ་བྱས་ནས་བསྟོད་པའོ། །དང་པོ་ནི། མགྲིན་པ་ཆོས་ཀྱི་མགུར་ལས་ཆད་མེད་པའི། །ཡན་ལག་དྲུག་ཅུའི་དབྱངས་ཀྱིས་འགྲོ་ཀུན་རྣར། །ཞེས་གསུངས་ཏེ། མགྲིན་པ་ཆོས་ཀྱི་མགུར་ལས་ཞེས་པས་འབྱུང་ཁུངས་ཀྱི་ཁྱད་པར། ཆད་མེད་པའི་ཞེས་པས་དུས་ཀྱི་ཁྱད་པར། ཡན་ལག་དྲུག་ཅུའི་དབྱངས་ཀྱིས་ཞེས་པས་ངོ་བོའི་ཁྱད་པར། འགྲོ་ཀུན་རྣར་ཞེས་པས་ཆེད་དུ་བྱ་བའི་ཡུལ་དངོས་སུ་བསྟན་ཏེ། དེ་དག་རང་རང་གི་སྐལ་བ་བཞིན་ཕན་བདེ་ལ་འགོད་
པའི་བྱེད་པ་ཤུགས་ཀྱིས་བསྟན་ནོ། །དང་པོ་སངས་རྒྱས་ཀྱི་གསུང་འབྱུང་བའི་གནས་ཀྱང་མགྲིན་པ་ལོངས་སྤྱོད་ཀྱི་འཁོར་ལོ་ཞེས་ཆོས་ཀྱི་དགའ་སྟོན་འབྱུང་བའི་གཞི་དང༌། གསུང་རྡོ་རྗེའི་གནས་ཀྱི་གཙོ་བོ་སྨོས་པ་ཙམ་ལས། མཐའ་གཅིག་ཏུ་མགྲིན་པ་ཁོ་ན་ལས་འབྱུང་དགོས་པ་ཡང་མ་ཡིན་ཏེ། གསང་བ་བསམ་གྱིས་མི་ཁྱབ་པའི་མདོ་ལས། དེ་བཞིན་གཤེགས་པའི་གསུང་གཙུག་ཏོར་ནས་བྱུང་བར་ཤེས་པ་དང༌། སྤྱི་གཙུག་ནས་འབྱུང་བར་ཤེས་པ་དང༌། དབུ་སྐྲ་རྣམས་ལས་བྱུང་བར་ཤེས་པ་དང༌། ཕྲག་པ་ནས་འབྱུང་བར་ཤེས་པ་དང༌། ཞེས་པ་ནས་བ་སྤུའི་ཁུང་བུ་ཐམས་ཅད་ནས་དེ་བཞིན་གཤེགས་པའི་གསུང་འབྱུང་བར་ཤེས་པའི་སེམས་ཅན་ཁ་ཅིག་ཡོད་དེ། ཞི་བའི་བློ་གྲོས། འདི་ཡང་དེ་བཞིན་གཤེགས་པའི་གསུང་གི་གསང་བའོ། །ཞི་བའི་བློ་གྲོས། མོས་པ་ཇི་ལྟ་བ་དང༌། ཡོངས་སུ་སྨིན་པ་ཇི་ལྟ་བ་དང༌། བསམ་པ་ཇི་ལྟ་བ་བཞིན་དུ་དེ་བཞིན་གཤེགས་པའི་གསུང་འབྱུང་བར་ཤེས་ཀྱང་ཞེས་སོགས་གསུངས་ལ། མོས་པ་དང་ཡོངས་སུ་སྨིན་པའི་སྐལ་བ་བཞིན་འབྱུང་ཚུལ། མདོ་སྡེ་རྒྱན་ལས། ལུང་དང་རྟོགས་དང་དབང་འབྱོར་ལས། །ཁ་དང་གཟུགས་ནི་ཐམས་ཅད་དང༌། །ནམ་མཁའ་ལས་ཀྱང་འབྱུང་བ་ཡིན། །ཞེས་གསུངས་ཏེ་སྤྱོད་འཇུག་གི་སྨོན་ལམ་མཛད་ཚུལ་དང་གནད་གཅིག་གོ །ཡུན་ཚད་ཀྱང༌། མངོན་རྟོགས་རྒྱན་ལས། དེ་བཞིན་འཁོར་བ་ཇི་སྲིད་འདིའི། །ལས་ནི་རྒྱུན་མི་འཆད་པར་འདོད། །ཅེས་དང༌། དེ་ཉིད་ཟད་པ་མེད་པའི་ཕྱིར། །རྟག་པ་ཞེས་ཀྱང་བརྗོད་
པ་ཡིན། །ཞེས་གསུངས་པ་ལྟར་སངས་རྒྱས་ཀྱི་མཛད་པ་འཕྲིན་ལས་ཐམས་ཅད་དང༌། ཁྱད་པར་དུ་མཛད་པའི་མཆོག་གསུང་གི་མཛད་པ་ནི་འཁོར་བ་མ་སྟོངས་བར་དུ་རྒྱུན་མི་འཆད་པར་འཇུག་སྟེ། བསྟོད་སྤྲིན་རྒྱ་མཚོ་ལས། ཁྱོད་ཀྱི་གསུང་དབྱངས་དབྱངས་ཀྱི་ང་རོའི་དཀྱིལ་འཁོར་འཁོར་བ་སྲིད་དུ་རྒྱུན་ཆགས་པ། །ཞེས་གསུངས་པ་ལྟར་རོ། །ངོ་བོའི་ཁྱད་པར་ནི་འདིར་ཡན་ལག་དྲུག་ཅུའི་དབྱངས་ཞེས་པ་ཙམ་ལས་རྩ་བཞིའི་གསལ་ཁ་མ་བྱུང་ཞིང༌། མདོ་སྡེ་རྒྱན་དང༌། དེའི་དབྱིག་འགྲེལ། བློ་བརྟན་གྱི་འགྲེལ་བཤད། རྣམ་བཤད་རིག་པ། ཉི་སྣང༌། རྟོག་གེ་འབར་བ་རྣམས་སུ་ཡང་དྲུག་ཅུ་ཁོ་ན་གསུངས་ལ། གསང་བ་བསམ་གྱིས་མི་ཁྱབ་པའི་མདོར་དྲུག་ཅུ་རྩ་བཞི་གསལ་བར་བགྲང་བ་བཞིན། རྗེ་བླ་མས་ཀྱང༌། དེ་ལྟར་བཞི་ཡིས་ལྷག་པའི་དྲུག་ཅུའི་དབྱངས། །ཞེས་གསུངས་པས་བཤད་ཚུལ་དེ་དག་དབྱེ་བསྡུའི་གྲངས་འདྲེན་ལུགས་ཐ་དད་པ་ཙམ་ཡིན་གྱི། དོན་ལ་མི་མཐུན་པ་མེད་དོ། །ཡན་ལག་སོ་སོའི་རང་བཞིན་ཞིབ་ཏུ་ཤེས་པར་འདོད་ན་གོང་དུ་སྨོས་པའི་གཞུང་དེ་དག་ལས་ཤེས་པར་བྱ་ཡི། འདིར་ཧ་ཅང་ཚིག་ཚོགས་ལྕི་བས་འཇིགས་ནས་མ་བྲིས་སོ། །གསུང་དེས་དགོས་པ་ཅི་ཞིག་སྒྲུབ་སྙམ་ན། དེའི་ཚུལ་ནི་འགྲོ་ཀུན་རྣར་ཞེས་ཕྱོགས་རེ་བ་ཙམ་མ་ཡིན་པར་ས་གསུམ་གྱི་འགྲོ་བ་ཐམས་ཅད་ལ་རང་རང་གི་སྐལ་བ་བཞིན་དུ་སྐྱེས་བུ་ཆུང་ངུའི་རིགས་ཅན་རྣམས་མངོན་མཐོ་དང༌། འབྲིང་དང་ཆེན་པོའི་རིགས་ཅན་རྣམས་ཐེག་པ་ཆེ་ཆུང་གི་
ངེས་ལེགས་བྱང་ཆུབ་ཀྱི་ལམ་ལ་སྦྱར་ནས་མཐའ་དག་གི་དོན་མཛད་ཚུལ། རྒྱུད་བླ་མ་ལས། ལྷ་རྣམས་ཐམས་ཅད་ཡང་ནས་ཡང༌། །ཆོས་ཀྱི་རྔས་ནི་སྐུལ་བྱེད་ལྟར། །དེ་བཞིན་ཁྱབ་བདག་འབད་སོགས་དང༌། །བྲལ་ཡང་འགྲོ་བ་མ་ལུས་པ། །སངས་རྒྱས་གསུང་གིས་ཁྱབ་མཛད་དེ། །སྐལ་ལྡན་རྣམས་ལ་ཆོས་སྟོན་ཏོ། །ཞེས་གསུངས་པ་ལྟར་རོ། །ཡང་ཁ་ཅིག་འདི་སྙམ་དུ། འགྲོ་བ་ཐམས་ཅད་ཀྱིས་སངས་རྒྱས་ཀྱི་གསུང་དངོས་སུ་ཐོས་མི་ནུས་པས། དེ་དག་ལ་སངས་རྒྱས་ཀྱི་གསུང་གིས་ཁྱབ་ཚུལ་མེད་སྙམ་ན། དེ་ནི་མ་ཡིན་ཏེ། དཔེར་ན་མེ་ཤེལ་ཉི་མ་ལ་བསྟན་པའི་ཚེ་དེས་གཞན་བསྲེག་པ་དེ་དངོས་སུ་མེ་ཤེལ་གྱིས་བསྲེག་པ་ཡིན་ཀྱང༌། རྩ་བ་ཉི་མའི་འོད་ཟེར་མེ་ཤེལ་གྱིས་བསྡུས་པའི་སྟོབས་ཡིན་པས་ཉི་འོད་ལ་རག་ལས་པ་ལྟར། དེ་དག་ལ་ལེགས་པའི་ལམ་ཕྲ་མོ་རེ་བསྟན་པ་ཐམས་ཅད་ཀྱང་དངོས་སུ་གང་ཟག་གཞན་ལས་ཐོས་པ་ཡིན་ནའང༌། དེའི་རྒྱུ་གང་ཟག་དེ་ལ་སངས་རྒྱས་ཀྱི་འཕྲིན་ལས་ཞུགས་པའི་དབང་གིས་ཡིན་པས། བརྒྱུད་ནས་སངས་རྒྱས་ཀྱི་མཐུ་ཡིན་ཏེ། ཚུལ་འདི་ཤེས་ན། བསྔགས་འོས་བསྔགས་བསྟོད་ལས། ཁྱོད་ཀྱིས་གང་ལས་འགྲོ་བ་དག །མ་དྲངས་རྒུད་པ་དེ་གང་མཆིས། །གང་དང་འཇིག་རྟེན་མ་སྤྲད་པའི། །ཕུན་ཚོགས་དེ་ཡང་གང་ཞིག་མཆིས། །ཞེས་ཚེར་མ་ཟུག་པ་ལྟ་བུའི་གདུང་བ་ཕྲ་མོ་བསལ་བ་དང༌། ཟས་ཁམ་གཅིག་རྙེད་པའི་བདེ་བ་ཡན་ཆད་སངས་རྒྱས་ཀྱི་བཀའ་དྲིན་དུ་གསུངས་པ་ལ་ངེས་པ་རྙེད་པར་འགྱུར་རོ། །༈ གཉིས་པ་སྔགས་ཀྱི་ཐུན་
མོང་མ་ཡིན་པའི་དབང་དུ་བྱས་ནས་བསྟོད་པ་ལ། མདོར་བསྟན་རྒྱས་བཤད་གཉིས། དང་པོ་ནི། སྙན་འཇེབས་ཕཻཾ་ཀ་ར་ཡི་སྒྲ་སྐད་ཀྱིས། །ཁམས་གསུམ་མ་ལུས་མཁའ་འགྲོར་བཅས་ཏེ་བསྡུ། །ཞེས་བྱུང༌། འདི་ལ་ཐོག་མར་དོགས་པའི་གནས་འདི་ཡོད་དེ། ཕཻཾ་གྱི་སྒྲ་སྒྲོག་པ་དང༌། མཁའ་འགྲོ་དབང་དུ་སྡུད་པ་ནི་གསུང་གི་ཡོན་ཏན་གྱི་ཆ་ཤས་གཅིག་ཡིན་པས། དེ་ལྷག་མ་ཐམས་ཅད་མདོར་བསྟན་དུ་འབྲེལ་མེད་དོ་སྙམ་ན། སྐྱོན་མེད་དེ། འདིར་མཁའ་འགྲོ་བསྡུ་བར་གསུངས་པས། རང་དོན་ཕོ་ཉ་གསུམ་བསྲེས་པའི་ལམ་གྱི་རྟོགས་པ་མཐར་ཕྱིན་ཚུལ་དང༌། གཞན་དོན་མཆོག་ཐུན་མོང་གི་དངོས་གྲུབ་ཐམས་ཅད་འགྲུབ་ཚུལ་བསྟན་པ་ཡིན་ཏེ་འཆད་པར་འགྱུར་རོ། །དེ་ཡང་སྙན་འཇེབས་ཞེས་པ་ནི། བསྟོད་སྤྲིན་རྒྱ་མཚོའི་འགྲེལ་པ་ལས། བདག་ཏུ་ལྟ་བ་ལ་སོགས་པ་མུ་སྟེགས་ཅན་གྱི་ལྟ་བ་ངན་པ་ཐམས་ཅད་འཇོམས་པར་བྱེད་པའི་སྟོབས་ཀྱི་ཡོན་ཏན་དང་ལྡན་པས་ན་སྙན་ལ་འཇེབས་པ་དང༌། ཞེས་གསུངས་པ་ལྟར། མི་མཐུན་ཕྱོགས་ཐམས་ཅད་འཇོམས་ཤིང་ཡོན་ཏན་མ་ལུས་པ་སྒྲུབ་པའི་མཐུ་དང་ལྡན་པས་ན་གསུང་གི་ཡོན་ཏན་གྱི་གཙོ་བོ་སྨོས་པ་ཡིན་ནོ། །ཕཻཾ་ཀ་ར་ཞེས་པ་ནི། ཞི་བ་ཡེ་ཤེས་ཀྱིས། མཁའ་འགྲོ་སྡུད་པའི་ཕཻཾ་སྐད་གནམ་དུ་སྒྲོག །ཅེས་དང༌། རྟོག་བདུན་རྣམ་བཤད་ལས། མཁའ་འགྲོ་སྡུད་པའི་ཕཻཾ་སྒྲ་དང་གདུག་ཅན་གསོད་པའི་ཕཊ་སྒྲ། ཞེས་གསུངས་པ་ལྟར། མཁའ་འགྲོ་དབང་དུ་བྱེད་པའི་སྒྲ་དངོས་ནི་ཕཻཾ་ཡིན་ལ། ཕྱི་མ་ནི་བྱིངས་མདོ་ལས། ཀ་ར་
བྱེད་པ་ལའོ། །ཞེས་པ་ལྟར་སྔ་མའི་མཇུག་ཏུ་བྱེད་ཚིག་སྦྱར་བ་ཡིན་ཏེ། ༸རྒྱལ་དབང་བདུན་པའི་འཇིགས་བྱེད་བསྐྱེད་རིམ་ལས། སྲིན་ཞལ་ནས་ཕེཾ་ཀ་ར་སྟེ། ཕེཾ་མཁའ་འགྲོ་འབོད་པ། ཀ་ར་བྱེད་པ་སྟེ་མཁའ་འགྲོ་དབང་དུ་བྱེད་པའི་ཕེཾ་ཀ་རའི་སྒྲ་འབྲུག་ལྟར་སྒྲོག་པ། ཞེས་སོ། །སྲིན་ཞལ་དམིགས་ཀྱིས་བཀར་བ་ནི་སྐྱེ་འགྲོ་དབང་དུ་བྱེད་པ་སོགས་ཐུན་མོང་བའི་དངོས་གྲུབ་སྒྲུབ་པའི་ཆེད་དུ་སྤྲུལ་བའི་ཞལ་ཡིན་པའི་རྒྱུ་མཚན་གྱིས་ཡིན་ལ། འཇིག་རྟེན་པའི་བཟླས་པ་དེ་ནས་བྱེད་པར་གསུངས་པའི་གནད་ཀྱང་དེ་ཡིན་ཞིང༌། རྩ་ཞལ་ནི་གང་ལ་གནད་དུ་བསྣུན་པའི་རྩ་འཁོར་སོགས་མ་བཅོས་པའི་སྒྲུབ་གཞི་ཅན་ཡིན་པས་འཇིག་རྟེན་ལས་འདས་པའི་བཟླས་པ་དེ་ནས་བྱེད་པར་གསུངས་ཏེ། དངོས་གྲུབ་རྒྱ་མཚོར་སྐྱེ་མཆེད་ཀྱི་ལྷ་འགོད་ཚུལ་ལ་དོགས་པ་བཅད་པ་བཞིན་ནོ། །འདིར་མཁའ་འགྲོ་ཞེས་པ་ཡང་མཚན་གཞི་གཙོ་བོ་སྨོས་པ་ཡིན་གྱི། སྤྱིར་ཡེ་ཤེས་པའི་ལྷ་ཚོགས་མཐའ་དག་གི་བྱིན་རླབས་སྡུད་བྱེད་ཡིན་ཏེ། འདོད་འཇོ་ལས། གྱེན་དུ་བལྟས་ནས་ཕེཾ་ཞེས་པའི་སྒྲ་སྒྲོག་པ་ཡིས་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་དཔའ་བོ་དང་དཔའ་མོའི་དབང་ཕྱུག་མ་རྣམས་དཀྱིལ་འཁོར་གྱི་འཁོར་ལོར་གྱུར་པའི་ཡེ་ཤེས་ཀྱི་འཁོར་ལོར་འགུག་པར་བྱེད་དོ། །ཞེས་སོ། །དེ་ལྟར་མཁའ་འགྲོ་དབང་དུ་འདུས་པ་ན་དེའི་སྟོབས་ཀྱིས་མཆོག་ཐུན་མོང་གི་དངོས་གྲུབ་གཞན་ཐམས་ཅད་ཀྱང་བདེ་བླག་ཏུ་འགྲུབ་པར་འགྱུར་ཏེ། ཁམས་གསུམ་གྱི་ཟས་ནོར་ལོངས་སྤྱོད་རྒྱལ་བློན་ཕྱག་རྒྱ་སོགས་ནི་དེ་དག་གི་ཐུགས་ཀྱི་དགོངས་པ་ཙམ་ལ་བརྟེན་ནས་ཀྱང་དབང་དུ་
སྡུད་ནུས་ལ། མཆོག་གི་དངོས་གྲུབ་ཀྱང་དེ་དག་གིས་ཕོ་ཉའི་ལམ་གྱི་གྲོགས་བྱས་པ་ལ་བརྟེན་ནས་དུས་ཤིན་ཏུ་མྱུར་བར་བདེ་བླག་ཏུ་བགྲོད་ནུས་པའི་ཚུལ། བདེ་མཆོག་རྩ་རྒྱུད་ལས། དཔའ་བོ་གཉིས་མེད་རྣལ་འབྱོར་མ། །དེ་ཀུན་འདོད་པའི་གཟུགས་ཅན་ཏེ། །ཡིད་ཀྱི་ཤུགས་ཀྱིས་འཇུག་པ་ཡིན། །ཞེས་དང༌། སྡོམ་འབྱུང་ལས། སྙིང་པོའི་ཕྱག་རྒྱ་སོགས་ལ་བསྐོར། །མཁའ་འགྲོ་མ་ཡི་དྲ་བ་སྡོམ། །ཞེས་གསུངས་ལ། དེའི་དོན་འདོད་འཇོ་ལས། མཁའ་འགྲོ་མའི་དྲ་བ་སྟེ་ཚོགས་ཀུན་གྱི་བདེ་བ་དམ་པ་སྟེ་མཆོག་སྦྱིན་པར་བྱེད་པའོ། །ཞེས་གསུངས་སོ། །དེར་མ་ཟད་མཆོག་གི་དངོས་གྲུབ་སྒྲུབ་ཚུལ་དང་སྦྱོར་བ་ན་ཁམས་གསུམ་ཞེས་པ་ཡང་ཟུང་འཇུག་གི་གོ་འཕང་ལ་བྱར་རུང་སྟེ། དགོངས་པ་ལུང་སྟོན་ལས། རྡོ་རྗེ་ཐལ་མོའི་ངེས་དོན་གྱི་སྐབས་སུ་ཟུང་འཇུག་ལ་ཁམས་གསུམ་གྱི་མིང་གིས་བཏགས་ཤིང༌། དེ་ལྟར་བཏགས་པའི་གོ་དོན་ནི། བསྐྱེད་རིམ་དངོས་གྲུབ་རྒྱ་མཚོ་ལས། འོ་ན་ཁམས་གསུམ་གྱི་དོན་ཇི་ལྟར་ཚང་སྙམ་ན། ཁམས་གསུམ་ནི་འདོད་ཁམས་སོགས་ལ་ཟེར་བ་མ་ཡིན་གྱི། སྤྱོད་བསྡུས་ལས་ཟུང་འཇུག་གི་མིང་གི་རྣམ་གྲངས་སུ། འཇིག་རྟེན་གསུམ་གྱི་བདག་ཉིད་ཅན། །ཞེས་གསུངས་པ་ལྟར་རོ། །ཞེས་དཔེ་དང་བཅས་ཏེ་བཤད་པ་བཞིན་ནོ། །དེ་ལྟར་ན་རྗེ་བཙུན་མ་འདི་ཉིད་ཀྱི་རྣལ་འབྱོར་ལྷུར་བྱེད་པའི་སྒྲུབ་པ་པོ་རྣམས་ཀྱིས་འདིའི་ཐུགས་རྗེ་ལ་བརྟེན་ནས་རིང་པོར་མ་ཐོགས་པར་གནས་གསུམ་གྱི་མཁའ་འགྲོ་ཐམས་ཅད་དབང་དུ་སྡུད་
པར་ནུས་ཤིང་དེ་ལ་བརྟེན་ནས་མཆོག་ཐུན་མོང་གི་དངོས་གྲུབ་ཐམས་ཅད་བདེ་བླག་ཏུ་འགྲུབ་པར་འགྱུར་ལ། དེའི་རྩ་བ་ཡང་རྗེ་བཙུན་མ་རང་ཉིད་ཀྱིས་སྔོན་སློབ་པའི་གནས་སྐབས་ན་རྣལ་འབྱོར་མ་རྒྱུད་ཀྱི་ཟབ་གནད་ཕོ་ཉ་གསུམ་དབྱེར་མེད་དུ་བསྲེ་བའི་ལམ་ལ་གོམས་པ་མཐར་ཕྱིན་པའི་དབང་གིས་ཡིན་པས། རྒྱུ་དང་འབྲས་བུའི་ཚུལ་མཐའ་དག་ནས་བསམས་ཏེ་དང་བ་བསྐྱེད་པར་བྱའོ། །༈ གཉིས་པ་རྒྱས་པར་བཤད་པ་ལ། གསུང་གི་སྒོ་ནས་ཇི་ལྟར་གདམས་ཚུལ་དང༌། གསུང་རྡོ་རྗེ་རང་གིས་མངོན་དུ་མཛད་ཚུལ་གཉིས། དང་པོ་ནི། སྒྲུབ་པོའི་ལམ་གྱི་མན་ངག་ཆ་ཚང་བར། །དབུགས་དབྱུང་ཚིག་དང་བཅས་ཏེ་སྟོན་མཛད་པས། །ལྷན་སྐྱེས་བདེ་ཆེན་སྟོང་ཉིད་མཉམ་སྦྱོར་བ། །དགའ་བའི་རོ་ལ་ཀུན་ནས་སྦྱོར་བར་མཛད། །ཅེས་བྱུང་། དེ་ཡང་ལམ་གྱི་མན་ངག་ཆ་ཚང་བ་ནི་ཉམས་ལེན་ཕྱོགས་རེ་བ་ཙམ་མ་ཡིན་པར། ལས་དང་པོ་བའི་ས་ནས་སངས་རྒྱས་ཀྱི་སའི་བར་གྱི་ཉམས་ལེན་ཚང་ལ་མ་ནོར་བ་ཞིག་དགོས་ཏེ། དཔེར་ན་ལམ་འབྲས་རྡོ་རྗེའི་ཚིག་རྐང་དུ། ཐོག་མར་སྣང་གསུམ་གྱི་ཁྲིད་ཀྱི་སྒོ་ནས་དལ་འབྱོར་རྙེད་དཀའ། འཆི་བ་མི་རྟག་པ། ལས་རྒྱུ་འབྲས། འཁོར་བ་སྤྱི་དང་བྱེ་བྲག་གི་ཉེས་དམིགས། ངེས་འབྱུང་བྱང་ཆུབ་ཀྱི་སེམས་སོགས་ལ་གོམས་པར་བྱེད་ཅིང༌། དེ་ནས་རྒྱུད་གསུམ་དུ་བསྟན་པ་ལྟར་གདན་གསུམ་ཚང་བའི་རྡོ་རྗེ་སློབ་དཔོན་གྱི་དྲུང་ནས་དབང་རྣམ་པར་དག་པ་མནོས་ཏེ། དམ་ཚིག་ཉི་ཤུ་ཚུལ་བཞིན་དུ་བསྲུང་ཞིང༌། གསལ་སྟོང་ཟུང་འཇུག་ལམ་གྱི་སྲོག་ཏུ་བྱས་ཏེ་བཅུ་གསུམ་རྡོ་རྗེ་འཛིན་པའི་གོ་འཕང་སྒྲུབ་པའི་བར་གྱི་ཉམས་ལེན་
ཚོམས་བཅོ་བརྒྱད་དུ་བསྡུས་ནས་བསྟན་པ་ལྟ་བུ་སྟེ། འདི་ཡང་མིང་གི་འདོགས་ཚུལ་ཙམ་ལས། དོན་ལམ་ཐུན་མོང་བས་རྒྱུད་སྦྱངས་ཤིང༌། དེ་ནས་སྔགས་ལ་ཞུགས་ཏེ་རིམ་གཉིས་ལ་སློབ་པར་གསུངས་པ་དང་གནད་གཅིག་གོ །འདིར་མན་ངག་ནི་ཨུ་པ་དེ་ཤ་ཞེས་པ་དྲང་ཐད་དུ་བསྒྱུར་ན། ཉེ་བར་རྟོགས་པར་བྱེད་པ་སྟེ་དོན་ཟབ་ཅིང་རྒྱ་ཆེ་བ་རྣམས་ཚིག་ཉུང་ངུས་གོ་བར་བྱེད་པ་དང༌། ལམ་གྱི་རྟོགས་པ་སྐྱེ་དཀའ་བ་རྣམས་ཀྱང་བདེ་བླག་ཏུ་སྐྱེད་པར་བྱེད་པའོ། །དབུགས་དབྱུང་ཞེས་པ་ནི་དམ་པ་གོང་མ་འགའ་ཞིག་གིས་སྒྲུབ་པ་མཛད་པའི་ཚེ་ལམ་གྱི་དྲོད་རྟགས་འཕྲལ་དུ་མ་བྱུང་བས་ཐུགས་སྐྱོ་བ་ན། རྗེ་བཙུན་མ་སོགས་ཀྱིས་ཞལ་བསྟན་ནས་སྤྲོ་བ་བསྐྱེད་དེ་དབུགས་ཕྱུང་བའི་ལོ་རྒྱུས་དང་སྦྱར་ཏེ་བཤད་ཀྱང་རུང་མོད། གཙོ་བོ་ནི་ཚར་ཆེན་གྱིས། བོགས་ཕྱིན་བརྒྱད་ཀྱིས་ཏིང་འཛིན་བོགས་དབྱུང་ཞིང༌། །གདམས་ངག་དྲུག་དང་བསྲུང་བ་སུམ་ཅུ་ཡིས། །བར་ཆད་ཀུན་སེལ་རྟེན་འབྲེལ་རྣམ་པ་ལྔ། །ཞེས་གསུངས་པ་ལྟར། ལམ་རང་རང་གི་སྐབས་ཀྱི་གེགས་སེལ་བོགས་འབྱིན་དང་བཅས་ཏེ་སྒྲུབ་པའི་སྦྱོར་དངོས་རྗེས་ཀྱི་རིམ་པའི་མན་ངག་ཆ་ཚང་བར་གདམས་པ་ལ་བྱེད་དོ། །གདམས་རྒྱུའི་ཆོས་ཀྱང་རྒྱལ་བས་དྲང་ངེས་ཀྱི་སྡེ་སྣོད་མཐའ་ཡས་པ་ཞིག་གསུངས་ན་ཡང་། ཆོས་ཕུང་བརྒྱད་ཁྲི་བཞི་སྟོང་པོ་ཐམས་ཅད་ཀྱི་བཅུད་བསྡུས་པ་རྣལ་འབྱོར་བླ་མེད་ཀྱི་ལམ་གྱི་སྲོག་ལྟ་བུ་ནི། བདེ་སྟོང་དབྱེར་མེད་ཀྱི་ཡེ་ཤེས་ཡིན་ཏེ། རྡོ་རྗེ་ཕྲེང་བ་ལས། ཆོས་ཕུང་བརྒྱད་ཁྲི་བཞི་སྟོང་ཁྱབ། །མདོར་བསྡུས་ཆོས་ཀྱི་ཕྱག་རྒྱ་འོ། །
རྒྱུད་ཀུན་གྱི་ནི་དོན་བསྡུས་པ། །སྟོང་ཉིད་སྙིང་རྗེ་མི་ཕྱེད་པ། །ཞེས་དང༌། བདེ་མཆོག་འབྱུང་བ་ལས། གསང་བ་སངས་རྒྱས་ཐམས་ཅད་ཀྱི། །འདུས་པ་སྡོམ་པ་དག་གི་མཆོག །ཅེས་གསུངས་པ་ལྟར་ཡིན་པས། འདིར་ཡང༌། ལྷན་སྐྱེས་བདེ་ཆེན་སྟོང་ཉིད་མཉམ་སྦྱོར་བ། །དགའ་བའི་རོ་ལ་ཀུན་ནས་སྦྱོར་བར་མཛད། །ཅེས་གསུངས་སོ། །འདི་ནི་ཤིན་ཏུ་རྟོགས་པར་དཀའ་ཞིང་གནད་ཆེ་བས་ཅུང་ཟད་ཕྱེ་སྟེ་བཤད་པ་ལ། བདེ་སྟོང་སྦྱོར་བའི་གནད་འདི་ལྟ་བུ་ཐེག་པ་གཞན་ལ་མེད་པ་ལམ་འདི་ཁོ་ནའི་ཁྱད་ཆོས་སུ་འགྱུར་ཚུལ་ཇི་ལྟར་ཡིན་ཞེ་ན། ཕར་ཕྱིན་ཐེག་པར་ཡང་ཞི་གནས་བསྒོམ་སྟེ་ལུས་སེམས་ཤིན་སྦྱངས་ཀྱི་བདེ་བ་སྐྱེད་ཅིང་དེའི་རྩི་མ་ཡལ་བའི་ངང་ནས་རྣམ་པར་མི་རྟོག་པའི་ལྷག་མཐོང་སྒོམ་པ་ལ་འཇུག་པ་དང༌། ས་དང་པོར་སྟོང་ཉིད་རྟོགས་པའི་དགའ་བདེ་ལྷག་པར་ཐོབ་པ་བཤད་ཅིང༌། བྱ་རྒྱུད་བསམ་གཏན་ཕྱི་མ་དང༌། སྤྱོད་རྒྱུད་རྣམ་སྣང་མངོན་བྱང་ལས་རླུང་ཕྱིར་རྒྱུ་བ་བཀག་སྟེ་ནང་དུ་བཟུང་ནས་ལྷའི་རྣལ་འབྱོར་བསྒོམ་པའི་སྲོག་རྩོལ་ལ་བརྟེན་པའི་བདེ་བ་སྐྱེ་བར་གསུངས་ཀྱང༌། དེ་དག་ཏུ་ནང་ལུས་ཀྱི་རྩ་འཁོར་ལ་གནད་དུ་བསྣུན་པའི་རླུང་གི་རྣལ་འབྱོར་མ་གསུངས་པས། དེའི་བདེ་བ་ཡང་བླ་མེད་ཀྱི་བདེ་སྟོང་སྦྱོར་བར་བཤད་པའི་བདེ་བའི་གྲངས་སུ་མི་འགྲོ་སྟེ། གསང་བ་གྲུབ་པ་ལས། བྱ་བ་སྤྱོད་པའི་དབྱེ་བ་ཡང༌། །མདོ་སྡེའི་སྡེ་སྣོད་ལ་སོགས་སུ། །མཆོག་ཏུ་དགའ་བ་གཅིག་པུ་ཉིད། །རྣམ་པ་དུ་མར་རྣམ་པར་གནས། །ཕུང་པོ་རིན་ཆེན་སྣོད་ཉིད་དུ། །སེམས་ཅན་བསམ་པའི་བྱེ་བྲག་གིས། །དེ་ཉིད་འབད་པས་སྦས་མཛད་ནས། །
སངས་རྒྱས་མགོན་པོས་རྣམ་པར་བཞག །ཅེས་དང༌། མན་ངག་སྙེ་མ་ལས། འོ་ན་བསམ་གཏན་དང་པོ་ཐོབ་པ་རྣམས་ཀྱང་འཁོར་ལོས་བསྒྱུར་བ་རྣམས་བཞིན་དུ་བདེ་བ་ཉེ་བར་བསྟེན་པ་ཡིན་ན། བདག་མེད་པ་ཉིད་གཉིས་ཀ་རབ་ཏུ་རྟོགས་པ་ན་ལྟ་ཅི་སྨོས། དེ་ལྟར་ནི་རབ་ཏུ་དགའ་བ་ལྷག་པ་ཉིད་ལས་ས་དང་པོ་རབ་ཏུ་དགའ་བ་ཞེས་བྱ་བར་བརྗོད་པར་བྱས་པས་སོ་ཞེ་ན་བདེན་ཏེ། འདི་ལྷན་ཅིག་སྐྱེས་པའི་བདེ་བ་ནི་མ་ཡིན་ཏེ། དེ་ཉིད་ཀྱི་ཕྱིར་བདེ་བ་ཆེན་པོ་མ་ཡིན་ནོ། །ཞེས་གསུངས་སོ། །དེ་ལྟ་བུའི་ཐབས་བདེ་བ་ཆེན་པོ་མེད་ན་སྟོང་ཉིད་ཀྱི་ལྟ་བ་དཔྱིས་ཕྱིན་པ་ཕར་ཕྱིན་ཐེག་པར་ཡོད་ཀྱང༌། དེ་རྐྱང་པ་བསྒོམ་པས་ཞི་མཐར་ལྟུང་སྟེ། རྡོ་རྗེ་མཁའ་འགྲོ་ལས། ཕྱག་རྒྱའི་སྦྱོར་བ་འདི་ཡིས་ནི། །ས་གསུམ་མ་ལུས་བཟའ་བར་བྱ། །གཞན་དུ་གལ་ཏེ་སྦྱོར་བ་ནི། །མ་ཚང་མར་མེ་ལྟ་བུར་འདའ། །ཞེས་ཕྱག་རྒྱའི་སྦྱོར་བའི་བདེ་ཆེན་གྱིས་ཟིན་པའི་སྒོ་ནས་ས་གསུམ་འོད་གསལ་དུ་འཇུག་དགོས་ཀྱི། དེས་མ་ཟིན་པར་སྟོང་ཉིད་ཀྱི་སྦྱོར་བ་གཅིག་པུ་བསྒོམ་ན་ཉོན་མོངས་ཙམ་ཟད་པའི་དམན་པའི་མྱང་འདས་སུ་ལྟུང་བར་གསུངས་སོ། །མདོ་ལུགས་ལ་ཡང་ཐེག་ཆེན་པ་རྣམས་ཀྱིས་ཞི་མཐའ་འགོག་པའི་ཕྱིར་བསོད་ནམས་ཀྱི་ཚོགས་རྒྱ་ཆེན་པོ་དང་སྦྲགས་ནས་བྱེད་མོད་ཀྱང༌། ད་དུང་སྒོམ་ལམ་ཐོབ་པ་ན་ཐབས་ཀྱི་ཆ་གཙོ་བོར་བྱེད་པ་མ་གཏོགས་སྟོང་ཕྱོགས་བསྒོམ་བྱའི་གཙོ་བོར་བྱེད་མི་རུང་བས། ཤེས་མཐོང་གིས་བལྟས་ནས་འདའ་དགོས་པ་ནི་ཐབས་ཤེས་མཉམ་པར་སྦྱོར་ཚུལ་སྔགས་ཀྱི་ཐབས་
མཁས་འདི་འདྲ་བ་མེད་པའི་རྒྱུ་མཚན་གྱིས་ཡིན་ཏེ། མདོ་ལུགས་ཀྱི་ཐབས་ཤེས་ཟུང་དུ་འབྲེལ་ཚུལ་ནི། བློ་ངོ་བོ་ཐ་དད་པ་གཉིས་གཅིག་གིས་གཅིག་རྩིས་ཟིན་པར་བྱེད་པ་ཙམ་ཡིན་ལ། སྔགས་ལུགས་ཀྱི་ཐབས་སྙིང་རྗེའམ་བདེ་བ་ཆེན་པོ་དང༌། ཤེས་རབ་སྟོང་ཉིད་རྟོགས་པ་གཉིས་སྒྲོན་མེ་དང་དེའི་འོད་བཞིན་སེམས་གཅིག་ལ་ལྡོག་ཆ་ཙམ་གྱིས་སོ་སོར་བཞག་པ་ཡིན་པས་འོ་ཆུ་འདྲེས་པ་ལྟར་དངོས་པོ་སོ་སོར་དབྱེ་རྒྱུ་མེད་པ་ཞིག་དགོས་པའི་ཚུལ། བདེ་མཆོག་འབྱུང་བ་ལས། ཤེས་རབ་སྙིང་རྗེའི་དབྱེ་བ་ནི། །སྒྲོན་མ་དང་ནི་འོད་ཟེར་བཞིན། །འདི་བཞིན་མི་ཕྱེད་བདག་ཉིད་དོ། །རོ་གཅིག་དངོས་པོའི་སེམས་ཡིན་ནོ། །ཞེས་དང༌། སམ་བྷུ་ཊ་ལས། ཆུ་དང་འོ་མ་འདྲེས་པ་བཞིན། །གཉིས་མེད་རྣམ་པའི་སྦྱོར་བ་ཡིས། །གཉིས་པོ་འདུས་པ་གང་ཡིན་པ། །ཤེས་རབ་ཐབས་ཞེས་བྱ་བར་གྲགས། །ཞེས་གསུངས་ཏེ། སྔགས་ཀྱི་སྐབས་འདིར་ཐམས་ཅད་ལ་རྡོ་རྗེའི་སྒྲ་སྦྱར་བ་ཡང་གནད་འདི་རྟོགས་དགོས་པ་ཡོད་དོ། །དེ་ལྟར་སྟོང་པ་ཉིད་ཀྱི་ལྟ་བ་ཕུ་ཐག་ཆོད་པ་ཞིག་མེད་ན་འཁོར་བ་ལས་མི་གྲོལ་ཞིང་ཨེ་ཡིག་གི་དོན་མི་ཚང༌། ཕྱི་ནང་གི་ལུས་ལ་གནད་དུ་བསྣུན་པ་ལས་བྱུང་བའི་ལྷན་སྐྱེས་ཀྱི་བདེ་བ་ཆེན་པོ་མེད་ན་སྔགས་ཀྱི་ཟབ་གནད་རྣམས་མི་འབྱུང་ཞིང་ཝ་ཡིག་གི་དོན་མི་ཚང༌། དེ་གཉིས་སོ་སོར་ཡོད་ཀྱང་སྟོང་ཉིད་ཀྱི་ལྟ་བ་ཞུ་བདེའི་ངོ་བོར་བསྐྱེད་དེ་སྟོང་ཉིད་ཡུལ་དང༌། བདེ་ཆེན་ཡུལ་ཅན་དུ་བྱས་ནས། བདེ་སྟོང་སྦྱོར་མི་ཤེས་ན་ཐིག་ལེའི་དོན་མི་ཚང་བས་ཐོབ་བྱེད་ལམ་གྱི་ཨེ་ཝཾ་མ་ཚང་ལ། དེ་མ་ཚང་ན་ཐོབ་བྱ་འབྲས་བུའི་
ཨེ་ཝཾ་ཟུང་འཇུག་གི་གོ་འཕང་འགྲུབ་པའི་ཐབས་མེད་པས་དེ་གཉིས་སྦྱོར་བ་ཤིན་ཏུ་གལ་ཆེ་ཡང༌། དེ་དག་སོ་སོའི་ངོ་བོ་ངོས་ཟིན་པ་དང་སྦྱོར་ཤེས་པ་ཤིན་ཏུ་དཀོན་ཏེ། ས་ར་ཧས། སྙིང་རྗེ་དང་བྲལ་སྟོང་པ་ཉིད་ཞུགས་པ། །དེས་ནི་ལམ་མཆོག་རྙེད་པ་མ་ཡིན་ནོ། །འོན་ཏེ་སྙིང་རྗེ་འབའ་ཞིག་བསྒོམ་ན་ཡང༌། །འཁོར་བ་འདིར་གནས་ཐར་པ་ཐོབ་མི་འགྱུར། །གང་ཡང་གཉིས་པོ་སྦྱོར་བར་ནུས་པ་དེ། །འཁོར་བར་མི་གནས་མྱ་ངན་འདས་མི་གནས། །ཞེས་དང༌། ཁྱིམ་དང་ཁྱིམ་ན་དེ་ཡི་གཏམ་སྨྲ་ཡང༌། །བདེ་ཆེན་གནས་ནི་ཡོངས་སུ་ཤེས་པ་མེད། །ཅེས་གསུངས་སོ། །དེ་ལྟ་བུའི་ལམ་དང་འབྲས་བུ་ཨེ་ཝཾ་འགྲུབ་པ་ལ། དེའི་ནང་ནས་ཝཾ་ཡིག་གིས་མཚོན་པ་ལྷན་སྐྱེས་ཀྱི་བདེ་བའི་ཆ་སྐྱེད་པ་འདྲེན་བྱེད་རྟགས་ཀྱི་ཨེ་ཝཾ་ལ་ལྟོས་དགོས་ཤིང༌། དེ་ཡང་གང་ལ་བྱེད་ན་ཕྱིའི་ཐབས་ཤེས་དང་སྦྱར་བ་ནི། བརྟག་པ་ཕྱི་མའི་ལེའུ་གཉིས་པ་ལས། རྡོ་རྗེ་བཙུན་མོའི་བྷ་ག་ནི། །ཨེ་ཡི་རྣམ་པའི་ཆ་བྱད་གཟུགས། །ཞེས་སོགས་དང༌། རྡོ་རྗེ་ཕྲེང་བ་ལས། ཨེ་ནི་བྷ་གའི་མཚན་ཉིད་དེ། །པདྨ་རྟེན་དུ་ཤེས་པར་བྱ། །བརྟེན་པ་རྡོ་རྗེ་ཞེས་ནི་གསུངས། །བརྟེན་པ་རྡོ་རྗེ་འཆང་བ་ཡི། །དེ་ལ་གནས་པ་ཐིག་ལེའི་གཟུགས། །ཞེས་ཡབ་ཀྱི་རྡོ་རྗེ་དང་ཡུམ་གྱི་པདྨ་ལ་བཤད་དོ། །ནང་དུ་རང་གི་ལུས་ལ་གནད་དུ་བསྣུན་པའི་རྟགས་ཀྱི་ཨེ་ཝཾ་འཇོག་ཚུལ་ཡང༌། སམྦྷུ་ཊ་ལས། སྤྱི་བོ་ལྟེ་བར་སོན་འཁོར་ལོ། །ཨེ་ཡི་རྣམ་པར་ཡང་དག་གནས། །སྙིང་ག་མགྲིན་པར་ཡང་དག་
གནས། །ཝཾ་གྱི་ཡི་གེ་འདྲ་བར་འདོད། །ཅེས་སྤྱི་བོ་དང་ལྟེ་བའི་རྩ་འཁོར་ཝརྟུ་ལའི་ཨེ་ཡིག་གི་རྣམ་པ་དབྱིབས་གྲུ་གསུམ། མགྲིན་པ་དང་སྙིང་གའི་རྩ་འཁོར་ཝཾ་ཡིག་གི་རྣམ་པ་དབྱིབས་ཟླུམ་པོ་ཅན་ཡིན་ལ། སྡོད་ལུགས་ཀྱང་སྤྱི་བོའི་རྩ་འཁོར་གདུགས་ཁ་སྦུབ་པ་བཞིན་ཐུར་དུ་བསྟན་པ་དང༌། མགྲིན་པའི་རྩ་འཁོར་གདུགས་བཀན་པ་ལྟ་བུ་ཁ་གྱེན་དུ་བསྟན་ཏེ་གཉིས་ཀ་ཁ་སྦྱོར་གྱི་ཚུལ་དུ་ཡོད་ཅིང༌། སྙིང་གའི་རྩ་འཁོར་ཐུར་ལྟ་དང་ལྟེ་བའི་རྩ་འཁོར་གྱེན་ལྟ་གཉིས་ཀྱང་ཁ་སྦྱོར་བའི་རྣམ་པར་གཞི་ལ་རང་ཆས་སུ་ཡོད་དོ། །བརྟག་པ་དང་པོར། ཨེ་ཡི་རྣམ་པ་ལྷ་མོ་སྤྱན། །བཾ་གྱི་རྣམ་པ་བདག་མར་བརྗོད། །མ་ནི་ལྷ་མོ་གོས་དཀར་མོ། །ཡ་ཡི་རྣམ་པ་སྒྲོལ་མར་བརྗོད། །ཅེས་ཡི་གེ་ཨེ་བཾ་མ་ཡ་བཞི་ལ་སྦྱར་ཡང༌། ཨེ་ཝཾ་དུ་མ་འདུས་པའི་སྐྱོན་མེད་ལ། དབྱིབས་ཀྱིས་མཚོན་ཚུལ་སྔ་མ་དང་ཤིན་ཏུ་མཚུངས་སོ། །པཎ་ཆེན་བློ་བཟང་ཆོས་རྒྱན་གྱི་དྲིལ་བུ་པའི་རིམ་ལྔའི་དམར་ཁྲིད་དུ་རྩ་འཁོར་གཉིས་གྲུ་གསུམ་ཞེས་པ་ནང་དབྱིབས་ལ་སྦྱར་རོ། །དེ་ལྟར་ཐབས་ཤེས་ཀྱི་གསང་བའི་རྩ་གཉིས་འདྲེན་བྱེད་རྟགས་ཀྱི་ཨེ་ཝཾ་དུ་འཇོག་པ་གྲགས་ཆེ་ལ། འཁོར་ལོ་བཞི་ཡང་འདྲེན་བྱེད་རྟགས་ཀྱི་ཨེ་ཝཾ་དུ་འཇོག་དགོས་པའི་རྒྱུ་མཚན་ནི། བརྟག་གཉིས་ལས། སངས་རྒྱས་ཀུན་གྱི་སྡོམ་པ་ནི། །ཨེ་ཝཾ་རྣམ་པར་རབ་ཏུ་གནས། །ཞེས་གསུངས་པ་ལྟར། ཡབ་ཡུམ་སྙོམས་པར་ཞུགས་ཏེ་རོ་རྐྱང་གི་རྒྱུ་བ་དྷཱུ་ཏཱིར་བཀག་པ་ལས་གཏུམ་མོ་སྦར་བས་ཧཾ་ཡིག་ཞུ་སྟེ་ཨཾ་ཧཾ་ཡང་དག་པར་སྦྱར་ཞིང་སྡོམ་པར་འགྱུར་ལ། དེ་ཡང་འཁོར་ལོ་བཞིའི་
ལྟེ་བར་དགའ་བཞི་རིམ་གྱིས་བསྐྱེད་པའི་མཐར་ཐམས་ཅད་ཀྱང་ལྷན་སྐྱེས་ཀྱི་དགའ་བའི་ངོ་བོར་སྡོམ་པར་འགྱུར་ཞིང༌། དེ་འདྲ་བའི་འོད་གསལ་ལས་ལངས་པའི་སྒྱུ་མའི་སྐུ་དང་ལྷན་སྐྱེས་ཀྱི་བདེ་ཆེན་ངོ་བོ་དབྱེར་མེད་ཀྱི་སྐུ་དང་ཐུགས་སུ་སྡོམ་པ་ལས་སྐུ་གསུམ་དབྱེར་མེད་སྡོམ་པ་འགྲུབ་པས། རྡོ་རྗེ་ཐེག་པའི་ལམ་འབྲས་ཀྱི་གནད་ཡོངས་སུ་རྫོགས་པར་འགྱུར་རོ། །དེས་ན་ཤེར་ཕྱིན་གྱི་མདོ་སྡེ་རྣམས་སུ་སྟོང་ཉིད་བརྗོད་བྱའི་གཙོ་བོར་བྱས་ཏེ་བསྟན་པ་ཙམ་གྱི་ཆ་ནས་ཀྱང་བླ་ན་མ་མཆིས་ཤིང་སྐབས་མ་མཆིས་པ་དང༌། མདོ་སྡེ་ཀུན་གྱི་གཙོ་བོར་བཤད་ལ། འདིར་ནི་ཡུལ་སྟོང་ཉིད་དེ་ཡུལ་ཅན་ཁྱད་པར་ཅན་ལྷན་སྐྱེས་ཀྱི་བདེ་བའི་སྒོ་ནས་བསྒོམ་ཚུལ་གྱི་གནད་གསལ་བར་ཕྱེ་བས་ན་ཤེར་མདོ་སོགས་ལས་ཀྱང་ཆེས་ཁྱད་པར་དུ་འཕགས་པས་མདོ་སྡེ་ཀུན་གྱི་བླ་མར་འགྱུར་ལ། གདུལ་བྱ་རྣམས་སྒོ་དུ་མ་ནས་དེ་ལ་སྦྱོར་བའི་ཕྱིར་དུ་གདམས་ཤིང་རྗེས་སུ་བསྟན་པ་ཡང་གསུང་གི་ཡོན་ཏན་ནམ་མཛད་པའི་གཙོ་བོར་འགྲུབ་བོ། །༈ གཉིས་པ་གསུང་རྡོ་རྗེ་རང་གིས་མངོན་དུ་མཛད་ཚུལ་ལ། སྤྱི་དོན་དང༌། གཞུང་དོན་གཉིས། དང་པོ་ནི། གོང་དུ་སྐུའི་ཡོན་ཏན་རྣམ་བསྐྱེད་རིམ་གྱི་ལག་རྗེས་དང་སྦྱར་བས་འདི་རྫོགས་རིམ་གྱི་ལག་རྗེས་སུ་འགྲུབ་ལ། དེ་ལྟ་ན་ལག་རྗེས་འཇོག་བྱེད་ལུགས་འདིའི་རྫོགས་རིམ་གྱི་འགྲོ་ལུགས་ཇི་ལྟ་བུ་ཞིག་ཡིན་སྙམ་དུ་རྣམ་དཔྱོད་ཅན་རྣམས་ཀྱིས་དཔྱོད་དགོས་སོ། །དེ་ཡང་བླ་མེད་ཀྱི་རྒྱུད་སྡེ་ཐམས་ཅད་ཐོབ་བྱའི་འབྲས་བུ་མཐར་ཐུག་སྐུ་དང་ཡེ་ཤེས་དབྱེར་མེད་པ་ཟུང་འཇུག་གི་གོ་འཕང་
སྒྲུབ་པར་མཚུངས་པས་རྫོགས་རིམ་གྱི་ལམ་གྱི་ལུས་སྤྱི་ཁོག་གནད་མཚུངས་ཀྱང༌། དང་པོ་སྒྲུབ་ཚུལ་ཅུང་ཟད་མི་འདྲ་བས་ས་བཅད་ལེན་ལུགས་དང་མིང་འདོགས་མི་འདྲ་བ་སོ་སོར་བྱུང་བ་ཡིན་ཏེ། སྔགས་རིམ་ལས། གསང་འདུས་གཉིས་དང་བདེ་དགྱེས་ཀྱི་རྫོགས་རིམ་ལ་མཐར་ཟུང་འཇུག་གི་ཡེ་ཤེས་ཀྱི་སྐུ་བསམ་གཏན་གཉིས་གང་རུང་གིས་སྣོད་བཅུད་འོད་གསལ་དུ་བསྡུས་ནས་འཇུག་ལྡང་བྱེད་པའི་རིམ་པས་སྒྲུབ་པ་དང༌། དང་པོ་བསྐྱེད་རིམ་མཐར་དབྱུང་དགོས་པ་འདྲ་ཞིང༌། རླུང་དང་ཐིག་ལེ་ལས་རུང་དུ་བྱས་ནས་འོད་གསལ་དུ་འཇུག་ལྡང་བྱེད་དགོས་པ་ཡང་འདྲ་མོད་ཀྱང༌། རླུང་དང་ཐིག་ལེ་ལས་རུང་དུ་སྒྲུབ་ལུགས་ལ་སྒོ་མང་པོ་བཤད་དེ། འཕགས་ལུགས་པས་ནི་རྡོར་བཟླས་ཉིད་ལ་འདྲིལ་ཞིང༌། ཡེ་ཤེས་ཞབས་ལུགས་པ་དང༌། བདེ་མཆོག་པས་ཐིག་ལེའི་རྣལ་འབྱོར་མང་པོ་དང་གཏུམ་མོ་དང་རླུང་གི་རྣལ་འབྱོར་གྱིས་སྒྲུབ་ལ། ཌོམ་བྷི་པ་ལ་སོགས་པས་གཏུམ་མོ་ལ་གནད་དུ་བསྣུན་པར་སྣང་ངོ༌། །ཞེས་གསུངས་པ་ལྟར་རོ། །དེས་ན་འདུས་པ་ལས་རིམ་ལྔ་གཙོ་བོར་བྱས་ཀྱང༌། སོ་སོར་སྡུད་དང་བསམ་གཏན་སྲོག་སྩོལ་དང༌། །འཛིན་པ་རྗེས་དྲན་ཏིང་འཛིན་ཡན་ལག་དྲུག །ཡོངས་སུ་སྡུད་པའི་ཟབ་ལམ་རིམ་པ་ལྔ། །ཞེས་དེ་ལ་སྦྱོར་དྲུག་ཚང་བར་གསུངས་པ་དང༌། མ་རྒྱུད་འཁོར་ལོ་སྡོམ་པ་སོགས་སུ་སྦྱོར་བ་ཡན་ལག་དྲུག་གཙོ་བོར་གསུངས་ཀྱང༌། མཁའ་འགྲོ་རྒྱ་མཚོ་དང་བདེ་མཆོག་འབྱུང་བ་ལས་རིམ་ལྔ་བསྟན་པར་རྫོགས་རིམ་དངོས་གྲུབ་སྙེ་མ་ལས་གསུངས་ཤིང༌། ཁྱད་པར་དུ་དགྱེས་པ་རྡོ་རྗེའི་རྒྱུད་འདི་ཉིད་ལས་གསུངས་པ་ཡང༌
འདུས་པ་དང་གནད་མཚུངས་ཏེ། དེ་ཡང་བརྟག་པ་དང་པོའི་ལེའུ་དགུ་པར། ངེས་པར་དངོས་པོ་ཐམས་ཅད་ཀྱི། །དག་པ་དེ་བཞིན་ཉིད་དུ་བརྗོད། །ཅེས་དབྱེ་གཞི་དང༌། ཕྱི་ནས་རེ་རེའི་དབྱེ་བ་ཡིས། །ལྷ་རྣམས་ཀྱིས་ནི་བརྗོད་པར་བྱ། །ཞེས་ཕུང་སོགས་ལྷར་བསྒོམ་པ་སོ་སོའི་རྣམ་དག །ཡུལ་གྱི་དངོས་པོ་དག་པའི་ཕྱིར། །རང་གི་རིག་པའི་བདེ་བ་མཆོག །ཅེས་བདེ་བ་ཆེན་པོ་རང་རིག་པའི་རྣམ་དག་གསུངས་ཏེ། བར་མའི་དབང་དུ་མཛད་ནས། བསྐྱེད་པའི་རིམ་པའི་ཕྱོགས་ལ་ནི། །འདིས་ནི་ཕུང་པོ་སྦྱང་བར་བྱ། །ཞེས་བདེ་ཆེན་དང་བྲལ་བའི་ལུས་དབེན་སྒོམ་ཚུལ་དེ་བསྐྱེད་རིམ་དུ་གསུངས་པས་དེ་དང་མ་བྲལ་བ་རྫོགས་རིམ་གྱི་ལུས་དབེན་དུ་བསྟན་པར་རིམ་ལྔ་གསལ་སྒྲོན་ལས་གསུངས་པས། ལུགས་འདིར་གྲགས་མི་ཆེ་ཡང་ལུས་དབེན་བསྒོམ་ཚུལ་དཔྱིས་ཕྱིན་པར་ཡོད་དོ། །དེ་བཞིན་དུ་ངག་དབེན་ཡང༌། མཁས་གྲུབ་རྗེའི་བརྟག་གཉིས་རྣམ་བཤད་ལས། ཟླ་བ་དང་ཉི་མ་དང་ཨཱ་ལི་ཀཱ་ལི་དང་འཕོ་བ་བཅུ་དྲུག་དང་ཞེས་སོགས་ཀྱིས་རླུང་ལ་རྡོར་བཟླས་བྱེད་པ་དང་བུམ་པ་ཅན་གཉིས་བསྟན་པས། ཞེས་གསུངས་པ་ལྟར། ལེའུ་དང་པོའི་ཟླ་བ་དང་ཉི་མ་ཞེས་སོགས་ཀྱིས་རླུང་གི་རྣལ་འབྱོར་གྱི་གཞི་སྟོན་ཅིང༌། གཉིས་པ་སྔགས་ཀྱི་ལེའུར་བཟླས་པའི་སྔགས་ལ་ནང་བཤད་བྱས་པ་དང༌། བཅུ་གཅིག་པ་ལྟ་སྟངས་ཀྱི་ལེའུར་དགང་དབྱུང་གཞིལ་བ་སོགས་ངེས་དོན་དུ་བཤད་པས་རྡོར་བཟླས་དང་བུམ་པ་ཅན་བསྒོམ་ཚུལ་བསྟན་ནོ། །དེ་བཞིན་དུ་མ་རྒྱུད་ཀྱི་སྐོར་གཞན་ལས་
ཀྱང་མང་དུ་གསུངས་ཏེ། རྫོགས་རིམ་དངོས་གྲུབ་སྙེ་མ་ལས། ལྟེ་བའི་ཧཱུཾ་ཡིག་གམ་ནཱ་ད་དཀར་དམར་ལས་ལྡང་འཇུག་གནས་གསུམ་གྱི་རྡོར་བཟླས་ཀྱི་རྣལ་འབྱོར་གྱིས་རླུང་དྷཱུ་ཏཱིར་བཙུད་པ་ལས་ལྷན་སྐྱེས་དང་སྒྱུ་མའི་སྐུ་བསྐྱེད་པ་ལཱུ་ཨི་པས་རྫོགས་རིམ་དུ་བཤད་པ་ནི་རྩ་རྒྱུད་དང༌། རྣལ་འབྱོར་མ་ཀུན་སྤྱོད་དང༌། མངོན་བརྗོད་དང༌། ཧེ་རུ་ཀ་མངོན་འབྱུང་གསུམ་བསྒྲིགས་ཏེ་བཤད་པ་ལས་ཤེས་པར་བྱའོ། །ཞེས་རྩ་བཤད་གུང་བསྒྲིགས་པའི་མན་ངག་ཏུ་གསུངས་སོ། །འོ་ན་མ་རྒྱུད་ཀྱི་སྐབས་འདིར་ཡང་རྫོགས་རིམ་ལ་སློབ་པའི་ཚེ་དབེན་པ་གསུམ་ལ་སོགས་པའི་བསྒོམ་ཚུལ་དེ་ཁོ་ན་ལྟར་དགོས་སམ་སྙམ་ན། རྒྱུད་སྡེ་ཕན་ཚུན་རྒྱས་བཀབ་སྟེ་ཉམས་སུ་བླང་དུ་རུང་ལ། དེ་མིན་ཡང་ལམ་གྱི་གནད་ཆེ་བ་རྣམས་ལ་དོད་ཐུབ་རེ་ངེས་པར་ཚང་དགོས་ཏེ། རིམ་ལྔ་གསལ་སྒྲོན་ལས། དེ་ལྟར་དོན་གཅིག་ཏུ་བཤད་དུ་མི་རུང་ཡང༌། དེའི་དོད་ཐུབ་ཇི་ལྟར་ཡིན་དཔྱོད་ན་ནི་ལེགས་ཏེ། དེ་ལྟར་བྱས་ན་རྒྱུད་སོ་སོའི་མན་ངག་གི་མཐའ་ཆོད་པར་འགྱུར་རོ། །ཞེས་དང༌། རིམ་ལྔ་སོགས་ལམ་གཞན་ལ་དཔྱད་ནས་ལམ་ཕན་ཚུན་སྡུད་ཚུལ་བྱེད་ན་ནི། དེ་རྣམས་དོན་གཅིག་ཏུ་མ་བཤད་ཀྱང་སྐབས་དོན་འགྲུབ་པས། རྒྱུད་སོ་སོའི་ལམ་གྱི་གནད་གང་དུ་སོང་ལ་མི་འཇིགས་པ་ཐོབ་པར་འགྱུར་ཏེ། ཞེས་གསུངས་པའི་ཕྱིར་རོ། །འོ་ན་ཡང་འདིའི་རྫོགས་རིམ་བསྒོམ་པའི་ཚེ་རིམ་ལྔ་ལྟར་ཡིན་ནམ་ཞེ་ན། འདིར་གཏུམ་མོའི་རྣལ་འབྱོར་གྱི་སྒོ་ནས་གཙོ་བོར་བསྒོམ་པར་གསུངས་ཀྱང༌། དེ་ལ་རིམ་ལྔའི་ལམ་གྱི་གནད་ཚང་བར་ཡོད་དོ། །དེའི་ཚུལ་ཡང་རྡོ་རྗེ་
མཁའ་འགྲོ་ལས། གནས་ཀྱི་མཐའ་ནི་དག་པར་བྱ། །ཞེས་པའི་དོན་བྷ་བ་བྷ་དྲས། གནས་ནི་ལུས་ཏེ། གཏུམ་མོའི་རྣལ་འབྱོར་བསྒོམ་པས་ལུས་དག་པ་སྟེ་སྦྱངས་པའོ། །ཞེས་ལུས་དག་བྱེད་དུ་གསུངས་པས་ལུས་དབེན་གྱི་དགོས་པ་འགྲུབ་ལ། མཁས་གྲུབ་རྗེའི་ཡིག་ཆུང་ལས་འདུས་པའི་ལུས་དབེན་ངག་དབེན་གྱི་དོད་མ་རྒྱུད་ཀྱི་གཏུམ་མོའི་རྣལ་འབྱོར་ཡིན་གསུངས་པ་དང༌། སྟག་ཕུ་བའི་མཁའ་སྤྱོད་མའི་རིམ་གཉིས་ལས། མ་རྒྱུད་ཀྱི་སྐབས་འདིར་གཏུམ་མོ་བསྒོམ་པ་ཉིད་ཀྱིས་རྡོར་བཟླས་ཀྱི་དོད་ཐུབ་པར་གསུངས། ཞེས་གཏུམ་མོའི་དམིགས་པ་སྐྱོང་ཚུལ་ཁྱད་པར་བ་འགའ་ཞིག་གི་བྱེད་པར་ངག་དབེན་གྱི་དགོས་པ་འདུ་བར་གསུངས་སོ། །དེ་བཞིན་དུ་སེམས་དབེན་ཡང༌། མཁས་གྲུབ་རྗེའི་ཡིག་ཆུང་ལས། འདུས་པའི་སེམས་དབེན་གྱི་དོད་མ་རྒྱུད་ལ་དགའ་བཞི་བསྐྱེད་པ་ཡིན་པས། ཞེས་གསུངས་པ་ལྟར། དགའ་བ་བཞི་དང་སྟོང་པ་སྦྱར་བའི་གནད་ཀྱིས་འགྲུབ་བོ། །དེ་ལྟར་རིམ་པ་དང་པོ་གཉིས་ཀྱི་གནད་ཚང་བར་གོ་ན། རིམ་པ་ལྷག་མ་གསུམ་ནི་སྔགས་རིམ་ལས་གསུངས་པ་གོང་དུ་དྲངས་པ་ལྟར་བླ་མེད་ཀྱི་རྒྱུད་སྡེ་ཀུན་ལ་མི་མཐུན་པ་མེད་པས་དོགས་པ་ཆུང་ཞིང༌། ཁྱད་པར་དུ་དོན་དམ་འོད་གསལ་གྱི་རྫོགས་རིམ་ནི་མ་རྒྱུད་རང་གི་བརྗོད་བྱའི་གཙོ་བོ་ཡིན་པས་སྨོས་མི་དགོས་ལ། ཀུན་རྫོབ་སྒྱུ་མའི་རྫོགས་རིམ་ཡང༌། བརྟག་པ་ཕྱི་མའི་ལེའུ་གཉིས་པ་ལས། ཇི་ལྟར་སྒྱུ་མ་རྨི་ལམ་དང༌། །ཇི་ལྟར་བར་མའི་སྲིད་ཡིན་པ། །རྟག་ཏུ་གོམས་པའི་སྦྱོར་
བ་ཡིས། །དཀྱིལ་འཁོར་ཉིད་ནི་དེ་བཞིན་འདོད། །ཅེས་སྒྱུ་མ་མཁན་གྱིས་སྤྲུལ་བའི་སྐྱེས་བུ་བཞིན་དུ་ཡན་ལག་དང་ཉིང་ལག་ཚང་ཞིང༌། རྨི་ལམ་བཞིན་དུ་རགས་པའི་ལུས་ལས་ལོགས་སུ་ཕྱེ་བ་ཐ་མལ་པའི་འཆི་བ་འོད་གསལ་ལས་བར་སྲིད་འགྲུབ་པ་བཞིན། ལམ་གྱི་འོད་གསལ་ལས་སྒྱུ་མའི་སྐུར་ལྡང་ཚུལ་རྡོར་ཕྲེང་དང་དགོངས་པ་ལུང་སྟོན་ཇི་ལྟ་བ་བཞིན་གསུངས་ལ། དེའི་མཇུག་ཐོགས་སུ། ཕྱག་རྒྱ་ཆེན་པོའི་དབང་བསྐུར་བར། །ཇི་ལྟར་ཤེས་པའི་བདེ་ཆེན་པོ། །དེ་ཡི་འདི་ནི་བྱིན་རླབས་ཡིན། །ཞེས་ཕྱག་རྒྱ་ཆེན་པོ་ལྷན་སྐྱེས་ཀྱི་ཡེ་ཤེས་མཚོན་བྱེད་དབང་གསུམ་པའི་བདེ་ཆེན་ངོ་སྤྲད་པ་དེའི་རྒྱུན་གྱི་འོད་གསལ་ལས་ལྡང་ཚུལ་དང༌། སླར་ཡང་དེའི་རྒྱུན་ཡང་ཡང་གོམས་པས་དག་པར་བྱས་ཏེ་བྱིན་གྱིས་རློབ་ཚུལ་འདུས་པ་ལྟར་གསུངས་སོ། །རྩ་རྒྱུད་ཀྱི་གནད་འདི་དག་ཤིན་ཏུ་གསལ་བར་ནི་བཤད་རྒྱུད་རྡོ་རྗེ་གུར་ལས་གསུངས་ཏེ། དེའི་ལེའུ་བཞི་པར། རང་ཡང་རང་བྱིན་བརླབས་པ་ཡིས། །བྱིན་གྱིས་བརླབ་པར་བྱ་བ་ཡིན། །ཆོ་གའི་རིམ་པའི་རིམ་པ་ཡིས། །དེ་ནས་མཚན་མ་མཚོན་པར་བྱ། །དང་པོ་སྤྲིན་གྱི་རྣམ་པ་སྟེ། །གཉིས་པ་དུ་བ་ལྟ་བུ་འོ། །གསུམ་པ་སྲིན་བུ་མེ་ཁྱེར་དངོས། །བཞི་པ་མར་མེ་གསལ་འབར་བའོ། །ལྔ་པ་རྟག་ཏུ་སྣང་བ་ནི། །སྤྲིན་མེད་ནམ་མཁའ་ལྟ་བུ་འོ། །ཐམས་ཅད་མཁྱེན་པའི་རྒྱུ་དེ་སྟེ། །དངོས་གྲུབ་ངེས་འཇུག་ཉེ་བ་ཡིན། །ཞེས་སྒྱུ་མའི་སྐུ་གང་ལས་འགྲུབ་པའི་འོད་གསལ་གྱི་ཡེ་ཤེས་དང༌། དེའི་མཇུག་ཐོགས་སུ། ཕྱི་ནས་སྒྱུ་མའི་རྣམ་པ་ལྟར། །རྨི་ལམ་རྣམ་པ་སྐད་ཅིག་འགྱུར། །ཁམས་གསུམ་རྒྱུ་
དང་མི་རྒྱུ་བ། །མ་ལུས་ལུས་པ་མེད་པར་འགྲུབ། །འཇིག་རྟེན་ཁམས་ནི་ཐམས་ཅད་དུ། །ཇི་སྲིད་རྡོ་རྗེའི་ལུས་ཅན་རྣམས། །ཡེ་ཤེས་ཕུང་པོའི་བློ་ལྡན་པ། །འདི་ཡི་རྗེས་སུ་ཐམས་ཅད་འབྲང༌། །ཞེས་འོད་གསལ་ནམ་མཁའ་ལྟ་བུ་དེ་ལས་སྒྱུ་མ་དང་རྨི་ལམ་ལྟར་རླུང་སེམས་ཙམ་གྱི་ལུས་སུ་སྐད་ཅིག་གིས་ལྡང་ཚུལ་མདོར་བསྟན་ལ། དེའི་རྒྱས་བཤད་ལེའུ་བཅུ་བཞི་པ་ལས། རང་བྱིན་རློབས་པའི་སྦྱོར་བ་རུ། །ཞེས་སོགས་ཤོ་ལོ་ཀ་བདུན་གྱིས་འོད་གསལ་སྒྲུབ་ཚུལ་དང༌། དེ་ནས། ཧེ་རུ་ཀ་དངོས་བེམ་པོ་མིན། །ཞེས་སོགས་ཤོ་ལོ་ཀ་ལྔས་སྒྱུ་ལུས་བཤད་པས། རྩ་བཤད་གུང་བསྒྲིགས་ན་རྒྱུད་དོན་ལ་མི་འཆུག་པའི་གཟེར་ཐེབ་པར་འགྱུར་རོ། །འོན་ཀྱང་བདག་བྱིན་རླབས་ཀྱི་སྐོར་འདིར་བརྟག་གཉིས་ཀྱི་རྒྱ་འགྲེལ་རྣམས་ཞལ་མི་གསལ་ཞིང༌། བོད་ཀྱི་ཊཱི་ཀ་བྱེད་སྔ་མ་རྣམས་ལ་གཏད་སོ་ཞིག་མ་བྱུང་འདུག་ནའང༌། རྗེ་བླ་མས་སྔོན་མེད་ལེགས་བཤད་ཀྱི་སྲོལ་ཕྱེ་བ་ལ་བརྟེན་ནས་མཁས་གྲུབ་སྨྲ་བའི་ཉི་མས་བརྟག་གཉིས་རྣམ་བཤད་དུ་གསལ་བར་གསུངས་སྣང་བས། ལམ་འདིའི་སྒྲུབ་པ་ལྷུར་ལེན་པའི་སྐྱེ་བོ་བློ་གྲོས་ཅན་ཡོད་ན་དེར་ལྟོས་ཤིག །དེས་འཕྲོས་དོན་ལམ་གྱི་གནད་ཕན་ཚུན་ཚང་ཚུལ་དཔྱོད་པའི་སྒོ་ཙམ་བསྟན་ཟིན་ཏོ། །ད་ནི་ལམ་དེ་དག་མཐར་གྱིས་ཉམས་སུ་ལེན་ཚུལ་བསྡུས་ཏེ་བརྗོད་ན། དེ་ཡང་ལམ་གོང་མ་རྣམས་བགྲོད་པ་ལྷན་སྐྱེས་ཀྱི་བདེ་བས་སྟོང་ཉིད་བསྒོམ་པ་ལ་ལྟོས་ཤིང༌། ལྷན་སྐྱེས་ཀྱི་བདེ་བ་འབྱུང་བ་སྤྱི་བོའི་ཧཾ་ཡིག་ཞུ་སྟེ་ཨ་ཧཾ་སྦྱོར་བ་ལ་རག་ལས་པ་དང༌། དེ་
ཞུ་བ་ལྟེ་བའི་གཏུམ་མོ་འབར་བ་ལ་ལྟོས་པའི་རྒྱུ་མཚན་གྱིས། པཎ་ཆེན་ནཱ་རོ་པས་གཏུམ་མོ་ལམ་གྱི་རྨང་རྡོ་ཞེས་གཙོ་བོར་གསུངས་སོ། །དེར་མ་ཟད་ཆོས་དྲུག་གི་ཁྲིད་ཡིག་ཡིད་ཆེས་གསུམ་ལྡན་ལས། ལམ་གྱི་རྨང་རྡོ་གཏུམ་མོ་ཡིན་ལ། དེ་ཡང་གཙོ་ཆེར་ཀྱེ་རྡོར་ལ་བརྟེན་པ་ཡིན་པས། ཞེས་གསུངས་པ་ལྟར། སྤྱིར་བདེ་དགྱེས་གཉིས་ཀ་ནས་གསུངས་ཀྱང༌། ཁྱད་པར་དུ་ཀྱེ་རྡོར་ལས། རྣལ་འབྱོར་མ་ལུས་དབུས་སུ་ནི། །ཨ་ཡི་རྣམ་པ་སྡོམ་པའི་གནས། །ཞེས་གང་དུ་སྡོམ་པའི་གནས་ཀྱི་གཙོ་བོ་གཏུམ་མོའི་ཨ་ཐུང་ལ་རྩལ་དུ་བཏོན་ནས་ལན་དུ་མར་གསུངས་ཤིང༌། དེར་སྡོམ་པ་ལས་བདེ་ཆེན་འདྲེན་ཚུལ་ཡང༌། ལྟེ་བར་གཏུམ་མོ་འབར་བ་ཡིས། །དེ་བཞིན་གཤེགས་པ་ལྔ་བསྲེགས་ཤིང༌། །སྤྱན་ལ་སོགས་པ་ཡང་བསྲེགས་ཏེ། །བསྲེགས་པས་རི་བོང་ཅན་ཧཾ་འཛག །ཅེས་སོགས་རྒྱས་པར་གསུངས་ལ། མཁས་གྲུབ་རྗེའི་རྣམ་བཤད་ལས་ཀྱང༌། འདིར་ནི་གཙོ་བོ་ལྟེ་བ་ལ་གནད་དུ་བསྣུན་པ་སྟོན་པས། གཏུམ་མོ་ལེགས་པར་ཤེས་དགོས། ཞེས་གསུངས་པ་བཞིན་ལུགས་འདིར་དེ་ནས་བརྩམས་ཏེ་འཁྲིད་པ་གནད་ཆེའོ། །རྒྱུ་མཚན་དེས་ན་ཐོག་མར་གནད་དུ་བསྣུན་ས་ཡང་ལྟེ་བར་བྱེད་དགོས་པས་ལུགས་གཞན་དང་མི་འདྲ་སྟེ། འདུས་པ་འཕགས་ལུགས་ཀྱིས་ཐོག་མར་གསང་གནས་དང༌། ཡེ་ཤེས་ཞབས། དྲིལ་བུ་པ། ཀུ་ཀུ་རི་པ་སོགས་ཀྱིས་སྙིང་གར་གནད་དུ་བསྣུན་པར་བཞེད། དུས་འཁོར་བས་ཐོག་མར་ལྟེ་བའི་གནས་སུ་བུམ་པ་ཅན་གྱི་རླུང་སྦྱོར་བྱེད། ཌོམ་བྷི་པ་དང་ནག་པོ་སྤྱོད་པ་སོགས་གཏུམ་མོ་གཙོ་བོར་བྱེད་པ་རྣམས་ཀྱིས་དང་པོར་
ལྟེ་བའི་རྩ་འཁོར་ལ་གནད་དུ་བསྣུན་པར་འདོད་དོ། །དེ་ཡང་དུས་དང༌། ལུས་དང༌། རླུང་དང༌། ཡུལ་གྱི་གནད་བཞི་ཚང་དགོས་པས། དུས་ཐོ་རངས་སམ་ཕྱི་དྲོ་མེའི་དུས། ལུས་རྣམ་སྣང་གི་ཆོས་བདུན་ལྡན། རླུང་རྒོད་བག་ཅན་མ་ཡིན་པར་རང་བབས་སུ་བཞག་སྟེ། ཡུལ་འཁོར་ལོ་བཞིའི་ལྟེ་བའི་དྷཱུ་ཏཱིའི་ནང་དང༌། ཁྱད་པར་ལྟེ་བའི་རྩ་འདབ་ཀྱི་དབུས་སུ་གཏོད་པར་གསུངས་སོ། །རླུང་རེ་བསལ་བ་དཔྱིས་ཕྱིན་པར་སྔོན་དུ་བྱེད་ན་རྩ་གསུམ་གསལ་བཏབ་ནས་བྱེད་ཚུལ་སྟག་ཕུ་བའི་མཁའ་སྤྱོད་མའི་རིམ་གཉིས་སུ་གསུངས་པ་ལྟར་བྱ་ལ། རླུང་རོ་དགུ་ཕྲུགས་ཐུན་མོང་བ་ཙམ་ལ་རྩ་གསལ་འདེབས་མི་དགོས་སོ། །དེ་ནས་རང་གི་ལུས་ཤེལ་གྱི་ཕྲུ་མ་བུས་པ་ལྟར་དྭངས་ཤིང་གསལ་བའི་དབུས་དྲང་ཐད་ཅུང་ཟད་རྒྱབ་ལ་ཉེ་བའི་ཆར་རྩ་དབུ་མ་གསལ་འདེབས་དགོས་ཤིང༌། དེ་ཡང་བཤད་རྒྱུད་སམ་བྷུ་ཊ་ལས། དེ་ཡི་ནང་དུ་སོན་པའི་རྩ། །མར་མེ་རང་གི་ངོ་བོ་ཅན། །ཞེས་སོགས་ལྟར་གསལ་ལ་དྭངས་པ་ཏིལ་གྱི་མར་མེ་ལྟ་བུ། དམར་ལ་སྣུམ་པ་རྒྱ་སྐྱེགས་ཀྱི་ཁུ་བ་ལྟ་བུ། འཇམ་ལ་མཉེན་པ་པདྨའི་འདབ་མ་ལྟ་བུ། དྲང་ཞིང་འདྲོང་བ་ཆུ་ཤིང་གི་སྡོང་པོ་ལྟ་བུ་སྟེ། རང་གི་ངོ་བོ་ཁྱད་ཆོས་བཞི་ལྡན་དང༌། དེའི་གཡས་སུ་རོ་མ་དམར་ཞར། གཡོན་དུ་རྐྱང་མ་དཀར་ཞར། གསུམ་ག་སྦོམ་ཕྲ་གྲོ་སོག་གི་ཚད་ཙམ་པ། རོ་རྐྱང་གཉིས་དབུ་མ་ལ་བརྟེན་ནས་སུམ་གཤིབ་བྱས་ཏེ་འཁོར་ལོ་བཞིའི་སྲོག་ཤིང་གི་ཚུལ་དུ་ཡར་སྣེ་སྤྱི་གཙུག་བར་དུ་སོན་པ། དེ་ནས་དབུ་མའི་ཡར་སྣ་འཁྱོགས་ཏེ་
སྨིན་མཚམས་སུ་སེག་ཁར་ཟུག་ཅིང༌། རོ་རྐྱང་གཉིས་སྣ་བུག་གཉིས་སོ་སོར་བུག་པ་ཧ་རེ་ཟུག་པ། མར་སྣེ་ལྟེ་འོག་སོར་བཞིའི་ཚད་དུ་སླེབ་ཅིང༌། དེ་ནས་རོ་རྐྱང་གཉིས་ཀྱི་སྣེ་དབུ་མའི་ནང་དུ་གུག་ནས་ཡོད་པ་བསམ་དགོས། འདི་ཡང་སྲོག་དྷཱུ་ཏཱིར་འཛུད་པའི་དགོས་དབང་ཡིན་གྱི། དངོས་པོའི་གནས་ཚོད་ལ་མར་སྣེ་ནོར་བུའི་རྩེ་སོགས་སུ་སླེབ་ཅིང༌། ལས་དང་པོ་བའི་སྐབས་འདིར་དབུ་མ་ཞན་པ་དང༌། གཞན་གཉིས་རྒྱས་པའི་ཚུལ་དུ་ཡོད་ལ། སྦོམ་ཕྲ་དང་ཁ་དོག་ཡང་གོང་གི་ཁྱད་པར་བཤད་པ་དེ་གཏུམ་མོ་འབར་བའི་དུས་ལ་དགོངས་པར་མན་སྙེ་ལས་གསུངས་པས། ཕལ་པ་ལ་དབུ་མའི་ཁ་དོག་སྔོན་པོར་འབྱུང་སྟེ། དེས་ན་དངོས་དང་སྒོམ་དོན་གྱི་ཁྱད་པར་ཡང་ཕྱེད་དགོས་སོ། །ཁ་ཅིག་རྩ་དབུ་མ་སྲོག་རྩ་ལ་འདོད་པ་སོགས་སྣ་ཚོགས་བྱུང་ཡང༌། རིམ་ལྔ་གསལ་སྒྲོན་ལས། དྷཱུ་ཏཱི་ནི་སྲོག་གི་དབྱིག་པ་ཞེས་པ་སྲོག་པ་རྩ་ལ་བརྟེན་པར་ཕྱག་ཆེན་ཐིག་ལེ་དང༌། ཡེ་ཤེས་ཐིག་ལེ་ལས་གསུངས་པས། ཞེས་པ་ལྟར༌། དེའི་ངོས་ལ་བརྟེན་པ་ཙམ་ལས་དོན་མི་གཅིག་གོ །དེ་ལ་བརྟེན་པའི་འཁོར་ལོ་བཞིའི་གནས་ཚུལ་ནི། སྤྱི་གཙུག་གི་ཐད་ཙམ་གྱི་ཐོད་པའི་འོག་ཀླད་རྒྱའི་སྟེང་དུ་དབུ་མ་ལ་རོ་རྐྱང་གིས་ལུ་གུ་རྒྱུད་དུ་འཁྱུད་པའི་མདུད་མཚམས་ནས་རྩ་འདབ་བཞི། དེ་ལས་གྱེས་པ་བརྒྱད། དེ་ལས་བཅུ་དྲུག །དེ་ལས་སོ་གཉིས་སུ་གྱེས་པའི་བདེ་ཆེན་འཁོར་ལོ་གྲུ་གསུམ་པ། འདིའི་ཁ་དོག་སྣ་ཚོགས་མདོག་ཏུ་ཁྲིད་ཡིག་ཡིད་ཆེས་གསུམ་ལྡན་དང༌། པཎ་ཆེན་གྱི་ལཱུ་དྲིལ་གཉིས་ཀའི་རྫོགས་རིམ་སོགས་དུ་མར་
བཤད་པས། ཁ་ཅིག་སྐབས་འདིར་དཀར་པོར་འདོད་པ་མི་འཐད་དོ། །དེ་བཞིན་དུ་ཨོལ་མདུད་ཀྱི་ཐད་ཀར་དབུ་མ་ལ་རོ་རྐྱང་གིས་འཁྱུད་མཚམས་ནས་སྔར་ལྟར་གྱེས་པའི་ལོངས་སྤྱོད་འཁོར་ལོ་རྩ་འདབ་བཅུ་དྲུག་པར་དབྱིབས་ཟླུམ་ཞིང་ཁ་དོག་དམར་པོ། ནུ་མ་གཉིས་ཀའི་དབུས་ཀྱི་ཐད་ཀའི་དབུ་མའི་མདུད་མཚམས་ནས་རྩ་འདབ་བཞི་དང་དེ་ལས་བརྒྱད་དུ་གྱེས་པའི་སྙིང་ག་ཆོས་ཀྱི་འཁོར་ལོ་ཁ་དོག་དཀར་ཞིང་དབྱིབས་ཟླུམ་པོ། ལྟེ་བའི་མདུད་མཚམས་ནས་སྔར་ལྟར་གྱེས་པའི་སྤྲུལ་བའི་འཁོར་ལོ་རྩ་འདབ་རེ་བཞི་པ་དབྱིབས་གྲུ་གསུམ་པ་ཁ་དོག་དམར་པོའམ་སྣ་ཚོགས་མདོག །འདིའི་རྩ་འཁོར་གཉིས་གཉིས་སྟེང་འོག་ཏུ་ཕྱོགས་ཏེ་ཐབས་ཤེས་ཁ་སྦྱོར་གྱི་ཚུལ་དུ་གནས་པའི་རྒྱུ་མཚན་དང་བཅས་སྔར་བཤད་པ་ལྟར་བསྒོམ་དགོས་སོ། །དེ་ནས་རང་གི་རླུང་སེམས་དེ་ཉིད་སྤྱི་བོའི་རྩ་འཁོར་གྱི་དབུས་སུ་ཞུགས་ཏེ་བལྟས་པས་རྩ་འདབ་རྣམས་སྦུབ་སྟོང་ཐལ་ལེ་ཡོད་པ་མཐོང་ཞིང། དྷཱུ་ཏཱིའི་ལམ་ནས་མགྲིན་པའི་རྩ་འཁོར་མཐོང་བས་དེར་སོང་ནས་ཡུད་ཅིག་བསྡད་དེ་དེའི་རྩ་འདབ་རྣམས་བལྟ། དེ་བཞིན་དུ་སྙིང་ག་དང་ལྟེ་བར་སོང་སྟེ་བལྟ་བའི་ཚུལ་གྱིས་རྩའི་གསལ་སྣང་སྦྱོང་བ་གལ་ཆེ་བར་གྲུབ་ཆེན་ལྭ་བ་པས་གསུངས་སོ། །དེའི་འོག་ཏུ་ཡི་གེ་འགོད་པ་ལ་རྒྱས་བསྡུས་ཀྱི་ལུགས་གཉིས་ཡོད་ཅིང༌། བསྡུས་པ་ཡི་གེ་བཞི་འགོད་པ་འདི་ཡིན་པས། ཁ་ཅིག་ལྟེ་བའི་ཨ་གཅིག་པུ་འགོད་པ་དང༌། ཁ་ཅིག་སྤྱི་བོའི་ཧཾ་དང་གཉིས་པོ་ཙམ་འགོད་པར་འདོད་པ་མི་ལེགས་པར་ཁྲིད་ཡིག་ཡིད་ཆེས་གསུམ་ལྡན་དུ་གསུངས་ཏེ། དེའི་རྒྱུ་
མཚན་སྤྱི་བོའི་ཧཾ་ལ་སེམས་བརྟན་ན་དེ་བྱང་སེམས་དཀར་པོའི་གནས་ཡིན་པས་དཀར་ཆ་འཕེལ་སྟོབས་ཆེ། མགྲིན་པའི་ཨོཾ་ལ་སེམས་བརྟན་ན་དེ་རོ་མའི་ཁྲག་འཕེན་འཛིན་བྱེད་པའི་གནས་ཡིན་པས་ལྟེ་བའི་མེ་གཏུམ་མོའི་གནས་སུ་འཁྲིད་སྟོབས་ཆེ། སྙིང་གའི་ཧཱུཾ་ལ་
སེམས་བརྟན་ན་དེ་འོད་གསལ་འཆར ་བའི་གནས་ཡིན་པས་གཉིད་སད་དུས་འོད་གསལ་ འཆར་སྟོབས་ཆེ། ལྟེ་བའི་ཨ་ལ་སེམས ་བརྟན་ན་གཏུམ་མོ་སྦར་བས་བྱང་སེམས་ཞུ་སྟོབས་ཆེ་བའི་གནད་ཤེས་དགོས་སོ། །དེ་ནས་ཡི་གེ་འགོད་ཚུལ་ནི། རྩ་འཁོར་སོ་སོའི་དཀྱིལ་དྲང་ཐད་ཀྱི་དབུ་མའི་ནང་དུ་འགོད་དགོས་ལ། གདན་ནི་སྟག་ཕུ་བས་ལྟེ་བ་མགྲིན་པ་གཉིས་ཀར་ཉི་གདན་གསུངས་ཀྱང༌། བརྟག་གཉིས་རྣམ་བཤད་དང༌། ཆོས་དྲུག་གི་ཁྲིད་ཡིག་གཉིས་ཀར་བཞི་པོ་ཟླ་གདན་དུ་གསུངས་པས་ཟླ་གདན་སྲན་མ་ཕྱེད་གཤགས་ཙམ་རེ་བསམ་ལ། དེའི་ལྟེ་བར་ཨ་ཐུང་ཤད་ཀྱི་རྣམ་པ་ཞེས་འབྱུང་བ་ནི། ངོ་བོ་རྒྱ་གར་ཝརྟུ་ལའི་ཡི་གེའི་ཨ་ཐུང་ཡིན་ཀྱང༌། རྣམ་པ་བོད་ཡིག་ལ་མཚོན་ན་གཟབ་མའི་ཤད་ཀྱི་དབྱིབས་དང་མཚུངས་པས་དེ་ལྟར་བཏགས་སོ། །སྙིང་གར་ཧཱུཾ་སྔོན་པོ་མགོ་ཐུར་ལྟ། མགྲིན་པར་ཨོཾ་དམར་པོ་མགོ་གྱེན་ལྟ། སྤྱི་བོར་ཧཾ་ཡིག་དཀར་པོ་མགོ་ཐུར་དུ་བལྟ་བ་བསམ་ཞིང༌། ཡིག་འབྲུའི་ཆེ་ཆུང་སམ་བྷུ་ཌིར་ཧཱུཾ་ཡིག་ཉུང་དཀར་གྱི་ཚད་དུ་གསུངས་པ་གཞན་གསུམ་ལ་ཡང་འདྲའོ། །ཡི་གེ་བཞི་ཀ་ཡང་མན་ངག་སྙེ་མར་བཤད་པ་ལྟར། མགོར་ཟླ་ཕྱེད་ཐིག་ལེ་ནཱ་ད་དང་བཅས་པ་གསལ་འདེབས་ཤིང༌། ཨ་དང་ཨོཾ་གཏུམ་མོའི་རང་བཞིན་ཡིན་པས་དེ་གཉིས་ཀྱི་ནཱ་ད་དམར་ཞིང་ཚ་བ་མེ་འབར་ལ་ཁད་པ་དང༌། གཞན་
གཉིས་བྱང་ཆུབ་ཀྱི་སེམས་ཀྱི་ངོ་བོ་ཡིན་པས་ནཱ་ད་ཡང་བྱང་སེམས་བ་མོ་ལྟ་བུ་འཛག་པའི་རྣམ་པ་ཅན་དུ་བསྒོམ་ན་བདེ་བ་འཕེལ་བའི་གནད་ཆེ་ཞིང༌། ཐམས་ཅད་ཀྱང་ཤིན་ཏུ་འོད་འཚེར་བའི་རྣམ་པར་བསམ་ན་བྱིང་བ་གཅོད་སླའོ། །དེ་ནས་ཡི་གེ་དེ་དག་ལ་ཚུ་རི་ནས་ཕ་རི་ལ་བལྟ་བ་ལྟ་བུ་མ་ཡིན་པར་རང་གི་སེམས་དམིགས་རྟེན་དེ་ལ་ཞུགས་པའི་ཚུལ་གྱིས་བཟུང་ནས་ཧ་ཅང་གྲིམས་དྲགས་པ་དང་ལྷོད་དྲགས་པའི་བྱིང་རྒོད་སྤངས་ཏེ་བསྒོམས་ནས་ཡི་གེ་བཞི་ཀ་དང༌། ཁྱད་པར་ལྟེ་བའི་ཨ་ཐུང་ལ་གཙོ་བོར་དམིགས་པ་གཏོད་དོ། །དེ་ལྟ་བུའི་དམིགས་རྣམ་དེ་ཉིད་ལ་ཆིག་དྲིལ་དུ་འབད་ན་ཡང་རང་སེམས་ཐིག་ལེ་དང་འདྲེས་པའི་ཉམས་སྐྱེ་ཞིང༌། དེའི་རྒྱུན་ལེགས་པར་བསྐྱངས་ན་རླུང་སེམས་འཇུག་པ་གཅིག་པའི་དབང་གིས་སེམས་བཟུང་ས་དེར་རླུང་ངེས་པར་འདུ་བས་ཞུགས་གནས་ཐིམ་གསུམ་རྟགས་དང་བཅས་པ་འབྱུང་ལ། དེའི་དབང་གིས་ལྟེ་བའི་གཏུམ་མོ་ཁྱད་པར་ཅན་སྦར་བས་གོང་གི་ཡི་གེ་གསུམ་དང༌། ཁྱད་པར་སྤྱི་བོའི་ཧཾ་ཡིག་ཞུ་བ་ལས་ཡས་བབས་ཀྱི་དགའ་བ་བཞི་དང༌། བྱང་སེམས་གྱེན་དུ་ལྡོག་སྟེ་མས་བརྟན་གྱི་དགའ་བ་བཞི་འདྲེན་ཞིང་དགའ་བ་བཞི་དང་སྟོང་པ་བཞི་སྦྱར་བས་མཐར་ལྷན་སྐྱེས་ཀྱི་ཡེ་ཤེས་མཚན་ཉིད་ཚང་བར་སྐྱེད་ནུས་སོ། །གཏུམ་མོ་འཁོར་ལོ་བཞི་མ་འདི་ལ་བུམ་པ་ཅན་བསྒོམ་པ་རྒྱུད་དང་གྲུབ་ཆེན་གྱི་གཞུང་དུ་མི་གསལ་ཡང༌། བོད་ཀྱི་བླ་མ་སྔ་མ་རྣམས་གཏུམ་མོའི་རྟོགས་པ་སྐྱེ་མྱུར་བའི་ཆེད་དུ་མན་ངག་གིས་ཁ་བསྐང་བ་ཡིན་ལ། དེ་ཡང༌། རྔུབ་དང་དགང་དང་གཞིལ་བ་དང༌། །མདའ་ལྟར་
འཕང་དང་རྣམ་བཞི་འོ། །ཞེས་དོན་ཚན་བཞིར་གསུངས་པས། རྔུབ་པའི་སྦྱོར་བ་ནི། ཁ་ནས་མི་རྔུབ་པར་སྣ་བུག་གཉིས་ནས་རླུང་འཇམ་པོར་དལ་གྱིས་རྔུབ་པའོ། །དགང་བའི་སྦྱོར་བ་ནི་རླུང་དེ་རོ་རྐྱང་གཉིས་ཀྱི་ནང་དུ་སོང་བས་དེ་གཉིས་རྒྱུ་མ་ཕུས་བཏབ་པ་ལྟར་ཁྲིག་གིས་གང་བའོ། །གཞིལ་བའི་སྦྱོར་བ་ནི། རྩ་དེ་གཉིས་ཀྱི་ནང་གི་རླུང་ཐམས་ཅད་མར་སྣ་ནས་དབུ་མའི་ནང་དུ་སིར་གྱིས་ཞུགས་པས་རོ་རྐྱང་གཉིས་སྟོངས་ལྡིབ་ཀྱིས་འགྲོ་བའོ། །འདིའི་སྐབས་སུ་མཆིལ་མ་གཅིག་སྒྲ་མེད་དུ་མིད་ཅིང་། དེས་སྣ་ཁྲིད་བྱས་ཏེ་སྟེང་རླུང་མར་མནན་པ་དང༌། འོག་སྒོ་གཉིས་ནས་རླུང་འཇམ་པོ་ཞིག་ཡར་ཐོན་ཏེ་ལྟེ་བའི་ཨ་ཐུང་གི་གོ་སར་ཁ་སྦྱོར་དུ་བྱས་པ་ལ་དམིགས་པ་གཏོད་པ་ནི། སྡོམ་འབྱུང་ལས། སྟེང་དང་འོག་ཏུ་འགྲོ་བའི་རླུང༌། །ཡིད་ཀྱི་ཁ་སྦྱོར་དུ་བྱ་སྟེ། །ཞེས་ལྟེ་བ་ཡན་གྱི་སྲོག་འཛིན་དང༌། དེ་མན་གྱི་ཐུར་སེལ་ཏེ་སྲོག་ཐུར་གཉིས་ཀ་ལྟེ་བར་བསྲེ་བ་བུམ་པ་ཅན་གྱི་དངོས་གཞི་ཡིན་ནོ། །མདའ་ལྟར་འཕང་བའི་སྦྱོར་བ་ནི། དེ་ལྟར་མི་བདེ་བ་མི་སྐྱེད་ཙམ་དུ་རླུང་ཐུབ་ཚད་བཟུང་སྟེ་ཕྱིར་གཏོང་དགོས་པ་ན་དབུ་མའི་ནང་ནས་ཡར་བདེ་ཁྲི་ལི་ལི་འགྲོ་བར་བསམ་པའོ། །དེ་ལྟར་རེ་ཞིག་དམིགས་སྐོར་བཞི་པོ་དེ་ཙམ་གྱི་སྒོ་ནས་སྦྱངས་ཏེ་བུམ་པ་ཅན་ཡུན་རིང་པོར་གནས་ཐུབ་པའི་ཚེ་དེའི་རླུང་སྦྱོར་དངོས་གཞི་སྒོམ་བཞིན་པའི་ངང་ནས་གོང་གི་ཡི་གེ་བཞི་གསལ་འདེབས་ཤིང༌། གསང་བའི་འཁོར་ལོ་ལ་གནས་པའི་རླུང་གིས་ཨཾ་ཡིག་སྦར་བས་གོང་མ་རྣམས་ཞུ་སྟེ་དགའ་བཞི་འདྲེན་པ་སོགས་གོང་དུ་བཤད་པའི་དམིགས་པའི་མཚམས་ལ་སྦྱོར་ཤེས་དགོས་ཀྱི། དམིགས་སྐོར་རྣམས་སོ་སོར་འཐོར་
ནས་འབྲེལ་མེད་དུ་འགྲོ་བ་དང་ཡི་གེ་གསལ་འདེབས་པའི་དུས་ངོས་མ་ཟིན་པ་ཡང་འབྱུང་སྣང་སྟེ། ཁྲིད་ཡིག་ཡིད་ཆེས་གསུམ་ལྡན་དུ་ཨ་ཐུང་གི་སར་ཞེས་ཡང་ཡང་གསུངས་པས། ཐོག་མ་རང་ནས་ཨ་གསལ་མ་བཏབ་ཀྱང་སླར་འདེབས་རྒྱུའི་གོ་སའི་ཐད་ཡིན་པའི་དོན་ནོ། །འོན་ཀྱང་ཡིད་ཆེས་གསུམ་ལྡན་ལས། རྫོགས་རིམ་གྱི་གདམས་ངག་གལ་ཆེ་བ་རྣམས་ཚང་བར་བཀོད་པའི་མན་ངག་སྙེ་མར་ཡང་སྐབས་དེར་རླུང་བུམ་པ་ཅན་བསྒོམ་པ་མ་བཤད། ཅེས་དང༌། སྔགས་རིམ་ལས། གཏུམ་མོའི་རྣལ་འབྱོར་འདི་དག་ལ་རླུང་ཁ་སྦྱོར་བཟུང་ནས་བྱེད་པ་མ་བཤད་པར་དམིགས་པ་ཤིན་ཏུ་བརྟན་པར་གནས་ནས་མེར་སྦོར་བའི་ལུགས་སུ་བཤད་ལ། གདམས་པ་གཞན་ལས་བུམ་པ་ཅན་བཟུང་བ་དང་སྦྲེལ་ནས་བྱེད་དོ། །ཞེས་གསུངས་པ་རྣམས་ཀྱི་དགོངས་པར་བརྟགས་ན་སྐབས་འདིར་བུམ་པ་ཅན་ལས་མེ་དམིགས་གཙོ་བོར་བྱས་ན་ལེགས། དེའི་བསྒོམ་ཚུལ་ནི་གོང་དུ་བཤད་པ་ལྟར་དང་པོ་རྩ་འཁོར་དང་། དེ་ནས་ཡི་གེའི་གསལ་སྣང་སྒྲུབ། དེ་ནས་གཏུམ་མོའི་མེ་གསོ་བ་ཞེས་པ་སྣ་བུག་གཉིས་ནས་རླུང་ཕྲ་ལ་རིང་བ་དལ་གྱིས་རྔུབ་པ་རོ་རྐྱང་གཉིས་ནས་མར་སོང༌། དེ་གཉིས་ཀྱི་མར་སྣ་དབུ་མའི་ནང་དུ་ཡར་བཅུག་སྟེ་ཡི་གེ་དབུ་ཅན་གྱི་ཆའི་ཞབས་ལྟ་བུར་ཡོད་པས། རླུང་ཐམས་ཅད་དབུ་མའི་ནང་དུ་ཞུགས་ནས་ཡར་སོང༌། ལྟེ་བའི་ཨཾ་ཡིག་ལ་ཕོག་སྟེ་རླུང་གིས་བུས་པས་མེ་སྟག་དམར་ཚེག་ཚེག་འབར་ལ་ཁད་བྱེད་པར་བསམ་པའོ། །ཡང་སྔར་བཞིན་རྔུབས་ཏེ་བུས་པས་མེ་རྒྱ་ཁབ་ཙམ་ཞིག །
འབར་བར་བསམ་པ་ནི་གཏུམ་མོ་སྦར་བ་ཞེས་བྱ་ལ། སླར་ཡང་སྔར་བཞིན་བྱས་པས་གཏུམ་མོའི་མེ་དམར་ཞིང་གསལ་བ། ཚ་ཞིང་ངར་བ། ཕྲ་ཞིང་འགྲིལ་བ་སྟེ་ཁྱད་པར་གསུམ་ལྡན་ཤུགས་དྲག་ཏུ་འབར་བ་དབུ་མའི་ལམ་ནས་ཡར་ཞུགས་ཧཱུཾ་ལ་གཡས་སུ་ལན་གསུམ་བསྐོར་བས་ཞུ་ལ་ཁད་བྱས། ཡང་གྱེན་དུ་སོང་སྟེ་ཨོཾ་ལ་གཡོན་སྐོར་གསུམ་བྱས་པས་དེའི་ཚ་ངར་ཇེ་ཆེར་སོང་ནས་འོད་འཕྲོས་པ་དང་གཉིས་ཀ་འདྲེས་ཏེ་ཡར་སོང༌། ཧཾ་ཡིག་ལ་རེག་ཙམ་བྱས་པས་དེ་བྱང་སེམས་ཀྱི་ངོ་བོར་སྐྱ་ནར་གྱིས་ཞུ་སྟེ་མར་བབས་ནས་དགའ་བཞི་འདྲེན་པས་དེ་ཐམས་ཅད་དང༌། ཁྱད་པར་ལྷན་སྐྱེས་ཀྱི་ཚེ་མཐའ་བྲལ་དབུ་མའི་ལྟ་བ་དང་སྦྱར་ཏེ་བདེ་སྟོང་དབྱེར་མེད་ཀྱི་ངང་ལ་རྩེ་གཅིག་ཏུ་མཉམ་པར་འཇོག་གོ །དེ་ལྟར་ཡང་ནས་ཡང་དུ་བསྒོམ་དགོས་པས་འོད་གསལ་དེ་ལས་ལྡང་རེས་བཞིན་ཕུང་པོ་རྙིང་པ་ལས་གོ་ས་ལོགས་སུ་རྗེ་བཙུན་མའི་སྐུར་ལྡང་སྙམ་པའི་འཕེན་པ་དང་། དེ་ནས་ལུགས་ལྡོག་གི་ཉེར་ཐོབ་ནས་སྨིག་རྒྱུའི་བར་གྱི་རྟགས་རྣམས་བྱུང་སྟེ་རྗེ་བཙུན་མའི་སྐུར་བཞེངས་པར་མོས་པ་ནི་སྐབས་དོན་ལོངས་སྤྱོད་རྫོགས་པའི་སྐུ་སྒྲུབ་བྱེད་ཀུན་རྫོབ་སྒྱུ་མའི་རྫོགས་རིམ་ལ་འཇུག་པའི་ཐབས་བླ་ན་མེད་པའོ། །དམིགས་པ་དེའི་ངང་ལ་རེ་ཞིག་བཞག་སྟེ། དེ་ལས་ལྡང་བ་ན་ཕུང་པོ་རྙིང་པ་རྗེ་བཙུན་མར་བསྒོམ་པའི་སྤྱི་བོ་ནས་ཞུགས་པར་བསམ་སྟེ་རྗེས་ཐོབ་ཀྱི་བྱ་བ་ལ་འཇུག་གོ །དེ་ནི་སད་དུས་ཀྱི་བསྲེ་བ་སྐོར་གསུམ་ཞེས་བྱ་ལ། བསྒོམ་ཚུལ་སྔ་མ་དང་སྦྱར་ཏེ་གཉིད་ཆོས་སྐུ། རྨི་ལམ་ལོངས་སྐུ། སད་པ་སྤྲུལ་སྐུའི་བསྲེ་བ་གསུམ་ལ་གཉིད་དུས་ཀྱི་བསྲེ་བ་སྐོར་
གསུམ་ཞེས་བྱ་སྟེ། འདི་རླུང་དབུ་མར་ཐིམ་ནུས་པའི་ཚེ་དཔྱིས་ཕྱིན་པར་བྱེད་ནུས་ཀྱང༌། དེ་མི་ནུས་པས་འདུན་སྟོབས་ཙམ་གྱིས་སྦྱངས་ན་ཡང་ཕན་ཤིན་ཏུ་ཆེའོ། །དེ་ཡང་སྒྱུ་མའི་སྐུ་དངོས་གནས་སུ་ལྡང་བ་ལ་རླུང་ལ་དབང་ཐོབ་པ་དགོས་ཤིང་། དེ་ལ་དབུ་མའི་རྩ་མདུད་རྫོགས་པར་གྲོལ་དགོས་པས། དེ་འབྱེད་པའི་ཐབས་ཀྱི་གཙོ་བོ། རྡོར་ཕྲེང་ལས། རླུང་གཉིས་ཀྱིས་ནི་ཕྱི་ནས་ནི། །མ་རིག་མདུད་པ་འབྱེད་པར་བྱེད། །ཅེས་གསུངས་པ་ལྟར། རླུང་འབྱུང་འཇུག་གནས་གསུམ་ཡི་གེ་གསུམ་གྱི་རང་གདངས་སུ་མོས་པའི་རྡོ་རྗེའི་བཟླས་པ་གལ་ཆེའོ། །འོན་ཀྱང་དེ་མ་ནུས་ན་དབུགས་དང་འབར་འཛག་གི་དམིགས་པ་སྦྲགས་པས་ཆོག་སྟེ། སྔགས་རིམ་ལས། དེ་ལྟར་མི་ནུས་པས་ནི་དབུགས་གྱེན་དུ་འགྲོ་ན་རྡུལ་གྱི་རི་མོ་དྲང་པོ་འབར་བ་དང༌། རླུང་ནང་དུ་འཇུག་པ་ན་ཧཾ་ཡིག་ཟླ་བ་འཛག་པ་ཐིག་ལེའི་གཟུགས་ཀྱིས་ལྟེ་བར་འོང་བར་བསམ་སྟེ། དེ་ཡང་གཡས་གཡོན་གཉིས་ཀྱི་རླུང་ཕྱི་ནང་དུ་རྒྱུ་བ་ལོག་པའི་བར་དུ་ཡང་དང་ཡང་དུ་བྱའོ། །ཞེས་སོ། །དེ་ལྟར་ན་རྗེ་བཙུན་རིག་བྱེད་མའི་མན་ངག་ཐུན་མོང་མ་ཡིན་པ་རིམ་པ་ལྔ་པ་ལས་བཤད་པའི་སྤྲོ་བསྡུའི་དམིགས་པ་སྐྱོང་མཚམས་ཀྱང་རྩ་དང་ཡི་གེའི་གསལ་སྣང་བུམ་པ་ཅན་ནམ། མི་དམིགས་གང་རུང་གི་སྒོ་ནས་འབར་འཛག་གི་དམིགས་པ་སོགས་ལེགས་པར་གོམས་པའི་མཚམས་སུ་བྱེད་དགོས་ཀྱི། དང་པོ་ནས་བྱེད་པ་མིན་ཏེ། ཁ་ཅིག་གཏུམ་མོའི་ལུགས་སུ་བྱས་ནས་ཡི་གེ་བཞི་བཀོད་ཀྱང་དེ་མ་ཐག་ཡི་གེ་དེ་རྣམས་དང༌། ལྟེ་བར་གནད་དུ་བསྣུན་པའི་
སྒྲོས་ཙམ་ཡང་མེད་པར་སྙིང་གའི་ཧྲཱིཿ ཡིག་གི་སྤྲོ་བསྡུ་བྱས་པ་མ་འབྲེལ་ཞིང༌། ལྟེ་བའི་ཨཾ་ཡིག་འབར་བའི་དམིགས་པ་མ་བྱས་གོང་དུ་སྤྱི་བོའི་ཧཾ་ཡིག་ཞུ་བའི་དམིགས་པ་བསྐྱངས་པ་ནི་འབར་འཛག་གོ་ལོག་པའོ། །དེར་མ་ཟད་སྔགས་རིམ་ལས། གཏུམ་མོའི་ངོ་བོ་འབར་དུ་གཞུག་གོ །དེ་འབར་བ་ཡང་དབུ་མ་ནས་སོང་སྟེ་བ་སྤུའི་བུ་ག་དང་རྩེ་མོ་དང་དཔྲལ་བའི་མཚམས་རྣམས་ཁྱབ་པར་བྱས་ཤིང༌། འཁོར་ལོ་གསུམ་དང་ཕུང་པོ་ལ་སོགས་པ་རྣམས་གདུངས་ནས་སྣ་བུག་གཡས་དང་མཛོད་སྤུའི་ཁུང་བུ་ལས་བྱུང་ངོ༌། །དེ་ནས་གློག་གི་འོད་བཞིན་དུ་ཕྱོགས་བཅུར་ཁྱབ་ནས་འཁོར་བ་པ་དང་ཉན་རང་དང་བྱང་སེམས་རྣམས་ལ་རེག་པས། ཞེས་པ་ནས། མཛོད་སྤུའི་བུ་ག་ནས་ཞུགས་ནས་བདེ་ཆེན་གྱི་འཁོར་ལོར་གནས་པ་ན་བྱང་སེམས་དང་ལྷན་ཅིག་ཞུ་ནས་འོག་ཏུ་འཛག་པ་ཐབས་ཤེས་རོ་གཅིག་པའི་བདེ་བ་ཆེན་པོ། ཞེས་སོགས་དང༌། འདིའི་དམིགས་པ་གཉིས་འགྲོས་ཤིན་ཏུ་མཚུངས་ཤིང༌། ཁྲིད་ཡིག་ཡིད་ཆེས་གསུམ་ལྡན་ལས། སེམས་བརྟན་པ་ན་གཏུམ་མོའི་འོད་ཟེར་གྱི་སྣང་བས་ལུས་ཀྱི་ཕྱི་ནང་དང་གནས་ཁང་སོགས་ཐམས་ཅད་ཅེས་གོ་རིམ་བྱེད་ཚུལ་སྔ་མ་ལྟར་གསུངས་པས་ཀྱང་ཤེས་སོ། །རྒྱུ་མཚན་གཞན་ཡང་དམིགས་སྐོར་འདི་ཉིད་མཇུག་ཏུ་བྱས་ན་ལམ་གྱི་འགྲོས་གོང་མ་དང་མཐུན་པའི་དགོས་པ་ཡང་ཡོད་དེ། གཞི་ལ་ལུས་ཐོག་མར་ཆགས་པ་དང་མཐར་འདོད་པའི་གནས་སྙིང་ག་ཡིན་པས་ལམ་དུས་སུ་སེམས་དབེན་དཔེའི་འོད་གསལ་ལས་སྒྱུ་མའི་སྐུར་ལྡང་བ་ན་སྙིང་གའི་དྷཱུ་ཏཱིའི་ནང་དུ་རླུང་མ་ལུས་པར་ཐིམ་པ་ལས་བྱུང་བའི་རླུང་སེམས་ཀྱིས་སྒྱུ་མའི་སྐུའི་
སྒྲུབ་གཞི་བྱས་ཏེ་ལྡང་དགོས་པས། བླ་མེད་ཀྱི་རྫོགས་རིམ་སོ་སོ་ལ་ཐོག་མར་གནད་དུ་བསྣུན་སའི་ཡུལ་མི་འདྲ་བ་བྱུང་ཡང་མཐར་སྙིང་གར་གཞོལ་དགོས་པ་ཐམས་ཅད་མཐུན་པའི་ཕྱིར་རོ། །རྗེའི་བརྟག་གཉིས་ཟིན་བྲིས་ལས། སྙིང་གར་རླུང་སེམས་བསྡུས་པ་ལས་འོད་གསལ་དུ་ཞུགས་པ་འདྲ་བ་གཞན་གང་ལ་ཡང་མེད་པས། སྙིང་གའི་སྡུད་རིམ་གནད་ཆེ་ཞེས་དང༌། རིམ་ལྔ་གསལ་སྒྲོན་ལས། ལྟེ་བར་གནད་དུ་བསྣུན་པ་ལ་སོགས་པ་རྣམས་ཀྱི་ལམ་ཡང་མཐར་སྙིང་གར་སྡུད་པ་ལ་གཞོལ་བའི་ཚུལ་ཤེས་པར་བྱ། ཞེས་གསུངས་སོ། །གཞན་ཡང་སྒྱུ་མའི་སྐུ་སྒྲུབ་པའི་ཚེ་སྔོན་དུ་བསམ་གཏན་གཉིས་གང་རུང་གི་སྡུད་རིམ་གཙོ་བོར་གསུངས་པ་དང༌། འདིའི་མཐར་ཡང་སྣོད་བཅུད་འོད་གསལ་དུ་སྡུད་པའི་རྗེས་གཞིག་གི་རིམ་པ་བསྟན་པ་འབྲེལ་ཤིན་ཏུ་མཚུངས་ལ། རྩ་བའི་གཞུང་རིམ་པ་ལྔ་པར་ཡང་དམིགས་སྐོར་འདིའི་མཇུག་ཏུ། གང་ལ་ཐོག་མ་དབུས་མཐའ་མེད། །ཅེས་སོགས་དྲངས་པའི་དགོངས་པའི་གནད་ཀྱང་འདི་ཁོ་ན་ཡིན་པར་སེམས་སོ། །དེའི་དམིགས་པ་སྐྱོང་ཚུལ་གྱི་ངོ་བོ་མདོར་བསྡུས་ཏེ་བརྗོད་ན་སྙིང་གའི་རྩ་འཁོར་གྱི་དྷཱུ་ཏཱིའི་ནང་གི་ཧཱུཾ་ཡིག་གི་མདུན་དུ་ཧྲཱིཿ ཡིག་དམར་པོ་འོད་འབར་བ་ཞིག་བསམ་ལ། ལྟེ་བའི་གཏུམ་མོའི་མེ་འོད་དབུ་མའི་ལམ་ནས་གྱེན་དུ་སོང་བ་ཧྲཱིཿ ལ་ཕོག་པས་ཤིན་ཏུ་གསལ་ཞིང་འཚེར་བར་གྱུར། དེ་ལས་འོད་ཟེར་དཔག་ཏུ་མེད་པ་འཕྲོས་ཤིང་གཏུམ་མོའི་མེ་འོད་དང་འདྲེས་ནས་དབུ་མའི་ལམ་ནས་གྱེན་དུ་སོང་སྟེ་མགོ་བོའི་ནང་ནས་གཡོན་སྐོར་དུ་བྱས་
ལ་རྣ་བ་གཡས་པའི་བུ་ག་ནས་ཐོན། མདའ་གཞུ་རྣ་བའི་དྲུང་དུ་བཀང་བའི་མདའི་ལྟོང་ནས་ཞུགས་ཏེ་དེའི་ནང་བརྒྱུད་ཅིང་ཨུཏྤ་ལའི་མདེའུ་རྒྱས་པར་བྱས་པའི་རྩེ་མོ་ནས་ཕྱིར་འཕྲོས། འཇིག་རྟེན་གསུམ་པོ་ཐམས་ཅད་འོད་ཀྱིས་ཁྱབ་པར་བྱས། མཐར་སྣོད་བཅུད་ཐམས་ཅད་ཀྱང་ལྷན་སྐྱེས་ཀྱི་བདེ་བ་ཆེན་པོའི་རང་བཞིན་འོད་ཟེར་དམར་པོའི་རྣམ་པར་ཞུ། ཚུར་འདུས་ཏེ་མདེའུའི་རྩེ་ནས་སྔར་བཞིན་ཞུགས་པ་རྣ་བ་གཡས་པ་བརྒྱུད། མགོ་བོར་གཡས་སུ་བསྐོར་ནས་མཛོད་སྤུའི་ཐད་ནས་དཀྱིལ་དུ་སོན་པ་སྐྱེ་བོའི་ཧཾ་ཡིག་དང་འདྲེས་ཏེ་བྱང་ཆུབ་ཀྱི་སེམས་སུ་ཞུ་བས་བདེ་ཆེན་གྱི་འཁོར་ལོ་གང་ཞིང་རྒྱས་པར་བྱས། རིམ་གྱིས་དབུ་མའི་ལམ་ནས་མར་བབས། མགྲིན་པ་སྙིང་ག་ལྟེ་བ་གསང་གནས་རྣམས་སུ་བབས་པས་དགའ་བཞི་དྲངས། ཁྱད་པར་ལྷན་སྐྱེས་ཀྱི་ཚེ་རང་གི་ལུས་ཀྱི་སྟོད་སྨད་ནས་སྙིང་གའི་ཧྲཱིཿ ཡིག་ལ་སྡུད་ཅིང༌། མཐར་ནཱ་ད་ཙམ་ཡང་མི་དམིགས་པར་བྱ་སྟེ། བརྟག་པ་ཕྱི་མའི་ལེའུ་ལྔ་པ་ལས། དེར་ནི་ཐོག་མ་དབུས་མཐའ་མེད། །སྲིད་མེད་མྱ་ངན་འདས་པ་མེད། །བདག་མེད་གཞན་ཡང་མེད་པ་ཉིད། །འདི་ནི་མཆོག་ཏུ་བདེ་ཆེན་ཉིད། །ཅེས་པའི་དོན་བཞིན་སྐྱེ་འགག་གནས་གསུམ་དང་བྲལ་ཞིང༌། འཁོར་འདས་ཀྱི་མཐའ་ལས་གྲོལ་བ། གང་ཟག་དང་ཆོས་ཀྱི་བདག་མེད་པའི་དེ་ཁོ་ན་ཉིད་དང་ལྷན་སྐྱེས་ཀྱི་བདེ་བ་དེ་ཉིད་སྦྱར་ཏེ་རྩེ་གཅིག་ཏུ་མཉམ་པར་འཇོག་གོ །འདིའི་དམིགས་སྐོར་གྱི་ཡི་གེ་འགའ་ཞིག་ཏུ། འཁོར་ལོ་བཞི་པོའི་ཐད་ཀྱི་བྱ་རོག་གདུང་གི་དབུས་སུ། ཞེས་དང༌། སྙིང་ལས་ལངས་ཏེ་འོད་ཟེར་གྱི་རྣམ་པ་ཁ་ཁ་མུ་ཁའི་ལམ་ནས་གྱེན་དུ་བྱོན་པ། ཞེས་བྲིས་པ་མི་
འཐད་དེ། ཁ་ག་མུ་ཁའམ་ཀ་ཀ་མུ་ཁ་ཞེས་པ་བོད་སྐད་དུ་བྱ་རོག་གདོང་ངམ་ཁྭ་གདོང་ཞེས་པ་ཡིན་པས་དེ་གཉིས་དོན་གཅིག་ལ། བྱ་རོག་གདོང་ནི། བརྟག་གཉིས་རྣམ་བཤད་ལས། ཕོ་མོའི་རིམ་པ་བཞིན་དུ་རྡོ་རྗེའི་རྩེ་དང་བྱ་རོག་གདོང་དུ་གྲགས་པས་པདྨའི་དབུས་བར་དུ་ཡོད་ཅིང༌། ཞེས་དང༌། ཡིག་ཆུང་ལས། བྱ་རོག་གདོང་ནི་ཕལ་བ་རྣམས་ལ་བྱ་ལེར་གྲགས་པ་འདི་ཡིན་ཞིང༌། ཞེས་པ་ལྟར། བུད་མེད་ཀྱི་བྷ་གའི་དབུས་ཀྱི་ཟེའུ་འབྲུ་ལ་དབྱིབས་ཀྱི་སྒོ་ནས་བཏགས་པ་ཡིན་པས། དེ་འཁོར་ལོ་བཞི་ཀའི་ཐད་དུ་ཡོད་ཚུལ་མེད་ཅིང༌། སྙིང་ག་ནས་འོད་ཟེར་འཕྲོས་པ་དེ་བརྒྱུད་ནས་སོང་ན་ཐུར་དུ་འགྲོ་བ་ཡིན་གྱི། གྱེན་དུ་འབྱོན་ཚུལ་མེད་དོ། །ཡང་དམིགས་སྐོར་གྱི་ཡི་གེ་དེ་ཉིད་ལས། ཧཾ་ལས་བདུད་རྩིའི་རྒྱུན་བབས་པ་དུང་ཅན་མའི་ལམ་ནས་བྱོན་ཏེ་མགྲིན་པའི་དང་སྙིང་གའི་འཁོར་ལོ་གང་ཞིང་རྒྱས་པར་བྱས། ཞེས་བྲིས་པ་ཡང་མི་འཐད་དེ། པཎ་ཆེན་བློ་བཟང་ཆོས་རྒྱན་གྱིས་མཛད་པའི་དུས་འཁོར་ཊཱིཀ་ཆེན་གྱི་སྙིང་པོ་བསྡུས་པ་ལས། ལྟེ་བ་མན་ཆད་དུ་སྒྲ་གཅན། མཆོག་གི་རྩ་དང༌། གཉིས་སྤངས་སོགས་རྩ་དབུ་མའི་མིང་གི་རྣམ་གྲངས་དང་ཉི་མའི་རྩ། དམར་སེར་ཅན། ར་ས་ནཱ། ཉི་མའི་ལམ་ཞེས་སོགས་གཡས་ཀྱི་རོ་མའི་མིང་དང༌། ཟླ་བའི་རྩ། ཨ་ཊི། ལ་ལ་ནཱ། ཟླ་བའི་ལམ་ཞེས་པ་གཡོན་གྱི་རྐྱང་མའི་མིང་དང༌། ལྟེ་བ་མན་ཆད་དུ་རྐྱང་མའི་རྒྱུན་ལ་བཤང་བའི་རྩ་དང༌། རོ་མའི་རྒྱུན་ལ་གཅི་བའི་རྩ་དང༌། དབུ་མའི་རྒྱུན་ལ་དུང་ཅན་མ་དང༌། དུས་མེའི་རྩ་དང༌། ཁུ་བ་འབབ་
པའི་རྩ་དང༌། མཆོག་གི་རྩ། ཞེས་བྱ་ཞིང༌། དབུ་མ་དང་དུང་ཅན་གཉིས་ཀ་ལ་དྷཱུ་ཏཱི། ཞེས་བྱའོ། །ཞེས་དུང་ཅན་མ་ནི་ལྟེ་བ་མན་ཆད་ཀྱི་དྷཱུ་ཏཱིའི་མིང་དུ་གསུངས་པས། སྤྱི་བོའི་ཧཾ་ཡིག་ལས་བདུད་རྩི་བབས་པས་དེ་བརྒྱུད་དེ་མགྲིན་པར་འགྲོ་བ་རིམ་པ་འཆོལ་བ་ཡིན་ནོ། །དེས་ན་མིང་དེ་དག་ཤིན་ཏུ་གསང་དགོས་པའི་དབང་གིས་བསྣོལ་བ་ཡིན་ན་མ་གཏོགས། སྒྲ་ཇི་བཞིན་པར་བཟུང་ན་ལུས་ཀྱི་སྟོད་སྨད་ཐམས་ཅད་མགོ་མཇུག་ལྡོག་དགོས་པས་ངོ་མཚར་བ་ཞིག་འོང་བར་སྣང་ངོ༌། །དེར་ནི་ཐོག་མ་ཞེས་སོགས་ཀྱི་ལུང་འདི་འདིའི་སྐབས་ཀྱི་ཆོ་ག་སོགས་སུ་དྲངས་པའི་ཚེ་གང་ལ་ཐོག་མ་ཞེས་བྱུང་བ་ཚིག་བསྒྱུར་བ་ཡིན་ཏེ། རྒྱུད་ལས་དེར་ནི་ཞེས་པ་གོང་དུ་ལྷན་སྐྱེས་ཀྱི་སྐད་ཅིག་མའི་ངོ་བོ་ཇི་ལྟར་ལགས། ཞེས་དྲིས་པའི་ལན་དུ་གསུངས་པའི་ཚིག་ཕྲད་ཡིན་ནོ། །དམིགས་སྐོར་འདི་ཡན་ཆད་ལ་སྒྱུ་ལུས་སྒྲུབ་པའི་ཐབས་ཀྱི་སྒོམ་ཚུལ་ཚང་ཡང༌། སྒྱུ་མའི་སྐུར་ལྡང་བའི་དམིགས་རིམ་མ་བྱུང་བས་དམིགས་སྐོར་འདི་ལ་བདག་བྱིན་རླབས་ཞེས་བཏགས་པ་ཡང་འདིའི་རྩ་བཤད་ཀྱི་རྒྱུད་དང་འདུས་པ་སོགས་ན་བདག་བྱིན་རླབས་ཀྱི་གཙོ་བོ་སྒྱུ་ལུས་ལ་མཛད་པ་དེར་བྱེད་ན་མི་རུང་ཡང༌། བརྟག་གཉིས་རྣམ་བཤད་ལས། བདག་བྱིན་རླབས་ཀྱི་དབྱེ་བ་སྒྱུ་ལུས་དང༌། ཕྱག་རྒྱ་བྱིན་གྱིས་བརླབས་ནས་སྙོམས་པར་ཞུགས་པ་དང༌། སྙིང་གར་མི་ཤིགས་པ་དང་འོག་སྒོར་ཕྲ་ཐིག་བསྒོམ་པ་དང༌། རྩ་འཁོར་ལ་གནད་དུ་བསྣུན་ནས་རང་སེམས་བདེ་ཆེན་གྱི་ངོ་བོར་བྱིན་གྱིས་རློབས་པ་སོགས་མང་དུ་གསུངས་པས་ཕྱི་མ་ལ་བྱས་ན་རུང་ངོ༌། །དེ་ལྟར་གོང་དུ་བཤད་པའི་ལམ་དེ་དག་
གེགས་སེལ་བོགས་འདོན་གྱི་མན་ངག་དང༌། ཕྱི་ནང་གི་རྐྱེན་ཚང་བའི་སྒོ་ནས་ཉམས་སུ་བླངས་པས་རླུང་དབུ་མར་ཞུགས་གནས་ཐིམ་གསུམ་འཆི་དུས་ཀྱི་སྐབས་ཇི་ལྟ་བ་བཞིན་དུ་མཚན་ཉིད་ཚང་བ་རྫོགས་པར་ འཆར་ཞིང༌། ཐམས་ཅད་སྟོང་པ་འོད་གསལ་གྱི་སྐབས་དེར་རང་སེམས ་ལྷན་སྐྱེས་ཀྱི་བདེ་བ་དང་ཡུལ་སྟོང་པ་ཉིད་རོ་གཅིག་ཏུ་གྱུར་པའི་བདེ་ཆེན་གྱི་ཡེ་ཤེས་ནི་སྒྱུ་ལུས་ཀྱི་སྒྲུབ་གཞི་དཔེའི་ལྷན་སྐྱེས་མཐར་ཐུག་ཏུ་བཤད་དོ། །འོད་གསལ་དེ་ལས་ལྡང་བ་ན་སྔོན་གྱི་འཕེན་པའི་དབང་གིས་འོད་གསལ་གྱི་སེམས་དེས་ལྷན་ཅིག་བྱེད་རྐྱེན་དང༌། དེའི་བཞོན་པར་གྱུར་པའི་རླུང་འོད་ཟེར་ལྔ་པས་ཉེར་ལེན་བྱས་ཏེ་ལུགས་ལྡོག་གི་ཉེར་ཐོབ་གྲུབ་པ་དང་དུས་མཉམ་པར་ཕུང་པོ་རྙིང་པ་ལས་གོ་ས་ལོགས་སུ་སྒྱུ་མའི་སྐུ་མཚན་དཔེས་བརྒྱན་པ་དངོས་གནས་སུ་བཞེངས་པ་འབྱུང་ངོ༌། །སྒྱུ་མའི་སྐུ་མཚོན་བྱེད་ལ་ཡེ་ཤེས་རྡོ་རྗེ་ཀུན་ལས་བཏུས་སུ་དཔེ་བཅུ་གཉིས་དང༌། རྡོ་རྗེ་མཁའ་འགྲོ་ལས་གཟུགས་བརྙན་རྨི་ལམ་སྒྱུ་མ་ཆུ་བུར་མིག་འཕྲུལ་ཏེ་དཔེ་ལྔ་གསུངས་ལ། སྤྱོད་བསྡུས་ལས། བདག་ལ་བྱིན་གྱིས་བརླབས་པ་བཤད་པ་རྣམས་གསལ་བར་བྱ་བའི་ཕྱིར། རྨི་ལམ་གྱི་མཚན་ཉིད། ཅེས་དང༌། འབྲས་བུ་མ་སྨིན་བྱས་པའི་ལས་རྣམས་ཀྱིས། །སྐྱེ་འདིར་རླུང་ནི་སླར་ཡང་འཇུག་པར་འགྱུར། །ཞེས་གཞི་ལ་འབྱུང་ལུས་རགས་པ་གནས་ཁང་ལྟ་བུ་དང་ཕྲ་བ་གཉུག་མའི་ལུས་གཉིས་ཡོད་པས། ཐ་མལ་པ་འགའ་ཞིག་ཀྱང་གཉིད་ཀྱི་དུས་ཡུལ་གཞན་དུ་སོང་ནས་སླར་ཡང་ལུས་དེར་འཇུག་པ་སྲིད་ལ། དེས་ནི་ཕུང་པོ་རྙིང་པ་ལས་
གོ་ས་ལོགས་སུ་སྒྱུ་མའི་སྐུར་ལྡང་ཚུལ་དང༌། སླར་ཡང་རགས་པའི་སྤྲུལ་སྐུ་འཛིན་པ་གཉིས་ཀ་མཚོན་ནུས་པས་དཔེ་ཐམས་ཅད་ཀྱི་ནང་ནས་འདི་གོ་བ་སྟེར་ཕུལ་ཆེ་བར་གསུངས་སོ། །དེ་སྐད་དུ། རིམ་ལྔ་གསལ་སྒྲོན་ལས། དཔེ་གཞན་ལ་དཔེ་དོན་ཆོས་མཐུན་སྦྱར་ནས་སྒྱུ་ལུས་ལ་ངེས་པ་སྐྱེད་པའི་གོ་བ་ཙམ་མ་གཏོགས། དཔེ་ཉིད་ཀྱི་སྟེང་ནས་མཚོན་བྱེད་དཔེའི་སྒྱུ་ལུས་ལམ་གྱི་ངོ་བོར་བསྐྱེད་དུ་མེད་མོད་ཀྱང་རྨི་ལམ་ལ་དེ་ཡོད་པས་མཆོག་ཏུ་གྱུར་པ་ཡིན་ནོ། །ཞེས་གསུངས་སོ། །ཚུལ་འདི་རྣམས་ས་འོག་གི་གཏེར་བཞིན་དུ་གྱུར་པ་ན་རྗེ་བླ་མ་འབའ་ཞིག་གིས་གངས་རིའི་ཁྲོད་འདིར་གསལ་བར་མཛད་དེ། བོད་སྔ་མ་རྣམས་བདེན་སྟོང་སྒྱུ་མ་ལྟ་བུ་ཞེས་ཟེར་བ་དང༌། ལྷ་སྐུ་སྣང་ལ་རང་བཞིན་མེད་པ་སྒྱུ་མ་ལྟ་བུ་ཟེར་བ་སོགས་ཕར་ཕྱིན་ཐེག་པ་དང༌། རྒྱུད་སྡེ་འོག་མ་ལ་གྲགས་པའི་སྤྱི་དོན་གྱི་སྒྱུ་མ་ཙམ་ལས། སྦས་དོན་དང་མཐར་ཐུག་གི་སྒྱུ་མའི་མཚོན་ཚུལ་རྒྱུད་དང་འཕགས་པ་ཡབ་སྲས་ཀྱི་དགོངས་པ་བཞིན་གསལ་བར་ཕྱེ་བ་མ་བྱུང་སྣང་ངོ༌། །ལ་ལས་འདིའི་སྐབས་སུ་ཕྲ་རགས་སོ་སོར་འབྱེད་པའི་ཐབས་འཕོ་བ་དང་གྲོང་འཇུག་གི་མན་ངག་དགོས་པར་འདོད་ཀྱང༌། དཔེའི་འོད་གསལ་གྱི་སྔོན་དུ་ས་ཆུ་ལ་ཐིམ་པ་སོགས་འཆི་རིམ་ཇི་བཞིན་པར་བསྐྱེད་པ་དེ་ཉིད་ཀྱིས་ལུས་གཉིས་སོ་སོར་ངང་གིས་ཕྱེ་ནས་འགྲོ་བས་ཐབས་གཞན་མི་དགོས་ལ། བསྐྱེད་རིམ་དངོས་གྲུབ་རྒྱ་མཚོར་འཕོ་བའི་མན་ངག་གི་མཐར་ཐུག་སེམས་དབེན་དུ་གསུངས་པའི་གནད་ཀྱང་འདི་ཡིན་ནོ། །མ་དག་པའི་སྒྱུ་ལུས་པ་དེས་ཀྱང་ཕྱིའི་རྐྱེན་ཕྱག་རྒྱ་དང་སྙོམས་པར་འཇུག་ཅིང༌། ནང་གི་རྐྱེན་བསམ་གཏན་གཉིས་ཀྱི་
སྡུད་རིམ་སོགས་ལ་ཡང་ནས་ཡང་དུ་གོམས་པར་བྱས་པས་ལྷན་སྐྱེས་ཀྱི་བདེ་བས་ཆོས་ཉིད་མངོན་སུམ་དུ་རྟོགས་པ་རིམ་པ་བཞི་པའི་དོན་གྱི་འོད་གསལ་མངོན་དུ་བྱས་ཏེ། དེའི་སྐད་ཅིག་གཉིས་པར་ཉོན་སྒྲིབ་མ་ལུས་པར་སྤངས་པ་དང་མཉམ་དུ་དག་པའི་སྒྱུ་མའི་སྐུ་མངོན་དུ་བྱེད། དག་པའི་སྒྱུ་ལུས་པ་དེས་ཀྱང་ལམ་གོང་མ་རྣམས་བགྲོད་དེ་སློབ་པ་མཐའི་དོན་གྱི་འོད་གསལ་ལ་བརྟེན་ནས་ཤེས་བྱའི་སྒྲིབ་པ་ཟད་པར་སྤངས་པ་དང་མཉམ་དུ་ཐུགས་རྣམ་པ་ཐམས་ཅད་མཁྱེན་པའི་ཡེ་ཤེས་དང་དབྱེར་མི་ཕྱེད་པ་རླུང་སེམས་ཙམ་ལས་གྲུབ་པའི་ཁ་སྦྱོར་ཡན་ལག་བདུན་ལྡན་གྱི་ལོངས་སྤྱོད་རྫོགས་པའི་སྐུ་མངོན་དུ་བྱེད་དོ། །དེ་ལྟ་བུའི་ལམ་གྱི་རིམ་པ་ཇི་སྙེད་ཅིག་བཤད་པ་ཐམས་ཅད་ཀྱང༌། དཔལ་ཀྱཻ་རྡོ་རྗེ་དང༌། རྗེ་བཙུན་རིག་བྱེད་མ་ལ་སོགས་པའི་ལྷ་ཚོགས་འདི་རྣམས་ཀྱིས་ཀྱང་སྔོན་སློབ་པའི་གནས་སྐབས་སུ་གོ་རིམ་བཞིན་ཉམས་སུ་བླངས་ཏེ་རང་རྒྱུད་ལ་རྟོགས་པ་འཁྲུངས་པ་དེ་དང་དོན་མཐུན་པར་ད་ལྟའི་གདུལ་བྱ་ལ་བསྟན་པ་ཡིན་པས་ལམ་དེ་དག་ལ་གོ་བ་ལེགས་པར་ཆགས་ན་རྗེ་བཙུན་མའི་སྐུ་གསུང་ཐུགས་ཀྱི་ཡོན་ཏན་བཤད་པ་རྣམས་ལ་ཡང་འདི་ནི་ལམ་འདི་ལྟ་བུ་ཞིག་ཉམས་སུ་བླངས་པའི་འབྲས་བུ་ཡིན་ནོ་སྙམ་དུ་འབྲས་བུ་ལ་ཡིད་ཆེས་དང་དེའི་རྒྱུ་ལ་སློབ་འདོད་སྐྱེ་བས། བསྟོད་པ་བྱས་པའི་དགོས་དོན་གྱི་གཙོ་བོ་དད་པ་གསུམ་མཚན་ཉིད་ཚང་བ་ཞིག་བསྐྱེད་ནུས་སོ། །ལམ་དེ་དག་ཐམས་ཅད་སྤྱིར་སྐུ་གསུང་ཐུགས་ཀྱི་ཡོན་ཏན་མ་ལུས་པ་སྒྲུབ་བྱེད་ཡིན་ཀྱང༌། རང་གི་ངོས་སྐལ་ལྟ་བུར་གསུང་རྡོ་རྗེ་འགྲུབ་བྱེད་ཀྱི་གཙོ་བོ་
གང་དང་གང་ཡིན་སྙམ་ན། འདི་ནི་མཁའ་འགྲོ་རྒྱ་མཚོ་ལས། རང་གི་སྐུ་ནི་སྒྱུ་མ་མཉམ། །བདག་བྱིན་རླབས་འདི་ཕྲ་མོ་དང༌། །རྡོ་རྗེ་བཟླས་རང་མཚན་ཉིད་དོ། །རྫོགས་པའི་བྱང་ཆུབ་སེམས་ཀྱི་གཏེར། །དེ་ལས་ལྷག་མ་ཟུང་འཇུག་གོ །ཞེས་ཡོངས་གྲགས་ཀྱི་གོ་རིམ་ལས་བཟློག་སྟེ་རྐང་པ་དང་པོ་གསུམ་གྱིས་སྒྱུ་ལུས་དང་རྡོར་བཟླས། རྐང་པ་བཞི་པས་འོད་གསལ་དང་སེམས་དབེན་བསྟན་པ་འདི་ལས་ཤེས་དགོས་ཏེ། སྒྱུ་ལུས་དང་དེའི་རིགས་འདྲའི་རྒྱུའི་གཙོ་བོ་རྡོར་བཟླས་གཉིས་ནི་གསུང་རྡོ་རྗེ་ལོངས་སྤྱོད་རྫོགས་པའི་སྐུ་འགྲུབ་བྱེད་དུ་མཚུངས་པས་ཕྱོགས་གཅིག་ཏུ་བསྟན། འོད་གསལ་གྱི་རིམ་པ་དང་དེའི་རིགས་འདྲའི་རྒྱུའི་གཙོ་བོ་སེམས་དབེན་ནི་ཐུགས་རྡོ་རྗེ་ཆོས་ཀྱི་སྐུ་འགྲུབ་བྱེད་དུ་མཚུངས་པས་ཕྱོགས་གཅིག་ཏུ་བསྟན་པ་ཡིན་ནོ། །འོ་ན་ཁྱོད་ཀྱིས་འདིར་གཏུམ་མོའི་རྣལ་འབྱོར་མང་པོ་ཞིག་བཤད་པ་དེ་དག་གང་དུ་སྡུད་པ་ཡིན་ཞེ་ན། དེ་ནི་རྡོར་བཟླས་ཀྱིས་མཚོན་ནས་གོ་དགོས་ཏེ། དེ་དག་གཙོ་བོར་སྲོག་གམ་རླུང་ལས་རུང་དུ་སྒྲུབ་པའི་སྲོག་རྩོལ་གྱི་ཡན་ལག་ཡིན་ཞིང༌། རྡོར་བཟླས་ཀྱང་སྲོག་རྩོལ་གྱི་ཆ་ཤས་གཅིག་ཡིན་པས་རྡོར་བཟླས་ཀྱི་རིམ་པ་ཞེས་པ་སྒོས་མིང་སྤྱི་ལ་བཏགས་པ་ཡིན་པའི་ཕྱིར། ཁྱད་པར་གསལ་བྱེད་ལས། ཐིག་ལེ་ལ་སོགས་པའི་བསམ་གཏན་གང༌། དེ་ཡང་སྲོག་འཐོན་པ་བཟློག་པའི་དོན་ཉིད་ཀྱིས་སྲོག་རྩོལ་ཞེས་བརྗོད་དོ། །ཞེས་དང༌། རྫོགས་རིམ་དངོས་གྲུབ་སྙེ་མ་ལས། སྲོག་ནི་རོ་རྐྱང་ལ་རྒྱུ་བའི་རླུང་ཡིན་ལ། རྩོལ་བའི་སྐད་དོད་ཀྱི་སྟེང་ནས་འགོག་པའི་དོན་དུ་བཤད་དུ་ཡོད་པས། ཞེས་དང༌།
རིམ་ལྔ་གསལ་སྒྲོན་ལས། ངག་དབེན་དང་རྡོ་རྗེའི་བཟླས་པ་ཤེས་པ་ནི་སྲོག་རྩོལ་གྱི་ཕྱོགས་གཅིག་གི་མིང་གིས་བཏགས་པ་སྟེ། རིམ་པ་འདིའི་སྤྱིའི་མིང་ནི་རྒྱུད་ཕྱི་མར་ཡན་ལག་དྲུག་གི་གསུམ་པ་སྲོག་རྩོལ་ཞེས་གསུངས་པས། ཞེས་གསུངས་ཤིང༌། ཞལ་ལུང་ལས། རིམ་པ་འདིའི་མིང་ལ་དབུགས་འགོག་པའི་ཡན་ལག་ཅེས་ཀྱང་གསུངས་སོ། །ཡང་ཕྱོགས་རེའི་མིག་ཅན་ཁ་ཅིག་སྣང་ཕྱོགས་ཀྱི་རྫོགས་རིམ་དེ་དག་ལོངས་སྤྱོད་རྫོགས་པའི་སྐུ་འགྲུབ་བྱེད་ཀྱི་གཙོ་བོར་འགྲོ་བ་བདེན་ཡང༌། དེ་ནི་སྐུ་སྒྲུབ་པའི་རྒྱུའི་གཙོ་བོར་སོང་བ་ཡིན་པས་སྐུ་གསུང་ཐུགས་གསུམ་གྱི་ནང་ནས་གསུང་སྒྲུབ་པའི་རྒྱུའི་གཙོ་བོར་འགྲོ་བ་འགོག་བྱེད་མ་གཏོགས་སྒྲུབ་བྱེད་དུ་མ་སོང་ངོ་སྙམ་ན། སྤྱིར་བླ་མེད་ཀྱི་དབང་ལེགས་པར་མ་ཐོབ་པར་རྒྱུད་དོན་སྨྲ་བ་མི་རུང་ཞིང་དབང་བརྡ་འཕྲོད་པ་ཞིག་ལ་དོགས་པ་འདི་འདྲ་བའི་གནས་མེད་མོད། འོན་ཀྱང་སྐྱེ་བོ་རྣམས་བློའི་མཐུ་རིམ་པར་ཞན་དུ་སོང་བས་འཁྲུལ་པ་འབྱུང་ཉེ་བས། དེའི་ལན་ཅུང་ཟད་བརྗོད་ན། ལྟོས་ས་ལྟོས་འཇོག་གི་སྒོ་ནས་ཆོས་གཟུགས་ཀྱི་སྐུ་འགྲུབ་པའི་རྒྱུའི་གཙོ་བོར་བཤད་ཚུལ་མི་འདྲ་བ་ལྟ་བུ་མདོ་སྔགས་གང་གི་སྐབས་སུ་ཡང་འབྱུང་སྟེ། དཔེར་ན། མདོ་སྡེ་རྒྱན་ལས། སྦྱིན་དང་ཚུལ་ཁྲིམས་བསོད་ནམས་ཀྱི། །ཚོགས་ཡིན་ཤེས་རབ་ཡེ་ཤེས་ཀྱི། །གསུམ་པོ་གཞན་ནི་གཉིས་ཀའི་སྟེ། །ལྔ་ཆར་ཡང་ནི་ཡེ་ཤེས་ཚོགས། །ཞེས་ཕར་ཕྱིན་དང་པོ་གཉིས་བསོད་ནམས་ཀྱི་ཚོགས་དང༌། ཐ་མ་ཡེ་ཤེས་ཀྱི་ཚོགས། བར་པ་གསུམ་གཉིས་ཀར་
གཏོགས་པ་དང༌། ཡང་ཐམས་ཅད་ཡེ་ཤེས་ཀྱི་ཚོགས་སུ་འགྲོ་ཚུལ་གཅིག་ཀྱང་གསུངས་ཤིང༌། དབུ་མ་འཇུག་པར་ཕར་ཕྱིན་དང་པོ་གསུམ་བསོད་ནམས་ཀྱི་ཚོགས་སུ་གསུངས་པ་ལྟ་བུ་ཡོད་ལ། བསོད་ནམས་ཀྱི་ཚོགས་སུ་གསུངས་པས་གཟུགས་སྐུའི་རྒྱུའི་གཙོ་བོ་དང༌། ཡེ་ཤེས་ཀྱི་ཚོགས་སུ་གསུངས་པས་ཆོས་སྐུའི་རྒྱུའི་གཙོ་བོར་བསྟན་པ་ཡིན་ཀྱང་ལྟོས་ས་ཐ་དད་པའི་དབང་གིས་མི་འགལ་ལོ། །དེ་བཞིན་དུ་སྐབས་འདིར་ཡང་ཐོབ་བྱའི་འབྲས་བུ་སྐུ་ཐུགས་གཉིས་དང༌། ཐོབ་བྱེད་ཀྱི་ལམ་རྫོགས་རིམ་རྐྱང་པ་ལ་སྦྱར་བའི་ཚེ་སྣང་ཕྱོགས་ཀྱི་རྫོགས་རིམ་རྣམས་སྐུ་འགྲུབ་བྱེད་དང༌། སྟོང་ཕྱོགས་ཀྱི་རྫོགས་རིམ་རྣམས་ཐུགས་འགྲུབ་བྱེད་དུ་སྦྱར་བ་ཡིན་ལ། ཐོབ་བྱའི་འབྲས་བུ་སྐུ་གསུང་ཐུགས་གསུམ་དང༌། ཐོབ་བྱེད་ཀྱི་ལམ་རིམ་པ་གཉིས་ཀའི་དབང་དུ་བྱས་པའི་ཚེ་བསྐྱེད་རིམ་སྐུ་འགྲུབ་བྱེད་དང༌། སྣང་ཕྱོགས་སམ་ཀུན་རྫོབ་སྒྱུ་མའི་རྫོགས་རིམ་རྣམས་གསུང་འགྲུབ་བྱེད་དང༌། སྟོང་ཕྱོགས་དོན་དམ་འོད་གསལ་གྱི་རྫོགས་རིམ་རྣམས་ཐུགས་འགྲུབ་བྱེད་དུ་སྦྱོར་དགོས་སོ། །དེ་ཡང་གང་ལས་ཤེས་ན་བླ་མེད་ཀྱི་དབང་ཐམས་ཅད་ཀྱི་དག་པ་བརྗོད་པའི་ཚེ། བུམ་དབང་གི་སྐབས་སུ་ལུས་ཀྱི་ཐུན་མོང་དང་ཐུན་མོང་མ་ཡིན་པའི་དྲི་མ་འཁྲུད་ཅིང༌། ལམ་བསྐྱེད་རིམ་བསྒོམ་པ་ལ་དབང་བ་དང་སྤྲུལ་སྐུ་འགྲུབ་པའི་ནུས་པ་འཇོག །གསང་དབང་གིས་ངག་གི་དྲི་མ་སྦྱོང་ཞིང་ཀུན་རྫོབ་སྒྱུ་མའི་རྫོགས་རིམ་བསྒོམ་པ་ལ་དབང་བ་དང་ལོངས་སྐུ་འགྲུབ་པའི་ནུས་པ་འཇོག །ཅེས་ཀུན་ལ་རླུང་ལྟར་གྲགས་པ་དེ་ཡིན་ལ། ཉིན་མོ་འབྱུང་གནས་ཀྱིས་ཀྱང་གསང་དབང་ལོངས་
སྐུའི་རང་བཞིན་དུ་བཤད་པའི་དོན་ནི་བུམ་དབང་སྤྲུལ་སྐུའི་རང་བཞིན་དུ་བཤད་པའི་དོན་གྱིས་ཤེས་ནུས་པར་གསུངས་སོ། །དེས་ན་བརྟག་གཉིས་ཀྱི་འགྲེལ་པ་པདྨ་ཅན་ལས། གསང་བའི་དབང་བསྐུར་བས་གསུང་རྣམ་པར་དག་པའོ། །ཞེས་གསང་དབང་གསུམ་འགྲུབ་བྱེད་དུ་གསུངས་ལ། དགྲ་ནག་གི་རྒྱུད་ལས། བཏུང་བ་རིན་ཆེན་འདི་ཡིས་ནི། །རྡོ་རྗེའི་ལུས་ནི་རབ་ཏུ་སྒྲུབ། །ཅེས་རྡོ་རྗེའི་སྐུ་འགྲུབ་བྱེད་དུ་བསྟན་པ་དང༌། སྦྱོར་བ་བདུན་པ་ལས། རྡོ་རྗེ་བཟླས་པའི་ངོ་བོ་ཡི། །སྒྱུ་འདྲའི་ཏིང་འཛིན་བསྟན་པར་བྱ། །ཞེས་སྒྱུ་མའི་སྐུ་སྒྲུབ་པའི་ལམ་དུ་གསུངས་ཤིང༌། ཡང་དེ་ཉིད་ལས། དེ་ཡི་རང་གི་ངོ་བོ་ནི། །གསུང་གི་རྡོ་རྗེའི་རང་བཞིན་ནོ། །ཞེས་གསུང་རྡོ་རྗེའི་རང་བཞིན་དུ་གསུངས་པ་རྣམས་ལ་འགལ་བ་མེད་པར་མ་ཟད་དོན་གཅིག་ཏུ་འགྲོ་སྟེ། མཚན་བརྗོད་ལས། སྲོག་ཆེན་པོ་ནི་ཡི་གེ་མེད། །ཚིག་ཏུ་བརྗོད་པ་སྤངས་པ་སྟེ། །བརྗོད་པ་ཀུན་གྱི་རྒྱུ་ཡི་མཆོག །ཚིག་ཀུན་རབ་ཏུ་གསལ་བར་བྱེད། །ཅེས་སྲོག་འཛིན་ཤིན་ཏུ་ཕྲ་བ་གཉུག་མའི་རླུང་དེ་ཉིད་ད་ལྟ་ཡི་གེའི་རྣམ་པར་མེད་ཀྱང་བརྗོད་པ་ཀུན་གྱི་རྒྱུ་བྱེད་པ་དང་། སླར་རླུང་སྔགས་ངོ་བོ་ཐ་མི་དད་དུ་བསྒོམ་པས་དངོས་གནས་ལ་སྔགས་ཀྱི་གདངས་སུ་ཤར་ཏེ། གདུལ་བྱ་ལ་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་འབྱེད་པའི་སངས་རྒྱས་ཀྱི་གསུང་རྣམ་པ་ཐམས་ཅད་པར་འགྱུར་ཞིང༌། ཡང་རླུང་དེ་ཉིད་ནི། རིམ་ལྔ་ལས། རླུང་དང་ཡང་དག་ལྡན་པ་ཡི། །རྣམ་ཤེས་གསུམ་པོ་སླར་ཡང་ནི། །རྣལ་འབྱོར་པ་ཡི་ལུས་སུ་འབྱུང༌། །སྒྱུ་མའི་ལུས་
ཞེས་དེ་ལ་བཤད། །ཅེས་སྒྱུ་མའི་སྐུར་འགྲོ་བ་ཡང་གསུངས་པས། མཐར་ཐུག་གི་ཚེ་ལོངས་སྤྱོད་རྫོགས་པའི་སྐུ་དང་ཡན་ལག་དྲུག་ཅུའི་གསུང་གཉིས་གདུལ་བྱའི་ངོ་བོར་ཞལ་ཕྱག་གི་རྣམ་པ་དང་སྒྲའི་རྣམ་པར་ཤར་བ་ཙམ་ལས། དོན་གྱི་ངོ་བོ་དག་པའི་རླུང་གཅིག་གི་ཉེར་འབྲས་སུ་གྲུབ་པས་ཐ་དད་པ་མེད་དོ། །དེར་མ་ཟད། ཟུང་འཇུག་གསལ་བ་ལས། གསང་བའི་དབང་བསྐུར་བས་གསུང་གི་རྡོ་རྗེ་དང་ཐུགས་ཀྱི་རྡོ་རྗེ་རྣམ་པར་སྦྱོང་སྟེ། དེ་ཡང༌། རླུང་རྣམས་ཕྲ་བའི་གཟུགས་ཀྱིས་ནི། །སེམས་དང་ཡང་དག་འདྲེས་གྱུར་པ། །ཞེས་རླུང་སེམས་འཇུག་པ་གཅིག་པའི་རྒྱུ་མཚན་ཙམ་ལ་བརྟེན་ནས་གསུང་སྦྱོང་བྱེད་དེ་ཉིད་ཐུགས་སྦྱོང་བྱེད་དུ་འགྲོ་བར་གསུངས་ན། རླུང་གཅིག་གི་འབྲས་བུའི་སྐུ་གསུང་གཉིས་འགྲུབ་བྱེད་ཇི་ལྟར་འགལ་བ་ལེགས་པར་སོམས་ཤིག །༈ གཉིས་པ་གཞུང་དོན་ལ། རང་གིས་མངོན་དུ་བྱས་པའི་གསུང་རྡོ་རྗེའི་ངོ་བོའི་ཡོན་ཏན་དང༌། དེའི་ནུས་པའི་ཡོན་ཏན་གཉིས། དང་པོ་ནི། ཟབ་མོ་སྟོང་ཉིད་སྙིང་སྟོབས་ཆེས་དཔའ་བས། །ལྷན་སྐྱེས་བདེ་ཆེན་གཡུ་ཡི་རལ་པ་གཟེངས། །མ་ཞུམ་ཞི་བ་སྐྱེ་མེད་ང་རོ་ཡིས། །ལོག་རྟོག་བདག་འཛིན་ཝ་ཚོགས་སྐྲག་པར་མཛད། །ཅེས་བྱུང༌། ཚིགས་བཅད་འདིའི་དོན་ལ་ཡང༌། གསུང་ལོངས་སྤྱོད་རྫོགས་པ་སྒྱུ་མའི་སྐུ་དང༌། ཡན་ལག་དྲུག་ཅུའི་གསུང་གི་ཆ་གཉིས་སུ་འབྱེད་དགོས་ཏེ། རྒྱུ་མཚན་གོང་དུ་བཤད་པ་དེ་དག་དང༌། དྲི་མེད་འོད་ལས། གང་ཞིག་སེམས་ཅན་ཀུན་གྱི་སྒྲས། །རྫུ་འཕྲུལ་བདག་ཉིད་རང་གསལ་བྱེད། །སེམས་ཅན་བསམ་པའི་དབང་གིས་འདི། །ལོངས་
སྤྱོད་རྫོགས་སྐུའི་མཚན་ཉིད་དོ། །ཞེས་དེ་གཉིས་གདུལ་བྱའི་བསམ་པའི་དབང་གིས་བརྗོད་པ་སྒྲ་དང་གཟུགས་སྐུའི་རྣམ་པར་ཐ་དད་དུ་སྣང་བ་ཙམ་ཡིན་པར་གསུངས་ཤིང༌། སྔགས་རིམ་ལས་ཀྱང༌། བུམ་དབང་གིས་སྤྲུལ་སྐུ། གསང་དབང་གིས་ལོངས་སྐུ། ཤེས་རབ་ཡེ་ཤེས་ཀྱིས་ཆོས་སྐུ་འགྲུབ་པར་གསུངས་པས། ལོངས་སྐུ་ནི་སྒྱུ་ལུས་ལ་བཤད་པས་ཆོག་མོད་ཀྱང༌། སྔགས་སྤྱི་སྐད་ལ་དེ་བཞིན་གཤེགས་པའི་གསུང་ལ་བཤད་པ་མང་བས་རེ་ཞིག་དེ་ལྟར་བཤད་དོ། །ཞེས་གཉིས་ཀ་ཁྱད་མེད་ལྟ་བུར་གསུངས་སོ། །དེས་ན་རྐང་པ་དང་པོ་གཉིས་ཀྱིས་སྔ་མ་དང༌། གཉིས་ཀྱིས་ཕྱི་མ་བསྟན་པ་ཡིན་ལ། སྟོན་ཚུལ་ཡང་དཔེར་ན་རི་དྭགས་ཀྱི་རྒྱལ་པོ་སེང་གེ་དེ་ནང་དུ་སྲོག་ཆགས་གཞན་ལ་སྐྲག་པ་མེད་པའི་སྙིང་སྟོབས་ཀྱི་ཤུགས་དང་ལྡན་པ་དེའི་དབང་གིས་ཕྱི་རོལ་གྱི་རྣམ་འགྱུར་ལ་ཡང་གཡུའི་རལ་པ་གྱེན་དུ་གཟེངས་པ་སོགས་འཇིགས་པའི་ཉམས་དང་ལྡན་པ་དེ་བཞིན་དུ། འོད་གསལ་གྱི་སྒོ་ནས་འཁོར་འདས་ཐམས་ཅད་སྟོང་པར་བཅུག་སྟེ། ཡུལ་དུ་སྣང་བ་ཐམས་ཅད་ལ་མཚན་འཛིན་གྱི་དམིགས་པའི་གཏད་སོ་ལྷག་མེད་དུ་ཞིག་ནས་མངོན་ཞེན་ཅུང་ཟད་ཀྱང་མེད་པའི་སྟོབས་ཀྱིས་ཡུལ་སྣང་མཐའ་དག་ལྷན་སྐྱེས་ཀྱི་བདེ་བ་འབར་བའི་གྲོགས་སུ་གྱུར་ཅིང༌། དེ་ཡང་ཉན་རང་གི་ཞི་བའི་བདེ་བ་ལྟ་བུ་མ་ཡིན་པར་སྔོན་གྱི་སྨོན་ལམ་གྱི་འཕེན་པས་བདེ་ཆེན་དེ་ཉིད་གདུལ་བྱའི་སྐྱེ་བོ་རྣམས་ཀྱི་དབང་པོའི་ཡུལ་ལ་མངོན་སུམ་དུ་སྣང་བའི་གཟུགས་
ཀྱི་སྐུའི་རྣམ་པར་བཞེངས་པ་སྟེ། མདོར་ན་གང་སྣང་སྟོང་པ། སྟོང་པ་བདེ་བ། བདེ་བ་ལྷ་སྐུར་ཤར་བའི་ཚུལ་སེང་གེའི་རལ་པ་གཟེངས་པ་དང་དཔེ་སྦྱར་ལ། སེང་གེའི་ངར་སྐད་དང་གསུང་གི་དཔེ་དོན་སྦྱར་བ་འོག་ནས་འབྱུང་ཞིང༌། དེ་ལྟར་དཔེའི་ཁྱད་ཆོས་རྣམས་དངོས་སུ་བསྟན་ཡང་ཁྱད་གཞི་གསལ་བར་མ་སྨོས། དེ་ཡང་སྟོང་པའི་ངང་ལས་བདེ་ཆེན་ལྷ་སྐུར་བཞེངས་པར་གསུངས་པ་འདིས་སྔ་ཕྱིའི་ལམ་འབྲས་ཀྱི་རིམ་པ་དུ་མ་ཞིག་མཚོན་པ་ཡིན་ཏེ། འགྲེལ་ཆེན་དྲི་མེད་འོད་ལས། རྡོ་རྗེ་ཐེག་པ་སྟེ་སྔགས་ཀྱི་ཚུལ་དང༌། ཕ་རོལ་ཏུ་ཕྱིན་པའི་ཚུལ་འབྲས་བུ་དང་རྒྱུའི་བདག་ཉིད་དུ་འདྲེས་པར་གྱུར་པའོ། །ཞེས་ཕར་ཕྱིན་ཐེག་པས་སྟོང་ཉིད་ཀྱི་ལྟ་བ་ལེགས་པར་གཏན་ལ་ཕབ་སྟེ། དེ་ཉིད་སྔགས་ཀྱི་བདེ་ཆེན་དང་སྦྱོར་དགོས་པར་གསུངས་པས། ལམ་ཐུན་མོང་དང་ཐུན་མོང་མ་ཡིན་པ་ལ་རིམ་གྱིས་བསླབ་ཚུལ་བསྟན་ནོ། །སྔགས་ལ་ཞུགས་ནས་ཞི་སོགས་ཀྱི་ལས་གང་བསྒྲུབ་པ་ཐམས་ཅད་སྟོང་ཉིད་ཀྱི་ལྟ་བའི་ངང་ནས་བྱེད་དགོས་པས། རིམ་ལྔ་ལས། རྡོ་རྗེ་ཐེག་པར་རྣལ་འབྱོར་པས། །དེ་ཉིད་གང་གང་དམིགས་བྱ་བ། །དེ་དེ་སྒྱུ་མ་ཁོ་ནར་གསུངས། །ཞེས་གསུངས་ཤིང༌། ཁྱད་པར་དུ་ལམ་རིམ་པ་གཉིས་ཀས་སྔགས་དང་ཡེ་ཤེས་ཀྱི་སྐུ་སྒྲུབ་པ་ཐམས་ཅད་སྟོང་ཉིད་ཀྱི་ངང་ནས་དེར་བཞེངས་པ་དགོས་ཏེ། བརྟག་གཉིས་རྣམ་བཤད་ལས། སྟོང་ཉིད་བསྒོམ་པ་དྲང་ངེས་གཉིས་སུ་བཤད་པས། ལྷ་བསྐྱེད་པ་ལ་ཡང་དྲང་དོན་བསྐྱེད་རིམ་པས་ལྷ་བསྐྱེད་ཚུལ་དང༌། ངེས་དོན་རྫོགས་རིམ་པས་ལྷན་སྐྱེས་ཀྱི་འོད་གསལ་གྱི་ངང་ལས་འཇའ་ལུས་ཡེ་ཤེས་ཀྱི་སྐུར་ལྡང་ཚུལ་གཉིས་ཡོད་པ་གོ་བར་
བྱ། ཞེས་གསུངས་པ་ལྟར། བསྐྱེད་རིམ་གྱི་ཚེ་འཆི་བ་ཆོས་སྐུའི་ལམ་འཁྱེར་ལས་ལམ་འཁྱེར་ཕྱི་མ་གཉིས་ལ་འཇུག་དགོས་ཤིང༌། རྫོགས་རིམ་གྱི་ཚེ་སྔར་སྤྱི་དོན་གྱི་སྐབས་སུ་བཤད་པ་བཞིན་རླུང་དང་ཐིག་ལེ་ལས་རུང་དུ་བསྒྲུབ་པའི་གཏུམ་མོའི་རྣལ་འབྱོར་ཡན་ལག་དང་བཅས་པ་ལ་ཚུལ་བཞིན་དུ་བསླབ་པས་རྩ་མདུད་མ་ལུས་པར་གྲོལ་ཏེ། རྩ་བ་དང་ཡན་ལག་གི་རླུང་ཐམས་ཅད་དྷཱུ་ཏཱིར་ཞུགས་གནས་ཐིམ་གསུམ་བྱས་པའི་མཐར་སྣོད་བཅུད་འོད་གསལ་དུ་བསྡུས་ཏེ་སྟོང་ཕྱོགས་ཀྱི་རྫོགས་རིམ་གཙོ་བོར་བསྒོམ་པས། འབྱུང་བའི་ཐིམ་རིམ་དང་སྟོང་པ་གསུམ་སོགས་འཆི་དུས་ཇི་ལྟ་བ་བཞིན་ཤར་བའི་མཐར་ཐམས་ཅད་སྟོང་པ་དཔེའི་འོད་གསལ་མངོན་དུ་བྱེད་ཅིང༌། དེ་ལས་མ་དག་པའི་སྒྱུ་མའི་སྐུར་ལྡང་བ་དང༌། དེ་ནས་དོན་གྱི་འོད་གསལ་སྐད་ཅིག་དང་པོ་ལས་དག་པའི་སྒྱུ་མའི་སྐུར་ལྡང་བ་དང༌། མཐའི་དོན་གྱི་འོད་གསལ་ལས་ལོངས་སྤྱོད་རྫོགས་པའི་སྐུར་བཞེངས་པའི་རིམ་པ་ཐམས་ཅད་འདིར་སྟོང་པའི་ངང་ལས་བདེ་ཆེན་ལྷ་སྐུར་བཞེངས་པར་བཤད་པ་འདིས་བསྟན་པ་ཡིན་ནོ། །དེ་ལ་ཁ་ཅིག་འདི་སྙམ་དུ་སྟོང་ཕྱོགས་ཀྱི་རྫོགས་རིམ་སྔོན་དུ་བཤད་པ་མི་འཐད་དེ། རིམ་ལྔ་ལས། རྒྱུ་དང་འབྲས་བུའི་ཁྱད་པར་གྱིས། །བདེན་པ་གཉིས་སུ་བསྟན་པ་ཡིན། །བདག་བྱིན་བརླབ་པའི་རིམ་གྱིས་ནི། །འོད་གསལ་བ་ནི་ཐོབ་པར་འགྱུར། །ཞེས་དང༌། སྤྱོད་བསྡུས་ལས། ཀུན་རྫོབ་ཀྱི་བདེན་པ་རྟོག་པ་དང་བྲལ་བས་ནི། དོན་དམ་པའི་བདེན་པ་མངོན་སུམ་དུ་བྱ་བར་མི་ནུས་སོ། །ཞེས་དང༌། སྒྲོན་གསལ་ལས་ཀྱང༌། དེའི་ཚེ་འགྲོ་བའི་རྒྱུད་ཉིད་དུ་བྱས་ནས་
ལངས་ཏེ་སྒྱུ་མ་ལྟ་བུའི་ཏིང་ངེ་འཛིན་མངོན་སུམ་དུ་བྱེད་དོ། །ཞེས་སྣང་ཕྱོགས་སྒྱུ་མའི་རྫོགས་རིམ་སྔོན་དུ་འགྲོ་དགོས་པར་བཤད་པ་དང་འགལ་ལོ་ཞེ་ན། སྐྱོན་མེད་དེ། འདིར་དང་པོ་འོད་གསལ་ལས་སྒྱུ་མའི་སྐུར་ལྡང་བར་བཤད་པའི་འོད་གསལ་ནི་དཔེའི་འོད་གསལ་ཡིན་ལ། དེ་སྒྱུ་མའི་སྐུའི་སྔོན་དུ་འགྲོ་དགོས་པར་འདུས་པ་ལས་ཀྱང་གསུངས། འཕགས་པ་ཡབ་སྲས་ཀྱིས་སྒྱུ་མའི་སྐུ་ལས་འོད་གསལ་ལ་འཇུག་པར་གསུངས་པའི་འོད་གསལ་ནི་རིམ་པ་བཞི་པའི་དོན་གྱི་འོད་གསལ་ཡིན་ཞིང༌། དེ་སྒྱུ་མའི་སྐུའི་རྗེས་སུ་འོངས་དགོས་པ་འདིར་ཡང་འདོད་པས་མི་འགལ་ལོ། །དེ་ལྟར་དོན་གྱི་ཆ་ལ་མི་མཐུན་པ་མེད་ཀྱང་ཕ་རྒྱུད་མ་རྒྱུད་གཉིས་ཀའི་ས་བཅད་ལེན་ལུགས་མི་འདྲ་སྟེ། འདུས་པའི་སྐབས་སུ་དབེན་པ་གསུམ་གྱི་རྫོགས་རིམ་དང༌། བདེན་པ་གཉིས་ཀྱི་རྫོགས་རིམ་ཞེས་དཔེའི་འོད་གསལ་གྱི་སྐོར་དབེན་གསུམ་གྱི་གྲངས་སུ་སོངས་ཟིན་པས། བདེན་པ་གཉིས་ཀྱི་རྫོགས་རིམ་སྟོན་པ་ན་སྣང་ཕྱོགས་སམ་སྒྱུ་མའི་རྫོགས་རིམ་སྔོན་དུ་འོངས་ལ། མ་རྒྱུད་ཀྱི་རྫོགས་རིམ་སྐབས་སུ་རླུང་དྷཱུ་ཏཱིར་ཚུད་པའི་ཐབས་ཀྱི་རྣལ་འབྱོར་དང༌། རླུང་དྷཱུ་ཏཱིར་ཚུད་པ་ལ་བརྟེན་ནས་རྫོགས་རིམ་དངོས་བསྒོམ་ཚུལ་གཉིས་སུ་བྱས་ཏེ། རྡོར་བཟླས་ཡན་ཆད་སྔ་མའི་ཁོངས་སུ་བསྡུས་ཤིང༌། ཕྱི་མའི་མགོ་དཔེའི་འོད་གསལ་གྱི་སྐོར་ནས་བཟུང་བའི་དབང་གིས་ས་བཅད་ལེན་པ་ན་ཡང་སྟོང་ཕྱོགས་ཀྱི་རྫོགས་རིམ་སྔོན་དུ་གསུངས་ལ། བསྟོད་པ་འདིར་ཡང་མ་རྒྱུད་ཀྱི་ལམ་སྲོལ་དང་མཐུན་པར་སྟོང་ཕྱོགས་སྔོན་དུ་གསུངས་པ་ཡིན་ནོ། །དེ་ཡང་སྙིང་སྟོབས་ཆེས་དཔའ་ཞེས་པའི་
དཔའ་བའི་དོན་ནི། སྤྱིར་ཀ་ཤིས་ས་ལུ་ལྗང་པའི་མདོ་འགྲེལ་དུ་ཐབས་ཤེས་ཀྱི་སྒོ་ནས་དཔའ་བར་འཇོག་ཚུལ་གཉིས་གསུངས་པ་ལྟ་བུ་མདོ་སྔགས་ཀུན་གྱི་བཤད་ཚུལ་སྣ་ཚོགས་ཡོད་ལ། ཁྱད་པར་དུ་རྒྱུད་འདིའི་བརྟག་པ་དང་པོའི་མགོ་ཉིད་དུ། སེམས་དཔའ་སྲིད་པ་གསུམ་གཅིག་པ། །ཤེས་རབ་འདི་ཡི་རིག་པ་ནི། །ཞེས་ཡུལ་སྟོང་པ་ཉིད་དང་རོ་མཉམ་དུ་གྱུར་པའི་ཤེས་རབ་འོད་གསལ་ལྷན་ཅིག་སྐྱེས་པའི་ཡེ་ཤེས་ཀྱི་ངོ་བོར་སྲིད་གསུམ་མཐའ་དག་རོ་གཅིག་ཏུ་གྱུར་པའི་ཆ་ནས་དཔའ་བར་བཤད་དེ། འདི་ཡང་དཀའ་འགྲེལ་པདྨ་ཅན་གཞིར་བཞག་ཅིང༌། མུ་ཏིག་ཕྲེང་བར། ཤེས་རབ་འདི་ཡིས་སྦྱོར་བས་ན། །ཞེས་འབྱུང་བ་དང་བསྟུན་ཚེ་ཐབས་ཤེས་དབྱེར་མེད་དུ་སྦྱོར་བས་དཔའ་བ་ཞེས་བཤད་དགོས་སོ། །དེ་ཡང་དཔའ་བ་ནི་འཇིགས་པ་མེད་པའི་དོན་ཡིན་ཞིང༌། རྒྱུད་བླ་མར། འཇིགས་དང་བཅས་པའི་ཕྱིར། ཞེས་པའི་ཐད་ཀྱི་ཐོགས་འགྲེལ་ལས། སྲིད་པ་ཟད་པ་རྣམས་ཀྱང་བག་ཆགས་མ་སྤངས་པའི་ཕྱིར་རྟག་ཏུ་རྒྱུན་མི་འཆད་པར་འདུ་བྱེད་ཐམས་ཅད་ལ་མི་བཟད་པར་འཇིགས་པའི་འདུ་ཤེས་པར་ཉེ་བར་གནས་པར་འགྱུར་ཏེ། ཞེས་པ་ལྟར་འཇིགས་པ་ཐམས་ཅད་ལས་གྲོལ་བ། ཡང་དག་པའི་ཤེས་རབ་ཀྱིས་སྒྲིབ་གཉིས་ཟད་པར་སྤང་བ་ལ་ལྟོས་པའི་དོན་ནོ། །གཉིས་པ་གསུང་དངོས་ལ་བསྟོད་པ་ནི། དཔེར་ན་སེང་གེ་རལ་པ་ཅན་དེ་ཉིད་ང་རྒྱལ་གྱི་གདེང་དང་ལྡན་པས་གང་ལ་ཡང་ཡ་ང་བ་མེད་པར་དྲེགས་པའི་ངར་སྐད་ཆེས་ཆེར་བསྒྲགས་པའི་ཚེ་ཝ་སྐྱེས་ལ་སོགས་པའི་གཅན་གཟན་ཕྲ་མོ་དང་རི་དྭགས་ཐམས་ཅད་
འཇིགས་ཤིང་སྐྲག་པས་ཟིལ་གྱིས་གནོན་པ་བཞིན་དུ། སངས་རྒྱས་རྣམས་ཀྱིས་རང་གིས་སྤངས་རྟོགས་མཐར་ཕྱིན་པར་ཞལ་གྱིས་བཞེས་པ་དང༌། ཆགས་སོགས་ཉེས་པ་གང་གིས་འཁོར་བར་འཆིང་ཞིང་སྐྱེས་མེད་སྤྲོས་བྲལ་བསྒོམ་པ་སོགས་ཀྱི་ལམ་གང་གིས་དེ་ལས་གྲོལ་བའི་ཚུལ་བསྟན་པ་ལ་བདུད་དང་མུ་སྟེགས་སོགས་ཀྱི་རྒོལ་བ་གང་གིས་ཀྱང་ཀླན་ཀའི་སྐབས་མེད་པར་མ་ཟད། དེ་དག་ཐམས་ཅད་ཀྱིས་སྨྲས་པ་རྣམས་བྱིས་པའི་རྡོལ་གཏམ་ལྟ་བུར་གཟིགས་ཏེ་མི་འཇིགས་པ་བཞིའི་དམ་བཅའི་སྒོ་ནས་སྨྲ་བ་ངན་པ་ཐམས་ཅད་ཟིལ་གྱིས་གནོན་པའི་ཕྱིར། ཉི་ཁྲི་ལས། མི་འཇིགས་པ་ཐོབ་པའི་གནས་ཏེ་ཁྱུ་མཆོག་རླབས་པོ་ཆེའི་གནས་སུ་དམ་བཅའོ། །འཁོར་གྱི་ནང་དུ་སེང་གེའི་སྒྲ་སྒྲག་གོ །ཞེས་དང༌། མདོ་སྡེ་རྒྱན་ལས། རང་གཞན་དོན་དུ་ཡེ་ཤེས་དང༌། །སྤངས་དང་ངེས་འབྱུང་གེགས་བྱེད་རྣམས། །སྟོན་མཛད་མུ་སྟེགས་གཞན་དག་གིས། །མི་རྫི་ཁྱོད་ལ་ཕྱག་འཚལ་ལོ། །ཞེས་དང༌། རྗེ་བླ་མས། དེ་ཕྱིར་རང་བཞིན་རྣམ་བྲལ་ཞེས། །སེང་གེའི་སྒྲ་ཡིས་ཡང་ཡང་དུ། །མཁས་པའི་ཚོགས་སུ་ལེགས་གསུངས་པ། །འདི་ལ་སུ་ཡིས་འགོང་བར་ནུས། །ཞེས་དང༌། བུདྡྷ་པ་ལི་ཏ་ལས་ཀྱང༌། ཕྱི་རོལ་པ་ཕས་ཀྱི་རྒོལ་བ་ཐམས་ཅད་བྱིས་པ་བསླུ་བ་དང་འདྲ་བར་ཐུགས་སུ་ཆུད་ནས། ཞེས་སོགས་ཀྱིས་སངས་རྒྱས་ཉག་གཅིག་སྨྲ་བ་བླ་ན་མེད་པར་གསུངས་སོ། །འདིའི་ཚིག་ཟིན་གཞན་གོ་སླ་ལ། མ་ཞུམ་ཞི་བ་ཞེས་པའི་མ་ཞུམ་པ་ནི། ༸རྒྱལ་དབང་བདུན་པའི་གསུང་ལས། མུ་སྟེགས་པ་ལ་སོགས་པ་རྒོལ་བ་གཞན་གྱིས་བརྒལ་ན་ཐུབ་པར་མི་འགྱུར་རོ་སྙམ་པའི་འཇིགས་པ་མེད་པས་ན་མ་ཞུམ་པ་དང༌། ཞེས་
གསུངས་པ་ལྟར་མི་འཇིགས་པ་བཞི་བརྙེས་པའི་དོན་ཡིན་ཞིང༌། ཞི་བ་ཞེས་པ་ནི། ལྷག་བསམ་བསྐུལ་བ་ལས། བྱམས་པ་ཆོས་བཞི་དང་ལྡན་ན། ཞེས་སོགས་གསུངས་པ་ལྟར། སངས་རྒྱས་ཀྱི་གསུང་ཐམས་ཅད་ཞི་བ་མྱང་འདས་ཐོབ་བྱེད་དང༌། ཉོན་མོངས་ཟད་བྱེད་འབའ་ཞིག་ཏུ་འགྲོ་བའི་དོན་ཏེ། རྗེ་བླ་མས། ཞི་འགྱུར་མིན་མཛད་ཁྱོད་ལ་མེད། །ཅེས་པ་ལྟར་རོ། །ཡང་ན་མི་འཇིགས་པ་བཞིའི་ནང་ནས། མ་ཞུམ་ཞེས་པས་རང་དོན་ཕུན་ཚོགས་ཀྱི་དམ་བཅའ་གཉིས་དང༌། ཞི་བ་ཞེས་པས་གཞན་དོན་ཕུན་ཚོགས་ཀྱི་དམ་བཅའ་གཉིས་བསྟན་པར་བྱས་ནའང་ཚིག་དོན་དང་ཤིན་ཏུ་འབྲེལ་ལོ། །དེས་ན་ཕས་ཀྱི་རྒོལ་བ་མུ་སྟེགས་ལ་སོགས་པ་སྐྲག་པར་མཛད་པ་ཙམ་མ་ཡིན་པར་གདུལ་བྱའི་རྒྱུད་ཀྱི་བདག་ཏུ་ལྟ་བའི་མ་རིག་པ་ལ་སོགས་པ་དམིགས་པའི་ཡུལ་ལ་ལོག་པར་རྟོག་པའི་ཉོན་མོངས་པ་ཐམས་ཅད་ཀྱང་སྐྲག་པར་མཛད་པ་སྟེ། དང་པོར་མངོན་གྱུར་མགོ་གནོན་ཅིང་ཕྱི་ནས་ས་བོན་བག་ཆགས་དང་བཅས་པ་སྤོང་བའི་དོན་ལ་ཡང་སྦྱོར་དགོས་པ་ནི་དོན་གྱི་གཙོ་བོ་ཡིན་ནོ། །༈ གཉིས་པ་གསུང་རྡོ་རྗེའི་ནུས་པའི་ཡོན་ཏན་ནི། གང་གི་སྙིང་ལ་ཆ་ཤས་ཞུགས་པས་ཀྱང༌། །ཐོག་མ་མེད་ནས་འཕུང་ཞེན་འགོང་པོའི་དཔུང༌། །སྙིང་གས་སྟོང་པའི་དབྱིངས་ཤི་མགུ་དཀའི་སེམས། །དབང་དུ་སྡུད་གསུང་རེ་བའི་ཡིད་ཀྱིས་བསྟོད། །ཅེས་བྱུང༌། དོན་ནི། བཅོམ་ལྡན་འདས་མའི་གསུང་གི་བྱིན་རླབས་ཀྱི་ཆ་ཤས་ཙམ་ཞིག་སྙིང་ལ་ཞུགས་པ་ལ་བརྟེན་ནས་ཀྱང་གདུལ་བྱའི་རྒྱུད་ཀྱི་ཉོན་མོངས་པ་བདག་འཛིན་ཞེས་ཐོག་མ་མེད་པ་ནས་ཕུང་ཁྲོལ་
འབའ་ཞིག་ལ་སྦྱོར་ཞིང༌། རས་ལ་སྣུམ་ཞུགས་པ་བཞིན་ཤེས་རྒྱུད་ལ་ཞེན་པའི་དབང་གིས་ཆགས་སོགས་ཉོན་མོངས་དང་ཉེས་པ་ཐམས་ཅད་འདྲེན་པར་བྱེད་པ། ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་པ་ལས་ཉམས་པར་བྱེད་པའི་འགོང་པོ་དེ་ཉིད་འདུལ་བར་བྱེད་དོ། །འདུལ་ཚུལ་ཡང་དེ་དང་འཛིན་སྟངས་འགལ་བར་ཞུགས་པའི་སྒོ་ནས་འདུལ་བ་ཙམ་མ་ཡིན་ཏེ། རྗེ་འཇམ་དབྱངས་བཞད་པའི་གྲུབ་མཐའ་ཆེན་མོར། དྲི་གཙོ་བསྟན་ཀྱང་གཉེན་པོ་མཆོག་སྦས་ཕྱིར། །ཤེས་སྒྲིབ་ཆུང་ཕྲ་སྔགས་ལས་མདོས་མི་ནུས། །ཞེས་གསུངས་པ་ལྟར། བདག་ལྟའི་ཞེན་ཡུལ་སུན་འབྱིན་པ་ཙམ་མདོ་ལ་ཡོད་ཀྱང་། རླུང་ལས་རུང་དུ་བྱས་ཏེ་གཉུག་སེམས་བདེ་བ་ཆེན་པོའི་ངོར་བསྐྱེད་ནས་དེས་སྟོང་ཉིད་བསྒོམ་པ་མེད་པས་བདེན་འཛིན་གྱི་བག་ཆགས་དྲུངས་འབྱིན་མི་ནུས་ལ། འདིར་ཉོན་མོངས་དེ་དག་གང་ལ་བརྟེན་པའི་དཔུང་ལྟ་བུའི་ཀུན་རྟོག་གཡོ་བར་བྱེད་པའི་རླུང་ཐམས་ཅད་རིམ་གྱིས་བཏུལ་ཏེ། ཐམས་ཅད་སྟོང་པ་འོད་གསལ་གྱི་དབྱིངས་དེར་འཆི་བའི་གནས་སྐབས་བཞིན་དུ་རླུང་མ་ལུས་པར་ཐིམ་པས་ཀུན་ནས་ཉོན་མོངས་པའི་རྟོག་པ་མཐའ་དག་གི་རྒྱུ་བ་ལོག་པ་ན། རང་གི་སེམས་སྔར་ཉོན་མོངས་པའི་བྲན་དུ་གྱུར་ཅིང་དགེ་བའི་ཕྱོགས་ལ་བཀོལ་དུ་མི་རུང་བར་ཡང་དག་པའི་ལམ་བཟང་པོ་གང་གི་ཕན་ཡོན་བསྟན་ནས་ཁྲིད་ཀྱང་མགུ་དཀའ་བ་དེ་ཉིད་ཉོན་མོངས་པའི་གདོན་གྱི་དཔུང་ཚོགས་དང་ཁ་བྲལ་བའི་དབང་གིས་ལམ་གྱི་རྟོགས་པ་གོང་མ་གང་དུ་འཁྲིད་ཀྱང་རང་གི་འདོད་པ་བཞིན་དབང་དུ་སྡུད་པར་བྱེད་པ་དེ་ལྟ་བུའི་ནུས་པ་དང་ལྡན་པའི་གསུང་ལ་བསྟོད་པ་བྱས་པ་ཡིན་ནོ། །
དེ་ཡང་ཐོག་མ་མེད་ནས་འཕུང་ཞེན་འགོང་པོ་ཞེས་པ། བདག་འཛིན་སོགས་ཀྱི་ཉོན་མོངས་དང༌། དེའི་རྒྱབ་རྟེན་གྱི་དཔུང་ནི་ཀུན་རྟོག་གཡོ་བའི་རླུང་དང༌། དེ་བཏུལ་བའི་སྟོབས་ཀྱིས་སེམས་འདུལ་བ་སོགས་རིམ་པ་དེ་ལྟར་སྦྱོར་དགོས་ཏེ། སྤྱོད་འཇུག་ལས། དེ་ལྟར་ཡུན་རིང་རྒྱུན་ཆགས་དགྲར་གྱུར་པ། །གནོད་པའི་ཚོགས་རབ་འཕེལ་བའི་རྒྱུ་གཅིག་པུ། །བདག་གི་སྙིང་ལ་ངེས་པར་གནས་འཆའ་ན། །འཁོར་བར་འཇིགས་མེད་དགའ་བར་ག་ལ་འགྱུར། །འཁོར་བའི་བཙོན་རའི་སྲུང་མས་དམྱལ་སོགས་སུ། །གསོད་བྱེད་གཤེད་མར་གྱུར་པ་དེ་དག་ནི། །གལ་ཏེ་བློ་གནས་ཆགས་པའི་དྲ་བ་ན། །གནས་ན་བདག་ལ་བདེ་བ་ག་ལ་ཡོད། །ཅེས་དང༌། བདག་གི་སེམས་ལ་གནས་བཞིན་དུ། །དགའ་མགུར་བདག་ལ་གནོད་བྱེད་པ། །ཞེས་ཐོག་མ་མེད་པ་ནས་གནོད་པ་ཡུན་རིང་ལ་ཤུགས་དྲག་པ་དུ་མ་རྒྱུན་མ་ཆད་པར་བྱེད་ཅིང༌། དེ་ཡང་འཇིག་རྟེན་གྱི་དགྲ་བོ་བཞིན་དུ་ཕྱི་རོལ་ནས་འོངས་པ་མ་ཡིན་པར་རང་གི་རྒྱུད་ལ་གནས་བཞིན་དུ་རང་ལ་གནོད་པ་ཁོ་ན་བྱེད་པའི་ཉོན་མོངས་རྣམས་ནི་ཤིན་ཏུ་མི་འཚམ་པའི་དགྲའི་དྭངས་མར་གསུངས་ཤིང༌། བློ་སྦྱོང་མཚོན་ཆ་འཁོར་ལོ་ལས། བདག་འཛིན་འགོང་པོ་ཞེས་པའི་གདུག་རྩུབ་ཅན། །རང་གཞན་ཕུང་དུ་འཇུག་པའི་དམ་ཉམས་ཁུག །ཁུག་ཅིག་ཁུག་ཅིག་ཁྲོ་བོ་གཤིན་རྗེའི་གཤེད། །རྒྱོབ་ཅིག་རྒྱོབ་ཅིག་དགྲ་བདག་སྙིང་ལ་བསྣུན། །ཕུང་བྱེད་རྟོག་པའི་མགོ་ལ་ཆེམས་སེ་ཆེམས། །དགྲ་བདག་གཤེད་མའི་སྙིང་ལ་མཱ་ར་ཡ། །ཞེས་ཕུང་ཁྲོལ་ཐམས་ཅད་ཀྱི་རྩ་བ་བདག་འཛིན་ཡིན་པས། དྲག་པོ་མངོན་སྤྱོད་ཀྱི་ལས་
ཀྱང་བྱེད་ན་གཙོ་བོ་དེ་ལ་བྱེད་འོས་པར་གསུངས་ཏེ། ཡེ་ཤེས་བསྐལ་པའི་མེ་ལྟར་འབར་བའི་འོད། །ཅེས་སོགས་ཀྱིས་ཀྱང་རིག་པའི་རྒྱལ་པོ་བདག་མེད་རྟོགས་པའི་ཤེས་རབ་ཁྲོ་བོའི་རྣམ་པར་བསྟན་ནས་འདུལ་རྒྱུའི་དགྲའི་གཙོ་བོ། དུག་གསུམ་དུ་གསུངས་སོ། །དེའི་དཔུང་ནི་ཀུན་རྟོག་གཡོ་བར་བྱེད་པའི་རླུང་ལ་བྱེད་དེ། དཔེར་ན་འཇིག་རྟེན་གྱི་དགྲ་ལ་ཡང་རྒྱབ་རྟེན་གྱི་དཔུང་ཞིག་ཡོད་ན་ཤིན་ཏུ་གདུག་རྩུབ་ཅིང་བཟློག་དཀའ་བ་ལྟར་ཉོན་མོངས་པ་རྣམས་ཀྱང་རླུང་ལ་བརྟེན་ནས་ཤིན་ཏུ་འཕྲོ་ཞིང་མ་རུང་བར་བྱེད་པ་ཡིན་ཏེ། ས་ར་ཧས། འདི་ན་ཡིད་འདུས་པ་ལ་རླུང་གི་རླབས། །གཡོ་ཞིང་འཕྱར་ལ་ཤིན་ཏུ་མི་བསྲུན་འགྱུར། །ཞེས་གསུངས་སོ། །དེའི་རྒྱུ་མཚན་ཡང༌། རིམ་ལྔ་ལས། རླུང་ཞེས་བྱ་བ་ལས་ཀུན་བྱེད། །འདི་ནི་རྣམ་ཤེས་བཞོན་པ་སྟེ། །ལྔ་ཡི་བདག་ཉིད་བཅུ་ཡང་ཡིན། །ཞེས་རླུང་ལ་བཞོན་པའི་ཐ་སྙད་བཏགས་ཏེ། རིམ་ལྔ་གསལ་སྒྲོན་ལས། རྣམ་ཤེས་ནི་ལུས་ཅན་མིན་པས། དེ་ལ་རང་དབང་དུ་ཡུལ་བགྲོད་པའི་ནུས་པ་མེད་ལ། རླུང་དང་མཉམ་པར་ཞུགས་ན་ནི་ཡུལ་བགྲོད་པའི་ནུས་པ་ཡོད་དོ། །ཞེས་རླུང་ལ་བརྟེན་ཚུལ་གསལ་བར་གསུངས་སོ། །འདི་ཡང་གྲངས་ཅན་པའི་ལུགས་ཀྱི། རང་བཞིན་ལོང་བ་རྐང་ཅན་དང༌། སྐྱེས་བུ་ཞ་བོ་མིག་ཅན་ལྟ་བུའི་ངོ་བོ་ཐ་དད་པའི་བརྟེན་ཚུལ་ཡིན་ན། དེས་འཆིང་གྲོལ་ལ་མི་ཕན་ཡང༌། འདིར་དེ་ལྟར་མ་ཡིན་པར་ངོ་བོ་གཅིག་ཏུ་སྐྱེས་པ་ཡིན་ཏེ། རིམ་ལྔ་ལས། རླུང་རྣམས་ཕྲ་བའི་གཟུགས་ཀྱིས་ནི། །ཤེས་དང་ཡང་དག་འདྲེས་གྱུར་ནས། །ཞེས་དང༌། སྤྱོད་བསྡུས་ལས། ཁམས་ཕྲ་བ་དང་རྣམ་པར་ཤེས་པ་སྣང་བ་དག་ནི་གཟུགས་མེད་པས། མར་གྱི་ནང་དུ་
མར་བཅུག་པ་བཞིན་འདྲེས་པར་གྱུར་ནས། འཇིག་རྟེན་དང་འཇིག་རྟེན་ལས་འདས་པའི་བྱ་བ་ཐམས་ཅད་རྫོགས་པར་བྱེད་དོ། །ཞེས་སོ། །དེ་ལྟར་ན་བདེན་འཛིན་འཁོར་བའི་རྩ་བར་བཞག་པ་ལྟར་རླུང་གིས་ཀྱང་འཁོར་བའི་རྩ་བ་བྱེད་པར་གསུངས་ཏེ། དགོངས་པ་ལུང་སྟོན་ལས། འདུ་ཤེས་ཅན་དང་འདུ་ཤེས་མེད། །སེམས་ཅན་དུ་བརྟགས་འདི་གནས་པ། །དེ་རྣམས་རླུང་ལས་བྱུང་བ་སྟེ། །ཞེས་དང༌། རྡོ་རྗེ་ཕྲེང་བ་ལས། ལས་ཀྱི་རླུང་ནི་སྣ་ཚོགས་པ། །དེ་ནི་ལྷན་ཅིག་རྣམ་ཤེས་དང༌། །སླར་ཡང་འཇིག་རྟེན་གསུམ་དུ་གནས། །དེ་ལས་ལས་དང་དེ་བཞིན་སྐྱེ། །དེ་ལས་ཆགས་སོགས་བག་ཆགས་དང༌། །དེ་ལས་སླར་ཡང་འཆི་དང་སྐྱེ། །དེ་ལྟར་འཁོར་ལོ་བསྐོར་བ་འདྲ། །ཞེས་དང་དབུ་མ་རིན་ཆེན་ཕྲེང་བར། ངར་འཛིན་ཡོད་ན་ཡང་ལས་ཏེ། །དེ་ལས་ཡང་ནི་སྐྱེ་བ་ཡིན། །ལམ་གསུམ་ཐོག་མཐའ་དབུས་མེད་པ། །འཁོར་བའི་དཀྱིལ་འཁོར་མགལ་མེ་ཡི། །དཀྱིལ་འཁོར་ལྟ་བུར་ཕན་ཚུན་གྱི། །རྒྱུ་ཅན་འདི་ནི་འཁོར་བར་འགྱུར། །ཞེས་སོགས་ཀྱིས་ངར་འཛིན་ལ་བརྟེན་ནས་ལམ་གསུམ་དུ་འཁོར་ཚུལ་གསུངས་པ་ཇི་ལྟ་བ་བཞིན་དུ་འདིར་རླུང་ལ་བརྟེན་ནས་གཞི་དང་ཉོན་མོངས་དང་ལས་ཀྱི་ལམ་གསུམ་དུ་འཁོར་བར་གསུངས་སོ། །དེས་ན་མདོ་ལུགས་ལྟར་བདེན་འཛིན་འཁོར་བའི་རྩ་བར་ཤེས་ནས་དེའི་གཉེན་པོ་བསྒོམས་པས་འཁོར་བ་ལས་གྲོལ་བ་ཙམ་འབྱུང་ཡང༌། དེའི་སྟེང་དུ་རླུང་གིས་ཀྱང་འཁོར་རྩ་བྱེད་ཚུལ་ཤེས་ཏེ་སྒོ་གཉིས་ཀ་ནས་བཟློག་པའི་ཐབས་བྱས་ན་སྤོང་སླ་བ་དང༌། འཁོར་བ་ཕྲ་རགས་ཀྱི་བག་ཆགས་ཟད་པར་སྤོང་བ་ལ་ངེས་པར་
སྔགས་ལ་བརྟེན་ཏེ་འཁོར་བའི་རྩ་བ་གཉིས་ཀ་སྤོང་བའི་ཐབས་ཆ་ཚང་བ་མེད་མི་རུང་ཡིན་ཏེ། རིམ་ལྔ་གསལ་སྒྲོན་ལས། ཐུན་མོང་བའི་འཁོར་བའི་འཇུག་རིམ་ཤེས་ན་དེའི་རྩ་བ་བདག་འཛིན་ལྡོག་དགོས་པར་ཤེས་ནས། བདག་མེད་པའི་ལྟ་བ་ཕུ་ཐག་ཆོད་པ་ཚོལ་བ་ཞིག་འོང་ལ། ཐུན་མོང་མ་ཡིན་པའི་རླུང་གི་དབང་གིས་འཁོར་བར་འཇུག་རིམ་ཤེས་ན་ཀུན་རྟོག་གཡོ་བའི་རླུང་དགག་དགོས་པར་མཐོང་ནས། དེ་འགོག་པའི་ཐབས་ལུས་ལ་གནད་དུ་བསྣུན་པའི་གདམས་པ་ཕུ་ཐུག་ཆོད་པ་ཞིག་འོང༌། ཞེས་དང་། རྗེ་འཇམ་དབྱངས་བཞད་པས། ལུས་ངག་ཡིད་གསུམ་རགས་ཕྲ་ཤིན་ཏུ་ཕྲ། །སྦྱངས་ཕྱིར་ཐེག་དང་མདོ་རྒྱུད་གོང་ནས་གོང༌། །ཞེས་འདོམས་པར་མཛད་དོ། །དེ་ལྟ་བུའི་རླུང་དེ་ཉིད་འཕགས་མའི་བྱིན་རླབས་ལ་བརྟེན་ནས་བཏུལ་བའི་ཚུལ་སྙིང་གས་སྟོང་པའི་དབྱིངས་ཤི་ཞེས་པ་འདིས་བསྟན་ལ། དེ་ཡང་སྙིང་གས་ཞེས་པ་རྡོར་བཟླས་སོགས་རླུང་དབུ་མར་འཇུག་པའི་ཐབས་སྲོག་རྩོལ་གྱི་རྣལ་འབྱོར་རྣམས་ཀྱི་སྐབས་དང༌། སྟོང་པའི་དབྱིངས་ཤི་ཞེས་པ་སེམས་དབེན་དཔེའི་འོད་གསལ་ཡན་ཆད་ཀྱི་རྟོགས་པ་སྐྱེ་བའི་སྐབས་ལ་སྦྱོར་དགོས་པ། རྒྱུད་ཀྱི་རྡོ་རྗེའི་ཚིག་གིས་བརྡ་སྦྱོར་ཚུལ་དང་སྒོ་བསྟུན་ནས་གསུངས་པ་ཡིན་ཏེ། དགོངས་པ་ལུང་སྟོན་ལས། གང་ཕྱིར་རང་ནི་ཟློས་གྱུར་པ། །ཡི་གེ་ཧཱུཾ་གི་གསང་སྔགས་ལྔ། །དེ་ཚེ་སྙིང་ལས་འདར་སྐྱེ་ཞིང༌། །དབང་པོ་ཐམས་ཅད་བརྒྱལ་བར་གྱུར། །ཞེས་སྲོག་རྩོལ་གྱི་རྣལ་འབྱོར་དེ་དག་ལ་སྦྱངས་ནས་རླུང་དབུ་མར་བཅུག་པ་ན། ཀུན་རྟོག་རླུང་དང་བཅས་པ་སྐྲག་ནས་སྙིང་གས་ཤིང་འདར་བར་གསུངས་ཏེ། རྩ་དབུ་མའི་མིང་ལ་ཀུན་འདར་མ་ཞེས་པ་ཡང༌། རང་བཞིན་མེད༌
པའི་ཚུལ་གྱིས་རྟོག་པ་ཀུན་འདར་བར་བྱེད་པ་ཞེས་བརྟག་གཉིས་ཀྱི་ཊཱིཀྐ་རྣམས་སུ་བཤད་པ་ཡང་འདི་དང་དོན་གཅིག་གོ །འདིའི་བཟླས་པ་རྡོར་བཟླས་ཀྱི་སྐབས་ཡིན་ཞིང༌། དེར་རྩ་རྒྱུད་དུ་ཡི་གེ་གསུམ་ལས་མ་གསུངས་པས། འདིར་སྭཱཧཱ་བསྣན་པ་དེ་གཉིས་རིན་འབྱུང་དང་དོན་གྲུབ་ཀྱི་ས་བོན་ཡིན་ཞིང་། བཟླས་པ་དེ་ལ་དེའི་བྱེད་པ་ཚང་བའི་དོན་ཡིན་ཏེ། ལེའུ་བཅུ་པའི་མཐའ་དཔྱོད་ལས། ཡི་གེ་ལྔ་གང་གི་ཚེ་ཟློས་པར་གྱུར་པ་དེའི་ཚེ་སྙིང་ལས་འདར་བ་སྐྱེ་བ་ནི་རླུང་དེར་བསྡུས་པའི་མཐུས་འདར་བའོ། །ཞེས་དང༌། ཡི་གེ་གསུམ་གྱི་བཟླས་པ་ཉིད་རིན་པོ་ཆེ་དང་དོན་ཡོད་པའི་བཟླས་པ་ཡིན་པ་ལ་དགོངས་ཀྱི། ཡི་གེ་གཉིས་བསྣན་ནས་རྡོར་བཟླས་བྱེད་པ་མིན་ནོ། །ཞེས་གསུངས་པའི་ཕྱིར་རོ། །སྟོང་པའི་དབྱིངས་ཤི་ཞེས་པ་ཐ་མལ་པ་རྣམས་ལ་གཞིའི་འོད་གསལ་ཤར་ཏེ་རླུང་རྣམས་མི་ཤིགས་པ་ལ་ཐིམ་པའི་ཚེ་འཆི་བ་ཞེས་བཤད་པ་དང་འདྲ་བར། འདིར་ཡང་ལམ་གྱི་འོད་གསལ་ཤར་ཏེ་རླུང་ཐམས་ཅད་མི་ཤིགས་པར་ཐིམ་པ་ལ་སྟོང་པའི་དབྱིངས་སུ་ཤི་བའི་སྒྲས་བསྟན་པ་ཡིན་ཏེ། སྤྱོད་བསྡུས་ལས། ཡང་དེ་རྣམས་མི་ཤིགས་པ་ཐོབ་ནས་དངོས་པོ་མེད་པར་འགྱུར་རོ། །ཞེས་སོ། །འདིའི་དངོས་པོ་མེད་པ་འོད་གསལ་སྟོང་པའི་དབྱིངས་ལ་བྱེད་དགོས་ཏེ། གསལ་སྒྲོན་ལས། འཆི་བའི་མཐར་སྙིང་གར་མི་ཤིགས་པ་ལ་ཞུགས་ནས་དངོས་པོ་མེད་པ་འོད་གསལ་དུ་འཇུག་པར་གསུངས་པ་དང༌། ཞེས་གསུངས་པའི་ཕྱིར། འདི་དག་ཀྱང་ཁོ་བོས་བློ་གྲོས་ཞིབ་མོས་ཅུང་ཟད་ཕྱེ་བ་ཡིན་གྱི། དེང་དུས་ཀྱི་འཆད་པ་པོ་རྣམས་ཡིན་ན་བདག་འཛིན་འགོང་པོ་དཔུང་དང་བཅས་པའི་སྙིང་གས་ཏེ་ཤིའོ་
ཞེས་པ་གཟུགས་ཅན་དང་རབ་བརྟགས་འདྲེས་པའི་རྐྱེན་ཡིན་ཞིང་དོན་གོ་སླའོ། །ཞེས་བརྗོད་བྱའི་གནད་ལ་སེན་མོ་མ་ཐེབས་པར་ཚིག་རིས་ཙམ་གྱི་སྟེང་ནས་དར་ཞུད་བྱེད་པ་ལས་འོས་མེད་དོ། །མགུ་དཀའི་སེམས་ཞེས་པ་གོང་དུ་བཤད་པ་ལྟར་དགེ་བའི་ཕྱོགས་སུ་བློ་མི་འགྲོ་བ་ལ་བྱེད་རུང་ཡང༌། དགོངས་པ་མཐར་ཐུག་འཚོལ་ན། རྒྱལ་བ་དགེ་འདུན་རྒྱ་མཚོའི་མཚན་བརྗོད་ཊཱིཀྐ་ལས། བདེ་བ་ཆེན་པོ་དངོས་ཀྱིས་དགའ་བ་དང༌། དེ་དང་རྗེས་སུ་འབྲེལ་བའི་བདེ་བས་མགུ་བ་དང༌། ཞེས་གསུངས་པ་ལྟར། མཉམ་གཞག་ཏུ་འོད་གསལ་བདེ་བ་ཆེན་པོའི་ཡེ་ཤེས་གོམས་པའི་དབང་གིས་རྗེས་ཐོབ་ཏུ་གང་སྣང་ཐམས་ཅད་དག་པའི་འཁོར་ལོར་འཆར་བས། གོང་དུ་བཤད་པ་ལྟར་གང་སྣང་སྟོང་པ། སྟོང་པ་བདེ་བ། བདེ་བ་ལྷ་སྐུར་ཤར་བ་ནི་སྐབས་འདིའི་མགུ་བའི་དོན་ཡིན་ལ། སྔར་ཀུན་རྟོག་གཡོ་བར་བྱེད་པའི་རླུང་རྣམས་ཁ་རྒྱལ་བའི་དབང་གིས་སེམས་ཕྱིན་ཅི་ལོག་གི་ཡུལ་ལ་འཕྱར་ཞིང་གཡེང་སྟེ་བདེ་བའི་གོ་སྐབས་ཅུང་ཟད་ཀྱང་མེད་པར་ཤིན་ཏུ་ངལ་བར་གྱུར་པ་ནི་མགུ་དཀའ་ཚུལ་དང༌། འདིར་ལུས་ལ་གནད་དུ་བསྣུན་པ་སོགས་ཀྱི་ལམ་ཟབ་མོ་བསྒོམས་པས་ལས་རླུང་གི་རྒྱུ་བ་མ་ལུས་པར་འགག་པ་ན་སེམས་ངལ་སོས་ཏེ་ལྷན་སྐྱེས་ཀྱི་བདེ་བས་ཚིམ་ཞིང་མགུ་ནས་གདུལ་བྱ་རྗེས་སུ་འཛིན་པའི་ཕྱིར་དུ་གཟུགས་སྐུའི་རྣམ་པར་སྟོན་པ་སོགས་ཀྱིས་འདོད་དོན་ཐམས་ཅད་སྒྲུབ་པར་བྱེད་པ་ནི་དེའི་སྒོ་ནས་སེམས་མགུ་ཚུལ་དང་དབང་དུ་སྡུད་ཚུལ་ཡིན་ཏེ། རྫོགས་རིམ་དངོས་གྲུབ་སྙེ་མ་ལས། ཤིན་ཏུ་འཕྱར་ཞིང་གཡོ་བའི་རླུང་གི་བཞོན་པས་ཉིན་མཚན་ཀུན་ཏུ་སེམས་འཁོར་ལོ་བཞིན་དུ་བསྐོར་བས་ཤིན་ཏུ་ངལ་བར་གྱུར་པ་
དེ་འཆད་པ་ལྟར་གྱི་ལུས་ལ་གནད་དུ་བསྣུན་པའི་གདམས་པ་བསྒོམ་པས་མི་བསྲུན་པའི་རླུང་ཐིམ་པ་དེའི་ཚེ་ལྷན་སྐྱེས་ཀྱི་ཡེ་ཤེས་ཀྱི་སེམས་ངལ་སོས་པས་ཚིམ་པ་སྐྱེ་སྟེ། ཞེས་དང༌། དེ་ཁོ་ན་ཉིད་གྲུབ་པ་ལས། ལྷན་ཅིག་སྐྱེས་པའི་རླུང་རང་གི་གནས་སུ་གནས་པས་རྟོག་པའི་ཚོགས་ལས་གྲོལ་ཞིང༌། སྟོང་པ་ཉིད་ཀྱི་རང་བཞིན་གྱིས་ཐུགས་ཚིམ་པར་བྱེད་པ། ཞེས་གསུངས་ཏེ། རྫོགས་རིམ་རྣལ་འབྱོར་ཆེན་པོའི་གཞུང་གི་ཐོག་མ་ཉིད་དུ་ཡང༌། རྣལ་འབྱོར་ཆེན་པོ་ངལ་གསོ་བྱ། །ཞེས་ཐབས་ཤེས་དབྱེར་མེད་དུ་སྦྱོར་བའི་རྣལ་འབྱོར་ཆེན་པོ་རྫོགས་རིམ་གྱི་སྒོ་ནས་ངལ་གསོ་ཚུལ་ཡང་དེ་ཡིན་ནོ། །ཡང་ཁ་ཅིག་འདི་སྙམ་དུ། རྗེ་བཙུན་མའི་གསུང་གི་བྱིན་རླབས་ཞུགས་པ་ལ་བརྟེན་ནས་མཆོག་ཐུན་མོང་གི་དངོས་གྲུབ་ཐམས་ཅད་འགྲུབ་ཏུ་རུང་བས། ཁྱོད་ཀྱིས་རྗེ་བཙུན་མའི་གསུང་རྡོ་རྗེའི་བྱིན་རླབས་ཀྱིས་གདུལ་བྱའི་རྒྱུད་ལ་སྐྱེས་པའི་རྟོགས་པ་དེ་ཡང་གསུང་རྡོ་རྗེའི་རང་བཞིན་དུ་བཤད་པ་བྱ་བྱེད་འདྲེས་པ་དང༌། ཧ་ཅང་ཐལ་བའི་སྐྱོན་དུ་འགྱུར་རོ་ཞེ་ན་སྐྱོན་མེད་དེ། འདིར་བྱིན་རླབས་འཇུག་ཚུལ་གྱི་གཙོ་བོ་ནི་གདུགས་ནམ་མཁར་བཟུང་བའི་གྲིབ་མ་ས་ལ་འབབ་པ་ལྟ་བུ་མ་ཡིན་གྱི། རྗེ་བཙུན་མའི་ཐུགས་རྒྱུད་ཀྱི་གསུང་རྡོ་རྗེའི་དེ་ལ་ང་རྒྱལ་བཞག་སྟེ། དེ་དང་རྒྱུ་མཐུན་པའི་ལམ་ཉམས་སུ་བླངས་པ་ལ་བརྟེན་ནས་དེ་ཉིད་ཀྱི་རིགས་འདྲའི་རྟོགས་པ་ཁྱད་པར་ཅན་སྐྱེས་པ་དེ་སྐབས་འདིའི་གདུལ་བྱ་ཁྱད་པར་ཅན་གྱི་དབང་དུ་བྱས་ཏེ། ཐུན་མོང་མ་ཡིན་པའི་བྱིན་རླབས་འཇུག་ཚུལ་ཡིན་པས། དེ་ལ་གཙོ་བོར་ལམ་དང་འབྲས་བུ་གང་རུང་གི་གསུང་རྡོ་རྗེའི་ཡོན་ཏན་གྱི་ཆར་གཏོགས་པ་ཞིག་དགོས་ཏེ་དཔེར་ན། གསེར་འཕྲེང་
ལས། གཞི་ཤེས་ཀྱི་དམིགས་པ་ལ་དེར་འདུ་བས་མ་ཁྱབ་ཀྱང༌། ལམ་བདེན་གྱི་སྐབས་སུ་འདུ་དགོས་ཏེ། འདི་མཁྱེན་པ་གསུམ་གྱི་ནང་ནས་གཞི་ཤེས་འབའ་ཞིག་གི་སྐབས་ཡིན་པ་དང༌། ཞེས་གསུངས་པ་བཞིན་ནོ། །དེར་མ་ཟད་སྐྱབས་འགྲོའི་ཚེ་ཐེག་པ་འོག་མས་རྒྱུ་སྐྱབས་ཙམ་དུ་བྱེད་པ་དང༌། ཐེག་ཆེན་ཐུན་མོང་བས་དེ་ཉིད་ཐོབ་བྱར་བྱས་ཏེ་འབྲས་སྐྱབས་སུ་འཛིན་པ་དང༌། ཐུན་མོང་མ་ཡིན་པ་སྔགས་ཀྱི་ཐེག་པས་ཐོབ་བྱར་འཛིན་པ་ཙམ་དུ་མ་ཟད་ད་ལྟ་ནས་དེ་ལ་ང་རྒྱལ་བཞག་སྟེ་བསྒོམ་པ་སོགས་གོང་མ་གོང་མའི་ཟབ་ཁྱད་ཡིན་པས། འབྲས་བུ་ཡང་དེ་དང་རྣམ་པ་མཐུན་པ་ཞིག་འབྱུང་དགོས་ཏེ་གནད་འདི་ཤེས་པ་ཤིན་ཏུ་གལ་ཆེའོ། །དེས་ན་འདིར་ཡང༌། རེ་བའི་ཡིད་ཀྱིས་བསྟོད། །ཅེས་གསུང་གི་ཡོན་ཏན་མཐོང་སྟེ་རང་རྒྱུད་ལ་ཡང་འདི་ལྟ་བུ་ཞིག་བྱུང་ན་ཅི་མ་རུང་སྙམ་དུ་མངོན་འདོད་དམ་རེ་བ་སྐྱེས་ནས་བསྟོད་པ་བྱས་པ་ཡིན། ཞེས་གསུངས་པར་སྣང་བས་སྔར་བཤད་པ་བཞིན་བསྟོད་པ་བྱེད་པའི་ཀུན་སློང་ལ་དད་པ་གསུམ་ཚང་བ་དང་བསྟོད་པ་བྱས་པའི་དགོས་པ་ལ་དད་པ་གསུམ་ཚང་བར་འདྲེན་ཐུབ་པ་ཞིག་བྱུང་ན་དད་པའི་འཇུག་ངོགས་ཞེས་མིང་བཏགས་པ་བཞིན་བསྟོད་པའི་དགོས་དོན་གྲུབ་པ་ཡིན་པས། རྗེས་འཇུག་རྣམས་ཀྱིས་ཀྱང་ལྷ་ལ་ཤག་བརྒྱབ་པ་ལྟ་བུ་མ་ཡིན་པར་འདི་ལྟ་བུའི་སྒོ་ནས་ལམ་དང་འབྲས་བུ་ཀུན་ལ་བག་ཆགས་ཅི་ཐེབས་སུ་བྱོས་ཤིག་ཅེས་ཐལ་མོ་སྦྱར་ཏེ་གསོལ་བ་འདེབས་སོ། །བཟླས་པ་རྣམ་བཞིའི་ཆུ་བོ་འབབ་པའི་བཅུད། །རླུང་སྔགས་དབྱེར་མེད་ཨཱ་ལི་ཀཱ་ལིའི་གདངས། །ཐེག་མཆོག་ལོངས་སྤྱོད་རིན་ཆེན་འབྱུང་གནས་ཀྱི། །སྙིང་པོ་འཇའ་ཚོན་བསྡུས་པའི་ལྷུན་པོ་བཞིན། །ཞེས་
བྱ་བ་ནི་བར་སྐབས་ཀྱི་ཚིགས་སུ་བཅད་པའོ།། །།༈ གསུམ་པ་ཐུགས་ལ་བསྟོད་པ་ལ། ཕར་ཕྱིན་ཐེག་པ་དང་ཐུན་མོང་བའི་དབང་དུ་བྱས་པ་དང༌། སྔགས་ཀྱི་ཐུན་མོང་མ་ཡིན་པའི་དབང་དུ་བྱས་པ་གཉིས། དང་པོ་ལ་རྣམ་པ་ཐམས་ཅད་མཁྱེན་པའི་ཡོན་ཏན་ལ་བསྟོད་པ་དང༌། སྟོབས་བཅུའི་ཡོན་ཏན་ལ་བསྟོད་པ་གཉིས། དང་པོ་ནི། རྒྱ་མཚོ་ལྟ་བུའི་གཏིང་ལྡན་ཤེས་བྱ་དང༌། །གངྒཱའི་རྡུལ་སྙེད་ཆོས་ཚུལ་མ་ལུས་པ། །ལག་མཐིལ་ཤིང་ཏོག་ཇི་བཞིན་མངོན་སུམ་དུ། །དུས་མཐའི་སྐད་ཅིག་ཡུན་ལ་མ་འདྲེས་གཟིགས། །ཞེས་བྱུང༌། དེ་ཡང་རྣམ་པ་ཐམས་ཅད་མཁྱེན་པའི་ཡེ་ཤེས་མངོན་དུ་བྱས་པ་ནི། ཤེས་བྱ་མ་ལུས་པར་རྟོགས་པ་ཙམ་ལ་མི་བྱེད་དེ། མདོ་སྡེ་རྒྱན་ལས། སངས་རྒྱས་ཀུན་གྱིས་འོད་ཟེར་ཆེན་པོས་དབང་བསྐུར་ཕྱིན། །དེ་ནི་ཆོས་ལ་དབང་བ་ཀུན་དང་ཡང་དག་ལྡན། །ཞེས་འོད་ཟེར་ཆེན་པོའི་དབང་བསྐུར་ཐོབ་པ་ན་གསུང་རབ་ཀྱི་དགོངས་པ་རང་དབང་དུ་འགྲེལ་ནུས་ཤིང༌། ཇི་ལྟ་བར་མ་ཟད་ཇི་སྙེད་པའི་ཆོས་ཀྱང་སྔར་མ་རྟོགས་པ་གསར་དུ་རྟོགས་རྒྱུ་མེད་པས་ཡེ་ཤེས་ཀྱི་ཕར་ཕྱིན་ལྷག་ཐོབ་ཏུ་འཇོག་པར་བྱང་ས་དང་དགོངས་པ་རབ་གསལ་ལས་གསུངས་པ་ལྟར་རོ། །འོན་ཀྱང་དེའི་ཚེ་མཁྱེན་པ་སོ་སོ་བའི་སྒོ་ནས་གཞལ་བ་ཡིན་ལ། སངས་རྒྱས་པའི་ཚེ་མཁྱེན་པ་སྐད་ཅིག་མ་གཅིག་གིས་ཀྱང་ཐམས་ཅད་གཟིགས་པ་ཡིན་ཏེ། བདེན་གཉིས་ལས། མཁྱེན་པའི་སྐད་ཅིག་གཅིག་གིས་ཀྱང༌། །ཤེས་བྱའི་དཀྱིལ་འཁོར་ཀུན་ཁྱབ་ཅན། །ཞེས་དང༌། འཇུག་པ་རང་འགྲེལ་ལས། མཁྱེན་པའི་སྐད་ཅིག་
གཅིག་ཁོ་ནས་ཐུགས་སུ་ཆུད་པས། ཞེས་དང༌། དགོངས་པ་རབ་གསལ་ལས། སངས་རྒྱས་མ་ཐོབ་བར་དུ་བློ་གཅིག་གིས་སྐད་ཅིག་མ་གཅིག་ལ་ཆོས་ཅན་སོ་སོར་སྣང་བ་དང་ཆོས་ཉིད་གཉིས་ཀ་དངོས་སུ་མཁྱེན་པ་མི་འོངས་པས། ཞེས་གསུངས་སོ། །དེས་ན་བསྟོད་པ་བརྒྱ་ལྔ་བཅུ་པར། ཁྱོད་འབའ་ཞིག་གི་ཡེ་ཤེས་ཀྱིས། །ཤེས་བྱ་ཐམས་ཅད་ཁྱབ་ལགས་ཀྱི། །ཁྱོད་ལས་གཞན་པ་ཐམས་ཅད་ཀྱི། །ཤེས་བྱ་ཁོ་ན་ལྷག་པ་ལགས། །ཞེས་པ་ཡང་བློ་རེ་རེ་བའི་དབང་དུ་བྱས་པ་ཤེས་དགོས་སོ། །རྣམ་པ་ཐམས་ཅད་མཁྱེན་པར་འཇོག་ཚུལ་ཡང་གཙོ་བོའི་དབང་དུ་བྱས་ན་ཤེས་བྱ་མཐའ་ཡས་པ་རེ་རེ་ནས་རྟོགས་པ་ལ་མི་བྱེད་ཀྱི། གཞི་བུམ་པ་ལྟ་བུ་གཅིག་ལ་མཚོན་ན་ཡང་དེའི་སྟེང་གི་ཀུན་རྫོབ་པའི་རྣམ་པ་དང༌། དོན་དམ་པ་ཆོས་ཉིད་ཀྱི་རྣམ་པ་གཉིས་ཀ་ཅིག་ཅར་མངོན་སུམ་དུ་རྟོགས་ཏེ་མཉམ་རྗེས་ངོ་བོ་གཅིག་ཏུ་སོང་བ་ནི་དེ་ལ་རྣམ་པ་ཐམས་ཅད་མཁྱེན་པའི་ཡེ་ཤེས་སུ་སོང་བའི་དོན་ཡིན་པས། ཤེར་མདོ་ལས། ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་འཚང་རྒྱ་བར་འདོད་པས་ཤེར་ཕྱིན་ལ་བསླབ་པར་བྱའོ། །ཞེས་ཆོས་ཐམས་ཅད་རྣམ་པ་ཐམས་ཅད་དུ་འཚང་རྒྱ་བར་གསུངས་པ་ཡང༌། བུདྡྷ་ཁོང་དུ་ཆུད་པ་ལའོ་ཞེས་པ་ལྟར། ཆོས་རང་རང་གི་སྟེང་གི་བདེན་གཉིས་ཅིག་ཅར་མངོན་སུམ་དུ་གཟིགས་པའི་དོན་ཡིན་པར་འཕགས་པ་ཆོས་ཀུན་འགྲོ་བའི་མདོ་ལས་གསུངས་སོ། །དོན་གྱི་དབང་འདི་གཟིགས་ཏེ། བྱང་ས་ལས། དེ་བཞིན་གཤེགས་པས་ནི་ཆོས་ཀྱི་ཚོགས་གསུམ་མངོན་པར་རྫོགས་པར་སངས་རྒྱས་ཏེ། དོན་དང་ལྡན་པའི་ཆོས་རྣམས་དང༌། དོན་དང་ལྡན་པ་མ་ཡིན་
པ་རྣམས། ཞེས་པ་ནས། དེ་ལ་རྣམ་པ་ཐམས་ཅད་མཁྱེན་པ་གང་ཡིན་པ་དང༌། མཆོག་མཁྱེན་པ་གང་ཡིན་པ་དེ་གཉིས་གཅིག་ཏུ་བསྡུས་པ་ནི་རྣམ་པ་ཐམས་ཅད་དང་མཆོག་མཁྱེན་པ་ཞེས་བྱའོ། །ཞེས་གསུངས་ཤིང༌། དེའི་ཡུལ་གྱི་སྟོང་ཉིད་ལ་ཡང་གཟིགས་ཚུལ་གྱི་ཆ་ནས་རྣམ་ཀུན་མཆོག་ལྡན་གྱི་སྟོང་ཉིད་དུ་བཤད་དོ། །བྱེ་སྨྲའི་ལུགས་ལ་ཡང༌། སངས་རྒྱས་བཅོམ་ལྡན་འདས་ཀྱིས་མི་ཤེས་པའི་རྒྱུ་བཞི་སོགས་ཉོན་མོངས་ཅན་མ་ཡིན་པའི་མུན་པ་གཏན་དུ་སྤངས་ཏེ་ཡུལ་གང་ལ་དགོངས་པ་གཏད་ཀྱང་མི་མཁྱེན་པ་མི་སྲིད་པས་ཐམས་ཅད་མཁྱེན་པར་འཇོག་ཅེས་ཟེར་ཡང༌། བདེན་གཉིས་གཟིགས་ཚུལ་འདི་ལྟ་བུ་བློར་མ་ཤོང་བའི་དབང་གིས་རྣམ་མཁྱེན་མི་འདོད་པར་བཤད་དེ། བརྒྱད་སྟོང་འགྲེལ་ཆེན་ལས། འདིར་རང་གི་སྡེ་པ་ཁ་ཅིག་ན་རེ། གང་གི་ཚེ་ཡེ་ཤེས་གཅིག་གིས་ཤེས་བྱའི་དཀྱིལ་འཁོར་མ་ལུས་པ་ཅིག་ཅར་ཁྱབ་ན། དེའི་ཚེ་དངོས་པོ་རྣམས་ནི་འདི་ཙམ་དུ་ཟད་དོ་ཞེས་ཡོངས་སུ་ཆད་པས་མཐའ་ཡས་པར་ཁས་བླངས་པ་ལ་གནོད་དོ། །འདི་ལྟར་ཤེས་པ་གཅིག་ལ་ཞུགས་པའི་དངོས་པོ་ལས་གཞན་པའི་དངོས་པོ་ནི་མེད་དོ། །ཞེས་དེ་ལྟར་ཡོངས་སུ་གཅོད་པ་ན་མཐའ་དང་ལྡན་པར་ཇི་ལྟར་མི་འགྱུར་ཞེས་ཟེར་རོ། །ཞེས་སོགས་དགག་སྒྲུབ་རྒྱས་པར་ཤེས་མཚན་གྱི་སྐབས་སུ་གསུངས་སོ། །འདིའི་ཚིག་ཟིན་འགའ་ཞིག་དང༌། དབུ་མ་རྒྱན་ལས། དོན་གྱི་རྣམ་པས་བསྒྱུར་ལྡན་པའི། །རྣམ་ཤེས་སུ་ཞིག་མི་འདོད་པ། །ཞེས་སོགས་ལ་བརྟེན་ནས་བྱེ་སྨྲས་རྣམ་མཁྱེན་མི་འདོད་པའི་རྒྱུ་མཚན་རྣམས་མི་འདོད་པའི་དབང་གིས་ཡིན་པར་སྨྲ་བ་མི་འཐད་དེ། བྱེ་སྨྲ་
ལ་རྣམ་མེད་པ་དང༌། མདོ་སྡེ་པ་ལ་རྣམ་བཅས་པ་ཞེས་གྲགས་ཀྱང༌། དེས་རྣམ་པ་མི་འདོད་ཚུལ་ནི། རིགས་ལྡན་གྲགས་པས། དབང་སྐྱེས་བློ་ནི་རྣམ་མེད་ཀྱི། །ཕྲ་རབ་བསགས་པ་དངོས་སུ་རིག །ཅེས་དང༌། ཀུན་བཏུས་ལས། མིག་ལས་སྐྱེས་བློ་རྣམ་མེད་ཅིང༌། ཞེས་དང༌། བདེ་གཤེགས་གཞུང་གི་རབ་བྱེད་ལས། །རྣམ་པ་མེད་པའི་དབང་སྐྱེས་བློས། །རྡུལ་ཕྲན་བསགས་པ་དངོས་སུ་རིག །ཅེས་སོགས་ཀྱིས་དབང་ཤེས་དམིགས་ཀྱིས་བསལ་ཏེ་རྣམ་མེད་དུ་འཛིན་པར་བཤད་ཀྱི། ཡིད་ཤེས་ལ་མ་ཡིན་ཏེ། ཡིད་ཤེས་ཀྱིས་ཀྱང་ཡུལ་རྣམ་མེད་ཐུག་ཕྲད་དུ་འཛིན་དགོས་ན་འདས་མ་འོངས་སོགས་འཛིན་པ་མི་འཐད་པར་འགྱུར་ལ། མཛོད་ལས། རྣམ་པ་ཤེས་རབ་དང་བཅས་པའི། །དམིགས་དང་བཅས་པས་འཛིན་པར་བྱེད། །ཅེས་དང་མཛོད་འགྲེལ་ལས། རྣམ་པ་ནི་སེམས་དང་སེམས་ལས་བྱུང་བ་ཐམས་ཅད་ཀྱི་དམིགས་པ་འཛིན་པའི་བྱེ་བྲག་ནི་རྣམ་པ་ཡིན་ནོ། །ཞེས་དང༌། གཞན་ཡང་ཟག་མེད་ལམ་བདེན་གྱི་རྣམ་པ་བཅུ་དྲུག་བཤད་པ་ལྟ་བུ་ཆེས་མང་བས་ཤེས་པ་ཐམས་ཅད་རྣམ་མེད་དུ་འདོད་པ་མིན་ནོ། །རྟོག་གེ་འབར་བ་རྩ་འགྲེལ་གྱི་ཀུན་མཁྱེན་བསྒྲུབ་པའི་ལེའུའི་ཕྱོགས་སྔ་སྨྲ་བ་པོ་ནི་ཤེས་བྱ་མཐའ་ཡས་པའི་རྟགས་ཀྱིས་ཐམས་ཅད་མཁྱེན་པ་མེད་པར་བསྒྲུབ་པའི་གཞན་སྡེ་རྣམས་ཡིན་གྱི། བྱེ་སྨྲ་ལྟ་བུ་མ་ཡིན་ཏེ། དེས་མཁྱེན་པ་སྐད་ཅིག་མ་རེ་རེས་ཆོས་ཐམས་ཅད་རྟོགས་པ་མི་འདོད་ཀྱང༌། སྟོབས་བཅུ་ཅི་རིགས་ཀྱི་སྒོ་ནས་ཐམས་ཅད་གཟིགས་པར་འདོད་པའི་ཕྱིར། མཛོད་འགྲེལ་ལས། གང་གི་ཕྱིར་འདིའི་མཁྱེན་པ་ཤེས་བྱ་ཐམས་ཅད་ལ་ཐོགས་པ་མི་མངའ་བར་འཇུག་
པ་དེའི་ཕྱིར་སྟོབས་ཡིན་ནོ། །ཞེས་སོ། །གཞན་ཡང་རྣམ་མཁྱེན་གྱིས་ཆོས་ཐམས་ཅད་ཅིག་ཅར་མངོན་སུམ་སུ་གཟིགས་ན་རང་ཉིད་ཀྱང་གཟིགས་དགོས་ལ། རང་ཉིད་གཉིས་སྣང་ནུབ་པའི་ཚུལ་གྱིས་གཟིགས་ན་རང་ལ་དོན་དམ་དཔྱོད་པའི་ཚད་མར་འགྱུར་བ་དང༌། གཉིས་སྣང་དང་བཅས་པའི་ཚུལ་གྱིས་གཟིགས་ན་རང་ཉིད་རང་ལས་ཐ་དད་དུ་འགྱུར་བ་སོགས་ཀྱི་དོགས་པ་དང༌། དེའི་སྐྱོན་སྤོང་ཚུལ་སོགས་གལ་ཆེ་བ་མང་ཡང་རྗེའི་གསུང་རབ་རྣམས་དང་སྟོང་ཐུན་སོགས་སུ་གསལ་བ་ལས་ཤེས་པར་བྱ་ཡི། འདིར་མང་གིས་དོགས་ནས་མ་སྤྲོས་སོ། །དེ་ལྟར་བདེན་པ་གཉིས་ཅིག་ཅར་མངོན་སུམ་དུ་གཟིགས་པས་རྣམ་མཁྱེན་ཞེས་བཤད་ཅིང༌། བདེན་པ་གཉིས་པོ་དེ་ལ་ཟབ་པ་དང་རྒྱ་ཆེ་བ་ཞེས་ཀྱང་བཤད་དེ། དབུ་མ་འཇུག་པར། ཟབ་མོ་སྟོང་པ་ཉིད་ཡིན་ཏེ། །ཡོན་ཏན་གཞན་རྣམས་རྒྱ་ཆེ་བ། །ཞེས་སྟོང་ཉིད་རང་གི་ངོ་བོ་ལ་མི་འདྲ་བའི་དབྱེ་བ་མེད་ཀྱང་ཤིན་ཏུ་གཏིང་དཔོག་དཀའ་བ་དཔེར་ན་རྒྱ་མཚོ་ཁ་གཏིང་མེད་པར་ཆུའི་རང་བཞིན་དུ་མཚུངས་ཀྱང་ཤིན་ཏུ་ཟབ་པས་གཏིང་མཐའ་གཞལ་དཀའ་བ་དང་འདྲ་སྟེ། དེ་ལ་དགོངས་ནས། རྩ་ཤེས་ལས། དེ་ཕྱིར་ཞན་པས་ཆོས་འདི་ཡི། །གཏིང་རྟོགས་དཀའ་བར་མཁྱེན་གྱུར་ནས། །ཞེས་གསུངས་པ་བཞིན་འདིར་ཡང༌། རྒྱ་མཚོ་ལྟ་བུའི་གཏིང་ལྡན་ཤེས་བྱ་དང༌། །ཞེས་གསུངས་སོ། །ཀུན་རྫོབ་ནི་གཞི་བུམ་པ་ལྟ་བུ་གཅིག་ལ་ཡང༌། རང་སྤྱི། མཚན་མཚོན། རྒྱུ་འབྲས། དགག་སྒྲུབ། བྱ་བྱེད། གཅིག་ཐ་དད། སྤྱི་བྱེ་བྲག །སྒྲ་དོན་གྱི་སྤྱི་ལ་སོགས་པ་རྣམ་
རྟོག་གི་མཐའ་དང་མཉམ་པའི་ཁྱད་པར་མི་འདྲ་བ་མཐའ་ཡས་པ་ཞིག་དབྱེར་ཡོད་པས་རྒྱ་ཆེ་བར་བཞག་པ་ཡིན་ལ། འདིར་ཡང༌། གངྒཱའི་རྡུལ་སྙེད་ཆོས་ཚུལ་མ་ལུས་པ། །ཞེས་གསུངས་ཏེ། རྒྱུད་བླ་མར། ཕྲ་མོ་ཟབ་མོའི་ཚུལ་བསྟན་པ། །སྦྲང་རྩི་རོ་གཅིག་པ་བཞིན་ཏེ། །རྣམ་པ་སྣ་ཚོགས་ཚུལ་བསྟན་པ། །སྣ་ཚོགས་སྒྲུབ་སྙིང་བཞིན་ཞེས་བྱ། །ཞེས་བདེན་གཉིས་གཙོ་བོར་སྟོན་པའི་ཆ་ནས་ཟབ་རྒྱས་ཀྱི་སྡེ་སྣོད་དུ་འཇོག་ཚུལ་གསུངས་པ་ཡང་འདི་དང་གནད་གཅིག་གོ །དེ་ལྟ་བུའི་ཇི་ལྟ་ཇི་སྙེད་ཀྱི་རྣམ་པ་གཉིས་པོ་དེ་ཉིད་རེས་འཇོག་མེད་པར་མངོན་སུམ་དུ་གཟིགས་པའི་ཚུལ་ནི། ལག་མཐིལ་ཤིང་ཏོག་ཇི་བཞིན་མངོན་སུམ་དུ། །དུས་མཐའི་སྐད་ཅིག་ཡུན་ལ་མ་འདྲེས་གཟིགས། །ཞེས་གསུངས་ཏེ། དཔེར་ན་སྐྱུ་རུ་ར་རློན་པ་དེ་ཉིད་ཤིན་ཏུ་དྭངས་པའི་དབང་གིས་ལག་མཐིལ་དུ་བཞག་པའི་ཚེ་ཕྱིའི་ཤུན་པ་དང་ནང་གི་འབྲས་བུ། ལག་པའི་མཐིལ་ཀུན་མི་སྒྲིབ་པར་དུས་མཉམ་དུ་མཐོང་ནུས་པ་ལྟར་ཆོས་ཉིད་ལ་མཉམ་པར་བཞག་བཞིན་དུ་ཆོས་ཅན་མངོན་སུམ་དུ་གཟིགས་ཤིང་ཆོས་ཅན་ཀུན་རྫོབ་པ་རྣམས་གཟིགས་བཞིན་དུ་ཆོས་ཉིད་མངོན་དུ་མཛད་ནུས་ལ། འོན་ཀྱང་ཆོས་ཉིད་ལ་གཟིགས་པའི་ངོར་ཀུན་རྫོབ་ཀྱི་སྣང་བ་མི་འཆར་བས་མ་ཡིན་དགག་གི་སྣང་བར་མི་འགྱུར་ཞིང༌། ཆོས་ཅན་ལ་གཟིགས་པའི་ངོར་སྤྲོས་བྲལ་གྱི་ཚུལ་དུ་མི་འཆར་བས་རྫུན་པའི་སྣང་བ་མི་འགོག་པར་བདེན་གཉིས་སོ་སོའི་སྣང་ཚུལ་གསལ་ལ་མ་འདྲེས་པ་འཇའ་ཚོན་གྱི་མདངས་བཞིན་དུ་འཆར་བ་ཡིན་ཏེ། རྗེ་བླ་མས། དེ་ལྟར་མགོན་ཁྱོད་ཆོས་ཀྱི་དབྱིངས་ལས་ཅུང་ཟད་གཡོ་བ་མེད་བཞིན་དུ། །དུ་མའི་ཤེས་བྱ་
གསལ་བར་སྣང་བ་མེ་ལོང་ནང་དུ་གཟུགས་བརྙན་ནམ། །ནམ་མཁའི་ལམ་ན་འཇའ་ཚོན་བཞིན་དུ་སོ་སོར་མ་འདྲེས་རྫོགས་པར་མཁྱེན། །ཞེས་གསུངས་པ་ལྟར་རོ། །ལ་ལ་དག་བདེན་གཉིས་ཅིག་ཅར་གཟིགས་པ་དང༌། དོན་དམ་ལ་གཟིགས་པའི་ངོར་ཀུན་རྫོབ་མི་འཆར་བ་ནང་འགལ་ལོ་སྙམ་པ་ནི་རིགས་ལམ་མ་བྱང་བའི་སྐྱོན་ཡིན་ཏེ། དཔེར་ན་རས་སྔོན་པོའི་སྟེང་དུ་ཤེལ་གོང་བཞག་པའི་ཚེ་གཉིས་ཀ་ཅིག་ཅར་མཐོང་ཡང་སོ་སོའི་རྣམ་པ་མ་འདྲེས་པར་མཐོང་དགོས་ཀྱི་ཤེལ་གོང་སྔོན་པོར་འཆར་མི་དགོས་ཤིང་རས་དྭངས་གསལ་ཅན་དུ་མཐོང་མི་དགོས་པ་བཞིན་ནོ། །༈ གཉིས་པ་སྟོབས་བཅུའི་ཡོན་ཏན་ལ་བསྟོད་པ་ནི། མཐར་ཐུག་དབྱིངས་ལས་མ་གཡོས་རྩེ་གཅིག་ཏུ། །མཉམ་པར་བཞག་བཞིན་སེམས་ཅན་ཁམས་སྣ་ཚོགས། །མ་འདྲེས་གསལ་ལེར་གཟིགས་པས་རང་རང་གི །བསམ་པ་ཇི་བཞིན་གང་འདོད་ཆོས་རྣམས་སྟོན། །ཞེས་བྱུང༌། ཤོ་ལོ་ཀ་འདིས་རྣམ་པ་ཐམས་ཅད་མཁྱེན་པའི་བདག་རྐྱེན་ལ་བརྟེན་ནས་གཞན་དོན་སྒྲུབ་ཚུལ་གྱི་རིམ་པ་ཆ་ཚང་བ་ཞིག་སྟོན་པར་སྣང་ལ། དེ་ཡང་མདོ་སྡེ་རྒྱན་གྱི་དགོངས་པ་བཞིན་ཟག་མེད་ཡེ་ཤེས་སྡེ་ཚན་ཉེར་གཅིག་ལ་རེ་རེ་བཞིན་སྦྱར་ཏེ་རྒྱུ་འབྲས་ཡོངས་རྫོགས་རེ་བཤད་དུ་ཡོད་ཀྱང༌། བྱང་ས་ལས། སྟོབས་བཅུ་གཙོ་བོར་སྨོས་པ་བཞིན། འཇུག་པ་རྩ་འགྲེལ་དང་བསྟོད་སྤྲིན་རྒྱ་མཚོ་སོགས་སུ་གཙོ་བོ་སྟོབས་བཅུ་དང་སྦྱར་བ་དང་མཐུན་པར་འདིར་ཡང་དེའི་དབང་དུ་བྱས་ནས་བཤད་པར་བྱའོ། །དེ་ཡང་ཆོས་ཀྱི་དབྱིངས་ལ་
རྩེ་གཅིག་ཏུ་ཞུགས་པའི་ངང་ནས་ཆོས་ཅན་ཀུན་རྫོབ་པ་རྣམས་གཟིགས་ཚུལ་ཤོ་ལོ་ཀ་དང་པོར་སོང་ཟིན་པས་སླར་འཆད་མི་དགོས་སྙམ་ན། སྔ་མ་ནི་བདེན་གཉིས་གཟིགས་ཚུལ་གྱི་ཆ་ནས་རྣམ་མཁྱེན་དུ་འཇོག་ཚུལ་བསྟན་པ་ཡིན་ལ། འདིར་སྟོབས་བཅུའི་སྒོ་ནས་གཞན་དོན་སྒྲུབ་ཚུལ་གྱི་རྩ་བར་བསྟན་པ་ཡིན་ནོ། །དེ་ལ་ཁོ་ན་རེ། གཞན་དོན་སྒྲུབ་པ་རྗེས་ཐོབ་ཀྱི་བྱ་བ་ཡིན་ཞིང༌། དེ་ལ་འདི་དང་འདི་བྱའོ་སྙམ་པའི་ཀུན་སློང་གཏོང་དགོས་པས་ཆོས་དབྱིངས་ལ་རྩེ་གཅིག་ཏུ་མཉམ་པར་བཞག་པ་དང་འགལ་སྙམ་ན། འདི་ལྟ་བུའི་འཕྲིན་ལས་ཕུན་ཚོགས་འབྱུང་བ་ཀུན་སློང་གི་རྩོལ་བ་མི་དགོས་པར་མ་ཟད། དེ་འདྲའི་རྩོལ་བ་ཉེ་བར་ཞི་བ་དགོས་ཏེ། སླད་ཀྱི་ཀུན་སློང་གི་རྩོལ་བ་བསྐྱར་མ་ལ་ལྟོས་ན་མར་མེའི་འོད་བཞིན་དུ་ཕྱོགས་རེ་བ་དང་དུས་ཉི་ཚེ་བ་ཙམ་དུ་འགྱུར་ལ། འདིར་ཀུན་སློང་གི་རྒྱུ་བ་གཏན་དུ་ལོག་ཀྱང་སྔོན་གྱི་སྨོན་ལམ་གྱི་དབང་གིས་ཕྱོགས་དུས་རྒྱར་མ་ཆད་པར་འཁོར་བ་མ་སྟོངས་བར་དུ་མཁའ་ཁྱབ་ཀྱི་འཇིག་རྟེན་ཀུན་ཏུ་འཕྲིན་ལས་ལྷུན་གྱིས་གྲུབ་པར་འཇུག་པ། དཔེར་ན་ཉི་མའི་དཀྱིལ་འཁོར་ལ་ཀུན་སློང་མེད་ཀྱང་དུས་ལས་མི་ཡོལ་བར་འཇིག་རྟེན་སྣང་བར་བྱེད་པ་དང༌། ཡིད་བཞིན་གྱི་ནོར་བུ་དང་དཔག་བསམ་གྱི་ཤིང་ལས་དགོས་འདོད་འབྱུང་བ་ལྟ་བུ་ཡིན་པའི་ཕྱིར། རྒྱུད་བླ་མ་ལས། བརྒྱ་བྱིན་རྔ་སྤྲིན་ཚངས་པ་དང༌། །ཉི་མ་ནོར་བུ་རིན་ཆེན་བཞིན། །ཞེས་དང༌། འཇུག་འགྲེལ་ལས། སངས་རྒྱས་བཅོམ་ལྡན་འདས་དེ་དག་ད་ལྟར་རྣམ་པར་རྟོག་པ་མི་མངའ་ཞིང༌། ཡིད་བཞིན་གྱི་ནོར་བུ་དང་དཔག་བསམ་གྱི་ཤིང་དང་འདྲ་བར་ཇི་ལྟར་འཚམ་པར་སེམས་ཅན་གྱི་དོན་སྒྲུབ་པ་ལྷུར་མཛད་ཅིང་ཆོས་ཀྱི་དབྱིངས་
ལས་སྐད་ཅིག་ཀྱང་མི་བསྐྱེད་ལ། སེམས་ཅན་འདུལ་བའི་དུས་ལས་ཀྱང་མི་འདའ་བ་ཞེས་སོགས་གསུངས་སོ། །དེས་ན་རྣམ་རྟོག་གི་རྒྱུ་བ་མཐའ་དག་ལོག་པའི་སྟོབས་ཀྱིས་དེ་བཞིན་ཉིད་ལས་སླར་མི་ལྡང་ཞིང༌། དེ་བཞིན་ཉིད་དང་རོ་གཅིག་པའི་ཡེ་ཤེས་ཀྱི་སྐུ་ལ་རྟག་ཏུ་བཞུགས་པའི་སྟོབས་ཀྱིས་ཉི་མ་དང་དེའི་འོད་ཟེར་བཞིན་འཕྲིན་ལས་ལྷུན་གྲུབ་ཏུ་འབྱུང་བས། འདིའི་ཚེ་ཆོས་དབྱིངས་ལ་མཉམ་པར་བཞག་པ་དང༌། རྗེས་ཐོབ་ཀྱི་མཛད་པ་སྒྲུབ་པ་གཉིས་མི་འགལ་བར་མ་ཟད་ཕན་ཚུན་རྩ་བ་ལྟ་བུར་འགྲོ་སྟེ། བདེན་གཉིས་ལས། གང་ཚེ་ཤེས་དང་ཤེས་བྱ་དང༌། །བདག་ཉིད་རྗེས་སུ་མི་མཐོང་བ། །དེ་ཚེ་མཚན་མ་མི་འབྱུང་ཕྱིར། །གནས་པ་བརྟན་ཕྱིར་མི་བཞེངས་སོ། །ཞེས་དང༌། དབུ་མ་འཇུག་པར། ཞི་སྐུ་དཔག་བསམ་ཤིང་ལྟར་གསལ་གྱུར་ཅིང༌། །ཡིད་བཞིན་ནོར་བུ་ཇི་བཞིན་རྣམ་མི་རྟོག །འགྲོ་གྲོལ་བར་དུ་འཇིག་རྟེན་འབྱོར་སླད་རྟག །འདི་ནི་སྤྲོས་དང་བྲལ་ལ་སྣང་བར་འགྱུར། །ཞེས་སོ། །ཁ་ཅིག་འདི་རྟག་ཏུ་མཉམ་བཞག་ལ་གནས་པའི་དབང་གིས་དེའི་རྒྱུད་ལ་རྗེས་ཐོབ་ཡེ་ཤེས་མེད་པར་འདོད་པ་མི་འཐད་དེ། རྒྱུད་བླ་ཐོགས་འགྲེལ་ལས། དེའི་རྗེས་ལ་ཐོབ་པ་ཤེས་བྱ་ཐམས་ཅད་ཀྱི་ཡེ་ཤེས་ནི་ཤེས་བྱའི་དངོས་པོ་མ་ལུས་པ་རྣམ་པ་ཐམས་ཅད་ལ་འཇུག་པས་ན་འོད་ཟེར་གྱི་དྲ་བ་འཕྲོ་བ་དང་ཆོས་མཚུངས་སོ། །ཞེས་གསུངས་ཤིང༌། རྗེས་ཐོབ་ཏུ་འཇོག་ཚུལ་ཡང༌། དགོངས་པ་རབ་གསལ་ལས། རྗེས་ལ་ཐོབ་པ་ཞེས་པའི་རྗེས་ཀྱི་དོན་ནི་མཉམ་གཞག་ལས་ལངས་པའི་རྗེས་ཞེས་དུས་སྔ་ཕྱིའི་རྗེས་མིན་གྱི།
མཉམ་གཞག་དེའི་སྟོབས་ཀྱིས་ཐོབ་པའམ། བྱུང་བའི་དོན་ནོ། །ཞེས་གསལ་བར་གསུངས་སོ། །དེའི་འོག་ཏུ་སྟོབས་བཅུའི་སྒོ་ནས་གཞན་དོན་སྒྲུབ་ཚུལ་དངོས་བཤད་པ་ལ། སྤྱིར་སྟོབས་བཅུའི་གོ་རིམ་འདྲེན་ཚུལ་ཡང་མི་འདྲ་བ་དུ་མ་ཡོད་དེ། བྱང་ས་ལས། གནས་དང་གནས་མིན་ལས་ཀྱི་རྣམ་སྨིན། བསམ་གཏན་དང་རྣམ་ཐར། དབང་པོ་མཆོག་དམན། མོས་པ་སྣ་ཚོགས། ཁམས་སྣ་ཚོགས། ཐམས་ཅད་དུ་འགྲོ་བའི་ལམ། སྔོན་གནས་རྗེས་དྲན། འཆི་འཕོ་དང་སྐྱེ་བ། ཟག་པ་ཟད་པ་མཁྱེན་པའི་སྟོབས་བཅུ་གསུངས་ཤིང༌། གོ་རིམ་དེ་ལྟར་གསུངས་པའི་རྒྱུ་མཚན་གསུམ་གསུངས་སོ། །ཉི་སྣང་ལས་བཤད་ཚུལ་དེ་དང་མཐུན་ལ། རྒྱན་སྣང་དང་འགྲེལ་ཆུང་ལས་བསམ་གཏན་དང་རྣམ་ཐར་མཁྱེན་པའི་དོད་དུ། ཀུན་ནས་ཉོན་མོངས་དང་རྣམ་བྱང་མཁྱེན་པ་ཞེས་གསུངས་ཀྱང༌། གསེར་ཕྲེང་ལས། མཐར་གནས་དགུའི་རོ་མྱང་བས་ཀུན་ནས་ཉོན་མོངས་པ་དང༌། དེ་མི་དམིགས་པས་རྣམ་པར་བྱང་བ་ཞེས་སྔ་མ་དང་དོན་མཐུན་པར་གསུངས་སོ། །འཇུག་འགྲེལ་ལས། ས་བཅུ་པའི་མདོ་དང་བསྟུན་ཏེ། མོས་པ་དང༌། ཁམས་དང༌། དབང་པོ་དང༌། ཐམས་ཅད་དུ་འགྲོ་བའི་ལམ་དང༌། བསམ་གཏན་དང་རྣམ་ཐར་མཁྱེན་པ་ཞེས་གོ་རིམ་སྔ་མར་མི་མཐུན་ཞིང་དང་པོ་གཉིས་དང་ཕྱི་མ་གསུམ་འདྲའོ། །རྗེས་འཇམ་དབྱངས་ལ་བསྟོད་པར་ཡང༌། ཕྱི་མ་བཞིན་གསུངས་ལ། འདི་ཡང་དེ་དང་སྒོ་བསྟུན་པར་སྣང་ཞིང༌། དེ་ལ་གནས་དང་གནས་མིན་མཁྱེན་པའི་སྒོ་ནས་བྱ་བ་དང་བྱ་བ་མ་ཡིན་པ་ཐམས་ཅད་སོ་སོར་འབྱེད་པས་མདོར་བསྟན་དང༌། དེའི་འོག་མ་བཞིས་སྣོད་དུ་རུང་མི་རུང་གི་གདུལ་བྱ་ངོས་
བཟུང་བ་ཡིན་ཏེ། རྒྱུད་བླ་མར། གང་དག་མོས་དགེ་ཕུན་སུམ་ཚོགས་ལྡན་བློ། །དེ་དག་རྗེས་སུ་བཟུང་ཕྱིར། ཞེས་མོས་པ་ཕུན་སུམ་ཚོགས་པ། དགེ་བའི་ལས་བསོད་ནམས་ཀྱི་མཐུ་ཅན། དབང་པོ་གསལ་བའི་བློ་དང་ལྡན་པ་གསུམ་དགོས་པར་གསུངས་ལ། དེ་གསུམ་ནི། མོས་པ་སྣ་ཚོགས་དང༌། ལས་ཀྱི་རྣམ་སྨིན་དང༌། དབང་པོ་མཆོག་དམན་མཁྱེན་པ་གསུམ་གྱིས་འགྲུབ་བོ། །དེ་དག་གི་རྩ་བ་བག་ལ་ཉལ་གྱི་ས་བོན་ནམ་ཁམས་མི་འདྲ་བའི་དབང་གིས་འབྱུང་བས། འདིར་ཡང༌། མཉམ་པར་བཞག་བཞིན་སེམས་ཅན་ཁམས་སྣ་ཚོགས། །མ་འདྲེས་གསལ་ལེར་གཟིགས་པས། ཞེས་ཁམས་སྣ་ཚོགས་མཁྱེན་པའི་སྟོབས་དངོས་སུ་བསྟན་ནས་གཞན་བཞི་དོན་གྱིས་བསྡུས་ཏེ་གདུལ་བྱའི་ཁྱད་པར་གསུངས་སོ། །དེ་ནས་སྟོབས་ལྷག་མ་ལྔས་གདུལ་བྱ་དེ་དག་གོང་དུ་འཁྲིད་ཚུལ་སྟོན་པ་ལ། རང་རང་གི །བསམ་པ་ཇི་བཞིན་གང་འདོད་ཆོས་རྣམས་སྟོན། །ཞེས་གསུངས་ཏེ། ཐམས་ཅད་དུ་འགྲོ་བའི་ལམ་མཁྱེན་པས་འཁོར་བ་དང་ངན་སོང་སོགས་ཀྱི་ལམ་ལས་བཟློག་སྟེ་བསམ་པ་མཆོག་དམན་གྱི་གོ་རིམ་བཞིན་ཆོས་བསྟན་ནས་མངོན་མཐོ་དང་ངེས་ལེགས་ཀྱི་ལམ་ལ་འགོད་ཚུལ་སྤྱིར་བསྟན། དེ་ནས་བསམ་གཏན་དང་རྣམ་ཐར་མཁྱེན་པས་ཉོན་མོངས་མངོན་གྱུར་མགོ་གནོན་པའི་ཐབས་ལ་སྦྱོར། སྔོན་གནས་རྗེས་དྲན་དང༌། འཆི་འཕོ་སྐྱེ་བ་དྲན་པ་གཉིས་ཀྱིས་རྟག་ཆད་ཀྱི་མཐའ་སྤོང་ཞིང༌། འཁོར་བ་གཏིང་མཐའ་མེད་ཚུལ་ལ་འཇིགས་པའི་ངེས་འབྱུང་དང་མར་ཤེས། རང་ཉམས་ལ་དཔགས་པའི་བྱམས་
སྙིང་རྗེ་བྱང་ཆུབ་ཀྱི་སེམས་བསྒོམ་པ་སོགས་ལ་སྦྱོར། ཟག་པ་ཟད་པ་མཁྱེན་པའི་སྟོབས་ཀྱིས་འཁོར་བའི་སྡུག་བསྔལ་ཕྲ་རགས་ཀྱི་རྩ་བ་ཉོན་མོངས་པ་དང་དེའི་བག་ཆགས་ཤེས་སྒྲིབ་ཀྱིས་བསྡུས་པ་མཐའ་དག་ཟད་པར་སྤོང་བའི་ལམ་ལ་སྦྱོར་བ་སྟེ། བྱང་ས་ལས། སེམས་ཅན་ཐམས་ཅད་ཀྱི་དགོས་པ་བྱེད་ནུས་པ་དང༌། ཐེ་ཚོམ་ཐམས་ཅད་གཅོད་ནུས་པ་ནི་དེ་བཞིན་གཤེགས་པའི་མཛད་པ་གསུམ་པ་སྟེ། དེ་ནི་དེ་བཞིན་གཤེགས་པས་སྟོབས་བཅུས་སྒྲུབ་པར་མཛད་དོ། །ཞེས་གསུངས་པ་བཞིན། མདོར་ན་འགྲོ་བ་ཞི་བའི་འཕྲིན་ལས་མངོན་མཐོ་ལ་འགོད་པ་ནས་མི་གནས་པའི་མྱང་འདས་ལ་འགོད་པའི་བར་གཞན་དོན་འཕྲིན་ལས་ཡོངས་སུ་རྫོགས་པས་བདག་རྐྱེན་བྱེད་ཚུལ་ཡེ་ཤེས་ཆོས་སྐུའི་ཐུན་མོང་མ་ཡིན་པའི་ཡོན་ཏན་གྱི་གཙོ་བོ་མཐིལ་ཕྱིན་པར་བརྗོད་པ་ཡིན་ནོ། །སྟོབས་སུ་འཇོག་ཚུལ། སྟོབས་སོ་སོའི་རྣམ་གཞག་མངོན་པ་གོང་འོག་གི་འདོད་པ་མི་འདྲ་བའི་ཚུལ་སོགས་བརྗོད་པར་བྱ་བ་མང་ཡང་མ་སྤྲོས་སོ། །༈ གཉིས་པ་སྔགས་ཀྱི་ཐུན་མོང་མ་ཡིན་པའི་དབང་དུ་བྱས་ནས་བསྟོད་པ་ལ། སྤྱི་དོན་དང༌། གཞུང་དོན་གཉིས། དང་པོ་ནི། གསུང་གི་ཡོན་ཏན་རྣམས་གསང་དབང་གི་ལམ། ཀུན་རྫོབ་སྒྱུ་མའི་རྫོགས་རིམ་གྱི་ལག་རྗེས་སུ་བསྟན་པ་ན། ཐུགས་ཀྱི་ཡོན་ཏན་རྣམས་ཤེར་དབང་གི་ལམ་དོན་དམ་འོད་གསལ་གྱི་རྫོགས་རིམ་བསྒོམ་པའི་ལག་རྗེས་སུ་འགྲུབ་བོ། །དེ་ལྟ་བུའི་འོད་གསལ་གྱི་ཡེ་ཤེས་བདེ་སྟོང་དབྱེར་མི་ཕྱེད་པ་དེ་ཆོས་ཕུང་བརྒྱད་ཁྲི་བཞི་སྟོང་གི་བརྗོད་དོན་ཀུན་ལ་རྒྱས་འདེབས་པའི་ཁྱབ་བྱེད་ལྟ་བུ་དང༌། དེ་དག་གི་སྙིང་པོའི་དོན་མཐར་ཐུག་པ་ཡིན་ཏེ། རྡོ་རྗེ་
ཕྲེང་བ་ལས། ཆོས་ཕུང་བརྒྱད་ཁྲི་བཞི་སྟོང་ཁྱབ། །མདོར་བསྡུས་ཆོས་ཀྱི་ཕྱག་རྒྱ་འོ། །ཞེས་དང་། རིམ་ལྔ་ལས། ཆོས་ཕུང་བརྒྱད་ཁྲི་བཞི་སྟོང་ནི། །ཐུབ་པ་ཆེན་པོས་གསུངས་པ་ལས། །མངོན་པར་བྱང་ཆུབ་མཚན་ཉིད་ནི། །སྙིང་པོ་ལས་ནི་སྙིང་པོར་གསུངས། །ཞེས་དང་།་གསང་བ་གྲུབ་པ་ལས། དེ་ལས་གཞན་དག་ཡོད་མིན་པས། །བདེ་ཆེན་ལས་གཞན་གསུངས་པ་མེད། །ཅེས་སོ། །མདོ་རྒྱུད་ཐམས་ཅད་ཀྱིས་འོད་གསལ་བདེ་བ་ཆེན་པོའི་ཡེ་ཤེས་བསྟན་པར་གསུངས་པའི་དོན་ནི། ཕར་ཕྱིན་ཐེག་པ་སོགས་ལས་དངོས་སུ་དེ་ཉིད་བསྟན་པ་མིན་ཡང་། དེའི་ཡུལ་གྱི་སྟོང་ཉིད་དཔྱིས་ཕྱིན་པར་བསྟན་ནས་རིམ་གྱིས་དེ་ཉིད་བདེ་བ་ཆེན་པོའི་ཡེ་ཤེས་ཀྱི་སྒོ་ནས་ཡུལ་དུ་བྱེད་པའི་འོད་གསལ་དངོས་ལ་འཁྲིད་བཞེད་པ་ཡིན་པས། མཐར་ཐུག་གི་དགོངས་གཞིའི་ཆ་ནས་མདོ་རྒྱུད་མཐའ་དག་གིས་འོད་གསལ་དེ་ཉིད་བསྟན་པར་གསུངས་པ་ཡིན་ཏེ། རིམ་ལྔ་གསལ་སྒྲོན་ལས། གང་ལ་བསམས་ནས་གསུངས་པའི་དགོངས་གཞིའི་དོན་དེ་རྣལ་འབྱོར་བླ་མེད་པའི་ལམ་ཐུན་མོང་མ་ཡིན་པ་ཡིན་ཀྱང་། དེ་ལ་བསམས་ནས་སྒྲ་གཞན་གྱིས་བསྟན་པའི་སྒྲས་ཟིན་གྱི་དོན་དེ་རྒྱུད་སྡེ་འོག་མའི་ལམ་ལ་ཡང་མི་འགལ་བ་ཡིན་ཏེ། འདི་སྐབས་མང་པོ་ཞིག་ཏུ་གསུང་རབ་འགྲེལ་པ་ལ་ཤིན་ཏུ་མཁོ་བ་ཞིག་སྣང་ངོ་། །ཞེས་གསུངས་པའི་ཕྱིར་རོ། །དེར་མ་ཟད་ཀུན་མཁྱེན་འཇམ་དབྱངས་བཞད་པས། གྲུབ་མཐའ་འོག་མའི་ལྟ་བ་གོང་མའི་སྟེགས། །ཞེས་གསུངས་པ་ལྟར། བྱེ་སྨྲའི་ལུགས་ཀྱི་གང་ཟག་གི་བདག་མེད་རགས་
པའི་ལྟ་བ་ཚུན་ཆད་འོད་གསལ་འགྲུབ་པའི་ཡན་ལག་ཏུ་འཁྱེར་དགོས་པ་ཤེས་པའི་ཕྱིར་དུ། བརྟག་པ་ཕྱི་མའི་ལེའུ་བརྒྱད་པར། དེ་ལ་བྱེ་བྲག་སྨྲ་བ་བསྟན། །མདོ་སྡེ་པ་ཡང་དེ་བཞིན་ནོ། །དེ་ནས་རྣལ་འབྱོར་སྤྱོད་པ་ཉིད། །དེ་ཡི་རྗེས་སུ་དབུ་མ་པ། །སྔགས་ཀྱི་རིམ་པ་ཀུན་ཤེས་ནས། །དེ་རྗེས་ཀྱཻ་རྡོ་རྗེ་བསྟན། ཞེས་གསུངས་པ་ཡིན་ཏེ། བརྟག་གཉིས་རྣམ་བཤད་ལས། གྲུབ་མཐའ་བཞི་སྟོན་པའི་གཙོ་བོར་བདག་མེད་པའི་ལྟ་བ་གཏན་ལ་འབེབས་པའི་ཆེད་ཡིན་ཏེ། བླ་མེད་ཀྱི་རྒྱུད་སྡེར་ལྷན་སྐྱེས་ཀྱི་བདེ་བ་བསྐྱེད་པའི་གནད་དུ་མ་གསུངས་པ་ནི་ཡུལ་ཅན་ཁྱད་པར་བ་བདེ་བ་ཆེན་པོ་དེ་ཉིད་བསྒོམ་པའི་ཕྱིར་དུ་ཡིན་ལ། དེ་ཁོ་ན་ཉིད་ཀྱི་དོན་ཡང་གྲུབ་མཐའ་སྨྲ་བ་གཞན་གསུམ་གྱིས་ཇི་ལྟར་གཏན་ལ་ཕབ་པ་རྣམས་མ་ཤེས་ན་དྲང་དོན་དང་ངེས་དོན་གྱི་མདོ་སྡེ་རྣམས་ལས་ལྟ་བའི་རིམ་པ་དུ་མ་གསུངས་པ་དང་། གྲུབ་མཐའ་གོང་འོག་རྣམས་ཀྱིས་བདག་མེད་གཏན་ལ་འབེབས་པའི་དགག་བྱ་ཕྲ་རགས་རྣམས་ཀྱི་དམིགས་པ་གང་ཡང་མི་ཕྱེད་ཅིང་། དེ་ལྟར་ན་དབུ་མའི་ལྟ་བ་ཡང་ལེགས་པར་མི་རྟོགས་པས་བདེ་སྟོང་སྦྱོར་བའི་ལྟ་བ་སྒྲོ་འདོགས་ལེགས་པར་ཆོད་པ་མི་རྙེད་པའི་ཕྱིར། དང་པོ་བྱེ་བྲག་སྨྲ་བ་བསྟན། །ཞེས་སོགས་གསུངས་པ་ཡིན་ནོ། །ཞེས་འདོམས་པར་མཛད་པ་ལྟར་རོ། །མདོ་སྡེ་ལས་ཆུ་བོ་ཐམས་ཅད་རྒྱ་མཚོར་འབབ་ཅིང་གཞོལ་བ་ལྟར་གསུང་རབ་མཐའ་དག་ཆོས་ཉིད་ལ་གཞོལ་བར་གསུངས་པའི་རྩ་བ་ཡང་འདི་ལ་ཐུག་ཅིང་། དེ་ལྟར་མདོ་རྒྱུད་ཀུན་གྱི་སྙིང་པོའི་དོན་ཡིན་པར་མ་ཟད། རྣལ་འབྱོར་མ་རྒྱུད་ཀྱི་སྐབས་འདིར་རང་གི་སྒོས་ཆོས་ལྟ་བུའི་བརྗོད་བྱའི་གཙོ་བོ་ཡིན་ཏེ།
ཕ་རྒྱུད་མ་རྒྱུད་གཉིས་ཀྱི་འཇོག་བྱེད་ཀྱང༌། ཞུ་བ་པོ་དང༌། ལྷ་ཚོགས་ཡབ་ཡུམ་ཤས་ཆེ་ཆུང༌། ཞལ་ཕྱག་མཉམ་མི་མཉམ། གླེང་གཞི་ཐོག་མར་སྨོས་ཚུལ། གདུལ་བྱ་གང་གཙོ་སོགས་སྔ་མ་རྣམས་ཀྱི་བཤད་ཚུལ་སྣ་ཚོགས་ཡོད་ཀྱང༌། རང་ལུགས་འཐད་ལྡན་ནི་ཀུན་རྫོབ་སྒྱུ་མའི་སྐུ་དང་དོན་དམ་འོད་གསལ་གཉིས་གཙོ་བོར་སྟོན་ཚུལ་གྱིས་འཇོག་དགོས་ཏེ། གུར་གྱི་ལེའུ་བཅུ་གསུམ་པ་ལས། ཤེས་རབ་ཕ་རོལ་ཕྱིན་པའི་ཐབས། །འདི་ནི་རྣལ་འབྱོར་མར་བརྗོད་དོ། །ཕྱག་རྒྱ་ཆེན་པོ་རབ་སྦྱོར་བས། །གང་ཕྱིར་དེ་ཉིད་ལ་འཇུག་པ། །རྣལ་འབྱོར་མ་ཡི་རྒྱུད་ཅེས་བྱ། །ཞེས་དང༌། གྲུབ་ཆེན་ནག་པོ་སྤྱོད་པས། རྣལ་འབྱོར་གྱི་ནི་རྒྱུད་རྣམས་སུ། །འདི་སྐད་ཅེས་སོགས་པས་གང་གསུངས། །དེ་ནི་རྣལ་འབྱོར་མ་རྒྱུད་དུ། །མེ་སྟེ་གཞན་དག་སོག་མ་འདྲ། །ཞེས་གླེང་གཞིའི་ཨེ་ཝཾ་གྱི་དོན་བདེ་སྟོང་གི་ཡེ་ཤེས་མ་རྒྱུད་ཀྱི་བརྗོད་བྱའི་གཙོ་བོར་གསུངས་སོ། །ཁྱད་པར་དུ་རྒྱུད་འདི་ཉིད་ལས་བདེ་སྟོང་གི་ཡེ་ཤེས་རྩལ་དུ་བཏོན་ནས་འཆད་པའི་ཚུལ་ནི། ལེའུ་དང་པོའི་མགོར། དངོས་པོ་ཉིད་ཀྱིས་རྣམ་གྲོལ་ཞིང༌། །དངོས་པོའི་འཆིང་བས་འཆིང་བར་འགྱུར། །ཞེས་དངོས་པོའི་རང་བཞིན་སྟོང་ཉིད་མ་ཤེས་པས་འཆིང་ཞིང་ཤེས་ན་གྲོལ་ཚུལ་དང༌། སྟོང་པ་ཉིད་དེ་ཡུལ་ཅན་བདེ་བ་ཆེན་པོའི་ཡེ་ཤེས་ཀྱིས་རྟོགས་པ་ལ་ལུས་ལ་གནད་དུ་བསྣུན་དགོས་ཤིང༌། གང་ལ་གནད་དུ་བསྣུན་པའི་རྩའི་གནད་སོགས་སྟོན་པར། ལུས་ལ་ཡེ་ཤེས་ཆེན་པོ་གནས། །ཞེས་སོགས་གསུངས་པ་དང༌། མདོར་ན་རྒྱུད་ཀྱི་འགོར། ཨེ་ཝཾ་མ་ཡ་ཞེས་ཨེ་གྲུ་གསུམ་བྷ་གའི་རྣམ་པ་
དང་། མཇུག་རྫོགས་མཚམས་སུ་ཡང༌། བདེ་ཆེན་སྟེར་བའི་ཟེའུ་འབྲུ་ལ། ཨཱཿ ཡི་རྣམ་པའོ་ཞེས་བདེ་སྟོང་མཚོན་པའི་ཨཱཿ ཡིག་ཐོག་མཐའ་གཉིས་ཀར་སྦྱར་བའི་བར་དུ་རྒྱུད་རྫོགས་པར་ཆུད་པས་དེ་ཉིད་བརྗོད་བྱའི་གཙོ་བོ་གཅིག་པུར་སྟོན་པ་ཡིན་ནོ། །ཡུལ་སྟོང་པ་ཉིད་གང་དང་བདེ་སྟོང་སྦྱོར་བའི་སྟོང་པ་ཡང་གྲུབ་ཆེན་མཚོ་སྐྱེས་ཀྱི་བཞེད་པ་ལྟར་ཐལ་འགྱུར་བའི་ལུགས་བཞིན་བྱེད་དགོས་ཏེ། བརྟག་པ་དང་པོའི་ལྔ་པ་དེ་ཁོ་ན་ཉིད་ཀྱི་ལེའུ་ལས། ངོ་བོ་གཟུགས་མེད་མཐོང་བ་མེད། །སྒྲ་མེད་ཐོས་པ་པོ་ཡང་མེད། །ཅེས་པ་ནས། སེམས་དང་སེམས་ལས་བྱུང་བ་མེད། །ཅེས་སོགས་དང༌། དེའི་དཀའ་འགྲེལ་པདྨ་ཅན་ལས། ངོ་བོ་ཉིད་ཀྱི་གཟུགས་ལ་སོགས་པའི་རང་བཞིན་མེད་དེ། ངོ་བོ་མེད་ཅེས་བྱ་བའི་དོན་ཏོ། །ཞེས་དང༌། རྣམ་པ་ཐམས་ཅད་ཀྱི་ཐམས་ཅད་དུ་དངོས་པོ་མེད་པ་ལ་ཞེས་སོགས་རྩ་ཤེས་ཀྱི། དངོས་པོ་གང་དག་གང་ན་ཡང༌། །སྐྱེ་བ་ནམ་ཡང་ཡོད་མ་ཡིན། །ཞེས་པ་དང་ཚུལ་མཐུན་པར་བཤད་དོ། །བྷ་ཝ་བྷ་དྲ་སོགས་ཀྱིས་རྒྱུད་འདི་རྣལ་འབྱོར་སྤྱོད་པའི་དབུ་མ་པའི་ལུགས་སུ་བཀྲལ་ཞིང༌། ཤཱནྟི་པས་སེམས་ཙམ་དུ་བཀྲལ་ལ། དེའི་རྒྱུ་མཚན་ཡང༌། འདི་ཉིད་ཀྱི་བཤད་པའི་རྒྱུད་གུར་གྱི་དྲུག་པ་ལས། ཡུལ་དང་དབང་པོའི་རང་བཞིན་ནི། །སེམས་ལས་ཕྱི་རོལ་གྱུར་མེད་ཀྱང༌། །གཟུགས་སོགས་སོ་སོར་སྣང་བ་རྣམས། །སེམས་ཉིད་ཁོ་ན་སྣང་བ་ཡིན། །ཞེས་དང༌། ཕྱི་ཡི་དོན་དུ་བཏགས་པ་སྟེ། །ཐམས་ཅད་སེམས་ཀྱི་རྣམ་འཕྲུལ་ཞིང༌། །ཞེས་སོགས་ལ་བརྟེན་པར་སྣང་ཡང༌། དེ་ནི་དཔལ་ལྡན་ཟླ་བས། དེས་ན་སེམས་ལས་གཞན་པའི་བྱེད་པ་པོ། །འགོག་
གི་གཟུགས་ཉིད་འགོག་པ་མ་ཡིན་ནོ། །ཞེས་པ་ལྟར་སེམས་གཙོ་བོར་སྟོན་པ་ཡིན་གྱི། ཕྱི་དོན་བཀག་པ་མིན་ནོ། །དེར་མ་ཟད་གུར་ལས། ཀུན་རྫོབ་ཏུ་ནི་འཇིག་རྟེན་ཡོད། །དཔྱད་པས་གང་ནའང་འཇིག་རྟེན་ཅི། །ཞེས་ཆོས་ཐམས་ཅད་དོན་དམ་པར་མེད་མཉམ་དང༌། ཐ་སྙད་དུ་ཡོད་མཉམ་དུ་གསུངས་པ་ལས་མཚན་ཉིད་གསུམ་ལ་བདེན་པར་ཡོད་མེད་ཁྱད་དབྱེ་བའི་ཟུར་ཙམ་ཡང་མེད་པས་སེམས་ཙམ་དང་མཐུན་པའི་གནས་མེད་དོ། །བོད་སྔ་མ་ཁ་ཅིག་སེམས་ཙམ་དང་ཐལ་རང་གི་ལུགས་ཀུན་བཀག་ནས་དེའི་གོང་མར་ཁས་འཆེ་བ་ནི་རང་ཉིད་སངས་རྒྱས་པའི་གྲུབ་མཐའ་བཞིའི་གྲངས་ནས་འབྱིན་པས་མི་འཐད་ཅེས་བརྟག་གཉིས་རྣམ་བཤད་དུ་གསུངས་སོ། །དེས་ན་སྔགས་ཀྱི་བདེ་བ་ཆེན་པོའི་འཛིན་སྟངས་སུ་བྱ་རྒྱུའི་སྟོང་ཉིད་མཐར་ཐུག་ནི་ཐལ་འགྱུར་བའི་ལུགས་ཀྱི་དེ་ཁོ་ན་ཡིན་པས། ཟབ་མོ་དབུ་མའི་ལྟ་བ་དང་གསང་ཆེན་རྡོ་རྗེ་ཐེག་པ་གཉིས་མེད་མི་རུང་བར་ཟུང་དུ་འཇུག་དགོས་པའི་རྩ་བ་ཡང༌དེ་ལ་ཐུག་ཅིང༌། དེའི་དབང་གིས་རྗེ་བླ་མས་རྒྱལ་བ་དབང་པོའི་ཏོག་གི་སྤྱན་སྔར་དམ་བཅས་པ་བཞིན་དུ་དེ་ལྟ་བུའི་ལམ་བཟང་མཁས་པ་སྔ་མ་མང་པོས་མ་ཐོན་པ་རྣམས་ལག་མཐིལ་གྱི་རྫས་བཞིན་དུ་གསལ་བར་མཛད་པའི་བཀའ་དྲིན་ནི་གངས་ཅན་པ་ཡོངས་ཀྱིས་འཁོར་ཐབས་མ་མཆིས་པས་ཟབ་མོའི་དོན་ལ་བག་ཆགས་ཅི་ཐེབས་ཀྱི་སྒྲུབ་པའི་མཆོད་པ་ལྷུར་བྱའོ། །སྟོང་པ་དེ་ཉིད་ཡུལ་དུ་བྱེད་པའི་བདེ་བ་ཡང་སྔར་བཤད་པ་ལྟར་ཕར་ཕྱིན་ཐེག་པ་དང༌། རྒྱུད་སྡེ་འོག་མར་གསུངས་པའི་བདེ་བས་མི་ཆོག་གི་
ལྷན་སྐྱེས་ཀྱི་བདེ་བ་དགོས་ལ། ལྷན་སྐྱེས་ཀྱི་བདེ་བའི་ནང་ནས་ཀྱང་ཞུགས་གནས་ཐིམ་གསུམ་བྱས་པ་ལས་དྷཱུ་ཏཱིའི་ནང་གི་གཏུམ་མོ་ཁྱད་པར་ཅན་འབར་ཏེ། བྱང་སེམས་ཞུ་བ་ལམ་དེ་ཉིད་ནས་འོངས་པའི་དགའ་བ་གཞན་གསུམ་ལས་ཁྱད་པར་དུ་གྱུར་པ་ཞིག་རྫོགས་རིམ་གྱི་ཐུན་མོང་མ་ཡིན་པའི་སྐབས་འདིའི་ལྷན་སྐྱེས་སུ་འཇོག་གི་སྤྱིར་ལྷན་སྐྱེས་ཀྱི་བདེ་བ་ཙམ་ནི་དབང་དུས་དང་བསྐྱེད་རིམ་སོགས་སུ་ཡང་ཡོད་དེ། སྔགས་རིམ་ལས། དེས་ན་དང་པོ་དབང་དུས་ཀྱི་དགའ་བཞི་དང༌། དེ་ནས་བུམ་དབང་གི་ལམ་བསྐྱེད་རིམ་གྱི་དུས་ཀྱི་དགའ་བཞི་དང༌། ཞེས་པ་ནས། བྱང་སེམས་ནོར་བུའི་ནང་དུ་གནས་ཤིང་ཕྱིར་མ་འཕོས་པའི་དུས་ཀྱི་ལྷན་སྐྱེས་སྐྱེ་བ་ཙམ་གྱི་ལམ་བསྒོམ་པ་ལ་དབང་གསུམ་པ་བསྐུར་མི་དགོས་སོ། །ཞེས་དབང་བཞིའི་ལམ་སོ་སོ་དང་འགྲེལ་པའི་དགའ་བཞི་སོ་སོར་ཡོད་པས་ལྷན་སྐྱེས་ཐམས་ཅད་འོད་གསལ་གྱི་ལམ་འདིར་འདུ་མི་དགོས་པར་གསུངས་སོ། །དེ་ལ་ཁ་ཅིག་ལྷན་སྐྱེས་ཀྱི་དགའ་བ་ནི་རྫོགས་རིམ་ཁོ་ནའི་ཡིན་གྱི། བསྐྱེད་རིམ་ལ་མེད་དེ། བརྟག་པ་དང་པོའི་བརྒྱད་པ་ལས། རྫོགས་པའི་རིམ་པའི་ཕྱོགས་ལ་ནི། །འདི་ལྟར་ལྷན་ཅིག་སྐྱེས་རྣམ་བཞི། །ཞེས་རྫོགས་རིམ་དམིགས་ཀྱིས་བསལ་བས་སོ་སྙམ་ན། དེ་ནི་བསྐྱེད་རིམ་ལ་ལྷན་སྐྱེས་ཀྱི་དགའ་བ་ཡོད་པའི་ཤེས་བྱེད་ཡིན་གྱི། མེད་པའི་ཤེས་བྱེད་མིན་ཏེ། བརྟག་གཉིས་རྣམ་བཤད་ལས། བསྐྱེད་རིམ་ལ་རླུང་དྷཱུ་ཏཱིར་ཞུགས་པ་མིན་པའི་ཞུ་བདེ་ལ་ལུས་ཀྱི་གནས་ཀྱི་སྒོ་ནས་དགའ་བཞིར་ཕྱེ་བ་ཙམ་ཞིག་ཡོད་ཀྱང༌། ལྷན་སྐྱེས་ལ་བཞིར་འབྱེད་པ་མེད་པར་ངེས་པ་དང༌། རྫོགས་རིམ་པའི་
མས་བརྟན་གྱི་མཚམས་ཤིག་ནས་དེ་ལྟར་འབྱེད་རྒྱུ་ཡོད་པར་སྟོན་གྱི། ཞེས་བསྐྱེད་རིམ་ལ་ལྷན་སྐྱེས་ཙམ་འཇོག་ཀྱང༌། དེའི་ལྷན་སྐྱེས་ལ་དགའ་བཞིར་འབྱེད་ཚུལ་མེད་པར་གསུངས་པས། དེའི་ལྷན་སྐྱེས་ལ་དགའ་བ་བཞི་མེད་ན་དེ་ལ་ལྷན་སྐྱེས་ཀྱི་དགའ་བ་གཏན་མེད་པའི་ཁྱབ་པ་ཚང་བས་ཀྱང་མི་འགྲུབ་བོ། །བརྟགས་དང་པོའི་བཅུ་པ་ལས། ཡང་ན་ཐམས་ཅད་བདག་ཉིད་དེ། །ཡང་ན་ཀུན་གྱི་རྣམ་པར་སྤངས། །ཞེས་གསུངས་པ་ཡང༌། རྫོགས་རིམ་དངོས་གྲུབ་སྙེ་མ་ལས་རིམ་པ་གཉིས་ཀས་དགའ་བ་དང་པོ་གསུམ་ལ་ལྷན་སྐྱེས་སུ་འཇོག་ཚུལ་ཡོད་མེད་དང་སྦྱར་ཏེ་སྔ་མ་བཞིན་གསུངས་ཤིང༌། མཁས་གྲུབ་རྗེའི་བརྟག་གཉིས་རྣམ་བཤད་ལས། ལྷན་སྐྱེས་གང་དང་དབྱེར་མི་ཕྱེད་པར་སྦྱར་བའི་རང་བཞིན་རྣམ་དག་གི་ཆ་ནས་དེ་ཉིད་དགའ་བ་གསུམ་པོ་ཐམས་ཅད་ཀྱི་བདག་ཉིད་ཡིན་ལ། ཡང་ན་ལྷན་སྐྱེས་ཀྱི་ཐུན་མོང་མ་ཡིན་པའི་མཚན་ཉིད་ཀྱི་ཆ་ནས་དགའ་བ་གཞན་གསུམ་པོ་ཀུན་གྱིས་སྤངས་ཞེས་བཤད་པ་ཡིན་པས་མི་འགལ་ལ། ཞེས་གསུངས་པ་གསུང་ཟིན་སྔ་མ་དང་ཅུང་མི་འདྲ་ཡང༌། དོན་གྱི་དགོངས་པ་ཤིན་ཏུ་མཐུན་ཏེ། འདིར་རང་བཞིན་རྣམ་དག་གི་ཆ་ནས་དགའ་བ་གསུམ་ལ་ཁྱབ་པར་བཤད་པ་དེའི་ཡུལ་སྟོང་ཉིད་ཀྱིས་ཁྱབ་པ་ལ་བྱེད་ན་ཆོས་ཐམས་ཅད་ལ་འདྲ་བས་དགའ་བ་གསུམ་སྨོས་དོན་མེད་ཀྱང༌། འདིའི་དགོངས་པ་ནི་ལྷན་སྐྱེས་སུ་འཇོག་ཚུལ་ལ་སྟོང་བཞིའི་ངེས་པ་འདྲེན་ཚུལ་གྱིས་བཞག་པ་དང༌། གནས་སོ་སོར་བདེ་ཉམས་འདྲེན་ཚུལ་གྱིས་བཞག་པ་གཉིས་ཡོད་པས་རྫོགས་
རིམ་ཁྱད་པར་ཅན་གྱི་མས་བརྟན་གྱི་དགའ་བ་དང་པོ་གསུམ་ཡང་སྟོང་པ་ཉིད་ལ་རོ་གཅིག་ཏུ་ཞུགས་ཏེ་ངེས་པ་འདྲེན་ཕུལ་ཆེ་བའི་ཆ་ནས་ལྷན་སྐྱེས་སུ་འགྲོ་བ་དང༌། གནས་སོ་སོར་བདེ་བ་སྐྱེད་ཚུལ་ནང་གསེས་ཀྱི་ཤུགས་ཆེ་ཆུང་མི་འདྲ་བས། དེའི་ཆ་ནས་ལྷན་སྐྱེས་མ་ཡིན་པར་བཞག་པ་མི་འགལ་བར་གསུངས་པ་ཡིན་ནོ། །ལྷན་སྐྱེས་ཀྱི་དོན་ལ་དེ་ལྟར་གཉིས་སུ་བྱེད་དགོས་པ་རྩ་བའི་རྒྱུད་ཀྱི་དགོངས་པ་ཡིན་ཏེ། བརྟག་པ་དང་པོའི་བཅུ་པ་ལས། ལྷན་ཅིག་སྐྱེས་པའི་གང་སྐྱེས་པ། །ལྷན་ཅིག་སྐྱེས་པར་དེ་བརྗོད་བྱ། །རང་བཞིན་ལྷན་ཅིག་སྐྱེས་པར་བརྗོད། །རྣམ་པ་ཐམས་ཅད་སྡོམས་པ་གཅིག །ཅེས་དང༌། དེའི་དོན་རྗེ་བཙུན་གྲགས་པ་རྒྱལ་མཚན་གྱི་མངོན་རྟོགས་ལྗོན་ཤིང་ལས། རྟེན་ཞུ་བདེ་ལྷན་སྐྱེས་དང༌། བརྟེན་པ་རང་བཞིན་ལྷན་སྐྱེས་ཞེས་གསུངས་སོ། །དེ་ལྟ་བུའི་བདེ་བ་དང་སྟོང་པའམ་ཐབས་ཤེས་སྦྱོར་ལུགས་ནི་ཕར་ཕྱིན་ཐེག་པ་དང་མི་འདྲ་བར་ངོ་བོ་དབྱེར་མེད་པ་དགོས་ཚུལ་གོང་དུ་བཤད་ཟིན་ཏོ། །དེ་འདྲ་བའི་དོན་གྱི་འོད་གསལ་སྐྱེ་བའི་རྒྱུ་ལ་ཕྱི་ནང་གི་ཐབས་གཉིས་ཡོད་པས། ནང་གི་རྩ་འཁོར་ལ་གནད་དུ་བསྣུན་པ་རླུང་གི་རྣལ་འབྱོར་དང༌། གཏུམ་མོའི་རྣལ་འབྱོར་ནི་ལྔར་བཤད་ཟིན་པས། འདིར་ཕྱི་རོལ་གྱི་ཐབས་ཕྱག་རྒྱའི་རྣམ་གཞག་མདོར་བསྡུས་ཏེ་བརྗོད་པར་བྱའོ། །དེ་ལ་ཐོག་མར་དོན་གྱི་འོད་གསལ་བདེ་བ་ཆེན་པོའི་ཡེ་ཤེས་འགྲུབ་པ་ཕྱག་རྒྱ་ལ་ལྟོས་དགོས་པའི་རྒྱུ་མཚན་ནི། ཡེ་ཤེས་རྡོ་རྗེ་ཀུན་ལས་བཏུས་ལས། རྡོ་རྗེ་དང་པདྨ་ཡང་དག་པར་སྦྱོར་བ་ནི་སེམས་དང་སེམས་ལས་བྱུང་བ་དག་གི་ཐབས་སུ་གྱུར་པའོ། །སེམས་དང་སེམས་ལས་
བྱུང་བ་དག་མཉམ་པར་སྦྱོར་བ་ནི་བདེ་བ་ཆེན་པོའི་ཏིང་ངེ་འཛིན་གྱི་ཐབས་སུ་གྱུར་པའོ། །ཞེས་དང༌། རིམ་ལྔ་ལས། སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ཡེ་ཤེས་གསུམ་གྱི་དབྱེ་བ་ནི། །གསལ་བ་འདི་ལས་མཚོན་པར་འགྱུར། །ཞེས་དང༌། རྗེ་བདག་ཉིད་ཆེན་པོས། ཕྱག་རྒྱ་མཆོག་དང་ཀུན་ཏུ་འདུས་གྱུར་ཏེ། །རྡོ་རྗེ་པདྨ་སྦྱོར་བའི་སྙོམས་འཇུག་གིས། །བདེ་བ་ཆེན་པོའི་རང་བཞིན་མ་བཙལ་ན། །ལམ་བཟང་མྱུར་བའི་ཁྱད་པར་གང་ལས་ཡིན། །ཞེས་གསུངས་སོ། །བསྟེན་བྱ་ཕྱག་རྒྱའི་དབྱེ་བ་ལ་ལས་དང་ཡེ་ཤེས་ཀྱི་ཕྱག་རྒྱ་གཉིས་བླ་མེད་ཀྱི་གཞུང་ཕལ་མོ་ཆེ་མཐུན་པར་གསུངས་ཤིང༌། དེའི་སྟེང་དུ་དུས་འཁོར་ལས། རྗེས་དྲན་སྐབས་ཀྱི་དུས་འཁོར་ཡབ་ཡུམ་དུ་སྣང་བའི་སྟོང་གཟུགས་ཀྱི་ཡུམ་དེ་ལ་ཕྱག་རྒྱ་ཆེན་མོ་དང༌། མཆོག་མི་འགྱུར་བའི་བདེ་བ་ལ་དམ་ཚིག་གི་ཕྱག་རྒྱར་བྱས་ཏེ་དེ་གཉིས་བསྣན་པས་བཞིར་བཤད་དོ། །བདེ་མཆོག་རྩ་རྒྱུད་ལེའུ་སོ་བཞི་པ་སོགས་གསུམ་ལས་རྩ་གནས་སུ་ཡི་གེ་འགོད་པ་ལ་ཆོས་རྒྱར་བྱས་པ་སོགས་ཕྱག་རྒྱ་བཞིའི་རྣམ་བཞག་རྒྱ་ཆེར་བསྟན་ལ། དྲིལ་བུ་རིམ་ལྔར་ལས་རྒྱ་ལ་དམ་ཚིག་གི་ཕྱག་རྒྱའི་མིང་གིས་བརྟགས་ཤིང༌། ཡེ་རྒྱ་དང་ཁ་སྦྱོར་གྱི་བདེ་བ་དྲན་པ་ཆོས་རྒྱ་དང༌། སྟོང་ཉིད་ལ་ཕྱག་རྒྱ་ཆེན་མོར་གསུངས་སོ། །སྟོང་ཉིད་ལ་ཕྱག་རྒྱ་ཆེན་མོར་གསུངས་པ་ནི་གནད་ཤིན་ཏུ་ཆེ་སྟེ། བརྟག་པ་དང་པོའི་བཅུ་པར། ཕྱག་རྒྱ་རྒྱུ་དང་བྲལ་བ་ལས། །ཡོ་གི་སྙིང་རྗེ་ཐབས་སུ་འགྱུར། །ཞེས་པའི་ཐད་ཀྱི་རྣམ་བཤད་ལས། ཕྱག་
རྒྱ་ནི་དོན་དམ་པར་རྒྱུ་དང་བྲལ་བའི་སྐྱེ་མེད་སྟོང་པ་ཉིད་ཡིན་ལ། དེ་འདྲ་བའི་ཤེས་རབ་དང་མཉམ་པར་སྦྱར་བ་ལས་སྐྱེས་པའི་སྙིང་རྗེ་བདེ་བ་ཆེན་པོ་ཉིད་ཐབས་སུ་འགྱུར་རོ། །ཚུལ་འདིས་ནི་རང་བཞིན་ལྷན་སྐྱེས་ཐོབ་པ་ནས་སྟོང་ཉིད་ཀྱིས་བདེ་ཆེན་འདྲེན་པའི་ཕྱག་རྒྱའི་བྱ་བ་བྱེད་པས་ཕྱག་རྒྱ་ཆེན་མོ་ཞེས་གསུངས་པ་དེ་བསྟན་ཏེ། འདི་གོ་ན་བླ་མེད་ཀྱི་རྒྱུད་སྡེ་རྣམས་སུ་སྟོང་ཉིད་ལ་བྷ་གའི་སྒྲས་བསྟན་པ་རྣམས་ཀྱི་དོན་ཀྱང་ལེགས་པར་རྙེད་པར་འགྱུར། ཞེས་གསུངས་ལ། དེར་མ་ཟད་ཤེར་མདོ་ལས་སྟོང་ཉིད་ལ་ཡུམ་གྱི་སྒྲས་བསྟན་པ་དང༌། ཏིང་ངེ་འཛིན་རྒྱལ་པོར། ཆོས་རྣམས་ཀུན་གྱི་རང་བཞིན་ཕྱག་རྒྱ་སྟེ། །ཞེས་གསུངས་པ་རྣམས་ཀྱི་དགོངས་པའི་མཐར་ཐུག་ཀྱང་འདི་ལ་གཞོལ་བར་སྣང་ངོ༌། །རྒྱུད་འདིར་ཡང་སྟོང་ཉིད་ལ་ཕྱག་རྒྱ་ཆེན་མོར་བྱས་ཏེ་དེ་ཁོ་ན་ཉིད་ཀྱི་ལེའུར་རྒྱས་པར་གསུངས་སོ། །ཡེ་ཤེས་ཀྱི་ཕྱག་རྒྱ་ལ་བསྒོམ་པའི་ཡེ་ཤེས་ཀྱི་ཕྱག་རྒྱ་དང༌། འཇིག་རྟེན་ལས་འདས་པའི་ཡེ་ཤེས་ཀྱི་ཕྱག་རྒྱ་གཉིས་ཡོད་ཅིང༌། ཡབ་ཡུམ་གཉིས་ཀྱི་དཀྱིལ་འཁོར་སྟོན་པའི་ལེའུ་དག་གིས་སྟོན་ལ། དེར་དམ་ཚིག་གིས་ཕྱག་རྒྱ་ཞེས་ཀྱང་བཏགས་སོ། །ལས་ཀྱི་ཕྱག་རྒྱ་རིགས་སོ་སོ་བ་རྣམས་དེ་ཁོ་ན་ཉིད་ཀྱི་ལེའུར་བསྟན། དེ་ཉིད་ངོ་ཤེས་ནས་འདུ་བའི་ཚུལ་བརྡའི་ལེའུར་བསྟན། མཁའ་གསང་བྱིན་གྱིས་རློབ་པ་སོགས་ལེའུ་ཐ་མས་བསྟན་ཏེ། མདོར་ན་ལས་རྒྱ་དང་སྙོམས་པར་འཇུག་ཚུལ་གྱི་ཡན་ལག་ཆ་ཤས་རེ་ལེའུ་ཕལ་ཆེར་གྱིས་བསྟན་ཏེ་ཞིབ་ཏུ་ཤེས་པར་འདོད་ན་མངོན་རྟོགས་ལྗོན་ཤིང་སོགས་སུ་དོན་ཚན་རེ་རེ་བཞིན་རྒྱུད་དང་སྦྱར་བ་ལས་ཤེས་པར་བྱའོ། །ཕྱག་རྒྱ་དང་སྦྱར་བ་ལས་བདེ་སྟོང་གི་ཡེ་
ཤེས་སྐྱེ་བ་ཡང་འཆི་རིམ་བཞིན་དུ་སྐྱེད་དགོས་ཤིང༌། དེ་ལ་སྙིང་གའི་སྡུད་རིམ་གལ་ཆེ་བས། སྡུད་རིམ་གཙོ་བོར་གྱུར་པའི་ཡན་ལག་དྲུག་གི་རྫོགས་རིམ་བཤད་རྒྱུད་གུར་ལས་གསུངས་པ་བཞིན་གྲུབ་ཆེན་མཚོ་སྐྱེས་དང་ཛ་ལན་དྷ་རི་པ་སོགས་ཀྱིས་བཀྲལ་བ་ལྟར་རོ། །དེ་ལྟར་གོང་དུ་བཤད་པ་བཞིན་གྱི་སྒྱུ་ལུས་གྲུབ་པའི་རྣལ་འབྱོར་པ་དེས་དོན་གྱི་འོད་གསལ་འགྲུབ་ཏུ་ཉེ་བའི་མཚན་མ་མཐོང་བ་ན་ཕྱི་ནང་གི་རྐྱེན་གཉིས་ལ་བརྟེན་ནས་རླུང་དབུ་མར་ཞུགས་གནས་ཐིམ་གསུམ་གྱིས་དྲངས་པའི་སྨིག་རྒྱུ་ནས་འོད་གསལ་གྱི་བར་གྱི་རྟགས་རྣམས་འབྱུང་ཞིང༌། ཁྱད་པར་འོད་གསལ་གྱི་དུས་སུ་ལྷན་སྐྱེས་ཀྱི་བདེ་བས་སྟོང་ཉིད་མངོན་སུམ་དུ་གསར་དུ་རྟོགས་པའི་དོན་གྱི་འོད་གསལ་འགྲུབ་ལ། དེ་ཉིད་ཉོན་སྒྲིབ་ཀྱི་དངོས་གཉེན་བར་ཆད་མེད་ལམ་ཡིན་པས། དེའི་ཚེ་མ་དག་པའི་སྒྱུ་ལུས་ནམ་མཁའི་དབྱིངས་སུ་ཆུ་འཛིན་ཞུ་བ་བཞིན་དོན་གྱི་འོད་གསལ་དུ་དག་སྟེ། རང་རྒྱུད་ལ་ལྡན་པའི་གང་ཟག་འཕགས་པར་གྱུར་པ་ཡིན་ལ། དེ་ནས་ལུགས་ལྡོག་གི་ཉེར་ཐོབ་གྲུབ་པ། དག་པའི་སྒྱུ་མའི་སྐུར་བཞེངས་པ། ཉོན་སྒྲིབ་ཟད་པར་སྤངས་ཏེ་དགྲ་བཅོམ་པར་གྱུར་པ་རྣམས་དུས་མཉམ་པའི་ཚུལ་གྱིས་འབྱུང་ངོ༌། །དེ་ནས་སློབ་པའི་ཟུང་འཇུག་གི་ཡ་གྱལ་གྱི་འོད་གསལ་དང༌། མི་སློབ་པའི་ཟུང་འཇུག་གི་ཡ་གྱལ་ཐུགས་དག་པ་འོད་གསལ་གྱི་ཡེ་ཤེས་རྣམས་རིམ་གྱིས་འགྲུབ་ཅིང༌། དེ་དག་ཉེར་ལེན་དང་ཉེར་འབྲས་ཅི་རིགས་པའི་སྒོ་ནས་འདིར་ཐུགས་ཀྱི་ཡོན་ཏན་དུ་བསྡུས་ཏེ་བསྟོད་པ་ཡིན་ནོ། །༈ གཉིས་པ་གཞུང་དོན་
ལ། འོད་གསལ་ཡེ་ཤེས་ཀྱི་ངོ་བོའི་ཁྱད་པར་དང༌། བྱེད་ལས་ཀྱི་ཁྱད་པར་གཉིས། དང་པོ་ནི། ནམ་མཁའི་མཐའ་ལྟར་རྒྱ་ཆེ་ཟླ་བའི་མ། །ལྟ་བུར་གཏིང་ཡང་རྫིང་བུ་རྙོག་མེད་ལྟར། །དྭངས་པས་ཆོས་ཚུལ་རྒྱ་མཚོའི་གཟུགས་བརྙན་ཀུན། །ཅིག་ཅར་གསལ་རྫོགས་འཆར་ལ་མཁའ་རླུང་འདྲ། །ཞེས་བྱུང༌། དེ་ལ་དཔེའི་ཁྱད་པར་གསུམ་གྱིས་མཚོན་ནས་བསྟན་ཏེ། དང་པོ་ནམ་མཁའ་ལྟར་རྒྱ་ཆེ་བ་དང༌། གཉིས་པ་རྒྱ་མཚོ་ལྟར་ཟབ་པ་སྟེ། ཟླ་བའི་མ་ཞེས་པ་ནི་སྔོན་རྒྱ་མཚོ་བསྲུབས་པ་ལས་ཟླ་བ་བྱུང་བས་དེ་ལ་ཟླ་བའི་མ་མ་ཞེས་བཏགས་པར་རིག་བྱེད་ལས་འབྱུང་བ་བཞིན་ནོ། །གསུམ་པ་ནི་རྫིང་བུ་རྙོག་པ་མེད་པ་ལྟར་དྭངས་ཤིང་གསལ་བའོ། །དེ་ཡང་ཟབ་པ་དང་རྒྱ་ཆེ་བར་འཇོག་པའི་ཚུལ་ནི་སྟོང་ཉིད་ཀྱི་འཛིན་སྟངས་དང་ལྷའི་རྣམ་པ་ཟུང་དུ་འབྲེལ་བའི་ཆ་ནས་འཇོག་པ། ཀླུ་བྱང་གིས། རྣམ་པར་རྟོག་མེད་ཟབ་པ་སྟེ། །རྒྱ་ཆེས་སངས་རྒྱས་རྣམས་ཀྱི་སྐུ། །ཞེས་དང༌། སྒྲུབ་ཐབས་ཀུན་བཟང་ལས། ཟབ་ཅིང་རྒྱ་ཆེ་བ་ཡི་བདག་ཉིད་ཅན། །གང་ཡིན་དེར་ནི་ཀུན་རྟོག་སྣང་མི་འགྱུར། །ཞེས་པ་ལྟ་བུ་སྔགས་ཀྱི་སྤྱི་སྐད་ལ་གྲགས་ཆེ་ཞིང༌། འདིར་དོན་གྱི་འོད་གསལ་ལ་སྐུའི་རྣམ་པ་མི་སྣང་ཡང་རིམ་པ་གསུམ་པའི་སྒྱུ་མའི་སྐུ་སྦྱོང་ཞིང་དག་པའི་སྒྱུ་ལུས་བསྒྲུབ་པ་དགོས་པའི་གཙོ་བོ་ཡིན་པས་བསྒོམ་ཚུལ་དེའི་ཤུགས་ཀྱིས་ཟིན་པའི་སྒོ་ནས་བཞག་རུང་སྟེ། འོད་གསལ་གྱི་སྔོན་དུ་བསམ་གཏན་གཉིས་བསྒོམ་ཚུལ་འཆད་པར། འདུས་པའི་རྩ་རྒྱུད་ལས། རྡོ་རྗེ་མི་ཕྱེད་གསུམ་བསྒོམ་པ། །འགོག་པའི་དམ་ཚིག་ཡེ་ཤེས་ཏེ། །ཞེས་སེམས་ཅན་ཐམས་ཅད་ཀྱི་ལུས་ངག་ཡིད་གསུམ་རང་གི་སྒོ་གསུམ་དང་དབྱེར་མེད་
དུ་བྱས་ལ། དེ་རྡོ་རྗེ་གསུམ་གྱི་ལྷ་སེམས་དཔའ་གསུམ་བརྩེགས་ཀྱི་ངོ་བོར་བསྒོམ་སྟེ། དེ་ཡང་རིམ་གྱིས་བསྡུས་ནས་འོད་གསལ་དུ་གཞུག་པ་ནི་རྒྱུད་དོན་མན་ངག་གིས་གསལ་བར་བྱས་པའི་བསྒོམ་ཚུལ་ཡིན་པར་གསལ་སྒྲོན་ལས་གསུངས་སོ། །རང་གི་ལུས་སྟོད་སྨད་ནས་རིམ་གྱིས་འོད་གསལ་དུ་འཇུག་པ་ནི་རིལ་འཛིན་དང་རྗེས་གཞིག་གི་བསམ་གཏན་གཉིས་ཀ་ལ་འདྲ་ཡང༌། ཁྱད་པར་རྗེས་གཞིག་ལ་སྔོན་དུ་ཕྱི་རོལ་གྱི་སྣོད་བཅུད་མཐའ་དག་འོད་གསལ་དུ་འཇུག་པ་དགོས་པས་དེའི་ཆ་ནས་ནམ་མཁའ་ལྟར་རྒྱ་ཆེ་བར་བཤད་ཚུལ་ཡང༌། སྒྲོན་གསལ་ལས། རྒྱུ་བ་དང་མི་རྒྱུ་བ་རྣམས་ལ་ཡི་གེ་ཁཾ་ནམ་མཁར་བྱེད་པས་རྗེས་སུ་གཞིག་པའི་རིམ་གྱིས་དངོས་པོ་མེད་པར་བྱས་ལ། བདག་ཉིད་ཀྱང་རིམ་གྱིས་ཞུགས་པ་དེ་བྱས་ན། རྡོ་རྗེ་ཡེ་ཤེས་ནམ་མཁའ་དང་མཉམ་པར་འགྱུར་ཞིང་། སེམས་དཔའ་གསུམ་གྱི་བདག་ཉིད་ཅན་གཅིག་ཏུ་འགྱུར་རོ། །ཁཾ་ཞེས་པར་འོད་གསལ་བའོ། །ཞེས་དང༌། རྒྱུད་ཕྱི་མར། བསྟན་གྱུར་རྡོ་རྗེའི་ལམ་ནས་ནི། །ནམ་མཁའི་ཁམས་སུ་སྤྲོ་བར་བྱ། །ཞེས་པའི་དོན། རིམ་ལྔ་གསལ་སྒྲོན་ལས། རིམ་གྱིས་འོད་གསལ་དུ་འཇུག་པས་བསྟན་པ་སྟེ་རྣམ་པར་དག་པ་ནམ་མཁའ་སྟེ་འཇིག་རྟེན་གྱི་ཁམས་རྣམས་སུ་སྤྲོ་བ་སྟེ། ཆོས་སྐུའི་ཚུལ་གྱིས་ཁྱབ་པར་བྱའོ། །ཞེས་དང༌། འཇིག་རྟེན་ཁམས་སུ་སྤྲོ་བའི་དོན་ནི་སྣོད་བཅུད་ཀུན་གྱི་ཆོས་ཉིད་ལ་བློས་ཁྱབ་པར་བྱེད་པའི་དོན་ནོ། །ཞེས་གསུངས་སོ། །ཕར་ཕྱིན་ཐེག་པའི་ལུགས་ཀྱིས་སྟོང་ཉིད་མངོན་སུམ་དུ་རྟོགས་པའི་ཚེ་ཡང་ཆོས་དབྱིངས་ཀུན་
འགྲོའི་ཚུལ་གྱིས་རྟོགས་པ་ཞེས་ཆོས་ཐམས་ཅད་ཀྱི་སྟེང་ནས་གཏན་ལ་ཕབ་པ་ཡིན་ཀྱང༌། ཆོས་མཆོག་ཐ་མའི་ཚེ་འདིས་སྡུད་རིམ་ལྟ་བུས་སྣོད་བཅུད་ཐམས་ཅད་གསལ་བཏབ་ནས་འོད་གསལ་དུ་འཇུག་པ་དང༌། དེ་དག་སྔོན་དུ་དག་པའི་སྣོད་བཅུད་ཀྱི་རྣམ་པར་བསྒོམ་པའི་ཐབས་མཁས་འདི་ལྟ་བུ་མེད་པས། དམིགས་བྱེད་བློ་ལ་ཤུགས་ཆེ་ཆུང་ཡོད་པར་མ་ཟད་དམིགས་པར་བྱེད་ཚུལ་གྱི་སྟེང་ནས་ཀྱང་ཤུགས་ཆེ་ཆུང་གི་ཁྱད་པར་ཤིན་ཏུ་ཆེའོ། །ཁྱད་པར་གཉིས་པ་ཟབ་པའི་དོན་ནི་ཡུལ་ཆོས་ཉིད་ལ་ཟབ་པར་འཇོག་པ་མདོ་སྔགས་ཀུན་ཏུ་གྲགས་ཆེ་ཞིང་གོང་དུ་བཤད་ཟིན་ལ། ཡུལ་ཅན་ཡེ་ཤེས་ཀྱང་ཆོས་ཉིད་དེ་དང་ངོ་བོ་ཐ་དད་པའི་ཚུལ་གྱིས་འཇུག་པ་མ་ཡིན་པར་ཆུ་ལ་ཆུ་བཞག་པ་བཞིན་རོ་གཅིག་ཏུ་ཞུགས་ཏེ། རྣམ་གྲངས་པ་མ་ཡིན་པའི་དོན་དམ་དུ་གྱུར་པའི་ཆ་ནས་རྒྱ་མཚོ་ལྟར་དུ་ཟབ་པར་བཤད་པ་ཡིན་ནོ། །ཁྱད་པར་གསུམ་པ་དྭངས་ཤིང་གསལ་བར་བཤད་པ་ནི། རིམ་ལྔ་ལས། ཐམས་ཅད་སྟོང་པ་རྨད་པོ་ཆེ། །དྭངས་ཤིང་གསལ་བའི་ཡེ་ཤེས་ཆེ། །ཞེས་སོགས་དང༌། གྲོལ་བའི་ཐིག་ལེ་ལས། ནམ་མཁའི་དཀྱིལ་ལྟར་རྣམ་དག་པའི། །ཟབ་གསལ་དྲི་མེད་རབ་བསྟན་ཏོ། །ཞེས་གསུངས་པ་རྣམས་དང་དོན་མཚུངས་ཏེ། འདིར་རྫིང་བུ་རྙོག་པ་མེད་པ་དཔེར་མཛད་པ་ནི། དེ་ཉིད་འདམ་རྫབ་ཀྱི་རྙོག་པ་དང་བྲལ་བ་ལྟར། དོན་གྱི་འོད་གསལ་འདི་ཡང་ཉོན་མོངས་པ་དྲུངས་འབྱིན་བྱེད་ཀྱི་དངོས་གཉེན་ཡིན་པས་འདིའི་ཚེ་ཉོན་མོངས་ཀྱི་རྙོག་པ་དང་བྲལ་བ་ལ་བྱ་སྟེ། སེམས་ཉོན་མོངས་པར་བྱས་པ་དང་། སེམས་མ་ཞི་བར་བྱས་པ་དང་། སེམས་རློང་རློང་པོའམ་རྙོག་པར་
བྱས་པ་རྣམས་རྣམ་གྲངས་སུ་མངོན་པ་ཀུན་བཏུས་ལས་གསུངས་སོ། །ཉོན་མོངས་དང་བྲལ་བ་ཁོ་ན་ལ་སྦྱར་བ་ནི་དོན་གྱི་འོད་གསལ་དང་པོའི་དབང་དུ་བྱས་པ་ཡིན་ལ། དེའི་རྒྱུན་གོམས་པས་སྒྲིབ་གཉིས་བག་ཆགས་དང་བཅས་པ་མ་ལུས་པ་དང་བྲལ་བ་ནི་མཐར་ཐུག་གི་ས་ལ་ལྟོས་པའི་དྭངས་གསལ་རྙོག་པ་མེད་པའི་དོན་ཡིན་ཏེ། སྔགས་རིམ་ལས། གསལ་བ་ནི་ཉོན་མོངས་པ་མེད་པ་དང༌། དག་པ་ནི་ཤེས་སྒྲིབ་དང་བྲལ་བ་དང༌། རྙོག་མེད་ནི་དེ་གཉིས་ཀྱི་བག་ཆགས་དང་བྲལ་བའོ། །ཞེས་དཀྱིལ་ཆོག་རྡོར་ཕྲེང་ལྟར་གསུངས་སོ། །ཁྱད་པར་དུ་སྔགས་བླ་མེད་ཀྱི་སྐབས་འདིར་ལྷན་སྐྱེས་ཀྱི་བདེ་བས་སྟོང་ཉིད་མངོན་སུམ་དུ་གསར་དུ་རྟོགས་པ་ལ་འོད་གསལ་ཞེས་བཏགས་པ་ནི་སྣང་བ་གསུམ་རྣམ་པར་དག་པའི་རྒྱུ་མཚན་གྱིས་ཡིན་ཏེ། ལས་མཐའ་རྣམ་འབྱེད་ལས། བསྐལ་པ་མཐའ་ཡས་རྣམས་སུ་ཡང༌། །མགོ་དང་རིན་ཆེན་སོགས་སྦྱིན་པ། །སྣང་བ་རྣམ་པར་མ་དག་ཕྱིར། །བྱང་ཆུབ་འབྲས་བུ་ཐོབ་མི་འགྱུར། །ཞེས་སོགས་དང༌། མཐའ་ཡས་བསྐལ་པ་རྣམས་སུ་ཡང༌། །སྔགས་ཀྱི་སྐུ་ཡི་ཏིང་འཛིན་གྱིས། །སྣང་བ་རྣམ་པར་མ་དག་ཕྱིར། །བྱང་ཆུབ་འབྲས་བུ་ཐོབ་མི་འགྱུར། །ཞེས་ཕར་ཕྱིན་ཐེག་པ་དང༌། རྒྱུད་སྡེ་འོག་མ་དང༌། གོང་མའི་ཡང་བསྐྱེད་རིམ་མན་ཆད་ཀྱི་ལམ་རྣམས་ཡིད་ཤེས་རགས་པ་ཁོ་ན་ཡིན་པས། ཡེ་ཤེས་ཆོས་སྐུའི་རྒྱུ་ཐུན་མོང་མ་ཡིན་པ་བྱེད་ནུས་ཀྱི་གཉུག་སེམས་འོད་གསལ་བ་དེར་མི་འགྲོ་བའི་ཕྱིར། དབང་དོན་དེ་ཉིད་ཡང་གསལ་ལས། ཡིད་ཤེས་རགས་པའི་མཉམ་གཞག་ཅི་འདྲ་
ཞིག་ཡིན་ཀྱང་སྣང་མཆེད་ཐོབ་གསུམ་ཚུན་ཆད་ཀྱི་སེམས་རགས་པ་ཁོ་ན་ཡིན་ལ། ཡེ་ཤེས་ཆོས་སྐུ་ནི་གཉུག་མ་ལྷན་སྐྱེས་ཀྱི་སེམས་ཉིད་གཉིས་སྣང་གི་སྤྲོས་པ་ཐམས་ཅད་དག་ནས་སྟོང་ཉིད་ལ་སླར་མི་ལྡང་བའི་ཚུལ་གྱིས་མཉམ་པར་བཞག་པ་ཡིན་པས། གཉུག་མ་དེའི་རིགས་འདྲ་ཐུན་མོང་མ་ཡིན་པའི་རྒྱུར་རགས་པ་གློ་བུར་བའི་སེམས་རྣམས་མི་འགྲོ་བའི་ཕྱིར་ཏེ། སྣང་བ་གསུམ་ལ་སོགས་པའི་སེམས་དེ་རྣམས་ཤེས་སྒྲིབ་ཀྱི་དངོས་གཉེན་དོན་གྱི་འོད་གསལ་གྱི་གོང་དུ་སླར་སྐྱེ་མི་རུང་གི་ཚུལ་གྱིས་འགག་དགོས་ཤིང༌། ཞེས་གསུངས་ཏེ་ལེགས་བཤད་བླ་ན་མེད་པར་སྣང་ངོ༌། །དེ་ལྟར་དོན་གྱི་འོད་གསལ་མངོན་དུ་གྱུར་པའི་ཚེ་སྣང་བ་གསུམ་དང་དཔེའི་འོད་གསལ་གྱིས་སྦྱངས་པའི་རླུང་དང༌། དེས་བསྒྲུབས་པའི་མ་དག་པའི་སྒྱུ་མའི་སྐུ་ཐམས་ཅད་ལྡོག་དགོས་ན་གཟུགས་ཀྱི་སྐུའི་རྒྱུན་ཆད་པར་འགྱུར་སྙམ་ན་སྐྱོན་མེད་དེ། རིམ་ལྔ་གསལ་སྒྲོན་ལས། དོན་གྱི་འོད་གསལ་མངོན་དུ་གྱུར་པའི་ཚེ་སྒྱུ་མའི་སྐུ་ཡང་ནམ་མཁའ་ལ་འཇའ་ཡལ་བ་ལྟར་འགྱུར་བའི་ཕྱིར་རོ། །དེ་ཡང་དོན་གྱི་འོད་གསལ་གྱིས་སྦྱངས་པའི་རླུང་གིས་བསྒྲུབས་པའི་སྐུ་ནི་དོན་གྱི་འོད་གསལ་མངོན་དུ་གྱུར་པའི་ཚེ་ཡང་མི་ལྡོག་ལ། དཔེའི་འོད་གསལ་གྱིས་སྦྱངས་པའི་རླུང་གིས་བསྒྲུབས་པ་ནི་དེ་དང་མི་འདྲ་བའི་ཁྱད་པར་རོ། །ཞེས་གསུངས་པ་ལྟར་དོན་གྱི་འོད་གསལ་གྲུབ་པ་དེའི་ཚེ་སྔ་མ་རྣམས་ལོག་ཀྱང་འོད་གསལ་ཡེ་ཤེས་རང་གི་བཞོན་པའི་རླུང་ཡོད་ལ། ནམ་ལུགས་ལྡོག་གི་ཉེར་ཐོབ་གྲུབ་པ་དེའི་ཚེ་རླུང་དེ་ཉིད་ཀྱིས་ཉེར་ལེན་དང་ཡེ་ཤེས་རང་གིས་ལྷན་
ཅིག་བྱེད་རྐྱེན་བྱས་ཏེ། དག་པའི་སྒྱུ་མའི་སྐུ་གསལ་ལ་རྫོགས་པར་འཆར་བས། གཟུགས་སྐུའི་རྒྱུན་གོང་འཕེལ་དུ་འགྱུར་གྱི། ཆད་པའི་དོགས་པ་མི་དགོས་ཏེ། དཔེར་ན་ནམ་མཁའི་སྤྲིན་སོགས་དྭངས་ཏེ་ཤིན་ཏུ་གསལ་བ་དང༌། གོ་ལའི་རླུང་སོགས་འགོག་མེད་དུ་རྒྱུ་བ་མི་འགལ་ཞིང་དེའི་དབང་གིས་ཉི་ཟླ་སོགས་གསལ་བར་སྣང་བ་བཞིན་ནོ། །ཞེས་སྟོན་པ་ལ་འདིར་ཡང༌། ཅིག་ཅར་གསལ་རྫོགས་འཆར་ལ་མཁའ་རླུང་འདྲ། །ཞེས་གསུངས་སོ། །དོན་གྱི་འོད་གསལ་གྱིས་སྒྱུ་མའི་སྐུ་སྒྲུབ་པ་ལ་སྦྱར་ན་དེ་ལྟར་ཡིན་ཀྱང༌། བཤད་ཚུལ་དེ་ཁོ་ན་བྱེད་མི་དགོས་ཏེ། ཡེ་ཤེས་དེའི་རྫས་རྒྱུན་མཐར་ཐུག་པའི་སྐབས་ལ་མཚོན་ན། རྗེ་བཙུན་མའི་ཐུགས་གཉིས་སུ་མེད་པའི་ཡེ་ཤེས་ཉི་མའི་དཀྱིལ་འཁོར་དེ་ཉིད། ནམ་མཁའ་ལྟ་བུའི་ཆོས་ཀྱི་དབྱིངས་དེར་སླར་མི་ལྡང་བའི་ཚུལ་གྱིས་ཞུགས་ཏེ་རོ་གཅིག་ཏུ་གྱུར་པས་དེ་ལས་ཅུང་ཟད་ཀྱང་འདའ་བ་མེད་ལ། འོན་ཀྱང་སྔོན་གྱི་ཐུགས་བསྐྱེད་སྨོན་ལམ་གྱི་རླུང་ཤུགས་དང་འགྲོགས་པའི་དབང་གིས་ཆོས་ཅན་ཀུན་རྫོབ་པའི་འཇིག་རྟེན་ཐམས་ཅད་གསལ་བར་གཟིགས་ཤིང༌། མཐའ་ཡས་པའི་གདུལ་བྱའི་དོན་གྱི་པད་ཚལ་རྒྱས་པར་བྱེད་པ་ལ་ཡང་སྦྱོར་དགོས་པའི་ཕྱིར། མཁས་གྲུབ་སྨྲ་བའི་ཉི་མས། ཁྱོད་ཐུགས་བདེ་བ་ཆེན་པོའི་ཉིན་བྱེད་འོད། །མཁའ་དབྱིངས་སྟོང་ཉིད་མཛེས་མའི་ལང་ཚོ་ལ། །རྟག་ཏུ་སྤྱོད་པའི་རྩེ་དགའ་མི་གཏོང་ཡང༌། །སྲིད་ཞིའི་དངོས་ཀུན་མ་འདྲེས་གསལ་ལེར་འབྱེད། །ཅེས་གསུངས་པ་བཞིན་ནོ། །
༈ གཉིས་པ་འོད་གསལ་ཡེ་ཤེས་ཀྱི་བྱེད་པའི་ཁྱད་པར་ལ་གཉིས། སྒྲིབ་གཉིས་ཟད་པར་སྤོང་བའི་བྱེད་ལས་དངོས་དང༌། འཕྲོས་དོན་སྤྱོད་པའི་ཁྱད་པར་བསྟན་པའོ། །དང་པོ་ལ་ཡང་སྒྲིབ་གཉིས་སྤངས་པས་སྲིད་མཐའ་འགོག་ཚུལ་དང༌། ཐབས་ལ་མཁས་པའི་དབང་གིས་དེའི་ཤུགས་ལ་ཞི་མཐའ་ཡང་ཁེགས་པའི་ཚུལ་གཉིས། དང་པོ་ནི། ཤེས་དང་ཉོན་མོངས་རྨོངས་བྱེད་མཆུ་རིང་བུང༌། །སྙིང་རྗེ་སྟོང་པ་ཉིད་ཞུགས་བསིལ་ཡབ་ཀྱིས། །རིང་དུ་བསྐྲད་ཀྱང༌། ཞེས་བྱུང༌། དེ་ཡང་རྒྱུད་བླ་མ་ལས། མ་དག་མ་དག་དག་པ་དང༌། །ཤིན་ཏུ་རྣམ་དག་གོ་རིམ་བཞིན། །སེམས་ཅན་བྱང་ཆུབ་སེམས་དཔའ་དང༌། །དེ་བཞིན་གཤེགས་པ་ཞེས་བརྗོད་དོ། །ཞེས་མཐོང་སྒོམ་གྱི་སྤང་བྱ་གཅིག་ཀྱང་མ་དག་པ་སོ་སྐྱེ་དང༌། ཕྱོགས་རེ་ཙམ་དག་པ་སློབ་པ་འཕགས་པ་དང༌། མ་ལུས་པར་དག་པ་སངས་རྒྱས་སུ་འཇོག་པར་གསུངས་ལ། མཐོང་སྒོམ་གྱི་སྤང་བྱ་སོ་སོར་འབྱེད་ཚུལ་ནི་བྱེ་མདོ་གཉིས་ཉོན་སྒྲིབ་ཁོ་ན་ལས་ཤེས་སྒྲིབ་ཀྱི་ཐ་སྙད་མི་བྱེད་དོ། །སེམས་ཙམ་དང་རང་རྒྱུད་པས་སྒྲིབ་པ་གཉིས་ཀར་མཐོང་སྤང་དང་སྒོམ་སྤང་གི་ཆ་གཉིས་གཉིས་འབྱེད་ཅིང༌། ཐལ་འགྱུར་བས་ཤེས་སྒྲིབ་ལ་སྒོམ་སྤང་གིས་ཁྱབ་པར་བཞེད་དོ། །ཉོན་སྒྲིབ་ལ་གཉིས་སུ་འབྱེད་ཀྱང་དེ་ཕར་ཕྱིན་ཐེག་པའི་རང་ལམ་གྱིས་བགྲོད་པའི་དབང་དུ་བྱས་པ་ཡིན་ཏེ། སྔགས་བླ་མེད་ཀྱི་གདུལ་བྱ་རིགས་ངེས་ཀྱི་ལམ་ལ་ལྟོས་ན་ཉོན་སྒྲིབ་ཐམས་ཅད་མཐོང་སྤང་ཁོ་ནར་འགྱུར་རོ། །ཕར་ཕྱིན་ཐེག་པའི་སྒོམ་ལམ་གྱི་ངོ་སྐལ་དུ་གྱུར་པའི་སྤང་བྱ་ཡིན་ཀྱང་སྔགས་ཀྱི་མཐོང་སྤངས་སུ་འགྱུར་
བ་མི་འགལ་ཏེ། མདོ་ལུགས་ལ་ཡང་ལས་ཉོན་གྱི་སྐྱེ་འཆི་དང༌། གོང་མར་འཕེན་བྱེད་ཀྱི་ལས་མི་ཁོམ་པ་བརྒྱད་སོགས་ཐེག་དམན་གྱི་སྒོམ་སྤངས་ཡིན་ཀྱང༌། ཐེག་ཆེན་གྱི་མཐོང་སྤངས་སུ་འགྱུར་བའི་ཕྱིར། རྒྱུད་བླ་མ་ལས། འཕགས་པས་འཆི་དང་རྒ་བ་དང༌། །ན་བའི་སྡུག་བསྔལ་རྩད་ནས་སྤངས། །ལས་དང་ཉོན་མོངས་དབང་གིས་སྐྱེ། །དེ་ལ་དེ་མེད་ཕྱིར་དེ་མེད། །ཅེས་དང༌། མངོན་རྟོགས་རྒྱན་ལས། བསམ་གཏན་ལ་སོགས་པའི། །ཡན་ལག་ཡོངས་སུ་ཟད་པ་དང༌། །ཞེས་དང༌། ཐེ་ཚོམ་མི་དལ་ཟད་པ་དང༌། །ཞེས་སོ། །དེ་ལྟར་ན་མཐོང་སྒོམ་སོགས་ཀྱི་ལམ་སོ་སོ་ལ་སྦྱོར་ཚུལ་ཡང༌། ལམ་ཐུན་མོང་བ་ནས་བཟུང་སྟེ་བསྒོམ་སྟོབས་ཀྱིས་རླུང་དྷཱུ་ཏཱིར་བཙུད་པ་ཐིམ་པས་སྟོང་པ་དངོས་སུ་འདྲེན་མི་ནུས་པ་དེ་སྲིད་དུ་ཚོགས་ལམ་དང༌། དེ་ནུས་པ་ནས་བདེ་བས་དེ་ཁོ་ན་ཉིད་མངོན་སུམ་དུ་མ་རྟོགས་པའི་སྒྱུ་ལུས་ཚུན་ཆོད་སྦྱོར་ལམ་དང༌། དོན་གྱི་འོད་གསལ་ཐོབ་ནས་ཟུང་འཇུག་མ་ཐོབ་བར་ལ་མཐོང་ལམ། སློབ་པའི་ཟུང་འཇུག་ཐོབ་ནས་མི་སློབ་པའི་ཟུང་འཇུག་མ་ཐོབ་པར་དེ་སྒོམ་ལམ་ས་དགུ་དང་སྦྱོར་དགོས་སོ། །དེ་ལྟར་ན་རིམ་པ་བཞི་པའི་དོན་གྱི་འོད་གསལ་སྐད་ཅིག་དང་པོ་དེས་ཀུན་བཏགས་དང་ལྷན་སྐྱེས་ཀྱི་ཉོན་མོངས་མ་ལུས་པའི་དངོས་གཉེན་བྱས་ནས་ཅིག་ཅར་དུ་སྤོང་བར་བྱེད་དེ། རིམ་ལྔ་གསལ་སྒྲོན་ལས། གཞན་ནས་འབྱུང་བ་ལྟར་མཐོང་ལམ་དུ་ཀུན་བཏགས་དང༌། ལྷན་སྐྱེས་སྤོང་བ་སྒོམ་ལམ་ནས་བྱ་དགོས་པའི་རྣམ་བཞག་མཐུན་མི་དགོས་སོ། །ཞེས་དང༌། ལམ་འདི་དང་ལམ་གཞན་གཉིས་ཤེས་
སྒྲིབ་སྤོང་བ་ལ་བསྐལ་པ་གྲངས་མེད་དང༌། སྙིགས་དུས་ཀྱི་ཚེ་ཐུང་གཅིག་གིས་ཁྱད་པར་བྱུང་བ་བཞིན་དུ་ཉོན་སྒྲིབ་ཟད་པར་བྱེད་པ་ལ་ཡང་མྱུར་བུལ་གྱི་ཁྱད་པར་ཤིན་ཏུ་ཆེའོ། །ཞེས་གསུངས་པའི་ཕྱིར། དེ་ནས་ཤེས་སྒྲིབ་རྣམས་རིམ་གྱིས་སྤངས་ཏེ་མཐར་སློབ་པ་མཐའི་དོན་གྱི་འོད་གསལ་དེས་ཤེས་སྒྲིབ་ཕྲ་མོའི་དངོས་གཉེན་བྱས་ནས་ཟད་པར་སྤོང་ཞིང༌། མདོར་ན་འོད་གསལ་དེའི་རྒྱུན་སྔ་ཕྱི་ཅི་རིགས་པའི་སྒོས་སྒྲིབ་པ་གཉིས་ཀ་དྲུངས་འབྱིན་པར་བྱེད་པའི་གནད་ཀྱིས་འདིར་ཡང་སྒྲིབ་པ་གཉིས་བསལ་བྱ་སྦྲང་བུའི་གཟུགས་དང༌། འོད་གསལ་ཡེ་ཤེས་སེལ་བྱེད་བསིལ་ཡབ་ཀྱི་གཟུགས་སུ་བཀོད་དོ། །འོ་ན་ཕར་ཕྱིན་ཐེག་པར་ཡང༌། ས་དགུ་ལ་ནི་ཆེན་པོ་ཡི། །ཞེས་སོགས་ལྟར་ཤེས་སྒྲིབ་སྐོར་དགུའི་གཉེན་པོ་ཆ་ཚང་བར་བཤད་པ་མ་ཡིན་ནམ་ཞེ་ན། དེར་བཤད་པའི་ལམ་དེ་ཙམ་གྱིས་ཤེས་སྒྲིབ་ཕྲ་མོའི་དངོས་གཉེན་བྱེད་མི་ནུས་ཏེ། དེ་རྣམས་རགས་པའི་ཡིད་ཤེས་ཁོ་ན་ཡིན་ཞིང༌། འདིའི་དངོས་གཉེན་ལ་གཉུག་སེམས་ཕྲ་མོ་ཞིག་དགོས་པས། འདིར་ཡང་སྙིང་རྗེ་སྟོང་པ་ཉིད་ཞུགས་ཞེས་ཐུན་མོང་མ་ཡིན་པའི་སྙིང་རྗེ་ལྷན་སྐྱེས་ཀྱི་བདེ་བ་ཆེན་པོ་དེ་ཉིད་སྟོང་པ་ཉིད་ཀྱི་ངང་དུ་ཆུ་ལ་ཆུ་བཞག་པ་བཞིན་དུ་རོ་གཅིག་ཏུ་ཞུགས་པའི་སྒོ་ནས་སྤོང་བར་གསུངས་སོ། །༈ གཉིས་པ་དེའི་ཤུགས་ཀྱིས་ཞི་མཐའ་ཁེགས་ཚུལ་ནི། བརྩེ་བའི་ཞགས་པ་ཡིས། །འགྲོ་ལ་དམ་དུ་འཁྱུད་པས་ཡང་དག་རོལ། །ཞེས་བྱུང༌། ཐེག་པ་འདིའི་ལུགས་ཀྱི་བརྩེ་བ་སྙིང་རྗེ་ཆེན་པོའི་གཙོ་བོ་ཡང༌། མངོན་བརྗོད་ལས། བདེ་ཆེན་ཐུགས་རྗེའི་བདག་ཉིད་ཅན། །ཞེས་དང༌། མན་ངག་སྙེ་མ་ལས། ཐབས་ནི་
དམིགས་པ་མེད་པའི་སྙིང་རྗེ་ཆེན་པོ་འགྲོ་བའི་དོན་བྱེད་པ་ལྷན་ཅིག་སྐྱེས་པའི་བདེ་བ་ཆེན་པོའི་རང་བཞིན་ནོ། །ཞེས་གསུངས་པ་ལྟར། ལྷན་སྐྱེས་ཀྱི་བདེ་བ་ལ་བྱེད་ཀྱི། སེམས་ཅན་སྡུག་བསྔལ་དང་འབྲལ་བར་འདོད་པ་ཐེག་པ་ཐུན་མོང་བའི་སྙིང་རྗེ་དེ་ཙམ་ལ་མི་བྱེད་དེ། འདོད་འཇོ་ལས། སྙིང་རྗེ་ལ་སྤྱིར་གཉིས་ཡོད་ཀྱང༌། འདི་འདྲའི་སྐབས་སུ་སེམས་ཅན་སྡུག་བསྔལ་དང་བྲལ་འདོད་ལ་བཤད་པ་ལྟར་མི་བྱ་ཡི། ལྷན་སྐྱེས་ཀྱི་བདེ་ཆེན་ལ་བྱ་སྟེ། ཞེས་ཐབས་ཤེས་ཕན་ཚུན་ཟིན་ཚུལ་མཚོན་པའི་སྐབས་སུ་གསུངས་སོ། །འོ་ན་བདེ་ཆེན་སྙིང་རྗེར་འཇོག་པ་ལ་དེ་སྙིང་རྗེར་འགྲོ་ཚུལ་ཞིག་དགོས་པས་གང་ཡིན་ཞེ་ན། བཤད་པར་བྱ་སྟེ། དེ་ངེས་ཚིག་གི་སྟེང་ནས་ཀྱང་སྙིང་རྗེར་འགྲོ་ཚུལ་ཞིག་ཡོད་ལ། ཁྱད་པར་དུ་བྱེད་ལས་ཀྱི་ཆ་ནས་སྙིང་རྗེའི་གཙོ་བོར་འགྲུབ་བོ། །དང་པོ་ནི། སྙིང་རྗེའི་སྐད་དོད་ཀ་རུ་ཎའི་ཀ་ལ་རྗེས་སུ་ང་རོ་བྱིན་པས་ཀཾ་བདེ་བ་དང་རུ་ཎ་འགོག་ལ་འཇུག་པས། ཐུན་མོང་ལྟར་ན་སེམས་ཅན་གྱི་སྡུག་བསྔལ་གཟིགས་ནས་ཐུགས་ཀྱིས་མ་བཟོད་པས་བདེ་བའི་གོ་སྐབས་མེད་པ་དང་། ཐུན་མོང་མ་ཡིན་པ་འདིའི་དབང་དུ་བྱས་ན་འགྱུར་བ་འཛག་བདེ་འགོག་པར་བྱེད་པས་བདེ་འགོག་ཅེས་མི་འགྱུར་བའི་བདེ་བ་ལ་དུས་འཁོར་ལས་གསུངས་པ་ལྟར་རམ། གྲུབ་ཆེན་མཚོ་སྐྱེས་ཀྱིས་རུ་ཎ་སྡུད་པ་ལ་བྱས་ཏེ་བདེ་བསྡུས་ཞེས་པ་ལྟར་ན་ཡང་དགའ་བ་དང་པོ་གསུམ་གྱི་མཐར་གང་དུ་སྡུད་པ་ལྷན་སྐྱེས་ལ་བཤད་དགོས་ཏེ། བརྟག་གཉིས་ཀྱི་མགོར་ཀྱཻ་རྡོ་རྗེའི་མཚན་དོན་དྲིས་པའི་ལན་དུ། ཧེས་ནི་སྙིང་རྗེ་ཆེན་པོ་ཉིད། །
བཛྲ་ཤེས་རབ་བརྗོད་པར་བྱ། །ཞེས་ཧེའི་དོན་སྙིང་རྗེ་ཆེན་པོར་གསུངས་པའི་ཐད་ཀྱི་རྣམ་བཤད་ལས། ཀ་རུ་ཎ་ཞེས་པའི་ཀ་ལ་ཐིག་ལེ་བྱིན་པས་ཀཾ་བདེ་བ་དང་རུ་ཎ་འགོག་པ་ལ་འཇུག་ཅིང༌། དེ་ཉིད་ཐུན་མོང་གི་སྙིང་རྗེའི་སྒྲ་དོན་དུ་བྱས་ན་སེམས་ཅན་སྡུག་བསྔལ་བ་ལ་མི་བཟོད་པའི་སྙིང་རྗེ་ཆེན་པོ་གང་གི་ཐུགས་རྒྱུད་ལ་འཁྲུངས་པའི་ཚེ་ཐུགས་བདེ་བར་གནས་པ་འགོག་པའི་རྣམ་ཅན་དུ་སྐྱེ་བས་བདེ་འགོག་གོ །ཐུན་མོང་མ་ཡིན་པའི་སྙིང་རྗེ་ལ་བཤད་ན་ཨ་ཧཾ་སྦྱར་བས་ཀུནྡ་ལྟ་བུའི་བྱང་ཆུབ་ཀྱི་སེམས་ཨ་ཝ་དྷཱུ་ཏཱི་ནས་རྡོ་རྗེ་ནོར་བུའི་རྩེར་བབས་པ་ཕྱིར་འཕོ་བ་འགོག་པ་ལས་སྐྱེས་པའི་བདེ་ཆེན་ལ་བདེ་འགོག་ཅེས་བྱའོ། །ཞེས་གསུངས། དེར་མ་ཟད་ཧེ་བཛྲ་གྱི་ཧེའི་སྒྲ་ལ་མཧཱ་ཀ་རུ་ཎ་ཞེས་པ་ཚང་ཚུལ་ཡང༌། དེའི་མ་དང་ཀ་དང་ཎ་གསུམ་ཕྱིས་རུའི་སྲོག་གི་ཨུ་ཕྱུང་སྟེ་ཨེར་བྱས་པ་ཧ་ལ་བཅུག་པས་ཧེར་འགྱུར་བར་ཤཱནྟི་པས་གསུངས་ལ། བོད་སྐད་ཀྱི་དབང་དུ་བྱས་ན་ཡང༌། བླ་མ་གོང་མ་འགའ་ཞིག །ཀྱཻ་རྡོ་རྗེ་དང་དགྱེས་པ་རྡོ་རྗེ་ཞེས་སྒྲ་འགྱུར་ཚུལ་གཉིས་འབྱུང་བ་ཡང་ཀྱཻ་ཞེས་འབོད་པའི་སྒྲ་ནི་སེམས་ཅན་སྡུག་བསྔལ་བ་མ་བཟོད་པས་སྙིང་རྗེ་ཐུན་མོང་བར་འཇུག་ལ། དགྱེས་པ་ཞེས་བཤད་ན་རྟག་ཏུ་བདེ་བ་ཆེན་པོས་དགྱེས་པར་རོལ་པ་ཞེས་སྙིང་རྗེ་ཐུན་མོང་མ་ཡིན་པ་ལ་འཇུག་པར་བཤད་དོ། །གཉིས་པ་དེ་ཉིད་བྱེད་ལས་ཀྱི་ཆ་ནས་སྙིང་རྗེའི་གཙོ་བོར་འགྲོ་ཚུལ་ཡང༌། ཐུན་མོང་གི་སྙིང་རྗེ་ནི་སེམས་ཅན་སྡུག་བསྔལ་དང་བྲལ་ན་དང༌། བྲལ་བར་གྱུར་ཅིག །བྲལ་བར་བྱའོ་སྙམ་དུ་སྒོམ་པར་བྱེད་ཀྱང་དངོས་སུ་རང་སྟོབས་ཀྱིས་དེ་ལྟར་བྱེད་མི་ནུས་
པས་བསམ་པ་བཟང་བ་ཙམ་ཡིན་ལ། ལྷན་སྐྱེས་ཀྱི་བདེ་བས་རླུང་སེམས་ལ་དབང་བསྒྱུར་བའི་སྟོབས་ཀྱིས་ཡེ་ཤེས་རང་ཉིད་ལྷའི་སྐུ་སོགས་གང་ལ་གང་འཚམ་གྱི་སྣོད་བཅུད་དེ་དང་དེའི་རྣམ་པར་ཤར་ནས་སེམས་ཅན་གྱི་དོན་བྱེད་པས་ཡིད་བཞིན་གྱི་ནོར་བུ་ལྟར་བྱེད་ལས་ཕུན་སུམ་ཚོགས་པའི་མཐུ་དང་ལྡན་ལ། ཡེ་ཤེས་འདི་ཉིད་མེད་ན་གཞན་དོན་ཉི་ཚེ་བ་ཙམ་བྱུང་ཡང༌། ས་གསུམ་གྱི་འགྲོ་བ་མ་ལུས་པའི་སྡུག་བསྔལ་དྲུངས་ཕྱུང་སྟེ་ཕན་བདེ་ལ་འགོད་པའི་བྱེད་ལས་ཁྱད་པར་ཅན་གྱི་སྒོ་ནས་རེ་བ་ཚིམ་པར་བྱེད་མི་ནུས་པའི་ཕྱིར། སམྦྷུ་ཊ་ལས། ཡིད་བཞིན་ནོར་ལྟར་མ་ལུས་པའི། །སེམས་ཅན་དོན་བྱེད་སྙིང་རྗེ་ཉིད། །ཅེས་དང༌། ས་ར་ཧས། བདེ་བ་གང་གིས་རྣམ་པར་རོལ་པ་ནི། །ཅི་སྟེ་དེ་བསྟེན་ནུས་པ་མེད་པས་ན། །ས་གསུམ་རེ་བ་གང་གིས་རྫོགས་པར་འགྱུར། །ཞེས་སོ། །དེར་མ་ཟད་ཐབས་སྙིང་རྗེ་ཆེན་པོ་ཞེས་ཐབས་ཀྱི་ཆ་དང༌། རྒྱ་ཆེ་བའི་ལམ་གྱི་སྡོམ་ལྟ་བུ་ནི་སྙིང་རྗེ་ཆེན་པོ་ལ་བྱེད་པ་མདོ་སྔགས་གཉིས་ཀ་འདྲ་ཡང༌། མདོ་ལུགས་ནི། དབུས་མཐའ་ལས། རྒྱ་ཆེ་བ་དང་ཡུན་རིང་དང༌། །ཞེས་པ་ལྟར། བསྒྲུབ་བྱ་སེམས་ཅན་གྱི་དོན་མཐའ་ཡས་པ་དང༌། སངས་རྒྱས་ཀྱི་སྐུ་དང་ཞིང་དང་མཛད་པ་མཐའ་ཡས་པ་ལྟར། དེའི་རྒྱུ་རྒྱ་ཆེ་བའི་ཚོགས་ཀྱི་དབྱེ་བ་མཐའ་ཡས་པར་དུས་བསྐལ་པ་གྲངས་མེད་མང་པོའི་བར་དུ་སློབ་དགོས་པར་གསུངས་ལ། སྔགས་ལུགས་ཀྱི་སྙིང་རྗེ་ཆེན་པོ་རང་ཉིད་ཀྱི་ཚོགས་པར་འབྲས་བུ་དེ་ཐམས་ཅད་སྒྲུབ་པའི་རྒྱུའི་གནད་ཚང་ཡོད་པས། ཚོགས་ཀྱི་དབྱེ་བ་
མཐའ་དག་ལ་རེ་རེ་ནས་མ་བསླབ་ཀྱང་འདིས་དེ་དག་ཐམས་ཅད་ཀྱི་དོད་ཐུབ་པར་མ་ཟད་སྟོབས་ཆེ་བས་དུས་ཀྱང་ཡུན་ཐུང་ངུས་འགྲུབ་པའི་ཕྱིར། སམྦྷུ་ཊ་ལས། དེ་ཕྱིར་དེ་རྒྱས་ཅི་ཞིག་བྱ། །མདོར་བསྡུས་པས་ནི་སངས་རྒྱས་ཉིད། །བསྐལ་པ་བྱེ་བ་གྲངས་མེད་པས། །ཇི་སྲིད་སངས་རྒྱས་གང་འཐོབ་པ། །གང་གིས་དམ་པའི་བདེ་བས་ཁྱོད། །སྐྱེ་བ་འདིར་ནི་ཐོབ་པར་འགྱུར། །ཞེས་ཤིན་ཏུ་གསལ་བར་གསུངས་ལ། སློབ་དཔོན་ཡེ་ཤེས་ཞབས་ཀྱིས་ཀྱང༌། སྙིང་རྗེ་དམ་པ་མཐའ་ཡས་པ་ཡི་ཐབས། །ཞེས་སྙིང་རྗེ་རང་གི་ངོ་བོ་ལ་ཐབས་ཀྱི་གནད་ཚང་བར་གསུངས་པ་དང༌། རྒྱུ་ཚོགས་མང་པོས་རྒྱང་རིང་པོ་ནས་བསྐོར་བ་ལྟ་བུ་བྱེད་མི་དགོས་པར་ཆོས་གཟུགས་གཉིས་ཀའི་ཉེ་རྒྱུའི་རྩ་བ་ནས་བཟུང་སྟེ་བསྒྲུབ་པས་ན་སྐུ་གསུམ་ལ་དམར་འཇུས་སུ་བྱེད་པ་ཞེས་ཀུན་མཁྱེན་འཇམ་དབྱངས་བཞད་པས་གསུངས་པ་རྣམས་ལེགས་པར་གོ་དགོས་ཏེ། གནད་འདི་མ་གོ་ན་ཐོབ་བྱའི་འབྲས་བུ་ཕར་ཕྱིན་ཐེག་པར་བཤད་པ་ལས་དམན་པའི་དོགས་པའམ། རྒྱུའི་མྱུར་ཁྱད་ལ་ཡིད་མི་ཆེས་པ་གང་རུང་འབྱུང་བས་ཆོས་ཀྱི་རྗེས་སུ་འབྲང་བའི་དད་པ་སྐྱེ་དཀའོ། །དེ་དག་གི་དོན་བསྡུས་ན་བསྟོད་པའི་ཤོ་ལོ་ཀ་འདིར་སྙིང་རྗེ་རང་ཉིད་སྟོང་པ་ཉིད་ལ་ཞུགས་པའི་ཆ་ནས་སྒྲིབ་གཉིས་བཅོམ་སྟེ་སྲིད་མཐའ་འགོག་པའི་ཤེས་རབ་ཀྱི་ངོ་བོ་དང༌། འགྲོ་བ་རྣམས་ལ་དམ་དུ་འཁྱུད་པའི་ཚུལ་གྱིས་མི་གཏོང་བར་དེའི་དོན་བྱེད་པའི་ཆ་ནས་ཞི་མཐའ་འགོག་པའི་ཐབས་ཀྱི་ངོ་བོ་སྟེ་ཐབས་ཤེས་གཉིས་ཀ་བློ་གཅིག་གི་ངོ་བོར་ཚང་བར་ཐབས་ཤེས་དབྱེར་མེད་དང་ཆོས་གཟུགས་འགྲུབ་པའི་ཚོགས་གཉིས་ཟུང་དུ་འབྲེལ་བར་གསུངས་པ་འདི་ནི་རྒྱུད་
ཀྱི་དགོངས་པ་མཐར་ཐུག་ཡིན་ཏེ། འདིའི་བཤད་རྒྱུད་སམྦྷུ་ཊ་ལས། སྤྲོས་པ་མེད་པའི་རང་བཞིན་ཉིད། །ཤེས་རབ་ཅེས་ནི་རབ་ཏུ་གྲགས། །ཡིད་བཞིན་ནོར་ལྟར་མ་ལུས་པའི། །སེམས་ཅན་དོན་བྱེད་སྙིང་རྗེ་ཉིད། །དམིགས་མེད་གནས་སུ་ཤེས་རབ་དང༌། །དམིགས་མེད་སྙིང་རྗེ་ཆེན་པོ་ཉིད། །བློ་དང་ལྡན་ཅིག་གཅིག་གྱུར་པ། །ནམ་མཁར་ནམ་མཁའ་ཇི་ལྟ་འོ། །ཞེས་གསུངས་ཤིང་ཐབས་ཤེས་སམ་བདེ་སྟོང་དབྱེར་མེད་ཚུལ་དཔེ་དང་བཅས་ཏེ་གོང་དུ་ཡང་བཤད་ཟིན་ཏོ། །༈ གཉིས་པ་འཕྲོས་དོན་སྤྱོད་པའི་ཁྱད་པར་བསྟན་པ་ནི། ཆགས་པ་མེད་ཀྱང་བརྩེ་ཆེན་ཆགས་པས་མྱོས། །ཁྲོ་དང་བྲལ་ཡང་ཉོན་མོངས་དགྲ་མགོ་གཅོད། །གཏི་མུག་ཀུན་བཅོམ་འོད་གསལ་ངང་དུ་གཟིམས། །ཡ་མཚན་སྒྱུ་མས་ས་བཅུ་པ་ཡང་རྨོངས། །ཞེས་བྱུང༌། དེ་ཡང་སྤྱོད་པའི་ཐ་སྙད་ཟོར་ཡངས་པར་བྱས་ན། ཆགས་བྲལ་གྱི་སྤྱོད་པ་དང༌། ས་དང་ཕ་རོལ་ཏུ་ཕྱིན་པའི་སྤྱོད་པ་དང༌། ཆགས་བཅས་ཀྱི་སྤྱོད་པ་གསུམ་དུ་གསུངས་པས་མདོ་སྔགས་ཐམས་ཅད་ལ་དེའི་སྒྲ་འཇུག་ཀྱང༌། གཙོ་བོ་ནི། སྔགས་རིམ་ལས། སྤྱོད་པ་ནི་འདོད་པའི་ཡོན་ཏན་ལ་རང་བཞིན་ཡོངས་སུ་ཤེས་པའི་སྒོ་ནས་ཐབས་མཁས་ཀྱིས་སྤྱོད་པ་ཡིན་ལ། ཞེས་འདོད་ཡོན་ལ་ཆགས་པ་ལམ་དུ་བྱེད་པ་ཡིན་ཞིང༌། དེའི་ནང་ནས་ཀྱང་རིག་མའི་འདོད་ཡོན་ལ་སྤྱོད་པ་ཡིན་ཏེ། རིམ་ལྔ་གསལ་སྒྲོན་ལས། གང་ལ་སྤྱོད་པའི་འདོད་ཡོན་གྱི་གཙོ་བོ་ནི་རིག་མའི་འདོད་ཡོན་ཡིན་ལ། ཞེས་སོ། །དེས་ན་སྤྱིར་སྤྱོད་པ་བྱེད་པའི་དུས་ལ་བསྐྱེད་རིམ་ཕྲ་རགས་མཐར་ཕྱིན་ནས་ཐུན་མོང་གི་དངོས་གྲུབ་འགྲུབ་པའི་ཕྱིར་དང༌། སེམས་
དབེན་ཐོབ་ནས་སྒྱུ་ལུས་འགྲུབ་པའི་ཕྱིར་དང༌། སྒྱུ་ལུས་གྲུབ་ནས་སློབ་པའི་ཟུང་འཇུག་ཐོབ་པའི་ཕྱིར་དང༌། དེ་ཐོབ་ནས་མཆོག་བསྒྲུབ་པའི་ཕྱིར་སྤྱོད་པ་བྱེད་པ་སྟེ། ལམ་ལ་བོགས་འབྱིན་གྱི་སྤྱོད་པའི་སྐབས་བཞི་གསུངས་ཀྱང༌། འདིར་འོད་གསལ་གྱི་རིམ་པ་ནི་དབང་གསུམ་པ་ཕོ་ཉའི་ལམ་གཙོ་བོར་གྱུར་པ་ཡིན་པས་དེ་དང་འབྲེལ་ནས་སྤྱོད་པའི་རྣམ་བཞག་གསུངས་པ་ཡིན་ཏེ། འདི་ལ་དགོངས་ནས་རྒྱུད་འདིའི་བརྟག་པ་དང་པོར་དེ་ཁོ་ན་ཉིད་ཀྱི་ལེའུས་ཕྱག་རྒྱའི་མཚན་ཉིད་བསྟན་པའི་མཇུག་ཐོག་ཏུ་སྤྱོད་པའི་ལེའུ་གསུངས་ཤིང༌། བདེ་མཆོག་གི་རྒྱུད་ལས་ཀྱང་ཉེར་དྲུག་པར་ཕྱག་རྒྱ་མཉེས་པར་བྱེད་པའི་ཚུལ་བསྟན་ནས། ཉེར་བདུན་པ་སོགས་གསུམ་གྱིས་སྤྲོས་བཅས་དང༌། སོ་བརྒྱད་པར་སྤྲོས་མེད་ཀྱི་སྤྱོད་པ་རྒྱས་པར་བསྟན་ཏོ། །དེ་ཡང་འདིར་སྙིང་རྗེ་ལ་ཆགས་པའི་མིང་གིས་བཏགས་པ་ནི་སྤྱིར། འགྲོ་ལ་ཆགས་པས་ཀུན་ཆགས་མཛད། །ཅེས་འགྲེལ་པ་དོན་གསལ་ལས་གསུངས་པ་ལྟ་བུ་སྙིང་རྗེ་ཐུན་མོང་བ་ལ་དོན་མིང་བཏགས་པ་ཡོད་ཀྱང༌། འདི་ནི། ཐབས་ཤེས་གཏན་ལ་དབབ་པ་གྲུབ་པ་ལས། སྙིང་རྗེ་སེམས་ཅན་ལ་ཆགས་པས། །འདོད་ཆགས་ཞེས་ནི་བྱ་བར་གྲགས། །ཞེས་དང་། རིམ་ལྔ་གསལ་སྒྲོན་ལས། ཐབས་གང་ལས་འགྲོ་བའི་དོན་འབྱུང་བའི་ཆགས་པ་ཆེན་པོ་ལྷན་ཅིག་སྐྱེས་པའི་བདེ་བ། ཞེས་གསུངས་པ་ལྟར། ལྷན་སྐྱེས་ཀྱི་བདེ་བ་ལ་ཆགས་པའི་སྒྲས་བསྟན་ནོ། །དེས་མྱོས་པ་ནི་ཆགས་པ་ཆེན་པོ་དེ་ཉིད་འབྲེལ་བའི་ཐབས་སྣ་ཚོགས་ཀྱིས་རྒྱས་པར་བྱས་པའི་དོན་ཏེ། དེ་ཡང་སྤྱོད་པ་བྱ་བའི་གནས་རྒྱུད་ལས་གསུངས་པ་དང་མཐུན་པར་ཆུ་ཚོན་གྱི་དཀྱིལ་འཁོར་སོགས་སུ་རྣལ་འབྱོར་
པ་ཕོ་མོ་རྣམས་ལྷ་སོ་སོའི་ཆས་སུ་ཞུགས་ཏེ་ང་རྒྱལ་བརྟན་པོས། ཐོག་མར་གཟུགས་དང་སྒྲ་དང་དྲིའི་ཡུལ་ལ་སྤྱོད་པས་ཆགས་པ་སྤེལ་ཞིང༌། དེ་ནས་ནང་གི་སྦྱིན་སྲེག་གི་ཚུལ་དུ་རོ་ལ་སྤྱོད་པས་ཁམས་རྟས་པར་བྱེད། དེ་རྗེས་ལྷན་ཅིག་སྤྱོད་པ་དང་རྗེས་སུ་སྤྱོད་པའི་ཕྱག་རྒྱ་རྣམས་ཀྱི་ནང་ནས་འདོད་པའི་སྒྱུ་རྩལ་ལ་མཁས་པ་གཅིག་བླངས་ཏེ་རྩ་བསྐུལ་བ་སོགས་སྔོན་དུ་འགྲོ་བས་སྙོམས་པར་ཞུགས་ནས་ལྷན་སྐྱེས་ཀྱི་བདེ་བ་འདྲེན་ཞིང༌། དེའི་སྔ་ཕྱི་ཀུན་ཏུ་ཨ་ར་ལི་སྟེ་རྩེད་མོའམ་དགའ་བའི་རོལ་པ་སྣ་ཚོགས་པ་བརྡ་དང་བརྡའི་ལན་དང༌། གླུ་དང་གླུའི་ལན་དང༌། གར་དང་གར་གྱི་ལན་ལ་སོགས་པ་སྒོ་མཐའ་དག་ནས་ལྷན་སྐྱེས་ཀྱི་བདེ་བ་དྲངས་ཏེ། དེ་ལ་གཅིག་ཏུ་གཞོལ་བར་གྱུར་པས་ན་ཆགས་པས་མྱོས་པ་ཞེས་བཤད་པ་ཡིན་ནོ། །སྙིང་རྗེ་ལ་ཆགས་པར་བཏགས་པའི་དབང་དུ་བྱས་པའི་བཤད་ཚུལ་དེ་ལྟར་ཡིན་ཀྱང་ཚུལ་དེ་ཁོ་ནར་མ་ངེས་པ་ནི། རིམ་ལྔ་གསལ་སྒྲོན་ལས། དེ་བས་ན་ཆགས་པ་དངོས་མིན་པ་ལ་དེའི་མིང་གིས་བཏགས་པ་མིན་ནོ། །ཞེས་གསུངས་པ་ལྟར་དེ་ཆགས་པ་དངོས་གནས་པ་ལ་བྱས་ནས་དེ་ཉིད་ལམ་དུ་བྱེད་ཚུལ་དང་ཡང་སྦྱོར་དགོས་ཏེ། བརྟག་པ་ཕྱི་མའི་གཉིས་པ་ལས། ཆགས་པས་འཇིག་རྟེན་འཆིང་གྱུར་པ། །འདོད་ཆགས་ཉིད་ཀྱིས་རྣམ་གྲོལ་འགྱུར། །ཞེས་དང༌། དུག་གི་དེ་ཉིད་ཤེས་པ་དེས། །དུག་གིས་དུག་ནི་སེལ་བར་བྱེད། །ཅེས་སོགས་དུག་གིས་དུག་སེལ་བ། རྣ་བར་ཆུ་སོང་བ་ཆུས་འདྲེན་པ། མེས་ཚིག་པ་མེས་གདུངས་པས་ཞིང་སོགས་དཔེར་བྱས་ཏེ་འདོད་ཆགས་ལམ་དུ་
བྱས་པས་འདོད་ཆགས་དྲུངས་འབྱིན་པར་གསུངས་པའི་ཕྱིར་རོ། །དེ་ལྟར་རྐང་པ་དང་པོའི་དོན་སྙིང་རྗེ་ལ་ཆགས་པར་བཤད་པ་དང༌། ཆགས་པ་དངོས་གནས་པ་ལམ་དུ་བྱེད་ཚུལ་གཉིས་སུ་ཕྱེ་བ་བཞིན་རྐང་པ་གཉིས་པ་དང་གསུམ་པའི་དོན་ཡང་ཁྲོ་བ་དང་གཏི་མུག་ལྟ་བུར་བཏགས་ནས་བཤད་པ་དང༌། ཁྲོ་བ་དང་གཏི་མུག་དངོས་གནས་པ་ལམ་དུ་བྱེད་ཚུལ་གཉིས་གཉིས་ལ་སྦྱར་ན་སྤྱོད་པའི་སྐབས་དང་ཤིན་ཏུ་འགྲེལ་ཏེ། དང་པོ་ནི་དཔེར་ན། བརྟག་པ་ཕྱི་མའི་གསུམ་པ་ལས། ཁྱོད་ཀྱིས་སྲོག་ཆགས་གསད་པར་བྱ། །ཞེས་སོགས་དམ་ཚིག་བཞི་གསུངས་པའི་དོན་འཆད་པར་དེའི་མཇུག་ཐོགས་སུ། སེམས་གཅིག་སྲོག་ཆགས་གསོད་པ་ཉིད། །གང་ཕྱིར་སྲོག་ནི་སེམས་སུ་བརྗོད། །ཅེས་སྲོག་ཆགས་སུ་ཐ་སྙད་གདགས་པའི་གཞི་སེམས་ཐམས་ཅད་དེ་བཞིན་ཉིད་དུ་རོ་གཅིག་པར་བྱེད་པའམ། སེམས་ཀྱི་ཀུན་རྟོག་གཡོ་བའི་བཞོན་པར་གྱུར་པའི་རླུང་ངམ་སྲོག་དྷཱུ་ཏཱིར་བཅུག་པ་ལ་སྲོག་ཆགས་བསད་པའི་སྒྲས་བསྟན་པ་ལྟར། འདིར་ཀུན་ནས་ཉོན་མོངས་པའི་དགྲ་བོ་བཞོན་པའི་རླུང་དང་བཅས་པ་རིག་པ་ཡེ་ཤེས་ཤུགས་དྲག་པོས་དྲུངས་ནས་ཕྱུང་བ་ལ། རབ་ཏུ་ཁྲོས་པའི་ཤུགས་ཀྱིས་མཚོན་ཆ་རྣོན་པོ་བཏབ་སྟེ་དགྲའི་མགོ་བོ་བཅད་པ་ལྟ་བུའི་ཉམས་དང་སྦྱར་ནས་གསུངས་པ་ཡིན་ནོ། །འདི་ནི་དཔེ་ཙམ་མ་ཡིན་པར་སྤྱོད་པའི་ཁྱད་པར་འགའ་ཞིག་གི་མཚོན་དོན་དུ་ཡང་སྦྱོར་དགོས་ཏེ། གྲུབ་ཆེན་ཤ་བ་རི་པ་རི་དྭགས་གསོད་པ་དང༌། བེ་ཏ་ལི་པ་བྱ་གསོད་པ། འགའ་ཞིག་གིས་ཕག་གསོད་པ་ལྟ་བུའི་ཚུལ་བསྟན་པ་རྣམས་ཀྱང་དོན་ཉོན་མོངས་འཇོམས་པའི་མཚོན་བྱེད་ཡིན་པར་རྡོ་རྗེའི་གླུ་སོགས་ལས་འབྱུང་བ་བཞིན་ནོ། །དེས་མཚོན་ཏེ་འོད་
གསལ་ངང་དུ་གཟིམས་ཞེས། འོད་གསལ་ལ་གཉིད་ཀྱི་སྒྲས་བསྟན་པ་ཡང་གཉིད་ཀྱིས་སེམས་ནང་དུ་བསྡུས་ཏེ་ཡུལ་མི་མཐོང་བར་བྱེད་པ་གཏི་མུག་དང་བྱེད་ལས་ཆ་འདྲ་བ་ཡོད་པས་དེའི་སྒོ་ནས་བཏགས་པ་ཡིན་ཏེ། མདོ་ལས། གང་མ་མཐོང་བ་ནི་མཐོང་བ་དམ་པའོ། །ཞེས་དང་། སྤྱོད་འཇུག་ལས། དོན་དམ་བློ་ཡི་སྤྱོད་ཡུལ་མིན། །ཞེས་གཉིས་སྣང་དང་བཅས་པའི་ཚུལ་གྱིས་མཐོང་བྱ་མ་ཡིན་པ་ལ་མ་མཐོང་བ་དང༌། བློས་ཡུལ་དུ་མ་བྱས་པ་སོགས་སུ་བཤད་པ་ལྟར། འདིར་ཡང་ཐམས་ཅད་སྟོང་པ་འོད་གསལ་གྱི་ཚེ་སྣང་བ་གསུམ་ལ་སོགས་པའི་སྐབས་ཀྱི་གཉིས་སྣང་གི་སྤྲོས་པ་མ་ལུས་པར་བསྡུས་ཏེ། ཡུལ་སྟོང་པ་ཉིད་དང་ཡུལ་ཅན་བདེ་བ་ཆེན་པོའི་ཡེ་ཤེས་གཉིས་རོ་མཉམ་དུ་གྱུར་པ་ལ་དེའི་ངང་དུ་གཟིམས་ནས་ཅི་ཡང་མ་མཐོང་བ་ལྟ་བུར་བཤད་པ་ཡིན་ཏེ། སྡོམ་འབྱུང་ལས། གང་གི་ཚེ་ན་དེ་ཉིད་རིག །བསམ་པ་ཐམས་ཅད་བསམ་དུ་མེད། །གང་དུ་བསམ་དུ་མེད་སེམས་པ། །དེ་ཚེ་བསམ་མི་ཁྱབ་པར་འགྱུར། །ཞེས་དང༌། ཡིད་མེད་ཡིད་ནི་བྱས་ནས་སུ། །ཅུང་ཟད་ཙམ་ཡང་བསམ་མི་བྱ། །མཁའ་དང་ནམ་མཁའ་མཉམ་དེ་བཞིན། །སེམས་ནི་རོ་མཉམ་བསྒོམ་བྱ་སྟེ། །ཞེས་གསུངས་ཏེ། ལམ་གྱི་འོད་གསལ་སྐབས་ཀྱི་ཐམས་ཅད་སྟོང་པ་དེ་ཇི་ལྟ་བ་གཞི་ལ་འཆི་དུས་འཆར་ཞིང༌། དེ་དང་ཆ་འདྲ་བ་གཉིད་ཀྱི་ཚེ་འབྱུང་བས་དེའི་ཆ་ནས་ཀྱང་མཚོན་པ་ཡིན་ནོ། །གཞན་ཡང་སྦྱོར་བ་བདུན་པ་ལས། དཀྱིལ་འཁོར་བྲི་བ་ལ་སོགས་དགག །སྡོམ་པའི་མཆོག་ནི་སྦྱིན་པ་འོ། །ཞེས་དབང་གསུམ་པའི་དམ་ཚིག་ཏུ་གསུངས་ཀྱང་གཙོ་བོར་སྤྱོད་པའི་སྐབས་
ཡིན་ཏེ། གསང་བ་གྲུབ་པ་ལས། ས་རྡོའི་རང་བཞིན་མཆོད་རྟེན་དང༌། །གླེགས་བམ་ལ་སོགས་མི་བྱ་ཞིང༌། །རྨི་ལམ་དུ་ཡང་དཀྱིལ་འཁོར་སོགས། །ལག་པའི་ཕྱག་རྒྱ་ཡང་མི་བྱ། །ཐེག་པ་གསུམ་ལ་ཞུགས་རྣམས་ལ། །ཕྱག་ལ་སོགས་པ་མི་བྱ་འོ། །ཞེས་གསུངས་པ་ཡང་སྤྱིར་སྤྱོད་པ་གསུམ་གའི་ཚེ་ལུས་ངག་གི་དགེ་སྦྱོར་གཞན་ལ་ཆེད་དུ་མི་བྱེད་པར་དེ་ཁོ་ན་ཉིད་བསྒོམ་པ་གཙོ་ཆེ་ལ། འོན་ཀྱང་སྤྲོས་བཅས་སྤྲོས་མེད་གཉིས་ནི་ལས་ཀྱི་ཕྱག་རྒྱ་ལ་བསྟེན་པས་ཕྱག་དང་ཕྱག་གི་ལན་སོགས་བྱ་བ་དང༌། ཤིན་ཏུ་སྤྲོས་མེད་ནི་དེ་ཙམ་ཡང་མེད་པར་བཟའ་བཏུང་དང་བཤང་གཅིའི་སྐབས་མ་གཏོགས་ཡེ་ཤེས་ཀྱི་ཕྱག་རྒྱ་ལ་བསྟེན་ནས་འོད་གསལ་དུ་འཇུག་པའི་རིམ་པས་ལྷན་སྐྱེས་བསྒོམ་པ་ཁོ་ན་ལ་ཆིག་དྲིལ་དུ་བྱེད་པར་གསུངས་སོ། །འདིའི་སྐབས་སུ་གཉིད་ཀྱི་འོད་གསལ་གཙོ་བོར་བསྒོམ་སྟེ་སྣང་ཚོད་ལ་རྟག་ཏུ་གཉིད་ལོག་ནས་བཞུགས་པ་ལྟར་ཡོད་པས་འོད་གསལ་ངང་དུ་གཟིམས་ཞེས་པ་ཤིན་ཏུ་སྤྲོས་མེད་དང༌། རྐང་པ་སྔ་མ་གཉིས་སྤྲོས་བཅས་ལ་སྦྱར་ཡང་རུང་སྟེ། ཤིན་ཏུ་སྤྲོས་མེད་ལ་བྷུ་སུ་ཀུའི་སྤྱོད་པ་ཞེས་འབྱུང་བའི་དོན་ཡང༌། ཡི་གེ་གསུམ་ལ་སོ་སོར་ཡི་གེ་བསྣན་ཏེ་ངེས་ཚིག་གིས་བཤད་ན་དང་པོར་བྷུཉྫ་ན་ཞེས་ཟས་ཟ་བ་དང༌། གཉིས་པར་སུ་ཏ་ན་ཞེས་གཉིད་ལོག་པ་དང༌། གསུམ་པར་ཀུ་ཊི་ས་ར་ཞེས་བཤང་གཅིའི་ཕྱིར་འགྲོ་བའི་འཆག་པ་སྟེ་འདུ་ཤེས་དེ་གསུམ་མ་གཏོགས་འདུ་འཛི་སྤངས་ཏེ་རྒྱུན་དུ་གཉིད་དང་འོད་གསལ་བསྲེས་པ་ཉིད་སྐྱོང་བར་གསུངས་སོ། །ཡི་གེ་ཕྱི་མ་འདི་ལ། བརྟག་གཉིས་རྣམ་བཤད་པར་རྙིང་དུ་ཀུ་ཊི་པ་ར་ཞེས་འབྱུང་བ་མ་དག་པར་མངོན་
ཏེ། རིམ་ལྔ་གསལ་སྒྲོན་དང༌། སྦས་དོན་ཀུན་གསལ་སོགས་དུ་མར་ཀུ་ཊི་ས་ར་ཞེས་འབྱུང་ཞིང༌། སྲྀ་འགྲོ་བ་ལའོ་ཞེས་པའི་བྱིངས་ལས་སྒྲུབ་ན་ཡང་ས་ར་ཞེས་པ་དག་པར་མངོན་ནོ། །དེ་བཞིན་དུ། འཇམ་དཔལ་མཚན་བརྗོད་ལས། མཆོད་པ་ཆེན་པོ་འདོད་ཆགས་ཆེ། །སེམས་ཅན་ཐམས་ཅད་དགའ་བར་བྱེད། །མཆོད་པ་ཆེན་པོ་ཞེ་སྡང་ཆེ། །ཉོན་མོངས་ཀུན་གྱི་དགྲ་ཆེ་བ། །མཆོད་པ་ཆེན་པོ་གཏི་མུག་ཆེ། །གཏི་མུག་བློ་སྟེ་གཏི་མུག་སེལ། །ཞེས་བདེ་ཆེན་གྱི་ཡེ་ཤེས་དེ་ཉིད་ལ་བྱེད་ལས་ཀྱི་སྒོ་ནས་ཆགས་སྡང་གཏི་མུག་སོགས་སུ་འདོད་ཚུལ་གསུངས་པས་དང་པོ་གཉིས་དངོས་ཟིན་གསལ་ཡང༌། ཕྱི་མའི་དོན། དཔེ་མེད་འཚོས་སྲོག་རྩོལ་གྱི་རླུང་གི་རྒྱུ་བ་དྷཱུ་ཏཱིར་བཀག་པས་གཏི་མུག་ཏུ་བཤད་ལ། ཉི་མ་དཔལ་གྱིས། གཏི་མུག་ལས་ཤིན་ཏུ་འདས་པའི་ཕྱིར་གཏི་མུག་ཆེན་པོའོ། །ཞེས་བཤད་དོ། །གཉིས་པ་ཞེ་སྡང་དང་གཏི་མུག་དངོས་གནས་པ་གཉིས་ལམ་དུ་བྱེད་ཚུལ་ཡང་དེས་མཚོན་ནས་གོ་དགོས་ཏེ། སྤྱོད་པའི་སྐབས་འདིར་འདོད་ཆགས་ལམ་དུ་བྱེད་ཚུལ་གསུངས་པའི་ཞར་ལ་དེ་གཉིས་ཀྱང་ལམ་དུ་བྱེད་ཚུལ། འདོད་ཆགས་ཞེ་སྡང་གཏི་མུག་གསུམ། །འཛིན་པས་དུག་ཏུ་འགྱུར་བ་ཡིན། །དུག་འདི་ཉེ་བར་ཞི་གྱུར་ན། །དུག་ནི་དུག་མེད་བྱས་པ་ཡིན། །ཞེས་སོགས་དྲངས་ཏེ་སྤྱོད་བསྡུས་ལས་གསུངས་པ་དང༌། དེའི་དགོངས་པ། རིམ་ལྔ་གསལ་སྒྲོན་ལས། འདོད་ཆགས་ལ་གནང་བ་ཡོད་དུ་ཆུག་ཀྱང་ཞེ་སྡང་དང་གཏི་མུག་ལ་གནང་བ་ཇི་ལྟར་ཡོད་སྙམ་ན། བསད་བསྐྲད་ལ་སོགས་པ་དྲག་པོའི་ལས། ཞེས་པ་ནས།
རྒྱུའི་ཀུན་སློང་སྐབས་སུ་སྙིང་རྗེ་བསྐྱེད་ཀྱང་དུས་ཀྱི་ཀུན་སློང་སྐབས་སུ་བགེགས་ལ་གནོད་སེམས་བསྐྱེད་པ་སོགས་བཤད་པས་ཞེ་སྡང་དང་དེའི་ཆར་གཏོགས་འགའ་ཞིག་གནང་བ་ཡོད་ལ། ཆགས་སྡང་གང་ཡིན་ཀྱང་ཉོན་མོངས་ཅན་གྱི་གཏི་མུག་དང་མཚུངས་ལྡན་དུ་འབྱུང་བས་ཉོན་མོངས་གཞན་གནང་བའི་ཞར་བྱུང་གི་སྒོ་ནས་གནང༌། ཞེས་གསུངས་སོ། །དཔལ་མཆོག་ནི་རྣལ་འབྱོར་རྒྱུད་ཡིན་པས་དངོས་བསྟན་སྤྱོད་པའི་སྐབས་དང་མ་འབྲེལ་ཡང་དགོངས་པ་ཕྱོགས་མཐུན་པས་དྲངས་པ་ཡིན་ལ། ཐེག་བསྡུས་ལས། ཞེ་སྡང་ནི་སྙིང་རྗེ་དང་རྣམ་པ་ཐམས་ཅད་དུ་འགལ་བས་གནང་བ་མེད་པར་གསུངས་པ་དང༌། གསེར་འཕྲེང་ལས་གཏི་མུག་གནང་བ་མེད་པར་གསུངས་པ་སོགས་སྐབས་གཞན་ཡིན་པའི་ཞིབ་ཆ་ཤེས་དགོས་སོ། །ཡ་མཚན་སྒྱུ་མས་ས་བཅུ་པ་ཡང་རྨོངས། །ཞེས་པ་ནི། སྤྱོད་པའི་ཁྱད་པར་དེ་དག་གསང་སྔགས་ཀྱི་ཐུན་མོང་མ་ཡིན་པ་ཡིན་པས་ཕར་ཕྱིན་ཐེག་པ་བ་རྣམས་ཀྱི་བློ་ཡུལ་ལས་འདས་པ་ལ་སྦྱར་རུང་ཙམ་ཡིན་ཀྱང༌། གཙོ་བོ་ནི་དོན་གྱི་འོད་གསལ་སྤྱིའི་ཡོན་ཏན་བརྗོད་པའི་དོན་བསྡུ་བ་ཡིན་ཏེ། དོན་གྱི་འོད་གསལ་མན་ཆད་མ་དག་པའི་སྒྱུ་ལུས་ལ་སོགས་པའི་དོད་ཐུབ་ཀྱི་ལམ་ཕར་ཕྱིན་ཐེག་པར་ཡང་ཡོད་པས། ས་བཅུ་པ་ནས་སྔགས་ལ་འཇུག་པའི་ཚེ་དེ་དག་རྒྱུད་ལ་སྐྱེ་མི་དགོས་ཤིང༌། དེའི་སྣོད་རུང་དུ་སྒྲུབ་པའི་དབང་དང་པོ་གཉིས་ཀྱང་བསྐུར་མི་དགོས་སོ། །སྤྱིར་སྟོང་ཉིད་མངོན་སུམ་དུ་རྟོགས་ཀྱང་གཉུག་སེམས་ལྷན་སྐྱེས་ཀྱི་བདེ་བའི་སྒོ་ནས་སྟོང་ཉིད་མངོན་སུམ་དུ་རྟོགས་པ་མེད་པས་དོན་གྱི་འོད་གསལ་གསར་དུ་སྐྱེད་དགོས་ཤིང༌། དེའི་སྣོད་རུང་དུ་སྒྲུབ་པའི་དབང་གསུམ་པ་ཡན་
ཆད་བསྐུར་དགོས་པས་དེ་ཉིད་སྔགས་ལ་མ་ཞུགས་པའི་བྱང་སེམས་བཅུ་པ་བ་རྣམས་ཀྱི་ཐུགས་སུ་ཆུད་པར་མི་ནུས་པའི་ཕྱིར་དེ་ལ་རྨོངས་ཞེས་བཤད་པ་ཡིན་ནོ། །དེ་ལྟར་ཡང་བརྟག་པ་ཕྱི་མའི་ལྔ་པ་ལས། འབར་བའི་ཕྲེང་བ་འཁྲུགས་པ་ཡི། །དཀྱིལ་འཁོར་རབ་ཏུ་བཞེངས་ནས་ནི། །རྡོ་རྗེ་སྙིང་པོ་དབང་སྦྱིན་ཕྱིར། །ཐིག་ལེ་མཆོག་ནི་བཀུག་པ་ཉིད། །ཅེས་དང༌། དེའི་དོན་འཆད་པར། མན་ངག་སྙེ་མ་ལས། མཆོག་ཏུ་མཐར་ཐུག་པ་ན་ཡང་ངེས་པར་ཐབས་འདི་ལ་ལྟོས་སོ་ཞེས་བརྗོད་པར་བྱ་སྟེ། དཔེར་ན་ནམ་མཁར་བཞུགས་པའི་རྫོགས་པའི་སངས་རྒྱས་རྣམས་ཀྱིས་གནང་བའི་ཤེས་རབ་ཀྱི་དབང་ལས། ཞེས་པ་ནས་ཐིག་ལེ་མཆོག་མ་ལས་དབང་བསྐུར་བ་བྱིན་པ་བཞིན་ནོ། །ཞེས་གསུངས་སོ། །དེ་ལ་འོད་གསལ་གྱི་གདམས་པ་བསྟན་ཅིང་དེས་མངོན་དུ་བྱས་ཚུལ་ཡང༌། རིམ་པ་གཉིས་པ་ལས། ནེ་རཉྫ་ནའི་ཆུ་འགྲམ་དུ། །མི་གཡོའི་ཏིང་འཛིན་ལ་བཞུགས་པ། །དེ་ཚེ་རྒྱལ་བ་མཁའ་རྡོ་རྗེ། །ཏིལ་གྱི་གང་བུ་གང་བཞིན་བཞུགས། །རྒྱལ་བའི་སྲས་ལ་སེ་གོལ་དང༌། །དེ་ལ་དབྱངས་གཅིག་གིས་གསུངས་པ། །བསམ་གཏན་འདི་ནི་རྣམ་དག་མིན། །འདིས་ནི་མཐར་ཐུག་མི་འཐོབ་སྟེ། །ནམ་མཁའི་ངོས་ལྟར་མཐའ་མེད་པ། །འོད་གསལ་བ་ནི་དེ་དམིགས་ཤིག །འོད་གསལ་བ་ཡི་གནས་ཐོབ་ནས། །རབ་དགའི་གཟུགས་སུ་སྐྱེ་བར་འགྱུར། །དེ་ཚེ་རབ་དགའ་སྐུ་རྡོ་རྗེ། །ཀུན་གྱི་དབང་ཕྱུག་ཐོབ་པར་འགྱུར། །འདི་ལྟར་སྒྲ་དེ་གསན་པ་དང༌། །དེ་ནས་ཏིང་འཛིན་མི་གཡོ་བཏང༌། །འདི་ལྟར་ནམ་ཕྱེད་དུས་སུ་ནི། །རྒྱལ་བའི་སྲས་ཀྱིས་དེ་ཉིད་དམིགས། །ཞེས་སོགས་
དོན་གྱི་འོད་གསལ་ཡན་ཆད་ཀྱི་ལམ་ལྷག་མ་མངོན་དུ་བྱེད་ཚུལ་གདམས་ཤིང༌། དེ་དང་མཐུན་པར། སྤྱོད་བསྡུས་ལས། སེ་གོལ་གྱི་སྒྲས་བསྐུལ་བར་གྱུར་པས་མི་གཡོ་བའི་ཏིང་ངེ་འཛིན་ལས་བཞེངས་ཏེ། བྱང་ཆུབ་ཀྱི་ཤིང་དྲུང་དུ་བཞུགས་ནས་ནམ་ཕྱེད་ཀྱི་དུས་སུ་འོད་གསལ་མངོན་དུ་མཛད་དེ། ཞེས་དང༌། གྲོལ་བའི་ཐིག་ལེ་ལས། གྲངས་མེད་བར་དུ་ཚོགས་བསགས་ཀྱང༌། །འདི་དོན་མ་རྟོགས་ནེ་རཉྫར། །ཅི་ཡང་མ་ཡིན་ཏིང་འཛིན་གནས། །ཞེས་པ་ནས། ནམ་ཕྱེད་དུས་སུ་བརྒྱལ་བ་ལྟར། །དེ་ཉིད་བསྒོམས་པས་ཐོ་རངས་དུས། །སྐད་ཅིག་གིས་ནི་ཡང་དག་རྟོགས། །ཞེས་གསུངས་སོ། །དེས་ན་ཕར་ཕྱིན་ཐེག་པའི་ལམ་གྱི་བགྲོད་པ་མཐར་ཕྱིན་ཀྱང་འཚང་རྒྱ་བ་ལ་དོན་གྱི་འོད་གསལ་འདི་ཉིད་གསར་དུ་བསྐྱེད་ནས་སྣོན་པ་འདེབས་དགོས་པའི་ཟབ་ཁྱད་དང་། འོད་གསལ་ཡེ་ཤེས་དེ་ཉིད་ཀྱིས་སྐལ་བ་མཉམ་པའི་རྒྱུ་བྱས་པའི་སངས་རྒྱས་ཀྱི་སའི་གཉིས་སུ་མེད་པའི་ཡེ་ཤེས་དང་དེ་གཉིས་ཀ་ཡུལ་བདག་མེད་པའི་དེ་ཁོ་ན་ཉིད་དང་རོ་གཅིག་ཏུ་ཞུགས་པའི་ངོ་བོའི་ཁྱད་པར་འདྲ་ཡང༌། ཤེས་བྱའི་སྒྲིབ་པ་རིམ་གྱིས་ཟད་པའི་ནུས་པའི་ཁྱད་པར་སྔ་མ་ལས་ནམ་མཁའ་དང་ལག་མཐིལ་བཞིན་དུ་ཆེས་མི་འདྲ་བས་སྔ་མའི་ཡོན་ཏན་ལེགས་པར་མཐོང་བ་ན། ཕྱི་མ་ལ་ཚད་མེད་པའི་དང་བ་ངང་གིས་འདྲེན་པར་འགྱུར་ཏེ། དེ་ཉིད་ཀྱི་ཕྱིར་འདིར་ཡང་བཅོམ་ལྡན་འདས་མའི་ཐུགས་ལ་རྒྱུའི་ཡོན་ཏན་བརྗོད་པའི་སྒོ་ནས་བསྟོད་པ་ཡིན་ནོ། །དེ་ལྟ་བུའི་རྗེ་བཙུན་མའི་ཐུགས་ཀྱི་ཡོན་ཏན་རྨད་དུ་བྱུང་བ་དེ་དག་འགྲུབ་པ་ལ། དེའི་ཉེ་རྒྱུ་ཐུན་མོང་མ་ཡིན་པ་དོན་གྱི་འོད་གསལ་སྔོན་དུ་འགྲོ་དགོས་ཤིང༌། དེའི་སྔོན་དུ་དཔེའི་འོད་གསལ་དང༌། དེའི་
སྔོན་དུ་སྟོང་ཉིད་ཐོས་བསམ་གྱིས་ལེགས་པར་གཏན་ལ་འབེབས་དགོས་ཤིང༌། དེ་ལ་ཡང་ངེས་དོན་གྱི་མདོ་སྡེའི་དགོངས་པ་ཤིང་རྟ་ཆེན་པོ་ཀླུ་སྒྲུབ་ཡབ་སྲས་ཀྱིས་བཀྲལ་བའི་སྲོལ་བཟང་པོ་རྙེད་དགོས་ལ། དེ་ཡང་འཇམ་མགོན་བླ་མའི་ལེགས་བཤད་དྲི་མ་མེད་པ་རྣམས་ཀྱིས་བློ་མིག་ལེགས་པར་ཕྱེད་པ་ངེས་པར་གལ་ཆེ་བས། སྤྱིར་ཐེག་པ་གསུམ་གྱི་ཐར་པ་འདོད་པའི་སྐྱེ་བོ་མཐའ་དག་དང༌། ཁྱད་པར་དུ་དོན་དམ་འོད་གསལ་གྱི་རིམ་པ་མངོན་དུ་བྱ་བར་འདོད་པའི་སྐལ་བཟང་རྣམས་ཀྱིས་ཟབ་མོའི་གཞུང་ལ་ཕྲ་ཞིབ་ཀྱི་དཔྱད་པས་བག་ཆགས་ཅི་ཐེབས་བསོད་ནམས་རླབས་པོ་ཆེའི་རྒྱབ་རྟེན་དང་བཅས་པ་ལ་འབད་པ་ལྷུར་བྱའོ། །ཆོས་དབྱིངས་དག་པའི་མཁའ་ལས་མི་འདའ་ཡང༌། །ཇི་སྙེད་ཆོས་ཀྱིས་འཇིག་རྟེན་གསལ་བར་བྱེད། །མཚན་འཛིན་མུན་པའི་དཔུང་ཚོགས་ཅིག་ཅར་དུ། །ཟ་བྱེད་རིག་པའི་རྒྱལ་པོ་ཁྲོ་བོ་ཆེ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །༈ བཞི་པ་སྐུ་གསུང་ཐུགས་ཐུན་མོང་དུ་བསྟོད་པ་ནི། དེ་ལྟར་སྐུ་གསུང་ཐུགས་ཀྱི་ངོ་མཚར་བའི། །གསང་གསུམ་མི་ཟད་རྒྱན་གྱི་འཁོར་ལོ་ལ། །བདག་གི་ལུས་དང་ངག་ཡིད་རབ་གུས་པས། །ལེགས་པར་བསྟོད་ཀྱི་དགྱེས་པས་སྙན་དུ་བཞེས། །ཞེས་བྱུང༌། དེ་ཡང་རྩོམ་པའི་ཕྱོགས་མཐོང་ཙམ་ཡོད་པ་ཁ་ཅིག་འདི་སྙམ་དུ། ཤོ་ལོ་ཀ་འདི་སྔ་མ་གསུམ་ཀའི་མཇུག་སྡུད་ཡིན་གྱི། དོན་ཚན་ཟུར་བ་མ་ཡིན་ཏེ། དེ་ལྟར་སྐུ་གསུང་ཐུགས་ཀྱི་ཞེས་རྫོགས་ཚིག་སྨོས་པ་དང༌། དོན་ཚན་སྔ་མ་གསུམ་དང་མི་འདྲ་བར་མང་ཉུང་ཡང་ཚིགས་བཅད་གཅིག་ལས་མ་བྱུང་བའི་ཕྱིར་སྙམ་ན། སྐྱོན་
མེད་དེ། དེ་ལྟར་ཞེས་པ་འོག་ནས་འབྱུང་བ་བཞིན་དཔེར་བྱེད་པའམ། དེ་ལྟ་བུའི་སྐུ་གསུང་ཐུགས་སོ་སོ་བ་དང་སྒྲུབ་བྱེད་བདེན་པ་གཉིས་ཀྱི་རྫོགས་རིམ་སོ་སོ་བ་དེ་དག་ཟུང་དུ་འཇུག་པའི་ཚུལ་འདིར་སྟོན་པའི་དོན་ཡིན་གྱི། མཇུག་སྡུད་བྱས་པ་མིན་ཏེ། འདི་མཇུག་སྡུད་ཡིན་ན་དེའི་འཕྲོ་དེ་མ་ཐག་ཏུ་ཡང༌། དེ་ལྟར་བདག་གིས་བསྟོད་པའི་ཞེས་མཇུག་སྡུད་གསལ་བར་སྨོས་པ་དང་ཟློས་པའི་སྐྱོན་དུ་འགྱུར་བའི་ཕྱིར་རོ། །དེར་མ་ཟད་འདི་ལ་དོན་ཚན་ལོགས་སུ་མ་བྱས་ན་དོན་གྱི་གནད་མང་པོ་ཞིག་སྟོར་བར་འགྱུར་ཞིང༌། དེའི་རྒྱུ་མཚན་ཞིབ་ཏུ་ཤེས་ན་ལུགས་འདིའི་ལམ་གྱི་འགངས་གཤོག་པའི་དགོས་པ་ཆེ་བར་སྣང་བས་མདོར་བསྡུས་ཙམ་ཞིག་བརྗོད་པར་བྱ་སྟེ། འདིའི་རྩ་བའི་གཞུང་ནི་རྒྱུད་བརྟག་པ་གཉིས་པ་ཡིན་ཞིང༌། དེའི་དགོངས་པ་འགྲེལ་ཚུལ་ཌོམྦྷི་པ་ནས་རིམ་བཞིན་བརྒྱུད་པ་དཔའ་བོ་རྡོ་རྗེ་ལས་འབྲོག་མིས་གསན་པ་སོགས་གདམས་པའི་བཀའ་སྲོལ་ཐམས་ཅད་འཇམ་མགོན་ས་སྐྱ་པ་ཡབ་སྲས་ལ་མངའོ། །ཁྱད་པར་དུ་ཡང་ཆོས་ཀྱི་བཀའ་བབས་གཙོ་བོ་ནི་བིརྺ་པ་ནས་ཤར་ཕྱོགས་ནག་པོ་པ་ལ་བརྒྱུད་པ་ག་ཡ་དྷ་ར་ལས་འབྲོག་མིས་གསན་པའི་ལམ་འབྲས་རྡོ་རྗེའི་ཚིག་རྐང་དུ་གྲགས་པ་འདི་ཉིད་ཡིན་ལ། དེའི་དོན་གྱི་གནད་བསྡུས་ན། གཞི་ལ་རྒྱུའི་རྒྱུད་དབང་བཞིའི་ཚུལ་དུ་གནས་པའི་སྟོབས་ཀྱིས་སྨིན་བྱེད་རྒྱུའི་དབང་ལ་དབང་བཞིར་བཞག་ཅིང༌། དེ་ལ་བརྟེན་པའི་གྲོལ་བྱེད་ལམ་གྱི་དབང་ཡང་དབང་བཞིའི་ཚུལ་དུ་བསྒོམ་པ་ལ་བརྟེན་ནས་གྲོལ་བ་འབྲས་བུའི་དབང་ཡང་དབང་བཞིའི་ཚུལ་དུ་འགྲུབ་པས། ལམ་འབྲས་བུ་དང་བཅས་པ་ཐམས་ཅད་དོན་ཚན་བཞི་བཞིར་བྱས་ཏེ་དབང༌
བཞི་དང་སྦྱར་བ་ནི། རྒྱུད་དོན་མན་ངག་གིས་གསལ་བར་ཕྱེ་བའི་སྲོལ་བླ་ན་མེད་པ་ཡིན་པས། རྗེ་བླ་མས་ཀྱང་བསྔགས་བརྗོད་རྒྱ་ཆེར་མཛད་པ་ཡིན་ཏེ། བླ་མ་ལྔ་བཅུ་པའི་ཊཱིཀྐ་ལས། དབང་བསྐུར་བ་ལ་སྨིན་བྱེད་རྒྱུའི་དབང༌། གྲོལ་བྱེད་ལམ་གྱི་དབང༌། གྲོལ་བ་འབྲས་བུའི་དབང་གསུམ་དུ་ཡོད་ཅིང༌། ཞེས་དང༌། སྔགས་རིམ་ལས། དབང་གསུམ་གྱི་ལམ་དུ་བསྡུས་ཏེ་ཉམས་སུ་ལེན་པའི་ཚུལ་རྣལ་འབྱོར་གྱི་དབང་ཕྱུག་བིརྺ་པའི་གདམས་ངག་ལམ་འབྲས་བུ་དང་བཅས་པའི་གནད། ཅེས་སོགས་དང༌། རྣལ་འབྱོར་གྱི་དབང་ཕྱུག་བིརྺ་པའི་གདམས་པ་འཛིན་པའི་བོད་ཀྱི་བླ་མ་མཁས་པ་འགའ་ཞིག་སྔགས་ཀྱི་ལམ་གྱི་གནད་ཐམས་ཅད་དབང་གི་ཁོགས་ནས་ཚོལ་བར་མཛད་པ་ནི་རྨད་དུ་བྱུང་བའི་སྲོལ་དུ་མཐོང་ངོ༌། །ཞེས་གསུངས་པ་ལྟར་རོ། །དེ་ལྟར་འབྲས་བུ་དབང་བཞི་དང་སྦྱོར་བ་ལ་སྐུ་གསུང་ཐུགས་སོ་སོ་བ་གསུམ་སྐུ་གསུང་ཐུགས་བསྡོམས་པ་དང་བཞིར་བྱེད་དགོས་ཏེ། ཀྱཻ་རྡོར་འབུམ་ལྔ་ལས། སྐུ་གསུང་ཐུགས་དང་ཡེ་ཤེས་ཕྱིར། །མངོན་པར་དབང་བསྐུར་རྣམ་པ་བཞི། །ཞེས་གསུངས་པའི་ཡེ་ཤེས་ཞེས་པ་མཁྱེན་པ་ཁོ་ན་ལ་བྱས་ན་ཐུགས་དང་ཁྱད་མེད་དུ་འགྱུར་བས། འདུས་པའི་རྩ་རྒྱུད་ལེའུ་གཉིས་པར་རྡོ་རྗེ་གསུམ་དབྱེར་མེད་པའི་བྱང་ཆུབ་ཀྱི་སེམས་བསྐྱེད་པར་གསུངས་པ་ངེས་དོན་དུ་བཤད་པའི་ཚེ་དོན་དམ་བྱང་ཆུབ་ཀྱི་སེམས་དེ་ཟུང་འཇུག་ལ་བཤད་པ་ལྟར། སྐུ་དང་ཡེ་ཤེས་དབྱེར་མེད་པ་ཟུང་འཇུག་གི་གོ་འཕང་ལ་བྱེད་དགོས་པ་ནི། རྫོགས་རིམ་དངོས་གྲུབ་སྙེ་མ་ལས། སྐུ་དེ་གཉིས་ངོ་བོ་གཅིག་ལ་ལྡོག་པ་ཐ་དད་
པ་ཙམ་མིན་པས། གཟུགས་སྐུ་དེ་ལ་གཉིས་སུ་མེད་པའི་ཡེ་ཤེས་ཀྱི་སྐུ་ཞེས་ལན་དུ་མར་གསུངས། ཞེས་དང༌། དབང་དོན་དེ་ཉིད་ཡང་གསལ་ལས། སྐུ་དང་ཐུགས་ཟུང་དུ་འཇུག་ཅིང་དེ་གཉིས་ཀྱང་ངོ་བོ་དབྱེར་མེད་པས་གཉིས་སུ་མེད་པའི་ཡེ་ཤེས་ཀྱི་བདག་ཉིད་དུ་གྱུར་པའི་ཟུང་འཇུག །ཅེས་སོ། །དེར་མ་ཟད་སྦྱང་གཞི་སྦྱོང་བྱེད་སྦྱོར་བའི་ཚེ་ཡང་དབང་དང་པོ་གསུམ་ལུས་ངག་ཡིད་གསུམ་སོ་སོའི་སྦྱོང་བྱེད་དང༌། བཞི་པ་ལུས་ངག་ཡིད་གསུམ་ཐུན་མོང་གི་སྦྱོང་བྱེད་དུ་འགྲོ་བས། སྐུ་གསུང་ཐུགས་སོ་སོ་དང༌། སྐུ་གསུང་ཐུགས་གསུམ་དབྱེར་མི་ཕྱེད་པའི་ཟུང་འཇུག་གི་ཡེ་ཤེས་ཀྱི་སྐུ་དེ་ཉིད་སྒྲུབ་བྱེད་དུ་འགྲོ་སྟེ། དུས་འཁོར་རྩ་རྒྱུད་ལས། དབང་བསྐུར་གསུམ་གྱི་རིམ་པ་ཡིས། །ལུས་ངག་སེམས་ནི་ཡང་དག་སྦྱོང༌། །བཞི་པ་ཡེ་ཤེས་དག་པ་སྟེ། །ལུས་ངག་སེམས་ནི་སྦྱོང་བ་འོ། །ཞེས་གསུངས་ལ། འདིས་འབུམ་ལྔའི་ལུང་དོན་གསལ་བར་བྱས་ཡོད་དོ། །དེ་དག་གི་དགོངས་པ་བཞིན་དུ། རྡོ་རྗེའི་ཚིག་རྐང་ལས། བཞི་པ་ལུས་ངག་ཡིད་གསུམ་གྱི་དབང་མཐར་ཕྱིན། ཞེས་དང༌། ལམ་འབྲས་པོད་དམར་གྱི་ནང་ཚན་ས་ཆེན་གྱི་དབང་བཞི་ངོ་སྤྲོད་ལས། མཆོག་དབང་བཞི་པ་དབའ་རླབས་བསྒོམ། །རྡོ་རྗེའི་དབའ་རླབས་བསྒོམས་པ་ཡིས། །ལུས་ངག་ཡིད་གསུམ་ཡེ་ཤེས་འབར། །འབྲས་བུ་བཞི་པའི་རྟོགས་པ་སྐྱེ། །ཞེས་གསུངས་ལ། གནད་དེ་དག་ཐམས་ཅད་ཤིན་ཏུ་གསལ་བར། རྡོ་རྗེ་འཆང་ཆེན་པོའི་ལམ་གྱི་རིམ་པ་ལས། དེ་ལྟ་བུའི་སྐུ་གསུང་ཐུགས་དབྱེར་མི་ཕྱེད་པ་ནི་དབང་བཞི་པ་ཡིན་ལ། དེ་ཡང་སྔ་མའི་ལམ་གཉིས་
ཀྱིས་ལམ་དུས་ཀྱི་དབང་བཞི་པ་བསྒྲུབས་ཤིང༌། སློབ་པའི་ཟུང་འཇུག་གིས་མི་སློབ་པའི་སྐུ་གསུང་ཐུགས་དབྱེར་མི་ཕྱེད་པར་བསྒྲུབས་པས་དབང་བཞི་པའི་ལམ་དུ་རིམ་གཉིས་ཐམས་ཅད་འདུ་བ་ཡིན་ནོ། །ཞེས་འདོམས་པར་མཛད་དོ། །ཚུལ་འདི་གོ་ན་དབང་བཞི་བྱིན་རླབས་རྣམས་ལ་བདུད་རྩི་འབེབས་སྦྱངས་རིམ་དང་ཅིག་ཅར་བྱེད་པ་དང༌། སྐུ་གསུང་ཐུགས་སོ་སོ་བ་དང་བསྡོམས་པའི་རྗེས་གནང་ཞེས་པ་རྣམས་ཀྱང་བཞིའི་གྲངས་མ་ཚང་བའི་ཧོར་ཁུང་གསོབ་བྱེད་ཙམ་མ་ཡིན་པར་ལམ་གྱི་ལུས་སྤྱི་དང་འབྲེལ་བའི་དགོས་པ་ཁྱད་པར་ཅན་ཡོད་པ་ཤེས་པར་འགྱུར་རོ། །དེས་ན་འདི་ལ་ཚིག་ཉུང་བ་ཡང་བརྗོད་བྱ་རྒྱ་ཆུང་བ་མ་ཡིན་གྱི། སྔ་མ་ཐམས་ཅད་འདི་ཉིད་གཏན་ལ་འབེབས་པའི་ཡན་ལག་ཏུ་འཁྱེར་ཤེས་དགོས་པས། རྒྱས་བཤད་ཟུར་དུ་མ་མཛད་པ་ཡིན་ཏེ། བླ་མེད་ཀྱི་རྒྱུད་སྡེ་རྣམས་སུ་དབང་དང་པོ་གསུམ་གྱི་རྣམ་གཞག་རྒྱས་པར་གསུངས་ཀྱང༌། བཞི་པ་སྟོན་པ་ན། དེ་ལྟར་དེ་བཞིན་བཞི་པ་ཡང༌། །ཞེས་དང༌། བཞི་པ་དེ་ཡང་དེ་བཞིན་ནོ། །ཞེས་པ་ལྟ་བུ་ཟུར་ཙམ་རེ་ལས་མ་གསུངས་པ་དེ། དབང་དང་པོ་གཉིས་གཟུགས་སྐུ་ཀུན་རྫོབ་ཀྱི་བདེན་པ་སྒྲུབ་བྱེད་དང༌། གསུམ་པ་ཐུགས་དོན་དམ་པའི་བདེན་པ་སྒྲུབ་བྱེད་ཡིན་པས། ཡ་གྱལ་དེ་དག་གནད་དུ་སོང་ན་དེ་དག་དུས་གཅིག་ཏུ་ཚོགས་པའི་ཟུང་འཇུག་འགྲུབ་སླ་བ་དང༌། དབང་དུས་སུ་ཡང་སྔ་མ་རྣམས་མོས་ངོར་ལེགས་པར་ཤར་ན། དེས་མཚོན་ཏེ་དབང་བཞི་པའི་དོན་ལ་གོ་བ་ཆགས་སླ་ཡང༌། སྔ་མ་མེད་ན་མཚོན་པའི་གཞི་མ་གྲུབ་པས་བཤད་ཀྱང་དགོས་པ་མེད་པའི་ཕྱིར། དཔེར་
ན་མདའ་རྩལ་སྦྱོང་བའི་ཚེ། མདའ་འཕེན་པ་དགོས་པའི་གཙོ་བོ་ཡིན་ཀྱང༌། སྔོན་དུ་མདའ་དང་གཞུ་སོ་སོའི་རྒྱུ་ཚོགས་ཚང་བའི་སྒོ་ནས་ལེགས་པར་བཅོས་ཟིན་ན། འཕེན་པའི་ཚེ་དེ་གཉིས་སྦྱར་ནས་འཕེན་ཚུལ་བརྡ་སྤྲད་དེ་སློབ་པ་མ་གཏོགས་འཕེན་པ་ལོགས་སུ་བཅོས་མི་དགོས་ལ། སྔར་མདའ་གཞུ་མ་བསྒྲུབས་པར་འཕེན་ཚུལ་ཇི་ཙམ་བཤད་ཀྱང་འཕང་དུ་མེད་པ་བཞིན་ཡིན་པའི་ཕྱིར། དེས་ན་དབང་གསུམ་པ་དེ་ཉིད་མཚོན་བྱེད་ཀྱི་དཔེར་བྱས་ཏེ། བཞི་པ་ལ་དེའི་དོན་ཚང་བ་དང༌། ཚང་བར་མ་ཟད་སྔ་མ་ལས་ཆེས་ཁྱད་པར་དུ་འཕགས་ཤིང་གྱ་ནོམ་པ་ཡིན་ནོ་ཞེས་སྟོན་པའི་ཆེད་དུ། དེ་ལྟར་དང༌། དེ་བཞིན་དང༌། ཡང་སྒྲ་སོགས་སྨོས་པ་ཡིན་པའི་ཕྱིར། ངག་གི་དབང་ཕྱུག་གྲགས་པས། དེ་ལྟར་སྒྲ་དང་ལྡན་ཉིད་ཕྱིར། །ཡང་གི་སྒྲ་དོན་ལྡན་ཕྱིར་དང༌། །དེ་བཞིན་སྒྲ་དོན་སྐྱེས་ཉིད་ཕྱིར། །བཞི་པ་དེ་བཞིན་ཉིད་བདག་འདོད། །ཅེས་གསུངས་ཏེ། སོ་སོའི་དོན་ཞིབ་པར་ནི་ཡན་ལག་བདུན་ལྡན་རྩ་འགྲེལ་དང་། སྔགས་རིམ་དབང་དོན་སོགས་ལས་ཤེས་པར་བྱ་ཡི། འདིར་མང་གིས་དོགས་པས་མ་སྤྲོས་ལ། འདི་ཉིད་ཀྱི་མགོར་དེ་ལྟར་ཞེས་སྨོས་པ་ཡང༌། རྒྱུད་དེ་རྣམས་དང་སྒོ་མཐུན་པར་གོང་གི་ཡོན་ཏན་རྣམས་འདིར་མཚོན་བྱེད་ཀྱི་དཔེར་བླངས་པའི་ཚུལ་ཡང་ཤེས་པར་བྱའོ། །དབང་བཞིའི་བཤད་པ་བྱེད་པའི་ཚེ་སྐུ་བཞིའི་ས་བོན་བསྐྲུན་པ་ཞེས་ཐམས་ཅད་ལ་གྲགས་ཆེ་ཡང༌། དབང་བཞི་པ་གང་དང་སྦྱོར་བའི་སྐུའི་ངོས་འཛིན་ཅུང་མི་གསལ་བར་སྣང་ལ། ལམ་འབྲས་རྡོ་རྗེའི་ཚིག་རྐང་ལས། ངོ་བོ་ཉིད་སྐུ་རང་བཞིན་གྱི་ལྷུན་གྲུབ་ཐོབ་པར་བྱེད་པ།
ཞེས་གསུངས་སོ། །འདིའི་ངོ་བོ་ཉིད་སྐུ་ཞེས་པ་ཡང་དག་པ་གཉིས་ལྡན་གྱི་དབྱིངས་ཙམ་ལ་མི་བྱེད་ཀྱི། གོང་དུ་བཤད་པ་ལྟར་གཉིས་སུ་མེད་པའི་ཡེ་ཤེས་ཀྱི་སྐུའམ། རིམ་ལྔ་གསལ་སྒྲོན་སོགས་སུ་ཟུང་འཇུག་གི་སྐུའི་མིང་གིས་བཏགས་པ་དེ་ལ་བྱེད་དགོས་ཏེ། གྲུབ་ཆེན་དྲིལ་བུ་ཞབས་ཀྱིས། འདི་ནི་ངོ་བོ་ཉིད་སྐུ་སྟེ། །སྟོང་ཉིད་སྙིང་རྗེ་གཉིས་མེད་པ། །མ་ནིང་ཞེས་བྱར་བརྗོད་པ་སྟེ། །ཁ་ཅིག་ཟུང་འཇུག་ཅེས་བྱར་བརྗོད། །ཅེས་སོ། །དེས་ན་མི་སློབ་པའི་སྐབས་ཀྱི་སྐུ་ཐུགས་ཟུང་དུ་འཇུག་པ་ཁ་སྦྱོར་ཡན་ལག་བདུན་ལྡན་གྱི་གོ་འཕང་ནི་འདིར་དངོས་སུ་བསྟོད་ཡུལ་གཙོ་བོ་ཡིན་ཞིང༌། དེ་ལ་རང་གི་རིགས་འདྲ་སློབ་པའི་ཟུང་འཇུག་ཐོབ་པ་སྔོན་དུ་འགྲོ་དགོས་པས། དེའི་རྣམ་གཞག་ཅུང་ཟད་ཙམ་ཞིག་བརྗོད་པར་བྱའོ། །དེ་ཡང་ལུགས་མཐུན་གྱི་སྟོང་པ་བཞི་སྔ་མ་ཕྱི་མ་ལ་ཐིམ་ནས་དོན་གྱི་འོད་གསལ་མངོན་དུ་བྱས་པ་ན། འོད་གསལ་གྱི་ཡེ་ཤེས་དང༌། དེའི་བཞོན་པའི་རླུང་ཕྲ་བ་གཉིས་ལ་བརྟེན་ནས་རང་གི་མཇུག་ཐོགས་སུ་ལུགས་ལྡོག་གི་ཉེར་ཐོབ་གྲུབ་པ་དང་དུས་མཉམ་དུ་སློབ་པའི་ཟུང་འཇུག་གི་སྐུ་གྲིབ་མ་དང་འདྲ་བར་གཅད་དུ་མེད་ཅིང་གཞིག་ཏུ་མེད་པ། འཕོ་བ་མེད་ཅིང་ཉོན་མོངས་པའི་ས་བོན་ཐམས་ཅད་ལས་གྲོལ་བ་ཆུ་ལས་ཉ་ལྡང་བའམ་གཉིད་ལོག་པ་ལས་སད་པ་བཞིན་དུ་བཞེངས་པ་དེའི་ཚེ་ཟུང་འཇུག་ཐོབ་པ་ཡིན་ནོ། །འོན་ཀྱང་སྤྱིར་ཟུང་འཇུག་ཏུ་འཇོག་ཚུལ་མི་འདྲ་བ་ཉེར་གསུམ་ཙམ་ཞིག་རིམ་ལྔ་ལས་གསུངས་ཤིང༌། འདི་ནི་དེའི་ནང་ནས་དང་པོ། འཁོར་བ་དང་ནི་མྱ་ངན་འདས། །རྟོགས་པ་
གཉིས་པོ་སྤངས་པས་ན། །གང་དུ་ངོ་བོ་གཅིག་གྱུར་པ། །ཟུང་དུ་འཇུག་ཅེས་དེ་ལ་བཤད། །ཅེས་འཁོར་འདས་སོགས་སུ་ཞེན་པའི་ཀུན་རྟོག་མཐའ་དག་བདེ་བ་ཆེན་པོའི་ཡེ་ཤེས་ཀྱིས་སྤངས་ཏེ། དེས་མི་ཕྱེད་པའི་གཉིས་མེད་དུ་སོང་བའི་སྐུ་ལ་ཟུང་འཇུག་ཏུ་བཞག་པ་སྤྱི་སྐད་ལ་སྤངས་པ་ཟུང་འཇུག་ཅེས་གྲགས་པ་དེ་ཡིན་ནོ། །དེ་ཐོབ་པས་ཟུང་འཇུག་ཐོབ་པ་ཙམ་གྱི་གྲངས་སུ་འགྲོ་ཡང་ཟུང་འཇུག་གཙོ་བོ་ཐོབ་པ་མིན་ཏེ། ཟུང་འཇུག་གི་གཙོ་བོ་ནི་རྟོགས་པ་ཟུང་འཇུག་ཡིན་ལ། དེ་ཐོབ་ཚུལ་ནི་རིམ་ལྔ་ལས། དེ་ཉིད་ཤེས་པས་རིམ་པ་བཞིན། །རང་བྱིན་རླབས་དང་འོད་གསལ་ཤེས། །དེ་དག་ཁོ་ན་འདུས་པ་གང༌། །འདི་ནི་ཟུང་འཇུག་རིམ་པ་འོ། །ཞེས་དང༌། ཀུན་རྫོབ་དང་ནི་དོན་དམ་གྱི། །དབྱེ་བ་སོ་སོར་ཤེས་ནས་ནི། །གང་དུ་ཡང་དག་འདྲེས་གྱུར་པ། །ཟུང་དུ་འཇུག་པར་དེ་བཤད་དོ། །ཞེས་པ་ལྟར་རང་བྱིན་རླབས་ཞེས་པ་ཀུན་རྫོབ་སྒྱུ་མའི་སྐུའི་མཐར་སོན་པ་དང༌། སེམས་འོད་གསལ་ཞེས་པ་དོན་དམ་བདེན་པའི་མཐར་སོན་པ་གཉིས་རེས་འཇོག་མེད་པར་རྒྱུད་གཅིག་ལ་དུས་མཉམ་དུ་ཚོགས་པ་དགོས་སོ། །ཟུང་འཇུག་གི་སྐད་དོད་ཀྱང་ཡུ་ག་ན་དྭ་ཞེས་པའི་ཡུ་ག་ཟུང་དང༌། ན་དྭ་ནི་གཉིས་མ་ཡིན་པ་སྟེ། ཡ་གྱལ་གཉིས་རེས་འཇོག་མ་ཡིན་པ་དུས་གཅིག་ཏུ་ཚོགས་པ་དགོས་པར་བཤད་ཅིང༌། དོན་གྱི་འོད་གསལ་ཐོབ་མ་ཐག་གི་ཚེ། ལུས་སྒྱུ་མའི་སྐུར་སོང་བའི་ཀུན་རྫོབ་མེད་ལ། དེ་ལས་ལུགས་ལྡོག་ཏུ་ལངས་མ་ཐག་གི་ཚེ་སེམས་དོན་དམ་དང་རོ་གཅིག་པའི་འོད་གསལ་མེད་པས་རེས་འཇོག་དང་ལུགས་ལྡོག་གི་སྣང་བ་ཐ་མ་ལས་ལངས་པའི་རྗེས་སུ་སླར་ཡང་འོད་གསལ་གྱི་ཡེ་ཤེས་
ནམ་མངོན་དུ་བྱས་པ་དེའི་ཚེ་གཉིས་ཀ་ཚང་བས་ཟུང་འཇུག་གི་མཚན་ཉིད་ལེགས་པར་ཚང་ངོ༌། །འདི་ལ་དགོངས་ཏེ། འདུས་པ་ཕྱི་མ་ལས། ཐབས་དང་ཤེས་རབ་སྙོབས་འཇུག་པས། །དངོས་པོ་ཐམས་ཅད་མདོར་བསྡུས་པ། །ཞེས་བརྟན་གཡོ་ཐམས་ཅད་ཀྱི་རྩ་བ་རླུང་སེམས་ཙམ་དུ་ཟད་ཅིང༌། དེ་ཟུང་འཇུག་གི་སྐུ་གཅིག་ཏུ་བསྐྱེད་པས་ན། སྣོད་བཅུད་ཐམས་ཅད་མདོར་བསྡུས་ཏེ་ཟུང་འཇུག་གི་སྐུར་བྱ་བར་གསུངས་སོ། །དེ་ལྟར་ན་ཟུང་འཇུག་གི་རིམ་པའི་སྦྱོར་བ་ཡན་ལག་དྲུག་ཏུ་ཕྱེ་བའི་རྗེས་དྲན་དང་ཏིང་ངེ་འཛིན་ལ་བསླབ་སྟེ། སློབ་པའི་ཟུང་འཇུག་བོགས་འབྱིན་སྤྱོད་པ་དང་བཅས་པ་མཐར་ཕྱིན་ནས་མི་སློབ་པའི་ཟུང་འཇུག་མངོན་དུ་བྱེད་དོ། །དེའི་ཚུལ་ཡང༌། རྡོ་རྗེ་གུར་དང་འདུས་པ་གཉིས་ཀ་ལས། རྡོ་རྗེ་ཉི་མ་ནུབ་ནས་ནི། །སྦྱོར་བ་འདི་ནི་རབ་སྩལ་ན། །སྐྱ་རེངས་འཆར་བའི་དུས་སུ་ནི། །འགྲུབ་འགྱུར་འདི་ལ་ཐེ་ཚོམ་མེད། །ཅེས་སོགས་ཀྱིས་བསྟན་ཏེ། དེའི་དོན་ཕྱི་ནང་གི་བྱང་ཆུབ་པའི་རིམ་པ་གཉིས་ལས། ཕྱི་ལ་སྦྱར་ན་ཚེས་བཅོ་ལྔའི་ཉི་མ་ནུབ་ནས་དམར་ཐག་ཆོད་པའི་དུས་སུ་ཚོགས་ཀྱི་མཆོད་པས་བླ་མ་མཉེས་པར་བྱས་ལ། དེས་ཀྱང་ཕྱག་རྒྱ་ལ་བརྟེན་ནས་དབང་བསྐུར་ཞིང་གདམས་པ་ཕོག་པས་སྐྱ་རེངས་ འཆར་བའི་དུས་སུ་མཆོག་འགྲུབ་པ་དང༌། ནང་ལ་སྦྱར་ན་བྱང་ཆུབ་ཀྱི་སེམས ་ཀྱི་ནུས་པ་ཡོངས་སུ་རྫོགས་པས་ཉི་མ་དང་ཟླ་བས་མཚོན་པའི་སྣང་མཆེད་ཐོབ་གསུམ་རིམ་གྱིས་འགགས་ཏེ། དག་པ་གཉིས་དང་ལྡན་པའི་ཡུལ་གྱི་འོད་གསལ་འདུ་མ་བྱས་ཆོས་ཀྱི་སྐུ་དང༌། ཡུལ་ཅན་གྱི་འོད་གསལ་
ཡེ་ཤེས་ཆོས་ཀྱི་སྐུ། དེའི་རྟེན་རླུང་སེམས་ཙམ་ལས་གྲུབ་པའི་གཟུགས་ཀྱི་སྐུ་གསུམ་ག་དབྱེར་མི་ཕྱེད་པ་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་རོ། །དེས་ན་ཁྱད་གཞི་འཕགས་མས་མངོན་དུ་མཛད་པའི་མཐར་ཐུག་གི་གོ་འཕང་དེ་ཉིད་ལ། ཁྱད་ཆོས་སྐུ་ཐུགས་གཉིས་སམ་བདེན་གཉིས་ཟུང་དུ་འཇུག་པའི་ཆ་ནས་མི་སློབ་པའི་ཟུང་འཇུག་དང༌། སྐུ་གསུང་ཐུགས་དབྱེར་མི་ཕྱེད་ཅིང་ཡོན་ཏན་ཡོངས་སུ་རྫོགས་པའི་ཆ་ནས་གསང་གསུམ་མི་ཟད་པ་རྒྱན་གྱི་འཁོར་ལོ་དང༌། དེ་གསུམ་དབྱེར་མེད་པའི་སྒོས་འཁོར་བ་མ་སྟོང་བར་དུ་འགྲོ་བའི་དོན་མཛད་ཚུལ་གྱི་སྟེང་ནས་ཁ་སྦྱོར་ཡན་ལག་བདུན་ལྡན་གྱི་གོ་འཕང་ཞེས་བཤད་པ་རྣམས་ཁྱད་གཞི་གཅིག་པར་མ་ཟད། ཁྱད་ཆོས་ཀྱང་དབྱེ་བ་འབྱེད་ཚུལ་མི་འདྲ་བ་ཙམ་ལས། དོན་གྱི་ངོ་བོ་ལ་མི་འདྲ་བ་ཅུང་ཟད་ཀྱང་མེད་དོ། །དེ་གསུམ་ལས་དང་པོ་ཟུང་འཇུག་ཏུ་འཇོག་ཚུལ་བརྗོད་ཟིན་པ་ལྟར་ཡིན་ལ། ཡན་ལག་བདུན་ལྡན་དུ་འཇོག་ཚུལ་ངག་གི་དབང་ཕྱུག་གྲགས་པས་གསལ་བར་ཕྱེ་ཞིང༌། དེ་ལ་བསྒྲུབ་བྱ་སྒྲུབ་བྱེད་དང་འབྲེལ་བའི་གནད་རྣམས་ཤིན་ཏུ་གསལ་བའི་དབང་གིས། རྗེ་བླ་མས་དབང་དོན་དང་སྔགས་རིམ་སོགས་སུ་དབང་བཞི་པའི་ཟུང་འཇུག་གི་དོན་ལ་གོ་བ་སྐྱེད་ཚུལ་དེའི་སྟེང་ནས་རྒྱས་པར་གསུངས་སོ། །རྡོ་རྗེའི་ཚིག་རྐང་སོགས་ལམ་འབྲས་ཀྱི་གཞུང་རྣམས་སུ་ངོ་བོའི་ཡོན་ཏན་རྒྱས་པར་བཤད་པ་ལ་དགོངས་ཏེ། དབང་བཞི་པའི་ཚེ་གསང་གསུམ་མི་ཟད་པ་རྒྱན་གྱི་འཁོར་ལོའི་ཐ་སྙད་དང་བཤད་པ་གཙོ་བོར་མཛད་ཅིང༌། འདིར་ཡང་རྟེན་གཞིའི་རྒྱུད་ཀྱི་དབང་གིས་དེ་དང་སྒོ་བསྟུན་ཏེ། གསང་གསུམ་མི་ཟད་རྒྱན་གྱི་འཁོར་ལོ་ལ། །ཞེས་སྨོས་སོ། །
དེའི་དོན་ཅུང་ཟད་ཕྱེ་སྟེ་བཤད་ན། རྡོ་རྗེའི་ཚིག་རྐང་ལས། བདེ་བར་གཤེགས་པའི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ལ་དག་པའི་སྣང་བའོ། །ཞེས་དང༌། བཅུ་གསུམ་རྡོ་རྗེ་འཛིན་པར་རྟེན་འབྲེལ་འགྲིགས་པ་ལྟར་སྣང༌། ཞེས་སོགས་གསུངས་ལ། དེའི་དགོངས་པ་འགྲེལ་པའི་གཞུང་སྔ་ཕྱི་མང་ཡང་གཙོ་བོར་གྱུར་པ། ཨ་སེང་ཞུ་ཀློག་ཡུམ་དང་སྲས། །ཟླ་བཟང་རྒ་ལྡན་ཀའུ་གཉག །ཅེས་པ་ལྟར། ཨ་སེང་མ། ཞུ་བྱས་མ། ཀློག་ཀྱ་མ། ཡུམ་དོན་མ་སོགས་ས་ཆེན་ཉིད་ཀྱིས་མཛད་པའི་རྣམ་འགྲེལ་བཅུ་གཅིག་ཏུ་གྲགས་པ་ལས། ཕྱི་མོ་ལྟ་བུ་མདོ་སྨད་པ་བྱང་སེམས་ཨ་སེང་གི་དོན་དུ་མཛད་པའི་ལམ་འབྲས་ཨ་སེང་མར་གྲགས་པ་ལས། སྐུ་གསུང་ཐུགས་ཐམས་ཅད་མཁྱེན་པ་སྐུ་གསུང་ཐུགས་ཀྱི་རྟེན་འབྲེལ་འགྲིགས་པ་ལྟར་སྣང༌། སྙིང་པོ་ཀྱཻ་རྡོ་རྗེ་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ། ངོ་བོ་ཉིད་ཀྱི་སྐུ་ཞེས་བྱ་བ་མངོན་དུ་གྱུར་ཏེ། སྐུ་ཐམས་ཅད་པའི་དུས་ན་གསུང་དང་ཐུགས་ཐམས་ཅད་པ་ཡིན་ལ། གཉིས་པོའི་ཚེ་ན་ཡང་དེ་བཞིན་དུ་ཡིན་པས། ཞེས་དང༌། མཐར་ཐུག་དེ་ཁོ་ན་ཉིད་ཀྱི་བདེ་བར་གཤེགས་ཏེ་དོན་ངོ་བོ་ཉིད་ཀྱི་སྐུའོ། །དེའི་སྐུ་མི་ཟད་པ་ནི་རྩ་གནས་གྱུར་པ་སྤྲུལ་བའི་སྐུ་སྟེ། སྐུའི་གསང་བ་བསམ་གྱིས་མི་ཁྱབ་པ་དང་སྐུ་ཐམས་ཅད་པའོ། །སྐུའི་གསང་བ་བསམ་གྱིས་མི་ཁྱབ་པ་ནི་སྐུའི་ཚད་གཟུང་མི་ནུས་པ་སྟེ། ཤཱཀྱ་ཐུབ་པའི་དབུའི་གཙུག་ཏོར་བལྟར་མི་མཐོང་བ་ལྟ་བུའོ། །སྐུ་ཐམས་ཅད་པ་ནི་སྤྲུལ་བ་མཆོག་ཤཱཀྱ་ཐུབ་པ་ནས། རི་བོང་དང༌། སྟག་དང༌། སེང་གེ་ལ་སོགས་པ་རྒྱུད་ཀྱིས་བསྡུས་
པའི་གཟུགས་སུ་སྟོན་པ་དང༌། རྒྱུད་ཀྱིས་མ་བསྡུས་པའི་གྲུ་དང་གཟིངས་དང་ཟམ་པ་དང༌། དཔག་བསམ་གྱི་ཤིང་དང༌། ཡིད་བཞིན་གྱི་ནོར་བུ་རིན་པོ་ཆེ་ལ་སོགས་པར་སྤྲུལ་ནས་སེམས་ཅན་གྱི་དོན་བྱེད་པའོ། །རྩ་ཡི་གེ་གནས་གྱུར་པ་ལོངས་སྤྱོད་རྫོགས་པའི་སྐུ་སྟེ། གསུང་མི་ཟད་པ་གསུང་གི་གསང་བ་བསམ་གྱིས་མི་ཁྱབ་པ་དང༌། གསུང་ཐམས་ཅད་པ་ལོངས་སྤྱོད་རྫོགས་པའི་སྐུའོ། །གསུང་གི་གསང་བ་བསམ་གྱིས་མི་ཁྱབ་པ་ནི། གསུང་གི་ཚད་གཟུང་བར་མི་ནུས་ཏེ། སྔོན་ཤཱ་རིའི་བུས་གང་ཙམ་ནས་ཐོས་སྙམ་ནས་ནུབ་ཕྱོགས་ཀྱི་འཇིག་རྟེན་གྱི་ཁམས་བཅུ་བརྒལ་ནས་ཕྱིན་པས་ཐོས་པ་ལྟ་བུའོ། །གསུང་ཐམས་ཅད་པ་ནི་ལེགས་པར་སྦྱར་བའི་སྐད་ནས་བཟུང་སྟེ་འགྲོ་བ་མཐའ་དག་གི་སྐད་དུ་ཆོས་སྟོན་པ་ནས། མེ་སྒྲ་དང་ཆུ་སྒྲ་ལ་སོགས་པ་འབྱུང་བ་མཐའ་དག་གི་སྒྲས་ཀྱང་སེམས་ཅན་གྱི་དོན་བྱེད་པའོ། །ཁམས་བདུད་རྩི་གནས་གྱུར་པ་ཐུགས་མི་ཟད་པ་ནི། ཐུགས་ཀྱི་གསང་བ་བསམ་གྱིས་མི་ཁྱབ་པ་དང༌། ཐུགས་ཐམས་ཅད་པ་ཆོས་ཀྱི་སྐུའོ། །དང་པོ་ནི་ཐུགས་ཀྱི་ཚད་གཟུང་བར་མི་ནུས་པ་སྟེ་དགྲ་བཅོམ་པའི་མངོན་པར་ཤེས་པས་ཀྱང་མི་ཤེས། ས་བཅུ་པའི་བྱང་ཆུབ་སེམས་དཔས་ཀྱང་མི་ཤེས་པའི་ཤེས་བྱ་ཡུལ་དང་དུས་དང་རང་བཞིན་གྱིས་བསྐལ་པ་རྣམས་སངས་རྒྱས་ཀྱིས་མཁྱེན་པའོ། །ཐུགས་ཐམས་ཅད་པ་ཤེས་བྱ་ཇི་སྙེད་པ་མཁྱེན་པ་ནི། ཀུན་རྫོབ་ཀྱི་རྟེན་འབྲེལ་མེ་ཏོག་མདོག་ལེགས་པ། ཚེར་མ་རྣོ་བ། དུག་གིས་འཆི་བ། སྨན་གྱིས་གསོ་བ། སྲན་མ་ཟླུམ་པ་ལ་སོགས་པ་རྒྱུ་འདི་ལས་འབྲས་བུ་འདི་འབྱུང་ཞེས་རྒྱུ་འབྲས་མ་འདྲེས་པར་སོ་སོར་མཁྱེན་པའོ། །ཤེས་
བྱ་ཇི་ལྟ་བ་མཁྱེན་པ་ནི། དངོས་པོའི་གནས་ལུགས་ཆོས་ཐམས་ཅད་ཀྱི་དེ་བཞིན་ཉིད་མཁྱེན་པའོ། །ཞེས་པ་ཡན་ཆད་ཀྱིས་གསང་གསུམ་མི་ཟད་པའི་དོན་རྒྱས་པར་གསུངས་ཤིང༌། དེ་ནས་རྒྱན་གྱི་འཁོར་ལོའི་སྒྲ་དོན་འཆད་པ་ལ། རྒྱན་ནི་གསེར་ལ་སོགས་པའི་རྒྱན་དེ་རང་གཞན་གཉིས་ཀ་ལ་མཛེས་པ་ལྟར། སྐུ་གསུང་ཐུགས་མཛད་པ་འཕྲིན་ལས་ཐམས་ཅད་འབད་པ་མེད་པར་ལྷུན་གྲུབ་ཏུ་ཐོབ་པ་དེ་རང་གཞན་གཉིས་ཀ་ལ་མཛེས་པའི་རྒྱན་ནོ། །འཁོར་ལོ་ནི་མཛད་པ་འཕྲིན་ལས་ཀྱི་ཙཀྲ་སྟེ། སྔ་མ་སྔ་མ་སངས་རྒྱས་ནས་ཕྱི་མ་ཕྱི་མ་སངས་རྒྱས་ལ་བཀོད་ནས་ཀྱང༌། གདུལ་བྱ་ཕྱི་མ་སངས་རྒྱས་ཀྱི་ས་ལ་བཀོད་པ་སྟེ། དོན་བྱས་པ་དང་དོན་བྱེད་པ་གཉིས་ཀས་ཀྱང་འཁོར་བ་མ་སྟོང་བར་དུ་སེམས་ཅན་གྱི་དོན་མཛད་པ་རྒྱུན་མི་འཆད་པའོ། །ཆོས་སྐུ་ནི་རང་གི་ངོ་བོ་མི་འགྱུར་བའི་འཁོར་ལོའོ། །ལོངས་སྐུ་ནི་གནས་གཞན་དུ་མི་འགྱུར་བའི་ཙཀྲའོ། །སྤྲུལ་སྐུ་ནི་མཛད་པ་འཕྲིན་ལས་རྒྱུན་མི་འཆད་པའི་ཙཀྲའོ། །ཞེས་སྐུ་གསུང་ཐུགས་གསུམ་གའི་ངོ་བོ་དང་བྱེད་ལས་ཀྱི་ཡོན་ཏན་ནམ་མཁའི་མཐའ་དང་མཉམ་པས་མི་ཟད་པ་དང༌། དེ་ཐམས་ཅད་འཇིག་རྟེན་ཀུན་ལ་ཕན་པའི་དོན་དུ་འགྱུར་བས་རྒྱན་དང༌། དེ་ཡང་དུས་རེས་འགའ་ཙམ་མ་ཡིན་པར་གཅིག་ནས་གཅིག་ཏུ་བརྒྱུད་དེ་འཁོར་བ་མ་སྟོང་གི་བར་དུ་འཇུག་པ་འཁོར་ལོའི་དོན་དུ་བཤད་དོ། །དང་པོ་མི་ཟད་པར་འགྲོ་བའི་རྒྱུ་མཚན་ནི། ཐོག་མར་སེམས་བསྐྱེད་པའི་དུས་ནས་བཟུང་སྟེ། སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ལ་དམིགས་པ་དང༌།
སེམས་ཅན་གྱི་ཁམས་བསམ་གྱིས་མི་ཁྱབ་པའི་དོན་དུ་བསྒྲུབས་པའི་སྟོབས་ཀྱིས་ཡིན་ཏེ། བློ་གྲོས་མི་ཟད་པའི་མདོ་ལས། མདོར་ན་སངས་རྒྱས་ཀྱི་ཆོས་ཐམས་ཅད་མི་ཟད་པ་སྟེ། བྱང་ཆུབ་ཀྱི་སེམས་ནི་དེ་དག་གི་རྩ་བར་སྐྱེས་པས་ན་མི་ཟད་པའོ། །དཀོན་མཆོག་གསུམ་གྱི་རིགས་རྒྱུན་མི་གཅོད་པས་མི་ཟད་པའོ། །སེམས་ཅན་གྱི་ཁམས་མི་ཟད་པས་ན་མི་ཟད་པའོ། །ཞེས་སོགས་དང༌། དབུས་མཐའི་འགྲེལ་པ་ལས། ཟད་མི་ཤེས་པ་དམ་པ་ནི། བྱང་ཆུབ་ཆེན་པོར་ཡོངས་སུ་བསྔོས་པས་གཏན་དུ་ཡོངས་སུ་གཏུགས་པར་མི་འགྱུར་བའི་ཕྱིར་རོ། །ཞེས་དང་། དེའི་འགྲེལ་བཤད་བློ་བརྟན་གྱིས་མཛད་པ་ལས། ཡང་ན་སེམས་ཅན་རྣམས་ཀྱི་དོན་དུ་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་བྱང་ཆུབ་ཆེན་པོར་ཡོངས་སུ་བསྔོས་པ་དག་སེམས་ཀྱི་ཁམས་བཞིན་དུ་མི་ཟད་པ་ཡིན་ཏེ། དེ་བས་ན་སེམས་ཅན་གྱི་ཁམས་བཞིན་དུ་གཏན་དུ་ཡོངས་སུ་གཏུགས་པར་མི་འགྱུར་རོ། །ཞེས་གསུངས་ཤིང༌། བློ་གྲོས་རྒྱ་མཚོས་ཞུས་པའི་མདོ་དང་སྤྱོད་འཇུག་སོགས་ལས་ཀྱང་དཔེ་དང་བཅས་ཏེ་གསལ་བར་གསུངས་སོ། །རྒྱན་གྱི་དོན་ཡང་འཇིག་རྟེན་ན་ཡུལ་དེ་མཛེས་ཤིང་ཁྱད་པར་འཕགས་པར་བྱེད་པ་ལ་རྒྱན་དུ་གྲགས་པ་ལྟར། ཡོན་ཏན་འདི་དག་སངས་རྒྱས་ཀྱི་ཆེ་བར་འགྲོ་བ་ཙམ་དུ་མ་ཟད། འགྲོ་བ་རྣམས་ཀྱང་གོ་འཕང་མཆོག་ཏུ་འགྱུར་བ་འདི་ལ་ལྟོས་པས་ན་འཇིག་རྟེན་གྱི་ཡང་རྒྱན་དུ་གྱུར་པ་སྟེ། རྒྱུད་བླ་མར། འཇིག་རྟེན་གྱི། རྒྱན་གྱུར་ཅེས་པའི་ཐོགས་འགྲེལ་ལས། འཇིག་རྟེན་གྱི་རྒྱན་དུ་གྱུར་པར་ཆོས་མཐུན་པས་ནི་འགྲོ་བ་
ཐམས་ཅད་ཀྱི་དགེ་བའི་རྒྱུ་ཡིན་པའི་ཕྱིར། ཞེས་སོ། །འཁོར་ལོའི་དོན་ལ་གཉིས་ལས། མཉམ་རྗེས་རེས་འཇོག་མེད་པར་ཆོས་ཉིད་ལ་རྩེ་གཅིག་ཏུ་མཉམ་པར་བཞག་བཞིན་དུ་གང་འཚམ་གྱིས་འགྲོ་བའི་དོན་མཛད་ཅིང༌། གཟུགས་སྐུ་སྣ་ཚོགས་ཆུ་ཟླ་ལྟར་སྟོན་བཞིན་དུ་ཆོས་ཀྱི་དབྱིངས་ལ་རྩེ་གཅིག་ཏུ་མཉམ་པར་འཇོག་པའི་སྐུ་ཐུགས་ཟུང་འཇུག་གི་སྟེང་ནས་འཁོར་ལོར་འཇོག་ཚུལ་འོག་ཏུ་འབྱུང་ཞིང༌། འདིར་འཕྲིན་ལས་གཅིག་ནས་གཅིག་ཏུ་བརྒྱུད་དེ་རྒྱུན་མི་འཆད་པས་འཁོར་ལོར་བཤད་དེ། གཞི་བསྡུ་བ་ལས། དེ་བས་ན་གཅིག་ནས་གཅིག་ཏུ་བརྒྱུད་དེ་བསྐོར་བའི་དོན་གྱིས་ན་འཁོར་ལོ་ཞེས་གསུངས་པ་ལྟར་རོ། །དེས་ན་གསང་གསུམ་མི་ཟད་རྒྱན་གྱི་འཁོར་ལོ་ཞེས་པ་དང་། ཁ་སྦྱོར་ཡན་ལག་བདུན་ལྡན་ཞེས་པ་གཉིས་ཀ་མིང་མི་འདྲ་ཡང་དོན་ཟུང་འཇུག་གི་རྒྱས་བཤད་དུ་འགྲོ་བ་ལ་ཁྱད་པར་མེད་དེ། གསང་གསུམ་ཞེས་པ་གང་ཟུང་དུ་འཇུག་རྒྱུའི་སྐུ་ཐུགས་གཉིས་ཀྱི་སྟེང་དུ་དེའི་ཚོགས་པ་ནས་གདུལ་བྱའི་དོན་བྱེད་པའི་ཐབས་ཀྱི་གཙོ་བོ་གསུང་ཟུར་དུ་ཕྱེ་སྟེ་གྲངས་གསུམ་དུ་བྱས་པ་ཙམ་ཡིན་ལ། མི་ཟད་རྒྱན་གྱི་འཁོར་ལོ་ཞེས་པས། དེ་དག་ངོ་བོ་དབྱེར་མེད་པ་གྲུབ་བདེ་རྫས་གཅིག་པའི་ཚུལ་གྱིས་འཁོར་བ་མ་སྟོང་བར་དུ་བཞུགས་པས་ཟུང་དུ་འཇུག་ཚུལ་བསྟན་པ་ཡིན་པའི་ཕྱིར། ཨ་སེང་མ་ལས། སྐུ་ཐམས་ཅད་པའི་དུས་ན་གསུང་དང་ཐུགས་ཐམས་ཅད་པ་ཡིན་ལ། གཉིས་པོའི་ཚེ་ན་ཡང་དེ་བཞིན་དུ་ཡིན་པས། གྲུབ་བདེ་གཅིག་པའི་ཚུལ་གྱིས་གདུལ་བྱ་མཐའ་དག་གི་དོན་དུ་འགྱུར་བའོ། །ཞེས་འཁོར་ལོའི་སྒྲ་དོན་
བཤད་ཅིང་འདི་དང་ཡན་ལག་བདུན་གྱི་རྒྱུན་མི་འཆད་པ་དང༌། འགོག་པ་མེད་པའི་ཡན་ལག་དོན་གཅིག་གོ །དེ་བཞིན་དུ་ཁ་སྦྱོར་ཡན་ལག་བདུན་གྱིས་ཀྱང་ཟུང་འཇུག་རྒྱས་པར་བཤད་པ་ཡིན་ཏེ། ཡན་ལག་བདུན་ནི། ངག་གི་དབང་ཕྱུག་གྲགས་པས། ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ཡོངས་གང་རྒྱུན་མི་འཆད་དང་འགོག་པ་མེད། །ཅེས་དང༌། སྡོམ་འབྱུང་དཀའ་འགྲེལ་པདྨ་ཅན་ལས། དཔལ་བདེ་མཆོག་གི་རྣམ་པ་ལོངས་སྤྱོད་རྫོགས་པའི་ཡན་ལག་དང༌། རྡོ་རྗེ་ཕག་མོས་ཡང་དག་འཁྱུད་པ་ཁ་སྦྱོར་གྱི་ཡན་ལག་དང༌། དེའི་དགའ་བ་བདེ་བ་ཆེན་པོའི་ཡན་ལག་དང༌། དེ་དང་སྟོང་པ་ཉིད་རོ་གཅིག་པ་རང་བཞིན་མེད་པའི་ཡན་ལག་དང༌། དེ་ལས་ཡང་བཞེངས་པ་སྙིང་རྗེའི་ཡན་ལག་དང༌། དེ་བར་ཆད་མེད་པ་རྒྱུན་ཆད་མེད་པའི་ཡན་ལག་དང༌། འཁོར་བ་མ་སྟོང་གི་བར་དུ་མྱ་ངན་ལས་མི་འདའ་བས་འགོག་པ་མེད་པའི་ཡན་ལག་ཅེས་པ་ནི་ཡན་ལག་བདུན་ནོ། །ཞེས་པ་ལྟར་ལ་ཡན་ལག་དང་པོ་བཞིས་གང་ཟུང་དུ་འཇུག་རྒྱུའི་སྐུ་ཐུགས་གསལ་བར་བསྟན། ཕྱི་མ་གསུམ་གྱིས་དེ་གཉིས་ཟུང་དུ་འཇུག་པའི་སྒོ་ནས་རྟག་ཏུ་བཞུགས་ཚུལ་བསྟན་པའི་ཕྱིར་ཏེ། སྔགས་རིམ་ལས། སྐུ་ལོངས་སྐུ་དང་ཁ་སྦྱོར་གྱི་ཡན་ལག་གཉིས་ཀྱི་བདག་ཉིད་དུ་གྱུར་པ་དང༌། ཐུགས་དེ་ཁོ་ན་ཉིད་ལ་གནས་པའི་བདེ་བ་ཆེན་པོ་དང༌། རང་བཞིན་མེད་པའི་ཡན་ལག་གཉིས་ཀྱི་བདག་ཉིད་དུ་གྱུར་པའི་ཟུང་འཇུག །ཅེས་སོ། །དེ་ནས་རྒྱུན་མི་འཆད་པའི་ཡན་ལག་དང༌། རྒྱུན་མི་འཆད་པར་མ་ཟད་གཟུགས་སྐུའི་སྣང་བ་དེ་ཡང་གཏན་དུ་མི་སྡུད་པར་བཞུགས་
པ་འགོག་པ་མེད་པའི་ཡན་ལག་གཉིས་ཀྱིས་འཁོར་བ་མ་སྟོང་བར་དུ་བཞུགས་ཚུལ་དངོས་བསྟན་པ་ཡིན་ལ། སྙིང་རྗེས་ཡོངས་སུ་གང་བའི་ཡན་ལག་ནི། དེའི་རྒྱུའི་དབང་དུ་བྱས་པ་ཡིན་ཏེ། རྣམ་འགྲེལ་ལས། སྙིང་རྗེ་དམན་པ་ཉིད་ཕྱིར་ཡང་། །གནས་པའི་འབད་རྩོལ་ཆེན་པོ་མེད། །གང་དག་བརྩེ་བ་ཆེན་པོ་པ། །གཞན་གྱི་ངོར་ནི་བཞུགས་པ་ཡིན། །ཞེས་གསུངས་པ་ལྟར་རོ། །དེ་བ་ཙནྡྲའི་ཤེས་རབ་ཡེ་ཤེས་གསལ་བ་ལས། སྙིང་རྗེས་ངེས་གང་ནི་མི་འགྱུར་བའི་བདེ་བའོ། །ཞེས་བཤད་ཅིང་གཞན་དུ་མས་ཀྱང་དེ་ཉིད་ལྷན་སྐྱེས་ཀྱི་བདེ་ཆེན་ལ་འདོད་པ་མི་འཐད་དེ། ཡན་ལག་བདུན་གྱི་དང་པོ་གསུམ་སྔགས་བླ་མེད་ཀྱི་བཤད་པ་ཐུན་མོང་མ་ཡིན་པ་དང་། ཕྱི་མ་བཞི་ཕར་ཕྱིན་ཐེག་པ་དང་། ཐུན་མོང་གི་བཤད་པར་གསུངས་པས། འདིའི་སྙིང་རྗེ་སྤྱི་དོན་སྐབས་ཀྱི་དམིགས་པ་མེད་པའི་སྙིང་རྗེ་ཙམ་ལ་བྱེད་པའི་ཕྱིར་ཏེ། སྔགས་རིམ་ལས། སྙིང་རྗེས་ངེས་གང་ཞེས་སྨོས་ཏེ། དམིགས་པ་མེད་པའི་སྙིང་རྗེས་མི་རྟོག་བཞིན་དུ་སེམས་ཅན་གྱི་དོན་མཛད་པའོ། །ཞེས་དང་། ཡན་ལག་དང་པོ་གསུམ་ཐུན་མོང་མ་ཡིན་པ་དང་། ཕྱི་མ་བཞི་ཐུན་མོང་བར་མན་སྙེ་ལས་བཤད། ཅེས་གསུངས་ཤིང་། སྡོམ་འབྱུང་དཀའ་འགྲེལ་ཀྱང་། ཡན་ལག་དང་པོ་གསུམ་ནི་ཐུན་མོང་མ་ཡིན་པ་སྟེ། ཐེག་པ་གཞན་དུ་མ་གསུངས། ཞེས་སོ། །འོ་ན་ལོངས་སྐུ་ཕར་ཕྱིན་ཐེག་པར་ཡང་བཤད་པས། དེ་ཡན་ལག་ཐུན་མོང་མ་ཡིན་པར་མི་འགྲོ་སྙམ་ན་སྐྱོན་
མེད་དེ། སྐུ་དེ་སྒྲུབ་བྱེད་ཀྱི་རྣམ་པ་མཐུན་པའི་རྒྱུའི་གཙོ་བོ་ཕར་ཕྱིན་ཐེག་པར་མ་བཤད་ཅིང༌། ཁྱད་པར་དུ་བདག་གི་གདགས་གཞི་མཐར་ཐུག་པ་ཕྲ་བའི་རླུང་སེམས་དེ་ཉིད་བྱིན་གྱིས་བརླབས་ཏེ་ལྷ་སྐུར་བསྒྱུར་བས་ན་བདག་བྱིན་བརླབ་ཏུ་གྲགས་པའི་ལམ་གྱིས་བསྒྲུབས་པ་འཇའ་ལུས་རྡོ་རྗེ་སེམས་དཔའི་སྐུ་བདེ་བ་ཆེན་པོའི་རང་མདངས་དེ་ཉིད་སྐབས་འདིའི་ལོངས་སྤྱོད་རྫོགས་པའི་སྐུ་ཡིན་ཞིང༌། དེ་ལ་སྦྱོར་བ་བདུན་པ་ལས་དཔེ་མེད་བདེ་རྫོགས་ཀྱི་སྐུ་ཞེས་བཤད། ལམ་འབྲས་ཨ་སེང་མར། སྐུ་མི་ཟད་པ་རྒྱན་གྱི་འཁོར་ལོ་ཞེས་བྱ་བར་འགྱུར་ཏེ། གཞན་ཁ་སྦྱོར་མཚན་དཔེས་བརྒྱན་པ་བདེ་བ་འབར་བ་ལ་སོགས་པ་ལོངས་སྐུར་འདོད་པ་ལ་བིརྺ་པ་དེ་ལ་རྩ་གནས་གྱུར་པ་སྤྲུལ་བའི་སྐུ། ཞེས་སོགས་ཀྱིས་རྩ་གནས་གྱུར་སྐུ་མི་ཟད་པ་རྒྱན་གྱི་འཁོར་ལོའི་ཐ་སྙད་སྦྱར་ནས་བཤད་པས། ཕར་ཕྱིན་ཐེག་པའི་སྐབས་ཀྱི་ལོངས་སྐུ་དང་མི་འདྲའོ། །ཡན་ལག་བདུན་པོ་དེ་དག་སྐུ་གཅིག་གི་སྟེང་དུ་རིམ་བཞིན་བསྣན་ནས་ཁྱད་ཆོས་སུ་འགྱུར་ཚུལ་གྲགས་ཆེ་ལ། རྗེ་བཙུན་གྲགས་པའི་མངོན་རྟོགས་ལྗོན་ཤིང་ལས། ཆོས་སྐུ་ནི་སྟོང་པ་དང་སྙིང་རྗེ་གཉིས་སུ་མེད་པ་སེམས་གནས་གྱུར་པ་རང་བཞིན་མེད་པའི་ཡན་ལག་གིས་བསྡུས་པ་ཡིན་ནོ། །ལོངས་སྤྱོད་རྫོགས་པའི་སྐུ་ནི་ངག་གནས་གྱུར་པའི་ལོངས་སྤྱོད་རྫོགས་པ་ཁ་སྦྱོར་བདེ་ཆེན་དང་གསུམ་གྱིས་བསྡུས་པ་ཡིན་ནོ། །སྤྲུལ་བའི་སྐུ་ནི་ལུས་གནས་གྱུར་པ་སྙིང་རྗེ་ཆེན་པོ་དང༌། རྒྱུན་མི་འཆད་པ་དང༌། འགོག་པ་མེད་པ་གསུམ་གྱིས་བསྡུས་པ་ཡིན་ནོ། །ཞེས་སྐུ་
གསུམ་སོ་སོ་ལ་སྦྱར་ཡང་དོན་འགལ་བ་མེད་དོ། །དེ་ལྟར་སྐུ་གསུང་ཐུགས་ཀྱི་གསང་བ་བསམ་གྱིས་མི་ཁྱབ་པ་ཡན་ལག་བདུན་ལྡན་གྱི་བདག་ཉིད། ཐོབ་བྱ་དོན་གྱི་དབང་བཞི་པ། འབྲས་བུ་ཟུང་འཇུག་གི་སྐུ་ནི་སྐབས་འདིའི་བསྟོད་པའི་ཡུལ་ཡིན་ཞིང༌།བསྟོད་པ་བྱེད་ཚུལ་ནི། བདག་གི་ལུས་དང་ངག་ཡིད་རབ་གུས་པས། །ལེགས་པར་བསྟོད་ཀྱི།ཞེས་གསུངས་ཏེ། དེ་ཡང་བསྟོད་པའི་ཡུལ་དེ་ལ་དམིགས་ནས་སེམས་དང་བ་ཙམ་མ་ཡིན་པར་གསང་གསུམ་རོ་གཅིག་པའི་ཟུང་འཇུག་གི་སྐུ་དེ་ཉིད་ཚོགས་ཇི་ལྟ་བུས་ཐོབ་ཚུལ་ལེགས་པར་ངེས་ཏེ་མི་ལྡོག་པའི་དང་བ་ཤུགས་དྲག་བསྐྱེད་ཅིང་། རང་གི་ལུས་ངག་ཡིད་གསུམ་ཀྱང་དེ་ལྟ་བུའི་གསང་བ་གསུམ་གྱི་དཔེར་བསྒྱུར་བར་འདོད་པས། ད་ལྟ་ནས་དེ་དང་རྣམ་པ་མཐུན་པའི་ལམ་ལ་སློབ་པ་ཞིག་བྱུང་ན། དང་པོ་གསུམ་གྱི་བྱེད་ལས་ཚང་བས་ལེགས་པར་བསྟོད་པར་འགྱུར་གྱི། རང་གི་བསྒྲུབ་བྱར་མི་བྱེད་ན་དེའི་ཡོན་ཏན་བརྗོད་པ་ཁོ་ནས་ལེགས་པར་བསྟོད་པར་མི་འགྱུར་རོ། །དེས་ན་གུས་པ་བསམ་པའི་ཁྱད་པར་ཡིན་ཀྱང༌། འདིར་ལུས་ངག་ཡིད་གསུམ་སྨོས་པའི་རྒྱུ་མཚན་ཡང་དེ་ཡིན་པ་ཤེས་པར་གྱིས་ཤིག །ཁོ་ན་རེ། ལས་དང་པོ་བའི་སྐབས་སུ་གཟུགས་སྐུ་དང་རྣམ་པ་མཐུན་པའི་ལམ་བསྒོམ་པ་ཙམ་ཡོད་ཀྱང༌། ཡན་ལག་བདུན་པོ་ཐམས་ཅད་དང་རྣམ་པ་མཐུན་པའི་ལམ་སྒོམ་ཚུལ་མེད་སྙམ་ན། མི་འཐད་དེ། བསྐྱེད་རིམ་གྱི་སྐབས་སུ་ཡང་མཚན་དཔེས་བརྒྱན་པའི་ལྷ་སྐུ་ཡུམ་བཅས་སུ་བསྒོམ་སྟེ་བདེ་བ་བསྐྱེད་ཅིང༌། དེ་ཡང་ལྟ་བས་རྒྱས་
འདེབས་པས་ཡན་ལག་དང་པོ་བཞི་དང༌། སྙིང་རྗེའི་སྒོ་ནས་དཀྱིལ་འཁོར་རྒྱལ་མཆོག་གི་ལྷ་སྤྲུལ་ཞིང༌། དེའི་རྒྱུན་ལ་རིང་དུ་གནས་ནས་མཆོད་བསྟོད་བཟླས་པ་སོགས་ལས་རྒྱལ་མཆོག་བྱེད་པས་ཡན་ལག་ཕྱི་མ་གསུམ་དང་རྣམ་པ་མཐུན་པའི་ཕྱིར། དེར་མ་ཟད་སྨིན་བྱེད་དབང་གི་དུས་ནས་ཀྱང་ཡན་ལག་བདུན་ལྡན་དེ་དང་རྣམ་པ་མཐུན་པ་ཙམ་འབྱུང་དགོས་ཏེ། དཀྱིལ་ཆོག་རྡོ་རྗེ་འཕྲེང་བ་ལས། ཤེས་རབ་ཡེ་ཤེས་དེ་ཉིད་མྱུ་གུར་གྱུར་པའི་བྱང་ཆུབ་ཀྱི་སེམས་བསྒོམ་པས་རབ་ཏུ་འཕེལ་བཞིན་པ་སྒྲིབ་པ་མེད་པ་ཉིད་དུ་གྱུར་པའི་དེ་ཁོ་ན་ཉིད་ཆོས་ཐམས་ཅད་བསམ་གྱིས་མི་ཁྱབ་པ་ཉིད་ཀྱི་རང་བཞིན་ཡན་ལག་བདུན་དང་ལྡན་པའི་རྡོ་རྗེ་འཆང་ཆེན་པོ། ཞེས་མྱུ་གུའི་དུས་ན་ལོ་འབྲས་མ་རྒྱས་ཀྱང་དེའི་རྒྱུ་མཐུན་ཚང་བ་དཔེར་བྱས་ནས་གསུངས་སོ། །དེ་ལྟར་འབྲས་བུ་ཟུང་འཇུག་གི་ཡོན་ཏན་མཐོང་ནས་ཆེད་དུ་བརྗོད་ཅིང༌། དེ་དང་རྣམ་པ་མཐུན་པའི་ལམ་ལ་རྗེས་སུ་སློབ་པ་ནི་ལེགས་པར་བསྟོད་པའི་དོན་དང༌། དེ་ནས་དགྱེས་པས་སྙན་དུ་བཞེས། །ཞེས་པ་ནི། བཅོམ་ལྡན་འདས་མ་ཡང་བདག་ལ་ཐུགས་དགྱེས་ནས་ཇི་ལྟར་གསོལ་བ་བཏབ་པའི་དོན་ཐམས་ཅད་དང་དུ་བཞེས་ཏེ་བདག་རྒྱུད་ལ་རྟོགས་པ་ཁྱད་པར་ཅན་དེ་དག་ཐམས་ཅད་མྱུར་དུ་སྐྱེ་བར་བྱིན་གྱིས་རློབས་ཤིག་ཅེས་ཐུགས་རྗེ་བསྐུལ་བའོ། །གཞན་ཡང་སྐུ་གསུང་ཐུགས་གསུམ་སོ་སོ་བ་དང་བསྡོམས་པ་སྟེ་བཞི་ག་དབང་བཞི་དང་སྦྱར་ཞིང༌། དབང་རེ་རེ་ལ་ཡང༌། རྡོ་རྗེའི་ཚིག་རྐང་ལས། ལམ་དུ་བསྐྱེད་རིམ་སོགས་ལྔ་པ་བཞིས་བསྟན། ཞེས་པ་ལྟར། ལམ་གང་ཡིན་
པ། ལྟ་བ་གང་ཡིན་པ། གྲུབ་མཐའ་གང་ཡིན་པ། འདའ་ཁ་མ་གང་ཡིན་པ། འབྲས་བུ་གང་ཡིན་པ་སྟེ་ལྔ་ལྔའམ། རྒྱས་པར་ཕྱེ་ན་བླ་མ་དང༌། དཀྱིལ་འཁོར་དང༌། དབང་དང༌། དྲི་མ་དང༌། དཔེ་དང༌། ཡོན་ཏན་དང༌། ལམ་དང༌། ལྟ་བ་དང༌། འདའ་ཁ་མ་དང༌། བར་དོ་དང༌། དམ་ཚིག་དང༌། བརྡ་དང༌། གྲུབ་མཐའ་དང༌། འགྲོས་དང༌། འབྲས་བུ་སྟེ་བཅོ་ལྔ་བཤད་ལ། ཕྱི་མ་རྣམས་སྦྱང་གཞི་བསྣན་པ་ལྟར་བཅུ་དྲུག་རེའི་སྒོ་ནས་གཏན་ལ་ཕབ་ན་སྤང་གཉེན་རྒྱུ་འབྲས་ཀྱི་གནད་ཚང་བ་རྟོགས་པར་འགྱུར་བས། ཞིབ་ཏུ་ཤེས་པར་འདོད་ན་ས་སྐྱ་པའི་རྗེ་བཙུན་གོང་མ་ལྔའི་གསུང་རབ་རྣམས་དང༌། ཚར་ཆེན་བློ་གསལ་རྒྱ་མཚོ་ཡབ་སྲས་སོགས་ཀྱི་ལེགས་བཤད་རྣམས་ལས་ཤེས་པར་བྱའོ། །ཟབ་ཡངས་གཏིང་མཐའ་བྲལ་བ་རྒྱ་མཚོའི་ངོགས། །རླབས་ཕྲེང་གཡོ་བའི་སྒྲ་དབྱངས་མི་ཟད་པ། །མེ་འོད་འཁྱུག་པའི་རྟ་གདོང་རི་བོ་བཞིན། །ཐུགས་གསུང་སྐུ་ཡི་ངོ་མཚར་བསམ་ལས་འདས། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ།། །།༈ གསུམ་པ་བརྩམས་པའི་དགེ་བ་བསྔོ་བ་འདོད་གསོལ་དང་བཅས་པ་བཤད་པ་ལ། བསྔོ་བ་དང༌། འདོད་དོན་གསོལ་བ། དོན་བསྡུ་བ་གསུམ། དང་པོ་ལ་མདོར་བསྟན། རྒྱས་བཤད་གཉིས། དང་པོ་ནི། དེ་ལྟར་བདག་གིས་བསྟོད་པའི་ནུས་མཐུ་ལས། །རབ་དཀར་དགེ་བ་ཟླ་ལྟར་དཀར་བ་དེས། །མར་གྱུར་དོན་དུ་སྟོབས་བཅུ་མངའ་བ་ཡི། །གོ་འཕང་ཚེ་འདིར་བདེ་བླག་ཐོབ་པར་ཤོག །ཅེས་བྱུང༌། དེ་ཡང་བསྔོ་བ་ནི་བློ་གྲོས་རྒྱ་མཚོས་
ཞུས་པའི་མདོ་ལས། ཇི་ལྟར་རྒྱ་མཚོ་ཆེ་ནང་ཆུ་ཐིགས་ལྷུང༌། །རྒྱ་མཚོ་མ་ཟད་བར་དུ་དེ་མི་འཛད། །དེ་བཞིན་བྱང་ཆུབ་ཡོངས་བསྔོས་དགེ་བ་ཡང༌། །བྱང་ཆུབ་མ་ཐོབ་བར་དུ་དེ་མི་འཛད། །ཅེས་གསུངས་པ་སོགས་མདོ་དང་བསྟན་བཅོས་དུ་མ་ནས་དགེ་རྩ་མི་ཟད་ཅིང་འཕེལ་བའི་ཐབས་ཀྱི་མཆོག་ཏུ་གསུངས་ལ། ཁྱད་པར་ཤེར་ཕྱིན་གྱི་མདོ་སྡེ་རྣམས་སུ་སྦྱིན་སོགས་གང་ལ་སློབ་པའི་ཚེ་ཡང་རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་ཡིད་ལ་བྱེད་པས་མི་དམིགས་པའི་ཚུལ་གྱིས་སློབ་པ་དང༌། དེ་ཡང་ཉན་ཐོས་དང་རང་སངས་རྒྱས་ཀྱི་སར་མི་བསྔོ་བར་རྣམ་པ་ཐམས་ཅད་མཁྱེན་པ་ཉིད་དུ་བསྔོ་བ་གསུམ་གསུམ་ཡ་མ་བྲལ་བར་བྱེད་པ་དགོས་པར་གསུངས་སོ། །བསྔོ་བ་དང་སྨོན་ལམ་ལ་ཁྱད་པར་ཅི་ཡོད་ཅེ་ན། བཟང་པོ་སྤྱོད་པར། གང་དག་བསྔོ་བའི་རྒྱལ་པོ་འདི་ཐོས་ནས། །ཞེས་སོགས་ལ་བརྟེན་ནས་གཙང་ཆུང་ཆོས་གྲགས་སོགས་ཀྱིས་དེ་གཉིས་ཁྱད་མེད་པ་འཐད་ཕྱོགས་སུ་བྱས་སོ། །འོན་ཀྱང་སྤྱོད་འཇུག་དར་ཊཱིཀ་ལས། བསྔོ་བ་དང་སྨོན་ལམ་ལ་ཁྱད་པར་ཆེར་མེད་མོད་ཀྱི། འདོད་བྱའི་འབྲས་བུ་དོན་གཉེར་གྱི་འདུན་པས་ཁྱད་པར་དུ་བྱས་པ་སྨོན་ལམ་དང༌། རྒྱུའི་དགེ་བ་རྣམས་འབྲས་བུ་དེའི་རྒྱུར་འགྱུར་བའི་འདུན་པས་ཁྱད་པར་དུ་བྱས་པ་བསྔོ་བའོ། །ཞེས་སོགས་ཁུངས་ཐུབ་དུ་མས་སྨོན་ལམ་ལ་བསྔོ་བྱའི་རྫས་ཁྱད་གཞིར་བྱས་པས་མ་ཁྱབ་ཅིང༌། བསྔོ་བ་ལ་དེ་འདྲ་ཞིག་དགོས་པར་གསུངས་སོ། །གཞན་ཡང༌། དབུས་མཐའ་ལས། མི་ཟད་པ་དང་རྟག་འཇུག་དང༌། །ཞེས་པའི་ཐད་ཀྱི་དབྱིག་འགྲེལ་ལས། ཡོངས་སུ་བསྔོ་བས་སྦྱིན་སོགས་ཀྱི་དགེ་བ་
མི་ཟད་པར་བྱེད་དོ། །སྨོན་ལམ་གྱིས་ནི་སྦྱིན་སོགས་བྱེད་པ་དང་མཐུན་པའི་སྐྱེ་བ་ཡོངས་སུ་འཛིན་པས་ཚེ་རབས་ཐམས་ཅད་དུ་སངས་རྒྱས་འབྱུང་བ་མཉེས་པར་བྱེད་ཅིང་སྦྱིན་སོགས་ཀྱི་བྱ་བ་ལ་རྟག་ཏུ་འཇུག་པ་འཐོབ་བོ། །ཞེས་བསྔོ་བས་སྔར་བྱས་ཀྱི་དགེ་བ་སྤེལ་བ་དང༌། སྨོན་ལམ་ནི་སླར་དགེ་བ་ལ་འཇུག་པའི་རྒྱུར་གསུངས་པ་ལྟ་བུ་རྣམ་གྲངས་ཐ་དད་ཀྱང་དོན་འགལ་བ་མེད་དོ། །དེས་ན་རྐང་པ་དང་པོ་གཉིས་ཀྱིས་བསྔོ་བྱའི་རྫས་བསྟན་ཏེ། དེ་ཡང་བཅོམ་ལྡན་འདས་མ་ཉིད་ཀྱིས་སྔོན་སློབ་པའི་གནས་སྐབས་ན་དབང་བཞི་དང་འབྲེལ་བའི་ལམ་རིམ་གཉིས་མཐའ་དག་ཚུལ་བཞིན་དུ་ཉམས་སུ་བཞེས་པའི་སྟོབས་ཀྱིས་སྐུ་བཞི་མངོན་དུ་མཛད་པའི་ཚུལ། སྙན་ངག་མཁན་པོའི་ཟོལ་བསྟོད་ལྟ་བུ་མ་ཡིན་པར་རྒྱུ་འབྲས་ངོ་བོའི་ཡོན་ཏན་ཆ་ཚང་བ་སྒྲོ་སྐུར་དང་བྲལ་བར་བརྗོད་པའི་སྒོ་ནས་བསྟོད་པ་བྱས་པ་དེ་ལས་བྱུང་བའི་དགེ་བའི་རྩ་བ་སྟོན་གནམ་གཡའ་དག་པའི་དུས་ཀྱི་ཟླ་བ་ཉ་གང་བ་དྲི་མ་མཐའ་དག་དང་བྲལ་བ་དེ་དང་འདྲ་བར། བསམ་པ་དང་སྦྱོར་བ་གང་ལ་ཡང་ཉོན་མོངས་པ་ཅན་གྱི་ཉེས་པའི་སྐྱོན་དང་མ་འདྲེས་པའི་རྣམ་པར་དག་པ་དེ་ཉིད་བསྔོ་བྱའི་རྫས་སུ་ངོས་བཟུང་བ་ཡིན་ནོ། །དེའི་འོག་ཏུ་རྐང་པ་གཉིས་ཀྱིས་བསྔོ་ཚུལ་མདོར་བསྟན་པ་ཡིན་ཏེ། ཆེད་དུ་བྱ་བ་སེམས་ཅན་ཐམས་ཅད་ཀྱི་དོན་དུ་ཐོབ་བྱའི་འབྲས་བུ་སྟོབས་བཅུ་མངའ་བ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་དེ་ཉིད་ཕར་ཕྱིན་ཐེག་པའི་ལུགས་ཀྱི་གྲངས་མེད་གསུམ་སོགས་ལ་མི་ལྟོས་པར། སྔགས་བླ་མེད་ཀྱི་མྱུར་ལམ་ལ་བརྟེན་ནས་སྙིགས་དུས་ཀྱི་ཚེ་ཐུང་
འདི་ལ་བདེ་བླག་ཉིད་དུ་ཐོབ་པར་ཤོག་ཅིག་ཅེས་པ་སྟེ། སྟོབས་བཅུའི་རྣམ་གཞག་སོགས་མདོ་ཙམ་གོང་དུ་བརྗོད་ཟིན་པས་མ་སྤྲོས་སོ། །༈ གཉིས་པ་རྒྱས་པར་བཤད་པ་ལ། རང་དོན་ཕུན་ཚོགས་བྱང་ཆུབ་འཐོབ་པའི་རྒྱུར་བསྔོ་བ་དང༌། གཞན་དོན་ཕུན་ཚོགས་འཕྲིན་ལས་ལྷུན་གྱིས་འགྲུབ་པའི་རྒྱུར་བསྔོ་བ་གཉིས། དང་པོ་ནི། དཔལ་ལྡན་རིག་བྱེད་ལྷ་མོའི་བསྐྱེད་པའི་རིམ། །རྣལ་འབྱོར་བསམ་གཏན་ལ་གཞོལ་ཡེ་ཤེས་མེས། །ཐ་མལ་སྣང་ཞེན་བུད་ཤིང་མ་ལུས་པ། །རིང་པོར་མི་ཐོགས་མྱུར་དུ་སྲེག་པར་ཤོག །ཅེས་བྱུང༌། དེ་ཡང་ལུགས་འདིའི་ལམ་རིམ་པ་གཉིས་ཀས་སྒྲོད་ཚུལ་སོགས་གོང་དུ་བཤད་ཟིན་པས། འདིར་ཚིག་ཙམ་ཞིག་བརྗོད་ན། རྒྱུ་ཚོགས་གཉིས་ལ་བརྟེན་ནས་འབྲས་བུ་སྐུ་གཉིས་ཀྱི་དཔལ་དང་ལྡན་པ་ལྷ་མོ་རིག་བྱེད་མའི་བསྐྱེད་རིམ་སྐུ་གསུམ་གྱི་རྣལ་འབྱོར་ཉམས་སུ་བླངས་ཏེ། སྣང་ངོར་རྟེན་དང་བརྟེན་པ་མཐའ་དག་འཇའ་ཚོན་བཞིན་དུ་མ་འདྲེས་ཤིང་རྫོགས་པར་འཆར་བའི་གསལ་སྣང་དང༌། དེ་ཡང་ངེས་ངོར་ཟབ་མོ་སྟོང་པ་ཉིད་ལ་དམིགས་པའི་དབང་གིས་དག་པའི་ཡེ་ཤེས་དེ་ཉིད་ཀྱི་རང་འོད་བཞིན་ལག་གི་རྣམ་པར་ཤར་བ་འབྲས་དུས་ཀྱི་རྟེན་དང་བརྟེན་པ་དེ་དག་དངོས་ཡིན་སྙམ་པའི་ང་རྒྱལ་གཉིས་ཀ་ཟུང་དུ་འཇུག་པ་ཟབ་གསལ་གཉིས་སུ་མེད་པའི་ཡེ་ཤེས་ཀྱི་མེ་ལྕེས་ཐ་མལ་གྱི་སྣང་བ་དང་ཐ་མལ་གྱི་ཞེན་པའི་བུད་ཤིང་མ་ལུས་པ་དུས་རིང་པོར་མི་ཐོགས་པར་མྱུར་དུ་སྲེག་པར་ཤོག་ཅིག་ཅེས་པའོ། །དེ་ཡང་སྔགས་རིམ་ལས། རྟེན་གཞལ་ཡས་ཁང་དང་བརྟེན་པ་ལྷར་འཆར་བའི་སྣང་བ་གོམས་པས་ཐ་མལ་པའི་སྣང་བ་དང༌། མི་
བསྐྱོད་པའོ། །རྣམ་སྣང་ངོ་སྙམ་པ་ལ་སོགས་པའི་ངེས་པའི་འཛིན་སྟངས་གོམས་པས་ཐ་མལ་གྱི་ང་རྒྱལ་བཟློག་པར་བྱའོ། །ཞེས་དང༌། ང་རྒྱལ་བསྒོམ་པ་ནི་གཙོ་བོ་ཡིན་ལ། ཐ་མལ་པའི་སྣང་བ་བཟློག་པའི་རྟེན་དང་བརྟེན་པའི་སྣང་བ་ཁྱད་པར་ཅན་བསྒོམ་པ་ནི་དེའི་ཡན་ལག་གོ །ཞེས་གསལ་སྣང་དང་ང་རྒྱལ་གཉིས་ནི་རིམ་པ་བཞིན་ཐ་མལ་གྱི་སྣང་བ་དང་ཞེན་པའི་གཉེན་པོ་ཡིན་ཞིང༌། དེ་གཉིས་ཀྱི་ནང་ནས་ཀྱང་ང་རྒྱལ་བསྒོམ་པ་གཙོ་བོ་ཡིན་ནོ། །ཁོ་ན་རེ། བསྐྱེད་རིམ་དེ་ཐ་མལ་པའི་སྣང་ཞེན་གྱི་བུད་ཤིང་བསྲེག་པའི་མེ་དང་འདྲ་བར་བཤད་པ་མི་འཐད་དེ། དེ་ཙམ་ལ་བརྟེན་ནས་ཐ་མལ་གྱི་སྣང་ཞེན་ས་བོན་དང་བཅས་པ་སྦྱོང་མི་ནུས་པས་སོ་སྙམ་ན་སྐྱོན་མེད་དེ། དཔེར་ན་ཀུན་བཏགས་དང་ལྷན་སྐྱེས་ཀྱི་ཉོན་མོངས་སྤོང་བྱེད་མཐོང་སྒོམ་གྱི་ལམ་རྣམས་ཡིན་ཀྱང༌། དེ་དང་བྱེད་ལས་ཆ་མཐུན་པའི་སྒོ་ནས་སྦྱོར་ལམ་ལ་མེ་དང་འདྲ་བར་སེམས་བསྐྱེད་ཀྱི་སྐབས་སུ་བཤད་པ་བཞིན། ཐ་མལ་པའི་སྣང་ཞེན་ས་བོན་དང་བཅས་པ་སྦྱོང་བྱེད་རྫོགས་རིམ་ཡིན་ཀྱང༌། དེ་མངོན་གྱུར་མགོ་གནོན་པའི་ཆ་ནས་བསྐྱེད་རིམ་ཡང་དེའི་སྦྱོང་བྱེད་དུ་གསུངས་པའི་ཕྱིར། རྟོགས་བརྗོད་ཀེ་ཏ་ཀའི་འགྲེལ་པ་སྐྱབས་མགོན་མཆོག་གིས་མཛད་པ་ལས། བསྐྱེད་རྫོགས་གཉིས་ཀྱི་སྦྱང་གཞི་ནི་སྐྱེ་ཤི་བར་དོ་གསུམ་ཡིན་ཞིང༌། རྫོགས་རིམ་གྱིས་ཐ་མལ་གྱི་སྐྱེ་ཤི་བར་དོ་གསུམ་གྱི་སྣང་ཞེན་གྱི་ས་བོན་སྦྱོང་བ་ཡིན་ལ། བསྐྱེད་རིམ་གྱིས་ཐ་མལ་པའི་སྐྱེ་ཤི་བར་དོའི་སྣང་ཞེན་མངོན་གྱུར་མགོ་གནོན་པ་ཡིན་ནོ། །
ཞེས་གསུངས། ཡང་ན་འདིའི་རྣལ་འབྱོར་བསམ་གཏན་ཞེས་པ་བསྐྱེད་རིམ་གྱི་ལྷའི་རྣལ་འབྱོར་ཙམ་ལ་མི་བྱེད་པར། རྣལ་འབྱོར་དྲུག་གི་རྫོགས་རིམ་ལ་བྱས་ན་ལེགས་ཤིང༌། དེ་ལྟར་གཞིའི་སྐུ་གསུམ་ལམ་གྱི་སྐུ་གསུམ་གྱིས་སྦྱངས་ཏེ། འབྲས་བུའི་སྐུ་གསུམ་གྱི་གོ་འཕང་མངོན་དུ་བྱ་བར་སྨོན་པ་ནི་ཤོ་ལོ་ཀ་དང་པོའི་དོན་ནོ། །༈ གཉིས་པ་གཞན་དོན་ཕུན་ཚོགས་འཕྲིན་ལས་ལྷུན་གྱིས་འགྲུབ་པའི་རྒྱུར་བསྔོ་བ་ལ། ཐོག་མར་དབང་དུ་སྡུད་པའི་ཕྱིར་སྨོན་པ་དང༌། དབང་དུ་བསྡུས་ནས་སྨིན་ཅིང་གྲོལ་བར་བྱ་བའི་ཕྱིར་སྨོན་པ་གཉིས། དང་པོ་ནི། ཏིང་འཛིན་སྒྱུ་འཕྲུལ་འོད་ཟེར་ཀྱོ་བ་ཡིས། །དབང་དུ་བྱ་བའི་བསྒྲུབ་བྱ་རླུང་དཀྱིལ་སྟེང༌། །བསིལ་ཟེར་ཕྱེད་དམར་ལ་བཀོད་འཐོར་བྱེད་ཤུགས། །དྲག་པོས་སྐད་ཅིག་ཉིད་ལ་འགུག་པར་ཤོག །ཅེས་བྱུང༌། དོན་བསྡུ་ན་ལྷ་མོ་རིག་བྱེད་མའི་ལམ་རིམ་པ་གཉིས་ལ་གནས་པའི་ཏིང་ངེ་འཛིན་གྱི་འོད་ཟེར་གྱི་ལྕགས་ཀྱུས་གང་དབང་དུ་བྱ་བར་འདོད་པའི་བསྒྲུབ་བྱ་དེ་ཉིད་རླུང་དཀྱིལ་ལ་གནས་པའི་ཟླ་བ་དམར་པོ་ལ་བཀོད། དེ་སྐད་ཅིག་ཉིད་ལ་རླུང་གི་ཤིང་རྟས་རང་དབང་མེད་པར་དྲངས་ཏེ་བདག་ཉིད་ཀྱི་མདུན་དུ་འགུག་ནུས་པར་ཤོག་ཅིག་ཅེས་པའོ། །དེ་ཡང་མཆིལ་པ་དང༌། ཀྱོ་བ་ནི་ལྕགས་ཀྱུའི་བརྡ་རྙིང་དུ་ལི་ཤིའི་གུར་ཁང་ལས་བཤད་དོ། །རླུང་དཀྱིལ་ལ་འགོད་པ་འདིའི་ལས་ཚོགས་རྣམས་སུ་གསལ་བར་གསུངས་ཀྱང༌། ཟླ་བ་དམར་པོ་ལ་འགོད་པ་སྒོས་ཀྱི་མན་ངག་རྣམས་སུ་ཆེར་མ་གསུངས་སོ། །འོན་ཀྱང་རྟོག་བདུན་ལས་རླུང་དཀྱིལ་གྱི་སྟེང་དུ་ཟླ་གདན་ལ་འགོད་པ་ཙམ་བཤད་ཅིང༌། དགྲ་ནག་ལས་རླུང་དཀྱིལ་
ལ་གནས་པའི་ཡི་གེའི་སྟེང་དུ་འགོད་པར་གསུངས་པའི་དགོངས་པ་ཨ་ཡིག་དམར་པོ་ལ་དམ་ཚིག་རྡོ་རྗེས་བཤད་དེ། དེ་དག་གི་དགོངས་དོན་གསལ་བར་ཕྱེ་བ་ནི། སྦྱིན་སྲེག་དངོས་གྲུབ་རྒྱ་མཚོ་ལས། དབང་ལ་ཟླ་བ་དམར་པོ་ལ་གནས་པའི་བསྒྲུབ་བྱ་ཁ་དོག་དམར་པོར་བསམ། ཞེས་དང༌། ཞྭ་ལུ་བའི་ལྕགས་མཁར་གྱི་རྩ་ཚིག་ལས། ལས་མཐུན་བསྒྲུབ་བྱ་བཀུག་ནས་ནི། །ཞེས་གསུངས་ཤིང༌། དེའི་དོན་རྒྱུད་ཆེན་དཀོན་མཆོག་ཡར་འཕེལ་གྱི་གསུང་ཀུན་མཁྱེན་འཇམ་དབྱངས་བཞད་པས་ཟིན་བྲིས་སུ་མཛད་པ་ལས། ཞི་བ་ལ་བསྒྲུབ་བྱ་དང་ཟླ་བ་ལ་སོགས་པ་ཡུལ་རྟེན་ཐམས་ཅད་དཀར་པོ། རྒྱས་པ་ལ་ཐམས་ཅད་སེར་པོ། དབང་ལ་ཐམས་ཅད་དམར་པོ་བྱ་བར་གསུངས་པ་རྣམས་དང་སྒོ་བསྟུན་པར་མངོན་ནོ། །ཁ་ཅིག་གཞུང་དེ་དག་ལ་མ་བརྟེན་ཡང་འདིའི་ལས་ཚོགས་ནས་གསལ་བར་འབྱུང་སྟེ། སྙེ་ཐང་པ་རིན་ཆེན་ཆོས་རྒྱལ་གྱིས་མཛད་པའི་འདིའི་བསྙེན་སྒྲུབ་ལས་གསུམ་ལས། བསྒྲུབ་བྱ་གཅེར་བུ་སྐྲ་གྲོལ་བ་རླུང་གི་དཀྱིལ་འཁོར་ཟླ་གམ་དམར་པོ་གཞུའི་དབྱིབས་ཅན་ལ་གནས་པ། ཞེས་གསུངས་པའི་ཕྱིར་རོ་སྙམ་ན་མ་ངེས་ཏེ། ཟླ་གམ་ཞེས་པ་ཟླུམ་པོ་ཕྱེད་དུ་བགོས་པའི་མིང་ཡིན་ལ། དེའི་འོག་ཏུ་གཞུའི་དབྱིབས་ཅན་ཞེས་གསུངས་པས། སྔ་མ་རླུང་དཀྱིལ་ཟླ་གམ་གྱི་རྣམ་པ་ཁ་དོག་ཅུང་ནག་ལ་དམར་མདངས་ཆེ་བའི་ཁམ་པ་ལྟ་བུར་བྱེད་དགོས་པའི་དོན་དུ་གསལ་ལོ། །༈ གཉིས་པ་དབང་དུ་བསྡུས་ནས་སྨིན་ཅིང་གྲོལ་བར་བྱ་བའི་ཕྱིར་སྨོན་པ་ནི། མདུན་དུ་
འོངས་སྙིང་ཨུཏྤལ་མདའ་རྣོན་གྱིས། །ཕུགས་པས་དཔའ་བརྟན་སྙིང་སྟོབས་སྲོག་ཤི་སྟེ། །རབ་མྱོས་གོས་བྲལ་བདག་གི་རྐང་པའི་མཐིལ། །ལྕེ་ཡིས་བལྡག་ཅིང་ཅི་སྨྲས་སྒྲུབ་པར་ཤོག །ཅེས་བྱུང༌། དེ་ཡང་དབང་གི་ལས་སྦྱོར་སྐབས་སུ་ལྕགས་ཀྱུ་དང་མེ་ཏོག་གི་མདའ་ལ་སོགས་པས་འདེབས་ཚུལ་རྒྱུད་ཀྱི་བཤད་པ་མི་འདྲ་བ་སྣ་ཚོགས་ཡོད་དེ། བདེ་མཆོག་རྩ་རྒྱུད་ལེའུ་ཞེ་ལྔ་པར། སྒྲུབ་པ་པོ་ཡི་གསང་གནས་སུ། །ཟངས་མའི་ཁབ་ཀྱིས་ཕུགས་ནས་ནི། །ཞེས་གཟུགས་བརྙན་ལ་གསུངས་པ་བསྒོམ་དོན་ལ་ཡང་འདྲ་ཞིང༌། དེའི་དོན་ནི་སྐྱེས་པའི་ལིངྒ་དང༌། བུད་མེད་ཀྱི་བྷ་གར་བསྣུན་པར་སྦས་དོན་ཀུན་གསལ་ལས་གསུངས་སོ། །ལྷན་སྐྱེས་རོལ་པའི་གཞུང་དུ་ཡང་བདེ་མཆོག་རྩ་རྒྱུད་ཀྱི་བཤད་པ་འདི་ཇི་ལྟ་བ་བཞིན་བཀོད་ཅིང༌། རྟོགས་པ་རིམ་པ་ལྔ་པ་ལས་ཀྱང༌། རྟགས་དང་བྷ་གར་ཡང་ཡང་དབུག་པར་བྱའོ། །ཞེས་གསུངས་སོ། །འོན་ཀྱང་དེ་ཉིད་ལས། སྐྱེས་པའི་སྙིང་གར་ལྕགས་ཀྱུས་ཕུག །བུད་མེད་ཀྱི་ཆོས་འབྱུང་ལའོ་ཞེས་དང༌། གཉིས་ཀའི་གསང་གནས་སུ་འདེབས་ཚུལ་གཅིག་ཀྱང་གསུངས་ལ། དེ་དང་མཐུན་པར་པནྜི་ཏ་དོན་ཡོད་རྡོ་རྗེས་བ་རི་ལོ་ཙཱ་བ་ལ་གནང་བའི་ལས་སྦྱོར་དང༌། རྗེ་བཙུན་གྲགས་པ་རྒྱལ་མཚན་གྱིས་མཛད་པའི་བསྙེན་སྒྲུབ་ཀྱི་ཡི་གེ་སོགས་དུ་མ་ལས་ཕོའི་སྙིང་ག་དང༌། མོའི་ཆོས་འབྱུང་དུ་འདེབས་པར་གསུངས་སོ། །རྒྱུད་གཞན་ལས་རྟེན་གྱི་ཁྱད་པར་མ་ཕྱེ་བར་སྙིང་ག་ནས་ལྕགས་ཀྱུས་བཏབ་སྟེ་འགུགས་པར་གསུངས་པ་ཤས་ཆེ་ཞིང༌། སྐབས་འདིར་གསུངས་པ་ཕལ་ཆེར་བཀུག་ཟིན་པའི་འོག་
ཏུ་བསྒྲུབ་བྱ་དེ་རང་ལ་སེམས་འདུན་པའི་ཐབས་ཀྱི་དབང་དུ་བྱས་པ་ཡིན་པས་ཆགས་པ་སྐྱེ་བའི་གནས་ཀྱི་གཙོ་བོ་གསང་གནས་ལ་གནད་དུ་བསྣུན་པར་བཤད་པ་དང༌། སྙིང་གར་འདེབས་པ་ནི་ཁམས་ཕྲ་རགས་ཐམས་ཅད་གང་ནས་ཐོག་མར་ཆགས་འཇིག་བྱེད་པའི་རྩ་བའི་གནས་ཡིན་པ་ལ་དགོངས་པ་ཡིན་ནོ། །དེ་ལྟར་སྙིང་ག་སོགས་སུ་མེ་ཏོག་གི་མདས་བསྣུན་པས་ལས་གང་བྱེད་པ་ནི། དཔའ་བརྟན་སྙིང་སྟོབས་སྲོག་ཤི །ཞེས་སོགས་གསུངས་ཏེ། བསྒྲུབ་བྱ་དེའི་རྒྱུད་ཀྱི་གང་ལ་ཡང་མི་འཇིགས་ཤིང་འདུན་པར་མི་བྱེད་པའི་དཔའ་བ་དང༌། གཞན་གྱིས་བསྒྱུར་དུ་མེད་པའི་བརྟན་པ། བྱ་བ་གང་ལ་རང་སྟོབས་ཀྱིས་ཐོགས་པ་མེད་པར་འཇུག་པའི་སྙིང་སྟོབས་རྣམས་རང་གི་བཞོན་པའི་རླུང་ངམ་སྲོག་དང་བཅས་པ་དུལ་བར་བྱས་པས་དེ་ཉིད་བདག་ལ་ཤིན་ཏུ་གུས་ཤིང༌། བདག་གིས་མ་བསྒོས་པར་རང་སྟོབས་ཀྱིས་བྱ་བ་གང་ལ་ཡང་འཇུག་པ་མི་དྲན་པས་སེམས་དང་བྲལ་བ་ལྟ་བུ་དང༌། བདག་གིས་གང་བསྒོས་པ་དེ་ཚུལ་བཞིན་དུ་མ་སྒྲུབ་ན་ཉམ་ཐག་ཅིང་སྡུག་བསྔལ་བར་འགྱུར་བ་མཐོང་ནས་གང་འདོད་དུ་ཁ་ལོ་བསྒྱུར་ནུས་པ་འབྱུང་སྟེ། བདེ་མཆོག་རྩ་རྒྱུད་ལས། བརྒྱལ་ཞིང་སེམས་དང་བྲལ་འདྲ་ལ། །རྨོངས་ཤིང་ཉོན་མོངས་པ་ཉིད་དང༌། །རླུང་གི་ཤུགས་ཀྱིས་འོངས་ནས་ནི། །སྒྲུབ་པ་པོ་ཡི་སྟེང་དུ་ལྷུང༌། །ཞེས་དང༌། སྦས་དོན་ཀུན་གསལ་ལས། བསྒྲུབ་བྱ་དེ་བརྒྱལ་ཞིང་སེམས་དང་བྲལ་བ་དང་འདྲ་བ་དང༌། ཅི་ཡིན་མི་ཤེས་པར་རྣམ་པར་རྨོངས་ཤིང་དེར་མ་སོང་ན་ཉོན་མོངས་པ་
སྟེ་སྡུག་བསྔལ་གྱི་གདུང་བ་དང་ལྡན་པར་མཐོང་ནས་རླུང་གི་ཤུགས་ལྟར་མགྱོགས་པར་འོངས་ནས་ནི་སྒྲུབ་པ་པོ་ཡི་སྟེང་ནས་འོག་ཏུ་ལྟུང་བར་འགྱུར་རོ། །ཞེས་སོ། །དེས་ན་འདིར་རབ་མྱོས་ཞེས་པས་དྲན་མེད་ལྟ་བུར་གྱུར་པ་དང༌། གོས་དང་བྲལ་བ་དང༌། བདག་གི་རྐང་མཐིལ་ལྕེས་བལྡག་པར་གསུངས་པ་རྣམས་ཀྱིས་ཁེངས་དྲེགས་དོར་ནས་བདག་ལ་ཆགས་ཤིང་གུས་པའི་རྣམ་པ་མཚོན་པ་ཡིན་ཏེ། འདིའི་མན་ངག་ཆེན་པོ་ལྔ་ཞི་འཚོས་མཛད་པ་ལས། བདག་གི་རྐང་དྲུང་འགྱེལ་ཞིང་རྟག་ཏུ་ཁོལ་པའི་གནས་སྐབས་འཛིན། །ཞེས་དང༌། ཤཱཀྱ་འཚོས་མཛད་པ་ལས། དེ་ཡང་རྟག་ཏུ་རྐང་པར་ལྷུང་སྟེ་ཁོལ་པོའི་ཚུལ་འདུག་མཐོ་རིས་གོ་འཕང་ཐོབ། །ཅེས་གསུངས་པ་ལྟར་རོ། །དོན་གྱི་གཙོ་བོ་དངོས་ནི། ཅི་སྨྲས་སྒྲུབ་པར་ཤོག །ཅེས་པས་བསྟན་ཏེ། གདུལ་བྱ་དེ་ལ་གང་སྨྲ་བར་བྱ་བའམ། གདམས་རྒྱུའི་ཆོས་ནི། དབུ་མ་རིན་ཆེན་ཕྲེང་བར། དང་པོ་མངོན་པར་མཐོ་བའི་ཆོས། །ཕྱིས་ནི་ངེས་པར་ལེགས་འབྱུང་བའོ། །གང་ཕྱིར་མངོན་པར་མཐོ་ཐོབ་པས། །རིམ་གྱིས་ངེས་པར་ལེགས་པ་འབྱུང༌། །ཞེས་པ་ལྟར། མངོན་མཐོ་དང་ངེས་ལེགས་ཀྱི་ཆོས་སྐོར་གཉིས་ལས་མ་འདས་པས། ཐོག་མར་སྒྲུབ་པའི་རྟེན་མངོན་མཐོ་ལ་བཀོད་དེ། དེ་ནས་རང་རང་གི་སྐལ་བ་བཞིན་ཐེག་པ་གསུམ་གྱི་ངེས་ལེགས་བྱང་ཆུབ་ཏུ་སྨིན་ཅིང་གྲོལ་བར་བྱ་བ་ནི་སྨོན་པའི་ཡུལ་གྱི་གཙོ་བོ་ཡིན་ནོ། །༈ གཉིས་པ་འདོད་དོན་གྱི་གསོལ་བ་འདེབས་པ་ལ་གསུམ། སྐབས་ཀྱི་འདོད་དོན་གཙོ་བོ་ངོས་བཟུང་སྟེ་གསོལ་བ་འདེབས་པ། དེ་ལ་ཕྱིའི་མཐུན་རྐྱེན་ཕུན་སུམ་ཚོགས་
པའི་དོན་དུ་གསོལ་བ་འདེབས་པ། ནང་གི་མཐུན་རྐྱེན་ཕུན་སུམ་ཚོགས་པའི་དོན་དུ་གསོལ་བ་འདེབས་པའོ། །དང་པོ་ནི། ཁྱད་པར་བསྟན་དང་འགྲོ་བའི་དོན་ཆེན་གྱི། །རྩ་ལག་མཐར་ཐུག་རྒྱལ་དབང་ཐམས་ཅད་མཁྱེན། །གང་སྐུའི་སྤྲུལ་བའི་རོལ་གར་གསར་ཚེས་ལ། །ཆེ་ཕྲའི་འགྲོ་བ་མ་ལུས་འདུད་པར་མཛོད། །ཅེས་བྱུང༌། དེ་ཡང་༸རྒྱལ་དབང་ཐམས་ཅད་མཁྱེན་པ་སྐུ་ཕྲེང་རྣམས་བསྟན་འགྲོའི་དོན་གྱི་རྩ་ལག་གཅིག་པུར་གསུངས་པ་དོན་ལ་གནས་ཏེ། བསྟན་འགྲོ་སྤྱི་ལ་མཚོན་ན་ལེགས་ཚོགས་ཐམས་ཅད་སངས་རྒྱས་ཀྱི་ཐུགས་རྗེ་ལ་བརྟེན་པ་ཁོ་ན་ཡིན་ཞིང༌། སངས་རྒྱས་ཀུན་གྱི་ཐུགས་རྗེ་གཅིག་ཏུ་བསྡུས་པའི་ངོ་བོ་འཕགས་མཆོག་སྤྱན་རས་གཟིགས་ངུར་སྨྲིག་འཆང་བའི་སྐུར་བཞེངས་པ་ནི་རྒྱལ་བའི་དབང་པོ་རིམ་བྱོན་རྣམས་ཡིན་པས་སོ། །བསྟན་པའི་དོན་གྱི་རྩ་ལག་ཏུ་གྱུར་ཚུལ་དང༌། འགྲོ་བའི་དོན་གྱི་རྩ་ལག་ཏུ་གྱུར་ཚུལ་སོ་སོར་བཤད་ན། སྔ་མ་ནི་སྤྱོད་འཇུག་ལས། བསྟན་རྩ་དགེ་སློང་ཉིད་ཡིན་ན། །ཞེས་གསུངས་ཏེ། མདོ་ལས། དགེ་སློང་ནི་རྣམ་པ་ལྔ་སྟེ། འདི་ལྟ་སྟེ། སློང་བའི་དགེ་སློང་དང༌། ཁས་འཆེ་བའི་དགེ་སློང་དང༌། མིང་གི་དགེ་སློང་དང༌། ཉོན་མོངས་བཅོམ་པའི་དགེ་སློང་དང༌། གསོལ་བ་དང་བཞིའི་ལས་ཀྱིས་བསྙེན་པར་རྫོགས་པའི་དགེ་སློང་ངོ༌། །ཞེས་ལྔ་གསུངས་པའི་ནང་ནས་བསྟན་པའི་རྩ་བ་ཉོན་མོངས་བཅོམ་པའི་ཐེག་པ་གསུམ་གྱི་དགྲ་བཅོམ་པ་རྣམས་ཡིན་པར་གསུངས་པའི་ཕྱིར། སྤྱོད་འཇུག་དར་ཊཱིཀ་ལས། དགེ་སློང་དུ་མ་བཤད་པའི་ནང་ནས་
བསྟན་པའི་རྩ་བ་དགེ་སློང་དགྲ་བཅོམ་པ་ཉིད་ཡིན། ཞེས་གསུངས་ལ། ཁྱད་པར་དུ་ཡང་ཕྱིར་མི་ལྡོག་པའི་ས་ལ་གནས་པ་ཡན་ཆད་ཀྱི་ཐེག་པ་ཆེན་པོའི་དགྲ་བཅོམ་རྣམས་ཡིན་ནོ། །འགྲོ་བའི་དོན་གྱི་རྩ་ལག་ཏུ་གྱུར་ཚུལ་ནི། མདོ་སྡེ་རྒྱན་ལས། གང་དག་བསྟན་པར་མི་འོས་པ། །སེམས་ཅན་རྣམས་ལ་གསང་བྱེད་ཅིང༌། །བསླབ་ལས་ཉམས་པ་སྨོད་པ་དང༌། །ཕུན་སུམ་ཚོགས་པ་བསྔགས་པ་དང༌། །གདམས་ངག་སྦྱིན་པར་བྱེད་པ་དང༌། །བདུད་རྣམས་སྦྲོན་པར་བྱེད་པ་སྟེ། །ལས་ལྔ་དག་གིས་རྒྱལ་སྲས་རྣམས། །སེམས་ཅན་རྩ་ལག་འདྲ་བ་ཡིན། །ཞེས་སྡོང་པོའི་འཕེལ་རྒྱས་རྩ་བ་རྒྱས་མི་རྒྱས་ལ་ལྟོས་པ་བཞིན་འཇིག་རྟེན་གྱི་དབང་འབྱོར་ཁས་དྲེགས་ཀྱང་ཉེ་དུ་མཆེད་ཟླ་སོགས་ལ་རག་ལས་པས། དེ་དག་ལ་རྩ་འཇིང་ངམ་རྩ་ལག་ཏུ་གྲགས་པ་བཞིན། སེམས་ཅན་རྣམས་ཀྱི་ལེགས་ཉེས་བླང་དོར་ཐམས་ཅད་སངས་རྒྱས་བྱང་སེམས་རྣམས་ཀྱི་བཀའ་དྲིན་ལ་ལྟོས་པས་དེ་དག་སེམས་ཅན་གྱི་རྩ་ལག་ཏུ་གསུངས་སོ། །བྱེ་བྲག་གངས་ཅན་གྱི་ལྗོངས་འདིའི་བསྟན་འགྲོའི་དོན་གྱི་རྩ་བར་གྱུར་ཚུལ་ནི། ཟ་མ་ཏོག་བཀོད་པའི་མདོ་སྡེ་སོགས་སུ། ཐོག་མར་སྤྲུལ་བས་མིའི་འགྲོ་བ་བསྐྱེད། དེ་ནས་ཟང་ཟིང་གིས་བསྡུས། དེ་ནས་ཆོས་ཀྱིས་བསྡུས། འགྲོ་བའི་དོན་དུ་འགྱུར་རོ་ཞེས་ལུང་བསྟན་པ་དང༌། བཀའ་གདམས་གླེགས་བམ་ལས་ཀྱང༌། གནས་དེ་ན་ཁྱོད་ཀྱི་ཞིང་ཁམས་ཡོད། །ཞིང་དེ་ན་ཁྱོད་ཀྱི་གདུལ་བྱ་ཡོད། །ཅེས་རང་གི་ཐུན་མོང་མ་ཡིན་པའི་འདུལ་སྐལ་དུ་གསུངས་སོ། །ཁྱད་པར་དུ་ཡང་འཇམ་མགོན་རྒྱལ་བ་གཉིས་པའི་བསྟན་པའི་སྲོག་ཤིང་
གཅིག་པུར་གྱུར་པའི་རྒྱུ་མཚན་ནི། པཎ་ཆེན་དགེ་འདུན་གྲུབ་ཀྱི་གསུང་མགུར་ལས། མགོན་ཁྱོད་ཀྱི་བསྟན་པ་འཛིན་པ་ལ། །དུས་ནམ་ཡང་བརྩོན་པ་བགྱིད་པར་སྨོན། །ཞེས་དམ་བཅའ་མཛད་པའི་དོན་བཞིན་རྒྱལ་བའི་དབང་པོ་རིམ་བྱོན་རྣམས་སྟོད་ཛ་ཏིའི་མེ་ཏོག་བཀྲ་བ་ནས་ཤར་ཕྱོགས་རྒྱ་མཚོའི་མཐའི་བར་གྱི་གསེར་མདོག་ཅོད་པན་འཆང་བ་མ་ལུས་པའི་གཙུག་རྒྱན་དུ་གྱུར་ཅིང༌། ཁྱད་པར་བསྟན་པའི་འབྱུང་ཁུངས་གདན་ས་ཆེན་པོ་གསུམ་ཆོས་སྲིད་གཉིས་ཀའི་སྒོ་ནས་འཛིན་སྐྱོང་སྤེལ་བར་མཛད་པ་ནི་འཕྲིན་ལས་ཀྱི་གཙོ་བོ་ཡིན་ནོ། །དེས་ན་༸རྒྱལ་དབང་ཐམས་ཅད་མཁྱེན་པ་ཞེས་པ་ཡང་འདོད་ཞེན་གྱིས་ཆེ་བརྗོད་བྱས་པ་ཙམ་མ་ཡིན་གྱི། ཡི་དམ་མཁའ་འགྲོའི་ཚོགས་ཀྱིས་སྔར་ནས་བཏགས་ཤིང་ལུང་བསྟན་པའི་མཚན་ཡིན་ཏེ། དཀོན་མཆོག་འབངས་ཀྱི་སྐྱེས་རབས་ལས། ཤུན་པ་རིམ་པ་བདུན་དུ་ཡོད་པ་ཉིད་ནི། ལྔ་བརྒྱ་དུས་ཀྱི་ཐ་མར་འགྲོ་བ་འདྲེན་པར་སྨོན་ལམ་ཐེབས་པའི་རྒྱལ་བ་བདུན་གྱིས་རྒྱུན་ཆད་མེད་པར་སྐྱོབ་པའི་རྟེན་འབྲེལ་ཟབ་མོ། ཞེས་གསུངས་པ་ལྟར་རོ། །དེ་ཡང་ལྔ་བརྒྱ་ཐ་མ་ནི། ལྔ་བརྒྱ་པ་ཕྱི་མ་ལྔ་ལ་བྱེད་པར་ཞི་འཚོ་དང་རྗེས་བཞེད་ལ། དུས་ཀྱང་ཇོ་འབྲོམ་སོགས་བྱོན་པའི་དུས་དེ་ཚུལ་ཁྲིམས་ལེའུའི་ནང་དུ་འདོད་པ་དང༌། ད་ལྟ་ཚུལ་ཁྲིམས་ལེའུའི་སྐབས་སུ་འདོད་པའི་ལུགས་གཉིས་བྱུང་བས། ལྔ་བརྒྱ་ཐ་མ་ཚུགས་མཚམས་གཉིས་སུ་འགྱུར་ལ། རྭ་སྒྲེང་གི་ལུང་བསྟན་ཐམས་ཅད་བཀྲ་ཤིས་འཁྱིལ་གྱི་ས་ཕྱོགས་འདིར་ཡང་ཕྱིས་སུ་བཏགས་པ་མ་
ཡིན་པར་སྔ་མོ་ནས་ཤིན་ཏུ་གསལ་བར་ཚང་བ་དང༌། ཤེར་མདོ་ལས་བསྟན་པ་བྱང་ནས་བྱང་དུ་དར་བར་གསུངས་པའི་བྱང་དང་པོ་དབུས་གཙང་ཡིན་པར་གྲགས་ཆེ་ཞིང༌། བྱང་ཕྱི་མ་ཕྱོགས་འདིར་རྩོད་མེད་ཀྱི་དམ་པ་དུ་མས་གསུངས་ལ། ཡོངས་སུ་གྲགས་པར་ཡང༌། བོད་དང་བོད་ཆེན་པོ་ཞེས་པའི་བོད་དབུས་དང༌། བོད་ཆེན་པོ་མདོ་སྨད་ལ་བྱེད་པས་ཀྱང་ཤེས་ཏེ། གཟུར་གནས་བློ་མིག་དང་ལྡན་པ་ཡོད་ན་གུང་བསྒྲིག་སྟེ་ཀུན་ལ་མི་ཕྱེད་པའི་དད་པ་ཐོབ་པར་འགྱུར་རོ། །གང་སྐུའི་སྤྲུལ་བའི་རོལ་གར་གསལ་ཚེས་ལ། །ཆེ་ཕྲའི་འགྲོ་བ་མ་ལུས་འདུད་པར་མཛོད། །ཅེས་པ་ནི། ཐོག་མར་གདན་སར་ཕེབས་རྒྱུའི་སྐོར་རྩོད་པ་ཅན་དུ་གྱུར་པའི་ཚེ། དེ་ཉིད་ཆོས་ཕྱོགས་སུ་ཞི་བའི་ཕྱིར་བསྟོད་པ་འདི་ཉིད་གསུངས་པ་ཡིན་པས། དེ་མ་ཐག་བཞེད་པ་ལྷུན་གྱིས་གྲུབ་པའི་ཚུལ་སོ་སོའི་རྣམ་ཐར་དུ་གསལ་བ་ལྟར་རོ། །༈ གཉིས་པ་ཕྱིའི་མཐུན་རྐྱེན་ཕུན་སུམ་ཚོགས་པའི་དོན་དུ་གསོལ་བ་འདེབས་པ་ནི། དབྱར་གྱི་ལང་ཚོ་དར་བའི་ཀུ་ཤའི་མདངས། །རབ་བཀྲ་ལོ་མའི་ཁུར་གྱིས་ལྕི་བའི་མདའ། །འདབ་ལྡན་དྷ་ནུའི་ཤུགས་ཀྱིས་ཕ་རོལ་པོའི། །ཡིད་ཀྱི་ཁྱེ་འུ་མྱོས་བྱེད་ཟུག་རྔུས་ཆོམས། །ཞེས་བྱུང༌། དོན་ནི་དབྱར་དུས་ཀྱི་ལང་ཚོ་ཤིན་ཏུ་དར་བའི་སྐབས་ཀྱི་སྔོ་ལྗང་ཀུ་ཤའི་འདབ་མའི་མདངས་ལྟར་ཁ་དོག་ལེགས་ཤིང་སྣུམ་པའི་ལོ་འདབ་ཀྱི་ཁུར་དང་བཅས་པའི་མེ་ཏོག་གི་མདའ་དང༌། འདབ་ལྡན་དྷ་ནུ་སྟེ་མེ་ཏོག་གི་གཞུ་སྦྱར་ནས་རྣ་བའི་བར་དུ་བཀང་སྟེ་འཕང་བའི་ཤུགས་ཀྱིས་བསྒྲུབ་བྱ་ཕ་རོལ་པོའི་ཡིད་ཀྱི་ཁྱེ་འུ་རང་ལ་དགའ་ཞིང་ཆགས་པའི་མྱོས་
བྱེད་ཀྱི་ཟུག་རྔུས་རང་དབང་མེད་པར་བཅོམ་སྟེ་བརྒྱལ་ཞིང་དྲན་མེད་ལྟ་བུར་འགྱུར་བར་མཛོད་ཅིག་ཅེས་པའི་རྐང་པ་དང་པོ་གསུམ་གོ་སླ་ལ། བཞི་པ་གོང་དུ་བཤད་ཟིན་པ་ལྟར་རོ། །༈ གསུམ་པ་ནང་གི་མཐུན་རྐྱེན་ཕུན་སུམ་ཚོགས་པའི་དོན་དུ་གསོལ་བ་འདེབས་པ་ནི། གཏིང་དཔག་དཀའ་ཞིང་མཐའ་བྲལ་གསུང་བསྟན་བཅོས། །ས་བཅུ་ལམ་ལྔའི་གྲོགས་འགུགས་དགའ་མ་གང༌། །ཟུར་ཕུད་ལྔ་པ་དགེ་སློང་གཟུགས་འཆང་བའི། །སྙིང་ལས་འོངས་ཏེ་འདི་ཡི་མཛའ་བོར་ཁུག །བརྩེ་དང་གཞན་ཕན་རལ་གྲིས་བརྗོད་པ་ཡི། །དམ་བཅའི་གོ་ཆ་སྲ་བའི་དཔའ་བོ་དང༌། །རྣམ་དག་ཚུལ་ཁྲིམས་གྲོགས་མཆོག་མཁས་བཙུན་བཟང༌། །གཡོག་འཁོར་བཅས་པ་སྲོག་ནི་གཅིག་ཏུ་སྒྲུབ། །ཅེས་བྱུང༌། འདོད་གསོལ་འདི་དག་གི་ཐུགས་ཀྱི་དགོངས་པའི་གཏད་སོ་ནི། ༸རྒྱལ་དབང་མཆོག་སྤྲུལ་རིན་པོ་ཆེའི་ཞབས་བརྟན་གསོལ་འདེབས་པཎ་ཆེན་ཉིད་ཀྱིས་མཛད་པ་ལས། རིགས་ལམ་ཕྲ་མོར་མཁས་དང་རྡོ་རྗེའི་ཐེག །གྲུབ་མཆོག་ས་འཛིན་མཐོན་པོའི་རྩེར་འཕགས་ཤིང༌། །སྡོམ་གསུམ་ཚུལ་ཁྲིམས་གོས་ཀྱིས་ལེགས་ཀླུབས་ཏེ། །བསྐལ་པ་རྒྱ་མཚོར་ཆོས་ཀྱི་འཁོར་ལོ་བསྐོར། །ཞེས་གསུངས་པ་དང་གནད་མཚུངས་པར་བསྟན་པ་ཡོངས་རྫོགས་ཀྱི་མངའ་བདག་ཆེན་པོར་འགྱུར་བའི་ཕྱིར་དུ་སྨོན་པ་ཡིན་ནོ། །དེ་ཡང་མཛེས་མ་ལང་ཚོ་དར་ལ་བབས་པ་དེ་ཉིད་ཀྱིས་ཆགས་ལྡན་གཞོན་ནུའི་ཡིད་རང་དབང་མེད་པར་འཕྲོག་སྟེ། གང་འདོད་པའི་གནས་སུ་དུས་བཏབ་ནས་མགྲོན་དུ་འགུགས་པ་དང༌། རྗེ་བཙུན་རྡོ་རྗེ་རྣལ་འབྱོར་
མའི་ངོ་བོ་འཕགས་མ་རིག་བྱེད་མ་འདི་ཉིད་ཀྱི་བྱིན་རླབས་ལ་བརྟེན་ནས་རྒྱལ་བའི་བསྟན་པ་ཡོངས་སུ་རྫོགས་པའི་གནད་རྣམས་སྒྲུབ་པ་པོའི་ཤེས་རྒྱུད་ལ་འགུག་ཅིང་སྐྲུན་པར་བྱེད་པ་གཉིས་དཔེ་དོན་སྦྱར་ཏེ། ཁྱོད་ཀྱིས་སྔར་རྗེ་རྒྱལ་བ་གཉིས་པའི་ཐུགས་ལ་ཇི་ལྟར་བསྐྲུན་པ་དེ་བཞིན་དུ་༸རྒྱལ་དབང་མཆོག་གི་སྤྲུལ་བའི་སྐུ་འདིའི་ཐུགས་ལ་ཡང་བསྐྲུན་པར་མཛོད་ཅིག་ཅེས་པ་སྙིང་པོའི་དོན་ཡིན་ལ། ཚིག་རིས་ཅུང་ཟད་ཕྱེ་ན་གཏིང་དཔག་པར་དཀའ་བའི་མདོ་སྡེ་རྣམས་དང༌། ཏིང་ངེ་འཛིན་གྱི་སྒོ་མཐའ་ཡས་པ་སོགས་རྒྱལ་བའི་སྲས་ཀྱི་སྤྱོད་པ་མུ་མཐའ་དང་བྲལ་བ་སྟོན་བྱེད་རྒྱ་ཆེ་བའི་སྡེ་སྣོད་ལ་སོགས་པ་ཐེག་པ་ཆེ་ཆུང་གཉིས་དང༌། སྡེ་སྣོད་གསུམ་གྱིས་བསྡུས་པའི་རྒྱལ་བའི་གསུང་རབ་དགོངས་འགྲེལ་གྱི་བསྟན་བཅོས་དང་བཅས་ལུང་གི་བསྟན་པ་མཐའ་དག་དང༌། ཐེག་པ་ཆེན་པོའི་ས་བཅུ་དང༌། ཐུན་མོང་གི་ལམ་ལྔས་བསྡུས་པའི་རྟོགས་པའི་བསྟན་པ་མ་ལུས་པ་སྟེ། མདོར་ན་མདོ་སྔགས་བཤད་སྒྲུབ་ཀྱིས་བསྡུས་པའི་ཐུབ་བསྟན་ཡོངས་སུ་རྫོགས་པའི་ལང་ཚོ་དར་ལ་བབས་པའི་གཞོན་ནུ་དེ་ཉིད་བཅོམ་ལྡན་རིག་བྱེད་དབང་མོ་ཁྱོད་ཀྱི་བཀའ་དྲིན་ལ་བརྟེན་ནས། སྔར་ཟུར་ཕུད་ལྔ་པ་འཇམ་མགོན་བརྟན་པའི་འཁོར་ལོ་གསུམ་ལྡན་ངུར་སྨྲིག་འཛིན་པའི་དགེ་སློང་གི་གཟུགས་འཆང་བ་འཇམ་མགོན་ཙོང་ཁ་པ་ཆེན་པོའི་ཐུགས་ཀྱི་ཁང་བཟང་དམ་པ་སྙིང་ག་ཆོས་ཀྱི་འཁོར་ལོའི་དབུས་སུ་འདོད་དགུར་རོལ་པ་དེ་ལས་དེང་འདིར་འོངས་ཏེ། ༸རྒྱལ་དབང་མཆོག་གི་སྤྲུལ་བའི་སྐུ་རིན་པོ་ཆེའི་ཐུགས་ཀྱི་ཀློང་དུ་རྗེ་བླ་མའི་རྣམ་ཐར་བཞིན་དུ་དགྱེས་དགུར་རྩེན་པའི་མཛའ་བོར་ཁུག་ཅིག་ཅེས་
རྗེ་རྒྱལ་བ་གཉིས་པ་དང་ལུང་རྟོགས་འཕྲིན་ལས་མཐའ་དག་ཁྱད་མེད་ཅིག་འབྱུང་བའི་དོན་དུ་གསོལ་བ་བཏབ་པའོ། །རྐང་པ་དང་པོའི་དོན། རྗེ་བླ་མས་རྒྱལ་བ་དབང་པོའི་ཏོག་གི་སྤྱན་སྔར་དམ་བཅས་ཚུལ་དང་སྦྱར་ན། ཉན་རང་དང་ཕར་ཕྱིན་ཐེག་པའི་བྱང་སེམས་རྣམས་ཀྱིས་ཀྱང་གཏིང་དཔག་པར་མི་ནུས་པའི་ཟབ་ལམ་གསང་སྔགས་རྡོ་རྗེའི་ཐེག་པ་དང་། རྟག་ཆད་སྤྲོས་པའི་མཐའ་བྲལ་དབུ་མའི་ལྟ་བ་ཟུང་དུ་འཇུག་པ་ལ་སྦྱར་དུ་རུང་ངོ་། །སྙིང་ལས་འོངས་ཏེ། ཞེས་སོགས་ཀྱང་། བསྟོད་སྤྲིན་རྒྱ་མཚོ་ལས། འཇམ་དབྱངས་ཐུགས་ཀྱི་དཔལ་གྱིས་མྱུར་དུ་བདག །སྟོན་ཟླས་ནམ་མཁར་ཇི་བཞིན་མཛེས་གྱུར་ཅིག །ཅེས་པ་ལྟར། ཐུགས་ཀྱི་བྱིན་རླབས་ཞུགས་པ་ལ་རྒྱུད་ལ་འཕོས་པའི་ཐ་སྙད་བྱར་རུང་ཞིང་། བརྒྱད་སྟོང་འགྲེལ་ཆེན་ལས། ལུས་ལ་སྟོབས་གང་ཡིན་པ་དང་། ཚིག་ལ་གཟི་བརྗིད་གང་ཡིན་པ་དང་། བློ་ལ་རབ་ཏུ་རྣོ་བ་གང་ཡིན་པ་དེ་ལྟ་བུའི་མདངས་གསུམ་གང་རབ་ཏུ་བཅུག་པ། ཞེས་སྒོ་གསུམ་ནུས་ལྡན་དུ་བསྒྱུར་བ་ལ་མདངས་བཅུག་པར་བཤད་པ་རྣམས་ཀྱང་དོན་འདྲའོ། །ཤོ་ལོ་ཀ་གཉིས་པ་ནི། གོང་གི་ལུང་དང་རྟོགས་པའི་བསྟན་པ་དེ་དག་ལ་དབང་འབྱོར་བའི་སྒོ་ནས་དོན་གཉིས་ལྷུན་གྱིས་གྲུབ་པའི་ཕྱིར་གསོལ་བ་འདེབས་པ་སྟེ། དཔེར་ན་དཔའ་བོ་སྟོབས་དང་ལྡན་པ་དེ་རང་ཉིད་བསྲུང་བའི་གོ་ཁྲབ། དགྲ་བོ་འཇོམས་པའི་མཚོན་ཆ། བློ་གཏད་ཐུབ་པའི་གྲོགས། བྱ་བ་སྒྲུབ་པའི་གཡོག་ལ་སོགས་པ་ཆ་རྐྱེན་མཐའ་དག་འཛོམ་ན་ཉེ་ཞོ་མེད་པར་འདོད་དོན་ཐམས་ཅད་སྒྲུབ་ནུས་
པ་བཞིན། འདིར་ཡང་ལུས་ཅན་རྣམས་ཀྱི་སྲིད་ཞིའི་རྒུད་པའི་འཆིང་བ་མཐའ་དག་གཅོད་བྱེད་བརྩེ་བ་སྙིང་རྗེ་ཆེན་པོས་ཀུན་ནས་བསླང་བའི་གཞན་ཕན་འཕྲིན་ལས་ཀྱི་རལ་གྲི་ཐོགས་ཤིང༌། རྒྱལ་སྲས་ཀྱི་སྤྱོད་པ་རླབས་པོ་ཆེ་ལ་སློབ་པར་དམ་བཅས་པ་བཞིན་དུ་ཕར་ཕྱིན་དྲུག་གིས་བསྡུས་པའི་ལམ་གྱི་ཆ་མ་ཚང་བ་མེད་པ་ལ་བསླབ་པས། སྒོ་གང་ནས་ཀྱང་སེར་སྣ་དང་ཚུལ་འཆལ་ལྟ་བུའི་སྐྱོན་གྱིས་སྨས་པར་མི་ནུས་པའི་སྲ་མཁྲེགས་ཀྱི་གོ་ཆ་བགོས་པ་སྟེ། དེ་ལྟར་ཕྱིར་དྲུག་རེ་རེ་ཡང་ཕར་ཕྱིན་དྲུག་ལྡན་དུ་ཉམས་སུ་ལེན་པ་ལ་གོ་ཆའི་སྒྲུབ་པ་ཞེས་རྒྱན་ལས་གསུངས་པའི་དོན་ཡང་དེ་ཡིན་ནོ། །དེ་བཞིན་དུ་སྡོམ་པ་གསུམ་གྱི་བཅས་མཚམས་ལས་ཅུང་ཟད་ཀྱང་མི་འདའ་བའི་རྣམ་པར་དག་པའི་ཚུལ་ཁྲིམས་ནི་ཡོན་ཏན་ཐམས་ཅད་གང་ལ་བརྟེན་པའི་གཞི་བླ་ན་མེད་པ་ཡིན་པས་གྲོགས་ཀྱི་མཆོག་དང༌། གཞུང་ལུགས་མང་དུ་ཐོས་ཤིང་འཆད་རྩོད་རྩོམ་ལ་མཁས་པ་ཞི་དུལ་གྱི་སྤྱོད་པས་གཞན་ཡིད་འཕྲོག་པས་བཙུན་པ། བསྟན་འགྲོར་སྨན་པའི་ལྷག་བསམ་དང༌། མཛད་འཕྲིན་གྱིས་མཚོན་པའི་བཟང་པོའི་ཡོན་ཏན་ཏེ། སྣང་ཚོད་ཐུན་མོང་བ་འདི་ཙམ་ནི་འདིའི་ཡོན་ཏན་གྱི་ཆ་ཤས་ཕལ་བ་ཞིག་ཡིན་པས་གཡོག་འཁོར་ལྟ་བུར་བཤད་དོ། །དཔེ་དོན་འདི་ལྟར་སྦྱོར་བ་མདོ་སྡེ་རྣམས་ཀྱི་གསུངས་ཚུལ་ཡིན་ཏེ། ལྗོན་པས་ཞུས་པའི་མདོ་ལས། མ་ནི་ཤེས་རབ་ཕ་ནི་ཐབས། །དགེ་བ་རྣམས་ནི་གཡོག་ཡིན་ལ། །ཉེ་དུ་བྱང་ཆུབ་ཕྱོགས་རྣམས་དང༌། །ཞེས་གསུངས་ཤིང༌། ཀུན་ཉོན་ཕྱོགས་ལ་མཚོན་ན། ཕ་དང་མ་ནི་བསད་བྱ་ཞིང༌། །རྒྱལ་པོ་གཙང་སྦྲ་ཅན་ཉིད་དང༌། །
ཡུལ་འཁོར་འཁོར་དང་བཅས་བཅོམ་ན། །མི་དེ་དག་པ་ཉིད་དུ་འགྱུར། །ཞེས་རྟེན་འབྲེལ་བཅུ་གཉིས་ལ་སྦྱར་ཏེ་མ་སྐྱེས་དགྲའི་འགྱོད་པ་བསལ་བའི་མདོ་ལས་གསུངས་པ་ལྟ་བུ་ཤིན་ཏུ་མང་ངོ༌། །གསུམ་པ་དོན་བསྡུ་བ་ནི། འོ་ན་འདིར་དེ་དག་ཐམས་ཅད་གཙོ་འཁོར་གྱི་ཚུལ་དུ་ཆ་ཚང་བར་སྒྲུབས་ཤིག་ཅེས་སྨོས་པས་ཆོག་མོད། སྲོག་ནི་གཅིག་ཏུ་སྒྲུབ་ཅེས་པའི་དོན་གང་ཡིན་ཞེ་ན། འདི་ནི་ཤིན་ཏུ་གནད་ཆེ་བས་བཤད་པར་བྱའོ། །དེ་ཡང་ཐོག་མར་སྲོག་ཅེས་པའི་དོན་ལེགས་པར་ངེས་ནས་དེ་དང་གཅིག་ཏུ་སྒྲུབ་ཚུལ་ཤེས་དགོས་ལ། དེའི་དོན་ནི་བརྟག་གཉིས་དང་སམྦྷུ་ཊི་གཉིས་ལས། ཐབས་དང་ཤེས་རབ་ཤིན་ཏུ་འདྲེས། །དེ་ཉིད་སྲོག་ཆགས་རྣམས་ཀྱི་སྲོག །དེ་ཉིད་ཡི་གེ་དམ་པ་ཉིད། །ཅེས་དང༌། ཀུན་སྤྱོད་ལས། དེ་ཉིད་སྲོག་ཆགས་རྣམས་ཀྱི་སྲོག །དེ་ཉིད་མི་འགྱུར་དམ་པ་ཡིན། །དེ་ཉིད་ཐམས་ཅད་ཁྱབ་བྱེད་དེ། །ལུས་ཀུན་ལ་ནི་རྣམ་པར་གནས། །དེ་ཉིད་སངས་རྒྱས་ཡེ་ཤེས་ཏེ། །ཧེ་རུ་ཀ་དཔལ་ཡིན་པར་བཤད། །ཅེས་ཐབས་བདེ་བ་ཆེན་པོ་དང༌། ཤེས་རབ་སྟོང་པ་ཉིད་རོ་གཅིག་ཏུ་འདྲེས་པའི་ལྷན་སྐྱེས་ཀྱི་ཡེ་ཤེས་དེ་ཉིད་སྲོག་ཆགས་རྣམས་ཀྱི་དགོས་དོན་མ་ལུས་པའི་ནང་ནས་ཤིན་ཏུ་གཅེས་པས་སྲོག་དང༌། ཡང་ན་སྲོག་དབང་ཡོད་ན་ལུས་ཀྱི་མིག་སོགས་དབང་པོ་གཞན་ཡང་འབྱུང་ལ། སྲོག་དབང་འགག་ན་ཐམས་ཅད་འགག་པ་ལྟར་ལྷན་སྐྱེས་ཀྱི་ཡེ་ཤེས་དང༌། དེའི་བདག་ཉིད་ལྷན་སྐྱེས་ཀྱི་དེ་ཁོ་ན་ཉིད་ཡོད་ན་གནས་སྐབས་མཐར་ཐུག་གི་ཡོན་ཏན་ཐམས་ཅད་
འབྱུང་རུང་ལ། མེད་ན་མི་རུང་བ་རྗེས་སུ་འགྲོ་ལྡོག་མི་འཁྲུལ་བས་སྲོག་དང༌། ཡང་ན་ཡེ་ཤེས་དེ་ཉིད་གང་དང་དབྱེར་མི་ཕྱེད་པའི་སྟོང་པ་ཉིད་དེ་སེམས་ཅན་ཐམས་ཅད་ཀྱི་ཡང་རང་བཞིན་ནམ་སྡོད་ལུགས་སུ་གྲུབ་པས་སྲོག་ཏུ་བཞག་པ་ཡིན་ཏེ། རྫོགས་རིམ་དངོས་གྲུབ་སྙེ་མ་ལས། ལྷན་སྐྱེས་ཀྱི་ཡེ་ཤེས་སོ། །དེ་སྲོག་ཆགས་རྣམས་ཀྱི་སྲོག་ཏུ་གྱུར་ཚུལ་ནི། ཤིན་ཏུ་གཅེས་པས་སྲོག་དང་འདྲ་བས་སམ། དེའི་རང་བཞིན་སྟོང་པ་ཉིད་སེམས་ཅན་རྣམས་ཀྱི་སྲོག་གི་ངོ་བོ་ཉིད་ཡིན་པའི་དོན་ནོ། །དེ་དང་བྲལ་ན་མི་འཚེ་བས་སྲོག་གོ །ཞེས་ཀྱང་འགའ་ཞིག་བཞེད་དོ། །ཞེས་དང༌། མཁས་གྲུབ་རྗེའི་བརྟག་གཉིས་རྣམ་བཤད་ལས། ལྷན་སྐྱེས་དེ་ཉིད་སྲོག་ཆགས་རྣམས་ཀྱི་སྲོག་དང་འདྲ་བར་ཤིན་ཏུ་གཅེས་པ་དང༌། ལྷན་སྐྱེས་ཀྱི་དེ་ཁོ་ན་ཉིད་རང་བཞིན་རྣམ་དག་དེ་ཉིད་སྐྱེ་འཇིག་གིས་མི་འགྱུར་བའི་དམ་པ་ཉིད་ཡིན་ལ། ཞེས་སོ། །དེ་ཡང་ཨཀྵ་ར་མི་འགྱུར་བ་དང་ཡི་གེ་གཉིས་ཀ་ལ་འཇུག་པས། བོད་སྔ་མ་ཕལ་ཆེར་བརྟག་གཉིས་དང་ཁ་སྦྱོར་གྱི་འགྱུར་ལྟར་ཡི་གེ་ལ་སྦྱར་ཏེ། དེ་ཉིད་ཡི་གེ་དམ་པ་ཨའི་དོན་སྐྱེ་བ་མེད་པ་ཉིད་ཅེས་འབྲུ་བསྣན་ལ། རྣམ་བཤད་དང་དངོས་གྲུབ་སྙེ་མར་དེའི་འགྱུར་བཅོས་ཏེ་ཀུན་སྤྱོད་ཀྱི་འགྱུར་དང་བསྟུན་ནས་དེ་ཉིད་མི་འགྱུར་དམ་པ་ཞེས་པ་ལ་འབྲུ་བསྣན་ནོ། །དེ་ལྟར་ལྷན་སྐྱེས་ཀྱི་ཡེ་ཤེས་སྲོག་ཏུ་བཞག་ནས། ཡོན་ཏན་ཐམས་ཅད་དེའི་ངོ་བོར་འདུས་ཚུལ་ལམ་དེ་དང་གཅིག་ཏུ་སྒྲུབ་ཚུལ་ཇི་ལྟར་ཡིན་ཞེ་ན། གོང་དུ་བཤད་པ་ལྟར་མདོ་སྔགས་ཟབ་རྒྱས་ཀྱི་བཀའ་དང་བསྟན་བཅོས། རིགས་པའི་གནས་དང༌
གྲུབ་མཐའ་རབ་འབྱམས་ལ་མཁས་པའི་ཡོན་ཏན་དང༌། ས་བཅུ་ལམ་ལྔ་གྲངས་མེད་གསུམ་གྱི་ཚོགས་ལ་སོགས་པ་ཐེག་ཆེན་ཐུན་མོང་བ་དང༌། སྔགས་ཀྱི་བཟླས་པ། དཀྱིལ་འཁོར་བྲི་སྒྲུབ། དཀའ་ཐུབ་སྦྱིན་སྲེག་ལ་སོགས་པ་ཐམས་ཅད་ལྷན་སྐྱེས་ཀྱི་ཡེ་ཤེས་གཅིག་པུའི་བྱེད་པར་འདུས་ཏེ། ཀུན་སྤྱོད་ལས། གང་ཞིག་ས་ལ་གནས་རྣམས་དང༌། །བསྟན་བཅོས་དག་ནི་མ་ལུས་དང༌། །རིག་བྱེད་གྲུབ་མཐའ་གནས་པ་རྣམས། །འཇིག་རྟེན་འདི་དང་གཞན་དག་ཏུ། །དེ་མེད་པར་ནི་འགྲུབ་མི་འགྱུར། །རིག་བྱེད་གྲུབ་པའི་མཐའ་རྣམས་ལ། །འདི་ནི་སྙིང་པོར་རབ་ཏུ་བཤད། །ཅེས་གསུངས་ཤིང༌། ཀུན་སྤྱོད་མར་དོས་བསྒྱུར་བ་ལས། རིག་བྱེད་གྲུབ་མཐའ་གནས་པ་རྣམས། །ཡེ་ཤེས་དེ་ལས་ཡང་དག་འབྱུང༌། །ཞེས་གསུངས་པ་ལྟར། ཀུན་སྤྱོད་ཀྱི་འགྲེལ་པར་རིག་བྱེད་གྲུབ་མཐའ་སོགས་ཡེ་ཤེས་ལ་གནས་པ་ནི། ཡེ་ཤེས་དེ་ལས་དེ་རྣམས་འབྱུང་བའི་དོན་དུ་བཤད་དོ། །གྲངས་མེད་གསུམ་སོགས་དེར་འདུས་ཚུལ་ནི། སམྦྷུ་ཊ་ལས། དེ་ཕྱིར་དེ་རྒྱས་ཅི་ཞིག་བྱ། །མདོར་བསྡུས་པས་ནི་སངས་རྒྱས་ཉིད། །བསྐལ་པ་བྱེ་བ་གྲངས་མེད་པས། །ཇི་སྲིད་སངས་རྒྱས་གང་འཐོབ་པ། །གང་གིས་དམ་པའི་བདེ་བས་ཁྱོད། །སྐྱེ་བ་འདིར་ནི་ཐོབ་པར་འགྱུར། །ཞེས་ཚོགས་གཉིས་ཀྱི་གསལ་བའི་དབྱེ་བ་མཐའ་ཡས་པ་ཐམས་ཅད་བློ་གཅིག་གི་བྱེད་པར་ཚང་བས་ཚོགས་གཉིས་རྫོགས་ཚབས་ཆེ་ཞིང་མྱུར་བ་དང༌། གསང་སྔགས་ཀྱི་ཉམས་ལེན་གཞན་ཀུན་དེར་འདུས་པའི་ཚུལ་ཡང༌། བརྟག་པ་དང་པོའི་བཅུ་པ་ལས།
དེ་ནི་སྔགས་བཟླས་དེ་དཀའ་ཐུབ་དང་དེ་སྦྱིན་སྲེག །དེ་ནི་དཀྱིལ་འཁོར་ཅན་དང་དེ་ནི་དཀྱིལ་འཁོར་ཉིད། །མདོར་བསྡུས་ནས་ནི་སེམས་ནི་འདུས་པའི་གཟུགས་ཅན་ནོ། །ཞེས་དང༌། དེའི་རྣམ་བཤད་ལས། ལྷན་སྐྱེས་དེ་ནི་ཡིད་སྐྱོབ་པས་ངེས་དོན་གྱི་སྔགས་བཟླས་པ་དང༌། དེ་ཉིད་ཁ་ན་མ་ཐོ་བ་དང་བྲལ་ཞིང་ཉེས་པ་ཐམས་ཅད་འགོག་པས་དཀའ་ཐུབ་དང༌། དེ་ཉིད་ཀྱིས་ཉོན་མོངས་དང་ཕུང་པོའི་ཡམ་ཤིང་ཐམས་ཅད་བསྲེག་པས་ངེས་དོན་གྱི་སྦྱིན་སྲེག་དང༌། དེ་ནི་རྣལ་འབྱོར་མ་ཐམས་ཅད་འདུས་པའི་བདག་ཉིད་ཅན་ཡིན་པས་དཀྱིལ་འཁོར་ཅན་དང༌། དེ་ནི་ཆོས་ཐམས་ཅད་ཀྱི་སྙིང་པོ་ལེན་པའི་དཀྱིལ་འཁོར་ཉིད་དེ། མདོར་བསྡུས་ནས་ནི་དོན་གྱི་ལྷན་སྐྱེས་དོན་དམ་པའི་བྱང་ཆུབ་ཀྱི་སེམས་ནི་ཆོས་ཐམས་ཅད་འདུས་པའི་རང་བཞིན་ཅན་ཡིན་པས་སེམས་དེ་ཉིད་བསྐྱེད་པར་བྱ་སྟེ། ཞེས་གསུངས་ཏེ། དེ་དག་གི་དོན་བསྡུས་ན། རྫོགས་རིམ་དངོས་གྲུབ་སྙེ་མ་ལས། ས་ལ་གནས་པ་ནི་ས་བཅུ་ལ་གནས་པ་དང༌། བསྟན་བཅོས་ནི་རྒྱུད་སྡེ་རྣམས་དང༌། རིག་བྱེད་ནི་ཕྱི་པའི་བསྟན་བཅོས་དང༌། གྲུབ་མཐའ་ནི་ཉན་ཐོས་པའི་གྲུབ་མཐའ་ལ་ཏ་ཐཱ་ག་ཏ་རཀྵི་ཏས་བཤད་དེ། ཕྱི་ནང་གི་གཞུང་ལས་བཤད་པའི་དངོས་གྲུབ་ཐམས་ཅད་ལམ་མདོར་བསྡུས་པ་འདི་ཉིད་ཀྱིས་འགྲུབ་པའི་དོན་ནོ། །ཞེས་དང༌། ཡང་དེ་ཉིད་ལས། ལམ་གཞན་གྱི་གནས་སྐབས་དང་མཐར་ཐུག་གི་དོན་གང་འགྲུབ་ཐམས་ཅད་ལམ་འདིར་མ་ཚང་བ་མེད་པ་དང༌། རིང་པོར་མ་ཐོགས་པ་དང༌། ལམ་བདེ་བས་འགྲུབ་པའི་ཚུལ་བྱེད་ལས་ཀྱི་སྒོ་ནས་འདིར་འདུས་པའོ། །ཞེས་དང༌། གསང་བ་འདུས་པའི་སྨོན་ལམ་ལས།
ལུས་ཀྱི་གཡོ་བ་ངག་གི་བརྗོད་པ་དང༌། །ཡིད་ཀྱི་བསམ་པ་ཀུན་གྱིས་འབད་མེད་པར། །རླབས་ཆེན་ཚོགས་རྣམས་ཡོངས་སུ་སྡུད་བྱེད་པའི། །ཞེས་གསུངས་པ་ལྟར་རོ། །དེས་ན་ལམ་དུས་ཀྱི་ཡོན་ཏན་ཐམས་ཅད་ལམ་གྱི་བདེ་ཆེན་ལྷན་ཅིག་སྐྱེས་པའི་ཡན་ལག་ཏུ་འཁྱེར་བ་དགོས་ཤིང༌། དེའི་སྟོབས་ཀྱིས་འབྲས་བུའི་སྐུ་གསུམ་ཡང་བདེ་ཆེན་གྱི་སྐུར་འདུ་བ་ཡིན་ཏེ། བརྟག་གཉིས་རྣམ་བཤད་ལས། བདེ་ཆེན་དེ་ཉིད་མཐར་ཐུག་པའི་བདེ་ཆེན་གྱི་སྐུར་སྐུ་གཞན་གསུམ་ཡང་བསྡུས་པ་ཤེས་པར་བྱ་བའི་ཕྱིར་ཏེ། མདོར་ན་ལམ་གྱི་གཙོ་བོ་ལྷན་སྐྱེས་ཀྱི་བདེ་ཆེན་དང༌། འབྲས་བུའི་གཙོ་བོ་བདེ་ཆེན་གྱི་སྐུར་བསྟན་ནས་བདེ་བ་ཆེན་པོ་ལ་ངེས་པ་ལྷག་པར་བསྐྱེད་པའི་ཆེད་དུ་ཡིན་ནོ། །ཞེས་གསུངས་པ་བཞིན་དེ་ལ་ངེས་པ་ལྷག་པར་སྐྱེ་བའི་ཆེད་དུ་འདིར་ཡང༌། སྲོག་ནི་གཅིག་ཏུ་སྒྲུབ་ཅེས་གསུངས་པ་ཡིན་པས། རྗེས་འཇུག་བློ་གྲོས་ཀྱི་ནོར་དང་ལྡན་པ་རྣམས་ཀྱིས་སྙིང་ལ་རུས་པ་བཅུག་སྟེ། དམ་པ་གོང་མ་དག་གི་བཀའ་ཆེམས་སུ་བཞག་པའི་དོན་བཞིན་ཚུལ་འདི་ལ་གཞན་དྲིང་མི་འཇོག་པའི་ངེས་པ་བརྟན་པོ་རྙེད་པའི་ཕྱིར་སྒོ་མཐའ་དག་ནས་འབད་པ་ལྷུར་བླང་བར་བྱའོ། །༈ གསུམ་པ་མཇུག་གི་དོན་ལ། བསྟན་བཅོས་ཇི་ལྟར་བརྩམས་པའི་ཚུལ། བརྩམས་པ་པོའི་དགོས་དོན་འགྲུབ་པར་སྨོན་པ། རྩོམ་པ་པོའི་མཚན་བསྟན་པ་གསུམ། དང་པོ་ནི། དེ་ལྟར་བསྟོད་དང་སྨོན་པའི་ཨཎྜ་རྙིལ། །བསམ་བཟང་སྲད་བུ་ཆེས་དཀར་རིང་པོ་ལ། །སྟར་དུ་བརྒྱུས་པའི་རྒྱན་
ཕྲེང་དོ་ཤལ་འདི། །ཚུལ་བཞིན་ལྷ་མོ་ཁྱོད་ཀྱིས་མགུལ་བར་ཆོངས། །ཞེས་བྱུང༌། དེ་ཡང་གོང་དུ་ཇི་སྐད་བཤད་པ་དེ་ལྟར་དུ་བསྟོད་ཚུལ་གྱི་ནང་ནས་འཕགས་མའི་སྐུ་གསུང་ཐུགས་ཀྱི་ཡོན་ཏན་རྒྱུ་འབྲས་ངོ་བོ་ཆ་ཚང་བའི་ཚུལ་གྱིས་བསྟོད་པ་དང༌། སྨོན་པའི་ནང་ནས་ཀྱང་གནས་སྐབས་མཐར་ཐུག་གི་འདོད་དོན་རྫོགས་པས་ན། རིན་པོ་ཆེའི་ནང་ན་ཨཎྜ་རྙིལ་ལམ། ཨིནྡྲ་ནཱི་ལ་སྟེ་རིན་པོ་ཆེ་དབང་གི་རྒྱལ་པོ་ལྟར་མཆོག་དང་གཙོ་བོར་གྱུར་པས་བརྩམས་པའི་བསྟན་བཅོས་ཀྱི་ངོ་བོ་ཕུན་སུམ་ཚོགས་པར་བསྟན་ནོ། །བརྩམས་པའི་ཀུན་སློང་ཕུན་སུམ་ཚོགས་པའི་ཚུལ་ནི། དཔེར་ན་ཕྲེང་བའི་རྡོག་པོ་ཐམས་ཅད་སྲད་བུ་ལ་བརྟེན་པ་ལྟར། རྩོམ་པ་ཡང་གང་ལ་བརྟེན་པའི་རྩ་བའི་ཀུན་སློང་ནི་བསྟན་འགྲོ་ལ་ཕན་པར་བཞེད་པའི་བསམ་པ་བཟང་པོའི་སྲད་བུ་ཡིན་ཞིང༌། དེ་ཡང་ཉེ་རིང་དང་རང་དོན་ཡིད་བྱེད་ཀྱི་དྲི་མ་ཕྲ་མོས་ཀྱང་མ་གོས་པས་ཆེས་དཀར་བ་དང༌། བསྟན་པ་ནམ་གནས་བར་དང་མཁའ་ཁྱབ་ཀྱི་འགྲོ་བའི་དོན་དུ་དམིགས་པས་ན་རྒྱ་ཆེ་ཞིང་ཡུན་རིང་པོའི་བར་གྱི་དགོངས་པ་རླབས་ཆེ་བའོ། །རྩོམ་ཚུལ་ཕུན་སུམ་ཚོགས་པ་ཡང་ཡིན་ཏེ། ཡོན་ཏན་དེ་དག་ཐོར་བུ་ཐོར་བུར་བརྗོད་པ་ལྟ་བུ་མ་ཡིན་པར་སྨིན་བྱེད་དབང་བཞི་དང༌། གྲོལ་བྱེད་རིམ་གཉིས་སོགས་ཀྱི་འགྲོས་དང་མཐུན་པར་ཆ་ཚང་ཞིང་གོ་རིམ་མ་འཆོལ་བར་ཕྲེང་བ་སྟར་དུ་བརྒྱུས་པ་བཞིན་མཐར་ཆགས་སུ་འབྱུང་བས་གོ་སླ་ཞིང་རྗེས་འཇུག་གིས་ཉམས་སུ་བླང་བདེ་བའོ། །དགོས་པ་ཕུན་སུམ་ཚོགས་པ་ནི། འཇིག་རྟེན་ན་རིན་པོ་ཆེའི་རྒྱན་ཕྲེང་དང་དོ་ཤལ་བཟང་པོ་ལྟ་བུ་རྒྱལ་པོ་སོགས་ལ་རྒྱན་དུ་ཕུལ་བས་དགྱེས་ནས་བྱ་
དགའ་སྩོལ་ཞིང༌། ན་ཆུང་སོགས་ལ་བྱིན་ནས་རྩེ་དགའི་གྲོགས་བགྱིད་པ་ལྟར། འདིར་ཡང་བསྟོད་པའི་ཚིག་གི་རྒྱན་ཕྲེང༌། དེ་ལས་འཕྱང་བའི་སྨོན་ཚིག་གི་དོ་ཤལ་དང་བཅས་ཏེ་འཕགས་མ་ཁྱེད་ལ་འབུལ་བ་ལགས་པས། ཁྱེད་ཀྱིས་ཚུལ་ལམ་ལུགས་དང་མཐུན་པར་མགུལ་དུ་བཞེས་ཏེ་བདག་གི་འདོད་པ་གྲུབ་པར་མཛོད་ཅིག་ཅེས་པའོ། །གཉིས་པ་ནི། རྒྱུ་འབྲས་རྟེན་འབྲེལ་བསླུ་བ་མེད་པ་དང༌། །རིག་བྱེད་མཛེས་མ་མཐུ་སྟོབས་ཐོགས་མེད་པས། །ཇི་ལྟར་སྨོན་པའི་འབྲས་བུ་བདེ་བླག་ཏུ། །གེགས་དང་ཉེར་འཚེ་མེད་པར་འགྲུབ་གྱུར་ཅིག །ཅེས་བྱུང༌། དེ་ཡང་གྲོ་སྲན་ལ་སོགས་པའི་འབྲས་བུ་ཕུན་སུམ་ཚོགས་པར་འབྱུང་བ་ལ་རྒྱུ་རང་རང་གི་ས་བོན་མ་འཆོལ་བར་བཏབ་པ་དང༌། རྐྱེན་ཆུ་ལུད་འཛོམ་པ་དགོས་པ་ལྟར། གནས་སྐབས་མཐར་ཐུག་གི་ཡོན་ཏན་རྣམས་འགྲུབ་པ་ལ་ཡང༌། ནང་ནས་དེ་དག་དང་མཐུན་པའི་ཉེར་ལེན་གྱི་རྒྱུ་ཚུལ་བཞིན་དུ་སྒྲུབ་པའི་རྟེན་འབྱུང་གི་འབྲེལ་བ་བསླུ་བ་མེད་པ་དང༌། ཕྱིའི་རྐྱེན་མཆོག་གསུམ་སྤྱི་དང་ཁྱད་པར་འདིའི་སྒྲུབ་པ་པོ་རྣམས་ལ་བཅོམ་ལྡན་རིག་བྱེད་མཛེས་མ་ཉིད་ཀྱི་མཐུ་སྟོབས་ཐོགས་པ་མེད་པའི་བྱིན་རླབས་ཀྱི་ནུས་པ་རང་རྒྱུད་ལ་ཞུགས་པ་ངེས་པར་དགོས་པས། དེ་གཉིས་རིམ་པ་བཞིན་རྐང་པ་དང་པོ་གཉིས་ཀྱིས་བསྟན་ནོ། །ཁ་ཅིག་འདི་སྙམ་དུ། འབྲས་བུ་འགྲུབ་པ་ལ་རྒྱུ་སྒྲུབ་དགོས་པ་བདེན་ཡང་འདིར་ཚིག་ཏུ་བརྗོད་པ་དགོས་པ་མེད་དེ། རྒྱུ་མ་བསྒྲུབས་པར་རྒྱུ་འབྲས་རྟེན་འབྱུང་ཞེས་བཤད་ཀྱང་རྫུན་དུ་འགྱུར་ལ། རྒྱུ་སྒྲུབ་ན་ཚིག་ཏུ་མ་བརྗོད་ཀྱང་ས་བོན་
ལས་མྱུ་གུ་སྐྱེ་བ་ལྟར་འབྲས་བུ་འབྱིན་ནུས་སོ་སྙམ་ན། འདི་ནི་ཤིན་ཏུ་དགོས་པ་ཆེ་སྟེ་ལུས་ངག་གི་དགེ་བ་བྱས་ཀྱང་དེའི་འབྲས་བུ་ལ་ཡིད་མ་ཆེས་པས་འབྲས་བུ་དམན་པར་འགྱུར་བ་དང༌། འབྲས་བུ་གཏན་དུ་འཇོམས་པ་ལྟ་བུ་མང་བས། འདིར་བདེན་སྟོབས་བརྗོད་པ་ནི་རྒྱུ་འབྲས་ཀྱི་འབྲེལ་བ་དེས་ཐོས་སུ་རེ་བ་མིན་གྱི། རང་རྒྱུད་ལ་བདེ་ལེགས་ཐམས་ཅད་ཀྱི་རྩ་བ་ལས་འབྲས་ཀྱི་འབྲེལ་བར་ཡིད་ཆེས་བསྐྱེད་ནས་སྔ་མའི་དགེ་རྩ་ཐམས་ཅད་ནུས་ལྡན་དུ་བསྒྱུར་བ་ཡིན་ནོ། །རྐང་པ་ཕྱི་མ་གཉིས་ནི། དེ་ལྟར་ཕྱི་ནང་གི་རྐྱེན་ཕུན་སུམ་ཚོགས་པ་ལ་བརྟེན་ནས་གོང་དུ་ཇི་སྙེད་བཤད་པའི་སྨོན་པའི་འབྲས་བུ་རྣམས་འགྲུབ་པ་ལ་བར་དུ་གཅོད་པའི་གེགས་དང༌། དེའི་ཆར་གཏོགས་པའི་ཉེར་འཚེ་ཕྲ་མོ་ཡང་མེད་པར་ཇི་ལྟར་སྨོན་པ་བཞིན་བདེ་བླག་ཉིད་དུ་འགྲུབ་པར་གྱུར་ཅིག་ཅེས་པའོ། །གསུམ་པ་ནི། ཅེས་ཁམས་གསུམ་དབང་སྡུད་ཀྱི་ལྷ་མོ་རིག་བྱེད་མ་ལ་བསྟོད་པ་འདི་ནི་ཆོས་སྨྲ་བའི་སྙོམས་ལས་པ་བློ་བཟང་དཔལ་ལྡན་ཡེ་ཤེས་ཀྱིས་དོན་ཆེན་པོ་ལ་དམིགས་ནས་སུག་བྲིས་སུ་བགྱིས་པའོ། །ཞེས་གསུངས་པས་གཞན་རྣམས་གོ་སླ་ཞིང༌། དོན་ཆེན་པོ་ནི་གོང་གི་འདོད་གསོལ་སྐབས་སུ་བཤད་པ་ལྟར་བསྟན་པའི་རྩ་ལག་༸རྒྱལ་དབང་མཆོག་གི་སྤྲུལ་སྐུ་རིན་པོ་ཆེའི་འཕྲིན་ལས་ཀྱི་སྒོ་བརྒྱ་འབྱེད་པའི་ཕྱིར་དུ་ཡིན་ནོ། །སྨྲས་པ། གང་གི་ཞབས་སེན་ཉི་འོད་རེག་པ་ཡིས། །བདག་བློ་འདབ་བརྒྱ་བཞད་པའི་ཟེའུ་འབྲུ་ལ། །རྒྱུད་དོན་སྦྲང་རྩིའི་བཅུད་ཀྱིས་གཏམས་མཛད་པ། །བླ་མ་ཧེ་རུ་ཀ་ཡིས་རིང་དུ་སྐྱོངས། །དཔའ་བོའི་དབང་ཕྱུག་སྙིང་རྗེའི་ཆུ་གཏེར་ཆེ་ལ་ཡང་དག་སྦྱོར་བ་ཡིས། །དགའ་བ་
ཆེན་པོར་ཁོལ་བའི་རླབས་ཕྲེང་རབ་འབྱམས་དཀྱིལ་འཁོར་སྤྲོ་ཞིང་སྡུད། །དཔའ་བོའི་བརྟན་པ་འཕྲོག་པའི་ཉམས་འགྱུར་གློག་དམར་རྩེ་དགས་རོལ་པ་མོ། །ཤེས་རབ་རྟ་གདོང་འབར་བའི་མེ་ཚན་རིག་བྱེད་དབང་མོ་བསྟོད་པའི་དབྱངས། །དགའ་བའི་དཔལ་ལྡན་ཡེ་ཤེས་མེ་ལོང་ངོས། །གསང་གསུམ་བཀོད་པ་མཁའ་དང་མཉམ་པའི་གཟུགས། །མངོན་པར་ཆུབ་པའི་སྒྱུ་འཕྲུལ་ལྟད་མོ་ཆེ། །རྣམ་དཔྱོད་སོར་མོས་མཚོན་འདི་ལྟོས་ཤིག་ཀྱེ། །བཅོམ་ལྡན་མ་ཡི་གསང་གསུམ་ཐུན་མཚམས་དམར་བའི་ལང་ཚོ་ནི། །བྱེ་བ་བཅུ་དྲུག་མ་རྒྱུད་མཁའ་དང་རོ་གཅིག་རང་བཞིན་ལས། །ལུང་རིགས་ལེགས་བཤད་སྐར་ཚོགས་རྣམ་པར་བཀྲ་བའི་རྣམ་བཤད་འདིས། །དགའ་བ་བཅུ་དྲུག་ཆ་རྫོགས་ལྷན་སྐྱེས་ཟླ་ཤེལ་མགྲོན་དུ་འགུགས། །ཆེར་སྙིགས་དུས་བཞིའི་མཐའ་དང་མི་འཚལ་བ། །སྔོན་རབས་མཁས་པ་མདོངས་མཐའི་དགའ་སྟོན་འདི། །རིག་འཛིན་དབང་མོ་མཉེས་པའི་མཆོད་སྤྲིན་ཏེ། །རང་རྒྱུད་དགེ་བའི་ས་བོན་སྨིན་བྱེད་ཡིན། །རྡོ་རྗེ་གསུམ་གསང་རྒྱུད་སྡེ་རྒྱ་མཚོའི་དོན། །རང་སྒྲ་བྲག་ཆའི་ཟླ་དང་བཅས་པའི་གཏམ། །ལེགས་བཤད་ནམ་མཁའི་རྔ་ཆེན་ལྡིར་བ་ཡིས། །བློ་ཆུང་གཏམ་གྱི་སྒྲ་བརྒྱ་ཅིག་ཅར་བསྙལ། །ལུས་ཀྱི་བསྟན་བཅོས་གནའ་བོའི་རས་བྲིས་ལ། །མཆོད་བརྗོད་སྦྱར་བྱང་གསར་པའི་གོང་གཤམ་ཅན། །བྱེད་པོ་རྟོག་གེའི་བཟོ་བོར་མཚོན་པའི་ལས། །མཁས་པའི་བཞད་གད་ཡུལ་གྱི་ཆོས་དེ་མིན། །འོན་ཀྱང་བརྗོད་དོན་འཕགས་མའི་གསང་བ་སོ་སོར་རང་རིག་ཡུལ། །རྗོད་བྱེད་རྡོ་རྗེའི་ཚིག་ཀྱང་སོ་སོ་རང་གི་རིག་བྱ་སྟེ། །འཁྲུལ་བྲལ་
འཕགས་བོད་གཞུང་བརྒྱའི་རྗེས་སུ་འགྲེལ་པ་ལྷུར་བླང་ཡང༌། །བྱིས་བློས་ནོངས་པར་གང་གྱུར་བླ་མ་ཡི་དམ་ཚོགས་ལ་བཤགས། །འདིར་འབད་དགེ་བ་ཕྲ་མོའི་མེ་མདག་ཀྱང་། །ཀུན་ཉོན་ཚལ་དུ་ཞུགས་པ་མཆེད་པའི་མེས། །སྲིད་པ་གཞོམ་ལས་བདེ་ཆེན་དུ་བའི་སྤྲིན། །མཁའ་དབྱིངས་ཁྱབ་པས་གྲུ་ཆར་འབེབས་གྱུར་ཅིག། །མཐའ་ཡས་ཕྱོགས་ཀྱི་ནགས་ཀླུང་ཡངས་པ་ནས། །མགྲོན་དུ་ཉེར་བཀུག་སྐལ་བཟང་བུང་བའི་ཁྱུ། །བཤད་སྒྲུབ་སྦྲང་རྩིའི་ཆང་གིས་རབ་མྱོས་ཏེ། །རྣམ་གྲོལ་དགའ་བའི་གར་སྟབས་བསྒྱུར་བར་ཤོག ། ཁྱད་པར་མཚུངས་མེད་མཆོག་སྤྲུལ་ལྷ་ཡི་དབང༌། །བློ་བཟང་ཐུབ་བསྟན་ཡང་སྙིང་ལྷུན་པོའི་སྤོར། །འཇིགས་མེད་ཆོས་ཀྱི་ཁྲི་ལ་ཞབས་བརྟན་ཅིང༌། །མཛད་བཟང་རྒྱ་མཚོའི་གོས་ཅན་ཁྱབ་གྱུར་ཅིག །ཅེས་བཅོམ་ལྡན་འདས་མ་ལྷ་མོ་རིག་བྱེད་མ་ལ་བསྟོད་པའི་རྒྱ་ཆེར་འགྲེལ་པ་རྡོ་རྗེ་གསུམ་གྱི་སྣང་བ་ཞེས་བྱ་བ་འདི་ནི། དགེ་བའི་བཤེས་གཉེན་སངས་རྒྱས་དངོས་སུ་མཐོང་སྟེ། བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་པ་ལ་གཞོན་ནུ་ནོར་བཟང་དང་ཆོས་མཚུངས་ཤིང༌། དེའི་མཐུས་ལུང་དང་རྟོགས་པའི་ཡོན་ཏན་གྱི་ཚོགས་ཀྱིས་གོ་འཕང་མཐོན་པོར་གྱུར་པ་སྒྲུབ་པའི་རྒྱལ་མཚན་འཛིན་པ་ཆེན་པོ་མཁས་གྲུབ་བསྟན་འཛིན་གྱིས། བསྟོད་པའི་རྩ་བ་འདི་ཉིད་པཎ་ཆེན་སྣང་བ་མཐའ་ཡས་ཀྱིས་༸རྒྱལ་དབང་ཐམས་ཅད་མཁྱེན་པའི་འཕྲིན་ལས་ཀྱི་སྒོ་འབྱེད་དུ་གསུངས་པ་དང་ཕྱོགས་མཐུན་པར་སྐྱབས་མགོན་མཆོག་སྤྲུལ་རིན་པོ་ཆེ་བློ་བཟང་ཐུབ་བསྟན་འཇིགས་མེད་རྒྱ་མཚོའི་ཞལ་སྔ་ནས་ཀྱི་རྣམ་པར་དཀར་བའི་མཛད་འཕྲིན་བསྟན་འགྲོ་ཡོངས་ཀྱི་ཕན་བདེའི་དགའ་
སྟོན་དང་ཆབས་ཅིག་པར་རྒྱས་པའི་ཕྱིར་དུ། འདི་ལ་འགྲེལ་པ་གསང་བ་གསུམ་གྱི་ཡོན་ཏན་གསལ་བར་སྟོན་ཅིང༌། ཁྱད་པར་རང་ལམ་གྱི་ལུས་ཡོངས་སུ་རྫོགས་པའི་འགྲོས་དང་མཐུན་པ་ཤིན་ཏུ་རྒྱས་པ་ཞིག་དགོས་ཞེས་གསུང་ནན་ཆེན་པོས་བསྐུལ་བ་བཞིན། མདོ་སྔགས་ཐུབ་བསྟན་ཡོངས་སུ་རྫོགས་པའི་མངའ་བདག་དཔལ་ཧེ་རུ་ཀ་དང་གཉིས་སུ་མེད་པའི་བླ་མ་རྡོ་རྗེ་འཆང་ཆེན་པོ་རྗེ་བཙུན་དཀོན་མཆོག་འཇིགས་མེད་དབང་པོའི་ཞལ་སྔ་ནས་ཀྱི་ཞབས་རྡུལ་སྤྱི་བོར་བསྟེན་པའི། ༸བཙུན་པ་དཀོན་མཆོག་བསྟན་པའི་སྒྲོན་མེས། རྒྱལ་བའི་ལུང་གིས་ཟིན་པའི་ཆོས་གྲྭ་ཆེན་མོ་བཀྲ་ཤིས་འཁྱིལ་དུ་སྦྱར་བ་འདི་ཡང་ཐུབ་བསྟན་ཡང་སྙིང་ཕྱོགས་དུས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག། །།