ཀུན་མཁྱེན་བླ་མས་མཛད་པའི་རྡོར་ཕྲེང་གི་དབང་གི་ཁ་སྐོང་།
ཀུན་མཁྱེན་བླ་མས་མཛད་པའི་རྡོར་ཕྲེང་གི་དབང་གི་ཁ་སྐོང་ཀྲྀ་ཡའི་ཕྱག་ལེན་དང་བཅས་པ་བཞུགས་སོ།།
བླ་མ་དང་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདིར་རྡོ་རྗེ་འཕྲེང་བའི་དབང་གི་ཆོ་ག་སྤྱིའི་ཁོགས་བླ་མེད་དང་སྦྱར་ཏེ་ངག་འདོན་མཐར་ཆགས་ཀྱི་རིམ་པ་སྐྱབས་མགོན་རྡོ་རྗེ་འཆང་ཆེན་པོའི་བཀའ་འབུམ་དུ་བཞུགས་པ་ལྟར་ལ། དེར་མི་གསལ་བ་རྒྱུད་སྡེ་འོག་མའི་དབང་བསྐུར་ཚུལ་སོགས་སྐྱབས་མགོན་འདི་ཉིད་ཀྱི་གསུང་རྒྱུན་དང་ཕྱག་བཞེས་བཞིན་ཁ་འགེང་བ་ནི། རྣལ་འབྱོར་རྒྱུད་ཀྱི་དབང་བསྐུར་ཚུལ་ལ་དཀྱིལ་འཁོར་དུ་གཞུག་པའི་སྐོར་རྣམས་བླ་མེད་དང་འདྲ་ཞིང༌། འོན་ཀྱང༌། ད་ནི་དད་པའི་ཞེས་སོགས་ཀྱི་མཇུག་ཏུ། དམ་ཚིག་མཆོག་ཏུ་ཁྱོད་འགྱུར་རོ། །ཞེས་བརྗོད་དེ། རྡོ་རྗེ་པདྨ་རྩེ་རོལ་བས། །ཞེས་སོགས་རྐང་པ་གཉིས་དོར། དབང་དངོས་གཞིའི་སྐབས་སློབ་མ་དང་དབང་རྫས་མཉམ་དུ་བསངས་ཏེ། ཤཱུ་ནྱ་ཏས་སྦྱངས། སློབ་མ་རྣམས་དང་དབང་རྫས་བུམ་ཆུ་སྟོང་པ་ཉིད་དུ་གྱུར། སྟོང་པའི་ངང་ལས་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ཡོངས་སུ་གྱུར་པ་ལས། མི་བསྐྱོད་པ་སྔོན་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པ། བླ་མ་དང་གཙོ་བོ་ཐ་མི་དད་པའི་ཐུགས་ཀའི་ཧཱུཾ་གི་འོད་ཟེར་གྱིས་རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་དང་དབང་གི་ལྷ་རྣམས་སྤྱན་དྲངས། གཉིས་སུ་མེད་པར་གྱུར། དབང་གི་ལྷ་རྣམས་ཀྱིས་དབང་རྫས་ཀྱི་ལྷ་ལ་དབང་བསྐུར།
མི་བསྐྱོད་པས་དབུ་བརྒྱན་པར་གྱུར། ཨོཾ་ཨརྒྷཾནས། ཤཔྟའི་བར་གྱིས་མཆོད། མི་བསྐྱོད་པ་ཞུ་བ་ལས་བྱུང་བའི་དབང་རྫས་བུམ་ཆུར་གྱུར། བླ་མ་དང་གཙོ་བོ་ཐ་མི་དད་པའི་ཐུགས་ཀའི་ཧཱུཾ་གི་འོད་ཟེར་གྱིས་ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་སློབ་མ་རྣམས་ལ་དབང་བསྐུར་བའི་ཕྱིར། ཞེས་པ་མན་ཆད་འདྲ་ལ། འོན་ཀྱང་རྒྱུད་སྡེ་འོག་མའི་དབང་ཆོག་ཁུངས་ཐུབ་མང་པོར། བུམ་པ་དཀར་པོ་བྱང་ཆུབ་ཀྱི་སེམས་ཀྱི་བདུད་རྩིས་གང་བ། ཞེས་ཚིག་མ་བསྒྱུར་བར་བཞག་པ་མང་བས་དེ་ལྟར་བྱས་ཀྱང་འགལ་བ་མེད་ལ། བླ་མེད་དང་ཁྱད་པར་དབྱེ་བའི་ཕྱིར། བུམ་པ་དཀར་པོ་ཡེ་ཤེས་ཀྱི་བདུད་རྩིས་གང་བ། ཞེས་ཚིག་བསྒྱུར་ཀྱང་རུང་ངོ༌། །མཆོད་པའི་མཇུག་ཏུ། དག་པ་བརྗོད་པ་དོར་ཏེ། ཅོད་པན་གྱི་དབང་གི་གསོལ་གདབ་བྱེད་ཅིང༌། སློབ་མ་དང་དབང་རྫས་ཅོད་པན་གཉིས་ཀ་རིན་འབྱུང་ཡབ་རྐྱང་དུ་བསྐྱེད་པ་སོགས་གོང་དང་འདྲའོ། །རྡོར་དྲིལ་གཉིས་ཀྱང་དེ་དང་མཚུངས་ཤིང༌། མིང་དབང་གི་ཚེ་སློབ་མ་རྣམ་སྣང་དུ་བསྐྱེད་དེ་ཡེ་ཤེས་པ་སྤྱན་དྲངས་ཏེ། གཉིས་སུ་མེད་པར་གྱུར། ཅེས་པའི་མཇུག་ཏུ། བླ་མ་དང་གཙོ་བོ་ཐ་མི་དད་པའི་ཐུགས་ཀའི་ཧཱུཾ་གི་འོད་ཟེར་གྱིས་ཕྱོགས་བཅུའི་རྒྱལ་བ་སྲས་བཅས་ཐམས་ཅད། ཅེས་སོགས་སྦྱོར་བ་མ་གཏོགས་གཞན་ཐམས་ཅད་འདྲའོ།། ༈ སློབ་དཔོན་གྱི་དབང་
གི་ཚེ་སློབ་མ་བསངས་སྦྱངས། སྟོང་པའི་ངང་ལས་དབང་སྟེགས་ཁྲུས་དཀྱིལ་ལ་གནས་པའི་སེངྒེའི་ཁྲིའི་སྟེང་དུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ཡོངས་སུ་གྱུར་པ་ལས། རྡོ་རྗེ་འཆང་དཀར་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ། བླ་མ་དང་གཙོ་བོ་ཐ་མི་དད་པའི་ཐུགས་ཀའི་ཧཱུཾ་གི་འོད་ཟེར་གྱིས་རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས། གཉིས་སུ་མེད་པར་གྱུར། དེ་ནས་རྡོར་དྲིལ་གྱི་དམ་ཚིག་སྦྱིན་ཚུལ་འདྲ་ཞིང༌། ཕྱག་རྒྱའི་དམ་ཚིག་ལ། ཡིད་ཀྱི་ལུས་ནི། ཞེས་སོགས་ཤོ་ལོ་ཀ་དང་པོས་ཆོག་པར་བྱས་ཏེ། སློབ་མ་རྡོ་རྗེ་འཆང་ཞལ་གཅིག་ཕྱག་གཉིས་པ་རྡོ་རྗེ་དང་དྲིལ་བུ་འཛིན་པར་གསལ་བར་དམིགས་པ་ལ་བརྟེན་ནས་ཟབ་གསལ་གཉིས་སུ་མེད་པའི་ཡེ་ཤེས་རྡོ་རྗེ་སློབ་དཔོན་གྱི་དབང་གི་ངོ་བོ་རྒྱུད་ལ་སྐྱེ་བར་གྱུར། ཅེས་དབང་གི་ངོ་བོ་ངོས་སྤྲད། རྟེན་བྱེད་ཆུ་དབང་སོགས་དཀྱུས་དང་འདྲ་ཞིང༌། སློབ་མ་ལ་མཆོད་པའི་མཇུག་ཏུ། དེ་ཁོ་ན་ཉིད་དང་ལས་ཀྱི་རིམ་པ་བཟླས་ལུང༌། མིག་སྨན་མེ་ལོང༌། མདའ་གཞུ། རྡོ་རྗེའི་བརྟུལ་ཞུགས། ལུང་བསྟན། འཁོར་ལོ། དུང༌། པོ་ཏི། དྲིལ་བུ། རིགས་ལྔའི་ཕྱག་མཚན་རྣམས་དཀྱུས་ལྟར་སྦྱིན་པར་སྐོར་བ་དང༌། ལྷ་ལ་འབུལ་བ། དབུགས་དབྱུང་རྣམས་ཀྱང་གཞུང་བཞིན་བྱས་ཤིང༌། དབུགས་དབྱུང་གི་ནང་ནས། ཤ་ལྔ་བདུད་རྩི་ལྔ་བཟའ་ཞིང༌། །ཞེས་པ་ནས། བུད་མེད་རིན་ཆེན་སྤངས་མི་བྱ། །ཞེས་པའི་བར་ཚིགས་བཅད་གཅིག་དོར་བར་གསུངས། སྤྱོད་རྒྱུད་འབྱུང་འདུལ་དང༌། བྱ་རྒྱུད་འོད་ཟེར་ཅན་
དང་སོར་འབྲང་གཉིས་ཏེ་གསུམ་གའི་དབང་འདྲེས་མར་བསྐུར་བའི་ཚེ། གསོལ་གདབ་ནས་ཐུན་མོང་གི་སྡོམ་བཟུང་གི་བར་དཀྱུས་དང་འདྲ་ཞིང༌། སྔགས་སྡོམ་འཛིན་པ་དེའི་གསོལ་འདེབས་དང་བཅས་པ་དོར། ཕྱག་ཀྱང༌། ཨོཾ་ན་མཿ ཏེ་ཧཱུཾ། ཞེས་སོགས་ཀྱིས་ཆོག་པར་བྱེད་ཅིང༌། དམ་བཞག་གཉིས་མི་དགོས། གཞན་རིགས་པའི་དབང་ལྔ་ཡན་ཆད་རྣལ་འབྱོར་རྒྱུད་དང་འདྲ་ཞིང༌། མིང་དབང་གི་སློབ་མ་ལ་མཆོད་པའི་མཇུག་ཏུ། དེ་ལྟར་རིག་པའི་དབང་ལྔ་ཐོབ་པ་ལ་བརྟེན་ནས་བྱ་སྤྱོད་ཀྱི་རྒྱུད་ཉན་པ་དང་བཤད་པ་དང་སྔགས་སྒྲུབ་པ་སོགས་ལ་དབང་བར་བྱས། ཞེས་བརྡ་སྤྲད། མཐའ་རྟེན་དུ་འཁོར་ལོ་དུང་དྲིལ་བུ་པོ་ཏི་རྣམས་དང༌། དུས་གསུམ་རྒྱལ་བ་ཀུན་གྱིས་བསྔགས་པ་ཡི། །ཐེག་མཆོག་ཆོས་ཀྱི་སྲིད་ལ་དབང་བསྒྱུར་བའི། །རྒྱལ་སྲིད་རིན་ཆེན་བདུན་གྱི་དབང་བསྐུར་བས། །བདུད་བཞིའི་གཡུལ་ལས་རྣམ་པར་རྒྱལ་གྱུར་ཅིག །ཨོཾ་སཔྟ་རཏྣ་ཨ་བྷི་ཥིཉྩ་མི། ཞེས་བརྗོད་དེ་རྒྱལ་སྲིད་སྣ་བདུན་དང། གང་ཞིག་རེག་ཅིང་མཐོང་ཐོས་དྲན་པས་ཀྱང། །མི་ཤེས་མུན་སེལ་ཕུན་ཚོགས་མཆོག་སྩོལ་བར། །རྒྱལ་བས་བྱིན་གྱིས་བརླབས་པའི་བཀྲ་ཤིས་རྫས། །དམ་པས་དབང་བསྐུར་དགེ་ལེགས་འབར་གྱུར་ཅིག །ཨོཾ་ཨཥྚ་བ་ཏྲ་བེ་མངྒ་ལམ་ཨ་བྷི་ཥིཉྩ་མི། ཞེས་བརྗོད་དེ་བཀྲ་ཤིས་རྫས་བརྒྱད་སྦྱིན། དེ་ནས་སྐོར་བ་དང་ལྷ་དབུལ་བྱས་ལ། དེ་ནི་ཁྱེད་རྣམས་དཀྱིལ་འཁོར་གྱི། །ཞེས་པ་ནས། སྒྲུབ་པ་པོ་རྣམས་རྒྱུད་ལ་སྦྱོར། །ཞེས་པའི་བར་ཤོ་ལོ་ཀ་
གཉིས་ཀྱིས་དབུགས་དབྱུང༌། དགེ་ལེགས་སུ་བྱེད་པའི་དཀྱིལ་འཁོར་གསུམ་གྱི་ཚེ། དཀྱིལ་འཁོར་དུ་འཇུག་པའི་སྐོར་མཐའ་དག་འབྱུང་འདུལ་སོགས་དང་འདྲ་ཞིང༌། དབང་དངོས་གཞིའི་ཚེ་ཆུ་དབང་གི་གསོལ་གདབ་ཀྱི་མཇུག་ཏུ། སློབ་མ་སྐད་ཅིག་གིས་དཀྱིལ་འཁོར་གྱི་གཙོ་བོར་བསྐྱེད། དབང་རྫས་བུམ་ཆུ་བསངས་སྦྱངས། སྟོང་པའི་ངང་ལས་ཨོཾ་ཧཱུཾ་ཏྲཱཾ་ཧྲཱིཿ ཨཱཿ རྣམས་ཡོངས་སུ་གྱུར་པ་ལས། ཡེ་ཤེས་ལྔའི་རང་བཞིན་གྱི་བུམ་ཆུར་གྱུར། ཅེས་བསྐྱེད་ཅིང༌། དབང་གི་ལྷ་རྣམས་སྤྱན་དྲངས་ཏེ། དབང་བསྐུར། ཆུའི་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་པ་ལས་རིགས་ལྔས་དབུ་བརྒྱན་ཅིང༌། དབང་གི་ལྷ་རྣམས་སློབ་མ་ལ་ཐིམ་པར་གྱུར། སློབ་མ་མཆོད། དེ་ལྟར་ཆུའི་དབང་ཐོབ། ཉོན་མོངས་པ་ལྔའི་དྲི་མ་སྦྱངས། རྣམ་པར་ཤེས་པ་ལྔ་གནས་བསྒྱུར། ལམ་མཚན་མ་མེད་པའི་རྣལ་འབྱོར་སྒོམ་པ་ལ་དབང༌། འབྲས་བུ་ཆོས་ཀྱི་སྐུ་མངོན་དུ་འགྱུར་བའི་ནུས་པ་ཁྱད་པར་ཅན་འཇོག །ཅེས་པ་བརྡ་སྤྲད། གཉིས་པ་ལ་སློབ་མ་གཙོ་བོར་བསྐྱེད། དབང་རྫས་ཅོད་པན་བསངས་སྦྱངས། སྟོང་པའི་ངང་ལས་ཨོཾ་ཧཱུཾ་ཏྲཱཾ་ཧྲཱིཿ ཨཱཿ རྣམས་ཡོངས་སུ་གྱུར་པ་ལས། དེ་བཞིན་གཤེགས་པ་རིགས་ལྔའི་རང་བཞིན་ཅོད་པན་དུ་གྱུར། དབང་ལྷ་སྤྱན་འདྲེན་པ་སོགས་ནས་སློབ་མ་མཆོད་པའི་བར་སྔ་མ་དང་འདྲ། དེ་ལྟར་ཅོད་པན་གྱི་དབང་ཐོབ། དྲི་མ་ལྔ་སྦྱངས། ཕུང་པོ་ལྔ་གནས་བསྒྱུར། ལམ་མཚན་མ་དང་བཅས་པའི་རྣལ་འབྱོར་སྒོམ་པ་ལ་དབང༌། འབྲས་བུ་གཟུགས་སྐུ་འགྲུབ་པའི་ནུས་པ་ཁྱད་པར་ཅན་
འཇོག །ཅེས་བརྡ་སྤྲད། འཁོར་ལོ། དུང༌། དྲིལ་བུ། པོ་ཏི། རྒྱལ་སྲིད་སྣ་བདུན། བཀྲ་ཤིས་རྫས་བརྒྱད་རྣམས་སྔར་ལྟར་བྱིན་པའི་རྗེས་སུ། དེ་ལྟར་ཆོས་སྟོན་པ་སོགས་ཀྱི་སློབ་དཔོན་དུ་བྱ་བའི་ཆེད་དུ་ཆོས་བཤད་པའི་རྗེས་སུ་གནང་བ་བྱིན་པས། བྱ་རྒྱུད་ཀྱི་དཀྱིལ་འཁོར་བྲི་སྒྲུབ་དང༌། ཆོས་ཉན་བཤད་སོགས་ལ་དབང་བར་བྱས། འཕྲིན་ལས་བཞིའི་སྒོ་ནས་འགྲོ་བའི་དོན་སྒྲུབ་པའི་ནུས་པ་བཞག །འབྲས་བུ་ཆོས་ཀྱི་འཁོར་ལོ་བསྒྱུར་བའི་གོ་འཕང་མྱུར་དུ་འཐོབ་པའི་སྐལ་བ་ཅན་དུ་བྱས་པ་ཡིན་ནོ། །ཞེས་བརྡ་སྤྲད་ལ། སྐོར་བ་མན་ཆད་འབྱུང་འདུལ་སོགས་དང་འདྲ། དེ་ཡང་ཕྱག་བཞེས་ཀྱི་རྒྱུན་ལ། འཁོར་ལོས་བསྒྱུར་དྲུག་གི་དབང་གི་ཚེ། རྡོར་འཕྲེང་དུ་མི་གསལ་བ་ཀྲྀ་ཡའི་སྒོས་ཆོས་རྣམས་དེ་ཉིད་ཀྱིས་ཁ་བསྐང་སྟེ་ཕྱག་ལེན་རྒྱས་པར་མཛད་སྣང་བས། དེས་ཁ་འགེངས་ཚུལ་ནི། གསོལ་གདབ་ནས། འཕྲེང་བའི་གཞུང་ལྟར་གྱི་ཡེ་ཤེས་འབེབས་ཆོག་གི་མཇུག་གི །ཧཱུཾ་ཧཿ ཨཛྷེ། ཞེས་པའི་སྔགས་ཀྱི་བར་དཀྱུས་བཞིན་བྱས་ལ། དེ་ནས། སླར་ཡང་བླ་མ་ལ་དཀྱིལ་འཁོར་གྱི་གཙོ་བོ་དངོས་ཡིན་སྙམ་པའི་མོས་གུས་དྲག་པོ་བྱས་པའི་རྐྱེན་གྱིས་བླ་མའི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དཀྱིལ་འཁོར་བའི་རྣམ་པར་སྤྱན་དྲངས་སློབ་མར་ཐིམ་པར་གྱུར། ཅེས་དང༌། དྲིལ་བུ་དཀྲོལ་བཞིན་དུ། འདི་དེ་དམ་ཚིག་རྡོ་རྗེ་སྟེ། །རྡོ་རྗེ་སེམས་དཔའ་ཞེས་སུ་བརྗོད། །རྡོ་རྗེ་ཡེ་ཤེས་བླ་མེད་འདི། །དེ་རིང་ཉིད་དུ་
འབབ་པར་ཤོག །ཨོཾ་བཛྲ་ཨ་བེ་ཤ་ཡ་ཨ་ཨ་ཨ། ཞེས་བརྗོད། མེ་ཏོག་འདོར་བའི་སྔགས་ལ། ཀྲྀ་ཡའི་གཞུང་རང་དུ། མེ་པྲ་ཡཙྪ་ཧཱུཾ། ཞེས་པ་དང༌། ཨཱ་ཁཾ་བཱི་རའི་བར་དུ་ཀླུ་བྱང་གི་ལུགས་ལྟར། ཧ་ཧ་ཧ་ཧ་ཧོཿ ཞེས་པ་བཅུག་ནས་འབྱུང་བས་བཞག་ཀྱང་རུང་བར་སེམས་སོ།། གཞུག་པའི་སྐོར་ལྷག་མ་འདྲ་ཞིང༌། དབང་དངོས་གཞིའི་ཐོག་མར་སྦྱངས་པ་ཉིན་འདིར་ཡང་བྱེད་དགོས། ཤིས་བརྗོད་ཀྱི་ཚེ། བཀྲ་ཤིས་གང་ཞིག་སེམས་ཅན་ཀུན་གྱི་སྙིང་ལ་གནས། །ཀུན་གྱི་བདག་ཉིད་རིགས་ཀུན་གྱི་ནི་བདག་པོ་མཆོག །སེམས་ཅན་མ་ལུས་སྐྱེད་མཛད་བདེ་བ་ཆེན་པོ་སྟེ། །དེས་ནི་དེང་ཁྱོད་དབང་བསྐུར་མཆོག་ལ་ཞི་བྱེད་ཤོག །བཀྲ་ཤིས་གང་ཞིག་མཐའ་དག་རྡོ་རྗེའི་རིགས་དང་ལྡན། །ཞེ་སྡང་ཟིལ་གནོན་སྐྱེ་བོ་ཡོངས་སུ་སྦྱོང་བ་པོ། །དེས་ནི་མི་བསྐྱོད་མགོན་པོ་ཞེས་བྱའི་མཚན་འཆང་བ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །བཀྲ་ཤིས་གང་ཞིག་མཐའ་དག་གཏི་མུག་རིགས་དང་ལྡན། །རྣམ་པར་སྣང་མཛད་རྟག་ཏུ་སྲིད་པའི་སྡུག་བསྔལ་འཕྲོག །གཏི་མུག་ཟིལ་གནོན་སྐྱེ་བོ་ཡོངས་སུ་སྦྱོང་བ་པོ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །བཀྲ་ཤིས་གང་ཞིག་མཐའ་དག་རིན་ཆེན་རིགས་དང་ལྡན། །དབུལ་བའི་སྡུག་བསྔལ་ཡོངས་སུ་གྲོལ་བའི་ཆེད་དུ་བརྩོན། །ང་རྒྱལ་ཟིལ་གནོན་སྐྱེ་བོ་ཡོངས་སུ་སྦྱོང་བ་པོ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །བཀྲ་ཤིས་གང་ཞིག་མཐའ་དག་ལས་ཀྱི་རིགས་དང་ལྡན། །བརྫུན་སྨྲར་དགའ་བ་རྣམས་ལ་སྙིང་རྗེའི་བདག་ཉིད་ཅན། །དེ་རྣམས་ཕྲག་
དོག་སྡིག་ལས་གྲོལ་བའི་གཉེན་པོ་སྟེ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །བཀྲ་ཤིས་གང་ཞིག་མཐའ་དག་པདྨའི་རིགས་དང་ལྡན། །འཇིག་རྟེན་དབང་ཕྱུག་སྲིད་པའི་དྲ་བ་འཇོམས་པ་པོ། །ཆགས་པ་ཟིལ་གནོན་སྐྱེ་བོ་ཡོངས་སུ་སྦྱོང་བ་པོ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །ཅེས་རིགས་ལྔའི་ཤིས་བརྗོད་ཡོངས་རྫོགས་དང༌། ཕུན་སུམ་ཚོགས་པ་མངའ་བ་ཞེས་སོགས་ཀྱིས་ཤིས་པ་བརྗོད་དེ་སློབ་མ་ལ་མེ་ཏོག་གཏོར། དབང་བསྐུར་རྡོ་རྗེ་ཞེས་པ་མན་ཆད་དཀྱུས་ལྟར་དང༌། ཆུ་དབང་གི་དབང་ལྷ་བསྟིམ་པའི་རྗེས་སུ། བདེ་བ་ཆེན་པོ་ཆགས་པ་ཆེ། །རྡོ་རྗེ་ཆེན་པོ་ནོར་ཆེན་པོ། །ཤེས་རབ་ཆེན་པོ་ཡེ་ཤེས་ཆེ། །རྡོ་རྗེ་སེམས་དཔའ་དེང་བདག་སྒྲུབ། །སངས་རྒྱས་ཀུན་གྱི་རྡོ་རྗེ་ཆེ། །རྡོ་རྗེའི་དབང་ཕྱུག་བླ་ན་མེད། །དབང་བསྐུར་ཐམས་ཅད་ཀུན་དོན་དུ། །དངོས་གྲུབ་ཐམས་ཅད་བདེ་བར་སྩོལ། །ཇི་བཞིན་དང་པོའི་སངས་རྒྱས་དོན་དམ་བདེ་བ་སྟེར་བ་པོ། །ཇི་བཞིན་འདོད་པ་ཐར་པ་ནོར་དང་ཆོས་རྣམས་སྟེར་བ་པོ། །ཇི་བཞིན་ཡེ་ཤེས་ལྔ་དང་ཤིན་ཏུ་དགའ་བའི་གྲོགས་བྱེད་པ། །ཇི་བཞིན་ཕྱག་ན་རྡོ་རྗེ་བདེ་བ་ཆེན་པོའི་མགོན་པོ་ཉིད། །ཛ་ཨ་ཨཱ་ཨི་བུདྡྷ་པ་ར་མ་ཐེ་དེ་ཧ་ཨོ། །ཛ་ཨ་ཀཱ་མོ་མོཀྵ་དྷ་ཎ་དྷརྨཱ་ད་ཨ་ཨོ། །ཛ་ཨ་པཉྫ་ཛྙཱ་ན་སུ་ར་ཨ་ས་ཧཱ་ཨ་ཨོ། །ཛ་ཨ་བཛྲ་པཱ་ཎི་མཧཱ་སུ་ཁ་ཧ་ན་ཨོ། །ཞེས་པ་རྡོ་རྗེའི་གླུའི་ཚིག་འདི་རྣམས་ཀྱི་རྗེས་ཟློས་བྱེད་དུ་གཞུག །ཆུ་དབང་གི་དག་པ་མན་ཆད་རིག་པའི་དབང་ལྷག་མ་རྣམས་དཀྱུས་དང་འདྲ། སློབ་དཔོན་གྱི་དབང་གི་བརྟན་བྱེད་ཆུ་
དབང་རྫོགས་ནས་སློབ་མ་ལ་མཆོད་པའི་མཇུག་ཏུ། སླར་ཡང་སློབ་མ་རྣམས་རྡོ་རྗེ་སེམས་དཔར་གྱུར། བཛྲ་སཏྭ་པུཥྤེ་ནས། ཤཔྟའི་བར་གྱིས་མཆོད། སློབ་མ་ལ་མེ་ཏོག་གཏོར་ཞིང་སྒེག་པའི་རྣམ་པ་དང་བཅས་པའི་སྒོ་ནས། དེང་ནས་བརྩམས་ཏེ་རྫོགས་སངས་རྒྱས། །སྲས་དང་བཅས་པ་རྣམ་རོལ་ཕྱིར། །རྡོ་རྗེ་བསྙེམས་མའི་རྣལ་འབྱོར་གྱིས། །དགའ་མཆོག་བདེ་བའི་མཆོད་པ་གྱིས། །ཨཿ ཞེས་བརྗོད་ཅིང་སྒེག་མོའི་ཚུལ་གྱིས་མཆོད་པའི་རྗེས་སུ་གནང་བ་སྦྱིན། དེ་བཞིན་དུ། སྒེག་དང་བཅས་པས་ཕྲེང་བ་འཕངས། །སངས་རྒྱས་ཐམས་ཅད་མཆོད་པར་གྱིས། །འདི་རྣམས་འབྲལ་བར་མི་འགྱུར་ཏེ། །ཕྲེང་བ་འདི་ནི་རྒྱན་ཡིན་ནོ། །ཨོཾ་ཞེས་ཕྲེང་བ་མ་དང༌། ལུས་ཅན་ཀུན་ལ་དམ་ཆོས་ཀྱི། །གླུ་ནི་ཁྱོད་ཀྱིས་བླང་བར་གྱིས། །དེ་ཡིས་བདེ་གཤེགས་དངོས་གྲུབ་ན། །ཤིན་ཏུ་བདེ་བ་ཐོབ་པར་འགྱུར། །གྲི་ཞེས་གླུ་མ་དང༌། དེ་ཉིད་ཐལ་མོའི་གར་གྱིས་ན། །རྫོགས་སངས་རྒྱས་ལ་རྗེས་ཆགས་པའ། །སངས་རྒྱས་འདུལ་བའི་འཕྲིན་ལས་ཀྱིས། །གར་མཁན་ཚུལ་དུ་འགྱུར་བར་གྱིས། །ཧོ་ཞེས་གར་མ་དང༌། རྫོགས་སངས་རྒྱས་ལ་སྤོས་ཕུལ་བས། །དམ་ཚིག་བརྟུལ་ཞུགས་ལེགས་བསྒོམ་པས། །ལུས་ཅན་བདེ་གཤེགས་ཆ་ལུགས་སུ། །ཡེ་ཤེས་ཀྱི་ནི་ཚུལ་དུ་གྱིས། །ཨཿ ཞེས་བདུག་སྤོས་མ་དང༌། སངས་རྒྱས་རྣམས་ལ་མེ་ཏོག་དོར། །བྱང་ཆུབ་ཡན་ལག་ཚོགས་གྱུར་པས། །མཚན་དང་དཔེ་བྱད་ལྡན་པ་ཡི། །བདེ་གཤེགས་སྐུ་ནི་ཐོབ་པར་གྱིས། །བྷྲུཾ་ཞེས་མེ་ཏོག་མ་དང༌། ཆོས་ཀྱི་མེ་ནི་ལེགས་སྦར་
བས། །རྡོ་རྗེ་ཆོས་དང་འདྲ་བར་ རང༌། །སེམས་ཅན་མ་རིག 
་ལྡོང་རྣམས་ལ། །ཡེ་ཤེས་སྣང་བས་གསལ་བར་གྱིས། །པྲ་ཞེས་མར་མེ་མ་དང༌། རྒྱལ་བ་རྣམས་ལ་དྲི་ཕུལ་བས། །ཚུལ་ཁྲིམས་ཏིང་འཛིན་ཤེས་རབ་དང༌། །རྣམ་གྲོལ་ཡེ་ཤེས་གཟིགས་པ་ཡི། །བྱང་ཆུབ་ལུས་ཅན་རྣམས་ལ་བསྐོར། །གཿ ཞེས་དྲི་ཆབ་མ་སྟེ་སྒེག་སོགས་བརྒྱད་ཀྱིས་མཆོད་པའི་རྗེས་སུ་གནང་བ་སྦྱིན། དེ་ཁོ་ན་ཉིད་དང་ལས་ཀྱི་རིམ་པ་བརྗོད་པ་འདྲ་ཞིང༌། སྔགས་དབང་སྐབས་དྲུག་ཀའི་སྔགས་གཏད། མིག་སྨན། མེ་ལོང༌། མདའ་འཕང་བ། དབང་གི་དག་པ་རྣམས་དཀྱུས་ལྟར་རོ། །གསང་དབང་གི །སློབ་མ་འོད་དཔག་མེད་དུ་གྱུར། ཞེས་པ་ཡན་ཆད་དཀྱུས་ལྟར་དང༌། དེ་ནས་བཅོམ་ལྡན་ཞི་བ་ཆེན་པོ་ཀྱཻ། །རྡོ་རྗེ་རྣལ་འབྱོར་གཅིག་བཞེད་པ། །མི་ཕྱེད་ཕྱག་རྒྱ་སྒྲུབ་པ་པོ། །རྡོ་རྗེའི་སྦྱོར་ལས་ཡང་དག་བྱུང༌། །ཇི་ལྟར་ཁྱོད་ནི་བདག་ཉིད་ཚེ། །ཁྱབ་བདག་བདག་ཀྱང་དེ་འདྲར་མཛོད། །འཁོར་བ་འདམ་གྱི་ཚོགས་ནང་དུ། །བྱིང་བ་སྐྱབས་མེད་བདག་ལ་སྐྱོབ། །ཅེས་བླ་མ་ལ་བསྟོད་པའི་རྗེས་ཟློས་བྱེད་དུ་གཞུག །འདས་པའི་རྡོ་རྗེ་འཆང་སོགས་ཀྱིས། །ཞེས་པ་མན་ཆད་དཀྱུས་ལྟར་རོ། །ཤེས་རབ་ཡེ་ཤེས་ཀྱི་དབང་ལ། །ཁྱོད་ཀྱི་ཞབས་ཀྱི་བཀའ་དྲིན་གྱིས། །གསང་བའི་དབང་བསྐུར་བླ་མེད་ཐོབ། །ཤེས་རབ་ཡེ་ཤེས་དབང་བསྐུར་གྱིས། །མགོན་པོ་རྗེས་སུ་བཟུང་བར་མཛོད།། ཅེས་པའི་ཚིགས་བཅད་ཀྱི་སྒོ་ནས་གསོལ་བ་འདེབས་ཤིང༌། རིག་མ་གཏོད་པའི་ཚིགས་བཅད་ཀྱི།
ནོར་བུའི་ནང་དུ་ཆུད་པར་བལྟ། །ཞེས་པའི་མཇུག་ཏུ། དགའ་སྦྱིན་གནས་སྦྱིན་ལྷ་མོ་འདི། །སྣ་ཚོགས་གཟུགས་ཅན་ཡིད་འོང་མ། །ཟུངས་ཤིག་ཟུངས་ཤིག་སེམས་དཔའ་ཆེ། །ཁྱེར་ལ་མཆོད་པ་རྟག་ཏུ་གྱིས། །ཞེས་པའི་ཚིགས་བཅད་བསྣན་ནས་བརྗོད་ལ། རིག་མ་དེས་ཀྱང་གུར་ཀུམ་ལ་སོགས་པས། ཞེས་པ་མན་ཆད་དང༌། དབང་བཞི་པ། རིག་པའི་བརྟུལ་ཞུགས། རྡོ་རྗེའི་བརྟུལ་ཞུགས། སྤྱོད་པའི་བརྟུལ་ཞུགས་གསུམ། ལུང་བསྟན། སྤྱིའི་ཆོས་བཤད་ཀྱི་རྗེས་གནང༌། འཁོར་ལོ། དུང༌། པོ་ཏི། དྲིལ་བུ་བཞི་དང༌། སོ་སོའི་ཆོས་བཤད་ཀྱི་རྗེས་སུ་གནང་བ། རིགས་ལྔའི་ཕྱག་མཚན་གཏོད་པ་རྣམས་དཀྱུས་བཞིན་བྱས་ནས། སླར་ཡང་ཀྲྀ་ཡ་ལས། རྣམ་པ་སྣ་ཚོགས་ལས་བྱས་པའ། །རིན་ཆེན་བདུན་ཡང་གཏད་པར་བྱ། །གྲི་གུག་དང་ནི་ཁ་ཊྭཱཾ་ག །བགྲང་ཕྲེང་གླེགས་བམ་སམ་འབོ་ར། །གྱོ་མོ་རྣལ་འབྱོར་དབྱུག་པ་ཡང༌། །པདྨའི་ལག་པའི་ལྷམ་དང་ན། །རྣལ་འབྱོར་པ་ཡི་སྒོམ་ཐག་རྣམས། །ལེགས་པར་དགའ་བའི་བསམ་པ་ཡིས། །སྔགས་ཆེན་དེ་ཡིས་སྦྱིན་པར་བྱ། །ཞེས་གསུངས་པ་ལྟར། རིན་ཆེན་སྣ་བདུན་བཟུང་ལ། མ་འོངས་པ་ན་ཐུབ་པའི་དབང་པོ་ཡི། །གོ་འཕང་ཐོབ་ཅིང་འཇིག་རྟེན་འཇིག་རྟེན་ལས། །འདས་པའི་དབང་ཕྱུག་བླ་མེད་ཐོབ་ཕྱིར་དུ། །རིན་ཆེན་སྣ་བདུན་རྗེས་གནང་སྦྱིན་པར་བྱ། །ཨོཾ་སཔྟ་རཏྣ་ཨ་བྷི་ཥིཉྩ་མཾ། ཞེས་བརྗོད་ལ་སྦྱིན། གྲི་གུག །ཁ་ཊྭཱཾ་ག །བགྲང་ཕྲེང་རྣམས་བཟུང་ལ། མ་རིག་གཟུང་འཛིན་རྣམ་རྟོག་བཅད་པའི་ཕྱིར། །གྲི་གུག་རྗེས་གནང་རབ་ཏུ་
སྦྱིན་བྱ་ཞིང༌། །ཞི་རྒྱས་དབང་དང་མངོན་སྤྱོད་ལ་སོགས་པའ། །འཕྲིན་ལས་གྲུབ་ཕྱིར་ཁ་ཊྭཱཾ་བགྲང་ཕྲེང་སྦྱིན། །ཨོཾ་གརྟི་ཀ་ཁ་ཊྭཱཾ་ཀ་མཱ་ལ་ཨ་བྷི་ཥིཉྩ་མཾ། ཞེས་བརྗོད་ལ་སྦྱིན། གླེགས་བམ་ཐོད་ལེ་ཀོར། སམ་འབོ་ར་རྣམས་བཟུང་ལ། ཕྱི་ནང་གསང་བ་དེ་ཁོ་ན་ཡི་ཆོས། །བསམ་པ་ཇི་བཞིན་གཞན་ལ་བསྟན་པའི་ཕྱིར། །རང་རང་རྒྱུད་ཀྱི་གླེགས་བམ་དག་དང་ན། །ཐོད་ལེ་ཀོར་དང་སམ་འབོ་ར་རྣམས་སྦྱིན། །ཨོཾ་པུསྟི་ཀ་སཾ་པུ་ཊི་ཀ་ཨ་བྷི་ཥིཉྩ་མཾ། ཞེས་བརྗོད་ལ་སྦྱིན། དེ་ནས་རྫ་སྣོད་དང༌། རྣལ་འབྱོར་དབྱུག་པ་དང༌། ལྷམ་དང༌། སྒོམ་ཐག་རྣམས་བཟུང་ལ། རྒྱལ་སྲིད་ལ་སོགས་སྲིད་པའི་བདེ་བ་ལ། །ཆགས་པ་སྤངས་ནས་བསོད་སྙོམས་འཚོ་བ་ལ། །བརྟེན་ནས་མི་ཆོད་བསམ་གཏན་བྱ་ཕྱིར་དུ། །གྱོ་མོའི་སྣོད་དང་རྣལ་འབྱོར་དབྱུག་པ་དང༌། །ལྷམ་དང་སྒོམ་ཐག་རྣམས་ཀྱང་སྦྱིན་པར་བྱ། །ཨོཾ་ཀ་ར་བ་ར་ཡོ་ག་དཎྜ་ཡ་ཊ་ཀཾ་ཨ་བྷི་ཥིཉྩ་མཾ། ཞེས་བརྗོད་ལ་སྦྱིན། དེ་ནས། ཐེ་ཚོམ་མེད་པའི་བསམ་པ་ཡིས། །ཁྱོད་འདིར་བློ་གྲོས་ངན་མི་བྱ། །གསང་སྔགས་སྤྱོད་པའི་ཚུལ་མཆོག་ན། །མཉམ་མེད་རང་གིས་རབ་གསལ་བྱ། །དེ་ལྟར་བྱས་ནས་སངས་རྒྱས་ལ། །ཕན་བཏགས་བྱས་པ་གཟོ་བ་ཡིན། །རྡོ་རྗེ་འཛིན་པ་དེ་ཀུན་ཡང༌། །ཁྱེད་ལ་རྟག་ཏུ་ཀུན་བསྲུང་མཛད། །ཤེས་རབ་ཐབས་ཀྱི་རང་བཞིན་དག །ཡིད་བཞིན་ནོར་བུ་ལྟར་མཐོ་བས། །སྐྱོ་མེད་དོགས་དང་བྲལ་བ་ཡིས། །དེ་ལྟར་སེམས་ཅན་དོན་གྱིས་ཤིག །ཅེས་བརྗོད། དེ་ནས་སྐོར་བ་དང༌། ལྷ་ལ་དབུལ་བ། དབུགས་དབྱུང།
དེང་བདག་སྐྱེ་བ་ཞེས་སོགས་ཆེད་དུ་བརྗོད་པའི་རྗེས་ཟློས་བྱ་བ་རྣམས་སྤྱི་དང་འདྲ་ཡང༌། ཉིན་འདིར་དཀྱིལ་འཁོར་ལ་བསྐོར་བ། ལྷ་དབུལ་སོགས་ཀྱང་དམིགས་པ་ཙམ་མ་ཡིན་པར་དངོས་སུ་བྱེད་པ་ཕྱག་ལེན་ཡིན་པས། བསྟན་པའི་རྒྱུན་ལ་དགོངས་ཏེ་དམ་པ་གོང་མ་རྣམས་ཀྱི་ཕྱག་བཞེས་མཐའ་དག་ཆ་ཕྲ་མོ་ནས་ཉམས་པ་མེད་པ་གལ་ཆེའོ།། ཞེས་པ་འདི་ནི་དགེ་བའི་བཤེས་གཉེན་དམ་པ་དུས་འཁོར་སློབ་ཟུར་ངག་དབང་ཕུན་ཚོགས་ནས་བསྐུལ་ཏེ། ཆུ་མོ་ཕག་གི་ལོ་རྒྱལ་བའི་ལུང་གིས་ཟིན་པའི་ཆོས་གྲྭ་ཆེན་པོ་དཔལ་ལྡན་བཀྲ་ཤིས་འཁྱིལ་གྱི་ཚོགས་ཡོངས་ལ་རྡོ་རྗེ་ཕྲེང་བའི་དབང་རྫོགས་པར་ཕུལ་སྐབས། ྋསྐྱབས་མགོན་རྡོ་རྗེ་འཆང་ཆེན་པོ་རྗེ་བཙུན་དཀོན་མཆོག་འཇིགས་མེད་དབང་པོའི་ཞལ་སྔ་ནས་ཀྱིས་མཛད་པའི་འཕྲེང་བའི་དབང་ཆོག་གི་ཁ་སྐོང་འདི་འདྲ་ཞིག་དགོས་ཚུལ་བྱུང་བ་ལྟར་ྋབཙུན་པ་དཀོན་མཆོག་བསྟན་པའི་སྒྲོན་མེས་འཕྲེང་བའི་དབང་ཆོག་རྣམས་དང༌། ཀྲྀ་ཡའི་རྒྱ་གཞུང་ལ་གཞིག་སྟེ་བཀོད་པའོ།། །།