ཡལ་འདབ་དང་པོ་ནས་བཅུ་པ་བར།
ལེགས་བཤད་དཔལ་གྱི་དུམ་བུ་ལས་འཕྲོས་པའི་གཏམ་དཔག་བསམ་ལྗོན་འབྲས་ཞེས་བྱ་བ་བཞུགས་སོ། །ན་མོ་མ་ཧཱ་མུ་ན་ཡེ། རྒྱལ་བ་མཆོག་གི་ཡོན་ཏན་རྒྱ་མཚོ་ལ། །རྟག་པར་རབ་གོམས་མཁས་དབང་ལྷག་མ་ཅན། །དགེ་བའི་དབང་པོས་བརྗོད་དོན་རབ་ཕྱེས་པའི། །གཏམ་རྒྱུད་སྨྲ་ལ་དྲན་པ་ཉེ་བར་བཞག །དེ་ཡང་སེམས་ཅན་ཐམས་ཅད་ཀྱི་སྐྱབས་གནས་མཐར་ཐུག་ཏུ་འོས་པ་ནི་སྟོན་པ་སངས་རྒྱས་ཏེ། བསྔགས་འོས་བསྔགས་བསྟོད་ལས། སྟོན་པ་ཐུགས་རྗེ་ཆེ་མངའ་བ། །བརྩེ་བར་ལྡན་ཞིང་ཐུགས་བརྩེར་མཛད། །དེར་བརྩོན་ལེ་ལོ་མི་མངའ་བ། །ཁྱོད་དང་འདྲ་བ་གཞན་སུ་མཆིས། །ཁྱོད་ནི་སེམས་ཅན་ཀུན་གྱི་མགོན། །
སྤྱི་ཡི་རྩ་ལག་བཟང་པོ་ཞེས། །ཞེས་སོ། །དེས་ན་རྒྱལ་བ་མཆོག་གི་རྗེས་སུ་སློབ་པ་རྣམས་ཀྱིས་དེའི་རྣམ་པར་ཐར་པ་ལ་ཐོས་བསམ་བྱེད་པ་དང་གཞན་ལ་སྒྲོགས་པ་སོགས་ནི་དོན་དང་བཅས་ཤིང་ཤིན་ཏུ་འོས་པ་སྟེ། སློབ་དཔོན་ཕྱོགས་ཀྱི་གླང་པོས། གང་ལ་རྣམ་པ་ཐམས་ཅད་དུ། །ཡོན་ཏན་ཐམས་ཅད་གནས་གྱུར་པ། །གལ་ཏེ་སེམས་ཤིག་ཡོད་ན་ནི། །དེ་ཉིད་ལ་ནི་སྐྱབས་འགྲོ་ཞིང་། །དེ་བསྟོད་དེ་ནི་བཀུར་བ་དང་། །དེ་ཡི་བསྟན་ལ་གནས་པའི་རིགས། །ཞེས་གསུངས་པས་འདིར་སྙན་དངགས་དཔག་བསམ་འཁྲི་ཤིང་གི་གཞུང་དོན་མདོར་བསྟན་ལེགས་བཤད་དཔལ་གྱི་དུམ་བུའི་གཏམ་རྒྱུད་གོ་དཀའ་བ་རྣམས་ཅུང་ཟད་སྤྲོས་པར་བྱ་བ་ནི་སྐབས་སུ་བབས་པ་འདི་ཉིད་དོ། །༈ ཡལ་འདབ་དང་པོ་ནི། འདུལ་བ་༼ཁ༽ལུང་ལས། སངས་རྒྱས་འདོད་ཆགས་བྲལ་ཐོས་ཤིང་། །གླང་པོ་དྲེགས་པའི་ཤས་ཆེན་དང་། །འཇིག་རྟེན་སྡུག་བསྔལ་གྱུར་མཐོང་ནས། །
ངས་ནི་བྱང་ཆུབ་སེམས་བསྐྱེད་དོ། །ཞེས་འབྱུང་བའི་དོན་ཏེ། ལུང་སྨན་གྱི་གཞི་ལས། སྟོན་པ་ལ་རྒྱལ་པོ་གསལ་རྒྱལ་གྱིས། སྟོན་པས་ཐོག་མར་གང་དུ་སེམས་བསྐྱེད་ལགས་ཞུས་པས། བཀའ་སྩལ་པ། སྔོན་རྒྱལ་པོ་འོད་ལྡན་ཞེས་བྱ་བའི་ཡུལ་དུ་གླང་པོ་རིན་པོ་ཆེ་མེ་ཏོག་ཀུ་མུ་དའི་མདོག་ལྟར་དཀར་བ་ཡན་ལག་བདུན་ཤིན་ཏུ་གནས་པ་ཞིག་བྱུང་བ། དེ་རྒྱལ་པོ་འོད་ལྡན་གྱིས་མཐོང་ནས་གླང་པོ་འདུལ་མཁན་ལ། འདི་དུལ་བར་གྱིས་ལ་ང་ལ་ཕུལ་ཞིག་གསུངས་སོ། །དེར་གླང་པོ་འདུལ་མཁན་གྱིས་དུལ་བར་བྱས་ནས་རྒྱལ་པོ་ལ་ཕུལ་བ་དང་། རྒྱལ་པོས་གླང་པོ་ལ་ཞོན་འདུལ་མཁན་ཡང་གོང་དུ་ཞོན་ཏེ་རི་དྭགས་གཤོར་དུ་སོང་བ་ན་གླང་པོ་དེས་གླང་མོའི་དྲི་ཚོར་བའི་རྗེས་སུ་རྒྱུགས་ནས་རླུང་ལྟར་ཁྱེར་བ་དང་། རྒྱལ་པོས་འདུལ་མཁན་ལ་ནམ་མཁའ་འགུལ་བ་འདྲ་ཞིང་ཕྱོགས་ཀུན་མྱུལ་དུ་འགྲོ་བ་འདྲ་བ་འདི་ཟློགས་ཤིག །དེས་ཟློག་མ་ནུས་ཏེ་རྒྱལ་པོ་ལ་འདི་མི་ཐུལ་གྱིས་ཤིང་གི་ཡལ་ག་ལ་འཇུས་མཛོད་སྨྲས་པས། རྒྱལ་པོས་དེ་ལྟར་བྱས་ཏེ་སྲོག་གི་འཇིགས་པ་ལས་ཐར་རོ། །དེ་ནས་རྒྱལ་པོས་གླང་རྫི་ལ་ཁྱོད་ཀྱིས་གླང་པོ་མ་ཐུལ་བ་ང་ལ་ཕུལ་གསུངས། དེས་ལྷ་བདག་གིས་ཤིན་ཏུ་ཐུལ་ཡང་བ་གླང་མོའི་དྲི་ཚོར་ནས་ཉན་ཏུ་མ་བཏུབ་བོ། །འོན་ཀྱང་དཔྱད་དྲན་ཏེ་ལོག་མཆིའོ་ཞུས་སོ། །དེ་ནས་ཞག་བདུན་ལོན་པ་དང་གླང་པོ་མྱོས་པ་དང་བྲལ་ཞིང་དཔྱད་དྲན་ཏེ་རང་ཡུལ་དུ་ལོག་པས་འདུལ་མཁན་གྱིས་རྒྱལ་པོ་ལ་གླང་པོ་མཆིས་ལགས་སོ། །རྒྱལ་པོས་སྨྲས་པ་ཁྱོད་ཀྱིས་འདི་མ་ཐུལ་ལོ། །ལྷ་ཐུལ་ལོ། །ཅིས་མངོན། ཉིད་ཀྱི་སྤྱན་སྔར་བབ་
པར་བགྱིའོ་ཞེས་གསོལ་ནས་ལྕགས་ཀྱི་ཐུ་ལུམ་མེས་བསྲེགས་ཏེ་དཔྱད་ཀྱི་སར་ཁྱེར་ནས་བྱིན་པས། བག་ཚ་བ་མེད་པར་ལེན་ནོ། །གླང་རྫིས་གསོལ་པ། ལྷ་ལེན་དུ་ནི་བཏུབ་ཀྱང་འགུམ་པར་འགྱུར་ལགས་སོ། །རྒྱལ་པོས། ཀྱེ་མཁས་པ་དེ་ལྟར་ཤིན་ཏུ་དུལ་བ་འདིས་བདག་ཅག་གཡེངས་པ་ལ་རྒྱུ་ཅི་ཡོད། གླང་རྫིས་གསོལ་པ། བདག་གིས་སྔར་སྨྲས་པ་བཞིན་ལུས་དུལ་ཀྱང་སེམས་མ་དུལ་བས་ལན་ནོ། །རྒྱལ་པོས་སེམས་འདུལ་ཤེས་པ་སུ་ཡིན་དྲིས་པས། དེའི་ཚེ་གླང་རྫི་དེ་ལ་ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་ཞུགས་པའི་ཕྱིར་དེས་སྨྲས་པ། རྒྱལ་པོ་ལུས་དང་སེམས་གཉིས་ཀ་འདུལ་བ་ནི་སངས་རྒྱས་བཅོམ་ལྡན་འདས་སོ། །རྒྱལ་པོ་ཆེན་པོ་སངས་རྒྱས་མཐུ་བོ་ཆེ། །ཉོན་མོངས་སྤངས་པ་དཔའ་བོ་སྟོབས་ལྡན་པ། །དེ་དང་གང་ཟག་དེ་འདྲར་རྗེས་འབྲང་བ། །དེ་དབང་འདིར་ནི་གཟུགས་མེད་སེམས་འགྱུར་རོ། །ཞེས་སོགས་སངས་རྒྱས་ཀྱི་ཡོན་ཏན་རྒྱ་ཆེར་བསྒྲགས་པས། རྒྱལ་པོས་བཅོམ་ལྡན་འདས་རྣམས་ཀྱི་བརྩོན་འགྲུས་དང་སྟོབས་ཐོས་ནས་ཤིན་ཏུ་དད་དེ། སྦྱིན་པ་ནི་བྱིན། བསོད་ནམས་ནི་བསགས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་པ། སྦྱིན་པ་རྒྱ་ཆེན་གྱུར་པ་འདི་ཡིས་སུ། །འགྲོ་བར་རང་བྱུང་སངས་རྒྱས་གྱུར་ནས་ནི། །སྔོན་གྱི་རྒྱལ་བ་རྣམས་ཀྱིས་མ་བསྒྲལ་བ། །སྐྱེ་བོའི་ཚོགས་རྣམས་བདག་གིས་བསྒྲལ་བར་བྱ། །བདག་གིས་སྐྱེ་དགུ་ལེགས་བསྐྱངས་ལས་བྱུང་བའམ། །བཏང་བ་ལས་བྱུང་བསོད་ནམས་ཡོད་པ་གང་། །དེས་ནི་སངས་རྒྱས་ཉིད་འཐོབ་འཇིག་རྟེན་དག །
འདོད་པའི་རིམས་ནད་ལས་ནི་ཐར་བར་བྱ། །ཞེས་བྱང་ཆུབ་མཆོག་ཏུ་ཐུགས་བསྐྱེད་པར་གསུངས་སོ། །༈ ཡལ་འདབ་གཉིས་པ་ནི། མདོ་སྡེ་༼ཨ༽ལས། བགོ་བཤའ་དག་གི་རྣམ་པར་སྨིན། །ཇི་ལྟར་དོན་ཆེན་གྱུར་པ་དེ། །དྲང་སྲོང་ཆེ་རྣམས་གསུངས་པ་བཞིན། །ཞེས་འབྱུང་བའི་དོན་བསྡུས་ཏེ་བརྗོད་ན། སྔོན་བྱུང་བ་འདས་པའི་དུས་སུ་རྒྱལ་པོའི་ཕོ་བྲང་ཨ་རིཥྚིར་རྒྱལ་པོ་དཔལ་གྱི་སྡེ་ཞེས་བྱ་བ་སྟོབས་ཀྱི་འཁོར་ལོས་སྒྱུར་བ་ཞིག་བྱུང་། དེ་ལ་བཙུན་མོ་རྒྱལ་བའི་འོད་དང་བློན་པོ་སྟོང་ཕྲག་བཅུ་གཉིས་ཡོད། བློན་པོའི་མཆོག་གི་ནི་བློ་གྲོས་ཆེན་པོ་ཡིན། ཕོ་བྲང་གི་སྒོ་བཞི་ནས་སྦྱིན་པ་རྒྱ་ཆེན་པོ་གཏོང་ཞིང་འགྲོ་བའི་དབུལ་བ་བསལ་ཏེ་འབངས་ཚེ་འཕོས་པ་རྣམས་ཀྱང་དེའི་མཐུས་ལྷའི་ཡུལ་དུ་སྐྱེས་ཏེ། ལྷ་རྣམས་འཕེལ་ཞིང་། ལྷ་མ་ཡིན་རྣམས་འགྲིབ་བོ། །རྒྱུ་དེའི་ལྷའི་དབང་པོ་བརྒྱ་བྱིན་གྱིས་མཐོང་ནས་ལྷའི་ཚོགས་ལ་དེ་ཡི་བསྔགས་པར་བརྗོད་དོ། །ནམ་ཞིག་གི་ཚེ་བཙུན་མོ་དམ་པའི་རྨི་ལམ་ན། སྟན་བཟང་པོ་ལས་བབ་ཅིང་སླར་འདུག་པ་དང་། རང་གི་མིག་ཕྱུང་བ་སླར་ཐོབ་པ་དང་། དཔུང་པ་གཡས་པ་བཅད་པ་ཚུར་སྐྱེས་པ། མི་མ་ཡིན་པས་རྒྱལ་པོའི་དཔུང་པ་གཡོན་པ་བཅད་དེ་སླར་སྐྱེ་བ་སོགས་ལྟས་ངན་པ་རྨིས་པས་འཇིགས་ཤིང་སྐྲག་སྟེ་རྒྱལ་
པོ་ལ་རྒྱུ་མཚན་ཞུས་པས། མཁྱེན་བཞིན་དུ་བཙུན་མོར་གནོད་པ་མི་འབྱུང་བར་སེམས་གསོ་གནང་། དེ་བཞིན་བློན་པོ་མཆོག་གི་རྨི་ལྟས་ཀྱང་ཤིན་ཏུ་འཁྲུགས་ཤིང་སྡུག་བསྔལ་བར་གྱུར་ནས་མཚན་མཁན་ལ་དྲིས་པས་ཀྱང་རྒྱལ་པོའི་སྐུ་ལུས་སློང་མཁན་འོང་བར་ལུང་བསྟན། བློན་པོ་སྟོང་ཕྲག་བཅུ་གཉིས་པོར་རྨི་ལྟས་ངན་པ་ལྔ་སྟེ། བྱ་ཁྲས་རྒྱལ་པོའི་གདུགས་དང་ཅོད་པན་ཕྲོགས་ནས་སླར་བྱིན་པ། སྐྱེ་བོ་ཐམས་ཅད་ཀྱི་མགོ་བཅད་པ་སླར་བྱུང་བ། མིག་ཐམས་ཅད་བྲུས་པ་སླར་སོས་པ། རྐང་ལག་བཅད་པ་སླར་སྐྱེས་པ། རྒྱལ་པོ་སེངྒེའི་ཁྲི་ལས་བབས་ནས་སླར་འཛེགས་པར་བརྩོན་པ་སོགས་རྨིས་པས་དེ་དག་ཀྱང་འགྱོད་པ་ཆེ་བར་སྐྱེས་སོ། །འཛམ་བུའི་གླིང་གི་མི་ཐམས་ཅད་རྒྱལ་པོའི་སྐུ་ལུས་སློང་བ་འོང་བར་ཤེས་ནས་མྱ་ངན་གྱིས་ངུ་བའི་སྒྲ་གསན་ཀྱང་། རྒྱལ་པོ་ནི་ཐུགས་སྟོབས་ལྷག་པར་རྒྱས་ནས་དགའ་ཞིང་སྤྲོ་བ་བཅས་ཏེ་དངོས་པོ་ཐམས་ཅད་བདེན་པར་མ་གྲུབ་པར་སྒྱུ་མ་ལྟ་བུའི་གཏམ་གྱིས་མངའ་འོག་གི་དབུགས་ཕྱུང་ངོ་། །དེའི་ཚེ་རྒྱལ་པོའི་ཕོ་བྲང་གི་བྱང་ཕྱོགས་སུ་རི་བོ་གཅིག་ན་དྲང་སྲོང་ལྔ་བརྒྱ་ཙམ་གནས་པ་ལས་གཅིག་རྒྱལ་པོའི་ཕོ་བྲང་དུ་འོང་བས། བཙུན་མོ་རྒྱལ་བའི་འོད་མཐོང་མ་ཐག །སྐྱེ་བ་སྔ་མར་རང་གི་ཆུང་མར་གྱུར་པའི་རྒྱུས་དེ་འདོད་ཆགས་སྐྱེས་ནས་ཡིད་འཁྲེང་བཞིན་དུ་རང་གི་བསྟི་གནས་སུ་སོང་ངོ་། །རེ་ཞིག་ན་དེའི་སློབ་མ་བྲམ་ཟེའི་ཁྱེའུ་ཞིག་རིག་བྱེད་འདོན་པ་རྫོགས་པས། མཁན་པོ་ལ་དགོས་པ་བསྒྲུབ་པར་ཞུས་པས་རྒྱལ་པོ་དཔལ་གྱི་སྡེའི་ཆུང་མ་སློང་ནས་འབུལ་བར་གདམས་པ།
བྲམ་ཟེའི་ཁྱེའུ་དེ་རྒྱལ་པོའི་ཉེ་བར་སོང་ནས་བཙུན་མོ་གནང་བར་ཞུས་པ་ན། རྒྱལ་པོ་དགྱེས་བཞིན་དུ་གནང་བ་ཁྲིད་དེ་རང་གི་མཁན་པོར་ཕུལ། རྒྱལ་པོས་བཙུན་མོ་བྱིན་པའི་ཚེ་ས་རྣམ་པ་དྲུག་ཏུ་གཡོས་པ་དེས་ལྷའི་དབང་པོ་བརྒྱ་བྱིན་གྱི་གནས་གཡོས་ལྷ་རྣམས་ཀྱི་ཤེས་པ་འོག་ཏུ་འཇུག་པས་རྒྱུ་མཚན་དེ་ལྟར་མཐོང་ནས་བྱང་ཆུབ་སེམས་དཔའི་སྙིང་སྟོབས་བརྟན་ཕྱིར་རང་ཉིད་དང་། ལྷ་ཡི་བུ་བཞིར་བཅས་རྒྱལ་པོའི་ཡུལ་གྱི་ཉེ་བར་ནགས་ཚལ་དུ་ཞུགས་ནས། བརྒྱ་བྱིན་ཉིད་བྲམ་ཟེ་རྒན་པོའི་ལུས་ཕྱེད་ཁོག་སྨད་མན་ཆད་སྟག་གིས་ཟོས་ཤིང་ལུས་ལས་ཁྲག་རྣག་འཛག་པས་ཤིན་ཏུ་ཡ་ང་ཞིང་ན་ཚ་མི་བཟོད་པའི་སྡུག་བསྔལ་ཅན་ཞིག་ཏུ་བརྫུས་ཏེ་ཁྲི་ལ་བསྡད་པ། ལྷའི་བུ་བཞི་བྲམ་ཟེ་དེའི་བུ་བཞིར་བརྫུས་ཤིང་ཕ་རྒན་འཆིར་དོགས་པའི་མྱ་ངན་དང་བཅས་པའི་ཚུལ་གྱིས་བཏེགས་ནས་རྒྱལ་པོའི་སྒོར་ལུས་སྨད་སློང་བར་ཆས་པ། དེའི་ཁྲག་གི་དྲི་ང་བས་སྟེང་ནས་ཁྭ་དང་། ཆུ་སྐྱར་དང་། བྱ་རྒོད་རྣམས་རྗེས་སུ་འབྲང་། འོག་ནས་ཁྱི་དང་ཝ་རྣམས་ཀྱང་རྗེས་སུ་འབྲང་ངོ་། །དེར་རྒྱལ་པོ་ལ་བྲམ་ཟེ་དབུལ་བོ་སློང་དུ་འོང་བར་ལམ་བར་དུ་སྟག་གིས་ལུས་སྨད་ཟོས་པས་སྡུག་བསྔལ་བ་ན་ནམ་མཁའ་ནས་ལྷ་མོ་ཞིག་གིས་རྒྱལ་པོ་དཔལ་གྱི་སྡེའི་སྐུ་སྨད་སློང་ནས་ལུས་སྟོད་ལ་སྦྱར་ན་སོས་པར་འགྱུར་བར་ལུང་བསྟན་ཚུལ་བཅས། རྒྱལ་པོར་སྐུ་སྨད་སློང་བ་ན་དགའ་སྤྲོའི་སེམས་ཀྱིས་གནང་སྟེ། རྒྱལ་པོ་རང་ཁ་སྦུབས་སུ་ཉལ་ནས་མི་གཉིས་ལ་སྙེད་པར་སོག་ལེས་དྲ་འཇུག་སྟེ་བྲམ་ཟེའི་ལུས་སྨད་ལ་སྦྱར་
བས་སྔར་མཁོས་ལྟར་སོས་པས་རྒྱལ་པོའི་ཐུགས་དགོངས་དྭངས་ཤིང་སྤྲོ་བར་གྱུར་ཏེ་རྫོགས་པའི་བྱང་ཆུབ་ཏུ་སྨོན་ལམ་བཏབ་བོ། །བརྒྱ་བྱིན་གྱིས་བྱང་ཆུབ་སེམས་དཔའི་ལུས་ལ་སྟོབས་བསྐྱེད་པ་དང་། འཚོ་བའི་སྨན་གྱིས་གསོས་ཤིང་། སྔར་གྱི་ཆ་བྱད་མི་སྣང་བར་རང་གི་ལུས་སུ་བསྟན་ཏེ་ལེགས་སོ་བརྗོད་དེ་ལུས་གཏོང་བ་ལ་འགྱོད་པའི་སེམས་མ་སྐྱེས་པའི་བདེན་ཚིག་རྒྱལ་པོ་ཉིད་ཀྱིས་བརྗོད་པས་སྐུ་ལུས་སྔ་མ་བཞིན་དུ་གྱུར་པའོ། །སྐབས་འདིར་ལྟས་དེ་དག་ཀྱང་མཐོང་ཞིང་ལྷས་ཀྱང་བསྐུལ་བས་དྲང་སྲོང་འཁོར་བཅས་ཀྱིས་བཙུན་མོ་རྒྱལ་བའི་འོད་རྒྱལ་པོ་ལ་ཚུར་ཕུལ་ནས་གཞན་གྱི་སློང་བ་ལ་མི་རྩོལ་བར་ནན་གྱིས་ཞུས་སོ། །༈ ཡལ་འདབ་གསུམ་པ་ནི། དཔག་བསམ་ལྗོན་ཤིང་ལས་འབྱུང་བ་ལྟར་ན། ཐུབ་པ་འདི་ཡུལ་ཤ་ཀེ་ཏ་བྱ་བར་རྒྱལ་པོ་གསེར་གྱི་གཙུག་ཏོར་དང་། བཙུན་མོ་མཛེས་ལྡན་དགའ་བྱེད་མའི་སྲས་སུ་འཁྲུངས་སོ། །འདིའི་དབུ་ལ་ནོར་བུ་རིན་པོ་ཆེའི་གཙུག་ཏོར་ཡོད་པ་ལས་བདུད་རྩི་འབབ་ཅིང་དེ་ལྕགས་ལ་རེག་པས་ལྕགས་རྣམས་གསེར་དུ་བསྒྱུར་བར་ནུས་པ་ཞིག་རང་ཆས་སུ་བྱུང་བས་དེའི་མཚན་ཡང་གཙུག་ན་ནོར་བུ་ཞེས་བྱ་བར་བཏགས་སོ། །འདི་འཁྲུངས་དུས་རིན་པོ་ཆེ་སྣ་ཚོགས་ཀྱི་ཆར་ཡང་བབས་སོ། །དེ་ལ་གླང་པོ་བཟང་པོའི་རི་བྱ་བ་གླང་པོའི་མཆོག་ཅིག་ཀྱང་ཡོད་དོ། །རྒྱལ་པོ་དེས་
རྒྱལ་སྲིད་ཆོས་བཞིན་དུ་སྐྱོང་ནས་རྟག་ཏུ་སྦྱིན་པ་རྒྱ་ཆེན་བྱས་པས་ཕོངས་པ་དང་སློང་བ་རྒྱུན་ཆད་པར་བྱས་སོ། །དྲང་སྲོང་འབྲི་ཁུ་བྱ་བ་ལ་པདྨ་ལས་བརྫུས་ཏེ་སྐྱེས་པའི་བུ་མོ་མཚན་ལྡན་ཞིག་ཡོད་པ་དེ་རྒྱལ་པོ་ལ་བཙུན་མོར་ཕུལ་ལོ། །དེ་ལ་སྲས་པདྨའི་གཙུག་ཏོར་བྱ་བ་རྒྱལ་པོ་ཉིད་དང་མཚུངས་པར་ཞིག་ཀྱང་བཙས་སོ། །དེ་ནས་རྒྱལ་པོས་མཆོད་སྦྱིན་རྒྱ་ཆེན་པོ་བྱེད་པར་འདོད་ནས་དྲང་སྲོང་འབྲི་ཁུ་དང་། རྒྱལ་པོ་བཟོད་དཀའ་སོགས་སྐྱེ་བོ་མང་པོ་བསྡུས། དེའི་ཚེ་བརྒྱ་བྱིན་གྱིས་རྒྱལ་པོའི་བསམ་པ་བརྟག་ཕྱིར་སྲིན་པོར་སྤྲུལ་ནས་སྦྱིན་སྲེག་གི་མེ་ནང་ནས་འཐོན་ཏེ། རྒྱལ་པོའི་དྲུང་དུ་འོངས་ནས་བཟའ་བཏུང་བསླངས་སོ། །རྒྱལ་པོས་བཟའ་བཏུང་སྣ་ཚོགས་བྱིན་ཀྱང་ཟར་མ་འདོད། ཅུང་ཟད་བགད་ནས་ང་ལ་བསད་མ་ཐག་པའི་ཤ་ཁྲག་དྲོན་མོ་དགོས་ཞེས་སྨྲས་པས། རྒྱལ་པོ་ཅུང་ཟད་མྱ་ངན་དུ་གྱུར་ཏེ་འཚེ་བ་མི་བྱེད་པས་དེ་འདྲ་མི་རྙེད་ཅིང་། བདག་གི་སྲོག་བཅད་ཀྱང་འཚེ་བར་མི་ནུས་ལ་མ་བྱིན་ན་འདིའང་རེ་ཐག་ཆད་པས་ཇི་ལྟར་བྱ་དགོངས་པས། ད་ནི་རང་གི་ཤ་ཁྲག་སྦྱིན་པའི་དུས་ལ་བབ་བོ་སྙམ་སྟེ། ང་རང་གི་ཤ་ཁྲག་སྦྱིན་གྱི་གསུངས་པས་འཁོར་རྣམས་སྡུག་བསྔལ་ཏེ་ཐམས་ཅད་ཀྱིས་བཟློགས་ཀྱང་མ་བཟློག་པར་རང་གི་རྩེའུ་ཆུང་གཏར་ནས་ཁྲག་འཐུང་དུ་བཅུག་པས་དེས་ཀྱང་མགྲིན་པར་ཐུག་གི་བར་དུ་འཐུངས་སོ། །ཡང་རང་གི་ཤ་བཅད་ཅིང་བྱིན་པས་དེས་ཀྱང་རུས་པ་ལ་ཐུག་གི་བར་དུ་ཟོས་པས་འཁོར་ཐམས་ཅད་མྱ་ངན་གྱིས་ནོན་ཞིང་། ཁྱད་པར་བཙུན་མོ་བརྒྱལ་ནས་ས་ལ་འགྱེལ་ལོ། །ད་དུང་རྒྱལ་པོའི་
དྲན་པ་མ་ཉམས་པར་འདུག་པས་བརྒྱ་བྱིན་ཤིན་ཏུ་ཡི་རང་སྟེ། བདག་ནི་བརྒྱ་བྱིན་ལགས་པས་ཤ་ཁྲག་མི་འཚལ་གྱི་སྦྱིན་པའི་འཕྲོ་གཅད་དུ་གསོལ། །ཞེས་སྨྲས་ནས་ལྷའི་བདུད་རྩི་བླངས་ཏེ་རྒྱལ་པོའི་རྨ་ལ་བཏབ་པས་རྒྱལ་པོའང་སྔ་མ་ཁོ་ན་བཞིན་དུ་གྱུར་ཏོ། །དེ་ནས་རྒྱལ་པོས་གླང་པོ་བཟང་པོའི་རི་མདུན་ན་འདོན་ཚངས་པའི་ཤིང་རྟ་ལ་ཕུལ་ལོ། །དེའི་ཚེ་དྲང་སྲོང་མ་རུ་རྩེའི་སློབ་མ་བསམ་གཏན་ཐོབ་པ་ཞིག་བྱུང་བ་ལ་བཀུར་སྟི་ཆེན་པོ་བྱས་ནས་ཁྱེད་ཅི་བཞེད་དྲིས་པས། ངའི་སློབ་དཔོན་ལ་རིག་བྱེད་བསླབ་པའི་ཡོན་དུ་སློབ་དཔོན་རྒས་ཤིང་གཡོག་གིས་ཕོངས་པས། གཡོག་ཅིག་དབུལ་བར་འདོད་ནས་ཁྱེད་ཀྱི་བཙུན་མོ་དང་སྲས་སློང་དུ་མཆིས་སོ་བྱས་པས་རྒྱལ་པོས་ཀྱང་གནང་ངོ་། །དེས་ཀྱང་ཁྱེར་ནས་སློབ་དཔོན་ལ་ཕུལ། རྒྱལ་པོ་བཟོད་དཀའང་གླང་པོ་ལ་ཆགས་ནས་རང་གི་ཡུལ་དུ་ལོག་སྟེ། གླང་པོ་ངེད་ལ་སྦྱིན་དགོས་ཟེར་བའི་འཕྲིན་བཏང་པས་གླང་པོ་བྲམ་ཟེ་ལ་བྱིན་ཚར་བྱས་ཀྱང་མ་ཉན་པར་གླང་པོ་མི་སྟེར་ན་དམག་བྱེད་དོ་ཟེར་ནས། དམག་ཁྱེར་བྱུང་བས་རྒྱལ་པོ་གཙུག་ན་ཤིན་ཏུ་ཡིད་འབྱུང་བར་གྱུར་ཏེ། ཀྱེ་མ་འདོད་པའི་དབང་གིས་མཛའ་བཤེས་ཀྱི་དམ་པ་ཉིད་ཀྱང་སྐད་ཅིག་གིས་དགྲ་ཡི་མཆོག་ཏུ་གྱུར་ཏོ། །བདག་གིས་གཡུལ་བཤམས་ན་བདེ་བླག་ཉིད་དུ་ཐུབ་སྟེ། སེམས་ཅན་མང་པོ་ལ་གནོད་པས་བདག་རང་འབྲོས་པར་བྱ་དགོངས་པ་དང་། རང་སངས་རྒྱས་བཞི་དྲུང་དུ་བྱོན་ནས། རྒྱལ་པོ་ཆེན་པོ་ནགས་སུ་གཤེགས་པའི་དུས་ལ་བབ་བོ་གསུངས་ནས། རྫུ་འཕྲུལ་གཞན་བརྟེན་གྱིས་ནགས་སུ་གཤེགས་སུ་
གསོལ། དེར་བློན་པོ་རྣམས་ཀྱིས་མ་རུ་རྩེའི་གམ་དུ་སྲས་སློང་བར་ཕྱིན་པས་དེས་ཀྱང་བྱིན་ནོ། །དེ་ནས་སྲས་ཀྱིས་དམག་དཔོན་བྱས་ཏེ་འཐབ་པས་བཟོད་དཀའ་ཕམ་ནས་རང་གི་གནས་སུ་བྲོས་སོ། །དེར་བཟོད་དཀའ་བསམ་སྦྱོར་ངན་པའི་དབང་གིས་ནད་དང་མུ་གེ་ཆེན་པོ་བྱུང་བ་ལ་བཟོད་དཀས་བྲམ་ཟེ་རྣམས་ལ་ཅིས་ཕན་དྲིས་པས། རྒྱལ་པོ་གཙུག་ནའི་གཙུག་ཏོར་གྱི་ནོར་བུ་དེ་ཡོད་ན་ཕན་པས་སློང་དུ་སོང་ཟེར། མི་སྟེར་བྱས་པས། དེ་ལ་བསླང་ཚད་མི་སྟེར་བར་མེད་པས་སྟེར་ངེས་ཟེར། བྲམ་ཟེ་གཅིག་སློང་དུ་བཏང་ངོ་། །དེའི་ཚེ་རྒྱལ་པོ་གཙུག་ནས་ནགས་ཚལ་གྱི་གནས་རྣམས་བལྟ་ཞིང་སོང་སོང་བས་མ་རུ་ཙེའི་གནས་དང་ཉེ་བ་ཞིག་ཏུ་ཕྱིན་ཏོ། །དེའི་ཚེ་སྔར་གྱི་བཙུན་མོ་རྩ་བ་དང་ལོ་མ་ལ་སོགས་པ་འཚོལ་བ་ལ་ནགས་སུ་རྒྱུ་བ་དང་རྔོན་པ་ཞིག་དང་ཕྲད་ནས་དེས་གཙེས་པས། རྒྱལ་པོ་གཙུག་ན་བདག་བསྐྱབ་ཏུ་གསོལ་ཅེས་སྨྲེ་སྔགས་བཏོན་པ་རྒྱལ་པོས་རྒྱང་རིང་པོ་ནས་ཚོར་ཏེ། ཅི་ཡིན་སྙམ་ནས་ལྟར་ཕྱིན་པ། རྔོན་པས་མཐོང་བས་དྲང་སྲོང་དུ་རྟོགས་ཏེ་དམོད་པས་འཇིགས་ནས་བྲོས་སོ། །རྒྱལ་པོས་བཙུན་མོ་རྒྱལ་སྲིད་ཀྱི་བདེ་བ་རྒྱ་ཆེན་པོ་ལ་ལོངས་སྤྱོད་པ་དེ་སྡུག་བསྔལ་འདི་འདྲ་མྱོང་སྙམས་ནས་ཐུགས་དབྱུང་སྟེ། ཀྱེ་མ་འདུས་བྱས་ཀྱི་ཆོས་གང་ལ་ཡང་ཡིད་བརྟན་པ་མེད་དོ་སྙམ་དུ་དགོངས་སོ། །དེའི་ཚེ་བཟོད་དཀས་བཏང་བའི་བྲམ་ཟེ་རྒྱལ་པོའི་མདུན་དུ་ཕྱིན་ཏེ་ལོ་རྒྱུས་བརྗོད། གཙུག་ཏོར་བསླངས་པས་ཁྱོད་རང་ཆོད་ལ་ཁྱེར་གསུངས། བྲམ་ཟེས་ཀྱང་གཙུག་ཏོར་
བཅད་ནས་ཁྱེར་ཕྱིན་པས། བཟོད་དཀའི་ཡུལ་གྱི་ནད་མུག་ཐམས་ཅད་རྒྱུན་ཆད་དོ། །རྒྱལ་པོ་གཙུག་ན་གཙུག་ཏོར་བཅད་པའི་ཟུག་རྔུས་རྐྱེན་བྱས། ཚ་དམྱལ་ལ་སྙིང་རྗེ་སྐྱེས་ནས་བརྒྱལ་ཏེ་ས་ལ་འགྱེལ་ལོ། །བཙུན་མོས་ཀྱང་དེ་མཐོང་ནས་བརྒྱལ་བར་གྱུར་ཏོ། །དེའི་ལྟས་བཟང་པོས་བསྐུལ་ནས་ལྷའི་ཚོགས་མང་པོ་དང་རྒྱལ་པོའི་འཁོར་རྣམས་དེར་འདུས་ཏེ། རྒྱལ་པོ་ལ་ཅི་ནོངས་ཞུས་པས། ཡར་ཙོག་གེ་བཞེངས། གདོང་གི་ཁྲག་རྣམས་ཕྱག་གིས་ཕྱིས་ནས་བཟོད་དཀའ་གཙུག་ཏོར་སློང་དུ་བྱུང་ནས་བྱིན་པ་ཡིན་གསུངས། དེ་སྦྱིན་པ་ལ་ཐུགས་འདོད་ཅི་བདོག་ཞུས་པས། བཟོད་དཀའི་ཡུལ་གྱི་ནད་མུག་སོགས་ལ་ཕན་དུ་རེ་བ་མ་གཏོགས་རང་འདོད་གཅིག་ཀྱང་མེད། འོན་ཀྱང་འདོད་པ་ཆེན་པོ་ཞིག་རྟག་ཏུ་ཡོད་གསུངས། དེ་གང་ལགས་ཞུས་པས། སེམས་ཅན་ཐམས་ཅད་བསྐྱབ་པར་འདོད་པ་ཞིག་ཡིན་གསུངས། འོ་ན་འགྱོད་པ་མེད་ལགས་སམ་ཞུས་པས། འགྱོད་པ་མེད་གསུངས། འོ་བརྒྱལ་བའི་རྣམ་འགྱུར་ལ་བལྟས་ན་ཡིད་མི་ཆེས་སོ་ཞུས་པས། ངའི་གཙུག་ཏོར་བྱིན་པ་ལ་འགྱོད་པ་མེད་ན་ང་ཡི་ལུས་སྔ་མ་བཞིན་དུ་གྱུར་ཅིག་གསུངས་པས་དེ་བཞིན་དུ་གྱུར་ཏོ། །དེར་འཁོར་རྣམས་ཀྱིས་ཕོ་བྲང་དུ་གཤེགས་པར་ཞུས་ཀྱང་མ་གནང་བ་ལ། ཡང་རང་སངས་རྒྱས་བཞི་བྱོན་ནས། དགྲ་རྣམས་ལའང་ཕན་བཏགས་ན་གཉེན་རྣམས་ཅིའི་ཕྱིར་འདོར་གཤེགས་པར་འཚལ་ལོ་གསུངས། དེར་ཕོ་བྲང་དུ་གཤེགས་ཏེ་འཁོར་རྣམས་ཕན་བདེ་ལ་བཀོད་དོ། །
༈ ཡལ་འདབ་བཞི་པ་ནི། འདུལ་བ་༼ཁ༽སྨན་གྱི་གཞིར་འབྱུང་བའི་དོན་བསྡུས་ནི། སྔོན་སྐྱེ་དགུའི་ཚེ་ལོ་དཔག་ཏུ་མེད་པ་ན་འཛམ་བུའི་གླིང་འདིར་རྒྱལ་པོ་གསོ་སྦྱོང་འཕགས་ཞེས་བྱ་བ་བྱུང་སྟེ། དེའི་སྤྱི་བོར་ཤ་ཡི་ལྦ་བ་ཤིང་བལ་གྱི་འདབ་མ་ལྟར་འཇམ་པ་ཞིག་བྱུང་བ། དེ་སྨིན་ཅིང་རྡོལ་བ་ལས་ཁྱེའུ་ལྤགས་པ་གསེར་གྱི་མདོག་ཅན་མཚན་བཟང་པོ་སུམ་ཅུས་བརྒྱན་པ་ཞིག་སྐྱེས་པ། བཙུན་མོའི་འཁོར་བརྒྱད་ཁྲིས་མཐོང་མ་ཐག་ནུ་མ་རྣམས་ལས་འོ་མ་ཟག་པ་དང་། བུད་མེད་རེ་རེས་ཀྱང་ང་ལས་ནུ་ཞེས་སྨྲས་པས་མིང་དེར་ཆགས་ཤིང་། སྐྱེས་པའི་གནས་ལས་སྤྱི་བོར་སྐྱེས་ཀྱང་ཟེར། གཞོན་ནུའི་རྩེད་མོས་རྩེ་བའི་ཚེ་བརྒྱ་བྱིན་དྲུག་གི་ཤི་འཕོས་པ་དང་། རྒྱལ་ཚབ་ལ་གནས་པ་ནའང་དེ་བཞིན་ལྷ་དབང་དྲུག་གི་ཚེ་ཚད་རྫོགས། དེ་ཡུལ་གཞན་ཞིག་ཏུ་གནས་ཚེ་ཡབ་རྒྱལ་པོ་འདས་ནས་བློན་པོ་རྣམས་ཀྱིས་རྒྱལ་སར་མངའ་གསོལ་ཕྱིར་རང་གནས་སུ་སྤྱན་དྲངས་ཀྱང་མ་ཕེབས་པར། སྔོན་གྱི་བསོད་ནམས་ཀྱི་མཐུ་ལས་ཡུལ་དེར་རྒྱལ་པོའི་འབྱོར་པ་ཕུན་སུམ་ཚོགས་པར་རྒྱལ་སྲིད་སྣ་བདུན་དང་བཅས། གླིང་བཞིར་འཁོར་ལོས་སྒྱུར་བ་བུ་སྟོང་ཚང་བར་བྱུང་ངོ་། །ཡངས་པ་ཅན་གྱི་ཉེ་འཁོར་ནགས་ཚལ་སྟུག་པོ་ཞིག་ན། དྲང་སྲོང་མངོན་
པར་ཤེས་པ་ལྔ་དང་ལྡན་པ་ལྔ་བརྒྱས་བསམ་གཏན་བྱེད་པར་བྱ་གར་མང་པོས་ལྡིང་ཞིང་སྒྲ་འབྱིན་པས་བསམ་གཏན་གྱི་ཚེར་མར་གྱུར་པས། དྲང་སྲོང་བཞིན་ངན་ཞེས་བྱ་བ་སེམས་འཁྲུགས་ནས་དམོད་བོར་བས་བྱ་གར་རྣམས་གཤོག་པ་ཆད་པ་རྒྱལ་པོས་མཐོང་བས་དྲང་སྲོང་ལྔ་བརྒྱ་རྣམས་ཆད་པས་བསྐྲད་པ་རི་རབ་ཀྱི་བང་རིམ་ལ་གནས་སོ། །རྒྱལ་པོ་འདི་ལ་བློན་པོ་རྣམས་ཀྱིས་བསྐུལ་བས་མངའ་འོག་ལ་འབྲུ་སྣ་ཉེར་བདུན་དང་། གོས་ཀྱི་ཆར་ཕབ་པས་བདེ་སྐྱིད་ཀྱི་དཔལ་ཕུན་སུམ་ཚོགས་པ་ན། རྒྱལ་པོས་ཡུལ་མི་རྣམས་ལ་འདི་དག་སུའི་བསོད་ནམས་ཡིན་དྲིས་པས། ལྷ་དང་བདག་ཅག་ཐུན་མོང་གི་ལགས་ཞེས་སྨྲས་པས། རྒྱལ་པོས་རང་གི་ཕོ་བྲང་ཁོ་ནར་རིན་པོ་ཆེའི་ཆར་ཕབ་པས་རྒྱལ་པོའི་བསོད་ནམས་སུ་ཡིད་ཆེས། རྒྱལ་པོ་དཔུང་གི་ཚོགས་བྱེ་བ་བརྒྱད་འབུམ་དང་ཐབས་ཅིག་རྒྱལ་སྲིད་རིན་ཆེན་བདུན་དང་བཅས་ཤར་ནུབ་བྱང་གསུམ་གྱི་ནམ་མཁར་རྫུ་འཕྲུལ་གྱིས་བྱོན་ཏེ་ལོ་བརྒྱ་སྟོང་ཕྲག་མང་པོར་གླིང་གཞན་གསུམ་ལ་ཡང་དབང་བསྒྱུར་ཏེ། གླིང་རེ་རེའི་ལོངས་སུ་སྤྱོད་པ་ནི་བརྒྱ་བྱིན་དྲུག་རེ་དྲུག་རེའི་ཡུན་ལོན་ནོ། །དེ་ནས་སུམ་ཅུ་རྩ་གསུམ་པའི་ལྷ་གནས་ལ་དབང་བསྒྱུར་བར་འདོད་དེ་གསེར་གྱི་རི་བདུན་པོ་རེ་རེར་གནས་བཅས་ཏེ་བརྒྱ་བྱིན་དྲུག་རེ་དྲུག་རེའི་ཡུན་དུ་བདེ་བར་སྤྱོད་ཅིང་སྟེང་གི་ནམ་མཁའ་ལ་འཕགས་པ་ན་རི་རབ་ཀྱི་བང་རིམ་ལ་སྔར་གྱི་དྲང་སྲོང་ལྔ་བརྒྱ་འཁོད་པ་དང་། ཆུ་ལ་གནས་པའི་ཀླུ་སོགས་ལྷ་རྣམས་
ཀྱི་སྲུང་མ་ལྔས་བཀག་ཀྱང་བསོད་ནམས་ཀྱི་ནུས་མཐུ་མ་ཁེགས་ཏེ། རི་རབ་ཀྱི་རྩེར་སུམ་ཅུ་རྩ་གསུམ་པའི་ལྷ་རྣམས་ཀྱི་འདོད་པའི་ཡོན་ཏན་ཐམས་ཅད་ལ་ལོངས་སྤྱོད་བཞིན་ལྷའི་དབང་པོ་བརྒྱ་བྱིན་གྱི་སྟན་ཕྱེད་ལ་འདུག་པ་ན་ལྷ་དང་མིའི་རྒྱལ་པོ་གཉིས་ཀྱི་ཁྱད་པར་ནི་མིག་འཛུམ་པ་ཙམ་སྟེ། དེར་བརྒྱ་བྱིན་སུམ་ཅུ་རྩ་དྲུག་ཤི་འཕོས་པའི་བར་གྱི་བདེ་སྐྱིད་ཉམས་སུ་མྱོང་ཞིང་ལྷ་མ་ཡིན་གྱི་དམག་དཔུང་བཅོམ། ནུས་མཐུའི་སྐེམས་པས་བསོད་ནམས་མ་ཡིན་པའི་སེམས་བསྐྱེད་དེ། དབང་པོ་བརྒྱ་བྱིན་གནས་འདི་ནས་ཕྱུང་ལ་བདག་ཁོ་ནས་ལྷ་དང་མི་རྣམས་ཀྱི་རྒྱལ་སྲིད་ཀྱི་དབང་ཕྱུག་ལ་དབང་བྱའོ་སྙམ་པ་དང་། སེམས་བསྐྱེད་མ་ཐག་ཏུ་དཔལ་འབྱོར་དེ་ལས་ཡོངས་སུ་ཉམས་ཏེ་འཛམ་བུའི་གླིང་དུ་ལྷུང་ནས་ནད་ཚབས་པོ་ཆེ་ཞིག་གིས་ཐེབས་ཏེ་སྡུག་བསྔལ་མི་བཟད་པ་འཆི་བ་ལ་ཐུགས་མྱོང་བ་ན། འཁོར་རྣམས་ཀྱིས་རྒྱལ་པོ་ང་ལས་ནུ་ལ་འདི་སྐད་ཅེས་སྨྲས་སོ། །ལྷ་འདས་ནས་ཡུལ་གྱི་མི་སླད་མ་དག་གིས་རྒྱལ་པོས་འདས་པའི་ཚེ་ཅི་གསུངས་ཞེས་འདྲི་ན། ལན་ཇི་ལྟར་གདབ་པར་བགྱི། རྒྱལ་པོས་གསུངས་པ། བློན་པོ་དག་གལ་ཏེ་ཁྱེད་ཅག་ལ་དེ་སྐད་ཟེར་ན་འདི་སྨྲོས་ཤིག །རྒྱལ་པོ་ང་ལས་ནུ་ནི་རིན་པོ་ཆེ་སྣ་བདུན་དང་ལྡན། མིའི་འབྱོར་པ་བཞིས་གླིང་བཞིར་དབང་བསྒྱུར། སུམ་ཅུ་རྩ་གསུམ་གྱི་ལྷ་རྣམས་ཀྱི་ནང་དུ་ཡང་སོང་ནས་འདོད་པའི་ཡོན་ཏན་ལྔ་པོ་དག་གིས་མ་ངོམས་བཞིན་དུ་འདས་སོ་ཟེར་རོ་ཞེས་གྱིས་ཤིག་གསུངས་སོ། །རྒྱལ་པོ་ང་ལས་ནུ་དེས་ཇི་སྲིད་གཞོན་ནུ་རྩེ་བའི་སར་རྩེས་པ་དང་། རྒྱལ་ཚབ་
བྱས་པ། འཛམ་གླིང་སོགས་གླིང་བཞིའི་རྒྱལ་སྲིད་ཆེན་པོ་བྱས་པ། གསེར་རི་བདུན་དང་སུམ་ཅུ་རྩ་གསུམ་གྱི་ལྷ་གནས་སུ་སོང་སྟེ་གནས་པ་དེའི་བར་ལ་བརྒྱ་བྱིན་བརྒྱད་ཅུ་རྩ་བཞི་ཤི་འཕོས་པ་ལེན་ནོ། །དབང་པོ་བརྒྱ་བྱིན་གྱི་ཚེའི་ཚད་ནི་མི་རྣམས་ཀྱི་ལོ་བརྒྱ་སུམ་ཅུ་རྩ་གསུམ་པའི་ལྷ་ཡི་ཉིན་ཞག་གཅིག་གོ །ཉིན་ཞག་སུམ་ཅུ་ཟླ་བ་གཅིག །ཟླ་བ་བཅུ་གཉིས་ལོ་གཅིག་ཏུ་བརྩིས་པའི་ལོ་སྟོང་ནི་སུམ་ཅུ་རྩ་གསུམ་ལྷ་རྣམས་ཀྱི་ཚེའི་ཚད་ཡིན་ཏེ། མིའི་ལོ་བྱེ་བ་ཕྲག་གསུམ་དང་དྲུག་ཁྲི་ཡོད་དོ། །འདིའི་སྐྱེ་བ་སྔ་མར་ཚོང་དཔོན་ཞིག་གྱུར་དུས། བཅོམ་ལྡན་འདས་རྣམ་པར་གཟིགས་མཇལ་བའི་ཚེ་དད་པ་ལྷག་པར་ཐོབ་ནས་སྲན་མ་སྤར་གང་གཏོར་བས་འབྲུ་མ་བཞི་ལྷུང་བཟེད་དུ་སོང་། འབྲུ་མ་གཅིག་ལྷུང་བཟེད་ཀྱི་ཁར་ཕོག་ནས་ས་ལ་ལྷུང་ངོ་། །ལྷག་མ་རྣམས་ནི་གཞན་དུ་འཐོར་རོ། །དེའི་ཚེ་སྨོན་ལམ་ཡང་རྒྱ་ཆེན་བཏབ། དེའི་རྣམ་པར་སྨིན་པས་གླིང་བཞི་དང་སུམ་ཅུ་རྩ་གསུམ་སོགས་ལ་དབང་བྱེད་པའི་བསོད་ནམས་ཚད་མེད་པར་ཐོབ་པར་གྱུར་ཏོ། །ཞེས་གསུངས་སོ། །༈ ཡལ་འདབ་ལྔ་པ་ནི། མདོ་སྡེ་ཨ་(རྒྱལ་པོ་ཟླ་འོད་ཀྱི་རྟོགས་བརྗོད།) ལས་འབྱུང་བའི་དོན་བསྡུ་ན། མཆོག་ཟུང་སྟོན་པ་དགེ་འདུན་དང་བཅས་པའི་སྔོན་དུ་མྱ་ངན་ལས་འདས་པར་འཁོར་
རྣམས་ངོ་མཚར་སྐྱེས་པ་ན་སྟོན་པས་སྔོན་བྱུང་གསུངས་པ་ཡིན་ཏེ། སྔོན་བྱུང་བ་འདས་པའི་དུས་སྐྱེ་དགུའི་ཚེ་ལོ་བཞི་ཁྲི་བཞི་སྟོང་པ་ན་བྱང་ཕྱོགས་སུ་རྒྱལ་པོའི་ཕོ་བྲང་རྡོ་བཟང་ན་རྒྱལ་པོ་ཟླ་འོད་ཅེས་ལྕགས་ཀྱི་འཁོར་ལོས་གླིང་གཅིག་ལ་དབང་བསྐུར་བ། འཛམ་བུའི་གླིང་དུ་རྒྱལ་སྲིད་ཀྱི་དབང་ཕྱུག་བྱེད་དོ། །འདིའི་ལུས་ལ་འོད་ཡོད་པས་མིང་དེ་ལྟར་ཆགས། གྲོང་ཁྱེར་དྲུག་ཁྲི་བརྒྱད་སྟོང་ཡང་འབྱོར་པ་རྒྱས་ཤིང་། རྒྱལ་པོ་བྱང་ཆུབ་སེམས་དཔའ་སྟེ་གྲོང་ཁྱེར་གྱི་སྒོ་བཞི་ནས་སྦྱིན་པ་རྒྱ་ཆེན་གཏོང་བས་མི་གཏོང་བ་ནི་མེད་དོ། །བློན་པོ་སྟོང་ཕྲག་ཕྱེད་དང་བཅུ་གསུམ་གྱི་ནང་ནས་ཁྱད་པར་འཕགས་པ་ནི་ཟླ་བ་བཟང་པོ་དང་། ས་འཛིན་གཉིས་ཡིན་པས་སྔ་མའི་རྨི་ལམ་དུ་ཤ་ཟ་རྣམས་ཀྱིས་རྒྱལ་པོའི་ཅོད་པན་ཕྲོགས་པར་རྨིས་པས་འཇིགས་སྐྲག་རེངས་ནས་སྤུ་ཟིང་བྱེད་དེ་རྒྱལ་པོའི་དབུ་སློང་བར་འོང་བར་འགྱུར་བ་ཤེས་ནས་བསླུ་བའི་བསམ་པས་རིན་པོ་ཆེ་ལས་བྱས་པའི་མགོ་དུ་མ་མཛོད་དང་བང་བ་རྣམས་སུ་བཞག་པར་གྱུར་ཏོ། །ཡང་བློན་པོ་མཆོག་ས་འཛིན་ཀྱང་རྨི་ལྟས་ངན་པས་བྲམ་ཟེ་ལྟས་མཁན་ལ་དྲིས་པས་ལུང་དེ་ལྟར་བསྟན་ཞིང་། བློན་པོ་སྟོང་ཕྲག་ཕྱེད་དང་བཅུ་གསུམ་རྣམས་ཀྱིས་ཀྱང་སྦྱིན་གཏོང་གི་གནས་ཁང་བཞི་རུ་གནོད་སྦྱིན་ལག་ན་ཐོད་པ་ཐོགས་པ་རྣམས་ཀྱིས་གདུགས་དང་རྒྱལ་མཚན་དང་བ་དན་རྣམས་བསྒྱེལ་བ་དང་། གསེར་གྱི་རྔ་བོ་ཆེ་འདབ་བཅག་པ་རྨིས་པས་འགྱོད་ཅིང་སྐྲག་པར་གྱུར་པ་ལ། རྒྱལ་པོས་དོན་དེ་མཁྱེན་བཞིན་དུ་མངའ་འོག་རྣམས་ལ་སྒྱུ་མ་ལྟ་བུའི་རྨི་ལམ་ལ་ངེས་པར་
མི་འཛིན་པས་དབུགས་ཕྱུང་ངོ་། །སྐབས་དེར་རི་སྤོས་ངད་ལྡན་ན་བྲམ་ཟེ་དྲག་པོའི་མིག་ཅེས་བྱ་བ་མིག་འཕྲུལ་གྱི་བྱ་བ་ཤེས་པས་བསམ་པ་ངན་པ་སྐྱེས་ཤིང་རྒྱལ་པོ་ལ་དབུ་སློང་བར་བརྩམ་པ་ན། རི་དེར་གནས་པའི་ལྷ་མོ་ཞིག་ཀྱང་ངུ་ཞིང་། འཇིག་རྟེན་ན་མི་དགེ་བའི་ལྟས་རྣམས་ཀྱང་བྱུང་བ་ན། ཕྱོགས་དེར་གནས་པའི་དྲང་སྲོང་མངོན་པར་ཤེས་པ་ལྔ་དང་ལྡན་པ་སྣ་ཚོགས་བཤེས་གཉེན་གྱིས་ཡུལ་དེར་ཉེ་བར་འཚེ་བ་འབྱུང་བར་འགྱུར་རོ་ཞེས་རང་གི་འཁོར་ལྔ་བརྒྱ་ལ་སྨྲས་སོ། །གྲོང་ཁྱེར་ལ་གནས་པའི་ལྷ་མོས་རྒྱལ་པོ་ལ་དབུ་སློང་བར་འོང་བས་དེ་ལས་སྲུང་བར་བསྐུལ་ཡང་མ་གནང་བར་ལྷག་པར་ཐུགས་སྟོབས་རྒྱས་སོ། །བྲམ་ཟེ་དྲག་པོའི་མིག་ཕོ་བྲང་གི་ལྷོ་སྒོ་ནས་ཞུགས་པར་བརྩམས་པས་སྔར་གྱི་ལྷ་མོས་བཀག་པ་རྒྱལ་པོས་གསན་ནས་བློན་པོ་མཆོག་ཟླ་བ་བྲམ་ཟེ་འབོད་དུ་མངགས་པས། དེས་རིན་པོ་ཆེའི་མགོ་རྣམས་བྱིན་ནས་བྲིད་ཀྱང་བཟློག་ཏུ་མ་འདོད་དོ། །རྒྱལ་པོའི་སྤྱན་སྔར་བྲམ་ཟེ་ཕྱིན་པས་དབུ་སྦྱིན་པར་ཐག་ཆོད་པ་ན། བློན་པོ་གཉིས་ནས་བྲམ་ཟེར་བྱམས་པའི་སེམས་བསྐྱེད་པ་དང་། ལྷའི་མི་རྟག་པ་ཉིད་ལ་བལྟ་བར་མི་ནུས་སོ་སྙམ་དུ་བསམ་ནས་སྐད་ཅིག་དེ་ཉིད་ལ་དུས་བྱས་ཏེ་ཚངས་པའི་འཇིག་རྟེན་དུ་སྐྱེས་སོ། །རྒྱལ་པོའི་ཕོ་བྲང་གི་སྒོར་སྲོག་ཆགས་བརྒྱ་སྟོང་དུ་མ་འདུས་པ་དག་མཐོང་ནས་བྲམ་ཟེས་དབེན་པར་རྒྱལ་པོ་གཤེགས་པར་བསྐུལ་བས་ཕོ་བྲང་གི་ནང་དུ་ནོར་བུ་དང་རིན་པོ་ཆེའི་སྙིང་པོ་ཞེས་བྱ་བའི་སྐྱེད་མོའི་ཚལ་དུ་ཕེབས་ཏེ། དེའི་དབུས་ཀྱི་སྟེགས་བུ་དེའི་དབུས་སུ་ཙམ་པ་
ཀའི་ཤིང་གི་རྩར་བཞུགས་ནས་བྲམ་ཟེ་ལ་དབུ་ལོངས་ཤིག་གསུངས་པར་དེས་གཅོད་པར་མ་ནུས་ཤིང་། སྐྱེད་ཚལ་གྱི་ལྷ་མོས་ཀྱང་བཤོལ་བ་ན། རྒྱལ་པོ་རང་གིས་སྨོན་ལམ་དང་བཅས་རང་གི་གཙུག་ཕུད་ཙམ་པ་ཀའི་ཤིང་ལ་བཅིངས་ནས་རལ་གྲི་རྣོན་པོས་བཅད་དེ་བྲམ་ཟེ་ལ་བྱིན་པ་དང་ཚེ་འཕོས་ཏེ་ཚངས་པའི་འཇིག་རྟེན་ལས་ཤིན་ཏུ་འདས་ནས་དགེ་རྒྱས་ཀྱི་ལྷའི་རིས་ཀྱི་ནང་དུ་སྐྱེས་སོ། །དབུ་ཡོངས་སུ་བཏང་བའི་དེ་མ་ཐག་ས་རྣམ་པ་དྲུག་ཏུ་གཡོས་ཤིང་ལྷ་རྣམས་ཀྱིས་མེ་ཏོག་གི་ཆར་དང་། རོལ་མོའི་སྒྲ་ཡང་བྱུང་། བྲམ་ཟེས་མགོ་ཁྱེར་ཏེ་འོང་བ་སྲོག་ཆགས་བརྒྱ་སྟོང་དུ་མས་མཐོང་ནས་མྱ་ངན་གྱིས་དུས་བྱས་པ་རྣམས་དགེ་རྒྱས་ཀྱི་ལྷ་དང་འོད་གསལ་གྱི་ལྷའི་རིས་སུ་སྐྱེས་སོ། །གཞན་རྣམས་འདུས་ནས་རྒྱལ་པོའི་གདུང་དྲི་བཟང་པོས་བསྲེགས་ཏེ། རུས་པ་རྣམས་གསེར་གྱི་བུམ་པར་བཅུག །ལམ་གྱི་གཞི་མདོར་སྐུ་གདུང་གི་མཆོད་རྟེན་བྱས་པར་མཆོད་ནས་སྐྱོ་བས་བསམ་གཏན་བསྐྱེད་པ་ན་འཇིག་རྟེན་ཕ་རོལ་ཏུ་ཚེ་འཕོས་པ་ཚངས་པའི་འཇིག་རྟེན་དུ་སྐྱེས། རྒྱལ་པོ་མ་མཐོང་བར་མྱ་ངན་གྱིས་ཤི་བ་རྣམས་འདོད་པ་ན་སྤྱོད་པའི་ལྷ་དྲུག་ཏུ་སྐྱེས་སོ། །གང་དེར་དུས་བྱས་པ་ཐམས་ཅད་ཀྱང་མཐོ་རིས་དང་ཐར་པ་ལ་གཞོལ་བར་གྱུར་ཏོ། །རྒྱལ་པོ་ཟླ་འོད་ནི་སྟོན་པ་ཉིད། བྲམ་ཟེ་དྲག་པོའི་མིག་ལྷས་བྱིན། བློན་པོ་གཉིས་མཆོག་གཉིས་ཡིན་པར་གསུངས་སོ། །
༈ ཡལ་འདབ་དྲུག་པ་ནི། སངས་རྒྱས་མཉན་ཡོད་ནས་མ་ག་དྷཱར་ཕེབས་པའི་ལམ་བར་དུ་ཚོང་པ་རྣམས་ཀྱང་ལམ་གྱི་འཇིགས་པ་ཞི་སླད་མྱུར་དུ་འོང་བར། ལམ་དུ་ཆོམ་རྐུན་པས་ཚོང་པ་རྣམས་ལ་གནོད་པ་བྱ་བར་སེམས་པས་དེ་སྟོན་པས་མཁྱེན་བཞིན་དུ་དེ་རྣམས་ལ་དྲིས་པ་ན། བདག་ཅག་མི་དགེ་བའི་ལས་ཀྱིས་འཚོ་བས་ཁྱེད་འཁོར་བཅས་སྔོན་དུ་ཕེབས་ཤིག །དེའི་རྗེས་སུ་བདག་ཅག་གི་བྱ་བ་ནི་ཚོང་པ་རྣམས་འཕྲོག་གོ་ཞུས་པས། སངས་རྒྱས་ཀྱིས་ཚོང་པ་རྣམས་ཀྱི་ནོར་གྱི་རིན་ཐང་དང་མཉམ་པའི་གཏེར་ཕྱུང་སྟེ་བྱིན་ནས་བློ་དེ་ལས་བཟློག་ཅིང་ལམ་དུ་གཤེགས་པ་ན། སླར་ཡང་འཕྲོག་འདོད་པས་དེ་ལྟར་ལན་དྲུག་གི་བར་དུ་མཛད་དོ། །དེ་རྗེས་ཆོམ་རྐུན་པ་དང་ཚོང་པར་བཅས་པས་སྟོན་པ་འཁོར་བཅས་མཆོད་པ་ན་ཆོས་ཐོས་ཤིང་། ཆོས་ཀྱི་མིག་རྣམ་པར་དག་པ་ཐོབ་པས་རབ་ཏུ་བྱུང་ནས་རྒྱུད་ལ་ཐར་པའི་ས་བོན་བསྐྲུན་ཏོ། །དེའི་རྒྱུ་མཚན་དགེ་སློང་རྣམས་ཀྱིས་ཞུས་པ་ན། སྔོན་གྱི་སྐྱེས་རབས་རྒྱ་ཤུག་གི་གླིང་དུ་འགྲོ་བའི་ལོ་རྒྱུས་གསུངས་པ་སྟེ། སློབ་དཔོན་སེངྒེ་ཞབས་ཀྱིས། གང་ཞིག་གཞན་གྱི་སྡུག་བསྔལ་རྣམས་ཀྱི་སྡུག །དེ་ནི་རྣམ་པར་གཅོད་ཕྱིར་དམ་བཅའ་བྱས། །འགྲོ་བ་རྣམས་ཀྱི་དོན་ནི་བྱེད་འགྱུར་བ། །དེ་ཉིད་ཤིན་ཏུ་སྡུག་བསྔལ་
རྣམས་ནི་བཟོད། །ཅེས་སོགས་ཀྱིས་འཆད་པ་སྟེ། ཝཱ་རཱ་ཎ་སཱིར་རྒྱལ་པོ་ཚངས་བྱིན་གྱི་སྐྱོང་བར་དེད་དཔོན་དགའ་བའི་སྡེའི་བུ་ཤིན་ཏུ་དགའ་བ་ཞེས་བསོད་ནམས་ཀྱི་དཔལ་རྒྱས་པས་རྣམ་ཐོས་ཀྱི་བུ་དང་འབྱོར་པ་མཉམ་པ། ལས་བྱས་ཤིང་ཉེ་བར་བསགས་པ། བསྟན་བཅོས་དུ་མའི་ཆ་ལ་མཁས་པའི་གྲགས་པ་ཅན། གཏོང་བ་དང་ཁྲེལ་ཡོད་པ་དང་། བཟོད་པ་ལ་སོགས་པའི་ཡོན་ཏན་རྣམས་ལྷག་པར་གནས་པ། བཤེས་པ་དང་དོན་དུ་གཉེར་བ་དང་གཉེན་འདུན་དུ་གྱུར་པའི་སྐྱེ་བོ་རྣམས་ཀྱི་ཡིད་དུ་འོང་བ་སྦྱིན་པ་རྒྱ་ཆེར་གཏོང་བ་ལ་དགའ་ཞིང་བརྩོན་པ་མི་འདོར་བས་སློང་བ་རྣམས་རེ་བ་ཡོངས་སུ་སྐོང་བར་བྱེད་པ་དེས་བསམ་པ། ཅུང་བཟད་བསགས་པའི་བང་མཛོད་ནི་རེ་ཞིག་ནས་ཟད་པར་འགྱུར་བས། རྒྱ་མཚོར་སོང་ནས་ནོར་བུ་རིན་པོ་ཆེ་བླངས་ན་ཡུན་དུ་འབྱོར་རོ་སྙམ་ནས། དོན་མཐུན་དུ་མ་དང་བཅས་གྲུར་ཞུགས་པ་ན་བྱང་ཆུབ་སེམས་དཔའ་སྙིང་སྟོབས་ཆེ་ཞིང་བྱམས་པ་ཆེན་པོས་བརྒྱན་པས་གནོད་པ་མི་མངའ་བར་འདོད་དོན་གྲུབ་སྟེ་ཕྱིར་ལོག་ནས་ཐང་ལ་བདེ་བར་རྒྱུ་བ་ཆོམ་རྐུན་པས་མཐོང་སྟེ་འཕྲོག་པར་བརྩམས་པ་ན། རང་གི་རྗེས་སུ་འབྲངས་པ་རྣམས་བསྲུང་ཕྱིར། དེ་དག་ཀྱང་སྦྱིན་པས་ཚིམ་པར་བྱས། སླར་མི་འཚེ་བར་བསྒོའོ། །དེ་ལྟར་ལན་དྲུག་རྒྱ་མཚོ་ནས་འཁོར་ཡང་། གོམས་པའི་ངན་གཡོ་མ་སྤངས་པས་ཆོམ་རྐུན་པ་རྣམས་ལ་ཡང་དེ་བཞིན་རྒྱུན་པར་རོ། །དོན་དེས་ཀྱེ་མའོ་ཆོམ་རྐུན་འདི་རྣམས་ལ་བདག་གི་འབྱོར་བ་ཆེན་པོ་ལན་དྲུག་བྱིན་ཀྱང་སེམས་མི་ཁེངས་
པར་ད་རུང་འཕྲོག་པའི་སྦྱོར་བ་ནི་མ་བཏང་པས། སླར་རྒྱ་མཚོར་ཞུགས་པའི་ལམ་ནི་ཆད་དོ་སྙམ་ནས། མྱ་ངན་གྱིས་ཡིད་མྱོས་པས་མཚན་མོ་ཤིན་ཏུ་རིང་བར་གདུང་ཞིང་། མཐར་གཉིད་ཡུར་བ་ན་རྨི་ལམ་དུ། འོད་ཀྱི་ཕུང་པོའི་ནང་དུ་ལུས་ཀྱི་ཕྱེད་འཐོན་པའི་ལྷ་མོ་མཛེས་སྡུག་ལང་ཚོའི་དཔལ་ལ་རིན་པོ་ཆེའི་རྒྱན་དང་ལྡན་པ་ཞིག་གིས་ལུང་བསྟན་པ་ནི། སྦྱིན་ལ་ཤིན་ཏུ་ཆགས་པས་མཛོད་ཀྱི་ཕུན་ཚོགས་ནི། །ཁྱོད་ཀྱིས་འདི་ནི་རིམ་གྱིས་སྲབ་པ་ཉིད་དུ་འགྱུར། །མཚན་མོ་མཛེས་པས་ཟླ་བའི་མཛེས་པ་ཟད་པ་སྟེ། །རྒྱ་མཚོའི་རླབས་ནི་ངེས་པར་བཟློག་པར་འགྱུར་བ་ལྟར། །སོགས་ནས། སྲིད་པ་རྣམ་པར་གཅོད་པའི་གོ་འཕང་ཚུལ་བྱེད་པ། །བྱ་བ་ཉུང་བ་ཉིད་ནི་མྱུར་དུ་བཅིངས་ནས་སུ། །འཇིག་རྟེན་རྣམས་ལ་འབྱོར་ཕྱིར་རྒྱ་ཤུག་གླིང་དུ་གཤེགས། །བདག་གིས་ཉེ་བར་བསྟན་པ་གང་ཡིན་དེ་ཉོན་ཅིག །སོགས་ཀྱིས་ལམ་གྱི་བསླབ་བྱ་རྒྱས་པར་བྱས་ནས་ལྷ་མོ་དེ་མི་སྣང་བར་གྱུར་ཏོ། །དེར་གཉིད་སད་པ་ན་དགའ་བ་ཁྱད་པར་ཅན་སྐྱེས་པས། ལྷ་ལ་མཆོད་ཅིང་སྦྱིན་གཏོང་རྒྱ་ཆེན་བྱས་ནས་རང་ཉིད་གཅིག་པུ་ལྷ་མོས་བསྙད་པ་ལྟར་ལམ་ཞུགས་པ་ནི། མི་ཕལ་པའི་ས་ལས་འདས་ཤིང་བསོད་ནམས་དང་སྙིང་སྟོབས་ཤིན་ཏུ་ཆེ་བའི་སར་གནས་པ་དག་གིས་སོ། །དེ་ཡང་ནུབ་ཀྱི་ཕྱོགས་སུ་ཤིན་ཏུ་ཆེ་བའི་གླིང་བདུན་བརྒྱ་དང་། རིན་པོ་ཆེ་བདུན། ཆུ་ཀླུང་ཆེན་པོ་བདུན་རྣམས་འདས་ནས་རི་མ་ལ་ཡར་འཛེགས་ཏེ། སྨན་ཆེན་དོན་ཡོད་ཟོས་པས་བཀྲེས་སྐོམ་དང་ངལ་བ་སེལ་ཞིང་ཀླུའི་དུག་ཞི། ཀུན་འཁོར་ཞེས་པའི་ཆུ་ཀླུང་ཆེན་པོ་
བདུན་རླུང་བེ་ཏཱཾ་བྷས་བསྒྲལ་བའི་རིར་སྨན་ཆེན་དུང་གི་ལྟེ་བ་སྦྲུལ་ནག་པོས་འཁྱུད་པ་བླངས་ཏེ། མིག་དང་མགོ་ལ་བཞག་པས་རང་སྲུང་ཆུ་སྔོན་གྱི་མཚོ་བརྒལ་བའི་འགྲམ་དུ་ཕུག་པ་ན་སྲན་མ་སྐར་མའི་མིག་མཐོང་། གནོད་སྦྱིན་དང་ལྟོ་འཕྱེ་རྣམས་ཞི་བའི་དོན་དུ་འདས་པའི་སངས་རྒྱས་རྣམས་ཀྱིས་གསུངས་པའི་མདོའི་ཚིག་རྣམས་བཀླགས་ཤིང་། སྨན་མ་གིར་སོགས་ཀྱིས་མཐོང་བ་དང་ཁ་རླངས། རེག་པ། མཆེ་བའི་དུག་རྣམས་ཞི་བར་བྱས། གསོ་སྦྱོང་བླངས་ཤིང་བྱམས་དང་སྙིང་རྗེས་སྲིན་པོ་ཤིང་རྟའི་རིའི་ཕུག་པ་བརྒལ་ནས། སྦྲུལ་སྦྲམ་ཆེན། ཟངས་མིག་སོགས་ཀྱི་འཇིགས་པ་ལས་ཐར། རི་ཆེན་པོ་བདུན་ཚེར་མ་རྣོན་པོར་ཁྱབ་པ་ལ་ཟངས་ཀྱི་རྐང་སྐྱོབས་བཅངས། ཤལ་མ་ལིའི་ནགས་དང་། ཆུ་ཀླུང་རྣམ་པ་བདུན་རྩེ་གསུམ་རི། བཅོ་བརྒྱད་འཁྱོག །ཕྲ་མོ་རི་རྣམས་ཀྱི་བར་དུ་རི་དང་མིང་མཚུངས་པའི་ཆུ་བོ་དུ་མ་ཡོད་པ་ལས་ཐར་བ་ན། དུག་གི་མིག་ཅེས་བྱ་བའི་རི། སྦྲུལ་གདུག་པའི་མཐོང་རེག་གི་དུག་གིས་ཁྱབ་པའི་རྩེར་བྲག་ཕུག་ཏུ་སྨན་ཆེན་འཚོ་བྱེད་ཡོད་པས་མགོ་དང་རྐང་ལག་ལྟོ་བ་སོགས་ལ་བྱུགས་ཤིང་། རྒྱལ་བའི་བཀའ་བཀླགས་པས་གནོད་པ་རྣམས་ཞི་ནས་དཀའ་བ་བརྒྱ་ཕྲག་དུ་མའི་བརྩོན་པས་གངས་རི་དཀར་པོའི་རྩེར་ཕྱིན་པ་ན། ལྷའི་དབང་པོའི་གྲོང་ཁྱེར་དང་མཚུངས་པ། རོ་ཧི་ཏ་ཞེས་དཔག་བསམ་གྱི་ཤིང་ཡང་ཡོད་པ་དེར་ཕྱིན་པ་ན་ལོ་བཅུ་གཉིས་སོང་ངོ་། །དེ་ན་དེད་དཔོན་སྙིང་སྟོབས་ཅན་མ་གྷ་དང་འཕྲད་པ། དེ་ནད་ལྕི་བས་ཐེབས་པར་སྨན་གྱིས་གསོས་ཀྱང་ཟླ་བ་དྲུག་གི་ཚེ་ལས་མེད་པར་ཤེས་སོ། །
དེར་རྒྱ་ཤུག་གི་གླིང་གི་གཏམ་ཞིབ་པར་དྲིས་པས་རང་གིས་མ་མཐོང་ཡང་། ཐོས་པ་ནི་འདི་ལྟ་བུའོ་ཞེས་རྫོགས་པར་སྨྲས་ཤིང་བཀྲ་ཤིས་པར་བྱས་ཏེ། གྲུ་གཟིངས་ཀྱི་སྦྱོར་བ་དང་དེད་དཔོན་མ་གྷས་གྲོགས་བགྱིས་ཏེ་སོང་ངོ་། །སྙིང་རྗེས་རབ་ཏུ་བསྐུལ་བ་ན། སེམས་ཅན་ཕན་ཕྱིར་བསྟན་པ་རྣམས། །སྤྲོ་བ་དང་འབྲེལ་རང་བཞིན་ཆོས། །འདོད་པ་ཡང་དག་སྒྲུབ་པ་ཡིན། །ལམ་དུ་ཆུའི་ཁ་དོག་སྣ་ཚོགས་པར་མཐོང་ནས་དྲིས་པས། ལྕགས་ཀྱི་རི་བོ་ལྔ་དང་། གཞན་ཡང་ཟངས་དང་། དངུལ་དང་། རིན་པོ་ཆེ་གསེར་གྱི་རི་བོ་ཡོད་པས། དེ་རྣམས་ཀྱི་གྲིབ་མའི་བྱེ་བྲག་ཡིན་ནོ་ཞེས་བརྗོད་ཅིང་སྐབས་འདིར་མ་གྷ་ཚེའི་དུས་བྱས་སོ། །ཤིན་ཏུ་དགའ་བས་ཆུའི་ངོགས་སུ་གྲོགས་དང་བྲལ་བའི་མྱ་ངན་བསལ་ནས་ཕུང་པོ་སྦས་ཏེ། སླར་ཡང་གཟིངས་ལ་ཞུགས་ནས་རྒྱ་མཚོའི་ཕ་མཐར་ནགས་ཚལ་སྟུག་པོར་ཞུགས་ཏེ། རི་བོ་ཤིན་ཏུ་བགྲོད་དཀའ་བ་མཐོང་ནས་ཅི་བྱ་བརྟོལ་མེད་པར་གྱུར་པ་དང་། རི་དེར་གནས་པའི་གནོད་སྦྱིན་སྔོན་པོ་ཞེས་པས། གནས་འདིའི་ཤར་ཕྱོགས་སུ། རི་བོ་རྩེ་མོ་གསུམ་པ་ཐེམ་སྐས་ཀྱི་དབྱིབས་ཡོད་པས་དེར་འཛེགས་ཤིག་ཟེར་བ་བཞིན་བྱས་པ་ན། དེའི་རྩེར་ཤེལ་གྱི་རི་བོ་འདུག་པར་བགྲོད་དཀའ་བ་ན་བྲག་ཕུག་ཏུ་གནས་པའི་གནོད་སྦྱིན་ཟླ་འོད་ཀྱིས་འདི་ནས་ཤར་ཕྱོགས་སུ་རྒྱང་གྲགས་ཙམ་སོང་ནས་ཙནྡན་གྱི་ནགས་ཚལ་ནས་རང་སྲུང་གི་སྨན་ལོངས་ལ་སྐས་གྱིས་ཤིག་ཟེར་བས་བདེ་བླག་ཏུ་ལམ་རྙེད་ནས་གསེར་གྱི་ཁང་པ་དང་ལྡན་པའི་གྲོང་ཁྱེར་དང་པོ་དང་། དེ་བཞིན་དུ་གཉིས་པ་དངུལ། གསུམ་པ་བཻ་ཌཱུརྱ། བཞི་པ་རིན་པོ་
ཆེའི་ཁང་པ་རྣམས་རིམ་པར་མཐོང་ཞིང་མིའི་ཅི་མོ་བཞི་དང་། བརྒྱད་དང་། བཅུ་དྲུག་དང་། སོ་གཉིས་རྣམས་བྱུང་ཞིང་། དགའ་བའི་འཛུམ་གྱིས་བསུས་ཏེ་ཕེབས་པར་སྨྲས་ཤིང་། དགེ་བ་བཅུའི་ལམ་ཡང་བརྗོད་པས། དེ་རྣམས་ལས་དཔག་ཚད་སྟོང་དང་གཉིས་སྟོང་དང་། བཞི་སྟོང་དང་། བརྒྱད་སྟོང་དུ་ཆར་འབེབས་པའི་ཡིད་བཞིན་གྱི་ནོར་བུ་དགོས་འདོད་ཀུན་འབྱུང་ཕྱག་ཏུ་སོན་པ་ན། རྟ་མཆོག་སྤྲིན་གྱི་ཤུགས་ལྡན་ཡང་སྐད་ཅིག་གིས་དེར་བྱུང་ནས། གོས་ཀྱི་སྐུད་པའི་རྣམ་པ་མཐུན་པའི་ཟེའུ་སོགས་ཅན་གྲོང་ཁྱེར་འདི་ལས་རི་དང་རྒྱ་མཚོས་བགྲོད་དཀའ་བའི། རང་ཡུལ་ལས་ཕྱོགས་ནམ་མཁའི་ལམ་ལས་སུ་བདག་ཁྱེར། ཞེས་མིའི་སྐད་དུ་སྨྲས་པས། དེད་དཔོན་ཤིན་ཏུ་དགའ་བ་རྟ་དེའི་རྒྱབ་ཏུ་བཞོན་ནས་སྐད་ཅིག་ལ་ཝཱ་རཱ་ཎ་སཱིར་སླེབས། རྒྱལ་པོ་ཚངས་བྱིན་གཤེགས་པས་མངའ་འོག་གིས་རྒྱལ་སར་དབང་བསྐུར་ནས་རྒྱལ་སྲིད་ཆོས་བཞིན་སྐྱོང་ཞིང་། ཚེས་བཅོ་ལྔའི་ཉིན་གསོ་སྦྱོང་ཡང་དག་པ་བླངས་ནས་རིན་པོ་ཆེ་རྒྱལ་མཚན་གྱི་ཏོག་ཏུ་བཀོད་དེ། གང་ཞིག་གང་གང་རྫས་འདོད་པ། །མི་རྣམས་ཀྱིས་ནི་འདི་རྙེད་དཀའ། །ཡིད་བཞིན་ནོར་འདི་ཡང་དག་པར། །དེ་ཕྱིར་དེ་དེ་སྦྱིན་གྱུར་ཅིག །ཅེས་བརྗོད་པས་ཐོག་མར་འབྲས་ཀྱི་སོ་བའི་ཆར་ཕབ། དེ་རྗེས་གོས་ཀྱི་ཆར་དང་། བཟའ་བཏུང་དང་། འབྲུའི་ཆར་དང་། རིན་པོ་ཆེ་སོགས་གང་ལ་ཅི་འདོད་པའི་ཆར་ཐམས་ཅད་ཡིད་བཞིན་དུ་ཕབ་པས་རྒྱལ་པོའི་བང་མཛོད་རྒྱས་ཤིང་མངའ་འོག་ཀྱང་ཤིན་ཏུ་འབྱོར་པས་བདེ་སྐྱིད་ཕུན་སུམ་ཚོགས་པས་རྒྱལ་སྲིད་ལོ་བརྒྱར་མཛད་
ནས་རང་གི་སྲས་ལ་རྒྱལ་པོར་དབང་བསྐུར་རོ། །སྐབས་འདི་གོ་དཀའ་བས་འབྲུ་གནོན་ཅུང་ཟད་བྱས་པ་ལགས་སོ། །༈ ཡལ་འདབ་བདུན་པ་ནི། སྟོན་པ་སེར་སྐྱའི་ནྱ་གྲོ་དྷའི་ཀུན་དགའ་ར་བ་ན་བཞུགས་སོ། །གང་གི་ཚེ་ཤཱཀྱ་ཕལ་མོ་ཆེ་བདེན་པ་ལ་བཀོད་པ་དེའི་ཚེ་ཤཱཀྱ་རྣམས་དུས་གསུམ་དུ་གཙུག་ལག་ཁང་དུ་འགྲོ་ཞིང་ཆོས་ཀྱང་ཉན་ནོ། །རྒྱལ་པོ་ཟས་ གཙང 
་མ་ཡང་དུས་གསུམ་དུ་ཤཱཀྱའི་ཚོགས་ཀྱིས་བསྐོར་ནས། སྟོན་པའི་སྤྱན་སྔར་འགྲོའོ། །སྟོན་པས་སྦྲང་རྩི་ལྟ་བུའི་ཆོས་བསྟན་པ་ན། འཁོར་ཤས་ཆེར་དག་ཀྱང་དབང་པོ་མི་གཡོ་བས་ཉན་ནོ། །དེའི་ཚེ་མིང་ཆེན་གྱིས་སངས་རྒྱས་འབྱུང་བ་ནི་བདག་ལ་འབྲས་བུ་དང་བཅས་པའོ། །ཞེས་སྨྲས་པས་རང་གི་ཆུང་མས་ཁྱེད་ལ་ནི་ལེགས་ན་བདག་ལ་ནི་མ་ཡིན་ཏེ། སྟོན་པ་ནི་བུད་མེད་ཀྱི་ཕྱིར་ཆོས་མི་སྟོན་པས་སོ། །མིང་ཆེན་གྱིས་ཁྱོད་དེ་སྐད་མ་ཟེར་སྟོན་པ་སེམས་ཅན་ཐམས་ཅད་ལ་ཐུགས་བརྩེ་བར་མཉམ་པ་ཡིན་གྱིས་ཆོས་ཉན་པའི་ཕྱིར་སོང་ཤིག །དེས་སྨྲས་པ་ལྷ་ཟས་
གཙང ་མ་འཁོར་དང་བཅས་པ་དུས་གསུམ་དུ་བྱོན་པས་བདག་ཅག་འགྲོ་བ་ངོ་ཚ་ལགས་སོ། །གལ་ཏེ་རྒྱལ་པོ་སྔ་དྲོ་བྱོན་ན་བདག་ཕྱི་དྲོ་འགྲོ་བར་འཚལ་ཟེར། དེ་ནས་མིང་ཆེན་གྱིས་རྒྱལ་པོ་ཟས་ གཙང ་མ་ལ་ཞུའོ་སྙམ་ན་དངོས་སུ་ཞུ་མ་ནུས་ཏེ་སྐྱེ་དགུའི་བདག་མོ་
ལ་བརྒྱུད་ནས་ཞུས་པས་ཞུ་བ་གནང་ངོ་། །དེ་ནས་སྔ་དྲོའམ་ཕྱི་དྲོ་རྒྱལ་པོ་མི་འབྱོན་པའི་དུས་ན་བུད་མེད་རྣམས་ཆོས་ཉན་དུ་འགྲོའོ། །ལན་ཅིག་སྐྱེ་དགུའི་བདག་མོ་ཤཱཀྱའི་ཆུང་མ་ལྔ་བརྒྱས་བསྐོར་ཏེ་ཆོས་ཉན་དུ་སོང་བ་ན་མིང་ཆེན་གྱི་ཆུང་མའང་རྒྱན་ཐམས་ཅད་ཀྱིས་བརྒྱན་ཏེ་སོང་ངོ་། །དེ་ཀུན་དགའ་བོས་མཐོང་ནས་འདི་ཐམས་ཅད་འདོད་ཆགས་དང་བྲལ་བ་ཁོ་ན་ཡང་མིན་པས་རྒྱན་གྱིས་བརྒྱན་ཏེ་འོངས་པ་མ་ལེགས་ཞེས་སྨྲས་པས། དེ་རྒྱན་བཀྲོལ་ནས་གཡོག་མོ་སྐྱེད་མ་ལ་བསྐུར་ཏེ་ཁྱིམ་དུ་བཏང་ངོ་། །དེ་ཡང་མྱུར་དུ་འཁོར་ཏེ་སྟོན་པས་དེ་རྣམས་ལ་ཆོས་གསུངས་པ་ན། ཤཱཀྱའི་བུད་མེད་གཅིག་ཆོས་ལ་རྣ་བ་མི་གཏོད་པར་རང་གི་མུ་ཏིག་གི་དོ་ཤལ་ལ་ལྟ་ཞིང་ནོམ་པར་བྱེད་དོ། །དེ་མིང་ཆེན་གྱི་ཆུང་མས་མཐོང་ནས་སངས་རྒྱས་ཀྱིས་འདུས་བྱས་ཐམས་ཅད་མི་རྟག་པར་གསུངས་ན་ཡང་། འདི་འདི་ལ་ཆགས་འདུག་པས་ངའི་མུ་ཏིག་གི་དོ་ཤལ་མཐོང་ན་འདིའི་ང་རྒྱལ་ཞི་བར་འགྱུར་རོ་སྙམ་སྟེ། གཡོག་མོ་སྐྱེད་མ་ལ་ངའི་མུ་ཏིག་གི་དོ་ཤལ་ལས་ཉུང་ཤས་ཤིག་ལོངས་ཤིག་ཟེར། གཡོག་མོ་སྐྱེད་མ་དེ་ཆོས་ཉན་པ་ལ་སེམས་བསྡུས་པས། ཀྱེ་ཧུད་བྲན་དུ་གྱུར་པ་ནི་རེ་སྡུག་བསྔལ། འདི་འདྲ་བའི་ཆོས་ཉན་པའི་དབང་ཡང་མེད་དོ་སྙམ་ནས་ཚིགས་བཅད་ཀྱང་སྨྲས་སོ། །སྟོན་པས་བྲན་མོ་འདིས་སངས་རྒྱས་ལ་བྱ་བ་བྱས་པ་ཡིན་ཡང་ཚེ་ཅུང་ཟད་ལས་མེད་པར་མཁྱེན་ནས་ཆོས་ཚིགས་བཅད་གཅིག་ཡི་གེར་བྲིས་ཏེ་དེ་ལ་སྩལ། དེ་ཡང་ཡིད་དགའ་ཞིང་སངས་རྒྱས་ལ་དད་པའི་སེམས་ཀྱིས་སོང་བ་ལས་ལམ་དུ་
བ་དྲུས་མ་ཞིག་གིས་བརྡུང་སྟེ་ཤིའོ། །དེ་མ་ཐག་སིངྒ་ལའི་གླིང་གི་རྒྱལ་པོའི་བཙུན་མོ་དམ་པའི་མངལ་དུ་ཞུགས་ཤིང་ཉིང་མཚམས་སྦྱར། ཕྱིས་བཙས་པ་ན་མུ་ཏིག་གི་ཆར་ཡང་བབས་སོ། །དེར་རྒྱལ་པོའི་བུ་མོ་མུ་ཏིག་ཅན་ཞེས་བཏགས་སོ། །དེ་ཆེན་པོར་གྱུར་པ་ན་བློ་གྲོས་གསལ་བ་དང་ཡིད་གཞུང་པ་དང་བྱ་བ་ཐམས་ཅད་ལ་མཁས་པར་གྱུར་པ་དེའི་ཚེ་ཡུལ་དབུས་ནས་འོངས་པའི་ཚོང་པ་རྣམས་ཀྱིས་སིངྒ་ལའི་གླིང་གི་རྒྱལ་པོའི་ཕོ་བྲང་དང་ཉེ་བར་མཚན་མོར་གནས་བཏབ་སྟེ། འདུག་པ་ལས་ཐོ་རངས་ཀྱི་དུས་ན་ཆེད་དུ་བརྗོད་པ་ལ་སོགས་པའི་མདོ་རྣམས་བཏོན་པས་མུ་ཏིག་ཅན་གྱིས་དཀར་ཁུང་ནས་ཐོས་ཏེ་ཤིན་ཏུ་ཡིད་བདེ་བ་སྐྱེས་པས། ནང་པར་རྒྱལ་པོ་ལ་ཞུས་ནས་ཚོང་པ་རྣམས་བོས་ཏེ་ཡུལ་དབུས་ཀྱི་རོལ་མོ་དག་ལོངས་ཤིག་བྱས་པས། ཚོང་པ་རྣམས་ཀྱིས་ལྷ་མོ་དེ་ནི་རོལ་མོ་མ་ལགས་སངས་རྒྱས་ཀྱི་བཀའ་འོ། །དེར་མུ་ཏིག་ཅན་སངས་རྒྱས་ཞེས་བྱ་བ་སྔར་མ་ཐོས་པ་གསར་དུ་ཐོས་པས་དགའ་བས་སྤུ་ཟིང་ཞེས་བྱེད་པར་གྱུར་ཏེ་སངས་རྒྱས་ཞེས་བྱ་བ་ཅི་འདྲ་དྲིས་པ་ན་ཚོང་པ་རྣམས་ཀྱིས་རྒྱས་པར་བཤད་དོ། །དེར་དད་པ་བླ་ན་མེད་པ་ཐོབ་ནས་དུས་གཞན་ཞིག་ན་ཚོང་པ་རྣམས་ཀྱིས་ཚོང་ཟིན་ནས་ཡུལ་དུ་ལྡོག་འགྲོ་བའི་ཚེ་མུ་ཏིག་ཅན་གྱིས་སྟོན་པ་ལ་ཞུ་བའི་འཕྲིན་ཡིག་ཕུལ་ཏེ། དེ་ཡང་འདི་སྐད་ཅེས། ལྷ་དང་ལྷ་མིན་མི་ཡིས་ཕྱག་བྱས་པ། །སྐྱེ་དང་བསྙུང་དང་བསྙེངས་ལས་ངེས་འབྱུང་ཞིང་། །གཙོ་བོ་གྲགས་པ་རྒྱ་ཆེར་རབ་གྲགས་པ། །དྲང་སྲོང་བདུད་རྩིའི་ཆ་ལས་ཐུགས་རྗེས་གནོང་། ཞེས་སོ། །
དེ་ནས་ཚོང་པ་རྣམས་ཀྱིས་མུ་ཏིག་ཅན་གྱི་ཞུ་བའི་ཕྲིན་ཡིག་དེ་བཅོམ་ལྡན་འདས་ལ་ཕུལ། དོན་རྣམས་ཞིབ་ཏུ་གསོལ་ལོ། །དེར་སྟོན་པས་ཚོང་པ་རྣམས་ལ་ཁྱེད་རྣམས་སླར་སིངྒ་ལར་འདོང་བའི་ཚེ་ང་ལ་སྨྲོས་ཤིག་ཅེས་བཀའ་སྩལ་ཏོ། །ཡང་དུས་གཞན་ཞིག་ན་ཚོང་པ་རྣམས་ཟོང་བསྒྱུར་ཟིན་ནས། སྟོན་པའི་སྤྱན་སྔར་སོང་སྟེ་གསོལ་བས། སྟོན་པས་རི་མོ་མཁན་དག་ལ་རས་ཀྱི་གཞི་ལ་ཉིད་ཀྱི་སྐུ་གཟུགས་འབྲིར་སྩལ་པ་ན་དེ་དག་གིས་མཚན་མ་བཟུང་བར་མ་ནུས་ནས། དེར་སྐུའི་རྣམ་པ་ཇི་བཞིན་པའི་འོད་ཟེར་སྤྲོས་པ་རས་གཞིའི་སྟེང་དུ་ཕོག་པ་ལ་བཟོ་བོ་རྣམས་ཀྱིས་ཚོན་བཀྱེས་ཏེ་ལེགས་པར་ཟིན་ཏོ། །དེའི་གཤམ་དུ། སྐྱབས་འགྲོ། བསླབ་པའི་གནས་ལྔ། རྟེན་འབྲེལ་ལུགས་འབྱུང་ལྡོག་གི་ཚིག་དང་། སོ་ཐར་ཚིགས་བཅད་གཉིས། འཕགས་ལམ་བརྒྱད་ཀྱི་ཚིག་རྣམས་བྲིས་པ་སྩལ། ཚོང་པ་རྣམས་ལ་དེའི་དོན་རྒྱས་པར་གསུངས་ནས་ཁྱེད་དག་ལས་གཅིག་སྔོན་དུ་སོང་ལ་སིངྒ་ལའི་རྒྱལ་པོ་ལ་རས་བྲིས་འདི་མུ་ཏིག་ཅན་ལ་སྐྱེས་སུ་བསྐུར་བ་ཡིན་གྱི། ས་ཕྱོགས་ཡངས་པར་སྐྱེ་བོའི་ཚོགས་བསྡུས་ལ་བཀུར་སྟི་ཆེན་པོས་བྲིས་སྐུ་འདི་ཁྲོམས་ཤིག །མུ་ཏིག་ཅན་གྱིས་འདི་དང་འདི་ཅི་ཡིན་ཞེས་འདྲི་ན་འདི་དང་འདིའོ་ཞེས་བརྗོད་ཅིག །དེ་ནས་བཀའ་བཞིན་འཚལ་ལོ་ཞེས་ཟེར་ནས་ཚོང་པ་རྣམས་སོང་སྟེ་སིངྒ་ལའི་རྒྱལ་པོ་ལ་སྨྲས་པས་དེས་ཀྱང་ས་ཕྱོགས་ལེགས་པར་བསྟར། རྒྱལ་མཚན་བསྒྲེངས་པ་ལ་སོགས་པའི་མཆོད་པའི་ཁྱད་པར་དཔག་ཏུ་མེད་པར་བཤམས། སྐྱེ་བོའི་ཚོགས་རྣམས་བསགས་ནས་རིན་པོ་ཆེའི་ཁྲི་ཡི་སྟེང་
དུ་བྲིས་སྐུ་ཞལ་ཕྱེ་བས་སྐྱེ་བོ་ཀུན་གྱིས་སྐད་གསང་མཐོན་པོས། སངས་རྒྱས་ལ་ཕྱག་འཚལ་ལོ་ཞེས་སྒྲོགས་ཤིང་ཀུན་ཀྱང་དད་པ་ལ་བཀོད། མུ་ཏིག་ཅན་དད་པའི་ཤུགས་ཀྱིས་མཆི་མས་མིག་གང་ཞིང་འདི་དང་འདི་ཅི་ཞེས་སོ་སོར་དྲིས་པས་ཚོང་པ་རྣམས་ཀྱིས་དེ་དང་དེ་རྒྱས་པར་བཤད་པས། མུ་ཏིག་ཅན་གྱིས་རྟེན་འབྲེལ་ལུགས་འབྱུང་དང་ལུགས་ལྡོག་གི་དོན་བསམ་ཤིང་། ཚོང་པ་རྣམས་ཀྱིས་ལན་གསུམ་བཟླས་པར་བྱས་པ་ལས་ལན་གཉིས་ནི་བསམ། གསུམ་པ་མ་བཟླས་པའི་སྔོན་རོལ་དེར་རྒྱལ་པོའི་བུ་མོ་མུ་ཏིག་ཅན་གྱིས་རྒྱུན་དུ་ཞུགས་པའི་འབྲས་བུ་ཐོབ་བོ། །དེར་ཆེད་དུ་བརྗོད་པ་ཡང་བྱས་ནས། ཡང་ནམ་ཞིག་གི་ཚེ་ཚོང་པ་རྣམས་སླར་ལྡོག་པ་ལ། བདག་གི་མིང་གིས་སངས་རྒྱས་ལ་ཕྱག་འཚལ་ལོ། །བསྙུན་དྲིས་ལ་མུ་ཏིག་མཆོག་བྲེ་བོ་ཆེ་གསུམ་པོ་འདི་ཕུལ་ལ། ཆ་དང་པོ་ནི་སངས་རྒྱས། གཉིས་པ་ནི་ཆོས། གསུམ་པ་དགེ་འདུན་ལ་འབུལ་ལོ་ཞེས་བརྗོད་ཅིག་ཟེར་རོ། །དེ་ནས་ཚོང་པ་རྣམས་ཀྱིས་དེས་ཇི་སྐད་བསྒོ་བ་བཞིན་དུ་ཕུལ། ཀུན་དགའ་བོས་སྐྱེས་འདི་གང་ལས་བྱུང་ཞུས་པས་མིང་ཆེན་གྱི་གཡོག་མོ་སྐྱེད་མ་རྒྱལ་པོའི་བུ་མོར་སྐྱེས་པ་དེས་བསྐུར་བ་ཡིན་ནོ། །དེ་ལ་སངས་རྒྱས་ཀྱི་སྐུ་སྐལ་ནི། དྲི་ གཙང ་ཁང་གི་ཞལ་བ་ལ་སོགས་པ་གཙུག་ལག་ཁང་གི་བྱ་བ་གྱིས་ཤིག །ཆོས་ཀྱི་སྐལ་བ་ནི་ཆོས་འཛིན་པའི་གང་ཟག་རྣམས་ལའོ། །དགེ་འདུན་གྱི་སྐལ་བ་ནི་དགེ་འདུན་ལ་མཉམ་པར་བགོས་ཤིག །ཅེས་བཀའ་སྩལ་ཏོ། །
༈ ཡལ་འདབ་བརྒྱད་པ་ནི། རྒྱལ་པོའི་ཁབ་ན་ཁྱིམ་བདག་མེ་སྐྱེས་ཀྱི་སྲིང་མོའི་ཁྱོ་གཅེར་བུའི་དགེ་བསྙེན་དཔལ་སྦེད་ཅེས་པ་ཡོད་པ་དེ་ལ་ཁྱིམ་བདག་མེ་སྐྱེས་དད་པ་ཅན་དེས་དཔལ་སྦེད་འདི་དགེ་འདུན་ལ་ཡོན་འབུལ་དུ་གཞུག་གོ་སྙམ་ནས། དེས་དེ་ལ་དཔལ་སྦེད་དགེ་འདུན་ལ་མཆོད་པ་དང་ཡོན་ཕུལ་ཅིག་དང་བསོད་ནམས་སུ་འགྱུར་རོ། །ཞེས་སྨྲས་སོ། །དེས་སྨྲས་པ་ངས་ཀྱང་དགེ་འདུན་ལ་མཆོད་ཅིང་ཡོན་འབུལ་ན་ཁྱོད་ཀྱིས་ཀྱང་གང་པོ་སོགས་ལ་བཤོས་གསོལ་ཅིག །མེ་སྐྱེས་ཀྱིས་བསམ་པ། ཁས་མ་བླངས་ན་དཔལ་སྦེད་ཀྱིས་དགེ་འདུན་མཆོད་པའི་བར་ཆད་དུ་འགྱུར་ན། སེམས་ཅན་ཐམས་ཅད་ལ་སྦྱིན་པ་ལ་ཉེས་མེད་ཀྱི་སྙམ་ནས་ཟས་སྦྱིན་པར་ཁས་བླངས་པས། དཔལ་སྦེད་ཀྱིས། ངས་དང་པོར་སངས་རྒྱས་སོགས་མཆོད་ན་མེ་སྐྱེས་ཀྱིས་ཟས་མི་སྦྱིན་གྱིས་གང་པོ་སོགས་ལ་སྔར་བཤོས་གསོལ་ན་ངས་ཕྱིས་ཟས་སྦྱིན་ནོ་སྙམ་ནས། མེ་སྐྱེས་ལ། དང་པོར་ཁྱོད་ཀྱིས་ཟས་བྱིན་དང་ངས་ཕྱིས་དགེ་སྦྱོང་གོའུ་ཏ་མ་འཁོར་བཅས་ལ་ཟས་སྦྱིན་ནོ་ཟེར། དེས་ཀྱང་ཁས་བླངས་ནས་གང་པོ་སར་སོང་སྟེ་ཁྱོད་གཅེར་བུ་བ་མང་པོ་དང་བཅས་སང་བདག་གི་ཁྱིམ་དུ་བཤོས་གསོལ་གྱིས་ཁས་ལོངས་ཤིག་སྨྲས་སོ། །གང་པོས་འདི་ནི་ངེས་པར་དགེ་སྦྱོང་
གོའུ་ཏ་མ་ལ་སུན་ནས་བདག་ལ་དད་དོ་སྙམ་སྟེ་ཁས་བླངས་ནས་སང་མེ་སྐྱེས་ཀྱི་ཁང་པར་ཆས་པ་དང་། དཔལ་སྦེད་གང་པོ་སར་སོང་སྟེ། དགེ་སྦྱོང་གོའུ་ཏ་མ་ནི་ཁྱིམ་བདག་གི་ཁྱིམ་དུ་བཞུད་དེ། ནང་དུ་བཞུད་ཀར་སྒོ་ཐེམ་ལ་ཞབས་བཞག་ནས་འཛུམ་པ་དང་ཀུན་དགའ་བོས་འཛུམ་པའི་རྒྱུ་དྲིས། དེར་ཇི་ལྟར་དགོངས་པ་དེ་ལྟར་ལུང་བསྟན་པ་ལ་སྐྱེ་བོ་མང་པོ་དད་པར་འགྱུར་གྱི། ཁྱོད་ཀྱིས་ཀྱང་དེ་རིང་དེ་ལྟར་གྱིས་ཤིག་བྱས་སོ། །དེ་ནས་གང་པོ་གཅེར་བུ་བ་མང་པོས་བསྐོར་ནས་འོངས་ཏེ་མེ་སྐྱེས་ཀྱི་སྒོ་ཐེམ་རྐང་པ་བཞག་སྟེ་རྟ་བགད་དུ་བགད་པ་དང་། གཅེར་བུ་བ་ཞིག་གིས་དེའི་རྒྱུ་དྲིས་པས། ཀྱེ། ཆུ་བོ་དྲེགས་བྲལ་གྱི་འགྲམ་ན་སྤྲེའུ་ཕོ་ཞིག་གིས་སྤྲེའུ་མོ་ཞིག་མཐོང་བ་ལ་རབ་ཏུ་ཆགས་ཏེ་བརྒྱུགས་པ་དང་ཤིང་རྩེ་ནས་བརྡེག་འཆོས་ནས་འདས་པས། བདག་ནི་སེམས་ཅན་འདི་འདོད་པའི་དབང་གིས་སྡུག་བསྔལ་ལོ་སྙམ་མོ། །དེ་སྐད་ཟེར་མ་ཐག་མེ་སྐྱེས་ཐོས་ནས། གང་པོ་ནི་ཁབ་འཚོང་བ་སླར་ཁབ་རྡུང་བའི་ཁྱིམ་དུ་ཁབ་འཚོང་བར་སེམས་པ་བཞིན་ཏེ། ཅི་ནས་འདི་ལ་ཀྱལ་ཀ་ཞིག་བྱའོ་སྙམ། དེ་དག་འདུག་པ་དང་། བཟའ་བཅའ་བསོད་པས་ཕོར་པ་བཀང་ནས་སྟེང་དུ་ཚོད་མ་བླུགས་ཏེ་བྱིན་ནོ། །གང་པོ་གཅིག་པུ་ལ་ཞབས་སུ་ཚོད་མར་སྟེང་དུ་འབྲས་ཆན་གྱིས་གཡོས་ནས་བྱིན། གཅེར་བུ་བ་ལ་ལས་ཟ་ཞིང་འདུག་པ་དང། བདག་སྟོན་པར་བསམ་སྟེ་ཚོད་མ་ཞིམ་པོ་དང་ཁ་ཟས་བཟང་པོ་སྦྱིན་པར་བསམས་སོ་སྙམ་ནས། ཚོད་མ་བྲིམས་ཟིན་པ་དང་། ཁོས་བསམ་པ། དེ་བྲེལ་བས་བརྗེད་ཀྱི་བདག་གིས་བསྐུལ་ལོ་སྙམ་ནས། ང་ལ་ནི་འབྲས་ཆན་འབའ་ཞིག་
ལས་ཚོད་མ་མེད་དོ་ཟེར། མེ་སྐྱེས་ཀྱིས་སྨྲས་པ། མི་མཐོང་བ་ནི་མཐོང་བར་བྱེད། །མཐོང་བར་བྱ་བ་མི་མཐོང་སྟེ། །དྲེགས་བྲལ་འགྲམ་གྱི་སྤྲེའུ་མཐོང་ལ། །ཕོར་བུའི་ནང་གི་ཚོད་མ་མིན། །སྨྲས་ནས་ཕོར་བུའི་ཞབས་ཀྱི་ཚོད་མ་བསྟན་པས་དེ་སྐྱེངས་ནས་སྦྱིན་པའི་ཡོན་ཏན་བརྗོད་པའི་ཚེ་མདུན་དུ་མ་འདུག་གོ་ཟེར། དེས་ཟས་ཟོས་ནས་སྦྱིན་པའི་ཡོན་ཏན་བརྗོད་པ། སྦྱིན་བདག་གིས་ནི་སྦྱིན་པའི་དུས། །དགེ་སྦྱོང་གཞན་ནི་ཟ་བའི་དུས། །ལྷག་མ་གཞན་ལ་འོང་བའི་དུས། །བསོད་ནམས་མི་དགེ་ཡོད་མ་ཡིན། །དེ་སྒོ་བས་ཐོས་ནས་འདི་འདྲའི་སྦྱིན་པའི་ཡོན་ཏན་མི་སྲིད། འདི་ལ་ཀྱལ་ཀ་ཞིག་བྱའོ་སྙམ་ནས་འབྲས་ཁུ་བུམ་བ་གང་སྒོ་དྲུང་དུ་ཕོ། སྒོ་གཏན་དྲངས་ནས་བཞག་གོ །གཅེར་བུ་པ་དེ་ཕྱིར་བྱུང་བ་ན་འབྲས་ཁུ་ལ་འདྲེད་དེ་ཀླད་པ་སྒོ་གཏན་ལ་ཕོག་ནས་ཁྲག་བྱུང་ངོ་། །དེ་ནས་སྒོ་བས། སྒོ་གཏན་ཕྱུང་བའི་དུས་ལ་བབ། འབྲས་ཁུ་ཕོ་བའི་དུས་བབ་པས། །མགོ་བོ་སྣད་པའི་དུས་ཡིན་གྱི། །དགེ་དང་མི་དགེའི་དུས་མེད་དོ། །ཞེས་སྨྲས་པས་དེ་ཀླད་པ་ལ་ཁྲག་ཟག་བཞིན་དུ་དཔལ་སྦེད་སར་སོང་སྟེ་མེ་སྐྱེས་ཀྱིས་འདི་འདྲའི་གནོད་པ་བྱས་སོ་ཟེར། དཔལ་སྦེད་ཀྱིས་ཁྱོད་གསོན་པོར་ཐར་གྱིས་ད་སྡོད་ཅིག་དང་། གོའུ་ཏ་མ་ཉན་ཐོས་དང་བཅས་པ་གསད་དོ་ཟེར་ནས་ཁོས་བསམ་པར། འདིའི་དགྲ་ལ་ལན་གླན་གྱི་སྤྱན་འདྲེན་དུ་འགྲོའོ། །གལ་ཏེ་ཐམས་ཅད་མཁྱེན་པ་ཡིན་ན་མི་ཁུག་ལ་མིན་ན་ཁས་ལེན་ནམ་སྙམ་ནས་སྟོན་པའི་དྲུང་དུ་སོང་སྟེ་ཞུས་པས་གནང་ངོ་། །ཁོས་འདི་ནི་ཐམས་ཅད་མཁྱེན་པ་མིན་གྱིས་དགྲའི་ལན་ཀླན་ནོ་སྙམ་ནས། ཁྱིམ་གྱི་སྒོར་དོང་ཆེན་
པོ་བརྐོས་ཏེ་ནང་དུ་ཤིང་ཀ་དི་དའི་མེ་བདག་གིས་བཀང་། སྟེང་དུ་རྩྭས་གཡོགས་ཏེ་སས་བཀབ། དུག་རྣོན་པོས་བཟའ་བཏུང་སྦྱར་ཏེ་བཞག་གོ །དེ་ནས་མེ་སྐྱེས་ཀྱི་སྲིང་མོས་དཔལ་སྦེད་ཅི་མཛད། དེ་ན་རེ། དགྲ་གོའུ་ཏ་མ་གསད་པའི་ཕྱིར་རོ། །མོ་ན་རེ་དེ་དགྲ་ཡིན་ན་གཉེན་སུ་མཆིས་ཟེར་བས་དཔལ་སྦེད་ཀྱིས་འདིའང་དགེ་སྦྱོང་གོ་ཏ་མ་ལ་དད་པས་གསང་བ་ཤོར་བར་འགྱུར་རོ་སྙམ་ནས་མོ་བང་མཛོད་དུ་བཅུག་གོ །གང་པོ་སོགས་ལའང་སྦྲན་པས་དེ་དག་དགའ་ནས་ཡང་ཐོག་ཏུ་འཁོད་དོ། །དཔལ་སྦེད་ཀྱིས་སྟན་བཏིང་ནས་སྟོན་པ་སྤྱན་དྲངས་པ་དང་སྟོན་པས་ཀུན་དགའ་བོ་ལ་དགེ་སློང་རྣམས་ལ་དཔལ་སྦེད་ཀྱི་ཁྱིམ་དུ་སངས་རྒྱས་མ་གཤེགས་པར་སྔར་དགེ་སློང་སུའང་མ་འགྲོ་སྒོས་ཤིག །དེས་བསྒོ་ནས་སྟོན་པ་དགེ་འདུན་དང་བཅས་དཔལ་སྦེད་ཀྱི་ཁྱིམ་དུ་གཤེགས་པ་ན། འོད་མའི་ཚལ་གྱི་ལྷ་བྲན་རྣམས་སྟོན་པའི་དྲུང་དུ་འཁོད་དེ། བཅོམ་ལྡན་འདས་དེ་ན་མ་གཤེགས་ཤིག །ཉིད་ལ་མ་རུང་བ་བགྱི་སླད་དེ། དོང་ཆེན་པོ་མེ་མདག་གིས་བཀང་བ་དང་། དུག་རྣོན་པོ་བཟའ་བཏུང་ལ་སྦྱར་ནས་ཡོད་དོ་ཞེས་ཞུས་པས། དེ་བཞིན་གཤེགས་པ་གནོད་པ་ཐམས་ཅད་དང་བྲལ་ན་དེས་ང་ལ་གནོད་པ་བྱར་ཅི་ཡོད་གསུངས་ནས་བྱོན་ནོ། །ཡང་རྒྱལ་པོའི་ཁབ་ཀྱི་ལྷ་དང་དཔལ་སྦེད་ཁྱིམ་གྱི་ལྷས་ཀྱང་སྔ་མ་བཞིན་གསོལ་ཡང་མ་གསན་ནོ། །དེའི་ཚེ་དཔལ་སྦེད་ཀྱི་ཆུང་མ་ནི། ད་ཙམ་དོང་གི་སྟེང་དུ་ཞབས་བཞག །ད་ཙམ་ལྷུང་། ད་ཙམ་ཚིག་གོ་སྙམ་ནས་ངུ་ཞིང་འདུག་གོ །
དེ་ནས་སྟོན་པས་དཔལ་སྦེད་གྱི་སྒོའུ་མེ་དོང་སྟེང་དུ་ཞབས་བཞག་མ་ཐག །དེ་ཉིད་མཚེའུ་པདྨ་ཅན་དུ་གྱུར་ཏེ་ཨུཏྤལ་སོགས་མེ་ཏོག་སྣ་ཚོགས་ཀྱིས་ཁེངས་ཆུ་བྱ་མང་པོས་སྐད་འབྱིན་པ་ཞིག་ཏུ་གྱུར། ལྷ་རྣམས་ཀྱིས་ནམ་མཁའ་ལས་མེ་ཏོག་གི་ཆར་འབེབས་སོ། །དེ་ནས་སྟོན་པ་པདྨའི་སྙིང་པོ་ཅན་གྱི་སྟེང་དུ་ཞབས་བཞག་སྟེ་དཔལ་སྦེད་ཀྱི་ཁྱིམ་དུ་བྱོན་པས་དཔལ་སྦེད་ངོ་མཚར་ནས། གང་པོ་བཅོམ་ལྡན་འདས་ཀྱིས་རྫུལ་འཕྲུལ་ལ་ལྟོས་ཤིག་སྨྲས་སོ། །གང་པོ་མ་དགའ་སྟེ་བཞིན་བསྒྱུར་ནས་ཁྱོད་དགེ་སྦྱོང་གོའུ་ཏ་མའི་སྒྱུ་ལ་དད་དམ་ཟེར། སྨྲས་པ་ཁྱོད་ཀྱང་ཐམས་ཅད་མཁྱེན་པ་ཡིན་ན་སྒྱུ་མ་དེ་ལྟ་བུ་གྱིས་ཤིག་ཟེར་བས་གང་པོ་ཡི་ཆད་དེ་བྲོས་ནས་སོང་ངོ་། །དཔལ་སྦེད་ཀྱིས་ཆུང་མ་པ་ཚུར་ཤོག་སྟོན་པ་ལ་ཕྱག་འཚོལ་ཅིག །ཁོ་བོ་མངོན་དུ་འབྱུང་མི་ནུས་ཕྱིར་ང་ཁྲིད་ཅིག་སྨྲས་སོ། །དེར་མོས་སྟོན་པའི་དྲུང་ན་ཁྲིད་དེ། འདི་མི་དགེ་བའི་གྲོགས་པོས་བསླུས་ནས་མི་དགེ་བ་དེ་ལྟ་བུ་བྱས་པ་བཟོད་པར་མཛོད་ཅིག་གསོལ་བས་སྟོན་པས་ཕྱག་གླང་པོའི་སྣ་ལྟ་བུ་བརྐྱངས་ནས། ཁྱིམ་བདག་དེ་བཞིན་གཤེགས་པ་ལ་ནི་དགྲ་གཉེན་གྱི་བྱེ་བྲག་མེད་དོ་བཟོད་དོ་གསུངས་ནས་དབུགས་དབྱུང་བས་ཁྱིམ་བདག་རབ་ཏུ་དགའ་སྟེ། བདག་སྡིག་པའི་གྲོགས་པོས་བསླུས་པའི་ཕྱིར་བཤོས་ལ་དུག་རྣོན་པོ་བཏབ་པས་དེ་དག་ཕོ་ལ་ད་གཟོད་སྦྱར་གྱི་ཅུང་ཟད་བཞུགས་ཤིག་ཟེར། ཁྱིམ་བདག་ངས་ནི་དུག་གསུམ་ཡང་བོར་ན་དུག་ངན་པ་དེས་ཅི་བྱར་ཡོད། གང་སྦྱར་བ་དེ་ཁྱེར་ཤོག་གསུངས་ནས་གདན་ལ་བཞུགས་ཏེ། ཀུན་དགའ་བོ། དགེ་སློང་རྣམས་ལ་རྒན་
རིམ་དུ་འབྱོར་ཚོགས་ཞེས་སྐད་མ་བྱུང་བར་དུ་སུས་ཀྱང་མ་ཟ་གྱིས་ཤིག་གསུངས་པས་དེས་ཀྱང་བསྒོའོ། །དེ་ནས་དགེ་འདུན་བདེ་བར་འཁོད་དེ་ཁ་ཟས་འདྲེན་པ་དང་སངས་རྒྱས་ཀྱི་རྫུ་འཕྲུལ་གྱིས་དེའི་ཁྱིམ་དུ་འབྱོར་ཚོགས་ཞེས་སྐད་བྱུང་བ་དང་དུག་ཐམས་ཅད་མེད་པར་གྱུར་ཏོ། །དཔལ་སྦེད་དོགས་བཞིན་དུ་ཁ་ཟས་འབྲིམ་ཞིང་རྒན་རིམ་ནས་གཞོན་ནུའི་བར་དུ་འོངས་ཏེ། བཅོམ་ལྡན་འདས་དུག་གསུམ་སྤངས་ཟིན་གྱི་ཉན་ཐོས་ཐམས་ཅད་དེ་ལྟར་མ་ཡིན་པས་ད་ཙམ་རྒན་རིམ་ནས་ཤིའོ་སྙམ་ཡང་གཅིག་ཀྱང་མ་གནོད་དེ། ཐ་ན་དེའི་ལྷག་མ་ཟ་བ་ཚུན་ཆད་ཀྱང་གནོད་པ་མ་གྱུར་བས་རབ་ཏུ་དད་དེ་ཆོས་ཞུས་ནས་བདེན་པ་མཐོང་། དེ་ཚུན་ཆད་མུ་སྟེགས་གཅེར་བུ་པ་རྣམས་ལ་སྒོ་བཅད། འཁོར་རྣམ་པ་བཞི་ལ་སྒོ་དབྱེའོ། །༈ ཡལ་འདབ་དགུ་པ་ནི། རྒྱལ་པོའི་ཁབ་ན་ཁྱིམ་བདག་རབ་ཏུ་བཟང་པོ་ཞེས་བྱ་བ་ལོངས་སྤྱོད་ཤིན་ཏུ་ཆེ་བ་ཞིག་གིས་རིགས་མཉམ་པ་ལས་ཆུང་མ་བླངས་ཏེ་དགའ་མགུར་སྤྱོད་པས་སེམས་ཅན་ཞིག་ཞུགས་སོ། །སྟོན་པ་བསོད་སྙོམས་ལ་བྱོན་པ་དང་ཁྱིམ་བདག་གིས་བདག་གི་མཆིས་བྲང་ལ་སེམས་ཅན་ཞིག་ཞུགས་ན་བུ་དང་བུ་མོ་གང་བཙའ་ཞུས་པས། སངས་རྒྱས་ཀྱིས་བུ་ཕོ་བཙའ་ཞིང་རིགས་གསལ་བར་བྱེད། ལྷ་མིའི་དཔལ་འབྱོར་ཉམས་སུ་མྱོང་། ངའི་བསྟན་པ་ལ་རབ་ཏུ་བྱུང་ནས་དགྲ་བཅོམ་པར་
འགྱུར་རོ། །ཞེས་ལུང་བསྟན་དེས་ཀྱང་བསོད་སྙོམས་ཕུལ་ལོ། །དེར་གཅེར་བུ་པ་ཞིག་ཡོད་པ་དེས་ངས་བསླང་བའི་ཁྱིམ་གཅིག་ཡོད་པ་དེ་ཁ་དྲངས་སོ་སྙམ་ནས། ཁྱིམ་བདག་སར་འོང་སྟེ་འདིར་གོའུ་ཏ་མ་འོང་ངམ་ཟེར། བྱོན་ནོ་སྨྲས་པས་ཅི་ལུང་བསྟན་ཟེར། འདི་ལྟར་བསྟན་ཏོ་བྱས་པས། དེ་རྩིས་ལ་མཁས་ཕྱིར་རྡོ་རྒྱུས་དཀར་པོ་བླངས་ཏེ་བརྩིས་པས་ཐམས་ཅད་བདེན་པར་མཐོང་ནས་ཕྲག་དོག་གི་བསམ་པས་བཞིན་བསྒྱུར་བས་ཅི་ཡིན་ཟེར། དེས་སྨྲས་པ། ཅུང་ཟད་བདེན་ལ་ཅུང་ཟད་རྫུན་ནོ། །བུ་ཕོ་བཙའ་བ་དང་རིགས་གསལ་བར་བྱེད་པ་ནི་བདེན་ཏེ། གསལ་བ་ཞེས་མེའི་མིང་ཡིན་ལ་བཙས་མ་ཐག་ཏུ་ཁྱོད་ཀྱི་ཁྱིམ་མེས་འཚིག་གོ །ལྷ་དང་མིའི་དཔལ་མྱོང་བ་མི་བདེན་ཏེ་མིས་ལྷའི་དཔལ་མྱོང་བ་སུ་ཡོད། རབ་ཏུ་འབྱུང་བ་ནི་བདེན་ཏེ་དེ་བཟའ་རྒྱུ་མེད་པའི་ཕྱིར། དགྲ་བཅོམ་འཐོབ་པ་ནི་མི་བདེན་ཏེ་གོའུ་ཏ་མའང་དགྲ་བཅོམ་མིན་ན་དེའི་ཉན་ཐོས་ལྟ་ཅི་སྨོས་ཟེར་བས་ཁྱིམ་བདག་སྡུག་སྟེ་དོར་བར་བྱའོ་སྙམ་ནས་སྦྲུམ་མ་ལ་སྨན་མ་ཡིན་པ་བྱིན་ནོ། །སྲིད་པ་ཐ་མལ་བ་ཡིན་པས་དེའི་སྨན་དུ་གྱུར་ཏོ། །གསུས་པ་མཉེ་བས་གཡས་དང་གཡོན་དུ་བྲོས་ཤིང་མས་ངུས་པས། ཁྱིམ་མཚེས་འོངས་ནས་ཅིའི་ཕྱིར་ངུ་། བུ་བཙའམ་ཞེས་སྨྲས་པས་སོང་ངོ་། །དེ་ནས་ཁྱིམ་བདག་དེས་ལྐོག་ཏུ་ཆུང་མ་དབེན་པར་ཁྲིད་ནས་བསད་དེ་རོ་སླར་ཁྱིམ་དུ་ཁྱེར། བདག་གི་ཆུང་མ་ཤིའོ་ཞེས་བསྒྲགས་ནས་དུར་ཁྲོད་དུ་ངུ་ཞིང་ཁྱེར་སོང་ངོ་། །གཅེར་བུ་པས་དེ་ཐོས་པས་ཤིན་ཏུ་དགའ་འོ། །
སྟོན་པས་མཁྱེན་ནས་འཛུམ་པར་མཛད་པས་འོད་ཟེར་བཀྱེ་སྟེ་ལས་གཉིས་མཛད་ནས་ཞལ་དུ་ནུབ་བོ། །དེའི་རྒྱུ་ཞུས་པས། སྟོན་པ་དུར་ཁྲོད་དུ་གཤེགས་ཀྱིས་ཆོས་གོས་ལོངས་ཤིག་གསུངས། ལྷ་མི་བརྒྱ་སྟོང་དང་བཅས་ཏེ་བསིལ་བའི་ཚལ་དུ་གཤེགས་པ་ན། བྲམ་ཟེའི་ཁྱེའུ་ཞིག་གིས། གོའུ་ཏ་མས་ལུང་དུ་བསྟན་པ་བརྫུན་ནོ། །རྒྱལ་རིགས་ཀྱི་ཁྱེའུ་ཞིག་གིས། རྒྱལ་བས་བརྫུན་གསུངས་མི་སྲིད་ཀྱི་དེ་ལྟ་ན་དུར་ཁྲོད་དུ་འདེངས་སོ་ཟེར་ནས་སྟོན་པ་ལ་དད་པའི་ཚིགས་སུ་བཅད་པ་སྨྲ་ཞིང་། རྒྱལ་པོ་གཟུགས་ཅན་སྙིང་པོས་ཀྱང་དེ་ཐོས་ནས་སྟོན་པ་དོན་མེད་པར་མི་གཤེགས་ཀྱི་བལྟར་འགྲོའོ་སྙམ་ནས་འོངས་སོ། །སྟོན་པ་བྱོན་ཏེ་གདན་ལ་བཞུགས། ཁྱིམ་བདག་དེས་མེ་སྦར་ཏེ་ཆུང་མའི་རོ་བསྲེགས་པ་དང་ལྟོ་བའི་ཉེ་འཁོར་མ་ཚིག་ཅིང་གཞན་ཐམས་ཅད་ཚིག་གོ །ལྟོ་བའི་ཉེ་འཁོར་དེ་བརྡོལ་བས་པདྨའི་སྙིང་པོ་ལས་གཞོན་ནུ་གཟུགས་བཟང་བ་བལྟ་ན་སྡུག་པ་ཞིག་བྱུང་ངོ་། །སྐྱེ་བོ་རྣམས་ངོ་མཚར་ཞིང་གཅེར་བུ་བའི་ང་རྒྱལ་ཉམས་སོ། །སྟོན་པས་ཁྱིམ་བདག་གཞོན་ནུ་ལོངས་ཤིག་གསུངས་ཀྱང་། དེས་མེས་ཚིག་པའི་ཟོན་གྱིས་མ་བླངས་སོ། །འཚོ་བྱེད་ལོངས་ཤིག་གསུངས་པས་དེས་ཐེ་ཚོམ་མེད་པར་མེ་ནང་དུ་ཞུགས་ནས་བླངས་སོ། །འཚོ་བྱེད་མེས་མ་གནོད་དམ་གསུངས། བདག་རྒྱལ་པོའི་ཕོ་བྲང་དུ་སྐྱེས་ཀྱང་བསིལ་བ་འདི་ལྟ་བུ་སྔར་མ་མྱོང་ལགས་སོ་ཞུས། ཁྱིམ་བདག་ལ་བུ་ཁྱེར་ཞིག་གསུངས། དེས་གཅེར་བུ་པའི་གདོང་དུ་བལྟས་པས་ཁོ་ན་རེ་སྐལ་ཆད་འདི་མ་ཚིག་པས་ཁྱིམ་ངེས་པར་ཚིག་ཅིང་ཁྱོད་ཀྱང་སྲོག་དང་བྲལ་
ལོ་ཟེར། དེས་མ་བླངས་པ་དང་གཟུགས་ཅན་སྙིང་པོ་ལ་བུ་འདིའི་མིང་མེ་སྐྱེས་ཏེ་ཁྱོད་ཀྱིས་ལོངས་ཤིག་གསུངས་པས་རྒྱལ་པོས་བླངས་ནས་མ་མ་བརྒྱད་ཀྱིས་བསྐྱེད་བསྲིངས། དེ་ནས་སྟོན་པས་ཆོས་འཆད་པས་སྐྱེ་བོ་ཕལ་ཆེར་འབྲས་བུ་བཞི་ལ་སོགས་པ་ཐོབ་བོ། །དེའི་ཞང་པོ་ཡུལ་གཞན་ཞིག་ཏུ་སོང་བ་དེས། དེ་ལྟ་བུའི་གནས་ཚུལ་ཞིབ་པར་ཐོས་པས། ཁྱིམ་བདག་རབ་བཟང་ལ། ཁྱོད་ཀྱིས་ངའི་སྲིང་མོ་བསད་པའི་བུ་ཡང་མ་བླངས་པས་རྒྱལ་པོ་ལ་ཞུ་འོ་སོགས་ཀྱིས་བསྔངས་པས་དེས་རྒྱལ་པོའི་མདུན་དུ་སོང་ནས་བུ་གནང་བར་ཞུས་པ་ན་སྟོན་པ་ལ་ཞུས་གསུངས། སྟོན་པས་གནང་བས་རྒྱལ་པོས་བསྐུར་བར་བརྩམས་ཏེ་འདི་ངས་བསྐྱེད་བསྲིངས་པས་ང་བལྟ་བའི་ཕྱིར་ཉིན་རེ་བཞིན་ལན་གསུམ་གསུམ་དུ་ཤོག་གསུངས་ནས་རྒྱན་མང་པོས་བརྒྱན་གླང་པོར་བསྐྱོན་ནས་བཏང་ངོ་། །འཇིག་རྟེན་ན་ཕ་མ་ཤི་བར་བུའི་མིང་མི་བསྒྲག་པ་ལ་དེའི་ཚེ་ཕ་ཤི་ནས་མེ་སྐྱེས་ཁྱིམ་བདག་ཏུ་གྱུར་དཀོན་མཆོག་གསུམ་ལ་སྐྱབས་སུ་འགྲོ་ཞིང་མ་བསད་པའི་སར་གཙུག་ལག་ཁང་བརྩིགས་པར་ཀུ་མཉེའི་ཚལ་གྲགས། དེའི་ཞང་པོས་གཏམ་ཐོས་ནས་ཙནྡན་ས་མཆོག་གི་ལྷུང་བཟེད་རིན་པོ་ཆེས་གང་བ་ཞིག་སྐྱེས་སུ་བསྐུར་རོ། །དེས་ཤིང་རིང་པོའི་རྩེ་ལ་བཏགས་ནས་འདི་སྐས་དང་ལྕགས་ཀྱུ་སོགས་མིན་པའི། དགེ་སྦྱོང་ངམ། བྲམ་ཟེ་རྫུ་འཕྲུལ་ཅན་ཞིག་གིས་ཁྱེར་ཅིག་སྨྲས་སོ། །དེ་འོད་སྲུང་སྟོབས་བཅུ་པས་མཐོང་ནས་ལག་པ་གླང་པོ་ཆེའི་སྣ་ཞགས་ལྟ་བུས་བླངས་ནས་ཁྱེར་རོ། །
མེ་སྐྱེས་ནི་ལྷའི་བདེ་སྐྱིད་གྱི་དཔལ་ཉམས་སུ་མྱོང་ལ། དེའི་ཚེ་རྒྱལ་པོའི་ཁབ་ན་བྲམ་ཟེ་བཟའ་མི་གཉིས་ཡོད་པའི་དེའི་ཆུང་མས་རས་བལ་ཉོས་ནས་འཁལ་ཏེ་འཐགས་སུ་བཏགས། འདི་ཚོང་དུས་སུ་ཁྱེར་ལ་ཀརྴ་པ་ན་སྟོང་སྟེར་ན་བྱིན་མ་ཡིན་ན་ཚོང་འདུས་མ་ཡིན་ནོ། །ཞེས་སྒྲོགས་ཤིག་ཟེར། དེས་ལན་གཉིས་སུ་ཚོང་འདུས་སུ་ཕྱིན་ནས་འགྲིམས་ཀྱང་ཉོ་མཁན་མ་བྱུང་བའི། རྗེས་མར་ཤོ་གམ་པ་ལས་བྱུང་བའི་རས་གཞན་ཞིག་ཀྱང་ཁྱེར་ནས་སོང་ཡང་སུས་མ་ཉོས་པས་ཚོང་འདུས་མ་ཡིན་ནོ་ཞེས་བསྒྲགས་པ་མེ་སྐྱེས་ཀྱིས་ཐོས་ནས་ལོ་རྒྱུས་དྲིས། དེའི་རྒྱུ་བཤད་པས་འདིར་ཁྱེར་ཤོག་ཟེར། ཁྱེར་ནས་བལྟས་པ། མ་སྤྱད་པ་འདིས་ལྔ་བརྒྱ་རི། སྤྱད་པ་འདིས་ཉིས་བརྒྱ་ལྔ་བཅུ་རི་སྨྲས་པས། ཁྱད་མེད་ཟེར། མེ་སྐྱེས་ཀྱིས་མངོན་དུ་བསྟན་གྱིས་བྱས་ནས། གཉིས་ཀ་ནམ་མཁར་བོར་བས་མ་སྤྱད་པ་དེ་ལྡིང་། སྤྱད་པ་དེ་ལྷུང་། ཚེར་མ་ལ་དྲུད་པ་མ་སྤྱད་པ་མ་ཐོགས། སྤྱད་པ་དེ་འཐོགས་སོ། །ཁོ་ན་རེ། ཁྱེད་མཐུ་ཆེ་བ་ཡིན་གྱིས་གང་དགར་གྱིས་ཟེར། དེར་མགྲོན་པོ་ཡིན་པས་མཆོད་པའི་ཕྱིར་སྟོང་བྱིན་ནོ། །མེ་སྐྱེས་ཀྱིས་མ་སྤྱད་པ་དེ་ཁྲུས་རས་བྱས། སྤྱད་པ་དེ་ཁྱེའུ་ཞིག་ལ་བྱིན། དེར་ཁྲུས་རས་བསྐམས་པར་རླུང་གིས་ཁྱེར་ནས་གཟུགས་ཅན་སྙིང་པོའི་པང་དུ་ལྷུང་བ་དང་། འདི་ག་ལས་འོངས་བློན་པོ་ན་རེ། ང་ལས་ནུ་བཞིན་དུ་གོས་ཀྱི་ཆར་ཏེ་རིན་པོ་ཆེའི་ཆར་ཡང་བབ་བོ་ཟེར། རྒྱལ་པོས་མེ་སྐྱེས་ལ་ལྷའི་དཔལ་མྱོང་བར་ལུང་བསྟན་གྱི་བོས་ཤིག་གསུངས། བོས་ནས་བྱིན་པས་ཅུང་ཟད་བགད་ནས་འདི་བདག་གིའོ་
ཟེར། ཅི་ལྷ་མིའི་དཔལ་མྱོང་ངམ་གསུངས་པས། མྱོང་ངོ་ཟེར། ང་སྤྱན་མི་འདྲེན་ནམ་གསུངས་། འདྲེན་ནོ་ཟེར། རྒྱལ་པོ་དེར་བྱོན་པ་དང་། བུད་མེད་ཀྱི་འཁོར་ཕྱི་པ་མཐོང་ནས་དབང་པོ་ཕྱིར་སློན་པར་བྱེད་དོ། །ཅིའི་ཕྱིར་འདི་ལྟར་བགྱིད། མནའ་མའོ། །མ་ལགས་སོ་ཕྱི་པའི་འཁོར་རོ། །དེ་བཞིན་ཏུ་བར་མ་ལའང་ངོ་། །བར་སྒོ་ནས་རྫིང་ཆུས་གང་བ་ལ་ཉ་རྒྱུ་བ་ལྟ་བུའི་འཕྲུལ་འཁོར་མཐོང་ནས་ལྷམ་ཕུད་པ་ན། ཅིའི་ཕྱིར། ཆུ་འབོག་པའོ། །ཆབ་མ་ལགས་ཏེ་རིན་པོ་ཆེའི་ས་གཞི་དང་ཉ་ནི་འཕྲུལ་འཁོར་རོ། །ཐུགས་མ་ཆེས་ནས་སོར་གདུབ་སྐྱུར་བས་ཀོ་ལ་ལ་ཟེར་ནས་སོང་བས་ཡིད་ཆེས་ཏེ་རིན་པོ་ཆེའི་ཁྲི་ལ་བསྡད། མནའ་མས་ཕྱག་འཚལ་བ་དང་མཆི་མ་བྱུང་། ཅིའི་ཕྱིར་ངུ་། མ་ཡིན་ཏེ་ཤིང་དུད་མནམ་པས་སོ། །དེ་ལྟར་ལྷ་མིའི་དཔལ་ལ་སྤྱོད་ཅིང་འདུག་པ་ན་རྒྱལ་པོའི་བྱ་བ་ཉམས་ནས་མ་སྐྱེས་དགྲས་སྦྲོན་དུ་བཏང་བས། ཁྱོད་ཀྱིས་ཞག་གཅིག་ཙམ་རྒྱལ་སྲིད་ཀྱི་བྱ་བ་བྱེད་མི་ནུས་སམ། བདག་གིས་དགུང་བདུན་དུ་འཚལ་ལོ། །མེ་སྐྱེས་ན་རེ། དེ་ལགས་ཏེ། མེ་ཏོག་ཁ་ཕྱེ་འཛུམ། ནོར་བུ་འོད་འབར་མི་འབར། བྱ་སྐད་འབྱིན་མི་འབྱིན་ལས་ཤེས་སོ། །མ་སྐྱེས་དགྲས་ནོར་བུ་ཞིག་བརྐུས་ནས་ཁྱེའུ་ཞིག་ལ་གཏད་པས། དེ་རང་གནས་སུ་སོང་ནས་བརྡེགས་པ་དང་། ཅི་ལ་བརྡེག །ང་རྐུན་མ་ཡིན་ན་འདི་དེ་བས་ཀྱང་རྐུན་ཆེན་པོ། མ་ལགས་ཏེ་རང་གནས་སུ་སོང་བ་ལགས། གཞོན་ནུ་ཅི་དགོས་པ་སྣོམས་ཤིག །དེ་སྐྱེངས་ནས་ཕ་ཤི་བ་དང་དབང་པོ་སྙམ་མོ། །མ་སྐྱེས་དགྲས་ཕ་སྲོག་དང་ཕྲལ་རང་རྒྱལ་པོར་སོང་བའི་ཚེ་ན།
མེ་སྐྱེས་ལ་ཁྱོད་དང་ང་སྤུན་ཡིན་པས་བགོའོ་ཟེར། དེ་སྐྲག་ནས། ཁྱོད་ལ་དབང་ན་བགོ་ཅི་འཚལ་འདིར་གཤེགས་སུ་གསོལ་བྱས་པ་ན། ལེགས་ཟེར་ནས་བརྗེས་པས་ལྷའི་ལོངས་སྤྱོད་དེ་མི་སྣང་བར་གྱུར་ནས་མེ་སྐྱེས་སར་སོང་། དེ་ལྟར་ལན་བདུན་དུ་གྱུར་པས་རྐུན་པོ་བཏང་ནས་འཛེགས་པ་དང་སྒྲ་བྱུང་བས་མེ་སྐྱེས་ཀྱིས་འདུག་པར་གྱུར་ཅིག་བསམ་པས་དེ་ཉིད་ན་འཁོད་དོ། །མ་སྐྱེས་དགྲས། ཐོང་ཞིག་ཟེར་བས་འགྲོ་བར་གྱུར་ཅིག་སྙམ་པས་སོང་ངོ་། །དེ་ནས་འདིས་ཕའང་བསད་པས་གསོད་ངེས་སྙམ་ནས་མེ་སྐྱེས་ཀྱིས་ལོངས་སྤྱོད་རྣམས་སྦྱིན་པར་བཏང་ནས་སྟོན་པའི་དྲུང་དུ་སོང་། ཚུར་ཤོག་གིས་བསྙེན་པར་རྫོགས་ནས་དགྲ་བཅོམ་པ་ཐོབ་བོ། །དེའི་རྒྱུ་ཞུས་པས། སངས་རྒྱས་རྣམ་གཟིགས་ཀྱི་ཚེ་ཕོ་བྲང་རྩ་ལག་ཅན་ན་རྒྱལ་པོ་མཉེན་ལྡན་ཞེས་བྱ་བས་རྒྱལ་སྲིད་བྱེད་དོ། །ཁྱིམ་བདག་ཉེས་མེད་ཅེས་བྱ་བས་སྟོན་པ་ལ་ཟླ་བ་གསུམ་དུ་བསྙེན་བཀུར་ཞུས་པས་གནང་ངོ་། །དེའི་རྗེས་སུ་རྒྱལ་པོས་ཟླ་བ་གསུམ་དུ་བསྙེན་བཀུར་ཞུས་པས་ཉེས་མེད་ཀྱིས་སྤྱན་དྲངས་ཟིན་ཏོ། །རྒྱལ་པོས་ཉེས་མེད་ལ་སྔོན་ལ་ངས་གསོལ་ནས་ཁྱོད་ཀྱིས་ཕྱིས་སུ་དགའམ་གསུངས། བདག་གིས་སྤྱན་དྲངས་ཟིན་པས་སྔོན་ལ་གསོལ་ལོ་ཟེར། འོ་ན་སུ་བཟང་བས་སྔོན་ལ་གསོལ་ལོ་གསུངས། དེ་ལྟར་བགྱིའོ་ཟེར་ནས་སོང་། ཉེས་མེད་ཀྱིས་སྔོན་དུ་དྲངས་རྒྱལ་པོས་རྗེས་སུ་དྲངས་པས་ཁྱད་མེད་གྱུར། རྒྱལ་པོ་སེམས་ལས་ཆེར་གྱུར་པ་ན་བློན་པོ་ཞིག་གིས་ལྷ། ཤིང་འཚོང་བ་ཁོགས་ཤིག་དང་འགྲུབ་པར་འགྱུར་ཟེར། བཀག་པས་དེ་
ལ་ཤིང་འཚོང་བ་མེད་པ་དང་། སྤོས་ཤིང་གིས་གདུགས་ཚོད་གཡོས། འབྲུ་མར་གྱིས་བརླན་པའི་རས་ཀྱིས་བག་ཆོས་བཙོས་པས་དྲི་ཞིམ་པོས་ཀུན་ཏུ་ཁྱབ་པ་རྒྱལ་པོས་ཚོར་ནས་ཅི་ཡིན་དྲིས། བློན་པོས་འདི་ལྟར་རོ་ཞེས་གསོལ་བས། ངས་དབང་བྱེད་དོ་གསུངས། ལྷ་ཁྱིམ་བདག་འདི་ལ་བུ་མེད་པས་ཤི་མ་ཐག་ནོར་ཁྱེད་ལ་མངའ་བར་འགྱུར་གྱིས་ཤིང་འཚོང་བ་གནང་མཛོད་གསོལ་བས། གནང་བ་དང་ཉེས་མེད་ཀྱིས་ཐོས་ནས། རྒྱལ་པོ་མ་དང་ལྷན་ཅིག་བསྲེག་ཀྱང་ཆོག་པའི་ཤིང་ཡོད་དོ་ཟེར། རྒྱལ་པོ་ཐུགས་མ་བདེ་བ་ན། བློན་པོས་དེ་འདྲ་མ་མཛད། ལྷའི་གྲོང་ཁྱེར་འདྲ་བའི་བཀོད་པ་ཕུན་སུམ་ཚོགས་པར་བཤམས་ནས་སྟོན་པ་སྤྱན་དྲངས་ཏེ། སྟོན་པའི་སྟེང་དུ་གླང་ཆེན་མཆོག་གིས་གདུགས་རྩིབས་བརྒྱ་པ་བཟུང་། དགེ་སློང་གཞན་ལ་གླང་ཆེན་ཕལ་གྱིས་གདུགས་བཟུང་། སྟོན་པ་ལ་བཙུན་མོ་དམ་པས་བསིལ་ཡབ་གཡོབ། གཞན་ལ་བཙུན་མོ་གཞན་གྱིས་གཡོབ་བོ་ཟེར་བས་དེ་ལྟར་བཤམས་པ་ན། ཉེས་མེད་ཀྱིས་ཚོར་ཏེ། གཞན་ནུས་ཀྱང་གླང་ཆེན་དང་བཙུན་མོ་མི་འབྱོར་སྙམ། མྱ་ངན་གྱིས་གདུང་བ་བརྒྱ་བྱིན་གྱིས་རྟོགས་ནས་ལྷའི་བུ་ལས་སྣ་ཚོགས་པ་ཉེས་མེད་ཀྱི་གྲོགས་ལ་བཏང་། དེས་སྔར་བས་ཆེས་ཁྱད་པར་དུ་འཕགས་པའི་གྲོང་ཁྱེར་ཞལ་ཟས་བཤམས། སྟོན་པའི་དབུ་ཐད་རྩིབས་བརྒྱ་པའི་གདུགས་གླང་ཆེན་ས་སྲུང་གིས་འཛིན། དགེ་སློང་རྣམས་ལ་ལྷའི་གླང་ཆེན་གཞན་གྱིས་གདུགས་འཛིན། སྟོན་པའི་སྤྱན་སྔར་བརྒྱ་བྱིན་གྱི་བཙུན་མོ་བདེ་སོགས་མས་བསིལ་ཡབ་གཡོབ། གཞན་ལ་ལྷའི་བཙུན་
མོ་མང་པོས་བསིལ་ཡབ་གཡོབ་ཏུ་བཅུག་གོ །རྒྱལ་པོས་བལྟ་རུ་བཏང་བ་ཀུན་ཡ་མཚན་ཏེ་དེ་ཉིད་དུ་བསྡད་པ་དང་། རྒྱལ་པོ་སོང་སྟེ་སྒོར་བསྡད་པས་སྟོན་པས། ཁྱོད་ཀྱིས་རྒྱལ་པོ་བདེན་པ་མཐོང་བ་ལ་ཚིག་རྩུབ་སྨྲས་པས་བཤགས་པ་ཕུལ་ཅིག་གསུངས། དེས་རྒྱལ་པོ་ལ་བཟོད་པར་གསོལ་ནས། ལྷ་ནང་དུ་གཤེགས་ལ་ཕྱག་ནས་བྲིམ་པར་མཛོད་ཅིག་ཟེར། ནང་དུ་བྱོན་པས་ལྷའི་འབྱོར་པ་མཐོང་ནས་ངོ་མཚར་ཏེ། ཁྱོད་གཅིག་པུས་གདུགས་ཚོད་གསོལ་བར་རིགས་ཀྱི། ཁོ་བོ་མ་ཡིན་ནོ་ཟེར། དེ་ནས་ཉེས་མེད་ཀྱིས་སྟོན་པ་ལ་ཕྱག་འཚལ་ནས། དགེ་བ་འདིས་བདག་ཕྱུག་ཅིང་ལོངས་སྤྱོད་ཆེ་བར་སྐྱེས། ཆོས་ཚུལ་འདི་ལྟ་བུ་ཐོས་ནས་སྟོན་པ་འདི་ལྟ་བུ་མཉེས་པར་བྱེད་པར་གྱུར་ཅིག་ཅེས་སྨོན་ལམ་བཏབ་པས། ད་ལྟ་འབྱོར་པ་ཆེ་བ་སོགས་ཡིན་ལ་རྒྱལ་པོར་ཚིག་རྩུབ་སྨྲས་པས་ཚེ་རབས་ལྔ་བརྒྱར་མ་དང་ལྷན་ཅིག་བསྲེགས་ཤིང་ད་ལྟའང་བསྲེགས་སོ། །༈ ཡལ་འདབ་བཅུ་པ་ནི་གོ་སླའོ། །