ཡལ་འདབ་གྱ་གཅིག་པ་ནས་དགུ་བཅུ་པའི་བར།
༈ ཡལ་འདབ་གྱ་གཅིག་པ་ནི་གོ་སླའོ། །༈ ཡལ་འདབ་གྱ་གཉིས་པ་ནི། མཉན་ཡོད་ན་ཁྱིམ་བདག་གཅིག་གིས་རིགས་མཉམ་པ་ལས་ཆུང་མ་བླངས་ཏེ་དགའ་མགུར་སྤྱད་པས་བུ་བྱུང་། དེར་ཕ་དེ་ཟོང་ཐོགས་ཏེ་ཡུལ་གཞན་དུ་སོང་བ་དང་ཤིའོ། །བུ་དེ་ཆེར་སྐྱེས་པ་ན་གྲོགས་པོ་ཞིག་དང་ལྷན་ཅིག་ཁྱིམ་ཞིག་གི་དྲུང་དུ་སོང་བ་དང་། ཁྱིམ་དེའི་སྟེང་ནས་བུ་མོ་ཞིག་གིས་མེ་ཏོག་གི་ཆུན་པོ་བུ་དེའི་སྟེང་དུ་འཕངས་པ། གྲོགས་པོས་ཀྱང་མཐོང་། དེར་བུ་དེ་ལ་ཁྱོད་ཁྱིམ་དེར་འཇུག་མི་ཉན་ནོ་བྱས་ནས་ཉིན་པར་བསྲུངས་ཏེ་མཚན་མོ་མའི་གམ་དུ་ཁྲིད་ནས་བརྡ་སྦྱར་ཏེ་སྲུངས་ཤིག་བསྒོའོ། །དེས་ཁྱེའུ་དེ་ཁྱིམ་དུ་མལ་བཅས་ནས་གྱོ་མོ་གཉིས་དང་ཆུ་དང་ས་བཞག་སྟེ་རང་ཉིད་སྒོ་ན་ཁྲི་བཅས་ནས་ཉལ་ལོ། །དེས་མ་སྒོ་ཕྱེས་ཤིག །གཅིར་འགྲོའོ་ཟེར། གྱོ་མོ་བཞག་གིས་དེར་གཅིས་ཤིག །ཡང་ཡུད་ཙམ་ཞིག་ནས་མ་སྒོ་ཕྱེས་ཤིག་བཤང་དུ་འགྲོའོ། །{དེས་སྨྲས་པ།}གྱོ་མོ་དང་ཆུ་དང་ས་བཞག་གིས་དེར་བཤང་བ་བྱོས་ཤིག །ཡང་ཡུད་ཙམ་ཞིག་བསྡད་ནས་མ་སྒོ་ཕྱེས་ཤིག །མི་འབྱེད་ན་གསད་དོ་ཟེར། དེ་ན་རེ། བུ་ཁྱོད་གང་དུ་འགྲོ་ཤེས་ཀྱི་སྒོ་མི་དབྱེའོ། །ཁོ་མོ་ཤི་བ་ནི་བླ་ཡི་བུ་ཤི་བ་ལ་བལྟ་མི་ཕོད་དོ་ཞེས་སྨྲས་པས། དེ་བུད་མེད་དེ་ལ་སེམས་ཆགས་པའི་དབང་གིས་ཁྲོས་ཏེ། རལ་གྲིས་མའི་མགོ་
བཅད་ནས་ས་ལ་བསྒྱེལ་ཏོ། །དེས་སྡིག་པ་བྱས་པས་འདར་བཞིན་དུ་སོང་བ་ན། བུ་མོ་དེ་ན་རེ། རྗེའི་སྲས། གཞན་སུ་ཡང་མེད་ཀྱི་མ་འཇིགས་ཤིག་ཟེར། དེས་སྨྲས་པ། ཁོ་བོས་ཁྱོད་ཀྱི་ཕྱིར་དུ་སྐྱེད་མ་མོ་བསད་དོ། །དེ་སྐྲག་ནས་འདིས་མ་འདི་ལྟར་བསད་ན་ཁོ་མོ་ལ་ཁྲོས་ན་གནས་སྐབས་ཅི་ཞིག་འགྱུར་སྙམ་དུ་སེམས་ཏེ། རྗེའི་སྲས་བདག་ཁང་ཐོག་ཏུ་འཛེགས་ནས་སླར་མཆི་བའི་བར་དུ་ཡུད་ཙམ་བཞུགས་ཤིག་བྱས་ནས་ཁང་ཐོག་ཏུ་སོང་ནས་ཆོམ་རྐུན་པ་ཞེས་སྒྲ་ཕྱུང་བ་ན། དེ་སྐྲག་ནས་བྲོས་ཏེ་རང་གི་ཁྱིམ་དུ་སོང་ནས་སྒོ་དྲུང་དུ་རལ་གྲི་བཞག་སྟེ། ཆོམ་རྐུན་པ་དེས་ཁོ་བོའི་མ་བསད་ནས་བྲོས་སོ་ཞེས་མ་ཡི་རོ་ལ་བཀུར་སྟི་བྱས་ནས་སོང་ངོ་། །དེ་མ་བསད་པས་འགྱོད་ནས་མུ་སྟེགས་ཅན་རྣམས་དང་དཀའ་ཐུབ་ཀྱི་གནས་སུ་སོང་ནས་སྡིག་པ་བྱང་བའི་ཐབས་དྲིས་པ་ན། མེ་མར་འཆོངས་ཤིག །དུག་ཟོ་ཞིག །གཡང་སར་མཆོངས་ཤིག་ལ་སོགས་པ་ཀུན་གྱིས་འཆི་བའི་ཐབས་ཁོ་ན་ལས་ངེས་འབྱུང་གི་ཐབས་སྟོན་པ་འགའ་ཡང་མེད་དོ། །དེ་ནས་རྒྱལ་བྱེད་ཚལ་དུ་སོང་བ་དང་། དགེ་སློང་ཞིག་གིས། གང་གིས་སྡིག་པའི་ལས་བྱས་པ། །དགེ་བ་ཡིས་ནི་འགོག་བྱེད་ན། །ཉི་ཟླ་སྤྲིན་ལས་བྱུང་བ་ལྟར། །འཇིག་རྟེན་འདིར་ནི་དེ་སྣང་འགྱུར། །ཞེས་ཁ་ཏོན་བྱེད་པ་ཐོས་ནས། འདིས་ནི་ངེས་པར་སྡིག་པའི་ལས་ཀྱང་དག་ནུས་སོ་སྙམ་ནས་དགེ་སློང་ཞིག་ལས་རབ་ཏུ་བྱུང་ནས་བསྙེན་པར་རྫོགས་ཏེ། བརྩོན་འགྲུས་བརྩམས་པས་སྡེ་སྣོད་གསུམ་དང་ལྡན་པ་རིག་གྲོལ་གྱི་སྤོབས་པ་ཅན་དུ་གྱུར་ཏོ། །དེ་ལ་དགེ་སློང་རྣམས་
ཀྱིས་བརྩོན་འགྲུས་བརྩམས་པའི་དོན་ཅི་ཡིན་དྲིས་པ་ན། སྐྱེད་མ་བསད་པའི་སྡིག་པ་བྱང་ཆེད་ཡིན་པར་སྨྲས་པས་སྐབས་དེ་སྟོན་པ་ལ་གསོལ་བ་དང་། མ་བསད་པ་ནི་འདུལ་བ་ལ་མི་སྐྱེ་བའི་ཆོས་ཅན་ཡིན་པས་ཕུད་པར་བྱའོ་གསུངས་པས། དེ་མཐའ་འཁོབ་ཞིག་ཏུ་སོང་ནས་ཁྱིམ་བདག་ཅིག་དད་པར་བྱས་ནས་གཙུག་ལག་ཁང་བརྩིག་ཏུ་བཅུག་སྟེ། དེ་ན་གནས་པ་དང་ཕྱོགས་ཐ་དད་ནས་འོངས་པའི་དགེ་སློང་མང་པོ་དེའི་གདམས་ངག་གིས་དགྲ་བཅོམ་པ་ཐོབ་བོ། །རེ་ཞིག་ན་དེ་ན་ནས་འཆི་ལ་ཐུག་པ་དང་། ལྷན་ཅིག་གནས་པ་རྣམས་ལ། ཁོ་བོའི་ཕྱིར་དུ་དགེ་འདུན་ལ་བསྲོ་ཁང་གྱིས་ཤིག་བྱས་པས་དེ་རྣམས་ཀྱིས་དེ་ལྟར་བྱས་སོ། །དེ་ནས་དགེ་སློང་དེ་ཤི་ནས་མནར་མེད་དུ་སྐྱེས་སོ། །དགྲ་བཅོམ་པ་ཞིག་གིས་མཁན་པོ་གང་དུ་སྐྱེས་བརྟག་པ་ན། མ་བསད་པས་མནར་མེད་དུ་སྐྱེས་པར་མཐོང་ངོ་། །དེ་མནར་མེད་ཀྱི་མེའི་འོད་ཀྱིས་ཕོག་པ་དང་། ཀྱེ་བསྲོ་ཁང་མེ་རེ་ཚ་ཞེས་སྨྲས་པས། དམྱལ་སྲུང་གིས་ཐོ་བས་མགོར་བསྣུན་ནས། སྐལ་ཆད་ཁྱོད་ཀྱི་བསྲོ་ཁང་གང་ན་ཡོད་འདི་ནི་མནར་མེད་པ་ཡིན་ནོ་ཞེས་སྨྲས་སོ། །དེ་དགེ་བའི་སེམས་ཀྱིས་ཤི་ནས་རྒྱལ་ཆེན་རིས་བཞིའི་ལྷར་སྐྱེས་སོ། །ལྷའི་བུ་དེས་དེར་སྐྱེས་པའི་རྒྱུ་མཐོང་ནས་དེ་ཉིད་ཀྱི་མཚན་མོར་བཅོམ་ལྡན་འདས་བལྟ་བའི་ཕྱིར། རྒྱལ་བྱེད་ཀྱི་ཚལ་ཐམས་ཅད་སྣང་བས་ཁྱབ་པར་བྱས་ཏེ། ལྷའི་མེ་ཏོག་སྣ་ཚོགས་ཀྱིས་སྟོན་པ་ལ་མངོན་པར་གཏོར་ནས་ཆོས་ཉན་པས་བདེན་པ་མཐོང་སྟེ་ཆེད་དུ་བརྗོད་པས་ཆེད་དུ་བརྗོད་དོ། །དེ་ནས་སྔར་འོངས་པའི་
ཆ་ལུགས་ཀྱིས་རང་གི་གནས་སུ་སོང་ངོ་། །དེའི་ལྷན་ཅིག་གནས་པའི་དགྲ་བཅོམ་པ་རྣམས་ཟས་ཀྱི་གྲལ་ན་འདུག་སྟེ། གཞན་ཞིག་གིས་ལག་ཆུ་གྲང་མོ་བྲིམས་པ་དང་། བདག་ཅག་ཆུ་གྲང་མོ་འདི་ལྟ་བུ་འཐུང་ན་མཁན་པོ་མནར་མེད་ན་ཟངས་ཁུ་བསྐོལ་མ་འཐུང་ངོ་སྙམ་ནས་མནར་མེད་དུ་བལྟས་པས་མི་སྣང་ངོ་། །ངན་སོང་གསུམ་དུ་བལྟས་ཀྱང་མི་སྣང་ནས། རྒྱལ་ཆེན་རིས་བཞིའི་ལྷར་སྐྱེས་ནས་སྟོན་པའི་སྤྱན་སྔར་བདེན་པ་མཐོང་སྟེ་ལྷ་རྣམས་ཀྱི་ནང་ན་འདུག་པ་མཐོང་ནས་འཛུམ་ཕྱུང་ཞིང་། ཀྱེ་མ་སངས་རྒྱས། ཀྱེ་མ་ཆོས། ཀྱེ་མ་དགེ་འདུན་ཞེས་ཆེད་དུ་བརྗོད་དོ། །༈ ཡལ་འདབ་གྱ་གསུམ་པ་ནི། འདུལ་བ་༼ང༽དབྱེན་གྱི་གཞི་ལས་གསུངས་པའི་དོན་མཐུན་བརྗོད་ན། སྔོན་ཝཱ་རཱ་ཎ་སཱིར་དང་ཉེ་བའི་བསྟི་གནས་མེ་ཏོག་དང་འབྲས་བུ་ཕུན་སུམ་ཚོགས་པ་བྱ་སྣ་ཚོགས་སྐད་འབྱིན་ཞིང་། བྱ་དང་རི་དྭགས་འདྲིས་པར་བསྟེན་པ་ན་དྲང་སྲོང་འབྲས་བུ་དང་། རྩ་བ་དང་། ཆུ་ལ་ལོངས་སྤྱོད་པ། པགས་པ་དང་ལོ་མ་གྱོན་པ། དུང་དང་བྲིས་པ་ཞེས་བྱ་བ་སྤུན་གཉིས་གནས་ཏེ། དུང་ནི་མཁན་པོ་བྱེད། བྲིས་པ་ནི་སློབ་མ་བྱེད་དོ། །རེ་ཞིག་དུང་གིས་རིལ་བ་ཆུས་བཀང་ནས་རྩ་བ་དང་འབྲས་བུའི་ཆེད་དུ་ནགས་སུ་སོང་། བྲིས་པས་མེ་ཏོག་དང་འབྲས་བུ་བླངས་ནས་དེར་ཕྱིན་པས་རང་གི་རིལ་
བར་ཆུ་མེད་ནས་ཤིན་ཏུ་སྐོམ་པས་དུང་གི་རིལ་བ་ནས་ཆུ་བཏུང་ངོ་། །དེ་དུང་གིས་མཐོང་སྟེ་ཁྲོས་ནས་ཆུ་སུས་བརྐུས་སྨྲས་པས། བྲིས་པས་བདག་གོ་བརྗོད་པ་ན་དེ་སྤུན་དང་སློབ་མ་ཡིན་པས་ཁྲོ་བ་ཞི་ནས་ལེགས་སོ་བརྗོད་ཀྱང་བྲིས་པས་ཉེས་ཕྱིར་ཆད་པ་ནན་དུ་གཅོད་པར་བསྐུལ་བས། དེ་ཁྲོས་ཏེ་འོ་ན་རྒྱལ་པོར་ཞུས་ཟེར། བྲིས་པས་ཡུལ་དེའི་རྒྱལ་པོ་ལ་ནན་བསྐུལ་བས་འོ་ན་རེ་ཞིག་སྡོད་ཅིག་ཟེར། བྲིས་པ་དེར་ལྟོགས་སྐོམ་གྱིས་གདུང་བཞིན་ཞག་དྲུག་ལོན་ཡང་རྒྱལ་པོ་བྱ་བ་མང་བས་བརྗེད་པ་ན། སླར་བློན་པོ་རྣམས་ཀྱིས་རྒྱལ་པོར་དྲན་པ་གསོས་པས། ཆད་པ་དེ་ཁོ་ན་ཡིན་གྱིས་སོང་ཞིག་ཟེར། དེའི་དུས་ཀྱི་རྒྱལ་པོ་ཚངས་བྱིན་ནི་སྒྲ་གཅན་ཟིན་ཡིན་གསུངས། ཡང་གནག་ལྷས་ཤིག་ན་ཕྱུགས་རྫི་མ་དང་། བུ་མོ་མ་སྨད་ཞིག་གནས། དེ་གཉིས་དར་བའི་བུམ་པ་ཐོགས་ཏེ་རྒྱུན་དུ་གྲོང་མཐར་འགྲོ་བ་ལ། བུ་མོ་ངན་གཡོ་ཆེ་བས་ཡུམ་རེ་ཞིག་དར་བའི་བུམ་པ་སྣོམས་ཤིག་བདག་ཆུ་བསིལ་ལོ་སྨྲས་པས་མ་རྒན་རང་བཞིན་བཟང་བའི་ཕྱིར་དར་བུམ་ལྗི་བ་ཁུར་ནས་རྒྱང་གྲགས་དྲུག་ཏུ་སོང་ངོ་། །དེའི་སྐབས་ཀྱི་བུ་མོ་ནི་གྲགས་འཛིན་མའོ་གསུངས། ༈ ཡལ་འདབ་གྱ་བཞི་པ་ནི། བཅོམ་ལྡན་འདས་ཡུལ་སྒྲ་གཅན་གྱི་གནས་དྲང་སྲོང་ཀུན་ཛི་ཀའི་ནགས་ན་བཞུགས་སོ། །དེའི་ཚེ་བླ་གབ་མེད་པར་ལྷུང་བཟེད་རབ་ཏུ་མང་པོ་བཞག་པ་ལ།
སྤྲེའུ་ཞིག་ཤིང་ལས་བབས་ཏེ་དེར་སོང་བ་དགེ་སློང་རྣམས་ཀྱིས་སྤྲེའུས་ལྷུང་བཟེད་བཅག་གི་དོགས་ཏེ་བཟློག་པ་ལས། སྟོན་པས་དགེ་སློང་དག་སྤྲེའུ་འདི་དྲན་པ་དང་ལྡན་པ་ཡིན་པས་མ་བཟློག་ཅིག །ཅེས་བཀའ་སྩལ། དེ་ནས་སྤྲེའུ་དེས་བཅོམ་ལྡན་འདས་ཀྱི་ལྷུང་བཟེད་བླངས་ཏེ། ཤིང་སཱ་ལའི་སྡོང་པོ་ལ་འཛེགས་ནས་སྦྲང་བུ་ལ་གནོད་པ་མེད་པར་སྦྲང་རྩིའི་དྭངས་མ་བླངས་ཏེ་ལྷུང་བཟེད་བཀང་ནས་ལྗོན་ཤིང་ལས་བབས་ཏེ་སྟོན་པ་ལ་ཕུལ་བ་ན་མ་བཞེས་ཏེ། དེས་ཕྱོགས་གཅིག་ཏུ་སོང་ནས་སྲོག་ཆགས་ཤི་བའི་ཡན་ལག་ཕྲ་མོ་ཡོད་པ་དག་བསལ་ནས་ཕུལ་ཡང་མ་བཞེས། ཡང་ལྷུང་བཟེད་དེ་བླངས་ཏེ་ཆུ་གཙང་མས་བྲན་ཏེ་ཕུལ་བས་སྟོན་པས་ཕྱག་ཏུ་བཞེས་ཤིང་གསོལ་བར་མཛད་དོ། །དེར་སྤྲེའུ་དེ་དགའ་མགུ་རངས་ནས་ཕྱི་ནུར་ཕྱིར་ནུར་དུ་གར་བྱས་ཤིང་། སྟོན་པ་ལ་དད་བཞིན་པར་ཁྲོན་པར་ལྷུང་སྟེ་ཤི་ནས་གྲོང་ཁྱེར་དེ་ཉིད་དུ་བྲམ་ཟེ་ལས་དྲུག་ལ་བརྩོན་པ་ཞིག་གི་ཆུང་མའི་མངལ་དུ་ཞུགས་ནས་ཕྱིས་བཙས་པ་ན་ཁྱིམ་དུ་སྦྲང་རྩིའི་ཆར་བབ། དེའི་མིང་གནས་འཇོག་གི་བུ་སྦྲང་རྩི་ཅན་ཞེས་བཏགས། དེ་ནས་ཕྱིས་ཡུན་རིང་ཞིག་ནས་དེ་རབ་ཏུ་བྱུང་སྟེ་ཉིན་རེ་བཞིན་འབད་བརྩོན་མེད་པར་སྦྲང་རྩི་ལྷུང་བཟེད་གསུམ་གསུམ་རྙེད་པར་གྱུར་ཏོ། །དང་པོ་ནི་སངས་རྒྱས་ལ་འབུལ། གཉིས་པ་ནི་དགེ་འདུན་ལའོ། །གསུམ་པ་ནི་བདག་ཉིད་གྲོགས་དང་བཅས་པ་ལོངས་སྤྱོད་དོ། །དེས་མཐར་དགྲ་བཅོམ་པའི་འབྲས་བུ་མངོན་དུ་བྱས་པ་སོགས་གོ་སླའོ། །༈ ཡལ་འདབ་གྱ་ལྔ་པ་ནི། འདུལ་བ་༼ང༽དབྱེན་གྱི་གཞིར་འབྱུང་ཡང་གོ་སླའོ། །
༈ ཡལ་འདབ་གྱ་དྲུག་པ་ནི། འདུལ་བ་༼ག༽གནས་མལ་གྱི་གཞིར་འབྱུང་བ་དོན་མཐུན་པས་འཆད་ན། སྔོན་བྱུང་བ་འདས་པའི་དུས་ན། ཡུལ་ཀ་ཤིའི་ནགས་སྟུག་པོ་ཞིག་ན་གོང་མ་སྲེག་དང་། རི་བོང་དང་། སྤྲེའུ་དང་། གླང་པོ་ཆེ་སྟེ་སྲོག་ཆགས་བཞི་ཞིག་གནས་སོ། །དེ་དག་ཕན་ཚུན་ཡིད་གཅུགས་པས་ལྷན་ཅིག་གནས་ཤིང་མཐུན་པ་སོགས་མཛའ་བཤེས་ཀྱི་སྤྱོད་ལམ་ཁོ་ནར་བྱེད་དོ། །ཇི་ཙམ་ན། དེ་དག་གི་བློ་སྐྱེས་ཏེ་རྒན་རིམ་དུ་བསྙེན་བཀུར་བྱ་བ་བགྲོས་ཏེ་ཁ་མཐུན་པ་ན། སྲོག་ཆགས་བཞིའི་རྒན་རིམ་བརྟག་པའི་ཆེད་དུ། གོང་མ་སྲེག་གིས་ཤིང་ནྱ་གྲོ་དྷ་ཞིག་བསྟན་ནས། ཤེས་ལྡན་དག །སུས་ཤིང་ནྱ་གྲོ་དྷའི་ཚད་ཇི་ཙམ་པ་མཐོང་། གླང་པོ་ཆེས་སྨྲས་པ། ཁོ་བོ་ཁྱུ་དང་ལྷན་ཅིག་ལམ་འདི་ནས་བགྲོད་པ་ན། འདིའི་སྲིད་ཁོ་བོའི་ལུས་དང་མཉམ་པ་ཁོ་ན་མཐོང་ངོ་། །སྤྲེའུས་སྨྲས་པ། ཁོ་བོ་ཁྱུ་དང་ལྷན་ཅིག་འདིར་འགྲོ་བ་ན་འདིའི་སྲིད་ཁོ་བོ་དང་མཉམ་པ་ཁོ་ན་མཐོང་ངོ་། །རི་བོང་ན་རེ། ཁོ་བོས་འདིའི་ལོ་མ་གཉིས་སྐྱེས་པའི་ཟིལ་པ་བལྡགས་སོ། །གོང་མ་སྲེག་ན་རེ། ཁོ་བོས་ས་བོན་རྣམས་ཟོས་ནས་ཕྱོགས་འདིར་རྟུག་པ་བོར་བ་ལས་སྐྱེས་པའི་ཤིང་འདི་ཡིན་ནོ། །དེ་ནས་དེ་དག་གིས་རྒན་རིམ་ཇི་ལྟ་བར་ཤེས་ནས། གླང་པོ་ཆེ་ཐམས་ཅད་ལས་གཞོན་པའི་ཕྱིར། ཀུན་ལ་བསྙེན་བཀུར་བྱའོ། །སྤྲེའུས་རི་བོང་
དང་གོང་མ་སྲེག །རི་བོང་གིས་གོང་སྲེག་ཁོ་ན་ལའོ། །གལ་ཏེ་གཡང་ས་སོགས་སུ་འགྲོ་བའི་ཚེ་གོང་སྲེག་གིས་རི་བོང་། རི་བོང་གིས་སྤྲེའུ། སྤྲེའུས་གླང་པོ་ལ་ཞོན་ནོ། །རེ་ཞིག་ན། དེ་དག་ལ་དགེ་བའི་བསྲུང་སྡོམ་ལེན་པའི་བློ་སྐྱེས་ཏེ་གོང་མ་སྲེག་ལ་ཇི་ལྟར་བྱ་དྲིས་པ་ན། དེས་དེ་དག་ལ་བསླབ་པ། བདག་ཅག་གིས། ལོ་མ་དང་མེ་ཏོག་དང་འབྲས་བུ་སྲོག་ཆགས་དང་བཅས་པ་བཟའ་བ་ནི་སྲོག་བཅད་པ་ཡིན་པས་གང་ཞིག་སྲོག་ཆགས་མི་གནས་པ་དེ་བཟའ་བར་བྱའོ། །ཡོངས་སུ་འཛིན་པ་དང་བཅས་པའི་བཟའ་བ་ལེན་པ་ནི་མ་བྱིན་པ་བླངས་པ་ཡིན་པས་འཛིན་པ་མེད་པ་ལས་བླང་ངོ་། །བགྲོད་བྱ་རང་གི་ཆུང་མ་ཁོ་ན་ལ་བགྲོད་པར་བྱ་ཡི་གཞན་གྱི་ཆུང་མ་ལ་བགྲོད་པ་ནི་འདོད་པས་ལོག་པར་ གཡེམ་པ ་སྟེ་སྤང་བར་བྱ་བའི་རིགས་སོ། །དོན་ཅི་ལ་ཡང་བརྟགས་ཤིང་བརྟགས་པའི་ཚིག་དུས་སུ་སྨྲ་བ་ལས་ཅི་ཡང་རུང་བ་ནི་མི་སྨྲ་སྟེ་རྫུན་དུ་སྨྲ་བའོ། །མྱོས་འགྱུར་གྱི་འབྲས་བུ་གང་དག་ཡོད་པ་ན་མི་བཟའ་ཞིང་མྱོས་པར་མི་འགྱུར་བའི་འབྲས་བུ་དག་བཟའོ། །དེ་ནས་དེ་རྣམས་དགའ་མགུ་རངས་ནས་བརྟུལ་ཞུགས་ཀྱི་གཞི་ལྔ་ལ་ནན་གྱིས་བསླབ་ནས་སླར་ཡང་གོང་མ་སྲེག་གིས་བསྐུལ་ཏེ་རང་རང་རིགས་མཐུན་གྱི་སྲོག་ཆགས་མང་པོའང་བརྟུལ་ཞུགས་ཀྱི་གཞི་ལྔ་ལ་རབ་ཏུ་བཀོད་པས། མཐར་ཡུལ་ཀ་ཤི་ན་དུད་འགྲོའི་སྐྱེ་གནས་སུ་སོང་བའི་འདབ་ཆགས་དང་། སྡེར་ཆགས་དང་། རི་དྭགས་དང་། གཡུང་དྭགས་སོགས་སྲོག་ཆགས་ཇི་སྙེད་པ་དེ་དག་
ཀྱང་བསླབ་པའི་གཞི་ལྔ་ལ་རབ་ཏུ་གནས་སོ། །དེའི་མཐུས་ལྷ་རྣམས་ཀྱིས་ཀྱང་དུས་དུས་སུ་ཆར་ཕབ་པས་མེ་ཏོག་དང་འབྲས་བུའི་ཤིང་དང་ལོ་ཏོག་དང་ལྡན་པར་གྱུར་ཏོ། །ནམ་ཞིག་ཡུལ་གྱི་མི་རྣམས་ཀྱིས་དེ་དག་གཅིག་ལ་གཅིག་གནོད་པ་མི་བྱེད་པར་གནས་པས་ས་གཞིར་རྟག་ཏུ་མེ་ཏོག་དང་འབྲས་བུའི་ཤིང་དང་ལོ་ཏོག་དང་ལྡན་པར་མཐོང་ནས་རྒྱལ་པོས་ཀྱང་ཐོས་ཏེ་རང་ཉིད་རྒྱལ་སྲིད་ཆོས་བཞིན་དུ་བྱས་པས་དེའི་མཐུ་ཡིན་ནོ་ཟེར། །དེ་བཞིན་དུ། བཙུན་མོ་དང་། བློན་པོ་དང་། གཞོན་ནུ་དང་། གྲོང་ཡུལ་གྱི་མི་རྣམས་ཀུན་གྱིས་རང་རང་གིས་ལེགས་པར་སྤྱད་པའི་མཐུ་ཡིན་ནོ་ཞེས་ཁ་འཆམ་པ་ན། ལྗོངས་དེའི་སྐྱེད་ཚལ་ཞིག་ཏུ་དྲང་སྲོང་མངོན་ཤེས་ལྔ་དང་ལྡན་པ་ཐམས་ཅད་ཀྱིས་བླ་མར་བཟུང་བ་ཞིག་ཡོད་པ་དེའི་མདུན་དུ་སོང་སྟེ། རྒྱལ་པོས་རྐང་པ་གཉིས་ལ་གཏུགས་ཏེ་སུའི་མཐུ་ལས་བྱུང་ཞེས་ཐེ་ཚོམ་དྲིས་པར། དྲང་སྲོང་ན་རེ། འདི་ནི་རྒྱལ་པོ་ལ་སོགས་པ་སུའི་ཡང་མཐུ་མ་ལགས་ཏེ། འོན་ཀྱང་ནགས་སུ་སྲོག་ཆགས་བཞི་གནས་ན་དེ་དག་གིས་བརྟུལ་ཞུགས་ཀྱི་གཞི་ལྔ་བླངས་ཏེ་སྲོག་ཆགས་གྲངས་མེད་བསླབ་པ་ལ་བཀོད་པ་དེའི་མཐུ་ཡིན་ནོ། །རྒྱལ་པོས་སྨྲས་པ། བརྟུལ་ཞུགས་ཀྱི་གཞི་ལྔ་གང་ལགས། དྲང་སྲོང་གིས་བརྟུལ་ཞུགས་ཀྱི་གཞི་ལྔ་ལེགས་པར་བཤད་པས། རྒྱལ་པོ་དང་། བཙུན་མོ་དང་། གཞོན་ནུ་དང་། བློན་པོ་དང་། གྲོང་ཡུལ་གྱི་མི་དང་། ཛམྦུའི་གླིང་གི་སྐྱེ་འགྲོ་ཕལ་ཆེ་བ་རྣམས་ཀྱིས་བརྟུལ་ཞུགས་ཀྱི་གཞི་ལྔ་
བླངས་ཏེ། དེ་དེར་སྤྱོད་པ་ན། འཆི་བའི་དུས་བྱེད་པའི་ཚེ་སུམ་ཅུ་རྩ་གསུམ་དུ་སྐྱེས་པས་ལྷའི་འགྲོ་བ་རབ་ཏུ་འཕེལ་བར་གྱུར་པ་བརྒྱ་བྱིན་གྱིས་མཐོང་ནས་ཚིགས་སུ་བཅད་པ་སྨྲས་པ། གུས་བཅས་ཞེ་སར་བཅས་པ་དག །དཀའ་ཐུབ་ཚལ་ན་གནས་པ་ཡི། །གོང་མ་སྲེག་གི་ཚངས་སྤྱོད་དག །འཇིག་རྟེན་སོ་སོར་རབ་ཏུ་བསྟན། །ཞེས་སོ། །དེའི་དུས་ཀྱི་གོང་མ་སྲེག་ནི་སངས་རྒྱས། རི་བོང་ཤཱ་རིའི་བུ། སྤྲེའུ་མོའུ་འགལ་བུ། གླང་ཆེན་ཀུན་དགའ་བོའོ། །༈ ཡལ་འདབ་གྱ་བདུན་པ་ནི། མདོ་སྡེ་ལས་༼ཧ༽བརྒྱ་པའི་སྡོམ་གཉིས་པར་འབྱུང་བ་བསྡུ་ན། སྟོན་པ་མཉན་ཡོད་དུ་བཞུགས། ཡུལ་སྲུང་བྱེད་ན་ཁྱིམ་བདག་ཞིག་ལ་བུ་བཙས་པར་མིང་པདྨའི་མདོག་ཅན་ཞེས་བཏགས། ཚེ་དང་ལྡན་པ་ཉེ་སྡེ་ལ་བསྟེན་ནས་རབ་ཏུ་བྱུང་ཞིང་། ཡུལ་བཅོམ་བརླག་གི་བོང་བུའི་ཀུན་དགའ་ར་བ་ན་གནས་པ་བསོད་སྙོམས་ལ་སོང་བ་སྤྱོད་ཡུལ་མི་མཁས་པས་སྨད་འཚོང་མའི་ཁྱིམ་དུ་ཞུགས་པ་ན། དེ་གཟུགས་མཛེས་པས་སྨད་འཚོང་མ་ཆགས་པ་ཆེར་གཡོས་ནས་འདོད་པ་
སྤྱོད་པར་བསྐུལ་ཀྱང་མ་ཉན་པར་སོང་ངོ་། །སྨད་འཚོང་མས་རིགས་ངན་མོ་སྔགས་ཀྱི་མཐུ་ཡོད་པ་ཞིག་ལ་གསེར་སྦྱིན་པར་ཆེད་དུ་འགུགས་པར་བསྐུལ་བ་ན། རིགས་ངན་མོ་དེས་བུད་མེད་དེ་རྒྱན་ཐམས་ཅད་ཀྱིས་བཀླུབས་ཏེ་ཁྱིམ་དེ་ལྷ་ཁང་བཞིན་དུ་བྱས་ཏེ་བཞག་ནས་དཀྱིལ་འཁོར་བ་ལང་གི་ལྕི་བས་བྱུགས་ཏེ། མཆོད་པ་བཤམས་ནས་མེ་སྦར་ཏེ་ཡུངས་ཀར་ལ་སྔགས་ཀྱིས་བཏབ་ཅིང་མེའི་ནང་དུ་འདེབས་སོ། །དགེ་སློང་སྔགས་ཀྱི་མཐུས་དྲངས་ནས་ཕྱིར་སྨད་འཚོང་མའི་ཁྱིམ་དེར་འོངས་སོ། །དེ་ནས་རིགས་ངན་མོ་དེས་སྨྲས་པ། བཙུན་པ་ཁྱོད་ཁྱིམ་འདིར་འོངས་པ་ལ་བྱ་བ་གཉིས་ཡོད་དེ། ཡང་ན་སྨད་འཚོང་མ་འདི་དང་ལྷན་ཅིག་ཉོལ། ཡང་ན་མེ་འདིའི་ནང་དུ་མཆོངས་ཤིག་ཟེར། པདྨའི་མདོག་གིས་བསམ་པ་ཚུལ་ཁྲིམས་ཉམས་པའི་ལས་བྱེད་པ་བས་ཚུལ་ཁྲིམས་དང་ལྡན་པ་ནི་ཤི་བ་སླའོ་སྙམ་དུ་གོས་རྣམས་ཕུད་ནས་རིགས་ངན་མོ་ལ་གཏད་དེ། ཁྱོད་ཀྱིས་གོས་འདི་རྣམས་གཙུག་ལག་ཁང་དུ་ཁྱེར་ལ་དགེ་འདུན་ལ་ཕུལ་ཅིག་གསུངས་ནས་མེར་མཆོང་བར་བརྩམས་པ་དང་། རིགས་ངན་མོ་ཤིན་ཏུ་དད་ནས་ཆོ་ག་བཏང་སྟེ་རྐང་པ་ལ་ཕྱག་འཚལ་ནས་བཟོད་པར་གསོལ་ལོ། །སྨད་འཚོང་མས་ཀྱང་དེ་མཐོང་ནས་འདོད་ཆགས་དང་བྲལ་ཏེ་དགའ་བ་སྐྱེས་ཤིང་རྐང་པར་བཏུད་ནས་བཟོད་པར་གསོལ། །དེ་གཉིས་ཀས་པདྨའི་མདོག་ལས་ཆོས་ཉན་པས་རྒྱུན་ཞུགས་ཐོབ། །སླར་དགེ་སློང་མ་རྣམས་ཀྱི་གཙུག་ལག་ཁང་དུ་ཕྱིན་ནས་རབ་ཏུ་བྱུང་སྟེ་བསྙེན་པར་རྫོགས། བརྩོན་འགྲུས་བརྩམས་པས་དགྲ་བཅོམ་པ་ཐོབ་བོ། །ཚེ་དང་ལྡན་པ་
པདྨའི་མདོག་གིས་བསམ་པ། བདག་གིས་གཞན་གྱི་རྒྱུད་ནི་དག་པར་བྱེད་ནུས་ཀྱི་རང་གི་རྒྱུད་ནི་དེ་ལྟར་མ་ཡིན་ནོ་སྙམ་ནས་བརྩོན་པ་དང་བསྒྲུབ་པ་དང་འབད་པས་ཉོན་མོངས་ཐམས་ཅད་སྤངས་ནས་དགྲ་བཅོམ་པ་ཉིད་མངོན་སུམ་དུ་བྱས་སོ། །སྔོན་འབྱུང་། སྨད་འཚོང་མ་དེ་ཚེ་རབས་ལྔ་བརྒྱའི་བར་པདྨའི་མདོག་གི་ཆུང་མར་གྱུར་པས་མཐོང་མ་ཐག་པ་དང་། སངས་རྒྱས་འོད་སྲུང་གི་དུས། ཝཱ་རཱ་ཎ་སཱིར་ཁྱིམ་བདག་ཅིག་ལ་ཆུང་མ་གཉིས་ཡོད་པ་ཁྱིམ་བདག་ཆུང་མ་གཉིས་བཅས་རབ་ཏུ་བྱུང་། ཁྱིམ་བདག་ནི་སྡེ་སྣོད་གསུམ་པ་རིག་གྲོལ་གྱི་སྤོབས་པ་དང་ལྡན། དགེ་སློང་མ་གཉིས་ནི་འཐབ་དཀྲོལ་ཅན་ཁ་གཤིས་ངན་པར་གྱུར་པས་དགེ་སློང་མ་རྣམས་ལ། རིགས་ངན་མོ་དང་། སྨད་འཚོང་མ་ཟེར་ཞིང་གཤེ་བས་ཁྱིམ་བདག་གིས་ངག་གི་ཉེས་པ་ལས་བཟློགས་ནས། ཕྱིས་སངས་རྒྱས་དགེ་འདུན་དང་བཅས་པ་ལ་བཤོས་གསོལ་ཏེ། དབུ་སྐྲ་དང་། སེན་མོའི་མཆོད་རྟེན་ལ་ཡང་བཀུར་སྟི་བྱས་ནས་ཚེ་རབས་ཀུན་ཏུ་ལོངས་སྤྱོད་ཆེ་བའི་ཁྱིམ་དུ་སྐྱེ་བ་དང་། གཟུགས་བཟང་བ། སངས་རྒྱས་ཤཱཀྱ་ཐུབ་པ་མཉེས་པར་བྱེད་ཅིང་། དེའི་བསྟན་པ་ལ་དགྲ་བཅོམ་པར་སྨོན་ལམ་བཏབ་པ་ཡིན་གསུངས་སོ། །
༈ ཡལ་འདབ་གྱ་བརྒྱད་པ་ནི། མདོ་སྡེ་༼ཨ༽ལས་བརྒྱའི་སྡོམ་བདུན་པར་བསྟན་ཏེ། སྟོན་པ་རྒྱལ་པོའི་ཁབ་ན་བཞུགས། གཟུགས་ཅན་སྙིང་པོའི་གླང་པོ་ཆེ་སྐྱོང་བ། གླང་ཆེན་སྙིང་པོ་ཞེས་ཤིན་ཏུ་ཕྱུག་པའི་ཆུང་མ་ལ་རྒྱུ་སྐར་ནག་པའི་ཉིན་བུ་སྐྱེས་པས་ནག་པ་གླང་ཆེན་གནས་ཞེས་གཏགས་སོ། །དེ་ཆེར་སྐྱེས་པ་ན་བཟོའི་གནས་དང་། ལས་ཀྱི་གནས་ཐ་དད་པ་སོགས་གནས་ལྔ་ལ་བྱང་བར་གྱུར་ཏོ། །དེའི་ཕ་མ་གཉིས་ཤི་ནས་རྒྱལ་པོས་སྔར་གྱི་ཐོབ་གླང་པོ་སྐྱོང་བར་བསྐོས་ཤིང་། ཆུང་མ་བླངས་ནས་སངས་རྒྱས་ཀྱི་བསྟན་ལ་དད་དེ་སྦྱིན་པ་དག་བྱིན་ཅིང་བསོད་ནམས་དག་བྱས་ནས་བསྟན་པ་ལ་རབ་ཏུ་བྱུང་བས་སྡེ་སྣོད་གསུམ་པ་རིག་གྲོལ་གྱི་སྤོབས་པ་དང་ལྡན་པ་ཆོས་སྨྲ་བར་གྱུར་ཏོ། །དེས་ཡིད་ལ་བྱེད་པ་བཟུང་ནས་འབད་པས་འདུ་ཤེས་མེད། འདུ་ཤེས་མེད་མིན་གྱི་བསམ་གཏན་བསྐྱེད་ནས་སློབ་མ་ལྔ་བརྒྱ་བསྡུས་ཤིང་འཁོར་བཅས་ལྗོངས་རྒྱུར་སོང་བ། སྔར་གྱི་ཆུང་མས་འཁོར་བཅས་སྤྱན་དྲངས་ཏེ་ཁྱིམ་དུ་ཟན་བྱིན་ནས་བརྟགས་པས་སོ་སོའི་སྐྱེ་བོར་ཤེས་ནས་ཐབས་ཀྱིས་བསླུ་བར་བསམས་ཏེ། ཉིན་གྲངས་སུ་བཤོས་གསོལ་ནས་འཁོར་ཇེ་ཉུང་ལ་བསླབས་ནས། མཐར་གཙོ་བོ་གཅིག་པུ་བོས་ཏེ་ཟན་བྱིན་ནས་ཁྱོད་མི་བཞུགས་པས་ཁོ་མོ་བྲན་རྣམས་ཀྱིས་བརྙས་སོ་ཞེས་སོགས་གཏམ་བརྗོད་པ།
སྔར་རང་གི་ངན་གཡོས་བྲན་ཁྱེའུ་ཞིག་ལ་བསྒོས་པ་བཞིན། དེས་ཆོས་ཉན་ཞིང་སྡོད་པ་ན། བྲན་གཡོག་གིས་ཆུང་མ་ལན་གསུམ་དུ་དགུག་པ་བཏང་ཡང་མ་སོང་བ་ན། དེས་སྐྲ་ནས་བཟུང་སྟེ་རྡེག་པ་དང་། ཇོ་བོ་སྤྱན་སྔར་བབ་པ་འདིའོ་སྨྲས་པས་ནག་པ་གླང་ཆེན་ཁྲོས་ནས་རལ་གྲི་བླངས་ཏེ། བྲན་ཕྲུག་གསོད་པར་རྒྱུགས་པ་ན། ཆུང་མས། ཇོ་བོ་རེ་ཞིག་གཟུ་ལུམ་མ་མཛད་པར་བསླབ་པའི་གཞི་རྣམས་ཕུལ་ལ་དེའི་འོག་ཏུ་འདི་བཅོས་པས་སླེབས་སོ་ཟེར། དེར་དགེ་སློང་གིས་བསླབ་པ་ཕུལ་ནས་ཁྱིམ་པའི་གོས་བགོས་ཏེ་འདུག་གོ །དེ་ཉན་ཐོས་རྣམས་ཀྱིས་སྟོན་པར་གསོལ་བ་ན། དགེ་སློང་དག །རིགས་ཀྱི་བུ་དེ་ནི་ཡུན་རིང་ཁྱིམ་དུ་མི་གནས་ཏེ། ངའི་བསྟན་ལ་རབ་ཏུ་བྱུང་ནས་དགྲ་བཅོམ་པ་བྱེད་དོ་གསུངས། རེ་ཞིག་གི་དུས་སྟོན་པས་དེ་འདུལ་བའི་དུས་མཁྱེན་ནས། ཕྱོགས་དེར་ཕེབས་ཏེ་འོད་ཟེར་བཀྱེ་བས་ཁྱིམ་ཐམས་ཅད་གསེར་ཞུན་མའི་ཁ་དོག་ལྟ་བུར་སྣང་བ་ན། ནག་པ་གླང་ཆེན་གྱིས་སྟོན་པ་ཕེབས་པ་ཤེས་ནས་ཞབས་ལ་བཏུད་པ་ན་ཁྱིམ་དུ་མ་གནས་པར་རབ་ཏུ་བྱུང་ཞིང་གསུངས་པས་དེ་བཞིན་བྱས་ཏེ། བརྩོན་པ་དང་། འབད་པ་དང་། བསྒྲུབས་པས་དགྲ་བཅོམ་མོ། །སྔོན་འབྱུང་ནི། སྔོན་རི་ཁྲོད་ཀྱི་གྲོང་ཞིག་ན། ཁྱིམ་བདག་ནགས་ཞེས་ལོངས་སྤྱོད་ཆེ་བ་ཞིག་ཡོད་པ་སྐྱེད་ཚལ་དུ་སོང་བ་ན། རང་སངས་རྒྱས་དང་འཕྲད་ནས་བཤོས་གསོལ་ཏོ། །ཁྱིམ་བདག་དེས་རང་སངས་རྒྱས་དེ་ལ་མཆོད་ཅིང་། དེའི་བསམ་གཏན་བྱེད་པ་མཐོང་ནས་རབ་ཏུ་བྱུང་བར་ཞུས་པས་དྲང་སྲོང་
རྣམས་ཀྱི་རྩར་མངགས་སོ། །དེ་རབ་ཏུ་བྱུང་ནས་བསམ་གཏན་བཞི་དང་མངོན་ཤེས་ལྔ་བསྐྱེད་དོ། །རང་སངས་རྒྱས་དེ་འདས་པའི་སྐུ་གདུང་གི་མཆོད་རྟེན་བརྩིགས་ནས་བདུག་པ་དང་། ཕྱེ་མ་དང་། སྤོས་དང་། མེ་ཏོག་རྣམས་ཀྱིས་བཀུར་སྟི་བྱས། དགེ་བ་འདིས་བདག་གང་དུ་སྐྱེ་བར་ནོར་མང་ལ་ལོངས་སྤྱོད་ཆེ་བ་དང་། འདི་ལས་འཕགས་པའི་སྟོན་པ་མཉེས་པར་བྱེད་ཅིང་ཡོན་ཏན་འདི་ལྟ་བུ་ཐོབ་པར་ཤོག་ཅིག་ཅེས་སྨོན་ལམ་བཏབ་བོ། །དེ་ཤི་ནས་ཚངས་པའི་འཇིག་རྟེན་དུ་སྐྱེས་ཤིང་ད་ལྟ་འདིའོ་གསུངས། །ཡང་སྔོན་རྒྱལ་པོ་ཚངས་བྱིན་གྱི་བློན་པོ་བྲམ་ཟེ་མེས་བྱིན་གྱི་ཆུང་མར་བུ་མཚེ་མ་གཉིས་སྐྱེས་པར་མིང་མེའི་བུ་དང་། མེ་ལྕེ་ཞེས་གདགས། ཆེར་སྐྱེས་པ་ན་ལས་རྣམ་པ་དྲུག་ལ་མཁས་ཤིང་རིག་པའི་གནས་བཅོ་བརྒྱད་ལ་བྱང་བར་གྱུར་ཏོ། །རེ་ཞིག་ན་ཕ་བློན་པོ་ཆོས་དང་ཆོས་མ་ཡིན་པ་སྤྱོད་པས་བུ་གཉིས་འདི་ཕྱུང་སྟེ་ཕ་མར་གནང་བ་ཞུས་ཏེ་རབ་ཏུ་བྱུང་ནས་བསམ་གཏན་བཞི་དང་མངོན་ཤེས་ལྔ་བསྐྱེད་ནས་ཕ་མ་ལ་བལྟ་བའི་ཕྱིར་རྫུ་འཕྲུལ་གྱིས་ནམ་མཁའ་ལ་འོང་བས་དགའ་ནས་མཆོད་དེ་རང་གི་སྐྱེད་ཚལ་དུ་གནས་པར་ཞུས་ཤིང་ཡུལ་དེས་མཆོད་པར་བྱ་བའི་གནས་སུ་གྱུར་ཏོ། །ཕ་བློན་པོས་རྒྱལ་པོའི་ཕོ་བྲང་དུ་དུས་དུས་སུ་འབྱོན་པར་བསྐུལ་བས་དེར་རྫུ་འཕྲུལ་གྱིས་འགྲོ་བ་ན་རྒྱལ་པོས་བཟའ་བཅའ་གཙང་མ་མང་པོས་ཚིམ་པར་བྱས་ཏེ་ཆོས་ཉན། རེ་ཞིག་རྒྱལ་པོ་དམག་ལ་ཆས་པས་རང་གི་བུ་མོར་བསྒོས་ཏེ། དྲང་སྲོང་བྱུང་རེས་སྔར་བཞིན་
མཆོད་ཅིག་བྱས་པས་སྐབས་དེར་དྲང་སྲོང་མེ་ལྕེ་རྫུ་འཕྲུལ་གྱིས་རྒྱལ་པོའི་ཕོ་བྲང་དུ་འོང་བར། བུ་མོས་རེག་པས་རྫུ་འཕྲུལ་ཉམས་ནས་ལྷན་ཅིག་ཉལ་བ་ཐབ། རྐང་པས་འགྲོ་བ་ངོ་ཚ་ནས་དེར་ཞག་གྲངས་ལུས་པ་ན་རྒྱལ་པོ་རང་མལ་དུ་སླེབས་པས་དྲང་སྲོང་ལ་བལྟས་ནས་བཟའ་བཅའ་ཕུལ་ཏེ་ཆོས་ཉན་པ་དང་། བུ་མོས་སྐོམ་ཁྱེར་འོངས་པས་དེ་སྔར་གྱི་མཛའ་བ་དྲན་ནས་མྱོས་ཏེ། ལག་པ་བརྐྱངས་པ་ན། རྒྱལ་པོ་ཁྲོས་ཏེ་རལ་གྲིས་གསོད་པར་ཉེ་བ་བུ་མོས་གཡོ་ཐབས་ཀྱིས་བཟློག །ཕུ་བོ་དྲང་སྲོང་མེའི་བུས་ནུ་བོ་སླེབས་པ་འཕྱིས་པས་བརྟགས་པ་ན། དེ་ཉམས་པས་སྡུག་བསྔལ་བ་མཐོང་སྟེ། འཕྲལ་དུ་རྫུ་འཕྲུལ་གྱིས་བྱིན་ནས་རྒྱལ་པོར་ཆོས་ཅུང་ཟད་བཤད་ཅིང་། རང་གི་མཐུས་ནུ་བོ་ནམ་མཁར་ཁྲིད་ནས་སླར་ཡང་བསམ་གཏན་བཞི་དང་མངོན་ཤེས་ལྔ་བསྐྱེད་དུ་བཅུག །བཙུན་མོའི་འཁོར་གྱིས་སྔ་མའི་གནས་ཚུལ་རྒྱལ་པོར་སྨྲས་པས་དེ་ཁྲོས་ནས། དཔུང་ཚོགས་བཞི་བཅས་དྲང་སྲོང་གི་གནས་སུ་སོང་བ་ན་དྲང་སྲོང་མེ་ལྕེས་མཐོང་ནས། དེ་གདུལ་བའི་ཕྱིར་རྫུ་འཕྲུལ་གྱིས་ནམ་མཁའ་ལ་སྡོད་པ་ན། རྒྱལ་པོ་ཐེ་ཚོམ་སྐྱེས་ཏེ་སྨྲས་པ། བྲམ་ཟེ་མེ་ལྕེ་བདག་གིས་ནི། །འདོད་པ་སྤྱོད་ཅེས་སྔར་ཐོས་ན། །ཚིག་དེ་བདེན་པ་ཡིན་ནམ་ཅི། །འོན་ཏེ་ཅི་ལགས་མི་སྤྱོད་དམ། །དེས་སྨྲས་པ། རྒྱལ་པོ་ཆེན་པོ་དེ་བདེན་ཏེ། །ཁྱོད་ཀྱིས་གཞན་ལས་ཐོས་པ་བཞིན། །བདག་ནི་ལམ་ངན་ཞུགས་གྱུར་ཏེ། །ཆགས་པའི་གནས་སུ་མྱོས་པར་གྱུར། །དེ་ནས་རྒྱལ་པོས་མེའི་བུ་ལ་དྲིས་པ། འདོད་པ་སྤྱོད་བཞིན་རྫུ་འཕྲུལ་འདི་ལྟ་བུ་དང་ལྡན་ནམ། རྒྱལ་
པོ་དེ་མ་ལགས་ཏེ་འདོད་པའི་གནས་སྐབས་དེར་རྫུ་འཕྲུལ་ཉམས་སོ། །འོན་ཀྱང་སླར་ཚངས་པར་སྤྱོད་དེ་རྫུ་འཕྲུལ་བསྐྱེད་དེ། སྨྲས་པས་རྒྱལ་པོ་ཡང་ངོ་མཚར་སྐྱེས་ནས་བཟོད་པར་གསོལ་ལོ། །དྲང་སྲོང་མེའི་བུ་སངས་རྒྱས། མེ་ལྕེ་ནག་པ་གླང་ཆེན་གནས། རྒྱལ་པོའི་བུ་མོ་ནི་འདིའི་ཆུང་མའོ། །གསུངས་སོ། །༈ ཡལ་འདབ་གྱ་དགུ་པ་ནི་གོ་སླའོ། །༈ ཡལ་འདབ་དགུ་བཅུ་པ་ནི་གོ་སླ་ཞིང་། ཡངས་པ་ཅན་པ་རྣམས་ནོར་ཅན་གྱི་ལོངས་སྤྱོད་ལ་ཡ་མཚན་སྐྱེས། དེས་དེ་དག་ལ་རིན་པོ་ཆེ་དག་བྱིན་པ་དང་དེ་རྣམས་ཀྱིས་མ་བླངས་པ་ན། སངས་རྒྱས་ཀྱིས། རིན་པོ་ཆེ་དག་རྙེད་པར་དཀའ་བ་ཡིན་པས་ལོངས་ཤིག་གསུངས། དེ་རྣམས་ཀྱིས་བླངས་པ་ལས་གང་གིས་ཅི་འདྲ་བ་བླངས་པ། དེའི་ཁ་དོག་དེ་འདྲ་བ་ཁོ་ནར་སྣང་བར་གྱུར་ཏོ། །