(༡༢༣) སྨོན་ལམ་ལྔ་འགྲེལ་ལས།༄༅། །འཕགས་པ་བཟང་པོ་སྤྱོད་པའི་ཚིག་དོན་གྱི་འགྲེལ་བ་ལེགས་བཤད་ཀུན་ལས་བཏུས་པ་བཞུགས་སོ། །
(༡༢༤)དོན་གཉིས་མཐར་ཕྱིན་རྫོགས་སངས་རྒྱས་རྣམས་དང་། །ཆགས་བྲལ་དམ་པའི་ཆོས་དང་དེ་འཛིན་པའི། །སྲས་མཆོག་གཉིས་སོགས་འཕགས་ཚོགས་ལ་བཏུད་ནས། །བཟང་པོ་སྤྱོད་པའི་ཚིག་དོན་དགྲོལ་བར་བྱ། །འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱལ་པོ་འདི་ཉིད་འཆད་པ་ལ། །ཐོག་མར་དགེ་བ་ཀླད་ཀྱི་དོན། །བར་དུ་དགེ་བ་གཞུང་གི་དོན། །ཐ་མར་དགེ་བ་མཇུག་གི་དོན་གསུམ་གྱི། །དང་པོ་ལ་མཚན་དོན་དང་། །འགྱུར་ཕྱག་གཉིས་ལས་དང་པོ་
(༡༢༥)ནི། །རྒྱ་གར་སྐད་དུ། །ཨཱརྱ་བྷ་དྲ་ཙཱརྱ་པྲ་ཎི་དྷ་ནི་རཱ་ཛ། བོད་སྐད་དུ། འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱལ་པོ། །དེའང་། རྒྱ་གར་ན་སྐད་རིགས་ཆེན་པོ་བཞི་ཡོད་པ་ལས་ལེགས་སྦྱར་གྱི་སྐད་དུ། །གཞུང་འདིའི་མཚན་ལ་ཨཱརྱ་བྷ་དྲ་ཙཱྻ་པྲ་ཎི་དྷ་ནི་རཱ་ཛ། ཞེས་འབྱུང་། དེ་བོད་སྐད་དུ་བསྒྱུར་ན། །ཨཱྻ་ནི་འཕགས་པ། བྷ་དྲ་ནི་བཟང་པོ། ཙཱྻ་ནཱི་སྤྱོད་པ། པྲ་ཎི་དྷ་ནི་ནི་སྨོན་ལ། རཱ་ཛ་ནི་རྒྱལ་པོ་སྟེ། འཕགས་པ་ཀུན་ཏུ་བཟང་པོས་གསུངས་པས་སམ། དེའི་སྤྱོད་པ་སྨོན་ལམ་དུ་འདེབས་
(༡༢༦)པའི་ཕྱིར་རམ། །ཡང་ན་བཟང་པོ་ནི་ཐོག་མཐའ་བར་ གསུམ་དུ་དགེ་བ་བྱང་ཆུབ་སེམས་དཔའི་སྤྱོད་པ 
་སྟེ། །དང་པོ་ཐོས་པ་ན་དོན་ངེས་ཤིང་ཡིད་ཆེས་པའི་དད་པ་དང་། པར་དུ་བསམ་པ་ན་ཐོབ་པར་ནུས་པར་རིག་ནས་དགའ་བ་དང་། ཐ་མ་བསྒོམ་པ་ན་ཡང་དག་པ་ཇི་ལྟ་བ་བཞིན་ཤེས་པའི་བློ་གྲོས་ཀྱི་རྒྱུ་ཡིན་པའི་ཕྱིར་རོ། །དེ་ཐམས་ཅད་ཡོངས་སུ་འདུས་པའི་སྨོན་ལམ་གྱི་མདོ་ཆེན་པོ་ཡིན་པས་ན་རྒྱལ་པོའོ། །གཉིས་པ་ནི། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དེའང་། ལོ་ཙཱ་བས་འགྱུར་མཛད་པའི་སྔ་ལོགས་སུ་རང་གི་འདོད་པའི་ལྷ་འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ་ཞེས་བཀོད་པའོ། །གཉིས་པ་གཞུང་གི་དོན་ལ། སྨོན་ལམ་
(༡༢༧)འགྲུབ་པའི་རྒྱུ་བསགས་སྦྱང་བྱ་བའི་ཉམས་ལེན་གྱི་རིམ་པ། དངོས་གཞི་སྨོན་ལམ་གྱི་རབ་དབྱེ་རྒྱས་པར་བཤད་
པ། རྗེས་ཕན་ཡོན་བསྟན་པས་མཇུག་བསྡུ་བ་གསུམ ་གྱི། དང་པོ་ལ་བདུན་ལས། དང་པོ་ཕྱག་འཚལ་བའི་ཡན་ལག་ལ་བསྟན་བཤད་གཉིས་ཀྱི། དང་པོ་མདོར་བསྟན་པ་ནི། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་ གསུམ་གཤེགས་པ ་མི་ཡི་སེང་གེ་ཀུན། །བདག་གིས་མ་ལུས་དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱིའོ། །དེའང་། མཐལ་ཀླས་པའི་ཞིང་གི་བཀོད་པའི་ཁྱད་པར་ཇི་སྙེད་པ་བསྟན་ཅིང་སྟོན་པར་་འགྱུར་བ་པོ་གང་སུ་དག་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་སྔར་སངས་རྒྱས་ནས་འདས་པར་གྱུར་
(༡༢༨)པ་དང་། ད་ལྟ་སངས་རྒྱས་ པ་དང་། མ་འོངས་པའི་དུས་སུ་འཚང་རྒྱ་བར་འགྱུར་བ་སྟེ། དུས་གསུམ ་དུ་གཤེགས་པའི་རྒྱལ་བ་དགའ་ལྡན་གྱི་གནས་ནས་སེམས་ཅན་གྱི་དོན་དུ་མི་ཡི་ལུས་སུ་བསྟན་པ། དཔེར་ན་སེང་གེས་གཅན་ཟན་དང་རི་དྭགས་ཐམས་ཅད་ཟིལ་གྱིས་མནན་ཏེ་བག་ཚ་བ་མེད་པ་ལྟར། དེ་བཞིན་གཤེགས་པས་ཀྱང་བདུད་དང་མུ་སྟེགས་ཅན་ཕྱིར་ོལ་པ་ལྷ་དང་མི་ཐམས་ཅད་ཟིལ་གྱིས་མནན་ཏེ་བག་ཚ་བའི་བསྙེངས་པ་མི་མངའ་སྟེ། མཁྱེན་པའི་ཡོན་ཏན་གྱིས་འཕགས་པ་མི་ཡི་སེང་གེ་མང་པོ་ཀུན་ཡིད་ཡུལ་དུ་དམིགས་ནས། བདག་གིས་སངས་རྒྱས་སྲས་དང་བཅས་པ་ལྷག་མ་གཅིག་ཀྱང་མ་ལུས་པ་དེ་དག་ལ། ལུས་ཀྱིས་བཏུད་པ་དང་ངག་གིས་བསྟོད་ཅིང་ཡིད་ཀྱི་རབ་ཏུ་དང་བ་
(༡༢༩)སྟེ་དད་པ་ཆེན་པོས་ཕྱག་འཚལ་བར་བགྱིའོ། །གཉིས་པ་རྒྱས་པར་བཤད་ པ་ལ་གསུམ ་གྱི། དང་པོ་ལུས་ཀྱི་ཕྱག་ནི། བཟང་པོ་སྤྱོད་པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་ཡིད་ཀྱིས་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །དེའང་། སྐྱབས་ཡུལ་རྣམས་ཀྱི་བཟང་པོ་ཡོན་ཏན་གྱི་སྤྱོད་པ་ལ་རབ་ཏུ་དད་པའི་སྨོན་ལམ་གྱི་སྟོབས་དག་གིས་ཀུན་ནས་བསླངས་ཏེ། སྡིག་པ་མི་དགེ་བའི་ཆོས་ལས་རྒྱལ་བ་ཕྱོགས་དང་དུས་ཀྱིས་བསྡུས་པ་ཐམས་ཅད་ཡིད་ཀྱི་ཡུལ་ལ་མངོན་སུམ་དུ་གྱུར་པ་ལྟར་དམིགས་ནས། དེ་དག་རེ་རེའི་དྲུང་དུ་རང་གི་ལུས་ཕྱོགས་བཅུའི་ཞིང་གི་རྡུལ་ཇི་སྙེད་ཡོད་
(༡༣༠)པ་དེ་སྙེད་ཀྱི་གྲངས་དང་མཉམ་པར་སྤྲུལ་ཏེ། ལུས་དེ་དག་ཐམས་ཅད་ཀྱང་རབ་ཏུ་བཏུད་པ་སྟེ་ཐལ་མོ་སྦྱར་ཞིང་ཡན་ལག་ལྔ་ས་ལ་གཏུགས་པ་ཡིས། རྒྱལ་བ་སྲས་དང་བཅས་པ་ཀུན་ལ་དུས་མཐའ་ཡས་པར་རབ་ཏུ་ཕྱག་འཚལ་ལོ། །གཉིས་པ་ཡིད་ཀྱི་ཕྱག་ནི། རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པར། །ཐམས་ཅད་རྒྱལ་བ་དག་གིས་གང་བར་མོས། །དེའང་། རྡུལ་ཕྲ་རབ་གཅིག་གི་སྟེང་ན་ཡང་སངས་རྒྱས་ཀྱི་ཞིང་མ་ལུས་པའི་རྡུལ་གྱི་གྲངས་ཇི་སྙེད་པ་དང་མཉམ་པའི་སངས་རྒྱས་རྣམས་བཞུགས་པ་དང་། དེ་ཡང་གཅེར་པ་དང་དོག་པ་མ་ཡིན་པར་སངས་
(༡༣༡)རྒྱས་རྣམས་ཀྱང་རང་རང་གི་སྲས་བྱང་སེམས་འཕགས་པས་བསྐོར་བ་ལ། མཆོད་པའི་བཀོད་པ་དཔག་ཏུ་མེད་པ་དང་བཅས་ཏེ་ཞིང་ཁམས་ཀྱི་དབུས་ན་བཞུགས་པ་དག་ཡིན་ལ། རྡུལ་གཅིག་ལ་ཇི་ལྟར་ཡོད་པ་དེ་ལྟར་ཆོས་ཀྱི་དབྱིངས་ཀྱིས་ཀླས་པ་ནམ་མཁའི་ཁམས་ཀྱི་མཐས་གཏུགས་པ་རྣམས་གཅིག་ཀྱང་མ་ལུས་པའི་རྡུལ་ཕྲ་རབ་ཐམས་ཅད་དུ་ཡང་རྒྱལ་བ་མང་པོ་དག་གིས་ཡོངས་སུ་གང་བར་མོས་ཏེ། དེ་དག་ལ་ཡིད་ཀྱི་དད་པ་བླ་ན་མེད་པ་བསྒོམས་པས་སེམས་སྦྱང་བར་བྱའོ། ། གསུམ་པ ་དག་གི་ཕྱག་ནི། དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱིས་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང་། །བདེ་
(༡༣༢)བར་གཤེགས་པ་ཐམས་ཅད་བདག་གིས་བསྟོད། །དེའང་། ཡིད་ཀྱི་ཡུལ་དུ་ཇི་ལྟར་བྱས་པའི་སངས་རྒྱས་སྲས་བཅས་དེ་དག་ལ་བསྟོད་ཅིང་བསྔགས་པ་ཡོན་ཏན་མི་ཟད་པ་རྒྱ་མཚོ་ལྟ་བུ་རྣམས། ངག་གི་འདུ་བྱེད་དབྱངས་ཀྱི་ཡན་ལག་སྟེ་།།།རྐན་ལ་སོགས་པ་རྒྱ་མཚོ་ལྟར་མང་པོར་སྤྲུལ་ནས་མཐའ་ཡས་པའི་སྒྲ་སྐད་ཀུན་གྱིས་རྒྱལ་བ་མ་ལུས་པ་ཀུན་གྱི་བསྔགས་པ་རབ་ཏུ་བརྗོད་ཅིང་། བདེ་བར་གཤེགས་པ་སྲས་དང་བཅས་པ་ཐམས་ཅད་བདག་གིས་བསྟོད་པར་བྱེད་པའོ། །གཉིས་པ་མཆོད་པའི་ཡན་ལག་ལ་གཉིས་ཀྱི། །དང་པོ་བླ་ན་ཡོད་པའི་མཆོད་པ་ནི། །མེ་ཏོག་དམ་པ་ཕྲེང་བ་དམ་པ་དང་། །སིལ་སྙན་རྣམས་དང་བྱུགས་པའི་གདུགས་མཆོག་དང་། །མར་
(༡༣༣)མེ་མཆོག་དང་བདུག་སྤྲོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང་། །ཕྱེ་མའི་ཕུར་མ་རི་རབ་མཉམ་པ་དང་། །བཀོད་པ་ཁྱད་པར་འཕགས་པའི་མཆོག་ཀུན་གྱིས། །རྒྱལ་བ་དེ་དག་ལ་ཡང་མཆོད་པར་བགྱི། །དེའང་། ལྷའི་ཡུལ་མན་ཆད་གྱི་འཇིག་རྟེན་ན་རྣམ་པར་བཀྲ་བའི་མེ་ཏོག་དམ་པ་དངོས་སུ་ཡོད་པ་ཇི་སྙེད་པ་དང་། མེ་ཏོག་སྣ་ཚོགས་སྤེལ་ཏེ་བརྒྱུས་པའམ་རིན་པོ་ཆེ་སྣ་ཚོགས་བརྒྱུས་པའི་ཕྲེང་བ་དམ་པ་དང་། རོལ་མོའི་བྱེ་བྲག་རྒྱུད་ཅན་དང་འབུད་དཀྲོལ་བརྡུང་བ་སོགས་སོལ་འཁྲོལ་སྙན་པའི་སྒྲ་རྣམས་དང་། དྲི་ཞིམ་པོའི་བྱུག་པ་དང་། ཚ་གདུང་སྐྱོབས་བྱེད་རིན་པོ་ཆེའི་
(༡༣༤)གདུགས་མཆོག་ཏུ་གྱུར་པ་དང་། རིན་པོ་ཆེའི་འོད་དང་འབྲུ་མར་གྱི་མེ་ལ་སོགས་པ་སྣང་གསལ་གྱི་མཆོག་མཐའ་ཡས་པ་དང་། སྦྱར་བ་དང་ལྷན་སྐྱེས་ཀྱི་དྲི་ཞིམ་པོ་བསྲེགས་པའི་བདུག་སྤོས་དམ་པ་སྟེ། དེ་དག་རེ་རེ་ཡང་ལྷ་དང་མིའི་ཡུལ་ན་ཡོད་པའི་ཁ་དོག་དང་དབྱིབས་དང་དྲི་དང་རྒྱུ་ཕུན་སུམ་ཚོགས་པ་མཐའ་ཡས་ཤིང་། རྣམ་པ་སྣ་ཚོགས་པ་བསམ་གྱི་མི་ཁྱབ་པ་དེ་དང་དེ་ཡིས། གང་མངོན་སུམ་དང་ཡིད་ཀྱི་སྤྱོད་ཡུལ་དུ་དམིགས་པའི་རྒྱལ་བ་སྲས་བཅས་དེ་དག་ལ་ནི་ཉིན་རེ་བཞིན་ཏུ་མཆོད་པར་བགྱིའོ། །གཞན་ཡང་སྲབ་འཇམ་མཉེན་པའི་ན་བཟའ་དམ་པ་མཆོག་རྣམས་དང་། སྤོས་ཆུས་ཡོན་ཆབ་ཏུ་གསོལ་བའམ་ཆག་ཆག་ཏུ་བཏབ་པའི་དྲི་མཆོག་ཏུ་
(༡༣༥)གྱུར་པ་དང་། དྲི་བཟང་གི་ཕྱེ་མའི་ཕུར་མ་སྟེ་ཐུམ་པོར་བྱས་པ་རྣམ་པ་སྣ་ཚོགས་སྤུངས་པའི་ཕུང་པོ་རི་རབ་དང་མཉམ་པ་སྟེ་མིང་གིས་སྨོས་པ་དང་། མིང་གིས་མ་སྨོས་པ་རྣམས་ཀྱང་བཀོད་པ་རྣམ་པ་སྣ་ཚོགས་མཛེས་པས་ཁྱད་པར་དུ་འཕགས་པའི་མཆོག་ཀུན་གྱིས་རྒྱལ་བ་སྲས་བཅས་ཀྱི་ཚོགས་དེ་དག་ཐམས་ཅད་ལ་ནི་མཆོད་པར་བགྱིའོ། །གཉིས་པ་བླ་ན་མེད་པའི་མཆོད་པ་ནི། མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །དེའང་། རྫུ་འཕྲུལ་དང་ཏིང་ངེ་འཛིན་གྱི་མཐུ་ཤིན་ཏུ་ཆེ་བའི་བྱང་ཆུབ་སེམས་དཔའ་
(༡༣༦)རྣམས་ཀྱིས་མཆོད་པ་གང་བགྱིས་པ་རྣམས་ནི་བླ་ན་མེད་པ་སྟེ། འཇིག་རྟེན་ན་མེད་པའི་ཡོ་བྱད་ཀྱི་ཁྱད་པར་བཟང་དགུ་དུ་མ་སྤྲུལ་ཞིང་། དེ་ཡང་བུམ་པ་བཟང་པོ་དང་། དཔག་བསམ་གྱི་ཤིང་དང་ཡིད་བཞིན་གྱི་ནོར་བུ་སོགས་ལས་བསམ་པ་ཙམ་གྱིས་གང་ཉེ་བར་མཁོ་བའི་ཡོ་བྱད་མཐའ་ཡས་པ་དང་། དམ་པའི་ཆོས་ཀྱི་སྒྲ་དང་བསྔགས་པའི་དབྱངས་མཐའ་ཡས་པ་འབྱུང་ནས་སངས་རྒྱས་ཀྱི་ཞིང་ཐམས་ཅད་རྒྱས་པར་འགེང་བས་ན་རྒྱ་ཆེ་བ་སྟེ་བདག་ཉིད་ཀྱི་སེམས་ཀྱིས་ཅི་ནུས་ཀྱི་མཆོད་པའི་ཡོ་བྱད་རྣམས་ཀྱིས་སངས་རྒྱས་ཀྱི་ཞིང་མང་པོ་རྒྱས་པར་བཀང་སྟེ་མཆོད་པ་བྱ་བར་བསམ་མོ། །མདོ་ལས། ཚངས་ པ་གསུམ ་པོ་འདི་དག་ནི་དེ་བཞིན་གཤེགས་པ་ལ་མཆོད་པ་དང་
(༡༣༧)རིམ་གྲོ་བླ་ན་མེད་པའོ། །མཆོད་པའི་ལས་བླ་ན་མེད་པས་བསོད་ནམས་ཚད་མེད་ པ་འབྱུང་ངོ་། །གསུམ ་གང་ཞེ་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དང་། དེ་བཞིན་གཤེགས་པ་རྣམས་ཀྱི་ཆོས་འཛིན་པ་དང་། ཇི་ལྟར་ཐོས་པའི་ཆོས་རྣམས་དེ་བཞིན་ཏུ་སྒྲུབ་པའོ། །ཞེས་བླ་ན་མེད་པའི་མཆོད་ པ་གསུམ ་བཤད་དོ། །དེ་ལྟར་ཕྱག་མཆོད་ཀྱི་རིམ་པ་དེ་དག་གོང་དུ་སྨོས་པའི་རྒྱལ་བ་ཐམས་ཅད་ལ་ཡང་ལྷག་པར་མོས་པའི་དད་པ་དང་། བཟང་པོ་སྤྱོད་པ་ལ་ཕན་ཡོན་མཐའ་ཡས་ཡོད་པར་ཡིད་ཆེས་པའི་དད་པའི་སྟོབས་དག་གིས་ཀུན་ནས་བསླངས་ཏེ། ཡུལ་རྒྱལ་བ་སྲས་བཅས་ཀུན་ལ་ཚུལ་དེས་ཕྱག་འཚལ་ཞིང་མཆོད་པར་བགྱིའོ། །
(༡༣༨) གསུམ་པ ་སྡིག་པ་བཤགས་པའི་ཡན་ལག་ནི། འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །དེའང་། རྒྱུ་འདོད་ཆགས་ཞེ་སྡང་གཏི་མུག་ གསུམ་གྱིས་ཀུན་ནས་བསླངས་པའི་དབང་གིས་ནི། གཞི་སྲོག་གཅོད་པ ་སོགས་ལུས་དང་། རྫུན་སོགས་ངག་དང་དེ་བཞིན་ཏུ་གནོད་སེམས་སོགས་ཡིད་ཀྱི་སྒོ་ནས་ཀྱང་། ལས་སྡིག་པ་མི་དགེ་བ་བྱེད་པ་པོ་བདག་གིས་བགྱིས་པ་དང་། གཞན་ལ་བྱེད་དུ་བཅུག་པ་དང་། བྱས་པ་ལ་རྗེས་སུ་ཡི་རང་བ་ཅི་མཆིས་ཤིང་ཡོད་པ་དེ་དག་ཐམས་ཅད་རྒྱལ་བ་སྲས་དང་བཅས་
(༡༣༩)པའི་སྤྱན་སྔར་བདག་གིས་འགྱོད་སྡོམ་གྱི་བསམ་པ་དྲག་པོས་ཆོ་ག་བཞིན་ཏུ་སོ་སོར་བཤགས་པར་བགྱིའོ། །བཞི་པ་རྗེས་སུ་ཡི་རང་བའི་ཡན་ལག་ནི། ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང་། །འགྲོ་བ་ཀུན་གྱི་བསོད་ནམས་གང་ལ་ཡང་། །དེ་དག་ཀུན་གྱི་རྗེས་སུ་བདག་ཡི་རང་། །དེའང་། ཕྱོགས་བཅུ་ན་བཞུགས་པའི་རྒྱལ་བ་ཀུན་དང་། སངས་རྒྱས་ཀྱི་སྲས་བྱང་སེམས་རྣམས་དང་། རང་ཉིད་དུལ་བར་བྱ་བའི་ཕྱིར་ཉོན་མོངས་པ་ལས་འབྱུང་བའི་སྡིག་པ་མི་དགེ་བ་ལས་རྒྱལ་བ་རྣམས་དང་། སློབ་པ་འཕགས་པ་རྒྱུན་ཏུ་ཞུགས་པ་ལ་སོགས་པའི་གང་ཟག་བདུན་དང་
(༡༤༠)མི་སློབ་པ་འཕགས་པ་དགྲ་བཅོམ་པའི་འབྲས་བུ་དང་། སོ་སོའི་སྐྱེ་བོའི་འགྲོ་བ་མ་ལུས་པ་ཀུན་གྱི་བསོད་ནམས་དགེ་བ་ཅི་དང་ཅི་བགྱིས་པ་གང་ལ་ཡང་རབ་ཏུ་དགའ་བའི་ཡིད་ཀྱིས་བསོད་ནམས་དེ་དག་ཀུན་གྱི་རྗེས་སུ་བདག་ཡི་རང་བར་བགྱིའོ། །ལྔ་པ་ཆོས་འཁོར་བསྐོར་བར་བསྐུལ་བའི་ཡན་ལག་ནི། གང་རྣམས་ཕྱོགས་བཅུའི་འཇིག་རྟེན་སྒྲོན་མ་དག །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །འཁོར་ལོ་བླ་ན་མེད་པར་བསྐོར་བར་བསྐུལ། །དེའང་། གང་དུ་སངས་རྒྱས་རྣམས་ཕྱོགས་བཅུའི་འཇིག་རྟེན་གྱི་ཁམས་མ་རིག་པའི་མུན་པར་འཁྱམ་པའི་སེམས་ཅན་རྣམས་ལ་ལམ་སྟོན་པར་མཛད་པས་འཇིག་རྟེན་གྱི་
(༡༤༡)སྒྲོན་མ་སྟེ། །དེ་བཞིན་གཤེགས་པ་དག་བྱང་ཆུབ་སྒྲུབ་པའི་ས་ལམ་གྱི་རིམ་པ་མ་ལུས་པ་ཡང་དག་པར་བགྲོད་དེ་སངས་རྒྱས་ཀྱི་གོ་འཕང་མངོན་དུ་མཛད་པས་ཤེས་བྱ་ཐམས་ཅད་ལ་མ་ཆགས་མ་ཐོགས་པའི་ཡེ་ཤེས་བླ་ན་མེད་པ་བརྙེས་པའི་མགོན་པོ་དེ་དག་རྣམས་ཀྱི་མདུན་དུ། བདག་གིས་ཀྱང་ལུས་དེ་སྙེད་དུ་སྤྲུལ་ནས་རྒྱལ་བ་དེ་ཐམས་ཅད་ཀུན་ལ་ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་བླ་ན་མེད་པ་དག་འགྲོ་བའི་ཤེས་རྒྱུད་ལ་བསྐོར་བར་མཛོད་ཅིག་ཅེས་བསྐུལ་བའོ། །དྲུག་པ་མྱ་ངན་ལས་མི་འདའ་བར་གསོལ་བ་འདེབས་པའི་ཡན་ལག་ནི། མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་བའི་ཕྱིར། །བསྐལ་པ་
(༡༤༢)ཞིང་གི་རྡུལ་སྙེད་བཞུགས་པར་ཡང་། །བདག་གིས་ཐལ་མོ་རབ་སྦྱར་གསོལ་བར་བགྱི། །དེའང་། དོན་དམ་པར་སངས་རྒྱས་མྱ་ངན་ལས་མི་འདའ་མོད་ཀྱི། མྱ་ངན་ལས་འདའ་བར་བསྟན་པས་འདུལ་བའི་སེམས་ཅན་རྣམས་ལ་དེ་ལྟ་བུའི་ཚུལ་སྟོན་པར་དེ་བཞིན་གཤེགས་པ་གང་དག་བཞེད་ཅིང་མཛད་པ་དེ་དག་ལ། དགོས་པ་འགྲོ་བ་མ་ལུས་པ་ཀུན་ལ་གནས་སྐབས་སུ་ཕན་ཞིང་མཐར་ཐུག་གི་བདེ་བ་འབྱུང་བའི་ཕྱིར། དུས་བསྐལ་པ་ཆེན་པོ། །ཞིང་མ་ལུས་པ་དག་གི་རྡུལ་ཕྲ་རབ་ཀྱི་གྲངས་སྙེད་དུ་བཞུགས་པར་ཡང་གསོལ་བ་འདེབས་པ་པོ་བདག་གིས་གུས་པའི་རྣམ་འགྱུར་ལུས་ཐལ་མོ་རབ་ཏུ་སྦྱར་ཏེ་ངག་ནས་གསོལ་བ་འདེབས་པར་བགྱིའོ། །བདུན་པ་དགེ་རྩ་
(༡༤༣)བྱང་ཆུབ་ཏུ་བསྔོ་བའི་ཡན་ལག་ནི། ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་བདག་གིས་བྱང་ཆུབ་ཕྱིར་བསྔོའོ། །དེའང་། གང་བསྔོ་ན་ཡུལ་མཆོག་ལ་ཕྱག་འཚལ་བ་དང་མཆོད་པ་གཉིས་ཀྱིས་མཆོད་ཅིང་སྟོབས་བཞིའི་སྒོ་ནས་རང་རྒྱུད་ཀྱི་ཉེས་པ་བཤགས་པ་དང་། གཞན་གྱི་དགེ་བ་ལ་རྗེས་སུ་ཡིད་རང་བ་དང་། ཆོས་ཀྱི་འཁོར་ལོ་བསྐོར་བར་བསྐུལ་ཞིང་མྱ་ངན་ལས་མི་འདའ་བར་གསོལ་བ་ཡིས་ཐོབ་པའི་དགེ་བ་ཅུང་ཟད་བདག་གིས་གང་དང་ཅི་བསགས་པ་དེས་མཚོན་ཏེ་བདག་གཞན་ཀུན་གྱི་དགེ་ཚོགས་ཐམས་ཅད་དོ། །གང་
(༡༤༤)གིས་བསྔོ་ན་བྱེད་པ་པོ་བདག་གིས། །གང་དུ་བསྔོ་ན་སྲིད་པའི་བདེ་བ་དང་ཉན་རང་གི་བྱང་ཆུབ་ཙམ་གྱི་ཆེད་དུ་མ་ཡིན་པར་རྫོགས་པའི་བྱང་ཆུབ་ཆེན་པོ་བླ་ན་མེད་པའི་ཕྱིར་ཏེ། ཇི་ལྟར་བསྔོ་ན་འཁོར་གསུམ་མི་དམིགས་པའི་ཤེས་རབ་ཀྱིས་ཟིན་ཅིང་བྱང་ཆུབ་ཀྱི་སེམས་ཀྱིས་འཕངས་པའི་ཐབས་ཤེས་ཟུང་དུ་འབྲེལ་བའི་ཚོགས་བསྔོ་བར་བགྱིའོ། །དེ་ཡང་འོག་ནས་འབྱུང་བའི་སྨོན་ལམ་རྣམས་ཇི་ལྟ་བ་བཞིན་འགྲུབ་པ་ལ་གེགས་བྱེད་པ་སྡིག་སྒྲིབ་ཡིན་པས་དེ་སྦྱང་བ་དང་། འགྲུབ་པའི་མཐུན་རྐྱེན་ནི་བསོད་ནམས་ཡིན་པས་དེ་རྒྱ་ཆེར་འཕེལ་ཞིང་ནམ་ཡང་མི་ཟད་པ་ཞིག་སྨོན་ལམ་འགྲུབ་པའི་རྒྱུར་ཅིས་ཀྱང་དགོས་ལ། ཡན་ལག་བདུན་པས་ནི་སྡིག་སྒྲིབ་སྦྱོང་བ་དང་བསོད་
(༡༤༥)ནམས་ཀྱི་ཚོགས་གསོག་པ་དང་དགེ་བའི་རྩ་བ་འཕེལ་ཞིང་མི་ཟད་པར་བྱེད་ པ་གསུམ ་ག་འགྲུབ་པས་དེ་སྔོན་དུ་བཏང་ན་འོག་ནས་འབྱུང་བའི་སྨོན་ལམ་རྣམས་འགྲུབ་པ་ལ་ནུས་པ་ཤིན་ཏུ་ཆེའོ། །གཉིས་པ་དངོས་གཞི་སྨོན་ལམ་གྱི་རབ་དབྱེ་རྒྱས་པར་བཤད་པ་ལ། དངོས་དང་། སྨོན་ལམ་གྱི་མཐའ་བསྟན་པ་གཉིས་ཀྱི་དང་པོ་ལ། བསམ་དག་བྱང་སེམས་མི་བརྗེད་དང་། །མ་གོས་སྦྱོར་དང་ཕན་བདེ་དང་། །གོ་ཆ་དང་ནི་སྐལ་མཉམ་གྲོགས། །བཤེས་བསྟེན་སངས་རྒྱས་མངོན་གྱུར་དང་། །དམ་ཆོས་འཛིན་དང་མཛོད་རྙེད་དང་། །འཇུག་དང་སྟོབས་དང་སྒྲུབ་དང་ལས། །རྗེས་སློབ་ཀུན་གྱི་མཇུག་སྡུད་དོ། །ཞེས་པ་ལྟར་དོན་ཚན་བཅུ་དྲུག་ཏུ་ཡོད་པ་ལས། དང་
(༡༤༦)པོ་བསམ་པ་དག་པའི་སྒོ་ནས་སྨོན་པ་ལ། སངས་རྒྱས་མཆོད་པའི་བསམ་པ། དགོངས་པ་ཡོངས་སུ་སྐོང་བ། སངས་རྒྱས་ཀྱི་ཞིང་སྦྱང་བ། སེམས་ཅན་ལ་ཕན་གདགས་པ་དང་བཞིའོ། །དང་པོ་ནི། །།།སྐྱ་རོལ་པའི་རྡོ་རྗེའི་འགྲེལ་པ་ལས། །འདི་མན་ཆད་ཀྱི་སྨོན་ལམ་གྱི་དོན་རྣམས་ཀྱང་ལས་དང་པོ་པ་ལ་ཕན་པའི་ཕྱིར་ཉམས་ལེན་གྱི་རིམ་པ་དང་སྦྱར་ཅེས་པ་ལྟར་བཤད་པར་བྱ་སྟེ་དེ་ལ། འདས་པའི་སངས་རྒྱས་རྣམས་དང་ཕྱོགས་བཅུ་ཡི། །འཇིག་རྟེན་དག་ན་གང་གཞུགས་མཆོད་པར་གྱུར། །དེའང་། ཕྱག་འཚལ་བ་སོགས་དགེ་རྩ་རྣམས་ཀྱིས་མཚོན་ནས་རང་གི་ལུས་ལོངས་སྤྱོད་དུས་ གསུམ་གྱི་དགེ་རྩ་ཐམས་ཅད་སྔར་བྱོན་འདས་པའི་སངས་རྒྱས་སུ་གྲགས་པ ་རྣམས་དང་། ད་
(༡༤༧)ལྟར་ཕྱོགས་བཅུའི་འཇིག་རྟེན་གྱི་ཁམས་དག་ན་སངས་རྒྱས་བཅོམ་ལྡན་འདས་གང་སེམས་ཅན་གྱི་དོན་ལ་བཞུགས་པ་རྣམས་ལ་ཕུལ་བས་དེ་དག་སྤྱན་སྔར་ཀུན་ཏུ་བཟང་པོའི་མཆོད་པའི་སྤྲིན་དུ་གྱུར་ཏེ་མཉེས་པར་བྱས་པར་བསམ་ཞིང་རྟག་ཏུ་དེ་ལྟར་མཆོད་པར་གྱུར་ཅིག་པའོ། །གཉིས་པ་ནི། གང་ཡང་མ་བྱོན་དེ་དག་རབ་མྱུར་བར། །བསམ་རྫོགས་བྱང་ཆུབ་རིམ་པར་སངས་རྒྱས་སྤྱོན། །དེའང་། གང་ཡང་མ་བྱོན་པ་སྟེ་མ་འོངས་པ་ན་འཚང་རྒྱ་བར་འགྱུར་བ་ཐེག་ པ་གསུམ ་གྱི་ལམ་དུ་ཞུགས་པ་རྣམས་ལ་སྔར་བཞིན་ཕུལ་བས་དེ་དག་འཚང་རྒྱ་བའི་མཐུན་པའི་རྐྱེན་མ་ཚང་བ་མེད་པར་གྱུར་ཏེ། འབད་རྩོལ་མེད་བཞིན་ཏུ་རབ་ཏུ་མྱུར་
(༡༤༨)པར་རང་རང་གི་དགོངས་པའི་བསམ་པ་ཚོགས་ལྷག་མ་རྫོགས་ནས་དུས་ལ་བབ་པས། དགའ་ལྡན་དུ་སྐྱེ་བ་སོགས་བྱང་ཆུབ་བརྙེས་པའི་བར་གྱི་གོ་རིམ་ཚུལ་དང་མཐུན་པར་སྟོན་པའི་སྒོ་ནས་སངས་རྒྱས་པར་སྤྱོན་ཅིག་པ་སྟེ་མྱུར་དུ་སངས་རྒྱས་པར་ཤོག་ཅིག་པའོ། །འདི་དག་ནི་ལམ་ཞུགས་ཀྱི་སློབ་པ་དང་མི་སློབ་པ་ལ་དགེ་རྩ་སོགས་གཏོང་བའི་ཚུལ་ཡིན་ལ། སྐྱེ་བ་གཞན་དུའང་དེ་ལྟར་བྱེད་པར་གྱུར་ཅིག་ཅེས་སྨོན་པ་ནི་འོག་མ་རྣམས་ལའང་ཤེས་པར་བྱའོ། ། གསུམ་པ ་ནི། ཕྱོགས་བཅུ་ག་ལའི་ཞིང་རྣམས་ཇི་སྙེད་པ། །དེ་དག་རྒྱ་ཆེར་ཡོངས་སུ་དག་པར་གྱུར། །བྱང་ཆུབ་ཤིང་དབང་དྲུང་གཤེགས་རྒྱལ་བ་དང་། །སངས་རྒྱས་སྲས་ཀྱིས་རབ་ཏུ་གང་བར་ཤོག །དེའང་། ཕྱོགས་
(༡༤༩)བཅུ་ག་ལ་བར་མ་དག་པའི་ཞིང་རྣམས་ཇི་སྙེད་པ་ལ་ལུས་ལོངས་སྤྱོད་སོགས་བཏང་བས་དེ་དག་མ་ལུས་པ་བདེ་བ་ཅན་གྱི་ཞིང་ཇི་ལྟ་བ་བཞིན་དུ་རྒྱ་ཆེ་ཞིང་སྐྱོན་ཐམས་ཅད་དང་བྲལ་བར་ཡོངས་སུ་དག་པར་གྱུར་ཏེ། དེའི་དབུས་སུ་བྱང་ཆུབ་ཀྱི་ཤིང་ལྗོན་པ་ཐམས་ཅད་ཀྱི་དབང་པོར་གྱུར་པའི་དྲུང་དུ་གཤེགས་ནས་སངས་རྒྱས་ཟིན་པའི་རྒྱལ་བ་དང་། དེ་དག་གི་འཁོར་དུ་སངས་རྒྱས་རྣམས་ཀྱི་ཐུགས་སྲས་བྱང་ཆུབ་སེམས་དཔའི་ཚོགས་ཀྱིས་བར་མཚམས་མེད་པར་རབ་ཏུ་གང་བར་ཤོག་ཅིག་པ་སྟེ་འདི་ནི་གཙོ་བོར་སྣོད་ལ་གཏོང་བའི་ཚུལ་ལོ། །བཞི་པ་ནི། ཕྱོགས་བཅུའི་སེམས་ཅན་གང་རྣམས་ཇི་སྙེད་པ། །དེ་དག་རྟག་ཏུ་ནད་མེད་བདེ་བར་གྱུར། །འགྲོ་བ་ཀུན་
(༡༥༠)གྱི་ཆོས་ཀྱི་དོན་རྣམས་ནི། །མཐུན་པར་གྱུར་ཅིང་རེ་བའང་འགྲུབ་པར་ཤོག །དེའང་། སྔར་ལྟར་རང་གི་ལུས་ལ་སོགས་པ་ཕྱོགས་བཅུའི་འཇིག་རྟེན་གྱི་ཁམས་ན་སེམས་ཅན་གྱི་བྱེ་བྲག་གང་ཞིག་རིགས་དྲུགས་གིས་བསྡུས་པ་རྣམས་ཇི་སྙེད་ཅིག་ཡོད་པ་ཀུན་ལ་བཏང་བས། དེ་དག་དུས་རྟག་ཏུ་འཁོར་བའི་སྡུག་བསྔལ་དང་དེའི་རྒྱུ་ལས་དང་ཉོན་མོངས་པ་ཐམས་ཅད་ལ་ནད་དང་མྱ་ངན་དང་ཟུག་རྔུའི་སྒྲས་བསྟན་པ་མདོ་ལས་མང་དུ་འབྱུང་བ་བཞིན་ཡིན་པས་དེ་ལྟ་བུའི་ནད་མེད་པའི་བདེ་བ་ཕུན་སུམ་ཚོགས་པ་དང་ལྡན་པར་གྱུར་པ་འགྲོ་བ་དེ་དག་ཀུན་གྱིས་མངོན་པར་འདོད་པའི་ཆོས་མཐུན་གྱི་དོན་རྣམས་ནི་སྒྲུབ་པའི་མཐུན་རྐྱེན་ཐམས་ཅད་འགྲུབ་པར་གྱུར་ཅིང་། དེའི་མཐུས་སངས་རྒྱས་
(༡༥༡)ཀྱི་གོ་འཕང་འཐོབ་པའི་རེ་བའང་དེ་བཞིན་དུ་འགྲུབ་པར་ཤོག་ཅིག་པ་སྟེ། དེ་ནི་གཙོ་བོར་ལམ་དུ་མ་ཞུགས་པའི་སེམས་ཅན་ལ་གཏོང་བའི་ཚུལ་ཡིན་ལ། འདི་ཡན་ཆད་བྱམས་པ་དང་སྙིང་རྗེའི་དམིགས་རྣམས་སྦྱོང་བ་དང་གཞན་དོན་དོན་གཉེར་གྱི་བསམ་པ་སྦྱོང་ཚུལ་ཡིན་ནོ། །གཉིས་པ་བྱང་ཆུབ་ཀྱི་སེམས་མི་བརྗེད་པའི་སྒོ་ནས་སྨོན་པ་ལ། ཚེ་རབས་དྲན་པ། རབ་ཏུ་བྱུང་བ། སྤྱོད་པ་སྤྱི་དང་ཚུལ་ཁྲིམས་དག་པ་ལ་བསླབ་པ། སྐད་སྣ་ཚོགས་ཀྱིས་ཆོས་སྟོན་པ། དགེ་བ་ལ་བརྩོན་པ། རྒྱུ་ལྔ་པོ་དེས་བྱང་ཆུབ་ཀྱི་སེམས་མི་བརྗེད་པ། འགལ་རྐྱེན་དང་བྲལ་བར་སྨོན་པ་དང་བདུན་ལས། དང་པོ་ནི། བྱང་ཆུབ་སྤྱོད་པ་དག་ནི་བདག་སྤྱོད་ཅིང་། འགྲོ་བ་ཀུན་ཏུ་སྐྱེ་བ་
(༡༥༢)དྲན་པར་གྱུར། །དེའང་། དེ་ལྟར་གཞན་གྱི་དོན་འགྲུབ་པ་ལ་རང་ཉིད་ཀྱིས་སངས་རྒྱས་ཐོབ་དགོས་པས་དེའི་རྒྱུའི་གཙོ་བོ་བྱང་ཆུབ་ཀྱི་སེམས་བསྐྱེད་པ་དང་དེ་འཕེལ་བའི་སྤྱོད་པ་བཟང་པོ་དག་ནི་བདག་གིས་སྤྱོད་པར་བྱེད་ཅིང་དེ་ལས་འཇིག་རྟེན་ཕ་རོལ་ཏུ་འཕོས་ཏེ་འགྲོ་བ་ཡི་གནས་གང་དང་གང་དུ་སྐྱེས་ཀྱང་རུང་སྟེ་དེ་དག་ཀུན་ཏུ་སྔོན་གྱི་སྐྱེ་བ་དྲན་ནས་སྔར་བཞིན་སྤྱོད་པར་གྱུར་ཅིག་པའོ། །གཉིས་པ་ནི། ཚེ་རབས་ཀུན་ཏུ་འཆི་འཕོ་སྐྱེ་བ་ན། །རྟག་ཏུ་བདག་ནི་རབ་ཏུ་འབྱུང་བར་ཤོག །དེའང་། དེ་ལྟར་ཚེ་རབས་ཀྱི་གནས་སྐབས་ཀུན་ཏུ་འཆི་འཕོ་བ་དང་སྐྱེ་བ་བརྒྱུད་མར་ཉམས་སུ་མྱོང་བའི་ཚེ་ན་ཁྱིམ་ན་གནས་པའི་ཉེས་དམིགས་དང་རབ་ཏུ་བྱུང་བའི་ཕན་ཡོན་དྲན་པའི་སྒོ་ནས་དུས་རྟག་ཏུ་བདག་ཉིད་ནི་
(༡༥༣)ཁྱིམ་ནས་ཁྱིམ་མེད་པར་རབ་ཏུ་འབྱུང་བར་ཤོག་ཅིག་པའོ། །འདི་ནི་དགེ་སློང་མི་འཁྲུགས་པས་བདག་བྱང་ཆུབ་སེམས་དཔའི་སྤྱོད་པ་སྤྱོད་པའི་ཚེ་ནམ་སངས་རྒྱས་ཀྱི་བར་དུ་དགེ་སློང་གི་ལུས་རྟེན་ཁོ་ན་འཐོབ་པར་གྱུར་ཅིག་ཅེས་སྨོན་ལམ་བཏབ་པ་ལྟ་བུ་ཡང་ཡོད་མོད་ཀྱང་གཙོ་བོར་ས་མ་ཐོབ་ཀྱི་བར་དུ་ཁྱིམ་གྱི་ཉེས་པས་བྱང་ཆུབ་ཀྱི་སེམས་ལ་བར་དུ་གཅོད་པ་མང་བས་དེའི་བར་གྱི་ཚེ་རབས་ཐམས་ཅད་དུ་རབ་ཏུ་འབྱུང་བར་སྨོན་པ་ཡིན་ནོ། ། གསུམ་པ ་ནི། རྒྱལ་བ་ཀུན་གྱི་རྗེས་སུ་སློབ་གྱུར་ཏེ། །བཟང་པོ་སྤྱོད་པ་ཡོངས་སུ་རྫོགས་བྱེད་ཅིང་། །ཚུལ་ཁྲིམས་སྤྱོད་པ་དྲི་མེད་ཡོངས་དག་པར། །རྟག་ཏུ་མ་ཉམས་སྐྱོན་མེད་སྤྱོད་པར་ཤོག །དེའང་། ཚེ་རབས་ཐམས་ཅད་དུ་སྨོན་པ་
(༡༥༤)དང་འཇུག་པའི་སེམས་བཟུང་ནས་དུས་ གསུམ་གྱི་རྒྱལ་བ་ཀུན་གྱིས་ཇི་ལྟར་བསླབ་པ ་ལྟར་དེའི་རྣམ་ཐར་གྱི་རྗེས་སུ་སློབ་པར་གྱུར་ཏེ། ཀུན་ནས་བཟང་པོ་ཕྱིན་དྲུག་གི་སྤྱོད་པ་ཐམས་ཅད་ཡོངས་སུ་རྫོགས་པ་ལ་སྤྱིར་སློབ་པར་བྱེད་ཅིང་ཁྱད་པར་ཚུལ་ཁྲིམས་རྣམ་ པ་གསུམ ་གྱི་སྤྱོད་པ་ཉོན་མོངས་པའི་དྲི་མེད་པ་རང་ཞི་བདེའི་སེམས་ཀྱིས་མ་གོས་པས་ཡོངས་སུ་དག་པ། དུས་རྟག་ཏུ་ཚུལ་འཆལ་གྱིས་མ་གོས་པས་མ་ཉམས་ཤིང་འཁོར་ གསུམ་དུ་འཛིན་པ ་དང་བྲལ་བས་སྐྱོན་མེད་པ་སྟེ་དེ་ལྟ་བུ་ལ་སྤྱོད་པར་ཤོག་ཅིག་པའོ། །བཞི་པ་ནི། ལྷ་ཡི་སྐད་དང་ཀླུ་དང་གནོད་སྦྱིན་སྐད། གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་གྱི་སྒྲ་སྐད་ཇི་ཙམ་པར། །ཐམས་ཅད་སྐད་དུ་
(༡༥༥)བདག་གིས་ཆོས་བསྟན་ཏོ། །དེའང་། གདུལ་བྱ་རྣམས་སྨིན་པར་བྱ་བའི་ཕྱིར་དུ་ལྷའི་སྐད་དང་ཀླུའི་སྐད་དང་གནོད་སྦྱིན་གྱིས་སྐད་དང་གྲུལ་བུམ་སོགས་མི་མ་ཡིན་པ་གཞན་དག་དང་མི་ཡི་སྐད་རིགས་ཐ་དད་པ་རྣམས་དང་། དེས་མཚོན་ཏེ་འགྲོ་བ་ཀུན་གྱི་སྒྲ་སྐད་རྣམས་ཇི་ཙམ་པར་ཡོད་པ་མཐའ་དག་ཤེས་ནས་དེ་དག་ཐམས་ཅད་ལ་སོ་སོའི་སྐད་དུ་བདག་གིས་ཟབ་པ་དང་རྒྱ་ཆེ་བའི་ཆོས་བསྟན་ཏོ་སྟེ་སྟོན་པར་ཤོག་ཅིག་པའོ། །ལྔ་པ་ནི། དེས་ཤིང་ཕ་རོལ་ཕྱིན་ལ་རབ་བརྩོན་ཏེ། །དེའང་། རྒྱུད་དེས་ཤིང་འཇམ་པ་ནི་རིགས་ཀྱི་ཡོན་ཏན་ལ་གནས་པར་སྨོན་པ་སྟེ། ཐེག་པ་ཆེན་པོའི་རིགས་ཀྱི་ཡོན་ཏན་མང་དུ་བཤད་ཀྱང་གཙོ་བོ་ནི་བྱམས་བརྩེ་ཤས་ཆེ་བའི་ངང་རྒྱུད་
(༡༥༦)འཇམ་པ་ལ་གསུངས་པར་སྣང་བའི་ཕྱིར་རོ། །ཕ་རོལ་ཏུ་ཕྱིན་པ་དྲུག་གི་སྤྱོད་པ་མ་ཤེས་པ་རྣམས་ཤེས་པར་བྱ་བ་དང་། ཤེས་པ་མི་ཉམས་ཤིང་གོང་ནས་གོང་དུ་འཕེལ་བ་ལ་རབ་ཏུ་བརྩོན་ཏེ་ཐེག་ཆེན་གྱི་རིགས་ལ་གནས་ཤིང་སྤྱོད་པ་ལ་སློབ་པར་ཤོག་ཅིག་པའོ། །དྲུག་པ་ནི། བྱང་ཆུབ་སེམས་ནི་ནམ་ཡང་བརྗེད་མ་གྱུར། དེའང་། དེ་ལྟར་ཚེ་རབས་དྲན་པ་སོགས་ལྔ་སྔོན་ཏུ་འགྲོ་བས་སེམས་ཅན་ཐམས་ཅད་འཁོར་བ་ལས་སྒྲོལ་འདོད་ཀྱི་ལྷག་བསམ་དང་། ཆོས་དབྱིངས་སྤྲོས་བྲལ་གྱི་ཡེ་ཤེས་ལ་མཉམ་པར་འཇོག་པའི་བྱང་ཆུབ་ཀྱི་སེམས་རྣམ་པ་གཉིས་པོ་དེ་ནི་དུས་དང་གནས་སྐབས་ཐམས་ཅད་དུ་ནམ་ཡང་བརྗེད་པར་མ་གྱུར་ཅིག་ཅེས་པ་སྟེ། དེ་ཡན་ཆད་ཀྱིས་བྱང་
(༡༥༧)ཆུབ་ཀྱི་སེམས་སྐྱེ་བའི་མཐུན་རྐྱེན་གཉེན་པོའི་ཕྱོགས་འགྲུབ་པར་སྨོན་པའོ། །བདུན་པ་ནི། སྡིག་པ་གང་རྣམས་སྒྲིབ་པར་འགྱུར་བ་དག །དེ་དག་མ་ལུས་ཡོངས་སུ་བྱང་བར་ཤོག །དེའང་། དེ་ལྟར་བྱང་སེམས་མི་བརྗེད་པའི་མཐུན་རྐྱེན་ཚང་ནས་དེའི་འགལ་རྐྱེན་ནག་པོའི་ཆོས་བཞི་ལ་སོགས་པའི་སྡིག་པ་མི་དགེ་བའི་ལས་གང་བསགས་པ་རྣམས་དང་། ཐེག་ཆེན་སྤངས་པ་སོགས་ལས་དང་། །ལོག་ལྟ་དང་ང་རྒྱལ་སོགས་ཉོན་མོངས་པའི་སྒྲིབ་པ་སྟེ། མདོར་ན་ཐེག་ཆེན་གྱི་ལམ་སྐྱེ་བ་ལ་བར་དུ་གཅོད་པར་བྱེད་པའི་ཕྱོགས་སུ་གྱུར་པ་གང་དག་ཡོད་པ་དེ་དག་ས་བོན་དང་བཅས་ཐམས་ཅད་མ་ལུས་པར་ཡོངས་སུ་བྱང་བར་ཤོག་ཅིག་པའོ། ། གསུམ་པ ་མ་གོས་
(༡༥༨)པའི་སྦྱོར་བའི་སྒོ་ནས་སྨོན་པ་ནི། ལས་དང་ཉོན་མོངས་བདུད་ཀྱི་ལས་རྣམས་ལས། །གྲོལ་ཞིང་འཇིག་རྟེན་འགྲོ་བ་རྣམས་སུ་ཡང་། །ཇི་ལྟར་པདྨོ་ཆུས་མི་ཆགས་པ་བཞིན། །ཉི་ཟླ་ནམ་མཁར་ཐོགས་པ་མེད་ལྟར་སྤྱད། །དེའང་། གང་གིས་ན་མི་དགེ་བའི་ལས་དང་ཆགས་སོགས་ཉོན་མོངས་པ་དང་། དམ་ཆོས་སྒྲུབ་ པ་ལ་བར་དུ་གཅོད་པའི་བདུད་ཀྱི་ལས་རྣམས་ཀྱིས་མ་གོས་ཤིང་། སྐྱོན་གསུམ ་པོ་དེ་ལས་རྣམ་པར་གྲོལ་བ་དང་། གང་དུ་ན་རང་ཉིད་རྒྱུ་ཞིང་སྤྱོད་པའི་འཇིག་རྟེན་གྱི་འགྲོ་བ་ཇི་སྙེད་ཡོད་པ་གང་དང་གང་གི་གནས་རྣམས་སུ་རྒྱུ་ཡང་རུང་སྟེ། ཇི་ལྟར་སྤྱོད་ན་དཔེ་པདྨོ་ཆུ་ལས་སྐྱེས་ཀྱང་འདམ་རྫབ་དང་ཆུས་མི་ཆགས་པ་སྟེ་གོས་པར་མི་འགྱུར་བ་བཞིན་ཏུ། འཁོར་
(༡༥༩)བར་གནས་ཀྱང་འཁོར་བའི་ལས་ཉོན་སོགས་ཀྱིས་མི་གོས་པ་དང་། ཉི་ཟླ་དག་ལོ་ཐོག་སྨིན་པ་སོགས་གཞན་དོན་མང་པོ་བྱེད་ཀྱང་དུས་རྟག་ཏུ་ནམ་མཁའ་ལ་ཐོགས་པ་མེད་ཅིང་ལན་ལ་རེ་བ་མེད་པར་རྒྱུ་པ་ལྟར་བདག་ཀྱང་སེམས་ཅན་ལ་ཕན་བདེའི་དོན་སྤྱད་ཀྱང་ལན་ལ་མི་རེ་ཞིང་ཆགས་པ་མེད་པ་ཁོ་ནར་སྤྱོད་ནུས་པར་གྱུར་ཅིག་པའོ། །བཞི་པ་སེམས་ཅན་ཕན་བདེ་ལ་འགོད་པའི་སྒོ་ནས་སྨོན་པ་ནི། ཞིང་གི་ཁྱོན་དང་ཕྱོགས་རྣམས་ཇི་ཙམ་པར། ངན་སོང་སྡུག་བསྔལ་རབ་ཏུ་ཞི་བར་བྱེད། །བདེ་བ་དག་ལ་འགྲོ་བ་ཀུན་འགོད་ཅིང་། །འགྲོ་བ་ཐམས་ཅད་ལ་ནི་ཕན་པར་སྤྱད། །དེའང་། ནམ་མཁའི་མཐས་གཏུགས་པའི་སངས་རྒྱས་ཀྱི་ཞིང་གི་རྒྱ་ཁྱོན་དང་།
(༡༦༠)དེ་ཡང་ཕྱོགས་རེ་ཙམ་མ་ཡིན་པར་ཕྱོགས་བཅུ་རྣམས་ཀྱི་མཐའ་ཇི་ཙམ་པར་ཡོད་པ་དེ་ཐམས་ཅད་ཀྱི་སེམས་ཅན་ཀུན་གྱི་ངན་སོང་གི་སྡུག་བསྔལ་གྱིས་མཚོན་ཏེ་འཁོར་བའི་སྡུག་བསྔལ་མཐའ་དག་རབ་ཏུ་ཞི་བར་བྱེད་པ་དང་། ལྷ་མའི་ཕུན་ཚོགས་ལ་སོགས་པ་མངོན་མཐོའི་བདེ་བ་དག་ལ་འགྲོ་བ་ཀུན་འགོད་ཅིང་། དེར་མ་ཟད་རང་རང་གི་སྐལ་པ་དང་མཚམས་པར་བྱང་ཆུབ་ཆེན་པོར་ཐབས་ཀྱིས་འཁྲིད་པའི་སྒོ་ནས་འགྲོ་བ་དེ་དག་ཐམས་ཅད་ལ་ནི་དམ་པའི་ཆོས་ཀྱིས་ཕན་པར་སྤྱད་པ་སྤྱོད་ནུས་པར་གྱུར་ཅིག་པའོ། །ལྔ་པ་གོ་ཆ་བགོ་བའི་སྒོ་ནས་སྨོན་པ་ནི། བྱང་ཆུབ་སྤྱོད་པ་ཡོངས་སུ་རྫོགས་བྱེད་ཅིང་། སེམས་ཅན་དག་གི་སྤྱོད་དང་མཐུན་པར་འཇུག །བཟང་པོ་སྤྱོད་པ་དག་ནི་རབ་སྟོན་ཅིང་། །མ་
(༡༦༡)འོངས་སྐལ་པ་ཀུན་ཏུ་སྤྱོད་པར་གྱུར། །དེའང་། བླ་ན་མེད་པའི་བྱང་ཆུབ་ཐོབ་པའི་ཕྱིར་དུ་རང་ཉིད་ཚོགས་གཉིས་ཀྱི་སྤྱོད་པ་མཐའ་དག་ཡོངས་སུ་རྫོགས་པ་ཉམས་སུ་ལེན་པ་ལ་བརྩོན་པའི་གོ་ཆ་བགོ་བར་བྱེད་ཅིང་། གཞན་སྨིན་པའི་ཕྱིར་སེམས་ཅན་དག་གི་ཁམས་དང་དབང་པོ་བག་ལ་ཉལ་ཤེས་པས། དེ་རྣམས་གང་གིས་འདུལ་བའི་སྤྱོད་པ་དང་མཐུན་པར་འཇུག་སྟེ། ཞུགས་ནས་ཀྱང་རང་གི་ཇི་ལྟར་རྟོགས་པའི་བཟང་པོ་སྤྱོད་པ་དག་གི་ཆོས་ནི་རབ་ཏུ་སྟོན་ཅིང་། དེ་ལྟར་རང་གི་སྤྱོད་པ་རྫོགས་པ་དང་ནུས་པ་ཐོབ་པ་དང་ཆོས་སྟོན་ པ་སྟེ་རང་གཞན་གྱི་དོན་གསུམ ་པོ་དེ་ཡང་དུས་ཉི་ཚེ་ཙམ་མ་ཡིན་པར་མ་འོངས་པའི་བསྐལ་པ་ཕྱི་མཐར་ཐུག་པ་མེད་པའི་བར་དེ་སྲིད་ཀུན་ཏུ་སྐྱོ་
(༡༦༢)ངལ་མེད་པར་རབ་ཏུ་སྤྱོད་པར་གྱུར་ཅིག་པའོ། །བྱང་ཆུབ་སྤྱོད་པ་དང་བཟང་པོ་སྤྱོད་པ་ཞེས་པའི་ཚིག་གཞུང་འདིར་ལན་མང་དུ་འབྱུང་བ་རྣམས་དོན་གཅིག་ཏུ་མི་འཆད་པར་སྐབས་ཐོབ་ཀྱི་དོན་སོ་སོར་འཆད་པ་ནི་འཕགས་ཡུལ་མཁས་པའི་གཞུང་ལ་བརྟེན་པ་སྟེ། མདོ་སྡེ་འཆད་པ་ལ་འདི་འདྲ་མང་དུ་འབྱུང་བ་ཤེས་དགོས་སོ་ཞེས་རོལ་རྡོར་གྱི་འགྲེལ་བ་ལས་སོ། །དྲུག་པ་སྐལ་མཉམ་གྱི་གྲོགས་དང་འགྲོགས་པར་སྨོན་པ་ནི། བདག་གི་སྤྱོད་དང་མཚུངས་པར་གང་སྤྱོད་པ། །དེ་དག་དང་ནི་རྟག་ཏུ་འགྲོགས་པར་ཤོག །ལུས་དང་ངག་རྣམས་དང་ནི་སེམས་ཀྱིས་ཀྱང་། །སྤྱོད་པ་དག་དང་སྨོན་ལམ་གཅིག་ཏུ་སྤྱད། །དེའང་། བདག་བྱང་ཆུབ་སེམས་དཔའི་སྤྱོད་པ་ལ་སྦྱོར་བ་ན་བདག་གི་སྤྱོད་པ་
(༡༦༣)དང་མཚུངས་པར་གང་གིས་སྤྱོད་ཅིང་སྐལ་པ་མཉམ་པ་ཡི་གྲོགས་བྱང་ཆུབ་སེམས་དཔའ་དེ་དག་དང་ནི་རྟག་ཏུ་མི་འབྲལ་བར་འགྲོགས་པར་ཤོག་ཅིག །འགྲོགས་ནས་ཀྱང་ལུས་དང་ངག་གི་སྤྱོད་པ་རྣམས་དང་ནི་དེ་བཞིན་ཏུ་སེམས་ཀྱིས་ཀྱང་རུང་སྟེ་སྒོ་ གསུམ་གྱི་སྤྱོད་པ ་དག་དང་སྨོན་ལམ་རྣམས་ཀྱང་གཅིག་ཏུ་མཐུན་པར་སྤྱད་ཅིང་འདེབས་པར་གྱུར་ཅིག་པའོ། །བདུན་པ་དགེ་བའི་བཤེས་གཉེན་བསྟེན་ཅིང་མཉེས་པར་བྱེད་པར་སྨོན་པ་ནི། བདག་ལ་ཕན་པར་འདོད་པའི་གྲོགས་པོ་དག །བཟང་པོའི་སྤྱོད་པ་རབ་ཏུ་སྟོན་པ་རྣམས། །དེ་དག་དང་ཡང་རྟག་ཏུ་ཕྲད་པར་ཤོག །དེ་དག་བདག་གིས་ནམ་ཡང་ཡིད་མི་དབྱུང་། །དེའང་། བདག་ལ་སྙིང་རྗེའི་སྒོ་ནས་
(༡༦༤)དམ་པའི་ཆོས་ཀྱིས་ཕན་འདོགས་པའི་གྲོགས་པོ་འཁོར་བ་དང་ཐེག་དམན་ལས་ཡོངས་སུ་སྐྱོབ་ཅིང་ཐེག་ཆེན་གྱི་བདེ་བ་སྟེར་བའི་དགེ་བའི་བཤེས་གཉེན་གང་དག་བཟང་པོ་སྤྱོད་པའི་ཆོས་ཀྱི་ལག་ལེན་རབ་ཏུ་སྟོན་ཅིང་འཆད་པར་བྱེད་པར་རྣམས་གང་ཡིན་པའི་ཆོས་སྨྲ་བ་དེ་དག་དང་ཡང་བྱང་ཆུབ་མ་ཐོབ་ཀྱི་བར་དུས་རྟག་ཏུ་ཕྲད་པར་ཤོག་ཅིག །ཕྲད་ནས་ཀྱང་བཤེས་གཉེན་དམ་པ་དེ་དག་བདག་གིས་དུས་ནམ་ཡང་ལན་གཅིག་གམ་སྐད་ཅིག་གཅིག་ཀྱང་ཐུགས་ཡིད་མི་དབྱུང་ཞིང་བསམ་སྦྱོར་གཉིས་ཀྱི་སྒོ་ནས་མཉེས་པ་ཁོ་ན་སྒྲུབ་པར་ཤོག་ཅིག་པའོ། །བརྒྱད་པ་སངས་རྒྱས་མངོན་གྱུར་ལ་མཆོད་པར་སྨོན་པ་ནི། སངས་རྒྱས་སྲས་ཀྱིས་བསྐོར་བའི་མགོན་པོ་རྣམས། །མངོན་སུམ་རྟག་ཏུ་
(༡༦༥)བདག་གིས་རྒྱལ་བ་ལྟ། །མ་འོངས་བསྐལ་པ་ཀུན་ཏུ་མི་སྐྱོ་བར། །དེ་དག་ལ་ཡང་མཆོད་པ་རྒྱ་ཆེར་བགྱི། །དེའང་། སངས་རྒྱས་ཀྱི་ཐུགས་སྲས་བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་བ་འགྲོ་བའི་མགོན་པོ་ཕྱོགས་བཅུའི་སངས་རྒྱས་རྣམས་ཀྱི་མཆོག་གི་སྤྲུལ་པའི་སྐུའི་བཀོད་པ་ཐམས་ཅད་རྣམ་པར་དག་པའི་མིག་གི་སྤྱོད་ཡུལ་དུ་མངོན་སུམ་དུ་གྱུར་ནས། དུས་ཀྱང་རེས་འགའ་བ་མིན་པར་རྟག་ཏུ་བདག་གིས་རྒྱལ་བ་དེ་དག་ཐམས་ཅད་ལ་སེམས་དང་བས་བལྟ་ཞིང་མཐོང་བར་གྱུར་ལ། གྱུར་པ་དེ་ནས་བཟུང་སྟེ་མ་འོངས་པའི་བསྐལ་པ་མཐའ་ཡས་པ་ཀུན་ཏུ་ཡིད་མི་སྐྱོ་བར་སངས་རྒྱས་སྲས་བཅས་དེ་དག་རེ་རེ་ལ་ཡང་མཆོད་པ་རྒྱ་ཆེར་ཏེ་ནམ་མཁའི་གཏོས་དང་
(༡༦༦)མཉམ་པ་ཆོས་ཀྱི་དབྱིངས་ཀྱིས་ཁྱབ་པ། རྣམ་པ་ཐམས་ཅད་ཀྱིས་མཆོག་དང་ལྡན་པས་མཆོད་པ་བགྱི་བར་ཤོག་ཅེས་པའོ། །དགུ་པ་དམ་པའི་ཆོས་ཡོངས་སུ་འཛིན་པར་སྨོན་པ་ནི། རྒྱལ་བ་རྣམས་ཀྱི་དམ་པའི་ཆོས་འཛིན་ཅིང་། །བྱང་ཆུབ་སྤྱོད་པ་ཀུན་ཏུ་སྣང་བར་བྱེད། །བཟང་པོ་སྤྱོད་པ་རྣམ་པར་སྤྱད་པ་ཡང་། །མ་འོངས་བསྐལ་པ་ཀུན་ཏུ་སྤྱད་པར་བགྱི། །དེའང་། རྒྱལ་བ་རྣམས་ཀྱི་ལུང་གི་དམ་པའི་ཆོས་མ་ལུས་པ་མི་བརྗེད་པའི་གཟུངས་ཀྱིས་འཛིན་པར་བྱེད་ཅིང་། །འབྲས་བུ་བྱང་ཆུབ་བླ་ན་མེད་པའི་སྤྱོད་པ་སྟོན་པའི་ཐེག་པ་ཆེན་པོའི་ལུང་གི་ཆོས་སེམས་ཅན་རྣམས་ལ་ཀུན་ཏུ་སྟེ་རབ་ཏུ་སྟོན་པའི་སྒོ་ནས་སྣང་བར་བྱེད་པ་དང་། ཐེག་ཆེན་གྱི་རྟོགས་པའི་ཆོས་བཟང་པོ་སྤྱོད་པ་རང་གཞན་གྱི་རྒྱུད་ལ་སྐྱེད་ཅིང་།
(༡༦༧)དེའི་མི་མཐུན་ཕྱོགས་དག་པ་དང་མཐུན་ཕྱོགས་འཕེལ་བར་བྱེད་པའི་སྒོ་ནས་རྣམ་པར་སྦྱང་བ་ཡང་མ་འོངས་པའི་བསྐལ་པ་མཐའ་མེད་པ་ཀུན་ཏུ་སྤྱད་པར་བགྱི་བར་ཤོག་ཅིག་པའོ། །བཅུ་པ་མི་ཟད་པའི་མཛོད་ཐོབ་པར་སྨོན་པ་ནི། སྲིད་པ་ཐམས་ཅད་དུ་ཡང་འཁོར་བ་ན། །བསོད་ནམས་ཡེ་ཤེས་དག་ནི་མི་ཟད་རྙེད། །ཐབས་དང་ཤེས་རབ་ཏིང་འཛིན་རྣམ་ཐར་དང་། ཡོན་ཏན་ཀུན་གྱི་མི་ཟད་མཛོད་དུ་གྱུར། །དེའང་། ཁམས་ གསུམ་གྱི་སྲིད་པ ་ཐམས་ཅད་དུ་ཡང་ལས་སྨོན་རྟེན་འབྲེལ་གྱི་དབང་གིས་སྐྱེ་བ་གཅིག་ནས་གཅིག་ཏུ་བརྒྱུད་པ་ཉམས་སུ་མྱོང་ཞིང་འཁོར་བ་ན། སངས་རྒྱས་ཐོབ་པའི་རྒྱུ་སྦྱིན་སོགས་བསོད་ནམས་ཀྱི་ཚོགས་དང་། རྟོག་པའི་སྤྲོས་པ་ཐམས་ཅད་དང་བྲལ་བའི་
(༡༦༨)ཤེས་རབ་ཡེ་ཤེས་ཀྱི་ཚོགས་དག་ནི་དུས་ནམ་ཡང་མི་ཟད་པ་གོང་ནས་གོང་དུ་འཕེལ་བ་རྙེད་པ་དང་། ཤེས་རབ་ཀྱི་བྱེ་བྲག་གང་ཞིག་རྒྱུ་ཆུང་ངུ་ལས་འབྲས་བུ་ཆེན་པོ་དང་། ཚོགས་ཆུང་ངུ་ལས་གྲུབ་པའི་དོན་ཆེན་པོར་བྱེད་པའི་སྒོ་ནས་བདག་གཞན་གྱི་དོན་ཕུན་སུམ་ཚོགས་པ་སྒྲུབ་པ་ལ་མཁས་པའི་ཐབས་དང་། ཆོས་རབ་ཏུ་རྣམ་པར་འབྱེད་པའི་ཤེས་རབ་དང་། སེམས་མཉམ་པར་འཇོག་ཅིང་རྩེ་གཅིག་པའི་ཏིང་ངེ་འཛིན་དང་། ཉོན་མོངས་པ་དང་སྙོམས་འཇུག་གི་སྒྲིབ་པ་སོགས་ལས་རྣམ་པར་ཐར་པ་དང་། དེ་རྣམས་ལས་བྱུང་བའི་ཡོན་ཏན་མཐའ་ཡས་པ་ཀུན་གྱི་མི་ཟད་པའི་མཛོད་དུ་གྱུར་ཅིག་པའོ། །བཅུ་གཅིག་པ་འཇུག་པར་སྨོན་པ་ལ། །ཞིང་དང་བཅས་པའི་སངས་རྒྱས་བལྟ་བ་ལ་དང་
(༡༦༩)སངས་རྒྱས་ཀྱི་གསུང་ལ་དང་། ཆོས་འཁོར་བསྐོར་བ་ལ་དང་། བསྐལ་པ་ལ་དང་། དེ་བཞིན་གཤེགས་པ་བལྟ་བ་ལ་དང་། དེའི་སྤྱོད་ཡུལ་ལ་དང་། ཞིང་སྒྲུབ་པ་ལ་དང་། དེ་བཞིན་གཤེགས་པའི་དྲུང་དུ་འགྲོ་བ་ལ་འཇུག་པ་སྟེ་བརྒྱད་ལས། དང་པོ་ནི། རྡུལ་གཅིག་སྟེང་ན་རྡུལ་རྙེད་ཞིང་རྣམས་ཏེ། །ཞིང་དེར་བསམ་གྱིས་མི་ཁྱབ་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་ལ། །བྱང་ཆུབ་སྤྱད་པ་སྤྱོད་ཅིང་བལྟ་བར་བགྱི། །དེ་ལྟར་མ་ལུས་ཐམས་ཅད་ཕྱོགས་སུ་ཡང་། །སྐྲ་ཙམ་ཁྱོན་ལ་དུས་ གསུམ་ཚད་སྙེད་ཀྱི། །སངས་རྒྱས་རྒྱ་མཚོ་ཞིང་རྣམས་རྒྱ་མཚོ་དང་། །བསྐལ་པ ་རྒྱ་མཚོར་སྤྱོད་ཅིང་རབ་ཏུ་འཇུག །དེའང་། རྡུལ་ཕྲ་རབ་གཅིག་གི་སྟེང་
(༡༧༠)དུ་ཕྱོགས་བཅུའི་ཞིང་ན་རྡུལ་ཕྲ་རབ་ཇི་སྙེད་ཡོད་པ་དེ་སྙེད་ཀྱི་གྲངས་དང་མཉམ་པའི་སངས་རྒྱས་ཀྱི་ཞིང་རྣམས་མ་འདྲེས་པར་མཐོང་བར་གྱུར་ཏེ། ཞིང་དེར་རྡུལ་རེ་རེའི་སྟེང་ན་ཡང་བསམ་གྱིས་མི་ཁྱབ་པའི་སངས་རྒྱས་རྣམས། སངས་རྒྱས་ཀྱི་ཐུགས་སྲས་བྱང་ཆུབ་སེམས་དཔའི་འཁོར་ཚོགས་ཀྱི་དབུས་ན་བཞུགས་པ་ལ། དེ་དག་དང་ལྷན་གཅིག་ཏུ་བདག་གིས་བླ་ན་མེད་པའི་བྱང་ཆུབ་འཐོབ་པའི་ཕྱིར་སྤྱད་པ་མཚུངས་པར་སྤྱོད་ཅིང་སྐུ་ལ་བལྟ་བར་བགྱིད་པ་དང་། རྡུལ་གཅིག་ལ་ཇི་སྙེད་མཐོང་བར་མོས་པ་དེ་ལྟར་ཕྱོགས་བཅུ་མ་ལུས་ཤིང་ལུས་པ་མེད་པ་ཐམས་ཅད་ཀྱི་ཕྱོགས་སུ་ཡང་སྐྲ་ཡི་རྩེ་མོ་ཙམ་གྱི་ཤིན་ཏུ་ཕྲ་བའི་སའི་ཁྱོན་ལ་འདས་མ་འོངས་ད་ལྟར་གྱི་དུས་ གསུམ་དུ་གཤེགས་
(༡༧༡)ཤིང་འབྱོན་པའི་ཚད་དེ་སྙེད་ཀྱི་སངས་རྒྱས་གྲངས་སུ་བགྲངས་ན་ཟད་མི་ཤེས་པ ་རྒྱ་མཚོ་ལྟ་བུ་དང་། དེའི་ཞིང་ཁམས་རྣམས་ཀྱང་རྒྱ་མཚོ་ལྟར་ཟད་མི་ཤེས་པ་དང་། དེ་དག་རེ་རེ་ཡང་དུས་བསྐལ་པ་རྒྱ་མཚོར་ཟད་མི་ཤེས་པའི་བར་དེ་སྲིད་དུ་བདག་ཀྱང་ཞིང་ཁམས་དེ་དག་རེ་རེར་བྱང་ཆུབ་ཀྱི་སྤྱད་པ་སྤྱོད་ཅིང་བལྟ་བ་ལ་རབ་ཏུ་འཇུག་པར་གྱུར་ཅིག་པའོ། །གཉིས་པ་ནི། གསུང་གཅིག་ཡན་ལག་རྒྱ་མཚོའི་སྒྲ་སྐད་ཀྱིས། །རྒྱལ་བ་ཀུན་དབྱངས་ཡན་ལག་རྣམ་དག་པ། །འགྲོ་བ་ཀུན་གྱི་བསམ་པ་ཇི་བཞིན་དབྱངས། །སངས་རྒྱས་གསུང་ལ་རྟག་ཏུ་འཇུག་པར་བགྱི། །དེའང་། སངས་རྒྱས་གཅིག་གིས་གསུང་གཅིག་བཀའ་སྩལ་བ་ལའང་གསུང་གི་རང་བཞིན་ཆ་ཚང་བ་དང་། ཆ་ཚང་བ་
(༡༧༢)ཁོ་ན་རིགས་མི་འདྲ་བ་ཡན་ལག་རྒྱ་མཚོ་ལྟར་མཐའ་ཡས་པའི་སྒྲ་སྐད་དུ་གྱུར་ཏེ། དོན་དང་ཚིག་དང་སྐད་དང་དབྱངས་མཐའ་ཡས་པ་ཉིད་ཀྱིས་སྟོན་པས་སོ། །དེས་ན་དེ་ཉིད་རྒྱལ་བ་ཀུན་གྱི་གསུང་དབྱངས་ཀྱི་ཡན་ལག་སྐྱོན་ཐམས་ཅད་དང་བྲལ་བས་རྣམ་པར་དག་པ་དང་ངོ་བོ་གཅིག་ཏུ་ཡང་གནས་ལ། ཆོས་གང་དང་གང་ཉན་པར་འདོད་པ་དང་། །དེ་དང་དེས་འདུལ་བར་འགྱུར་བའི་འགྲོ་བ་ཀུན་གྱི་རང་རང་གི་བསམ་པ་ཇི་ལྟ་བ་བཞིན་ཏུ་གསུང་དབྱངས་དེ་གོ་ཞིང་ཐེ་ཚོམ་གཅོད་པར་མཛད་པའི་སངས་རྒྱས་ཐམས་ཅད་ཀྱི་གསུང་མཐའ་ཡས་པ་ཉན་ཅིང་དོན་དེ་སེམས་པ་ལ་དུས་རྟག་ཏུ་བདག་འཇུག་པར་བགྱི་ཞིང་ཐོས་པར་ཤོག་ཅིག་པའོ། ། གསུམ་པ ་ནི། དུས་ གསུམ་གཤེགས་པ ་རྒྱལ་བ་ཐམས་ཅད་དག །
(༡༧༣)འཁོར་ལོའི་ཚུལ་རྣམས་རབ་ཏུ་བསྐོར་བ་ཡི། །དེ་དག་གི་ཡང་གསུང་དབྱངས་མི་ཟད་ལ། །བློ་ཡི་སྟོབས་ཀྱིས་བདག་ཀྱང་རབ་ཏུ་འཇུག །དེའང་། དུས་གསུམ་དུ་འབྱོན་ཅིང་གཤེགས་པར་གྱུར་པའི་རྒྱལ་བ་ཐམས་ཅད་བདག་གིས་སེམས་ཅན་རྣམས་དགྲོལ་བའི་ཆེད་དུ། དཔེར་ན་ཤིང་རྟའི་འཁོར་ལོར་འདྲིལ་ཞིང་འགྲོ་བ་དང་འདྲ་བར་སེམས་ཅན་རྣམས་ཀྱི་ཤེས་རྒྱུད་ལ་ཆོས་བསྟན་པ་ཡང་ཉན་པ་པོའི་རྒྱུད་ལ་གོ་བར་བྱེད་པའི་འཁོར་ལོ་ཞེས་བྱ་སྟེ། དེའི་ཚུལ་གྱིས་སེམས་ཅན་མོས་པ་ཐ་དད་པ་དག་ལ་ཆོ་འཕྲུལ་ གསུམ་ལ་སོགས་པ ་ཐབས་གང་དང་གང་གིས་འདུལ་བའི་ཆོས་རྣམས་རབ་ཏུ་བསྟན་ཅིང་བསྐོར་བ་ཡི་སངས་རྒྱས་དེ་དག་གི་ཡང་གསུང་ཆོས་ཀྱི་སྒྲ་དབྱངས་མི་ཟད་པ་མཐའ་ཡས་
(༡༧༤)པ་རྣམས་ཀྱི་དོན་ལེགས་པར་རྟོགས་པ་ལ་བློ་ཡི་མཐུ་ཐོབ་པའི་སྟོབས་ཀྱིས་བདག་ཉིད་ཀྱང་གསུང་གི་ཕྲིན་ལས་དེ་ལ་ངོ་བོ་བྱེད་ལས་འདྲེས་པར་ཐོབ་པའི་ཚུལ་གྱིས་རབ་ཏུ་འཇུག་པར་གྱུར་ཅིག་པའོ། །བཞི་པ་ནི། མ་འོངས་བསྐལ་པ་ཐམས་ཅད་འཇུག་པར་ཡང་། །སྐད་ཅིག་གཅིག་གིས་བདག་ཀྱང་འཇུག་པར་བགྱི། །གང་ཡང་བསྐལ་ པ་དུས་གསུམ ་ཚད་དེ་དག །སྐད་ཅིག་ཆ་ཤས་ཀྱིས་ནི་ཞུགས་པར་སྦྱང་། །དེའང་། མ་འོངས་པའི་བསྐལ་པ་མང་པོ་ཐམས་ཅད་དུ་ནམ་མཁས་གར་ཁྱབ་ཀྱི་འཇིག་རྟེན་རྣམས་སུ་ཆོས་ཇི་སྙེད་ཅིག་འབྱུང་བ་ཀུན་ལ་ཡེ་ཤེས་འཇུག་ཅིང་མངོན་ཤེས་ཀྱིས་ཤེས་པར་འགྱུར་བ་ཡང་སངས་རྒྱས་ཀྱིས་མཁྱེན་པ་དེ་བཞིན་ཏུ་ཡེ་ཤེས་ཀྱི་སྐད་ཅིག་མ་གཅིག་གིས་
(༡༧༥)བདག་ཉིད་ཀྱང་དུས་ཐམས་ཅད་ཀྱི་དངོས་པོ་ཀུན་ལ་གཅིག་ཅར་དུ་འཇུག་པར་བགྱི་ཞིང་། །དེས་མཚོན་ནས་གང་ཡང་བསྐལ་པ་འདས་མ་འོངས་ད་ལྟའི་དུས་ གསུམ་གྱིས་བསྡུས་པ ་ཇི་སྙེད་ཅིག་ཡོད་པ་དེ་ཐམས་ཅད་ཀྱི་ཚད་དེ་དག་འདིར་སེམས་ཀྱི་སྐད་ཅིག་མ་གཅིག་གི་ཆ་ཤས་སུ་འཇུག་ཅིང་བསྒྱུར་ནུས་པའི་སྟོབས་ཀྱི་དེ་ཐམས་ཅད་ཀྱི་ཡུལ་ནི་སྒྲིབ་པ་མེད་པར་ཞུགས་པར་གྱུར་ནས་བྱང་ཆུབ་ཀྱི་སྤྱད་པ་སྤྱོད་པར་གྱུར་ཅིག་པའོ། །ལྔ་པ་ནི། དུས་ གསུམ་གཤེགས་པ ་མི་ཡི་སེང་གེ་གང་། །དེ་དག་སྐད་ཅིག་གཅིག་ལ་བདག་གིས་བལྟ། །དེའང་། དུས་ གསུམ་དུ་གཤེགས་བཞུགས་འབྱོན་པའི་མི་ཡི་སེང་གེ་སངས་རྒྱས་བཅོམ་ལྡན་འདས་གང་ཡིན་པ ་དེ་དག་ཐམས་ཅད་ཀྱི་སྐུའི་
(༡༧༦)བཀོད་པ་འཁོར་གྱི་ཚོགས་རྒྱ་མཚོ་དང་བཅས་པ་རྣམས་དུས་སྐད་ཅིག་མ་གཅིག་ལ་བདག་གིས་ཡོངས་སུ་བལྟ་ཞིང་རྟག་ཏུ་དེ་ལ་འཇུག་པར་ཤོག་ཅིག་པའོ། །དྲུག་པ་ནི། རྟག་ཏུ་དེ་དག་གི་ནི་སྤྱོད་ཡུལ་ལ། །སྒྱུ་མར་གྱུར་པའི་རྣམ་ཐར་སྟོབས་ཀྱིས་འཇུག །དེའང་། དུས་རྟག་ཏུ་སངས་རྒྱས་དེ་དག་གི་ནི་ཏིང་ངེ་འཛིན་གྱི་རྣམ་པར་འཕྲུལ་པ་དང་། བྱིན་རླབས་དང་སྒྱུ་མའི་རྣམ་པར་རོལ་པ་ལས་བྱུང་བའི་མཛད་པའི་སྒོ་བསམ་གྱིས་ཁྱབ་པའི་སྤྱོད་ཡུལ་ལ་མཉམ་བཞག་སྤྲོས་བྲལ་གྱི་ཡེ་ཤེས་རྟོགས་པས་རྗེས་ཐོབ་ཏུ་དངོས་པོ་ཐམས་ཅད་སྒྱུ་མ་ལྟར་གྱུར་པའི་མཐུས་སྒྲིབ་པ་ལས་རྣམ་པར་ཐར་པའི་སྟོབས་ཀྱིས་གང་ལ་གང་འདོད་དུ་བསྒྱུར་ཐུབ་ཅིང་སྤྱོད་པའི་ཚུལ་གྱིས་བདག་དུས་ཐམས་ཅད་དུ་འཇུག་
(༡༧༧)པར་གྱུར་ཅིག་པའོ། །བདུན་པ་ནི། གང་ཡང་དུས་ གསུམ་དག་གི་ཞིང་བཀོད་པ ། དེ་དག་རྡུལ་གཅིག་སྟེང་དུ་མངོན་པར་བསྒྲུབ། །དེ་ལྟར་མ་ལུས་ཕྱོགས་རྣམས་ཐམས་ཅད་དུ། །རྒྱལ་བ་རྣམས་ཀྱི་ཞིང་གི་བཀོད་ལ་འཇུག །དེའང་། གང་ཡང་དུས་ གསུམ་དུ་གནས་པའི་སངས་རྒྱས་དག་གི་ཞིང་ཁམས་ཀྱི་བཀོད་པ ་དེ་དག་མོས་སྨོན་རྫུ་འཕྲུལ་གྱི་སྟོབས་ཀྱིས་རྡུལ་ཕྲན་གཅིག་གི་སྟེང་དུ་མངོན་པར་སྒྲུབ་ནུས་ཤིང་། དེ་ལྟར་སྒྲུབ་པ་བཞིན་མ་ལུས་ཤིང་ལུས་པ་མེད་པའི་ཕྱོགས་རྣམས་དང་། དུས་ཐམས་ཅད་ཀྱི་རྡུལ་རེ་རེ་བཞིན་གྱི་སྟེང་དུའང་རྒྱལ་བ་རྣམས་ཀྱི་ཞིང་རྣམས་སྒྲུབ་ཅིང་བཀོད་པ་ཡིད་དུ་འོང་བ་དང་། རྒྱན་གྱི་ཁྱད་པར་རྣམ་པ་ཐམས་ཅད་པ་སྐད་ཅིག་གཅིག་
(༡༧༨)གིས་གཞན་ལ་སྟོན་ནུས་པའི་བྱ་བ་ལ་འཇུག་པར་གྱུར་ཅིག་པའོ། །བརྒྱད་པ་ནི། གང་ཡང་མ་བྱོན་འཇིག་རྟེན་སྒྲོན་མ་རྣམས། །དེ་དག་རིམ་པར་འཚང་རྒྱ་འཁོར་ལོ་བསྐོར། །མྱ་ངན་འདས་པ་རབ་ཏུ་ཞི་མཐའ་སྟོན། །མགོན་པོ་ཀུན་གྱི་དྲུང་དུ་བདག་མཆིའོ། །དེའང་། གང་ཡང་སྔར་མ་བྱོན་པའི་སངས་རྒྱས་ཕྱི་མཐའི་མུར་ཐུག་པ་རྣམས་སུ་ཕྱོགས་བཅུའི་འཇིག་རྟེན་གྱི་ཁམས་མཐའ་དག་ཏུ་སྣང་བར་བྱེད་པའི་སྒྲོན་མ་རྣམས། དེ་དག་སོ་སོ་རང་རང་གི་མཛད་པ་རྣམས་རིམ་པ་མ་འཆོལ་བར་འཚང་རྒྱ་བ་དང་ཆོས་ཀྱི་འཁོར་ལོ་བསྐོར་བ་དང་མཐར་མྱ་ངན་ལས་འདས་པ་སྡུག་བསྔལ་རབ་ཏུ་ཞི་བའི་མཐའ་ཐོབ་པའི་ཚུལ་སྟོན་པའི་མགོན་པོ་དེ་དག་ཀུན་གྱི་དྲུང་དུ་བདག་རྫུ་འཕྲུལ་གྱི་སྟོབས་ཀྱིས་ཅིག་ཅར་དུ་
(༡༧༩)ལུས་དེ་སྙེད་ཅིག་སྤྲུལ་ཏེ་ཕྱག་དང་བཀུར་སྟི་བྱ་བ་དང་མཆོད་སྤྲིན་རྒྱ་མཚོ་ལྟ་བུས་མཆོད་པ་དང་ཆོས་འཁོར་བསྐོར་བའི་དོན་དུ་གསོལ་བ་འདེབས་པ་སོགས་བྱ་བའི་ཕྱིར་བདག་མཆི་སྟེ་འགྲོ་བར་ཤོག་ཅིག་པའོ། །བཅུ་གཉིས་པ་སྟོབས་ལ་སྨོན་པ་ནི། ཀུན་ནས་མྱུར་བའི་རྫུ་འཕྲུལ་སྟོབས་རྣམས་དང་། །ཀུན་ནས་སྒོ་ཡི་ཐེག་པའི་སྟོབས་དག་དང་། །ཀུན་ཏུ་ཡོན་ཏན་སྤྱོད་པའི་སྟོབས་རྣམས་དང་། །ཀུན་ཏུ་ཁྱབ་པ་བྱམས་པ་དག་གི་སྟོབས། །ཀུན་ཏུ་དགེ་བའི་བསོད་ནམས་སྟོབས་རྣམས་དང་། །ཆགས་པ་མེད་པར་གྱུར་པའི་ཡེ་ཤེས་སྟོབས། ཤེས་རབ་ཐབས་དང་ཏིང་འཛིན་སྟོབས་དག་གིས། །བྱང་ཆུབ་སྟོབས་རྣམས་ཡང་དག་སྒྲུབ་པར་བྱེད། །དེའང་། སངས་རྒྱས་མཆོད་པ་དང་སེམས་ཅན་
(༡༨༠)ལ་ཆོས་སྟོན་པ་དང་ཞིང་ཐ་དད་པར་ཅིག་ཅར་དུ་འགྲོ་བ་ལ་སོགས་པ་ཀུན་ཏུ་ཐོགས་པ་མེད་ཅིང་མྱུར་བ་ཉིད་དུ་སྒྲུབ་ནུས་པའི་རྫུ་འཕྲུལ་གྱི་སྟོབས་རྣམས་དང་། ཐབས་ཚུལ་མཐའ་ཡས་པས་སེམས་ཅན་ཐམས་ཅད་ཀུན་ནས་ཕན་པའི་སྒོར་གྱུར་པ་ཡི་སེམས་བསྐྱེད་བཞོན་པ་བཟང་པོ་དང་འདྲ་བའི་ཐེག་པའི་སྟོབས་དག་དང་། ཕྱིན་དྲུག་དང་།།།བསྡུ་དངོས་དང་ཚད་མེད་བཞི་ལ་སོགས་པ་དང་འགྲོགས་པའི་སྙོམས་འཇུག །ཟད་པར་ཟིལ་གནོན་མངོན་ཤེས་སོགས་ཀུན་ཏུ་ཡོན་ཏན་གྱི་ཆོས་དུ་མ་ལ་སྤྱོད་པའི་སྟོབས་རྣམས་དང་། ཕན་པ་དང་བདེ་བའི་བསམ་པས་སེམས་ཅན་ཐམས་ཅད་ལ་ཀུན་ཏུ་ཁྱབ་པ་བྱམས་པ་སོགས་ཚད་མེད་ པ་བཞི་པོ་དག་གི་སྟོབས་དང་། ཐོག་མཐའ་བར་གསུམ ་ཀུན་ནས་རབ་ཏུ་དགེ་བའི་
(༡༨༡)སྦྱིན་སོགས་བསོད་ནམས་ཀྱི་སྟོབས་དག་དང་། ཤེས་བྱ་ཐམས་ཅད་ལ་ཆགས་ཤིང་ཐོགས་པ་མེད་པར་འཇུག་པར་གྱུར་པའི་ཡེ་ཤེས་མངོན་པར་མཁྱེན་པའི་སྟོབས་དང་། གནས་ལུགས་རྟོགས་པའི་ཤེས་རབ་དང་གཞན་དོན་སྒྲུབ་པའི་ཐབས་མཁས་དང་། མངོན་ཤེས་སོགས་ཡོན་ཏན་ཁྱད་པར་ཅན་ཐོབ་པར་བྱེད་པའི་ཏིང་ངེ་འཛིན་གྱི་སྟོབས་ཏེ་རང་རང་གི་མི་མཐུན་ཕྱོགས་ཀྱིས་བརྫི་བར་མི་ནུས་པས་སྟོབས་དགུ་པོ་དེ་དག་གིས་འབད་ནས། བཅུ་པ་བླ་ན་མེད་པའི་བྱང་ཆུབ་མྱུར་བ་ཉིད་དུ་ཐོབ་པའི་སྟོབས་ཡེ་ཤེས་ཀྱི་ཁྱད་པར་རྣམས་ཡང་དག་པར་སྒྲུབ་པར་བྱེད་པར་གྱུར་ཅིག་པའོ། །བཅུ་ གསུམ་པ ་གཉེན་པོ་སྒྲུབ་པ་ལ་སྨོན་པ་ནི། ལས་ཀྱི་སྟོབས་རྣམས་ཡོངས་སུ་དག་བྱེད་ཅིང་། །
(༡༨༢)ཉོན་མོངས་སྟོབས་རྣམས་ཀུན་ཏུ་འཇོམས་པར་བྱེད། །བདུད་ཀྱི་སྟོབས་རྣམས་སྟོབས་མེད་རབ་བྱེད་ཅིང་། །བཟང་པོ་སྤྱོད་པའི་སྟོབས་ནི་རྫོགས་པར་བགྱི། །དེའང་། རྣམ་སྨིན་ཡིད་དུ་མི་འོང་བ་སྐྱེད་པར་བྱེད་པའི་མི་དགེ་བའི་ལས་ཀྱི་ཕྱོགས་མཐུན་དང་བཅས་པའི་སྟོབས་རྣམས་བཤགས་པ་དང་བསྡམས་ པ་དང་དཀོན་མཆོག་གསུམ ་ལ་སྐྱབས་སུ་འགྲོ་ཞིང་བྱང་ཆུབ་མཆོག་ཏུ་སེམས་བསྐྱེད་པས་ཕྱག་དར་བཞིན་ཏུ་ཡོངས་སུ་དག་པར་བྱེད་ཅིང་། ལུས་སེམས་ལ་གནོད་པར་བྱེད་པ་ཆགས་སོགས་ཉོན་མོངས་པའི་སྟོབས་རྣམས་འདོད་ཆགས་ཀྱི་གཉེན་པོར་མི་སྡུག་པ་དང་། ཞེ་སྡང་གི་གཉེན་པོར་བྱམས་པ་དང་གཏི་མུག་གི་གཉེན་པོར་རྟེན་འབྲེལ་བསྒོམ་པ་སོགས་ཀྱིས་ཀུན་ཏུ་ཕམ་སྟེ་འཇོམས་
(༡༨༣)པར་བྱེད་པ་དང་། འཁོར་པ་ལས་མི་འདའ་ཞིང་སྡུག་བསྔལ་མྱོང་བར་བྱེད་པ་དང་བྱང་སེམས་ཀྱི་སྤྱོད་པ་ལ་བར་ཆད་བྱེད་པའི་ཕུང་འཆི་ལྷ་བུའི་བདུད་ཀྱི་སྟོབས་རྣམས་ནི། རིམ་པ་བཞིན་ཏུ་ཤེས་རབ་ཀྱིས་ཕུང་པོ་ལ་བདག་མེད་པར་རྟོགས་པ་དང་སེམས་ཉིད་སྐྱེ་འཇིག་མེད་པ་དང་ཡུལ་གྱི་མངོན་ཞེན་དག་པས་བཅོམ་སྟེ་སྟོབས་མེད་པར་རབ་ཏུ་བྱེད་ཅིང་། བཟང་པོ་སྤྱོད་པའི་སྟོབས་ནི་ལས་ཉོན་བདུད་ཀྱི་སྟོབས་རྣམས་གཞོམ་པའི་གཉེན་པོ་གསུམ་གྱིས་སྤང་བྱ་སྤོང་ཞིང་ཡོན་ཏན་རྫོགས་པར་བགྱིད་པའི་ཐབས་ཀྱིས་སངས་རྒྱས་ཐོབ་པར་གྱུར་ཅིག་པའོ། །བཅུ་བཞི་པ་ཕྲིན་ལས་ལ་སྨོན་པ་ནི། ཞིང་རྣམས་རྒྱ་མཚོ་རྣམ་པར་དག་བྱེད་ཅིང་། །སེམས་ཅན་རྒྱ་མཚོ་དག་
(༡༨༤)ནི་རྣམ་པར་གྲོལ། །ཆོས་རྣམས་རྒྱ་མཚོ་རབ་ཏུ་མཐོང་བྱེད་ཅིང་། །ཡེ་ཤེས་རྒྱ་མཚོ་རབ་ཏུ་གོམས་པར་བྱེད། །སྤྱོད་པ་རྒྱ་མཚོ་རྣམ་པར་དག་བྱེད་ཅིང་། །སྨོན་ལམ་རྒྱ་མཚོ་རབ་ཏུ་རྫོགས་པར་བྱེད། །སངས་རྒྱས་རྒྱ་མཚོ་རབ་ཏུ་མཆོད་བྱེད་ཅིང་། །བསྐལ་པ་རྒྱ་མཚོར་མི་སྐྱོ་སྤྱད་པར་བགྱི། །དེའང་། མཁའ་ཁྱབ་ཀྱི་མ་དག་པའི་ཞིང་རྣམས་རྒྱ་མཚོ་ལྟ་བུ་ནི་རིན་པོ་ཆེའི་ས་གཞི་དང་དཔག་བསམ་གྱི་ལྗོན་པ་སོགས་རྣམ་པར་དག་པའི་རང་བཞིན་ཅན་གྱི་བཟང་པོར་བྱེད་ཅིང་། དེ་དག་ན་འཁོད་པའི་སེམས་ཅན་རྒྱ་མཚོ་དག་ནི་ཆོ་འཕྲུལ་ གསུམ་གྱི་སྒོ་ནས་སྲིད་ཞིའི་འཇིགས་པ ་ལས་རྣམ་པར་སྒྲོལ་བར་བྱེད་པ་དང་། ལུང་རྟོགས་ཀྱི་ཆོས་རྣམས་རྒྱ་མཚོ་ཤེས་རབ་ཀྱི་མིག་རྣམ་པར་དག་པས་རབ་ཏུ་
(༡༨༥)མཐའ་ཕྱིན་པར་མཐོང་བར་བྱེད་ཅིང་། ཇི་ལྟར་ཇི་སྙེད་ཀྱི་ཆོས་མངོན་སུམ་དུ་མཐོང་བའི་ཡེ་ཤེས་རྒྱ་མཚོ་དག་ནི་ཡུད་ཙམ་གྱིས་རབ་ཏུ་རྟོགས་པར་བྱེད་ལ། རྒྱལ་སྲས་ཀྱི་སྤྱོད་པ་རྒྱ་མཚོ་ལྟ་བུ་དང་འགལ་བའི་དྲི་མ་ཐམས་ཅད་སྦྱོང་བའི་སྒོ་ནས་རྣམ་པར་དག་པར་བྱེད་ཅིང་། རང་གཞན་ལ་ཕན་བདེའི་སྨོན་ལམ་རྒྱ་མཚོ་ལྟ་བུ་འགྲུབ་པའི་རྒྱུ་ཚུལ་ཁྲིམས་རྣམ་པར་དག་པ་བསྲུང་བའི་སྒོ་ནས་ཡོངས་སུ་རྫོགས་ཤིང་སྨོན་ལམ་ལ་དབང་ཐོབ་པར་བྱེད་པ་དང་། ཕྱོགས་བཅུའི་སངས་རྒྱས་གྲངས་མེད་པ་རྒྱ་མཚོ་ལྟ་བུ་རྣམས་ནི་མཆོད་པ་ཐམས་ཅད་ཀྱིས་རབ་ཏུ་མཆོད་པར་བྱེད་ཅིང་། ཞིང་དག་པ་སོགས་ཀྱི་ལས་བདུན་པོ་དེའང་བསྐལ་པ་མཐའ་མེད་པ་རྒྱ་མཚོ་ལྟ་བུར་མི་
(༡༨༦)སྐྱོ་བར་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་སྟོབས་ཀྱིས་སྤྱད་པ་བགྱི་སྟེ། དེ་ལྟར་ལས་བརྒྱད་པོ་དེ་ཡང་སྐད་ཅིག་མ་རེ་རེའི་ནང་དུ་ཚང་བར་སྤྱོད་པར་ཤོག་ཅིག་པའོ། །བཅོ་ལྔ་པ་རྗེས་སུ་སློབ་པ་ལ་སངས་རྒྱས་དང་བྱང་ཆུབ་སེམས་དཔའི་རྗེས་སུ་སློབ་ པ་གཉིས་ལས། དང་པོ་ནི། གང་ཡང་དུས་གསུམ ་གཤེགས་པའི་རྒྱལ་བ་ཡི། །བྱང་ཆུབ་སྤྱོད་པའི་སྨོན་ལམ་བྱེ་བྲག་རྣམས། །བཟང་པོ་སྤྱོད་པས་བྱང་ཆུབ་སངས་རྒྱས་ནས། །དེ་ཀུན་བདག་གིས་མ་ལུས་རྫོགས་པར་བགྱི། །དེའང་། གང་ཡང་དུས་ གསུམ་དུ་གཤེགས་བཞུགས་འབྱོན་པར་མཛད་པའི་རྒྱལ་བ་གྲངས་མེད་པ ་ཡིས་བླ་ན་མེད་པའི་བྱང་ཆུབ་འཐོབ་པའི་ཕྱིར་དུ་སྤྱད་པ་སྤྱོད་པའི་ཚེ་སྨོན་ལམ་གྱི་བྱེ་བྲག་བསམ་
(༡༨༧)གྱིས་མི་ཁྱབ་པ་བཏབ་པ་རྣམས་བཟང་པོ་སྤྱོད་པ་སྤྱད་པས་བླ་ན་མེད་པའི་བྱང་ཆུབ་ཏུ་སངས་རྒྱས་པར་གྱུར་ནས། སྨོན་ལམ་དེ་དག་ཀུན་བདག་ཉིད་གཅིག་པུ་དག་གིས་ལྷག་མ་མ་ལུས་པར་ཡོངས་སུ་རྫོགས་པར་བགྱི་ཞིང་སྒྲུབ་པར་ཤོག་ཅིག་པའོ། །གཉིས་པ་ནི། རྒྱལ་བ་ཀུན་གྱི་སྲས་ཀྱི་ཐུ་བོ་པ། །གང་གི་མིང་ནི་ཀུན་ཏུ་བཟང་ཞེས་བྱ། །མཁས་པ་དེ་དང་མཚུངས་པར་སྤྱད་པའི་ཕྱིར། །དགེ་བ་འདི་དག་ཐམས་ཅད་རབ་ཏུ་བསྔོ། །ལུས་དང་ངག་དང་ཡིད་ཀྱང་རྣམ་དག་ཅིང་། །སྤྱོད་པ་རྣམ་དག་ཞིང་རྣམས་ཡོངས་དག་དང་། །བསྔོ་བའང་བཟང་པོ་མཁས་པ་ཅི་འདྲ་བ། །དེ་འདྲར་བདག་ཀྱང་དེ་དང་མཚུངས་པར་ཤོག །ཀུན་ནས་དགེ་བ་བཟང་པོ་སྤྱོད་པའི་ཕྱིར།
(༡༨༨)།འཇམ་དཔལ་གྱི་ནི་སྨོན་ལམ་སྤྱད་པར་བགྱི། །མ་འོངས་བསྐལ་པ་ཀུན་ཏུ་མི་སྐྱོ་བར། །དེ་ཡི་བྱ་བ་མ་ལུས་རྫོགས་པར་བགྱི། །དེའང་། རྒྱལ་བ་ཀུན་གྱི་སྲས་ཀྱི་ནང་ནས་མཐུ་བོ་སྟེ་སེམས་བསྐྱེད་པ་སྔ་ལ། བྱང་ཆུབ་སེམས་དཔའི་ཡོན་ཏན་ཇི་སྙེད་པ་ཡོངས་སུ་རྫོགས་ཤིང་རྣམ་པར་དག་པའི་མཆོག་ཏུ་གྱུར་པ་གང་གི་མིང་ནི་ཕྱོགས་བཅུའི་སངས་རྒྱས་སྲས་དང་བཅས་པས་མགྲིན་གཅིག་ཏུ་ཀུན་ཏུ་བཟང་པོ་ཞེས་བྱ་བར་ཞིང་ཐམས་ཅད་དུ་བསྒྲགས་པར་གསུངས་ཤིང་། བདག་དང་གཞན་གྱི་དོན་ཕུན་ གསུམ་ཚོགས་པར་སྒྲུབ་པ ་ལ་མཁས་པ་དེ་དང་མཚུངས་པར་བྱང་ཆེན་གྱི་སྤྱོད་པ་རླབས་པོ་ཆེ་ལ་སྤྱད་པའི་ཕྱིར། བདག་ལ་དགེ་བ་ཅི་ཡོད་པ་འདི་དག་ཐམས་ཅད་དེའི་རྗེས་སུ་
(༡༨༩)རབ་ཏུ་བསྔོ་བར་བྱ་སྟེ། ཚུལ་ཇི་ལྟར་ན། སེམས་ཅན་གང་ལ་གང་འདུལ་གྱི་ལུས་མཐའ་ཡས་པར་སྟོན་པ་དང་། དབྱངས་གཅིག་གིས་འགྲོ་བ་ཀུན་གྱི་སྒྲ་སྐད་དང་འབྱོར་བའི་ངག་དང་། དེར་མ་ཟད་རྣམ་པར་མི་རྟོག་བཞིན་མ་འདྲེས་པར་ཤེས་ལ་སྙིང་རྗེ་ཆེན་པོའི་ཏིང་ངེ་འཛིན་ལ་འཇུག་ནུས་པའི་ཡིད་ཀྱང་སྟེ་སྒོ་ གསུམ་པོ་རྣམ་པར་དག་ཅིང་ཕར་ཕྱིན་དྲུག་གི་སྤྱོད་པ ་ལ་སེར་སྣ་སོགས་ཀྱི་དྲི་མ་རྣམ་པར་དག་པ་དང་། ཞིང་མ་དག་པ་རྣམས་ཀྱང་ཡོངས་སུ་དག་པར་འགྱུར་པ་དང་ལྔ་པོ་དེ་ཐོབ་པའི་ཆེད་དུ་བསྔོ་བ་བཟང་པོ་མཁས་པ་ཀུན་ཏུ་བཟང་པོས་བཏབ་པ་ཅི་འདྲ་བ་དེ་འདྲར་བདག་ཀྱང་ཀུན་ཏུ་བཟང་པོ་དེ་དང་སྤྱོད་ཚུལ་མཚུངས་པར་ཤོག་ཅིག །ཐོག་མཐའ་བར་ གསུམ་ཀུན་
(༡༩༠)ནས་དགེ་བ་ཟབ་པ ་དང་རྒྱ་ཆེ་བའི་ཆོས་བཟང་པོ་སྤྱོད་པ་སྤྱད་ཅིང་ཉམས་སུ་ལེན་པའི་ཕྱིར་འཕགས་མཆོག་འཇམ་དཔལ་སྔོན་གྱི་ཚེ་རྒྱལ་པོ་ནམ་མཁའ་ཞེས་པར་གྱུར་པས་ནི་འདི་སྐད་དུ། འཁོར་བའི་མཐའ་ཇི་ཙམ་པ་དེ་སྲིད་དུ་སེམས་ཅན་ལ་ཕན་པ་སྤྱོད་པར་བྱའོ་ཞེས་པ་སོགས་སྨོན་ལམ་རྒྱ་ཆེར་བཏབ་པ་དེ་བཞིན་དུ་བདག་གིས་ཀྱང་སེམས་ཅན་མ་ལུས་པ་ལ་བདེ་ཞིང་ཕན་པར་བྱ་བ་སྣ་ཚོགས་ཀྱིས་མཐོ་རིས་དང་ཐར་པ་ཐོབ་པར་འགྱུར་བའི་དོན་སྤྱད་པར་བགྱི་སྟེ། དེ་ལྟར་སྲས་ཀྱི་མཆོག་གཉིས་དང་སྤྱོད་བསྔོ་སྨོན་ལམ་མཚུངས་པར་སྨོན་པ་དེ་ཡང་བར་མ་དོར་ལྡོག་པར་མི་འགྱུར་པར་མཐར་ཕྱིན་པའི་ཕྱིར་དུ་མ་འོངས་ཕྱི་མཐར་ཐུག་པ་མེད་པའི་བསྐལ་པ་ཀུན་ཏུ་ནམ་ཡང་སེམས་མི་སྐྱོ་བར་
(༡༩༡)བརྩོན་འགྲུས་ཤུགས་དྲག་པོ་དེ་ཡི་བྱ་བ་སྟེ་སྤྱོད་པ་དེ་དག་ཐམས་ཅད་ལྷག་མ་མ་ལུས་པ་བདག་གིས་རྫོགས་པར་བགྱི་བར་ཤོག་ཅིག་པའོ། །བཅུ་དྲུག་པ་ཀུན་གྱི་མཇུག་སྡུད་པའི་སྒོ་ནས་བསྔོ་བ་བསྟན་པ་ནི། སྤྱོད་པ་དག་ནི་ཚད་ཡོད་མ་གྱུར་ཅིག །ཡོན་ཏན་རྣམས་ཀྱང་ཚད་བཟུང་མེད་པར་ཤོག །སྤྱོད་པ་ཚད་མེད་པ་ལ་གནས་ནས་ཀྱང་། དེ་དག་འཕྲུལ་པ་ཐམས་ཅད་འཚལ་བར་བགྱི། །དེའང་། གོང་དུ་བཤད་པ་ལྟར་གྱི་བདག་གིས་བྱང་ཆུབ་སེམས་དཔའ་རྣམས་ཀྱི་སྤྱོད་པ་རླབས་པོ་ཆེ་མཐའ་དག་མ་ཚང་བ་མེད་པར་ཁུར་དུ་བླང་པ་དག་ནི་དཔེ་གྲངས་དུས་སོགས་ཀྱི་སྒོ་ནས་འདི་ཙམ་མོ་ཞེས་ཚད་བཟུང་དུ་ཡོད་པར་མ་གྱུར་ཅིག །རྒྱུ་དེ་ལས་བྱུང་བའི་འབྲས་བུ་གཟུངས་དང་སྤོབས་པ་སོགས་ཡོན་
(༡༩༢)ཏན་གྱི་ཚོགས་རྣམས་ཀྱང་རྒྱ་ཆ་ཞིང་མཐའ་ཡས་པས་ཚད་བཟུང་དུ་མེད་པར་ཤོག་ཅིག །དེ་ལྟར་སྤྱོད་པ་དང་ཡོན་ཏན་ཚད་མེད་པ་ལ་གནས་པར་བྱས་ནས་ཀྱང་ཕྱོགས་བཅུའི་སངས་རྒྱས་སྲས་དང་བཅས་པ་དེ་དག་གི་སྐུ་གསུང་ཐུགས་ཀྱི་རྣམ་པར་འཕྲུལ་བ་གཞལ་དུ་མེད་པ་ཐམས་ཅད་འཚལ་བར་བགྱི་སྟེ་ཐོབ་པར་ཤོག་ཅིག་པའོ། །གཉིས་པ་སྨོན་ལམ་གྱི་མཐའ་བསྟན་པ་ནི། ནམ་མཁའི་མཐར་ཐུག་གྱུར་པ་ཇི་ཙམ་པར། །སེམས་ཅན་མ་ལུས་མཐའ་ཡས་དེ་བཞིན་སྟེ། །ཇི་ཙམ་ལས་དང་ཉོན་མོངས་མཐར་གྱུར་པ། །བདག་གི་སྨོན་ལམ་མཐའ་ཡང་དེ་ཙམ་མོ། །དེའང་། ཕྱོགས་བཅུ་གང་ནས་གཞལ་ཀྱང་ནམ་མཁའི་མཐར་ཐུག་པར་གྱུར་པ་མེད་པ་ཇི་ཙམ་པ་དེ་ཐམས་ཅད་སེམས་ཅན་གྱིས་
(༡༩༣)གོ་མཚམས་མེད་པར་གང་བས་འགྲོ་བ་མ་ལུས་པའི་མཐའ་ལ་ཐུག་པ་མེད་པ་ཡང་དེ་བཞིན་དུ་ཡིན་ཏེ། སེམས་ཅན་གྱི་མཐའ་ཇི་ཙམ་པར་དེ་དག་གི་དགེ་མི་དགེའི་ལས་འཁོར་བའི་རྐྱེན་དུ་གྱུར་པ་དང་། ཆགས་སོགས་ཉོན་མོངས་པ་རྒྱུ་དང་བཅས་པའི་ཕྱོགས་སུ་གྱུར་པ་ཡང་དེ་ཙམ་སྟེ། ལས་ཉོན་གྱི་མཐར་ཐུག་པ་མེད་པར་གྱུར་པ་ལྟར་མི་མཐུན་ཕྱོགས་དེ་དག་གི་གཉེན་པོ་འཕགས་པའི་ཡེ་ཤེས་ཀྱིས་སྲབ་པའི་ཕྱིར་བདག་གིས་སེམས་ཅན་གྱི་དོན་བྱ་བའི་སྨོན་ལམ་གྱི་མཐའ་ཡི་ཚད་བཟུང་དུ་མེད་པ་ཡང་དེ་ཙམ་མོ། ། གསུམ་པ ་རྗེས་ཕན་ཡོན་བསྟན་པས་འཇུག་བསྡུ་བ་ལ་སྨོན་ལམ་གྱི་ཕན་ཡོན་དང་། ཕན་ཡོན་ཅན་གྱི་སྨོན་ལམ་ཉིད་བསྔོ་བ་གཉིས་ཀྱི་དང་པོ་ལ་བསྟན་བཤད་བསྡུ་
(༡༩༤) གསུམ་ལས། དང་པོ་མདོར་བསྟན་པ ་ནི། གང་ཡང་ཕྱོགས་བཅུའི་ཞིང་རྣམས་མཐའ་ཡས་པ། །རིན་ཆེན་བརྒྱན་ཏེ་རྒྱལ་བ་རྣམས་ལ་ཕུལ། །ལྷ་དང་མི་ཡི་བདེ་བའི་མཆོག་རྣམས་ཀྱང་། །ཞིང་གི་རྡུལ་སྙེད་བསྐལ་པར་ཕུལ་བ་བས། །གང་གིས་བསྔོ་བའི་རྒྱལ་པོ་འདི་ཐོས་ནས། །བྱང་ཆུབ་མཆོག་གི་རྗེས་སུ་རབ་མོས་ཤིང་། །ལན་ཅིག་ཙམ་ཡང་དད་པ་སྐྱེད་པ་ནི། །བསོད་ནམས་དམ་པའི་མཆོག་ཏུ་འདི་འགྱུར་རོ། །དེའང་། གང་ཡང་སྐྱེ་བོ་ལ་ལ་ཞིག་གིས་ཕྱོགས་བཅུའི་ཞིང་ཁམས་རྣམས་རབ་ཏུ་རྒྱ་ཆེ་ཞིང་མཐའ་ཡས་པ་དག་རིན་ཆེན་སྣ་ཚོགས་པའི་རྒྱན་དུ་མས་རྒྱན་ཏེ་བཀོད་པས་ཡོངས་སུ་མཇེས་པར་བྱས་ནས་ཕྱོགས་བཅུའི་རྒྱལ་བ་སྲས་དང་བཅས་པ་རྣམས་ལ་དང་བའི་སེམས་ཀྱིས་ཕུལ་
(༡༩༥)བ་དང་། དེར་མ་ཟད་ལྷ་དང་མི་ཡི་ཡོ་བྱད་ཀྱི་དམ་པ་དབང་པོ་སོ་སོ་ལ་བདེ་བའི་མཆོག་སྐྱེད་པའི་རྒྱུ་གཟུགས་མཛེས་པ། སྒྲ་སྙན་པ་དྲི་ཞིམ་པ་རོ་བདའ་བ་རེག་བྱ་འཇམ་པ་སོགས་འདོད་པའི་ཡོན་ཏན་མཐའ་ཡས་པ་རྣམས་ཀྱིས་ཀྱང་གྲངས་མང་བ་ཕྱོགས་བཅུའི་ཞིང་གི་རྡུལ་ཕྲན་སྙེད་དང་། དུས་རིང་བ་བསྐལ་པའི་བར་རྒྱུན་མི་འཆད་དུ་ཕུལ་བ་པས། སྐྱེས་བུ་གང་གིས་བསྔོ་བའི་རྒྱལ་པོ་མཆོག་ཏུ་གྱུར་པ་འདི་ཐོས་ནས་ཚིག་དོན་ཡིད་ལ་དྲན་བཞིན་པས་བླ་ན་མེད་པའི་བྱང་ཆུབ་མཆོག་གི་རྒྱུ་དང་འབྲས་བུའི་ཚུལ་ལ་རྗེས་སུ་ཡི་རང་བས་རབ་ཏུ་མོས་ཤིང་མོས་ནས་ཀྱང་དད་པ་མང་དུ་སྐྱེས་ན་ལྟ་ཅི་སྨོས། ཐ་ན་ལན་ཅིག་ཙམ་ཡང་དད་པ་རབ་ཏུ་སྐྱེད་ཅིང་སྨོན་ལམ་འདེབས་པ་དེ་ནི་བསོད་ནམས་
(༡༩༦)དམ་པའི་མཆོག་ཏུ་སྟེ་སྔ་མ་ལས་ཆེས་ལྷག་པའི་བསོད་ནམས་གསོག་པར་འདི་འགྱུར་ཏེ་བྱང་ཆུབ་ཀྱི་བར་དུ་ཟད་པར་མི་འགྱུར་རོ། །གཉིས་པ་རྒྱས་པར་བཤད་པ་ནི། གང་གིས་བཟང་སྤྱོད་སྨོན་ལམ་འདི་བཏབ་པས། །དེས་ནི་ངན་སོང་ཐམས་ཅད་སྤངས་པར་འགྱུར། །དེས་ནི་གྲོགས་པོ་ངན་པ་སྤངས་པ་ཡིན། །སྣང་བ་མཐའ་ཡས་དེ་ཡང་ དེས་མྱུར་མཐོང་། །དེ་དག་རྙེད་པ་རབ་རྙེད་བདེ་བར་འཚོ། །མི་ཚེ་འདིར་ཡང་དེ་དག་ལེགས་པར་འོང་། །ཀུན་ཏུ་བཟང་པོ་དེ་ཡང་ཅི་འདྲ་བར། །དེ་དག་རིང་པོར་མི་ཐོགས་དེ་བཞིན་འགྱུར། །མཚམས་མེད་ལྔ་པོ་དག་གི་སྡིག་པ་རྣམས། །གང་གིས་མི་ཤེས་དག་གིས་བྱས་པ་དག །དེ་ཡིས་བཟང་པོ་སྤྱོད་པ་འདི་བརྗོད་ན། །མྱུར་དུ་མ་ལུས་ཡོངས་སུ་བྱང་
(༡༩༧)བར་འགྱུར། །ཡེ་ཤེས་དང་ནི་གཟུགས་དང་མཚན་རྣམས་དང་། །རིགས་དང་ཁ་དོག་རྣམས་དང་ལྡན་པར་འགྱུར། །བདུད་དང་མུ་སྟེགས་མང་པོས་དེ་མི་ཐུབ། །འཇིག་རྟེན་གསུམ་པོ་ཀུན་ནའང་མཆོད་པར་འགྱུར། །བྱང་ཆུབ་ཤིང་དབང་དྲུང་དུ་དེ་མྱུར་འགྲོ། །སོང་ནས་སེམས་ཅན་ཕན་ཕྱིར་དེར་འདུག་སྟེ། །བྱང་ཆུབ་སངས་རྒྱས་འཁོར་ལོ་རབ་ཏུ་བསྐོར། །བདུད་རྣམས་སྡེ་དང་བཅས་པ་ཐམས་ཅད་བཏུལ། དེའང་། སྐྱེས་བུ་གང་ཞིག་གིས་དད་པ་ཕུན་སུམ་ཚོགས་པས་བཟང་པོ་སྤྱོད་པའི་སྨོན་ལམ་འདི་བརྩོན་པས་བཏབ་ པ་དེས་ནི་ཕན་ཡོན་བཅུ་གསུམ ་པོ་འདི་དག་རིམ་གྱིས་འཐོབ་པར་འགྱུར་ཏེ། གང་ཞེ་ན། ངན་སོང་དུ་སྐྱེ་འགྱུར་གྱི་སྡིག་པ་ཐམས་ཅད་བྱང་ནས་རི་ཞིག་ལས་ཀྱི་དབང་གིས་
(༡༩༨)ངན་སོང་དུ་འགྲོ་བ་ཐམས་ཅད་སྤངས་པར་འགྱུར་ཞིང་། གང་ཟག་དེས་ནི་འདི་ཕྱི་ཐམས་ཅད་དུ་སྡིག་པའི་གྲོགས་པོ་ཉོན་མོངས་པ་འཕེལ་བར་བྱེད་ཅིང་ལས་ངན་སྡིག་པ་ལ་སྦྱོར་བར་བྱེད་པ་དང་ཚུལ་ཁྲིམས་དང་ཐོས་བསམ་སྒོམ་ གསུམ་འཕེལ་བ་ལ་རབ་དུ་གཅོད་པ ་སོགས་ཀྱི་གྲོགས་ངན་པ་ཐམས་ཅད་སྤངས་ཏེ་ཕྲད་པར་མི་འགྱུར་བ་ཡིན་ནོ། །དེ་གཉིས་སྤངས་པར་མ་ཟད་སངས་རྒྱས་སྣང་བ་མཐའ་ཡས་བདེ་བ་ཅན་གྱི་ཞིང་ཁམས་རྟེན་དང་བརྟེན་པར་བཅས་པ་དེ་ཡང་གང་ཟག་དེས་མྱུར་བར་ཚེ་འདི་ལ་མཐོང་ཞིང་ཕྱི་མ་ཞིང་དེར་སྐྱེ་བ་དང་། སྨོན་ལམ་འདི་ལ་བརྩོན་པ་དེ་དག་ཐེག་ཆེན་གྱི་ཆོས་ལ་སྤྱོད་པའི་བཤེས་གཉེན་དང་གནས་གྲོགས་ཡོ་བྱད་སོགས་ཀྱི་རྙེད་པ་ཐམས་ཅད་འབད་རྩོལ་མེད་པར་རབ་ཏུ་རྙེད་པ་དང་། གཞན་ལ་
(༡༩༩)སྡུག་བསྔལ་དུ་གྱུར་པའི་ནད་གདོན་སོགས་ཀྱི་རྐྱེན་ངན་རྣམས་ཀྱང་བྱང་ཆུབ་ཀྱི་སེམས་དང་སྤྱོད་པའི་གྲོགས་སུ་འགྱུར་བས་ལུས་སེམས་བདེ་བར་འཚོ་བ་དང་། མི་ཚེ་འདིར་ཡང་རྒྱལ་བ་སྲས་དང་བཅས་པའི་བྱིན་རླབས་ཀྱིས་དེ་དག་གི་འདི་ཕྱིའི་དོན་ཐམས་ཅད་འགྲུབ་པས་ལེགས་པར་འོངས་པ་དང་། དེར་མ་ཟད་བྱང་ཆུབ་སེམས་དཔའ་ཀུན་ཏུ་བཟང་པོ་ཡི་ཡོན་ཏན་དང་རྣམ་འཕྲུལ་སོགས་གང་ཅི་མཆིས་པ་དེ་ཡང་ཅི་འདྲ་བར་སྨོན་ལམ་འདེབས་པ་པོ་དེ་དག་དུས་རིང་པོར་མི་ཐོགས་པར་དེ་བཞིན་ཏུ་འགྱུར་པ་དང་། སྐྱེ་བ་སྔ་ཕྱིའི་བར་མཚམས་མེད་པར་དམྱལ་བར་འཕེན་པར་བྱེད་པའི་ལས་ཕ་མ་དགྲ་བཅོམ་གསོད་པ། དགེ་འདུན་གྱི་དབྱེན་བྱེད་པ། དེ་བཞིན་གཤེགས་
(༢༠༠)པའི་སྐུ་ལ་ངན་སེམས་ཀྱིས་ཁྲག་ཕྱུང་བ་དང་ལྔ་པོ་དག་གི་སྡིག་པ་རྣམས་ལས་གང་ཡང་རུང་བ་ཞིག་རྨོངས་པ་གང་གིས་ལས་འབྲས་མི་ཤེས་པའི་དབང་གིས་སྔར་བྱས་པ་དག །བྱེད་པ་པོ་དེ་ཡིས་ཕྱིས་དད་པ་སྐྱེས་ནས་བཟང་པོ་སྤྱོད་པ་འདི་ཉིད་སྙིང་ཐག་པ་ནས་བརྗོད་ན་མྱུར་དུ་སྡིག་པ་དེ་དག་ལྷག་མ་མ་ལུས་པ་ཡོངས་སུ་བྱང་བར་འགྱུར་རོ། །བཟང་པོ་སྤྱོད་པའི་སྨོན་ལམ་འདི་ཡི་དམ་དུ་བྱེད་པའི་གང་ཟག་རྣམས་ཚེ་རབས་ཕྱི་མ་རྣམས་སུ་ལྷ་མའི་འགྲོ་བ་གང་དུ་སྐྱེས་ཀྱང་རིག་པའི་གནས་རྣམས་ལ་ཤེས་པ་ཐོགས་མེད་དུ་འཇུག་པའི་ཡེ་ཤེས་ཕུན་སུམ་ཚོགས་པ་དང་ནི། བལྟ་ན་སྡུག་པའི་གཟུགས་ཕུན་སུམ་ཚོགས་པ་དང་དེའང་མཚན་དང་དཔེ་བྱད་རྣམས་ཀྱིས་བརྒྱན་པ་དང་། རྒྱལ་པོ་ལྟ་བུའི་
(༢༠༡)རིགས་མཐོན་པོ་དང་གསེར་མདོག་སོགས་ཁ་དོག་ཕུན་སུམ་ཚོགས་པ་ལ་སོགས་པའི་ཡོན་ཏན་རྣམས་དང་ལྡན་པར་འགྱུར་ལ། བདུད་དང་མུ་སྟེགས་སོགས་ོལ་བ་མང་པོས་ཀྱང་སྨོན་ལམ་འདེབས་མཁན་དེ་མི་ཐུབ་སྟེ་གླགས་ལྟ་བར་མི་ནུས་སོ། །ས་འོག་ས་སྟེང་ས་བླར་སྤྱོད་པའི་འཇིག་རྟེན་གསུམ་པོ་ཀུན་ནའང་གང་ཟག་དེ་ལ་ལྷ་དང་བཅས་པའི་འགྲོ་བ་ཐམས་ཅད་ཀྱིས་མཆོད་ཅིང་གུས་ལ་ཕན་འདོགས་བྱེད་པར་འགྱུར་བ་དང་། སྨོན་ལམ་འདི་ཡི་དམ་དུ་བྱེད་པ་དེ་དག་ཐོགས་པ་མེད་པར་ས་ལམ་གྱི་བགྲོད་པ་མཐར་ཐུག་ནས་བྱང་ཆུབ་ཀྱི་ཤིང་གི་དབང་པོའི་དྲུང་དུ་གང་ཟག་དེ་མྱུར་དུ་འགྲོ་ཞིང་དེར་སོང་ནས་ཀྱང་སེམས་ཅན་ཐམས་ཅད་ལ་བླ་ན་མེད་པའི་བྱང་ཆུབ་
(༢༠༢)ཀྱི་ཕན་པ་སྒྲུབ་པའི་ཕྱིར་དུ་ཤིང་དྲུང་དེར་རྡོ་རྗེའི་སྐྱིལ་སྐྲུང་གི་འདུག་སྟེ་བླ་ན་མེད་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས་ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་རབ་ཏུ་བསྐོར་བའི་ཕྱིར་བྱམས་པ་ཆེན་པོའི་ཏིང་ངེ་འཛིན་གྱིས་བདུད་དམག་བྱེ་བ་ཕྲག་བརྒྱ་རྣམས་སྡེ་དང་བཅས་པ་ཐམས་ཅད་བཏུལ་ཏེ་སངས་རྒྱས་ཀྱི་མཛད་པ་སོགས་མཐར་ཕྱིན་པར་བྱེད་དོ། ། གསུམ་པ ་དོན་བསྡུ་བ་ནི། གང་ཡང་བཟང་པོ་སྤྱོད་པའི་སྨོན་ལམ་འདི། །འཆད་པ་དང་ནི་སྟོན་ཏམ་ཀློག་པ་ཡི། །དེ་ཡི་རྣམ་པར་སྨིན་པ་སངས་རྒྱས་མཁྱེན། །བྱང་ཆུབ་མཆོག་ལ་སོམ་ཉི་མ་བྱེད་ཅིག །དེའང་། གང་ཡང་དད་ལྡན་གྱི་སྐྱེ་བོ་ལ་ལ་ཞིག་གིས་བཟང་པོ་སྤྱོད་པའི་སྨོན་ལམ་གྱི་རྒྱལ་པོ་འདི་ཡི་དོན་དང་ཚིག་དང་དེ་དག་གླེགས་
(༢༠༣)བམ་ལ་བྲིས་པ་འཆད་པ་དང་ནི། གཞན་ལ་སྟོན་ནམ་གླེགས་བམ་ཀློག་པར་བྱེད་ན་ཡང་རུང་སྟེ། དེ་ཡི་རྣམ་པར་སྨིན་པ་དག་གིས་འབྲས་བུ་ཉན་རང་འཕགས་པ་སོགས་ཀྱིའང་ཇི་བཞིན་པར་རྟོགས་པར་མི་ནུས་སོ་སྐྱེས་ལྟ་ཅི་སྨོས། དེས་ན་འདིའི་བསོད་ནམས་ཀྱི་མཐའ་ནི་སངས་རྒྱས་ཁོ་ནས་མཁྱེན་པའི་སྤྱོད་ཡུལ་ཡིན་པས་དེའི་བཀའ་ལ་ཐེ་ཚོམ་སྤངས་པའི་ཡིད་ཆེས་ཀྱི་དད་པ་བསྐྱེད་དེ་བླ་ན་མེད་པའི་བྱང་ཆུབ་མཆོག་གི་ཐབས་འདི་ལ་སོམ་ཉི་མ་བྱེད་ཅིག་པའོ། །གཉིས་པ་ཕན་ཡོན་ཅན་གྱི་སྨོན་ལམ་ཉིད་བསྔོ་བ་ལ། སེམས་དཔའ་མཆོག་གི་བསྔོ་བ་ལ་འཇུག་པ། །རྒྱལ་བས་བསྔོས་པ་ལ་འཇུག་པ། །སྨོན་ལམ་གྱིས་འབྲས་བུ་མངོན་གྱུར་དུ་བསྔོ་བ། །སངས་རྒྱས་ལ་དངོས་སུ་ལུང་བསྟན་ཐོབ་པར་བསྔོ་བ། །ལུང་
(༢༠༤)བསྟན་ཐོབ་ནས་སེམས་ཅན་ལ་ཕན་པ་སྒྲུབ་པར་བསྔོ་བ་དང་ལྔ་ལས། དང་པོ་ནི། འཇམ་དཔལ་ཇི་ལྟར་མཁྱེན་ཅིང་དཔའ་བ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་ཀུན་གྱི་རྗེས་སུ་བདག་སློབ་ཅིང་། །དགེ་བ་འདི་དག་ཐམས་ཅད་རབ་ཏུ་བསྔོ། །དེའང་། འཕགས་པ་འཇམ་དཔལ་ཤེས་རབ་མཆོག་གིས་དངོས་འཛིན་འཇོམས་ཤིང་འགྲོ་བའི་དོན་ལ་དཔའ་བོར་གྱུར་པ་དེས་ཇི་ལྟར་ཐུགས་སུ་ཆུད་ཅིང་མཁྱེན་པ་དང་། འཕགས་ པ་ཀུན་ཏུ་བཟང་པོ་དེ་ཡང་དེ་ཁོ་ན་བཞིན་ཏུ་འཁོར་གསུམ ་རྣམ་པར་མི་རྟོག་པའི་ཤེས་རབ་ཀྱིས་ཟིན་པའི་སྒོ་ནས་དགེ་རྩ་རྣམས་བྱང་ཆུབ་ཆེན་པོར་བསྔོ་བའི་ཚུལ་ལ་མཁས་པ་ཡིན་ཏེ། དེ་ལྟར་སེམས་དཔའ་མཆོག་དེ་དག་ཀུན་གྱི་རྗེས་སུ་བདག་ཀྱང་ཞུགས་
(༢༠༥)ནས་དེ་དང་འདྲ་བ་སློབ་པར་འདོད་ཅིང་འདུན་པས་བཟང་པོ་སྤྱོད་པའི་སྨོན་ལམ་བཏབ་པ་ལས་བྱུང་བའི་དགེ་བ་གང་ཅི་མཆིས་པ་འདི་དག་ཐམས་ཅད་རབ་ཏུ་བསྔོ་བར་བགྱིའོ། །གཉིས་པ་ནི། དུས་ གསུམ་གཤེགས་པ ་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ཀུན་ཀྱང་། །བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི། །དེའང་། དུས་གསུམ་དུ་འགྲོ་དོན་ལ་བྱོན་གཤེགས་མཛད་པའི་རྒྱལ་བ་ཐམས་ཅད་ཀྱིས་མགྲིན་གཅིག་ཏུ་བསྔོ་བ་ཡི་ཚུལ་གང་ལ་མཆོག་ཏུ་བསྔགས་ཤིང་བསྟོད་པར་མཛད་པ་ནི། དགེ་རྩ་རྣམས་ནམ་མཁའི་མཐས་གཏུགས་པའི་སེམས་ཅན་ཐམས་ཅད་ལ་སྲིད་པ་ཇི་སྲིད་གནས་ཀྱི་བར་དུ་བླ་ན་མེད་པའི་ཕན་པ་དང་བདེ་བའི་དགའ་སྟོན་སྤེལ་བར་བྱ་བའི་ཕྱིར་བྱང་ཆུབ་
(༢༠༦)མཆོག་གི་གོ་འཕང་འཐོབ་པའི་རྒྱུར་བསྔོ་བ་ཡིན་ལ། ཚུལ་དེས་བཟང་པོ་སྤྱོད་པའི་སྨོན་ལམ་བཏབ་པ་སོགས་ལས་བྱུང་བའི་བདག་གི་དགེ་བའི་རྩ་བ་འདི་དག་ཀུན་ཀྱང་ཀུན་ཏུ་བཟང་པོའི་སྤྱོད་པ་སྤྱད་པའི་སྒོ་ནས་བྱང་ཆུབ་ཆེན་པོ་འཐོབ་པའི་ཕྱིར་རབ་ཏུ་བསྔོ་བར་བགྱིའོ། ། གསུམ་པ ་ནི། བདག་ནི་འཆི་བའི་དུས་བྱེད་གྱུར་པ་ན། །སྒྲིབ་པ་ཐམས་ཅད་དག་ནི་ཕྱིར་བསལ་ཏེ། །མངོན་སུམ་སྣང་བ་མཐའ་ཡས་དེ་མཐོང་ནས། །བདེ་བ་ཅན་གྱི་ཞིང་དེར་རབ་ཏུ་འགྲོ། །དེར་སོང་ནས་ནི་སྨོན་ལམ་འདི་དག་ཀྱང་། །ཐམས་ཅད་མ་ལུས་མངོན་དུ་འགྱུར་བར་ཤོག །དེ་དག་མ་ལུས་བདག་གིས་ཡོངས་སུ་བཀང་། །འཇིག་རྟེན་ཇི་སྲིད་སེམས་ཅན་ཕན་པར་བགྱི། །དེའང་། བདག་ནི་ནམ་ཞིག་འཆི་བའི་དུས་བྱེད་པར་གྱུར་པ་
(༢༠༧)གང་གི་ཚེ་ན་ལས་ཉོན་གྱི་སྒྲིབ་པ་སྤྱི་དང་ཁྱད་པར་སངས་རྒྱས་མངོན་སུམ་དུ་མཐོང་བའི་གེགས་ལ་སོགས་པ་ཐམས་ཅད་དག་ནི་རྒྱང་རིང་དུ་ཕྱིར་བསལ་ཞིང་མེད་པར་བྱས་ཏེ་མིག་གི་དབང་པོའི་མངོན་སུམ་གྱི་སྤྱོད་ཡུལ་དུ་སངས་རྒྱས་སྣང་བ་མཐའ་ཡས་སྲས་ཀྱི་ཐུ་བོ་གཉིས་ལ་སོགས་པའི་འཁོར་གྱིས་བསྐོར་བ་དེ་མཐོང་བར་གྱུར་པས་སླར་ཡང་སྒྲིབ་པ་མང་པོ་བྱང་ཞིང་ཏིང་ངེ་འཛིན་གྱི་སྒོ་དུ་མ་ཐོབ་ནས་ཚེ་འཕོས་མ་ཐག་ཏུ་དེ་བཞིན་གཤེགས་པ་འོད་དཔག་མེད་དེའི་སངས་རྒྱས་ཀྱི་ཞིང་ཡོན་ཏན་ཚད་མེད་པ་དང་ལྡན་པ་མཆོག་ཏུ་བདེ་ཞིང་ཡིད་བདེ་འབའ་ཞིག་གི་གནས་སུ་གྱུར་ པ་ངན་སོང་གསུམ ་སོགས་སྡུག་བསྔལ་གྱི་མིང་མི་གྲགས་ཤིང་བདེ་བླག་ཏུ་ཕ་རོལ་ཕྱིན་པ་རྣམས་ལ་སྤྱད་དུ་ཡོད་པའི་བདེ་
(༢༠༨)བ་ཅན་གྱི་ཞིང་ཁམས་དེར་ཡུད་ཙམ་གྱིས་འགྲོ་ཞིང་། དེར་སོང་ནས་ནི་སྨོན་ལམ་ལས་བརྫུས་ཏེ་སྐྱེས་ནས་བཟང་པོ་སྤྱོད་པའི་སྨོན་ལམ་འདི་ཉིད་བཏབ་པའི་འབྲས་བུ་དེ་དག་ཀྱང་ཐམས་ཅད་ལྷག་མ་མ་ལུས་པ་མངོན་དུ་འགྱུར་བར་ཤོག་ལ། དེ་ལྟར་མངོན་དུ་གྱུར་ནས་ཀྱང་སྨོན་ལམ་དེ་དག་གི་དོན་མ་ལུས་པ་རང་རྒྱུད་ལ་དགོས་པ་རྣམས་བདག་གིས་ཡོངས་སུ་བཀང་ཞིང་རྫོགས་པར་བྱས་ནས་གཞན་དོན་དུ་འཇིག་རྟེན་ཇི་སྲིད་གནས་ཀྱི་བར་དེ་སྲིད་དུ་སེམས་ཅན་ཐམས་ཅད་ལ་གནས་སྐབས་དང་མཐར་ཐུག་གི་ཕན་པ་སྒྲུབ་པར་བགྱི་བར་གྱུར་ཅིག་པའོ། །བཞི་པ་ནི། རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །པདྨ་དམ་པ་ཤིན་ཏུ་མཛེས་ལས་སྐྱེས། །སྣང་བ་མཐའ་ཡས་རྒྱལ་བས་
(༢༠༩)མངོན་སུམ་དུ། །ལུང་བསྟན་པ་ཡང་བདག་གི་དེར་ཐོབ་ཤོག །དེའང་། རྒྱལ་བ་འོད་དཔག་ཏུ་མེད་པའི་འཁོར་གྱི་དཀྱིལ་འཁོར་ཡོན་ཏན་ཐམས་ཅད་ཀྱིས་བརྒྱན་པས་བཟང་ཞིང་ནང་དུ་ཏིང་ངེ་འཛིན་དང་ཕྱི་རོལ་དུ་སྨོན་ལམ་གྱིས་འགྲུབ་པའི་བདེ་སྐྱིད་ཕུན་སུམ་ཚོགས་པས་དགའ་བ་དང་ལྡན་པ་དེར་རིན་པོ་ཆེའི་པདྨོ་དམ་པ་ཤིན་ཏུ་མཛེས་པའི་ཟེའུ་འབྲུའི་ཁང་བ་ལས་བརྫུས་ཏེ་སྐྱེས་ནས་སྣང་བ་མཐའ་ཡས་རྒྱལ་བ་འོད་དཔག་མེད་ཀྱིས་མངོན་སུམ་དུ་ཁྱོད་འཇིག་རྟེན་གྱི་ཁམས་འདི་ཞེས་བྱ་བ་ལ་སངས་རྒྱས་འདི་ལྟ་བུར་འགྱུར་རོ་ཞེས་བྱ་བའི་ལུང་བསྟན་པ་ཡང་བདག་གིས་འཁོར་གྱི་དཀྱིལ་འཁོར་དེར་ཐོབ་པར་ཤོག་ཅིག་པའོ། །ལྔ་པ་ནི། དེར་ནི་བདག་གིས་ལུང་བསྟན་རབ་ཐོབ་ནས། །སྤྲུལ་པ་མང་པོ་བྱེ་བ་
(༢༡༠)ཕྲག་བརྒྱ་ཡིས། །བློ་ཡི་སྟོབས་ཀྱིས་ཕྱོགས་བཅུ་རྣམས་སུ་ཡང་། །སེམས་ཅན་རྣམས་ལ་ཕན་པ་མང་པོ་བགྱི། །དེའང་། ཞིང་ཁམས་དེར་ནི་བདག་གིས་དེ་ལྟ་བུའི་ཚུལ་གྱིས་ལུང་བསྟན་པ་རབ་ཏུ་ཐོབ་ནས་སྤྲུལ་པ་གྲངས་མང་པོ་བྱེ་བ་ཕྲག་བརྒྱ་སོགས་དཔག་ཏུ་མེད་པ་ཡིས་གཞན་དོན་ལ་བློ་གཅིག་ཏུ་གཞོལ་ཞིང་ཐབས་དང་ཤེས་རབ་ཀྱི་ཕ་རོལ་ཏུ་ཕྱིན་པ་ཡི་སྟོབས་ཀྱིས་ཕྱོགས་བཅུའི་འཇིག་རྟེན་གྱི་ཁམས་རྣམས་སུ་སྐད་ཅིག་རེ་རེར་ཡང་སེམས་ཅན་མཐའ་ཡས་པ་རྣམས་ལ་ངན་སོང་གི་སྡུག་བསྔལ་ལས་སྐྱོབ་པ་ནས་བླ་ན་མེད་པའི་བྱང་ཆུབ་ལ་འགོད་པའི་བར་གྱི་ཕན་པ་མང་པོ་འཁོར་བ་མ་སྟོང་གི་བར་དུ་བགྱིད་པར་ཤོག་ཅིག་པའོ། ། གསུམ་པ ་ཟ་མར་དགེ་བ་མཇུག་གི་དོན་ལ། སྨོན་ལམ་བཏོན་ཅིང་བསྔོས་པའི་
(༢༡༡)དགེ་རྩ་བསྔོ་བ། ཞར་བྱུང་འགྱུར་སྨོན་ལམ་གྱི་དོན་བཤད་ པ། སྨོན་ལམ་ཡོངས་སུ་རྫོགས་པའི་བྱ་བ་དང་གསུམ ་ལས། དང་པོ་ནི། བཟང་པོ་སྤྱོད་པའི་སྨོན་ལམ་བཏབ་པ་ཡི། །དགེ་བ་ཅུང་ཟད་བདག་གིས་ཅི་བསགས་པ། །དེས་ནི་འགྲོ་བའི་སྨོན་ལམ་དགེ་བ་རྣམས། །སྐད་ཅིག་གཅིག་གིས་ཐམས་ཅད་འབྱོར་བར་ཤོག །བཟང་པོ་སྤྱོད་པ་ཡོངས་སུ་བསྔོས་པ་ལས། །བསོད་ནམས་མཐའ་ཡས་དམ་པ་གང་ཐོབ་དེས། །འགྲོ་བ་སྡུག་བསྔལ་ཆུ་བོར་བྱིང་བ་རྣམས། །འོད་དཔག་མེད་པའི་གནས་རབ་ཐོབ་པར་ཤོག །དེའང་། བཟང་པོ་སྤྱོད་པའི་སྨོན་ལམ་གྱི་གླེགས་བམ་བཀླགས་པའམ་ཁ་ཏོན་དུ་བཏོན་ པ་སོགས་ལས་བྱུང་བའི་སྒོ་གསུམ ་གྱི་དགེ་བ་ཅུང་ཟད་བདག་གིས་གང་ཅི་བསགས་པ་དེས་ནི་ཕྱོགས་བཅུའི་འགྲོ་བ་མ་ལུས་པའི་དཀར་པོའི་ཕྱོགས་ཀྱི་དོན་ཡིད་ལ་སྨོན་པ་འགྲུབ་པར་
(༢༡༢)ཤོག་ཅིག་ཅེས་ཚིག་གི་ལམ་དུ་བརྗོད་པའི་དགེ་བ་ཇི་སྙེད་པ་རྣམས་ཡུན་རིང་དུ་མི་ཐོགས་པར་དུས་སྐད་ཅིག་གིས་འབད་རྩོལ་མེད་པར་དེ་དག་ཐམས་ཅད་འབྱོར་ཞིང་འགྲུབ་པར་ཤོག་ཅིག །དེ་ལྟར་བཟང་པོ་སྤྱོད་པའི་སྨོན་ལམ་བཏོན་པ་སོགས་ཀྱི་དགེ་རྩ་ཡོངས་སུ་བསྔོས་པ་འདི་ཡི་བསོད་ནམས་ངོ་བོ་འཇིག་རྟེན་པའི་དགེ་བ་གཞན་ལས་མཆོག་ཏུ་གྱུར་པས་དམ་པ་དུས་ནམ་མཁའ་ཇི་སྲིད་གནས་ཀྱི་བར་དུ་ཟད་མི་ཤེས་པའི་བསོད་ནམས་ཀྱི་ཚོགས་དམ་པ་མཐའ་ཡས་པ་གང་ཞིག་ཐོབ་པ་དེས་འགྲོ་བ་སྡུག་བསྔལ་གྱི་ཆུ་བོར་བྱིངས་ཉམ་ཐག་པར་གྱུར་པ་རྣམས་སངས་རྒྱས་འོད་དཔག་མེད་པའི་བཞུགས་གནས་རབ་ཏུ་བདེ་ཞིང་སྐྱིད་པ་དེར་སྐྱེ་བ་འཛིན་པ་སོགས་ཡོན་ཏན་གྱི་ཚོགས་རྒྱ་མཚོ་ལྟ་བུ་ཐོབ་པར་ཤོག་ཅིག་པའོ། །གཉིས་པ་ནི། སྨོན་ལམ་རྒྱལ་པོ་འདི་དག་མཆོག་གི་གཙོ། །མཐའ་ཡས་འགྲོ་བ་ཀུན་ལ་ཕན་བྱེད་ཅིང་། །
(༢༠༣)ཀུན་ཏུ་བཟང་པོ་བརྒྱན་པའི་གཞུང་གྲུབ་སྟེ། །ངན་སོང་གནས་རྣམས་མ་ལུས་སྟོངས་པར་ཤོག །དེའང་། བཟང་པོ་སྤྱོད་པའི་སྨོན་ལམ་གྱི་རྒྱལ་པོ་འདི་དག་གིས་མཆོག་གི་གཙོ་བོར་བླ་ན་མེད་པའི་བྱང་ཆུབ་འགྲུབ་པ་དང་། ནམ་མཁའ་ལྟར་མཐའ་ཡས་པའི་འགྲོ་བ་མ་ལུས་པ་ཀུན་ལ་འཕྲལ་དང་ཡུན་གྱི་ཕན་བདེ་སྟེར་བར་བྱེད་ཅིང་། སེམས་ཅན་ཐམས་ཅད་ཀྱིས་འཕགས་པ་ཀུན་ཏུ་བཟང་པོས་སངས་རྒྱས་སྲས་བཅས་ཀྱི་སྤྱོད་པ་རབ་འབྱམས་མཛེས་པར་བྱེད་པ་ཟབ་ཅིང་རྒྱ་ཆེ་བའི་ཚིག་དོན་གྱིས་རྣམ་པར་བརྒྱན་པའི་སྨོན་ལམ་གྱི་མདོ་ཆེན་པོ་གསུངས་པའི་གཞུང་འདི་ལས་ཇི་སྐད་འབྱུང་བ་དེ་ཁོ་ན་བཞིན་དུ་འགྲུབ་པར་གྱུར་ཏེ་ངན་སོང་གིས་མཚོན་པའི་ཕྱོགས་བཅུའི་འཇིག་རྟེན་གྱི་འཁོར་བའི་རྒྱུད་ཀྱིས་བསྡུས་པའི་གནས་རྣམས་མ་ལུས་པ་སྟོངས་པར་ཤོག་ཅིག་པའོ། ། གསུམ་པ ་ནི།
(༢༡༤)འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱལ་པོ་རྫོགས་སོ། །ཞེས་པ་སྟེ་བཤད་པ་མཐའ་ཕྱིན་པའི་དོན་ནོ། །མཁས་མང་ལེགས་བཤད་ལས་བཏུས་འགྲེལ་ཆུང་འདི། སྐྱེས་སྦྱངས་དམན་པས་བསྟན་བཅོས་གྲར་མི་རྩི། །རང་གིས་བརྗེད་འཕང་བྲིས་ལ་ནོངས་མཆིས་ན། །གཞུང་ལུགས་སྨྲ་བ་རྣམས་ཀྱི་སྤྱན་སྔར་འཆགས། །འདིར་འབད་ལས་བྱུང་དགེ་བ་གང་ཐོབ་དེས། །བདག་གཞན་མ་ལུས་རིང་པོར་མ་ཐོགས་པར། །ཀུན་བཟང་སྤྱོད་མཆོག་རྒྱ་མཚོ་མཐར་ཕྱིན་ནས། །སྣང་མཐའ་རྒྱལ་པོའི་གོ་འཕང་ཐོབ་པར་ཤོག །འཕགས་པ་བཟང་པོ་སྤྱོད་པའི་སྨོན་ལམ་གྱི་འབྲུ་འགྲེལ་ལེགས་བཤད་ཀུན་བཏུས་ཞེས་བྱ་བ་འདི་ནི། །ལོ་ཙཱ་བ་ཡེ་ཤེས་སྡེ་དང་། །ཇོ་ནང་རྗེ་བཙུན་ཏཱ་ར་ནཱ་ཐཱ་དང་། །མཁན་ཆེན་
(༢༡༥)ཆོས་དཔལ་རྒྱ་མཚོ་དང་། །།།སྐྱ་རོལ་པའི་རྡོ་རྗེ་རྣམས་ཀྱིས་འགྲེལ་པ་ལས་བཏུས་ཏེ་གཞུང་ཚིག་དཀྱུས་སུ་འགྲིགས་པར་བགྱི་བ་པོ། །སྐྱབས་རྗེ་འཇམ་འབྱངས་མཁྱེན་བརྩེའི་དབང་པོའི་སློབ་གྲལ་བ་གྲགས་པ་རྒྱལ་མཚན་གྱིས་དབེན་རི་པདྨ་ཤེལ་ཕུག་ཏུ་བྲིས་པའོ། །དགེ་ལེགས་འཕེལ།།