གཅོད་ཀྱི་ལས་ཚོགས་དམིགས་རིམ་སྐོར་གསུམ།
ཡང་གསང་ཌཱཀྐིའི་ཐུགས་ཐིག་གི་ཆ་ལག་ཟུར་འགེབ་མི་ཟད་རྒྱན་འཁོར་ལས༔ གཅོད་ཀྱི་ལས་ཚོགས་དམིགས་རིམ་ལས༔ དང་པོ་སྔ་ནོན་དམིགས་པ་ནི༔ སྔ་ནོན་སྔ་རུ་མ་ནོན་ན༔ དགྲ་ངན་དག་ལ་བྱ་ཤོར་མཚུངས༔ ཕཊ༔ རང་ཉིད་སྐད་ཅིག་གིས་ཡེ་ཤེས་ཀྱི་མཁའ་འགྲོ་མ་ཁྲོས་མ་ནག་མོའི་ཐུགས་ཀ་ནས་འོད་ཟེར་རབ་ཏུ་འཕྲོས་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་འོད་ཀྱིས་ཁྱབ་པར་བསམ༔ ཐམས་ཅད་འོད་ཀྱི་ངང་དུ་ཞུ་ནས་སྣང་སྲིད་ཀྱི་ལྷ་འདྲེ་ཐམས་ཅད་མ་ལུས་ལུས་པ་མེད་པ་ཐར་ས་དང་འཆོར་ས་མེད་པར་མཐའ་ནས་བསྡུས་ཏེ་གཉན་ཁྲོད་དེ་རུ་བསྡུས་ནས་གནམ་ལྕགས་རྡོ་རྗེ་ལས་གྲུབ་པའི་གུར་ཁང་ནག་པོ་མེ་འབར་བའི་ནང་དུ་ཚུད་དེ་ཀུན་གྱི་མཐུ་སྟོབས་ནུས་པའི་དཔའ་ཟིལ་ཆགས་ཏེ་འདར་ཕྲི་ལི་ལི་གནས་པར་བསམ༔ སྔ་ནོན་དམིགས་པ་མང་ཡང་དེ་ཙམ་གྱིས་ཆོག་པ་ཁྱད་ཆོས་ཡིན༔ དེ་ནས་བར་གནོན་དམིགས་པ་ནི༔ བར་ནོན་བར་དུ་མ་ནོན་ན༔ དཔའ་བོའི་ལག་གི་མཚོན་ཤོར་འདྲ༔ རང་ལུས་ཆེ་བ་སྲ་བ་ཡུལ་ལྗོངས་ཙམ་དུ་བསྐྱེད་པའི་འོག་ཏུ་ལྷ་འདྲེ་ཐམས་ཅད་མནན་ནས་སྐད་ངན་ཙིར་ཙིར་བྱེད་པར་བསམ༔ སླར་ཡང་བཀའ་སྣང་ཞིང་སྲིད་པའི་ལྷ་འདྲེ་ཐམས་ཅད་ཤོག་སྐྱ་རླུང་གིས་བསྐྱོད་པ་ལྟར་བཀུག་ནས་མལ་འོག་ཏུ་མནན་པར་བསམ་ཞིང་ལྷ་འདྲེ་དེ་དག་ལ་ཐིམས་པར་བསམ༔ དམིགས་པ་བསམ་ཞིང་ངག་ཏུ་ནི༔ འོ་ད་ནི་བསྐལ་པ་མ་ཞིག་འབྱུང་བ་མ་རྡིབ་ཀྱི་བར་དུ་བདག་འདི་ནས་མི་འགུལ༔ འདི་ལས་མི་འཕོ༔ གནས་འདི་ལས་མི་གཡོའོ༔ འདི་རུ་འདུག་གོ༔ ཉལ་ལོ༔ ཕཊ༔ ཕཊ༔ ཕཊ༔ ལན་གསུམ་བརྗོད༔ སྟེང་གི་ནམ་མཁར་བླ་མ་ཡི་དམ་སངས་རྒྱས་བྱང་སེམས་མཁའ་འགྲོ་ཆོས་སྐྱོང་ཐམས་ཅད་བཀྲ་དཔུང་ངེ་འོད་ཐིབས་སེ་བཞུགས་པར་བསམ་ལ༔ ཡེང་མེད་རོ་སྙོམ་གྱི་ངང་དུ་མཉམ་པར་བརྡལ༔ རབ་དངོས་ཐ་མ་རྨི་ལམ་འབྲིང་ཉམས་ལ་སློང་ཚད་ངེས་པར་འོང་བ་ཡིན༔ ས་མ་ཡཱ༔ ཕྱི་ནོན་དམིགས་པ་ནི༔ ཕྱི་ནོན་ཕྱི་རུ་མ་ནོན་ན༔ ནོར་ངན་དག་གི་རྗེས་སྙོགས་འདྲ༔ གདན་ཚབས་སུ་སྐུ་གསུང་ཐུགས་རྟེན་རབ་གནས་བྱས་ལ་བཞག༔ ཕུང་པོའི་མཆོད་སྦྱིན་དང་ཆོས་སྦྱིན་བྱ༔ བདེ་སྡུག་གཏོང་ལེན་དམིགས་པ་གནད་སྨིན་བྱས་ལ༔ ཧ་ཧ༔ ཧི་ཧི༔ ཧེ་ཧེ༔ ཧོ་ཧོ༔ ཧཱུྃ་ཧཱུྃ༔ ཕཊ༔ ཕཊ༔ ཕཊ༔ གོམ་པ་བདུན་བོར་ནས༔ རྐང་དུང་ལན་གསུམ་འབུད༔ ཕཊ༔ ཀྭཻའི་ཀྭཻའི་ཡུལ་འདིའི་ལྷ་མཐུ་བོ་ཆེ༔ ཀླུ་མཐུ་བོ་ཆེ༔ གཞི་བདག་མཐུ་བོ་ཆེ༔ ཁྱེད་རྣམས་ཉོན་ཅིག༔ ངའི་གནས་འདི་ན་སྔར་མེད་ལྷ་འདྲེ་སླར་མ་བཙུད༔ འདིར་གནས་ཀྱི་ལྷ་འདྲེ་ཕྱི་རུ་མ་གཏོང་ཞིག༔ གཏད་དོ༔ གཉེར་རོ༔ བཅོལ་ལོ༔ མཐུ་དང་ནུས་པ་ཅི་འདུག་ཁྱོད་ལ་བལྟའོ༔ རེམ་རེམ༔ ཕཊ༔ རང་གི་རིག 
་པ་ཡེ་ཤེས་ཀྱི་མཁའ་འགྲོ་མ་སྡེ་ལྔར་གྱུར་ཏེ་ཕྱོགས་བཞིར་གཤེགས་པར་བསམ་ལ་མིག་མཐོ་གང་ཙམ་དུ་ཕྱིན་ཏེ་སླེབས་ནས་ཐོའམ་ཚེར་ལྕགས་གཅིག་བཙུག་ལ༔ ཡེ་ཤེས་ཀྱི་བྱ་ཁྱུང་ནག་པོ་འཇིགས་སུ་རུང་བ་གཅིག་གིས་ཕྱིར་གཟིགས་ཏེ་མཚམས་བཅད་པར་བསམ༔ ཨོཾ་བཛྲ་ཁྲོཾ་ག་རུ་ཊ་ཙ་ལེ་ཙ་ལེ་ཧཱུྃ་ཕཊ༔ བདག་ཅག་འཁོར་བཅས་སྲུངས་ཤིག་རཀྴ་ཀུ་རུ་བྷྲུཾ༔ ས་མ་ཡཱ༔ ཡང་གསང་ཌཱཀྐིའི་ཐུགས་ཐིག་ཆ་ལག་ཏུ༔ གཅོད་ཀྱི་ལས་ཚོགས་དམིགས་རིམ་སྐོར་གསུམ་མདོར་བསྡུས་འདི༔ རྨད་བྱུང་ཟབ་གསང་གཏེར་ལ་དབང་བསྒྱུར་བའི༔ རྩོད་བྲལ་གཏེར་ཆེན་ཛྙཱ་ན་དྭཱི་པ་ཡིས༔ མཁའ་འགྲོའི་བཀའ་བཞིན་ལེགས་པར་སྤེལ་བ་ལ༔ འགྲོ་ཀུན་ཡུམ་ཆེན་རྒྱལ་ས་ཟིན་པར་སྨོན༔ གཅོད་ཡུལ་བསྟན་པ་རྒྱས་པའི་ཤིས་པ་སྩོལ༔ ཤུ་བྷཾ༔