དྲིས་ལན་མདོར་བསྡུས་སྐོར།
དྲིས་ལན་མདོར་བསྡུས་སྐོར་བཞུགས་སོ།།
དྲི་བ་རྣམས་ཀྱི་ལན་མདོར་བསྡུས་བརྗོད་པ། མཁའ་སྤྱོད་མའི་བྱིན་རླབས་ཟེར་བའི་རྒྱུ་མཚན་ནི། བདེ་ཀྱེ་ལྟ་བུ་མ་རྒྱུད་ཀྱི་དབང་བསྐུར་ཚད་ལྡན་ཐོབ་པའི་གང་ཟག་ལ། ཡེ་ཤེས་སྐྱེ་བའི་སྣ་འདྲེན་དུ་དབང་བཞིའི་སྙིང་པོ་བྱིན་རླབས་ཀྱི་ཚུལ་དུ་བསྡུས་ཏེ་བསྐུར་བ་ལས། དབང་མ་ཐོབ་པའི་གང་ཟག་ལ་བྱིན་རླབས་བྱ་མི་རུང་བས་དེ་ལྟར་བཏགས། དོན་དུ་དབང་བྱིན་རླབས་གཉིས་ཀ་དབང་བཞི་ཙམ་དུ་གཞི་མཐུན་ཀྱང་། ཆོ་ག་རྒྱས་བསྡུས་སོགས་ཁྱད་པར་ཆེན་པོ་ཡོད་པ། ཐ་སྙད་དུ་མཁའ་སྤྱོད་མའི་བྱིན་རླབས་ཟེར་བ་མ་གཏོགས། དབང་ཟེར་སྲོལ་མེད།། ༈ །།མདུན་བསྐྱེད་ཀྱི་རྟེན་གཞིའི་དཀྱིལ་འཁོར་གྱི་གཙོ་བོ་སིནྡྷ་རའི་དཀྱིལ་འཁོར་ཡིན།། ༈ །།ལྷ་བསྐྱེད་སྐབས་སུ་སྐུ་
ཚོམ་བུའི་དཀྱིལ་འཁོར་ནི་བརྡ་ཙམ་ཡིན་ཀྱང་དེའི་འོག་ཏུ་རྡོ་རྗེའི་ས་གཞི་དང་། ཕྱི་རོལ་དུ་རྡོ་རྗེའི་རྭ་གུར་ཡངས་ཤིང་རྒྱ་ཆེ་བར་བསྒོམས་པའི་དབུས་སུ་འབྱུང་བཞི་རི་རབ། ཐོད་པ་བདུད་རྩིས་གང་བ་དང་བཅས་པའི་སྟེང་། སིན་དཀྱིལ་ཉིད་ཆོས་འབྱུང་གི་གཞལ་ཡས་ཁང་གི་དབུས་སུ་སྔགས་རྣམས་ལྷར་བསྐྱེད་པ་ཡིན། ཚོམ་བུའི་དཀྱིལ་འཁོར་ལ་ལྷ་བསྐྱེད་རྒྱུ་མེད། འགའ་ཞིག་གིས་ཚོམ་བུའི་དཀྱིལ་འཁོར་ལ་མཁའ་སྤྱོད་མ་ཞལ་ཕྱག་ཡོངས་རྫོགས་བྲིས་པ་ནི་ནོར་བ་རེད།། ༈ །།མདུན་བསྐྱེད་ཡོད་སྐབས་གཏོར་མ་མདུན་བསྐྱེད་ཁོ་ན་ལ་ཕུལ་ཀྱང་འཐུས་ཡོད། ཚར་ལུགས་ཆོ་ག་ནག་འགྲོས་སུ་གཏོར་མགྲོན་སྤྱན་འདྲེན་གསུངས་པས། དེ་ལྟར་ན་གཏོར་མགྲོན་དང་མདུན་
བསྐྱེད་གཉིས་ཀ་ལ་ཕུལ་བའམ། གཏོར་མགྲོན་སྤྱན་དྲངས་པ་ཁོ་ན་ལ་ཕུལ་པའམ། ཡང་ན་གཏོར་མགྲོན་སྤྱན་དྲངས་པ་མདུན་བསྐྱེད་ལ་བསྟིམས་ནས་ཕུལ་ཀྱང་ཆོག། ༈ །།ལྷོ་སྒོའི་སྐབས་རྣམ་ཤེས་དང་བཅས་པའི་བྱང་བུ་བསྲེགས་ཐབས་མེད་པས། རྣམ་ཤེས་ནམ་མཁར་སྤུར་བའི་བྱང་བུ་ཕུང་པོའི་ཚུལ་དུ་བསྲེག །དེ་ནས་རྣམ་ཤེས་ནམ་མཁར་སྤར་བ་ལ་ལམ་སྦྱང་བསྟན་སོགས་བྱེད་པ་གསར་མ་ཕལ་ཆེར་གྱི་སྲོལ་ཡིན། གཞན་དུ་ལམ་སྦྱང་བསྟན་དང་རྣམ་ཤེས་སྤར་བ་སྔོན་དུ་བྱས་ནས། བྱང་བུ་བསྲེག་པའང་མང་ངོ་།། ༈ །།གྲུབ་པ་བཞི་ཞེས་པ་རྙིང་མའི་ཆོས་སྐད་ཡིན་ཏེ། །ཆོས་ཉིད་ངོ་བོ་ཉིད་ཀྱིས་གྲུབ་པ། །ཆོས་ཅན་རང་བཞིན་གྱིས་གྲུབ་པ། །བྱིན་གྱིས་བརླབས་པས་གྲུབ་པ། མཐུས་གྲུབ་པ་བཞིའོ། །དེ་དང་གནས་རི་ལ་སྦྱར་ན། གནས་ཀྱི་ས་རྡོ་རི་བྲག་སོགས་ངོ་བོ་སྟོང་པ་ཉིད་ཆོས་ཀྱི་སྐུ་ལས་མ་གཡོས་པས་ཆོས་ཉིད་ངོ་བོ་ཉིད་ཀྱིས་གྲུབ་པ། རྣམ་པ་སངས་རྒྱས་དང་བྱང་ཆུབ་སེམས་དཔའི་ཐུགས་རྗེ་ལས་གནས་ཀྱི་བཀོད་པ་རང་བྱོན་སོགས་གཟུགས་སྐུའི་ཚུལ་དུ་ཤར་བ་ཆོས་ཅན་རང་བཞིན་གྱིས་གྲུབ་པ། དེ་ལྟ་བུའི་གནས་དེ་ལ་གང་ཟག་ཁྱད་པར་ཅན་གྱིས་སྒྲུབ་པ་དང་། རབ་གནས་དང་། གནས་ཆེན་བྱིན་འབེབས་སོགས་མཛད་པས་སླར་ཡང་བྱིན་རླབས་ཅན་དུ་གྱུར་པ་བྱིན་གྱིས་བརླབས་པས་གྲུབ་པ། དེ་ལ་བརྟེན་
ནས་དད་པ་ཅན་གྱིས་ཕྱག་མཆོད་བསྐོར་བ་སོགས་བགྱིས་པས་རྒྱུད་བྱིན་གྱིས་བརླབ་ཅིང་དངོས་གྲུབ་སྩོལ་ནུས་པ་མཐུས་གྲུབ་པ་སྟེ། དེ་ལྟ་བུའི་གྲུབ་པ་བཞི་དང་ལྡན་པས་ཐམས་ཅད་ཀྱི་ཕྱག་དང་མཆོད་པའི་རྟེན་དུ་གྱུར་པ་ནི་གནས་ཀྱི་མཚན་ཉིད་ཡིན་ནོ།། ༈ །།མཐའ་དྲུག་ཚུལ་བཞི་ཞེས་པ་མདོ་རྒྱུད་ཐམས་ཅད་ཀྱི་བཤད་ཐབས་ཡིན་པས་རྒྱས་པར་སྤྲོས་ན་མཐའ་ཀླས་པ་ཞིག་ཡོད་ཀྱང་། མིང་ཙམ་གྱི་སྒོ་ནས་མདོར་བསྡུ་ན་མཐའ་དྲུག་ནི། མདོ་སྔགས་སྤྱི་དང་། ཁྱད་པར་མདོ་འཆད་པའི་སྐབས་སུ་ཉེ་བར་མཁོ་བ་སྟེ། འཇམ་མགོན་ས་པཎ་གྱིས། གཞུང་ལུགས་ཆེན་པོ་བཤད་པ་ལ་མཐའ་དྲུག་ཤེས་དགོས་ཏེ། དགོངས་པ་དང་དགོངས་པ་མ་ཡིན་པ། དྲང་བའི་དོན་དང་ངེས་པའི་དོན། སྒྲ་ཇི་བཞིན་པ་དང་ཇི་བཞིན་མ་ཡིན་པའོ། །ཞེས་གསུངས་པ་ལྟར། དགོངས་པ་ཅན་ནི་སངས་རྒྱས་ཀྱི་གསུང་རབ་གང་ཞིག ། དངོས་སུ་གསུངས་པ་དེ་ལྟར་མ་ཡིན་པར་དོན་གཞན་ལ་དགོངས་པ་བཙལ་ཏེ་བཤད་དགོས་པ། དགོངས་པ་ཅན་མ་ཡིན་པ་ནི། སངས་རྒྱས་ཀྱི་གསུང་རབ་གང་ཞིག །དགོངས་པ་གཞན་ནས་བཙལ་མི་དགོས་པར་གསུངས་པ་ཇི་ལྟ་བ་བཞིན་བཤད་ཆོག་པ། དྲང་བའི་དོན་ནི་གདུལ་བྱ་འགའ་ཞིག་རྗེས་སུ་གཟུང་བའི་ཕྱིར་ཀུན་རྫོབ་ཀྱི་བདེན་པ་གཙོ་བོར་བཏོན་ནས་རིམ་གྱིས་ཁ་དྲང་བའི་ཆེད་དུ་གསུངས་པ། ངེས་པའི་
དོན་ནི། གདུལ་བྱ་དབང་པོ་རྣོན་པོ་རྣམས་ལ་ངེས་པའི་དོན་གཙོ་བོར་བཏོན་ནས་གསུངས་པས། ཚིག་དེ་ཉིད་ཀྱི་རྗེས་སུ་འབྲངས་པས་དོན་ཕྱིན་ཅི་མ་ལོག་པར་རྟོགས་པ། སྒྲ་ཇི་བཞིན་པ་ནི། སྦྱིན་པ་བཏང་། བས་ལོངས་སྤྱོད་འབྱུང་བ་དང་། ཚུལ་ཁྲིམས་བསྲུངས་པས་མཐོ་རིས་ཐོབ་པ་སོགས་ཇི་སྐད་གསུངས་པ་ལྟར་བཤད་ཆོག་པ། སྒྲ་ཇི་བཞིན་མ་ཡིན་པ་ནི། མདོ་ལས། ཕ་དང་མ་ནི་གསད་བྱ་ཞིང་། ཞེས་པ་ལྟ་བུ་ལ་མཚོན་ན། ཕ་གཟུང་བ་དང་། མ་འཛིན་པ་ལ་དགོངས་པས་གཟུང་འཛིན་གྱི་རྟོག་པ་བཅོམ་པའི་དོན་ལ་འཇུག་པས་མཚོན་ཇི་སྐད་གསུངས་པ་བཞིན་ཐད་ཀར་བཤད་དུ་མི་བཏུབ་པ་རྣམས་སོ། །ཚུལ་བཞི་ནི། ཚིག་དོན་སྤྱི་དོན། སྦས་དོན། མཐར་ཐུག་གི་དོན་དང་བཞི་ཡིན། དེ་གཙོ་བོ་སྔགས་འཆད་པ་ལ་འཇུག་སྟེ། ཚིག་དོན་ནི། རྒྱུད་ཀྱི་ཚིག་རྣམས་ཀྱི་འབྲུ་དོན་མ་ནོར་བར་འཆད་པ་ལ་ཟེར། སྤྱི་དོན་ནི། སྔགས་བླ་མེད་ལ་མཚོན་ན། བསྐྱེད་རིམ། སྦས་དོན་རྫོགས་རིམ། མཐར་ཐུག་གི་དོན་ཟུང་འཇུག་སྐུ་དང་ཡེ་ཤེས་སོགས་ཀྱི་རྣམ་པར་བཞག་པ་རྣམས་ཡིན་ནོ།། ༈ །།ཚར་ལུགས་མཁའ་སྤྱོད་ཆོ་ག་ནག་འགྲོས་མའི་དུར་བདག་གཏོར་བསྔོས་སྐབས་ཛཧཱུྃ་བཾ་ཧོ༔གཉིས་གསུངས་པ་སྔ་མ་གཏོར་འགྲོན་སྤྱན་འདྲེན་པའི་སྔགས་དང་། ཕྱི་མ་མདུན་བསྐྱེད་ལ་བསྟིམ་པའི་སྔགས་རེད།། ༈ །།རྣལ་འབྱོར་མའི་
རིགས་བདག་རྣམ་སྣང་ལ་ཧེ་རུ་ཀ་ཞེས་པའི་ཐ་སྙད་བཏགས་པས་རུས་པ་དང་རིན་པོ་ཆེའི་རྒྱན་གཉིས་ཀ་ཡོད། དེའང་རུས་པའི་རྒྱན་ལ་རིན་པོ་ཆེའི་ཕྲས་བཏབ་པ་ཡིན། །ཡུམ་དངོས་སུ་མ་གསུངས་པ་དང་། མེ་ཕུང་མི་དགོས།། ༈ །།རྫོགས་རིམ་སྐབས། དབུ་མའི་མས་སྣེའི་དགའ་འཁྱིལ་དམར་པོས་བདེ་བ་དང་། ཡས་སྣའི་དཀར་པོས་སྟོང་པ་བསྒྲུབ་པའི་དམིགས་པ་བྱེད་པ་ཁྲིད་ཡིག་ཆེན་མོ་སོགས་ཐམས་ཅད་ཀྱི་དགོངས་པ་ཡིན།། ༈ །།རླུང་ལུས་ལ་གནས་པས་བདེ་བ་སྒྲུབ་པའི་སྐབས། སྔར་རླུང་བྱང་བ་དང་། དམིགས་པ་གསལ་པོ་ཡོད་ན་རླུང་མ་བཟུང་ཡང་རུང་། དེ་མིན་བུམ་ཅན་དང་དམིགས་པ་སྦྲགས་ན་ལེགས།། ༈ །།གཉིས་བྲལ་འཆད་དུས་ཞལ་ཤེས་གསུམ་ཟེར་བ་འདི་ལ་འཆད་ཚུལ་མང་པོ་ཞིག་འདུག་ཀྱང་། དོན་དུ་གཉིས་བྲལ་ནི་རྩ་དབུ་མའི་མངོན་བརྗོད་ཡིན་པས། དབུ་མ་འཆད་དུས་ཞལ་ཤེས་གསུམ། ཞེས་བསྐྱེད་རིམ་ཕག་མོ་མཁའ་སྤྱོད་དང་། རྫོགས་རིམ་རྩ་དབུ་མ་ཟུང་འབྲེལ་དུ་འཆད་པའི་སྐབས་ཞལ་ཤེས་གསུམ་ཡོད་ཅེས་པའི་དོན་ལགས། གསུམ་པོ་དེ་གང་ཞེ་ན། ཡོངས་གྲགས་སུ་སྔོན་|འགྲོའི་སྐབས་བླ་མ་བསྐྱེད་པ་དང་བསྟིམ་པའི་ཞལ་ཤེས་གཉིས། དངོས་གཞིའི་སྐབས་བསམ་མི་ཁྱབ་ཐུན་མོང་མ་ཡིན་པའི་ཞལ་ཤེས་དང་གསུམ་ལ་མཛད། འགལ་ཞིག་གིས་ཞལ་ཤེས་ཐམས་ཅད་འདིར་བསྡུ་
བའི་དབང་དུ་བྱས་ཏེ། སྔོན་འགྲོའི་སྐབས་བླ་མ་བསྐྱེད་བསྟིམ་གྱི་ཞལ་ཤེས་གཉིས་གཅིག་ཏུ་བརྩིས། དངོས་གཞིར་ལུས་དཀྱིལ་ཐུན་མོང་མ་ཡིན་པའི་ཞལ་ཤེས། མཇུག་ཏུ་བསམ་མི་ཁྱབ་ཐུན་མོང་མ་ཡིན་པའི་ཞལ་ཤེས་སོ་ཟེར་བའང་སྣང་། སྐྱེ་འགག་གནས་གསུམ་བྲལ་བ་སོགས་ཀྱི་དོན་ཞྭ་ལུ་མཆོག་སྤྲུལ་རིན་པོ་ཆེས་མཛད་པ་འདི་ཀས་འཐུས་པས་དཔེ་བཤུ་ཐུབ་ན་ལེགས།། ༈ །།ལུས་དཀྱིལ་ཡོད་སྐབས་གོ་ཆ་བཀོད་ལུགས་དམིགས་པ་གསལ་ཐེབས་ན་ཕྱི་ནང་གི་ལྷ་ཐམས་ཅད་ལ་ཡེ་ཤེས་པ་བསྟིམ་པ་ཡིན་པས་རྨོར་ཆེན་གསུང་ལྟར་ཕྱི་ནང་གི་རྣལ་འབྱོར་མ་ཐམས་ཅད་ཀྱི་གནས་སུ་བཀོད་ཐུབ་ན་ལེགས། དེ་ཙམ་གསལ་མ་ཐེབས་ན། ཕྱིའི་རྣལ་འབྱོར་མ་ལ་དངོས་སུ་གསལ་བཏབ་ནས་ལུས་དཀྱིལ་རྣམས་ལའང་གོ་ཆས་རྒྱས་བཏབ་ཡོད་སྙམ་པ་ཙམ་བྱས་ན་འཐུས་ཚུལ་གསུང་རྒྱུན་ལས་འབྱུང་།། ༈ །།བསམ་མི་ཁྱབ་ཐུན་མིན་སྐབས། ལུས་ཀྱི་ཤུལ་བུག་པ་ཧ་རེ་ཡོད་པ་ཞེས་པའི་དོན། རགས་ལུས་ཡོངས་རྫོགས་དྭང་མའི་ལུས་མཁའ་སྤྱོད་མ་ལ་ཐིམ་ཚར་བའི་རྗེས་ཤུལ་ན་རང་གི་གོས་བུག་པ་ཧ་རེ་ཡོད་པ་ཙམ་ལུས་པ་ལ་ཟེར་བ་ཡིན་གྱི། ལུས་ལ་བུག་པ་ཧ་རེ་ཡོད་ཟེར་བའི་དོན་ག་ལ་ཡིན།། ༈ །།དབུ་མ་ཁ་དབྱེའི་སྐབས། ཁྲིད་ཡིག་ཆེན་མོར་རྩ་གསུམ་གྱི་ནང་མེས་ཁེངས་གསུངས་པ་མེད། དོན་དུ་འབར་བའི་མེས་ལུས་ཀྱི་ནང་
ཐམས་ཅད་ཁེངས། ཁམས་སྙིགས་མ་རྣམས་བསྲེགས། དྭང་མ་རྣམས་དབུ་མར་འདུས་པ་བསྒོམ་དགོས་རྒྱུ་ཡིན། ལར་ཁྲིད་ཡིག་ཐམས་ཅད་གོ་བསྡུར་ན་བླ་མ་རྣམས་ཀྱི་དགོངས་ཕྱོགས་ལྟ་བུས་ཅུང་མི་འདྲ་བ་མང་བས། རང་ལུགས་མཁྱེན་བརྩེས་མཛད་པའི་ཁྲིད་ཡིག་ཆེན་མོ་མཁའ་སྤྱོད་བགྲོད་པའི་སྣེ་ལམ་ཁོ་ན་དང་། ངག་འདོན་གནས་གསར་བས་མཛད་པའི་སྒྲུབ་ཐབས་ནག་འགྲོས་ལྟར་གཙོ་བོར་བྱེད་དགོས་པ་ཐུགས་ངེས་ཞུ།། ༈ །།ནཱ་རོ་པའི་སློབ་མ་གཉིས་སྐྱེས་མཆོག་གཉིས་ཞེས་པའི་གཉིས་སྐྱེས་ནི་བྲམ་ཟེའི་མིང་ཡིན་པས། བྲམ་ཟེའི་རིགས་སུ་འཁྲུངས་པའི་སློབ་མ་མཆོག་མ་ན་ཀ་ཤཱི་དང་། རཏྣ་རཀཱིཏ་གཉིས་ལགས།། ༈ །།སེམས་བསྐྱེད་ཚད་མེད་རྒྱུ་འབྲས་བུ་སོང་བ་ནི། དང་པོ་སྨོན་འཇུག་གི་སེམས་བསྐྱེད་རྒྱུ་དང་། དེ་ནས་སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་འབྲས་བུའི་ཚུལ་དུ་བསྒོམ་པ་སྒྲུབ་ཐབས་ཕལ་ཆེར་ལྟར་དང་། དེ་གཉིས་ངོ་བོ་དབྱེར་མེད་ནི། སྨོན་འཇུག་གི་སེམས་བསྐྱེད་ལས་ཚད་མེད་བཞི་ལོགས་སུ་མ་བསྒོམས་ཀྱང་། སྨོན་འཇུག་གི་སེམས་བསྐྱེད་ལ་ཚད་མེད་བཞི་དོན་གྱིས་ཚང་བ་ལགས།། ༈ །།བདག་གི་གཞི་སྦྱངས་བསྒྱུར་སྐབས། བླ་མ་རང་ལ་བསྟིམས་པས་རང་གི་ལུས་འོད་ཀྱི་རང་བཞིན་ལྟ་བུར་གྱུར་པའི་སྙིང་གའི་ཐད་དུ་ཆོས་འབྱུང་སོགས་བསྒོམ། དེའི་འོད་ཀྱིས་ལུས་
འོད་ཀྱི་གོང་བུར་སྦྱངས། དེ་ལས་རྣལ་འབྱོར་མའི་སྐུར་བསྒྱུར་བ་ཡིན། རྡོར་སེམས་བསྒོམ་བཟླས་སྐབས་རང་ཐ་མལ་པའི་ལུས་རྟེན་འདི་གའི་སྤྱི་བོར་བླ་མ་རྡོ་རྗེ་སེམས་དཔའ་མཐོ་ཚད་དུ་བསྒོམ།། ༈ །།རྣལ་འབྱོར་མའི་ཚོགས་བརྒྱ་འབུལ་མཁན་མ་ཐོས། འབུལ་ན་ནི་ལོས་ཆོག །འབུལ་ལུགས་ཆོ་ག་ཚར་གཅིག་བདག་འཇུག་ཡན་གྲུབ་ནས། ཚོགས་བྱིན་རླབས་ནས་ལྷག་མའི་བར་གྲངས་གསོག །བརྒྱ་དུས་གཅིག་མ་ཚར་ན་གང་ཚར་གྱི་མཚམས་རྗེས་ཆོག་བྱ། སླར་ཆོ་ག་བསྐྱར་བས་འཐུས།། ༈ །།དབང་གི་ངོ་བོ་ནི། རྣལ་འབྱོར་བླ་མེད་ཀྱི་དབང་དུ་བྱས་ན། རང་རྒྱུད་ལ་སྐུ་བཞིའི་ས་བོན་ནུས་ལྡན་དུ་བྱེད་པའི་སྔགས་ཀྱི་ཆོ་གའི་ཁྱད་པར། ངེས་ཚིག་ནི། ཨ་བྷིཥིཉྩ་ཞེས་པའི་སྒྲ་ལས་དྲངས་ན་མངོན་པར་གཏོར་བ་སྟེ་སྒོ་གསུམ་ཆ་མཉམ་དང་བཅས་པའི་དྲི་མ་གཏོར་བའམ། ཨ་བྷི་ཥེ་ཀ་ཏ་ཞེས་པའི་སྒྲ་ལས་དྲངས་ན་མངོན་པར་བླུགས་པའམ་འཇོག་པ་སྟེ། སྐུ་བཞིའི་ས་བོན་རྒྱུད་ལ་འཇོག་པ་དབྱེ། སྤྱིར། བུམ། གསང་། ཤེས་རབ་ཡེ་ཤེས། དབང་བཞི་པ་བཞིར་འདུ། གཞན་རྒྱུད་སྡེ་སོ་སོའི་དབང་གི་དབྱེ་བ་ཕྲ་མོ་བསམ་གྱིས་མི་ཁྱབ་པ་ལགས།། ༈ །།ཀྱེ་རྡོར་ལམ་དུས་རབ་ཐུན་བཞི་ནས། ཐ་མ་ཐུན་གཉིས་ཡན་ལེགས། དབང་གི་ཆུ་རྒྱུན་མི་འཆད་པའི་ཐབས་ཡིན། མངོན་རྟོག་གཞན་ཚར་གྲངས་འདོན་ན་སྤྱིར་ཕན་ཡོན་ཆེན་པོ་ཡོད་
པ་གཞིར་བཅས་ལས། དབང་གི་ཆུ་རྒྱུན་ལ་ཕན་པའི་ཐ་སྙད་མེད།། ༈ །།དབང་དོན་གྱི་ཡེ་ཤེས་ཚད་ལྡན་ཞིག་རྒྱུད་ལ་སྐྱེས་ནས་མ་ཉམས་ན། རྗེས་སུ་དབང་གཞན་ཞུས་པས་སྔགས་སྡོམ་མམ། དབང་དོན་གྱི་ཡེ་ཤེས་ངོ་བོ་གསར་དུ་ཐོབ་རྒྱུ་མེད་རུང་། རྣམ་པ་སྔར་གྱི་སྔགས་སྡོམ་མམ་དབང་གི་ཡེ་ཤེས་དེ་ཇེ་བཟང་དུ་འགྲོ་བས། ཇི་ཙམ་བཟང་དུ་སོང་བ་དེ་ཙམ་གསར་ཐོབ་ཀྱི་ཆ་ཤས་ཡིན། འདི་ཙམ་ནི་ལམ་དུས་ཚར་རེ་ཙམ་ལ་ཡང་བརྩི་རྒྱུ་ཡོད།། ༈ །།འབྲས་བུ་དམན་པ་སྟེ་ཆུང་ངུ་ལ། འབྲས་བུ་མེད་ཅེས་དགག་སྒྲ་བཞག་པའི་དོན། ཉན་ཐོས་ཀྱི་ལམ་ལ་ཞུགས་ན་ཉན་ཐོས་དགྲ་བཅོམ། རང་རྒྱལ་གྱིས་རང་རྒྱལ་དགྲ་བཅོམ། བྱང་སེམས་རྐྱང་པས་ས་བཅུ་གཅིག་པ་ཙམ་ཐོབ་ཀྱང་། མཐར་ཐུག་གི་འབྲས་བུ་ཆེན་པོ་སངས་རྒྱས་ཀྱི་གོ་འཕང་ཐོབ་མི་ནུས་པས་གནས་སྐབས་ཀྱི་འབྲས་བུ་ཆུང་ངུ་ལས་མེད། སྔགས་བླ་མེད་ཀྱིས་བཅུ་གསུམ་རྡོ་རྗེ་འཛིན་པའི་ས་ཐོབ་ནུས་པས་འབྲས་བུ་ཆེ་ཞེས་པའི་དོན་ཡིན། འོ་ན་སངས་རྒྱས་ཀྱིས་གདུལ་བྱ་རྣམས་ལ་དང་པོ་ནས་སྔགས་བླ་མེད་མི་བསྟན་པ་ཅི་སྙམ་ན། ཇི་ལྟར་བྱིས་པ་གསོ་བ་དང་། །ཡི་གེའི་ཕྱི་མོ་ཀློག་འཇུག་ལྟར། །དེ་བཞིན་སངས་རྒྱས་གདུལ་བྱ་ལ། །ཇི་ཙམ་བཟོད་པའི་ཆོས་བསྟན་ཏོ། །ཞེས་བྱིས་པ་ཁ་ཟས་ཆ་བསྐྱེད་དེ་གསོ་བ་དང་། ཡི་གེ་ཀ་ཁ་ནས་རིམ་པར་སློབ་དགོས་
པ་ལྟར། སངས་རྒྱས་ཀྱིས་ཀྱང་གདུལ་བྱ་ལ་ཐུན་མོང་བ་རིམ་གྱིས་དྲང་བ་མ་གཏོགས་ཐབས་མེད་པས། ཐེག་པ་གསུམ་དང་། རྒྱུད་སྡེ་བཞི་སོགས་གསུངས་དགོས་པའི་རྒྱུ་མཚན་དེ་ལྟར་ལགས།། ༈ །།བར་སྲིད་དང་ཁམས་གོང་མ་རྟེན་འབྲེལ་གང་གི་སྐབས་ཡིན་པ། རྟེན་འབྲེལ་འབྱུང་ལྡོག་མཐར་ཆགས་དང་ཐོད་རྒལ་གང་ཡིན། ཤེས་བྱའི་གཞི་ལྔ་མཐའ་གསུམ་དུ་བསྡུ་སྐབས། འདུས་མ་བྱས་དང་ལྡན་མིན་འདུས་མ་བྱས་དང་ལྡན་མིན་འདུ་བྱེད་ཀྱི་དོག་གནས། ཀུན་གཞི་དང་ཉོན་ཡིད་ཀྱི་ཡུལ་དང་དབང་པོ་གང་ཡིན། སྤྱིར་དེ་གཉིས་དབང་སྐྱེས་ཀྱི་བློ་ཡིན་མིན། ཀུན་གཞིའི་འཁོར་གྱི་ཀུན་འགྲོ་ལྔའི་ངོས་འཛིན། ཉོན་ཡིད་དང་ཡིད་རྟོག་བཅས་སོགས་ཀྱི་ཁྱད་པར། ཡུལ་ཅན་ཡིན་ན་བློ་ཡིན་པས་ཨི་ཁྱབ། སྤྱིར་ཡུལ་ཅན་ལ་གང་ཟག་སོགས་དབྱེ་བ་དུ་ཡོད། ཡིད་ཀྱི་མངོན་སུམ་ངོས་འཛིན། དེའི་ཡུལ་ཆོས་ཁམས་ཡིན་མིན། ན་སུམ་རྫོགས་པའི་བློ་དེ་ཡིད་མངོན་ཡིན་མིན་དང་། སྟོང་ཉིད་ཆོས་ཁམས་བདུན་པོ་ལས་གང་ཡིན། རང་རིག 
་མངོན་སུམ་གྱི་ངོས་འཛིན། ཡིད་མངོན་དང་
རང་རིག ་མངོན་སུམ་རྣལ་འབྱོར་མངོན་སུམ་གསུམ་གྱི་ཁྱད་པར། དེ་གསུམ་ཀ་ཡིད་མངོན་དུ་འདུ་མིན། ཡིད་ངོར་དབྱིབས་དང་ཁ་དོག་ཡུལ་གྲུབ་སོགས་གསལ་པོར་སྣང་བ་ཕུང་ཁམས་གང་དུ་བསྡུ། དོན་སྤྱི། རིགས་སྤྱི། ཚོགས་སྤྱི།
རྫས་སྤྱི་རྣམས་ཀྱི་ཁྱད་པར་དོན་སྤྱི་དང་མེད་པ་གསལ་སྣང་གཉིས་ཀྱི་ངོས་འཛིན། འདི་ཡང་ཕུང་ཁམས་གང་གིས་བསྡུ། དོན་དམ་བློ་ཡིས་ཡུལ་ཡིན་ཚེ་བློ་གང་གི་ཡུལ་ཡིན། ཡུལ་བཞིའི་ནང་ནང་གང་ཡིན། དེ་འདྲའི་བློ་དེ་ཀུན་རྫོབ་ཡིན་མིན། ཡིན་ན་དོན་དམ་པ་བློ་ཀུན་རྫོབ་པའི་ཡུལ་དུ་གཉིས་སྣང་མ་ནུབ་པར་བྱར་རུང་མིན། གཏི་མུག་མེད་པའི་དགེ་རྩ་དང་མཚུངས་ལྡན་གྱི་འདོད་ཆགས་དེ་དགེ་མི་དགེ་གང་ཡིན་སོགས་འགྲེ། སྤྱིར་དགེ་སེམས་དང་མཚུངས་ལྡན་གྱི་མི་དགེ་བ་ཡོད་མེད། མི་དགེའི་སེམས་དང་མཚུངས་ལྡན་གྱི་དགེ་རྩ་ཡོད་མེད། ཚོར་འདུ་སོགས་བློ་ཡི་ཡུལ་ཡིན་ནམ། ཡུལ་ཅན་ཡིན་ནམ། གཉིས་ཀ་ཡིན་མིན་ལུས་ངག་གི་ངོས་འཛིན། སྤྱི་རྣམ་བྱང་ཕྱོགས་ཀྱི་ཆོས་ཐམས་ཅད་བྱང་ཕྱོགས་ལ་འདུ་མིན། འདུ་ཚེ་ཚད་མེད་བཞི་སོགས་རེ་རེ་ནས་གང་ལ་ལ་ཇི་ལྟར་བསྡུ་ཚུལ། རྒྱན་གྱི་ཟག་མེད་ཆོས་ལྔའི་སྐབས་སྤྱན་དང་གཟུངས་ཀྱི་སྒོ་དང་ཟག་མེད་ཀྱི་ཕུང་པོ་ལྔ་སོགས་མེད་པའི་རྒྱུ་མཚན། གཞན་འགྱུར་བཞིའི་ངོས་འཛིན་དང་ངེས་ཚིག །སེམས་བྱུང་ང་གཅིག་དགེ་མི་དགེ་ལུང་མ་བསྟན་གསུམ་དུ་བསྡུ་ཚུལ། ཆོས་དང་གང་ཟག་གཞི་མཐུན་ཡོད་མེད། ཡུལ་རྣམ་ཤེས་ཡུལ་ཤེར་ཕྱིན་སོགས། ཅན་གཉིས་ཀའི་གཞི་མཐུན་ཡོད་མེད། དབུ་མ་ཐལ་འགྱུར་བའི་ལུགས་ལ་ཀུན་བཏགས་མི་འདོད་པའི་རྒྱུ་མཚན། གལ་ཏེ་ཀུན་
བཏགས་མེད་ཚེ་ལས་འབྲས་སོགས་ཡོད་མེད་ལ་དཔྱད། ཀུན་བཏགས་མེད་པ་དེ་ཡང་དོན་དམ་དུ་ཡིན་ནམ་ཐ་སྙད་ཡིན། དོན་དམ་དུ་ཡིན་ན་གཞན་དབང་དང་ཡང་མཚུངས་སོ། །མཛོད་དུ་སེམས་བྱུང་། ༥༡ ཚང་བར་མ་གསུངས་པའི་རྒྱུ་མཚན། སེམས་བྱུང་།༡ དུ་མ་འདུས་པ་ཨེ་ཡོད། ཡོད་ན། ༥༡ ཏུ་བཞག་པའི་རྒྱུ་མཚན། ཆུད་མི་ཟ་བའི་རྫས་ཕུང་པོ་གང་དུ་བསྡུ།། ༈ །།ཐུག་མེད་དང་ཐུག་པ་དང་བཅས་པའི་དྲི་བའང་ཡོད།། ༈ །།སྔགས་ཕྱོགས་ཀྱི་དོག་གཅོད་ས་བོན། ལྷན་སྐྱེས་འདྲེན་བྱེད་ཀྱི་ཐབས་ལ་ཚོགས་དྲུག་གི་སྦྱོར་བ་ལ་ཁྱད་པར་ཡོད་མེད། ཡོད་ན་དེའི་ཁྱད་པར། མེད་ན་ལུས་ཤེས་དམིགས་ཀྱིས་བསལ་བའི་དགོས་པ། བུམ་དབང་གི་ལྟ་བ་ངོ་བོ་ཉིད་གསུམ་གྱི་གོ་དོན། ལྟ་བ་དང་གྲུབ་མཐའི་ཁྱད། གྲུབ་མཐའ་དང་རིག་འཛིན་གྱི་ཁྱད། ཀུན་གཞི་རྒྱུ་རྒྱུད་ལས་འཕྲོས་པའི་ལྟ་བ་འཁོར་འདས་དབྱེར་མེད་དང་། གྲུབ་མཐའ་འཁོར་འདས་དབྱེར་མེད་ཀྱི་ཁྱད། གསང་དབང་དང་ཤེར་དབང་གི་འདའ་ཀ་མ་ལ་དབང་པོའི་སྒོ་ཡི་གེས་དགག་དགོས་མིན་དབང་བཞི་པ་དང་སྦྱར་ནས་སླད་དཔྱད། རྩ་ཡིག་དབྱིབས་སོགས་དང་། སྒྲ་དང་ནུས་པ་གང་དུ་འདོད་པ། འདི་སྐབས་ཀྱི་སྙིང་པོ་རླུང་དཀྱིལ་གྱི་ངོས་འཛིན། རྡོ་རྗེ་རྦ་རླབས་ལམ་གསུམ་གྱི་ངོས་འཛིན་ཞིབ་ཆ། ས་བོན་དང་བག་ཆགས་ཀྱི་ཁྱད་པར་རྩ་བའི་འགྲོས་
སོགས་ཀྱི་དོན་དང་འགྲོས་བཞི་ཐིམ་ལུགས། ཟུང་འཇུག་གི་ངོ་བོ་ཉིད་སོགས་ལྟ་བ་དུག་མེད་བཞིའི་ངོ་བོ་ལ་ཁྱད་ཅི་ཡོད། གདན་གྱི་ཉི་ཟླ་དང་མངོན་བྱང་གི་ཉི་ཟླ་གཉིས་གཅིག་མིན། རླུང་དབུ་མར་ཐིམ་པ་དང་རེངས་པའི་ཁྱད་པར། ལྔ་པའི་ཁྲིད་ཡིག་ཏུ་གསང་དབང་གི་ས་བརྩི་ཚུལ་གཞན་དང་མ་འདྲ་བའི་གནད། མཁྱེན་བརྩེའི་ཁྲིད་ཡིག་ཏུ་སློབ་བཤད་པ་སྦྱང་གཞི་ཕྱེད་དང་ལྔ། ཚོགས་བཤད་པ་ཕྱེད་དང་བཞི་ཞེས་པའི་ངོས་འཛིན། ཀླུ་སྒྲུབ་དང་ཀུན་གཞིའི་སྐབས་བཞེད་ཚུལ་མ་མཐུན་པའི་འགལ་སྤྱོང་། སྲུབ་ཤིང་འཁོར་ལོའི་དོན།། ༈ །།རྒྱུད་བཅོ་བརྒྱད་སྐུ་གསུང་ཐུགས་སོགས་དཔུང་འཇོག་བྱེད། ཐབས་གྲོལ་ལམ་གྱི་དོག་གནས། ཐེག་པ་ལམ་ཞུགས་ཀྱི་བཤད་པའི་དོན་གནས་ཀློང་གསལ་རྒྱུད་ཚོལ། ཡོ་ག་སྡེ་གསུམ་གྱི་ལྟ་བའི་ཁྱད་པར། དབང་། བྱིན་རླབས། རྗེས་གནང་། རིག་གཏད། སྒོམ་ལུང་༧ བཅས་ཀྱི་ཁྱད་པར། སེམས་ཀློང་མན་ངག་སྡེ་གསུམ་གྱི་ལྟ་བའི་ཁྱད་པར། བསྙེན་སྒྲུབ་ལས་གསུམ་གྱི་ཆོ་གའི་ཁྱད་པར། སྒྲུབ་ཁོག་དང་དཀྱིལ་ཆོག་དང་བསྙེན་ཡིག་སོགས་ཀྱི་ཁྱད་པར།། ༈ །།གྲུབ་མཐའ་བཞིའི་འདོད་ཚུལ་རགས་པ་ཙམ་ཞིག་གཞན་གྱི་དྲིས་ལན་དུ་བརྗོད་པ་བཞུགས་སོ།། ༈ །།ན་མོ་གུ་ར་བེ། གྲུབ་མཐའ་བཞིའི་ནང་ཚན་བྱེ་སྨྲ་བས། མུ་སྟེགས་པས་འདོད་པའི་རྟག་གཅིག་རང་དབང་ཅན་གྱི་
གང་ཟག་གི་བདག་དེ་ཉིད་ཕུང་པོ་ལས་གཅིག་ཐ་དད་དུ་མ་གྲུབ་པ་སོགས་ཀྱི་རིགས་པས་ལེགས་པར་བཀག་ནས། རང་གི་འདོད་པ་བརྗོད་པ་ན། ཤེས་བྱ་ཐམས་ཅད་གཞི་ལྔར་འདུས་ཤིང་། དེ་ཡང་བདེན་གྲུབ་ཏུ་བཞེད། བཟུང་བ་རྡུལ་ཕྲན་ཆ་མེད་དང་། ཤེས་པ་སྐད་ཅིག་ཆ་མེད་དོན་དམ་དུ་ཡོད་པར་འདོད་པས་མཚོན། རྡུལ་ཕྲ་རབ་འདུས་པའི་བདག་ཉིད་ཅན་གྱི་ཕྱི་དོན་རགས་པ་རྣམས་ནི་བཏགས་ཡོད་ཀུན་རྫོབ་ཀྱི་བདེན་པ་དང་། དེའང་བསྡུ་ན་འདུས་བྱས་དང་། འདུས་མ་བྱས་གཉིས་སུ་འདུ་བ་ལས། སྔ་མ་མི་རྟག་པ་དང་། ཕྱི་མ་རྟག་པའི་རྫས་སུ་ཡོད་ལ། ཆོས་ཀྱི་བདག་གཟུགས་འཛིན་གཉིས་ཀ་གཏན་ནས་མ་སྤངས་པས་མཚོན་རྣམ་གཞག་ཤིན་ཏུ་རགས་པ་ཡིན་ལ། མདོ་སྡེ་པས། རིག་མིན་གྱི་གཟུགས་མ་གཏོགས་གཟུགས་སེམས་སེམས་བྱུང་གསུམ་ཡོད་པར་འདོད་ནའང་། རིག་མིན་གྱི་གཟུགས་གཞིག་ཅིང་གཞོམ་དུ་མི་རུང་བ་དང་། ལྡན་མིན་འདུ་བྱེད་གཟུགས་སེམས་སེམས་བྱུང་གསུམ་ལས་རྫས་གཞན་དུ་མེད་པ་དང་། འདུས་མ་བྱས་རྒྱུ་རྐྱེན་གྱིས་མ་བསྐྱེད་པའི་ཕྱིར་རྫས་ཡོད་དུ་མི་འདོད་པས་ཆོས་ཁམས་ཕྱོགས་གཅིག་བདག་མེད་རྟོགས་པས་ཁྱད་པར་དུ་འཕགས་ལ། སེམས་ཙམ་པས། ཕྱི་གཟུང་པའི་ཡུལ་སྣ་ཚོགས་སུ་ཤར་བ་ནི་རྣམ་རིག་ཙམ་ལས་དོན་གཞན་མེད་པས་རྫུན་ལ། དེར་རྫུན་པས་དེར་འཛིན་བྱེད་ཀྱི་
ཤེས་པའང་རྫུན་པར་གྲུབ་པའི་ཕྱིར་ཆོས་ཀྱི་བདག་རགས་པ་སྤོང་ཡང་། གཟུང་འཛིན་གཉིས་མེད་དུ་མྱོང་བའི་ རང་རིག ་རང་གསལ་གྱི་ཤེས་པ་ཡོངས་གྲུབ་དོན་དམ་པའི་བདེན་པ་ཉིད་ཡོད་པར་འདོད་པས་བྱེ་མདོ་སེམས་གསུམ་ལ་དངོས་པོར་སྨྲ་བའི་གྲུབ་མཐའ་ཞེས་འཇོག་སྟེ། ཆོས་ཉིད་ཀྱི་བདེན་པ་ཇི་བཞིན་མཐོང་བའི་སྐབས་མེད་པར་བཞེད། དབུ་མ་རང་རྒྱུད་པས་ཡོངས་གྲུབ་ཀྱང་ངོ་བོ་ཉིད་ཀྱིས་མེད་པར་འདོད་པས་བདག་གཉིས་ཀ་སྤང་ནའང་ཆད་མཐར་ལྷུང་ཉེ་ལ། ཐལ་འགྱུར་བས་ཡོད་མེད་ལ་སོགས་པའི་ཁས་ལེན་ཐམས་ཅད་དང་བྲལ་བས་ན་རྒྱུའི་ཐེག་པའི་ལྟ་བའི་མཐར་ཐུག་པར་ཡོངས་སུ་གྲགས་ཤིང་གྲུབ་པ་ཉིད་དོ། །དེས་ན་ཕྱི་རོལ་པ་ཐམས་ཅད་གང་ཟག་གི་བདག་ཡོད་པར་འདོད་པ་དང་། ནང་པའི་ཐེག་དམན་ཐམས་ཅད་གང་ཟག་གི་བདག་མེད་པ་དང་། ཐེག་པ་ཐམས་ཅད་ཆོས་ཀྱི་བདག་མེད་པ་དང་། དབུ་མ་ཐམས་ཅད་སྤྲོས་བྲལ་དུ་འདོད་པས་ཁྱབ་ཅིང་། སྤྱིར་གྲུབ་མཐའ་འོག་མ་འོག་མས་དོན་དམ་མཐར་ཐུག་ཏུ་འདོད་པ་གང་ཡིན་པ་དེ་གོང་མ་གོང་མའི་རིག་པས་བཅོམ་སྟེ། དེ་ལས་ཀྱང་ཕྲ་བའི་ཨུ དོན་དམ་གཞན་ཡོད་པར་འདོད་པས་ན། འོག་མའི་འདོད་ཚུལ་ལེགས་པར་ཤེས་པ་དེ། གོང་མའི་གྲུབ་མཐའ་ཇི་བཞིན་འཇོག་ཤེས་པའི་ལམ་སྟེགས་སུ་ཤིན་ཏུ་གལ་ཆེ་བས་ན། ཕྱི་རོལ་པ་ནས་བཟུང་།
དབུ་མ་ཐལ་འགྱུར་བའི་བར་གྱི་གྲུབ་པའི་མཐའི་གནད་ཐམས་ཅད་ལེགས་པར་རྟོགས་ཤིང་ཁོང་དུ་ཆུད་པར་བྱས་ཏེ། མཐར་ཐུག་བསམ་བརྗོད་ཐམས་ཅད་དང་བྲལ་བའི་ཡེ་ཤེས་ཉིད་ལ་མཉམ་པར་འཇོག་པ་ནི་ཐོས་བསམ་སྒོམ་གསུམ་འགལ་མེད་དུ་རྟོགས་པའི་ལམ་ཁྱད་པར་ཅན་ལགས་སོ། །ཞེས་པའང་རྨོངས་པ་ཨ་བྷ་ཡས་བྲིས།། ༈ །།ཁྱབ་བདག་ཞྭ་ལུ་རིན་ཆེན་བློ་གསལ་ཞབས་ནས། ངལ་བསོའི་བླ་མའི་རྣལ་འབྱོར། བསྡུ་ན་ཀུན་འདུས་ནོར་བུ་ལུགས་ཆོག །སྒྲོལ་དཀར་བུམ་ཅན་སྦྱོང་བ་བཞི་ལྡན་མིན། རྒྱུད་སྡེ་འོག་མ་ལས་ཀྱང་སྤྱིར་རླུང་འཛིན་ཚུལ་མང་དུ་གསུང་། གཏུམ་མོའི་དམིགས་པ་ཐམས་ཅད་རླུང་དང་། བསྲེ། འཕོ་བ་དང་པོ་སྒྲ། དེ་ནས་རླུང་། གོམས་ནས་གཉིས་ཀ་དགོས། བདུད་རྩི་འབེབས་སྦྱང་གཤར་བགེགས་ཆེ། འོད་ཟེར་ལས་དང་པོ་ལ་བདེ། རྩ་བཀའ་བརྒྱུད་ལུགས་གེགས་ཆུང་། ས་ལུགས་ཝཱ འབྲིང་། དགེ་ལུགས་ཆེ། ཡོན་ཏན་སྐྱེ་གྱུར་བུལ་ཀྱང་དེ་དང་འདྲ། དང་པོ་བསྒོམ་ཚུལ། བར་པ་གནས་ཚུལ། ཕྱི་མ་ཆགས་ཚུལ་ཡིན། འོག་རླུང་དང་པོར་འཐེན་པ་གེགས་ཆེ། དང་པོར་སྟེང་རླུང་རྔུབ། དེ་ནས་འོག་རླུང་ཅུང་ཟད་འཐེན་པ་ཁ་སྦྱོར་གྱི་ཚུལ་ལོ།། ༈ །།སེམས་ཉིད་ངལ་གསོའི་ཁྲིད་ཀྱི་སྐབས། ཤིང་གཏན་ནི་ཨོག་མཁར། བསམ་གཏན་གྱི་རོལ་པའི་འདུག་སྟངས་ནི། གྲུབ་ན་རྣམ་སྣང་ཆོས་བདུན་
ཏེ། འཕགས་ཡུལ་གྱི་གྲུབ་ཆེན་རྣམས་ཀྱི་བཞེད་པ་ཉིད་ཁོ་ན་ཡིན་མོད། མ་གྲུབ་ན་སེམས་དཔའི་སྐྱིལ་ཀྲུང་སོགས་རང་ཉིད་གང་བདེ་བས་རུང་། སྐྱབས་ཡུལ་གྱི་གདན་སེང་གེས་བཏེགས་པའི་རིན་པོ་ཆེའི་ཁྲིར་སྣ་ཚོགས་པདྨའི་ལྟེ་བ་དང་མཉམ་པའི་ཟླ་གདན། དེའི་དབུས་སུ་རྩ་བའི་བླ་མ། སེང་ཁྲིའི་མཐའ་སྐོར་དུ་དེ་ལས་ཅུང་དམའ་བའི་སེང་ཁྲིའི་སྟེང་བརྒྱུད་པའི་བླ་མ་རྣམས་བསྒོམས། དེའང་སྐུ་འོལ་སྤྱི་ཙམ་དེ་དང་དེའི་མངོན་རྟོགས་བཞིན་ལ། རྣམ་པ་མཚན་དཔེས་བརྒྱད་པ་ཁོ་ནར་བསྒོམས་པ་རྟེན་འབྲེལ་གྱི་གནད་དུ་ཆེ་གསུངས། སྐྱབས་གསོལ་གྱི་ཚིག །ས་ལུགས་ལྟར་ན། བླ་མ་དང་དཀོན་མཆོག ། སོགས་ཡིན་ཀྱང་། བུ་ལུགས་ལ། བླ་མ་སངས་རྒྱས་ཆོས་དང་ཚོགས་ཀྱི་མཆོག །སོགས་བརྗོད་གསུང་། ཕྱག་འཚལ་བའི་སྐབས། ལུས་གྲངས་མེད་པ་མགོ་གྲངས་མེད་པ་སོགས་སྤྱི་ལྟར་གསུམ། ཡན་ལག་བདུན་པའི་ཚིག་ཇི་སྙེད་སུ་དག་ཚང་མ་ཅིས་ཀྱང་དགོས། དེ་མིན་ཀྱང་། དཀོན་མཆོག་གསུམ་ལ་ཕྱག་འཚལ་ལོ། །སོགས་བསྡུས་པ་གཞན་བྱ་གསུང་། མཎྜལ་ཚོམ་བུ་བདུན་མ་སོགས་དང་། བདག་གཞན་ལུས་ངག་ཡིད་གསུམ། སོགས་ངེས་པར་སྦྱར་གསུངས། རྡོ་རྗེ་སེམས་དཔའི་ཐུགས་ཀའི་ཧཱུཾ་དེ། བླ་མ་རྡོར་སེམས་ཀྱི་ཐུགས་གཉིས་སུ་མེད་པའི་ཡེ་ཤེས་སུ་བསྒོམས་ནས། སྔགས་ཕྲེང་གི་འོད་ཀྱིས་
ཐུགས་བརྒྱུད་བསྐུལ་བར་བསྒོམ་གསུང་། བླ་མའི་རྣལ་འབྱོར་སྐབས། བླ་མ་སོགས་སོ་སོའི་མངོན་རྟོགས་སྐུར་གསལ། བླ་མ་ནམ་མཁའ་ལ་རང་མལ་དུ་བསྒོམ་པ་ཁྲོ་ཕུའི་ཁྲིད་ཕལ་ཆེར་ལས་འབྱུང་ཞིང་། གཅིག་ལ་གཅིག་བསྟིམ་སོགས་ཀྱང་མི་རུང་བ་མ་ཡིན་གསུང་། གཉུག་མ་ངོ་སྤྲོད་པའི་ཚིགས་སུ་བཅད་པ་ལྔ་ནི། བུ་སྟོན་ཁྱོད་གང་རྣམ་པར་རྟོགས། ཅེས་སོགས་བརྩམས་ཏེ་ཤོ་ཀ་ལྔའོ། །བླ་མ་ཐོ་བརྩེགས་སུ་བསྒོམས་པ་སོགས་གང་གི་སྐབས་ཀྱང་། གསོལ་འདེབས་གནས་སྦྱར་མ་དང་འབྲེལ་ན་སོ་སོའི་ཞིང་ཁམས་དང་བཞུགས་གནས་སོགས་ཀྱང་གསལ་ཐུབ་ན་ལེགས་པས། འདིར་ནམ་མཁའི་དབྱིངས་མཐོན་པོར་འོག་མིན་གྱི་ཞིང་ཁམས་བཀོད་པ་ཚད་མེད་པའི་དབུས་དྲུག་པ་རྡོ་རྗེ་འཆང་། དེའི་གཡས་འོག་ཏུ་པོ་ཏཱ་ལའི་རི་རྩེར་ཡེ་ཤེས་རང་སྣང་ལས་གྲུབ་པའི་གཞལ་ཡས་ཁང་དུ་འཕགས་པ་སེམས་ཉིད་ངལ་བསོ། །གཡོན་འོག་ཏུ་ལྷ་གནས་སྤྲུལ་པའི་གཞལ་ཡས་ཁང་བྱང་སེམས་བློ་གྲོས་རིན་ཆེན། པོ་ཏཱ་ལའི་འོག་ཏུ་ཤར་སྒྱུ་འཕྲུལ་སྤྲུལ་པའི་གྲོང་ཁྱེར་དུ་ཏེ་ལོ་པ་སོགས་རིམ་པར་ཕན་ཚུན་རེས་མོས་སུ་གསལ་བཏབ། དེའང་འོལ་སྤྱི་ཙམ་དུ་ཞིང་སོ་སོ་ལ། རྣམ་པར་དག་པའི་ཞིང་གི་བཀོད་པ་ཕུན་སུམ་ཚོགས་པར་མོས། མཐར་རང་གི་སྤྱི་གཙུག་ཏུ་རྩ་བའི་བླ་མ་བཞུགས་གནས་བཅས་གསལ་གསུང་། འདི་སྐབས་སྐབས་ལས་དུས་
རྒྱུན་དཀྱུས་བཞིན་གྱིས་གསལ་གསུང་། དངོས་གཞིར་སྤྱིར་རྒྱུད་གསུམ་པའི་རྣལ་འབྱོར་གྱི་རྒྱུད་ཡན་ཆད་སྤྱི་ལ་ཁྱབ་པའི་ཆོས་སྐད་ཡིན་ཚུལ། དེ་ལ་སོ་སོའི་ཐ་སྙད་དང་དོན་གྱི་འཇོག་ཚུལ་ཅུང་ཟད་མི་འདྲ་བ་ཡོད་ཚུལ་སོགས་གསུང་ནས། དེ་ལྟ་བུའི་རྒྱུད་གསུམ་གྱིས་ཐོས་བསམ་གྱི་སྒྲོ་འདོགས་བཅད་ནས་ཉམས་སུ་བླངས་པའི་ཚུལ་ལ་བལྟ་སྒོམ་གཉིས་ལས། དང་པོ་ལ་ཡུལ་རང་བཞིན་ཉམས་དགའ་བར་བཞག་པ་དབུ་མ་སོགས་ཀྱི་ལྟ་ཁྲིད་དང་། ཡུལ་ཅན་གཉིས་མེད་ཀྱི་ཡེ་ཤེས་ལྟ་བར་བཞག་པ་འདི་པའི་ལུགས་གཉིས་ལས། ཕྱི་མ་ཁྲིད་གཞུང་ལྟར་ཉམས་སུ་བླངས་པས། ཉམས་མྱོང་ནང་ནས་ཤར་ཏེ་རྨི་ལམ་གྱི་སྣང་བ་གཉིད་སད་མ་ཐག་ཅི་ཡང་མེད་པ་རང་ཡལ་ལ་འགྲོ་བ་ལྟར། སྣང་བ་ཐམས་ཅད་བདེན་མེད་དུ་བུན་ལོང་གིས་ཤར་ནས་རང་གི་སེམས་ཀྱི་རྣམ་འཕྲུལ་ཐག་ཆོད་པ་སེམས་ཙམ་པའི་ལྟ་བ། དེ་ལྟར་མྱོང་མཁན་གྱི་ཤེས་པ་སྐྱེ་འགགས་གནས་གསུམ་གྱིས་སྟོང་པར་རྟོགས་པ་དབུ་མ་པའི་ལྟ་བ། དེའང་བླ་མའི་བྱིན་རླབས་ཀྱིས་རང་བཞིན་བརྗོད་བྲལ་དུ་ཉམས་སུ་མྱོང་བ་གསང་སྔགས་ཐུན་མོང་མ་ཡིན་པའི་ལྟ་བ་སྟེ། དེའི་རྒྱུན་བསྒོམ་པས་ཉམས་སུ་བླངས་པའི་སྐབས། དཔེ་དང་པོ་ནི་རལ་བསྐོར་མཁན་དང་། མདའ་མཁན་གྱི་གཏམ་རྒྱུད་གསུང་སྟེ། དེའང་ཁོང་གཉིས་ཁྱིམ་གཞིས་བུ་སྨད་བཅས་རྒྱལ་དུ་བཞག་ནས་སྒྱུ་རྩལ་
འགྲན། མདའ་བརྒྱ་དང་བཅོ་ལྔ་གྲངས་ཚད་དུ་བཞག་པས། རལ་བསྐོར་མཁན་གྱིས་བསྒྲིམ་སྟེ་བསྐོར་བས། མདའ་བརྒྱ་དང་བཞི་འཕངས་ཀྱང་མ་ཕོག །དེ་མཚམས་མདའ་མཁན་གྱིས་བཞག་ནས་ནང་དུ་ཕྱིན། ཆུང་མར་ལོ་རྒྱུས་བསྙད་པས་ཐབས་ཡོད་ཟེར། སང་སྔར་གྱི་འཕྲོས་ནས་འཕངས་པའི་ཚེ། ཆུང་མས་ཆ་ལུགས་ཡ་མ་ཟུང་ཞིག་བསྒྲིགས་ནས་ཕྱིན་པས་རལ་མཁན་དེར་མིག་ཡེངས་པའི་བར་མདའ་སྙིང་གར་རྒྱབ་པས། བདག་ནི་མདའ་ཡིས་མ་བསད་དེ། །དྲན་དང་ཤེས་བཞིན་ཉམས་པས་བསད། །དྲན་དང་ཤེས་བཞིན་རྟག་ཏུ་སྲུང་། ཞེས་ཟེར་ནས་ཤི་སྐད། དཔེ་དེ་བཞིན་དྲན་པ་ཉམས་པས་ཆོས་ཀུན་འཇིག་ཟློཔར་འགྱུར་པས་དྲན་པ་ཧྲིལ་གྱིས་བསྒྲིམ་ལ་བསྒོམ། །བར་དུ་གླང་པོ་ཆེ་སེམས་ཅན་ཅང་ཤེས་པ་ཡིན་པས། ལེགས་པ་ཡུལ་ནས་ལམ་ལ་འགྲོ་བའི་སྐབས་ཅུང་ཟད་མ་བྱུང་བའི་ཚེ་ལྕགས་ཀྱུ་སོགས་ཀྱིས་བཏབ་པས་ལམ་དུ་ཆུད་འགྲོ། ལེགས་པར་འགྲོ་བའི་སྐབས་ད་དུང་བསྡུས་ནས་གང་མིན་དུ་འགྱུར་བ་བཞིན་དང་། ཐ་མ་གཟིངས་ཏེ་རྒྱ་མཚོ་ལས་ཉིན་ལམ་གཅིག་གཉིས་བར་ཕུག་རོན་སོགས་བཅའ་ག་ལེགས་པོ་མ་བྱས་ན་སླར་ལོག་འགྲོ། དེ་ནས་བཅའ་ཁ་མ་བྱས་ཀྱང་འདབ་ཆགས་ཉམ་ཆུང་བ་དང་། གཤོགས་རྩལ་ཟད་པས་ཕྱོགས་ཐམས་ཅད་ནས་བསྐོར་ནས་གྲུ་གཟིངས་ལ་བབས་པ་བཞིན་ཡེངས་དང་མ་ཡེངས་མེད་
པར་ཆོས་ཉིད་ཀློང་དུ་གྱུར་ན་རྣམ་རྟོག་རང་གྲོལ་ལ་འགྲོ་བའོ། །དེས་ན་དཔེ་དོན་འདི་རྣམས་ལ་ལེགས་པར་དཔྱད་ནས་ཉམས་སུ་བླང་བར་བྱའོ། ༈ །གཞི་ལམ་འབྲས་བུའི་དྲིས་ལན་གྱི་ས་བོན་ཤིན་ཏུ་བསྡུས་པ་དགེ །ལགས་རིན་པོ་ཆེར། རིང་མོའི་དུས་ནས་གཞི་ལམ་འབྲས་བུའི་དྲི་བ་རིན་པོ་ཆེའི་ཅོད་པན་སྤྱི་བོར་སྩལ་བས་སྐལ་པ་ཤིན་ཏུ་བཟང་ནའང་། གུས་པ་ཧ་ཅང་མི་མཁས་ཤིང་མ་སྦྱངས་པས་དྲི་བ་རང་གི་དངོས་བསྟན་ཙམ་གྱི་དོན་ཡང་མ་གོ་བར་ནོར་སྐྱོང་གི་མདུན་དུ་རྩྭ་བཞག་པ་ལྟར་གྱུར་ན་ལན་ལྡོན་པ་ལྟ་ཅི་སྨོས། འོན་ཀྱང་སྐྱེས་བུ་དམ་པའི་བསྒོ་བ་རྣར་གཟོན་བགྱིད་པའང་ཕོངས་ནས་གང་དྲན་ཨཱི འཛེམ་མེད་དུ་ས་བོན་ཙམ་ཞུ་ན། སྤྱིར་གཞི་ནི་སྦྲ་ནའི་སྒྲ་ལས་དྲངས་ན་གཞི་དང་། རྟེན་དང་། གནས་སོགས་ལ་འཇུག་པས་ལམ་འབྲས་ཀྱི་རྟེན་དུ་གྱུར་པ་ཞིག་ལ་ངོས་འཛིན་ཕྱིར། འདི་ར་ཟུང་འཇུག་འདུས་མ་བྱས་པའི་ཡེ་ཤེས་རྒྱུན་ཆགས་པ་ལ་བཞེད། ལམ་ནི། མཱ་ན་ཞེས་པའི་སྒྲ་ལས་དྲངས་ན་རྗེས་སུ་ཚོལ་བར་འཇུག་པས། འབྲས་བུ་རྗེས་སུ་ཚོལ་བས་ན་ལམ་དང་། དེ་ལའང་དམིགས་ཡུལ་གྱི་འབྲས་བུ་གསུམ་ལ་དེ་དང་རྗེས་སུ་མཐུན་པའི་ལམ་གསུམ་དུ་འགྱུར་བ་ལས། འདིར་རེ་ཞིག་རྫོགས་བྱང་ཆེན་པོའི་འབྲས་བུར་དམིགས་པ་ལ། ཐབས་ཤེས་རྒྱ་ཆེ་བ་དང་ཟབ་པ་དག་གིས་ཁྱད་པར་དུ་བྱས་པ་ལ་འདོད།
འབྲས་བུ་ནི། ཕཱ་ལ་ཞེས་པའི་སྒྲ་ལས་དྲངས་ན་རྫོགས་པ་སྟེ། ལམ་གྱི་བྱ་བ་ཡོངས་སུ་རྫོགས་པ་ལ་འཇུག་པས། འདིར་སྤངས་རྟོགས་ཕྲིན་ལས་མཐར་ཕྱིན་པའི་གོ་འཕང་ལ་འཇོག །དེ་ལྟར་སྤྱིར་ངེས་པས་སྐབས་དོན་བྱེ་བྲག་ཏུ། ༈ །།གཞིའི་སྐབས། གཤེགས་སྙིང་ལ་ཀུན་གཞིའི་སྒྲས་སྨོས་པ་ནི་རེ་ཞིག་དྲང་བའི་དབང་དུ་མཛད། བདེ་གཤེགས་སྙིང་པོ་ནི་ས་བོན་གྱི་ཆ་ནས་འཇོག །ཆོས་དབྱིངས་ཡེ་ཤེས་ནི་སྟོང་པའི་ལྡོག་པ་དང་། རང་རིག ་གསལ་བའི་ལྡོག་ཆ་ནས་དབྱེ། །བདེན་གྲུབ་ནི་འགྱུར་བ་མེད་པའི་ཆ་ནས་བཏགས། མ་རིག་པ་གཞོམ་དུ་མེད་པའང་དྲི་མ་དང་ལྷན་ཅིག་མི་འདུ་བས་བརྗོད། ཟུང་འཇུག་འདུས་མ་བྱས་པ་ནི་ཁས་ལེན་པའི་གནས་ལུགས་ཀྱི་མཐར་ཐུག་ཏུ་འཇོག །ལུང་མ་བསྟན་ནི་རང་གི་ངོ་བོ་འདུས་མ་བྱས་པའི་ཕྱིར་ལས་མིན། དེ་མ་ཡིན་པས་དགེ་སྡིག་གང་དུའང་མི་འགྱུར་བའི་ཕྱིར་བཏགས། རང་བཞིན་གནས་རིགས་འདུས་མ་བྱས་པ་ནི་དངོས་དང་། འདུས་བྱས་ནི་རྒྱས་འགྱུར་ལ་དེར་བཏགས། དེ་ལྟར་ན་འཐད་མིན་དང་དྲང་ངེས་སོགས་ཅིར་འགྱུར་ཇི་སྐད་སྨོས་པ་རྣམས་ཀྱིས་དགོངས་མཆི། མདོ་སྔགས་སོ་སོར་དགོངས་གཞི་གཅིག་ཀྱང་འཆད་ཚུལ་མི་འདྲ་བ་བག་རེ་ཡོད་པ་གཞིར་བཅས། གནས་རིགས་ཟུང་འཇུག་འདུས་བྱས་དང་འདུས་མ་བྱས་གཉིས་སུ་མ་ངེས་གསུངས་པའང་མཁས་པའི་རྣམ་དཔྱོད་
ཀྱི་འཕྲུལ་ཆེན་པོར་གོ་སྟེ། ཇི་སྐད་དུ། འདུས་བྱས་རབ་ཏུ་མ་གྲུབ་པས། །འདུས་མ་བྱས་ཀྱང་ཇི་ལྟར་གྲུབ། །ཅེས་པ་ལྟར་རང་བཞིན་གནས་རིགས་འདུས་བྱས་པ་ཡིན་ན། འདུས་མ་བྱས་ཀྱང་མ་ཡིན་ཏེ། འདུས་མ་བྱས་དང་འདུས་བྱས་ཕན་ཚུན་ལྟོས་གྲུབ་ཡིན་པའི་ཕྱིར། དེས་ན་བསམ་གྱིས་མི་ཁྱབ་པའོ། །འོ་ན་རང་ལུགས་འདུས་མ་བྱས་སུ་ཁས་བླངས་པ་ཉམས་པར་འགྱུར་རོ་སྙམ་ན། དེ་ནི་དཔྱད་པ་དང་། སྔ་མ་ནི་ཤིན་ཏུ་དཔྱད་པའི་གནས་སྐབས་ལ་ལྟོས་ཕྱིར་འགལ་བ་ཅུང་ཟད་ཙམ་ཡང་མེད་དོ། །དེས་ན་འཇམ་མགོན་བླ་མའི་ལེགས་བཤད་གནས་སྐབས་གསུམ་དུ་དབྱེ་བ་འདི་ནི་ཀུན་ལ་གཅེས་པའི་ལྡེའུ་མིག་གོ། ༈ །།ལམ་གྱི་སྐབས་མེད་དགག་ནན་འཛིན་ཀྱང་རེ་ཞིག་ལས་དང་པོ་པས་སྟོང་ཉིད་དོན་སྤྱིའི་རྣམ་པས་ཡིད་ལ་བྱེད་པའི་ཚེ་འགལ་བ་མེད། རིག་ཚོགས་ཀྱི་དགོངས་པ་ཕྱོགས་གཅིག་པའང་དེ་ཀ་ལས་མ་འདས། མ་ཡིན་དགག་ནི་མེད་དགག་གི་ཞེན་པ་སེལ་བའི་ཆེད་དུ་སྟེ། སྤྲོས་བྲལ་དང་རྟེན་འབྲེལ་ལའང་དེས་ཁྱབ། དམིགས་བསལ་བདེན་གྲུབ་ཏུ་སྒྲུབ་པ་སོགས་ནི་ཉམས་མྱོང་ཙམ་ལ་དགོངས་མཆི། ཟུང་འཇུག་ཅེས་པ་གཙོ་ཆེར་སྔགས་ཀྱི་ཆོས་སྐད་ཡིན། སྤྲོས་བྲལ་ནི་སྤྱིར་བཏང་། འཛིན་མེད་བརྗོད་པ་ལ་རབ་ཏུ་མི་གནས་པ། ཡིད་ལ་མི་བྱེད་པ་སོགས་ནི་སྤྲོས་བྲལ་དུ་ཞེན་པ་སྤོང་པའི་ཆེད་ལགས། འོན་
ཀྱང་ནང་གསེས་སུ་དབྱེ་བ་མང་། མཐའ་བཞི་ལས་གྲོལ་དང་། སྤྲོས་བྲལ་ནི་ཚིག་རྒྱས་བསྡུས་ཙམ་དུ་བས་སོ། །དེས་ན་རང་ལུགས་ཕར་ཕྱིན་གྱི་སྐབས་སུ་མཐའ་བཞི་སོགས་སྤྲོས་པ་མཐའ་དག་ལས་འདས་པ་དང་། སྔགས་སུ་བརྗོད་བྲལ་ཟུང་འཇུག་འདུས་མ་བྱས་པའི་ཡེ་ཤེས་རྒྱུན་ཆགས་པར་བཞེད་ཀྱང་། བཤད་པ་དང་ཉམས་མྱོང་གི་ངོས་སྐལ་ལས་དོན་གཅིག་ཏུ་འབབས་པའི་འཐད་པ་རྒྱ་ཆེར་སྤྲོར་ཡོད། ཡུལ་སྤྲོས་བྲལ་དང་། ཡུལ་ཅན་ཡེ་ཤེས་གཉིས་ཇི་སྲིད་གཟུང་འཛིན་དུ་སྣང་བ་དེ་སྲིད་ཡེ་ཤེས་ལྟ་བ་མིན་པར་བཞེད་དེ། མིག་གིས་གཟུགས་ལ་ལྟ་བའི་ཚེ་གཟུགས་ཉིད་ལྟ་བར་འཇོག་གི་མིག་ལྟ་བར་མི་འཇོག་པ་བཞིན་ནོ་སྙམ་དུ་དགོངས། མཐར་ཐུག་ཡུལ་ཡུལ་ཅན་ནམ་ཤེས་བྱ་དང་ཤེས་པ་རོ་གཅིག་པའི་སྐབས་སུ་ནི་དེ་འདྲའི་རྣམ་བཞག་བྱར་མེད། འོན་ཀྱང་མངོན་པ་ལས་ཤེས་རབ་དང་ལྟ་བ་གཅིག་ཏུ་བཞེད་པ་ལྟར་། ན་སྔ་མ་ལའང་དཔྱད་བྱར་ཡོད་དེ་ཞིབ་ཏུ་དགོངས་འཚལ་ལོ།། ༈ །།འབྲས་བུའི་སྐབས་སུ། སྤྱིར་འཆད་ཚུལ་མང་བ་བཀའ་ཕེབས་ལྟར་ལགས་རུང་། རང་ལུགས་ཀུན་མཁྱེན་ཆེན་པོའི་སྡོམ་གསུམ་ཁ་སྐོང་དུ་ལེགས་པར་གཏན་ལ་ཕབས་པའི་དོན་འགྲེལ་པ་དག་གིས་བཀྲལ་བ་ལས་ལྷག་དོན་ཞུ་རྒྱུ་མ་མཆིས་མོད། དེ་ལའང་འགལ་སྤོང་སོགས་ཞིབ་ཆའི་མཐའ་དཔྱོད་དགོས་པ་མང་ནའང་རེ་ཞིག་མ་སྤྲོས་སོ། །ཞེས་
པའང་མང་དུ་ཐོས་ཀྱང་བསམ་སྒོམ་གྱིས་དབེན་པའི་ཀུན་རྨོངས་མཉྫུགྷོ་ཥས་རང་བློར་གང་དྲན་གྱི་ས་བོན་དཀྱུས་གཅིག་ཏུ་མགྱོགས་པར་བྲིས་ཏེ་ཕུལ་བ་དགེ། ༈ །།ཇི་ཕེབས་བཀའ་འདྲི་གནང་ལན་མདོ་ཙམ། ཕུན་སུམ་ཚོགས་ཞེས་པའི་གསུམ་ནི་མང་ཚིག་སྤྱི་སྒྲ་ཙམ་ལས་གྲངས་གནས་གསུམ་གྱི་ངེས་ཚིག་དང་སྦྱར་བ་སྔར་མ་མཐོང་། སེམས་ཅན་དང་། སྲོག་དང་། གང་ཟག་དང་། གསོ་བ་པོ། བྱེད་པ་པོ། ཤེས་པ་པོ། བདག །བདག་འཛིན་སོགས་དོན་གཅིག་ལ་སེམས་ཅན་རྣམས་ཀྱིས་བདག་ཏུ་འཛིན་པའི་འཛིན་སྟངས་ཀྱི་རྣམ་པ་ཐ་དད་པ་རེ་ཡོད་པའི་ཆ་ནས་དེ་དག་སྟོང་པར་གཏན་ལ་དབབ་པའི་ཆོས་ཀྱི་རྣམ་གྲངས་བསྐྱར་ནས་མདོ་སྡེ་རྣམས་སུ་གསུངས་པ་ལྟར་ལགས། ཨེ་མ་དངུལ་ཆུ་བས་ཀྱང་སོགས་གསུངས་པ་ཚིག་སྣ་བསྡུས་པའི་དབང་ལས། དངུལ་ཆུ་ཟ་བ་ལས་ཀྱང་འཚེར་གསུངས་པ་མིན་ནམ་སྙམ་པ་ལས་དེའི་རྒྱུ་མཚན་དམིགས་བསལ་མ་ཐོས། ཨརྒྱུ་མཆོད་ཡོན་ལ་འཇུག་ཅིང་། དེའང་ཆང་དང་འོ་མ་བསྲེས་པ་དེ་ཕྱི་གཙང་རིགས་ཀྱི་ལྷ་ལ་མཆོད་དུས་ཨགྷཾ་དཀར་པོ་ཟེར། ཆང་དང་རཀྟ་བསྲེས་པ་ཨཧཱུྃ་དམར་པོ་ཟེར་ཞིང་དྲེགས་བྱེད་ནག་ཕྱོགས་ལ་འགྲོ་བ་ལགས། དྲང་སྲོང་རི་ཊིའི་ལོ་རྒྱུས་ཀྱི་ལུག་ཐུག་པོ་ཟེར་བ་ཕོ་ལུག་འོག་ཡོད་ཐུག་རེ་ཟེར་བ་དེ་ཡིན་ལ། གཅན་ཅེས་པ་སྡེར་ཆགས་སམ་རྔོན་པ་དང་།
གཟན་ཅེས་པ་ཤ་ཁྲག་གི་གཟན་ཚོལ་བ་ལ་འཇུག་པས་ཡིག་སྡེབ་ལ་གཅན་གཟན་བྲི་དགོས་པ་ལགས། ཅེ་སྤྱང་རྒྱ་གར་དུ་ཅུང་འདྲ་མིན་ཡོད་འདུག །བོད་དུ་སྤྱང་ཀི་དང་གཅན་གཟན་སྤྱི་ལ་འཇུག་པའི་སྐབས་ཀྱང་སྣང་། སྟོད་འགྲེལ་དྲུག་ཅུའི་ལོ་མིང་རྒྱུ་མཚན་གང་ལས་བཏགས་པའི་སྒྲ་བཤད་མ་མཐོང་ཡང་། ལོ་དེར་མིང་དེ་དང་མཐུན་པའི་འབྲས་བུ་འབྱིན་པ་ནི་བཤད་འདུག་པས་དེ་འདྲའི་དོན་སྦྱར་ཡིན་ནམ། སེ་ཞིག་སོགས་ནི་རྒྱ་ནག་སྐད་ཟུར་ཆག་པ་ཁོ་ན་ཡིན་ཏེ་ཟུར་བརྒྱུད་མིང་པཱ་ཀ་ལ་སྤར་ཁ་ཟེར་བ་བཞིན་ནོ། །གྲོ་ནི་དངོས། ཇུ་ཙེ་ཁྲེ་དང་ཙི་ཙི། དཀར་མོ་ནས་འབྲས་ལ་ཟེར་བ་ལགས། སྡིག་བཤགས་མནའ་བཤགས་འབུམ་ཆུང་སོགས་ཇི་གསུང་ལྟར་ཁོ་ན་ལགས་པས་མཁས་པ་ཚད་མ་རྣམས་ཀྱིས་བཀའ་འགྱུར་གྲལ་ནས་ཕུད་པའང་དེ་དོན་ལགས། རྡུལ་མུན་སྙིང་སྟོབས་གསུམ་ནི་རིམ་བཞིན་འདོད་ཆགས་གཏི་མུག་ཞེ་སྡང་གསུམ་ལ་ཟེར། འཁོར་ལོ་དྲུག་ནི་གཙུག་ཏོར། སྤྱི་མགྲིན། སྙིང་ལྟེ་གསང་གནས་བཅས། ཀུན་དགའི་རེ་མིག་ནང་། ཨ་ལཾ་བུ་ཀ་བོད་སྐད་བསྒྱུར་མ་བཏུབ་པ་ཡིན་འདུག །དོན་དྲག་ཤུལ་ལྟ་བུ་ཞིག་ལགས། གཞན་རྣམས་ལྟས་ཆེན་པོ། རྩ་བ་ནས་བཏོན་བྱེད། གཞོན་ནུ་ལྟ་བུ་ཟེར་བ་ལགས། །གནམ་དཀྱིལ་དགུ་ཚིགས་ཟེར་བ་འདི་ལ་ཕྱི་པའི་གཞུང་དུ་གཏན་ཚིག་དང་དེའི་ལྷ་བསྒྲུབ་རྒྱུ་སོགས་ཡོད་པར་
སྣང་། ནང་པའི་གཞུང་ཚད་ལྡན་རྣམས་སུ་མ་བཤད། སྐར་མདས་སེམས་ཅན་གསོད་པ་དེ་བཞིན། གློག་གམ་ཐོག་དང་། མཁའ་ལྡིང་གིས་གནོད་པ་བསྐྱལ་བ་དེ་རིགས་ཡུལ་དང་དུས་ཁ་ཅིག་ཏུ་འབྱུང་བར་སྣང་། མུ་ཐི་ལ་རིན་པོ་ཆེའི་རིགས་ཀྱི་བྱེ་བྲག་ཏུ་སྣང་ལགས།།