རྟེན་འབྲེལ་སྲུང་བའི་བྱིན་རླབས་བྱ་ཚུལ་མན་ངག་དང་བཅས་པ་ཕན་བདེའི་ཆར་སྤྲིན།
༄༅། །རྟེན་འབྲེལ་སྲུང་བའི་བྱིན་རླབས་བྱ་ཚུལ་མན་ངག་དང་བཅས་པ་ཕན་བདེའི་ཆར་སྤྲིན་ཞེས་བྱ་བ་བཞུགས་སོ།། །།
༄༅། །ཨོཾ་སྭ་སྟི་སིདྡྷཾ། །སྟོང་དང་རྟེན་འབྲེལ་དབྱེར་མེད་སྙིང་པོའི་དོན། །མངོན་གྱུར་ཤཱཀྱའི་གཙོ་ལ་གུས་བཏུད་ནས། །གཟུངས་སྔགས་ཟབ་མོའི་བྱིན་རླབས་མན་ངག་བཅས། །ཕན་བདེའི་ཆར་འབེབས་འདོད་དགུའི་སྤྲིན་ཆེན་སྤྲོ། །འདི་ལ་གསུམ། བྱིན་རླབས་ཀྱི་ཆོ་ག །རྒྱུན་གྱི་ཉམས་ལེན། ལས་སྒྲུབ་པའི་རིམ་པའོ། །དང་པོ་ལ་གཉིས། སྦྱོར་བ་སློབ་དཔོན་གྱི་བྱ་བ་དང་། དངོས་གཞི་སློབ་མ་ལ་བྱ་བའོ། །དང་པོ་ནི། གནས་གཙང་ཞིང་དབེན་པར་ཐུབ་པའི་དབང་པོའི་སྐུ་རིང་བསྲེལ་གྱི་སྙིང་པོ་ཅན་ནམ། རས་བྲིས་ཞལ་ཤར་དུ་ཕྱོགས་ཏེ་བཀྲམ་པའི་སྤྱན་སྔར་མེ་ཏོག་ལ་སོགས་པའི་མཆོད་པ་ལྔ་དང་། ཕྱོགས་སྐྱོང་ལ་འབུལ་རྒྱུའི་གཏོར་མ་
དཀར་ཟླུམ། ཉེ་ལོགས་ཅི་བདེ་བར་སྦྱོང་ཆས། རྟེན་འབྲེལ་གྱི་རྫས་སོགས་འོག་ཏུ་དགོས་པའི་ཡོ་བྱད་ཐམས་ཅད་འདུ་བྱ། དེ་ནས་སློབ་དཔོན་རང་ཉིད་ཁྱིམ་པ་ཡིན་ན་གསོ་སྦྱོང་གི་སྡོམ་པ་བླང་། གང་ལྟར་ཡང་ཁྲུས་དང་གཙང་སྦྲ་ལ་གནས་པས་སྐྱབས་འགྲོ་ཅི་ནུས་དང་། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་རྟེན་འབྲེལ་ཟབ་མོའི་སྒོམ་བཟླས་ཉམས་སུ་བླང་བར་བགྱིའོ། །ལན་གསུམ་གྱིས་སེམས་བསྐྱེད། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ། རང་གི་མདུན་དུ་སེང་གེ་ཆེན་པོ་བརྒྱད་ཀྱིས་བཏེག་པའི་རིན་པོ་ཆེའི་ཁྲི་པདྨ་དང་ཟླ་བའི་གདན་གྱི་སྟེང་དུ་བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་སྐུ་མདོག་གསེར་གྱི་ལྷུན་པོ་ལ་ཉི་མ་ཤར་བ་ལྟ་བུ་མཚན་དཔེས་སྤྲས་ཤིང་། ཕྱག་གཡས་ས་གནོན། །གཡོན་མཉམ་གཞག །ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། ན་བཟའ་ཆོས་གོས་རྣམ་གསུམ་གསོལ་ཞིང་འགྲོ་བ་ཀུན་ལ་བུ་ལྟར་གཟིགས་པའི་ཐུགས་རྗེ་ཅན་སངས་རྒྱས་བྱང་སེམས་ཐམས་ཅད་ཀྱིས་བསྐོར་བ་མངོན་སུམ་ལྟ་བུར་གསལ་བར་གྱུར། ཐལ་སྦྱར་དང་བཅས་གདངས་ཡོད་མེད་གང་རུང་གིས། སྐུར་གྱུར་པ་ནི་ཐམས་ཅད་ལ། །མཚན་མཆོག་གསུམ་ཅུ་གཉིས་མངའ་ཞིང་། །རྫོགས་པའི་སངས་རྒྱས་གྲགས་ལྡན་པ། །རྒྱལ་བ་ཀུན་ལ་ཕྱག་འཚལ་ལོ། །རྫོགས་སངས་གང་དུ་བལྟམས་པ་དང་། །གང་དུ་བྱང་ཆུབ་ལ་རེག་དང་། །ཞི་བའི་འཁོར་ལོ་བསྐོར་བ་དང་། །ཟག་མེད་མྱ་ངན་འདས་ཕྱག་འཚལ། །བདེ་གཤེགས་གང་དུ་བཞུགས་པ་དང་། །འཆགས་པ་དང་ནི་བཞེངས་པ་དང་། །སེང་གེ་ལྟ་བུར་གཟིམས་པ་ཡི། །གནས་དེ་ལ་ཡང་ཕྱག་འཚལ་ལོ། །ཞེས་ཕྱག་བྱ། མཆོད་པ། ཨོཾ་བཛྲ་ཨམྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ་ཀྱིས་བསང་། སྭ་བྷ་ཝས་སྦྱང་། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ༀ་ཞུ་བ་ལས་
བྱུང་བའི་མེ་ཏོག །བདུག་སྤོས། མར་མེ། དྲི་ཆབ། ཞལ་ཟས་རྣམས་དྭངས་ཤིང་ཐོགས་པ་མེད་པར་གྱུར། ཞེས་དང་། སོ་སོའི་ཕྱག་རྒྱ་བཅས། ཨོཾ་པུཥྤེ། དྷུ་པེ། ཨཱ་ལོ་ཀེ། གནྡྷེ། །ནཻ་བི་དྱ་ཨཱཿཧཱུྃ། ཞེས་བྱིན་གྱིས་བརླབས་ནས། ཨོཾ་སརྦ་ཏ་ཐཱ་ག་ཏ་ཤཱཀྱ་མུ་ནི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་ས་ར་ཎ་ས་མ་ཡེ་ཧཱུྃ། ཞེས་པས་མཆོད་ཡོན་ཕུལ་བ་སྔོན་དུ་འགྲོ་བས། པུ། །དྷ་པེ། ཨཱ་ལོ་ཀེ། གནྡྷེ། ནེ་ཝི་དྱ་རྣམས་སྦྱར་ཏེ་མཆོད་པ་ལྔས་མཆོད། ཐལ་མོ་སྦྱར་ནས། དཀོན་མཆོག་གསུམ་ལ་བདག་སྐྱབས་མཆི་སོགས་ཡན་ལག་བདུན་པ་ཚར་གསུམ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རྒྱུ་དང་འབྲས་བུའི་དགོས་པ་ཕུན་སུམ་ཚོགས་པ་དང་ལྡན་པ། ཆོས་ཐམས་ཅད་ཁོང་དུ་ཆུད་པ་དང་ལྡན་པའི་སངས་རྒྱས་བཅོམ་ལྡན་འདས་རྣམས་ཀྱི་རྟེན་ཅིང་འབྲེལ་བར་འབྱུང་བའི་བྱིན་རླབས་ཀྱིས་བདག་ལ་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ། དེ་ནས་བཅོམ་ལྡན་འདས་ཀྱི་གསུང་གི་རྗེས་ཟློས་བྱེད་པར་བསམ་
སྟེ། ཨོཾ་ཡེདྷ་རྨ་ཧེ་ཏུ་པྲ་བྷ་བཱ་ཏེ་ཏུནྟེཥཱནྟ་ཐཱ་གཏོ་ཧྱ་བ་དཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎཿསྭཱ་ཧཱ། ཞེས་པ་ལན་གསུམ་གྱིས་སྔགས་ཀྱི་སྒོ་ནས་རང་གིས་གསོལ་བ་འདེབས་པའི་ཚིག་གིས་གསོལ་བ་བཏབ། དེའི་རྗེས་ལ་བཅོམ་ལྡན་འདས་ཀྱི་གསུང་གི་རྟེན་འབྲེལ་སྙིང་པོ་ལན་གསུམ་གྱི་རྗེས་ཟློས་བྱས་པར་བསམས་ལ། རྟེན་འབྲེལ་སྙིང་པོ་ཅི་ནུས་མཐར། བཅོམ་ལྡན་འདས་བདག་དང་སེམས་ཅན་ཐམས་ཅད་ལ་བྱིན་གྱིས་བརླབ་ཏུ་གསོལ། ཞེས་བརྗོད། གཉིས་པ་དངོས་གཞི་སློབ་མ་ལ་བྱ་བའི་རིམ་པ་ནི། སློབ་མ་རྣམས་ཕྱི་རོལ་ཏུ་ཁྲུས་བྱས། ནང་དུ་རང་རང་གི་གྲལ་ལ་འཁོད་ནས་མེ་ཏོག་བཀྱེ་བསྡུ་གྲུབ་རྗེས། སློབ་དཔོན་གྱིས་སེམས་བསྐྱེད་གསལ་གདབ་པ་སོགས་སྔོན་དུ་འགྲོ་བས། དེ་ལ་འདིར་ཡང་དག་པར་རྫོགས་པའི་སངས་རྒྱས་རྣམས་ཀྱིས་གདུལ་བྱ་སོ་སོའི་སྐལ་བ་དང་ འཚམས་པར་དམ་པའི་ཆོས་ཀྱི་བདུད་རྩི་བསམ་གྱིས་མི་ཁྱབ་པ་ཞིག་གསུངས་པ་ཐམས་ཅད་ཀྱང་བསྡུ་ན་ཐེག་པ་ཆེ་ཆུང་གཉིས་སུ་འདུ་བ་ལས་འདིར་ཐེག་པ་ཆེན་པོ་ཡིན། ཐེག་ཆེན་ལའང་རྒྱུ་འབྲས་ཀྱི་ཐེག་པ་གཉིས་ལས་འདིར་འབྲས་བུ་གསང་སྔགས་རྡོ་རྗེ་ཐེག་པ་ཡིན། དེ་ལའང་རྒྱུད་སྡེ་བཞིར་བཞུགས་པ་ལས་འདིར་བྱ་བའི་རྒྱུད་ཡིན། དེ་ལའང་ནང་གསེས་སུ་མདོ་སྡེ་རྟོག་པའི་རྒྱུད་དང་། བྱ་བའི་
རྒྱུད་གཉིས་ལས་འདིར་མདོ་སྡེ་རྟོག་པའི་རྒྱུད་ཀྱི་ནང་ཚན། རྟེན་ཅིང་འབྲེལ་བར་འབྱུང་བའི་སྙིང་པོའི་གཟུངས་དང་། ཆོ་ག་ཞིབ་མོའི་རྗེས་སུ་འབྲངས་ཏེ་རྣལ་འབྱོར་གྱི་དབང་ཕྱུག་ཆེན་པོ་འགྲན་ཟླ་དང་བྲལ་བ། མཁས་པ་རྣམས་ཀྱི་གཙུག་གི་ནོར་བུ་དཔལ་བིརླ་པས་ལེགས་པར་བཀྲལ་ཞིང་། གངས་ཅན་གྱི་ལྗོངས་འདིར་ཡོངས་རྫོགས་བསྟན་པའི་མངའ་བདག་རྗེ་བཙུན་ས་སྐྱ་པ་ཡབ་སྲས་ལ་བཀའ་བབས་པའི་རྟེན་འབྲེལ་སྙིང་པོའི་སྲུང་བའི་བྱིན་རླབས་ཀྱི་ཆོ་ག་ཟབ་མོ་སྒྲུབ་པ་ལ། ཐོག་མར་གཟུངས་ཀྱི་གླེང་གཞི་དང་གཞུང་གི་དོན་ཅུང་ཟད་གསོལ་ན། སྔོན་གྱི་ཚེ་བདག་ཅག་གི་སྟོན་པ་ཐུབ་པའི་དབང་པོ་སུམ་ཅུ་རྩ་གསུམ་ལྷའི་དགའ་ཚལ་དུ་སྤྱོད་ལམ་ཞི་བ་རྣམས་ཀྱི་མཆོག་རྟ་ཐུལ་ལ་སོགས་པའི་ཉན་ཐོས་ཆེན་པོ་རྣམས་དང་། འཕགས་པ་བྱམས་པ་དང་། སྤྱན་རས་གཟིགས་ལ་སོགས་པ་བྱང་ཆུབ་སེམས་དཔའི་ཁྱུ་མཆོག་རྣམས་དང་། ཚངས་པ་དང་། སྲེད་མེད་ཀྱི་བུ་ལ་སོགས་པ་འཇིག་རྟེན་སྐྱོང་བ་རྣམས་དང་ཐབས་གཅིག་ཏུ་བཞུགས་པའི་ཚེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གིས་ལྷ་དང་བཅས་པའི་འཇིག་རྟེན་ལ་ཐུགས་བརྩེ་བས་དགོངས་ཏེ་བསོད་ནམས་ཀྱི་ཕུང་པོ་ཚད་མེད་པར་འཕེལ་བའི་ཕྱིར་བྱིན་རླབས་དང་ཕན་ཡོན་མཐའ་
ཡས་པའི་གཟུངས་འདི་ཉིད་ཞུས་པ་ན། སྟོན་པས་ཀྱང་དགྱེས་བཞིན་དུ་མཆོད་རྟེན་བྱ་བའི་ཆོ་ག་དང་བཅས་བཀའ་སྩལ་ཏེ། དེ་ཡང་ལེགས་སྦྱར་ལྷའི་སྐད་དུ་ཡེདྷ་རྨ་ལ་སོགས་པའི་གཟུངས་ཀྱི་སྔགས་ཚིག་འདི་རྣམས་བོད་སྐད་དུ། ཆོས་རྣམས་གང་དག་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །དེ་ལ་འགོགས་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུངས། །ཞེས་འབྱུང་བ་འདིས་སངས་རྒྱས་ཀྱི་གསུང་རབ་མཐའ་དག་གི་དོན་གྱི་སྡོམ་ཆེན་པོ་འཕགས་པའི་བདེན་པ་བཞི་སྟོན་པ་ཡིན་ཏེ། དེ་ཡང་ཉན་ཐོས་ཀྱི་ཐེག་པ་ལྟར་ན། སྡུག་བསྔལ་གྱི་བདེན་པ་ནི་ཁམས་གསུམ་གྱི་ཉེ་བར་ལེན་པའི་ཕུང་པོ་ལྔ་ལ་དམིགས་པའི་སྡུག་བསྔལ་གྱི་སྡུག་བསྔལ་དང་། འགྱུར་བའི་སྡུག་བསྔལ་དང་། ཁྱབ་པ་འདུ་བྱེད་ཀྱི་སྡུག་བསྔལ་ཇི་སྙེད་པའོ། །ཀུན་འབྱུང་གི་བདེན་པ་ནི་གང་ཟག་གི་བདག་ཏུ་ལྟ་བས་རབ་ཏུ་ཕྱེ་བའི་ལས་དང་ཉོན་མོངས་པ་སྟེ་སྡུག་བསྔལ་གང་ལས་སྐྱེ་བའི་ཉེར་ལེན་དུ་གྱུར་པའོ། །འགོག་པའི་བདེན་པ་ནི་ཇི་སྐད་བཤད་པའི་སྡུག་བསྔལ་རྒྱུ་དང་བཅས་པ་ལས་རྣམ་པར་གྲོལ་བའི་ལྷག་བཅས་དང་ལྷག་མེད་ཀྱི་མྱ་ངན་ལས་འདས་པའི་གོ་འཕང་ངོ་། །ལམ་གྱི་བདེན་པ་ནི་ཀུན་འབྱུང་གི་བདེན་པ་སྤོང་པའི་རྒྱུ་གང་ཟག་གི་བདག་མེད་འཁོར་དང་བཅས་པའོ། །ཐེག་ཆེན་ཕ་
རོལ་ཏུ་ཕྱིན་པ་ལྟར་ན། གཙོ་བོར་སྡུག་བསྔལ་གྱི་བདེན་པ་ཉན་རང་དགྲ་བཅོམ་དང་། ཐེག་ཆེན་སློབ་པའི་རྒྱུད་ཀྱི་སྡུག་བསྔལ་གྱི་བདེན་པ་ཕྲ་མོར་གྱུར་པ་དག་དང་། ཀུན་འབྱུང་གི་བདེན་པ་དེ་དག་གི་ཉེར་ལེན་ཆོས་ལ་དམིགས་པའི་མཚན་ཉིད་ཅན་གྱི་ཤེས་བྱའི་སྒྲིབ་པ་ཕྲ་བ་དང་། འགོག་པའི་བདེན་པ་མཐའ་གཉིས་ལས་རབ་ཏུ་བརྒལ་བའི་མྱང་འདས་དང་། ལམ་གྱི་བདེན་པ་བདག་མེད་གཉིས་འཁོར་དང་བཅས་པའོ། །རྡོ་རྗེ་ཐེག་པ་ལྟར་ན། རྒྱུད་སྡེ་འོག་མའི་སྐབས་སུ་བདེན་པ་གཞན་རྣམས་ཕལ་ཆེར་ཐེག་ཆེན་ཐུན་མོང་མ་ཡིན་པ་དང་ཚུལ་མཐུན་ཞིང་། ལམ་བདེན་ལ་ཐབས་ཀྱི་རིམ་པ་ཟབ་མོས་ཕྱེ་བས་རིམ་བཞིན་དུ་ཁྱད་པར་འཕགས་པས་ན་འབྲས་བུ་ལ་མྱུར་དུ་སྦྱོར་བ་དང་། རྣལ་འབྱོར་ཆེན་པོ་བླ་ན་མེད་པར། སྡུག་བསྔལ་ཀྱི་བདེན་པ་ཐ་མལ་གྱི་སྣང་ཞེན་དང་། གྱ་ནོམ་ལྷར་ཞེན་གྱི་རྟོག་པ། ཀུན་འབྱུང་གི་བདེན་པ་འཕོ་བའི་བག་ཆགས། ལམ་གྱི་བདེན་པ་སྨིན་གྲོལ་ཟབ་མོའི་ཐབས་ལས་སྐྱེས་པའི་ཡེ་ཤེས། འགོག་པའི་བདེན་པ་ཁ་སྦྱོར་ཡན་ལག་བདུན་ལྡན་གྱི་གོ་འཕང་སྟེ། དེ་ལྟར་ན་ཚིགས་སུ་བཅད་པ་འདི་ཁོ་ནས་མདོ་རྒྱུད་ཐམས་ཅད་ཀྱི་བརྗོད་བྱ་མཐའ་དག་དངོས་བསྟན་དང་། སྦས་དོན་གྱི་ཚུལ་གྱིས་གསལ་བར་མཚོན་པའི་ཕྱིར་ཇི་སྐད་དུ། རྟེན་ཅིང་འབྲེལ་བར་
འབྱུང་བ་འདི་ནི་དེ་བཞིན་གཤེགས་པ་རྣམས་ཀྱི་ཆོས་ཀྱི་སྐུ་ཡིན་ཏེ། སུས་རྟེན་ཅིང་འབྲེལ་བར་འབྱུང་བ་མཐོང་བ་དེས་དེ་བཞིན་གཤེགས་པ་མཐོང་ངོ་། །ཞེས་གསུངས་ལ། གཞན་ཡང་ཉན་ཐོས་དང་ཐུན་མོང་བའི་བདེན་པ་བཞི་དང་། རང་རྒྱལ་དང་ཐུན་མོང་པའི་རྟེན་འབྲེལ་བཅུ་གཉིས་དག་ཐེག་ཆེན་ཐུན་མོང་མ་ཡིན་པའི་སྟོང་པ་ཉིད་དང་། རྟེན་ཅིང་འབྲེལ་འབྱུང་ཟབ་མོ་དབྱེར་མི་ཕྱེད་པའི་བདེན་གཉིས་ཟུང་འཇུག་གི་མཚོན་ཚུལ་སོགས་མཐའ་ཡས་པར་འཆད་དུ་ཡོད་དོ། །དེ་ལྟར་ན་དེ་ལྟ་བུའི་ཟབ་པ་དང་རྒྱ་ཆེ་བའི་དམ་པའི་ཆོས་ཀུན་གྱི་སྙིང་པོར་གྱུར་བ་ལ་དད་པ་དང་ངེས་ཤེས་མཆོག་ཏུ་བསྐྱེད་ནས་ཐོག་མར་བྱིན་རླབས་ཟབ་མོ་ཞུ་བའི་ཡོན་དུ་མཎྜལ་ཕུལ། དེ་ལྟར་མཎྜལ་ཕུལ་ནས་སློབ་དཔོན་གྱིས་དམིགས་པ་རྣམས་གསལ་གདབ་པ་ནི། ཁྱེད་རང་རྣམས་ཀྱི་མདུན་དུ་སྐུ་གཟུགས་འདི་དང་ཐ་མི་དད་པའི་སེང་གེས་ཞེས་པ་ནས་མངོན་སུམ་ལྟ་བུར་གསལ་བར་གྱུར་པར་གོང་བཞིན། དེ་ལྟར་གསལ་བའི་སྤྱན་སྔར་ཁྱེད་རང་རྣམས་དང་སེམས་ཅན་ཐམས་ཅད་ལུས་ཞིང་རྡུལ་དང་མཉམ་པས་ཕྱག་བྱས་པར་མོས་ལ་ཐལ་མོ་སྦྱར་ནས་འདིའི་རྗེས་ཟློས་མཛོད། གདངས་ཡོད་མེད་གང་རུང་གིས། སྐུར་གྱུར་པ་སོགས་གོང་བཞིན། བདག་གཞན་གྱི་ལུས་ལོངས་སྤྱོད་མཆོད་པ་ལྔ་པོ་འདི་སོགས་སུ་སྤྲུལ་
ནས་ཕུལ་བའི་མོས་པ་མཛོད། མཆོད་པ་རྣམས་ཁ་གསོས་ལ། དཔོན་སློབ་ལྷན་ཅིག་པས་བསང་སྦྱང་ནས་འབུལ་བའི་བར་གོང་བཞིན། དེ་རྣམས་ཀྱི་སྤྱན་སྔར་སྡིག་པ་བཤགས་པ་ལ་སོགས་པ་ཡན་ལག་བདུན་པ་བགྱི་སྙམ་པས་འདིའི་རྗེས་ཟློས་མཛོད། དཀོན་མཆོག་གསུམ་ལ་སོགས་ལན་གསུམ། དེ་ནས་བདག་ལ་རྟེན་འབྲེལ་ཟབ་མོས་ནད་གདོན་བར་ཆད་ཞི་བར་བྱིན་གྱིས་བརླབ་ཏུ་གསོལ་སྙམ་པས་འདིའི་རྗེས་ཟློས་མཛོད། བཅོམ་ལྡན་འདས་སོགས་གོང་བཞིན། སླར་ཡང་སྔགས་ཀྱི་སྒོ་ནས་གསོལ་བ་འདེབས་སྙམ་པས་འདིའི་རྗེས་ཟློས་མཛོད། ཨོ་ཡེདྷ་རྨ་ནས་སྭཱ་ཧཱའི་བར་ཚར་གསུམ། དེ་ལྟར་གསོལ་བ་བཏབ་པས་བདག་ཅག་གི་སྟོན་པ་སོགས་སངས་རྒྱས་བྱང་སེམས་རྣམས་ཀྱིས་རྟེན་འབྲེལ་ཟབ་མོའི་དོན་སྟོན་པའི་སྔགས་གསུངས་པའི་རྗེས་ཟློས་བྱས་པར་མོས་ལ་འདིའི་རྗེས་བ ཟློས་མཛོད། གཟུངས་ཚར་གསུམ། རྟེན་འབྲེལ་གྱི་རྫས་ཤུ་དག་དཀར་པོ། བོང་ང་ནག་པོ། གུ་གུལ་ནག་པོ་རྣམས་སྦྱར་བའི་ཕྱེ་མ་ལ་སློབ་དཔོན་གྱིས་བྱིན་གྱིས་བརླབ་པ་ནི་རྟེན་སྙིང་ཉེར་གཅིག་བཟླས་ལ་མཆིལ་མ་མ་འཐོར་བར་ཕུ་བཏབ། དེ་ནས་ཁྱེད་རང་རྣམས་སྣ་བུག་གཡོན་བཀག་གཡས་ནས་རླུང་ལན་གསུམ་བྱས་པའི་དང་པོས་ཁྲག་མཁྲིས་ཀྱི་རྒྱུ་གསལ་བ་ལ་དེར་འཛིན་ཞུགས་པ། རླུང་
གི་རྒྱུ་སྟོང་པ་ལ་དེར་འཛིན་ཞུགས་པ། བད་ཀན་དང་འདུས་པའི་རྒྱུ་ཟུང་འཇུག་ལ་དེར་འཛིན་ཞུགས་པ་རྣམས་ཕྱིར་བུས། གཉིས་པས་ཁྲག་མཁྲིས་རླུང་བད་ཀན་འདུས་པ་རྣམས་བུས། གསུམ་པས་འདོད་ཆགས་ཞེ་སྡང་གཏི་མུག་གསུམ་ཀ་འདྲེས་པའི་རྣམ་རྟོག་རྣམས་བུས་པའི་མོས་པས་རླུང་རོ་ལན་གསུམ་ཕྱིར་བསལ་བའི་མཐར་ནང་དུ་འོང་མི་གཞུག་པར་ཐུབ་ཚད་ཅིག་ཕྱིར་འཇོག་པར་ཞུ། ཞེས་ བརྗོད་ལ་རླུང་འབུད་ཅིང་ཕྱིར་འཇོག་ཏུ་གཞུག །དེ་ནས་སྣ་བུག་གཡས་བཀག་གཡོན་ནས་རྫས་དུད་རྡུབ་པ་དང་ལྷན་ཅིག་ཏུ་མཆིལ་མ་མིད་པ་དང་བཅས་རླུང་ནང་དུ་ཐུབ་ཚད་བཟུང་བས། ལུས་ཀྱི་ནང་ཐམས་ཅད་ཡེདྷ་རྨའི་སྔགས་ཀྱི་ཡིག་འབྲུ་གསེར་འོད་ལྟར་འབར་བ་དང་། རྟེན་འབྲེལ་གྱི་དུད་པས་ཁེངས་པས་ཉོན་མོངས་ནད་གདོན་རྣམ་རྟོག་ཐམས་ཅད་ཞི་བའི་མོས་པ་མཛོད་བྱས་ལ། སློབ་དཔོན་གྱིས་སྤོས་ཕོར་དུ་རྫས་དུད་སྦྱར་བརྟེན་སྙིང་བཟླ་ཞིང་སློབ་མ་རེ་རེ་ནས་བདུག །སློབ་མས་རླུང་རྡུབ་འཛིན་བྱ། དེ་བརྟན་པའི་ཕྱིར་ཁྱེད་རང་རྣམས་མེ་ཏོག་འཐོར་བཞིན་པས་འདིའི་རྗེས་ཟློས་ལན་གསུམ་མཛོད། བཅོམ་ལྡན་བདག་ལ་སོགས། སློབ་དཔོན་གྱིས་ཁྱེད་རང་རྣམས་ཀྱི་སྤྱི་བོར་མེ་ཏོག་བཞག་ནས་བརྟན་པར་བྱས་པའི་མོས་པ་མཛོད། བཅོམ་ལྡན་འདི་ལ་སོགས་དང་། ཡང་དག་པར་
རྫོགས་པའི་སངས་རྒྱས་ཀྱི་རྟེན་ཅིང་འབྲེལ་བར་འབྱུང་བའི་བྱིན་རླབས་ཀྱིས། རྡོ་རྗེ་སློབ་མ་འདིའི་ཉོན་མོངས་ནད་གདོན་རྣམ་རྟོག་ཐམས་ཅད་སྲུང་དུ་གསོལ། ཞེས་བརྗོད། དེ་ནས་གཏོར་ཐེབ་གསུམ་དུ་ཟན་རིལ་མཐེབ་རྡོག་ལས་ཆེ་ཙམ་དཀྱིལ་ཀྱོང་མོར་དཀར་རྒྱན་བཏབ་པ་རེ་དང་། ཆངས་བུ་རེ་བཅུག །ཆུས་སྦྱང་། ལས་ཀྱི་རྡོ་རྗེས་སློབ་མ་རྣམས་ལ་གཡས་སྐོར་གསུམ་དང་། སློབ་དཔོན་གྱིས་སྐྱབས་སྦྱིན་མཐར་མཆོག་སྦྱིན་སེ་གོལ་དང་བཅས། ཨོཾ་སརྦ་བིགྷཱན་སོགས་དང་། རྡོ་རྗེ་སློབ་མ་འདི་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ལོག་འདྲེན་ཐམས་ཅད་འདིར་མ་གནས་པར་གཞན་དུ་སོངས་ཤིག །ཅེས་དང་། སྦྱོང་ཆས་ཕྱིར་དོར། གུ་གུལ་གྱིས་བདུག །ཉུངས་ཀར་གྱིས་བྲབ། རྡོ་རྗེ་ དྲིལ་བུ 
་གསོལ་དཀྲོལ་བཅས་ཨམྲྀཏ་སོགས་བརྗོད། དེ་ནས་ཕྱོགས་སྐྱོང་གཏོར་མ་ཨམྲྀ་ཏས་བསང་། སྭ་བྷ་ཝས་སྦྱང་། སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ལྷའི་བདུད་རྩི་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ་ལན་གསུམ། ལག་གཡས་ཁུ་ཚུར་ལ་མཛུབ་མོ་བཀུག་པའི་ཕྱག་རྒྱ་བསྐོར་ཏེ། ཨོཾ་ད་ཤ་དི་ལོ་ཀ་པཱ་ལས་པ་རི་ཝཱ་ར་ཨཱ་ཀར་ཡ་ཛས་མགྲོན་དགུག །ཐལ་མོ་ཁོང་སྟོང་མཐར་སེ་གོལ་བཅས་
གོང་གི་སྔགས་ཀྱི་ས་པ་རི་ཝཱ་རའི་མཐར་ཨོཾ་ཨ་ཀཱ་རོ་བཏགས་པ་ལན་གསུམ་གྱིས་གཏོར་མ་ཕུལ། རྡོ་རྗེ་ཐུགས་ཀར་བཟུང་ཞིང་
དྲིལ་བུ ་ཆིག་རྡུང་གིས། འཇིག་རྟེན་སྐྱོང་བ་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་སོགས་ཀྱིས་ཕྲིན་ལས་བཅོལ་ལ་གཏོར་མ་ཕྱིར་བསྐྱལ། འོ་དེས་རྟེན་འབྲེལ་ཟབ་མོའི་བྱིན་རླབས་གསན་པ་ཡིན་པས་ཉིན་རེ་བཞིན་རྟེན་འབྲེལ་སྙིང་པོ་ཅི་ནུས་བཟླ་བ་ས་དམ་ཚིག་དང་སྡོམ་པའི་ཚོགས་ལ་བསྲང་བསོམ་བགྱིད་སྙམ་པས་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས། གཏང་རག་གི་མཎྜལ། ལུས་ལོངས་སྤྱོད་དབུལ་བ། དགེ་བ་བསྔོ་བ་། རྣམས་སྤྱི་ལྟར་བྱས་ལ་སློབ་མ་རྣམས་རང་གནས་སུ་བཏང་། དེ་ནས་སློབ་དཔོན་གྱིས་མདུན་བསྐྱེད་དང་དབྱེར་མེད་དུ་བཞུགས་པར་བསམས་ལ་སྟོང་པ་དང་རྟེན་འབྱུང་ཟབ་མོའི་དོན་ལ་མཉམ་པར་བཞག་ཅིང་། བསྔོ་སྨོན་ཤིས་བརྗོད་ཇི་ལྟར་རིགས་པ་བྱ་བ་ལས་རྗེས་ཆོག་གཞན་མི་དགོས་སོ། །གཉིས་པ་རྒྱུན་གྱི་ཉམས་ལེན་ནི། དེ་ལྟར་བྱིན་རླབས་ཟབ་མོ་ལེགས་པར་ཐོབ་ནས། ཉིན་ཞག་ཕྲུག་རེའི་ཐོ་རངས་ཀྱི་དུས་སུ་གྲུབ་ན་གོང་དུ་བཤད་པའི་སློབ་དཔོན་གྱི་བྱ་བའི་སྐབས་ལྟར་སྐྱབས་འགྲོ་ནས་བཟླས་པའི་མཇུག་གི་གསོལ་འདེབས་བར་ཉམས་སུ་བླངས་ལ། མདུན་གྱི་ལྷ་མི་དམིགས་པར་
བསམས་ཏེ་རྟེན་འབྲེལ་ཟབ་མོའི་དོན་ལ་མཉམ་པར་བཞག་ཅིང་བསྔོ་སྨོན་བྱ། མཆོད་པ་ནི་དངོས་སུ་བཤམ་པ་དང་། བྱིན་རླབས་མི་དགོས། ཡིད་ཀྱིས་སྤྲུལ་ཏེ་ཕུལ་ལོ། །དེ་ཙམ་མ་གྲུབ་ན་མདུན་གྱི་ནམ་མཁར་བཅོམ་ལྡན་འདས་ཐུབ་པའི་དབང་པོ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མངོན་སུམ་བཞིན་དུ་བཞུགས་པའི་ཞལ་ནས་རྟེན་འབྲེལ་ཟབ་མོའི་སྔགས་ཚིག་ཚངས་པའི་དབྱངས་ཀྱིས་བཀའ་སྩལ་བ་རྗེས་སུ་བཟླས་པས་རང་གི་རྒྱུད་བྱིན་གྱིས་བརླབས་པར་བསམས་ལ་གཟུངས་ཇི་ལྟར་རིགས་པ་བཟླའོ། །འདིའི་བསྙེན་པ་བྱེད་པར་འདོད་ན་སྐུ་གཟུགས་ཀྱི་སྤྱན་སྔར་མཆོད་པ་བཤམ། ཁྲུས་དང་གཙང་སྦྲ་ལ་གནས་པས་སློབ་དཔོན་གྱི་བྱ་བའི་སྐབས་ཇི་ལྟ་བར་ཐུན་གསུམ་མམ་བཞིར་ཉམས་སུ་བླངས་ལ་གཟུངས་འབུམ་ཕྲག་གཅིག་བཟླའ་བར་བྱའོ། །དེ་ལྟ་བུའི་རྒྱུན་དང་དུས་ཀྱི་ཉམས་ལེན་ལ་བརྩོན་པས། གནས་སྐབས་སུ་ནད་དང་གནོད་པ་ཐམས་ཅད་སྲུང་ཞིང་ཞི་བ་དང་། ལེགས་ཚོགས་ཀྱི་རྟེན་འབྲེལ་ཐམས་ཅད་འབད་མེད་དུ་འབྱུང་བ་དང་། ལྷ་བསྒོམ་པ་དང་། སྔགས་བཟླ་བ་སོགས་ཀྱི་ནུས་པ་མཐའ་དག་ཚད་མེད་པར་འཕེལ་བས་ལས་རབ་འབྱམས་གང་བརྩམ་པ་ཐོགས་པ་མེད་པར་འགྲུབ་པས་མཚོན་ཕན་ཡོན་བསམ་གྱིས་མི་ཁྱབ་ཅིང་། མཐར་
ཐུག་རྟེན་ཅིང་འབྲེལ་འབྱུང་ཟབ་མོའི་དོན་ཁོང་དུ་ཆུད་པས་འཕགས་པའི་ལམ་གྱི་ཡེ་ཤེས་རྒྱུད་ལ་སྐྱེ་བར་འགྱུར་བ་ཡིན་ནོ། །གསུམ་པ་ལས་སྒྲུབ་པའི་རིམ་པ་ལ་གཉིས། འདི་ཉིད་ཀྱི་ཆོ་ག་ཞིབ་མོ་ལས་ཇི་ལྟར་འབྱུང་བ་དང་། གཟུངས་དང་མན་ངག་གཞན་ལས་འབྱུང་བའི་ཚུལ་ལོ། །དང་པོ་ལ་གཉིས། ལས་ཐམས་ཅད་ཀྱི་སྔོན་དུ་འགྲོ་བའི་སྒོམ་བཟླས་དང་། ལས་ཀྱི་རིམ་པ་དངོས་སོ། །དང་པོ་ནི་དཀོན་མཆོག་གསུམ་རྗེས་སུ་དུན་པའི་དད་པས་སྐབས་སུ་འགྲོ་བ་དང་། བྱང་ཆུབ་ཀྱི་སེམས་གཉིས་ཡིད་ལ་བྱས་ཏེ། ཡེདྨ་རྨ་སོགས་དང་། བཅོམ་ལྡན་འདས་ཀྱི་ཚིགས་སུ་བཅད་པ་འདིས་སེམས་ཅན་རྣམས་ཀྱིས་རྟེན་ཅིང་འབྲེལ་བར་འབྱུང་བ་ལུགས་དང་མཐུན་པ་དང་། ལུགས་དང་མི་མཐུན་པའི་སྒོ་ནས་འཇུག་པ་དང་ལྡོག་པ་དག་གསུངས་ཏེ། ཇི་ལྟར་ལས་དང་ཉོན་མོངས་པ་ཡོད་ན་ནི་ སེམས་ཅན་ཐམས་ཅད་འཁོར་བ་ལ་འཇུག་པར་འགྱུར་ལ། ལས་དང་ཉོན་མོངས་པ་མེད་ན་ནི་འཁོར་བ་ལས་ལྡོག་གོ་ཞེས་བྱ་བའི་བདེན་པའི་ཚིག་འདིས་བདག་གིས་ཆོ་ག་ཞིབ་མོ་འདི་འགྲུབ་པར་གྱུར་ཅིག །ཅེས་རྟེན་ཅིང་འབྲེལ་བར་འབྱུང་བའི་དོན་རྗེས་སུ་དྲན་པས་བདེན་པའི་ཚིག་གིས་སེམས་བསྐྱེད་པ་ལན་གསུམ་དུ་བྱའོ། །དེ་ནས་ཐལ་མོ་སྦྱར་ལ། སངས་རྒྱས་ལ་ཕྱག་འཚལ་ལོ། །ཆོས་ལ་
དགེ་འདུན་ལ༔ ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་སྙེད་བཞུགས་པ་ལ༴ རང་སངས་རྒྱས་རྣམས་ལ་ཕྱགཌ དགྲ་བཅོམ་པ་རྣམས་ལ༴ རྒྱུན་དུ་ཞུགས་པ་རྣམས་ལ༴ འཕགས་པ་བྱམས་པ་ལ་སོགས་པའི་བྱང་ཆུབ་སེམས་དཔའ་རྣམས་ལ༴ བརྟུལ་ཞུགས་གྲུབ་པ་རྣམས་ལ །སེམས་ཅན་གྱི་སྨན་པ་རྣམས་ལ་ཕྱག་འཚལ་ལོ། །ནོར་བུ་གྲུབ་པ་རྣམས་ལ་ཕྱག་འཚལ་ལོ། །ཞེས་གཟུངས་ཀྱི་མཐུ་སྐྱེད་པའི་ཕྱིར་ཕྱག་འཚལ་བ་སྔོན་དུ་འགྲོ་བས། རང་གི་སྤྱི་བོར་ལྷ་བསྒོམ་པའི་གནས་རྒྱ་འགྲེལ་དུ་རང་གི་ལག་མཐིལ་ལམ་ལུས་ལ་བཀོད་པར་གསུངས་ཤིང་། མཚན་རྙིང་ལས་ལག་པའི་མཐིལ་ལམ་སྤྱི་གཙུག་ཅེས་འབྱུང་། སེང་གེས་བཏེག་པའི་རིན་པོ་ཆེའི་ཁྲི་པདྨའི་སྙིང་པོ་རབ་ཏུ་རྒྱས་པ་དང་བཅས་པའི་ཟེའུ་འབྲུའི་སྟེང་དུ་དཔལ་རྒྱལ་བ་ཤཱཀྱ་ཐུབ་པ་སྐུ་མདོག་གསེར་བཙོ་མ་ལྟར་འབར་བ། མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་སྤྲས་པ། ཕྱག་གཡས་སྐྱབས་སྦྱིན་དང་། གཡོན་མཉམ་གཞག་གི་ཕྱག་རྒྱ་མཛད་པ། ན་བཟའ་ཆོས་གོས་རྣམ་གསུམ་ངུར་སྨྲིག་གི་མདོག་ཅན་གསོལ་བ། སྐུ་ལས་སྐྱེས་པའི་འོད་ཟེར་མེའི་ཕུང་པོ་ལྟ་བུའི་ཀློང་ན་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པར་གྱུར། ཅེས་གསལ་ལ་སེམས་རྩེ་གཅིག་ཏུ་གཏད་ནས་མཉམ་པར་བཞག་པ་
ནི་ལྷའི་སྐུ་རྗེས་སུ་དྲན་པའོ། །དེ་ནས་གཟུངས་བཟླ་བ་ནི། བཅོམ་ལྡན་འདས་ཀྱི་སྐུ་ལ་དམིགས་པ་དང་། གཟུངས་ཀྱི་ཚིག་དོན་རྗེས་སུ་དྲན་པས། ན་མོ་རཏྣ་ཏྲ་ཡཱ་ཡ། ཨོཾ་ཡེ་དྷརྨཱ་ནས་ཤྲ་མ་ཎཿསྭཱ་ཧཱ། ཞེས་ཇི་ཙམ་ནུས་པ་བཟླས་ཏེ་ལས་ཀྱི་ཆོ་ག་སོ་སོ་ལ་འཇུག །མཐར་ལྷའི་སྐུ་མི་དམིགས་པར་བསམས་ལ་དགེ་བ་བསྔོ་ཞིང་སྨོན་ལམ་གདབ། རྟེན་ཅིང་འབྲེལ་འབྱུང་སྒྱུ་མ་ལྟ་བུའི་ངང་ནས་སྤྱོད་ལམ་དགེ་བའི་བྱ་བ་ལ་བརྩོན་པར་བྱའོ། །དེ་ལྟ་བུའི་ཚུལ་གྱིས་བཟླས་བརྗོད་འབུམ་ཕྲག་གཅིག་བྱས་ན་ཇི་སྐད་གསུངས་པའི་ལས་ཐམས་ཅད་ཐོགས་མེད་དུ་འགྲུབ་པར་འགྱུར་ཏེ། ཆོ་གའི་གཟུངས་ལས། །བཟླས་བརྗོད་འབུམ་ནི་བྱས་གྱུར་ན། །དགོས་པ་ཐམས་ཅད་འགྲུབ་པར་འགྱུར། །ཞེས་སོ། །གཉིས་པ་ལ་བཅུ། དང་པོ་ནད་གསོ་བའི་ལས་ཀྱི་ཆོ་ག་ནི། རིམས་ལ་སོགས་པ་ནད་གང་ཡང་རུང་བས་བཏབ་པ་ལ། གཟུངས་མང་དུ་བཟླས་པའི་མཐར་ལངས་ཏེ། ལག་གཡས་རྡོ་རྗེའི་ཁུ་ཚུར་དང་བཅས་པས་ནད་པའི་ལུས་ལ་བསྐོར་ཞིང་བྱབས། གཟུངས་ཀྱི་མཐར་རིམས་ལ་སརྦ་ཛཱ་རེ་བྷྱཿཨ་པ་ནཱ་ཡ་སྭཱ་ཧཱ། དང་། ནད་གཞན་ལ་སརྦ་རོ་གེ་བྷྱཿཨ་པ་ནཱ་ཡ་སྭཱ་ཧཱ། ཞེས་མང་དུ་བརྗོད་ཅིང་ཐལ་མོ་སྤྲུགས་ཏེ་དོར་བའི་ཚུལ་བྱས་པས་ནད་ཐམས་ཅད་རྡོ་ཁབ་ལེན་གྱིས་ལྕགས་ཕྱེ་བླངས་པ་
ལྟར་འདུས་ནས་ནད་བདག་སོ་སོ་ལ་ཐིམ་པར་བསམས་པས་ཞི་བར་འགྱུར་རོ། །ཡང་ན་བུ་མོ་གཞོན་ནུ་མས་འགལ་བའི་སྐུད་པ་དཀར་པོ་སུམ་བསྒྲིལ་ལ་མདུད་པ་གསུམ་བྱས་ལ་གཟུངས་སྔགས་ཉི་ཤུ་རྩ་བརྒྱད་བཟླས་པས་བཏབ་ནས་གང་གི་མགུལ་དུ་བཏགས་ན་སྲུང་བ་དང་ཞི་བར་འགྱུར་རོ། །སྙིང་ག་དང་རྩིབ་ལོགས་ན་བ་ལ་ཆུ་གྲང་མོ་ལ་བཟླས་ཏེ་བཏང་བས་སེལ་བར་འགྱུར་རོ། །གཞན་ཡང་ནད་གང་ཐེབས་པ་ལ་བབས་དང་བསྟུན་ཏེ་བཟླས་བརྗོད་བྱས་ལ་ཆུ་བསྐོལ་ལམ། ནད་སོ་སོ་ལ་ཕན་པའི་སྨན་ལ་བཏབ་སྟེ་བཏང་ན་འཕྲལ་དུ་འཚོ་བར་འགྱུར་རོ། །གཡན་པ་དང་འབྲུམ་བུ་སོགས་ལྷན་སྐྱེས་དང་གློ་བུར་གྱི་རྨའི་རིགས་ལ། གྲོག་མའི་ཚང་གི་ས་ལ་སྔགས་བཏབ་པས་བྱུགས་ན་ཕན་པར་འགྱུར་རོ། །གཞང་འབྲུམ་དང་། མཚན་མའི་ནད་ལ་སྐྱེར་པའི་ཁཎྜ་འམ། བྱང་ཆུབ་སེམས་དཔའི་རིལ་བུ་ཞེས་མཆན་རྙིང་པར་གངས་ཏིག་ཏུ་བཤད་པས། དེའི་ཕྱེ་མ་ལ་སྔགས་ཉི་ཤུ་བཟླས་ཏེ་བྱུགས་པས་བདེ་བར་འགྱུར་རོ། །འཁྲུ་ན། འཁྲུ་བ་གཅོད་པའི་སྨན་ནམ། བྱང་ཆུབ་སེམས་དཔའི་རིལ་བུའམ། འབྲས་ཆན་ལ་སོགས་པ་འཕྲོད་པའི་ཁ་ཟས་ལ་ལན་བདུན་ནམ་ཉི་ཤུ་སོགས་བཟླས་ཏེ་བཏང་ན་ཕན་པར་འགྱུར་རོ། །གཉིས་པ་ལོ་ཏོག་ལ་ཉེ་བར་ཕན་པའི་ཆོ་ག་ལ། ཆུ་
ཀླུང་ཆེན་པོའི་བྱེ་མ་དང་། རི་ཆེན་པོའི་རྩེ་མོའི་ས་དང་། དུར་ཁྲོད་ཀྱི་ཐལ་ཆེན་རྣམས་ལ་བརྒྱ་རྩ་བརྒྱད་སྔགས་ནས་གཏོར་ན་ལོ་ཏོག་དང་། བཟའ་ཤིང་གི་ར་བ་ལ་འཚེ་བའི་སེམས་ཅན་གྱི་ཁ་འཆིང་བར་འགྱུར་རོ། །བཅོམ་ལྡན་འདས་ལ་ཕུལ་བའི་མེ་ཏོག་རྙིང་པ་སྟེ། མཎྜལ་སོགས་ཀྱི་མེ་ཏོག་རྙིང་པ་ལ་སྔགས་ཉི་ཤུ་རྩ་གཅིག་བཟླས། གཙང་ཞིང་བླ་གབ་མེད་པའི་ཕྱོགས་སུ་མཎྜལ་ཆེན་པོའི་དབུས་སུ་རྫའི་བུམ་པ་ཆུས་བཀང་བ་བཞག །དེའི་སྟེང་དུ་ཁམ་ཕོར་དུ་མེ་བཞག་ལ་མེ་ཏོག་བསྲེགས་པའི་དུད་པ་རྒྱུན་མི་འཆད་པར་འཐུལ་བར་བྱས་ན་ཆར་ཧ་ཅང་ཆེས་བ་གཅོད་པར་འགྱུར་རོ། །ཤིང་སེ་བའམ། སྐྱེར་བའི་ལྕུག་མ་ལ་ལན་བརྒྱ་རྩ་བརྒྱད་བཟླས་ཏེ་སེར་བ་འོང་བའི་ཕྱོགས་སུ་ཀླད་ལ་བསྐོར་ཞིང་བྱབས་པས་སེར་བ་འཕྲལ་དུ་བཟློག་པར་འགྱུར་རོ། །ཡང་ན་ཐལ་ཆེན་དང་ཡུངས་ཀར་ལ་ལན་བརྒྱ་རྩ་བརྒྱད་བཟླས་པའི་ཐུམ་པོ་སེ་བའམ། སྐྱེར་བའི་ལྕག་མའི་མགུལ་དུ་གདགས་ཏེ་སེར་བ་འགྲིམ་པའི་སྲང་དུ་བཙུགས་ན་མཚམས་བཅད་པར་འགྱུར་ཏེ། འདི་ལ་ནང་གསེས་སུ་ལོ་ཏོག་ལ་ཕན་གདགས་པ་དང་། ཆར་གཅོད་པ་དང་། སྤྲིན་ཟློག་པའི་ཆོ་ག་ཞེས་གསུངས་སོ། །གསུམ་པ་གདོན་གྱིས་ཟིན་པ་ལ་ཕན་གདགས་པ་བུམ་པའི་ཆོ་ག་ནི། སྟེགས་བུ་འདོམ་གང་གྲུ་བཞི་པའི་དབུས་
སུ། བུམ་པ་གཙང་མ་ལྔའམ། མ་འབྱོར་ན་གཅིག་ལེགས་པར་བཀྲུས་ཏེ་གུ་གུལ་གྱིས་བདུག །ནང་དུ་ཆུ་གཙང་མ་དང་ཡུངས་ཀར། ག་བུར། ཙནྡན་དཀར་པོ། །གླ་རྩི། གཞན་ཡང་ཤུ་དག་སོགས་དྲི་དང་ལྡན་ཞིང་གདོན་འཕྲོག་པའི་སྨན་གྱི་རིགས་རྣམས་ལེགས་པར་སྦྱར་བས་སུམ་གཉིས་དགང་སྟེ་ཁ་རྒྱན་མགུལ་ཆིངས་དང་བཅས་པ་བཞག །སྔགས་བརྒྱ་རྩ་བརྒྱད་བཟླས་པས་ཆུ་ནུས་ལྡན་དུ་བྱིན་གྱིས་བརླབ་པའམ། སྤྲོ་ན་གཟུངས་སྒྲུབ་སྤྱི་ལྟར་བྱ། དེ་ནས་དཀོན་མཆོག་གི་རྟེན་མེ་ལོང་དུ་འཆར་བ་ལ་སྐུ་ཁྲུས་གསོལ་བའི་ཁྲུས་ཆུ་སླར་ཡང་བུམ་པར་བླུགས་ཏེ། ནད་པ་ཁྲུས་སྟེགས་ཀྱི་དབུས་སུ་བཞག་པའམ། སྟན་དཀར་པོའི་སྟེང་དུ་གོས་དཀར་པོ་དང་བཅས་ཁྲུས་དང་གཙང་སྦྲ་ལ་གནས་པས་འཁོད་དུ་གཞུག་ལ་བཀྲུ་བ་ཙམ་མམ། བཀྲུ་བྱབས་སྲུང་གསུམ་སྤྱི་ལྟར་བྱས་ལ་བུམ་ཆུ་ཁོང་དུ་གཏང་། ལུས་ལ་གཏོར་ཞིང་བདེན་ཚིག་དང་ཤིས་བརྗོད་ཀྱི་ཚིགས་སུ་བཅད་པ་རྒྱ་ཆེར་བྱས་པས་གདོན་ཐམས་ཅད་ཞི་བ་དང་སྲུང་བའི་མཆོག་ཏུ་འགྱུར་རོ། །བཞི་པ་བྱིས་པ་ལ་ཕན་གདགས་པའི་ཆོ་ག་ནི། བྱིས་པའི་གདོན་སྤྱི་ལ། གིའུ་ཝང་ལ་མངོན་པར་བསྔགས་ཏེ། དེའི་ཁུ་བས་གྲོ་ག་འམ། ཤོག་བུ་གཙང་མ་ལ། ཨོཾ་བཛྲ་ཀྲོ་དྷ་མ་ཧཱ་བ་ལ་ཧ་ན་ད་ཧ་པ་ཙ་བིདྷཱ་ན་ཡ་ཛཱ་ཊི་ལ་མཱོ་དྷར་ཨུཙུ་ཥྨ་ཀྲོ་དྷ་
ཧཱུྃ་ཕཊ། ཞེས་བྲིས་པ་གཟུངས་སྔགས་ཀྱིས་རབ་ཏུ་གནས་པ་དང་། སྔགས་བཟླས་པའི་ཡུངས་ཀར་གྱི་ཐུམ་པོ་བཅས་གཙང་སྦྲ་དང་ལྡན་པས་མགུལ་དུ་གདགས་ན་གདོན་ཐམས་ཅད་ལས་ཐར་བར་འགྱུར་རོ། །བྱེ་བྲག་མཁའ་འགྲོ་སྟེ་བྱའི་གདོན་གྱིས་ཟིན་པ་ལ་ཡུངས་ཀར་དང་། གུ་གུལ་ནག་པོ་ལ་རྟེན་སྙིང་དང་། གོང་གི་སྔགས་འདི་ཉིད་ལན་བདུན་བཟླས་པའི་ཐུམ་པོ་མགུལ་དུ་གདགས་པ་དང་། དུད་པས་བདུག་ན་ཞི་ཞིང་སྲུང་བར་འགྱུར་རོ། །ལྔ་པ་རིགས་བརྒྱུད་སྤེལ་བའི་ཆོ་ག་ལ། བུད་མེད་མོ་གཤམ་ལ་བུ་འབྱུང་བར་འདོད་ན། རིང་བསྲེལ་དང་བཅས་པའི་སངས་རྒྱས་ཀྱི་སྐུ་གཟུགས་བྱིན་རླབས་ཅན་ལ་སྐུ་ཁྲུས་གསོལ་བའི་ཆུ་སླར་ཡང་བུམ་པར་བླུགས་ལ་སྔགས་བཟླས་པས་བྱིན་གྱིས་བརླབ་པའམ། གཟུངས་སྒྲུབ་ཚུལ་བཞིན་དུ་བྱ། དེ་ནས་ར་བ་བཞི་གང་ཡང་རུང་བའི་ཡར་ངོའི་ཚེས་གཅིག་གི་ཉིན་བུད་མེད་དེ་ཉིད་ཁྲུས་དང་གཙང་སྦྲ་ལེགས་པར་བྱས་ལ། བུམ་པའི་ཆུ་བླུད་པས་རིགས་བརྒྱུད་འཕེལ་བར་འགྱུར་རོ། །སྦྲུམ་མ་བདེ་བར་བཙའ་བར་འདོད་ན། ཆུ་གཙང་མ་ལ་བཟླས་བརྗོད་བགྱིས་པ་ཁོང་དུ་བཏང་ཞིང་། མར་ལ་བསྔགས་ཏེ་སྐྱེ་གནས་ལ་བྱུགས་པས་བདེ་བར་བཙའ་བར་འགྱུར་རོ། །དྲུག་པ་ལམ་དུ་ཞུགས་པ་ལ་ཉེས་པ་མི་འབྱུང་བའི་ཆོ་ག་ནི། སྐུད་པ་
དཀར་པོའམ་གོས་ཀྱི་གྲྭར་མདུད་པ་བདུན་བྱ། མདུད་པ་རེ་ལ་སྔགས་ཚར་རེ་བཏབ་པ་བཅིངས་ཏེ་ཕྱིན་ན་འཇིགས་པ་ཐམས་ཅད་སྲུང་ཞིང་། ཇི་ལྟར་འདོད་པའི་དོན་བདེ་བླག་ཏུ་འགྲུབ་པར་འགྱུར་རོ། །བདུན་པ་ཡིད་གཞུངས་པའི་ཆོ་ག་ནི། ཤུ་དག་ཚོན་གང་པ་དང་། ཞུན་མར་སྲང་སུམ་བརྒྱ་དྲུག་ཅུ་ལ་སྔགས་བཟླས་པ་ལྷན་ཅིག་ཏུ་བསྲེས་ནས་བུམ་པར་བླུགས། ལོ་གཅིག་ཏུ་ཉི་མ་རེ་རེ་བཞིན་ཤུ་དག་གི་དུམ་བུ་དང་། མར་སྲང་རེ་ལ་བཟླས་བརྗོད་བྱས་ཏེ་བསྟེན་པའམ། ཡང་ན་བ་སེར་སྐྱའི་མར་དང་འོ་མ་ལ་བཟླས་ཏེ་ལྷན་ཅིག་ཏུ་སྦྱར་བ་སྣ་མའི་ཤིང་གིས་དཀྲུགས་ཏེ་ཟོས་པས་བློ་གྲོས་དང་ལྡན་ཅིང་ཡིད་གཞུངས་བའི་མཆོག་ཏུ་འགྱུར་རོ། །བརྒྱད་པ་མཛའ་བར་འགྱུར་བའི་ཆོ་ག་ནི། མེ་ཏོག་དམར་པོ་འམ། རྩྭ་དང་ཤིང་གི་དུམ་བུའམ། རྒུན་འབྲུ་ལ་སོགས་པའི་འབྲས་བུའམ། བའི་ལྕི་བ་འདི་ལ་དཔེ་རྣམས་སུ་འཇིམ་པ་དང་། འཇི་བ་སོགས་སྣ་ཚོགས་སྣང་ཡང་མཆན་རྙིང་དུ་འདི་ལྟར་གདའ། ས་ལ་མ་ལྷུངས་བ་ལག་གཡས་པའི་ཆངས་བར་བཅུག །སྔགས་ལན་བརྒྱ་རྩ་བརྒྱད་བཟླས་ཏེ་གང་གི་ལག་ཏུ་བྱིན་པ་དེ་དང་སྙིང་ཉེ་བའི་མཛའ་བཤེས་མཆོག་ཏུ་འགྱུར་རོ། །དགུ་པ་མི་ནད་དང་ཕྱུགས་ནད་སྲུང་བའི་ཆོ་ག་ནི། ཡུངས་ཀར་ལ་བརྒྱ་རྩ་བརྒྱད་བཟླས་པའི་ཐུམ་པོ་སྒོ་གོང་དུ་གདགས་ན་གནས་དེར་མི་ནད་
དང་ཕྱུགས་ནད་ཐམས་ཅད་ཞི་ཞིང་སྲུང་བར་འགྱུར་རོ། །རྟ་ལ་སོགས་པའི་ཕྱུགས་ཀྱི་རིགས་འཆི་བར་ཉེ་པའི་ནད་ཀྱིས་ཐེབས་པ་ན། ཆུ་དང་ཡུངས་ཀར་ལ་བརྒྱ་རྩ་བརྒྱད་བཟླས་ནས་ལུས་ལ་གཏོར་ན་སོས་པར་འགྱུར་རོ། །ཡུངས་ཀར་ལ་བརྒྱ་རྩ་བརྒྱད་བཟླས་པའི་ཐུམ་པོ་མགུལ་དུ་གདགས་ན་ནད་དང་གནོད་པ་ཐམས་ཅད་སྲུང་ཞིང་ཞི་བར་འགྱུར་རོ། །བཅུ་པ་རྒྱུན་དུ་བཟླས་བརྗོད་བྱ་བའི་ཆོ་ག་ནི། ཐོ་རངས་སྔ་བར་ལངས་ཏེ། ཁ་ཤར་དུ་ཕྱོགས་པའམ་ཕྱོགས་པར་མོས་ལ་གོང་དུ་བཤད་པ་ལྟར་སྒོམ་བཟླས་ཆག་མེད་དུ་བགྱིས་པའི་ཕན་ཡོན་ནི། འདིའི་ཆོ་གའི་གཟུངས་ལས། རྟག་ཏུ་བཟླས་བརྗོད་བྱས་ན་ནི། །བསམ་པ་ཐམས་ཅད་རྫོགས་པར་འགྱུར། །གནོད་པས་ཅིས་ཀྱང་ཚུགས་མི་འགྱུར། །དམ་ཆོས་ཡོངས་སུ་གཟུང་བར་འགྱུར། ཞེས་སོ། །དེ་རྣམས་ཀྱང་སྟོན་པ་སངས་རྒྱས་དང་དེས་གསུངས་པའི་གཟུངས་སྔགས་ལ་ཡིད་ཆེས་པའི་དད་པ་བརྟན་པོས་བསྒྲུབ་ན་ངེས་པར་འགྲུབ་པ་ཡིན་ཏེ། ཚིགས་སུ་བཅད་པ་འདི་དག་གི །མཐུ་དང་རྫུ་འཕྲུལ་བསམ་མི་ཁྱབ། །ཆོ་ག་དེ་དག་ཐམས་ཅད་ནི། །གང་ལ་དད་པས་ཡིད་ཆེས་ན། །འགྲུབ་པར་ཐེ་ཚོམ་མེད་པར་འགྱུར། །ཞེས་གསུངས་སོ། གཉིས་པ་གཟུངས་དང་མན་ངག་གཞན་ལས་ཇི་ལྟར་འབྱུང་བ་ནི། རྟེན་ཅིང་འབྲེལ་བར་འབྱུང་
བའི་སྙིང་པོའི་གཟུངས་ལས། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས། མི་གནས་པའི་ས་ཕྱོགས་སུ་མཆོད་རྟེན་ནི་སྒྱུ་རུ་རའི་འབྲུ་ཙམ། སྲོག་ཤིང་ནི་ཁབ་ཙམ། གདུགས་ནི་བ་ཀུ་ལའི་མེ་ཏོག་ཙམ་ཞིག་བྱས་ལ། རྟེན་ཅིང་འབྲེལ་བར་འབྱུང་བ་ཆོས་ཀྱི་དབྱིངས་ཀྱི་ཚིགས་སུ་བཅད་པ་ནང་དུ་བཅུག་ན། དེས་ཚངས་པའི་བསོད་ནམས་བསྐྱེད་པར་འགྱུར་ཏེ། འདི་ནས་ཤི་འཕོས་ཤིང་འཆི་བའི་དུས་བྱས་ནས་ཚངས་པའི་འཇིག་རྟེན་དག་ཏུ་སྐྱེ་བར་འགྱུར་རོ། །དེ་ནས་ཤི་འཕོས་ཏེ་འཆི་བའི་དུས་བྱས་ནས་གནས་གཙང་མའི་རིས་གྱི་ལྷ་དང་སྐལ་པ་མཉམ་པར་སྐྱེ་བར་འགྱུར་རོ། །ཞེས་རྒྱ་ཆེར་བསྔགས་པའི་མཆོད་རྟེན་གྱི་ལས་བྱ་བར་འདོད་ན། མཚན་ཉིད་དང་ལྡན་པའི་མཆོད་རྟེན་དངོས་སམ། ཆོ་ག་ལྟར་འདུ་བྱས་པའི་སཱཙྪའི་ནང་དུ་རྟེན་སྙིང་གི་གཟུངས་གཞུག་ཅིང་རབ་ཏུ་གནས་པར་བྱ་སྟེ། དེའི་ཚུལ་ནི་གཞན་དུ་གསལ་བ་ལྟར་རོ། །དེ་བཞིན་དུ་འདིའི་སྒོ་ནས་གཟུངས་ཆུ་བསྒྲུབ་པ་དང་། རྟེན་ལ་སྐུ་ཁྲུས་གསོལ་བ་དང་། རབ་ཏུ་གནས་པ་བྱ་བའི་ཚུལ་རྣམས་ནི་བཀའ་གདམས་ལྷ་བཞིའི་ཐུབ་པའི་ལས་ཚོགས་སུ་གསལ་བས་དེར་རྟོགས་པར་བྱ་ཞིང་། གཞན་ཡང་ཕན་བྱེད་ཀྱི་གདམས་པ་ཕྲན་ཚེགས་ལ། འབྲུ་འཕེལ་བར་འདོད་ན། འབྲུ་སྣ་ཚོགས་དྲི་བཟང་གི་ཆུས་
སྦགས་པ་ལ་མངོན་པར་བསྔགས་ཏེ་རྡུལ་ཕྲ་རབ་རེ་རེ་བཞིན་འབྲུའི་ཕུང་པོ་བསམ་གྱིས་མི་ཁྱབ་པ་འཕེལ་བའི་རང་བཞིན་དུ་བསམས་ལ་ས་བོན་དང་ལྷན་ཅིག་ཏུ་འདེབས་པར་བྱའོ། །ཕྱུགས་འཕེལ་བར་འདོད་ན། གྲོ་གའམ་ཤོག་བུ་ལ་གཟུངས་བྲིས་ཏེ་གིའུ་ཝང་གིས་བྱུག །རབ་ཏུ་གནས་པ་དང་བཅས་སྐར་མ་རྒྱལ་གྱི་ཉིན་ཕྱུགས་མ་དགེ་མཚན་ཅན་གྱི་གདོང་པ་ལ་གདགས་པར་བྱའོ། །རིན་པོ་ཆེ་འཕེལ་བར་འདོད་ན། བཀྲ་ཤིས་པའི་མཚན་མ་ཅན་གྱི་བུམ་པར་རིན་པོ་ཆེ་ཇི་ལྟར་རྙེད་པ་བཅུག །ལག་པ་གཡས་པས་ཁ་བཀབ་སྟེ་བཟླས་བརྗོད་མང་དུ་བྱས་ལ་གཏེར་ཆེན་པོའི་བུམ་པར་བསམ། །དར་རམ་རས་སེར་པོས་ཁ་བཅད་ལ་བང་མཛོད་ཀྱི་དབུས་སུ་སྦ་བར་བྱའོ། །ཟས་འཕེལ་བར་འདོད་ན། ཁ་ཟས་བཟང་རྒུ་སྣ་ཚོགས་ལ་སྔར་བཞིན་བཟླས་བརྗོད་བྱས་ལ། རྫའི་གའུར་བཅུག་སྟེ་ཐབ་ ཀྱི་དབུས་སུ་སྦ་བར་བྱའོ། །མིག་གི་ནད་ཞི་བར་འདོད་ན། ཐོ་རངས་བླངས་པའི་ཆུ་བསིལ་གཙང་མའམ། ཟས་མ་ཟོས་གོང་གི་མཆིལ་མ་ལ་ལན་བདུན་བསྔགས་ཏེ་གཡས་གཡོན་གོ་ལྡོག་པའི་སྲིན་ལག་གིས་བྱུགས་པས་ཕན་པར་འགྱུར་རོ། །རྣ་བའི་ནད་ཞི་བར་འདོད་ན། ཞུན་མར་དང་ལ་ཕུག་གི་ས་བོན་ལ་བསྔགས་ནས་བླུགས་བར་བྱའོ། །གདོང་པ་དང་སོ་སྲིན་གྱི་ནད་ལ། ཨ་དང་ཡེདྷ་རྨ་
བརྒྱ་རྩ་བརྒྱད་བཟླས་པས་བོང་ང་ནག་པོ་སྲན་མ་ཙམ་ལ་བཏབ་སྟེ་བདུག་པའམ། སོ་བར་དུ་བཟུང་བས་ཕན་པར་འགྱུར་རོ། །གྲེ་བ་འགགས་ན་ཨ་རུ་རའི་ཁུ་བའམ། དྲི་ཆུ་བར་པ་ལ་བཏབ་ནས་བཏང་ན་འཕྲལ་དུ་སེལ་ལོ། །ཡིད་མི་བདེ་བ་ལ་ཨ་ག་རུ་ནག་པོ་དང་ཏིལ་མར་བསྲེས་པ་ལ་སྔགས་ནས་དུ་བས་བདུག་པས་ཕན་ནོ། །རྨི་ལམ་ངན་པ་ཞི་བར་འདོད་ན། རང་གི་སྤྱི་བོར་རྃ་ལས་ཉི་མའི་དཀྱིལ་འཁོར་གྱི་སྟེང་དུ་གཟུངས་སྔགས་ཀྱི་ཕྲེང་བ་མེ་འབར་བ་དང་བཅས་པ་གསལ་བཏབ་ལ། སྔགས་བཟླས་པས་དེ་ལས་ཡེ་ཤེས་ཀྱི་མེ་ཆེར་འབར་བས་རྨི་ལམ་ངན་པ་རྒྱུ་དང་བཅས་པ་སྲེག་པར་བསམས་ལ་གཟུངས་དྲག་ཏུ་བཟླའོ། །རྩོད་པ་དང་ཕས་རྒོལ་ཞི་བར་འདོད་ན། རང་གི་སྙིང་གར་ཨ་ལས་ཟླ་བའི་སྟེང་དུ་གཟུངས་སྔགས་ཀྱི་ཕྲེང་བ་གསལ་བཏབ་ལ་བཟླས་པས། དེ་ལས་འོད་ཟེར་དཀར་པོ་བདུད་རྩིའི་ཚོགས་དང་བཅས་པ་འཕྲོས། ཕ་རོལ་ལ་རེག་པས་སྡང་བར་སེམས་པ་ཐམས་ཅད་ཞི་ནས། བྱམས་པའི་སེམས་དང་ལྡན་པར་བསམས་ལ་གཟུངས་བཟླ། སྙིང་རྗེ་དྲག་ཏུ་བསྒོམ་མོ། །ནད་ཞི་བར་འདོད་ན། གང་ན་བའི་གནས་སུ་ཟླ་བ་ལ་སྔགས་ཕྲེང་བཀོད། དེ་ལས་བདུད་རྩིའི་རྒྱུན་བབས་པས་ནད་ཞི་བར་བསམས་ལ་བཟླ། སྟོང་ཉིད་ཟབ་མོའི་དོན་ལ་བློ་བཞག་པར་
བྱའོ། །ཚེ་སྲིང་བར་འདོད་ན། སྤྱི་གཙུག་ཏུ་གསེར་གྱི་རྡོ་རྗེ་རྒྱ་གྲམ་འོད་འབར་བའི་ལྟེ་བར་ཟླ་བ་ལ་གཟུངས་སྔགས་ཀྱི་ཕྲེང་བ་གསལ་བཏབ་ལ་བཟླས་པས་འཇིག་རྟེན་དང་། འཇིག་རྟེན་ལས་འདས་པའི་བཅུད་ཐམས་ཅད་འདུས་ཏེ་སྔགས་ཕྲེང་ལ་ཐིམ། དེ་ལས་བདུད་རྩིའི་རྒྱུན་བབས་པས་ལུས་ཀྱི་ནང་ཐམས་ཅད་གང་། འཆི་མེད་ཚེའི་དངོས་གྲུབ་ཐོབ། རྡོ་རྗེ་ལས་རྡོ་རྗེ་ཕྲ་མོ་དཔག་ཏུ་མེད་པ་བྱུང་སྟེ་ལུས་ཀྱི་ཕྱི་ནས་རྡོ་རྗེའི་གོ་ཁྲབ་ཀྱི་ཚུལ་དུ་གཡོགས་པར་བསམས་ལ་བཟླས་པས་ཚེ་དང་བསོད་ནམས་ཐམས་ཅད་འཕེལ་བར་འགྱུར་རོ། །དེ་རྣམས་ནི་ཞར་ལས་འོངས་པ་སྟེ་མན་ངག་སྣ་ཚོགས་པ་ལས་ཉེ་བར་བཏུས་པའོ། །རྟེན་འབྲེལ་སྙིང་པོའི་གཟུངས་སྔགས་ཆུ་གཏེར་ལས། །ལེགས་འོངས་བྱིན་རླབས་མན་ངག་དང་བཅས་པ། །ཕན་བདེའི་ཆར་འབེབས་བདུད་རྩིའི་སྤྲིན་ཆེན་འདིས། །འགྲོ་ཀུན་དོན་གཉིས་ངལ་འཚོ་རྒྱས་གྱུར་ཅིག། །།ཅེས་པའང་རྟེན་འབྲེལ་སྲུང་བའི་ཡི་གེ་རྙིང་པ་མཆན་བུ་དང་བཅས་ཅུང་ཟད་མི་འདྲ་བ་ལེ་ཚན་གསུམ་དང་། འཇམ་མགོན་ཀུན་དགའ་བློ་གྲོས་ཀྱིས་མཛད་པའི་བྱིན་རླབས་ཀྱི་ཡི་གེ་ལ་གཞི་བྱས། གཟུངས་གཉིས་ཀྱི་རྣམ་བཤད་དང་། མཆན་བུ་སོགས་རྒྱ་བོད་ཀྱི་ཡིག་ཆ་མན་ངག་དང་བཅས་པ་རྣམས་ཀྱིས་ཟུར་བརྒྱན་ཏེ། བྱ་བྲལ་བ་འཇམ་དབྱངས་མཁྱེན་
བརྩེའི་དབང་པོས་སྦྱར་བའི་དགེ་བས་འགྲོ་ཀུན་སྲིད་པ་དང་ཞི་བའི་དགེ་ལེགས་ཀྱི་རྟེན་འབྲེལ་ཕུན་སུམ་ཚོགས་པའི་དཔལ་ལ་དུས་རྟག་ཏུ་ལོངས་སྤྱོད་པའི་རྒྱུར་གྱུར་ཅིག། །།མངྒ་ལཾ།། །།