རིག་པ་འཛིན་པའི་སྡེ་སྣོད་སྤྱི་གཏན་ལ་ཕབ་པའི་ཚོམས་ཏེ་ལེའུ་བཅུ་པའི་འགྲེལ་པ།
ཡོན་ཏན་རིན་པོ་ཆེའི་མཛོད་ལས། འབྲས་བུའི་ཐེག་པའི་རྒྱ་ཆེར་འགྲེལ་རྣམ་མཁྱེན་ཤིང་རྟ་ཞེས་བྱ་བ་བཞུགས། །
དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །དེ་ལྟར་ལེའུ་དགུ་པ་ཡན་གྱིས་རྒྱུ་མཚན་ཉིད་ཀྱི་ཐེག་པའི་རིམ་པ་སྐྱེས་བུ་གསུམ་གྱི་ཉམས་སུ་བླང་བྱར་གཏན་ལ་ཕབ་ནས། ད་ནི་དབང་པོ་ཤིན་ཏུ་རྣོན་པོའི་དོན་དུ་འཇིག་རྟེན་ན་རྙེད་པར་དཀའ་བ་གསང་སྔགས་རྡོ་རྗེའི་ཐེག་པ་བཤད་པའི་ཕྱིར། བྱང་ཆུབ་སེམས་དཔའ་སྔགས་ཀྱི་ཐེག་པ་ལ། །འབྲས་བུའམ་ནི་རྡོ་རྗེའི་ཐེག་པ་དང་། །ཐབས་ཀྱི་ཐེག་པ་རིག་པ་འཛིན་པ་ཡི། །སྡེ་སྣོད་ཞེས་གྲགས་རྒྱུ་ལས་ཁྱད་པར་འཕགས། །ཞེས་སྨོས་ནས་སྤྱིར་སེམས་ཅན་གྱི་བློ་དང་འདུ་ཤེས་ཀྱི་རྗེས་སུ་འགྲོ་བའི་ཐེག་པའི་རྣམ་དབྱེ་བསམ་གྱིས་མི་ཁྱབ་ཀྱང་མདོ་སྡེའི་རྒྱན་ལས། སྡེ་སྣོད་དག་ནི་གསུམ་མམ་གཉིས་ཀྱང་རུང་། །ཞེས་ཐེག་པ་མཆོག་དམན་གྱི་སྡེ་སྣོད་གཉིས་སུ་བསྡུ་བ་ལས། འདིར་ཐེག་པ་ཆེན་
པོའི་གདུལ་བྱ་དབང་པོ་ཤིན་ཏུ་རྣོན་པོའི་རིགས་ཅན་གཉིས་ཡོད་པའི་གཉིས་ཀའང་སྙིང་རྗེ་ཆེན་པོའི་གཞན་དབང་ལས་སེམས་ཅན་གྱི་དོན་དུ་བླ་ན་མེད་པའི་བྱང་ཆུབ་འདོད་པར་གཅིག་པས་བྱང་ཆུབ་སེམས་དཔའི་ཐེག་པར་འདུ་བའི་ཚུལ། ཐེག་པ་ཆེན་པོའི་ཚུལ་བསྒྲུབ་པ་ལས། ཐེག་པ་ཆེན་པོ་རྣམ་གཉིས་ཏེ། །ཕ་རོལ་ཕྱིན་དང་གསང་སྔགས་སོ། །ཞེས་དང་། བླ་མེད་ཀྱི་རྒྱུད་དོན་ལ་འཇུག་པ་ལས། བྱང་ཆུབ་སེམས་དཔའི་ཐེག་པ་ཡང་གཉིས་ཏེ། ས་དང་ཕ་རོལ་ཏུ་ཕྱིན་པའི་ཐེག་པ་དང་། གསང་སྔགས་འབྲས་བུ་རྡོ་རྗེའི་ཐེག་པའོ། །ཞེས་སོ། །དེའང་འབྲས་བུའི་ཐེག་པར་གང་གིས་བཞག་ན། གཞན་དག་འདིར་འདོང་བ་ནི་འབྲས་བུ་དང་། འདིས་འདོང་པ་ནི་རྒྱུའི་ཐེག་པར་འདོད་ཀྱང་འདིར་རྒྱུ་མཚན་ཉིད་ལས་ནི་ཁམས་བདེ་བར་གཤེགས་པའི་སྙིང་པོ་ས་བོན་དུ་ཡོད་པ་ཙམ་ཚོགས་གཉིས་ཀྱི་རྐྱེན་ལས་གོང་འཕེལ་དུ་
སོང་ནས་སངས་རྒྱས་ཐོབ་པར་འདོད་ཅིང་། རྒྱུ་འབྲས་སྔ་ཕྱིར་འབྲེལ་བས་རྒྱུའི་ཐེག་པ་ཞེས་བྱ་ལ། སྔགས་སུ་སྙིང་པོ་དེ་སེམས་ཅན་ཐམས་ཅད་ལ་རང་ཆས་སུ་ལྷུན་གྱིས་གྲུབ་ཅིང་། ཡོན་ཏན་བརྒྱད་ཆས་མ་ཚང་བ་མེད་པར་ཡོད་པའི་སྦྱང་གཞི་ཉི་མ་ལྟ་བུ་དེ་ཉིད་ལ། སྦྱང་བྱ་འཁོར་བའི་རང་བཞིན་ཚོགས་བརྒྱད་ཀུན་གཞི་དང་བཅས་པའི་འདུས་བྱས་ཀྱི་སེམས་གློ་བུར་བ་སྤྲིན་དང་འདྲ་བས་གཏུམས་པ་ཉིད། སྦྱོང་བྱེད་དབང་དང་བསྐྱེད་རྫོགས་ཀྱི་ལམ་ནས་གཞལ་མེད་ཁང་དང་། ལྷའི་ཕྱག་རྒྱ་དང་། མཆོད་བསྟོད་བསྙེན་པ་དང་། སྣོད་བཅུད་སྦྱོང་པའི་མཛད་པ་ཡོངས་སུ་དག་པ་བཞིས་བསྒོམས་པས་གློ་བུར་གྱི་དྲི་མའི་དག་བྱ་མཐའ་དག་སྦྱངས་ནས་གནས་སྐབས་ཀྱི་ཡོན་ཏན་རྣམས་དང་། མཐར་ཐུག་གི་སྦྱངས་འབྲས་རང་ངོའི་ཡོན་ཏན་ཅི་ཡིན་པ་མངོན་དུ་གྱུར་པ་སྟེ། བརྟག་གཉིས་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །དེ་བསལ་ལ་ནི་སངས་རྒྱས་ཉིད། །ཅེས་སོ། །དེ་བས་ན་རྒྱུ་མཚན་མེད་པའི་རྣམ་གྲངས་ཙམ་གྱིས་ཕྱེ་བ་སྨིན་པར་ཚད་མས་དྲངས་པའི་འབྲས་བུ་ལ་ལམ་དུ་བྱེད་བས་འབྲས་བུའི་ཐེག་པ་ཞེས་བྱ་སྟེ་གསང་བ་ལུང་བསྟན་པའི་མདོ་ལས། རྒྱུ་ལ་སྦྱོར་བ་རྒྱུ་ཡི་ཆོས། །འཁོར་ལོ་རབ་ཏུ་བསྐོར་བྱས་ནས། །འབྲས་བུའི་ཐེག་པ་ཉེ་ལམ་ཞིག །མ་འོངས་དུས་ན་འབྱུང་བར་འགྱུར། །ཞེས་དང་། དེ་བཞིན་དུ་སྙིང་པོའི་རང་བཞིན་འགྱུར་བ་མེད་ཅིང་གང་གིས་ཀྱང་མི་ཕྱེད་པ་དང་མི་ཆོད་པ་ཆེན་པོ་ཡིན་པས་ཀྱང་རྡོ་རྗེའི་ཐེག་པ་བླ་ན་མེད་པར་
བཞག་པ་སྟེ་དྲི་མེད་འོད་ལས། རྡོ་རྗེ་ནི་མི་ཕྱེད་པ་དང་མི་ཆོད་པ་ཆེན་པོ་ཡིན་ལ་དེ་ཉིད་ཐེག་པ་ཆེན་པོ་ཡིན་པས་རྡོ་རྗེའི་ཐེག་པ་སྟེ། སྔགས་དང་ཕ་རོལ་ཏུ་ཕྱིན་པའི་ཚུལ་འབྲས་བུ་དང་རྒྱུའི་བདག་ཉིད་གཅིག་ཏུ་འདྲེས་པར་གྱུར་པའོ། །ཞེས་སོ། །དེའང་གང་ཟག་འདོད་ཡོན་གྱི་གདུང་བ་ཤས་ཆུང་བའམ། གདུང་ཀྱང་སྙིང་རྗེ་ཆེན་པོའི་གཞན་དབང་གི་གཉེན་པོས་བསྒྱུར་ནས་མི་འཆིང་ཞིང་གྲོལ་བར་འདོད་པ་ལ་བྱང་ཆུབ་སེམས་དཔའི་ཐེག་པ་གསུངས་ཤིང་། དེ་ལྟར་མི་ནུས་པ་རྣམས་ལ་ཐབས་ཀྱི་ཆ་ཤིན་ཏུ་མང་ཞིང་འདུས་ལ་ཟབ་པ་གསང་སྔགས་ཀྱི་རིམ་པ་གསུངས་པས་ཐབས་ཀྱི་ཐེག་པ་ཞེས་བྱ་སྟེ་སྙིང་པོའི་རྒྱུད་ཕྱི་མ་ལས། །མཉམ་ཉིད་དོན་རྟོགས་རང་རིག་རྒྱལ་པོ་དང་། །བླ་མེད་དོན་རྟོགས་ཐབས་ཆེན་འདི་དག་ཏུ། །རྒྱ་མཚོ་ཆེན་པོར་ཆུ་ཀླུང་ཀུན་འབབ་ལྟར། །རྣམ་ཐར་ཐེག་པ་བསམ་ཡས་མ་ལུས་འདུས། །ཞེས་སོ། །ཡང་གདུལ་བར་བྱ་བ་དང་མཚན་གཞིའི་སྒོ་ནས་རིག་པ་འཛིན་པ་སྔགས་ཀྱི་སྡེ་སྣོད་ཅེས་བྱ་སྟེ། བསླབ་པ་གསུམ་ག་སྟོན་པའི་ཁྱད་གཞི་ཅན་དུ་ཡོད་པས་ན་དཔུང་བཟང་ལས། གསང་སྔགས་མདོ་སྡེའི་ཚུལ་དུ་བཤད་ཀྱིས་ཉོན། །ཞེས་པའི་དོན་སྒྲ་ཇི་བཞིན་པ་ནི་བསྟན་པ་ཐམས་ཅད་སྔགས་ཀྱི་ལམ་དུ་སྟོན་པ་ཀུན་འདུས་རིག་པའི་མདོ་ལ་སོགས་པར་དགོངས་པ་སྟེ། གཞན་ཡང་རྣམ་འཇོམས་ལས། །མདོ་སྡེ་འདི་ཡི་གཟི་བརྗིད་ཀྱིས། །ཞེས་དང་། ལ་ཝ་བས་མདོ་སྡེ་རྟོག་པའི་རྒྱུད་ཅེས་དང་། །
དེ་བཞིན་དུ་མ་རྒྱུད་ལ་ཤེས་རབ་ཀྱི་མདོ་ཞེས་ཀླུ་བྱང་དང་ཟླ་བ་གྲགས་པས་བཤད་པ་བཞིན་ཐ་སྙད་དེར་སྨོས་པ་ཡང་ཡོད་པས་ན་འཕགས་པ་ལྷས་ཀྱང་། རིག་པ་འཛིན་པའི་སྡེ་སྣོད་དོ། །ཞེས་སྡེ་སྣོད་བཞི་པར་ཡང་ཕྱེའོ། །འདི་དག་གི་ཚུལ་རྒྱས་པ་ལོག་རྟོག་སེལ་བ་དང་བཅས་པ་རྒྱུད་འབུམ་རིན་པོ་ཆེའི་རྟོགས་པ་བརྗོད་པ་ལ་བཀོད་ཟིན་ཏོ། །དེ་ལ་གསང་སྔགས་སྤྱིའི་མཚན་གཞི་དང་ཁྱད་ཆོས་སྟོན་པའི་ཚུལ། །རྒྱུན་ཆགས་ངོས་ནས་གཞི་ལམ་འབྲས་བུའི་རྒྱུད། །རིམ་གཉིས་ལ་བརྟེན་ཐབས་དང་ཤེས་རབ་འབྲེལ། །དཀའ་ཐུབ་མཐུ་ཡིས་མི་གདུང་འཇུག་སྒོ་ཡངས། །དབང་པོ་རྣོན་པོའི་དབང་བྱས་བརྟུལ་ཞུགས་མྱུར། །ཞེས་སྨོས་ནས། དེ་ལ་ཐོག་མར་རྒྱུད་ཅེས་བྱ་བའི་སྒྲ་ནི། ཏནྟྲ་པྲ་ས་ན་ཏ་ཞེས་བྱ་སྟེ། སྔགས་རྒྱུད་རྣམས་ཞི་བ་ལ་སོགས་པའི་ལས་ཕྲ་མོ་བསྒྲུབ་པའི་ཆོ་ག་དང་། མངོན་ཤེས་དང་རྫུ་འཕྲུལ་ལ་སོགས་ཐུན་མོང་གི་དངོས་གྲུབ་ཆེན་པོ་བསྒྲུབ་པའི་ཆོ་ག་དང་། རང་བཞིན་ཡོངས་ཤེས་མི་གནས་པའི་མྱ་ངན་ལས་འདས་པ་བསྒྲུབ་པའི་ཆོ་གའི་བྱེ་བྲག་ཏུ་གྱུར་པ་རྩ་བ་དང་ཉེ་བའི་སྙིང་པོ་ལ་སོགས་པའི་སྔགས་དང་། དེ་དག་གི་དཀྱིལ་འཁོར་དང་། ཕྱག་རྒྱ་དང་། མཆོད་པ་དང་། སྦྱིན་སྲེག་དང་། ཕྲིན་ལས་དང་། བརྟུལ་ཞུགས་ལ་སོགས་པ་རྒྱུད་ཀྱི་དངོས་པོའི་ཆོ་ག་སྣ་ཚོགས་དང་འབྲེལ་བས་ཀྱང་རྒྱུད་ཅེས་བྱའོ། །དེ་དག་ནི་རྒྱུད་སྤྱིའི་མཚན་བསྟན་པ་སྟེ་ཁྱད་པར་གྱི་མཚན་ནི་འདུས་པའི་རྒྱུད་ཕྱི་མ་ལས། །དབང་པོ་དང་ནི་ཡུལ་རྣམས་ཀྱི། །རྐྱེན་གྱིས་གང་དང་གང་བྱུང་ཡིད། །ཡིད་དེ་མ་ན་བྱ་བར་བཤད། །ཏྲ་ནི་སྐྱོབ་པར་བྱེད་པའི་དོན། །འཇིག་རྟེན་སྤྱོད་ལས་རྣམ་གྲོལ་བར། །གང་བཤད་དམ་ཚིག་སྡོམ་པ་སྟེ། །རྡོ་རྗེ་ཀུན་གྱི་བསྲུང་པ་ནི། །སྔགས་ཀྱི་སྤྱོད་པ་ཞེས་བཤད་དོ། །ཞེས་
མཎྜལ་མ་ན་ནི་ཡིད། །ཏྲ་ནི་སྐྱོབས་པས་ན་སྔགས་ཞེས་པའམ། རྣམ་གྲངས་གཞན་ཡང་མ་ན་དང་། ཏྲ་ཡའི་སྒྲ་དེ་ཉིད་ཤེས་པ་དང་སྙིང་རྗེ་ལ་དྲངས་པ་ལྟ་བུས་མཚོན་མཐའ་གཅིག་ཏུ་མི་གནས་པ་ཤེས་པར་བྱའོ། །དེ་ལྟར་སྔགས་དེའི་ཀླད་དུ་གསང་བའི་སྒྲ་ཞུགས་པའི་དོན་ནི། རྟོགས་པར་དཀའ་བ་དང་རྟོགས་སུ་མི་རུང་བ་ལ་འཇུག་སྟེ། དུས་གསུམ་གྱི་སངས་རྒྱས་ཐམས་ཅད་ཀྱི་དགོངས་པ་དམ་པར་གྱུར་པས་སྐལ་བ་མེད་པ་དང་བློ་མ་སྦྱངས་པ་དག་གིས་རྟོགས་པར་དཀའ་བས་གསང་བ་དང་། འཇིག་རྟེན་པ་དང་ཐེག་པ་འོག་མ་པ་རྣམས་ཀྱི་སྤྱོད་ཡུལ་དུ་མི་རུང་བས། གསང་བར་བྱ་ཞིང་སྦས་ན་འགྲུབ་པ་ཡིན་པའི་ཕྱིར་ཡང་གསང་བའོ། །མིང་གི་སྒྲ་འཇུག་ཡུལ་གྱི་སྒོ་ནས་འཁོར་འདས་ཐམས་ཅད་ཀྱི་རྒྱུར་གྱུར་པས་ན་རྒྱུན་ཆགས་པ་སྟེ། རྡོ་རྗེ་རྩེ་མོར། །རྒྱུད་ནི་རྒྱུན་ཆགས་ཞེས་བྱར་བརྗོད། །འཁོར་བ་རྒྱུད་དུ་འདོད་པ་ཡིན། །མྱ་ངན་འདས་པ་རྒྱུད་ཕྱི་མ། །ཞེས་སོ། །དབྱེ་ན་དོན་དང་ཚིག་གི་སྒོ་ནས་དངོས་པོ་དྲུག་ལ་འཇུག་པའི་ཚུལ། འདི་ལྟར་དོན་གྱི་སྒོ་ནས་གཞིའི་རྒྱུད་ཅེས་བྱ་བ་ཁམས་བདེ་གཤེགས་སྙིང་པོ་ལ་འཇུག་པ་དང་། ལམ་གྱི་རྒྱུད་ཅེས་བྱ་བ་སྔགས་དང་ཕྱག་རྒྱ་དང་ཏིང་ངེ་འཛིན་ལ་སོགས་པ་ཐབས་ལ་མཁས་པའི་བསླབ་པའི་དངོས་པོ་རྒྱ་ཆེ་བའི་མཚན་ཉིད་དང་། འབྲས་བུའི་རྒྱུད་ཅེས་བྱ་བ་མཆོག་དང་ཐུན་མོང་གི་དངོས་གྲུབ་རྣམ་པ་གཉིས་བསྒྲུབ་བྱའི་རྒྱུད་ལ་རྒྱུ་རྐྱེན་འབྲས་བུའི་ཚུལ་དུ་འབྲེལ་བར་གནས་པས་ན་རྒྱུད་ཅེས་འབྲེལ་བའི་དོན་དུ་གྲུབ་ལ། ཚིག་གི་སྒོ་ནས་ནི། བཤད་མ་ཐག་པའི་སྒྲར་སྣང་བ་དང་ཉིད་སྐལ་བ་མཉམ་པའི་རྒྱུར་
མིང་ཚིག་གི་སྒྲར་གྲགས་པའི་མཚན་ཉིད་དང་། དེའི་གཟུགས་བརྙན་ནམ་བརྡར་གྱུར་པ་གླེགས་བམ་དུ་གཏོགས་པ་རྣམས་ཏེ་མིང་གདགས་པའི་ཡུལ་རྣམ་པ་དྲུག་ཡིན་ནོ། །དེའང་རྒྱུ་འབྲས་ཀྱི་ཐེག་པ་ཆེན་པོ་གཉིས་འབྲས་བུ་ཐོབ་པ་ལ་མཆོག་དམན་མེད་པ་དོན་གཅིག་ནའང་། ལམ་གྱི་བསྒྲུབ་ཚུལ་ལ་རྨོངས་མ་རྨོངས་ཀྱི་ཁྱད་པར་མཐའ་ཀླས་པ་ཞུགས་ཏེ། འདི་ལྟར་ཐེག་པ་གཉིས་ཀའི་མངོན་པར་འདོད་པའི་དོན་གྱི་གཙོ་བོ་ནི་གཞན་དོན་ཡིན་ན། གདུལ་བྱ་ལ་དངོས་སུ་སྣང་ནས་དེ་དག་གི་དོན་མཛད་པའི་སངས་རྒྱས་ཀྱི་བྱ་བ་སྤྲོས་པ་ཉེ་བར་ཞི་བའི་ཆོས་ཀྱི་སྐུ་དེས་དངོས་སུ་མི་མཛད་ཀྱང་དེའི་རྒྱུ་དུས་ཀྱི་སྙིང་རྗེ་དང་སྨོན་ལམ་གྱི་དབང་ལས། རྣམ་པར་མི་རྟོག་ཅིང་མི་རྩོལ་བཞིན་དུ་གཟུགས་ཀྱི་སྐུ་རྣམ་པ་གཉིས་འགྲུབ་པ་ཡིན་ལ། དེ་འགྲུབ་པའི་རྒྱུའང་ཟབ་མོ་རྟོགས་པའི་ཤེས་རབ་ཀྱིས་ཆོས་ཀྱི་སྐུ་དང་། རྒྱ་ཆེ་བའི་ཐབས་ཕར་ཕྱིན་ལ་མེད་པ་མཚན་དཔེ་དང་བཅས་པའི་སངས་རྒྱས་ཀྱི་ང་རྒྱལ་ལ་གནས་པའི་བསྐྱེད་རིམ་ཟབ་མོའི་རྣལ་འབྱོར་ལ་བརྟེན་ནས་ཚེ་གཅིག་ལ་སོགས་པར་གཟུགས་ཀྱི་སྐུ་མྱུར་དུ་འགྲུབ་པས་ན་དེ་ཉིད་ཀྱང་ཐབས་ཤེས་ཡ་བྲལ་མ་ཡིན་པར་རང་བཞིན་ཡོངས་ཤེས་ཀྱི་བསྐྱེད་རྫོགས་གཉིས་ཕན་ཚུན་ལྟོས་གྲུབ་ཅན་ཡོད་པ་ནི་གསང་སྔགས་ཀྱི་ཐེག་པ་ཆེན་པོ་སྤྱིའི་གྲུབ་མཐའ་ཡིན་ནོ། །དེ་སྐད་དུ་རྡོ་རྗེ་གུར་ལས། །གལ་ཏེ་སྟོང་པ་ཐབས་ཡིན་ན། །དེ་ཚེ་སངས་རྒྱས་ཉིད་མི་འགྱུར། །རྒྱུ་ལས་འབྲས་བུ་གཞན་མེད་ཕྱིར། །ཐབས་ནི་སྟོང་པ་ཉིད་མ་ཡིན། །ལྟ་བ་རྣམས་ལས་ལོག་རྣམས་དང་། །བདག་ཏུ་བལྟ་བ་འཚོལ་
རྣམས་ཀྱི། །བདག་ཏུ་འཛིན་པ་བཟློག་པའི་ཕྱིར། །རྒྱལ་བ་རྣམས་ཀྱིས་སྟོང་པར་བསྟན། །དེ་ཕྱིར་དཀྱིལ་འཁོར་འཁོར་ལོ་ཞེས། །བདེ་བའི་ཐབས་ཀྱི་སྡོམ་པ་སྟེ། །སངས་རྒྱས་ང་རྒྱལ་རྣལ་འབྱོར་གྱིས། །སངས་རྒྱས་ཉིད་ཡུན་རིང་མི་འགྱུར། །སྟོན་པ་སུམ་ཅུ་རྩ་གཉིས་མཚན། །མངའ་བདག་དཔེ་བྱད་བརྒྱད་ཅུར་ལྡན། །དེ་ཕྱིར་ཐབས་དེས་བསྒྲུབ་བྱ་སྟེ། །ཐབས་ནི་སྟོན་པའི་གཟུགས་ཅན་ནོ། །ཞེས་སྟོང་པ་ཉིད་ཐབས་སུ་འདོད་པ་དགག་པའི་དོན་དེ་ཡིན་ནོ། །དེ་བས་ན་སྔགས་ཀྱི་ལམ་དུ་དཀྱིལ་འཁོར་གྱི་འཁོར་ལོ་བསྒོམ་པ་ཉིད་ཐབས་མཆོག་ཏུ་གྱུར་པ་ཡིན་ལ། ཐབས་དེའི་ཁྱད་པར་ནི་གཉིས་སུ་བསྟན་ཏེ། །བདེ་བའི་ཐབས་ཀྱི་སྡོམ་པ་སྟེ། །ཞེས་པས་དཀའ་སྤྱད་ལ་མ་ལྟོས་པས་བདེ་བ་དང་། སྡོམ་པའི་ཆ་ནས་བསམ་པ་སེམས་བསྐྱེད་དང་། སྤྱོད་པ་ཕྱིན་དྲུག་ཀྱང་འཇུག་སྒོའི་དབང་དང་། རྟེན་གཞལ་མེད་ཁང་དང་བརྟེན་པ་ལྷའི་སྐྱེ་མཆེད་ལ་སོགས་པར་དངོས་བསྟན་དང་རྗེས་མཐུན་པའི་དག་པ་སྦྱོར་ཚུལ་ལས་སྤྱོད་པའི་ཐབས་ཤིན་ཏུ་མྱུར་བ་དང་། དེའི་རང་བཞིན་སྟོང་པ་ཉིད་རྟོགས་པའི་ཤེས་རབ་མི་ཕྱེད་པའི་སྡོམ་པའི། །སྤྱིར་ཕྱིན་དྲུག་དངོས་བསྟན་ལ་མི་སྤྱོད་པའང་མ་ཡིན་ཏེ། བླ་མ་ལ་ཡོན་དབུལ་ཞིང་དཀྱིལ་འཁོར་མཆོད་པ་ལ་སོགས་པའི་སྦྱིན་པ་དང་། དམ་ཚིག་གི་གནང་བཀག་ལས་མི་འདའ་བའི་ཚུལ་ཁྲིམས་དང་། རྒྱ་ཆེ་བའི་ཐབས་ལ་མི་ངལ་ཞིང་། དོན་ཟབ་མོ་ལ་མི་སྐྲག་པའི་བཟོད་པ་དང་། ཀུན་གྱི་གྲོགས་སུ་གྱུར་པའི་བརྩོན་འགྲུས་དང་། རྣམ་པ་ལྷའི་རྣལ་འབྱོར་ལས་མི་འདའ་བའི་བསམ་གཏན་དང་། དེ་ཀུན་ཀྱང་སྟོང་ཉིད་ཟབ་མོའི་
ངང་ལས་མི་གཡོ་བའི་ཤེས་རབ་ཏུ་གནས་པ་སོགས་ཕྱིན་དྲུག་ཏུ་བསྡུ་ཚུལ་མཐའ་མ་འགགས་པ་ཡོད་ལ། རྒྱུ་དེས་འབྲས་བུའི་སྐབས་སུའང་གཟུགས་ཀྱི་སྐུ་མཚན་དཔེས་སྤྲས་པའི་རྟེན་དང་། དེ་ལ་བརྟེན་པའི་དམིགས་པ་མེད་པའི་ཐུགས་གཉིས་བདེན་པ་དབྱེར་མེད་ངོ་བོ་གཅིག་གི་རང་བཞིན་དུ་གནས་པ་བཞིན་དུ། ལམ་དུས་ན་རྣལ་འབྱོར་པའི་གཞིའི་ལུས་དེ་བཞིན་གཤེགས་པའི་སྐུའི་རྣམ་པར་སྣང་བའི་ཐབས་དང་། ནང་སེམས་ཀྱི་དེ་ཁོ་ན་ཉིད་རང་བཞིན་མེད་པར་ཟུང་དུ་འཇུག་པའི་ཤེས་རབ་གཉིས་ཤེས་པ་གཅིག་གི་ངོ་བོར་དབྱེར་མེད་པའི་ཐབས་ཤེས་ཟུང་དུ་འབྲེལ་བས་མཐའ་གཉིས་གང་ལའང་མི་གནས་པའི་ཐབས་ཁྱད་པར་ཅན་ཞེས་བྱའོ། །དེ་ལྟ་བུའི་ཐབས་ནི་ཐབས་མང་བ་དང་། དཀའ་བ་མེད་པ་དང་། ཐབས་མཁས་པ་དང་། ཐབས་མྱུར་བ་རྣམས་ཀྱིས་འཕགས་པ་སྟེ། འདི་ལྟར་དབང་པོ་རྣོན་པོའི་གང་ཟག་དེས་རང་རང་གི་ཉོན་མོངས་པ་གང་ཡིན་པ་དེ་ཉིད་ཀྱི་རིགས་ཤེས་པར་བྱས་ནས་དེའི་སྦྱོང་བྱེད་ལྷ་དང་སྔགས་ལ་བརྟེན་པའི་རྣལ་འབྱོར་དང་། འདུ་ཤེས་སྒྱུར་བའི་ཚུལ་ཐབས་མཁས་ཀྱི་སྤྱོད་པས་ཟིན་པ་ལ་སོགས་པའི་སྒོ་མང་པོ་ལ་བརྟེན་ནས་རང་གྲོལ་ཞིང་གཞན་རྗེས་སུ་འཛིན་པའི་ཐབས་ཡོད་པས་ཐབས་མང་བ་དང་། དཀའ་ཐུབ་དང་སྡོམ་པའི་ཀུན་སྤྱོད་ཀྱིས་མི་གདུང་བར་ཇི་ལྟར་འདོད་པའི་ལམ་ལ་བཀྲིར་ཡོད་ཅིང་ངལ་བས་བསྒྲུབ་མི་དགོས་པར་ཉོན་མོངས་པ་གདུལ་བའི་ཐབས་ཟབ་ལ་རྒྱ་ཆེ་བ་མང་པོས་རང་དང་གཞན་གྲོལ་བར་བྱེད་པའི་ཐབས་ཡོད་པས་དཀའ་བ་མེད་པ་དང་། མཚམས་མེད་པ་ལྔ་ལ་སོགས་པ་མི་དགེ་
བའི་ལས་དང་ཁ་ན་མཐོ་བ་དག་ལ་སྤྱད་ཀྱང་དེ་ཉིད་ཀྱིས་མི་འཆིང་བར་འགྲོ་བ་འདྲེན་པའི་ཐབས་ལ་མཁས་པ་དང་། མཚན་ཉིད་ཐེག་པ་ལྟར་ས་དང་ཕ་རོལ་ཏུ་ཕྱིན་པའི་སྤྱོད་པ་རྒྱ་ཆེན་པོས་དུས་ཡུན་རིང་མོར་བསྒྲུབ་དགོས་པ་མ་ཡིན་གྱིས། མཐོང་བའི་ཆོས་ལ་མྱུར་དུ་བསྒྲུབ་པའི་ཐབས་ཡོད་པས་ཐབས་མྱུར་བའོ། །དེ་ཡང་དམིགས་པ་དང་གྲོགས་དང་རྗེས་སུ་སྤྱོད་པ་གསུམ་རྒྱ་ཆེ་བས་མྱུར་བའི་ཚུལ། དམིགས་པ་རྣམ་པར་དག་པ་དང་། །གྲོགས་ཀྱི་མཐུ་དང་སྤྱོད་པ་ཡི། །བློ་ལྡན་རྣམས་ཀྱི་ཐེག་པ་ནི། །ཆེན་པོའི་ཆེན་པོ་ཉིད་དུ་སྒྲོགས། །ཞེས་པ་ལྟར་དམིགས་པ་རྣམ་པར་དག་པས་མྱུར་བ་ནི། །སྤྲོས་པའི་བག་ཆགས་ཀྱི་རྒྱུན་ཡོངས་སུ་དག་པའི་ལྷར་སྣང་དང་འདོད་ཆགས་ཀྱི་ཀུན་སྤྱོད་ཟབ་མོས་རླུང་དབུ་མར་བཙུད་ནས་འཁྲུལ་པའི་སྣང་བ་མྱུར་དུ་ལྡོག་པར་ནུས་པ་དང་། རྒྱལ་བ་རྣམས་ཀྱི་དམ་ཚིག་བཟུང་པས་ལས་ཀྱི་རྣམ་པར་སྨིན་པ་ལྡོག་ནུས་ཤིང་། བྱིན་གྱིས་རློབ་པ་དང་། བསོད་ནམས་ཀྱི་ཚོགས་ཆེན་པོ་ཞར་བྱུང་དུ་སྐྱེ་བ་དང་། དབང་པོ་རྣོ་བས་ཆོས་ཀྱི་དབྱིངས་དག་མཉམ་ཆེན་པོ་ལ་རང་བཞིན་གྱིས་བློ་འཇུག་པར་ནུས་པའོ། །སྤྱོད་པའི་སྒོ་ནས་མྱུར་བ་ནི། དཀའ་ཐུབ་དང་སྡོམ་པས་མ་གཟིར་བས་མཐུན་པའི་གྲོགས་དང་བསམ་པ་ཐམས་ཅད་ལམ་གྱི་གེགས་སུ་མི་འགྱུར་བ་དང་། མཉམ་པ་དང་། མཐུན་པའི་སྤྱོད་པ། བརྟུལ་ཞུགས་ཀྱི་སྤྱོད་པས་བསམ་པ་མཉམ་པའི་གཉའ་གནོན་དུ་འགྱུར་བ་དང་། ཆོས་སྤྱོད་ཀྱི་སྒོ་སྣ་ཚོགས་ལ་སྤྱོད་པས་འགྲོ་བའི་དོན་བྱེད་ཅིང་གཅིག་གྲོགས་གཅིག་ཏུ་འགྱུར་བ་དང་། ཆོ་ག་ལྷག་ཆད་ལ་མཉམ་པའི་
བརྟུལ་ཞུགས་འདྲེས་པས་ཐེ་ཚོམ་གྱི་གེགས་མི་འཇུག་པ་སྟེ། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོས་དབང་བྱས་ཕྱིར། །སྔགས་ཀྱི་ཐེག་པ་ཁྱད་པར་འཕགས། །ཞེས་ཐམས་ཅད་འདྲེན་ཏོ། །འདིར་ཁ་ཅིག་ཐབས་མང་པོ་དེ་གང་ཟག་བྱེ་བྲག་པ་གཅིག་ལ་དགོངས་པ་ཡིན། མཐོང་ལམ་སྐྱེ་བ་ཕ་རོལ་ཏུ་ཕྱིན་པས་ཀྱང་ནུས་སོ་ཞེས་འདོད་དེ། ཕ་རོལ་ཏུ་ཕྱིན་པའི་ལམ་ནི་རྒྱུ་དང་རྗེས་དཔག་ལམ་དུ་བྱེད་ཅིང་ཐབས་ལ་འཁྲུལ་པས་དབང་པོ་རྣོ་བའི་གེགས་སུ་འགྱུར་ལ་སྔགས་སུ་འབྲས་བུ་དང་མངོན་སུམ་ལམ་དུ་བྱེད་པས་ཐེག་པའི་འཇུག་སྒོ་རང་གིས་ཀྱང་རྨོངས་པ་ཡིན་ཏེ། མཚན་ཉིད་ལས་ཕྱི་སྣང་བའི་བདེན་ཞེན་སྒྱུ་མར་བསྒོམ་པ་དང་ཀུན་བརྟགས་ཀྱི་རིག་པས་བཟློག་པ་ཙམ་ལས་མེད་པས་རང་བཞིན་ཡོངས་གྲུབ་ཀྱི་འབྱུང་བའི་རིག་པ་ལ་རྨོངས་ཤིང་། མགོ་གཏོང་བ་ལ་སོགས་པའི་སྦྱིན་པས་ཀྱང་སེམས་ཅན་མང་པོ་ལ་ཕན་པ་མི་འགྲུབ་པས་སྔགས་སུ་ཐབས་ཀྱི་མཆོག་སེམས་ཅན་མང་པོའི་དོན་རྫོགས་པ་ནི་འཚོལ་བས་མ་རྨོངས་པའོ། །དེ་བཞིན་དུ་ནང་ཕུང་པོ་ཁམས་དང་སྐྱེ་མཆེད་གདན་གསུམ་ཚང་བའི་ལྷར་མ་ཤེས་པས་གནས་ཚུལ་གྱི་དོན་ལ་རྨོངས་པས་རང་ལ་འབྲེལ་བ་ཐོགས་ཚད་ཀྱི་དོན་གཅིག་ཅར་དུ་བྱེད་མི་ནུས། གསང་བ་རྟོག་ཚོགས་དང་ཉོན་མོངས་པ་ཡེ་ཤེས་སུ་མ་ཤེས་པས་ལམ་གྱི་རྣམ་པ་ལ་རྨོངས་ཏེ་རྣམ་རྟོག་མ་སྤངས་པར་དོན་དམ་པའི་ཡེ་ཤེས་ཀྱི་རྒྱ་མཚོར་འཇུག་མི་ནུས། བྱིན་རླབས་ཀྱི་འཕོ་བ་ཐོབ་པ་ལས་ཆོས་ཐམས་ཅད་རང་བཞིན་གྱི་དག་མཉམ་བློ་ལས་འདས་པའི་བདེན་པ་དབྱེར་མེད་མ་ཤེས་ཤིང་རྣམ་གྲངས་པའི་དོན་དམ་སྒྲ་རྟོག་གི་
ཡུལ་དུ་གྱུར་ནས་རྟོགས་སོ་སྙམ་པའི་སྤྲོས་བྲལ་དང་། དབང་གི་ཡེ་ཤེས་ལས་ཇི་ལྟ་བ་བཞིན་རྟོགས་པ་གཉིས་ལ་ཁྱད་པར་ཡོད་པས་རྟོགས་པའི་ལྟ་བ་ལ་རྨོངས་པ་ཉིད་དེ་ཡིད་དཔྱོད་ཅན་གྱི་བློ་ལ་ཆུད་པ་མ་ཡིན་ནོ། །ཁྱད་པར་གསང་སྔགས་བླ་ན་མེད་པ་ནི་སྒྱུ་འཕྲུལ་ལས། རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་བདག་ཉིད་དེ། །ས་ཆུ་སྤྱན་དང་མཱ་མ་ཀཱི། །མེ་རླུང་གོས་དཀར་སྒྲོལ་མ་ཉིད། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །ཞེས་སོ། །དེ་བས་ན་བླ་ན་མེད་པའི་གསང་སྔགས་ཀྱི་གདུལ་བྱ་ནི་ཐེག་པ་ཆེན་པོའི་ཡང་ཆེན་པོ་པ་རིགས་ཀྱི་ནུས་པ་ལྷག་པ་ཅན་གྱི་དབང་པོ་ཤིན་ཏུ་རྣོན་པོ་པས་བདེན་པ་དབྱེར་མེད་སྣོད་བཅུད་དག་མཉམ་རང་བཞིན་ཡོངས་གྲུབ་སངས་རྒྱས་ཀྱི་ཞིང་ཁམས་ཆེན་པོར་གཏན་ལ་འབེབས་པའི་ཐབས་དང་། རྡོ་རྗེ་ཕྲེང་བ་ལས། སྐུ་ཡི་དཀྱིལ་འཁོར་ཞེས་བརྗོད་པ། །རྡོ་རྗེ་སློབ་དཔོན་ཉིད་ཀྱི་ལུས། །སངས་རྒྱས་ཀུན་གྱི་སྐུ་རྫོགས་པ། །འདི་དག་མ་ལུས་རྫོགས་སངས་རྒྱས། །ཞེས་དང་། སྒྱུ་འཕྲུལ་དྲྭ་བ་ཆེན་པོ་ལས། །སློབ་དཔོན་ཇི་ལྟར་བལྟ་ཞེ་ན། །བླ་མ་སངས་རྒྱས་ཀུན་དང་མཉམ། །དེ་ནི་རྟག་ཏུ་རྡོ་རྗེ་འཆང་། །ཞེས་པ་ལྟར་བླ་མ་སངས་རྒྱས་སུ་མཐོང་བའི་མོས་གུས་ཀྱི་ཐབས་མཆོག་ཏུ་གྱུར་པ་ལ་སོགས་པ་ཇི་ལྟ་བ་བཞིན་སྟོབས་སུ་གྱུར་པས་ཡུན་རིང་པོ་ལ་མ་ལྟོས་པར་མཐོང་ལམ་བཙན་ཐབས་སུ་སྐྱེ་བ་ཡོད་དོ། །དེ་ལྟ་ནའང་ལྔ་བརྒྱའི་ཐ་མ་འདི་ན་གསང་སྔགས་ཚུལ་བཞིན་སྟོན་པར་ནུས་
པའི་རྡོ་རྗེ་སློབ་དཔོན་དང་། དེའི་སྣོད་དབང་པོ་རྣོན་པོའི་ཕྱོགས་དང་མི་འགལ་བའང་ཤིན་ཏུ་དཀོན་ན། སྔགས་ལམ་ལ་གྱ་ཚོམ་དུ་འཇུག་པ་མཐའ་དག་དབང་རྣོན་དུ་སྒྲོ་བཏགས་ནས་གཟུགས་བརྙན་ཙམ་གྱི་རྣམ་པར་གཞག་པ་ལ་དེ་དེ་བཞིན་དུ་བཟུང་ནས་རྡོ་རྗེའི་ལམ་ལ་སྒྲ་ཇི་བཞིན་པར་སྤྱོད་པ་ནི་རྡོ་རྗེའི་དམྱལ་བ་ཆེན་པོའི་འཇུག་ངོགས་ཡིན་ཏེ། འདི་ལྟར་སྔགས་ཀྱི་སྤྱད་པ་སྲུང་གི་དམ་ཚིག་ས་མ་ཡ་འབུམ་སྡེར་གནས་པ་ལས་རྡུལ་ཚོན་གྱི་དཀྱིལ་འཁོར་བྱ་བའི་ཁ་ན་མ་ཐོ་བ་ཅུང་ཟད་ཙམ་སོ་ཐར་གྱི་ཕས་ཕམ་པའི་དོ་མ་ཡིན་ན། རྩ་བའི་དམ་ཚིག་ལ་སོགས་པ་སྨོས་ཅི་དགོས། ཐབས་ལ་བརྟེན་པའི་གནང་བཀག་ཀྱང་ཕ་རོལ་ཏུ་ཕྱིན་པ་ལས་བཀག་པ་སྔགས་སུ་བག་ཡངས་སུ་གནང་བ་མེད་དེ། ཅིའི་ཕྱིར་ན་ཉོན་མོངས་པ་དངོས་བསྟན་ལམ་དུ་འགྲོ་བ་རྒྱལ་བའི་བསྟན་པ་ལ་མེད་པས་སོ། །དེ་བས་ན་བྱང་ཆུབ་སེམས་དཔའི་སྡེ་སྣོད་དུ་དགེ་བའི་རྩ་བ་དང་མཚུངས་ལྡན་གྱི་ཉོན་མོངས་པ་ཉིད་སྙིང་རྗེ་ཆེན་པོའི་གཞན་དབང་དང་འབྲེལ་བར་བསོད་ནམས་ཀྱི་ཚོགས་གསོག་པ་ལ་ལྟོས་ནས་སྣང་བཅས་ཀྱི་ཐབས་དང་འབྲེལ་བར་ལམ་དུ་བྱེད་ཅིང་། རྒྱུད་ཀྱི་ཉོན་མོངས་པ་དངོས་ལ་བསྒོམ་ལམ་གྱི་སྤོང་བྱེད་ཡོད་པས་སྲིད་པའི་གནས་ཏེ་སེམས་ཅན་གྱི་དོན་འབྱུང་བ་ཙམ་ལ་དགོངས་ནས་གསུངས་པ་དང་། གསང་སྔགས་སུ་དབང་པོ་རྣོན་པོས་ལྷའི་རྣལ་འབྱོར་དང་རྗེས་སུ་འབྲེལ་བའི་བདེན་པ་དབྱེར་མེད་སངས་རྒྱས་ཀྱི་ཞིང་ཁམས་སུ་ཤར་བའི་ཐབས་ཀྱིས་ལམ་དུ་བྱེད་པའི་ཁྱད་པར་ཕྱེད་པར་བྱེད་པའང་གནད་ཀྱི་དམ་པ་གཅིག་ཡིན་ནོ། །དེ་ལྟར་ཤེས་ན་ཨིནྡྲ་བྷཱུ་ཏིས། འདམ་བུའི་ཚལ་ནི་ཉམས་དགའ་བར། །ཝ་སྐྱེས་ཉིད་དུ་གྱུར་ཀྱང་སླ། །འདོད་
ཡོན་སྤངས་པའི་དཀའ་ཐུབ་ནི། །ནམ་ཡང་མི་ནུས་གོ་ཏ་མ། །ཞེས་ཞུས་པའི་དོན་ལ་འཇུག་ནུས་པ་ཡིན་ནོ། །དེ་ལྟ་བུའི་ཁྱད་པར་ཅན་གྱི་གསང་སྔགས་ལ་ཡོངས་སུ་གྲགས་པར་རྒྱུད་སྡེ་བཞིར་ཕྱེ་བ་དག་གང་གི་ཕྱིར་བསྟན་ཞེ་ན། དུས་དང་རིགས་དང་དབང་པོ་གསུམ་ལ་དགོངས་པའི་ཚུལ། །དུས་ལ་དགོངས་པ་རྫོགས་ལྡན་གསུམ་ལྡན་དང་། །གཉིས་ལྡན་དང་ནི་རྩོད་པར་ལྡན་པ་བཞི། །རིགས་ལ་དགོངས་པ་བྲམ་ཟེ་རྗེའུ་རིགས། །རྒྱལ་པོ་དང་ནི་དམངས་སམ་གདོལ་པའོ། །དབང་པོར་དགོངས་པ་རྟུལ་འབྲིང་རྣོན་དང་མཆོག །དེ་ལ་སྤྱིར་རྒྱུད་སྡེའི་སྒོ་ནས་འཇུག་སྒོ་མི་འདྲ་བ་བཞིར་བཞག་པ་ནི་སྔགས་རྒྱུད་ཡོད་དོ་ཅོག་ཆིངས་ཆེན་པོ་བཞིས་བཅིང་པའི་སླད་དུ་སྡོམས་ཉེ་བར་བཞག་པ་ཙམ་ཡིན་གྱི་གཞན་དུ་རྡོ་རྗེ་སྙིང་པོ་རྒྱན་གྱི་རྒྱུད་དང་། སྡོམ་འབྱུང་དང་། སངས་རྒྱས་ཐོད་པ་དང་། ཡེ་ཤེས་རྡོ་རྗེ་ཀུན་ལས་བཏུས་སོགས་སུ་གཞུང་ཚད་ཇི་ལྟ་བུས་བསྟན་བློ་ལ་མ་ངེས་ཤིང་དེ་དག་ལ་ཅང་མི་སེམས་པའི་སྡང་ཞེན་གྱི་སེམས་ཡིད་ལ་ཉེ་བར་བཞག་ནས་གསང་སྔགས་ནང་རྒྱུད་ཆེས་ཟབ་པ་ཡོངས་གྲགས་སུ་མ་བསྒྱུར་བའི་ཐེག་པ་དང་། རྒྱུད་སྡེའི་རྣམ་གྲངས་བསམ་གྱིས་མི་ཁྱབ་པའི་ཚུལ་ལ་མཐའ་གཅིག་ཏུ་བཟུང་བའི་ལོག་རྟོག་དང་ཀླན་ཀ་རུང་བ་མ་ཡིན་ཏེ། རྡོ་རྗེ་སྙིང་པོ་རྒྱན་གྱི་རྒྱུད་ལས། གསང་དང་གསང་ཆེན་ཤིན་ཏུ་གསང་། །རྣལ་འབྱོར་རྣལ་འབྱོར་ཆེན་པོ་དང་། །རྗེས་སུ་རྣལ་འབྱོར་ཆེན་པོ་དང་། །ཅེས་དང་། གསང་དང་གསང་ཆེན་ཤིན་ཏུ་གསང་། །རྒྱུད་རྣམས་ཀུན་གྱི་སྤྱི་བོ་སྟེ། །ཞེས་པས་ཤིན་ཏུ་རྣལ་འབྱོར་དང་། །རྗེས་སུ་རྣལ་འབྱོར་ལ་སོགས་པའི་མཚན་
གཞི་གསལ་བར་བསྟན་ལ། དེ་བཞིན་དུ་དཔུང་བཟང་ལས། །ལྷ་དང་ལྷ་མིན་མི་ལ་ཕན་གདགས་ཕྱིར། །གསང་སྔགས་རིག་སྔགས་རྣམ་པ་སྣ་ཚོགས་དག །བྱེ་བ་ཕྲག་གསུམ་དང་ནི་འབུམ་ཕྲག་ལྔ། །རིག་འཛིན་སྡེ་སྣོད་གསལ་བར་རྒྱལ་བས་གསུངས། །ཞེས་སྔགས་ཀྱི་རྒྱུད་སྡེ་ནི་སེམས་ཅན་གྱི་བློ་དང་ཆོས་ཀྱི་དབྱིངས་དམ་པའི་རྗེས་སུ་འགྲོ་བ་ཡིན་པས་མཐའ་དང་། གྲངས་དང་། ཆེད་ཀྱིས་དཔག་པར་མི་ནུས་ཏེ། རྡོ་རྗེ་འཆང་གྲངས་མེད་པས་ཐོག་མ་མེད་པའི་དུས་ནས་འཁོར་ཚད་མེད་པའི་ནང་དུ་དུས་གསུམ་གྱི་དངོས་པོའི་མཐའ་མི་ཐུག་པར་གསུངས་ཤིང་གསུང་བའི་ཕྱིར་ཏེ། འཇམ་དཔལ་སྒྱུ་འཕྲུལ་ལས། །འདས་པའི་སངས་རྒྱས་རྣམས་ཀྱིས་གསུངས། །མ་འོངས་རྣམས་ཀྱང་གསུང་འགྱུར་ལ། །ད་ལྟར་བྱུང་བའི་རྫོགས་སངས་རྒྱས། །ཡང་དང་ཡང་དུ་གསུངས་པ་རྣམས། །ཞེས་གསུངས་པ་སྟེ། དེ་དག་སྡེ་ཚན་གྱི་ནང་དུ་འདུས་ཚུལ་གྱི་རྣམ་གྲངས་ཅུང་ཟད་དགོད་ན། བཤད་རྒྱུད་རྡོ་རྗེ་ཕྲེང་བ་ལས། །སྟོང་ཕྲག་ཉི་ཤུ་རྩ་བཞི་ནི། །ཁྲག་འབབ་པར་ནི་ཤེས་པར་བྱ། །སྟོང་ཕྲག་ཉི་ཤུ་རྩ་བཞི་ནི། །བྱང་ཆུབ་སེམས་ནི་རབ་ཏུ་འབབ། །སྟོང་ཕྲག་ཉི་ཤུ་རྩ་བཞི་ནི། །རླུང་རྒྱུ་བར་ནི་ཤེས་པར་བྱ། །ཞེས་པ་ལྟར་རྩ་སྟོང་ཕྲག་བདུན་ཅུ་རྩ་གཉིས་ཀྱི་རིམ་པས་དེར་འབབ་པའི་ཁུ་རྡུལ་གཉིས་དང་རླུང་གི་འདུ་བ་ལས་ཆོས་ཀྱི་རྣམ་གྲངས་དེ་སྙེད་ཅིག་འཆར་བའི་ཕྱོགས་ལ་བློ་ཡངས་པར་བྱ་སྟེ། སངས་རྒྱས་ཐོད་པ་ལས། །རྣལ་འབྱོར་ཕ་རྒྱུད་རྣམས་ཀྱི་ཚད། །བྱེ་བ་ཕྲག་ནི་དགུ་བཅུར་ངེས། །དེ་བཞིན་རྣལ་འབྱོར་མ་རྒྱུད་གྲངས། །བྱེ་བ་ཕྲག་ནི་བཅུ་དྲུག་གྲགས། །ཞེས་དང་། ཀླུ་སྒྲུབ་ཞབས་ཀྱི་རིམ་ལྔའི་
འགྲེལ་པ་ལས་ཀྱང་སྔགས་ཀྱི་དབྱེ་བ་ནི་སྟོང་ཕྲག་བདུན་ཅུ་རྩ་གཉིས་སོ། །ཞེས་སོ། །དེ་ལྟའང་འདིར་རྒྱུད་སྡེ་བཞིའི་ངེས་པ་ལྟར་འཆད་པ་ནི་གདུལ་བྱའི་གཙོ་བོ་མི་འདྲ་བ་བཞི་ལ་འདུལ་བྱེད་ཀྱི་གསང་སྔགས་ཀྱང་དེ་དང་མཚན་ཉིད་མཚུངས་པ་རྣམ་པ་བཞིར་ཡོད་པའི་ཆིངས་ཀྱིས་བཅིངས་ནས་བཤད་པས་རྣམ་གྲངས་བསྡུ་སླ་བའི་ཕྱིར་རོ། །དེ་སྐད་དུ་གསང་བ་གྲུབ་པ་ལས། གདུལ་བྱ་དུས་དང་འདུལ་བྱེད་ཀྱི། །སྐལ་བ་ཅན་རྣམས་དོན་གྱི་ཕྱིར། །གསང་སྔགས་ཚུལ་ཆེན་རྣམ་པ་བཞི། །འཇིག་རྟེན་ཁམས་སུ་བསྒྲགས་པ་ཡིན། །ཞེས་སོ། །དེ་ལ་སྤྱིར་གདུལ་བྱ་ལ་དགོངས་པའི་གཙོ་བོ་ནི་འདོད་ཡོན་ལ་ཆགས་པ། ལམ་དུ་བྱེད་ཚུལ་མི་འདྲ་བ་བཞི་ཡོད་པས་རྒྱུད་སྡེ་བཞིར་བསྟན་ཏེ། རྡོ་རྗེ་སྙིང་པོ་རྒྱན་ལས། །འདི་ནི་གཉིས་པོ་འཁྱུད་པ་ཡི། །རྒྱུད་ཀྱི་དབྱེ་བ་བསྟན་པའོ། །དེ་བཞིན་དུ་ནི་ལག་བཅངས་དང་། །དགོད་དང་བལྟས་པས་ཤེས་པར་བྱ། །ཅེས་པ་ལྟར་དུས་བཞི་པོའི་གནས་སྐབས་ཀྱི་འཛམ་བུའི་གླིང་པ་རྣམས་ལ་སྦྱང་གཞི་འདོད་ཆགས་ཀྱི་འཇུག་ཚུལ་བཞི་ཡོད་དེ། འདི་ལྟར་རྫོགས་ལྡན་གྱི་དུས་ན་ཉོན་མོངས་པ་འདོད་ཆགས་ཀྱང་ཤས་ཆུང་བས་གཅིག་ལ་གཅིག་བལྟས་པ་ཙམ་གྱིས་ཚིམ་པ་ཡོད་པས་དེའི་དོན་དུ་བྱ་བའི་རྒྱུད་དང་། གསུམ་ལྡན་གྱི་དུས་ན་བགད་པས་ཚིམ་པའི་འདོད་ཆགས་ཡོད་པས་དེའི་དོན་དུ་སྤྱོད་པའི་རྒྱུད་དང་། གཉིས་ལྡན་གྱི་དུས་ན་གཅིག་ལ་གཅིག་རེག་པའི་འདོད་ཆགས་ཡོད་པས་དེའི་དོན་དུ་རྣལ་འབྱོར་རྒྱུད་དང་རྩོད་ལྡན་གྱི་དུས་དབང་པོ་གཉིས་སྦྱོར་གྱི་འདོད་ཆགས་ཡོད་པས་དེའི་དོན་དུ་བླ་མེད་ཀྱི་རྒྱུད་གསུངས་པའོ། །དུས་ལ་དགོངས་པ་ནི་བླ་མེད་ཀྱི་ལུགས་
ཀྱི་དབང་བཞིའི་རིམ་པ་དང་སྦྱར་བའི་ཕྱོགས་འཐད་པ་ཡིན་ཏེ། དགོད་པ་དག་པ་སློབ་དཔོན་ཉིད། །ལྟ་བ་གསང་བའི་དབང་ཡིན་ནོ། །ཞེས་པ་དང་མི་འགལ་ཞིང་བྱ་སྤྱོད་གཉིས་གོ་རིམ་མི་འཆོལ་བའི་ཚུལ་ལྷ་ཐམས་ཅད་ཡང་དག་པར་བསྡུས་པའི་རྒྱུད་ལས། རྫོགས་ལྡན་དང་པོ་བྱ་བའི་རྒྱུད། །གསུམ་ལྡན་གཉིས་པ་སྤྱོད་པའི་རྒྱུད། །གཉིས་ལྡན་གསུམ་པ་རྣལ་འབྱོར་རྒྱུད། །རྩོད་ལྡན་བཞི་པ་བླ་མེད་དོ། །དུས་བཞི་ལ་ནི་དགོངས་ནས་ཀྱང་། །རྒྱུད་ཀྱི་རྣམ་པ་བཞིར་བཤད་དོ། །ཅེས་དང་། ཁ་སྦྱོར་གྱི་བརྟག་པ་དྲུག་པའི་རབ་བྱེད། གསུམ་པ་ལས། དགོད་དང་བལྟ་དང་ལག་བཅངས་དང་། །གཉིས་གཉིས་འཁྱུད་དང་རྣམ་པ་བཞི། །སྲིན་བུའི་ཚུལ་གྱི་རྒྱུད་བཞིར་གནས། །ཞེས་པ་དང་མཐུན་པར་བརྟག་གཉིས་ལས་ཀྱང་གསུངས་སོ། །དེ་བས་ན་འདི་དག་ལ་རིམ་པ་བཞིན་དགོད་པའི་རྒྱུད་དང་། བལྟ་བའི་རྒྱུད་དང་། ལག་བཅངས་སམ། འཁྱུད་པའི་རྒྱུད་དང་། གཉིས་སྦྱོར་གྱི་རྒྱུད་ཅེས་ཀྱང་བརྗོད་དེ་འཆད་ཚུལ་གཞན་དུ་གོ་རིམ་ནོར་བ་མང་ངོ་། །རིགས་ལ་དགོངས་པ་ནི་སྤྱོད་པའི་སྒོ་ནས་ཕྱེ་བ་སྟེ། འདི་ལྟར་བྲམ་ཟེ་རྣམས་གཙང་སྒྲ་དང་དཀའ་ཐུབ་ལ་སྤྱོད་པས་དེ་གདུལ་བའི་ཕྱིར་ལུས་ངག་གི་ལས་དང་ཁྲུས་དང་གཙང་སྦྲ་གཙོ་བོར་སྟོན་པ་བྱ་བའི་རྒྱུད་དང་། རྗེའུ་རིགས་ནི་སྒོ་གསུམ་ཆ་མཉམ་པའི་སྤྱོད་པ་ལ་གཟོ་བས་དེའི་དོན་དུ་སྤྱོད་རྒྱུད་དང་། རྒྱལ་རིགས་ནི་རྒྱ་ཆེ་བ་ལ་མོས་པས་སེམས་ཀྱི་ལས་གཙོ་བོར་སྤྱོད་པས་དེའི་དོན་དུ་དམིགས་པ་གཙོ་བོར་སྤྱོད་པ་རྣལ་འབྱོར་གྱི་རྒྱུད་དང་། དམངས་རིགས་ནི་གཙང་སྦྲ་ཆུང་ཞིང་ཉོན་མོངས་པའི་བརྟུལ་ཞུགས་ཆེ་བས་དེའི་དོན་དུ་ཡེ་ཤེས་ཀྱི་ལས་ལ་གཙོ་བོར་སྤྱོད་པའི་བླ་མེད་དེ། བདེ་མཆོག་རོལ་པའི་རྒྱུད་ལས། །བྱ་བ་བྲམ་ཟེ་
གཙང་དང་བསྟུན། །སྤྱོད་པ་རྗེའུ་རིགས་དེ་བས་ལྷག །རྣལ་འབྱོར་རྒྱལ་པོའི་འཁོར་ཚོགས་མང་། །གཞི་རྨོངས་གདོད་ནས་གྲོལ་བ་སྟེ། །གཞན་དུ་སུ་ལའང་མ་བསྟན་པར། །མཛེས་མ་ཁྱོད་ལ་བསྟན་པ་ཡིན། །ཞེས་སོ། །དབང་པོ་ལ་དགོངས་པ་ནི། རྟུལ་པོ་རྣམས་ཀྱི་སེམས་ཀྱི་ཀུན་ཏུ་བརྩམ་པ་ཆེན་པོ་ཉམས་འོག་ཏུ་མི་ཆུད་པས་ལུས་ངག་གི་བྱ་བ་ལ་ཆེ་ཐང་དུ་མཐོང་ནས་འཇུག་པས་དེའི་དོན་དུ་ཁྲུས་དང་གཙང་སྦྲ་དང་། དཀར་གསུམ་ཟ་བ་དང་། གོས་གསུམ་བརྗེ་བ་ལ་སོགས་པའི་བྱ་བ་ལྷུར་ལེན་པས་ཀྲི་ཡ་དང་། དབང་པོ་འབྲིང་པོས་སེམས་ཀྱི་བརྩམ་པ་ཆེན་པོ་ཡང་རྟོགས་སུ་རུང་ལ་ལུས་ངག་གི་བྱ་བ་དང་སེམས་ཀྱི་བསྒོམ་པ་ཆ་མཉམ་པས་སྤྱོད་པའི་རྒྱུད་དང་། དབང་པོ་རྣོན་པོས་སེམས་ཀྱི་བསྒོམ་པ་གཙོ་བོ་ལ་ལུས་ངག་གི་སྤྱོད་པ་དེའི་གྲོགས་སུ་སྤྱོད་པས་རྣལ་འབྱོར་གྱི་རྒྱུད་དང་། ཤིན་ཏུ་རྣོན་པོས་སྒོ་གསུམ་གྱི་བྱ་བ་ཐམས་ཅད་ལྷའི་རྣལ་འབྱོར་དང་ཟུང་དུ་འཇུག་ཅིང་། སྤང་བླང་དང་དགག་བསྒྲུབ་ལ་སོགས་པའི་ཆོས་ཐམས་ཅད་མཉམ་པ་ཆེན་པོར་སྤྱོད་པས་རྣལ་འབྱོར་བླ་ན་མེད་པ་སྟེ། རྡོ་རྗེ་གུར་ལས། །དམན་པ་རྣམས་ལ་བྱ་བའི་རྒྱུད། །བྱ་མིན་རྣལ་འབྱོར་དེ་ལྟག་ལ། །སེམས་ཅན་མཆོག་ལ་རྣལ་འབྱོར་རྒྱུད། །རྣལ་འབྱོར་བླ་མེད་དེ་ལྟག་ལའོ། །ཞེས་སོ། །གཞན་ཡང་སྔོན་གྱི་མཁན་པོ་དག་གྲུབ་མཐའ་སྨྲ་བ་བཞི་རྗེས་སུ་བཟུང་བའི་ཕྱིར་རྒྱུད་སྡེ་བཞིར་ཕྱེ་བར་འདོད་པ་དང་། ལྷ་གཞིའི་རྗེས་སུ་འཇུག་པའི་ཕྱིན་ཅི་ལོག །བཞི་རྗེས་སུ་བཟུང་བའི་ཕྱིར་རྒྱུད་སྡེ་བཞིར་ཕྱེ་བར་འདོད་པ་རྣམས་ལ་བསྟན་བཅོས་ཕྱི་རིམ་ནས་དགག་བསྒྲུབ་སྔ་མ་སྔ་མའི་ལྡོག་ཕྱོགས་འབའ་ཞིག་
བཀོད་པ་མང་དུ་མཐོང་ཡང་། འདི་ལྟར་སྔགས་རྒྱུད་རྣམས་ནི་དུས་འདི་ཙམ་ནས་བྱུང་བསམ་པར་མི་ནུས་ཤིང་། སྟོན་པ་དང་དགོངས་པ་མཉམ་པའི་འཁོར་བྱང་ཆུབ་སེམས་དཔའི་ཚུལ་དུ་བསྟན་པ་རྣམས་ཀྱིས་ཆོས་ཀྱི་རྣམ་གྲངས་དེ་དག་བཟུང་ནས་དུས་ལ་བབ་པའི་གདུལ་བྱའི་ངོར་སྣང་ཞིང་ནུབ་པའི་ཚུལ་ཚད་མེད་ན། གྲུབ་མཐའ་སྨྲ་བ་བཞིའི་འདོད་པའི་རྗེས་སུ་གསུངས་པ་བློས་ཐུག་པར་མི་འགྱུར་ཀྱང་། མདོ་སྔགས་གཉིས་དོན་གྱི་དགོངས་པ་གཅིག་ཏུ་འབབ་པའི་ཆ་ནས་མི་འགལ་མོད། དེ་བཞིན་དུ་ལྷ་བཞིའི་རྗེས་སུ་འཇུག་པ་དག་རྒྱུད་སྡེ་དེ་དག་གི་གདུལ་བྱའི་གཙོ་བོར་དགོངས་ནས་གསུངས་པ་མ་ཡིན་ཀྱང་སངས་རྒྱས་ནི་ཐབས་མཁས་ལ་ཐུགས་རྗེ་ཆེ་ཞིང་ཐམས་ཅད་མཁྱེན་པའི་མཚན་དོན་མ་ནོར་བ་ཡིན་པས་སེམས་ཅན་གྱི་དོན་དུ་ཕྱི་དོན་གྱི་དངོས་པོ་བདེན་པར་སྨྲ་བའི་བདག་ཏུ་བལྟ་བ་ཅན་རྗེས་སུ་བཟུང་བའི་དོན་དུ། དགེ་སློང་དག་ཁུར་ཡང་ཡོད་ཁུར་ཁྱེར་བ་ཡང་ཡོད་དོ། །ཞེས་བྱ་བའི་རྗེས་སུ་འབྲངས་ནས་བྱེ་བྲག་སྨྲ་བའི་གྲུབ་པའི་མཐའ་བྱ་བ་ལྟར། ཕྱིན་ཅི་ལོག་བཞིའི་ཕྱོགས་ལ་ཞེན་པ་དག་རྗེས་སུ་བཟུང་བའི་ཕྱིར་རྒྱུད་སྡེ་བཞིར་གསུངས་པའང་མི་འགལ་ཏེ། འདི་ལྟར་གཏི་མུག་ཅན་ཚངས་པ་ནི་གཙང་སྦྲ་ཆོས་སུ་སྨྲ་སྟེ། འདག་འཆལ་དག་གིས་བགོས་པའི་གོས། །དྲི་མ་མེད་པར་འགྱུར་བ་བཞིན། ལུས་ལ་ཆོས་སྦྱིན་གྱིས་བགོས་ལ། །འབབ་སྟེགས་བཀྲུས་པ་དེ་ཡིས་འདག །ཅེས་པའི་ཚུལ་གྱིས་བཟུང་བའི་ཕྱིར། །བྱ་བའི་རྒྱུད་ལེགས་གྲུབ་ལས། ཁྲུས་བྱས་གཙང་མ་བཟུང་བྱ་སྟེ། །བཀྲ་ཤིས་ངོ་མཚར་བཟུང་བྱས་ལ། །བསྒྲུབ་པའི་རྫས་ནི་རྗེས་སུ་བཟུང་། །ཞེས་སོ། །ཞེ་སྡང་ཅན་ཁྱབ་
འཇུག་པ་འཚེ་བ་ཆོས་སུ་སྨྲ་སྟེ། །རྒྱལ་རིགས་ལ་ནི་རྒྱལ་རིགས་དང་། །བྲམ་ཟེ་གསད་པ་བྲམ་ཟེ་དང་། །ཞེས་པའི་དོན་དུ་སྤྱོད་རྒྱུད་རྣམ་སྣང་མངོན་བྱང་ལས། ཨེ་མ་ཧོ་གསོད་པ་འདི་ནི་བཟང་། །གསད་པས་བྱང་ཆུབ་ཐོབ་པར་བྱེད། །ཅེས་སོ། །ང་རྒྱལ་ཅན་བརྒྱ་བྱིན་རྗེས་སུ་བཟུང་བའི་ཕྱིར། །དབང་ཕྱུག་འབྱོར་པ་ལྷ་ཡི་རྒྱུད། །རྣལ་འབྱོར་ཡང་དག་བཤད་པའོ། །ཞེས་རྣལ་འབྱོར་བསྟན་ཏོ་འདོད་ཆགས་ཆོས་སུ་སྨྲ་བ་དབང་ཕྱུག་གི་རྒྱུད་ལ་དགའ་ཞིང་ཡུལ་ཡོངས་སུ་མི་སྤོང་བ་རྣམས་ནི། གཽ་ཏམ་བུད་མེད་མེ་ཡིན་ཏེ། །དེ་ཡི་ཉེ་གནས་ཐབ་ཁུང་ཡིན། །ཞེས་དང་། གཞན་ཡང་དེ་དག་རྣམས། །བྷ་ག་ལེགས་ལྡན་ཁྱབ་འཇུག་སྟེ། །བུད་མེད་རྣམས་ཀྱི་འདོམས་ན་གནས། །མི་རྣམ་དགའ་བར་བྱེད་པས་ན། །དེས་ན་སྲེད་མེད་བུ་ཞེས་བྱ། །ཞེས་འདོད་ཆགས་ཀྱི་ཀུན་སྤྱོད་ཅན་རྣམས་གདུལ་བའི་ཕྱིར། གསང་བ་འདུས་པར། བུད་མེད་གཟུགས་དང་འདབ་བཟང་བ། །ལོ་གྲངས་བཅུ་དྲུག་ལོན་པ་ལ། །བྱིན་གྱིས་བརླབས་ཏེ་གནས་གསུམ་དུ། དབེན་པར་མཆོད་པ་རབ་ཏུ་བརྩམ། །ཞེས་བླ་མེད་བསྟན་ཏོ། །འདི་ནི་སྙིགས་མའི་དུས་ཀྱི་གདུལ་བྱ་ལ་གཙོ་བོ་ཡིན་པར་སྡོམ་འབྱུང་ལས། སྙིགས་མའི་དུས་ན་འགྲུབ་པར་འགྱུར། །ཞེས་སོ། །འགྲུབ་པའི་ཁྱད་གཞི་གང་ཡིན་ན་ཐབས་ཤེས་འབྲེལ་བའི་ལྷའི་རྣལ་འབྱོར་གྱི་སྒོ་ནས་ཤེས་རབ་ཀྱི་ལམ་ཁྱད་ཞུགས་པར་འགྲོ་བ་ཉིད་ཡིན་ཏེ། འདི་ལྟར་གསང་སྔགས་བླ་ན་མེད་པ་ཕལ་མོ་ཆེ་ནི་ཐབས་ཤེས་ཁྱད་པར་ཅན་ལྷ་ཡབ་ཡུམ་གཉིས་སྦྱོར་གྱི་རྣམ་པ་ཅན་དུ་ཡོད་པ་དང་། ཆགས་པ་ལམ་དུ་བྱེད་པའི་ཐབས་ཤེས་
ཀྱི་རྫོགས་རིམ་ཀྱང་ཤིན་ཏུ་ཟབ་པ་དག་ཡོད་པས་བྱང་ཆུབ་ཀྱི་སེམས་གཉིས་ཀྱི་འདུ་འཕྲོད་ཁྱད་པར་ཅན་གྱི་གནད་ལ་བརྟེན་ནས་སྟོང་ཉིད་ཀྱི་ལྟ་བ་ལའང་ཁྱད་ཞུགས་པ་རྣལ་འབྱོར་གྱི་དབང་ཕྱུག་རྣམས་ཀྱི་ཉམས་སུ་མྱོང་བར་འགྱུར་རོ། །དེ་སྐད་དུ་ཨིནྟྲ་བྷཱུ་ཏིས། བླ་མའི་ཁྱད་པར་དང་། སྣོད་དང་། ཆོ་ག་དང་། ལས་དང་། དམ་ཚིག་དང་། བསྒོམ་པའི་ལྟེ་བ་དང་། སྤྱོད་པའི་ཁྱད་པར་གྱིས་འཕགས་སོ། །ཞེས་བསྟན་ཏོ། །གཞན་ཡང་བག་ཆགས་ཀྱི་སྒོ་ནས་དབྱེ་བའི་ཚུལ་དུས་འཁོར་བསྡུས་རྒྱུད་ལས། ཤེས་རབ་རྒྱུད་ནི་ཤར་ནས་སླར་ཡང་རྣལ་འབྱོར་རྗེས་སུ་རིག་པ་ཉིད་ནི་ནུབ་ཀྱི་ཞལ་ནས་སོ། །གཡས་ཀྱི་ཞལ་ནས་རྒྱལ་བའི་བདག་པོས་རྣལ་འབྱོར་རྒྱུད་གསུངས་གཡོན་གྱི་ཞལ་ནས་བྱ་བ་ལ་སོགས་པའོ། །ཞེས་གཡོན་ཞལ་སད་པའི་བག་ཆགས་ཀྱི་དབང་ལས་རགས་པ་ཕྱི་དོན་དུ་ཞེན་པ་ལ་བྱ་བ་དང་སྤྱོད་པའི་རྒྱུད། གཡས་ཞལ་རྨི་ལམ་གྱི་བག་ཆགས་ཀྱི་དབང་གིས་སེམས་ཀྱི་སྣང་བ་ཙམ་དུ་ཞེན་པ་ལ་རྣལ་འབྱོར་གྱི་རྒྱུད། མདུན་ཞལ་གཉིད་འཐུག་པོ་ལོག་པའི་བག་ཆགས་ཀྱི་དབང་གིས་ཕྱིའི་རྟོག་པ་ཐམས་ཅད་ནུབ་ནས་མི་རྟོག་པར་ཞེན་པ་ལ་བླ་ན་མེད་པའི་རྒྱུད་རྒྱབ་ཞལ་བཞི་པའི་བག་ཆགས་ཀྱི་དབང་གིས་བདེ་བར་ཞེན་པ་ལ་རྣལ་འབྱོར་རྗེས་རིག་གི་རྒྱུད་སྡེའི་རྣམ་གྲངས་ཕྱེ་བ་རྣམས་གསུངས་པ་ཡིན་ནོ། །དེ་བས་ན་རྒྱུད་སྡེ་འོག་མ་གསུམ་དུ་བདེ་བ་ལམ་བྱེད་ཀྱི་ཐབས་ཁྱད་པར་བ་མེད་པས་ཡན་ལག་བདུན་གྱི་ནང་གི་ཁ་སྦྱོར་གྱི་ཡན་ལག་ཀྱང་མ་བསྟན་པ་ཡིན་ནོ། །དེ་དག་གིས་གདུལ་བྱ་གང་ལ་དགོངས་པའི་ཁྱད་པར་བསྟན་ནས་འདུལ་བྱེད་ཆོས་ཀྱི་རྣམ་པར་གཞག་པའི་ཕྱིར། ཆོས་ནི་བྱ་སྤྱོད་རྣལ་འབྱོར་བླ་ན་མེད། །དང་པོ་གསུམ་ནི་གསང་
སྔགས་ཕྱི་པ་སྟེ། །ཐུབ་པས་དངོས་གསུངས་མཚན་ཉིད་ཐེག་པ་དང་། །གཙང་སྦྲ་སྡོམ་པའི་ཀུན་སྤྱོད་ཕལ་ཆེར་མཚུངས། །རྩོད་པའི་དུས་དང་འགལ་བའི་འདོད་ཆགས་ཀྱི། །ཀུན་སྤྱོད་ལམ་བྱེད་ལྷ་ཡང་ཟུང་འབྲེལ་མིན། །ཤ་ལྔ་བདུད་རྩི་ལྔ་ལ་ལོངས་མི་སྤྱོད། །དེ་ལ་རྒྱུད་སྡེ་བཞིར་གྲངས་ངེས་པའི་ཀྲི་ཡ་དང་། ཨུ་པ་དང་། ཡོ་ག་སྟེ་བྱ་སྤྱོད་རྣལ་འབྱོར་གྱི་རྒྱུད་གསུམ་ནི་ཐུབ་པ་ཆགས་བྲལ་གྱི་རྣམ་པས་དངོས་སུ་གསུངས་ཤིང་། ཕྱི་མཚན་ཉིད་ཀྱི་ཐེག་པ་ལྟར་གཙང་བཙོག་དང་སྤོང་ལེན་མང་ཞིང་ནང་གི་དམ་རྫས་ལ་སྤྱོད་མི་ནུས། བླང་དོར་དང་སྤང་གཉེན་ལ་སོགས་ཚངས་པར་སྤྱོད་པའི་དཀའ་ཐུབ་དང་སྡོམ་བའི་ཀུན་ཏུ་སྤྱོད་པ་ཡང་ཚུལ་མཚུངས་པས་ན་དཀའ་ཐུབ་རེག་བྱེད་དམ། ཐུབ་པ་རྒྱུད་ཀྱི་ཐེག་པ་ཞེས་ཀྱང་བྱའོ། །དེ་སྐད་དུ་འཇམ་དཔལ་རྩ་རྒྱུད་ལས། ཐུབ་པ་བདུན་པས་ཚིགས་བཅད་ནི། །སངས་རྒྱས་གསུང་ནི་དག་པས་གསུངས། །ཅེས་སྟོན་པའི་ཁྱད་པར་དང་། ནང་གི་འདོད་པའི་ཡོན་ཏན་ལའང་སྤྱོད་པར་མི་ནུས་ཤིང་ལུས་ངག་གི་སྡོམ་པ་གཟུགས་ཅན་དང་ཕྱོགས་མཚུངས་པའོ། །དེའང་ཐེག་པ་ཆེན་པོ་གཉིས་ཀའི་བསམ་པའི་རྟེན་ནི་ཆོས་དང་བླ་མ་ལ་གུས་ཤིང་དགེ་བ་བཅུའི་ལས་ལམ་ལ་གནས་པ། དེའི་གྲོགས་སུ་མང་དུ་ཐོས་པ་དང་ལྡན་ཞིང་ཁྱད་པར་འགྲོ་བ་འདོན་པར་འདོད་པའི་བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་གྲུབ་པ་ཁོ་ན་ཡིན་ནོ། །དེ་སྐད་དུ་སྤྱོད་པའི་རྒྱུད་ལག་ན་རྡོ་རྗེ་མངོན་པར་དབང་བསྐུར་བའི་རྒྱུད་ལས། བྱང་ཆུབ་སེམས་དཔའ་ཆེན་པོ་གཟུངས་སྔགས་ཆེན་པོའི་དཀྱིལ་འཁོར་ཤིན་ཏུ་རྒྱ་ཆེ་བ་འདི་དང་། ཤིན་ཏུ་ཟབ་པ་
འདི་དང་། གཏིང་དཔག་དཀའ་བ་དང་གསང་བ་བས་ཀྱང་ཆེས་གསང་བ་སེམས་ཅན་སྡིག་པ་ཅན་རྣམས་ལ་བསྟན་དུ་མི་རུང་བ་འདི་ནི། ལག་ན་རྡོ་རྗེ་ཁྱོད་ཀྱིས་ཤིན་ཏུ་དཀོན་པ་ཞིག་སྨྲས་ཏེ། འདི་ནི་སྔོན་མ་ཐོས་ན་འདི་སེམས་ཅན་ཇི་ལྟ་བུ་ལ་བཤད་པར་བྱ། ལག་ན་རྡོ་རྗེས་སྨྲས་པ། འཇམ་དཔལ་གང་དག་བྱང་ཆུབ་ཀྱི་སེམས་བསྒོམ་པ་ལ་ཞུགས་པ་དང་། གང་གི་ཚེ་དེ་དག་གི་བྱང་ཆུབ་ཀྱི་སེམས་གྲུབ་པར་གྱུར་པ་དེའི་ཚེ། འཇམ་དཔལ་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོ་སྤྱོད་པའི་བྱང་ཆུབ་སེམས་དཔའ་དེ་དག་ཡེ་ཤེས་ཆེན་པོར་དབང་བསྐུར་བའི་གཟུངས་སྔགས་ཀྱི་དཀྱིལ་འཁོར་དུ་གཞུག་པར་བྱ་ཡི། གང་དག་གིས་བྱང་ཆུབ་ཀྱི་སེམས་རྫོགས་པར་མ་གྱུར་པ་དེ་དག་ནི་གཞུག་པར་མི་བྱ་སྟེ། དེ་དག་ནི་དཀྱིལ་འཁོར་ཡང་བ་ལྟར་མི་གཞུག་གོ །དེ་དག་ནི་ཕྱག་རྒྱ་དང་གསང་སྔགས་ཀྱང་བསྟན་པར་མི་བྱའོ། །ཞེས་པས་དབང་བསྐུར་བའི་སྔ་རོལ་དུ་སྨོན་འཇུག་གི་སེམས་ལ་ནུས་པ་བརྟན་པ་ནི་མེད་དུ་མི་རུང་བ་ཡིན་ནོ། །འདི་ལྟར་མ་གོ་བ་དག་སྔགས་ཀྱི་གདུལ་བྱ་ནི་སྙིང་རྗེ་ཆེན་པོའི་གཞན་དབང་དུ་གྱུར་བའི་འགལ་ཟླ་ཞེ་སྡང་ལ་སོགས་པའི་ཉོན་མོངས་པ་ཅན་དུ་འདོད་པ་ནི་ཤིན་ཏུ་གཏི་མུག་ཅན་དུ་རིགས་པར་བྱ་སྟེ། འདི་ལྟར་སྔགས་རྒྱུད་ཀྱི་ཆེ་བ་བསྟན་པ་དང་། དམ་ཚིག་གི་ཀུན་ཏུ་སྤྱོད་པའི་དུས་ཚིག་གི་རྣམ་པ་འདྲ་བ་ཙམ་བྱུང་སྲིད་ན་དེའི་དགོངས་པ་ནི་དེ་མ་ཡིན་ཏེ། རྒྱལ་པོ་མྱ་ངན་མེད་ལྟ་བུའི་གཟུ་ལུམ་ཅན་ཡང་དགེ་བའི་བཤེས་གཉེན་དང་ཕྲད་ན་སྔོན་གྱི་དགེ་བའི་རྩ་བ་དང་འབྲེལ་བའི་སེམས་ཁྱད་པར་ཅན་རྒྱུད་ལ་སྐྱེ་བའི་བག་ཆགས་བཟང་པོ་ཡོད་པས་དེའི་ཞེ་སྡང་དུས་རེས་འགའ་བའམ་གཉེན་པོས་ལྡོག་པའི་གློ་བུར་བ་ཅན་ཡིན་པ་བཞིན་ནོ། །ད་ལྟ་སྡིག་སྤྱོད་ཀྱི་རྒྱལ་བློན་ལ་སོགས་ཏེ་ཁྱིམ་པའི་ཕྱོགས་ཉོན་མོངས་པ་རྒྱུན་ཆགས་ལ་
སྡོམ་སེམས་མེད་པ་གང་ཞིག་སྔགས་ཀྱི་བརྟུལ་ཞུགས་ཀྱི་གྲོལ་དུ་རེ་བ་ནི་ཕྱོགས་འཛོལ་བ་ཆེན་པོ་ཡིན་ནོ། །དེ་བས་ན་ཐེག་པ་འདི་ལ་འཇུག་པ་རྣམས་ཀྱང་སྔར་འཁོར་ལོ་ཆེན་པོ་བཞིའི་ཚོམས་སུ་བསྟན་པ་ལྟར་དགེ་བའི་བཤེས་གཉེན་མཚན་ཉིད་དང་ལྡན་པ་ལེགས་པར་བསྟེན་ལ་ལེའུ་དང་པོ་ནས་བཟུང་སྟེ་བློ་སྦྱོང་གི་རིམ་པ་དང་། དེ་ནས་བྱང་ཆུབ་སེམས་དཔའི་སྤྱོད་པ་རྣམས་ལེགས་པར་ཤེས་པར་བྱས་ལ་དེའི་ཁུར་འཁྱེར་བར་ནུས་པ་ན། བྱང་སྡོམ་གྱི་རྟེན་དགེ་བསྙེན་ཡིན་ན་དགེ་བསྙེན་གྱི་སྡོམ་པའི་ཕྱོགས་ཇི་ལྟར་ནུས་ཚད་དང་། དེའི་གསོ་སྦྱོང་བསྙེན་གནས་ལ་བརྩོན་པར་བྱ་ཞིང་། རབ་ཏུ་བྱུང་བ་ཡིན་ན་དགེ་ཚུལ་སློང་གི་སྡོམ་པ་ཡོངས་སུ་དག་པར་བྱས་ནས་བྱང་ཆུབ་སེམས་དཔའི་སྡོམ་པ་ཆོ་ག་བཞིན་དུ་བླང་བར་བྱ་བ་ནི་མཆོག་ཡིན་ལ། གལ་ཏེ་སེམས་ཀྱི་བརྩམ་པ་དོན་དུ་འགྱུར་ན་སྔགས་ཀྱི་དཀྱིལ་འཁོར་ཆེན་པོར་དབང་བསྐུར་ནོད་པའི་སྔོན་འགྲོར་སྡོམ་པ་ཆིག་རྫོགས་སུ་བཟུང་བ་ཁོ་ནས་ཀྱང་མི་རུང་བ་མ་ཡིན་ཏེ་དེ་ཉིད་ལ་དགོས་པ་ལྷག་པོ་གཞན་མེད་པའི་ཕྱིར་རོ། །དེ་དག་གི་དོན་སྤྱོད་བསྡུས་ལས་ཀྱང་། ཐོག་མ་ཉིད་དུ་ནི་སངས་རྒྱས་ཀྱི་ཐེག་པའི་བསླབ་པ་ལ་བསླབ་བོ། །གང་གི་ཚེ་སངས་རྒྱས་ཀྱི་ཐེག་པའི་བསམ་པ་ལོབས་པར་གྱུར་པ་དེའི་ཚེ་ཐེག་པ་གསར་ལ་དྲན་པ་གཅིག་པའི་ཏིང་འཛིན་ལ་བསླབ་བོ། །ཞེས་སྔོན་དུ་སངས་རྒྱས་ཀྱི་ཐེག་པའི་བསམ་པ་སྨོན་འཇུག་དང་། དེའི་རྗེས་ཐེག་པ་གསར་པ་ནི་སྔགས་ཀྱི་ཐེག་པ་ཉིད་ཡིན་ནོ། །དེ་ལྟར་སྨོན་འཇུག་གི་སེམས་བསྐྱེད་ནས་ནི་སྤྱོད་པ་ཕྱིན་དྲུག་དང་ལྡན་པར་བྱ་བ་སྨོས་མ་དགོས་ཀྱི། ཕྱིན་དྲུག་ནི་མདོ་སྔགས་གཉིས་ཀའི་གཞུང་ལམ་ཡིན་པས་བསམ་གྱིས་མི་ཁྱབ་པའི་འབྲས་བུ་ལམ་དུ་བྱེད་པའི་གནས་སྐབས་ཀྱང་དེ་ཉིད་ལ་དམིགས་པའི་ཕྱིན་དྲུག་དང་དག་པ་
སྦྱོར་ཚུལ་ཡོང་པའི་ཕྱིར་རོ། །དེ་ལྟར་བྱང་ཆུབ་སེམས་དཔའི་སྡོམ་པ་དང་མི་འགལ་བའི་སྟེང་ནས་སྔགས་ཕྱི་ནང་སོ་སོའི་ཁྱད་པར་གྱིས་ཕྱེ་བའི་དམ་ཚིག་དང་སྡོམ་པའི་གནང་བཀག་ལ་མི་འགལ་བར་སྤྱོད་པ་དེ་ལ་སྔགས་ཀྱི་ལམ་རྣལ་མར་འགྲོ་བ་ཞེས་བྱའོ། །དེ་ལ་བྱ་བའི་རྒྱུད་དུ་ནི་གཞི་སྣང་སྟོང་བདེན་པ་གཉིས་སུ་ཤེས་ནས། དེའི་སྔོན་དུ་བྱེད་པའི་ལམ་ཁྲུས་དང་གཙང་སྦྲ་ཀུན་ཏུ་སྤྱོད་པས་དཀར་གསུམ་ཟ་བ་དང་གོས་གསུམ་བརྗེ་བ་ལ་སོགས་ཕྱིའི་བྱ་བ་མང་པོ་ལ་ལྟོས་ཤིང་། སྨྱུང་བར་གནས་པའི་ཆོ་ག་ལ་སོགས་པས་གནས་ལ། སྐྱེ་བ་བཅུ་དྲུག་ནས་སངས་རྒྱས་མངོན་དུ་བྱེད་པར་འདོད་པ་ནི་འབྲས་བུའོ། །དེ་དང་རྣམ་པ་མཚུངས་པའི་གཞི་ལམ་འབྲས་བུས་གཞལ་བའི་སྤྱོད་པའི་རྒྱུད་དུ་ནི་ཕྱིའི་བྱ་བ་དང་ནང་གི་ཏིང་ངེ་འཛིན་གཉིས་ཆ་མཉམ་པར་སྤྱོད་ཅིང་ལྟ་བ་ཡོ་ག་དང་སྤྱོད་པ་ཀྲི་ཡ་ལྟར་བྱེད་པས་གཉིས་ཀའི་རྒྱུད་ཅེས་ཀྱང་འབོད་ཅིང་ཚེ་བདུན་ནས་འབྲས་བུ་ཐོབ་པའོ། །རྣལ་འབྱོར་གྱི་རྒྱུད་དུ་ནི་ཕྱིའི་བྱ་བ་གྲོགས་ཙམ་ལས་དངོས་གཞི་ལྷའི་ཏིང་ངེ་འཛིན་གཙོ་བོར་འདོད་ཅིང་ཚེ་གསུམ་ན་འབྲས་བུ་ཐོབ་པའོ། །དེ་ལྟར་སྔགས་ཕྱི་པ་གསུམ་དུ་འཇུག་པའི་སྒོ་ནི་ཆུའི་དབང་གཙོ་ཆེ་སྟེ་ཡེ་ཤེས་ཐིག་ལེའི་རྒྱུད་ལས། ཆུ་ཡི་དབང་བསྐུར་དབུ་རྒྱན་དག །བྱ་བའི་རྒྱུད་ལ་རབ་ཏུ་གྲགས། །རྡོ་རྗེ་ དྲིལ་བུ 
་དེ་བཞིན་མིང་། སྤྱོད་པའི་རྒྱུད་ལ་རབ་ཏུ་གསལ། ཕྱིར་མི་ལྡོག་པ་ཡི་ནི་དབང་། །རྣལ་འབྱོར་རྒྱུད་ལ་གསལ་བར་བྱས། །ཞེས་སོ། །དེའང་རིག་གཏད་དང་། རྗེས་གནང་དང་། ཆུ་དབང་གི་བྱེད་པ་སྟོན་པས་ཀྱང་ཕྱི་བར་བཞག་ལ། དབང་གོང་མ་གསུམ་གཙོ་ཆེ་ཞིང་སྤྱོད་པ་བླང་དོར་མེད་པ་ནང་པའོ། །དེ་ལྟར་ཕྱི་པ་གསུམ་པོ་ཤིན་ཏུ་བརྩོན་པ་ཆེ་ཡང་སྔགས་ནང་པ་ལྟར་ཚེ་འདིའམ། བར་དོར་མཆོག་གི་དངོས་གྲུབ་ཐོབ་པ་མ་ཡིན་ཏེ། ཡེ་ཤེས་གྲུབ་པའི་རྒྱུད་ལས། །བརྟུལ་ཞུགས་སྐུར་པ་སྡོམ་པ་དང་། །སྣ་ཚོགས་ཕྱག་རྒྱ་དང་ལྡན་པའི་
ལྷ་ཡི་གཟུགས་སུ་བསྒོམ་པ་ཡི། སྒྲུབ་པ་འགྲུབ་པར་མི་འགྱུར་རོ། །ཞེས་སོ། །དེ་བཞིན་དུ་སྔགས་ཕྱི་པ་གསུམ་གྱི་དཀྱིལ་འཁོར་གྱི་ལྷ་རྣམས་རིག་མའི་འདོད་ཡོན་ལ་སྤྱོད་པའི་ཁྱད་པར་ཡང་རྩོད་པའི་དུས་འདིའི་མིའི་འགྲོ་བ་རྣམས་ཀྱི་འདོད་ཆགས་ཀྱི་ཀུན་ཏུ་སྤྱོད་པ་དང་འགལ་བ་ཅན་ཁོ་ན་ཡིན་པས་བྱ་བ་ལ་སོགས་པའི་རྒྱུད་སྡེ་གསུམ་པོ་རིམ་པ་བཞིན་བལྟ་བ་དང་། དགོད་པ་དང་། ལག་བཅངས་ཀྱི་ཁྱད་པར་ཙམ་ལས་དོན་བསྒོམ་པའི་ཡེ་ཤེས་ཀྱི་རིག་མ་ཁོ་ནའི་འདོད་ཡོན་ལ་དམིགས་པ་ཅན་ཡིན་ལ། བླ་མེད་དུ་ནི་དངོས་དང་བསྒོམས་པའི་རིག་མ་གཉིས་ཀ་ཡབ་ཡུམ་སྙོམས་པར་འཇུག་པ་ཅན་ཡིན་པའི་ཚུལ་ལ་ཡང་། དུས་བཞི་སོ་སོའི་སྦྱང་གཞི་འདོད་ཆགས་ཀྱི་འཇུག་ཚུལ་དང་སྒོ་བསྟུན་པ་སྟེ། འདི་ལྟར་རྫོགས་ལྡན་གྱི་དུས་ཁྱོ་ཤུག་ཕན་ཚུན་གཅིག་ལ་གཅིག་བལྟས་པ་ཙམ་གྱིས་ཚིམ་པའི་འདོད་ཆགས་ཅན་གདུལ་བའི་ཕྱིར་བྱ་བའི་རྒྱུད་ཀྱི་ལྷ་རྣམས་དེ་དང་མཚུངས་པར་སྟོན་ཏེ། ཕྱག་ན་རྡོ་རྗེ་མངོན་པར་དབང་བསྐུར་བའི་རྒྱུད་ལས། དབུས་སུ་ནི་བཅོམ་ལྡན་འདས་སྤྱན་རས་གཟིགས་དབང་བྲི། དེའི་གཡོན་དུ་ན་བཟའ་དཀར་མོ་བཅོམ་ལྡན་འདས་ལ་བལྟ་བ་བྲིའོ། །ཞེས་དང་དོན་ཡོད་ཞགས་པའི་ཆོ་ག་ཞིབ་མོ་ལས། བཅོམ་ལྡན་འདས་ཞལ་ཁྲོ་གཉེར་ཅན་ལ་གཏོད་པར་བྱ་ཞིང་། གཡས་ཕྱོགས་ན་ལྷ་མོ་སྒྲོལ་མ་མཛེས་བག་དང་བཅས་ཤིང་། ལུས་བཏུད་པ་ལ་མཆོག་སྦྱིན་པའི་ཕྱག་རྒྱ་ལ་མིག་གཏོད་པར་བྱའོ། །གཡོན་དུ་ནི་པདྨའི་རིགས་མཛེས་པ་མཛེས་བག་དང་བཅས་པ་སྔགས་ཀྱི་ཚུལ་དང་རྗེས་སུ་མཐུན་ཞིང་དོན་ཡོད་ཞགས་པ་ལ་མིག་གཏོད་པར་བྱའོ། །ཞེས་དང་། རྡོ་རྗེ་གཙུག་ཏོར་ལས། དཀྱིལ་འཁོར་གྱི་ནི་ལྷ་ཚོགས་རྣམས། །ཕོ་ཡང་མོ་ལ་བལྟ་བ་དང་། །མོ་ཡང་ཕོ་ལ་བལྟ་བ་བྲི། ཞེས་སོ། །དེ་བས་ན་བྱ་བའི་
རྒྱུད་ཀྱི་ལྷ་རྣམས་སྤྱན་རྒྱས་པར་འབྱུང་ངོ་། །གསུམ་ལྡན་གྱི་དུས་བགོད་པས་ཚིམ་པའི་འདོད་ཆགས་ཅན་གདུལ་བའི་ཕྱིར་སྤྱོད་པའི་རྒྱུད་ཀྱི་ལྷ་རྣམས་ཀྱང་དེ་དང་མཚུངས་པར་སྟོན་ཏེ། རྣམ་སྣང་མངོན་བྱང་ལས། དེ་ཡི་གཡས་སུ་ལྷ་མོ་ནི། །སངས་རྒྱས་སྤྱན་ཞེས་བྱ་བ་སྟེ། ལྷ་མོ་ཅུང་ཟད་འཛུམ་པའི་ཞལ། །འོད་ཀྱི་དཀྱིལ་འཁོར་འདོམ་གང་བ། །མཚུངས་མེད་སྐུ་ནི་རབ་ཏུ་དྭངས། །དེ་ནི་ཤཱཀྱ་ཐུབ་པའི་ཡུམ། །ཞེས་དང་། རྣམ་པར་སྣང་མཛད་རྒྱལ་པོ་ཆེ། །ཡིད་ཙམ་འཛུམ་པའི་ཞལ་དུ་བྲི། །ཞེས་པ་ལ་སོགས་པས་སྤྱོད་རྒྱུད་ཀྱི་ལྷ་ཐམས་ཅད་ཞལ་འཛུམ་པ་ཤ་སྟག་གོ །གཉིས་ལྡན་གྱི་ཚེ་གཅིག་ལ་གཅིག་རེག་ཅིང་ལག་བཅངས་སུ་བྱ་བའི་འདོད་ཆགས་ཅན་གདུལ་བའི་ཕྱིར་རྣལ་འབྱོར་རྒྱུད་ཀྱི་ལྷ་རྣམས་ཀྱང་དེ་ལྟར་སྟོན་པའི་ཚུལ་རྩེ་མོ་ལས། རྡོ་རྗེ་ལྷ་མོ་ཅ་ཅོ་སྒྲོག །པུས་འཁྱུད་རང་གི་ལྷ་མོ་ནི། །དེ་ཡི་གློན་མགོ་བསྒྱུར་ཞིང་། །འཛུམ་བཅས་ཀུན་ཏུ་བལྟ་བ་ཡིས། །བཅོམ་ལྡན་འདས་ཀྱི་ཞབས་ལ་འཁྱུད། །ཅེས་དང་། །དཔལ་མཆོག་དང་པོ་ལས། དཀྱིལ་འཁོར་གྱིས་ནི་ལྷ་ཚོགས་རྣམས། །དཔུང་པ་ཡིད་ཙམ་དམ་པར་བཞག །ཅེས་དང་། དེ་ཡི་ལོགས་པ་རྡོ་རྗེ་ཆེ། །མདའ་ནི་གསོར་བ་ལ་བརྩོན་པ། །སྙེམས་པའི་ཕྱག་གིས་ཡོངས་འཁྱུད་པའི། །ཆུ་སྲིན་རྒྱལ་མཚན་སྒྲེང་དང་བཅས། །ཞེས་པས་ཡོ་གའི་ལྷ་ཐམས་ཅད་ཕྱག་རྒྱ་འབྲེལ་བར་འབྱུང་ངོ་། །རྩོད་ལྡན་གྱི་དུས་ན་དབང་པོ་གཉིས་དངོས་སུ་སྦྱོར་བའི་འདོད་ཆགས་ཅན་གདུལ་བའི་ཕྱིར་བླ་མེད་ཀྱི་ལྷ་རྣམས་ཡབ་ཡུམ་ཟུང་འབྲེལ་ཅན་དུ་སྟོན་ཏེ། སྡོམ་པའི་རྩ་རྒྱུད་ལས། །མཚན་མ་གཉིས་ལ་སྔགས་བྱས་ཏེ། །སྔགས་པ་མཁའ་འགྲོ་མ་ལ་སྦྱོར། །ཞེས་དང་། གསང་འདུས་ལས། དབང་པོ་གཉིས་ཀྱི་སྦྱོར་བ་ཡི། །དངོས་པོ་ཐམས་ཅད་བརྟག་པར་བྱ། །ཅེས་སོ། །དེ་ལྟར་མིང་འདོགས་དང་རྣམ་དབྱེའི་སྒོ་ནས་རྒྱུད་
སྡེ་གོང་འོག་ཐུན་མོང་ལ་གྲགས་པའི་གདུལ་བྱའི་ཁྱད་པར་བཤད་ནས། ད་ནི་སོ་སོའི་རང་བཞིན་དབྱེ་བའི་ཚུལ། །དབྱེ་ན་བྱ་བ་དང་ནི་སྤྱོད་པའི་རྒྱུད། །སེམས་དཔའ་སེམས་མ་རིག་སྔགས་གཟུངས་སྔགས་ལྷ། །བྱ་བས་རྗེ་ཁོལ་སྤྱོད་པས་སྤུན་གྲོགས་ཚུལ། །བྱ་བས་རྗེ་ཁོལ་རྣམ་པར་བསྒྲུབ་པའང་། །བདག་བསྐྱེད་མེད་པར་རང་ཉིད་དམན་པར་བཞག །ལ་ལར་ཡོད་དེ་གཙོ་བོར་མདུན་བསྐྱེད་སྟོན། །ཕྱི་ཡི་བྱ་བ་ཁྲུས་དང་གཙང་སྦྲ་གཙོ། །མཆོག་དམན་ཚུལ་དུ་བསྒྲུབས་ནས་དངོས་གྲུབ་འདོད། །དེའང་སྤྱིར་སྔགས་ཀྱི་དབྱེ་བ་ལ་རིག་སྔགས་དང་། གཟུངས་སྔགས་དང་། གསང་སྔགས་ཞེས་ཐབས་དང་། ཤེས་རབ་དང་། གཉིས་སུ་མེད་པའི་ངོ་བོ་གསུམ་དུ་གནས་པའི་ཚུལ་དགོངས་པ་གྲུབ་པའི་རྒྱུད་ལས། གསང་སྔགས་ཀུན་གྱི་དབྱེ་བ་ནི། རྣམ་པ་གསུམ་དུ་ཤེས་བྱ་སྟེ། རིག་སྔགས་ཐབས་ཀྱི་ངོ་བོ་ཡིན། །གཟུངས་སྔགས་ཤེས་རབ་ངོ་བོ་ཡིན། །གསང་སྔགས་གཉིས་མེད་ཡེ་ཤེས་སོ། །ཞེས་པ་ལས་ཕྱི་པ་ནི་ཐབས་དང་ཤེས་རབ་རིམ་ཅན་དུ་བསྒོམ་པས་བསྐྱེད་རྫོགས་ཙམ་པོ་པ་ཉིད་དང་། དེའང་བྱ་བ་དང་སྤྱོད་པའི་རྒྱུད་ནི་སེམས་དཔའ་སེམས་མ། རིག་སྔགས་དང་གཟུངས་སྔགས་ཀྱི་ལྷ་སྟེ་དེ་དག་རྗེ་ཁོལ་དང་། སྤུན་གྲོགས་ཀྱི་ཚུལ་དུ་བསྒྲུབ་པའི་ཚུལ་གཉིས་ལས། དང་པོ་གཟུངས་སྔགས་སུ་གཏོགས་པ་བྱ་བའི་རྒྱུད་ནི། ཚུལ་གསུམ་པའི་སྒྲོན་མེ་ལས། སྐྱེ་བ་གཞན་དུ་གོམས་པའི་བག་ཆགས་ཀྱིས་སྐྱེ་བོ་མེད་པའི་ནགས་ཚལ་གྱི་གནས་དང་། ཁྲུས་དང་དཀྱིལ་འཁོར་བྲི་བ་དང་མཆོད་པ་དང་སྦྱིན་སྲེག་དང་། དཀའ་ཐུབ་དང་བཟླས་བརྗོད་ལ་སོགས་པའི་བྱ་བ་མེད་པར་ཡིད་མཉམ་པར་འཇོག་པ་མི་ཐོབ་པས་དེའི་ཕྱིར་ན་བྱ་བའི་
རྒྱུད་སྟོན་པར་མཛད་པ་ཡིན་ནོ། །གང་ཡང་དེ་ཁོ་ན་ཉིད་ལ་མངོན་པར་ཞེན་པའི་སེམས་དང་ལྡན་པ་དག་ཀྱང་དད་པའི་སྟོབས་ཀྱིས་བདེ་བར་གཤེགས་པས་གསུངས་པའི་བྱ་བ་རྣམས་ཀྱིས་ཀྱང་ཡེ་ཤེས་ཐོབ་པར་འགྱུར་བས་བྱ་བ་ལ་ལྟོས་པ་དང་བཅས་པ་ཡིན་ལ། དེ་རྣམས་ལ་ནི་བྱ་བའི་ཡན་ལག་ཤིན་ཏུ་མང་པོ་མ་ཡིན་པ་རྩ་བའི་རྒྱུད་གསུངས་པ་ཡིན་ནོ། །ཞེས་སོ། །འདིའི་རྩ་བའི་རྒྱུད་ནི་སྤྱོད་རྒྱུད་དང་དོན་གཅིག་པས་སློབ་དཔོན་སངས་རྒྱས་གསང་བས་སྤྱོད་པའི་རྒྱུད་ཅེས་མིང་དུ་ཡོད་ཀྱང་ངོ་བོ་མེད་དེ་བྱ་བ་དང་རྣལ་འབྱོར་དུ་འདུས་ཞེས་འཆད་པ་དང་མཐུན་པར་དཀོན་མཆོག་འགྲེལ་ལས་ཀྱང་བྱ་རྒྱུད་བྱེ་བྲག་པའམ་གཉིས་ཀའི་རྒྱུད་ཅེས་འཆད་པའི་དགོངས་པའང་དེ་ཙམ་དུ་ཐལ་གྱིས་གཞན་དུ་རྩ་རྒྱུད་རྣམ་སྣང་མངོན་བྱང་དང་། བཤད་རྒྱུད་གླང་ཆེན་རོལ་བ་སོགས་ཆ་མཉམ་དུ་སྟོན་པའི་རྒྱུད་དུ་དམིགས་ཀྱིས་བསལ་བ་བྱེད་པའི་ཁུངས་ནི་སྤྱོད་བསྡུས་ལེའུ་གསུམ་པའི་རྗེས་སུ་འབྲངས་པ་ཙམ་མོ། །དེ་སྐད་དུ་རང་ཤར་ལས། ལྟ་བ་ཡོ་གར་བལྟ་བ་ལ། །སྤྱོད་པ་ཀྲི་ཡར་སྤྱོད་པའོ། །དེའི་ཕྱིར་གཉིས་ཀའི་རྒྱུད་ཅེས་གྲགས། །ཞེས་སོ། །དེ་ལ་བྱ་བའི་རྒྱུད་ཀྱི་ལམ་ནི་དཔུང་བཟང་གི་འགྲལ་པར་སྤྱོད་པའི་སྒོ་བཞིས་བསྡུས་ཏེ། འཇུག་པའི་སྤྱོད་པ་དབང་གི་སྣོད་རུང་དུ་བྱེད་པ། སྤྱོད་པའི་སྤྱོད་པ་རིགས་གསུམ་གྱི་ལྷ་བསྙེན་པ། བསྒྲུབ་པའི་སྤྱོད་པ་རྫས་དང་ཆ་རྐྱེན་འཛོམ་པས་བཟླས་བརྗོད་ལ་བརྩོན་པ། གྲུབ་པའི་སྤྱོད་པ་ལྷ་དང་སྒལ་པ་མཉམ་པའི་རིག་འཛིན་ནམ་མཁའ་སྤྱོད་འགྲུབ་ནས། དེའི་རྟེན་ལ་སྔགས་ཀྱི་ཕྱིན་དྲུག་གི་སྤྱོད་པ་སྤྱད་དེ་མཐར་ཐུག་གི་འབྲས་བུ་ལྷའི་སྐུ་གསུང་ཐུགས་དང་མཉམ་པར་སྦྱོར་བས་རིགས་གསུམ་རྡོ་རྗེ་འཛིན་པའི་གོ་འཕང་མངོན་དུ་བྱེད་པའོ། །དེ་སྐད་དུ་ཧེ་རུ་ཀ་
གལ་པོར། མི་ཚེ་བདུན་ན་སངས་རྒྱས་པ། །རིགས་གསུམ་མགོན་པོས་འགྲོ་བ་འདུལ། །ཞེས་སོ། །དེའང་རིག་འཛིན་འགྲུབ་པའི་ཚེས་བསྐལ་བ་རེར་གནས་པས་འདིའི་མི་ཚེ་བདུན་དང་བྱ་རྒྱུད་རང་གཞུང་ནས་བཤད་པའི་བསྐལ་ཆེན་བརྒྱད་ན་འབྲས་བུ་ཐོབ་པར་བཤད་པ་སྦྱོར་ཤེས་པར་བྱའོ། །དེའང་བྱ་བའི་རྒྱུད་དེ་ལ་ནང་ཏིང་ངེ་འཛིན་གྱི་སྤྱོད་པ་ཡང་གཏན་མེད་པ་ནི་མ་ཡིན་ཏེ། སྨྱུང་བར་གནས་པ་ལ་སོགས་པ་ཕྱིའི་བྱ་བའི་ཡན་ལག་མང་པོ་དེ་དག་བསམ་གཏན་འགྲུབ་པའི་ཐབས་སུ་དམིགས་པ་ཡིན་པའི་ཚུལ་དཔུང་བཟང་ལས། དུས་སུ་ཟོས་ནས་དུས་སུ་ཁྲུས་བྱས་ཏེ། །ཕྲེང་བ་མེ་ཏོག་མར་མེ་སྤོས་དང་དྲི། །ཤ་ཆང་མེད་པའི་ལྷ་བཤོས་ཕུལ་ནས་སུ། །ཀུ་ཤིའི་ཁྲི་ལ་འདུག་ནས་བཟླས་བརྗོད་བརྩམ། །ཞེས་དང་། བསམ་གཏན་བདེ་བ་འགྲུབ་པར་བྱ་བའི་ཕྱིར། །དེ་བཞིན་གཤེགས་པས་སྨྱུང་བ་རྗེས་སུ་གསུངས། །ཞེས་དང་། རྒྱུད་ལས། ལུས་དང་ངག་གི་གཙང་སྦྲ་དང་། །གསུམ་པ་ཡིད་ཀྱི་གཙང་སྦྲ་དང་། །བཞི་པ་བདེན་པར་སྨྲ་བ་དང་། །ལྔ་པ་ཕྱི་ཡི་གཙང་སྦྲར་བཤད། །ཅེས་པས་ཡིད་ཀྱི་གཙང་སྦྲ་ནི་ཏིང་ངེ་འཛིན་དུ་བསྡུ་ཤེས་པའི་ཐབས་མ་འགགས་པའི་ཕྱིར་སྨྱུང་བར་གནས་པ་སོགས་ལྷ་སྒོམ་ཐ་དད་པར་བཤད་པའང་དགག་པར་མི་ནུས་སོ། །དེ་སྐད་དུ་རྣམ་སྣང་མངོན་བྱང་གི་འགྲེལ་པར་ཡང་། བྱ་བའི་རྒྱུད་རྣམས་ཀྱང་ཕྱིའི་སྤྱོད་པ་གཙོ་བོར་གྱུར་པ་ཡིན་མོད་ཀྱང་ནང་གི་སྤྱོད་པ་གཏན་མེད་པ་ནི་མ་ཡིན་ཏེ། ཞེས་བཤད་དོ། །དེའང་ལམ་བསྒོམ་པའི་སྣོད་རུང་ནི་དབང་གི་བྱ་བས་བྱེད་ལ། སྣོད་དུ་གྱུར་ནས་དམ་ཚིག་དང་སྡོམ་པ་དག་པར་བྱ་བའི་ཚུལ་དབང་དུས་ན་འབྱུང་བའི་རྩ་བའི་ལྟུང་བ་དང་། ཁྱད་པར་ལེགས་གྲུབ་ཀྱི་རིག་སྔགས་ཀྱི་འདུལ་བ་རྣམ་པར་ཕྱེ་བས་སྟོན་པ་བཞིན་
ནོ། །དེ་ལ་བྱ་བའི་རྒྱུད་ལ་བསྟེན་པ་ཇི་ལྟར་བྱ་བ་ནི། ལེགས་གྲུབ་ཀྱི་སྔགས་ཀྱི་མཚན་ཉིད་རིམ་པར་བྱེ་བ་ལས། རིགས་དང་རང་བཞིན་མཐུ་རྣམས་དང་། །ལས་དང་རྣམ་པར་དཔྱད་ནས་ནི། །རང་གི་ཡིད་དང་མཐུན་པ་ཡི། །གསང་སྔགས་ལ་ནི་བསྙེན་པ་བརྩམ། །ཞེས་སོ། །དེ་ལ་རྗེ་ཁོལ་གྱི་རྣམ་པར་བསྒྲུབ་པའི་ཚུལ་ནི། བདག་ཉིད་དམ་ཚིག་པ་འབངས་ལྟ་བུའི་མདུན་དུ་སྔགས་ཀྱི་གཟུགས་སུ་བསམ་པ་སྟེ་པདྨའི་རིགས་ལས་ཚོན་ན་འོད་དཔག་མེད་དམ་སྤྱན་རས་གཟིགས་རྗེ་དཔོན་ལྟ་བུར་བསྒོམས་ནས་རིག་པ་བཟླ་བ་དང་སྨྱུང་བར་གནས་པ་སོགས་བྱའོ། །དེ་ཡང་ལམ་སྡུད་པའི་སྤྱི་ཆིངས་ལ་བརྟེན་ནས་ཤེས་པར་བྱ་བའི་ཚུལ། བསམ་གཏན་ཕྱི་མ་ལས། དུས་གསུམ་དུ་ནི་ཕྲ་མོ་འདི། །གསང་སྔགས་བསྒྲུབ་ལ་བརྟུན་པ་ཡིས། །ཚངས་པ་རྟག་ཏུ་རིག་བྱ་ང་། །ཡན་ལག་བཅུ་ཡི་ཆོ་གའི་ལས། ཞེས་པས་གང་དུ་བསྒྲུབ་པའི་གནས་དང་། བདག་གི་དེ་ཁོ་ན་ཉིད་དང་། རིག་སྔགས་ཀྱི་དེ་ཁོ་ན་ཉིད་དང་། བཟླས་བརྗོད་ཀྱི་དེ་ཁོ་ན་ཉིད་དང་། མེ་ལ་གནས་པ་དང་། སྒྲ་ལ་གནས་པ་དང་། སྒྲ་མཐར་ཐར་པ་སྟེར་བའི་བསམ་གཏན་གསུམ་དང་། སྔགས་བསྒྲུབ་པ་ལ་འཇུག་པའི་ཆོ་ག་དང་། སྦྱིན་སྲེག་གི་ཆོ་ག་དང་། དབང་བསྐུར་གྱི་ཆོ་ག་སྟེ་བཅུ་ལ་བསྟེན་ནས་དེ་བཞིན་གཤེགས་པ་དང་། རྡོ་རྗེ་དང་། པདྨའི་རིགས་གསུམ་དང་། ལྔ་རྩེ་ན་དང་ནོར་རྩེ་ན་ལ་སོགས་པ་འཇིག་རྟེན་པའི་རིགས་དྲུག་གསང་སྔགས་དང་འབྲེལ་བར་ལས་ཚོགས་བསྒྲུབ་པའི་ཚུལ་ཡང་བྱ་བ་སྤྱི་རྒྱུད་བཞི་དང་། དེ་དག་གི་འགྲེལ་པ་རྣམས་ཀྱིས་ཤེས་པར་བྱ་ཞིང་དུས་གསུམ་དུ་མཆོད་པ་དང་། སྡིག་པ་བཤགས་པ་དང་། རྗེས་སུ་ཡི་རང་བ་དང་། སྨོན་ལམ་གདབ་པ་དང་། ཤེར་ཕྱིན་བཀླག་པ་དང་། མཎྜལ་བྱ་བ་དང་། སྡོམ་པ་བཟུང་བ་དང་། དུས་གསུམ་དུ་བསྲུང་བ་བྱ་བ་རྣམས་གོས་ལན་གསུམ་བརྗེས་ནས་བྱ་ཞིང་། སྨྱུང་བར་
གནས་པ་ནི་ལེགས་གྲུབ་ལས་གསུངས་པ་ལྟར་རོ། །དེའང་བྱ་རྒྱུད་ལ་བདག་བསྐྱེད་དང་ཡེ་ཤེས་པ་གཞུག་པ་ཡོད་མེད་ཀྱི་ཁྱད་པར་ལ་མི་མཐུན་པ་མང་པོ་སྣང་བའང་རྒྱུད་སྡེ་དེ་དག་འགྲེལ་པ་དང་བཅས་པར་ལ་ལ་ནས་མི་མངོན་པའི་ཚིག་ཏུ་བཤད། ལ་ལ་ནས་མངོན་པའི་ཚིག་ཏུ་བཤད་པས་ཁ་གཉིས་སུ་གྱེས་པ་ཡིན་ནོ། །དེ་ལ་མེད་པའི་ཕྱོགས་ལ་བྱ་རྒྱུད་རང་རྒྱུད་པ་ཞེས་གྲགས་ཏེ་ཡེ་ཤེས་རྡོ་རྗེ་ཀུན་ལས་བཏུས་ལས། བདག་ཉིད་ལྷའི་སྙེམས་པ་མེད་པ་དང་། ཡེ་ཤེས་སེམས་དཔའི་བདེ་བ་མེད་པ་ནི་བྱ་བའི་རྒྱུད་ལ་བཞུགས་སོ། །ཞེས་སོ། །དེའང་གྲུབ་མཐའ་སྨྲ་བའི་འདོད་པ་ལྟར་བརྗོད་དུས་བྱེ་བྲག་སྨྲ་བ་གཟུང་འཛིན་མི་འདྲ་བ་འདོད་ཅིང་། རྒྱལ་བུ་དོན་འགྲུབ་སོ་སྐྱེའི་རྟེན་ལ་འཚང་རྒྱ་བ་འདོད་པ་དང་རྗེས་སུ་མཐུན་པར་ལྷ་དང་བདག་རྗེ་འབངས་ལ་དངོས་གྲུབ་འདོད་པའོ། །ཡོད་པའི་ཕྱོགས་བླ་མེད་ཀྱི་བྱ་རྒྱུད་ཞེས་བྱ་སྟེ། ལེགས་གྲུབ་ཀྱི་མངོན་རྟོགས་ལས། བྱ་རྒྱུད་ལས་ལྷ་བསྒྲུབ་པའི་རིམ་པ་མ་བསྟན་ཏོ་སྙམ་དུ་བསམ་པར་མི་བྱ་སྟེ། བཅོམ་ལྡན་འདས་ཀྱིས་ཕལ་ཆེར་མ་བསྟན་ཀྱང་ཕྱག་ན་རྡོ་རྗེ་དབང་བསྐུར་བ་དང་། དེ་ཁོ་ན་ཉིད་བཅུ་པ་དག་ལས་གཙོ་བོར་བསྟན་ཏོ། །གཅིག་ཏུ་དངོས་གྲུབ་ཐམས་ཅད་ནི་གསང་སྔགས་ཀྱི་ལྷ་དང་། དེ་ཁོ་ན་ཉིད་ལ་རག་ལུས་པ་ཡིན་ལ་དེ་དག་རྣམ་པར་ཉམས་ན་ཞི་བ་ལ་སོགས་པའི་ལས་རྣམས་འགྲུབ་པར་མི་འགྱུར་བས་བླ་མས་བཤད་པ་དང་རྒྱུད་ཀྱི་ཁྱད་པར་ཅུང་ཟད་དཔྱད་པ་ལས་ཁོང་དུ་ཆུད་པར་བྱའོ། །ཞེས་སོ། །དེ་ལ་བདག་བསྐྱེད་འདོད་པའི་ཁུངས་ཀྱི་གཙོ་བོ་ནི་བསམ་གཏན་ཕྱི་མ་འགྲེལ་པ་བཅས་པ་ཁོ་ན་ཡིན་ལ། ཇི་ལྟར་ཡང་མཐུན་རྐྱེན་གཙོ་བོར་སྟོན་པའི་དགོས་པའི་ལྷའི་རྣལ་འབྱོར་རྩེ་གཅིག་ཏུ་བསྒོམ་པའི་བྱ་བས་
འཇིགས་པ་དང་། ཀུན་འབྱུང་བ་ཅན་གྱི་རྣམ་རྟོག་ལ་བདེན་འཛིན་དང་བཅས་པའི་སྤྱོད་པས་ལམ་བསྒྲུབ་པའི་གདུལ་བྱ་བྱེ་བྲག་པ་ལ་དམིགས་ཀྱིས་བསལ་བ་སྟེ། གཞན་དུ་ན་སློབ་དཔོན་ཀླུ་སྒྲུབ་ཀྱིས་ཕྱག་སྟོང་སྤྱན་སྟོང་གི་གཟུངས་ཀྱི་སྒྲུབ་ཐབས་ལས་བདག་བསྐྱེད་ལ་ཡེ་ཤེས་པ་གཞུག་པ་དང་། དབང་བསྐུར་བ་དང་བཅས་པ་གསུངས་པ་བཞིན་ནོ། །འོན་ཀྱང་སློབ་དཔོན་སངས་རྒྱས་གསང་བ་དང་བྱང་ཆུབ་མཆོག་ནི་བདག་བསྐྱེད་ཡོད་ཀྱང་ཡེ་ཤེས་པ་མི་གཞུག་པ་ཉིད་འཆད་དོ། །སྤྱོད་རྒྱུད། བྱ་བའི་ཐབས་དང་རང་གི་རྣལ་འབྱོར་ལ། །ཆ་མཉམ་སྤྱོད་པས་སྤྱོད་པའི་རྒྱུད་དུ་གྲགས། །རང་ཉིད་དམ་ཚིག་སེམས་དཔའི་མདུན་བཞུགས་པའི། །ཡེ་ཤེས་ལྷ་ལས་སྤུན་ལྟར་དངོས་གྲུབ་ལེན། །དེ་སྐད་དུ་ནང་གི་ཏིང་ངེ་འཛིན་དང་ཕྱིའི་བྱ་བ་གཉིས་ཆ་མཉམ་པར་སྤྱོད་པས་གཉིས་ཀའི་རྒྱུད་དུ་གྲགས་ཏེ། རྡོ་རྗེ་སྙིང་པོ་རྒྱན་གྱི་རྒྱུད་ལས། བྱ་དང་གཉིས་ཀ་རྣལ་འབྱོར་རྒྱུད། །ཅེས་དང་། མངོན་བྱང་གི་དོན་བསྡུས་པར། །རྒྱུད་འདི་གཙང་སྦྲ་ལ་སོགས་པ་སྨད་པས་འཇིག་རྟེན་པ་དང་འགལ་བར་སྤྱོད་པས་སྤྱོད་པའི་རྒྱུད་ཅེས་བྱའོ། །ཞེས་སོ། །དེའང་བསྒོམ་བྱ་དང་མངོན་པར་རྟོགས་པས་ལམ་གྱི་ཆིངས་སྡུད་པའི་ཚུལ་ནི་འཇུག་པའི་སྤྱོད་པ་དང་། སྦྱོར་བའི་སྤྱོད་པ་དང་། གྲུབ་པའི་སྤྱོད་པ་གསུམ་ལས། དང་པོ་ལ་ཕྱིའི་འཇུག་པ་ནི་དབང་གིས་སྣོད་རུང་དུ་བྱེད་པ་དང་། ནང་གི་འཇུག་པ་ནི་སྤྱོད་པའི་རྒྱུད་རྣམ་སྣང་མངོན་བྱང་ལས། གསང་བའི་བདག་པོ་ལྷའི་གཟུགས་ཀྱང་རྣམ་པ་གཉིས་ཏེ། ཡོངས་སུ་དག་པ་དང་ཡོངས་སུ་མ་དག་པའོ། །དེ་ལ་ཡོངས་སུ་དག་པ་ནི་རྟོགས་པའི་ངོ་བོ་སྟེ་མཚན་མ་ཐམས་ཅད་དང་བྲལ་བའོ། །ཡོངས་སུ་མ་དག་པ་ནི་མཚན་མ་དང་བཅས་པའི་གཟུགས་ཏེ་ཁ་དོག་དང་དབྱིབས་སོ། །དེ་ལ་ལྷའི་རྣམ་པ་གཉིས་ཀྱིས་དགོས་པ་རྣམ་པ་གཉིས་འགྲུབ་པར་འགྱུར་ཏེ། མཚན་མ་དང་
བཅས་པས་ནི་མཚན་མ་དང་བཅས་པའོ། །མཚན་མ་མེད་པས་ནི་མཚན་མ་དང་བཅས་པའི་དངོས་གྲུབ་ཀྱང་འབྱུང་བར་འགྱུར་རོ། །ཞེས་མཚན་བཅས་དང་མཚན་མེད་ཀྱི་རྣལ་འབྱོར་གཉིས་ལས། མཚན་མི་དང་བཅས་པ་ནི་ལྷའི་རྣམ་པ་བཞིན་ལག་ཅན་བསྒོམ་པ་ཡིན་ལ། མཚན་མ་མེད་པ་ནི་སྟོང་ཉིད་བསྒོམ་པ་ལ་དོན་དམ་པའི་ལྷའི་ཐ་སྙད་དུ་སློབ་དཔོན་སངས་རྒྱས་གསང་བ་བཞེད་པ་ཉིད་རྒྱུད་ཀྱི་དགོངས་པར་གནས་ཏེ། སྔ་མའི་འཕྲོ་ལས། མཚན་མར་བཅས་པས་མཚན་བཅས་ཀྱི། དངོས་གྲུབ་རྒྱལ་བ་དམ་པ་བཞེད། མཚན་མ་མེད་ལ་གནས་པས་ནི། །མཚན་མ་ཅན་ཡང་བསྒྲུབ་ཏུ་རུང་། །ཞེས་པས་ཤིན་ཏུ་གསལ་ལོ། །དོན་དེ་ལ་དགོངས་ནས་བུདྡྷ་གུཔྟས། །རྡོ་རྗེའི་གདན་ལ་འདུག་ནས་ནི། །མཆོད་དང་གསོལ་བས་ལྷ་དྲུག་སྒོམ། །སྟོང་པ་ཡི་གེ་སྒྲ་གཟུགས་དང་། །ཕྱག་རྒྱ་མཚན་མ་དྲུག་ཡིན་ནོ། །ཞེས་སྟོང་ཉིད་དང་ཡི་གེ་དང་། སྒྲ་དང་། གཟུགས་དང་། ཕྱག་རྒྱ་དང་། མཚན་མ་སྟེ། དྲུག་ཀ་ལ་ལྷའི་ཐ་སྙད་བཞག་པ་ཡིན་ནོ། །འོན་ཏེ་སྟོང་ཉིད་རྐྱང་པའི་རྣལ་འབྱོར་གྱིས་འཚང་རྒྱ་བའི་གེགས་བྱེད་དོ་ཞེ་ན། མཚན་མ་རྐྱང་པའི་རྣལ་འབྱོར་གྱིས་གེགས་བྱེད་པ་ནི་དེ་བས་ཆེས་ལྷག་སྟེ་དངོས་པོར་བལྟ་བ་ནི་ཕྱི་རོལ་པ་དང་། ཕྱི་དོན་ལ་བདེན་པར་སྨྲ་བ་རྣམས་ཀྱིས་འདོད་པ་ཡིན་ནོ། །དེ་བས་ན་ཟབ་མོའི་མདོ་སྡེའམ་རྒྱུད་སྡེའི་རིམ་པ་སོ་སོ་ནས་གདུལ་བྱའི་རིམ་པ་དང་བསྟུན་པའི་དངོས་བསྟན་ཇི་ལྟར་གསུངས་པ་ལས་མཐའ་གཅིག་ཏུ་བཟུང་ནས་ལུང་དོན་སྐྱོགས་པར་མི་བྱ་སྟེ་གཟུགས་སྐུ་འགྲུབ་པའི་རྒྱུ་བཞིན་ལག་གི་རྣམ་པ་ཅན་ལས་གཞན་དུ་མི་སྲིད་ན་ཚངས་པ་འགྲུབ་པ་ལ་གདོང་བཞི་དང་། བརྒྱ་བྱིན་
འགྲུབ་པ་ལ་མིག་སྟོང་སོགས་བདེ་འགྲོ་དང་ངན་འགྲོ་དེ་དང་དེའི་འཁོར་བའི་འདྲ་འབག་བསྒོམ་དགོས་པའི་མཐའ་མི་ཐུག་པར་འགྱུར་རོ། །ཅིའི་ཕྱིར་ན་ཕ་རོལ་ཏུ་ཕྱིན་པ་དང་སེམས་ཕྱོགས་ཆེན་པོ་ལ་སོགས་ནས་ཕྱིན་དྲུག་དང་། བླ་མ་བསྙེན་བཀུར་ལ་སོགས་པའི་ཐབས་ཀྱི་ཆ་སྔོན་དུ་བསྟན་ནས་མཚན་དཔེའི་སྣང་བ་ལ་མ་ལྟོས་པའི་ཤེས་རབ་ཁྱད་པར་ཅན་ཁོ་ནས་འབྲས་བུ་སྐུ་གསུམ་འགྲུབ་པར་ནི་འདོད་ལ། སྔགས་སུ་བསྐྱེད་རིམ་གྱི་ལམ་ལ་ནི་སྟོང་ཉིད་ཀྱི་ལྟ་བས་མ་ཟིན་པའི་བསྐྱེད་རིམ་རང་རྒྱུད་པས་ཁམས་གསུམ་དུ་གོལ་བར་བཤད་པའི་ཕྱིར་རོ། །དེ་བས་ན་སྟོང་ཉིད་ཀྱི་རྩིས་མ་ཟིན་པའི་ལྷའི་རྣལ་འབྱོར་རྐྱང་པ་ནི་སྐབས་འདིར་བདག་མེད་པའི་ཤེས་རབ་དང་བྲལ་བའི་ལམ་དུ་གདོན་མི་ཟ་ལ། ཤེས་རབ་ཀྱི་ཕྱོགས་ལ་ནི་རྣམ་པའི་གཟུགས་བརྙན་བསྒོམ་པ་ལ་མི་ལྟོས་པའི་སྟོང་པ་ཉིད་ཀྱི་གདངས་སྙིང་རྗེ་ཆེན་པོ་དང་འབྲེལ་བ་ནི་ཐབས་ཤེས་འབྲེལ་བའི་ལམ་ཆོས་ཀྱི་སྐུའི་བསྒྲུབ་གཞི་གཟུགས་སྐུ་ཐམས་ཅད་ཀྱི་འབྱུང་གནས་ཡིན་པའོ། །དེ་བས་ན་ལུང་དེས་ན་མཚན་བཅས་དང་མཚན་མེད་གཉིས་ཀྱི་རྣམ་གཞག་ལེགས་པར་བསྟན་ནས་བཞིན་ལག་གི་རྣམ་པ་ཅན་དུ་བསྒོམ་པ་གཟུང་འཛིན་འདོད་ཀྱང་ཕལ་ཆེར་མདོའི་རྗེས་སུ་འཇུག་པ་དང་རྗེས་མཐུན་པར་དང་པོར་མཚན་མ་ཅན་དང་བཅས་པའི་བདག་མདུན་ཐ་དད་བསྐྱེད་ཀྱང་། མཐར་གོམས་པ་བརྟན་པ་ན་དོན་གྱི་རྣམ་པ་སེམས་སུ་ཤེས་ནས་ཕྱི་རོལ་གྱི་སྤྲོས་པ་ཐམས་ཅད་གཅོད་པ་ལྟར་ཁ་དོག་དང་དབྱིབས་སུ་བསྒོམ་པ་ཡོངས་སུ་མ་དག་པའི་ལྷ་དང་ལུས་ངག་གི་ལས་རྣམས་ལྟར་སྣང་ཙམ་དུ་ཤེས་ནས་མཚན་མ་མེད་པ་ནང་གི་རྣལ་འབྱོར་ལ་འབད་པའི་དེ་ཁོ་ན་ཉིད་
ལ་ཡོངས་སུ་དག་པའི་ལྷའི་བརྡའ་ཆད་བཞག་གོ །གལ་ཏེ་དེ་ལ་ལྷའི་གཟུགས་སྒྲ་ཞུགས་པས་རྣམ་པ་དང་བཅས་པ་ཡིན་ནོ་སྙམ་ན། དེ་ནི་མ་ངེས་ཏེ་ཆོས་སྐུ་དང་ངོ་བོ་ཉིད་སྐུ་སོགས་ལའང་གཟུགས་སྒྲ་ཞུགས་པའི་ཕྱིར་རོ། །དེ་ལྟར་མཚན་མ་ཡོད་མེད་ཀྱི་རྣལ་འབྱོར་གཉིས་ལེགས་པར་ཤེས་ནས་གཉིས་པ་སྦྱོར་བའི་སྤྱོད་པ་ལ་ཕྱིའི་ཡན་ལག་བཞི་དང་། ནང་གི་ཡན་ལག་བཞིའི་བཟླས་བརྗོད་ལ་བརྟེན་པའི་ཚུལ་རྣམ་སྣང་མངོན་བྱང་སོགས་ལས་ཤེས་པར་བྱ་ཞིང་། འདི་ལ་རང་དམ་ཚིག་པར་བསྐྱེད་ཅིང་མདུན་དུ་ཡེ་ཤེས་པའི་ལྷ་བསྐྱེད་པ་ལས་དངོས་གྲུབ་བླང་ཞིང་རང་ལ་ཡེ་ཤེས་པ་འཇུག་པ་མེད་པར་འདོད་པ་ཉིད་གྲགས་ཆེའོ། །འོན་ཀྱང་དེ་ཉིད་བསྡུས་པའི་བསྟོད་འགྲེལ་ལས། །སྙིང་པོ་ཕྱག་རྒྱ་སྔགས་རིགས་རྣམས། །ཇི་ལྟར་འདོད་པའི་ཚུལ་གྱིས་ནི། ཞེས་དྲངས་པའི་རྗེས་སུ་འབྲངས་ནས་བདག་བསྐྱེད་ལ་ཡེ་ཤེས་པ་གཞུག་པར་འདོད་པའི་ཕྱོགས་ཀྱང་ཡོད་དེ། རྣལ་འབྱོར་རྒྱུད་ནས་རིགས་པ་བསྒྲེས་པར་སྣང་ངོ་། །ལར་བྱ་སྤྱོད་གཉིས་ལ་བདག་བསྐྱེད་ཡོད་མེད་དང་ཡེ་ཤེས་པ་འཇུག་མིན་གྱི་ཕྱོགས་གཉིས་རྩ་བའི་དངོས་བསྟན་དང་། རྣལ་འབྱོར་རྒྱུད་ཀྱི་རིགས་པས་བཀབ་པ་ལས། རྒྱ་གར་བའི་སློབ་དཔོན་རྣམས་ཀྱང་བཞེད་པ་མི་མཐུན་པ་ཁོ་ནར་སྣང་བས་མཐའ་གཅིག་ཏུ་མི་བཟུང་ལ། བྱ་སྤྱོད་གཉིས་པོའི་རྒྱུད་ཀྱི་ལམ་སྡུད་པའི་སྤྱི་ཆིངས་ནི་ལྷ་དང་དེ་ཁོ་ན་ཉིད་ཀྱི་རྣལ་འབྱོར་དང་། རླུང་དང་བཟླས་པའི་རྣལ་འབྱོར་བཞིར་གནས་པ་ལས། དང་པོ་གཉིས་ནི་གཟུགས་སྐུ་གཉིས་ཀྱི་སྒྲུབ་བྱེད་གཙོ་བོ་ཡིན་ལ། བཟླས་པ་ནི་ལྷའི་ཐུགས་རྒྱུད་བསྐུལ་བའི་ཡན་ལག་དང་། རླུང་ནི་རྣལ་འབྱོར་དང་པོ་གཉིས་བརྟན་བྱེད་ཀྱི་ཡན་ལག་ཡིན་པས་
བཞི་པོའང་བསྡུ་ན་མཚན་མ་ཡོད་མེད་གཉིས་སུ་འདུ་ལ། དེའང་རླུང་གི་རྣལ་འབྱོར་ནི་བླ་མེད་ཀྱི་རྫོགས་རིམ་དང་མི་མཚུངས་ཏེ། བདེ་གསལ་མི་རྟོག་པའི་ཏིང་ངེ་འཛིན་དང་། ལྷའི་རྣལ་འབྱོར་འགྲུབ་པའི་རྒྱུ་ཙམ་ཡིན་པས་རྒྱུད་སྡེ་གོང་མའི་ལམ་ཁྱད་པར་ཅན་དང་ཆེ་ཁྱད་ཞུགས་པ་ཡིན་ནོ། །གསུམ་པ་གྲུབ་པའི་སྤྱོད་པ་ནི། རལ་གྲི་ལ་སོགས་པའི་ཕྱིའི་རྫས་ལ་བརྟེན་ནས་རལ་གྲིའི་རིག་པ་འཛིན་པ་ལ་སོགས་པ་དང་། ནང་གི་ལུས་གནས་སོ་སོར་འབྱུང་བ་བཞིའི་དཀྱིལ་འཁོར་བསྒོམས་ནས་ཕྲིན་ལས་བཞི་བསྒྲུབ་པ་དང་། འོད་ཟེར་ཅན་མ་ལ་སོགས་པའི་བསྒྲུབ་པ་བྱས་ནས་ལྷ་དེ་དག་གི་མཚན་མ་མཐོང་མཐོང་འབད་པ་ན་བྱང་ཆུབ་ཀྱི་སེམས་མི་བརྗེད་པའི་ཏིང་ངེ་འཛིན་འཐོབ་པ་སོགས་དངོས་གྲུབ་བསྒྲུབ་པའི་ཚུལ་དུ་མ་ཞིག་རྒྱུད་ལས་གསུངས་སོ། །རྣལ་འབྱོར་རྒྱུད་ཀྱི་མཚན་ཉིད་གང་ཡིན་པ་ནི། རྣལ་འབྱོར་རྒྱུད་ཀྱི་གྲུ་ཆད་མན་ཆད་ལ། །བཀོད་པ་ཆེན་པོ་ལོངས་སྤྱོད་རྫོགས་པ་ལྟར། །བསྟན་ཡང་ཟུང་འབྲེལ་མ་ཡིན་བསྐྱེད་དང་རྫོགས། །ཐབས་དང་ཤེས་རབ་རིམ་ཅན་སོ་སོ་བ། །རྣལ་འབྱོར་གཙོར་སྤྱོད་ལུས་ངག་གྲོགས་སུ་སྟོན། །ཡེ་ཤེས་དགུག་བསྟིམ་ཕྱག་རྒྱ་བཞི་ཡིས་བཅིང་། །དམ་ཡེ་གཅིག་པའི་ངང་ནས་དངོས་གྲུབ་བླང་། །བཟླས་པའི་མཐའ་ལ་གཤེགས་གསོལ་བྱ་བའོ། །དེ་ལ་རྩ་བའི་རྒྱུད་དེ་ཉིད་འདུས་པ། བཤད་རྒྱུད་རྡོ་རྗེ་རྩེ་མོ། ཆ་མཐུན་གྱི་རྒྱུད་དཔལ་མཆོག་དང་པོ་སོགས་དང་། རྡོར་དབྱིངས་དང་། ཁམས་གསུམ་རྣམ་རྒྱལ་དང་། ངན་སོང་སྦྱོང་བ་དང་། དོན་གྲུབ་སྟེ་དུམ་བུ་བཞིར་གྲགས་པའི་དཀྱིལ་འཁོར་གྱི་གྲུ་ཆད་ལ་བཀོད་པ་ཆེན་པོ་ལོངས་སྤྱོད་རྫོགས་པ་ལྟར་བསྟན་ཀྱང་དེ་དག་གི་ལྷ་ཡང་ཐབས་དང་ཤེས་རབ་ཟུང་དུ་འབྲེལ་བ་ཅན་མ་ཡིན་ཅིང་། ཆོས་ཐམས་ཅད་བདག་མེད་པའི་རང་བཞིན་སྟོང་ཉིད་དུ་རྟོགས་
པའི་ཡེ་ཤེས་ཀྱི་བྱིན་རླབས་ཀུན་རྫོབ་ཙམ་དུ་རྡོ་རྗེ་དབྱིངས་ལ་སོགས་པའི་ལྷར་བཏགས་པ་སྟེ་ལམ་རིམ་ལས། །ལྷུན་གྲུབ་མཉམ་པར་མ་རྟོགས་པས། །ཆོས་ཀུན་རྣམ་དག་ཡེ་ཤེས་ཀྱི། །ཐབས་ཤེས་རིམ་ཅན་དུ་བསྒོམས་པས། །བསྐྱེད་རྫོགས་སོ་སོ་བ་ཉིད་དེ། །ཞེས་སོ། །དེའང་ལུས་ངག་གི་བྱ་བ་གཙང་སྦྲ་ལ་སོགས་པ་སྤྱོད་པའི་གྲོགས་ཙམ་ལས། དངོས་གཞི་སེམས་ཀྱི་བྱ་བ་ལྷའི་རྣལ་འབྱོར་ལ་སོགས་པ་གཙོ་བོར་སྟོན་པ་སྟེ། དེའང་དུམ་བུ་དང་པོ་ནི་དེ་བཞིན་གཤེགས་པ་དང་དེའི་རིགས་གཉིས་ཀྱི་ཕྱི་མ་ནི་རྣམ་སྣང་གི་རིགས་ཏེ་གདུལ་བྱའི་རྒྱུད་དུག་གསུམ་ཆ་མཉམ་པ་དང་། གཏི་མུག་ཅན་གཉིས་གདུལ་བ་ལ་དགོངས་པ་དང་། གཉིས་པ་ནི་རྡོ་རྗེའི་རིགས་ཏེ་མི་བསྐྱོད་པའི་རིགས་ཀྱིས་གདུལ་བྱ་ཞེ་སྡང་ཅན་འདུལ་བ་དང་། གསུམ་པ་ནི་པདྨའི་རིགས་ཏེ་འོད་དཔག་མེད་ཀྱི་རིགས་ཀྱིས་གདུལ་བྱ་འདོད་ཆགས་ཅན་འདུལ་བ་དང་། བཞི་པ་རིན་པོ་ཆེའི་རིགས་ཏེ་རིན་འབྱུང་གི་རིགས་ཀྱིས་གདུལ་བྱ་སེར་སྣ་ཅན་འདུལ་བའོ། །དེ་ལྟར་རིགས་བཞི་ལས་མ་བསྟན་པ་ནི་འགྲོ་བའི་བསམ་པ་རྫོགས་པར་བྱེད་པའི་བྱེད་པ་པོའི་སྒོ་ནས་རིན་པོ་ཆེའི་རིགས་ཡིན་ལ། ལས་སུ་བྱ་བའི་སྒོ་ནས་ལས་ཀྱི་རིགས་ཡིན་པའི་ཕྱིར་ལས་དང་བྱེད་པ་པོ་གཉིས་གཅིག་ཏུ་སྡུད་པའི་ཚུལ་སློབ་དཔོན་སངས་རྒྱས་གསང་བས་བཤད་དོ། །དེ་ལྟར་རིགས་བཞི་པོ་ལམ་ཐོབ་བྱའི་སྒོ་ནས་རིམ་པ་བཞིན་ངོ་བོ་ཉིད་དང་རྣམ་པར་སྨིན་པ་དང་། ལོངས་སྤྱོད་རྫོགས་པ་དང་། སྤྲུལ་པའི་སྐུ་བཞི་དང་། ཡང་མེ་ལོང་ལྟ་བུ་དང་། མཉམ་པ་ཉིད་དང་། སོ་སོར་རྟོག་པ་དང་། བྱ་བ་གྲུབ་པའི་ཡེ་ཤེས་བཞི་དང་། བྱང་ཆུབ་ཀྱི་སེམས་དང་། སྦྱིན་པའི་ཕར་ཕྱིན་དང་། ཤེས་རབ་ཀྱི་ཕར་ཕྱིན་དང་།
བརྩོན་འགྲུས་ཀྱི་ཕར་ཕྱིན་ཏེ་བཞི་བཞིའོ། །དེ་ལྟར་དུམ་བུ་བཞི་པོ་རང་རང་གི་གོ་འཕང་མངོན་དུ་བྱེད་པའི་ཚུལ་དུམ་བུ་རེ་རེ་ལས་རྒྱས་འབྲིང་བསྡུས་གསུམ་གྱི་ཏིང་ངེ་འཛིན་གསུམ་མཚན་བཞི་བཞིར་བསྟན་ནས་དཀྱིལ་འཁོར་ཆེན་པོ་དང་། གཟུངས་དཀྱིལ་དང་། ཆོས་དཀྱིལ་དང་། ལས་དཀྱིལ་གྱི་སྐབས་ཀྱི་དང་པོ་སྦྱོར་བ་དང་། དཀྱིལ་འཁོར་རྒྱལ་མཆོག་དང་། ལས་རྒྱལ་མཆོག་གི་ཏིང་ངེ་འཛིན་གསུམ་ལ་བརྟེན་ནས་ཉམས་སུ་ལེན་པའི་ཚུལ་དེ་ཉིད་སྣང་བ་དང་། དཔལ་མཆོག་འགྲེལ་ཆེན་སོགས་ལས་ཤེས་པར་བྱའོ། །སྤྱི་མཚན་དུ་ལྷའི་རྣལ་འབྱོར་བསྒོམ་པ་ལ་སྲིད་པ་བསྐྱེད་པའི་རིམ་པ་ཀུན་ནས་ཉོན་མོངས་པའི་ཕྱོགས་དང་བསྟུན་ནས་བསྒོམ་བརྒྱུད་སྡེ་འོག་མ་གསུམ་གྱི་ལུགས་མ་ཡིན་ཀྱང་རྣམ་བྱང་གི་ཕྱོགས་དང་བསྟུན་ནས་མངོན་བྱང་ལྔའི་རིམ་པས་སྲིད་པ་ཐ་མ་པའི་བྱང་སེམས་འཚང་རྒྱ་བའི་རིམ་པ་ལྟར་བསྒྲུབ་པའི་ཚུལ། ཞིང་དང་གནས་ཕུན་སུམ་ཚོགས་པ་འགྲུབ་པའི་རྒྱུ། གདན་པདྨ་ལས་མངོན་པར་བྱང་ཆུབ་པ་དང་། ཆོས་ཕུན་སུམ་ཚོགས་པའི་རྒྱུ་གསུང་ཡིག་འབྲུ་ལས་མངོན་པར་བྱང་ཆུབ་པ་དང་། དུས་ཕུན་སུམ་ཚོགས་པ་རྟག་པ་རྒྱུན་གྱི་འཁོར་ལོ་འགྲུབ་པའི་རྒྱུ་ཐུགས་ཕྱག་མཚན་ལས་མངོན་པར་བྱང་ཆུབ་པ་དང་། འཁོར་ཕུན་སུམ་ཚོགས་པའི་རྒྱུ། སྐུ་ཡོངས་སུ་རྫོགས་པ་དཀྱིལ་འཁོར་གྱི་འཁོར་ལོ་དང་བཅས་པ་ལས་མངོན་པར་བྱང་ཆུབ་པ་དང་། སྐུའི་ངོ་བོ་ཕུན་སུམ་ཚོགས་པའི་རྒྱུ་ལ་ཡེ་ཤེས་སེམས་དཔའ་ལས་མངོན་པར་བྱང་ཆུབ་པ་ལྔ་ནི་སློབ་པའི་ལམ་དང་བསྟུན་པའི་བསྒོམ་རིམ་ཡིན་ནོ། །ཚུལ་དེ་ལྟ་བུས་རང་ལྷར་བསྐྱེད་པ་ལ་ཡེ་ཤེས་པ་དགུག་གཞུག་དང་། འབྲས་བུའི་ཕྱག་རྒྱ་བཞི་ཐོབ་པའི་ཐབས་སུ་དམ་ཚིག་གི་ཕྱག་རྒྱ་དང་། ཆོས་ཀྱི་ཕྱག་རྒྱ་དང་། ལས་ཀྱི་ཕྱག་རྒྱ་དང་། ཕྱག་རྒྱ་ཆེན་པོ་སྟེ་
སོ་སོ་རང་རིག་པའི་ཡེ་ཤེས་ཀྱི་ཞུ་བདེའི་མཚན་ཉིད་ལ་རྒྱས་ཐེབས་ནས་འཁོར་གསུམ་ཡོངས་དག་གི་ཚོགས་སུ་སྦྱོར་བ་ནི་དེ་ཁོ་ན་ཉིད་ཀྱི་མཆོད་པས་མཉེས་པ་བྱེད་པ་སྟེ་རྡོ་རྗེ་མཁའ་འགྲོ་ལས། ཇི་བཞིན་ཤེས་རབ་སྙོམས་ཞུགས་པའི། །ཡང་དག་སྦྱོར་དང་ལྡན་པ་ཡིས། །དེ་བཞིན་གཤེགས་པའི་གཙུག་ཏོར་དཀར། །ཡིད་ནང་ཆུད་པ་དེ་ཡིས་སྤྱད། །མཆོག་ཏུ་དགའ་བ་སྤྲོ་བ་ཡི། །གནས་སྐབས་སུ་ནི་མཉེས་པར་འགྱུར། །ཞེས་སོ། །དེ་ལྟར་རྩ་རླུང་ཐིག་ལེ་གསུམ་གྱི་གནས་ཚུལ་མངོན་དུ་རིག་ནས་དེ་ལ་རྩོལ་བའི་སྦྱོར་བས་གནད་དུ། །བསྣུན་པ་ལམ་བསླབས་ན་རྩ་མདུད་གྲོལ་བའི་ཡོན་ཏན་གྱི་ཁྱད་པར་མི་འགྲུབ་པས་མཐར་ཐུག་གི་འབྲས་བུ་ལ་རིང་བའི་ཕྱིར་དེའི་གནད་བཤད་ནས་བསྒོམ་པའི་ཚུལ། མདོར་ན་གནས་པ་རྩ་ནི་ཡུར་བ་འདྲ། །གཡོ་བ་རླུང་ནི་འགྲོ་འོང་ཁ་ལོ་པ། །བྱང་ཆུབ་སེམས་ནི་ཆུ་འདྲ་ཁྲིད་སར་འདུ། །འཁོར་ལོ་དྲུག་ཏུ་བརྩེགས་པའི་སྒྲ་གཅན་དབྱིངས། །སྲོག་དང་རྩོལ་བའི་ཤིང་རྟས་དྲངས་པ་ལས། དབུ་མའི་མདུད་པ་གཉིས་གཉིས་གྲོལ་བ་དང་། །རླུང་དང་ཁམས་ཀྱི་དྭངས་མ་རྣམ་གཉིས་ཏེ། སྒྲ་གཅན་ལྟོར་ཞུགས་དང་པོའི་ས་ནས་བཟུང་། །ས་བཅུའི་ཡོན་ཏན་གོང་འཕེལ་གཙུག་ཏོར་འགྲོ། །དེ་ཡང་རྩ་གནད་དུ་འགྲོ་བ་ལ་ལུས་གནད། རླུང་གནད་དུ་འགྲོ་བ་ལ་འཁྲུལ་འཁོར། ཐིག་ལེ་གནད་དུ་འགྲོ་བ་ལ་རྩོལ་བ་གལ་ཆེ་བ་ནི་སྤྱིར་གཅེས་ལ། བྱེ་བྲག་ཏུ་ལུས་ཀྱི་རྟེན་རྩ་ནི་ཡུར་བ་དང་འདྲ་སྟེ་རླུང་རྒྱུ་བའི་ལམ་ཡིན་པས་སྲོག་རྩོལ་ལ་བརྟེན་ནས་རྩ་ལམ་སྦྱང་བར་བྱའོ། །ངག་གི་རྟེན་རླུང་ནི་འཁོར་འདས་གཉིས་ཀར་འགྲོ་བའི་ཁ་ལོ་བ་ལྟ་བུ་ཡིན་པས་
རིག་པའི་རྒྱལ་པོ་བསྒྲུབ། །གལ་ཏེ་དེ་ནི་རབ་བྱུང་གྱུར། །སྡོམ་པ་གསུམ་ལ་ཡང་དག་གནས། །སོ་སོ་ཐར་དང་བྱང་ཆུབ་སེམས། །རིག་འཛིན་སྡོམ་པ་མཆོག་ཡིན་ནོ། །ཞེས་སོ། །དེ་ནས་ཇི་ལྟར་བསྒྲུབ་པ་ལ། །མཚན་མ་དང་བཅས་པའི་རྣལ་འབྱོར་དང་། །མཚན་མ་མེད་པའི་ཤེས་རབ་ཀྱི་རྣལ་འབྱོར་གཉིས་ལས། དང་པོ་ནི་རགས་པ་ལྷ་ལ་དམིགས་པ་དང་། ཕྲ་བ་ཕྱག་མཚན་ལ་དམིགས་པའོ། །རགས་པ་ལྷ་ལ་དམིགས་པ་ནི། ཁྲུས་བྱ་བ་ནས་བཟུང་སྟེ་སྔོན་འགྲོའི་བྱ་བ་རྣམས་སོང་ནས་ཆོ་ག་ལྔས་ལྷ་གང་ཡིན་པའི་རྣལ་འབྱོར་དུ་བསྙེམས་ལ་རང་འདའི་ཡེ་ཤེས་པ་བཅུག་པ་ལ་ཕྱག་རྒྱ་བཞིས་རྒྱས་གདབ། དེ་ནས་དེ་བཞིན་གཤེགས་པ་ཚད་མེད་པ་བཅུག་པ་ལ་སླར་ཡང་ཕྱག་རྒྱ་བཞིས་བཅིང་ཞིང་རང་གི་རིགས་ཀྱིས་བྱིན་གྱིས་རློབ་པ་དང་། རང་རིགས་ཀྱི་དབང་གང་ཡིན་གྱི་དབང་བསྐུར། སྒེག་མོ་ལ་སོགས་པ་གསང་བའི་མཆོད་པ་བཞེས་ཡང་དག་པར་མཆོད། དེ་བཞིན་གཤེགས་པ་ཐམས་ཅད་ལ་ཕྱག་བྱས་ནས་རང་གི་ཕྱག་རྒྱ་ཆེན་པོ་བསྒོམས་ལ་ལྷ་དེ་དང་དེའི་བཟླས་པ་བྱ་བའི་ཚུལ་བསྟོད་འགྲེལ་ལས་བཤད་པ་བཞིན་ནོ། །དེ་ལྟར་མངོན་བྱང་ལྔ་ལས་ལྷ་བསྐྱེད་པ་བསྒོམ་མི་ནུས་པས་ནི་ལྷ་གང་ཡིན་དེའི་སྙིང་པོ་བརྗོད་ནས་བདག་མདུན་གཉིས་སུ་བསྒོམས་ཏེ་མཆོད་བསྟོད་དང་བཟླས་པ་ལ་འཇུག་པའི་ཚུལ་ཨ་བ་ཏ་ར་ལས། ཇི་སྐད་དུ་གསུངས་པའི་རང་གི་ལྷའི་གས་ཚིག་གི་སེམས་དཔའི་རྣལ་འབྱོར་བྱེད་མི་ནུས་པའི་སྔགས་པས་བཟླས་བརྗོད་ཙམ་ཉིད་དང་། དེའི་དོན་གྱིས་བཟླས་བརྗོད་བྱ་བའི་ལྷ་སེམས་དཔར་བདག་བྱིན་གྱིས་བརླབ་པ་དང་དབང་བསྐུར་བ་དང་། ཏིང་ངེ་འཛིན་དང་མཆོད་པ་དང་ལྡན་པར་བསམས་ཏེ། མདུན་དུ་ལང་དེ་ལྟ་བུ་ཉིད་བསྒོམ་ཞིང་བཟླས་བརྗོད་བྱའོ། །ཞེས་པ་ལྟར་རོ། །
ཕྲ་བ་ཕྱག་མཚན་ལ་དམིགས་པ་ནི། དུམ་བུ་དང་པོ་ལས། ལྕེ་ནི་རྐན་ལ་སྦྱར་བྱ་ཞིང་། །སྣ་ཡི་རྩེ་མོར་བསམ་བྱ་ཞིང་། །རྡོ་རྗེ་རྩེ་མོ་བདེ་རེག་པས། །སེམས་ནི་མཉམ་པར་བཞག་པར་འགྱུར། །ཞེས་དང་། ཀོ་ས་ལའི་རྒྱན་ལས། དེ་ནས་བསྒོམ་པར་བྱ་བའི་དམིགས་པ་རྡོ་རྗེ་ཕྲ་མོའི་ཁ་དོག་ལ་སོགས་པ་ཇི་ལྟར་ངེས་པར་བྱས་པ་ལྟར་སྣའི་རྩེ་མོར་བཞག་ལ་དེ་ལ་སེམས་གཟུང་བར་བྱའོ། །ཞེས་སོ། །དེ་ལྟར་ཕྲ་མོའི་རྣལ་འབྱོར་ལ་བརྟན་པ་ཐོབ་ནས་སྤྲོ་བསྡུ་བྱ་ཚུལ་སོགས་ཡན་ལག་གི་རྣམ་གྲངས་ནི་འདིར་མ་བཤད་དོ། །གཉིས་པ་མཚན་མ་མེད་པའི་རྣལ་འབྱོར་ནི། ཆོས་ཐམས་ཅད་བདག་མེད་པར་ཤེས་པའི་བློ་ཅན་རྣམས་ལ་དེ་ཁོ་ན་ཉིད་དོན་དམ་པའི་ཤེས་རབ་རྟོགས་པའི་ཐབས་སུ་ཞི་གནས་དང་ལྷག་མཐོང་ཟུང་དུ་འཇུག་པའི་རྣལ་འབྱོར་གཉིས་སུ་བསྟན་པའི་ཚུལ་ཀོ་ས་ལའི་རྒྱན་ལས། ཞེ་གནས་ནི་ཏིང་ངེ་འཛིན་ལ་སེམས་པའི་མཚན་ཉིད་དེ་སེམས་གང་དམིགས་པར་བྱ་བ་གཅིག་ལ་རབ་ཏུ་འཇུག་པའོ། །ལྷག་མཐོང་ནི་ཤེས་རབ་སྟེ། དེ་ཡང་སེམས་ལས་བྱུང་བ་ཆོས་རབ་ཏུ་རྣམ་པར་འབྱེད་པའི་མཚན་ཉིད་ཅན་ཏེ། མཉམ་པར་འཇོག་པའི་སེམས་ཀྱིས་འདི་ནི་ཟག་པ་དང་བཅས་པའོ། །འདི་ནི་ཟག་པ་མེད་པའོ། །འདི་ནི་ཀུན་ནས་ཉོན་མོངས་པའོ། །འདི་ནི་རྣམ་པར་བྱང་བའོ་ཞེས་རྣམ་པར་འབྱེད་པའི་རྣམ་པའོ། །ཞེས་ཇི་སྙེད་པའི་ཤེས་བྱ་འབྱེད་པ་ལ་དམིགས་པའི་ལྷག་མཐོང་སྟེ་ཐོས་བསམ་ལས་བྱུང་བའི་ཤེས་རབ་ཀྱིས་བསྐྱེད་པའོ། །ཇི་ལྟ་བ་ལ་དམིགས་པ་ནི་མངོན་པར་འདུ་བྱེད་པ་མེད་པ་ཉིད་དེ་བསྒོམས་བྱུང་དང་བྱིན་རླབས་ཀྱི་སྟོབས་ལས་སྐྱེ་བའི་ཚུལ་རྒྱས་པར་སྔར་ནས་བཤད་ཟིན་ཏོ། །དེ་ལྟར་རྣལ་འབྱོར་རྒྱུད་ཀྱི་ལམ་སྡུད་པའི་ཆིངས་ནི་ཕྲ་མོ་དང་
ལྷའི་རྣལ་འབྱོར་ཐུན་བཞིར་བསྐྱངས་ནས་མཚན་བཅས་ཀྱི་ཏིང་ངེ་འཛིན་བསྐྱེད་ཅིང་། ལྷའི་རྣལ་འབྱོར་གྱི་མཐར་ཡེ་ཤེས་པ་གཤེགས་ནས་དམ་ཚིག་པ་བསྡུས་པ་དེས་ནི་ཆོས་ཅན་ཀུན་རྫོབ་ཀྱི་བདེན་པ་ལྷ་དང་ཕྲ་མོའི་རྣལ་འབྱོར་ལ་བརྟེན་པ་དེ་ཡང་མཚན་མ་དང་བྲལ་བའི་རྣལ་འབྱོར་དོན་དམ་པའི་བདེན་པ་དང་འཇུག་པས་ན་བདེན་གཉིས་སྔ་ཕྱི་རེས་འཇོག་ཏུ་འདོད་པའོ། །འདི་ཡང་གྲུབ་མཐའ་སྨྲ་བ་དང་བསྟུན་ན་སེམས་ཙམ་པས་གཟུང་བ་ཕྱི་རོལ་དང་། དེ་འཛིན་བྱེད་མེད་པར་མྱོང་བྱ་མྱོང་བྱེད་ཐམས་ཅད་སེམས་ཙམ་དུ་གཅིག་པས་ལས་ཐམས་ཅད་སེམས་ཀྱི་ལས་སུ་འདོད་ཅིང་། མཐར་ཐུག་གཟུང་འཛིན་གྱི་རྣམ་པས་ལས་གསོག་པ་དེའི་དྲི་མའི་ཆ་གང་གིས་ཀྱང་གོས་མ་མྱོང་བའི་གཉིས་མེད་ཀྱི་སེམས་དང་ཤེལ་རྡུལ་དང་བྲལ་བ་ལྟ་བུར་འདོད་པ་བཞིན་གྱི་ཆ་རྣམས་ལྷ་དང་དེ་ཁ་ན་ཉིད་ལ་རྣལ་འབྱོར་དུ་བྱེད་པའི་ལམ་གྱིས་དོར་ཏེ། རང་མྱོང་ཙམ་གྱི་དམ་ཚིག་པ་ལ་དེ་མ་ཐག་ཡེ་ཤེས་སེམས་དཔའ་བཅུག་ནས་ནང་ཏིང་ངེ་འཛིན་གྱི་བསྒོམ་བཟླས་གཙོ་བོར་བྱས་ཏེ་མཐར་ཡེ་ཤེས་པའང་གཤེགས་སུ་གསོལ་བའོ། །དེ་ལྟར་གྲུབ་མཐའ་སྨྲ་བ་དང་བསྟུན་པ་ལ་དགོས་པ་ཅི་ཡོད་ན། རྒྱུད་སྡེ་བཞི་ཀར་ལྷའི་རྣལ་འབྱོར་དང་། སྟོང་པ་ཉིད་ལ་བརྟེན་པའི་བདེན་གཉིས་རིམ་ཅན་དང་གཅིག་ཅར་དུ་བསྒྲུབ་པའི་ཐབས་གཙོ་ཆེ་ཆུང་དང་མན་ངག་གི་ཆ་ནས་བསྐྱེད་རྫོགས་གཉིས་ཀའི་གནད་རྫོགས་མ་རྫོགས་ཀྱི་ཕྱི་ནང་དུ་བྱེ་བ་ལྟར་དོན་གྱི་ཐོབ་ཆ་ལ་ཁད་ཉེ་འགྱེད་ཆེ་བས་ལམ་གྱི་གནས་སྐབས་གོང་ནས་གོང་དུ་བགྲོད་པའི་རིམ་པ་ཇེ་ཟབ་ཏུ་སྟོན་པ་ཡིན་པའི་ཆིངས་ལེགས་པར་ཤེས་པའི་སླད་དུ་སྟེ། དེ་ལྟར་མ་ཕྱེད་པས་ད་ལྟ་ནི་ཐུན་མོང་གི་དངོས་གྲུབ་ཕྲན་ཚེགས་ཀྱི་དོན་དུ་བསྙེན་པའི་
གཟུགས་བརྙན་དང་། དབང་བསྐུར་རབ་གནས་ལ་སོགས་པ་ཙམ་ལ་འཇུག་པའི་དོན་དུ་ཕྱག་རྒྱ་འཆིང་བ་དང་ཆོ་གའི་ལས་ཁྲིགས་ལ་གོ་བ་འཚོལ་བ་ཙམ་ལས་མི་སྣང་ངོ་། །དེ་བས་ན་ངེས་པར་སྤྱོད་པའི་དཀའ་ཐུབ་དང་བཅས་པ་སྔགས་ཕྱི་པ་གསུམ་གྱི་རྩེ་མོར་ཕྱིན་པ་ནི་རྣལ་འབྱོར་གྱི་རྒྱུད་འདི་ཡིན་ན་ཡོ་གའི་ཤིང་རྟ་ཆེན་པོ་སངས་རྒྱས་གསང་བ་ལ་སོགས་རྣལ་འབྱོར་རྒྱུད་ལ་མཁས་པའི་སློབ་དཔོན་གསུམ་གྱི་གཞུང་ལས་ཐུན་མོང་དང་ཐུན་མོང་མ་ཡིན་པའི་དངོས་གྲུབ་བསྒྲུབས་ནས་ལམ་གྱིས་གཅོད་ཚུལ་རྣམས་རིག་པར་བྱའོ། ད་ནི་གསང་སྔགས་ནང་པ་སྟོན་པའི་ཕྱིར། བླ་ན་མེད་པའི་གསང་སྔགས་ནང་པ་ནི། བསྐྱེད་དང་རྫོགས་དང་ཟུང་དུ་འཇུག་པ་ལས། །ཕ་རྒྱུད་མ་རྒྱུད་གཉིས་མེད་རྒྱུད་དུ་བཞག །ལྷ་ནི་འཁྲིལ་སྦྱོར་དམ་རྫས་ཁྱད་པར་སྤྱོད། །གཙང་བཙོག་སྤོང་ལེན་མེད་པའི་རང་བཞིན་ཅན། །དེ་ལ་རྣལ་འབྱོར་ཆེན་པོའི་རྒྱུད་འདི་ནི་ངོ་བོའི་སྒོ་ནས་ཐབས་ཤེས་སམ་བསྐྱེད་རྫོགས་གཉིས་མེད་དུ་འདོད་པ་ཡིན་ཡང་། ཀུན་རྫོབ་ཏུ་རྣམ་པར་དབྱེ་བ་ཙམ་གྱི་ཆ་ནས་བརྗོད་ན། དགྱེས་རྡོར་ལས། སྐྱེས་བུ་རྣམས་ནི་གདུལ་དོན་དུ། །རྣལ་འབྱོར་རྒྱུད་ནི་རབ་ཏུ་བསྟན། །བཙུན་མོ་རྣམས་ནི་བསྡུ་བའི་ཕྱིར། །རྣལ་འབྱོར་མ་ཡི་རྒྱུད་རབ་བཤད། །ཅེས་པ་ལྟར་དཀྱིལ་འཁོར་གང་དུ་ལྷའི་རྣམ་པ་ཕོ་ཤས་ཆེ་ཞིང་། དར་དང་རིན་པོ་ཆེའི་རྒྱན་མང་པ་ཕ་རྒྱུད། ལྷ་མོའི་རྣམ་པ་ཤས་ཆེ་ཞིང་གཅེར་བུ་རུས་པའི་རྒྱན་ཅན་དང་། གཡང་གཞི་དང་ཐལ་ཆེན་གྱི་བྱུགས་པ་ལ་སོགས་པ་མ་རྒྱུད་དོ། །དེ་ཙམ་དུའང་མ་ངེས་ཏེ་དབུས་ཀྱི་ལྷའི་གཙོ་བོ་གོ་འཕོ་ལ་གཙོ་མོ་མི་འཕོ་བ་རྣལ་འབྱོར་ཕའི་རྒྱུད་དེ། འདི་ལྟར་དབྱིངས་ཕྱུག་མ་གཅིག་པོ་ཉིད་རྣམ་སྣང་ལ་སོགས་པ་རིགས་ལྔ་པོའི་དཀྱིལ་འཁོར་གང་བསྒྲུབ་ཀྱི་གཙོ་བོ་དང་སྟང་དཔྱལ་དུ་འགྱུར་ཏེ་
སྐུའི་དཀྱིལ་འཁོར་ལ་རྣམ་སྣང་། གསུང་ལ་འོད་དཔག་མེད། ཐུགས་རྡོ་རྗེ་མི་བསྐྱོད་པ། ཡོན་ཏན་རིན་ཆེན་འབྱུང་ལྡན། ཕྲིན་ལས་དོན་ཡོད་གྲུབ་པའི་དཀྱིལ་འཁོར་དུ་ཡུམ་དབྱིངས་ཕྱུག་གཅིག་པུས་ཁྱབ་པ་ལྟ་བུའོ། །དེ་བཞིན་དུ་དབུས་ཀྱི་གཙོ་མོ་གོ་འཕོ་ལ་གཙོ་བོ་མི་འཕོ་ན་མའི་རྒྱུད་དེ། དྲི་མེད་འོད་ལས། ཀུན་རྫོབ་ཀྱིས་གང་དུ་རྣལ་འབྱོར་མ་རྣམས་ཡང་དག་པར་རྒྱུ་ཞིང་གཙོ་བོ་མི་གཡོ་བ་དེ་ནི་རྣལ་འབྱོར་མའི་རྒྱུད་དོ། །གང་དུ་ཐབས་ཡང་དག་པར་རྒྱུ་ཞིང་ཤེས་རབ་མི་གཡོ་བ་དེ་ནི་ཐབས་ཀྱི་རྒྱུད་དོ། །ཅེས་སོ། །འཕོ་ལུགས་ནི་རིགས་ལྔ་སོ་སོ་དང་སྟང་དཔྱལ་དུ་བྱེད་པ་དོན་གཅིག་གོ །གང་གི་སླད་དུ་འཕོ་དགོས་ན། མེ་ཏོག་ཕོག་པའི་ལྷའི་རིགས་གཙོ་བོར་བྱས་ན་ཉེ་བའི་དཀྱིལ་འཁོར་ཞེས་བྱ་སྟེ་བསྒྲུབ་ཐག་ཉེ་ལ་ལས་བཞི་གང་བསྒྲུབ་པའི་རིགས་དང་དཀྱིལ་འཁོར་རྫོགས་པར་བསྙེན་པས་དངོས་གྲུབ་མྱུར་དུ་འགྲུབ་པའོ། །དེའང་སྐུ་གསུང་ཐུགས་ཡོན་ཏན་ཕྲིན་ལས་ལྔ་པོ་རེ་རེ་ལའང་སྐུའི་སྐུ་ལ་སོགས་པ་ལྔ་ལྔར་ཕྱེ་བས་ཉི་ཤུ་རྩ་ལྔ། དེ་བཞིན་དུ་ཡེ་ཤེས་ལྔའི་རིགས་ཀྱང་དེ་སྙེད་དུ་ཕྱེ་བས་ཉི་ཤུ་རྩ་ལྔ། གཉིས་པོ་ཕྱེ་བ་ཕན་ཚུན་བསྒྲེས་པས་སྐུ་དང་ཡེ་ཤེས་ཀྱི་དཀྱིལ་འཁོར་རིགས་བརྒྱ་དང་། སྟོང་དང་། ཁྲི་འབུམ་ནས་བསམ་ཡས་ལྷུན་གྱིས་གྲུབ་པའི་དཀྱིལ་འཁོར་གྱི་བར་དུ་འགྱུར་པ་ཡིན་ཏེ། སྒྱུ་འཕྲུལ་ལས། དཀྱིལ་འཁོར་བསམ་ཡས་ལྷུན་གྱིས་གྲུབ། །ཅེས་སོ། །དེ་ལྟར་ཕ་རྒྱུད་དུ་ནི་ཐབས་བསྐྱེད་པའི་རིམ་པ་སྤྲོས་པ་དང་། རྫོགས་རིམ་རླུང་གཙོ་བོར་འདོན་ལ། མའི་རྒྱུད་དུ་ནི་བསྐྱེད་པ་ཙམ་ལས་རྫོགས་རིམ་ཐིག་ལེ་འབའ་ཞིག་གཙོ་བོར་བྱེད་དོ། །གཉིས་ཀའི་རང་བཞིན་ཆ་མཉམ་དུ་སྟོན་པ་ལ་གཉིས་སུ་མེད་པའི་རྒྱུད་ཅེས་བརྡར་བཏགས་ཀྱང་གྲུབ་པའི་མཐའ་དང་ལྟ་དགོངས་ནི་གཉིས་སུ་འདུ་བ་ཁོ་ན་ཡིན་པས་ངེས་པའི་དོན་དུ་ན་རྒྱུད་ཐམས་ཅད་ཐབས་ཤེས་གཉིས་
སུ་མེད་པའི་རྒྱུད་ཡིན་པར་འདུས་པའི་རྒྱུད་ཕྱི་མ་ལས་རྣལ་འབྱོར་གྱི་སྒྲ་དོན་བཤད་པའི་སྐབས། ཐབས་དང་ཤེས་རབས་སྙོམས་འཇུག་པ། །རྣལ་འབྱོར་ཞེས་ནི་བཤད་པ་ཡིན། །ཞེས་དང་། དང་པོའི་སངས་རྒྱས་ལས། །ཐབས་ཀྱི་ལུས་ཀྱིས་རྣལ་འབྱོར་ཡིན། །ཤེས་རབ་གཅིག་བུས་འགྱུར་མ་ཡིན། །ཐབས་དང་ཤེས་རབ་སྙོམས་འཇུག་པ། །དེ་བཞིན་གཤེགས་པས་རྣལ་འབྱོར་གསུངས། །ཞེས་སོ། །ཕྱི་པ་ལྟར་ཚངས་པར་སྤྱོད་པའི་དཀའ་ཐུབ་དང་། གཙང་རྨེ་ལ་སོགས་པའི་བླང་དོར་གྱི་ཆོས་མང་པོས་གདུང་བ་མ་ཡིན་པར་ཆོས་མཉམ་པ་ཆེན་པོའི་དམ་ཚིག་ལ་ལྟ་བས་ཕྱེ་བ་ནི་བླ་ན་མེད་པའི་ཁྱད་ཆོས་སོ། །གྲུབ་མཐའ་སྨྲ་བ་དང་བསྟུན་ནས། དབུ་མ་པ་བྱང་ཆུབ་འདོད་པས་བསོད་ནམས་ཀྱི་ཚོགས་ལ་བརྩོན་པ་ན་སྣང་བ་ཐམས་ཅད་བརྫུན་པའི་རང་བཞིན་དུ་ཐ་སྙད་ཀྱིས་རྒྱས་འདེབས་པས་བཅོས་མ་ཡེ་ཤེས་ཀྱི་ཚོགས་གསོག་པ་ན། སྟོང་པ་ཉིད་ལ་ཡང་སྒྲོ་སྐུར་ཐམས་ཅད་བཅད་ནས་ཅི་ཡང་མ་ཡིན་པའི་ཐལ་འགྱུར་འཕེན་པ་ལྟར། འདིར་ནི་སྣང་སྲིད་ཐམས་ཅད་ལྷ་དང་གཞལ་ཡས་སུ་བསྐྱེད་པའི་རིམ་པ་ལ་གདོད་ནས་གྲུབ་པའི་ཡེ་ཤེས་པ་འཇུག་པའི་ཕྱག་རྒྱས་ཐ་མལ་གྱི་སྣང་ཞེན་འདོར་བས་བསོད་ནམས་ཀྱི་ཚོགས་རྫོགས། རྫོགས་རིམ་མཚོན་བཅས་ཀྱི་ཐབས་ལ་མཁས་པས་སྒོ་གསུམ་གྱི་སྙིགས་མ་རྣམས་གཅོད་ཅིང་། ཆོས་ཐམས་ཅད་སྐྱེ་བ་མེད་པར་ཤེས་པའི་ཤེས་རབ་ཟབ་མོས་སྒྲོ་སྐུར་གྱི་མཐའ་འཆིང་གྲོལ་མེད་པར་བཅད་ནས་ཡེ་ཤེས་ཀྱི་ཚོགས་རྫོགས་པར་བྱེད་པ་སྟེ། འདུས་པའི་རྒྱུད་སྔ་འགྱུར་ལས། དངོས་པོ་འདི་རྣམས་མ་སྐྱེས་པ། །ཆོས་དང་ཆོས་ཉིད་མེད་པ་སྟེ། །ནམ་མཁའ་ལྟ་བུར་བདག་མེད་པ། །བྱང་ཆུབ་ཚུལ་
འདི་བསྟན་པའོ། །ཞེས་སོ། །དེ་ལྟར་རིམ་པ་གཉིས་ཀྱི་རྣལ་འབྱོར་ཟབ་མོ་ནི་གསང་སྔགས་ཕྱི་པ་མན་ཆད་དུ་ཡོད་པ་མ་ཡིན་ཏེ། ལྷ་བསྐྱེད་པའི་རྣལ་འབྱོར་ཕྱི་པ་ལ་ཡོད་ཀྱང་དེ་བསྐྱེད་རིམ་རྣལ་མམ་ཡིན་པས་ལྷ་རྫོགས་པའི་རྣལ་འབྱོར་ཀྱང་རྫོགས་རིམ་དུ་མི་བཟུང་ངོ་། །ཅིའི་ཕྱིར་ན་རྣལ་འབྱོར་བླ་མེད་ལྟར་སྲིད་པ་སྐྱེ་བའི་རིམ་པ་དང་རྗེས་སུ་མཐུན་པས་འཁོར་བའི་འདྲ་འབག་ལམ་དུ་བྱེད་པའི་བསྐྱེད་རིམ་མ་ཡིན་པས་སོ། །དེ་བས་ན་གྲུབ་མཐའ་སྨྲ་བ་བཞི་པོའང་འོག་མ་འོག་མའི་ཆ་ལ་གོང་མ་གོང་མའི་རིགས་པས་གནོད་པ་དང་མཚུངས་བར་རྒྱུད་སྡེའི་རིམ་པ་ལའང་དངོས་དང་རྗེས་མཐུན་པའི་ཁྱད་པར་གནམས་ལྟ་བུ་ཡོད་དོ་སྤྱོད་འཇུག་ལས། རྣལ་འབྱོར་པ་ཡང་བློ་ཁྱད་ཀྱི། གོང་མ་གོང་མ་རྣམས་ཀྱིས་གནོད། །ཅེས་གསུངས་པས་མཚོན་པར་ནུས་སོ། །དེ་ལས་འདིར་དཔལ་གསང་བ་འདུས་པ་དང་། སྒྱུ་འཕྲུལ་དྲ་བ་ལ་སོགས་པའི་རྒྱུད་ཀྱི་གཞུང་བསྐྱེད་པ་དང་རྫོགས་པ་དང་རྫོགས་པ་ཆེན་པོའི་ཚུལ་ཞེས་རྣམ་པ་གསུམ་དུ་བགྲངས་པའི་རང་བཞིན་བརྗོད་པའི་ཕྱིར། རྣལ་འབྱོར་ཆེན་པོ་ཕ་རྒྱུད་ཐབས་ཀྱི་ལམ། བསྐྱེད་རིམ་གཙོར་བྱས་རླུང་ལྔ་དག་པར་བྱེད། རྗེས་སུ་རྣལ་འབྱོར་མ་རྒྱུད་ཤེས་རབ་ལམ། །རྫོགས་རིམ་གཙོར་བྱེད་ཁམས་ལ་ཞུ་བདེ་བསྐྱེད། །ཤིན་ཏུ་རྣལ་འབྱོར་གཉིས་མེད་ཡེ་ཤེས་ལམ། །གཅིག་དང་དུ་བྲལ་འོད་གསལ་ཆེན་པོའི་སྦྱོར། །དེ་ལ་གསང་སྔགས་བླ་ན་མེད་པ་འདིར་སྡུག་བསྔལ་བདེན་པའི་རང་བཞིན་གློ་བུར་གྱི་དྲི་མ་དང་བཅས་པ་རྒྱུ་འབྲས་ཀྱིས་སློངས་པའི་སྲིད་པ་སྐྱེ་བའི་རིམ་པ་གང་ཡིན་པའི་འཁོར་བའི་འདྲ་འབག་བསྐྱེད་རིམ་གྱི་སྒོ་ནས་སྦྱངས་ཤིང་ཞིང་དག་པར་བྱེད་པས་ལམ་གྱི་བདེན་པ་དང་། ཀུན་འབྱུང་བའི་ཆོས་ལས་ཉོན་གྱི་རྣམ་པར་ཤར་བའི་རིགས་རྒྱུན་སྡུག་བསྔལ་བདེན་པའི་ཆོས་ཉིད་འབྲས་བུ་སངས་རྒྱས་
ཀྱི་རྣམ་པར་ཐར་པའི་འདྲ་འབག་གདན་གསུམ་ཚང་བའི་དཀྱིལ་འཁོར་དུ་བསྒྱུར་ཏེ་བསྒོམས་བས་འགོག་བདེན་དུ་འཆར་ཞིང་། དེ་ཡང་སྦྱང་བྱ་གློ་བུར་བ་ཀུན་བརྟགས་ལ་བལྟོས་ནས་བསྐྱེད་རིམ་དང་གཞན་དབང་ལ་བལྟོས་ནས་རྫོགས་རིམ་དང་ཡོངས་གྲུབ་དང་མཐུན་པར་རྫོགས་པ་ཆེན་པོ་ལམ་དུ་བྱེད་པའི་ཚུལ་དུ་འདོད་པ་སྟེ། འདི་ལྟར་རྣལ་འབྱོར་ཆེན་པོ་ཐབས་ཕའི་རྒྱུད་ནས་ནི། དཀྱིལ་འཁོར་བསྐྱེད་པའི་རིམ་པ་ཐབས་སུ་བྱས་ནས། འབྱུང་བ་ལྔའི་རླུང་རྣམ་པར་དག་པས་འཁྲུལ་སྣང་ཞིང་ཁམས་སུ་དག་པར་བྱེད་ཅིང་གསལ་སྟོང་རྣམ་པར་མི་རྟོག་པའི་ཡེ་ཤེས་ཟུང་དུ་འཇུག་པས་དངོས་གྲུབ་རྣམ་པ་གཉིས་བསྒྲུབ་པར་བྱེད་དོ། །ཤེས་རབ་མའི་རྒྱུད་ལས་ནི་བསྐྱེད་རིམ་གྱི་སྤྲོས་པ་གཙོ་བོར་མི་འདོན་པར་ཁམས་བདེ་བ་ཆེན་པོ་བྷ་གའི་དཀྱིལ་འཁོར་ལས་རང་ལུས་ཐབས་ལྡན་ལ་སྔོན་དུ་གོམས་ནས་གཞན་ལུས་ཕྱག་རྒྱ་ཆེན་པོ་ལས་དགའ་བ་བཞིའི་ཡེ་ཤེས་བདེ་བ་ཆེན་པོས་བྱང་ཆུབ་བསྒྲུབ་པར་བྱེད་དོ། །གཉིས་སུ་མེད་པའི་རྒྱུད་སྡེ་ཤིན་ཏུ་རྣལ་འབྱོར་ལས་ནི་གཅིག་དང་དུ་བྲལ་གྱི་ཆོས་ཉིད་འོད་གསལ་ལྷུན་གྲུབ་ཆེན་པོའི་ཡེ་ཤེས་གཙོ་བོར་བྱེད་པས་ཕུང་པོའི་སྙིགས་མ་དྭངས་མའི་འཇའ་འོད་དུ་དྭངས་པར་བྱེད་དོ། །དེ་དག་གི་རང་བཞིན་རྒྱས་པ་ནི་འོག་ནས་སྟོན་པར་འགྱུར་རོ། །ཀུན་གྱི་གནད་དུ་ཁམས་དྲུག་ལྡན་པའི་ལུས། །ཕུང་པོ་ཁམས་དང་སྐྱེ་མཆེད་རྩ་ཐིག་རླུང་། །ལས་སུ་རུང་ལས་བསྐྱེད་རྫོགས་ཟུང་འཇུག་གསུམ། །ཡོན་ཏན་ཀུན་སྐྱེད་རྡོ་རྗེ་ཐེག་པའི་ལམ། །དེ་ལ་སེམས་ཅན་ཐམས་ཅད་ནི་བདེ་བར་གཤེགས་པའི་སྙིང་པོ་ཅན་དྲི་མ་དགུའི་སྡུབས་ན་གནས་པ་ཉིད་འཁོར་འདས་ཐམས་ཅད་ཀྱི་རྒྱུ་གྱུར་པ་ཡིན་པས། དེ་ཉིད་རྡོ་རྗེ་ཐེག་པའི་ཉེ་ལམ་ཟབ་མོས་སྤྱད་པ་
བྱས་བས་ཚེ་གཅིག་ལ་སོགས་པར་མྱ་ངན་འདའ་བའི་ཚུལ་སློབ་དཔོན་འཕགས་པས། གང་ཞིག་འཁོར་བའི་རྒྱུར་གྱུར་པ། །དེ་ཉིད་སྦྱང་བ་བྱས་པ་ལས། །དག་པ་དེ་ཉིད་མྱ་ངན་འདས། །ཞེས་པ་ལྟར་འདའ་བའི་རྟེན་རྡོ་རྗེའི་ཐེག་པ་ཟབ་མོའི་སྣོད་དུ་གྱུར་པ་ནི་ཁམས་དྲུག་དང་ལྡན་པའི་རྡོ་རྗེའི་ལུས་ཁོ་ན་ལས་གཞན་དུ་མ་ཡིན་ལ། དམ་པ་དང་པོའི་རྒྱུད་ལས། །ཐིག་ལེ་ཟླ་བ་ཞུ་བ་སྐུ། །རྣམ་པར་བཅད་པ་ཉ་རྡུལ་གསུངས། །ཨ་ཡིག་མུན་ཅན་ཐུགས་རབ་བརྗོད། །མཁའ་ཁམས་ཨེ་ལ་རྣམ་པར་གནས། །ཞེས་རྣམ་པར་ཤེས་པ་དང་བཅས་པའི་ཁམས་སམ་དྲི་བཅས་དེ་བཞིན་ཉིད་ལ་སྟོང་པ་ཆེན་པོའམ་མུན་ཅན་དང་ཉེ་བར་ཐོབ་པ་ཞེས་བྱ་ལ། རང་གི་ངོ་བོ་ཉིད་ཕྱོགས་ཐམས་ཅད་དང་བྲལ་བའི་ཆ་ནས་རང་བཞིན་མེད་པ་ནི་ཐམས་ཅད་སྟོང་པའམ་འོད་གསལ་ལྷན་ཅིག་སྐྱེས་པའི་ཡེ་ཤེས་ཡིན་ནོ། །དེ་ལ་ཤིན་ཏུ་སྟོང་བའམ། །མཆེད་པ་སྟེ་དམར་ཆ་རྡུལ། སྟོང་པའམ་སྣང་བ་དཀར་ཆ་སྙིང་སྟོབས་ཐབས་ཤེས་སུ་བཞག་པ་གཉིས་གྱིས། །དེ་གཉིས་ལ་རྩ་བའི་སྟོང་ཆེན་ནམ་མུན་ཅན་ལྡན་པས་ལུས་ངག་ཡིད་གསུམ་དང་མུན་ཅན་ལ་སྒྲ་གཅན་དང་། དུས་མེར་ཕྱེ་བའི་དུས་མེ་ཡེ་ཤེས་སོ། །དེ་དག་གཞི་ལུས་ཀྱི་དུས་ན་འབྱུང་བ་དང་རྒྱུར་བྱས་པའི་ཁམས་ལྔ། དེའི་སྟེང་དུ་ཡེ་ཤེས་བསྣན་པས་དྲུག་ཏུ་འགྱུར་བའི་རྡོ་རྗེའི་ལུས་གང་ཡིན་པའི་རྟེན་ཁྱད་པར་ཅན་ལ་གནད་དུ་བསྣུན་པས་ལམ་གྱི་ཡོན་ཏན་མཐའ་དག་ཐོབ་ཅིང་རྩ་དག་པའི་འབྲས་བུར་སྐུ་མཚན་དང་དཔེ་བྱད་ཀྱིས་བརྒྱན་པ། རླུང་དག་པས་གསུང་དབྱངས་ཡན་ལག་དྲུག་ཅུ་དང་ལྡན་པ། ཐིག་ལེ་དག་པས་ཐུགས་ཇི་ལྟ་བ་དང་ཇི་སྙེད་པ་མཁྱེན་པ་འགྲུབ་པ་ཡིན་ནོ། །དེ་ལྟར་ཤེས་ནས་ལམ་ལ་ཇི་ལྟར་དཀྲི་བའི་ཚུལ་ནི། རང་བཞིན་ལྷུན་གྲུབ་དཀྱིལ་འཁོར་ཆེན་པོ་རུ། །ལྟ་བས་ཐག་གཅད་བསྒོམས་པས་ཉམས་སུ་བླང་། །སྤྱོད་
པས་ལ་དོང་འབྲས་བུས་དོན་གཉིས་བསྒྲུབ། །གཞི་ལམ་འབྲས་བུའི་རྒྱུད་ལ་ཡང་དག་བསྟེན། །འདི་ལྟར་རྡོ་རྗེ་ཐེག་པའི་ཉེ་ལམ་ཟབ་མོའི་གནས་སྐབས་ན་ཆོས་ཐམས་ཅད་དབྱིངས་ནས་སངས་རྒྱས་པའི་རང་བཞིན་ལྟ་བས་གཏན་ལ་འབེབས་པས་བདེན་པ་དབྱེར་མེད་གཞི་ལྷུན་གྲུབ་ཀྱི་དཀྱིལ་འཁོར་རང་བཞིན་ཡོངས་གྲུབ་ཏུ་ལྡན་པའི་ངང་དུ་དངོས་སྟོབས་ཀྱི་རིགས་པ་མི་འཇུག་པས་སྒྲ་རྟོག་དང་ཞེན་ཡུལ་གྱིས་གཞལ་བའི་གྲུབ་མཐའི་གཏན་ཚིགས་འཆའ་བ་དང་། བདེན་གཉིས་ཀྱིས་རྗེས་སུ་དཔགས་པ་རྣམ་གྲངས་པའི་དོན་དམ་ཙམ་མ་ཡིན་པར་མོས་གུས་ཀྱིས་ཕ་ཕོགས་ཐོབ་པའི་གནས་ལུགས་ཕྱག་རྒྱ་ཆེན་པོའམ། དབང་ལས་བྱུང་བའི་དཔེའི་ཡེ་ཤེས་སམ་པ་སྐྱེད་རྫོགས་ཟབ་མོའི་ཐབས་ཤེས་རྟེན་འབྲེལ་གྱི་འདུ་འཕྲོད་ལ་བརྟེན་ནས་འཇིག་རྟེན་ལས་འདས་པ་འཕགས་པའི་རྒྱུད་ཀྱི་རང་བྱུང་གི་ཡེ་ཤེས་ཟག་པ་མེད་པའི་ཆོས་ཉིད་མངོན་སུམ་པར་ཉམས་སུ་མྱོང་བའི་ལྟ་བ་ལ་གྲུབ་མཐས་གཞལ་བའི་མཐོ་དམན་གྱི་ཆོས་སྒྲོ་བཏགས་པ་ཙམ་ཡང་མ་གྲུབ་སྟེ་སྒྱུ་འཕྲུལ་རྒྱས་པ་ལས། །ཐབས་ཀྱི་ཐེག་པ་ཆེན་པོར་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུའང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་སོ། །དེ་ལྟ་བུའི་དང་ལས་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་གདན་གསུམ་ཚང་བའི་དཀྱིལ་འཁོར་ཆེན་པོར་ཡེ་ནས་གནས་པར་གསལ་འདེབས་ཤིང་བསྒོམ་པ་ནི་སྡོམ་བྱུང་ལས། །ཁམས་གསུམ་གཞལ་ཡས་ཁང་བདག་ཉིད། །སྲོག་ཆགས་རྣམས་ནི་དཀྱིལ་འཁོར་པ། །དེ་དབུས་སྐད་ཅིག་རྣམ་པ་ཡི། །དཀྱིལ་འཁོར་བདག་པོ་རྣལ་འབྱོར་པའོ། །ཞེས་པ་ལྟར་ཕྱི་དོན་དུ་འཛིན་པའི་སྣང་
བ་སངས་རྒྱས་ཀྱི་ཞིང་ཁམས་ཞི་བ་དང་ཁྲོ་བོའི་དཀྱིལ་འཁོར་གྱི་བཀོད་པ་སྒོ་རྒྱན་རྟ་བབས་ལ་སོགས་པ་ཡོངས་སུ་རྫོགས་པ་དང་། ནང་ཕུང་པོ་ལྔ་དང་འབྱུང་བ་ལྔ་དེ་བཞིན་གཤེགས་པ་རྣམ་པར་ཤེས་པའི་རྒྱལ་པོ་ལ་སོགས་པ་སྟང་དཔྱལ་ལྔའི་ངོ་བོ་ལ་དབང་ཡུལ་དང་རྣམ་པར་རྟོག་པའི་ཚོགས་བྱང་ཆུབ་སེམས་དཔའ་རྣམས་དང་སྒོ་བ་ཡབ་ཡུམ་ལ་སོགས་པར་བསྒོམས་པས་གཟུགས་ཐམས་ཅད་སྣང་སྟོང་། སྒྲ་ཐམས་ཅད་གྲག་སྟོང་། དྲན་རྟོག་ཐམས་ཅད་རིག་སྟོང་སྒྱུ་མའི་རང་བཞིན་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་དཀྱིལ་འཁོར་དུ་བསྒོམ་པ་དེ་ཡང་སྣང་བའི་ཆ་ནས་བསྐྱེད་པ་སྟེ། བརྟག་གཉིས་ལས། བཞིན་ལག་ཁ་དོག་རྣམ་པ་ནི། །བསྐྱེད་པ་ཙམ་གྱིས་རྣམ་པར་གནས། །ཞེས་སོ། །དེ་ཡང་རང་བཞིན་མེད་པའི་ཏིང་ངེ་འཛིན་གྱི་ལྷུམས་སུ་ཞུགས་པའི་ཆ་ནས་རྫོགས་པར་ལྷུན་གྱིས་གྲུབ་པའི་བསྐྱེད་རྫོགས་ཟུང་འཇུག་གི་བདེན་པ་དབྱེར་མེད་ཆེན་པོར་ཉམས་སུ་བླངས་ལ་དེའི་ཚེ་སྤང་བྱ་སྤོང་བྱེད་ལ་ལྟོས་ནས་ཉན་རང་རྣམས་གཉེན་པོས་སྤོང་། བྱང་ཆུབ་སེམས་དཔས་ལམ་དུ་བསྒྱུར་ནས་ཉེས་པས་མ་གོས་པར་བྱེད་པ་དེ་སྔགས་ཀྱི་སྐབས་འདིར་རང་བཞིན་ཡོངས་ཤེས་ཀྱི་སྤོང་ལེན་མེད་པར་ལམ་དུ་བྱེད་པ་ཡིན་པས་ཕྱི་ནང་གི་སྣང་བ་དང་། བློའི་འགྲོ་ལྡོག་བཟང་ངན་ལ་ཐ་མལ་གྱི་སྣང་བས་མི་དཔྱད་ཅིང་། འདོད་ཡོན་རང་དགར་ཞེན་པའི་དུག་ལྔ་རང་རྒྱུད་དུ་ཤོར་བ་མ་ཡིན་པར་ཐབས་ཀྱིས་ཟིན་པའི་མཉམ་རྫོགས་ཆེན་པོའི་རོལ་པར་འཆར་བའི་སྤྱོད་པ་ལ་དོར་ན་རང་གཞན་གྱི་དོན་གཉིས་ལྷུན་གྱིས་གྲུབ་པའི་འབྲས་བུ་ཐོབ་པར་འགྱུར་བའི་ཚུལ་གསང་བ་གྲུབ་པ་ལས། །ཐ་མལ་པ་ཡི་ལུས་སྤངས་ནས། །ལྷ་རྫས་ང་རྒྱལ་ལྡན་ཡིད་ཀྱིས། །ཏིང་འཛིན་མཆོག་ལ་རྣམ་གནས་ན། །དེ་ནི་འགྲུབ་འགྱུར་ཐེ་ཚོམ་
མེད། །ཅེས་སོ། །ཇི་ལྟར་འགྲུབ་ན། རྡོ་རྗེ་ཐེག་པའི་སྒོར་སྔགས་ཀྱི་སྤྱད་པ་སྤྱོད་པའི་བྱང་ཆུབ་སེམས་དཔའ་རྣམས་ཀྱི་དོན་དུ་གཉེར་བྱ་ནི་གཞན་དོན་ཕུན་སུམ་ཚོགས་པ་ཁོ་ན་ཡིན་ན། དེའི་རྟེན་ནི་རང་དོན་མངོན་དུ་གྲུབ་པ་ལ་རག་ལས་ཤིང་། དེ་མངོན་དུ་བྱེད་པའང་ཉེར་ལེན་གྱི་རྒྱུ་དང་། ལྷན་ཅིག་བྱེད་པའི་རྐྱེན་ཚང་བ་ལ་རག་ལུས་པས། སྔ་མ་ལ་བལྟོས་ནས་གཞིའམ་རྒྱུའི་རྒྱུད་དུ་བཞག་ཅིང་། ཕྱི་མ་ལ་བལྟོས་ནས་ཐབས་སམ་ལམ་གྱི་རྒྱུད་དང་། གཉིས་ཀ་ལ་བལྟོས་ནས་དོན་གཉིས་མཐར་ཕྱིན་པ་ནི་འབྲས་བུའི་རྒྱུད་དེ། སྙིང་པོའི་རྒྱུད་ཕྱི་མ་ལས། རྒྱུད་ནི་རྒྱུན་ཆགས་ལ་བཤད་དེ། ཐབས་དང་རྒྱུ་ལས་འབྲས་བུའོ། །ཞེས་སོ། །དེའང་རྒྱུའམ་གཞིའི་རྒྱུད་ནི་སྦྱང་གཞི་འཁོར་བའི་རང་བཞིན་ཀུན་གཞི་ཚོགས་བདུན་དང་བཅས་པའི་སྦུབས་ན་བདེ་བར་གཤེགས་པའི་སྙིང་པོ་བྱང་ཆུབ་ཀྱི་སེམས་ཀུན་ཏུ་བཟང་པོ་མི་ཤིགས་པ་ཁྱད་པར་གསུམ་ལྡན་འགྲོ་བའི་རྒྱུད་ལ་རྒྱུན་ཆགས་སུ་ཡོད་པ་ཉི་མ་སྤྲིན་གྱིས་བསྒྲིབས་པ་ལྟ་བུ་སྟེ་རྩེ་མོ་ལས། རྒྱུད་ནི་རྒྱུན་ཆགས་ཞེས་བྱ་སྟེ། །འཁོར་བརྒྱུད་དུ་འདོད་པ་ཡིན། །ཞེས་སོ། །ཁ་ཅིག་མེད་བཞིན་སྣང་བ་ཐག་ཁྲ་ལ་སྤྲུལ་ལྟ་བུ་རྒྱུད་དུ་འགལ་ལོ་ཞེས་སྨྲ་བའང་རིགས་པ་མ་ཡིན་ཏེ། རྣམ་རྟོག་དང་བདག་ཏུ་བལྟ་བའི་ཉེར་ལེན་ལས་འཁོར་བའི་རང་བཞིན་གློ་བུར་དུ་སྲིད་པ་སྟེ་གུ་ཧྱ་གརྦྷ་ལས། ཨེ་མ་ཧོ། བདེ་གཤེགས་སྙིང་པོ་ལས། །རང་རང་རྣམ་རྟོག་ལས་ཀྱི་སྤྲུལ། །ཞེས་པས་སོ། །ཐབས་སམ་ལམ་གྱི་རྒྱུད་ནི། སྦྱང་གཞི་དེ་ཉིད་ཀྱི་དྲི་མ་གློ་བུར་བ་བར་མ་ཆད་པའི་ཐབས་ཀྱིས་སྦྱངས་ནས་རང་གི་རང་བཞིན་ཅི་ཡིན་པ་མངོན་དུ་བྱེད་པ་སྟེ་ས་བོན་དྲེད་གཤེར་དང་ཕྲད་ནས་མེ་ཏོག་གི་བར་དུ་འཕེལ་བ་ལྟ་བུ་སྟེ། ཧེ་བཛྲ་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་
མས་བསྒྲིབས། །དེ་བསལ་ནས་ནི་སངས་རྒྱས་ཉིད། །ཅེས་སོ། །དེའང་ལམ་དུ་ཞུགས་བྱ་ནི་ཐབས་ཀྱི་རྒྱུད་ཡིན་ཏེ། ཐབས་དང་འཕྲད་ན་དེས་དྲི་མ་བསལ་ནས་སངས་རྒྱས་སུ་འགྱུར་ལམ་འཕྲད་ན་མི་འགྱུར་བའི་ཕྱིར་རོ། །དེ་ཡང་ལམ་སོ་སོའི་ཡོན་ཏན་མངོན་དུ་གྱུར་པའི་ཆ་ནས་གླང་པོ་རབ་འབོགས་ལས། སེམས་ལྔ་སྐྱེས་པའི་སྐྱེས་བུའི་ཐུགས། །ལམ་གྱི་ངོ་བོ་རྒྱུད་ཡིན་ནོ། །ཞེས་སོ། །འབྲས་བུའི་རྒྱུད་ནི། སྦྱང་གཞི་དེ་ཉིད་སྦྱོང་བྱེད་ཀྱི་ཐབས་ཟབ་མོས་ལེགས་པར་སྦྱངས་པས་བསྒྲིབ་བྱེད་དང་བྲལ་ཏེ་གློ་བུར་གྱི་རྐྱེན་གྱིས་མི་འཕྲོགས་པའི་འབྲས་བུ་མངོན་དུ་གྱུར་པ་སྟེ། འདུས་པའི་རྒྱུད་ཕྱི་མ་ལས་ཀྱང་། །གཞི་དང་དེ་ཡི་རང་བཞིན་དང་། །མི་འཕྲོགས་པ་ཡི་རབ་དབྱེ་བས། །རང་བཞིན་རྣམ་པ་རྒྱུ་ཡིན་ཏེ། །གཞི་ནི་ཐབས་ཞེས་བྱ་བ་ཡིན། །དེ་བཞིན་མི་འཕྲོགས་འབྲས་བུ་སྟེ། །གསུམ་གྱིས་རྒྱུད་དོན་བསྡུས་པའོ། །ཞེས་སོ། །དེ་ཡང་འཁོར་བའི་ཕ་རོལ་ཏུ་འགྲོ་བའི་འཕགས་ལམ་ཁྱད་པར་ཅན་ཡིན་ཅིང་། དེའི་ཕྱི་མ་ནི་ས་མཐར་ཕྱིན་པའི་འབྲས་བུ་བླ་ན་མེད་པ་ཡིན་པ་ནི། དཔལ་མཆོག་ལས། །རྒྱུད་ནི་རྒྱུན་ཞེས་བྱ་བར་བཤད། །ཕྱི་མ་ཉིད་ནི་ཐོག་མར་བརྗོད། དེ་ཕྱིར་གསང་བ་གསང་ཆེན་ནི། །ཕྱི་མའི་རྒྱུད་ནི་ཡིན་པར་འདོད། །ཅེས་སོ། །དེའི་ཕྱིར་བསྐྱེད་རྫོགས་གཉིས་ཀའི་སྔོན་དུ་འགྲོ་བ་ནི་བྱང་ཆུབ་ཀྱི་སེམས་དང་། སྟོང་པ་ཉིད་ཀྱི་ལྟ་བ་གཏན་ལ་འབེབས་པ་གཉིས་ཡིན་པས་གཞི་རྒྱུད་བདེ་བར་གཤེགས་པའི་སྙིང་པོ་ཅན་གྱི་གནས་ལུགས་ལེགས་པར་ཤེས་པ་ཉིད་གཅེས་པ་ནི་སྔགས་རང་སའི་གྲུབ་མཐའ་ཡིན་ལ། དེ་ཡང་མ་ན་ནི་སྒྲའི་བྱིངས་ལས། །མན་ཤེས་པ་ལའོ། །ཞེས་འདོན་པས། དེ་ཁོ་ན་ཉིད་ཤེས་པའི་ཤེས་རབ་ཡིན་ལ། ཏྲཱ་ཡ་ནི་འཇིག་རྟེན་སྐྱོབ་པའམ། སྐྱོབ་པ་ནི་སྙིང་རྗེ་ཆེན་
པོ་སྟེ། དེ་གཉིས་དབྱེར་མི་ཕྱེད་པ་གསང་སྔགས་སོ། །དེས་ལུས་ངག་ཡིད་གསུམ་སྐྱོབ་པར་བྱེད་དེ། དུས་འཁོར་རྩ་རྒྱུད་ལས། ལུས་ངག་སེམས་ཀྱི་ཁམས་རྣམས་ནི། །གསང་ཕྱིར་སྐྱོབ་པར་འགྱུར་དེའི་ཕྱིར། །སྔགས་དོན་སྔགས་ཀྱི་སྒྲ་ཡིས་ནི། །སྟོང་ཉིད་ཡེ་ཤེས་འགྱུར་མེད་སྟེ། །བསོད་ནམས་ཡེ་ཤེས་ལས་བྱུང་སྔགས། །སྟོང་ཉིད་སྙིང་རྗེའི་བདག་ཉིད་ཅན། །ཞེས་སོ་དེ་ལ་བླ་མེད་ཀྱི་ཐེག་པའི་གདུལ་བྱ་ནི་དབང་པོ་ཤིན་ཏུ་རྣོན་པོའི་དབང་དུ་བྱས་ནས་གཞིའམ། རྒྱུ་རྒྱུད་བདེ་གཤེགས་སྙིང་པོའི་རང་བཞིན་ཅན་དེ་ཉིད་རྣམ་པར་ཤེས་པའི་ཚོགས་བརྒྱད་ལས་འདས་པའི་འདུས་མ་བྱས་བདེན་གཉིས་དབྱེར་མེད་ཀྱི་རང་བཞིན་དུ་གཏན་ལ་འབེབས་ཤིང་། དེ་ཡང་དབུ་མ་པ་ཁ་ཅིག་ལྟར་དོན་དམ་འཕགས་པའི་མཉམ་གཞག་དང་། ཀུན་རྫོབ་འཇིག་རྟེན་པའི་རྗེས་སུ་འབྲང་ཟེར་ནས་དོན་ལ་མེད་ལ། ཐ་སྙད་དུ་ཡོད་པ་ངོ་བོ་རྫས་འགལ་ཞིང་སོམ་ཟིན་པའི་ལྟ་བ་ལ་བློ་གདེང་འཆའ་བ་ནི་སྨོན་པ་ཙམ་ཡིན་པས་དེས་ཆོས་ཀྱི་དབྱིངས་རྣམ་པར་དག་པའི་དོན་མི་ཤེས་སོ། །དེ་སྐད་དུ་རྒྱུད་ལས། ཐུབ་པ་ཆེན་པོའི་ཆོས་རྣམས་ཀྱི། ཕུང་པོ་བརྒྱད་ཁྲི་བཞི་སྟོང་ལ། །གང་གི་དེ་ཉིད་མི་ཤེས་པ། །དེ་ཡི་ཐམས་ཅད་འབྲས་བུ་མེད། ཅེས་པས་འཕགས་པའི་རྟོགས་པ་སྔགས་ལ་མ་བརྟེན་པར་སྒྲ་ཇི་བཞིན་དུ་རྟོགས་པར་མི་ནུས་ལ། དེའི་འགྱུར་འགའ་ཞིག་ལ་ལུས་ཀྱི་དེ་ཉིད་མི་ཤེས་པ། ཞེས་པས་ཀྱང་ལུང་དོན་གཞན་དུ་མི་འགྲོ་སྟེ། འདི་ལྟར་ལུས་ལ་གནས་པའི་གཉུག་མ་བྱང་ཆུབ་ཀྱི་སེམས་རང་བཞིན་ཀུན་ཏུ་བཟང་པོའི་དེ་ཉིད་མི་ཤེས་པའི་ཕྱིར་རོ། །དེ་བས་ན། དེ་དག་ཀུན་གྱི་གསང་སྔགས་ཀྱི། ཆོ་ག་བཟང་པོ་འདི་མཁྱེན་ནས། ཞེས་སོགས་བཤད་དོ། །དེ་ལྟ་མོད་ཀྱི་འདུལ་བྱེད་ཀྱི་ཆོས་དབང་པོ་རྣོན་པོ་ལ་དགོངས་
ཀྱང་། གདུལ་བྱའི་ཁམས་དེ་དང་འབྲེལ་བ་ཤ་སྟག་གིས་མ་ཁྱབ་པའི་ཕྱིར་སྤྱི་མཚན་དུ་བདེན་པ་གཉིས་ཀྱི་རྗེས་སུ་ཕྱོགས་པ་ཡང་འདོར་བ་མ་ཡིན་ཏེ། གློ་བུར་གྱི་དྲི་མས་བསྐྱེད་པའི་འཁྲུལ་པའི་ཆོས་ལས་ཉོན་སྡུག་བསྔལ་གྱི་རྣམ་པར་ཤར་བའི་རིགས་རྒྱུན་དེ་ཉིད་ལམ་བདེ་བ་ཆེན་པོར་བསྒྱུར་བའི་ཐབས་སུ། འདི་ལྟར་སེམས་རྩེ་གཅིག་པའི་ཏིང་ངེ་འཛིན་ལས་སེམས་ཤིན་ཏུ་སྦྱངས་པ་སྐྱེ་ཤིང་། དེས་རླུང་རྣམས་ལས་སུ་རུང་ནས་ནང་དུ་ཕན་འདོགས་པའི་རྣམ་པ་ཅན་གྱི་ལུས་ཤིན་དུ་སྦྱངས་པ་སྐྱེ་ལ། དེ་ལ་བརྟེན་ནས་ལུས་ལ་བདེ་བ་དང་སེམས་ལ་སྟོང་པ་ཉིད་ཀྱི་ཡེ་ཤེས་སྐྱེ་བས་བདེ་སྟོང་གཉིས་སུ་མེད་པའི་ལྟ་བ་ཞེས་རྣལ་འབྱོར་སྤྱོད་པའི་ས་ལས་བཤད་དོ། །དེའང་དོན་དམ་པར་སྐྱེ་འགག་མེད་པ་དང་། ཀུན་རྫོབ་ཏུ་ཆོས་ཐམས་ཅད་སྒྱུ་མ་ལྟ་བུར་བལྟ་བ་དབུ་མ་པ་དང་ཆོས་མཚུངས་པ་ལས། སྔགས་སུ་ཀུན་རྫོབ་པའི་ཆ་དེ་ལྟའི་མཚན་ཉིད་དུ་བལྟ་བས་ཀྱང་འབྲས་བུ་ལམ་དུ་བྱེད་པའི་ཆོ་ག་ཟབ་ཅིང་ལྟ་བ་རྒྱ་ཆེ་ལ་ཚོགས་གཉིས་རྫོགས་པའི་ས་ཆོད་ལྷག་པར་དུ་ཆེ་བ་ཡིན་ཏེ་ཕུར་པ་རྣལ་འབྱོར་ཆེན་པོའི་རྒྱུད་ལས། །འོག་མས་འབྲས་བུ་ངོ་མ་ཤེས། །རྒྱུད་ལ་ཡེ་ཤེས་འདོད་པ་སྟེ། །ཚོགས་གཉིས་ལྡན་པས་བསྐལ་པ་ཡང་། །མང་བར་བགྲོད་པས་འབྲས་བུ་ཐོབ། །གང་ཞིག་རྒྱུ་ལས་ལམ་བྱས་པའོ། །གསང་སྔགས་འདི་ནི་ཐབས་ཆེན་པོ། །འབྲས་བུ་ལས་ནི་འབྲས་བུར་ངེས། །གང་ཡང་འབྲས་བུར་ངེས་པ་སྟེ། །ལྷ་ལས་ལྷ་ཡི་འབྲས་བུ་དང་། །ལྷ་ལས་ལྷ་ཡི་ལྟ་བ་སྟེ། །གང་ཞིག་འབྲས་བུ་ལམ་བྱས་པས། །ཚེ་གཅིག་དག་ལས་སངས་རྒྱས་འགྲུབ། །ཅེས་སོ། །དེ་ལྟར་གཞི་དང་། ལམ་དང་། འབྲས་བུའི་རྒྱུད་གསུམ་གྱི་དོན་ནི་གསང་སྔགས་རྡོ་རྗེ་ཐེག་པའི་ལམ་གྱི་བརྗོད་བྱའི་རྩ་བ་ཡིན་ལ། འདི་ཉིད་
ལེགས་པར་ཁོང་དུ་ཆུད་ན་འབྲས་བུ་ལམ་དུ་བྱེད་པའི་ཁྱད་པར་ལའང་མི་རྨོངས་ཤིང་། དེ་ལས་རྗོད་བྱེད་སྒྲའི་རྒྱུད་ཀྱི་དབྱེ་བ་དང་། བསྡུ་བ་དང་། གཞུང་ཚད་དང་། བྱུང་ཚུལ་ལ་སོགས་པ་རྣམ་པར་དབྱེ་ཞིང་། མཐའ་དྲུག་དང་བཅས་པའི་འཆད་ཐབས་ཀྱི་མན་ངག་རྒྱན་བདུན་ལ་སོགས་པས་སོ་སོའི་གཞུང་བཤད་པར་བྱ་བ་ཡིན་ནོ། །བཤད་པའི་རྒྱུད་ཀྱི་ཁྱད་པར་ནི་མི་གསལ་བ་གསལ་བར་བྱེད་པ། མཚང་བ་ཁ་སྐོང་བ། འཁྲུགས་པ་གོ་རིམ་སྡེབ་པ། རྒྱས་བསྡུས་སྟོན་པ། བཤད་ཐབས་ཀྱི་མན་ངག་སྟོན་པ་སྟེ་མཚན་ཉིད་ལྔ་དང་ལྡན་པ། བསྡུ་ན་རྒྱུད་ཐམས་ཅད་རྩ་བ་དང་ཡན་ལག་གཉིས་སམ། རྩ་བཤད་གཉིས་སམ། རྒྱས་བསྡུས་གཉིས་སུ་འདུ་བ་ཡིན་ནོ། །དེ་ལྟར་ཀུན་གཞི་རྒྱུ་རྒྱུད་ལ་ལྟ་བ་འཁོར་འདས་རྒྱ་གྲོལ་དུ་གཏན་ལ་དབབ་པའི་ཚུལ་བསྟན་ནས། ལམ་ཐབས་ཀྱི་རྒྱུད་ལ་དབང་བཞི་དང་རྗེས་སུ་འབྲེལ་བར་བསྐྱེད་རྫོགས་ཡན་ལག་དང་བཅས་ལ་བསླབ་པའི་ཚུལ། འཇུག་པའི་སྒོ་ནི་སྨིན་པར་བྱེད་པའི་དབང་། །གྲོལ་བར་བྱེད་པ་བསྐྱེད་རྫོགས་རྣམ་པ་གཉིས། །མཐུན་པའི་གྲོགས་སུ་དམ་ཚིག་སྤྱོད་པ་གསུམ། །སྔགས་ཀྱི་ལམ་མཆོད་རྣལ་མར་ངེས་པ་ལས། །ཞེས་རྡོ་རྗེ་ཐེག་པའི་ལམ་གྱི་ལུས་ཡོངས་སུ་རྫོགས་པ་ནི་མ་སྨིན་པ་སྨིན་པར་བྱེད་པ་དབང་དང་། སྨིན་པ་གྲོལ་བར་བྱེད་པ་བསྐྱེད་རྫོགས་དང་། གཉིས་ཀའི་གྲོགས་སུ་གྱུར་པ་དམ་ཚིག་དག་པར་བྱེད་པའི་ཕྱིར་ཐོས་བསམ་གྱི་ཤེས་རབ་དང་འབྲེལ་བར་ཐབས་ཀྱི་རྒྱུད་ལེགས་པར་མཉན་ནས་རིམ་གཉིས་ལ་བརྟེན་ཏེ་གློ་བུར་གྱི་མཚན་རྟོག་སྤོང་ཞིང་འབྲས་བུའི་རྒྱུད་མངོན་དུ་བྱ་བ་སྟེ། རྒྱན་བདུན་དགྲོལ་བ་ལས། དེ་ནས་རིམ་པར་དབང་བླངས་
ཏེ། །ཐབས་ཀྱི་རྒྱུད་ལ་འཇུག་པར་བྱ། །ཞེས་སོ། །དེ་ལ་དང་པོ་དབང་མ་ཐོབ་པའི་ཉེས་དམིགས་དང་། ཐོབ་པའི་ཕན་ཡོན་བཤད་པའི་ཕྱིར། དང་པོ་དབང་བསྐུར་མ་ཐོབ་དངོས་གྲུབ་མེད། །བྱེ་མ་བཙིར་ལས་ཞུན་མར་འདོད་པ་བཞིན། །འཆང་ཉན་བསྒོམ་ལ་བརྩོན་ཀྱང་དམྱལ་བར་འགྲོ། །དབང་ཐོབ་སྐྱེས་བུ་རྒྱལ་བའི་སྲས་སུ་འགྱུར། །དཀྱིལ་འཁོར་མཐོང་བས་སྡིག་ལས་རྣམ་པར་གྲོལ། །གཙང་མའི་རིགས་སྐྱེ་སྐྱེ་བ་བདུན་དག་ན། །ངེས་པར་འགྲུབ་ཅིང་ས་བཅུ་འཐོབ་པར་བཤད། །དེ་ལ་བདག་ཅག་གི་སྟོན་པས་ཆགས་བྲལ་གྱི་ཐེག་པ་ནས་འདོད་པའི་ཁམས་སུ་གཞོན་ནུ་དོན་གྲུབ་ཀྱི་རྟེན་ལ་འཚང་རྒྱ་བའི་ཚུལ་བཞིས་མཚོན་ནས། རྡོ་རྗེ་ཐེག་པའི་ལམ་ཆགས་ཅན་གྱི་ཐེག་པས་ཚེ་གཅིག་ལ་འཚང་རྒྱ་པའི་ཚུལ་ཡང་སྔ་མའི་བཞི་པོ་དང་ཆོས་མཚུངས་པས་སངས་རྒྱས་ཀྱི་མཛད་པ་བསྒྲུབ་པའི་ཚུལ་འདི་ལྟར་གཞོན་ནུ་དོན་གྲུབ་འགྲོ་བའི་གཙོ་བོ་མིའི་རྒྱུད་དུ་སྲིད་པ་བཟུང་བ་བཞིན་དུ་སྔགས་ཀྱི་སྒོར་སྤྱད་པ་སྤྱོད་པའི་བྱང་ཆུབ་སེམས་དཔའ་རྣམས་ཀྱི་རྣམ་སྨིན་གྱི་ལུས་ཐ་མལ་གྱི་སྣང་ཞེན་ལས་འདས་པ་དེ་བཞིན་གཤེགས་པ་རིགས་ལྔའམ། དེ་དང་དེའི་རིགས་ཀྱིས་བསྡུས་པའི་ལྷའི་ང་རྒྱལ་དུ་འཕོས་པའི་བསྐྱེད་རིམ་གྱིས་རང་ཉིད་ལྷའི་རྒྱུད་དུ་བསྒྲུབ་པ་དང་། གཞོན་ནུ་རོལ་རྩེད་ཀྱི་དུས་ན་རྟགས་དང་ཆ་ལུགས་མ་ངེས་པ་ཉིད་དེ། ཁབ་ནས་མངོན་པར་བྱུང་བ་ནས་བཟུང་རབ་ཏུ་བྱུང་བའི་རྟགས་དང་ཆ་ལུགས་རྣམ་པ་གཅིག་པ་ཅན་ལས་མི་འདའ་བ་བཞིན། སྔགས་སུ་ལྷའི་སྤྲུལ་པ་རྣམ་འགྱུར་ཆུ་ལུགས་མ་ངེས་ཤིང་། རིགས་བརྒྱ། རིགས་ལྔ། རིགས་གསུམ་ལ་སོགས་པ་ཐམས་ཅད་ཀྱང་མཐར་གསང་ཆེན་རིགས་གཅིག་ཏུ་འདུ་བ་དང་། འཁོར་བ་དང་། མྱ་ངན་ལས་འདས་
པར་སྒྲོ་བཏགས་པའི་ཆོས་སྣ་ཚོགས་པ་རྣམས་ཀྱང་བདེན་པའི་དེ་ཁོ་ན་ཉིད་གཅིག་ཏུ་རོ་གཅིག་པའི་འོད་གསལ་ལྷན་ཅིག་སྐྱེས་པའི་རྫོགས་རིམ་དུ་འདུ་བའོ། །དེ་ལྟ་བུའི་དེ་བཞིན་ཉིད་དང་། གསང་ཆེན་རིགས་གཅིག་ནི་བསྐྱེད་རྫོགས་ཐམས་ཅད་ཀྱི་གཞི་དང་རྩ་བ་ཡིན་པས་གླེང་གཞི་ཞེས་བཤད་དོ། །དེ་ལྟར་རབ་ཏུ་བྱུང་བའི་ཚེ་དམ་པའི་ཆོས་འདུལ་བའི་ཀུན་སྤྱོད་ལས་གཞན་དུ་གཡོས་པ་མེད་པ་བཞིན། སྔགས་སུ་རྡོ་རྗེའི་དམ་ཚིག་རྣམས་གཟུང་ནས་དབང་བསྐུར་བ་ནོད་ཅིང་མདོ་སྔགས་ཀྱི་ལམ་སྤྱི་དང་བྱེ་བྲག་པ་རྣམས་དབང་གི་ལུས་ཡོངས་སུ་རྫོགས་པའི་རུམ་དུ་གདོན་མི་ཟ་བར་ཚད་བའི་ངེས་ཚིག་བསྟན་པའོ། །དེ་བཞིན་དུ་སྲིད་པ་ཐ་མ་པའི་རྟེན་དེ་ཉིད་ལ་ཟད་པ་དང་མི་སྐྱེ་བ་ཤེས་པའི་ཡེ་ཤེས་ཀྱི་ཉེ་རྒྱུ་ལ་བརྟེན་པ་བཞིན་དུ། སྔགས་སུའང་སྒེག་སོགས་ལ་སྤྱོད་པའི་ཉེ་རྒྱུས་དབང་དང་དམ་ཚིག་དང་རིམ་གཉིས་ལ་སོགས་པའི་བོགས་དབྱུང་ནས་ཟུང་འཇུག་གི་གོ་འཕང་མངོན་དུ་བྱེད་པ་སྟེ། སྒྲོན་གསལ་ལས། མི་ཡི་སྐྱེ་བར་འཁྲུངས་བ་ནི། །རྒྱུད་ཅེས་བྱ་བ་ཡིན་པར་བརྗོད། །བཙུན་མོའི་འཁོར་གྱི་ནང་ནས་ནི། །རབ་ཏུ་བྱུང་བ་གླེང་བ་ཡིན། །འདུལ་ལས་སྡོམ་པ་བསྟན་པ་ནི། །ངེས་པའི་ཚིག་ཅེས་བྱ་བ་ཡིན། །འབྲས་བུ་འདོད་པ་ཆོས་སྤྱོད་པས། །དེ་ནི་རྒྱུ་ཞེས་བརྗོད་བྱ་སྟེ། །འདི་ནི་འདོད་ཆགས་བྲལ་ཆོས་ཀྱི། །ཚུལ་ནི་རྣམ་པ་བཞིར་འདོད་དོ། །ཅེས་དང་། །འདོད་ཆགས་ཆོས་ཀྱི་ཚུལ་གྱིས་ནི། །དོན་གསལ་རྟོགས་ཕྱིར་བཤད་པར་བྱ། །རིགས་ལྔའི་སངས་རྒྱས་བསྐྱེད་པ་ནི། །རྒྱུད་ཅེས་བྱ་བ་ཡིན་པར་འདོད། །སླར་ཡང་རིགས་གཅིག་གྱུར་པ་ནི། །གླེང་བཞི་ཡིན་པར་རབ་ཏུ་བསྟན། །རྡོ་རྗེ་ལ་སོགས་གཟུང་བ་ཉིད། །ངེས་པའི་
ཚིག་ནི་ཡིན་པར་བཤད། །སྒེག་པ་ལ་སོགས་སྤྱོད་པ་ནི། །རྒྱུ་ཞེས་བྱ་བ་ཡིན་པར་བཤད། །ཅེས་སོ། །དེའི་ཕྱིར་བཞི་པོ་དེ་དག་ལས་ཀྱང་རྡོ་རྗེ་ཐེག་པའི་ལམ་གྱི་ལུས་ཡོངས་སུ་སྡུད་པའི་སྤྱི་ཆིངས་ནི་དབང་བསྐུར་བ་ཁོ་ན་ཡིན་པས་རྒྱུད་དོན་ཤེས་པའི་ཕྱིར་དུ་ཉན་པ་དང་། ཤེས་ནས་བསྐྱེད་རྫོགས་བསྒོམ་པ་ཐམས་ཅད་ཀྱི་སྔོན་དུ་འགྲོ་བ་དབང་དང་དམ་ཚིག་ལ་མ་བརྟེན་ན་མི་འགྲུབ་པའི་ཚུལ་དཔལ་གསང་བ་སྙིང་པོ་ལས། །སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་ན། །ཉན་པ་ལ་སོགས་བརྩམ་པ་ནི། །འབྲས་བུ་མེད་ཅིང་བརླག་པར་འགྱུར། །ཞེས་དང་། ཨ་ཏི་ཡོ་ག་ལས། གསང་སྔགས་དབང་ལ་མ་བརྟེན་ག་ལ་འགྲུབ། །དཔེར་ན་མཉན་པ་ལག་སྐྱ་བྲལ་བ་བཞིན། །ཞེས་སོ། །དེ་བས་ན་རྡོ་རྗེ་ཐེག་པའི་ལམ་ལ་ཐོས་བསམ་དང་། །འཆད་ཉན་བསྒོམ་བསྒྲུབ་ཇི་ལྟ་བུ་བྱེད་ཀྱང་སྔོན་དུ་དབང་བསྐུར་བ་མ་ཐོབ་ན་རྡོ་ཐལ་ཁུ་ཚུར་གྱིས་བཙིར་ནས་ཞུན་མར་འདོད་པའམ་ས་བོན་མེད་པའི་མྱུ་གུ་རེ་བ་བཞིན་ཏེ་རྣམ་སྣང་མངོན་བྱང་ལས། དབང་མེད་པ་ལ་དངོས་གྲུབ་མེད། །བྱེ་མ་བཙིར་བས་མར་མི་འབྱུང་། །མཁའ་ལ་ཁུ་ཚུར་གྱིས་བརྡེག་དང་། །སྨིག་རྒྱུའི་ཆུ་ནི་འཐུང་དང་མཚུངས། །ཞེས་སོ། །དངོས་གྲུབ་མི་ཐོབ་པར་མ་ཟད་གསང་སྒྲོགས་ཀྱི་ཉེས་པས་སེམས་ཅན་དམྱལ་བ་ཆེན་པོར་འགྲོ་བའི་ཚུལ་དུས་འཁོར་ལས། །དབང་བསྐུར་མེད་པར་རྒྱུད་འཆད་དང་། །ཟབ་མོའི་དེ་ཉིད་བསྒོམ་བྱེད་པ། །དེ་དོན་ལེགས་པར་ཤེས་ན་ཡང་། །དམྱལ་བར་འགྱུར་གྱི་གྲོལ་བ་མེད། །ཅེས་དང་། བསྡུས་རྒྱུད་ལས། གང་ཞིག་རྒྱུད་ལུང་ང་རྒྱལ་གྱིས། །དབང་བསྐུར་མེད་པར་ཆོས་བཤད་ན། །སློབ་དཔོན་སློབ་མ་ཤི་མ་ཐག །དངོས་གྲུབ་ཐོབ་ཀྱང་དམྱལ་བར་འགྲོ། །ཞེས་སོ། །ཁྱད་པར་རྡོ་རྗེ་
ཐིག་པའི་ལམ་ལ་བསམ་གཏན་དང་ཡེ་ཤེས་དབང་ལ་བརྟེན་ནས་སྐྱེ་བའི་ཚུལ་ཡང་སངས་རྒྱས་ཐོད་པ་ལས། འདིར་ནི་དབང་དང་བྲལ་ན་ནི། །ཡེ་ཤེས་ཀུན་གྱིས་སྟོངས་པ་ཉིད། །དཔེར་ན་པི་ཝང་སྦྱོར་རྒྱུད་ཆད། །རྒྱུད་དང་བྲལ་ན་བརྡུང་མི་རུང་། །དེ་བཞིན་དབང་དང་བྲལ་ན་ནི། །སྔགས་འཆད་བསམ་གཏན་འགྲུབ་མི་འགྱུར། །ཞེས་པས་ཀྱང་མདོ་སྔགས་གཉིས་ཀྱི་ལྟ་བ་ལ་མངོན་སུམ་དང་རྗེས་དཔག་གི་ཁྱད་པར་དུ་ཁ་ཚོན་ཀྱང་ལེགས་པར་ཆོད་པ་ཡིན་ནོ། །དེ་ལྟར་དབང་བསྐུར་པའི་སྔ་རོལ་ཀྱང་དཀྱིལ་འཁོར་དུ་གཞུག་པ་ཉིད་ཡིན་ཏེ་ཞུགས་པ་ལ་ཕྱི་ཕན་པའི་དབང་ཙམ་ལས་མ་བསྐུར་ཀྱང་། དེའི་སྔོན་དུ་རྡོ་རྗེའི་རྣལ་འབྱོར་དུ་སེམས་བསྐྱེད་པ་ཡོད་པས། རྒྱལ་བ་རྣམས་ཀྱི་སྲས་སུ་དགོངས་པའི་ཚུལ་གསང་བའི་སྙིང་པོ་ལས། དབུ་རྒྱན་ཅོད་པན་ཕྲེང་བ་དང་། །གོ་ཆ་རྒྱལ་མཚན་ཕྱག་རྒྱ་དང་། །གདུགས་དང་བུམ་པ་བཟའ་བཏུང་དང་། །སྙིང་པོ་ལྔ་ཡི་དབང་བསྐུར་ན། །དུས་འདི་ཕྱིན་ཆད་རྒྱལ་བའི་སྲས། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །ཞེས་སོ། །དེའང་སྡོམ་པའི་རྟེན་དུ་མི་རུང་བས་དབང་བསྐུར་བ་དངོས་ལས་ཕྱིར་ཕྱོགས་དགོས་པའི་ཆོས་མི་ལྡན་གྱིས་གང་ཟག་ལ་ཕན་གདགས་པའི་ཕྱིར་ཡང་རྡུལ་ཚོན་གྱི་དཀྱིལ་འཁོར་དུ་འཇུག་པར་བྱ་བ་ནི་ཡོ་ག་དེ་ཉིད་འདུས་པ་ལས་བཤད་དོ། །དེའི་དགོས་པ་ནི། སྡིག་པ་བགྱིས་པར་གྱུར་པ་གང་། །དེ་ཀུན་དཀྱིལ་འཁོར་འདི་འདྲ་བ། །མཐོང་བས་བྱད་བར་འགྱུར་ལགས་ན། །ཞེས་དང་། མ་ཧཱ་མ་ཡ་ལས། མཐོང་བ་དང་ནི་བཅུག་པ་ཡི། །དེ་ཀུན་སྡིག་ལས་རྣམ་པར་གྲོལ། །ཞེས་དང་། གདན་བཞིའི་བཤད་རྒྱུད་ལས།
མཚམས་མེད་ལྔ་ཡི་ལས་ཅན་ཡང་། །ཚོན་རྩི་མཐོང་བས་གྲོལ་བར་འགྱུར། །དཀྱིལ་འཁོར་བཅུག་དང་དབང་བསྐུར་བ། །གཙང་མའི་རིགས་སུ་སྐྱེ་བར་འགྱུར། །ཞེས་དང་། གསང་མཛོད་ལས། དབང་བསྐུར་ཡང་དག་སྦྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ཡིས་སྐྱེ་བ་བདུན་ན་ནི། །མ་བསྒྲུབས་པར་ཡང་འགྲུབ་པར་འགྱུར། །ཞེས་སོ། །ས་བཅུ་ནོན་པའི་ཚུལ་ཡང་བསྒྲུབ་སྡེ་གསང་བ་འདུས་པ་ལས། །དབང་བསྐུར་པས་ནི་ས་བཅུ་ནོན། །ཞེས་སོ། །དེ་ཡང་བུམ་དབང་གི་ལས་སྒྲིབ་དང་གསང་དབང་གི་ཉོན་མོངས་པའི་སྒྲིབ་པ་སྟེ་མཐོང་སྤངས་དག་ལ། དབང་གོང་མ་གཉིས་ཀྱིས་ཤེས་བྱའི་སྒྲིབ་པ་ཕྲ་རགས་གཉིས་སུ་ཕྱེ་བའི་བསྒོམ་སྤངས་དག་པའི་ཚུལ་གྱིས་ས་བཅུ་ནོན་པ་ནི་སྤྱིར་བཏང་དང་། །དམིགས་བསལ་ནི། འདི་ལྟར་ཐེག་པ་ཆེན་པོ་སྤྱི་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་རྒྱལ་བའི་སྲས་སུ་མིང་འཐོབ་ཅིང་། བདེན་པ་མཐོང་ནས་དངོས་གཞི་འཐོབ་བོ་ཞེས་གྲགས་པ་ལྟར། འདིར་གསང་སྔགས་ཀྱི་ཚུལ་ཁྱད་པར་ཅན་ལ། །དུས་འདི་མན་ཆད་རྒྱལ་བའི་སྲས། །ཞེས་པ་ལ་སོགས་པས་བསྟན་པ་ལྟར། ནང་དབང་ཐོབ་ནས་རྒྱལ་བའི་སྲས་ཞེས་བྱ་བའི་མིང་འཐོབ་ཅིང་། དངོས་གཞི་ཐོབ་ནས་རིག་པ་འཛིན་པ་ཞེས་བྱ་བའི་ས་ཐོབ་པའི་ཚུལ་གསང་བའི་སྙིང་པོ་ལས། །ཤེས་འཇུག་མཚན་ཉིད་སྦྱོར་བའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་པས་རྒྱུ་ཤེས་པའི་མཚན་ཉིད་ནི། རྟོག་པ་རྣམ་བཞིའི་ཚུལ་རིག་པའོ། །རྐྱེན་འཇུག་པའི་མཚན་ཉིད་ནི། ཇི་ལྟར་ཤེས་པ་དེ་བཞིན་དུ་སྒོ་གསུམ་གྱི་སྤྱོད་པས་ཉམས་
སུ་བླངས་ཏེ་འཇུག་པའོ། །འབྲས་བུའི་མཚན་ཉིད་ནི་གོམས་པས་དེ་མངོན་དུ་གྱུར་པའོ། །དེའི་ཕྱིར་ཤེས་པ་དང་འཇུག་པའི་མཚན་ཉིད་གཉིས་ནི་འབྲས་བུ་ལ་སྦྱོར་བར་བྱེད་པ་ཉིད་ལས་མི་འདའ་བས་ན་གཟུངས་ཀྱང་ཡིན་ལ། འབྲས་བུ་སྨིན་པར་བྱེད་པ་ཡིན་པས་ན་རྒྱུ་རྐྱེན་ཡང་ཡིན་ཏེ། ད་ནུས་པ་ཅན་དུ་གྱུར་ནས་འབྲས་བུ་འབྱིན་པའི་མཐུ་ལྡན་ཉིད་དུ་འགྱུར་བ་ཡིན་པས། འབྲས་བུ་མངོན་དུ་མ་ཕྱུང་ཡང་རིག་པ་འཛིན་པ་ཞེས་བྱ་བའི་དངོས་གཞི་ཐོབ་པ་ཡང་ཡིན་ལ། སངས་རྒྱས་ཀྱི་ཞིང་རྣམས་སུ་ལུང་བསྟན་ཐོབ་པའང་ཡིན་ཏེ་རྡོ་རྗེ་མིང་གི་དབང་ཐོབ་པས་སངས་རྒྱས་དང་མཉམ་པར་སྦྱོར་བར་ནུས་པའི་ཕྱིར་རོ། །དེ་སྐད་དུ་མཉམ་སྦྱོར་རྩ་རྒྱུད་ལས། རིགས་ཀྱི་འཁོར་ལོ་བསྒྱུར་བ་ཡིས། །གཙོ་བོ་གང་ཡང་རུང་བ་འགྲུབ། །ཚེ་འདིར་རིག་འཛིན་འཐོབ་བྱེད་ཅིང་། །དེས་ནི་བདེ་བ་ཆེན་པོ་འགྲུབ། །ཅེས་སོ། །དེ་ལྟ་བུའི་རིག་འཛིན་སྐྱེ་བ་དང་འགྲོ་བ་གང་གི་རྒྱུད་ཀྱིས་བསྡུས་པ་ཡིན་ན། །འདོད་པའི་ཁམས་ཀྱི་མི་དང་ལྷ་དང་། ཚངས་པ་ལ་སོགས་པ་གཟུགས་ཁམས་ཀྱི་སྐྱེ་བ་དང་འགྲོ་བ་རྣམས་ཀྱི་རྒྱུད་རྣམ་པར་དག་པས་བསྡུས་པ་ཡིན་ཏེ། དམ་པའི་རིགས་ཅན་དྲྭ་མ་ལྔ་བཞིན་ནོ། །གཟུགས་མེད་པའི་ཁམས་སུ་ནི་ཁོམ་ལྡན་མ་ཡིན་པས་སྐྱེ་བ་དོན་དུ་གཉེར་བར་མི་བྱེད་དོ། །དེ་ལྟར་སྐྱེ་བ་གཟུང་བ་ད་དག་ཁྱད་པར་གྱི་ས་ལ་གནས་པ་ཡིན་པའི་ཚུལ་སྔ་མ་ལས། མི་དང་ལྷ་དང་ཚངས་པ་ཡི། །སྐྱེ་བ་རྣམ་དག་འཛིན་མོད་ཀྱི། །ཁྱད་པར་ས་ལ་གནས་འགྱུར་ ཡིན། །ཞེས་སོ། །དེ་ཡང་སྲེད་པས་བསྡུས་པའི་ས་རྣམས་ནི་འདིར་དྲང་དོན་ཡིན་པས་ཡེ་ཤེས་ཀྱིས་ལ་གནས་པ་ནི་ཁྱད་པར་གྱིས་སྟེ། གསང་སྔགས་ཀྱི་གཞུང་ལས་བཅུ་གསུམ་རྡོ་རྗེ་འཛིན་པའམ། ཡི་གེ་འཁོར་ལོ་
ཚོགས་ཆེན་དང་། རིག་པ་འཛིན་པའི་ས་ཞེས་གྲགས་ཏེ། ས་རབ་རིག་པ་འཛིན་པའི་ས། །ཞེས་སོ། །དཔེར་ན་ཆུ་སྐྱར་གྱིས་མིད་པའི་གར་མཁན་ཆུའི་རུམ་དང་མ་བྲལ་ཀྱང་སྐམ་སར་གཏོགས་པ་བཞིན་དུ། དབང་དོན་གྱི་ཡེ་ཤེས་ལས་རྒྱུ་རྐྱེན་ནུས་པ་ཅན་དུ་གྱུར་ནས་མཐོང་ལམ་ནས་རིམ་པར་མངོན་དུ་བྱས་པ་དེ་སྔར་བཤད་པ་བཞིན་གོམས་པ་མི་བརྟན་པས་རེ་ཞིག་སྲེད་པའི་ས་དང་མ་བྲལ་དུ་ཟིན་ཡང་། ཡེ་ཤེས་ཀྱིས་ཟིན་པར་གྱུར་པས་བསྐྱེད་རྫོགས་ཀྱི་ལམ་དུ་དེའི་རྒྱུན་གོམས་པར་བྱེད་ཅིང་འབྲས་བུ་མཐར་ཕྱིན་པར་མ་གྱུར་གྱི་བར་དུ་རིག་པ་འཛིན་པ་ཞེས་བྱ་ལ། མཐར་ཕྱིན་ནས་ཀྱང་རིག་པ་འཛིན་པ་ཞེས་བྱ་བའི་མིང་ཕྱོགས་གཅིག་འཛིན་པ་ལ་ཉེས་པ་མེད་དོ་ཞེས་པཎ་ཆེན་རོང་པས་བཞེད་དོ། །དེ་ཡང་མཚན་ཉིད་ཐག་པ་ལས་ཕ་རོལ་ཏུ་ཕྱིན་པ་བཅུའི་སྒོ་ནས་ས་བཅུ་རིམ་ཅན་དུ་རྫོགས་པའི་མཐར་བླ་ན་མེད་པའི་བྱང་ཆུབ་འགྲུབ་པ་དང་ཚུལ་མཚུངས་པ་ལས། སྔགས་ཀྱི་ལམ་དུས་དེ་དག་དུས་ཡུན་རིང་མོས་སྤྱད་མི་དགོས་པར་མིག་འཕྲུལ་ལྟ་ བུར་མྱུར་བས་རྒྱུ་དང་འབྲས་བུ་སྔ་ཕྱིར་བཅས་ནས་བཙལ་བ་མ་ཡིན་པར་རིག་པ་འཛིན་པའི་ས་དེ་ལ་ལྷུན་གྱིས་རྫོགས་པའི་ཚུལ། ཕ་རོལ་ཕྱིན་པ་ཀུན་ཏུ་རྫོགས། །ཐབས་དང་ཤེས་རབ་ཐབས་ཀྱི་མཆོག །ཤེས་རབ་མཆོག་གི་མཆོག་གྱུར་པ། །ས་ཡི་ཁྱད་པར་བཅུ་དང་གསུམ། །རྒྱུ་འབྲས་ཁྱད་པར་ལྷུན་གྱིས་རྫོགས། །ཞེས་སོ། །དེ་ཡང་ཆོས་ཐམས་ཅད་ལ་ཡོངས་སུ་འཛིན་པ་མེད་པར་ཤེས་ནས་བཀག་པ་མེད་པ་ནི་སྦྱིན་པའི་ཕ་རོལ་ཏུ་ཕྱིན་པ། མཉམ་པ་ཉིད་དུ་རིག་པས་བསྲུང་མཚམས་ཀྱི་འདུ་ཤེས་མི་གནས་པ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ། འཁྲུལ་པ་མེད་པས་བཟང་ངན་གྱི་བྱེ་བྲག་མི་ཕྱེད་པ་ནི་བཟོད་པའི་ཕ་རོལ་ཏུ་ཕྱིན་པ། བླང་དོར་མེད་པ་དང་སྤྱོད་ཡུལ་ཚོགས་སུ་གྱུར་པ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ། དབང་པོ་
ཡུལ་ལ་འཇུག་ཀྱང་ཆགས་པའི་སྐྱོན་གྱིས་མ་གོས་པ་ནི་བསམ་གཏན་གྱི་ཕ་རོལ་ཏུ་ཕྱིན་པ། གཤིས་ཀྱི་གནས་ལུགས་ཕྱིན་ཅི་མ་ལོག་པར་རྟོགས་པས་འཁོར་འདས་ཀྱི་ས་གཉིས་ཆོས་ཐམས་ཅད་དབྱིངས་ནས་མྱ་ངན་ལས་འདས་པ་ནི་ཤེས་རབ། དེ་ལས་བདག་དང་གཞན་གྱི་དོན་བསྒྲུབ་པ་ལ་མཁས་པ་ནི་ཐབས། ཞིང་དང་སྤྱོད་ཡུལ་ཡོངས་སུ་དག་པར་འགྱུར་བ་ནི་སྨོན་ལམ། དེ་ལ་མི་མཐུན་པའི་ཕྱོགས་ཀྱིས་བརྫི་བར་མི་ནུས་པའི་བརྟུལ་ཞུགས་ནི་སྟོབས། དཔེ་དང་ཐ་སྙད་ཀྱི་རྗེས་སུ་དཔགས་པ་ཙམ་མ་ཡིན་པར་སངས་རྒྱས་རྣམས་ཀྱི་ཆོས་སྐུའི་བཞུགས་ཚུལ་ཇི་ལྟ་བ་བཞིན་དུ་རྟོགས་པ་ནི་ཡེ་ཤེས་ཀྱི་ཕ་རོལ་ཏུ་ཕྱིན་པ་སྟེ། ཚངས་པ་ཁྱད་པར་སེམས་ཀྱིས་ཞུས་པའི་མདོ་ལས། མི་སེམས་པ་ནི་སྦྱིན་པ། མི་གནས་པ་ནི་ཚུལ་ཁྲིམས། ཅི་ཡང་བྱེ་བྲག་མི་ཕྱེད་པ་ནི་བཟོད་པ། བླང་དོར་མེད་པ་ནི་བརྩོན་འགྲུས། མ་ཆགས་པ་ནི་ཏིང་ངེ་འཛིན། མི་གཉིས་པ་ནི་ཤེས་རབ་བོ། །ཅེས་དང་། རྡོ་རྗེའི་ཏིང་ངེ་འཛིན་གྱི་མདོ་ལས། སེམས་སྟོང་པ་ཉིད་དུ་མི་གཡོན་ཕ་རོལ་ཏུ་ཕྱིན་པ་དྲུག་འདུས་སོ། །ཞེས་གསུངས་སོ། །དེ་ལྟར་ཕ་རོལ་ཏུ་ཕྱིན་པ་བཅུ་དང་ས་བཅུ་ནི་ཐབས་ཤེས་ཀྱིས་བསྡུས་པ་ཡིན་ལ། དེའི་སྟེང་དུ་ས་དེ་དག་གི་ཐབས་ཀྱི་འབྲས་བུ་ནི། ཐབས་དང་ཤེས་རབ་ཐབས་ཀྱི་མཆོག །ཅེས་བཅུ་གཅིག་ཀུན་ཏུ་འོད་ཀྱིས་སྟེ་འོད་ཟེར་ཀུན་ཏུ་བཀྱེ་བས་གདུལ་བྱའི་འགྲོ་བ་མཐའ་དག་སྣོད་དུ་རུང་བར་མཛད་པས་ན་དེ་སྐད་ཅེས་ཐུན་མོང་དུ་གྲགས་པའོ། །ཤེས་རབ་མཆོག་ཅེས་བྱ་བ་ནི། །བསླབ་པ་མིན་པའི་ཟུང་འཇུག་ཀུན་ཏུ་འོད་ཀྱི་ས་ལས་གཡོས་པ་མེད་བཞིན་དུ། མ་ཆགས་ཤིང་སྒྲིབ་པ་མེད་པའི་ཤེས་རབ་དང་།
དམིགས་པ་མེད་པའི་ཐུགས་རྗེའི་མཆོག་དང་ལྡན་པ་མ་ཆགས་པདྨ་ཅན་གྱིས་སྟེ། འཁོར་འདས་ཐམས་ཅད་ལ་ཁྱབ་ཀྱང་སྲིད་པའི་འདམ་རྫབ་ཀྱིས་མ་གོས་པས་པདྨ་ཅན་གྱི་མངོན་བརྗོད་དང་ལྡན་པའོ། །མཆོག་གྱུར་པ་ཞེས་པ་ནི། ཐབས་ཤེས་གཉིས་ཀའི་མཆོག་ཏུ་གྱུར་པའི་ས་སྟེ། །དེ་ལྟ་བུའི་བྱིན་རླབས་ཀྱིས་རྒྱལ་བ་རྣམས་ཀྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ཡོན་ཏན་ལྷུན་གྱིས་རྫོགས་པར་གྲུབ་པ་སྟེ། འདི་ལྟར་སྐུའི་གསང་བ་བསམ་གྱིས་མི་ཁྱབ་པ་དང་། གསུང་གི་གསང་བ་བསམ་གྱིས་མི་ཁྱབ་པ་དང་། ཐུགས་ཀྱི་གསང་བ་བསམ་གྱིས་མི་ཁྱབ་པ་སྟེ་གསུམ་ཀའང་མི་ཟད་ཅིང་རྣམ་པ་ཐམས་ཅད་པའོ། །དེ་ལ་སྐུའི་གསང་བ་བསམ་གྱིས་མི་ཁྱབ་པ་ནི། དེའི་མཐའ་ས་བཅུའི་དབང་ཕྱུག་གིས་ཀྱང་རྟོགས་པར་མི་ནུས་ལ། རྣམ་པ་ཐམས་ཅད་པ་ཡིན་པས་སྐུ་གང་ལ་གང་འདུལ་དུ་སྟོན་པ་དང་། གསུང་རིགས་དྲུག་གི་སྐད་དུ་ཆོས་སྟོན་པ་དང་། ཐུགས་ཤེས་བྱ་ཇི་ལྟ་བ་དང་ཇི་སྙེད་པའི་ཡེ་ཤེས་སྐད་ཅིག་གིས་མཁྱེན་པས་རྣམ་པ་ཐམས་ཅད་མཁྱེན་པའི་ཡེ་ཤེས་ཞེས་ཀྱང་བྱའོ། །རྒྱན་ཞེས་བྱ་བ་ནི་རང་གཞན་གཉིས་ཀ་ལ་མཛེས་པས་ན་རྒྱན་དང་། འཁོར་ལོ་ནི་མཛད་པའི་ཕྲིན་ལས་རྒྱུན་མི་འཆད་པས་འཁོར་ལོ་སྟེ་དོན་བྱེད་པ་དང་བྱས་པ་གཉིས་ཀའི་རྒྱུན་འཁོར་བ་མ་སྟོངས་ཀྱི་བར་དུ་རྟག་པ་རྒྱུན་གྱི་འཁོར་ལོར་ཡོད་པས་སོ། །དེ་བས་ན་ཡི་གེ་འཁོར་ལོ་ཚོགས་ཆེན་གྱིས་འམ། །ཐབས་དང་ཤེས་རབ་མཆོག་གིས། །ཞེས་གྲགས་སོ། །དེ་ལྟ་ནའང་གསར་རྙིང་གི་རྒྱུད་སྡེ་དུ་མ་ནས་ས་ལམ་བགྲོད་ཚུལ་རྡོ་རྗེའི་ཚིག་གིས་བཅིངས་པ་ལ་རྒྱ་བོད་ཀྱི་སློབ་དཔོན་རྣམས་མཐའ་གཅིག་ཏུ་བཞེད་པ་མཐུན་པ་མ་མཐོང་སྟེ། །
གསང་བ་འདུས་པ་ལ་མཚོན་ན་རིམ་ལྔར། དང་པོ་ལས་ཀྱི་སྦྱོར་བ་ཡི། །ས་བརྒྱད་པ་ནི་འཐོབ་པར་འགྱུར། །སྣང་བ་གསུམ་པ་འཐོབ་པ་དག །ས་བཅུ་ལ་ནི་རབ་ཏུ་གནས། །ཞེས་སོ། །དེ་ལ་ཁ་ཅིག་ནི་མཚན་ཉིད་ཐེག་པས་ས་ལམ་བགྲོད་པའི་མཐར་ལམ་དེ་ལ་སྣོན་མ་གདབ་པའི་ཚུལ་དུ་སྔགས་ལ་འཇུག་པའི་ས་མཚམས་ས་བཅུ་པ་ནས་ཡིན་པར་འདོད་ཅིང་། དེ་ཡང་སྐྱེ་བ་གཅིག་གིས་ཐོགས་པ་དང་། སྲིད་པ་ཐ་མ་པ་གཉིས་ལས་ཕྱི་མ་པ་དེས་བསྐྱེད་རིམ་ནས་བརྩམས་ཏེ་སེམས་དབེན་གྱི་བར་བསྐྱེད་མི་དགོས་པར་སྒྱུ་ལུས་ནས་བསྒོམས་པས་ཆོག་པར་འདོད་དེ་སྲོད་ལ་གསང་དབང་བསྐུར། སྒྱུ་ལུས་མངོན་དུ་བྱས། ནམ་ཕྱེད་དཔང་གསུམ་པ་བསྐུར། འོད་གསལ་མངོན་དུ་བྱས། ཐོ་རངས་དབང་བཞི་པ་བསྐུར། མི་སློབ་པའི་ཟུང་འཇུག་མངོན་དུ་བྱས་ཏེ། མཚན་ཐོག་ཐག་གཅིག་ལ་འཚང་རྒྱ་བར་འདོད་ཅིང་། དེའང་མཚན་ཉིད་ཐེག་པའི་རང་ལམ་གྱིས་ས་བཅུ་པའི་བར་དུ་བགྲོད་པ་དེས་བསྐྱེད་རིམ་ནས་བརྩམས་ཏེ་སེམས་དབེན་གྱི་བར་རྒྱུད་ལ་སྐྱེ་བའི་དོད་ཐུབ་པར་འདོད་ཀྱང་། རིག་པ་གཞན་གྱི་གནོད་བྱེད་ཡོད་དེ། མདོ་ལས་མི་གཡོ་བའི་ཏིང་ངེ་འཛིན་ལས་བསླང་ནས་འོད་གསལ་དུ་ཞུགས་པ་དེ་ཉིད་ལས་ཟུང་འཇུག་ཏུ་བཞེངས་པ་དངོས་སུ་གསུངས་ན། འོད་གསལ་དང་ཟུང་འཇུག་འདི་དག་མདོ་སྔགས་ཀྱི་ལམ་ཐུན་མོང་བར་འགྱུར་བ་དང་། དེ་ལྟ་ན་སྒྱུ་ལུས་ལ་སོགས་པ་ཡང་ཐུན་མོང་བར་འགྱུར་བ་དང་། འདི་སྐབས་སུ་མདོ་དྲངས་པ་ཉིད་ཀྱིས་མདོའི་ལམ་ལས་སྔགས་ལ་འཇུག་པའི་མཚམས་སྟོན་པ་ཡིན་ན། རིམ་པ་ལྔ་པོ་ཐམས་ཅད་ཀྱི་སྐབས་སུ་
མདོ་དྲངས་པས་ན་དེ་དང་དེའི་མདོའི་ལམ་ནས་སྔགས་ལ་འཇུག་པའི་མཚམས་སྟོན་པར་མཚུངས་པའི་ཕྱིར་དང་། ཁྱད་པར་རིམ་པ་གསུམ་ལས། བདག་ལ་བྱིན་གྱིས་བརླབ་པའི་རིམ། །གང་གིས་རྙེད་པར་མི་འགྱུར་བ། །མདོ་སྡེ་རྒྱུད་དང་རྟོག་པ་ལ། །དེ་ནི་ངལ་བ་དོན་མེད་འགྱུར། །ཞེས་མདོའི་ལམ་གྱི་འབད་པ་བྱས་ཀྱང་དེ་དག་གི་ངལ་བ་དོན་མེད་པར་བཤད་པའི་ཕྱིར་རོ། །དེ་བས་ན་རྒྱུད་སྡེ་ཕྱི་འགྱུར་གྱི་ཆོས་སྐད་ནང་མཐུན་པར་སྨྲ་བ་དག་ཀྱང་སོ་སྐྱེའི་རྣལ་འབྱོར་དང་། འཕགས་པས་མཐོན་པོའི་རྣལ་འབྱོར་སྟོབས་ནུས་ཆེ་ཆུང་གི་ཁྱད་པར་གནམ་ས་ལྟ་བུར་ཁྱད་ཞུགས་པ་ལ་དོང་ཐུབ་དུ་བྱེད་པ་ཧ་ཅང་ཐལ་ལོ་ཞེས་ལུང་དང་རིགས་པ་རྒྱ་ཆེན་པོས་དགག་ཅིང་། སྔགས་ལ་མ་བརྟེན་པའི་འཕགས་པའི་རྟོགས་པ་མེད་པར་ཚད་མས་གྲུབ་པའི་ཤེས་བྱེད་དུ་རྣམ་སྣང་མངོན་བྱང་ལས། །རྫོགས་པའི་སངས་རྒྱས་གང་འདས་དང་། །དེ་བཞིན་གང་དག་མ་བྱོན་དང་། །ད་ལྟར་བྱུང་བའི་མགོན་པོ་རྣམས། །འགྲོ་ལ་ཕན་ཕྱིར་ཞུགས་པ་དག །དེ་དག་ཀུན་གྱི་གསང་སྔགས་ཀྱི། །ཆོ་ག་ཟབ་མོ་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་ཚད་མེད་བརྙེས། །ཞེས་པ་འདི་ངེས་དོན་དུ་འདོད་པའི་ཕྱོགས་ལེགས་པ་ཡིན་ནོ། །ཅིའི་ཕྱིར་ན་འདིའི་དགོངས་པ་བཤད་པར་བྱ་སྟེ། མདོ་ལམ་གྱིས་བཅུ་གཅིག་པ་ནི་དྲང་དོན་ཡིན་པའི་ཚུལ། །འདི་ལྟར་དྲན་པ་ཉེ་བར་གཞག་པ་བཞི་ནས། རྫུ་འཕྲུལ་གྱི་རྐང་པ་དང་པོ་གསུམ་གྱི་བར་ལ་གདུལ་བྱ་རབ་ཏུ་དྲང་བའི་ཕྱིར་རབ་ཏུ་དགའ་བ་ལ་སོགས་པའི་ས་བཅུ་གཅིག་ཏུ་བཏགས་པ་གང་ཞིག་རང་ལམ་གྱིས་བགྲོད་ནུས་ལ། དེ་ནས་ནི་གདོན་མི་ཟ་བར་སྔགས་ཀྱི་
ཐེག་པར་འཇུག་པའི་འཇུག་མཚམས་ནི་རྫུ་འཕྲུལ་གྱི་རྐང་པ་བཞི་པ་ནས་ཡིན་ནོ། །དེ་ལྟར་ཡིན་པའི་འཐད་པ་གང་ཞིག་ཡིན་སྙམ་ན། མཚན་བརྗོད་ལས། རྫུ་འཕྲུལ་རྐང་པའི་སྟོབས་ཆེན་ལྡན། དེ་ཉིད་དྲན་པ་ཆེན་པོ་འཆང་། །དྲན་པ་བཞི་པོའི་ཏིང་འཛིན་རྒྱལ། །ཞེས་མཚན་ཉིད་ཐེག་པའི་ལམ་གྱི་རིམ་པ་དང་མི་འདྲ་བའི་སྒྲས་བསྟན་ཅིང་གཞན་ཡང་མདོ་ལས། རང་སངས་རྒྱས་མང་པོ་ཐེག་ཆེན་ལ་ཞུགས་ནས། འགའ་ཞིག་གིས་ས་བརྒྱད་པ་ཐོབ་ནས་ཕྱིར་ལོག་པར་གསུངས་པའི་སའི་ངོས་འཛིན་ཡང་བཤད་མ་ཐག་པ་དེ་ལས་གཞན་པ་ཡིན་ན། འཕགས་པའི་ས་བརྒྱད་པ་དངོས་བསྟན་ཐོབ་ནས་ཕྱིར་མི་ལྡོག་པའི་རིགས་པ་གང་གིས་བསྒྲུབ། དེ་ལ་དགོངས་ནས་སློབ་དཔོན་དཔའ་བོས། ཡིད་ནི་མཆོག་ཏུ་གཡོ་བས་ལྡོག །ཇི་སྲིད་དེ་ལ་དབུགས་མ་ཕྱུང་། །ས་བཞིན་གཡོ་མེད་མ་ཐོབ་བར། །བརྟན་མེད་མི་གཡོའི་ས་ཐོབ་དཀའ། །ཞེས་གསུངས་པ་ཡིན་ནོ། །གལ་ཏེ་ས་བཅུ་པ་ཐོབ་ཀྱི་བར་དུ་ཡང་སྔགས་ཀྱི་ཐེག་པ་ལ་འཇུག་པའི་ངེས་པ་མེད་དོ་ཞེས་པ་ནི་ཐེག་ཆེན་འཕགས་པ་ལ་བརྒྱུད་ནས་བསྐུར་བ་བཏབ་པ་ཡིན་ཏེ། འདི་ལྟར་ཆོས་ཉིད་སྤྲོས་བྲལ་མངོན་སུམ་པར་གཟིགས་པའི་ལྷག་མཐོང་གི་དབང་པོ་མཆོག་ཐོབ་ལ་མ་ཉམས་པ་དེ་སྔགས་ཀྱི་སྣོད་མ་ཡིན་ལ། འཆིང་པ་ཀུན་གྱིས་དཀྲིས་པའི་སོ་སོ་སྐྱེ་བོ་མཐའ་དག་སྔགས་ཀྱི་སྣོད་ཡིན་པར་བསྒྲུབས་པས་ཆེས་ཟབ་པའི་ཆོས་ཀྱི་སྣོད་དང་སྣོད་མ་ཡིན་པའི་རྣམ་གཞག་ཤིན་ཏུ་འཆོལ་བ་ཡིན་ནོ། །ཡང་སྣོད་དང་སྐལ་བ་མེད་པ་མ་ཡིན་ཀྱང་རྒྱལ་བས་དེ་ལ་སྔགས་ཀྱི་ཐེག་པ་རེ་ཞིག་མི་གསུང་ངོ་ཞེ་ན། སངས་རྒྱས་ཐེག་པ་དམན་པས་འཁྲིད་མི་མཛད། །ཅེས་
པའི་ལུང་དང་འགལ་ལོ། །གལ་ཏེ་གསུངས་ཀྱང་དེ་དེ་ལ་ཡིད་མི་གཏོད་བས་ལམ་མི་སྒོམ་མོ་ཟེར་ན། ཐབས་བདེ་བ་དང་། ལམ་བདེ་བ་དང་། འཇུག་པ་བདེ་བ་དང་། དུས་མྱུར་བའི་མཐར་ཐུག་པ་སྔགས་ལ་ཡིད་མི་གཏོད་ཅིང་མི་མོས་ན་དེ་དཀོན་མཆོག་གསུམ་ལ་རྒྱུ་མཚན་ཤེས་ནས་དད་པ་ཐོབ་པའི་དབང་པོ་རྣོན་པོ་དང་། ཟབ་མོའི་དེ་ཁོ་ན་ཉིད་ལ་མངོན་སུམ་དུ་མཐོང་བའི་སྐལ་བ་ཅན་ཡང་དོན་མེད་པར་འགྱུར་ཤིང་། མཚན་ཉིད་ཐེག་པ་ལས་བཤད་པའི་ལམ་ཕལ་མོ་ཆེ་སྔགས་ཀྱིས་བགྲོད་པར་ཤེས་ནས་མདོ་སྔགས་དབང་པོ་མཆོག་ལ་དོན་གཅིག་ཏུ་རྟོགས་པ་དེ་ཡང་ཚིག་ཙམ་དུ་ཟད་པ་ཡིན་ནོ། །དེ་བས་ན་ཐེག་ཆེན་གྱི་རྫུ་འཕྲུལ་གྱི་རྐང་པ་བཞི་པར་ཆོས་ཀྱི་རྒྱུན་གྱི་ཏིང་ངེ་འཛིན་ངེས་པར་འཐོབ་པ་ཡང་མདོ་སྡེའི་རྒྱན་ལས། །དེ་ཚེ་ཆོས་ཀྱི་རྒྱུན་ལས་ནི། །སངས་རྒྱས་རྣམས་ལ་ཞི་གནས་དང་། །ཡེ་ཤེས་ཡངས་པ་ཐོབ་བྱའི་ཕྱིར། །གདམས་ངག་རྒྱ་ཆེར་རྙེད་པར་འགྱུར། །བསམ་གཏན་ལས་ཐོབ་མངོན་པར་ཤེས། །མངོན་པར་བསྒྲུབ་པའི་སྒོ་ནས་ནི། །སངས་རྒྱས་དཔག་ཏུ་མེད་པ་ལ། །མཆོད་པའི་ཕྱིར་དང་ཉན་པའི་ཕྱིར། །འཇིག་རྟེན་ཁམས་ནི་རྣམས་སུ་འགྲོ། །ཞེས་རྫོགས་པའི་སངས་རྒྱས་ལས་འགྱུར་བ་མེད་པའི་ཏིང་ངེ་འཛིན་དང་། བློས་དཔག་ཏུ་མེད་པའི་ཡེ་ཤེས་ཐོབ་པའི་ཕྱིར་སྔགས་ཀྱི་ཐེག་པ་ཡོད་པའི་འཇིག་རྟེན་གྱི་ཁམས་དཔག་ཏུ་མེད་པར་སོང་ནས་ཐེག་ཆེན་ཐུན་མོང་མ་ཡིན་པ་ཐབས་ལ་མཁས་པའི་གདམས་ངག་རྒྱ་ཆེན་པོ་རྙེད་པར་འགྱུར་བའི་དོན་གྱིས་སྔགས་བླ་མེད་བསྟན་ཅིང་འཕངས་པ་ཡིན་ནོ། །དེ་ལྟ་ན་སངས་རྒྱས་ལ་གདམས་ངག་དངོས་སུ་ཉན་པ་དང་འགལ་ལོ་ཞེ་ན། དབང་བཞི་དང་མན་ངག་སྟེར་བའི་བླ་མ་མཚན་ཉིད་པ་ནི་རྡོ་རྗེ་ཐེག་པའི་རྒྱུད་སྡེ་
ཐམས་ཅད་ནས་སངས་རྒྱས་དངོས་སུ་གསུངས་ལ། དེ་ལ་སློབ་མ་ཡང་དེ་ལྟར་མཐོང་བའི་མཚན་ཉིད་ཚང་བ་དགོས་པ་ནི་རྒྱུད་སྔོན་དུ་སྦྱངས་པ་ཁོ་ན་ལ་ལྟོས་པའི་ཕྱིར་རོ། །གཞན་དུ་ན་སེམས་ཅན་གྱི་ལོག་རྟོག་གི་དབང་དུ་སངས་རྒྱས་ལ་སངས་རྒྱས་སུ་མཐོང་བའི་ངེས་པའང་མེད་དེ། བཅོམ་ལྡན་འདས་ལ་སྨན་པ་རྒྱུན་ཤེས་ཀྱི་བུས་བྲན་མོའི་བུར་བལྟས་པ་བཞིན་ནོ། །དེ་བས་ན་དོན་འདི་ནི་མདོ་སྔགས་ཀྱི་གྲུབ་པའི་མཐའ་རྒྱ་མཚོ་ལྟ་བུ་ལ་མངའ་དབང་འབྱོར་པ་དག་གིས་ཀྱང་ལེགས་པར་བཤད་ཡོད་པས་ཕྱོགས་གཅིག་མཐོང་བ་དང་། དེ་ལ་ཞེན་པའི་བློས་སྐྲག་པར་མི་བྱའོ། །དེ་ལྟ་ནའང་འདི་ནི་རྩོད་པའི་གནས་མ་ཡིན་ཏེ། སྔགས་ལ་མ་བརྟེན་པར་ཕར་ཕྱིན་ཐེག་པའི་རང་ལམ་ནས་སངས་རྒྱས་མི་འགྲུབ་པར་འདོད་པ་འདི་སྔགས་རང་སའི་གྲུབ་མཐར་བསྙོན་དུ་མེད་པ་རྡོ་རྗེའི་ལུང་གིས་ཁ་མཚོན་ཆོད་ཀྱང་། དྲང་དོན་དུ་མཚན་ཉིད་ཐེག་པའི་རང་ལམ་ནས་ཀྱང་ས་བཅུ་རྒྱུན་མཐའི་བར་གྱི་ལམ་ཚང་ལ་མ་ནོར་བ་བསྟན་ནས་བློ་བྲིད་དེ་སྔགས་ལ་བྲོད་པ་སྐྱེ་བའི་ཐབས་སུ་བསྟན་པ་སྒྲ་ཇི་བཞིན་པར་བཟུང་སྟེ་རྒྱུ་ཚང་ནས་འབྲས་བུ་མི་འགྲུབ་པ་ནི་ཡིད་གཉིས་དང་བཅས་པའོ་ཞེས་རྒྱུ་འབྲས་དག་གྲོལ་དུ་འཛིན་ཅིང་རེ་ཞིག་སྔགས་ཀྱི་མྱུར་ལམ་བློར་མི་ཆུད་པའི་གང་ཟག་རིམ་གྱིས་པ་ལ་བརྟེན་ནས་བདག་ཉིད་ལ་སྡིག་པར་འགྱུར་བ་ལ་དགོངས་ནས་སྔགས་ཀྱི་དབང་བསྐུར་ཐམས་ཅད་ཀྱི་སྔོན་དུ། འདི་ནི་ཁྱོད་ཀྱི་གསང་བའི་ཆུ། །སྣོད་མ་ཡིན་ལ་སྨྲ་མི་བྱ། །ཞེས་སྔགས་ཀྱི་ལམ་ནི་ཡེ་གསང་ཆེན་པོར་བསྡམ་པའི་ཆིངས་ཀྱིས་བཅིངས་པའི་ཕྱིར་རོ། །དོན་དེ་ལ་དམིགས་ནས་འཕགས་པ་ཡབ་སྲས་ཀྱིས་ཀྱང་། མདོ་སྔགས་ཀྱི་ལམ་སེམས་བསྐྱེད་ནས་ཟུང་འཇུག་གི་རིམ་པ་ལ་སློབ་བའི་ཚུལ་དབང་པོ་མཆོག་ལ་
དགོངས་པ་གཅིག་ཏུ་བསྒྲུབ་པར་རིགས་པར་བྱའོ། །གལ་ཏེ་མཚན་ཉིད་ཐེག་པ་སྔགས་ཀྱི་ལམ་སྟེགས་སུ་ངེས་པར་དགོས་ན་སྔགས་ནས་ཚེ་གཅིག་ལ་སོགས་བར་སངས་རྒྱ་བའི་མྱུར་ལམ་མིང་ཙམ་དུ་སོང་ཞིང་། འདི་ལྟར་རི་རབ་ཀྱི་ཟོམ་ལ་རུས་སྦལ་གྱི་བགྲོད་པས་འཇིགས་ནས་སུམ་ཅུ་རྩ་གསུམ་དུ་སླེབ་ཁར་ཁྱུང་གི་ལྡིང་སྟངས་ཀྱིས་སླེབ་པོ་ཟེར་བ་ལྟར་སྲིད་དུ་རིང་བའི་ལམ་ལ་ངལ་བ་མཐའ་དག་པ་བརྟེན་ནས་སླར་ཡང་གསེབ་ལམ་ནས་བགྲོད་པ་ནི་བྱིས་པ་མགོ་འཁོར་བའི་གཏན་ཚིགས་ཙམ་སྟེ། ཅིའི་ཕྱིར་ན་མདོ་ལས། །གང་ལ་སངས་རྒྱས་རང་བྱུང་བདག་ཉིད་གང་། །རབ་ཏུ་གནས་ཤིང་རྟོགས་ལམ་གང་ཅི་འདྲ། །སྟོབས་དང་བསམ་གཏན་རྣམ་པར་ཐར་དང་དབང་། །དེ་ཉིད་ལ་ནི་སེམས་ཅན་རྣམས་དགོད་དོ། །ཞེས་རང་གི་ཡེ་ཤེས་རྟོགས་པ་ལ་ཐབས་གང་མྱུར་བ་དེའི་ལམ་ནས་སེམས་ཅན་འཁྲིད་པའི་ཕྱིར་ཆོ་ག་ཟབ་མོ་འདི་མཁྱེན་ནས་ཞེས་པའི་ལམ་གསང་སྔགས་ཡིན་པས་སོ། །དེ་བས་ན་དོན་གྱི་ཆ་ནས་སྔགས་ཀྱི་ལམ་ཁོ་ན་ངེས་དོན་ཡིན་པའི་ཚུལ་འཕགས་པ་ཡབ་སྲས་ཀྱི་རིམ་ལྔར་ཡང་བསྐྱེད་རིམ་མེད་པར་རྫོགས་རིམ་བསྒྲུབ་མི་ནུས། དབེན་གསུམ་མེད་པར་ཀུན་རྫོབ་ཀྱི་དབེན་པ་རྟོགས་མི་ནུས་ཤིང་། དེ་མེད་པར་དོན་དམ་པའི་འོད་གསལ་རྟོགས་མི་ནུས་ལ། དེ་མེད་པར་ཟུང་འཇུག་བསྒྲུབ་མི་ནུས་པར་བཤད་པ་ཡིན་ནོ། །དེའི་ཕྱིར་ལུགས་འདི་ལ་འོད་གསལ་ནི་འཕགས་པའི་བདེན་མཐོང་གི་ལམ་དང་། ཟུང་འཇུག་ནི་མི་སློབ་པའི་ལམ་སྟེ་རྫོགས་པའི་སངས་རྒྱས་ཀྱི་གོ་འཕང་ཁོ་ན་ཡིན་པས་སྙིགས་མ་ལྔ་བདོ་པའི་དུས་འདིར་ནི་སྔགས་བླ་ན་མེད་པའི་མྱུར་ལམ་གྱིས་འཐོབ་པ་ལས་དབང་པོ་ཚར་བཅད་པའི་ཐེག་པ་གཞན་གྱིས་དངོས་གྲུབ་ཐོབ་པར་མི་འགྱུར་བའི་ཚུལ་དཔལ་མཆོག་དང་པོ་ལས། དཀའ་ཐུབ་
སྡོམ་པ་མི་བཟེད་པས། །ལུས་བསྐམས་གྱུར་ཞིང་སྡུག་བསྔལ་ལ། །སྡུག་བསྔལ་གྱིས་སེམས་གཡེངས་ཏེ། །གཡེངས་པས་དངོས་གྲུབ་གཞན་དུ་འགྱུར། །ཞེས་པས་དངོས་སུ་གསལ་ལོ། །དེ་ནི་གསང་སྔགས་ཀྱི་ཆེ་བ་བསྟན་པ་ཙམ་ཡིན་གྱིས་ཕར་ཕྱིན་གྱི་རང་ལམ་ནས་སངས་རྒྱས་མི་འགྲུབ་པའི་ལུང་མི་འབྲུབ་བོ་ཅེ་ན། གསང་ཆེན་ཐབས་ལ་མཁས་པ་ཞེས་བྱ་བའི་མདོ་སྡེའི་མཚན་དོན་གྱིས་ཀྱང་གསང་སྔགས་ཟུར་གྱིས་སྨོས་ནས་དོན་གྱིས་སྦྱོར་སྒྲོལ་གྱི་ལམ་ཡང་བསྟན་པའི་ཚུལ་ནི་དེད་དཔོན་གྱི་བུ་མོ་ལ་བགྲོད་པས་བསྐལ་པ་ཁྲིའི་ཚོགས་འདུམས་པ་དང་། མི་ནག་མདུང་ཐུང་ཅན་བསད་པས་བསྐལ་པ་འབུམ་གྱི་ཚོགས་འདུམས་པའི་ཚུལ་དེ་ཡང་ཚེ་གཅིག་ལ་སོགས་པར་སངས་རྒྱས་སྟེར་བའི་སྔགས་ཀྱི་ཐེག་པ་འབའ་ཞིག་ལ་དགོངས་པ་ཡིན་ཏེ། དེ་ལྟ་མ་ཡིན་ན་བསྐལ་པ་གྲངས་མེད་གསུམ་གྱི་ཚོགས་དང་འགལ་བ་འདུ་བའི་ཕྱིར་རོ། །དེ་ལྟར་འདོད་པ་སྣ་ཚོགས་པ་བཀོད་པའང་། བོད་ཡུལ་འདིར་རང་གི་བློ་ལ་འཐད་པའི་རྒྱུད་ཀྱི་དུམ་བུ་རེ་ཙམ་ལ་ཕྱོགས་ཆར་བཟུང་ནས་ཆོས་ཀྱི་རྣམ་གྲངས་རྒྱ་མཚོ་ལྟ་བུ་ལ་མི་བདེན་ནོ་ཞེས་རྩ་ལྟུང་དྲུག་པ་རིན་གྱིས་ཉེ་བ་ཡོད་དེ། རྡོ་རྗེ་མཁའ་འགྲོ་ལས། བསྟན་བཅོས་རྣམས་ནི་རྙེད་སླ་སྟེ། དེ་ཡི་སྦྱོར་བརྙེད་པར་དཀའ། །ཞེས་པས་བསྟན་བཅོས་ཀྱི་སྦྱར་གཞི་རྒྱད་ཀྱི་རྣམ་གྲངས་ཀྱི་མཐའ་ཆོད་པར་དཀའ་ཞིང་། མཁས་པ་དང་གྲུབ་པར་གྲགས་པས་བཀོད་པའི་གྲུབ་མཐའ་བློས་རྗེས་སུ་དཔགས་པའི་ཕྱིར་རང་གི་ངོ་བོ་མངོན་སུམ་པ་ནི་སངས་རྒྱས་ཁོ་ནའི་སྤྱོད་ཡུལ་ཡིན་པའི་ཚུལ་སྔ་མ་ལས། གྲུབ་མཐའ་མན་ངག་སྤྱོད་ཡུལ་ཏེ། །མཁས་པ་རྣམས་ཀྱི་སྤྱོད་ཡུལ་མིན། །གྲུབ་མཐའ་མངོན་སུམ་ལས་ཤེས་བྱ། །མན་ངག་
ཡང་ནི་རྗེ་དཔག་ལས། ཤེས་བྱ་བླ་མའི་ཞལ་ལས་ཀུན། །དེ་མཁས་སངས་རྒྱས་སྤྱོད་ཡུལ་ལོ། །ཞེས་སོ། །དེ་བས་ན་འདིར་རྡོ་རྗེའི་ལུང་གི་དབང་པོ་ནི་སངས་རྒྱས་ཐམས་ཅད་ཀྱི་དགོངས་པ་འདུས་པའི་རྒྱུད་ལས། མུན་པ་དང་སྒྲོན་མའི་བསྐལ་པ་འདྲེས་མར་ཐོག་མ་དང་ཐ་མ་མེད་པར་བྱུང་ཞིང་འབྱུང་སྟེ། གང་སྒྲོན་མ་ཇི་སྙེད་པ་བྱུང་ཞིང་འབྱུང་བ་རྣམས་ཀྱང་གསང་སྔགས་ཀྱི་ངེས་པའི་དེ་ཁོ་ན་ཉིད་མ་རྙེད་པའི་བར་དུ་དཔག་ཏུ་མེད་པའི་དཀའ་བ་སྤྱད་ཀྱང་རྣམ་པ་ཐམས་ཅད་མི་མཁྱེན་མཁྱེན་པར་མི་འགྱུར་རོ། །གསང་སྔགས་ཀྱི་ངེས་པའི་དེ་ཁོ་ན་ཉིད་རྙེད་མ་ཐག་པར་རྣམ་པ་ཐམས་ཅད་མཁྱེན་ཏོ། །མཁྱེན་ནོ། །མཁྱེན་པར་འགྱུར་རོ། །ཞེས་དང་། ཀྱེ་དམན་པའི་ལུས་ཀྱི་སེམས་དཔའ་རྣམས་དེ་བཞིན་གཤེགས་པ་ཐམས་ཅད་ཀྱི་མདའ་འདག་རྡོ་རྗེ་སེམས་དཔའ་ཉིད་ཀྱིས་ཀྱང་གསང་སྔགས་ཀྱི་དེ་ཁོ་ན་ཉིད་མ་རྙེད་ཀྱི་བར་དུ་བསྐལ་པ་གྲངས་མེད་གསུམ་དུ་དཔག་ཏུ་མེད་པའི་དཀའ་བ་སྤྱད་ཀྱང་རྣམ་པ་ཐམས་ཅད་མཁྱེན་པ་མ་མཁྱེན་ནོ། །ཞེས་སོ། །དེ་ལྟར་གསང་སྔགས་ཀྱི་དེ་ཁོ་ན་ཉིད་ལྷན་ཅིག་སྐྱེས་པའི་ཡེ་ཤེས་དང་དངོས་གྲུབ་ཐམས་ཅད་བླ་མའི་བྱིན་རླབས་འབའ་ཞིག་ལ་རག་ལས་པ་ཡིན་པས་དང་པོ་སློབ་དཔོན་གྱི་མཚན་ཉིད་ཤེས་པར་བྱ་བའི་ཚུལ་ལས་སྤང་བྱ་ནི། །དབང་བསྐུར་སློབ་དཔོན་རིམ་གཉིས་གདེངས་དང་བྲལ། བསྟི་གནས་དཀོར་སྤྱོད་མ་བསྡམས་ཁྱིམ་ལ་ཆགས། །སྙིང་རྗེ་ཆུང་དང་རྟོག་གེས་ཟིལ་ནོན་དེས། །དབང་བསྐུར་བྱས་ཀྱང་བེ་སྤྲེལ་གཡང་སར་ལྟུང་། དེ་ལ་དབང་བསྐུར་བྱས་ཀྱང་སངས་རྒྱས་ཀྱི་ས་བོན་ཐེབ་པར་མི་འགྱུར་བའི་སློབ་དཔོན་ངན་པ་ནི་རྣམ་པ་ཐམས་ཅད་མཁྱེན་པའི་ལམ་གྱི་གེགས་ཆེན་པོར་གྱུར་པ་ཡིན་ཏེ། འདི་ལྟར་རང་ཉིད་ཀྱི་དབང་མ་ཐོབ་པར།
གསང་སྔགས་རང་དགར་ལེན་པ་བརྒྱུད་པ་གསུམ་གང་དང་ཡང་མི་ལྡན་པའི་བཅོས་མའི་ཆོས་ཀྱི་དད་ཅན་བསླུ་བའི་གཟུ་ཕུམ་ཅན་དང་། བྱང་ཆུབ་ཀྱི་སེམས་དང་དེའི་རྗེས་སུ་འབྲང་བའི་དབང་དོན་གྱི་ཡེ་ཤེས་ཁོང་དུ་ཆུད་ངེས་པའི་དམ་པའི་སྐྱེས་བུ་བྱུང་སྲིད་ན་སློབ་མའི་རྒྱུད་བྱིན་གྱིས་རློབ་པ་ལ་དོན་གྱིས་མཁས་པ་ཡིན་ཡང་ལས་དང་པོ་པའི་ལྟ་བ་སྣ་ཚོགས་དང་རྟོག་གེའི་འདམ་རྫབ་ལ་ཞེན་ཅིང་ཕྲག་དོག་གི་སྒོ་ནས་དེ་དག་ལ་སྒྲོ་འདོགས་པས་ནག་པོའི་ཆོས་ཉམས་སུ་མྱོང་བ་དང་། བསྐྱེད་རྫོགས་ཟབ་མོའི་དོན་ཁོང་དུ་མ་ཆུད་ཅིང་གདེངས་སུ་མ་གྱུར་པས་རང་ཉིད་སྨིན་པ་དང་གྲོལ་བ་ལས་ཕྱིར་ཕྱོགས་བཞིན་དུ་རྡུལ་ཚོན་གྱི་ལས་དང་ཆོ་གའི་རིམ་པ་ཙམ་ཤེས་པ་ལ་མཁས་པར་རློམ་པ་དང་། རང་གི་ཆེ་བ་ཉམས་སུ་དོགས་ནས་གདམས་པ་ནོད་བའི་སློབ་དཔོན་སྦ་བའམ། འཇིག་རྟེན་གྱི་གྲགས་པའི་རྗེས་སུ་འབྲངས་ནས་རང་འདོད་པའི་ཕྱོགས་ལ་ཁུངས་འབྱིན་པ་ལ་སོགས་ནི་ཉམས་པའི་སྤྱོད་པ་ཆེན་པོ་ཡིན་པས་བཤད་པར་བྱ་བའི་ཆོས་གང་ཞིག་དེ་བཞིན་གཤེགས་པའི་བཀའ་མ་ནོར་ཞིང་མན་ངག་ཆེན་པོ་དང་ལྡན་པ་ཡིན་ཡང་ཆོས་དེས་ལས་དང་དངོས་གྲུབ་ཀྱི་རྒྱུར་རུང་བ་མ་ཡིན་ཏེ་རྒྱུད་ལས། ཕྱི་ནང་གི་དབང་མ་བསྐུར་བར་སློབ་དཔོན་བྱེད་པ་ནི་དམ་ཚིག་གི་ཉམས་པའི་སྤྱོད་པའོ། །མཁས་པ་ལ་མི་མཁས་པར་སྒྲོ་འདོགས་པ་ཡང་དམ་ཚིག་ཉམས་པའི་སྤྱོད་པའོ། །མི་མཁས་པ་མཁས་པར་ཆེ་བ་འབྱིན་པར་བྱེད་པ་ཡང་དམ་ཚིག་ཉམས་པའི་སྤྱོད་པའོ། །བཀའ་ནོད་པའི་སློབ་དཔོན་གྱི་ཁུངས་བསུབས་ནས་རང་དང་པའི་ཕྱོགས་ལ་ཁུངས་འབྱིན་པར་བྱེད་པ་ཡང་ཉམས་པའི་སྤྱོད་པ་ཡིན་ནོ། །ཞེས་སོ། །དེ་བཞིན་དུ་བྱང་ཆུབ་སེམས་དཔའ་
སྔགས་ཀྱི་སྡེ་སྣོད་ནས་མཆོག་དང་ཐུན་མོང་གི་དངོས་གྲུབ་སྣ་གཅིག་བརྙེས་པའི་ཡོན་ཏན་གྱི་བསྐལ་བཞིན་དུ་བདག་ཅག་ནི་འཕགས་པའི་སྤྲུལ་པའམ་རིགས་དང་རུས་དང་ཆོ་འབྲང་གིས་འཚང་རྒྱ་བའི་སྐལ་བ་ཅན་ནོ། །ཞེས་བསྟི་གནས་ཀྱི་དཀོར་དང་སྡེ་རིགས་ལ་སྤྱོད་པས་ཁེངས་ཤིང་སྡོམ་པ་གསུམ་གྱི་གནད་བཀག་གང་ཡང་མི་ཤེས་པས་མ་བསྡམས་པ་དང་། གཅོམ་ཆེན་པོས་གཞན་ལ་ཁྱད་དུ་གསོད་ཅིང་བྱང་ཆུབ་ཀྱི་སེམས་དང་། རྟོགས་པས་རྒྱུད་གྲོལ་བའི་གཞན་དབང་དུ་མ་གྱུར་བས་སློབ་མ་ཚར་གཅོད་པ་ལ་དགའ་ཞིང་རྗེས་སུ་འཛིན་པ་ལ་མི་དགའ་བ་དང་། དངོས་གྲུབ་བརྙེས་པ་ལ་བཀག་པ་མེད་དེ་དེ་ལས་གཞན་དུ་ཁྱིམ་ན་གནས་པ་དང་རྒྱལ་པོའི་བྲན་གཡོག་དང་། བཙོང་གཡོག་ལ་ཞུགས་པ་དག་རྒྱལ་པོའི་བླ་མར་མི་བྱ་བ་དང་། མོས་གུས་ལྷོངས་ན་བཀག་པ་མེད་དེ་དེ་ལས་གཞན་དུ་མིག་འདྲིས་ལ་བརྟེན་ནས་དངོས་གྲུབ་ཀྱི་གེགས་སུ་འགྱུར་བ་ཕ་མ་དང་། ཕོ་ནུའི་སློབ་དཔོན་སོགས་ཀྱང་དུས་འཁོར་གྱི་རྒྱུད་ལས་བཀག་པའི་ཚུལ། རྟེན་ནི་གསུམ་ལས་དགེ་སློང་མཆོག །འབྲིང་ནི་དགེ་ཚུལ་དུ་བརྗོད་དོ། །ཁྱིམ་གནས་དེ་ནི་དག་པའི་མཐའ། །ས་ཐོབ་མིན་པའི་ཁྱིམ་པ་ནི། །རྒྱལ་པོའི་བླ་མར་མི་བྱའོ། །ཞེས་དང་། ཁྱིམ་པ་གཙུག་ལག་ཁང་དཀོར་སྤྱོད། །སློབ་མ་ལ་ནི་གཤེ་ཞིང་སྨོད། །བཙང་གཡོག་ལ་ནི་ཞུགས་པ་དག །དེ་ནི་ས་སྟེང་རྡོར་འཛིན་མིན། །ཞེས་དང་། གཞན་ཡང་དཀོན་ཅོག་དཀོར་ལ་རྔམས་སེམས་ཅན། །ཁྱིམ་ལ་ཆགས་ནས་ནག་ཆང་བསྟེན། །སློབ་མ་འཆལ་ཞིང་ལས་ལ་བརྩོན། །ཚོང་དང་ཁེ་སྤོགས་ལྷུ་རུ་ལེན། །སྙིང་རྗེ་མེད་ཅིང་སྲོག་ཆགས་གསོད། །རབ་བྱུང་འབེབས་ཤིང་བསླབ་པ་འཆལ། །དེ་བསྟེན་དམྱལ་བར་འཕེན་པར་བྱེད། །ཅེས་བསྟི་གནས་སམ་དགོན་པ་ལ་ཁྱིམ་ཀྱི་འདུ་ཤེས་པ་ལྟར་མི་མངོན་པ་
པས་དཀོན་མཆོག་གི་དཀོར་ལ་ཇི་མི་སྙམ་པར་སྤྱོད་པ་དང་། སྡོམ་པ་གསུམ་གྱི་གནང་བཀག་ལེགས་པར་ཤེས་ཤིང་སྤྱོད་པ་དུས་ཚོད་དང་འབྲེལ་བ་མ་ཡིན་བཞིན་པར་གཅིག་ཅར་པ་ཡི་སྨན་ཆེན་དེ། རིམ་གྱིས་པ་ཡི་དུག་ཆེན་ཡིན། །ཞེས་པ་ལྟར་འཁོར་བར་སྐྱེ་བའི་རྒྱུའི་གཙོ་བོ་མ་ལོག་བཞིན་དུ་ཁྱིམ་གྱི་འཚོ་རྩིས་ལ་ཆགས་ནས་སྔགས་ཀྱི་སྤྱོད་པ་རླབས་པོ་ཆེ་འདོད་རྒྱལ་དུ་སྤྱོད་པ་དང་། སློབ་མའི་ཚོགས་ཀྱང་སོ་ནམ་དང་། ཚོང་དང་། ཁེ་སྤོགས་དང་། ཁྱིམ་པ་དང་འདྲིས་ཤིང་བཤེས་པ་དང་། རྒྱལ་པོའི་མངག་གཞུག་པར་བཀོལ་ནས་ཟས་ནོར་ཅུང་ཟད་ཀྱི་དོན་དུ་བསླབ་བ་འཆལ་དུ་འཇུག་ཅིང་། སྲོག་གཅོད་པ་ལ་སོགས་པར་ཅང་མི་མནོ་བར་སྲིད་པའི་མངོན་རྟོགས་འབའ་ཞིག་གཟེངས་གཏོད་པ་ལ་དམ་པའི་ཆོས་སུ་སེམས་པས་ང་རྒྱལ་ཞིང་ཁེངས་པ་གང་ཞིག་དང་འབྲེལ་ནའང་དམྱལ་བའི་ས་མཁན་ཡིན་པས་རྒྱང་ཐག་བསྲིང་ངོ་། །ཞེས་པའི་དོན་ནོ། །མདོར་ན་སྔགས་ཀྱི་ལམ་ནས་དངོས་གྲུབ་ཐོབ་པ་ནི་དམ་པའི་བླ་མ་ཁོ་ནའི་བྱིན་རླབས་ལ་རག་ལུས་པས་སློབ་དཔོན་རང་ཉིད་སྨིན་གྲོལ་གྱི་གོ་འཕང་ལས་གཞན་དུ་གྱུར་བཞིན་དུ་ཁེ་གྲགས་ཀྱི་བསམ་པས་སེམས་ཅན་བསླུས་པའི་ཉེས་པ་ནི་ཚད་མེད་དེ་ཡེ་ཤེས་འཁོར་ལོའི་རྒྱུད་ལས། །དད་ལྡན་གཅིག་བསླུས་སེམས་ཅན་བརྒྱ་བསང་པས། །སྡིག་པ་ཤིན་ཏུ་ཆེ་བར་རྒྱལ་བས་གསུངས། །དེ་ཕྱིར་རང་འདོད་བསླུ་བའི་ཆོས་མི་བཤད། །ཅེས་བཤད་པས་བློ་གྲོས་བླུན་པོ་རྣམས་གཟབ་པར་བྱའོ། །བསྟེན་བྱའི་མཚན་ཉིད་ནི། ཕྱི་ནང་གསང་བའི་དེ་ཉིད་རྣམ་པ་བཅུ། །རིག་ཅིང་རང་ཉིད་གྲོལ་བའི་བླ་མ་ཡིས། །དད་དང་ངོ་ཚ་ཤེས་པའི་སློབ་མའི་རྒྱུད། །བརྟགས་ལ་དབང་བསྐུར་རིམ་པས་བྱིན་པར་བྱ། །དེ་ལ་རྡོ་རྗེ་ཐེག་པའི་དབང་བསྐུར་བ་དང་། དེའི་སྲོག་ཏུ་གྱུར་
པའི་ཕྱི་ནང་གསང་བའི་དམ་ཚིག་རྣམས་ཐོབ་ཅིང་མ་ཉམས་པ་ཕྱི་ནང་གསང་བའི་དེ་ཉིད་བཅུ་ལ་སོགས་པའི་ཆོག་ཟབ་མོས་སློབ་མ་རྗེས་སུ་འཛིན་པ་ལ། སྐུ་གསུང་ཐུགས་ཀྱི་རྡོ་རྗེའི་ཡེ་ཤེས་དང་ལྡན་པས་རིག་པ་འཛིན་པའི་ཐེག་པའི་དོན་ལ་གནས་ཤིང་མན་ངག་གི་མཛོད་དང་ལྡན་པ་ལ་སོགས་པའི་ཡོན་ཏན་ཚང་བ་སྟེ། སྒྱུ་འཕྲུལ་དྲ་བར། སྟོན་པ་མཛོད་ལྡན་ཆུ་བོ་རྫོགས། །མན་ངག་གཉེར་ལྡན་ཐབས་ལ་མཁས། །ཞེས་དང་། སྤྱི་མདོ་ལས། བརྟན་ཞིང་དུལ་ལ་གཡོ་སྒྱུ་མེད། །གསང་སྔགས་རྒྱུད་ཀྱི་སྦྱོར་བ་ཤེས། །དཀྱིལ་འཁོར་བྲི་བའི་ལས་ལ་མཁས། །དེ་ཉིད་བཅུ་ནི་ཡོངས་ཤེས་ཤིང་། །སེམས་ཅན་རྣམས་ལ་མི་འཇིགས་སྦྱིན་། །ཞེས་དང་། རྡོ་རྗེ་མཁའ་འགྲོ་ལས། དུལ་ཞིང་ཞི་བའི་ཆ་བྱད་ཅན། །སེམས་ཅན་རྣམས་ལ་མི་འཇིག་སྦྱིན། །སྦྱོར་དང་བཟོད་དང་ཐབས་དག་དང་། །རྟག་ཏུ་སྦྱིན་ལ་སོགས་དགའ་ཞིང་། །རྣལ་འབྱོར་བསམ་གཏན་མཆོག་ཏུ་བརྩོན། །དེ་ཉིད་བཅུ་པོ་རྣམ་པར་རིག །རྡོ་རྗེ་སློབ་དཔོན་དུ་བསྟེན་ནོ། །ཞེས་སོ། །དེ་ལ་དེ་ཉིད་བཅུ་ནི་རྡོ་རྗེ་སྙིང་པོ་རྒྱན་གྱི་རྒྱུད་ལས། ཕྱིར་བཟློག་གཉིས་ཀྱི་ཆོ་ག་དང་། །གསང་དང་ཤེས་རབ་ཡེ་ཤེས་དང་། །ཁ་སྦྱར་འབྱེད་པའི་ཆོ་ག་དང་། །གཏོར་མ་རྡོ་རྗེའི་བཟླས་པ་དང་། །དྲག་ཤུལ་བསྒྲུབ་པའི་ཆོ་ག་དང་། །རབ་ཏུ་གནས་དང་དཀྱིལ་འཁོར་བསྒྲུབ། །གསང་བའི་དེ་ཉིད་བཅུ་ཡིན་ནོ། །དཀྱིལ་འཁོར་ཏིང་འཛིན་ཕྱག་རྒྱ་དང་། །སྟང་སྟབས་འདུག་སྟངས་བཟླས་བརྗོད་དང་། སྦྱིན་སྲེག་མཆོད་པ་ལས་སྦྱོར་དང་། །སླར་སྡུད་པ་ཡི་རྣམ་པ་ནི། །ཕྱི་ཡི་དེ་ཉིད་བཅུ་ཡིན་ནོ། །ཞེས་པ་ལ་སོགས་པས་བསྟན་པ་བཞིན་ལས་ཕྱིའི་དེ་ཉིད་བཅུ་ནི་རྣལ་འབྱོར་རྒྱུད་མན་ཆད་ཏུ་ཐུན་མོང་ཡིན་ལ། དེ་ལ་ནང་གི་སྒྲ་ཞུགས་པ་ནི་རྒྱུད་སྡེ་ཕྱི་ནང་གི་ཁྱད་པར་དབྱེ་བའི་ངོ་ནས་དྲངས་
པ་དེ་ཉིད་ལས། །ཕྱི་ནང་དབྱེ་བ་ཤེས་པ་ཡིས། །རྒྱུད་ཀྱི་དབྱེ་བ་ཤེས་པར་བྱ། །ནང་དུ་བསྟན་པ་བླ་མ་ལས། །ཡང་དག་བླངས་ཏེ་བསྒྲུབ་པའོ། །ཞེས་སོ། །དེ་ཡང་གསང་སྔགས་ནང་པ་བླ་ན་མེད་པ་གསང་བའི་རྒྱུད་འདིར་ནི་འཇིག་རྟེན་པ་དང་། གྲུབ་མཐའ་པ་ཕལ་ཆེར་གྱི་བློ་ཡུལ་དུ་མི་ཆུད་པའི་ལས་ཀྱི་རང་བཞིན་ཤེས་ན་ཐབས་ཟབ་ལ་རྒྱ་ཆེ་བ་ཁྲོ་བཅུ་ལ་སོགས་པའི་བསྲུང་འཁོར་བསྒོམས་པས་ཕྱིར་བཟློག་པ་དང་། བྲིས་པའི་སྲུང་འཁོར་གྱི་ཕྱིར་བཟློག་པའི་མངོན་སྤྱོད་ཀྱི་ལས་རྣམ་པ་གཉིས་ལྟར་སྣང་འཇིག་རྟེན་པའི་ཀུན་སྤྱོད་དང་མཐུན་པས་མ་དད་པ་སྐྱེ་བའི་ཕྱིར་ཤིན་ཏུ་གསང་ཞིང་སྦ་བའི་གནས་གསང་བ་དང་ཤེས་རབ་ཡེ་ཤེས་ཀྱི་དབང་བསྐུར་གཉིས་ལ་བརྟེན་པའི་སྦྱོར་བ་དང་། དེ་བཞིན་དུ་ཁ་སྦྱོར་དབྱེ་བའི་ཚོགས་སད་པ་སྟེ་སྒྲོལ་བ་དང་། གཏོར་མའི་ཆོ་ག་དང་། རྡོ་རྗེའི་བཟླས་པ་དང་། མ་གྲུབ་པས་བཙན་ཐབས་སམ་སྤོགས་པའི་ཆོ་གས་ལྷ་སད་པ་སྟེ་དྲག་ཤུལ་བསྒྲུབ་པ་དང་། རབ་གནས་དང་དཀྱིལ་འཁོར་བསྒྲུབ་པའི་ཆོ་ག་ཡང་འཁོར་བ་དང་རྣམ་པ་མཐུན་པ་སྲིད་པ་སྐྱེ་བའི་རིམ་པ་དང་སྦྱར་ནས་འདོད་པ་བརྟེན་པ་དང་མངའ་འབྱིན་གྱི་ལས་སོགས་འཇིག་རྟེན་ན་རང་གི་ཆོས་ཉིད་ལ་ངོ་ཚ་བ་གསང་ཞིང་སྦེད་པའི་གནས་མཐའ་དག་ཉམས་སུ་བསྟར་བ་ཉིད་ཀྱིས་ན་གསང་བའི་དེ་ཉིད་བཅུ་ཞེས་བཤད་པ་ཡིན་པར་རིག་པར་བྱ་ཞིང་། ཚུལ་དེ་ལྟ་བུ་ཁོང་དུ་ཆུད་པ་ནི་རྡོ་རྗེའི་ཐེག་པ་བླ་ན་མེད་པ་མངོན་སུམ་དུ་སྟོན་པའི་རྡོ་རྗེའི་སློབ་དཔོན་ཡིན་ལ། དེ་ཙམ་གྱིས་གཟུགས་བརྙན་ཤེས་ཀྱང་མི་ཆོག་པར་འཇིག་རྟེན་པའི་ཀུན་ཏུ་རྟོག་པ་ཅན་གྱི་སེམས་ཉེ་བར་ལེན་པའི་ཕུང་པོ་ལྔ་ལས་ཡང་དག་པར་འདས་པའི་རྟོགས་པས་བདག་རྒྱུད་
གྲོལ་བ་ལ་བརྟེན་པ་གཅེས་ཏེ། ཅིའི་ཕྱིར་ན་རང་མ་སྨིན་པས་གཞན་སྨིན་པར་མི་ནུས་ཤིང་། རང་མ་གྲོལ་བས་གཞན་གྲོལ་བར་མི་ནུས་པས་སོ། །དེ་སྐད་དུ་སམྦུ་ཊར་སློབ་དཔོན་སྨིན་པའི་ལས་ཀྱིས་ནི། །སློབ་མ་ཡོངས་སུ་སྨིན་པར་བྱ། །ཞེས་དང་། ཕྲེང་བར། ཐོག་མར་དཀྱིལ་འཁོར་རྣལ་འབྱོར་བདག །རྡོ་རྗེ་སློབ་དཔོན་རང་ཉིད་བསྒོམ་ཞེས་དང་། རྒྱ་གར་དམ་པས་རང་ཐ་མལ་དུ་སྡད་བས་གཞན་སྨིན་པར་མི་ནུས་ཞེས། །སྨིན་པའི་ཆེད་གང་ཡིན་ན། རྒྱུད་ལ་ཡོན་ཏན་སྐྱེ་བའི་ས་བོན་ཐེབས་ནས་ཆོས་དང་བླ་མ་ལ་རྐྱེན་གང་གིས་ཀྱང་མི་འཕྲོག་པའི་ཡིད་ཆེས་སྐྱེ་ཤིང་། དལ་འབྱོར་རྙེད་དཀའ་ནས་བརྩམས་ཏེ་ལམ་གྱི་ཡོན་ཏན་གློ་རྡོལ་དུ་སྐྱེས་ནས། དབང་པོའི་ཁྱད་པར་གྱིས་ཉིན་ཞག་གམ། ལོ་ཟླ་ལ་སོགས་པ་སྔ་ཕྱིའི་བློ་ལ་ཁྱད་པར་ཆེན་པོ་ཐོབ་པ་མངོན་སུམ་དུ་གཏན་ལ་ཕེབས་པ་ཉིད་ཡིན་ལ། དེ་ལས་གཞན་དུ་སློབ་མའི་རྒྱུད་གོང་ནས་གོང་དུ་དཀྲི་བའི་རྒྱུ་ཅི་ཡང་མ་མཆིས་བཞིན་དུ་ཕུང་པོ་ལྔ་ལ་བདག་ཏུ་རྟོག་པའི་ཀུན་འབྱུང་བ་དང་བཅས་པའི་རྟོག་གེའི་འདམ་རྫབ་ཀྱིས་རྣམ་པར་སྦགས་པའམ། ཀུན་རྨོངས་སྐྱོང་བྱེད་ཀྱི་བརྟུལ་ཞུགས་འཛིན་པ་ལ་དགེ་སློང་རྡོ་རྗེ་འཛིན་པ་དང་། གྲུབ་ཆེན་དུ་བླ་དགས་དཔྱངས་པའི་རྡོ་རྗེ་སློབ་དཔོན་གྱིས་གཟུགས་བརྙན་ཙམ་གྱི་རྫས་དང་འབྱོར་བའི་སྟོབས་དང་། ཆོ་གའི་བཤད་སྦྱར་ཙམ་གྱིས་མངོན་རྟོགས་དོམ་པ་ལ་སྨིན་བྱེད་དུ་འདོད་པ་དང་། དབང་དོན་གྱི་ངོ་བོ་གང་ཡིན་པ་རིག་ཅིང་ཤེས་པ་ལྟ་ཅི་སྨོས། སྔགས་སྡོམ་གྱི་མཚན་ཉིད་ལ་བྲལ་ཐོབ་ཇི་ལྟར་གནས་ཤེས་ནས་སྤང་བླང་བགྱིད་པའི་བློ་ཙམ་ཡང་མ་མཆིས་པ་གང་ཞིག་ཀུ་ཤའི་ཆུན་པོ་དང་། །དར་སྣའི་ཕུར་མ་ཐོབ་པ་ཙམ་ལ་རྒྱུད་སྨིན་པར་འདོད་པ་ནི་ཤེས་པར་རློམ་ཀྱང་མི་ཤེས་པའི་རབ་རིབ་ཀྱིས་བཅིངས་པ་ཡིན་ནོ། །
དེ་སྐད་དུ་པཎྜི་ཏ་སྡོམ་པའི་ཀ་མ་ལ་ཤཱི་ལས་བླ་མའི་བྱིན་རླབས་མ་ཞུགས་ན་ཆོས་ལ་ངེས་ཤེས་མི་སྐྱེ། འཁོར་བ་ལ་བློ་མ་ལོག་ན་ཕན་པ་མེད་པས་གཟུང་འཛིན་དང་བྲལ་མི་སྲིད། གཟུང་འཛིན་འཁོར་བའི་རྒྱུ་ཡིན་ཏེ་བསྟན་ཀྱང་མི་གོ་བའི་སྐལ་མེད་སྙིང་རྗེ་བར་གདའ་ཞེས་གསུངས། བྷཾ་ག་ལའི་པཎྜི་ཏ་བོད་དུ་བྱོན་པའི་དུས་ཙ་ན་གསར་རྙིང་གི་གྲུབ་ཐོབ་རྩོད་པ་དང་བྲལ་བ་རྣམས་ཡོད་པ་ཡིན་ཏེ། བོད་དད་པ་ཆེ་བས་དབང་གི་སྣོད་དུ་རུང་བའི་སློབ་མ་ཡོད་སྲིད་ཀྱང་དབང་བསྐུར་ནུས་ཀྱི་བླ་མ་མི་འདུག་ཅེས་པའང་གནས་དུས་དེར་འདུལ་བའི་བསྟན་པ་ཉམས་དམས་པས་དགོངས་པ་ཅན་དང་། དུས་ད་ལྟ་བ་རྣམས་ལ་ངེས་པ་ཅན་དུ་དགོངས་པ་ཁོ་ན་ཡིན་ནོ། །སློབ་དཔོན་རང་ཉིད་ཀྱིས་དབང་དོན་གྱི་ཡེ་ཤེས་མ་མཐོང་ན་གཞན་རྒྱུད་གྲོལ་བར་མི་ནུས་པས་འདུས་པའི་གཞུང་ལས་ཀྱང་གསང་སྔགས་ལ་གཞོལ་བ་དང་། བསམ་གཏན་ལ་གཞོལ་བའི་བླ་མ་གཉིས་བསྟེན་པར་བྱ་བ་ལ་ཁྱད་པར་མེད་ཀྱང་། བསྒྲུབ་པར་བྱ་བ་ནི་ཕྱི་མ་ཁོ་ནའོ། །ཞེས་བཞེད་པའང་དེའི་རྒྱུད་ཀྱི་རྟོགས་པའི་ཡོན་ཏན་སློབ་མའི་རྒྱུད་ལ་འཕོ་བའི་སླད་དུ་དགོངས་ན། རྫིང་བུ་ན་མ་མཆིས་པ་ཡུར་པ་ལ་འདྲེན་པ་ལ་འཇིག་རྟེན་ན་བཞད་གད་འབྱུང་བ་བཞིན་རང་རྒྱུད་མ་གྲོལ་བའི་བླ་མས་སློབ་མའི་རྒྱུད་བྱིན་གྱིས་རློབ་པར་མི་ནུས་པ་འདི་ནི་དངོས་སམ་ཤུགས་ལ་བསྟན་པའི་ལུང་མང་པོ་ནས་འབྱུང་ཞིང་མངོན་སུམ་ཚད་མ་ཡིན་པའི་ཚུལ་འཇིག་རྟེན་འཛིན་གྱི་ཞུས་པའི་མདོ་ལས་ཀྱང་། འཇིག་རྟེན་འཛིན་གང་སུ་ཞིག་ངས་གསུངས་པའི་ཆོས་ཀྱི་དོན་ཤེས་ཤིང་ཇི་སྐད་གསུངས་པ་བཞིན་དུ་ནན་ཏན་བྱེད་ན། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། སྨྲེ་སྔགས་འདོན་པ་དང་། ཡིད་སློང་བ་དང་། སྡུག་བསྔལ་ལས་རྣམ་པར་
གྲོལ་བར་འགྱུར་རོ། །གང་སུ་ཞིག་ངས་གསུངས་པ་བཞིན་དུ་མི་སྤྱོད་མི་བསྒོམ་ན་གཟུགས་ཀྱི་འཆིང་བས་རྣམ་པར་འཆིང་སྲེད་བའི་འཆིང་བས་རྣམ་པར་བཅིངས་ཏེ། མ་རིག་པ་ལས་མ་ལྡོག་པས་ཉེ་བར་ལེན་པའི་ཕུང་པོ་ལྔ་ལ་ཆགས་སོ། །གང་ཟག་དེ་ཉེ་བར་ལེན་པའི་ཕུང་པོ་ལྔ་ལ་ཆགས་པས་འཁོར་བའི་གཡང་ས་ལས་རྣམ་པར་མ་གྲོལ་ཏོ། །འཇིག་རྟེན་འཛིན་དེ་ལྟ་བས་ན་འཇིག་རྟེན་པ་དག་པ་དང་རྩོད་ཀྱིས་ང་ནི་འཇིག་རྟེན་པ་དག་དང་མི་རྩོད་དོ། །འཇིག་རྟེན་ཞེས་བྱ་བ་གང་ཞེ་ན་འདི་ལྟ་སྟེ། ཉེ་བར་ལེན་པའི་ཕུང་པོ་ལྔ་ལ་ཆགས་པ་ནི་འཇིག་རྟེན་ཞེས་བྱའོ། །གང་ཟག་དེ་ཕུང་པོ་ལྔ་ལ་ཆགས་ཏེ་ཕུང་པོ་ལྔས་རྣམ་པར་གཟིར་བས་ཕུང་པོ་ལྔའི་རང་བཞིན་མི་ཤེས་ཕུང་པོ་ལྔའི་མཚན་ཉིད་སྟོང་པ་ཉིད་དུ་མི་ཤེས་ཏེ་ང་དང་རྩོད་དོ། །གང་ཟག་དེ་སངས་རྒྱས་ཀྱིས་གསུངས་པ་དང་འགལ་བར་བྱེད་དེ། སངས་རྒྱས་དང་རྩོད་པས་ཤིན་ཏུ་ཉམ་ང་བ་ཆེན་པོར་ལྟུང་ངོ་། །གང་སུ་ཞིག་དེ་བཞིན་གཤེགས་པ་འཇིག་རྟེན་ན་བཞུགས་ཀྱང་རུང་། ཡོངས་སུ་མྱ་ངན་ལས་འདས་ཀྱང་རུང་སྟེ། དེ་ལྟར་ཕུང་པོ་ལྔ་ལ་ཡང་དག་པར་མ་ཡིན་པ་དང་སྟོང་པ་ཅི་ཡང་མེད་པ། ཕྱིན་ཅི་ལོག་དང་། མ་རིག་པ་དང་། ཡང་དག་པ་མ་ཡིན་པ་ཀུན་ཏུ་བརྟགས་པ་ལས་སྐྱེས་ཏེ་བུས་པ་སོ་སོ་སྐྱེ་བོ་དག་བསླུས་པ་ཡིན་པར་རྟོགས་ན་ཕུང་པོ་མ་ཡིན་པ་ལ་ཕུང་པོ་ལྔ་དང་འདྲ་བར་ཤེས་སོ། །གང་ཟག་དེ་ནི་སངས་རྒྱས་དང་མི་རྩོད་པ་སྟེ། སངས་རྒྱས་ཀྱིས་གསུངས་པ་དང་འགལ་བར་མི་སྤྱོད་པས་སེམས་ཅན་དམྱལ་བ་དང་། བྱོལ་སོང་དང་ཡི་དྭགས་ཀྱི་སྡུག་བསྔལ་ལས་རྣམ་པར་གྲོལ་བར་འགྱུར་རོ། །འཇིག་རྟེན་འཛིན་སངས་རྒྱས་བཅོམ་ལྡན་འདས་ནི་གང་ཟག་དང་མི་རྩོད་དོ། །རྩོད་པ་ཐམས་ཅད་ཡོངས་སུ་བཅད་པས་སངས་རྒྱས་ཞེས་བྱ་སྟེ། སེམས་ཅན་ཐམས་ཅད་ལ་
ཡང་དག་པའི་ཆོས་སྟོན་ཏོ། །ཞེས་རང་ཉིད་ཀྱིས་ཐོབ་པར་བྱ་བའི་གནས་ཕྱིན་ཅི་མ་ལོག་པ་ཐོབ་ནས་གཞན་ལ་ཆོས་སྟོན་པར་ཞལ་གྱིས་བཞེས་པའི་དོན་ཡིན་ནོ། །ཚུལ་འདིའི་རིགས་པ་ནི་དུས་ཀྱི་འཁོར་ལོས་ཀྱང་གསལ་བར་བསྟན་པ་ཡིན་ཏེ། །དང་པོར་ཡང་དག་བསྟེན་བྱ་བ། །སློབ་དཔོན་ཡང་ནི་དམ་ཚིག་ཅན། །རྡོ་རྗེ་ཐེག་པར་ཡང་དག་གནས། །དེ་ཁོ་ན་ཉིད་ཀྱི་ཚངས་སྤྱོད་ཅན། །བདུད་རྣམས་ཀྱི་ནི་རྡོ་རྗེའི་དབུག །དེ་ཡང་ས་ཡི་སྟེང་དུ་ནི། །རྡོ་རྗེ་སེམས་དཔར་རབ་ཏུ་གྲགས། །ཞེས་པས་དེ་ཁོ་ན་ཉིད་ཀྱི་ཚངས་སྤྱོད་ཅན་ནི་སྔགས་ཀྱི་ཚུལ་ཁྲིམས་རྣམ་པར་དག་པ་ཡིན་པས་དེ་ལ་ནི་རྟེན་གྱི་སྒོ་ནས་མཆོག་དམན་དུ་བྱས་པ་ཁོ་ནར་མ་ངེས་པ་རྟོགས་པས་རང་རྒྱུད་གྲོལ་བའི་དོན་ཏེ། བྲམ་ཟེ་ཆེན་པོས་ཀྱང་། ཧེ་རུ་ཀ་དཔལ་དགེ་སློང་མཆོག །ཅེས་བཤད་པ་ལྟར། འདི་ལྟར་སློབ་དཔོན་དེའི་རྒྱུད་རྡོ་རྗེ་ཐེག་པའི་དམ་ཚིག་དང་བརྟུལ་ཞུགས་ལ་དབང་མ་ཐོབ་ནས་སྡོམ་གསུམ་རྫས་འགལ་བའི་ཀུན་ཏུ་རྟོག་པས་ཟིལ་གྱིས་ནོན་པ་མ་ཡིན་པར་ཆོས་ཐམས་ཅད་ངོ་བོ་ཉིད་མེད་པར་རྟོགས་པའི་བདེན་པ་མངོན་དུ་གྱུར་ནས་འདུ་ཤེས་ལ་སོགས་པའི་ཕུང་པོ་ལྔ་ལས་རྣམ་པར་གྲོལ། སྡོམ་པ་དང་སྡོམ་པ་མ་ཡིན་པ་མ་ཡིན་པའི་རྟོག་དཔྱོད་ལས་ཡང་དག་པར་འདས་པའི་དངོས་པོའི་གནས་ལུགས་ཇི་ལྟ་བ་བཞིན་རྟོགས་པ་ནི་དེ་ཁོ་ན་ཉིད་ཀྱི་ཚངས་པར་སྤྱོད་པ་སྟེ། སྡུད་པ་ལས། འདུ་ཤེས་འདོད་ཆགས་བྲལ་ལ་སྡོམ་མིན་ག་ལ་ཡོད། ཅེས་སོ། །འོ་ན་དུས་ཀྱི་འཁོར་ལོ་ལས། རྟེན་ནི་གསུམ་ལས་དགེ་སློང་མཆོག །ཅེས་པ་ལ་སོགས་པ་གོང་དུ་དྲངས་མ་ཐག་པ་དག་དང་འགལ་ལོ་སྙམ་ན་དེ་ནི་རྒྱལ་པོ་དང་བློན་པོ་ཕལ་ཆེར་སྡོམ་མིན་རྒྱུད་ལྡན་གྱི་གང་ཟག་ཡིན་པས་དེ་དག་སྔགས་ཀྱི་ལམ་རྣལ་མས་
གྲོལ་བ་འབའ་ཞིག་དོན་དུ་གཉེར་བའི་བློ་དང་མི་ལྡན་པ་ཆོས་ཅན། །རྒྱུ་དེས་གནས་སྐབས་ཙམ་གྱི་དངོས་གྲུབ་ལ་དམིགས་པས་དད་པའི་རྗེས་སུ་འབྲང་བ་ཡིན་ན་བསྟན་པ་ལ་གུས་པ་བསྐྱེད་པའི་ཕྱིར་རྟགས་ཅན་འབའ་ཞིག་ཡོན་གནས་ཀྱི་དམ་པར་བསྔགས་ཤིང་། སྔགས་ཀྱི་གཟུགས་བརྙན་ཙམ་ལ་སྦྱོར་བའི་སློབ་དཔོན་དུ་ཡང་ཁུངས་འབྱིན་པ་ཙམ་ཞིག་གོ །ཅིའི་ཕྱིར་ན་དེ་དག་གིས་སྡོམ་པ་གསུམ་རྫོགས་པར་འཛིན་མི་ནུས་པ་ཆོས་ཅན། གལ་ཏེ་དེ་ལྟར་མི་འདོད་ན་འགྲེལ་ཆེན་དྲི་མེད་འོད་ལས། དམ་ཚིག་འདི་ནི་སྡོམ་བརྩོན་རྣམས་ལ་བྱིན་གྱིས་ཁྱིམ་པ་རྣམས་ལ་མ་ཡིན་ཏེ། ཁྱིམ་པ་རྣམས་ནི་བྱ་བ་མང་བས་བསྒྲུབ་མི་ནུས་པའི་ཕྱིར། དབང་འདི་སྡོམ་བརྩོན་རྣམས་ལ་བསྐུར་གྱི་ཁྱིམ་པ་རྣམས་ལ་མ་ཡིན་ཏེ་ཁྱིམ་པ་རྣམས་ནི་སྤོང་སེམས་ལ་དབང་མ་ཐོབ་པས་མཆོག་ཏུ་མི་འགྱུར་བའི་བདེ་བ་ལས་ཉམས་པའི་ཕྱིར་རོ་ཞེས་པའང་དྲན་པར་བྱའོ། །འོན་ཀྱང་དེང་སང་ལྔ་བརྒྱའི་ཐ་མ་ལ་བསྟན་པ་ཉམས་དམས་པས་རྒྱུད་ནས་ཇི་ལྟར་བཤད་པའི་མཚན་ཉིད་མཐའ་དག་ཚང་བ་དང་། ཁྱད་པར་དབང་དོན་གྱི་ཡེ་ཤེས་མཐོང་བ་མ་རྙེད་ན་གཟུགས་བརྙན་འདྲ་རུང་ཙམ་དུ་སྤྱོད་པའི་གསང་སྔགས་ལ་རྟེན་གྱི་སྒོ་ནས་ཀྱང་དགེ་སློང་རྡོ་རྗེ་འཛིན་པ་ཉིད་མཆོག་ཏུ་གྱུར་པར་བཤད་པ་ནི་བསྟན་པ་ལ་ཆེ་བ་བཞག་པའི་སླད་དུ་དགོངས་པ་ནི་འདོད་དུ་རུང་སྟེ་དོན་གྱི་ཆ་ནས་ས་ཐོབ་པ་ཉིད་ལ་གཙོ་བོར་བཟུང་བ་ཉིད་ཀྱི་ཕྱིར་རོ། །དེ་བཞིན་དུ་བུར་གྱི་བརྒྱད་པ་ལས་ཀྱང་། རྩ་བའི་ལྟུང་བ་རབ་འཇོམས་ཤིང་། །སྔགས་དང་རྒྱུད་ཀྱིས་རབ་སྦྱོར་གྱིས། །འཇིག་རྟེན་རྣམས་ལ་བདེ་སྟེར་བ། །དེ་འདྲའི་བླ་མ་དངོས་བྱས་ལ། །ཞེས་པས་རྡོ་རྗེ་
སློབ་དཔོན་གྱི་མཚན་ཉིད་དུ་སྔགས་རྒྱུད་ཀྱི་ཆོ་ག་ལ་མཁས་ཤིང་བསྙེན་པས་བདག་རྒྱུད་དག་པ། རྩ་ལྟུང་དང་སྦོམ་པོའི་ལྟུང་བ་སྤངས་པ་ཁོ་ན་བཤད་དེ། དམ་ཚིག་དང་སྡོམ་པ་ཡང་འབོགས་པ་པོ་ལ་ནི་ལྷག་པར་ལྡན་དགོས་པའི་ཕྱིར་རོ། །དེ་ལྟ་ན་ཡང་སངས་རྒྱས་རྣམས་ནི་འགྲོ་བ་གདུལ་བའི་ཚུལ་ལ་ཐབས་མཁས་ཤིང་ཐུགས་རྗེ་ཆེན་པོ་དང་ལྡན་པ་ཡིན་པས་ངེས་པའི་དོན་དུ། འདུལ་བྱེད་ཀྱི་སློབ་དཔོན་ཡང་མཐའ་གཅིག་ཏུ་མི་བཟུང་སྟེ། སངས་རྒྱས་རང་ཉིད་ཀྱི་གདུལ་བྱར་རེ་ཞིག་དུས་ལ་མ་བབ་པ་ཉན་ཐོས་ཀྱི་གདུལ་དུ་རུང་བར་འཆོས་པ་དཔེར་ན་རྒྱལ་པོ་ཟས་གཙང་མ་ཉིད་དགེ་སློང་འཆར་ཀས་གདུལ་བའི་སྐབས་བཙལ་བ་ལྟ་བུ་དང་། སློབ་མ་དབང་པོ་མཆོག་སྔགས་ཀྱི་སྤྱོད་པ་འབའ་ཞིག་ལ་མོས་པ་དེ་འདུལ་འཛིན་གྱིས་གདུལ་བར་མི་ནུས་པས་ཁྱིམ་པ་རྡོ་རྗེ་འཛིན་པ་བསྟན་ནས་སྔགས་ཀྱི་ལམ་འཇུག་པ་བདེ་ཞིང་དུས་མྱུར་བས་མཚན་ཉིད་ཐེག་པའི་ལམ་ཕལ་མོ་ཆེ་སྔགས་ལམ་འབའ་ཞིག་གིས་གཅིག་ཆར་བགྲོད་ནས་དོན་དང་འབྲས་བུ་གཅིག་ཏུ་འབྱོར་བར་མཛད་པ་ནི་རྒྱལ་པོ་ཨིནྡྲ་བྷཱུ་ཏི་ཆགས་བྲལ་གྱི་ལམ་ལ་མི་མོས་པས་འདམ་བུའི་ཚལ་ནི་ཉམས་དགའ་བར། །ཝ་སྐྱེས་ཉིད་དུ་གྱུར་ཡང་སླ། །འདོད་ཡོན་སྤངས་པའི་དཀའ་ཐུབ་ནི། །ནམ་ཡང་མི་ནུས་གཽ་ཏ་མ། །ཞེས་ཞུས་པས་སྟོན་པ་ཆགས་བྲལ་གྱི་རྣམ་པ་བསྒྱུར་ནས་རྡོ་རྗེ་བཙུན་མོའི་སྒྱུ་མ་དང་བཅས་པས་འདུས་བའི་རྒྱུད་བསྟན་པ་བཞིན་ནོ། །ཡང་སློབ་མ་བཙན་ཚུགས་ཅན་ལ་མོས་པའམ། དྲང་སྲོང་ཉི་མའི་ཤིང་རྟ་ཅན་ལྟ་བུ་བློ་ཆུང་ཞིང་། རྒྱུ་འབྲས་དག་གྲོལ་དུ་འཛིན་པ་གང་ཞིག་ཁྱིམ་པའི་རྟེན་ཅན་གྱིས་མི་ཐུལ་བས་དགེ་སློང་རྡོ་རྗེ་འཛིན་པ་མཆོག་ཏུ་བཤད་ཅིང་། ཁྱད་པར་དུས་
ཀྱི་འཁོར་ལོ་ལས་རྒྱལ་པོའི་བླ་མ་ནི་ས་ཐོབ་པ་ཡིན་ན་མ་གཏོགས་དེ་ལས་གཞན་དུ་དགེ་སློང་རྡོ་རྗེ་འཛིན་པ་བསྟན་པའི་དགོས་པའང་། སྔགས་ཀྱི་སྡེ་སྣོད་ལ་མོས་པས་སྤྱོད་པའི་གང་ཟག་དང་རྒྱུད་ལྡན་ཙམ་དུ་གཉིས་ཀ་མཚུངས་ན་སངས་རྒྱས་ཀྱི་བསྟན་པ་ནི་ཕྱི་ཚུལ་ལ་རྟགས་ཀྱིས་ཆེ་བ་ཡིན་པས། ལུས་ངག་གི་སྡོམ་པ་གཟུགས་ཅན་དང་འགལ་བར་མི་སྤྱོད་པ་གང་ཞིག་འཇིག་རྟེན་ན་དཀོན་མཆོག་གི་དངོས་པོར་མཐུན་སྣང་གྲུབ་པར་གྲགས་པའི་ཕྱིར་ན་བསླབ་པ་ལ་གུས་པ་ལ་སོགས་པའི་གང་ཟག་གཞན་གྱི་ཁུར་དུ་མི་འགྲོ་ཞིང་། ཉེས་ལྟུང་བསླབ་བྱ་དང་བཅས་པའང་དམ་པའི་ཆོས་འདུལ་བའི་སྡེ་སྣོད་ལས་ཤེས་དགོས་པས་བསྟན་པ་ལ་ཐོད་རྒལ་དུ་འཇུག་པའི་ཉེས་དམིགས་དང་བླང་དོར་ཤེས་ཤིང་། རྒྱལ་པོ་ནི་ཁམས་དང་མངའ་རིས་དང་བཅས་པ་ཡིན་པས་བསྟན་པ་ཡུན་དུ་གནས་པ་དང་། དཀོན་མཆོག་གསུམ་ལ་བླ་མར་བྱ་བའི་རིམ་གྲོ་དུས་ལས་མི་ཡོལ་བའི་སླད་དུ་དགོངས་པའང་ཡིན་ནོ། །ཚུལ་དེ་ལྟ་བུས་དབང་ནོད་པའི་སློབ་དཔོན་གྱི་མཚན་ཉིད་བསྟན་ནས་བསྐུར་དུ་རུང་བའི་སློབ་བུའི་སྣོད་བརྟག་པ་ནི་ཤིན་ཏུ་གཅེས་ཏེ། བླ་མ་ལྔ་བཅུ་པ་ལས། །བླ་མ་དང་ནི་སློབ་མ་དག །མཚུངས་པར་དམ་ཚིག་ཉམས་འགྱུར་བས། །དཔའ་བོས་དང་པོར་སློབ་དཔོན་དང་། །སློབ་མའི་འབྲེལ་པ་བརྟག་པར་བྱ། །ཞེས་པས་སློབ་དཔོན་ཕན་ཚུན་འབྲེལ་པ་ལེགས་པར་མ་བརྟགས་པར་གསར་ངས་སམ། ཐུགས་ཕྲད་དུ་སྤྱོད་པས་རྡོ་རྗེ་ཐེག་པའི་དབང་ཟབ་མོ་བསྐུར་ཐོབ་བྱས་ན་ལོག་པའི་བཤེས་གཉེན་དང་ཕྲད་པས་སློབ་མའི་དོན་ཉམས་པའི་ཚུལ་སྔར་ཡང་བཤད་ལ། སློབ་མ་སྣོད་ངན་ལ་མན་ངག་བྱིན་ན་སློབ་དཔོན་གྱི་དངོས་གྲུབ་ཀྱང་ཉམས་ཤིང་ཇི་ལྟར་བསྒོས་ཤིང་གཉེར་དུ་གཏད་པའི་དམ་ཚིག་རྣམས་བསྲུང་བར་མི་ནུས་པས་
དངོས་གྲུབ་ཀྱི་རྩ་བ་ཆད་ནས་ཚེ་འདིར་གེགས་ཀྱི་འཚེ་བ་དང་ཚེ་ཐུང་བ་ལ་སོགས་པའི་ཉེས་དམིགས་མང་པོ་དང་། ཕྱི་མ་ངན་སོང་དུ་ལྟུང་བ་ལ་སོགས་པའི་ཉེས་པ་ཆེན་པོ་འཐོབ་པས་ཕན་ཚུན་ཉམ་འོག་ཏུ་ཆུད་ཆུད་ཡུན་བསྲིངས་ནས་བརྟག་པའི་ཚུལ་ཕྲེང་བ་ལས། ཇི་ལྟར་རིན་ཆེན་བརྡར་བ་དང་། །གསེར་ནི་བསྲེག་དང་གཅད་པས་བརྟག །དེ་བཞིན་དུ་ནི་སློབ་མ་ཡང་། །ལོ་ནི་བཅུ་གཉིས་བར་དུ་བརྟག །དེ་ཕྱིར་ཕན་ཚུན་དེ་ལྟ་བུས། །དུས་ཀུན་ཏུ་ནི་དེ་ལྟར་བརྟག །གཞན་དུ་གེགས་ནི་འབྱུང་འགྱུར་ཏེ། །དངོས་གྲུབ་འཇོམས་ཤིང་སྡུག་བསྔལ་སྟེར། །ཞེས་སོ། །དེ་ལ་སློབ་མ་བརྟག་པའི་གནས་རྒྱུད་སྡེ་རྣམས་ནས་མང་དུ་གསུངས་ཀྱང་གསང་བའི་མན་ངག་བྱིན་པར་འོས་པ་ནི་གཅིག་ཏུ་དད་པ་དང་ལྡན་པ་དང་། གཉིས་སུ་ངོ་ཚ་ཁྲེལ་ཡོད་ལྡན་པ་ཁོ་ན་ཡིན་ཏེ། དད་པ་མེད་ན་དམ་ཚིག་ལ་གཡར་ཁྲལ་འཇལ་ཀྱང་བྱིན་རླབས་འཇུག་པའི་མཚམས་མི་སྦྱོར། །ངོ་ཚ་དང་ཁྲེལ་ཡོད་མེད་ན་ཉམས་པ་སླ་ཞིང་སོར་ཆུད་པ་དཀའ་བ་ནི་མཐོང་ཆོས་སུ་གྱུར་པ་ཡིན་ལ། མཚན་ཉིད་དམིགས་བསལ་གྱི་སྒོ་ནས་བརྟག་པ་ནི་རྡོ་རྗེ་མཁའ་འགྲོ་ལས། །ཁྲོ་དང་བཅས་ཤིང་རྟོག་གེར་གུས། །ན་སོ་དག་ནི་ཡོལ་བ་དང་། །གང་ཡང་དགེ་སློང་དངོས་གནས་དང་། །ཞེན་དང་ཆགས་པས་བཅིངས་པ་ལ། །རིན་ཐང་མེད་པའི་རིན་ཆེན་ནི། །དེ་ལ་སྦྱིན་པར་མི་བྱའོ། །གང་ཡང་ང་རྒྱལ་མེད་པ་དང་། །རྒྱུ་མེད་བདག་ཏུ་མི་འཛིན་ཞིང་། །དེ་བཞིན་ཆོས་ལ་མངོན་པར་དགའ། །དེ་ལ་མན་ངག་བྱིན་པར་བྱ། །གཞན་དུ་ན་ནི་ལྟུང་བར་འགྱུར། །ཞེས་སོ། །དེ་ལ་རྒྱུད་ཁྲོ་ཞིང་གཏུམ་པ་ལ་ཉེས་ལྟུང་གི་ཆར་བ་འབབ། །རྟོག་གེ་ལ་དགའ་ན་འགལ་བ་དང་ཐེ་ཚོམ་མང་དུ་འདུ་
བས་ཡོན་ཏན་ལ་སྒྲིབ། ན་སོ་ཡོལ་ན་རྩ་རླུང་ཐིག་ལེའི་སྟོབས་བྲིབས་གསང་སྔགས་ཀྱི་ཡོན་ཏན་མི་སྐྱེ་ཉན་ཐོས་ཀྱི་དགེ་སློང་དངོས་གནས་པ་ནི་ཐེག་པ་ཆེན་པོ་སྤྱི་དང་བྱེ་བྲག་ལ་ཡིད་གཉིས་དང་བཅས་ཤིང་ཆོས་རྣམས་ལ་དངོས་པོར་ཞེན་པའི་དབང་དང་། ལུས་ངག་གི་ལས་ཀྱི་དངོས་པོས་བསྡུས་པའི་བྱ་བ་དང་བྱ་བ་མ་ཡིན་པ་ལ་འཇུག་པ་དང་ལྡོག་པའི་མཚན་ཉིད་གཙོ་བོར་འཛིན་པས་དབང་དང་དམ་ཚིག་གི་སྣོད་དུ་རུང་བར་དཀའ་ཤིང་། སྔགས་ཀྱི་ཐབས་ལ་མཁས་པའི་དོན་དཔྱིས་ཕྱིན་པར་མི་གོ་བ་དག་གོ །ཞེན་ཅིང་ཆགས་པ་ནི་ཉོན་མོངས་བའི་གཞན་དབང་ཁོ་ནས་སེམས་སོར་མི་ཆུད་པའོ། །དེ་དག་ལས་ལྡོག་ཅིང་ང་རྒྱལ་མེད་པས་དད་པའི་ཉེ་བར་ལེན་པ་དང་ལྡན་པ་ངོ་ཚ་ཤེས་ཤིང་ཁྲེལ་ཡོད་པས་སྔགས་ཀྱི་སྡོམ་པ་དང་དམ་ཚིག་གཟུང་བར་རུང་ན་རིགས་དང་གཟུགས་དང་དབང་ཕྱུག་ལའང་ལྟོས་པ་མ་ཡིན་པའི་ཕྱིར། ཆོས་དང་ཆོས་ཀྱི་གང་ཟག་རྣམས་ལ་མངོན་པར་གུས་པ་ཉིད་གཙོ་བོར་གཟུང་སྟེ། ཕྲེང་བ་ལས་ལེགས་པར་བརྟགས་པ་ང་རྒྱལ་ལ་སོགས་པའི་སྐྱོན་དང་བྲལ་བ། དགེ་བསྙེན་ལ་སོགས་པའི་བསླབ་པ་ལ་གནས་པ། ཐོས་པ་ལ་སོགས་པས་ཡོངས་སུ་སྦྱངས་པ་དང་ལྡན་པ། རྡོ་རྗེ་སེམས་དཔའི་སྡོམ་པ་ཡོངས་སུ་གཟུང་བར་རུང་བ་རྣམས་ནི་རིགས་དང་མངག་དང་གཟུགས་དང་བྲལ་བ་རྣམས་ཀྱང་ལྷག་པར་གནས་པར་བྱ་སྟེ། གལ་ཏེ་དེ་རྣམས་ཀྱང་དད་པས་རྡོ་རྗེ་སེམས་དཔའི་སྡོམ་པ་དོན་དུ་གཉེར་ཞིང་རྡོ་རྗེ་ཐེག་པ་ལས་སྟོན་པ་གཞན་མི་འཚལ་བར་གྱུར་ནས་སོ་ཞེས་སོ། །འོན་ཀྱང་སྒྲིབ་པ་སྦྱོང་བ་དང་གདོད་ཀྱིས་རྟེན་འབྲེལ་སྒྲིག་པའི་སླད་དུ། དཀྱིལ་འཁོར་དུ་འཇུག་པ་ཙམ་ལས་གཞན་དུ་སྔགས་སྡོམ་གྱི་རང་བཞིན་གང་ཡིན་པ་གཟུང་མི་ནུས་པས་དབང་དངོས་གཞི་ཐོབ་པའི་སྐལ་བ་དང་
མི་ལྡན་པ་དག་ལ་ནི་བརྟག་པ་སྔོན་དུ་བྱ་མི་དགོས་ཏེ། དེ་ནི་དཀྱིལ་འཁོར་དུ་འཇུག་པ་ཙམ་ལས་དབང་དངོས་བསྐུར་དུ་མི་རུང་བའི་ཕྱིར་དམ་བཞག་དང་སྡོམ་བཟུང་བྱེ་བྲག་པ་རྣམས་ཀྱང་མི་བྱའོ། །དེ་སྐད་དུ་རྡོ་རྗེ་འབྱུང་བ་ལས། གང་ཞིག་སྡོམ་པ་འཛིན་པར་མི་བྱེད་པ་དེ་ལ་ནི་དང་ཁྱོད་ཅེས་བྱ་བ་ལ་སོགས་པ་རྣམས་བརྗོད་པར་མི་བྱ་སྟེ་སློབ་དཔོན་དུ་རྗེས་སུ་གནང་བ་དང་དབང་བསྐུར་བར་མི་བྱའོ། །འཇུག་པ་ཙམ་ཞིག་བྱེད་དུ་གཞུག་གོ །ཞེས་པའི་དོན་འདི་སློབ་དཔོན་སངས་རྒྱས་གསང་བའི་རྣམ་སྣང་མངོན་བྱང་གི་འགྲེལ་པ་ལས་ཡང་ཤིན་ཏུ་མཐུན་ལ། དེས་མཚོན་ནས་བྱང་ཆུབ་སེམས་དཔའི་སྡོམ་པ་ཙམ་བསྲུང་གི་སྔགས་ཀྱི་སྡོམ་པ་བྱེ་བྲག་པ་བསྲུང་མི་ནུས་པ་ལ་སློབ་མའི་དབང་ཙམ་དང་། དེ་གཉིས་ཀ་བསྲུང་ནུས་ན་སློབ་དཔོན་གྱི་དབང་ཡང་བསྐུར་བར་རུང་གིས་དེ་ལྟར་སྤོང་སེམས་ལ་དབང་ཐོབ་མ་ཐོབ་ཀྱི་སྒོ་ནས་སློབ་མ་བརྟག་པའི་རིགས་པ་མ་ཤེས་ན་རྡོ་རྗེ་སློབ་དཔོན་གྱི་གཟུགས་བརྙན་དུ་རྣམ་པར་འཁྱམས་ཤིང་གཞན་རྒྱུད་ལའང་ཉེས་པའི་ཚོགས་ཆེན་པོ་འདུ་བྱེད་དོ། །དེ་ལྟར་དཔོན་སློབ་ཀྱི་རྟེན་འབྲེལ་ཚོགས་པའི་གནས་སྐབས་སུ་སླ་ཆོས་དང་ཞར་བྱུང་ལྟ་བུས་དབང་རྣམས་བཙན་ཐབས་སམ། གོང་འོག་རྣམས་གཅིག་ཅར་དུ་ཞུས་ཐོབ་མི་བྱ་བར་ལོ་ཟླའི་གོང་ནས་སྙན་གསན་དབབ་པ་དང་བཅས་ཤིང་། ཐ་ནའང་ཞག་གིས་བར་ཆོད་པའི་གསོལ་བ་དུས་གསུམ་དུ་གདབ་བའི་མཐར་བསྐུར་བའི་ཚུལ་བླ་མ་ལྔ་བཅུ་པ་ལས། མཆོག་ཏུ་དད་པས་དུས་གསུམ་དུ། །མཎྜལ་མེ་ཏོག་བཅས་ཐལ་མོས། །སྟོན་པ་བླ་མ་བསྙེན་བསྐུར་ཞིང་། །ཞབས་ལ་སྤྱི་བོས་ཕྱག་བྱའོ། །ཞེས་སོ། །ཇི་ལྟར་བསྐུར་བའི་སྦྱོར་བ་ལ། བསྙེན་པ་དང་ནི་ས་ཡི་ཆོ་ག་དང་། །སྟ་གོན་དང་ནི་སློབ་མ་
འཇུག་ཅིང་སྨིན། །མངོན་རྟོགས་བཞི་པོ་རེ་རེ་ཉིད་ལ་ཡང་། །བཞི་བཞིར་རྫོགས་པའི་ཡན་ལག་མ་ཚང་ན། །ཆོ་ག་ཉམས་པས་སྨིན་པར་ནུས་མ་ཡིན། །དེ་ལ་སོ་སོ་སྐྱེ་བོའི་རྒྱུད་ལྡན་གྱི་སློབ་དཔོན་རྣམས་ཀྱིས་ནི་ཆོ་ག་ཕྲ་མོ་ཉམས་པ་ལས་ཀྱང་བྱིན་རླབས་དང་དངོས་གྲུབ་ཀྱི་གནས་ལ་སྒྲིབ་པར་བྱེད་ན། ཆོ་གའི་རྩ་བ་ཉམས་ན་བྱིན་རླབས་མི་འབྱུང་བས་ཐོག་མར་སློབ་དཔོན་རང་ཉིད་ཀྱི་རྒྱུད་དག་པར་བྱེད་པའི་བསྙེན་པ་དང་། བདག་པོས་གཟུང་བའི་གཞི་ལ་དབང་མི་ཟ་བ་སའི་ཆོ་ག་དང་། དཀྱིལ་འཁོར་དང་སློབ་མའི་ལས་ལ་ཐོད་རྒལ་དུ་མི་འཇུག་པ་སྟ་གོན་གྱི་རིམ་པ་དང་། འཇུག་པ་སྔོན་དུ་བཏང་ནས་ཞུགས་པ་ལ་དབང་བསྐུར་བའོ། །དང་པོའི་ཡན་ལག་བཞི་ནི། སྐྱེ་གནས་རྣམ་པ་བཞིའི་བག་ཆགས་སྦྱོང་བྱེད་ཀྱི་མངོན་རྟོགས་གང་རུང་ལ་ལྟོས་ནས་བསྐྱེད་གཞིའི་ཏིང་འཛིན་གསུམ་བསྒོམ་པ་ནི་བསྙེན་པའོ། །དེ་ལས་བདག་ཉིད་ལྷར་བསྐྱེད་པ་ནི་ཉེ་བར་བསྙེན་པའོ། །ཡུམ་དང་བཅས་པའི་སྐྱེ་མཆེད་དང་མཁའ་གསང་བྱིན་གྱིས་བརླབས་པ་ལ་སོགས་པ་ནི་བསྒྲུབ་པའོ། །དེ་ལ་ཡེ་ཤེས་པ་དགུག་གཞུག་བྱ་ཞིང་དབང་བསྐུར་རྒྱས་གདབ་ལ་སོགས་པ་ནི་བསྒྲུབ་པ་ཆེན་པོ་སྟེ། ཕུར་པ་རྣལ་འབྱོར་ཆེན་པོའི་རྒྱུད་ལས། སྤྱིར་ན་གསང་སྔགས་ངེས་པ་ལ། །ཏིང་འཛིན་གསུམ་བསྐྱེད་བསྙེན་པ་ཡིན། །བདག་ཉིད་ལྷར་བསྐྱེད་ཉེ་བསྙེན་ཏེ། །ཡུམ་བསྐྱེད་བསྒྲུབ་པར་ཤེས་པར་བྱ། །གཞན་རྣམས་བསྒྲུབ་པ་ཆེན་པོ་ཡིན། །ཞེས་དང་། དེའི་ཚེ་བཟླས་བརྗོད་ལ་གྲངས་དུས་ཀྱི་བསྟེན་པའི་ཚང་ཀྱང་སྡོམ་འབྱུང་ལས། དཀྱིལ་འཁོར་བདག་པོའི་བཟླས་པ་འབུམ། །རྩོད་དུས་སུ་ནི་བཞི་འགྱུར་རོ། །ཞེས་པའི་བཞི་འབྱུང་ནི་གཞིའི་བསྙེན་པ་དང་། དངོས་གྲུབ་བསྒྲུབ་པའི་གནས་སྐབས་གཉིས་ལ་འདོད་ཚུལ་ཐ་དད་པ་ཡོད་དོ། །ཇི་ལྟར་ཡང་ཕྲེང་བ་ལས། ཡང་ན་རང་གི་ལྷ་ཡི་
འབུམ། །དཀྱིལ་འཁོར་བ་ཡི་ཁྲི་ཡིན་ཏེ། །ཞེས་པས་འཁོར་ལ་བཅུ་ཆ་དང་། ཐུན་མོང་དུ་ཡེ་ཤེས་འབེབས་སྔགས་ཁྲི་ཕྲག་གཅིག་རྣམས་སོ། །ཚུལ་དེ་ལྟ་བུ་ས་གཞིའི་བསྙེན་པ་མཐར་སོན་ནས་ས་ཚྭ་གདབ་པ་དང་། ཆུ་སྦྱིན་དང་། ཚོགས་གཏོར་དང་ཡེ་ཤེས་འབེབས་སྔགས་ཀྱི་བཅུ་ཆའི་སྦྱིན་སྲེག་གི་ཁ་སྐོང་དང་བཅས་པའང་མེད་ཐབས་མེད་ཅིང་། ད་ལྟར་གཞིའི་བསྙེན་པ་ནི་རྡོ་རྗེའི་མཁར་དུ་མི་ཤིགས་པའི་སྐུ་བསྐྱེད་པ་ཞེས་བྱ་སྟེ་ཚོགས་བསག་པ་དང་བགེགས་ཉམས་པར་བྱེད་པའི་ཕྱིར། དབང་གི་སྔོན་དུ་མེད་དུ་མི་རུང་བའི་ཚུལ་དཔལ་ལྡན་སྡོམ་པ་ལས། སྔོན་དུ་བསྙེན་པ་མ་བྱས་ན། །སློབ་དཔོན་བདག་ཉིད་སུན་འབྱིན་ཡིན། ཞེས་ལྷ་མཉེས་པར་བྱ་བའི་བསྙེན་པ་མ་གྲུབ་ན་ཉེས་དམིགས་ཆེན་པོ་བཤད་ཅིང་། གྲུབ་པའི་ཕན་ཡོན་ནི། གདན་བཞི་ལས། །སྔོན་དུ་བསྙེན་པ་བྱས་ནས་སུ། །དེ་འོག་ལས་ཤིག་བརྩམས་ན་ནི། །འགྲུབ་འགྱུར་འདི་ལ་ཐེ་ཚོམ་མེད། །ཞེས་སོ། །གཉིས་པ་ས་ཆོག་གི་ཡན་ལག་བཞི་ནི། །དཀྱིལ་འཁོར་གྱི་ཁང་པ་རྙིང་པར་བྱེད་པ་མང་བས་ས་བརྟག་པ་དར་བའི་ལུགས་སོ། །འོན་ཀྱང་འདིར་ས་བརྟག་པ་དང་། བླང་བ་དང་། སྦྱང་བ་དང་། བཟུང་བ་དང་། བསྲུང་བ་ལྔ་དཀྱུས་སུ་བཤད་པའི་དང་པོ་དཀྱིལ་འཁོར་བྱ་བར་རུང་བ་དང་མི་རུང་བའི་གནས་ཕྱོགས་དང་མཚན་ཉིད་ཀྱི་སྒོ་ནས་བརྟག་པ་ནི། རྡོ་རྗེ་མཁའ་འགྲོ་ལས། གྲོང་དང་དུར་ཁྲོད་ཚོང་འདུས་དང་། ཚལ་དང་ལྷ་ཁང་གྲོང་ཁྱེར་གྱི། །ཤར་དང་བྱང་གི་ས་གཞི་ཤིས། །ལྷོ་དང་ནུབ་ཕྱོགས་དེ་ལྟ་མིན། །ཞེས་གནས་དྲུག་དང་དེ་ནས་གཞལ་བའི་ཕྱི་རོལ་གྱི་ཤར་དང་བྱང་གི་གཞི་ཤིས་པའི་སར་གསུངས་པ་སོགས་རྒྱུད་སྡེ་སོ་སོའི་རིགས་དབྱེ་མཐའ་གཅིག་
ཏུ་མི་མཐུན་པས་དཔྱད་དཀའ་ཡང་རྣལ་འབྱོར་པའི་ཡིད་ལ་རང་བཞིན་གྱིས་བདེ་བ་སྟེར་བ་ལ་བཀག་བ་མེད་དེ། ཡང་ན་ཡིད་ནི་གང་དགའ་བ། །དེ་རྣམས་སུ་ནི་དཀྱིལ་འཁོར་བྲི། །ཞེས་དང་། སྤྱི་རྒྱུད་ལས། ཕུན་སུམ་ཚོགས་པ་ཀུན་བཟང་བའི། །ཚོགས་པ་དག་ནི་རྙེད་པར་དཀའ། །མདོར་ན་ས་གཞི་མཉམ་པ་དང་། །མདངས་སྣུམ་ཤར་དུ་གཞལ་བ་བཞེད། །ཆུ་མང་ལྡན་པའི་གནས་དང་ནི། །ལྗོན་ཤིང་བཟང་པོས་བརྒྱན་པ་དང་། །བདག་གི་ཡིད་ནི་མགུ་བ་དང་། །འཚེ་མེད་ཟུག་རྔུ་སྤངས་པ་ནི། །དཀྱིལ་འཁོར་གནས་སུ་ཤིས་པ་སྟེ། །མི་ཡི་དངོས་གྲུབ་ཀུན་ཐོབ་བྱེད། །ཅེས་སོ། །དེ་ལ་ཟུག་རྔུ་ནི་སའི་རོ་ལྔ་སྟེ་འོག་ཏུ་འཆད་ལ། །གཞན་ཡང་གསེག་མ་དང་། ངམ་གྲོག་དང་། ཁུང་བུ་དང་། གྲོག་མཁར་དང་། ཚ་སྒོ་ཅན་དང་། ཐལ་བ་དང་། རྡུལ་དང་། སྐྲ་དང་། སྲིན་བུ་དང་། སྲོག་ཆགས་མང་བ་རྣམས་སྤང་ངོ་། །འོན་ཀྱང་ས་གཞི་བརྟག་པ་དང་། བརྐོས་ནས་སྦྱང་བ་ལ་ནན་ཏན་དུ་བྱེད་མི་དགོས་པའི་གནས་བཅུ་ཡོད་དེ་སྔ་མ་ལས། དྲང་སྲོང་གནས་དང་བ་ལང་ལྷས། །ཕུག་དང་རི་ཡི་རྩེ་མོ་དང་། །ས་གཞི་གང་ན་འཐས་པ་དང་། །ཁང་ཐོག་དང་ནི་རྡོ་ལེབ་དང་། །མཆོད་རྟེན་དྲུང་དང་འབབ་ཆུའི་གླིང་། །མཚོ་རྣམས་ཀྱི་ནི་འགྲམ་དག་ཏུ། །ས་གཞི་སྦྱང་དང་བརྟག་པ་དང་། །ནན་ཏན་དུ་ནི་བྱ་མི་དགོས། །འཐས་པར་བཅགས་ཀྱང་དེར་མི་དགོས། །དེར་ནི་ཟུག་རྔུ་དབྱུང་མི་དགོས། །མཐོ་དམའ་ལ་སོགས་སྐྱོན་དག་ཀྱང་། །དེར་ནི་དོགས་པ་སྐྱེ་མི་དགོས། །ཞེས་སོ། །གཞན་ཡང་གཙུག་ལག་ཁང་དང་། ཚལ་དང་། དུར་ཁྲོད་ལ་སོགས་པར་ཡང་དེ་དང་འདྲ་བར་རྡོ་རྗེ་མཁའ་འགྲོ་ལས་བཤད་དོ། །དེ་ལྟར་རུང་བའི་གནས་ལ་སས་བརྟག་པ་ནི་ལག་ན་རྡོ་རྗེ་མངོན་པར་དབང་བསྐུར་བའི་རྒྱུད་ལས། མཁས་པས་ཁྲུ་གང་ཙམ་
བརྐོས་ནས། །སྔགས་པ་ཡིས་ནི་བརྐོས་བ་དེ། །ས་དེ་ཉིད་ཀྱིས་དགང་བར་བྱ། །ལྷག་ན་མཁས་པ་ཀུན་ཏུ་མཆོག །ཁ་ད་ཆད་དུ་འབྲིང་དུ་བརྗོད། །གང་བར་མ་གྱུར་ན་དེ་སྤངས། །ཞེས་སོ། །ཆུས་བརྟག་པ་ནི་ཁུང་བུ་དེ་ཉིད་སླར་ཡང་འཁྱིལ་བའི་སྔགས་བཟླ་བཞིན་པར་མཐོ་གང་དུ་བརྐོས་པ་ཆུས་བཀང་ལ་གོམ་པ་བརྒྱའི་བར་ཤར་དུ་ཕྱིན་ནས་ལག་ཏེ་བལྟས་པའི་ཚེ་ཆུ་མ་བྲི་བ་དང་གཡས་སུ་འཁྱིལ་ན་བཟང་། བྲི་ཞིང་གཡོན་དུ་འཁོར་བ་ལ་སྒྲ་དང་བཅས་ན་ཀླུའི་འཇིགས་པ་ཡོད་པས་སྤང་བར་ཕྲེང་བ་དང་མཁའ་འགྲོ་ལས་བཤད་དོ། །ཁ་དོག་གི་སྒོ་ནས་བརྟག་པ་ནི་དེ་ཉིད་ལས། དཀར་པོ་དག་ནི་ཞི་བར་བསྟན། །དམར་པོ་དབང་གི་དོན་དུ་འདོད། །སེར་པོ་རྒྱས་པར་ཤེས་པར་བྱ། །ནག་པོ་དྲག་ཤུལ་སྤྱོད་པར་ཤེས། །ཞེས་སོ། གཉིས་པ་ས་བླང་བ་ནི། བརྟགས་པས་རུང་བའི་ས་དེ་སྣང་བ་རྒྱལ་གོ་ལ་སོགས་པར་རིན་མི་སྣང་བ་སའི་ལྷ་མོ་ལ་ཉེར་སྤྱོད་དང་གཏོར་མ། ཞིང་སྐྱོང་ལ་སོགས་པ་ལ་དཀར་མངར་ཕུད་དང་གཏོར་མས་བརྔན་ལ་ཚིག་གིས་བཀྲོལ་ནས་རང་དབང་ཅན་དུ་བྱ་བའི་ཚུལ་ཆོ་ག་རང་རང་ལྟར་ཤེས་པར་བྱ་ཞིང་། མཐར་ས་ལྷ་ནི་གཞི་དེ་ཉིད་དུ་བསྟིམ་པའམ། ཡང་ན་ནམ་མཁར་བཏེག་ལ་བཞུགས་སུ་གསོལ་བ་ཡིན་ནོ། །དེའི་ཚེ་བདག་པོས་བྱིན་པའི་ཚུལ་རྟེན་འབྲེལ་གྱི་བརྟག་པ་དང་རྨི་ལམ་གྱི་མཚན་མ་སོགས་ལས་ཤེས་པར་བྱའོ། །གསུམ་པ་སྦྱང་བ་ལ་བཞི། ལྟོ་འཕྱེ་བརྟག་པ་དང་། སའི་ཟུག་རྔུ་དབྱུང་བ་དང་། རྫས་སྔགས་ཏིང་ངེ་འཛིན་གྱིས་སྦྱང་བ་དང་། ཆོས་ཉིད་བསམ་གྱིས་མི་ཁྱབ་པའི་བདེན་པས་སྦྱང་བའོ། །དང་པོ་ནི། མཁའ་འགྲོ་ལས། །གཙུག་ལག་ཁང་དང་ཁང་བཟང་དང་། །མཆོད་རྟེན་
དཀྱིལ་འཁོར་གྲོང་ཁྱེར་དང་། །ཁྱིམ་དང་ལྡུམ་ར་ལ་སོགས་ལ། །ལྟོ་འཕྱེའི་ལྟོ་བར་བརྐོ་བ་དང་། །ཞེས་པས་དཀྱིལ་འཁོར་གྱི་ཁང་པ་གསར་དུ་བྱེད་པ་ལ་ནི་ངེས་པར་དགོས་ལ། དེ་བཞིན་དུ་ས་བརྐོས་ནས་དཀྱིལ་འཁོར་གྱི་སྟེགས་བུ་བྱེད་པ་ལ་ཡང་བྱ་དགོས་སོ། །དེ་ཡང་གཞི་གང་ཡིན་པ་དེ་ཐིག་གིས་གྲུ་བཞིར་བཅད་པའི་ཕྱོགས་རེ་རེར་ཟླ་བ་གསུམ་གསུམ་གྱི་ཞག་གྲངས་དང་མཐུན་པའི་རེའུ་མིག་དགུ་བཅུ་རེར་ཕྱེ་ལ། ཇི་ལྟར་གནས་པ་དང་རྒྱུ་བའི་ཚུལ་བརྟག་པ་ནི། སྟོན་ཟླར་བའི་ཚེས་གཅིག་ལ་དབང་ལྡན་གྱི་མཚམས་ཀྱི་རེའུ་མིག་ཏུ་ལྟོ་འཕྱེའི་མགོ་བོ་དང་། སྲིན་པོའི་ཕྱོགས་ཀྱི་རེའུ་མིག་ཏུ་མཇུག་རྩེ་བཞག་སྟེ་ཁ་ལྷོར་བལྟས་ནས་ཉལ་བའི་མཚན་ཉིད་ངེས་པར་བྱས་ནས། ཉིན་ཞག་རེ་ལ་རེའུ་མིག་ར་གདོང་ངོས་ནས་བགྲོད་པའི་གཡས་བསྐོར་གྱི་འཕོ་བས་ཟླ་བ་གསུམ་ལ་ཕྱོགས་རེའི་རིའུ་མིག་བཅུ་ཕྲག་དགུ་པ་དང་། ལོ་གཅིག་ལ་རྫོགས་པར་འཁོར་རོ། །ས་བདག་འཕྱེའོ་དེའི་གདེངས་ཀ་ནས་མཇུག་རྩེའི་བར་གྱི་ལུས་ཀྱི་སྲིད་ཀྱིས་རེ་མིག་དགུ་བཅུ་རེ་ནོན་ལ། ཞེང་གི་ཆ་དགུ་རེ་ནོན་པས་ཕྱོགས་གང་དུ་འཁོར་ཡང་གསང་གནས་ནི་རང་སན་ཡོད་དོ། །དེའི་ལུས་ལ་ཀླུ་ཆེན་པོ་བརྒྱད་ཀྱང་གནས་ཏེ་མཇུག་རྩེར་རིགས་ལྡན། གསང་གནས་སུ་སྟོབས་རྒྱུ། ལྟེ་བར་དུང་སྐྱོང་། དཔུང་པར་པདྨ་ཆེན་པོ། སྙིང་གར་ནོར་རྒྱས་མགྲིན་པར་འཇོག་པོ། རྣ་བར་པདྨ། སྤྱི་བོར་མཐའ་ཡས་དང་། ལྟོ་འཕྱེ་རང་ཉིད་ཀྱང་མདོག་དཀར་ལ་བལྟ་ན་སྡུག་པས་མཐའ་ཡས་ཀྱི་རིགས་སུ་འདུའོ། །དེའང་གཞི་ཆེ་ཆུང་དེ་དང་དེར་དེའི་སྤྲུལ་པ་ལྟར་ལུས་ཆེ་ཆུང་སྣ་ཚོགས་སུ་ཤར་བར་འདོད་ན་ས་གཞིའི་ཕྱེད་ཁྱབ་པ་དང་འགལ་ཞིང་རྟག་པའི་འགྲོས་
ཅན་དུ་མི་རིགས་ལ། འདི་ལྟར་སངས་རྒྱས་རྣམས་ནི་འགྲོ་བ་ལ་གཅིག་ཏུ་ཕན་པའི་རྟེན་འབྲེལ་ཐུགས་སུ་ཆུད་པ་ཡིན་པས་བརྟོག་ལུགས་དེ་ལྟར་དུ་གསུངས་ནས་ས་བདག་ལ་གནོད་པ་མི་འོང་བའི་གནས་ཤེས་པའི་ཕྱིར་དགོངས་པའོ། །དེ་བས་ན་ལྟོ་འཕྱེ་དེ་ཉིད་འོ་མ་ལ་སོགས་པའི་ཉེར་སྤྱོད་ཀྱིས་མཆོད་ནས་བརྐོ་མཁན་ཉིད་གནོད་པ་མེད་པའི་སེམས་ཀྱིས་བགེགས་བྱེད་དང་། རྟོག་རྩེ་རྡོ་རྗེ་མཚན་པའི་ཕྱག་ཆར་བསམས་ལ། བརྐོ་བའི་དམིགས་ནི་མཆན་གྱི་འོག་དང་ལྟོ་བ་གཉིས་སུ་བཤད་པ་ལས་སྔ་མ་རྟོག་པ་བཟོ་བ་ཡིན་པས་དེའི་སྐབས་བཙལ་བ་ནིའི་བྷཱུ་ཏིས། ཤར་ནས་ཆ་ནི་ཉི་ཤུ་རྩ་བདུན་དོར། །བྱང་ནས་ཕྱེད་དང་བཅུ་བཞིའི་ཆ་དོར་བར། །ཤར་ནུབ་ཆ་དགུ་ལྷོ་བྱང་ཕྱེད་དང་ལྔ། །འདི་ནི་མཆན་གྱི་མདུན་དུ་ཐོག་མར་བརྐོ། །ཞེས་མགོ་གར་བསྟན་ཤར་དང་རྒྱབ་བྱང་གི་དབང་དུ་བྱས་པའི་གདོང་པས་གོང་ནོན་པའི་རུ་མིག་ནས་ཤར་ལ་སོགས་པ་ནས་དོར་བའི་བགྲང་གཞི་བྱས་ལ་ཞིབ་མོར་བརྟག་གོ །དེའི་ཚེ་དམིགས་པ་དང་ལས་དང་བྱ་བའི་ཚུལ་ཡང་། མི་ནི་བགེགས་མཐར་བྱེད་ཀྱི་རྣམ་པར་བསྒོམ། །ཞི་བའི་སེམས་ཀྱིས་གཏོར་མའི་ནང་དུ་ནི། །བཞག་པའམ་མེ་མཚམས་ལ་སོགས་ཕྱི་རོལ་དོར། །འབད་པས་དེ་ཡི་ཁམ་ལྔ་པ་ཡི་ས། །ས་གཞིའི་དབུས་སུ་ལེགས་པའི་ཡིད་ཀྱིས་དགྲམ། །ཁམ་ལྔ་པ་དེར་ལས་མི་དུ་མ་ཡི། །ཕྱོགས་དང་མཚམས་སུ་ཀུན་ནས་བསྐོ་བར་བྱ། །ཅེས་དང་། །བརྐོ་བའི་ས་དམིགས་མ་འཁྲུལ་ན་ཆོས་ནོར་འདོད་དོན་འཕེལ་ཞིང་། དེའི་ལུས་ཀྱི་ཆ་དགུའི་ས་ལ་བརྐོས་ན་ཉེས་པ་བསྐྱེད་པའི་ཚུལ་ཡང་། དེ་ཡིས་ཆོས་ནོར་འདོད་དོན་འཕེལ་ཞིང་འགྲུབ། །གལ་ཏེ་ལྟོ་འཕྱེའི་རྒྱལ་པོ་གནས་པ་ཡི། །ཆ་དགུ་ས་ཡི་ཆ་ལ་བརྐོས་གྱུར་ན། །
ཕ་མ་བུ་དང་བུ་མོ་སྤུན་ཆུང་མ། །མནའ་མ་རང་གི་སྐྱེ་བོ་མཛའ་བཤེས་འཆི། །གལ་ཏེ་རྒྱབ་ཏུ་བརྐོས་ན་རང་འཆི་ཞིང་། །ཡང་ན་རང་གནས་ནས་འཕོ་ནོར་བརླག་འགྱུར། །མཇུག་མར་གླང་ཆེན་རྟ་དང་མ་ཧེ་ར། །བ་ལང་འཆི་ཞིང་སྟོབས་ཀྱང་ཉམས་པར་འགྱུར། །གལ་ཏེ་ཁམ་ལྔའི་ནང་དུ་ཤིང་དང་སྐྲ། །གྲོག་མཁར་སྐྲ་སེན་ཐལ་བས་གནོད་པ་འབྱུང་། །རྡོ་བས་རླུང་གི་འཇིགས་པ་ཕུབ་མ་དང་། །འགལ་དུམ་གྱིས་རིམས་རུས་པས་ཟུག་གཟེར་རོ། །ཞེས་སོ། །གཉིས་པ་སའི་ཟུག་རྔུ་དབྱུང་བ་ནི། །རྡོ་རྗེ་མཁའ་འགྲོ་ལས། །སྨན་སོགས་དངོས་གྲུབ་བྱེ་བྲག་གིས། །པུས་མོ་མཆུ་སོ་ལྟེ་བའི་བར། །བརྐོས་ལ་ཕུབ་མ་རྡོ་དང་ནི། །ཇོ་མོ་སོལ་བ་ཟུག་རྔུ་ནི། །ཚེར་མ་ལ་སོགས་བསལ་ལ་བཅག །ཅེས་པས་དངོས་གྲུབ་ཆེན་པོ་བསྒྲུབས་ནས་སྟེགས་ཇི་ལྟར་བྱེད་པའི་རྒྱས་པ་རྣམས་ལྟེ་བ་ཙམ་གྱི་སྲིད་དང་། །འབྲིང་དང་དམན་པ་ལ་མཆུ་སོ་དང་པུས་མོ་ནུབ་པའི་ཟབས་སུ་བརྐོས་ལ་སའི་རོའམ། ས་སེལ་དབྱུང་བར་བྱ་སྟེ། ཟུག་རྔུ་ཇི་ལྟར་དག་པ་ཙམ་གྱིས་དངོས་གྲུབ་ཆེ་བ་ཡིན་ལ། མ་བསལ་བའི་ཉེས་དམིགས་ནི་ཕྲེང་བ་ལས། རྡོ་བར་བཅས་ན་རླུང་ཆེན་པོ། །རུས་པར་བཅས་ན་ལྐུགས་པ་ཉིད། །ཕུབ་མ་སོལ་བར་ལྡན་ན་རིམས། །སྐྲ་དང་རྩ་བ་ཤིང་སོགས་བཅས། །ཉེ་བར་འཚེ་བ་ཕྲ་མོ་།།།ཞེས་དང་། སྤྱི་རྒྱུད་ལས། ཟུག་རྔུར་བཅས་པའི་ས་གཞི་ནི། །ལས་བྱས་པ་དག་འགྲུབ་མི་འགྱུར། །ཟུག་རྔུའི་ཉེས་པ་རུས་པ་དང་། །གྱོ་མོ་དང་ནི་ཐལ་བ་དང་། །སྡོང་དུམ་དང་ནི་ཚེར་མ་དག །རབ་ཏུ་བསྒྲིམས་ཏེ་མ་ལུས་དབྱུང་། །ཅེས་སོ། །དེའང་སྲིད་ཐུངས་པས་སམ། །ས་སེལ་བསམ་ལྡངས་པའམ། རྒྱའི་ཆ་ཐམས་ཅད་བརྐོ་བར་མ་ནུས་ན་སྤྱི་རྒྱུད་ལས། །གལ་ཏེ་དབྱུང་བར་མི་ནུས་ན། །དེར་ནི་གསང་སྔགས་ཁོ་ན་ཡིས། །སྦྱང་བ་ལེགས་
པར་བྱས་པར་འགྱུར། །ཞེས་པས། ཨོཾ་ཧ་ན་ཧ་ན་ཀྲོ་དྷ་ཧཱུྃ་ཕཊ། ཅེས་བཟླས་ནས་སྦྱང་ངོ་། །སླར་ཡང་ས་སེལ་མ་གཏོགས་པའི་ས་རྣམས་དྲི་བཟང་གི་ཆུ་དང་སྦྱང་བས་དགང་ཞིང་། མ་ཁེངས་ན་བཀྲ་ཤིས་པའི་ས་གཞན་ཡང་བསྣན་ནས་ལེགས་པར་བཅགས་ལ་དབུས་ཅུང་ཟད་མཐོ་ལ། ཤར་དང་བྱང་ཅུང་ཟད་གཞོལ་བར་བྱ་སྟེ། མཁའ་འགྲོ་ལས། དབུས་སུ་མཐོ་བར་བྲི་བར་བྱ། །ཤར་དང་བྱང་དུ་གཞོལ་བ་ནི། །སྔགས་པ་རྣམས་ཀྱི་དོངས་གྲུབ་འགྱུར། །དབུས་སུ་མཐོ་བས་རྒྱལ་སྲིད་དང་། །རིག་པ་འཛིན་པའི་གནས་དག་འཐོབ། །བྱང་ཆུབ་མཐོ་བས་འཆི་འགྱུར་རམ། །ནོར་རྣམས་བརླག་པར་འགྱུར་བ་སྟེ། །ཡང་ན་ནད་ཀྱིས་འདེབས་པར་འགྱུར། །ཇི་ལྟར་བཤད་པའི་ཤར་མཐོ་བས། །མྱུར་དུ་རིགས་རྣམས་ཟད་པར་འགྱུར། །དབུས་སུ་དམའ་བས་རང་བཞིན་ས། །སྒྲུབ་པ་པོ་ནི་འཇོམས་དང་ལྡན། །ཞེས་པས་དཀྱིལ་འཁོར་གྱི་སྟེགས་བུ་ཉིད་ལའང་མཐོ་གཞོལ་དེ་ལྟར་གོ་བར་བྱའོ། །དེའང་སྟེགས་བུ་གཉུག་མར་གནས་སུ་རུང་ན་སྨན་དང་རིན་པོ་ཆེ་ལྔ་དང་འབྲུ་ལྔ་བཅུག་པའི་བུམ་པ་འགྲུབ་ན་རབ། མིན་ནའང་དེ་དག་ལ་སྲོག་ཆགས་དང་རླན་གྱིས་མི་འཇིག་པའི་བཅའ་ག་དང་བཅས་པའི་ས་གཏེར་འཛུད་པ་ནི་བཀྲ་ཤིས་པའི་ཡན་ལག་གོ །གསུམ་པ་ནི། ལས་ཐམས་ཅད་པ་བཟླས་པའི་ཡུངས་ཀར་དང་ཆུས་ས་གཞིའམ་སྟེགས་བུ་ལ་གཏོར་ཞིང་། སྔགས་དེ་ཉིད་བཟླས་པའི་བ་བྱུང་ལྔས་ཤར་ནས་རིམ་པར་བྱུགས་པ་ལ་དྲིའི་ཆུས་ཀྱང་གཏོར། ལག་མཐིལ་གཡས་པ་ས་ལ་བཞག་པས་བསྐོར་ཞིང་། ཨོཾ་ཧ་ན་ཧ་ན་ཧཱུཾ་ཕཊ༔ ཅེས་བཟླས་པས་ལག་པ་ལས་བྱུང་བའི་འོད་ཟེར་གྱིས་མ་དག་པ་ཐམས་ཅད་སྦྱངས། ཨཱོཾ་བྷཱུ་ཁཾ་ཞེས་པས་ས་ཕྱོགས་ཀྱི་དངོས་པོ་ཐམས་ཅད་ནམ་མཁའི་རང་བཞིན་དུ་
བྱས། སོར་མོ་རྣམས་ཁ་ཕྲལ་བ་རྡོ་རྗེ་རྩེ་ལྔར་བསམས་པས་ས་གཞི་ལ་བརྡེག་ཅིང་། ཨོཾ་མེ་དི་ནི་བཛྲཱི་བྷ་ཝ་བཛྲ་བྷནྡྷ་ཧཱུྃ། ཨོཾ་ཧ་ན་ཧ་ན་བཛྲཱ་ཀྲོདྷ་ཧཱུྃ་ཕཊ ཅེས་བརྗོད་པས་དབང་ཆེན་ལ་ཐུག་གི་བར་གྱི་གཞི་ཐམས་ཅད་རྡོ་རྗེའི་རང་བཞིན་དུ་བཅིངས། ཨོཾ་ཨཱཧཱུྃ་ཤོདྷ་ཡ་ཤོདྷ་ཡ་རཀྵ་ཧཱུྃ་ཧཱུྃ་ཕཊ ཅེས་བརྗོད་པས་རྡོ་རྗེ་གསུམ་གྱི་ཉེས་སྐྱོན་རྣམས་སྦྱངས་ཤིང་བསྲུངས་ལ་བརྟན་པར་བྱའོ། །དེ་ནས་སྔར་ས་ལྷ་ནམ་མཁར་བཞག་པ་ཡིན་ན་གཞིར་ཕབ་ལ་མཆོད་གཏོར་ཕུལ་ནས་ས་གཞི་ལ་བསྟིམ། པད་སྐོར་དང་བཅས། ཡི་གེ་གསུམ་དང་ཡིག་བརྒྱ་བཟླ་བ་ལ་སའི་ལྷ་མོས་ས་བྱིན་གྱིས་རློབ་པ་ཞེས་བྱའོ། །བཞི་པ་ནི། ཇི་ལྟར་སྦྱང་བྱའི་ས་དང་སྦྱོང་བྱད་ཀྱི་སྤྲོས་པ་ཐམས་ཅད་རང་བཞིན་མེད་པའི་ཆོས་ཉིད་གཅིག་ཏུ་མཉམ་པར་བཞག་པ་སྟེ། མངོན་བྱང་ལས། སྔགས་པ་རྟོག་ལ་གནས་ནས་སུ། །གང་ཞིག་ས་སྦྱོང་བྱེད་པ་ནི། །བྱང་ཆུབ་སེམས་ནི་རྣམ་སྤངས་པས། །གསང་བའི་བདག་པོ་དེ་ཡི་བདག །དེ་བས་རྟོག་པ་རྣམས་སྤངས་ནས། །ས་ཀུན་རྣམ་པར་སྦྱང་བར་བྱ། །ཞེས་སོ། །འདི་ཡན་གྱི་ས་ཆོག་ཕལ་ཆེར་དཀྱིལ་འཁོར་གྱི་ཁང་པ་གྲུ་བཞི་སྒོ་བཞི་པ་རྟ་བབས་དང་ལྡན་པས་དཀྱིལ་འཁོར་ཉིད་དང་རྗེས་སུ་མཐུན་པ་གསར་དུ་བསྒྲུབ་པ་ལ་དགོངས་པ་ཡིན་ཏེ་མཁའ་འགྲོ་ལས། དེ་ལྟར་སྦྱངས་པའི་ས་གཞི་ལ། །དཀྱིལ་འཁོར་དང་ནི་རྗེས་མཐུན་པའི། །རིན་ཆེན་ལ་སོགས་བཞི་འགྱུར་གྱི། །དཀྱིལ་འཁོར་གྱི་ནི་ཁང་པ་བྱ། །ཞེས་པའི་བཞི་འགྱུར་ནི་དཀྱིལ་འཁོར་ཇི་ལྟར་བྱ་བའི་སྟེགས་བུའི་བཞི་འགྱུར་རོ། །དཀྱིལ་འཁོར་གྱི་ཁང་པ་རྙིང་ངའི་རྡུལ་ཚོན་གྱིས་བཞེངས་ན། མི་མངོན་པ་ལ་བླང་བ་དང་། རྫས་སྔགས་ཏིང་ངེ་འཛིན་གྱིས་སྦྱང་བ་དང་བཟུང་བ་དང་བསྲུང་བ་བཞི་རྣམས་བྱ་ལ། རས་བྲིས་ཡིན་ན་
བཟུང་བ་དང་བསྲུང་བ་ཙམ་གྱིས་ཆོག་གོ །བཞི་པ་ནི། ལྷའི་རྣལ་འབྱོར་གྱི་ངང་ནས་སྐྱིལ་ཀྲུང་བཤིག་སྟེ་ལངས་ནས་བགེགས་ལ་བཀའ་བསྒོ་བ་དང་གཞི་དུལ་བར་བྱ་བའི་ཕྱིར་རྐང་པ་བྱིན་གྱིས་བརླབས་ནས་གཞི་བཅའ་བ་སྔོན་དུ་འགྲོ་བའི་རྡོ་རྗེ་རྩེ་གཅིག་པ་དང་རྩེ་གསུམ་པ་དང་། རྩེ་ལྔ་པ་དང་། སྣ་ཚོགས་རྡོ་རྗེ་སྟེ་རྐང་པའི་སྟང་སྟབས་བཞིས་ས་ལ་རྡོ་རྗེ་བྲི་བ་དང་། རྡོ་རྗེའི་མིག་གཉིས་ཀྱི་མདུན་དུ་བལྟ་བའི་མངོན་ཕྱོགས་དང་། རྒྱབ་ཏུ་བལྟ་བའི་ཕྱིར་ཕྱོགས་ཀྱི་བལྟ་བ་གཉིས་གཉིས་དང་། ཤར་དུག་ཡས་བརྒྱད་དང་ལྷོར་གཡོན་བརྐྱང་དང་། ནུབ་ཏུ་ས་ག་དང་། བྱང་དུ་ཟླུམ་པོ་དང་། དབུས་སུ་མཉམ་པ་དང་ཁ་སྦྱོར་དང་། རུས་སྦལ་རྩེ་གཅིག་པ་དང་རུང་བའི་དྲ་བ་སྟེ་སྟང་སྟབས་བརྒྱད་དང་གར་གྱི་ཉམས་དགུས་ཐོ་བ་དང་། དབྱུག་པ་དང་། མདའ་གཞུ་དང་། རལ་གྲིའི་ཕྱག་རྒྱ་རྣམས་བསྟན་པའི་རྡོ་རྗེའི་གར་གྱི་ལས་རིམ་ཁྲག་འཐུང་ཆེན་པོའི་རྒྱུད་སྡེ་སྤྱི་དང་། ཁྱད་པར་སྒྱུ་འཕྲུལ་དྲྭ་བའི་གར་ལ་སོགས་པ་རྒྱུད་སྡེ་རང་རང་གི་དོན་ཁོང་དུ་ཆུད་པར་བྱ་བའི་གནས་ཡིན་ཏེ། སྤྱི་ཙམ་དུ་ས་བཟུང་བའི་སླད་དུ། ཨོཾ་པྲ་ཎ་མ་མི་སརྦ་ཏ་ཐཱ་ག་ཏཱ་ན། ཞེས་པས་དེ་བཞིན་གཤེགས་པ་རྣམས་ལ་ཐལ་མོ་སྤྱི་བོར་སྦྱར་ནས་ཕྱག་བྱས་ལ། མ་རིག་པ་དང་བདུད་ཀྱི་གཞན་དབང་དུ་སོང་བའི་སེམས་ཅན་ཐམས་ཅད་ལ་སྙིང་རྗེའི་སེམས་ཀྱིས་བལྟས་ཏེ། དེ་དག་བསལ་བའི་ཕྱིར་རྡོར་དྲིལ་འཛིན་པས་ཁྲོ་བོའི་ང་རྒྱལ་དུ་ལངས་ཏེ། མིག་གཡས་པ་མ་ལས་ཉི་མ་དང་། གཡོན་པ་ཊ་ལས་ཟླ་བ། མིག་འབྲས་ཧཱུྃ་ལས་དུས་མཐའི་ཞུགས་སུ་འབར་བའི་རྡོ་རྗེའི་བལྟ་བས་ཕྱོགས་ཐམས་ཅད་དུ་བལྟ་ཞིང་། ཧཱུྃ་གི་གླུ་དང་རྡོ་རྗེའི་རྐང་པའི་སྟེབས་ཀྱིས་དཀྱིལ་འཁོར་གྱིས་གཞི་ལ་གྱང་འགྲོས་
སུ་བསྐོར་ཞིང་དེའི་ཚེ་རྐང་པའི་འོག་ནས་བསྐལ་པའི་མེ་ལྟ་བུའི་འོད་ཟེར་བྱུང་བས་གདུག་པ་ཅན་རྣམས་བྱེར་བར་བསམས་ནས་རྡོར་དྲིལ་དཔུང་འགོར་ཐོད་དབྱུག་ལྟར་གདེངས་པ་དང་། འཁོར་ལོ་ལྟར་བསྐོར་བ་དང་། མདའ་ལྟར་འཕང་བ་དང་། ལྕགས་ཀྱུ་ལྟར་དགུག་པ་དང་། ཞགས་པ་ལྟར་འཕང་བ་སོགས་ཀྱི་ཕྱག་རྒྱ་དང་ཆབས་གཅིག །གཙོ་བོའི་སྔགས་དང་སུམྦྷ་ནིས་བགེགས་བསྐྲད་ཅིང་བཀའ་བསྒོ་བ་ཙམ་གྱིས་ཀྱང་དོན་ཚང་བ་ཡིན་ཏེ་ཕྲེང་བ་ལས། ཡོངས་སུ་མི་ཤེས་པའམ་མི་ནུས་པའམ་བྱ་བ་བསྡུས་པ་ལ་དགའ་བའམ་མི་འདོད་པས་ཀྱང་རུང་སྟེ་རྡོ་རྗེའི་རྐང་སྟབས་ལ་སོགས་ཐམས་ཅད་དམ་ཉུང་ཟད་མ་བསྒྲུབས་ནའང་སྐབས་སུ་བབ་པ་ཉམས་པར་མི་འགྱུར་ཏེ། གེགས་བསལ་བ་ནི་བསྐོར་པ་ལ་སོགས་པས་ཀྱང་འགྲུབ་པའི་ཕྱིར་རོ། །ཞེས་སོ། །དེ་ལྟར་ལྷའི་ང་རྒྱལ་ལ་གནས་པས་བགེགས་ལ་བཀའ་བསྒོས་པའི་རྗེས་ལ་དཀྱིལ་འཁོར་བྱ་བའི་གཞི་དྲི་དང་བདུད་རྩི་ལྔ་ལ་སོགས་པས་ལེགས་པར་བྱུག །མེ་ཏོག་དང་སྤོས་དང་གླུ་གར་ལ་སོགས་པས་ཟུར་བཞི་དང་སྒོ་བཞིན་ས་མཆོད། གཞི་དེར་ཐལ་མོས་བཀབ་ནས་དཀྱིལ་འཁོར་གྱི་བདག་པོའི་སྔགས་བརྒྱ་རྩ་བརྒྱད་དང་ཡི་གེ་བརྒྱ་པ་ལན་བདུན་བཟླ་བཞིན་པར་མངོན་རྟོགས་བསྒོམས་ནས་ས་ལྷའི་འཁོར་ལོ་སྤྲོ་བསྡུ་བྱས་ལ་ཉལ་བ་ནི་ས་བཟུང་པ་དངོས་ཡིན་ནོ། །ལྔ་པ་ནི། བཀའ་བསྒོ་བྱས་ནས་དཀྱིལ་འཁོར་གྱི་གཞི་བཟུང་བའི་དུས་དེ་ཉིད་དུ་དམ་ལ་མི་འདུ་ཞིང་སླར་ལ་གནོད་སེམས་འཆང་པ་རྣམས་བཀུག་ནས་ཁྲོ་བོ་བཅུའི་ཕུར་བུས་གདབ་པ་ལས་བསྲུང་བ་ཞེས་བྱ་སྟེ། དེའང་རྗེ་བོ་བཙོན་དུ་བཅིངས་ན་འབངས་རྣམས་རང་བཞིན་གྱི་ཉན་པ་ལྟར་ཕྱོགས་བཅུའི་གདོན་གྱི་བདག་པོ་དབང་པོ་ལ་སོགས་པ་བཅུ་ཡིན་པས་དེ་དག་དཀྱིལ་འཁོར་གྱི་བྱ་བ་མ་
གྲུབ་ཀྱི་བར་གཟིར་ཞིང་མནན་པའི་གཏའ་ལ་གཞུག་པ་ནི། དངོས་པོར་འཛིན་པ་ཐམས་ཅད་ཤཱུ་ནྱ་ཏས་སྟོང་པར་སྦྱངས། དེའི་ངང་ལས་རཾ་ལས་ཉིད་དཀྱིལ་གྱི་སྟེང་དུ་ཧཱུཾ་ལས་སྣ་ཚོགས་རྡོ་རྗེའི་ལྟེ་བ་ལའང་ཧཱུཾ་གིས་མཚན་པའི་འོད་ཟེར་ལས་བྱུང་བའི་རྡོ་རྗེ་འབར་བ་སྤྲོས་པས་གོ་མཚམས་མེད་པར་དུམ་བུ་གཅིག་ཏུ་འཁྲིགས། དེའང་འོག་གི་ས་གཞི་སྣ་ཚོགས་རྡོ་རྗེའི་རང་བཞིན་ཅན་དུ་གྱུར་པའི་ཕྱོགས་རྣམས་རྡོ་རྗེའི་རྭ་བ་དང་། སྟེང་རྣམས་རྡོ་རྗེའི་གུར་དང་བླ་རེར་གྱུར་པའི་ཕྱི་རོལ་མདའ་ལ་སོགས་པ་མཚོན་ཆའི་དྲྭ་བར་འགྲིགས་པ་རྣམས་ཀྱང་འབར་ཞིང་བཟོད་པར་དཀའ་བའི་ནང་དུ། རང་ཉིད་ཁྲོ་བོ་གཞན་ལས་རྒྱལ་བ་ལ་སོགས་པ་བགེགས་རྣམས་ཟ་བར་བྱེད་པ་ཅན་དུ་བསྒོམས་ལ། སྙིང་ག་ནས་ཁྲོ་བོ་འདོད་པའི་རྒྱལ་པོ་དཔག་ཏུ་མེད་པ་སྤྲོས། ཕྱོགས་སྐྱོང་བྲང་པོར་གྲགས་ཐམས་ཅད་པའི་ངོ་བོར་བཀུག །ཁྲོ་བོ་བཅུའི་རང་བཞིན་དུ་གནས་པའི་ཕུར་བུ་ཚད་དང་མཚན་ཉིད་ཚང་བ་ཉིད་རྡོ་རྗེ་སྡེར་མོའི་རིག་པ་དང་བཅས་དབང་ལྡན་ནས་བརྩམས་པའི་ཕྱོགས་སྐྱོང་རྣམས་ཀྱི་སྤྱི་བོ་ནས་རྐང་མཐིལ་བར་ཐལ་བྱུང་དུ་ཞུག་པས་ཆོས་ཉིད་དང་དུབ་རྒྱལ་བར་བསམས་ལ་ཕུར་གདན་ལ་འདེབས་པའམ། སྟེགས་བུའི་མཐའ་བསྐོར་འོད་ཕྲེང་གི་ཐད་དམ། དཀྱིལ་འཁོར་གྱི་ཁང་པའི་ཕྱི་རོལ་ཕྱོགས་བརྒྱད་དུ་འདེབས་པ་གང་བདེར་འདོད་ལ། དེའང་སྟེང་ཤར་གྱི་ཤར་དང་འོག་ནུབ་ཀྱི་ནུབ་ཏུའོ། །གལ་ཏེ་ཕུལ་བུ་གཅིག་ལས་མེད་ན་དམིགས་པ་སྔ་མ་ལྟར་དུ་བསྒོམས་ཤིང་དཀྱིལ་འཁོར་གྱི་དབུས་སུ་དམིགས་ནས་དབང་ལྡན་གྱི་ཕྱོགས་སུ་གདབ་པའམ། གཅིག་ཀྱང་མེད་ན་ལག་པའི་ཁུ་ཚུར་གན་རྐྱལ་དུ་གནས་པ་བསྒྱུར་ནས། ཨོཾ་བཛྲ་ཨཱཧཱུཾ་ཞེས་ས་ལ་བསྣུན་པའི་ཏིང་
ངེ་འཛིན་གྱི་ཕུར་པ་དམིགས་པ་སྔ་མ་ཁྱིལ་བས་གདབ་པར་རུང་སྟེ། ཡང་ན་ཡེ་ཤེས་ཀྱིས་ནུས་ན། །ཏིང་ངེ་འཛིན་གྱི་ཕུར་བུས་གདབ། །ཅེས་བཤད་པའོ། །དེ་ལ་ཕུར་པའི་རྒྱུ་ཚད་དང་དབྱིབས་བྱུག་པ་དུག་བྲབ་གསུམ་བྱས་པའི་ལས་བཞི་སོ་སོའི་རྣམ་པ་ཐ་དད་པ་བསྒོམ་དོན་ལ་སོགས་པ་ནི་རྡོ་རྗེ་ཕུར་པའི་རྒྱུད་སྡེ་ཁོ་ན་བཤད་གཞི་རྨད་དུ་བྱུང་བས་བཟོ་ལ། ཁྲོ་བཅུ་སོ་སོའི་གར་གྱི་སྟང་སྟབས་ཀྱང་ཡེ་ཤེས་རྩེ་མོའི་རྒྱུད་ལས་ཤིན་ཏུ་གསལ་བར་བསྟན་ཏོ། །གསུམ་པ་སྟ་གོན་ལ་ཡན་ལག་བཞི་སྟེ། ས་ལྷ་དང་། དཀྱིལ་འཁོར་བའི་ལྷ་དང་། བུམ་པ་དང་སློབ་མ་སྟ་གོན་ནོ། །དེ་ལ་དང་པོ་ནི་ས་ཆོག་གི་སྐབས་སུ་ཡོད་པས་སྐབས་འདིར་མི་བྱེད་པ་མང་བས་མེད་ཀྱང་རུང་ལ། འོན་ཀྱང་ལྷག་པའི་ཉེས་པ་མེད་དེ་རྡོ་རྗེ་ཕྲེང་བ་ལས་དེ་ལྟར་གསུངས་པའི་ཕྱིར་རོ། །གཉིས་པ་ནི་ལྷ་ལྟ་གོན་མ་བྱས་ན་ལྷ་ལ་དབང་ཟབ་དང་བརྙས་པའི་ཉེས་བུ་ཡོད་པས་སྙན་གསན་དབབ་པའི་དོན་དུ་སྟེ། དེ་ལ་དཀྱིལ་འཁོར་ཇི་ཙམ་བྱ་བའི་ཆོད་ནི་ལྷའི་རིགས་ཀྱི་སྒོ་ནས་བཞག་ན། རྡོ་རྗེའི་རིགས་དང་། དེ་བཞིན་གཤེགས་པ་དང་། རིན་པོ་ཆེ་དང་། གར་དབང་དང་། དོན་གྲུབ་ཀྱི་རིགས་རྣམས་ཁྲུ་གསུམ་པ་ནས་བདུན་པའི་བར་ཇི་ཙམ་སྦར་བའི་ཚུལ་རྡོ་རྗེ་གུར་ལས། རྡོ་རྗེ་ཅན་གྱི་ཁྲུ་གསུམ་སྟེ། སངས་རྒྱས་དཀྱིལ་འཁོར་ཁྲུ་བཞི་པ། །ཁྲུ་ལྔ་པ་ནི་སྣང་བྱེད་ལའོ། །གར་གྱི་དབང་ཕྱུག་ཁྲུ་དྲུག་པ། །རྟའི་རྒྱལ་པོ་ཁྲུ་བདུན་པའོ། །ཞེས་སོ། །གནས་ཁང་ཡངས་དོག་ལ་སོགས་པའི་སྒོ་ནས་བཞག་ན་གསང་བའི་སྙིང་པོ་དང་། ཐབས་ཀྱི་ཞགས་པ་ལས་དོན་མཐུན་པར། དཀྱིལ་འཁོར་ལ་གང་ཚད་དུ་བྱ། །ཡང་ན་ཁྲུ་ནི་གསུམ་གྱི་ཚད། །ཡང་ན་ལུས་གང་ཚད་དུ་སྟེ། །ཡང་ན་ལུས་ཀྱི་གསུམ་གྱི་ཚད། །ཡང་ན་ཁྲུ་ནི་སུམ་ཅུ་གཉིས། །ཞེས་སོ། །སྦྱིན་བདག་གི་འབྱོར་བའི་སྒོ་ནས་བཞག་གམ་བཅོམ་ལྡན་འདས་ཀྱིས། འཛམ་བུའི་གླིང་གི་དབང་ཕྱག་གིས་
འཁོར་ལོས་སྒྱུར་བའི་རྒྱལ་པོ་ཡིས། །ཀུན་ནས་དཔག་ཚད་མཐའ་རུ་ནི། །དཀྱིལ་འཁོར་རབ་ཏུ་བྲི་བར་བྱ། །མཁས་པས་གདུལ་བྱའི་སྐྱེ་བོ་ཡི། །སེམས་རྣམས་ཡང་དག་བལྟས་ནས་ནི། །འདོད་པས་ཚད་རྣམས་བྱས་ན་ཡང་། །ཉེས་པ་ཅུང་ཟད་ཡོད་མ་ཡིན། །ཞེས་རྒྱལ་པོ་ལ་སོགས་པས་ཡོན་སྦྱར་ན་དཔག་ཚད་ཙམ་ཡང་མ་བཀག་ལ། གདུལ་བྱའི་ཁམས་དང་འབྱོར་པའི་དབང་དུ་ལག་མཐིལ་ཉིད་དུའང་བྲི་བར་རུང་ན་སའི་སྟེང་དུ་ནི་ཆེ་ཆུང་ཐ་དད་པ་ཉིད་མོས་པའི་རྗེས་སུ་རུང་བའི་ཚུལ། རང་གི་འདོད་པས་དཀྱིལ་འཁོར་ཀུན། །ལག་པའི་མཐིལ་དུ་བྲིས་བྱས་ནས། །བསྟན་བཅོས་ལས་བྱུང་དོན་བྱེད་དེ། །ས་སྟེང་སོགས་སུ་སྨོས་ཅི་དགོས། །ཞེས་ལག་གིས་བྲི་བར་མ་ནུས་པ་རྣམས་ཡིད་ཀྱིས་བྲི་བར་བསྟན་པ་ཡིན་ནོ། །དེ་ལྟར་དཀྱིལ་འཁོར་ཆེ་ཆུང་ཇི་ཙམ་བྱ་བའི་གཞི་ངེས་པར་བྱས་ནས་ལྟ་གནས་ཤེས་པར་བྱ་བའི་ཕྱིར་ཐིག་གི་བྱ་བ་བསྒྲུབ་པ་ཡིན་ལ། དེ་ལའང་ལས་ཐིག་སྔོན་ལ་གདབ་པ་དང་། ཡེ་ཐིག་སྔོན་ལ་གདབ་པའི་ལུགས་གཉིས་ལས། དང་པོ་ནི་ས་ར་ཧས། དང་པོ་དཀར་རྩི་ཐིག་སོགས་པས། རིམ་བཞིན་ཐིག་གདབ་ངེས་པར་བྱ། །དེ་སྟེང་ཡེ་ཤེས་ཐིག་བཏབ་བས། །ཀུན་ཀྱང་ཡོངས་སུ་བརྐྱང་བར་བྱ། །ཞེས་དམ་ཚིག་པ་ལ་ཡེ་ཤེས་པ་གཞུག་པའི་ཚུལ་གྱིས་ཐོག་མར་བྱིན་གྱིས་བརླབས་པའི་གཞི་ལས་ཐམས་ཅད་པའི་ལྷའི་ངོ་བོར་མོས་པའི་གཤེར་ཐིག་དཀར་པོ་བཏབ་ལ། དེ་ནས་རློབས་བྱེད་ཡེ་ཐིག་གིས་ལག་ཐིག་དེ་བྱིན་གྱིས་བརླབས་པའི་ཕྱིར་དུ་དགོངས་པ་ཡིན་ཏེ། འདི་ལྟར་ཡེ་ཐིག་ནམ་མཁའ་ལ་གདབ་པ་བཞིན་དུ་ས་ལའང་སྔ་མའི་སྟེང་དུ་འདེབས་པར་དོན་དུ་རིག་པར་བྱའོ། །གཉིས་པ་ནི། སྡོམ་འབྱུང་ལས། །བློ་ལྡན་ནམ་མཁར་ཐིག་གདབ་བྱ། །དེ་བཞིན་
འོག་ཏུ་ཐིག་རབ་གདབ། །ཅེས་དང་། རྡོ་རྗེ་ཕུར་བུ་འབར་བ་ལས། །ཐིག་སྐུད་ཡེ་ཤེས་ལྔ་ལྡན་པ། །ལྟེ་བར་ཁུ་ཚུར་གཡོན་གྱིས་བཟུང་། །ལས་ཀུན་བྱེད་པས་བཟུང་ནས་ནི། །ནམ་མཁར་བཏབ་པས་རང་བཞིན་དང་། །ཏིང་འཛིན་དཀྱིལ་འཁོར་གསལ་བར་བྱེད། །གཟུགས་བརྙན་གསལ་ཕྱིར་ས་ཐིག་གདབ། །ཅེས་སྤྲུལ་གཞི་ལས་སྤྲུལ་པ་འགྱད་པ་ལྟར་ཡི་ཐིག་སྔོན་ལ་བཏབ་པས་བར་སྣང་ལ་རང་བཞིན་ཡེ་ཤེས་ཀྱི་དཀྱིལ་འཁོར་གསལ་བར་གྱུར་པ་དེའི་གཟུགས་བརྙན་གཉིས་པ་ཞིག་བྱད་དང་མེ་ལོང་གི་རྣམས་ལྟར་སལ་སྤྲུལ་པའི་དཀྱིལ་འཁོར་དུ་པ་ལྟར་མངོན་པར་བྱིན་གྱིས་རློབ་པའི་དོན་དུ་ཡེ་ཐིག་སྔོན་དུ་བསྟན་པ་ཡིན་པར་རིག་པར་བྱ་སྟེ། ཅིའི་ཕྱིར་ན་སྟོན་པ་སྐུ་གསུམ་གྱི་སྤྲུལ་གཞིའང་ཆོས་ཀྱི་སྐུ་ཅི་ཡང་མ་ཡིན་པའི་གདངས་ལོངས་སྤྱོད་རྫོགས་པར་འཆར་ཞིང་། དེ་ལས་སྤྲུལ་པའི་སྐུ་སྣ་ཚོགས་སུ་སྟོན་པའི་ཁྱད་བྱེད་དང་སྒོ་མཐུན་པ་ཡིན་ནོ། །དེའང་ལས་ཐིག་གི་རྒྱུ་ནི་རས་བལ་དཀར་པོ་དང་། ཡེ་ཐིག་གི་རྒྱུ་ནི་ཚོན་སྣ་ལྔ་པ་སྟེ། གཉིས་ཀའང་རིན་ལ་མ་བརྩེགས་པའི་དཔའ་བོའི་རིན་གྱིས་ཉོས་པ་གང་ཞིག་གཞོན་ནུ་མས་བཀལ་ཐབས་ལེགས་པར་བྱས་པ་སྟེ། ཧེ་རུ་ཀ་གལ་པོ་ལས། རལ་བལ་པདྨའི་རྒྱུས་པ་དང་། །ཤིང་འི་སྐྲ་ཡི་སྐུད་པའམ། །བྷ་སུ་ཏ་ཡི་ཐིག་སྐུད་བྱ། །ཞེས་དང་། པུཎྜ་རི་ཀ་ལས། གཟུངས་མ་མཚན་དང་ལྡན་པ་གཅིག །ལས་ཀྱི་རྡོ་རྗེ་མོར་དབང་བསྐུར། །ཐིག་སྐུད་འཁེལ་དུ་གཞུག་པའོ། །ཞེས་དང་། སྤྱི་རྒྱུད་ལས་ཀྱང་། དཀྱིལ་འཁོར་ཐིག་གདབ་ཐིག་སྐུད་ནི། །ཁ་བསྒྱུར་གཙང་མ་སྲ་ཞིང་ཕྲ། །དེ་བཞིན་བུ་མོ་གཞོན་ནུས་བཀལ། །གསར་པ་ཤིན་ཏུ་ཚང་པ་དང་། །མཛེས་ཤིང་ཤིན་ཏུ་རན་པ་དང་། །དྲི་ཞིམ་རེག་ན་བདེ་བ་དང་། །ལེགས་པར་བཀལ་དང་ཕྲ་བ་དར། །སྦོམ་ཕྲ་ལ་སོགས་བཀལ་ལེགས་དང་། །འཇུར་མདུད་མེད་པར་
གྱུར་པ་ཡི། །ཐིག་སྐུད་མེ་ཏོག་སྤོས་མཆོད་པས། །ཤེས་རབ་ཅན་གྱིས་ཐིག་གདབ་བོ། །ཞེས་སོ། །རིང་ཐུང་གི་ཚད་ནི་ཁུ་ཚུར་གྱི་སོར་མོ་བཞི་གང་བའི་ཆང་བཟུང་ལྷག་པའི་དཀྱིལ་འཁོར་གྱི་ཉིས་འགྱུར་དང་སྦོམས་སུ་སྒོའི་ཉི་ཤུ་ཆར་བྱེད་ལ། དེ་ལས་རིང་ཐུང་བྱུང་ན་སློབ་དཔོན་ནད་ཀྱིས་འདེབས་པར་སྤྱི་རྒྱུད་ལས་བཤད་ལ་ཉིས་འགྱུར་ལ་རིང་ཐུང་གཉིས་སུ་ཡོད་དེ་རིང་བ་ནི་འོད་ཕྲེང་ནས་འོད་ཕྲེང་གི་བར་དང་། ཐུང་བ་ནི་རྭ་རྩེ་ནས་རྭ་རྩེའི་མཐར་ཐུག་པའོ། །དེའང་ལས་ཐིག་ཐོག་མར་གདབ་པའི་ལུགས་ལྟར་ན་ལས་ཐིག་གི་བྱ་བ་ནི་ས་གཞི་ཁོ་ན་ལ་ཡིན་ཀྱང་། ཡེ་ཐིག་གི་བྱ་བ་ནི་ནམ་མཁའ་དང་ས་གཞི་གཉིས་ཀ་ལ་བྱེད་དགོས་པ་ཉིད་དོ། །ལ་ལ་ཡེ་ཐིག་ནམ་མཁའ་ལ་བཏབ་པའི་ཕྱི་ནས་ས་ལ་གདབ་ཏུ་མི་རུང་བའི་ཁྱད་པར་འབྱེད་པ་ལྟར་ན་ཚོན་སྣ་ལྔ་པའི་ཐིག་སྐུད་གཉིས་དང་། ཚོན་སྣ་གཅིག་པའི་ཐིག་སྐུད་གཅིག་སྟེ་གསུམ་དགོས་པའི་ཕྱོགས་སུ་སྣང་ཡང་དེ་ནི་ནམ་མཁའ་དང་ས་ལ་གདབ་པའི་ཡེ་ཐིག་གཉིས་ཀ་ཐིག་སྐུད་གཅིག་གིས་རུང་བའི་ཕྱོགས་དང་འགལ་བ་ཉིད་དོ། །འོན་ཀྱང་དཀྱིལ་འཁོར་གཞན་དུ་ལོངས་སྤྱད་ཟིན་པའི་ཐིག་སྐུད་ནི་དམན་མ་ཡིན་པས་མི་རུང་བར་སློབ་དཔོན་སངས་རྒྱས་གསང་བ་བཞེད་དོ། །ཡང་ཡེ་ཐིག་སྔོན་ལ་འདེབས་པའི་ལུགས་ལ་ནི་ཐིག་སྐུད་ཟུར་པ་མེད་ན་དེའི་ཡེ་ཤེས་པ་བཛྲ་མུས་གཤེགས་སུ་གསོལ་བའི་ཐིག་སྐུད་ལ་གཉིས་པའི་མིང་དུ་བཏགས་ལ། དེ་ཉིད་བདུད་རྩི་ལྔ་དང་དཀར་ཆལ་གྱིས་སྦགས་བས་ཀྱང་རུང་སྟེ། དཀྱིལ་འཁོར་གཞན་དུ་ལོངས་སྤྱད་པའི་གཞན་སྒྲ་ནི་ལས་དང་བྱ་བ་དང་ཆོ་ག་དང་དུས་གང་རུང་ཐ་དད་པ་ཞིག་ལ་འདོད་ཀྱིས། དཀྱིལ་འཁོར་གཅིག་གི་བྱ་བ་སྔ་ཕྱི་ལ་གཞན་སྒྲ་མི་འཇུག་པའི་ཕྱིར་རོ། །དེ་ལྟར་ལུགས་གཉིས་པོ་གང་ཡང་རྒྱུད་
དང་མན་ངག་གི་དགོངས་པ་དང་མི་འགལ་བས། དགོས་པའི་ཁྱད་པར་དེ་དང་དེར་ངེས་པར་བྱས་ནས། ཐོག་མར་བྱིན་གྱིས་བརླབ་པའི་ཚུལ་ནི། ཡེ་ཤེས་ཀྱི་ཐིག་སྐུད་དཔའ་བོ་འབྲུ་ལྔས་བརླབ་པ་དང་། དམ་ཚིག་གི་ཐིག་སྐུད་འབྲུ་གསུམ་གྱིས་སྐུ་གསུང་ཐུགས་ཀྱི་རང་བཞིན་དུ་བརླབ་པའི་ཚུལ་རང་རང་གི་དཀྱིལ་ཆོག་ལྟར་བྱས་ནས་གདབ་པའི་ཚུལ་ནི་སློབ་དཔོན་ཡབ་ཡུམ་མམ། །དེར་བཏགས་པའི་སྒྲུབ་གྲོགས་གཉིས་ཀ་ལྷ་སྐུར་གསལ་བའི་སྦྱོར་མཚམས་ནས་བྱང་ཆུབ་སེམས་ཀྱི་རང་བཞིན་ཐིག་སྐུད་ཀྱི་རྣམ་པར་བརྐྱང་བར་མོས་ནས་ཐིག་སྐུད་མ་ཆད་པ། ཐིག་སྣམ་ཤོར་བ། ཕྱོགས་མ་འཁྲུལ་བ་སྟེ་སློབ་དཔོན་གྱི་སྡོད་ས་མ་འཕྱུགས་པ། སློབ་མས་སློབ་དཔོན་ལ་རྒྱབ་མི་སྟོན་པ། ཐིག་ལ་མ་འགོངས་པའི་ཚུལ་ལ་བསྒྲིམས་ནས་གདབ་པའི་ཚུལ་རྡོ་རྗེ་ལས་རིམ་ལས། ཐིག་སྐུད་ཆད་ན་སློབ་དཔོན་འགྲོངས། །ཕྱོགས་འཁྲུལ་བས་ནི་གཉིས་ཀ་ཉམས། །རྒྱུད་ཆད་ལམ་ལ་གནོད་པ་སྟེ། །དེ་ཕྱིར་མཁས་ལྡན་བསྒྲིམས་ཏེ་བྱ། །ཞེས་དང་། དེའི་ནང་ནས་ཐིག་སྐུད་ཀྱི་པྲ་རྟགས་ངན་པ་ནི་ཚངས་ཐིག་གཉིས་འདེབས་པའི་དུས་ལ་གཙོ་བོར་བརྟག་གོ །དེ་ཡང་། རབ་གནས་ལྡན་པའི་ཐིག་འགོམས་ན། །བདེ་གཤེགས་སྐུར་བ་བཏབ་དང་མཚུངས། །སངས་རྒྱས་ཆོས་ལས་རིང་འགྱུར་བས། །ཧྲཱི སྒྲའི་ཕྱག་རྒྱས་འཛུལ་བར་བྱ། །ཞེས་ཐིག་ལ་རང་དབང་མི་འདུ་བར་འགོམས་དགོས་ན་ཧྲཱིའི་སྒྲས་ནམ་མཁའ་ལ་བཏེག་པའི་འོག་ཏུ་འཛུལ་བར་མོས་ཤིང་། དེ་བཞིན་དུ་ཤར་ལ་སོགས་པའི་ཕྱོགས་རྣམས་ཀྱང་བློས་བཏགས་པ་ཙམ་ལས་ངོ་བོ་ཉིད་ཀྱིས་གྲུབ་པ་མེད་པའི་དོན་རྟོགས་ན་ཕྱོགས་འཆོལ་བའི་ཉེས་པའང་རང་བཞིན་གྱིས་ཁེགས་པ་ཉིད་དོ། །རྒྱུད་སྡེ་རྣམས་ནས་ཐིག་སྐོར་བྱ་ལུགས་གསུམ་དུ་བཤད་ཀྱང་དཱ་རི་ཀ་པས། གཡོན་ནས་
བསྐོར་བའི་སྦྱོར་བ་ཡི། །རྣམ་པ་ཀུན་ཏུ་ཐིག་གདབ་བྱ། །མཚམས་གྱི་ཆུ་ནི་གཡས་སུ་སྟེ། །ཞེས་ཕྱོགས་ཐིག་གཡོན་སྐོར་དང་། མཚམས་ཐིག་གཡས་སྐོར་དུ་བྱ་བ་ནི་རྟེན་འབྲེལ་གྱི་སྒོ་ནས་སྤྱི་ལ་ཁྱབ་ཆེ་བ་ཡིན་ནོ། །དེ་ལ་འདིར་སྟ་གོན་གྱི་ལྷ་གནས་ཐིག་ལ་བརྟེན་ནས་མ་འཆོལ་བར་ངོས་འཛིན་པ་དང་། དགོས་པ་དེ་གཅིག་པོར་མ་ངེས་པས་སྙན་གསན་དབབ་པ་ལྟ་བུའི་སླད་དུ་དམིགས་ནས་དཀྱིལ་འཁོར་བྱ་བའི་གཞིར་མཎྜལ་ལ་དྲིའི་ཐིག་ལེར་ཚོམ་བུ་འགོད་པའི་ལུགས་གཉིས་ལས། དང་པོ་ལྟར་ན་སྐབས་འདིར་ས་ཐིག་ངེས་པར་འདེབས་དགོས་ལ། ཕྱི་མ་ལྟར་ན་འོག་ཏུ་ཡེ་ཐིག་སྔོན་དུ་འགྲོ་བས་ཐིག་གི་ལས་ཐམས་ཅད་ཆིག་རྫོགས་སུ་བྱ་བ་འཇུག་པ་བདེ་བ་ཉིད་དོ། །འདིར་ནི་རྟོག་པ་ཅན་གྱི་སྣང་ངོ་ལ་གཟོ་བ་དང་པོའི་ཕྱོགས་ལྟར་བཤད་ན། སློབ་དཔོན་ཞལ་ཤར་དང་། ཐིག་གཡོག་ནུབ་ཏུ་ཕྱོགས་པས་རྒྱུད་སྟེ་སོ་སོའི་རང་ལུགས་དང་མཐུན་པའི་ཐིག་གདབ་པ་ཡིན་ལ། ཐིག་གིས་ནི་གཞལ་ཡས་ཁང་གི་མཚན་ཉིད་གཏན་ལ་འབེབས་པའི་ཕྱིར་ན་སྔ་འགྱུར་རྒྱུད་སྡེ་ཆེན་པོའི་རིང་ལུགས་ལ་བརྟེན་ནས་དཀྱིལ་འཁོར་གྱི་བཀོད་པ་མི་འདྲ་བ་གསུམ་བསྟན་པ་ལས་ཐོག་མར་འདུས་པ་མདོའི་དཀྱིལ་འཁོར་སྒོ་སྦྲག་དགུ་བ་བཤད་པར་བྱ་སྟེ། དེ་ལ་བཅུད་ཆགས་པའི་དང་པོ་ཚངས་པ་ཡིན་པས་ཐིག་གི་ཐོག་མའི་མིང་ལའང་དེ་ལྟར་གྲགས་པའོ། །ཐོག་མར་ཤར་ནུབ་ཚངས་ཐིག་གདབ། །དབུས་ནས་ཕྱོགས་བཞིར་མཚམ་མ་བྲི། །ཤར་ནུབ་ཚད་ནས་བསྣོལ་ཐིག་དང་། །ཕྱོགས་བཞིའི་ཚད་ནས་ཟུར་ཐིག་གིས། །བྱ་རྗེས་བཙལ་ལ་ལེགས་པར་གདབ། །ཐིག་ཆེན་བརྒྱད་པོ་གྲར་བཅད་ལ། །ཚངས་པའི་ཐིག་གི་ཕྱོགས་བཞི་ནི། །མཉམ་པ་བདུན་དུ་གཞལ་བ་ལས། །དང་པོ་ལྟེ་བ་འཁོར་
ལོའི་ས། །ལྷག་རྣམས་ཆ་མཉམ་གཉིས་སུ་བཅད། །ནང་མ་བརྒྱད་གསིལ་ནང་སྒོ་བརྒྱད། །ཕྱི་མ་ཕྱི་ཡི་སྒོར་འདོད་དེ། །རེ་རེའང་གསུམ་གསུམ་དག་ཏུ་བགོ། །ཀུན་གྱི་ནང་མ་ཁྱམས་ཡིན་ལ། །བར་མའི་དབུས་དོར་མཐའ་བཏབ་པ། །རྩིག་པ་འདོད་སྣམ་ཕ་གུའི་གནས། །ཕྱི་མ་ཕྱེད་གདབ་ཕྱི་མ་གསིལ། །མུན་པ་མདའ་ཡབ་ཤར་བུའི་གནས། །ནང་སྒོ་བརྒྱད་ཀྱི་གཡས་གཡོན་དུ། །ཚངས་པའི་ཐིག་ལ་རང་ཚད་ཀྱི། །ཆ་ཕྲན་ལྔ་གདབ་སྒོ་ཁྱུད་དང་། །རྩིག་པའི་གནས་སུ་ངེས་པ་ཡིན། །སྒོ་ནི་ཕྱི་མའི་གཡས་དང་གཡོན། །རང་ཆེད་ཆ་ཆེན་གཉིས་གཉིས་དང་། །མདའ་ཐིག་ཕྱིའི་ཆ་ཆེན་གསུམ། །བཏབ་པའི་གཡས་གཡོན་ཆ་ཆེན་གྱི། །དང་པོའི་ཕྱེད་གདབ་ཕྱི་མ་གདབ། །གཉིས་པ་ཆ་བཞིར་བསིལ་བ་དག །འགྲམ་ལོགས་རྩིག་པ་མུན་པ་དང་། །ཀ་བ་ཀ་རྒྱན་རྣམས་ཀྱིས། །ཕྱི་མའི་ཆ་ཆེན་གསུམ་པོ་ཡི། །ནང་མ་གཉིས་པོ་ཆ་བཞི་སྟེ། །ཏཱ་ར་ཎ་བརྒྱད་ཆ་མཉམ་ལས། །དང་པོ་ཀ་རྒྱན་མཐའ་དང་མཉམ། །གཉིས་གསུམ་དེ་ལས་གཅིག་ཕྱིར་འཕྱར། །བཞི་པ་གཉིས་བསྐུམ་ལྔ་པ་གཅིག །ཕྱིར་འཕྱང་དྲུག་པ་གཉིས་སུ་བསྐུམ། །བདུན་བརྒྱད་རིམ་པར་རེ་རེ་འཕྱར། །རིམ་པས་རྟ་རྐང་ཆུ་སྐྱེས་དང་། །སྒྲོམ་དང་ཟ་ར་ཚགས་སྣ་མཆོངས། །བསྒྲིལ་འཕྱང་ཤར་བུ་ཁྱུང་མགོའོ། །སྣམ་བུ་གསུམ་པའི་ཕྱི་ཐིག་དང་། །ཚངས་ཐིག་ཕྲད་པ་ནས་བརྩམས་ཏེ། །ཆ་ཕྲན་གཉིས་ཀྱི་གླང་རྒྱབ་དབུས། །མུན་པའི་ཕྱི་ཐིག་ཚངས་གནས་ཀྱི། །གཡས་གཡོན་ཆ་ཕྲན་གཉིས་ཐལ་ནས། །སྔར་བཞིན་བསྐོར་བ་མུན་པའི་མཐོངས། །ཆ་ཕྲན་གཅིག་བསྐོར་མུ་རན་ཏེ། །འཁོར་ལོ་ཉིས་འགྱུར་པདྨ་དང་། །གདུགས་ནི་ཆ་ཕྲན་རེ་རེའོ། །སྣ་ཚོགས་རྡོ་རྗེའི་རྭ་གཡས་གཡོན། །སྣམ་བུ་གསུམ་པའི་ཕྱི་ཐིག་དང་། །ཚངས་ཐིག་གཉིས་ཕྱིན་འཇོམ་པ་ནས། །བཟུང་སྟེ་
ཀ་རྒྱན་རྩེ་ནས་བསྐོར། །དེ་ནས་ཕྲེད་གཉིས་ཕྱི་རུ་གཅིག །ཕྱིན་ཏེ་སྔོན་མའི་ཚད་དེས་བསྐོར། །དབུས་རྭ་རྩ་བའི་རྒྱ་ཚད་ནི། །བལྟར་མི་མངོན་ཡང་ཆ་ཆེན་གཅིག །རིམ་ཕྲ་རྩེ་མོ་ཆ་ཕྲན་གཉིས། །པད་འཁོར་གདུགས་ཀྱི་འོག་ཏུ་སྦྱར། །ལྟེ་བའི་སུམ་ཆ་ཟླུམ་པོར་བསྐོར། །དེ་མཐར་གསུམ་བསྐོར་ཆ་ཕྲན་རེ། །དེ་མཐར་གྲུ་ཐིག་ལ་རེག་པར། །བསྐོར་བའི་ནང་དུ་ཆ་ཕྲན་གཅིག །རིམ་པར་བསྐོར་བ་ལྟེ་བ་དང་། །མུ་ཁྱུད་རྩིབས་དང་རྩིབས་རྟེན་ཡིན། །ཕྱི་མའི་མདའ་ཐིག་ཕྱི་རོལ་དུ། །ཆ་ཕྲན་གཅིག་དང་ཆ་ཆེན་གཅིག །ཕྱེད་དང་གཅིག་ཏུ་བསྐོར་བ་ནི། །པདྨ་དུར་ཁྲོད་རྡོ་རྗེ་དང་། །མེ་རིའི་ས་རུ་ངེས་པ་ཡིན། །སྟེང་ཁང་ཞི་བའི་དཀྱིལ་འཁོར་ནི། །སྒྱུ་འཕྲུལ་ཞི་བ་ཇི་བཞིན་ཏེ། །ཐིག་ཆེན་བརྒྱད་པོ་སྔར་བཞིན་ལ། །ཚངས་པའི་ཐིག་གི་ཕྱོགས་བཞི་རུ། །ཆ་ཆེན་དགུ་དགུ་བཅོ་བརྒྱད་ལ། །རྩ་བའི་བརྒྱད་ཆ་སྒོ་ཉིད་ལ། །སྒོ་ཡི་བཞི་ཆ་ཆ་ཕྲན་ནོ། །ཚངས་ཐིག་ནས་བཟུང་དང་པོ་དང་། །དྲུག་པ་ཕྱེད་གདབ་ཕྱི་མ་གསིལ། །གཉིས་བདུན་བརྒྱད་རྣམས་ཆ་བཞི་དང་། །ལྔ་དགུ་དབུས་དོར་མཐའ་གཉིས་གདབ། །གསུམ་པ་རང་བཞག་བཞི་པའི་ནང་། །ཆ་ཕྲན་གཅིག་ཏུ་གདབ་པར་བྱ། །དབུས་ནས་ཟླུམ་སྐོར་ཆ་ཕྲན་ལྔ། །གཅིག་དང་ལྔ་དང་གཅིག་རྣམས་ནི། །ལྟེ་བ་མུ་ཁྱུད་རྩིབས་རྩིབས་རྟེན། །གྲུ་ཐིག་ཕྱི་རུ་ཆ་ཕྲན་གཅིག །སྲིད་དུ་སྒོ་ཚད་གློ་འབུར་ཏེ། །དེ་ནས་རིམ་བཞིན་ཁྱམས་བརྩིག་པ། །འདོད་སྣམ་ཕ་གུ་དྲྭ་ཕྱེད་དང་། །ཤར་བུ་མདའ་ཡབ་དག་གི་ས། །སྒོ་ཁྱུང་ཆ་ཆེན་འགྲམ་དང་ལོགས། །དེ་ཡི་ཕྱེད་ཡིན་མུན་པ་དང་། །ཀ་བ་ཀ་རྒྱན་ཆ་ཕྲན་རེ། །རྟ་བབས་བརྒྱད་ནས་གདུགས་ཀྱི་བར། །སྔ་མ་ཇི་བཞིན་འདིར་ཡང་དྲན། །མདའ་ཐིག་ཟུར་ནས་ཆ་ཕྲན་གཅིག །དོར་མཐར་གཅིག་དང་གཉིས་གཉིས་དང་། །ཆ་ཆེན་གཅིག་ཏུ་བསྐོར་བ་ནི། །རྩིབས་རྟན་
པདྨ་རྡོ་རྭ་དང་། །མེ་རི་རབ་རྣམས་ཀྱི་ས། །རྩ་ཐིག་སྒོ་ཁྱུད་འཛོམ་རྩེ་ནས། །རྩིབས་རྟེན་ཚངས་ཐིག་ཕྲད་པའི་བར། །གཡས་ནས་གཅིག་ཤོས་གཡོན་ནས་གཡས། །བསྐོར་བ་འོག་གཞི་འཁོར་ལོའི་རྩིབས། །སྒྱུ་འཕྲུལ་ཁྲོ་བོའི་ཁྱད་པར་ནི། །ཚངས་པའི་ཐིག་གི་ཕྱོགས་བཞི་རུ། །ཆ་ཆེན་དགུ་དགུ་བཅོ་བརྒྱད་གདབ། །ནང་མ་གསུམ་པོ་ཕྱེད་གཏུབ་ཀྱི། །དང་པོ་ཕྱེད་གདབ་ཕྱི་མ་ཕྱེད། །གཉིས་པ་དང་ནི་བཞི་པའི་ནང་། །བཞི་ཆ་གཅིག་རེ་གདབ་པར་བྱ། །ལྔ་པ་དབུས་དོར་མཐའ་གཉིས་གསིལ། །དྲུག་པ་ཕྱེད་གདབ་ཕྱི་མ་གདབ། །དེ་ནི་ནང་གི་སྒོ་ཡིན་ལ། །ཆ་ཆེན་བཞི་པ་ཕྱི་ཡི་ཁྱམས། །ལྔ་དགུ་དབུས་དོར་མཐའ་གཉིས་གསིལ། །དྲུག་པ་ཕྱེད་གདབ་ཕྱི་མའང་གདབ། །བདུན་དང་བརྒྱད་པ་ཆ་བཞིར་བགོ། །ཕྱི་སྒོ་ཚངས་ཐིག་གཡས་གཡོན་དུ། །ཆ་ཆེན་གཉིས་གཉིས་བཏབ་པ་ལས། །དང་པོ་ཕྱེད་གདབ་ཕྱི་མ་བཅད། །གཉིས་པ་ཆ་ཕྲན་བཞི་ཏུ་གསིལ། །དབུས་ནས་ཟླུམ་སྐོར་ཆ་ཕྲན་ལྔ། །གཅིག་དང་ལྔ་དང་གཅིག་རྣམས་ནི། །ལྟེ་བ་མུ་ཁྱུད་རྩིབས་རྩིབས་རྟེན། །དེ་ནས་ནང་གི་གློ་འབུར་གྱི། །དཀྱུས་སུ་སྒོ་ཚད་ཞེང་ཆ་ཕྲན། །ཁྱམས་རྩིབས་འདོད་སྣམ་ཕ་གུ་དང་། །དྲྭ་ཕྱེད་ཤར་བུ་མདའ་ཡབ་བོ། །སྒོ་ཁྱུད་སྒོ་ཚད་འགྲམ་ལོགས་གཉིས། །དེ་ཡི་ཕྱེད་དེ་ནང་བསྒོའོ། །ཕྱི་མ་རིམ་བཞིན་ཕྱི་ཁྱམས་དང་། །རྩིག་པ་འདོད་སྣམ་ཕ་གུ་དང་། །དྲྭ་ཕྱེད་ཤར་བུ་མདའ་ཡབ་ས། །སྒོ་ཁྱུད་ཆ་ཆེན་འགྲམ་དང་ལོགས། །དེ་ཡི་ཕྱེད་ཡིན་མུན་པ་དང་། །ཀ་བ་ཀ་རྒྱན་ཆ་ཕྲན་རེ། །རྟ་བབས་གདུང་བར་གོང་དང་མཚུངས། །མངའ་ཐིག་ཟུར་ནས་ཆ་ཕྲན་གཅིག །དོར་མཐར་ཆ་ཕྲན་གཅིག་དང་གཉིས། །ཆ་ཆེན་གཅིག་དང་དེ་ཕྱེད་དང་། །ཆ་ཆེན་གཅིག་ཏུ་བསྐོར་བ་ནི། །རྩིབས་རྟེན་པདྨ་དུར་ཁྲོད་དང་། །རྡོ་རྗེའི་རྭ་བ་མེ་རིའི་ས། །ལྷག་
མ་སྔར་དང་མཚུངས་པའོ། །སངས་རྒྱས་མཉམ་སྦྱོར་ནི། ཚངས་པའི་ཐིག་གི་ཕྱོགས་བཞི་རུ། །ཆ་ཆེན་དགུ་དགུ་བཅོ་བརྒྱད་ལས། །ཚངས་ཐིག་འགྲམ་ནས་དང་པོ་དང་། །བདུན་པའི་ཕྱེད་གདབ་ཕྱི་མ་གསིལ། །གཉིས་དང་བརྒྱད་པ་ཆ་བཞིར་བགོ། །དྲུག་དགུ་དབུས་དོར་མཐའ་གཉིས་གདབ། །དེ་ནི་གཞི་ཡི་དཀྱིལ་འཁོར་རོ། །ལྔ་པ་ཕྱེད་བཅད་ནང་མ་ཕན། །ཕྱོགས་བཞིར་ཐིག་བཞིས་གླིང་དགུར་ཕྱེ། །ནང་གི་དཀྱིལ་འཁོར་དགུ་ཡི་ས། །ཀུན་ཀྱང་གྲུ་བཞི་སྒོ་བཞིའི་དབུས། །ཟླུམ་པོ་གཉིས་དང་ཟླ་གམ་དང་། །པདྨ་རིན་ཆེན་ཆ་བརྒྱད་དང་། །རྒྱ་གྲམ་དབྱིབས་ཏེ་རིམ་པ་བཞིན། །མི་བསྐྱོད་རྣམ་སྣང་ཧེ་རུ་ཀ །གར་དབང་ཉི་མ་རྟ་མཆོག་རྣམས། །དབུས་དང་ཕྱོགས་བཞི་མཚམས་བཞིའོ། །མདའ་ཡབ་ཟུར་ནས་ཆ་ཕྲན་གཅིག །གཉིས་གཅིག་གཉིས་དང་ཆ་ཆེན་གཅིག །ཆ་ཆེན་ཕྱེད་དང་ཆ་ཕྲན་གཅིག །བསྐོར་བ་ལྷ་སྣམ་པད་རྡོར་དང་། །མེ་རི་དུར་ཁྲོད་འདོད་འབྱུང་གནས། །ཁོར་ཡུག་ཉིད་དོ་གཞན་དག་ནི། །སྤྱི་དང་མཐུན་པར་རིགས་པ་ཡིན། །གསུམ་ཀའི་མཚན་ཉིད་ཞིབ་པ་ནི། །སོ་སོའི་རྒྱུད་དང་འགྲེལ་པ་དང་། །དཀྱིལ་ཆོག་དག་ལས་ཤེས་པར་བྱ། །དེ་ལྟར་ལས་ཐིག་གི་བྱ་བ་སྔོན་དུ་བཏང་ནས། ལྷ་སྟྭ་གོན་དངོས་ནི། ཐིག་གིས་མཚོན་པའི་ལྷའི་གནས་སོ་སོར་དྲི་བཟང་དང་། བདུད་རྩི་ལྔས་གཙོ་བོའི་གནས་སུ་གྲུ་བཞི་པ་དང་། འཁོར་གྱི་གནས་སུ་ཟླུམ་པོ་བྱས་ལ་སོ་སོའི་སྔགས་བརྗོད་ཅིང་མེ་ཏོག་གི་ཚོམ་བུ་བཀོད་ནས་སྟན་ལ་དམིགས་པར་བྱ་ལ། མཐའ་མཆོད་པས་བསྐོར་ནས་བྱིན་གྱིས་བརླབས། སྤྲོ་ཞིང་ནུས་ན་དམ་ཚིག་གི་འཁོར་ལོ་ཇི་ལྟ་བ་བསྐྱེད་ནས་ཡེ་ཤེས་པ་གཞུག་ཅིང་གོམས་པ་བརྟན་པས་ནི་ས་བོན་གྱིས་བསྐྱེད་པས་ཀྱང་
རུང་ལ། སྔར་ས་ཆོག་གི་སྐབས་སུ་བསྐྱེད་ནས་ནམ་མཁར་བཏེག་པ་ཡིན་ན་དེ་ཉིད་ཕབ་པས་ཀྱང་ཆོག་སྟེ། ཧེ་རུ་ཀ་འདུས་པར། །ཐིག་གདབ་ཆོ་ག་ཇི་བཞིན་བྱ། །དྲི་ཡི་ཐིག་ལེ་མཚན་མ་དགོད། །ནམ་མཁའི་དཀྱིལ་འཁོར་ཕབ་ཅིང་མཆོད། །ཅེས་པས་གསལ་ལོ། །དེ་ལ་ལྷ་གྲངས་དང་མཉམ་པའི་མཆོད་པས་མཆོད་ནས་སྟྭ་གོན་ལ་གནས་པའི་གསོལ་བ་གདབ་པའི་མཐར་གཞི་དེ་ཉིད་དུ་ཐིམ་པར་མོས་ཚོམ་བུའི་གདན་ཕུལ་ནའང་བསྡུ་བར་བྱའོ། །གསུམ་པ་བུམ་པ་སྟ་གོན་ལ་གཉིས་ཏེ་བུམ་པའི་མཚན་ཉིད་བཤད་པ་དང་། དེ་ལ་བུམ་རྫས་བཏབ་ནས་བསྒྲུབ་ཚུལ་ལོ། །དང་པོ་ནི། པདྨ་དྲ་བའི་རྒྱུད་ལས། །གསེར་དང་ཟངས་སམ་ས་ཉིད་ལ། །བུམ་པ་ལྟོ་ཡངས་མགྲིན་པ་ཕྲ། །ཁ་གཡེལ་ཞབས་ཚད་ཞུམ་པ་ལ། །ཞེས་དང་། དགྲ་ནག་ནས། བུམ་པ་ལྟོ་ཆེ་བྲེ་ཚད་ལ། །མཆུ་འཕྱང་མགྲིན་རིང་གདན་ལྡན་པར། ཞེས་དང་། བཟང་པོ་ཡོངས་བཟུང་ལས། །མགྲིན་པ་རིང་བ་ལྟོ་ཆེ་བ། །ཡལ་ག་བཟང་པོས་ཁ་རྣམས་བརྒྱན། །ཞེས་དང་། ཡང་དག་གི་དབང་གཞུང་ལས། བུམ་པ་མགྲིན་རིང་ལྟོ་བ་ཟླུམ། །ཞེས་སོ། །ཚད་ནི་དང་པོའི་སངས་རྒྱས་ལས་ལྟོ་བའི་ཟླུམས་སུ་སོར་མོ་བཅུ་དྲུག་དང་། ལྟེ་བའི་འོག་ནས་ཁ་དང་མཆུའི་བར་གྱི་སྲིད་དུ་སོར་མོ་ཉི་ཤུ། ཁ་འགྲམ་ནས་འཕྱངས་པའི་མཆུ་ལ་སོར་མོ་གཉིས་དང་། མགྲིན་པའི་དཔངས་ལ་སོར་མོ་དྲུག་མཆུའི་མཐའ་ནས་མཐའ་གཞན་གྱི་བར་ལ་ཡོད་པའི་ཆ་གཉིས་མགུལ་སྦུབས་དང་། ཆ་གཅིག་མཆུ་གཉིས་ཀྱི་ཞེང་ལ་བཤད་དེ་ཞི་རྒྱས་དབང་གསུམ་གྱི་བུམ་པའི་མཚན་ཉིད་དོ། །དེའང་རྒྱུད་གཞན་དག་ལས་རྩ་བ་དང་ནག་ནོག་མེད་པ་ཞེས་པས་རྩ་བ་ནི་ཞབས་སྟེགས་དང་ནག་ནོག་མེད་པ་ནི་རང་བཞིན་གྱི་དཀར་བ་དང་དྲི་མ་མེད་པའོ། །གལ་ཏེ་རྒྱུའི་ཁ་དོག་གིས་
མ་བཏུབ་ན་ཅན་དན་དཀར་པོའི་ལྡེ་གུའམ་རྡོ་ཐལ་ལ་སོགས་པས་བྱུག་པར་བཤད་དོ། །དེ་སྐད་དུ། །ནག་པོ་རྣམ་པར་སྤངས་པ་དང་། །རྩ་བ་དོར་ཞིང་མ་འབྱར་བ། །བུ་ག་རྣམ་པར་སྤངས་པ་དང་། །དེ་བཞིན་གས་པ་མེད་པ་བཟུང་། །ཞེས་དང་། རིམ་ལ་གསལ་བ་ལས། རིན་ཆེན་རྒྱུ་ལས་བྱུང་བ་ཡི། །ལྟོ་ཆེ་མགྲིན་པ་རིང་བ་དང་། །མཆུ་འཕྱང་ནག་པོ་ར་རི་མེད། །དྲི་ཞིམ་ས་དཀར་གྱིས་བྱུགས་ནས། །རང་རང་རིགས་ཀྱི་མཚན་མ་གདབ། །རྣམ་རྒྱལ་དང་ནི་ཐམས་ཅད་དང་། །སྣ་ཚོགས་རྡོ་རྗེ་ལས་ཀྱི་ལྷ། །ཁ་དོག་མཐུན་པའི་རས་ཟུང་སྟེ། །བུམ་པའི་མགུལ་དུ་དཀྲི་བར་བྱ། །ཙུ་ཏ་ལ་སོགས་ཤིང་དག་ནི། །ལོ་མ་མེ་ཏོག་དང་ལྡན་པ། །འདི་ནི་བུམ་པའི་ཁ་རྒྱན་ནོ། །ཞེས་པ་སྟེ་ཁྱད་པར་རྣམ་རྒྱལ་ནི་མཚན་ཉིད་ཐམས་ཅད་དང་ལྡན་པ་དགོས་པའོ། །གྲངས་ནི་ལྷ་གྲངས་ཡོད་དོ་འཚལ་གྱི་སྒོ་ནས་སྡུད་པ་དང་། རིགས་ཀྱི་སྒོ་ནས་སྡུད་པ་དང་། །ཕོ་བྲང་དབུས་མའི་ལྷ་གྲངས་ཀྱིས་སྡུད་པ་དང་། འཁོར་ལོའི་སྒོ་ནས་སྡུད་པ་སོགས་མཐའ་གཅིག་ཏུ་མ་ངེས་ཀྱང་ལྷ་གྲངས་ཚོགས་པར་དཀའ་བས་རིགས་ལྔའམ། གཙོ་ལས་གཉིས་ནི་མེད་དུ་མེ་རུང་ངོ་། །གཉིས་པ་ནི། བུམ་པ་ཇི་ཙམ་ཡོད་པ་གཙང་ཞིང་དྭག་པར་བྱས་པ་གུ་གུལ་གྱིས་བདུག །ལས་སྔགས་བཟླ་བཞིན་པར་ཡུངས་ཀར་གྱིས་བྲབས་པས་བགེགས་བསྐྲད། རྒྱུན་འབབ་ལ་སོགས་རྟ་གླང་བོང་བུ་སོགས་ཀྱིས་མ་བགྲོད་ལ། སྲོག་ཆགས་དང་རྡུལ་གྱིས་མ་གོས་ཤིང་སྣོད་གཞན་དང་མ་རག་པར། ཨོཾ་ཏཔ་ཏེ་མ་ཧཱ་ཏཔ་ཏ་སྭཱ་ཧཱ། ཞེས་པས་ལྷའི་གངྒཱར་བྱིན་གྱིས་བརླབས་ཤིང་མོས་པའི་ཆུ་ལ། ས་ར་ཧས་ཆང་དང་བཟང་པོ་ཡོངས་བཟུང་ལས་འོམ་ཅུང་ཟད་ལྡུགས་པར་བཤད་དོ། །ཇི་ལྟར་ཡང་དྲི་བཟང་དང་བཅས་པས་གཟུགས་སྐུ་གཉིས་ཀྱི་ཆ་སྟེ་སུམ་
གཉིས་ལོངས་པར་བཀང་བ་ལ། བུམ་རྫས་ནི་རྒྱུ་འཕྲུལ་རྩ་རྒྱུད་ལས། །འབྲུ་ལྔ་སྤོས་ལྔ་རིན་ཆེན་ལྔ། །སྙིང་པོ་ལྔ་དང་སྨན་ལྔ་དང་། །བདུད་རྩི་ལྔ་ཉིད་རབ་བསྐམས་ལ། །ཞེས་པས་འབྲུ་ལྔ་ནི། ནས་འབྲས་གྲོ་ཏིལ་མོན་སྲན་ནོ། །སྤོས་ལྔའམ་དྲི་ལྔ་ནི། གུར་གུམ། གླ་རྩི། ཛཱ་ཏི། ཅེན་ངན་དཀར་དམར་རོ། །ཁ་ཅིག་ཏུ་ཛཱ་ཏིའི་དོད་དུ་ག་བུར་དང་གླ་རྩིའི་དོད་དུ་ཨ་ག་རུ་བཤད་པ་ཡང་སྣང་སྟེ་ཉེར་ལྔ་ལ་འདི་ལེགས་སོ། །རིན་པོ་ཆེ་ལྔ་ནི། གསེར་དང་། པདྨ་རཱ་ག །མུ་ཏིག །བྱེ་རུ། མུ་མེན་ནོ། །པད་རཱ་ག་མེད་ན་དངུལ་ཟངས་དུང་གསུམ་གང་རུང་ངོ་། །སྙིང་པོ་ལྔ་ནི། ཆུའི་སྙིང་པོ་ལ་ན་ཚ། མེ་ཏོག་གི་སྙིང་པོ་སྦྲང་རྩི། ཤིང་ཏོག་གི་སྙིང་པོ་བུ་རམ། སའི་སྙིང་པོ་ཨ་འབྲས་སམ་ཏིལ། རྩི་ཏོག་གི་སྙིང་པོ་མར་རྣམས་སོ། །སྨན་ལྔ་ནི། བཟང་པོ་ཡོངས་བཟུང་ལས། ཀུཎྜ་ཀ་རི་བྲཱྀ་ཏཱ་ཏི། །ཧ་ས་དེ་ཝ་ཧ་ས་དང་། །པེ་ཏ་ཨ་པ་ར་ཛཱི་ཏ་སྟེ། །འདི་དག་གཅིག་ཤོས་སྨན་གྱི་ཚོགས། །ཞེས་པ་ལ་ངོས་འཛིན་གྱི་སྒོ་ནས། བྲཱྀ་ཧཱ་ཏི་ཀཎྜ་ཀཱ་རི་ཨ་པ་རཱ་ཛཱི་ཏ། དཎྜ་སྟེ་དབྱུག་པའི་ཨུཏྤལ་དཀར་དམར་རྣམས་སོ། །དེའི་དང་པོ་སྟག་ཚེར་བ་ཡིན་ཞེས་གྲགས་ལ། གསུམ་པ་གཞན་གྱི་མི་ཐུབ་པ་དཀར་པོའོ། །ཁ་ཅིག་ཏུ་ཀཎྜ་ཀཱ་རི་ལ་སྟག་ཚེར། །སླེ་ཏྲེས་ལ་སེང་ཚེར། ཤུ་དག་དཀར་པོ་ལ་ཨ་པ་རཱ་ཛཱི་ཏ། ཆུ་སྲིན་སྡེར་མོ་ལ་ཧ་ས་དེབ། དབང་ལག་ལ་ཨིནྡྲ་ཧ་སྟི་ཞེས་བཤད་པ་ཡང་སྣང་ངོ་། །སྨན་ལྔ་ལ་སོགས་པའི་མིང་དང་ངོས་འཛིན་མི་གཅིག་ཙམ་སྣང་བའི་ཚུལ་པདྨ་དྲཱ་བ་ལས། ག་བུར་གུར་གུམ་ཅུ་གང་དང་། །གླ་རྩི་གི་ཧཾ་ཆུ་ཡིས་བཀང་། །ཛ་ཁྲི་སེང་ཁྲི་ཧ་ས་དེ། །གི་རིཀ་ནི་དེ་འོག་གོ །ཅེས་སོ། །དེ་ལྟར་ལྔ་ཚན་ལྔ་པོ་ནི་རྣལ་འབྱོར་རྒྱུད་མན་ཆད་ཀྱི་བུམ་རྫས་ཡིན་ཏེ། ཀྲི་ཡ་དཔུང་བཟང་ལས། ནད་ཀྱི་བསྐལ་པ་བསལ་བའི་ཕྱིར། །སྨན་ལྔ་དག་ནི་བུམ་པར་བླུག །ཚུལ་ཁྲིམས་རྣམ་པར་དག་བྱའི་ཕྱིར། །
དྲི་སྣ་ལྔ་ཡང་བུམ་པར་བླུག །དགོས་འདོད་རེ་བ་སྐོང་བ་དང་། །མཚོན་གྱི་བསྐལ་པ་བསལ་བའི་ཕྱིར། །རིན་ཆེན་ལྔ་ཡང་བུམ་པར་བླུག །མུ་གེའི་བསྐལ་པ་བསལ་བའི་ཕྱིར། །འབྲུ་སྣ་ལྔ་ཡང་བུམ་པར་བླུག །ཀུན་གྱི་སྙིང་པོར་གྱུར་པ་དང་། །དགོས་འདོད་རེ་བ་བསྒྲུབ་པའི་ཕྱིར། །སྙིང་པོ་ལྔ་ཡང་བུམ་པར་བླུག །ཅེས་སོ། །དེའི་སྟེང་དུ་བདུད་རྩི་ལྔ་དང་ཤ་ལྔ་སྟེ་བླ་མེད་ཀྱི་དམ་རྫས་ཆེན་པོ་ལྔ་ཕྲག་གཉིས་བསྣན་པའི་ལྔ་ཚན་བདུན་པ་ནི་བླ་མེད་ཁོ་ནའི་བུམ་ཛས་ཀྱི་ཁྱད་པར་ཏེ། བུམ་པའི་ནང་དུ་བྱིན་གྱིས་བརླབས་པའི་སྔགས་ཀྱིས་གཞུག་ཚུལ་ཡང་བླ་མེད་ཁོ་ནའི་ཁྱད་པར་རོ། །དང་པོའི་ལྔ་ཚན་ལྔ་པོ་ནི། རིམ་པར་སྣང་མཐའ་དང་། དོན་གྲུབ་དང་། རིན་འབྱུང་དང་། མི་བསྐྱོད་པ་དང་། རྣམ་སྣང་གི་སྔགས་ཀྱིས་བུམ་པའི་ནང་དུ་གཞུག་ལ། བདུད་རྩི་ལྔ་ལ་ཨཱོཾ་པཉྩ་ཨ་མྲྀ་ཏ་ཨཱཧཱུྃ་དང་། ཤ་ལྔ་ལ་ཨོཾ་པཉྩ་མཱཾ་ས་ཨཱཧཱུྃ་གིས་གཞུག་པའམ། རྫས་སྔགས་རྣམས་གཅིག་ཅར་དུ་དྲིལ་བས་ཀྱང་རུང་བའོ། །དེ་ལྟར་རྫས་ཀྱིས་བཀང་བའི་བུམ་པའི་མགུལ་ཆིངས་ནི་རྒྱུད་སྡེ་འོག་མ་ལྟར་ན་སངས་རྒྱས་གསང་བས་རྣམ་འཇོམས་འགྲོལ་བར། གཞན་དུ་ལོངས་མ་སྤྱད་པའི་རས་གཙང་མཐོར་ཅོག་གསུམ་གྱིས་ཚུལ་དུ་དཀྲིའོ། །ཞེས་སྐུ་གསུམ་མཚོན་པ་དང་། དེ་བཞིན་རྣལ་འབྱོར་རྒྱུད་ལ་སྐུ་ལྔ་མཚོན་པའི་པྲོག་ལྔ་དང་། བླ་མེད་ལ་དེའི་སྟེང་དུ་ཞུ་བདེའི་ཡེ་ཤེས་མཚོན་པའི་པྲོག་བདུན་དུ་བཤད་པ་ཡང་ཡོད་དོ། །དེ་ཉིད་སྲད་བུ་དཀར་པོའམ་ཁ་དོག་བཅོས་བུས་འཆིང་བའི་ཚུལ། མཁའ་འགྲོ་ལས། ཁ་དོག་བཅོས་པའི་སྐུད་པས་བརྒྱན། །ཞེས་སོ། །དེ་བཞིན་རྒྱུད་སྡེ་འོག་མ་ལ་དམིགས་ནས་སློབ་དཔོན་བི་མ་ལ་དང་། བདེ་བའི་མྱུ་གུས་ཁ་རྒྱན་དཱུར་ཝར་བཤད་པ་ཡང་སྣང་སྟེ། གཞུང་
སོ་སོས་དམིགས་ཀྱིས་བསལ་བ་དག་ལ་གཅིག་ཤོས་ཀྱིས་གཅིག་འགོག་པའི་རིག་པ་བསམ་པ་ལ་སྙིང་པོ་མེད་དོ། །ཅིའི་ཕྱིར་ན། རྒྱ་གར་བའི་གཞུང་མང་པོ་ནས་ཨ་མྲ་ལ་སོགས་པའི་ཤིང་ལྔའི་ཁ་རྒྱན་བཤད་ཅིང་། རྡོ་རྗེ་ཕུར་པའི་རྒྱུད་འགའ་ཞིག་ལས་ཤུག་པའི་ལྡེམ་བུའང་བཤད་པ་དང་། དེ་ལས་ལྡོག་པའི་དྲག་པོའི་དམ་རྫས་དུ་མ་བཤད་པ་ཡང་ཡོད་པས་མཐའ་གཅིག་ཏུ་མི་བཟུང་ལ། རྡོ་རྗེ་མཁའ་འགྲོ་ལས། ཁ་ནི་ཤིང་ལོ་གསར་པས་བརྒྱན། །ཞེས་དང་། ཀུ་ཤའི་ཆུན་པོ་གདན་དུ་བཏིང་། །ཞེས་པ་ལ་དཔགས་ནས་ཁ་རྒྱན་ནི་ཤིང་དང་། ཀུ་ཤ་ནི་གདན་ལས་གཞན་དུ་མི་འཕོ་བར་ངེས་ན། བཟང་པོ་ཡོངས་བཟུང་ལས། །ཡལ་ག་བཟང་པོས་ཁ་རྣམས་བརྒྱན། །ཞེས་པས་ཡལ་གའི་སྒྲ་ནི་ཁྱབ་ཆེ་བའི་ཕྱིར་ཤིང་ཁོ་ནའི་རང་དབང་ཅན་དུ་བྱེད་མི་ནུས་ན། སྤྱི་རྒྱུད་ལས་ཀྱང་། ལྡུམ་བུ་བཟང་པོ་དང་། ཤིང་གི་ཡལ་འདབ་གཉིས་སུ་ཕྱེ་བས་ཤེས་སོ། །དེ་བས་ན་རྒྱུད་སྡེ་བསྲེ་བ་ནི་སངས་རྒྱས་ཀྱི་གསུང་ཡིན་པས་འདིར་ཕྱོགས་རིས་སུ་མི་གཅོད་ལ། བསྟན་བཅོས་བསྲེ་བ་ནི་གང་ཟག་གི་གཞུང་དུ་ངེས་པའི་ཕྱིར་འགྲེ་བ་མ་ཡིན་ནོ། །དག་པ་སྦྱོར་ཚུལ་གྱི་ངོ་ནས་སྔགས་ཕྱི་པ་ལྟར་ན། བུམ་པའི་དབྱིགས་དང་ཁ་དོག །ཁ་རྒྱན་དང་མགུལ་ཆིངས་དང་། དུང་ཞལ་དྲི་ཞིམ་པའི་ཆུ་མེ་ཏོག་དཀར་པོས་བརྒྱན་པའི་མཆོད་ཡོན་དང་བཅས་པའི་སྟེང་དུ་གཟུངས་རྡོར་མེ་ཏོག་གི་ཕྲེང་བ་ཅན་ལ་སོགས་པ། ཕྱི་རོལ་དུ་སྣང་བའི་དངོས་པོ་རྣམས་སྤྲུལ་པའི་སྐུར་མཚོན་ལ། བཅུད་ཉི་ཤུ་རྩ་ལྔ་བླུགས་པས་སེམས་ཅན་རྣམས་ཀྱི་བསོད་ནམས་ཀྱི་ཚོགས་རྫོགས་ནས་ལོངས་སྤྱོད་འཕེལ་བས་ལོངས་སྤྱོད་རྫོགས་སྐུར་མཚོན་པ་དང་། བུམ་པའི་ནང་གི་བསིལ་བའི་ངོ་བོས་ཉོན་མོངས་པའི་ཚ་གདུང་བཅིལ་བས་ནི་ཞི་བ་ཆོས་ཀྱི་སྐུར་མཚོན་ལ།
ལྷ་བསྒོམ་པ་ནི་ངོ་བོ་ཉིད་ཀྱི་སྐུ་སྟེ། སྐུ་བཞིར་མཚོན་པས། བྱང་ཆུབ་ཀྱི་ཆོས་མ་ལུས་པའང་རང་བཞིན་གྱིས་ཚང་བ་ཡིན་ནོ། །སྔགས་ནང་པ་ལྟར་ན་མཉམ་སྦྱོར་གྱི་དཀྱིལ་ཆོག་ལས། །བུམ་པ་ལྷ་ཡི་གནས་ཡིན་ཏེ། །ཁ་རྒྱན་མགུལ་ཆིངས་རྟ་བབས་རྒྱན། །གཟུངས་ཐག་ཐུགས་རྗེ་ཆེན་པོའི་རྟགས། །སྨན་ལྔ་ཐུགས་རྗེ་བྱང་ཆུབ་སེམས། །འབྲུ་རྣམས་ལྷ་ཡི་རང་བཞིན་ཡིན། །རིན་ཆེན་རྣམ་ལྔ་སྐུ་ཡི་འོད། །སྙིང་པོ་ཡེ་ཤེས་ཐུགས་ཀྱི་དབྱིངས། །སྤོས་སོགས་ཚུལ་ཁྲིམས་ཡོན་ཏན་རྒྱལ། །ཞེས་སོ། །དེ་ལྟ་བུའི་བུམ་པ་གྲངས་ངེས་སུ་ལོངས་པ་ཡོད་ན་རྡུལ་ཚོན་གྱི་དཀྱིལ་འཁོར་དུ་མཚན་མ་དགོད་པའི་རིམ་པ་ལྟར་དུའམ། ཡང་ན་སྔར་སྟྭ་གོན་བྱས་པའི་སྒོ་མཚམས་བརྒྱད་དུ་དྲིའི་མཎྜལ་རེ་རེའི་སྟེང་དུ་བུམ་བ་བརྒྱད་དང་གཙོ་བོའི་བུམ་པ་ནི་དབུས་སུ་བཞག་པར་བྱ་ལ། དེ་དག་ཏུ་ལྷ་བསྐྱེད་ཚུལ་ཡང་ལྷའི་སྒོ་ནས་བུམ་པའི་གྲངས་ངེས་བསྡུས་པའི་ཕྱོགས་ལྟར་དཔྱད་ཅིང་། རྣམ་རྒྱལ་གཅིག་པོ་ལས་མེད་ན་དེ་ཉིད་དུ་ལྷ་ཐམས་ཅད་བསྐྱེད་པ་ཡིན་ནོ། །ལས་བུམ་ནི་ཤར་སྒོའི་གཡོན་དུ་འགོད་པ་རྒྱ་གར་བའི་ལུགས་ཡིན་ལ། རྣམ་རྒྱལ་ལྡིང་ཁྲི་ལ་འགོད་པ་ཉིད་ལ་ནི་ལུང་དང་རིགས་པའི་གནོད་བྱེད་ཡོད་དེ། འོད་ཀྱི་དྲྭ་བར་འདི་མི་དགོས་གསུངས་ནས་བུམ་པའི་སྟེགས་ཀྱི་མཉྫི་ནས་དང་བཅས་པ་བོར་ཏེ་བུམ་པ་གསུམ་སྦྲེལ་བར་བཞག་གོ །ཅེས་སོ། །འདི་ལྟར་དབང་རྫས་རྣམས་ནི་དཀྱིལ་འཁོར་གྱི་བདག་པོའི་ཐུགས་ཀ་ལས་གློ་བུར་དུ་སྤྲུལ་པར་མོས་པའམ། དེ་མ་ཐག་སྤྱན་དྲངས་པའི་དབང་ལྷ་གློ་བུར་བའི་ཕྱག་མཚན་ཡིན་པས་སོ། །ལྷ་བསྐྱེད་པའི་གནས་ནི་སྔོན་རབས་པ་ཁ་ཅིག །བྱ་སྤྱོད་གཉིས་བུམ་པའི་སྟེང་གི་དུང་ཞལ་དུ་ལྟ་བསྒོམ་ལ། རྣལ་འབྱོར་རྒྱུད་དང་བླ་མེད་གཉིས་བུམ་
པའི་ནང་དུ་བསྐྱེད་དོ་ཞེས་འདོད་ཀྱང་། བུམ་པའི་སྟེང་གི་དུང་ཞལ་ལམ། ཐོད་ཕོར་དང་། བླ་མེད་ལ་ཐོད་པ་སོགས་བཤད་པ་ནི་མཆོད་ཡོན་འབུལ་བའི་སྣོད་ཁོ་ན་ཡིན་པས་བརྟག་གཉིས་ལས། །ཐམས་ཅད་ཆུ་ལས་ཁམ་ཕོར་དུ། །ཉུང་ཟད་བླུགས་ཏེ་རྣམ་རྒྱལ་གྱི། །བུམ་པ་བཾ་ལས་བསྐྱེད་པ་ཡི། །རིན་ཆེན་བུམ་པའི་སྟེང་བཞག་བྱ། །དེར་ནི་དཀྱིལ་འཁོར་བསྐྱེད་བྱ་སྟེ། །ཞེས་པ་ལ་གོ་བ་ཐད་ཀར་བླངས་ཏེ་བུམ་ནང་དུ་བསྐྱེད་པ་ལས་ཕྱོགས་འཛོལ་བའི་ལུགས་སུ་སྣང་ངོ་། །དེ་བས་ན་ཐམས་ཅད་ལ་ལྷ་བུམ་པའི་ནང་དུ་བསྐྱེད་པ་ཙམ་དུ་འདྲ་ཡང་རྣལ་འབྱོར་རྒྱུད་མན་ཆད་ལ་ཡེ་ཤེས་པ་གཤེགས་སུ་གསོལ་བ་དང་། བླ་མེད་ལ་དམ་ཡེ་གཉིས་མེད་བདེ་སྟོང་ཆེན་པོའི་ངང་དུ་འོད་ཞུ་བའི་ཁྱད་པར་ནི་དཔྱད་བཟོད་པ་ཉིད་དོ། །དེ་ཡང་བླ་མེད་ཀྱི་སྐབས་འདིར་རྣམ་རྒྱལ་བུམ་པའི་སྟེང་གི་དུང་ཞལ་ལ་སོགས་པའི་མཆོད་ཡོན་དྲི་བཟང་དང་བདུད་རྩི་ལྔས་སྦགས་པ་ཨོཾ་བཛྲ་ཨ་མྲྀ་ཏོ་ད་ཀ་ཋ་ཧཱུཾ་དང་འབྲུ་གསུམ་ལན་བདུན་གྱིས་ཡེ་ཤེས་ཀྱི་བདུད་རྩིར་བྱིན་གྱིས་བརླབས་པའི་ཆུའི་རྡུལ་ཕྲ་རབ་རྣམས་རྡོ་རྗེའི་རང་བཞིན་དུ་མོས་པ་དེ་ཉིད་བཟླས་པའི་མཐར་མཆོད་ཡོན་དུ་ཕུལ་བའི་རྐྱེན་ལས་ལྷ་འོད་ཞུ་བྱ་བ་ཉིད་དོ། །རྡོ་རྗེ་ཕྲེང་བ་པ་རྣམས་ནི་སྔོན་དུ་ལྷ་བ་ཞུས་ལ། དེའི་ཕྱི་ནས་བཟླས་པ་བྱེད་པ་ཉིད་དང་། ལས་བུམ་གྱི་ལྷ་མི་བཞུ་བའི་ལུགས་ཀྱང་འདོད་དོ། །དེ་ལྟ་ན་བགེགས་བཟློག་པའི་ཕྲིན་ལས་འཆོལ་ལོ། །དེ་དག་གི་ཚེ་རྒྱ་གར་པ་རྣམས་བུམ་པ་གཞལ་ཡས་ཁང་དུ་བསྐྱེད་མི་བསྐྱེད་ཕྱོགས་གཉིས་སུ་གནས་ཀྱང་རྣམ་རྒྱལ་ནི་ཀུ་ཀུ་ར་ཛཱའི་དག་སྦྱོར་ལྟར་རྟེན་དང་བརྟེན་པའི་ཆོ་ག་ཆང་བས་བསྐྱེད་པ་མང་ཞིང་ལེགས་ལ། ཕྱི་མ་ལྟར་ན་བུམ་པའི་ནང་དུ་པདྨ་ལ་སོགས་པའི་གདན་ལ་ཆོ་ག་གསུམ་ཙམ་གྱི་ལྷ་བསྐྱེད་པ་ཡིན་ཏེ་ལས་བུམ་ཕལ་
ཆེར་དེ་ལྟར་རོ། །གང་གི་ཚེ་ཡང་བུམ་པའི་ནང་དུ་བརྟེན་པའི་ལྷ་ཚོགས་གསལ་བ་ལ་སྙིང་གའི་ས་བོན་ལས་བྱུང་བའི་འོད་ཟེར་གྱིས་ཡེ་ཤེས་ཀྱི་འཁོར་ལོ་སྤྱན་དྲངས་ཏེ་དམ་ཡེ་གཉིས་མེད་ལ་མཆོད་བསྟོད་བྱ་ཚུལ་ནི་བླ་མེད་ཀྱི་ལུགས་ཡན་ལ། འོན་ཀྱང་མདོ་སྒྱུ་ལ་སོགས་པར་ནི་ཡན་ལག་རབ་གནས་ཀྱི་ཆོ་ག་ཟུར་དུ་ཡོད་དོ། །བཞི་པ་སློབ་མ་སྟ་གོན་ནི། ཐོག་མར་སློབ་དཔོན་རང་ཉིད་ཀྱི་སྒྲུབ་གྲོགས་བྱེད་པའི་སྒོའི་སློབ་དཔོན་ཞེས་བྱ་སྟེ་དབང་རྫས་འདེགས་འཇོག་ལ་སོགས་པ་སྔོན་དུ་རང་གིས་དབང་བསྐུར་བ་ཞིག་ལས་གསར་བུ་གཞན་གྱིས་མི་རུང་སྟེ། གསང་སྒྲོག་ཏུ་འགྱུར་བས་ན་སློབ་མ་མིན་པའི་དབང་ལྟད་བལྟ་བའང་བཀག་པའི་ཚུལ་མི་ཐུབ་ཟླ་བས། །དམ་ཚིག་ཉམས་པས་འཇིགས་པའི་ཕྱིར། །སློབ་མ་མིན་པ་གཞུག་མི་བྱ། །ཞེས་སོ། །གལ་ཏེ་དེ་ལྟར་མ་འབྱོར་ན་དཀྱིལ་འཁོར་གྱི་ཁང་པའི་ཤར་སྒོའམ། ཡོལ་བའི་ཕྱི་ལོགས་སུ་སྡོམ་པ་གཉིས་སམ་སློབ་དཔོན་གྱིས་སྡོམ་པ་བྱིན་ནས་ལྷག་གནས་བྱ་ཞིང་། དབང་རྫས་རྣམས་ལའང་སློབ་དཔོན་ཉིད་ལས་གཞན་གྱིས་རེག་ཏུ་མི་རུང་བ་ཉིད་དེ་བཞེངས་བཞུགས་མང་པོ་འཇུག་པ་མི་བདེ་བས་དེའི་ཉེས་པ་འགེགས་ཕྱིར་སྒོའི་སློབ་དཔོན་ནམ། ལས་ཀྱི་རྡོ་རྗེས་ཀྱང་དབང་རྫས་རྣམས་དར་ཟབ་ལ་སོགས་པའི་ཚས་ཀྱིས་བླངས་ཏེ་རྡོ་རྗེ་འབར་བ་ལས། །དབང་བསྐུར་བ་ཡི་རིམ་པ་དང་། །སྦྱིན་སྲེག་ལས་རྣམས་བྱེད་དོན་དུ། །དཀྱིལ་འཁོར་གྱི་ནི་ཡོ་བྱད་རྣམས། །སློབ་དཔོན་གྱིས་ནི་ཁྱེར་བར་བྱ། །སློབ་མས་ཁྱེར་ན་དམ་ཚིག་ཉམས། །ཞེས་བཤད་དོ། །སློབ་མ་མང་ཉུང་གི་གྲངས་ཚད་ཀྱང་རྒྱུད་སྡེ་རྣམས་ནས་ངེས་པ་དང་མ་ངེས་པའི་ཚད་གཉིས་སུ་བསྟན་ཏེ། དང་པོ་ལྟར་ན་སྤྱི་རྒྱུད་ལ་སོགས་པ་ནས་མང་མཐའ་ཉི་ཤུ་རྩ་ལྔས་བཅད་པ་དང་། གཉིས་པ་
ལྟར་ན་རྣམ་སྣང་མངོན་བྱང་ལ་སོགས་པ་ནས་བཅད་མི་དགོས་པར་གསུངས་པ་ཡང་དོན་མཐུན་ཏེ། །མཚན་ཉིད་ཐམས་ཅད་ཚང་བའི་སློབ་མ་ནི་རྡོ་རྗེ་སེམས་དཔའ་བཞིན་དུ་དཀོན་པའི་དངོས་པོ་ཅན་ཡིན་པས་གཞལ་བྱ་དེས་གཞལ་ན་མངས་ཀྱིས་དོགས་པ་མེད་པའི་ཕྱིར་ཏེ། དཔེར་ན་སྐྱེས་བུའི་ཞོ་ཤའི་སྟོབས་ཤེས་ནས་ཁྱོད་ཀྱིས་ཇི་ལྟར་ཐེག་ཚད་གཅིག་ལོངས་ཤིག་ཟེར་བ་ལྟ་བུའོ། །གཞན་དུ་ན་རྒྱུད་དུ་མང་ཉུང་མི་དཔྱད་པའི་མཐའ་འདིས་བསྡུས་པ་ཡིན་ཏེ། །མདོར་ན་སློབ་མ་ཕན་ཚུན་དུ། །ནང་མི་གཤིན་པ་མི་བཟུང་ངོ་། །གཅིག་ལ་གཅིག་ནི་སེམས་བཟང་ཞིང་། །ཞི་དུལ་བླ་མ་ལ་ཕན་པ། །ཞེས་པས་དེ་ལྟར་ཚོགས་པ་ནི་མང་པོ་མི་འདུ་བའི་ཕྱིར་རོ། །འོན་ཀྱང་དཀྱིལ་འཁོར་དུ་གཞུག་པ་ཙམ་ལ་ནི་གྲངས་མ་ངེས་ཏེ། སེམས་ཅན་གྱི་ཁམས་མཐའ་ཡས་པ་བསྒྲལ་བར་ཡི་དམ་བཅའ་བ་ཐེག་པ་ཆེན་པོའི་ཁྱད་ཆོས་ཡིན་པས་དེ་དག་གིས་དཀྱིལ་འཁོར་གྱི་ཚོན་གྱི་མཐོང་བའི་ཕན་ཡོན་ཀྱང་བསམ་གྱིས་མི་ཁྱབ་པའི་ཚུལ་སྔར་ཡང་བཤད་ཅིང་། དེ་སྐད་དུ་མངོན་བྱང་ལས། འོན་ཀྱང་སློབ་དཔོན་སྙིང་རྗེ་ཆེན་པོ་དང་ལྡན་པས་སེམས་ཅན་གྱི་ཁམས་མ་ལུས་པ་བསྒྲལ་བ་ཡི་དམ་བཅའ་བ་ཁོ་ནར་བྱ་སྟེ། དེས་བྱང་ཆུབ་ཀྱི་སེམས་ཀྱི་རྒྱུར་འགྱུར་བར་བྱ་བའི་ཕྱིར་སེམས་ཅན་ཚད་མེད་པ་རྣམས་ཡོངས་སུ་གཟུང་བར་བྱའོ། །ཞེས་པ་ལ་སོགས་གསུངས་སོ། །ཡང་སྔོན་དུ་སློབ་མ་བཟུང་བའི་ཆོག་བྱས་ཤིང་དབང་གི་དངོས་གཞི་ལ་འདུ་བ་ཡིན་ཀྱང་སྟ་གོན་གྱི་ཚེ་སྟེས་དབང་དྲག་པོས་འདུ་བར་མ་ནུས་ན། སྤྱི་རྒྱུད་ལས། །སློབ་མ་ཡོངས་སུ་བཟུང་བ་གང་། །སྟྭ་གོན་གནས་ཚེ་མེད་ན་ནི། །དེ་ཡི་གཟུགས་བརྙན་བྱས་ནས་སུ། །ཇི་སྐད་བཤད་པའི་ལས་རྣམས་བྱ། །སློབ་མ་ཡོངས་སུ་བཟུང་བ་གང་། །གལ་ཏེ་རྐྱེན་འགའ་ཞིག་གིས་ནི། །དེར་ནི་འོངས་པར་མ་གྱུར་ན། །གཞན་
དག་དེ་ཡི་སྐྱིན་པར་གཞུག །ཅེས་གསུངས་པ་ལྟར་བྱ་སྟེ། འདི་ལྟར་སྟ་གོན་བྱེད་པའི་གནས་ཀྱང་དཀྱིལ་འཁོར་གྱི་ཁང་པར་བྱེད་པ་མང་བས་དེའི་ཚེ་ཡོལ་བ་བྲེ་བའམ་བྲིས་སྐུ་ལ་སོགས་པ་དག་བཅིང་སྟ་གོན་གྱི་རྫས་རྣམས་ཀྱང་ཐོག་མ་ནས་སློབ་མས་མི་མཐོང་བར་བྱ་བའི་ལུགས་ཡོད་ན། ཡོལ་བ་བྲེ་བའམ། སྟ་གོན་གྱི་བྱ་བ་མ་བྱས་པའི་སློབ་མ་ལ་དབང་ཅིག་ཅར་དུ་བསྐུར་བ་ནི་རྩ་ལྟུང་བདུན་པར་འདུ་བའི་ཕྱིར་རོ། །འཁོར་ལོ་སྡོམ་པ་ལས་ཀྱང་། །སྔགས་པས་དཀྱིལ་འཁོར་མ་མཐོང་བར། །གང་ཞིག་རྣལ་འབྱོར་པ་ཉིད་འདོད། །མཁའ་ལ་ཁུ་ཚུར་གྱིས་བརྡེག་དང་། །སྨིག་རྒྱུའི་ཆུ་ལ་འཐུང་དང་མཚུངས། །ཞེས་སོ། །དེ་ཡང་སློབ་མ་སྟ་གོན་གྱི་སྦྱོར་བའི་ཆོས་ནི་ཀུན་སློང་འཆོས་པ་ཉིད་ཡིན་ལ། དངོས་གཞི་ནི་ནང་དབང་བསྐུར་ནས་སྡོམ་པ་བཟུང་བ་དང་། ལྟས་བརྟག་པ་ཕྱི་ནང་གཉིས་རྣམས་ལས་དང་པོ་བློ་བཅོས་པ་ནི། སློབ་མ་རྣམས་ཁྲུས་བྱས་གོས་གསར་པ་བགོས་མཎྜལ་ཕུལ་ནས་པུས་མོའི་ལྷ་ང་སེ་ལ་བཙུགས་ཏེ་འདུག་པ་ལ། དབང་ཆོག་ཕལ་མོ་ཆེར་སྤྱི་རྒྱུད་ཀྱི་ཚིག་འདི་སླེབས་པས་དེའི་དོན་བཀྲལ་ནས་བཤད་པར་བྱ་སྟེ། འདི་ན་གསང་སྔགས་བསྒྲུབ་པ་དོན་དུ་གཉེར་བ་གང་ཞིག་ཚེ་འདི་ལེན་ལ་མངོན་མཐོ་ཐོབ་པར་འདོད་པ་དང་། དེ་ལས་གཞན་པ་འཇིག་རྟེན་ཕྱི་མའི་མངོན་མཐོ་ཐོབ་པར་འདོད་པ་དང་། གཉིས་ཀ་མ་ཡིན་པའི་འཇིག་རྟེན་ཕ་རོལ་ནི་འཇིག་རྟེན་ལས་འདས་པའི་སྒྲ་ཡིན་པས་ངེས་ལེགས་ཀྱི་ཡོན་ཏན་དོན་དུ་གཉེར་བ་སྟེ་ཀུན་སློང་གསུམ་ལས། སྔ་མ་གཉིས་ཀ་ཆགས་འཇིག་དང་བཅས་པའི་འཇིག་རྟེན་དུ་གྱུར་བས་ཚེ་འདིའི་ཐ་སྙད་ཀྱིས་མཚོན་པ་གང་ཞིག་དོན་དུ་གཉེར་བའི་གནས་མ་ཡིན་ལ། གསུམ་པ་འཇིག་རྟེན་ཕ་རོལ་གྱི་དོན་ནི་སྐུ་ལྔའམ། གཉིས་ཀྱི་ཕུན་ཚོགས་དོན་དུ་གཉེར་བ་ཡིན་པས་
དེས་ནི་འདི་དང་ཕྱི་མའི་ཚེ་ལ་མངོན་མཐོའི་ཡོན་ཏན་ཀྱང་ཞར་ལ་ཐོབ་པར་འགྱུར་བའི་དོན་ཏེ། ཕྱེད་བཅས་བཞི་བརྒྱ་པར། ལ་ལ་གསང་སྔགས་སྒྲུབ་དོན་གཉེར། །འདི་ནི་དཀྱིལ་འཁོར་འཇུག་པར་བྱེད། །བསོད་ནམས་འདོད་པས་དེ་ལས་གཞན། །གཞན་དག་འཇིག་རྟེན་གཞན་དོན་གཉེར། །འཇིག་རྟེན་ཕ་རོལ་དོན་གཉེར་བའི། །དད་པ་མང་དུ་བྱེད་པ་ཡིས། །བློ་ལྡན་དཀྱིལ་འཁོར་འཇུག་བྱ་ཡིས། །ཚེ་འདིའི་འབྲས་བུ་འདོད་མི་བྱ། །ཚེ་འདི་འདོད་པར་གྱུར་པ་ལ། །འཇིག་རྟེན་ཕ་རོལ་དོན་མི་འགྱུར། །འཇིག་རྟེན་ཕ་རོལ་དོན་གཉེར་སྐྱེས། །འཇིག་རྟེན་འདི་ཡི་འབྲས་བུ་རྒྱས། །ཞེས་བཤད་པས་སོ། །དངོས་གཞིའི་ཐོག་མར་ནང་དབང་གི་དོན་པོ་ནི་འཁོར་ལོས་སྒྱུར་བའི་རྒྱལ་པོའི་རྒྱལ་ཚབ་ཏུ་དབང་བསྐུར་བ་ལ་དེའི་རིགས་ཀྱི་བུར་བསྐྲུན་པ་ཞིག་དགོས་པ་དང་འདྲ་བར། རྡོ་རྗེ་སློབ་དཔོན་གྱི་ཆོས་སྲིད་ལ་དབང་བསྐུར་ཕྱིར་སློབ་མ་ཉིད་རྡོ་རྗེའི་བླ་མའི་སྲས་སུ་བསྒྲུབ་པ་སྟེ། རྡོ་རྗེ་ཁྲོས་པའི་བཤད་རྒྱུད་ལས། །སྲས་ཀྱི་མཆོག་ཏུ་རབ་ཏུ་དམིགས། །ཁྲག་འཐུང་འདུས་པའི་དཀྱིལ་འཁོར་ལ། །དབང་ནི་རབ་ཏུ་བླང་བར་བྱ། །ཞེས་པ་ལ་སོགས་པས་སྲས་སུ་བྱ་ཚུལ་རྒྱས་པར་བཤད་དོ། །འདིར་ནི་རེ་ཞིག་སྤྱི་མཐུན་དུ་སློབ་དཔོན་དཀྱིལ་འཁོར་གྱི་བདག་པོར་གསལ་བའི་སྙིང་གའི་ས་བོན་ལས་བྱུང་བའི་འོད་ཟེར་གྱིས་སློབ་མའི་རྣམ་སྨིན་གྱི་ཕུང་པོ་སྦྱངས། རྣམ་པར་ཤེས་པ་ཧཱུྃ་ཡིག་ལ་སོགས་པའི་ས་བོན་དུ་བྱས་པ་ཁ་ནས་དྲངས་རྡོ་རྗེའི་ལམ་ནས་ཡུམ་གྱི་པདྨར་བཞག་པ་ལྷའི་རྣམ་པར་གྱུར་པ་ལ། རང་གི་སྙིང་གའི་འོད་ཟེར་གྱིས་གདན་གསུམ་ཚང་བའི་ལྷ་སྤྱན་དྲངས། ཞལ་ནས་ཞུགས་རྗེས་སུ་ཆགས་པའི་མེས་ཞུ་བར་གྱུར་པའི་བདེ་ཆེན་བྱང་ཆུབ་སེམས་ཀྱི་དབང་བསྐུར་བའི་དེ་མ་ཐག་ཡུམ་གྱི་མཁའ་ནས་བཏོན་ཏེ་དཀྱིལ་འཁོར་གྱི་ཤར་སྒོར་བཞག་པའི་དམིགས་པ་ནི་སློབ་དཔོན་
ཉིད་ཀྱིས་བྱ་སྟེ། སློབ་མ་ལ་བུ་ཞེས་འབོད་པའི་དངོས་དོན་ལ་སྦྱོར་བའོ། །དེ་ནས་བླ་མ་ལ་དགའ་བ་ཆེན་པོ་ཞེས་རྡོ་རྗེ་འཆང་གི་མཚན་ནས་བོས་ཏེ་ཁྱོད་ནི་བདག་གི་སྟོན་པ་གཅིག་བུར་བས་སོ་ཞེས་གསོལ་བ་གདབ་པའི་ཚུལ། རྡོ་རྗེ་ཕུར་བུའི་རྒྱུད་ལས་ཀྱང་། །སྐྱེ་རྒ་ན་དང་འཆི་བ་ཡི། །ཆུ་སྲིན་པིར་ཐོགས་འཇིགས་བྱེད་ལས། །གདོན་པར་འདོད་པ་ཁྱོད་འབའ་ཞིག །དགའ་ཆེན་ཁྱོད་བདག་སྟོན་པར་བས། །ཞེས་པ་ལ་སོགས་པས་བསྟན་པ་བཞིན་ནོ། །དེའི་འཕྲོར་རྩེ་མོ་དང་མཐུན་པར། བྱང་ཆུབ་ཆེན་པོའི་ཚུལ་བསྟན་པ། །ཞེས་པ་ནི་གཞན་གྱིས་མི་འཕྲོགས་པའི་དོན་དུ་རྒྱ་གར་པ་རྣམས་འཆད་དོ། །ཚུལ་དེ་ལྟ་བུའི་སྔགས་དང་རྒྱུད་དང་ཕྱག་རྒྱ་བཞི་ལ་སོགས་པའི་དམ་ཚིག་དང་། སྨོན་པ་དང་འཇུག་པའི་བྱང་ཆུབ་སེམས་རྣམ་པ་གཉིས་དང་། གསུམ་ལ་སྐྱབས་སུ་འགྲོ་བ་ལ་སོགས་པ་བདག་ལ་སྩོལ་ཞེས་གསོལ་བ་གདབ་པ་ལ་སྡོམ་པ་ཇི་ལྟར་སྦྱིན་པ་ནི་ཡོངས་དག་གི་རྒྱུད་ལས། །སོ་སོ་ཐར་པ་དང་པོར་སྦྱིན། །དེ་ནས་བྱང་ཆུབ་སྡོམ་ཆེན་བྱིན། །དེ་ནས་དབུ་མའི་ཆོས་རྣམས་བཤད། །མཐར་ནི་འབྲས་བུའི་ཐེག་ཆེན་གྱི་དབང་བྱིན་འབྲས་བུའི་རྒྱུད་རྣམས་བཤད། །ཅེས་དང་། བརྟག་གཉིས་ལས། དང་པོར་གསོ་སྦྱོང་སྦྱིན་པར་བྱ། །དེ་རྗེས་བསླབ་པའི་གནས་བཅུ་བྱིན། །དེ་ལ་བྱེ་བྲག་སྨྲ་བ་བསྟན། །མདོ་སྡེ་པ་ཡང་དེ་བཞིན་ཏེ། ཞེས་པ་ལ་སོགས་དང་མཐུན་པར་མདོ་སྔགས་ཀྱི་བསྟན་པ་ཡོངས་རྫོགས་གསང་སྔགས་ཀྱི་གཞུང་ལམ་གཅིག་ཏུ་རྫོགས་པར་སྟོན་པ་ནི་གསང་ཆེན་འདུས་པ་མདོའི་གྲུབ་པའི་མཐའ་ལྟ་བུ་ཡིན་ལ། དེ་བཞིན་དུ་སོ་ཐར་གྱི་རྟེན་དུ་རུང་ན་དགེ་བསྙེན་ཡན་ཆད་ཀྱི་སོ་སོར་ཐར་པ་བྱང་སྡོམ་གྱི་སྔོན་རོལ་ཏུ་སྟེར་བའི་ཆོ་ག་ཡང་འབྱུང་
བ་ལྟར་སྡོམ་པའི་རྟེན་དུ་རུང་མི་རུང་གི་སྐབས་བཙལ་ཤེས་པར་བྱས་ནས་སྡོམ་ཁྱད་དམིགས་གསལ་གྱི་དབྱེ་བ་ནི། སྡོམ་པ་གང་ཞིག་སྦྱིན་པའི་གཞི་རྟེན་དུ་གྱུར་པ་སྐྱབས་སུ་འགྲོ་བ་དང་འབྲེལ་པར་སེམས་བསྐྱེད་པ་ནི་ཐུན་མོང་གི་སྡོམ་པ་སྟེ་སྔགས་དང་ཕ་རོལ་ཏུ་ཕྱིན་པ་གཉིས་ཀའི་ཡིན་པས་སློབ་མའི་དབང་བསྐུར་བ་རྣམས་གཟུང་དུ་གཞུག་ལ། དེའི་སྟེང་དུ་རིགས་ལྔའི་སྡོམ་པ་ནི་སློབ་དཔོན་དུ་བྱེད་པའི་སྡོམ་པ་སྟེ་རྡོ་རྗེ་ཐེག་པ་ཁོ་ནའི་ནང་ཚན་ལས་ཀྱང་བྱ་སྤྱོད་གཉིས་དང་ཐུན་མོང་མ་ཡིན་པར་རྣལ་འབྱོར་དང་བླ་མེད་གཉིས་ཀྱི་ཁྱད་པར་གྱི་སྡོམ་པ་ཡིན་པས་སློབ་དཔོན་གྱི་དབང་བསྐུར་བ་རྣམས་ལས་དེ་ཕྱིན་ཆད་ལ་མ་འབོགས་སོ། །འབོགས་པའི་ཆོ་ག་ནི་ཁྱབ་ཆེ་བའི་དབང་དུ་བྱས་ན་སྒྱུ་དྲྭ་ལས། དཀོན་མཆོག་གསུམ་ལ་བདག་སྐྱབས་མཆི། །སོགས་ཀྱི་རྐང་པ་བཞི་ལས་དང་པོས་སྐྱབས་སུ་འགྲོ་བ་དང་། གཉིས་པས་སྡིག་པ་སྟོབས་ཆེན་གྱིས་རྒྱུད་མ་རུངས་པར་བྱས་པ་ལ་སྡོམ་པ་སྐྱེ་དཀའ་བས་བཤགས་སྡོམ་དང་། གསུམ་པས་བསོད་ནམས་ཆེན་པོ་དང་མི་ལྡན་པ་ལའང་སྐྱེ་དཀའ་བས་རྗེས་སུ་ཡི་རང་བའི་ཡན་ལག་གིས་དགེ་བའི་ཚོགས་གློ་བུར་དུ་བསྡུས་པའི་མཐར། རྐང་པ་བཞི་པས་སྡོམ་པ་བཟུང་བ་ནི་སྔོན་དུ་བྱང་སྡོམ་གྱི་མཚན་ཉིད་བརྡའ་ལེགས་པར་འཕྲོད་པའི་གང་ཟག་དབང་པོ་ཤིན་ཏུ་རྣོན་པོའི་དབང་དུ་བྱས་པ་སྟེ། གཞན་དུ་ན་སྨོན་སེམས་ཙམ་ཡང་སྡོམ་པ་དངོས་བསྟན་དུ་མི་རུང་ན། སྤྱོད་པའི་ཚུལ་ཚིག་གིས་བརྡའ་མི་འཕྲོད་པ་འཇུག་སྡོམ་དུ་རུང་བ་མ་ཡིན་པས་བྱང་ཆུབ་སེམས་དཔའི་རིགས་ལ་ནུས་པ་སད་ནས་སྨོན་སེམས་བརྟན་ཅིང་། སྤྱོད་པ་ལ་བསླབ་པའི་དོན་དུ་འཇུག་སེམས་བཟུང་བའི་ཚིག་ཕུར་ལས། །སངས་རྒྱས་ཆོས་དང་ཚོགས་མཆོག་ལ། །ཞེས་པ་ལ་སོགས་པ་སྦྲེལ་ནས་སེམས་ཅན་ཐམས་ཅད་བདག་གི་མགྲོན་དུ་གཉེར། །ཞེས་པའི་རྐང་པ་གཉིས་ཀྱི་ཆོ་གས་བཟུང་བ་
ལེགས་ན་བསྡོམ་ལ་སྐྱེ་འཇིག་ཀྱང་མོས་པའི་རྗེས་སུ་འགྲོ་བའི་ཕྱིར་ན་སྨོན་འཇུག་སོ་སོའི་སྡོམ་པ་བླང་ལུགས་བརྡའ་ལེགས་པར་འཕྲོད་པ་ནི་ངེས་པར་གཅེས་པའོ། །དེ་ལྟར་སྐབས་འདིའི་ཐུན་མོང་གི་སྡོམ་པ་བཟུང་ཕྱིན་ཆད་བྱང་ཆུབ་སེམས་དཔའི་སྤྱོད་པ་ཕྱིན་དྲུག་སོགས་ལ་སློབ་པར་ཁས་བླངས་པ་ཡིན་པས་ན་སྡོམ་པ་དེ་འཇིག་པའི་རྒྱུའི་རྩ་ལྟུང་དག་ཀྱང་རས་སུ་བོར་བ་ཤིན་ཏུ་མི་རིགས་ཏེ་སྔགས་ནི་བྱང་ཆུབ་སེམས་དཔའི་སྡེ་སྣོད་ཁྱད་པར་ཅན་ཉིད་ལས་དངོས་དོན་ལ་འགལ་བ་ལྟག་སྤྲོད་པའི་གྲུབ་པའི་མཐའ་གཞན་དུ་གྱུར་པ་མ་ཡིན་པའི་ཕྱིར་རོ། །དེ་ལྟ་བུའི་ཐུན་མོང་གི་སྡོམ་བཟུང་སྔོན་དུ་སོང་ནས་སློབ་དཔོན་གྱི་སྡོམ་པ་བཟུང་བར་གསོལ་བ་བཏབ་པའི་ཕྱི་ནས་རིགས་ལྔའི་སྡོམ་པ་བཟུང་བ་དངོས་ནི། བླ་མས་བསྒྲག་ཅིང་སློབ་མས་བཟུང་བ་གང་ཞིག་སྡོམ་པའི་མཚན་ཉིད་ཡིན་པས། །ཇི་ལྟར་དུས་གསུམ་མགོན་པོ་རྣམས། །ཞེས་པ་ནས། །སེམས་ཅན་མྱ་ངན་འདས་ལ་འགོད། །ཅེས་པའི་བར་གྱི་ཤོ་ལོ་ཀ་དང་པོས་སྨོན་སེམས་དང་། གཉིས་པས་འཇུག་སེམས་དང་། ལྷག་མ་རྣམས་ཀྱིས་སྔགས་སྡོམ་གསལ་བར་དམིགས་ཕྱེ་བ་མངོན་སུམ་དུ་གསལ་ཞིང་། དོན་ཆེན་པོ་དང་ལྡན་པ་ལ་ནན་ཏན་གྱི་ཆོས་ཀྱང་འགལ་བ་མེད་པའི་ཕྱིར་རིགས་པ་ཕྱིན་ཅི་ལོག་མི་སྒྲུབ་བོ། །དེ་ལྟར་རིགས་ལྔ་སྤྱི་དང་བྱེ་བྲག་གི་དམ་ཚིག་དང་སྡོམ་པའི་གནས་འོག་ཏུ་འཆད་པར་འགྱུར་བ་གང་ཡིན་པ་ལ་རྣམ་པ་ཕྱེད་པའི་ངེས་པ་བརྟན་པོ་དང་། འདི་ནི་བཟུང་ངོ་འདི་ནི་མི་བཟུང་ངོ་འདི་ནི་མི་བཟུང་ངོ་སྙམ་པ་ལྟ་བུའི་རིགས་སུ་བཅད་པའང་མེད་པས་སྡོམ་པ་བཟུང་འདོད་བསྐྱེད་པ་ནི་ངེས་པར་གལ་ཆེ་བ་ཡིན་ཏེ། འདི་ལྟར་ཆོ་ག་ལས་སྐྱེ་བའི་ཕྱོགས་ཀྱི་སྡོམ་པ་ཐོབ་གཏོང་སྐྱོར་གསུམ་ཀ་འདུན་པའི་རྗེས་སུ་འབྲང་བས་དངོས་གཞིའི་ཆོ་ག་རྣམ་པར་དག་པ་ལ་ལྟོས་པ་ཅན་ཁོ་ནར་རིག་
པར་བྱ་ཞིང་། མཐར་གྱིས་སྔགས་སྡོམ་དེ་དག་ཀྱང་ཐ་མལ་སྣང་ཞེན་ལས་ལྡོག་པའི་ཉེས་སྤྱོད་སྡོམ་པ། བསྐྱེད་རྫོགས་ཀྱི་མྱུར་ལམ་ཟབ་མོ་ལ་བསླབ་གཞི་འཛིན་པའི་དགེ་བ་ཆོས་སྡུད། གཞན་དོན་དུ་ལས་བཞིའི་ཕྲིན་ལས་ལ་མངའ་དབང་འབྱོར་པའི་སེམས་ཅན་དོན་བྱེད་དེ། སྔགས་སྡོམ་བྱེ་བྲག་པའི་ཆིངས་ཀྱིས་བཅིངས་པའི་ཚུལ་ཁྲིམས་རྣམ་པ་གསུམ་དུ་ངེས་པར་བྱའོ། །དེ་ལྟར་སྔགས་སྡོམ་འབོགས་པའི་དུས་ཚོད་ནི་སྐབས་འདི་དང་དངོས་གཞིའི་མགོར་འབོགས་པ་ལ་ཁྱད་པར་མེད་དེ་འབོགས་བྱེད་ཀྱི་སློབ་དཔོན་རང་ཉིད་ལ་སྡོམ་པ་དེ་ལྡན་གཞིར་བཞག་ནས་རྩ་ལྟུང་མ་བྱུང་བའི་གནས་སྐབས་གང་དུའང་སློབ་མ་ལ་སྡོམ་པ་སྐྱེ་ཞིང་། འབོགས་པ་པོ་ལ་མི་ལྡན་ན་སློབ་མ་ལའང་མི་སྐྱེ་བས། སློབ་དཔོན་རང་ཉིད་རྣམ་པ་ཐམས་ཅད་ནས་ཐམས་ཅད་དུ་རྒྱུད་དག་པའི་ཐབས་ལ་འབད་པར་བྱས་ནས་གཞན་དང་གཞན་གྱིས་རྡོ་རྗེ་སློབ་དཔོན་དུ་བཀུར་བ་ཙམ་གྱིས་ཁེངས་པར་མི་བྱ་སྟེ། སོ་སོ་སྐྱེ་བོའི་རྒྱུད་ལྡན་གྱི་དམ་བཅའ་ནི་གཞན་གྱི་བསྟི་སྟང་ལ་བརྟེན་ནས་ཉམས་པར་སྣང་བའི་ཕྱིར་རོ། །དེ་ནས་བདུད་རྩི་འཁྱིལ་བའི་སྔགས་དང་ཆུས་བསྲུང་ལ། སློབ་མ་ལྷར་བསྐྱེད་པའི་གནས་གསུམ་དུ་གཡས་པའི་ཁུ་ཚུར་རྡོ་རྗེ་དང་བཅས་པའི་དྲིའི་ཆུས་ཡས་རིམ་མམ། མས་རིམ་ཅི་རིགས་ནས་རེག་པའི་ལུགས་གཉིས་ཅི་བདེ་བ་དང་བསྟུན་ནས་ཕྱག་མཚན་གསུམ་ལ་གནས་པའི་འབྲུ་གསུམ་གྱིས་མཚན་པར་བསྒོམས་ནས་སྐུ་གསུང་ཐུགས་སུ་བྱིན་གྱིས་བརླབ་པ་དང་། སྐྱེ་མཆེད་བྱིན་གྱིས་བརླབ་པ་སོགས་བྱས་ནས་མཆོད་ཡུལ་དུ་གྱུར་པ་ལ་འདོད་ཡོན་ལྔས་མཆོད་ཅིང་། དུས་དེང་ནས་བཟུང་སྟེ་འཁོར་བའི་ཉེས་པ་དང་བཅས་པས་འདོད་ཡོན་ལ་སྤྱོད་པའི་སྲེད་ལེན་ལས་གྲོལ་ཏེ་སྒྱུ་མ་ལྟ་བུའི་མཆོད་པས་བསོད་ནམས་སུ་འགྱུར་བར་གྱིས་ཤིག །ཅེས་བརྡའ་སྤྲད་དོ། །དེ་ནས་སྒོ་གསུམ་གྱི་སྒྲིབ་པ་སྦྱོང་བ་དང་འབྲེལ་
བར་ཕྱི་ལྟར་ལྟས་བརྟག་པའི་དང་པོ་ངག་གི་སྒྲིབ་པ་སྦྱང་ཕྱིར་སོ་ཤིང་དོར་བའི་རྭ་བ་གྲུ་བཞི་པ་བའི་ལྕི་བ་ལ་སོགས་པས་བྱུགས་པའམ། པདྨ་འདབ་བརྒྱད་དྲིའི་མེ་ཏོག་གི་ཚོམ་བུ་ཅན་ཉེར་བསྡོགས་བྱ། ཨ་ཤྭད་ཐ་ལ་སོགས་པ་བོད་དུ་མི་རྙེད་པས་འོ་མ་ཅན་གྱི་ཤིང་དྲང་ཞིང་ཕྲ་རྒྱས་འཚམ་པ། གས་པ་དང་འབུས་གཡེངས་པ་ལ་སོགས་པའི་སྐྱོན་དང་བྲལ་བ་རྟེན་འབྲེལ་བཅུ་གཉིས་ལས་འཁོར་འདས་ཀྱི་ཆོས་ཐམས་ཅད་སྐྱེ་འགག་ཤེས་པའི་བརྡར་སོར་མོ་བཅུ་གཉིས་པའི་ཚད་ཟུར་གསུམ་དུ་བྱ་སྟེ། ཕྲེང་བ་ལས་སོར་ནི་བཅུ་གཉིས་གཞལ་བ་ཡི། །ཟུར་ནི་གསུམ་དུ་ཡོངས་སུ་བྱ། །ཞེས་པ་ལྟར་གྱི་མཚན་ཉིད་ཆང་བ་དྲི་བཟང་གི་ཆུས་བཀྲུ། བདུག་པས་བདུགས་རྩེ་མོར་མེ་ཏོག་གི་ཕྲེང་བ་དང་། སྲད་བུ་དམར་པོས་བཅིངས་པ་ཉིད་བགེགས་མཐར་བྱེད་ཀྱི་སྔགས་བཟླས་པས་བྱིན་གྱིས་བརླབས་པ་དེ་ཉིད་ངག་གི་ཉེས་པ་བསལ་བ་དང་། དངོས་གྲུབ་ཀྱི་ལྟས་བརྟག་པའི་དོན་དུ་སློབ་མའི་ལག་པར་མེ་ཏོག་རང་ལ་བསྟན་ནས་བྱིན་པར་བྱ་སྟེ་ཕུར་བུའི་རྒྱུད་འཇིག་རྟེན་སྣང་བྱེད་ལས། ངག་གི་ཉེས་པ་བསལ་བའི་ཕྱིར། །སོ་ཤིང་བྱིན་ལ་སོ་རྩ་དྲུད། །ཕྲིན་ལས་བཞི་ཡི་དངོས་གྲུབ་བརྟག །ཅེས་སོ། །དེ་ཡང་སྤྱི་རྒྱུད་ལས། སློབ་མ་ཁ་བྱང་དུ་ཕྱོགས་པ་ལ་སོ་ཤིང་གཏན་ནས་འདོར་བའི་ཚེ་ཤར་དུ་བལྟ་བར་བཤད་མོད། དཔོན་སློབ་གཉིས་ཀ་བྱང་དུ་ཕྱོགས་པས་ཀྱང་རུང་སྟེ། དེ་ནི་རང་བཞིན་དུ་བཀྲ་ཤིས་པའི་ཕྱོགས་ཡིན་པས་སོ། །ཇི་ལྟར་ཡང་སེ་ཤིང་མཁའ་དབྱིངས་ཀྱི་རྒྱས་བཟུང་བའི་རྩ་བས་སོ་རྩ་དྲུད་པའི་སྟང་ཀ་དང་བཅས་ངག་གི་ཉེས་པ་བསལ་བ་དང་། དངོས་གྲུབ་ཀྱི་ལྟས་བརྟག་པའི་འདུན་པ་དྲག་པོས། ཨོཾ་བཛྲ་ཧ་ས་ཧཾ། ཞེས་བརྗོད་པ་དང་ཆབས་ཅིག་བར་མིག་གྱེན་དུ་ཕྱོགས། ཧ་ཅང་ཤུགས་
དྲག་པས་ཕྱི་རོལ་ཏུ་ལྟུང་བ་མ་ཡིན་པར་དེར་ནས་ལྟས་བརྟག་པ་ནི། ཤར་དང་བྱང་ནུབ་ལྷོ་རིམ་བཞིན། །ཞི་རྒྱས་དབང་དང་མངོན་སྤྱོད་དོ། །སྟེང་ཕྱོགས་རིག་འཛིན་འོག་ས་འོག །དངོས་གྲུབ་ཐོབ་ཅིང་ཕྱིར་ལྟུང་མེད། །རྩ་བ་རང་བསྟན་ལན་གསུམ་བསྐྱར། །གཡས་ཡོ་ཚེ་ཐར་གཡོན་ཡོ་སྦྱིན། །གསེག་འགྲོས་མར་མེ་བརྒྱ་རྩ་སྦར། །ལྟུང་ནས་བསག་སྦྱང་རྒྱ་ཆེར་བྱ། །དེ་ནས་ཡིད་སྒྲིབ་དག་ཕྱིར་ཁྱོར་ཆུ་བྱིན་པ་ནི། དུང་ཞལ་དུ་གནས་པའི་དྲིའི་ཆུ་བཾ་ལས་སྐྱེས་པའི་ཆུར་བསམས་ལ་འཁྱིལ་བའི་སྔགས་བདུན་གྱིས་བརླབས་པ་ཁྱོར་པ་གཡས་སམ། གཡོན་པར་བཤད་པའང་ཡོད་པས་གང་རུང་དུ་ལན་གསུམ་སྟེར་ཞིང་། ཨོཾ་ཧྲཱི བི་ཤུད་དྷེ་དྷརྨ་པཱ་པ་ནི་ཙ་ཡ་སྱ་ཤོ་དྷ་ཡ་སརྦ་བི་ཀཝཱ་ན་ཨ་པ་ན་ཡ་ཧཱུྃ་ཕཊ ཞེས་ཨོཾ་གྱིས་མགོ་དྲངས། གསུང་རྡོ་རྗེའི་ས་བོན་གྱིས་བོས་ནས། ཆོས་ཐམས་ཅད་རྣམ་པར་དག་པ་ཡིན་པས་ཕུང་པོ་འདིའི་སྡིག་པ་རྣམ་པར་སྦྱོངས་ཤིག །རྣམ་པར་རྟོག་པ་ཐམས་ཅད་བསལ་བར་མཛོད། །ཅེས་ལན་གསུམ་བཏུང་དུ་བཅུག་པའི་ལྷག་མ་དཔུང་པ་གཡོན་ཕྱོགས་ནས་རྒྱབ་ཏུ་དོར་བས་ཡིད་ཀྱི་དྲི་མ་དག་པར་བསམ་མོ། །འདིར་གཞན་དག་དག་གི་ཉེས་པ་བསལ་བའི་དོན་དུ་འདོད་པ་དང་། རྨི་ལམ་གསལ་བའི་དོན་དུ་འདོད་པའི་ཕྱོགས་གཉིས་སུ་གྲགས་ནའང་སྔགས་དོན་གྱི་ཁ་ཚོན་ལེགས་པར་ཆོད་དེ། མིང་བཞིའི་ཕུང་པོ་ཡིད་ལས་སྐྱེ་བས་ན་རྣམ་པར་རྟོག་པ་བསལ་བར་མཛེས་ཅེས་འབྱུང་ངོ་། །དེ་ནས་ལུས་སྒྲིབ་དག་པར་བྱ་བ་དང་བསྲུང་བའི་ཕྱིར་ཧཱུྃ་ལས་སྐྱེས་པའི་སྐུད་པ་དམར་པོ་སློབ་བུའི་ལུས་ཚད་དང་མཉམ་པ་གསུམ་ལྟ་བ་དུ་བྱས་པའམ། ཡང་ན་ཕྲེང་བ་ལས་ཁྲུ་གང་སོར་བཞི་པའང་བཤད་པས་ཇི་ལྟར་རུང་བ་ལ་རྡོ་རྗེའི་མདུད་པ་གསུམ་མམ་དྲུག་ཏུ་བྱས་པ་ལས་ཆུས་བསང་ཞིང་།
འཁྱིལ་བའི་སྔགས་བདུན་གྱིས་བརླབ། ཁམས་དཀར་དམར་གྱི་ཆའི་བར་ཆད་བསྲུང་ཕྱིར་སྐྱེས་པའི་དཔུང་པ་གཡོན་དང་། བུད་མེད་ཀྱི་གཡས་སུ་ཉིན་མཚན་ནམ། ཕྱི་ནང་གི་བར་ཆད་བསྲུང་ཕྱིར་རིམ་པ་གཉིས་སུ་བཅིང་ཞིང་། ཨོཾ་བུདྡྷ་མི་ཏྲི་རཀཱ་དཀྵ་སརྦཱ་ན་སྭཱ་ཧཱ། ཞེས་བཟླ་བཞིན་པར་རྡོ་རྗེ་རྒྱ་གྲམ་གྱི་ཚུལ་དུ་རེག་ནས་ལུས་རྡོ་རྗེའི་གོ་ཆས་བཞུ་བླུགས་སུ་གཡོགས་པར་བསྒོམ་མོ། །གཉིས་པ་ནང་ལྟར་རྨི་ལམ་གྱི་ལྟས་བརྟག་པ་ནི་གྲིབ་གདོན་ལ་སོགས་པས་རྨི་ལམ་མི་འཁྲུགས་པའི་ཕྱིར་ཀུ་ཤའི་སྔས་སྟན་བྱིན་པར་བྱ་སྟེ། །ཀུ་ཤ་འདི་ནི་གཙང་ཞིང་དགེ། ཞེས་པ་ལ་སོགས་པས་དེའི་ཕན་ཡོན་བསྟན་པ་ལྟར་དེ་བཞིན་གཤེགས་པས་ཀྱང་རྩྭ་འཚོང་གི་ཁྱེའུ་བཀྲ་ཤིས་ལས་བཀྲ་ཤིས་ཀྱི་རྩ་ཀུ་ཤའི་ཆུན་པོ་བླངས་ཏེ་དེའི་སྟན་ལ་བཞུགས་ནས་ཏིང་ངེ་འཛིན་གསུམ་དང་རིག་པ་གསུམ་བསྐྱེད་དེ་མངོན་པར་སངས་རྒྱས་པའི་ཕྱིར་རོ། །དེ་བས་ན་སྔགས་ཀྱི་ལམ་དུས་ཀྱང་སྡོམ་འབྱུང་ལས། དྷཱིཡིག་གི་ནི་སྔགས་བཟླས་པའི། །ཀུ་ཤ་དེ་ལ་རབ་སྦྱིན་བྱ། །ཞེས་པས། དྷཱིཡིག་ལས་བྱུང་བར་བསམས་པའི་ཀུ་ཤའི་ཕོན་པོ་སྟན་དང་། རྐྱང་པ་སྔས་ཀྱི་དོན་དུ་དྷཱི ཡིག་དང་འཁྱིལ་པའི་སྔགས་ཀྱིས་བརླབས་པ་ཐལ་མོ་སྦྱར་བའི་བར་དུ་ཨོཾ་བཛྲ་ཏིཀྵ།།།བཾ་ཞེས་སྦྱིན་པར་བྱ་སྟེ། སྒྱུ་འཕྲུལ་དྲྭ་བ་ལས། ལག་མཐིལ་སོ་ཤིང་ཀུ་ཤ་སྦྱིན། །ཞེས་སོ། །དེ་ལྟར་བཀྲ་ཤིས་པའི་རྫས་དེས་ནི་བགེགས་བསྲུང་ཞིང་བསྐལ་བ་དགེ་མི་དགེ་རྨི་ལམ་ལས་གསལ་བར་བྱེད་དེ། སྤྱི་རྒྱུད་ལས། ཀུ་ཤ་བཏིང་བའི་ས་གཞི་ལ། །ཤར་ཕྱོགས་སྔས་བསྟན་ཉལ་དུ་གཞུག །ཅེས་པ་ལྔར་སེང་གེའི་ཉལ་སྟབས་ཀྱིས་ཉལ་ལོ། །དེའང་འཇམ་དཔལ་རྩ་རྒྱུད་ལས། དང་པོའི་ཐུན་གྱི་རྨི་ལམ་གང་། །བད་
ཀན་ལས་བྱུང་ཤེས་པར་བྱ། །གཉིས་པར་གང་བྱུང་མཁྲིས་པ་སྟེ། །འཇིག་རྟེན་ལ་ཡོད་སྨད་པ་ཡིན། །གསུམ་པ་རླུང་བྱུང་ཤེས་པར་བྱ། །བཞི་པ་བདེན་པར་འབྱུང་བ་ཡིན། །ཞེས་བཤད་དོ། །རྨི་ལམ་ལུང་སྟོན་ནི་གསང་བའི་དགོངས་རྒྱུད་ལས། རྡོ་རྗེ་སློབ་དཔོན་ཕྱག་ཆ་གནང་ཞིང་རྨི། །ཐུགས་ཀྱི་དངོས་གྲུབ་ཐོབ་པའི་རྟགས། །ལག་ཏུ་བྷནྡྷ་ཐོགས་པ་དང་། །ཀུན་གྱི་དམག་དཔོན་བྱེད་པ་དང་། །སྐུ་ལ་རྒྱན་ཆ་འདོགས་ཤིང་རྨི། །སྐུ་ཡི་དངོས་གྲུབ་ཐོབ་པའི་རྟགས། །གསེར་གཡུ་ལུས་ལ་གདགས་པ་དང་། །གཞན་ཡང་ཟངས་ལྕགས་རིན་པོ་ཆེ། །བདག་གིས་རྟག་ཏུ་འཆང་ཞིང་རྨི། །ཡོན་ཏན་དངོས་གྲུབ་ཐོབ་པའི་རྟགས། །ལག་ཏུ་པདྨ་མེ་ཏོག་ཐོགས། །ཉི་ཟླ་དངོས་གྲུབ་ཐོབ་པའི་རྟགས། །མདའ་གཞུ་གོ་མཚོན་ཐོགས་པ་དང་། །རྩི་ཤིང་མང་པོ་བསྡུས་པ་དང་། །ནམ་མཁའ་ལ་ནི་འཕུར་ཞིང་རྨི། །ཕྲིན་ལས་དངོས་གྲུབ་ཐོབ་པའི་རྟགས། །ཞེས་སོ། །གལ་ཏེ་ངན་པ་ཤར་ན་ཚོགས་དང་། གཏོར་མ་དང་། ཡི་གེ་བརྒྱ་པ་དང་། ལས་ཐམས་ཅད་པའི་སྔགས་དང་། སྦྱིན་སྲེག་དང་། སྲུང་འཁོར་དང་། ཁྱད་པར་བདག་མེད་པའི་དོན་གྱིས་བཟློག་པར་བྱ་སྟེ། མངོན་བྱང་ལས། ཡང་ན་དངོས་རྣམས་རྨི་ལམ་དང་། །དྲི་ཟའི་གྲོང་ཁྱེར་ལྟར་ཤེས་ནས། །བློ་དང་ལྡན་པར་རྨི་ལམ་རྣམས། །སྙིང་པོ་མེད་པར་ཤེས་པར་བྱ། །ཞེས་སོ། །དེ་ནས་སྤྲོ་བ་བསྐྱེད་པ་ནི། རྣམ་སྣང་མངོན་བྱང་ལས། འཇིག་རྟེན་དུ་ནི་ཀུན་མཁྱེན་དག །ཞེས་པ་ནས། །དེ་བཞིན་གཤེགས་པར་འགྱུར་བ་ཡིན། །ཞེས་པའི་བར་གྱི་རྐང་པ་སུམ་ཅུ་སོ་གཉིས་དབང་ཆོག་རྣམས་ལ་བཀོད་པ་ལྟར་ཤླཽ་ཀ་དང་པོའི་དོན་སྔར་ཡང་བཤད་ཟིན་ལ། ཤླཽ་ཀ་གཉིས་པའི་གྲགས་པ་མཐའ་ཡས་ཏེ་སངས་རྒྱས་པའི་སྔགས་ཡོན་ཏན་གྱི་
ཁྱད་པར་མཐའ་ཡས་པར་གྲགས་པའི་སྔགས་འབྱུང་བ་ཁྱད་པར་དུའང་དཀོན་པར་བསྟན་ཅིང་། དེ་ནས་ཤླཽ་ཀ་གསུམ་པས་རྡོ་རྗེ་སློབ་དཔོན་མཚན་ཉིད་དང་ལྡན་པའི་ལག་གི་འདུ་བྱེད་ཀྱིས་བསྐྲུན་ཅིང་བྱང་ཆུབ་ཀྱི་སེམས་རྒྱུན་ལས་སྤྲུལ་པའི་དཀྱིལ་འཁོར་དུ་བྱིན་གྱིས་བརླབས་ཤིང་བསྒྲུབས་པའི་རྡུལ་ཚོན་གྱི་དཀྱིལ་འཁོར་མཐོང་བ་ཙམ་ཡང་མཐུ་ཆེ་བས་སྡིག་པ་ཟད་པར་སྟོན་པ་དང་། དེ་ནས་རྐང་པ་གཉིས་ཀྱིས་དཀྱིལ་འཁོར་མཐོང་བ་ཙམ་ཡང་དེ་འདྲ་ན་གྲག་པ་མཐའ་ཡས་ཏེ་དཀྱིལ་འཁོར་དུ་ཞུགས་ནས་དེའི་སྤྱོད་པ་དང་ཚུལ་ལུགས་ལ་གནས་པ་ནི་སྨོས་ཅི་དགོས་ཏེ་ཞེས་སྙོན་དུ་དོར་བ་དང་། དེ་ནས་རྐང་པ་གཉིས་ཀྱིས་བདེ་བར་སྐྱོབ་པ་དང་། ལེགས་པར་སྐྱོབ་པའི་དངོས་གྲུབ་གང་ཡིན་པའི་གོ་འཕང་སྔགས་བཟླས་པས་ངེས་པར་ཐོབ་པར་བསྟན་ལ། དེ་ནས་རྐང་པ་བཞིས་དེ་ཡང་སྔགས་ཀྱི་དཀྱིལ་འཁོར་དུ་ཚུལ་བཞིན་དུ་འཇུག་པ་དག་གི་སྡིག་པ་བཤགས་པ་དང་། སྐྱབས་སུ་འགྲོ་བ་དང་། སྡོམ་པ་འཛིན་པ་རྣམས་ཏེ་ཆོས་གཅིག །རྟེལ་གཞལ་ཡས་ཁང་གི་ཡོན་ཏན་དང་དག་པ། བརྟེན་པའི་ལྷ་ཚོགས་རྣམས་ཀྱི་སྐུ་དང་ཕྱག་རྒྱ་མཐོང་ནས་དད་པ་ཆེན་པོ་སྐྱེས་པ་དང་གཉིས། སེམས་བསྐྱེད་མི་གཏོང་བ་དང་དམ་ཚིག་བཟུང་བ་སྟེ་ཆོས་གསུམ་ལྡན་གྱི་སྤྱོད་པ་མཆོག་དང་ལྡན་པ་རྣམས་ནི་སྐྱེ་བ་འདིར་འབྲས་བུ་མ་ཐོབ་ཀྱང་ངན་འགྲོར་འགྲོ་བའི་སྒོ་ཆོད་པར་བསྟན་ལ། དེ་ནས་བདག་ཉིད་ཆེན་པོ་ཁྱེད་རྣམས་ཀྱི། །ཞེས་པ་ལ་སོགས་པའི་ལྷག་མ་རྣམས་ཀྱིས་ནི་འཇིག་རྟེན་ན་རྙེད་པར་དཀའ་བའི་རྙེད་པ་ཆེན་པོ་དེ་རིང་ཁྱོད་ཀྱིས་རྙེད་དོ་ཞེས་སྤྲོ་བ་བསྐྱེད་ནས། ད་ནི་རྒྱལ་བ་སྲས་དང་བཅས་པ་རྣམས་ཀྱི་བསྟན་པའི་ཉིང་ཁུ་དཔལ་གྱི་དུམ་བུ་ལྟ་བུ་འདི་ཀུན་ལ་ཡོངས་སུ་བཟུང་
བས་གནས་པ་སྐྱེ་བར་འགྱུར་བ་ནི་ཞེས་པ་ལ་སོགས་པའི་དོན་གྱི་ད་ལྟ་བླ་མེད་འབྱུང་བའི་རྒྱུའི་གཙོ་བོ་སྔགས་ཀྱི་ཐེག་ཆེན་གནས་པའམ་སྐྱེ་བཞིན་པ་དེ་ཡང་ནི་ངེས་པར་ཐེག་ཆེན་ལ་སྐྱེ་བར་འགྱུར་རོ་ཞེས་པའི་དོན་དུ་དེའི་འགྲེལ་པ་ལས་བཤད་དོ། །དེས་མཚོན་ནས་རིང་པོར་མི་ཐོགས་པར་དེ་བཞིན་གཤེགས་པའི་རང་བཞིན་དུ་འགྱུར་རོ་ཞེས་དབུགས་འབྱིན་པའོ། །ལ་ལ་དཀྱིལ་འཁོར་མཐོང་ཡང་ཆོས་གསུམ་དང་མི་ལྡན་ན་སྡིག་པ་མི་བྱང་ཞེས་འཆད་མོད། དེ་ལྟ་ན་དབང་གི་སྔོན་དུ་འགྲོ་བའི་ཆོས་གསུམ་པོའི་ནུས་པ་ཁོ་ན་ཡིན་པས། བསྐལ་པ་བྱེ་བ་དུ་མ་རུ། །སྡིག་པ་གང་ཞིག་སྔོན་བྱས་པ། །དཀྱིལ་འཁོར་འདི་འདྲ་མཐོང་བ་ཡིས། །དེ་དག་ཐམས་ཅད་ཐད་འགྱུར་ན། །ཞེས་པ་ལ་སྙིང་པོ་མེད་དོ། །དེ་ལྟ་བུའི་བུམ་པ་དང་སློབ་མ་སྟ་གོན་ནི་རས་བྲིས་ལ་བརྟེན་པ་ཡིན་ཀྱང་བྱ་བ་ཉིད་ལེགས་སོ། །དེ་ལྟར་དབང་གི་ཉེར་བསྡོགས་སམ། །སྟ་གོན་གྱི་རིམ་པ་སྔོན་དུ་བཏང་ནས་ལྷག་པ་གཟུགས་བརྙན་གྱི་དཀྱིལ་འཁོར་འདུ་བྱ་བའི་ཕྱིར་ཐོག་མར་ཡེ་ཐིག་གི་བྱ་བ་འཇུག་སྟེ། ཡེ་ཤེས་ཀྱི་ཐིག་སྐུད་ལྔ་ཚན་ལྔ་པ་སྟེ། ཉི་ཤུ་རྩ་ལྔའི་གྲང་སུ་ལོངས་པ་སྣོད་ལྔར་བཞག་པ་ལྔ་བདུད་རྩི་ལྔ་དང་ཡུངས་ཀར་ཀྱི་ཕྱེ་མ་བསྲེས་པའི་དྲི་ཞིམ་པོས་ཚོན་སྣ་ལྔའི་སྐུད་པ་རྣམས་ཁ་དོག་སོ་སོར་བསྒྱུར་བར་བྱ་སྟེ། འདི་ལྟར་སྲད་དུ་བུ་ཚན་པ་ལྔ་ནི་ཡེ་ཤེས་ལྔ་མཚོན་ལ་ཡེ་ཤེས་རེ་རེ་ལའང་ཡེ་ཤེས་བཞི་བཞི་དང་ལྡན་པར་མཚོན་པའི་ཚུལ་མཁའ་འགྲོ་དང་སྡོམ་འབྱུང་ལས་བཤད་པའི་ཕྱིར་རོ། །དེ་ནས་རང་དང་ཐིག་གྲོགས་ལྟར་གསལ་བའི་ལག་མཐིལ་གཡོན་པའི་མཐེའུ་ཆུང་གི་རྩ་བ་ནས་རིམ་པར་མཐེ་བོའི་རྩ་བའི་བར་དུ་སྲད་བུ་རྣམས་བཀོད་ལ། རྒྱུད་སྡེ་སྔ་འགྱུར་ལས་ཨོཾ་ཧཱུྃ་ཏྲཱཾ་ཧྲཱིཨཱ་དང་། ཕྱི་འགྱུར་ལས་བྲུཾ་ཨཱཾ་དྲཾ་ཁཾ་ཧཱུྃ་དང་། ཐུན་མོང་དུ་ཨོཾ་ཨཱཧཱུྃ་
སྭཱ་ཧཱ་ལ་རིགས་ལྔའི་ས་བོན་དུ་བཤད་པ་ལྟར་ལས་རིགས་དང་ཁ་དོག་ཏུ་མཐུན་པའི་དེ་བཞིན་གཤེགས་པ་ལྔའི་ངོ་བོར་བསྐྱེད་པའི་དམ་ཚིག་པ་ལ་ནམ་མཁར་བཞུགས་པའི་སྟྭ་གོན་གྱི་ལྷའི་ཐུགས་ཀའི་ས་བོན་ལས་ཡེ་ཤེས་ཀྱི་སྐུད་པ་འོད་ཟེར་གྱི་རྣམ་པར་འགྱུར་པར་མོས་པ་སྟེ། ཨོཾ་ཨཱཤཱུནྱ་ཏ་བཛྲ་སཱུ་ཏྲ་མེ་པྲ་ཡཙྪ་མ་ཧཱ་མཎྜ་ལ་སཱུ་ཏྲ་ཎཱ་ཡ་ཧཱུྃ། ཞེས་མི་བསྐྱོད་པ་ལ་གསོལ་བ་གདབ་པ་དང་མཐུན་པར་ཤཱུ་ནྱ་ཏའི་མལ་དུ་ཨཱ་དརྴ་སོགས་རིགས་གཞན་བཞིའི་མཚན་སྔགས་བཅུག་ནས་གསོལ་བ་གདབ་པར་བྱ་སྟེ། སྔགས་དོན་དཀྱིལ་འཁོར་ཆེན་པོའི་ཐིག་གདབ་པར་བྱ་བའི་ཕྱིར་རྡོ་རྗེའི་ཐིག་བདག་ལ་སྩོལ་ཅིག་ཅེས་པའོ། །མིག་འབྲས་གཡས་གཡོན་ཉི་མ་དང་ཟླ་བ་སེར་པོའི་རང་བཞིན་ཛ སེར་པོས་མཚན་པར་བསྒོམས་ཏེ། ཨོཾ་དླི་པྟ་དྲཾཥྚ་ཨཾ་ཀུ་ཤ་ཛ ཞེས་བརྗོད་བཞིན་པར་མིག་མྱུར་བ་མྱུར་བར་བསྒྲིལ་ནས་རྫི་མ་གཟེངས་བསྟོད་ཅིང་རྡེབ་པ་འབར་བའི་སྟ་སྟངས་ལྕགས་ཀྱུ་ལྟ་བུས་རིགས་ལྔའི་སངས་རྒྱས་རྣམས་ཀྱི་འོད་ཟེར་གྱི་ཐིག་སྐུད་བཀུག་པ་རིགས་དང་ཁ་དོག་མཐུན་པའི་སྐུད་པ་རྣམས་ལ་བསྟིམ། །རང་དང་ཐིག་གྲོགས་གཉིས་ཀས། ཨོཾ་ཨཱ ཨནྱོ་ནྱ་ཨ་ནུ་ག་ཏཱ་སརྦ་དྷརྨཱ ཞེས་བརྗོད་པས་ཆོས་ཐམས་ཅད་ཕན་ཚུན་རྗེས་སུ་སོན་པ་སྟེ་གཅིག་ལ་གཅིག་ལྟོས་སུ་གནས་པའོ། །སྥར་སྥར་ཨ་ནུ་པྲ་ཏི་བིཥྚ སརྦ་དྷརྨཱ ཞེས་པས་ཆོས་ཐམས་ཅད་ཕན་ཚུན་རྗེས་སུ་ཞུགས་པ་སྟེ་གཅིག་ལ་གཅིག་འདྲེས་པའོ། །ཨ་ཏྱནྟ་ཨ་ནུ་བྲོ་བིཥྚ སརྦ་དྷརྨཱ ཨོཾ་ཨཱཧཱུཾ་ཞེས་པས་ཆོས་ཐམས་ཅད་ཤིན་ཏུ་རྗེས་སུ་ཞུགས་པ་སྟེ་གཅིག་ལ་གཅིག་དབྱེར་མེད་དུ་འདྲེས་པའོ། །ཞེས་པའི་དོན་ཏོ། །དེ་དང་རྗེས་སུ་མཐུན་པར་ཐོག་མར་སྐུད་པ་ལྔ་
ལྔས་སྐུད་པ་རེ་རེར་བྱ་ལ། དེ་ནས་ལྔ་ག་གཅིག་ཏུ་
དྲིལ་བའི་ཐིག་སྐུད་བྱ་སྟེ། སྡོམ་འབྱུང་ལས། །ཆོས་ཀུན་ངོ་བོ་ཉིད་ཀྱིས་ནི། །སྲད་བུ ་ཕན་ཚུན་བསྒྲིལ་བར་བྱ། །ཞེས་སོ། །ཐིག་སྐུད་རིང་ཟུང་གི་ཚད་ནི་སྔར་བཤད་པ། དེ་ལྟ་བུའི་ཐིག་སྐུད་བ་བྱུང་ལྔ་དང་བདུད་རྩི་ལྔས་བརླན་པ་རིན་པོ་ཆེའི་སྣོད་ཀྱི་དབུས་སུ་ཨཱ མཐའ་གཉིས་སུ་ཨོཾ་ཧཱུྃ་སྟེ་འབྲུ་གསུམ་བྲིས་པའི་བར་དུ་ཆུད་པར་གཞུག །དེ་ནས་མིག་གཡས་གཡོན་མ་དང་ཊ་ལས་ཉི་ཟླར་བསྐྱེད། བཛྲ་དྲྀཥྚི་མ་ཊ་ཞེས་བརྗོད་ནས་བརྟེན་པར་བྱ། ལས་ཐམས་ཅད་པ་བཟླུས་པའི་བདུད་རྩིའི་ཆུ་དང་ཡུངས་ཀར་ཀྱིས་གཏོར། རྡོ་རྗེ་དང་བཅས་པའི་ལག་པས་རེག་ཅིང་འཁྱིལ་པའི་སྔགས་དང་བཅས་པས་བསྲུངས་ལ། དྲིའི་ཆུ་དང་མེ་ཏོག་དང་སྤོས་ཀྱིས་མཆོད། །གཡས་པའི་སོར་མོ་རྣམས་དགབ་བཞིན་པར། ཨོཾ་བཛྲ་ས་མ་ཡ་སླུ་ཏྲ་མ་ཏི་ཀྲ་མ་ཧཱུྃ་ཞེས་པ་དང་། འབྲུ་གསུམ་ཉིས་བརྒྱ་རྩ་བརྒྱད་རེ་བཟླས་པས་ལྷག་གནས་བྱའོ། །དེ་ནས་གཙོ་བུམ་རྣམས་ཀྱི་ཆུ་ལས་བུམ་དུ་ཅུང་ཟད་བསྲེས་བས་དཀྱིལ་འཁོར་གྱི་ས་ལ་བསང་གཏོར་བྱ་བ་དང་སྤྲགས་ཨོཾ་སརྦ་སཾ་ཤོདྷ་ནི་ཧཱུྃ་ཕཊ། ཞེས་བརྗོད་པས་གཙང་མར་བྱས། དཀྱིལ་འཁོར་གྱི་ས་ལ་དྲིའི་ཆུས་བྱུགས་ཤིང་མེ་ཏོག་གཅལ་དུ་བཀྲམ་ཉེར་སྤྱོད་བཤམས་ནས་ནམ་མཁའ་ལ་བྲི་བྱའི་དཀྱིལ་འཁོར་ཆུ་ལས་ཆུ་བུར་བརྡོལ་བ་ལྟར་བཞུགས་པར་བསམས་ལ་མཆོད་མོན་ལ་སོགས་པའི་ཚུ་བཞི་སྔོན་དུ་འགྲོ་བས་མཆོད་ཅིང་བསྟོད། དེ་ནས་སློབ་དཔོན་གྱིས་རྡེ་དྲིལ་དང་བཅས་ཤིང་དཔོན་སློབ་གཉིས་ཀས་ལངས་ཏེ་རྡོ་རྗེའི་རྐང་སྟབས་དང་བཅས་གཡོན་པའི་རྡོ་རྗེ་ཁུ་ཚུར་གྱིས་ཐིག་སྐུད་ལྟེ་བར་བཟུང་བའི་ཚུལ་རྡོ་རྗེ་མཁའ་འགྲོ་ལས། གཡོན་པའི་རྡོ་རྗེ་ཁུ་ཚུར་ནི། །ལྟེ་བར་བཞག་ལྟེ་གཟུང་བར་བྱ། །དེ་ཡི་འོག་ཏུ་ཅི་
བདེར་བྱ། །ཞེས་པ་ལྟར་གྱི་སྤྱོད་ལམ་ལ་གནས་ནས་ཐིག་གྲོགས་ལ་ཛྫཛྫཛྫ ཞེས་རླུང་གི་འགྲོ་ལྡོག་དང་སྦྱར་ནས་གཏད་པས་སངས་རྒྱས་ཐམས་ཅད་ཀྱི་རིགས་དང་ཡེ་ཤེས་ལྔའི་རང་བཞིན་སྲད་བུའི་རྣམ་པར་གྱུར་པར་བསམ་ཞིང་སེ་གོལ་གྱི་སྒྲ་དང་བཅས་ཐོག་མར་ནམ་མཁའ་ལ་འདེབས། དེ་ནས་ལས་ཐིག་རྣམས་ཀྱི་སྟེང་དུ་གདབ་པའི་ཚུལ་ཕྲིན་ལས་ཀྱི་རྒྱུད་ལས། ལྷ་དང་གཉིས་མེད་གནས་པའི་ཐིག །མཆོད་བྱས་ཡེ་ཤེས་ཐིག་ནི་གདབ། །གཉིས་པས་གཟུགས་བརྙན་ཐིག་གདབ་བོ། །ཞེས་སོ། །ཐིག་གདབ་པའི་གནས་སྐབས་ཐམས་ཅད་དུ། ཨོཾ་བཛྲ་ས་མ་ཡ་སཱུ་ཏྲ་ཞེས་དང་། ཧཱུྃ་ཨོཾ་སྭཱ་ཨཱཧཱ་ཞེས་བརྗོད་ཅིང་། ཐིག་གི་རང་སྒྲ་ལས། སེམས་ཅན་དོན་དུ་ཁྱེད་རྣམས་ཀྱི། །དུས་ཡིན་དེ་ཕྱིར་འདིར་སྤྱོན་ཅིག །ཅེས་བྱུང་བའི་སྒྲས་ནམ་མཁའ་གང་བའི་དེ་བཞིན་གཤེགས་པ་ཐམས་ཅད་བསྐུལ་ཏེ་བྱོན། ཐིག་སྐུད་ལ་བསྟིམ་པས་ལས་ཐིག་བྱིན་གྱིས་བརླབས་པའི་དོན་དུ་ཡང་འགྱུར་ན། ས་ལ་གདབ་པའི་ཡེ་ཐིག་ཟུར་པ་མི་དགོས་པར་གྲུབ་པས་མངོན་བྱང་གི་འགྲེལ་པ་དང་རྣམ་གཞག་མི་གཅིག་གོ །འདིར་ཡེ་ཤེས་ཀྱི་ཐིག་ནི་བཞིའམ། བརྒྱད་དམ། བཅུ་དྲུག་ལ་སོགས་པ་རྐང་པ་རྡོ་རྗེའི་འགྲོས་ཀྱིས་བསྐོར་བཞིན་པར་ལས་ཐིག་གི་ཐད་ཀའི་སྟེང་གི་ནམ་མཁའ་ལ་གདབ་སྟེ། རྡོ་རྗེ་འབར་བ་ལས། ཤར་ནས་ནུབ་ལ་ལྷོ་ནས་བྱང་། །ཕྱིའི་ཕྱོགས་བཞི་དག་ཏུ་གདབ། །མེ་དང་བདེན་བྲལ་མཚམས་གནས་ཏེ། །གྲུ་ཡི་ཐིག་ནི་མཉམ་པར་གདབ། ཅེས་པ་ལྟར་རམ། ཡང་ན་ཚངས་ཐིག་གཉིས་ཙམ་གྱིས་ཀྱང་རུང་སྟེ་སྔོན་གྱི་མཁན་པོ་དག་གིས་ཀྱང་དེ་ལྟར་འཆད་དོ། །དེ་ལྟར་ཡེ་ཐིག་ནམ་
མཁའ་ལ་བཏབ་པའི་དེ་མ་ཐག་དཔོན་སློབ་གཉིས་ཀའི་ལག་པ་མཉམ་པོར་སྨད་ཅིང་སློབ་དཔོན་གྱི་རྐང་པ་གཡོན་སྐྱིལ་ཀྲུང་ཕྱེད་པ་དང་གཡས་ས་ལ་འཛུག་པ་གང་ཞིག་ལས་སློབ་མས་བཟློག་པར་བསྡད་དེ་ཚངས་ཐིག་གཉིས་པོའི་སྟེང་ནས་རིམ་པར་ལས་ཐིག་ཐམས་ཅད་ཀྱི་སྟེང་དུ་མེ་ཐིག་གདབ་པར་བྱའོ། །དེའི་ཚེ་ཡེ་ཐིགས་ལ་འདེབས་ཀྱང་དམིགས་པས་ནམ་མཁའ་ལ་འདེགས་པར་མོས་པའི་ཚུལ་སྡོམ་འགྲེལ་ལས་བཤད་པ་ཉིད་དཔྱད་བཟོད་དོ། །དེ་ལྟར་གདབ་པའི་ཐིག་གི་སྒྲས་དེ་བཞིན་གཤེགས་པ་རྣམས་སྤྱན་དྲངས་ཏེ་འོད་དུ་ཞུ་བ་ཡེ་ཤེས་ལྔའི་ངོ་བོ་སྲད་བུའི་རྣམ་པ་ཁ་དོག་ལྔ་པར་གྱུར་པ་རེ་ཆད་ནས་ལས་ཐིག་ལ་ཐིམ་པར་མོས་པ་ཡིན་པའི་རྒྱུ་མཚན་རྒྱལ་བའི་སྡེས། །ཚོན་རྩི་འགྱེད་པའི་དུས་སུ་ནི། །ཡེ་ཤེས་ཐིག་ནི་ནམ་མཁའ་ལ། །རྩ་བའི་སྔགས་བརྗོད་ནས་བཏག་སྟེ། །བྲི་བཟིན་ནས་ཕབ་ལ་བསྟིམ། །ཞེས་ལས་ཐིག་གི་སྟེང་དུ་བརྩེགས་པའི་ཡེ་ཐིག་ལ་འགོམས་པའི་ཉེས་པ་སྤང་བའི་དོན་དུ་བསྟན་པ་ཡིན་ནོ། །ཡེ་ཐིག་གི་བྱ་བ་ཟིན་ནས་ཐིག་སྐུད་སྔར་གྱི་སྣོད་དུ་བཞག །མཆོད་ཡོན་ལ་སོགས་པའི་མེ་ཏོག་དང་། སྤོས་གྱིས་མཆོད་ནས། དམ་ཚིག་གི་ཕྱག་རྒྱ་དང་བཅས། བཛྲ་མུས་ཐིག་སྐུད་ཀྱི་ཡེ་ཤེས་པ་ནམ་མཁར་བཞུགས་པའི་སྟ་གོན་གྱི་ལྷའི་ཐུགས་ཀར་གཤེགས། དེ་ལྟ་བུའི་ཡེ་ཤེས་ཀྱི་ཐིག་ལ་དབང་མེད་དུ་འགོངས་དགོས་པའི་ཉེས་པའང་འདུན་པས་དག་པར་བྱ་སྟེ། རྡོ་རྗེ་འབར་བ་ལས། ཡེ་ཤེས་ཐིག་ལ་མི་འགོངས་ཏེ། །ཏིང་འཛིན་དོག་ནས་འཛུལ་བར་བྱ། །ཞེས་པ་ལྟར་ཚོན་གྱི་སྐབས་སུའང་འདྲ་སྟེ། རྡོ་རྗེ་ཤུགས་ཀྱི་འཇུག་པས་ཡེ་ཤེས་ཀྱི་ཐིག་ཙོན་ཡིད་ཀྱིས་ནམ་མཁར་བཏེག་ལ། ཨོཾ་བཛྲ་བ་ག་ཀྲ་མ་ཧཱུྃ་ཞེས་བརྗོད་ཅིང་འོག་ཏུ་འཛུལ་ནས་ནང་དུ་ཞུགས་པར་
མོས་ལ་ཧི་ཞེས་གདོན་པ་དང་། ཕྱོགས་ཀུན་ཏུ་ཁྲོ་བོའི་ལྟ་སྟངས་ཀྱིས་བལྟས་ཏེ་སྒོའི་ཐིག་ཕྱིས་པས་ཐར་བའི་སྒོ་བྱེ་བར་བསམ་མོ། །དེ་ནས་ཚོན་འབྱེད་པའི་སྔ་རོལ་འདིར་གཏོར་མ་ཆ་གསུམ་བྱ། །ཚོན་གྱི་རྒྱུ་ནི་ལས་རིམ་ལས། །ཨིནྡྲ་ནཱི་ལ་ཟླ་འོད་དང་། པུཥྤ་རཱ་ག་བྱུ་རུ་ཟངས། །མར་ག་ཏ་ལས་བྱས་པས་དགྱེ། །ཞེས་པ་ལྟར་འབྱོར་པ་རྣམས་ཀྱིས་དཀར་པོ་ལ་སོགས་པའི་དོན་དུ་ཟླ་ཤེལ་དང་། སྤུག་དང་། པདྨ་རཱ་ག་དང་། མ་རྒ་ཏ་དང་། ཨིནྡྲ་ནཱི་ལའམ། ཡང་ན་མུ་ཏིག་དང་། གསེར་དང་། བྱེ་རུ་དང་། མུ་མེན་དང་། གཡུལ་སོགས་པ་དངོས་སུ་འབྱོར་ན་རབ། མ་འབྱོར་ཀྱང་ཚོགས་གསོག་པའི་དོན་དུ་རྒྱུ་གང་ལ་འདྲེས་པར་བྱ་ཞིང་། འབྲིང་ཐ་ནི་མེ་ལོང་ལས། འབྲས་དང་ས་ལུ་ལ་སོགས་པ། །ཁ་དོག་བསྒྱུར་བ་དེ་བཞིན་ནོ། །སྨན་དང་འབྱོར་པ་ཆུང་བ་ཡིས། །འབྱུང་ཁུངས་ལྔ་ཡིས་བྲི་བར་བྱ། །ཞེས་པས་འབྲུའི་ཕྱེ་མ་མེ་ཏོག་གིས་ཁ་བསྒྱུར་བ་དང་། སྨན་དང་། ཐ་མ་སེ་ཕག་དང་། སོལ་བ་དང་། རུས་པའི་ཕྱི་མ་ལ་སོགས་པས་ཀྱང་རུང་བར་སྤྱི་རྒྱུད་ལ་སོགས་པར་ཡང་བཤད་དོ། །དེ་དག་རྣམས་སྣོད་གསར་པར་བླུགས་ནས་སྒྱུ་འཕྲུལ་ལ་སོགས་པའི་དཀྱིལ་ཆོག་ལས་བཤད་པའི་ཡན་ལག་གི་རབ་གནས་ལྟར་རམ། དཀྱིལ་འཁོར་སོ་སོའི་ལྷའི་རིམ་པ་དང་མཐུན་པའི་ཕྱོགས་སུ་བཀོད་ལ་ཁ་དོག་སོ་སོས་མཚོན་པའི་དཔའ་བོ་འབྲུ་ལྔ་བྲིས། བསངས་སྦྱངས་སྔོན་དུ་འགྲོ་བས་ས་བོན་ཙམ་མམ། རྡོ་རྗེའི་ཆོ་ག་གསུམ་གྱིས་རྣམ་སྣང་ལ་སོགས་པར་བསྐྱེད། ཡེ་ཤེས་པ་གཞུག་ཚུལ་རང་གི་མིག་གཉིས་ཛ་ཡིག་ལས་སྐྱེས་པའི་ཉི་ཟླར་བསམས་ལ། ཨོཾ་དིཔྟ་དྲྀཥྚ་གུ་ཧྱ་ཛྙཱ་ན་ཛཛ ཞེས་བརྗོད་ཅིང་རྫིམ་བསྐྱོད་པ་འབར་བའི་ལྟ་སྟངས་ཀྱིས་བསྐུལ། བདེན་པ་གང་གིས་སེམས་ཅན་རྣམས་རྡུལ་ཚོན་མང་
ཞིང་སངས་རྒྱས་རྣམས་ནི་སེམས་ཅན་ལ་ཆགས་པས། རྗེས་སུ་ཆགས་པར་གྱུར་པའི་བདེན་པ་དེས་རྡུལ་ཚོན་རྣམས་འབར་བར་གྱུར་ཅིག །ཅེས་བདེན་སྟོབས་བརྗོད་པས་ནམ་མཁའི་ཁམས་ཀྱི་དེ་བཞིན་གཤེགས་པ་རྣམས་ཀྱིས་སྦྱོར་བ་མཛད་པར་མོས་ཤཱུ་ནྱ་ཏ་སོགས་ཡེ་ཤེས་ལྔའི་སྔགས་ཚན་ལྔ་བརྗོད་པས་དེ་རྣམས་ཀྱི་ཐུགས་ཀ་ནས་ཡེ་ཤེས་ལྔའི་རང་བཞིན་འོད་ཟེར་ཁ་དོག་ལྔ་བའི་རྣམ་པར་གྱུང་ཚོན་རྣམས་ལ་ཐིམ་པར་བསམས་ལ། ཨོཾ་སརྦ་པཉྩ་རཏྣ་ས་མ་ཡེ་ཧཱུྃ་ཧཱུྃ་ཧཱུྃ། ཞེས་བརྒྱ་རྩ་བརྒྱད་བཟླས་པས་རྡུལ་ཚོན་རིན་པོ་ཆེའི་རྡུལ་ཕྲ་རབ་ཏུ་འབར་བར་བསམ། ལྷའི་རྣལ་འབྱོར་སྟོབས་ཆེན་རྡུལ་ཚོན་མང་པོར་སྤེལ་ནུས་པ་ཡིན་ནོ། །དེ་ནས་དྲི་དང་མེ་ཏོག་ལ་སོགས་པས་མཆོད། ཡིག་འབྲུ་རྣམས་མི་མངོན་པར་བྱས་ལ་མཐེབ་སྲིན་གཡས་པས་རེག་ཅིང་། ཨོཾ་བཛྲ་ཙི་ཏྲ་ས་མ་ཡ་མ་ཏི་ཀྲ་མ་ཧཱུཾ། ཞེས་དང་། མཐེབ་སྲིན་གཉིས་ཀས་རེག་ཅིང་། ཨོཾ་བཛྲ་ས་མ་ཡ་སཱུ་ཏྲ་མ་ཏི་ཀྲ་མ་ཧཱུྃ་ཛཛཛ ཅེས་བརྗོད་ཅིང་བསྣུན་པར་བྱའོ། །དེ་ནས་འཁོར་ལོའི་དབང་ཕྱུག་ཉིད་རྒྱས་པའི་ཆས་སུ་ཞུགས་ཏེ། སྔར་དཀྱིལ་འཁོར་གྱི་སའི་ལྟེ་བར་ཟླུམ་ཐིག་བྱེད་པའི་དོན་དུ་ཕུར་བུ་དངོས་སུ་བཏབ་པ་ཡིན་ན་ཧཱུྃ་བཞི་པའི་སྔགས་ཀྱིས་བཏོན་ནས་རང་གི་ལག་མཚན་རྡོ་རྗེ་ལ་ཐིམ་པར་མོས། ཕུར་ཁུང་དུ་ཡུམ་ལྔའི་ས་བོན་བརྗོད་པ་དང་སྦྲགས་འབྱུང་བ་རིམ་བརྩེགས་དང་མཐུན་པའི་རྡུལ་ཚོན་རིམ་པར་བླུགས་ཤིང་། ས་ཆུ་སྤྱན་དང་མཱ་མ་ཀཱི། །མེ་རླུང་གོས་དཀར་དམ་ཚིག་སྒྲོལ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་སངས་རྒྱས་ཞིང་། །ཞེས་བརྗོད་ཅིང་དོན་དྲན་པར་བྱ། སླར་ཡང་གཡས་པའི་མཐེབ་སྲིན་གྱིས་ཚོན་རྩི་ལྔ་ནས་ཅུང་ཟད་རེ་བླངས་པ་གཡོན་པའི་མཐིལ་དུ་བཞག་ལ། ཨོཾ་ཨཱསརྦ་པཉྩ་རཏྣ་ས་མ་ཡེ་ཧཱུྃ་ཧཱུྃ་ཧཱུྃ། ཞེས་བརྗོད་ཅིང་། གཡས་པའི་ཉེང་ལག་
ལྔའི་བྲེ་ཁ་ལ་ཉི་མའི་སྟེང་དུ་དཔའ་བོ་འབྲུ་ལྔ། གཡོན་པའི་ཉིང་ལག་ལྔའི་བྲེ་ཁ་ལ་ཟླ་བའི་སྟེང་དུ་ཡུམ་གྱི་ས་བོན་ལྔས་མཚན་པར་བསྒོམས་ཏེ། གཡས་པའི་སོར་མོ་ལྔ་ཚོམ་ཀྱིས་གཡོན་པར་གནས་པའི་ཚོན་སྣ་ལྔ་ཁུང་བུའི་སྟེང་དུ་བཀོད་ལ་དོན་ཡེ་ཤེས་རིན་པོ་ཆེའི་རང་བཞིན་རྟགས་ཀེང་རུས་ཆེན་པོའི་རི་རབ་ཏུ་བྱུང་བར་བསམ་མོ། །དེ་ནས་ཚོན་དགྱེ་བ་ནི། ཐོག་མར་སློབ་དཔོན་ཉིད་དཀྱིལ་འཁོར་གྱི་དབུས་སམ་ནང་དུ་གནས་ནས་དགྱེ་བའི་ཆུལ་རྣམ་སྣང་མངོན་བྱང་ལས། ཚོན་ནི་ནང་ནས་དགྱེ་བར་བྱ། །ཕྱི་རོལ་ནས་ནི་ཚོན་མི་དགྱེ། །ཞེས་པ་ལྟར་དབུས་སུ་ཕྱིན་ཏེ་ཚོན་རྩི་དཀར་པོ་ཐོག་མར་བླངས་ནས། །འདི་ནི་ཆོས་དབྱིངས་དག་པ་སྟེ། སེམས་ཅན་ཁམས་ནི་རབ་གྲོལ་བྱེད། །མི་བསྐྱོད་རྡོ་རྗེ་རྒྱལ་ཆེན་གྱི། །དཀྱིལ་འཁོར་སྙིང་པོ་བྲི་བར་བྱ། །ཞེས་ཡེ་ཤེས་སོ་སོའི་མཚོན་དེན་དང་བསྟུན་ཞིང་། དེ་ཡང་ཐོག་མར་གཡོན་པའི་རྡོ་རྗེ་ཁུ་ཚུར་ལ་སོགས་པའི་ཕྱག་རྒྱས་དགྱེ་བའི་ཚུལ་སྤྱི་རྒྱུད་ལས། །རྡོ་རྗེ་ཁུ་ཚུར་སྦྱོར་བའམ། །ཡང་ན་ལྕགས་ཀྱུའི་ཕྱག་རྒྱའམ། །ལྷུང་བཟེད་ཕྱག་རྒྱའི་སྦྱོར་བའམ། །ཡང་ན་རིག་བྱེད་ལག་པས་འདྲི། །ཞེས་པ་ལྟར་དབང་ལྡན་ནས་བརྩམས་ཏེ་ཕྱི་ནས་རིམ་པ་བཞིན་དུ་བྲིའོ། །རྩིག་པ་ལྔ་སོ་སོའི་ཞིང་ནི་རྩ་ཐིག་ཁྲུ་གང་བའི་དཀྱིལ་འཁོར་ཁོ་ནའི་དབང་དུ་བྱས་ནས་སྒོའི་ཉི་ཤུ་ཆ་སྟེ་ཐིག་སྐུད་ཆད་ལྡན་གང་དང་། དཔངས་སུ་མཐེའུ་ཆུང་ཕྱེད་ཙམ་པ་སྤོམ་ཕྲ་དང་འདྲེས་པ་དང་། །ཡོན་པོས་ཡུལ་འཐོན་པ་ལ་སོགས་པའི་ཉེས་པའི་སྐྱོན་གྱིས་མ་གོས་པས་གཡས་སུ་བསྐོར་ནས་འདྲི་བའི་ཚུལ་རྡོ་རྗེ་མཁའ་འགྲོ་ལས། ཚོན་རྩི་རེ་རེའི་ཞེང་དུ་ནི། །སྒོ་ཡི་ཉི་ཤུ་ཆ་ཡི་ཚད། །གལ་ཏེ་ཚོན་རྩི་མི་མཉམ་ཞིང་། །ཡོ་དང་དམའ་བར་གྱུར་ན་ནི། །རི་མོ་དམའ་བས་དོན་མི་འགྲུབ། །ཡོན་པོས་གདུང་བ་སྐྱེད་བྱེད་པས། །དཔང་
ནི་མཐེའུ་ཆུང་ཕྱེད་ཙམ་དུ། །མཐོ་ཞིང་དྲང་བར་བྲི་བར་བྱ། །དེ་ལས་སྦོམ་ན་ནད་འབྱུང་སྟེ། །དམའ་ན་ནོར་ནི་ཟད་པར་འགྱུར། །ཡོན་པོས་ཕན་ཚུན་སྡུད་འགྱུར་ཏེ། །ཆད་ན་བླ་མ་སློབ་དཔོན་དག །གཉིས་ཀ་འཆི་བར་ཤེས་པར་བྱ། །གཡས་སྐོར་མ་ཡིན་བྲིས་ན་ནི། །རྡུལ་ཚོན་ཕུར་བུས་བཏབ་པར་འགྱུར། །ཞེས་སོ། །དེ་ལ་རྡུལ་ཚོན་ཕུར་བུས་བཏབ་པ་ནི་ཕུར་བུས་གདབ་བོ། །ཐོ་བས་བརྡུང་ངོ་ཞེས་འཇོམས་པར་བྱེད་པའི་དོན་དུ་ངེས་པའི་གཡོན་སྐོར་དུ་བྲིས་ན་ལག་པའི་གྲུ་མོ་ལ་སོགས་པས་བྲིས་ཟིན་པ་ཕན་ཚུན་འདྲེས་པ་ལ་སོགས་པའི་སྐྱོན་གྱིས་རིགས་འཆད་པར་བཤད་དོ། །འདི་ལྟར་འཁོར་འདས་ཀྱི་ཆོས་ཐམས་ཅད་མཉམ་པ་ཉིད་དུ་རྟོགས་ནས་གློ་བུར་བའི་ཀུན་རྟོག་ཟིལ་གྱིས་ནོན་པ་དག་ལ་ཚོན་བྲ་བཟང་ངན་སོགས་དཔྱད་དགོས་པ་མ་ཡིན་ཀྱང་། དེ་ཁོ་ན་ཉིད་ཀྱི་བསམ་པ་ལྷའི་ང་རྒྱལ་དང་སྦྱོར་མི་ནུས་པ་དག་ལ་ནི་ཚོན་པྲ་བརྟག་པའང་དགོས་ཏེ། ཚོན་བཀྱེ་བ་ལ་ཉེས་པ་གང་། །དེ་ཉིད་བསམ་སྦྱོར་མེད་རྣམས་ལའོ། །དེ་ཉིད་བསམ་སྦྱོར་བཟང་རྣམས་ལ། །སུས་ཀྱང་བར་ཆད་བྱ་མི་ནུས། །ཞེས་པས་རྣམ་པར་རྟོག་པའི་གཞན་དབང་ཅན་དུ་གྱུར་པའི་སློབ་དཔོན་རྣམས་ཀྱིས་ནི་ཐོག་མར་རང་ཉིད་ཀྱིས་སྒོ་ཚད་གཅིག་ཙམ་དུ་བྲིས་པ་ལ་ཀ་པཱ་ལས་བཀབ་སྟེ་བཞག་གོ །དེ་ནས་སློབ་མས་ཅི་དགར་དགྱེ། །ཞེས་རྡོ་རྗེ་མཁའ་འགྲོ་ལས་བཤད་པ་ལྟར་སློབ་མའམ། རིག་བྱེད་ལག་སྟེ་རི་མོ་མཁན་ལ་སོགས་པ་ལ་ལེགས་པར་གདམས་ནས་ཆོ་ག་བཞིན་དུ་བྲིམས་ནས་བྲིར་བཅུག་གོ །རྩིག་པ་སྦྲེལ་རན་པ་ན་བྲ་བརྟག་པའི་ཚུལ་ཀུ་ཀུརཱ་ཛས། རེ་ཁཱ་དམའ་བས་མི་འགྲུབ་ཅིང་། །ཡོན་པོས་གདུང་བ་བསྐྱེད་པར་བྱེད། །ཆད་པ་སློབ་དཔོན་མ་དག །འཆིའམ་ན་བར་འགྱུར་བ་ཡིན། །ཆད་ལྷག་ལས་ནི་ནད་འབྱུང་
ཞིང་། །ཕྱོགས་འཁྲུལ་རྨོངས་པའི་གནས་སུ་འགྱུར། །ཞེས་པ་སྟེ་དེ་ལྟར་བྱུང་ན་བཟློག་ཚུལ་ནི་ཕྲེང་བ་ལས། དྲིལ་བུའི་སྒྲ་དང་རྡོ་རྗེའི་གྲུས་མཚན་མ་ངན་པ་བསལ་བར་བྱའོ། །ཆོས་དབྱིངས་འདི་ནི་དག་པ་སྟེ། །སེམས་ཅན་ཁམས་ནི་རབ་གྲོལ་བར། །རྒྱལ་ཆེན་དགྱེས་པ་རྡོ་རྗེ་ཡི། །དཀྱིལ་འཁོར་རབ་ཏུ་བྲི་བར་བྱའོ། །ཞེས་ཆོས་ཀྱི་དབྱིངས་རང་བཞིན་གྱིས་རྣམ་པར་དག་པའི་དོན་དྲན་པས་སེམས་ཅན་གྱི་ཁམས་ལ་བློ་བུར་དུ་ལྡན་པའི་དགེ་མི་དགེའི་ཀུན་ཏུ་རྟོག་པ་ལས་གྲོལ་བའི་རྡོ་རྗེའི་གླུས་བཟློག་བར་བྱའོ། །འདི་ནི་གུས་ལས་རྡུལ་ཚོན་གདབ་པའི་དམ་ཚིག་ཏུ་གསུངས་པས་བགེགས་བསལ་བའི་དོན་དུ་མི་འགྱུར་རོ་སྙམ་ན། ཕྲེང་བ་ལས་མཚན་མ་ངན་པ་བསལ་བའི་རྡོ་རྗེའི་གླུར་ཡང་གསུངས་པ་མངོན་དུ་གསལ་ལ། ཁྱད་པར་རྡུལ་ཚོན་གདབ་པའི་དམ་ཚིག་ཅེས་པའི་སྒྲ་ཚིག་ནི་མཐའ་གཅིག་ཏུ་མི་འཇུག་པས་འདིར་ཡང་དེ་ལྟར་བྱུང་བར་ཤེས་པ་ནི་བློ་གྲོས་ཆེན་པོ་ཡིན་ནོ། །ལ་ཉེ་བརྟག་པའི་ཕྱོགས་འདི་དག་ལ་རྟོག་གེའི་རིགས་པ་མི་བསམ་སྟེ། དེ་ལྟ་ན་འདི་ལྟར་དང་པོ་སྐྱོན་མེད་དུ་བྲིས་པ་ལ་ཕྱི་ནས་སྦོམ་པོ་ལ་སོགས་པའི་སྐྱོན་དུ་མིག་འཕྲུལ་ལྟར་གྱུར་པའི་དོན་དུ་རང་ཉིད་འཁྲུལ་བའི་ཕྱིར་དང་། གང་ཞིག་སློབ་དཔོན་གྱིས་སྐྱོན་དེ་དག་སྤངས་ནས་དཔྱད་བཟོད་པར་བྲིས་པ་ཇི་ལྟ་བར་སློབ་མ་ལ་སོགས་བྲིབ་པོ་གཞན་ལའང་དེ་བཞིན་དུ་བྲིས་ཤིག་ཅེས་ལེགས་པར་འདོམས་པ་ལ། དེ་དག་གིས་བྲིས་པའམ། རང་གིས་ཀྱང་རུང་སྟེ་དྲན་པ་ཉེ་བར་གཞག་ནས་བྲིས་ཀྱང་དགེ་མི་དགེའི་རྟེན་འབྲེལ་ནི་སུས་ཀྱང་བྱེད་པ་པོ་མེད་པར་མངོན་པ་ཡིན་པས་དང་པོར་བྲིས་པ་དང་།
ཕྱི་ནས་བྲིས་པ་གཉིས་ལ་སྦོམ་ཕྲ་ལ་སོགས་པའི་ཁྱད་ཞུགས་བརྟག་པའི་དོན་དུ་རིགས་པར་བྱ་སྟེ། རྒྱ་གཞུང་གི་དཀྱིལ་ཆོག་གསུམ་མཐུན་པར་ཡང་དེ་ལྟར་འབྱུང་བས་སོ། །དེའི་དགོས་པ་ནི་རེ་ཁཱ་ལ་མེ་ཏོག་སིལ་མས་གཏོར་ཞིང་མཆོད་པ་དབུལ་བར་བཤད་པས་དེས་རྡུལ་ཚོན་ལ་གནོད་པ་སྤང་བའི་དོན་དུ་འདོད་པའང་རིགས་པ་མ་ཡིན་པ་ཆེན་པོ་སྟེ། དེ་ལྟ་ན་སློབ་དཔོན་གྱིས་བྲིས་པའི་རེ་ཁཱ་ཁོ་ན་མེ་ཏོག་གིས་འཇིག་པས་ཁམ་ཕོར་ལ་སོགས་དག་པ་དགོས་ལ། སློབ་མས་བྲིས་ཕ་མི་འཇིག་པར་དོན་གྱི་ཡོད་པས་མཐོང་བའི་ཆོས་ལ་འགལ་བའོ། །དེ་ལྟར་ཚོན་གྱིས་རྟེན་དང་བརྟེན་པའི་རིགས་དང་ཡེ་ཤེས་ཀྱི་མཚོན་བྱ་ངེས་པར་བྱེད་པས་ནང་གི་བརྟེན་པའི་ལྷ་རིགས་ལྔ་སྤྱི་ཁྱབ་ལྟར་རམ། དབུས་དང་ཕྱོགས་ཀྱི་ལྷ་གོ་བརྗེས་པའི་རྒྱས་འདེབས་ལྟར་ཡོད་པའི་ཁ་དོག་གི་རིམ་པས་བརྩིག་པའང་ཤེས་པར་བྱ་ལ་བརྩིག་པ་ལྔ་པོ་བསྒོམ་བྱའི་དབང་དུ་མ་ཕྱི་ནང་དུ་ནས་གང་རེས་མ་རེག་པའི་ལྔ་སྒྲག་ཏུ་འདོད་པ་དང་། སྟེང་ནས་སྟེང་རིམ་དུ་ཁ་དོག་སྣ་ལྔ་བརྩེགས་པར་འདོད་པའི་ལུགས་གཉིས་ལས་ཕྱི་མ་ལྟར་ན་རྩིག་ཞེང་ལ་ཆ་ཕྲན་གྱི་ལྔ་ཆ་ལས་མི་འབྱུང་པས་ཕྱི་ནས་ནང་རིམ་དུ་ཡོད་པ་ཉིད་ལེགས་སོ། །སྤྱིར་ཚོན་ཐོབ་དཀྱིལ་འཁོར་སོ་སོའི་དམིགས་བསལ་གྱིས་ངེས་དགོས་ནའང་སྤྱི་མཚན་དུ་དབུས་ཀྱི་ལྟེ་བ་མཐིང་ག །ལྷ་སྣམ་དམིགས་བསལ། མུ་ཁྱུད། འོད་ཕྲེང་རྩིབས་སམ། པདྨ། མཆན། གྲུ་ཆད། གློ་འབུར། བར་ཁྱམས། སྒོ་དང་ཀ་བ་རྣམས་ཕྱོགས་མདོག །གསེར་ཁྱམས། ཁྲག་ཁྱམས་ནི་རང་མིང་གིས་གོ་སླ་ལ་རྩིབས་སྟེང་སྔོན་པོ། འདོད་སྣམ་མམ་སྟེགས་བུ་ནི་ཤེལ་ལམ། གསེར་དང་། པདྨ་རཱ་ག་ལ་སོགས་པའི་
རིན་པོ་ཆེ་གང་ཡང་རུང་བ་ཉིད་དེ་དམར་པོར་བྱེད་པ་ཤས་ཆེ། ཕ་གུའམ་རིན་པོ་ཆེའི་སྣམ་བུ་ནི་སེར་པོ། དྲྭ་བ་དྲྭ་ཕྱེད་ཀྱི་གཞི་ནག་པོ་ལ་དྲྭ་བ་ནི་མུ་ཏིག་གི་ཕྲེང་བ་ནོར་བུས་མཛེས་པ། ཤར་བུའི་ཟ་ར་ཚགས་དང་། མདའ་ཡབ། མཆོད་རྟེན་རིས་རྣམས་ནི་དཀར་པོ་ལ་དེ་དག་གིས་ནི་ནམ་མཁའི་ངོ་བོ་ཉིད་ཡིན་པས་སྔོན་པོར་བྱའོ། །མུན་པའི་སྣམ་བུ་དང་གླང་རྒྱབ་ནི་བར་སྟོང་གི་མཚན་ཉིད་ཡིན་པས་ནག་པོའོ། །རྟ་བབས་ཀྱི་ཀ་བ་དང་། འཁྱོག་པོའི་ནང་ལོག་བླ་རེ་བྲེ་བའི་འོག་གིས་ནི་སོ་སོའི་ཕྱོགས་ཀྱི་དེ་བཞིན་གཤེགས་པའི་ཁ་དོག་དང་། ཕྱི་མ་ནི་ཕྱོགས་མདོག་གིས་སྤྲས་པའི་ནམ་མཁའི་རང་བཞིན་ནོ། །རྟ་བབས་སྣམ་བུ་བཞི་པ་དང་། བརྒྱད་པ་དང་། བཅུ་གཅིག་པ་སོགས་བརྡའ་དོན་གྱི་ཆ་ལས་མ་ངེས་པ་ཉིད་དེ་རྟ་རྐང་གཞི་སྔོན་པོ་ལ་རྡོ་རྗེའི་གྲེར་བུ་ཆུ་སྐྱེས་དམར་པོ་སྒྲོམ་མཛེས་ཚོན་ཟར་ཚཌ་དཀར་པོ་ལ་གཞི་ནག་པོ། སྣ་འབྱང་སེར་པོ། སྒྲིལ་འཕྱང་གཞི་ནག་པོ་ལ་དྲྭ་བ་དཀར་པོ། ཤར་བུ་དཀར་པོ་སྔོན་པོའི་གཞིར་སྒྲིལ་བ། རྒྱ་ཕུབས་ཁྱུང་མགོ་མཐིང་ག །པདྨ་དམར་པོ་འཁོར་ལོ་བཞི་དང་རི་དྭགས་སེར་པོ། གདུགས་དཀར་པོ། སྒོ་དང་སྒོ་ཁྱུད་ཀྱི་མཚམས་བཞིར་ཟླ་ཕྱེད་རྡོ་རྗེ། རྡོ་རའི་ས་མཐིང་ག་ལ་རྡོ་རྗེ་དཀར་པོའམ་སེར་པོ། །མེ་རི་ཡེ་ཤེས་ལྔའི་མདོག་ཅན། གཞལ་ཡས་ཁང་གི་འོག་གཞི་སྣ་ཚོགས་རྡོ་རྗེའི་ལྟེ་བ་ནག་པོའམ། གཙོ་བོའི་སྐུ་མདོག་ཏུ་བཤད་པའང་ཡོད་ལ། ཕྱོགས་སོ་སོའི་དབུས་རྭ་རྣམས་ནི་རང་ཕྱོགས་ཀྱི་གཤོགས་པའི་མདོག་ཅན་དང་། རྭ་རྩེ་གསུམ་པ་ཡིན་ན་གཡས་གཡོན་གཉིས་ནི་དེའི་གློ་ན་ཡོད་པའི་དེ་བཞིན་གཤེགས་པའི་མདོག་དང་། རྭ་ལྔ་པ་ཡིན་ན་དེ་ལས་གཞན་པའི་ཕྱོགས་དང་དབུས་ཀྱི་
རྒྱལ་བའི་མདོག་སྟེ་ཇི་ལྟར་རིགས་པའོ། ཞེས་བཤད་པས་གསལ་པོར་མངོན་པའི་རྭ་གཉིས་ནི་གཡས་གཡོན་གྱི་རྒྱལ་བའི་ཁ་དོག་དང་བསྟུན་ལ། ཕག་ནས་ཅུང་ཟད་མངོན་པའི་རྭ་གཉིས་ནི་རྒྱབ་མདུན་གྱི་རྒྱལ་བའི་མདོག་དང་བསྟུན་ནོ། །ཁ་གཅིག་ཏུ་ནི་ཕྱོགས་སོ་སོའི་རྭ་ཐམས་ཅད་ཀྱང་ཕྱོགས་དེའི་རྒྱལ་པའི་མདོག་དང་བསྟུན་པར་ཡང་བཤད་དོ། །ཡང་གཙོ་བོ་ཞལ་བཞི་པ་ལ་རང་རང་གི་ཕྱོགས་ཀྱི་ཞལ་མདོག་གོ །ཞེས་ཀྱང་བཤད་དེ། སྒྱུ་འཕྲུལ་ཞི་བ་ལ་འོག་གཞིའི་འཁོར་ལོ་ཕྱོགས་མདོག །རྟ་བབས་ཀྱི་གཡས་གཡོན་དུ་གསེར་ལས་བྱས་པའི་བུམ་པ་བཟང་པོ་དང་། དཔག་བསམ་གྱི་ཤིང་རང་མདོག་དང་། ཏ་ལའི་ལྗོན་པ་དང་། རིན་པོ་ཆེའི་ཕུང་པོ་ཁྲུས་ཀྱི་རྫིང་བུ་རྣམས་ཕྱོགས་རེར་གཉིས་གཉིས་སྤེལ་མར་བྲིས་པའོ། །སྣ་ཚོགས་རྡོ་རྗེའི་འོག་གི་པདྨའི་ལྟེ་བ་ནི་ལྗང་གུ །གེ་སར་སེར་པོ། །འདབ་མ་ནི་ཁ་དོག་སྣ་ཚོགས་པའོ། །དེའི་གཞི་ནི་དམར་ཤས་ཆེ་བའི་དཀར་པོའོ། །རྡོ་རྗེའི་ས་གཞི་སྟེ་དེའི་སྣམ་བུ་ནི་རླུང་གི་མཚོན་པས་བསྒོམ་དོན་དུ་འོག་གཞིའི་རླུང་གི་དཀྱིལ་འཁོར་གྱི་མཐའ་ནས་སྟེང་དུ་འོག་མིན་ལ་ཐུག་གི་བར་རྡོ་རྗེའི་རྭ་བ་གནས་པའི་ཕྱིར་ཁ་དོག་སྣ་ཚོགས་པའོ། །འོད་ཕྲེང་གི་ཁ་དོག་ལྔ་ནི་དེ་བཞིན་གཤེགས་པ་ལྔའི་ཡེ་ཤེས་ཀྱི་རང་བཞིན་ཕྱིར་གསལ་དུ་འཕྲོ་བའི་ཚུལ་ལོ། །དེ་ཡན་ཆད་ནི་ཕྱིའི་ཚོན་ས་སྟེ། ནང་གི་ཚོན་ས་ནི་ཇི་སྐད་དུ། རྩ་ཐིག་ནང་གི་དཀྱིལ་འཁོར་དུ་ཟུར་ཐིག་གཉིས་ཀྱིས་བཅད་པའི་ཕྱོགས་བཞིའི་ས་གཞི་རྣམས་རང་ཕྱོགས་ཀྱི་དེ་བཞིན་གཤེགས་པའི་མདོག་གོ །བསྒོམ་བྱའི་དཀྱིལ་འཁོར་གྱི་ཕྱོགས་བཞིའི་ཐོག་རྣམས་ཀྱང་དེ་བཞིན་ནོ། །ཞེས་པས་ཐོག་ནི་ཕྱི་ནང་ཁ་དོག་མི་གཅིག་པར་མི་མངོན་ལ། ནད་གི་ཀ་བ་རྣམས་ཀྱང་རང་ཕྱོགས་ཀྱི་དེ་བཞིན་
གཤེགས་པའི་མདོག་ལ་སོ་སོའི་རིགས་ཀྱི་མཚན་མ་འཁོར་ལོ་སོགས་ཀྱི་ཕྲེང་བས་མཚན་པའོ། །གདུང་ཟླུམ་རྣམས་ཀྱི་ཁ་དོག་ནི་སྔོན་པོ་དང་། རྡོ་རྗེ་ནི་སོ་སོའི་ཕྱོགས་གི་དེ་བཞིན་གཤེགས་པའི་མདོག་དང་མཐུན་པ་ཉིད་སྐབས་ཕྱེད་པར་སླའོ། །གཙོ་བོའི་ས་ནི་རིགས་ལྔ་སྤྱིར་བཏང་ལ་དེ་དང་དེའི་མདོག་དང་། མ་ངེས་པ་ཅན་ལ་དེའི་རིགས་བདག་གང་ཡིན་དང་དབུས་ཀྱི་ས་གཞི་དང་མཐུན་པར་བྱའོ། །སྣ་ཚོགས་པདྨའི་ལྟེ་བ་ནི་ལྗང་གུ་ལ་འདབ་མའི་དབྱེ་བ་ནི། བདེན་པ་ལ་ལྡང་དང་དབང་ལྡན་ནག །མེ་དང་རླུང་གི་མཚམས་ནི་སེར། །ཕྱོགས་རྣམས་ཀྱི་ནི་དམར་པོའོ། །ཞེས་པ་ལྟར་རོ། །དེས་ནི་དཀྱིལ་འཁོར་སྤྱིའི་ཚོན་སའི་ཐ་སྙད་བསྟན་ལ། གཞན་དུ་རྒྱུད་སྡེ་སོ་སོའི་རང་ལུགས་དམིགས་བསལ་སྟར་ཁོང་དུ་ཆུད་པར་བྱས་ནས་གཟུ་ལུམ་ལས་ཐལ་བར་བྱའོ། །འདི་དག་གི་ཚུལ་ནི་སྒྱུ་འཕྲུལ་རྔམ་གློག་ལས། མཁའ་འམ་ཡིད་ཀྱི་ནམ་མཁའ་ལ། །འབྱུང་ཆེན་བརྩེགས་པར་ལྷུན་གྱིས་གྲུབ། །དེ་སྟེང་རིན་ཆེན་སྣ་བཞི་ལས། །ལྷུན་གྱིས་གྲུབ་པ་ཚད་དཔག་མེད། །དེ་ལ་བརྟེན་པའི་ས་གཞི་ནི། །རིན་ཆེན་སྣ་ཚོགས་གཅལ་དུ་བཀྲམ། །མནན་ནེ་མ་བཏེག་འཕར་མཛེས་པའི་གཞི། །དེ་ལ་ཕོ་བྲང་གཞལ་ཡས་ཁང་། །གྲུ་བཞི་ལྷམ་པ་མཛེས་པར་སྣང་། །རིན་ཆེན་སྣ་བཞི་རྒྱུ་ལས་གྲུག །གློ་འབུར་བཞི་ཡང་མཁར་ཐབས་ཚུལ། །རིན་ཆེན་བཞི་ལས་གྲུབ་པའོ། །བུམ་པའི་རྩེ་མོ་ཆོས་ཀྱི་ཏོག །རྨ་བྱའི་མདོངས་ལྟར་བཀྲ་པའོ། །སྒོ་བཞི་སྒོ་ཁྱུད་རྣམས་ཀྱིས་བརྒྱན། །རྟ་བབས་བརྒྱད་དང་ཡང་དག་ལྡན། །དབུས་ནས་འཁོར་ལོ་རྩིབས་བཞི་པ། །ལྟེ་བར་བཅས་ཤིང་རྩིབས་རྟེན་ལྡན། །གྲུ་ཆད་བར་ཁྱམས་མཛེས་པར་འབར། །རིན་ཆེན་འོད་ཟེར་འབར་བར་འཁྱིལ། །སེམས་ཅན་པདྨ་
ཉི་ཟླ་དང་། །རིན་ཆེན་འབར་བའི་གདན་མཆོག་ལྡན། །རིན་ཆེན་ཁྲི་རྐང་རྣམ་བརྟན་མཛེས། །ཕོ་བྲང་དེ་ཡི་རྒྱན་མཆོག་ཀྱང་། །ཉི་ཟླ་ནོར་བུ་རིན་ཆེན་འབར། །བླ་རེ་རྒྱལ་མཚན་ན་བཟའ་གདུགས། །དར་དང་དོ་ཤལ་མུ་ཏིག་ཕྲེང་། ། དྲིལ་བུ ་དང་ནི་རྔ་ཡབ་སྩོགས། །རོལ་མོའི་ཆ་བྱད་སྣ་ཚོགས་བརྒྱན། །འཇིག་རྟེན་ལྷ་ཚོགས་མཛེས་པ་དང་། །དེ་ལ་སོགས་ཏེ་རྒྱན་རྣམས་ཀྱང་། །བསམ་གྱིས་མི་ཁྱབ་མཐའ་ཡས་མཆོག །གཞལ་ཡས་དེ་ཡི་བླ་བཞིན། །བླང་ཆེན་རྣམས་ཀྱིས་མཛེས་པར་བྱས། །རྟ་བབས་རྣམས་ཀྱི་ཙོང་ཙོང་ལ། །གསེར་གྱི་ དྲིལ་བུ ་འབར་བ་དག །དཀོན་མཆོག་གསུམ་གྱི་མཚན་ཡས་སྒོག །སྒོ་དྲུང་དེ་དག་རེ་རེ་ན། །ཏཱ་ལའི་སྐྱེ་ཤིང་ཙོང་ཙོང་བྲེས། །དྲི་དང་གཟུགས་དང་འོད་དུ་ལྡན། །ཏཱ་ལའི་སྐྱེ་ཤིང་དེ་དག་ལ། །ཁུ་བྱུག་ལ་སོགས་བཀྲ་ཤིས་པའི། །བྱ་རྣམས་སྙན་པའི་སྐང་ཀྱང་སྒྲོག །སྒོ་དྲུང་དེ་དག་རེ་རེ་ན། །ཁྲུས་ཀྱི་རྫིང་བུ་དབྱིབས་ལེགས་པ། །བྲོ་མཆོག་ཡན་ལག་བརྒྱད་ལྡན་ཆུ། །གྲངས་མེད་དེ་དག་རེ་རེ་ན། །ལྷ་དང་ལྷ་མོ་བསམ་མི་ཁྱབ། །ཕྱི་རོལ་ཁོར་ཁོར་ཡུག་ན། །རྩེས་འཆགས་བརྫོག་མི་ལང་། །དེ་ལ་སོགས་དེ་བསམ་ཡས་མཆོག །མ་བཙལ་ཡེ་ནས་ལྷུན་གྱིས་གྲུབ། །ཅེས་སོ། །དེ་ལྟ་བུའི་དཀྱིལ་འཁོར་ཀྱི་དག་པ་ཡང་གཞི་ལམ་འབྲས་བུའི་ཆོས་དང་སྦྱར་ན། གཞིའི་དུས་ན་སེམས་ཅན་གྱི་ཁམས་ལ་འབྱུང་དུ་རུང་བའི་ས་བོན་གྱི་ཚུལ་དུ་མི་ནས་གནས་པས་སྒོ་བཞིར་སྣང་བ་ནི་ཚད་མེད་པ་བཞི་སྟེ། བསྒོམ་དོན་བསྒོ་བཞི་པོ་རེ་རེའི་གཡས་གཡོན་ན་སྒོ་རེ་རེའང་སྒོ་ཁྱུད་གཉིས་གཉིས་ཏེ་རྣམ་པར་ཐར་པའི་སྒོ་ཕྱོགས་རེ་རེ་ལ་གསུམ་གསུམ་དང་ལྡན་ལ་གྲུ་ཆད་བཞི་པ་ཅན། །སྒོ་འགྲམ་གཉིས་གཉིས་པ་ཀ་བ་གཉིས་གཉིས་ཀྱིས་བཏེག་པའི་རྟ་བབས་བཞི་ནི་དྲན་པ་ཉེ་བར་
བཞག་པ་བཞི་དང་། བརྒྱད་ཀྱི་ཚེ་རྣམ་པར་ཐར་པ་བརྒྱད། པཉྩ་རེ་ཁཱ་སྟེ་རྩིག་པ་ལྔ་ནི་ཡེ་ཤེས་ལྔ་སྟེ་ནང་ནས་རིམ་པ་བཞིན། མཐིང་ག །ལྗང་གུ། དམར་པོ། སེར་པོ། དཀར་པོའོ། །ལྔ་པོའང་གཞའ་ཚོན་ལྟར་དྭངས་ལ་ཟང་ཐལ་བའོ། །མེ་ལོང་ལྟ་བུ་ལ་སོགས་པའི་ཡེ་ཤེས་བཞི་གློ་འབུར་གྱི་ཚུལ་ལ། ཆོས་ཀྱི་དབྱིངས་ཀྱི་ཡེ་ཤེས་ཀྱི་བརྡར་དབུས་མའི་བུམ་པ་ཟླུམ་པོས་ནམ་མཁའི་དབྱིངས་ཁྱབ་པའི་ཆར་ཁེབས་ནི་གཙང་ཁང་ཕྱུར་ཕུའི་ཡ་ཕིབས་ཏེ་མདའ་ཡབ་ཀྱི་སྟེང་གི་ནམ་མཁའ་ནོན་པར་ཕུབ་པས་ཕིབས་ཉིས་རིམ་གྱི་རྣམ་པ་ཅན་གྱི་སྟེང་གི་དབུས་དང་ཕྱོགས་བཞིར་རྡོ་རྗེ་རྩེ་ལྔ་པའི་རྭ་གྱེས་པ་ལྟ་བུའི་རྩེ་མོ་ལ་ཡེ་ཤེས་འོད་གསལ་བའི་རྡོ་རྗེ་དང་ནོར་བུ་རིན་པོ་ཆེའི་ཏོག་གིས་མཚན་པ། རྩིག་པ་ལྔའི་སྟེང་ན་སེམས་ཉིད་མི་འགྱུར་བའི་མཚོན་བྱེད་ཕ་གུ་སེར་པོ་ལ། ཐུགས་རྗེ་རིན་པོ་ཆེའི་མངའ་ཡབ་ཕིབས་ཆུང་གི་ཚུལ་དུ་ཕྱིར་འཕྱང་བའི་གདུང་སྣ་ནས་བྱང་ཆུབ་ཡན་ལག་བདུན་གྱི་དྲ་བ་དང་དྲ་བ་ཕྱེད་པ་ནོར་བུ་དང་མུ་ཏིག་གི་འཕྱང་འཕྲུལ་ཅན་ཉི་ཟླའི་རླུང་བསྐྱོད་དང་བཅས་པ། དེའི་གདུང་སྣ་གནོན་པའི་ཚུལ་དུ་བསམ་གྱིས་མི་ཁྱབ་པའི་ཆོས་ཉིད་མཚོན་པའི་པུ་ཤུ་མཆོད་རྟེན་བརྩེགས་སུ་བསྒྲིགས་པ། རྟོག་པ་མེད་པ་མཚོན་པའི་རི་དྭགས་ཀྱིས་བསྐྱོད་པའི་འཁོར་ལོ་ནི་བདེན་པ་བཞིའི་རང་བཞིན་མཚོན་པ་སྟེ། དེའི་ལྟེ་བ་ལ་ཆོས་ཀྱི་དབྱིངས་རིན་པོ་ཆེའི་གདུགས་བཙུགས་པ་འཁོར་བ་དང་། ཟུར་བཞིར་རྒྱལ་མཚན་དང་། དབྱིག་པ་རིང་པོ་ལ་བ་དན་འཕྱང་བའི་མགུལ་མཚམས་ནས་རིན་པོ་ཆེའི་ དྲིལ་བུ ་དང་། གཡེར་ཁ་དང་། ཟ་ར་ཚགས་དང་། ལྡ་ལྡི་དང་། རིན་པོ་ཆེའི་ཙོང་ཙོང་དང་། ཉི་ཟླའི་ཚར་ཆར་དང་།
རྔ་ཡབ་ནོར་བུའི་རྒྱན་ཅན་དང་། ལྷ་དང་མིའི་རྒྱན་རྣམ་པ་དུ་མས་དབུས་ཀྱི་རྡོ་རྗེ་ནོར་བུའི་ཏོག་ནས་རྟ་བབས་ཀྱི་བར་འབྲེལ་བ་ལས་སྒྲ་སྙན་པར་འབྱིན་པ་རྣམས་ནི་དབང་པོ་ལྔ་དང་། སྟོབས་ལྔ་བརྩིགས་པའི་ཕྱི་རོལ་ན་འདོད་ཡོན་གྱི་སྣམ་བུ་ཆགས་པ་ཆེན་པོའི་ཁ་དོག་ཏུ་འཚོར་བ་ལ་མཆོད་པའི་ལྷ་མོ་མང་པོ་འདོད་ཡོན་གྱི་མཆོད་སྤྲིན་ཟད་མི་ཤེས་པར་སྤྲོ་བ་ནི་སྔགས་ལམ་དུ་འདོད་ཡོན་མ་སྤངས་རྒྱན་དུ་རོལ་པའི་བརྡའ་དང་། འོག་གཞིའི་པདྨའི་ཟེ་བ་དང་། ཕྲུམ་ཕྲུམ་དང་། པ་ཏྲ་རིས་ཉི་ཟླའི་གདན་ལ་རང་མདོག་ཏུ་ཟང་ཐལ་བར་སྣང་བའི་ཁྱམས་སམ་ཞིང་ཁམས་ལྗང་གུར་མངོན་པའི་མཐའ་བསྐོང་ན་རྣམ་པར་ཤེས་པ་ཚོགས་བརྒྱད་མཚོན་པའི་དུར་ཁྲོད་ཆེན་པོ་བརྒྱད་དང་། རང་བྱུང་གི་ཡེ་ཤེས་བརྒྱད་མཚོན་པའི་གྲུབ་པའི་སློབ་དཔོན་བརྒྱད། དེ་བཞིན་དུ་མེ་བརྒྱད་ནི་ཡོངས་སུ་གདུང་བ་བརྒྱད། ཤིང་བརྒྱད་ནི་ཉོན་མོངས་པའི་རང་བཞིན་བརྒྱད། ཆུ་བརྒྱད་ནི་དག་བྱེད་ཀྱི་ལམ་བརྒྱད། ལྷ་བརྒྱད་ནི་དངོས་གྲུབ་ཀྱི་སྒོ་བརྒྱད། ཀླུ་བརྒྱད་ནི་ཡོན་ཏན་གྱི་ཚོགས་བརྒྱད། ཞིང་སྐྱོང་བ་བརྒྱད་ནི་བསོད་ནམས་དང་ཡེ་ཤེས་ཀྱི་འདུ་བ་བརྒྱད། ནང་གི་ཀ་བ་བརྒྱད་ནི་འཕགས་ལམ་ཡན་ལག་བརྒྱད། གདན་ལྔ་ནི་དུག་ལྔ་རང་གི་ངོ་བོས་དག་པ་སྟེ། མདོར་ན་མ་དག་པ་སེམས་ཅན་གྱི་དུས་ཉིད་ནས་སྐྱོན་དང་ཡོན་ཏན་གྱི་ཆ་རེ་རེ་གཉིས་གཉིས་སུ་གནས་པ་སྟེ། དཔེར་ན་ཉོན་མོངས་པ་ལྔ་དང་ཡེ་ཤེས་ལྔ་དག་བྱ་དང་དག་འབྲས་སུ་སྦྱོར་བས་མཚོན་ཏེ། གཞི་དུས་ན་སེམས་ཅན་གྱི་ཁམས་ལ་འོ་མ་ལས་མར་དང་། ཏིལ་ལས་ཏིལ་མར་ལྟ་བུའི་ཁྱབ་བྱེད་དུ་གནས་པའི་རྟགས་སུ་མཚོན་པའོ། །ལམ་དང་སྦྱར་ན་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་གྱི་རང་བཞིན་ཏེ། སྒོ་བཞི་ནི་ཚད་མེད་པ་བཞི། དེར་
འཇུག་པའི་ཐེམ་སྐས་སམ་རྒྱུའི་རྟ་བབས་ནི་ཕ་རོལ་ཏུ་ཕྱིན་པ་དྲུག །འབྲས་བུའི་རྟ་བབས་ནི་དྲན་པ་ཉེ་བར་གཞག་པ་བཞི། གློ་འབུར་བཞི་ཡང་དག་སྤོང་བ་བཞི། འཁོར་ལོ་ལ་སོགས་པའི་རྒྱན་བཞི་རྫུ་འཕྲུལ་གྱི་རྐང་པ་བཞི། རྩེག་པ་དང་པོ་ལྔ། ཕ་གུ་དང་། དྲྭ་ཕྱེད་དང་། མདའ་ཡབ་དང་། པུ་ཤུ་དང་། ཕྱུར་བུ་ལྔ་ནི་སྟོབས་ལྔ། སེང་གེ་ལ་སོགས་པའི་གདན་ལྔ་དང་ཉི་ཟླ་གཉིས་ཏེ་བདུན་ནི་བྱང་ཆུབ་ཀྱི་ཡན་ལག་བདུན། ཀ་བ་བརྒྱད་ནི་འཕགས་ལམ་བརྒྱད་དེ་ཚོགས་ལམ་ནས་བསྒོམ་པའི་བར་གྱི་ཡོན་ཏན་གྱི་ཆ་རྣམས་བརྡའི་སྒོ་ནས་མཚོན་པའོ། །འབྲས་བུ་དང་སྦྱར་ན་སངས་རྒྱས་ཀྱི་སའི་ཡོན་ཏན་ལ་སྦྱོར་ཏེ། སྟོབས་བཅུ་ནི་གླང་པོ་ཆེའི་ཁྲི། མི་འཇིགས་པ་བཞི་སེང་གེའི་ཁྲི། དབང་བཅུ་རྨ་བྱའི་ཁྲི། རྫུ་འཕྲུལ་རྟའི་ཁྲི། སོ་སོར་རིག་པ་ལ་སོགས་ཏེ་ཤེས་བྱ་ཐམས་ཅད་ལ་ཆགས་ཐོགས་མེད་པ་ཤང་ཤང་གི་ཁྲི། ཡེ་ཤེས་ལྔའི་རྩིག་པ། སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་འོད་ཟེར། འགྲོ་བ་སྐྱོབ་པའི་གདུགས། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཀྱི་གཞན་དང་མཚུངས་པ་མེད་པའི་ཏོག་ལ་སོགས་པ་སྟེ་མཐར་ཐུག་པའི་འབྲས་བུའི་ཡོན་ཏན་གྱི་དོན་ལ་མཚོན་པའོ། །དེ་ལྟ་བུའི་དཀྱིལ་འཁོར་ནི་གཞི་ལ་ཡོད་པས་རང་ངོའི་སྒྲིབ་པ་མཐའ་དག་དང་བྲལ་བའི་ཚེ་འོག་མིན་དུ་རང་སྣང་བས་ཕྱོགས་ག་ཤེད་ན་ཡོད་པར་ནི་མི་བལྟ་སྟེ། སྒྱུ་འཕྲུལ་དྲྭ་བ་ལས། འགྲོ་བ་ཀུན་ལ་རབ་གནས་པའི། །དཀྱིལ་འཁོར་བསམ་ཡས་ལྷུན་གྲུབ་ནི། །རྟེན་དང་བརྟེན་པར་བཅས་པ་ཡི། །དཀྱིལ་འཁོར་མ་ལུས་རྫོགས་པར་ལྡན། །ཞེས་སོ། །དེ་བས་ན་ལམ་དུས་སུ་མཚོན་
བྱེད་དཔེའི་དཀྱིལ་འཁོར་ལའང་ཇི་ལྟར་བྱ་བ་མང་བ་བཞིན་དུ་ཚོགས་གསོག་པའི་སྟོབས་ཆེ་བ་ལ་དགོངས་ནས་ཆོ་ག་ཞིབ་མོས་བསྒྲུབ་པའི་ཚུལ་རྒྱུད་སྡེ་རྣམས་ལས་ལེགས་པར་གསུངས་པས་སླ་ཆོས་དང་གཟུ་ལུམས་ཀྱིས་མ་བརྫིས་པར་ཞིབ་མོ་རྣམ་པར་འཐག་བའི་དྲན་པ་ཉེ་བར་བཞག་ནས་ལྷག་པ་གཟུགས་བརྙན་ཀྱི་དཀྱིལ་འཁོར་མངོན་པར་འདུ་བྱ་ཞིང་། ལས་དང་བྱ་བའི་རིམ་པ་རྫོགས་པའི་མཐར་སློབ་དཔོན་གྱིས་དཀྱིལ་འཁོར་ལ་བསྐོར་ཞིང་མཉམ་པར་བཞག་པའི་སེམས་ཀྱིས་བལྟས་ནས་རྣམ་པར་ཤེས་པ་ལས་སུ་མ་རུང་བའི་གནས་རྣམས་ནི་ཡི་གེ་བརྒྱ་པས་བཤགས། མཐོང་ཆོས་སུ་གྱུར་པའི་སྐྱོན་གྱི་རྣམ་པ་དག་ཆད་ན་གསོ་ལྷག་ན་དབྱི་ནས་ལེགས་པར་བཅོས་པར་བྱ་སྟེ་སྤྱི་རྒྱུད་ལས། དཀྱིལ་འཁོར་རྫོགས་པར་བྲིས་ནས་ནི། །ཡིད་ཀྱིས་ལེགས་པར་མཉམ་གཞག་ནས། །དེ་ཡི་འོག་ཏུ་མང་བརྟགས་ཏེ། །བརྒྱ་ལ་འགའ་ཞིག་མ་ལེགས་ན། །དེ་ནི་ཕྱིར་ཡང་བཅོས་པར་བྱ། །ཞེས་སོ། །དེ་ལྟར་བཅོས་ནས་ཚོན་ལྷག་རྣམས་སྔར་བཞིན་མཆོད། དེའི་ཡེ་ཤེས་པ་བཛྲ་མུས་ནམ་མཁའི་ལྷའི་ཐུགས་ཀར་གཤེགས། དམན་མ་རྣམས་གཙང་སར་བཞག་གོ །ཚོན་འཐོར་བ་རྣམས་ཀྱང་རས་ལ་སོགས་པས་ལེགས་པར་ཕྱི། བདུད་རྩི་ལྔ་དང་བཅས་པའི་དྲིའི་ཆུ་ལ་འཁྱིལ་པའི་སྔགས་དང་ཧཱུྃ་བཟླས་པ་དཀྱིལ་འཁོར་གྱི་མཐའ་སྐོར་དུ་བྱུགས་པས་ཀུན་རྫོབ་ཙམ་དུའང་བསྲུང་བར་བྱ་ལ། དམིགས་པའི་སྒོ་ནས་ཕྱི་རོལ་གྱི་བསྲུང་བའི་འཁོར་ལོ་རྣམས་དང་། ཁྱད་པར་རྩིབས་བཅུའི་ཁོང་གསེང་ལ་ཁྲོ་བོ་བཅུ་གནས་པའི་འཁོར་ལོ་སེར་པོ་གཙུག་ཏོར་འཁོར་ལོས་སྒྱུར་བའི་ངོ་བོ་ཉིད་དྲག་ཏུ་འཁོར་བའི་ལྟེ་བ་ལ་གཞལ་ཡས་ཁང་གི་རྣམ་པ་རབ་ཏུ་བརྟན་པར་མོས་ཞིང་།
རྡོ་རྗེའི་ས་གཞི་ལ་སོགས་པའི་རྭ་གུར་གྱིས་ཀྱང་བགེགས་རྣམས་བཟློག་པར་བསམ་པ་ནི་ངེས་པར་གཅེས་ཏེ་སྔགས་ཀྱི་དངོས་གྲུབ་ཆེན་པོ་བསྒྲུབ་པ་ལ་བལྟར་མི་མངོན་པའི་བགེགས་ཀྱི་འཚེ་བ་ཤིན་ཏུ་མང་བ་ཡོད་དོ། །དེ་བས་ན་དཀྱིལ་འཁོར་བྲི་བ་ནས་བརྩམས་ཏེ་དཀྱིལ་འཁོར་གྱི་ཁང་པར་སྔགས་ཀྱི་དབང་ཐོབ་པ་གཅིག་མེད་པའི་སྟོང་པར་བཞག་ཏུ་མི་རུང་བའི་ཚུལ་སྤྱི་རྒྱུད་ལས། ཁྲུས་ལ་སོགས་པ་བྱེད་པའི་ཚེ། །དཀྱིལ་འཁོར་མཐོང་བ་གཞན་བཞག་སྟེ། །དཀྱིལ་འཁོར་བྲི་བའི་ཚེ་ན་ནི། །ནམ་ཡང་སྟོང་པར་མི་བཞག་གོ །ཞེས་བཤད་དོ། །དེ་ནས་བརྟེན་པའི་རྣམ་པ་དགོད་པའི་ཚུལ་ནི། གཙོ་བོ་གཟུགས་སུ་རྫོགས་པར་བྲི། །འཁོར་རྣམས་ཕྱག་རྒྱ་དག་ཏུ་བྱ། །ཕལ་བ་དག་ལ་ཡིག་འབྲུས་སོ། །ཞེས་པས་རིགས་ཀྱིས་བསྡུས་པའི་གཙོ་བོ་རྣམས་སྐུ་གཟུགས་དང་། འཁོར་རྣམས་ཕྱག་མཚན། ཡང་འཁོར་རྣམས་ལ་ཡིག་འབྲུ་སྟེ་ས་བོན་དགོད་པའམ། རང་མདོག་དང་མཚུངས་པའི་ཐིག་ལེའི་རྣམ་པ་དགོད་པས་ཀྱང་མི་རུང་བ་མ་ཡིན་ཏེ་མངོན་བརྗོད་བླ་མ་ལས། མི་ནུས་ན་ནི་བྲིས་པ་ཡི། །ཕྱག་རྒྱའམ་མཚན་མ་དགོད་པར་བྱ། །ཞེས་བཤད་དོ། །དེ་ཡང་འཕགས་ཡུལ་སོགས་སུ་ནི། གསང་བ་བསྲུང་བ་ལ་ཤིན་ཏུ་སྒམ་པས་དངོས་གྲུབ་ཀྱང་ངེས་པར་ཐོབ་པའི་ཕྱིར་ཉེ་སྐོར་དུ་སྐལ་མི་ལྡན་གྱི་གང་ཟག་ཡོད་ན་མཚན་མ་དང་ཕྱག་རྒྱ་བྲི་ལ། དེ་མེད་ན་སྐུ་གཟུགས་འདུ་བྱེད་པ་ཡིན་ནོ། །ལར་རས་བྲིས་སོགས་ལ་ལྷའི་སྐུ་གཟུགས་དངོས་སུ་བྲི་བ་ཡོད་མོད་ཀྱིས་དེ་ཡང་ལྷའི་ཡན་ལག་མ་རྫོགས་ན་བྱིན་གྱིས་མི་རློབ་པས་དེ་བས་ཕྱག་མཚན་བྲི་བ་ཉིད་ལེགས་སོ། །དེ་ནས་བུམ་པ་དགོད་པར་བྱ་སྟེ། སྔར་ལྷག་གནས་བྱས་པའི་བུམ་པ་རྣམས་སློབ་དཔོན་
རྡོ་རྗེ་སེམས་དཔའི་ང་རྒྱལ་ལ་གནས་ཤིང་རྡོར་དྲིལ་དང་བཅས་ཧཱུྃ་བཞི་པའི་སྔགས་ཟློ་བཞིན་པར་སྤོས་རོལ་གྱིས་སྣ་དྲངས་ཏེ་དཀྱིལ་འཁོར་ལ་གཡས་སུ་ལན་གསུམ་བསྐོར་ནས་གོ་སྐབས་ཡངས་ན་རྣམ་རྒྱལ་དཀྱིལ་འཁོར་གྱི་གཙོ་བོའི་མདུན་ནམ། མདུན་གྱི་ལྷ་སྣམ་མམ་ཤར་སྒོའི་ཕྱི་རོལ་གྱི་གཡས་ལོགས་ཅི་བདེ་བར་དགོད་ལ། བུམ་པ་གཞན་བརྒྱད་ལ་སོགས་པ་ཡོད་ན་དེས་མཚོན་ནས་ལྷ་སོ་སོའི་གནས་ཀྱི་མདུན་ནམ། སྒོ་མཚམས་བརྒྱད་དམ། ཉུང་ན་ཤར་སྒོའི་གཡོན་ལོགས་སམ། རྡོ་རྗེ་རྭ་བའི་ནང་ཁོངས་སུ་ཆུད་པར་བཞག་སྟེ། དཱ་རི་ཀ་པས། རྡོ་རྗེ་རྭ་བའི་ཕྱི་རོལ་ཏུ། །བགེགས་བསྐྱེད་འགྱུར་པས་མི་དགོད་དོ། །ཞེས་སོ། །ལས་བུམ་ནི་སློབ་དཔོན་གྱི་མདུན་དུ་བུམ་གདན་ལ་བཞག་གོ །ལར་བུམ་པ་དགོད་ཚུལ་ལ་རྒྱ་གཞུང་རྣམས་ཀྱང་མཐའ་གཅིག་ཏུ་མི་མཐུན་པས་དོན་ལ་འགལ་བ་མེད་ཚུལ་སྔར་བཤད་ཟིན་ཏོ། །དེ་ནས་དཀྱིལ་འཁོར་གྱི་ཕྱི་ངོས་སུ་ཤར་དུ་ཤེར་ཕྱིན། ལྷོར་ཏིང་ངེ་འཛིན་རྒྱལ་པོ། །ནུབ་ཏུ་སྡོང་པོ་བཀོད་པ། བྱང་དུ་གསང་བ་བསམ་གྱིས་མི་ཁྱབ་པ་གདོན། །ནང་གི་ཕྱོགས་ཀུན་ཏུ་མེ་ཏོག་གསིལ་མར་བཀྲམ་ཞིང་། གདུགས་དང་། རྒྱལ་མཚན་དང་། བླ་བྲེ་དང་། བ་དན་སྣ་ཚོགས་པ་དང་། རྟ་བབས་དང་། དྲིལ་བུ ་དང་བཅས་པའི་རྔ་ཡབ་དང་། འདབ་མས་གང་བའི་བུམ་པ་དང་། གོས་ཟུང་དང་ཡོལ་བ་ལ་སོགས་པ་དགྲམ། མདའ་དང་རལ་གྲི་དང་རྨ་བྱ་ལ་སོགས་པའི་རྒྱན་བཀོད་དམིགས་བསལ་ཀྱིས་བྲི། མདའ་སྣུན་གྱིས། དེ་ནས་མེ་ཏོག་སྤོས་ལ་སོགས། །ལྷའི་གྲངས་དང་མཉམ་པར་དབུལ། །ཞེས་པ་ལྟར་གྲུབ་ན་ལྷ་དེ་ལ་ཕྱི་ནང་གི་མཆོད་པ་རྫོགས་པར་བཤམ། སྒྱུ་དྲ་ལས། བཅོས་བུའི་རས་ནི་སྣ་ཚོགས་དང་། །རྒྱན་ཕྲེང་བཏུང་དང་བོ་བས་བསྐོར། །ཞེས་པའི་བྲོ་བ་ནི་
བཟའ་བཏུང་རོ་བྲོ་བའི་མཆོག་ཡིན་ལ། དེ་དང་མཐུན་པར་སྤྱི་རྒྱུད་ལས་གསུངས་པས་དེ་དག་རྣམས་ཧཱུྃ་དང་གཙོ་བོའི་སྔགས་ལ་བཛྲ་སྥ་ར་ཎ་ཁཾ་བཏགས་པས་དབུལ། ཕྱོགས་སྐྱོང་རྣམས་མཉེས་པར་བྱ་ཕྱིར་བ་དན་བཅོ་ལྔ་གཟུག་པའང་། ཤར་ཕྱོགས་སུ་དབང་པོ་ལ་སེར་པོ། ཁྱབ་འཇུག་ལ་ནག་པོ། ཉི་ཟླ་གཉིས་རང་མདོག །མེས་པོའི་སེར་པོ། མེ་ལྷའི་དམར་པོ། གཤིན་རྗེའི་ནག་པོ། བདེན་བྲལ་གྱི་དུང་ཁ་རྣམས་སོ་སོའི་ཕྱོགས་སུའོ། །ནུབ་ཏུ་ཆུ་ལྷར་དཀར་པོ། སའི་ལྷ་མོར་སེར་པོ། ཐག་བཟངས་རིས་ལ་ནག་པོའོ། །རླུང་དུ་རླུང་ལྷའི་ལྗང་གུ །བྱང་དུ་ལུས་ངན་པོའི་སེར་པོ་དང་། ཚོགས་བདག་གི་དཀར་པོ་དང་། བྱང་ཤར་དུ་དབང་ལྡན་ལའང་དཀར་པོའོ། །དེ་ནས་རྡུལ་ཚོན་གྱི་དཀྱིལ་འཁོར་བསྒྲུབ་པའི་ཁྱད་ཆོས་ལ། རང་ལུགས་བཤད་པ་དང་། རྒྱུད་སྡེ་སྤྱི་ཁྱབ་ལ་གྲགས་པའི་ཁྱད་པར་བཤད་པ་གཉིས་ལས། དང་པོ་ནི། སློབ་དཔོན་ཁྲུས་བྱས། དྲི་ཞིམ་པོས་ལུས་ལ་བགོས། འཁོར་ལོས་བསྒྱུར་བའི་ཆས་སུ་ཞུགས། ཕྱི་རོལ་པ་ལ་གཏོར་མ་བྱིན་ནས་བསྐྲད། ཕུར་བུས་གདབ་པ་དང་། སྲུང་བའི་འཁོར་ལོ་བསྒོམ་པས་མཚམས་བཅད། ལས་ཐམས་ཅད་པ་བཟླས་པའི་ཆུ་དང་སྔགས་ཀྱིས་དཀྱིལ་འཁོར་ལ་བསངས་ཤིང་བསྲུངས་ནས་རྡོ་རྗེ་དང་ དྲིལ་བུ ་འཛིན་པས་དཀྱིལ་འཁོར་གྱི་ཤར་སྒོ་ལ་ཕྱོགས་པས་འདུག །དེ་ནས་དཀྱིལ་འཁོར་བསྒྲུབ་པ་དངོས་ལ་བདག་མདུན་ཐ་དད་དུ་བྱེད་པ་དང་། ཐ་མི་དད་དུ་བསྒྲུབ་པའི་ལུགས་གཉིས་ལས། དང་པོ་ནི། བདག་གི་རྣལ་འབྱོར་བཟླས་པའི་བར་སྒྲུབ་ཐབས་བཞིན་དུ་བྱས་ནས། དེའི་རྫོགས་པའི་རིམ་པ་ཉེར་བསྡུའི་ནཱ་ད་ཤིན་ཏུ་ཕྲ་བའི་དེ་ཁོ་ན་ཉིད་ལ་མཉམ་པར་བཞག་པའི་སྟོང་ཉིད་གསལ་ཁྱབ་ཅན་གང་ཞིག་
དང་། མདུན་བསྐྱེད་བསྐྲུན་པའི་ཐོག་མ། ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །ཞེས་པ་ལ་སོགས་པས་དེ་བཞིན་ཉིད་ཀྱི་ཏིང་ངེ་འཛིན་གཉིས་མཚམས་སྦྱར་ནས་རྟེན་དང་བརྟེན་པའི་བསྐྱེད་ཆོག་རྣམས་རྡོ་རྗེ་སེམས་དཔའ་སྒྱུ་འཕྲུལ་དྲ་བའི་བདག་སྲས་ཀྱི་ཆོ་ག་བཞིན་པས་ལྷ་རྣམས་མངོན་སུམ་པར་བཞུགས་པ་ཉིད་དུ་དམིགས་ལ། གཞན་སྲས་ཀྱི་ཚོགས་དཀྱིལ་འཁོར་བསྒྲུབ་པའི་ཚུལ་ནི་དེ་ཉིད་ལས། ཡུམ་གྱི་པདྨའི་དཀྱིལ་འཁོར་དུ། །བདེ་བ་ཐུགས་ཀྱི་དཀྱིལ་འཁོར་སྤྲོ། །སངས་རྒྱས་སྤྲིན་ཚོགས་མ་ལུས་ཀུན། །དགྱེས་མཉམ་མཆོག་གི་སྦྱིན་པས་བསྟིམ། །ཞེས་པའི་དོན་གསལ་བར་ཕྱེ་བ་ནི། སྙིང་འགྲེལ་ཉི་ཟླའི་སྤྲིན་གྱི་སྣང་བ་ཆེན་པོའི་ལེའུ་དགུ་པ་ལས་གསལ་བར་བཤད་པ་ལས་ཤེས་པར་བྱ་ཞིང་འོག་ཏུ་བསྐྱེད་རིམ་གྱི་དུས་ཀྱང་འཆད་པར་འགྱུར་རོ། །གཉིས་པའི་ལུགས་ནི། རྡུལ་ཚོན་གྱི་དཀྱིལ་འཁོར་བསངས་སྦྱངས་བྱས་ནས་འབྱུང་བ་རིམ་བརྩེགས་གཞལ་ཡས་ཁང་གདན་དང་བཅས་པ་གསལ་བཏབ་ནས་དཀྱིལ་འཁོར་བ་བསྐྱེད་ཅིང་ལྷ་རྣམས་མངོན་སུམ་པར་དམིགས་པ་ལ་རྡོ་རྗེ་ཤུགས་ཀྱི་འཇུག་པས་དཀྱིལ་འཁོར་དུ་ཞུགས་ནས་བསྒྲུབ་པའི་ཚུལ་ནི་མེ་ཏོག་བཟུང་ནས། ཨོཾ་མཆོག་ཏུ་བདེ་བའི་སེམས་ནི་རོལ་བར་ལྡན། །སྒེག་པའི་ཕྱག་གིས་བཅོམ་ལྡན་འདས་ལ་འདུད། །ཛཧཱུཾ་བཾ་ཧོ ཧི་ཧི་ཧི་ཧི་ཧཱི། མགོན་པོས་སྙེམ་པའི་མེ་ཏོག་བཞེས་སུ་གསོལ། །ཞེས་བརྗོད་དེ་གར་ལས་བྱུང་བའི་ཐལ་མོས་མེ་ཏོག་གི་ཕྲེང་བ་ཕུལ་བས། བདག་ལའང་ཕྲེང་བའི་དབང་བསྐུར་བར་བསམས་ཏེ་མགོ་བོར་བཅིང་བར་བྱའོ། །དེ་ནས་མཆོད་ཡོན་ཕུལ་ལ་ནུབ་སྒོ་ལ་སོགས་པའི་ཐད་དུ་སོང་སྟེ་ཧཱུྃ་མཛད་ཀྱི་ང་རྒྱལ་ལ་གནས་པས་ཧཱུྃ་ཞེས་
བརྗོད་ཅིང་གཡས་བརྐྱང་གི་གར་དང་བཅས་པས་སྒོ་བ་བཞི་ལ་བཀའ་བསྩལ་པས། དེ་དག་གིས་ཀྱང་ཤར་སྒོ་ནས་རིམ་གྱིས་ཕྱེ་བར་བསམས་ལ། རྡོ་རྗེ་ཁུ་ཚུར་བཅིངས་ཏེ་མཛུབ་མོ་གཉིས་འགྱེད་པ་དང་འདུད་པའི་སྦྱོར་བས། །ཨོཾ་བཛྲོད་གྷ་ཊ་ས་མ་ཡ་ཨ་བེ་ཤ་ཡ་ཧཱུྃ། ཞེས་པས་སྒོ་ཕྱེ་ལ་བདག་རང་བཞིན་གྱི་དཀྱིལ་འཁོར་དུ་གནས་པ་དེ་རྡུལ་ཚོན་ལ་དམིགས་པའི་མདུན་བསྐྱེད་ཀྱི་དཀྱིལ་འཁོར་གྱི་དབུས་སུ་རྡོ་རྗེ་ཤུགས་ཀྱི་འཇུག་པས་ཞུགས། །དེའི་གཙོ་བོ་དང་ཐ་མི་དད་པར་མོས་ནས་རང་གི་རིགས་ཀྱི་བུ་མོ་མཱ་མ་ཀཱི་དང་འདྲ་བར་བསྐྱེད་པའི་ཕྱག་རྒྱའི་སྐྱེ་མཆེད་དང་མཁའ་གསང་བྱིན་གྱིས་བརླབས་ནས་སྙོམས་འཇུག་གི་རྐྱེན་ལས་ཡེ་ཤེས་དགུག་པའི་ཚུལ་འདུས་པའི་ལེའུ་བཞི་པ་ལས། བཙུན་མོ་མཛེས་ཤིང་མདངས་བཟང་བ། །ལོ་གྲངས་བཅུ་དྲུག་ལོན་རྙེད་ནས། །དྲི་དང་མེ་ཏོག་བརྒྱན་བྱས་ཏེ། །དེ་ཡི་དབུས་སུ་འདོད་པ་བྱ། །ཡོན་ཏན་སྐ་རགས་མཱ་མ་ཀིར། །ཤེས་རབ་ཅན་གྱིས་དེ་བྱིན་བརླབ། །ཞི་བ་སྤྲོ་བྱ་སངས་རྒྱས་གནས། །མཁའ་ཡི་དབྱིངས་ནི་རབ་ཏུ་བརྒྱན། །ཞེས་པ་ལྟར་རམ། དེ་མེད་ན་གསལ་ལྡན་མ་སྟེ་ཡེ་ཤེས་ཀྱི་ཕྱག་རྒྱ་དང་སྙོམས་འཇུག་བསྐུལ་ནས་ཞི་བ་ནི་སངས་རྒྱས་རྣམས་དང་། སྤྲོ་བྱ་ནི་བརྒྱན་པའི་དོན་དུ་བཤད་པས། སངས་རྒྱས་གནས་ཀྱི་མཁའ་དབྱིངས་ཏེ་གཞལ་ཡས་ཁང་གི་ནང་དུ་སྤྲོ་བའམ། བརྒྱན་པའི་ཚུལ། ཡང་དག་པར་སྤྱོད་ནས་སྙོམས་པར་ཞུགས་པའི་དགའ་བའི་སྒྲ་དང་། སྙིང་གའི་བྱང་ཆུབ་སེམས་ཀྱི་འོད་ཟེར་གྱིས་ཕྱོགས་བཅུའི་སངས་རྒྱས་དམ་ཚིག་པ་རྣམས་ཀྱང་སྤྱན་དྲངས། མཆོད་ཡོན་དང་ཞབས་བསིལ་ཕུལ་ལ་རང་གི་སྤྱི་བོ་ནས་བཅུག །འདོད་ཆགས་རྡོ་རྗེའི་
མིས་ཞུ་བར་གྱུར་པ་ནོར་བུའི་ལམ་ནས་པདྨར་ཕྱུང་། ཉི་ཟླ་ཁ་སྦྱོར་གྱི་ཐིག་ལེའི་ས་བོན་རྣམས་ཡོངས་སུ་གྱུར་པ་ལས། ལྷའི་འཁོར་ལོར་རྫོགས་པ་ཐུགས་ཀ་ནས་སྤྲོས་ཏེ་དམ་ཚིག་གི་འཁོར་ལོ་སོ་སོའི་གནས་ཇི་ལྟ་བར་བཞུགས་སུ་གསོལ་ནས་སྐྱེ་མཆེད་དང་། སྐུ་གསུང་ཐུགས་བྱིན་གྱི་བརླབ་པ་དང་། དབང་བསྐུར་བ་དང་། ཡེ་ཤེས་པ་གཞུག་པ་དང་། མཆོད་པའི་རིམ་པ་ལ་སོགས་པ་སྒྲུབ་གཞུང་བཞིན་དུ་བྱ་བའམ། ཡང་ན་དམ་ཚིག་གི་འཁོར་ལོ་སོ་སོའི་གནས་སུ་བཞུགས་པའི་བར་སྔར་བཞིན་ལ་མཛད་པ་རྣམས་མཛད་ནས་རེ་ཞིག་རང་རང་གི་ཞིང་དུ་གཤེགས་དཀྱིལ་འཁོར་དུ་འབྱོན་མ་རག་ཏུ་བཞུགས་པ་དེ་སླར་སྤྱན་དྲངས་ནས་རྡུལ་ཚོན་གྱི་དཀྱིལ་འཁོར་ལ་འཇུག་པ་ནི་ཀླུ་བྱང་གི་བཞེད་པ་སྟེ། འཇིག་རྟེན་དང་སྒོ་བསྟུན་པ་སྤྱན་འདྲེན་ལ་སོགས་པའི་ཆོ་གའི་ཡན་ལག་རྫོགས་པ་ལ་རྣམ་པ་འདི་བདེ་བར་སྣང་ངོ་། །དེའི་ཚེ་སྟ་གོན་གྱི་དུས་ནམ་མཁར་བཞག་པ་ཡང་སྐབས་འདིར་སྤྱན་དྲངས་ནས་རོ་གཅིག་ཏུ་བལྟའོ། །དེའང་རྟེན་དང་བརྟེན་པ་བསྐྱེད་པའི་གནས་སྐབས་ན་བདག་མདུན་སོ་སོ་བ་ཡིན་ཀྱང་སྙེམས་འཇུག་གི་བྱ་བ་ལ་ཞུགས་པ་ནས་རང་དང་རྡུལ་ཚོན་གྱི་དཀྱིལ་འཁོར་གྱི་གཙོ་བོ་གཉིས་ཐ་མི་དད་ཡིན་ལ། སྤྲོས་པའི་ལྷ་ཚོགས་རྣམས་ཀྱང་དམ་ཚིག་པར་བཏགས་ཀྱང་དོན་ལ་ཡེ་ཤེས་པ་ཁོ་ན་ཡིན་པའི་ཁྱད་པར་ཤེས་དགོས་སོ། །སྤྱིར་འདིའི་སྐངས་ཀྱི་ཡེ་ཤེས་པ་གཞུག་ཚུལ་གྱི་རིམ་པ་ལ་དཱ་རི་ཀ་བ་ནི། ནམ་མཁའི་ལྷ་རྣམས་ཕབ་ནས་ཀྱང་། །ཡེ་ཤེས་དཀྱིལ་འཁོར་སྤྱན་དྲངས་ཏེ། །དྲུག་པོ་རོ་གཅིག་གྱུར་པར་བྱ། །ཞེས་སྟ་གོན་གྱི་ལྷ་ནམ་མཁར་བཏེགས་པ་དང་ཡེ་ཤེས་པ་གསར་བྱུང་གཅིག་སྟེ་
གཉིས་གཞུག་པ་དང་། དྲུག་གི་ངེས་ཚིག་ནི། སྟ་གོན་གྱི་དམ་ཡེ་གཉིས། ས་ཆོག་གི་སྐབས་དཀྱིལ་འཁོར་ནམ་མཁར་བཏེགས་ན་དེའི་དམ་ཡེ་གཉིས། གློ་བུར་དུ་རང་བཞིན་གྱི་གནས་ནས་སྤྱན་དྲངས་པའི་ཡེ་ཤེས་པ་དང་། རྡུལ་ཚོན་གྱི་དམ་ཚིག་པ་དྲུག་བསྲེ་བར་འདོད་ལ། མདའ་བསྣུན་ཆེན་པོ་ནི། །སྔར་གསུངས་སྟ་གོན་ལྷ་རྣམས་ནི། །སྙིང་ག་ཉིད་ནས་རབ་སྤྲུལ་ནས། །དཀྱིལ་འཁོར་ལ་ནི་བྱིན་གྱིས་བརླབ། །ལང་ནི་སྙིང་གའི་འོད་ཟེར་ལས། །ཡེ་ཤེས་ལྷ་རྣམས་བཀུག་བྱས་ཏེ། །དཀྱིལ་འཁོར་ལྷ་རྣམས་བྱིན་གྱིས་བརླབ། །ཅེས་གཞུག་ཚུལ་གཉིས་བཞེད་ལ། དེ་དང་ཕྱོགས་མཐུན་བར་ལ་ལི་བཛྲས་ཀྱང་དཀྱིལ་འཁོར་བྲིས་ཟིན་མ་ཐག་ཏུ་དམ་ཚིག་པ་གསར་དུ་མ་བསྐྱེད་པར་སྟ་གོན་གྱི་ལྷ་ཕབ་ནས་དཀྱིལ་འཁོར་གྱི་གནས་སོ་སོར་བཞག་པ་ལ་མང་ལ་ནས་སྤྲོས་པའི་ལྷ་རྣམས་བཅུག །དེ་ལ་ཡེ་ཤེས་པ་གཞུག་པར་བྱེད་དོ། །གཉིས་པ་བདག་མདུན་ཐ་མི་དད་དུ་བྱེད་ན། ལྷའི་རྣལ་འབྱོར་སོ་སོ་བ་མི་དགོས་ཏེ། བསྒྲུབ་ག་ཞིང་ཡིར་འཛིན་པ་དང་བྲིས་པ་གཟུགས་བརྙན་གྱི་དཀྱིལ་འཁོར་གཉིས། སྒྲུབ་ཆོས་ཏིང་འཛིན་གསུམ་ནས་ཆོ་གའི་ཡན་ལག་རྫོགས་པའི་བར་ཐམས་ཅད་ཀྱང་ཀུན་འབྱུང་གིས་བསྐྱེད་པའི་རང་བཞིན་ཅན་ཡིན་ན་ཕྱི་རོལ་གྱི་ཡུལ་རྣམས་དབྱིངས་དང་དབྱིངས་ཀྱི་རང་བཞིན་དུ་ཤེས་པ་དང་། རྫས་དང་དངོས་པོ་རྣམས་གཉིས་སུ་མེད་པའི་བྱང་ཆུབ་ཀྱི་སེམས་སུ་ཤེས་པའི་དུས་ན་ཡེ་ཤེས་ཀྱི་དཀྱིལ་འཁོར་རིག་པ་རང་སྣང་བའི་ངོ་བོ་ཉིད་ལ་གཅིག་དང་ཐ་དད་པའམ། བདག་དང་གཞན་དུ་རིས་ཆད་པ་མེད་པའི་རང་བཞིན་དབྱེར་མེད་ཀྱི་དཀྱིལ་འཁོར་བསམ་ཡས་ལྷུན་གྲུབ་སྟེ། གསང་སྙིང་ལས། དཀྱིལ་འཁོར་བསམ་ཡས་ལྷུན་གྲུབ་ནི། །རྫོགས་ཆེན་རྟོགས་པའི་རྣལ་འབྱོར་བས། །ཀུན་འབྱུང་
དཀྱིལ་འཁོར་ཆེན་པོར་སྤྱོད། ཅེས་སོ། །ཚུལ་འདི་ལྟ་བུ་ཁོང་དུ་མ་ཆུད་པ་དག་བདག་མདུན་དབྱེར་མེད་དུ་བསྒྲུབ་པའི་ཕྱོགས་ལ་ཀླན་ཀ་བྱེད་པ་ནི་རྣལ་འབྱོར་དབང་ཕྱུག་ལ་བབ་དང་། མ་ཧེའི་ལྷ་སོགས་ཀྱི་དཀྱིལ་ཆོག་ཀྱང་མ་མཐོང་བར་ཟད་དོ། །དེ་བས་ན་ལས་དང་པོ་པ་ཞེས་བྱ་བ་ནི་ལྷོངས་སུམ་གྱུར་པའི་གང་ཟག་རྣམས་ཡིན་པས་བདག་མདུན་ཐ་དད་པའི་གོ་དོན་འབྱོར་པ་གཙོ་བོར་བྱ་ལ། དེ་ཁོ་ན་ཉིད་མཐོང་བ་རྣམས་ཀྱིས་ནི་ཆོས་ཐམས་ཅད་གདོད་ནས་རྫས་འགལ་བ་མ་ཡིན་པའི་རང་བཞིན་ཤེས་ནས་བདག་མདུན་དུ་དབྱེ་བའི་རྣམ་པར་རྟོག་པ་དུ་མ་རོ་གཅིག་ཏུ་བསྡུས་ནས་སྣང་སྲིད་འཁོར་འདས་ཐམས་ཅད་དཀྱིལ་འཁོར་གཅིག་གི་རྟེན་དང་བརྟེན་པའི་རང་བཞིན་དུ་རྫོགས་པར་གསལ་བཏབ་ནས། ད་གདོད་བདག་འཇུག་བླང་བ་དང་། དབང་བསྐུར་རབ་གནས་ལ་སོགས་དགོས་པའི་ཁྱད་པར་དམིགས་བསལ་ལ་བབ་པའི་ཆེ་བདག་མདུན་ཆ་གཉིས་པར་དབྱེ་བའི་རྣམ་དབྱེ་ཤེས་པར་བྱས་ནས་དཀྱིལ་འཁོར་བསྒྲུབ་པའི་ལས་རིམ་ལ་འཇུག །ཆད་ལྷག་ལ་སོགས་པའི་ཉེས་དམིགས་བསལ་དོན་དུ་མེའི་སྒོ་ནས་མེ་ལྷ་ཚིམ་པ་དང་། མེ་ལྷའི་སྒོ་ནས་དཀྱིལ་འཁོར་ཚིམ་པས་ལས་དང་དངོས་གྲུབ་ཀྱི་གྲོགས་སུ་འགྱུར་བའི་དོན་དུ་སྦྱིན་སྲེག་བྱ་བའི་ཚུལ་ཡང་རྡོ་རྗེ་ལས་རིམ་ལས། ས་དང་རབ་གནས་རྣམ་གཉིས་དང་། །བདེ་བ་སྦྱིན་པའི་དུས་ཉིད་དོ། །ཞེས་ས་ཆོག་གི་ཚེ་མཚན་མ་ངན་ན་ཞི་བ། དཀྱིལ་འཁོར་རབ་ཏུ་གནས་པའི་ཚེ་རྒྱས་པ། དབང་བསྐུར་བའི་དུས་ན་དབང་། སྟ་གོན་གྱི་རྨི་ལམ་ངན་ན་དྲག་པོའོ། །སྒྲུབ་ཚུལ་དེ་ལྟ་བུ་རས་བྲིས་ཀྱི་དཀྱིལ་འཁོར་ལའང་མི་རུང་བ་མ་ཡིན་ཀྱང་རྡུལ་ཚོན་གྱི་དཀྱིལ་འཁོར་ལས་བྱ་བ་ཉུང་བའི་སྐབས་ཡིན་པས་ཆོ་གའི་ཡན་ལག་དམིགས་བསལ་རྣམས་མ་གྲུབ་ཀྱང་ཆོག་གོ །དེ་ལ་བྲིས་སྐུའི་ཡེ་ཤེས་པ་ལ་འབྱིན་འཇུག་བྱེད་པ་
སོགས་ནི། ཧ་ཅང་ཀུན་ཏུ་རྟོག་པའི་གཞན་དབང་དུ་གྱུར་པ་སྟེ་ལྷག་གནས་བྱས་པའི་འགལ་ཟླར་འགྱུར་པའི་ཕྱིར་རོ། །དེ་གཉིས་ཀ་ལས་ཁྱད་པར་དུ་གྱུར་པ་ནི་ཟབ་མོ་ལུས་ཀྱི་དཀྱིལ་འཁོར་ཡིན་ཏེ། རྒྱུད་སྡེ་འོག་མ་གཉིས་སུམ་གྲགས་ཤིང་། རྣལ་འབྱོར་རྒྱུད་དུའང་གསལ་བར་མ་བསྟན་པས་རྣལ་འབྱོར་ཆེན་པོ་བྱེ་བྲག་པ་དང་། རྗེས་སུ་རྣལ་འབྱོར་ཁོ་ནའི་ཁྱད་ཆོས་སོ། །དེའི་ཁྱད་གཞི་གང་ཡིན་ན་སྤྱིར་དབང་གི་བྱ་བ་བསྒྲུབ་པའི་མངོན་དཀྱིལ་གསུམ་ལས་ཚོན་དཀྱིལ་རྣམ་པ་གཉིས་ནི་ཕྱི་རོལ་དུ་ཐིག་ཚོན་ལ་སོགས་པས་གསར་བྱུང་དུ་བསྒྲུབ་ཅིང་དམིགས་པའི་རྣམ་པ་ཡང་ཁ་ཕྱིར་བལྟའི་རྣལ་འབྱོར་སྒྲོ་བཏགས་ཤས་ཆེ་ལ། ནང་ཟབ་མི་ལུས་ཀྱི་དཀྱིལ་འཁོར་ནི་སྐྱེད་བྱེད་འགྲུབ་པའི་རྒྱུ་ཕུང་པོ་ཁམས་དང་སྐྱེ་མཆེད་དུ་ཚོགས་ཤིང་རྩ་དང་ཁམས་ལ་སོགས་པའི་གོང་བུ་ཉིད་ལྷའི་བདག་ཉིད་དུ་གཟུགས་ལས་འདས་པར་ཡོད་དེ། འདི་ལྟར་རྡོ་རྗེའི་ལུས་གྲུབ་པ་ཙམ་ནས་རང་བཞིན་གྱིས་དེ་ལྟར་གནས་པའི་རྣམ་པ་སྒྱུ་མ་ཙམ་དུ་མཐོང་བའི་དེ་ཁོ་ན་ཉིད་ལ་དམིགས་ཤིང་ཁ་ནང་བལྟའི་རྣལ་འབྱོར་གཙོ་ཆེ་བས་འབྲས་བུ་མྱུར་སྟེ། སྡོམ་འབྱུང་ལས། རྩ་རྣམས་དེ་དག་ཐམས་ཅད་ནི། །ལུས་ནི་དགེ་བར་བྱེད་པ་སྟེ། །དེ་ཡི་ཚོགས་ལས་ཡང་དག་འབྱུང་། །གོང་བུ་ལྷ་ཡི་བདག་ཉིད་དོ། །གཟུགས་ལས་འདས་པ་གོང་བུར་འགྱུར། །ཞེས་སོ། །དེའང་ཐོག་མར་ཚོན་དཀྱིལ་གཉིས་གང་ཡང་རུང་བར་དབང་བསྐུར་བ་ནོད་ནས་བསྐྱེད་རྫོགས་ཀྱི་རང་བཞིན་ལ་ངེས་པ་ཐོབ་པ་རྣམས་ལ་ནི་རྣམ་པ་དངོས་བསྟན་དུ་མེད་ཀྱང་རང་བཞིན་ཤེས་པའི་ཡོན་ཏན་ལས་སྦས་དོན་དུ་དེ་དང་དེའི་ངོ་བོ་ཉིད་དུ་ཡོད་པ་ཡེ་ཤེས་མཁའ་འགྲོ་གསང་བའི་རྒྱུད་ལས། རྡོ་ཤིང་འདྲ་འབག་ལ་སོགས་པའི། །གཟུགས་བརྙན་ཡོངས་སུ་རྫོགས་པ་
ལ། །ལྷ་ཡིན་ཟེར་ནས་མཚོད་སོགས་བྱེད། །བཅོས་མའི་ལྷ་སོགས་དེ་ལྟར་ན། །ཕུང་སོགས་ཡེ་ནས་སངས་རྒྱས་ལ། །ཅི་ཡི་ཕྱིར་ན་མཆོད་མི་བྱེད། །ཅེས་དང་། དྲིལ་བུ ་པས་ཀྱང་། འགྲོ་བ་འདི་དག་རང་བཞིན་གྱི། །གྲུབ་པའི་དཀྱིལ་འཁོར་གཉིས་མེད་པའོ། །ཞེས་བཤད་དོ། །གལ་ཏེ་བསྐྱེད་རྫོགས་ཀྱི་དེ་ཁོ་ན་ཉིད་ཁོང་དུ་མ་ཆུད་པས་རྣམ་འགྱུར་མ་ཞི་བའི་དངོས་པོར་མཐོང་བ་ཅན་གྱི་ནི་སློབ་མ་དཀྱིལ་འཁོར་དེར་འཇུག་པ་སོགས་ལ་ནི་ལུས་ཡོངས་སུ་གྱུར་པ་ལས་རྟེན་གཞལ་ཡས་ཁང་དང་། རྩ་དང་ཁམས་རྣམས་ཡོངས་སུ་གྱུར་པ་ལས་བརྟེན་པའི་ལྷ་ཚོགས་ལུས་དཀྱིལ་ལྟར་བསྒོམས་པའི་མཐར་དེ་ཉིད་ཆ་གཉིས་པར་ཕྱེ་ནས་ཟབ་མོ་ལུས་ཀྱི་དཀྱིལ་འཁོར་དུ་འཇུག་བྱ་འཇུག་བྱེད་ལྟར་དམིགས་པ་ཉིད་ཀྱང་མི་རིགས་པ་མ་ཡིན་ཏེ་རྡོ་རྗེ་མཁའ་འགྲོ་ལས། རྣལ་མའི་སྦྱོར་བ་རྟོགས་པའི་ཕྱིར། །བཅོས་མ་ཡི་ནི་བསྒོམ་པ་དང་། །བཅོས་མ་ཡི་ནི་བཟླས་པ་བྱ། །ཞེས་པ་དང་མཐུན་ནོ། །གལ་ཏེ་གང་ཟག་གི་བློའི་ནུས་པ་ལ་དམིགས་པའི་ཕྱོགས་གཉིས་པོ་མཐའ་གཅིག་ཏུ་བཟུང་ནས་ལུང་གཅུས་ན་བློའི་གཞལ་བྱ་ལ་འགལ་བ་མང་པོ་འདུ་སྟེ། དེ་ལ་དང་པོའི་ཕྱོགས་མི་འཐད་པར་འདོད་པ་དག་ལ་ནི་གློ་བུར་དུ་བཅོས་པ་དང་། གདོད་ནས་རང་བཞིན་གྱིས་གྲུབ་པའི་ཁྱད་པར་གྱི་ལུང་དང་མངོན་སུམ་དུ་འགལ་བར་འགྱུར་བའི་གནོད་བྱེད་ཡོད་དེ། རྡོ་རྗེ་ཕྲེང་བ་ལས། རྡོ་རྗེ་སློབ་དཔོན་ལུས་འདི་ལ། །རྒྱལ་བའི་སྐུ་ནི་རིམ་བཞིན་གནས། །ཞེས་པ་ནས། །སྐུ་ཡི་དཀྱིལ་འཁོར་ཞེས་བརྗོད་པ། །རྡོ་རྗེ་སློབ་དཔོན་ཉིད་ཀྱི་ལུས། །ཞེས་པའི་བར་གྱིས་རྐང་པ་བརྒྱད་ཀྱིས་བསྟན་པའི་ཕྱིར་རོ། །གཉིས་པའི་ཕྱོགས་ཀྱང་དངོས་གནས་ལ་འཐད་དུ་མི་རུང་སྟེ་ལུས་གཞལ་ཡས་ཁང་དུ་བསྒོམས་པ་དེས་ས་སོ་སོའི་དོད་ཐུབ་ཙམ་དུ་མོས་པའི་ཕྱོགས་བཀག་ནས་རྣམ་པ་བསྒྱུར་བ་ལ་ཞུགས་པའི་ཚེ་དེ་དག་
མཐའ་ཡས་པ་ཕྱོགས་ཤིན་ཏུ་འཆོལ་བ་ཡིན་པའི་ཕྱིར་དཀྱིལ་འཁོར་གྱི་རྣམ་པ་རྫོགས་པར་སྒོམ་དུག་ལ་རུང་། དཔེར་ན་ཡན་ལག་རྟ་བབས་སུ་བསྒོམས་ནས་རྣ་བ་རི་དྭགས་སུ་བྱེད་པས་མཚོན་རྣམ་པའི་གཟུགས་བརྙན་དྲས་ཤིང་དྲུབས་པའི་ཆོས་གོས་ལ་ཚོམ་བུའི་བྱ་བ་མ་བྱས་པ་ལྟར་མགོ་ལུས་སུ་མི་འབྲེལ་བའི་རིགས་པ་མ་ཡིན་པ་བཟློག་མི་ནུས་སོ། །དེ་བས་ན་ཚུལ་འདི་ནི་ལུས་དང་སེམས་ཀྱི་ཚོགས་པའི་ཆ་ནས་རྟེན་དང་བརྟེན་པར་བསྟན་པ་སྟེ་སྔོན་ཆད་དབྱེ་བ་ལེགས་པར་མ་ཕྱེད་དོ། །དེ་ལྟར་བསྐྱེད་གཞི་ལྷག་པ་གཟུགས་བརྙན་གྱི་དཀྱིལ་འཁོར་གསུམ་པོས་མཚོན་ནས་ལྷག་པ་ཏིང་ངེ་འཛིན་ནམ་བསམ་གཏན་གྱི་དཀྱིལ་འཁོར་ལྟར་བསྒྲུབ་པའི་དུས་ན་རྡོ་རྗེ་སློབ་དཔོན་གྱི་སྤངས་རྟོགས་ཀྱི་གོ་འཕང་མཆོག་དམན་དང་སྦྱར་བའི་དབྱེ་བ་གསུམ་དུ་ངེས་ཏེ། སློབ་དཔོན་རྫོགས་པའི་སངས་རྒྱས་ཀྱིས་སློབ་མ་ས་བཅུ་རྒྱུན་མཐའ་པའི་བྱང་ཆུབ་སེམས་དཔའ་ལ་མཛོད་སྤུ་ལས་འོད་ཟེར་ཆེན་པོའི་དབང་བཞིན་དུ་སྔགས་ལམ་ས་བཅུ་གཉིས་པའི་རྟེན་དེ་ལ་རྡོ་རྗེ་བཙུན་མོའི་མཁའ་དབྱིངས་སུ་སློབ་དཔོན་རྡོ་རྗེ་འཆང་དབང་གིས་འབྲས་དུས་ཀྱི་དབང་བསྐུར་བ་ལ་བརྟེན་ནས་ཕྱེད་བཅས་བཅུ་གསུམ་གྱི་ས་ནོན་ཅིང་། ཉེ་རྒྱུའི་ལམ་དེ་ཉིད་ལ་བརྟན་པ་ཐོབ་པས་ལས་རླུང་གི་འགྲོས་དག་ས་བཅུ་གསུམ་རིལ་པོར་རྫོགས་པ་ལ་ཟུང་འཇུག་ངོ་བོ་ཉིད་ཀྱི་སྐུ་ཞེས་བྱ་སྟེ་དབྱིངས་དང་ཡེ་ཤེས་གཉིས་སུ་མེད་པའི་བདག་ཉིད་ཅན་ནོ། །སློབ་དཔོན་མཐར་ལམ་པ་གཅིག་གིས་སློབ་མ་མཐོང་སྒོམ་ལ་གནས་པའི་བྱང་ཆུབ་སེམས་དཔའ་རྣམས་ལ་དབྱིངས་རིགས་སྤྲུལ་པའི་དཀྱིལ་འཁོར་ནམ་མཁས་གར་ཁྱབ་ནས་དཔག་ཚད་ཙམ་གྱི་བར་བསྒོམ་པ་སློབ་དཔོན་ཆེན་པོས་སྟག་ཚང་གསང་ཕུག་
ཏུ་ཕུར་བའི་དཀྱིལ་འཁོར་སྤྲུལ་པ་ལྟ་བུ། སློབ་དཔོན་འཕགས་པའི་བདེན་མཐོང་གིས་སློབ་མ་ཚོགས་སྦྱོར་གྱི་ཡོན་ཏན་མཐར་ཕྱིན་པ་དག་ལ་རིག་པ་ཉམས་ཀྱི་དཀྱིལ་འཁོར་རྒྱང་གྲགས་ཙམ་པའི་བར་སྟེ་སློབ་དཔོན་སངས་རྒྱས་གསང་བས་མཚོ་མ་ཕམ་ལ་ཐིག་བཏབ་ནས་རྡོར་དབྱིངས་ཀྱི་དཀྱིལ་འཁོར་སྤྲུལ་པ་ལྟ་བུ་སློབ་དཔོན་གྱི་ཏིང་ངེ་འཛིན་གྱི་ནུས་སྟོབས་དང་སློབ་མའི་ལས་དག་སྟོབས་ཀྱི་དབང་ལས་ཡིན་པའི་ཚུལ་ལས་རིམ་ལས། སློབ་དཔོན་མཐར་ཉེའི་ལམ་གནས་བས། །བཞི་བཅུ་རྩ་གཉིས་གསུམ་འཕྲོ་ཞིང་། །སངས་རྒྱས་སྟོང་གི་དཀྱིལ་འཁོར་སོགས། །རྡོ་རྗེའི་ཐིག་ཚད་དོར་ཙམ་གྱི། །རྒྱང་གྲགས་ལ་སོགས་མཚན་མ་ཡི། །དཀྱིལ་འཁོར་ཕྱག་རྒྱ་གསལ་ལྡན་པས། །ཏིང་འཛིན་ལྷག་པའི་གཟུགས་བརྙན་ཡིན། །ཞེས་སོ། །དཀྱིལ་འཁོར་དེར་འཇུག་པ་མི་ནུས་ན་སློབ་དཔོན་འཇིག་རྟེན་པའི་ལམ་གྱི་ཡོན་ཏན་མཐར་ཕྱིན་པ་སྟེ་སྦྱོར་ལམ་གྱི་བར་ཆད་མེད་ལམ་ཐོབ་པའམ། གཡོ་ཐོབ་གོམས་བརྟན་གྱི་ཏིང་ངེ་འཛིན་ཚད་དུ་ཕྱིན་པ་དག་གིས་སློབ་མ་ཤེས་རབ་དང་དད་བརྩོན་དམ་ཚིག་ཅན་སྐལ་བ་རབ་ལ་ལུས་དཀྱིལ། འབྲིང་ལ་ཆུ་ཚོན། ཐ་མ་ལ་རྡུལ་ཚོན་ཏེ་བུམ་དབང་གི་དཀྱིལ་འཁོར་དང་། དབང་གོང་མ་གསུམ་ལ་ཀུན་རྫོབ་བྱང་སེམས། ཡུམ་གྱི་བྷ་ག །དོན་དམ་བྱང་སེམས་ཏེ་རང་བྱུང་གི་དཀྱིལ་འཁོར་གསུམ་ལ་བརྟེན་ནས་དབང་བསྐུར་བ་ཡིན་ནོ། །དེ་ལྟར་རྒྱུ་དབང་གི་དུས་ན་བུམ་དབང་རྡུལ་ཚོན་གྱི་དཀྱིལ་འཁོར་ལས་གཞན་དུ་མི་རུང་བའི་ཚུལ་སློབ་དཔོན་སོ་སོ་སྐྱེ་བོའི་རྒྱུད་ལྡན་ལ་འཐད་དུ་རུང་གིས། ཐེག་པ་ཆེན་པོའི་མཐོང་ལམ་སྐྱེས་པ་ཡན་ཆད་ལ་ནི་དེ་ལྟར་དུ་དམ་ལ་བཞག་ན་དངོས་གྲུབ་བརྙེས་པའི་སློབ་དཔོན་རྒྱ་བོད་གང་དུའང་བྱོན་པ་དག་གིས་སྔོན་གྱི་བྱུང་བ་དང་། མཐོང་ཆོས་སུ་གྱུར་པའི་གྲུབ་འབྲས་བསླུ་
བ་མེད་པ་ལ་བསྐུར་བའི་ཉེས་པ་ཆེན་པོ་འཐོབ་པའི་ཕྱིར་དང་། ལར་ཡང་རྡུལ་ཚོན་ལ་སོགས་པ་གཟུགས་བརྙན་གྱི་དཀྱིལ་འཁོར་རྣམས་ནི་ཆོས་ཀྱི་མིག་རྡུལ་དང་བྲལ་བ་ཐོབ་པའི་སློབ་དཔོན་དག་ལ་རང་གཞན་གྱི་ཚོགས་རྫོགས་པའི་ཐབས་དང་། སེམས་ཅན་གྱི་རྣམ་པར་རྟོག་པ་འདུལ་བའི་རྟེན་ཅིང་འབྲེལ་བར་འབྱུང་བ་ལ་གཙོ་བོར་དགོངས་ནས་གསུངས་པ་ཉིད་དེ། དོན་དུ་ནི་དེ་དག་ཀྱང་དབང་སྐུར་བྱེད་ལ་ལྟོས་ན་གང་ཞིག་བསྒྲུབ་བྱར་གྱུར་པའི་དམིགས་པའི་རྟེན་དང་། བསྐུར་བྱ་ལ་ལྟོས་ན་རྨོངས་པའི་གཞན་དབང་འབའ་ཞིག་གིས་རང་སེམས་ཀྱི་ཆོས་ཉིད་དང་། ཕུང་པོ་ཁམས་དང་སྐྱེ་མཆེད་རྣམས་དེ་བཞིན་གཤེགས་པའི་སྙིང་པོ་ཅན་གྱི་རྟེན་དང་བརྟེན་པའི་རང་བཞིན་དུ་ཡོད་པ་ལས་ཁ་ཕྱིར་ཕྱོགས་ཀྱི་མ་རིག་འཛིན་པས་སྒྲིང་པ་རྣམས་ལ་རང་ངོའི་ཡོན་ཏན་གང་ཡིན་པ་བརྡའ་དང་དོན་དང་རྟགས་ཀྱིས་མཚོན་ནས་མངོན་སུམ་པར་སྟོན་པའི་ཐབས་ཀྱི་ཡན་ལག་ཙམ་ལས། གཙོ་བོར་དམིགས་རྟེན་དེ་དག་ཀྱང་མཚན་མར་འཛིན་པའི་རྫས་དང་དངོས་པོ་ཉིད་ཀྱིས་ནི་ཡང་དག་པ་ཉིད་དུ་མི་འགྲུབ་པས་ཤཱུ་ནྱ་ཏ་ལ་སོགས་པའི་སྔགས་ཀྱིས་སྟོང་པར་སྦྱངས་ནས། རོལ་མོ་ལྟ་བུའི་ཏིང་ངེ་འཛིན་གྱི་རྣམ་པར་འཕྲུལ་པའི་བྱེད་ལས་ཀྱིས་རྟེན་དང་བརྟེན་པའི་དཀྱིལ་འཁོར་དུ་བསྐྱེད་ཅིང་བྱིན་གྱིས་བརླབས་པ་ཉིད་ལས་དངོས་གྲུབ་བསྒྲུབ་པར་བྱེད་པའི་ཕྱིར་ན། ས་ལ་སོགས་པ་ཕྱག་རྒྱར་བྱས། ཞེས་པ་ལ་སོགས་པ་དཔལ་ལྡན་སྒྱུ་འཕྲུལ་དྲྭ་བས་བསྟན་པ་སྟེ། འདི་ལྟར་འབྱུང་བ་ཆེན་པོའི་རྒྱུ་ལས་ཕྱག་རྒྱའམ། མཚན་མར་བྱས་པ་ཙམ་ཀྱིས་ཀྱང་རྒྱུ་དང་བསམ་པའི་བྱེ་བྲག་གི་དབང་གིས་རྣམ་པར་གྲོལ་བའི་རིམ་པ་ཐོབ་པའི་རྒྱུར་འགྱུར་ན། གཟུང་འཛིན་གྱི་དངོས་པོ་ལ་ཞེན་པའི་དྲི་མ་དག་པའི་ཡེ་ཤེས་ཆེན་པོས་
མཚན་མའི་ཕྱག་རྒྱ་དེ་དག་ཡེ་ཤེས་ཀྱི་དཀྱིལ་འཁོར་དུ་བྱིན་གྱིས་བརླབས་ཤིང་སྦྱངས་པ་ལས་གྲུབ་པར་འགྱུར་བ་ནི་སྨོས་ཅི་དགོས་ཏེ། དེའི་ཕྱིར་ཤེས་རབ་དང་ཏིང་ངེ་འཛིན་ནི་དངོས་གྲུབ་ཆེན་པོ་ཡིན་ཡང་དག་པའི་ཕྱིར་རོ། །དེ་བས་ན་གཞུང་དང་གང་ཟག་ཁྱད་པར་ཅན་ལ་གྱི་ནར་བལྟས་ནས་ཆོས་སྤོང་གི་ལས་ཀྱིས་འགོག་པ་ནི་ཉེས་དམིགས་ཆེན་པོ་དང་བཅས་པའི་ཕྱིར་ན། དངོས་གྲུབ་བརྙེས་པའི་སློབ་དཔོན་དག་གིས་གཞན་སྣང་ལ་བལྟར་མི་མངོན་ཡང་ཏིང་ངེ་འཛིན་གྱི་རྣམ་པར་འཕྲུལ་པ་རྒྱ་མཚོ་ལས་གཡོ་བ་མེད་པའི་དཀྱིལ་འཁོར་འདོད་རྒྱལ་བ་སྣ་ཚོགས་སུ་སློབ་མ་སྨིན་པའི་མངོན་སུམ་ཚད་མ་རྟོག་གེ་ལྟར་སྣང་གི་རིགས་པའི་སྟོབས་ཀྱིས་བཟློག་པ་མ་ཡིན་པས་མཉམ་པར་བཞག་པའི་སེམས་ཀྱིས་བལྟ་བར་བྱ་སྟེ། འདི་ལྟར་བྱང་ཤམྦྷ་ལར་འཇམ་པའི་དབྱངས་གྲགས་པས་བློས་སླང་གི་དཀྱིལ་འཁོར་དུ་ཚངས་པའི་དྲང་སྲོང་བྱེ་བ་ཕྲག་ཕྱེད་དང་བཞི་བཅུག་སྟེ་སྨིན་པར་བྱས་པའི་ཕྱིར་དང་། རྣམ་པ་གྲུ་བཞི་པ་ཁོ་ནར་ཀྱང་མ་ངེས་ཏེ། དུས་འཁོར་འཁོར་ལོ་སྡོམ་ཆེན་གྱི་དཀྱིལ་འཁོར་ཟླུམ་པོ་སྒོ་བརྒྱད་དུ་སྣང་བའི་ཕྱིར་དང་། སྒོ་ཅན་ཁོ་ནར་ཀྱང་མ་ངེས་ཏེ། ཤེས་རབ་མའི་རྒྱུད་ཟབ་མོ་དག་ཏུ་ཟུར་གསུམ་ཆོས་འབྱུང་གི་རྣམ་པ་དང་། གཞན་ཡང་པདྨ་འདབ་བརྒྱད་ལ་སོགས་དམ་ཚིག་ཆེན་པོའི་དཀྱིལ་འཁོར་སྒོ་དང་རྟ་བབས་ལ་སོགས་པའི་རྣམ་པ་མ་རྫོགས་པ་མང་དུ་སྣང་བས་དེ་དག་ཀྱང་དཀྱིལ་འཁོར་དེ་དང་དེའི་བདག་པོས་མངོན་སུམ་དུ་བསྟན་ཅིང་བྱིན་གྱིས་བརླབས་པའི་ཕྱིར་དང་། ལྷ་ཚོགས་མང་ཉུང་ཡང་མ་ངེས་ཏེ་སྒྱུ་འཕྲུལ་ལས། བདེ་བ་ཆེན་པོའི་དཀྱིལ་འཁོར་ནི། །སྟང་དཔྱལ་གཉིས་སམ་ཡང་ན་ལྔ། །བྱས་ཏེ་དད་ལྡན་རབ་ཞུགས་ན། །འདོད་པ་ཡིད་འོང་མཉམ་པར་འགྱུར། །ཞེས་རྩ་བའི་དཀྱིལ་འཁོར་ཆེན་པོ་དང་དངོས་གྲུབ་ཁྱད་མེད་འཐོབ་པར་གསུངས་པའི་ཕྱིར་རོ། །ཁྱད་པར་བློ་མཆོག་
རྣམས་ཀྱིས་གཞལ་ན། རྒྱུད་ཐམས་ཅད་ཀྱི་གླེང་གཞིར་སྟོན་པ་རྡོ་རྗེ་འཆང་སངས་རྒྱས་དང་བྱང་ཆུབ་སེམས་དཔའི་འཁོར་གྱིས་བསྐོར་ནས་རྡོ་རྗེ་བཙུན་མོའི་བྷ་ག་ལ་བཞུགས་སོ། །ཞེས་པས་དེ་བཞིན་གཤེགས་པ་རྣམས་གཉུག་མར་གནས་པའི་གཞལ་མེད་ཁང་ནི་རྡོ་རྗེ་བཙུན་མོའི་བྷ་ག་ཉིད་ན། དེའི་རང་བཞིན་ནི་རྣམ་པར་ཐར་པའི་སྒོ་གསུམ་ལས་འདའ་བ་མ་ཡིན་པ་མཚོན་ཕྱིར་ཆོས་འབྱུང་སོགས་སུ་བསྟན་ནམ། མ་བསྟན་ཀྱང་རུང་སྟེ་དངོས་པོར་སྣང་བའི་གནས་ཉི་ཚེ་བར་རྒྱ་ཡོངས་སུ་ཆད་པའི་ངེས་པ་དང་བྲལ་བ་མཁའ་ཁྱབ་ཀྱི་བྷ་ག་ཤེས་རབ་ཀྱི་ཕ་རོལ་ཏུ་ཕྱིན་མའི་གནས་སུ་གྲུབ་པ་གང་ཞིག་རེ་ཞིག་གདུལ་བྱ་འདུལ་བྱེད་དང་བསྟུན་ནས་དམ་ཚིག་ཆེན་པོའི་གཞལ་མེད་ཁང་གྲུ་བཞི་པ་ལ་སོགས་བར་བྱིན་གྱིས་བརླབས་པའི་ཚུལ། དེ་ནས་དེ་བཞིན་གཤེགས་པ་མི་བསྐྱོད་པས་དེ་བཞིན་གཤེགས་པ་ཐམས་ཅད་ཀྱི་བཙུན་མོའི་བྷ་ག་ལ་དམ་ཚིག་ཆེན་པོའི་དཀྱིལ་འཁོར་གྲུ་བཞིར་བྱིན་གྱིས་བརླབས་པ་ནི་ཞེས་བྱ་བ་ལ་སོགས་པས་བསྟན་ཏོ། །དེ་ལྟར་གྲུ་བཞིར་བརླབས་པ་བཞིན་དུ་དགྱེས་རྡོར་ལས། རྡོ་རྗེ་བཙུན་མོའི་བྷ་ག་ནི། །ཨེ་ཡི་རྣམ་པའི་ཆ་བྱད་གཟུགས། །སངས་རྒྱས་རིན་ཆེན་ཟ་མ་ཏོག །བདེ་བ་ཅན་ན་རྟག་ཏུ་བཞུགས། །ཞེས་སོ། །དེ་བས་ན་རྒྱུ་དུས་ཀྱི་དཀྱིལ་འཁོར་གྲུ་བཞི་སྒོ་སྣམ་རྟ་བབས་དང་བཅས་པའི་རྣམ་པ་རྫོགས་པར་བསྟན་པ་དེའང་རྒྱུའི་ཐེག་པ་དང་བསྟུན་ནས་དྲན་པ་ཉེ་བར་གཞག་པ་བཞི་ལ་སོགས་པ་བྱང་ཕྱོགས་སོ་བདུན་དུ་དག་པ་སྦྱོར་བ་ཉིད་ལས་རྒྱུ་མཚན་གཞན་མ་མཆིས་ན། ལམ་བདེན་ཐམས་ཅད་ནི་འདུས་བྱས། འདུས་བྱས་ཀྱི་རང་བཞིན་ནི་ཀུན་རྫོབ་ལས་འདའ་བ་མེད་པས་ཀུན་རྫོབ་ཀྱི་ཆོས་ཐམས་ཅད་དོན་དམ་བདེན་པའི་ངོ་བོ་ཉིད་རྣམ་པར་ཐར་པའི་སྒོ་གསུམ་དུ་སྟོན་པའི་ཕྱིར་རྡོ་རྗེ་བཙུན་མོའི་བྷ་གའམ་
གཟུགས་བརྙན་དུ་མཚོན་ལ། སོ་བདུན་པོ་ཉིད་ཀྱང་སྔགས་ལམ་དུ་ཡུལ་དང་། རྩ་དང་། ཁམས་སོ་སོ་ནས་སོ་བདུན་དུ་བཤད་སྦྱར་གྱི་དག་པའང་དོན་དམ་པར་བདེ་སྟོང་གཉིས་སུ་མེད་པའི་བདག་ཉིད་ཅན་ཡིན་པ་གང་ཞིག་ཨེ་ཝཾ་གི་ཡི་གེའི་བརྡའ་ལས་རྟེན་དང་བརྟེན་པའི་དཀྱིལ་འཁོར་དུ་མཚོན་པའི་ཚུལ་འཇམ་དཔལ་སྒྱུ་འཕྲུལ་ལས། ཐིག་ལེ་སྟོང་པ་ཡི་གེ་དྲུག །སྟོང་པ་ཆེན་པོ་ཡི་གེ་ལྔ། །ཞེས་པས་འཕགས་ཡུལ་གྱི་ཡི་གེའི་སྐྱེ་མཆེད་དཔྲལ་བ་ལས་ཚེག་དྲག་ལྟ་བུ་དང་། ཟླ་ཚེས་ལྟ་བུ་ལ་སོགས་པ་སྤྱིར་དྲག་པོའི་གྲངས་ངེས་སུ་འགྲུབ་པའི་ཚུལ་དུས་ཀྱི་འཁོར་ལོ་ལས་བཤད་པ་ལྟར་རོ། །ཡི་གེ་དེ་གཉིས་ལས་ཆོས་ཀྱི་ཕུང་པོ་ཐམས་ཅད་སྐྱེ་འགག་བྱེད་ཅིང་། རྟེན་དང་བརྟེན་པའི་དཀྱིལ་འཁོར་ཡང་དག་པར་རྫོགས་པའི་ཚུལ་གྱི་ཟབ་མོའི་དེ་ཁོ་ན་ཉིད་དུ་ཆུད་པའི་རྡོ་རྗེ་འཛིན་པ་རྣམས་ལ་ནི་དཀྱིལ་འཁོར་དུ་སྣང་བའི་དབྱིབས་ཀུན་རྫོབ་པ་འབའ་ཞིག་ལ་དངོས་པོར་བལྟ་བའི་བདེན་ཞེན་རང་རྒྱུད་པ་ཡོད་པ་མ་ཡིན་ཏེ། མཁའ་འགྲོ་རྒྱ་མཚོ་ལས་ཀྱང་། ལྷའི་དཀྱིལ་འཁོར་བ་དང་བཅས། །དམ་ཆོས་ལ་སོགས་ཐམས་ཅད་རྣམས། །ཆོས་ཀྱི་འབྱུང་གནས་ནང་དུ་སྟེ། །བཞུགས་པ་གང་གི་གནས་རྣམས་སུ། །དུས་རྣམས་ཀུན་ཏུ་རབ་གནས་པའོ། །ཨེ་ཡི་ཡི་གེའི་གནས་བསྒྲུབས་ནས། །ཝཾ་ཡིག་རྡོ་རྗེ་སེམས་དཔའ་ཅན། །ཞེས་པས་དཀྱིལ་འཁོར་སོ་སོའི་མཚོན་དོན་ལ་དགོངས་པ་དང་། དངོས་གྲུབ་ཐོབ་པའི་སློབ་དཔོན་གྱི་ཆ་ནས་ཕྱོགས་གཅིག་ཏུ་བཟུང་པར་མི་བྱའོ། །དེ་ལྟ་མོད་ཀྱི་དབང་བཞི་པའི་དངོས་དོན་མ་རྟོགས་ཤིང་སྒྲ་སྤྱིའི་རང་བཞིན་ལྷ་དང་དཀྱིལ་འཁོར་གྱི་དབྱིབས་དང་རྣམ་པའི་བརྟུལ་ཞུགས་མཆོག་ཏུ་འཛིན་པ་ལས་མ་གྲོལ་བའི་བྱིས་པའི་སློབ་དཔོན་ཕལ་གྱིས་ནི་རང་གཞུང་ནས་བཤད་པའི་ཆོ་གའི་ཡན་ལག་ཉམས་ན་སློབ་མ་སྨིན་པར་མི་ནུས་པ་ནི་དོན་ལ་གནས་པ་ཡིན་ནོ། །དེ་
ནས་བུམ་པ་བསྒྲུབ་པའི་ཆོ་ག་ནི་སོ་སོའི་གཞུང་ལས་ཤེས་པར་བྱའོ། །བཞི་པའི་ཡན་ལག་བཞི་ནི། སློབ་དཔོན་རང་ཉིད་འཇུག་པ་དང་། སློབ་མ་འཇུག་པར་གནང་བ་ནོད་པ་དང་། ནོད་ནས་སློབ་མ་དཀྱིལ་འཁོར་དུ་གཞུག་པ་དང་། ཞུགས་པ་ལ་དབང་བསྐུར་བའོ། །དང་པོ་ནི་ཕྱི་རོལ་ཏུ་བགེགས་ཐམས་ཅད་པའི་གཏོར་མ་བྱིན་ལ་བགེགས་དང་བྲལ་བར་བལྟས། ཁྲུས་བྱ། ཆགས་པས་ཆགས་པ་གདུལ་བའི་བརྡར་སློབ་དཔོན་ཆས་གོས་དམར་པོ་དང་རྒྱན་གྱིས་སྤྲས་ལ་དཀྱིལ་འཁོར་གྱི་ཤར་སྒོར་འདུག་སྟེ་མེ་ཏོག་ཐོགས་ལ། ཨོཾ་བཛྲ་ས་མ་ཡ་ཨོཾ། ཨཱ བཛྲ་ས་མ་ཡ་ཨཱ ཧཱུྃ་བཛྲ་ས་མ་ཡ་ཧཱུྃ། སྭཱ་བཛྲ་ས་མ་ཡ་སྭཱ། ཧཱ་བཛྲ་ས་མ་ཡ་ཧཱ། ཞེས་པས་རང་བཞིན་གྱི་དཀྱིལ་འཁོར་པའི་ལྷ་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་དང་དབྱེར་མེད་དུ་བལྟས་ལ། ཨོཾ་ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བའི། །ཕྱག་རྒྱ་ཆེན་པོར་བདག་སྦྱོར་ཅིག །ཅེས་རིག་པའི་མེ་ཏོག་དོར་བས་དཀྱིལ་འཁོར་གྱི་ལྷ་རྣམས་དངོས་གྲུབ་སྩོལ་བར་ཕྱོགས་ནས། ཨོཾ་བཛྲ་ས་མ་ཡ་ཧཱུྃ་གིས་དམ་ཡེ་འདེས། ཨོཾ་བཛྲ་ས་མ་ཡ་སྟྭམ་གྱིས་བརྟན་པར་བྱས། ཨོཾ་བཛྲ་ས་མ་ཡ་ཧོས་དབང་དུ་གྱུར་ཞིང་དགྱེས་པ་བསྐྱེད། ཛཧཱུྃ་བཾ་ཧོ ས་གསལ་བརྟན་གྱི་ཚད་བརྒྱད་ཐོབ་པའི་དཀྱིལ་འཁོར་དང་ཐ་མི་དད་དུ་གྱུར་པར་བལྟའོ། །གོ་འཕང་མཐོན་པོ་དང་ལྡན་པའི་སློབ་དཔོན་དག་གིས་ན་ནང་ཡེ་ཤེས་ཀྱི་དཀྱིལ་འཁོར་དུ་འཇུག་པའི་ཚུལ་འདི་ཙམ་གྱིས་ཀྱང་དམ་ཚིག་གི་དཀྱིལ་འཁོར་དུ་འཇུག་པའི་ཆོས་ཐམས་ཅད་ཉམས་སུ་མྱོང་བ་ཡིན་ཏེ། རྩ་རྒྱུད་ལས། །རང་སྣང་དབྱེར་མེད་དཀྱིལ་འཁོར་ལ། །འཇུག་པའི་མཚན་ཉིད་མཉམ་སྦྱོར་བས། །ཞེས་དང་། མཉམ་སྦྱོར་བས།
འཁོར་ལོ་སྔོན་དུ་མཐོང་བ་ཡི། །བསོད་ནམས་བརྟག་པ་གང་ཡིན་པ། །ཕྱིས་བྱས་པ་ཡང་དེ་བཞིན་ནོ། །ཞེས་དཀྱིལ་འཁོར་དུ་འཇུག་པའི་མཚན་ཉིད་ནི་ལྷ་རྣམས་དང་གཉིས་སུ་མེད་པར་བྱ་བ་སྟོན་པ་ཡིན་པའི་ཕྱིར་ཡེ་ཤེས་ཀྱི་དཀྱིལ་འཁོར་ཐམས་ཅད་ཀྱང་བདག་ཉིད་ལས་གཉིས་སུ་མེད་དེ་གཉིས་སུ་བྱར་མེད་སོ་སོ་མ་ཡིན་ཐ་མི་དད་པ་རིག་པ་འདུན་པའི་ཕྱག་གིས་ཞུགས་པ་ཉིད་ཀྱི་ཕྱིར་རོ། །དེ་ལྟ་མོད་ཀྱིས་སོ་སོ་སྐྱེ་བོའི་སློབ་དཔོན་རྣམས་ནི་ཉམས་ཆགས་དང་བཅས་པ། རྟོག་སྒྲིབ་དང་བཅས་པ་ཡིན་པས་འདུན་པ་དང་དད་པས་དཀྱིལ་འཁོར་དུ་འཇུག་པ་ངེས་པར་དགོས་ཏེ། ཅིའི་ཕྱིར་ན་སྣོད་ཀྱིས་མ་སྨིན་པ། ཆོ་གས་མ་སྨིན་པ། ཆོ་ག་མ་རྫོགས་པས་མ་སྨིན་པ། ཟབ་མོས་འཇིགས་ནས་མ་སྨིན་པ་བཞིར་འཕགས་པ་ཡབ་སྲས་བཞེད་པས་སློབ་དཔོན་གྱི་རྒྱུད་ལ་རྩ་ལྟུང་ཡོད་ན་སློབ་མ་ལ་རིག་འཛིན་གྱི་སྡོམ་པ་མི་སྐྱེ་བས་སོ། །ཚུལ་དེ་ལ་དགོངས་ནས་ཧེ་རུ་ཀ་འདུས་པར། །ནུས་དང་ལྡན་པའི་ལྟས་ཐོབ་ནས། །རྣལ་འབྱོར་བདག་ཉིད་འཇུག་པར་བྱ། །ཞེས་དང་། གསང་སྙིང་ལས། ཀུན་བྱས་དབང་ཕྱུག་རིམ་པས་འཇུག །དེ་ནས་སློབ་མ་འཇུག་པར་བྱ། །ཞེས་དང་། མེ་ལོང་ལས། །གསལ་དང་རིག་པའི་སྟོབས་ཀྱིས་ནི། །རྡོ་རྗེ་སློབ་མ་བྱིན་བརླབ་ཕྱིར། །སློབ་དཔོན་དག་ཀྱང་འཇུག་པར་བྱ། །ཞེས་དང་། རིམ་པ་གསལ་བ་ལས་ཀྱང་། སློབ་མ་འཇུག་པའི་ཚུལ་གྱིས་ནི། །དང་པོར་སློབ་དཔོན་འཇུག་པར་བྱ། །ཞེས་པས་སློབ་མ་ལ་ཇི་ལྟར་བསྐུར་པ་ཙམ་དུ་རུང་གི་རིག་པ་བདེ་གཤེགས་སྙིང་པོའི་ངོ་བོ་ཉིད་བླ་མ་དང་ཐ་མི་དད་པའི་དཀྱིལ་འཁོར་གྱི་གཙོ་བོར་རྫོགས་པ་ལ། རྣམ་སྨིན་བག་ཆགས་ཀྱི་རྟེན་གློ་བུར་པའི་ཀུན་རྟོག་ཆ་དང་བཅས་པ་སློབ་བུའི་རྣམ་པར་བྱེ་བའམ། རྒྱུ་དབང་ཐོབ་པའི་བླ་མས་ལས་ཀྱི་སློབ་དཔོན་མཛད་པར་མོས་ཀྱང་རུང་སྟེ་པདྨའི་ཞབས་ཀྱིས། རང་ཉིད་
དབང་ལེན་བླ་མ་ཡིས། །ལས་ཀྱི་སློབ་དཔོན་བྱེད་པར་བསམ། ཞེས་པ་སྟེ་རྒྱུ་གང་གིས་རྩ་ལྟུང་རྣམས་དག་པར་བྱེད་ཅིང་སློབ་མ་ལའང་དོན་དུ་འགྱུར་པ་ཉིད་འཐོབ་པའི་ཕྱིར་རོ། །གཉིས་པ་སློབ་མ་འཇུག་པའི་གནང་བ་ནོད་ཅིང་བདེན་པ་བསྒྲག་པ་ནི། རྡོ་རྗེ་སློབ་དཔོན་ཐལ་མོ་སྦྱར་ལ། རྡོ་རྗེ་ཡེ་ཤེས་ཏེ་དེ་ཁོ་ན་ཉིད་ལ་བསྟོད་པ་སྔོན་དུ་བཏང་ནས། ཚུལ་དེ་ལྟ་བུའི་དངོས་གྲུབ་ཀྱི་དམ་པ་སློབ་མ་ལ་བྱིན་པའི་ཕྱིར་དུ་དམིགས་ནས། །རྡོ་རྗེ་ཡེ་ཤེས་འཐོབ་བྱེད་པའི། །དེ་བཞིན་གཤེགས་པ་ཐམས་ཅད་ཀྱི། །ཕོ་བྲང་སྙིང་པོའི་དཀྱིལ་འཁོར་འདིར། །བདག་གིས་སློབ་མ་གཞུག་པར་བགྱི། །བཟོད་པར་མཛད་དེ་དགོངས་སུ་གསོལ། །ཞེས་དང་། བདེན་པ་གང་གིས་ཡེ་ཤེས་མཆོག །ཤེས་རབ་ཐབས་དང་དཀྱིལ་འཁོར་གྱི། །བདེན་པ་དེ་ཡིས་མགོན་པོ་ཁྱོད། །འདོད་པ་བདག་ལ་ཡོངས་རྫོགས་མཛོད། །ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཡང་དག་བྱུང་། །དེ་ཉིད་དེ་བཞིན་ཉིད་དེས་འབྱུང་། །བདེན་པ་དེ་ཡིས་དཀྱིལ་འཁོར་ནི། །གཟུགས་བརྙན་གསལ་བ་སློབ་མ་རྣམས། །ཀུན་གྱིས་སྒྲིབ་མེད་མཐོང་བར་ཤོག །ཅེས་ལན་གསུམ། །དེ་ལ་གཉིས་སུ་མེད་པ་ནི་ཡེ་ཤེས་མཆོག་དང་། དེ་ནི་ཐབས་ཤེས་ཡ་བྲལ་བ་མ་ཡིན་པའི་བདག་ཉིད་ཀྱི་དཀྱིལ་འཁོར་རོ། །དེའི་རང་བཞིན་ནམ་ཡང་བརྫུན་པ་མ་ཡིན་པའི་བདེན་པས་བདག་གི་འདོད་པའི་དངོས་གྲུབ་རྫོགས་པར་མཛོད་ཅེས་པའི་དོན་དང་། ཆོས་རྣམས་ནི་སྒྲ་ཡང་བ་ཉིད་ཀྱང་འདིར་དཀྱིལ་འཁོར་གྱི་རྟེན་དང་བརྟེན་པའི་རང་བཞིན་ལ་སྦྱར་རོ། །དེ་དག་ཀྱང་སེམས་ཙམ་དུ་སྣང་བས་གཟུགས་བརྙན་ལྟ་བུའོ། །གསལ་དག་རྙོག་པ་མེད་པ་ནི། ཉོན་མོངས་པ་དང་། ཤེས་སྒྲིབ་དང་། སྙོམས་འཇུག་གི་སྒྲིབ་པ་གསུམ་
དང་བྲལ་བའི་དོན་ཏོ། །གཟུང་དུ་མེད་པ་ནི་རང་བཞིན་གྱིས་མ་གྲུབ་ཀྱང་སོ་སོ་རང་གི་རིག་པས་ཤེས་ལ་གཞན་གྱིས་གཟུང་དུ་མེད་པའོ། །བརྗོད་དུ་མེད་པ་ནི་སྒྲ་དང་རྟོག་པ་དང་ཞེན་པའི་ཡུལ་ཙམ་དུའང་མ་གྲུབ་པའོ། །དེ་རྣམས་ཀྱང་རྒྱུ་ནི་ཆོས་ཀྱི་དབྱིངས་ལས་ནི་ཐོས་པ་དང་། བསམ་པ་དང་བསྒོམ་པའི་ཤེས་རབ་ལས་ཡང་དག་པར་འབྱུང་ངོ་། །དེ་ཁོ་ན་ཉིད་ཀྱི་དེ་བཞིན་ཉིད་ནི་ཡང་དག་པའི་ཡེ་ཤེས་ཀུན་ཏུ་བཟང་པོ་དེ་དཀྱིལ་འཁོར་ཐམས་ཅད་ཀྱི་སྤྲོ་གཞིར་བྱུང་བའོ། །དོན་དམ་པའི་བདེན་པ་དེ་ལས་ནི་དཀྱིལ་འཁོར་གྱི་གཟུགས་བརྙན་དུ་སྣང་ཞིང་བྲིས་པ་ལས། དེ་དང་དེའི་སྐུར་བལྟ་བ་ནི་གསལ་བའོ། །དེ་ལྟ་བུའི་དཀྱིལ་འཁོར་ནི་བཅོམ་ལྡན་འདས་ཀྱིས་ལེགས་པར་གསུངས་པའི་གསང་སྔགས་ཟབ་མོའི་བྱིན་རླབས་ཀྱིས་སྡིག་པ་བསལ་བ་ལ་བརྟེན་ནས་སློབ་མ་ཀུན་གྱིས་སྒྲིབ་མེད་དེ་མངོན་སུམ་པ་ཉིད་དུ་མཐོང་བར་ཤོག་ཅིག་ཅེས་པའོ། །གསུམ་པ་སློབ་མ་དཀྱིལ་འཁོར་དུ་གཞུག་པ་ནི། རྡོ་རྗེ་ལས་རིམ་ལས། ཁྲུས་དགབ་དྲི་དང་ལུས་དབུལ་དང་། །བགེགས་བསྐྲད་ལྷར་བརླབ་དམ་ཚིག་བྱིན། །དེ་ཉིད་དཔོག་དང་ཆུ་ནན་དང་། །བསྒྲག་དང་རིན་ཆེན་དོར་བ་དང་། །ལྷ་དབབ་པ་དང་ནན་ཏན་དང་། །མིག་དབྱེ་དཀྱིལ་འཁོར་ལེགས་བསྟན་དང་། །ཞེས་པའི་གོ་རིམ་ལྟར་བསྡུ་སྟེ། །དེ་ལ་སྔོན་དུ་ལྷག་གནས་བྱས་པའི་སློབ་མ་རྣམས་ཕྱི་རོལ་དུ་ལས་ཐམས་ཅད་པའི་ཆུས་བཀྲུས། འཁྱིལ་བ་བཟླས་པའི་གོས་དམར་པོའམ། གཞན་ཡང་རུང་སྟེ། ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་བོ་དྷི་ཨ་ལཾ་ཀཱ་ར་ཝསྟ་བཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ་གིས་སྨད་གཡོགས་དང་། ཨོཾ་བཛྲ་རཀྵ་ཧཾ་ཞེས་སྟོད་གཡོགས་དགབ། ཨོཾ་བཛྲ་ཨུཥྞི་ཥ་ཧཱུྃ་ཕཊ་ཀྱིས་གཙུག་ཏོར་བསྐོན། དཀྱིལ་འཁོར་མཐོང་བ་རེ་ཞིག་བསྒྲིབ་པ་དང་། མ་རིག་པས་ལྡོངས་པ་ཉིད་མཚོན་ཕྱིར་ཡིད་མཆོག་ཏུ་བྱ་བའི་སྔགས་དོན།
ཨོཾ་ཙཀྵུ་བྷནྡྷཾ་བར་མ་ན་ཡ་ཧཱུྃ་ཞེས་པའམ། ཧཱུྃ་ཞེས་པས་ཀྱང་རུང་སྟེ་གདོང་གཡོགས་དམར་པོ་ལ་སོགས་པ་བཅིང་། ཨཱ་ཁཾ་བཱི་ར་ཧཱུྃ་ཞེས་རིམ་བར་སྣང་མཐའ་དང་། དོན་གྲུབ་དང་། རྣམ་སྣང་དང་། རིན་འབྱུང་དང་། མི་བསྐྱོད་པའི་ས་བོན་ལས་སྐྱེས་པའི་མེ་ཏོག་གི་ཕྲེང་བ་རང་རང་སྐྱེད་བྱེད་ཀྱི་ཡིག་འབྲུས་མཚན་པ་རེ་བཟུང་བར་མོས། ལས་ཀྱི་རྡོ་རྗེས་བུ་ཁྱོད་ཅི་ལ་དགའ་བ་སྨོས་ཞེས་པ་ལ་སོགས་པའི་དྲི་བ་དང་ལན་ལྡོན་པར་བྱ། དེ་ནས་སྒོའི་སློབ་དཔོན་ནམ་ལས་སློབ་ཀྱིས་རང་གི་རྡོ་བཟུང་བཞིན་པ་ལ་སློབ་མ་འཆང་དུ་བཅུག་ནས་དཀྱིལ་འཁོར་གྱི་ཡོལ་བ་དང་ཉེ་བར་ཁྲིད་ལ། བདེན་ཕྱོགས་བཞི་ཀ་ལ་ཕྱག་འཚལ་དུ་གཞུག་ཅིང་འཚལ་ཚུལ་ནི་དང་པོ་རྡོ་ཐལ་མོ་བརྐྱང་སྟེ་ལུས་ཐམས་ཅད་ཀྱིས་དང་། གཉིས་པ་ལ་རྡོ་ཐལ་མོ་སྙིང་གར་སྦྱར་ཏེ་དཔྲལ་བས་དང་། གསུམ་པ་རྡོ་རྗེ་ཐལ་མོ་སྤྱི་བོར་སྦྱར་ཏེ་ཁས་དང་། བཞི་པ་རྡོ་རྗེ་ཐལ་མོ་སྤྱི་བོ་ནས་ཕབ་སྟེ་སྙིང་གར་བཞག་ནས་སྤྱི་བོ་ས་ལ་རེག་པའི་ཚུལ་བཞི་ཡོ་ག་ལས་བཤད་དོ། །དེ་ནས་ཨོཾ་སརྦ་བུདྡྷ་པཱུ་ཛ་ཀརྨ་ཎི་ཨཱཏྨ་ནཾ་ནི་རྱཱཏ་ཡཱ་མི། ཞེས་པས་རིགས་བཞིའི་སངས་རྒྱས་ཐམས་ཅད་ལ་བོས་ནས་ལུས་དབུལ་དུ་བཅུག །གང་གི་ཕྱིར་དབུལ་ན་དེ་བཞིན་གཤེགས་པ་ཐམས་ཅད་ལ་མཆོད་ཅིང་བསྙེན་བཀུར་བ་དང་། མཆོད་ཅིང་དབང་བསྐུར་བ་དང་། མཆོད་ཅིང་ཆོས་འཁོར་བསྐོར་བ་དང་། མཆོད་པའི་ལས་ཀྱི་དོན་དུའོ། །དེ་ནས་ཕྱི་རོལ་པ་ལ་གཏོར་མ་བྱིན་ནས་བི་ཤྭ་བཛྲ་ལ་སོགས་པའམ། ཧཱུྃ་བཞི་པས་ཉེ་བ་མ་ཡིན་པར་བསྐྲད། ལག་པའི་སོར་མོ་རྣམས་ལ་རིགས་ལྔ་ཡབ་ཡུམ་བསྐྱེད་ལ་བདེན་པ་བདར་ནས་སོར་མོ་བསྣོལ་བའི་སྦྱོར་མཚམས་ནས་བྱང་ཆུབ་སེམས་ཀྱི་འོད་ཟེར་འཕྲོས་སློབ་མའི་སྒྲིབ་པ་བྲལ་འོད་དུ་ཞུ་ནས་དངུལ་ཆུ་ལྟ་བུར་གྱུར་པ་དེ་ཆོ་ག་
གསུམ་གྱིས་རྣམ་པར་སྣང་མཛད་དུ་བསྐྱེད་ལ་གནས་གསུམ་དུ་འབྲུ་གསུམ་གྱིས་གོ་བགོ་ཞིང་བསྲུང་ངོ་། །དེ་ནས་བླ་མས་ཀཱ་ཡ་སིདྡྷི་ཨོཾ་ལ་སོགས་པས་གནས་གསུམ་དུ་འབྲུ་གསུམ་བཞག་ལ་འདུ་འཕྲོ་དང་། སརྦ་ཏ་ཐཱ་ག་ཏ་ཀཱ་ཡ་ལ་སོགས་པས་སྐུ་གསུང་ཐུགས་ཀྱི་དམ་ཚིག་སྦྱིན། ཁྱད་པར་གསང་ཆེན་ཐབས་ལ་མཁས་པའི་ཐེག་པ་ཆེན་པོར་རིགས་ངེས་པར་བྱེད་ལ། དེ་བཞིན་གཤེགས་པ་ཐམས་ཅད་དང་མི་འབྲལ་ཞིང་བདུད་ཐམས་ཅད་ཟིལ་གྱིས་གནོན་པའི་ཕན་ཡོན་དང་ཡང་ལྡན་པ་ཐམས་ཅད་རྣལ་འབྱོར་གྱི་སེམས་བསྐྱེད་པ་ཉིད་རང་གི་སྔགས་དོན་གྱིས་གོ་བར་བྱ་བ་ནི། ཨོཾ་སརྦ་ཡོ་ག་ཙིཏྟ་ཨུདྤཱ་ཏ་ཡ་མི། ཞེས་སློབ་མ་རྣམས་གདོན་དུ་འཇུག་ཅིང་བསྒོམ་དོན་ལ། སྙིང་གར་ཀུན་རྫོབ་བྱང་སེམས་མཚོན་པའི་ཟླ་བའི་སྟེང་དུ་སངས་རྒྱས་ཀྱི་རང་བཞིན་རྟོགས་པར་མཚོན་པའི་དོན་དམ་བྱང་ཆུབ་ཀྱི་སེམས་སྟོང་པ་ཉིད་ཀྱི་རྡོ་རྗེ་རྩེ་ལྔ་པས་རྒྱས་བཏབ་པས་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་ས་བོན་བསྒྲུབ་པ་སྟེ་དཔལ་མཆོག་ལས། གང་ཞིག་བསྐྱེད་པ་ཙམ་གྱིས་ནི། །སངས་རྒྱས་ཉིད་དུ་དོགས་མེད་པའི། །བྱང་ཆུབ་སེམས་ནི་བཏང་མི་བྱ། །ཕྱག་རྒྱ་རྡོ་རྗེ་གང་ཡིན་པའོ། །ཞེས་སོ། །དེའི་རྗེས་འབྲེལ་དུ་རྡོ་རྗེ་མེ་ཏོག་དང་བཅས་པ་སྙིང་གར་རེག་ལ། ཨོཾ་སུ་ར་ཏ་ས་མ་ཡ་སྟཾ་ཧོ སིདྡྷི་བཛྲ་ཡ་ཐཱ་སུ་ཁཾ། ཞེས་བདེ་བའི་དམ་ཚིག་འདུས་པའི་བདག་ཉིད་དངོས་གྲུབ་ཇི་ལྟ་བའི་བདེ་བ་ཅེས་པའི་སྔགས་དོན་གྱིས་རྡོ་རྗེ་སེམས་དཔའི་རང་བཞིན་དུ་བྱས་ནས་མེ་ཏོག་ལ་སོགས་པས་མཆོད། །སངས་རྒྱས་ཀུན་གྱི་གསང་བ་འདི། །དམ་ཉམས་མ་འདྲེས་མེད་པ་ལ། །ནམ་ཡང་སྨྲ་བར་མ་བྱེད་ཅིག །ཐེག་པ་ཆེན་པོ་སྟོན་བྱེད་པ། །ང་ལ་བརྙས་དང་སྨད་མི་རུང་། །སྐུ་གསུང་ཐུགས་ལ་རྟག་གནས་ཤིང་། །མ་ལུས་སེམས་ཅན་དོན་གྱིས་
ཤིག །ཅེས་དམ་ཚིག་དབོག་གོ །དེ་ཡང་དམ་ཉམས་མ་འདྲེས་མེད་པ་ལ། ཞེས་པ་ནི་དཀྱིལ་འཁོར་དུ་ཞུགས་སུ་ཟིན་ཀྱང་དམ་ཚིག་ཉམས་ཤིང་སླར་གསོ་བའི་འདུན་པ་མེད་པ་དང་། མ་འདྲེས་པ་ནི་ཉན་ཐོས་ལ་སོགས་སྔགས་ལ་མི་དད་བ་དང་། མེད་པ་ནི་གསང་སྒྲོག་ཏུ་འགྱུར་བའི་སྐྱེ་བོ་ཕལ་བ་ལ་མི་སྨྲ་བའི་དོན་ནོ། །དེ་ནས་སློབ་དཔོན་གྱིས་དཀྱིལ་འཁོར་གང་ཡིན་པ་དེའི་ཤར་སྒོའི་བདག་པོའི་སྔགས་ཀྱིས་སློབ་མ་དགུག་ཅིང་། ཨཱ་ཁཾ་བཱི་ར་ཧཱུྃ་ཞེས་ཡོལ་བའི་ནང་ལོགས་སུ་ཁྲིད་ལ། མ་ཧཱ་རཏ་སུ་དྲྀ་ཌྷ་སུ་ཏོ་ཥྱོ་སུ་པོ་ཥྱོ་བཛྲ་སཏྭ་ཨཱ་དྱ་སིདྡྷྱ།།།།།་མཱཾ་ཞེས་པ་འདོན་བཞིན་པར་དཀྱིལ་འཁོར་ལ་བསྐོར་བ་བྱེད་དུ་གཞུག་གོ །དེ་ནས་དམ་ལ་བཞག་པ་ལ་ཕན་ཡོན་གྱི་སྒོ་ནས་བཞག་པ་དང་། ཉེས་དམིགས་ཀྱི་སྒོ་ནས་བཞག་པ་དང་། གཉིས་ཀའི་སྒོ་ནས་བཞག་པ་གསུམ་དུ་བཤད་པའི་དང་པོ་ནི་རྡོ་རྗེ་གྱེན་དུ་བསྟན་པ་སྙིང་གར་བཞག་ལ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་པས། ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་མ་ལུས་པའང་ཐོབ་པར་འགྱུར་ན། དངོས་གྲུབ་གཞན་དང་གཞན་ལྟ་སྨོས་ཅི་དགོས། དེའི་ཕྱིར་དེ་ལྟ་བུའི་རྡོ་རྗེ་ཡེ་ཤེས་བསྐྱེད་པར་བྱ་ཡིས། དེ་བས་ན་ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་པ་སྟེ། དཀྱིལ་འཁོར་དུ་ཚུལ་བཞིན་དུ་བཅུག་ནས་ལྷ་ངོ་བསྟན་པ་སོགས་མ་ཡིན་པ་དག་དང་། སྔགས་ཀྱི་སྤྱོད་ཡུལ་ལ་སྐྲག་པ་སྐྱེ་བ་རྣམས་ཀྱི་མདུན་དུ་སྨ་བར་མ་བྱེད་ཅིག །སྨྲས་ན་རྩ་ལྟུང་བདུན་པ་ཉམས་སུ་མྱོང་བ་ཡིན་པས་ཁྱོད་དམ་ཚིག་ཉམས་པར་འགྱུར་ཏ་རེ། ཞེས་སོ། །གཉིས་པ་ནི། འབྲུ་གསུམ་བཟླས་པའི་དུང་ཆོས་ཀྱི་ཆུ་མིད་མེད་དང་མཐེ་བོང་གིས་སློབ་མའི་ཁར་བྱིན་ཞིང་རྡོ་རྗེ་ཐུར་དུ་བསྟན་ནས། འདི་ནི་
ཁྱོད་ཀྱི་དམྱལ་བའི་རྒྱུ། །དམ་ཚིག་འདས་ན་སྲེག་པར་བྱེད། །རྡོ་རྗེ་ཁྲོ་བོ་ཆེན་པོར་གྱུར། །རྡོ་རྗེའི་ཆུ་འདི་བཏུང་བར་གྱིས། །ཨོཾ་བཛྲ་ཡཀྵ་ཧཱུྃ། ཞེས་བརྗོད། འདི་ལྟར་སྔགས་ཀྱི་དངོས་གྲུབ་ནི་དམ་ཙིག་གཅིག་པོ་ལ་བརྟེན་ནས་བྲལ་ཐོབ་བྱེད་པས་གལ་ཏེ་ཉམས་པར་གྱུར་ན་ནི་ད་ལྟ་ལྕེ་ཐོག་ཏུ་བཞག་པའི་ཆུ་ནི་ཤིན་ཏུ་བརྒལ་བར་དཀའ་བས་ན་དམྱལ་བའི་ཆུ་ཞེས་བརྗོད་དེ། །ཚོགས་ཤིང་དུས་ལ་བབ་པའི་ཚེ་སྙིང་གའི་དབུས་ན་རྡོ་རྗེ་ཁྲོ་བོ་ཞེས་བྱ་སྟེ། ཉམས་ན་ཚར་གཅོད་པར་བྱེད་པས་རྡོ་རྗེ་སྟེ་འདི་ཕྱིའི་བདེ་འབྲས་དང་ཕུན་སུམ་ཚོགས་པ་ཐམས་ཅད་འཇོམས་ཤིང་། ཁྲོ་བོའི་དོན་གྱིས་མོད་ལ་བརླག་པར་བྱེད་པའི་ཉེས་དམིགས་ཅན་ཡིན་ནོ་ཞེས་སྟོན་པའོ། །གསུམ་པ་ནི། ཡང་ཆུན་ན་བླུད་ནས། དེ་ལྟ་བས་ན་བུ་ཁྱོད་ཀྱིས། །དམ་ཚིག་འདི་དག་བསྲུང་བར་གྱིས། །དམ་ཚིག་བསྲུངས་ན་དངོས་གྲུབ་པས། །རྡོ་རྗེ་བདུད་རྩིའི་ཆུ་འཐུངས་ཤིག །ཨོཾ་བཛྲ་ཨུ་ད་ཀ་ཧཱུྃ་ཋ ཞེས་པ་སྟེ་འདི་ནི་རྩ་ལྟུང་ཁྱད་པར་བ་ཐམས་ཅད་ཀྱི་དམ་གཞག་ཡིན་པས་དམ་ཚིག་འདི་དག་ཅེས་དུ་མའི་སྒྲ་ཞུགས་ལ་ཉམས་ན་ཚར་གཅོད་པས་ན་རྡོ་རྗེ་དང་། བསྲུངས་ན་ཕན་འདོགས་བས་ན་བདུད་རྩིའི་ཆུ་སྟེ་ཕན་ཡོན་དང་ཉེས་དམིགས་གཉིས་ཀའི་དོན་ལ་ནན་ཏན་དུ་བཀར་བའོ། །དེ་ནས་བླ་མའི་བཀའ་ཉན་པའི་སྒོ་ནས་དམ་ལ་བཞག་པ་ནི། ཁྱོད་ཀྱི་མི་བསྐྱོད་རྡོ་རྗེ་ང་ཡིན་པས་ངལ་བརྙས་ན་ཡང་བ་མ་སྤངས་པར་ཚེའི་དུས་བྱས་ནས་སེམས་ཅན་དམྱལ་བ་ཆེན་པོར་ཉམས་པར་གྱུར་ཏ་རེ། ཞེས་རྩ་ལྟུང་དང་པོ་ལ་དམིགས་ཀྱིས་བཀར་བ་འགྱུར་བ་ནི་དངོས་གྲུབ་འཕྲོག་པའི་ཉེས་དམིགས་ལ་དགོངས་པ་སྟེ། དེ་ལྟར་མནའ་ཆུ་བླུད་པའི་དམ་ཚིག་རྣམས་ལས་དྲལ་བ་ནི་འགལ་ཚབས་ཆེན་པོ་དང་བཅས་པ་སྟེ་དཀོན་མཆོག་གསུམ་གྱི་བདག་ཉིད་བླ་མ་དང་དཀྱིལ་འཁོར་པའི་ལྷ་ཚོགས་གཉིས་སུ་མེད་
པའི་སྤྱན་སྔར་མནའ་བསྒྲགས་ནས་དམ་ལ་བཞག་པ་ཡིན་པའི་ཚུལ་རྩེ་མོ་ལས། རྡོ་རྗེ་སེམས་དཔའི་མནའ་ཡིས་ནི། །སྙིང་པོ་འདི་ཡིས་མནའ་བསྒྲག་གོ །ཞེས་སོ། །དེ་ལྟར་དམ་ཚིག་བསྒྲག་བཟུང་དང་འབྲེལ་བར་ཐབས་སྤྱོད་པའི་ཕྱོགས་དང་ཤེས་རབ་ལྟ་བའི་ཕྱོགས་གཉིས། ཟུང་དུ་འབྲེལ་བའི་སྒོ་ནས་འདོད་ཡོན་ལ་ཉེས་པའི་སྐྱོན་གྱིས་མི་གོས་པར་སྤྱོད་པའི་ཚུལ་གོ་བར་བསྒྲག་པ་ནི། ཐབས་དང་ཤེས་རབ་སེམས་ཉིད་ཀྱིས། །རྟག་ཏུ་གོས་པ་མེད་གྱིས་ལ། །འདོད་པ་ལྔ་ཡི་ཡོན་ཏན་སྤྱོད། །ཅེས་སོ། །དེ་ནས་ལྷག་པའི་ལྷའི་སྐལ་པ་མཐུན་པ་དེ་དངོས་གྲུབ་མྱུར་བའི་ཕྱིར་དེ་དང་ལས་འབྲེལ་བརྟག་ཅིང་སྐལ་བ་མཉམ་པར་བྱེད་པའི་དོན་དུ་མེ་ཏོག་དོར་བར་བྱ་བའང་རྒྱུད་ལས། སྐལ་བ་མཉམ་པའི་ཡེ་ཤེས་དེ། །གཉེར་ན་ཉེ་བར་འབྱུང་བ་ཡི། །ཡ་མཚན་ཆེན་པོ་འབྱུང་བར་ངེས། །ཞེས་སོ། །དེའི་ཚུལ་ནི་མེ་ཏོག་དེ་ཉིད་མེ་ཏོག་གི་ཕྲེང་བར་མོས་ལ། སློབ་དཔོན་གྱི་ཐུགས་ཀ་ནས་བྱུང་བའི་འབྲུ་གསུམ་གྱི་འོད་ཟེར་གྱིས་སློབ་མའི་སྡིག་སྒྲིབ་བཀྲུས་པ་གང་ཞིག་དང་གུས་དང་བཅས་པས་དཀྱིལ་འཁོར་དབང་ཕྱུག་གི་མདུན་ན་ཡོད་པར་དམིགས་ལ་སློབ་དཔོན་གྱིས་བདེན་པའི་བྱིན་བརླབ་བྱ་བ་ནི། ཡང་དག་པ་ཡི་དཀྱིལ་འཁོར་འདིར། །བདག་གི་སློབ་མ་བཅུག་པ་འདིའི། །ལྷ་རྣམས་རིགས་ཀྱི་རིམ་པ་ནི། །བསོད་ནམས་ཇི་ལྟར་དེ་ལྟར་ཤོག །འདིས་ནི་དངོས་གྲུབ་གང་འགྲུབ་དང་། །རིགས་ནི་གང་གི་སྣོད་དུ་འགྱུར། །བསོད་ནམས་མཐུ་ཡང་ཇི་འདྲ་བ། །དེ་འདྲ་དཀྱིལ་འཁོར་དུ་གྱུར་ཅིག །ཅེས་བརྗོད་པའི་མཐར་སློབ་མས། མེ་ཏོག་ལ་སོགས་རིན་ཆེན་ཕྲེང་། །ཞེས་པ་ལ་སོགས་པའི་མཐར། པྲ་ཏཱིཙྪ་བཛྲ་ཧོ ཞེས་ཕུལ་བས་ལྷ་དེས་རང་གི་དབུ་ལ་བཅིངས་པ་ལྟར་བཞེས་པར་
བསམ། སྔར་དབང་བསྐུར་ཐོབ་ནས་རིགས་ངེས་པ་ཅན་ཡིན་ན་རང་གི་ལྷག་པའི་ལྷ་གང་ཡིན་པ་དེའི་དབུ་ལ་བཅིངས་པར་མོས་པ་མངོན་བྱང་གི་འགྲེལ་པ་ལས་བཤད་དོ། །དེའང་བརྟེན་པ་ལྷའི་སྐུ་ལ་དངོས་སུ་ཕོག་པ་ལ་མཚོན་ན། དབུ་ལ་ཕོག་ན་མཆོག །སྤྱན་ནམ་ཞལ་ལ་སྔགས། སྐུའི་སྟོད་སྨང་བར་གསུམ་ལ་ཐུན་མོང་གི་དངོས་གྲུབ་རབ་ཐ་འབྲིང་གསུམ་འགྲུབ། སྐུ་ལས་ཧ་ཅང་རིང་ན་བསྒྲུབ་ཐག་རིང་། ཉེན་མྱུར། ལྷ་གཉིས་ཀྱི་བར་དུ་ལྷུང་ན་གང་ལ་ཉེ་བ། མཉམ་ན་གང་ལ་དད་པ་དེའོ། །རྟེན་གཞལ་ཡས་ཁང་པ་ལ་མཚོན་ན་ལྷ་གནས་ཀྱིས་ཤེས་ལ། རྩིག་པའམ་རྩིག་པའི་ཕྱི་རོལ་ཏུ་ལྷུང་ན་ལན་གསུམ་བསྐྱར་ཞིང་དངོས་གྲུབ་ཕྲ་མོ་ལས་མེད་དོ། །རྡོ་རྗེ་རྭ་བའི་ནང་དུ་ལྷུང་ན་ཚོགས་ཆེན་པོ་དང་། ཕྱི་རོལ་དུ་ལྷུང་ན་དངོས་གྲུབ་མེད་པས་རེ་ཞིག་དཀྱིལ་འཁོར་ཡང་མི་བསྟན་ཏེ་ཞི་བའི་སྦྱིན་སྲེག་གམ། བསག་སྦྱང་ལ་བརྩོན་ནས་ཕྱིན་ཆད་གཞུག་པ་སྤྱི་རྒྱུད་ལས་བཤད་དོ། །དེའང་དྲི་མེད་འོད་ལས་རྡུལ་ཚོན་གྱི་དཀྱིལ་འཁོར་དུ་མེ་ཏོག་དོར་ན་རྡུལ་ཚོན་ཉམས་པའི་ཕྱིར་བསོད་ནམས་མ་ཡིན་པར་བཤད་པ་ཡོད་ཀྱང་དཀོན་མཆོག་བརྩེགས་པ་ལས། ཆོས་རྣམས་ཐམས་ཅད་རྐྱེན་ཡིན་ཏེ། །འདུན་པའི་རྩེ་ལ་རབ་ཏུ་གནས། །ཞེས་པས་ཆོས་རྣམས་ནི་འདུན་པའི་རྗེས་སུ་འབྲང་བ་ཡིན་ན་རང་རང་གི་བློའི་ནུས་པ་ཆེ་ཆུང་དང་སྦྱར་བས་རུང་ངོ་། །གལ་ཏེ་རྡུལ་ཚོན་དངོས་ལ་དོར་བ་དཀའ་ན་མཎྜལ་གྱི་རེ་ཁཱ་ཚོམ་བུ་ཅན་ལ་དོར་བར་བྱའོ། །ཇི་ལྟར་ཡང་རུང་སྟེ་སློབ་དཔོན་གྱིས་རང་རང་གི་མེ་ཏོག་ཕོག་པའི་ལྷ་དེ་ཨ་ཧྱ་ཧིས་སྤྱན་དྲངས་ནས་མེ་ཏོག་གིས་མཚོན་པ་ཉིད་ཕྲེང་བ་ལ་བཅངས་ཏེ། པྲ་ཏི་གྲི་ཧྞ་སྟཾྭ། ཨི་མཾ་ས་ཏྭ་མ་ཧཱ་བ་ལ། ཞེས་སེམས་དཔའ་སྟོབས་པོ་ཚེ་འདི་ཟུངས་ཞིག །ཅེས་པའི་སྔགས་
དོན་གྱིས་སློབ་མའི་སྤྱི་བོར་བཅིང་། ཛཧཱུྃ་བཾ་ཧོས་བསྟིམ་ལ། བདེན་ཚིག་དྲངས་པའི་རྗེས་སུ་སློབ་མ་འདིའི་སྙིང་ལ་ཞུགས་ཏེ་དངོས་གྲུབ་ཕུན་སུམ་ཚོགས་པ་སྩོལ་ཅིག །ཅེས་བརྗོད། དེ་ནས་གསང་བའི་འཇུག་པ་ཡེ་ཤེས་དབབ་པ་ནི། ཅོད་པན་བཅིངས་པའི་དེ་མ་ཐག་པར་དབྱེ་བའི་ཕྱག་རྒྱ་དང་བཅས་པྲ་བེ་ཤ་ཞེས་བརྗོད་པས་སློབ་མའི་མ་རིག་སྒོ་ངའི་སྦུབས་དྲལ་བའི་བརྡར་ཁོག་པ་ཁ་བྱེ་བར་བསམ། ཨ་བེ་ཤ་ཞེས་མང་དུ་བརྗོད་ཅིང་ལྟ་བའི་གདེངས་བསྐྱེད་ནས་རིགས་དང་མཐུན་པའི་ལྷ་ཐིམ་པ་དང་གཉིས་སུ་མེད་པར་བསམ་ཞིང་ཅང་ཏེའུ་དང་དྲིལ་བུའི་སྒྲ་མྱུར་དལ་སྤེལ་མར་འཁྲོལ། དེའི་ཚེ་གང་ཟག་རྣམས་ཀྱི་ལོག་པར་རྟོག་པས་རྣམ་པར་བརྟག་པའི་སྒྲིབ་པ་དེ་དག་སངས་རྒྱས་རྣམས་ཀྱིས་རྣམ་པར་དག་པར་གྱུར་པ་ཡིན་པས་ཆོས་དང་ཆོས་ཉིད་རང་བཞིན་གྱིས་འབྲེལ་བའི་བྱིན་རླབས་སེམས་ཅན་གྱི་ཁམས་ལ་སྣང་བར་འགྱུར་པས་ན་སྤྲོས་པ་དང་བྲལ་བའི་ཟག་མེད་ཀྱི་སེམས་གཞིའི་རྒྱུད་དུ་གྱུར་པ་ལ་བླ་མའི་བླ་མའམ། དབང་ལས་བྱུང་བའི་ཡེ་ཤེས་ཞེས་བྱ་སྟེ་མཐོང་ལམ་རྣམ་པར་མི་རྟོག་པའི་བདག་ཉིད་ཡིན་ཏེ་དང་པོའི་སངས་རྒྱས་ལས་ཡེ་ཤེས་ཕེབས་པས་སངས་རྒྱས་བླ་མ་ཡི་ཡང་བླ་མ་རྫུ་འཕྲུལ་ལྡན་པའི་སྟོན་པ་གཅིག་པུར་འགྱུར། ཞེས་སོ། །དེའི་དོན་ནི་སྡོང་པོ་བཀོད་པ་ལས་ཀྱང་། ཇི་ལྟར་མཚན་ཉིད་སྣ་ཚོགས་པ། །དེ་དག་བྱིས་པའི་སྤྱོད་ཚུལ་ཏེ། །གང་ཞིག་མཚན་ཉིད་ཀུན་མེད་པའི། །སངས་རྒྱས་རྣམས་ནི་མི་མཐོང་ངོ་། །ཞེས་པས་དབང་ཐམས་ཅད་ཀྱི་ངོ་བོ་ཉིད་བྱིན་རླབས་འཕོ་བའི་དབང་ངམ། ཡེ་ཤེས་ཕོག་པའི་དོན་པོ་ནི། ལྷ་དང་དོན་དམ་པར་སྐལ་མཉམ་དུ་བྱས་པ་ཡིན་ནོ། །དེ་བས་ན་ཡེ་ཤེས་ཉིད་ཀྱང་
འབོགས་པ་པོ་ལ་ལྷག་པར་ལྡན་དགོས་ན་རེ་ཞིག་ཐབས་ཀྱི་རང་བཞིན་གཙོ་བོར་བྱེད་པ་རྫས་དང་དམིགས་པ་ལ་བརྟེན་ནས་སློབ་མ་ལ་དབབ་པ་དང་སྣོད་ལ་དབབ་པའི་ཚུལ་གཉིས་ཀྱི་ཆོ་ག་ནི་འདུས་པའི་རྒྱུད་ཀྱི་རྗེས་སུ་འབྲངས་བ་ལ་སོགས་པའི་དཀྱིལ་ཆོག་རྣམས་ལས་འབྱུང་བ་ལྟར་རོ། །གལ་ཏེ་མ་ཕེབས་ན་སྤོག་པའི་ཆོ་ག་ནི་མདའ་སྣུན་རྗེས་སྙིང་གར་ཡི་དམ་ཡབ་ཡུམ་གྱི་སྐུ་ཡུངས་ཀར་ཙམ་པ་བསྒོམས་ལ་དེའི་མཁའ་གསར་བསྐྱོད་པ་ལས་བྱུང་བའི་འོད་ཟེར་དམར་པོས་ལུས་ཀུན་གང་བར་བསམ་པར་བཤད་ཅིང་། དེ་སྐད་དུ་འབུམ་པ་མངོན་བརྗོད་ལས། ཨོཾ་ཏིཥྛ་མ་ཧཱ་ཀྲོ་དྷ་ཨ་བེ་ཤ་ཡ་ཨཧ་ཛྷེ༚ ཞེས་པས་དཔའ་བོ་བསྐུལ་ཞིང་འདོམས་དཀྲིས་རྡུལ་གྱིས་གོས་པ་ལ་ཤ་ལྔ་བདུད་རྩི་ལྔ་དང་གུ་གུལ་བྱི་ལའི་བྲུན་རྣམས་བསྲེས། ཐོད་ཆེན་དུ་གནས་པའི་སོལ་ཆེན་གྱི་མེ་ལ་བསྲེག་གོ །ཕེབས་ནས་ལུས་ངག་གི་རྣམ་འགྱུར་འདོད་རྒྱལ་དུ་སྟོན་པ་བྱུང་ན་ལྕེ་ལ་ཨཱ དམར་པོ་བྲིས་ལ་དོན་དྲི། རྣམ་འགྱུར་རིང་དུ་མ་ཞི་ན། སྣ་ཚོགས་རྡོ་རྗེའི་སྟེང་དུ་རི་རབ་དང་རྣམ་སྣང་བརྩེགས་པ་སྤྱི་བོར་བསྒོམ་དུ་བཅུག་པས་ཞི་བར་བྱའོ། དེ་ནས་མེ་ཏོག་ཕོག་པའི་ལྷའི་རིགས་དང་མཐུན་པའི་གསང་མཚན་རང་རང་གི་གོ་བ་ཙམ་དུ་རྣ་བར་བསྒྲགས་ནས་གདགས་ཤིང་མ་འོངས་པ་ན་དེ་དང་དེའི་མཚན་ཅན་གྱི་སངས་རྒྱས་སུ་འགྱུར་བར་ལུང་བསྟན་པས་རྟེན་འབྲེལ་བསྒྲིག་གོ །དེ་ནས་དཀྱིལ་འཁོར་ལ་མངོན་དུ་ཕྱོགས་པས་ཁྱོད་ཀྱི་མིག་ལ་སྣང་བ་ཇི་ལྟར་གསལ་ཞེས་དྲིས་པས་དཀར་པོ་ལ་སོགས་པའི་སྣང་བ་དང་བསྟུན་ནས་ཞི་བ་ལ་སོགས་པའི་དངོས་གྲུབ་མཐོང་བར་བརྟག །དེ་ནས་མིག་དབྱེ་བ་ནི། སློབ་མའི་མིག་གཉིས་ལ་འབར་བ་དང་ལྡན་པའི་ཨོཾ་རེ་བསྒོམས་ནས། རྡོ་རྗེ་སེམས་དཔའ་དེང་ཁྱོད་ཀྱི། །ཞེས་པ་ལ་སོགས་པ་རྐང་པ་བཞིའི་
མཐར་བཛྲ་ཙཀྵུ་པྲ་བེ་ཤ་ཕཊ ཅེས་མིག་ཐུར་གྱིས་མཚོན་པར་གདོང་གཡོགས་ཕྱེ་ནས་མ་རིག་པའི་མུན་པ་གསལ། གཟུགས་ཅན་ཐམས་ཅད་ལ་ཐོགས་པ་མེད་པའི་རྡོ་རྗེའི་མིག་དང་། ཡེ་ཤེས་ཀྱི་དཀྱིལ་འཁོར་མཐོང་བས་སངས་རྒྱས་ཀྱི་སྤྱན་བླ་ན་མེད་པ་ཐོབ་པའི་མོས་པ་བྱའོ། །དེ་ནས་དཀྱིལ་འཁོར་བལྟ་བར་བསྐུལ་བ་ནི། ཧེ་བཛྲ་པཱ་ཤྱ། དེ་རིང་དད་པའི་ཤུགས་ཀྱིས་ནི། །དཀྱིལ་འཁོར་དམ་པ་བལྟ་བར་བྱ། །སོགས་བརྗོད། དཀྱིལ་འཁོར་མཐོང་བའི་དེ་མ་ཐག་པར་སྔགས་ཚན་གསུམ་དང་བསྟུན་ནས་ཐལ་མོ་སྤྱི་མགྲིན་སྙིང་གར་སྦྱར་བའི་སྒོ་གསུམ་གྱི་ཕྱག་དཀྱིལ་འཁོར་ལ་བསྐོར་བ་བྱེད་པ་དང་སྤྲགས་སྒོ་བཞི་གནས་འཚལ་བ་ནི་ས་ར་ཧ་བ་སོགས་ཀྱིས་བཤད་དོ། །སྔགས་ནི། ན་མཏེ་ཧཱུྃ། ན་མམེ་ཧཱུྃ། ན་མོ་ན་མཧཱུྃ། ཞེས་སོ། །འདི་དག་ནི་འཕགས་པ་ལྷས་ཀྱང་། དེ་མིག་ཕྱེ་ནས་ཕྱག་བྱས་ཏེ། །ལྷ་ཡི་དེ་ཉིད་བསྟན་པར་བྱ། །ཞེས་སོ། །དེ་ནས་དཀྱིལ་འཁོར་བསྟན་པ་ནི། གཙོ་བོ་ནས་བརྩམས་ཏེ་ལྷ་ངོ་བསྟན་པ་དང་། ཤར་སྒོ་ནས་བརྩམས་པའི་ལུགས་གཉིས་ལ་ཁྱད་པར་མེད་ཅིང་རྟེན་གཞལ་ཡས་ཁང་གི་དོན་རྟགས་རྣམས་ཀྱང་སྔར་བཤད་པ་བཞིན་ལེགས་པར་ངོ་སྤྲད་དོ། །དེ་ལྟར་དཀྱིལ་འཁོར་དུ་ཞུགས་པའི་ཕན་ཡོན་ནི་སྔོན་འོག་མིན་དུ་མཐར་ལམ་པ་ཞུགས་པ་དང་སྐལ་བ་མཉམ་པ་ཡིན་ཏེ། སངས་རྒྱས་མཉམ་སྦྱོར་ལས། རྡོ་རྗེ་སེམས་དཔའ་ལ་སོགས་པའི། །འཁོར་ལོ་སྔོན་དུ་མཐོང་བ་ཡིས། །བསོད་ནམས་བརྟག་པ་གང་ཡིན་པ། །ཕྱིས་བྱས་པ་ཡང་དེ་བཞིན་ནོ། །ཞེས་སོ། །དེ་ཡན་ཆད་ནི་འཇུག་པའི་ཆོ་ག་སྟེ་ནང་གསེས་ཀྱིས་ཕྱེས་ན། མེ་ཏོག་དོར་བ་ཡན་ཆད་དཀྱིལ་འཁོར་དུ་འཇུག་པ་སྟེ་ཕྱི་འཇུག་དང་། མེ་ཏོག་གི་ཕྲེང་བ་བཅིང་པ་དང་། ཡེ་ཤེས་དབབ་པ་
དང་། གདོང་གཡོགས་བསལ་ནས་དཀྱིལ་འཁོར་བསྟན་པ་ལ་སོགས་པ་ནི་ནང་འཇུག་སྟེ་སྐལ་པ་ཆེ་ཆུང་གི་སྐབས་དབྱེ་བའི་མཚམས་སོ། །དེ་ལྟར་དཀྱིལ་འཁོར་དྲི་བ་ནས་སློབ་མ་འཇུག་པའི་བར་གྱི་སྤྱི་དོན་ཡང་། ཐོག་མར་ས་གཞི་མཉམ་པ་ནི་ཆོས་ཐམས་ཅད་མཉམ་པར་རྟོགས་པའི་རྟེན་འབྲེལ་ལོ། །དེ་ནས་དཀྱིལ་འཁོར་ཆེ་ཆུང་གི་ཚད་རིག་པས་དཔོགས་པ་ནི་རྗེས་ལ་ཐོབ་པའི་ཤེས་རབ་བསྐྱེད་པ་མཚོན་ལ། དེ་ནས་ཐིག་གདབ་པ་ནི་རིག་པའི་ཆོས་ཉིད་དཀྱིལ་འཁོར་ལས་གཞན་དུ་མི་འགྱུར་བའོ། །ཚོན་དགྱེ་བ་ནི་རྣམ་པར་ཤེས་པའི་ཚོགས་བརྒྱད་ཡེ་ཤེས་ལྔར་མཚོན་པའོ། །དེ་ལ་རྣམ་པ་དགོད་པ་ནི་སྣང་གྲགས་རིག་པ་དཀྱིལ་འཁོར་གསུམ་དུ་རྒྱས་འདེབས་པའོ། །དེ་ལ་རབ་ཏུ་གནས་ནས་བསྒྲུབ་ཅིང་མཆོད་པ་ནི་སྐུ་དང་ཡེ་ཤེས་ཀྱི་དཀྱིལ་འཁོར་ལྷུན་རྫོགས་སུ་བྱེད་པའོ། །སྐབས་དེ་དང་དེར་སྦྱིན་སྲེག་བྱ་བ་ནི་བདེ་བ་ཆེན་པོའི་དོན་རྒྱུད་ལ་སྦྱིན་ཞིང་རྣམ་པར་རྟོག་པའི་ཚོགས་བསྲེག་པའོ། །དེ་ནས་དཀྱིལ་འཁོར་དུ་འཇུག་པ་ནི་ལྷ་དང་སྐལ་པ་མཉམ་པར་བསྒྲུབ་པའོ། །དེ་ནས་སློབ་མ་འཇུག་པ་ནི་དངོས་གྲུབ་ལ་ཉེ་བར་བསྙན་པའོ། །བཞི་པ་ཞུགས་པ་ལ་དབང་བསྐུར་བ་ཆས་ཀྱི་རྒྱལ་པོའི་གོ་འཕང་སྦྱིན་པ་ལ་གཉིས། །དབང་སྤྱིའི་རྣམ་པར་བཞག་པ་མདོར་བསྟན་པ་དང་། དབང་བཞིའི་ངོ་བོ་བྱེ་བྲག་ཏུ་བརྗོད་པའོ། །དང་པོ་སྟོན་པའི་ཕྱིར། རྒྱུད་སྡེ་སོ་སོའི་དབང་གི་རིགས་དབྱེ་ལ། །བྱ་བའི་རྒྱུད་ལ་ཆུ་དང་ཅོད་པན་གཉིས། །སྤྱོད་པའི་རྒྱུད་ལ་དེ་སྟེང་རྡོ་རྗེ་མིང་། །རྣལ་འབྱོར་རྒྱུད་ལ་རིག་པའི་དབང་ལྔ་དང་། །གསང་བ་བཀའ་ཡི་དབང་དང་མཐའ་རྟེན་རྫོགས། །བླ་མེད་བུམ་གསང་ཤེས་རབ་ཚིག་དབང་བཞི། །ཐེག་པའི་རྩེ་མོའི་རིམ་པ་བྱེ་བྲག་པ། །སྤྲོས་དང་སྤྲོས་མེད་ཤིན་ཏུ་རབ་སྤྲོས་མེད། །སྤྱིར་ན་དབང་གི་དབྱེ་བསྡུ་
མཐའ་ཡས་ཀྱང་། །ས་ཟིན་འཇོག་མཚམས་རྣམ་པ་བཞི་པོ་ཡིན། །ཞེས་སློས་ནས། དེ་ལ་བྱ་བའི་རྒྱུད་ནི་ཆུ་དབང་དང་ཅོད་པན་གྱིས་འགྲུབ་ལ། གཞན་རྣམས་ནི་ཡན་ལག་ཙམ་སྟེ། ཐོག་མཐར་ཤིས་པ་བརྗོད་པ་སྦྱར་བའོ། །སྤྱོད་པའི་རྒྱུད་ལ་ནི་དེའི་སྟེང་དུ་རྡོ་རྗེ་མིང་གི་དབང་བསྣན་པ་དངོས་བསྟན་ཏེ། རྗེས་གནང་གི་ཡན་ལག་མང་ཉུང་རྒྱུད་དང་སློབ་དཔོན་སོ་སོའི་གཞུང་གི་ཁྱད་པར་ཡོད་དོ། །རྣལ་འབྱོར་རྒྱུད་ལ་རིགས་རྐྱང་དང་། རིགས་བསྡུས་ཆེ་ཆུང་གང་ཡིན་ཀྱང་རིག་པའི་དབང་ལྔ་དང་། གསང་དབང་དང་། བཀའ་ཡི་དབང་དང་བཅས་པས་སློབ་མའི་དབང་གཙོ་བོར་གྱུར་ཅིང་། མཐའ་རྟེན་སློབ་དཔོན་གྱི་དབང་ལ་སོགས་པ་ལོ་ག་ཕྱིའི་དབང་བཅུ་དང་། བཅུ་གསུམ་ལ་སོགས་པ་གྲགས་པ་གང་ཡིན་པའི་ཚུལ་སྦྱོང་རྒྱུད་དང་། རྡོ་རྗེ་འབྱུང་བ་ལ་སོགས་ལས་ཤེས་པར་བྱའོ། །དེ་ལྟ་ནའང་འདིའི་གསང་དབང་ནི་ལྷ་དང་དཀྱིལ་འཁོར་གྱི་དེ་ཁོ་ན་ཉིད་དང་། སློབ་དཔོན་གྱི་ལས་སྟོན་པ་ཙམ་ལས་མིང་དུ་བཏགས་པ་ཡིན་ལ། དེ་བཞིན་དུ་རྣལ་འབྱོར་རྒྱུད་ཁ་ཅིག་ལས་ཤེས་རབ་ཡེ་ཤེས་ཀྱི་དབང་གསུངས་པ་ཡང་མིང་ཙམ་ཡིན་གྱིས། བླ་མེད་ཀྱི་རྒྱུད་ལས་གསུངས་པ་དང་དོན་མི་འདྲ་བའི་ཚུལ། དགོད་པ་དག་པ་སློབ་དཔོན་ཉིད། །བལྟ་པ་གསང་བའི་དབང་ཡིན་ནོ། །ཞེས་དབང་གི་རིམ་པ་ཙམ་དུ་བཞེད་པའི་ཕྱིར་རོ། །དགོད་པ་ལ་སོགས་པ་ནི་བླ་མེད་རབ་ལུགས་ཀྱི་དུས་ན་བསྐྱེད་རིམ་གྱི་དབང་བཞིའི་རིམ་པ་ཡིན་ལ། དེའི་བལྟ་བ་ཞེས་པའང་ཕོ་མོའི་གནས་ལ་ཆགས་པས་བལྟ་བ་ཉིད་ཡིན་ན། ཕྱི་རྒྱུད་འོག་མ་གསུམ་ལས་ཆེས་ཤིན་ཏུ་གསང་བ་རྣལ་འབྱོར་བླ་ན་མེད་པའི་ཀུན་ཏུ་སྤྱོད་པ་ནི་འཇིག་རྟེན་དང་གྲུབ་མཐའ་པ་ཕལ་གྱིས་བློ་ཡུལ་དང་འགལ་བ་ཡིན་
པས། རྡོ་རྗེ་སྙིང་པོ་རྒྱན་ལས་ཀྱང་། །ཕྱི་ནང་དབྱེ་བ་ཤེས་པ་ཡི། །རྒྱུད་ཀྱི་དབྱེ་བ་ཤེས་པར་བྱ། །ནང་དུ་བསྟན་པ་བླ་མ་ལས། །ཡང་དག་བླངས་ཏེ་བསྒྲུབ་པར་བྱ། །ཞེས་བསྟན་པ་བཞིན་ནོ། །དེ་བས་ན་དབང་གོང་མ་གསུམ་ནི་རྣལ་འབྱོར་བླ་ན་མེད་པ་ཁོ་ནའི་ཁྱད་ཆོས་ཡིན་པའི་ཚུལ་ཡེ་ཤེས་ཐིག་ལེའི་རྒྱུད་ལས། ཆུའི་དབང་བསྐུར་དབུ་རྒྱན་དག །བྱ་བའི་རྒྱུད་ལ་རབ་ཏུ་གྲགས། །རྡོ་རྗེ་ དྲིལ་བུ ་དེ་བཞིན་མིང་། །སྤྱོད་པའི་རྒྱུད་ལས་རབ་ཏུ་གསལ། །ཕྱིར་མི་ལྡོག་པ་ཡི་ནི་དབང་། །རྣལ་འབྱོར་རྒྱུད་དུ་གསལ་བར་བྱས། །དེ་ནི་དྲུག་པའི་བྱེ་བྲག་དབང་། །དེ་ནི་སློབ་དཔོན་དབང་ཞེས་བྱ། །རྣལ་འབྱོར་བླ་མ་ཡི་ནི་མཚན། །གསང་བ་ཡི་ནི་དབང་རྒྱལ་བཤད། །ཤེས་རབ་ཡེ་ཤེས་བླ་ན་མེད། །བཞི་པ་དེ་ཡང་དེ་བཞིན་ནོ། །ཞེས་སོ། །དེ་ཡང་སངས་རྒྱས་མཉམ་སྦྱོར་ལས་སློབ་དཔོན་དང་སློབ་མའི་དབང་གིས་བསྡུས་པ་གསང་བ་བྱང་ཆུབ་སེམས་དང་། དབུ་རྒྱན་དང་། ཕྱག་རྒྱ་དང་། མིང་གི་དབང་རྣམས་སུ་གསུངས་པ་དང་། སློབ་དཔོན་ཆེན་པོ་པདྨ་སམྦྷ་ཝས་གསང་སྔགས་ལམ་རིམ་དུ་ལམ་གྱི་མདོ་རྣམ་པ་ལྔར་གསུངས་པ་དང་། ཤེར་ཕྱིན་བརྒྱ་ལྔ་བཅུའི་འགྲེལ་པ་ལས། ཡུམ་སྨོས་པ་ལས་ནི་དེ་བཞིན་གཤེགས་པའི་ཡབ་ཀྱང་སྨོས་དགོས་ཏེ། གང་ཞེ་ན། ཡབ་ནི་ཏནྟྲ་ཏཏྭ་སཾ་གྲ་ཧ་ཞེས་བྱ་བ་གསང་སྔགས་ཀྱི་མདོ་སྡེ་ཟབ་མོ་ཡིན་པར་བཤད་དེ། ཞེས་སྔགས་རྒྱུད་ཟབ་མོ་མདོའི་གཞུང་ལམ་དུ་དྲངས་ཤིང་མདོ་སྡེའི་མིང་གི་མངོན་བརྗོད་ཅན་འདུས་པ་མདོའམ། འོག་མིན་ཚོགས་ཆེན་འདུས་པའི་རྩ་རྒྱུད་ལས། །སྲིད་པ་གསུམ་གྱིས་ཕྱག་བྱས་པའི། །བླ་མའི་ས་ལ་གནས་པ་ཡི། །དབང་མཆོག་སུམ་ཅུ་རྩ་དྲུག་ཡིན། །ཕྱི་ཡི་དབང་དང་ནང་གི་དབང་། །བསྒྲུབ་པའི་དབང་དང་གསང་བའི་དབང་། །བཅུ་དང་བཅུ་གཅིག་བཅུ་གསུམ་དང་། །རྣམ་པ་གཉིས་ཀྱི་
རྫོགས་པར་འགྱུར། །ཞེས་དང་། བཤད་རྒྱུད་དགོངས་པ་འདུས་པ་ལས། ལ་ལས་ནི་རྒྱུད་ཀྱི་ཆུ་བོའི་དབང་གི་དབང་བྱིན་ནོ། །ལ་ལས་ནི་འབྱུང་བའི་ཆུ་བོའི་དབང་གིས་དབང་བྱིན་ནོ། །ལ་ལས་ནི་གྲགས་པའི་ཆུ་བོའི་དབང་གིས་དབང་བྱིན་ནོ། །ལ་ལས་ནི་རྫོགས་པའི་ཆུ་བོའི་དབང་གིས་དབང་བྱིན་ནོ། །ཞེས་ཕྱི་དབང་རྒྱུད་ཀྱི་ཆུ་བོ་དང་། ནང་དབང་འབྱུང་བའི་ཆུ་བོ་དང་། སྒྲུབ་དབང་གྲགས་པའི་ཆུ་བོ་དང་། གསང་དབང་རྫོགས་པའི་ཆུ་བོ་བཞིར་དབྱེ་བསྡུ་བྱ་བའི་ཚུལ། བཤད་རྒྱུད་རྔམ་གློག་ལས། དང་པོ་ཕྱིའི་དབང་བཅུ་བསྐུར། །དེ་ནས་ནང་དབང་བཅུ་དང་གཅིག །དེ་ནས་བསྒྲུབ་དབང་བཅུ་དང་གསུམ། །ཐ་མར་གསང་བ་རྣམ་པ་གཉིས། །བཅུ་ཕྲག་གསུམ་དང་དྲུག་དག་གིས། །དབང་མཆོག་དམ་པ་བསྐུར་བ་ཡིན། །ཞེས་འདུས་པ་མདོ་རྩ་བའི་དཀྱིལ་འཁོར་དང་། བསྙེན་པ་ཡན་ལག་གི་དཀྱིལ་འཁོར་སོ་སོར་ཕྱེ་བ་གཉིས་འབྲེལ་བ་ལས་དེ་བཞིན་གཤེགས་པས་ལེགས་པར་གསུངས་པའི་བསྟན་པ་མ་ལུས་ཤིང་ལུས་པ་མེད་པ་རིག་འཛིན་གྱི་སྡེ་སྣོད་གཅིག་ཏུ་རྫོགས་པའི་རིམ་པ་བླ་ན་མེད་པ་དང་། དཔལ་གསང་བ་འདུས་པའི་རྒྱུད་འགྱུར་སྔ་ཕྱི་གཉིས་དང་། ཟླ་གསང་ཐིག་ལེ་ལ་སོགས་པ་ནས་བུམ་པ་དང་། གསང་བ་དང་། ཤེས་རབ་ཡེ་ཤེས་ཞེས་གྲགས་པ་དང་། དུས་ཀྱི་འཁོར་ལོ་ལས་ནི་བྱིས་པ་འཇུག་པའི་དབང་བདུན་དང་། དབང་གོང་མ་ལ་འཇིག་རྟེན་པ་གསུམ་དང་། འཇིག་རྟེན་ལས་འདས་པ་གཅིག་སྟེ་བཅུ་གཅིག་ཏུ་བཤད་པ་ལ་སོགས་ཆོ་ག་དང་། བརྡའ་དང་། བགྲོས་ཐ་དད་པ་ཅན་ཡིན་པས་རིག་པའི་དབང་དང་རྗེས་སུ་མཐུན་པ་ལྔ་ལའང་རིགས་ལྔའི་དག་སྦྱོར་གནས་སྐབས་དེ་ཉིད་དུ་བགྱིད་པའི་དེས་པ་མེད་དོ། །འདི་བཞིན་དུ་སྔ་
འགྱུར་ལའང་སློབ་མ་དང་དབང་རྫས་རིགས་ཀྱི་ལྷ་སོ་སོར་བསྐྱེད་པ་མ་ཡིན་པར་ལྷག་པའི་ལྷ་འབའ་ཞིག་ཏུ་དྲན་པར་བྱ་བའང་ཡོད་དོ། །རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས་ནི་ཕྱི་ཕན་པའི་དབང་བཅུ་དང་། ནད་ནུས་པའི་དབང་ལྔ་དང་། གསང་བ་བྱང་ཆུབ་སེམས་ཀྱི་དབང་གསུམ་སྟེ་བཅོ་བརྒྱད་དུ་གསུངས་པ་ལས། ཕྱི་ཕན་པའི་དབང་བཅུའི་ནང་དུ་རྣལ་འབྱོར་ཕྱི་པ་ལས་གསུངས་པའི་བུམ་པ་དང་། དབུ་རྒྱན་དང་། ཅོད་པན་དང་། ཕྲེང་བ་དང་། ཕྱག་རྒྱ་དང་ལྔ་ནི་དངོས་སུ་འདུ་ལ། གཟུངས་ནི་ཉན་པའི་དབང་དང་། གསང་བ་ནི་བསྒོམ་ཞིང་བསྒྲུབ་པ་དང་། འཁོར་ལོར་བསྒྱུར་བ་ནི་རྡོ་རྗེ་རྒྱལ་པོ་ལ་སོགས་རྒྱུད་ནས་འདུ་བ་ཁོ་ན་ཡིན་པས་ན་རྒྱུད་སྡེ་སྤྱི་ལ་གྲགས་པའི་རིག་པའི་དབང་ལྔ་པོ་ནི་རིགས་བསྡུས་པའི་ཆིངས་ཆེན་པོའང་ཡིན་ནོ། །དེ་ཡང་དཔལ་སྒྱུ་འཕྲུལ་དྲྭ་བ་ལས་གསུངས་པའི་ཕྱི་ཕན་པའི་དབང་བཅུ་ནི་དད་པ་ཅན་གྱི་སྣོད་རུང་ལ་སྟེར་བ་ཡིན་ལ། ནད་ནུས་པའི་དབང་ལྔ་པོ་ནི་བརྩོན་འགྲུས་ཅན་ལ་སྦྱིན་པ་ཡིན་ཏེ། བདག་དོན་ནུས་པའི་བརྩོན་འགྲུས་ཅན་ལ་ཉན་སྒོམ་གཉིས། གཞན་དོན་ནུས་པའི་བརྩོན་འགྲུས་ཅན་ལ་འཆད་ཕྲིན་གཉིས། གཉིས་ཀའི་དོན་ནུས་པའི་བརྩོན་འགྲུས་ཅན་ལ་རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་སྦྱིན་ནོ། །གསང་བ་ཟབ་མོའི་དབང་གསུམ་ནི་བརྟུལ་ཞུགས་ཅན་ལ་སྟེར་བར་བྱ་སྟེ། དེ་ཡང་སྤྱོད་པའི་བརྟུལ་ཞུགས་ཅན་ལ་གསང་བའི་དབང་ངོ་། །རིག་པའི་བརྟུལ་ཞུགས་ཅན་ལ་ཤེས་རབ་ཡེ་ཤེས་ཀྱི་དབང་ངོ་། །མཉམ་པའི་བརྟུལ་ཞུགས་ཅན་ལ་དབྱེར་མེད་བདེ་བ་ཆེན་པོའི་དབང་སྟེར་བར་བྱ་སྟེ། འདི་ལྟར་སངས་རྒྱས་རྣམས་ཀྱི་ཆོས་ནི་སེམས་ཅན་འབའ་ཞིག་ལ་སྨན་པའི་དོན་དུ་ཡིན་ན་ཐེག་པ་ཆེན་པོའི་ལམ་ལས་སྐལ་མེད་ཡལ་བར་འདོར་བ་མ་བཤད་ཀྱང་། སྙིང་རྗེ་ཀུན་ནས་བསླང་བའི་སེམས་
ཀྱིས་སྣོད་དང་འཚམས་པའི་བཅུད་མ་བྱིན་ན་སེང་གེའི་འོ་མ་གྱོ་མོའི་སྣོད་ཀྱིས་བརྟེན་པར་མི་ནུས་པ་བཞིན་ཕ་རོལ་ལ་རྣམ་སྨིན་ངན་པ་བསྐྱེད་པའི་ཕྱིར་རོ། །ཁྱད་པར་དུ་སེམས་ཀྱི་ཕྱོགས་ལ་དབང་དང་བྱིན་རླབས་ཆུ་བོའི་རྒྱུན་ལྟར་སྟོན་པ་ཆུ་བོ་ལྟ་བུའི་རྒྱུད། རྫོགས་པ་རང་བྱུང་རྩ་བའི་ལུང་བརྒྱད་ལ་བརྟེན་ནས་སྤྲོས་བཅས་སྤྱིའི་དབང་རྣམ་པར་གཞག་པ་དང་། བྱེ་བྲག་ཏུ་བསྟན་པ་དང་། གསུམ་པའི་དོན་གྱི་འབྲས་བུ་ངོས་བཟུང་བའོ། །དང་པོ་ནི། སྤྲོས་བཅས་སྤྱིའི་དབང་བཅུ་གཉིས་པོ་ནང་ཚན་དུ་ཕྱེ་བས་དུ་མར་འཕེལ་བ་ཁྲུས་ཀྱི་དབང་ནས་རིན་པོ་ཆེའི་འཁོར་ལོ་རྣམ་པར་བཤད་པའི་བར་དུ་གསུངས་སོ། །གཉིས་པ་ནི། སྒོམ་པ་བཞིའི་དབང་ངེས་པ་གང་ཞིག་ཕྱི་དང་ནང་དང་། གསང་བ་དང་། ཡོངས་སུ་རྫོགས་པ་བཞིའི་རིམ་པས་ཉན་ཐོས་ནས་རྫོགས་པ་ཆེན་པོའི་བར་གྱི་རིམ་པ་དགུའི་གྲུབ་མཐའ་ཉིད་ཀྱང་ཐེག་པ་སོ་སོའི་སྒོས་ཆོས་ལས་བཏུས་པ་མ་ཡིན་མོད་ཀྱི། སྔགས་ཀྱི་ཐབས་མཁས་ཀྱི་ཟིན་པས་ཐེག་པ་སོ་སོའི་རིགས་འདྲའི་ཡོན་ཏན་དང་སྤངས་ཐོབ་མངོན་སུམ་དུ་སྐྱེ་བའི་མྱུར་ལམ་ལ་དབྱེ་བའི་ངོས་ནས་དུས་མེའི་གྲངས་སུ་འགྱུར་བ་དང་། ཉན་ཐོས་ཀྱི་སྐབས་སུ་སྐྲ་དབྱུང་བ་དང་། སྟོད་གཡོགས་དང་། སྨད་གཡོགས་དང་། ཆོས་གོས་དང་། དགེ་ཚུལ་གྱི་སྡོམ་པ་དང་། དགེ་སློང་གི་སྡོམ་པ་དང་། བསིལ་བྱེད་དང་། ལྷུང་བཟེད་སྦྱིན་པ་ལ་སོགས་པ་ནི་ཕྱིའོ། །དེའི་རྗེས་ནས་ནང་རང་སངས་རྒྱས་དང་། །གསང་བ་བྱང་ཆུབ་སེམས་དཔའ་སྟེ་རྒྱུའི་ཐེག་པ་གསུམ་གྱི་དབང་རྫོགས་པས་རྒྱུ་བྱང་ཆུབ་ཀྱི་སེམས་བརྟན། རྐྱེན་ཀུན་རྫོབ་བྱང་ཆུབ་ཀྱི་སེམས་ལས་སུ་རུང་། ཆོས་ཀྱི་བྱང་རྒྱུའི་ས་བོན་རྣམས་ལ་འཇུག་ཏུ་རུང་བའི་རྣམ་པ་ལ་དབང་བས་ན་དབང་ཞེས་བྱའོ། །དེ་ནས་སྔགས་ཕྱི་པའི་ཐེག་པ་གསུམ་གྱི་དབང་རྫོགས་པར་
བྱས་པས་ལམ་བྱང་ཆུབ་ཀྱི་སེམས་ལ་དབང་ཞིང་། དེའང་ཆུ་དང་། ཅོད་པན་དང་། རྡོ་རྗེ་དང་། དྲིལ་བུ ་ལ་ནན་ཏན་དུ་བསྐུར་བས་འབྲས་བུ་བྱང་ཆུབ་ཀྱི་སེམས་ལ་དབང་བས་ན་དབང་ཞེས་བྱའོ། །སྔགས་ནང་པ་གསུམ་ལས་ཕྱི་བསྐྱེད་པ་མ་ཧཱ་ཡོ་གའི་དུས་སུ་བུམ་པའི་དབང་རྗེས་འབྲངས་དང་བཅས་པ་ལ་ནན་ཏན་དུ་བྱས་པས། ཕན་པ་དང་ནུས་པ་འཇུག་པའི་བྱེ་བྲག་གི་ཡོན་ཏན་ཁྱད་པར་དུ་སྐྱེ་བའོ། །ནང་ལུང་ཨ་ནུའི་དུས་ནང་དམ་གསང་བའི་སྒྲ་དོན་གྱིས་སྦས་པ་རིག་མའི་དབང་ལ་ནན་ཏན་དུ་བྱས་ཏེ་བསྐུར་བས་ཀུན་རྫོབ་བྱང་ཆུབ་ཀྱི་སེམས་ལ་ལོངས་སྤྱོད་ཅིང་ཞུ་བ་དེའི་ཡེ་ཤེས་ལ་དབང་བས་ན་དབང་ཞེས་བའོ། །གསང་བ་རང་བཞིན་རྫོགས་པ་ཆེན་པོའི་སྤྲོས་བཅས་ཀྱི་དབང་གི་དུས་ན་ནི། ཕྱི་བུམ་པ་ལ་བརྟེན་པ་རྨ་བྱ་དང་མེ་ལོང་ལ་སོགས་པའི་ཁྱད་པར་གྱི་རྫས་བདུན་གྱིས་སྲིད་པ་བདུན་གྱི་རྒྱུན་འགགས་པར་བྱད་དོ། །ནང་བཀྲ་ཤིས་པའི་རྫས་བརྒྱད་དང་རིན་པོ་ཆེ་སྣ་བདུན་ལ་བརྟེན་ནས་བསྐུར་བས་གནས་སྐབས་སུ་འདོད་པའི་དོན་དང་། མཐར་ཐུག་སེམས་དང་ཡེ་ཤེས་ལ་དབང་བས་ན་དབང་ངོ་། །སྤྲོས་མེད་གསང་བ་ལ་བརྟེན་ནས་བསྐུར་པ་ནི། །བདུད་རྩི་ལྔ་དང་། བྷན་དྷ་དང་ཁྱད་པར་དབང་ཆེན་གྱི་སྐུ་ལ་སོགས་མཆོག་གི་རྫས་བདུན་ལ་བརྟེན་ནས་བསྐུར་བས་ནང་སྲིད་པའི་འཁོར་ལོ་བདུན་རྒྱུན་ཆད་པར་བྱེད་དོ། །སྤྲོས་བཅས་ཀྱི་སྤྲོས་མེད་ཤེས་རབ་ཡེ་ཤེས་རིག་མ་ལ་བརྟེན་པའི་ཚེ་སིན་དྷུ་ར་དང་། མེ་ལོང་ཡུ་བ་ཅན་ལ་སོགས་པ་སྙིང་པོའི་རྫས་བདུན་ལ་བརྟེན་ནས་གསང་བ་ལ་སོགས་པའི་གནས་གསུམ་དུ་བསྐུར་བས་གསང་བ་སེམས་འཇུག་པའི་ལས་བདུན་རྒྱུན་ཆད། རྡོ་རྗེ་གསུམ་དང་གཉིས་སུ་མེད་པའི་ཡེ་ཤེས་ལ་བརྟན་པ་ཐོབ། དེ་ཡང་གསང་བ་དང་ཤེས་རབ་ཡེ་ཤེས་གཉིས་རྒྱུ་འབྲས་སུ་བསྟན་ནས་དབང་
གསུམ་པར་བཞག་གོ །སྤྲོས་བཅས་ཀྱི་ཡོངས་སུ་རྫོགས་པ་བྱང་ཆུབ་སེམས་ཀྱི་དཀྱིལ་འཁོར་ལ་བརྟེན་པ་སྤངས་པ་དང་རྟོགས་པ་ལ་སོགས་ཏེ་དམིགས་པ་མེད་པའི་རྫས་བདུན་ལ་བརྟེན་ནས་བསྐུར་བས། ཁམས་གསུམ་དུ་འཇུག་པའི་སྦྱོར་བ་བདུན་རྒྱུན་ཆད་པའོ། །གསུམ་པའི་དོན་ནི་ཤེས་རབ་ཡེ་ཤེས་ཀྱི་དབང་སྟེ་འོག་ཏུ་སྟོན་པས་མཚོན་ནོ། །དེ་ལྟར་སྤྲོས་བཅས་ལ་ལྟོས་པའི་གསང་དབང་། སྤྲོས་མེད་ཀྱི་དབང་ལ་ཡང་ཕྱི་ནང་གསང་བ་ཡོངས་རྫོགས་བཞི་ལས། ཕྱི་ནི་མཎྜལ་དང་བུམ་པ་ལ་བརྟེན་ནས་སྐུ་གསུང་ཐུགས་ཀྱི་ཡི་གེ་འཁོར་ལོས་དག་པར་བྱེད་པའོ། །ནང་གི་ཆོས་ཐམས་ཅད་སྐྱེ་བ་མེད་པ་ལ་སོགས་པ་བུམ་པའི་གནས་ངེས་པའོ། །གསང་བ་ནི་དངོས་པོ་ཐམས་ཅད་རང་བཞིན་མེད་པའི་ཤར་གྲོལ་རིས་མེད་ཆེན་པོར་མཚོན་པའོ། །ཡོངས་སུ་རྫོགས་པའི་ཆོས་ཐམས་ཅད་སྟོང་ཞིང་བདག་མེད་ལ། ཞེས་པ་ལ་སོགས་པས་རྟོགས་པ་ཁྱད་པར་ཅན་ལ་བཟླ་བའི་ཚིག་དབང་རིན་པོ་ཆེ་སྟེ་ཐལ་འགྱུར་ལས། སྤྲོས་པ་མེད་པའི་དབང་མཆོག་ནི། །མཎྜལ་བུམ་པ་ལ་བརྟེན་ནས། །ཚིགས་སུ་བཅད་པས་དབང་སྦྱིན་བྱ། །ཞེས་སོ། །ཤིན་ཏུ་སྤྲོས་མེད་ཀྱི་དབང་ལ་ཡང་། ཕྱི་ནི་འཁོར་འདས་རུ་ཤན་འབྱེད་པའོ། །ནང་ནི་ཡེ་ཤེས་ཉི་ཤུ་རྩ་ལྔ་ལ་སྤྱོད་པའི་དོན་དུ་མཎྜལ་ཕུལ་ནས་གསོལ་བ་གདབ་པ་ལ་སོགས་པ་རྣམས་སོ། །གསང་བ་ནི་ནམ་མཁའི་ཕྱོགས་བཞི་ནས་སེམས་ཉིད་ཀྱི་སྒོར་འཇུག་གོ །ཡོངས་སུ་རྫོགས་པ་ནི་ནམ་མཁའ་རྒྱ་ཆེ་བའི་སྒྲས་དབྱིངས་ཀྱི་དོན་ལ་འདྲིས་པར་བྱས་ནས་ངོ་བོ་ཉིད་མེད་པའི་སེམས་ཉིད་ལ་མཐའ་དབུས་མེད་པ་མཚོན་པ་སྟེ་ཐལ་འགྱུར་ལས། ཤིན་ཏུ་སྤྲོས་པ་མེད་པ་ལ། །འཁོར་འདས་རུ་ཤན་འོག་བཞིན་དབྱེ། །དེ་ཚེ་ནམ་མཁའི་མཚན་ཉིད་ལས། །ལུས་ངག་
ཡིད་ཀྱི་སྒྲིབ་པ་ཡང་། །མཚན་ཉིད་ཀྱིས་ནི་ངེས་པར་བརྟག །གལ་ཏེ་སྤྱོད་པ་མ་དག་ན། །རང་རང་མཐུན་པའི་དགེ་བས་སྦྱང་། །དབང་ནི་བརྡའ་ལ་བརྟེན་པ་ཡི། །རང་རིག་གསལ་བའི་རང་ངོ་སྤྲད། །བརྡའ་དཀྲོལ་མན་ངག་མཁས་པས་སྤྱད། །ཅེས་སོ། །རབ་ཏུ་སྤྲོས་པ་མེད་པ་ལ་ལང་ཕྱི་ནི་འདུག་སྟངས་སྟོན་པའོ། །ནང་ནི་ལྟ་སྟངས་སྟོན་པའོ། །གསང་བ་ནི་དེ་གཉིས་བསྟུན་ནས་སངས་རྒྱས་ཀྱི་ཞིང་དུ་སྤྱོད་པའོ། །ཡོངས་སུ་རྫོགས་པ་ནི། སོང་ཅིག་ལ་སོགས་པའི་ཚིག་གིས་བརྡའ་དོན་སྤྲོད་པ་སྟེ་ཐལ་འགྱུར་ལས། རབ་ཏུ་སྤྲོས་པ་མེད་པ་ལ། །སེམས་ཀྱི་དཀྱིལ་སྒོ་ཕྱེ་ལ། །ལུས་ཀྱི་འདུག་སྟངས་ངེས་པར་བརྩམས། །དེ་ལ་གོམས་ཏེ་གཟིགས་སྟངས་སྦྱར། །མངོན་སུམ་རིག་པ་ལུང་གི་བརྡའོ། །ཞེས་སོ། །དེ་ལྟ་བུའི་དབང་གི་དག་བྱ་དག་འབྲས་ལ་ལུས་ཀྱི་འབྱུང་བའི་རྒྱ་བཞི་ཞིག་པ་ལ་བཞི་ཚན་དུ་ངེས་པའི་དབྱེ་བས་མདོར་བསྟན་པ་དང་། རང་ངོའི་དབྱེ་བས་བཅུ་དྲུག་བཅུ་དྲུག་ཏུ་ཕྱེ་ནས་ས་བཅུ་དྲུག་ལ་གནས་པའི་ངེས་པ་རྒྱས་པར་བཤད་པ་དང་། རྣམ་པར་འཕྲལ་བའི་དབྱེ་བས་ཤིན་ཏུ་རྒྱ་ཆེར་བཤད་པའི་གནས་སྐབས་ན་བཅུ་དྲུག་པོའི་རྣམ་གྲངས་ལ་འགྱུར་བརྩིས་པས་དག་བྱའི་དྲི་མ་ལ་ལྟོས་ན་སྤྱིར་ཁྲི་ཕྲག་གཅིག་དང་དྲུག་བརྒྱ་དྲུག་ཅུ་ཐམ་པ། དག་བྱེད་ཀྱི་དབང་ལ་ལྟོས་ན་དབང་ཉིས་བརྒྱ་དང་བརྒྱད་ཅུ་རྩ་དགུ་བཞིར་འབྲེལ་པས་ཕྱེ་ན་ཆིག་སྟོང་ཆིག་བརྒྱ་ལྔ་བཅུ་རྩ་དྲུག་ཏུ་འགྱུར་ལ། དེ་ཡང་དག་བྱ་འགྲོ་བའི་ལུ་མི་འདྲ་བ་བཅུ་གཉིས་ལས་བྱེད་པའི་འགྱུར་གྱིས་ཕྱེ་ན། །ཆིག་ཁྲི་སུམ་སྟོང་བརྒྱད་བརྒྱ་བདུན་ཅུ་རྩ་གཉིས་ལ་སོགས་པས་ལས་ཀྱི་མཐའ་ཉེ་བར་སྡུད་པའོ། །དེ་དག་ཀྱང་དབང་བསྐུར་བ་མཐར་ཕྱིན་པ་འབྲས་བུའི་ཡོན་ཏན་ལ་སྦྱང་ན་གནས་སྐབས་དང་མཐར་ཐུག་གཉིས་ཀྱིས་དང་པོ་ལའང་སྤྲོས་བཅས་ཀྱིས་ཚོགས་ལམ་
བཅུ་གཉིས་རྫོགས་པའི་ཡོན་ཏན་འཐོབ་པའི་རྟེན་བྱེད། སྤྲོས་མེད་ཀྱིས་སྦྱོར་ལམ་ངེས་འབྱེད་ཆ་བཞི་རྫོགས་པའི་རྟེན་བྱེད། ཤིན་ཏུ་སྤྲོས་མེད་ཀྱིས་མཐོང་ལམ་རྫོགས་པའི་རྟེན་བྱེད། རབ་ཏུ་སྤྲོས་མེད་ཀྱིས་བསྒོམ་ལམ་ས་དགུ་རྫོགས་པའི་རྟེན་བྱེད་དོ། །དེ་རིག་འཛིན་བཞི་དང་སྦྱར་ན་དབང་བཞིའི་འཇུག་པ་རྗེས་སུ་དྲན་པ་ལས་རྣལ་འབྱོར་གྱི་ས་དང་། རྣལ་འབྱོར་ཆེན་པོའི་ས་དང་། འབྱེད་པའི་རྣལ་འབྱོར་གྱི་ས་དང་། རྟོགས་པའི་རྣལ་འབྱོར་གྱིས་དང་བཞི་པོ་ས་བཅུ་དྲུག་དང་སྦྱར་བའི་ཚུལ་ཡོད་དོ། །མཐར་ཐུག་གི་འབྲས་བུ་ནི་མགོན་པོ་རྡོ་རྗེ་འཆང་གི་ས་སྟེ། སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ཡོན་ཏན་རྫོགས་པའི་ཚུལ་ཞིབ་པ་ནི་ཐེག་པའི་མཆོག་རིན་པོ་ཆེའི་རིམ་ཁང་དྲུག་པ་ལས་ཤེས་པར་བྱ་ཞིང་། ཐེག་པའི་རྩེ་མོ་བླ་ན་མེད་པ་འདིའི་དབང་གི་ཁྱད་པར་ནི་མཁས་སུ་རེ་བའི་ཀུན་འབྱུང་གི་རྣམ་པར་རྟོག་པས་ཟིལ་གྱིས་ནོན་པའི་བྱིས་པ་ཉེར་སྤྱོད་ཀྱི་ཤེས་རབ་ཅན་དང་མཛའ་བ་མ་ཡིན་ཀྱང་། ཆོས་ཉིད་ཀྱི་བདེན་པ་གཟིགས་ནས་ཆོས་ཀྱི་མིག་རྡུལ་དང་བྲལ་བ་མངོན་སུམ་དུ་གྱུར་པས་འཕགས་པའི་ཡུལ་དུ་སྡེ་སྣོད་དང་རྒྱུད་སྡེ་རྒྱ་མཚོ་ལྟ་བུ་ལ་མངའ་དབང་འབྱོར་པའི་པཎྜི་ཏ་ཆེན་པོ་དྲི་མེད་ཆོས་ཀྱི་བཤེས་གཉེན་ཀྱང་ཐེག་པ་འདིའི་ལམ་སྲོལ་འབྱེད་པ་ལ་ཞུགས་ཤིང་། །གངས་རིའི་ཁྲོད་ཀྱི་རྟོག་གེ་བ་རྣམས་ཀྱི་དབུས་ན་ཆོས་ཀྱི་གྲགས་པའི་དོ་ཟླ་སྤོབས་ལ་སོ་སོ་ཡང་དག་རིག་པ་བཞིའི་དེ་ཁོ་ན་ཉིད་མངོན་དུ་གྱུར་པའི་ཆ་ནས་དམིགས་པ་ཡུལ་གྱི་བློ་ཅན་དག་གི་གཞུང་ལ་གཞན་དྲིང་མི་འཇོག་པའི་རྒྱལ་བ་གཉིས་པ་ཀུན་མཁྱེན་ངག་གི་དབང་པོའང་ཡིད་དཔྱོད་ཀྱི་གྲུབ་པའི་མཐའ་རྒྱ་མཚོ་ལྟ་བུ་ཁོང་དུ་ཆུད་པའི་གཞན་དབང་གིས་བརྫི་བར་མ་ནུས་ནས་ཤིན་ཏུ་རྣལ་འབྱོར་ཆེན་པོའི་ལྟ་བ་དང་གྲུབ་པའི་མཐའ་
གང་ཡིན་པའི་ཁྱད་པར་འབྱིན་པ་ལ་ཞུགས་པའི་ཕྱིར་རོ། །དེ་དག་གི་ཚུལ་ཇོ་བོའི་དམ་ཚིག་བསྡུས་པ་ལས་ཀྱང་། བླ་མའི་ཞལ་ལས་བྱུང་བའི་དབང་དང་། ཡི་དམ་གྱི་ལྷས་བྱིན་གྱིས་བརླབས་པའི་དབང་དང་། རྡོ་རྗེ་མཁའ་འགྲོ་མས་ལུང་བསྟན་པའི་དབང་དང་། རང་གི་སེམས་ཉིད་ཀྱི་རྩལ་གྱིས་ཐོབ་པའི་དབང་དང་བཞིའོ། །ཞེས་པ་ལྟར་དང་པོ་ནི་དབང་གི་ཆོ་ག་ལ་སྒྲ་ཇི་བཞིན་པར་ལྟོས་པ་དག་དང་། གཉིས་པ་ནི་རྒྱལ་པོ་ཛའི་ཁང་སྟེང་དུ་གླེགས་བམ་བབས་པ་ལྟ་བུ་དང་། གསུམ་པ་ནི་སློབ་དཔོན་ཀླུ་སྒྲུབ་དང་འགྲོ་བཟང་གིས་ཨོ་རྒྱན་དྷརྨཱ་གཉྫོ་ནས་བརྟག་གཉིས་དང་མ་ཧཱ་མ་ཡ་གཉིས་མ་བྱིན་བླང་བས་བདག་གིར་བྱས་པ་ན་མཁའ་འགྲོ་མས་བསྙགས་ཏེ་རྗེས་ལ་ཟིན་པའི་ཚེ་ཆོས་དེའི་བདག་པོ་གྱིས་ལ་ཤོད་ཅིག་ཅེས་རྗེས་སུ་གདམས་པ་ལྟ་བུ་དང་། བཞི་པ་ནི་ཆོས་ཉིད་ཀྱི་ལྟ་བས་ཐོབ་བ་རིག་པའི་རྩལ་དབང་སྟེ་དེ་ལ་བརྟེན་ནས་བསྐུར་བྱའི་སློབ་མས་དངོས་གྲུབ་ཐོབ་པ་ནི་དབང་གི་འབྲས་བུ་ཡིན་པས་ཐ་སྙད་ཁོ་ན་ལའང་ཞེན་པར་མི་བྱའོ། །དེ་ལྟར་རྒྱུད་སྡེ་སོ་སོའི་རང་ལུགས་ཀྱི་དབང་གི་རྣམ་པར་དབྱེ་བ་དང་བསྡུ་བའི་མཐའ་གཅིག་ཏུ་མ་ངེས་ཤིང་ཁྱད་པར་གདུལ་བྱའི་ཁམས་དང་། བསམ་པ་དང་། དབང་པོ་དང་། བག་ལ་ཉལ་དང་། ཉོན་མོངས་པའི་གཉེན་པོར་གསུངས་པ་ཐམས་ཅད་མཐར་གྱིས་དབང་བཞིའི་ངོ་བོར་མ་འདུས་པ་མེད་ལ། འདི་ལྟར་ཕྱི་རོལ་ཏུ་ནམ་ཟླ་དུས་བཞི་དང་། ནང་དུ་ལུས་ངག་ཡིད་སེམས་ཀྱི་ཚོགས་པ་བཞི་དང་། གསང་བར་གཏི་མུག་དང་། ཞེ་སྡང་དང་། འདོད་ཆགས་དང་། ཆ་མཉམ་པ་བཞི་དང་། དོན་དམ་པར་སྐྱེ་བ་དང་། འགག་པ་དང་། འགྲོ་བ་དང་། འོང་བ་བཞིའམ། ཡོད་པ་དང་། མེད་པ་དང་། ཆད་པ་དང་། རྟག་པའི་མུ་བཞི་སྦྱོང་ཕྱིར། བུམ་པ་དང་། གསང་བ་དང་། ཤེས་རབ་ཡེ་ཤེས་དང་། ཚིག་དབང་རིན་པོ་ཆེ་ཡོངས་སུ་རྫོགས་པ་བཞིས་དག་པར་སྦྱང་ཞིང་། ཚོགས་
དང་། སྦྱོར་བ་དང་། མཐོང་བ་དང་། བསྒོམ་པའི་ལམ་བཞི་བགྲོད་ནས། སྤྲུལ་སྐུ་དང་། ལོངས་སྐུ་དང་། ཆོས་སྐུ་དང་། ངོ་བོ་ཉིད་སྐུའི་གོ་འཕང་བཞི་ཐོབ་པར་བྱ་བའི་ཕྱིར་གོང་ནས་གོང་དུ་ལྟ་ཁྱད་ཞུགས་པའི་དབང་བཞི་བྱུང་བ་སྟེ། ཐལ་འགྱུར་ལས། ཕྱི་དང་ནང་དང་གསང་བ་དང་། །གསང་བ་ཡོངས་སུ་རྫོགས་པ་ཡི། །སྡེབས་ནི་རྣམ་པ་བཞི་དག་གིས། །འགྲོ་བའི་ལུས་ངག་ཡིད་སེམས་བཞི། །རྣམ་པར་དག་པར་བྱ་བའི་ཕྱིར། །དབང་ནི་རྣམ་པ་བཞི་ཡིས་ཀྱང་། །སྐལ་པ་ལྡན་པ་སྨིན་པར་བྱ། །ཞེས་སྤྲོས་བཅས་ལ་སོགས་པའི་དབང་གི་ངེས་འབྱེད་བཞིར་བསྡུ་བ་དང་། དེ་དག་ཀྱང་བུམ་དབང་ལ་སོགས་ཏེ་རྒྱུད་སྡེ་སྤྱི་ལ་གྲགས་པའི་དབང་བཞིར་རྒྱུ་འབྲས་ཀྱི་ཚུལ་དུ་འབྲེལ་ཞིང་གོང་ནས་གོང་དུ་ཐེག་པའི་ལྟ་ཁྱད་ཞུགས་པའི་ཚུལ་སངས་རྒྱས་མདུད་པ་ལས། སེམས་ཅན་བསམ་པའི་དབང་གིས་ན། །རྟ་དང་གླང་པོ་མ་ཧེ་དང་། །རྔ་མོ་རི་བོང་ཁལ་རྣམས་བཞིན། །ཕན་དང་ནུས་དང་རྟ་དང་ཞུགས། །ཕྱི་ཡི་དབང་དང་ནང་གི་དབང་། །གསང་བའི་དབང་དང་ཐབས་ཀྱི་དབང་། །ཇི་ལྟར་གསུངས་ཀྱང་རྣམ་པ་བཞི། །བུམ་པའི་དབང་དང་གསང་བའི་དབང་། །ཤེས་རབ་ཡེ་ཤེས་དབང་མཆོག་དང་། །དེ་བཞིན་བཞི་པའི་དབང་དུ་གསུངས། །ཞེས་དཔེ་དང་སྦྱར་ནས་གསུངས་པ་བཞིན་ཕན་པའི་དབང་ནི་བུམ་དབང་གི་བྱེ་བྲག་ཏུ་འདུ་བས་ལུས་ལ་བསྐུར་བའོ། །ནུས་པའི་དབང་ནི་གསང་དབང་གི་བྱེ་བྲག་ཡིན་ནོ། །དེ་ཡང་ངག་ལ་བསྐུར་བའི་ཆ་ནས་གསང་དབང་དང་། སེམས་ལ་བསྐུར་བའི་ཆ་ནས་ཤེར་དབང་དུ་འདུ་བས་བལྟ་བའི་དབང་ཞེས་འདོད་དེ། ཇི་ལྟར་བལྟ་ན་སྦྱོར་བ་བཞིའི་རང་བཞིན་དུ་བལྟ་བའི་ལྟ་བ་བཞི་དང་ལྡན་པ་སྟེ། དེ་སྐད་དུ་སྔ་མ་ལས། ལུས་དང་ཡིག་འབྲུའི་སྦྱོར་བ་དང་། །རྩ་དང་ཡི་གེའི་
སྦྱོར་བ་དང་། །རླུང་དང་ཡིག་འབྲུའི་སྦྱོར་བ་དང་། །སེམས་དང་ཡིག་འབྲུའི་སྦྱོར་བ་ཡི། །གང་ཡང་གང་དུ་གཟུང་བར་བྱ། །ཞེས་སོ། །དེ་ལ་དང་པོའི་དོན་ནི། ལུས་ཀྱི་དབང་པོའི་གནས་སོ་སོར་ས་བོན་གྱི་ཡི་གེ་བསྐྱེད་པ་དང་། གཉིས་པ་ནི་འཁོར་ལོ་ལྔའི་རྩ་འདབ་ཏུ་ས་བོན་གྱི་ཡི་གེ་འགོད་པ་དང་། གསུམ་པའི་དོན་ནི་ས་བོན་གྱི་ཡིག་འབྲུ་ལ་དམིགས་ནས་སྲོག་རྩོལ་འགོག་པ་དང་། བཞི་པའི་དོན་ནི་རླུང་སེམས་དབྱེར་མེད་དུ་འདྲེས་པའི་ཞུ་བདེའི་ཡེ་ཤེས་སྐྱེས་པ་སྟེ། དེ་དག་ཀྱང་ཕན་ཚུན་རྟེན་དང་བརྟེན་པའི་རང་བཞིན་ཅན་ཡིན་པས་ན་ཤེས་རབ་ཡེ་ཤེས་ཀྱང་གསང་བའི་དབང་དུ་གཏོགས་པ་ཡིན་ལ། བཞི་པའི་དབང་ཉིད་ནི་ཤེས་རབ་ཡེ་ཤེས་ཀྱི་ཁོངས་སུ་གཏོགས་པས་ན་ཞུགས་པ་ཞེས་བྱ་བའི་སྒྲས་བསྟན་ཏོ། །ཇི་ལྟར་ཞུགས་ན་དབང་གསུམ་པའི་ཐབས་ལ་བརྟེན་ནས་དོན་དམ་ལྷན་ཅིག་སྐྱེས་པའི་ཤེས་རབ་སློབ་མའི་རྒྱུད་ལ་ཡང་དག་པར་ཞུགས་པས་ན་ཞུགས་པ་ཞེས་བྱ་སྟེ། སྒྲོལ་མ་རྣལ་འབྱོར་མ་ལས། ཤེས་རབ་རྟོགས་པར་བྱེད་པ་ཐབས། །ཤེས་རབ་མེད་ན་ཐབས་མཁས་མེད། །ཅེས་སོ། །དེ་བས་ན་ཐབས་ཀྱི་ནང་ནས་ཀྱང་ཐབས་མཆོག་ཏུ་གྱུར་པ་ལ་བརྟེན་ནས་བྱུང་བས་ན་ཐབས་ཀྱི་དབང་ཤེས་ཀྱང་གསུངས་སོ། །དེ་ལྟར་བཞི་པོའང་རིགས་ཅན་བཞིའི་ཁམས་དང་སྦྱར་ན་སྔགས་རྒྱུད་སྔ་མ་ལས། ཡན་ལག་ལུས་ནི་ཤན་པ་སྟེ། །དྲྭ་བ་ཅན་ལ་བུམ་པ་སྦྱིན། །ངག་གི་ལས་ནི་བྲམ་ཟེ་སྟེ། །འཇིག་རྟེན་ཅན་ལ་གསང་བ་སྦྱིན། །སེམས་ཀྱི་ལས་ནི་རྗེའུ་སྟེ། །ལྷན་ཅིག་སྐྱེས་པ་ཤེས་རབ་དབང་། །ཡོན་ཏན་ཕྲིན་ལས་རྒྱལ་པོ་སྟེ། །ཀུན་ཀ་ཚོགས་ལ་བཞི་ཀ་བསྐུར། །ཞེས་སོ། །དེའང་དབང་གི་ས་བོན་རང་ལ་གནས་པ་གང་ཞིག་རྒྱུ་རྐྱེན་གྱི་རྟེན་ཅིང་འབྲེལ་བར་འབྱུང་བ་ལས་སད་པར་བྱེད་པའི་
ཚུལ། མདོ་སྡེའི་རྒྱན་ལས། ཇི་ལྟར་རྨ་དང་ཟས་ལ་དེ་དག་གིས། །གཟག་དང་སྤྱད་དུ་རུང་བས་སྨིན་འདོད་ལྟར། །དེ་ཕྱིར་རྟེན་འདིར་ཕྱོགས་གཉིས་ཞི་བ་དང་། །ཡོངས་སུ་སྤྱད་པ་ཉིད་དུ་སྨིན་པར་རྟེན། །ཞེས་ཕར་ཕྱིན་དུ་རྟེན་དེ་ཉིད་ལ་མཐོང་སྤངས་སྤོང་བཞིན་པ་དང་། མཐོང་ལམ་སྐྱེ་རུང་ལ་སྨིན་པའི་ཚད་དུ་བཞག་པ་ལྟར་སྔགས་ཀྱི་ལམ་དུ་བར་ཆད་མེད་པའི་དབང་དུ་བྱས་ན། སྐྱེ་བ་འདི་ཉིད་ལ་སྤང་བྱ་སྤང་རུང་དང་ཐོབ་བྱ་ཐོབ་རུང་གི་ནུས་པ་ཐོབ་པའི་ཕྱིར་དབང་གིས་རྒྱུད་སྨིན་པའི་ཚད་དུ་བཞག་སྟེ། དེའང་ཆུ་ལུད་དྲོད་གཤེར་འཛོམ་པ་ལ་ས་བོན་ཐེབས་དགོས་པ་བཞིན་རང་རྒྱུད་ལ་སྐྱེད་བྱེད་འགྲུབ་པའི་རྒྱུ་ཡོད་པའི་ཚུལ། གཞི་དང་ལམ་དང་འབྲས་བུ་དབང་བཞི་རུ། །གདོད་ནས་གྲུབ་པ་རྩ་རླུང་ཐིག་ལེའི་རྟེན། །རང་ཆས་ཉིད་དེ་མཆུངས་པར་ལྡན་པ་དང་། །ལྷན་ཅིག་བྱེད་པའི་རྒྱུ་ནི་རྣམ་གཉིས་ལས། །སྣོད་དུ་རུང་བའི་སློབ་བུ་རྒྱུ་ཡི་རྐྱེན། །ལྟ་དགོངས་ལྡན་པའི་སློབ་དཔོན་བདག་པོའི་རྐྱེན། །ནུས་པའི་ཆོ་ག་མཁྱེན་པ་དམིགས་པའི་རྐྱེན། །རྟེན་ཅིང་འབྲེལ་འབྱུང་དེ་མ་ཐག་པའི་རྐྱེན། །རྒྱུ་གཉིས་རྐྱེན་བཞི་ཚོགས་ལས་དབང་བསྐུར་འགྲུབ། །ཅེས་སྨོས་ཏེ། དེ་ལ་སྔགས་ཀྱི་ཐེག་པ་བླ་ན་མེད་པའི་དབང་དུ་ནི་གཞི་རང་བཞིན་ལྷུན་གྲུབ་ཀྱི་དཀྱིལ་འཁོར་ཆེན་པོ་ཕུང་པོ་ཁམས་དང་སྐྱེ་མཆེད་ཀྱི་རྟེན་དང་བརྟེན་པའི་རང་བཞིན་དུ་རྫོགས་པ་རང་ལ་ཡོད་པ་གང་ཞིག །དབང་གི་ལམ་དུ་ཐབས་ལ་བརྟེན་ནས་སྨིན་པའི་ནུས་རུང་དུ་བྱས་ནས་ལམ་དངོས་བསྐྱེད་པ་དང་རྫོགས་པའི་རིམ་པ་ཟུང་དུ་འཇུག་པ་ཉིད་ལས། འབྲས་བུ་རྡོ་རྗེ་འཆང་གི་གོ་འཕང་ཐོབ་ནས་ཆོས་ཀྱི་འཁོར་ལོ་བསྐོར་བ་ཡིན་ཏེ། བརྟག་གཉིས་ལས། ལུས་ལ་ཡེ་ཤེས་ཆེན་པོ་གནས། །རྟོག་པ་ཐམས་ཅད་ཡང་དག་སྤངས།
དངོས་པོ་ཀུན་ལ་ཁྱབ་བ་པོ། །ལུས་གནས་ལུས་ལས་མ་སྐྱེས་པའོ། །ཞེས་དང་། བསྐྱེད་པ་ཡི་ནི་རིམ་པ་དང་། དེ་བཞིན་རྫོགས་པའི་རིམ་པས་ཏེ། །རིམ་གཉིས་མཉམ་པར་གནས་ནས་ནི། །རྡོ་རྗེ་འཆང་གི་ཆོས་འཆད་དོ། །ཞེས་སོ། །དེའང་དབང་གི་རྟེན་ནི་ཁམས་དྲུག་དག་ལྡན་གྱི་རྡོ་རྗེའི་ལུས་རྩ་རླུང་ཐིག་ལེའི་རྐྱེན་དང་ལྡན་པ་ཁོ་ན་ལས་གཞན་ཡིད་ཀྱི་ལུས་ཅན་གཟུགས་མེད་དང་། འདོད་སྲེད་རགས་པ་བཅོམ་པའི་བསམ་གཏན་བཞི། ཁམས་གཅིག་ནས་ལྔའི་བར་ལས་མི་ལྡན་པའི་གནས་རིགས་ཉི་ཤུ་ལ་སོགས་པ་མ་རིག་པ་སྐྱེ་དང་བཅས་པའི་རང་བཞིན་དུ་དྲན་པ་ཉེ་བར་བཞག་པ་ནས་བསྟན་པ་རྣམས་ཀྱིས་མ་ཡིན་པའི་ཚུལ་འབྲས་བུའི་ཐེག་པ་སྔ་མ་ལས། གཟུགས་མེད་པ་ཡི་རྟེན་རྣམས་ལ། །དབང་རྣམས་བསྐུར་བའི་རྟེན་མེད་དེ། །རྩ་རླུང་རྟོག་པ་མི་དམིགས་པས། །ཡེ་ཤེས་དབང་བསྐུར་ག་ལ་ནུས། །གཟུགས་ཁམས་རྩ་དང་རླུང་ཡོད་ཀྱང་། །ཁམས་ཀྱི་ཟས་དང་བྲལ་བས་མིན། །དེས་ན་འདོད་ཁམས་གནས་རིགས་ནི། །དབང་རྣམས་བསྐུར་བའི་རྟེན་ཡིན་ཏེ། །འདོད་ཆགས་ཞེ་སྡང་གཏི་མུག་དང་། །ང་རྒྱལ་ཁོང་ཁྲོ་ཕྲག་དོག་གིས། །གདུངས་ནས་འདོད་པའི་འདོད་ཁམས་འདི། །དབང་གི་སྣོད་དུ་རུང་བ་ཡིན། །ཞེས་སོ། །དེ་ལྟ་ནའང་དམ་པའི་རིགས་ཅན་ལྔར་གཏོགས་པ་དང་། ཉན་རང་དགྲ་བཅོམ་ལྷག་མེད་དུ་ཞུགས་པ་འགའ་ཞིག་ཡིད་ལུས་ཀྱི་སྔགས་ལམ་ལ་འཇུག་པ་ཡོད་པ་ནི་བསམ་པའི་རྟེན་ཁྱད་པར་ཅན་ཡིན་པས་མ་ངེས་སོ། །གཞན་ལྷ་དང་ལྷ་མིན་སྒྲ་མི་སྙན་གསུམ་ནི་འབྲས་བུ་ལ་སྤྱོད་པས་རྒྱུད་དམན་ལ་གླིང་གསུམ་དུ་སྐྱེས་པའི་ཁམས་དྲུག་ལྡན་ནི་ཁྱད་པར་བ་དང་། དེའི་ནང་ཚན་ལས་ཀྱང་འཛམ་བུའི་གླིང་པ་ནི་ལས་ཀྱི་བར་གྲགས་པས་མཆོག་ཏུ་གྱུར་པའོ། །དབང་གི་ངོ་བོ་ནི།
བདེ་གཤེགས་སྙིང་པོའི་རང་བཞིན་སྤྲོས་པ་མེད་པར་ལྡན་པ་གང་ཞིག་མཚུངས་ལྡན་གྱི་རྒྱུ་ཡིན་ཏེ། དེ་མེད་ན་འདོད་རྐྱལ་དུ་བསྒྲུབ་མི་ནུས་པའི་ཚུལ་དབང་བསྐུར་རྒྱལ་པོ་ལས། དབང་མཆོག་རང་ལ་མེད་གྱུར་ན། བསྐུར་བས་ཐོབ་པ་ག་ལ་འགྱུར། །བྲ་སྲན་འབྲས་སུ་དབང་བསྐུར་ཡང་། །དེ་ལ་འབྲས་ཀྱི་དངོས་སྣང་མེད། །ཅེས་སོ། །དེ་བས་ན་སློབ་མའི་རྒྱུད་ཀྱི་མཚུངས་ལྡན་གྱི་རྒྱུ་ཡིན་པ་གང་ཞིག་ཐབས་ལ་བརྟེན་ནས་འབྲས་བུར་འབྱིན་པ་མེ་ཏོག་ལས་འབྲས་བུར་སྨིན་པ་ལྟ་བུར་བསྒྲུབ་པའི་ཕྱིར་རྡོ་རྗེ་སློབ་དཔོན་གྱི། རྟོག་ཚོགས་སུ་སྣང་བ་ཆོས་ཅན་ཀུན་རྫོབ་ཀྱི་བདེན་པ་ཉིད་དུ་དག་པ་ཏིང་ངེ་འཛིན་གྱི་ནུས་པའི་གཟུགས་ཅན་ལྷན་ཅིག་བྱོད་པའི་རྒྱུའི་རྟེན་ཅིང་འབྲེལ་འབྱུང་གིས་དབང་གི་བྱ་བ་བསྒྲུབས་པ་ལ་བརྟེན་ནས་སློབ་མའི་རྒྱུད་དག་པར་བྱེད་པ་སྟེ། ཧེ་རུ་ཀ་འདུས་པ་ལས། གང་གིས་གང་ལ་དབང་བསྐུར་བས། །རྒྱུད་དག་ནུས་པ་ཐོབ་ཕྱིར་དབང་། །ཞེས་སོ། །དེ་ཡང་དབང་བསྐུར་བྱའི་སློབ་མ་སྣོད་དུ་རུང་བར་བཏགས་པ་རྒྱུའི་རྐྱེན་ཡིན་ཏེ། འདི་ལྟར་དངོས་གྲུབ་ཀྱི་གཙོ་བོ་ནི་དད་པ་དང་དམ་བཅས་པའི་དམ་ཚིག་གཉིས་ཡིན་པས་ང་དང་མི་ལྡན་ན་དངོས་གྲུབ་མི་ཐོབ་ཀྱི་སྟེང་དུ་སྡུག་བསྔལ་གྱི་རྒྱུར་བཤད་པའི་ཚུལ། བྱང་ཆུབ་སེམས་ནི་མ་བསྐྱེད་དང་། ཐེ་ཚོམ་ཡོད་པ་ཉིད་དང་ནི། །གང་ཞིག་བཀའ་བསྩལ་མི་བྱེད་དང་། །མ་དད་པ་ནི་མི་འགྲུབ་བོ། །ཅེས་སོ། །སྐུར་བྱེད་ཀྱི་སློབ་དཔོན་ཡང་བདག་གི་དེ་ཁོ་ན་ཉིད་དང་། ལྷའི་དེ་ཁོ་ན་ཉིད་དང་། གསང་སྔགས་ཀྱི་དེ་ཁོ་ན་ཉིད་དང་། བཟླས་བརྗོད་ཀྱི་དེ་ཁོ་ན་ཉིད་དང་། འཕྲོ་འདུའི་དེ་ཁོ་ན་ཉིད་དེ་སྔགས་ཀྱི་ཡན་ལག་ལྔའི་སྦྱོར་བ་ལ་མཁས་པ་བདག་པོའི་རྐྱེན། དངོས་གྲུབ་ཐོབ་ཅིང་མཁས་པའི་རང་བཞིན་དང་ལྡན་པའི་བླ་མ་རྣམས་ཀྱི་མན་ངག་ཇི་ལྟ་བའི་དབང་གི་བྱ་བ་དང་ཆོ་
ག་མ་ནོར་བ་མཁྱེན་པ་དམིགས་པའི་རྐྱེན་བུམ་དབང་ལ་སོགས་ཏེ་དབང་སྔ་མ་སྔ་མས་ཕྱི་མ་ཕྱི་མའོ་གོ་བྱེ་ནས་བྱིན་གྱིས་བརླབ་པར་རྟོགས་པ་དང་། ཤེས་རབ་ཀྱིས་མངོན་སུམ་པར་རྟོགས་པ་སྟེ་རྟོགས་པ་རྣམ་པ་གཉིས་པོ་དེའི་མཐུ་དང་བྱིན་རླབས་ཀྱིས་སློབ་མ་ལ་ཕན་འདོགས་ཤིང་དབང་སོ་སོའི་གོ་བརྡའ་འཕྲོད་པར་བྱེད་པ་ནི་དེ་མ་ཐག་པའི་རྐྱེན་ཏེ། དེ་ལྟ་བུའི་རྒྱུ་གཉིས་དང་རྐྱེན་བཞི་ཚོགས་པ་ལ་བརྟེན་ནས་དངོས་གྲུབ་ཐོབ་རུང་གི་ནུས་པ་རྒྱུད་ལ་སྨིན་ན་ལམ་དང་འབྲས་བུའི་གོ་འཕང་གི་ཆོས་མཐའ་དག་པའི་ཡོན་ཏན་བསྐྱེད་ནས་རྟོགས་པའི་དབང་མཆོག་ཐོབ་པའི་ཆུལ་རང་ཤར་ལས། རྟོགས་པ་ཡེ་ཤེས་དབང་མཆོག་ནི། །ཅིར་སྣང་རིག་པར་ཤེས་པའོ། །རིག་པ་དགག་བསྒྲུབ་མེད་པ་ནི། །དབང་རྣམས་དུས་ཅིག་རྫོགས་པའོ། །དབང་རྣམས་གྲོལ་བྱེད་གདམས་ངག་གོ །དམིགས་མེད་དཀྱིལ་འཁོར་ཆེན་པོ་ཉིད། །དབང་ཉིད་རང་ལ་ཡོད་པའོ། །ཞེས་སོ། །དེའང་སྦས་དོན་དུ་རྟེན་དང་བརྟེན་པའང་ག་ཚུལ་གྱི་སྒོ་ནས་གཉེན་པོ་གྲངས་ངེས་ལྟར་གཞག་པ་ནི་གསང་བ་སྒྱུ་འཕྲུལ་པའི་ལུགས་ཀྱི་ཕན་ནུས་ཀྱི་དབང་བཅོ་ལྔ་དང་། གསང་དབང་གསུམ་རླུང་སེམས་རྩ་དང་ཐིག་ལེའི་རང་བཞིན་དང་དག་བྱ་དག་བྱེད་དུ་སྦྱར་བའི་ཚུལ། གཉེན་པོ་གྲངས་ངེས་སྒོ་ནས་བཞག་པ་ནི། །ལུས་ཀྱི་གཙོ་བོར་གྱུར་པ་རྩ་ཡིན་ཏེ། །རྩ་ཡི་རྣམ་པ་ཡི་གེའི་གཟུགས་སུ་གནས། །དེ་ལ་རླུང་བརྟེན་རླུང་ལ་ཁམས་རྣམས་བརྟེན། །ཁམས་ལ་དོན་དམ་བྱང་ཆུབ་སེམས་བརྟན་ཞི། །ཞེས་སྨོས་ནས། །དེ་ལ་སྤྱིར་འགྲོ་བ་རྣམས་རང་རང་གི་ལས་དང་འཁྲུལ་པའི་དབང་གིས་གནས་རིགས་དྲུག་ཏུ་འཁོར་བ་ལས། ཁྱད་པར་མཐོ་རིས་ཀྱི་རྟེན་ཁམས་དྲུག་ལྡན་རྣམས་ནི་མང་ལ་གནས་འཛིན་པའི་ཐོག་མར་མིག་གཉིས་དང་ལྟེ་པའི་རྩ་མདུད་ཆགས་ཏེ་
དེ་ལས་ལུས་རྣམས་བསྐྱེད་པས་ན་གནས་པ་རྩ་ནི་ལུས་ཀྱི་དག་བྱའི་གཙོ་བོ་ཡིན་པས་དེའི་གཉེན་པོར་སྐུ་རྡོ་རྗེ་བུམ་པའི་དབང་། དེ་ལ་གཡོ་བྱེད་ཀྱི་རླུང་བརྟེན་ནས་བྱེད་ལས་སྣ་ཚོགས་སུ་ཤར་བ་ནི་ངག་གི་དག་བྱའི་གཙོ་བོ་ཡིན་པས་དེའི་གཏེན་པོར་གསུང་རྡོ་རྗེ་གསང་བའི་དབང་། དེ་ལ་བཀོད་པ་བྱང་ཆུབ་ཀྱི་སེམས་ཁམས་ཀྱི་དངས་མ་ཆེན་པོ་བརྟེན་པས་རྩ་ཡུར་བ་ལྟ་བུའི་ནང་དུ་ཁམས་རགས་པ་ཆུ་རྒྱུན་ལྟ་བུ་དེ་རླུང་གིས་བ་སྤྱོད་ནས་འགྲོ་འོང་ཅན་དུ་གནས་པ་དེའི་གཉེན་པོར་ཐིག་ལེ་བདེ་བ་ཆེན་པོར་དག་ཅིང་སྨིན་པ་ཐུགས་རྡོ་རྗེ་ཤེས་རབ་ཡེ་ཤེས་ཀྱི་དབང་། དེ་དང་རྗེས་སུ་མཐུན་པར་དོན་དམ་པའི་བྱང་ཆུབ་ཀྱི་སེམས་ཀྱང་རླུང་གི་ཆ་དེས་ཁུར་ནས་སྐྱོན་ཡོན་སྣ་ཚོགས་བསྐྱེད་པ་ནི་ཡིད་ཀྱི་དག་བྱ་ཡིན་ནོ། །དེའི་གཉེན་པོར་ཡེ་ཤེས་རྡོ་རྗེ་དབང་བཞི་པས་སེམས་དག་ཅིང་སྨིན་པར་བྱེད་པས་དབང་བཞིར་བྱུང་བ་སྟེ། དེ་སྐད་དུ་སྒྱུ་འཕྲུལ་ཆེན་མོ་ལས། རོ་མ་རྐྱང་མ་ཀུནྡྷར་མ། །འཁོར་ལོ་སོ་སོའི་དཀྱིལ་དག་ན། །ཀ་བའི་ཚུལ་དུ་གནས་པ་ལ། །ཡལ་ག་འདབ་མ་གྲངས་ལས་འདས། །ཁམས་དང་རླུང་ནི་འབབ་པ་ཡི། །ཡེ་ཤེས་རྩ་ནི་སྟོང་ཕྲག་གཅིག །བདུན་ཅུ་རྩ་གཉིས་བསྒྲེས་པ་ཡི། །ཉི་ཁྲི་ཆིག་སྟོང་དྲུག་བརྒྱའི་རླུང་། །འགྱུ་བ་ཆེན་མོར་འདོད་པ་སྟེ། །གཞན་ནི་བཞི་སྟོང་བརྒྱད་ཁྲིའོ། །ཞེས་པས་རྩ་རླུང་ཐིག་ལེའི་བཞུགས་ཚུལ་བསྟན་ལ། དེ་ཟབ་དབང་དུ་བསྐུར་བའི་ཚེ་རླུང་སེམས་རྩ་ཐིག་ལ་བརྟེན་པ་ལུས་དཀྱིལ་དང་འབྲེལ་བའི་ཚུལ་ལམ་རིམ་ལས། གནས་རྟེན་རྩ་དང་ཐིག་ལེ་ལ། །བཅུ་དབང་ལྔ་གསུམ་དབང་རྣམས་ལྡན། །ཞེས་སོ། །གཉིས་པ་དབང་བཞི་སོ་སོའི་ངེས་པ་བྱེ་བྲག་ཏུ་བཤད་པ་ནི། སྔགས་ནི་འདོད་ཡོན་གྱི་ལམ་ཡིན་པས་གནས་རིགས་སོ་སོའི་འདོད་ཆགས་རྣམ་པ་བཞིའི་
དག་བྱ་དག་བྱེད་ཀྱི་ངོས་ནས་དབང་བཞིར་ངེས་པའི་ཚུལ་སྡོམ་པའི་རྩ་རྒྱུད་ལས། དགོད་དང་བལྟ་དང་ལག་འཛིན་དང་། །འཁྱུད་དང་གཉིས་སྤྲོས་ལ་སོགས་ལ། །དབང་བཞི་བསྐུར་པར་གྱུར་པ་ཡིན། །ཞེས་པ་ལྟར་ལས། དང་པོ་བུམ་པའི་དབང་གི་རང་བཞིན་སྟེན་པའི་ཕྱིར། འདོད་པའི་ཁམས་ཀྱི་གང་ཟག་རང་རྒྱུད་པ། །ཀུན་ལ་འདོད་ཆགས་རྣམ་བཞིར་གནས་པ་སོགས། །དག་བྱ་དག་བྱེད་ལ་བརྟེན་ངེས་པ་ཡང་། །དང་པོ་བལྟས་པས་ཚིམ་པའི་འདོད་ཆགས་ནི། །གཞན་འཕྲུལ་དབང་བྱེད་པ་ལ་གནས་པ་སྟེ། །རྡུལ་ཚོན་དཀྱིལ་འཁོར་ལ་བརྟེན་བུམ་པའི་དབང་། །བསྐུར་བས་གཙོ་བོར་ལུས་ཀྱི་སྒྲིབ་པ་འདག །སྣོད་བཅུད་བརྟན་གཡོ་ཕུང་ཁམས་སྐྱེ་མཆེད་ཀུན། །གདན་གསུམ་ཚང་བའི་དཀྱིལ་འཁོར་གཅིག་ཏུ་ཤར། །སྣང་སྟོང་ཟུང་འཇུག་ངོ་བོ་ཉིད་གསུམ་གྱི། །གྲུབ་མཐའ་འཁོར་འདས་གཉིས་མེད་ཆེན་པོ་ལ། །འདའ་དཀའ་འོད་ཀྱི་གོང་བུ་སྒྲ་ཡིས་འཕོ། །རྩ་ཡི་འགྲོས་ཐིམ་བསྐྱེད་རིམ་སྤྲུལ་པའི་སྐུ། །མཁའ་ཁྱབ་སྐུ་ཡི་རྡོ་རྗེ་འདུས་མ་བྱས། །ཞེས་སྨོས་ནས། དེ་ལ་གཞན་འཕྲུལ་དབང་བྱེད་པ་རྣམས་ནི་གཅིག་ལ་གཅིག་བལྟ་བའི་འདོད་ཆགས་ཀྱིས་གདུང་པར་བྱེད་པས། དག་བྱ་དེའི་གཉེན་པོར་དག་བྱེད་བུམ་པའི་དབང་གི་ལམ་གཟུགས་བརྙན་ཐབས་ཀྱི་དཀྱིལ་འཁོར་རྡུལ་ཚོན་ནམ། དེའི་ཟླས་དྲང་པའི་ཆུ་ཚོན་གྱི་དཀྱིལ་འཁོར་དུ་བསྐུར་བ་སྟེ་རང་ཤར་ལས། གཟུགས་བརྙན་དཀྱིལ་འཁོར་ཆེན་པོ་ནི། །དབང་བསྐུར་དམ་པ་བྱེད་པའི་ཚེ། །དཀྱིལ་འཁོར་རྣམ་པ་གཉིས་སུ་འདོད། །ཅེས་པའི་བར་གྱི་ཞི་ཁྲོའི་དཀྱིལ་འཁོར་གཉིས་བསྟན་ཏོ། །ཆུ་ཚོན་ནི་མི་གཡོ་བླ་མེད་ལས། ཡང་ན་དཀྱིལ་འཁོར་བྲི་བྱ་བ། །རས་བྲིས་ཚུལ་དུ་བྲི་བར་བྱ། །ཞེས་སོ། །དེ་ཡང་སྔོན་ནས་གོམས་པའི་རང་བཞིན་ཤེས་ཤིང་། བློ་ཆེན་གྱི་སྐལ་བས་རྒྱུད་
དག་པ་ཁ་ཅིག་ལ་ནི་ལུས་དཀྱིལ་ཉིད་ཀྱང་བསྔགས་པའི་ཚུལ། དུས་ཀྱི་འཁོར་ལོ་ལས། ལུས་ཀྱི་དབང་པོ་བྷ་ག་སེམས། །སྐུ་གསུང་ཐུགས་ཀྱི་རྡོ་རྗེ་ཡི། །དཀྱིལ་འཁོར་རྣམ་པ་གསུམ་དུ་འགྱུར། །གཞན་པ་ཚོན་ལྔ་ལྡན་པས་མིན། །ཞེས་པའི་བུམ་དབང་ཕྱག་རྒྱ་མའི་ལུས་དང་། བུམ་པའང་ནུ་མ་ལ་བཤད་པའི་ཕྱིར་རོ། །དེ་བས་ན་གང་ཟག་གི་བྱེ་བྲག་ལ་ལྟོས་ནས་འཇུག་ཚུལ་མ་ངེས་པ་ཉིད་ཀྱང་ད་ནི་སྙིགས་མ་ལྔའི་མཐར་ཐུག་པས་འཕགས་པའི་རྒྱུད་ལྡན་གྱི་བླ་མ་དང་། སློབ་མ་ཡང་ལས་སད་གཅིག་ཅར་བ་ཤིན་ཏུ་དཀོན་པས་ཚོན་དཀྱིལ་ཁོ་ན་ལ་ཆེད་དུ་བྱ་བའོ། །ཇི་ལྟར་བསྐུར་བའི་ཚུལ་ནི་སློབ་མས་སློབ་དཔོན་ལ་མཎྜལ་དབུལ་བ་ལ་སོགས་པའི་དབང་གི་སྔོན་དུ་འགྲོ་བ་རྣམས་ཆོ་ག་སོ་སོའི་རང་ལུགས་བཞིན་ལ་རྒྱས་པའི་ཡན་ལག་ཏུ་སློབ་མའི་བྱུར་དང་སྡིག་པ་སྦྱང་བའི་རིམ་པ་རབ་ཏུ་གནས་པ་བཞིན་འཆད་པའང་ཡོད་ལ། དབང་གི་དོན་དུ་གསོལ་བ་གདབ་ཚུལ་ཁྱབ་ཆེ་བ་ནི། བྱང་ཆུབ་རྡོ་རྗེས་སངས་རྒྱས་ལ། །མཆོད་ཆེན་ཇི་ལྟར་བསྩལ་བ་ལྟར། །བདག་ཀྱང་ཡོངས་སུ་བསྒྲལ་བའི་ཕྱིར། །ནམ་མཁའི་རྡོ་རྗེ་དང་བདག་སྩོལ། ཞེས་པ་སྟེ། དེ་ལ་བྱང་ཆུབ་རྡོ་རྗེའི་རྡོ་རྗེ་འཆང་སྟེ། དེས་སངས་རྒྱས་མི་བསྐྱོད་པ་ལ་སོགས་པ་ལ་མཆོད་པ་ཆེན་པོ་དབང་གི་བྱ་བ་བསྩལ་བ་སྟེ་ཇི་ལྟར་བསྐུར་བ་དེ་བཞིན་དུ། བདག་ཀྱང་འཁོར་བའི་རང་བཞིན་ལས་རབ་ཏུ་བསྒྲལ་བའི་ཕྱིར། ནམ་མཁའི་རྡོ་རྗེ་ཞེས་སློབ་དཔོན་ལ་རྡོ་རྗེ་འཆང་དང་རྣམ་དབྱེ་མེད་པར་བོས་ནས་དེང་བདག་སྩོལ་ཏེ་གནས་སྐབས་གཞན་དུ་མ་ཡིན་པར་སྟན་ཐོག་འདི་ཉིད་དུ་བདག་ལ་དབང་བསྐུར་བ་སྩོལ་ཞེས་པའི་དོན་དུ་སྒྲོན་གསལ་ལས་བཤད་དོ། །དེ་ནས་དཀྱིལ་འཁོར་གྱི་ཤར་
ཕྱོགས་སུ་ཁྲུས་དཀྱིལ་རེ་ཁ་གྲུ་བཞི་པ་སྣ་ཚོགས་པདྨས་མཚན་པའམ། ཡང་ན་རྟ་བབས་མེད་པའི་སྒོ་ཁྱུད་གཅིག་པ་ནུབ་བསྟན་གྱི་དབུས་སུ་པདྨ་འདབ་བརྒྱད་དང་། ཤར་ལ་སོགས་པའི་སྣམ་བུ་ལ་རིགས་ལྔའི་མཆན་མ་ཕྱོགས་ཀྱི་མཚོན་པར་བྱས་པའི་མཚམས་བཞི་བོར་ཡུམ་བཞིའི་མཚན་མ་རྡུལ་ཚོན་ནམ། འབྲས་ཕྱེའི་ཁུ་བས་བྲིས་པའི་སྟེང་། དབང་སྟེགས་ཀྱི་ཤིང་སྟན་ལ་པདྨ་འདབ་བརྒྱད་དམ། ཟླ་དཀྱིལ་བྲིས་པས་བཀབ་པའི་སྟེང་སློབ་མ་དངོས་སུ་བཞག་པའམ། མ་བདེན་མོས་པས་དཀྱིལ་འཁོར་ལ་མངོན་དུ་ཕྱོགས་པར་བྱའོ། །དེ་ནས་དབང་བསྐུར་བ་དངོས་ནི། སྐུ་རྡོ་རྗེ་སྤྲུལ་སྐུའི་ངོ་བོ་བླ་མ་དང་གཉིས་སུ་མེད་པའི་དཀྱིལ་འཁོར་གྱི་ལྷས་བུམ་དབང་བསྐུར་བའི་དགོངས་པ་གཏད་ནས་ཐུགས་ཀ་ལ་སོགས་པ་ནས་རིགས་ལྔ་སོ་སོའི་ངོ་བོ་ཉིད་ཀྱི་དབང་རྫས་རྣམས་བྱུང་བར་མོས་ཤིང་སློབ་མ་ཡང་ལྷག་པའི་ལྷ་གང་ཡིན་དུ་གསལ་ནས་བསྐུར་བའམ། སྤྲོ་ཞིང་ནུས་ན་སློབ་མ་ལ་སྔར་ལྟར་ནང་དབང་བསྐུར་བའི་དམིགས་པས་རྡོ་རྗེའི་ལམ་ནས་བརྒྱུད་རིག་མའི་པདྨར་བཞག་པ་མེ་དམིགས་པའི་ངང་ལས་ཆོ་ག་གསུམ་གྱི་དབང་རྫས་དང་མཐུན་པའི་ལྷར་བསྐྱེད་ནས་དབང་བསྐུར་བའི་དོན་དུ། སློབ་དཔོན་གྱིས་དབང་ལྷ་ལ་གསོལ་བ་གདབ་པ་ནི། རྡོ་རྗེ་ཅན་གྱིས་སངས་རྒྱས་ལ། ཞེས་པའི་རྐང་པ་བཞི་བརྗོད་པ་དང་ལྷན་ཅིག་སྙིང་གའི་འོད་ཟེར་གྱིས་ཕྱོགས་བཅུའི་དེ་བཞིན་གཤེགས་པ་སྲས་དང་བཅས་པ་གདན་གསུམ་ཚང་བའི་དཀྱིལ་འཁོར་གྱི་རྣམ་པར་སྟེང་གི་ནམ་མཁའ་ལ་གསར་དུ་སྤྱན་དྲངས་པས་དབང་གི་བྱ་བ་བྱེད་པར་མོས་པའི་ཕྱོགས་གཉིས་ཡོད་དེ། དེ་ལ་གདན་གསུམ་ནི། ཕུང་ཁམས་གཤེགས་
པ་གཤེགས་མའི་གདན། །སྐྱེ་མཆེད་སེམས་དཔའ་སེམས་མའི་གདན། །ལས་དབང་བྱ་བ་དང་བཅས་སམ། །ཡན་ལག་ཁྲོ་བོ་ཁྲོ་མོའི་གདན། །ཞེས་པས་རྒྱུ་དུས་ཀྱི་ཕུང་པོ་ལྔ་དང་ཁམས་ལྔ་ནི། འབྲས་བུའི་དུས་ན་སངས་རྒྱས་མི་བསྐྱོད་པ་ལ་སོགས་པའི་སྟང་དཔྱལ་ལྔ་དང་། །སྐྱེ་མཆེད་རྣམས་ནི་རྣམ་ཤེས་དག་པའི་ནང་སེམས་བཞི་དང་། དབང་པོ་དག་པའི་ཕྱི་སེམས་བཞི། དེ་ལ་ཡུལ་བཞི་དང་། དུས་བཞི་གནས་སུ་དག་པའི་སེམས་མ་བསྡམས་པའི་སྟང་དཔྱལ་བརྒྱང་། ཡན་ལག་བཞིན་ལུས་ཀྱི་རྣམ་ཤེས་དང་། དབང་པོ་དང་། རེག་བྱ་དང་། རེག་ཤེས་བཞི་གནས་སུ་དག་པའི་སྒོ་བ་བཞི་སྟེ། དེ་ལ་རྟག་པར་བལྟ་བ་དང་། ཆད་པར་བལྟ་བ་དང་། བདག་ཏུ་བལྟ་བ་དང་། མཚན་མར་བལྟ་བ་བཞི་གནས་སུ་དག་པའི་ཡུམ་གྱིས་བསྡམས་པའི་སྟང་དཔྱལ་བཞི་སྟེ་གདན་གསུམ་ཚང་བའི་ལྷ་སུམ་ཅུ་སོ་བཞི་ལས། སངས་རྒྱས་རྣམས་ཀྱིས་ནི་དབང་བསྐུར་བའི་དགོངས་པ་མཛད། རིག་པའི་ལྷ་མོ་རྣམས་ཀྱིས་ནི་བཞེངས་ནས་བུམ་པ་ཡོ་བར་བཟུང་སྟེ་དབང་བསྐུར། དབང་ཡུལ་གྱི་སེམས་དཔའ་སེམས་མ་རྣམས་ཀྱིས་ནི་བཀྲ་ཤིས་གང་ཞིག་ལ་སོགས་པའི་ཚིག་གིས་མེ་ཏོག་གཏོར་ཞིང་ཤིས་པ་བརྗོད། ལས་དབང་གི་ཁྲོ་བོ་ཁྲོ་མོས་བགེགས་བསྐྲད་པར་མོས་ཤིང་དབང་སོ་སོའི་མཇུག་ཏུ་དབང་ལྷ་ཡང་སློབ་མ་ལ་བསྟིམ་པ་ཡིན་ནོ། །དེ་ཡང་དབང་ལྷ་གསར་དུ་སྤྱན་དྲངས་ཀྱང་མཐའ་གཅིག་ཏུ་གདན་གསུམ་ཚང་བའི་རྣམ་པ་དང་གྲངས་ངེས་ཅན་དུའང་མ་ངེས་ཏེ། རྡོ་རྗེ་སྙིང་པོ་རྒྱན་གྱི་རྒྱུད་ལས། ཏིལ་གྱི་གང་བུ་བཞིན་གང་བའི། །རྒྱལ་བས་བུམ་པ་བཟུང་ནས་ནི། །ཞེས་གསུངས་པས་ཤེས་སོ། །དེ་ལ་དབང་བསྐུར་བའི་
ཚིག་གིས་དབུགས་འབྱིན་པ་ནི། དབང་བསྐུར་རྡོ་རྗེ་ཆེན་པོ་སྟེ་ཞེས་རྐང་པ་བཞིའི་དོན་ནི། དབང་བསྐུར་བ་ནི་རྡོ་རྗེ་སྟེ་འདོར་དུ་མི་རུང་ལ། གཞོམ་གཞིག་དང་བྲལ་བའི་དོན་དང་། ཆེན་པོ་ནི་དེའི་སྤྱི་བོ་ན་གཞན་མེད་པས་སོ། །ཁྱད་པར་ཆེན་པོ་དེ་ནི་ཁམས་གསུམ་ཀུན་གྱི་རྒྱལ་པོར་གྱུར་པས་ཕྱག་བྱས་པའི་སྒྲས་བསྟན་ལ། རྡོ་རྗེ་ནི་རྡོ་རྗེ་འཆང་སྟེ་དེའི་གསང་བ་གསུམ་གྱི་ཡོན་ཏན་གང་ཡིན་པའི་རིགས་ལས་སྐྱེས་པ་འདི་ནི་དེང་ཁྱོད་ལ་སྦྱིན་པར་བྱའོ། །ཞེས་པའི་དོན་ཏོ། །ཚིག་འདི་ནི་རིག་དབང་ལྔ་ཀའི་མགོར་སྦྱར་བའང་ཡོད་དེ། །དེ་ལ་ཕྱི་མ་ལྟར་ན་དབང་ལྷ་གསར་དུ་སྤྱན་དྲངས་པ་ལས་དབང་ཐོབ་ན་རྡུལ་ཚོན་གྱི་དཀྱིལ་འཁོར་དེ་ལ་དབང་ཐོབ་པར་ཅིས་འགྱུར་སྙམ་ན། དེ་དང་གཉིས་སུ་མེད་པའི་རྡོ་རྗེ་སློབ་དཔོན་གྱིས་དབང་བསྐུར་བའི་དགོངས་པ་གཏད་པས་དབང་ནི་དེ་ལས་ཐོབ་པ་ཁོ་ན་ཏེ། དཔེར་ན་ཤེར་སྙིང་སྟོན་པ་ན། དེའི་ཚེ་བཅོམ་ལྡན་འདས་ཟབ་མོ་སྣང་བ་ཞེས་བྱ་བའི་ཆོས་ཀྱི་རྣམ་གྲངས་ཀྱི་ཏིང་ངེ་འཛིན་ལ་སྙོམས་པར་ཞུགས་སོ། །ཞེས་པ་ལྟར་ཏིང་ངེ་འཛིན་དེའི་མཐུ་ལས་སྤྱན་རས་གཟིགས་དང་ཤཱ་རིའི་བུས་འདྲི་བ་དང་ལན་ལྡོན་པའི་སྤོ་བས་པ་ཐོབ་པས་ཆོས་ཀྱི་རྣམ་གྲངས་དེ་བྱུང་བ་ལྟ་བུའོ། །དོན་འདི་ཁོང་དུ་ཆུད་ན་ཆོས་ཐམས་ཅད་རྒྱལ་བའི་དགོངས་རྒྱུད་གཅིག་ཏུ་གནས་པ་ཡིན་ཏེ། སྒྲོན་མ་རྣམ་པར་བཀོད་པ་ལས། །དགོངས་པ་བརྡའ་དང་སྙན་རྒྱུད་ནས། །གསང་སྔགས་དོན་གྱི་ཚད་མ་འབྱུང་། །ཞེས་སོ། །ཅིའི་ཕྱིར་རིག་པའི་དབང་དུ་བཞག་ན། མ་རིག་པའི་རང་བཞིན་ལྔ་ཡོངས་སུ་གྱུར་པའི་ངོ་བོ་རིག་པའི་ཆོས་ཉིད་སངས་རྒྱས་ལྔ་དང་ཡེ་ཤེས་ལྔའི་བདག་ཉིད་དུ་སད་པར་བྱེད་པས་ན་དེ་སྐད་དུ་གྲགས་ཏེ་ཕྲེང་བ་ལས། སངས་རྒྱས་ལྔར་ནི་རྣམ་དག་
པའི། །དབང་བསྐུར་ལྔ་ཐོབ་རྒྱུ་ལས་ནི། །མ་རིག་པ་དང་བྲལ་བས་ན། །ཡེ་ཤེས་ལྔ་ནི་ཐོབ་པར་འགྱུར། །ཞེས་སོ། །དེའང་ཆུ་དབང་གིས་དྲི་མ་འཁྲུད་པ་དང་། དབུ་རྒྱན་བསྐོན་པ་དང་། རྡོར་དྲིལ་གཏོད་པ་དང་། མིང་གདགས་པ་ལྔ་པོ་ནི་སྐྱེད་བྱེད་འགྲུབ་པའི་རྒྱུ་ཡིན་ལ། དབང་གི་ངོ་བོ་ནི་ཆུ་དབང་ལ་མཚོན་ན་སྤྱི་ཙམ་དུ་སློབ་མ་མི་བསྐྱོད་པར་བསྐྱེད་ནས་དབང་རྫས་མི་བསྐྱོད་པ་ཞུ་བའི་ཆུས་གཏོར་བླུད་བྱས་པས། དེའི་རྒྱུད་ཀྱི་རྣམ་ཤེས་ཀྱི་ཕུང་པོ་དང་། ཉོན་མོངས་པ་ཞེ་སྡང་སྦྱོང་། མེ་ལོང་ཡེ་ཤེས་མངོན་དུ་བྱས་པར་བསྒོམས་ཏེ། ཕྲེང་བ་ལས། རྣམ་རྒྱལ་བུམ་པ་བླངས་ནས་ནི། །པདྨའི་སྒོ་ནི་བཟང་པོ་ལ། །ཧཱུྃ་རྡོར་ལས་བྱུང་མི་བསྐྱོད་བསྒོམ། །རང་ཉིད་ཡེ་ཤེས་ས་བོན་གྱི། །འོད་ཟེར་ཡང་དག་བསྐུལ་ལས་བྱུང་། །སླར་ཡང་ཡེ་ཤེས་སེམས་དཔའ་བསྒོམ། །མི་བསྐྱེད་པ་ཡི་རྣམ་པ་མཆོག །ཅེས་སོ། །དམིགས་བསལ་ནི་མེ་ཏོག་གང་ལ་ཕོག་པའི་ལྷར་བསྐྱེད་ནས་རང་གི་ལྷ་ཞུ་བའི་བུམ་ཆུ་སྤྱི་བོར་གཏོར་ཞིང་། ཕྱི་ནང་གི་དྲི་མ་འཁྲུད་པར་བྱས་པ་ལས་དེའི་རྒྱུད་ཀྱི་དག་བྱ་དག་འབྲས་ཀྱང་ལྷ་དེ་དང་དེའི་རིགས་དང་ཡེ་ཤེས་ལ་སྦྱར་ཤེས་པར་བྱའོ། །དེའང་དེ་བཞིན་གཤེགས་པ་ལ་ཕོག་ན་རིན་ཆེན་གྱི་ཅོད་པན་ནམ་དབུ་རྒྱན། དེ་བཞིན་གཤེགས་པའི་རྡོ་རྗེ། དེས་མཚོན་པའི་ དྲིལ་བུ ་དང་མིང་། དེ་བཞིན་གཤེགས་པའི་རིགས་ལ། དེ་བཞིན་གཤེགས་པ་ལྔའི་ཅོད་པན་དང་། དང་པོའི་རྡོ་རྗེ་དང་། དེས་མཚོན་པའི་ དྲིལ་བུ ་དང་མིང་། རྡོ་རྗེའི་རིགས་ལ་སངས་རྒྱས་ལྔ་དང་། རྡོ་རྗེ་ཕྲེང་བའི་ཅོད་པན་དང་། ཁྲོ་བོའི་རྡོ་རྗེ་དང་། ཁྲོ་བོའི་ དྲིལ་བུ ་དང་མིང་། །པདྨའི་རིགས་ལ་འོད་དཔག་མེད་དང་། པདྨའི་ཕྲེང་བའི་ཅོད་པན། རྡོ་རྗེ་པདྨ་དང་། པདྨའི་ དྲིལ་བུ ་
དང་མིང་། ནོར་བུའི་རིགས་ལ། རིན་ཆེན་མྱུ་གུའི་ཅོད་པན་དང་མིང་རྡོ་རྗེ་རིན་ཆེན་དང་། རིན་ཆེན་ དྲིལ་བུ ་དང་མིང་། ལས་ཀྱི་རིགས་ལ་སྣ་ཚོགས་རྡོ་རྗེའི་ཅོད་པན་དང་། སྣ་ཚོགས་རྡོ་རྗེ་དང་། སྣ་ཚོགས་ དྲིལ་བུ ་དང་མིང་གིས་དབང་བསྐུར། དེའང་མིང་དབང་ནི། མེ་ཏོག་ཕོག་པའི་རིགས་ཀྱི་མིང་གི་མགོ་བོར་ཀྱཻ་ཞེས་འབོད་བའི་སྐྲ་དང་། དཔལ་དང་རྡོ་རྗེའི་མགོ་ཅན་དུ་གདགས་པའི་ཚུལ་དཱ་རི་ཀ་པས། དཔལ་དང་རྡོ་རྗེའི་སྒྲ་ལྡན་པར། །སློབ་དཔོན་གྱིས་ནི་ལན་གསུམ་བརྗོད། །ཅེས་པ་ལྟར་རྡོར་དྲིལ་མགོ་ཐོག་ཏུ་བཟུང་ནས་ལན་གསུམ་བརྗོད་པ་ཡིན་ན། །དེ་བཞིན་དུ་དབུ་རྒྱན་སོགས་ལའང་སློབ་མ་རིན་འབྱུང་དང་། ཚོར་བའི་ཕུང་པོ་སོགས་དག་བྱ་ངག་འབྲས་སྦྱར་ཤེས་པར་བྱ་བའི་ཚུལ་ཕྲེང་བར། ས་བོན་ཏྲཱཾ་ལས་བྱུང་བ་ཡི། །རིན་ཆེན་འབྱུང་ལྡན་བསྒོམས་ནས་ནི། །རི་མོ་དར་སོགས་ཅོད་པན་ཡང་། །སློབ་མའི་མགོ་ལ་སྦྱིན་པར་བྱ། །སོགས་རིམ་པར་གསུངས་སོ། །དེ་ལྟར་རིག་པའི་དབང་ཐོབ་པས་དེའི་རིགས་སུ་སྐྱེས་པའི་ཕྱིར་རིགས་ཀྱི་བྱ་བ་ལས་མི་འགོང་ཞིང་དེའི་ཡན་ལག་གི་དམ་ཚིག་དང་ངེས་གཉིས་ལས་རྣལ་འབྱོར་རྒྱུད་ཀྱི་རང་ལུགས། ཁྱོད་ཀྱིས་སྲོག་ཆགས་གསད་མི་བྱ། །མ་བྱིན་པར་ཡང་མི་བླང་ངོ་། །འདོད་པ་ལོག་པར་མི་སྤྱད་ཅིང་། །རྫུན་དུ་སྨྲ་བར་མི་བྱའོ། །འཕུང་ཀྲོལ་ཀུན་གྱི་རྩ་བ་ཡི། །ཆང་ནི་རྣམ་པར་སྤང་བར་བྱ། །ཞེས་བསླབ་པའི་གཞི་ལྔ་ལ་བསླབ་ཅིང་། རྩེ་མོ་ལས་ཀྱང་བསླབ་པ་ལྔ་ལ་རྣམ་པར་གནས། །ཞེས་པས་བླ་མེད་དང་ཡང་ཐུན་མོང་ཡིན་ནོ། །དབང་བར་བྱེད་པའི་ཆ་ནས་ཕུང་པོ་ལྔ་དང་འབྱུང་བ་ལྔ་གནས་འགྱུར་ཐོབ་པའི་འབྲས་བུ་དེ་བཞིན་གཤེགས་པ་ལྔའི་སྤངས་རྟོགས་ཀྱི་རང་བཞིན་ལ་སྦྱོར་བའོ། །དེ་ལྟ་ནའང་མཐར་གྱི་ནི་གོ་བ་དེ་ཙམ་གྱིས་ཉོན་མོངས་པ་དང་མ་རིག་པའི་ཆ་བཟློག་མི་
ནུས་ཏེ། དེས་ནི་སྦྱོང་གཞི་སྦྱོང་བྱེད་ལྟར་འཛིན་པའི་གཉིས་སུ་སྣང་བ་མ་སྤངས་པའི་ཕྱིར་རོ། །འདི་ལྟར་ཆུ་དབང་ལ་མཚོན་ན་སྦྱང་གཞིའི་རྣམ་པར་ཤེས་པ་དང་། ཞེ་སྡང་དེ་མ་རིག་པ་གློ་བུར་བས་བསླད་པའི་བློའི་འཛིན་སྟངས་ཀྱི་དེ་དང་དེར་གཟུང་བ་ཉིད་ལས། ཡུལ་ཐོག་ཏུ་ཡེ་ནས་གྲུབ་མ་མྱོང་། སྲིད་པའི་རང་བཞིན་ནི་མེད་བཞིན་དུ་འཁྲུལ་སྣང་གིས་བསྐྱེད་པ། ཐག་ཁྲ་ལ་སྤྲུལ་ལམ། ཐོ་ཡོར་ལ་སྐྱེས་བུར་གཟུང་བ་ལྟར་རྣམ་པར་ཤེས་པའི་ཕུང་པོ་ཡང་རང་གི་མཚན་ཉིད་ཀྱིས་མ་གྲུབ་བཞིན་དུ་གྲུབ་པ་ལྟར་སྣང་བའི་ཆོས་ཉིད་གང་ཡིན་པའི་མ་ཚང་རིག་ནས་སྒྱུ་མ་ལྟ་བུར་མངོན་སུམ་དུ་མཐོང་བ་ནི་སངས་རྒྱས་མི་བསྐྱེད་པའི་དེ་ཁོ་ན་ཉིད་དང་། རྣམ་ཤེས་དེ་ལས་རྐྱེན་གྱིས་མཆེད་པའི་ཞེ་སྡང་ཉིད་ཀྱང་གློ་བུར་དུ་བློས་འཁྲུལ་པས་བཏགས་པ་མ་གཏོགས། ཡུལ་རང་ངོས་ནས་མ་གྲུབ་པ་གང་ཞིག་རྣམ་པ་ཀུན་གྱི་མཆོག་དང་ལྡན་པའི་སྟོང་ཉིད་ཀྱི་མཁྱེན་ཆ་ཙམ་དུ་ཇི་སྙེད་པའི་ཆོས་སྟོན་པར་མཛད་པའི་ཐུགས་ཀྱི་ཆ་ལ་མེ་ལོང་ལྟ་བུའི་ཡེ་ཤེས་ཞེས་རྣམ་གྲངས་པའི་དོན་དམ་གྱིས་བཏགས་པ་ནི་གནས་སྐབས་ཀྱི་སྦྱང་གཞི་སྦྱོང་བྱེད་ཡིན་ལ། དེ་ཡང་མཐར་གཏུགས་ན་ཆོས་ཐམས་ཅད་ངོ་བོ་ཉིད་མེད་པའམ། རབ་ཏུ་མི་གནས་པར་གྲུབ་པས་སྦྱང་གཞི་དང་སྦྱང་འབྲས་གཉིས་ཀར་བཞག་ཏུ་མེད་དེ། རེ་ཞིག་བྱིས་པ་སྐྲག་པ་སྤང་ཕྱིར་རིགས་ལྔ་དང་ཡེ་ཤེས་ལྔའི་རྣམ་པར་གཞག་པ་ཙམ་ལས་བློའི་ངོ་ནས་གཞལ་བའི་ཡུལ་ལས་འདས་པའི་ཕྱིར་སློབ་དཔོན་འཕགས་པས། དེ་ཕྱིར་གཞན་པས་ཆོས་འདི་དག །གཏིང་རྟོགས་དཀའ་བར་མཁྱེན་གྱུར་ནས། །ཐུབ་པའི་ཐུགས་ནི་ཆོས་བསྟན་ལས། །རབ་ཏུ་ལོག་པར་གྱུར་པ་ཡིན། །ཞེས་གསུངས་
སོ། །ཚུལ་འདི་ལྟ་བུ་མ་ཤེས་ན་རྡོ་རྗེ་ཐེག་པའི་ལམ་ནི་དྲང་དོན་གྱི་ཁ་དྲང་བ་ཙམ་མ་ཡིན་པར་རྒྱ་ཆེ་བའི་རང་བཞིན་དུ་བཤད་པ་དག་ཀྱང་ཟབ་མོའི་དེ་ཁོ་ན་ཉིད་འབའ་ཞིག་ཏུ་འབབ་ཅིང་དེའི་ལམ་གྱི་ལུས་མ་ལུས་ཤིང་ལུས་པ་མེད་པ་ཡང་དབང་གི་རང་བཞིན་ལ་རྫོགས་པ་ཁོང་དུ་མི་ཆུད་དོ། །དེ་ལྟར་རིག་པའི་དབང་ལྔའི་སྟེང་དུ་དྲི་མ་དང་བཅས་པའི་ཡེ་ཤེས་ཀྱི་ཁམས་རྡོ་རྗེ་སེམས་དཔའི་དེ་ཁོ་ན་ཉིད་དུ་སྦྱང་པའི་ཕྱིར་ཐ་མལ་གྱི་སྤྱོད་པ་བརྟུལ་ནས་རྡོ་རྗེ་སེམས་དཔའི་ཁྱད་པར་གྱི་སྤྱོད་པའི་ཚུལ་འཇུག་པ་བརྟུལ་ཞུགས་ཀྱི་དབང་ལུང་བསྟན་དང་། དབུགས་དབྱུང་དང་། རྗེས་གནང་དང་བཅས་པའི་སློབ་མའི་དབང་དྲུག་གོ །དེའང་ཐབས་དེ་ལས་བྱུང་བ་ནི་རྡོ་རྗེ་སློབ་དཔོན་གྱི་དབང་སྟེ། སློབ་དཔོན་དུ་འདས་པ་གང་ཞིག་ལ་སྔར་ལྷག་གནས་ཀྱི་སྐབས་སུ་སློབ་དཔོན་གྱི་སྡོམ་པ་བྱིན་ན་དེས་འཐུས་ལ། མིན་ན་གནས་སྐབས་འདིར་བསྒྲག་པར་བྱ་སྟེ་གཞན་དོན་ལ་རྗེས་སུ་གནང་བའི་མཐུ་བསྐྱེད་པའི་ཕྱིར་བུམ་པའི་བྱ་བ་གཙོ་བོར་བྱ་བ་དང་། དམ་ཚིག་གསུམ་འཛིན་པ་གཙོ་བོར་བྱ་བ་གཉིས་ལས། ཕྱི་མའི་དོན་གྱི་སློབ་དཔོན་གྱི་དབང་ཞེས་གསུངས་ཀྱིས། དེ་ཡང་འབྲས་བུ་ལ་ལྟོས་ནས་ཕྱིར་མི་ལྡོག་པའི་དབང་ཞེས་ཀྱང་བྱ་སྟེ་དཔེར་ན་མདོ་ལམ་དུ་མ་ངེས་པའི་རིགས་ཅན་ཡང་སྦྱོར་ལམ་ཐོབ་པ་ནི་ཕྱིར་མི་ལྡོག་པར་བཤད་པ་བཞིན་ནོ། །དེ་སྐད་དུ་བརྟག་གཉིས་ལས། ཤེས་རབ་བཅུ་དྲུག་ལོན་པ་ལ། །ལག་པ་དག་གིས་ཡང་དག་འཁྱུད། །རྡོ་རྗེ་ དྲིལ་བུ ་མཉམ་སྦྱོར་བས། །སློབ་དཔོན་དབང་དུ་རབ་ཏུ་བརྗོད། །ཅེས་རྡོ་རྗེ་ཐུགས་ཀྱི་དམ་ཚིག་གསོར་བ་དང་། དྲིལ་བུ ་གསུང་གི་དམ་ཚིག་འཁྲོལ་བ་དང་། གཉིས་ཀས་འཁྱུད་པ་ཕྱག་རྒྱའི་དམ་ཚིག་གསུམ་ལས་བྱུང་བའི་བདེ་སྟོང་གི་ཏིང་ངེ་འཛིན་གྱི་ཁྱད་པར་རིག་དབང་ལྔ་ལྟ་བུའི་རིགས་ཉེ་འཚེ་བའི་འཁྱུད་རྒྱའི་རྣམ་པ་ཙམ་
གྱི་བདེ་བ་མ་ཡིན་པར་རིགས་ཐམས་ཅད་ཀྱི་ཁྱབ་བྱེད་དྲུག་པ་རྡོ་རྗེ་འཆང་དང་རྡོ་རྗེ་སྙེམས་མ་སྦྱོར་བའི་བདེ་སྟོང་གི་ཡེ་ཤེས་ལ་ཡབ་ཀྱིས་བལྟ་བ་དང་ཡུམ་གྱིས་དགོས་པའི་སྒོ་ནས་སེམས་གཏད་པ་ནི་རྣལ་འབྱོར་བླ་མེད་ཀྱི་ཁྱད་པར་དུ་བྱས་པའི་བསྐུར་ཚུལ་ཏེ་དབང་སྟེགས་ལ་བཞག་ནས་རྣལ་འབྱོར་ཆེན་པོའི་ལྷ་ལུས་ལ་བཀོད་དེ་དམ་ཚིག་གསུམ་གཟུང་བ་ལ། དབང་ལྷ་སྤྱན་དྲངས་ནས་རང་རིགས་ཀྱི་བུམ་པའི་ཆུས་དབང་བསྐུར་རྗེས་དབང་ལྷ་བསྟིམས་ནས་རིགས་བདག་གི་རྒྱས་འདེབས་བྱས་ལ་མཆོད་པས་ཞལ་བསྲོ། ལྷ་དང་གཞལ་ཡས་ཁང་དང་སློབ་དཔོན་གྱི་དེ་ཁོ་ན་ཉིད་བསྟན། སྔགས་དང་། ཕྱག་མཚན་དང་། མིང་དབང་བསྐུར་ནས་མིག་ཐུར་དང་མེ་ལོང་ལ་སོགས་པའི་སྐུ་གསུང་ཐུགས་ཡོན་ཕྲིན་ལས་ལྔའི་རྗེས་གནང་དང་། རང་རང་གི་ཆོས་ཀྱི་འཁོར་ལོ་བསྐོར་བའི་རྗེས་སུ་གནང་བ་ལ་སོགས་པ་ནི་དེའི་ཡན་ལག་ཡིན་ལ། དེ་ཡང་ས་མ་བུ་ཊ་ར། ཧཱུཾ་རྡོ་རྗེ་གསོར་བ་མཛེས་པ་སྟེ། །སེམས་ཅན་ཐམས་ཅད་བསྒྲལ་བར་བྱ། །རྣམ་ཐར་ཆོས་སུ་བྱེད་པ་སྟེ། །སྙིང་པོ་མཆོག་གི་རྡོ་རྗེའི་ཟུར། །ཞེས་ཐུགས་ཀྱི་རང་བཞིན་བརྗོད་པ་དོན་གྱི་ཨེ་ཝཾ་དང་། ཨཱཤེས་རབ་ཐབས་ཀྱི་ཆོ་ག་ནི། །འགྲོ་བ་རྣམས་ནི་སད་པའི་བདག །མི་ཤེས་འདམ་དུ་བྱིང་བ་ཡི། །སེམས་ཅན་དོན་ཕྱིར་དཀྲོལ་བར་བྱ། །ཞེས་དྲིལ་བུའི་སྒྲ་ལས་ཐམས་ཅད་མཁྱེན་པའི་བརྗོད་པ་རྫོགས་པ་སྒྲའི་རང་བཞིན་བརྗོད་པ་དོན་གྱི་ཨེ་ཝཾ་དང་། ཨཱ ཤེས་རབ་ཐབས་ཀྱི་ཆོ་ག་ནི། །འགྲོ་བ་རྣམས་ནི་སད་པའི་བདག །མི་ཤེས་འདམ་དུ་བྱིང་བ་ཡི། །སེམས་ཅན་དོན་ཕྱིར་དཀྲོལ་བར་བྱ། །ཞེས་དྲིལ་བུའི་སྒྲ་ལས་ཐམས་ཅད་མཁྱེན་པའི་བརྗོད་པ་རྫོགས་པ་སྒྲའི་ཨེ་ཝཾ། ཨོཾ་ཨཱ་ལི་ཀཱ་ལི་མཉམ་སྦྱོར་བས། །མཉམ་པར་བཞག་པ་ཧཱུཾ་གི་ལུས། །ཕྱོགས་བཅུ་ཀུན་ཏུ་བསྒྲག་བྱ་སྟེ། །ཤེས་རབ་ཐབས་ཀྱི་སྒྲ་བསྒྲོག་བྱ། །ཞེས་ཁ་སྦྱོར་གཟུགས་ཀྱི་ཨེ་ཝཾ་གྱི་རང་བཞིན་གང་ཡིན་པའི་ངེས་པ་མངོན་སུམ་པ་རྟོགས་ན། དམ་
ཚིག་གསུམ་སྒྲ་ཇི་བཞིན་པར་གྱུར་ནས་བུམ་དབང་ཉིད་དུ་དབང་བཞིའི་ཟབ་གནད་རྫོགས་པར་དོན་གྱིས་སོང་བས། རབ་ཏུ་གནས་པས་ལྷ་ལ་ཡེ་ཤེས་པ་གཞུག་པ་དང་། དབང་གི་ཆོ་གས་གཞན་རྗེས་སུ་འཛིན་པ་དང་། རྒྱུད་བཤད་པ་དང་། ཚོགས་ཀྱི་འཁོར་ལོའི་དབེན་དུ་གྱུར་པས་ན། །སློབ་མ་བསྡུ་བ་ཉིད་དུ་གྱིས། །ཞེས་བྱུང་བ་ཡིན་ལ། འོན་ཀྱང་དེ་ལྟར་རྟོགས་པར་བྱེད་པ་ལ་རྒྱུད་སྡེ་ཆེན་པོ་གཞན་དང་གཞན་དག་གི་དབང་བཞིའི་རིམ་པ་ལ་ནང་བྱན་ཚུད་པའི་གང་ཟག་དབང་པོ་རབ་ཏུ་གྱུར་པ་འགའ་ཙམ་ལས་ཐམས་ཅད་ནས་ཐམས་ཅད་ལ་དོན་དུ་མི་འགྱུར་བའི་ཕྱིར་འཆད་ཚུལ་དེ་ནི་རྒྱུད་སྡེ་ཕྱོགས་རེ་བའི་དགོངས་པར་བྱས་ནས་དབང་གོང་མ་གསུམ་མ་ཐོབ་པར་བླ་མེད་ཀྱི་རྒྱུད་རྫོགས་པར་ཉན་བཤད་དང་རྫོགས་རིམ་ཟབ་མོ་བསྒོམ་པ་ལ་མི་དབང་བར་འདོད་པ་ནི་དཔྱད་བཟོད་པ་ཉིད་དེ། དེ་དག་ལ་བུམ་དབང་གི་དངོས་གཞི་བདུན་ཞེས་གྲགས་སོ། །དེ་ལྟ་བུའི་བུམ་དབང་ནི་རི་མོ་དང་ལུས་ཀྱི་དཀྱིལ་འཁོར་གཉིས་སུ་འཐོབ་བ་ཡིན་ཏེ། སྦྱོར་བ་བདུན་པ་ལས། རི་མ་དང་ནི་ལུས་ཀྱི་ལས། །དཀྱིལ་འཁོར་དུ་ནི་དེ་ཉིད་འཐོབ། །ཅེས་སོ། །སྒྲིབ་པ་གང་འདག་ན་སྲོག་གཅོད་པ་ལ་སོགས་ཏེ་ལུས་ཀྱི་ལས་སྔར་བསགས་སྦྱངས་ཤིང་རང་གི་དམ་ཚིག་ལས་འདའ་བར་མི་རུང་བས་ཕྱིན་ཆད་ཀྱི་རྒྱུན་ལམ་གཅོད། ལས་ཀྱི་སྒྲིབ་པ་འདག །གནས་སྐབས་བཞི་ལས་སད་པའི་གནས་སྐབས་དང་། དེའི་སྣང་བ་གཟུགས་ཀྱི་ཕུང་པོ་སོགས་ཤིན་ཏུ་རགས་པ་ཅན་ཡིན་བས་ལུས་ཀྱི་ཐིག་ལེའི་སྒྲིབ་པ་འདག །ཕུང་པོའི་བདུད་འཇོམས་པ་སྟེ། སྲོག་གཅོད་པ་སོགས་སྔ་ཕྱི་ཡི། །དག་དང་ཉེས་པར་མི་འགྱུར་རོ། །ཞེས་སོ། །དབང་བའི་ཆ་ནས་ནི་བསྐྱེད་རིམ་སྒོམ་པའི་སྣོད་དུ་རུང་ཞིང་། གཟུགས་སོགས་ཕུང་ཁམས་སྐྱེ་མཆེད་ལ་རང་རྒྱུད་དུ་
བལྟ་བ་ལས་གྲོལ། སྣང་སྲིད་དུ་སྣང་བའི་ཆོས་ཅན་ཀུན་རྫོབ་པ་ལས་དབེན་པར་བྱེད་པ་དང་། སྦྱིན་སྲེག་ལ་སོགས་པའི་ཕྲིན་ལས་ཀྱི་ཡན་ལག་ལ་དབང་བ་སྟེ། །སྦྱོར་གསུམ་ཡན་ལག་བཅས་པ་རུ། །གཟུགས་ལ་སོགས་པའི་ཡུལ་རྣམས་ཀྱི། །སྣང་སྲིད་དབེན་པས་རྟོགས་པའོ། །ཞེས་སོ། །དེའང་རང་གི་ལུས་ཕུང་པོ་ལྔ་དང་འབྱུང་བ་ལྔའི་རབ་བཞིན་སངས་རྒྱས་རིགས་ལྔ་ཡབ་ཡུམ་གྱི་ངོ་བོ་ལ། རྟོག་ཚོགས་བྱང་ཆུབ་སེམས་དཔའ་བཅུ་དྲུག་ལས་དབང་བྱ་བ་དང་བཅས་པ་ཁྲོ་བོ་ཁྲོ་མོར་གྱུར་པའི་གདན་གསུམ་དང་། དེ་ལས་འཕྲོས་པ་རྡོ་རྗེ་དབྱིངས་ཀྱི་ལྷ་ལྔ་བཅུ་དང་། དམ་པ་རིགས་བརྒྱ་ལ་སོགས་པ་རྒྱུད་སྡེ་སོ་སོའི་གཞུང་ནས་འབྱུང་བའི་དག་བྱ་དག་འབྲས་ཀྱི་ལྷའི་འཁོར་ལོ་དབྱིབས་ཀྱི་ལམ་དུ་བསྒོམས་པས་གཟུགས་ཐམས་ཅད་སྣང་སྟོང་། སྒྲ་ཐམས་ཅད་གྲགས་སྟོང་། སེམས་ཐམས་ཅད་རིག་སྟོང་ཟུང་འཇུག་སྒྱུ་མའི་རྣམ་རོལ་དུ་ཤར་བ་དེའང་གསལ་བ་ཙམ་གྱི་ཆ་ནས་སྣང་ཕྱོགས་ཀྱི་ངོ་བོ་བསྐྱེད་པ་དང་། རང་བཞིན་མེད་པའི་ཆ་ནས་སྟོང་ཕྱོགས་ཀྱི་ངོ་བོ་རྫོག་པ་དང་། ལྷུན་གྱིས་གྲུབ་པའི་ཆ་ནས་ཟུང་འཇུག་གི་ངོ་བོ་བསྐྱེད་རྫོགས་བདེ་བ་དབྱེར་མེད་ཆེད་པོར་བལྟ་བའི་ལྟ་བ་ངོ་བོ་ཉིད་གསུམ་གྱི་ཕྱི་དོན་དུ་འཛིན་པའི་རྣམ་རྟོག་དང་། དཀྱིལ་འཁོར་རང་གནས་ལ་སྒྲིབ་པའི་མུན་པ་བསལ་བ་སྟེ་འདོད་པའི་ཡོན་ཏན་ཐམས་ཅད་ཀྱང་ཐ་མལ་རང་རྒྱུད་དུ་མ་གོལ་བར་ཡུལ་དུ་སྣང་བ་ཡུམ། བཟའ་བཏུང་དང་རྒྱན་གོས་ལ་སོགས་པ་ཡབ་ཏུ་སྣང་བཟུང་དུ་འཇུག་པའི་ཚུལ་གྱིས་དང་དུ་བླང་བར་བྱ་སྟེ། སྒྱུ་འཕྲུལ་ལས། གཟུགས་སྒྲ་དྲི་རོ་ལ་སོགས་པའི། །རྣམ་སྨིན་ཡུམ་དུ་ཤེས་པས་སྤྱད། །ཅེས་དང་། གསང་བ་གྲུབ་པ་ལས། ཐ་མལ་པ་ཡི་ལུས་སྤངས་ནས། །ལྷ་རྫས་ང་རྒྱལ་ལྡན་ཡིད་ཀྱིས། །ཏིང་འཛིན་མཆོག་ལ་རྣམས་གནས་ན། །དེ་ནི་འགྲུབ་
འགྱུར་ཐེ་ཚོམ་མེད། །ཅེས་སོ། །དེ་ལྟར་བུམ་དབང་གི་བྱེད་པས་ལུས་རགས་པ་སྐྱེད་བྱེད་ཀྱི་རྩའི་འགྲོས་རྣམས་དག་པས་ལུས་ཤིན་ཏུ་སྦྱངས་པའི་ཡོན་ཏན་འཐོབ་ནས་རྡོས་བཅས་ལ་ཐོགས་པ་མེད། རྩ་ནང་དུ་རྒྱ་བའི་ཁམས་ལྡོག་པས་ཆུ་བོ་གྱེན་ལ་ལྡོག །རྡུལ་དབུ་མར་ཆིངས་པས་ཉི་མ་གཏེ་བར་འཛིན། །གཅིག་ནི་དུ་མ་དང་། དུ་མ་ནི་གཅིག་ཏུ་བྱེད་པར་ནུས། སྟོང་གསུམ་ཡུངས་འབྲུར་ཆུད་པ་སྟེ་འཇིག་རྟེན་ལས་འདས་པའི་ས་དྲུག་དང་གྲུབ་མཐའ་འཁོར་འདས་གཉིས་མེད་ལ་དབང་བསྒྱུར་བ་ཡིན་ལ། གལ་ཏེ་གྲུབ་མཐའ་མ་སྙོགས་ན་སྣང་བ་བསྒྱུར་བའི་འདའ་ཀ་མ། འོད་ཀྱི་གོང་བུའི་འདའ་ཀ་མ། སྒྲས་འཕོ་བའི་འདའ་ཀ་མ་གསུམ་གྱིས་འཕོ་བའི་ཕྱི་མ་དངོས་སུ་སྨོས་པ་སྟེ། མཐར་ཐུག་གི་འབྲས་བུ་ནི་སྐུ་རྡོ་རྗེ་སྤྲུལ་པའི་སྐུ་ལ་སྦྱོར་བའི་ཚུལ་གླང་པོ་རབ་འབོགས་ལས། རྩའི་འགྲོས་ཐིམ་དབྱིངས་ཀྱི་ལམ་དག་པ། །ལུས་ཀྱི་སྒྲིབ་བྱད་བསྐྱེད་རིམ་སྤྲུལ་པའི་སྐུ། །ཞེས་དང་། སྦྱོར་བ་བདུན་པ་ལས། དེ་ཡི་རང་བཞིན་ངོ་བོ་ནི། །སྐུ་ཡི་རྡོ་རྗེའི་རང་བཞིན་ནོ། །ཞེས་སོ། །བུམ་དབང་གི་དམ་ཚིག་ནི་རྩ་ལྟུང་བཅུ་བཞི་དང་། སྦོམ་པོ་བརྒྱད་བསྲུང་བ་ཡིན་ནོ། །གཉིས་པ་གསང་དབང་སྟོན་པའི་ཕྱིར། །བྷ་གའི་དཀྱིལ་འཁོར་ལ་བརྟེན་གསང་དབང་བསྐུར། །དགོད་པས་ཚིམ་པ་འཕྲུལ་དགའི་འདོད་ཆགས་དང་། །ངག་གི་སྒྲིབ་སྦྱངས་བདག་བྱིན་རློབ་པའི་ལམ། །གཏུམ་མོས་གཟུང་འཛིན་རོ་རྐྱང་དབུ་མར་འཛུད། །རང་བྱུང་ཡེ་ཤེས་གྲུབ་མཐའ་མ་འདྲེས་རྫོགས། །འདའ་ཀ་དཔེ་ཡི་འོད་གསལ་ཆེན་པོའི་དང་། །ཡི་གེའི་འགྲོས་ཐིམ་ལོངས་སྤྱོད་རྫོགས་པའི་སྐུ། །ཡན་ལག་དྲུག་ཅུར་རྫོགས་པའི་གསུང་རྡོ་རྗེ། །ཞེས་སྨོས་ནས། འདི་ལྟར་དགོད་པས་ཚིམ་པའི་འདོད་ཆགས་ནི་འཕྲུལ་དགའ་བ་ལ་ཡོད་པས། དག་བྱ་དེའི་
གཉེན་པོར་དག་བྱེད་གསང་བའི་དབང་ནི་ཤེས་རབ་མའི་བྷ་གའི་དཀྱིལ་འཁོར་གྱི་ཐབས་ལ་བརྟེན་ནས་བསྐུར་བ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་དང་། དུས་ཀྱི་འཁོར་ལོ་གཉིས་ཆར་ལས་གསུངས་ལ། དེ་སྐད་དུ་ཀློང་གསལ་ལས་ཀྱང་། ཡུམ་མཁའ་སངས་རྒྱས་ཐམས་ཅད་ཀྱི། །གསང་བ་ཟབ་མོའི་དཀྱིལ་འཁོར་ཏེ། །ཡེ་ཤེས་བཞིའི་རང་བཞིན་དུ། །གཉིས་སུ་མེད་པར་དབང་བསྐུར་རོ། །ཞེས་པ་ལྟར་རོ། །འཐད་པ་ནི་འདི་ལྟར་དངུལ་ཆུ་བཞུ་བཏུལ་གྱི་སྦྱོར་བ་མེད་པར་གསེར་འགུར་མི་འགྲུབ་པ་ལྟར་ཞུ་བ་མེད་པའི་བདེ་བ་དང་། བདེ་བ་མེད་པའི་ཞུ་བ་ཡང་མེད་ལ། ཀུནྡ་ནི་རྩ་རྣམས་ཀྱིས་བསྡམས་པ་ལྟར་གནས་ཤིང་། །དེ་འཇུ་བ་ནི་རྗེས་ཆགས་ཀྱི་རྐྱེན་ལ་ལྟོས་དགོས་པས། ཚངས་པ་ལ་སོགས་པ་གཟུགས་ཁམས་པ་རྣམས་ཀྱི་ལུས་ཀྱི་བདེ་བ་ཡང་ཡིད་ལས་བྱུང་བའི་ཆུའི་བུ་དང་བུ་མོ་ལ་སོགས་པའི་རྐྱེན་གྱིས་ཀུནྡ་དྭངས་མའི་བདེ་བ་ཉམས་སུ་མྱོང་བའི་ཕྱིར་ན། མི་འགྱུར་བའི་བདེ་བ་ཆེན་པོ་མངོན་དུ་བྱེད་པ་ལ་ཞུ་བདེ་ལམ་དུ་བྱེད་དགོས་པས་དེའི་ཐབས་སུ་འགྱུར་བ་ནི་རྣམ་པར་སྨིན་པའི་ལུས་ཀྱི་བདག་ཉིད་ཅན་གཞོན་ནུ་མ་ལང་ཚོ་དང་ལྡན་པའི་ཆུ་སྐྱེས་ཀྱི་དཀྱིལ་འཁོར་ལས་གཞན་མེད་དེ་གཏུམ་པོའི་རྒྱུད་ཀྱི་རྩ་བ་ལས། ཨེ་མ་བདེ་བ་སྐྱེས་ཙམ་གྱི། །བྱང་ཆུབ་མཆོག་ནི་ཐོབ་བྱེད་པའི། །བྱེད་པོ་བུད་མེད་དང་སྦྱོར་ལས། །གཞན་དུ་ནམ་ཡང་མ་ཡིན་ནོ། །སྒྱུ་མའི་དེ་ཉིད་ཐམས་ཅད་ལས། །བུད་མེད་སྒྱུ་མའི་དེ་ཉིད་བསྔགས། །ཞེས་སོགས་རྒྱ་ཆེར་ཡོད་དོ། །དེ་ཡང་སློབ་དཔོན་ཡབ་ཡུམ་གྱི་ལུས་དཀྱིལ་ལ་བརྟེན་པར་བཤད་པ་ནི་དངོས་གཞི་ལ་ལྟོས་ནས་དེ་གཉིས་ཀྱི་ཕུང་ཁམས་སྐྱེ་མཆེད་གདན་གསུམ་རྫས་ཀྱི་དཀྱིལ་འཁོར་ཡིན་པའི་ཕྱོགས་ནས་
བཤད་པའོ། །དེ་བས་ན་དབང་རྟེན་མཚན་ཉིད་དང་ལྡན་པ་གསུང་རྡོ་རྗེ་ལོངས་སྤྱོད་རྫོགས་སྐུའི་ངོ་བོ་བླ་མ་ལ་དབུལ་བར་བྱ་སྟེ། ཕྱག་ཆེན་ཐིག་ལེ་ལས། བཞིན་བཟང་མིག་ནི་དཀྱུས་རིང་བ། །གཟུགས་བཟང་ལང་ཚོས་བརྒྱན་པ་ནི། །བཅུ་གཉིས་ཡང་ན་བཅུ་དྲུག་གམ། །མ་སྙེད་ཉི་ཤུ་ལོན་པའང་རུང་། །ཉི་ཤུ་ཡན་ཆོད་ཕྱག་རྒྱ་གཞན། །དེས་ནི་དངོས་གྲུབ་ཐག་རིང་བྱེད། །སྲིང་མོ་ཡང་ནི་བུ་མོའམ། །ཆུང་མ་བླ་མ་ལ་དབུལ་བྱ། །ཞེས་སོ། །དེ་ཡང་ལང་ཚོ་དང་རྩའི་ཡོན་ཏན་ཁྱད་པར་བ་དང་ལྡན་པ་ནི་དམིགས་བསལ་ཡིན་པས་མཐའ་གཅིག་ཏུ་མི་བཟུང་ལ། ཇི་ལྟར་ཡང་དེའི་རྒྱུད་སྦྱངས་ནས་གསང་སྒྲོག་ཏུ་མི་འགྱུར་བ་ནི་ངེས་པར་གལ་ཆེ་བ་ཡིན་ནོ། །དེ་ནས་ནམ་ཕྱེད་ཀྱི་ཚེ་ཡོལ་བའི་རིམ་པ་ལ་སོགས་པས་ཀྱང་གསང་བ་བསྲུངས་ཏེ་སློབ་མ་ལ་མིག་དར་བཅིངས་ནས་དེས་གསོལ་བ་གདབ། གསང་དབང་གི་རྫས་ཞུ་བདེའི་རྐྱེན་གྱིས་བསྒྲུབ་པའི་ཕྱིར་སློབ་དཔོན་ཡབ་ཡུམ་གྱི་ཕུང་ཁམས་སྐྱེ་མཆེད་གདོད་ནས་ལྷའི་དཀྱིལ་འཁོར་དུ་རྫོགས་པའི་ཡབ་ཀྱི་གསང་གནས་ཧཱུཾ་ལས་རྡོ་རྗེ་ནོར་བུའི་རྩེ་མོར་ཟླ་བའི་སྟེང་ན་ཧཱུཾ། ཡུམ་མཁའ་ཨཱལས་པདྨ་འདབ་མ་བརྒྱད་པའི་ཟེ་འབྲུར་ཉི་མའི་སྟེང་དུ་མཱུཾ། དེ་ནས་ས་མ་ཡ་ཧོ་ལ་སོར་བའི་བརྡའ་དང་བརྡའ་ལན་གྱི་སྦྱོར་བ་བསྐུལ་ཏེ་ཡབ་ཡུམ་སོ་སོའི་ཐལ་གོང་དང་། རྐེད་སྐབས་དང་། དབང་པོའི་སྒོ་གཉིས་རེག་པའི་བདེ་བ་ཉམས་སུ་མྱོང་བ་སྟེ་ཕྱག་རྒྱ་བཞི་དང་། འདུ་ཤེས་གསུམ་ལྡན་གྱི་དང་ནས་སྙོམས་པར་འཇུག་ཅིང་། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བརྗོད་ཅིང་དེ་བཞིན་གཤེགས་པ་ལྔས་མཚོན་པའི་སངས་རྒྱས་ཐམས་ཅད་ནམ་མཁའ་གང་བར་སྤྱན་དྲངས། རིགས་ཀྱི་ཡུམ་དང་སྙོམས་པར་
ཞུགས་པ་བདག་ཉིད་ལ་བསྟིམ་པས་འདོད་ཆགས་རྡོ་རྗེའི་རོས་ཚིམ། རྗེས་སུ་ཆགས་པ་ཆེན་པོའི་མེས་བཞུ་ནས་གནས་སོ་སོར་དགའ་བ་བཞིའི་ཡེ་ཤེས་ཉམས་སུ་མྱོང་། དབུ་མའི་ལམ་ནས་རྡོ་རྗེ་ནོར་བུར་བརྟེན་པའི་ལྷན་སྐྱེས་ཀྱི་བདེ་བ་ལ་མཉམ་པར་ཡང་ཡང་བཞག་ནས་རྩ་ཁམས་ཀྱི་དཔའ་བོ་མཁའ་འགྲོ་མཉེས་པར་བྱས་ཏེ་མཐར་སློབ་མ་ལ་དབང་བསྐུར་བའི་དོན་དུ་གནང་བ་ཞུས་ལ་ཡུམ་གྱི་ཆུ་སྐྱེས་སུ་དཔའ་བོ་མཁའ་འགྲོའི་ཚོགས་སྤྲིན་ལྟར་གཏིབས་པ་ལ་མཆོད་པའི་སྤྲིན་དུ་སྤྲོ་བར་བྱ་སྟེ་གསང་བ་འདུས་པ་ལས། རྡོ་རྗེ་པདྨའི་སྦྱོར་བ་ཡི། །རྡོ་རྗེ་ཅན་གྱི་ཡང་དག་བསྡུ། །སྐུ་གསུང་ཐུགས་ཀྱི་སྦྱོར་བ་ཡི། །དེ་དག་ཐམས་ཅད་སྙིང་གར་བསྡུས། །རྡོ་རྗེའི་ལམ་ནས་ཕྱུང་ནས་ནི། །སློབ་མའི་ཁར་ནི་དབབ་པར་བྱ། །ཞེས་སོ། །དེ་ལྟ་བུའི་བདུད་རྩི་ཀུན་རྫོབ་བྱང་ཆུབ་ཀྱི་སེམས་ནི་དེ་བཞིན་གཤེགས་པ་ཞུ་བའི་ཁུ་བ་ཡིན་པས་སྐལ་མེད་ལ་བསྟན་པ་ལྟ་ཅི། ཐོས་སུ་ཡང་མི་རུང་བས་གསང་བའི་སྒྲ་ཞུགས་ལ། སྐལ་ལྡན་གྱི་སློབ་བུའི་ལྕེ་ཐོག་ཏུ་བྱིན་པས་དག་བྱ་ངག་གི་རྩ་བ་དང་། རྣམ་པར་ཤེས་པའི་རྟེན་དུའང་གྱུར་པའི་ནང་གི་འབྱུང་བ་རླུང་གི་ཁམས་ལ་འདྲེས་པས་ཆན་ལ་ཕབས་ཀྱིས་ཐེབས་པ་ལྟར་གསུང་རྡོ་རྗེ་ལོངས་སྤྱོད་རྫོགས་པའི་སྐུའི་སྤངས་རྟོགས་ཀྱི་ནུས་པ་ཁྱད་པར་ཅན་ཞག་པས་ན་དབང་ཞེས་བྱའོ། །དེ་ཡང་ཡབ་ལས་ཐེབ་བ་ཐབས་བདེ་བ་ཆེན་པོའི་གསང་དབང་དང་། ཡུམ་ལས་ཐོབ་པ་ཤེས་རབ་སྟོང་པ་ཉིད་ཀྱི་གསང་དབང་། གཉིས་ཀ་ལས་ཐོབ་པའི་གཉིས་མེད་བདེ་བ་ཆེན་པོའི་གསང་དབང་རྣམ་པ་གསུམ་དུ་ཕྱེན། དང་པོ་ནི་ཡུམ་གྱི་མཁའ་ནས་ཡབ་ཀྱི་ལྕེས་བླངས་པའམ། ཡང་ན་ཕྱག་ཆེན་ཐིག་ལེ་ལས། སྦོམ་པོ་ཐ་
ལྟག་སྦྱར་བ་ཡིས། །ལོངས་སྤྱོད་ནང་དུ་གཞུག་པར་བྱ། །དེ་ཚེ་ཡང་དག་ཡེ་ཤེས་སྐྱེ། །བུ་མོའི་བདེ་བ་ཇི་ལྟ་བུ། །ཞེས་མཐེབ་སྲིན་འོད་དཔག་མེད་ཡབ་ཡུམ་དུ་མོས་པས་བླངས་ནས་སམ། བདུད་རྩི་ཟགས་ཀྱིས་དོགས་ནས་མེ་ལོང་ཡུ་བ་ཅན་ནམ་ཉ་སྐྱོགས་མཐེབ་སྲིན་གྱིས་བཟུང་ནས་བླངས་བ་བདུད་རྩི་དང་སྦྱར་ནས་སློབ་མ་གདོང་གཡོགས་བཅིངས་བཞིན་པ་ལ་སྟེར་བ་ནི། དེའི་གཙང་མེའི་རྟོག་པ་འགོག་པའི་སླད་དུ་ཡིན་ཏེ། མིག་དང་ལག་པའི་ཡུལ་མིན་པར་བཤད་པའི་ཕྱིར་རོ། །གཉིས་པ་ནི་རིག་མས་ཀྱང་གཅེར་བུར་བྱས་ནས་ལངས་ཏེ་ཆུ་སྐྱེས་ན་གནས་པའི་བདུད་རྩི་སློབ་མའི་ལྕེ་ཐོག་ཏུ་བླུགས་ཤིང་། དེས་ཀྱང་པདྨའི་སྣ་རྩེ་ནས་གཞིབས་ཏེ་བཏུང་ངོ་། །གསུམ་པ་ནི་ཡབ་ཡུམ་གཉིས་ཀ་སྙོམས་འཇུག་ཏུ་གནས་པའི་མཁའ་གསང་ལས་སློབ་བུའི་ལྕེས་ལེན་པ་སྟེ། དབང་མཛོད་ལས། བ་དང་བེའུའི་ཚུལ་དག་གམ། །དེ་བཞིན་བུང་བ་སྦྲང་རྩིའི་ཆུལ། །ཡང་ན་བྱ་དང་བྱིའུའི་ཚུལ། །ཞེས་སོ། །གང་གི་ཚེ་ཡང་བླ་མ་ཡབ་ཡུམ་གྱིས་ཤིས་པ་བརྗོད་པའི་མཐར། གཙོ་བོའི་སྔགས་བརྗོད་པ་དང་ལྷན་ཅིག་སློབ་མའི་ལྕེ་ལ་དབབ་པར་བྱ་ཞིང་། སློབ་མས་རྣམ་སྣང་ལ་དེ་བཞིན་གཤེགས་པ་ཐམས་ཅད་ཞུ་བའི་ཁུ་བར་མོས་ནས་གསུངས་རྡོ་རྗེ་འོད་དཔག་མེད་པའི་ང་རྒྱལ་འཛིན་བཞིན་པས་ཨ་ཧོ་མ་ཧཱ་སུ་ཁཾ་ཞེས་དང་དུ་བླང་བར་བྱའོ། །དེ་ལྟ་མོད་ཀྱི་བསྐྱེད་རྫོགས་ལ་ནུས་པ་མི་བརྟན་པས་གསང་དབང་བེམ་པོ་པ་ལས་མི་བསྐུར་རོ། །དེ་ཡང་ཐལ་རྒྱུད་ལས། ཕྱག་རྒྱ་ཆེན་པོ་ནམ་མཁའི་དབྱིངས། །སོར་བཞིའི་ཚད་དུའང་རང་བཞིན་གནས། །བདེ་བའི་ཡེ་ཤེས་ཐུགས་དཀྱིལ་འཁོར། །ཁ་དོག་དབྱིབས་དང་ལྡན་པར་བྱ། །ཐབས་ཀྱི་རབ་གནས་ཆོ་གར་ལྡན། །ཞེས་པ་ལ་བརྟེན་ནས་གསང་དབང་གི་དཀྱིལ་འཁོར་དངོས་བསྟན་དུ་འདོད་པ་རྒྱུད་འགྲེལ་རྣམས་ལས་
འབྱུང་ཀྱང་ངེས་པའི་དོན་དུ་ནི་ཚད་དང་མཚན་ཉིད་དེ་ཡང་དག་པ་མ་ཡིན་ཏེ། འདི་ལྟར་སངས་རྒྱས་ཐམས་ཅད་ཀྱི་ཐུགས་ཀྱི་དཀྱིལ་འཁོར་དམ་པ་ནི་བདེ་བ་ཆེན་པོ་གཉིས་སུ་མེད་པའི་རང་བཞིན་ཡིན་ལ། ད་ལ་དགའ་བ་ལ་སོགས་པ་རྣམ་པ་བཞི་ཡོད་པས་དེའི་མཚན་དོན་དུ་སོར་བཞི་པའི་བརྡས་རྨོས་ཤིང་། དེ་རྟོགས་པར་བྱེད་པ་ནི་རིག་མ་ལ་བརྟེན་དགོས་པ་དེའི་རྒྱུད་དག་པ་ནི་ཚངས་པའི་ཐིག་གིས་མཚོན་ལ། རྩ་བཙལ་བ་ལ་སོགས་པ་ནི་ཐིག་གི་ཆོ་ག་སྤྱི་ལ་བརྗོད་ཅིང་། ལྔ་ཚན་ལྔའི་རྡུལ་ཚོན་ནི་དུག་ལྔ་ཡེ་ཤེས་ལྔར་གནས་དག་པ་སོགས་ལ་བཏགས་ནས་དཀྱིལ་འཁོར་གྱི་མིང་དུ་སྨོས་པ་ཉིད་ཡིན་ནོ། །དེ་ལྟ་བུའི་གསང་དབང་ཐོབ་པས་བྱ་བའི་ལས་གང་ལ་དབང་ན་དྲང་དོན་དུ་བདུད་རྩི་ལྔ་དང་སྒྲོན་མ་ལྔ་བཟའ་བ་དང་། སྦས་དོན་དུ་འབར་འཛག་གི་འགྲོས་ལས། ཁམས་ཀྱི་དྭངས་མ་སྒྲིབ་བྲལ་དུ་ཟ་བ་ལ་དབང་སྟེ་སྡོམ་འབྱུང་ལས། ཨེ་མ་ཧོ་ཇི་ལྟ་ཇི་ལྟར་བཟའ། །སྣང་བ་ཐམས་ཅད་སྟོང་པ་ཉིད་དུ་བཟའ། །ཞེས་སོ། །དེ་ཡང་གཡོ་བའི་རླུང་དག་ནས་ངག་དབེན་པར་བྱེད་པ་རྡོ་རྗེའི་བཟླས་པ་དང་། སྲོག་རྩོལ་འགོག་བ་རླུང་གི་རྣལ་འབྱོར་དང་། སྒྱུ་ལུས་བསྒོམ་པ་ལ་དབང་སྟེ་སྦྱོར་བ་བདུན་པ་ལས། རྡོ་རྗེ་བཟླས་པའི་ངོ་བོ་ཡིས། །སྒྱུ་དྲྭའི་ཏིང་འཛིན་བརྟན་པར་བྱ། །མིག་སོགས་ནང་གི་ཆོས་རྣམས་ཀྱི། །སྣང་སྲིད་དབེན་པར་རྟོགས་པའོ། །ཞེས་སོ། །སྒྲིབ་པ་གང་འདག་ན་རྫུན་ལ་སོགས་པ་ངག་གི་ལས་སྔར་བསགས་སྦྱངས་ཞིང་རང་གི་དམ་ཚིག་ལས་འདའ་བར་མི་རུང་བས་ཕྱིན་ཆད་ཀྱི་རྒྱུན་ལམ་གཅོད། ཉོན་མོངས་པའི་སྒྲིབ་པ་འདག །གནས་སྐབས་བཞི་ལས་རྨི་ལམ་དང་། དེ་ཡི་ངོར་སྣང་བས་ཕྲ་ཞིང་། ཡི་གེའི་ཐིག་ལེ་རླུང་གིས་
བསྐྱོད་པ་ལས་བརྗོད་འདོད་ཀྱི་ངག་ཏུ་འབྲེལ་བའི་ཚུལ། དགོངས་པ་ལུང་སྟོན་ལས། ཐུང་དུ་མ་ལུས་དག་ཏུ་འགྱུར། །ཞེས་ཡི་གེ་ལས་མིང་། མིང་ལས་ཆིག་གམ། ལུང་སྟོན་པའི་སྒྲར་འགྱུར་བའི་ངག་གི་ཐིག་ལེ་དག་ཅིང་རང་བཞིན་བརྒྱད་ཅུའི་རྟོག་པ་འགག་ཉོན་མོངས་པའི་བདུད་འཇོམས་པ་སྟེ་སྦྱོར་བ་བདུན་པ་ལས་དེ་ཡི་རང་གི་ངོ་བོ་ནི། །གསུང་གི་རྡོ་རྗེའི་རང་བཞིན་ནོ། །རྫུན་ལ་སོགས་པ་སྔ་ཕྱི་ཡི། །ངག་དང་ཉེས་པར་མི་འགྱུར་རོ། །ཞེས་སོ། །དེ་ལྟར་གསང་དབང་གི་ལམ་ནི་བདག་བྱིན་རློབ་པ་ཀུན་རྫོབ་སྒྱུ་མའི་རྫོགས་རིམ་ཙཎྜ་ལཱའི་རྣལ་འབྱོར་ལམ་དུ་བྱ་བ་ཡིན་ཏེ། དེ་ཡང་རླུང་བཟུང་བས་རྣམ་པར་ཤེས་པ་ཟིན་པ་ཡིན་ཏེ། འདི་ལྟར་རྣམ་པར་ཤེས་པ་ནི་སྐྱེས་བུ་འཕྱེའོ་ལྟ་བུ་ཡིན་པས་འགྲོ་འོང་གི་ནུས་པ་ཅན་མ་ཡིན་ཀྱང་། དེའི་བཞོན་པར་གྱུར་པའི་ལས་ཀྱི་རླུང་ཞེས་བྱ་བ་གནས་པ་དང་། རྒྱུ་བ་དང་། ལྡང་བ་དང་། འཇུག་པའི་བདག་ཉིད་ཅན་དེས་ཁུར་ནས་སེམས་ཀྱི་རྒྱུད་ཀུན་ཏུ་འགྲོ་བར་བྱེད་པ་ཡིན་ཏེ། རྒྱུད་ལས། འདི་ནི་རླུང་ཁམས་ཆེན་པོ་སྟེ། །རྣམ་ཤེས་གསུམ་གྱི་བཞོན་པ་ཡིན། །ཞེས་སོ། །དེའང་བྱེད་ལས་ཀྱི་སྒོ་ནས་རླུང་བཅུར་དབྱེ་བ་ནི་འོག་ཏུ་འཆད་པར་འགྱུར་ལ། འདིར་ནི་བཞི་པོའི་བྱེད་ལས་འདོད་རྒྱལ་དུ་བཤད་ན། ཐོག་མར་སྐྱེ་སྲིད་འཛིན་པའི་དུས་ན་རྣམ་པར་ཤེས་པ་རླུང་ལ་ཞོན་ཏེ་མངལ་དུ་ཞུགས་པ་གང་ཞིག་ཁུ་ཁྲག་ལ་བརྟེན་ནས་གནས་པར་གྱུར་པས་རྣམ་པར་ཤེས་པ་ཡང་བརྒྱལ་ལོ། །དེའི་ཚེ་ཡེ་ཤེས་ཀྱི་རླུང་གི་བདག་ཉིད་གནས་པ་ཡིན་ནོ། །དེ་ནས་སྲོག་གི་རླུང་ནས་བརྩམས་ཏེ་རླུང་བཅུ་རིམ་གྱིས་སྐྱེས་པས་ལུས་རྒྱས་པར་བྱེད་ལ། རྒྱས་པ་དེ་རྒྱུ་བའི་རླུང་གིས་ཇི་སྲིད་གསོན་པའི་བར་དུ་རུལ་མྱགས་སུ་མི་འགྱུར་བའི་བྱ་བ་བྱེད་དོ། །དེ་ཡང་
ལྡང་བ་དང་འཇུག་པའི་སྒོས་དྲན་བསམ་དང་ཚོར་བ་སྣ་ཚོགས་སུ་བསྐྱེད་པར་བྱེད་པས། ལམ་དུས་སུ་རྣལ་འབྱོར་གྱི་ལས་ཀྱང་དེས་བྱེད་པ་ཡིན་ལ་འཆི་བའི་དུས་སུ་ནི་རླུང་དེ་དག་འགགས་པས་སྲིད་པ་དེ་ཉིད་ཞིག་པ་ཞེས་བྱའོ། །དེ་ཡང་སྤྱིར་རླུང་བཅུ་པོ་རང་རང་གི་གནས་ནས་རང་རང་གི་བྱ་བ་བྱེད་པ་དག་ཀྱང་རླུང་རྒྱུ་བའི་རང་བཞིན་ཡིན་མོད་ཀྱིས། རེ་ཞིག་སྲོག་རྩོལ་རྒྱུ་བའི་དབྱེ་བས་འཇུག་པ་དང་། གནས་པ་དང་། ལྡང་རྒྱུའི་སྦྱོར་བ་རྣམ་པ་གསུམ་གྱིས་དབྱེ་བས་བཞག་པ་ནི་རྒྱུད་ལས། གསུམ་ཉིད་སྦྱོར་བ་རྣམ་པ་གསུམ། །རྣམ་གསུམ་དབྱེ་བས་རྣམ་པར་གནས། །ཞེས་སོ། །དེ་ལ་སྲོག་གི་རྒྱུ་བ་ནི། སྣ་སྒོ་ཁོ་ན་ཡིན་ཏེ། སྣ་ཡི་སྒོ་ཡི་རྒྱུན་ལས་ནི། །སྲོག་དང་རྩོལ་བའི་རྒྱུ་བདག །དུས་ཀུན་ཏུ་ནི་རྒྱུ་བ་ནི། །སྲོག་ཅེས་བྱ་བ་ཡིན་པར་བཤད། །ཅེས་སོ། །རྣམ་ཤེས་ཀྱི་རླུང་ནི་ཡེ་ཤེས་ཀྱི་རླུང་གི་བདག་ཉིད་དེ། མཐར་ཐུག་དེ་ལ་རྒྱུ་བ་མེད་པའི་ཆ་ནས་གནས་པ་ཉིད་དུ་བཤད་ཀྱང་དུས་ཀྱི་འཁོར་ལོ་ལས་ཕྱེད་བཅས་སོ་གཉིས་ཀྱི་མཚམས་སུ་རྒྱུ་བར་བསྟན་པ་བཞིན་རྡོ་རྗེ་ཕྲེང་བ་ལས་ཀྱང་། ཐུན་བཞིའི་མཚམས་སུ་རྒྱུ་བར་བཤད་དོ། །ནམ་མཁའི་རླུང་ནི་ད་ལྟ་ཁྱབ་པའི་ཚུལ་གྱིས་རྒྱུ་ཞིང་། དངོས་སུ་རྒྱུ་བ་ནི་འཆི་བའི་གནས་སྐབས་ཁོ་ན་སྟེ་དེངས་བའི་ཚུལ་གྱིས་སོ། །དེ་སྐད་དུ་ཕྲེང་བ་ལས། ད་ལྟ་ཁྱབ་པའི་ཚུལ་གྱིས་རྒྱུ། །ཞེས་སོགས་པས་བསྟན་ནོ། །དེ་ལ་ཡེ་ཤེས་ཀྱི་རླུང་ནི་དྷུ་ཏིའི་མར་སྣའི་ཨ་ཐུང་གི་དབུས་ན་གནས་པ་ལས། དེ་གཟུང་འཛིན་གྱི་རྩ་གཉིས་ཀྱིས་དབང་ལས་སྲོག་དང་རྩོལ་བ་གཉིས་སུ་བྱུང་། དེ་འཁོར་ལོ་བཞིའི་རྩ་འདབ་རྣམས་ལས་རིམ་པ་བཞིན་ནང་གི་ཡུལ་ཉི་ཤུ་རྩ་བཞི་ལ་སོགས་པར་འབྱུང་སྟེ། སྲོག་གི་རླུང་གི་དབང་བྱས་པས་སྣ་སྒོ་ལ་རྒྱུ་
བ་ཡིན་ནོ། །དེའང་ཕྱི་ནང་གནད་གཅིག་པ་ཡིན་པས་ཕྱི་རོལ་དུ་དབྱུག་གུའམ་ཆུ་ཚོད་བྱ་བ་དང་། འཕོ་བ་བཅུ་གཉིས་དང་། ཉིན་ཞག་དང་། ཆོས་ཞག་དང་། ཁྱིམ་ཞག་ལ་སོགས་པའི་དབྱེ་བ་ཡོད་པ་ལྟར། ནང་དུའང་ཉིན་ཞག་གཅིག་ལ་དབུགས་ཉི་ཁྲི་ཆིག་སྟོང་དྲུག་བརྒྱའི་གྲངས་ངེས་ཅན་དུ་རྒྱུ་སྟེ། ཉི་ཁྲི་དང་ནི་ཆིག་སྟོང་དང་། དེ་བཞིན་གྲངས་ནི་བརྒྱ་ཕྲག་དྲུག །ཉིན་དང་མཚན་མོ་ངེས་པར་རྒྱུ། །ཞེས་སོ། །དེ་ལྟར་རྒྱུ་བ་དེ་གཟུང་བས་ལམ་དུ་ཇི་ལྟར་འགྱུར་ན། དཔེར་ན་རླུང་བཅིངས་པས་ག་པུར་སྡོད་པ་བཞིན་སྣ་སྒོར་རྒྱུ་བའི་སྲོག་གི་རླུང་བཅིངས་པས་རྣམ་པར་ཤེས་པ་ཟིན་ནས་མི་རྟོག་པའི་ཏིང་ངེ་འཛིན་སྐྱེ་ཞིང་། དེ་ཐབས་དང་མན་ངག་གིས་ཟིན་པའི་ཚེ་འབྱུང་འཇུག་གནས་གསུམ་པ་གྲངས་པ་ཡང་རྡོ་རྗེའི་བཟླས་པར་གྱུར་ནས་སྒྲིབ་པ་ཟད་པར་བྱེད། ཟད་པར་ལ་སོགས་པའི་ཏིང་ངེ་འཛིན་གྱི་སྒོ་མཐའ་ཡས་པ་དང་། ཕྲིན་ལས་རྣམ་པ་བཞི་འགྲུབ་པར་བྱེད་ཅིང་། མཐར་གྱིས་ལས་རླུང་ཐམས་ཅད་འགགས་ནས་ཡེ་ཤེས་ཀྱི་རླུང་མངོན་དུ་བྱས་པའི་དུས་ན་ས་དང་ལམ་གྱི་ཡོན་ཏན་མ་ལུས་པ་ཆིག་རྫོགས་སུ་འགྱུར་བས་ན་ཐབས་ཀྱི་ལམ་ཞེས་བྱའོ། །དེ་ལྟར་ཉི་ཁྲི་ཆིག་སྟོང་དྲུག་བརྒྱ་འགྱུ་བ་དེ་ལྡང་བ་དང་། འཇུག་པ་དང་། གནས་པ་དང་། ཐམས་ཅད་བསྡོམ་པ་བཞིས་ལམ་དུ་བྱ་བ་ལ་སྲོག་རྩོལ་འགོག་པ་ཞེས་བྱ་སྟེ། དེ་ལ་ལྡང་བ་ལམ་དུ་བྱེད་པ་ཕྱིར་དབྱུང་བའི་མན་ངག་གསུམ་ནི། རྩོལ་བ་བཞག་སྟེ་སྲོག་ནས་བཏང་བ། ཤེད་སྐྱེད་དེ་གཉིས་ཀ་ནས་བཏང་བ། སྒྲ་དང་བཅས་ཏེ་ཁ་སྒོ་ནས་བཏང་བའོ། །འཇུག་པ་ལམ་དུ་བྱེད་པ་དགང་བའི་མན་ངག་གཉིས་ནི། རྩོལ་བ་བཞག་ཏེ་སྲོག་ནས་དགང་བ། །སྒྲ་བཅས་མ་ཡིན་པ་ཁ་ནས་དགང་བའོ། །གནས་པ་ལམ་དུ་བྱེད་པ་ནི་ཐུར་སེལ་གྱི་སྟོད་
དུ་སྲོག་སྤུབ་ལ་སྦྱར་ནས་རོ་རྐྱང་གི་རླུང་དབུ་མར་འཛུད་པའི་ཐབས་ལ་མཁས་པས་ཡི་གེའི་འགྲོས་ཐིམ་སྟེ་རྣམ་གྲངས་བདུན་པོ་གནད་བཞི་ལ་བརྟེན་ནས་བསྒོམ་པར་བྱེད་པའོ། །དེ་ལྟར་རླུང་གི་གནད་བཞི་དང་བསྟུན་ནས་ནད་དུ་འཁོར་ལོ་ལམ་བརྟེན་པ་སྲུང་ཤིང་གི་འཁྲུལ་འཁོར་ལ་སོགས་པ་ལྔའམ། རྩ་གསུམ་དང་འཁོར་ལོ་ལྔ་ལ་བརྟེན་པ་གཅིག་དང་། གཉིས་དང་། བཞི་དང་། ལྔའམ་དྲུག་ལ་སོགས་པའི་རྩའི་རྣལ་འབྱོར་རྒྱུད་སྡེ་སོ་སོའི་རང་ལུགས་དང་བསྟུན་ལ་ཐིག་ལེའི་འཐབ་མོ་དང་། རྣལ་འབྱོར་བཞི་ལ་སོགས་པ་མྱུར་བ་བདུན་གྱི་མན་ངག་མིའི་འཁོར་ལ་སོགས་ལ་བརྟེན་ནས་ཉམས་སུ་བླངས་པས་རླུང་ལ་བརྟེན་ནས་རྩ་མདུད་གྲོལ། གཏུམ་མོ་ལ་བརྟེན་ནས་བྱང་སེམས་ཞུ། འཁྲུལ་འཁོར་ལ་བརྟེན་ནས་རྩ་གནས་ཐམས་ཅད་བྱང་སེམས་ཀྱིས་ཁྱབ་པས་ཡི་གེའི་འགྲོས་ཐིམ། ལྟ་བ་རང་བྱུང་གི་ཡེ་ཤེས་སྐྱེ། དེ་ཡང་ཤེས་སྒྲིབ་དང་བཅས་པའི་ཆ་ནས་ཏིང་ངེ་འཛིན་ནམ་སྣེྲལ་ཞིལ་སོགས་པའི་རང་བྱུང་གི་བསམ་གཏན་བཞིའི་རང་བཞིན་དུ་འཆད་པ་ཡིན་ནོ། །དེའི་གྲུབ་མཐའ་མ་འདྲེས་ཡོངས་སུ་རྫོགས་པ་ནི། ས་བདུན་པ་ནས་བཅུ་པའི་བར་བཞི་པོ་ལ་ངག་དག་པ་ཨཱ་ལི་ཀཱ་ལི་ལ་དབང་བས་འགྲོ་དྲུག་གི་སྐད་དང་བརྡའ་འཕྲོད་ཆོས་ཀྱང་དེའི་སྐད་དུ་སྟོན། དགུ་པར་སོ་སོ་ཡང་དག་རིག་བཞི་ལ་དབང་ཐོབ་པས་ཆས་ཐམས་ཅད་ཀྱི་དེ་ཉིད་རིག །གལ་ཏེ་གྲུབ་མཐའ་མ་སྙོགས་ན་འདའ་ཀ་མ་དཔེའི་འོད་གསལ་ནི། འཆི་ཁའི་སྡུད་རིམ་གྱི་རྐྱེན་བྱས་ཏེ་རླུང་ཐམས་ཅད་དབུ་མར་ཚུད་ནས་རྣམ་པར་མི་རྟོག་པའི་ཏིང་ངེ་འཛིན་སྐྱེ་ཞིང་ཡི་གེའི་འགྲོས་ཐིམ། གསུང་རྡོ་རྗེ་ལོངས་སྤྱོད་རྫོགས་པ་འགྲུབ་པ་སྟེ། གླང་པོ་རབ་འབོགས་
ལས། ཡི་གེའི་འགྲོས་ཐིམ་སྔགས་ཀྱི་ལམ་དག་པ། །ངག་གི་སྒྲིབ་དག་རྫོགས་རིམ་ལོངས་སྤྱོད་རྫོགས། །ཞེས་སོ། །གསང་དབང་གི་དམ་ཚིག་ཉུ་བདུད་རྩི་ལྔ་དང་སྒྲོན་མ་ལྔ་བསྟེན་ཞིང་། རིག་མ་མི་སྤང་། སྲོག་ཆགས་མི་གསད། བླ་མ་མི་བསྐུར་བ་རྣམས་ཡིན་ནོ། །གསུམ་པ་ཤེས་རབ་ཡེ་ཤེས་ཀྱི་དབང་སྟོན་པའི་ཕྱིར། །གདན་གསུམ་མངོན་རྟོགས་ངོམ་པའི་མཛེས་མ་ཡི། །གསང་བའི་དཀྱིལ་འཁོར་ལ་བརྟེན་ཤེར་དབང་གིས། །ལག་བཅངས་ཚིམ་པ་དགའ་ལྡན་འདོད་ཆགས་དག །ཡིད་ཀྱི་སྒྲིབ་སྦྱང་སྣང་མཆེད་ཐོབ་གསུམ་དང་། །དགའ་བཞིའི་ཡེ་ཤེས་ཁམས་ཀྱི་ཞུ་བདེས་འགྲུབ། གྲུབ་མཐའ་བདེ་སྟོང་དབྱེར་མེད་ཉམས་སུ་མྱོང་། །འདའ་ཀ་དེར་སྣང་མ་གྲུབ་རྡོ་རྗེ་སེམས། །སྙིང་གའི་རྩ་མདུང་གྲོལ་བ་དཔེའི་ཡེ་ཤེས། །མཁའ་ཁྱབ་ཐུགས་ཀྱི་རྡོ་རྗེ་དྭངས་མའི་སྐུ། །དེ་ལ་དགའ་ལྡན་པ་རྣམས་ནི་ལག་བཅངས་ཀྱི་འདོད་པས་གདུང་བར་བྱེད་པས་དེའི་གཉེན་པོར་དབང་གསུམ་པ་བསྟན་ལ། དེ་ཡང་རིག་མའི་ཐབས་ཀྱི་ཆོ་ག་སྒྲ་ཇི་བཞིན་པ་ལམ་དུ་ལྷོངས་ཤིང་དེ་ཉིད་རིག་རྣམས་ལ་ནི་སངས་རྒྱས་ཀྱི་ཡེ་ཤེས་མ་ནོར་བ་མངོན་སུམ་དུ་མཐོང་ཞིང་སྟོན་པའི་ཐབས་ཀྱི་མཐར་ཐུག་པ་འདི་ལས་གཞན་དུ་མེད་དེ་སྒྲོལ་མ་རྣལ་འབྱོར་མའི་རྒྱུད་ལས། ཤེས་རབ་རྟོགས་པར་བྱེད་པ་ཐབས། །ཤེས་རབ་མེད་ལ་ཐབས་མཁས་མེད། །རྡོ་རྗེ་པདྨ་རྒྱས་བྱེད་ཀྱི། །པདྨས་རྡོ་རྗེ་འབྱེད་པར་བྱེད། །སྤྲུལ་པ་བདེ་ཆེན་འཁོར་ལོས་ཀྱང་། །ཆོས་དང་ལོངས་སྤྱོད་རྣམ་པར་འབྱེད། །དེ་ལྟས་འདི་ནི་གསང་ཆེན་ཏེ། །རྒྱུད་གཞན་དུ་ནི་འབད་པས་སྦས། །ཞེས་སོ། །དེ་ཡང་གཞན་གྱིས་མ་མཐོང་བ་བྱས་ལ་བསྟེན་པའི་ཚུལ་ཁང་བུ་བརྩེགས་པའི་རྒྱུད་ལས། ཕྱག་རྒྱ་མཐོང་ན་དངོས་གྲུབ་མེད། །དེས་ན་མཐོང་བ་མེད་པར་
བསྟེན། །ཞེས་སོ། །དེ་བས་ན་བདེ་བ་མི་བསྟེན་པའི་གནས་སྐབས་ན་ཡོན་གྱིས་མགུ་བར་བྱས་ལ་རང་གི་གནས་སུ་བཏང་ངོ་། །དེ་ལྟ་ནའང་ཚངས་སྤྱོད་ཀྱི་རྟེན་ལྡན་ལ་སོགས་པ་རང་བཞིན་མ་བརྟགས་པས་འདོད་རྒྱལ་དུ་སྤྱོད་པ་རྣམས་ལ་ཉེས་སྤྱོད་ཆེན་པོའི་གཡངས་ཡང་འདི་ཡིན་ནོ། །ཡོན་ཏན་གྱི་ཆ་ནས་ཕྲ་ཞིང་རྟོགས་པར་དཀའ་ལ་མ་རྟོགས་ནས་ལམ་དུ་མ་ལྷོད་ནའང་ཉེས་དམིགས་ཆེན་པོ་ཡིན་པས་ན་རྡོ་རྗེ་མཁའ་འགྲོ་ལས། གང་ཞིག་དགེ་སློང་དངོས་གནས་པ། །དེ་ལ་དེ་ཉིད་བསྟེན་མི་བྱ། །ཅེས་དང་། ལམ་སྒྲོན་ལས། གསང་བ་ཤེས་རབ་དབང་བསྐུར་ནི། དད་པོའི་སངས་རྒྱས་རྒྱུད་ཆེན་ལས། །རབ་ཏུ་འབད་པས་འགག་པའི་ཕྱིར། །ཚངས་པར་སྤྱོད་པས་བླང་མི་བྱ། །ཞེས་བསྐྱེད་རྫོགས་གོང་མའི་དེ་ཁོ་ན་ཉིད་ལ་ནང་བྱང་མ་ཆུད་ཅིང་། རང་ལམ་གྱི་བརྟུལ་ཞུགས་ལ་མཆོག་ཏུ་འཛིན་པས་དབང་དེ་གཉིས་བླངས་ན། ངོ་ཚ་དང་ཁྲེལ་ཡོད་གཉིས་ལྡན་རྣམས་ནི་བརྟུལ་ཞུགས་དེ་ཉམས་སོ་སྙམ་ནས་འགྱོད་པར་འགྱུར་ཏེ། དཔེར་ན་ཤེར་ཕྱིན་ཉན་པས་ཉན་ཐོས་མང་པོ་ཁ་ནས་ཁྲག་སྐྱུགས་ཏེ་ཤི་བ་བཞིན་ནོ། །གཉིས་དང་མི་ལྡན་པ་རྣམས་ནི་གསང་སྔགས་ཀྱི་གཟུགས་བརྙན་ལ་ཕས་ཕམ་པའི་ཆོས་ཉམས་སུ་མྱོང་ནས་ངན་སོང་དུ་འགྲོ་བས་ན་སྤྱོད་པ་དུས་ཚོད་དང་འབྲེལ་བ་ཤིན་ཏུ་གལ་ཆེ་བ་ཡིན་ལ། འོན་ཀྱང་ཡིད་ཀྱིས་བཏགས་པ་ཙམ་ནི་མི་འགོག་པས་ཚིག་ཙམ་གྱི་དབང་བསྐུར་བར་བྱང་ཆུབ་སེམས་འགྲེལ་ལས་བཤད་དོ། །ཡང་ཁ་ཅིག་ལུང་དེ་གཉིས་ལ་བརྟེན་ནས་སོ་སོ་ཐར་བའི་རྟེན་ཁྱད་པར་ཅན་ལ་དགག་བྱ་དམིགས་བསལ་མེད་བཞིན་དུ་དབང་གོང་མ་གཏན་འགོག་པའང་རིག་པ་མ་ཡིན་ཏེ། དེ་ལྟ་ན་རབ་བྱུང་གི་སྡོམ་པས་རྡོ་རྗེ་ཐེག་
པའི་ཟབ་ལམ་བཀག་པས་སྡོམ་པ་གསུམ་གནད་ཀྱི་མི་འགལ་བ་ཡར་ལྡན་དུ་འགྱུར་བ་ལས་ལོག་སྟེ། ཐེག་པ་ཡན་མན་དགྲ་གཤེད་ལྟར་འགྱུར་པའི་ཕྱིར་དང་། དུས་འཁོར་གྱི་དབང་གོང་མའི་སྐབས་སུ་དགེ་སློང་ལ་སྣ་ཚོགས་གཟུགས་ཅན་གྱི་འཁྱུད་པའི་དབང་ཤིན་ཏུ་གསལ་བར་གསུངས་པ་དང་མཐུན་པར། ཚངས་པར་སྤྱོད་པའི་རྟེན་ཁྱད་པར་ཅན་ནི་དབང་གོང་མའི་སྣོད་ཡིན་པར། རྡོ་རྗེ་གདན་པས། དགེ་སློང་ལུས་ལ་ཕྱག་རྒྱར་སྟེན། །ལྷོ་ནུབ་སྲིན་པོའི་ཁ་གན་ནོ་མཛད། །པདྨ་ཀ་ར་ཞེས་བྱ་བའི། །བླ་མ་དེ་ལ་ཕྱག་འཚལ་ལོ། །ཞེས་དད་དགེ་ཚུལ་ལུས་ལ་གདོལ་པའི་རིགས། །ཕྱག་རྒྱ་མ་དང་དངོས་གྲུབ་བརྙེས། །ཀུ་ཀུ་རི་པ་ཞེས་བྱ་བའི། །བླ་མ་དེ་ལ་ཕྱག་འཚལ་ལོ། །ཞེས་པ་དང་། དེ་བཞིན་དུ་དགེ་སློང་རྡོ་རྗེ་འཛིན་པ་ཉིད་སྔགས་འཆང་གི་དང་པོར་གསུངས་པ་དེ་ཡང་བུམ་དབང་འཁོར་བཅས་ཙམ་ཐོབ་པས་ནི་མ་ཡིན་ཏེ་དེ་ཙམ་གྱི་རྒྱུད་སྡེ་ཟབ་མོ་ཉན་བཤད་དང་། རྫོགས་རིམ་ཟབ་མོའི་སྣོད་ལ་མི་དབང་བའི་ཕྱིར་དེ་ལྟར་གསུངས་པའི་དོན་ཡང་ལྡོག་པར་འགྱུར་ཞིང་། རབ་ཏུ་བྱུང་བ་ཐམས་ཅད་བླ་མེད་ཟབ་ལམ་གྱི་སྣོད་མ་ཡིན་པར་སོང་བས་འཛམ་བུའི་གླིང་གི་རྒྱན་དྲུག་གི་གཙོ་བོ་སློབ་དཔོན་འཕགས་པ་དང་། ཀླུ་བྱང་དང་། ཟླ་བ་གྲགས་པ་དང་། ཤཱནྟི་པ་དང་། སངས་རྒྱས་ཡེ་ཤེས་ལ་སོགས་པའང་སྔགས་ཀྱི་ལམ་ནས་དངོས་གྲུབ་བརྙེས་ནས་གྲུབ་བརྒྱའི་གྲལ་དུ་བཞུགས་པའང་སྡིག་ཅན་དུ་འགྱུར་བས་སོ། །དེ་བས་ན་འདུ་ཤེས་གསུམ་དང་མི་ལྡན་པ་ལ་གསང་དབང་བཀག་ལ། དེའི་སྟེང་དུ་འཛག་པའི་གཉེན་པོ་མེད་པ་ལ་ཤེར་དབང་བཀག་གིས། གལ་ཏེ་བཟོད་པ་ཆུང་ངུ་ཐོབ་ཀྱི་བར་བསྲིང་དགོས་ན་དེའི་ལམ་རྟགས་མངོན་སུམ་དུ་སྐྱེས་པ་འཇིག་རྟེན་དཀོན་བས་རབ་བྱུང་ཐམས་ཅད་བླ་མེད་ཟབ་ལམ་གྱི་སྣོད་མ་ཡིན་པར་
འགྱུར་བས་རྩ་ལྟུང་ལ་རིན་ཐང་ཆེན་པོ་བྱེད་པ་ཉིད་དོ། །དེ་ལ་གསུམ་པའི་དབང་ནི་ཤེས་རབ་མའི་བྷ་གའི་དཀྱིལ་འཁོར་དུ་བསྐུར་བ་ཡིན་པས་དེའི་རྣམ་པར་གཞག་པ་ལ་བདུན། རིག་མ་བརྟག་ཅིང་དགུག་པ་དང་། བྱང་ཆུབ་ཀྱི་སེམས་རྒྱས་པར་བྱ་བ་དང་། བསླབ་བྱའི་སྒོ་ནས་སྣོད་ལྡན་དུ་བསྒྲུབ་པ་དང་། སློབ་མ་ལ་གཏད་ནས་གོ་བར་བྱ་བ་དང་། རྩ་བསླང་ནས་སྤྱོད་ཐབས་བཤད་པ་དང་བལྟ་བ་བཞི་དང་སྦྱར་ནས་དབང་དོན་ངོས་བཟུང་བ་དང་། འཕོ་མེད་ཀྱི་དོན་ལ་སྦྱར་ནས་ཡིན་ཚུལ་ལྟར་ལྡོག་ཅིང་དགྲམ་པའི། དང་པོ་ནི་དབང་བཀོད་པ་ཆེན་པོ་ལས། སངས་རྒྱས་རིགས་ཀྱང་བྱེ་བྲག་ལས། །རིག་མའང་དེ་བཞིན་བྱེ་བྲག་འགྱུར། །ཞེས་པས་རིགས་སོ་སོ་དང་མཐུན་པའི་རིག་མ་མེད་ན་མི་འགྲུབ་པས་རིགས་བརྟག་པ་འདི་གལ་ཆེ་ལ། དེ་ལ་ཕྱི་ནང་གསང་གསུམ་ལས་ཕྱ་ལྟར་དུ་རྒྱལ་རིགས་ཀྱིས་དེ་བཞིན་གཤེགས་པ། རྗེའུ་རིགས་ཀྱིས་རྡོ་རྗེ། དམངས་རིགས་ཀྱིས་རིན་པོ་ཆེ། བྲམ་ཟེས་པདྨ། གདོལ་པས་ལས་ཀྱི་རིགས་ཀྱི་སངས་རྒྱས་འགྲུབ་པ་ཡིན་ནོ། །ནང་ལྟར་ན་ཀྱེ་རྡོ་རྗེ་མཁའ་འགྲོ་སྡོམ་པ་ལས། ལྷ་དང་ལྷ་མིན་མི་རྣམས་དང་། གནོད་སྦྱིན་མིའམ་ཅི་ལས་ཀྱང་། །ཕྱག་རྒྱ་བཀུག་ལ་རབ་ཏུ་བརྟག །ཅེས་པས་རྫུ་འཕྲུལ་ཐོབ་པའི་སློབ་དཔོན་བཛྲ་ཧེ་དང་། དཔལ་ལྡན་བདེ་ཆེན་ལ་སོགས་པ་བཞིན་ལྷ་དང་ལྷ་མིན་ལ་སོགས་པའི་བུ་མོ་དགུག་པར་ནུས་པ་རྣམས་ལ་དངོས་བསྟན་ལྟར་ཡིན་ལ། གཞན་དུ་ལོ་གྲངས་དང་རིགས་ཀྱི་སྒོ་ནས་དེ་དག་ཏུ་གདགས་པར་ཡང་བཤད་དོ། །སྤྱིར་བུད་མེད་ཐམས་ཅད་རིགས་ཅན་ལྔའི་རྩ་དང་ལྡན་པ་སྟེ། སྔ་མའི་འཕྲོར། བུད་མེད་ཐམས་ཅད་རིགས་ཅན་ལྔ། །དེ་ཡི་བཀོད་བ་བདེ་བ་ཆེ། །རྣལ་འབྱོར་དངོས་གྲུབ་རྫོགས་པའོ། །
ཞེས་པས་རིགས་ཅན་ལྔར་མ་འདུས་པ་མེད་ཅིང་རྩ་ལྔ་པོ་དེས་བསྟུམས་པས་བྱང་སེམས་དཀར་པོའང་དངོས་སུ་མི་འབྱུང་ངོ་། །སྐྱེས་པ་རྣམས་ལ་ནི་རྩ་ལྔ་པོ་མེད་པས་ཁུ་བ་དངོས་སུ་འཐོན་ལ། རྡུལ་འབྱུང་བའི་རྩ་ཁ་ཁྱད་པར་གྱི་གནས་འགྱུར་བ་མེད་པས་བྱང་སེམས་དམར་པོ་ཐུར་དུ་མི་འབབ་ཀྱང་། རྩ་གྱེན་རྒྱུག་ཏུ་ཡོད་པས་སྣ་སྦུག་གཡས་པ་ནས་རྐྱེན་དང་འགྲོགས་པའི་ཚེ་འབབ་པའོ། །དེ་ལས་གསང་བ་ལྟར་བརྟག་པ་ནི། རྡོ་རྗེ་མཁའ་འགྲོ་ལས། རི་མོ་ཅན་ནི་སེམས་གཡོ་ཞིང་། །འོ་མ་འཛིན་སྦོམ་པདྨ་ཅན། །ལྟེ་བ་དུང་འདྲ་དུང་ཅན་མ། །དེ་དག་རིམ་པ་བཞིན་དུ་བརྗོད། །ཅེས་སོ། །རང་བཞིན་གསལ་བར་སྟོན་པ་ནི་དབང་བཀོད་ལས། པདྨའི་རིགས་དང་དུང་ཅན་ཏེ། །རི་མོ་ཅན་དང་ཧ་སྟིའོ། །རིགས་ནི་དེ་དག་བརྟག་པ་སྟེ། །ཁ་དོག་འགྲོས་དང་སྐད་ཀྱིས་བརྟག །ཁ་དོག་བརྟག་པ་འདི་ལྟ་སྟེ། །པདྨའི་རིགས་སུ་གང་འདོད་པ། །བྱད་ནི་ཟླུམ་ཞིང་ཤ་མདོག་སྨུག །སྐད་ཕྲ་ཡིད་དུ་འོང་སྨྲོ་ཞིང་། །གཟུགས་དང་བོངས་ནི་ཆུང་ཞིང་སྦོམ། །ཡིད་དུ་འོང་ཞིང་ཆགས་པ་སྐྱེ། །སྐྲ་ཡི་མདོག་སེར་ལི་ལ་འཇམ། །སེན་མོའི་འོད་ཀྱང་དམར་ལ་དངས། །སྨིན་མཚམས་བར་ཡང་མ་ཆད་དེ། །ལོ་ནི་བཅོ་ལྔ་ཉིད་ལོན་པ། །པདྨའི་མཚན་ཉིད་ཡིན་པར་འདོད། །དུང་ཅན་དག་གི་མཚན་ཉིད་ནི། །བྱད་ཉིད་ཆེ་ཆུང་སྙོམས་པ་སྟེ། །ཁ་དོག་དཀར་ཞིང་སོ་ཡང་དཀར། །ལུས་ནི་རིགས་ཤིང་དབའ་བརྟུལ་ཆེ། །གཟུགས་བཟང་ཡིད་དུ་འོང་བ་སྟེ། །མིག་རྩ་ཡིད་ཙམ་དམར་བ་ལ། །སྐྲ་ལང་གནག་ཅིང་འཛུམ་ཁ་སྙི། །སོར་མོ་ཕྲ་ཞིང་མཉན་ལྕུག་ཆེ། །སེང་གེ་ལྟ་བུའི་འགྲོས་དང་ལྡན། །སྐད་ནི་ཚངས་པའི་དབྱངས་དང་མཚུངས། །བཅུ་དྲུག་ལོ་དང་ལྡན་པ་ནི། །དུང་ཅན་ཡིན་པར་རབ་ཏུ་བཤད། །རི་མོ་ཅན་གྱི་མཚན་ཉིད་ནི། །
ཁ་ཉིད་ཆུང་ཞིང་ཤ་ཡང་སེར། །བྱད་ཀྱི་དཀྱུས་ཀྱང་རིང་བ་སྟེ། །གཟུགས་ཉིད་ཕྲ་ཞིང་སྨྲ་བ་ཉུང་། །དཔའ་བརྟུལ་ཆེ་ཞིང་ཞུམ་པ་ལྟར། །མིག་གི་འབྲས་བུ་དཀར་ནག་ཕྱེད། །སྐད་ཀྱི་ང་རོ་ཆུང་བ་སྟེ། །ཤ་སྲབ་མཚན་སྤུ་གསལ་བ་དང་། །ཡིད་དུ་འོང་ཞིང་གླང་ཆེན་འགྲོས། །བཅུ་བཞི་ལོ་དང་ལྡན་པ་སྟེ། །རི་མོ་ཅན་དུ་ཡང་དག་འདོད། །ཧསྟི་མ་ཡི་མཚན་ཉིད་ནི། །བྱད་དཀྱུས་དག་ནི་རིང་བ་ལ། །ཤ་ཡི་མདོག་ནི་ཡིད་ཙམ་སྔོ། །སོ་དཀར་མིག་གི་འབྲས་བུ་གནག །གཟུགས་ཆེ་སྐེད་སྐབས་ཕྱེད་པ་སྟེ། །སྣ་རྒྱུད་བཟང་ཞིང་སྨིན་མ་བཟང་། །སྐབས་སྐབས་སྐད་ཀྱང་འཛེར་བར་བྱེད། །སྤྱོད་པ་དལ་ལ་ཆིག་འཇམ་སྨྲ། །བ་གླང་འགྲོས་འདྲ་བརྟུལ་ཞུགས་ཆེ། །སུམ་ཅུ་མན་ཆད་ལོ་རྣམས་སོ། །དེ་ལྟར་མཚན་དང་ལྡན་པས་ན། །ཧསྟིའི་རིགས་སུ་ཡབ་དག་འདོད། །གསང་བའི་ཡུམ་དེ་རེ་རེ་ཡི། །འབྲས་བུ་རེ་རེ་ཐོབ་པ་སྟེ། །རི་མོ་ཅན་དང་ཧ་སྟི་མཆོག །ཡང་ན་བུ་མངས་ལོངས་སྤྱོད་ལྡན། །ལོ་ཚད་ངེས་པ་མེད་པར་བསྟན། །ཡང་ནི་ཡིད་འོང་གཞོན་ནུ་མ། །སྐྱེས་པས་མ་གཙེས་བརྟུལ་ཞུགས་ལྡན། །བཅུ་བཞི་ལོ་དང་ལྡན་པའོ། །དེ་ལྟར་བསྟེན་པའི་ཡུམ་ལ་ཡང་། །སྦྱར་བས་འགྲུབ་དང་བསྟེན་པས་འགྲུབ། །བསམ་པས་འགྲུབ་དང་མཐོང་བའོ། །རི་མོ་ཅན་ལ་སྦྱར་བས་ཏེ། །དུང་ཅན་བསྟེན་པའི་སྟོབས་ཀྱིས་འགྲུབ། །པདྨའི་རིགས་ནི་བསམ་པར་བྱ། །ཧ་སྟེ་མཐོང་ཞིང་རེག་པས་སོ། །དབང་ཉིད་རྒྱས་པར་བྱེད་པ་ན། །རིགས་ནི་བཞི་ཀ་ཚང་བར་བྱ། །དེ་མེད་ནའང་སོ་སོ་བཤད། །སྦྱར་བས་བྱས་ན་དངོས་གྲུབ་རབ། །བསྟེན་པས་དངོས་གྲུབ་འབྲིང་དུའོ། །བསམ་པས་འགྲུབ་པ་ཐ་མའོ། །མཐོང་བས་གསུམ་ཀའི་གྲོགས་སུ་བསྟེན། །ཞེས་སོ། །དེ་བཞིན་
དུ་སྡོམ་འབྱུང་གི་སོ་གཅིག་པ་ལས། ལཱ་མ་དང་། ཁཥྜ་རོ་ཁ་ལ་སོགས་པའི་མིང་གཞན་གྱིས་བཤད་དོ། །དེ་ཡང་ཁྱད་པར་དུ་རྩའི་སྒོ་ནས་བརྟག་པ་སྟེ། པདྨ་ཅན་ནི་པདྨ་རྒྱས་པ་ལྟ་བུའི་རྩ་དང་ལྡན་པས། དེ་ལ་རྩ་ཁ་འབྱེད་པའི་གདམས་ངག་གལ་ཆེ་ཞིང་བདེ་བའི་ཡེ་ཤེས་སྟེ་བས་ཆོས་ཉིད་གསལ་བའི་གྲོགས་ཞེས་བྱའོ། །དུང་ཅན་མ་ནི། རྩ་ཁ་དུང་གི་ཁ་སྒོ་ལྟར་འཁྱིལ་ནས་ཡེད་པས་དེ་ལ་རྩ་གཅུད་པའི་མན་ངག་གཙོའོ། །རི་མོ་ཅན་ནི་རི་དྭགས་ཅན་དང་མཚུངས་པས། རི་དྭགས་ཨེ་ན་ཡའི་བྱིན་པ་ལྟར་རྩ་མཇུག་ཕྲ་ལ་གྲིམས་པ་སྟེ། དེ་ལ་རྩ་སློང་བའི་མན་ངག་གཙོ་ཆེའོ། །ཧསྟི་མ་ནི་གླང་སྣ་ཅན་སྟེ་གླང་པོའི་སྣ་ལྟར་གྱེན་ལ་གདེངས་པས་འདི་ལ་རྩ་འགུགས་པའི་མན་ངག་གཙོ་ཆེའོ། །བ་གླང་ཅན་ནི་འདིར་མ་སྨོས་པ་སྟེ། །རྩ་བག་ལ་ཉལ་དང་། ཤེས་པ་ལ་སྒྲིན་པ་མེད་པས་ཡོན་ཏན་ཆུང་བའོ། །དེ་ལ་རྩ་སྤྱད་པའི་མན་ངག་གཙོ་ཆེ་བ་ཡིན་ནོ། །དེའང་རྩ་སྣ་རིང་བ་དང་། ཐུང་བ་དང་། འབྲིང་པོ་གསུམ་ལས་རིང་བ་ནི་བདེ་བ་ཁ་སྲ་ལ་ཕྱི་ནས་ལྷག་པར་སྐྱེ། ཐུང་བ་ན་བདེ་བ་ཁ་སྙི་ལ་ཡུན་ཐུང་། འབྲིང་པོ་ནི་རྣམ་ཤེས་མེད་པ་དང་འདྲ་བར་རིགས་པར་བྱའོ། །རྩ་སོ་སོའི་བྱེད་ལས་ཀྱི་དབང་དུ་ན། རི་དྭགས་ཅན་གྱིས་ལུས་སྤེལ་བའི་ལས་འགྲུབ། དུང་ཅན་མས་ངག་སྤེལ་བའི་ལས་འགྲུབ། གླང་སྣ་མས་ཡིད་སྤེལ་བའི་ལས་འགྲུབ། བ་གླང་ཅན་མས་སེམས་སྤེལ་བའི་ལས་འགྲུབ། པདྨ་ཅན་གྱིས་བདེ་བ་ལུས་ལ་རྒྱས་པའི་ལས་འགྲུབ་པའོ། །ཡང་ཞིང་སྔགས་ཀྱི་རིགས་ཅན་མཆོག་དམན་གཉིས་ཀྱི་སྒོ་ནས་བརྟག་པ་ལ། མཁའ་འགྲོ་མ་ནི། སྐྲ་གྱེན་དུ་གཡེངས་པ། འགྲམ་ཡངས་ལ་ཡན་ལག་ཕྲ་བ། མིག་དཀྱུས་རིང་པའོ། །ཕལ་པའི་རིགས་ནི་མིག་ཡངས་པ། སྐྲ་གཡས་སུ་འཁྱིལ་བ། ཡ་སོ་ལྷག་པ། གཡོན་
ནས་བལྟས་ན་དགྱེ་ལ། །གཡས་ནས་བལྟས་ན་དགུ་པའོ། །ཐད་ཀ་ནས་བལྟས་ན་རབ་ཏུ་དྲང་བ་སྟེ། །དཔལ་རྡོ་རྗེ་མཁའ་འགྲོ་ལས། །ཐ་མལ་སྔགས་ཀྱི་ལུས་ཅན་དང་། །ཞིང་སྐྱེས་མ་ནི་གར་ཡང་རུང་། །ཞེས་སོ། །དེའང་རིག་མའི་ངེས་ཚིག་ནི། རིག་པའི་ཡེ་ཤེས་མངོན་དུ་བསྐྱེད་པས་རིག་པ་དང་། དེ་ལ་མ་བརྟེན་ན་སངས་རྒྱས་ཀྱི་ཡེ་ཤེས་མི་རྟོགས་པས་ཡོན་ཏན་ཐམས་ཅད་ཀྱི་འབྱུང་གནས་ས་གཞི་ལྟར་སྐྱེད་བྱེད་འགྲུབ་པའི་ཆ་ནས་ས་ཞེས་རྒྱལ། ཡང་ན་བདེ་བའི་གཟུངས་དང་ལུས་ཀྱི་གཟུངས་དེའི་ལུས་ལ་བརྟེན་ནས་སྐྱེ་བས་ན་གཟུངས་དང་། མ་ནི་ནམ་མཁའ་དང་འདྲ་བར་འདོད་པའི་ཡོན་ཏན་ཐམས་ཅད་ཀྱི་འབྱུང་གནས་ཡིན་པས་གཟུངས་མ་ཞེས་འབྱུང་ངོ་། །ཡང་ན་འཁོར་བ་ལས་སངས་རྒྱས་ཀྱི་སར་འཛིན་པར་བྱེད་པས་ཕྱག་དང་། དེ་ལས་བྱུང་བའི་ཡེ་ཤེས་ཀྱི་འཁོར་བའི་རང་བཞིན་སངས་རྒྱས་སུ་རྒྱས་འདེབས་པར་བྱེད་པས་རྒྱ་དང་། མ་ནི་རྟོགས་པའི་ཡོན་ཏན་དེ་ལས་འབྱུང་བས་སྤང་དུ་མི་རུང་བའི་ཕྱིར་ཕྱག་རྒྱ་མ་ཞེས་བྱ་སྟེ། སྒྲོལ་མ་རྣལ་འབྱོར་མའི་རྒྱུད་ལས། རྩ་ཡི་ཕྲ་བ་ལྷ་མོ་སྟེ། །དེ་བཞིན་ཁམས་དང་གཉེར་བཅས་པ། །བུད་མེད་རྣལ་འབྱོར་མའི་དཀྱིལ་འཁོར། །སྤངས་ནས་རི་མོ་སུ་ཞིག་ལེན། །ཞེས་སོ། །སྤྱི་མཚན་དུ་དབྱིབས་དང་། ཁ་དོག་དང་། སྤྱོད་ལམ་གསུམ་གྱི་སྒོ་ནས་བརྟག་པ་ནི། རྐེད་པ་ཕྲ་བ་དང་། རང་བཞིན་ལྡེམ་པ་དང་། ཡན་ལག་ལྕུག་ཅིང་སེན་མོ་དམར་བཀྲག་ཆེ་བ་དང་། ལུས་བོང་འཚམས་པ་དང་། ཧ་ཅང་དཀར་བ་དང་། གནག་འམ་ཡིན་པ་དང་། དེ་བཞིན་སེར་བ་དང་། དམར་བའི་མཐའ་གཉིས་སྤངས་པས་སྔོ་སང་དུ་འདུག་པ་དང་། མིག་ཡངས་པས་སྨིན་མཚམས་འབྲེལ་བ་དང་། སོ་དཀར་ལ་ཐགས་
དམ་པ་དང་། སྤྱོད་ལམ་དལ་བ་དང་། འགྲོ་ན་གཡས་སུ་འགྲོ་ཞིང་དང་བའི་འགྲོས་འདྲ་བ་དང་། ངག་སྙན་ལ་བག་ཆེ་བ་དང་། སྨྲ་བ་ཉུང་ཞིང་སོས་དལ་བ་དང་། གཡོན་པའི་ཀུན་སྤྱོད་བྱེད་པ་དང་། སེམས་རྒྱུད་འཇམ་ཞིང་ངོ་ཚ་ཆེ་བ་དང་། ཐབས་ལ་གུས་ཤིང་ཕྲག་པ་ཡངས་པ་སྟེ། དེ་ལྟ་བུ་ལ་བརྟེན་ན་ཆོས་ཉིད་རྣམ་པར་མི་རྟོག་པ་འགྲུབ་པའི་ཚུལ་ཡང་། བུ་མོའི་ལོངས་སྤྱོད་བདེ་བ་ཡིས། །རྣམ་པར་མི་རྟོག་གཉིས་མེད་འགྲུབ། །རི་བོ་ཉམས་ནི་དགའ་བ་དང་། །ནགས་ཚལ་དབེན་པའི་ས་ཕྱོགས་སུ། །མིག་བཟང་བསྟན་པའི་བློ་ལྡན་བཟུང་། །ཞེས་སོ། །ཞང་ལ་དགུག་པའི་མན་ངག་ཀྱང་། །ལྟོ་འགྲོས་ལག་འགྲོ་བཟུང་བ་ན། །དེ་དག་དུད་མེད་ཐལ་པར་བྱ། །སྦྲང་རྩི་སྦྱར་བ་མཚན་ཁུང་དུ། །ཐིག་ལེ་བྱས་ན་འགུགས་པར་འགྱུར། །མི་ཚིལ་མི་ཡི་ཐོད་པར་བཞག །ན་རྨའི་བལ་གྱི་སྡོང་བུར་བྱ། །གཟུགས་འཚང་ཐོད་པ་དག་ལས་ནི། །སྣག་ཚ་བླངས་ཏེ་བུ་མོ་ལ། །ཐིག་ལེ་བྱས་ན་འགུགས་པར་འགྱུར། །ཞེས་སོ། །གཉིས་པ་ནི། །རྡོ་རྗེ་མཁའ་འགྲོའི་སོ་བརྒྱད་པ་ལས། ཏིལ་དཀར་པོ་དང་། ན་ག་གེ་སར་དང་། དཔའ་བོའི་ཚིག་འགྲོང་གི་རྩ་བ་རྣམས་བཏགས་ཏེ། །སྦྲང་རྩི་དང་མ་ཧེའི་མར་དང་ལྷན་ཅིག་ཏུ་སྦྱར་ཏེ་བསྐུས་ན་བྷོ་ལ་རེངས་ཤིང་འདོད་པའི་བདག་ཉིད་ཅན་རྣམས་ཡིད་འཕྲོག་པར་འགྱུར་ཞེས་སོགས་པས་བསྟན་ཏོ། །གསུམ་པ་ནི་དེ་ལ་ལས་རྒྱུ་འབྲས་ཀྱི་ཆས་བསྟན་ལ་སྲིད་པ་ལ་བློ་ལོག་པར་བྱ། རབ་ཏུ་དབང་བསྐུར་ནས་མན་ངག་སྦྱིན་པ་དང་། ཐ་ནའང་དགེ་བསྙེན་གྱི་སྡོམ་པ་སྦྱིན་པ་ལ་སོགས་པས་རྒྱུད་དག་པར་བྱ་སྟེ། སྒྲོལ་མ་རྣལ་འབྱོར་མ་ལས། དང་པོར་འདུས་པ་བྱས་ནས་ནི། །རྡོ་རྗེ་ཆོ་ག་རབ་ཏུ་བསྒྲུབ། །དེ་བཞིན་གཤེགས་པའི་བཙུན་
མོའི་མཆོག །དམ་ཚིག་ཆེན་པོར་བྱིན་གྱིས་བརླབ། །ཅེས་སོ། །བཞི་པ་ནི། སློབ་མས་གསོལ་བ་བཏབ་པའི་རྗེས་ལ། སློབ་དཔོན་ཉིད་དཀྱིལ་འཁོར་གྱི་བདག་པོར་གསལ་ཞིང་། སློབ་མ་འདོད་ཆགས་རྡོ་རྗེའི་ངོ་བོ་ཉིད་འོད་དཔག་མེད་དུ་བསྐྱེད་དུ་བཙུག་པའི་ལག་པ་གཡོན་པར་གདན་གསུམ་ཚང་བའི་དཀྱིལ་འཁོར་གྱི་བདག་ཉིད་རིགས་ཀྱི་ལྷ་མོའི་སྙིམ་པ་གཡས་པར་སྦྱིན་པ་ལ་བཅངས་ནས། རྡོ་རྗེ་དང་བཅས་པའི་ལག་པ་གཡས་པ་སློབ་མའི་སྤྱི་བོར་བཞག་སྟེ། ལྷ་མོ་འདི་ནི་ཕྱག་རྒྱ་ཆེ། །མཐའ་ཡས་བདེ་བ་སྦྱིན་པ་མོ། །རྣམ་པ་ཀུན་ཏུ་ཕྱག་རྒྱ་ལོངས། །བུ་ཡིས་བླ་མེད་མཆོད་པ་གྱིས། །ཞེས་གནང་བ་བྱིན་པས། སྣ་ཚོགས་ལུས་ཅན་མས་ཀྱང་གུར་གུམ་ལ་སོགས་པ་དྲི་ཞིམ་པོས་ལུས་ལ་བགོས། རྒྱན་གྱི་བྱེ་བྲག་དུ་མས་བརྒྱན་ནས་དམ་ཚིག་དྲི་བའི་ཕྱིར། དཔའ་བོ་བྱང་ཆུབ་སེམས་ཟ་བར། །ཁྱོད་ནི་སྤྲོ་བ་ཡིན་ནམ་ཅི། །རིགས་ལྔ་ལས་ནི་རབ་བྱུང་བའི། །རིག་མ་མཆོད་པ་ལ་གུས་སམ། །དྲི་ཆེན་དྲི་ཆུ་སྟོབས་དྲག་སོགས། །ཟ་བ་རང་ལྟ་ཡིད་ཆེས་སམ། །རྗེས་སུ་མཐུན་སྨོས་དམ་ཚིག་བཟང་། །ཇི་ལྟར་དགའ་བ་སྨྲོག་ཤིག་བུ། །ཞེས་བརྗོད་པས་སློབ་མས་ཕྱག་འཚལ་ཞིང་མེ་ཏོག་འཐོར་བ་དང་བཅས་སྤྲོ་བ་དྲིས་པ་དང་དུ་བླང་བའི་ཕྱིར། ཇི་ལྟར་གསུངས་པའི་དམ་ཚིག་སོགས། །ལྷ་མོ་བདག་ནི་ཅིས་མི་སྤྲོ། །བུད་མེད་རྟག་གུས་ཅིས་མི་བྱ། །པདྨ་མཆོད་པར་ཅིས་མི་བགྱིད། །ཅེས་ལན་གདབ་བོ། །དེ་ནས་བླ་མ་ཡབ་ཡུམ་སྙོམས་པར་ཞུགས་པའི་བདེ་བ་ཆེན་པོའི་སྒྲ་དང་འོད་ཀྱིས་ཕྱོགས་བཅུའི་དེ་བཞིན་གཤེགས་པ་ཐམས་ཅད་འདོད་ཆགས་རྡོ་རྗེའི་རྣམ་རོལ་ཅན་དུ་བཀུག་སྟེ། མདུན་གྱི་ནམ་མཁར་སྟོང་གསུམ་གཡོ་བ་ཙམ་གྱིས་རྗེས་ཆགས་མཛད་པས་བྱང་ཆུབ་ཀྱི་
སེམས་དཀར་དམར་གྱི་ངོ་བོ་འོད་དུ་ཞུ་ནས་དབང་རྟེན་དང་སློབ་མ་ལ་ཐིམ་པར་བསྒོམ་དུ་བཅུག་པས་དེ་གཉིས་ཀྱང་ཆགས་པའི་སེམས་ཀྱིས་མྱོས་པར་གྱུར་པ་ལས། ཁྱད་པར་རིག་མ་ཉིད་ཀྱི་ཐ་མལ་དུ་རྟོག་པའི་ཀུན་ཏུ་རྟོག་པ་རང་འགགས་ནས་སྐྲ་གྲོལ་ལུས་གཅེར་བུར་ཕྱུང་། འཛུམ་པ་དང་བཅས་པའི་ཟུར་མིག་གི་མདས་དཔའ་བོའི་སྙིང་ལ་འབིགས་པ་དང་ཆབས་ཅིག་གཡོན་པ་རང་ཉིད་ཀྱི་པདྨའི་གཡོན་གྱི་ཆར་སོན་པའི་རྩའི་ཐད་དུ་ཁུ་ཚུར་དང་བཅས་པའི་མཐེ་བོང་བསྣུན་ནས་བདེ་བ་འབབ་པའི་རྩ་རྡོ་རྗེ་དབྱིངས་ཀྱི་དབང་ཕྱུག་མ་སྟོན་ཅིང་། གསང་བའི་ཆུ་སྐྱེས་དངོས་པོ་གང་ཞིག་དངོས་གྲུབ་ཆེན་པོའི་འབྱུང་གནས་ཡིན་པར་ངོ་སྤྲད་ནས་རྟོགས་པ་བསྐྱེད་པ་ནི། ཨེ་མ་བདག་གི་པདྨ་འདི། །བདེ་བ་ཐམས་ཅད་ཀྱི་ནི་གནས། །ཅི་སྟེ་ཆོ་ག་བཞིན་བསྟེན་ན། །དེ་ཡི་མདུན་ནང་འདུག་སྟེ། །སངས་རྒྱས་མཉེས་པ་ལ་སོགས་པའི། །བྱ་བ་པདྨ་ཇི་བཞིན་བྱེད། །བདེ་ཆེན་རྒྱལ་པོ་རང་ཉིད་དེ། །འདི་ཉིད་ན་ནི་རྟག་ཏུ་བཞུགས། །རྨོངས་པ་གང་ཞིག་འདི་སྤོང་བ། །དེ་ལ་མཆོག་གི་དངོས་གྲུབ་མེད། །པདྨ་བྷཉྫ་མོཀྵ་ཧོ །ཞེས་བརྗོད་དེ་ཐབས་ཀྱི་པང་དུ་ཕྱིན་ནོ། །དེ་ལ་པདྨ་ནི་ཐབས་དེའི་དཀྱིལ་འཁོར་གྱི་མིང་སྨོས་པ་ཡིན་ལ། བྷཉྫ་ནི་བསྟེན་ཅིག་པ་སྟེ། གང་བསྟེན་ན་མོཀྵ་སྟེ་ཐར་པའི་རང་བཞིན་སྤྲོས་པ་ཐམས་ཅད་དང་བྲལ་བའོ། །ལྔ་པ་ནི་ཕྱག་ཆེན་ཐིག་ལེ་ལས། གཟུགས་བཟང་བཅུ་དྲུག་ལོན་པ་དང་། །སིདྷི་ག་བུར་ཡོད་པ་ཡི། །ཕྱག་རྒྱ་གཅེར་བུར་བྱས་ནས་ནི། །ལེགས་དགྱེས་དབྱངས་ཀྱིས་མཆོད་པར་བྱ། །པདྨ་ཁ་སྦྱར་སྦྱོར་བ་ཡིས། །ཡང་དང་ཡང་དུ་འདོད་པ་བྱ། །ཞེས་པ་ལྟར་ཐབས་ཀྱི་པང་དུ་ཕྱིན་ནས། །ཐབས་ཤེས་གཉིས་ཀ་ལྷར་འདུ་ཤེས་པའི་གནས་གསུམ་
དུ་ཡི་གེ་གསུམ་དང་། ཐབས་ཀྱི་རྡོ་རྗེ་ཧཱུཾ་ལས་རྡོ་རྗེ་རྩེ་ལྔ་པའི་རྩེ་མོར་ཨོཾ་གྱིས་མཚན་ལ། ཤེས་རབ་ཀྱི་པདྨ་ཨཱལས་པདྨ་འདབ་མ་དམར་པོ་འདབ་མ་བཞི་པའི་ཟེ་འབྲུར་ཧྲཱིས་མཚན་པས་ཡི་གེར་འདུ་ཤེས་པ་དང་། ཐབས་ཀྱི་ནང་ནས་ཐབས་མཆོག་ཏུ་གྱུར་པ་འདི་ལ་བརྟེན་ནས་སེམས་ཅན་ཐམས་ཅད་ཀྱི་དོན་དུ་བདེ་ཆེན་ལྷན་ཅིག་སྐྱེས་པའི་ཡེ་ཤེས་མངོན་དུ་བྱའོ་སྙམ་པའི་སེམས་བསྐྱེད་པ་ཆོས་ཀྱི་འདུ་ཤེས་ཏེ། འདུ་ཤེས་གསུམ་དང་ལྡན་པའི་དང་ནས་ཧཱུཾ་ཧཱུཾ་ལ་སོགས་པས་དབུ་མའི་མར་སྣང་བདེ་བ་མངོན་དུ་རྒྱུ་བའི་རྩ་གཟུང་འཛིན་དང་བྲལ་བའི་བདག་ཉིད་ཅན་བཙལ་བཞིན་པས་སྙོམས་པར་འཇུག་པར་བྱ་སྟེ། ཕྱག་ཆེན་ཐིག་ལེ་ལས། པདྨའི་སྙིང་པོའི་དབུས་ན་ནི། །རྡོར་དབྱིངས་དབང་ཕྱུག་མ་ནི་བཞུགས། །དེ་མ་རྙེད་པའི་བར་དུ་ནི། །ཐབས་གཞན་ལས་ནི་བྱང་ཆུབ་མེད། །དེ་ནི་རང་གི་དགའ་བའི་གཟུགས། །ཕྲ་མོའི་ཕྲ་མོ་ཡང་དག་མཆོག །ཅེས་སོ། །འཚོལ་བའི་ཚུལ་ནི་སོར་མོས་གོ་བར་བྱ་བ་སྟེ་མཛུབ་མོའི་རྩེ་དང་ལྕེ་རྩེ་ལ་འདོད་ཆགས་རྡོ་རྗེའི་ངོ་བོ་ཡི་གེ་ཧྲཱིཡིག་དམར་པོ་བསམས་ལ་ཤཱི་ཏཱ་བརྗོད་པ་སྔོན་དུ་འགྲོ་བས། ཡང་དག་པར་བསྐུལ་ནས་རྩ་བྱ་རོག་གདོང་དང་ཕྲད་པར་བྱས་ཏེ། ཨཱོཾ་ཤཱི་ཤཱི་ཤཱི་ཧ་ཧ་ཧ་སྭཱ་ཧཱ་ཞེས་དང་། ཨཱོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ལ་སོགས་པའི་སྔགས་དོན་གྱི་དེ་བཞིན་གཤེགས་པ་ཐམས་ཅད་ཀྱི་རྗེས་སུ་ཆགས་པའི་རྡོ་རྗེའི་རང་བཞིན་གྱི་བདག་ཉིད་ངའོ་སྙམ་པའི་རྗེས་ཆགས་དང་ལྡན་པས་རྣམ་པར་འགྱུར་བ་དང་འཁྱུད་པའི་སྟབས་བརྒྱད་ལ་མཁས་པར་བྱ་སྟེ། དོན་དམ་པ་འདུས་པ་ཞེས་བྱ་བའི་རྣལ་འབྱོར་མའི་རྒྱུད་ལས། ཁྱོགས་དང་བླ་ཞེས་བྱ་བ་དང་། །དེ་བཞིན་ཤིན་ཏུ་བརྐྱང་པ་དང་། །ཁབ་དང་གྲུ་
མོའི་མཚན་ཉིད་བྱ། །བུང་བ་ལྟ་བུར་ཨི་ཡི་སྒྲ། །ངེས་པར་བློ་དང་ལྡན་པས་བསྐུལ། །སྒེག་འཆོས་སྟབས་ཀྱི་འཁྱུད་ནས་ནི། །མགོ་བོའི་སྐྲ་བཟུང་ལྐོག་མ་གཟིར། །མ་མཆུའི་སྦྲང་རྩི་གཞིབས་པར་བྱ། །རྡོ་རྗེ་འཁྱུད་པས་འཁྱུད་པ་དང་། །རྡོ་རྗེ་འོ་ཡིས་འོ་གདབ་ཅིང་། །སོ་དང་སེན་མོ་བསྣུན་པར་བྱ། །རྡོ་རྗེ་པདྨར་རབ་འཇུག་ཅིང་། །སཱི་ཏ་ཀྱི་སྒྲ་རྣམས་འབྱེད་པ་དང་། །ནུ་མ་འཚིར་དང་སྐྱེས་པའི་ཚུལ། །སྦྱོར་བ་ཐམས་ཅད་བྱ་བར་བྱ། །ནུ་མ་སོར་མོ་སྐེ་དང་མ་མཆུ་དང་། །རྣ་བ་མིག་དང་སྤྱི་བོ་བྷ་ག་དང་། །འོ་བྱ་རྣ་བ་མཆན་ཁུང་སྐེ་དང་ལྟག །སེན་མོས་བཏབ་བྱ་ནུ་མ་མཆན་ཁུང་དང་། །མཁུར་ཚོས་འགྲམ་དད་རྐང་ལག་མཐིལ་དག་ཏུ། །ཉེད་པར་བྱ་ཞིང་འཁྱུད་པའི་སྟབས་བརྒྱད་བྱ། །སོར་མོ་ལིངྒ་ལྕེ་དང་ལྕེས་བསྐྱོད་ནས། །པདྨ་བསྐུལ་ཞིང་རྩ་མཆོག་གསད་པ་བྱ། །ཞེས་སོ། །དེའི་ཚེ་བདེ་བ་བརྟན་པར་བྱེད་པའི་མན་ངག་ནི། རྡོ་རྗེ་མཁའ་འགྲོ་ལས། འབྱུང་པོའི་ཤིང་གི་རྩ་བ་འབད་པས་ཁར་བཅུག་ན་ཇི་སྲིད་དུ་བུ་མོའི་བདེ་བ་རྙེད་པ་དེ་སྲིད་ཀྱི་བར་དུ་སྔགས་པས་འཛིན་པར་འགྱུར་རོ། །གཞན་དུ་ཤ་དང་ལཀྵ་ནའི་སྨན་བཏགས་ཏེ་ཏིལ་མར་དུ་བཙོས་ལ་རྐང་པ་ལ་བསྐུས་ན་ཡང་འདོད་པ་ལ་སྤྱོད་པ་རྣམས་ཀྱིས་བསྔགས་སོ། །ཞེས་སོ། །དྲུག་པ་ནི། དགའ་བ་བཞིའི་ཡེ་ཤེས་ལ་བརྟེན་ནས་དབང་དོན་ཤེས་པར་བྱ་བ་སྟེ། དེ་ཡང་རྟེན་ཤེས་རབ་མ་ལས་བརྟེན་པ་དགའ་བཞིའི་ཡེ་ཤེས་བསྐྱེད་པའི་ཚུལ་རྣམ་གྲངས་ཀྱི་སྒོ་ནས་ཁྱེ་ན་གོམས་པ་ལ་ལྟོས་པའི་དགའ་བ་བཞི། སྤང་བྱ་ལ་ལྟོས་པའི་དགའ་བ་བཞི། རང་གི་ངོ་བོ་ལ་ལྟོས་པའི་དགའ་བ་བཞི། གནས་ལ་ལྟོས་པའི་དགའ་བ་བཞི་ལས་རྟེན་ཅན་གྱི་ལམ་གྱི་གཙོ་བོ་ནི་ཐོག་མར་རྩ་རླུང་ཐིག་ལེ་གསུམ་གྱི་མན་ངག་ལ་
ལྟོས་པའི་ཚུལ་གཏུམ་པོའི་རྒྱུད་ལས། བཅོམ་ལྡན་འདས་ཀྱིས་བཀའ་བསྩལ་པ། རྐྱང་མ་ཤེས་རབ་རང་བཞིན་ཏེ། །གཡོན་པའི་རྩ་རུ་རབ་ཏུ་གྲགས། །རོ་མ་ཐབས་ཀྱི་རང་བཞིན་གྱི། །གཡས་པ་ལ་ནི་ཡང་དག་གནས། །རྐྱང་མ་རོ་མའི་དབུས་དག་ལ། ཀུན་འདར་མ་ནི་རབ་ཏུ་གསུངས། །གང་ཚེ་ཨ་ཝ་དྷཱུ་ཏིར་རླུང་། །ཁུ་བ་དང་ནི་རོ་གཅིག་འགྱུར། །ཞེས་དང་། ལྟེ་བར་གནས་པའི་ཙནྡ་ལཱི། །མར་མེ་ལྟར་འབར་དེ་ཡིས་ནི། །ཞུ་བའི་ཁུ་བ་མཆོག་ལ་ནི། །དེ་ལས་སྐྱེས་པའི་བདེ་བ་ལ། །ཞེས་ཞུ་བདེ་ལ་བརྟེན་ནས་ཡེ་ཤེས་འདྲེན་དགོས་པ་གང་ཞིག་གནས་ཀྱི་སྒོ་ནས་ངོས་བཟུང་བའི་ཁྱད་པར་ལ་དུས་འཁོར་ལྟར་ན། གཙུག་ཏོར་ནས་ནི་མཛོད་སྤུ་ཡི། །པདྨ་ཁུ་བར་འོངས་དགའ་བ། །མགྲིན་པ་སྙིང་གར་མཆོག་དགའ་བ། །ཁྱད་པར་དགའ་བ་དེ་ནས་འགྱུར། །སྣ་ཚོགས་དགའ་བྱེད་ལྟེ་བར་ཏེ། །གསང་བའི་པདྨའི་གར་འོངས་པའོ། །གསང་གནས་རྡོ་རྗེ་ནོར་བུའི་བར། །ལྷན་སྐྱེས་དགའ་བ་མི་འཕོ་བའོ། །ཞེས་འདོད་ལ། ཁ་ཅིག་ཏུ་སྙོམས་འཇུག་གི་དང་པོ་བལྟ་བ་ལ་སོགས་པའི་དུས་སུ་དགའ་བ། རྡོ་རྗེའི་རྩ་བར་ཐིག་ལེ་གཡོས་པས་མཆོག་དགའ། བདེ་བ་ཕྱིར་འབྱུང་བ་ལ་ཐུག་པ་ཁྱད་དགའ། འཛག་བདེ་བཀག་པ་ཡུན་རིང་དུ་གོམས་པ་ལས་རྡོ་རྗེ་ནོར་བུར་བྱང་སེམས་བརྟན་ཅིང་སྣང་བ་གསུམ་དང་། འོད་གསལ་གྱི་རྟག་ཤར་བ་ལྷན་ཅིག་སྐྱེས་དགར་འདོད་པའང་ཡོད་དེ་ཉམས་སུ་མྱོང་བའི་ལུགས་སུ་སྣང་ངོ་། །སྤྱི་མཚན་དུ་ནི་ཕྱག་ཆེན་ཐིག་ལེ་ལྟར་གྲགས་པ་བརྟན་པ་ཡིན་ཏེ། ཚངས་བུག་ནས་ནི་མགྲིན་གནས་སུ། །དེ་ཙམ་དུ་ནི་ཐིག་ལེ་བཞི། །དེ་ཡི་གནས་སུ་དགའ་བ་བཞི། །རོ་གཉིས་དང་ནི་ལྡན་པའོ། །མགྲིན་
པ་ནས་ནི་སྙིང་གར་གནས། །ཡང་ནི་དེ་ཙམ་བཞི་ཡིན་ནོ། །མཆོག་གི་དགའ་བའི་བཞི་ཡིན་ཏེ། །རོ་གཉིས་དང་ནི་ལྡན་པའོ། །སྙིང་གའི་གནས་ནས་རིན་ཆེན་སྐེར། །ཡང་ནི་དེ་ཙམ་བཞི་ཡིན་ནོ། །དགའ་བྲལ་དགའ་བའི་བཞི་ཡིན་ཏེ། །རོ་གཉིས་དང་ནི་ལྡན་པའོ། །རིན་ཆེན་སྐེད་ནས་སྟེང་མི་གནས། །ཡང་ནི་དེ་ཙམ་བཞི་ཡིན་ནོ། །ལྷན་ཅིག་སྐྱེས་དགའ་བཞི་ཡིན་ཏེ། །རོ་གཉིས་དང་ནི་ལྡན་པའོ། །དགའ་བ་བཅུ་དྲུག་ཐིག་ལེ་སྟེ། །ཐིག་ལེ་ཟླ་བའི་ཆ་རུ་དྲན། །ཨཱ་ལི་ཐིག་ལེར་ཤེས་པར་བྱ། །འཁོར་ལོ་བཞི་ཡི་རིམ་པས་སོ། །ཞེས་འཁོར་ལོ་བཞི་སོ་སོར་དགའ་བཞིའི་འགྲོས་རེ་རེ་ལ་དགའ་བ་བྱེ་བྲག་པ་བཞི་བཞིར་ཕྱེ་བའི་བཅུ་དྲུག་ཏུ་བསྟན་པ་ཡིན་ནོ། །དེ་ཡང་རྣམ་རྟོག་ཤིན་ཏུ་རགས་པ་ཆོད་པས་དགའ་བ་དང་། ཆེན་པོ་ཚད་པས་མཆོག་དགའ་དང་། འབྲིང་པོ་ཆོད་པས་ཁྱད་པར་གྱི་དགའ་བ་དང་། རགས་པའི་ཆ་མེད་པས་ལྷན་སྐྱེས་ཀྱི་དགའ་བ་སྟེ་བཞི་པོ་དབང་བཞི་དང་སྦྱར་ན་སྔ་མ་གསུམ་རྟོག་བཅས་ཀྱི་དགའ་བ་ཡིན་ཏེ། དང་པོས་འཇུག་པའི་ཡེ་ཤེས་རླུང་གི་འཕེན་སྡུད་ལ་སྤྱོད། གཉིས་པས་ཚོར་བ་སྟེ་མྱོང་བའི་དངོས་རྗེས་ལ་སྤྱོད། གསུམ་པས་བདེ་བ་སྟེ་སེམས་དང་ཡེ་ཤེས་འཁྲུག་པའི་ས་གསུམ་གྱིས་བུམ་པ་དང་། གསང་བ་དང་། ཤེས་རབ་ཡེ་ཤེས་ཀྱི་བདག་ཉིད་དང་། ཕྱི་མ་ནི་མྱོང་བ་སྟེ་སེམས་དང་ཡེ་ཤེས་དབྱེར་མི་ཕྱེད་པ་རྟོག་མེད་ལྷན་ཅིག་སྐྱེས་པའི་དགའ་བས་དབང་བཞི་དཔེའི་ཡེ་ཤེས་སུ་མཚོན་ནས་དོན་གྱི་ཡེ་ཤེས་བཞི་པའི་དུས་ན་སེམས་དང་ཡེ་ཤེས་གང་དུ་ཡང་མ་ཕྱེད། མི་འབྱེད་མཐའ་གཉིས་ལས་འདས་པར་སྦྱོར་བ་ལ་ལྔ་པའི་ཐ་སྙད་ཀྱི་བསྟན་པའང་ཡོད་དེ་ཁང་བུ་བརྩེགས་པའི་རྒྱུད་ལས། དང་པོ་དགའ་བ་ཙམ་ཉིད་ལས། །གཉིས་པ་ཚོར་བ་མྱོང་རིག་ལ། །
གསུམ་པ་བདེ་བ་ཉིད་ཅེས་བྱ། །བཞི་པ་མྱོང་བས་ལྷན་ཅིག་སྐྱེས། །ལྔ་པ་སྟོང་པ་ཉིད་ཅེས་སོ། །ཞེས་སོ། །དེ་དག་དབང་བཞི་དང་སྦྱར་བའི་ཚུལ་ཕྱག་ཆེན་ཐིག་ལེ་ལས། གནས་བཞི་ལ་ནི་དབང་བཞི་སྟེ། །ལེགས་སྐྱེས་དབང་མོར་ཤེས་པར་བྱ་རྒྱུ་དང་འབྲས་བུའི་རིམ་པ་ཡི། །མདོར་བསྡུས་པ་ནི་བཞི་ཡིན་ཏེ། །སྤྲུལ་དང་ཆོས་དང་ལོངས་སྤྱོད་དང་། །བདེ་བ་ཆེན་པོ་བཞི་བའོ། །དེ་དག་སྐུ་ནི་བཞི་ཡིན་ཏེ། །དོན་དམ་པར་ནི་ཤེས་པར་བྱ། །ཞེས་སོ། །དེ་ཡང་གསང་དབང་གི་ལམ་ལ་གོམས་པ་དང་། སྔོན་གྱི་སྦྱངས་སྟོབས་ཅན་ལ་རང་བཞིན་བརྒྱད་ཅུའི་རྟོག་པ་འགགས་པའི་རིམ་པ་དང་བསྟུན་ནས་ངོས་འཛིན་པ་ཡིན་ནོ། །ཇི་ལྟར་ཡང་དེའི་ཚེ་སྣང་མཆེད་ཐོབ་གསུམ་གྱིས་བསྡུས་པའི་འོད་གསལ་ནི། མཆེད་པ་ལ་བདེ་བ་ཤས་ཆེ་བས་ཆགས་པ་ཆེན་པོ། ཉེར་ཐོབ་ལ་བདེ་བ་དང་སྟོང་པ་ཆ་མཉམ་པས་ཆགས་པ་བར་མ། སྣང་བ་ལ་སྟོང་པ་ཤས་ཆེ་བས་ཆགས་བྲལ་ཞེས་གོ་རིམ་མ་ངེས་པ་དང་། དེ་ཡང་སྣང་བའི་དུས་ན་རང་བཞིན་བརྒྱད་ཅུའི་རྟོག་པ་སྐྱེད་བྱེད་ཀྱི་རླུང་དང་བཅས་པ་རང་དག་པས་སྟོང་པ། མཆེད་པའི་དུས་ན་སྣང་བ་སྐྱོད་བྱེད་ཀྱི་རླུང་དང་བཅས་པས་སྟོང་པས་ཤིན་ཏུ་སྟོང་པ། ཉེར་ཐོབ་ཀྱི་དུས་ན་མཆེད་པ་རླུང་དང་བཅས་པས་སྟོང་པས་ན་སྟོང་པ་ཆེན་པོ། དེ་ཡང་རགས་པའི་རླུང་སེམས་ཀྱིས་ཆས་ཁུར་པའི་བསླད་པ་ཐམས་ཅད་དང་བྲལ་བས་སྟོང་པ་འོད་གསལ་ཞེས་བྱ་སྟེ་དོན་དམ་པའི་རྫོགས་རིམ་གྱིས་སྙིང་གའི་རྩ་མདུད་གྲོལ་བ་ལ་བརྟེན་ནས་འབྱུང་བས་དཔེའི་ཡེ་ཤེས་ཉིད་དེ། བདེ་བས་ཐབས་བྱས་པའི་སྟོང་པ་ཡིན་པས་སོ། །དེ་དུས་གང་གི་ཚེ་སྐྱེ་ན། །རིན་ཆེན་སྐེ་ནས་སྟེང་གི་གནས། །ཞེས་པས་བྱང་ཆུབ་ཀྱི་སེམས་རིན་པོ་ཆེ་རྡོ་རྗེ་ནོར་བུས་སླེབ་ནས་ཕྱིར་མ་འཕོས་པའི་
དུས་ན་དགའ་བ་བཅུ་དྲུག་པོའི་ཡང་མཐར་ཐུག་པས་གནས་སྐབས་དེ་ཉིད་དབང་གསུམ་པའི་ཡེ་ཤེས་སུ་འདོད་དགོས་པ་ཡིན་ཏེ། ཕྲིན་ལས་ཀྱི་རྒྱུད་ལས། རྟོག་པའི་བག་ཆགས་འཇོམས་པར་བྱེད། །དབང་གསུམ་འབྲས་བུ་དེ་བཞིན་ནོ། །ཞེས་དང་། ཕྱག་ཆེན་ཐིག་ལེ་བས། ཤེས་རབ་ཡེ་ཤེས་བདག་གིས་བཤད། །ཤེས་རབ་མྱ་ངན་འདའ་ཞེས་བཤད། །ཡེ་ཤེས་སྲིད་པ་ཞེས་བྱར་དྲན། །འཁོར་བ་འདི་ནི་མཆོག་དགའ་བ། །མྱ་ངན་འདས་པ་དགའ་འབྲལ་དྲན། །ཡང་ན་མྱ་ངན་འདས་གྲགས་པ། །སངས་རྒྱས་རིན་ཆེན་པདྨའི་སྣོད། །བུད་མེད་བྷ་གའི་ཕྱག་རྒྱའོ། །དེ་ནི་ཤེས་རབ་ཅེས་བྱར་དྲན། །ཡེ་ཤེས་སྣོད་ནི་ཡིན་པར་གྲགས། །ཐམས་ཅད་བདེ་བའི་མཆོག་གི་གནས། །ཁུ་བ་ཤེས་རབ་ཅེས་སུ་ཤེས། །ཡེ་ཤེས་བདེ་བ་ཞེས་སུ་དྲན། །དབང་བསྐུར་འོད་དུ་ཞུ་བར་འགྱུར། །ཡེ་ཤེས་དུས་ལས་གཞན་པའོ། །དེ་ནི་འགོག་པ་བཞི་པ་སྟེ། །རང་བཞིན་ཡེ་ཤེས་མཚན་ཉིད་དོ། །ཞེས་སོ། །འོ་ན་འདི་མཐོང་གམ་རྣམ་པར་མི་རྟོག་པའི་ཡེ་ཤེས་བཞི་པ་དང་མཚུངས་སམ་ཞེ་ན། ལམ་ལ་བཀྲི་ཚུལ་གྱི་ཆ་ནས་མི་མཚུངས་པས་དབང་གི་གོ་རིམ་སོ་སོར་བྱུང་ལ། དེ་ལྟ་ནའང་དབང་གསུམ་པའི་ཡེ་ཤེས་མཐོང་ལམ་དུ་གྲུབ་ཆེན་མཻ་ཏྲི་བས་ཀྱང་འདོད་ཅིང་། ཁྱད་པར་ཌོམ་བྷི་ཧེ་རུ་ཀས། ཨེ་མ་ངོ་མཚར་རྨད་ཀྱི་ཆོས། །ཕྱག་རྒྱའི་རྐྱེན་གྱིས་རྟོགས་པ་ཡིན། །མངོན་གསུམ་ལམ་དུ་གྲགས་པ་སྟེ། །བྱིན་རླབས་ལམ་དུ་གྱུར་བ་ཡིན། །ཞེས་དང་། ཁ་ཅིག་དཔེ་ཞེས་ཟེར་བ་ནི། །ཡང་དག་དོན་ལ་རྒྱབ་ཕྱོགས་པའི། །བྱིས་པ་རྣམས་ཀྱི་སྨྲ་བ་ཡིན། །དེས་ནི་ལྷན་ཅིག་སྐྱེས་པ་ཡི། །ཡེ་ཤེས་མིང་ཙམ་ཐོས་པར་ཟད། །ཅེས་སོགས་དགག་བསྒྲུབ་རྒྱ་ཆེར་འབྱུང་མོད། །དེ་ལྟ་ནའང་སྙེམ་ལྔ་པ་ལས། དེ་ཅི་འདི་མཐོང་བའི་ལམ་
ཡིན་ནམ་ཞེ་ན། དེ་ལྟ་མ་ཡིན་ཏེ་ཞེས་པ་ལ་སོགས་ཀྱིས་དེ་ལྟར་འདོད་པ་བཀག་པས་ཕྱོགས་གཉིས་སུ་འཛིན་པའི་རྟོག་གེའི་རིགས་པ་འབའ་ཞིག་གིས་སྔགས་ལམ་འགྲེལ་ཞིང་སྐྱེ་འགག་དུ་འཛིན་པ་རྣམ་གྲངས་པའི་དོན་དམ་གྱིས་ཡེ་ཤེས་ཀྱི་རང་བཞིན་གཞལ་བ་རྣམས་ཀྱི་དགག་བསྒྲུབ་ནི་བྱིས་པ་འདྲིད་པའི་ཚིག་བླ་དཱགས་ཙམ་དུ་གོ་ལ། སྤྱིར་གང་ཟག་གི་སྦྱངས་པ་དང་དབང་པོའི་རིམ་པ་ལ་ལྟོས་ནས་དབང་ཐོབ་ལུགས་ནི་མང་དུ་སྣང་བས་གྲུབ་ཆེན་དེ་གཉིས་ལྟ་བུའི་ངོས་ནས་དབང་འོག་མ་གཉིས་ཀྱི་འབྲས་བུའི་གོ་འཕང་གང་ཡིན་པ་མངོན་དུ་གྱུར་བའི་ཚེ་དབང་གསུམ་པ་མཉན་པས་དེའི་ལྷན་སྐྱེས་ཉམས་མྱོང་གི་ཟག་པ་དང་བྲལ་བ་གཅིག་ཅར་དུ་མཐོང་ན་བཞི་པའི་ཡེ་ཤེས་དཔེ་ལ་མ་ལྟོས་པ་ཐོད་རྒལ་དུ་སྐྱེས་པའི་མཐའ་ཡང་འགོག་པར་མི་ནུས་ཏེ། འདི་ལྟར་རྒྱུད་ལས་དགའ་བཞིའི་རིམ་པ་དང་དབང་བཞི་སྦྱར་བའི་ཕྱིར་དང་། ཁྱད་པར་རྡོ་རྗེ་ཐེག་པའི་ལམ་ནི་བྱང་ཆུབ་ཀྱི་སེམས་མི་ཤིགས་པ་བདེ་བར་གཤེགས་པའི་སྙིང་པོ་ཅན་ཡིན་ལ་མི་ཤིགས་པ་ཉིད་ཀྱིས་མི་འགྱུར་བའི་བདེ་བ་མངོན་དུ་བྱས་པ་འབྲས་བུ་ཡིན་ན་ལམ་དེས་དེ་འཐོབ་པ་འོག་ཏུ་བསྟན་པའི་ཕྱིར་རོ། །ཡང་དབང་པོ་ཤིན་ཏུ་རྟུལ་པོས་ཐབས་ལམ་ཟབ་མོའི་ཆོག་ལ་བརྟེན་ནས་བདེ་བ་དང་བཅས་པའི་མི་རྟོག་པ་ཡུད་ཙམ་ཉམས་སུ་མྱོང་པའི་ཚེ་རྟོག་པ་རགས་པ་མང་པོ་ཞིག་འགགས་པ་ཡོད་ཀྱང་འདོད་ཆགས་བདེ་ཆེན་དུ་འཆིང་མ་ནུས་ན་རང་བཞིན་སྙོམས་འཇུག་གི་གནས་སྐབས་ལྟར་སྣང་བ་ཙམ་སྟེ་དེ་ནི་གཤིས་ཀྱི་གནས་ཚུལ་གཏན་མ་རྟོགས་པའི་གང་ཟག་ལའང་སྐྱེ་མོད་ཀྱིས། དེས་མཐོང་ལམ་གྱི་བདེན་པ་མཐོང་བ་མ་ཡིན་ནོ། །དེ་བས་ན་དབུས་མཐའ་ལས་སེམས་མེད་
པའི་གནས་སྐབས་ལྔར་ཆོས་སྐུ་ཉམས་སུ་མྱོང་བར་བཤད་པའི་དོན་ནི་སྣང་ཡུལ་མི་འཛིན་པའི་ཆ་ལ་བཏགས་པ་ཙམ་ཡིན་པ་ལྟར། འདིར་སྙོམས་འཇུག་གི་རྐྱེན་ལས་སོ་སོ་རང་རིག་གིས་རིག་ཆ་དང་འགལ་བའི་རྟོག་མེད་ཙམ་སྐྱེས་པ་གང་ཞིག་མས་བརྟན་གྱི་དགའ་བ་ལ་བརྟེན་ནས་འདོད་ཆགས་བདེ་ཆེན་དུ་འཆིང་མི་ནུས་པ་རྣམས་ལ་ནི་དཔེར་ཡང་རུང་བ་དཀའ་སྟེ་འཕོ་མེད་ཀྱི་བདེ་བ་ལ་ཡུན་དུ་གོམས་ནས་དེའི་རང་བཞིན་ཤེས་དགོས་པའི་ཕྱིར་རོ། །འདི་ལྟར་སྔགས་ནི་མངོན་སུམ་གྱི་ལམ་ཡིན་པས་རྗེས་དཔག་དང་འགལ་བའི་ཕྱིར་གང་ཟག་རིམ་གྱིས་པ་རྣམས་ལ་སྔ་ཕྱི་རྒྱུ་འབྲས་ཀྱི་ཚུལ་དུ་གནས་པས་གསུམ་པའི་ལམ་དུ་དཔེའི་ཡེ་ཤེས་ཞེས་བྱ་བ་ཆོས་ཐམས་ཅད་བསམ་དུ་མེད་པ་དེ་ཁོ་ན་ཉིད་ཀྱི་གཟུགས་བརྙན་བདེ་བས་ཐབས་བྱས་པའི་ལྷན་ཅིག་སྐྱེས་དགའི་ཤེས་རབ་ལ་གོམས་པར་བྱས་པ་ལས་བཞི་པའི་དུས་ན། རང་བཞིན་ཅི་ཡིན་པ་མཐོང་བའི་ཐབས་བྱུང་འབྲས་བུའི་ལྷན་སྐྱེས་མངོན་སུམ་དུ་སྐྱེ་བ་ཡིན་ཏེ། རྡོ་རྗེ་ཁྲོས་པའི་རྩ་རྒྱུད་ལས། དེ་ཡི་ཤེས་རབ་ཡེ་ཤེས་ཀྱི། །དབང་གི་རྡོ་རྗེ་ཐུགས་ཉིད་དག །རྡོ་རྗེ་སེམས་དཔའི་བྱིན་རླབས་ཀྱིས། །སེམས་ཉིད་མཁའ་དང་མཚུངས་པར་མཐོང་། །ཞེས་སོ། །རྒྱུ་མཚན་དེས་དབང་འདི་ནི་གསང་དབང་གི་ཉམས་སུ་མྱོང་བ་བརྟན་པ་དག་ལས་གཞན་དུ་སྦྱིན་པར་བྱ་བ་མ་ཡིན་པའང་ཤུགས་ལ་ཤེས་པར་འགྱུར་ལ། དེ་བས་ན་འཕོ་མེད་ཀྱི་བདེ་བ་ལྷག་མཐོང་གིས་ཟིན་པ་ལས། ལྷན་ཅིག་སྐྱེས་པའི་ཡེ་ཤེས་རྟོགས་པར་འགྱུར་བའི་ཚུལ་ཡང་དབང་མདོར་བསྟན་ལས། ཇི་ལྟར་ལྕགས་ཀྱིས་ཕུག་པའི་ལྕགས། །ལྕགས་ཉིད་དུ་ནི་རྗེས་འགྲོ་མིན། །དེ་བཞིན་བདེ་བས་ཕུག་པའི་སེམས། །སྡུག་བསྔལ་ཉིད་དུ་རྗེས་འགྲོ་མིན། །ཆགས་བྲལ་ལས་གཞན་སྡིག་པ་མེད། །བདེ་བ་ལས་གཞན་བསོད་
ནམས་མེད། །དེ་ཕྱིར་འགྱུར་མེད་བདེ་བར་སེམས། །ཞེས་དང་། གཞོན་ནུ་མ་ཡི་དགའ་བ་ནི། །མེད་པར་དགའ་བ་སྨྲ་མི་ནུས། །བདེ་བ་ཆེན་པོ་རང་གིས་རིག །དེ་བཞིན་ཏིང་འཛིན་དང་བྲལ་བའི། །བདེ་བ་སྨྲ་བ་ནུས་མ་ཡིན། །འགྱུར་མེད་ཏིང་འཛིན་ཐོག་པ་ན། །རྣལ་འབྱོར་པ་ཡིས་རང་རིག་འགྱུར། །འགྱུར་མེད་ལས་སྐྱེས་བདེ་རིག་པ། །ཐམས་ཅད་མཁྱེན་ལའང་ཐེ་ཚོམ་ཟ། །དེ་ལྟ་ན་ཡང་ཡིད་བདེ་མིན། །ཆགས་བྲལ་ཉིད་དུ་མི་བྱའོ། །འཕོས་པ་ལས་ནི་ཆགས་བྲལ་འགྱུར། །ཆགས་བྲལ་ལས་ནི་སྡུག་བསྔལ་འབྱུང་། །སྡུག་བསྔལ་སྐྱེས་བུའི་ཁམས་ཟད་བྱེད། །ཟད་པ་ལས་ནི་འཆི་བར་བརྗོད། །ཤི་ནས་སླར་ཡང་དེ་རྣམས་ཀྱི། །སྲིད་པའོ་སྲིད་ལས་སླར་འཆི་འཕོ། །དེ་ལྟར་སེམས་ཅན་གྱི་སྲིད་པ། །ཆགས་བྲལ་ལས་བྱུང་གཞན་དུ་མིན། །དེ་ཕྱིར་འབད་པ་ཐམས་ཅད་ཀྱིས། །འཕོ་བའི་ཆགས་པ་རྣམ་པར་སྤང་། །གང་གིས་འགྱུར་མེད་བདེ་ཆེན་འགྱུར། །ཞེས་སྲིད་པའི་རྩ་བ་འཛག་བདེ་ཡིན་ན་དེའི་བྱེད་པ་བཅིངས་པ་ལས་གནས་སྐབས་སུའང་སྡུག་བསྔལ་གྱི་རྒྱུ་འབྲས་མཐའ་དག་འགོག་ཅིང་དཔེ་ལ་བརྟེན་ནས་དོན་ཤེས་པས་མས་བརྟན་གྱི་ཡེ་ཤེས་ལུགས་ལས་ལྡོག་པ་ཉམས་སུ་མྱོང་། དེའི་ཚེ་དབང་པོ་རབ་ཏུ་གྱུར་པས་དེ་ཉིད་དུའམ། འབྲིང་གིས་ཀྱང་གོམས་པ་ཤིན་ཏུ་བརྟན་པའི་ཚེ་ཁམས་ཀྱི་སྙིགས་མ་མཐའ་དག་སྦྱངས་ནས་མཐར་ཐུག་གི་འབྲས་བུ་འགྱུར་བ་མེད་པའི་བདེ་བ་ཆེན་པོ་འཐོབ་པར་འབྱུང་བ་ནི་དབང་གསུམ་པའི་བྱེད་ལས་ཐུན་མོང་མ་ཡིན་པ་ཉིད་དང་། སྐབས་འདིར་ནི་རྣལ་འབྱོར་མ་ལས། སྐྱེས་པ་གཅིག་གི་འདོད་ཆེན་གྱི། །མི་ཡི་བུ་མོ་ཁྲི་ཕྲག་དང་། །ཉིན་རེར་ལྷ་དང་ལྷ་མིན་
མོ། །བུད་མེད་འབུམ་ཕྲག་ཟིལ་གནོན་པ། །ཁུ་བ་རེངས་པའི་བྱེད་པ་ལས། །གཅིག་གིས་ཐམས་ཅད་འདོད་སྤྱོད་ལ། །རྡོ་རྗེར་བྱེད་པ་རབ་ཏུ་བཤད། །ཅེས་པ་ལྟར་ཞུ་བ་རྗེས་སུ་དྲན་པ་ལས་རྡོ་རྗེ་ནོར་བུར་བྱང་ཆུབ་ཀྱི་སེམས་བརྟན་པར་བྱ་བའི་ཐབས་ཀྱི་སྒོ་ནས་གནས་སྐབས་ཀྱི་རང་འབྲས་བདེ་བའི་ཆ་མི་བསྐྱོད་པའི་དབུགས་དབྱུང་དང་། རྟོགས་པའི་ཆ་རྡོ་རྗེ་འཆང་གི་དབུགས་དབྱུང་གཉིས་ཉམས་སུ་མྱོང་བར་འགྱུར་ཏེ། །ཐབས་དང་ཐབས་བྱུང་དབྱེ་བ་ཡིས། །བཞི་པའི་དོན་ནི་རྣམ་པ་གཉིས། །འདོད་གཅིག་དེ་བཞིན་གཤེགས་དངོས་གྲུབ། །གཞན་ནི་རྡོ་རྗེ་འཛིན་པར་འདོད། །ཞེས་པས་དགའ་བ་བཞི་པའི་དོན་གྱི་བལྟ་བ་ལྷན་ཅིག་སྐྱེས་དགའི་ཡེ་ཤེས་ལ་གོམས་པར་བྱེད་པ་དབང་གསུམ་པའི་དོན་པོ་ཡིན་ནོ། །དེ་བལྟ་བ་བཞི་དང་སྦྱར་ནས་ངོ་སྤྲད་པ་དངོས་ནི། གཞན་ལུས་ལ་བརྟེན་པའི་བདེ་བས་སས་ཀྱི་ཚོར་བ་གཟིར་ནས་སྡུག་བསྔལ་གྱི་ཆ་ལས་ལོག་པ་ནི་བལྟ་བ་གཡོ་བའི་དུས་ཞེས་བྱ་སྟེ་དགའ་བའི་ཡེ་ཤེས་སོ། །བདེ་བའི་ཚོར་བ་དེས་ཐ་མལ་གྱི་རྟོག་པ་ཤིན་ཏུ་རགས་པའི་ཆ་རྣམས་རང་འགགས་པས་སེམས་སྟོང་པ་ཙམ་དུ་ཤེས་ཀྱང་། །སྟོང་ཉིད་རང་བཞིན་དང་མ་འདྲེས་པའི་དུས་ན་བལྟ་བ་ཐོབ་པ་ཞེས་བྱ་སྟེ་མཆོག་དགའི་ཡེ་ཤེས་སོ། །དེ་ནས་ཞུ་བདེའི་ཉམས་ཆེར་རྒྱས་ནས་རྟོག་པ་ཕལ་ཆེར་འགགས་ཀྱང་། །སེམས་དང་སེམས་བྱུང་འབྲེལ་མ་ཆོད་པའི་ཆ་ནས་མྱོང་བ་ལ་ཐོབ་ཤོར་ཅུང་ཟད་འཆར་བའི་དུས་ན་ལྟ་བ་གོམས་པ་ཞེས་བྱ་སྟེ་ཁྱད་པར་གྱི་དགའ་བའི་ཡེ་ཤེས་སོ། །དེ་ནས་ལུས་སེམས་གཉིས་མེད་བདེ་བའི་རོས་མྱོས་ནས་རྣམ་པར་མི་རྟོག་པ་ཉག་གཅིག་ཏུ་ཤར་ཡང་། དེའི་རང་བཞིན་ཉམས་སུ་མྱོང་བ་ཟག་པ་དང་བཅས་པ་རྐྱེན་ལས་སྐྱེས་པའི་རེས་འགའ་བ།
ཅིག་ཙམ་པ་འཇིག་རྟེན་པ་ཀུན་རྫོབ་པའི་ཆ་དང་བཅས་པ་ནི་བཅོས་མ་ཉིད་ནའང་བལྟ་བ་བརྟན་པ་ཞེས་བྱ་སྟེ་ལྷན་ཅིག་སྐྱེས་དགའི་ཡེ་ཤེས་ཡིན་ལ། གལ་ཏེ་ལྷན་སྐྱེས་ལྟར་སྣང་བ་དེ་གོམས་པའི་མཐུ་ལས་རང་ངོའི་ཉམས་སུ་མྱོང་བ་རྒྱུ་མཐུན་པ་དང་བཅས་པའི་དྲི་མ་དག་ནས་སོ་སོ་རང་གིས་རིག་པ་རྣམ་པར་མི་རྟོག་པ་དམིགས་བྱ་དམིགས་བྱེད་ལས་འདས་པ་སྟེ་ཁྱད་ཆོས་གསུམ་ལྡན་གྱི་རྣམ་པ་ཐམས་ཅད་པའི་མཆོག་དང་ལྡན་པའི་དེ་ཁོ་ན་ཉིད་འཇིག་རྟེན་ལས་འདས་པའི་ཡེ་ཤེས་མཐོབ་ན་རང་གི་ངོ་བོས་རྟོགས་པའི་འབྲས་བུའི་ལྷན་སྐྱེས་ཀྱི་ཡེ་ཤེས་ཡིན་པས་དེ་ལྟར་དུ་ངོ་སྤྲད་པར་བྱའོ། །བདུན་པ་ནི། དེའི་ཚེ་མས་བརྟན་གོམས་པར་བྱ་བའི་ཐབས་ལ་བསླབ་དགོས་ཏེ། སྒྲོལ་མ་རྣལ་འབྱོར་མའི་རྒྱུད་ལས། ཧཞེས་བྱ་བ་མཆོག་ཏུ་དགའི་ཚེ་བཅིང་པར་བྱའོ། །ཡང་ན་ཧཱུཾ་ཞེས་བྱ་བ་སྙིང་ག་ལ་གནས་པའི་སྒྲ་ཡིས་སོ། །ཡང་ན་ཧྲི་ཧ་ཞེས་བྱ་བ་མགྲིན་པ་ལ་གནས་པའི་སྒྲ་ཡིས་སོ་ཧཱུཾ་དང་ཕཊ་ཀྱི་བྱ་བ་དང་། མདའ་བོ་ཆེའི་སྦྱོར་བ་བྱས་ལ་ཁུ་བ་བཅིང་པར་བྱའོ། །གཞན་ཡང་ཆ་བཞི་པའི་ཕྱེད་ཀྱི་མཚམས་སུ་ལྷན་ཅིག་སྐྱེས་པ་བསྒོམ་པར་བྱ་སྟེ། གལ་ཏེ་བྷ་གའི་ཟེ་འབྲུ་ལ་གནས་པའི་ཐིག་ལེ་ཡང་རྡོ་རྗེའི་ཁས་བཏུང་བར་བྱའོ། །བསྐོར་བ་ལ་སོགས་པའི་སྦྱོར་བ་དང་། རླུང་གིས་སྦྱོར་བ་མཉམ་པར་བྱའོ། །ཅེས་དང་། དེ་ལས་དགའ་བ་བཞིའི་དབྱེ་བས་སྒྲུབ་པ་པོ་ལ་རེངས་པ་དང་། །རྡུལ་བ་དང་། བ་སྤུ་ལྡང་བ་དང་། དབུགས་འགྱུར་བ་དང་། འདང་བ་དང་། ཁ་དོག་ལོག་པ་དང་། མཆི་མ་འབྱུང་བ་དང་། ཐིམ་པ་ཞེས་བྱ་བ་སྙིང་སྟོང་ས་བརྒྱད་འབྱུང་ངོ་། །བུ་མོས་ཡེ་ཤེས་ཐོབ་པ་ནི། །སྙིང་ནི་འགུལ་ཞིང་བསྐྱོད་པ་དང་། །འདར་
དང་དྲན་པ་ཉམས་པ་དང་། །སྐྲ་གྲོལ་གཅེར་བུ་གཤེར་བས་ཁྱབ། །མདོག་དམར་རབ་ཏུ་ཕྲ་བའི་མིག །ཡེ་ཤེས་ལྔ་ཡི་རྣམ་པར་འཕྲུལ། །བུད་མེད་ཤེས་རབ་ཡེ་ཤེས་ཏེ། །དེ་ལས་ཡེ་ཤེས་ལྔ་ཐོབ་འགྱུར། །རྡོ་རྗེ་ཆུ་སྐྱེས་སྦྱོར་ལྡན་པ། །སྐུ་ཡི་རྡོ་རྗེ་བླན་པར་བརྗོད། །རླུང་ནི་མཉམ་པར་རྒྱུར་བ་དང་། །སཱི་ཏ་ཀྱི་སྒྲ་དང་སྐད་འགྱུར་བ། །གསུང་ནི་ཉེ་བར་སྒྲུབ་པའོ། །བསྐྱོད་པ་ལས་ནི་རབ་ཞུ་བ། །ནོར་བུ་བཅུ་དྲུག་ཆ་བབས་ཏེ། །ཡིད་ཀྱི་བདེ་བས་གཉིས་འགགས་པ། །ཐུགས་ཀྱི་དེ་ཉིད་བསྒྲུབ་པར་བརྗོད། །གཞུ་ཡི་གཟུགས་ཅན་རབ་སྦྱོར་བམ། །དུང་དང་ཀུནྡ་ལྟར་ཐིག་ལེ། །སྡོམ་བརྩོན་བདེ་བས་གཟུང་བར་བྱ། །རང་གི་རིག་པའི་ཡེ་ཤེས་མཆོག །བསྒྲུབ་པ་ཆེན་པོ་དེ་ཉིད་སྟེ། །རྣམ་ཤེས་ཡེ་ཤེས་དག་པར་བྱེད། །འདི་ཡི་རྡོ་རྗེ་བདག་ཉིད་ཆེ། །སྐུ་གསུམ་མི་ཕྱེད་ལས་བྱུང་བ། །ཡེ་ཤེས་རྒྱ་མཚོ་འགྲུབ་པར་འགྱུར། །ཡེ་ཤེས་ཆེན་པོ་རབ་སྦྱོར་བས། །ཤིན་ཏུ་རྣལ་འབྱོར་མཁས་པས་བསྟོད། །བུད་མེད་སྒྱུ་མའི་ཕྱག་རྒྱ་འདི། །དམ་ཚིག་རྣམས་ཀྱི་མཆོག་གི་མཆོག །ངན་ཟོས་ངན་སྤྱོད་ཐམས་ཅད་ཀྱིས། །སྒྲིབ་པ་དག་ཏུ་ཡོངས་མི་འགྱུར། །ཞེས་སོ། །རྒྱལ་ཀུན་ད་ནོར་བུའི་ལམ་ནས་ཐལ་བ་སྲིད་ན་ཆུ་སྐྱེས་ཉིད་ལས་རོ་འཛིན་གྱིས་བླངས་ཏེ་དམ་ཚིག་གི་ངོ་བོར་མོས་ནས་བཏུང་བར་བྱ་སྟེ། དབང་མདོར་བསྟན་ལས། འཇིག་དང་འཛག་འགྱུར་དེ་ནས་འཛག །ཅེས་སོ། །དེ་ལྟ་བུའི་ཤེར་དབང་ཐོབ་བས་བྱ་བའི་ལས་གང་ལ་དབང་ན། སྦྱོར་བདུན་ལས། ཐབས་ཀྱི་ཁྱད་པར་ཆེ་བའི་ཕྱིར། །རྡོ་རྗེ་ལྟ་བུར་ཡང་དག་གནས། །མཆོག་གི་དངོས་གྲུབ་འགྲུབ་པའི་ཕྱིར། །བརྟུལ་ཞུགས་ཆོ་ག་རིམ་པ་བསྟན། །གཟུང་དང་འཛིན་པའི་ངོ་བོ་ཉིད། །ཆོས་ཀུན་རྟོགས་པར་བྱ་བའོ། །ཞེས་དྲང་དོན་དུ་སྣ་ཚོགས་གཟུགས་
ཅན་མ་བརྟེན་ནས་ཕོ་ཉའི་ལམ་བསྒོམ་པ་དང་། སྦས་དོན་དུ། ལྷ་མོ་དགའ་སྦྱིན་གནས་སྦྱིན་མ། །ཞེས་པའི་དགའ་སྦྱིན་ནི་གཉིས་ཤེར་ཞུ་བ་དང་། གནས་སྦྱིན་ནི་འཕོ་མེད་དུ་བཅིངས་པའི་མཉམ་གནས་སྦྱིན་པ་ལས་ཕྱག་རྒྱ་ཆེན་པོ་དང་སྦྱོར་བའི་ཁ་སྦྱོར་གྱི་ཐིག་ལེ་ནོར་བུའི་ལམ་ནས་གཙུག་ཏོར་གྱི་རྩེར་འཁྱེར་བ་ལ་དབང་། ཡིད་དག་པ་ཐུགས་རྡོ་རྗེའི་སྤངས་རྟོགས་ཁྱད་པར་ཅན་རྒྱུད་ལ་བཞག་པ་ནི་དབང་གི་ངོ་བོ་སྟེ། སྦྱོར་བ་བདུན་པ་ལས། དེ་ཡི་རང་གི་ངོ་བོ་ནི། །ཐུགས་ཀྱི་རྡོ་རྗེའི་རང་བཞིན་ནོ། །ཞེས་སོ། །སྒྲིབ་པ་གང་འདག་ན་བརྣབ་སེམས་ལ་སོགས་པ་འདག་ཚུལ་སྔར་བཞིན་དང་། ཡེ་ཤེས་ཀྱི་སྒྲིབ་པ་སྟེ་ཤེས་སྒྲིབ་རགས་པ་དང་། གནས་སྐབས་བཞི་ལས་གཉིད་འཐུག་གི་དང་། དེ་ཚོགས་དྲུག་རགས་པ་འགགས་པའི་རྣམ་རྟོག་ཡིན་པས་ཡིད་ཀྱི་ཐིག་ལེ་དང་། འཆི་བདག་གི་བདུད་ལ་སོགས་ཉེས་པའི་ཚོགས་འཇོམས་པ་སྟེ། སྦྱོར་བ་བདུན་པ་ལས། བརྣབ་སེམས་ལ་སོགས་སྔ་ཕྱི་ཡི། །ངག་དང་ཉེས་པར་མི་འགྱུར་རོ། །ཞེས་སོ། །ལམ་གྱི་གནས་སྐབས་སུ་དེ་ལྟར་གོམས་པ་ལས་ཡུཾ་གྱི་རྩ་འཁྱོངས་པའི་ཚད་ནི་སྙོམས་འཇུག་བྱས་མ་བྱས་འདྲ་བར་བདེ་བའི་རང་བཞིན་དང་མི་འབྲལ་ཞིང་། རྩ་ནང་ནས་ཁྲག་དང་ཆུ་སེར་མི་རྒྱུ། ནད་དང་སྡུག་བསྔལ་ལས་གྲོལ། རྩའི་ནང་སྟོངས་ཏེ་ཁ་བྱེ་ནས་ཡེ་ཤེས་ཀྱི་རླུང་གིས་དབང་བྱས་པས་མི་རྟོག་པའི་ཡེ་ཤེས་ལ་རྒྱུན་དུ་གནས་པའོ། །ཡབ་ཀྱི་ཐིག་ལེ་འབྱོངས་པའི་ཚད་ནི་བྷ་གའི་ནང་ནས་དངས་མ་ཚུར་འཕྲོག་པར་ནུས། ཀུནྡ་ཆུའི་རྣམ་པ་ལྟར་སླ་ཞིང་སྒྲིབ་པ་མེད་པར་མཆེད་པས་ལུས་ཀྱི་ནད་འབྱོངས། ཐིག་ལེ་དངོས་སུ་མཐོང་པའི་དངོས་པོ་མེད་པར་གྱུར་བས་
འཁོར་བའི་རྩ་བ་གཅོད། ཕྱི་རུ་ལུས་འབྱོངས་པས་རིམ་པ་དགུ་རྗེ་ཞིང་སྐྲ་དཀར་དང་གཉེར་མ་མེད་ལ་གཞོན་ཤ་ཆགས་འདུ་བའི་ནད་ཞི་ནས་ཚེ་ཉི་ཟླ་དང་མཉམ་ཐིག་ལེ་རོ་མ་ལ་བཏབ་ན་ཟས་མི་དགོས། རྐྱང་མ་ལ་བཏབ་ན་གོས་མི་དགོས། ཀུན་དྷར་མ་ལ་བཏབ་ན་རི་བྲག་ལ་ཟང་ཐལ། རྩ་ཁམས་དྭངས་མའི་དངས་མ་ཆེན་པོའི་ནང་གི་མཁའ་འགྲོ་ཡབ་ཡུམ་ཐམས་ཅད་དབུ་མ་འབའ་ཞིག་གི་ཕོ་བྲང་དུ་འདུ་བས། ཕྱི་ཡུལ་མ་དག་པ་གསར་དུ་ཆགས་འཇིག་ཅན་འཛམ་བུའི་གླིང་ལ་སོགས་པའི་ཡུལ་ཉེར་བཞིའི་དཔའ་བོ་མཁའ་འགྲོ་སྤྲུལ་པའི་སྐུའི་བདག་ཉིད་ཅན་རྣམས་ནང་གི་རྩ་ཁམས་ཤིན་ཏུ་རྣམ་པར་དག་པའི་ཡུལ་ཉི་ཤུ་རྩ་བཞི་ལ་འདུས་པས། གསང་བ་མཁའ་ཁྱབ་ལོངས་སྐུའི་ཞིང་གི་ཡུལ་ཉེར་བཞིའི་ཞིང་གི་དཔའ་བོ་མཁའ་འགྲོ་དང་། དོན་དམ་པར་ཆོས་ཀྱི་སྐུའི་བདག་ཉིད་ཅན་ཐམས་ཅད་ཀྱང་རྡོ་རྗེའི་ལུས་ལ་ཐ་མི་དད་པའི་ཚུལ་གྱིས་བཞུགས་ནས་བྱིན་གྱིས་བརླབས་པར་བྱེད། དེའི་གྲུབ་མཐའ་ནི་བདེ་སྟོང་དབྱེར་མེད་དུ་རྟོགས་པ་ས་བཅུ་གཅིག་པ་དང་བཅུ་གཉིས་པའི་གནས་སྐབས་དང་སྐལ་བ་མཉམ་ཞིང་། གྲུབ་མཐའ་མ་སྙོགས་ན་འདའ་ཀའི་ཚེ་སྡུད་རིམ་གྱིས་རྐྱེན་བྱས་ནས་རྩ་མདུད་དྲལ་བས། དོན་དམ་པའི་བྱང་ཆུབ་སེམས་ཀྱི་རྟེན་ཁམས་ཀྱི་ཐིག་ལེ་ཀུན་རྫོབ་པ་རྣམས་ལྷན་ཅིག་ཏུ་ཚོགས་ཤིང་། དབུ་མར་ཅུང་ཟད་ཞུགས་པས་དེར་སྣང་མ་གྲུབ་པའི་རྡོ་རྗེ་སེམས་དཔའ་མཐོང་བར་འགྱུར་ཏེ། དེ་ལ་རྡོ་རྗེ་ནི་སྟོད་པ། སེམས་དཔའ་ནི་བདེ་བ་སྟེ་རྡོ་རྗེ་ལྟ་བུའི་ཏིང་ངེ་འཛིན་གྱི་བདེ་སྟོང་ཉམས་སུ་མྱོང་ནས་བར་དོ་མེད་པ་མཐར་ཐུག་གི་འབྲས་བུ་ཐུགས་རྡོ་རྗེ་ཆོས་སྐུའི་རང་བཞིན་འགྲུབ་པ་སྟེ། གླང་པོ་རབ་འབོགས་ལས། བདུད་རྩི་ཁམས་ཀྱི་དྭངས་མ་བཅུད་ཀྱི་
ལམ། །སེམས་ཀྱི་སྒྲིབ་སྦྱངས་དྭངས་མ་ཆོས་ཀྱི་སྐུ། །ཞེས་སོ། །དམ་ཚིག་ནི་སྒྲོལ་མ་རྣལ་འབྱོར་མ་ལས། བུད་མེད་བྲལ་ལ་སྡོམ་བརྩོན་མེད། །འདོད་ལྡན་ཚངས་སྤྱོད་ཆེན་པོ་ནི། །ཞི་བའི་དམ་ཚིག་འདོད་ཆགས་སྤོང་། །ཞེས་དང་། དམ་ཚིག་ཤིན་ཏུ་འདའ་བར་དཀའ། །པདྨའི་སྙིང་པོ་བདེ་བ་ཅན། །ཇི་སྲིད་མ་རྙེད་འབྲས་བུ་མེད། །ཅེས་སོ། །དེ་བས་ན་བུད་མེད་མཐོང་ན་ཡང་གཡོན་ནས་བསྐོང་བ་གསུམ་བྱེད་པ་སོགས་བཤད་དོ། །བཞི་པ་ཆིག་དབང་རིན་པོ་ཆེའི་རང་བཞིན་སྟོན་པའི་ཕྱིར། །བྱང་ཆུབ་སེམས་ཀྱི་དཀྱིལ་འཁོར་ལ་བརྟེན་ནས། །གསུམ་པའི་ཉམས་མྱོང་ཚིག་གིས་མཚོན་པའི་དབང་། །འཐབ་བྲལ་མན་ཆོད་འཁྱུད་སྦྱོར་འདོད་ཆགས་དང་། །སྒོ་གསུམ་སྒྲིབ་དག་ཐ་དད་འཛིན་པ་སྦྱང་། །སྟོང་པའི་ཐིག་ལེ་རིག་པའི་སྙིང་པོ་ཅན། །གྲུབ་མཐའ་བསམ་མི་ཁྱབ་པའི་ཡེ་ཤེས་ཏེ། །འདའ་ཀ་གསང་ཆེན་ཕྱག་རྒྱ་ཆེན་པོ་ལ། །འབྲས་བུ་མཁའ་ཁྱབ་ངོ་བོ་ཉིད་སྐུའོ། །དེ་ལ་འཐབ་བྲལ་མན་ཆོད་ནི་གཉིས་འཁྱུད་ཀྱི་འདོད་པས་གདུང་བར་བྱེད་པས་དག་བྱ་དེའི་གཉེན་པོར་དག་བྱེད་ཆིག་དབང་རིན་པོ་ཆེ་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་བསྐུར་བ་སྟེ། དེ་ལ་དངོས་བསྟན་བཤད་པ་དང་། འདོད་པ་གཞན་ཞར་བྱུང་དུ་འགོད་པའོ། །དང་པོ་ནི། དབང་གསུམ་པའི་དུས་ན་སྣ་ཚོགས་གཟུགས་ཅན་མ་ལས་རྙེད་པའི་དཔེའི་ལྷན་སྐྱེས་དེ་ནི་དོན་དམ་པའི་བྱང་ཆུབ་སེམས་ཀྱི་མྱུ་གུ་ལྟ་བུ་ཡིན་ཏེ། དཔའ་བོ་གཅིག་པ་ཉིད་དུ་བསྟན་པའི་གཏུམ་པོའི་རྒྱུད་ལས། མདོ་སྡེ་ཆོས་མངོན་ཐམས་ཅད་ནས། །བུད་མེད་རྣམས་ནི་སྨད་མཛད་པ། །སྣ་ཚོགས་སློབ་མའི་སྣོད་ཕྱིར་བཤད། །དེ་ཁོ་ན་ཉིད་སྦས་ནས་
གསུངས། །ཕུང་པོ་ལྔ་དང་རྣམ་བྲལ་བའི། །མྱ་ངན་འདས་པ་བལྟ་བར་བྱ། །ཞེས་ཕ་རོལ་ཏུ་ཕྱིན་པ་མན་ཆད་དུ་དེ་ཁོ་ན་ཉིད་ཟབ་མོ་རྗེས་དཔག་ཙམ་ལས་སྟོན་པར་མ་ནུས་པ་སྔགས་ལམ་དུ་ཐབས་ལ་བརྟེན་ནས་སྒྲིབ་པ་གཉིས་བག་ཆགས་དང་བཅས་པ་གློ་བུར་དུ་བཅོམ་ནས་སྒྲ་ཇི་བཞིན་པ་ཉིད་མངོན་སུམ་དུ་རྟོགས་པར་འགྱུར་བ་ནི་འཕོ་མེད་ཀྱི་ཞུ་བདེ་ལས་སྐྱེས་པའི་ཡེ་ཤེས་དེས་སྣང་བ་གསུམ་དང་། འོད་གསལ་ལ་གོམས་པར་བྱས་པས་ཕུང་པོ་ལྔའི་ཉེ་བར་ལེན་པ་མཐའ་དག་དབྱིངས་སུ་དངོས། སྟོང་པ་གཉིས་ཀྱི་ཆགས་པ་ལས་ཀྱང་འདས་ཤིང་། མུན་ཆེན་གྱི་ཆགས་བྲལ་ཀྱང་མ་ཡིན་པས་མཐའ་གང་དུའང་མ་ལྷུང་ལ། འཛག་མེད་ཀྱི་བདེ་བ་ཆེན་པོའི་རོས་ཡིད་ཀྱི་དྲི་མ་བཀྲུས་པས་དབང་པོའི་སྡུག་བསྔལ་གྱི་གྲོང་ཁྱེར་མཐའ་དག་པ་ནི་བཅོམ་རང་བཞིན་མི་ཤིགས་པ་ཆེན་པོའི་དྭངས་མས་རྣམ་སྨིན་གྱི་ལུས་ཐམས་ཅད་ཁྱབ་པའི་རྐྱེན་ལས་རྣམ་ཐར་བཞི་ལྡན་གྱི་བདེ་བ་ཆེན་པོའམ། བསམ་གྱིས་མི་ཁྱབ་པའི་དེ་ཁོ་ན་ཉིད་ཀྱི་ལྷུམས་སུ་ཞུགས་པ་ནི་དབང་བཞི་པའི་ངོ་བོ་ཉིད་ཡིན་ཏེ། རྡོ་རྗེ་ཁྲོས་པའི་བཤད་རྒྱུད་ལས། ཆོས་སྐུ་མངོན་སུམ་མཐོང་བའི་ཚེ། །དབང་གི་མཆོག་ཏུ་དེ་ཉིད་ངེས། །ཞེས་དང་། དེའི་རང་བཞིན་སེམས་ལས་འདས་པའི་ཡེ་ཤེས་ཡིན་པའི་ཚུལ། དབང་མདོར་བསྟན་ལས། ཇི་ལྟར་ཟངས་ཀྱི་དྲི་མ་ནི། །རོ་ཡི་སྦྱོར་བས་ཉམས་པར་འགྱུར། །དེ་ཡི་ཡོད་ཉིད་ཉམས་པ་མེད། །དྲི་མེད་ཉིད་ཀྱིས་ཡ། །གནས། །དེ་བཞིན་སེམས་ཀྱི་དྲི་མ་ནི། །སྟོང་ཉིད་སྦྱོར་བས་རྣམ་ཉམས་འགྱུར། །དེ་ཡི་ཡེ་ཤེས་ཉིད་ཉམས་མེད། །དྲི་མེད་ཉིད་ཀྱིས་ཡང་དག་གནས། །ཞེས་སོ། །དེ་ཡང་དོན་གྱི་དབང་དུ་ན་སྒྲ་དང་རྟོག་པའི་ཡུལ་དུ་ཡོད་པ་
མ་ཡིན་ཏེ། རྒྱུད་ལས་ཡོད་དང་མེད་པ་ལས་གྲོལ་བ། དེ་ནི་དག་གི་སྤྱོད་ཡུལ་མིན། །ཞེས་སོ། །དེ་ལྟ་ནའང་རེ་ཞིག་ཚིག་གིས་མཚོན་ནས་དེའི་རང་བཞིན་གོ་བར་བྱ་དགོས་པས་ཚིག་དབང་ཞེས་བྱ་ལ། དེའི་ཕྱིར་ཚིག་ཙམ་གྱི་སྒོ་ནས་བསྐུར་བའི་བརྡའ་ཆད་ནི། དབང་གསུམ་པའི་བལྟ་དགོད་ལག་བཅངས་ལ་སོགས་པའི་སྒོ་ནས་རྡོ་རྗེ་ནོར་བུར་བྱང་ཆུབ་སེམས་ཀྱིས་གང་བའི་བར་སྔར་ལྟར་ཉམས་སུ་མྱོང་བ་ལས། ཤེས་རབ་ཀྱི་རྩ་དཔྱིད་ཀྱི་ཐིག་ལེ་ཉི་གཞོན་འཆར་ཀའི་འོད་ཟེར་གྱི་ཕུང་པ་ཚད་མེད་པ་ཅན། དེ་དང་ཕྲད་པ་ཙམ་གྱིས་ཡས་བབས་ཀྱི་དགའ་བ་བཞི་རྫོགས་པའི་མཐར་ཐུག་པའི་གནས་སྐབས་ན་མཁས་པ་བཞི་དང་ལྡན་པའི་ཐབས་ཀྱིས་ལྡོག་པ་ལས། མས་བརྟན་གྱི་དགའ་བ་བཞིའི་མཐར་ཉམས་སུ་མྱོང་བའི་ལྷན་ཅིག་སྐྱེས་པའི་ཡེ་ཤེས་ཀུན་རྫོབ་པ་གང་ཞིག་གི་དྲི་མའི་ཆ་སྤངས་པའི་རང་བཞིན་གྱི་འོད་གསལ་དེ་ཉིད་འབྲས་བུའི་ལྷན་སྐྱེས་སུ་སློབ་དཔོན་གྱི་ཆིག་ཙམ་གྱིས་བརྡའ་ངོ་སྤྲད་ནས་སློབ་མས་གོ་བ་ཚིག་གི་བཞི་པ་ཡིན་ཏེ། ཕྲིན་ལས་ཀྱི་རྒྱུད་ལས། བཞི་པའི་དབང་ནི་བསྐུར་བྱ་བ། །རླུང་གི་རང་བཞིན་ངེས་ཤེས་ཤིང་། །བོ་ལ་ཀ་ཀོ་ལ་སྦྱར་བ། །རང་བཞིན་བདེ་སྟོང་ཕན་ཚུན་འབྱུང་། །གཟུང་དུ་མེད་དེ་བརྗོད་དུ་མེད། །རྟོག་པ་ཀུན་དང་བྲལ་བ་ཡི། །རང་བཞིན་འོད་གསལ་དེར་གནས་པ། །ཆིག་ཚོགས་དབང་གི་རང་བཞིན་བྱིན། །ཞེས་སོ། །དེའང་ཡས་བརྟན་གྱི་བདེ་བའི་རང་བཞིན་སྟོང་པ་ཉིད་དང་དབྱེར་མི་བྱེད་པར་སྦྱར་བའི་དེ་ཁོ་ན་ཉིད་ལས་སླང་འགྱུར་མེད་དུ་བྱེད་ནུས་ན་ཁམས་ཐམས་ཅད་རང་བྱུང་གིས་གྱེན་དུ་འགྲོ་བས་དེའི་སྙིགས་མ་མཐའ་དག་བཟའ་བར་བྱེད་ཅིང་། དབུ་མར་གཟུང་འཛིན་གཉིས་ཀྱི་རྦ་རླབས་རེངས་པ་གསུམ་གསུམ་ལས་རྫུ་འཕྲུལ་ཡམ་ཟུང་དག་
མངོན་པར་ཤེས་པ་འཆང་ཞིང་། འཁོར་ལོ་ཐམས་ཅད་དྭངས་མས་ཁྱབ་པའི་ཐ་མ་གཙུག་ཏོར་དུ་བརྟན་པའི་ཚེ་རྣམ་པ་ཐམས་ཅད་པའི་མཆོག་དང་ལྡན་པའི་འགྱུར་མེད་ཀྱི་བདེ་བ་ཆེན་པོ་འཐོབ་པ་ནི་མྱ་ངན་ལས་འདས་པའི་དོན་གྱི་བཞི་པ་སྟེ། རྒྱུད་ལས། མྱ་ངན་ལས་འདས་པའི་བདེ་བ་འཕོ་མེད་ལྷན་ཅིག་སྐྱེས་པ་འགྱུར་མེད་ནི་བཞི་པ་སྟེ། ཞེས་འགྱུར་བ་མེད་པའི་བདེ་བ་ལ་དབང་བཞི་བར་བཞག་གོ །དེ་ལྟ་བུའི་ཡེ་ཤེས་ངོས་མ་ཟིན་ན་ལས་རྒྱ་ལ་བརྟེན་ནས་ཐབས་ཀྱི་ཆོ་གས་ཉམས་མྱོང་འདྲེན་པ་རྟེན་ཅན་གྱི་བཞི་པ་སྟེ། དང་ང་དེ་དངོས་ལ་བདེ་ཆེན་གྱི་མཚན་ཉིད་མཚོན་བྱེད་དུ་གནས་པའི་ཚུལ་སྦྱོར་བ་བདུན་པ་ལས། འོན་ཀྱང་ཤེས་རབ་ཡེ་ཤེས་ལ། །བདེ་ཆེན་མཚན་ཉིད་གཟུགས་སུ་གནས། །ཞེས་སོ། །དེ་ཉིད་ལམ་དུ་གོམས་པར་བྱས་པས་མཐར་གྱིས་སྒྲིབ་པ་མཐའ་དག་ཟད་ནས། འཇིག་རྟེན་ལས་འདས་པའི་དབང་བཞི་པ་ལ་སྦྱོར་བའི་ཚུལ་དེ་ཉིད་ལས། མི་གནས་ཀྱང་ནི་མི་བསླུའི་ཕྱིར། །བདེ་བ་ཆེན་པོ་ཞེས་སུ་བཤད། །ཅེས་ད་ལྟ་དངོས་སུ་མི་གནས་ཀྱང་དེ་ཡན་ལག་དང་བཅས་པ་གོམས་པས་འབྲས་བུའི་བདེ་ཆེན་འཐོབ་པ་ལ་མི་བསླུ་བ་ཉིད་དེ། འདི་ལྟར་རྟེན་ཅན་ལ་ལྟོས་ནས་དགའ་བ་བཞི་པོ་རེ་རེ་ལ་བཞི་བཞིར་ཕྱེ་བའི་དང་པོ་བཞིས་ཚོགས་ལམ། ལྔ་པས་སྦྱོར་ལམ། དྲུག་པས་མཐོང་ལམ། བདུན་པ་ནས་བཅོ་ལྔའི་བར་གྱིས་བསྒོམ་ལམ། ཐ་མ་བཅུ་དྲུག་པས་མི་སློབ་པའི་ལམ་ལ་སྦྱོར་བའི་ཚུལ། རྡོ་རྗེ་ལས་རིམ་ལས། གནས་ནི་ཡེ་ཤེས་བཅུ་དྲུག་ཕོ། །ཚོགས་སྦྱོར་ལ་སོགས་དང་པོ་ནས། །མཐར་ཕྱིན་སངས་རྒྱས་པ་ཉིད་དེ། །གནས་བཞི་དེ་བཞིན་དབྱེ་བ་ལས། །གཉིས་པའི་གཉིས་པ་རང་དགའ་སོགས། །ཕ་རོལ་ཕྱིན་དངས་མཚན་ཉིད། །མཚུངས་ཀྱང་རྫོགས་པར་བཤད་པ་ཡིན། །ཞེས་ཡས་བབས་རྣམས་རྒྱུ་དང་། །མས་བརྟན་
རྣམས་འབྲས་བུའི་ས་ལས་དང་སྦྱར་ཏེ་ལུགས་ལྡོག་གི་བཅུ་དྲུག་པའི་མཐར་ཁུ་རྡུལ་གཉིས་སྟེང་འོག་ཏུ་ཐིམ་པའི་སྐད་ཅིག་མ་ལ་རླུང་འགགས་པས། གསུམ་པོའི་འགྱུར་བ་མྱོང་བའི་ཤེས་རྒྱུན་ཀྱང་ཆད་དེ། སྐུ་བཞི་མངོན་དུ་བྱེད་པ་ནི་འབྲས་བུའི་བཞི་པ་སྟེ། དེ་སྐད་དུ་འགྲེལ་ཆེན་དྲི་མེད་འོད་ལས། ཕྱག་རྒྱ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་མི་འགྱུར་བའི་བདེ་བ་ཆེན་པོའི་སྐད་ཅིག་མ་རྣམས་ཀྱི་ཐ་མ་མངོན་པར་རྫོགས་པར་བྱང་ཆུབ་པའི་མཚན་ཉིད་མི་ཆོད་པ་སྟེ། དེ་བཅོམ་ལྡན་འདས་གང་གིས་བྱང་ཆུབ་ཤིང་དྲུང་དུ་ཐོབ་པ། དེ་ནི་དབང་མཆོག་ཐོབ་པའོ། །ཞེས་སོ། །དེ་ལྟ་བུའི་དབང་བཞི་པ་མ་ཐོབ་ན་སངས་རྒྱས་ཀྱི་ཡེ་ཤེས་ཤེས་པ་མེད་པས་དོན་དང་མི་ལྡན་པའི་ཚུལ་སྔ་མ་ལས། དེ་ལྟར་དབང་བཞི་པ་མ་རྟོགས་པའི་ཕྱིར་དབང་ཐམས་ཅད་དོན་མེད་པར་འགྱུར་རོ། །ཞེས་པས་འཇིག་རྟེན་ལས་འདས་པ་དོན་དམ་པའི་དབང་གི་མཆོག་ཏུ་གྱུར་པ་ཚིག་གི་དབང་ཐོབ་པས་ལྟ་བ་རང་བྱུང་གི་ཡེ་ཤེས་མཐོང་ལམ་གྱི་བདེན་པ་མངོན་སུམ་དུ་སྟོན་པའི་གནས་ལུགས་བསམ་གྱིས་མི་ཁྱབ་པ་དང་། སྟོང་པ་ཉིད་ཀྱི་ཐིག་ལེ་རིག་པའི་ཡེ་ཤེས་ཀྱི་སྙིང་པོ་ཅན་ཐོད་རྒལ་ལ་སོགས་པ་དོན་དམ་འོད་གསལ་གྱི་རྫོགས་རིམ་བསྒོམ་པ་ལ་དབང་། སྒྲིབ་པ་གང་འདག་ན་སྒོ་གསུམ་ཐ་དད་དུ་འཛིན་པའི་སེམས་ཀྱི་དྲི་མ་ཤིན་ཏུ་ཕྲ་བ་ཆ་མཉམ་པར་སྦྱོང་ཞིང་ལྷའི་བུའི་བདུད་བཅོམ་གནས་སྐབས་བཞི་ལས་སྙོམས་འཇུག་གི་གནས་སྐབས་དང་། དེའང་འཛག་བདེའི་སྲེད་པ་ཡིན་པས་ཁུ་རྡུལ་རླུང་གསུམ་ལས་འཁོར་བའི་ལུས་ངག་ཡིད་གསུམ་དང་། བདེ་སྡུག་བཏང་སྙོམས་གསུམ་འཆར་བས་ཁུ་རྡུལ་རླུང་གསུམ་ལ་ཆ་མཉམ་དུ་འཇུག་པའི་སེམས་དང་། ཤེས་སྒྲིབ་ཆེས་ཕྲ་བ་འཕོ་བའི་བག་ཆགས་ཀྱི་སྒྲིབ་པ་ཆ་དང་བཅས་
པ་སྦྱང་བ་ཡིན་ལ། དེའི་གྲུབ་མཐའ་བསམ་གྱིས་མི་ཁྱབ་པ་ནི་བདེ་སྟོང་གི་ཡེ་ཤེས་རྒྱ་ཆད་ཕྱོགས་ལྷུང་དང་བྲལ་བ་ཉིད་དེ། ཕྱེད་བཅས་བཅུ་གསུམ་གྱི་ས་ལ་འཁོར་འདས་ཐམས་ཅད་བདེ་སྟོང་གཅིག་ཏུ་རྟོགས་པས་བླང་དོར་དང་སྤང་གཉེན་མེད་པའོ། །གྲུབ་མཐའ་མ་སྙོགས་ན་འདའ་ཀ་མ་ཕྱག་རྒྱ་ཆེན་པོས་འཕོ་བ་ལ་སྦྱང་བ་དང་། གོམས་སུ་འཇུག་པ་དང་། ལས་ལ་སྦྱར་བ་གསུམ་ཡིན་ནོ། །མཐར་ཐུག་གི་འབྲས་བུ་ནི་དབང་གི་ས་བོན་རྒྱུད་ལ་ཐེབས་པ་དེ་རིམ་གཉིས་ཀྱིས་སད་པར་བྱས་པས་མཆོག་ཏུ་མི་འགྱུར་བའི་སྟོང་གཟུགས་ཕྱག་རྒྱ་ཆེན་པོ། །ཡེ་ཤེས་ཀྱི་རླུང་རིག་ལས་གྲུབ་པའི་མཚན་དཔེའི་བདག་ཉིད་ཅན་ཁ་སྦྱོར་ཡན་ལག་བདུན་ལྡན་གྱི་བདག་ཉིད་བདེ་ཆེན་ལྷན་ཅིག་སྐྱེས་པའི་ཡེ་ཤེས་ངོ་བོ་ཉིད་ཀྱི་སྐུ་འགྲུབ་པའི་ཚུལ་གླང་པོ་རབ་འབོགས་ལས། རླུང་གི་འགྲོས་ཐིམ་མི་ཤིགས་རྡོ་རྗེའི་སྐུ། །ལུས་ངག་ཡིད་དག་ངོ་བོ་ཉིད་ཀྱི་སྐུ། །ཞེས་སོ། །གཉིས་པ་འཕྲོས་དོན་ནི། རྒྱུད་སྡེ་ཕལ་ཆེར་ལས་དབང་གསུམ་པ་དཔེའི་ཡེ་ཤེས་སུ་བྱས་ནས། དེ་ལས་བཞི་པའི་དོན་གྱི་ཡེ་ཤེས་མཐོང་བར་བཤད་ཀྱང་བཞི་པའི་རང་བཞིན་ནི་སྒྲ་རྟོག་དང་ཞེན་པའི་ཡུལ་དུ་འགལ་པས་ཚིག་གིས་སྟོང་གཅད་པ་མངོན་སུམ་དུ་མི་གནས་ལ། འདྲ་བའི་ཕྱིར་ན་དངོས་མ་ཡིན་པ་ཉིད་ཀྱིས་འཕགས་པའི་ཡུལ་དུའང་འདོད་པ་དུ་མར་སྣང་སྟེ། འདི་ལྟར་ནོར་བུས་གནས་པའི་བདེ་བ་གསུམ་པར་བྱས་ནས། དེ་ལས་འཕོས་པ་དང་བྱང་སེམས་ལྕེས་མྱངས་པ་བཞི་པར་བྱེད་པའི་སྒྲོ་བཏགས་དང་། ཕལ་ཆེར་ཤེས་རབ་ཡེ་ཤེས་ཀྱི་ལྷན་སྐྱེས་བརྫུན་པར་རྟོགས་ནས་དེའི་བདེ་བ་ལ་སྟོང་པའི་རྒྱས་བཏབ་པ་གང་ཞིག་བ་དེ་སྟོང་དབྱེར་མེད་ཀྱི་བཞི་པར་འདོད་པ་ནི་དེ་ཁོ་ན་ཉིད་ལ་ཤིན་ཏུ་འཁྲུལ་པའི་ཕྱོགས་ཡིན་པས་དུས་འཁོར་འགྲེལ་ཆེན་ལས། དགོད་པ་དང་བལྟ་བ་དང་ལག་པ་བཅངས་པ་དང་གཉིས་གཉིས་སྦྱོར་བ་ཞེས་པ་དབང་རྣམ་
པ་བཞི་ནི་དེ་ཁོ་ན་ཉིད་དུ་མི་འགྱུར་རོ། །འདིར་དེ་ཁོ་ན་ཉིད་ནི་གཉིས་འཁྱུད་པ་མེད་པ་སྟེ་ལས་ཀྱི་ཕྱག་རྒྱའི་རྒྱུ་ལས་སྐྱེས་པ་ནི་རྣམ་པར་དཔྱད་ན་གཉིས་སུ་མེད་པའི་ཡེ་ཤེས་སུ་མི་འགྱུར་རོ། །ཞེས་པའི་དགོངས་པ་ཡང་དེ་ཡིན་ནོ། །འདིར་ནི་གསུམ་པའི་ཉམས་མྱོང་ལྷན་ཅིག་སྐྱེས་པའི་ཡེ་ཤེས་དེའི་ཐབས་ལ་བརྟེན་ནས་གང་ཞིག་རྟོགས་བྱའི་མི་མཐུན་ཕྱོགས་ཤིན་ཏུ་ཕྲ་བའི་རྣམ་རྟོག་ཀུན་ཆོད། ཁུ་རྡུལ་གཉིས་སྟེང་འོག་ཏུ་ཐིམ་ཞིང་འགགས་པའི་མོད་ལ་རང་བཞིན་གྱིས་དག་པར་བྱེད་པས་དབང་བཞི་པའི་དཔེར་རུང་ལ་དོན་དམ་པར་བདག་ཏུ་བལྟ་བ་དང་། འཁོར་འདས་ཀྱི་ཆོས་སུ་འཛིན་པའི་རྣམ་པར་རིག་པ་ཐམས་ཅད་རང་གི་ངོ་བོས་སྟོང་པའི་དེ་ཁོ་ན་ཉིད་ལ་དབང་བཞི་པའི་བླ་དྭགས་སུ་བཏགས་ནས་གནས་སྐབས་སུ་ཆིག་ཙམ་གྱིས་མཚོན་པར་བྱེད་ལ། མཐར་ཐུག་དེའི་དོན་གཉིས་སུ་མེད་པའི་ཡེ་ཤེས་གང་ཡིན་པ་ནི་དད་པ་དང་བྱིན་རླབས་ཀྱིས་རྟོགས་པར་བྱ་བའི་དབང་ཡིན་པས་ན། དོ་ཧ་ལས། བླ་མའི་བྱིན་རླབས་གང་གི་སྙིང་ཞུགས་པ། །ལག་པའི་མཐིལ་ན་གནས་པའི་གཏེར་མཐོང་འདྲ། །ཅེས་སོ། །དབང་བཞི་པ་ལ་ཡན་ལག་བདུན་ལ་སོགས་པའི་འབྲས་བུའི་ཕྱོགས་ནས་བསྙད་ན་མཐར་མི་ཐུག་པར་འགྱུར་པས་འདིར་དེ་ཙམ་མོ། །དབང་བཞི་པའི་དམ་ཚིག་ནི། ཁྱོད་ཀྱིས་སྲོག་ཆགས་གསད་པར་བྱ། །གཞན་གྱིས་བུད་མེད་རྣམས་སྤྱད་ནས། །མ་བྱིན་པར་ཡང་ཁྱོད་ཀྱིས་ལོངས། །ཐམས་ཅད་ལ་ཡང་བརྫུན་ཚིག་སྨྲ། །ཞེས་སོ། །དེ་ལྟར་དྲི་མ་འཁྲུད་བྱེད་ཀྱི་དབང་བཞི་པོ་ལ། སྒྲ་དོན་སྦྱར་ན་ཨ་བྷི་ཥིཉྩའི་སྒྲས། །གློ་བུར་དྲི་མ་གཏོར་དང་ཥེཀ་ཏས། །སྐལ་བ་བླུགས་པ་རྣམ་པ་གཉིས་སུ་འགྲུབ། །ཅེས་སྨོས་ཏེ། དེ་ལ་དབང་གི་སྒྲ་བཤད་ནི། སྣོད་དུ་རུང་བ་དང་ལུགས་སུ་ལུགས་པའི་རྣམ་པ་ལྟར་ལམ་
བསྒོམ་རུང་དང་། འབྲས་བུ་ཡེ་ཤེས་ཀྱི་ནུས་པ་ཁྱད་པར་ཅན་རྒྱུད་ལ་བླུགས་པ་ལྟར་འཇོག་པས་ན་དབང་། དྲི་མ་དག་པར་བྱེད་པས་ན་གཏོར་བའི་དོན་དུ་འཇོག་པ་སྟེ་སྔ་མ་ལས། སྣོད་དུ་རུང་ཕྱིར་བུམ་དབང་སྟེ། །བླུགས་གཏོར་དག་པར་བྱེད་པས་དབང་། །ཞེས་དང་བརྟག་གཉིས་ལས་ཀྱང་། གཏོར་དང་བླུགས་པ་ཞེས་བྱ་བ། །དེས་ན་དབང་ཞེས་བརྗོད་པར་བྱ། །ཞེས་སོ། །དེ་ལྟ་བུའི་དབང་བཞིའི་རིམ་པ་ད་ལྟ་ནས་རྒྱུ་ལམ་འབྲས་བུའི་རང་བཞིན་དུ་གནས་པའི་ཚུལ། དབང་མཆོག་རང་ལ་གནས་པ་ཁམས་དྲུག་གི །རྟེན་དང་འབྱོར་བ་རྒྱུ་ཡི་དབང་ཡིན་ཏེ། །སློབ་དཔོན་ཉིད་ཀྱིས་ཚོགས་བསྐུར་བ་དང་། རང་གི་དམིགས་པས་འདྲིས་པ་ལམ་གྱི་དབང་། །རྒྱུ་དུས་འོད་ཟེར་ཆེན་པོའི་དབང་བཞིན་དུ། །རང་སེམས་སྐུ་བཞིར་སྨིན་པ་འབྲས་བུའི་དབང་། །དབང་བཞི་རྫོགས་ཚེ་རིག་འཛིན་སྡོམ་པ་འཐོབ། །དེ་ལ་སེམས་ནི་མིང་གཞིའི་ཕུང་པོ་ཅན་ཡེ་ཤེས་ཀྱི་རྟེན་ཡིན་ལ། ཕུང་པོའི་རྟེན་ནི་འབྱུང་པ་ལྔ། འབྱུང་བའི་རྟེན་རྩ་དང་། རྩའི་བརྟེན་པ་སྲོག་གི་རླུང་། རླུང་གི་བརྟེན་པ་བྱང་ཆུབ་ཀྱི་སེམས་ཡིན་པས་དེ་དག་ཀྱང་སྨན་གྱི་རོ་དང་། ནུས་པ་དང་། དྲི་དང་། ཞུ་རྗེས་ལྟ་བུར་གཅིག་ལ་གཅིག་བརྟེན་དུ་ཚོགས་པ་གཅིག་པ་ལས་རང་གི་སེམས་རྒྱུད་དྲི་མས་གོས་མ་མྱོང་བ་དེ་བཞིན་གཤེགས་པའི་སྙིང་པོ་ཅན་ལ་དབང་གི་རང་བཞིན་གདོད་ནས་གནས་པའི་ཚུལ། རྡོ་རྗེ་ཕུར་བའི་བཤད་རྒྱུད་ལས། སེམས་ཉིད་རྟོགས་ན་དབང་ཡིན་ཏེ། །ཐམས་ཅད་རང་རིག་ཕུར་བུ་མཆོག །ཅེས་སོ། །དེའང་འཁོར་བའི་གནས་སྐབས་ན་འབྱུང་བ་ལྔ་དང་། དེའི་སྟེང་དུ་ཡེ་ཤེས་བསྣན་པ་ས་ཁམས་དྲུག་གི་རྟེན་ཁྱད་པར་ཅན་གྱི་རྐྱེན་དང་འབྱོར་པ་མཚུངས་ལྡན་གྱི་རྒྱུའི་དབང་དུ་གནས་པའི་ཚུལ་ནི། རྡོ་རྗེ་འབར་བའི་རྒྱུད་ལས། སེམས་ནི་མིང་གཞིའི་ཕུང་པོ་སྟེ། །ཕུང་པོའི་རྟེན་ནི་འབྱུང་
བ་ལྔ། །འབྱུང་བའི་རྟེན་ནི་རྩ་རྣམས་སོ། །རྩ་རྣམས་བརྟེན་པ་སྲོག་གི་རླུང་། །སྲོག་རླུང་བརྟེན་པ་བྱང་ཆུབ་སེམས། །ཞེས་པ་ལྟར་ལས་རྒྱུ་དུས་ཀྱི་ཕུང་པོ་ལྔ་རྒྱལ་བ་རིགས་ལྔ། འབྱུང་བ་ལྔ་ཡུམ་ལྔ། སྐྱེ་མཆེད་སེམས་དཔའ་སེམས་མ་ལ་སོགས་གདན་གསུམ་ཆེད་བའི་ལྷའི་རྣམ་པར་འགྱུར་བ་ཅན་གྱི་དཀྱིལ་འཁོར་གྱི་འཁོར་ལོར་རྫོགས་པ་ནི་བུམ་པའི་དབང་གི་རང་བཞིན་དུ་ཡོད་པ་སྟེ་སྡོམ་འབྱུང་ལས། དང་པོ་ལྷ་ཡི་རང་བཞིན་དུ། །རྡོ་རྗེ་སེམས་དཔའ་རྣམ་པར་བཞུགས། །ཞེས་སོགས་པས་བསྟན་ནོ། །དེ་བས་ན་ལམ་བསྒོམ་པའི་སྔོན་དུ་འགྲོ་བ་ཅན་བུམ་དབང་གི་ས་བོན་ལུས་འདིའི་རྩའི་གཙོ་བོ་རྣམས་ཡེ་ནས་སྤྲུལ་སྐུར་གནས་པས་དེའི་གློ་བུར་བའི་དྲི་མ་དག་བྱེད་བུམ་པའི་དབང་བསྐུར་བ་ནི་ལམ་གྱི་དབང་ཡིན་ལ། དེ་བཞིན་དུ་གསང་དབང་གི་ས་བོན་དག་ཡི་གེའི་རང་བཞིན་ལོངས་སྤྱོད་རྫོགས་པའི་སྐུར་གནས་པ་དེའི་གློ་བུར་བའི་དྲི་མ་དག་བྱེད་གསང་བའི་དབང་དང་། ཤེར་དབང་གི་ས་བོན་ཀུན་རྫོབ་བྱང་སེམས་དང་རྟེན་བརྟེན་པར་འབྲེལ་བ་སེམས་ཉིད་བདེ་ཆེན་ཆོས་སྐུའི་རང་བཞིན་དུ་གནས་པ་དེའི་གློ་བུར་བའི་དྲི་མ་དག་བྱེད་ཤེར་དབང་སྟེ་ཤེས་རབ་ནི་ལྷན་ཅིག་སྐྱེས་པའི་ལྟ་བ་དང་། ཡེ་ཤེས་ནི་དེའི་རང་བཞིན་ཤེས་པའི་ལྷག་མཐོང་ངོ་། །དབང་བཞི་པའི་ས་བོན་ད་ལྟ་བལྟར་མི་མངོན་ཀྱང་བདེ་སྟོང་གི་མྱོང་ཞེན་དང་བཅས་པའི་ལྷན་ཅིག་སྐྱེས་པའི་ཡེ་ཤེས་སུ་གནས་པ་དེའི་གློ་བུར་བའི་དྲི་མ་ཚིག་དབང་གིས་དག་པར་བྱེད་པས་རླུང་སེམས་དྭངས་པའི་ཡེ་ཤེས་རིག་སྟོང་མཐའ་བྲལ་རྣམ་ཐར་གསུམ་གྱི་མཚན་ཉིད་ཅན་གྱི་ནུས་པ་རྒྱུད་ལ་འཇོག་པའི་ལམ་དབང་བཞིའམ། དེའང་གཞན་དུ་ཐོག་མར་ཆོ་ག་ལ་བརྟེན་པའི་བསྐུར་བྱ་སྐུར་བྱེད་ལ་ལྟོས་ཏེ་དབང་གི་བརྡའ་འཕྲོད་པར་བྱེད་པའི་ཆ་ནས་རྒྱུ་དབང་དུའང་
བཞག་པ་ཡིན་པས་དེ་ལྟར་ན་བླ་མས་སློབ་མ་ལ་བསྐུར་བ་ནི་གཞི་ལམ་གཉིས་ཀའི་དབང་དུ་བསྡུ་རུང་ལ། དེ་ལས་གཞན་པ་བདག་འཇུག་དང་། རྣལ་འབྱོར་ཟབ་མོའི་དབང་བཞི་དང་། བྱིན་རླབས་འཕོ་བའི་རྒྱུན་ལ་གོམས་སུ་འཇུག་ཅིང་དད་པས་ནན་ཏན་དུ་བྱ་བ་ཐམས་ཅད་ལམ་དབང་ཡིན་ལ། རྒྱུ་དུས་ན་རང་གི་རིག་ཆ་ལ་ལྡན་པའི་དབང་གི་དེ་ཁོ་ན་ཉིད་ཉི་མའི་དཀྱིལ་འཁོར་ལྟ་བུ་དེ་འཁོར་བའི་རང་བཞིན་ཀུན་གཞི་ཚོགས་བརྒྱད་དང་བཅས་པའི་དྲི་མ་གློ་བུར་བ་སྤྲིན་སྤུབས་ལྟ་བུས་བལྟར་མི་མངོན་པར་བྱས་པ་གང་ཞིག །ལམ་དུས་ཀྱི་དབང་མངོན་རྟོགས་རྣམ་པ་བཞིའི་རྩ་ལ་སྣང་རྒྱས་པའི་བྱེད་ལས་ཀྱི་ཐབས་ལ་མཁས་པས་སྤྲིན་སྤུབས་ལྟ་བུའི་དྲི་མ་གློ་བུར་བ་དེ་ཉིད་སྐད་ཅིག་ལ་བསལ་བ་ལས་གནས་སྐབས་ཀྱི་ཡོན་ཏན་རྒྱ་ཆེན་པོ་དང་། ཕ་རོལ་ཏུ་ཕྱིན་པ་ལས་ཁམས་བདེ་བར་གཤེགས་པའི་སྙིང་པོ་ས་བོན་བོན་ཙམ་དུ་འགྲོ་བའི་རྒྱུད་ལ་ཡོད་པ་རྐྱེན་ཚོགས་གཉིས་ལས་བསྐལ་པ་གྲངས་མེད་གསུམ་དུ་འཕེལ་བ་སློབ་ལམ་རྫོགས་པའི་རྒྱུན་མཐར་འོད་ཟེར་ཆེན་པོའི་དབང་བསྐུར་ཐོབ་པའི་རྒྱུ་འབྲས་སྔ་ཕྱིར་སྨོན་པ་ལྟར་མ་ཡིན་པར། འདིར་རྒྱུ་དུས་ནས་རང་སེམས་སྐུ་བཞིར་སྦྱོར་བའི་འབྲས་དུས་ཀྱི་དབང་འོད་ཟེར་ཆེན་པོའི་རང་བཞིན་དུ་ཐོབ་པའང་ཡོད་པའི་ཕྱིར་འབྲས་བུའི་དབང་ཞེས་བྱ་བ་ཡིན་ནོ། །དེ་ལྟ་ན་ད་ལྟ་དེ་དང་དེའི་ཡོན་ཏན་དངོས་སུ་མ་སྐྱེས་པས་རྒྱུ་ལ་འབྲས་བུའི་མིང་བཏགས་པ་ཙམ་ལས་ས་ཟིན་གཞན་པ་མེད་དོ་ཟེར་ན། གང་ཟག་དབང་པོ་རབ་ཏུ་གྱུར་པ་དག་ནི་དབང་བསྐུར་ཉིད་ཀྱིས་གྲོལ་བ་ཡང་ཡོད་དེ་གྲུབ་ཆེན་རྣམས་ཀྱི་རྣམ་པར་ཐར་པས་གསལ་ལ། གལ་ཏེ་སྨིན་པའི་ཚད་དེའི་རྒྱུད་ལ་སྔར་མེད་ཀྱི་ཡོན་ཏན་ཆེན་པོ་ཐོབ་པས་ཀྱང་མ་ཡིན་པར་གཟུགས་ཀྱི་རྣམ་འགྱུར་གསར་པ་འཐོབ་དགོས་ན། དགྲ་བཅོམ་པ་
རྣམས་ཀྱང་ལུས་ཀྱི་རྣམ་པ་མི་འགྱུར་བས་འབྲས་བུ་ཐོབ་པའི་སྟང་གང་གིས་གཅོད། འདི་ལྟར་ཡེ་ཤེས་སྐྱེ་བའི་སྣ་འདྲེན་ནི་དབང་གི་ཐབས་ལ་བརྟེན་ནས་བྱེད་པ་ཡིན་པས་ད་ལྟ་མངོན་སུམ་དུ་བལྟར་མི་མངོན་ཀྱང་། སྨིན་པའི་ཚད་དུ་རུང་བའི་རྒྱུ་མཚན་ནི། ཕར་ཕྱིན་ཐེག་པར་རྟེན་གང་ཞིག་ལ་མཐོང་སྤངས་སྤོང་རུང་དང་། མཐོང་ལམ་སྐྱེ་རུང་ལ་སྨིན་པའི་འཐད་པ་འཇོག་པ་ལྟ་བུ་སྟེ། མདོ་སྡེའི་རྒྱན་ལས། ཇི་ལྟར་རྨ་དང་ཟས་ལ་དེ་དག་གིས། །གཟག་དང་དཔྱད་དུ་རུང་བས་སྨིན་འདོད་ལྟར། །དེ་ཕྱིར་རྟེན་འདིར་ཕྱོགས་གཉིས་ཞི་བ་དང་། །ཡོངས་སུ་དཔྱད་པ་ཉིད་དུ་སྨིན་པར་བསྟན། །ཞེས་པ་ལྟར་རོ། །དེ་བས་ན་སྔགས་ཀྱི་དབང་བསྐུར་བ་ཐོབ་ཅིང་དམ་ཚིག་དང་སྡོམ་པ་རྣམ་པར་དག་པ་རྣམས་ནི་རིམ་གཉིས་ཀྱི་རྟེན་འབྲེལ་ལས་འབད་པ་ཆུང་དུས་ཀྱང་ཚེ་འདི་ཉིད་ལ་དངོས་གྲུབ་ཐོབ་པ་ནི་སྔགས་ཀྱིས་བཏབ་པའི་ས་བོན་ཡུད་ཙམ་ལ་སྨིན་པ་མ་ཤའི་སྦྱོར་བ་བཞིན་ནོ། །དེ་དག་ཀྱང་བསྡུ་ན་རྒྱུ་འབྲས་ཀྱི་དབང་གཉིས་སུ་འདུ་སྟེ། བུམ་པ་དང་། གསང་བ་དང་། ཤེས་རབ་ཡེ་ཤེས་གསུམ་ནི་བར་ཆད་ཀྱི་བདེ་བ་དང་བཅས་པས་འཇིག་རྟེན་པའི་དབང་ཞེས་བྱ་སྟེ། དང་པོའི་སངས་རྒྱས་ལས། གསུམ་པོ་འཇིག་རྟེན་ཀུན་རྫོབ་སྟེ། །བཞི་པ་དོན་གྱི་དམ་པ་ཡིན། །ཞེས་སོ། །རྒྱུ་མཚན་འདིས་སྔགས་སུ་བུམ་དབང་གི་འབྲས་བུ་བཅུ་གཅིག་ཀུན་ཏུ་འོད་ལ་བཞག་པ་ལ་སོགས་པའི་རིམ་པས་ཀྱང་མདོ་ལམ་གྱིས་དྲང་དོན་ཡིན་པའི་མཚན་ཉིད་ལེགས་པར་ཤེས་ནུས་སོ། །དེ་ནས་མཐའ་རྟེན་དུ་བརྟུལ་ཞུགས་བྱིན་ནས་ལུང་བསྟན་པ་དང་། རྗེས་གནང་དང་དབུགས་དབྱུང་གཉིས་ལས། དང་པོ་ནི་དབང་རྟེན་གྱི་ལག་པ་སློབ་མར་གཏད་ལ་གཉིས་ག་ནས་རང་གི་ལག་གཡོན་གྱིས་བཟུང་། རྡོ་རྗེ་དང་བཅས་པའི་གཡས་པ་སློབ་མའི་སྤྱི་
བོར་བཞག་ལ། དེ་བཞིན་གཤེགས་པ་རྣམས་དཔང་དུ་བཙུགས་ནས། འདིར་ནི་ཁྱེད་རྣམས་དབང་པོ་ཡིན། །བདག་གིས་འདི་ལ་འདི་གཏད་དོ། །ཐབས་གཞན་གྱིས་ནི་སངས་རྒྱས་མིན། །འགྲོ་གསུམ་འདི་ཡང་དག་པ་ཡིན། །དེ་ཕྱིར་འདི་དང་བྲལ་བར་ནི། །ཁྱེད་ཀྱིས་ནམ་ཡང་མ་བྱེད་ཅིག །འདི་དེ་སངས་རྒྱས་ཐམས་ཅད་ཀྱི། །རིག་པའི་བརྟུལ་ཞུགས་བླ་ན་མེད། །རྨོངས་པ་གང་གིས་འདའ་བྱེད་པ། །དེ་ལ་མཆོག་གི་དངོས་གྲུབ་མེད། །ཅེས་བརྗོད་ནས་བྱིན་ནོ། །དེ་བཞིན་དུ་སློབ་མ་རྡོ་རྗེ་སེམས་དཔར་བསྐྱེད་ནས་རྡོ་རྗེའི་བརྟུལ་ཞུགས་བྱིན་པ་ནི་ཡེ་ཤེས་ལྔའི་རང་བཞིན་ནང་གི་རྡོ་རྗེ་དང་མི་འབྲལ་བའི་དོན་ཏེ། ཕྲེང་བ་ལས། གང་ཚེ་རྣམ་པར་མི་རྟོག་པའི། །ལས་ཀུན་ཐབས་དང་བཅས་པར་སྤྱོད། །རྣམ་པར་མི་རྟོག་བསྒོམ་པ་ལས། །བརྟུལ་ཞུགས་རྣམས་ཀྱི་མཆོག་གི་མཆོག །ཅེས་སོ། །དེ་བཞིན་དུ་ཁ་ཊཱཾྭ་ག་དང་། ཅང་ཏེའུ་དང་། པདྨའི་སྣོད་ལ་སོགས་པ་གཏད་ནས་སྤྱོད་པའི་བརྟུལ་ཞུགས་བྱིན་པ་ཡང་། ཁ་ཊཱཾྭ་ག་ནི་ལྷ་ཡི་སྐུ། །ཅང་ཏེའུ་ཤེས་རབ་ཏུ་ནི་བརྟག །སྔགས་ནི་བཏུང་བའི་ཐོད་པའོ། །ཞེས་ཀུན་སྤྱོད་ལས་བཤད་དོ། །གཞན་ཡང་ཁམས་གསུམ་དང་དབྱེར་མེད་པའི་ཆོས་ཉིད་རྟོགས་པར་ནུས་པ་ཁྱོད་ཡིན་ནོ་ཞེས་གཟེངས་བསྟོད་པའི་དོན་དུ་ལུང་བསྟན་པ་ཡང་སངས་རྒྱས་མཉམ་སྦྱོར་ལས། སློབ་མ་དཀྱིལ་འཁོར་བསྡུས་ནས་ནི། །ཡོན་གྱི་མཆོག་དེ་བླངས་ནས་ནི། །རྡོ་རྗེ་མིང་གི་དབང་བསྐུར་བས། །དེ་བཞིན་གཤེགས་པར་དེ་ལུང་བསྟན། །ཕྱག་རྒྱའི་སྦྱོར་བ་འདི་དག་གིས། །བྱང་ཆུབ་སྙིང་པོའི་བར་དུ་ནི། །རྡོ་རྗེའི་མིང་དུ་རབ་ཏུ་གྲགས། །དེ་ནས་སངས་རྒྱས་སྲས་སུ་འགྱུར། །ཞེས་སོ། །གཉིས་པ་ནི། རྣམ་སྣང་མངོན་བྱང་ལས། །དེ་ནས་རྐང་པའི་བར་འོག་ཏུ། །ཆོས་ཀྱི་འཁོར་ལོ་བཞག་པར་བྱ། །དེ་ནས་ལག་པ་གཡས་པར་
ཡང་། །ཤིན་ཏུ་བཟང་པོའི་དུང་བྱིན་ཏེ། །ཆོས་ཀྱི་དུང་ནི་བླ་མེད་པ། །ཀུན་ཏུ་རྒྱས་པར་བུས་ནས་སུ། །དེ་རིང་ཕྱིན་ཆད་འཇིག་རྟེན་ལ། །སྐྱོབ་པ་རྣམས་ཀྱི་འཁོར་ལོ་བསྐོར། །སོམ་ཉི་ཡིད་གཉིས་མི་བྱ་ཞིང་། །དྭོགས་པ་མེད་པའི་སེམས་ཀྱིས་ཁྱོད། །གསང་སྔགས་སྤྱད་པའི་ཚུལ་གྱི་མཆོག །འཇིག་རྟེན་འདི་ལ་རབ་ཏུ་ཤོད། །དེ་ལྟར་བྱས་ན་སངས་རྒྱས་ལ། །ཕན་འདོགས་བྱས་པ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཡང་། །ཁྱོད་ལ་རྣམ་པ་ཀུན་ཏུ་བསྲུང་། །ཞེས་དང་། རིགས་སོ་སོའི་རྗེས་གནང་གི་ཚིག་སྒྲ་བསྒྱུར་ནས་དཀྱིལ་འཁོར་བྲི་བཤད་བྱེད་པའི་རྗེས་གནང་ཡང་སྦྱིན་པ་ཡིན་ནོ། །དེ་ནས་དབུགས་དབྱུང་བ་ནི། ཁྱོད་ནི་འདོད་པ་ལ་ཉེ་བར་ལོངས་སྤྱོད་ཀྱང་སངས་རྒྱས་ཉིད་ཡིན་ནོ། །ཞེས་དཀྱིལ་འཁོར་དུ་འཇུག་པ་དང་། དབང་བསྐུར་བ་སོགས་ཀྱིས་སངས་རྒྱས་ཐོབ་ནུས་ཀྱི་ས་བོན་འཕེལ་བར་བྱ་བའི་ཚུལ་སློབ་མས་གོ་བར་བྱས་ནས་སློབ་མ་དཀྱིལ་འཁོར་ལ་འབུལ་བའི་ཚུལ་སྤྱི་རྒྱུད་ལས། དེ་ནས་བླ་མ་བདག་ཉིད་ཀྱི། །དེ་ཡི་སྤྱི་བོར་གདུགས་ཀྱང་བཟུང་། །ཐལ་མོ་སྦྱར་བར་བྱས་ནས་ནི། །དཀྱིལ་འཁོར་ལེགས་པར་བསྐོར་དུ་གཞུག །ཅེས་པ་ལྟར་སློབ་མས་དཀྱིལ་འཁོར་བསྐོར་བའི་མཐར་ཤར་སྒོ་ནས་ལུས་ས་ལ་ཕབ་བའི་ཕྱག་བྱས་ནས་མགོ་བོ་མ་བཏེག་པ་གང་ཞིག་དཀྱིལ་འཁོར་ལ་ཚིག་འདིས་དབུལ་བར་བྱ་སྟེ། རྒྱུད་རྣམས་འཛིན་པར་འགྱུར་བ་ཡིན། །སློབ་མ་འདི་ནི་ཕུལ་བ་ལགས། །ཞེས་སོ། །དེ་ནས་དབང་བཞི་ཀ་ཐུན་མོང་དུ་གྱུར་པའི་དམ་ཚིག་ནི་རྡོ་རྗེ་ཕུར་བུའི་རྒྱུད་ལས། བུམ་པའི་དམ་ཚིག་གང་ཡིན་པ། །བསྐྱེད་པའི་རིམ་པ་བརྟག་པ་དང་། །རྨོངས་པ་རྣམས་ལས་འདའ་བྱ་སྟེ། །སྣོད་ཀྱི་འཇིག་རྟེན་གཞལ་ཡས་ཁང་། །བཅུད་ཀྱི་སེམས་ཅན་ལྷ་ཡི་མཆོག །དེ་ནི་བུམ་པའི་
དམ་ཚིག་ཡིན། །གང་ཞིག་གསང་བ་སྟོན་པ་ལ། །གསང་བའི་དམ་ཚིག་འདི་ཡིན་ཏེ། །བུད་མེད་ཤེས་རབ་རང་བཞིན་པས། །ཙཎྜ་ལི་ལ་རྟག་ཏུ་བསྒོམ། །ཟས་ལྔ་རྟག་ཏུ་བཟའ་བར་བྱ། །སྤྱད་པར་བྱ་བའི་མཆོག་ཡིན་ནོ། །ཡེ་ཤེས་ཆེན་པོའི་དམ་ཚིག་ནི། །མོ་རྣམས་ཀུན་ལ་སྤྱད་པ་དང་། །དགའ་བ་རྟག་ཏུ་བསྟེན་པར་བྱ། །སེམས་ཉིད་དྷཱུ་ཏིར་རབ་ཏུ་བལྟ། །ཡེ་ཤེས་སྙིང་པོའི་དམ་ཚིག་གོ །དེ་ལྟ་བུ་དང་མི་ལྡན་པའི། །དབང་དང་དམ་ཚིག་ཀུན་ལས་འདས། །བསྒྲུབས་ཀྱང་འགྲུབ་པར་མི་འགྱུར་ཏེ། །སྔགས་པ་བྱ་བ་གང་ཡང་མེད། །སྔགས་པ་སྔགས་པ་ཞེས་བྱ་བ། །རྩ་བ་དང་ནི་ཡན་ལག་དང་། །ཁྱད་པར་དམ་ཚིག་གང་ཡིན་དང་། །ཤིན་ཏུ་དབང་གི་དམ་ཚིག་དང་། །རྩ་དང་རླུང་གི་དམ་ཚིག་དང་། །བྱང་ཆུབ་སེམས་ཀྱི་བཞག་ས་རྣམས། །གང་ཞིག་བཞག་པ་སྔགས་པ་ཡིན། །དེ་ལ་མཆོག་གི་དངོས་གྲུབ་འབབ། །ཅེས་སྔགས་སྡོམ་ཐོབ་པ་མི་ཉམས་པའི་ཕྱིར་དུ་བསྒྲག་པ་སྟེ། བསྙེན་པར་རྫོགས་པའི་དངོས་པོ་ཐོབ་ནས་བསླབ་པ་བསྒྲགས་པ་བཞིན་ནོ། །དེ་ལྟར་དབང་བཞི་མཐའ་རྟེན་དང་བཅས་པ་རྫོགས་པའི་དུས་ན་རིག་འཛིན་གྱི་སྡོམ་པའང་ཐོབ་པ་ཡིན་ཏེ། དེའང་སློབ་མའི་སྒོ་གསུམ་རྡོ་རྗེ་གསུམ་དུ་བྱིན་གྱིས་བརླབས་པའི་དུས་ནས་བརྩམས་ཏེ་རྒྱུད་སྡེ་འོག་མ་གསུམ་ལ་རང་ལུགས་ཀྱི་དངོས་གཞི་རྫོགས་ནས་སློབ་དཔོན་གྱི་དབང་བསྐུར་བའི་མཐའ་དང་། བླ་མེད་ལ་བུམ་དབང་གི་མཐར་བསྐྱེད་རིམ་གྱི་སྔགས་སྡོམ་དངོས་བསྟན་དང་། དབང་གོང་མ་གསུམ་ལ་དེའི་ལྡོག་ཆས་ཕྱེ་བའི་སོ་སོའི་དམ་ཚིག་གསར་ཐོབ་རེ་རེ་སྟེ། ངོ་བོ་གཅིག་པའི་ཆ་ནས་སྡོམ་པར་ཡང་བཞག་ཏུ་རུང་བ་རྣམས་ཐོབ་པའི་མཚམས་སྐབས་འདི་ཡིན་པས་ན་རང་རང་ལ་ལྟོས་པའི་ཡོན་ཏན་དང་། རྩ་ལྟུང་གཉིས་ཀ་བསྐྱེད་པའི་རྟེན་དུ་སོང་བ་ཡིན་ནོ། །དེ་ནས་སློབ་མས་སློབ་
དཔོན་ལ་ཕྱག་བྱས་ལ། གཙོ་བོས་ཇི་ལྟར་བཀའ་སྩལ་པ་སོགས་ལན་གསུམ་གྱིས་དམ་བཅས་ལ། མོས་གུས་ཆེན་པོའི་སེམས་ཀྱི་བདག་གི་ལུས་དང་། ལོངས་སྤྱོད། ས་གཞིས་ཡུལ་འཁོར། བུ་དང་། བུ་མོ། ཆུང་མ་ནས་ཇི་ལྟར་འབྱོར་པའི་ངང་དུ་དབུལ་བར་བྱ་སྟེ། མྱ་ངན་ལས་འདས་པའི་རྒྱུད་ལས། གསེར་ལ་སོགས་པའི་ཡོ་བྱད་དང་། །རང་གི་ལུས་དང་ནོར་གྱི་དབྱིག །མ་སྲིང་མོ་རྣམས་བརྒྱན་པ་དང་། །གྲོང་དང་གྲོང་ཁྱེར་བཅས་པ་རྣམས། །དམིགས་པ་མེད་པའི་སེམས་ཀྱིས་ནི། །དེ་དང་མཉམ་པ་ཁོ་ནར་འབུལ། །ཞེས་དང་། དཀྱིལ་འཁོར་སོ་སོའི་རིགས་ལ་དམིགས་པའི་ཡོན་ནི་གསང་བའི་དགོངས་རྒྱུད་ལས། བདག་ལུས་སྲོག་དང་ནོར་ལ་སོགས། །བུ་དང་ཆུང་མར་བཅས་པ་རྣམས། །ཞུམ་པ་མེད་པའི་སེམས་ཀྱིས་དབུལ། །རྡོ་རྗེ་རིགས་ཀྱི་ཡོན་ཡིན་ནོ། །བྲན་དང་བཅས་པའི་འདོད་ཡོན་ལྔ། །འཁོར་ལོ་ཅན་གྱི་ཡོན་ཡིན་ནོ། །རིན་ཆེན་སྣ་ལྔ་ལ་སོགས་དང་། །གླང་པོ་རྟ་དང་མ་ཧེར་བཅས། །རིན་ཆེན་རིགས་ཀྱི་ཡོན་ཡིན་ནོ། །མ་དང་སྲིང་མོ་ཆུང་མ་དང་། །རབ་ཏུ་བརྒྱན་པ་དགོད་པ་དང་། །རྒོད་མ་ལ་སོགས་མོ་ཆགས་རྣམས། །པདྨ་རིགས་ཀྱི་ཡོན་དུ་དབུལ། །རྟ་དང་གླང་ཆེན་མ་ཉེ་དང་། །རྫས་ཀྱི་རྣམ་པ་མང་བཀལ་བ། །ལས་ཀྱི་རིགས་ཀྱི་ཡོན་དུ་དབུལ། །ཞེས་སོ། །རྒྱུ་དེ་ལས་སངས་རྒྱས་ཐམས་ཅད་ཀྱི་ངོ་བོ་ཉིད་བླ་མ་མཉེས་པ་ལས་དངོས་གྲུབ་ཐོབ་པའི་ཚུལ་རྒྱུད་ལས། མཆོད་པ་ཐམས་ཅད་ཡོངས་སྤངས་ནས། །བླ་མ་མཆོད་པ་ཡང་དག་བརྩམས། །དེ་མཉེས་པས་ནི་ཀུན་མཁྱེན་པའི། །ཡེ་ཤེས་མཆོག་ནི་འཐོབ་པར་འགྱུར། །ཞེས་བཤད་དོ། །དབང་ཐོབ་པའི་ཕན་ཡོན་སྟོན་པའི་ཕྱིར། །དབང་ཐོབ་སྐྱེས་བུ་ཐ་བའི་སྐྱོན་སྦྱངས་པའི། །ཞིང་སར་ས་བོན་
བཞག་པ་ཇི་བཞིན་དུ། །སྒྲིབ་པ་གཉིས་དག་སྐུ་བཞི་མངོན་དུ་བྱེད། །འདི་ལྟར་རྡོ་རྗེ་སློབ་དཔོན་མཚན་ཉིད་དང་ལྡན་པ་ལ། ཐར་བ་དང་ཐམས་ཅད་མཁྱེན་པ་འདོད་པའི་བློ་ཅན་གྱི་སློབ་མས་དབང་བསྐུར་བ་རྫོགས་པར་ནོད་བའི་དེ་མ་ཐག་ཐར་པའི་ལམ་སྣ་ཟིན་ཅིང་རྒྱལ་བའི་སྲས་སུ་འགྱུར་བའང་སྒྱུ་འཕྲུལ་ལས། དུས་འདི་མན་ཆད་རྒྱལ་བའི་སྲས། །ཞེས་པའི་རིག་པ་འཛིན་པའི་མིང་ཡང་འཐོབ་ཅིང་། །བདེན་པ་མཐོང་ནས་དངོས་གཞི་འཐོབ་པ་ཡིན་ནོ། །དེའང་དངོས་གྲུབ་ཀྱི་རྩ་བ་རྡོ་རྗེའི་བླ་མ་མིག་བཞིན་དུ་བསྟེན་ནས་ཅི་གསུང་གི་བཀའ་ནོད་ཅིང་། བསྐྱེད་རྫོགས་ཀྱི་སྔོན་དུ་འགྲོ་བའི་བསག་སྦྱངས་ཀྱི་རིམ་པ་མཐའ་དག་པ་དང་འབྲེལ་བར་བསྐྱེད་རིམ་དང་རྫོགས་པའི་རིམ་པ་བསྒོམ་པ་ལ་ཞུགས་པ་ན་རྣམ་པར་སྨིན་པའི་ལུས་ལྷའི་རང་བཞིན་དུ་བལྟ་བ་ལ་སོགས་པའི་དབྱེ་བས་དྲན་པ་ཉེར་གཞག་བཞིའི་དོན་བསྒོམ་པ་ལ་སོགས་པ་ཚོགས་ལམ་དང་མཐུན་ནོ། །དེ་ནས་རིམ་གྱིས་བསྐྱེད་རྫོགས་སོ་སོའི་ཡོན་ཏན་སྟོབས་སུ་གྱུར་ནས་རྣམ་པར་མི་རྟོག་པའི་ཡེ་ཤེས་མཐོང་ལམ་ལ་སྦྱོར་བས་སྦྱོར་ལམ་དང་། རྒྱུ་དེ་ལས་བལྟ་བ་ཤིན་ཏུ་རྣམ་པར་དག་པའི་ཆོས་ཉིད་ཆོས་ཀྱི་མིག་རྡུལ་དང་བྲལ་བ་མཐོང་བས་མཐོང་ལམ། མཐོང་ཟིན་བསྒོམ་པར་བྱེད་པས་བསྒོམ་ལམ་བསླབ་བྱ་མཐའ་དག་པ་ཡོངས་སུ་རྫོགས་ནས་སློབ་ཏུ་མེད་པ་མི་སློབ་པའི་ལམ་སྟེ་ཕ་རོལ་ཏུ་ཕྱིན་པ་ལས་གསུངས་པའི་བསྐལ་པ་གྲངས་མེད་གསུམ་གྱིས་ཐོབ་བྱ་ཐེག་བསྡུས་ལས། བཟང་དང་སྨོན་པའི་སྟོབས་ཆེན་གྱིས། །བྱང་ཆུབ་སེམས་དཔའ་གྲངས་མེད་གསུམ། །ཀུན་ཏུ་བརྩམས་པར་མཛད་ཅེས་བརྗོད། །ཅེས་པའི་ཚད་གཟུང་ཅན་འདིར་གསང་སྔགས་ཕྱི་བའི་ཚུལ་ལས་ཀྱང་། སྐལ་པ་བར་མ་དང་། མོས་པ་རབ་དང་། མཉམ་པར་གཞག་པ། མཆོག་ཏུ་གྱུར་
པས་བསྙེན་པ་དང་མཚན་མ་བསྙེན་པར་གྱུར་པ་ལས་མཐོང་བའི་ཆོས་ལ་དངོས་གྲུབ་ཆེན་པོ་འཐོབ་པར་འགྱུར་ལ། དེ་ལྟར་འཐོབ་པས་སངས་རྒྱས་ཀྱི་ཞལ་མཐོང་བར་ནུས་ནས། དེ་ནས་སྐྱེ་བ་གཅིག་གམ། གཉིས་སམ། གསུམ་ལ་སོགས་པའི་རིམ་གྱིས་བླ་ན་མེད་པའི་བྱང་ཆུབ་འཐོབ་ལ། རྣལ་འབྱོར་བླ་ན་མེད་པ་ལས་ནི། སྐལ་བ་ཆུང་བར་གྱུར་ཀྱང་མོས་པ་དང་། བརྩོན་འགྲུས་དང་། དགེ་བའི་བཤེས་གཉེན་གྱི་སྟོབས་གསུམ་ཚོགས་ནས་མཐོང་བའི་ཆོས་ལ་རྣམ་པར་སྨིན་པ་དང་ཚེ་ལ་དབང་བའི་རིག་འཛིན་འཐོབ་པར་འགྱུར་ལ། ཚེ་དེས་ཀྱང་མྱུར་དུ་སངས་རྒྱས་ཀྱི་ས་འཐོབ་པའི་ཚུལ་ཡང་འདུས་པ་ལས། འདི་ཡིས་བཅོམ་ལྡན་བདག་ཉིད་ཆེ། །སྐུ་གསུམ་མི་ཕྱེད་ལས་བྱུང་བ། །ཡེ་ཤེས་རྒྱ་མཚོ་རྣམ་པར་བརྒྱན། །ཚེ་འདི་ཉིད་ལ་ཐོབ་པར་འགྱུར། །ཞེས་དང་། དུས་ཉེ་བ་ནི་གསང་མཛོད་ལས། དབང་བསྐུར་ཡང་དག་སྦྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ཡིས་སྐྱེ་བ་བདུན་ནི། །མ་བསྒོམས་པར་ཡང་དངོས་གྲུབ་འཐོབ། །ཅེས་སོ། །དེའང་ངེས་པའི་དོན་དུ་ནི་དུས་ཀྱི་ཚད་གཟུང་བར་མི་རུང་སྟེ། འདི་ལྟར་དུས་ནི་རྟོག་པས་བཏགས་པའི་སྣང་བ་སྟེ། དེ་བས་ན་གང་དུ་སེམས་ལ་རང་དབང་མ་ཐོབ་ཀྱི་བར་དུ་ནི་ཡུལ་དང་དུས་ལ་སོགས་པའང་སོ་སོའི་རང་མཚན་འཛིན་པ་ལྟར་སྣང་ལ། སེམས་ལ་དབང་ཐོབ་ཕན་ཆད་ནི་ཡུལ་དུས་དེ་དག་ཀུན་རྫོབ་པ་ཡིན་ཏེ། འཕགས་པ་དྲི་མ་མེད་པས་བསྟན་པ་ལས། དུས་ཐུང་བར་འདོད་པ་རྣམས་ལ་བསྐལ་པ་མང་པོ་ཞག་བདུན་གྱིས་འདའ་བར་བྱིན་གྱིས་བརླབ་པོ། །ཞེས་གསུངས་པའི་ཕྱིར་རོ། །དེ་བཞིན་དུ་ས་ཐོབ་པའི་ཡོན་ཏན་དང་དབང་ཐོབ་པའི་ཡོན་ཏན་གཉིས་མཐོང་ཆོས་སུ་རྫུ་འཕྲུལ་ལ་སོགས་པ་མི་འདྲ་ཡང་། སངས་རྒྱས་ཐོབ་པ་ལ་འབྲས་བུ་ལམ་དུ་བྱེད་པའི་ཆ་ནས་འདི་ཉིད་ཉེ་
བས་ལམ་ཤིན་ཏུ་ཟབ་པ་ཡིན་ཏེ། འདི་ལྟར་སྔགས་ཀྱི་དབང་ཐོབ་པའི་སྐྱེས་བུ་ནི་ཐབ་ལེགས་པར་སྦྱངས་པའི་ཞིང་ས་ལ་ས་བོན་སྐྱོན་མེད་བཞག་པ་བཞིན་དུ། གཞི་དང་པོའི་གནས་ལུགས་ལ་གློ་བུར་བའི་དྲི་མ་གཉིས་ཀྱིས་བསླད་པའི་སྦྱང་གཞི། རྟེན་ཅིང་འབྲེལ་བར་འབྱུང་བའི་དབང་གིས་སྦྱངས་པས། ཟག་པ་དང་བྲལ་བའི་སྐྱེ་མེད་ཀྱི་ཡེ་ཤེས་མཐོང་བའི་འབྲས་བུ་ལ་སྤྱོད་པས་ན་ལམ་ཡང་འབྲས་བུ་དང་མཐུན་པས། འབྲས་བུ་ལམ་དུ་བྱེད་པ་ཞེས་བྱ་སྟེ། དངོས་པོའི་གནས་ལུགས་དང་མཐུན་པར་སྦྱོང་བ་ཡིན་པས། རྒྱུ་ལ་འབྲས་བུས་རྒྱས་གདབ་པའམ། འབྲས་བུ་ལ་རྒྱུས་རྒྱས་གདབ་པའི་ཕྱིར་དབང་བསྐུར་ཁོ་ནས་སྨིན་པ་ཞིག་དགོས་ཀྱིས། དེ་ལྟར་སྨིན་པ་ལ་དབང་གི་དེ་ཁོ་ན་ཉིད་ལེགས་པར་ཤེས་དགོས་པའི་ཚུལ་མཉམ་སྦྱོར་ལས། དཀྱིལ་འཁོར་དུ་ནི་མ་ཞུགས་དང་། །དམ་ཚིག་རྣམས་ནི་སྤངས་པ་དང་། །གསང་བའི་དེ་ཉིད་མི་ཤེས་པས། །བསྒྲུབ་ཀྱང་ཅི་ཡང་མི་འགྲུབ་བོ། །ཅེས་དང་། སངས་རྒྱས་ཐོད་པ་ལས། དཔེར་ན་བུ་ཚ་མེད་པའི་ཁྱིམ། །ཤི་བ་ཙམ་གྱིས་སྟོངས་པ་ཉིད། །དེ་བཞིན་དབང་དང་བྲལ་བའི་ལུས། །ཡེ་ཤེས་ཀུན་གྱིས་སྟོང་པ་ཡིན། །དཔེར་ན་པི་ཝང་སྦྱོར་སོགས་ཀུན། །རྒྱུད་དང་བྲལ་ན་བརྡུང་མི་ནུས། །དེ་བཞིན་དབང་དང་བྲལ་ན་ནི། །སྔགས་དང་བསམ་གཏན་འགྲུབ་མི་འགྱུར། །ཞེས་པས་དབང་ནི་ལམ་གྱི་འཇུག་སྒོ་ཙམ་དུ་བལྟ་བ་མ་ཡིན་པར། དཔེར་ན་གསེར་ལ་བསྲེགས་བཅད་བརྡར་བཞེས་བསྲེགས་པས་གསེར་ཡིན་མིན་གྱི་མཚང་བརྟོལ་བ་དང་། །བཅད་པས་གསེར་གྱི་སྲོག་ཤེས་པར་བྱ་བ་དང་། བདར་བས་བསླད་པ་ངན་པ་དང་། རང་བཞིན་ངན་པའི་བྱེ་བྲག་ཤེས་པར་བྱ་བ་བཞིན་དུ། ཕྱིན་ཅི་མ་ལོག་པའི་རྒྱུད་དང་། ངེས་པའི་ཁུང་དང་། དངོས་གྲུབ་ཐོབ་ཅིང་མཁས་པར་གྱུར་པའི་བླ་མ་དག་གི་མན་ངག་དང་། དེ་གཉིས་དང་། མཐུན་པར་
ཞུགས་པའི་སོ་སོར་རྟོག་པའི་ཤེས་རབ་ཀྱིས་མངོན་སུམ་རྟོགས་པར་མ་བྱས་ན་སྔགས་ཀྱི་དོན་ནི་ཟབ་ཅིང་བརླིང་ལ། དཀྱིལ་ཆེ་བས་རྗེས་སུ་དཔགས་པ་ཙམ་གྱིས་དངོས་གྲུབ་ཐོབ་པ་མ་ཡིན་ནོ། །ཅིའི་ཕྱིར་ན་རྡོ་རྗེ་ཐེག་པའི་གཞི་ལམ་འབྲས་བུའི་ཆོས་སྒོ་མཐའ་དག་པ་ནི། དབང་གི་རང་བཞིན་ལ་ལེགས་པར་རྫོགས་ཤིང་རིམ་པ་གཉིས་ཀྱི་ལམ་ཡང་དེར་འདུ་བ་ཡིན་པས། རྒྱུད་སྡེ་རྣམས་ནས་དབང་བསྐུར་ཁོ་ནའི་བསྔགས་པ་གསུངས་ལ། དེའང་ཐོག་མར་སྟ་གོན་དང་དཀྱིལ་འཁོར་དུ་གཞུག་པའི་སྐབས་སུ་སྐྱབས་སུ་འགྲོ་བ་དང་། སེམས་བསྐྱེད་པ་དང་། ཐེག་ཆེན་ཐུན་མོང་བ་དང་། བྱེ་བྲག་པའི་སྡོམ་བཟུང་བསླབ་བྱ་དང་བཅས་པ་ལ་ལེགས་པར་དཔྱོད་ཤེས་ན་བྱང་ཆུབ་སེམས་དཔའི་སྡེ་སྣོད་ལ་ལོགས་སུ་བསླབ་མི་དགོས་པའི་ཤུགས་བསྟན་གྱིས་ཉན་ཐོས་ཀྱི་སྡེ་སྣོད་ཀྱང་ཞར་ལ་ཁོང་དུ་ཆུད་ནས་མདོ་སྔགས་རྫས་འགལ་བའི་ལོག་རྟོག་ཀྱང་ལྡོག་པར་འགྱུར་ལ། དངོས་གཞི་དབང་གི་ངོ་བོ་དང་། དེ་ཐོབ་པས་རྒྱུད་ལ་ནུས་པ་ཇི་ལྟར་འཇོག་དང་། ལམ་གང་བསྒོམ་པ་ལ་དབང་དང་། འབྲས་བུ་ཇི་ལྟ་བུ་ཐོབ་པའི་ཚུལ་ཡང་ལེགས་པར་ཤེས་པ་ཡིན་ལ་དེའི་བདག་པོའི་རྐྱེན་དུ་གྱུར་པ་ནི་ཐོག་མར་བླ་མ་ཁོ་ན་ལ་རག་ལུས་པ་ཡིན་པས་དེའི་མཚན་ཉིད་སྔར་ལེགས་པར་བཤད་པ་ལྟར་གྱི་སྟེང་། དབང་དོན་མི་ཤེས་ན་སྨོས་ཅི་དགོས་ཏེ་ཤེས་ཀྱང་རྩ་ལྟུང་དག་པར་མ་བྱས་པ་དང་། ཆོ་ག་ལ་ནོར་འཁྲུལ་དང་གཟུ་ལུམ་སླ་ཆོས་འཚལ་བདག་གིས་ནི་སློབ་མའི་རྒྱུད་ལ་རིག་འཛིན་གྱི་སྡོམ་པ་གཞག་པར་མི་ནུས་ཏེ། སོ་ཐར་གྱི་ལས་ཆོག་ལ་ནོར་འཁྲུལ་བྱུང་ན་སོ་ཐར་གྱི་སྡོམ་པ་མི་སྐྱེ་བ་བཞིན་ན། །དེའང་ལས་ཆོག་ལ་ནོར་འཁྲུལ་བྱུང་ན་དགྲ་བཅོམ་པའི་གོ་འཕང་ལ་བསྒྲིབ་པ་ཙམ་ཡིན་མོད་དབང་
ལ་ནོར་འཁྲུལ་བྱུང་ན་རྣམ་པ་ཐམས་ཅད་མཁྱེན་པའི་གོ་འཕང་ལ་བསྒྲིབ་པས་དེ་གཉིས་ཀྱི་འབྲས་བུ་ལ་རྒྱ་མཚོ་དང་བ་གླང་གི་རྨིག་རྗེས་ཀྱི་ཆུ་ཙམ་མོ། །དེ་བས་ན་བུམ་དབང་གི་ལམ་བསྐྱེད་རིམ་གྱི་སྦྱང་གཞི་སྦྱོང་བྱེད་དང་། གསང་དབང་གི་ལམ་གཏུམ་མོའི་དྲོད་ཙམ་ལ་དམིགས་པ་མུ་སྟེགས་བྱེད་ལའང་ཡོད་མོད་ཀྱི་ནང་དུ་ཡེ་ཤེས་སྐྱེ་བའི་རྟེན་ཅིང་འབྲེལ་འབྱུང་ཤེས་པ་དང་། དབང་གོང་མ་གཉིས་ཀྱི་ཡེ་ཤེས་དམིགས་གཏད་ཅན་ཙམ་སྐྱེས་ནའང་། ཉོན་མོངས་པ་དང་རྣམ་རྟོག་འབྱེད་པའི་ཐབས་ལ་མི་མཁས་པའི་བླ་མས་ནི་དབང་དོན་ཤེས་པ་མ་ཡིན་པས་དེ་ལྟ་བུ་ལ་སློབ་མས་མོས་པ་བྱས་ཀྱང་གནས་སྐབས་ཀྱི་བདེ་སྐྱིད་ཙམ་དང་། རིམ་གྱིས་འགྲུབ་པའི་རྒྱུ་ཙམ་དུ་སྲེད་ཀྱིས། གསང་སྔགས་ནས་བླ་མ་སངས་རྒྱས་དངོས་སུ་གསུངས་པའི་བྱིན་རླབས་འབྱུང་བ་མ་ཡིན་པས་ཆེ་འདིའམ་བར་དོར་སངས་རྒྱས་ཀྱི་འབྲས་བུ་སྦྱིན་མི་ནུས་སོ། །ཅིའི་ཕྱིར་ན་ཕ་རོལ་ཏུ་ཕྱིན་པ་མན་ཆད་དུ་བླ་མ་སངས་རྒྱས་སུ་བལྟ་བར་བྱ་ཞེས་གསུངས་ལ། སྔགས་སུ་བླ་མ་སངས་རྒྱས་དངོས་ཡིན་པ་ནི་དབང་བསྐུར་བ་ཚུལ་བཞིན་ཐོབ་པའི་སློབ་དཔོན་ཀྱི་ངོ་ཁལ་ཡིན་ཏེ། དེ་སྐད་དུ་ཞང་ཞུང་པཎྜི་ཏས། སྐྱོན་ཅན་སྤང་བྱའི་སློབ་དཔོན་གྱིས། །དབང་གི་ཆོ་ག་བྱས་ཀྱང་ནི། །སངས་རྒྱས་ས་བོན་ཚུལ་བཞིན་དུ། །ཐེབས་པར་འགྱུར་བ་མ་ཡིན་ཏེ། །དེ་བརྟེན་གཉིས་ཀ་དམྱལ་བ་རུ། །འདྲེན་པར་བྱེད་པ་གསུངས་པ་ཡིན། །ཞེས་སོ། །དེ་བས་ན་སྒྲིབ་པ་བཞི་དག་ཅིང་འབྲས་བུ་བཞི་མངོན་དུ་བྱེད་པ་དབང་ལ་རག་ལས་པ་ཡིན་པས། དེའང་རྒྱུ་ལ་གནས་ཚུལ་ཤས་ནས་རྐྱེན་བླ་མ་དང་དཀྱིལ་འཁོར་ལས་ཐོབ་པའི་གནད་འཁྲུལ་པ་མེད་པ་ཤེས་པར་བྱས་ནས་འབྲས་བུ་བསྒྲུབ་པའི་ཐབས་ལ་མཁས་པས་ནན་ཏན་དུ་འབད་པར་བྱའོ། །དབང་གི་ཆོ་གའི་རྗེས་ཀྱི་བྱ་བ་རྣམས་ནི་དཀྱིལ་ཆོག་རྣམས་
ཀྱིས་ཤེས་པར་སླ་བས་འདིར་མ་བྲིས་སོ། །གཉིས་པ་ལམ་ལ་བསྐྱེད་རྫོགས་རྣམ་གཉིས་ལས། དང་པོ་བསྐྱེད་རིམ་སྐྱེ་གནས་རྣམ་པ་བཞིའི། །བག་ཆགས་སྦྱང་ཕྱིར་དེ་དང་མཐུན་པར་སྟོན། །བསྐྱེད་ཚུལ་འཁོར་བའི་རྣམ་པ་དང་མཐུན་པས། །སྲིད་པ་གསུམ་པོ་མ་ལུས་སྦྱང་ཞིང་དག །མྱ་ངན་འདས་དང་བཞུགས་ཚུལ་མཐུན་པ་ཡི། །ལྷ་ཡི་རྣམ་པས་འབྲས་བུ་གཞི་ལ་རྫོགས། །གཉིས་ཀའང་རྫོགས་པའི་རིམ་པའི་སྨིན་བྱེད་དུ། །འགྲོ་བའི་དག་རྫོགས་སྨིན་གསུམ་སྤྱི་ལ་གཅེས། །དེ་ལ་ཐེག་པ་ཆེན་པོའི་སྒོར་ཐབས་ཀྱི་སྤྱད་པ་སྤྱོད་པའི་སྐྱེས་བུ་ཆེན་པོ་གཉིས་ཀྱི་དོན་དུ་གཉེར་བྱ་ནི་སེམས་ཅན་གྱི་དོན་དུ་གཟུགས་ཀྱི་སྐུ་བསྒྲུབ་པ་ཁོ་ན་ཡིན་ལ། དེ་འཐོབ་པའི་ཐབས་ནི་སྔགས་ཀྱི་ལམ་དུ་དམ་ཚིག་དང་སྡོམ་པ་རྣམ་པར་དག་པར་བྱས་ནས་འཁོར་བའི་རྣམ་པ་དང་མཐུན་པའི་ལྷའི་རྣལ་འབྱོར་ལམ་དུ་བྱེད་པས་སྲིད་པ་གསུམ་དུ་གོལ་བའི་ཐ་མལ་གྱི་སྣང་ཞེན་མ་ལུས་པ་སྤྱོད་ཞིང་དག་པར་བྱེད་ལ། དེ་ལྟར་དག་པས་མྱང་འདས་དང་བཞུགས་ཚུལ་མཐུན་པའི་ལྷའི་རྣམ་པ་ལམ་བྱེད་ཀྱིས་མཚན་དཔེའི་སྐུ་འགྲུབ་པའི་རྒྱུ་བྱས་ཏེ་དོན་གཉིས་ལྷུན་གྲུབ་ཀྱི་ས་ལ་ཕྱིན་པ་ནི་ཐོབ་བྱ་འབྲས་བུའི་རྒྱུད་གཞི་རྫོགས་ཆེན་པོའང་ཡིན་ལ། དེ་གཉིས་རྫོགས་རིམ་གྱི་སྨིན་བྱེད་དུ་འགྲོ་ཚུལ་དང་། དག་རྫོགས་སྨིན་གསུམ་གྱི་མཚན་ཉིད་འོག་ཏུ་བཤད་པར་བྱའོ། །དེ་ལྟར་འབྲས་བུའི་རྒྱུད་དེ་མངོན་དུ་བྱེད་པ་ལ་ཉེ་བར་ལེན་པའི་རྒྱུ་དང་། ལྷན་ཅིག་བྱེད་པའི་རྐྱེན་གཉིས་ཐབས་ཤེས་ལྟ་བུར་ཚོགས་དགོས་པས་ཉེར་ལེན་ནི་གཞིའམ་རྒྱུའི་རྒྱུད་དང་། བྱེད་ཅན་ནི་ཐབས་སམ་ལམ་གྱི་རྒྱུད་ཡིན་པས་འཁོར་འདས་ལམ་གསུམ་གཞི་ལམ་འབྲས་བུའི་རྒྱུད་དུ་འདུས་པའི་ཚུལ་ཧེ་བཛྲ་ལས། འདི་ཉིད་འཁོར་བ་ཞེས་བྱ་སྟེ། །འདི་ཉིད་མྱ་
ངན་འདས་པ་ཉིད། །འཁོར་བ་སྤངས་ནས་གཞན་དུ་ནི། །མྱ་ངན་འདས་པ་རྟོགས་མི་འགྱུར། །ཞེས་པས་རང་བཞིན་ལྷན་ཅིག་སྐྱེས་པའི་དུས་ན། གསལ་བ་ནི་འཁོར་བ། སྟོང་པ་ནི་མྱང་འདས། ཉམས་ལེན་གྱི་སྐབས་སུ། །སེམས་ནི་འཁོར་བ། རང་བཞིན་མེད་པ་ནི་མྱང་འདས་འབྲས་རྒྱུད་ཀྱི་སྐབས་སུ་ལྷུན་གྲུབ་འཁོར་བ། གནས་འགྱུར་མྱང་འདས་ཏེ། དེ་ཀུན་ལ་ལམ་གྱི་མན་ངག་ཐབས་རྒྱུད་སྦྱར་བས་ཐབས་དང་། རྒྱུ་དང་འབྲས་བུའི་རྒྱུད་གསུམ་དུ་གནས་པ་ཡིན་ནོ། །དེ་ལ་སེམས་ཅན་ཐམས་ཅད་ལ་རང་ཆས་སུ་ལྡན་པའི་སེམས་ཀྱི་རང་བཞིན་བདེ་བར་གཤེགས་པའི་སྙིང་པོ་མི་ཤིགས་པ་ཁྱད་པར་གསུམ་ལྡན་རྟོགས་ན་མྱང་འདས་དང་། མ་རྟོགས་ན་འཁོར་བའི་རྒྱུ་བྱེད་པ་གང་ཞིག་འཁོར་འདས་ཐམས་ཅད་དུ་འགྱུར་བ་མེད་པར་རྒྱུན་ཆགས་པས་ན་གཞིའམ་རྒྱུའི་རྒྱུད་ཅེས་བྱ་སྟེ། ངོ་བོ་ཉིད་དང་འཆིང་གྲོལ་མེད་པའི་ཆ་ནས་དོན་གྱི་གནས་ལུགས། རྣམ་པ་དྲི་མ་དང་བཅས་ཀྱང་རང་ངོ་ལ་གོས་མ་མྱོང་བས་བདེ་གཤེགས་སྙིང་པོ། མཚན་ཉིད་མེད་པའི་ཆ་ནས་ཆོས་སྐུ་དང་། རང་བཞིན་གྱི་གདངས་མ་འགགས་པའི་ཆ་ནས་གཟུགས་སྐུའི་ཡོན་ཏན་གྱི་རྟེན་དུ་གནས་པ་གང་ཞིག་ལམ་དུས་སུ་བྱང་ཆུབ་ཀྱི་སེམས་དང་། བདེན་པ་དབྱེར་མེད་དང་། རང་བྱུང་གི་ཡེ་ཤེས་ལ་སོགས་པའི་ཐ་སྙད་སྣ་ཚོགས་སུ་ཆགས་པ་སྟེ། རྟེན་མེད་ཅིང་བདག་ཉིད་ཐོབ་པ་མེད་བཞིན་དུ། རྒྱུད་ལས། རང་བྱུང་ཡེ་ཤེས་གནས་མེད་སྣང་། ཞེས་པ་ལྟར་ལྷན་ཅིག་བྱེད་པའི་རྐྱེན་གདམས་ངག་བར་མ་ཆད་པའི་ཐབས་ཀྱི་རྒྱུད་ལ་བརྟེན་ནས་གློ་བུར་གྱི་དྲི་མ་སྦྱངས་པས། ཡོངས་སུ་དག་པའི་ཞིང་ཁམས་ན་སྐུ་དང་ཡེ་ཤེས་ཀྱི་བཀོད་པ་སྣ་ཚོགས་སུ་སྣང་བ་ནི་གཞན་གྱིས་མི་འཕྲོགས་པ་འབྲས་བུའི་རྒྱུད་ཅེས་བྱའོ། །དེ་ལྟ་བུའི་གཞི་ལམ་འབྲས་བུའི་རྒྱུད་ནི་ཀུན་ཁྱབ་གྱི་ཚད་མ་
གསུམ་ལ་བརྟེན་ནས་གཏན་ལ་དབབ་དགོས་ཏེ། རྒྱལ་བའི་བཀའ་དྲི་མ་མེད་པའི་ལུང་ཚད་མ་དང་། མཁས་པས་ཉམས་སུ་བླངས་ཤིང་གྲོལ་བའི་དབང་པོ་ཡོད་པའི་མན་ངག་ཚད་མ་དང་། གཉིས་ཀ་དང་རྗེས་སུ་མཐུན་པའི་རིགས་པ་ཚད་མ་སྟེ་རྡོ་རྗེ་མེ་ལོང་ལས། ལུང་དང་རིགས་པ་མན་ངག་གིས། །ཚད་མ་དག་གིས་གང་གཞལ་བས། །ཤེས་བྱ་ཁོང་དུ་ཆུད་པར་འགྱུར། །ཞེས་སོ། །དེ་ལྟར་ཚད་མ་གསུམ་གྱིས་གཏན་ལ་ཕབ་པའི་ཡིད་ཆེས་རྣམ་པ་གསུམ་ལ་བརྟེན་ནས་རྒྱུད་ཀྱི་དོན་ཁོང་དུ་ཆུད་པར་བྱ་བའང་དུས་ཀྱི་འཁོར་ལོ་ལས། དང་པོར་བླ་མ་ལ་ཡིད་ཆེས་པར་བྱའོ། །དེའི་རྗེས་སུ་རང་ཉིད་ལ་ཡིད་ཆེས་པར་བྱའོ། །དེའི་རྗེས་སུ་རྒྱུད་ཀྱི་རྒྱལ་པོ་ལ་ཡིད་ཆེས་པར་བྱའོ། །དེ་ལྟར་ཡིད་ཆེས་རྣམ་པ་གསུམ་གྱིས་རྒྱུད་དོན་མ་ལུས་པ་རྟོགས་པར་འགྱུར་རོ། །ཞེས་སོ། །དེ་ཡང་སྔགས་རང་གཞུང་གི་གྲུབ་པའི་མཐའ་ལ། ཐོག་མར་རྟོགས་པའི་ལྟ་བ་རྒྱུ་རྒྱུད་གནས་ལུགས་ཀྱི་དེ་ཁོ་ན་ཉིད་ཕྱིན་ཅི་མ་ལོག་པར་ཤེས་དགོས་ཏེ་རྒྱལ་བའི་ཞབས་ཀྱིས། དེ་ལ་དང་པོར་གནས་ལུགས་ཤེས་པ་གཅེས། །ཐེག་པའི་དབང་གིས་རྣམ་པ་མང་ན་ཡང་། །ངེས་པའི་སྙིང་པོ་བདེན་པ་དབྱེར་མེད་དེ། །སངས་རྒྱས་རྣམས་ཀྱི་གསར་བའི་མཛོད་ཁང་ཡིན། །ཞེས་གསུངས་ལ། དེ་ཤེས་པ་ནི་རྟོག་གེ་རྣམ་པར་འཁྱམས་པའི་ལུང་རིགས་ལྟར་སྣང་བ་ཙམ་གྱིས་གཏན་ལ་མི་ཕེབས་པས་བླ་མ་མཚན་ཉིད་དང་ལྡན་པ་བཙལ་ཏེ་དེ་ལ་སྙིང་ཐག་པ་ནས་ཡིད་ཆེས་པས་སངས་རྒྱས་ཀྱི་འདུ་ཤེས་བཞག །མོས་གུས་ཀྱི་ལྕགས་ཀྱུས་བླ་མའི་ཐུགས་ཤིན་ཏུ་རྣམ་པར་མི་རྟོག་པའི་ཡེ་ཤེས་དབང་དུ་བསྡུས་ནས་རང་གིས་མངོན་སུམ་དུ་མཐོང་བའི་ཆོས་ཉིད་ལ་ཐེ་ཚོམ་མི་སྐྱེ་བ་ནི་རང་ལ་ཡིད་ཆེས་པ་ཞེས་བྱའོ། །དེ་སྐད་དུ་བརྟག་གཉིས་ལས། གཞན་གྱིས་བརྗོད་མིན་ལྷན་ཅིག་སྐྱེས། །
གང་དུ་ཡང་ནི་མི་རྙེད་དེ། །བླ་མའི་དུས་ཐབས་བསྟན་པ་དང་། །རང་གི་སེམས་ཉིད་ལས་ཤེས་བྱ། །ཞེས་སོ། །དེའི་ཚེ་ཐ་སྙད་ཀྱི་ཤེས་ངོ་ཙམ་མ་ཡིན་པའི་གཤིས་ཀྱི་བཞུགས་ཚུལ་ཇི་ལྟ་བར་རྟོགས་པས་ཆོས་ཐམས་ཅད་དོན་དམ་པར་སྐྱེ་འགག་མེད་པ་དང་། ཀུན་རྫོབ་ཏུ་སྒྱུ་མ་ཙམ་དུ་མི་འགག་པས་ཕ་རོལ་ཏུ་ཕྱིན་པ་དང་ཐ་སྙད་ཙམ་དུ་མཐུན་པས་ཚིག་གི་ལམ་དུ་མདོ་སྔགས་ཀྱི་ལྟ་བ་ལ་ཁས་ལེན་གཉིས་པ་མ་མཆིས་ཀྱང་། སྔགས་ལམ་དུ་ཀུན་རྫོབ་པའི་ཆ་ཐམས་ཅད་ཡོངས་སུ་དག་པའི་ལྷའི་རྣམ་རོལ་དུ་རང་ཤར་ཞིང་། བདེན་པ་གཉིས་ཀྱང་དུས་མཉམ་དུ་རང་བཞིན་ཡོངས་གྲུབ་ཆེན་པོར་ཟུང་དུ་འཇུག་པའི་ཐ་དང་རིས་མེད་ཆེན་པོ་ལ་དུས་སྔ་ཕྱི་མེད་པས་རིམ་གཉིས་ཕྱོགས་རེ་བ་དང་ཕྱོགས་རེ་བ་མ་ཡིན་པ་ཉིད་དུ་རྣམ་པའི་བློས་བརྟགས་ཤིང་དཔྱད་པའི་བློ་རྫས་སོ་སོ་བ་སླར་ཟུང་དུ་འཇུག་ཏུ་མེད་པའི་ཁྱད་པར་ཤེས་ན་ལྟ་བའི་གནས་ལུགས་ཕྱག་རྒྱ་ཆེན་པོའང་མན་ངག་ལྟར་བཤད་པའི་རྒྱུད་ཀྱི་དོན་དུ་གནས་པ་མཐོང་ནས་ཡིད་ཆེས་ཁྱད་པར་ཅན་སྐྱེ་བར་འགྱུར་ཏེ། ས་ར་ཧས། སྲིད་དང་ཞི་བ་མཉམ་པ་ཉིད་ལགས་ཕྱག་རྒྱ་ཆེ། །ཞེས་བཤད་དོ། །དེའང་གཞིའི་ཆས་གནས་སྐབས་སུ་བདག་གིར་བྱས་པའི་དྲི་མ་དེ་ཐབས་སམ། ལམ་གྱི་རྒྱུད་སྨིན་གྲེལ་གཉིས་ཀྱིས་སྦྱོང་བ་ལས་དང་པོ་ནི་སྔར་བཤད་ཟིན་ལ། གཉིས་པའི་དོན་ནི་སྦྱང་བྱ་འཁྲུལ་པའི་རང་བཞིན་གློ་བུར་བ་ཀུན་བརྟགས་དང་། དེའི་ས་བོན་གྱི་ཆ་གཉིས་ལ་ལྟོས་ནས་སྦྱོང་བྱེད་བསྐྱེད་རྫོགས་གཉིས་སུ་གསུངས་ཏེ། སྙིང་པོའི་རྒྱུད་ཕྱི་མ་ལས། ལྷ་ཡི་རྣམ་པའི་སྦྱོར་བ་ཡི། །ཟླ་བ་རྡོ་རྗེ་ལ་སོགས་རིམ། །བསྐྱེད་པའི་རིམ་པ་ཞེས་སུ་བཤད། །རང་བཞིན་གྲུབ་པའི་རྣལ་འབྱོར་ནི། །རྫོགས་པའི་རིམ་པ་ཞེས་བྱར་བརྗོད། །ཅེས་པ་དང་མཐུན་པར་སློབ་དཔོན་འཕགས་པས་ཀྱང་། བསྐྱེད་པའི་རིམ་པར་ལགས་གནས་ཏེ། །རྫོགས་པའི་རིམ་པ་འདོད་རྣམས་ལ། །ཐབས་
འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་གསུངས། །ཞེས་སྦྱང་གཞི་ལ་ལྟོས་ནས་བསྐྱེད་རྫོགས་སོ་སོ་བར་བཤད་པའི་དབང་དུ་བྱས་ན་དང་པོ་བསྐྱེད་རིམ་གྱི་དགོས་པ་ནི་སོ་སྐྱེའི་དུས་ན་དྲི་བཅས་དེ་བཞིན་ཉིད་ཀྱི་སྣང་བ་ཀུན་བརྟོགས་པས་གློ་བུར་དུ་བཟོས་པའི་སྣོད་དང་བཅུད་ལ་ཐ་མལ་དུ་འཛིན་པ་བཅོས་མ་བསྐྱེད་པའི་རིམ་པས་སྦྱོང་ཞིང་། ཞར་ལ་ཐལ་བྱུང་གི་སྟོང་རྐྱང་དུ་བལྟ་བའང་ལྡོག་པར་འགྱུར་ལ། ལམ་གྱི་ཆ་ནས་མ་དག་པའི་ས་བདུན་བགྲོད་པ་དང་། འབྲས་བུ་གཟུགས་སྐུའི་རྟེན་འབྲེལ་སྒྲིག་པ་སྟེ་རྡོ་རྗེ་མཁའ་འགྲོ་ལས། དཀྱིལ་འཁོར་ལ་སོགས་ལས་གང་ནི། །བཅོས་མའི་སེམས་ཀྱིས་གང་བྱེད་པ། །ཕྱི་རོལ་ལས་རྣམས་གསལ་བྱེད་པས། །དང་པོའི་ལས་ཅན་རྣམས་ལ་བསྔགས། །ཞེས་རྫོགས་རིམ་བསྐྱེད་པའི་རྟེན་ལྟ་བུར་ཡང་གསུངས་སོ། །གཉིས་པ་རྫོགས་རིམ་ཀྱི་དགོས་པ་ནི། འཕགས་པའི་ལམ་དུ་བཅོས་མ་དང་བྲལ་བ་མངོན་སུམ་པའི་ལྷའི་རྣལ་འབྱོར་ཞེས་བྱ་སྟེ་བཞིན་ལག་གི་རྣམ་པ་ཅན་དུ་མི་གནས་པའི་ཞུ་བདེ་མཚུངས་ལྡན་གྱི་ལྷ་སྐུ་ཁ་སྦྱོར་ཞེས་པ་གོང་བུའི་བདག་ཉིད་ཅན་ལ་བརྟེན་པ་སྟེ། སྡོམ་འབྱུང་ལས། རྩ་རྣམས་དེ་དག་ཐམས་ཅད་ནི། །ལུས་ནི་དགེ་བར་བྱེད་པ་སྟེ། །དེ་ཡི་ཚོགས་ལས་ཡང་དག་བྱུང་། །གང་བུ་ལྷ་ཡི་བདག་ཉིད་དོ། །གཟུགས་ལས་འདས་པ་གོང་བུར་འགྱུར། །ཞེས་སོ། །དེས་སྦྱང་བྱ་འཕོ་བའི་བག་ཆགས་ཀྱི་དྲི་མ་སྦྱོང་ཞིང་། ལམ་གྱི་ཆ་ནས་དག་པའི་ས་གསུམ་བགྲོད་པ་དང་། འབྲས་བུ་ལྷན་སྐྱེས་བདེ་བ་ཆེན་པོའི་སྐུ་དང་མཆོག་གི་དངོས་གྲུབ་བསྒྲུབ་པའོ། །དེ་ལྟར་བསྐྱེད་རྫོགས་སོ་སོའི་སྦྱང་གཞི་ལ་ལྟོས་ན་དང་པོའི་སྦྱང་གཞི་སྲིད་པར་བསྐྱེད་རིམ་གཉིས་པའི་སྦྱང་གཞི་ཆོས་ཉིད་དུ་སྡུད་རིམ་ལ་བྱེད་པ་སྟེ། བརྟག་གཉིས་ལས། སྲིད་པ་སྐྱེ་བ་བསྐྱེད་རིམ་འགྱུར། །
འགགས་པ་ཤེས་རབ་སྲིད་མཐར་བྱེད། །ཅེས་དང་། དེ་གཉིས་སྐྱེ་འགགས་ཀྱི་ལམ་གཉིས་སུ་བཞག་ནས་རང་རང་དང་རྗེས་སུ་མཐུན་པའི་དངོས་གྲུབ་ཐོབ་ཚུལ་ཡང་སྙིང་པོའི་རྒྱུད་ཁ་ཆེ་འགྱུར་ལས། འཇིག་རྟེན་པ་ཡི་དངོས་གྲུབ་ནི། །བསྐྱེད་པའི་རིམ་པའི་སྦྱོར་བས་འཐོབ། འཇིག་རྟེན་འདས་པའི་དངོས་གྲུབ་ནི། །རྫོགས་པའི་རིམ་པའི་སྦྱོར་བས་སོ། །ཞེས་དང་། འདུས་པ་ལས་ཀྱང་། སངས་རྒྱས་རྣམས་ཀྱི་ཆོས་བསྟན་པ། །རིམ་པ་གཉིས་ལ་ཡང་དག་གནས། །བསྐྱེད་པ་ཡི་ནི་རིམ་པ་དང་། །རྫོགས་པ་ཡི་ནི་རིམ་པའོ། །ཞེས་སོ། །དེ་གཉིས་སོ་སོའི་བསྐྱེད་སྡུད་ཀྱི་རིམ་པས་སྐྱེ་འཆི་གཉིས་ཀྱི་རང་བཞིན་བདེན་པ་གཉིས་ལ་སྦྱོར་ཚུལ་ནི། བསྐྱེད་རིམ་མཐར་ཕྱིན་ནས་རྫོགས་རིམ་ཐོབ་པ་ཅིག་སྤྱོད་པའི་འཕྲོར་ལུས་ན། འཆི་བའི་དུས་ན་ནི་དོན་དམ་བདེན་པ་མངོན་དུ་བྱ་ལ། སྐྱེ་བའི་དུས་སུ་ནི་ཀུན་རྫོབ་བདེན་པས་སྒྱུ་ལུས་སུ་ལྡང་བར་བྱའོ་སྙམ་པའི་འཕེན་པ་གཏོང་བ་སྟེ་ལམ་རིམ་ལས། སྲིད་པ་རིམ་པར་སྨིན་ཚུལ་དུ། །འཇུག་པའི་ཡན་ལག་ལྔ་རུ་བཞག །གང་དག་དངོས་སུ་རང་རིག་ཕྱིར། །ཤི་བ་དོན་དམ་བདེན་པ་སྟེ། །སྐྱེ་བ་བར་མ་ཀུན་རྫོབ་ཡིན། །སྐྱེས་པའི་རིམ་གསུམ་གཉིས་མེད་དོན། །ཞེས་དང་། སྤྱོད་བསྡུས་ལས། སྐྱེ་བའི་མིང་ནི་ཀུན་རྫོབ་བདེན་པ་སྟེ། །འཆི་བའི་མིང་ཡང་དོན་དམ་བདེན་པ་ཡིན། །ཞེས་སོ། །དེ་ལྟ་ན་བུམ་དབང་དང་དའི་ལམ་བསྐྱེད་རིམ་ལ་བརྟེན་ནས་ཀྱང་རྒྱུའི་ས་བཅུ་གཅིག་པ་སོགས་མཆོག་གི་དངོས་གྲུབ་ཐོབ་པའི་རྣམ་གཞག་དང་འགལ་བར་འགྱུར་རོ་ཞེ་ན། །དེ་དང་དེའི་རྟེན་འབྲེལ་བསྒྲིགས་ཤིང་ནུས་པ་རྒྱུད་ལ་འཇོག་ཕྱིར་དེ་སྐད་དུ་བསྟན་པ་སྟེ། ཧེ་རུ་ཀ་འདུས་པ་ལས། གང་གིས་གང་ལ་དབང་བསྐུར་བས། །རྒྱུད་དག་ནུས་པ་ཐོབ་ཕྱིར་དབང་། །ཞེས་པ་ལྟར། ད་ལྟ་དངོས་སུ་མ་ཐོབ་ཀྱང་ཕྱིས་མངོན་དུ་འགྱུར་ངེས་ཀྱི་རྒྱུ་ཚོགས་ཤིང་གྲངས་
ཚང་པར་སོང་བའི་ཕྱིར་ཏེ། འདི་ནི་ཚད་མའི་གཞུང་ལས་ཀྱང་། །མཚད་མེད་རྒྱུ་དེ་ལ་ནི། །འབྲས་བུ་གང་གིས་བཟློག་པར་བྱེད། །ཅེས་བསྟན་པས་སོ། །ད་ནི་སོ་སོའི་རང་བཞིན་བཤད་པ་ལ་རྫོགས་རིམ་གྱི་རྟོགས་པ་ཁྱད་པར་ཅན་མ་རྙེད་པར་དུ་བསྐྱེད་རིམ་ལ་བརྟེན་ནས་རྟོག་པས་རྟོག་པ་འདུལ་བར་བྱེད་པ་ནི། རྣལ་འབྱོར་ཆེན་པོའི་རྒྱུད་ཀྱི་དགོངས་པ་ཡིན་ཏེ། རྡོ་རྗེ་སྙིང་འགྲེལ་ལས། རྣམ་རྟོག་བག་ཆགས་ཀྱིས་བཅིངས་ལ། །ཐོག་མར་རྟོག་པའི་ཆོ་ག་བསྟན། །ཞེས་པས་ཆོ་གའི་ཁྱད་པར་ནི་ཁྱད་ཆོས་བཞི་དང་ལྡན་པ་སྟེ། རྒྱུ་དང་མཐུན་པའི་བསྐྱེད་ཆོག་ཚང་བ། རང་འབྲས་ཀྱི་སྔགས་ཀྱི་ཡོན་ཏན་བསྐྱེད་པ། ངོ་བོ་ཞུ་བདེ་དང་སྟོང་ཉིད་འབྲེལ་བ། བྱེད་ལས་དག་རྫོགས་སྨིན་གསུམ་ཚང་པའོ། །དང་པོ་ནི། སྒྱུ་འཕྲུལ་དྲྭ་བ་ལས། སྐྱེ་གནས་བཞི་པོ་དག་བྱའི་ཕྱིར། །བསྐྱེད་པའང་དེ་བཞིན་རྣམ་པ་བཞི། སྤྲོས་ཅན་སྤྲོས་དང་སྤྲོས་པ་མེད། །ཤིན་ཏུ་སྤྲོས་པ་མེད་བཞིའོ། །ཞེས་འཁོར་བའི་འདྲ་འབག་སྐྱེ་གནས་རྣམ་པ་བཞིའི་བག་ཆགས་སྦྱོང་བ་ལ་ལྟོས་ནས་བསྐྱེད་ཚུལ་རྣམ་པ་བཞིར་བསྟན་པའི་དང་པོ་སྒོང་སྐྱེས་སྦྱོང་བའི་ཚུལ། ཇི་ལྟར་སྒོང་སྐྱེས་ལན་གཉིས་སྐྱེ་བ་ལྟར། །བདག་སྲས་གཞན་སྲས་རྣམ་པ་གཉིས་སུ་བསྐྱེད། །བདག་གི་སྲས་སུ་གཞན་བྱ་བ་ལ་ལྔ། ས་བོན་ལས་ནི་གཙོ་བོ་བསྐྱེད་པ་དང་། ཕྱོགས་བཅུའི་སངས་རྒྱས་པ་ཀུག་ནས་མཁར་བསྟིམ་དང་། །སེམས་ཅན་བཀུག་ནས་སྒྲིབ་པ་སྦྱང་བ་དང་། །གཉིས་སུ་མེད་པ་ཆེ་བ་བསྐྱེད་པ་དང་། །མཁའ་ནས་བཏོན་ནས་གདན་ལ་འགོད་པའོ། །གཞན་གྱི་སྲས་སུ་བདག་བྱ་བ་ལ་བརྒྱད། །སྒོ་ང་སྨིན་པ་དེ་དང་དེར་གྱུར་བཞིན། །གཙོ་བོ་འོད་ཞུ་ས་བོན་གྱུར་པ་དང་། །དེ་ལས་ཡབ་ཡུམ་སྐྱེ་མཆེད་རྫོགས་པ་དང་། །ཡབ་ཀྱི་རྟོག་པ་ཡི་གེར་གྱུར་པ་དང་། །ཡུམ་ལས་འོད་འཕྲོ་ལྷ་
ལ་གསོལ་གདབ་དང་། །ཀུན་ཀྱང་རང་བསྟིམ་ང་རྒྱལ་བཟུང་བ་དང་། །སྙོམས་པར་ཞུགས་ནས་མཁའ་རུ་དཀྱིལ་འཁོར་བསྐྱེད། །རྟོག་པ་ཞེ་གཉིས་ལྷར་གསལ་ཕྱིར་གདོན་དང་། །ཕྱག་རྒྱ་བཞི་ཡིས་བཅིངས་དང་རྒྱས་གདབ་བོ། །དེ་ལ་འཁོར་བའི་རྣམ་པ་གྲུབ་ཚུལ་སྤྲོས་པ་ཅན་སྒོམ་སྐྱེས་སྦྱོང་བའི་བསྐྱེད་རིམ་ནི་དང་པོའི་ལས་ཅན་རྣམས་ལ་བསྔགས་ཤིང་། དེའང་ལས་དང་པོ་པའི་ཚད་ནི་བཞི་བརྒྱ་ལྔ་བཅུ་པའི་འགྲེལ་པར་རགས་པའི་དཀྱིལ་འཁོར་ཡུད་ཙམ་གྱིས་མངོན་དུ་བྱེད་ནུས་པ་ཚུན་ཆད་ལ་བཤད་ཅིང་། བསྐྱེད་རྫོགས་སོ་སོའི་ཆ་ནས་བཞག་ན་བསྐྱེད་རིམ་གྱི་གནས་སྐབས་ཐམས་ཅད་ལས་དང་པོ་དང་། རྫོགས་རིམ་ནི་དེ་ལས་ལྡོག་པར་རིམ་ལྔ་དང་སྤྱོད་བསྡུས་ལས་བཤད་དོ། །དེའང་ཐོག་མར་སྒོ་ང་དང་། དེ་ལས་གཟུགས་སུ་སྨིན་པ་ལྟར་གཉིས་སྐྱེས་ཀྱི་སྲིད་པ་དེའི་བག་ཆགས་སྐྱོང་བའི་གཉེན་པོ་ཁྱད་པར་ཅན་བདག་སྲས་གཞན་སྲས་གྱི་རྣམ་པས་བསྟན་པའི་དང་པོ་ནི། ཡེ་ཤེས་རྩེ་མོ་ལས། སྲས་དང་བཙུན་མོར་བཅས་པ་ནི། །འཁོར་བའི་ཆོས་ལས་སྐྱེས་པ་སྟེ། །སེམས་ཅན་གྱིས་ནི་སྲས་སུ་བྱ། །ཞེས་སོ། །འདི་ལ་གཉིས། མན་ངག་ཏུ་བསྟན་པ་སྒྲུབ་སྡེའི་ལུགས་དང་། རྣམ་པར་འགྱུར་བར་བསྟན་པ་རྒྱུད་སྡེའི་ལུགས་སོ། །དང་པོ་ནི། རིག་འཛིན་ཆེན་པོ་པདྨ་སམྦྷ་ཝའི་དགོངས་པ་སྟེ། བླ་དཔེ་ལས། བདག་གི་སྲས་སུ་གཞན་བྱ་བ་ལ་ལྔ། རྒྱུའི་ས་བོན་ལས་གཙོ་བོ་ཡབ་ཡུམ་བསྐྱེད་པ་དང་། ཕྱོགས་བཅུའི་བུདྡྷ་བཀུག་ནས་མཁའ་རུ་བསྟིམ་པ་དང་། སེམས་ཅན་རྣམས་བཀུག་ལ་སྒྲིབ་པ་སྦྱང་བ་དང་། གཉིས་སུ་མེད་པ་ལ་ཆེ་བ་བརྗོད་པ་དང་། མཁའ་ནས་བཏོན་ལ་དཀྱིལ་འཁོར་དུ་དགོད་པའོ། །ཞེས་པ་སྟེ། བསྒྲུབ་གཞིའི་རྣམ་པར་སྨིན་པའི་ལུས་བསམ་གཏན་གསུམ་གྱི་མན་ངག་ལ་བརྟེན་ནས་ནམ་མཁའི་དབྱིངས་སུ་རྒྱུའི་རྡོ་རྗེ་འཛིན་པ་
ཡབ་ཡུམ་དུ་བསྐྱེད་ཅིང་། དེའི་མཁའ་གསང་དུ་ཕྱོགས་བཅུའི་སངས་རྒྱས་རྣམས་སྤྱན་དྲངས་ནས་བདག་གི་སྲས་སུ་བྱ་བའི་ས་བོན་དུ་བསྒྲུབ་པ་དང་། སེམས་ཅན་རྣམས་བཀུག་ནས་སྒྲིབ་པ་སྦྱངས་ཏེ་འཁོར་འདས་རོ་གཅིག་ཏུ་ཞུ་བ་དང་། གཉིས་མེད་ཀྱི་རབ་བཞིན་ལ་ཆེ་བ་བརྗོད་པ་དང་། དེའི་རྐྱེན་གྱིས་འབྲས་བུའི་རྡོ་རྗེ་འཛིན་པར་བཞེངས་པའི་མཁའ་གསང་ནས་འཁོར་རྣམས་བཏོན་ཏེ་དཀྱིལ་འཁོར་དུ་དགོད་པ་ལ་བདག་གི་སྲས་སུ་སངས་རྒྱས་བྱས་པ་ཞེས་བྱའོ། །གཉིས་པ་ནི། སྒྱུ་འཕྲུལ་རྒྱ་མཚོ་ལས། རང་བྱུང་དངོས་དང་མི་འགལ་ཞིང་། །འབྲས་བུ་ཉིད་ལ་ལམ་ཤེས་པས། །མ་ལུས་དཀྱིལ་འཁོར་ཐིག་ལེ་རྣམས། །བདག་གི་སྲས་སུ་བསྒོམ་པར་བྱ། །ཞེས་པའི་དོན་རྒྱུད་ཀྱི་རྒྱལ་པོ་སྒྱུ་འཕྲུལ་ལྟར་བརྗོད་པ་ལ་གཉིས། གཙོ་བོ་ཡབ་ཡུམ་དུ་བསྐྱེད་ནས་སྙོམས་པར་འཇུག་པ་དང་། ངོ་མཚར་སྲས་ཀྱི་དཀྱིལ་འཁོར་ཡི་གེའི་སྤྲིན་ལས་སྤྲོ་བའོ། །དང་པོ་ནི། ཨེ་མ་ཧོ ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ནས་སྐྱེ་བ་མེད། །ཅེས་པས་དོན་དམ་སེམས་བསྐྱེད་བརྟན་པར་བྱས་ནས་བསྐྱེད་གཞིའི་ཏིང་ངེ་འཛིན་གསུམ་བསྒྲུབ་པར་བྱ་ཞིང་། །དེའང་གཞན་གཉིས་པོ་སྤྱི་དང་མཐུན་ལ། རྒྱུའི་ཏིང་འཛིན་གྱི་ཁྱད་པར་སྒྱུ་འཕྲུལ་ལས། རྩ་བ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །ཨཞེས་བརྗོད་པའི་རྐྱེན་ལས་སེམས་ཀྱི་རང་བཞིན་ཡི་གེར་རྫོགས་པ་སྤྲོ་བསྡུས་གསལ་འགྲིབ་མེད་པ་ཡོངས་སུ་གྱུར་པ་ལས་མངོན་བྱང་གི་རང་བཞིན་ཉི་ཟླའི་དཀྱིལ་འཁོར་ཨས་མཚན་པ་ལས་བྱུང་བའི་ཡི་གེ་རྒྱུ་དུས་ན་ནང་གི་ཁམས་དཀར་པོ། ལམ་དུས་ན་ཡི་གེའི་རྒྱུའམ་སྦྱང་གཞི། འབྲས་དུས་ན་
མཚན་གྱི་ས་བོན་ཨཱ་ལི་ལ་ཚེག་དྲག་བསྣན་པའི་བཅུ་དྲུག་གཉིས་དཀར་པོ་མུ་ཏིག་གི་ཕྲེང་བ་ལྟ་བུ། རྒྱུ་དུས་ན་ཁམས་དམར་པོ། །ལམ་དུས་ན་ཡི་གེའི་རྒྱུའམ་སྦྱང་གཞི། འབྲས་དུས་ན་དཔེ་བྱད་ཀྱི་ས་བོན་ཀཱ་ལི་དམར་པོ་མར་མེའི་ཕྲེང་བ་ལྟ་བུ་སུམ་ཅུ་རྩ་བཞི་ལ་ཡ་ར་ལ་ཝ་ལ་སོགས་དྲུག་བསྣན་པའི་བཅུ་ཕྲག་གཉིས་པོས་རིམ་པ་གཉིས་སུ་བསྐོར་བའི་ཡི་གེ་ཐོག་མཐའ་གཉིས་འོད་དུ་ཞུ་ནས་ཧཱུཾ་གིས་མཚན་པའི་རྡོ་རྗེར་གྱུར། །དེ་ཡོངས་སུ་གྱུར་པ་ལས་རང་བཞིན་གཞིའི་ཀུན་ཏུ་བཟང་པོར་བསྒོམ་མོ། །དེའང་མྱང་འདས་དང་བཞུགས་ཚུལ་མཐུན་པའི་སྦྱོང་བའི་དབང་དུ་བྱས་ན་ཉི་ཟླའི་དཀྱིལ་འཁོར་ནི་མེ་ལོང་ལྟ་བུ་དང་རྡོ་རྗེའི་རིགས་སོ། །འོད་ཀྱི་གོང་བུ་ནི་མཉམ་པ་ཉིད་དང་རིན་པོ་ཆེའི་རིགས་སོ། །རྡོ་རྗེ་ཧཱུཾ་གིས་མཚན་པ་ནི་སོ་སོར་རྟོག་པ་དང་པདྨའི་རིགས་སོ། །སྐུ་ཡོངས་སུ་རྫོགས་པ་ནི་ཆོས་ཀྱི་དབྱིངས་ཀྱི་ཡེ་ཤེས་དང་དེ་བཞིན་གཤེགས་པའི་རིགས་སོ། །འབྲས་དུས་ཀྱི་མངོན་བྱང་ལྔའི་ཡོན་ཏན་ཡོངས་སུ་རྫོགས་པའི་ཚུལ། རྡོ་རྗེ་སྙིང་པོ་རྒྱན་གྱི་རྒྱུད་ལས། ཨཱ་ལི་དང་ནི་ཀཱ་ལི་དང་། །རྡོ་རྗེ་ཟླ་བ་རྣམ་པ་གཉིས། །གཅིག་ཏུ་གྱུར་པ་མཉམ་ཉིད་དེ། །ས་བོན་མཚན་མར་གྱུར་པ་ནི། །སོ་སོར་རྟོག་པར་ངས་བཤད་དོ། །དེ་བྱུང་སངས་རྒྱས་ཐམས་ཅད་ཀྱི། །འགྲོ་དོན་བྱེད་པ་བྱ་ནན་ཏན། །གཟུགས་བརྙན་རྫོགས་པ་ཆོས་དབྱིངས་ཏེ། །ཞེས་སོ། །དེ་ནས་ཡེ་ཤེས་ཕྱོགས་བཞི་དབུས་བརྟགས་ཏེ། ཞེས་པ་ནས། ཉི་ཟླ་པདྨ་རིན་པོ་ཆེ། །ཞེས་པའི་བར་གྱི་རྣམ་སྣང་གི་རང་བཞིན་གཞལ་ཡས་ཁང་བསྐྱེད་པར་བྱ་སྟེ། དེ་ལ་རྣམ་སྣང་ནི་སངས་རྒྱས་རྣམས་ཀྱི་སྐུའི་བདག་ཉིད་ཡིན་པས་སྐུ་དེས་གསུང་དང་ཐུགས་ཀྱི་རྟེན་བྱེད་པ་ལྟར་གཞལ་ཡས་ཁང་པས་ཀྱང་སངས་རྒྱས་རྣམས་བཞུགས་པའི་གནས་སམ་རྟེན་བྱེད་ཅིང་སྣོད་ཀྱི་འཇིག་རྟེན་གྱི་བག་ཆགས་
སྦྱོང་བའི་ཕྱིར་ཏེ་གལ་ཕྲེང་ལས། སྣོད་ཀྱི་རིམས་བྱུང་ཚུལ་གྱིས། །རིམ་བརྩེགས་གཞལ་ཡས་གཞུང་བཞིན་བསྐྱེད། །ཅེས་སོ། །ཨ་ནི་སྐྱེ་མེད་དེ་བཞིན་ཉིད། །ཀྵ་ནི་ཡེ་ཤེས་ཐུགས་ཀྱི་ཐུགས། །ཞེས་པས་ཀུན་ཏུ་བཟང་པོའི་གཡོན་དུ་བཟང་མོ་ཡབ་དང་འདྲ་བར་བསྐྱེད་པ་དེ་དང་གཉིས་མེད་དུ་འཁྲིལ་ནས་སྙོམས་པར་འཇུག་བའི་ཚུལ། ཐབས་དང་ཤེས་རབ་དགྱེས་སྤྲིན་བྱང་ཆུབ་སེམས་ཚོགས་རྒྱུ་འཁོར་ལོ། །འབྲས་བུ་རྒྱལ་བ་སྨིན་གྲུབ་ངོ་མཚར་མིང་ཚོགས་བཞི་བཅུ་གཉིས། །འདུས་མ་བྱས་ཉིད་འདུས་བྱས་རྡོ་རྗེ་དཀྱིལ་འཁོར་འབྱིན་པའི་དམ། །འདའ་བར་མི་མཛད་དབང་མེད་རྒྱུ་རྐྱེན་ཚོགས་པའི་མཐུ་ཆེན་ཧོ །ཞེས་ཡབ་ཡུམ་ཐབས་ཤེས་སུ་ཚོགས་པའི་བྱང་ཆུབ་སེམས་ཀྱི་རྒྱུ་སྙོམས་འཇུག་གི་རྐྱེན་ལས་འབྲས་བུ་རྒྱལ་བ་བཞི་བཅུ་རྩ་གཉིས་སུ་སྨིན་པའི་དམ་ཚིག་ལས་འདའ་བར་མི་མཛད་པ་ལ་ཧོ་ཞེས་དགྱེས་པ་བསྐྱེད་པའོ། །གཉིས་པ་ནི། སྦྱོར་མཚམས་ནས་བྱང་ཆུབ་སེམས་ཀྱི་སྤྲིན་ཡི་གེའི་རང་བཞིན་དུ་སྤྲོས་ནས་ངོ་མཚར་སྲས་ཀྱི་དཀྱིལ་འཁོར་དུ་བྱ་བ་ནི། །ཋ་ནི་སྒྱུ་འཕྲུལ་རྡོ་རྗེ་ཉིད། །ཅེས་པ་ནས། ཨོཾ་ནི་ཐམས་ཅད་ཞིག་པ་ཡིན། །ཅེས་པའི་བར་གྱིས་བདག་གི་སྲས་སུ་སངས་རྒྱས་རྣམས་བྱས་པ་ལྷའི་དཀྱིལ་འཁོར་དུ་གྱུར་པས་རྒྱལ་བའི་མཛད་པ་བསྒྲུབས། སླར་འདུས་དཀྱིལ་འཁོར་དུ་བྱོན་ནས་རྣམ་སྣང་ཡབ་ཡུམ་ནི་གཙོ་བོ་ཡབ་ཡུམ་ལ་ཐིམ། ལྷ་གཞན་རྣམས་ནི་རང་གནས་སུ་བཞུགས་པར་བསམ་མོ། །གཉིས་པ་གཞན་སྲས་ནི་ཡེ་ཤེས་རྩེ་མོ་ལས། ཇི་ལྟར་སངས་རྒྱས་མཐུ་ལས་བྱུང་། །ལྷུན་གྱིས་གྲུབ་པའི་ཆོ་ག་དང་། །ཆོ་གའི་ཡན་ལག་རྫོགས་པ་ལ། །མཁས་པ་སངས་རྒྱས་སྲས་ཡིན་ནོ། །ཞེས་པས་འདི་ལའང་སྒྲུབ་སྡེ་དང་། རྒྱུད་སྡེའི་ལུགས་གཉིས་ལ། དང་པོ་ནི།
བླ་དཔེ་ལས། གཞན་གྱི་སྲས་སུ་བདག་བྱ་བ་ལ་བརྒྱད་དེ། གཙོ་བ་ཡབ་ཡུམ་ཞུ་སྟེ་རྒྱུའི་ས་བོན་དུ་གྱུར་པ་དང་། དེ་ལས་ཡབ་ཡུམ་དུ་བསྐྱེད་པ་དང་། ཡབ་ཀྱི་རྟོག་ཚོགས་ལས་ཡི་གེ་བསྐྱེད་པ་དང་། ཡུམ་ལས་འོད་འཕྲོ་ཞིང་། ལྷ་ལ་གསོལ་བ་གདབ་པ་དང་། དཀྱིལ་འཁོར་ཐམས་ཅད་བདག་ཡབ་ཡུམ་ལ་བསྟིམ་པས་ཡེ་ཤེས་པར་ང་རྒྱལ་བསྐྱེད་པ་དང་། ཡབ་ཡུམ་སྦྱོར་བ་བྱ་ཞིང་མཁའ་རུ་དཀྱིལ་འཁོར་བསྐྱེད་པ་དང་། བདག་གི་རྟོག་པ་ཞེ་གཉིས་ལྷ་སྐུར་གྱུར་ཏེ་ཕྱིར་གདོན་པ་དང་། ཡེ་ཤེས་པ་སྤྱན་དྲང་ཤིང་རྒྱས་གདབ་པ་ལ་སོགས་པའོ། །ཞེས་པ་སྟེ། དེ་ལ་དང་པོ་ནི། གཙོ་བོ་ཡབ་ཡུམ་འོད་དུ་ཞུ་ནས་ཐིག་ལེ་མཐིང་ནག་གི་གོང་བུ་ས་བོན་ཕྱག་མཚན་གྱིས་མཚན་པར་གྱུར་པ་ནི་སྒོ་ང་། གཉིས་པ་དེ་འབྲས་བུའི་རྡོ་རྗེ་འཛིན་པར་བཞེངས་པ་ནི་སྒོང་ཁྱིམ་བརྡོལ་ནས་བཙས་པ། གསུམ་པ་ནི། དབང་པོ་ཡུལ་ལ་སད་བའི་རྟོག་ཚོགས་ཡི་གེའི་སྤྲིན་དུ་སྤྲོས་ནས་ལྷའི་དཀྱིལ་འཁོར་དུ་བསྒྲུབ་པ་ནི། སྒྱུ་འཕྲུལ་ལས། ཐ་ནི་སྒྱུ་འཕྲུལ་རྡོ་རྗེ་ཉིད། །ཅེས་པ་ནས། ཨོཾ་ནི་ཐམས་ཅད་ཞིག་པ་ཡིན། །ཞེས་པ་དང་མཚུངས་ལ། ཧཱུཾ་ཡིག་ལ་སོགས་པའི་ཡི་གེའི་སྤྲིན་བྱེ་བྲག་པ་ནི་རང་རང་གི་གཞུང་ལས་འབྱུང་བའོ། །བཞི་པ་ནི། རྡོ་རྗེ་ཕུར་བུ་ལ་མཚོན་ན་རྒྱུད་ལས། ཡབ་ཡུམ་འདོད་ཆགས་ང་རོ་བརྗོད། །བྱིན་གཉིས་དམ་དུ་རབ་འཁྱུད་དེ། །ལག་པ་དམ་འཁྱུད་མ་མཆུ་གཞི་བ། །སངས་རྒྱས་ཀུན་གྱི་ཡེ་ཤེས་སྐུ། །དང་ཉིད་རྡོ་རྗེ་ཆོས་ཉིད་ལས། །འབར་བའི་ཁྲོ་བོ་མི་བཟང་པ། །སྐུ་ཡི་དབྱིག་ཏུ་སྲས་བསྐྱེད་ཅིག །ཅེས་པས་མཚོན་ནོ། །ལྔ་པའི་དོན་ནི། འདོད་ཆགས་ཆེན་པོའི་ཚུལ་གྱིས་ནི། །ཡེ་ཤེས་དཀྱིལ་འཁོར་ཀུན་བསྡུས་ཏེ། །འཁོར་རྣམས་ཐུགས་ལ་བཞུགས་པ་ཡི། །ཤེས་རབ་མ་ནི་དགའ་བར་བྱ། །ཞེས་སོ། །དྲུག་པ་ནི་མཁའ་གསང་བྱིན་གྱིས་བརླབས་ནས་ཕྱག་
རྒྱ་བཞིས་སྙོམས་པར་ཞུགས་པ་སྟེ། །རྡོ་རྗེ་ཕུར་བུ་འབར་བ་ལས། །ཆགས་པ་ལྕགས་ཀྱུ་ཞེས་བྱ་སྟེ། །པདྨར་ཆུད་པ་ཞགས་པ་མོ། །ཁ་ཕྱེད་མ་ནི་སྒྲོག་ཡིན་ཏེ། །སྒྲ་གྲག་མ་ནི་དྲིལ་བུའོ། །ཞེས་དང་། ཆོས་ཀུན་བྱང་ཆུབ་སེམས་སུ་གནས། །དང་པོར་བབས་པ་གཞལ་མེད་ཁང་། །གཉིས་པ་གདན་གྱུར་གསུམ་པ་ལས། །ཡབ་ཀྱི་རྟོག་ཚོགས་ཡི་གེར་རྫོགས། །བྷ་ག་ཉིད་དུ་ལྷ་རྣམས་བསམ། །ཞེས་ཡི་གེའི་ས་བོན་རྣམས་ཡོངས་སུ་གྱུར་པ་ལས། ཡུམ་མཁར་ལྷ་ཚོགས་གསལ་གདབ་བོ། །བདུན་པ་དང་བརྒྱད་པའི་དོན་ཡང་འཆད་པར་འགྱུར་བ་དང་འདྲ་བས་ཤེས་པར་སླའོ། །གཉིས་པ་རྒྱུད་སྡེའི་ལུགས་ནི། སྒྱུ་འཕྲུལ་རྒྱ་མཚོ་ལས། གང་གིས་གང་ལ་གསོལ་བཏབ་པས། །ཐུགས་རྗེས་བྱིན་བརླབས་སྦྱངས་བྱས་ནས། །ཐུགས་ཞུགས་འདྲེས་པར་དབྱེར་མེད་ན། །སྲས་འགྱུར་དགོངས་པ་ཅི་ལ་གནས། །ཞེས་པ་སྟེ། དང་ལ་དངོས་པོར་བལྟ་བ་སྣང་ཕྱོགས་ཀྱི་ཞེན་པ་སྦྱོང་བ་དང་། ཆད་པར་བལྟ་བ་སྟོང་ཕྱོགས་ཀྱི་ཞེན་པ་སྦྱོང་བའི་ཚུལ་གཉིས་ལས། དང་པོ་ལའང་ཐུགས་དམ་བསྐུལ་བ་དང་། བྱིན་རླབས་རྗེས་སུ་གནང་བ་གཉིས་ལས། དང་པོ་སྣང་ཕྱོགས་ཀྱི་ཞེན་པ་སྦྱོང་བ་ནི། གཙོ་བོའི་ཐུགས་ཀ་ནས་རིག་པའི་ཀུན་ཏུ་བཟང་པོ་སེམས་དཔའི་རྒྱན་ལྡན་རྣམ་སྨིན་གྱི་ལུས་ཀྱི་རྣམ་པ་ཅན་རྐང་པའི་ལོང་བུ་སྤྲད་ཅིང་ཐལ་མོ་སྦྱར་བ་འཐོན་ནས། དཀྱིལ་འཁོར་ལ་ལན་གསུམ་བསྐོར་ནས་དགའ་བ་ཆེན་པོའི་སྒོ་ནས་མེ་ཏོག་གཏོར་བཞིན་པས། ཨོཾ་སྔོན་གྱི་ཐུགས་དམ་ཆེན་པོ་ནི། །འཇིག་རྟེན་མ་ལུས་ཐམས་ཅད་ཀུན། །རྒྱལ་བའི་ཞིང་དུ་སྦྱོར་བས་ན། །ཕྱག་རྒྱ་ཆེན་པོར་བདག་སྦྱོར་ཅིག །ཅེས་གསོལ་བ་གདབ་བོ། །གཉིས་པ་ནི། ལྷ་རྣམས་ཀྱིས་བདག་ལ་རྗེས་སུ་དགོངས་ཏེ་ཐབས་དང་ཤེས་རབ་ཀྱི་འོད་ཟེར་སྤྲོས་པས། སེམས་
དང་སེམས་བྱུང་གི་རྟོག་པ་དང་། དེ་ལས་གྱུར་པའི་རྣམ་སྨིན་གྱི་ལུས་ངག་སྦྱངས། གཟུང་འཛིན་གཉིས་བྲལ་གྱི་རང་བཞིན་གསེར་ཞུན་མ་ལྟ་བུའི་འོད་ཀྱི་གོང་བུར་གྱུར་པ་ལ། དེ་བཞིན་གཤེགས་པ་རྣམས་ཀྱིས་སྐུ་གསུང་ཐུགས་ཀྱི་འོད་ཟེར་ཡི་གེ་གསུམ་གྱི་རྣམ་པས་བདག་ལ་བསྟིམ་པས། གོང་བུ་ཉིད་ཀྱང་དེ་དང་གཉིས་སུ་མེད་པའི་འབྲུ་གསུམ་དུ་གྱུར་ནས་རགས་པ་སྐུ་དང་གསུང་གི་ས་བོན་ཕྲ་བ་ཐུགས་ཀྱི་ས་བོན་ལ་འདྲེས་ནས་ཟླ་དཀྱིལ་ལ་ཧཱུཾ་དུ་གནས་པར་གྱུར། དེ་ཉིད་རླུང་གི་དཀྱིལ་འཁོར་གྱིས་བཏེག་པས་གཙོ་བོའི་ཐུགས་ཀར་མདའ་འཕངས་པ་ལྟར་སོང་བའི་རྐྱེན་གྱིས་ཡབ་ཡུམ་བདེ་བའི་རོལ་མོས་ཚིམ་ནས་བྱང་ཆུབ་ཀྱི་སེམས་དང་གཉིས་སུ་མེད་པའི་གོང་བུར་གྱུར་པའི་ཡུམ་གྱི་མཁའ་ལ་གནས་པ་ལ་ལྷ་ཚོགས་ཐམས་ཅད་ཀྱང་རང་རང་གི་གསང་སྔགས་ཀྱི་སྒྲ་དང་བཅས་ནས་བྱང་ཆུབ་ཀྱི་སེམས་གོང་བུའི་བདག་ཉིད་ཅན་ལ་ཐིམ། དེའི་ངང་ལ་གཙོ་བོ་ཡབ་ཡུམ་ཀྱང་རྗེས་ཆགས་ཆེན་པོས་བདེ་བའི་ངོ་བོར་ཞུ་སྟེ་ཐམས་ཅད་གཅིག་ཏུ་འདྲེས་པའི་གོང་བུར་བསམ་མོ། །གཉིས་པ་སྟོང་ཕྱོགས་ཀྱི་ཞེན་པ་སྦྱོང་བ་ནི་གོང་བུ་དེ་ཉིད་ཀྱང་ཡི་གེ་དང་ཕྱག་མཚན་གྱི་རྣམ་པར་སོང་བ་ཡོངས་སུ་གྱུར་པ་ལས་ཞི་བ་དང་ཁྲོ་བོའི་སྐུ་གང་ཡིན་པར་ང་རྒྱལ་བསྐྱེད་ནས། ཤཱུ་ནྱ་ཏའི་སྔགས་ཀྱིས་དེ་ལ་ཡེ་ཤེས་ལྔའི་དབང་བསྐུར། སྐུ་གསུང་ཐུགས་ཡོན་ཏན་ཕྲིན་ལས་ལྔར་བྱིན་གྱིས་བརླབ། དེ་ནས་གཙོ་བོ་ཡབ་ཡུམ་གྱི་མཁའ་གསང་རྡོ་རྗེ་དང་པདྨར་བྱིན་གྱིས་བརླབས་ནས་ས་མ་ཡ་ཧོ་ལ་སོགས་པའི་བརྡའ་དང་བརྡའ་ལན་གྱིས་བསྐུལ་ནས་སྙོམས་པར་ཞུགས་ཏེ། བྱང་ཆུབ་ཀྱི་སེམས་ཡུམ་གྱི་མཁའ་ལ་སྤྲོས་པས་མཁའ་གསང་གཞལ་ཡས་ཁང་དུ་བྱིན་གྱིས་བརླབ། དེའི་ནང་དུ་ལྷ་རྣམས་ཀྱི་ས་བོན་གསལ་བཏབ་ལ། ལྷ་སོ་སོའི་
གསང་སྔགས་བརྗོད་པའི་རྐྱེན་གྱིས་སྐུ་ཡོངས་སུ་རྫོགས་པར་གྱུར། དེ་རྣམས་ཛཞེས་བརྗོད་པ་ཙམ་གྱིས་ཡུམ་གྱི་མཁའ་ནས་བཏོན་ཏེ་མདུན་གྱི་ནམ་མཁར་བཞག་པ་ལ་ཨོཾ་ཨཱཧཱུཾ་གིས་སྐུ་གསུང་ཐུགས་བྱིན་གྱིས་བརླབས། འོད་ཟེར་སྤྲོ་བསྡུས་སངས་རྒྱས་ཀྱི་མཛད་པ་བསྒྲུབས་ནས་རང་རང་གི་གདན་ལ་བཞུགས་པར་བསམ་མོ། །དེའང་སྒྱུ་འཕྲུལ་ཞི་བའི་དབང་དུ་བྱས་ན་ཀུན་ཏུ་བཟང་པོ་ཡབ་ཡུམ་ནི་གཙོ་བོའི་ཐུགས་ཀའི་ཁྱམས་ལ་བཞུགས་པར་བསམ་ཞིང་། རིགས་པའི་སྐྱེས་བུ་དྲུག་ནི་ཕྱིའི་ཁྱམས་ལ་བསྐྱེད་པ་ཡིན་ནོ། །འདུ་ཤེས་ཕྱིན་ཅི་ལོག་ཏུ་ཤར་ནས་རྒྱལ་བའི་ཕྲིན་ལས་ལ་བསྐུར་པ་གདབ་པར་འདོད་པ་དག་ན་རེ། རིགས་པའི་སྐྱེས་བུ་དྲུག་ལ་གླན་ཀ་བྱེད་པར་བསྙད་ནས་རང་ཉིད་ལ་བསོད་ནམས་མ་ཡིན་པ་འདུ་བྱེད་མོད། རྡོ་རྗེ་མཁའ་འགྲོའི་སུམ་ཅུ་པ་ལས། །ཡེ་ཤེས་རྣམ་པ་ལྔ་པ་ནི། །བལྟ་བ་ལྔ་ཡི་ཕ་རོལ་འགྲོ། །ལྷ་ཡི་ཡེ་ཤེས་གསལ་བར་བལྟ། །ལྷ་མིན་ཡེ་ཤེས་ཁྲོ་བའོ། །ཡི་དྭགས་ཡེ་ཤེས་ཞེན་པ་སྟེ། །དམྱལ་བའི་ཡེ་ཤེས་འཇིགས་པས་ནོན། །བྱོལ་སོང་ཡེ་ཤེས་བླུན་པ་སྟེ། །བརྟན་པ་རྣམས་ནི་སེམས་མེད་པའོ། །ཅེས་དང་། ལས་རྣམས་ཀྱི་ནི་བྱེ་བྲག་གིས། །ཡེ་ཤེས་བྱེ་བྲག་སྤྲུལ་པ་ཡིན། །ཞེས་འགྲོ་བ་སོ་སོའི་གནས་རིགས་གདུལ་བའི་ཡེ་ཤེས་དེ་ལྟ་ན། དེའི་བརྟེན་པར་གྱུར་པའི་གཟུགས་ཀྱི་སྐུས་གདུལ་བའི་ཕྲིན་ལས་ཆེན་པོ་རྒྱུ་མཚན་གང་གིས་དགག་པར་ནུས། དེ་བས་ན་མཉམ་སྦྱོར་གྱི་རྩ་རྒྱུད་ལས་ཀྱང་། གསང་སྔགས་མཐུན་པའི་ཁྱད་པར་གྱིས། །མོས་པའི་བློ་དག་མཐུན་པར་སྟོན། །ཞེས་པའང་དྲན་པར་བྱའོ། །དེ་ལྟར་སྒོང་སྐྱེས་སྤྱོད་པའི་བསྐྱེད་རིམ་གྱི་ཁྱད་པར་ནི་ལན་གཉིས་སུ་སྐྱེ་བ་དང་མཐུན་པ་ཁོ་ནར་སྦྱོང་བ་ཡིན་
བས་ན་སྤྲོས་པ་ཆུང་ངུའི་དབང་དུ་བྱས་ན་འདི་ལྟར། བསྡུ་ན་ཐོག་མར་རང་ཉིད་ལྷར་གསལ་བས། །མདུན་མཁར་དཀྱིལ་འཁོར་གསལ་བཏབ་རྒྱུན་བཤགས་བྱ། །གཉིས་ཀ་མི་དམིགས་དང་ནས་ལྷ་སོ་སོའི། །དཀྱིལ་འཁོར་མངོན་རྟོགས་ཇི་བཞིན་བསྒོམ་པའོ། །ཞེས་སྨོས་པ་ནི་གཞུང་ཉིད་ཀྱིས་གོ་སླའོ། །གཉིས་པ་ལ་གཉིས། ཧེ་རུ་ཀ་གལ་པོ་ལྟར་མངོན་བྱང་བཞི་རྗེས་འབྲང་དང་བཅས་པ་བཤད་པ་དང་། རྒྱུད་སྡེ་སྤྱི་ཁྱབ་དང་བསྟུན་ནས་མངོན་བྱང་ལྔའི་མཚན་ཉིད་བཤད་པའོ། །དང་པོ་ནི། མངལ་སྐྱེས་སྦྱོང་ཕྱིར་མངོན་བྱང་བཞིའམ་ལྔ། དང་པོ་ཁྲག་འཐུང་གལ་པོའི་དགོངས་བསྟོད། འཆི་སྲིད་བར་དོར་བཅས་པ་སྟོང་ཉིད་སེམས། །དྲི་ཟ་ཉེ་བར་ལེན་པའི་རྣམ་ཤེས་ནི། །ལྷ་ཡི་ས་བོན་གྱིས་སྦྱང་དེ་ཉིད་ཀྱང་། །ཁུ་རྡུལ་རླུང་དང་འདྲེས་པའི་མེར་མེར་ནུར། །ས་བོན་ཉིད་ལས་ཕྱག་མཚན་གྱུར་པས་སྦྱོང་། །ལྟར་དང་མཁྲང་གྱུར་ཕྱག་མཚན་འོད་གོང་གྱུར། །ཁྱབ་འཇུག་ཉ་དང་རུས་སྦལ་དབང་པོ་རྫོགས། །ལྷ་ཡི་རྣམ་པར་གྱུར་ནས་སྦྱང་བའོ། །དེ་སྐད་དུ་ཧེ་རུ་ཀ་གལ་པོ་ལས། དང་པོ་སྟོང་པ་བྱང་ཆུབ་སེམས། །གཉིས་པ་ས་བོན་འབྱུང་བ་སྟེ། །གསུམ་པ་ལ་ནི་གཟུགས་རྫོགས་པ། །བཞི་པ་ལ་ནི་ཡི་གེ་འགོད། །ཅེས་བས་འཆི་སྲིད་བར་དོ་དང་བཅས་པ་སྟོང་ཉིད་བྱང་ཆུབ་ཀྱིས་སྦྱང་། ཉེར་ལེན་དྲི་ཟའི་རྣམ་ཤེས་ཁུ་ཁྲག་དང་འདྲེས་པ་ལྷའི་ས་བོན་བསྡུ་བས་སྦྱང་། རླུང་བཅུས་ལུས་རིམ་གྱིས་བསྐྱེད་ནས་གཟུགས་ཀྱི་རྣམ་པར་རྫོགས་པ་ལྷར་གྱུར་པས་སྦྱང་། བཅོས་ནས་དབང་པོ་ཡུལ་ལ་སད་པ་ནི་ཡི་གེ་འགོད་པས་སྦྱང་བ་སྟེ། ལྷ་མངལ་འབྱིན་གྱི་ས་བོན་སྤྲོ་བའམ། གནས་གསུམ་ལ་སོགས་པ་ཡི་གེས་རྒྱས་གདབ་པ་ལའང་སྦྱར་དུ་རུང་ངོ་། །དེའང་ནང་གསེས་གྱི་དབང་དུ་རླུང་བཅུའི་འདུ་འཕྲོད་ཀྱིས་འགྱུར་བའི་གནས་སྐབས་ལྔ་ཉམས་སུ་མྱོང་བ་རྡོ་རྗེའི་ཆོ་ག་
བཞིས་སྦྱོང་བའི་ཚུལ་ནི། ས་བོན་དེ་ཉིད་ལྷའི་ཕྱག་མཚན་དུ་གྱུར་པས་མེར་མེར་ནུར་ནུར་སྦྱང་། ཕྱག་མཚན་འོད་གོང་དུ་གྱུར་པས་ལྟར་ལྟར་དང་མཁྲད་གྱུར་གཉིས་སྦྱང་། འོད་གོང་ལྟར་གྱུར་བས་ཁྱབ་འཇུག་ཉ་དང་རུས་སྦལ། དབང་པོ་རྫོགས་པ་བཞི་པོ་སྦྱང་བ་སྟེ་འདུས་པ་ཕྱི་མ་ལས་ཀྱང་དེ་དང་ཚུལ་མཐུན་པར་བཤད་དོ། །དེ་ལ་བསྡུས་པའི་ཆོ་ག་གསུམ་བསྐྱེད་ནི། །ཕྱག་རྒྱ་སྐུ་ལ་ཡིག་འབྲུ་གསུང་རྡོ་རྗེ། །ཐུགས་ནི་ཕྱག་མཚན་ཉིད་དུ་སྦྱོར་བ་ལ། །རྡོ་རྗེའི་ཆོ་ག་གསུམ་ཞེས་ཕ་རྒྱུད་ལུགས། །དེ་ཡང་ལུས་འགྲུབ་པའི་ས་བོན་ཁུ་རྡུལ་གཉིས་གནས་སུ་དག་པ་མཚོན་པ་ཉི་ཟླ་སྐུ་དང་གསུང་། ཨཱཡིག་ལ་སོགས་པ་ཐུགས་སུ་མོས་ནས་སྦྱོང་བའི་ཚུལ། ཐིག་ལེ་ཟླ་བ་ཞུ་བ་སྐུ། །རྣམ་པར་གཅད་པ་ཉི་རྡུལ་གསུང་། །ཨཱཡིག་མུན་ཅན་ཐུགས་རབ་བརྗོད། །ཅེས་སོ། །དེ་ལས་རྣམ་པ་གཞན་དུ་གྱུར་པ་རང་གི་དངོས་བསྟན་ནི། དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེའི་ངོ་བོ་ཉིད་རྡོ་རྗེ་རྩེ་ལྔ་པ་བསྒོམས་པས་སྦྱང་བྱའི་ཡིད་ཐུགས་རྡོ་རྗེར་དག །ཕྱག་མཚན་དེ་ཉིད་ཡི་གེར་གནས་གྱུར་པའམ། གསུང་རྡོ་རྗེའི་ངོ་བོ་ཨཱདང་ཧཱུཾ་ལ་སོགས་པས་མ་ཆེན་པར་བསྒོམས་པས་སྦྱང་བྱའི་ངག་གསུང་རྡོ་རྗེར་རྫོགས། དེ་ལས་འོད་ཟེར་སྤྲོ་བསྡུའི་ཆོ་གས་དོན་གཉིས་བྱས་ཡོངས་སུ་གྱུར་བ། ལྷའི་རྣམ་པ་ཐམས་ཅད་རྫོགས་པར་བསྒོམས་པར་སྦྱང་གཞིའི་ལུས་རྡོ་རྗེར་སྨིན་པ་སྟེ། རྡོ་རྗེའི་ཆོ་ག་གསུམ་གྱི་དང་པོས་མངལ་དུ་ཁམས་དཀར་དམར་ཚོགས་པ་ལ་དྲི་ཟའི་རྣམ་ཤེས་ཞུགས་པ། གཉིས་པས་ཁུ་ཁྲག་སེམས་གསུམ་འདྲེས་ནས་མེར་མེར་པོ་ལ་སོགས་པ་འགྱུར་བའི་གནས་སྐབས་ལྔ་ཉམས་སུ་མྱོང་བ། གསུམ་པས་འབྱུང་བ་བྱེར་སྡུད་ཀྱི་ལུས་ཡོངས་སུ་གྲུབ་ནས་ཕྱིར་བཙས་པ་སྤྱོད་ལ། འབྲས་
བུའི་དུས་ན་ལུས་ངག་ཡིད་གསུམ་རྡོ་རྗེ་གསུམ་དུ་བསྒྲུབ་པའི་རྟེན་འབྲེལ་བསྒྲིག་གོ །དེའང་རྒྱུད་ལས། བཙུན་མོའི་བྷ་ག་བདེ་ཆེན་དུ། །སྟོན་པ་སུམ་ཅུ་རྩ་གཉིས་མཚན། །གཙོ་བོ་དཔེ་བྱད་བརྒྱད་ཅུར་ལྡན། །ཞེས་པ་ལྟར། དེ་བཞིན་གཤེགས་པ་རྣམས་རྡོ་རྗེ་བཙུན་མོའི་བྷ་ག་ལ་བཞུགས་ནས་སེམས་ཅན་ལ་སྨན་པའི་མཛད་པ་ཕྲིན་ལས་སྐུ་གསུམ་ལྷུན་གྱིས་གྲུབ་པའི་བདག་ཉིད་དང་ཆོས་ཉིད་མཐུན་པར་སྦྱང་བའམ། མན་སྙེ་ལས། དེའི་རྗེས་སུ་བར་དོའི་སྲིད་པ་ཇི་ལྟ་བ་བཞིན་གྱི་གཟུགས་འགགས་པའི་རྗེས་ཀྱི་མངལ་གྱི་གནས་སྐབས་བཞིན་དུ་བྱང་ཆུབ་སེམས་དཔའ་རྣམས་ཀྱི་བར་ཆད་མེད་པའི་ལམ་འགགས་པའི་རྗེས་ལ་ས་བཅུ་པའི་གནས་སྐབས་རིག་པར་བྱ་སྟེ། འདི་རྣམས་སྒྲིབ་པ་དང་བཅས་པ་ཉིད་དོ། །ཞེས་པ་ལྟར་མངལ་ཞུགས་ཀྱི་རིམ་པ་དང་སྦྱོར་བའི་ཚུལ་དང་། མངོན་བྱང་གི་མཚན་ཉིད་བྱེ་བྲག་ཏུ་བཤད་པ་གཉིས་ལས་དང་པོ་ནི། བར་མདོ་ནས་ལུས་འཆོལ་ཚོགས་ཀྱི་ལམ། །མངལ་དུ་རྣམ་ཤེས་འཇུག་པ་སྦྱོར་ལམ་སྟེ། །ལྷུམས་ཞུགས་བྱང་ཆུབ་ལྔ་པོ་མཐོང་བསྒོམ་དང་། །ཟླ་བ་བཅུ་ནི་ས་དང་རབ་སྦྱར་ནས། །བཙའ་བ་མི་སློབ་ལམ་གྱུར་སྤྲུལ་པའི་སྐུ། །དེ་ལ་འཆི་བ་ཆོས་སྐུའི་འོད་གསལ་ལུགས་ལྡོག་དུ་མཆེད་པའི་ཡིད་ལུས་བར་དོ་ལོངས་སྤྱོད་རྫོགས་པའི་སྐུར་ལྡང་མི་ནུས་པའམ། ནུས་ཀྱང་གཞན་དོན་དུ་སྐྱེ་བ་སྤྲུལ་སྐུའི་ལམ་འཁྱེར་ལ་འཇུག་པ་དག་གིས་བར་མདོ་ནས་སེམས་བསྐྱེད་དང་ལྡན་པས་ལུས་འཚོལ་བ་ཚོགས་ལམ། ཆོས་ལྡན་གྱི་ལུས་རྟེན་ཐོབ་པའི་མངལ་སྒོ་འདམས་ནས་ལུས་ལེན་པ་དངོས་ལ་སྦྱོར་བ་སྦྱོར་ལམ། བྱང་ཆུབ་རྣམ་པ་ལྔའི་རིམ་པས་མངལ་དུ་ཉིང་མཚམས་སྦྱོར་བའི་བྱེད་ལས་རང་རྒྱུད་པ་རྣམས་སྦྱང་བ་མཐོང་བསྒོམ་གྱི་ལམ་དང་། ཟླ་བ་བཅུས་བཅུར་མཚོན་ནས་རྡོ་རྗེ་མི་བསྐྱོད་པ་ལ་སོགས་ལྷག་པའི་ལྷ་གང་ཡིན་པའི་
སྐུར་བཞེངས་ནས་མི་སློབ་པའི་ཟུང་འཇུག་སྐྱེ་བ་སྤྲུལ་པའི་སྐུར་འགྲུབ་པའི་ཚུལ་ཀློང་གསལ་ལས། མངལ་ཞུགས་བྱང་ཆུབ་རྣམ་ལྔ་སྟེ། །ཟླ་བ་བཅུ་ནི་ས་བཅུའི་ཚུལ། །སྐྱེས་པ་རང་བཞིན་སྤྲུལ་པའི་སྐུ། །ལྷུན་གྲུབ་སྐུ་གསུམ་བདག་ཉིད་དོ། །ཞེས་སོ། །གཉིས་པ་མངོན་བྱང་ཀྱི་ངོ་བོ་སྐྱེ་གནས་བཞིའི་རིམ་པ་དང་མཐུན་པར་རྒྱུ་འབྲས་གོ་རིམ་གྱི་དབང་དུ་མངལ་སྐྱེས་ལ་མཚོན་ན། མངོན་བྱང་དང་པོ་གཉིས་ཀྱི་ཕ་མའི་ཁུ་ཁྲག་ཚོགས་པ། གསུམ་པས་དྲི་ཟའི་རྣམ་ཤེས་ཞུགས་པ། བཞི་པས་ཁུ་རྡུལ་རྣམ་ཤེས་གསུམ་འདྲེས་ནས་འགྱུར་བའི་གནས་སྐབས་རྣམས་མྱོང་བ། ལྔ་པས་མངལ་གྱི་གནས་སྐབས་རྫོགས་པ་སྟེ། དེ་དང་འབྲལ་བར་ཕྲ་བའི་ཆ་ནས་མིང་གཞིའི་ཕུང་པོ་དང་། ཁམས་དང་། རྣམ་ཤེས་དང་། ཉོན་མོངས་པའི་ཚོགས་ཏེ་གཟུགས་ཅན་མ་ཡིན་པ་རྣམས་དང་། །གཟུགས་ཅན་དང་འདྲེས་པས་རགས་པ་སྐྱེ་གནས་བཞི་པོའི་སྦྱང་གཞི་སྦྱོང་བྱེད་སྟོན་པའི་ཕྱིར། མངོན་བྱང་དང་པོ་ཟླ་བའི་དཀྱིལ་འཁོར་ནི། །མངལ་སྐྱེས་ཁུ་བ་དྲོད་གཤེར་སྐྱེས་ཀྱི་གཤེར། །སྒོང་སྐྱེས་ཕ་དང་རྫུས་སྐྱེས་སྟོང་པའི་ཆ། །དེ་ལ་སྦྱང་གཞི་ནི་ཕུང་པོ་ལྔ་ལས་གཟུགས་ཀྱི་ཕུང་པོ། ཁམས་ལྔ་ལས་སའི་ཁམས། ལུས་ཀུན་གཞིའི་རྣམ་ཤེས། ཉོན་མོངས་པ་ལྔ་ལས་གཏི་མུག །མངལ་སྐྱེས་ཀྱི་ཕའི་ཁམས། དྲོད་གཤེར་སྐྱེས་ཀྱི་གཤེར། སྒོང་སྐྱེས་ཀྱི་ཕ་བརྫུས་སྐྱེས་ཀྱི་སྟོང་པའི་ཆ་རྣམས་སོ། །སྦྱོང་བྱེད་ནི་རྣམ་སྣང་གི་ངོ་བོ་ཨཱ་ལི་ལས་བྱུང་བའི་མངོན་བྱང་དང་པོ་ཟླ་བའི་དཀྱིལ་འཁོར་དུ་བསྒོམ་པ་རྣམ་པ་ལམ་བྱེད། དེའི་ངོ་བོ་ཆོས་ཐམས་ཅད་མེ་ལོང་གི་གཟུགས་བརྙན་ལྟར་སྣང་བས་མེ་ལོང་ལྟ་བུའི་ཡེ་ཤེས་སུ་མོས་པ་ནི་མོས་པ་ལམ་
བྱེད། དེའང་ཆོས་སྐུའི་ཡེ་ཤེས་སྒྲིབ་མེད་དུ་གསལ་བ་ནི་འབྲས་བུ་ལམ་བྱེད། ལམ་བྱེད་གསུམ་ལ་བརྟེན་ནས་ཚོགས་གཉིས་རྫོགས་པའི་རྟེན་འབྲེལ་དུ་འགྱུར་བ་ནི་བྱིན་རླབས་ལམ་བྱེད་ཅེས་བྱ་སྟེ། ལམ་བྱེད་ཕྱི་མ་ནི་འོག་མ་རྣམས་ལའང་འགྲེའོ། །དེ་བཞིན་གཉིས་པ་ཉི་མའི་དཀྱིལ་འཁོར་ཡང་མངལ་སྐྱེས་རྡུལ་དང་དྲོད་གཤེར་སྐྱེས་ཀྱི་དྲོད། །སྒོང་སྐྱེས་མ་དང་བརྫུས་སྐྱེས་གསལ་བའི་ཆ། །དེ་ལ་སྦྱང་གཞི་ཚོར་བའི་ཕུང་པོ་དང་ནམ་མཁའི་ཁམས། ཉོན་མོངས་པ་ཅན་གྱི་ཡིད་དེ་སེར་སྣ་ང་རྒྱལ། མངལ་སྐྱེས་གྱི་མའི་ཁམས། སྒོང་སྐྱེས་ཀྱི་མའི་ཆ་དྲོད་གཤེར་སྐྱེས་ཀྱི་དྲོད། རྫུས་སྐྱེས་ཀྱི་གསལ་བའི་ཆ་རྣམས་སོ། །དེ་དག་སྦྱོང་བྱེད་ནི་རིན་འབྱུང་གི་ངོ་བོ་ཀཱ་ལི་ལས་བྱུང་བའི་བདུན་གྱི་བདུན་པའི་དཀྱིལ་འཁོར་དུ་བསྒོམ་པ་ནི་རྣམ་པ་ལམ་བྱེད། དེའི་ངོ་བོ་ཆོས་ཐམས་ཅད་མཉམ་པ་ཉིད་དུ་རྟོགས་པའི་ཡེ་ཤེས་སུ་མོས་པ་ནི་མོས་པ་ལམ་བྱེད། དེའང་སངས་རྒྱས་དང་སེམས་ཅན་གྱི་རང་བཞིན་དངོས་པོ་གཅིག་པར་ཐུགས་སུ་ཆུད་པའི་ཡེ་ཤེས་སྒྲིབ་མེད་དུ་གསལ་བས་ན་འབྲས་བུ་ལམ་བྱེད་དོ། །མངོན་བྱང་གསུམ་པ་ས་བོན་ཕྱག་མ་ཆེན་བཅས། །ཁུ་རྡུལ་གཉིས་པར་རྣམ་ཤེས་ཞུགས་པ་དང་། །སྐྱེ་གནས་བཞི་པོའི་བར་དོའི་རྣམ་ཤེས་སྦྱོང་། །དེ་ལ་སྦྱང་གཞི་ནི་འདུ་ཤེས་ཀྱི་ཕུང་པོ་དང་། རླུང་གི་ཁམས། ངག་ཡིད་ཀྱི་རྣམ་པར་ཤེས་པ། ཉོན་མོངས་པ་འདོད་ཆགས། སྐྱེ་གནས་བཞིའི་དྲི་ཟ་ཉེ་བར་ལེན་པའི་རྣམ་ཤེས་རྣམས་སོ། །སྦྱོང་བྱེད་ནི་འོད་དཔག་མེད་ཀྱི་ངོ་བོ་ས་བོན་ཕྱག་མཚན་དང་བཅས་པའི་རྣམ་པར་བསྒོམ་པ་ནི་རྣམ་པ་ལམ་བྱེད། དེའི་ངོ་བོ་ཆོས་ཐམས་ཅད་མ་འདྲེས་པར་རྟོགས་པའི་ཡེ་ཤེས་སུ་མོས་པ་ནི་མོས་པ་ལམ་བྱེད། དེའང་ཆོས་ཐམས་
ཅད་མ་བསྒྲིབས་པར་གསལ་ཞིང་མཁྱེན་པའི་ཡེ་ཤེས་སོ་སོར་རྟོག་པ་ནི་འབྲས་བུ་ལམ་བྱེད་དོ། །མངོན་བྱང་བཞི་པ་རྣམ་གསུམ་གཅིག་ཏུ་འདྲེས། །ཁུ་རྡུལ་སེམས་གསུམ་རོ་གཅིག་འདྲེས་པ་དང་། །དྲོད་གཤེར་སྐྱེས་ཀྱི་དྲོད་དང་རྣམ་ཤེས་དང་། །བརྫུས་སྐྱེས་གསལ་ལ་སྟོང་པའི་ཆ་ཙམ་དང་། །བར་སྲིད་འདྲེས་པའི་ཆ་རྣམས་སྦྱོང་བ་ཡིན། །དེ་ལ་སྦྱང་གཞི་འདུ་བྱེད་ཀྱི་ཕུང་པོ་དང་རླུང་གི་ཁམས། བྱ་བ་སྒོ་ལྔའི་རྣམ་ཤེས། ཉོན་མོངས་པ་ཕྲག་དོག །སྐྱེ་གནས་བཞིར་འཇུག་པའི་ཚུལ་གྱི་མངལ་སྐྱེས། སྒོང་སྐྱེས་དང་བསྟུན་ན་དྲི་ཟའི་རྣམ་ཤེས་དང་ཁུ་རྡུལ་འདྲེས་པ། དྲོད་གཤེར་སྐྱེས་ཀྱི་དྲོད་དང་དྲི་ཟའི་རྣམ་ཤེས་འདྲེས་པ་བརྫུས་སྐྱེས་ཀྱི་གསལ་ལ་སྟོང་པ་ཙམ་དང་བར་སྲིད་འདྲེས་པའི་ཆ་རྣམས་སོ། །སྦྱོང་བྱེད་ནི་དོན་འགྲུབ་གྱི་ངོ་བོ་ཉི་ཟླ་ཕྱག་མཚན་ས་བོན་དང་བཅས་པ་འདྲེས་པའི་ཐིག་ལེ་གོང་བུའི་རྣམ་པ་ཅན་དུ་བསྒོམ་པ་ནི་རྣམ་པ་ལམ་བྱེད། དེའི་ངོ་བོ་སངས་རྒྱས་ཐམས་ཅད་ཀྱི་མཛད་པ་རོ་གཅིག་ཏུ་འདྲེས་པའི་ཡེ་ཤེས་སུ་མོས་པ་ནི་མོས་པ་ལམ་བྱེད། དེས་སེམས་ཅན་གྱི་བྱ་བ་ཐམས་ཅད་གྲུབ་པའི་ཡེ་ཤེས་ནི་འབྲས་བུ་ལམ་བྱེད་དོ། །མངོན་བྱང་ལྔ་པ་སྐུ་རུ་གྲུབ་པ་ནི། །སྐྱེ་གནས་བཞི་པོའི་སྐྱེ་མཆེད་ཡོངས་རྫོགས་ནས། །རགས་པའི་ཡུལ་ལ་དབང་པོ་སད་པ་ཡི། །འཁོར་བའི་རྣམ་པ་ཆ་དང་བཅས་པ་སྦྱོང་། །ཁམས་དང་ཕུང་པོ་རྣམ་པར་ཤེས་པའི་ཚོགས། །གནས་སུ་དག་པ་གདན་གསུམ་ཚང་བའི་ལྷ། །མྱ་ངན་འདས་དང་བཞུགས་ཚུལ་མཐུན་པ་ནི། །རྒྱུ་ལས་འབྲས་བུའི་ཧེ་རུ་ཀ་ཉིད་དོ། །དེ་ལ་སྦྱང་གཞི་ནི་རྣམ་ཤེས་ཀྱི་ཕུང་པོ་དང་སའི་ཁམས། །རོ་ཡིད་དང་བཅས་པའི་རྣམ་ཤེས་ཚོགས་བརྒྱད་ཀྱི་ཆོས་ཉིད་དུ་འཛིན་པའི་ཆ། ཉོན་མོངས་པ་ཞེ་སྡང་།
སྐྱེ་གནས་བཞིའི་ལུས་གྲུབ་པའི་གནས་སྐབས་རྣམས་སོ། །སྦྱོང་བྱེད་ནི་མི་བསྐྱོད་པའི་ངོ་བོ་རྒྱུའི་ཧེ་རུ་ཀ་ཡབ་ཡུམ་དུ་བསྐྱེད་པ་ནི་སྐུའི་རྣམ་པ་ལམ་བྱེད་དེ། བཙས་ནས་དབང་པོ་ཡུལ་ལ་སད་པས་འཁོར་བའི་རྣམ་པ་ཆ་དང་བཅས་པ་སྦྱངས་ལ། དེའང་ལྷའི་རྣམ་པ་དེ་ལ་ཡན་ལག་དང་ཉིང་ལག་ལ་སོགས་པ་ཡོངས་སུ་རྫོགས་པ་ལྟར་ཡེ་ཤེས་དེ་ལ་ཡོན་ཏན་ཐམས་ཅད་རྫོགས་པར་མོས་པ་ནི་མོས་པ་ལམ་བྱེད། དེའི་ངོ་བོ་ཆོས་ཀྱི་དབྱིངས་ཀྱི་ཡེ་ཤེས་སུ་རོ་གཅིག་པ་ནི་འབྲས་བུ་ལམ་བྱེད་དེ། དགྱེས་རྡོར་ལས། ཟླ་བ་མེ་ལོང་ཡེ་ཤེས་ཏེ། །བདུན་གྱི་བདུན་པ་མཉམ་པ་ཉིད། །རང་ལྷའི་ས་བོན་ཕྱག་མཚན་ནི། །སོ་སོར་རྟོག་པར་བརྗོད་པར་བྱ། །ཐམས་ཅད་གཅིག་གྱུར་ནན་ཏན་ཉིད། །རྫོགས་པ་ཆོས་དབྱིངས་དག་པ་སྟེ། །ཞེས་སོ། །གཉིས་པ་རང་འབྲས་སྔགས་ཀྱི་ཡོན་ཏན་བསྐྱེད་ཚུལ་ནི། འཁོར་བའི་འདྲ་འབག་རྣམ་པ་བཞིའི་སྐྱེ་སྲིད་དང་། ཕུང་པོ་དང་། ཁམས་དང་། རྣམ་པར་ཤེས་པ་དང་། ཉོན་མོངས་པའི་ཆ་དང་བཅས་མངོན་བྱང་ལྔའི་སྦྱོང་བྱེད་ཀྱིས་སྦྱངས་པའི་མཐར་རྒྱུའི་རྡོ་རྗེ་འཛིན་པར་རྫོགས་པ་ནི་མངལ་སྐྱེས་ལ་མཚོན་ན་རང་གི་ཕ་མ་མཚོན་པའི་སྦྱང་གཞི་ཡིན་ལ། དེའི་ངང་ལས་རྒྱུ་རྡོ་རྗེ་འཛིན་པ་ཡབ་ཡུམ་ཐིག་ལེར་ཞུ་བ་ནི་བར་སྐབས་དང་མཚུངས་ལ། དེ་ལས་ཞུ་བ་གླུས་བསྐུལ་གྱི་སྒྲའི་རྐྱེན་གྱིས་ཕུང་ཁམས་སྐྱེ་མཆེད་གནས་སུ་དག་པ་གདན་གསུམ་ཚང་བའི་ལྷའི་ངོ་བོ་འབྲས་བུའི་རྡོ་རྗེ་འཛིན་པར་བཞེངས་པ་ནི་ཕ་མ་དེ་གཉིས་ཀྱི་བུར་གྱུར་པའི་ཆ་དང་རྣམ་འགྱུར་སྦྱོང་ཞིང་། དེའང་མཚན་དཔེའི་བདག་ཉིད་ཅན་དུ་བཞེངས་ནས་གཞན་ལ་ཕན་པ་རྒྱ་ཆེན་པོ་འགྲུབ་པ་ནི་མྱ་ངན་ལས་འདས་པ་དང་བཞུགས་ཚུལ་མཐུན་པ་ཡིན་ནོ། །དེ་ལྟར་སྒོ་ང་དང་མངལ་སྐྱེས་སྦྱོང་བའི་བསྐྱེད་རིམ་གཉིས་ལས། ཉི་ཟླའི་
བར་དུ་ས་བོན་དང་མ་ཆེན་མའི་རྣམ་པ་ཞུ་བ་སྒོང་སྐྱེས་དང་། མངོན་བྱང་ལྔས་བསྐྱེད་ཞུ་བ་འཁོར་གྱི་ལྷ་མོའི་གླུས་བསྐུལ་བའི་རྐྱེན་གྱིས་བཞེངས་པ་མངལ་སྐྱེས་སྦྱོང་ཚུལ་ཏེ་ངེས་བརྗོད་བླ་མ་ལས། མངལ་སྐྱེས་ཀླུ་ཡི་སྦྱོར་བ་ཡི། །བསྒོམ་པ་རྣམས་ནི་ཡོངས་སུ་བརྟག །སྒོང་སྐྱེས་གླུ་ནི་མེད་པ་སྟེ། །ཞེས་སོ། །གསུམ་པ་དེ་རྫོགས་རིམ་གྱི་སྨིན་བྱེད་དུ་འགྲོ་ཚུལ་ནི། ལམ་དུས་ཀྱི་བསྐྱེད་རིམ་ཞུ་བདེ་དང་སྟོང་ཉིད་དུ་འབྲེལ་བ་ལས། ཁུ་རྡུལ་རླུང་གསུམ་སེམས་དང་བཅས་པའི་ཆ། རྣམ་པར་དག་པས་རྫོགས་རིམ་སྨིན་བྱེད་འགྱུར། །དེའང་འགྲོ་བའི་ལུས་རྟེན་ཁྱད་པར་ཅན་ལ་རིགས་སམ་ཁམས་ཀྱི་སྦྱང་གཞི་ལྷུན་གྲུབ་ཏུ་ཡོད་པ་གང་ཞིག་ཐབས་ཀྱིས་ཟིན་པའི་ཚེ་གྲོལ་བར་འགྱུར་བ་ཡིན་ཏེ། འདི་ལྟར་ཁམས་དཀར་དམར་གྱི་རྟེན་གཉིས་ལ་བརྟན་པའི་ཚུལ་དུ་འབྲེལ་བའི་རྣམ་པར་ཤེས་པའི་སེམས་ཀྱི་རང་བཞིན་རྒྱུ་དུས་ན་དབང་གིས་སྨིན་པར་བྱས་པ་གང་ཞིག །རྟོག་བཅས་ཀྱི་ལམ་བསྐྱེད་རིམ་གྱི་དུས་སུ་མངོན་བྱང་ལྔ་ལ་བརྟེན་ནས་བསྒོམས་པས་རྫོགས་རིམ་གྱི་སྨིན་བྱེད་དུ་འགྲོ་བ་ཡིན་ཏེ། ཅིའི་ཕྱིར་ན་དེའི་དུས་ནའང་གནད་དུ་བསྣུན་པའི་གཙོ་བོ་ནི་ཁམས་དཀར་དམར་གཉིས་དང་རྣམ་པར་ཤེས་པ་གསུམ་ཡིན་པའི་ཕྱིར་རོ། །བཞི་པ་བྱེད་ལས་ཀྱི་ཁྱད་པར་དག་རྫོགས་སྨིན་གསུམ་ནི། མངོན་བྱང་སོ་སོའི་རང་བཞིན་རྒྱུ་འབྲས་འབྲེལ་བ་ཅན་ཡིན་པས་འཁོར་བ་དང་མཐུན་པའི་རྣམ་པ་ལམ་བྱེད་ཀྱི་སྦྱང་བྱ་སྲིད་པའི་རང་བཞིན་སྦྱོང་ཞིང་དག་པར་བྱེད། རྒྱལ་བའི་བཞུགས་ཚུལ་དང་མཐུན་པའི་མོས་པ་ལམ་བྱེད་ཀྱིས་སོ་སོའི་ཡེ་ཤེས་སུ་རྫོགས་པར་བྱེད། གཉིས་ཀ་རྫོགས་རིམ་གྱི་སྨིན་བྱེད་
དུ་འགྲོ་བའི་འབྲས་བུ་ལམ་བྱེད་ཀྱི་མཚན་དཔེའི་བདག་ཉིད་དུ་སྨིན་པར་བྱེད་པའོ། །གསུམ་པ་ནི་དེ་ལྟར་ཕ་མའི་འདུ་འཕྲོད་ལ་བརྟེན་པའི་སྐྱེ་གནས་རགས་པ་གཉིས་ཀྱི་སྦྱང་གཞི་སྦྱོང་བྱེད་སྤྲོས་པ་ཅན་མ་ཧཱ་ཡོ་ག་ལྟར་བཤད་ནས། ཕྲ་བ་ཁུ་རྡུལ་གྱི་རྒྱུ་ལམ་བརྟེན་པ་གཉིས་ནི་སྐྱེ་བ་འགྲུབ་པར་སླ་བས་བསྐྱེད་རིམ་ཀྱང་སྤྲོས་པ་ཆུང་བ་ཡིན་པའི་ཚུལ། དྲོད་གཤེར་སྐྱེས་ནི་གཉིས་པོ་འདུས་པ་ལས། རྣམ་ཤེས་ཞུགས་པའི་མོད་ལ་གཟུགས་འགྲུབ་བཞིན། །ལྷ་ཡི་མཚན་དང་མངོན་རྟོགས་དྲན་ཙམ་ལ། །ཕྱག་རྒྱ་རྫོགས་པའི་བསྐྱེད་རིམ་ཚང་བར་བསྒོམ། །དེ་ཡང་བསྐྱེད་རིམ་སྤྲོས་པ་ཅན་གཉིས་ལ་གོམས་པ་ཆེར་ཐོབ་པ་རྣམས་ཀྱིས་ནི་དྲོད་གཤེར་སྐྱེས་སྦྱོང་བ་ཨ་ནུ་ཡོ་གའི་བསྐྱེད་རིམ་གྱི་གྲུབ་མཐའ་གཙོ་ཆེ་བར་བསྒོམ་སྟེ། བང་མཛོད་འཕྲུལ་གྱི་ལྡེ་མིག་ལས། །ཨ་ནུ་ཡོ་གའི་ཐེག་པར་ནི། །སྙིང་པོ་ཙམ་ཞིག་བརྗོད་བྱས་པས། །མ་སྐྱེས་རྫོགས་པའི་ལྷ་རུ་བསྒོམ། །ཞེས་པ་ལྟར་བརྟན་པ་ཆེར་ཐོབ་པས་དབྱིངས་དང་ཡེ་ཤེས་ཟུང་དུ་འཇུག་པའི་རྩལ་སྣང་གི་འཕེན་པས་གནས་ལུས་ལ་སྲེད་པ་དང་ལེན་པའི་བག་ཆགས་སྦྱང་བ་ཙམ་ལས། མངོན་བྱང་ལྔ་ལ་སོགས་པའི་རྣམ་པ་དང་ཚིག་སྤྲོས་ལ་མ་བརྟེན་པར་ལྷ་སོ་སོའི་སྙིང་པོ་བརྗོད་པ་ཙམ་གྱིས་ཤེས་རབ་ཀྱི་དབྱིངས་སྟོང་ཉིད་ཀུན་ཏུ་བཟང་མོའི་ཀློང་ལས་ཀུན་རྫོབ་བདེན་པའི་ཆ་ལྷའི་ཕྱག་རྒྱར་རྫོགས་པར་གསལ་བ་ནི་དྲོད་གཤེར་སྐྱེས་སྦྱོང་བའི་བསྐྱེད་རིམ་བདེ་སྟོང་དབྱེར་མེད་ཆེན་པོ་སྟེ། རང་ཤར་ལས། རིམ་གྱིས་འཛུག་པ་གང་ཞེ་ན། དབྱིངས་དང་ཡེ་ཤེས་རིམ་གྱིས་ཞུགས་ནས་ནི། ཞེས་པ་ལྟར་རོ། །བཞི་པ་ནི། བརྫུས་ཏེ་སྐྱེ་བ་སྐད་ཅིག་དྲན་རྫོགས་ཏེ། །མིང་དང་གཟུགས་ལ་མ་བརྟེན་ཝལ་གྱིས་གསལ་
འདི་ལྟར་ལྷ་དེའི་རྣམ་པའམ་སྙིང་པོ་ཙམ་དྲན་པའི་མོད་ལ་སྐད་ཅིག་དྲན་རྫོགས་སུ་བསྐྱེད་པ་ཆུ་ལས་ཉ་འཕར་བ་བཞིན་ཏེ། རང་ཤར་ལས། གཅིག་ཅར་འཇུག་པ་གང་ཞེ་ན། ལྷ་རྣམས་མ་བསྐྱེད་སྙིང་པོ་དྲན་པས་རྫོགས། །ཞེས་དང་། སྡོམ་འབྱུང་ལས། སྐད་ཅིག་ཙམ་པའི་རྣལ་འབྱོར་གྱིས། །རྫོགས་པའི་རིམ་པ་བསྒོམ་པ་ནི། །ཁམས་གསུམ་གཞལ་ཡས་ཁང་བདག་ཉིད། །སྲོག་ཆགས་རྣམས་ནི་དཀྱིལ་འཁོར་བ། །དེ་དབུས་སྐད་ཅིག་རྣམ་པ་ཡི། །དཀྱིལ་འཁོར་བདག་པོ་རྣལ་འབྱོར་པའོ། །ཞེས་པ་ལྟར་རོ། །དེ་ལ་ཁ་ཅིག་བསྐྱེད་ཚུལ་ཕྱི་མ་ལ་བསྐྱེད་རིམ་གྱི་ཡན་ལག་མ་ཚང་ཞེས་དགག་པ་ནི་མུན་སྤྲུལ་ཏེ། དེ་ལྟ་ན་བརྫུས་སྐྱེས་སྦྱོང་བའི་བསྐྱེད་རིམ་ལའང་མངལ་འབྱིན་གྱི་གནས་སྐབས་ལ་སོགས་པའི་ཡན་ལག་སྦྱར་དགོས་པའི་ཕྱིར་དང་། གཞན་ཡང་སྦྱོང་ཚུལ་བཞི་མེད་ན་འཁོར་བའི་འདྲ་འབག་བཞི་ཀ་ཚང་བ་ལམ་དུ་བྱས་པར་ག་ལ་འགྱུར། གལ་ཏེ་མངོན་བྱང་སོ་སོའི་གནས་སྐབས་སུ་སྐྱེ་གནས་བཞི་གའི་བག་ཆགས་སྦྱོང་བས་སོ་ཟེར་ན། འོ་ན་སྐབས་དེའི་མངོན་བྱང་དང་པོ་ལ་མཚོན་ན། བརྫུས་སྐྱེས་ཀྱི་སྦྱང་གཞི་སྟོང་པའི་ཚ་ཙམ་ལས་མེད་པས་དེར་སྦྱར་བར་འོས་པའི་ཡན་ལག་དེ་ཅི་ཞིག་ཡིན། དེ་ནི་དགྱེས་རྡོར་ལ་སོགས་པའི་རྒྱུད་གཞན་ལས་མ་བཤད་དོ་ཞེ་ན། རང་ཉིད་མོས་ཤིང་ཞེན་པའི་བག་ཆགས་དང་འབྲེལ་བ་མཐའ་དག་རྒྱུད་ཡིན་ལ། དེ་ལས་གཞན་པ་ནི་བརྫུས་མའོ་ཟེར་བ་འདི་གངས་རིའི་ཁྲོད་པ་རྣམས་ལ་གྲགས་པས་བདེན་མོད་ཀྱི་སྐད་ཅིག་དྲན་རྫོགས་ཀྱི་བསྐྱེད་རིམ་རྒྱལ་བའི་བཀའ་ལས་གཞན་དུ་གྱུར་པའོ་སྙམ་ན། མངོན་བརྗོད་བླ་མའི་རྒྱུད་ལས། གཅིག་ཅར་འཇུག་པའི་སྦྱོར་བ་ཡི། །བདག་གི་ལུས་ནི་རྣམ་པར་
བསམ། །ཞེས་དང་། གསང་བ་མཆོག་ནི་བླ་ན་མེད། །སྐད་ཅིག་གིས་ནི་བདག་བསྒོམ་པ། །ཧེ་རུ་ཀ་དཔལ་གཟུགས་སུ་བྱ། །ཞེས་དང་། སྡོམ་འབྱུང་ལས། དབང་པོ་རྣོན་པོས་སྐད་ཅིག་གིས། །རྣམ་པས་སེམས་ཙམ་དཀྱིལ་འཁོར་བསམ། །ཞེས་དང་རྡོ་རྗེ་ དྲིལ་བུ ་པས། སེམས་ཅན་བརྫུས་ཏེ་སྐྱེ་བ་བཞིན། །ས་བོན་མེད་པར་རྣམ་པར་བསྒོམ། །ཞེས་སོ། །དེའང་སྒྱུ་མ་ལམ་བྱང་པ་རྣམས་ཀྱིས་ནི་སྒྱུ་མའི་དམིགས་གཏད་ལ་ཆེ་ཐད་དུ་བྱ་དགོས་ལ། སྒྱུ་མ་མཁན་ཆེས་བྱང་པ་རྣམས་ཀྱིས་ནི་སྒྱུ་མའི་སྤྲུལ་པ་བདེ་བླག་ཏུ་འགྲུབ་པ་དང་འདྲ་བས། སློབ་པའི་གནས་སྐབས་ན་གོམས་པ་བརྟན་པ་དང་མི་བརྟན་པའི་ཁྱད་པར་ལ་དཔགས་ནས་བསྒོམ་པ་ནི་འདིར་ཡང་འདོད་པ་ཡིན་པའི་ཚུལ། བསྒོམ་ཚུལ་བཞི་པོའང་དང་པོའི་ལས་ཅན་ལ། སྒོང་སྐྱེས་སྦྱོང་བའི་བསྐྱེད་རིམ་གཙོ་བོར་བསྒོམ། རིམ་བཞིན་གོམས་པ་བརྟན་དང་བརྟན་པ་ཆེ། །ཤིན་ཏུ་བརྟན་པའི་མཐུ་དང་མཐུན་པར་སློབ། །ཅེས་འདོམས་པ་སྟེ་གང་ཟག་གཅིག་ལའང་བྱིས་པ་དང་། དར་བབས་དང་། རྒན་པོའི་གནས་སྐབས་གསུམ་ཡོད་པ་བཞིན་རགས་པའི་དཀྱིལ་འཁོར་ཡུད་ཙམ་གྱི་མངོན་དུ་བྱེད་མི་ནུས་ཚུན་དང་པོ་གཉིས་དང་། ཕྲ་བ་དེའི་སྤྱན་གྱི་དཀར་ནག་ཚུན་ཆོད་ལ་གསལ་སྣང་ཐོབ་པའི་བར་དྲོད་གཤེར་སྐྱེས་དང་། དཀྱིལ་འཁོར་གྱི་འཁོར་ལོ་ཡུད་ཙམ་ལ་རྫོགས་པའི་ཚེ་རྫུས་སྐྱེས་ལྟར་བསྒོམ་པ་སྟེ། སྡོམ་འབྱུང་ལས། བསྐྱེད་པའི་རིམ་པས་དཀྱིལ་འཁོར་བསྒོམ། རྟུལ་འབྲིང་དག་གིས་བསམ་པར་བྱ། །རྣལ་འབྱོར་སྐད་ཅིག་རྣམ་པ་ཡི། །སེམས་ཙམ་ཉིད་ཀྱི་དཀྱིལ་འཁོར་ཏེ། །སྐད་ཅིག་རྣམ་པའི་རྣལ་འབྱོར་གྱིས། །རྫོགས་པའི་རིམ་པ་བསྒོམ་པར་བྱ། །ཞེས་སོ། །དེའང་རང་གི་སྡེ་པས་བརྫུས་སྐྱེས་སྦྱང་བ་ཤིན་ཏུ་རྣལ་འབྱོར་གྱི་བསྐྱེད་
རིམ་དུ་འདོད་པའང་ལུང་གི་དོན་ལ་གོ་བ་མ་ལྷོངས་པ་སྟེ། ཤིན་ཏུ་རྣལ་འབྱོར་ནི་འཕགས་ལམ་གྱི་རྫོགས་རིམ་མོས་སྤྱོད་ལས་འཕགས་པ་ཡིན་པས་དེ་ལ་བསྐྱེད་རིམ་གྱི་གྲུབ་པའི་མཐའ་འགལ་བའི་ཕྱིར་རོ། །འོན་རྨད་བྱུང་རྒྱལ་པོ་ལས། ཡེ་ནས་ལྷུན་མཉམ་དཀྱིལ་འཁོར་ལ། །ཡིན་པར་ཤེས་ནས་བསྒོམ་པ་ལས། །ཐ་དད་བློ་ཡི་རིམ་པ་ཡིས། །སྤྱན་དྲངས་གཤེགས་གསོལ་འདིར་མི་དགོས། །ཞེས་པས་བསྐྱེད་རིམ་སྤྲོས་པ་མེད་པ་མ་བསྟན་ནམ་ཞེ་ན། དེས་རང་གཞུང་གི་གྲུབ་མཐའ་བསྐྱེད་རིམ་དུ་སྟོན་པ་མིན་པར་སློབ་མ་དག་ཆེན་ཡེ་ཤེས་ཀྱི་དཀྱིལ་འཁོར་དུ་འཇུག་པ་ལ་སོགས་དགོས་པ་རེས་འགའ་བའི་སླད་དུ་ཡིན་ཏེ། གང་ལ་གང་འདུལ་གྱི་བསྐྱེད་རིམ་ཙམ་པོ་པ་འགའ་ཞིག་སངས་རྒྱས་ཀྱི་ས་ནའང་བསྒོམ་པ་ཡོད་པ་བཞིན་ནོ། །གལ་ཏེ་ལུང་དུ་གྲུབ་ཚད་དེའི་གྲུབ་མཐའ་ཡིན་ན་ཉན་ཐོས་ཐེག་པ་ནས་རིམ་གྱིས་འཇུག་ཚུལ་བསྟན་པའང་དེར་འགྱུར་དགོས་པས་གཅིག་ཅར་བ་འཕགས་ལམ་གྱི་རྫོགས་རིམ་དུ་མི་འགྱུར་རོ། །དེ་སྐད་དུ་རང་གཞུང་ལས། སངས་རྒྱས་སེམས་ཡིན་སྨོས་ཅི་དགོས། །སེམས་ཅན་ཀུན་ཀྱང་རང་གི་སེམས། །སྟོན་པས་བསྟན་པའང་རང་གི་སེམས། །དེ་ཕྱིར་ངོ་བོ་ཉིད་མཉམ་པས། །འཕགས་ལམ་ངེས་དོན་འདི་ལས་མེད། །ཅེས་བསྟན་པ་ཡིན་ནོ། །དེ་ལྟ་བུའི་བསྐྱེད་རིམ་ཀྱང་སྣང་བའི་ཆ་ཐབས་སུ་བྱས་པའི་ཆ་ཙམ་ལས་དོན་ལ་བསྐྱེད་རྫོགས་ཡ་མ་བྲལ་བར་ཉམས་སུ་ལེན་པའི་ཚུལ། ཀུན་ཀྱང་དེ་བཞིན་ཉིད་ཀྱི་ཏིང་ངེ་འཛིན། །སྤྲོས་པ་ཀུན་དང་བྲལ་བའི་ཤེས་རབ་གདངས། །ཀུན་སྣང་སྙིང་རྗེའི་འཕེན་པས་བསྐྱེད་རིམ་དུ། །ཤར་བ་ཐབས་ཀྱི་
ལམ་མཆོག་མ་ནོར་ཞིང་། །སྣང་དུས་ཉིད་ནས་རང་བཞིན་མ་གྲུབ་པ། །ཟབ་མོ་སྣང་སྟོང་ཐབས་ཤེས་འབྲེལ་བའི་ལམ། །དེ་ལ་སྔགས་བླ་མེད་ཀྱི་བསྐྱེད་རིམ་བསྒོམ་པ་རྣམས་ཀྱང་ཐོག་མར་སྒོང་སྐྱེས་དང་མངལ་སྐྱེས་སྦྱོང་བ་ནས་རིམ་པར་སློབ་པའི་ལམ་ལ་འཇུག་དགོས་ན། གཉིས་ཀའི་སྔོན་དུ་འགྲོ་བ་ནི་དེ་བཞིན་ཉིད་ཀྱི་ཏིང་ངེ་འཛིན་ཡིན་ལ། དེའི་རང་བཞིན་ནི་ཟབ་མོ་སྟོང་པ་ཉིད་ཀྱི་གནས་ལུགས་རྟོགས་པ་ལས་ཤེས་དགོས་པས་ཐོག་མར་གཞི་རང་བཞིན་ལྷུན་གྲུབ་ཀྱི་ལྟ་བ་གཏན་ལ་ཕེབས་པ་གཅེས་ཏེ། དེ་དབང་དུས་སུ་བྱིན་རླབས་འཕོ་བའི་སྟོབས་ཀྱིས་སམ། གསུམ་པའི་དཔེའི་ཡེ་ཤེས་ལ་བརྟེན་ནས་རྒྱུད་ལ་སྐྱེས་ན་ཆོ་ག་ལས་ཐོབ་པ་ཡིན་པས་སྨོས་ཅི་དགོས། གཞན་དུ་ན་མདོ་ལམ་དུ་ཐོས་བསམ་ལ་བརྟེན་ནས་སམ། གལ་ཏེ་སྔགས་ལམ་འབའ་ཞིག་ལ་བརྟེན་པ་ཡིན་ན་རྒྱུད་བཤད་པ་དང་མན་ངག་བསྟན་པ་ལས་རིག་པར་བྱ་དགོས་ཏེ། དེ་ལ་དག་པ་གཞིའི་གནས་ལུགས་ནི་གསང་བའི་སྙིང་པོ་ལས། སྟོང་པ་བདག་མེད་ཡེ་མཁྱེན་རང་རིག་ཐུགས། །དམིགས་བྱ་དམིགས་བྱེད་མེད་པར་དྲན་དབང་བསྒྱུར། །ངོ་མཚར་སྐུ་གསུམ་ཡོན་ཏན་ཞིང་ཁམས་ལས། །གཞན་ན་མེད་དེ་དེ་ཉིད་དེ་ལྟར་ཡིན། །ཞེས་པ་ལྟར་གདོད་མའི་སེམས་ཉིད་དེ་ནི་སྟོང་པ་ཆོས་སྐུའི་སྙིང་པོ་ཅན་ཡིན་པས་ནམ་མཁའ་ལྟར་གོ་ཕྱེད་པ། གསལ་བ་ལོངས་སྐུའི་རང་བཞིན་ཅན་ཡིན་པས་ཉི་ཟླ་ལྟར་རང་འོད་གསལ་བ། འཆར་ཚུལ་སྤྲུལ་སྐུའི་བདག་ཉིད་ཅན་ཡིན་པས་ཡིད་བཞིན་གྱི་ནོར་བུ་ལྟར་འདོད་དགུ་ལྷུན་གྱིས་གྲུབ་པས་བདེ་བར་གཤེགས་པའི་སྙིང་པོ་ཅན་ནམ། རྒྱལ་བའི་སྐུ་གསུམ་གྱི་འཆར་གཞིར་ཡེ་ནས་རང་ཆས་སུ་ཡོད་པ་ཉིད་དོ། །དེའི་ངང་ལས་སེམས་ཅན་རྣམས་འཁྲུལ་ཚུལ་ཡང་། །ཨེ་མ་ཧོ་བདེ་གཤེགས་སྙིང་པོ་
ལས། རང་རང་རྣམ་རྟོག་ལས་ཀྱིས་འཁྲུལ། །སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །བདག་དང་བདག་གིར་སོ་སོར་འཛིན། །ཞེས་དང་། རྔམ་སློག་ལས། ཨེ་མའོ་ཡ་ནས་རྣམ་དག་ཆོས། །སྣ་ཚོགས་སྣང་ཡང་རྟོག་པར་གསང་། །ངོ་བོ་ཉིད་ནི་བརྗོད་དུ་མེད། །སྣོད་མ་ཡིན་ལ་བསྟན་པར་དཀའོ། །ཞེས་ངོ་བོའི་བཞུགས་ཚུལ་ལ་འཁྲུལ་པ་མེད་བཞིན་གློ་བུར་བའི་བདག་རྟོགས་གིས་སྲིད་པའི་ཉེས་དམིགས་བརྒྱ་ཕྲག་གི་དབུས་སུ་ཁྲིད་ནས་གནས་རིགས་སོ་སོར་ལོག་རྟོག་གིས་ཀུན་ནས་བརྟགས་ཀྱང་རང་གི་རང་བཞིན་ལ་ཉམས་པ་རྡུལ་ཙམ་མེད་ཅེས་བསྟན་པ་སྟེ། སྔ་མའི་འཕྲོར། སྲིད་གསུམ་ཡེ་ནས་དག་པའི་རང་བཞིན་ལ། །བདག་ཏུ་རྟོག་པ་སྲིད་རྩེའི་ཉེས་དམིགས་ཀྱིས། །ཡུན་རིང་དུས་ནས་འཕྱམས་པའི་འགྲོ་བ་རྣམས། །མི་མཐུན་བདེ་སྡུག་གནས་རྣམས་སོ་སོར་བཟུང་། །ལོས་རྟོག་གོམས་པའི་དབང་གིས་ཀུན་བརྟགས་ཀྱང་། །རང་བཞིན་ཉིད་ལས་ཉམས་པ་རྡུལ་ཙམ་མེད། །ཅེས་སོ། །དེ་ལྟར་གཞི་དངོས་པོ་གཤིས་ཀྱི་བཞུགས་ཚུལ་ལ་རང་བྱན་ཚུད་པས་ལྟ་བ་གཏན་ལ་ཕེབས་པ་ལ། དེ་བཞིན་ཉིད་ཀྱི་ཏིང་ངེ་འཛིན་ཅེས་བྱ་སྟེ། ངོ་བོའི་ཆ་ནས་ཤེས་རབ་ཡིན་ཀྱང་མོས་པས་དཔྱོད་པའི་ལམ་ལ་བསམ་གཏན་ལྟར་སྣང་བས་ཏིང་ངེ་འཛིན་གྱི་སྒྲ་ཞུགས་པའོ། །དེ་སྐད་དུ་ཀུན་བྱེད་ལས། དེ་ནི་མ་ནོར་བ་ཡི་རང་བཞིན་ལ། །བཞིན་ནི་བཅོས་པ་མེད་པའི་བདག་ཉིད་ཅན། །ཉིད་ནི་ངོ་བོ་ཉིད་ལ་བཏགས་པ་ཡིན། །ཞེས་སོ། །གནས་ལུགས་དེ་སྒྲ་ཇི་བཞིན་པར་རྟོགས་ན་འཕགས་པའི་བདེན་མཐོང་ཡིན་པས་ས་དང་པོ་ནས་ཡོད་པའི་ལྷག་བསམ་རྣམ་དག་གི་སེམས་རང་ཤུགས་ལ་སྐྱེ་བས་
བསྐྱེད་རིམ་ལ་ཆེ་ཐད་དུ་མི་དགོས་ཏེ། རྡོ་རྗེ་མཁའ་འགྲོའི་ལྔ་བཅུ་པ་ལས། རྣལ་མའི་སྦྱོར་བ་རྟོགས་གྱུར་པས། །བཅོས་མ་དག་ནི་མི་བྱའོ། །དཔེར་ན་གཟིངས་ལ་འཇུས་ནས་ནི། །ཆུ་ཡི་ཕ་རོལ་འགྲོ་བར་བྱེད། །ཕ་རོལ་ཕྱིན་ནས་འདོར་བ་ལྟར། །བཅོས་མ་དག་ཀྱང་དེ་བཞིན་ནོ། །ཞེས་སོ། །དེ་ལྟ་ནའང་དང་པོའི་ལས་ཅན་ལ་རྫོགས་རིམ་འགྲུབ་པའི་རྒྱུ་ཡིན་པས་བསྐྱེད་རིམ་བསྔགས་པའི་རྒྱུ་མཚན་ནི། བརྟག་གཉིས་ལས། བསྐྱེད་པའི་རིམ་པའི་རྣལ་འབྱོར་གྱིས། །བརྟུལ་ཞུགས་ཅན་གྱིས་སྤྲོས་པ་བསྒོམ། །སྤྲོས་པ་རྨི་ལམ་ལྟར་བསྒོམ་ན། །སྤྲོས་པ་ཉིད་ཀྱིས་སྤྲོས་མེད་བྱེད། །ཅེས་སོ། །དེ་ཡང་བསྐྱེད་གཞི་དེ་བཞིན་ཉིད་ཀྱི་ཤེས་རབ་དེ་སོ་སོ་སྐྱེ་བོའི་ས་ལ་རྗེས་དཔག་ཙམ་ཡིན་པས་ཆོས་ཐམས་ཅད་བསམ་དུ་མེད་པའི་དེ་ཁོ་ན་ཉིད་ཀྱི་གཟུགས་བརྙན་ཙམ་དུ་སྣང་བའི་ཏིང་ངེ་འཛིན་ལྟར་གྱུར་པའི་དེ་བཞིན་ཉིད་དེའི་གདངས་སྙིང་རྗེ་ཆེན་པོར་ལངས་བ་མོས་པས་དཔྱོད་པའི་སེམས་བསྐྱེད་ལ་ཀུན་ཏུ་སྣང་བའི་ཏིང་ངེ་འཛིན་དུ་བཏགས་ནས་དེའི་འཕེན་པས་བསྐྱེད་རིམ་གྱི་རྒྱུ་ཚོགས་བསྒྲུབ་པ་ནི་ཐབས་ཀྱི་ལམ་མ་ནོར་བ་ཡིན་ནོ། །གྲུབ་མཐའ་འདི་འཆའ་ཤེས་པ་བྱུང་ན་ཁོ་བའི་མན་ངག་ལས་ཡིན་པའང་རིག་པར་བྱའོ། །དེའི་ཕྱིར་སྟོང་པ་ཉིད་དང་སྙིང་རྗེ་ཆེན་པོ་ཟུང་དུ་འཇུག་པའི་གསལ་སྣང་ལྷའི་མཚན་དཔེར་ཤར་ཀྱང་། སྣང་བའི་དུས་ཉིད་ནས་རང་བཞིན་ཀྱིས་མ་གྲུབ་པའི་སྣང་སྟོང་གི་རང་བཞིན་མེ་ཏོག་དང་། །དྲི་ངད་ལྟར་ཐབས་དང་ཤེས་རབ་ཏུ་འབྲེལ་བ་ནི་བསྐྱེད་རྫོགས་ཟུང་འཇུག་གི་དོན་མ་འཁྲུལ་བ་ཡིན་ཏེ། བརྟག་གཉིས་ལས། བསྐྱེད་པའི་རིམ་པ་ཉིད་དང་ནི། །རྫོགས་པ་ཡི་ནི་རིམ་པ་ཉིད། །རིམ་གཉིས་མཉམ་པར་བཞག་ནས་ནི། །རྡོ་རྗེ་ཅན་
གྱི་ཆོས་འཆད་དོ། །ཞེས་པ་ལྟར་རོ། །དེའང་འདི་ལྟར་རྟེན་གཟུགས་སྐུ་རྣམ་པ་གཉིས་འཐོབ་པའི་རྒྱུ་ནི་བསྐྱེད་རིམ་ཀྱིས་བྱེད་ལ། བརྟེན་པ་ཐུགས་དེ་ཁོ་ན་ཉིད་ཀྱི་ཡེ་ཤེས་འཐོབ་པ་དེ་ལ་རྫོགས་རིམ་ཀྱི་བྱ་བས་རྒྱས་ཐེབས་པས་བྱེད་པའི་ཚུལ་སྔ་མ་ལས། བཅོམ་ལྡན་འདས་ཀྱིས་བཀའ་བསྩལ་པ། ཨེ་མ་བྱང་ཆུབ་སེམས་དཔའ་ཆེ། །དད་པའི་ཤུགས་ཀྱིས་རབ་ཏུ་ཉམས། །ལུས་ཀྱི་དངོས་མེད་ག་ལ་བདེ། །བདེ་བ་སྨྲ་བ་མི་ནུས་སོ། །ཁྱབ་དང་ཁྱབ་བྱེད་ཚུལ་གྱིས་ནི། །བདེ་བས་འགྲོ་བ་ཁྱབ་པ་ཉིད། །ཇི་ལྟར་མེ་ཏོག་ལ་གནས་དྲི། །མེ་ཏོག་དངོས་མེད་ཤེས་མི་འགྱུར། །དེ་བཞིན་གཟུགས་སོགས་དངོས་མེད་པས། །བདེ་བ་ཉིད་ཀྱང་དམིགས་མི་འགྱུར། །ཞེས་སོ། །དེ་ལས་འགལ་བའི་དམིགས་བཅས་བསྐྱེད་རིམ་ནི། །མུ་སྟེགས་བྱེད་དང་གདོན་གྱི་རིགས་ལའང་ཡོད། །སྤྱིར་མུ་སྟེགས་བྱེད་དགེ་བ་དང་ལྡན་པ་དཔག་ཏུ་མེད་པ་ཡོད་ཀྱང་དེའི་རྒྱུད་སྡོམ་པས་བསྡམས་པ་མ་ཡིན་པས་བར་མ་དགེ་བ་ཙམ་ལས་མེད་པ་ལྟར། རིག་འཛིན་གྱི་སྡོམ་པ་དང་མི་ལྡན་པའི་བསྐྱེད་རིམ་ལ་སོགས་གསང་སྔགས་ཀྱི་ཐབས་ལམ་ཀྱིས་ཀྱང་འཚང་རྒྱ་བར་མི་ནུས་ལ། ཁྱད་པར་བསྐྱེད་རིམ་སོ་སོའི་སྦྱང་གཞི་སྦྱོང་བྱེད་ཀྱི་རྟེན་ཅིང་འབྲེལ་འབྱུང་མི་ཤེས་ཤིང་རྣམ་པ་ཐམས་ཅད་དུ་ཤེས་རབ་དང་བྲལ་བའི་ལམ་སྣང་ཕྱོགས་ཀྱི་ཁ་དོག་དང་དབྱིབས་ཀྱི་རྣམ་པ་ཙམ་ལ་རྟག་པར་བལྟ་བའི་བསྐྱེད་རིམ་ནི་མུ་སྟེགས་བྱེད་དང་ཡི་དྭགས་མཐུ་བོ་ཆེ་རྣམས་ལའང་ཡོད་དེ། མུ་སྟེགས་བྱེད་ཀྱི་གསང་སྔགས་ཀྱི་གྲུབ་འབྲས་དང་། བདེ་འགྲོའི་ལུས་རྟེན་ལ་བསྐྱེད་རིམ་རང་རྒྱུད་དུ་སྤྱད་པའི་གོམས་པ་མདོར་དུ་བརྟས་པའི་གདོན་གྱི་
རྣམ་འགྱུར་ལས་ཀྱང་ཤེས་སོ། །ཚུལ་བཞིན་དུ་གྲུབ་པའི་འབྲས་བུ་ནི། སྔགས་སུ་བྱང་ཆུབ་སེམས་དཔའི་མཐོང་ལམ་ལ། ཕྱག་རྒྱ་ཆེན་པོ་མཆོག་གི་དངོས་གྲུབ་ཅེས། །ཤིན་ཏུ་གྲགས་པ་མངོན་དུ་བྱེད་པའི་ཐབས། །སྣང་ཆ་ལྷ་སྐུར་གསལ་བ་བསོད་ནམས་ཚོགས། །དེ་ལ་རང་བཞིན་མ་གྲུབ་ཡེ་ཤེས་ཏེ། །ཚོགས་གཉིས་ཉེ་རྒྱུར་བསྟེན་པའི་དབང་རྣོན་ནི། །ལམ་ལྔར་འབྲེལ་བ་རིགས་འཛིན་རྣམ་པ་བཞིའི། །ཐེམ་སྐས་ཉིད་ལས་ངེས་པ་ལྔ་ལྡན་སོགས། །སྐུ་ལྔའི་ཞིང་དུ་མིག་འཕྲུལ་ལྟ་བུར་འགྲོ། །དེའང་ཐེག་ཆེན་གྱི་གང་ཟག་རིགས་གཉིས་ལས་ཐབས་སམ་ལམ་ཡང་རྣམ་པ་གཉིས་སུ་བསྟན་ཏེ། གང་ཟག་འདོད་ཡོན་ལ་གདུང་པ་དང་མི་ལྡན་པ་རྣམས་ལ་ནི་བྱང་ཆུབ་སེམས་དཔའི་ཐེག་པ་གསུངས་ལ། འདོད་ཡོན་སྤང་མི་ནུས་པ་རྣམས་ལ་ནི་སྔགས་ཀྱི་ཐབས་ཁྱད་པར་ཅན་གྱི་ཐེག་པ་གསུངས་པ་ལྟར་མཐོང་ལམ་མ་སྐྱེས་ཀྱི་བར་དུ་ལམ་དེ་གཉིས་སོ་སོའི་རིགས་ཀྱི་ནུས་པ་གསོས་བཏབ་ནས་སྦྱངས་པ་ལས། ནམ་ཞིག་སྐྱེས་པ་ན་ངོ་བོ་ལ་གཉིས་སུ་མེད་པས་བྱང་ཆུབ་སེམས་དཔའི་ས་ལས་ནི་མཐོང་ལམ་རྣམ་པར་མི་རྟོག་པའི་ཡེ་ཤེས་ཞེས་གྲགས་ལ། །སྔགས་སུ་ནི་ཕྱག་རྒྱ་ཆེན་པོ་མཆོག་གི་དངོས་གྲུབ་ཅེས་གྲགས་པ་བརྟན་པ་གང་ཞིག །མཚན་ཉིད་ཐེག་པ་ལྟར་ཐབས་ཕྱོགས་རེ་བ་ཙམ་པས་མེད་ཅིང་སྤང་གཉེན་གཉིས་གཉིས་བྱེད་པའི་དཀའ་ཐུབ་ཀྱིས་དུས་ཡུན་རིང་པོར་མི་གདུང་བར། འདིར་སྔགས་ཀྱི་ཐེག་པ་ཐབས་བསམ་གྱིས་མི་ཁྱབ་པ་དང་ལྡན་པས་ལྷག་པའི་ལྷའི་བསྐྱེད་རིམ་གྱི་ལམ་དུ་ཕོ་བྲང་རྣམ་སྣང་། རྗེས་ཆགས་རྡོ་རྗེ་འཆང་། དབང་བསྐུར་མི་བསྐྱོད་པ། མཆོད་པ་དོན་གྲུབ། བསྟོད་པ་རིན་འབྱུང་། བདུད་རྩི་མྱོང་བ་འོད་དཔག་མེད་དེ་ཡན་ལག་དྲུག་རྫོགས་སུ་ཉམས་སུ་བླངས་པས་ཐ་དད་པའི་ཡེ་ཤེས་ལྔ། བྱང་
ཆུབ་ཀྱི་སེམས་དང་དྲུག་གིས་བསོད་ནམས་ཀྱི་ཚོགས་རྫོགས་ནས་ཚེ་གཅིག་ལ་སོགས་པར་སའི་ཡོན་ཏན་རྫོགས་པར་བྱེད་པའི་ཚུལ། རྡོ་རྗེ་གུར་ལས། སངས་རྒྱས་གནས་གཞི་རྫོགས་བྱས་ནས། །ཀུན་ཏུ་བཟང་པོའི་བདེ་བ་དངོས། །རྣམ་པ་ལྔ་པོ་བསྒོམས་བྱས་ཏེ། །རང་ལྷག་ལྷ་ཡི་སྒྲུབ་ཐབས་བྱ། །དེ་བཞིན་དཀྱིལ་འཁོར་རྣམ་བཀོད་ལ། །མཆོད་བསྟོད་བདུད་རྩི་མྱང་སོགས་པ། །རིམ་པ་འདི་ཡིས་བསྒོམས་བྱས་ན། །ཡན་ལག་དྲུག་གི་སྦྱོར་བར་འདོད། །ཅེས་སོ། །དེ་ལྟ་བུའི་བསྐྱེད་རིམ་རྒྱས་པ་གཉིས་ལ་ཐུན་མོང་དུ་གྱུར་པ་ཕྱག་རྒྱ་བཞིས་བཅིང་བ་དང་། དབང་བསྐུར་བ་དང་། རྒྱས་གདབ་པའི་ཚུལ་གསུམ་ལས། དང་པོ་ནི། ཡེ་ཤེས་པ་སྤྱན་དྲངས་པའི་དེ་མ་ཐག་གི་བྱ་བ་དེ། རང་རང་གི་ཕྱག་རྒྱ་དང་བཅས་པའི་བཛྲ་ཨངྐུ་ཤས་དམ་ཚིག་སེམས་དཔའི་སྤྱི་བོར་ཡེ་ཤེས་སེམས་དཔའ་དགུག །བཛྲ་པཱ་ཤ་ཧཱུྃ་གིས་དམ་ཚིག་སེམས་དཔའ་ལ་ཡེ་ཤེས་པ་གཞུག །སྥོ་ཊ་བཾ་གྱིས་དབྱེར་མེད་དུ་བཅིང་། ཨཱ་བེ་ཤས་དགྱེས་པ་བསྐྱེད་པའོ། །དེ་ལྟར་བདག་དམ་ཚིག་པ་བསྐྱེད་པ་ལ་ཡེ་ཤེས་པ་དགུག་གཞུག་གིས་གཅིག་ཏུ་འདྲེས་པ་ལ་སྦྱོར་བའི་ཏིང་ངེ་འཛིན་ནམ་སྙོམས་འཇུག་གི་ཐ་སྙད་ཀྱང་ཐོབ་ལ། འཁོར་གྱི་ལྷ་རྣམས་རྫོགས་པར་བསྐྱེད་པ་ལ་དཀྱིལ་འཁོར་རྒྱལ་མཆོག་དང་། མཆོད་བསྟོད་ཕྲིན་ལས་ལ་སོགས་པ་ལས་རྒྱལ་མཆོག་སྟེ་ཏིང་འཛིན་གསུམ་དུ་བཤད་ནས་ངོ་བོ་ཉིད་སྐུ་དང་། ལོངས་སྐུ་དང་། སྤྲུལ་སྐུ་འགྲུབ་པའི་རྟེན་འབྲེལ་ལམ་བྱེད་དུ་བསྟན་པ་ནི་སམྦུ་ཊིར། དང་པོ་སྦྱོར་བའི་ཏིང་འཛིན་མཆོག །རྣལ་འབྱོར་པས་ནི་སྙོམས་འཇུག་བྱ། །དེ་ནས་དཀྱིལ་འཁོར་རྒྱལ་པོ་མཆོག །དེ་ནས་ཡང་ནི་ལས་རྒྱལ་པོ། །ཞེས་སོ། །
གཉིས་པ་ནི། བེམ་པོ་རི་ཁམས་དང་སྐྱེ་མཆེད་ཟད་པར་བྱ་བའི་ཕྱིར་གདན་གསུམ་ཚང་བའི་དབང་ལྷ་སྤྱན་དྲངས་ནས་ཆོ་གའི་སྙིང་པོ་བསྡུས་པས་དབང་བཞི་ག་བསྐུར་བའང་ཡོད་དེ་ལཱུ་ཡི་པའི་མངོན་རྟོགས་ཀྱི་འགྲེལ་པ་བཞིན་ནོ། །འོན་ཀྱང་ཕལ་ཆེར་ལ་བྱང་ཆུབ་སེམས་ཀྱི་རང་བཞིན་དུ་གནས་པའི་ཆུ་རྒྱུན་གྱིས་དབང་བསྐུར་བས་བག་ཆགས་ཀྱི་དྲི་མ་ཐམས་ཅད་བཀྲུས། སྨིན་མཚམས་དང་། མགྲིན་པ་དང་། སྙིང་ག་དང་། རྐང་མཐིལ་ཡན་ཆད་གང་བ་ལས་དབང་བཞི་ཐོབ། ཆུ་ལྷག་མ་གྱེན་དུ་འཁྱིལ་བ་ལས་རིགས་བདག་གི་རྒྱས་གདབ་པའོ། །དེའི་དགོས་པ་ནི་ཀུན་རྫོབ་ཏུ་བསྐྱེད་གཞིའི་ཕུང་པོ་ཁམས་དང་སྐྱེ་མཆེད་སྦྱང་ལ་དོན་དམ་པར་གློ་བུར་བའི་སེམས་ཀྱི་བག་ཆགས་སྦྱང་བའི་ཚུ། དུས་འཁོར་འགྲེལ་ཆེན་ལས། འདིར་རྡུལ་ཕྲ་རབ་ཚོགས་པའི་བདག་ཉིད་ཀྱི་ཕུང་པོ་ཁམས་དང་སྐྱེ་མཆེད་རྣམས་མ་གཏོགས་པ་སེམས་ཙམ་གྱིས་ཤེས་རབ་ཡེ་ཤེས་རང་རིག་པར་མི་འགྱུར་བ་རྨོངས་པ་རྣམས་ཀྱིས་བརྗོད་པར་བྱ་བ་གང་ཡིན་པ་དེ་ནི་མ་ཡིན་ཏེ། གང་གི་ཕྱིར་གློ་བུར་བའི་སེམས་ཀྱི་བག་ཆགས་ཀྱི་དབང་གིས་སོ། །འདིར་ཕུང་པོ་ཁམས་དང་སྐྱེ་མཆེད་ཅེས་བྱ་བ་ནི་གློ་བུར་བའི་སེམས་ཀྱི་བག་ཆགས་སོ། །ཞེས་སོ། །གསུམ་པ་ནི། དགྱེས་རྡོར་ལས། ཕྱག་རྒྱ་རྟགས་དང་མཚན་མ་སྟེ། །འདིས་ནི་རིགས་ནི་མཚོན་པར་བྱ། །ཞེས་རིགས་བདག་གི་རྒྱས་འདེབས་པ་འདི་ནི་རྡོ་རྗེ་ཐེག་པའི་གཞི་ལམ་འབྲས་གསུམ་གྱི་མཚོན་དོན་ཏེ། དེ་ལ་སྤྱིར་མི་བསྐྱོད་པས་རྣམ་སྣང་ལ་སོགས་བཞི་ལ་རྒྱས་འདེབས་པའི་དོན་ནི། མི་བསྐྱོད་པ་སེམས་ཀྱི་ངོ་བོ་ཉིད་ཡིན་ལ། གཟུགས་ལ་སོགས་པ་མིང་གཞིའི་ཕུང་པོ་སེམས་ཙམ་གྱི་ལས་སུ་ཟད་པས་དེ་དག་ཀྱང་སེམས་སུ་ཤེས་པར་བྱ་བའི་དོན་དུ་རྒྱས་གདབ་
པ་ནི་རང་བཞིན་ལ་རང་བཞིན་གྱི་རྒྱ་ཞེས་ཀྱང་བྱའོ། །དབྱེ་ན་གཙོ་བོ་ཡབ་ཡུམ་རང་སེམས་སུ་ཤེས་པ་ལ་ཡིད་ཀྱི་ངོ་བོ་མི་བསྐྱོད་པས་རྒྱས་འདེབས་པ་ནི་ངོ་བོ་ལ་ངོ་བོ་ཉིད་ཀྱི་རྒྱ། ལུས་ཀྱི་ངོ་བོ་རྣམ་པར་སྣང་མཛད་ལ་སེམས་རྣམ་པར་དག་པའི་ངོ་བོ་མི་བསྐྱོད་པས་རྒྱས་འདེབས་པ་ནི་ལུས་ལ་སེམས་ཀྱི་རྒྱ། ཡིད་རྣམ་པར་དག་པའི་ངོ་བོ་མི་བསྐྱོད་པ་ལ་ལུས་རྣམ་པར་དག་པ་རྣམ་སྣང་གིས་རྒྱས་འདེབས་པ་ནི་སེམས་ལ་ལུས་ཀྱི་རྒྱ། རྒྱུ་འདོད་ཆགས་རྣམ་པར་དག་པའི་ངོ་བོ་འོད་དཔག་མེད་ལ་འབྲས་བུ་སེར་སྣ་རྣམ་པར་དག་པའི་ངོ་བོར་ནི་འབྱུང་གིས་རྒྱས་འདེབས་པ་ནི་རྒྱུ་ལ་འབྲས་བུའི་རྒྱ། འབྲས་བུ་ཕྲག་དོག་རྣམ་པར་དག་པའི་ངོ་བོ་དོན་ཡོད་གྲུབ་པ་ལ་རྒྱུ་འདོད་ཆགས་རྣམ་པར་དག་པའི་ངོ་བོ་འོད་དཔག་མེད་ཀྱིས་རྒྱས་འདེབས་པ་ནི་འབྲས་བུ་ལ་རྒྱུའི་རྒྱའོ། །སྤྱིར་མ་དག་པའི་ཕུང་ཁམས་སྐྱེ་མཆེད་ལྟར་བསྒོམ་པ་ནི་ཀུན་བརྟགས་ལ་གཞན་དབང་གི་རྒྱ། ལྷ་རྣམས་ཀྱི་སྤྱི་བོར་སོ་སོའི་རིགས་བདག་གིས་རྒྱས་གདབ་པ་ནི་གཞན་དབང་ལ་གཞན་དབང་གི་རྒྱ། རིགས་བདག་དེ་རྣམས་ཀྱི་སྤྱི་བོར་རང་རང་གི་རིགས་ཀྱི་ཕྱག་མཚན་གྱིས་རྒྱས་གདབ་པ་ནི་གཞན་དབང་ལ་ཡོངས་གྲུབ་ཀྱི་རྒྱ་སྟེ། དེ་བཞིན་དུ་སྐྱེ་མཆེད་བཅུ་གཉིས་ཀྱི་ལྷ་ལ་རྒྱས་འདེབས་ལུགས་ཀྱང་མིག་ལ་རྣམ་སྣང་། རྣ་བ་ལ་མི་བསྐྱོད་པ། སྣ་ལ་རིན་འབྱུང་། ལྕེ་ལ་འོད་དཔག་མེད། ལུས་དབང་ལ་དོན་གྲུབ། ཡིད་ལ་མི་བསྐྱོད་པ། སྒྲ་ལ་རིན་འབྱུང་། དྲི་ལ་འོད་དཔག་མེད། རོ་ལ་དོན་གྲུབ། རེག་བྱ་དང་ཆོས་ལ་མི་བསྐྱོད་པ། ཁམས་ལ་མཚོན་ན་ས་ལ་རྣམ་སྣང་། ཆུ་དང་ནམ་མཁའ་ལ་མི་བསྐྱོད་པ། མེ་ལ་སྣང་མཐའ། རླུང་ལ་དོན་གྲུབ་སྟེ་སོ་
སོའི་ཡོན་ཏན་གྱི་ཆ་དང་བྱེད་ལས་དང་མཐུན་པའི་དག་པ་སྦྱར་རོ། །འདི་ནི་ཤིན་ཏུ་གལ་ཆེ་བ་ཡིན་ཏེ་རིགས་འཆོལ་བ་ལས་དངོས་གྲུབ་ཉམས་པའི་ཚུལ་སྔ་མ་ལས། རིགས་འཆོལ་བསྒོམ་པའི་སྦྱོར་བ་ལས། དངོས་གྲུབ་མེད་ཅིང་སྒྲུབ་པོའང་མེད། །ཅེས་སོ། །སྤྱིར་ལམ་ཐམས་ཅད་ཐབས་ཤེས་སུ་འབྲེལ་དགོས་པས་བསྐྱེད་རིམ་གྱི་དུས་ཐབས་སྣང་བའི་ཆ་ནས་སངས་རྒྱས་ཀྱི་སྐུ་དང་ཞིང་ཁམས་ཀྱི་རྣམ་པ་ལམ་བྱེད་ལ་བརྟེན་ནས་བསོད་ནམས་ཀྱི་ཚོགས་རྫོགས། ཤེས་རབ་སྟོང་བའི་ཆ་ནས་དེའི་རང་བཞིན་རང་རྒྱུད་པར་བལྟ་བའི་ངོ་བོ་ཉིད་དུ་གྲུབ་པ་མེད་པར་རྟོགས་པས་ཡེ་ཤེས་ཀྱི་ཚོགས་རྫོགས་པ་སྟེ། ཧེ་རུ་ཀ་ཡི་ཞལ་ལུང་ལས། སྣང་ཆ་ལྷ་སྐུར་གསལ་བ་ཡི། །བསོད་ནམས་ཚོགས་ཀྱང་འདི་ཡིས་རྫོགས། །དེ་ལ་དངོས་ཞེན་རྣམ་དག་པས། །ཡེ་ཤེས་ཚོགས་ནི་རྫོགས་པ་ཡིན། ཞེས་སོ། །དེ་ཡི་དབང་པོ་རྣོན་པོས་བསྐྱེད་རིམ་བརྟན་པའི་ཉེ་རྒྱུ་ལས་རྒྱ་ལ་བརྟེན་ཏེ་ཕུང་ཁམས་ལྷར་བསྐྱེད་པ་ནས་རྫོགས་རིམ་གྱི་རྟོགས་པ་མཐར་ཕྱིན་པའི་བར་གྱི་ལམ་ལྔའི་རིམ་པ་ཇི་ལྟར་བགྲོད་ཚུལ་གྱི་དབང་དུ་བྱས་ན་རིག་པ་འཛིན་པའི་སྡེ་སྣོད་ལས། ཕུང་པོ་ཁམས་རྣམས་ལྷ་རུ་བསྒོམ། །འཛབ་དང་འཕྲོ་འདུ་ཚོགས་ཀྱི་ལམ། །དེ་ཉིད་འདྲིས་བྱེད་སྦྱོར་བའི་ལམ། །ཀུན་ཏུ་བཟང་པོ་ཧེ་རུ་ཀ །སེམས་སུ་སྨིན་པ་མཐོང་བའི་ལམ། །ཤིན་ཏུ་བརྟན་པ་བསྒོམ་པའི་ལམ། །དབྱིངས་ཡེ་གཉིས་མེད་མཐར་ཕྱིན་ལམ། །ཞེས་པ་ལྟར་དེ་ཡང་བསྐྱེད་རིམ་བཟླས་བརྗོད་ཏིང་ངེ་འཛིན་གསུམ་དུ་འབྲེལ་བ་ལས་དངོས་གྲུབ་འཐོབ་ཅིང་། དེའི་རྩ་བ་ཡང་འགྲོ་བའི་ཡིད་སེམས་རྟོག་བཅས་དབང་ཤེས་ལས་སུ་རང་ཞིང་གནས་འགྱུར་བ་ལས་འབྱུང་བའི་ཕྱིར་ན། ཐོག་མར་ཆོས་ཐམས་ཅད་ཡི་གེའི་སྒོ་ལ་
གནས་པ་ནས་རིམ་པར་སློབ་པའི་ཚུལ། གསང་རྙིང་ལས། སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །ཞེས་དང་། འཇམ་དཔལ་སྒྱུ་འཕྲུལ་ལས། ཨ་ནི་ཡིག་འབྲུ་ཀུན་གྱི་མཆོག །དོན་ཆེན་ཡི་གེ་དམ་པ་ཉིད། །ཁོང་ནས་འབྱུང་བ་སྐྱེ་བ་མེད། །ཅེས་དང་། རྒྱལ་བའི་ཡུམ་ལས། ཨ་ཞེས་བྱ་བ་ནི་མ་སྐྱེས་པའི་ཕྱིར་ཆོས་ཐམས་ཅད་ཀྱི་སྒོའོ། །ཞེས་པ་ལྟར། རང་བཞིན་ལྷུན་གྲུབ་ཀྱི་ཡི་གེ་འོད་གསལ་བའི་སེམས་ཉིད་དང་། ལུས་གནས་རྩའི་ཡི་གེ་དབྱངས་གསལ་ལྷའི་ས་བོན་དང་། སྒྲ་དོན་རྟགས་ཀྱི་ཡི་གེ་སྒྲ་སྤྱི་དང་དོན་སྤྱིའི་རྣམ་པར་བཏགས་པ་དང་། དེ་དག་བྲིས་པ་གཟུགས་བརྙན་དུ་གནས་པ་ལཉྩ་དང་ནཱ་ག་ར་ལ་སོགས་པ་རྒྱ་གར་ཤར་ནུབ་ཀྱི་ཡི་གེ་དང་། བོད་ཀྱི་ཡི་གེས་མཚོན་པའི་ལྷའི་ཐུགས་སྲོག་དང་། སྔགས་ཕྲེང་ལ་སོགས་པ་ལ་ཐོག་མར་དམིགས་པ་བརྟན་དུ་བཅུག་ནས་དེ་ལ་གོམས་པ་དང་ཕྱག་མཚན། དེ་བརྟན་ནས་སྐུ་རྐྱང་པ། དོ་ནས་རྒྱན་དང་ཕྱག་མཚན། དེ་ནས་ཡུམ་དང་། དེ་ནས་འཁོར་གྱི་ལྷ་ཚོགས་གཞལ་ཡས་ཁང་དང་བཅས་པ་དེ་ནས་འོད་ཟེར་སྤྲོ་བསྡུ་ལ་ཞུགས་པ་ནི་དཀྱིལ་འཁོར་དང་པོའི་ཏིང་ངེ་འཛིན་ཏེ། ཚོགས་ལམ་གསུམ་རྫོགས་ནས་སྤྱན་དང་མངོན་ཤེས་ཕྲ་མོ་འགྲུབ། །སངས་རྒྱས་ཆོས་ཀྱི་རྒྱུན་གྱི་ཏིང་ངེ་འཛིན་ཐོབ། །སངས་རྒྱས་སྤྲུལ་པའི་སྐུའི་ཞལ་མཐོང་། དེ་ནས་ཚད་མེད་བཞིའི་སྒོ་སྟེང་དང་དབུས་ཀྱི་ཕྱུར་བུ་རབ་ཏུ་མཐོ་བ་ལྔར་དཀྱིལ་འཁོར་སྤྲོ་བ་ལས། དབུ་མའི་གཙང་ཁང་དུ་གཟུགས་ཀྱི་རྒྱལ་པོ་ལ་སོགས་པའི་དཀྱིལ་འཁོར་རྫོགས་པ་གཅིག་བསྒོམས་ཤིང་། དེ་ཡང་ཞི་ཁྲོ་སྤེལ་མར་བསྒོམ་པ་ལ་བརྟན་པ་ཐོབ་པས་སྦྱོར་ལམ་དྲོད་འཐོབ། དེ་བཞིན་དུ་ཤར་སྒོའི་རྟ་བབས་ཀྱི་ཁང་པར་མི་བསྐྱོད་པ་
བསྒོམས་པས་རྩེ་མོ། ནུབ་སྒོའི་ཁང་པར་སྣང་མཐའ་བསྒོམས་པས་བཟོད་པ། དེ་བཞིན་དུ་ལྷོའི་རིན་འབྱུང་གིས་ཆོས་མཆོག །བྱང་གི་དོན་གྲུབ་ཀྱིས་མཐོང་ལམ་ཐོབ་ནས་ཡོན་ཏན་བརྒྱ་ཕྲག་བཅུ་གཉིས་དང་། དུས་སྐད་ཅིག་མ་ལ་སངས་རྒྱས་བརྒྱའི་ཞལ་བལྟ་བ་ལ་སོགས་པའོ། །དེ་ལྟ་བུའི་དཀྱིལ་འཁོར་སྟོང་ཕྲག་བཅུ་གཉིས་ཀྱིས་བསྒོམ་པ་རྫོགས་པས་ས་གཉིས་པ། བྱེ་བ་ཕྲག་བཅུ་གཉིས་ཀྱིས་གསུམ་པ། བྱེ་བ་ཁྲག་ཁྲིག་ཕྲག་བརྒྱས་བཞི་པ། བྱེ་བ་ཁྲག་ཁྲིག་སྟོང་གིས་ལྔ་པ། བྱེ་བ་ཁྲག་ཁྲིག་ཕྲག་བརྒྱ་སྟོང་གི་ས་དྲུག་པ། ཁྲག་ཁྲིག་ཕྲག་བརྗོད་དུ་མེད་པའི་བསྒོམ་པས་བདུན་པ། རབ་བཀྲམ་གྱིས་བརྒྱད་པ། གཞལ་དུ་མེད་པས་དགུ་པ། གྲངས་མེད་ཀྱིས་བསམ་ཡས་ལྷུན་གྱིས་གྲུབ་པའི་དཀྱིལ་འཁོར་གྱི་བསྒོམ་པ་རྫོགས་པས་བཅུ་པ། དེའི་མཐར་རྡོ་རྗེ་འཆང་ཀུན་ཏུ་བཟང་པོ་ཧེ་རུ་ཀའི་དབང་ཕྱུག་རྣམས་ཀྱིས་འོད་ཟེར་ཆེན་པོའི་དབང་བསྐུར་བས་ས་བཅུ་གཅིག་པ་བགྲོད་པའི་སྐད་ཅིག་མ་ལ་སྔགས་ལམ་གྱི་ས་ཁྱད་པར་ཅན་རྣམས་ཀྱང་མངའ་དབང་ཆུབ་བས་རྡོ་རྗེ་འཆང་ཆེན་པོ་ཞེས་བྱའོ། །ཡང་ལམ་ལྔར་རིགས་འཛིན་བཞི་དང་འབྲེལ་བར་བགྲོད་པའི་དབང་དུ་བྱས་ན་ཀུན་མཁྱེན་ཆེན་པོའི་བཞེད་པ་ནི་བསྐྱེད་རིམ་ལ་བརྟན་པ་ཐོབ་པས་སེམས་ཉིད་ལྷར་སྨིན་ཡང་འབྱུང་བའི་སྙིགས་མ་ཉེ་རྒྱུའི་སྤྱོད་པས་སྦྱོང་བར་མ་ནུས་པ་རྣམས་ནི་ཚོགས་སྦྱོར་གྱི་ལམ་ལ་གནས་པ་རྣམ་པར་སྨིན་པའི་རིགས་འཛིན་ཞེས་བྱ་སྟེ། དེས་སྦྱོར་ལམ་ཆོས་མཆོག་མ་ཐོབ་པར་རྣམ་སྨིན་གྱི་ལུས་རྟེན་ཞིག་ན། སྲིད་པ་ཕྱི་མ་ལ་ཉིང་མཚམས་སྦྱོར་མི་དགོས་པར་བར་དོར་ཕྱག་རྒྱ་ཆེན་པོ་ཐོབ་སྟེ། སེམས་ལྷ་སྐུ་སྒྱུ་མའི་སྟོང་གཟུགས་ཙམ་དུ་སྨིན་ཟིན་པས་རྣམ་སྨིན་གྱི་ལུས་དོར་མ་ཐག་བྱང་ཆུབ་སེམས་དཔའི་མཐོང་ལམ་ཐོབ་པར་
འགྱུར་རོ། །རྟེན་དེས་ཆོས་མཆོག་ཐོབ་ན་ནི། ཚེ་ལ་དབང་བསྒྱུར་བའི་རིགས་འཛིན་གྱི་དམ་པ་འགྲུབ་པ་ཞེས་བྱ་སྟེ་ལུས་རྟེན་དེ་ཉིད་ཀྱང་དྭངས་མའི་ལུས་རྡོ་རྗེ་ལྟ་བུར་འགྱུར་ཞིང་སེམས་ཀྱང་མཐོང་ལམ་ཐོབ་པ་ཡིན་ནོ། །དེ་ལྟ་བུའི་རྟེན་གྱི་བཅུ་དྲུག་མཐུད་པའི་ལོ་གྲངས་སམ། ཡུན་དེ་སྲིད་ན་ལྷུན་གྲུབ་རིགས་འཛིན་མངོན་དུ་བྱས་ནས་མཐོང་བའི་ཆོས་ལ་མྱ་ངན་ལས་འདའ་བ་ཡིན་ཏེ་ལམ་རིམ་ལས། དོན་མཐོང་འཇུག་པ་མཐར་ཕྱིན་པའི། །ཚོགས་སྤྱོད་བསྒྲུབ་པའི་དངོས་གྲུབ་ཀྱིས། །ལུས་ཁམས་སྐྱེ་གནས་ཟག་པ་ཟད། །རྡོ་རྗེའི་ལུས་གྱུར་ཚེ་ཡི་རིགས། །མཐོང་བའི་ཆོས་ལ་མྱ་ངན་འདའ། །ལུས་མ་བོར་བ་རྒྱལ་བའི་ས། །ཞེས་སོ། །སྔགས་ཀྱི་གཞུང་ཁ་ཅིག་ལས་ཚེ་གཅིག་ལུས་གཅིག་ལ་མཁའ་སྤྱོད་བགྲོད་ནས་མྱ་ངན་ལས་འདའ་བ་དང་། ཡང་ན་སྐྱེ་བ་བདུན་དང་། འགོར་ཡང་བཅུ་དྲུག་ན་སངས་རྒྱ་བར་འདོད་པ་དང་མཚུངས་པར། འདིར་ཚེ་དབང་གི་ལུས་རྟེན་སངས་རྒྱས་གཉིས་པ་པདྨའི་ཞབས་ལྟར་སྐྱེ་ཤིའི་མིང་ཡང་མེད་པར་བྱས་པའམ། རིམ་ཞུགས་ཀྱི་དངོས་གྲུབ་ཐོབ་པ་ཡིན་ཡང་ཚེ་ལོ་བརྒྱ་པ་བཅུ་དྲུག་གི་འདུ་བྱེད་ཟད་རེས་སླར་ལ་མཐུད་དེ་བསྲིངས་པའི་ལོ་ཆིག་སྟོང་དང་དྲུག་བརྒྱའི་བར་ཚེ་གཅིག་ཏུ་བྱས་ནས་མཐར་ཕྱིན་ལྷུན་གྲུབ་ཀྱི་རིགས་འཛིན་འཐོབ་པའི་ཚུལ། རྒྱས་པ་ལས། ཚེ་ནི་བཅུ་དང་དྲུག་པ་ཡི། །བརྒྱ་བརྒྱ་དག་ཏུ་བསྣུར་ཞིང་གནས། ལུས་མ་བོར་བར་སངས་རྒྱས་པ། །ཟག་གསུམ་ཟག་པ་དེ་ལ་མེད། །ཅེས་སོ། །འདི་ལ་ཚེ་བཅུ་དྲུག་པ་གྲོང་འཇུག་ཏུ་འདོད་པ་ནི་ལུས་མ་བོར་བ་སངས་རྒྱས་པ་ཞེས་པས་སྲིད་པ་ཐ་མ་བར་བསྟན་
པ་དང་འགལ་བ་ཡིན་ནོ། །དེ་ཡང་རྡོ་རྗེ་རྩེ་མོ་ལས། སྐྱེ་བ་བཅུ་དྲུག་མཐར་ཐུག་གི །ཞི་བའི་སངས་རྒྱས་ཉིད་ཐོབ་འགྱུར། །ཞེས་དང་། བྱེད་ལས་ཀྱི་ཆ་ནས་དོན་མཐུན་ཏེ། དེ་སྲིད་དུ་ཚེ་བསྲིངས་པ་དང་། སྐྱེ་བ་བརྒྱུད་པའི་ཁྱད་པར་ཙམ་མོ། །འདི་ལ་ཟུར་ལུགས་པ་རྣམས་ནི་ཆོས་ཉིད་ཀྱི་བདེན་པ་མཐོང་ཡང་རྣམ་སྨིན་གྱི་ལས་རྟེན་སྦྱོང་བར་མ་ནུས་པ་རྣམ་སྨིན་རིགས་འཛིན་དང་། སྦྱོང་བར་ནུས་ནས་དྭངས་མའི་སྐུར་གྱུར་པ་ཚེ་དབང་དུ་འདོད་པའི་ཤེས་བྱེད་དུ། ལམ་ཆུང་ལས། ནུས་པ་ཐོབ་དང་མ་ཐོབ་པའི། །མཐོང་ལམ་གཉིས་སུ་འགྱུར་བ་ཡིན། །ཞེས་པ་འདྲེན་ཏོ། །དེ་གཉིས་ཀྱི་བཞེད་པ་ནི་དབང་པོ་རྣོ་རྟུལ་དང་ཉེ་རྒྱུའི་སྤྱོད་པ་ལ་བརྟེན་མ་བརྟེན་གྱི་ཆ་ནས་གཞལ་བ་སྟེ། སྔ་མ་ནི་ལམ་རིམ་གྱིས་བཤད་མ་ཐག་པ་ལྟར་དབང་པོ་རྟུལ་པོ་ཉེ་རྒྱུའི་སྤྱོད་པ་དང་མ་འབྲེལ་བ་ནི་རྩ་རླུང་ཐིག་ལེའི་ཟག་པ་དང་བཅས་པའི་སྒྲིབ་བྱེད་ཕྲ་མོས་ས་དང་པོའི་བར་ཆད་མེད་ལམ་ལ་བསྒྲིབས་པས་མཐོང་ལམ་གྱི་གེགས་བྱས་པར་བསྟན་ལ། དབང་པོ་རྣོན་པོ་རྣམས་ནི་ལམ་ཆུང་གིས་བཤད་པ་ལྟར་ཉེ་རྒྱུའི་སྤྱོད་པའི་མཐུ་ལས་ལུས་རྟེན་གྱི་ཆ་ནས་མཐོང་ལམ་ལ་སྒྲིབ་པ་མེད་པ་མདོ་སྔགས་སྤྱིའི་བཤད་བགྲོས་དང་མཐུན་པར་བསྟན་པ་ཡིན་པས་ཕྱོགས་འགལ་བར་མི་བཟུང་ངོ་། །དཔེར་ན་བསྐྱེད་རིམ་བརྟན་པས་སྤྱོད་པའི་ཉེ་རྒྱུ་ལས་རྒྱ་བརྟེན་པ་གང་ཞིག་འདོད་པའི་ལྷ་དང་རྗེས་སུ་མཐུན་པའི་ལུས་ཕྲ་ལང་གི་ཡོན་ཏན་བརྒྱད་ལྡན་ཐོབ་པ་འདོད་པའི་རིགས་འཛིན་དང་། ཡེ་རྒྱ་ལ་བརྟེན་པའི་དབང་པོ་རྟུལ་པོས་མིའི་ལུས་རྟེན་རགས་པ་དང་། རྣོན་པོས་སྔ་མ་དང་མཚུངས་པར་བསྒྲུབ་པ་བཞིན་ནོ། །གཉིས་ཀའང་འདོད་པའི་རིགས་འཛིན་གྱི་རྟེན་ལས་སྙིགས་མའི་ཁམས་ཟད་ནས་དྭངས་མ་འཇའ་ཚོན་གྱི་རྣམ་པའི་གཟུགས་ཀྱི་རིགས་འཛིན་དུ་གནས་བསྒྱུར་བར་བྱེད་ཅིང་། དེའང་འདོད་པའི་རིགས་འཛིན་ནི་མིའི་གནས་སུ་འོང་ཡང་བལྟར་མངོན་ལ། གཟུགས་ཀྱི་རིགས་འཛིན་ནི་གནས་རིགས་
ཐ་དད་པས་མིའི་གནས་སུ་དངོས་བསྟན་འོང་བ་མེད་ཀྱང་སྤྲུལ་པས་གཞན་དོན་བྱེད་ཅིང་། རང་ཉིད་ཀྱང་རྟེན་དེས་རྫོགས་རིམ་ལ་ཞུགས་ནས་མཆོག་གི་དངོས་གྲུབ་བླ་ན་མེད་པ་བསྒྲུབ་པར་བྱེད་དོ། །བཞེད་པ་འདི་གཉིས་ཀྱི་འགལ་བ་མཐུན་པར་བསྡུ་ཤེས་པ་ཕྱིན་ཆད་བྱུང་ནའང་མན་ངག་གི་བསྟན་བཅོས་འདིའི་མཐུར་ཤེས་པར་བྱའོ། །མདོར་བསྡུ་ན་བསྐྱེད་རིམ་བརྟན་པ་ལས་ཚོགས་ལམ་བགྲོད་ཅིང་། དྲོད་ཆེན་པོ་ཐོབ་པ་ལ་རིམ་གཉིས་ཟུང་འཇུག་ཏུ་འབྲེལ་བ་གཅེས་པ་ཡིན་ཏེ་འདུས་པའི་ལུགས་ལའང་ཐབས་ལ་མཁས་པ་དོན་གྲུབ་ཀྱི་སྦྱོར་བ་ཞེས་པས་བསྐྱེད་རིམ་དང་། སེམས་ཅན་གྱི་ཁམས་ཐམས་ཅད་སྒྱུ་མ་དང་། གཟུགས་བརྙན་མཉམ་པ་ཉིད་དང་། རྐྱེན་གྱི་རྗེས་སུ་བརྩམས་པ་ཉིད་དང་ཞེས་པས་ཤེས་རབ་དང་། ཕྱི་ཡུལ་རྣམ་པར་དབེན་པ་ཞེས་པས་ལུས་དབེན་པ་དང་། ནང་གི་ཡུལ་རྣམ་པར་དབེན་པ་ཞེས་ངག་དབེན་དང་། དེ་དག་གི་ཏིང་འཛིན་ལུས་དང་ངག་རྣམ་པར་དབེན་པ་དེ་དག་གི་ཡུལ་ཅན་དང་། སེམས་ཕྱི་རོལ་དུ་བལྟ་བའི་བྱིན་རླབས་ཀྱིས་སེམས་དབེན་དང་། སའི་རིམ་པ་ཞེས་པས་བསྐྱེད་རིམས་བདུན་དང་། དབེན་གསུམ་ས་བརྒྱད་པ་དང་། དགུ་བ་དང་། སྒྱུ་མ་ལྟ་བུའི་ཏིང་ངེ་འཛིན་གྱི་ལྷ་སྐུ་སྒྱུ་མར་རང་བྱིན་རླབས་ཀྱི་ཏིང་ངེ་འཛིན་དང་། བདག་གི་སེམས་སྣང་བ་གསུམ་པོ་མེད་པ་རྣམ་པར་དག་པས་འོད་གསལ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་དང་། དེའི་རྗེས་སུ་ཐོབ་པ་སྐྱེ་བ་ཞེས་པས་སློབ་པའི་འོད་གསལ་དང་། ཟུང་འཇུག་དང་། བྱ་བ་དང་བྲལ་བའི་བྱང་ཆུབ་སེམས་དཔའ་དེ་བཞིན་གཤེགས་པ་ཉིད་ཀྱི་སྐུའི་རྗེས་སུ་སོང་བ་དེ་བཞིན་གཤེགས་པ་ཉིད་ཀྱི་
སྤྲུལ་པ་དང་ལྡན་པ་ཞེས་སོགས་ཀྱིས་མི་སློབ་པའི་རྗེས་སུ་མཐུན་པའི་ཟུང་འཇུག་ལོངས་སྤྲུལ་གཉིས་ཀྱི་སྐུའི་ཟུང་འཇུག་དང་། རིམ་གྱིས་གནས་པ་འཕོ་བ་ཞེས་པས་ཟུང་འཇུག་རྣམས་ཀྱི་དོན་བསྡུས་པ་དང་། དེ་བཞིན་གཤེགས་པའི་སྐུ་ཞེས་པས་མི་སློབ་པའི་ཟུང་འཇུག་བསྟན་པའི་ཕྱིར་རོ། །རང་ལམ་གྱི་སྐབས་འདིར་མཐོང་ལམ་གྱི་འོད་གསལ་དེ་ལས་ལངས་པའི་སློབ་པའི་ཟུང་འཇུག་ས་གཉིས་པ་དྲི་མ་མེད་པ་ལ་སོགས་པའི་ལྷག་མ་དགུ་ནི་ཟུང་འཇུག་ཡེ་ཤེས་སྒྱུ་མའི་སྐུ་ཅན་ཕྱག་རྒྱ་ཆེན་པོའི་རིག་འཛིན་གྱི་སྒྲས་བསྡུས་པའི་བསྒོམ་ལམ་དུ་རིགས་ཀྱི་འཁོར་ལོས་བསྒྱུར་བ་དང་མཚུངས་པར་བགྲོད་པའི་ཚུལ་ལམ་རིམ་ལས། རང་སེམས་ཕྱག་རྒྱ་ཆེན་པོ་སྟེ། །བསྒོམས་པས་མངོན་དུ་གྱུར་པའི་ལྷ། །ཐུན་མོང་མཆོག་གི་མཚོན་དཔེར་ལྡན། །ལོངས་སྤྱོད་གཉིས་ལ་ཕྱག་རྒྱའི་རིགས། །རྡོ་རྗེ་འཁོར་ལོ་རིན་ཆེན་དང་། །པདྨ་རལ་གྲིའི་རིགས་འཛིན་འགྱུར། །ཞེས་སོ། །འདི་ལ་སྒྱུ་འཕྲུལ་པའི་བཤད་བགྲོས་སུ་ས་གཉིས་པ་དྲི་མ་མེད་པ་ནས་ལྔ་པ་སྤྱད་དཀའི་བར་ལ་རྟོགས་པའི་ཡེ་ཤེས་རྡོ་རྗེ་ལྟ་བུས་རང་སའི་སྒྲིབ་པ་བཅོམ་པའི་ཕྱིར། རྡོ་རྗེའི་རིགས་འཛིན་ཞེས་བྱའོ། །ས་དྲུག་པ་མངོན་དུ་གྱུར་པར་ཤེར་ཕྱིན་གཙོ་བོར་སྤྱོད་ཅིང་ཆོས་འཁོར་བསྐོར་ལ། བདུན་པར་ཡང་ཐབས་ལ་མཁས་པ་འཁོར་ལོ་ལྟར་གྱུར་པས་དེ་གཉིས་ལ་འཁོར་ལོའི་རིགས་འཛིན་ཞེས་བྱའོ། །བརྒྱད་པར་མི་རྟོག་པའི་ཡེ་ཤེས་ལ་དབང་བས་རིན་པོ་ཆེའི་རིགས་འཛིན་དང་། དགུ་པར་ཆགས་པ་མེད་པའི་ཚུལ་གྱིས་ཞིང་སྦྱོང་ཞིང་གཞན་དོན་མཛད་པས་པདྨའི་རིགས་འཛིན་དང་། བཅུ་པར་ཕྲིན་ལས་ཕུན་སུམ་ཚོགས་པས་སེམས་ཅན་གྱི་དོན་བྱེད་པས་རལ་གྲིའི་རིགས་འཛིན་ཏེ་བསྒོམ་པའི་ལམ་
གྱི་ས་བཅུ་པོ་ཕྱག་རྒྱའི་རིགས་འཛིན་དུ་བསྡུས་ནས། རྒྱུན་མཐའི་ཡེ་ཤེས་ལས་རྣམ་གྲོལ་དང་། ཁྱད་པར་གྱི་ལམ་ནི་མཐར་ལམ་ལྷུན་གྲུབ་རིགས་འཛིན་ཏེ། སངས་རྒྱས་ཀྱིས་ཡན་ལག་བདུན་དང་ལྡན་པའི་ཡེ་ཤེས་ཀྱི་གཞིར་གྱུར་པའོ། །ཞེས་འདོད་དོ། །དེའང་མཉམ་སྦྱོར་གྱི་ལུགས་ལྟར་ན་བསྙེན་སྒྲུབ་ཡན་ལག་བཞིའི་རིམ་པས་རིགས་འཛིན་གྱི་ས་རྣམས་བགྲོད་ནས་སོ་སོའི་རིགས་ཀྱི་འཁོར་ལོས་བསྒྱུར་བའི་གཙོ་བོ་འགྲུབ་པའི་ཚུལ་རྩ་རྒྱུད་ལས། བསྙེན་སྒྲུབ་བཞི་ཡི་རིམ་པ་ཡིས། །འདོད་པའི་དོན་ལ་རབ་སྦྱོར་ཞིང་། །དེ་དག་དང་ནི་དགེ་སྤྱད་ན། །འདོད་པ་དང་ནི་འགྲོ་འོང་ལྡིང་། །རིགས་ཀྱི་འཁོར་ལོ་བསྒྱུར་བ་ཡི། །གཙོ་བོ་གང་ཡང་རུང་བ་འགྲུབ། །ཚེ་འདིར་རིགས་འཛིན་ཐོབ་བྱེད་ཅིང་། །དེས་ནི་བདེ་བ་ཆེན་པོ་འགྲུབ། ཅེས་སོ། །དེ་ལ་གྲུབ་འབྲས་ཀྱི་ངོ་བོ་ངེས་པ་ལྔ་དང་ལྡན་པའི་ཁ་སྦྱོར་ཡན་ལག་བདུན་ལྡན་གྱི་ལྷ་སྐུ་ཕྱག་རྒྱ་ཆེན་པོ་ནི། གནས་ངེས་པ་ལྷུན་སྟུག་པོ་བཀོད་པར། སྟོན་པ་ངེས་པ་རིགས་ལྔའི་སངས་རྒྱས། འཁོར་ངེས་པ་ས་བཅུའི་སེམས་དཔའ། ཆོས་ངེས་པ་ཐེག་པ་ཆེན་པོ་འབའ་ཞིག་སྟོན་པ། དུས་ངེས་པ་རྟག་པ་རྒྱུན་གྱི་འཁོར་ལོར་ཁ་སྦྱོར་ཡན་ལག་བདུན་ལྡན་གྱི་རང་བཞིན་དུ་བཞུགས་པ་སྟེ། སློབ་དཔོན་ངག་གི་དབང་ཕྱུག་གིས། །ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ཡོངས་གང་རྒྱུན་མི་འཆད་དང་འགོག་པ་མེད། །ཡན་ལག་བདུན་བཤད་དོན་དང་ལྡན་པ་བསྒྲུབ་བྱ་འདིར། །བདག་འདོད་ཚད་མས་ཡོངས་བསྒོམས་བློ་ཆེན་རྣམས་ཀྱིས་བསྔགས་ཞེས་སོ། །གཞན་ཡང་སྐུ་ལྔ་ལ་སོགས་པའི་འབྲས་
བུའི་རང་བཞིན་ནི་ལེའུ་ཅན་བཅུ་གསུམ་པར་འཆད་པར་འགྱུར་རོ། །དེ་ལྟར་རིམ་པ་དང་པོ་བསྐྱེད་རིམ་གྱི་སྒོ་ནས་སྐྱེ་བ་ཀུན་རྫོབ་ཀྱི་བདེན་པ་ལམ་དུ་བྱེད་པས་རྒྱུད་སྦྱངས་ནས། ད་ནི་དེ་ཉིད་སྨིན་བྱེད་དུ་གྱུར་པའི་ངོ་བོ་རིམ་པ་གཉིས་པ་ལ་བརྟེན་ནས་འཆི་བ་དོན་དམ་བདེན་པ་ལམ་དུ་བྱེད་པ་རྫོགས་པའི་རིམ་པ་སྟོན་པའི་ཕྱིར། གཉིས་པ་རྫོགས་པའི་རིམ་པ་ཉིད་ལ་ཡང་། །ཕ་རྒྱུད་རྣམས་ལས་འབྱུང་བ་ལྔ་ཡི་རླུང་། །རྣམ་པར་དག་པའི་གསལ་སྟོང་ཡེ་ཤེས་བསྐྱེད། །མ་རྒྱུད་རྣམས་ལས་ཁམས་ལ་ཞུ་བདེ་ཡིས། །ཡེ་ཤེས་བསྐྱེད་ཕྱིར་རང་ལུས་ཐབས་ལྡན་དང་། །གཞན་ལུས་ལ་བརྟེན་དགའ་བཞིའི་ཡེ་ཤེས་བསྐྱེད། །གཉིས་མེད་རྒྱུད་ལས་གཅིག་དང་དུ་བྲལ་གྱི། །ཐིག་ལེ་ཆེན་པོའི་འོད་གསལ་གཙོར་བྱེད་ལས། །དེ་ཡང་སྤྱིར་རྫོགས་རིམ་གྱི་ངོ་བོ་ནི་རྣམ་རྟོག་གི་རང་བཞིན་ཤེས་ནས་དེ་ཉིད་མི་རྟོག་པའི་ལམ་དུ་དམིགས་པ་དང་བཅས་པའི་ཐབས་ལ་བརྟེན་པའམ། དམིགས་པ་མེད་པའི་ཤེས་རབ་ཀྱིས་འགོག་པ་སྟེ་རྡོ་རྗེ་སྙིང་འགྲེལ་ལས། རྣམ་རྟོག་རང་བཞིན་ཤེས་པ་ན། །མི་རྟོག་པ་ལ་འཇུག་པར་བྱ། །ཞེས་སོ། །དེའང་དབྱེ་ན་ཐབས་ཕའི་རྒྱུད་གསང་བ་འདུས་པ་དང་། གཤིན་རྗེའི་གཤེད་ལ་སོགས་རྣལ་འབྱོར་ཆེན་པོའི་རྒྱུད་རྣམས་ལས་ནི་འབྱུང་བ་ལྔའི་རླུང་ལ་གནད་དུ་བསྣུན་ནས་ཟབ་གསལ་ལམ། གསལ་སྟོང་རྣམ་པར་མི་རྟོག་པའི་ཡེ་ཤེས་ལ་གཙོ་བོར་དམིགས་ནས་དངོས་གྲུབ་རྣམ་པ་གཉིས་སྒྲུབ་པར་བྱེད་དོ། །དེ་ལའང་འདུས་པའི་དབང་དུ་བྱས་ན་འཕགས་ལུགས་དང་ཡེ་ཤེས་ཞབས་གཉིས་ཀྱི་ལུགས་སྲོལ་ཐ་དད་པ་ལས། དང་པོའི་ལུགས་ལ་བདེན་པ་གཉིས་ཀྱི་རྫོགས་རིམ་དང་། །དབེན་པ་གསུམ་གྱི་རྫོགས་རིམ་གཉིས་སུ་འདོད་པའི་
སྔ་མ་ནི་འདུས་པ་ཕྱི་མ་ལས། རྣལ་འབྱོར་ཡན་ལག་དྲུག་གིས་ནི། །བསྙེན་པར་བྱས་ནས་བསྒྲུབ་པ་མཆོག །བསྒྲུབ་པར་བྱ་སྟེ་གཞན་དུ་ན། །དངོས་གྲུབ་མཆོག་ནི་འཐོབ་མི་འགྱུར། །ཞེས་པ་ལྟར་སྔོན་དུ་རང་བྱིན་གྱིས་བརླབ་པ་སྒྱུ་མའི་ལུས་ཀུན་རྫོབ་ཀྱི་བདེན་པ་ཐོབ་དགོས་པའི་ཚུལ་རིམ་ལྔ་ལས། བདག་བྱིན་བརླབས་པའི་ཏིང་འཛིན་དང་། །དེ་བཞིན་འོད་གསལ་བ་ཡི་གནས། །རྒྱུ་དང་འབྲས་བུའི་ཁྱད་པར་གྱིས། །བདེན་པ་གཉིས་སུ་བསྟན་པ་ཡིན། །ཞེས་སོ། །གཉིས་པ་ནི་རིམ་ལྔ་ལས། སེམས་ཅན་ཀུན་གྱི་སྲོག་གྱུར་པ། །རླུང་ཞེས་བྱ་བས་ལས་ཀུན་བྱེད། །འདི་ནི་རྣམ་ཤེས་བཞོན་པ་སྟེ། །ལྔ་ཡི་བདག་ཉིད་བཅུ་ཡང་ཡིན། །ཞེས་པ་ལྟར་འགྲོ་བའི་ཁམས་ཐམས་ཅད་ནི་རླུང་གི་གཞན་དབང་དུ་གྱུར་པ་ཡིན་པས་དེ་དབང་དུ་འདུས་པའི་ཐབས་རྡོ་རྗེའི་བཟླས་པའམ་དག་དབེན་དང་། སེམས་ལ་དམིགས་པའམ་སེམས་དབེན་དང་། བདག་བྱིན་གྱིས་བརླབས་པ་སྒྱུ་ལུས་ཀུན་རྫོབ་བདེན་པ་སྟེ་དབེན་པ་གསུམ་དེའི་སྟེང་དུ་ཡང་དག་པའི་མཐའ་འོད་གསལ་མི་མངོན་པར་བྱང་ཆུབ་པ་དང་། གཉིས་སུ་མེད་པའི་ཡེ་ཤེས་སམ་ཟུང་འཇུག་སྟེ་རིམ་པ་ལྔའི་ལམ་གྱིས་བསྡུས་པའི་ཡོན་ཏན་གྱི་ཚོགས་མ་ལུས་པ་བསྐྱེད་པར་འགྱུར་བས་ན་རྫོགས་རིམ་ཞེས་བྱའོ། །དེ་སྐད་དུ་ཧེ་རུ་ཀ་གལ་པོ་ལས་ཀྱང་། རྡོ་རྗེའི་བཟླས་དང་སེམས་ལ་དམིགས། །བདག་བྱིན་བརླབས་དང་འོད་གསལ་དང་། །ཟུང་དུ་འཇུག་པ་འདི་ལྔ་ལ། །ཞེས་དབུ་མར་ཞུགས་གནས་ཐིམ་གསུམ་གྱི་སྟོང་པ་བཞི་དང་། དགའ་བཞིའི་ཡེ་ཤེས་བསྐྱེད་ནས་སད་རྨིའི་བསྲེ་བ་གསུམ་གསུམ་དང་། བདག་བྱིན་རློབས་པའི་རིམ་པ་རླུང་
སེམས་ཙམ་ལས་གྲུབ་པའི་སྒྱུ་མའི་ལྷ་སྐུ་དག་པའི་སྒྱུ་ལུས་སུ་བསྒྲུབ་པ་དང་། ལས་རྒྱ་ལ་བརྟེན་ནས་དེ་ཉིད་འོད་གསལ་དུ་དག་པས་རང་རྒྱུད་ལྡན་གྱི་གང་ཟག་འཕགས་པར་སོང་། བར་ཆད་མེད་ལམ་མངོན་དུ་གྱུར་ནས་ཟུང་འཇུག་གི་སྐུར་ལྡང་པའི་ཚུལ་ཇི་ལྟ་བ་རྡོ་རྗེའི་ཚིག་གིས་ཆིངས་སུ་བཅིངས་པ་ཡིན་ནོ། །གཉིས་པ་ནི་རྗེ་བཙུན་འཇམ་པའི་དབྱངས་ཀྱིས་རྗེས་སུ་བཟུང་བའི་སློབ་དཔོན་ཆེན་པོ་སངས་རྒྱས་ཡེ་ཤེས་ཞབས་ཀྱི་བཞེད་པ་སྟེ། སྒྱུ་མ་ལྟ་བུའི་ལྷ་སྐུ་ཕྱག་རྒྱ་ཆེན་པོ་གསལ་བའི་བདག་ཉིད་ཅན་དང་། དེ་ཁོ་ན་ཉིད་ལ་ཞུགས་པའི་ཐུགས་ཟབ་ཅིང་གཏིང་དཔག་དཀའ་བ་གཉིས་དབྱེར་མེད་དུ་སྦྱོར་བ་ཟབ་གསལ་གཉིས་སུ་མེད་པའི་ཡེ་ཤེས་ཀྱི་རྫོགས་རིམ་སྟེ་གྲེལ་བའི་ཐིག་ལེ་ལས། དེས་ན་ཟབ་གསལ་བྱང་ཆུབ་ནི། །གཉིས་མེད་རྟོགས་པས་དེ་གྲོལ་ལོ། །ཟང་མོ་ཁོ་ན་རྟོགས་པས་མིན། །གསལ་བདག་ཀྱང་དེ་བཞིན་ནོ། །དེ་བཞིན་ཐལ་བྱུང་ཟབ་མོ་ཡིས། །གྲོལ་འདོད་དེ་ལ་ང་མ་དད། །དེ་བས་གཉིས་མེད་རང་བཞིན་དུ། །རྟོགས་པས་ཚེ་འདིར་འབྲས་ཐོབ་དེས། །རྣམ་པར་རྟོག་པ་ཀུན་བྲལ་བས། །བསམ་བརྗོད་ཡུལ་ལས་ཤིན་ཏུ་འདས། །ཞེས་པ་སྟེ་གཞུང་འདི་ནི་རྫོགས་པ་ཆེན་པོ་དང་ཆོས་སྐད་ཤིན་ཏུ་མཐུན་པར་ཡོད་ཅིང་གྲུབ་མཐའ་འཛིན་པའང་ཡིན་ནོ། །ཡང་ཤེས་རབ་མའི་རྒྱུད་ཡང་ཕུར་དང་། ཀུན་འདུས་རིག་པ་དང་། འཁོར་ལོ་སྡོམ་པ་དང་། དགྱེས་རྡོར་ལ་སོགས་རྗེས་སུ་རྣལ་འབྱོར་རྣམས་ལས་ནི་ཁམས་བྱང་ཆུབ་ཀྱི་སེམས་ཐིག་ལེའི་རྣལ་འབྱོར་གཙོ་བོར་བྱེད་ཅིང་། དེ་ཡང་གཞན་ལུས་ལ་བརྟེན་ནས་དགའ་བཞིའི་ཡེ་ཤེས་ཀྱི་ཞུ་བདེ་འདྲེན་བས་བདེ་སྟོང་རྣམ་པར་མི་རྟོག་པའི་རྫོགས་རིམ་གཙོ་ཆེ་བ་ཡིན་ཏེ། འདིར་རྡོ་རྗེ་ཕུར་བུ་ལ་མཚོན་ན་ཕྲིན་ལས་ཀྱི་རྒྱུད་
ལས། སྲུབ་དང་བསྲུབ་པའི་ཐབས་དག་ལས། །མི་རྟོག་པ་ནི་རབ་ཏུ་སྐྱེ། །དགའ་དང་མཆོག་ཏུ་དགའ་བ་དང་། །མངོན་དགའ་རང་བཞིན་དགའ་བ་སྟེ། །རྡོ་རྗེ་དབྱིངས་ཀྱི་དབང་ཕྱུག་མ། །བགྲོད་བྱེད་མན་ངག་ངག་གིས་སོ། །དང་པོ་དགའ་བའི་དུས་སུ་ན། །དབུགས་ནི་རྒྱུ་བ་བཅུ་དྲུག་ལ། །ཆུ་ཚོད་ལྔ་པར་སྦྱར་བྱས་ཏེ། །གཟུང་དང་ལྡོག་པ་དེ་བཞིན་བྱ། །ཉི་ཁྲི་ཆིག་སྟོང་དྲུག་བརྒྱ་ནི། །ཆུ་ཚོད་སུམ་ཅུ་གཉིས་ལྡན་བྱ། །དབྱུག་གུ་དྲུག་ཅུ་རྩ་བཞི་ཡིན། །ཕྲ་མོའི་ཐུན་ནི་དྲུག་ཅུ་བཞི། །ཆེན་པོ་ཐུན་བཞི་ཐུན་བརྒྱད་ཡིན། །དགའ་བའི་གནས་སུ་དབུགས་དང་ནི། །ཐུན་ཚོད་བཅུ་གཉིས་བརྩིས་བྱས་ཏེ། །དེ་བཞིན་མཆོག་ཏུ་དགའ་བའི་དུས། །ཐུན་ཚོད་ཆུ་ཚོད་དེ་བཞིན་བསླབ། །བདེ་བ་མང་སྐྱེས་གནས་དེར་ནི། །མན་ངག་དག་ཀྱང་དེར་བསྟན་བྱ། །ཞེས་སོ། །ཁྱད་པར་དུ་དགྱེས་པ་རྡོ་རྗེ་ལ་གྲགས་པ་བརྟན་པའི་སྣང་གསུམ་དང་། རྒྱུད་གསུམ་གྱི་བཀྲི་ཚུལ་ལམ་འབྲས་བུ་དང་བཅས་པ་ཡང་ཧེ་རུ་ཀ་གལ་པོ་ལས། འཁོར་འདས་ཐུན་མོང་ལམ་དང་འདིས། །འཇིག་རྟེན་པ་དང་འཁོར་ལོ་བསྐོར། །འཁོར་འདས་ཐུན་མོང་ལམ་བཤད་ན། །སྣང་བ་གསུམ་དུ་བསྟན་པའི་ལམ། །ཀུན་གཞི་ལུས་དང་ཕྱག་རྒྱ་ཆེ། །རྒྱུ་རྒྱུད་ཐབས་དང་འབྲས་བུའི་རྒྱུད། །ཅེས་དང་། གཞན་ཡང་གླང་པོ་ཆེ་རབ་འབོགས་ཀྱི་བཀོལ་རྒྱུད་དང་མ་མོའི་རྒྱུད་ལས་དགྱེས་པ་རྡོ་རྗེའི་གདམས་པའི་གནད་ཐམས་ཅད་གསལ་བར་བསྟན་པ་ཡིན་ནོ། །གཞན་ཡང་མ་རྒྱུད་དུ་གྲགས་མཆེ་བ་མཆོག་གི་དབྱིབས་སྔགས་ཆོས་གསུམ་དང་། དཔྱིད་ཀྱི་ཐིག་ལེའི་རྫོགས་རིམ་དང་། ཁྱད་པར་དུ་བདག་བྱིན་རླབས་ཀྱི་རིམ་པ། སྣ་ཚོགས་རྡོ་རྗེའི་རིམ་པ། ནོར་བུ་འགེང་
བའི་རིམ་པ། ཛ་ལནྡྷ་རའི་རིམ་པ། བསམ་གྱིས་མི་ཁྱབ་པའི་རིམ་པ་ལྔ་ལས། དང་པོ་ནི་སྙིང་གའི་ཐིག་ལེ་ལ་དམིགས་ནས་འབྱུང་བ་ལྔའི་ཁ་དོག་དང་སྦྱར་བའི་རླུང་འབྱུང་འཇུག་གིས་སྒྲིབ་པ་སྦྱངས་ཤིང་དངོས་གྲུབ་བསྡུ་བའོ། །གཉིས་པ་ནི་འཁོར་ལོ་ལྔའི་དབུས་སུ་རིགས་ལྔའི་ཕྱག་མཚན་ལ་དམིགས་པའོ། །གསུམ་པ་ནི་རོལ་བ་ཆེན་པོའི་ངང་ནས། འཁོར་བཞིར་དགའ་བཞིའི་ཡེ་ཤེས་ངོས་འཛིན་པའོ། །བཞི་པ་ནི་རིགས་ལྔའི་ཕྱག་མཚན་སྐུར་གྱུར་པ་ལས་བདུད་རྩི་འབེབས་ཤིང་གཏུམ་མོའི་མན་ངག་དང་བསྲེ་བའོ། །ལྔ་པ་ནི་སྙིང་ག་ནས་འོད་ཟེར་སྤྲོས་ནས་བརྟན་གཡོ་འོད་ཞུའི་རྫོགས་རིམ་མོ། །གཉིས་སུ་མེད་པའི་རྒྱུད་རྡོ་རྗེ་སེམས་དཔའ་སྒྱུ་འཕྲུལ་དྲ་བ་དང་དུས་ཀྱི་འཁོར་ལོ་དང་། སངས་རྒྱས་མཉམ་སྦྱོར་ལ་སོགས་པ་ལས་ནི་རྩ་ཐིག་རླུང་གསུམ་གྱི་ཞུ་བ་དེས་དྲངས་པའི་གསལ་བ་དང་། མི་རྟོག་པ་དང་། བསམ་གྱིས་མི་ཁྱབ་པའི་ཐིག་ལེ་ཆེན་པོའི་རྣལ་འབྱོར་གཅིག་དང་དུ་བྲལ་གྱི་འོད་གསལ་ཆེན་པོའི་རྫོགས་རིམ་གསུམ་དུ་འདོད་པ་ཡིན་ནོ། །དེ་ཡང་བདེ་བའི་འོད་གསལ། གསལ་བའི་འོད་གསལ། མི་རྟོག་པའི་འོད་གསལ་གསུམ་ལས་དང་པོ་ནི། དབུ་མར་དྭངས་མ་བབས་ཏེ་ཁམས་ལས་སུ་རུང་བ་ལས་ཟག་མེད་ཀྱི་བདེ་བའི་ཏིང་ངེ་འཛིན་སྐྱེ་ལ། གཉིས་པ་ནི་རླུང་ལྔའི་དྭངས་མ་སྟོབས་སུ་གྱུར་ཏེ་དབུ་མར་ཚུད་པ་ལས་ནང་དུ་དྭངས་གསལ་སྒྲིབ་པ་མེད་པའི་བསམ་གཏན་དང་། ཕྱི་རོལ་དུ་སྣ་སྒོར་རླུང་ལྔའི་ཁ་དོག་མངོན་པ་དང་ཡེ་ཤེས་ལྔའི་འོད་གདངས་སྐུ་དང་ཐིག་ལེའི་རང་བཞིན་དུ་འཆར་ཏེ། འཇམ་དཔལ་སྒྱུ་འཕྲུལ་ལས། ཡེ་ཤེས་སྣང་བ་ལམ་མེ་བ། །འགྲོ་བའི་མར་མེ་ཡེ་ཤེས་སྒྲོན། །གཟི་བརྗིད་ཆེན་པོ་འོད་
གསལ་བ། །ཞེས་པས་མཚོན་ནོ། །དེ་བཞིན་དུ་དུས་ཀྱི་འཁོར་ལོ་ལས་རྫོགས་རིམ་ཡན་ལག་དྲུག་ཏུ་བཤད་དེ། རྩ་རྒྱུད་ལས། སོ་སོར་སྡུད་དང་བསམ་གཏན་དང་། །སྲོག་རྩོལ་དེ་བཞིན་འཛིན་པ་དང་། །རྗེས་སུ་དྲན་དང་ཏིང་ངེ་འཛིན། སྦྱོང་བ་ཡན་ལག་དྲུག་ཏུ་འདོད། །ཅེས་དང་། ཧེ་རུ་ཀ་གལ་པོ་ལས་ཀྱང་དོན་འདི་བཤད་དེ། སྦྱོར་བ་ཡན་ལག་དྲུག་གིས་བསྙེན། ཞེས་པ་ལྟར། སོར་བསམ་གཉིས་ཀྱིས་མ་གྲུབ་པ་བསྒྲུབས་ཤིང་གྲུབ་ཟིན་པ་རྟེན་པར་བྱ་བ་དང་། དེའང་དུ་བ་ལ་སོགས་པའི་སྟོང་གཟུགས་ནི་མཐར་མཚན་དཔེས་སྤྲས་པའི་སྐུར་འགྱུར་ལ། སྟོང་གཟུགས་ཀྱི་རྣམ་པ་དེ་ཉིད་ཀུན་རྫོབ་བདེན་པ་དང་། རང་བཞིན་མེད་པ་དོན་དམ་བདེན་པའོ། །སྲོག་འཛིན་གཉིས་ཀྱིས་ངག་གི་རྩ་བ་རླུང་ལ་དབང་ཐོབ་པར་བྱས་ནས་རྒྱལ་བའི་གསུང་བསྒྲུབ་ཅིང་། རྗེས་དྲན་ནི་མི་འགྱུར་བའི་བདེ་བའི་ཉེ་རྒྱུ་དང་། ཏིང་ངེ་འཛིན་ནི་ངོ་བོ་ཉིད་ཡིན་པས་རྒྱལ་བའི་ཐུགས་སྒྲུབ་བྱེད་ཡིན་ལ། དེས་ན་གཉིས་ཚན་རེ་རེ་བཞིན་སྐུ་གསུང་ཐུགས་ཀྱི་རྡོ་རྗེའི་ཏིང་ངེ་འཛིན་དུ་གསུངས་པ་ཡིན་ཏེ་རྒྱུད་ཀྱི་ལེའུ་ལྔ་པ་ལས། ལུས་ནི་དང་ཞིང་རྡུལ་ཕྲན་ཉམས་པ་ནམ་མཁའ་དང་མཚུངས་མཚན་ལ་སོགས་པ་རྣམས་ཀྱིས་རབ་རྫོགས་འགྱུར། །སྣ་ཚོགས་འཇིག་རྟེན་གསུམ་པོ་ཉིད་ནི་དྭངས་ཞིང་སྒྲིབ་པ་རྣམ་པར་བྲལ་བ་རྨི་ལམ་བཞིན་དུ་སྣང་། །སྐད་ནི་ཀུན་ནས་ཆད་པ་མེད་ཅིང་དུ་མའི་སྐད་གཞན་དག་གིས་དུ་མའི་སྙིང་ལ་འཇུག་པ་སྟེ། །སེམས་ནི་དམ་པའི་བདེ་བས་གང་ཞིང་མི་གཡོ་ཐམས་ཅད་དུས་སུ་ལྷན་ཅིག་སྐྱེས་པས་འཁྱུད་པའོ། །ཞེས་སོ། །གསུམ་པ་ནི། །སྒྱུ་འཕྲུལ་རྔམ་གློག་ལས། །
དངོས་པོ་ཐམས་ཅད་རྣམ་བྲལ་བའི། །ཕུང་པོ་ཁམས་དང་སྐྱེ་མཆེད་དང་། །གཟུང་དང་འཛིན་པ་རྣམ་པར་སྤངས། །ཆོས་བདག་མེད་པ་མཉམ་ཉིད་པས། །རང་སེམས་གདོད་ནས་མ་སྐྱེས་པ། །སྟོང་པ་ཉིད་ཀྱི་རང་བཞིན་ནོ། །ཞེས་སོ། །དེ་ལྟར་གསུམ་པོ་ཡང་། སྔ་མ་གཉིས་ནི་སྣང་བཅས་དམིགས་པའི་ལམ། །ཕྱི་མ་གཅིག་ནི་སྣང་མེད་འོད་གསལ་སྟེ། །དང་པོའི་ཕྱོགས་ལ་གནས་པ་རྩ་དང་ནི། །གཡོ་བ་རླུང་ལ་བཀོད་པ་བྱང་ཆུབ་སེམས། །གསུམ་དུ་གནས་པ་རྡོ་རྗེ་ཕུང་པོའི་གྲོང་། །དེ་ལ་ཕྱོགས་དང་པོ་སྣང་བཅས་དམིགས་པ་དང་བཅས་པའི་རྫོགས་རིམ་གྱི་མཚན་ཉིད་ནི་རྩ་རླུང་ཐིག་ལེ་གསུམ་ལ་གནད་དུ་བསྣུན་པ་ཁོ་ན་སྟེ། དེ་ལ་རྩའི་གཙོ་བོ་གསུམ་དང་འཁོར་ལོ་ལྔ། བྱེད་ལས་ཀྱི་སྒོ་ནས་ཐ་དད་དུ་གཞག་པའི་རྩ་སྟོང་ཕྲག་བདུན་ཅུ་རྩ་གཉིས་སུ་ཡོད་དེ་སངས་རྒྱས་ཐོད་པ་ལས། སྟོང་ཕྲག་བདུན་ཅུ་རྩ་གཉིས་ཀྱི། །རྩ་རྣམས་ཀྱི་ནི་རིགས་བཤད་དོ། །ཞེས་སོ། །དེ་ཡང་རྣམ་པར་འགྱུར་བའི་ལྷའི་བདག་ཉིད་དུ་གཡོ་བ་མེད་པར་གནས་པས་ན་གནས་པ་རྩ་ཞེས་བྱ་ལ། སམྦུ་ཊིར། ཧེ་རུ་ཀ་ལ་སོགས་པའི་ལྷ། །རྩ་གཟུགས་མཛེས་པར་ཡང་དག་བྱུང་། །ཞེས་སོ། །དེའི་ནང་ནས་གནད་དུ་བསྣུན་པའི་གཙོ་བོ་ལྷན་ཅིག་སྐྱེས་པའི་བདེ་བ་སྟེར་ཞིང་ལུས་ཅན་རྣམས་ཀྱི་སྲོག་ཏུ་གྱུར་པ་ནི། སཝ་དྷུ་ཏིའོ། །དེ་ལྟ་བུའི་རྩ་རྣམས་དང་རྟེན་དང་བརྟེན་པའི་ཚུལ་དུ་འབྲེལ་བའི་རླུང་གི་རང་བཞིན་ནི་གཡོ་བ་དང་། འཕྲ་བ་དང་། བསྐྱོད་པའི་བྱེད་ལས་ཅན་རྣམ་པར་ཤེས་པའི་བཞོན་པར་གྱུར་ལ། ཁམས་གསུམ་ཐམས་ཅད་ཀྱང་རླུང་གི་འདུ་བྱེད་པའི་ཕྱིར་གཡོ་བའི་རླུང་ཞེས་བརྗོད་པའོ། །དེ་ལྟར་རྩ་རླུང་གཉིས་ཅར་གྱི་བརྟེན་པ་ལྟ་བུར་གྱུར་པ་ནི་བཀོད་ལ་བྱང་ཆུབ་ཀྱི་སེམས་ཐིག་ལེ་ཉིད་དེ། དེ་ལའང་
རྩ་བ་སྤྲོས་བྲལ་གྱི་ཐིག་ལེ་དང་། འཁྲུལ་པ་མ་རིག་པའི་ཐིག་ལེ་དང་། ཁམས་ལྔ་རྫས་ཀྱི་ཐིག་ལེ་སྟེ་རྣམ་གསུམ་དུ་དབྱེ་བ་ལས། དང་པོ་ནི་དོན་དམ་པའི་བྱང་ཆུབ་ཀྱི་སེམས་སྐྱེ་འགག་གནས་གསུམ་དང་བྲལ་བའོ། །གཉིས་པ་ནི། མ་རིག་པ་དང་། འདུ་བྱེད་དང་། རྣམ་པར་ཤེས་པས་ཀུན་ནས་བརྟགས་ཤིང་མིང་གཞི་ལས་བསྒྱུར་བ་རྟོགས་པ་སྔགས་ཀྱི་ཐིག་ལེ་དང་། དེ་ལས་གཞན་དབང་ཡིད་ཀྱི་ནུས་པ་ཅན་ལ་རླུང་གི་ཐིག་ལེ་ཞེས་བྱའོ། །གསུམ་པ་ནི་ཡུལ་སྣང་གཟུགས་ཀྱི་ཕུང་པོ་སྟེ། དེ་ལ་ཕྱི་ནང་གཉིས་ལས་ཕྱི་ནི་རྣལ་འབྱོར་རྒྱུད་ཀྱི་དགོངས་པ་ཡིན་ཏེ་བཤད་མ་ཐག་པས་ཁྱབ་ལ། ནང་གི་དང་པོ་སྐྱེ་སྲིད་ལ་སྦྱོར་བའི་ཚེ་བར་དོའི་རྣམ་ཤེས་འཛིན་པའི་རྐྱེན་དུ་གྱུར་པ་ཕ་མའི་དྭངས་མ་ཁམས་དཀར་དམར་གཉིས་ཏེ་དེའང་གཡོ་བའི་རླུང་གིས་གང་དུ་བཀོད་པའི་གནས་སུ་འགྲོ་འོང་བྱེད་པའི་གཞན་དབང་ཅན་ཡིན་པས་ན་བཀོད་པ་བྱང་ཆུབ་ཀྱི་སེམས་ཞེས་བྱ་སྟེ་གསུམ་གའང་ཕན་ཚུན་འབྲེལ་བ་ཅན་ཡིན་ནོ། །དེ་ལ་རྩའི་རང་བཞིན་ནི་སྲང་ཁ་དང་འདྲ་སྟེ་རླུང་རྒྱུ་བའི་ལམ་མོ། །རླུང་གི་རང་བཞིན་ནི་ཅང་ཤེས་ལོང་བ་དང་འདྲ་སྟེ་ཐལ་བྱུང་དུ་འགྲོ་ཡང་ལམ་དང་ལམ་མ་ཡིན་པ་མི་ཤེས་སོ། །རྣམ་པར་ཤེས་པ་ནི་སྐྱེས་བུ་འཕྱེའོ་དང་འདྲ་སྟེ་རླུང་གི་ཆས་མ་ཁུར་ན་བསྐྱོད་པའི་མཐུ་མེད་དོ། །དེ་བས་ན་རྣམ་པར་ཤེས་པའི་རྟེན་ནི་ཁམས་བྱང་ཆུབ་ཀྱི་སེམས་ཡིན་ནོ། །དེ་ལས་རྫས་སྔགས་རླུང་གསུམ་གྱི་ཐིག་ལེ་མ་རིག་པ་དང་འབྲེལ་བས་འཁོར་བ་མུ་མཐའ་མེད་པར་བསྐྱེད་ལ། ཐབས་ཀྱིས་ཟིན་པ་ལས་དེའི་གཉེན་པོར་སོང་སྟེ་མྱ་ངན་ལས་འདས་པ་ལ་བསྙེན་པའོ། །དེ་ལྟར་རྩ་ཐིག་རླུང་གསུམ་རྟེན་ཅིང་འབྲེལ་འབྱུང་དུ་ཚོགས་པའི་གླིང་གསུམ་གྱི་རྟེན་ལ་ཁམས་དྲུག་ལྡན་གྱི་མཆོག་རྡོ་རྗེའི་ལུས་ཞེས་
གསུངས་ལ། ཁྱད་པར་དུ་འཛམ་བུའི་གླིང་པ་ནི་ལས་ཀྱི་འབྲས་བུ་ཚེ་འདིར་སྨིན་པ་ཤས་ཆེ་བས་ལས་ཀྱི་ས་པ་ཞེས་མཆོག་ཏུ་གྲགས་པས་ཉེ་རྒྱུའི་སྤྱོད་པ་ལ་སློབ་པའི་དུས་ཡིན་ཏེ། གཞན་དུ་བདེ་འགྲོ་ཡིན་ཡང་ལྷ་དང་ལྷ་མིན་དང་སྒྲ་མི་སྙན་གསུམ་ནི་འབྲས་བུ་ལ་སྤྱོད་པས་རྒྱུ་དམན་པའི་ཕྱིར་རོ། །རང་བཞིན་རྒྱས་པར་དབྱེ་ན་དང་པོ་གནས་པ་རྩའི་མཚན་ཉིད་ནི། །མི་ཡི་མངལ་གནས་འཛིན་པའི་ཐོག་མ་རུ། །མིག་གཉིས་དང་ནི་ལྟེ་བའི་རྩ་མདུད་ཆགས། །དེ་ལས་ལུས་བསྐྱེད་དངས་མར་གྱུར་པ་ཡི། །རྩ་གསུམ་ཀ་བ་ལྟ་བུར་གནས་པའི་ནང་། ཕྱི་རུ་ལུས་ངག་ནང་དུ་ཉོན་མོངས་གསུམ། །གསང་བར་སྐུ་གསུང་ཐུགས་ཀྱི་རྟེན་བྱེད་པའི། །ཡི་གེ་གསུམ་གནས་དབུ་མའི་ཡས་མར་སྣ། །ཚངས་པའི་སྒོ་དང་གསང་གནས་གཉིས་ལ་ཟུག །གཡས་གཡོན་རོ་རྐྱང་དཀར་དང་དམར་བ་ཉིད། །བུད་མེད་ཉིད་ལ་ལྡོག་པས་རྐྱང་མ་གཡས། །དབུ་མ་སྔོ་སྐྱར་གཉིས་པོས་ལུགས་རྒྱུད་དུ། །མདུད་པ་ཉི་ཤུ་རྩ་གཅིག་བྱས་པ་ལ། །དེ་ལ་ཀུན་གཞིའི་སྲོག་རླུང་དང་བཅས་པའི་བར་སྲིད་ཀྱི་རྣམ་པར་ཤེས་པ་ཁམས་གསུམ་དུ་སྐྱེ་བར་སྦྱོར་བ་ན། འདུ་ཤེས་དང་། རྣམ་ཤེས་ཀྱིས་ནམ་མཁའ་མཐའ་ཡས་ལ་སོགས་པའི་སྐྱེ་མཆེད་མུ་བཞི་ཡུལ་དུ་བྱས་ནས་དེར་སྐྱེ་བ་ནི་གཟུགས་མེད་པའི་ཁམས་ཏེ་ཡིད་ལུས་སོ། །བསམ་གཏན་བཞི་པོར་སྐྱེ་བ་ནི་གཟུགས་ཁམས་པ་སྟེ་འདོད་སྲེད་རགས་པ་བཅོམ་པས་བརྫུས་སྐྱེས་སོ། །མདོར་ན་ཁམས་གཅིག་ནས་ལྔའི་བར་ལྡན་པའི་གནས་ཉི་ཤུ་པོར་སྐྱེས་པ་དག་ནི་མ་རིག་པ་སྐྱེ་དང་བཅས་པའོ། །འདོད་ཁམས་རིགས་དྲུག་པོ་ནི་ཁམས་དྲུག་དང་ལྡན་ཞིང་ཕྲ་རགས་ཀྱི་ཁྱད་པར་ཅན་སྐྱེ་གནས་བཞི་དང་ལྡན་པའོ། །དེ་ལ་འདིར་གླིང་གསུམ་དུ་སྐྱེས་པའི་མི་རྣམས་མངལ་གྱི་གནས་སྐབས་འཛིན་པའི་ཐོག་
མར་མིག་གཉིས་དང་ལྟེ་བའི་རྩ་མདུད་ཆགས་ཤིང་། དེ་ལས་དྭངས་མའི་དབང་པོར་གྱུར་པ་གནས་ཚུལ་དང་མཐུན་པའི་རྩ་དབུ་མ་སྔོ་སྐྱ་སྲོག་རླུང་དང་བཅས་པའི་ཡར་སྣ་སྤྱི་གཙུག་ཏུ་སླེབས་པ་ལ་ཕ་ལས་ཐོབ་པའི་དངས་མ་ཧཾ་ཡིག་གི་རང་བཞིན་དུ་གནས་པ་དང་། མར་སྣ་གསང་བར་ཟུག་པ་ལ་མ་ལས་ཐོབ་པའི་དམར་ཆ་ཨ་ཐུང་གི་རང་བཞིན་དུ་གནས་པའི་བར་ན་ཀུན་གཞིའི་རྟེན་སྲོག་གི་རླུང་གནས་ཏེ་ནམ་མཁའ་བཞིན་ནོ། །དེ་ཡང་ལྟེ་འོག་མན་ཆད་ལ་དུང་ཅན་ཞེས་བྱ་སྟེ་དཀར་ཆ་འབབ་ཅིང་བདེ་བསྐྱེད་པའི་རྩ་ཡིན་ལ། བུད་མེད་ལ་ནི་རིགས་ཅན་ལྔས་གཏུམས་པས་ས་བོན་དངོས་སུ་མི་འཛག་ཅིང་རེག་པའི་བདེ་བ་སླར་ལ་འཕེལ་བས་ལང་ཚོ་རྒུད་ཀྱང་ཆོག་མི་ཤེས་པའོ། །དེའི་གཡས་གཡོན་དུ་རོ་རྐྱང་གཉིས་གནས་པའི་རོ་མ་དཀར་མོས་ནི་ལུས་དང་བྱང་སེམས་བསྐྱེད་ཅིང་ཁྲག་དང་དྲི་ཆེན་འཕེན་སྡོམ་གྱི་ལས་བྱེད། གཡོན་རྐྱང་མ་དམར་པོས་ནི་ངག་དང་ཁྲག་བསྐྱེད་ཅིང་དྲི་ཆུ་འབྱིན་སྡོམ་གྱི་ལས་བྱེད་དེ། དབང་མདོར་བསྟན་ལས། ཟླ་བའི་ལམ་གྱིས་དྲི་ཆེན་རྩ། །ཉི་མས་དྲི་ཆུ་འབབ་པའི། །སྐྱེ་འཆི་མཉམ་དང་འདོད་ཆགས་ལས། །སྒྲ་གཅན་ས་བོན་འབབ་པའོ། །ཞེས་སོ། །བུད་མེད་ལ་རྩ་གཉིས་པོ་གོ་ལྡོག་ཏུ་གནས་པའི་རྐྱང་མ་ལས་རིགས་ཅན་ལྔའི་རྩར་གྱིས་ཤིང་། དེའི་འདུ་བྱེད་ལས་སྐྱེས་པ་བས་ནད་དང་གཡོ་སྒྱུའི་རྣམ་གྲངས་སུམ་ཅུ་རྩ་གཉིས་དང་བུ་སྣོད་དང་། སྲིན་བུའི་རྣམ་གྲངས་ཀྱིས་ལྷག་ཅིང་རྩ་སྣ་འགྱུར་བ་ལས། ཟླ་མཚན་འོང་ངོ་། །དེ་ཡང་རོམ་ཞེས་པ་ནི་རང་བཞིན་དུ་བཞག་ན་དོན་བྱེད་མི་ནུས་པས་ན་རོ་དང་མཚུངས་ལ། དེ་ལ་རྟེན་འབྲེལ་གྱིས་གནད་དུ་བསྣུན་ན་རྩ་དེ་བདེ་བའི་ངོ་བོ་ཡིན་པས་གང་དྲན་པ་མེད་ཅིང་ཡིད་ལ་བྱར་མེད་པའི་ཆོས་ཉིད་ལ་
ཟས་ཀྱི་རོ་མྱོང་བ་ལྟར་འགྱུར་བས་རོ་མ་ཞེས་བྱའོ། །རྩ་དེ་དྲང་ན་ལུས་ཀྱི་ཡོན་ཏན་རྫོགས། འཆུས་ན་ཡོན་པོར་འོང་། སྟོད་སྨད་སྦོམ་ཕྲར་གྱུར་པས་གཟུགས་མི་སྡུག །རྩའི་སྦུག་ཡངས་ན་ལྟོ་ཆེ། །ཕྲན་ཆུང་འཁྱོག་ན་སྐྱུག་ཅིང་ཟས་མི་ལེན། གློ་བུར་གྱི་ནད་སྣ་མང་། དེས་ཟས་ལེན་པ་དང་། ཕ་མའི་ཁམས་ཀྱི་དྭངས་སྙིགས་ཕྱེད་ཅིང་འཁྲུ་བར་བྱེད་དོ། །རྐྱང་མ་ཞེས་པ་ནི་རང་བཞིན་དུ་བཞག་ན་གཞན་དང་མི་འབྲེལ་ཞིང་རེང་བུ་ལྟར་གནས་པས་རྐྱང་མ་ལ། གཅུད་པའི་མན་ངག་ལ་མཁས་ན་རྩ་དེ་སྟོང་པའི་ངོ་བོ་ཡིན་པས་ཆོས་ཉིད། རྟོག་བྲལ་གྱི་ཉམས་སྐྱེ་བས་རྟོག་པའི་ཡན་ལག་དང་མི་ལྡན་པས་རྐྱང་མའོ། །རྩ་དེ་དྲང་ན་ངག་སྙན་ལ་བརྡའ་གསལ། ཡལ་ག་བྱུང་ན་སྐད་འཛེར་ལ་བརྡའ་མི་གསལ། འཆུས་ན་གག་སྐད་དུ་འོང་། ལྟེབ་པ་ལས་ལྡབ་ལྡིབ་དང་འདར་བ་འོང་། རྩ་འདི་ཕྲན་ལུས་དྲོད་ཆེ། ཡངས་ན་ཆུང་པའོ། །དབུ་མ་ནི་གནས་ཚུལ་གྱི་དབང་དུ་བྱས་ན་དེ་གཉིས་ཀའི་དབུས་ན་ཡོད་པས་དབུ་མའམ། ཆོས་ཉིད་ཀྱི་དབང་དུ་བྱས་ན་ཡོད་མེད་གཉིས་ཀའི་མུ་དང་བྲལ་བས་བདེ་སྟོང་གཉིས་སུ་མེད་པའི་ངོ་བོ་ཡིན་པས་དབུ་མ་ཞེས་བྱ་ལ། དེའང་གནས་ཚུལ་ཀུན་རྫོབ་པའི་ཆ་ནས་རྩའི་རང་བཞིན་ཕྲན་སྐོམ་དད་ཆུང་། ཡངས་ན་སྐོམ་དད་ཆེ། འཁྱོག་ན་བློ་རྒོད་ཅིང་དངོས་མེད་ཀྱི་ལས་སྣ་ཚོགས་སྟོན། །སྦོམ་ཕྲ་ཡོད་པའམ་ཕན་ཚུན་དུ་འགྱུར་ན་སྒོ་གསུམ་ལ་རང་དབང་མེད་པའི་གེགས་སྣ་ཚོགས་འབྱུང་བ་ཡིན་ཏེ་སྲོག་དང་རླུང་ཐམས་ཅད་ཀྱི་རྟེན་གཞི་ཡིན་པའི་ཕྱིར་རོ། །དེ་ལྟར་རྩ་གསུམ་པོ་འདི་ནི་རྩ་ཐམས་ཅད་ཀྱི་ཕྱི་མོ་ཡིན་པས་མ་སྒྲ་ཞུགས་པའོ། །བྱེད་ལས་ཀྱི་སྒོ་ནས་གཞལ་ན་རོ་མ་ནས་ཁྲག་དང་ཆུ་སེར་དང་བྱང་སེམས་རྒྱུ་བས་ཐིག་ལེའི་ལས་ལ་མཁས་ན་ལུས་ཀྱི་ལས་ཟད་པར་བྱེད། ཟས་ཀྱི་ཞེན་པ་ཆོད་
ཅིང་བསམ་གཏན་གྱི་ཟས་ཀྱིས་འཚོ། །རྐྱང་མ་ནས་འབྱུང་བཞིའི་དྭངས་མ་དང་ཡེ་ཤེས་ཀྱི་རླུང་རྒྱུ་བས་རྩའི་གནད་ལ་མཁས་ན་ངག་གི་ལས་དག །གོས་ཀྱི་ཞེན་པ་ཆོད། གནད་དུ་བསྣུན་པའི་ངོ་བོ་དོན་དམ་གྱི་དབུ་མ་ནི་ཤེལ་ཀྱི་ཀ་བ་བཙུགས་པ་ལྟར་སྟོང་པ་ཟང་ཐལ་བ་འོད་ཀྱི་རང་བཞིན་ཅན་ཡིན་པས་རླུང་གི་གནད་ལ་མཁས་ན་སེམས་ཀྱི་ལས་སྦྱོང་། སྐོམ་གྱི་ཞེན་པ་དག །རྨི་ལམ་རྒྱུན་ཆོད། མཐར་ཐུག་མཐའ་གཉིས་ལ་མི་གནས་པའི་ཆོས་ཉིད་འོད་གསལ་གྱི་དོན་ལ་སྤྱོད་པས་ཀྱང་དབུ་མ་ཞེས་བྱའོ། །དེའང་སྦྱོང་བ་སྔོན་དུ་སོང་བ་དང་བསོད་ནམས་ཅན་ལ་རྩ་དེ་ཟང་ཐལ་དུ་ཡོད་པས་ཅི་བསམ་དགེ་བར་འགྱུར། ཤེས་རབ་ཆེ་ལ་ཡིད་གཞུངས་པས་ལམ་གྱི་ཡོན་ཏན་ཀྱང་བདེ་བླག་ཏུ་སྐྱེ་བ་ཡིན་ནོ། །མ་དོར་ན་ལུས་གྲུབ་ཕན་ཆད་རྩ་གྲུབ་ལ། རྩ་གྲུབ་ན་དེ་ལ་བརྟན་པའི་རླུང་དང་ཡེ་ཤེས་ལ་སོགས་པའང་གྲུབ་པས་དེ་ཐབས་ལམ་ཟབ་མོའི་གནད་ཀྱིས་གྲོལ་བ་ལ་རྡོ་རྗེའི་ལུས་ཀྱི་གནས་ལུགས་ཤེས་དགོས་པའི་ཚུལ་ཐལ་འགྱུར་ལས། ལུས་ཀྱི་གནད་ནི་རྩེ་ཡིན་ཏེ། །གནས་དང་བཀོད་པ་འགྱུར་བ་དང་། །འཁོར་ལོའི་རྟེན་དང་ལུས་ཀྱི་སྲོག །མིང་དང་བྱེ་བྲག་རྒྱུ་དང་རྐྱེན། །བྱེད་པའི་ལས་དང་མཚན་ཉིད་དང་། །ཉོན་མོངས་ལས་དང་ཡེ་ཤེས་ལས། །ལམ་ལ་བརྟེན་ནས་མངོན་སྣང་བ། །ནད་དང་འབྱུང་བའི་བྱེ་བྲག་དང་། །འཁྲུག་མལ་གནས་པའི་མཐའ་ཡིས་དབྱེ། །ལྟེམ་པས་འགགས་ལ་བཅིར་བས་འཆིང་། །མནན་པས་གནད་ལ་གཅུད་པས་གསལ། །གཅུས་པས་བག་ལ་དྲང་བས་ཤེས། །འཕུལ་བས་སྟོང་ལ་དྲག་པས་ཟིན། །དེ་ལྟར་རྩ་ཡི་གནད་ཀྱིས་ཀྱང་། །སངས་རྒྱས་གནད་ནི་མཚོན་པའོ། །ཞེས་སོ། །དེའི་ཚུལ་ནི་སློབ་དཔོན་
ཆེན་པོ་བི་མ་ལའི་དུམ་དུམ་ཁྲིགས་དང་། རྩ་གནས་འཁོར་ལོའི་རང་བཞིན་རྒྱས་པར་ཕྱེ་བ་ཐེག་པའི་མཆོག་རིན་པོ་ཆེས་ཤིན་ཏུ་གསལ་བར་སྟོན་པས་འདིར་དེ་ཙམ་མོ། །དེ་ལྟར་རྩ་གསུམ་པོ་ལུས་ཀྱི་སྲོག་ཤིང་ལྟར་གནས་བྱའི་ནང་ན་སྐུ་གསུང་ཐུགས་ཀྱི་ཡི་གེ་གསུམ་གཙོ་འཁོར་ལྟར་གནས་པ་དེས་ཕྱི་རུ་ལུས་ངག་ཡིད་གསུམ། ནང་དུ་ཉོན་མོངས་པ་གསུམ། གསང་བར་སྐུ་གསུང་ཐུགས་ཀྱི་རྟེན་བྱེད་དོ། །དེ་ལྟ་བུའི་དབུ་མ་ལ་རོ་རྐྱང་གཉིས་པོས་ལྟེ་བ་ནས་གྱེས། མཁལ་མར་གཅེར་བ་ལ་སོགས་པ་ལུ་གུ་རྒྱུད་ཀྱི་མདུད་པ་ཉི་ཤུ་རྩ་གཅིག་གི་ཚུལ་དུ་གནས་ཏེ། དུས་འཁོར་ཡེ་ཤེས་ལེའུར་ལུ་གུ་རྒྱུད་དུ་བཅིངས་པའི་རྩ། སྲོག་དང་ཐུར་སེལ་གྱི་ལམ་གསུམ། །ཞེས་སོ། །དེ་ལ་ཐུར་སེལ་གྱི་ལམ་གསུམ་ལྕགས་སྒྲོག་ལྟར་བཅིངས་པའི་རྩ་ལས་གྱེས་པའི་རྩ་ཆེན་ཉི་ཤུ་རྩ་བཞིའི་སྣ་ཟུག་པའི་རྩ་མདུང་ཡིག་འབྲུའི་རྣམ་པར་ཡོད་པ་ལས་སྐུ་གསུང་ཐུགས་ཀྱི་བྱེ་བྲག་གིས་གནས་སུ་ཉེ་བར་བརྗོད་ཅིང་། དེ་རྣམས་ལས་བྱུང་བའི་ཁམས་ཉི་ཤུ་རྩ་བཞི་པོ་དང་བཅས་པ་ནང་གི་ཡུལ་ཉི་ཤུ་རྩ་བཞིར་གྲུབ་ཚུལ་ནི། འདི་ལྟར་གཡོན་པའི་ཆུར་སྐྱེས་པའི་ཕྱེད་མ་ནི་མ་ཚོགས་མར་གནས་ཏེ་པུལླི་ར་མའོ། །ཕྲ་གཟུགས་མ་ནི་སྤྱི་གཙུག་ན་ཏེ་ཛ་ལནྡྷ་རའོ། །རྩེ་བ་མ་ནི་རྣ་བ་གཡས་པ་ན་ཏེ་ཨཽ་ཌྱན་ནོ། །ཐུང་ངུ་མ་ནི་རྣ་བ་གཡོན་པ་ལ་སྟེ་གཽ་ད་ཝ་རིའོ། །གཡོན་པ་མ་ནི་ལྟག་རྩ་སྟེ་ཨུ་རྦ་ཏའོ། །རུས་སྦལ་སྐྱོས་མ་ནི་སྨིན་དབུས་ཏེ་ར་མེ་ཤྭ་རའོ། །སྒོམ་པ་མ་ནི་མིག་གི་ཕྱི་རོལ་ཏེ་དེ་ཝཱི་ཀོ་ཊིའོ། །དབང་བསྐུར་མ་ནི་ཕྲག་པ་གཉིས་ཀྱི་རྩ་སྟེ་མ་ལ་ཝའོ། །འདི་དག་ནི་རྟག་ཏུ་ཉེ་བའི་གནས་སོ། །སྐྱོན་མ་ནི་མཆན་ཁུང་ན་སྟེ་ཀཱ་མ་རུའོ། །འཇུག་མ་ནི་ནུ་མའི་རྩ་སྟེ་ཨོ་ཊེ་ལའོ། །
མ་མོ་ནི་ལྟེ་བའི་རྩ་སྟེ་ཏྲི་ཤ་ཀུའོ། །མཚན་མོ་ནི་སྣ་རྩེར་ཟུག་པ་སྟེ་ཀོ་ས་ལའོ། །དེ་རྣམས་ལ་ཞིང་དང་ཉེ་ཞིང་ཞེས་བྱའོ། །བསིལ་མ་ནི་ཁ་ལ་སྟེ་ཀ་ལིངྐའོ། །ཚབ་མ་ནི་མགྲིན་པའི་དབུས་ན་སྟེ་ལམ་པ་ཀའོ། །དེ་དག་ནི་རྐྱང་མས་བརྟེན་པས་ཤེས་རབ་ཀྱི་རང་བཞིན་ནོ། །གཡས་པའི་ཆར་སྐྱེས་པ་གཞོལ་མ་ནི་བྲང་གཞུང་དུ་གནས་པས་ཀཉྩི་ཀའོ། །རངས་མ་ནི་སྒང་པར་འབྲེལ་བས་ཧི་མ་ལ་ཡའོ། །འདི་ལ་ཚནྡྷོ་དང་ཉེ་བའི་ཚནྡྷོ་ཞེས་བྱའོ། །ཤིན་ཏུ་གཟུགས་ཅན་ནི་མཚན་མ་ན་སྟེ་པྲེ་ཏ་བུ་རིའོ། །སྤྱི་མ་ནི་འོག་སྒོར་འབྲེལ་བ་སྟེ་གྲྀ་ཧ་དེ་ཝའོ། །རྒྱུ་སྦྱིན་ནི་བརླ་ལ་སྟེ་སཽ་རཥྚའོ། །སྦྱོར་བྲལ་མ་ནི་བྱིན་པར་སྟེ་སཽ་བརྞ་དྲཱི་བའོ། །དེ་ལ་འདུ་དང་ཉེ་འདུ་ཞེས་བྱའོ། །སྡུ་གུ་ནི་རྐང་པའི་སོར་མོར་འབྲེལ་བ་སྟེ་ནཱ་ག་རའོ། །གྲུབ་མ་ནི་བོལ་གོང་གི་རྩ་སྟེ་སིནྡྷུུའོ། །འཚེད་མ་ནི་རྐང་མཐེབ་སྤུ་འཁྱིལ་གྱི་རྩ་སྟེ་མ་རུའོ། །ཡིད་བཟངས་ནི་པུས་མོའི་གཉན་གོང་ན་ཀུ་ལུ་ཏ་སྟེ་འཐུང་གཙད་དང་། །ཉེ་བའི་འཐུང་གཅོད་རྣམས་སོ། །རྩ་དེ་དག་རྣམས་ལས་རིམ་པ་བཞིན་སོ་དང་སེན་མོ་དང་། སྐྲ་དང་། བ་སྤུ་དང་། པགས་པ་དང་། རྒྱུས་པ་དང་། ཤ་དང་། རུས་པ་དང་། མཆིན་པ་དང་། སྙིང་དང་། མིག་འབྲས་དང་། མཁྲིས་པ་དང་། གློ་བ་དང་། རྒྱུ་མ་དང་། གྲོད་པ་དང་། ལྟོ་བ་རྣམས་ཀྱི་ཁམས་བསྐྱེད་པར་བྱེད་དོ། །གཞོལ་མས་བཤད་པ་འབབ་པའི་བདག་རྐྱེན་བྱེད་པ་ནས་རིམ་པར། རྒྱུངས་པ་འབབ་ཅིང་དྭངས་སྙིགས་འབྱེད་པ་དང་། རྣག་དང་། བད་ཀན་དང་། ཁྲག་དང་། རྡུལ་དང་། ཚིལ་དང་། མཆིལ་མ་དང་། ལུད་པ་དང་། སྣ་ཆུ་རྣམས་འབབ་པའི་བདག་རྐྱེན་བྱེད་དེ་ཁམས་ཉི་ཤུ་རྩ་བཞི་པོ་ཐིམ་པ་ལས་སྙིགས་མར་
གྱུར་པའོ། །དེའང་ལོངས་སྤྱོད་རྣམས་ཀྱི་དྭངས་མ་ནི་དཀར་ཆ་ཡིན་ཏེ། ཟས་ཀྱི་དངོས་པོ་རྣམས་མེ་མཉམ་ཀྱི་རླུང་དང་། བད་ཀན་མྱགས་བྱེད་དང་། མཁྲིས་པ་མདོག་འགྱུར་གསུམ་གྱིས་བསྲེགས་བཞུ་སྦྱངས་པ་ལས་དྭངས་སྙིགས་ཕྱེ་སྟེ་དྭངས་མ་མཆན་པའི་རྩ་ཆེན་བཞི་ལས་བརྒྱུད་ཁྲག་ཆེན་དུ་གྱུར་ནས་རྩ་གནས་ཀུན་ཏུ་རྒྱུ་བས་ཁྲག་གིས་ཤ་བསྐྱེད། དེ་ལས་ཚིལ། དེ་ལས་རུས་པ། དེ་ལས་རྐང་། དེ་ལས་ཁུ་བ་བསྐྱེད་པས་ལུས་ཟུངས་བདུན་ཞེས་བྱ་ལ། ཁྱད་པར་དྭངས་མ་དཀར་པོས་ནི་ལུས་ཅན་ཀུན་གྱི་སྙིང་ལ་དགའ་བ་དང་། ཆགས་སྡང་རྨོངས་གསུམ་བསྐྱེད་པས་འཁོར་བ་བསྐྱེད་པའི་གཞིར་གྱུར་ཏོ། །དེ་ཉིད་རྒྱུད་སྡེ་རྒྱ་མཚོ་ལས་གསུངས་པའི་ཐབས་ལ་བརྟེན་ནས་འཛག་མེད་དུ་བཅིངས་ན། དགའ་བ་བཞི་ལ་བཞི་ཚན་དུ་ཕྱེ་བའི་བཅུ་དྲུག་གི་རྗེས་དྲན་བརྟན་པར་བྱས་པ་ལས་རྩ་ཐ་དད་པའི་བྱེད་ལས་དག་ནས་རྩ་ཐམས་ཅད་ཀྱང་དབུ་མར་འགྲོ། །སྔར་རྣམ་པར་རྟོག་པ་དང་བཅས་པའི་རླུང་རགས་པ་ཉིན་ཞག་ཕྲུགས་གཅིག་ལ་ཉི་ཁྲི་ཆིག་སྟོང་དྲུག་བརྒྱར་རྒྱུ་ཞིང་། དུས་སྦྱོར་བཅུ་གཉིས་ཀྱི་བདག་ཉིད་དུ་བྱས་པ་དེ། དབུ་མར་མཉམ་པར་འབབ་པའི་ཡོན་ཏན་ཐོབ་པས་རླུང་ཐམས་ཅད་ཀྱང་ཡེ་ཤེས་ཀྱི་རླུང་གི་དབང་དུ་བྱས་ནས་མཐར་ཐུག་འགྱུར་བ་མེད་པར་འགྲོ། །དེ་བཞིན་དུ་ཁམས་ཐིག་ལེའི་ཚོགས་ཀྱི་རྣམ་པར་འགྱུར་བ་བརྟེན་ནས་འབྱུང་བ་རྒས་ཤིང་རྒུད་པའི་མཐར་འཆི་བའི་རྣམ་འགྱུར་བརྟན་པ་དེའང་ཡས་བརྟན་གྱི་བདེ་བ་སྟོང་པ་ཉིད་དུ་སྦྱར་བ་འགྱུར་མེད་དུ་བྱེད་ནུས་ན་ཁམས་དེ་དག་ཀྱང་རང་བྱུང་གིས་གྱེན་དུ་འགྲོ་བས་སྙིགས་མ་ཐམས་ཅད་ཟད་པར་བྱེད་པས་རྡོ་རྗེའི་ལུས་སུ་འགྱུར་བའི་ཚུལ་ཐལ་འགྱུར་ལས། འདི་ཡི་ཡོན་ཏན་བརྗོད་མི་ལང་། །རྒས་དང་ཤི་བ་མེད་པ་དང་། །
གཞོན་ཤ་ཆགས་ཤིང་བཟང་བ་དང་། །བཅུད་ཀྱིས་ལེན་པ་ཆེན་པོར་འགྱུར། །ཞེས་སོ། །དེ་ལྟར་ཡུལ་ཉེར་བཞི་པོའང་རྒྱུད་སྡེ་གསར་རྙིང་བགྲོས་མཐུན་པར་ཧེ་རུ་ཀའི་གནས་བཅུ་དང་སྦྱར་ནས་ས་ལམ་བགྲོད་པའི་རིམ་པ་དང་བསྟུན་ན། །བརྟག་གཉིས་ལས། གནས་དང་ཉེ་བའི་གནས་དང་ནི། །ཞིང་དང་ཉེ་བའི་ཞིང་ཉིད་དང་། །ཚནྡྷོ་ཉེ་བའི་ཚནྡྷོ་དང་། །དེ་བཞིན་འདུ་བ་ཉེ་འདུ་བ། །འཐུང་གཅོད་ཉེ་བའི་འཐུང་གཅོད་ཉིད། །དུར་ཁྲོད་ཉེ་བའི་དུར་ཁྲོད་ཉི། །འདི་རྣམས་ས་ནི་བཅུ་གསུམ་ཡིན། །ཅེས་འཐུང་གཅོད་རྣམ་གཉིས་ལས་གཞན་པའི་གནས་དང་ཉེ་གནས་ལ་བཞི་བཞི། ལྷག་མ་བརྒྱད་ལ་གཉིས་གཉིས་སྦྱར་བས་ཡུལ་ཉེར་བཞི་དང་། ས་བཅུའི་དབང་དུ་བྱས་ན་སམྦུ་ཊིར། གནས་ནི་རབ་ཏུ་དགའ་བའི་ས། །ཞེས་པ་ནས། ཉེ་བའི་དུར་ཁྲོད་ཆོས་ཀྱི་སྤྲིན། །ཕ་རོལ་ཕྱིན་བཅུའི་ས་རྣམས་ལ། །ཞེས་སོ། །བཅུ་གསུམ་པའི་ཚེ་འཐུང་གཅོད་གཉིས་པོ་ཡེ་ཤེས་སུ་སྦྱོར་བའི་ཚུལ། རྒྱུད་རྒྱས་པ་ལས། འཐུང་གཅོད་དཔེ་མེད་ཡེ་ཤེས་ཏེ། །ཉེ་བའི་འཐུང་གཅོད་ཡེ་ཤེས་ཆེ། །ཞེས་སོ། །དེ་ལ་སྦས་པའི་རྩ་ལྔ་སྙིང་གར་གནས་པ་སྒྲིབ་བྲལ་དུ་གྱུར་པས་བཅུ་གསུམ་རྡོ་རྗེ་འཛིན་པ་སྟེ། འདི་ལྟར་དྭངས་མ་རྣམས་ཀྱིས་འཁོར་ལོ་སོ་སོ་གང་བའི་འགྲོས་ཀྱིས་མཐའ་གཙུག་ཏོར་མཆོག་གྲུབ་སྟེ། དེར་བརྟེན་པའི་སྐད་ཅིག་ཐ་མ་ལ་མཚན་དཔེའི་མེ་ཏོག་རྒྱས་པའི་སངས་རྒྱས་སུ་མངོན་པར་བྱང་ཆུབ་པ་ཡིན་ནོ། །དོན་དེའི་ཕྱིར་གང་ལ་གནད་དུ་བསྣུན་པའི་རྩ་འཁོར་བཤད་པ་ནི། རིམ་བཞིན་སྐུ་གསུང་ཐུགས་སམ་སྐུ་བཞི་ལྔ། ཕྱིན་དྲུག་གྲངས་ཀྱི་འཁོར་ལོའི་རྩ་འདབ་རྣམས། །ཕྲི་བསྣན་གྱུར་པ་སྦྱང་གཞི་སྦྱོང་བྱེད་ཚུལ། །ལྟེ་བར་དྲུག་ཅུ་རྩ་བཞི་མགྲིན་པ་ལ། །བརྒྱད་
ཚན་གཉིས་དང་སྙིང་གར་རྩ་འདབ་བརྒྱད། །སྤྱི་བོར་སུམ་ཅུ་རྩ་གཉིས་བདེ་སྐྱོང་ན། །བདུན་ཅུ་རྩ་གཉིས་དེ་བཞིན་གཙུག་ཏོར་ལ། །ནམ་མཁའི་ཁམས་ཀྱི་འཁོར་ལོ་ཞེས་སུ་གྲགས། །འཁོར་ལོ་རེ་དང་སོ་སོའི་བར་མཚམས་སུ། །འཕོ་བ་བཅུ་གཉིས་རླུང་གི་དུས་སྦྱོར་དང་། །དེ་བཞིན་རྟེན་ཅིང་འབྲེལ་འབྱུང་བཅུ་གཉིས་གནས། །ཁམས་ལ་འཕོ་བ་སྤངས་པའི་ལུགས་ལྡོག་འགྲོས། །གསང་གནས་ཡེ་ཤེས་འཁོར་ལོར་ཕྱིན་པ་དང་། །རླུང་གི་འཕོ་བ་གཅིག་དང་རྟེན་འབྲེལ་གཅིག །འགགས་ནས་དང་པོའི་ས་ཡི་རྟོགས་པ་འཆར། །རིམ་བཞིན་ནམ་མཁའི་ཁམས་ཀྱི་འཁོར་ལོའི་བར། །རླུང་དང་རྟེན་འབྲེལ་རེ་རེའི་ཆ་ལྡོག་པས། །ས་ནི་བཅུ་གཉིས་རབ་ཏུ་རྫོགས་པའི་མཐར། །ཐིག་ལེ་ནམ་མཁའི་ཁམས་དང་འདྲེས་པའི་ཚེ། །མངོན་པར་འཚང་རྒྱ་དང་པོའི་སངས་རྒྱས་ལུགས། །དེ་ལ་འཁོར་ལོ་བརྟན་པའི་སྲོག་ཤིང་ལྟ་བུ་ནི་དབུ་མ་ཡིན་པས་དེ་ཉིད་དངོས་པོའི་གནས་ཚུལ་ལ་མེད་པར་འདོད་པ་ཡང་མི་རིགས་ཏེ། མེད་ན་གནང་དུ་བསྣུན་པའི་ཡོན་ཏན་ཀྱང་དེའི་རྗེས་སུ་འབྲང་ངོ་། །ཡང་ཁ་ཅིག་སྲོག་པ་རྩ་ལ་དབུ་མར་འདོད་པ་དང་། ཁ་ཅིག་རྒྱུངས་པ་དང་རྟེན་བརྟེན་པ་ལྟ་བུར་འདོད་པ་ལ་དང་པོ་ལྟར་ན་དེར་རླུང་སེམས་འདུས་པས་སྨྱོ་འབོག་འབྱུང་ལ། གཉིས་པ་ལྟར་ནའང་དབུ་མ་ལས་རྩ་འདབ་གྱེས་ཚུལ་ལ་སོགས་པའི་རྣམ་གཞག་དང་འགལ་ལོ། །ཞེས་སྲོག་རྩ་ལ་མ་ལྟོས་པའི་དབུ་མ་གསར་དུ་འཆོས་ཀྱང་གཉིས་ཀས་དགོངས་པ་མ་ལོན་པ་སྟེ། སྲོག་རྩ་དང་རྒྱུད་པ་ལ་རླུང་སེམས་འདུས་ན་དེ་ལྟར་ཡིན་ཀྱང་། དེའི་དབྱིངས་སུ་དམིགས་པའི་ཆོས་ཉིད་ཀྱི་དབུ་མ་ལ་རླུང་སེམས་འདུས་པས་སྨྱོ་འབོག་འབྱུང་བ་ག་ལ་སྲིད། བྲམ་ཟེ་ཆེན་པོས་རླུང་དང་འགྱུ་བ་རྩལ་ཆེན་སྲོག་པ་རྩར་བཅུད་ནས། ཐ་མལ་ཤེས་པ་དང་
གིས་འགག་པར་འགྱུར། །ཞེས་པས་སོ། །དེ་ལྟ་བུའི་རྟེན་དང་བརྟེན་པའང་ཐ་སྙད་ཙམ་དུ་མཚོན་པ་སྟེ། དབུ་མ་ནི་བསྒོམས་པ་ལས་བྱུང་བའི་རྩ་ཡིན་པས་མཚན་ཉིད་བཞི་དང་ལྡན་པར་བཤད་ལ། འོན་ཀྱང་ཀུན་གཞི་སྲོག་རླུང་དང་བཅས་པའི་རྟེན་ནི་དེ་ཉིད་ཡིན་པས་འདོར་དུའང་མི་རུང་སྟེ། སྲོག་པ་རྩ་བཅད་ན་གནད་འཆན་པ་ཤིན་ཏུ་སླ་བའི་ཕྱིར་རོ། །དེ་བས་ན་གནས་པ་དང་། ཆོས་ཉིད་དང་དོན་དམ་པའི་དབུ་མ་གསུམ་དུ་འདོད་པའི་ཕྱོགས་ནི་རིགས་པ་དང་བཅས་པ་ཡིན་ཏེ། རྡོ་རྗེ་གདན་བཞི་ལས། ལུས་སེམས་སྲོག་གི་དབྱུག་པ་ལ། །སྦྱོར་བ་དྲུག་གི་མན་ངག་གནས། །ཐབས་དང་ལྡན་ན་ཤིན་ཏུ་འབར། །ཞེས་པས་ཐབས་ནི་དེའི་ནང་དུ་ཆོས་ཉིད་ཀྱི་དབུ་མ་བསྒོམས་ནས་དེ་ལ་གནད་དུ་བསྣུན་པའི་དོན་ཡིན་ལ། དེའི་ནང་དུ་བསྒོམ་དགོས་པའི་རྒྱུ་མཚན་ནི་ཀུན་གཞི་སྲོག་རླུང་དང་བཅས་པ་དེ་ལ་བརྟེན་པས་སྲོག་གི་རླུང་སྦྱོང་བའི་དོན་དུ་སྟེ། ཡེ་ཤེས་ཐིག་ལེ་ལས། སྲོག་པ་དབྱུག་གུའི་ནང་ན་གནས། །སུམ་ཅུ་རྩ་གཉིས་མདུད་དང་བཅས། །ཕྲ་བའི་ཕྲ་བ་ཡང་དག་མཆོག །ཕྱི་རོལ་མ་ཡིན་ནང་མ་ཡིན། །ཞེས་པས་གནས་ཚུལ་གྱི་ངེས་ནས་སྲོག་གི་དབྱུག་གུའམ་སྲོག་འཛིན་པའི་རྩའི་ནང་ན་ཆོས་ཉིད་ཀྱི་རྩ་མཚན་ཉིད་བཞི་དང་ལྡན་པ། འོད་གསལ་བའི་རང་བཞིན་ཐོགས་རེག་དང་བྲལ་བ་ཇི་སྲིད་དུ་ལུས་སེམས་དབུགས་གསུམ་གྱི་ཚོགས་པ་ཡོད་པ་དེ་སྲིད་རྩ་དེ་ཉིད་ཡོད་པས་མེད་པའང་མ་ཡིན་ལ། དེ་གསུམ་སོ་སོར་འགྱེས་པའི་ཚེ་རྩ་དེའང་དབུགས་དང་ལྷན་ཅིག་པ་ལྟར་མི་མངོན་པས་དངོས་པོ་ལྟར་ཡོད་པའང་མ་ཡིན་པ་ཅན་གྱི་དབུ་མ་ཡོད་དེ། སམྦུ་ཊི་ལས། རྩ་ཡི་མཛེས་སྤྱི་ལས་བྱུང་བ། །དེ་ནི་
རྡུལ་བྲལ་རབ་ཏུ་གྲགས། །དག་པའི་ཤེལ་གྱི་འོད་དང་མཉམ། །ཞེས་སོ། །དེ་ལ་ཨ་ཝ་དྷཱུ་ཏི། ཡིད་བཟང་མ། ཀུན་འདར་མ། སྒྲ་གཅན། མུན་པ་མ་སོགས་སུ་གྲགས་ལ། ཁ་ཁ་མུ་ཁ་དང་། བྱ་རོག་གདོང་དང་། དུང་ཅན་མ་ལ་སོགས་པ་ནི་གཟུགས་ཅན་གྱི་རྩ་ཡིན་ཡང་དབུ་མའི་རྣམ་གྲངས་ཙམ་དུ་བསྡུས་པར་ངེས་པར་བྱའོ། །དོན་དམ་པའི་དབུ་མ་ནི་གོང་ལ་གནད་དུ་བསྣུན་པའི་འབྲས་བུའི་ངོ་བོ་ཉིད་ཡིན་ཏེ། ངོ་བོ་ཉིད་དེ་ཡང་མཐར་གྱི་ཚིག་བླ་དྭགས་ཙམ་དུ་ཟད་པས་ངོ་བོ་ཉིད་མེད་པ་ཞེས་བྱའོ། །དེ་ལས་གནས་པ་སྲོག་གི་དབྱུག་གུ་དང་བཅས་པའི་རྩ་དབུ་མ་རོ་རྐྱང་གི་ཡན་ལག་ཅན་ལ་རྩའི་འཁོར་ལོ་ཡང་སྐུ་གསུང་ཐུགས་བདེ་བ་ཆེན་པོ་ལྟར་ན་གསུམ་དུ་ཡོད་དེ། ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞི། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག །སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་དོ། །སྐུ་བཞི་ཡེ་ཤེས་ཀྱི་རིམ་པ་དང་སྦྱང་བའི་དབང་དུ་དེའི་སྟེང་དུ་སྤྱི་བོ་བདེ་ཆེན་གྱི་འཁོར་ལོ་ན་རྩ་འདབ་སུམ་ཅུ་རྩ་གཉིས་ཡོད་དོ། །སྐུ་ལྔ་ལྷུན་གྲུབ་ཀྱི་དག་པ་དང་བསྟུན་ན་དེའི་སྟེང་དུ་གསང་གནས་བདེ་སྐྱོང་གི་འཁོར་ལོ་ན་རྩ་འདབ་སུམ་ཅུ་རྩ་གཉིས་སོ། །སྦྱང་གཞི་སྦྱོང་བྱེད་ཀྱི་དབང་དུ་བྱས་ན་སྔ་མའི་སྟེང་དུ་གཙུག་ཏོར་ནམ་མཁའི་ཁམས་ཀྱི་འཁོར་ལོ་བསྣན་པའོ། །དེ་བས་ན་རྩ་འཁོར་མང་ཉུང་དང་། དེ་ལ་ཡི་གེ་དགོང་པ་ལ་སོགས་པའི་རྣམ་གྲངས་ལ་རྒྱུད་སྡེ་སོ་སོའི་ལུགས་མི་མཐུན་པ་ནི་སེམས་ཅན་གྱི་རྒྱུད་ཀྱི་ཉོན་མོངས་པ་དང་། རྩ་དང་། དབང་པོ་ཐ་དད་པའི་རིམ་པ་ལྟར་འདུལ་བྱེད་ཀྱི་མན་ངག་ཀྱང་དེ་བཞིན་དུ་བསྟན་པ་སྟེ། དེ་ལ་གཡོ་བའི་རླུང་དང་བཀོད་པ་བྱང་ཆུབ་ཀྱི་སེམས་ཟུང་དུ་འཇུག་པས་གནད་དུ་བསྣུན་པའི་འབྲས་བུ་ལ་མཆོག་
དམན་དང་ཁྱད་པར་མེད་པའི་ཚུལ། དཔེར་ན་མཉན་ཡོད་ནས་གྲོང་ཁྱེར་ཙམ་པར་རྒྱུ་བ་ལ་ཐལ་བྱུང་གི་ལམ་དང་། འཚེ་དོག་ཆུང་བའི་སྲང་དང་། སྟོབས་པོ་ཆེས་བགྲོད་པའི་རྒྱ་ལམ་སོགས་ཐ་དད་དུ་ཡོད་ཀྱང་སླེབས་ས་གཅིག་པ་བཞིན་ནོ། །དེ་ལ་དུས་འཁོར་བ་ལྟར་ན་འཁོར་ལོ་དྲུག་དང་། སོ་སོའི་བར་སྟེ་བཅུ་གཉིས་ལ་རླུང་གི་འཕོ་བ་བཅུ་གཉིས་དང་། རྟེན་ཅིང་འབྲེལ་པར་འབྱུང་བ་བཅུ་གཉིས་ཡོད་པའི་བྱེད་པ་བཅིངས་པ་ན་ཁམས་ཀྱི་རྣམ་པར་འགྱུར་བ་མི་བརྟེན་པར་འཛག་མེད་དུ་ཆིངས་ནས་འཕོ་བ་སྤངས་ཏེ་ལུགས་ལས་ལྡོག་པའི་འགྲོས་གསང་གནས་ཡེ་ཤེས་ཀྱི་འཁོར་ལོར་ཕྱིན་པ་ལས་རླུང་འཕོ་བ་གཅིག་འགག་ཅིང་། རྟེན་འབྲེལ་གཅིག་བདབ། །ས་དང་པོའི་རྟོགས་པ་སྐྱེ་དེ་བཞིན་དུ་འཁོར་ལོ་རེ་དང་བར་ཐག་རེའི་གནས་སུ་རླུང་གི་འཕོ་བ་རེ་འགག་ཅིང་རྟེན་འབྲེལ་རེ་དག་ནས་ས་གཉིས་པ་ལ་སོགས་བགྲོད། མཐར་གཙུག་ཏོར་ནམ་མཁའི་ཁམས་ཀྱི་འཁོར་ལོར་ཕྱིན་པའི་ཚེ་འཕོ་བ་བཅུ་གཉིས་པོ་ཐམས་ཅད་འགག་ཅིང་རྟེན་ཅིང་འབྲེལ་འབྱུང་བཅུ་གཉིས་པོ་ཕན་ཚུན་འབྲེལ་པ་ཆད་ནས་མི་འགྱུར་བའི་བདེ་བ་ཆེན་པོ་རྫོགས་པའི་སངས་རྒྱས་ཀྱི་གོ་འཕང་མངོན་དུ་བྱེད་པ་ཡིན་ཏེ། དབང་མདོར་བསྟན་ལས། རྟེན་དང་བརྟེན་པའི་འབྲེལ་བ་ནི། །ཇི་སྲིད་མི་འགྱུར་ཉིད་དུ་འགྱུར། །སེམས་ཀྱི་མི་འགྱུར་ཉིད་ཐོབ་ན། །རྟེན་དང་བརྟེན་པའི་འབྲེལ་བ་མེད། །ཅེས་སོ། །དེ་ཡང་རྩ་འཁན་དྲུག་གི་རང་བཞིན་དོན་སྤྱི་ལ་དམིགས་པ་རྒྱུད་སྡེ་པ་དད་པའི་རྫོགས་རིམ་གྱི་དབྱིངས་མཇལ་ཤེས་པའི་ཕྱིར་དཔལ་སྒྱུ་འཕྲུལ་དྲ་བའི་གཞུང་དང་བསྟུན་ན། །དེ་དང་རྣམ་གྲངས་མཐུན་པའི་རྩ་འདབ་ལ། །སྦྱང་གཞིར་གནས་པའི་རིགས་དྲུག་ས་བོན་རྣམས།
སྦྱོང་བྱེད་རིགས་པའི་སྐྱེས་བུ་རྣམ་དྲུག་དང་། །ཕ་རོལ་ཕྱིན་པ་དྲུག་གིས་སྦྱངས་པ་ལས། །ཐ་དད་པ་ཡི་ཡེ་ཤེས་རྣམ་པ་ལྔ། །བསམ་གྱིས་མི་ཁྱབ་གཅིག་དང་དྲུག་འཐོབ་པོ། །རྣམ་པ་ཐམས་ཅད་དུ་འབྲེལ་བ་བླ་མའི་མོས་གུས་དང་། རྫོགས་རིམ་གྱི་སྨིན་བྱེད་བསྐྱེད་རིམ་ལམ་དུ་སོང་བ་ལས། བསོད་ནམས་དང་ཡེ་ཤེས་ཀྱི་ཚོགས་རྫོགས་ནས་རླུང་སེམས་ལས་སུ་རུང་བས་སྦྱང་གཞི་རིགས་དྲུག་གི་ས་བོན་རྣམས་སྦྱོང་བྱེད་རིགས་པའི་སྐྱེས་བུ་དྲུག་གམ་ཕྱིན་དྲུག་གི་རང་བཞིན་འཁོར་ལོ་དྲུག་ཏུ་རྒྱུ་བའི་རླུང་སེམས་ཐིག་ལེ་དང་བཅས་པ་ལ་གནད་དུ་བསྣུན་ནས་སྦྱངས་པས། འཁོར་ལོ་དྲུག་དང་སོ་སོའི་བར་སྟོངས་ཏེ་བཅུ་གཉིས་སུ་རླུང་དག་པས་ས་བཅུ་གཉིས་བསྒྲོད་ཚུལ་སྔར་བཞིན་ལ་སྦྱངས་འབྲས་བཤད་མ་ཐག་པའི་ཡེ་ཤེས་དྲུག་འཐོབ་ཅིང་། མཐར་ཐུག་ཡེ་ཤེས་ཆེན་པོའི་ས་བཅུ་གསུམ་པ་རྫོགས་པའོ། །དེ་བཞིན་སྙིང་ག་ཞི་བའི་འཁོར་ལོ་དང་། །སྤྱི་གཙུག་ཁྲོ་བོའི་འཁོར་ལོ་རྣམ་གཉིས་ལ། །ལྷ་དང་རྣམ་གྲངས་མཉམ་པའི་རྩ་འདབ་དང་། །ཐབས་གྲོལ་སྟེང་འོག་ལམ་གྱི་སྒོ་གཉིས་སུ། །འདོད་པ་རྒྱུད་ཀྱི་རྒྱལ་པོ་སྒྱུ་འཕྲུལ་ལུགས། །དེ་ལ་སྒྱུ་འཕྲུལ་རྩ་བའི་རྒྱུད་ཀྱི་རང་ལུགས་ནི་འཁོར་ལོ་གཉིས་ཡིན་ཏེ། སྙིང་ག་ཞི་བའི་འཁོར་ལོ་དང་། །སྤྱི་གཙུག་ཁྲོ་བོའི་འཁོར་ལོའོ། །དེ་གཉིས་ལ་རྩ་འདབ་ཀྱང་རགས་པ་ནི་ལྷའི་བགྲངས་དང་མཉམ་པ་སྟེ་སྙིང་ག་ན་བཞི་བཅུ་རྩ་གཉིས་དང་། དུང་ཁང་ན་ལྔ་བཅུ་རྩ་བརྒྱད་དེ་དམ་པ་རིགས་བརྒྱའི་བདག་ཉིད་དོ། །ཕྲ་བ་ནི་བསམ་གྱིས་མི་ཁྱབ་ཀྱང་ཁམས་དང་རླུང་འབབ་བའི་རྩ་སྟོང་ཕྲག་བདུན་ཅུ་རྩ་གཉིས་ནི་འབུམ་ལྔ་དང་། སངས་རྒྱས་ཐོད་པ་ལ་སོགས་སྤྱི་དང་མཐུན་པར་ཡོད་དེ། སྒྱུ་འཕྲུལ་ཆེན་མོ་ལས། །རོ་མ་
རྐྱང་མ་ཀུན་འདར་མ། །འཁོར་ལོ་སོ་སོའི་དཀྱིལ་དག་ན། །ཀ་བའི་ཚུལ་དུ་གནས་པ་ལ། །ཡལ་གའི་འདབ་མ་གྲངས་ལས་འདས། །ཁམས་དང་རླུང་ནི་འབབ་པ་ཡི། །ཡེ་ཤེས་རྩེ་ནི་སྟོང་ཕྲག་གཅིག །བདུན་ཅུ་རྩ་གཉིས་བསྒྲེས་པ་ཡི། །ཉི་ཁྲི་ཆིག་སྟོང་དྲུག་བརྒྱའི་རླུང་། །འགྱུ་བ་ཆེན་མོར་འདོད་པ་སྟེ། །ཞེས་སོ། །དེ་ཡང་རྒྱུད་གདམས་ངག་ལྟར་བཤད་པའི་དབང་དུ་བྱས་ན་རྩ་རྒྱུད་ལེའུ་བཞི་པ་ནས་ཉེར་གཅིག་པ་ཡན་ཆད་ལ་ཐབས་གྲོལ་གྱི་ལམ་གཉིས་གཙོ་ཆེ་ཆུང་དང་། ཆ་མཉམ་པའི་ཚུལ་གསུམ་དུ་འཆད་པའི་སྟེང་སྒོ་རྣམ་གྲོལ་ལའང་ཐུན་མོང་དང་འཇུ་འདུལ་གྱི་མན་ངག་གཉིས་ལས། དང་པོ་ནི་སྒྱུ་འཕྲུལ་རྒྱ་མཚོ་ལས། འཁོར་ལོ་གསུམ་གཉིས་སྲོག་ཤིང་གསུམ། །མེ་རླུང་འགྲོ་བ་ནམ་མཁའི་བ། །བཞོ་བས་སྟེང་དུ་རྣམ་པར་གྲགས། །ཞེས་འཁོར་ལོ་དྲུག་ལ་བརྟེན་ནས་འབར་འཛག་གི་སྦྱོར་བས་དགའ་བཞིའི་ཡེ་ཤེས་བསྐྱེད་པ་སྟེ། ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞི་སྙིང་པོ་ཨ་ཐུང་དང་བཅས་པ་བསྒོམས་པས་སའི་དྭངས་མ་ཟིན། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་པ་སྙིང་པོ་ཐིག་ལེ་བཾ་དང་བཅས་པ་བསྒོམས་པས་ཆུའི་དྭངས་མ་ཟིན། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག་པ་ཡི་གེ་ཨ་དང་བཅས་པ་བསྒོམས་པས་མེའི་དྭངས་མ་ཟིན། སྤྱི་བོ་བདེ་ཆེན་གྱི་འཁོར་ལོ་རྩ་འདབ་སུམ་ཅུ་རྩ་གཉིས་ཡི་གེ་ཧཾ་དང་བཅས་པ་བསྒོམས་པས་ཆུའི་དྭངས་མ་ཟིན། དེ་ཡང་སྒྲོམ་མདོ་རླུང་གི་འཁོར་ལོ་བསྐྱོད་པས། སུམ་མདོ་མེའི་འཁོར་ལོ་འབར་ཏེ་འཁོར་ལོ་བཞིའི་ཐིག་ལེ་ཞུ་བ་ལས་རླུང་གི་དྭངས་མ་ཟིན། དགའ་བ་བཞི་དང་འབྲེལ་
བའི་བདེ་བའི་ཡེ་ཤེས་རྒྱུད་ལ་སྐྱེས་པ་ལ་སྟེང་སྒོ་རྣམ་གྲོལ་གྱི་ལམ་ཐུན་མོང་བ་ཞེས་བྱའོ། །གཉིས་པ་ནི། སྙིང་ག་ལྟེ་མགྲིན་སྤྱི་བོའི་འཁོར་ལོ་བཞིར་རིམ་པས་ཀུན་ཏུ་བཟང་པོའི། བདེ་ཆེན་ཐིག་ལེའི། སྦྱོར་བ་དག་པའི། ཁྱབ་གདལ་ཆེན་པོའི་མན་ངག་བཞི་རྩ་རྒྱུད་ལེའུ་བཅུ་གསུམ་པས་སྟོན་པ་ལྟར་བསྒོམས་པས། འཁོར་ལོ་བཞིའི་ལྟེ་བའི་དྭངས་མ་གཡོ་བྱེད་དང་བྲལ་བའི་འོད་གསལ་ལ་དྭངས་མའི་དྭངས་མ་རྣམས་ཐིམ་པས་མཆོག་ཏུ་མི་འགྱུར་བའི་འོད་གསལ་རྣམ་པར་མི་རྟོག་པ་འཆར་བའོ། །འོག་སྒོ་ཁམས་གསུམ་རོལ་པའི་མན་ངག་ལ་ནམ་མཁའ་ནི་ཤེས་རབ། རྡོ་རྗེ་ནི་ཐབས་ཏེ། ཐབས་ཤེས་གཉིས་མེད་ཕྱག་རྒྱ་བཞིའི་རོལ་པས་རྩ་ཁམས་ནས་ཞུ་བདེ་འདྲེན་པ་དང་རྡོ་རྗེ་ནོར་བུར་བཅིང་བ་དང་། ཡུམ་གྱི་མཁར་སྤྲོ་བ་དང་། རྩ་མདུད་ཀྱི་རྟོག་པ་ཐམས་ཅད་དགྲོལ་བ་དང་། དེ་སླར་རླུང་གི་མཐུས་དྲང་ཞིང་ལྡོག་པ་ལས་འཁོར་ལོ་བཞི་གསོས་བཏབ། སྤྱི་བོ་བདེ་ཆེན་གྱི་འཁོར་ལོར་ཁྱབ་གདལ་ཆེན་པོའི་དགོངས་པ་ལ་སྦྱར་བས་རྣམ་སྨིན་གྱི་ལུས་ལ་ལྷན་ཅིག་སྐྱེས་པའི་ཡེ་ཤེས་ཀྱིས་རྒྱས་ཐེབས་པས། ཐ་མལ་གྱི་འདོད་ཆགས་སུ་རྟོག་པའི་བདུད་བཅོམ། །བདེ་བའི་ཡེ་ཤེས་ཀྱི་རྩི་རྒྱས། །དེ་སྤྱད་པས་འདུ་བའི་ནད་སེལ། ཁམས་འཛག་མེད་ཀྱིས་འཁོར་བའི་གཡུལ་ངོ་བཅོམ། རྟོགས་ཚོགས་སྐུ་དང་ཡེ་ཤེས་སུ་གྱུར་པས་མྱ་ངན་ལས་འདའ་བའི་གཡུལ་རྒྱལ་བ་ལ་འོག་སྒོ་ནམ་མཁའི་རྡོ་རྗེའི་ལམ་ཞེས་ཀྱང་བྱའོ། །གཉིས་པ་བརྟེན་པ་རླུང་གི་རབ་ཏུ་དབྱེ་བ་ནི། གཡོ་བ་རླུང་ལ་འགྱུ་བ་ཆེ་ཆུང་གཉིས། །ཆེ་བ་ཉིན་ཞག་ཕྲུགས་གཅིག་དག་ལ་ནི། །ཉི་ཁྲི་ཆིག་སྟོང་དྲུག་བརྒྱའི་གྲངས་སུ་འགྱུ། །ཆུང་བ་ཀུན་རྟོག་བརྒྱད་ཁྲི་བཞི་སྟོང་གི། གྲངས་དང་མཉམ་པའི་བཞོན་པ་ལྟ་བུར་གནས་
དེ་ལ་རྩ་སྟོང་ཕྲག་བདུན་ཅུ་རྩ་གཉིས་པོ་གསུམ་དུ་བསྒྲེས་པའི་འགྱུར་འབྱུང་བ་བཞི་སོ་སོའི་རླུང་ལ་ལྔ་སྟོང་བཞི་བརྒྱ་རེའི་འགྱུར་ཚད་བསྡོམས་པས་སྐྱེས་བུ་དར་བབས་ནད་ཀྱི་སྐྱོན་དང་བྲལ་བ་ཞིག་ལ་ཉིན་ཞག་རེར་ཉི་ཁྲི་ཆིག་སྟོང་དྲུག་བརྒྱ་འགྱུ་བ་ནི་འགྱུ་བ་ཆེན་པོའི་རླུང་ཡིན་ཏེ་ཐལ་འགྱུར་ལས། རྩ་ལ་བརྟེན་པའི་རླུང་དག་ནི། ཉི་ཁྲི་དང་ནི་སྟོང་ཕྲག་གཅིག །དྲུག་བརྒྱ་དག་ཏུ་འགྱུ་བ་ནི། །འགྱུ་བ་ཆེན་མོའི་རླུང་དུ་འདོད། །ཅེས་སོ། །དེའང་རྒས་པ་རྣམས་ལ་ནི་འབྱུང་བའི་གྲལ་ཉམས་པས་ལྔ་བཅུ་རྩ་བརྒྱད་ཀྱིས་མ་ཚང་ལ། སྤྱིར་རྒོད་ན་ཚེ་ཐུང་། བྱིང་ན་སྡུག་བསྔལ་བ་སོགས་འབྱུང་ངོ་། །འབྱུང་བ་མ་རྒྱས་པའི་གཞོན་ནུ་རྣམས་ལ་ནི་སུམ་ཅུ་རྩ་གཉིས་ཀྱི་མ་ཆེད་ལ་འཕོ་བ་རིང་ན་ཚེ་རིང་ཞིང་ནང་ཉུང་འཁོར་འདུ། ཐུང་ན་དེ་ལས་ལྡོག །དྲག་ན་བསོད་ནམས་དང་ལྡན། ཞན་ན་སྡུག་བསྔལ་ལོ། །འགྱུ་བ་ཆུང་བ་ནི་ཀུན་ཏུ་རྟོག་པ་ཅན་གཙོ་ཆེ་བའི་ཉོན་མོངས་པ་བརྒྱད་ཁྲི་བཞི་སྟོང་གི་གྲངས་དང་མཉམ་བས་དེ་དག་གི་བཞོན་པར་གྱུར་པ་སྟེ་སྒྱུ་འཕྲུལ་ལས། གཞན་ནི་བཞི་སྟོང་བརྒྱད་ཁྲིའོ། །ཞེས་པ་ལྟར་རོ། །དེ་ཡང་ཁ་སྣ་ནས་རྒྱུ་བ་མ་གཏོགས་པ་རྩའི་ནང་ན་རྟོག་པ་དང་ཡེ་ཤེས་ཀྱི་རྟེན་དུ་འགྱུ་བ་ཆུང་བའི་རླུང་ལོངས་སྤྱོད་འཁོར་ལོ་ལས་གྱེས་པའི་འཕར་རྩ་ནས་འགྱུ་བ་རྣམས་བསྡོམས་པར། ཆིག་འབུམ་ཉི་ཁྲི་དྲུག་སྟོང་དྲུག་བརྒྱ་ནང་དུ་འགྱུ་བ་སྟེ་ཐལ་འགྱུར་ལས། རྩ་ནས་ངེས་པར་འགྱུ་བ་ནི། འབུམ་ཕྲག་གཅིག་དང་ཁྲི་ཕྲག་གཉིས། །སྟོང་ཕྲག་དྲུག་དང་བརྒྱ་ཕྲག་དྲུག །རྩ་ནས་ངེས་པར་འབྱུང་བ་སྟེ། །འགྱུ་བ་ཆུང་བའི་རླུང་དུ་འདོད། །ཅེས་སོ། །བྱེད་ལས་ཀྱི་སྒོ་ནས་དབྱེ་བའི་ཕྱིར། །རྩ་བའི་རླུང་ནི་སྲོག་འཛིན་མེ་མཉམ་དང་། །ཁྱབ་བྱེད་གྱེན་
རྒྱུ་ཐུར་སེལ་ལྔར་གནས་པའི། །བྱེད་ལས་རིམ་བཞིན་སྲོག་བརྟེན་མེ་དྲོད་བསྐྱེད། །ལུས་ཉམས་བརྟས་དང་དབུགས་ཀྱི་འགྲོ་འོང་དང་། འགྲོ་འདུག་བཤང་གཅི་འཕེན་པའི་བྱ་བ་བྱེད། །དེའང་ཕོ་རླུང་གྱེན་རྒྱུ་སྟོད་ན་གནས། །མོ་རླུང་ཐུར་སེལ་སྨད་དང་མ་ནིང་མཉམ། ནང་གི་རླུང་ནི་འབྱུང་ལྔའི་ཁ་དོག་ཅན། །ཕུང་པོ་ཁམས་དང་སྐྱེ་མཆེད་གནས་པའི་རྟེན། །དུག་ལྔ་དང་ནི་ཡེ་ཤེས་རྣམ་པ་ལྔ། །རྒྱུ་འབྲས་ལྟ་བུར་མཆེད་པའི་རྟེན་བྱེད་དོ། །དེ་ལ་རྩ་བའི་རླུང་ལྔ་ལས་སྲོག་འཛིན་སྙིང་ག་ན་གནས་ཏེ་སྲོག་གནས་པར་བྱེད་དོ། །མེ་མཉམ་ལྟོ་བ་ན་གནས་ཏེ་དྲོད་འབེབས། ཁྱབ་བྱེད་ནི་ལུས་བྱེད་ས་ལ་གནས་ཏེ་ལུས་ཉམས་བརྟས་པར་བྱེད། གྱེན་རྒྱུ་ནི་རོ་སྟོད་ན་གནས་ཏེ་དབུགས་འབྱུང་རྔུབ་བྱེད། །ཐུར་སེལ་ནི་རོ་སྨད་ན་གནས་ཏེ་འགྲོ་འདུག་དང་ཟག་པ་འདོར་བའི་བྱ་བ་བྱེད་པ་ཡིན་པས་ཕྱིའི་རླུང་ལྔ་ཞེས་གྲགས་སོ། །ནང་གི་རླུང་ནི་འབྱུང་བ་ལྔའི་རང་བཞིན་ཏེ་སའི་རླུང་ནི་སེར། ཆུའི་དཀར། མེའི་དམར། རླུང་གི་ལྗང་། ནམ་མཁའི་རླུང་མཐིང་ག་སྟེ། བསྒོམ་ཚུལ་གྱི་དབང་དུ་བྱས་ན་དབྱིབས་ཀྱང་རིམ་པ་བཞིན་གྲུ་བཞི་དང་། ཟླ་གམ་དང་། གྲུ་གསུམ་དང་། གཞུ་བདུངས་པ་ལྟ་བུ་དང་། ཟླུམ་པོའོ། །དེ་དག་ལ་བརྟེན་ནས་ནང་གི་ཕུང་པོ་ཁམས་དང་སྐྱེ་མཆེད་གནས་པའི་རྟེན་བྱེད། དེ་ཡང་མ་དག་པའི་དུས་ན་དུག་ལྔ་མཆེད་པའི་གཞི་བྱེད་ལ། ལམ་གྱི་དུས་ཟད་པར་གྱི་ཏིང་ངེ་འཛིན་ལ་བརྟེན་ནས་རྫུ་འཕྲུལ་གྲུབ་པ་དང་། དག་པའི་ཚེ་ཡེ་ཤེས་ལྔ་མཆེད་པའི་རྟེན་བྱེད་དོ། །དེ་དག་རྒྱུ་ཚུལ་ཀྱི་དབང་དུ་བྱས་ན་དབྱར་མེ། སྟོན་རླུང་། དགུན་ཆུ། དཔྱིད་སའི་རླུང་རྒྱུ་བས་དེའི་གཉེན་པོར་གོ་ལྡོག་ནས་བསྒོམ་པའམ། ཡང་ན་ཀུན་ཏུ་ཤེས་པ་ནམ་མཁའི་རླུང་འབའ་ཞིག་གམ། ནད་ཁམས་དང་བསྟུན་ནས་གང་འཕྲོད་བསྒོམ་པའོ། །དེ་དག་
ཀྱང་ཕོ་མོ་མ་ནིང་གི་རླུང་གསུམ་དུ་བསྡུ་ན། སྣ་བུག་གཡས་ནས་རྒྱུ་བ་ཕོ་རླུང་། གཡོན་ནས་རྒྱུ་བ་མོ་རླུང་། ཆ་མཉམ་དུ་རྒྱུ་བ་མ་ནིང་གི་རླུང་གསུམ་ཡང་། འབྱུང་བ་ལྔའི་རླུང་གི་ངེས་པས་དུས་བཞིའི་འཕོ་དུས་ལ་སྦྱར་ཏེ། སྐྱེས་པས་མོ་རླུང་དང་། བུད་མེད་ཀྱི་ཕོ་རླུང་དང་། གཉིས་ཀས་མ་ནིང་གི་རླུང་ལ་གཙོ་བོར་སྦྱངས་ན་གསང་བ་ཡེ་ཤེས་ཀྱི་རླུང་ལྔ་འབྱོངས་པར་སླ་ལ། དེ་ལ་ནི་རགས་པ་མེད་པས་ཁ་དོག་དང་རྣམ་པ་མེད་དོ། །དེའང་གྱེན་རྒྱུ། ཐུར་སེལ། མཉམ་གནས་གསུམ་གྱི་གནད་ལས། སྟེང་རླུང་མནན་པ་དང་། འོག་རླུང་བསྡུ་བ་དང་། བར་རླུང་བསྐྱིལ་བ་གསུམ་གྱི་གནད་ལ་མཁས་པར་བྱ་བའི་ཚུལ་ཐལ་འགྱུར་ལས། གྱེན་དུ་རྒྱུ་དང་ཐུར་དུ་སེལ། །བར་ན་མཁས་པས་གནད་ཉིད་བཙལ། །ཞེས་སོ། །གཞན་ཡང་མདའ་ལྟར་འཕང་བ་དང་། གཞུ་ལྟར་འགུག་པ་དང་། བུམ་པ་ཅན་དུ་བསྐྱིལ་བ་དང་། ཆུ་སྲིན་ཆིངས་སུ་བསྡམ་པ་དང་། རི་བོ་ལྟར་མནན་པ་དང་། སྦུབས་ཆུ་ལྟར་བསྡུ་བ་དང་། རྩ་གནས་སུ་དགྲམ་པ་དང་། རང་གནས་སུ་གཞིལ་བ་དང་། ནམ་མཁའ་ལྟར་ཆོས་ཉིད་དུ་ཁྱབ་པར་གདལ་བའི་གནད་དགུ་ལ་མཁས་པར་བྱའོ། །དེའང་རླུང་གི་རང་བཞིན་ནི་གཉིས་ཏེ། ལས་ཀྱི་རླུང་དང་ཡེ་ཤེས་ཀྱི་རླུང་ངོ་། །དེ་སྐད་དུ་རྩ་གནས་འཁོར་ལོ་ལས། རླུང་ལ་རྣམ་པ་གཉིས་ཡིན་ཏེ། །ཡེ་ཤེས་དང་ནི་ལས་རླུང་ངོ་། །ཞེས་པ་ལྟར་ལས་ཀྱི་རླུང་གིས་འཁོར་བའི་རྒྱུ་བྱེད་དེ། རྩའི་གནས་འགྱུར་ཞིང་འཆུས་པ་ལས། ལས་ཀྱི་རླུང་དུ་སོང་སྟེ་དེ་སེམས་ཀྱི་བཞོན་པར་གྱུར་པ་ལས་རྣམ་པར་རྟོག་པ་སྣ་ཚོགས་པ་དང་། མི་དགེ་བའི་རྣམ་འགྱུར་དང་། བྱིང་རྒོད་རྨུགས་གསུམ་ལ་སོགས་པ་རླུང་ཉམས་ངན་པ་
སྐྱེ། གནས་མལ་འཕྱུགས་པ་ལས་འཁྲུལ་སྣང་སྣ་ཚོགས་འཆར། དུས་བཞིའི་རླུང་འགྱུར་བས་ཚེའི་དུས་བྱེད་པའང་། དགུན་དུས་ཀྱི་ཆབ་རོམ་ལྟ་བུའི་རླུང་མེ་རླུང་དུ་སོང་བ་དང་། །དཔྱིད་དུས་ཀྱི་ས་བོན་ལྟ་བུའི་རླུང་ཆུ་རླུང་དུ་སོང་བ་དང་། དབྱར་དུས་ཀྱི་མེ་སྟག་ལྟ་བུའི་རླུང་ས་རླུང་དུ་སོང་བ་དང་། སྟོན་དུས་ཀྱི་མེ་ཏོག་ལྟ་བུའི་རླུང་རླུང་གི་རླུང་དུ་སོང་བ་ལས་ཚེའི་དུས་བྱེད་དོ། །གཞན་ཡང་འགྱུ་ཚད་མ་ཚང་བ་ལས་ཚེའི་དུས་བྱེད་པ་ནི། དར་ལ་བབས་པ་ལ་སུམ་བརྒྱས་མ་ཚང་ན་ལོ་གཅིག །ལྔ་བཅུས་མ་ཚང་ན་ལོ་གཉིས། སུམ་ཅུ་རྩ་གཉིས་མ་ཚང་ན་ལོ་གསུམ། ཉེར་གཅིག་མ་ཚང་ན་ལོ་བཞི། བརྒྱད་ཆས་མ་ཚང་ན་ཟླ་བ་བདུན། དྲུག་ཆས་མ་ཚང་ན་ཟླ་བ་ལྔ། བཞི་ཆས་མ་ཚང་ན་ཟླ་བ་གཅིག །བཅུ་ཆས་མ་ཚང་ན་ཞག་ཉེར་དགུ། ཉི་ཤུ་མ་ཚང་ན་ཞག་བཅོ་བརྒྱད། སུམ་ཅུ་མ་ཚང་ན་ཞག་བཅུ། བཞི་བཅུ་མ་ཚང་ན་ཞག་བདུན། དྲུག་ཅུ་མ་ཚང་ན་ཞག་བཅོ་ལྔ་རྣམས་སོ། །རླུང་འགྱུར་བ་ལས་ནད་བསྐྱེད་པའང་ཉིན་དུས་མེ་རླུང་དུ་གནས་པ་ཆུ་རླུང་དུ་གྱུར་པ་དང་། མཚན་དུས་ཆུ་རླུང་དུ་གནས་པས་རླུང་དུ་གྱུར་པ། ནང་དུས་ས་རླུང་དུ་གནས་པ་རླུང་གི་རླུང་དུ་གྱུར་པ་དང་། ནུབ་དུས་རླུང་གི་རླུང་དུ་གནས་པ་མེ་རླུང་དུ་གྱུར་པ་རྣམས་ལས་ནང་དུ་འགྲོལ། དེའང་མེ་རླུང་དུ་གནས་གྱུར་པ་ལ་མཁྲིས་པ། ཆུ་ལས་བན་ཀན། རླུང་ལས་རླུང་ནད། ས་ལས་ལྡན་པ་སྟེ་ནད་གཉིས་འདུས་དང་། འདུས་པ་སྟེ་གསུམ་ག་འདུས་པའི་ནད་བསྐྱེད་དོ། །ནད་བཅོས་ཚུལ་ནི་སློབ་དཔོན་ཆེན་པོ་བི་མ་ལའི་དུམ་དུམ་ཁྲིགས་ན་གསལ་ལོ། །མདོར་ན་ལས་རླུང་གི་བྱེ་བྲག་བཅུ་གཉིས་ལས་ནང་དུ་འཕེལ་འགྲིབ་བྱེད། དེས་ཕྱིར་ལོ་བཅུ་གཉིས། ནང་དུ་ཟླ་
བ་བཅུ་གཉིས། གསང་བར་དུས་སྦྱོར་བཅུ་གཉིས་སུ་བྱས་ནས་འཁོར་བ་སྨིན་པར་བྱེད་པ་ཡིན་ནོ། །དེ་དག་ཀྱང་བསྡུ་ན་འཛིན་པ་དང་བསྐྱེད་པའི་རྒྱུ་གཉིས་ལ་བསྡུ་བའི་ཚུལ་དེ་ལས། ལས་ལ་རྣམ་པ་གཉིས་ཡིན་ཏེ། །འཛིན་པའི་རྒྱུ་དང་བསྐྱེད་པའི་རྒྱུ། །ཞེས་སོ། །དེ་ཡང་ཕྱི་རོལ་གྱི་གནས་སྐབས་དང་སྦྱར་ཏེ་ཉིན་ཞག་གཅིག་གི་རླུང་ཉི་ཁྲི་ཆིག་སྟོང་དྲུག་བརྒྱ་ལ་དབྱུག་གུས་ཕྱེ་ན་ཞག་གཅིག་ལ་ཐུན་བརྒྱད། ཐུན་ཚོད་སུམ་ཅུ་རྩ་གཉིས། དབྱུག་གུ་དྲུག་ཅུ་རྩ་བཞི། འཕོ་བ་བཅུ་དྲུག་སྟེ། འཕོ་བ་རེ་ལ་རླུང་ཆིག་སྟོང་སུམ་བརྒྱ་ལྔ་བཅུ་ཡོད་པ་བཞིན། གཞན་ལའང་དགོད་དོ། །དེ་ལྟ་བུའི་ཞག་གཅིག་ལ་འབྱུང་བའི་བྱེད་ལས་བཅུ་གཉིས་ཀྱི་བྱེར་ཟུག་བཅུ་གཉིས་སུ་འགྱུར་ལ། དེས་རླུང་བཅུ་གཉིས་སུ་འཕེལ་འགྲིབ་ལྟར་སྟོན་ཅིང་ཉི་མ་ལྷོ་བྱང་གི་བགྲོད་པས་ཉིན་ནུབ་རིང་ཐུང་འབྱུང་བའི་གནད་མ་འཁྲུལ་དུས་ཀྱི་འཁོར་ལོས་སྟོན་པ་ལྟར་ནང་གི་རླུང་ལའང་དེ་བཞིན་དུ་ཡོད་དོ། །ཡེ་ཤེས་ཀྱི་རླུང་གིས་མྱ་ངན་ལས་འདས་པ་སྨིན་པའི་ཚུལ་ནི། སྤྱིར་གནས་སྐབས་ཀྱི་འགྱུ་བ་ཙམ་དུ་རླུང་གཉིས་གཅིག་ཀྱང་རྩལ་གནད་དུ་བསྣུན་པས་རྩ་མ་འཁྱུས་པའི་འགྱུ་བ་ལས་ཡེ་ཤེས་ཀྱི་རླུང་དུ་སོང་ནས་བྱེད་ལས་བདེ་བ་དང་། སྟོང་པ་དང་། གསལ་བར་སྟོན་པས་ན་ཡེ་ཤེས་ཀྱི་རླུང་ཞེས་བྱ་སྟེ་སྒྲིབ་བྱེད་ཤེས་བྱའི་ཐ་སྙད་ཀྱིས་མ་བསླད་པའོ། །དཔེར་ན་ལས་རླུང་འདོད་རྒྱལ་བ་སྲོག་བརྩར་ཞུགས་ན་སྨྱོན་པར་འགྱུར་ཀྱང་། མཐའ་གཉིས་ལ་མི་གནས་པའི་ཡེ་ཤེས་ཀྱི་རྩ་དབུ་མའི་ནང་དུ་ཞུགས་ན་སངས་རྒྱས་ཀྱི་ས་དང་འབྲས་བུའི་ཡོན་ཏན་བསྐྱེད་པ་བཞིན་དུ། ཤེས་པའི་གདངས་
དང་རྩ་ནས་འགྱུ་བའི་རླུང་ཙམ་དུ་གཅིག་ཀྱང་གནད་དུ་བསྣུན་མ་བསྣུན་དང་། དེ་སྒྲ་ཇི་བཞིན་པ་ལམ་དུ་སོང་མ་སོང་གི་ངོས་ནས་ཤེས་པ་ལས་སུ་རུང་བ་ལས་ཡེ་ཤེས་དང་། མ་རུང་བ་ལས་ཉོན་མོངས་དང་འཁོར་བའི་རྒྱུར་འགྱུར་བའོ། །དེ་བས་ན་ཡེ་ཤེས་ཀྱི་རླུང་དེ་ལས་སུ་རུང་བའི་བྱེད་ལས་ནི་བཞི་སྟེ། རླུང་དེ་གཡོ་བ་མེད་པའི་ཆ་ནས་གཞི་གནས་ཀྱི་ཡེ་ཤེས་ཀྱི་ལས་བྱེད་པས་ཅིར་སྣང་གནས་ལུགས་ལས་འགྱུར་མི་སྲིད། རླུང་དེ་སྣང་བའི་ཆ་ནས་ཡེ་ཤེས་ཀྱི་མཚན་ཉིད་མ་འདྲེས་པར་འཛིན་པས་སོ་སོའི་རིགས་དང་སྐུ་དང་ཡེ་ཤེས་དང་འོད་དང་ཁ་དོག་གི་གོ་འབྱེད་ཅིང་། །དེ་ལྟར་འབྱེད་ཀྱང་གཞན་བྱུང་གི་རྐྱེན་ལ་མ་ལྟོས་པར་རང་གི་ངོ་བས་ཡེ་ནས་ཤེས་པས་ཡེ་ཤེས་ཞེས་བྱའོ། །དེ་སྐྱེ་བའི་ཆ་ནས་སོ་སོ་རང་རིག་གི་ཤེས་བྱས་བསྡུས་པའི་ཡེ་ཤེས་ཀྱིས་རང་གཞན་གྱི་དོན་གཉིས་ཐོགས་པ་མེད་པར་བྱེད་ཀྱང་བྱ་བྱེད་རང་རྒྱུད་པར་མི་གནས། འགྱུ་བའི་ཆ་ནས་བདག་དང་བདག་གིར་འཛིན་པ་མ་ཡིན་བཞིན་དུ་འཇིག་རྟེན་དང་འཇིག་རྟེན་ལས་འདས་པའི་ཤེས་བྱས་བསྡུས་པའི་ཐམས་ཅད་མཁྱེན་པའི་ཡེ་ཤེས་ལ་མངའ་དབང་འབྱོར་པའོ། །དེ་ལྟར་རྒྱུ་དུས་ཀྱི་བྱེད་པ་བཞི་པོས་ལམ་དུས་ན་དོན་དམ་པའི་འབྱུང་བ་བཞིར་བྱས་པས་འབྲས་དུས་ན་སྐུ་བཞིའི་ངོ་བོར་སྨིན་པ་སྟེ་སྔ་མ་ལས། ཡེ་ཤེས་རླུང་ནི་བཞི་ཡིན་ཏེ། །རིགས་དང་ཡེ་ཤེས་ཁ་དོག་དང་། །ཐིག་ལེ་དངོས་ཀྱི་རླུང་ཡིན་ནོ། །ཞེས་སོ། །དེ་ལྟར་ལས་རླུང་དང་ཡེ་ཤེས་ཀྱི་རླུང་གཉིས་པོའི་བྱེད་ལས་ངེས་པར་བྱས་ནས་དྭངས་མའི་རླུང་ལྔ་དབུ་མར་བསྡུ་བའི་ཚུལ། ཁྱད་པར་དྭངས་མའི་རླུང་ལྔ་དྷཱུ་ཏིར་ཆུད། །ཟད་པར་ས་ཆུ་མེ་རླུང་ནམ་མཁའི་ཡི། །ཏིང་ངེ་འཛིན་དང་ཡོན་ཏན་རྫུ་འཕྲུལ་འགྲུབ། །གསང་བའི་རླུང་
ནི་ཡེ་ཤེས་རྣམ་པ་ལྔ། །རགས་པའི་ཆོས་དང་རྣམ་པ་འགལ་བ་ཡིན། །དེ་ལ་སྲོག་གི་སྦྱོར་བ་རླུང་ལ་མ་བསླབས་ན་ཁམས་ལས་སུ་མི་རུང་ཞིང་ཏིང་ངེ་འཛིན་དང་། དེ་ལས་སྐྱེས་པའི་རྫུ་འཕྲུལ་ཀྱང་མི་འགྲུབ་པས་རེ་ཞིག་དང་པོ་ཟད་པར་གྱི་ཏིང་ངེ་འཛིན་ལ་དམིགས་ནས་རླུང་དབུ་མར་བསྡུ་ཚུལ་ནི། སྲོག་དང་ཐུར་སེལ་ཁ་སྦྱར་ནས་ནང་དུ་ཐུབ་ཐང་དུ་བཟུང་བའི་མཐར་དལ་གྱིས་ཕྱི་ལ་བཏང་ནས་ཕྱི་ནང་གི་འབྱུང་བ་གཉིས་མེད་གཅིག་ཏུ་དར་ཅིག་བཟུང་ནས་སྔར་བཤད་པའི་འབྱུང་བ་སོ་སོའི་ཁ་དོག་དང་དབྱེ་བས་དབུ་མའི་ནང་ལོགས་སྙིང་གའི་ཐད་སོའི་འཁོར་ལོ་སོ་སོའི་དབུས་ལ་སོགས་པར་བསྒོམས་པ་ཅུང་ཟད་བརྟན་དུས། བདེ་ཆེན་ན་ཆུ་རླུང་། ལོངས་སྤྱོད་ནས་རླུང་། སྙིང་ནང་དུ་ནམ་མཁའ། ལྟེ་བར་མེ་རླུང་རྣམས་ཀྱི་ཁ་དོག་དང་རྣམ་པ་ཅན་གང་ཞིག་རླུང་སེམས་བྱེད་པ་གཅིག་ཏུ་བཅིངས་པས་རླུང་ལྔ་ལས་སུ་རུང་བའི་རྟགས་སུ་རླུང་ལྔའི་ཁ་དོག་དང་། རྩ་འཁོར་མཐོང་བ་དང་། ཤེས་པ་གསལ་ལ་མི་རྟོག་པ་དང་། སྟོང་གཟུགས་ཀྱི་རྣམ་པ་དུ་མ་མཐོང་བར་འགྱུར་རོ། །དེ་ཡང་གཡས་རླུང་དབུ་མར་ཚུད་པས་དུ་བ་ལྟ་བུ་དང་། གཡོན་རླུང་ཚུད་པས་སྨིག་རྒྱུ། མེ་རླུང་ལས་མར་མེ་དང་འོད་འབར་བ། ཆུ་རླུང་ལས་སྤྲིན་དང་། མཐོངས་ཁུང་གི་ཟླ་འོད་ལྟ་བུ། ས་རླུང་ལས་གསེར་གྱི་ཁ་དོག་དང་། གློག་ལྟ་བུ། ནམ་མཁའི་རླུང་ལ་དང་པོར་མཐིང་ག་དང་། དེ་ནས་འོད་ལྔའི་ཐིག་ལེ། ཐམས་ཅད་དབུ་མར་ལས་སུ་རུང་བ་ལས་འོད་ལྔ་དང་། གཞའ་ཚོན་དང་། ཐིག་ལེ་དང་། ལྷ་སྐུ་དང་། མཆོད་རྟེན་དང་། གཞལ་མེད་ཁང་། དྲྭ་ཕྱེད། པདྨ་ལ་སོགས་པ་དང་། མདོར་ན་ལུས་གནད་ཀྱི་ཁྱད་པར་དང་། རླུང་སེམས་ཀྱི་འདུ་བ་ངན་པ་ལས་
དྷ་དུར་ཐོས་པས་སྲོག་རླུང་འདུས་པའི་འཁྲུལ་སྣང་བཞིན་འགྲོ་དྲུག་གི་འཁོར་ལོ་དྲུག་ཏུ་རླུང་སེམས་འདུས་ན་བདེ་འགྲོ་དང་ངན་སོང་གི་གནས་རིགས་སོ་སོའི་ཡུལ་དང་བདེ་སྡུག་གི་སྣང་བ་འཆར་རོ། །དེ་ལྟར་བྱུང་ན་སེམས་ཅན་དེ་དག་ལ་སྙིང་རྗེ་ཆེན་པོ་བསྒོམས་ཤིང་དེ་ནས་གདོན་པར་སེམས་བསྐྱེད། གནས་སྦྱོང་གི་གདམས་ངག་དང་ལྡན་པས་འཁྲུལ་པའི་གཞི་རྩ་གཅད། ཁྱད་པར་ཟད་པར་སོ་སོའི་ཏིང་ངེ་འཛིན་ལ་དབང་ཐོབ་པའི་དུས་ན་གཞན་སྣང་ལ་ལུས་ཀྱི་དངོས་པོ་དེ་དང་དེར་སྣང་བའི་རྫུ་འཕྲུལ་གྱི་བཀོད་པ་འགྲུབ། དེའང་སའི་རླུང་གི་དྭངས་མ་དབུ་མར་ཚུད་པས་ཟད་པར་སའི་ཏིང་ངེ་འཛིན་ལ་དབང་བསྒྱུར། ནང་དུ་སེམས་གནས་ཁྱད་པར་ཅན་དང་། ཕྱི་རོལ་དུ་རིན་འབྱུང་གི་ངོ་བོ་འོད་ཟེར་སེར་པོར་གསལ། ང་རྒྱལ་གནས་སུ་དག །མཉམ་པ་ཉིད་ཀྱི་ཡེ་ཤེས་ལ་སྦྱོང་། རིན་པོ་ཆེ་བརྩེགས་པའི་འཇིག་རྟེན་དུ་འགྲོ། དེ་བཞིན་ཆུ་རླུང་གིས་ཟད་པར་ཆུའི་ཏིང་ངེ་འཛིན་དང་། དངས་གསལ་རྙོག་པ་མེད་པའི་སེམས། མི་བསྐྱོད་པའི་ངོ་བོ་འོད་དཀར་པོ། །ཞེ་སྡང་དག །མེ་ལོང་ལྟ་བུའི། མངོན་པར་དགའ་བའི་ཞིང་དུ་འགྲོ། །མེ་རླུང་དབུ་མར་ཚུད་པས་དྲོད་སྐྱེ། རླུང་གི་རླང་དབུ་མར་ཆུད་པས་ནང་དུ་སེམས་གཡོ་བ་དང་མཆེད་པ་ཐོབ། །ནམ་མཁའི་རླུང་དབུ་མར་ཆུད་པས་དེ་ཐམས་ཅད་པའི་ཆོས་ཉིད་རྣམ་པར་མི་རྟོག་པ་སྐྱེ་ཞིང་། གཞན་རྣམས་དག་བྱ་དག་འབྲས་སྤྱི་དང་མཚུངས་པས་ན་སྒྱུ་འཕྲུལ་དྲྭ་བ་ལས། རླུང་ལྔའི་དྭངས་མ་སྟོབས་གྱུར་ན། །འོད་ལྔ་ནང་གི་ཡེ་ཤེས་ལྔ། །སྐུ་ལྔ་བགྲོད་པའི་ཞིང་ཁམས་ལྔ། །ཟད་པར་ལྔ་སོགས་འཐོབ་པར་འགྱུར། །ཞེས་སོ། །དེ་ལྟར་རླུང་གི་རྣལ་འབྱོར་ལ་བརྟེན་པས་ཤེས་པ་གསལ་དངས་ཕྱེད། ངོ་བོ་སྤྲོས་པ་དང་བྲལ། འགྱུ་བྲན་ཡེ་ཤེས་སུ་དེངས་པའི་
ཚེ། གསར་པའི་རླུང་ཞེས་བྱ་བ་ལྷག་མཐོང་རྣམ་པར་མི་རྟོག་པའི་ངོ་བོ་ཉིད་རགས་པའི་ཆོས་ཐམས་ཅད་དང་ཤིན་ཏུ་འགལ་བ། ཆོས་ཉིད་དོན་གྱི་ཡེ་ཤེས་ལྔའི་རང་བཞིན་ཅན་རྣམ་པར་འགྱུར་བ་མི་བརྟན་པའི་དོན་དང་མཇལ་བར་འགྱུར་ཏེ། ཡེ་ཤེས་ཀྱི་རླུང་ནི་གནས་སྐབས་འགྱུར་བ་ཅན་དུ་སྟོན་ཀྱང་། མཐར་ཐུག་འོད་གསལ་བའི་བདག་ཉིད་ཅན་ཡིན་པས་སོ། །དེའི་དོན་དུ་ལམ་གྱི་གནས་སྐབས་ན་ཐབས་ཀྱི་ཆའི་མན་ངག་ཟབ་མོ་ལ་གནད་དུ་བསྣུན་ནས་རླུང་གི་རེག་བྱ་དང་གྲངས་ལའང་བསླབ་པར་བྱ་སྟེ། རེག་བྱ་ནི་འབྱུང་བ་སོ་སོའི་མཚན་ཉིད་ལྟར་བསྒོམ་ལ། གྲངས་ནི་ཕྲེང་བ་ལ་སོགས་པ་བགྲངས་པས་རླུང་འགག་སྟོབས་ཀྱིས་རིམ་པས་ཉུང་ངུ་ཉུང་ངུ་སོང་ནས། རེ་ཞིག་ན་རླུང་རང་ལུགས་སུ་རྒྱུ་བ་ཉིས་བརྒྱ་ལྔ་བཅུ་རྩ་བརྒྱད་ཀྱི་རིང་ལ་རླུང་ཁུག་པ་གཅིག་གིས་ཆོག་པར་སོང་ནས་བཟུང་མཐར་ཉི་ཁྲི་ཆིག་སྟོང་དྲུག་བརྒྱ་པོ་ཐམས་ཅད་དེ་ལྟར་མི་རྒྱུ་བར་མཉམ་པར་འབབ་པ་ནི་ཡེ་ཤེས་ཀྱི་རླུང་གི་དབང་དུ་གྱུར་པ་ལས་སོ། །དེའི་ཚེ་བྱེད་ལས་ཐ་དད་པའི་རྩ་སྟོང་ཕྲག་བདུན་ཅུ་རྩེ་གཉིས་པོ་དག་པས་རྩ་ཐམས་ཅད་དབུ་མ་གཅིག་གི་རང་བཞིན་དུ་འགྲོ་བ་ཡིན་ནོ། །གཞན་ཡང་རླུང་ལས་སུ་རུང་བས་རང་བཞིན་གྱི་རླུང་ལྔ་དང་དབང་པོ་ལྔ་ལ་རྒྱུ་བའི་རླུང་དབང་དུ་འདུ། ལུས་ཡང་བ་དང་། འཇག་མའི་རྩེ་ལ་སྐྱིལ་ཀྲུང་འཆང་ནུས་པ་དང་། བེམ་པོའི་བྲག་ལ་ཐོགས་རེག་མི་མངའ་ཞིང་། འབྱུང་བ་གཞན་ལའང་འདོད་རྒྱལ་དུ་སྤྱོད་ནུས་པ་དང་། མངོན་ཤེས་དང་། རྫུ་འཕྲུལ་དང་། རྐང་མགྱོགས་ལ་སོགས་པའི་ཐུན་མོང་གི་དངོས་གྲུབ་རྣམས་འགྲུབ་པ་ཡིན་ནོ། །དེ་ལྟར་སྲོག་གི་རང་བཞིན་རླུང་གི་བྱེད་ལས་ཤེས་པར་བྱས་ནས་
ཁམས་ཀྱི་བཞུགས་ཚུལ་ནི། གསུམ་པ་བཀོད་པ་བྱང་ཆུབ་སེམས་ཀྱི་ཁམས། །རོམ་ལས་ནི་ཟླ་བའི་བདུད་རྩི་དང་། །རྐྱང་མ་ལས་ནི་ཉི་མའི་རྡུལ་འབབ་ཅིང་། །ཕོ་ཡི་རྐྱང་མ་མོ་ཡི་རོ་མའི་སྣ། །མདུད་པར་གྱུར་པས་ཁམས་གཉིས་འཛག་པ་བསྲུང་། །དེ་ལས་གཞན་དུ་གཉིས་པོ་ལས་མཆེད་པའི། །རྩ་མདུད་ཀུན་ན་དྭངས་མ་དཀར་དམར་གཉིས། །དཔའ་བོ་དང་ནི་རྣལ་འབྱོར་མའི་ཚུལ་དུ། །འཁྲིལ་ཞིང་སྦྱོར་བས་བདེ་སྟོང་མཆོད་པ་ལེན། །དེ་ལ་ལེན་པའི་རྣམ་ཤེས་ཀྱི་རྟེན་དུ་གྱུར་པ་ཁམས་དྭངས་མ་ཆེན་པོ་ཡང་ཁུ་རྡུལ་གཉིས་ཀྱི་རྣམ་པར་ཡོད་པའི་ཟླ་བའི་རང་བཞིན་ཁུ་བ་ནི་རོ་མའི་ཡར་སྣ་ནས་སྤྱི་གཙུག་གི་ཧཾ་ལས་འབབ་ལ། ཉི་མའི་རང་བཞིན་རྡུལ་ནི་རྐྱང་མའི་མར་སྣ་གསང་གནས་ཀྱི་ཨ་ལས་འབབ་ཅིང་། དེའང་སྐྱེས་པའི་རྐྱང་མ་དང་བུད་མེད་ཀྱི་རོ་མའི་མར་སྣ་མདུད་པར་གྱུར་པ་ལས་གཅིག་ཤོས་ལ་རྡུལ་དང་གཅིག་ཤོས་ལ་ཁུ་བ་མི་འཛག་པར་བཤད་པའི་ཕྱོགས་འདི་ཐལ་བྱུང་གི་རྣམ་རྟོག་ཅན་ལ་གོ་བ་བླང་བདེ་བའང་ཡིན་ནོ། །དེ་ལྟར་གཉིས་པོ་ལས་འཁོར་ལོའི་རྩ་འདབ་ལ་སོགས་ཐ་དད་པར་གྱེས་པའི་དྭངས་མ་དཀར་དམར་གཉིས་རྩ་མདུད་ཕལ་ན་དཔའ་བོ་དང་རྣལ་འབྱོར་མའི་བདག་ཉིད་དུ་བཞུགས་ནས་ཞུ་བདེའི་རྣལ་འབྱོར་བསྒོམ་པ་རྣམས་ལས་བདེ་སྟོང་གི་མཆོད་པ་ལེན་པ་ཡིན་ནོ། བརྟག་གཉིས་ལས། ཁུ་བའི་རྣམ་པ་བཅོམ་ལྡན་འདས། །དེ་ཡི་བདེ་བ་འདོད་མར་བརྗོད། །ཅེས་དང་། ངེས་བརྗོད་བླ་མ་ལས། དཀྱིལ་འཁོར་དཔའ་བོ་རྣལ་འབྱོར་མ། །ཁ་སྦྱོར་གཉིས་སུ་མེད་པ་ཉིད། །ཅེས་སོ། །དེའང་འཁོར་བའི་རྩ་བ་འཛག་བདེ་ཡིན་པས་དེའི་རང་བཞིན་འཕོ་མེད་དུ་འཆིང་བའི་བསམ་པས་ཡིད་ནང་དུ་ཆུད་པ་ལས་
སོ་སོ་རང་རིག་པའི་ཡེ་ཤེས་ཀྱི་ཞུ་བདེའི་མཚན་ཉིད་ལ་རྒྱས་ཐེབས་ནས་འཁོར་གསུམ་ཡོངས་དག་གི་ཚོགས་སུ་སྦྱོར་བ་ནི་དེ་ཁོ་ན་ཉིད་ཀྱི་མཆོད་པས་མཉེས་པ་བྱེད་པ་སྟེ་རྡོ་རྗེ་མཁའ་འགྲོ་ལས། ཇི་བཞིན་ཤེས་རབ་སྙོམས་ཞུགས་པའི། །ཡང་དག་སྦྱོར་དང་ལྡན་པ་ཡིས། །དེ་བཞིན་གཤེགས་པའི་གཙུག་ཏོར་དཀར། །ཡིད་ནང་ཆུད་པ་དེ་ཡིས་སྤྱད། །མཆོག་ཏུ་དགའ་བ་སྤྲོ་བ་ཡི། །གནས་སྐབས་སུ་ནི་མཉེས་པར་འགྱུར། །ཞེས་སོ། །དེ་ལྟར་རྩ་རླུང་ཐིག་ལེ་གསུམ་གྱི་གནས་ཚུལ་མངོན་དུ་རིག་ནས་དེ་ལ་རྩོལ་པའི་སྦྱོར་བས་གནད་དུ་བསྣུན་པ་ལམ་བསླབས་ན་རྩ་མདུད་གྲོལ་བའི་ཡོན་ཏན་གྱི་ཁྱད་པར་མི་འགྲུབ་པས་མཐར་ཐུག་གི་འབྲས་བུ་ལ་རིང་བའི་ཕྱིར་དེའི་གནད་བཤད་ནས་བསྒོམ་པའི་ཚུལ། མདོར་ན་གནས་པ་རྩ་ནི་ཡུར་བ་འདྲ། །གཡོ་བ་རླུང་ནི་འགྲོ་འོང་ཁ་ལོ་པ། །བྱང་ཆུབ་སེམས་ནི་ཆུ་འདྲ་ཁྲིད་སར་འདུ། །འཁོར་ལོ་དྲུག་ཏུ་བརྩེགས་པའི་སྒྲ་གཅན་དབྱིངས། །སྲོག་དང་རྩོལ་བའི་ཤིང་རྟས་དྲངས་པ་ལས། དབུ་མའི་མདུད་པ་གཉིས་གཉིས་གྲོལ་བ་དང་། །རླུང་དང་ཁམས་ཀྱི་དྭངས་མ་རྣམ་གཉིས་ཏེ། སྒྲ་གཅན་ལྟོར་ཞུགས་དང་པོའི་ས་ནས་བཟུང་། །ས་བཅུའི་ཡོན་ཏན་གོང་འཕེལ་གཙུག་ཏོར་འགྲོ། །དེ་ཡང་རྩ་གནད་དུ་འགྲོ་བ་ལ་ལུས་གནད། རླུང་གནད་དུ་འགྲོ་བ་ལ་འཁྲུལ་འཁོར། ཐིག་ལེ་གནད་དུ་འགྲོ་བ་ལ་རྩོལ་བ་གལ་ཆེ་བ་ནི་སྤྱིར་གཅེས་ལ། བྱེ་བྲག་ཏུ་ལུས་ཀྱི་རྟེན་རྩ་ནི་ཡུར་བ་དང་འདྲ་སྟེ་རླུང་རྒྱུ་བའི་ལམ་ཡིན་པས་སྲོག་རྩོལ་ལ་བརྟེན་ནས་རྩ་ལམ་སྦྱང་བར་བྱའོ། །ངག་གི་རྟེན་རླུང་ནི་འཁོར་འདས་གཉིས་ཀར་འགྲོ་བའི་ཁ་ལོ་བ་ལྟ་བུ་ཡིན་པས་
འཁོར་བའི་བྱེད་པ་བཅིང་པའི་གནང་ལ་མཁས་པར་བྱའོ། །ཡིད་ཀྱི་རྟེན་ཐིག་ལེ་ནི་དོན་དམ་པའི་བྱང་ཆུབ་སེམས་ཀྱི་ཡང་རྟེན་ཡིན་པས་རླུང་གི་གནད་ལ་བརྟེན་ནས་ཁྲིད་སར་འདུ་བར་བྱས་ཏེ་རྣམ་པར་འགུར་བ་མེད་པ་ཡེ་ཤེས་ཀྱི་རླུང་དང་ལྷན་ཅིག་གཙུག་ཏོར་གྱི་རྩེ་མོར་བཅིང་པར་བྱའོ། །དེ་ཡང་ལས་རྒྱའི་དབང་དུ་བྱས་ན་ཐལ་འགྱུར་ལས། ཐིག་ལེའི་ཆོས་ཉིད་སྟོན་འདོད་པས། །དོན་དམ་དང་ནི་ཀུན་རྫོབ་ལས། །རེ་ཞིག་ཀུན་རྫོབ་ཐིག་ལེ་ལ། །བརྟེན་ནས་སངས་རྒྱས་འདོད་པ་ཡི། །ཞེས་དང་། བསྟེན་བྱ་ཉིད་དང་རྩ་རྣམས་དང་། །དམིགས་བྱ་དག་གིས་ལུས་རྫོགས་བྱ། །དེ་ནས་ཐིག་ལེ་ཀུན་རྫོབ་ཉིད། །རབ་བཅིང་བཟུང་དང་ལྡོག་པ་དང་། །རྩ་ལ་གདབ་ཅིང་རླུང་ལ་བསྲེ། །སྟོང་ཉིད་བསྟེན་བྱ་བློ་རྗེས་བཅད། །ལུས་དང་སེམས་ཉིད་གོ་ལྡོག་བྱ། །དོན་དམ་ཐིག་ལེ་བསྟེན་པ་ཡིས། །ཆོས་སྐུ་སྟོད་པའི་ཡུལ་རྣམས་རྙེད། །ཅེས་སོ། །ཇི་ལྟར་བཅིང་ན་ལུས་བསྲངས་པས་རྩ་བསྲང་། རྩ་བསྲངས་པས་རླུང་བསྲང་། རླུང་བསྲངས་པས་རྣམ་པར་མི་རྟོག་པའི་ཆོས་ཉིད་མཐོང་བ་ཡིན་པས་ལུས་ཀྱི་གནད་རྣམ་པར་སྣང་མཛད་ཀྱི་ཆོས་བདུན་ནམ། གཙུག་ཏོར་ནམ་མཁའ་ལ་དྲང་པོར་གཏད་པས་ལྟག་པ་ཐང་ཞིང་མགྲིན་པ་སྒུར་བ་ཙམ་ཡོད་བས་དེས་གཙུག་ཏོར་དང་། ལྟག་པ་དང་། མགྲིན་པའི་རྩ་རྣམས་འཆིང་ངོ་། །འདན་པ་མ་ཡོ་བ་དྲང་པོར་བསྲངས་པས་དཔྲལ་བ་རྣབ་སྨིན་དབུས་སྣ་རྩའི་རྩ་རྣམས་འཆིང་ངོ་། །ལྟ་སྟངས་དང་། གྱེན་དུ་ལྡོག་པ་དང་། དཔུང་པ་མཐོ་ཟིང་ངེ་བྱས་པས་མིག་དང་ཁ་དང་ཕྲག་པའི་རྩ་རྣམས་འཆིང་ངོ་། །གྲུ་མོ་ཕྱིར་མ་གྱེས་པར་རྩིབ་མ་ལ་སྦྱར་བས་མཆན་ཁུང་གི་རྩ་རྣམས་འཆིང་ངོ་། །སྒལ་ཚིགས་དྲང་པོར་བསྲང་ཞིང་དགྱེ་འཁྱོག་མེད་པར་བྱས་པས་ནུ་མ་
སྙིང་ག་ལྟེ་བ་འདོམས་བར་གྱི་རྩ་རྣམས་འཆིང་ངོ་། །ལག་ངར་གྱི་རུས་པ་དཔྱི་མགོའི་རུས་པ་ལ་རག་པར་བརླའི་སྟེང་དུ་བཞག་པས་བརླའི་རྩ་རྣམས་འཆིང་ངོ་། །བསམ་གཏན་གྱི་སྟེགས་བུ་ལ་ཚང་ར་བཞག་ཅིང་རྐང་པ་སྟན་སྟེངས་སུ་སྐྱིལ་ཀྲུང་བཅས་ནས་གཡོ་འགུལ་མེད་པར་ཡུན་རིང་དུ་གནས་པས་མཚན་མ། གཤང་ལམ་པུས་མོ་བྱིན་པ་པོ་ལ་གོང་མཐེ་བོང་རྐང་སོར་གྱི་རྩ་རྣམས་འཆིང་བ་ཡིན་ནོ། །དེ་ལྟར་རྩའི་གཙོ་བོ་རྣམས་བཅིངས་པས། དེ་ལས་གྱེས་པའི་རྩ་ཡལ་ག་བདུན་ཁྲི་ཉིས་སྟོང་ཡོད་པ་རྣམས་ཆིངས་ཤིང་། དེ་རྣམས་ལ་རྒྱུ་བའི་རླུང་ཆིངས་པས་རླུང་ལ་བཞོན་པའི་རྣམ་རྟོག་འཆིང་། རླུང་དང་རྣམ་རྟོག་གཡོ་མེད་དུ་གྱུར་ན་ཤུགས་ལས་བདེ་བ་སྐྱེ་ཞིང་། རྒྱུད་ལས་ཀྱང་། མཐོ་རིས་རྩ་གསུམ་གཟའ་བརྒྱད་སྟེང་དུ་བཅིང་། །ངན་སོང་རྩ་གསུམ་ཡན་ལག་འོག་ཏུ་བསྡོམས། །ནམ་མཁའི་སྒོ་འབྱེད་དབང་སྡུད་པར་རླུང་དགང་། །དེ་གསུམ་གཅིག་ཅར་སྔགས་ཀྱི་མྱུར་ལམ་སྟེ། །ཉི་ཁྲི་ཆིག་སྟོང་དྲུག་བརྒྱའི་དབུགས་རྟོག་ནི། །སྟེང་འོག་ཆིངས་ཀྱི་ཐུབ་པས་ཐུབ་པའི་ལམ། །བསྒོམས་པས་བྱིང་རྒོད་གེགས་སོགས་སྐྱོན་མེད་པར། །རྩ་བའི་རླུང་ལྔ་ཡན་ལག་རླུང་ལ་འབད། །ཅེས་པས་འདུག་སྟངས་དང་བཅས་པས་རྩ་གསུམ་འཁོར་ལོ་དྲུག་དང་བཅས་པ་གསལ་གདབ་ཅིང་། །དེ་ཡང་དབུ་མ་ལ་རོ་རྐྱང་གི་མདུད་པ་ཉི་ཤུ་རྩ་གཅིག་ཏུ་བྱས་པ་ཐབས་ལ་བརྟེན་ནས་རླུང་སེམས་ལས་སུ་རུང་བ་དང་། ཚོགས་གཉིས་གོང་འཕེལ་གྱི་མཐུ་དང་། འཆི་བའི་དུས་གསུམ་པོར་དབུ་མར་རླུང་ཞུགས་ཏེ་མདུད་པ་རྣམས་རིམ་པར་གྲོལ་བས་རླུང་སེམས་ཀྱི་འདུ་འཕྲོད་ལས་སྣང་བ་དང་།
མ་ཆེད་པ་དང་། ཐོབ་པ་དང་། ཉེ་བར་ཐོབ་པའི་ཡེ་ཤེས་བཞི་དང་། ཏིང་ངེ་འཛིན་དང་། མངོན་ཤེས་ལ་སོགས་ཡོན་ཏན་གྱི་ཚོགས་འགྲུབ་པ་ཡིན་ཏེ་རྒྱུད་ལས། ཕོ་མོ་རེག་པ་འཕྲོད་རྗེས་སུ། །དྲན་མེད་བདེ་ལ་སྨྲ་མི་ཤེས། །དེ་བཞིན་བརྒྱལ་ལམ་འཆི་བའི་དུས། །དྷཱུ་ཏིར་རླུང་ཚུད་ཅང་མི་དྲན། །དེ་ཕྱིར་ཨ་ཝ་དྷུ་ཏི་ནི། །མི་རྟོག་ཆོས་དབྱིངས་ཡེ་ཤེས་རྩ། །ཞེས་སོ། །དེ་ལ་སྤྱིར་རླུང་འཇུག་གནས་ལྡང་གསུམ་ལ་བརྟེན་ནས་དབུ་མར་འཇུག་པ་ལས་ལྡང་དུས་གཡས་བསྐོར་དང་། འཇུག་དུས་གཡོན་བསྐོར་དུ་གསལ་གདབ་པ་ཡིན་ཏེ། འདི་ལྟར་གཡས་རོ་མའི་བྱེད་ལས་ནི་རླུང་ཕྱིར་སྤྲོ་བ་བསྐྱེད་པ་འཁོར་བའི་རླུང་དུ་ཡོད་པས་རྩ་ཁའང་སྟེང་དུ་ཕྱོགས་ལ། གཡོན་རྐྱང་མའི་བྱེད་ལས་ནི་རླུང་ནང་དུ་འཇུག་བསྡུད་པ་མྱ་ངན་ལས་འདས་པའི་རླུང་དུ་ཡོད་པས་རྩ་ཁའང་འོག་ཏུ་འཕྱང་བ་ཉིད་དེ་སྡོམ་འབྱུང་ལས། །རླུང་ནི་འཁོར་བའི་སྟེང་དུ་བགྲོད། །མྱ་ངན་འདས་པས་འོག་ཏུ་བགྲོད། །ཅེས་པ་ལྟར་རོ། །དེ་ལ་ཆོས་ཉིད་ཀྱི་དབུ་མ་ནི་ཡོད་ལ་རྫས་སུ་གྲུབ་པ་མ་ཡིན་པས་སྒྲ་གཅན་ཏེ། ཕྱི་ལྟར་དུ་དེའི་གདོང་མཇུག་གཉིས་ཀྱིས་ཉི་ཟླ་བཟའ་བར་བྱེད་པས་ནང་ལྟར་དུ་ཁམས་དཀར་དམར་གྱི་རང་བཞིན་ཨ་ཧཾ་གཉིས་དབུ་མའི་ཡས་མར་གྱི་སྣ་རྩེར་གནས་པའི་འབར་འཛག་གི་ཏིང་ངེ་འཛིན་གོམས་པ་ལས་དབུ་མར་རླུང་ཞུགས་གནས་ཐིམ་གསུམ་གྱི་བྱ་བ་བྱེད་ཅིང་། ཉི་མ་དང་ཟླ་བའི་རང་བཞིན་ཁམས་དཀར་དམར་གཉིས་དབུ་མའི་ནང་དུ་རྒྱུན་མི་ཆད་དུ་འབབ་པར་བསྒོམ་པའི་བྱེད་པ་འཆིང་བ་ལ་ནུས་པ་ཐོབ་ན་ཕྱི་རོལ་ཏུ་ཉི་ཟླ་གཟའ་འཛིན་པར་མི་ནུས་ཤིང་། གཏོད་ལ་གནོན་པ་སོགས་ནུས་པའོ། །དེ་ཡང་གཏུམ་མོ་ཡེ་ཤེས་ཀྱི་འཁོར་ལོ་དང་། བདེ་
ཆེན་ཆོས་ཉིད་ཀྱི་འཁོར་ལོ་དང་། རྩ་སྦྱོངས་ཁོགས་འབྱིན་གྱི་འཁོར་ལོ་གསུམ་དུ་དབྱེ་བ་ལྟར་ན་དང་པོ་ནི། རྟ་གདོང་རྒོད་མཁའི་མེས་རྒྱ་མཚོ་ཟ་བ་ལྟར་ཉི་མའི་རང་བཞིན་གྱི་བདག་ཉིད་ཅན་ཨ་ཤད་ལས་བྱུང་བའི་མེས་ཕུང་ཁམས་མ་ལུས་པ་ཟ་བར་བྱེད་པས་གཏུམ་མོ་ཞེས་བྱ་སྟེ། དེ་ཉིད་འཁོར་ལོ་དྲུག་ཏུ་བརྩེགས་པའི་སྲོག་ཤིང་ལྟ་བུའི་དབུ་མ་སྒྲ་གཅན་གྱི་དབྱིངས་སུ་སྲོག་རྩོལ་གྱི་ཤིང་རྟས་འཁོར་ལོ་སོ་སོའི་གནས་ནས་རིམ་གྱིས་དྲངས་པ་ལས་སྤྱི་བོར་རི་བོང་འཛིན་པའི་ཡབ་ཀྱི་བདག་ཉིད་ཧཾ་ཐུར་བསྟན་དང་རེག་པ་འཕྲོད་པ་ལས་དྭངས་མ་དཀར་པོར་བབ་པས་དབུ་མ་དང་། བདེ་བ་སྐྱེས་པའི་ངང་ལ་དར་ཅིག་གློད། དེ་ནས་རོ་མའི་དྭངས་མ་དཀར་པོ་དང་། རྐྱང་མའི་དམར་པོ་གཉིས་དབུ་མའི་ཡར་སྣ་མར་སྣ་ནས་ཞུགས་པ་སྙིང་གར་འདྲེས་པའི་བདེ་གསལ་ཟུང་འཇུག་གི་ཨེ་ཝཾ་ཆེན་པོའི་ཉམས་བསྐྱང་བ་ཡིན་ནོ། །གཉིས་པའི་དོན་ཡང་གཏུམ་མོ་འབར་ཚུལ་སྔར་དང་འདྲ་བ་ལས་ཨེ་ཝཾ་ཟུང་དུ་འཇུག་པའི་ཚུལ་སྙིང་གར་ཨ་ཡིག་དང་སྤྱི་བོའི་པཾ་འདྲེས་པའི་གོང་བུ་སྲན་མ་ཙམ་ལ་སེམས་བཟུང་ངོ་། །དེ་ཡང་དུས་ཀྱི་འཁོར་ལོར། ཟུང་བདུན་གྱི་ས་བོན་རྫོགས་པའི་ཕྱི་ནས་གསལ་བྱེད་ཀྱི་རང་བཞིན་ཀྵ་ཡིག་གདན་དུ་སྨོས་པ་ནི། ཟུང་གི་ས་བོན་དབྱངས་ཡིག་སུམ་ཅུ་པོ་ཐམས་ཅད་ཀྱང་ཧཾ་ཀྱི་རང་བཞིན་གཅིག་ཏུ་འགྱུར་པའི་ཕྱིར་བཀོད་ལ། ཧཾ་དང་ཀྵ་ཡིག་ཟུང་དུ་སྦྱོར་བའི་དོན་དུ་ཀྵ་ཡིག་སྨོས་ཏེ། ཟུང་རྣམས་ཐབས་ཤེས་སུ་གྱུར་པས་ཨེ་ཝཾ་མོ། །གསུམ་པ་དང་སྦྱར་ན་ཆགས་བྲལ་རྣམས་རླུང་ཁམས་གཉིས་དུས་མཉམ་པར་ཟུང་དུ་འཇུག་པས། ལྟེ་བར་མེ་རླུང་ཨེའི་རྣམ་པས་
ཧཾ་ཡིག་ཞུ་ནས། དབུ་མ་དང་འཁོར་ལོ་ཐམས་ཅད་ཁྱབ་པའི་རླུང་སེམས་ཀྱི་ཐིག་ལེ་དཀར་པོ་ཐུར་དུ་འབབ་པ་དང་། དམར་པོ་གྱེན་འགྲོ་གཉིས་སྙིང་གར་འདྲེས་པས་གཉུག་མ་ལྷན་ཅིག་སྐྱེས་པའི་ཡེ་ཤེས་སྤྲོས་བྲལ་དུ་འཆར་བའི་ངང་ལ་གློད་པ་ཡིན་ནོ། །དེ་གསུམ་གའང་མཐར་སེམས་དང་སེམས་བྱུང་ཞི་བའི་མི་རྟོག་པ་ལ་མཉམ་པར་འཇོག་པ་ནི་མཐུན་ཏེ། ཐབས་དེས་འགྲུབ་པའི་རང་འབྲས་ནི་ལྷག་མཐོང་གི་རྟོགས་པ་བདེ་གསལ་མི་རྟོག་པའི་ཉམས་ལས་འདས་པའི་ཡེ་ཤེས་དངོས་པོ་དང་དངོས་མེད་དང་། བསྒོམ་པ་ལས་འདས་པ་ཉིད་དུ་ཤེས་དགོས་པའི་ཕྱིར་ཏེ་གསང་བ་འདུས་པ་ལས། བསྒོམ་པ་མེད་པ་བསྒོམ་པའི་དངོས། །བསྒོམས་པ་ཉིད་ནི་བསྒོམས་པ་མིན། །དེ་ལྟར་དངོས་དང་དངོས་མེད་པས། །བསྒོམ་པ་དམིགས་སུ་མེད་པའོ། །ཞེས་སོ། །དེ་ཡང་རྩ་གནས་སྤྱི་དང་བྱེ་བྲག་པའི་འཁོར་ལོ་སོ་སོར་རླུང་ཟིན་པས་ཐིག་ལེ་ཟིན། ཐིག་ལེ་ཟིན་པས་མི་འགྱུར་བའི་བདེ་བ་ཟིན་ཞིང་འཕེལ་བ་ལས་འཁོར་ལོ་སོ་སོར་རླུང་སེམས་ལས་སུ་རུང་། དུས་སྦྱོར་བཅུ་གཉིས་ཀྱི་རླུང་དག་པ་ལས་ཚོགས་དང་། སྦྱོར་བ་དང་། མཐོང་བ་དང་། བསྒོམ་པའི་ལམ་བཞི་རྫོགས་པའི་ཡོན་ཏན་འཐོབ་པ་ཡང་། དབུ་མ་ལ་རོ་རྐྱང་གི་མདུད་པ་ཉི་ཤུ་རྩ་གཅིག་ཏུ་བྱས་པའི་གཉིས་གཉིས་གྲོལ་བ་ལས་ས་བཅུ་པོ་རེ་རེ་བཀོད་པའང་ཁམས་དྭངས་མ་རེ་དང་རླུང་དྭངས་མ་རེ་དེར་ཆུད་པའི་ཡོན་ཏན་དུ་ཤེས་པར་བྱ་སྟེ། དང་པོ་སྤྲུལ་པའི་འཁོར་ལོར་རླུང་སེམས་ཞུགས་པ་ལས་དེ་ཉིད་ལས་སུ་རུང་། ཆོས་ཀྱི་རྒྱུན་གྱི་ཏིང་ངེ་འཛིན་ཐོབ་པ་ལས་ཚོགས་ལམ་ཆེན་པོའི་དྲོད་རྟགས་འཆར། དེར་རླུང་གནས་པ་ལས་འབྱོངས་པའི་ཡོན་ཏན་མངོན་དུ་གྱུར་ནས་དབུ་མའི་རྩེ་མདུད་དང་པོ་གཉིས་དང་སྤྲུལ་
པའི་འཁོར་ལོའི་རྩ་མདུད་གྲོལ། རླུང་དོན་གྱི་འོད་གསལ་མཉམ་གཞག་དང་རོ་མཉམ་དུ་གོམས་པར་གྱུར་པ་ལས་རླུང་ཐིམ་པའི་ངེས་པ་གྲུབ། སངས་རྒྱས་སྤྲུལ་པའི་སྐུའི་ཞལ་མཐོང་། །འདུན་པ་ལ་སོགས་པའི་ཏིང་ངེ་འཛིན་རྫུ་འཕྲུལ་གྱི་རྐང་པ་བཞི་ལ་དབང་ཐོབ་པའི་ཕྱིར་སྤྱན་དང་། མངོན་ཤེས་དང་། རྫུ་འཕྲུལ་ཕྲ་མོ་འགྲུབ། སྤྲུལ་བསྒྱུར་ལ་དབང་ཐོབ་པ་ཡིན་ཏེ། རྒྱན་ལས། དེ་ཚེ་ཆོས་ཀྱི་རྒྱུན་ལས་ནི། །སངས་རྒྱས་རྣམས་ལ་ཞི་གནས་དང་། །ཡེ་ཤེས་ཡངས་པ་ཐོབ་བྱའི་ཕྱིར། །འཇིག་རྟེན་ཁམས་ནི་རྣམས་སུ་འགྲོ། །ཞེས་སོ། །དབྱེ་ན་ཚོགས་ལམ་ཆུང་ངུར་དྲན་པ་ཉེ་བར་གཞག་པ་བཞི་ནི། ལུས་སུ་རྟོག་པ་ལྷར་བསྒོམ་པས་ལུས་དྲན་པ་ཉེ་བར་གཞག །བྱུང་ཚོར་ཡེ་ཤེས་སུ་བསྒྱུར་བས་ཚོར་བ། སེམས་དང་སེམས་བྱུང་གི་སྤྲོས་པ་ཉེ་བར་ཞི་བས་སེམས། སྣང་བཏགས་ཀྱི་ཆོས་ཐམས་ཅད་སྒྱུ་མར་ཤེས་པས་ཆོས་དྲན་པ་ཉེ་བར་གཞག་པ་སྟེ། སྒྱུ་འཕྲུལ་དམ་པ་ལས། བདག་བྱིན་གྱིས་བརླབས་པ་ནི་ལུས་དྲན་པ་ཉེ་བར་གཞག་པ་སྟེ་ལྷའི་ངོ་བོ་ཉིད་དུ་སྣང་བ་གཟུགས་བརྙན་ལྟ་བུའོ། །ཀུན་ཏུ་རྟོག་པའི་ཡེ་ཤེས་ཆེན་པོའི་གནས་སྐབས་ནི། ཆོར་པའི་ངོ་བོ་ཉིད་དེ་བདེ་བ་ཆེན་པོའོ། །སྤྲོས་པའི་ཕྱོགས་ལས་རྣམ་པར་རྒྱལ་པ་ནི། འདིར་སེམས་མི་དམིགས་པ་ཉིད་དོ། །གཟུགས་བརྙན་གྱི་ངོ་བོ་ཉིད་དུ་སྒྱུ་མ་སྦྱོང་བ་ནི་ཆོས་ཉིད་ཀྱི་རང་བཞིན་ནོ། །ཞེས་སོ། །ཚོགས་ལམ་འབྲིང་དུ་ཡང་དག་སྤོང་བ་བཞི་ནི། བསྐྱེད་རྫོགས་ལ་གནས་པ་དེས་མི་དགེ་བའི་ཆོས་མ་སྐྱེས་པ་རྣམས་གསར་དུ་མི་བསྐྱེད། སྐྱེས་ན་བསྐྱེད་རིམ་གྱི་ལྷར་སྣང་དང་རྫོགས་རིམ་ཀྱིས་བདེ་གསལ་བུ་སྦྱོང་། དགེ་བའི་ཆོས་
མ་སྐྱེས་པ་དག་བསྐྱེད་རྫོགས་ཀྱིས་ཡན་ལག་མང་པོས་གསར་དུ་བསྐྱེད། སྐྱེས་པ་གོང་དུ་སྤེལ་བའི་ཐབས་ཀྱང་བདག་འཇུག་དང་། སྦྱིན་སྲེག་དང་། ཕྱི་ནང་གི་ཚོགས་ཀྱི་འཁོར་ལོ་དང་། ཞུ་བདེའི་རྣལ་འབྱོར་དང་ཉེ་བར་ལེན་པའི་ལྷ་བཞི་མཆོད་པ་ལ་སོགས། བསོད་ནམས་ཀྱི་ཚོགས་མཐའ་མ་འགགས་པས་སྤང་གཉེན་དང་བདེན་འཛིན་གྱི་ཞེན་པ་སྦྱང་ངོ་། །དེ་ལ་ཉེ་བར་ལེན་པའི་ལྷ་བཞི་གང་ཞེ་ན། དམ་ཚིག་གསུམ་བགོད་ལས། དང་པོ་ཉེ་བར་ལེན་པའི་ལྷ་བཞི་མ་མཆོད་ན་ཕྱོགས་བཅུ་དུས་གསུམ་གྱི་སངས་རྒྱས་གང་ལ་ཕུལ་ཀྱང་མཉེས་པར་མི་འགྱུར་ཞིང་བཞེས་པར་མི་འགྱུར་རོ། །དེ་ཅིའི་ཕྱིར་ན། ཉེ་བར་ལེན་པའི་ལྷ་བཞི་ལ་བརྟེན་ནས་སངས་རྒྱས་སོ། །དེ་གང་ཞེ་ན་བསོད་ནམས་ཉེ་བར་ལེན་པའི་ལྷ་དཀོན་མཆོག་གསུམ། དངོས་གྲུབ་ཉེ་བར་ལེན་པའི་ལྷ་ཡི་དམ་གྱི་ལྷ། ཡང་དག་པར་འབྲས་བུ་ཉེ་བར་ལེན་པའི་ལྷ་རྡོ་རྗེ་སློབ་དཔོན་དང་མཆེད་ལྕམ། ལུས་ཉེ་བར་ལེན་པའི་ལྷ་དུས་གསུམ་གྱི་ཕ་མའོ། །ཞེས་སོ། །ཚོགས་ལམ་ཆེན་པོར་རྫུ་འཕྲུལ་གྱི་རྐང་པ་བཞི་ཡང་། བསྐྱེད་རྫོགས་ཀྱི་དོན་ལ་གཅིག་ཏུ་དྲན། འདུན་པས་བསྒོམ། སོ་སོར་རྟོགས་པའི་ཤེས་རབ་ཀྱིས་དཔྱོད། བརྗེད་པ་མེད་པར་སེམས་པས་རླུང་སེམས་ལས་རུང་གི་ཏིང་ངེ་འཛིན་དང་རྫུ་འཕྲུལ་ཐོབ། རྨི་ལམ་སྤྲུལ་སྒྱུར་ལ་སོགས་པས་སྤྲུལ་སྐུའི་ཞིང་དག་པར་བགྲོད་དེ་ཆོས་ཉན་ནས་ཁམས་ཀྱི་དྲི་མ་སྦྱོང་། ཡི་དམ་ལྷའི་ཞལ་མཐོང་ཞིང་ལུང་བསྟན་ཐོབ་པ་ལ་སོགས་སོ། །སའི་བྱེད་ལས་གཙོ་ཆེ་བ་ཆོས་ཀྱི་འཁོར་ལོར་རླུང་སེམས་ཞུགས་དེ་ལས་སུ་རུང་ན་སྦྱོར་ལམ་གྱི་དྲོད་རྟགས་འཆར། དེར་རླུང་ཞུགས་གནས་ཐིམ་གསུམ་སྔ་མ་དང་འདྲ། དབུ་མའི་རྩ་མདུད་གསུམ་པ་དང་བཞི་པ་གྲོལ། དེའང་བསྐྱེད་རྫོགས་
ཟུང་འཇུག་གི་དོན་ལ་དད་པ་དང་ངེས་ཤེས་ཀྱི་དད་པ་ཁྱད་པར་ཅན་སྐྱེ། དེས་བརྩོན་འགྲུས་ལ་བསྐུལ། རང་བཞིན་དྲན། ཏིང་ངེ་འཛིན་དང་། ཤེས་རབ་ཀྱི་སྒོ་མཐའ་ཡས་པ་བསྒོམས་པས་སྤང་བྱ་འཇོམས་པའི་ནུས་པ་ཐོབ་པ་ནི་དབང་པོ་ལྔའོ། དེ་ལྟར་ལྔས་དྲོད་སྣང་བའི་ཡེ་ཤེས་མི་རྟོག་པ་ཐེ་ཚོམ་དང་། མི་ཁོམ་པ་ཟད་པ་ལ་སོགས་པའི་རྟགས་ཀྱིས་མཚོན་ལ། རྩེ་མོ་མཆེད་པའི་ཡེ་ཤེས་དགེ་རྩ་བརྟན་པ་ལ་སོགས་པ་ཐོབ་ཅིང་ཆོས་ཐམས་ཅད་རྨི་ལམ་དང་འདྲ་བར་རྟོགས། བདེན་ཚིག་འགྲུབ་པའི་ཚུལ་རྒྱན་ལས། །རྨི་ལམ་ན་ཡང་ཆོས་རྣམས་ཀུན། །རྨི་ལམ་ལྟ་བུར་བལྟ་ལ་སོགས། །རྩེ་མོར་ཕྱིན་པ་སྦྱོར་བའི་རྟགས། །རྣམ་པ་བཅུ་གཉིས་དག་ཏུ་བཞེད། །ཅེས་སོ། །དེ་ཡང་དད་པ་ལ་སོགས་པ་དབང་པོ་ལྔ་ནུས་པ་ལྷག་པོར་གྱུར་པས་སྤང་བྱ་འཇོམས་པའི་ཕྱིར་སྟོབས་ལྔ་པ་ཐོབ་དུས་བཟོད་པ་དེ་ཁོ་ན་ཉིད་ལ་ཞུགས་པས་ཐོབ་པའི་ཡེ་ཤེས་ངན་སོང་གི་རྒྱུན་ཆད་པ་དང་། ཆོས་མཆོག་དེ་མ་ཐག་པའི་ཏིང་ངེ་འཛིན་ཉེར་ཐོབ་ཀྱི་ཡེ་ཤེས་ཐོབ། དགེ་བའི་རྩ་བ་རྣམས་ཀྱང་ཐར་པ་བྱང་ཆུབ་ལས་མི་འགྱུར། ཏིང་ངེ་འཛིན་དང་རྫུ་འཕྲུལ་ལ་སོགས་སྔོན་པས་ཆེས་ལྷག་པ་ཐོབ་པའོ། །མེའི་བྱེད་ལས་གཙོ་ཆེ་བ་མགྲིན་པ་ལོངས་སྤྱོད་ཀྱི་འཁོར་ལོར་རླུང་སེམས་ཞུགས་པ་ལས་སུ་རུང་བ་ལས་མཐོང་ལམ་གྱི་དྲོད་རྟགས་འཆང་། དེར་རླུང་གནས་པ་ལས་རྩ་མདུད་ལྔ་པ་དང་དྲུག་པ་གྲོལ། བསྐྱེད་རྫོགས་ལ་མོས་པས་སྤྱོད་པ་ཙམ་མ་ཡིན་པའི་དྲན་པ་དང་། དེའི་ཆོས་རབ་ཏུ་རྣམ་པར་འབྱེད་པ་དང་། བརྩོན་འགྲུས་བརྟན་པ་དང་། དགའ་བ་རྒྱ་ཆེན་པོ་དང་། བསྐྱེད་རིམ་ཀྱིས་ལུས་ཤིན་ཏུ་སྦྱངས་པ་དང་། རྫོགས་
རིམ་ཀྱིས་སེམས་ཤིན་ཏུ་སྦྱངས་པ་དང་། ཏིང་ངེ་འཛིན་གྱི་སྒོ་དུ་མ་ལ་དབང་བ་སྟེ། བྱང་ཆུབ་ཀྱི་ཡན་ལག་བདུན་རྫོགས་པ་ལས་འཕགས་པའི་ས་དང་པོ་མཐོང་ལམ་རྣམ་པར་མི་རྟོག་པའི་ཡེ་ཤེས་ཐོབ་སྟེ། རྒྱན་ལས། རང་གི་སེམས་ནི་ཡོངས་སྨིན་ཅིང་། །སེམས་ཅན་དོན་འགྲུབ་མཐོང་བ་ལ། །རབ་ཏུ་དགའ་བ་སྐྱེ་བར་འགྱུར། །ཞེས་སོ། །དེའང་དུས་སྐད་ཅིག་སྔ་ཕྱི་མེད་པ་གཅིག་ལ་ཏིང་ངེ་འཛིན་བརྒྱ་ཐོབ། སངས་རྒྱས་བརྒྱའི་ཞལ་མཐོང་། བརྒྱས་བྱིན་གྱིས་བརླབ་པར་ཤེས། འཇིག་རྟེན་གྱི་ཁམས་བརྒྱ་བགྲོད། ཞིང་ཁམས་བརྒྱར་འགྲོ། །ཞིང་དེ་སྙེད་སྣང་བའི་འོད་ཟེར་འགྱེད། །སེམས་ཅན་བརྒྱ་སྨིན། བསྐལ་པ་བརྒྱར་གནས། སྔོན་དང་ཕྱི་མའི་མཐའ་བརྒྱ་ལ་ཡེ་ཤེས་འཇུག །ཆོས་ཀྱི་སྒོ་བརྒྱ་འགྱེད། ལུས་བརྒྱར་སྟོན། ལུས་རེ་རེ་ལ་འཁོར་ཕུན་སུམ་ཚོགས་པ་བརྒྱ་བརྒྱས་བསྐོར་བ་ལ་སོགས་པའི་ཡོན་ཏན་བརྒྱ་ཕྲག་བཅུ་གཉིས་མངོན་སུམ་དུ་ཐོབ་པའང་སློབ་དཔོན་ཀླུ་སྒྲུབ་དང་། པདྨ་དང་། བི་མ་ལ་སོགས་པས་ཤེས་ལ། རྩ་རླུང་ཐིག་ལེའི་སྟོབས་བྲི་བའི་དུས་ཀྱི་གཞན་དབང་གིས་གཞན་སྣང་ལ་བལྟར་མི་མངོན་པའི་ཚུལ་གྱི་ས་ཐོབ་པའམ། རྣམ་སྨིན་གྱི་ལུས་དོར་མ་ཐག་ཐོབ་པ་ལའང་རྟོག་གེའི་རིག་པ་གྱི་ན་པས་མི་བསམ་སྟེ། ཀློང་ཆེན་རབ་འབྱམས་ཀྱི་རྒྱུད་ལས། དཔེར་ན་འདབ་ཆགས་རྒྱལ་པོ་ཁྱུང་ཆེན་དེ། །མངལ་ན་གནས་རྐྱང་ཀླུ་རྣམས་ཟིལ་གྱིས་གནོན། །སྒོ་ངའི་ནང་དུ་འདབ་གཤོག་ཚད་དུ་ཕྱིན། སྒོང་རྒྱ་རལ་ནས་ཕྱི་རྒྱ་རླབས་ཀྱིས་ཆོད། །ཅེས་སོ། །དེ་ལྟར་སྙིང་གའི་རྩ་མདུད་གྲོལ་བ་ལས་མཐོང་ལམ་གྱི་ཡོན་ཏན་སྐྱེས་ནས་བསྒོམ་པའི་ལམ་གྱི་ས་དགུ་ནི་རྫོགས་རིམ་གྱི་བྱེད་ལས་གཙོ་ཆེ་བ་སྤྱི་བོ་བདེ་ཆེན་གྱི་འཁོར་ལོར་རླུང་སེམས་ཞུགས་
པ་དང་གནས་པ་དང་ཐིམ་པ་གསུམ་གྱི་ཡོན་ཏན་རྫོགས་པ་ལས་བགྲོད་པ་སྟེ། དེའང་ཞུགས་པའི་རྟགས་སུ་སྣ་བུག་ནས་རླུང་མཉམ་རྒྱུ་ཐེངས། གནས་པའི་རྟགས་སུ་སྣ་བུག་གི་རྒྱུ་བ་ཆད་པ་འབྱུང་། ཐིམ་པའི་རྟགས་སུ་མཁའ་སྣང་ལ་སོགས་པའི་སྟོང་གཟུགས་རྣམས་འཆར་བ་ཡིན་ནོ། །དེ་ལས་དང་པོ་ནས་བཅུ་པའི་བར་ཕ་རོལ་ཏུ་ཕྱིན་པ་བཅུ་དང་སྦྱོར་བའང་ཕལ་པོ་ཆེ་ལས། ས་བཅུ་ཕ་རོལ་ཕྱིན་བཅུ་ལྷག་པར་ཆེ་བ་ཡིན། །ཞེས་པ་ལྟར་ལས་འདིར་རྫོགས་རིམ་ཟབ་མ་དང་འབྲེལ་བའི་ཏིང་ངེ་འཛིན་གྱི་སྒོ་ནི་འཇིག་རྟེན་ལས་འདས་པ་ཟང་ཟིང་མེད་པའི་སྦྱིན་པ་དང་། རང་རང་གི་མི་མཐུན་པའི་ཕྱོགས་བསྲུང་བའི་ཚུལ་ཁྲིམས། སྲོག་རྩོལ་གྱི་དཀའ་བ་བཟོད་ཅིང་ཟབ་མོའི་དོན་ལ་མི་སྐྲག་པའི་བཟོད་པ། སྤྲོ་བཞིན་དུ་འཇུག་པའི་བརྩོན་འགྲུས། རླུང་སེམས་ཐིག་ལེ་གསུམ་རོ་གཅིག་པའི་བསམ་གཏན། འཁོར་གསུམ་རྣམ་པར་གྲོལ་བའི་ཤེས་རབ་སྟེ་དགེ་བའི་ཆོས་སྡུད་པའི་ཚུལ་ཁྲིམས་ཀྱི་དངོས་པོ་ཅན་ནི་ཕ་རོལ་ཏུ་ཕྱིན་པ་དྲུག་ཀའི་ངོ་བོར་གནས་ཤིང་བརྗོད་བྱ་ཡང་ཀུན་ཏུ་འདྲེས་པས་དེ་དག་དང་འབྲེལ་བ་ལ་རྣམ་པ་ཐམས་ཅད་པའི་མཆོག་དང་ལྡན་པའི་སྟོང་པ་ཉིད་དུ་གཙུག་ན་རིན་པོ་ཆེའི་མདོ་ལས་གསུངས་ལ་དེ་སྐད་དུ། རྒྱན་ལས། རྒྱ་ཆེ་བ་དང་ཟང་ཟིང་མེད། དོན་ཆེ་བ་དང་མི་ཟད་པ། སྦྱིན་པ་ལ་སོགས་ཐམས་ཅད་ཀྱི། །ཡོན་ཏན་བཞིར་ནི་ཤེས་པ་བྱ། །ཞེས་དང་། སེམས་ཅན་དོན་ལ་རབ་བརྩོན་པ། །གཏོང་དང་མི་གནོད་བཟོད་པས་བྱེད། །གནས་དང་གྲོལ་བ་གཞིར་བཅས་ལས། །རང་དོན་རྣམ་པ་ཐམས་ཅད་སྤྱོད། །ཅེས་པའི་དོན་སྔར་ཡང་བཀྲལ་ཟིན་ལ། དེའི་སྟེང་
དུ་ཐབས་ལ་མཁས་པ་དང་། སྙིང་སྟོབས་ཆེ་བ་དང་། སྨོན་ལམ་གྱི་རང་འབྲས་མངོན་དུ་གྱུར་པ་གསུམ་བསྣན་པའི་སྟོབས་ཀྱིས་དང་པོ་རབ་ཏུ་དགའ་བ་དང་། གཉིས་པ་དྲི་མ་མེད་པ་དང་། གསུམ་པོ་འོད་བྱེད་པ་དང་། བཞི་པ་འོད་འཕྲོ་བ་དང་། ལྔ་པ་སྤྱད་དཀའ་བ་དང་། དྲུག་པ་མངོན་གྱུར་བ་དང་། བདུན་པ་རིང་དུ་སོང་བ་དང་། བརྒྱད་པ་མི་གཡོ་བ་དང་། དགུ་པ་ལེགས་པའི་བློ་གྲོས་དང་། བཅུ་པ་ཆོས་ཀྱི་སྤྲིན་རྣམས་དབུ་མར་རོ་རྐྱང་གི་མདུད་པ་ཉི་ཤུ་རྩ་གཅིག་ལས་གཉིས་གཉིས་རེ་གྲོལ་བས་ས་རེ་ཐོབ་པ་ཡིན་ལ། ཐམས་ཅད་ཀྱི་ཐ་མ་ཉི་ཤུ་རྩ་གཅིག་པ་གྲོལ་བའི་ཚེ་གཙུག་ཏོར་རྩེ་མོའི་ས་མཆོག་རྡོ་རྗེ་འཆང་གྲུབ་པའི་ཚུལ་ངེས་བརྗོད་རྩེ་མོ་ལས། རོ་མ་རྐྱང་མ་ཀུན་འདར་མ། །མདུད་པ་འཁོར་བའི་འཁྲུལ་སྣང་སྟེ། །གྲོལ་བས་ཡེ་ཤེས་མྱ་ངན་འདའ། །ཞེས་སོ། །དེ་ལྟར་སྔགས་རྒྱུད་འགྱུར་སྔ་ཕྱི་གུང་མཐུན་པའི་རྒྱུད་སྡེའི་རྫོགས་རིམ་གྱི་ཕྱོགས་སྨོས་ནས། རྒྱུད་ཀྱི་རྒྱལ་པོ་སྒྱུ་འཕྲུལ་དྲྭ་བའི་དོན་སློབ་དཔོན་ཆེན་པོ་བི་མ་ལའི་གསང་ཐིག་གིས་བཀྲལ་བའི་ལུགས་མདོ་ཙམ་སྟོན་པའི་ཕྱིར། ཁྱད་པར་སྒྱུ་འཕྲུལ་དྲྭ་བ་གསང་ཐིག་ལུགས། །སྣོད་བཅུད་རང་ལ་རྫོགས་པ་ཕུང་པོའི་གྲོང་། །དུས་གསུམ་ལུང་དུ་མ་བསྟན་བདེ་གཤེགས་སྙིང་། །མཐའ་དག་མངོན་འཚང་རྒྱ་བ་རྡོ་རྗེའི་གདན། །སྙིང་ག་དཔལ་གྱི་བེའུའི་ཁོང་སེང་ན། །རྩ་ཡི་དངས་མ་བརྒྱད་དུ་གནས་པ་ལས། །དབུས་མ་གསུམ་ནི་སྐུ་གསུམ་ཆོས་ཉིད་རྟེན། །མདུན་པ་གཅིག་ནི་ཡེ་ཤེས་འཆར་བའི་རྩ། །རྒྱབ་ན་ཡོན་ཏན་རྩ་ལས་ཞིང་ཁམས་འཆར། །གཡོན་ན་རང་རྒྱུད་རྩ་གསུམ་འཁྲུལ་སྣང་རྟེན། །སོ་སོའི་དབུས་ན་འཁོར་འདས་ཡིག་འབྲུ་ནི། །སྦྱང་གཞི་སྦྱོང་བྱེད་
ཆུལ་དུ་གནས་པ་རྣམས། །སྐུ་གསུང་ཐུགས་ཀྱི་ཡི་གེས་དག་པར་བྱེད། །ཀུན་གྱི་དབུས་ན་དྭངས་མའི་རྩ་དཀར་པོ། །རྟ་རྔའི་བཅུ་ཆ་ཙམ་དུ་ཕྲ་བའི་ནང་། །རྡུལ་དང་དབུགས་ཀྱི་དྭངས་མ་འདྲེས་པའི་འོད། །ཁ་དོག་ལྔ་པ་ཤིན་ཏུ་ཕྲ་བ་ཉིད། །རང་བཞིན་འོད་གསལ་བྱང་ཆུབ་སེམས་ཀྱི་རྟེན། །ཀུན་བཟང་རིགས་ལྔ་བཞུགས་པའི་གཞལ་མེད་ཁང་། །གང་དུ་རླུང་སེམས་དྭངས་མ་འདུས་པའི་ཚེ། །མྱ་ངན་འདས་པའི་ཞིང་སྣང་མཐའ་དག་འཆར། །སྣང་ཆའི་འོད་ལྔ་སྟོང་ཆའི་ཆོས་སྐུ་གཉིས། །རོ་གཅིག་འདྲེས་པས་ལམ་གྱིས་ཚོགས་གཉིས་རྫོགས། །འོག་མིན་རྣམ་དག་སྟུག་པོ་བཀོད་པ་ཞེས། །གཞན་དུ་མི་གནས་སྒྲིབ་པ་མཐའ་དག་པ། །ནམ་ཞིག་སྤངས་པའི་དུས་དེར་ལྷུན་གྱིས་གྲུབ། །དེ་ལ་ཕྱི་སྣོད་ཀྱི་འཇིག་རྟེན་དང་པོར་རླུང་ལ་བརྟེན་ནས་ཆུ་ཆགས། ཆུས་ས་བརྟེན། ས་ལས་དྲོད་འབྱུང་ཞིང་ཤིང་དང་ལྕགས་ལ་སོགས་པ་མེའི་རྒྱུར་སོང་བ་ལས་ཀྱང་འབྱུང་བ་བཞིའི་རང་བཞིན་དུ་གྲུབ་པ་ལྟར། རླུང་སེམས་དྭངས་མར་འདུས་པ་ཁྲག་གི་རང་བཞིན་ཆུས་གཅིག་ཏུ་བསྡུས་པ་ལས་ནང་བཅུད་ཀྱི་སེམས་ཅན་གྱི་ལུས་སུ་ཆགས། དེ་ཡང་སའི་རང་བཞིན་ཤ་སྟེ་ཤས་ལུས་ཀྱི་མཉེན་ཤ་དང་། གྲི་མས་ཤ་དང་། ཤ་སྣ་ཚོགས་པ་སྙིང་ནས་མཆེད་ཅིང་བརྟེན། དེ་ལས་མེའི་རང་བཞིན་ལུས་ཀྱི་དྲོད་སྐྱེས་ནས་དབང་པོ་དང་ཁ་དོག་བསྐྱེད། མེས་རླུང་བསྐྱེད་པས་དབུགས་དང་བཀྲག་མདངས་རྒྱས་པར་བྱེད་ཅིང་། ཕྱི་ནང་གི་འབྱུང་བ་དེ་དག་བག་ལ་ཉལ་དང་ཀུན་ནས་ལྡང་བའི་ལས་ཀྱིས་བརྟན་གཡོ་ཆགས་གནས་འཇིག་སྟོངས་ཕྱེད་པ་དང་མཐུན་པར་ནང་ལུས་སེམས་
ཀྱི་ཚོགས་པའང་འབྱུང་བ་སོ་སོའི་བྱེད་ལས་འཁྲུགས་པས་སྐྱེ་རྒ་ན་འཆིའི་རྐྱེན་བྱེད་པས་ན་སྣོད་བཅུད་ཀྱི་རང་བཞིན་ནི་རང་གི་ལུས་སེམས་ལ་ཚང་ངོ་། །དུས་ཀྱི་འཁོར་ལོའི་གཞུང་ནས་ཀྱང་། །ཕྱི་འཇིག་རྟེན་གྱི་ཁམས། ནང་སེམས་ཅན་གྱི་ལུས། གཞན་ཆོས་ཉིད་ཀྱི་དབྱིངས་ཞེས་རྟེན་འབྲེལ་གནད་མཚུངས་པར་སྦྱོར་བས་ན་རྡོ་རྗེའི་ལུས་ཀྱི་མན་ངག་ལ་བརྟེན་ནས་འབྱུང་བ་གནད་ལ་བོར་བའི་རྟེན་འབྲེལ་གྱིས་སེམས་ཆོས་སྐུར་གྲོལ་བར་བྱེད་པ་ལ་ཐབས་ཀྱི་ལམ་ཞེས་བྱའོ། །འདི་ལྟར་བསྐལ་པ་བཟང་པོའི་སངས་རྒྱས་སྟོང་རྩ་གཉིས་ཀྱང་འཛམ་བུའི་གླིང་གི་ཡུལ་དབུས་གྲོང་ཁྱེར་མ་ག་དྷའམ། རྡོ་རྗེའི་གདན་དུ་མངོན་པར་འཆང་རྒྱ་བ་ལྟར། ནང་ལྟར་དུ་རྡོ་རྗེ་ལུས་ཀྱི་གནས་ལུགས་ལ་བརྟེན་པ་རྣམས་ནི་རྣམ་སྣང་མངོན་བྱང་ལས། སེམས་ལ་ནི་དུས་གསུམ་མེད་དོ། །དུས་གསུམ་དང་བྲལ་བ་གང་ཡིན་པ་དེ་ནི་ངོ་བོ་ཉིད་ཀྱི་མཚན་མ་དང་བྲལ་བའོ། །ཞེས་པ་ལྟར་འདས་དང་མ་འོངས་ད་ལྟའི་དུས་གསུམ་ཅར་དུ་ལུང་མ་བསྟན་པའི་སེམས་ཀྱི་ཆོས་ཉིད་བདེ་བར་གཤེགས་པའི་སྙིང་པོ་ཅན་སངས་རྒྱ་བའི་གནས་ནི་སྙིང་ག་ཆོས་ཀྱི་འཁོར་ལོའི་རྡོ་རྗེ་གདན་ཆེན་པོ་ཡིན་ཏེ། དེ་ལྟར་ཡིན་པས་དཔལ་སྒྱུ་འཕྲུལ་དྲྭ་བ་ཆེན་པོའི་ལུགས་སུ་འཁོར་འདས་བསྐྱེད་སྡུད་ཀྱི་ས་བོན་སྙིང་ག་ན་གནས་པ་ལ་གནད་དུ་བསྣུན་པའི་རྫོགས་རིམ་འཆང་ངོ་། །དེ་ཡང་སྙིང་ག་ཆོས་ཀྱི་འཁོར་ལོ་ནི་དབྱིངས་ཟབ་པས་དབལ་གྱི་བེའུ་ཞེས་སྨོས་ནས། དེའི་ཁོང་གསེང་ན་འཁྲུལ་སྣང་དང་ཡེ་ཤེས་བསྐྱེད་བྱེད་དྭངས་མའི་རྩ་ཕྲན་བརྒྱད་དུ་གནས་པའི་དབུས་ན་སྦྱང་གཞི་སྦྱོང་བྱེད་ལྟར་གནས་པའི་ས་བོན་ལ་གནད་དུ་བསྣུན་པའི་ཚུལ་སློབ་དཔོན་ཆེན་པོ་དྲི་མ་མེད་པའི་བཤེས་གཉེན་
གྱི་གསང་ཐིག་ལས། གང་ལ་ཡོད་པ་རྣམ་པ་བརྒྱད་དུ་ཤེས། །ཞེས་དང་། འགྲིལ་པང་། གང་ལ་ཡོད་ན་སྙིང་ཁོང་སྟོང་གི་དཀྱིལ་ན་རྩའི་དྭངས་མ་རྩ་ཕྲན་རྒྱུས་པ་བལྡད་པ་འདྲ་བ་བརྒྱད་ཡོད་པ་ལས། གསུམ་ཆོས་ཉིད་ཀྱི་རྩ་གཅིག་ཡེ་ཤེས་ཀྱི་རྩ། གསུམ་རང་རྒྱུད་ཀྱི་རྩ། གཅིག་ཡོན་ཏན་གྱི་རྩ། དེ་ལྟར་བརྒྱད་དུ་ཤེས་པར་བྱའོ། །ཞེས་སོ། །དེ་ལ་དབུས་མ་གསུམ་ནི་སྐུ་གསུམ་གྱི་ཡི་གེ་ཆོས་ཉིད་མི་འགྱུར་བའི་རྟེན་ཡིན་ལ་འོད་སྣང་སེར་ལ་ཟླུམ་པའི་རྣམ་པ་ཅན་གྱི་དཀྱིལ་དུ་སྦྱང་གཞི་ལྷ་མིན་དང་བྱོལ་སོང་གི་ས་བོན་ཡི་གེ་སུ་དང་ཏྲིའི་སྟེང་དུ་སྦྱོང་བྱེད་སྐུ་རྡོ་རྗེའི་སྙིང་པོ་ཡི་གེ་ཨཱོཾ་རང་འོད་ཟ་འོག་གི་གུར་ཁང་ལྟ་བུར་གསལ་ལོ། །དེའི་མདུན་ན་ཡེ་ཤེས་བཞིའི་རྟེན་བྱེད་པ་མེ་ལོང་ཡེ་ཤེས་ཀྱི་རྩ་མཐིང་ག་གྲུ་བཞི་པའི་སྦུབས་ན་སྦྱང་གཞི་ལྷ་དང་མིའི་ས་བོན་ཨ་དང་ནྀྲ་དཀར་དམར་གྱི་སྟེང་ན་སྦྱོང་བྱེད་ཐུགས་རྡོ་རྗེའི་རང་བཞིན་ཧཱུྃ་མཐིང་གའོ། །གཡོན་དུ་དུག་གསུམ་དང་ཁམས་གསུམ་རང་མཚན་པའི་འཁྲུལ་སྣང་བསྐྱེད་པའི་རྟེན་རང་རྒྱུད་པའི་རྩ་ཟླ་བ་ཁམ་པའི་དབྱིབས་ཅན་ཁ་དོག་དམར་པོའི་སྦུབས་ན་སྦྱང་གཞི་དམྱལ་བ་དང་ཡི་དྭགས་ཀྱི་ས་བོན་པྲེ་དང་དུའི་སྟེང་སྦྱོང་བྱེད་གསུང་རྡོ་རྗེའི་རང་བཞིན་ཨཱཡིག་པདྨ་རཱ་ག་ལྟར་འཚོར་བའོ། །རྒྱབ་ན་ཡོན་ཏན་གྱི་རྩ་ལས་ཞིང་ཁམས་དང་གཞལ་ཡས་ཁང་ལ་སོགས་དག་པའི་སྣང་བ་མུ་མེད་པར་འཆར་བ་སྟེ་གནས་ཚུལ་ལ་བརྒྱད་ཡོད་ཀྱང་བྱེད་ལས་ནི་བཞི་པོ་ཉིད་དེ་སྔ་མ་ལས། རྣམ་བཞི་བྱེ་བྲག་དྲུག་དང་བརྒྱད་དཀྱིལ་ན། ཞེས་སོ། །བྱེ་བྲག་འོད་སེར་པོ་ལ་ཀུན་གཞིའི་རྣམ་ཤེས་མཐིང་ག་ལ་ཡིད་ཀྱི་རྣམ་ཤེས། དམར་པོ་ལ་ཉོན་མོངས་པ་ཅན་གྱི་ཡིད་
དམར་ནག་ལ་སྒོ་ལྔའི་རྣམ་ཤེས་གནས་སོ། །དྭངས་མ་རྒྱུ་ཚུལ་གྱི་དབང་དུ་བྱས་ན་འོད་སེར་པོ་རྩའི་དྭངས་མ་དར་དཀར་གྱི་སྐུད་པ་འདྲ་བ་ལ་རྒྱུའོ། །མཐིང་ག་དབུགས་ཀྱི་དྭངས་མ་ལ་རྒྱུའོ། །དམར་པོ་ཁྲག་གི་དྭངས་མ་ལ་རྒྱུའོ། །དམར་ནག་ནི་སྒོ་ལྔའི་རྩའི་དྭངས་མ་ལ་རྒྱུའོ། །དེའང་འོད་སེར་པོའི་འགྲམ་ན་ཨོཾ་དང་སུ་ཏྲི་གཉིས་གནས་སོ། །འོད་མཐིང་གའི་སྒབ་ན་ཧཱཾ་དང་ཨ་ནྀྲ་གཉིས་གནས་སོ། །འོད་དམར་པོའི་སྒབ་ན་ཨཱདང་བྲེ་དུ་གཉིས་གནས་སོ། །འོད་དམར་ནག་ནི་དེ་རྣམས་ཀྱི་སྐྱོན་དང་ཡོན་ཏན་ནོ། །དེ་ལ་ཨ་ནྀྲ་གཉིས་དབུགས་ཀྱི་སྙིགས་མ་ལ་རྒྱུའོ། །སུ་ཏྲི་གཉིས་རྩའི་སྙིགས་མ་ལ་རྒྱུའོ། །པྲེ་དུ་གཉིས་ཁྲག་གི་སྙིགས་མ་ལ་རྒྱུའོ། །དེ་ཡང་ལྷ་དང་མི་གཉིས་སུ་སྐྱེ་བའི་ཁ་ཟིན་ནི་ཡིད་ཀྱི་རྣམ་པར་ཤེས་པས་བྱས་ནས་ས་བོན་ཨ་དང་ནྀྲ་ལ་བསོག་གོ །བྱོལ་སོང་དང་ལྷ་མིན་གཉིས་སུ་སྐྱེ་བའི་ཁ་ཟིན་ནི་ཀུན་གཞིའི་རྣམ་པར་ཤེས་པས་བྱས་ནས་ས་བོན་སུ་དང་ཏྲི་ལ་བསོག་གོ །ཡི་དྭགས་དང་དམྱལ་བར་སྐྱེ་བ་ནི་སྒོ་ལྔའི་རྣམ་པར་ཤེས་པ་དང་ཉོན་མོངས་པ་ཅན་གྱི་ཡིད་ཀྱིས་བྱས་ནས་ས་བོན་བྲེ་དང་དུ་ལ་བསོག་གོ །འདི་ལྟར་གནས་པ་དེ་ནི་འགྲོ་བ་རིགས་དྲུག་གོ་སེམས་ཅན་ཐམས་ཅད་ལ་རང་རྒྱུད་དུ་གནས་སོ་ཞེས་དེ་ཉིད་ལས་སོ། །དེ་བས་ན་མ་དག་པའི་དུས་ལས་དང་ཉོན་མོངས་པས་བྱས་པའི་བག་ཆགས་མཐའ་དག་ཡི་གེ་དྲུག་པོའི་སྟེང་དུ་བསོག་པའི་ཚུལ་ཡང་ཞེ་སྡང་གིས་བྱས་པའི་ལས་དུའི་སྟེང་དུ་བསགས་ནས་དམྱལ་བར་འཕེན་པ་བཞིན་གཞན་ལྔ་ལ་ཡང་ཤེས་པར་བྱ་ཞིང་། རྟོགས་པའི་དུས་ན་དགེ་བའི་ཆ་དང་ཡེ་ཤེས་ཀྱི་རང་རྩལ་རྣམ་པར་དག་པ་རྣམས་སྐུ་གསུང་ཐུགས་ཀྱི་ཡི་གེ་གསུམ་གྱི་སྟེང་དུ་བསོག་པས་ན། སྐུའི་རྣམ་པ་ལམ་བྱེད་ལྷ་བསྒོམ་པ་ལ་སོགས་པ་རྣམས་ཨོཾ། གསུང་གི་རྣམ་པ་ལམ་བྱེད་སྔགས་
བཟླས་པ་ལ་སོགས་པ་ཨཱ ཐུགས་ཀྱི་ཆོས་ཉིད་ལམ་བྱེད་རྣམ་པར་མི་རྟོག་པ་བསྒོམ་པ་ལ་སོགས་པ་ཧཱུཾ་གི་སྟེང་དུ་བཞག་པས་སྦྱང་གཞིའི་ཡི་གེ་དང་དེས་བཟུང་བའི་བག་ཆགས་ཐམས་ཅད་ཟད་པར་བྱེད་པས་ན་འཁོར་འདས་ཤན་འབྱེད་པའི་བཟླས་པའི་གཙོ་བོའང་ཡི་གེ་འབྲུ་གསུམ་དུ་བཤད་པ་ཡིན་ནོ། །དེ་ལྟར་སྙིང་གའི་རྩ་བརྒྱད་པོའི་དབུས་མ་ནི་རྒྱུད་སྡེ་གཞན་ལྟར་ན་ཡང་དག་པའི་དབུ་མ་ཡིན་ལ། དབུ་མའི་རླུང་གི་དྭངས་མ་ཡང་ཡེ་ཤེས་ཀྱི་རྩ་ལ་འཇུག་དགོས་པས། ཡེ་ཤེས་ཀྱི་འོད་རྩ་ཤེལ་དགར་གྱི་སྐུད་པ་ལྟ་བུ་ལ་ཕྲ་བའི་ཆ་ནས་རྟ་རྔའི་བཅུ་ཆ་ཙམ་གྱི་ནང་ན་ཁྲག་དང་དབུགས་ཀྱི་དྭངས་མ་འདྲེས་པ་ལ་བརྟེན་པའི་རླུང་སེམས་ཤིན་ཏུ་ཕྲ་བའི་སྣང་ཆ་མ་འགགས་པའི་གདངས་འོད་ལྔའི་ཁ་དོག་ཅན་གྱི་དབུས་ན་སྟོང་པའི་ཆ་རང་བཞིན་འོད་གསལ་གྱི་ཐིག་ལེ་ཆེན་པོ་བཞུགས་ཏེ། མངོན་བརྗོད་བླ་མ་ལས། རྟག་ཏུ་སྙིང་ལ་གནས་པ་ཡི། །ཐིག་ལེ་གཅིག་ལ་འགྱུར་བ་མེད། །དེ་བསྒོམ་བྱེད་པའི་སྐྱེ་བོ་ལ། །ངེས་པར་ཡེ་ཤེས་སྐྱེ་བར་འགྱུར། །ཞེས་དང་། བཤད་རྒྱུད་རྡོ་རྗེ་ཕྲེང་བ་ལས། སྙིང་གའི་པདྨོའི་སྦུབས་མཁའ་ལ། །ཡེ་ཤེས་རྡོ་རྗེ་རྟག་ཏུ་བཞུགས། །གཙོ་བོ་ཆེན་པོ་མི་བསྐྱོད་པའི། །འཇིག་རྟེན་ཁམས་ནི་དེ་ཉིད་དོ། །ཞེས་སོ། །དེ་བས་ན་འདི་ཉིད་ནི་ཡེ་ཤེས་ཀྱི་རྩ་སྟེ་ཚོགས་གཉིས་རྫོགས་པའི་ཡོན་ཏན་ལས་སྒྲིབ་པ་མཐའ་དག་ཟད་དེ་རླུང་སེམས་ཀྱི་དྭངས་མ་ཐམས་ཅད་དེར་འདུས་པའི་ཚེ་མྱ་ངན་ལས་འདས་པའི་ཞིང་སྣང་དཔག་ཏུ་མེད་པ་འཆར་ཞིང་རང་སྣང་དོན་གྱི་འོག་མིན་སྟུག་པོ་བཀོད་པར་སངས་རྒྱས་པ་ཞེས་བྱ་སྟེ། །
ཀུན་བྱེད་ལས། སྟོན་པ་ཆོས་སྐུའི་གནས་ནི་འོག་མིན་ཆོས་ཀྱི་དབྱིངས་ཀྱི་ཕོ་བྲང་སྟེ། ཡང་དག་དོན་གྱི་འོག་མིན་དེ་རུ་བཤད། །ཅེས་སོ། །དེ་ཕྱིར་ལུས་ནི་ཡེ་ཤེས་ཆེན་པོའི་རྟེན། །འཁོར་བ་ཉིད་ནའང་ངོ་བོའི་བཞུགས་ཚུལ་ལ། །ཉམས་དང་དམན་པར་གྱུར་པ་གཉིས་ཀ་མེད། །འགྱུར་བ་མེད་པའི་དོན་དམ་བྱང་ཆུབ་སེམས། །ཏིལ་ལ་མར་གྱིས་ཁྱབ་པ་ཇི་བཞིན་ནོ། །དེ་ལྟར་སེམས་ཉིད་རང་བཞིན་གྱིས་འོད་གསལ་བའི་ཁྱབ་བྱེད་ཆེན་པོས་འཇག་མའི་སྲིན་བུ་ཡན་ཆད་ལ་ཁྱབ་བའི་ཕྱིར་འཁོར་བའི་གནས་སྐབས་ནའང་རང་གི་ངོ་བོ་ཉིད་ལས་གཞན་དུ་གྱུར་པའམ། ཉམས་པ་དང་། དམན་པར་གྱུར་པ་རྡུལ་ཙམ་ཡང་མེད་དེ་དངུལ་ཆུ་མདག་མེའི་དཀྱིལ་དུ་ལྷུང་ཀྱང་རྡུལ་གྱི་ཆོས་ཉིད་དང་མ་འདྲེས་པ་བཞིན་ནོ། །དེ་སྐད་དུ་གསང་འདུས་ལས། རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་སེམས་ཅན་མེད། །ཅེས་དང་། ཡེ་ཤེས་གྲུབ་པ་ལས། སེམས་ཀྱི་དམ་པ་འོད་གསལ་བ། །ཀུན་ཏུ་དང་པོའི་སངས་རྒྱས་ཏེ། །སུས་ཀྱང་མ་བྱས་རང་བྱུང་པ། །ཡེ་ནས་ཉིད་ནི་གནས་པའོ། །ཞེས་སོ། །ད་ལྟ་མོད་ཀྱིས། བདེ་གཤེགས་སྙིང་པོའི་རང་བཞིན་ནི་སྤྲོས་བྲལ་དུ་ཡོད་པས་རེ་ཞིག་སེམས་ཅན་གྱི་ཁམས་ལ་རྣམ་པར་ཤེས་པའི་ཚོགས་བརྒྱད་ཀྱི་སྒྲིབ་བྱེད་དང་བཅས་པས་ཏིང་ངེ་འཛིན་གྱིས་སྦྱང་བ་ལ་བརྟེན་ནས་ཉམས་འོག་ཏུ་མ་ཚུད་ཀྱི་བར་དུ། རྣམ་པར་རིག་པ་དང་བཅས་པའི་ཤེས་ངོ་ན་ཤིན་ཏུ་ལྐོག་ཏུ་གྱུར་པ་ཡིན་པའི་ཚུལ་སྟུག་པོ་བཀོད་པའི་མདོ་ལས། ཇི་ལྟར་ཤིན་ཏུ་བཟང་པོའི་གསེར། །གསེར་གྱི་དབྱིབས་ལ་མི་སྣང་སྟེ། །
བཙལ་ནས་ཤིན་ཏུ་ཞིབ་བཏགས་ནས། །ཡོངས་སུ་སྦྱངས་ན་སྣང་བར་འགྱུར། །དེ་བཞིན་ཀུན་གཞིའི་རྣམ་པར་ཤེས། །རྣམ་ཤེས་བདུན་དང་བཅས་པ་ཡང་། །ཏིང་ངེ་འཛིན་གྱིས་ཡོངས་སྦྱངས་བའི། །རྣལ་འབྱོར་ཅན་གྱིས་རྟག་ཏུ་མཐོང་། །ཞེས་སོ། །དེའི་ཚུལ་ཡང་ཤཱ་རིའི་བུ་དོན་དམ་པ་ནི་དད་པས་རྟོགས་པ་ཁོ་ན་ཡིན་ནོ་ཞེས་གསུངས་པ་ལྟར་དང་པའི་ཉེ་བར་ལེན་པ་དང་ལྡན་པས་མཚན་ཉིད་བསྒོམས་སྟོབས་ཀྱིས་རྟོགས་པའམ། རྡོ་རྗེ་ཐེག་པའི་དབང་དོན་གྱི་ཡེ་ཤེས་ལས་མངོན་སུམ་དུ་མཐོང་བ་འགའ་ཙམ་ལས་རྟོག་གེའི་གཞན་དབང་དུ་གྱུར་པ་དག་ལ་ཚོགས་བརྒྱད་ཀྱིས་བསླད་པའི་ཤེས་པ་འདུས་བྱས་པ་ལྟར་ལས་མངོན་པ་མ་ཡིན་ཏེ་དཀོན་མཆོག་སྤྲིན་ལས། འདི་དག་ནི་བདག་མོད་པ་ཡིན་མོད་ཀྱི། འོན་ཀྱང་བྱིས་པ་སོ་སོའི་སྐྱེ་བོ་བདག་ཏུ་འཛིན་པ་ལ་ཞེན་པ་དག་ནི། བདག་གི་ཕུང་པོ་རྣམས་ལ་བདག་ཡོད་དོ། །ཅེས་མངོན་པར་ཞེན་པས་དེ་ཁོ་ན་ཉིད་ཁོང་དུ་མི་ཆུད་དོ། །ཁོང་དུ་མ་ཆུད་པས་མ་གལ་མེའི་འཁོར་ལོ་ལྟར་འཁོར་བའི་འཁོར་ལོར་འཁྱམ་མོ། །ཞེས་པས་གསལ་ལོ། །དེ་བས་ན་ངེས་པའི་དོན་གྱི་མདོ་སྡེ་རྣམས་དང་། གསང་སྔགས་ཀྱི་ཚུལ་ཟབ་མོ་དག་ལས་ནི་སེམས་ཅན་དང་སངས་རྒྱས་དབྱེར་མེད་མཉམ་པ་ཆེན་པོར་གནས་པའི་ཚུལ་འཕགས་པ་སྡོང་པོ་བཀོད་པ་ལས། གང་ཞིག་བདག་དང་སངས་རྒྱས་རྣམས། །རང་བཞིན་མཉམ་པར་རབ་གནས་ཤིང་། །མི་གནས་ལེན་པ་མེད་པ་དེ། །དེ་དག་དེ་བཞིན་གཤེགས་པར་འགྱུར། །ཞེས་དང་། རྒྱུད་བླ་མ་ལས། ཇི་ལྟར་སྔར་བཞིན་ཕྱིས་དེ་བཞིན། །
འགྱུར་བ་མེད་པའི་ཆོས་ཉིད་དོ། །ཞེས་དང་། རྔམ་གློག་ལས། ཨེ་མ་ཧོ། ཡུན་རིང་དུས་ནས་རྨོངས་པའི་འགྲོ་བ་རྣམས། །ཡེ་ནས་དོན་གྱི་སངས་རྒྱས་ཡིན་མོད་ཀྱང་། །རྨོངས་པའི་དབང་གིས་འཁོར་བའི་འཁོར་ལོར་འཁྱམས། །ལོག་རྟོག་ཉིད་ནས་དངོས་མེད་བྱང་ཆུབ་སེམས། །འཁྲུལ་འཁོར་ཉིད་ཀྱང་མི་ཟད་རྒྱན་དུ་ཆེ། །སྙིགས་མ་ལྔ་ཉིད་བདེ་ལྡན་གནས་སུ་གསལ། །ཕུང་པོ་ལྔ་ཉིད་མངོན་པར་རྫོགས་པའི་སྐུ། །སྲིད་རྩེའི་ཉེས་དམིགས་བྱང་ཆུབ་སྙིང་པོར་གསལ། །ཕྱི་ནང་སྣོད་བཅུད་ཡབ་ཡུམ་ངང་དུ་གསལ། །ཞེས་དང་། བྱང་ཆུབ་སེམས་ཀྱི་སྤྲིན་གྱིས་ཐམས་ཅད་ལ་རྒྱས་པར་ཁྱབ་པ་ནི་ཏིལ་འབྲུལ་བར་གྱིས་ཁྱབ་པ་བཞིན་ནོ། །ཞེས་སོ། །སྟོན་པ་ཆིག་ཙམ་ལ་ཞེན་པ་དག །སྔགས་ཀྱི་ལྟ་བ་ནི་གཞི་འགྱུར་མེད། གནས་གྱུར་འདོད་པའི་ཕྱི་ཡི་སེམས་ཙམ་པ་དང་གཅིག་གོ་ཞེས་སྨྲ་སྟེ། སེམས་ཙམ་པས་འགྱུར་མེད་རྟག་པ་རིག་ཙམ་རང་གསལ་དུ་འདོད་པ་དང་། འདིར་ལྷུན་གྲུབ་འདུས་མ་བྱས་རྟག་ཆད་ལས་འདས་ཤིང་ཡོན་ཏན་ལྷུན་གྲུབ་ཀྱི་ཁམས་འདོད་པ་གཉིས་ཀ་ལ་གཅིག །དེ་བཞིན་དུ་སེམས་ཙམ་བ་ཀུན་གཞི་ཚོགས་བརྒྱད་དང་བཅས་པ་གནས་འགྱུར་བའི་ཡེ་ཤེས་སུ་འདོད་ལ། འདིར་ནི་དེ་དག་བསལ་བ་ཙམ་ལས་གནས་གྱུར་བ་མེད་ཀྱི་མི་མངོན་པ་མངོན་པར་བྱས་ནས་མྱུར་དུ་རྟོགས་པས་ན་ཁྱད་པར་ཤིན་ཏུ་ཆེའོ། །དེའི་རྒྱུ་མཚན་ནི་གསང་སྔགས་པ་ཐམས་ཅད་ཀྱི་བྱང་ཆུབ་ཀྱི་སེམས་མི་ཤིགས་པ་བདེ་བར་གཤེགས་པའི་སྙིང་པོ་ལ། མི་ཤིགས་པ་ཉིད་ཀྱིས་མི་འགྱུར་བ་ཞེས་བཞག་པའི་མི་འགྱུར་བའི་བདེ་བ་མངོན་དུ་བྱེད་དགོས་ཏེ། དེ་ལྟར་མི་ཤིགས་པ་ཉིད་ཀྱིས་འབྲས་བུ་ཉིད་ལ་ལམ་དུ་བྱེད་པས་
རྡོ་རྗེ་ཐེག་པའི་ཚུལ་ཞེས་བྱ་བ་ཡིན་པའི་ཕྱིར་རོ། །དེ་ལྟ་ནའང་ཁ་ཅིག་དོན་དམ་པར་རང་བཞིན་མེད་པས་སངས་རྒྱས་ཡིན་པ་དང་། ཀུན་རྫོབ་ཏུ་སངས་རྒྱས་སུ་འགྱུར་དུ་རུང་བའི་རྒྱུ་ཡིན་པས་སངས་རྒྱས་སུ་བཞག་གིས། དངོས་པོའི་མཚན་ཉིད་ནི་མ་དག་པའི་སྣང་བ་ལྟར་བདེན་ནོ་ཞེས་འདོད་དོ། རྒྱུ་འབྲས་དག་གྲོལ་དུ་འཛིན་པ་རྣམས་ནི་ངེས་དོན་གྱི་མདོ་སྡེ་དང་། ཟབ་མོའི་རྒྱུད་སྡེ་རྣམས་ཀྱི་དགོངས་པ་དྲང་དོན་དུ་འབད་བ་དུ་མའི་སྒོ་ནས་ཁུངས་འབྱིན་ཏེ། ཕལ་ཆེར་ནི་ང་རྒྱལ་གྱི་དབང་གིས་དམ་པའི་གཞུང་ལུགས་ལའང་གཤེ་ཞིང་། གཏི་མུག་གི་དབང་གིས་རྒྱལ་བའི་བཀའ་ལའང་ཐེ་ཚོམ་ཟ་བས་དགག་བསྒྲུབ་ད་དག་ཀྱང་རང་རང་གི་བློའི་ཞེན་ཡུལ་ཙམ་དུ་ཟད་པར་འགྱུར་བའི་ཚུལ་དགོངས་འདུས་ལས། ཐེག་པ་ཆེན་པོའི་གསང་སྔགས་འདི། །མཐུན་འཇུག་ཐབས་ཀྱི་སྒྲར་བསྟན་པའི། །ཚིག་དང་སྒྲ་ལ་དོན་མི་བཞག །དམ་པ་རྣམས་ཀྱི་དགོངས་པ་ནི། །དཔེའམ་ཚད་མའམ་གཏན་ཚིགས་སམ། །རྗེས་སུ་དཔག་པའི་ཤེས་རབ་ཀྱིས། །རྟོགས་པར་ནུས་པ་མ་ཡིན་ནོ། །ཞེས་སོ། །འདི་ལྟར་ཟབ་མོའི་དེ་ཁོ་ན་ཉིད་གང་ཡིན་པ་དེ་ནི་སངས་རྒྱས་ཀྱི་རང་བཞིན་མ་ནོར་བ་ཡིན་ན། དེ་ནི་ཚིག་གི་ལམ་དུ་མི་གནས་པའི་ཚུལ་ལངྐར་གཤེགས་པ་ལས། བཤད་པ་དག་ཀྱང་འཁྲུལ་པ་སྟེ། ཡང་དག་དོན་ལ་ཡི་གེ་མེད། ཅེས་པས་སངས་རྒྱས་ཀྱི་རང་བཞིན་ནི་སངས་རྒྱས་ཁོ་ནས་མཁྱེན་གྱིས། དེ་ལས་གཞན་དུ་ཉན་ཐོས་སམ། རང་སངས་རྒྱས་སམ། བྱང་ཆུབ་སེམས་དཔའ་ས་བཅུ་པས་ཀྱང་བསམ་བྱ་མ་ཡིན་ན། རྟོག་གེའི་རིག་པ་ལ་མཐའ་གཅིག་ཏུ་གཞུངས་པས་སངས་རྒྱས་ཀྱི་བཞུགས་ཚུལ་ཤེས་པར་མི་ནུས་ཏེ། །
ལྷན་ཅིག་སྐྱེས་གྲུབ་ཀྱི་འགྲེལ་པར་ཡང་དབུ་མའི་གཞུང་ལུགས་ནི་ཚིག་ཙམ་གྱིས་ཆོས་ཐམས་ཅད་སྟོང་པར་བརྗོད་པའི་རྟོག་གེ་བ་རྩོད་པ་ལ་མོས་པ་ཞེས་བྱ་བ་ཡིན་ནོ། །ཞེས་སོ། །དེ་ཡང་རེ་ཞིག་ལམ་གྱི་གནས་སྐབས་སུ་བློ་དག་པར་བྱེད་པ་རིགས་པ་ཡིན་ཀྱང་། རིགས་པ་དག་པར་བྱེད་པ་ལུང་ཡིན་ནོ། །ལུང་དག་པར་བྱེད་པའང་། ལུང་རྣམས་བལྟོས་པ་ལས་གྲུབ་ཅིང་སྐྱེས་པའི་རིགས་པའི་བློ་མ་ཉམས་པ་ཡིན་པས་དེས་སངས་རྒྱས་རྣམས་ཀྱི་དངོས་པོའི་བཞུགས་ཚུལ་ཇི་ལྟ་བ་མི་རྟོགས་པའི་ཚུལ་རྟོག་གེ་བ་རྣམས་ཀྱི་གཙུག་གི་ནོར་བུ་ཆོས་ཀྱི་གྲགས་པས་ཀྱང་། དེ་ནི་རྗེས་དཔག་འཇུག་མི་འགྱུར། །ཞེས་སོ། །དེ་བས་ན་ལངྐར་གཤེགས་པ་ལས། བློ་གྲོས་ཆེན་པོ་རྣམ་པར་ཤེས་པ་ཐམས་ཅད་རིགས་གཅིག་པ་མ་ཡིན་ན་ནི། འདི་ལྟར་ཀུན་གཞིའི་རྣམ་པར་ཤེས་པ་རྒྱུ་ལས་འབྱུང་བར་མི་འགྱུར་རོ། །ཞེས་དང་། རྡོ་རྗེ་ཕྲེང་བར། ཐམས་ཅད་རྣམ་ཤེས་ཕུང་པོར་ཞུགས། །རྣམ་ཤེས་དེའང་འོད་གསལ་བའོ། །མྱ་ངན་འདས་དང་ཀུན་སྟོང་དང་། །ཆོས་ཀྱི་སྐུ་ཡང་གསུངས་པ་ཡིན། །ཞེས་པ་ལྟར་རོ། །དེ་ལྟ་ན་སངས་རྒྱས་དང་སེམས་ཅན་གཉིས་སུ་མེད་པས་རྒྱལ་བའི་ཕྲིན་ལས་ཀྱང་ཆུད་གསོན་པར་འགྱུར་རོ་ཟེར་ན། མཐར་ཐུག་གི་སངས་རྒྱས་ནི་ཕྱོགས་དང་རིས་སུ་མ་ཆད་པའི་ཕྱིར་ན་ངོ་བོ་ཉིད་མེད་པ་སྟེ། འཇིག་རྟེན་འདས་ལེར། སངས་རྒྱས་རྣམས་ནི་ཆོས་ཀྱི་སྐུ། །རྣམ་དག་ནམ་མཁའ་ལྟ་བུ་ཡིན་ཞེས་སོ། །དེ་ལྟར་ཡིན་པས་ཆོས་ཀྱི་འཁོར་ལོ་ཐ་མ་ནི་འཁོར་གསུམ་ཡོངས་དག་གི་རང་བཞིན་དུ་གནས་པའི་ཕྱིར་འདི་ནི་སངས་རྒྱས་སོ། །འདི་ནི་དེའི་ཕྲིན་ལས་སོ་སྙམ་པའང་ད་དུང་གཉིས་སུ་སྣང་བའི་བློའི་གཟེབ་ལས་མ་ཐར་བ་ཉིད་དོ། །ད་བསན་
ཆ་ལ་བཏགས་ཤིང་གཞན་དོན་ལ་དམིགས་པའི་གཟུགས་སྐུའི་ཡོན་ཏན་འབའ་ཞིག་ལ་ཐོབ་བྱའི་མཐར་ཐུག་ཏུ་བྱེད་པ་ནི་ཐེག་པ་ཆེན་པོ་རྡོ་རྗེ་གཅོད་པ་ལས། གང་དག་ང་ལ་གཟུགས་སུ་མཐོང་། །གང་དག་ང་ལ་སྒྲར་ཤེས་པ། །ལོག་པའི་ལམ་ལ་ཞུགས་པ་སྟེ། །སྐྱེ་བོ་དེས་ནི་ང་མི་མཐོང་། །ཞེས་པ་དང་འགལ་བ་ཡིན་ནོ། །ཆུལ་དེ་ལྟ་བུས་རྡོ་རྗེ་ལུས་ཀྱི་གནས་ལུགས་ཤེས་པར་བྱས་ནས་དེ་ལ་གནད་དུ་བསྣུན་པའི་རང་འབྲས་སྙིང་པོའི་བཞུགས་ཚུལ་བདེ་བླག་ཏུ་རྟོགས་པ་ལ་དམིགས་ནས་ཐབས་ཀྱི་ལམ་རྣམ་པ་གཉིས་ལ་སློབ་པའི་ཚུལ། འདི་ལྟར་རྡོ་རྗེ་ལུས་ཀྱི་གནས་ལུགས་དང་། །གདོད་མ་གཞི་ཡི་བཞུགས་ཚུལ་ཤེས་བྱས་ནས། །གཏུམ་མོ་དང་ནི་སྒྱུ་ལུས་ཉིང་འཁྲུལ་ལམ། །འོད་གསལ་བར་དོ་འཕོ་བ་རྣམ་པ་དྲུག །སྐྱེས་བུའི་རྩོལ་བས་འགྲུབ་ཀྱིས་གཞན་རྐྱེན་ལ། །རག་མ་ལུས་ཕྱིར་རང་ལུས་ཐབས་ཀྱི་ལམ། །དེ་ལ་རང་ལུས་ཐབས་ལྡན་དང་། གཞན་ལུས་རིག་མ་ལ་བརྟེན་པ་གཉིས་ལས། དང་པོ་ནི་ལམ་གྱི་རྩ་བ་གཏུམ་མོ་དང་། གཞི་མ་སྒྱུ་ལུས་དང་། དྲོད་ཚད་རྨི་ལམ་དང་། སྙིང་པོ་འོད་གསལ་དང་། བསུན་མ་བར་དོ་དང་། བློ་ཆོད་འཕོ་བ་དྲུག་པོ་ནི་རང་གིས་རྩོལ་བའི་མཐུས་བསྒྲུབ་པ་ཁོ་ན་ལས་གཞན་རྐྱེན་ལ་རག་མ་ལུས་པས་ན་རང་ལུས་ཐབས་ལྡན་ཞེས་བྱའོ། །དེ་ལ་དང་པོར་གསང་དབང་གི་ལམ་གཏུམ་མོ་ནི། སྔོན་དུ་འགྲོ་བའི་རིམ་པས་རྒྱུད་ལས་སུ་རུང་བར་བྱས་ནས་ལུས་ཀྱི་གནད་རྣམ་པར་སྣང་མཛད་ཀྱི་ཆོས་བདུན་ནི་ཀློང་ཆེན་རབ་འབྱམས་ལས། རྐང་པ་རྡོ་རྗེ་སྐྱིལ་ཀྲུང་བཅའ། །ལག་པ་གཉིས་ནི་མཉམ་གཞག་
བསྣོལ། །ལུས་ནི་མདའ་སྨྱུག་བཞིན་དུ་བསྲང་། །དཔུང་པ་རྒོད་གཤོག་བཞིན་དུ་བརྒྱང་། །མཇིང་པ་གཞུ་མཆོག་བཞིན་དུ་བསྐུམ། །ལུས་གནད་ཕག་པ་གཟིངས་ལྟར་གཏོད། །མིག་དང་སྣ་རྩེ་སེམས་རྩེ་བསྟུན། །ཞེས་པ་ལྟར་རམ། ཡང་ན་སྐྱིལ་ཀྲུང་ལྷོད་ཆ་དང་ལྡན་པས་རྫོགས་རིམ་གྱི་ལྷ་སྐུ་གསལ་སྟོང་སྒྱུ་མ་ལྟ་བུར་གསལ་པའི་ངང་ནས་སྟོང་ར་བསྒོམ་པ་དང་། རྩ་གསུམ་འཁོར་ལོ་དང་བཅས་པ་གསལ་གདབ་པ་དང་། དེ་ལ་ཨ་ཀ་ཙ་ཊ་ཏ་པ་ཡ་ཤ་ལ་སོགས་པའི་ཡི་གེའི་རིམ་པ་དགོད་པ་དང་། རླུང་སྐྱོན་སེལ་ཞིང་མཉམ་རྒྱུ་ཡེ་ཤེས་ཀྱི་རླུང་ལ་སོགས་རླུང་རྒྱུ་བའི་དུས་གནད་ལ་མཁས་པར་བྱ་བ་དང་། རྔུབ་པ་དང་། དགའ་བ་དང་། གཞིལ་བ་དང་། འཕང་བའི་གནད་བཞི་ལ་མཁས་པར་བྱ་བ་དང་། འབྱུང་བ་བཞིའི་རླུང་འཇའ་ཚོན་ལྟ་བུ་ལ་དམིགས་པ་དང་། རླུང་བྱེར་བའི་ཉེས་དམིགས་འགེགས་པ་དང་། ཁུག་པའི་ཡུན་ཚོད་ནང་དུ་གནས་པ་ལ་ཡུན་བསྲིང་བ་དང་། འབར་འཛག་དང་ཐིག་ལེའི་འཐབ་མོ་ཤེས་པ་དང་། འབྱུང་འཇུག་གནས་གསུམ་རྡོ་རྗེའི་བཟླས་པར་ཤེས་པ་ལ་སོགས་མན་ངག་གི་གནད་ལ་འདྲིས་པས་ཉམས་སུ་བླངས་པས། རླུང་དབུ་མར་ཞུགས་པའི་རྟགས་སུ་བསྒོམ་པའི་དུས་ན་མཉམ་རྒྱུར་འབྱུང་བ་དང་། གནས་པ་ལས་ཡོན་ཏན་སྐྱེ་ཞིང་སྣ་བུག་གི་རྒྱུ་བ་རགས་པ་འགགས་པ་དང་། །ཐིམ་པ་ལས་སྣ་བུག་གི་རྒྱུ་བ་གཞན་དུ་འཕོས་ནས་སྣ་སྒོར་སྤུ་མི་འགུལ་པ་ལ་སོགས་པ་འབྱུང་ངོ་། །གལ་ཏེ་རླུང་བྱིང་བ་དང་བྱེར་བ་ལས་དེ་ལྟར་འབྱུང་སྲིད་དེ་རྟགས་སུ་བྱིང་ན་དམིགས་པ་མི་གསལ། བྱེར་ན་ཡོན་ཏན་མི་སྐྱེ་བོའི་ཁྱད་པར་ཤས་པར་བྱས་ནས་འཇུར་མིག་ཏུ་སྲད་བུ་འགྲིམ་
པ་ལྟ་བུའི་དམིགས་པ་རྩེ་གཅིག་པ་ཀུན་ལ་གལ་ཆེ་བ་ཡིན་ནོ། །དེ་ལྟར་རླུང་གནད་ཁ་སྦྱོར་གྱི་ངང་ནས་ཕྲ་ཐིག་གི་རྣལ་འབྱོར་སོགས་ཏིང་ངེ་འཛིན་རྩེ་གཅིག་པ་བསྒྲུབ་པའི་ཚུལ་རྒྱུད་དང་མན་ངག་སོ་སོའི་ངེས་པ་ལྟར་ཤེས་པར་བྱའོ། །དེ་ལྟར་བསྒོམས་པས་རྟགས་སྣང་ནི་ས་ཆུ་ལ་ཐིམ་པས་སྨིག་རྒྱུ། ཆུ་མེ་ལ་ཐིམ་པས་དུ་བ། མེ་རླུང་ལ་ཐིམ་པས་མཁའ་སྣང་། རླུང་སྣང་བ་ལ་ཐིམ་པར་ཕྱོགས་པ་ན་མར་མེ། ཐིམ་པ་དངོས་ཀྱི་དུས་སྟོང་པ། སྣང་བ་མཆེད་པ་ལ་ཐིམ་པས་ཤིན་ཏུ་སྟོང་བ། །མཆེད་པ་ཉེར་ཐོབ་ལ་ཐིམ་པས་སྟོང་པ་ཆེན་པོ། ཉེར་ཐོབ་འོད་གསལ་ལ་ཐིམ་པས་ཐམས་ཅད་སྟོང་པའམ་འོད་གསལ་འཆར་ལ། དེ་བཞིན་དུ་འབར་འཛག་ལས་བྱུང་བའི་དགའ་བ་བཞིའི་མཚན་ཉིད་དང་ལྷན་སྐྱེས་ངས་ཟིན་པར་གཅེས་སོ། །རྗེས་ལ་ལུས་ཀྱི་ཆུན་བཙལ་བའི་འཁྲུལ་འཁོར་དང་། བྲབ་གཞིལ་དང་ལུས་འདུལ་གྱི་རིམ་པ་དུས་སྐབས་དང་འབྲེལ་བའི་གནད་དུ་འགྲོ་བ་དང་། དེའང་འཁྲུལ་འཁོར་དྲག་པོས་བཙན་ཐབས་སུ་གཅུན་པ་ལས། ལྟར་སྣང་ཙམ་པའི་ཡོན་ཏན་གློ་བུར་བ་སྐྱེས་པ་ནི་དགོས་པ་ཆུང་སྟེ། དེའི་རང་བཞིན་གེགས་མང་ལ་བརྟན་པ་མ་ཡིན་པས་སོ། །རྩ་རླུང་ཐིག་ལེའི་ལམ་གང་ཡིན་ཡང་ཐུན་ཐམས་ཅད་ཀྱི་མཇུག་ཏུ་འཇམ་རླུང་དང་སྦྲགས་རྣམ་པར་མི་རྟོག་པའི་གཏུམ་མོ་རང་བཞིན་འོད་གསལ་བའི་ཆོས་ཉིད་ལ་མཉམ་པར་གཞག་པ་ནི་ཤིན་ཏུ་གཅེས་ཏེ། སེམས་དངོས་པོའི་གནས་ལུགས་སྐྱེ་འགག་གནས་གསུམ་དང་བྲལ་བ་འཁྲིད་ལ་སོགས་པའི་ཚེ་ཐོས་བསམ་ལ་བརྟེན་ནས་གཏན་ལ་ཕབ་པའི་དོན་སྤྱིའི་
གོ་བ་འདིར་གཏུམ་མོའི་བསྒོམ་རིམ་ཀྱི་རྟོག་པ་འགག་སྟོབས་དང་བདེ་སྟོང་གི་ཉམས་མྱོང་ལ་བརྟེན་ནས་མྱོང་ཐོག་ཏུ་གཏན་ལ་དབབ་པ་ཡིན་པའི་ཕྱིར་རོ། །དེ་བས་ན་དང་པོའི་ལས་ཅན་རྣམས་ཀྱིས་ཕྱི་རོལ་དུ་དེ་བཞིན་གཤེགས་པའི་སྐུ་གཟུགས་ལ་སོགས་པའམ། རྡེའུ་དང་། ཤིང་བུ་དང་རླུང་བགྲང་བའི་རྟེན་ཅན་ལ་དམིགས་པ་དང་། སྨིན་མཚམས་ལས་སོར་མོ་བརྒྱད་དམ་བཅུ་དྲུག་ལ་སོགས་པའི་ཐད་ཀར་གཏད་མེད་དུ་བཞག་ནས་སེམས་འཛིན་པ་སོགས་རང་ཉམས་ལ་བོགས་གང་ཆེ་དང་བསྟུན་ནས་ཞི་གནས་ཀྱི་མྱོང་བ་བརྟན་པོ་བཙལ་ཞིང་། དེའི་རང་བཞིན་སོ་སོར་རྟོག་པའི་ཤེས་རབ་ཏུ་རང་རིག་པའི་ལྷག་མཐོང་གི་ཡེ་ཤེས་ལ་རྩལ་སྦྱང་བ་སོགས་བླ་མའི་མན་ངག་ལས་ཤེས་པར་བྱ་སྟེ། དོ་ཧ་མཛོད་ལས། བླ་མའི་ལུང་ལ་བསྒྲིམས་ཏེ་རབ་འབད་ན། །ལྷན་ཅིག་སྐྱེས་པ་འབྱུང་བར་ཐེ་ཚོམ་མེད། །ཁ་དོག་ཡོན་ཏན་ཡི་གེ་དཔེ་བྲལ་བ། །སྨྲ་རུ་མི་བཏུབ་དེ་ནི་གྱི་ན་མཚོན། །གཞོན་ནུ་མ་ཡི་བདེ་བ་སྙིང་ལ་ཞེན་པ་བཞིན། །དབང་ཕྱུག་དམ་པ་དེ་ནི་སུ་ལ་བསྟན་ནུས་སམ། །དངོས་དང་དངོས་མེད་ཡོངས་སུ་བཅད་པ་ན། །དེ་ནི་འགྲོ་བ་མ་ལུས་རབ་ཏུ་ཐིམ་པར་འགྱུར། །གང་ཚེ་ཡིད་ནི་གཡོ་རང་གནས་བརྟན་པ་དང་། །དེ་ཚེ་འཁོར་བའི་དངོས་པོ་ལས་ནི་གྲོལ་བར་འགྱུར། །ཞེས་སོ། །གཉིས་པ་སྒྱུ་ལུས་ནི། སེམས་ཅན་ཐམས་ཅད་ཀྱི་དོན་དུ་སྒྱུ་མ་ལྟ་བུའི་ཏིང་ངེ་འཛིན་ལ་བརྟེན་ནས་ཡིད་ངོའི་ལྷ་སྐུ་ལྷན་སྐྱེས་ཡབ་ཡུམ་དུ་ལྡང་བར་བྱའོ་སྙམ་དུ་སེམས་བསྐྱེད་ནས། མགྲིན་པའི་རྩ་འཁོར་དུ་གསུང་རྡོ་རྗེའི་ངོ་བོ་བླ་མ་ལོངས་སྤྱོད་རྫོགས་པའི་སྐུ་དམར་གསལ་ཡུམ་དང་བཅས་པ་
བསྒོམས་ལ་སྒྱུ་ལུས་འབྱོངས་པར་གསོལ་བ་དྲག་ཏུ་བཏབ། དེ་ནས་སྣོད་བཅུད་དངོས་པོའི་རྣམ་འགྱུར་ཐམས་ཅད་མེད་བཞིན་དུ་འཁྲུལ་པའི་དབང་ལས་སྣང་བ་མིག་ཡོར་དང་། སྨིག་རྒྱུ་དང་། རྨི་ལམ་དང་། བྲག་ཅ་དང་། དྲི་ཟའི་གྲོང་ཁྱེར་དང་། མིག་འཕྲུལ་དང་། གློག་དང་། ཆུ་བུར་དང་། སྒྱུ་མ་མཁན་གྱི་སྤྲུལ་པ་བྱས་པའི་སྐྱེས་བུ་བཞིན་དུ་བལྟ་བར་བྱ་སྟེ། ཏིང་ངེ་འཛིན་རྒྱལ་པོ་ལས། སྒྱུ་མ་བྱེད་པ་དག་གིས་གཟུགས་སྤྲུལ་ཏེ། །རྟ་དང་གླང་པོ་ཤིང་རྟ་སྣ་ཚོགས་བྱས། །དེ་ལ་ཇི་བཞིན་སྣང་བ་གང་ཡང་མེད། །ཆོས་རྣམས་ཐམས་ཅད་དེ་འདྲར་ཤེས་པར་གྱིས། །ཞེས་སོ། །འདི་ནི་སྒྱུ་མ་ལྟ་བུའི་འཛིན་སྟངས་ཀྱི་ཡུལ་སྣང་ཐམས་ཅད་ལ་རྒྱས་འདེབས་པའི་དྲན་འདུན་གཙོ་ཆེའོ། །དེ་ལ་སྤྱི་དོན་མ་དག་པའི་སྒྱུ་ལུས་དང་། དག་པའི་སྒྱུ་ལུས་གཉིས། སྦས་དོན་རླུང་སེམས་ཀྱི་སྒྱུ་ལུས་གསུམ་དུ་བསྒོམ་པར་བྱ་བ་ལས། །ཕྱོགས་དང་པོ་ཐ་མལ་གྱི་སྒོ་གསུམ་སྒྱུ་མར་སྤྱོད་པའི་ཚུལ། མེ་ལོང་ལ་རང་གི་གཟུགས་བརྙན་འཆར་དུ་བཅུག་ནས་དེ་ལ་རྒྱན་གོས་དང་། བཟའ་བཏུང་ལ་སོགས་པ་བསྟབས་ན་དགའ་བ་འདུག་གམ་བལྟ། རེས་བརྡེག་འཆོག་དང་རྣམ་འགྱུར་རྩུབ་མོ་བསྟན་ནས་མི་དགའ་བ་འདུག་གམ་བལྟས་པས། དེ་ལ་དགའ་སྡུག་གཉིས་ཀ་མེད་པ་ལྟར་རང་ཉིད་ལའང་དེ་ལྟར་གོམས་སུ་བཅུག་ནས་སྒྱུ་མ་ལྟ་བུའི་སྣང་བ་འཆར་བ་ལ་རྩལ་སྦྱང་། དེ་བཞིན་དུ་མེ་ལོང་གི་གཟུགས་བརྙན་ལ་བརྗོད་པ་འཇམ་རྩུབ་སྣ་ཚོགས་པ་འདོད་རྒྱལ་དུ་བསྒྲགས་ཀྱང་ཆགས་སྡང་མི་སྐྱེ་བ་བཞིན་དུ་དག་བྲག་ཅ་ལྟ་བུར་སྦྱང་། དེ་བཞིན་
སྨིག་རྒྱུ་གཡོ་བའི་ཆོས་རྣམས་ཀྱང་ཆུ་རླུང་འཇམ་པོ་ལ་ཉི་ཟེར་དང་རླུང་ཕྲ་མོས་བཏབ་པ་ལྟར་སྣང་ཡང་ཚུར་མ་གྲུབ་པ་བཞིན་དུ། ཡིད་ངོར་ཤར་བའི་གཟུང་འཛིན་གྱི་རྟོག་པ་སྣ་ཚོགས་པའང་སྣང་ཙམ་ཉིད་ནས་བདེན་པར་མ་གྲུབ་པར་བསམ། དེ་ལྟར་ལུས་ངག་ཡིད་གསུམ་དང་ཡུལ་གྱི་སྣང་བ་ཕན་ཚུན་རྟེན་ཅིང་འབྲེལ་འབྱུང་ལས་སྐྱེས་པའི་ཕྱིར་ན་ན་ཚ་འདྲེ་གདོན་ལ་སོགས་པ་དང་། འཇིག་རྟེན་རྙེད་པ་སྙན་དང་མི་སྙན་པ་ལ་སོགས་པའི་ཆོས་བརྒྱད་པོ་དབེན་པར་མགོ་སྙོམས་ནས་ཅུང་ཟད་གོམས་པའི་ཚེ་སྐྱེ་བོ་མང་པོའི་མདུན་སར་ཡིད་ཀྱི་དམ་བཅའ་ཤིན་ཏུ་བརྟན་པར་བྱས་ནས་རྐྱེན་དང་བསྲེ་བ་ལ་བསླབ་བོ། །གལ་ཏེ་ཆགས་སྡང་སྐྱེ་བ་འདུག་ན་སླར་ཡང་དབེན་པ་འབའ་ཞིག་ཏུ་ཕྱིན་ལ་རྐྱེན་ཐུབ་ཐུབ་ཏུ་བསྒོམ་པར་བྱའོ། །གཉིས་པ་དག་པའི་སྒྱུ་ལུས་ལ་སྤྲུལ་པ་དབྱིབས་ཀྱི་རྣལ་འབྱོར་དང་། རང་བཞིན་དབྱིབས་ཀྱི་རྣལ་འབྱོར་ལས། དང་པོ་ནི། རྫོགས་རིམ་ཀྱི་སྔོན་འགྲོ་བསྐྱེད་རིམ་ཡིན་པས་སྔོན་དུ་བསྐྱེད་རིམ་ལ་བྱང་ཆུབ་ན་རབ། མིན་ན་རྫོགས་རིམ་རང་ལམ་གྱི་ལྷ་སྐུ་སྒྱུ་མ་ལྟ་བུའི་གསལ་སྣང་ལ་གོམས་པ་བརྟན་པ་མེད་ན་བར་དོ་ལོངས་སྐུར་ལྡང་བའི་ལམ་གྱི་དངོས་གཞི་ལའང་ངེས་པ་མི་ཐོབ་པས། རེ་ཞིག་དང་པོར་ཐབས་ཀུན་རྫོབ་ཀྱི་སྐུ་ལ་བརྟེན་པའི་ཚུལ། ཡི་དམ་གྱི་སྐུ་འགྱིང་ལོག་པ་བྲིས་འབུར་ཅི་རིགས་པའི་སྣང་བརྙན་མེ་ལོང་དུ་འཆར་བཅུག་པའམ། ཡང་མེ་ལོང་ལས་ཀྱང་མེ་ལོང་གཉིས་པར་འཆར་དུ་བཅུག་པའི་གཟུགས་བརྙན་ལ་ཡུན་རིང་དུ་ཤེས་པ་རྩེ་གཅིག་པས་བལྟས་ལ་ཡིད་ཡུལ་དུ་གནས་པ་ལ་བསླབ་སྟེ་རིམ་ལྔ་ལས། རྡོ་རྗེ་སེམས་
དཔའ་ལེགས་བྲིས་པ། །མེ་ལོང་དྲི་མ་མེད་པ་ལ། །གཟུགས་བརྙན་གསལ་བར་སྣང་དང་མཚུངས། །ཞེས་སོ། །དེ་ལྟར་གོམས་པ་ཤིན་ཏུ་བརྟན་པར་གྱུར་པ་དང་རང་བཞིན་དབྱིབས་ཀྱི་རྣལ་འབྱོར་ལ་བསླབ་དགོས་ཏེ། དེ་ལྟར་མ་བསླབ་ན་བློས་བཅོས་པའི་ཐ་སྙད་ལ་གསལ་བའི་སྐུའི་གསལ་སྣང་ཙམ་གྱིས་མཆོག་གི་དངོས་གྲུབ་ཐོབ་པ་མ་ཡིན་ཞིང་ཇི་ལྟ་བའི་སྒྱུ་མའི་སྐུར་ཡང་མི་འགྱུར་བས་སོ། །དེ་བས་ན་སྔར་བློས་བཅོས་པའི་བག་ཆགས་ཙམ་དུ་གོམས་པ་དེ་ཉིད་ལྷག་མཐོང་གི་ལྟ་བས་ཟིན་པའི་བསྐྱེད་རིམ་མཚན་ཉིད་པའི་གསལ་སྣང་དུ་འཆར་བ་ལ་བསླབས་པས་རྣམ་སྨིན་གྱི་ལུས་འདི་ཉིད་ལྷའི་རང་བཞིན་དུ་རྣམ་པར་དག་ཅིང་། དེ་ཡང་བཞིན་ལག་གི་རྣམ་པར་སྣང་ཡང་རང་བཞིན་མེད་པའི་སྟོང་གཟུགས་ཕྱག་རྒྱ་ཆེན་པོའི་ལྷ་སྐུར་འཆར་བ་འབྱུང་སྟེ་དུས་འཁོར་ལས། རང་གི་ཡིད་ལས་སྐྱེས་པ་མེ་ལོང་ནང་གི་གཟུགས་བརྙན་ལྟ་བུ་ཉིད། གང་ཞིག་མཐའ་དག་རྒྱལ་བའི་སྲས་དང་རྣལ་འབྱོར་དབང་པོས་བསྟན་བྱ་སྟེ། ཞེས་སོ། །དེ་ནས་བོགས་དབྱུང་བའི་དོན་དུ་ལྷ་དེ་ཉིད་འཇིག་རྟེན་གྱི་ཁམས་གང་བ་ཙམ་གྱི་ཆེ་བ་དང་། ཡུངས་འབྲུར་ཚུད་པ་ཙམ་གྱི་ཆུང་བ་དང་། གཅིག་ལས་དུ་མ་དང་། དུ་མ་གཅིག་ཏུ་བསྡུ་བ་ལ་སོགས་དང་། གཞན་ཡང་རྗེས་ཤེས་དང་། རྗེས་ཐོབ་ཐམས་ཅད་དུ་སྣོད་བཅུད་ཀྱི་སྣང་བ་དབང་ཤེས་ཀྱི་ངོ་ལ་དངོས་སུ་སྣང་བ་དང་། དེའི་བག་ཆགས་ཡིད་ངོར་སྣང་བ་མཐའ་དག་ལྷ་དང་གཞལ་ཡས་ཁང་དུ་རྩལ་སྦྱོང་ཞིང་། ཁྱད་པར་སྐབས་འདིར་ལྷ་
སྐུའི་སྒྱུ་མ་བསྒོམ་པའི་དགོས་དོན་ནི་རང་བཞིན་གྱི་འོད་གསལ་ལས་བར་དོ་འཆར་བའི་ལྷ་སྐུར་ལྡང་བའི་ཆེད་དུ་ཡིན་པས་རྨི་ལམ་གྱི་སྒྱུ་ལུས་སྐབས་འབྱུང་བ་བཞིན་དུ་དུག་གསུམ་གྱི་རང་བཞིན་སྐུ་གསུམ་དུ་སྦྱང་བའི་ཞིང་སྦྱོང་རྣམ་པ་གསུམ་ལ་བསླབས་ཏེ། ཞེ་སྡང་སྒྱུ་ལུས་སུ་བསྲེ་བ་སྤྲུལ་སྐུའི་ཞིང་སྦྱོང་། འདོད་ཆགས་དབང་དང་བསྲེ་བ་ལོངས་སྐུའི་ཞིང་སྦྱོང་། གཏི་མུག་འོད་གསལ་དུ་བསྲེ་བ་ཆོས་སྐུའི་ཞིང་སྦྱོང་གསུམ་ཉམས་སུ་བླངས་ནས་བར་དོའི་ཡིད་ལུས་འབྱུང་བའི་ལུས་དང་བྲལ་བ་ཤིན་ཏུ་ཕྲ་བའི་ལྷའི་སྐུར་ལྡང་ཞིང་དེ་ཉིད་འོད་གསལ་དུ་འཇུག་པ་དང་། དེ་ལས་སྒྱུ་མ་ལྟ་བུར་ལྡང་བ་སོགས་ཀྱང་རྨི་ལམ་གྱི་སྐབས་ཉམས་སུ་བླང་ཚུལ་དང་མཐུན་པ་ཡིན་ནོ། །གསུམ་པ་ནི། རླུང་དབུ་མར་ཐིམ་པ་ལས་སྟོང་པ་བཞིས་དྲངས་པའི་འོད་གསལ་གྱི་མཐར་རླུང་སེམས་ཙམ་གྱི་སྒྱུ་མའི་ལྷ་སྐུར་ལྡང་བའམ། ཡང་ན་རླུང་དབུ་མར་ཐིམ་པའི་དགའ་བ་བཞི་དྲངས་པའི་རྗེས་ཀྱི་ལྷན་སྐྱེས་ལས་སྒྱུ་མའི་སྐུར་ལྡང་བ་སྟེ། དེ་ཡང་སྔ་མ་ལ་སློབ་པའི་དོན་དུ་རྫོགས་རིམ་གྱི་ལྷ་སྐུ་སྒྱུ་མ་ལྟ་བུའི་སྙིང་གའི་རྩ་འདབ་ཀྱི་དབུས་སུ་རླུང་སེམས་ཙམ་ལས་གྲུབ་པའི་ཧཱུཾ་སྔོན་པོ་འོད་ཟེར་ཁ་དོག་ལྔ་པ་ཞིག་བསམ། དེ་ལ་རླུང་རིག་གཅིག་ཏུ་དྲིལ་བས་རླུང་དབུ་མར་ཞུགས་པའི་རྟགས་དུ་བ་སོགས་པ་དང་སྣང་མཆེད་ཐོབ་གསུམ་གྱི་འོད་གསལ་དང་བཅས་པའི་ངང་དུ་ལྷ་སྐུ་ཧཱུཾ་དང་བཅས་པ་རོ་གཅིག་ཏུ་བསྡུས་ནས་མཉམ་པར་བཞག་ཅིང་། སླར་ཡང་རླུང་སེམས་ཙམ་ལས་གྲུབ་པའི་སྒྱུ་མའི་སྐུར་ལྡང་བའོ། །ཕྱི་མའི་དོན་ཡང་སྟོང་བཞིའི་དོད་ཐུབ་དུ་དགའ་བཞི་འདྲེན་པ་ཙམ་ལས་ཁྱད་པར་གཉིས་པ་མེད་དོ། །དེ་ཙམ་མི་ནུས་
པས་རིལ་འཛིན་དང་རྗེས་གཞིག་གི་བསམ་གཏན་ལ་བརྟེན་པའི་འཇུག་ལྡང་བྱ་ཚུལ་གཉིས་ལས། དང་པོ་ནི། ལྷ་སྐུ་ཡིག་འབྲུ་དང་བཅས་པ་ལ་རིག་པ་རྩེ་གཅིག་ཏུ་དྲིལ་བའི་རླུང་ཁ་སྦྱོར་ཅི་རིགས་བཟུང་བའི་མཐར། མེ་ལོང་ཧས་བཏབ་པ་ལྟར་སྟོང་གཟུགས་ཀྱི་ལྷ་སྐུ་ཡིག་འབྲུ་ལ་བསྡུ། ཡིག་འབྲུ་ཡང་ནཱ་དའི་བར་དུ་བསྡུས་ཏེ་མི་དམིགས་པའི་ངང་ནས་རླུང་ཁ་སྦྱོར་ཅི་ནུས་སུ་བཟུང་ངོ་། །གཉིས་པ་ནི། སྣོད་ཀྱི་འཇིག་རྟེན་འོད་དུ་ཞུ་བ་བཅུད་ཀྱི་སེམས་ཅན་ལ་བསྡུ། དེ་རྣམས་ཀྱང་འོད་དུ་ཞུ་བ་རང་ལ་བསྡུ། རང་ཉིད་ཧཱུཾ་གི་བར་ཞུ་ཚུལ་སྔར་བཞིན་ནོ། །འོད་གསལ་དེའི་ངང་ལ་རླུང་སེམས་ཙམ་ལས་གྲུབ་པའི་སྒྱུ་མའི་ལྷ་སྐུར་ལྡང་བ་དང་། ཡང་དེ་ཉིད་འོད་གསལ་དུ་འཇུག་པ་དང་ཡང་ལྡང་བ་སོགས་ལ་རླུང་སྦྱོར་དང་ལྷན་ཅིག་ཡང་ཡང་སློབ་པར་བྱའོ། །འདི་ནི་སྒྱུ་ལུས་ཀྱི་དོན་པོ་ཡིན་ཏེ་བར་དོར་མཆོག་གི་དངོས་གྲུབ་ཐོབ་པའི་ལམ་ཐུན་མོང་མ་ཡིན་པའང་ཡིན་ལ། གནས་སྐབས་སུའང་སྣང་བ་ཐམས་ཅད་སྒྱུ་མ་ལྟར་འཆར་བས་བདེན་འཛིན་འཇིག་པ་དང་། མངོན་དུ་གྱུར་ན་མེ་ཆུ་དུག་མཚོན་ལ་སོགས་པས་ཀྱང་མི་གནོད་ཅིང་། ཚེ་འདི་ཉིད་ལའང་རྩ་རླུང་ཐིག་ལེ་སྒྲིབ་བྲལ་དུ་དག་ནས། འདོད་གཟུགས་ཀྱི་ལྷ་དང་རྗེས་སུ་མཐུན་པའི་འཇའ་ལུས་སྒྱུ་མའི་སྐུ་འགྲུབ་པ་སོགས་ཡོན་ཏན་དཔག་ཏུ་མེད་པ་ཡིན་ནོ། །གསུམ་པ་རྨི་ལམ་གྱི་གདམས་པ་ལ། རྨི་ལམ་བཟུང་བ་དང་། སྦྱང་ཞིང་སྒྱུ་མར་སློབ་པ་དང་། འཁྲུལ་པ་ལ་ལོབ་རྫིས་བྱ་བ་དང་། ཉམས་སུ་མྱོང་ཚུལ་ལ་སོགས་པའི་སྒོ་ནས་སྟོན་པ་ལ། སྤྱིར་དམ་ཚིག་ལ་སྐྱོན་ཡོད་པ་དང་། མོས་གུས་ཞན་པ་དང་། དངོས་ཞེན་ཆེ་བ་དང་། །གྲིབ་གྱིས་ནོན་
པ་དང་། ཟས་ཚོད་མི་རིག་པ་དང་། རྣམ་གཡེང་དང་། ཐེ་ཚོམ་ཅན་ལ་སོགས་པས་མི་ཟིན་པས། དེ་དག་སེལ་བའི་གཉེན་པོ་ལ་འབད་ནས་སེམས་ཅན་ཐམས་ཅད་ཀྱི་དོན་དུ་སེམས་བསྐྱེད། མགྲིན་པའི་ནང་དུ་དྲིན་ཅན་གྱི་བླ་མ་བསྒོམས་ལ་དགེ་སྦྱོར་རྒྱུད་ལ་སྐྱེ་བའི་གསོལ་བ་དྲག་པོ་གདབ་པོ། །དེ་ལ་རྨི་ལམ་གྱི་སྣང་བ་མཐའ་དག་ནི་ད་ལྟ་བའི་འཁྲུལ་སྣང་ཀུན་རྫོབ་པའི་རྗེས་འབྲང་གི་བག་ཆགས་ཀྱིས་བསླད་པ་ཙམ་ལས་ཀུན་རྫོབ་ཏུའང་མ་གྲུབ་པའི་འཁྲུལ་སྣང་ཡིན་པས་འཁྲུལ་པ་ཉིང་འཁྲུལ་ཞེས་བྱ་ལ། རྨི་ལམ་གྱི་ལུས་ནི་ཀུན་རྫོབ་ཀྱི་སྣང་བ་ད་ལྟར་བའི་བག་ཆགས་གོམས་པའི་རླུང་སེམས་ཙམ་གྱི་ལུས་ཡིན་པས་ན་བག་ཆགས་ཀྱི་ལུས་ཞེས་བྱ་སྟེ། དེ་གཉིས་ལམ་དུ་ཁྱེར་བའི་ཕྱིར་རྨི་ལམ་གྱི་ལུས་དང་སྣང་བ་སྒྱུ་མ་ལྟ་བུའི་ལྷ་སྐུ་ལ་སྦྱོང་བ་དངོས་གཞི་དང་གཉིད་དུས་ཀྱི་སྟོང་པའི་འོད་གསལ་རླུང་སེམས་ཙམ་གྱི་ལྷ་སྐུ་སྒྱུ་མ་ལྟ་བུར་སྐད་ཅིག་གིས་ལྡང་བ་དགེ་སྦྱོར་གྱི་གཙོ་བོ་ཡིན་ནོ། །དེ་ལ་ཐོག་མར་མགྲིན་པའི་རྩ་འཁོར་གྱི་དབུས་སུ་པདྨ་འདབ་མ་བཞི་པ་གསལ་བའི་ལྟེ་བར་ཨོཾ་དཀར་པོ། མདུན་དུ་ཨ་སྔོན་པོ། གཡས་སུ་ན་སེར་པོ། རྒྱབ་ཏུ་ཏ་དམར་པོ། གཡོན་དུ་ར་ལྗང་གུ་རྣམས་གསལ་འཚེར་ཅན་དུ་བསྒོམ་པའམ། དམིགས་པ་ཟིན་བདེ་བའི་ཁྱད་ནས་ལྟེ་བར་ཨོཾ་དམར་པོ་རྐྱང་པ་ལ་སེམས་རྩེ་གཅིག་ཏུ་གཏད་ནས་རླུང་ཁ་སྦྱོར་དུ་བསྒོམ། དྲན་འདུན་ཐམས་ཅད་དུ་གཉིད་དུ་སོང་བ་ཡིན། སྣང་བ་དང་ཤེས་པ་འདི་དག་རྨི་ལམ་དུ་འདུག་སྙམ་པའི་འདུན་པ་དྲག་པོ་བར་མ་ཆད་པ་བྱ། ཁྱད་པར་གཉིད་དུ་འགྲོ་ཁར་མགྲིན་པའི་དམིགས་རྟེན་ལ་དྲན་ཤེས་རྩེ་གཅིག་ཏུ་གཏད་ནས་དེར་རླུང་སེམས་འདུས་པ་ལས་རྨི་ལམ་ཟིན་བདེ་བ་
དང་། མང་བ་དང་། གསལ་བ་སོགས་ཀྱི་གནད་ཆེ། སྤྱིར་སད་པའི་དུས་ཉིད་ན་རླུང་སྦྱོར་ལ་གོམས་པ་བརྟན་པས་རླུང་དབུ་མར་ཞུགས་སྟོབས་ལས་སྟོང་པ་བཞི་འདྲེན་ནུས་པ་ཡིན་ན་ཆོད་ལྷག་པར་ཆེ་བས་གཉིད་དུས་ཀྱང་སྟོང་པ་བཞི་རིམ་གྱིས་འཆར་བ་ངོས་བཟུང་ལ། དེ་ནས་རྨི་ལམ་འཆར་བའི་རྒྱུན་ལ་འཐུད་པས་ཆོག་མོད། ཕལ་ཀྱིས་དེ་ལྟར་མི་ནུས་པས་དེ་ལ་རླུང་སྟོབས་དང་འདུན་སྟོབས་གཙོ་ཆེ་བར་བསྟན་ཏོ། །དེ་ཡང་དབུ་མར་རླུང་ཅུང་ཟད་འཇུག་པར་བརྩམས་པ་ནས་གཉིད་དུས་ཀྱི་སྟོང་པ་བཞིའི་མགོ་ཟིན། ཞུགས་པ་དང་གཉིད་སྟུག་པོའི་རྟོག་བྲལ་གྱི་ངང་ལས་འོད་གསལ་འཆར་མ་ནུས་པའི་མུར་རླུང་རོ་རྐྱང་དུ་ཤོར་ནས་མགྲིན་པའི་རྩ་ལ་རྒྱུ་བས་རྨི་ལམ་འབྱུང་བ་སྟེ། སྤྱོད་བསྡུས་ལས། ཕུང་པོ་ཁམས་དང་སྐྱེ་མཆེད་དབང་པོ་རྣམས་ཤེས་པ་གཉིས་པོ་དེ་འདིར་རབ་འདུས་ནས། །ས་ཐུག་གྱུར་པས་གང་ཞིག་རང་གཉིད་ལོག །རླུང་གི་སྟོབས་ཀྱིས་རྨི་ལམ་མཐོང་བར་འགྱུར། །ཞེས་སོ། །དེའང་ཤེས་པ་གཉིས་པོ་ནི་སྣང་མཆེད་དང་འདུས་པ་ནི་ཐོབ་པའོ། །དེའི་ཚེ་རྨི་ལམ་ཧ་ཅང་སྟུག་པས་སམ། ཡུད་ར་ཟིན་ཡང་འཕྲལ་དུ་འཁྲུལ་འགྲོ་བ་ཞིག་བྱུང་ན་བརྗེད་འབྱམས་ཞེས་བྱ་སྟེ་ཉིན་སྣང་དུ་ཚོགས་དྲུག་གི་ཡུལ་སྣང་རྨི་ལམ་དུ་རྒྱས་འདེབས་པའི་གོམས་འདྲིས་ཆུང་བས་ལན་ནོ། དེ་ལ་རང་སའི་འཆར་སྒོའི་རྩལ་སྣང་མཐའ་དག །རྨི་ལམ་དུ་སྤྱད་པའི་འདུན་པ་དྲག་ཏུ་བཏང་། གཉིད་ནམ་སད་ལའང་དེ་ལྟར་བྱ། ཡང་རྨི་ལམ་འཛིན་པའི་འདུན་པ་ཧ་ཅང་དྲག་ཐལ་ནས་གཉིད་མ་ཕེབས་པའམ། ཕེབས་ཀྱང་རྨི་ལམ་མེད་པ་ནི་སྟོང་འབྱམས་ཞེས་བྱ་སྟེ་འདུན་པ་ཅུང་ཟད་གློད། སྙིང་གའམ་རྡོ་རྗེ་ནོར་བུའི་དབུས་སུ་
མཚན་གྱི་ས་བོན་ཨཱ་ལི་ལ་ཚེག་དྲག་བསྣན་པའི་བཅུ་དྲུག་ཕྲག་གཉིས་དཀར་པོ་མུ་ཏིག་གི་ཕྲེང་བ་ལྟ་བུ། རྒྱུ་དུས་ན་ཁམས་དམར་པོ། །ལམ་དུས་ན་ཡི་གེའི་རྒྱུའམ་སྦྱང་གཞི། འབྲས་དུས་ན་དཔེ་བྱད་ཀྱི་ས་བོན་ཀཱ་ལི་དམར་པོ་མར་མེའི་ཕྲེང་བ་ལྟ་བུ་སུམ་ཅུ་རྩ་བཞི་ལ་ཡ་ར་ལ་ཝ་ལ་སོགས་དྲུག་བསྣན་པའི་བཅུ་ཕྲག་གཉིས་པོས་རིམ་པ་གཉིས་སུ་བསྐོར་བའི་ཡི་གེ་ཐོག་མཐའ་གཉིས་འོད་དུ་ཞུ་ནས་ཧཱུཾ་གིས་མཚན་པའི་རྡོ་རྗེར་གྱུར། །དེ་ཡོངས་སུ་གྱུར་པ་ལས་རང་བཞིན་གཞིའི་ཀུན་ཏུ་བཟང་པོར་བསྒོམ་མོ། །དེའང་མྱང་འདས་དང་བཞུགས་ཚུལ་མཐུན་པའི་སྦྱོང་བའི་དབང་དུ་བྱས་ན་ཉི་ཟླའི་དཀྱིལ་འཁོར་ནི་མེ་ལོང་ལྟ་བུ་དང་རྡོ་རྗེའི་རིགས་སོ། །འོད་ཀྱི་གོང་བུ་ནི་མཉམ་པ་ཉིད་དང་རིན་པོ་ཆེའི་རིགས་སོ། །རྡོ་རྗེ་ཧཱུཾ་གིས་མཚན་པ་ནི་སོ་སོར་རྟོག་པ་དང་པདྨའི་རིགས་སོ། །སྐུ་ཡོངས་སུ་རྫོགས་པ་ནི་ཆོས་ཀྱི་དབྱིངས་ཀྱི་ཡེ་ཤེས་དང་དེ་བཞིན་གཤེགས་པའི་རིགས་སོ། །འབྲས་དུས་ཀྱི་མངོན་བྱང་ལྔའི་ཡོན་ཏན་ཡོངས་སུ་རྫོགས་པའི་ཚུལ། རྡོ་རྗེ་སྙིང་པོ་རྒྱན་གྱི་རྒྱུད་ལས། ཨཱ་ལི་དང་ནི་ཀཱ་ལི་དང་། །རྡོ་རྗེ་ཟླ་བ་རྣམ་པ་གཉིས། །གཅིག་ཏུ་གྱུར་པ་མཉམ་ཉིད་དེ། །ས་བོན་མཚན་མར་གྱུར་པ་ནི། །སོ་སོར་རྟོག་པར་ངས་བཤད་དོ། །དེ་བྱུང་སངས་རྒྱས་ཐམས་ཅད་ཀྱི། །འགྲོ་དོན་བྱེད་པ་བྱ་ནན་ཏན། །གཟུགས་བརྙན་རྫོགས་པ་ཆོས་དབྱིངས་ཏེ། །ཞེས་སོ། །དེ་ནས་ཡེ་ཤེས་ཕྱོགས་བཞི་དབུས་བརྟགས་ཏེ། ཞེས་པ་ནས། ཉི་ཟླ་པདྨ་རིན་པོ་ཆེ། །ཞེས་པའི་བར་གྱི་རྣམ་སྣང་གི་རང་བཞིན་གཞལ་ཡས་ཁང་བསྐྱེད་པར་བྱ་སྟེ། དེ་ལ་རྣམ་སྣང་ནི་སངས་རྒྱས་རྣམས་ཀྱི་སྐུའི་བདག་ཉིད་ཡིན་པས་སྐུ་དེས་གསུང་དང་ཐུགས་ཀྱི་རྟེན་བྱེད་པ་ལྟར་གཞལ་ཡས་ཁང་པས་ཀྱང་སངས་རྒྱས་རྣམས་བཞུགས་པའི་གནས་སམ་རྟེན་བྱེད་ཅིང་སྣོད་ཀྱི་འཇིག་རྟེན་གྱི་བག་ཆགས་
གྱིས་ཟིན་པ་སྟེ། དེའི་ཚེ་རྨི་ལམ་གྱི་མེས་ཚིག་པ་དང་། ཆུས་ཁྱེར་བ་དང་། གཅན་གཟན་གྱིས་ཟོས་པ་ལ་སོགས་སུ་ཞིག་གིས་ཉམས་སུ་མྱོང་སྙམ་དུ་ཤེས་པ་ལ་དཔའ་བསྐྱེད་ནས་མི་ཕོད་པའི་སྟེང་དུ་ཐོག་བརྫིས་བྱ། འཇམ་ཟིན་རྩུབ་ཟིན་གཉིས་གང་ཡིན་ཡང་འདྲ་སྟེ་རབ་ཀྱིས་རྨི་ལམ་གྱི་སྣང་བ་གང་ཤར་ཐམས་ཅད་སྟོང་པ་ཉིད་ཀྱི་རྩིས་ཟིན་པས་སྣང་བཞིན་པའི་དུས་ནས་ཡོད་མ་མྱོང་ཞིང་དོན་རང་སྟེང་ནས་མ་གྲུབ་པས་དེ་ཁོ་ན་ཉིད་ཤེས་པ་དང་། འབྲིང་གི་རྨི་ལམ་གྱི་ཡུལ་སྣང་སྒྱུ་མའི་དཔེ་བརྒྱད་དུ་བལྟ་ཞིང་། རང་གི་སྒོ་གསུམ་ཡང་སྒྱུ་ལུས་ཀྱི་སྐབས་ལྟར་ཉམས་འོག་ཏུ་ཆུད་པར་སློབ་ནུས་ན་ཆོད་ཆེ་ལ། ཐ་མས་རྨི་ལམ་གྱི་སྣང་བ་ཐམས་ཅད་སྒྱུ་མ་ལྟ་བུར་བལྟས་ནས་རྨི་ལམ་བཀོལ་དུ་རུང་བར་བྱའོ། །དེ་ནས་རྩལ་སྦྱངས་ནི། །རྨི་ལམ་ཟིན་པའི་དུས་རང་ཉིད་རྒྱལ་པོ་དང་། རྗེའུ་རིགས་དང་། བྲམ་ཟེ་དང་། དམངས་ལ་སོགས་པ་སྣ་ཚོགས་སུ་སྤྲུལ་པ་དང་། སེང་གེ་དང་། གླང་པོ་ཆེ་དང་། སྟག་ལ་སོགས་པ་དང་། ཁྱུང་དང་། ཀང་ཀ་ལ་སོགས་པ་དང་། རི་དང་ནགས་ཚལ་ཁང་ཁྱིམ་འབྱུང་བ་བཞི་ལ་སོགས་སྣ་ཚོགས་པར་སྤྲུལ་པ་དང་། ཡང་དེ་དག་ཐམས་ཅད་སྐད་ཅིག་ལ་མི་སྣང་བར་བྱ་བ་སོགས་ལ་བསླབ་ཅིང་། གོམས་པའི་ཚེ་སྣོད་བཅུད་ལྷ་དང་གཞལ་ཡས་སུ་སྤྲུལ་ཞིང་དེ་ཡང་ཆེ་བསྐྱེད་ཆུང་བསྐྱེད་དང་། བསྡུ་ཞིང་ལྡང་བའི་རྫུ་འཕྲུལ་ལ་གཙོ་བོར་བསླབ་པར་བྱའོ། །དེ་ནས་བསྒྱུར་བ་ནི་མེ་ཆུར་བསྒྱུར། ཆུ་མེར། རླུང་སར། ས་རླུང་། མི་དུད་འགྲོ་དང་། དུད་འགྲོ་མིར་ཡོད་པ་མི་སྣང་བར། མེད་པ་སྣང་བར་བསྒྱུར་ཞིང་མཐར་གོམས་ནས་སྣོད་གཞལ་ཡས་དང་། བཅུང་ལྷ་དང་ལྷ་མོའི་རྣམ་
འགྱུར་དུ་བསྒྱུར་བར་བྱའོ། །དེ་ནས་སྤེལ་བ་ནི། རྨི་ལམ་ན་སྣང་བའི་དངོས་པོ་གང་ཞིག་གཅིག་ལས་གཉིས། གཉིས་ལས་བཞི། དེ་ལས་བརྒྱད་སོགས་བརྒྱ་སྟོང་མང་པོའི་བར་སྤེལ་བ་ལ་སློབ་ཅིང་། མ་དག་པའི་སྣང་བ་དེ་ཡི་དམ་གྱི་ལྷར་བསྒོམས་ནས་མང་པོར་སྤེལ་བ་དང་། མ་ངེས་པའི་ཆོ་འཕྲུལ་སྟོད་ནས་མེ་འབར་བ་དང་། སྨད་ནས་ཆུ་འབྲུབ་པ་དང་། ཉི་ཟླ་ཞབས་འོག་ཏུ་གནོན་པ་དང་། སྟོང་གསུམ་ལུས་གཅིག་གིས་ཁྱབ་པར་བྱ་བ་ལ་སོགས་པར་རྩལ་སྦྱང་ངོ་། །དེ་ལྟར་རྩལ་སྦྱངས་ནས་སད་རྨི་གཉིས་ཀའི་གནས་སྐབས་སུ་གཅིག་གྲོགས་གཅིག་གིས་བྱེད་དགོས་པས་གཏུམ་མོ་དང་སྒྱུ་ལུས་ལ་སོགས་ཉིན་སྣང་གི་དགེ་སྦྱོར་གང་ལ་གོམས་སྟོབས་ཆེ་བ་དེ་ཉིད་རྨི་ལམ་དུ་བསྒོམས་ནས་སྟོང་པའི་འོད་གསལ་ཙམ་ལས་རླུང་སེམས་ཀྱི་ལྷ་སྐུ་སྒྱུ་མ་ལྟ་བུ་ལ་སྦྱང་དགོས་ཏེ། རྨི་ལམ་གྱི་གདམས་པའི་དགོས་པ་ཐ་མལ་པ་རྣམས་ལ་འཆི་སྲིད་ཀྱི་འོད་གསལ་ལས་རླུང་སེམས་ཙམ་གྱི་བར་སྲིད་མིང་གཞི་འདུས་པའི་ཕུང་པོ་ཅན་དུ་གྲུབ་པ་དེ་ཉིད་སྒྱུ་མའི་སྐུར་ལྡང་བའི་ཆེད་དུ་ཡིན་པས་སོ། །དེ་ཡང་གཉིད་དུས་ན་ཡུལ་ལྔའི་ཤེས་པ་རིམ་གྱིས་ཡིད་ལ་ཐིམ་པ་ལས་བྱུང་བའི་སྟོང་པ་བཞི་ངོས་ཟིན་པ་དག་གིས་ནི་འོད་གསལ་ལས་རྨི་ལམ་འཆར་བའི་སྐད་ཅིག་མ་དང་པོ་ལ་རླུང་སེམས་ཙམ་གྱི་ལྷ་སྐུ་སྒྱུ་མ་ལྟ་བུར་ལྡང་། དེ་ལ་མཉམ་པར་བཞག་ནས་སྣོད་བཅུད་ཀྱི་སྣང་བ་གཞལ་ཡས་ཁང་དང་ལྷ་སྐུར་བསྒོམ་པ་སོགས་བྱ། ཡང་གཉིད་ཀྱིས་སྟོང་པ་བསྐྱེད་ལ་དེ་ཉིད་འོད་གསལ་དུ་བཅུག་ནས་ཅི་ནུས་སུ་མཉམ་པར་བཞག །གལ་ཏེ་རྨི་ལམ་འཆར་ན་དེ་ཉིད་སྒྱུ་མའི་སྐུར་ལྡང་བའི་རིམ་པ་ལ་བསླབ་པར་བྱའོ། །དེ་ཙམ་མི་ནུས་པས་རྨི་ལམ་ཟིན་མ་ཐག་ཡི་དམ་གྱི་སྐུ་སྒྱུ་མ་ལྟ་
བུར་ལྡང་བར་བྱས་ནས་དེའི་ངང་ལ་མཉམ་པར་བཞག་ཅིང་། རིལ་འཛིན་དང་རྗེས་གཞིག་ལ་སོགས་པའི་བསམ་གཏན་རྣམས་ཀྱང་བྱའོ། །དེ་ལ་བརྟན་པ་ཐོབ་ནས་ཞིང་སྦྱོང་བྱེད་པའི་ཚུལ། སད་པའི་དུས་ན་ཕྱོགས་གང་ཞིག་བགྲོད་པའི་ཡུལ་དང་རྣམ་པ་ཡིད་ལ་ཡང་ཡང་བྱས་ལ། དེ་ནས་གཉིད་དུ་འགྲོ་ཁར་དེའི་འདུན་པ་ལྷག་པར་བསྐྱེད་ཅིང་རྨི་ལམ་ཟིན་པ་ལས་ཡི་དམ་གྱི་ལྷ་སྐུར་ལངས་པ་དེ་ཉིད་རི་བོའི་རྩེ་དང་། བསྒྲུབ་གནས་རྟེན་གསུམ་ཁྱད་པར་ཅན་དང་། བླ་མ་བཞུགས་པའི་ས་ལ་སོགས་དང་། རིམ་བཞིན་ལྷའི་གནས་ལ་སོགས་པར་སྐར་མངའ་འཕངས་པ་བཞིན་དུ་ཕྱིན་ནས་གནས་རིགས་སོ་སོའི་ཁྱད་པར་བརྟག །དེ་ཉིད་འབྱོངས་ནས་དག་པའི་ཞིང་སྦྱོང་བྱ་བ་ནི། འོག་མིན་སྟུག་པོ་བཀོད་པ་ལ་སོགས་ཏེ་རིགས་ལྔའི་སངས་རྒྱས་ཀྱི་ཞིང་ལྔའི་རྟེན་དང་བརྟེན་པའི་བཀོད་པ་སྔོན་དུ་ཤེས་པར་བྱས་ནས། སད་དུས་སུ་འདུན་པ་ཡང་ཡང་དང་གཉིད་ཁར་ལྷག་པར་འདུན་པ་སྔར་བཞིན་ནས་རྨི་ལམ་ཟིན་པའི་ཚེ་སྒྱུ་ལུས་ཀྱི་ལྷ་སྐུར་ལངས་ནས་ཞིང་ཁམས་དེ་དག་ཏུ་སྐར་མདའ་རྒྱུག་པ་བཞིན་སོང་སྟེ་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་མཆོད་བགྱིད་པ་དང་ཆོས་ཉན་པ་སོགས་བྱའོ། །དེ་ཡང་ཞིང་ཁམས་དེ་དག་ཕྱོགས་གཤེད་ན་ཡོད་པ་མ་ཡིན་ཅིང་བཀོད་པ་དང་རྣམ་འགྱུར་གང་དུ་བསམ་པའི་སྟོབས་གོམས་པའི་རང་གཟུགས་ཡིན་པས་རང་གི་གནས་ཁང་ངམ། མགྲིན་པའི་པད་འདབ་ཀྱི་ཡི་གེ་ལྔ་ལ་དེ་དང་དེའི་དམིགས་པ་གཏད་ཀྱང་རུང་སྟེ་འཁོར་འདས་ཀྱི་རྣམ་པ་སེམས་ཀྱི་བཟོ་བོས་བྱས་པའི་ཕྱིར་རོ། །མདོར་བསྡུ་ན་རྨི་ལམ་འབྱོངས་ནས་།།།གྱི་ན་བ་བྱེད་པ་ལ་ནི་སྙིང་པོ་མེད་དེ། གདམས་པ་འདིའི་
དགོས་པ་བར་དོར་སྒྱུ་མའི་སྐུ་མངོན་དུ་བྱེད་པའི་དོན་དུ་དམིགས་པ་ཡིན་པས་སད་རྨི་གཉིས་ཀར་གཅིག་གྲོགས་གཅིག་གིས་བྱེད་པའི་ཕྱིར་སྒྱུ་ལུས་དང་སྤེལ་ནས་རླུང་སེམས་ཙམ་གྱི་ལྷ་སྐུ་སྒྱུ་མ་ལྟ་བུ་བསྒོམས་ནས་དེ་ཉིད་འོད་གསལ་དུ་འཇུག་ལྡང་ལ་གཙོ་བོར་བྱའོ། །དེས་ནི་བར་དོ་ལོངས་སྐུར་ལྡང་བའི་ཚུལ་ཉམས་འོག་ཏུ་ཆུད་ཅིང་གནས་སྐབས་སུའང་སྣང་བ་སེམས་སུ་ཤེས་ནས་འཁྲུལ་སྣང་གི་བདེན་ཞེན་ཀྱང་ཤུགས་ལ་ལྡོག་པར་འགྱུར་རོ། །བཞི་པ་འོད་གསལ་གྱི་གདམས་པ་ནི། སྔོན་དུ་འགྲོ་བའི་ཆོས་རྣམས་ཕལ་ཆེར་རྨི་ལམ་དང་མཆུངས་ལ། གཞན་ཡང་བ་སྐུ་མཉེ་བྱ་ཞིང་ཁམས་གསོ། བཟའ་བཏུང་བཅུད་ཅན་བསྟེན། བྱང་སེམས་མི་ཉམས་པར་བྱ། ལུས་གནད་ཙོག་པུ། དུས་གནད་ཐོ་རངས། གཉིད་སྲབ་པའི་དུས། འདུན་པ་གཉིད་ཁའི་དྲན་པ། ཡུལ་གྱི་གནད་སྙིང་གའི་དམིགས་རྟེན་རྣམས་སོ། །དེ་ལ་ཐོག་མར་སེམས་བསྐྱེད་ནས་སྙིང་གར་བླ་མ་ཡབ་ཡུམ་བསྒོམས་ནས་གསོལ་བ་གདབ། རྫོགས་རིམ་གྱི་ལྷ་སྐུ་སྒྱུ་མ་ལྟ་བུར་གསལ་བའི་སྙིང་གའི་རྩ་འཁོར་གྱི་དབུས་སུ་ཧཱུཾ་ཡིག་སྔོན་པོ་གསལ་བ་ལ་སེམས་རྩེ་གཅིག་ཏུ་གཏད་དེ་རླུང་ཁ་སྦྱོར་དུ་བསྒོམ། དེ་ནས་རིལ་འཛིན་ནམ་རྗེས་གཞིག་གི་བསམ་གཏན་གྱིས་ཉེར་བསྡུ་བྱས་ནས་ནཱ་ད་ཡང་མི་དམིགས་པའི་ངང་དུ་རླུང་སྦྱོར་དང་བཅས་མཉམ་པར་བཞག །ཡང་སྐད་ཅིག་གིས་སྔར་ལྟར་གསལ་བཏབ། སད་དུས་སུ་དེ་ལྟར་བསྒོམས་པས་སྙིང་གར་རླུང་གི་འདུ་བ་བྱང་ནས་གཉིད་དུས་སུ་རླུང་སེམས་དེར་འདུ་སླ་ཞིང་། ཁྱད་པར་རླུང་དབུ་མར་ཐིམ་སྟོབས་ཀྱིས་སྟོང་པ་བཞིའམ་ཆགས་ཅན་ལ་དགའ་བཞིས་བསྐྱེད་པའི་སོ་སོའི་རང་འབྲས་འོད་གསལ་ལམ་ལྷན་སྐྱེས་ལ་མཉམ་པར་འཇོག་པ་ཁོ་ནའོ། །དེ་ཡང་ཉལ་བའི་
རྣལ་འབྱོར་ལ་ཞུགས་ནས་གཉིད་མ་བྱུང་བར་སྙིང་གའི་ས་བོན་ཧཱུཾ་ལ་རྩེ་གཅིག་ཏུ་གཏད་པས་རླུང་སེམས་ཅུང་ཟད་འདུས་པས་འབྱུང་བ་རིམ་པས་ཐིམ་པའི་རྟགས་དུ་བ་དང་སྨིག་རྒྱུ་ལ་སོགས་པའི་རྟགས་སྣང་ཕྲ་མོ་འཆར། དེ་ནས་གཉིད་དུ་འགྲོ་བར་ཕྱོགས་པ་ན་རླུང་ཆེར་འདུས་ཏེ་རྣམ་པར་ཤེས་པ་སྣང་བ་ལ་ཐིམ། ཡུལ་རགས་པའི་རྟོག་པ་འགགས་པ་ལ་སྟོང་པ་ཞེས་བྱ་སྟེ་སྟོན་གྱི་ནམ་མཁའ་གཡའ་དག་པ་ལ་ཟླ་འོད་ཤར་བ་ལྟ་བུ་འབྱུང་། དེ་ནས་གཉིད་ཅུང་ཟད་འཐུམ་པའི་དུས་སུ་རླུང་ཆེས་ཆེར་འདུས་ཏེ་ཡུལ་ཕྲ་བའི་རྟོག་པ་མཐའ་དག་འགགས། སྣང་བ་མཆེད་པར་ཐིམ་པ་ལ་ཤིན་ཏུ་སྟོང་པ་ཞེས་བྱ་སྟེ་ནམ་མཁའ་གཡའ་དག་པ་ལ་ཉི་འོད་ཀྱིས་ཕོག་པ་ལྟ་བུ་འཆར། དེ་ནས་གཉིད་ཆར་འཐུམ་པའི་དུས་སུ་རླུང་ཐམས་ཅད་འདུས་ནས་མཆེད་པ་ཉེར་ཐོབ་ལ་ཐིམ་པས་རྟོག་པ་ཕྲ་བ་ཕལ་ཆེར་འགགས་པ་ལ་སྟོང་པ་ཆེན་པོ་ཞེས་བྱ་སྟེ། ནམ་མཁའ་གཡའ་དག་པ་ལ་མཚམས་ཀྱི་སྨག་གིས་ཁྱབ་པ་ལྟ་བུ་འཆར། དེ་ནས་རླུང་ཐམས་ཅད་ཐིམ་པས་གཉིད་དུ་འཐུམ་གྱིས་སོང་། རྟོག་པ་ཕྲ་རགས་ཐམས་ཅད་འགགས་པའི་མོད་ལ་དབུ་མའི་ཡོན་ཏན་གྱི་རྩ་ཁ་གྱེན་བསྟན་དུ་རླུང་སེམས་འདུས་པས་ཐམས་ཅད་སྟོང་པའམ། ཉེར་ཐོབ་འོད་གསལ་ལ་ཐིམས་པ་ཞེས་བྱ་སྟེ་སྟོན་ཀའི་ཐོ་རངས་ནམ་མཁའ་སློང་བྱེད་ཀྱི་རྐྱེན་གསུམ་དང་བྲལ་ནས་གཡའ་དག་པ་ལྟ་བུའོ། །དེ་ལྟར་སྟོང་པ་བཞི་པོ་སོ་སོའི་ཐད་ཀར་འདུན་པ་དྲག་པོས་ངོས་ཟིན་པར་བྱས་པའི་མཐར། ཐམས་ཅད་སྟོང་པ་འོད་གསལ་གྱི་རང་བཞིན་དེ་ཉིད་ཀྱི་ངང་མ་ཤོར་བར་བྱ་བ་དེ་གདམས་པའི་ངོ་བོ་ཉིད་ཡིན་ནོ། །དེ་ལྟ་ནའང་དབང་པོ་དང་སྐལ་པ་རབ་ཏུ་གྱུར་པའམ། དབེན་པ་ཡུན་
རིང་བརྟེན་པའི་བསྒོམ་ཉམས་ཅན་མ་ཡིན་པའི་རྣམ་རྟོག་གི་གཞན་དབང་ཅན་ཕལ་ལ་སྟོང་པ་དང་པོ་དང་གཉིས་པའི་གནས་སྐབས་ཙམ་མམ། སྦྱངས་སྟོབས་ཀྱིས་ཕྱི་མ་གཉིས་ངོས་ཟིན་པ་ཙམ་བྱུང་ཀྱང་། མོད་ཉིད་ལ་ཀུན་གཞིའི་རང་བཞིན་ལུང་མ་བསྟན་གྱིས་འོད་གསལ་གྱི་དེ་ཉིད་ལ་བསྒྲིབས་ནས་དྲན་པ་མེད་པར་བྱེད་པ་དང་། དེའི་ངང་ལས་ཀུན་གཞིའི་རྣམ་པར་ཤེས་པས་ཡིད་ཤེས་བསླད་ནས་རྨི་ལམ་སེམས་པའི་ཚུལ། དེའི་དོན་འདུས་པའི་རྒྱུད་ལས། ཀུན་གཞི་ལུང་མ་བསྟན་པ་ལས། སྔ་མ་འཕྲོ་བ་ཡིད་ཡིན་ལ། །ཕྱི་མ་སྐྱེ་བ་ཉོན་མོངས་ཡིད། །སྒོ་ལྔ་སྐྱེ་བ་རྟོག་པ་སྟེ། །ཞེས་སོ། །དེའི་ཚེ་སད་མ་ཐག་ཏུ་བླ་མ་ལ་གསོལ་བ་དྲག་ཏུ་བཏབ་གཉིད་ཐུན་ཆུང་ངུར་བཅད། ལུས་ཀྱི་དབུས་ན་ཆོས་ཉིད་ཀྱི་དྷཱུ་ཏི་ཤེལ་གྱི་ཀ་བ་བཙུགས་པ་ལྟ་བུ་ཕྱི་ནང་སྒྲིབ་པ་མེད་པ་ཟང་ཐལ་ལེ་བའི་སྙིང་གའི་ཐད་ཨ་ཡིག་དམར་པོ་མར་མེ་སྦར་བ་ལྟ་བུའི་གསལ་སྣང་གིས་ལུས་ཀྱི་ནང་ཐམས་ཅད་སྐར་ཁུང་དུ་ཟླ་ཟེར་ཞུགས་པ་ལྟར་གྱུར་པ་ལ་རིག་པ་གཏད་དེ་གཤིས་ཀྱི་བཞུགས་ཚུལ་བསྒྱོངས། དེ་ཡང་གཉིད་སད་ཁ་དང་ལོག་ཁར་ཤེས་པ་གྲིམས་པའི་ཚུལ་ནམ་མཁའ་ཀློང་ཡངས་ཀྱི་རྒྱུད་ལས། གཉིད་ནི་བསྒོམ་པར་གསལ་འདེབས་ན། །ལྡོག་ཁ་སད་ཁའི་དུས་དག་ཏུ། །ཏི་ལ་ཆོས་སྐུ་དྲན་བྱས་ན། །རིན་ཆེན་གའུར་བཅུག་པ་འདྲ། །ཞེས་སོ། །དེ་ལྟར་བརྩོན་པས་སྦྱངས་བས་གཉིད་སྟུག་གི་དྲན་མེད་ཀྱང་མ་ཡིན་ལ། རྨི་ལམ་རྨིས་པ་ཡང་མ་ཡིན་པའི་བར་སྐབས་དེར་ནམ་མཁའ་གཡའ་དང་བྲལ་བ་ལྟ་བུའི་ཤེས་པ་དངས་ཆ་དང་ལྡན་པ་ཞིག་སྐབས་འགར་བྱུང་ན་འོད་གསལ་ཟིན་པའི་འགོ་བརྩམ་པ་ཡིན་ནོ། །སྤྱིར་འོད་གསལ་ལ་གཞི་ལམ་འབྲས་གསུམ་གྱི་ངོ་ནས་དབྱེ་ན། དང་པོ་ནི། འདོད་ཁམས་
པར་རགས་པ་ཚོགས་བདུན་གྱི་རྣམ་པར་ཤེས་པ་དང་། གཟུགས་ཁམས་པར་ཕྲ་བ་ཀུན་གཞིའི་རྣམ་པར་ཤེས་པ་དང་། གཟུགས་མེད་པར་ཤིན་ཏུ་ཕྲ་བ་ཀུན་གཞི་འབའ་ཞིག་པ་ཅན་གྱི་རྣམ་པར་ཤེས་པ་གཙོ་ལྡན་དུ་ཡོད་པས་འོད་གསལ་ལ་བསྒྲིབས་ནས་རང་ངོ་རང་གིས་མ་རིག་པས་འཁོར་བ་གྲུབ་པ་ཡིན་ཏེ། འདི་ལྟར་གནས་ལུགས་ཀྱི་འོད་གསལ་དང་། གཉིད་ཀྱི་འོད་གསལ་དང་། འཆི་བའི་འོད་གསལ་གསུམ་བསྒོམས་མ་བསྒོམས་ཐམས་ཅད་དུ་ཡོད་པས་གཞིའི་འོད་གསལ་ཞེས་བྱའོ། །གཉིས་པ་ནི། ལམ་དུ་བསྒོམས་པའི་སྟོབས་ཀྱིས་རྣམ་པར་ཤེས་པའི་ཚོགས་ཀྱིས་ཉེ་བར་ལེན་པ་དྭངས་ནས་ཆོས་ཐམས་ཅད་སྐྱེ་མེད་དུ་རྟོགས་པ་སྤྱི་དོན་གྱི་འོད་གསལ་དང་། སད་སྟུག་འཆི་བ་གསུམ་གྱི་གནས་སྐབས་སུ་རླུང་སེམས་དབུ་མར་འདུས་ཤིང་ཐིམ་པ་ལས་བྱུང་བའི་སྟོང་བ་བཞི་པོ་མྱོང་ཐོག་ཏུ་ངོ་འཕྲོད་པ་སྦས་དོན་ནམ་ལྷག་མཐོང་གསལ་བའི་ཡེ་ཤེས་ཀྱིས་སད་པར་བྱས་པའི་འོད་གསལ་ནམ་མཁའ་གཡའ་དག་པའི་དཔེས་མཚོན་པའི་སྒྱུ་མ་ལྟ་བུའི་གཉིས་སྣང་ཕྲ་ཞིང་ཕྲ་བའང་དག་ནས་ཤིན་ཏུ་རྣམ་པར་མི་རྟོག་པའི་ཡེ་ཤེས་མངོན་སུམ་དུ་རྟོགས་པ་མཐར་ཐུག་གི་འོད་གསལ་རྣམས་ལམ་དུས་ཀྱི་འོད་གསལ་བསྒོམ་བྱ་མ་འཁྲུལ་བ་ཉིད་དང་། དེ་ལས་མི་སློབ་པའི་ཟུང་འཇུག་མངོན་དུ་གྱུར་པ་ལ་འབྲས་བུའི་འོད་གསལ་ཞེས་ཐ་སྙད་ཙམ་དུ་མཚོན་པ་སྟེ། དངོས་དོན་ལ་འོད་གསལ་ནི་འཕགས་པའི་བདེན་པ་གསར་མཐོང་གི་ལམ་ཡིན་ལ། ཟུང་འཇུག་ནི་སངས་རྒྱས་ཀྱི་ས་ཁོ་ན་ཡིན་ནོ། །དེ་བས་ན་ལམ་གྱི་གནས་སྐབས་འདི་དག་ཏུ་རབ་ཀྱིས་སྣང་མཆེད་ཐོབ་པའི་རྗེས་ཀྱི་འོད་གསལ་ཡུལ་སྣང་ཕྲ་རགས་ཐམས་ཅད་
འགགས་པ་ནམ་མཁའ་གཡའ་དག་པ་ལྟ་བུ་དེ་ཉིད་ངོས་ཟིན་པར་བྱེད་པ་ལམ་གྱི་དངོས་གཞི་ཡིན་ལ། དེ་ཉིད་གོམས་པ་ཤིན་ཏུ་བརྟན་པར་གྱུར་ན་འོད་གསལ་དེ་ཉིད་ཉེར་ཐོབ་ཏུ་ལྡང་བ་ལ་སོགས་པའི་སྟོང་པ་བཞི་ལུགས་ལྡོག་ཏུ་འཆར་བས་ན་ལུགས་འབྱུང་བྱང་ནས་ལུགས་ལྡོག་ངོས་འཛིན་པའི་འཕེན་པ་བྱའོ། །འབྲིང་གིས་སྟོང་བཞི་རིམ་ཅན་དུ་མ་ངེས་ཀྱང་གཉིད་འཐུག་པོ་སངས་ཤིང་རྨི་ལམ་མ་བྱུང་བའི་གནས་སྐབས་ན་འདུན་སྟོབས་དང་རླུང་སྟོབས་ཅི་རིགས་པའི་རྐྱེན་གྱིས་ཡུལ་སྣང་ཕྲ་རགས་ཀྱི་སྣང་བ་མ་འགགས་པས་གཉིད་དུ་མ་སོང་བའི་རྣམ་པ་ལྟ་བུའི་སེམས་གསལ་སྟོང་རྟོག་བྲལ་ཙམ་དུ་ངོས་ཟིན་པ་ནི་སྲབ་མོའི་འོད་གསལ་དང་། དེའང་རེས་རྨི་ལམ་དང་འདྲེས་ནས་འབྱུང་བའོ། །ཐ་མ་གཉིད་སྟུག་གི་གནས་སྐབས་དེ་ཉིད་ལས་སྐབས་ཅི་རིགས་པར་རྨི་ལམ་རྨིས་པ་མ་ཡིན་པར་བུམ་ནང་དུ་མར་མེ་སྦར་བ་ལྟར་ཤེས་པ་གསལ་ལམ་མེ་བ་ཞིག་ངོས་ཟིན་པ་ནི་ཉམས་ཀྱི་འོད་གསལ་ཡིན་ནོ། །དེ་ལྟར་ཟིན་ལུགས་གང་བྱུང་ཡང་རེ་ཞིག་མྱོང་བ་སྐྱེ་བདེ་བ་ལ་བཟུང་ནས་མཐར་གོང་དུ་བསྟན་པའི་ལམ་གྱི་འོད་གསལ་སྒྲ་ཇི་བཞིན་པ་གསུམ་གྱི་གཤིས་ཐོག་ཏུ་ཕབས་ན་གཏི་མུག་གཉིད་ཀྱི་རང་བཞིན་འོད་གསལ་དུ་དྭངས་པའི་འབྲས་བུ་མི་སློབ་པའི་ཟུང་འཇུག་ཏུ་འགྲུབ་པ་ཡིན་ནོ། །དེ་སྐད་དུ་འཇམ་དཔལ་བཤད་རྒྱུད་ལས། གཏི་མུག་ཆོས་དབྱིངས་ཡེ་ཤེས་ཏེ། །རབ་ཏུ་ཆེ་བའི་རྣམ་གྲངས་ཀུན། །གཏི་མུག་གཉེན་པོ་ཡིན་པའི་ཕྱིར། །ཞེས་སོ། །ཕྱི་དུས་འདིར་རྩེ་གཅིག་ཏུ་མཉམ་པར་འཇོག་ནུས་པ་ཤིན་ཏུ་དཀོན་པས་སྐྱོ་བ་འཕེལ་ལ། འོད་གསལ་ཟིན་པར་རློམ་པ་ཕལ་ཆེར་ཀྱང་འཇུར་དྲན་རྩེ་གཅིག་པའི་རྒྱུན་གཉིད་ལ་འདྲེས་པ་དང་། ལ་ལར་སྲབ་མོ་དང་། ཉམས་ཀྱི་འོད་གསལ་ཙམ་དུ་སྣང་
བས་དེ་དག་གི་ངོ་བོ་ནི་བདེ་གསལ་མི་རྟོག་པའི་བསམ་གཏན་གཉིད་དུ་འདྲོངས་པ་ཙམ་ཡིན་པས་ཁམས་གསུམ་ལས་འདའ་བ་མ་ཡིན་ནོ། །དེ་བས་ན་འོད་གསལ་གྱི་དགོས་པ་ནི་འཆི་བའི་དུས་ན་སྟོང་པ་བཞིའི་རང་བཞིན་ངེས་ནས་སྣང་ཡུལ་མེད་པའི་འོད་གསལ་ལ་རང་དབང་ཐོབ་སྟེ་འཆི་བ་ཆོས་སྐུར་ལམ་དུ་སློང་པའི་དོན་དུ་ཡིན་པས་ན། སང་དུས་རླུང་དབུ་མར་ཐིམ་པའི་སྟོང་པ་བཞི་བསྐྱེད་ནས་འོད་གསལ་ལ་མཉམ་པར་འཛོག་པ་དང་། གཉིད་དུས་ན་རང་བཞིན་གྱིས་འཆར་བའི་སྟོང་པ་བཞི་ངོས་བཟུང་ནས་འོད་གསལ་ལ་མཉམ་པར་འཇོག་པ་གཉིས་གཅིག་གྲོགས་གཅིག་གིས་བྱས་ནས་བོགས་འབྱིན་པར་བྱའོ། །གནས་འདིས་སྐབས་སུ་གཟུང་འཛིན་གྱི་རྣམ་རྟོག་སྦྱོང་། ལས་ཉོན་བག་ཆགས་དང་བཅས་པ་བསྲེག །མཐར་ཐུབ་འོད་གསལ་མ་བུ་འདྲེས་ནས་མི་སློབ་པའི་ཟུང་འཇུག་བརྙེས་པར་འགྱུར་རོ། །ལྔ་པ་བར་དོའི་གདམས་པ་ནི། ལུས་ལོངས་སྤྱོད་ཉེ་དུའི་འབྲེལ་བ་བཅད། དམ་ཚིག་ཉམས་ཆགས་སྙིང་ཐག་པ་ནས་བཤགས། བླ་མ་ལ་གསོལ་བ་བཏབ་སེམས་རྣམ་པ་གཉིས་བསྐྱེད་ནས་གང་ལའང་ཆགས་ཞེན་མེད་པ་ནི་སྔོན་དུ་འགྲོ་བའི་ལས་སོ། །འདི་ལྟར་མིའི་ལུས་རྟེན་གནད་འཆད་པའི་ཆོར་བ་མྱོང་བ་རྣམས་རང་བཞིན་སྐྱེ་གནས་ཀྱི་བར་དོ་ལས་སྲིད་པ་ཕྱི་མར་ཉིད་མཚམས་སྦྱོར་བའི་དུས་ན། ཕུང་པོ་ལྔ་དང་། དབང་པོ་ལྔ་དང་། ཁམས་ལྔ་དང་། ཡེ་ཤེས་ལྔ་སྟེ་རགས་པ་ཉི་ཤུ་ཐིམ་པའི་རྗེས་ལ་རང་བཞིན་བརྒྱད་ཅུའི་རྟོག་པ་འགགས་པ་དང་བསྟུན་ནས་ཕྲ་བ་ནང་གི་འབྱུང་བ་ཐིམ་ཚུལ་ནི་གང་ཟག་སོ་སོའི་ངོས་ན་ཕྱིའི་བསྐལ་པ་འཇིག་ཚུལ་དང་ཆོས་མཚུངས་པ་ཡིན་ཏེ། རྒྱུད་སྡེ་སྔ་འགྱུར་ལས། རླུང་ལ་དྲོད་ཡོད་གནས་
སུ་འདུས། །དེ་དུས་རྩ་རྣམས་ཁྲག་དྲོས་པས། །ཁ་སྣ་སྐམ་ལ་སྒོ་བདུན་དུ། །མེ་བདུན་བསྐལ་པ་འབྱུང་བར་འགྱུར། །ཆུ་དང་རྡུལ་རྣམས་གཅིག་ཏུ་འདུས། །ཆུ་ཡི་བསྐལ་པ་འབྱུང་བར་འགྱུར། །སྣ་བུག་གཉིས་སུ་དབུགས་ཆད་པས། །མཇུག་ཏུ་རླུང་གིས་འཇིག་པ་ཡིན། །ཞེས་སོ། །དེའང་རང་བཞིན་བརྒྱད་ཅུའི་རྟོག་པ་འགགས་ཚུལ་ནི། སྣང་མཆེད་ཐོབ་གསུམ་གྱི་སྐབས་སུའང་འབྱུང་བར་བཤད་པས་མ་ངེས་པ་སྟེ། སྤྱིར་ཡང་འཆི་རྟགས་ཀྱི་རིམ་པ་རྣལ་འབྱོར་ལྡན་པ་རྣམས་ཀྱི་ཤེས་ངོར་ཆེས་སྔ་བ་ནས་རིམ་པས་འབྱུང་བ་དང་། གཅིག་ཆར་དུ་འབྱུང་བ་མ་ངེས་པའང་ཡོད་དེ་ནང་གི་དུས་སྦྱོར་བཅུ་གཉིས་ཀྱི་རླུང་འགག་སྟོབས་ལས་སོ། །དེ་ནས་ཤིན་ཏུ་ཕྲ་བ་སྣང་མཆེད་ཐོབ་གསུམ་གྱི་ཐིམ་ཚུལ་ནི། ཕུང་པོའི་འདུ་བྱེད་འདོར་བ་ལ་མངོན་དུ་ཕྱོགས་པས་རླུང་རྣམས་སྙིང་གར་ཐིམ་པ་དང་སྤྱི་བོའི་ཐིག་ལེ་དཀར་པོ་ཐུར་དུ་འབབ། རྣམ་ཤེས་སྣང་བ་ལ་ཐིམ་པའི་མཚན་ཉིད་སྤྲིན་མེད་ཀྱི་ནམ་མཁའ་ཟླ་འོད་ཀྱིས་སློང་བ་ལྟ་བུའི་དཀར་ལམ་པ་དང་། ལྟེ་བའི་ཐིག་ལེ་དམར་པོ་གྱེན་དུ་ལོག །སྣང་བ་མཆེད་པ་ལ་ཐིམ་པའི་མཚན་ཉིད་སྤྲིན་མེད་ཀྱི་ནམ་མཁའ་ཉི་འོད་ཀྱིས་སློང་བ་ལྟ་བུའི་དམར་ལམ་པ་དང་། དེ་གཉིས་སྙིང་གར་གར་ཕྲང་ཅིང་མཆེད་པ་ཉེར་ཐོབ་ལ་ཐིམ་པའི་མཚན་ཉིད་སྟོན་གནམ་གཡའ་དག་པ་མཚམས་ཀྱི་སྨག་གིས་སློངས་པ་ལྟ་བུའི་སྣང་བ་ནག་ལམ་པའི་མོད་ལ་དྲན་པ་ཉམས་ཏེ་བརྒྱལ། དེ་ནས་ཉེར་ཐོབ་འོད་གསལ་ལ་ཐིམ་པས་བརྒྱལ་བ་ལས་སངས་ཏེ་སྔ་མ་ལྟ་བུའི་སློང་བྱེད་ཀྱི་རྐྱེན་གསུམ་དང་བྲལ་བའི་ཐོ་རེངས་ཀྱི་སྟོན་གནམ་གཡའ་དགབ་ལྟ་བུ་ཞིག་འཆར་བ་དེ་ཉིད་ལ་འཆི་བ་འོད་གསལ་ཞེས་བྱ་སྟེ། ལུས་ཅན་ཐམས་ཅད་ལ་ཐུན་མོང་དུ་གྱུར་པའི་གཞི་གནས་ཀྱི་འོད་གསལ་
མངོན་དུ་གྱུར་པའི་དུས་སོ། །གོམས་པ་རྣམས་ལ་ནི་གྲོལ་བ་ལོང་ཡོད་དུ་འཆར་ལ། མ་གོམས་པ་རྣམས་ལ་ཤར་ཡང་ངོས་མི་ཟིན། ཁམས་དྲུག་ལྡན་མ་ཡིན་པའི་སེམས་ཅན་ལ་ནི་ཅུང་ཟད་རེ་ལས་མི་འཆར་ཞིང་དེ་ཡང་ངོ་འཕྲོད་པའི་སྐལ་བ་དང་མི་ལྡན་པའོ། །དེ་བས་ན་ད་ལྟ་སྐྱེ་ཤི་བར་དོ་ལ་སད་རྨིའི་གནས་སྐབས་གཉིས་ལས་སད་པའི་དུས་ན་སྟོང་པ་བཞིས་དྲངས་པའི་འོད་གསལ་ལམ་བདེ་སྟོང་གིས་དྲངས་པའི་ལྷན་སྐྱེས་གང་ཡིན་ཡང་དེའི་འོད་གསལ་ལ་མཉམ་པར་འཇོག་པ་ནི་སད་དུས་ཀྱི་ཆོས་སྐུའི་བསྲེ་བ་ཡིན་ལ། དེ་ལས་ལྡང་བའི་ཚེ་ལུགས་ལྡོག་གི་ཉེར་ཐོབ་ནས་སྨིག་རྒྱུའི་བར་གི་རྟགས་སྣང་དང་ལྷན་ཅིག་ཡིད་ངོའི་ལྷ་སྐུར་ལྡང་བ་ནི་སད་དུས་ཀྱི་ལོངས་སྐུའི་བསྲེ་བ། དེ་ལས་ལྡང་བ་དང་རྣམ་སྨིན་གྱི་ཕུང་པོ་སེམས་དཔའ་གསུམ་བརྩེགས་ཀྱི་ལྷ་སྐུར་བལྟ་བ་སད་དུས་ཀྱི་སྤྲུལ་སྐུའི་བསྲེ་བ་ཡིན་པ་ལྟར་མཚན་མོའི་གཉིད་ལའང་སྦྱངས་ནས་ཉིན་མཚན་གཉིས་ཀར་གོམས་པ་བརྟན་པ་ཞིག་དགོས་སོ། །དེ་ལྟར་གོམས་ནས་འཆི་བའི་ཚེ་ཤིན་ཏུ་ཕྲ་བའི་རླུང་སེམས་གཉིས་དངོས་གཅིག་ཏུ་ཚོགས་པའི་རླུང་གི་ཆ་ཅུང་ཟད་གཡོ་བར་བརྩམས་པ་ལས་འོད་གསལ་དེ་ཉིད་ཉེར་ཐོབ་ཏུ་ལྡང་བའི་མོད་ལ་བར་དོ་གྲུབ་ཅིང་། དེ་མ་ཐག་ཏུ་མཆེད་པ་དང་སྣང་བ་རིམ་པར་འཆར། དེ་ལས་ཀུན་རྟོག་བརྒྱད་ཅུ་སྐྱེས་ནས་བར་དོའི་ཡིད་ལུས་མིང་བཞི་འདུས་པའི་ཕུང་པོ་ཅན་གྱི་འཁྲུལ་སྣང་ཐམས་ཅད་ཉམས་སུ་མྱོང་ངོ་། །དེའི་ཚེ་གང་ཟག་རབ་ཀྱིས་འཆི་བ་ཆོས་སྐུར་བསྲེ་བ་ནི། རགས་པ་ཉི་ཤུ་དང་ནང་གི་འབྱུང་བ་སྡུད་པའི་དུས་སུ་སྣོད་བཅུད་ཀྱི་འཛིན་རྟོག་བསྐྱེད་རྫོགས་གཉིས་གང་ལ་གོམས་པའི་སྡུད་རིམ་དང་མཐུན་པར་བསྡུས་ཏེ་ཆོས་ཉིད་ཀྱི་དྲན་པ་ལས་མི་གཡོ་
བར་བྱ། དེ་ནས་ཤིན་ཏུ་ཕྲ་བའི་སྣང་མཆེད་ཐོབ་གསུམ་གྱི་རྟགས་རྣམས་བྱུང་བའི་དུས་རྒྱུས་ཅན་ཤུལ་ལམ་དུ་ཞུགས་པ་ལྟར་ལས་རང་བཞིན་བརྒྱད་ཅུའི་རྟོག་ཚོགས་སྟོང་པ་གསུམ་དུ་ཐིམ་པའི་མཐར་འཆི་བ་འོད་གསལ་གྱི་སྟོང་པ་དོན་དམ་བདེན་པའི་ཆོས་ཉིད་ལ་སྦྱར་ཏེ་མཉམ་པར་བཞག་པས་རྣམ་སྨིན་ལུས་ཀྱི་རྒྱ་དང་། བག་ཆགས་སྣང་བའི་རྒྱ་དང་། རྣམ་ཤེས་སེམས་ཀྱི་རྒྱ་སྟེ་རྒྱ་གསུམ་ལས་གྲོལ། སློབ་བའི་ལམ་གྱི་ཡོན་ཏན་མཐར་ཕྱིན་པས་དག་བྱ་མཐའ་དག་དག་ནས་མི་སློབ་པའི་ཟུང་འཇུག་སངས་རྒྱས་ཆོས་སྐུའི་ཡོན་ཏན་དུས་གཅིག་ཏུ་རྫོགས་པ་ལ་འཆི་བ་ཆོས་སྐུའི་བསྲེ་བ་ཞེས་བྱ་སྟེ་བདག་ཅག་གི་བླ་མ་དམ་པས། ཡུལ་ལྔའི་ཤེས་པ་རིམ་གྱིས་ཡིད་དུ་ཐིམ། །དེ་ཡང་ཀུན་གཞིར་ཐིམ་པས་མི་རྟོག་པ། །རྩེ་གཅིག་སྣང་ཡུལ་མེད་པའི་ངང་དེ་ཉིད། །ཆོས་དབྱིངས་ཐིམ་པས་རང་བཞིན་སྤྲོས་དང་བྲལ། །ཐུན་པར་ལྷག་མོས་འོད་གསལ་དུ་འཇུག་པའི། །བར་འདིའི་ཆོས་སྐུའི་རྣལ་འབྱོར་ལ་གནས་ཤིང་། །ཞེས་བཞེད་དོ། །འོད་གསལ་དེ་ལས་སྟོང་བཞི་ལུགས་ལྡོག་ཏུ་ལྡང་བར་བརྩམ་པ་ན། གཉིད་དུས་ན་རྨི་ལམ་དང་མཚུངས་པའི་བར་དོའི་སྲིད་པ་དེའི་ཕུང་པོ་སྔ་མ་ལས་གོ་ས་ལོགས་པ་བ་ཡིན་པས་འབྱུང་ལུས་རགས་པ་ལས་འདས་པའི་མིང་གཞིའི་ཕུང་པོ་ཅན་གྱི་བག་ཆགས་དེ་ཉིད་རླུང་སེམས་ཙམ་ལས་གྲུབ་པའི་མཚན་དཔེའི་བདག་ཉིད་ཅན་གྱི་ཡིད་ངོའི་ལྷ་སྐུར་ལྡང་བས་སྦྱོང་བ་ལ་བར་དོ་ལོངས་སྐུའི་བསྲེ་བ་ཞེས་བྱ་སྟེ། གཉིད་དམ་འཆི་བའི་འོད་གསལ་ལུགས་ལྡོག་ཏུ། །སླར་ཡང་མཆེད་པས་ཀུན་གཞིའི་རྣམ་ཤེས་ལས། །ཡིད་ཉིད་གཅིག་པུར་ལངས་པས་རྨི་ལམ་སེམས། །དབང་པོ་ཀུན་ཚད་ཡིད་ཀྱི་ལུས་གྲུབ་པ། །དེ་མཚུངས་སྐད་ཅིག་མངོན་བྱང་ལྔ་ལས་
ནི། །དང་པོའི་མགོན་པོ་ལེགས་པར་བསྐྱེད་པའི་ཚུལ། །བར་དོ་སྒྱུ་ལུས་ལོངས་སྐུར་ལྡང་བར་ཤོག །ཅེས་སོ། །གལ་ཏེ་ལོངས་སྐུའི་ལམ་སྦྱོངས་སྒྱུ་ལུས་སུ་ལྡང་མི་ནུས་པའམ། ནུས་ཀྱང་སྲིད་པ་ཐ་མ་པའི་བྱང་ཆུབ་སེམས་དཔའ་ལྟར་དྲན་ཤེས་གཉིས་དང་ལྡན་བཞིན་པས་དགོས་པ་ཁྱད་པར་བའི་སླད་དུ་མངལ་དུ་ཉིད་མཚམས་སྦྱོར་བ་ལྟ་བུ་ཡིན་ན། སྔགས་ལ་སྤྱོད་པའི་རྟེན་ཁྱད་པར་ཅན་དུ་རྟེན་ཅིང་འབྲེལ་འབྱུང་མི་འཚོལ་བའི་ཕམ་ལེགས་པ་མངོན་ཤེས་ཀྱིས་བརྟགས་ལ། དེ་གཉིས་ཀྱི་ཁུ་ཁྲག་དཀར་དམར་ཚོགས་པ་ནས་ལུས་རྫོགས་པའི་བར་མངོན་བྱང་ལྔ་དང་། ཆོག་གསུམ་དང་། སྐད་ཅིག་བརྫུས་སྐྱེས་ལ་སོགས་པས་ཉིང་མཚམས་སྦྱོར་བ་ལ་སྐྱེ་བ་སྤྲུལ་སྐུའི་ལམ་ཁྱེར་རམ་བསྲེ་བ་ཞེས་བྱ་སྟེ། བར་དོའི་ལུས་དེ་མ་ཡི་མངལ་དུ་ནི། །ཞུགས་ཚུལ་དང་པོ་མགོན་པོ་མི་བསྐྱོད་པའི། །སྐུ་ལས་ཞུགས་པས་རྡོ་རྗེའི་སེམས་བསྐྱེད་ཅིང་། །དེ་ལས་ལུས་དཀྱིལ་བཀོད་ཅིང་སྒོ་གསུམ་དག །བྱིན་གྱིས་བརླབས་ཤིང་སེམས་དཔའ་གསུམ་བརྩེགས་སུ། །བྱས་ནས་རིག་མའི་འདོད་ཡོན་རྣམ་རོལ་བའི། །ཉིན་སྣང་སྐྱེ་ཤི་བར་དོའི་གོམས་འདྲིས་ཀྱི། །སྐྱེ་བ་སྤྲུལ་སྐུའི་རྣལ་འབྱོར་ལམ་བྱེད་ཤོག །ཅེས་སོ། །དེ་ལྟར་བསྲེ་བ་གསུམ་དང་སྦྱར་ནས་བཤད་པ་ནི་གསོན་དུས་ན་གོམས་སྟོབས་དང་ལྡན་པ་རྣམས་ལ་ཡིན་གྱི། གོམས་པ་ཆུང་བདག་གིས་འཆི་བ་འོད་གསལ་དང་སྒྱུ་ལུས་དངོས་བསྟན་ལམ་དུ་སློང་མི་ནུས་ན་བར་སྲིད་གྲུབ་པའི་དོན་སྦྱངས་སྟོབས་དང་འཕེན་པ་ལ་བརྟེན་པའི་སྒྱུ་མ་ལྟ་བུའི་ལྷ་སྐུར་ལྡང་ཞིང་། བར་དོའི་སྣང་བ་ཐམས་ཅད་གཞལ་ཡས་ཁང་དང་འཁོར་གྱི་ལྷར་སྦྱང་བ་དང་། དེ་ཡང་བསམ་གཏན་གཉིས་གང་རུང་གི་
འོད་གསལ་དུ་བསྡུས་ནས་མཉམ་པར་གཞག་པ་དང་། གཞན་ཡང་སྨིན་བྱེད་དབང་དང་མཐུན་པར་བསྲེ་བ། གྲོལ་བྱེད་ལམ་དང་མཐུན་པར་བསྲེ་བ། བསྲུང་བྱ་དམ་ཚིག་དང་མཐུན་པར་བསྲེ་བ། ཐོབ་བྱ་འབྲས་བུ་དང་མཐུན་པར་བསྲེ་བ་རྣམས་དང་། ཐ་མལ་གྱི་སྣང་ཞེན་དང་བཅས་པའི་ལུས་ལྷའི་སྐུར་གོ་འཕོ་བ་དང་། དེ་བཞིན་དུ་ངག་སྔགས་སུ་གོ་འཕོ་བ་དང་། ཡིད་ཆོས་ཉིད་དུ་གོ་འཕོ་བ་སྟེ་བསྲེ་འཕ་ཟུང་འཇུག་གི་གནད་ལ་འདྲིས་པར་བྱའོ། །དེ་ཡང་མི་ནུས་ན་ཐོག་མར་འཆི་ལྟས་རྣམས་ངེས་པར་བྱས་ལ་འོད་གསལ་དང་བར་དོ་འདུན་པའི་སྟོབས་ཀྱིས་བཟུང་ནས་བསྒོམ་དགོས་ཏེ། དེ་ལ་ཕྲ་བའི་ཐིམ་རིམ་སྣང་མཆེད་ཐོབ་གསུམ་དང་། འཆི་བའི་འོད་གསལ་ཟིན་ན་དེ་ལ་ཅི་ནུས་སུ་མཉམ་པར་འཇོག །དེ་ལས་ལུགས་ལྡོག་ཏུ་མཆེད་པའི་བར་སྲིད་ཀྱི་ལུས་དབང་པོ་ཀུན་ཚང་ལ། དྲི་ཟེས་ནས་ལུས་བརྟས་པར་བྱེད་པ་མིང་བཞི་འདུས་པའི་ཕུང་པོ་ལ་རང་བཞིན་བརྒྱད་ཅུའི་རྟོག་པ་སྐྱེ་ཞིང་། །སྐྱེ་གནས་མ་གཏོགས་པ་གང་དུའང་ཐོགས་པ་མེད་པའི་ལས་ཀྱི་རྫུ་འཕྲུལ་དང་ལྡན་ལ། རང་དང་རིགས་མཐུན་པའི་བར་དོ་དང་ལྷའི་མིག་གིས་མཐོང་བ། རང་ཤི་བར་ཤེས་ཤིང་ཤི་བའི་རོ་ཡང་མཐོང་བ། ས་རླུང་ལས་རི་བོ་ཉིལ་བའི་སྒྲ་དང་། ཆུ་རླུང་ལས་རྒྱ་མཚོ་འཆོལ་བའི་སྒྲ་དང་། མེ་རླུང་ལས་ནགས་ཚལ་ཚིག་པའི་སྒྲ་དང་། རླུང་གི་རླུང་ལས་དུས་ཀྱི་རླུང་སྒྲ་སྟེ་འཇིགས་པའི་སྒྲ་བཞི། དུག་གསུམ་གྱི་ཤེས་པའི་རང་གཟུགས་ཀྱི་གཅོང་རོང་དཀར་དམག་ནག་པོ་སྟེ་ཡང་བའི་གཡང་ས་གསུམ། ལས་ཀྱི་དབང་ལས་བག་ཆགས་འཁྲུལ་པའི་གཟུགས་བརྙན་གཤེད་མའི་རྣམ་པ་མང་པོས་འཚེ་བ་དང་། མེ་ཆུ་གཅན་གཟན་གྱི་འཇིགས་པ་ལ་སོགས་ལས་བཟང་ངན་དང་དགེ་བའི་ར་ཟླ་ཡོད་མེད་ཀྱིས་ཁྱད་པར་ལས་འཁྲུལ་སྣང་ཀྱང་མངས་
པར་འཆར་ལ། ཚེ་ཚད་ཀྱང་ངེས་པ་དང་མ་ངེས་པ་གཉིས་སུ་འཆད་དེ་ལས་སྣང་བསམ་གྱིས་མི་ཁྱབ་པས་གཉིས་ཀ་ལ་དགག་བསྒྲུབ་མི་བྱའོ། །སྐྱེ་བ་འགྲུབ་ཚུལ་ནི་བརྫུས་ཏེ་སྐྱེ་ན་གནས་ལ་སྲེད་པ། དྲོད་གཤེར་ལས་སྐྱེ་ན་དྲི་དང་རོ་ལ། མངལ་དང་སྒོ་ང་ལས་སྐྱེ་ན་ཕ་མའི་ཉལ་པོ་ལ་ཆགས་སྡང་། དེ་ཡང་ཕོར་སྐྱེ་ན་མ་ལ་ཆགས་ཤིང་ཕ་ལ་ཞེ་སྡང་། མོར་སྐྱེ་ན་དེ་ལས་ལྡོག་པའོ། །སྤྱིར་གཟུགས་མེད་ཁམས་སུ་སྐྱེ་ན་བར་སྲིད་མི་འོང་སྟེ་དེའི་རང་བཞིན་ཀུན་གཞི་ལུང་མ་བསྟན་དུ་གཙོ་བོར་གནས་པས་སོ། །གཟུགས་མེད་ནས་འདོད་གཟུགས་སུ་སྐྱེ་ན་བར་སྲིད་འབྱུང་སྟེ་ཀུན་གཞིའི་རྣམ་ཤེས་དང་། ཉོན་མོངས་པ་ཅན་གྱི་ཡིད་ལྡང་བའི་ཕྱིར་རོ། །རྣམ་བྱང་གི་འོད་དང་ཁ་དོག་འཆར་བའི་སྦས་དོན་ནི་འདིར་རེ་ཞིག་མ་བཤད་དེ་ལམ་བགྲོད་ཚུལ་ལ་ཁྱད་པར་ཆེན་པོ་ཡོད་པས་སོ། །ལུས་ཀྱི་རྣམ་པ་ནི་མདོ་སྡེ་འགའ་ཞིག་ལས་སྔོན་གྱི་ལུས་ལྟར་དང་། འགའ་ཞིག་ནས་ཕྱི་མ་སྐྱེ་འགྱུར་གྱི་རྣམ་པ་བཤད་པ་ཇི་ཙམ་གནས་ཡུན་གྱི་སྟོད་སྨད་ཀྱི་ཕྱོགས་ལ་དགོངས་པ་ཡིན་པས་གཉིས་ཀ་ལྟར་བདེན་ནོ། །དེ་ལྟ་བུའི་བར་དོ་ནི་རྣམ་སྨིན་རྡོས་པ་དང་བཅས་པའི་ལུས་མ་ཡིན་པས་རླུང་སེམས་ཙམ་ལས་གྲུབ་པའི་རྟན་བཟང་བའི་སྟོབས་ཀྱིས་མཚམས་སྦྱོར་དང་། ལམ་གྱི་ཡོན་ཏན་ཆོད་ཆེ་བས་ན་བར་དོའི་མཚན་ཉིད་དང་རྟགས་རྣམས་ཉམས་འོག་ཏུ་ཆུད་པར་བྱས་ལ། འཁྲུལ་སྣང་དང་མེ་ཆུ་གཅན་གཟན་དགྲ་གདོན་གྱི་འཇིགས་པའོ། །གང་ལའང་རྡོས་བཅས་ཀྱི་ལུས་མེད་པས་དེ་དག་གི་གནོད་པའི་གནས་མེད་དོ་སྙམ་ནས་ཐོག་བརྫིས་བྱས་པས་འཁྲུལ་སྣང་དང་བག་ཚ་བ་མཐའ་དག་རང་བཞིན་མེད་པར་འགྱུར་ཏེ། ཁྱད་པར་དུ་བདེན་མེད་སྒྱུ་མར་བསྒོམ་པ་དང་། ལྷ་དང་གཞལ་ཡས་སུ་གསལ་གདབ་པ་དང་།
རྫོགས་རིམ་དུ་བསྡུས་ཏེ་མཉམ་པར་འཇོག་པ་དང་། ཕ་མའི་འདུ་འཕྲོད་མཐོང་བ་ལ་སོགས་པའི་ཆགས་སྡང་སྐྱེ་བའི་ཚེ། བླ་མ་ཡབ་ཡུམ་དུ་བསྒོམས་ནས་དབང་བླང་བ་དང་། བདེ་སྟོང་གི་ཉམས་བསྒྱང་བ་དང་། སྟོང་ཉིད་ཀྱི་ལྟ་བས་རྒྱས་འདེབས་པ་དང་། ཞིང་ཁམས་ཁྱད་པར་ཅན་ཡིད་ལ་བྱ་བ་དང་། འཕོ་བའི་མན་ངག་གིས་ས་བཅད་པ་ལ་སོགས་བྱས་པས་མངལ་སྒོ་དང་སྐྱེ་གནས་ངན་པ་ངེས་པར་ཁེགས་ལ། དགོས་པ་བྱེ་བྲག་པ་ལ་དམིགས་ནས་བདེ་འགྲོའི་རྟེན་ཁྱད་པར་ཅན་འཛིན་པར་འདོད་ན། ཉི་ཟླ་ཁ་སྦྱོར་ལས། ལྷ་དང་མི་ནི་ཁ་དོག་དཀར། །ཡི་དྭགས་འོད་ནི་དུ་བ་འདྲ། །དམྱལ་བ་སྡོང་དུམ་ལྟ་བུའམ། །ཡང་ན་བལ་ནག་གསེད་པ་འདྲ། །བྱོལ་སོང་ཡང་ནི་ཁྲག་བཙོས་བཞིན། །ལྷ་མིན་ཁ་ཆར་འབབ་པ་འདྲ། ཞེས་དང་། ལྷ་དང་མི་ནི་གྱེན་ལ་བལྟ། །ལྷ་མིན་བྱོལ་སོང་དེ་བཞིན་འཕྲེད། །ཡི་དྭགས་དམྱལ་བ་ཐུར་དུ་བལྟ། །ཞེས་དང་། ལྷ་ལ་རིན་པོ་ཆེའི་གཞལ་ཡས། ལྷ་མིན་ལ་ནགས་ཚལ་ཉམས་དགའ་བར་སོ་སོའི་རིགས་ཅན་ཕོ་མོ་ཚོགས་པ། མི་ལ་ཤར་ལུས་འཕགས་པོར་རྟ་ཕོ་མོས་བརྒྱན་པའི་མཚོ། ལྷོ་འཛམ་བུ་གླིང་ཁང་བཟང་གི་ནང་དུ་མི་ཕོ་མོ། ནུབ་བ་ལང་སྤྱོད་བ་ལང་ཕོ་མོས་བརྒྱན་པའི་མཚོ། སྒྲ་མི་སྙན་ངང་པས་བརྒྱན་པའི་མཚོའམ། དེ་དག་དང་ཕྱོགས་མཐུན་པར་གསལ་བ་ཡིན་པས་ན། བར་དོའི་ལུས་རྟེན་དེ་མངོན་པར་ཤེས་པ་དང་ལྡན་པའི་ཕྱིར་འཛམ་བུའི་གླིང་གི་ཡུལ་དབུས་བསྟན་པ་དང་བའི་ས་ལས་ཆོས་ལྡན་གྱི་མི་ལུས་ཐོབ་པའི་ཕ་མའི་མངལ་སྒོ་འདམས་ནས་སྨོན་ལམ་གྱི་མཚམས་སྦྱར་ཏེ་དྲན་པ་དང་ཤེས་བཞིན་ལྡན་པས་སྐྱེ་བ་འཛིན་པར་བྱའོ། །དྲུག་པ་འཕོ་བའི་གདམས་པ་ནི། སྤྱིར་འཕོ་བ་ཞེས་པའི་སྒྲ་དོན་ནི་ཚངས་པའི་སྒོ་ནས་རྣམ་ཤེས་འཐོན་པའི་ཐབས་གཅིག་པོ་ལ་འཁྲུལ་པར་མི་བྱ་སྟེ། འཕོ་བ་རབ་ནི་སྐྱེ་
བ་ཀུན་རྫོབ་ཀྱི་བདེན་པས་འཕངས་པའི་རྣམ་པར་ཤེས་པའི་རང་བཞིན་འཆི་བ་དོན་དམ་གྱི་བདེན་པ་འོད་གསལ་གྱི་ངང་དུ་འཕོ་བ་དང་། འབྲིང་ནི་ལོག་པའི་ཀུན་རྫོབ་ད་ལྟར་བའི་བག་ཆགས་ལ་བརྟེན་པའི་རྨི་ལམ་དང་བར་དོའི་རླུང་སེམས་ཙམ་གྱི་ལུས་གང་ཡིན་པ་ཡང་དག་པའི་ཀུན་རྫོབ་སྒྱུ་ལུས་ཀྱི་ལྷ་སྐུར་འཕོ་བ་ཡིན་པས་ན་འོད་གསལ་དང་བར་དོ་ཟིན་པའི་གང་ཟག་ལ་དེ་མ་ཐག་འཆད་པར་འགྱུར་བའི་འཕོ་བ་དགོས་པ་མ་ཡིན་ནོ། །གང་ཟག་ཐ་མའི་འཕོ་བ་ལའང་གསུམ། སྦྱངས་ཏེ་འཕོ་བ། བཙན་ཐབས་སུ་འཕོ་ག་ལུས་གནད་ཀྱི་འཕོ་བའོ། །དང་པོ་ནི། རླུང་ལ་བརྟེན་པ་ཡིན་ན་བུམ་པ་ཅན་རབ་འབྲིང་ཐ་གསུམ་ཅི་རིགས་འབྱོངས་པ་དགོས་ལ། འཕོ་བ་སྦྱོང་བ་དངོས་ནི་སོ་སོའི་གཞུང་གིས་སྟོན་པ་ལྟར་ལས། སྤྱི་མཐུན་དུ་དབང་པོའི་སྒོ་ལ་སོགས་པའི་སྒོ་དགུ་ནས་རྣམ་ཤེས་འཐོན་པའི་རྟེན་འབྲེལ་གྱིས་གནས་རིགས་སོ་སོ་བ་འགྲུབ་ཚུལ་ནི། ཚངས་ཕུག་ལས་འཐོན་ན་རིག་འཛིན་གྱི་གནས་མཁའ་སྤྱོད་ཀྵུཾ། སྨིན་མཚམས་ལས་གཟུགས་ཁམས་ཧཱུཾ། མིག་ལས་མི་ཧཱུཾ། རྣ་བ་ལས་མིའམ་ཅི་ཡུམ། སྣ་ལས་གནོད་སྦྱིན་ཡུམ། ཁ་ལས་ཡི་དྭགས་སུ། ལྟེ་བ་ལས་འདོད་ལྷ་ཀྵུཾ། ཆུ་ལམ་ལས་དུད་འགྲོ་སུམ། གཤད་ལམ་ལས་དམྱལ་བར་འཕེན་པས་ཀྵུཾ། དེ་དག་ལ་འཁོར་བའི་སྒོ་བརྒྱད་ཅེས་བཏགས་ནས་ཁ་དོག་སོ་སོ་བའམ་དཀར་པོ་ཁོ་ནའི་ཡི་གེས་དགག་པའི་ཚུལ་བཤད་ལ། དེ་ལྟར་བཀག་པ་ལས་ཚངས་བུག་ནེ་དུས་མིན་དུ་ཐལ་གྱི་དགོས་པ་ཡིན་པས་ལས་ལ་སྦྱོར་བའི་ཚེ་དེའི་ཡི་གེ་བསལ་ནས་མདུན་གྱི་ནམ་མཁར་བླ་མ་དང་གཉིས་སུ་མེད་པའི་ཡི་དམ་གྱི་སྐུ་གསལ་བའི་ཐུགས་ཀར་དབུགས་ཐོག་གཅིག་ཏུ་ཧི་ཀ་དྲག་པོ་ཉེར་གཅིག་སྤུང་བ་དང་། ལུས་གནད་བསྟུན་ནས་འཕོ་བའི་ཚུལ་དང་
སླར་རང་གནས་སུ་ལྡོག་པ་གཉིས་སྤེལ་ནས་སྦྱང་བའོ། །དེ་ལྟར་སྦྱངས་ནས་ལས་ལ་མངོན་སུམ་པར་སྦྱར་བའི་དུས་ནི་འཆི་རྟགས་ཚང་ཞིང་བསླུ་བའི་ཐབས་ཀྱིས་མ་བཟློག་པའི་དུས་ཏེ་གཞན་དུ་ན་ལུས་རྟེན་དུས་མིན་དུ་སྤངས་པས་རྩ་ལྟུང་བརྒྱད་པ་དང་ཉེ་བའོ། །དེ་ལ་འཆི་བའི་རྟགས་ནི་རྨི་ལམ་དང་སྤྱོད་ལམ་འགྱུར་པ་ལ་སོགས་པའི་བརྟག་ཐབས་གཞན་ལྟར་དུ་ཤེས་པར་བྱས་ནས། རྣལ་འབྱོར་པའི་རང་ཉམས་ལ་བཙན་པ་ནི་རླུང་འཕོ་བ་བཅུ་གཉིས་མི་བྱེད་པར་གཅིག་ཁོ་ན་ནས་རྒྱུ་བའོ། །དེ་ཡང་མའི་དུས་སྦྱོར་གཡས་པའི་དུས་སྐྱེས་ན་འཆི་ལྟས་ཀྱང་གཡས་ནས་འབྱུང་སྟེ། དེར་ཞག་གཅིག་གི་སྲིད་དུ་འཕོ་བ་མི་བྱེད་ན་ལོ་གསུམ་ཕྱོགས་གསུམ་ནའོ། །དེ་བཞིན་དུ་ཞག་ལྔ་དང་། བཅུ་དང་། བཅོ་ལྔ་དང་། ཉི་ཤུ་དང་། ཉེར་ལྔ་རྒྱུ་ན་རིམ་པས་ལོ་གསུམ་དང་། གཉིས་དང་། གཅིག་དང་། ཟླ་བ་དྲུག་དང་། གསུམ་ནའོ། །ཞག་ཉེར་དྲུག་ནས་སོ་གཅིག་གི་བར་ལ་རིམ་བཞིན་ཟླ་བ་གཉིས་དང་། གཅིག་དང་། ཕྱེད་དང་། ཞག་བཅུ་དང་། ལྔ་དང་། གསུམ་ནའོ། །དེ་ནས་གཡོན་ནས་ཞག་གཉིས་དང་དབུ་མར་ཞག་གཅིག་རྒྱུ་ཞིང་འཆིའོ། །མའི་དུས་སྦྱོར་གཡོན་པའི་དུས་སྐྱེས་ན་འཆི་ལྟས་ཀྱང་དེ་བཞིན་ཏེ་གཡོན་ཁོ་ན་ནས་ཞག་གཅིག་རྒྱུད་སྔ་མ་དང་འབྲལ། ཞག་གསུམ་རྒྱུ་ན་ལོ་གཉིས་དང་ཟླ་བ་དྲུག་ནའོ། །དེ་བཞིན་དུ་ཞག་དྲུག་དང་། དགུ་དང་། བཅུ་གཉིས་དང་། བཅོ་ལྔ་དང་། བཅོ་བརྒྱད་དང་། ཉེར་བཞི་དང་། ཉེར་བདུན་དང་། སུམ་ཅུ་རྒྱུ་ན་རིམ་པས་ཟླ་བ་ཉེར་བདུན་དང་། ཉེར་བཞི་དང་། ཉེར་གཅིག་དང་། བཅོ་བརྒྱད་དང་། བཅོ་ལྔ་དང་། བཅུ་གཉིས། དགུ་དང་། དྲུག་དང་། གསུམ་ནའོ། །དེ་ནས་ཟླ་བ་གསུམ་ལ་གཡོན་ནས་ཞག་པོ་གསུམ་དང་། དེ་ནས་སྣ་བུག་གཡས་ནས་ཞག་གཉིས་དང་། དབུ་མར་ཞག་གཅིག་རྒྱུ་ནས་འཆི་བར་བཤད་པ་ཡིན་ནོ། །ཉེར་
པའི་ལྟས་ནི། རྣ་བའི་སྒྲ་མེད་ན་ཞག་དྲུག །ལྕེའི་རོ་མེད་ན་ལྔ། མིག་གི་དབུས་སུ་སྔར་མེད་ཀྱི་རི་མོ་བྱུང་ན་བཞི། སྣ་ཞོམ་ཞིང་དྲི་མེད་ན་གསུམ། ལུས་ཀྱི་རེག་བྱ་མེད་ན་གཉིས། ཁུ་བ་མེད་ན་ཞག་གཅིག་གོ །ཤིན་ཏུ་ཉེ་བ་ནི་ནང་གི་འབྱུང་བ་ཐིམ་པའི་རྟགས་ཏེ་བར་དོའི་སྐབས་ལྟར་རོ། །དེ་ལྟར་བྱུང་ན་ཐབས་གང་གིས་ཀྱང་བསླུ་བའི་ཐབས་བྱ་སྟེ། སློབ་དཔོན་ངག་གི་དབང་ཕྱུག་གིས། ཆོས་སྤྱོད་དབང་པོ་ཐུལ་བ་ནི། །འཁོར་བ་རུ་ནི་ཇི་སྲིད་འཚོ། །དེ་སྲིད་བསོད་ནམས་ལ་སོགས་ཚོགས། །བྱང་ཆུབ་སྒྲུབ་བྱེད་རབ་ཏུ་སྐྱེ། འཁོར་བར་སྲོག་ལས་གཅེས་པ་ནི། །འགའ་ཡང་ཡོད་པ་མ་ཡིན་པས། །དེས་ན་རྣམ་པ་ཐམས་ཅད་དུ། །འཆི་བ་བསླུ་བ་ཀུན་ཏུ་སྤྱད། །ཅེས་སོ། །ཅིས་ཀྱང་མ་བཟློག་ན་ཡོ་བྱད་རྣམས་ལ་རྣམ་སྨིན་དཀར་པོ་བསྐྱེད། འཁོར་དང་ལོངས་སྤྱོད་ལ་ཞེན་པ་བཏང་། དམ་ཚིག་གསོ་ཞིང་ཚོགས་གཏོར་ལ་འབད། ཆགས་སྡང་ལ་སོགས་པའི་མཚམས་སྦྱོར་ངན་པ་མཐའ་དག་སྤངས་ལ་སྨོན་ལམ་རྒྱ་ཆེན་པོ་བཏབ། འོག་མིན་ལ་སོགས་པའི་ཞིང་ཁམས་གང་ལ་མོས་པ་ལ་འདུན་པ་རྩེ་གཅིག་ཏུ་གཏད་ནས་འཕོ་བ་བྱའོ། །གཉིས་པ་བཙན་ཐབས་སུ་འཕོ་བ་ནི། སེམས་བསྐྱེད་རྒྱ་ཆེན་པོ་དང་། གསོལ་འདེབས་སྣང་བ་འགྱུར་བར་བྱས་ལ་གང་དུ་འཕོ་སར་འདུན་པ་རྩེ་གཅིག་གི་ངང་ནས། སྒོ་བརྒྱད་ཡན་ལག་བཞི་ཉིང་ལག་དང་བཅས་པས་བཀག་པའམ། རྡོ་རྗེ་རྦ་རླབས་ཀྱི་མན་ངག་ལ་བརྟེན་ནས་འཕོ་བར་བྱའོ། །གསུམ་པ་ལུས་གནད་བཅོས་ཏེ་འཕོ་བ་ནི། འདུན་པ་སོགས་སྔར་བཞིན་ལས། མགོ་བྱང་བསྟན་གྱི་གློ་གཡས་ས་ལ་ཕབ། ལག་གཡས་འགྲམ་པ་དང་གཡོན་བརླ་སྟེང་དུ་བརྐྱང་། རྐང་པ་གཉིས་མ་བསྣོལ་བར་སྟེང་འོག་ཏུ་བཞག་ནས་བརྐྱང་པ་སེང་གེའི་
ཉལ་སྟབས་ཀྱི་ངང་ནས་དག་པའི་ཞིང་ཁམས་ཡིད་ལ་བྱ་ཞིང་འཕོ་བའམ། དཀོན་མཆོག་ལ་སྙིང་ཐག་པ་ནས་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པས་མཚོན་དགེ་བའི་སེམས་མངོན་གྱུར་བའི་ངང་ནས་འདུ་བྱེད་བཏང་བ་དེ་ལའང་ངན་སོང་མེད་པ་ཡིན་ནོ། །འཕོ་བའི་དམ་ཚིག་ནི་སེམས་ཅན་འཆི་ཁ་མ་ལ་ཕན་གདགས་པ་དང་། སྨོན་ལམ་གདབ་པ་ཁོ་ན་ཡིན་ནོ། །འདི་ལྟར་འཕོ་བའི་གདམས་པ་ནི་ངན་འགྲོར་འགྲོ་བའི་སྡིག་ཅན་ལའང་སེམས་བསྐྱེད་དང་རྟོགས་པར་ལྡན་པའི་གཞན་སྟོབས་ཀྱི་གནད་དུ་འཕོག་ན་མཐོ་རིས་ཀྱི་རྟེན་ལ་སྦྱོར་བ་ཡིན་ན་འཆི་ཀའི་མཚམས་སྦྱོར་བཟང་པོ་དང་ལྡན་པ་ལ་ནི་སྨོས་ཅི་དགོས་ཏེ། དེ་བས་ན་སྡིག་པའི་ལས་ལ་འགྱོད་སེམས་དྲག་པོ་དང་། དཀོན་མཆོག་དང་སྔགས་ཀྱི་མྱུར་ལམ་ལ་ཡིད་ཆེས་པའི་དད་པས་སྐྱབས་སུ་འགྲོ་བ་དང་སེམས་བསྐྱེད་དང་སྨོན་ལམ་དྲག་པོ་ལས་གཞན་དུ་སེམས་མ་གཡེལ་བ་ཁོ་ན་གཅེས་སོ། །དེ་ལྟར་སྣང་བཅས་དམིགས་པའི་ལམ་གྱི་རྫོགས་རིམ་ཐ་དད་པའང་མེ་ཏོག་ཕོག་པའི་རིགས་ཀྱི་ལྷ་ལྟར་པཎ་གྲུབ་སོ་སོའི་བཞེད་གཞུང་གིས་བཀྲལ་ཞིང་དེ་དང་དེ་ལ་ཆེ་ཐང་དུ་བྱས་པས་དངོས་གྲུབ་བརྙེས་པ་དང་། བཤད་སྲོལ་གྱི་རབས་ཟིན་མ་ཟིན་གྱི་གྲགས་པ་བརྟན་མི་བརྟན་ལས་རང་བཞིན་དུ་རྒྱུད་སྡེ་གསར་རྙིང་བགྲོད་ལམ་མཐུན་པར་ཡོད་པའི་ཚུལ་སོ་སོའི་ཐད་ཀར་ཡང་བཤད་ལ་ཁྱད་པར་དམིགས་བཅས་ཀྱི་རྫོགས་རིམ་སྦྱོར་དྲུག་དང་། རིམ་ལྔ་དང་། ལམ་འབྲས་དང་། བསྲེ་འཕོ་དང་། ཕྲ་ཏིག་ལ་སོགས་པ་ཧེ་རུ་ཀ་གལ་པོ་དང་། དཔལ་ཡང་དག་དང་། མཉམ་སྦྱོར་དང་། ཟླ་གསང་དང་། རྡོ་རྗེ་ཕུར་བུ་ལ་སོགས་པ་དུམ་བུའི་རྒྱུད་སྡེ་རྣམས་ལ་དངོས་བསྟན་དུ་ཡོད་དེ་གཞུང་མངས་ཀྱི་དོགས་
ནས་ལུང་མཐའ་དག་བསྡུ་བར་མ་བྱས་སོ། །འདི་ལྟར་མི་ཤེས་པ་རྣམས་བསྟན་པ་གཅིག་ལ་སྟོན་པ་གཉིས་སུ་བལྟ་ཞིང་། འགྱུར་དང་བགྲོས་ཀྱི་ཁྱད་པར་ལ་ཡང་ཡང་བཅོས་ཤིང་ཆིག་ལ་གྲིམས་པའི་ཕྱོགས་ནི་བཀའ་ཡིན་ལ། དངོས་གྲུབ་བརྙེས་པའི་སློབ་དཔོན་ཆེན་པོ་རྣམས་ཀྱིས་དོན་ལ་རྟོན་པ་གཙོ་བོར་བྱས་ནས་དོ་ཧ་ལྟར་བཤད་པ་ལ་ཡིད་གཉིས་དང་བཅས་པས་ཕྱི་ནང་གི་བསྟན་པའི་ཁྱད་པར་བཞིན་དུ་བལྟས་ནས་འགལ་པར་འཛིན་ཅིང་ཕྱོགས་གཅིག་ཏུ་སྡུད་མི་ཤེས་པ་ནི་མུན་སྤྲུལ་དང་བཅས་པའི་བློ་ཅན་ཡིན་ཏེ། དེས་བསྟན་པ་ལ་སེལ་ཆེན་པོ་བསྐྱེད་པས་བག་ཚ་བའི་གནས་སོ། །དེ་བས་ན་སྐབས་འདིའི་རྫོགས་རིམ་ལ་མཚོན་ན་གསང་པ་ཡོངས་རྫོགས་འདུས་པའི་རྒྱུད་ལས། སྔགས་སེམས་སྒྱུ་ལུས་འོད་གསལ་དང་། ཟུང་འཇུག་རྫོགས་རིམ་འབྲས་བུའོ། །ཞེས་བཤད་པས་ཆོས་དྲུག་གི་ལམ་གྱི་ལུས་ཀྱང་དེ་ཉིད་དུ་རྫོགས་པ་ཡིན་ཏེ། རྨི་ལམ་ནི་རྒྱུ་ལུས་ཀྱི་ཡན་ལག་དང་། འཕོ་བ་ནི་སྤྱིར་ཐམས་ཅད་དུ་དམིགས་བསལ་ཡོད་ལ། ཁྱད་པར་འོག་མའི་ལམ་ལྟར་སྣང་བ་དང་། ཀུན་རྫོབ་བའི་ཆ་ཐམས་ཅད་གོང་མའི་རྟོགས་པ་ཇི་བཞིན་པ་དང་དོན་དམ་གྱི་རང་བཞིན་དུ་གོ་འཕོ་བས་ཐམས་ཅད་ཀྱི་ཡན་ལག་ཀྱང་ཡིན་ལ། བར་དོ་ནི་མཚམས་སྦྱོར་ཡིན་པས་འདི་དག་དྲུག་ཀའང་ལམ་ཐམས་ཅད་དུ་དངོས་ཤུགས་ཅི་རིགས་ལས་འབྱུང་བ་ཡིན་ཏེ་དཔེར་ན་ཚོགས་བསགས་པའི་སྒོ་ཐམས་ཅད་གཅིག་ཏུ་བསྡུས་པ་ལ་ཡན་ལག་བདུན་པར་གྲགས་པ་བཞིན་ནོ། །གཉིས་པ་ནི། རྩ་ཐིག་རླུང་ལ་གནད་དུ་སོང་ནས་སླར། །བདེ་སྟོང་ལམ་དུ་བྱེད་པ་གཞན་ལུས་ཏེ། །ཀུན་ཀྱང་ལམ་དུ་འགྲོ་བ་ཐབས་ཀྱི་ལམ། །དེ་ལ་གོང་དུ་བསྟན་མ་ཐག་པའི་རྫོགས་རིམ་རྣམས་ནི་ལས་རྒྱ་ལམ་བསྟེན་ཀྱང་རང་ལུས་ལ་གནད་དུ་བསྣུན་ནས་སྦྱང་དུ་རུང་བས་རང་ལུས་ཐབས་ལྡན་
ཞེས་གཙོ་ཆེ་བའི་ཁོང་ནས་སྨོས་ལ། འོན་ཀྱང་དབང་པོ་རྣོན་པོ་ནི་ལམ་གྱི་བོགས་འབྱིན་དུ་རིག་མ་དང་སྙོམས་པར་འཇུག་པའང་ཡོད་པས་བཤད་པའང་འདྲེས་མར་བྱུང་ངོ་། །སྤྱིར་སྲོག་རྩོལ་སྒྲ་ཇི་བཞིན་པ་ཐོབ་ཅིང་འཕོ་མེད་ལ་གདེངས་སུ་གྱུར་ནས་གཞན་ལུས་ལ་འཇུག་པའི་དུས་ཡིན་པས་བདེ་སྟོང་གི་རྣལ་འབྱོར་ལམ་དུ་བྱེད་པ་ལ་དངོས་གྲུབ་སྐྱེ་བའི་རྟེན་ནི་སྒྱུ་འཕྲུལ་མེ་ལོང་ལས། རྒྱལ་རིགས་རྗེ་རིགས་བྲམ་ཟེ་དང་། །དམངས་རིགས་ཆོས་མ་གར་མཁན་མ། །གདོལ་བ་ཉོ་ཚོང་མ་ཉིད་དང་། །མ་དང་སྒྱུག་མོ་སྲིང་མོ་དང་། །མཐར་སྒེག་ལུས་འཚོང་མ་ལ་སོགས། །དངོས་གྲུབ་སྐྱེ་བའི་རྟེན་དུ་བཤད། །བཅོ་བརྒྱད་བཅུད་ལྡན་རབ་ཡིན་ཏེ། །ཉི་ཤུ་ལ་སོགས་འབྲིང་དུ་བཤད། །རྩ་ལྔ་ཐ་མའི་ཚད་ཡིན་ཏེ། །གཞན་ལ་དངོས་གྲུབ་མེད་པར་གསུངས། །ཞེས་པས་རིགས་མ་ངེས་པ་ལོ་གྲངས་ངེས་པར་བཤད་པ་ལྟར་རམ། རྒྱུད་སྡེ་གཞན་དང་གཞན་དག་ལས་བཤད་པ་ལྟར་ཡང་རུང་སྟེ། འབྱོར་ཞིང་ཚོགས་ན་རིགས་ལྔའི་རིགས་ཅན་གྱི་མི་མོ་དང་། །རང་ལུས་ལ་འཛིན་པ་ཐོབ་པའི་མཁའ་འགྲོ་མ་སྟེ། དེ་ཡང་དོན་གྱི་འོད་གསལ་ཐོབ་པའི་ལྷན་སྐྱེས། དབང་དང་བསྐྱེད་རིམ་གྱིས་རྒྱུད་སྦྱངས་བའི་སྔགས་སྐྱེས། ཡུལ་ཉེར་བཞི་ལ་སོགས་པར་སྐྱེས་པའི་ཞིང་སྐྱེས་མ་ནི་དངོས་གྲུབ་མྱུར་ལ། དེ་ལྟ་བུ་ནི་བརྟེན་པ་ཙམ་གྱིས་ཐབས་དང་ཤེས་རབ་ཏུ་འབྲེལ་པའི་རྟེན་འབྲེལ་ལས་སྒྲིབ་པའི་ས་བོན་རླུང་ཁུག་པ་གཅིག་འགགས་ནས་འགྱུར་བ་མེད་པའི་བདེ་ཆེན་སྟེར་ཞིང་། མཐར་གྱིས་ཉི་ཁྲི་ཆིག་སྟོང་དྲུག་བརྒྱའི་འགྱུ་བ་འཕོ་བ་གཅིག་ཏུ་ཐུབ་ནས་ལམ་གྱི་ཡོན་ཏན་མཐའ་དག་པ་བཙན་ཐབས་སུ་འཕེལ་བའོ། །དེའི་སླད་དུ་ཡར་མར་གྱི་ཚེས་བཅུ་དང་བཅུ་བཞི་སོགས་ལ་དབང་གསུམ་པའི་སྐབས་སུ་བསྟན་པའི་མན་ངག་དང་ལྡན་པས་རྗེས་ཆགས་
སྤྱོད་པའི་ཚུལ་ཀུན་ཏུ་བཟང་པོ་གབ་པ་མངོན་ཕྱུང་གི་རྒྱུད་ལས། བཅུ་དྲུག་ལོ་ལོན་རིགས་ཅན་མ། །གཟུགས་དང་ལང་ཚོས་བརྒྱན་པ་ལ། །དང་པོར་བསླབ་བྱ་ལེགས་བསླབས་ནས། །དབང་བསྐུར་ནས་ནི་བསྒྲུབ་པ་བརྩམ། །སྐུ་གསུང་ཐུགས་དང་ཆགས་པ་ནི། །དཔྲལ་བ་ལ་སོགས་རྣམས་ལ་དགོད། །སྭཱ་ཧཱ་གསང་བ་གཙུག་ཏོར་ཆེར། །དེ་ནས་པདྨ་རྣམ་པར་སྦྱང་། །ཨ་ཡིས་པདྨ་འདབ་བརྒྱད་ལ། །ཨ་ཡིག་གིས་ནི་རབ་ཏུ་བརྟག །དེ་ལྟར་རྡོ་རྗེ་པདྨ་དང་། །བཅས་པ་བྱས་ནས་པདྨར་གཞུག །དེ་ནས་རྡོ་རྗེ་འཛིན་པས་སྙེམས། །འཛིན་ཅིང་རྣལ་འབྱོར་ཧཱུཾ་ཕཊ་བྱ། །བྷ་གར་ལིང་ག་རབ་བཀོད་ནས། །བྱང་ཆུབ་སེམས་ནི་སྤྲོ་མི་བྱ། །ཁམས་གསུམ་པོ་ནི་མ་ལུས་པའི། །སངས་རྒྱས་གཟུགས་ནི་བསྒོམ་པར་བྱ། །ཞེས་སོ། །སྤྱིར་གཞན་ལུས་བསྟན་པ་ལ་བདུད་ཀྱི་སློབ་དཔོན་གྱིས་མ་བསླད་པའི་ཡེ་ཤེས་ཀྱི་ཕྱག་རྒྱ་གསལ་ཁྱབ་ཆེན་པོ་དང་། ཕྱག་རྒྱ་ཆེན་མོ་གཉིས་ངེས་པར་དགོས་ལ། །ཡེ་རྒྱ་བསྟེན་པ་ལ་དབྱིངས་རིག་གཉིས་མེད་ཀྱི་ཕྱག་རྒྱ་ཆེན་པོ་ངེས་པར་དགོས་སོ། །དེ་ཡང་རྗེས་ཆགས་མྱོང་བའི་སྟན་ཐོག་གཅིག་ལ་སྦྱར་ན་གཞན་ལུས་ཀྱི་རྐྱེན་ལས་དགའ་བའི་ཡེ་ཤེས་ཀྱིས་སེམས་ལ་བདེ་བ་དང་། སྟོང་པ་དང་། གསལ་བ་གསུམ་ཉམས་སུ་མྱོང་བར་བྱེད་པས་ན་ལས་ཀྱི་ཕྱག་རྒྱ་དང་། དེ་བཞིན་དུ་ཞུ་བ་དེས་དྲངས་པའི་རྐྱེན་ལས་མགྲིན་པར་མཆོག་དགའི་ཡེ་ཤེས་སྐྱེས་པ་ནི་དམ་ཚིག་གི་ཕྱག་རྒྱ་སྟེ་ཡེ་ཤེས་བཞིའི་དམ་ཚིག་དང་འདུ་འབྲལ་མེད་པས་སོ། །དོ་ནས་སྙིང་གར་མཆོག་དགའི་ཡེ་ཤེས་ཉམས་སུ་མྱོང་བ་ནི་ཆོས་ཀྱི་ཕྱག་རྒྱ་སྟེ་ཆོས་སྤྱི་དང་རང་གི་མཚན་ཉིད་ལ་ལོངས་སྤྱོད་པར་བྱེད་པས་སོ། །དེ་ནས་རྡོ་རྗེ་ནོར་བུར་ལྷན་ཅིག་སྐྱེས་དགའི་ཡེ་ཤེས་ཉམས་སུ་མྱོང་བ་ནི་ཕྱག་རྒྱ་ཆེན་པོ་སྟེ། བསམ་གྱིས་མི་ཁྱབ་
པའི་རིམ་པ་ལས། རང་བཞིན་རྣམ་དག་ལ་གེམས་པ། །གཉིས་མེད་དོན་ནི་དམ་པ་གང་། །མ་སྐྱེས་པ་དང་མི་འཇིགས་པ། །དེ་ནི་ཕྱག་རྒྱ་ཆེན་པོ་ཡིན། །ཞེས་སོ། །དེའི་ཕྱིར་རང་དང་རིག་མ་གཉིས་ཀའི་ལུས་ལྷར་འདུ་ཤེས་པ་དང་། མཁའ་གསང་སྔགས་དང་ཡིག་འབྲུར་འདུ་ཤེས་པ་དང་། བདེ་བ་ཆོས་ཉིད་དུ་འདུ་ཤེས་པའི་ངང་ནས་ཤེས་རབ་མའི་ལུས་ཀྱི་བུམ་པ་ལ་རེག་པས་དགོད་པ་དང་། སོར་ལོའི་ལྕུག་ཕྲན་བསྣུན་པས་གཙུག་ཏོར་སྐུའི་ཐིག་ལེ་མགྲིན་པར་བབ་པས་དགའ་བའི་དགའ་བ་དང་བུམ་དབང་བདེ་བ་ཆེན་པོའི་རང་བཞིན་དུ་མྱོང་། ལུས་ཀྱི་ཐིག་ལེ་དང་སད་པའི་གནས་སྐབས་དང་། ལུས་ཀྱི་སྒྲིབ་པ་སྦྱོང་། དེའུ་ཆུ་སྐྱེས་ལ་བལྟས་པས་མགྲིན་པ་ནས་སྙིང་གར་བབ། མཆོག་དགའི་དགའ་བ་དང་གསང་དབང་ཉམས་སུ་མྱོང་། ངག་གི་ཐིག་ལེ་དང་། རྨི་ལམ་གྱི་གནས་སྐབས་དང་། ངག་གི་སྒྲིབ་པ་སྦྱོང་། ཡུམ་ཆེན་མོའི་ཕོ་བྲང་དུ་རྡོ་རྗེ་སེམས་དཔའ་ཞུགས་པས་སྙིང་གའི་ཐིག་ལེ་ལྟེ་བར་བབ། ཁྱད་པར་གྱི་དགའ་བ་དང་ཤེས་རབ་ཡེ་ཤེས་ཀྱི་དབང་ཉམས་སུ་མྱོང་། སེམས་ཀྱི་ཐིག་ལེ་དང་གཉིད་སྟུག་གི་གནས་སྐབས་ཡིད་ཀྱི་སྒྲིབ་པ་དག །དེ་ནས་ཤེས་རབ་ཀྱི་བསྒུལ་བ་སྐྱོང་ལས་ལྟེ་བའི་ཐིག་ལེ་རྡོ་རྗེ་ནོར་བུར་བབ། ལྷན་ཅིག་སྐྱེས་པའི་དགའ་བ་དང་དབང་བཞི་པ་ཉམས་སུ་མྱོང་། འཕོ་བ་ཡེ་ཤེས་ཀྱི་ཐིག་ལེ་དང་། ཆགས་རྟོག་གི་གནས་སྐབས་དང་ཡེ་ཤེས་ཀྱི་སྒྲིབ་པ་སྦྱངས། དེ་ནས་དབྱིངས་རིག་གཉིས་མེད་ཀྱི་ཕྱག་རྒྱ་ཆེན་པོས་འཛག་པ་དེའི་རྒྱུན་འཕོ་མེད་དུ་བརྟན་པར་བྱས་པ་གང་ཡིན་པ་ནི་ཆོས་ཀྱི་དབྱིང་རང་བཞིན་བརྡལ་བ་ཆེན་པོའི་མཚན་ཉིད་དོ། །དེ་ནས། དགྲམ་ཆེན་རླུང་གི་ཐེམ་བུ་དང་། རྡོ་རྗེ་རྒྱ་གྲམ་གྱི་ཐིམ་བུ་དང་། སྟག་མོ་ཁ་ཡན་གྱི་ཐིམ་བུ་དང་། ལྕགས་ཐག་ཁོང་འདྲེན་གྱི་ཐེམ་བུ་དང་། །
འཁོར་ལོ་ཁ་སྦྱོར་གྱི་ཐེམ་བུ་དང་། མེ་རླུང་ཁ་སྦྱོར་གྱི་ཐེམ་བུ་དང་། སྲོག་རྩོལ་རླུང་གི་ཐེམ་བུ་སྟེ་རྣམ་པ་བདུན་གྱི་འདྲེན་ལ་བརྟེན་ནས་གཙུག་ཏོར་གྱི་རྩེ་མོར་བསྐྱལ་ཞིང་། བྲབ་གཞིལ་ལ་སོགས་པའི་མན་ངག་གི་འཁྲུལ་འཁོར་དང་། ཁྱད་པར་དབྱིངས་རིག་གཉིས་མེད་ཀྱི་ལྟ་བས་འགྲེམས་པ་ནི་མཆོག་ཏུ་མི་འགྱུར་བའི་བདེ་བ་ཆེན་པོའོ། །དེ་ལ་ལུས་ངག་ཡིད་གསུམ་ཆགས་པ་དང་བཅས་པའི་བདེ་བ་ཆེན་པོ་བཞི་ནི་སོ་སོའི་ཐིག་ལེ་བརྟན་པ་ལས་བྱུང་ལ། ཐིག་ལེ་བཞི་དང་དགའ་བ་བཞི་པོ་རེ་རེ་ལའང་། བཞི་ཚན་དུ་ཕྱེ་བས་འགྱུར་མེད་མཆོག་གི་བདེ་བ་ཆེན་པོའི་དགའ་བ་བཅུ་དྲུག་ཏུ་གྱུར་པ་རང་རིག་ཡེ་ཤེས་ཀྱི་དེ་ཁོ་ན་ཉིད་དང་གཉིས་སུ་མེད་པ་དེ་ལ་དེ་ཉིད་རྣམ་པ་བཅུ་དྲུག་ཅེས་བྱའོ། །དེའི་རྟེན་དུ་གྱུར་པའི་ཐིག་ལེ་བཅུ་དྲུག་སྟེ། ལུས་ཀྱི་ལུས་ཀྱི་ཐིག་ལེ། ངག་གི་ལུས་ཀྱི་སེམས་ཀྱི་ལུས་ཀྱི། ཡེ་ཤེས་ཀྱི་ལུས་ཀྱི་ཐིག་ལེ་བཞི་སྟེ་ལུས་ཀྱི་ཐིག་ལེ་བཞི། དེ་བཞིན་དུ་ངག་དང་། སེམས་དང་། ཡེ་ཤེས་ལའང་བཞི་བཞིར་ཕྱེ་བའི་བཅུ་དྲུག་ཕྱེད་ཕྱེད་ཀྱི་ཐིག་ལེ་དེ་ཉིད་དཀར་ནག་གི་ཕྱོགས་གཉིས་སུ་ཕྱ་བས་ནང་གི་ཡུལ་ཉི་ཤུ་རྩ་བཞིའི་རྩལ་འཇུག་པའི་ཆ་ནས་ཐིག་ལེ་ཉི་ཤུ་རྩ་བཞི་པ་ཚར་བཞི་དང་། བཅུ་དྲུག་ཕྱེད་ཕྱེད་ཀྱི་དྭངས་མའི་ཐིག་ལེ་དེ་ཉིད་འཁོར་ལོ་དྲུག་གི་རྩ་བརྒྱ་དང་ལྔ་བཅུ་རྩ་དྲུག་ལ་འཇུག་པའི་དབྱེ་བས་ཐིག་ལེའི་གྲངས་ཀྱང་དེ་སྙེད་ཚར་བཞི་དང་། བཅུ་དྲུག་ཕྱེད་ཕྱེད་ཀྱི་ཐིག་ལེ་དེ་ཉིད་ཚིགས་སུམ་བརྒྱ་དྲུག་ཅུའི་རྩ་འཁོར་སུམ་བརྒྱ་དྲུག་ཅུའི་རྩ་བདུན་ཁྲི་ཉིས་སྟོང་ལ་འཇུག་པའི་དབྱེ་བས་དྭངས་མའི་ཐིག་ལེ་བདུན་ཁྲི་ཉིས་སྟོང་གི་ཚན་པ་བཞིའོ། །དེ་ལྟར་རྩ་འཁོར་དེ་རྣམས་སུ་ཏིང་ངེ་འཛིན་གྱི་སྟོབས་ཀྱི་ཀུན་ཏུ་རྟོག་པ་ཅན་མ་ཡིན་པའི་ཡེ་ཤེས་ཀྱི་རླུང་ཟིན་
པས་དྭངས་མའི་ཐིག་ལེ་ཟིན། ཐིག་ལེ་ཟིན་པས་མཆོག་ཏུ་མི་འགྱུར་བའི་བདེ་བ་ཟིན་ནས་རྩའི་འཁོར་ལོ་རྣམས་སུ་ཡེ་ཤེས་ཀྱི་རླུང་དང་དྭངས་མའི་ཐིག་ལེས་གང་བས་ལམ་རྟགས་ཀྱི་ཡོན་ཏན་མངོན་དུ་གྱུར། མ་རིག་པའི་རྩ་བ་འཛག་པ་དེ། ངོ་བོ་རྣམ་ཤེས་ཀྱི་བཞོན་པ་ལས་རླུང་། འབྲས་བུ་འཁོར་བ་བཞིར་བསྐྱེད་པའི་རྟེན་འབྲེལ་ཡན་ལག་བཅུ་གཉིས་འགགས། བྱང་ཆུབ་ཀྱི་སེམས་གཙུག་ཏོར་ནོར་བུ་དང་རྡུལ་གྱི་རྡོ་རྗེ་ནོར་བུར་ཕྱིན་པ་དུས་མཉམ་པས་ས་བཅུ་གསུམ་པ་རྫོགས་པའི་ཚུལ་རྒྱུད་ལས། ཁྱེད་བཅིངས་ཉིན་མཚན་རྣལ་འབྱོར་སོ་ནམ་བྱས། རྩ་ནི་ཡུར་བ་འདྲ་སྟེ་བྱང་པར་དགོས། ཁྱད་སེམས་ཆུ་འདྲ་ཁྲིད་སར་ཡོད་པ་དགོས། །རླུང་ནི་ཁྲོན་སྐྱོགས་འདྲ་སྟེ་སྐྱོན་མེད་དགོས། །དེ་ལྟར་རྩ་རླུང་འབྱོངས་ནས་རྗེས་ཆགས་སུ། །འདོད་ཆགས་ཆེན་པོ་བདེ་ཆེན་ནམ་མཁའ་གང་། །ཁུ་བ་ཐུར་འབབ་རྡོ་རྗེ་ནོར་བུར་བརྟེན། །རྡུལ་གྱི་གྱེན་སོང་གཙུག་ཏོར་འཁོར་ལོར་བརྟེན། །དེ་ལྟར་ལོ་གསུམ་དག་ལ་འབད་པ་ན། །ཁུ་བ་རྡོ་རྗེ་ནོར་བུར་ཡར་འཕེལ་བས། །གསང་གནས་རྩ་འདབ་རྣམས་ནི་ཕྱེད་གང་ཞིང་། །ལས་རླུང་བརྒྱ་ཕྲག་བཅོ་བརྒྱད་གཅིག་འགགས་པས། །དབང་བཅུ་ལ་སོགས་ཐོབ་པའི་སེམས་དཔར་འགྱུར། །ས་ནི་དང་པོ་རབ་ཏུ་དགའ་བ་རྫོགས། །ཡོན་ཏན་བརྒྱ་ཕྲག་བཅུ་གཉིས་བཅུ་གཉིས་ཐོབ། །ཐུར་དུ་རྡུལ་འཕེལ་གཙུག་ཏོར་དཔྲལ་བ་ཡི། །རྩ་འདབ་ཕྱེད་གང་ཟླ་བ་ཧཾ་ཡིག་ཞུ། །བདུད་རྩི་ཐིག་ལེའི་རྒྱུན་ཆད་ཕྱིར་ལ་བབ། །དེ་བཞིན་ཁུ་བ་གསང་གནས་རྩ་འདབ་ཀྱི། །ཕྱེད་པ་ལྷག་མ་མ་ལུས་གང་བ་ཡི། །ལས་རླུང་བརྒྱ་ཕྲག་བཅོ་བརྒྱད་གཉིས་དགགས་པས། །ས་ནི་གཉིས་པ་དྲི་མ་མེད་པ་རྫོགས། །ཡོན་ཏན་དེ་ཉིད་ནམ་མཁའ་གང་བ་ཐོབ། །རྡུལ་གྱིས་དཔྲལ་བའི་རྩ་འདབ་ཕྱེད་འཕྲོ་གང་། །དེ་ནས་ཁུ་བ་ལྟེ་བར་ཡར་སླེབ་ཅིང་། །རྡུལ་གྱིས་མགྲིན་
པར་ཕྱིན་སླེབ་རྩ་འདབ་གང་། །ལས་རླུང་བརྒྱ་ཕྲག་བཅོ་བརྒྱད་གཉིས་འགགས་པས། །ས་ནི་གསུམ་པ་འོད་རབ་འབྱེད་པ་དང་། །བཞི་པ་འོད་འཕྲོ་གཉིས་པོ་རྫོགས་པ་ཡིན། །ཁུ་རྡུལ་གཉིས་ཀས་སྙིང་གར་སླེབ་ནས་ནི། །སྙིང་གའི་རྩ་འདབ་ཐམས་ཅད་གང་བ་ཡིས། །ལས་རླུང་བརྒྱ་ཕྲག་བཅོ་བརྒྱད་གཉིས་འགགས་པས། །ས་ནི་ལྔ་པ་སྦྱང་བར་དཀའ་བ་དང་། །དྲུག་པ་མངོན་དུ་གྱུར་པ་གཉིས་པོ་རྫོགས། །ཁུ་བ་ཡར་སོང་མགྲིན་པའི་འཁོར་ལོར་སླེབས། །རྡུལ་ནི་ལྟེ་བའི་འཁོར་ལོར་ཕྱིར་སླེབས་ནས། །ལས་རླུང་དུས་སྦྱོར་གཉིས་པོ་རང་འགགས་པས། །ས་ནི་བདུན་པ་རིང་དུ་སོང་བ་དང་། །བརྒྱད་པ་མི་གཡོ་བ་གཉིས་རྫོགས་པ་ཡིན། །ཁུ་བ་ཡར་སོང་དཔྲལ་བའི་འཁོར་ལོར་སླེབ། །རྡུལ་ནི་གསང་བའི་འཁོར་ལོར་ཕྱིར་སླེབ་ནས། །ལས་རླུང་དུས་སྦྱོར་གཉིས་པོ་རབ་རྫོགས་པས། །ས་ནི་དགུ་པ་ལེགས་པའི་བློ་གྲོས་དང་། །བཅུ་པ་ཆོས་ཀྱི་སྤྲིན་གཉིས་རྫོགས་པ་ཡིན། །དེ་ནས་ཁུ་བ་གཙུག་ཏོར་ཡང་སླེབ་ནས། །རྡུལ་གྱི་རྡོ་རྗེ་ནོར་བུར་ཕྱིར་སླེབ་ནས། །ལས་རླུང་དུས་སྦྱོར་གཉིས་པོ་རབ་འགགས་པས། །ས་ནི་བཅུ་གཅིག་ཀུན་ཏུ་འོད་དང་ནི། །བཅུ་གསུམ་རྡོ་རྗེ་འཛིན་པ་རྫོགས་པ་ཡིན། །ཞེས་སོ། །དེ་ལྟར་སྣང་བཅས་ཀྱི་རྫོགས་རིམ་སྤྱི་དང་ཁྱད་པར་ཕྱིའི་རྐྱེན་གཞན་ལུས་ལ་བརྟེན་པ་ལ་ཐབས་ཀྱི་ལམ་ཞེས་གྲགས་པ་ནི་དམ་པའི་ཆོས་འདུལ་བ་དང་། མདོ་སྡེ་དང་། མངོན་པའི་སྡེ་སྣོད་ཐམས་ཅད་ལས་ཉོན་མོངས་པ་མཐའ་དག་གི་འབྱུང་གནས་སུ་བསྟན་པའི་བུད་མེད་གང་ཞིག་འདིར་སྟོང་པ་ཉིད་ཀྱི་འབྱུང་གནས་རྒྱལ་བའི་ཡུམ་མམ་ཤེས་རབ་ཀྱི་ཕ་རོལ་ཏུ་ཕྱིན་མའི་རང་བཞིན་དུ་བལྟས་ནས་དེ་ཉིད་ཐབས་ལ་མཁས་པའི་ཆོ་གས་ལམ་དུ་བྱས་པ་སྟེ། དེ་ཡང་ལུས་ཀྱི་རྩའི་རང་བཞིན་ཤེས་རབ་ཀྱི་ཆར་གནས་པ་རླུང་དང་ཐིག་
ལེའི་ཐབས་ཀྱིས་ལམ་དུ་བྱས་པ་ལས་རྩ་ཐམས་ཅད་ཆོས་ཉིད་ཀྱི་དབུ་མར་འགྱུར། སྲོག་དང་ཐུར་སེལ་གྱི་རང་བཞིན་ཤེས་རབ་ཀྱི་ཆར་གནས་པ་སྩོལ་བའི་ཐབས་ཀྱིས་ལམ་དུ་བྱས་པས་རོ་རྐྱང་གི་རྒྱུ་བ་ཡེ་ཤེས་ཀྱི་རླུང་དུ་འགྲོ། །ཡུལ་དྲུག་ཤེས་རབ་ཀྱི་ཆར་གནས་བ་རྫས་སུ་མ་གོལ་བའི་དབང་པོ་དྲུག་གིས་ཐབས་ཀྱིས་ལམ་དུ་བྱས་པས་ཚོགས་དྲུག་ཡེ་ཤེས་སུ་འཆར། མཐོང་ཐོས་མྱོང་ཚོར་ལ་སོགས་པ་ཤེས་རབ་ཀྱི་ཆར་གནས་པ་རྣམ་པར་ཤེས་པ་བརྒྱད་ཡེ་ཤེས་འབའ་ཞིག་ཏུ་གནས་གྱུར་པའི་ཐབས་ཀྱིས་ལམ་དུ་བྱས་པས་སྐྱེ་མེད་བྱང་ཆུབ་ཀྱི་སེམས་སུ་གྲོལ། སད་པའི་གནས་སྐབས་ཐམས་ཅད་དུ་དེ་ལྟར་བྱེད་བས་གཉིད་དམ་འཆི་བའི་ཚེ་འབྱུང་བཞི་ཐིམ་པ་ཐབས། དབང་པོ་ཐིམ་པ་ཤེས་རབ། རགས་པ་ཐིམ་པ་ཐབས། ཕྲ་བ་ཐིམ་པ་ཤེས་རབ། རླུང་སེམས་ལས་སུ་རུང་བ་དང་། ཚོགས་གཉིས་རྫོགས་པ་དང་། འཆི་བའི་དུས་གསུམ་པོར་རྩ་མདུད་གྲོལ་བ་ཐབས། ཐིག་ལེ་གཡོ་བ་ཤེས་རབ། རླུང་འགྲགས་པ་ཐབས། རྣམ་རྟོག་འགགས་པ་ཤེས་རབ། ཕྲ་བ་ཐིམ་པ་ཐབས། འོད་གསལ་ཤར་བ་ཤེས་རབ་སྟེ་ཐབས་ལ་བརྟེན་རས་ཤེས་རབ་འགྲུབ་པས་ཐབས་ཀྱི་ལམ་ཞེས་བྱ་ལ། ཁྱད་པར་སྙོམས་འཇུག་གི་ཞུ་བདེས་དྲངས་པའི་དགའ་བཞིའི་ཡེ་ཤེས་ལ་བརྟེན་ནས་རྣམ་རྟོག་གི་བཞོན་པར་གྱུར་པའི་རླུང་གི་ཆ་འགགས་པས་རང་བཞིན་བརྒྱད་ཅུའི་རྟོག་པ་འགག་སྟོབས་དང་མཐུན་པར་སྟོང་པ་བཞི་ཉམས་སུ་མྱོང་། རང་བཞིན་ལྷན་ཅིག་སྐྱེས་པའི་ཡེ་ཤེས་ཀྱིས་ས་མཁན་བྱས་པའི་ཆོས་ཉིད་ནམ་མཁའི་གཟུགས་ཅན་བསམ་གྱིས་མི་ཁྱབ་པའི་ཡེ་ཤེས་འགྱུར་བ་མེད་པ་གང་ཞིག་གསང་སྔགས་ཆེན་པོ་ཡོངས་གྲུབ་པ་རྣམས་ཀྱི་ཐབས་ཀྱི་ཁྱད་པར་འདི་ལ་མ་བརྟེན་པར་གང་གིས་ཀྱང་
རྟོགས་པར་མི་ནུས་པའི་ཚུལ་རྒྱུད་ལས། རྣམ་པ་ཀུན་གྱི་མཆོག་ལྡན་མ། །སྟོང་ཉིད་ཤེས་རབ་མཛེས་མ་ཉིད། །རྒྱལ་བ་ཐམས་ཅད་བསྐྱེད་པའི་ཡུམ། །འདི་ཉིད་མ་བསྟེན་འཚང་མི་རྒྱ། །ཞེས་སོ། །དེ་བས་ན་ཉེ་རྒྱུ་དེ་ལ་བརྟེན་ནས་རང་རྒྱུད་ལྡན་གྱི་གང་ཟག་འཕགས་པར་སྐད་ཅིག་ལ་བཏང་ནས་བར་ཆད་མེད་ལམ་གཅིག་ཅར་དུ་སྐྱེ་བས་ན་ཐབས་ཀྱི་ལམ་ཞེས་བྱ་བ་ཡིན་ལ། དེའང་སྲོག་ཐིམ་པ་ནི། སྒྲིབ་པ་རྣམ་པར་དག་པས་སྤངས་བ་ཕུན་སུམ་ཚོགས་པ་ཡིན་ལ། སེམས་ཐིམ་པ་ནི་འོད་གསལ་དུ་འདྲེས་ནས་ཟུང་འཇུག་ཏུ་བཞེངས་པས་རྟོགས་པ་ཕུན་སུམ་ཚོགས་པ་མངོན་དུ་བྱས་པའོ། །གཉིས་པ་སྣང་བ་མེད་པའི་རྫོགས་རིམ་ནི། །རྣམ་པར་གྱུར་པའི་བསྐྱེད་རྫོགས་གང་ཡིན་ཡང་། །དག་པའི་སྣོད་བཅུད་བརྟན་གཡོར་སྣང་བ་ཀུན། །འོད་དུ་ཞུ་ནས་སྙིང་གའི་ས་བོན་ནམ། །ཐིག་ལེར་ཐིམ་པ་དེ་ཡང་མས་རིམ་ནས། །སྟོང་པར་གྱུར་པ་ནམ་མཁའི་ངོ་བོ་ཉིད། །ཡེ་ཤེས་ཆེན་པོའི་སྤྱོད་ཡུལ་ཉིད་ལ་བཞག །བསྐྱེད་རིམ་གྱིས་ནི་སྣང་བའི་བདེན་ཞེན་འགོག །རྫོགས་རིམ་གྱིས་ནི་སྒྱུ་མའི་ཞེན་རྟོག་སྤོང་། །བདེ་གསལ་མི་རྟོག་ལྷན་སྐྱེས་ཡེ་ཤེས་འཆར། །ཟག་པའི་རྫོགས་རིམ་བླ་ན་མེད་པ་རྣམས། །བླ་མེད་རྒྱུད་ལས་འོག་མར་གསུངས་པ་མེད། །དབང་རྣོན་ཚེ་གཅིག་རྡོ་རྗེ་འཆང་འགྲོ་བའི། །ཉེ་ལམ་སྦས་པ་ཤིན་ཏུ་ཟབ་མོ་ཡིན། །དེ་ལ་བཞིན་ལག་གི་རྣམ་པར་ཤར་བའི་བསྐྱེད་རྫོགས་དམིགས་པ་དང་བཅས་པ་ཇི་ལྟ་བུའང་མཐར་གྱིས་ན་བསམ་གྱིས་མི་ཁྱབ་པའི་རྫོགས་རིམ་པ་བསྡུ་དགོས་ཏེ། འདི་ལྟར་བསྐྱེད་རིམ་གྱི་གནས་སྐབས་ན་ལྷ་དང་གཞལ་ཡས་ཁང་དུ་བལྟས་པ་དག་པའི་སྣོད་བཅུད་དང་བཅས་པའང་འོད་དུ་ཞུ་བ་སྙིང་གའི་ས་བོན་ལ་བསྟིམ་
ས་བོན་ཉིད་ཀྱང་ནཱ་དའི་བར་དུ་བསྡུ་བ་བཞིན་དུ་རྫོགས་རིམ་གྱི་ལྷན་སྐྱེས་བདེ་བ་ཆེན་པོའི་ལྷ་སྐུ་ཡང་དམིགས་པ་དང་བཅས་པ་ཡིན་པས་ནམ་མཁའ་ལ་གཞའ་ཚོན་དེངས་པ་བཞིན་བསམ་གྱིས་མི་ཁྱབ་པའི་ངང་ལ་བཞག་པ་ནི་རྫོགས་རིམ་གྱི་རྒྱལ་པོ་སྟེ། དེ་ལནྡ་ད་ཞེས་བྱ་བ་ནི་ཤིན་ཏུ་ཕྲ་བའི་རླུང་ཁམས་གསུམ་པའི་བདག་ཉིད་ཅན་སངས་རྒྱས་མ་ཐོབ་ཀྱི་བར་དུ་གཞོམ་དུ་མེད་པ་རྣམ་བཅས་ལ་བརྟེན་ནས་དངོས་སུ་འཇུག་པའི་ཕྱི་ལོགས་པ་ཉིད་མཆོག་ཏུ་མི་འགྱུར་བའི་བདེ་བ་ཆེན་པོ་ཡིན་པའི་ཕྱིར་རོ། །དེ་བས་ན་སངས་རྒྱས་ཀྱི་ཐུགས་ཀྱི་སྦོས་པ་དང་བྲལ་བ་ཡིན་པས་དེ་ཉིད་གཤིས་ཐོག་ཏུ་གོམས་པར་བྱེད་པའི་གནས་སྐབས་ན་ཕ་རྒྱུད་པ་ཁ་ཅིག་ལྟར་རླུང་གི་ཐབས་ལས་སྐྱེས་པའི་ཤེས་པ་གསལ་བ་ཙམ་དང་མ་རྒྱུད་པ་ལ་ལ་ལྟར་ཞུ་བའི་ཐིག་ལེ་ལས་སྐྱེས་པའི་བདེ་གསལ་ཟུང་འཇུག་ཙམ་དོན་དམ་པའི་བསྒྲུབ་བྱར་འདོད་ནས་ཐབས་ལས་བྱུང་བའི་དཔེ་ཙམ་གྱི་ལྟ་བ་ཁོ་ན་ལ་མཆོག་ཏུ་འཛིན་ཅིང་བསམ་གྱིས་མི་ཁྱབ་པའི་ཡེ་ཤེས་ལ་བསྐུར་བདེ་ནི་གཤིས་ཀྱི་བཞུགས་ཚུལ་གཏན་མ་རྟོགས་པ་ཡིན་ཏེ། ཡེ་ཤེས་གྲུབ་པ་ལས། ལུས་ཀྱི་སྦུད་པ་གང་ཡིན་དང་། །སྦུད་པ་འབུད་པར་བྱེད་བདག །དེ་དག་ཁྱད་པར་མ་མཐོང་སྟེ། །དེ་ཉིད་མཐོང་བའི་རྣལ་འབྱོར་པས། །སྦུད་པ་ཡི་ནི་བྱ་བ་ནོན། །ཞེས་པས་རླུང་འབའ་ཞིག་གི་ཐབས་ལས་བྱུང་བའི་གསལ་བ་བཀག་ལ། དབང་པོ་གཉིས་བྱུང་བདེ་བ་ནི། །དེ་ཉིད་ཡེ་ཤེས་རྐྱེན་ངན་སྨྲ། །དེ་ནི་བདེ་བ་ཆེ་ཡིན་ཞེས། །རྒྱལ་བ་མཆོག་གིས་མ་གསུངས་སོ། །བདེ་ཆེན་མི་རྟོག་མ་ཡིན་ཏེ། །བདེ་བ་ཆེན་པོ་རྟག་ཏུ་རྟོག །མཆན་ཁུང་གཡའ་འཕྲུག་ལས་བྱུང་བ། །ཅི་ཡི་ཕྱིར་ན་བདེ་ཆེན་མིན། །ཞེས་པས་ཐིག་ལེའི་རྐྱེན་ལས་སྐྱེས་པའི་བདེ་བ་དོན་དམ་དུ་འདོད་པ་བཀག་པ་ཡིན་ནོ། །འོ་ན་རྒྱུད་སྡེ་ཐམས་ཅད་ནས་
མཆོག་ཏུ་མི་འགྱུར་བའི་བདེ་བ་ཆེན་པོ་ཞེས་སྨོས་པ་ལ་རྒྱུ་མཚན་མེད་དོ་ཟེར་ན། སྲིད་པར་ཀུན་ཏུ་འགྲོ་བ་ཅན་གྱི་རྒྱུ་འབྲས་ལས་བྱུང་བའི་འཁོར་བའི་སྡུག་བསྔལ་ཆ་དང་བཅས་པ་སྤངས་པ་ལ་བདེ་བ་ཆེན་པོ་ཞེས་བཏགས་པར་ཟད་ཀྱིས། །དཔེར་ན་ཆོས་ཀྱི་དབྱིངས་ལ་སྡིག་པའི་རྒྱུ་འབྲས་གཉིས་ཀ་མེད་པ་ལ་དགེ་བར་བཏགས་པ་བཞིན་ནོ། །འདི་ལྟར་ཐབས་ལས་བྱུང་བའི་བདེ་བ་ནི་འདུས་བྱས་ཡིན་པས་འདུས་བྱས་ཀྱི་རང་བཞིན་ནི་རྣམ་པར་འགྱུར་བ་ཅན་ཉིད་ཀྱི་ཕྱིར་དངོས་པོ་དང་བཅས་པས་དོན་དམ་པར་མི་རུང་སྟེ། མགོན་པོ་ཀླུ་སྒྲུབ་ཀྱིས། གལ་ཏེ་མྱ་ངན་འདས་དངོས་ན། །མྱ་ངན་འདས་པ་འདུས་བྱས་འགྱུར། །དངོས་པོ་འདུས་བྱས་མ་ཡིན་པ། །འགའ་ཡང་གང་ནའང་ཡོད་མ་ཡིན། །ཞེས་སོ། །དེ་ལྟ་ནའང་རེ་ཞིག་སྣང་བའི་བདེན་ཞེན་མ་དག་པར་དུ་བསྐྱེད་རིམ་དང་། སྒྱུ་མར་ཞེན་པའི་རྟོག་པ་སྤོང་ཕྱིར་བདེ་གསལ་ལ་སོགས་པའི་རྫོགས་རིམ་ནི་ལམ་གྱི་ཆ་རྐྱེན་ཁྱད་པར་ཅན་ཡིན་པས་ལམ་མ་རྫོགས་བར་དུ་ནི་འདོར་བར་མི་རུང་སྟེ། བཟོ་གནས་ཀྱི་དཔྱད་མ་རྫོགས་པར་རླན་འདམ་མི་འདོར་བ་བཞིན་ནོ། །དེ་སྐད་དུ་བརྟག་གཉིས་ལས། བསྐྱེད་པའི་རིམ་པའི་རྣལ་འབྱོར་གྱིས། །བརྟུལ་ཞུགས་ཅན་གྱི་སྤྲོས་པ་བསྒོམ། །སྤྲོས་པ་རྨི་ལམ་ལྟར་བསྒོམས་ནས། །སྤྲོས་པ་ཉིད་ཀྱིས་སྤྲོས་མེད་བྱེད། །ཅེས་སོ། །དེ་བས་ན་བསྐྱེད་རྫོགས་བསྒོམས་པའི་བྱེད་ལས་ནི་བསྐྱེད་རིམ་གྱི་དུས་སྣོད་གཞལ་ཡས་ཁང་དུ་བསྒོམས་པས་ཡིད་ངོའི་སྣང་བ་ཤིན་ཏུ་རྒྱ་ཆེ་བ་སྟོང་གསུམ་གྱི་སྟོང་ཆེན་པོ་ལ་སོགས་པའམ། མིག་ཤེས་ཙམ་གྱི་སྣང་བས་རྡོ་རི་བྲག་གང་མཚན་པར་བལྟ་བ་སྤྱོད་ལ་བཅུད་ལྟ་དང་ལྷ་མོར་བསྒོམས་པས་ཡིད་ངོར་སྣང་ཚོད་རྨི་ལམ་ལྟ་བུར་འཆར་བའི་དུས་
གསུམ་གྱི་ལས་དང་བག་ཆགས་ཐམས་ཅད་དང་། མིག་ཤེས་ཙམ་དུ་སྣང་བའི་སེམས་ལ་བདེན་ཞེན་གྱི་བག་ཆགས་ཆ་དང་བཅས་པ་སྦྱོང་། ཁྱད་པར་རང་གི་ཕུང་པོ་ཁམས་དང་སྐྱེ་མཆེད་ཀྱང་གདོང་མ་ནས་ལྷའི་བདག་ཉིད་དུ་ཡོད་པའི་རང་བཞིན་ཤེས་ཤོང་། དེ་དང་དེར་གསལ་ཐེབས་པས་གཟུགས་ཀྱི་ཕུང་པོ་ལ་སོགས་པའི་སྒྲིབ་པ་སྦྱོང་། བསོད་ནམས་ཀྱི་ཚོགས་རྫོགས། བདེ་བའི་རང་བཞིན་ཤས་ཆེ་བཞི་གནས་ཀྱི་ཏིང་ངེ་འཛིན་སྐྱེ། དེ་ཡང་སྔགས་ཕྱི་པ་གསུམ་དུ་ནི་བསྐྱེད་རིམ་ཙམ་པོ་སྒྱུ་མ་ལྟ་བུ་དང་། རྒྱས་གདབ། དྲེན་པ་ཉེར་གཞག་བཞི་བསྒོམ་པ་དང་། ཐུན་རྗེས་བསྡུ་བ་ཙམ་ལས་བླ་མེད་ལྟར་འཁོར་བ་དང་རྣམ་པ་མཐུན་པར་སྦྱོང་བའི་ཐབས་ལ་མཁས་པ་སོགས་ཟབ་པའི་རིམ་པ་རྣམས་མེད་དོ། །རྫོགས་པའི་རིམ་པ་ནི་སྣང་ཆ་ལྷ་དང་གཞལ་ཡས་སུ་བལྟ་བའི་སྤྲོས་པ་ཉེ་བར་བསྡུས་ནས་ནད་དུ་ཕྲ་ཐིག་དང་། རྩ་རླུང་ཐིག་ལེའི་རང་བཞིན་ལ་གནད་དུ་བསྣན་ནས་ཉོན་མོངས་པའི་སྒྲིབ་པ་འདག་སྟོབས་ཆེ། རླུང་སེམས་ལས་སུ་རུང་བ་ལས་ལྷག་མཐོང་གི་ངོ་བོ་མཐོང་བར་སླ་བས་ཡེ་ཤེས་ཀྱི་ཚོགས་རྫོགས། ཁྱད་པར་བསམ་གྱིས་མི་ཁྱབ་པའི་རྫོགས་རིམ་ཀྱིས་ཤེས་བྱའི་སྒྲིབ་པ་སྦྱོང་ཞིང་ཆོས་ཉིད་རྣམ་པར་མི་རྟོག་པའི་ཡེ་ཤེས་རྒྱུད་ལ་རྫོགས་པ་ཡིན་ལ། འདི་ལྟར་ཆོས་རྣམས་གཞི་ལ་ཡེ་གནས་ཀྱི་མི་ཤིགས་པའི་ཐིག་ལེ་ལ་གནད་དུ་བསྣུན་པའི་གཞི་འབྲས་དབྱེར་མེད་ཀྱི་ལམ་འདི་དག་ནི་རྒྱུད་སྡེ་འོག་མར་གསུངས་པ་མེད་པས་དབང་པོ་རྣོན་པོ་སྲིད་པ་ཐ་མ་པའི་གང་ཟག་ཏུ་བྱེད་པའི་ཉེ་ལམ་བླ་ན་མ་མཆིས་པ་ཉིད་དེ་གསང་བ་གྲུབ་པ་ལས། ཤེས་རབ་ལྷ་མོ་བླ་ན་མེད། །འདི་ནི་ཕ་རོལ་ཕྱིན་ཅེས་བརྗོད། །གལ་ཏེ་བསྒོམས་ནས་
ཤེས་གྱུར་པ། །སེམས་ཅན་ཀུན་ལས་རྣམ་གྲོལ་འགྱུར། །ཞེས་སོ། །ད་ནི་གསང་སྔགས་ཀྱི་དངོས་གྲུབ་འཛིན་པའི་སྲོག་ཤིང་དམ་ཚིག་གི་རང་བཞིན་དབྱེ་བའི་ཕྱིར། གསུམ་པ་མཐུན་པའི་གྲོགས་གྱུར་དམ་ཚིག་ནི། །སྔགས་ལ་ཞུགས་པའི་བརྟུལ་ཞུགས་མི་ཉམས་བསྲུང་། །ཐབས་དང་གཉེན་པོའི་རྟེན་འབྲེལ་མ་འཆོལ་བ། །རྨ་བྱའི་མགྲིན་པར་བཙན་དུག་ཞུགས་ལྟར་སྤྱད། །དེ་ལ་དམ་ཚིག་མ་བསྲུངས་ན་སྔགས་ཀྱི་ཡོན་ཏན་གང་ཡང་མི་འགྲུབ་པས་རང་གི་ངོ་བོ་སྔགས་ལ་ཞུགས་པའི་བརྟུལ་ཞུགས་བཟང་པོ་མི་ཉམས་པ་དང་། དེའི་སྐྱོད་པའི་ཁྱད་པར་ལ་གང་ཟག་རང་སྒོ་ནས་ཤེས་རབ་དང་ཏིང་ངེ་འཛིན་ལ་སོགས་པའི་ཐབས་ཀྱིས་ཟིན་པ་དང་ཉོན་མོངས་པའི་གཉེན་པོར་འགྱུར་བའི་རྟེན་ཅིང་འབྲེལ་འབྱུང་གི་བླང་དོར་མ་ནོར་བས་ལམ་གྱི་གེགས་སུ་མི་འགྲོ་བ་ཞིག་དགོས་ཏེ། དཔེར་ན་རྨ་བྱ་རང་ཉིད་ཀྱིས་བརྟུལ་ཞུགས་གང་ཡིན་པས་འཚོ་བར་བྱེད་པའི་ཚེ་དུག་གི་བཟའ་བ་བཅུད་ལེན་དུ་གྱུར་ནས་འདབ་མ་ཡང་བལྟ་ན་སྡུག་པར་འགྱུར་ཀྱང་། སྐྱེས་བུ་གཞན་གྱིས་བདག་གིར་བྱས་ནས་བཟའ་བ་དེ་བྱིན་ན་སྲོག་དང་བྲལ་བཞིན་ཐབས་དང་ཤེས་རབ་ཀྱིས་མ་ཟིན་ན་སྔགས་ལམ་ལ་ཞུགས་པ་ཙམ་གྱིས་སྤྱོད་པའི་བརྟུལ་ཞུགས་སྒྲ་ཇི་བཞིན་པ་སྤྱོད་དུ་མི་དབང་ངོ་། །དབྱེ་ན། དེ་ལ་དམ་ཚིག་དང་ནི་སྡོམ་པའི་ཁྱད། །དམ་ཚིག་འདའ་བར་བྱ་བ་མ་ཡིན་ལ། །སྡོམ་པ་དང་མི་བྱའི་ངེས་པ་སྟེ། །ངོ་བོ་གཅིག་ལ་ལྡོག་ཆས་དབྱེ་བའོ། །དེ་སྐད་དུ་སྐབས་སྦྱོར་བདུན་པའི་རྒྱུད་ལས། སངས་རྒྱས་ཀྱི་དམ་ཚིག་གང་ཡིན་པ་སེམས་ཅན་གྱི་སྡོམ་པ་ཡིན་ལ། སེམས་ཅན་གྱི་དམ་ཚིག་གང་ཡིན་པ་སངས་རྒྱས་ཀྱི་སྡོམ་པ་
ཡིན་ཏེ། ཞེས་པའི་དང་པོ་ནི་སངས་རྒྱས་ཀྱིས་ན་མཉམ་པ་ཆེན་པོའི་དམ་ཚིག་གི་རང་བཞིན་ལས་འདའ་བ་མ་ཡིན་པ་གང་ཞིག་སེམས་ཅན་གྱི་ཁམས་ལ་སྤང་གཉེན་དང་བཅས་པས་ལམ་དུས་ཀྱི་སྡོམ་པའི་རང་བཞིན་དུ་ཡོད་དེ་རྒྱུད་ལས། ཐབས་ནི་བདེ་བའི་སྡོམ་པ་སྟེ། ཞེས་སོ། །གཉིས་པ་ནི་སེམས་ཅན་གྱི་དུས་ན་འདའ་བར་མི་རུང་བའི་དམ་ཚིག་སངས་རྒྱས་རྣམས་ལ་ཆོས་ཐམས་ཅད་རང་སྣང་ཡེ་ཤེས་ཀྱི་ངོ་བོར་སྡོམ་པའི་འབྲས་རྒྱུད་ཀྱི་སྔགས་སྡོམ་དུ་གནས་ཏེ་རྒྱུད་ལས། དེ་ནས་ཆོས་ཀུན་སྡོམ་གཅིག་པའི། །རྡོ་རྗེ་སེམས་དཔའ་ཞེས་བྱར་བཤད། །ཅེས་དང་། རྔ་མ་གློག་ལས། ཆོས་ཀུན་ཡེ་ནས་དག་པའི་ཕྱིར། །ལོག་རྟོག་ཡེ་ནས་རྣམ་པར་དག །དེ་བས་སྡོམ་པ་རྣམ་པར་དག །ཅེས་དང་། དེ་ལྟ་བུའི་སྡོམ་པ་དང་དམ་ཚིག་ནི་སློབ་པའི་ལམ་གྱི་གནས་སྐབས་ཡིན་པས་སངས་རྒྱས་ཀྱི་ས་ལ་འབྲེལ་བ་མེད་དོ་ཟེར་ན་མདོ་སྡེའི་རྒྱན་ལས་སེམས་བསྐྱེད་བཞི་ཆེན་གྱིས་དབྱེ་ནས་སངས་རྒྱས་ཀྱི་ས་ལ་སྒྲིབ་པ་སྤངས་པའི་སེམས་བསྐྱེད་བཤད་པའང་མི་འཐད་དོ། །དེ་ལྟ་ནའང་བརྒྱ་ལྔ་བཅུ་པའི་འགྲེལ་བར་དམ་ཚིག་ནི་འདའ་བར་བྱ་བ་མ་ཡིན་པའི་ཕྱིར་རོ། །སྡོམ་པ་ནི་བྱ་བ་དང་མི་བྱ་བའི་ངེས་པའོ། །ཞེས་པ་ནི་སྨོན་འཇུག་གཏོང་བ་ལ་སོགས་འདའ་བར་མི་རུང་བའི་ཆ་ཐམས་ཅད་དམ་ཚིག་དང་། གནང་བཀག་ལ་དཔྱད་ནས་འཇུག་ལྡོག་གཉིས་སུ་བྱེད་དགོས་པ་མཐའ་དག་སྡོམ་པར་བཞག་པའི་དོན་ཡིན་ནོ། །ལ་ལ་དག་བྱ་སྤྱོད་གཉིས་སུ་རྩ་ལྟུང་མ་བཤད་པས་དམ་ཚིག་ཡིན་ལ། བླ་མེད་ནི་རྩ་ལྟུང་དང་འབྲེལ་བས་སྡོམ་པ་ཡིན་པའི་རྒྱུ་མཚན་གྱིས་སྔགས་སྡོམ་ཉམས་པའི་རྒྱུད་ལ་དམ་ཚིག་དང་ལྡན་པ་ཡང་ཡོད་དོ་འདོད་པའང་ལྟར་སྣང་ཙམ་སྟེ། འདི་ལྟར་བྱ་སྤྱོད་གཉིས་ཀྱི་སྡོམ་
པའི་ངོ་བོ་ན་བྱང་ཆུབ་སེམས་དཔའི་འཇུག་སྡོམ་ཡང་ཡིན་ལ། རྩ་ལྟུང་དུའང་གསུངས་ཏེ་རྣམ་སྣང་མངོན་བྱང་ལས། དེ་རིང་ཕྱིན་ཆད་བུ་ཁྱོད་ཀྱིས། །དམ་པའི་ཆོས་དང་བྱང་ཆུབ་སེམས། །སྲོག་གི་ཕྱིར་ཡང་ང་ཕྱིན་ཆད། །ཡོངས་སུ་བཏང་བར་མི་བྱའོ། །ཁྱོད་ཀྱིས་སེར་སྣ་དང་ནི་གང་། །སེམས་ཅན་གནོད་པ་མི་བྱའོ། །དམ་ཚིག་འདི་དག་སངས་རྒྱས་ཀྱི། །བརྟུལ་ཞུགས་བཟང་པོས་ཁྱོད་ལ་བཤད། །ཅེས་སོ། །དེ་རྩ་ལྟུང་ཡིན་པར་ཅིས་འགྲུབ་ན་དེ་ཉིད་ལས། རྩ་བའི་ལྟུང་བ་བཞི་ནི་སྲོག་གི་ཕྱིར་ཡང་ཉམས་པར་མི་བྱའོ། །ཞེས་བཞི་པོ་དེ་ལ་རྩ་ལྟུང་དུ་བཤད་ལ། །དེ་བཞིན་དུ་འཇམ་དཔལ་རྩ་རྒྱུད་ལས། ལྔ་པོ་འདི་དག་ནི་རྩ་བའི་ལྟུང་བ་ཡིན་པར་བསྟན་ཏེ། ཞེས་རྩ་ལྟུང་ལྔ་བཤད་དོ། །གཞན་ཡང་མངོན་བྱང་དང་ལེགས་གྲུབ་གཉིས་ཀ་ལས་སྔགས་ཀྱིས་འདུལ་བ་གསུངས་པས་ན་དབང་བསྐུར་ཡོད་ཕྱིན་ཆད་དེ་ལ་བརྟེན་ནས་སྐྱེ་བའི་སྔགས་སྡོམ་ཡང་འགྲོ་ལྡོག་མཚུངས་པའི་ཕྱིར་ན་སྡོམ་པ་དང་དམ་ཚིག་གཉིས་ནི་ལྡོག་པས་ཕྱེ་བ་ཙམ་ལས་ངོ་བོ་ཐ་དད་པ་མ་ཡིན་ཏེ་རིགས་ལྔའི་སྡོམ་གཟུང་དག་ལས། སངས་རྒྱས་རིགས་ཀྱི་དམ་ཚིག་ཅུ། །བདག་གི་སེམས་བསྐྱེད་སྡོམ་གཟུང་ནས། །དཀོན་མཆོག་གསུམ་གཟུང་མི་གཏོང་ངོ་། །སངས་རྒྱས་རིགས་ཀྱི་སྡོམ་པ་ཡིན། །ཞེས་ལྔ་ཀ་ལ་དེ་ལྟར་གསུངས་པ་ཡང་ཡོད་དོ། །ད་ནི་སོ་སོའི་རང་བཞིན་དབྱེ་བའི་ཐོག་མར། །ཀུན་གྱི་སྤྱི་དོན་སྔགས་སྡོམ་མ་ཐོབ་དང་། །སྨྱོ་བ་ལ་སོགས་འདུ་ཤེས་རང་བཞིན་དུ། །མི་གནས་པ་ལ་ལྟུང་དང་དངོས་གྲུབ་མེད། །སྔགས་སྡོམ་ལྡན་ཞིང་མ་ཉམས་མ་བཏང་ལ། །ཤེས་པ་རང་བཞིན་རྣལ་དུ་གནས་པ་དེ། །ལྟུང་བ་དང་ནི་དངོས་གྲུབ་གཉིས་ཀའི་སྣོད། །འདི་ལྟར་རྟེན་གྱི་གང་
ཟག་སྡོམ་པས་མ་བསྡམས་པ་རྣམས་ལ་ནི་རང་བཞིན་གྱི་ཁ་ན་མ་ཐོ་བ་ལས་བཅས་འགལ་གྱི་ཆ་ནས་དངོས་གྲུབ་དང་ལྟུང་ཉམས་གཉིས་ཀ་མེད་དེ་སློང་མོས་འཚེ་བ་པ་རྣམས་ལ་མངའ་དབང་དང་དཔྱ་ཁྲལ་གཉིས་ཀ་མེད་པ་བཞིན་ནོ། །དེ་བས་ན་བསྲུངས་ན་གོང་འཕེལ་དུ་སོང་ནས་དངོས་གྲུབ་ཐོབ་ལ། ཉམས་ན་ལྟུང་བའི་སྣོད་ནི་སྔགས་སྡོམ་ཐོབ་ལ་མ་ཉམས་པའི་ཤེས་པ་རང་ལུགས་སུ་གནས་པ་ཡིན་ཏེ། སྨྱོ་བ་དང་འདུ་ཤེས་འཁྲུལ་པ་ཅན་ལའང་ཆགས་འཇག་གཉིས་ཀ་མེད་དེ་སྟོན་པ་འཚོ་ཞིང་གཞེས་པའི་ཚེ་དགེ་སློང་བྱེ་མ་སྐྱེས་སྨྱོ་ནས་སྒྲེན་མོར་བྱེད་པ་ལ་སོགས་ཀྱིས་ལྟུང་བའི་བཞི་ལ་མི་འཇུག་པའི་སྐབས་བསྒྲུབ་པར་མི་ནུས་པ་བག་ཡངས་སུ་གནང་བ་བཞིན་འདིར་ཡང་མཚུངས་ཏེ། མི་དགེ་བ་གཟུགས་ཅན་མཐར་ཐུག་ཏུ་འདོད་པ་བདག་ཅག་གི་སྟོན་པའི་ལུགས་མ་ཡིན་པས་སོ། །དེ་ལ་གང་ཞིག་བཤད་བྱའི་ལྟུང་མཚམས་ངོས་ཟིན་པའི་ཕྱིར་ཀུན་དཀྲིས་དང་སྦོམ་པོའི་ཁྱད་པར་བཤད་པ་ནི། བྱང་ཆུབ་སེམས་ལས་གཞན་པའི་རྩ་ལྟུང་ལ། །ཀུན་དཀྲིས་ཞེས་བྱ་ད་དུང་བྱ་བ་དེ། །བྱེད་འདོད་མ་ལོག་དེ་ལ་འགྱོད་པ་མེད། །ངང་ངོར་ལྟོས་པའི་ངོ་ཚ་ཤེས་པ་དང་། །གཞན་ངོར་ལྟོས་པའི་ཁྲེལ་ཡོད་མེད་པ་སྟེ། །ཆོས་གསུམ་ཚང་པའི་ཀུན་སློང་བྱ་བའི་མཐར། །གཏུགས་པ་དེ་སྲིད་རྒྱུན་ཆགས་ཡོད་གྱུར་ན། །ཀུན་དཀྲིས་ཚང་བའི་ཕམ་པར་གྱུར་པ་ཡིན། །དུས་ཀྱི་བར་ཆད་རྒྱུན་ཆགས་མེད་པའམ། །ཆོས་གསུམ་གང་ལས་ཅིག་ཤོས་མ་ཚང་ན། །བྱ་བའི་ཡན་ལག་མ་ཚང་སྦོམ་པོར་འགྱུར། །དེ་ལ་སྤྱིར་ཀུན་དཀྲིས་ཞེས་བྱ་བ་ནི་བྱང་སེམས་ཀྱི་རྩ་ལྟུང་གི་ཡན་ལག་ཡིན་པ་བྱང་ཆུབ་སེམས་དཔའི་སྡེ་སྣོད་དུ་གཏན་ལ་ཕབ་ཟིན་པ་ལྟར་ལས། འདིར་སྔགས་ཀྱི་ལྟུང་བའི་ཡན་
ལག་ཏུ་སྦྱོར་བའི་ཚུལ། རྩ་ལྟུང་ལྔ་པ་བྱང་ཆུབ་ཀྱི་སེམས་སྤོང་བ་ཀུན་དཀྲིས་ལ་མི་ལྟོས་ཤིང་དེ་ལས་གཞན་པའི་བཅུ་གསུམ་པོ་གང་ཡིན་ཀྱང་ཉེས་པ་དེ་དང་དེ་བྱེད་ཅིང་ད་དུང་བྱེད་འདོད་མ་ལོག་པ་དང་། བྱ་བ་དེ་ལ་ཉེས་དམིགས་སུ་བལྟས་པའི་འགྱོད་པ་མེད་པ་དང་། རང་ངོ་ལ་ལྟོས་པའི་ངོ་ཚ་དང་གཞན་ངོ་ལ་ལྟོས་པའི་ཁྲེལ་ཡོད་མེད་པ་སྟེ་ཆོས་གསུམ་མམ། དེའི་སྟེང་དུ་ཉེས་པ་དེ་དག་ལ་དགའ་ཞིང་མགུ་བ་བསྣན་ནས་ཆོས་བཞིར་བྱེད་པའང་ཡོད་དེ་ནང་གསེས་པ་ཙམ་སྟེ་ཇི་ལྟར་ཡང་དེ་ལྟར་བྱེད་པའི་ཀུན་སློང་ངན་པ་སྐྱེས་པའི་སྐད་ཅིག་མ་གཉིས་པ་ནས་བྱ་བའི་དངོས་གཞི་རྫོགས་པ་ཚུན་ཚད་ན་ཀུན་དཀྲིས་ཆེན་པོའམ་ཕས་ཕམ་པ་ཞེས་བྱ་སྟེ། །དེས་སྡོམ་པ་གཅོད་པས་གཉེན་པོའི་ཕྱོགས་ཕམ་པར་བྱེད་ལ། དེ་ཡང་ཕས་ཀྱི་མི་མཐུན་ཕྱོགས་ནས་ཚུ་རོལ་ཀྱི་མཐུན་ཕྱོགས་ཕམ་པར་བྱས་པའི་དོན་ཏོ། །དེ་སྐད་དུ་རྩེ་མོ་ལས། དེ་ལས་གཞན་པ་བཅུ་བཞི་ནི། །ཕས་ཕམ་པར་ནི་རབ་ཏུ་བཤད། །སྤང་ཞིང་དོར་བར་མི་བྱ་སྟེ། །རྩ་བའི་ལྟུང་བ་ཞེས་བྱའོ། །ཞེས་སོ། །གལ་ཏེ་རྩ་ལྟུང་བསྐྱེད་པའི་ཀུན་སློང་སྐྱེས་པ་ནས་དངོས་གཞི་མ་རྫོགས་པའི་བར་དེར་འདི་ལ་ཉེས་པ་འདི་ལྟ་བུ་ཡོད་དོ་སྙམ་ནས་སྤྱོད་འདོད་ལོག་པ་དང་། ངོ་ཚ་ཁྲེལ་ཡོད་ཀྱི་བློ་སྐྱེས་པ་དང་། དགའ་མགུ་ལོག་པའི་ཡིད་ཅུང་ཟད་སྐྱེས་ཀྱང་སྦོམ་པོར་འགྱུར་བ་ལས་ཀུན་དཀྲིས་མི་ཚང་བས་རྩ་ལྟུང་རྫོགས་པར་མི་འབྱུང་བའི་ཕྱིར་བློ་ལས་སུ་རུང་ན་བསྒྲུབ་པར་མི་ནུས་པ་ཡང་མེད་པས་སོ། །འདི་ལྟར་རྡོ་རྗེ་ཐེག་པའི་རྩ་ལྟུང་ནི་གྲངས་མང་ལ་འབྱུང་ཉེ་བར་སྣང་བས་བསྲུང་དཀའ་འོ་སྙམ་པས་སེམས་ཐིལ་གྱིས་མནོན་པར་བྱས་ལ་བསླབ་ཚིགས་ངེས་པའི་སྒོ་ནས་
བརྗེད་ངེས་པ་དང་ལུང་མ་བསྟན་དུ་འདོར་བ་སྤངས་ནས་བཤགས་སྡོམ་དང་འགྲོགས་པ་གཅེས་སོ། །གཞན་ཡང་ཀུན་དཀྲིས་ཀྱི་ཚེས་བཞིར་དབྱེ་བའི་དབང་དུ་བྱས་ན། བཞི་ཅར་གྱི་ནང་ནས་ཉེས་དམིགས་སུ་བལྟ་བ་ཡོད་ན་ལྷག་མ་གསུམ་ཆར་ཚང་བ་དང་། གཉིས་དང་། གཅིག་ཚང་བ་རྣམས་ཆུང་ངུ་དང་། ཉེས་དམིགས་སུ་མི་བལྟ་བ་ཡོད་ན་ལྷག་མ་གསུམ་ཆར་མེད་ཀྱང་འབྲིང་ཡིན་ལ། ཆེན་པོ་ནི་ཤུགས་ལས་ཤེས་སོ། །དེ་བས་ན་ཤྭ་འོད་མ་བྱུང་བའི་སྔ་རོལ་ནས་ཆུ་ལོན་ཉེ་བར་བསྡོག་པ་བཞིན་རྩ་བ་དང་ཡན་ལག་གི་ལྟུང་བ་མ་བྱུང་བའི་སྔ་རོལ་ནས་རྩ་ལྟུང་བསྐྱེད་པའི་ཀུན་སློང་གི་སོ་མཚམས་ངེས་པར་བྱས་ནས་གཉེན་པོ་བསྟེན་པའི་ཚུལ། དེ་ཡིས་ཤེས་བྱས་རྩ་བ་ཡན་ལག་ཀུན། །ཡིད་ཀྱིས་མི་སློང་ལུས་ཀྱིས་ངོར་མི་བྱ། །ཉིན་དང་མཚན་མོ་ཆ་དྲུག་བགོས་པ་ལ། །ཆ་དེའི་ནང་དུ་རྩ་ལྟུང་བཅུ་བཞི་པོའི། །ཉེས་པ་བྱུང་ངམ་མ་བྱུང་སྔོ་བགྲང་བྱ། །གོས་ན་འགྱོད་པ་བསྒྱེད་ཅིང་ཕྱིར་འཆོས་སེམས། །གོས་པ་མེད་ན་དགའ་བ་སྒོམ་ཞིང་བསྔོ། །སྔོན་ཆད་གོས་སམ་མ་གོས་གང་ཡིན་ཀྱང་། །ཕྱིན་ཆད་སྲོག་ལ་བབས་ཀྱང་ཉེས་བྱས་ཀྱི། །གོས་པར་མི་བྱའི་སྡོམ་སེམས་ཤིན་ཏུ་བསྟེན། །གང་ཚེ་ཆ་དྲུག་གང་ཡང་རུང་བའི་ནང་། །སྔོ་བགྲང་བྱེད་པའི་འདུ་ཤེས་རྨོངས་གྱུར་ན། །ཁ་ན་མཐོ་སྦོམ་པོ་ཞེས་པ་འགྱུར། །དྲུག་ཀ་འདས་ན་སྦོམ་པོ་དྲུག་ཏུ་འགྱུར། །ཞག་དེའི་ཁོང་དུ་ཕྱིར་བཅོས་མ་གྲུབ་ན། །ཕྱི་མའི་སྐྱ་རེངས་དང་པོ་འཆར་བ་དང་། །སྦོམ་པོ་བཅུ་གཉིས་དག་ཏུ་འགྱུར་བར་བཤད། །ཡན་ལག་དམ་ཚིག་ལ་ཡང་དེ་ཡིས་འགྲེ། །དེ་ལ་རྩ་བ་དང་ཡན་ལག་གི་དམ་ཚིག་དང་སྡོམ་པའི་རང་བཞིན་འཆད་པར་འགྱུར་བ་གང་ཡིན་ཀྱང་ཡིད་ཀྱིས་སྤང་བར་མི་བྱ། ལུས་ཀྱི་དོང་པར་མི་བྱ་སྟེ། དེ་ལྟར་མི་བྱེད་པ་ལ་མི་ཤེས་པ་ནི་ལྟུང་བའི་སྒོ་ཡིན་པས་སྔོན་དུ་ལྟུང་མཚམས་ལེགས་པར་
ཤེས་པར་བྱས་ནས་དགྲ་ལ་སོ་འཛུགས་པ་བཞིན་རྣམ་པ་ཐམས་ཅད་དུ་དྲན་པ་ཉེ་བར་གཞག་པའི་སེམས་ཀྱིས་བལྟ་ཞིང་། དེ་ཡང་ལུས་དང་འབྲེལ་བ་རྣམས་ནི་བྱ་བ་དེ་བྱས་ཟིན་པ་དང་རྩ་ལྟུང་དུ་འགྱུར་ལ། ངག་དང་འབྲེལ་བ་རྣམས་ནི་ཕ་རོལ་པོ་གང་རུང་གིས་གོ་བ་དང་། ཡིད་ཁོ་ནས་འགྱུར་བ་རྣམས་ནི་ཐུན་མཚམས་སོ་སོའི་ནང་དུ་གཉེན་པོས་མ་སླེབ་ན་རྩ་ལྟུང་དུ་འགྱུར་པ་ཡིན་ལ། སྤྱིར་ཡང་ལུས་ངག་གི་གྲོགས་སུ་ཡིད་མི་འགྲོ་བ་ནི་མེད་པས་ན་ཞག་གཅིག་ལ་ཆ་དྲུག་ཏུ་བགོས་པའི་ཆ་སོ་སོའི་ནང་དུ་ཕས་ཕམ་པ་ཞེས་བྱ་བ་རྩ་ལྟུང་བཅུ་བཞིའི་སྡེ་ཚན་དང་སྦོམ་པོ་ལ་སོགས་པའི་ཉེས་པས་རང་རྒྱུད་ལ་གོས་སམ་མ་གོས་བརྟག་པར་མ་བྱས་ན་རྣམ་པར་ཤེས་པ་ལས་སུ་མི་རུང་བ་ནི་སེམས་ཅན་གྱི་ཆོས་ཉིད་ཡིན་པས་ལྟུང་བ་མུ་མཐའ་མེད་པར་འཕེལ་བའི་ཉེན་ཡོད་དོ། །དེ་ལྟར་བརྟག་པ་ལས་ཉེས་ལྟུང་ཆ་དང་བཅས་པས་གོས་འདུག་ན་འགྱོད་པ་དྲག་པོ་དང་ཕྱིར་འཆོས་ཀྱི་བསམ་པ་བསྐྱེད། མ་གོས་པ་འདུས་ན་བདག་གི་ལམ་ལ་བར་དུ་ཆད་པ་མེད་པས་གོ་བཅད་སྙམ་དུ་འགའ་བ་བསྒོམ་ཞིང་དགེ་བའི་རྒྱུན་སེམས་ཅན་ལ་བསྔོ། སྔན་ཆད་གོས་མ་གོས་གཉིས་ཀའི་རྗེས་ཤེས་སུ་སྲོག་ལ་བབས་ཀྱང་ཉེས་ལྟུང་དང་འགྲོགས་པར་མི་བྱའོ་སྙམ་དུ་སེམས་བསྐྱེད་པར་བྱའོ། །གལ་ཏེ་ཆ་དྲུག་པོ་གང་རུང་གཅིག་གི་ནང་དུའང་དེ་ལྟར་རྟོག་ཅིང་དཔྱོད་པའི་བསམ་པ་བརྗོད་ན། དྲན་ཤེས་ཀྱི་སྒོ་ནས་སྔོ་བགྲང་བྱེད་པ་ལས་འདས་པའི་སྦོམ་པོ་ཞེས་བྱ་བ་འབྱུང་སྟེ། ཉིན་དང་མཚན་མོ་ལན་གསུམ་དུ། །ཉིན་རེ་བཞིན་ཀྱིས་བཟླ་བར་བྱ། །གང་ཚེ་ཉམས་གྱུར་རྣལ་འབྱོར་པ། །ཁ་ན་མཐོ་སྦོམ་པོར་འགྱུར། །ཞེས་སོ། །དེ་ཡང་སྔོ་བགྲང་བྱེད་པའི་དོན་ཤེས་ཆ་དྲུག་ཀ་ལམ་བྱུང་ན་སྦོམ་པོ་དྲུག་ཏུ་འཕེལ་ལོ། །
དེ་ལྟར་འཕེལ་བ་དེ་ཉིན་ཞག་དེ་ཉིད་ལ་ཕྱིར་བཅོས་མ་གྲུབ་ན་ཞག་ཕྱི་མའི་སྐྱ་རེངས་དང་པོ་འཆར་བ་དང་སྦོམ་པོ་བཅུ་གཉིས་སུ་འགྱུར་བ་ཡིན་པས་གཟབ་པར་བྱའོ། །སྤྱིར་མདོ་སྔགས་ཀྱི་ལམ་ཐམས་ཅད་དུ་དྲན་དང་ཤེས་བཞིན་ཉམས་པས་བདེན་པ་གཉིས་ལ་བརྟེན་པའི་ཡོན་ཏན་ཐམས་ཅད་ཉམས་པར་འགྱུར་བའི་ཚུལ། བཤེས་སྤྲིང་ལས། དྲན་པ་ཉམས་པས་ཆོས་ཀུན་འཇིག་པར་འགྱུར། །ཞེས་སོ། །ཚུལ་དེ་ལྟ་བུས་ཀུན་སློང་ལས་རུང་བར་བྱས་ནས་རྡོ་རྗེ་ཐེག་པའི་ལྟུང་བ་དང་དམ་ཚིག་གི་རྣམ་གྲངས་སྤྱི་དང་བྱེ་བྲག་པ་གཏན་ལ་དབབ་པའི་སྤྱི་དོན་ལ་རྩ་ལྟུང་དང་སྦོམ་པོའི་ལྟུང་བ་གཉིས་ལས། དང་པོ་ནི། ཐོག་མར་བླ་མེད་སྤྱི་ལ་གཅེས་པའི་ཆིངས། །རྩ་ལྟུང་བཅུ་བཞིའི་རབ་དབྱེ་འདི་ལྟར་བརྟག །དང་པོ་དབང་ཐོབ་སློབ་དཔོན་སྨོས་ཅི་དགོས། །སྔགས་རྒྱུད་ཚིགས་བཅད་གཅིག་པ་ཡན་ཆད་བཀྲལ། །ལམ་གྱི་མན་ངག་ཟབ་མོ་སྟོན་གསུམ་ལ། །ཆོས་ཀྱི་འབྲེལ་བའི་བསྙེན་བཀུར་ཁུར་བོར་བརྙས། །དེ་ལ་སྔགས་ཀྱི་དངོས་གྲུབ་ཡོད་མ་ཡིན། །འདི་ལྟར་རྩ་ལྟུང་བཅུ་བཞི་པོ་རྡོ་རྗེ་སྙིང་པོ་རྒྱན་གྱི་རྒྱུད་དང་། དུས་འཁོར་དང་། གཤེད་དམར་དང་། དགྲ་ནག་གི་རྒྱུད་སོགས་ལས་གྲངས་ངེས་པ་གསུངས་ཤིང་། རྒྱུད་སྡེ་ཐམས་ཅད་ཀྱི་དོན་བཏུས་པ་ཉིད་ཀྱི་ཕྱིར་བླ་མེད་སྤྱི་གཅེས་པའི་ཆིངས་ཆེན་པོ་ཡིན་པས་བླ་མ་ལྔ་བཅུ་པ་ལས་ཀྱང་། རྩ་བའི་ལྟུང་བ་བཅུ་བཞི་ནི། །བཀླག་དང་འཛིན་པ་ཉིད་དུ་བྱ། །ཞེས་སོ། །ཅིའི་ཕྱིར་རྩ་ལྟུང་དུ་བོས་སྙམ་ན་ལྗོན་ཤིང་ལ་སོགས་པའི་རྩ་བ་བཏོན་ན་སྡོང་བུ་དང་ཡལ་ག་ནས་འབྲས་བུའི་བར་མེད་པར་བྱེད་པ་བཞིན་དུ་ཡོན་ཏན་ཐམས་ཅད་བསྐྱེད་པའི་རྩ་བ་བཏོན་ན་གོང་མའི་ཆ་བསྐྱེད་པ་ལ་བསྒྲིབ་ཅིང་གནས་འོག་མར་ལྟུང་བས་ན་ལྟུང་བ་ཞེས་བྱ་བ་ཡིན་ནོ། །དེ་ལ་རྩ་ལྟུང་དང་པོ་
བསྐྱེད་པའི་ཡུལ་ནི། རང་ཉིད་ལ་དབང་བསྐུར་རྒྱུད་བཤད་མན་ངག་བསྟན་པ་གསུམ་ཅར་ལྡན་པ་ལ་བཀའ་དྲིན་གསུམ་ལྡན་ཞེས་བྱ་སྟེ་རྒྱུད་ལས། རྒྱུད་བཀྲོལ་དབང་བསྐུར་དེ་ཉིད་བསྟན། །ཞེས་དང་། རིན་ཆེན་སྒྲོན་མ་ལས། སློབ་དཔོན་གང་གིས་དབང་བསྐུར་བ་དང་རྒྱུད་བསྟན་པ་དང་། གང་གི་ཐད་ནས་ལས་ཀྱི་མན་ངག་མནོས་པ་དེ་ཡང་སློབ་དཔོན་ཡིན་ཏེ་གསུམ་པོ་འདི་དག་ཀྱང་ཕྲག་དོག་མེད་ཅིང་ཕན་པར་འདོད་པ་ནི་སློབ་དཔོན་ཡིན་ཏེ། ཞེས་པས་བཀའ་དྲིན་གསུམ་པོ་ཡང་སློབ་མ་ལ་ཕན་པའི་སེམས་ཀྱིས་སྟོང་པའི་བྱང་ཆུབ་སེམས་ལྡན་གང་ཡིན་པ་དེ་ཉིད་ལ་རང་གི་འདོད་དོན་གྲུབ་པས་སྙིང་རིང་བར་གྱུར་ཏེ་ཇི་མི་སྙམ་པའི་སེམས་སྐྱེས་ནས་བསྟི་སྟང་དང་བྲལ་བ་ནི་བླ་མར་འཛིན་པའི་ཁུར་བོར་ནས་བརྙས་པ་སྟེ། ཀོ་ས་ལའི་རྒྱན་ལས། སྙིང་ནས་སློབ་དཔོན་སྨོད་པ་དག །བསྒྲུབས་ཀྱང་འགྲུབ་པར་མི་འགྱུར་རོ། །ཞེས་སོ། །དེ་བས་ན་རྩ་ལྟུང་བསྐྱེད་པའི་ཡུལ་དེ་ལྟ་བུ་ལ་བརྙས་ན་སྨོས་ཅི་དགོས། མདོར་ན་སྔགས་ཀྱི་རྒྱུད་ཚིགས་སུ་བཅད་པའི་དོན་མ་ནོར་བ་བསྟན་པའམ། བསྒོམས་བྱུང་གི་ཤེས་རབ་ལྟ་བུའི་ངོས་ནས་མན་ངག་གི་གནད་མ་འཁྲུལ་བ་ཕྲ་མོ་ཕན་པའི་སེམས་ཀྱི་སྟོན་པ་གང་ཞིག་ལའང་བྱས་པ་དྲིན་དུ་གཟོ་བའི་ཁུར་བོར་ཏེ་བརྙས་པའི་ཉེས་པའང་བཟོད་པར་དཀའ་བའི་ཚུལ་སྔ་མ་ལས། ཚིགས་བཅད་གཅིག་ཙམ་མཉན་པ་ལ། །གང་གི་བླ་མར་མི་འཛིན་པ། །ཁྱི་ཡི་སྐྱེ་གནས་བརྒྱར་སྐྱེས་ནས། །སྨེ་ཤ་ཅན་དུ་སྐྱེ་བར་འགྱུར། །ཞེས་སོ། །འདི་ལྟར་རྩ་ལྟུང་བཅུ་བཞི་པོ་ཐམས་ཅད་ཀྱི་ནང་ནས་ཀྱང་ཉེས་དམིགས་ཤིན་ཏུ་ཆེ་བས་དང་པོར་བཞག་པ་གང་ཞིག་ལས་བརྙས་དམོད་བྱས་པའི་ཚད་དུ་མ་སླེབ་ན་ཡན་ལག་མ་ཆང་བའི་ལྟུང་བ་ཡིན་ལ། རྩ་ལྟུང་གི་ཚད་དུ་སླེབ་ཅིང་ཀུན་
དཀྲིས་ཆེན་པོ་ཚང་བ་ནི་མཚམས་མེད་ལས་ཀྱང་ཉེས་པ་ཆེ་བ་ཡིན་ཏེ། འདི་ལྟར་མཚམས་མེད་དང་དམ་པའི་ཆོས་སྤངས་པས་ཀྱང་གདོད་རྡོ་རྗེ་ཐེག་པའི་སྒོར་ཞུགས་ནས་བླ་མའི་བཀའ་བཞིན་ཉེས་ལྟུང་གིས་མ་གོས་པར་བསྒྲུབས་ན་དངོས་གྲུབ་ཐོབ་པའི་ཚུལ་བདེ་བ་ཆེན་པོའི་རྒྱུད་ལས། ཤད་པ་སྨད་འཚོང་མཚམས་མེད་སྤྱད་པས་ཀྱང་། །རང་རིག་ཤེས་པས་གང་གིས་བསྒྲིབ་མི་འགྱུར། །ཞེས་བཤད་ལ། སྙིང་ནས་སློབ་དཔོན་དམོད་ཅིང་བཤགས་སྡོམ་གྱིས་སོར་ཆུད་པ་མི་བྱེད་པ་དེ་ནི་རྡོ་རྗེའི་དམྱལ་བར་འགྲོ་བའི་ཚུལ་སྒྱུ་འཕྲུལ་དྲྭ་བའི་རྒྱུད་ལས། བླ་མ་ལ་ནི་དམོད་པ་དང་། །ཐུགས་དཀྲུགས་པ་ཡི་ཉེས་པ་ནི། །ཕྱི་ཡི་རྒྱ་མཚོ་ཆེན་པོ་ལས། །ཆུ་དེ་སྐྲ་ཡི་གཏོར་གྱུར་པ། །དེ་ཡི་ཚད་དུ་སྡུག་བསྔལ་མྱོང་། །རྡོ་རྗེའི་དམྱལ་བར་གྲགས་པ་ཡིན། །ཞེས་བཤད་པས་གཟབ་པར་བྱའོ། །གང་ཏེ་སླར་གསོ་བའི་ཐབས་ལ་འབད་ནས་རྣམ་སྨིན་གྱི་ཆ་སྤྱོད་ནུས་ཀྱང་དངོས་གྲུབ་ཐོབ་པ་ལ་ཤིན་ཏུ་འགྱང་བར་བྱད་པའི་ཚུལ་འཆད་འགྱུར་རྣམས་ཀྱིས་ཤེས་པར་འགྱུར་རོ། །གཉིས་པ་སྡོམ་པ་གསུམ་དང་བསླབ་པའི་གནས། །བདེ་བར་གཤེགས་པའི་གནང་བཀག་མཚམས་ལས་འདས། །དེ་བཞིན་མཚན་ཉིད་ལྡན་པའི་བླ་མ་ཡི། །ཡུལ་དུས་ལ་དགོངས་བཀའ་ལ་ཁྱད་བསད་ཡིན། །དེ་ལ་ཡུལ་ནི་སྲིད་པའི་སྡུག་བསྔལ་དང་། བདག་ལྟའི་ས་བོན་དང་། སྤང་བྱ་མཐའ་དག་གི་རྒྱུ་སྤངས་ནས་ལེགས་པ་དང་། སླར་མི་ལྡོག་པ་དང་། མ་ལུས་པར་གཤེགས་པས་ན་བདེ་བར་གཤེགས་པ་སྟེ་རྣམ་འགྲེལ་ལས། རྒྱུ་སྤངས་ཡོན་ཏན་གསུམ་བདེ་གཤེགས། །ཞེས་པའི་བདག་ཅག་གི་སྟོན་པ་བླ་ན་མེད་པ་དེ་ཉིད་ཀྱིས་ཐེག་པ་གསུམ་དུ་འདོམས་པའི་བཀའི་བརྗོད་བྱ་ལས་སྡོམ་པ་གསུམ་དུ་བཅས་པའི་བསླབ་པའི་གནས་ལ་ཤེས་བཞིན་དུ་ཁྱད་དུ་གསོང་འདོད་ཀྱི་ཀུན་སློང་དང་བཅས་པས་འདས་
པར་བྱས་པ་ནི་བདེ་གཤེགས་བཀའ་འདས་ཀྱི་རྩ་ལྟུང་ཡིན་ལ། དེ་དང་རྗེས་སུ་མཐུན་པར་སྡེ་སྣོད་ལེགས་པར་ཤེས་ཤིང་རྒྱུད་སྡེ་དང་བསྟན་བཅོས་ལ་སོགས་རང་དང་གཞན་གྱི་གྲུབ་པའི་མཐའ་རྒྱ་མཚོ་ལྟ་བུའི་ཕ་རོལ་ཏུ་སོན་བའི་བླ་མ་མཚན་ཉིད་དང་ལྡན་པས་ཡུལ་དང་དུས་དང་གནས་སྐབས་ལ་དགོངས་ནས་གསུངས་པའི་བཀའ་ལ་ཁྱད་དུ་གསད་པའང་འདྲའོ། །གསུམ་པ་དབང་གྲལ་གཅིག་ཏུ་འདྲེས་པའི་མཆེད། །བསྐུར་ཞིང་བརྙས་བྱས་དམིགས་ཀྱིས་གསལ་ནའང་། །མཐའ་ཡས་སེམས་ཅན་བདེ་གཤེགས་སྙིང་པོའི་སྤུན། །ཡིན་ཕྱིར་རིང་དང་ཉེ་བའི་མཆེད་ལའང་མཚུངས། །དེ་ལ་བླ་མ་དང་དཀྱིལ་འཁོར་གཅིག་གིས་བསྡུས་ན་རིགས་གཅིག་པའི་སྤུན་དུ་འགྱུར་བས་འདྲེས་པའི་མཆེད་ཅེས་བྱ་བ་ཡུལ་གཉན་ཏེ་གསལ་བཀྲའི་དོན་འཆད་པས་ཀྱང་ཤེས་ལ། སངས་རྒྱས་ཡེ་ཤེས་ཞབས་ཀྱི་རིམ་པ་རྣམ་པར་གཞག་པ་ལས་ཀྱང་། དཀྱིལ་འཁོར་སློབ་དཔོན་རིག་མ་གཅིག །དབང་བཞི་ངག་གི་བྱེ་བྲག་གིས། །ཉེ་དང་ཁྱད་པར་བྱེ་བྲག་གོ །ཞེས་དང་། ཤཱནྟི་བས་ཀྱང་སྤུན་ཞེས་བྱ་བ་ནི་གང་དང་སློབ་དཔོན་གཅིག་ལ་དཀྱིལ་འཁོར་དུ་དབང་ཐོབ་པ་སྟེ། དེ་ལ་ཕྲག་དོག་ལ་སོགས་པའི་རྒྱུས་སྐྱོན་རྣམས་བརྗོད་པར་མི་བྱའོ། །ཞེས་དམིགས་ཀྱིས་བསལ་བ་དང་མཐུན་པར་སློབ་དཔོན་ཡེ་ཤེས་སྙིང་པོས་ཀྱང་བཤད་ལ། གཞན་ཡང་མཐའ་ཡས་པའི་སེམས་ཅན་ཐམས་ཅད་བདེ་གཤེགས་སྙིང་པོའི་རིགས་གཅིག་གིས་བསྡུས་པས་སྤྱིའི་མཆེད་དང་། རྒྱལ་བའི་བསྟན་པ་ལ་ཞུགས་སོ་ཅོག་བསླབ་པའི་གནས་ཆེ་ཕྲ་གང་རུང་ཞིག་དང་ལྡན་པས་རིང་བའི་མཆེད་དང་། རྡོ་རྗེ་ཐེག་པའི་སྡོམ་པ་ལ་གནས་པ་ཉེ་བའི་མཆེད་དུ་བསྡུ་ཤིང་མདོར་ན་བྱང་ཆུབ་སེམས་དཔའི་སྡེ་སྣོད་གཉིས་སུ་སེམས་ཅན་ཐམས་ཅད་
ཕ་མ་དང་སྤུན་གྱི་རང་བཞིན་དུ་མ་གྱུར་བ་མེད་པས་བརྙས་པ་སྤང་བའི་ཚུལ་ངན་སོང་སྦྱོང་རྒྱུད་ལས། རྡོ་རྗེ་སྤུན་དང་སྲིང་མོ་དང་། །རྡོ་རྗེ་མ་རྣམས་ཉིད་ལ་ནི། །རྣལ་འབྱོར་ཅན་གྱིས་བརྙས་མི་བྱ། །ཞེས་སོ། །འོ་ན་དྲི་མེད་འོད་ལས། རྡོ་རྗེའི་སྤུན་རྒན་པོའམ། གཞོན་ནུ་ནུའམ། བསླབ་པ་དང་ལྡན་པ་ལ་རབ་ཏུ་ཁྲོ་བར་བྱེད་ནའོ། །ཞེས་པས་སེམས་ཅན་ཐམས་ཅད་བསླབ་པ་དང་ལྡན་པ་མ་ཡིན་པས་སོ་ཟེར་ན། ལས་དང་པོ་པའི་སེམས་ཀྱི་ཀུན་ནས་དཀྲིས་པ་ཅན་ལ་རྩ་ལྟུང་འབྱུང་བའི་ཡུལ་དེ་ཙམ་དུ་བསྟན་གྱིས་གཞན་དུ་བྱང་ཆུབ་སེམས་དཔའི་སྡེ་སྣོད་ལས་སེམས་ཅན་ལ་ཁྲོ་བ་འགོག་པའི་ཚུལ་ཇི་ལྟ་བུ་བསྟན་བསམ་དགོས་ལ། ཁྱད་པར་བསྐྱེད་རིམ་གྱི་དམ་ཚིག་ཏུའང་སྣོད་བཅུད་ལྷ་དང་ལྷ་མོར་བལྟ་དགོས་ན་མ་འོངས་པ་ན་སངས་རྒྱས་སུ་འགྱུར་བའི་སེམས་ཅན་ལའང་བརྙས་པ་སྤང་དགོས་པ་སྨོས་ཅི་དགོས་ཏེ་གསལ་བཀྲ་ལས། མཐའ་ཡས་སེམས་ཅན་རང་རིག་ཕྱིར། །གང་དག་བདག་ལས་གཞན་མེད་ཅིང་། །བདེ་གཤེགས་སྙིང་པོའི་སྤུན་ཡིན་ཕྱིན། །མ་འོངས་སངས་རྒྱས་རང་བཞིན་ན། །སྤྱི་སའི་མཆོད་དེ་ཕ་ཚན་བཞིན། །སངས་རྒྱས་ཆོས་ཞུགས་རིང་བ་དང་། །ལྟ་སྤྱོད་མཐུན་པ་ཉེ་བར་བཤད། །ཕ་གཅིག་དམ་ཚིག་ནང་འདྲེས་པ། །ཞེས་དང་། ཡེ་ཤེས་གྲུབ་པ་ལས། སེམས་ཅན་ཀུན་གྱི་ཡིད་ཁྱབ་བ། །རྡོ་རྗེ་སེམས་དཔའ་རང་ཉིད་བཞུགས། །དེ་ལྟ་བས་ན་རྣལ་འབྱོར་གྱི། །དབང་པོས་གང་ལའང་བརྙས་མི་བྱ། །ཅེས་དང་། ཡེ་ཤེས་ཞབས་ཀྱིས། བསྟན་དང་རྡོ་རྗེའི་ཐེག་པ་ལ། །ཞུགས་པ་ཐམས་ཅད་སྤུན་དུ་བརྗོད། །ཀུན་ཀྱང་ཡེ་ཤེས་དང་ལྡན་པས། །རྡོ་རྗེ་སེམས་དཔའ་རྡོ་རྗེའི་སྤུན། །ཞེས་སོ། །བཞི་པ་སྦྱོར་བ་རྩུབ་པའི་སེམས་ཅན་ཞིག །མཐོང་བའི་ཆོས་ལ་ལས་ཀྱིས་མནར་གྱུར་པ། །དེ་ལ་དགའ་བ་
བསྒོམས་ནས་བྱམས་པའི་སེམས། །གཏོང་བ་བྱང་ཆུབ་སེམས་དཔར་རབ་ལྕི་ན། །གཞན་བདེ་བྲལ་བར་འདོད་ལ་སྨོས་ཅི་དགོས། །དེ་ལ་རྩ་ལྟུང་བཞི་པའི་ངོ་བོ་ནི། སེམས་ཅན་ཐམས་ཅད་ལ་བྱམས་པའི་སེམས་བླ་ན་མེད་པ་བུ་གཅིག་པ་བཞིན་དུ་བལྟས་ནས་བློས་ནམ་ཡང་འདོད་དུ་མི་རུང་བ་ཞིག་ཡིན་པ་ལ། དེ་ལས་ལོག་ནས་འདི་དག་ནི་བདེ་བ་དང་བྲལ་ཀྱང་རུང་ངོ་སྙམ་ནས་སེམས་ཅན་བློས་སྤངས་པ་སྟེ། རྡོ་རྗེ་སྙིང་པོ་རྒྱན་ལས། བྱམས་སེམས་མེད་པར་སེམས་ཅན་སྤངས། །ཞེས་སོ། །ད་ལྟ་བྱམས་པ་བསྒོམ་པར་རློམས་པ་རྣམས་ཀྱིས་ཀྱང་སེམས་ཅན་བསམ་སྦྱོར་ཤིན་ཏུ་མི་བསྲུན་པ་ཞིག་མཐོང་ཆོས་སུ་སྡུག་བསྔལ་གྱིས་མནར་བ་མཐོང་ན་དེ་ནི་བྱམས་པ་བསྒོམ་པའི་ཡུལ་ལས་ལོགས་སུ་བྱས་ནས་དེ་ལ་ཡི་རང་བའི་རྣམ་འགྱུར་སྟོན་པ་མང་དུ་སྣང་བ་ནི་བྱམས་པའི་མི་མཐུན་ཕྱོགས་ཆེན་པོ་ཡིན་ལ། འདི་ལྟར་ན་བྱམས་པ་བསྒོམ་པའི་ཡུལ་མི་རྙེད་དེ། །སྡུག་བསྔལ་གྱིས་མནར་ཆེས་པའི་སེམས་ཅན་ལ་སྤྱི་མཐུན་དུ་བྱམས་པ་དང་སྙིང་རྗེ་སྐྱེ་སླ་བ་དེ་ཡང་དེའི་རྒྱུ་བསྒྲུབ་པ་མ་མཐོང་བས་ཡིན་གྱིས། འདི་ལྟར་བདག་ཅག་གིས་གལ་ཏེ་དམྱལ་བ་པའི་སེམས་ཅན་མཐོང་ཞིང་དེས་དང་པོར་རྒྱུ་གང་གིས་དམྱལ་བར་སྐྱེ་བའི་བསམ་སྦྱོར་མ་རུངས་པ་དེ་ཡང་མངོན་སུམ་དུ་མཐོང་ན་རྒྱུ་དེ་ལྟ་བུ་ལ་འབྲས་བུ་འདི་ལྟ་བུ་རུང་ངོ་སྙམ་པ་འཐོབ་དགོས་པའི་ཕྱིར་རོ། །དེ་བས་ན་ཕ་རོལ་གྱི་སྤྱོད་པའི་སྒོ་ནས་བྱམས་པའི་སེམས་ལ་བཏང་བཞག་གཉིས་སུ་མི་བལྟ་བར་འདི་དག་བདེ་བ་དང་བདེ་བའི་རྒྱུ་དང་ལྡན་ན་ཅི་མ་རུངས་བསྙམ་པའི་ཁུར་བླངས་ནས་རྩ་ལྟུང་བསྲུང་དགོས་ཏེ། རྒྱུད་ལས། སེམས་ཅན་ཀུན་ལ་ཕན་པའི་སེམས། །ནམ་ཡང་གཏོང་བར་
མི་བྱའོ། །ཞེས་བཤད་པས་སོ། །ལྔ་པ་གཞན་དོན་གཉེར་བའི་བྱང་ཆུབ་སེམས། །སྤངས་པའི་མོད་ལ་སྨན་སེམས་གཏོང་བའི་ཕྱིར། །ཀུན་དཀྲིས་ཚང་བའི་ཕམ་པར་གྱུར་པ་དང་། །གནང་བའི་སྐབས་བདུན་མིན་པར་ཁུ་བ་ཕྱུང་། །འདི་ལྟར་སེམས་ཅན་ཐམས་ཅད་ཀྱི་དོན་དུ་སངས་རྒྱས་བསྒྲུབ་པར་བྱའོ་སྙམ་དུ་དམ་འཆའ་བའི་བསམ་པ་བཟང་པོ་དེ་བཏང་ནས་བདག་ཉིད་མཐུ་ཆུང་བའི་ཁུར་བླངས་ཏེ་ཞི་བདེའི་སེམས་སྐྱེས་ནས་དེ་དང་འཛིན་སྟངས་འགལ་བ་དང་། རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་སངས་རྒྱས་འདོད། །ཅེས་པས་མཚུངས་ལྡན་གྱི་སེམས་ཁྱད་པར་ཅན་གྱིས་གཞན་སྡུག་བསྔལ་རྒྱུ་བཅས་དང་བྲལ་བར་འདོད་པ་སྙིང་རྗེ་དང་བཅས་པའི་སྨོན་སེམས་བཏང་བ་སྟེ། འདི་ནི་སེམས་ཅན་ཡལ་བར་འདོར་བའི་བློ་སྐྱེས་པ་ཙམ་ནས་ཡན་ལག་གཞན་མཚང་ཡང་ཕས་ཞེས་བྱ་བ་བྱང་ཆུབ་སེམས་ཀྱི་མི་མཐུན་ཕྱོགས་ཀྱིས་རང་ཉིད་ཕམ་པར་བྱས་པས་ན་ཕས་ཕམ་པ་ཞེས་བྱ་བའི་རྩ་ལྟུང་ཡིན་ན། །དེ་ལྟར་སྨོན་སེམས་དེའི་རྟེན་སྤངས་པ་ནི་གནང་བའི་སྐབས་བདུན་མ་ཡིན་པར་ཁུ་བ་ཕྱུང་བ་སྟེ། གསང་བའི་དབང་དང་གསུམ་པ་དང་། །རོ་མཉམ་པ་དང་ལྷ་མཆོད་དང་། །རིགས་རྒྱུད་སྤེལ་དང་རིལ་བུ་དང་། །འཆི་བལྟས་བརྟག་པའི་དུས་ཡིན་ཏེ། །ཞེས་སོ། །དྲུག་པ་ཐེག་པ་གསུམ་ལྟོས་རྒྱལ་བའི་བཀའ། །དཔྱས་ཤིང་སྟོན་པས་མ་གསུངས་ཞེས་སྨྲ་དང་། །ལས་དང་དངོས་གྲུབ་རྒྱུར་རུང་བསྟན་བཅོས་གཞན། །རྗེས་གནང་བྱིན་བརླབས་བཀའ་རུམ་བལྟས་བརྙས། །དེ་ལ་རང་ངམ་གཞན་གྱི་ཁྱད་པར་ནི་རང་སངས་རྒྱས་པ་དང་། གཞུན་མུ་སྟེགས་པ་ལ་འདོད་པ་དང་། ཡང་རང་གསང་སྔགས་པ་དང་། གཞན་ཕ་རོལ་ཏུ་ཕྱིན་པའི་ཐེག་པར་འདོད་ཚུལ་གཉིས་ལས། དང་པོ་ལྟར་ན། མུ་སྟེགས་ཅན་ལ་སྨད་བྱས་ན། །རྣམ་པར་
སྣང་མཛད་རིང་བའི་རྒྱུ། །ཞེས་ཨཱ་ཙརྱ་ཀ་།།།པས་འདྲེན་པ་ལྟར་ཡང་འཐད་དེ་བྱང་ཆུབ་སེམས་དཔའི་སྡེ་སྣོད་གཉིས་ལས་ཕ་རོལ་ཏུ་ཕྱིན་པ་ལས་ནི་ངག་གི་ཉེས་པ་དང་། གཞན་མི་དད་པའི་ཆ་ཐམས་ཅད་བསྲུང་ཞིང་སྔགས་སུ་ནི་སྣང་བ་དག་པ་རབ་འབྱམས་སུ་སློབ་པ་ཁོ་ན་ཡིན་པས་སོ། །དེ་སྐད་དུ་ཏིང་ངེ་འཛིན་རྒྱལ་པོ་ལས། གང་ཞིག་ཆོས་འདི་མཐོང་ནས་ཆགས་བྱེད་ཅིང་། །ཆོས་མ་ཡིན་པ་ཐོས་ནས་ཁོང་ཁྲོ་བ། །ང་རྒྱལ་རྒྱགས་པས་བཅོམ་ནས་ལོག་པ་ཡིས། །ང་རྒྱལ་དབང་གིས་སྡུག་བསྔལ་རྗེས་སུ་མྱོང་། །ཞེས་པ་ལྟར་རོ། །འོ་ན་སློབ་དཔོན་ཨཱརྱ་དེ་ཝ་ལ་སོགས་པས་ཀྱང་རྩ་ལྟུང་ཉམས་སུ་བསྟར་རོ་ཟེར་ན། དེ་ནི་བསྒྲུབ་པར་བྱ་བའི་དམ་ཚིག་ཁོ་ན་ཡིན་ཏེ། མདོ་སྡེའི་རྒྱན་ལས། རིག་པའི་གནས་ལྔ་དག་ལ་མཁས་པར་མ་བྱས་ན། །ཞེས་པ་ལ་སོགས་པ་ལྟར་ལྷག་པའི་ཐུགས་རྗེ་ཁྱད་པར་ཅན་དང་ལྡན་པས་ཡང་དག་པའི་དོན་ལ་ཕྱོགས་པ་དང་མ་ཕྱོགས་པའི་རིགས་པའི་ཁྱད་པར་གྱི་མཚོན་ཆ་རྣོན་པོས་གྲུབ་མཐའ་ངན་པ་ཅན་ལ་ཆར་གཅོད་རྗེས་འཛིན་གྱི་སྐབས་གཉིས་བྱིན་ནས་བསྟན་པ་དང་སེམས་ཅན་གཉིས་ཀ་ལ་བྱ་བ་རླབས་པོ་ཆེ་བྱས་པའི་ཕྱིར་རོ། །དེ་ལྟར་མི་ནུས་པའི་གང་ཟག་གིས་མུ་སྟེགས་ཅན་གྱི་གྲུབ་མཐའ་ལའང་བཏང་སྙོམས་སུ་བྱ་བ་ལས་སྨད་པར་མ་གསུངས་ཏེ་ཡེ་ཤེས་ཐིག་ལེར། མུ་སྟེགས་པའམ་ཉན་ཐོས་པ། །དམན་ཀྱང་དེ་ལ་བརྙས་མི་བྱ། །ཅེས་སོ། །འདི་ལྟར་བདེ་གཤེགས་སྙིང་པོའི་ཁྱབ་བྱེད་ཅན་དུ་མ་ཟད་མི་དགེ་བའི་ཕྱོགས་ལས་ཤིན་ཏུ་བྱོལ་ནས་ངེས་འབྱུང་གི་ལམ་དཀར་ཆོས་རྣམས་ལས་མཐོ་རིས་བསྒྲུབ་པ་གཅེར་བུ་བའི་བུ་བདེན་སྨྲ་ལ་སོགས་པ་དང་། མཐའ་བྲལ་གྱི་ལྟ་བ་གྱ་ཚོམ་ཅན་འདོད་པ་ཚངས་པ་ལ་
སོགས་པའི་རྣམ་པར་རིག་པ་ཅན་དེ་དག་གིས་ཀྱང་མངོན་མཐོའི་ལམ་རྟེན་འཚོལ་བ་སོགས་ལེགས་པར་དཔྱད་པའི་གཞུང་ཡང་ཡོད་པ་གང་ཞིག་ཐལ་འགྱུར་རྣམ་པར་དག་པས་ཚར་གཅོད་ནུས་པ་བྱུང་ན་སློབ་དཔོན་ཆེན་པོ་དཔའ་བོའི་ཞབས་དང་། །སངྒྷ་ཨཱ་ཙརྱ་བཞིན་བློ་ནུས་ཁྱད་པར་ཅན་དང་ལྡན་པ་ཡིན་པས་སྐྱེ་བོ་ཕལ་པ་བ་ལང་ལྟ་བུ་ལས་ཆེས་ལྷག་པ་ཡིན་ནོ། །གཉིས་པ་ནི་རྩ་ལྟུང་གི་དཀའ་འགྲེལ་ལྟར་ཡིན་ཡང་ཕ་རོལ་ཏུ་ཕྱིན་པ་བཀའ་མ་ཡིན་ཟེར་བ་ལ་སོགས་པ་སྔོན་རྒྱ་གར་དུ་ཉན་ཐོས་ཀྱི་བསྟན་པ་དར་བའི་ཚེ་བྱུང་ཡང་ད་ལྟ་བོད་ན་དེའི་ཉེས་པ་འབྱུང་བ་ཉུང་ལ། འོན་ཀྱང་ཐེག་པ་གསུམ་གང་རུང་ཞིག་ལ་དམིགས་ནས་འདི་ནི་སངས་རྒྱས་ཀྱི་གསུངས་པ་མ་ཡིན་ནོ་ཞེས་སྙིང་ཐག་པ་ནས་བསྐུར་བ་འདེབས་པ་རྣམས་ལ་རྩ་ལྟུང་འདི་འབྱུང་སྟེ། ནམ་མཁའི་སྙིང་པོའི་མདོ་ལས། གང་ཡང་བྱང་ཆུབ་སེམས་དཔའ་ཉན་ཐོས་ཀྱི་ཐེག་པ་བཤད་པའམ། རང་སངས་རྒྱས་ཀྱི་ཐེག་པ་བཤད་པའམ། ཐེག་པ་ཆེན་པོའི་ཆོས་བཤད་པ་སྤོང་ཞིང་འགོག་ཏུ་འཇུག་པ་འདི་ནི་རྩ་བའི་ལྟུང་བ་གཉིས་པའོ། །ཞེས་རང་ལུགས་ཀྱི་གཉིས་པར་བསྡུ་བ་ཡིན་ནོ། །ཁྱད་པར་དུ་ཁ་ཅིག་རང་ཉིད་མོས་པའི་རྒྱུད་ལུང་ལ་སོགས་ཞེན་པའི་ཡུལ་དང་འབྲེལ་བ་གང་ཡིན་པ་རྣམས་རྒྱུད་དང་བཀའ་ཡིན་ལ། ད་ལས་གཞན་དུ་བརྡའ་དང་། བགྲོས་མ་མཐུན་པ་དག་ལ་བོད་ཀྱི་བྱས་པའོ་ཟེར་བ་ནི་རྩ་ལྟུང་འདི་ལ་རིན་ཐང་ཆེན་པོ་བཅལ་ནས་ཆེ་ཐང་དུ་བྱས་པ་ཡིན་ཏེ། སྔོན་གྱི་དུས་ན་བྱོན་པའི་ལོ་པཎ་ཆེན་པོ་ཆོས་ཉིད་ཀྱི་བདེན་པ་གཟིགས་པ་དག་གིས་ལུང་འབྲེལ་གང་ཟག་གི་དབང་པོ་དང་བཅས་དོན་ལ་རྟོན་པ་གཙོ་བོར་བྱས་ནས་ལེགས་པར་བསྒྱུར་བའི་རྒྱུད་སྡེ་ཟབ་མོ་དག་ལ་གང་ཟག་རང་
རྒྱུད་པའི་ལུགས་ཀྱིས་ཚིག་ལ་གྲིམས་ཤིང་རྣམ་པར་རྟོག་པ་དང་བཅས་པས་དཔྱད་པར་མི་ནུས་ཏེ། དཔལ་སངས་རྒྱས་ཐམས་ཅད་ཀྱི་དགོངས་པ་འདུས་པ་ལས། གསང་སྔགས་ཀྱི་ངོ་བོ་དེ་ནི་གང་གི་བློ་ཞིབ་པ། ཆེས་ཞིབ་བ། ཤིན་ཏུ་ཟབ་པ། ཆེས་ཟབ་པས་བལྟ་བར་བྱའོ། །ཞེས་དང་། ཆེས་ཟབ་པ་ནི་གང་ཞེ་ན། གང་ལ་ལ་དག་ཆོས་ཐམས་ཅད་ལ་མུ་དང་། གཏིང་དང་། མཐའ་དང་། དབུས་འཚོལ་ཞིང་འབྱེད་པ་དག་ཡོད་དེ། ད་ནི་བློ་ཟབ་པ་ཆེས་ཟབ་པ་ཞེས་མི་བྱའོ། །ཐུག་པ་ཉིད་དུ་ཐུག་པ་ཞེས་བྱའོ། །གང་འཁྲུལ་པ་དག་སྨིག་རྒྱུ་ལ་ཆུར་འདུ་ཤེས་ཏེ་བསྙེག་པའམ། ལྡོངས་པ་དག་ནམ་མཁའ་ལ་མཐའ་འཚོལ་བ་བཞིན་ཆོས་ཐམས་ཅད་ཀྱི་མུ་དང་། གཏིང་དང་། མཐའ་དང་། དབུས་བཙལ་བས་ཀྱང་མི་རྙེད་ལ་དབྱེ་བར་ཡང་མེད་དོ། །ལངྐའི་བདག་པོ་འོན་ཏང་ཆོས་ཐམས་ཅད་ལ་མུ་དང་གཏིང་མེད་ལ། མཐའ་དང་དབུས་མེད་པར་ཆུབ་པ་གང་ཡིན་པ་དེ་ནི་བློ་ཟབ་པ། ཆེས་ཟབ་པ་ཞེས་བྱའོ། །དེའི་ཕྱིར་གསང་སྔགས་ཀྱི་ངོ་བོ་ནི་རབ་ཏུ་དང་ག་པར་དཀའ་བའི་ཕྱིར་བློ་ཞིབ་པ། ཆེས་ཞིབ་པ། ཆེས་ཟབ་པས་བལྟ་བར་བྱའོ། །ཞེས་སོ། །སྤྱིར་ཡང་བཀའ་ཐམས་ཅད་ཞལ་ནས་གསུངས་པར་མ་ངེས་ཏེ། རྗེས་སུ་གནང་བ་དང་། བྱིན་གྱིས་བརླབས་པ་ལ་སོགས་པས་བསྟན་པ་བཞིན་ནོ། །དེ་བས་ན་དེ་བཞིན་གཤེགས་པ་རྣམས་ཀྱི་བྱིན་རླབས་ནི་གདུལ་བྱ་སྐལ་བ་དང་ལྡན་པ་རྣམས་ལ་སྣང་བ་ཡིན་པའི་ཚུལ་སྡུད་པ་ལས། །རྒྱལ་བའི་ཉན་ཐོས་པ་དག་ཇི་སྙེད་ཆོས་འཆད་ཅིང་། །ཞེས་པ་ལ་སོགས་པས་བསྟན་ཅིང་། དེ་སྐད་དུ་སྔ་མ་ལས་ཀྱང་། ལངྐའི་བདག་པོ་དེ་བས་ན་གསང་སྔགས་ནི་རང་བཞིན་གྱིས་སྣང་བར་ཟད་ལ། སྐྱེས་བུ་དམ་པ་རྣམས་ཀྱིས་བྱིན་རླབས་ཀྱིས་སྟོན་པར་ཟད་དོ། །ཞེས་པས་
དུད་པ་དང་། ཤེས་རབ་དང་། ཏིང་ངེ་འཛིན་དང་། རྟོགས་པ་དང་། དེའི་གྲོགས་སུ་གྱུར་པའི་སྡོམ་པ་ལ་གནས་པའི་དགེ་བའི་གཤེས་གཉེན་ཁྱད་པར་ཅན་རྣམས་ནི་སངས་རྒྱས་དང་འདྲ་བར་དེ་བཞིན་གཤེགས་པ་ཉིད་ཀྱིས་ཡང་ཡང་བཀའ་སྩལ་ན་དེ་ལྟ་བུ་ལ་ངན་སེམས་བསྐྱེད་ནས་ཚོས་ལ་སྨོད་པ་ནི་བཟོད་པར་དཀའ་བ་ཡིན་ནོ། །དེ་བས་ན་ལས་དང་དངོས་གྲུབ་ཀྱི་རྒྱུར་རུང་ན་བསྟན་བཅོས་ཡིན་ཡང་རྒྱལ་བའི་བཀའ་དང་ཁྱད་པར་མེད་དེ་དགོས་པའི་དོན་འགྲུབ་པ་མངོན་སུམ་པའི་ཕྱིར་རོ། །གལ་ཏེ་བདག་ཅག་གིས་ཉམས་སུ་བསྟར་གན་རྒྱལ་བའི་བཀའ་དམ་པ་ཡིན་གྱིས། །གཞན་གྱི་ཚུལ་ནི་རྙོག་པ་དང་བཅས་པའོ་སྙམ་པས་སེམས་ཟིལ་གྱིས་ནོན་པ་དེས་ནི་ཐོག་མ་ཉིད་ནས་རང་རྒྱུད་རྩ་ལྟུང་གིས་སྤགས་པས་བསྒྲུབ་པར་བྱ་བ་གང་ཞིག་བཀའ་མ་ནོར་བ་ཡིན་ཀྱང་དངོས་གྲུབ་ཐབ་པ་ལ་སྒྲིབ་པའི་ཚུལ་གཏོར་རྒྱུད་ཆེན་པོ་ལས། །རྒྱུད་ལུང་གཅིག་གིས་གཅིག་ལ་བསྐུར། །དམ་ལས་ཉམས་པས་མཐུ་བྱིན་མེད། །ཅེས་སོ། །དེ་བས་ན་སངས་རྒྱས་ཀྱི་བསྟན་པ་སྤྱི་དང་ཁྱད་པར་བྱང་ཆུབ་སེམས་དཔའི་སྡེ་སྣོད་རྣམ་པ་གཉིས་ནི་རྣམ་གྲངས་རྒྱ་ཆེ་ཞིང་འགྲོ་བའི་རྣམ་རིག་དང་མཐུན་པའི་གདུལ་ཚུལ་བསམ་གྱིས་མི་ཁྱབ་པར་སྟོན་པ་གང་ཞིག་ལའང་ངང་གི་འདུན་པ་དང་མཐུན་པར་འཇུག་པས་དུས་མྱུར་བུལ་ཙམ་གྱིས་བྱང་ཆུབ་པར་འགྱུར་པ་ལས་སེམས་ཅན་གྱི་རྒྱུད་ཆུང་མི་གསོན་པའི་ཚུལ་ལ་མཐུན་པས་སོ་སོ་རངས་ན་བདེན་པ་ཡིན་ནོ། །དེའི་ཕྱིར་རང་ཡིད་གང་ཆེས་པ་ལ་དམ་པར་གཟུང་དུ་རུང་གིས་གཞན་ལ་ཀུན་སློང་ངན་པ་དང་། བསྐུར་བ་གདབ་པ་ནི་ནམ་ཡང་མི་རུང་སྟེ་རྒྱུད་ལས། མོས་པ་དུ་མའི་སེམས་ཅན་ལ། །སྤྱོད་པ་སྣ་ཚོགས་སྟོན་མཛད་དེ། །སྣ་ཚོགས་ཚུལ་གྱིས་གདུལ་བྱ་ལ། །ཐབས་ནི་སྣ་ཚོགས་སྟོན་པ་ཡིན། །ཟབ་མོའི་ཆོས་ནི་སྟོན་པ་ལ། །གས་ཏེ་མོས་པར་མ་གྱུར་ཀྱང་། །དམོད་པ་དག་ནི་མི་བྱ་སྟེ། །ཆོས་ཉིས་
བསམ་མི་ཁྱབ་དྲན་བྱ། །ཞེས་སོ། །བདུན་པ་དབང་གི་ཆོ་ག་མ་བྱས་དང་། །མ་རྫོགས་ཉམས་དང་སྨོད་ངན་ཟབ་མོས་སྐྲག །འདུལ་བའི་དུས་སྐབས་གནས་ཀྱིས་བསྐལ་པ་ལ། །གསང་སྔགས་ཟབ་མོའི་དོན་དང་དགོངས་སྤྱོད་བསྒྲགས། །དམིགས་བསལ་ཡིན་གྱིས་རྗེས་གནང་བཟླས་ལུང་བྱང་། །གསང་སྒྲོག་ངོས་འཛིན་འདིར་ནི་སྣོད་ལ་བརྟག །དེ་ལ་གསང་བསྒྲོག་པའི་ཡུལ་ནི། ལོག་པར་བལྟ་བ་ལ་གོམས་པར་བྱས་པས་སྣོད་རུང་མ་ཡིན་པ་དང་། ཆོ་ག་མ་བྱས་པ་སྟེ་བུམ་དབང་མ་ཐོབ་པ་ལ་བསྐྱེད་རིམ་སྟོན་པ་དང་། ཆོ་ག་མ་རྫོགས་པ་སྟེ། དབང་གོང་མ་རྣམས་མ་ཐོབ་པ་ལ་རྫོགས་རིམ་ཟབ་མོ་སྟོན་པ་དང་། ཉམས་པ་སྟེ་རྩ་ལྟུང་བྱུང་ཀྱང་ཕྱིར་མི་འཆོས་ཤིང་ཁེ་ཉེན་ལ་ངེས་པར་ཡིད་ཆེས་པའི་ཤེས་རབ་མེད་པ་དང་། སྣོད་ངན་པ་སྟེ་དབང་ཐོབ་ཀྱང་གསང་སྔགས་ཟབ་མོའི་ལྟ་སྤྱོད་ལ་སྐྲག་པ་སྐྱེ་བ་དང་། དུས་ཀྱིས་བསྐལ་བ་སྟེ་ཟབ་མོ་སྟོན་མ་རན་པ་དང་། གནས་ཀྱི་བསྐལ་པ་སྟེ་དགག་བྱ་དམིགས་བསལ་ཡོད་པ་རྣམས་ལ་གསང་སྔགས་ཟབ་མོའི་ཐུན་མོང་མ་ཡིན་པའི་དགོངས་པ་དང་སྤྱོད་པ་བསྐྲགས་པ་སྟེ་རྡོ་རྗེ་སྙིང་པོ་རྒྱན་ལས། སྣོད་མི་རུང་ལ་གསང་བ་བསྟན། །ཞེས་སོ། །བརྒྱད་པ་གཟུགས་ཕུང་རྣམ་སྣང་ལ་སོགས་ལྔ། །དེ་བཞིན་སྐྱེ་མཆེད་ལྷ་སྐུར་མི་ཤེས་པ། །སྡུག་བསྔལ་བདེན་པར་བསྒྲུབ་པའི་རྟོག་གེའི་བློས། །བརྙས་དང་དཀའ་ཐུབ་མཐུ་ཡིས་ལྷག་པར་གདུང་། །དེ་ལ་རྡོ་རྗེ་ཐེག་པའི་རང་ལུགས་ནི་ཕུང་པོ་ལྔ་རྒྱལ་བ་ལྔ་དང་། འབྱུང་བ་ལྔ་ཡུམ་ལྔ། སྐྱེ་མཆེད་སེམས་དང་སེམས་མའི་རང་བཞིན་དུ་བཞུགས་པ་ལ་དེ་བཞིན་དུ་ཤེས་པས་ནང་གི་སྦྱིན་སྲེག་དང་། ཚོགས་འཁོར་ལ་སོགས་པས་མཆོད་ཅིང་། འདོད་ཡོན་གྱིས་མཉེས་པར་བྱ་རྒྱུ་ལ།
ཀུན་འབྱུང་གིས་བསྐྱེད་པའི་སྡུག་བསྔལ་བདེན་པའི་རང་བཞིན་དུ་བལྟས་ནས་ཡན་ལག་གཏུབ་པ་དང་། དུག་འཐུང་བ་དང་། གཡང་སར་མཆོད་པ་དང་། ལུས་འདི་མི་གཙང་ངོ་ཞེས་སྨོད་ཅིང་རྒུད་པར་བྱ་བའི་བསམ་པས་གནས་མིན་གྱི་བཟོད་པ་དང་སྨྱུང་བར་གནས་པ་དང་དཀའ་ཐུབ་ལ་སོགས་པའི་སྒོ་ནས་རྒྱལ་བའི་བདག་ཉིད་ཅན་གྱི་ལུས་གདུང་བར་བྱེད་ཅིང་ཕུང་པོ་ལྔ་ལ་དེ་བཞིན་གཤེགས་པའི་འདུ་ཤེས་བསྐྱེད་པ་ལས་ལོག་སྟེ་བརྙས་པའི་སེམས་མཐར་ཐུག་པ་སྐྱེས་པའི་ཚེ་རྩ་ལྟུང་རྫོགས་པ་ཡིན་ཏེ། དཀའ་འགྲེལ་པདྨ་ཅན་ལས། གཉིས་པ་ཐམས་ཅད་རྣམ་པར་སྤངས་པ་ནི་ཕུང་པོ་ལྔ་དང་དེ་བཞིན་གཤེགས་པ་ལྔ་ལ་དབྱེ་བར་མི་བྱའོ། །ཞེས་པ་དང་འགལ་ཟླའི་ཆོས་ཉམས་སུ་མྱོང་བའི་ཕྱིར་རོ། །དགུ་པ་རང་བཞིན་དག་པའི་སྟོང་ཉིད་དོན། །སངས་རྒྱས་ཁོ་ནའི་སྤྱོད་ཡུལ་ཉིད་ལས་གཞན། །སེམས་ཅན་ཁམས་དང་འབྲེལ་བ་ལྡེམ་དགོངས་སུ། །ཐེ་ཚོམ་ཟོས་ནས་དཀྲི་བར་སྤངས་པའོ། །དེ་ལ་ཆོས་རྣམས་ཀྱི་མཚན་ཉིད་ནི་རང་གི་ངོ་བོས་མ་གྲུབ་པས་ཐོས་བསམ་གྱི་སྒོ་ནས་གཏན་ལ་དབབ་པའི་ཚུལ་རིག་ཀྱང་ཆོས་ཉིད་བསྒོམ་སྟོབས་ཀྱིས་ཐོབ་པའི་ཆ་ནས་སྐྱེ་འགག་རང་བཞིན་མེད་པས་རྟག་ཆད་སྤོང་བ་ལ་ཡིད་མ་ཆེས་ནས། བློ་དང་ཡིད་བྱེད་ཀྱི་རྐྱེན་གྱིས་མེའི་ས་བོན་དར་ལྕགས་ལས་བྱུང་བ་ལྟར་ལྟོས་ཤིང་གྲུབ་པ་ཅན་དུ་ནན་གྱིས་འཆོས་ཤིང་། ངེས་དོན་གྱི་མདོ་སྡེ་དང་རྒྱུད་སྡེ་ཟབ་མོའི་དོན་གཤིས་ཐོག་ཏུ་ངོ་མ་འཕྲོད་པས་ཐེ་ཚོམ་ཟ་བ་དང་། དེ་བཞིན་དུ་བདེ་གཤེགས་སྙིང་པོའི་རང་བཞིན་སེམས་ཅན་གྱི་ཁམས་ལ་བསྟར་མི་མངོན་པའི་ཚུལ་དུ་འགྲེལ་བར་བཤད་པ་མཐའ་དག་བྱིས་པ་སྐྲག་པ་སྤང་བའི་ཕྱིར་བསྟན་པ་ཙམ་ལས་གཞན་དུ་ན་ལྡེམ་བོར་དགོངས་པ་ཁོ་ན་
ཡིན་ནོ་སྙམ་ནས་ཟབ་མོའི་མདོ་སྡེ་དང་རྒྱུད་སྡེ་ནས་བཤད་པ་དག་གི་དགོངས་པ་འགྲེལ་པ་རྣམས་ལ་ཡང་བཀྲི་ཚུལ་དེ་ལྟ་བུ་ནི་རྒྱལ་བའི་བསྟན་པ་ལས་གཞན་དུ་གྱུར་པའོ་ཟེར་ཞིང་ཡིད་གཉིས་ལ་དམ་འཆའ་བའོ། །དེ་སྐད་དུ་འཇིག་རྟེན་འཛིན་གྱིས་ཞུས་པ་ལས། སངས་རྒྱས་ཀྱིས་ཕུང་པོ་ལྔ་ཅི་ལ་དགོངས་ཏེ་གསུངས་པ་མི་ཤེས། སངས་རྒྱས་ཀྱིས་དོན་དམ་པ་གསུངས་པ་མི་ཤེས། ཞེས་སོ། །བཅུ་པ་དཀོན་མཆོག་གསུམ་དང་བླ་མ་དམོད། །བསྟན་པ་འཇིག་སོགས་དྲག་ཤུལ་ཆོ་ག་ཡིས། །མངོན་དུ་སྤྱོད་པའི་ཡུལ་ལ་སྲན་ཅིང་བཟོད། །འདྲིས་ཤིང་བཤེས་ནས་བྱམས་པར་བྱས་པའོ། །འདི་ལ་གཉིས། སྔགས་ལམ་ལ་ཞུགས་པའི་གང་ཟག་སྤྱིར་བཏང་ལ་དགོངས་པ་དང་། ནུས་པ་ཐོབ་པའི་དམིགས་བསལ་ལ་དགོངས་པའོ། །དང་པོ་ནི། བླ་མ་དང་དཀོན་མཆོག་སྨོད་པ་ལ་སོགས་པའི་གང་ཟག་བསམ་སྦྱོར་མ་རུངས་པ་ཅན་གང་ཞིག་ལ་ཡི་རང་བའི་སེམས་ཀྱིས་མཛའ་བར་སྤྲེལ་ཤིང་ལུས་ངག་གི་སྒོ་ནས་དངོས་སུ་བྱམས་པར་བྱས་པ་སྟེ། སྡོམ་འབྱུང་འགྲེལ་པར། གདུག་ལ་ཐོག་མ་བར་མཐའ་བྱམས། །ཞེས་སོ། །འོན་ཀྱང་བྱམས་པ་སྤངས་པའི་སེམས་ཀྱིས་སེམས་ཅན་དེ་བློས་གཏོང་བ་ནི་རྩ་ལྟུང་བཞི་པ་དང་འགལ་བའོ། །གཉིས་པ་ནི། བྱང་ཆུབ་ཀྱི་སེམས་དང་ལྡན་ཞིང་རྟོགས་པས་བདག་བསྒྲལ་བའི་གང་ཟག་རྣམས་ལ་ནི་བསྒྲལ་བའི་ཞིང་དུ་གྱུར་པ་བཅུ་ཡོད་དེ། གསལ་བཀྲ་ལས། དཀོན་མཆོག་སློབ་དཔོན་སྐུ་དགྲ་གཉིས། །དམ་ཉམས་ལོག་དང་འཁུ་བ་དང་། །འདུ་བར་འདས་དང་ཡོངས་ལ་གནོད། །དམ་དགྲ་ངན་པའི་དང་ཚུལ་ཅན། །ངན་སོང་གསུམ་དང་བཅུ་པོ་ནི། །རྣལ་འབྱོར་ཀུན་གྱིས་ངང་དུ་བླང་། །ཞེས་པས་སྐུ་དགྲ་གཉིས་དང་དམ་ཚིག་
ཉམས་ཀྱང་ཇི་མི་སྙམ་པས་མི་གཡོ་ཞིང་ཉམས་པའི་སྤྱོད་པ་མི་གཏོང་བ་དང་། སྔགས་ཀྱི་ཐེག་པར་ཞུགས་པ་ལས་སླར་ལོག་སྟེ་ཁྱད་གསོང་བྱེད་པ་དང་། བླ་མ་དང་མཆེད་ལ་ཞེ་སྡང་བས་འཁུ་བ་དང་། སྔགས་སྤྱོད་ལ་འདུ་བར་མི་དབང་བཞིན་དུ་བརྐུ་ཐབས་སམ་ཤེང་སྤྱོད་ཀྱིས་འདའ་བ་དང་། སེམས་ཅན་ཡོངས་ལ་གནོད་པ་དང་། དམ་ཚིག་ཅན་ལ་དགྲར་བྱེད་པ་དང་། མི་དགེ་བའི་ལས་འབའ་ཞིག་ལ་འཇུག་པའི་ངང་ཚུལ་ངན་པ་ཅན་ཏེ་སྡུག་བསྔལ་གྱི་རྒྱུ་ལ་སྤྱོད་པ་དགུ་ལས། དང་པོ་གཉིས་དང་། གཉིས་ཀའི་རྟེན་དང་བརྟེན་པ་ལྟ་བུར་གྱུར་པ་བསྟན་པ་ལ་གནོད་པ་གསུམ་པོས་ཤིན་ཏུ་བརླང་པོར་སྤྱོད་ན་དཀོན་མཆོག་དཔང་དུ་གསོལ་བའི་སེམས་བསྐྱེད་དང་ལྡན་པས་ཀྱང་ཚར་གཅད་དུ་རུང་བའི་ཚུལ། སྦྱོང་རྒྱུད་ལས། གླེན་པ་དཀོན་མཆོག་གསུམ་སྨོད་དང་། །སངས་རྒྱས་བསྟན་ལ་གནོད་བྱེད་དང་། །བླ་མ་སྨོད་ལ་བརྩོན་པ་རྣམས། །མཁས་པས་བསྒྲིམས་ཏེ་གསད་པར་བྱ། །ཞེས་དང་། གདོང་དྲུག་གི་རྒྱུད་ལས། བློ་ལྡན་སྒྲུབ་པོས་སེམས་ཅན་ལ། །ཕན་པའི་སེམས་ཀྱིས་སྲོག་ནི་གཅད། །ཅེས་པས་སྦྱོར་བ་ངན་པ་རླབས་ཆེན་ལ་ཞུགས་པ་རྣལ་མར་བཞག་ན་བསྟན་པ་དང་སེམས་ཅན་ལ་གནོད་པ་ཆེར་བསྐྱེད་ཅིང་དེའི་རྒྱུད་ལའང་མནར་མེད་དུ་ཡུན་རིང་གནས་པའི་ལས་འདུ་བྱེད་པས་དེ་ལས་བཟློག་པའི་ཆེད་དུ་དམིགས་པས་ན་དོན་གྱིས་རྗེས་སུ་བཟུང་བའི་སེམས་དང་བཅས་པས་ཚར་གཅད་དགོས་ཏེ་དེ་ལྟར་མ་བྱས་པར་སྲན་ཅིང་བཟོད་ན། དམ་ཚིག་ཉམས་པར་འགྱུར་བའི་ཚུལ་སྔ་མ་ལས། གདུག་པ་རྣམས་ལས་བཟློག་བྱ་སྟེ། །དངོས་སུའམ་ཡང་ན་སྔགས་དང་གཞན། །འཁྲུལ་འཁོར་དང་ནི་ཏིང་ངེ་འཛིན། །སྨན་
གྱིས་ཀྱང་ནི་བྱ་བས་ཏེ། །དེ་ལྟར་མི་བྱེད་དེ་ཡིས་ནི། །དམ་ཚིག་ངེས་པར་ཉམས་པར་འགྱུར། །ཞེས་སོ། །དེ་བས་ན་སྡོམ་འགྲེལ་ལས། འོན་ཀྱང་དེ་དག་གལ་ཏེ་དཀོན་མཆོག་གསུམ་ལ་གནོད་པ་བྱེད་པར་བཀག་ཀྱང་མི་ལྡོག་ན། དེའི་ཚེ་སངས་རྒྱས་དང་བྱང་ཆུབ་སེམས་དཔའ་རྣམས་ལ་མཁྱེན་པར་གསོལ་བ་བཏབ་ལ། སྙིང་རྗེ་ཆེན་པོ་བསྐྱེད་ནས་གསུངས་པ་བཞིན་དུ་བསྒྲུབ་པར་བྱའོ། །ཞེས་སོ། །དེ་ལས་གཞན་པ་བདུན་དང་སྡུག་བསྔལ་གྱི་འབྲས་བུ་ལ་སྤྱོད་པ་ངན་སོང་གསུམ་པོ་ནི་སྤྱི་ཙམ་དུ་བསྒྲལ་བའི་ཞིང་དུ་སྨོས་ཀྱང་། དེ་དང་དེའི་རྣམ་པར་ཤེས་པ་ཞིང་ཁམས་རྣམ་དག་ཏུ་གནས་སྤོ་ནུས་པ་དང་། སྔོན་དང་ཕྱི་མའི་མཐའ་ཤེས་པའི་མངོན་ཤེས་དང་ལྡན་པས་ངན་འགྲོའི་རྒྱུ་ལ་སྤྱོད་པ་དག་གིས་འབྲས་བུ་ངན་པ་འགོག་ཅིང་། ཡུན་ཐུང་ངུར་བྱེད་པ་དང་། འབྲས་བུ་ལ་སྤྱོད་པ་དག་གནས་ངན་ལས་ངེས་པར་སྒྲོལ་ནུས་པ་རྣམས་ལ་དགོངས་ཀྱིས། སྔ་མ་ལས། ལས་དེ་དག་ནི་རྣལ་འབྱོར་བས་ལུས་ལས་འཕོ་བར་བྱས་ནས་མཐོ་རིས་སམ་རྣམ་པར་དག་པའི་སངས་རྒྱས་ཀྱི་ཞིང་ལ་སྐྱེ་བར་ནུས་སམ། རྣམ་པར་ཤེས་པ་ཀུན་ནས་གཞུག་པ་དང་ལྡན་པ་ཁོ་ནའོ། །ཞེས་སོ། །དེ་བས་ན་དེ་ལྟར་མི་ནུས་པ་རྣམས་ལ་མངོན་སྤྱོད་མ་བྱས་པ་རྩ་ལྟུང་དུ་གསུངས་པ་མེད་དེ་འཇམ་དཔལ་རྩ་རྒྱུད་ལས། དེ་བས་སྔགས་ཀྱི་བསྒྲུབ་པ་ནི། །མངོན་སྤྱོད་དག་ནི་ཡོངས་མི་བྱ། །སངས་རྒྱས་བྱང་ཆུབ་སེམས་དཔའ་ལས། །མངོན་སྤྱོད་རབ་ཏུ་བཀག་པ་ཡིན། །སྙིང་རྗེ་མཆོག་ལྡན་སངས་རྒྱས་དང་། །བྱང་ཆུབ་སེམས་དཔའ་རྫུ་འཕྲུལ་ཆེ། །སྔགས་རྣམས་མཐུ་བསྟན་དོན་དུ་ནི། །ལས་རྣམས་ཐམས་ཅད་བསྟན་པ་ཡིན། །ཞེས་པས་བྱང་ཆུབ་ཀྱི་སེམས་
དང་རྟགས་པར་མི་ལྡན་པ་དེ་ཁྲོ་བས་ཟིལ་གྱིས་ནོན་པ་ཆོས་ཉིད་ཡིན་པས་མངོན་དུ་སྤྱོད་པའི་ལས་ཀྱིས་དམྱལ་བར་འཕེན་པའི་ཚུལ་དེ་ཉིད་ལས། བྲམ་ཟེའི་ཁྱིའུས་ཁྲོ་བོ་གྲུབ། །གཤིན་རྗེའི་གཤེད་ཅེས་བྱ་བ་ནི། །བློང་ན་དེ་ཡི་དེ་ཡང་གྲུབ། །དེ་ནི་ཁྲོ་བས་ཟིལ་གྱིས་ནོན། །སྲོག་ཆགས་དག་གི་འཚོ་བ་བཅད། །ཅེས་དང་། དེ་ཡི་སྔགས་ཀྱིས་མཐུ་ཡིས་ནི། །ལུས་དེས་ལྷ་མིན་བསྟེན་པར་བྱེད། །ལྷ་མིན་ལུས་ལ་ཞུགས་ནས་ནི། །ད་ནི་ཡུན་རིང་འཚོ་བར་བྱེད། །དེ་ནས་ལུས་དེ་ཞིག་ནས་ཀྱང་། །མནར་མེད་དམྱལ་བར་ཡང་དག་འགོ །ཞེས་ཙ་ནག་ཀྱི་ཞེས་བྱ་བས་གཤིན་རྗེའི་གཤེད་གྲུབ་ནས་ལྷ་མིན་གྱི་འཇུག་པ་བྱས་པས་རིང་པོར་འཚོ་བའི་རྒྱུན་ལ་མངོན་སྤྱོད་བྱས་པས་དམྱལ་བར་སྐྱེས་པའི་ཚུལ་གསུངས་པ་བཞིན་ནོ། །བཅུ་གཅིག་མིང་བྲལ་ཆོས་ལ་ཚད་མས་གཞལ། །ཆོས་ཀྱི་བདག་མེད་བློ་དང་རྫས་འགལ་བཞིན། །ཕུང་སོགས་སྟོང་པར་བལྟ་བ་མཆོག་འཛིན་བློས། །སྐྱེ་མེད་གྲུབ་མཐའ་རྟོག་པས་འཇལ་བའོ། །དེ་ལ་སྟོང་པ་ཉིད་ཀྱི་རང་བཞིན་ཆོས་ཀྱི་བདག་མེད་རྟོགས་པའི་དེ་ཁོ་ན་ཉིད་དང་མ་བྲལ་བས་རྒྱལ་བའི་ཐུགས་ཀྱི་རང་བཞིན་བསྒྲུབ་དགོས་ན་དེ་ནི་མིང་དང་ཚིག་དང་ཡི་གེའི་ལམ་དུ་མི་གནས་པ་གང་ཞིག་ལ་བློ་དང་སྙམ་བྱེད་ཀྱི་རྟོག་པས་ཕུང་པོ་ལྔའི་མཚན་ཉིད་ལ་གཞལ་བའི་ཐལ་བྱུང་གི་སྟོང་པར་བལྟ་བ་ལ་མཆོག་ཏུ་འཛིན་པ་ནི། ཕུང་པོ་ལྔ་པོ་རང་བཞིན་གྱིས་སྟོང་པར་བལྟ་བའི་དགོངས་པ་ལས་ཕྱིར་ཕྱོགས་པ་སྟེ། འཇིག་རྟེན་འཛིན་གྱི་ཞུས་པ་ལས། ཕུང་པོ་ལྔའི་རང་བཞིན་མི་ཤེས། ཕུང་པོ་ལྔའི་མཚན་ཉིད་སྟོང་པ་ཉིད་དུ་མི་ཤེས་ཏེ་ང་དང་རྩོད་དོ། །ཞེས་སོ། །མདོར་བསྡུ་ན། སྐྱེ་མེད་ཀྱི་གྲུབ་པའི་མཐའ་ནི་སྟོང་པ་དཔེར་བྱ་བ་ལ་སོགས་པའི་རྟོག་པས་གཞལ་བའི་ཡུལ་ལའང་མི་གནས་པའི་ཚུལ་སྤྱི་མདོ་ལས། ལང་ཀའི་བདག་པོ་གསང་བའི་དབྱིངས་དེར་
དཔེར་བྱ་བ་ནི་འཇིག་རྟེན་ན་མེད་དོ། །དཔེར་རེ་ཞིག་ཉེ་བ་མངོན་སུམ་པར་བྱས་ནས་ནམ་མཁའ་ལ་གཟུང་བར་བྱ་སྟེ། ནམ་མཁས་ཀྱང་བསྒྲུན་དུ་ཡོད་པ་མ་ཡིན་ནོ། །འཇིག་རྟེན་ན་མངོན་སུམ་པའི་དཔེར་དེ་ལས་མེད་པའི་ཕྱིར་དཔེར་ན་ནམ་མཁའ་ལ་ལྟོས་ཏེ་དེ་ལས་ཤེས་པར་བྱའོ། །ཞེས་སོ། །དེ་བས་ན་སྒྱུ་མ་ཙམ་དུ་བལྟས་ཀྱང་སྒྱུ་མའི་མིང་དང་དཔེ་དང་མཚན་ཉིད་ལ་ཞེན་པའི་རྟོག་པ་དང་བཅས་པ་ཁོ་ན་ཡིན་པས་འཁོར་གསུམ་ལ་བདེན་ཞེན་དང་མ་བྲལ་བ་ལྟ་བ་རྣམ་དག་ཏུ་འདོད་པའི་གྲུབ་མཐའ་འཆའ་ནའང་ཡིད་ཀྱི་དེ་ལྟར་རྟོག་ན་འདིའི་རྩ་ལྟུང་ཡིན་ཏེ་གུར་ལས། ཆོས་ཉིད་ཚད་ནི་བཟུང་མི་བྱ། །ཞེས་སོ། །གལ་ཏེ་དེ་ལྟ་ན་ལམ་ལ་ཞུགས་པའི་གང་ཟག་ལ་ཆོས་ཀྱི་བདག་འཛིན་མི་སྐྱེ་བ་ནི་ཕར་ཕྱིན་དུ་ས་བརྒྱད་པ་མ་ཐོབ་བར་དང་། སྔགས་སུ་དོན་གྱི་ལྷན་སྐྱེས་མ་ཐོབ་པར་མི་ལྡོག་པས་བསྒྲུབ་མི་ནུས་སོ་ཟེར་ན། བདེན་ཏེ་བསྒྲུབ་མ་ནུས་པའི་ཆ་ནས་རྩ་ལྟུང་དུ་བཞག་པར་མ་མཐོང་སྟེ། ཤཱནྟི་བས། ཆོས་ལ་ཚད་མས་གཞལ་མི་བྱ། །ཞེས་པ་ལྟར་ཆོས་བདག་མེད་པ་ལ་བདག་ཏུ་བལྟ་བའི་སེམས་ཀྱིས་རྣམ་པར་བརྟགས་ཤིང་། ལས་དང་པོ་པའི་གནས་སྐབས་ན་ཐོས་བསམ་གྱིས་དམིགས་པའི་ལྟ་བའི་ཞེན་པ་གང་ཡིན་པ་དེ་ཡིན་ལ་བཞག་ནས། རྟོག་དཔྱོད་ཀྱི་རིགས་པ་རྣོན་པོས་བསམ་གྱིས་མི་ཁྱབ་པའི་ཆོས་ཉིད་ལ་གཞལ་ཤིང་བློའི་བསྣོན་མ་བཏབ་ནས་མཉམ་པར་འཇོག་པའི་དུས་ཉིད་ནའང་སྤྲོས་བྲལ་གྱི་མཚན་ཉིད་ལ་དམིགས་པའི་ལུགས་ཀྱིས་རང་བཞིན་པའི་ཆོས་ཉིད་ལས་སླར་ལ་ལྡང་བ་དང་། ལྟ་བའི་ངོ་བོ་ཉིད་ནི་འདི་དང་འདི་ལྟ་བུ་ཉིད་དོ་སྙམ་དུ་ཚོགས་བརྒྱད་ཀྱི་ཤེས་པ་དང་མ་བྲལ་བའི་འཛིན་སྟངས་ཀྱིས་དེ་དང་དེར་རྟོག་པ་ལ་རྩ་ལྟུང་
དུ་བཤད་པ་ཡིན་ཏེ། སྟོང་ཉིད་དེ་དང་དེར་རྟོག་པ། །ཞེས་སོ། །བཅུ་གཉིས་སྔགས་ཀྱི་སྣོད་རུང་གདུལ་བྱའམ། །དད་གསུམ་ལྡན་ལ་དོན་གཉེར་ཆོས་མི་སྟོན། །ཀུན་སློང་ངན་པས་གཞན་སེམས་སུན་ཕྱུང་ནས། །འདུན་པ་ཕྱིན་ཅི་ལོག་ཏུ་ཀྱོགས་པའོ། །དེ་ལ་སྔགས་ཀྱི་སྣོད་དུ་རུང་བའི་གདུལ་བྱ་སྟེ་བླ་མའི་མན་ངག་འཛིན་པ་ལ་དབང་བའམ། མིན་ཀྱང་རང་བཞིན་དུ་དྲང་བ་དང་། འདུན་པ་དང་། ཡིད་ཆེས་པའི་དད་པ་གསུམ་དང་ལྡན་པ་ལ་སོ་སོའི་རྒྱུད་ཚོད་དང་བློ་མཐུན་གྱི་ཆོས་གདོང་བཟློག་ནས་མི་སྟེར་ཞིང་། །དེ་དག་གི་དོན་བྱེད་པར་ནུས་བཞིན་དུ་ཀུན་སློང་ངན་པས་མི་བྱེད་པ་དང་། དེ་གང་ལ་དད་པའི་ལམ་ལས་འདུན་པ་ལྡོག་འདོད་ཀྱི་བསམ་པས་དེའི་སེམས་སུན་འབྱིན་པ་དང་། གཡོ་རྒྱུ་དང་ཆོས་མ་ཡིན་པའི་བསམ་སྦྱོར་གྱི་སྒོ་ནས་དེ་ཆོས་བཞིན་དུ་བྱེད་པའི་འདུན་པ་ལས་གཞན་དུ་ཀྱོགས་ནས་ལམ་མིན་པ་ལ་སྦྱར་བ་སྟེ། ཤཱནྟི་པས། དད་ལྡན་སེམས་ཅན་བཟློག་པ་ཡིན། །ཞེས་སོ། །བཅུ་གསུམ་སྦྱང་བྱའི་དམ་རྫས་རང་རྒྱུད་དུ། །བལྟས་ནས་ལ་ལ་སྤོང་ཞིང་ལ་ལ་སྲེད། །སྔགས་ཀྱི་བརྟུལ་ཞུགས་ཇི་བཞིན་ཉམས་འོག་ཏུ། །མ་ཆུད་མཐའ་གཉིས་མལ་དུ་འཁྱམས་པའོ། །དེ་ལ་གཉིས། བླ་མེད་ཀྱི་རྩ་ལྟུང་དང་། རྣལ་འབྱོར་དང་ཐུན་མོང་གི་རྩ་ལྟུང་དུ་འགྲོ་ཚུལ་ལོ། །དང་པོ་ནི་སྤྱོད་པ་དུས་ཚོད་དང་འབྲེལ་བས་སྦྱང་བྱའི་དམ་རྫས་ཤ་ལྔ་བདུད་རྩི་ལྔ་དང་། ཤ་ཆང་ལ་སོགས་པ་བཟའ་བཏུང་གི་ཚོགས་དང་། བྲོ་གར་གླུ་ཚིག་རིག་མ་ལ་སོགས་འདོད་པའི་ཡོན་ཏན་གྱི་རང་བཞིན་ཚོགས་ཀྱི་འཁོར་ལོའམ། དཔའ་བོ་དང་དཔའ་མོའི་སྟོན་མོ་ལ་སོགས་པའི་དུས་ཀྱི་མཚོན་དང་དུ་བླང་བའི་གནས་སྐབས་སུ་དགག་བྱ་དམིགས་བསལ་མེད་ཅིང་ནུས་པ་
ཐོབ་བཞིན་དུའང་དེ་དག་རང་རྒྱུད་པར་བལྟས་ནས་དད་དུ་བླང་མི་ནུས་པའམ། ཡང་ཤ་ལྔ་བདུད་རྩི་ལྔ་ལྟ་བུ་ལ་རང་རྒྱུད་པའི་རྟོག་པས་གཟིར་ཏེ་དང་དུ་བླང་མི་ནུས་བཞིན་དུ་ཤ་ཆང་ལ་སོགས་ཆགས་སྲེད་རང་རྒྱུད་པས་བག་ཡངས་སུ་སྤྱོད་པ་དང་། ཉན་ཐོས་ཀྱི་བརྟུལ་ཞུགས་ཀྱིས་སེམས་ཟིལ་གྱིས་ནོན་ནས་ཐེ་ཚོམ་དང་བཅས་པ་སྟེ། མདོར་ན་ཀླུ་དང་བྲམ་ཟེ་ལྟ་བུར་གཙང་རྨེའི་གཉིས་རྟོག་གིས་བཅིངས་པའམ། ཁྱི་དང་ཕག་པ་བཞིན་དུ་སྨྱོ་ཐབས་ཀྱིས་སྤྱོད་པའི་ཕྱོགས་གཉིས་ཀའི་མཐར་མ་ལྷུང་བར་ཆོས་ཉིད་མཉམ་པའི་རྟོགས་པས་དང་དུ་བླང་པའི་ཚུལ་བདུད་རྩི་འབྱུང་པ་ལས། གཙང་དང་མི་གཙང་རྣམ་རྟོག་ཡིན། །མཁས་པས་དབུས་ལའང་གནས་མི་བྱ། །ཞེས་པ་ལྟར་རོ། །གཉིས་པ་ནི་རྡོ་རྗེ་ དྲིལ་བུ ་དང་བཅས་པའི་ཕྱག་རྒྱ་ལ་སོགས་པ་སྟེ། དེ་དག་གི་དེ་ཉིད་མི་ཤེས་པས་བཀུར་སྟི་དང་ངེས་ཤེས་གང་ཡང་མེད་བཞིན་བཞད་གད་བྱེད་པ་ལ་སོགས་པའོ། །འདི་ལྟར་ དྲིལ་བུ ་ལ་མཚོན་ན་དེ་རིགས་ལྔའི་རང་བཞིན་ཐབས་ཤེས་སུ་འབྲེལ་བའི་དམ་ཚིག་གི་རྟེན་དུ་མི་བསྟེན་པར་བརྙས་ཐབས་ཀྱིས་འདོར་བ་དང་། དངོས་གྲུབ་ལ་སྒྲིབ་པ་དེ་ཉིད་མེད་པའི་སེམས་ཀྱིས་འཁྲོལ་བ་སྟེ། དེ་ཉིད་སེམས་མེད་རྣལ་འབྱོར་པ། །གླང་པོ་ དྲིལ་བུ ་འཁྲོལ་དང་མཚུངས། །ཞེས་པས་ཉེས་བྱས་སུའང་འགྱུར་རོ། །དེ་བཞིན་དུ་ཕྱག་རྒྱ་ལ་སོགས་པར་ལག་པའི་རྣམ་འགྱུར་གྱི་ན་བར་བལྟས་ནས་སྐྱེ་བོའི་ཁྲོད་དུ་སྨོད་ཅིང་བཞད་གད་བྱེད་པ་སྟེ་དཔལ་མཆོག་འགྲེལ་ཆེན་ལས། དད་པ་མེད་པས་བཞད་གང་བྱེད། །ཅེས་དམ་ཚིག་ལས་འདས་པའི་གནས་སུ་གསུངས་པའོ། །བཅུ་བཞི་རྣལ་འབྱོར་མ་སོགས་འཇིག་རྟེན་འདས། །མ་མོ་མཁའ་
འགྲོ་ལ་སོགས་སོ་མཚམས་འཛིན། །འབྱུང་བ་ལྔ་ཡི་ཁམས་ལ་རང་རྒྱུད་བལྟས། །དབང་གི་རྟེན་གྱུར་བུད་མེད་སྨོད་བའོ། །འདི་ལ་སྒྲ་ཡངས་པར་བྱས་ན་སྐུལ་བྱེད་མ་དང་། རལ་གཅིག་མ་དང་། རྡོ་རྗེ་ཕག་མོ་ལ་སོགས་པའི་ཡེ་ཤེས་ཀྱི་མཁའ་འགྲོ་བུད་མེད་ཀྱི་ཚུལ་སྟོན་པ་དག་ལ་སྨད་ན་ཡོ་ག་དང་བླ་མེད་གཉིས་ཀའི་རྩ་ལྟུང་ཡིན་ལ། སྤྱིར་མ་མོ་དང་མཁའ་འགྲོའི་སྒྲ་ཞུགས་ཚད་འདས་མ་འདས་ཀྱིས་མཚམས་ན་བཞུགས་པ་མ་ཡིན་ཀྱང་རྡོ་རྗེ་ཕག་མོ་དང་རྣལ་འབྱོར་མའི་སྒྲས་འཇིག་རྟེན་ལས་འདས་པ་སྡེ་ཚན་གཅིག་ཏུ་སྨོས་ནས་དངོས་བསྟན་ལ་འཇིག་རྟེན་ལས་འདས་པ་འཕགས་པའི་ས་ལ་བཞུགས་སུ་ཟིན་ཀྱང་འཇིག་རྟེན་ཆོས་མཆོག་ལ་སོགས་པ་འཁོར་བའི་ཆ་ལུགས་བ་རྣམས་ཏེ། དཔེར་ན་མེ་ལྕེ་འབར་མའི་ཉི་ཤུ་རྩ་གཉིས་པ་ལས། མཁའ་འགྲོ་ལྷ་མོ་ནག་མོ་འདི། །བསྐལ་པ་མང་པོའི་སྔོན་རོལ་ནས། །དུས་གསུམ་རྒྱལ་བའི་ཞལ་མཐོང་སྟེ། །དམན་པའི་ཞིང་འདིར་སྤྲུལ་སྐུ་ཡིས། །ལྷ་མོའི་ཚུལ་དུ་སྐུ་བསྟན་ནས། །འགྲོ་བའི་དོན་ལ་རབ་ཏུ་བརྩོན། །ཉོན་མོངས་སྒྲིབ་པ་རབ་ཏུ་སྤངས། །ད་ལྟར་ཤེས་བྱའི་སྒྲིབ་པ་སྦྱོང་། །ཞེས་ཨེ་ཀ་ཙ་ཏིའི་སྤྲུལ་པར་བསྟན་པ་བཞིན་ནོ། །དེ་བཞིན་དུ་སྔགས་སྡོམ་དང་ལྡན་པའི་མ་མོ་མཁའ་འགྲོའི་ཚོགས་ལ་སྐུར་པ་འདེབས་པ་དང་། དེའི་ཟླས་དྲངས་ནས་འབྱུང་བ་ལྔའི་རང་བཞིན་སྤྱན་མ་ལ་སོགས་པའི་ཡུམ་ལྔར་མ་ཤེས་པར་རང་རྒྱུད་དུ་བལྟས་པ་དང་། བུད་མེད་ཀྱི་རིགས་སོ་ཅོག་ལ་དམིགས་པའི་བུད་མེད་ཐ་མལ་པ་གཅིག་ཤོས་ལའང་རིགས་བདས་པའི་སྒོ་ནས་བསྐུར་བ་བྱས་ཀྱང་རྩ་ལྟུང་དུ་འགྱུར་བར་དུས་འཁོར་འགྲེལ་ཆེན་ལས། བུད་མེད་ཐམས་ཅད་ལ་སྨོད་པ་གང་ཡིན་པ་དེ་ནི་ངས་པར་སྟེ་གདོན་མི་ཟ་བར་མ་ནུ་ཞེས་པ་བཅུ་
བཞི་པར་འགྱུར་རོ་ཞེས་དང་། ཤཱནྟི་པས་ཀྱང་། རྩོད་པའི་དུས་འདིར་འགྲོ་བ་རྣམས་བུད་མེད་ལ་རབ་ཏུ་ཞེན་པས་དེ་རྣམས་གདུལ་བའི་ཕྱིར་བུད་མེད་དུ་སྤྲུལ་པའི་ལྷ་རྣམས་འདི་ན་གནས་པས་མི་སྨོད། ཅེས་དང་། བུད་མེད་ཀྱི་ཁྲོད་ན་རྡོ་རྗེ་ཕག་མོ་ལ་སོགས་པ་གནས་པས་དེས་ན་གང་ཡིན་མི་ཤེས་པས་བུད་མེད་ལ་མི་སྨོད་པར་བཤད་པ་ཡིན་ནོ། །ཁྱད་པར་ཤེས་རབ་རང་བཞིན་བུད་མེད་ལ། །ཞེས་པས་ཤེས་རབ་ནི་བདེ་ཆེན་ལྷན་ཅིག་སྐྱེས་པའི་ཡེ་ཤེས་ཡིན་ལ། རང་བཞིན་ནི་རྟེན་འདི་ལས་ཡེ་ཤེས་དེ་འབྱུང་བས་ན་དབང་གི་རྟེན་དུ་གྱུར་པ་ནི་བླ་མའང་ཡིན་ལ། སྤྱོད་པ་ལ་ཞུགས་པའི་དུས་ན་བསྟེན་བྱར་གྱུར་པའང་ཡེ་ཤེས་བསྐྱེད་པའི་རྟེན་ཡིན་པས་དེ་ལ་སྙིང་ཐག་པ་ནས་སྨོད་ཅིང་དེས་ཀྱང་དོན་གོ་བ་ན་རྩ་ལྟུང་དུ་འགྱུར་བ་ཡིན་པས་གཟབ་པར་བྱའོ། །དེ་ལྟར་རྩ་བའི་ལྟུང་བ་བཅུ་བཞི་པོ་ནི་བསྲུངས་ན་ཕན་ཡོན་ཆེ་ཞིང་ཉམས་ན་ཉེས་དམིགས་གཞན་ལས་ཆེ་བའོ། །གཉིས་པ་ཡན་ལག་གི་ལྟུང་བ་སྦོམ་པོ་བརྒྱད་ནི། བཅུ་བཞིའི་ཡན་ལག་སྡོམ་པ་གཏོང་བྱེད་ཀྱི། །ཕམ་པ་མིན་ཡང་དངོས་གྲུབ་ཐོབ་པ་ལ། །གེགས་སུ་ཆེ་བའི་སྦོམ་པོ་བརྒྱད་ཡོད་དེ། །དབང་དང་དམ་ཚིག་སྡོམ་པས་མ་སྦྱངས་པའི། །ཐ་མལ་བུད་མེད་རིག་མར་བསྟེན་པ་དང་། །མཚན་ཉིད་འགལ་བའི་དྲན་པའི་ཁྲོན་པ་ནས། །ཆོ་ག་མ་ཡིན་བཞིན་པས་བདུད་རྩི་ལེན། །དབང་མ་ཐོབ་དང་ལྷག་པར་དད་མེད་ལ། །སྐུ་གཟུགས་གླེགས་བམ་ཕྱག་མཚན་ཕྱག་རྒྱ་སྟོན། །ཚོགས་ཀྱི་འཁོར་ལོའི་དུས་ན་འཐབ་རྩོད་དང་། །བབ་ཅོལ་ཀྱལ་ཀས་བརྟུལ་ཞུགས་ཐ་མལ་སྦྱར། །སྣོད་ལྡན་དམ་ཆོས་འདྲི་ལ་ཤེས་བཞིན་དུ། །དེ་ལས་འགལ་བའི་སྙོན་དོར་ལན་དུ་ལྡོན། །
སྔགས་ཀྱི་ལྟ་སྤྱོད་བསྐུར་ཞིང་ཉམས་སད་པའི། །ཉན་ཐོས་ནང་དུ་ཞག་བདུན་ལོངས་པར་སྡད། །སྔགས་རྒྱུད་དེ་ཉིད་ཆོག་མི་ཤེས་བཞིན། །རྡོ་རྗེ་འཛིན་པར་ང་རྒྱལ་རྫུན་དང་འགྲོགས། །དཔང་བསྐུར་ཐོབ་ཀྱང་སྔགས་ལ་མི་དད་པའི། །ཐེ་ཚོམ་ཅན་ལ་སླར་ཡང་གསང་བ་འཆད། །ཞེས་རྐང་པ་གཉིས་གཉིས་ཀྱིས་སྦོམ་པོའི་ལྟུང་བ་རེ་རེ་སྟོན་པ་ནི་གཞུང་འདི་ཉིད་ཀྱིས་བཀྲལ་ནས་བཤད་པས་གོ་སླ་ལ། ཆད་མ་རྒྱན་ལས། ལུང་ནི་ཡིད་ཆེས་ཚིག་ཡིན་ཏེ། །ཉེས་པ་ཟད་པ་རྫུན་གྱི་ཚིག །སྨྲ་བར་མི་འགྱུར་རྒྱུ་མེད་ཕྱིར། །ཉེས་ཟད་ལུང་དུ་ཤེས་པར་བྱ། །ཞེས་པས་དེ་གཞུང་གང་གིས་སྟོན་ན། བླ་མའི་ཞབས་ཀྱི་པདྨོ་ལ། །ཀུན་ནས་དད་པས་ཕྱག་བཙལ་ཏེ། །སྦོམ་པོའི་ལྟུང་བ་རྣམ་པ་བརྒྱད། །རྒྱུད་ལས་གསུངས་པ་བྲི་བར་བྱ། །ཤེས་རབ་སྟོབས་ཀྱིས་ལེན་པ་དང་། །ང་ཡི་བདུད་རྩི་སྟོབས་ཀྱིས་ལེན། །སྣོད་མིན་ལ་ནི་མི་གསང་དང་། །ཚོགས་ཀྱི་ནང་དུ་རྩོད་པ་དང་། །དད་ལྡན་ལ་གཞན་ཆོས་སྟོན་དང་། །ཉན་ཐོས་ནང་དུ་ཞག་བདུན་གནས། །རྫུན་གྱིས་རྣལ་འབྱོར་ང་རྒྱལ་བྱེད། །དད་པ་མེད་ལ་ཆོས་སྟོན་པ། །འདི་རྣམས་སྦོམ་པོའི་ལྟུང་བར་བཤད། །རྩ་ལྟུང་སྦོམ་པོའི་རིམ་པ་དག །ཆོ་ག་ཡིས་ནི་ཤེས་བྱ་ཞིང་། །ཉེས་པར་གྱུར་ན་བཤགས་པར་བྱ། །རྡོ་རྗེ་ཐེག་པའི་སྦོམ་པོའི་ལྟུང་བ་སློབ་དཔོན་ཀླུ་སྒྲུབ་ཀྱི་ཞལ་སྔ་ནས་མཛད་པ་རྫོགས་སོ། །ཞེས་པ་སྟེ། དེ་བས་ན། ཀླུ་སྒྲུབ་ཀྱིས་བསྡུས་དེ་བཞིན་དཔའ་བོ་དང་། ལ།།།ཀཱ་ར་ས་དེ་ལས་དོན་གཞན་པ། །བསྙེན་པ་དག་པར་མ་བྱས་དབང་བསྐུར་དང་། །རབ་གནས་སྦྱིན་སྲེག་སློབ་མ་བསྡུ་བར་རིངས། །ཚོགས་འཁོར་ལས་གཞན་ཕྱི་དྲོའི་ཁ་ཟས་སོགས། །སོ་བྱང་བཅས་པ་དགོས་མེད་འདའ་བ་ཡིས། །བདག་ཉིད་སུན་འབྱིན་
དངོས་གྲུབ་འཕྲོག་པའི་རྒྱུར། །གསུངས་པའི་སྦོམ་པོ་རྣམས་ལའང་བརྟག་པར་བྱ། །དེ་ལྟ་སྤྱིར་སྦོམ་པོའི་ལྟུང་བ་དེ་ཙམ་གྱིས་ཟད་པ་མ་ཡིན་ཀྱང་སྦོམ་པོའི་སྡེ་ཚན་དུ་གཏོགས་པའི་ཁ་ན་མ་ཐོ་བའི་སྒོ་ཆེ་བ་རྣམ་པ་བརྒྱད་བསྟན་པ་དང་མཐུན་པར་དཔའ་བོའི་ཞབས་ཀྱིས་ཀྱང་། རྣལ་འབྱོར་གང་ཞིག་རིག་མ་ནི། །དམ་ཚིག་མེད་ལའང་སྟོབས་ཀྱིས་སྤྱོད། །དེ་ལ་འཕྱ་བར་བྱེད་པ་ཡང་། །དེ་ཡི་ལྟུང་བ་དང་པོར་གསུངས། །རྒྱུད་ལས་མ་གསུངས་རིམ་ཉིད་ཀྱིས། །གང་ཞིག་བདུད་རྩི་བསྟེན་པ་ཡང་། །ཞེས་པ་ལ་སོགས་ཆ་མཐུན་པ་དང་། དེ་བཞིན་རྡོ་རྗེ་སྙིང་པོ་རྒྱན་ལས། དམ་ཚིག་མི་ལྡན་རིག་མར་བསྟེན། །ཚོགས་ཀྱི་འཁོར་ལོར་རྩོད་པ་བྱེད། །གསང་བའི་ཆོས་ནི་སྟོན་པ་དང་། །དད་ལྡན་རྣམས་ལ་གཞན་དུ་སྟོན། །ཉན་ཐོས་ནང་དུ་ཡུན་རིང་གནས། །སྣོད་མི་རུང་ལ་གསང་བ་བསྟན། །ཁ་ན་མ་ཐོ་སྦོམ་གྱུར་ཏེ། །སྔགས་པ་དེ་ཡི་དམ་སྡོམ་ཟད། །ཟད་པས་འགྲུབ་པར་ཡོངས་མི་འགྱུར། །ཞེས་བསྡུ་བའི་སྒོ་ནས་སྦོམ་པོ་དྲུག་ཏུ་བཞག་པ་དང་། ཡང་དེ་དང་དོན་མཐུན་པའི་སྟེང་དུ། བསྙེན་སོགས་དག་པར་མ་བྱས་པར། །དཀྱིལ་འཁོར་ལས་ལ་འཇུག་པ་དང་། །སྡོམ་པ་གཉིས་ཀྱིས་བཅས་པ་ལ། །དགོས་པ་མེད་པར་འདའ་བ་དང་། ཞེས་གཉིས་པོ་བསྣན་ནས་སྦོམ་པོ་བརྒྱད་དུ་བཤད་ལ། དེའང་གྲངས་དུས་མཚན་མའི་བསྙེན་པ་གང་རུང་ལ་བརྟེན་ནས་ལྷའི་རྣལ་འབྱོར་དག་པར་མ་བྱས་པར་དབང་བསྐུར་དང་རབ་གནས་སྦྱིན་སྲེག་ལ་སོགས་དཀྱིལ་འཁོར་གྱི་བྱ་བ་ལ་ཞུགས་ནས་སློབ་མ་བསྡུ་བ་དང་། སོ་བྱང་གི་སྡོམ་པ་གཉིས་དང་ལྡན་པ་ཡིན་ན་དབང་བསྐུར་ཙམ་པོ་བ་ཐོབ་པ་ཉིད་ནས་
སྔགས་ཀྱི་བརྟུལ་ཞུགས་སྒྲ་ཇི་བཞིན་པར་འཇུག་ཅིང་། དེའང་བཟའ་བཏུང་ཤ་ལྔ་བདུད་རྩི་ལྔར་བྱིན་གྱིས་བརླབས་ནས་ལྷའི་རྣལ་འབྱོར་དང་ལྡན་པས་བཟའ་བའི་དམ་ཚིག་ལ་སྤྱོད་པའི་ཚོགས་འཁོར་ལ་དང་བ་སྟོན་པ་ཙམ་མ་ཡིན་པར་བསླབ་པ་འོག་མ་གཉིས་ཀྱི་ལྟུང་བྱེད་བསྐྱེད་པའི་གནས་སྐབས་ལ་ཅད་མི་སེམས་པས་བཅས་པའི་མཚམས་ལས་དགོས་མེད་དུ་འདའ་བར་བྱེད་པ་རྣམས་ནི། བདག་ཉིད་ཀྱི་བསླབ་པ་སུན་འབྱིན་ཞིང་། སྔགས་ལ་མོས་པས་སྤྱད་ནས་ཡོན་ཏན་གོང་འཕེལ་དུ་སོང་བ་ལས་དངོས་གྲུབ་ཐོབ་པའི་ཆ་ལ་སྒྲིབ་པ་ཡིན་པས་ལ།།།ཀཱ་རས་དམ་ཚིག་ཀུན་ལས་བཏུས་པའི་འགྲེལ་པར་བསྟན་པ་དག་ལའང་བརྟག་པར་བྱ་ཞིང་སྤྱོད་པ་དུས་ཚོད་དང་འབྲེལ་པ་ཁོ་ན་གཙོ་བོར་གཟུང་བར་བྱའོ། །དེ་ལྟར་སློབ་དཔོན་དཔའ་བོའི་ལུགས་ཀྱི་རྩ་ལྟུང་བཅུ་བཞི་པ་རྗེས་འབྲང་དང་བཅས་པ་ནི་བླ་མེད་སྤྱི་ལ་ཁྱབ་ཆེ་ཞིང་ཡོངས་སུ་གྲགས་པ་གཙོ་བོར་སྨོས་ནས་གཞན་ཡང་གྲངས་ངེས་དེ་ལྟ་བུའི་མཐའ་མི་འགོག་པའི་ཚུལ། འདི་ལྟར་རྣལ་འབྱོར་བླ་མེད་ཐུན་མོང་གི །རྩ་ལྟུང་བཅུ་བཞི་བྷ་ཝི་ལྷས་བསྡུས་པ། །ཀུན་ལ་ཁྱབ་ཅིང་ཡོངས་སུ་གྲགས་པ་སྟེ། །གཞན་དུ་རྒྱུད་སྡེ་བཞི་པོའི་ངང་ལུགས་ཀྱི། །བཅུ་བཞིའི་གྲངས་ངེས་དུས་ཀྱི་འཁོར་ལོ་དང་། །སྤྱི་རྒྱུད་མངོན་བྱང་སོགས་ལས་གསལ་པོར་གསུངས། །དེ་ལ་དུས་ཀྱི་འཁོར་ལོའི་ལུགས་ཀྱི་བཅུ་བཞི་ནི་རྩ་ལྟུང་ཡིན་ཏེ། དབང་ལེ་ལས། དཔལ་ལྡན་བླ་མའི་ཐུགས་དཀྲུགས་པ་ལས་བུ་རྣམས་ཀྱི་ནི་རྩ་བའི་ལྟུང་བ་རི་བོང་འཛིན་པར་འགྱུར། །དེའི་བཀའ་ལ་འགོངས་པས་ལྟུང་བ་གཞན་དུ་འགྱུར་ཏེ་ངེས་པར་དེ་བཞིན་སྤུན་ལ་ཁྲོས་པས་གསུམ་པའོ། །བྱམས་པ་བཏང་བས་བཞི་པར་འགྱུར་ཏེ་བྱང་ཆུབ་སེམས་ནི་རབ་ཏུ་ཉམས་པ་ལས་ཀྱང་
མདའ་རུ་འགྱུར། །དྲུག་པ་གྲུབ་པའི་མཐའ་ལ་སྨོད་པའོ་རི་བོ་དག་ཀྱང་མ་སྨིན་མི་ལ་གསང་བ་བྱིན་ལས་སོ། །ཕུང་པོ་ཉོན་མོངས་པ་ལས་ཀླུ་རུ་འགྱུར་སྟེ་སླར་ཡང་དགུ་པ་དད་པའི་ཆོས་ལ་མ་དད་གང་། །སྒྱུ་ཡི་བྱམས་པ་དང་ནི་མིང་སོགས་བྲལ་བའི་བདེ་བ་སྟེར་ལ་རྟོག་པ་ཕྱོགས་དང་དྲག་པོའོ། །དགེ་བའི་སེམས་ཅན་དག་ལ་སྐྱོན་བརྗོད་པ་ལས་ཉི་མའོ་དམ་ཚིག་ཐིམ་པ་གཏོང་བ་ལས་ཀྱང་གཞན། །བུད་མེད་ཐམས་ཅད་ལ་སྨོད་ངེས་པར་ནུར་འགྱུར་ཏེ་རྡོ་རྗེ་ཐེག་པར་གནས་པ་རྣམས་ལའོ། །ཞེས་རྒྱུན་ཆགས་སུ་བཤད་པའི་དོན་དཔལ་ལྡན་ཞེས་པའི་རྐང་པ་དང་པོས་རྩ་ལྟུང་དང་པོ་སོར་བཞག་པའོ། །རྐང་པ་གཉིས་པའི་དེའི་བཀའ་ལ་འགོངས་པ་ཞེས་པ་ནས་འགྱུར་ཏེ་ཞེས་པའི་བར་གྱིས་བླ་མའི་བཀའ་ལ་འགོངས་པའི་རྩ་ལྟུང་གཉིས་ཕ་བསྟན་ཏོ། །ངེས་པར་ཞེས་པ་ནས་གསུམ་པའི་ཞེས་པས་སྤུན་ལ་ཁྲོས་པ་བསྟན་ཏོ། །བྱམས་པ་བཏང་བས་བཞི་པར་འགྱུར་ཏེ་ཞེས་དངོས་བསྟན་དང་། དེའི་འཕྲོ་བྱང་ཆུབ་ཅེས་པ་ནས་མདའ་རུ་འགྱུར་བའི་བར་གྱིས་དོན་དམ་པ་དང་ཀུན་རྫོབ་ཀྱི་བྱང་སེམས་སྤངས་པ་ལྔ་པ་བསྟན། དྲུག་པ་ཞེས་པའི་རྐང་པ་གཅིག་པོ་ཕྱེད་དུ་བཅད་པའི་དྲུག་པ་དངོས་བསྟན་དང་། རི་བོའི་སྒྲས་བདུན་པ་ཡང་བཤད་དོ། །ཕུང་པོ་ཞེས་པའི་རྐང་པ་གཅིག་པོ་མཚམས་སུ་བཅད་པས་ཀླུ་སྟེ་བརྒྱད་པ་དང་འཕྲོས་རྣམས་ཀྱི་རྩ་ལྟུང་དགུ་པ་བསྟན་ཏོ། །སྒྱུའི་བྱམས་པ་དང་ནི་ཞེས་པས། ཁ་ནས་ཚིག་ལེགས་པར་འདོན་ཅིང་ཞེ་ལ་གདུག་པར་འཛིན་པའི་སེམས་གྱ་གྱུབ་ཅན་གྱི་རྩ་ལྟུང་བཅུ་པ་བསྲུང་ཚུལ་འཆོལ་བ་ཁ་ཞེ་གོ་ལྡོག་པའི་དོན་དུ་བཤད་དེ། འདི་ནི་སེམས་ཀྱི་བྱམས་པ་མི་གཏོང་ལ་ལུས་ངག་གི་དེ་ལས་ལྡོག་
པ་ཡིན་པས་སོ། །དེའི་འཕྲོ་མིང་སོགས་བྲལ་བ་ནས་དྲག་པོའི་སྒྲས་རྩ་ལྟུང་བཅུ་གཅིག་པ་བསྟན། དག་པའི་ཞེས་པ་ནས་ཉི་མའོ་ཞེས་པའི་བར་གྱི་བཅུ་གཉིས་པ་བསྟན་ཏོ། །དམ་ཚིག་ཅེས་པ་ནས་གཞན་ཞེས་པའི་བར་གྱིས་བཅུ་གསུམ་པ་བསྟན་ཏོ། །བུད་མེད་ཞེས་པའི་རྐང་པ་ཐམས་རྩ་ལྟུང་ཕྱི་མ་གང་ཡིན་པ་མ་ནུའི་མིང་གི་མངོན་བརྗོད་ཀྱིས་བསྡུས་པའོ། །འདི་ལྟར་དུས་འཁོར་གྱི་རྩ་ལྟུང་བཅུ་བཞི་པོ་དང་། གོང་དུ་བཤད་པ་གཉིས་རྩ་ལྟུང་དང་པོ་ལ་སོགས་པ་འགའ་དང་འགའ་ལས་ཕལ་ཆེར་དོན་མི་གཅིག་པ་མེད་ཀྱིས་ཚིག་ཟུར་ལ་ཕྲ་བའི་རིག་པས་དཔྱད་ན་མཐུན་པ་དང་མི་མཐུན་པ་གཉིས་ཀར་བསྒྲུབ་ཤེས་པས་འདིར་ནི་ལོགས་སུ་མ་བཀྲལ་ལོ། །དེ་བཞིན་དུ་རྒྱུད་སྡེ་འོག་མ་གསུམ་ལ་ཡང་གྲངས་ངེས་བཅུ་བཞི་པ་ཅན་དུ་དུས་འཁོར་འགྲེལ་ཆེན་ལས་གསུངས་པ་ལྟར་ཡིན་ཡང་ཐམས་ཅད་རྩ་ལྟུང་དུ་བསྡུར་རུང་མི་རུང་གཉིས་སུ་དཔྱད་དུ་ཡོད་དེ། འདི་ལྟར་བྱ་རྒྱུད་ལ་མཚོན་ན་གསང་བ་སྤྱི་རྒྱུད་ལས། དེ་རིང་ཕྱིན་ཆད་ཁྱེད་རྣམས་ཀྱིས། །སངས་རྒྱས་ཆོས་དང་དགེ་འདུན་དང་། །བྱང་ཆུབ་སེམས་དཔའ་རྣམས་དང་ནི། །གསང་སྔགས་རིག་སྔགས་ཚོགས་རྣམས་ལ། །དད་པ་རབ་ཏུ་བརྟན་པར་བྱ། །རྟག་པར་ཐེག་པ་ཆེན་པོ་ལ། །ཁྱད་པར་དུ་ནི་མོས་པར་བྱ། །དམ་ཚིག་ཅན་དང་མཛའ་བོ་དང་། །བླ་མ་ལ་ཡང་གུས་པར་བྱ། །ལྷ་རྣམས་ཀུན་ལ་སྡང་མི་བྱ། །དུས་མཚམས་དག་ཏུ་མཆོད་པར་བྱ། །སྟོན་པ་གཞན་གྱི་གཞུང་མི་མཆོད། །རྟག་ཏུ་གློ་བུར་མགྲོན་མཆོད་བྱ། །སྲོག་ཆགས་ཀུན་ལ་བྱམས་པའི་སེམས། །རབ་ཏུ་བརྟན་པ་ཉེ་བར་གཞག །ཐེག་ཆེན་ལ་ནི་དགའ་རྣམས་ཀྱིས། །བསོད་ནམས་དག་ལ་ནན་ཏན་སྐྱེད། །བཟླས་བརྗོད་བྱེད་ལ་འབད་པ་ཡིས། །གསང་སྔགས་སྤྱོད་ལ་བརྩོན་པར་བྱ། །གསང་
སྔགས་རྒྱུད་ལས་བསྟན་པ་ཡི། །དམ་ཚིག་རྣམས་ཀྱང་བསྲུང་བར་བྱ། །དམ་ཚིག་མེད་པ་རྣམས་ལ་ནི། །སྔགས་དང་ཕྱག་རྒྱ་མི་སྦྱིན་ནོ། །གསང་སྔགས་རྒྱུད་ནི་ལེགས་བསྲུང་ཞིང་། །དེ་ཡང་བདག་གིས་རྟོགས་པར་བྱ། །ཞེས་པ་སྟེ། དེའི་མི་མཐུན་ཕྱོགས་རྣམས་དམ་ཚིག་ལས་འདས་པ་ཡིན་ན། བླ་མེད་ཀྱི་རྩ་ལྟུང་དང་པོ་དང་། གསུམ་པ་དང་། བཞི་པ་དང་། ལྔ་དང་། བདུན་པ་དང་། བཅུ་གསུམ་པ་རྣམས་ལ་ལ་དངོས་དང་ལ་ལ་ཤུགས་ཀྱིས་བསྟན་ལ། ཁྱད་པར་གསང་སྔགས་རྒྱུད་ལས་བསྟན་པ་ཡི། །དམ་ཚིག་རྣམས་ཀྱང་བསྲུང་བར་བྱ། །ཞེས་པས་རྩ་ལྟུང་ཐམས་ཅད་ཤུགས་ལ་ཡོད་པར་གྲུབ་བོ། །དེ་བཞིན་དུ་སྤྱོད་རྒྱུད་ལས་གསུངས་པའི་བཅུ་བཞི་ནི། མངོན་བྱང་ལས། བཅུ་པོ་འདི་དག་བྱང་ཆུབ་སེམས་དཔའ་གསང་སྔགས་ཀྱི་སྒོར་སྤྱོད་པའི་བསླབ་པ་ཐམས་ཅད་ཀྱི་རྩ་བ་ཡིན་པས་གཞི་ཞེས་བྱའོ། ཞེས་མི་དགེ་བཅུ་སྤོང་གི་ཁྲིམས་དང་། དེའི་སྟེང་དུ་སྔར་དྲངས་པ་ལྟར་རྩ་བའི་ལྟུང་བ་བཞི་ནི་སྲོག་གི་ཕྱིར་ཡང་ཡོངས་སུ་ཉམས་པར་མི་བྱའོ། །ཞེས་རྩ་ལྟུང་དངོས་བསྟན་བཞི་གསུངས་པའི་ཕྱིར་རོ། །རྣལ་འབྱོར་རྒྱུད་ལས་ནི་དེ་ཉིད་སྣང་ཆེན་ལས། །དེ་བཞིན་གཤེགས་པ་ཐམས་ཅད་ཀྱི་ཚུལ་ཁྲིམས་ནི། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། །ཞེས་པ་ལ་སོགས་པས་རིགས་ལྔའི་སྡོམ་བཟུང་བསྟན་པ་ལས་དེ་བཞིན་གཤེགས་པའི་རིགས་ཀྱི་ཚུལ་ཁྲིམས་དཀོན་མཆོག་གསུམ་ལ་སྐྱབས་འགྲོ་མི་གཏོང་བ་སྟེ་གསུམ། རྡོ་རྗེའི་རིགས་ལ་རྡོར་དྲིལ་ཕྱག་རྒྱ། སློབ་དཔོན་གཟུང་བ་སྟེ་བཞི། རིན་པོ་ཆེའི་རིགས་ལ་ཆོས་དང་ཟང་ཟིང་མི་འཇིགས་བྱམས་པ་སྦྱིན་པ་སྟེ་བཞི། པདྨའི་རིགས་ལ་དམ་
པའི་ཆོས་མ་ལུས་པ་འཛིན་པ་སྟེ་གཅིག །ལས་ཀྱི་རིགས་ལ་སྡོམ་པ་དེ་རྣམས་མི་གཏོང་བ་དང་། །མཆོད་པའི་ལས་ལ་བརྩོན་པ་སྟེ་གཉིས་རྣམས་བསྡོམས་པས་བཅུ་བཞིའོ། །དེ་རྣམས་ལས་དཀོན་མཆོག་གསུམ་གཏོང་བས་མཚོན་བདེ་གཤེགས་བཀང་འདས་ཀྱི་རྩ་ལྟུང་ནི་ཕལ་ཆེར་ལ་འབྱུང་ཉེ་སྟེ། བླ་མེད་ཀྱི་རྩ་ལྟུང་གཉིས་པའི་ངོ་བོ་སྡོམ་པ་གསུམ་གང་རུང་གི་བཅས་པ་ལས་འདས་པ་ཞིག་དགོས་པའི་ཕྱིར་ན་འདིའི་དམ་ཚིག་ནི་སྔགས་ཀྱི་ཚུལ་ཁྲིམས་ཡིན་པའི་ཕྱིར་རོ། །ཁྱད་པར་རྡོ་རྗེའི་རིགས་ཀྱི་དམ་ཚིག་ནི་བླ་མེད་ཀྱི་རྩ་ལྟུང་བཅུ་གསུམ་པ་དང་ཐུན་མོང་ཡིན་ལ། དེ་བཞིན་རྡོ་རྗེ་རྣལ་འབྱོར་མ་ལ་སོགས་བུད་མེད་ཀྱི་གཟུགས་འཛིན་པ་ལ་སྨད་པའི་རྩ་ལྟུང་ཀྱང་བླ་མེད་ཀྱི་བཅུ་བཞི་པ་དང་ཐུན་མོང་བ་ཡིན་པའི་ཕྱིར་རོ། །དེ་བས་ན་དུས་འཁོར་འགྲེལ་ཆེན་གྱི་རྗེས་སུ་འབྲངས་ནས་རྒྱུད་སྡེ་བཞིག་རྩ་ལྟུང་བཞི་པ་ཅན་དང་གྲངས་ངེས་མཚུངས་པར་འབྲེལ་ཞིང་ཕལ་ཆེར་ངོ་བོ་མཚུངས་པར་འདོད་པ་རྣམས་ཀྱང་བསྲུང་བྱའི་དམ་ཚིག་གི་དབྱིངས་ལ་གཞལ་བར་ནུས་པའི་བློ་ནུས་ཅན་ཡིན་ཏེ། འདི་ལྟར་དམ་ཚིག་ཏུ་གདགས་པའི་ངེས་ཚིག་ནི་སྐབས་སྦྱོར་བདུན་པ་ལས། དམ་པ་ནི་སངས་རྒྱས་ཏེ་དེའི་ཞལ་ནས་གསུངས་པའི་ཚིག་ཡིན་པས་དམ་ཆོས་རྣམས་སྒྲོག་པའི་ཕྲིན་ལས་སོ། །ཞེས་པ་ལྟར་ཡིན་ལ། དེའི་རང་བཞིན་ལ་ནན་ཏན་དུ་ལྡན་པའི་སེམས་ཀྱིས་དམ་བཅའ་བ་ལ་ནི་སྡོམ་པའི་སྒྲས་བཏགས་པའི་ཚུལ་སྙིང་པོའི་རྒྱུད་ཕྱི་མ་ལས། གང་ཞིག་ནན་ཏན་ལས་མི་འགོང་། །རྨི་ལམ་དུའང་དམ་ཚིག་བརྗོད། །དམ་བཅའ་བ་ནི་སྡོམ་པར་འདོད། །ཅེས་པ་ལྟར་རོ། །དེ་ལྟ་ནའང་བླ་མེད་ཀྱི་རྩ་ལྟུང་བཅུ་བཞི་པོ་ནི་རྒྱུད་སྡེ་གོང་འོག་ཐམས་ཅད་
ནས་རྩ་ལྟུང་འབའ་ཞིག་པ་ཅན་རྣམས་ཕྱོགས་གཅིག་ཏུ་བསྡུས་པ་ཡིན་པས་ན། དེ་ལས་གཞན་པ་བཅུ་བཞི་ནི། །ཕས་ཕམ་པར་ནི་རབ་ཏུ་བཤད། །སྤང་བ་དོར་བར་མི་བྱ་སྟེ། །རྩ་བའི་ལྟུང་བ་ཞེས་བཤད་དོ། །ཞེས་སོ། །དེ་ལྟ་བུའི་དམ་ཚིག་རྣམས་བསྲུང་བ་ལ་ནན་ཏན་འབད་དགོས་པར་གདམས་པ་ནི། རྣལ་འབྱོར་ལྡན་པ་འཆིའམ་སྲོག་གཏོང་སླ། །རྟག་ཏུ་དམ་ཚིག་བསྲུང་བར་མ་བྱས་ན། །སྔགས་ལ་སྤྱོད་པའི་སྐྱེས་བུ་ངན་སོང་དང་། །སངས་རྒྱས་གཉིས་ལས་འགྲེ་ས་གསུམ་པ་མེད། །དེ་སྐད་དུ་སྡོམ་འབྱུང་ལས། །གལ་ཏེ་དངོས་གྲུབ་མཆོག་འདོད་ན། །སྲོག་ནི་ཡོངས་སུ་གཏོང་ཡང་སླ། །འཆི་བའི་དུས་ལ་བབ་ཀྱང་སླ། །རྟག་ཏུ་དམ་ཚིག་བསྲུང་བར་བྱ། །ཞེས་སོ། །དེ་ལྟར་འབད་པ་ཆེན་པོས་དམ་ཚིག་བསྲུང་བ་རྣམས་ནི་ཚེ་འདིར་བརྩོན་པ་ཞེན་ནས་མ་གྲུབ་ཀྱང་། ཕྱི་མའམ་བཅུ་དྲུག་ཚུན་ཆད་ལ་ངེས་པར་འགྲུབ་སྟེ་དམ་ཚིག་ལྔ་པ་ལས། གལ་ཏེ་ལྟུང་བ་མེད་གྱུར་ན། །སྐྱེ་བ་བཅུ་དྲུག་དག་ལ་འགྲུབ། །ཅེས་སོ། །དེ་ལྟར་མ་གྲུབ་ན་སྔགས་ལ་འཕྲ་ཡང་དེ་བཞིན་གཤེགས་པའི་བཀའ་ལས་གཞན་དུ་འདའ་བའི་ལྟུང་བ་དང་ལྷན་ཅིག་ཅན་དུ་གདོན་མི་ཟ་བས་དེ་ལ་སྔགས་ཀྱི་དངོས་གྲུབ་མེད་ཅིང་། དེས་མཆོད་པ་ཕུལ་ཡང་ལྷ་རྣམས་གྱིས་བཞེས་པར་མི་འགྱུར་བའི་ཚུལ་ཟླ་གསང་ཐིག་ལེ་ལས། སྔགས་ཀྱི་དངོས་གྲུབ་དོན་འདོད་པས། །དམ་ཚིག་བསྲུང་ལ་བརྩོན་པར་བྱ། །གཞན་དུ་བྱས་ན་སྔགས་མཁན་ཀྱིས། །སྔགས་ལ་སོགས་པའི་དོན་མི་འགྲུབ། །ལྷ་རྣམས་ཀྱང་ནི་དམ་ཚིག་གི །གསོལ་ཡང་བཞེས་སུ་མི་གནང་སྟེ། །འཇིག་རྟེན་འདི་རུ་སྡུག་བསྔལ་ཆེ། །འཇིག་རྟེན་
པ་རོལ་དམྱལ་བ་རྣམས། །དམ་ཚིག་སྤྱོད་ལས་འདས་པ་ཡི། །རྨོངས་པའི་བདག་ཉིད་དེ་འཐོབ་བོ། །ཞེས་དང་། བགྲོད་ལམ་གོང་འོག་གཉིས་ལས་མེད་པའི་ཚུལ་ཡང་གསང་བའི་མཛོད་ལས། གང་ལ་བསྒོ་བ་དང་ལྡན་ཞིང་། །གལ་ཏེ་དམ་ཚིག་སྡོམ་པ་གནས། །སྐྱེ་འདིར་ལས་དབང་གིས་མ་གྲུབ། །སྐྱེ་བ་གཞན་དུ་དངོས་གྲུབ་འཐོབ། །རེ་ཞིག་དམ་ཚིག་ཉམས་པ་ལ། །དངོས་གྲུབ་ཐོབ་པ་ལྟ་ཞོག་གིས། །མི་ཡི་སྐྱེ་བའང་རྙེད་པར་དཀའ། །ཞེས་སོ། །དེ་ཕྱིར་ལྟུང་ན་བདག་ཉིད་སུན་ཕྱུང་ནས། །ཕྱིར་བཅོས་ཐབས་ལ་དེ་མ་ཐག་ཏུ་འབད། །ཁྱད་པར་རྩ་ལྟུང་དང་པོ་ཤིན་ཏུ་ལྕི། །བླ་མར་བསྙེན་བཀུར་འཁོར་གསུམ་ཡོངས་དག་འབུལ། །དབང་བསྐུར་བསྐྱར་ནས་སྡོམ་པ་སོར་གཞུག་ཅིང་། །ཉེ་བར་མི་གནས་བདག་འཇུག་ལན་མང་བླང་། །དེ་ལ་སྤྱིར་ཉེས་ལྟུང་དང་ཐུན་ཚོད་གཅིག་ཀྱང་མི་འགྲོགས་པ་ལ་བསླབ་ཅིང་། དེ་ལྟར་འབད་ཀྱང་རྡོ་རྗེ་ཐེག་པའི་རྩ་ལྟུང་ནི་རྣམ་གྲངས་མང་ལ་བདག་ཅག་གི་གཉེན་པོ་ནི་ཉུང་ཟད་དང་བཅས་པས་ཉེས་ལྟུང་གི་མགོ་བརྩམ་པ་ཙམ་ནས་བདག་ཉིད་ཀྱི་བསམ་སྦྱོར་མ་ཡིན་པ་ལ་སུན་གདོན་ཅིང་དྲན་ཤེས་ཀྱི་གཉེན་པོའི་སྒོ་ནས་ཕྱིར་བཅོས་པ་ལ་འབད་པའི་ཚུལ། ས་ཧོ་རའི་དགེ་སློང་རྣལ་འབྱོར་སྤྱོད་པས། ང་ལ་སོ་སོ་ཐར་པའི་ཉེས་པས་གཏན་ནས་མ་གོས། བྱང་ཆུབ་སེམས་དཔའི་སྡོམ་པ་ལ་ཉེས་པ་ཅོ་ལེ་བ་ཙམ་གྱིས་གོས། གསང་བ་སྔགས་ཀྱི་སྡོམ་པ་ལ་ཉེས་པ་ཅ་རེ་ཉ་རེ་བརྒྱབ་སྟེ་བཤགས་སྡོམ་མེད་པར་ཉེས་ལྟུང་དང་ཞག་གཅིག་ཀྱང་འགྲོགས་མ་མྱོང་ཞེས་གསུངས་པ་ལྟར་ཉམས་སུ་བླང་། ཁྱད་པར་རྩ་ལྟུང་དང་པོ་ནི་ཤིན་ཏུ་ལྕི་བའི་ཚུལ། སྒྱུ་འཕྲུལ་དྲཱ་བའི་རྒྱུད་ལས། བླ་མ་ལ་ནི་སྨོད་པ་དང་། །ཐུགས་དཀྲུགས་པ་ཡི་ཉེས་
པ་ནི། །ཕྱི་ཡི་རྒྱ་མཚོ་ཆེན་པོ་ལས། །ཆུ་དེ་སྐྲ་ཡིས་གཏོར་གྱུར་པ། །དེ་ཡི་ཚད་དུ་སྡུག་བསྔལ་མྱོང་། །རྡོ་རྗེའི་དམྱལ་བར་གྲགས་པ་ཡིན། །ཞེས་པས་དེ་ལྟ་བུའི་ཉེས་དམིགས་ལས་འདའ་བའི་དབང་ད་ལྟ་རང་ལ་ཡོད་པས་ཅི་ནུས་པའི་བསྙེན་བཀུར་སྒོ་ཐ་དད་པ་དང་། འཁོར་གསུམ་ཡོངས་དག་ཕུལ་ནས་ཐུགས་ཟིན་པར་བྱ་ཞིང་དབང་བསྐུར་བ་བསྐྱར་ནས་མནོད་ན་སྡོམ་པ་སོར་མི་ཆུད་པའི་ཚུལ། དུས་ཀྱི་འཁོར་ལོ་ལས། རྩ་བའི་ལྟུང་བ་གང་ཞིག་དག་པའི་སླད་དུ་སླར་དཀྱིལ་འཁོར་འདིར་ནི་གཞུག་བྱ་སྟེ། །ཞེས་སོ། །གལ་ཏེ་བླ་མ་མི་བཞུགས་པའམ་ལམ་འཕྲང་འཚེ་བས་བཀག་པ་ལྟ་བུས་མི་ནུས་ན་བདག་འཇུག་ལན་གྲངས་མང་དུ་བཏུད་ནས་རྨི་ལམ་དུ་བླ་མ་མཉེས་པའི་རྟགས་མཐོང་ཚུན་ཆད་ཀྱིས་སོར་ཆུད་པར་འགྱུར་ཏེ། ཕྲེང་བ་ལས། གལ་ཏེ་བླ་མ་དམ་པ་ཤིན་ཏུ་རིང་བ་དང་ལམ་བགྲོད་དཀའ་བ་ལ་སོགས་པའི་ཉེ་བར་འཚེ་བས་བགྲོད་པར་མི་ནུས་པའི་ཕྱོགས་ན་སྟེ་གཞན་དུ་མ་ཡིན་ནོ། །ཞེས་པས་བསྟན་ཏོ། །དེ་ལྟར་ཡང་སྙིང་ཐག་པ་ནས་འགྱོད་སེམས་དྲག་པོ་དང་བཅས་ཤིང་ཕྱིན་ཆད་ལྟུང་བས་མ་གོས་པར་བྱ་སྙམ་པ་ལས་ལོག་ནས་ཉེས་ལྟུང་བྱུང་ཡང་དབང་དང་བདག་འཇུག་གིས་སོར་ཆུད་པས་སླའོ་སྙམ་དུ་སེམས་པ་ནི་ཤིན་ཏུ་གཏི་མུག་དང་ལྡན་པ་སྟེ། དཱ་རི་ཀ་པས། དེ་ཡང་ཕྱིས་མི་བྱེད་པའི་དམ་འཆའ་བ་རྣམས་ལ་ཡིན་གྱིས། ཕྱིས་སྡོམ་པའི་བསམ་པ་མེད་པ་རྣམས་ལ་ནི་མ་ཡིན་ཏེ། འདི་ལྟར་སྐྱེས་བུ་འགའ་ཞིག་དུག་གིས་ཟིན་ནས་སྨན་པ་འགས་དེ་བཟློག་པའི་ཕྱིར་སྨན་གྱི་བཏུང་བ་བླུད་ནས་སྔར་བཞིན་དུ་དུག་ཟ་བ་དང་མཚུངས་སོ། །ཞེས་པ་ནི་ཉེས་
ལྟུང་སྦྱོང་བའི་ཆ་ཐམས་ཅད་ལའང་ཤེས་དགོས་པ་ཡིན་ནོ། །དེའང་ཐོག་མ་ནས་རྩ་ལྟུང་གི་མ་གོས་པ་དང་། །བཅོས་ནས་སོར་ཆུད་པ་གཉིས་ཀྱང་ཁྱད་པར་ཆེ་བའི་ཚུལ། །ཐབས་ལ་མཁས་པའི་མདོ་ལས། །རིགས་ཀྱི་བུ་འདི་ལྟ་སྟེ། དཔེར་ན་ཉན་ཐོས་ཀྱི་ཐེག་པ་ཅན་ལ་རྩ་བའི་ལྟུང་བ་བྱུང་ན་ཕུང་པོ་དེ་ཉིད་ཀྱིས་མྱ་ངན་ལས་འདའ་བའི་སྐལ་བ་མེད་དོ། །ཞེས་ཚེ་དེ་ལ་དགྲ་བཅོམ་པའི་འབྲས་བུ་ཐོབ་མི་ནུས་པ་དང་། དེ་བཞིན་དུ་བྱང་ས་ལས། བྱང་སེམས་ཀྱི་རྩ་ལྟུང་བྱུང་ན་ཚེ་དེ་ལས་དང་པོ་ཐོབ་མི་སྲིད་པར་གསུངས་པ་དང་རྣམ་གཞག་མཚུངས་པས་ན་ཐེག་པ་ཆེན་པོའི་ལམ་གཉིས་ས་ཆོད་ཆེ་ལ་འབྲས་བུ་ཐོབ་པ་ཉུང་བའང་རྒྱུ་མཚན་དེས་ཡིན་པ་རིག་པར་བྱའོ། །ཚུལ་དེ་ལྟ་བུའི་རྩ་བའི་ལྟུང་བ་རྣམས་བཅོས་ནས་དེ་བཞིན་དུ་གཞན་ཞེས་པའི་སྒྲས་སྦོམ་པོ་གཙོ་བོར་གྱུར་པའི་ཉེས་ལྟུང་རྣམས་ཕྱིར་འཆོས་པའི་ཚུལ། བླ་མ་མེད་ན་སྔགས་ཀྱི་སྡོམ་ལྡན་བདུན། །ཕྱག་དང་སྤྱོད་ལམ་དུལ་བས་རང་གི་མིང་། །སྨོས་ནས་རྡོ་རྗེ་ཐེག་པའི་འདུལ་བ་དང་། །འགལ་བའི་ནོངས་པ་འདི་དང་འདི་བྱུང་བས། །འཆབ་ན་བདག་ཉིད་བདེ་བར་གནས་མི་འགྱུར། །འཆབ་མེད་ལེགས་པར་གསོལ་ནས་བཤགས་ཡུལ་གྱིས། །ཉེས་པར་མཐོང་དམ་རང་གིས་མཐོང་ལགས་བརྗོད། །ཡུལ་གྱིས་ཕྱིན་ཆད་བསྡམ་པར་བྱེད་དམ་དྲི། །ཆོས་བཞིན་འདུལ་བ་བཞིན་དུ་སྤྱི་བོས་ནོད། །ཅེས་པ་ལན་གསུམ་རྗེས་ལ་ཐབས་ལེགས་བྱ། །ཞེས་སྨོས་ནས་དེའི་ཚུལ་ནི་སྙིང་པོ་རྒྱན་ལས། ལྟུང་སོགས་ཉེས་པའི་རིམ་པ་ལས། །དང་པོར་བདག་སེམས་སུན་ཕྱུང་སྟེ། །ཡུལ་མདུན་སྙན་གསན་ཕབ་ནས་ཀྱང་། །གསུམ་བླང་གསུམ་འགལ་བཤགས་པ་དང་། །ཞེས་བཤགས་ཡུལ་བླ་མ་ཡོད་ན་རབ། དེ་ལྟར་མེད་ན་ངོ་ཚ་ཁྲེལ་ཡོད་ཀྱི་རྟེན་
སྔགས་ཀྱི་སྡོམ་པ་ལ་རྩ་ལྟུང་མེད་པ་ཞིག་གི་མདུན་དུ་ཕྱིར་འཆོས་པའི་ཚུལ། བཙུན་པ་ཆོས་ལྡན་རབ་འབྱོར་དབྱངས་ཀྱིས་སྦོམ་པོའི་འགྲེལ་བ་ལས། དེ་ལ་ཕྱིར་བཅོས་པ་ནི་འབྱོར་པར་གྱུར་ན་ཚོགས་ལ་དབང་པོའི་སྟོན་མོ་བྱས་ནས་དེ་དག་གི་མདུན་དུ་དངོས་པོ་བརྗོད་པ་སྔོན་དུ་སོང་བ་ཅན་གྱིས་བཤགས་པ་དང་རྗེས་སུ་གཟུང་བར་གསོལ་བ་གདབ་པ་བྱས་ནས་ཡུལ་དེ་དག་གིས་ཀྱང་ཁྱོར་བའི་ཆུ་ལ་ཡི་གེ་བརྒྱ་པ་ལན་བདུན་བཟླས་པ་སྦྱིན་པར་བྱའོ། །ཞེས་སོ། །དེའི་ཚུལ་འདིར་ཁྲིགས་སུ་སྨོས་ན། །ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། རིག་པ་འཛིན་པ་ཆེན་པོ་བདག་ལ་དགོངས་སུ་གསོལ། །གསང་མིང་སྨོས་ནས། བདག་ཆེ་གེ་མོ་ཞེས་བྱ་བ་མ་རིག་པ་དང་ཉོན་མོངས་པའི་དབང་དུ་གྱུར་པས་རིག་པ་འཛིན་པའི་སྡེ་སྣོད་ཆེན་པོའི་ཚུལ་ཁྲིམས་ཀྱི་བསླབ་པའི་གཞི་ལས་རྡོ་རྗེ་ཐེག་པའི་འདུལ་བ་དང་འགལ་བའི་ནོངས་པ་བླ་མ་སྨོད་པ་ལ་སོགས་པའི་རྩ་བའི་ལྟུང་བ་བཅུ་བཞི་དང་། ཡན་ལག་སྦོམ་པོའི་རྣམ་གྲངས་བརྒྱད་ལས་འདི་དང་འདི་ཞེས་བྱ་བ་བྱུང་བས་ཞེས་སམ། ཕས་ཕམ་པ་གང་ཞིག་དང་ཁ་ན་མ་ཐོ་བའི་མཐུས་བཅོམ་པ་དེ་དག་རྒྱལ་བ་སྲས་དང་བཅས་པ་རྣམས་དང་རིག་པ་འཛིན་པ་ཆེན་པོའི་སྤྱན་སྔར་ཤིན་ཏུ་འགྱོད་པས་ཟིལ་གྱིས་ནོན་པའི་སེམས་ཀྱིས་ལྷག་མ་མེད་པར་མཐོལ་ཞིང་འཆགས་ཏེ་མི་འཆབ་པོ། །མི་སྦེད་དོ། །ཕྱིན་ཆད་ཀྱང་སྡོམ་མོ། །བདག་ཉིད་ཆེན་པོ་ཁྱེད་རྣམས་ཀྱིས་བདག་གི་ཉེས་ལྟུང་ཚངས་པར་བསྩལ་ན་ནི་བདག་བདེ་བ་ལ་རེག་པར་འགྱུར་གྱིས། གལ་ཏེ་མ་བསྩལ་ན་ནི་བདག་མགོན་མེད་པ། སྐྱོབ་པ་མེད་པ། མིག་མེད་པ། རྟེན་མེད་པ། གཙོ་བོ་མེད་པ། འདྲེན་པ་
མེད་པ། ལམ་གོལ་དམན་པ་ཅན་དུ་སོང་ནས་མྱ་ངན་ལས་འདས་པ་ཆེན་པོ་ལས་རྒྱབ་ཀྱིས་ཕྱོགས་ཤིང་། ངན་འགྲོའི་གཡང་ས་ལ་ཕྱོགས་པར་འགྱུར་རོ། །ཞེས་ལན་གསུམ་བརྗོད་པའི་མཐར་བཤགས་ཡུལ་གྱིས། ཁྱོད་ཀྱིས་ཉེས་ལྟུང་འདི་རྣམས་ཚུལ་བཞིན་དུ་མཐོང་ངམ། འགྱོད་སེམས་སྐྱེས་སམ། ཕྱིན་ཆད་བསྡམ་མམ། ཞེས་དྲིས་པ་ལ། ཤིན་ཏུ་མཐོང་ངོ་། །འགྱོད་དོ། །ཕྱིན་ཆད་བསྡམ་མོ། །ཆོས་བཞིན་དུ་རྡོ་རྗེ་ཐེག་པའི་འདུལ་བ་བཞིན་དུ་སྤྱི་བོས་ནོད་པར་བགྱིའོ། །ཞེས་ལན་གསུམ་གྱི་མཐར། བཤགས་ཡུལ་གྱིས་ཐབས་ཡིན་ནོ། །བཤགས་མཁན་གྱིས་ལེགས་སོ། །ཞེས་བརྗོད་ནས་ཕྱིར་བཅོས་པར་བྱ་སྟེ། དེ་ལྟར་མ་བགྱིས་པའི་ཉེས་པ་ནི། སྙིང་པོ་རྒྱན་ལས། རྟག་ཏུ་བག་མེད་པར་གནས་དང་། ཉེས་པ་ཆུང་ངུ་ཕྲ་མོ་ཡང་། །སྦྲུལ་གྱི་མཆེ་བས་བཏབ་བཞིན་དུ། །ལུས་ངག་སེམས་ནི་ཉམས་པར་བྱེད། །ཅེས་སོ། །རྒྱུ་མཚན་དེ་ལ་དམིགས་ནས། གལ་ཏེ་ཕྱིར་བཅོས་འགྱངས་ན་ཞག་རེ་བཞིན། །གོང་འཕེལ་འགྲོ་འགྱུར་དེ་ཡི་གཉེན་པོ་རུ། །སྟོབས་བཞི་ཚང་བའི་ཡིག་བརྒྱས་རྟག་ཏུ་བཤགས། །བཅུ་བཞིའི་སྔོ་བགྲང་བརྗོད་པའི་བཤགས་ཚིག་གདོན། །ཞེས་འདོམས་པ་སྟེ། དེ་ལ་ཡི་གེ་བརྒྱ་པ་གདོན་ཚུལ་ནི། སྦོམ་པོའི་འགྲེལ་པ་ལས། དེའི་མེའི་སར་མིང་སྤེལ་བར་བྱའོ། །ཞེས་པས་སརྦ་སིདྡྷི༚་མེ་ཆེ་གེ་མོ་པྲ་ཡཙྪ་ཞེས་གདོན་པའི་དོན་ཏོ། །དེས་ནི་ལྟུང་བ་འཕེལ་བའི་རྒྱུན་ཆད་པར་འགྱུར་ཏེ་སྙིང་པོ་རྒྱན་ལས། རྡོ་རྗེ་སེམས་དཔའ་ལ་དམིགས་ཏེ། ཡི་གེ་བརྒྱ་པ་ཆོ་ག་བཞིན། །ཉི་ཤུ་རྩ་གཅིག་རེ་རེ་བཟླས། །ལྟུང་སོགས་བྱིན་གྱིས་བརླབས་གྱུར་བས། །འཕེལ་བ་རུ་ནི་མི་འགྱུར་ཞེས། །གྲུབ་པ་མཆོག་རྣམས་ཀྱིས་བཤད་པས། །ཐུན་
མཚམས་སུ་ནི་སྦྱང་བར་བྱ། །འབུམ་ཕྲག་དུ་ནི་བཟླས་གྱུར་ན། །རྣམ་པར་དག་པའི་བདག་ཉིད་འགྱུར། །ཞེས་སོ། །དེ་བཞིན་དུ་རྩ་ལྟུང་དང་སྦོམ་པོའི་རྣམ་གྲངས་ལ་སོགས་ཤེས་ཤིང་འགྱོད་པའི་སེམས་དྲག་པོས་གཟིར་ན་རྩ་ལྟུང་བཅུ་བཞི་བསྔོ་བགྲང་ཅན་གྱིས་བཤགས་པས་ཀྱང་འདག་སྟེ། སྦོམ་པོའམ་ཆེན་པོ་ལ་སོགས་པའི་ཡན་ལག་གི་རྣམ་གྲངས་རྣམས་བདེ་གཤེགས་བཀའ་འདས་ཀྱི་ཁོངས་སུ་འདུ་བར་རུང་བའི་ཕྱིར་དང་། ལྟུང་བའི་རྣམ་གྲངས་སྡེ་ཚན་གཅིག་ཏུ་བསྡུས་པའི་ཆོ་ག་ལ་སེམས་གཏད་ནས་བཤགས་པ་ཡིན་པའི་ཕྱིར་ན་དཔའ་བོའི་ཞབས་ཀྱིས། གལ་ཏེ་བྱུང་ན་ཆོ་ག་བཞིན། །བཤགས་ན་དམྱལ་བར་མི་འགྲོའོ། །ཞེས་སོ། །ཁྱད་པར་མདོ་སྒྱུ་སེམས་གསུམ་རིང་ལུགས་ནི། །སྤྱི་མདོར་སྐུ་དང་གསུང་ཐུགས་རྡོ་རྗེ་ཡི། །བསྲུང་དང་སྤྱད་བྱ་ཡིད་འོང་མི་འདོར་དང་། །ཤེས་བྱ་བསྒྲུབ་པའི་དབྱེ་བས་ཉི་ཤུ་བརྒྱད། །དེ་སྐད་དུ་སྤྱི་མདོ་ལས། སྐུ་དང་གསུང་ཐུགས་རྡོ་རྗེ་ཡི། །བསྲུང་དང་སྤྱད་དང་ཡིད་འོང་དང་། །མི་འདོར་ཤེས་བྱ་བསྒྲུབ་པ་དང་། །ཞེས་ཉི་ཤུ་རྩ་བརྒྱད་ཀྱི་གྲངས་ངེས་ཅན་དུ་བསྡུ་བ་ལས། རྩ་བ་སྐུ་གསུང་ཐུགས་ཀྱི་དམ་ཚིག་ཏུ་བསྡུ་བའི་ལུགས་ལྟར་ན་བསྲུང་བའི་ཡུལ་ནི་ལྷ་དང་བླ་མ་གཉིས་སུ་མེད་པ་ཉིད་གཙོ་བོར་གྱུར་པ་ཡིན་ལ། དེ་ལ་ཡུལ་ཀྱི་དབྱེ་བ་ནི་གསལ་བཀྲ་ལས། སྤྱི་དང་འདྲེན་དང་དམ་ཚིག་དབང་། །ཉམས་ཆགས་སྐོང་དང་ཤེས་རྒྱུད་འགྲོལ། །མན་ངག་ལུང་གི་སློབ་དཔོན་རྣམས། །ཞེས་པའི་སློབ་དཔོན་རྣམ་པ་དྲུག་ལས་ཆོས་ཀྱི་བཀའ་དྲིན་ཐོབ་པོའི་ཆ་ནས་བཀུར་ཚུལ་གྱི་ཁྱད་པར་ནི་དེ་ཉིད་ལས། ཡུལ་ལ་དབང་བའི་རྒྱལ་བོ་དང་། །ཁུ་བོ་ཕ་དང་མ་དང་མིག །སྙིང་བས་ལྷག་
པའི་ཚུལ་བལྟས་ཏེ། །ཞེས་པས་མན་ངག་གི་སྒོ་ནས་རང་སེམས་ཆོས་སྐུར་ངོ་སྤྲོད་ཅིང་། གང་ལ་གསོལ་བ་བཏབ་བ་ལས་དངོས་གྲུབ་ཐོབ་པ་ནི་སངས་རྒྱས་ལས་ལྷག་པར་བལྟ་བ་ཡིན་ནོ། །དེ་ལ་འདི་ལྟར་ཕན་འདོགས་པ་དང་གནོད་པ་སྤང་བའི་གཞིའི་གཙོ་བོ་ལུས་ཡིན་པས་སྐུའི་དམ་ཚིག་ཏུ་བླ་མ་དང་ལྷ་ལ་གུས་པར་བལྟ་ཞིང་མཆེད་དང་ལྕམ་དྲལ་གྱིས་མཚོན་པའི་འགྲོ་བ་ཐམས་ཅད་བླ་མའི་སྐུའི་གདུལ་བྱ་ཡིན་པས་གནོད་པ་སྤང་། རྣམ་པར་སྨིན་པའི་ལུས་ཀྱི་སྣང་ཞེན་བསྐྱེད་རིམ་གྱིས་སྦྱོར། དགེ་བའི་ཆོས་དང་མི་དགེ་བའི་རྣམ་འགྱུར་དག་ལ་བརྟེན་ནས་བསྐྱེད་པས་གསུང་གི་དམ་ཚིག་སྔགས་དང་ཕྱག་རྒྱ་རྒྱུན་མི་གཅོད། ངག་གི་ཉེས་པ་སྤང་བའི་ཕྱིར་བླ་མས་ཅི་གསུང་བསྒྲུབ་པ་དང་། མཆེད་ལྕམ་གྱི་དག་མི་གཅོག་པ་དང་། འཁོར་བ་བསྐྱེད་པའི་རྒྱུའི་གཙོ་བོ་ཡིད་ཀྱི་རྣམ་པར་ཤེས་པ་ཡིན་པས་ཐུགས་ཀྱི་དམ་ཚིག་ཏུ་ཡིད་ཀྱི་ཉེས་པ་སྤང་ཞིང་གསང་བ་གཞན་ལ་མི་སྤེལ། བྱང་ཆུབ་ཀྱི་སེམས་རྣམ་པ་གཉིས་བསྐྱེད་ཅིང་བླ་མ་དང་ཐུགས་ཡིད་བསྲེ། ཏིང་ངེ་འཛིན་གྱི་སྒོ་དུ་མ་ལ་སྤྱོད་པའོ། །དེ་སྐད་དུ་མཉམ་སྦྱོར་ལས་བསྒྲུབ་པའི་དམ་ཚིག་ཆེན་པོ་ནི། །ལྷ་དང་བླ་མ་མི་སྤོང་ཞིང་། །སྔགས་དང་ཕྱག་རྒྱ་རྒྱུན་མི་གཅད། །ཅེས་དང་། གསལ་བཀྲ་ལས། རང་ལུས་རྒྱལ་བའི་ཕྱག་རྒྱ་ཆེ། །སེམས་ཅན་ཁམས་ཀྱང་དེར་ཤེས་ཤིང་། །སྣང་སྟོང་གཉིས་མེད་རྡོ་རྗེའི་སྐུ། །བྱས་མཐོང་ཟོས་པ་ཐམས་ཅད་ཀྱང་། །སེམས་ཕྱིར་གང་ཡང་བྱས་སྣང་མེད། །དྲན་དང་ཤེས་བཞིན་སྔོན་བཏང་ལ། །དུས་གསུམ་རྒྱུན་དུ་མ་དྲན་ན། །ཐེག་ཆེན་སྔགས་པར་ཅི་ཡིས་ཆུད། །ཅེས་སོ། །དེ་ལྟར་སྐུ་གསུང་ཐུགས་ཀྱི་དམ་ཚིག་རེ་རེ་ལའང་
གསུམ་གསུམ་དུ་འགྱུར་ཏེ། འདི་ལྟར་དངོས་གྲུབ་ཐམས་ཅད་ཀྱི་རྩ་བ་བླ་མ་བཀུར་བ་ལ་མཚོན་ན་ལུས་ཀྱི་རྣམ་འགྱུར་གྱིས་བཀུར། ངག་གིས་བསྟོད། ཡིད་ཀྱིས་གུས་པར་བྱའོ། །ངག་གི་སྒོ་ལ་མཚོན་ན་ཕན་པའི་ཚིག་སྨྲ་བ་དང་། ཁ་ཏོན་དང་བཟླས་བརྗོད་ཟབ་མོ་བྱེད་པ་དང་། སྲོག་རྩོལ་གོམས་པར་བྱེད་པའོ། །ཡིད་ཀྱི་སྒོ་ལ་མཚོན་ན་སྨོན་འཇུག་གཉིས་དང་། ཏིང་ངེ་འཛིན་དང་། ཤེས་རབ་བསྒྲུབ་པའོ། །ཡན་ལག་གི་དམ་ཚིག་ལྔ་ཚན་ལྔ་ནི་འོག་ཏུ་བཤད་པར་བྱའོ། །སྒྱུ་འཕྲུལ་རྩ་བའི་དམ་ཚིག་རྣམ་ལྔ་དང་། །ཡན་ལག་བཅུར་བཤད་རྩ་བའི་ཕྱོགས་ལ་ནི། །རྡོ་རྗེ་སློབ་དཔོན་མི་སྤོང་བཀུར་སྟིས་བསྙེན། །སྔགས་དང་ཕྱག་རྒྱ་རྒྱུན་མི་གཅད་པ་དང་། །ཡང་དག་ལམ་དུ་ཞུགས་ལ་བྱམས་པར་བྱེད། །གསང་བའི་དོན་རྣམས་གཞན་མི་བསྒྲག་པའོ། །དེ་ལ་རྩ་བའི་དམ་ཚིག་ནི་རྩ་རྒྱུད་ལས། །བླ་མེད་མི་སྤོང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་གཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །འདི་ནི་རྩ་བ་ལྔ་རྣམས་ཏེ། །བསྒྲུབ་དང་བསྲུང་བའི་དམ་ཚིག་མཆོག །ཅེས་སོ། །དེ་ལ་བླ་མེད་མི་སྤོང་བ་ནི་ཡི་དམ་གྱི་ལྷ་བསྒོམ་པ་ཉིད་ལ་འདུས་ཏེ། འདི་ལྟར་ཐེག་པ་ཆེན་པོ་སྤྱིའི་ལུགས་ཀྱི་བྱང་ཆུབ་ཀྱི་སེམས་མི་གཏོང་བ་དང་། དཀོན་མཆོག་ལ་བསྙེན་བཀུར་མི་འདོར་བ་དང་། སྔགས་ཕྱི་མ་ལས་དེའི་སྟེང་དུ་རང་གི་ལྷག་པའི་ལྷ་མཆོད་ཅིང་བསྒོམ་པར་བསྟན་པ་དེ་དག་ཀྱང་འདིར་འཁོར་བའི་འདྲ་འབག་སྦྱོང་ཞིང་རྒྱལ་བའི་རྣམ་པ་དང་མཐུན་པའི་ཕྱག་རྒྱ་རྟགས་ཀྱི་ལྷ་སྐུ་བསྒོམ་པ་ལ་འདུས་ཏེ། དཀོན་མཆོག་གསུམ་དང་
བྱང་ཆུབ་སེམས། །ལྷ་དང་བླ་མ་དེ་བཞིན་ཏེ། །ཞེས་སོ། །དེ་ལ་འདུ་ཚུལ་ནི་རྣམ་པ་ཐ་དད་པ་གསུམ་དུ་བསྟན་པའི་དཀོན་མཆོག་ཀྱང་ཚུལ་གཅིག་ཏུ་བསྟན་པའི་བྱང་ཆུབ་ཀྱི་སེམས་སུ་འདུ་བ་ཡིན་ཏེ། འདི་ལྟར་སངས་རྒྱས་དང་དགེ་འདུན་ནི་ཡེ་ཤེས་ཀྱི་བྱེ་བྲག་ཡིན་ལ། ཆོས་ནི་དེའི་ཆོས་ཉིད་ཡིན་པས་ཡེ་ཤེས་དང་ཆོས་ཉིད་ནི་ཀུན་རྫོབ་ཙམ་དུ་ཆོས་ཅན་བདག་ཉིད་གཅིག་པ་དང་། དོན་དམ་པར་སྤྲོས་ས་ཉེ་བར་ཞི་བའི་བྱང་ཆུབ་ཀྱི་སེམས་ཡིན་པས་དེའི་རྟགས་ཀྱི་ཕྱག་རྒྱ་ལྷ་སྐུ་ཡིན་པ་ནི་དཀོན་མཆོག་འགྲེལ་ལས། དཀོན་མཆོག་གསུམ་གྱི་རང་བཞིན་བྱང་ཆུབ་སེམས། །དེ་སྩོལ་བླ་མ་དེ་རྒྱ་ལྷག་པའི་ལྷ། །ཞེས་བཤད་པ་ཡིན་ནོ། །དེ་ལྟར་ལྷ་བསྒོམ་པ་དེ་མཉེས་པར་བྱ་བའི་ཐབས་སུ་སྔགས་དང་ཕྱག་རྒྱ་རྒྱུན་མི་གཅད་པ་འབྱུང་ཞིང་། དེའི་ཡན་ལག་ཏུ་དམ་ཚིག་རྣམས་ཀྱང་འབྱུང་བས་བླ་མེད་མི་སྤོང་བ་དེ་ཉིད་དུ་གྲུབ་བོ། །བླ་མ་བཀུར་བ་ནི་ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ཀྱི་བསོད་ནམས་ཀྱི་ཕུང་པོས་ནི་རྡོ་རྗེ་སློབ་དཔོན་གྱི་བ་སྤུའི་བུ་ག་གཅིག་གི་གྲངས་སུ་ཡང་ཉེ་བར་མི་འགྲོའོ། །ཞེས་ཞིང་དག་པ་རྣམས་ཀྱི་སངས་རྒྱས་ནི་རྡོ་རྗེ་སློབ་དཔོན་ཡིན་པར་གསུངས། སྔགས་དང་ཕྱག་རྒྱ་རྒྱུན་མི་གཅད་པ་ནི་ཟླ་གསང་ཐིག་ལེ་ལས། བདག་གི་དེ་ཉིད་མཉམ་གཞག་དང་། །དེ་བཞིན་ལྷ་ཡི་དེ་ཉིད་དང་། །སྔགས་དང་ཕྱག་རྒྱའི་དེ་ཉིད་ནི། །དེ་ཡི་དཀྱིལ་འཁོར་མཆོག་ཏུ་འགྱུར། །ཞེས་པས་དེ་ཁོ་ན་ཉིད་ཀྱིས་བསྡུས་པའི་ཡན་ལག་ཅན་གྱི་བཟླས་བརྗོད་ལ་ཕྱག་རྒྱ་ཡང་ཚང་བར་ཤེས་པར་བྱའོ། །དེ་ལྟར་ཡང་། གསང་སྔགས་སྤྱི་དང་མཐུན་པའི་དབང་དུ་བྱས་ན་གསལ་བཀྲ་ལས། དམ་ཚིག་ལས་དང་ཆོས་དང་ནི། །སྐུ་ཉིད་ཕྱག་རྒྱ་
ཆེན་པོ་བཞི། །ཞེས་པ་སྟེ་ཡོངས་ལ་གྲགས་པ་བཞིན་ནོ། །ཡང་དག་ལམ་ཞུགས་ལ་བྱམས་པ་ནི། སྤྱིར་ཐེག་པ་ཆེན་པོ་ལ་ཞུགས་པ་རྣམས་དང་། ཁྱད་པར་དམ་ཚིག་དང་ལྡན་པའི་མཆེད་ལ་བྱམས་པར་བྱེད་པ་སྟེ། རྔམ་གློག་ལས། རྡོ་རྗེ་སྤུན་ལ་གདུང་སེམས་དང་། །ཡང་དག་ལམ་དུ་ཞུགས་པ་ལ། །རྔན་དང་བཅས་པའི་སེམས་ཙམ་ཡང་། །རྟག་ཏུ་སྤང་བར་བྱ་བ་ཡིན། །བརྩེ་ཞིང་གདུང་བའི་ཤུགས་ཕྱུང་ལ། །གཅིག་ལ་གཅིག་ནི་མིག་བཞིན་བལྟ། །མདོར་ན་སྲོག་ལའང་མི་ཆགས་པར། །སྤུན་དང་མིང་སྲིང་དགོས་པ་སྒྲུབ། །ཅིའི་ཕྱིར་རྡོ་རྗེའི་སྤུན་རྣམས་ནི། །འདི་ནས་བྱང་ཆུབ་བར་དག་ཏུ། །མི་འབྲལ་འགྲོགས་པའི་གྲོགས་མཆོག་སྟེ། །མེ་མར་འོད་དང་སྡོང་བུ་འདྲ། །ཞེས་དང་། དཔལ་ཕྲེང་གི་མདོ་ལས་ཀྱང་། བྱང་ཆུབ་སེམས་བརྟན་ཐེག་ཆེན་ཞུགས་ལ་བྱམས། །ཞེས་སོ། །གསང་དོན་མི་སྨྲ་བ་ནི། ཕྲ་རྒྱས་ལས། དམ་ཉམས་དམ་ལས་ལོག་པ་དང་། །དམ་མེད་དཀྱིལ་འཁོར་མ་མཐོང་དང་། །འདྲེས་དང་མ་འདྲེས་ཐམས་ཅད་ལ། །ཞེས་པས་གསང་བའི་ཡུལ་བསྟན་ལ། །ཇི་ལྟར་གསང་བའི་དངོས་པོ་ནི་བཅུ་སྟེ། སྤྱི་དང་བར་གསང་བཞི་བཞི་དང་། །འོས་དང་གཉེར་གཏད་རྣམ་པ་བཅུ། །ཞེས་པ་ལས་སྤྱིར་གསང་བཞི་ནི། རྩ་ལྟུང་བདུན་པའི་མཚན་ཉིད་དེ། ལྟ་བ་ཟབ་མོ་བློ་དམན་དང་ཐེ་ཚོམ་ཅན་ལ་གསང་བ་དང་། སྤྱོད་པ་བརླང་པོ་གསར་དུ་ཞུགས་པ་དང་ལོག་ལྟ་ཅན་ལ་གསང་བ་དང་། ཡི་དམ་གྱི་ལྷའི་མཚན་སྔགས་དང་། དེ་གྲུབ་པའི་རྟགས་མཚན་གཞན་ལ་གསང་བ་སྟེ། དེ་ཡང་མ་འདྲེས་པ་ལ་བསྟན་ན་འདུན་པར་འགྱུར་ཤིང་། །འདྲེས་པ་ལའང་གྱ་ཚོམ་དུ་བསྟན་ན་དངོས་གྲུབ་
ཉམས་པས་སྤྱི་ནས་གསང་བར་བྱ་བ་སྟེ་གསལ་བཀྲ་ལས། ལྟ་བ་སྤྱོད་པ་བརླང་པོ་དང་། །ལྷ་ཡི་མིང་དང་གྲུབ་རྟགས་རྣམས། །སྤྱིར་གསང་རྣམ་པ་བཞི་ཡིན་ནོ། །ཞེས་སོ། །བར་གསང་ནི། གང་དུ་བསྒྲུབ་པའི་གནས་དང་། འདུ་བའི་དུས་དང་། བསྒྲུབ་པའི་གྲོགས་དང་། རྫས་ལ་སོགས་པ་ཚོགས་བསྒྲུབ་བམ་གསང་བའི་སྤྱོད་པ་ལ་ཞུགས་པ་དེ་སྲིད་དུ་གསང་སྟེ། བསྒྲུབ་པའི་གནས་དུས་གྲོགས་དང་རྫས། །བར་དུ་གསངས་ལ་བསྒྲུབ་པར་བྱ། །ཞེས་སོ། །གསང་བར་འོས་པ་ནི། སྔགས་ཀྱི་སྤྱོད་པ་ཁྱད་པར་བ་དང་། དམ་ཚིག་གི་རྫས་འདུ་བར་ཞུགས་པའི་སྤྱོད་ལམ་མི་མཐུན་པའི་ཆ་ཐམས་ཅད་དོ། །གཉེར་དུ་གཏོད་པ་ནི། བླ་མ་དང་མཆེད་ཀྱིས་ཀྱང་རུང་སྟེ་འདི་ནི་གཞན་ལ་བརྗོད་པར་མི་བྱའོ་ཞེས་གསང་བར་གདམས་པ་ལས་མི་འདའ་བ་སྟེ། ཤཱནྟ་ཏནྟྲ་ལས། གཞན་ཡང་སློབ་དཔོན་མཆེད་ལྕམ་གྱིས། །གསང་བར་བསྒྲགས་ནས་གནས་སྐབས་སུ། །དེ་ལྟར་འོས་པ་ཤིན་ཏུ་གསང་། །ཞེས་སོ། །དེ་ལྟ་བུའི་རྩ་བའི་དམ་ཚིག་ལྔ་ལས། ལྷ་མི་སྤང་བ་དང་། སྔགས་དང་ཕྱག་རྒྱ་རྒྱུན་མི་གཅོད་པ་ནི་ཡོན་ཏན་ཁྱད་པར་ཅན་གྱི་བསྒྲུབ་པའི་དམ་ཚིག་ཡིན་ལ། གཞན་གསུམ་པོ་ནི་དེའི་གྲོགས་སུ་འགྱུར་བའི་ཕྱིར་བསྲུང་བའི་དམ་ཚིག་ཡིན་ཏེ། བསྒྲུབ་དང་བསྲུང་བའི་དམ་ཚིག་མཆོག །ཅེས་སོ། །ཡན་ལག་དམ་ཚིག་སྡེ་ཚན་གཉིས་སུ་བསྡུ། །དང་པོའི་ཕྱོགས་ནི་ཉོན་མོངས་ལྔ་མི་སྤོང་། །རང་བཞིན་ཤེས་པའི་ཉོན་མོངས་དེ་བཞིན་ཉིད། །ཐབས་ཀྱིས་ཟིན་པ་རྨ་བྱས་དུག་ཟོས་འདྲ། །ཡེ་ནས་རིགས་ལྔར་ཤེས་པས་ཡེ་ཤེས་འགྱུར། །དེ་སྐད་དུ་རྩ་རྒྱུད་ལས། གཏི་མུག་ཆགས་སྡང་ཞེ་སྡང་དང་། །ང་རྒྱལ་ཕྲག་དོག་མི་སྤོང་ངོ་། །ཞེས་པ་ལས་རྒྱུ་གང་གིས་མི་སྤོང་ཞེ་ན། རང་
བཞིན་ཡོངས་ཤེས་ཀྱི་མི་སྤོང་བ་དང་། ཐབས་ཀྱི་ཟིན་པས་མི་སྤོང་བ་སྟེ། དང་པོ་ནི། ཉོན་མོངས་པའི་རང་བཞིན་ངོ་བོ་ཉིད་མེད་པར་རྟོགས་ན་རྣམ་པར་གྲོལ་བ་ཡིན་པའི་ཚུལ་ངེས་པ་དོན་གྱི་མདོ་སྡེ་ལས་ཀྱང་། འདོད་ཆགས་དང་ཞེ་སྡང་དང་གཏི་མུག་རྣམས་སྤངས་པས་རྣམ་པར་གྲོལ་བ་མ་ཡིན་ནམ་སྨྲས་པ། གང་འདོད་ཆགས་དང་ཞེ་སྡང་གཏི་མུག་རྣམས་སྤངས་བས་རྣམ་པར་གྲོལ་བའོ་ཞེས་བསྟན་པ་ནི་ང་རྒྱལ་བ་རྣམས་ལ་སྟེ། གང་ང་མེད་པ་རྣམས་ཀྱི་དོན་ནི་འདོད་ཆགས་དང་ཞེ་སྡང་དང་གཏི་མུག་གི་རང་བཞིན་ཉིད་རྣམ་པར་གྲོལ་བའོ། །ཞེས་དང་། པདྨ་ནི་དགུན་དུ་འཁྱག་ལས་མི་སྐྱེ་ཡི། ཆུ་དང་འདམ་ལས་སྐྱེའོ། །དེ་བཞིན་དུ་བླ་ན་མེད་པ་གང་དག་རྫོགས་པའི་བྱང་ཆུབ་ནི། ཉན་ཐོས་ཉོན་མོངས་པ་སྤངས་ཤིང་འདུས་མ་བྱས་མཐོང་བ་རྣམས་ལ་མི་སྐྱེ་ཡི། །འཇིག་ཚོགས་ལ་བལྟ་བ་རི་རབ་ལྟ་བུ་བསྐྱེད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་བས། དེའི་ཕྱིར་ཉོན་མོངས་པ་ནི་དེ་བཞིན་གཤེགས་པའི་གདུང་ངོ་། །ཞེས་འཕགས་པ་དྲི་མ་མེད་པར་གྲགས་པས་བསྟན་པ་ལས་སོ། །ཁྱད་པར་སྔགས་ཀྱི་སྡེ་སྣོད་ལས་ནི། དེ་ཁོ་ན་ཉིད་མངོན་སུམ་དུ་རྟོགས་པའི་བདེན་པས་ཉོན་མོངས་པའང་རང་རྒྱུད་ཀྱི་དངོས་པོ་ཅན་དུ་མི་འཆར་བས་རང་བཞིན་གྱིས་རྣམ་པར་དག་ལས་སྤང་དུ་མེད་པ་དང་། ཉོན་མོངས་པ་ལྔ་པོ་ཉིད་རིགས་ལྔའི་སངས་རྒྱས་ཀྱི་རིགས་དང་རང་བཞིན་དང་ཕྲིན་ལས་ཡིན་པས་ཉོན་མོངས་པ་སྤངས་ནས་བསྒྲུབ་ཏུ་མེད་པའི་ཚུལ་ཡང་ཡང་བཤད་ཟིན་ཏོ། །གཉིས་པ་ནི། འདི་ལྟར་འདོད་ཆགས་ལ་མཚོན་ན། ཉེ་བར་ལེན་པའི་
ཕུང་པོ་ལྔ་ལ་ཞེན་ཅིང་ལྷག་པར་ཆགས་པའི་མཚན་ཉིད་ཅན་དུ་གནས་ཀྱང་། དེ་ལམ་བརྟེན་ན་སྦྱིན་པ་བཏང་བས་བསོད་ནམས་ཀྱི་ཚོགས་སུ་འདུ་བྱེད་པ་དང་། དེ་བཞིན་དུ་ཚུལ་ཁྲིམས་དང་བཟོད་བས་ཀྱང་ཚོགས་ཆེན་པོ་བསྐྲུན་དུ་མེད་དེ་ཐེག་པ་ཆེན་པོའི་སྡེ་སྣོད་ལས། འདོད་ཆགས་མེད་ན་འཇིག་ཚོགས་ལ་བལྟ་བ་མི་འབྱུང་ངོ་། །བདག་དང་བདག་གིར་བལྟ་བ་མེད་ན་སྙིང་སྟོབས་མི་འབྱུང་སྟེ། དེ་བས་ན་འཇིག་ཚོགས་ལ་བལྟ་བ་རི་རབ་ལྟ་བུ་ཡོད་པ་རྣམས་ལ་སྙིང་སྟོབས་རི་རབ་ལྟ་བུ་སྐྱེ་བར་འགྱུར་ཏེ། སྙིང་སྟོབས་རི་རབ་ལྟ་བུ་བསྐྱེད་པའི་གང་ཟག་རྣམས་ཀྱིས་ནམ་མཁའི་དབྱིངས་ཀྱིས་མཐའ་ཀླས་པའི་སེམས་ཅན་ཐམས་ཅད་བདག་གཅིག་པུས་གྲོལ་ཞིང་ཐར་བར་བྱའོ། །དབུགས་དབྱུང་བར་བྱའོ། །ཡོངས་སུ་མྱ་ངན་ལས་འདའ་བར་བྱའོ། །ཞེས་སེམས་བསྐྱེད་ནུས་པར་འགྱུར་རོ། །གཞན་ཡང་བྱང་ཆུབ་སེམས་དཔའ་རྣམས་སྲིད་པ་ཐམས་ཅད་དུ་སྨོན་ལམ་ཀྱིས་ལུས་གྲུབ་པར་བྱས་ནས། སེམས་ཅན་ཐམས་ཅད་ཀྱི་དོན་བྱེད་པ་ན་ཉོན་མོངས་པའི་རླན་གྱིས་མ་བརླན་ན། སྲིང་པའི་མྱུ་གུ་མངོན་དུ་འགྲུབ་པའི་ཐབས་མེད་པས་དེ་བས་ན་འདི་སྤང་བར་མི་བྱ་སྟེ། ཐེག་པ་ཆེན་པོ་ལ་ཞུགས་པ་རྣམས་ཀྱིས་ཉོན་མོངས་པ་རྣམས་ནི། ཕ་མ་དང་དགེ་བའི་བཤེས་གཉེན་ལྟ་བུར་བལྟ་བར་བྱ་བ་ཡིན་ནོ། །ཞེས་དང་། དེ་ལ་བརྟེན་ནས་ཕྱིན་དྲུག་གི་སྤྱོད་པ་ལ་འཛུག་ཚུལ་ཡང་། གང་ལ་ཡོངས་སུ་བཏང་དགའ་བ། །དེ་ནི་མཆོག་ཏུ་བཤད་པ་ཡིན། །ཞེས་པ་ནས། ཆགས་བཅས་ཡན་ལག་བཅད་ཀྱང་ནི། །མི་འཁྲུགས་བཟོད་པ་ཡོངས་སུ་རྫོགས། །ཞེས་པས་མཚོན་ནོ།
ཁྱད་པར་སྔགས་ཀྱི་རང་ལམ་དུ་ནི། འདི་ལྟར་གཟུངས་ཀྱི་བདག་ཉིད་ཅན་ལ་མ་བརྟེན་ན་ཡེ་ཤེས་དང་དངོས་གྲུབ་ཀྱི་བྱེད་པར་མི་འགྱུར་བས་མཚོན། ཞེ་སྡང་ལ་སོགས་པ་གཞན་རྣམས་ཀྱང་ཡོན་ཏན་འགྲུབ་པའི་ཆོས་ཀྱི་རྐྱེན་དུ་གནས་པ་ཡང་ཡིན་ལ། ཐབས་དང་བྲལ་བ་རྣམས་ལ་ཉེས་སྐྱོན་གྱི་ཆོས་ཀྱི་རྐྱེན་དུ་ཡང་གནས་པ་ཡང་ཡིན་པ་ལས། འདིར་ནི་ཐབས་དང་ཤེས་རབ་གཉིས་ཀས་ཟིན་པས་རྨ་བྱས་འཛིན་པ་ལ་བྱ་བ་བཞིན་དུ། ཉོན་མོངས་པའི་རང་བཞིན་ཡེ་ཤེས་སུ་གྲོལ་བར་འགྱུར་བའི་ཚུལ་རྒྱུད་ལས། སྔགས་ཀྱིས་ཡོངས་སུ་ཟིན་པའི་ནང་། །ཀུན་ལ་གནོད་པར་བྱེད་མི་ནུས། །དེ་བཞིན་ཐབས་ཀྱི་ཟིན་པ་ཡིས། །དུག་གསུམ་སྡུག་བསྔལ་གནོད་མི་འགྱུར། །ཞེས་སོ། །དེ་བས་ན་གཏི་མུག་ནི་རྣམ་པར་སྣང་མཛད་ཀྱི་དམ་ཚིག་སྟེ། ཆོས་ཀྱི་དབྱིངས་ཀྱི་ངང་དུ་ཤེས་རབ་ཉིད་གྲུབ་པ་མེད་པས་རིག་པ་མེད་པར་རོ་གཅིག་པའི་ཕྱིར་རོ། །ཞེ་སྡང་ནི་མི་འཁྲུགས་པའི་དམ་ཚིག་སྟེ། གདུག་པ་ཅན་འདུལ་བའི་བདག་ཉིད་དོ། །ང་རྒྱལ་ནི་རིན་ཆེན་འབྱུང་ལྡན་གྱི་དམ་ཚིག་སྟེ། ཆོས་ཉིད་མཉམ་པ་ཉིད་ལ་སྲན་འཛུགས་པའི་བདག་ཉིད་དོ། །འདོད་ཆགས་ནི་སྣང་བ་མཐའ་ཡས་ཀྱི་དམ་ཚིག་སྟེ། ཆོས་ཐམས་ཅད་ལ་དབང་བསྒྱུར་བའི་བདག་ཉིད་དོ། །ཕྲག་དོག་ནི་གདོན་མི་ཟ་བར་གྲུབ་པའི་དམ་ཚིག་སྟེ། ཆོས་མཉམ་པ་ཉིད་དུ་རྟོགས་ཤིང་དངོས་པོར་ཞེན་པ་བལྟ་བ་ལ་ཆར་ཞན་པ་རྣམས་གདུལ་བའི་བདག་ཉིད་དོ། །གཉིས་པའི་ཕྱོགས་ནི་བདུད་རྩི་ཆེན་པོ་ལྔ། །བླང་བྱར་ངེས་པས་ཆོས་ཉིད་རོལ་པར་བླང་། །རིགས་ལྔའི་རང་བཞིན་ཉིད་དུ་ཤེས་པས་བླང་། །དངོས་གྲུབ་བསྒྲུབ་པའི་དམ་རྫས་ཡིན་པས་བླང་། །
མཁའ་འགྲོ་འདུ་ཞིང་དངོས་གྲུབ་ཉེ་བས་བླང་། །སངས་རྒྱས་ཀུན་གྱི་བརྟུལ་ཞུགས་ཡིན་པས་བླང་། །དེ་སྐད་དུ་རྩ་རྒྱུད་ལས། དཀར་རྩི་དམར་རྩི་དྲི་ཤ་ཆེན། །དག་པའི་སྣོད་བཅུད་མི་དོར་རོ། །ཡན་ལག་བཅུ་ཡི་དམ་ཚིག་མཆོག །ཡེ་ནས་དག་མཉམ་རྟོགས་པར་སྤྱད། །ཅེས་དང་། བདུད་རྩི་འབྱུང་བའི་རྒྱུད་བམ་པོ་བརྒྱད་པ་ལས་ཀྱང་། ཀླུ་དང་བྲམ་ཟེ་གཙང་མ་ཟ། །དེ་ཡང་གྲོལ་བར་ངས་མ་བཤད། །ཁྱི་དང་ཕག་པ་མི་གཙང་ཟ། །དེ་ཡང་གྲོལ་བར་ངས་མ་བཤད། །རྣལ་འབྱོར་ཐབས་ལྡན་རྣམས་ཀྱིས་ནི། །ཆོས་སྐུ་གཅིག་ལ་ཐ་དད་པའི། །རིགས་ལྔའི་རང་བཞིན་འདི་བསྟན་ཏོ། །ཞེས་པ་ནས་སོ་སོའི་རང་བཞིན་བསྟན་པའི་མཐར། །གཙང་དང་མི་གཙང་རྟོག་པ་ཡིན། །མཁས་པས་དབུས་ལའང་གནས་མི་བྱ། །ཞེས་པ་ལ་སོགས་པས་བསྟན་པ་བཞིན་མཉམ་གཞག་གི་དོན་དག་མཉམ་ཆེན་པོར་རྟོགས་པ་དང་རྗེས་ཐོབ་ཀྱི་རོལ་པར་རིགས་ལྔའི་རང་བཞིན་དུ་ཤེས་ནས་དམ་ཚིག་ཆེན་པོའི་རྫས་སུ་བླང་དོར་མེད་པར་སྤྱོད་པའོ། །ཆ་ཤས་དབྱེ་བ་ཉིས་བརྒྱའི་གྲངས་ངེས་ནི། །ཉི་ཤུར་བསྡུ་བ་ཀུན་གཟིགས་རོང་བའི་ལུགས། །དེ་སྐད་དུ་རྩ་རྒྱུད་ལས། རྩ་བའི་དམ་ཚིག་ལྔ་ལ་ནི། །གཅིག་ལའང་གཉིས་དང་བཅུ་ཕྲག་གསུམ། །ཞེས་པས་རྩ་བ་གཅིག་ལའང་སུམ་ཅུ་རྩ་གཉིས་སུ་ཕྱེ་བས་བརྒྱ་དང་དྲུག་ཅུར་འགྱུར་ལ། ཡན་ལག་གཅིག་ཉིད་ལའང་ཉི་ཤུར་ཕྱེ་བས་ཉིས་བརྐྱར་འགྱུར་ཏེ་བསྡོམས་ན་སུམ་བརྒྱ་དྲུག་ཅུའོ། །འདི་ལྟར་ཡན་ལག་གི་དམ་ཚིག་ཉིས་བརྒྱ་པོ་ཉི་ཤུར་བསྡུ་བའི་ཚུལ་དཀོན་མཆོག་འགྲེལ་ལས། ཡན་ལག་གི་དམ་ཚིག་ནི། ཡན་ལག་ཉི་ཤུར་དབྱེ་བར་བྱ་སྟེ། གཅིག་ལ་ཡང་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ཡན་ལག་རྣམ་པ་ལྔ། སྐུ་གསུང་ཐུགས་ཀྱི་དངོས་གཞི་
གསུམ་ཡང་དེ་ཉིད་དུ་ཞིག་སྟེ་ཡན་ལག་གི་གཞི་མེད། རྩ་བ་ཐབས་དང་ཤེས་རབ་གཉིས་ཀྱང་ཐབས་ཤེས་རབ་དང་ལྡན། ཤེས་རབ་ཐབས་དང་ལྡན་པས་རྩ་བ་གཉིས་པོ་ཞིག་སྟེ་ཡན་ལག་བཞིར་འགྱུར་བས། དེ་ཡང་སྐུ་གསུང་ཐུགས་ཡོན་ཏན་ཕྲིན་ལས་ལྔའི་ཆ་ཤས་སུ་འགྱུར་བས་རྩ་བའི་འཕྲོ་གཞི་མེད་དེ། ཡན་ལག་དང་ཆ་ཤས་ཉི་ཤུ་ཉི་ཤུར་འགྱུར་རོ། །ཞེས་སོ། །སེམས་ཀྱི་ཕྱོགས་ལ་མེད་དང་གཅིག་པུ་དང་། །ཕྱལ་བ་དང་ནི་ལྷུན་གྲུབ་ཞེས་གྲགས་པ། །བསྲུང་མཚམས་བྲལ་ལ་འདའ་བྱ་མི་དམིགས་བའི། །ངོ་བོའི་བཞུགས་ཚུལ་དམ་ཚིག་ཆིངས་ཀྱིས་བཅིངས། །ཡེ་ནས་ཉམས་མེད་རྡོ་རྗེ་རྒྱལ་པོའི་ལུགས། །དེ་ལ་རང་བཞིན་རྫོགས་པ་ཆེན་པོ་ནི་འཕགས་པའི་ལམ་ཡིན་པས་ངོ་བོའི་བཞུགས་ཚུལ་ལ་རྟོགས་པ་ལྟ་བའི་དམ་ཚིག་ཆེན་པོ་བཞིའི་ཆིངས་ཀྱིས་བཅིངས་ནས་གནས་ལུགས་ཀྱི་གཤིས་དེ་ལས་གཞན་དུ་མི་གཡོ་བའི་དོན་དུ་བསྟན་པ་སྟེ་རིན་པོ་ཆེ་སྤུངས་པ་ལས། དེ་དུས་བསྲུང་པའི་མཚམས་འདས་པའི། །དམ་ཚིག་ལྷུན་གྲུབ་ཆེན་པོ་དང་། །མེད་དང་གཅིག་པུ་ཕུལ་བ་ཡིས། །དེ་ཡི་གྲོགས་སུ་དེ་འགྱུར་རོ། །ཞེས་སོ། །དེ་ལ་དང་པོ་ནི་ངོ་བོ་ཀ་ནས་དག་པ་སྤྲོས་བྲལ་རང་བྱུང་ཆེན་པོའི་དམ་ཚིག་ནི་བསྲུང་མཚམས་མེད་པའི་ཆོས་ཉིད་ལས་མི་གཡོ་བ་བྱར་མེད་ལྷུན་རྫོགས་ཀྱི་ཡེ་ཤེས་ཆེན་པོའི་ངོ་བོར་གནས་པ་སྟེ། ཐིག་ལེ་ཀུན་གསལ་ལས། རང་རིག་ཡེ་ཤེས་ཆེན་པོ་ལ། །བསྲུང་དང་སྲུང་བྱེད་གཉིས་མེད་པས། །ཉམས་དང་མ་ཉམས་གཉིས་སུ་མེད། །ཐེག་བརྒྱད་བཅོས་མའི་ཚིག་གི་གྲངས། །ང་མི་བསྲུང་བས་མེད་ཅེས་བྱ། །ཞེས་སོ། །དེ་ཡང་འདི་ལྟར་ཕུང་པོ་ལྔ་ཡུལ་མེད་དུ་རྟོགས་པའི་དང་ངང་རང་བཞིན་གྱི་བདག་ཉིད་གང་ཡིན་པ་ལ་ཚོགས་བརྒྱད་ཀྱི་
འཆེད་བས་དཀྲིགས་ནས། འདའ་ཉམས་ཀྱི་རྣམ་པར་རིག་པ་ཅན་དུ་བལྟ་བ་ནི་སྣང་བཏགས་དང་ཤེས་བྱའི་ཆོས་ལས་མ་འདས་པའི་ཕྱིར་རོ། །དེ་སྐད་དུ་སྤྱི་མདོ་ལས། བསྲུང་བྱ་སྲུང་བྱེད་མེད་པ་ནི། །ཆོས་ཉིད་དམ་པའི་དམ་ཚིག་ཡིན། །ཞེས་སོ། །དེ་ལ་རྒྱུ་མཚན་མེད་དོ་སྙམ་ན་རྟོགས་པའི་དུས་ན་བླང་དོར་མེད་པའི་དོན་ཏེ་རྫོགས་པའི་སངས་རྒྱས་དང་རྟོགས་པ་མཉམ་པ་ས་ར་ཧས། ཀྱེ་མ་གནས་ལུགས་རྟོགས་ནས་དམན་པ་ཉིད་བྱེད་ན། །རྒྱལ་པོ་ཁྲི་ལས་བབས་ནས་ཕྱག་དར་བྱེད་པ་བཞིན། །ཟད་མི་ཤེས་པའི་བདེ་བ་ཆེན་པོ་ཉིད་སླངས་ནས། །འཁོར་བའི་བདེ་ལ་རེག་པ་ཉིད་ཀྱིས་འཆིང་། །ཞེས་སོ། །གཉིས་པ་ནི། དེ་ལྟར་ཕྱི་ནང་ཡུལ་མེད་དུ་རྟོགས་པའི་ངང་ནས་སྒོ་ལྔ་རང་ཡན་གྱི་རིག་པ་ལ་སྙམ་བྱེད་ཀྱི་བློ་ཞེན་མི་འཇུག་པར་ཆོས་ཅན་ཐམས་ཅད་ཆོས་ཉིད་ཡངས་པར་ལ་བཟླ་བ་ནི་ཕྱལ་པ་ཞེས་བྱ་སྟེ། ཀུན་བྱེད་ལས། དངོས་པོ་མི་སྤྱོད་ཡེ་ཤེས་མ་འགགས་པ། །དེ་ལ་ཕྱལ་པ་ཞེས་སུ་བཏགས་པ་ཡིན། །ཞེས་དང་། ཀུན་གསལ་ལས། འོག་མའི་དམ་ཚིག་ལས་གྲོལ་ཞིང་། །རང་གི་སྒོ་གསུམ་ཡངས་བས་ན། །ཕྱལ་པ་ཞེས་སུ་བཏགས་པ་ཡིན། །ཞེས་དང་། སྔ་མའི་གཞུང་ལས། སེམས་ཀྱི་གླང་པོ་ཡན་དུ་ཆུག །དེ་ནི་རང་ཉིད་ལ་དྲིས་ཤིག །ཅེས་སོ། །གསུམ་པ་ནི། དེ་ལྟར་ངོ་བོ་ཉིད་མེད་པའི་ཆོས་ཉིད་ཀ་དག་གི་གདངས་ལ་མཁྱེན་ཆ་དང་ཡོན་ཏན་གྱི་ཚོགས་རང་བཞིན་ལྷུན་གྲུབ་ཏུ་གནས་པ་ཆོས་ཅན་སྣང་བ་བཞིའི་ཉམས་ལེན་དང་མི་འབྲལ་བ་ནི་ལྷུན་གྱིས་གྲུབ་པའི་དམ་ཚིག་སྟེ་ཀུན་བྱེད་ལས། ཇི་ལྟར་སྣང་བའི་ཆོས་རྣམས་མ་ལུས་ཀུན། །ཡིན་ཆོས་བྱང་ཆུབ་སེམས་སུ་རྫོགས་པའི་ཕྱིར། །ལྷུན་གྱིས་གྲུབ་པ་ཞེས་སུ་ང་ཡིས་བཤད། །ཅེས་དང་། ཀུན་གསལ་ལས། རང་རིག་ཡེ་ཤེས་གཅིག་པུ་ལ། །བྱ་རྩོལ་མེད་པར་ཡོངས་
བསྲུངས་པས། །ལྷུན་གྲུབ་ཞེས་སུ་བརྟགས་པ་ཡིན། །ཞེས་སོ། །བཞི་པ་ནི། འདི་ལྟར་དམ་ཚིག་དང་། དམ་ཚིག་མ་ཡིན་པ་དང་། སྡོམ་པ་དང་སྡོམ་པ་མ་ཡིན་པ་དང་། དངོས་པོ་དང་དངོས་པོ་མེད་པ་དང་། སྐྱེ་བ་དང་། འགག་པ་དང་། བདག་གིས་ནི་རྟོགས་སོ། །གཞན་ནི་འཁྲུལ་ལོ་ཟེར་ནས་བློ་དང་སྙམ་བྱེད་གཉིས་ཀྱིས་གཞལ་བའི་འདོད་དགའི་ལྟ་བ་དགག་བཞག་གི་རྗེས་སུ་འབྲང་བ་དང་། ཕོ་ཚོད་ཀྱི་རྟོགས་པ་ཐམས་ཅད་བློས་མི་མཚོན་པ་ཆོས་ཉིད་གཅིག་ཏུ་གནས་གྱུར། བལྟས་པས་མ་མཐོང་བས་རང་བཞིན་གཅིག་ཏུ་གནས་གྱུར། ཚིག་གིས་མི་མཚོན་པའི་ཡེ་ཤེས་གཅིག་ཏུ་གནས་གྱུར་པས་གཅིག་པུ་ཞེས་བྱ་སྟེ། ཀུན་གསལ་ལས། བསྲུང་དུ་མེད་པའི་དམ་ཚིག་ལས། །འདའ་མི་སྲིད་པའི་བསྲུང་ཐབས་ནི། །རང་རིག་ཡེ་ཤེས་གཅིག་པུ་བས། །གཅིག་པུ་ཞེས་སུ་བཏགས་པ་ཡིན། །ཞེས་དང་། ཀུན་བྱེད་ལས། སེམས་སུ་ཀུན་གཅིག་གཅིག་པུར་བསྟན་པ་ཡིན། །ཞེས་སོ། །ཆོས་ཉིད་ལ་གཅིག་དང་དུ་མའི་སྒྲ་མི་འཇུག་གོ་སྙམ་ན་མིང་ལ་བརྟེན་ནས་དོན་ལ་འཇུག་པའི་གནས་སྐབས་ན་ཤིན་ཏུའང་རུང་བས་ན་མདའ་སྣུན་གྱིས་ཀྱང་། གདོད་ནས་དག་པ་ནམ་མཁའི་རང་བཞིན་ལ། །བལྟས་ཤིང་བལྟས་ཤིང་མཐོང་བ་འགག་པར་འགྱུར། །གཉུག་མའི་ཡིད་ལ་སྐྱོན་གྱིས་བྱིས་པ་བསླུས། །སྐྱེ་བོ་མ་ལུས་ལྷག་པར་སུན་འབྱིན་ཞིང་། །ང་རྒྱལ་སྐྱོན་གྱིས་དེ་ཉིད་མཚོན་མི་ནུས། །འཇིག་རྟེན་མ་ལུས་བསམ་གཏན་གྱིས་རྨོངས་འགྱུར། །གཉུག་མའི་རང་བཞིན་སུས་ཀྱང་མཚོན་དུ་མེད། །བླུན་པོ་རྣམས་ཀྱིས་རང་གི་བློ་ལ་དཔྱད་བྱས་ན། །སྐད་ཅིག་གྲོལ་བ་དེ་ལ་ཆོས་ཀྱི་སྐུ་ཞེས་བྱ། །གྲོལ་བ་དེ་ལས་གཞན་པའི་བདེ་ཆེན་ས་ཡོད་
ཅེས། །བྱིས་པ་རྣམས་ཀྱི་སྨྲས་ཀྱང་སྨིག་སྒྱུའི་ཆུ་དང་མཚུངས། །ཐ་མི་དད་པའི་ཡེ་ཤེས་ཁོ་ན་མཆོག་གཅིག་པུ། །ཞེས་སོ། །དེའི་ཕྱིར་བསྲུང་མཚམས་དང་བྲལ་བའི་ཆོས་ཉིད་རྟོགས་པ་ལ་ཡེ་ནས་ཉམས་པ་མེད་པ་རྡོ་རྗེ་རྒྱལ་པོའི་ལུགས་ཞེས་བྱ་སྟེ་དེའི་ཤེས་རྒྱུད་ལ་བསོད་ནམས་མ་ཡིན་པ་འདུ་མི་བྱེད་པའི་ཕྱིར་དང་། འདའ་བར་བྱ་བའི་དམིགས་པ་མེད་པས་ངོ་བོ་ཉིད་ཀྱི་བཞུགས་ཚུལ་གང་ཡིན་པ་དམ་ཚིག་གི་ཚིངས་ཀྱིས་བཅིངས་པ་ཙམ་ལས་འོག་མ་ཁྱད་དུ་གསོད་པའི་ཚིག་ཏུ་འཁྲུལ་པར་མི་བྱ་སྟེ། ཡི་གེ་མེད་པ་ལས། དེ་དུས་བསྲུང་མཚམས་ལས་འདས་པའི། །མོད་དད་གཅིག་པུ་ཕྱལ་པ་ཡི། །དེ་ཡི་གྲོགས་སུ་དེ་འགྱུར་རོ། །ཞེས་བཤད་དོ། །ཚུལ་དེའི་ཕྱིར་སློབ་དཔོན་སངས་རྒྱས་གཉིས་པས། རྒྱལ་པོ་ཆེན་པོ་ངའི་གསང་སྔགས་འདི་ལྟ་བ་ཆོས་ཀྱི་སྐུ་དང་བསྟུན་ལ། སྤྱོད་པ་བྱང་ཆུབ་ཀྱི་ཕྱོགས་དང་བསྟུན་ནས་ལྟ་བའི་ཕྱོགས་སུ་སྤྱོད་པ་མ་ཤོར་བ་མཛོད། ཤོར་ན་དགེ་མེད་སྡིག་མེད་དུ་སོང་ནས་ཕྱིས་གསོར་མི་རུང་། སྤྱོད་པའི་རྗེས་སུ་ལྟ་བ་འབྲངས་ན་དངོས་པོ་མཚན་མས་བཅིངས་ནས་གྲོལ་བར་མི་འགྱུར། ངའི་སྔགས་སེམས་ཕྱོགས་འདི་ལྟ་བཤས་ཆེ། མ་འོངས་པ་ན་ཚིག་གི་གདེངས་ནི་ཤེས་ཏེ་ལྟ་བའི་གདེངས་མ་རྙེད་པ་མང་ངོ་ཞིག་ངན་སོང་དུ་འགྲོ། ཞེས་གསུངས་སོ། །དེ་ལྟ་བས་ན། ལམ་ཞུགས་རྣམས་ཀྱི་རང་རྒྱུད་དག་བྱའི་ཕྱིར། །ཉམས་ན་ཕྱིར་བཅོས་རིན་ཆེན་བུམ་པ་བཟང་། །དམ་ཚིག་རྣམ་པར་བཀོད་པའི་གྲུབ་མཐའ་ནི། །རྩ་བའི་བླ་མའི་སྐུ་གསུང་ཐུགས་གསུམ་ལ། །ཕྱི་ནང་གསང་བའི་དམ་ཚིག་གསུམ་ཚན་གསུམ། །སྲོག་གཅོད་མི་ཚངས་སྤྱོད་དང་བརྐུ་བ་སྤོང་། །ཕ་མ་སྤུན་སྲིང་རང་ལུས་ཆོས་གང་སྨོད། །བླ་མའི་གྲིབ་འགོང་ཡུམ་གཙི་
སྤུན་སྲིང་བརྡེག །གསུང་གི་གསུམ་ལ་རྫུན་ཕྲ་ཚིག་རྩུབ་སྤང་། །ཆོས་སྨྲ་དོན་སེམས་གནས་ལུགས་སྒོམ་མི་བཀུར། །བླ་མའི་ཡུམ་དང་སྤུན་སྲིད་ཚིག་མི་བརྙས། །ཐུགས་ཀྱི་གསུམ་ལ་ཡིད་ཀྱི་རྣམ་གསུམ་དང་། །སྤྱོད་དང་བསྒོམ་དང་ལྟ་བ་ལོག་པ་སྤང་། །བླ་མ་ལྷ་མཆེད་བལྟ་བསྒོམ་ཐུན་ཀུན་སེམས། །དེ་ལ་ལམ་ཞུགས་རྣམས་ནི་འབྲས་བུ་ལ་རེག་པ་མ་ཡིན་པས་གཤིས་ཀྱི་བཞུགས་ཚུལ་དམ་ཚིག་གི་ཆིངས་ཆེན་པོས་བཅིངས་པའི་ཚིག་ཐམས་ཅད་ལ་འཁྲུལ་དུ་མི་གཞུག་པར་རང་རྒྱུད་དག་པའི་ཐབས་ལ་འབད་དགོས་ཏེ་དམ་ཚིག་མཆོག་གི་རྒྱུད་ལས། དམ་ཞེས་བྱ་བ་བཅིངས་པ་སྟེ། །རྡོ་རྗེ་འདའ་ཀ་གཏན་གྱི་གཉེར། །ཞེས་དང་། ངེས་ཚིག་ཀྱང་ས་མ་ཡ་ཞེས་པའི་སྒྲ་དོན་དམ་དུ་བསྲུངས་ན་མི་དགེ་བ་འཚིག་པས་དམ་ཚིག་དང་། སྐུ་གསུང་ཐུགས་ལ་སོགས་པའི་དམ་རྒྱ་མྱུར་བ་གང་ཞིག་ལས་ཉམས་ན་དམྱལ་མེས་འཚིག་པ་སྟེ། དམ་ཚིག་རྣམ་བཀོད་ལས། ས་ཞེས་བྱ་བ་བསྐྱེད་པ་ལ། །མ་ཞེས་བྱ་བ་མ་ཉམས་ན། །དངོས་གྲུབ་ཐམས་ཅད་སྟེར་བ་ཉིད། །ཡེ་ཞེས་ཉམས་ན་ཡལ་བར་འགྱུར། །དམ་ཞེས་བྱ་བ་བཅིངས་པ་སྟེ། །དེ་ཉིད་གྲོལ་ན་ཉམས་པ་ཉིད། །ཚིག་ཅེས་བྱ་བ་དེ་འདས་ན། །མེ་ཡི་སྡུག་བསྔལ་མྱོང་བའོ། །ཞེས་དང་། འཇམ་དཔལ་བཤད་རྒྱུད་ལས། དབང་རྣམས་འཛིན་པའི་རྟེན་དག་གི། །དམ་ཚིག་ཡིན་ཏེ་ཉམས་ན་ཡལ། །དཔེར་ན་བྱང་དང་རེ་མོ་བཞིན། །ཞེས་སོ། །དབྱེ་བའི་དབང་དུ་བྱས་ན་རང་ཤར་ལས། །འབུམ་སྡེར་གསུངས་པའི་དམ་ཚིག་རྣམས། །མདོར་བསྟན་ལེགས་པར་ཡིད་ལ་ཟུང་། །དེ་ཡང་མདོར་བསྟན་འདི་ལྟ་སྟེ། །རྟོགས་བྱེད་ལྟ་བའི་དམ་ཚིག་དང་། །
སྤྱོད་པ་རྒྱུན་གྱི་དམ་ཚིག་དང་། །བསྒྲུབ་པ་སྤྱི་ཡི་དམ་ཚིག་དང་། །ཐུན་མོང་སྤྱི་ཡི་དམ་ཚིག་དང་། །སྐུ་གསུང་ཐུགས་ཀྱི་དམ་ཚིག་དང་། །ཡན་ལག་གྲངས་ཀྱི་དམ་ཚིག་དང་། །གལ་མདོ་ངེས་པའི་དམ་ཚིག་གོ །ཞེས་སོ། །དེ་དག་ཀྱང་སྤྱི་དང་ཁྱད་པར་ལྷག་པའི་དམ་ཚིག་གསུམ་དུ་འདུ་བ་ལས། དང་པོ་སྤྱིའི་དམ་ཚིག་ནི་སོ་བྱང་དང་རྒྱུད་སྡེ་ཕྱི་པས་བསྡུས་པ་གང་ཡིན་པ་སྟེ། ཤཱནྟ་ཏནྟྲ་ལས། སོ་སོ་ཐར་དང་བྱང་ཆུབ་སེམས། །བྱ་སྤྱོད་རྣལ་འབྱོར་རྒྱུད་རྣམས་ལས། །བསྲུང་བར་བྱ་བ་གང་གསུངས་པ། །ཐུན་མོང་སྤྱི་ཡི་དམ་ཚིག་ཡིན། །ཞེས་སོ། །གཉིས་པ་ནི་སྔགས་སྤྱི་ལ་ཁྱབ་པའི་དམ་ཚིག་ཡིན་པས་འདིར་འཆད་པར་བྱ་བ་སྟེ། སྤྱི་མདོ་ལས། སྐུ་དང་གསུང་ཐུགས་རྡོ་རྗེ་ཡི། །བསྲུང་དང་སྤྱད་དང་ཡིད་འོང་དང་། །མི་འདོར་ཤེས་བྱ་བསྒྲུབ་པ་དང་། །ཞེས་ཉི་ཤུ་རྩ་བརྒྱད་དུ་གྲངས་ངེས་པའི་རྩ་བ་སྐུ་གསུང་ཐུགས་ཀྱི་དམ་ཚིག་ལའང་ཕྱི་ནང་གསང་གསུམ་དང་། རེ་རེ་ལའང་གསུམ་གསུམ་དུ་ཕྱེ་བས་ཉི་ཤུ་རྩ་བདུན་ཏེ། དམ་ཚིག་རྣམ་བཀོད་ལས། སྐུ་དང་གསུང་དང་ཐུགས་དག་ལས། །རེ་རེ་ལའང་དགུ་དགུ་སྟེ། །འཇུག་དང་ལས་ཀྱི་རྣམ་པས་ཤེས། །ཞེས་སོ། །རང་བཞིན་རྒྱས་པར་ཕྱེ་ན་དམ་ཚིག་རིན་པོ་ཆེ་རྣམ་པར་བཀོད་པའི་རྒྱུད་ལས། སྐུ་ཡི་ཕྱི་ཡི་དམ་ཚིག་ལ། །རྣམ་པ་གསུམ་དུ་བརྟག་བྱ་སྟེ། །མ་བྱིན་བླངས་པས་ཕྱི་ཡི་ཡང་། །སྐུ་ཡི་དམ་ཚིག་ཉམས་པར་འགྱུར། །དེ་ཡི་རྟགས་སུ་ཡན་ལག་ནད། །མི་བཟང་སྣ་ཚོགས་ལུས་ལ་འབྱུང་། །མི་ཚངས་སྤྱད་པ་ནང་ཡིན་ཏེ། །རྟགས་སུ་དབང་པོའི་ནད་རྣམས་སོ། །སྲོག་གཅོད་པ་ནི་གསང་བ་སྟེ། །དེ་ཡི་རྟགས་སུ་དོན་སྣོད་ནད། །རྣལ་འབྱོར་པ་ཡིས་མྱོང་བའོ། །ཞེས་དང་། བསྐང་བའི་ཚེག་དང་
བསྐང་ཚུལ་ནི་དམ་ཚིག་མཆོག་གི་རྒྱུད་ལས། །རྟགས་དང་སྦྱར་བའི་རྣལ་འབྱོར་བས། །ཕྱི་ཡི་ཕྱི་ལ་ལྡེར་སོ་དང་། །རི་མོའི་ལས་ནི་ལན་བདུན་བགྱིས། །དེ་ཡིས་སྡིག་ལས་རྣམ་པར་གྲོལ། །ཕྱི་ཡི་ནང་ལ་ལུགས་སྐུ་བདུན། །རབ་ཏུ་གནས་པས་རྩོལ་བས་བཞེངས། །བླ་མ་མཆོག་ལ་དབུལ་བར་བྱ། །ཕྱི་ཡི་གསང་བའི་རྟགས་བྱུང་ན། །རྡོ་རྗེ་དང་ནི་ དྲིལ་བུ ་ཉིད། །དགུའམ་བཅུ་གཅིག་བླ་མ་ལའོ། །དེས་ནི་ནད་ལས་གྲོལ་བ་དང་། །འདོད་པ་ཕུན་སུམ་ཚོགས་པ་དང་། །དགེ་དང་ཞི་བའི་ལས་འགྲུབ་དང་། །འགྲོ་བ་རྣམས་ནི་བྱམས་པར་འགྱུར། །ཞེས་སོ། །སྐུའི་ནད་ལ་ཡང་ཕྱི་ནང་གསང་བ་གསུམ་ནི་ཁང་བུ་བརྩེགས་པ་ལས། ནང་གི་ཕྱི་ནི་སྤུན་དང་ཡང་། །གང་གིས་ཕ་དང་མ་ཉིད་དང་། །རང་གི་ལུས་ལ་མི་སྨད་དོ། །ནང་གི་ནང་ཉིད་སྤྱིར་ན་ཡང་། །ཐེག་པ་ཆེ་ཆུང་ཆོས་རྣམས་ལ། །འཇུག་པར་འདོད་དང་ཞུགས་པ་དང་། །ཞུགས་ཏེ་གཟུགས་བརྙན་འཛིན་པའི་ལུས། །སྨད་ཅིང་མཐོ་བཙམས་རྒྱན་སྨད་ན། །སངས་རྒྱས་སྐུ་ནི་བརྒྱ་ཕྲག་བསླུས། །ནང་གི་གསང་བར་རང་གི་ལུས། །ལྷ་ཡི་དཀྱིལ་འཁོར་ཡིན་པའི་ཕྱིར། །སྨན་དང་ཟས་ལ་དུག་འདྲེས་ཟོས། །གལ་ཏེ་མཚོན་གྱིས་བཏབ་ན་ཡང་། །ཟག་པའི་ལམ་མེད་ལུས་བརྒྱ་བླངས། །དེ་འོག་ཚ་བའི་དམྱལ་བ་མྱོང་། །ཞེས་སོ། །སྐུའི་གསང་བའི་ཕྱི་ནང་བ་གསུམ་ཡང་དེ་ཉིད་ལས། སྐུ་ཡི་གསང་བ་ཕྱི་ལ་ཡང་། །རྡོ་རྗེ་སྤུན་ནམ་སྲིང་མོ་ཡི། །ལུས་ཀྱི་རྒྱན་ལ་དཔྱས་པ་དང་། །མཐོ་བཙམས་ལག་གིས་བརྡེག་པའི་ཚུལ། །གལ་ཏེ་གཞན་ལ་བྱེད་བཅུག་ན། །འདི་ཡང་མནར་མེད་རྒྱུད་འཕེལ་འགྱུར། །ནང་གི་ཤིན་ཏུ་འདྲེས་པའི་མཆེད། །ཀུ་རེ་རྩེད་མོའི་ཚུལ་ཙམ་དུའང་། །བརྡེག་གམ་བརྡེག་པར་བཙམས་
པའམ། །རྨི་ལམ་ན་ཡང་ཡུམ་ལ་གཙེས། །དེ་མ་ཐག་ཏུ་མ་བཤགས་ན། །འདི་ཡང་སྔར་དང་སྡིག་མཉམ་མོ། །གསང་བའི་གསང་བ་བླ་མ་ཡི། །སྐུ་ཡི་གྲིབ་མ་མི་འགོང་ལ། །བླ་མའི་སྤྱན་ལམ་དག་ཏུ་ཡང་། །མཚོན་ཆ་གཟུང་བར་མི་བྱའོ། །རྐང་ལག་བརྐྱང་དང་ཉལ་མི་བྱ། །སྐྱིལ་ཀྲུང་འདུག་དང་རྒྱབ་མི་བསྟན། །ལྷམ་དང་སྟན་དང་བཞོན་པ་དང་། །གདུགས་སོགས་སྒེག་པའི་རྒྱན་རྣམས་སྡང་། བླ་མའི་གཟིམས་ཁང་དག་ལ་ཡང་། །ལག་པས་མཚོན་ནམ་རྡོ་དག་གིས། །བཙམ་པར་བྱ་བ་མ་ཡིན་ནོ། །དེ་དག་ལས་ནི་འབུམ་འགྱུར་དུ། །བླ་མའི་གནས་ཁང་བཤིག་པ་དང་། །སྐུ་ལ་བཙམས་ཤིང་བསྡིགས་བྱས་པ། །འདི་ཡི་སྡིག་པ་ཕ་མཐའ་ཡས། །གལ་ཏེ་བླ་མ་བག་མེད་པས། །མ་སྤྱད་སྟོངས་ནའང་ཕ་མཐའ་ཡས། །མཆེད་སྤུན་སྐུ་ལ་བརྙས་བྱས་ན། །འདི་ཡི་རྣམ་སྨིན་བརྗོད་མི་ནུས། །ཞེས་སོ། །གསུང་གི་དམ་ཚིག་ལའང་ཕྱིའི་ཕྱི་རྫུན་སྤོང་བ་ནི་འཁོར་ལོ་བརྩེགས་པ་ལས། སྔགས་ཀྱི་མོས་པ་སྤྱོད་པ་ཡིས། །འགྲོ་བ་ཕལ་པ་དག་ལ་ཡང་། །བརྫུན་པའི་ཚིག་ནི་རང་འདོད་ཀྱིས། །སྨྲ་ལ་རྟག་ཏུ་དགའ་བ་ལ། །སྔགས་བཟླས་ནུས་པ་མི་འབྱུང་ཞིང་། གཞན་ལ་སྨྲ་བའང་བཙུན་པ་མིན། །རང་གི་དག་ཉིད་ཉམས་པ་ཡིས། །འགྲོ་བ་གཞན་གྱི་ལྕེ་འབབ་འགྱུར། །མ་འོངས་དུས་ན་སྨེ་ཤའི་ལུས། །བདག་གི་ཕྱོགས་སུ་མྱོང་བར་འགྱུར། །དེ་འོག་ངན་སོང་སྡུག་བསྔལ་ཡང་། །རྣམ་པ་སྣ་ཚོགས་མྱོང་བར་འགྱུར། །ཞེས་སོ། །གསུང་གི་ཕྱིའི་ནང་གི་དམ་ཚིག་ཏུ་ཕྲ་མ་མི་སྨྲ་སྟེ། དེ་ཉིད་ལས། སྔགས་ལ་ཞུགས་པའི་གང་ཟག་གང་། །གཞན་གཉིས་དབྱེ་འཇུག་ཕྲ་མ་སྨྲ། །ཆོས་སྨྲས་འཁོར་རྣམས་མི་འདུ་དང་། །ཅི་བྱས་ལོག་པར་འགྱུར་བ་དང་། །མ་སྤྱད་པར་ཡང་དགྲར་འགྱུར་
དང་། །ལུས་ལ་མཚོན་གྱིས་འདེབས་པ་དང་། །ཤི་འཕོས་ནས་ནི་སྡེར་ཅན་ལུས། །དེ་ནས་ངན་སོང་རིམ་གྱིས་མྱོང་། །ཞེས་སོ། །ཕྱིའི་གསང་བ་གཞན་གྱི་ཞེ་གཅོད་པ་སྤོང་བ་སྟེ། །དེ་ཉིད་ལས། རྟག་ཏུ་ཞེ་གཅོད་ཚིག་སྨྲ་བ། །སྔ་མའི་ལས་དང་ཕྱི་མའི་རྟགས། །འགྲོ་བ་བྱམས་བྲལ་བཤེས་ཀྱང་སྡང་། །ཆོས་ཀྱི་ཚིག་ཀྱང་འཆོལ་བར་འགྱུར། །ཤི་འཕོས་རབ་ཏུ་གྲགས་པའི་ལུས། །དེ་ནས་ངན་སོང་གསུམ་དུ་འཁོར། །ཞེས་སོ། །གསུང་གི་ནང་གི་གསུམ་ནི། ཆོས་སྨྲ་བ་ཕྱི། བསྒྲུབ་པ་ནང་། བསྒོམ་པ་གསང་བ་སྟེ། དམ་ཚིག་རྣམ་བཀོད་ལས། སྔགས་པ་སྡོམ་ལ་གནས་པ་ཡིས། །ཆོས་སྨྲ་རྣམས་དང་ཆོས་བསྒྲུབ་དང་། །ཆོས་ནི་སྒོམ་པའི་གང་ཟག་ལ། །སྨྲེ་ཞིང་སྐུར་བ་བཏབ་པ་དང་། །གཤེ་ཞིང་སྨད་པའི་ཚིག་སྨྲ་ན། །གཞན་གྱི་མས་པ་ཉམས་པ་དང་། །རང་གི་བདོག་པ་ཉམས་པ་དང་། །རང་གི་ཆོས་རྣམས་བརྗེད་ངས་ཏེ། །ཡིད་དཔྱོད་འདྲ་མིན་འཆོལ་བར་འགྱུར། །ཞེས་སོ། །གསང་བའི་གསུམ་ནི། ཕྱི་རྡོ་རྗེའི་སྤུན་སྲིང་ལ་སྨད་པ། ནང་བླ་མའི་ཕྱག་རྒྱ་དང་ཉེ་འཁོར། །གསང་བ་བླ་མ་ལ་སྨོད་པ་ནི། །བཀོད་པ་ཆེན་པོ་ལས། བླ་མ་དང་ནི་ཉེ་བའི་འཁོར། །རྡོ་རྗེ་སྤུན་དང་སྲིང་མོ་ལ། །ངན་སྨྲས་ཚིག་གི་ཟུར་ཙམ་ཡང་། །བརྡའམ་དངོས་པོར་བརྗོད་མི་བྱ། །གལ་ཏེ་རྨི་ལམ་དག་ཏུ་ཡང་། །བྱུང་ན་ཡིད་ཀྱིས་བཤགས་པར་བྱ། །དངོས་དང་ཞེ་ཡིས་བྱས་པ་དང་། །གལ་ཏེ་དྲན་པས་མ་ཟིན་པར། །ཐལ་བར་གྱུར་ཀྱང་མ་བཤགས་ན། །ཐུར་དུ་བལྟས་ཏེ་དམྱལ་བར་འགྲོ། །ཞེས་སོ། །དེ་བཞིན་དུ་ཐུགས་ཀྱི་དམ་ཚིག་ལའང་ཕྱི་ནང་གསང་གསུམ་ལ་གསུམ་ཚན་རེས་དབྱེ་བ་ལ། དང་པོ་ཕྱིའི་ཕྱི་ནི་སྙིང་པོའི་རྣམ་པར་ལེན་པའི་རྒྱུད་
ལས། གང་དག་སྔགས་པ་རྡོ་རྗེ་འཛིན། །སེམས་ཅན་གཞན་ནམ་རང་ཡང་རུང་། །གནོད་པར་བྱ་བའི་སེམས་འཆད་ན། འདི་ནི་ཤུག་ཅན་གྱི་ལུས། །གྲང་བའི་རེག་པར་ལྡན་པ་ཡི། །ལུས་ནི་སྟོང་ཕྲག་ལྔ་བླངས་ནས། །གྲང་བའི་དམྱལ་བར་ངེས་པར་འགྱུར། །མཆོག་ཏུ་སྔགས་ལ་ཞུགས་པ་ལ། །གནོད་པར་བྱ་བའི་སེམས་བྱས་ན། །གོང་མའི་སྡུག་བསྔལ་མྱོང་བར་འགྱུར། །ཞེས་སོ། །ཕྱིའི་ནང་བླ་མ་དང་མཆེད་ལྕམ་ལ་གནོད་སེམས་སྤང་བ་སྟེ། གནམ་ལྕགས་འབར་བའི་རྒྱུད་ལས། གལ་ཏེ་སེམས་ཅན་ཕལ་པ་ལ། །ཡུལ་གྱུར་གནོད་པའི་སེམས་སྐྱེས་ན། །འགྲོ་བ་ཐུན་མོང་ལུས་ཅན་ནི། །བརྒྱ་ཕྲག་གསུམ་གྱི་སྲོག་བཅད་པས། །འདི་ཡི་སྡིག་པ་ཆ་དང་མཉམ། །གལ་ཏེ་བསྟན་པའི་རྟགས་འཛིན་པའི། །གཟུགས་ཅན་རྣམས་ལ་ལོག་འགྱུར་རོ། །སྔགས་ལ་ཞུགས་པ་ཕྲག་འགྱུར་རོ། །རྡོ་རྗེའི་སྤུན་སྲིང་བདུན་ཕྲག་གོ །བརྒྱུད་པའི་བླ་མ་བརྒྱ་ཕྲག་གོ །རྩ་བའི་བླ་མ་དེ་ཡི་བརྒྱ། །སྔགས་ཀྱི་སྒོར་ཞུགས་དབང་ཐོབ་པས། །མཆོག་ཏུ་རྣམ་སྨིན་དེ་ལྟར་རོ། །ཞེས་སོ། །ཕྱིའི་གསང་བ་རང་གཞན་གྱི་གྲུབ་མཐའ་ལ་ལོག་ལྟ་སྐྱེས་པ་སྤང་བ་སྟེ། བཀོད་པ་ཆེན་པོ་ལས། རང་དམ་གཞན་གྱི་གྲུབ་པ་ཡི། །ཆོས་ལ་སྨོད་པ་ལོག་པའི་ལམ། །རྩ་བའི་དམ་ཚིག་ལས་འདས་ནས། །ས་སྤྱོད་མེ་ཡི་སྡུག་བསྔལ་ལ། །ཡུན་རིང་བར་དུ་གནས་པའོ། །རང་གི་གྲུབ་མཐར་ལོག་ལྟ་སྐྱེས། །དམྱལ་བ་ཉིད་ལས་ཐར་སྐབས་མེད། ཅེས་སོ། །ཐུགས་ཀྱི་ནང་གི་ཕྱི་སྤྱོད་པ་དང་། ནང་བསྒོམ་པ་དང་། གསང་བ་ལྟ་བ་ལོག་པ་སྤང་བ་སྟེ། །ཁང་བུ་བཙེགས་པ་ལས། །ལྟ་དང་བསྒོམ་དང་སྤྱོད་པ་ལོག །འདི་ནི་ལམ་ལོག་ཆེན་པོ་སྟེ། །སེམས་ཅན་ཀུན་གྱི་སྡུག་བསྔལ་གང་། །
འདི་ཡི་སེམས་ལ་སྨིན་པར་ངེས། །ཞེས་སོ། །གསང་བའི་གསུམ་གྱི་ཕྱི་ལྟ་སྒོམ་སྤྱོད་པ། ནང་ཡི་དམ་གྱི་ལྷ། གསང་བ་བླ་མ་དང་མཆེད་ལྕམ་ཉིན་ཞག་ཏུ་ཡིད་ལ་མ་བྱས་པ་སྟེ། པདྨ་ཀློང་ཡངས་ལས། སུ་ཡི་ཡིད་ཀྱི་ལས་འཁྱལ་ཏེ། །ཡིད་ལ་བྱ་བའི་ཆོས་རྣམས་ལ། །ཡིད་ལ་མ་བྱས་ཉམས་པ་དང་། །འདས་དང་ཞིག་པའི་ལས་ཀྱི་མཐའ། །མནར་མེད་སྡུག་བསྔལ་མྱོང་བའོ། །ཞེས་པ་དང་། ལྷན་ཅིག་སྐྱེས་པ་ཉེ་བར་ལེན་པའི་རྒྱུད་ལས། དངོས་གྲུབ་མཆོག་ནི་འདོད་པ་ཡིས། །ཡི་དམ་སྤང་བར་མི་བྱ་ཞིང་། །བླ་མ་སྤངས་ན་དངོས་གྲུབ་བརླབ། །གཞན་དུ་བསྒྲུབས་ཀྱང་མི་རྙེད་དོ། །དེ་ཕྱིར་ཆོས་ཕྱིར་ཁས་བླངས་དང་། །བླ་མའི་མདུན་དུ་དམ་བཅས་པ། །ཡིད་ལ་བསམས་པའི་དགེ་བའི་ལས། །དེ་ཉིད་སྤངས་ན་དངོས་གྲུབ་ཉམས། །ཞེས་སོ། །དེ་དག་ཀྱང་མདོར་བསྡུ་ན་རེས་འཁོར་བ་ལས་བསྒྲལ་བའི་ལམ་མཁན་བླ་མའི་སྐུ་གསུང་ཐུགས་དང་འགལ་བར་མི་སྤྱོད་པའི་དོན་དུ་འདུས་པའི་ཚུལ་མ་ཕམ་མགོན་པོ་དགའ་རབ་རྡོ་རྗེས། བླ་མ་མཆོག་གི་བཀའ་བསྩལ་པ། གལ་ཏེ་ཉེས་པའི་སྐྱོན་རིག་ཀྱང་། །ཇི་སྐད་སྨྲས་པ་དེ་བཞིན་བྱ། །དེ་བཞིན་བླ་མའི་བྱ་བ་ལ། །ལུས་ཀྱི་སྡུག་བསྔལ་མཆོག་གྱུར་ཀྱང་། །རང་གི་ནུས་པས་འབད་དེ་བྱ། །བླ་མའི་ཐུགས་ནི་སྐད་ཅིག་ཀྱང་། །དཀྲུག་པར་བྱ་བ་མ་ཡིན་ནོ། །བླ་མའི་ཟས་དང་ནོར་རྣམས་ལ། །རང་གི་སྲོག་པས་ཕངས་པ་བཞིན། །རྣལ་འབྱོར་པས་ནི་རྟག་ཏུ་བྱ། །གལ་ཏེ་བླ་མའི་ཞིང་ཁམས་སུ། །ཆོས་བཤད་དབང་བསྐུར་རབ་གནས་དང་། །བསམ་གཏན་བསྒོམ་པར་བྱ་བ་རྣམས། །རྗེས་མ་གནང་བར་མི་
བྱའོ། །མདོར་ན་ལུས་དང་ངག་ཡིད་ཀྱིས། །བྱ་བའི་རྣམ་པ་གང་བྱེད་ཀྱང་། །བླ་མར་མ་ཞུས་མ་གནང་བར། །ཅུང་ཟད་ཙམ་ཡང་མི་བྱའོ། །གཞན་ཡང་དགེ་བའི་ལས་གང་ཡང་། །བླ་མ་ལ་ཞུས་བརྩམ་པར་བྱ། །རྣལ་འབྱོར་སྤྱོད་ལམ་ཐམས་ཅད་དུ། །བླ་མ་མཆོག་དང་འབྲལ་མི་བྱ། །དུས་གསུམ་ཟས་ནི་ནམ་ཟ་ཡང་། །སུམ་ཆར་བཅད་པའི་ཕུད་རྣམས་ཀྱིས། །བླ་མ་མཆོག་ལ་དབུལ་བར་བྱ། །ནོར་དང་དཀོན་པའི་རིན་པོ་ཆེས། །བླ་མ་རྡོ་རྗེ་འཛིན་པ་ལ། །འདོད་པ་མེད་ཀྱང་ཕྱོགས་སུ་དབུལ། །ཅི་དང་ཅི་ཡི་ཕུད་རྣམས་ཀྱིས། །བླ་མ་མཆོག་ལ་བསྔོས་ཏེ་དབུལ། །མདོར་ན་བདག་གི་བསམ་པ་ཀུན། །རྣམ་པར་དག་པ་ཟོལ་མེད་པར། །བླ་མའི་ཕྱོགས་སུ་དམིགས་པར་བྱ། །ལེགས་པའི་ཡོན་ཏན་ཐམས་ཅད་འགྲུབ། །ཅེས་སོ། །དེ་ལྟར་རྩ་བ་ཉི་ཤུ་རྩ་བདུན་པོ་ནི་འདའ་བར་བྱ་བ་མ་ཡིན་པས་དམ་ཚིག་ཏུ་བཞག་ལ། ཐབས་ཀྱིས་ཟིན་པའི་ཆ་ནས་གཞན་དོན་དུ་འགྱུར་མི་འགྱུར་ལ་དམིགས་ནས་གནང་བཀག་གཉིས་སུ་སྦྱོང་བ་ཡན་ལག་གི་དམ་ཚིག་སྟོན་པའི་ཚུལ། ཐབས་ཀྱི་དབང་འགྱུར་ཡན་ལག་ཉི་ཤུ་ལྔ། །ཏན་གན་མ་བྱིན་ལེན་རྫུན་ཀྱལ་བའི་ཚིག །སྦྱང་བྱ་ལྔ་ནི་གནང་བཀག་ཤེས་པས་སྤྱོད། །དེ་སྐད་དུ་གསལ་བཀྲ་ལས། །སྤྱད་པ་ལྔ་དང་མི་སྤོང་ལྔ། །དང་དུ་བླང་དང་བསྒྲུབ་དེ་བཞིན། །ཤེས་བྱ་ལྔ་རྣམས་མཐུན་མིན་བཤད། །ཅེས་ལྔ་ཚན་ལྔར་བཤད་པ་རྣམས་ནི་འདི་ལྟར་གསང་སྔགས་བླ་ན་མེད་པའི་ཆོས་ཐམས་ཅད་གདོད་མ་ཉིད་ནས་དེ་བཞིན་གཤེགས་པ་རྣམས་ཀྱི་རྡོ་རྗེ་གསུམ་གྱི་དཀྱིལ་འཁོར་ཆེན་པོར་སངས་མ་རྒྱས་པ་འགའ་ཡང་མེད་པས་འཁོར་འདས་ཐམས་ཅད་ལ་ཀུན་ཏུ་བཟང་པོའི་ཕྱག་རྒྱས་བཏབ་པར་ངེས་པ་རྣམས་ཀྱི་དམ་ཚིག་ཡིན་ཏེ། དེ་ལྟར་རྟོགས་ན་ཆོས་ཐམས་
ཅད་ཀུན་ཏུ་བཟང་པོའི་ཞིང་ཁམས་སུ་མཉམ་པར་སྦྱོར་བས་བདག་ཉིད་ལ་ཉེས་པ་མི་བསྐྱེད་ཅིང་། གཞན་ལའང་ཕན་པ་ཆེན་པོ་དང་བཅས་པའི་སྤང་གཉེན་གཉིས་སུ་མེད་པའི་དམ་ཚིག་ལ་སྒྲ་ཇི་བཞིན་པར་སྤྱོད་དུ་དབང་ཞིང་དེས་ལས་དང་ལས་ཀྱི་འབྲས་བུ་རྣམ་པར་དཀར་བ་དང་རྣམ་པར་གནག་པ་གཉིས་ཀ་བསྐྱེད་པར་མི་བྱེད་པའི་ཕྱིར་རོ། །དེ་ལྟར་མ་རྟོགས་པའི་བར་དུ་ནི་དབུ་མར་ལས་རླུང་གསོད་པ་སོགས་འོག་ཏུ་འཆད་པའི་སྦས་དོན་ལ་དྲན་པ་ཉེ་བར་བཞག་པ་ཁོ་ན་ཡིན་ནོ། །དེ་ལ་དང་པོར་སྤྱད་པར་བྱ་བ་ལྔ་ནི་རྒྱུད་ལས། སྦྱོར་སྒྲོལ་མ་བྱིན་ལེན་པ་དང་། །རྫུན་དང་ངག་བླང་བརྗོད་པ་རྣམས། །ཐབས་མཆོག་ངེས་པར་ཟིན་པ་ཡིས། །གནས་སྐབས་དག་ཏུ་ཤེས་པར་བྱ། །ཞེས་པ་དང་མཐུན་པར་འདུས་པ་ལས་ཀྱང་། ཁྱོད་ཀྱིས་སྲོག་ཆགས་གསད་པར་བྱ། །རྫུན་གྱི་ཚིག་ཀྱང་སྨྲ་བར་བྱ། །མ་བྱིན་པར་ཡང་ཁྱོད་ཀྱིས་ལོང་། །བུད་མེད་དག་ཀྱང་བརྟེན་པར་བྱ། །རྡོ་རྗེའི་ལམ་ནི་འདི་དག་གིས། །སེམས་ཅན་ཐམས་ཅད་གྲོལ་བར་འགྱུར། །ཞེས་སོ། །གཉིས་པ་མི་སྤོང་བ་ལྔ་ནི། འདོད་ཆགས་ཞེ་སྡང་གཏི་མུག་ཉོན་མོངས་ལྔ། །མི་སྤོང་ལྔ་ནི་རང་རྒྱུད་པ་དང་དབྲལ། །དེ་སྐད་དུ་གསལ་བཀྲ་ལས། ཡང་དག་དུག་ལྔ་ལོག་དུག་ལྔ། །ཞེས་པས་འཁོར་འདས་མཉམ་པ་ཉིད་དུ་རྟོགས་པས་འབྱེད་པ་མེད་པ་ནི་གཏི་མུག་དང་། དེ་ལྟར་མ་རྟོགས་པའི་སེམས་ཅན་ལ་ཐུགས་རྗེས་ཆགས་པས་འདོད་ཆགས་དང་ལོག་པར་རྟོག་པ་སྒྲོལ་བའི་ཞེ་སྡང་དང་། མཉམ་ཉིད་རྟོགས་པའི་ལྟ་བ་སྲོ་མ་ཤི་བའི་ང་རྒྱལ་དང་། གཉིས་སུ་འཛིན་པའི་ལྟ་སྤྱོད་ཆོས་ཉིད་ཀྱི་ཀློང་དུ་མི་ཆུད་པའི་ཕྲག་དོག་སྟེ་ལྔ་པོ་སྤངས་ན་དོན་དང་ཉེ་བ་མ་ཡིན་པས་ཡང་དག་པའི་
དུག་ལྔ་ཞེས་བྱ་སྟེ་སྦས་དོན་ཡིན་ནོ། །དེ་སྐད་དུ་རྒྱས་པ་ལས། རྣམ་རྟོག་ཉིད་ན་རང་བྱུང་ཡེ་ཤེས་ཏེ། །རྣམ་རྟོག་མི་བསྐྱོད་ཡེ་ཤེས་བརྗོད་དུ་མེད། །ཅེས་སོ། །ལོག་པའི་དུག་ལྔ་ནི། སྤྱིའི་མཚན་ཉིད་མི་རྟག་པ་དང་། སྡུག་བསྔལ་བ་དང་། བདག་མེད་པ་དང་། དབང་མེད་བ་དང་། སྟོང་པ་ཡིན་ལ། རང་གི་མཚན་ཉིད། ཕྱི་རྫས་དང་། ནང་སེམས་ཅན་ལ་ཞེན་ཅིང་སྲེད་པ་འདོད་ཆགས། ཀུན་ནས་མནར་སེམས་པ་ཞེ་སྡང་། ཁོང་ཁེངས་ཤིང་མཉེན་ལྡུག་དང་མི་ལྡན་པ་ང་རྒྱལ། གཞན་འབྱོར་ཕུན་ཚོགས་ཕྲག་ཏུ་མི་ཤོར་བ་ཕྲག་དོག་སྟེ། འདི་དག་སྤངས་ན་ཤེས་པའི་གཤིས་ལ་ཉོན་མོངས་པ་རང་རྒྱུད་དུ་མི་ལྡན་པའི་ཀླུང་ལས་ལྡོག་ནས་ཉན་རང་གི་ལམ་དུ་གོལ་བའི་ཕྱིར་རོ། །དེ་བས་ན་ཐབས་ཞག་ལས། གཏི་མུག་ཞེ་སྡང་ང་རྒྱལ་དང་། །འདོད་ཆགས་ཕྲག་དོག་ཆེན་པོ་ནི། །བསྲུང་པ་མེད་པའི་སྡོམ་པ་ཅན། །ད་ནི་དམ་ཚིག་རྡོ་རྗེ་ཡིན། །ཞེས་དང་། དེའི་འགྲེལ་པར་སངས་རྒྱས་གཉིས་པ་པདྨའི་ཞབས་ཀྱིས། གཏི་མུག་ནི་རྣམ་པར་སྣང་མཛད་ཀྱི་དམ་ཚིག་སྟེ། ཅིའི་ཕྱིར་ན། མ་རིག་པ་སྤང་དུ་མེད། རིག་པ་བསྒྲུབ་ཏུ་མེད། ཆོས་ཀྱི་དབྱིངས་སུ་རོ་གཅིག་པའི་ཕྱིར་རོ། །ཞེས་གསུངས་སོ། །དེ་ལྟ་མོད་ཀྱིས་ད་ལྟའི་གནས་སྐབས་ན་རྨོངས་ཆེན་རྣམས་ནི་གསང་སྔགས་ཀྱི་རང་བཞིན་ལ་གྱ་ཚོམ་དུ་འདུག །མོས་གུས་དང་སེམས་བསྐྱེད། ཐབས་དང་ཤེས་རབ་དང་ཏིང་ངེ་འཛིན་དང་བྲལ་བས་དེ་དག་ལ་ནི་ཐར་པ་མེད་ལ། རྟོག་གེ་ལྟར་སྣང་གི་སྔགས་ལ་ཞུགས་ནས་རྒྱུ་འབྲས་དག་གྲོལ་དུ་འཛིན་པ་རྣམས་ནི་ཧ་ཅང་རྣམ་རིག་གི་དབང་དུ་གྱུར་ཅིང་ཞེན་པའི་སེམས་ཀྱི་རང་རྒྱུད་དམ་ལ་བཞག་པ་འབའ་ཞིག་ལས་རྣལ་མའི་ལམ་ལ་འགྲོ་བ་ཤིན་ཏུ་ཉུང་བ་སྟེ། ཅིའི་ཕྱིར་ཞེ་ན།
དཔེར་ན་རྒྱུད་ལ་ཞེ་སྡང་དྲག་པོ་སྐྱེས་པའི་རང་ལྡོག་མེ་ཉམས་པ་ལམ་དུ་འདོད་པ་ཡོད་དེ། དེ་ལྟར་ན་དྲན་པ་རང་རྒྱུད་པ་དང་ལྡན་པའི་ཕ་གསོད་ཀྱི་བུ་ཡང་ལས་ཀྱིས་གོས་པར་མི་འགྱུར་བས་རྣམ་པར་གྲོལ་བ་ཞེས་བྱ་བའང་ཐ་སྙད་ཙམ་དུ་ཟད་དོ། །ལ་ལ་དེ་གཏན་ཚིགས་ཀྱིས་གཞིགས་ནས་ལམ་དུ་འདོད་དེ། དེ་ལྟ་ན་རྒྱུ་མཚན་ཉིད་ཀྱི་ཐེག་པ་དང་ཁྱད་པར་མེད་པས་དགེ་བའི་རྩ་བ་དང་མཚུངས་ལྡན་གྱི་ཉོན་མོངས་བསྒོམ་ལམ་གྱི་སྤོང་བྱེད་ཅན་སེམས་ཅན་གྱི་དོན་འབྱུང་ལ་དགོངས་པ་དང་འདྲའོ། །ལ་ལ་ཞེ་སྡང་གི་གཉེན་པོར་བྱམས་པ་བསྒོམས་ནས་སྤང་གཉེན་གཉིས་སུ་བྱེད་པ་ཡོད་དེ། དེ་ལྟ་ན་གཉེན་པོ་ལམ་བྱེད་ཡིན་གྱིས་ཉོན་མོངས་པ་ལམ་དུ་བྱས་པ་མ་ཡིན་པས་སོ། །ལ་ལ་ཞེ་སྡང་འགགས་པའི་རྗེས་ཐོགས་ཀྱི་ཤེས་པ་ཐང་ཆད་པ་ལྟ་བུ་ལ་ལམ་དུ་འདོད་དེ། །དེ་ལྟ་ན་ཉོན་མོངས་པ་དང་ཡེ་ཤེས་ཐ་དད་པ་ཅན་ཡིན་ནོ། །དེ་བས་ན་དེ་དག་གི་རང་བཞིན་ནི་ཉོན་མོངས་ཀྱི་དུས་ན་སྤང་གཉེན་གང་རུང་གི་ཆ་དང་ལྡན་པས་རང་གི་ངོ་བོས་མ་གྲུབ་པའི་ལམ་རྒྱུན་དང་ལྟེ་ཆད་ལ། ཆད་པའི་རྗེས་ལ་དཔྱད་པ་རྣོན་པོའི་མཚམས་སྦྱོར་གྱིས་མཐུད་བས་འགོག་པ་བྲལ་འབྲས་དང་དངོས་གཉེན་གྱི་ལམ་བདེན་ཙམ་མོ། །འོ་ན་ཇི་ལྟར་ཡིན་ན། ཤེས་བྱའི་གཤིས་ལ་ཉོན་མོངས་པ་རང་རྒྱུད་ལྡན་མ་གྲུབ་པས་འདོད་ཆགས་ལ་སོགས་པ་སྐྱེས་པའི་དུས་ཉིད་ནས་སྟོང་པ་ཉིད་ཀྱི་ཆོས་ཉིད་དུ་ལྡང་བས་རང་ལྡོག་ཅན་དུ་ཡང་མི་གནས། དེ་ལ་གཏན་ཚིགས་ཀྱིས་གཞིགས་པའི་འབྲེལ་པ་ཡང་མ་གྲུབ། སྤང་བྱའི་གཉེན་པོ་བསྒོམ་པའི་སྤྲོས་པ་རང་ཞིག །སོ་སོའི་
རང་བཞིན་མ་འགགས་པའི་ངང་དེ་ཉིད་ཀྱི་རང་བཞིན་ཆོས་ཉིད་དུ་ཤེས་ན་ཉོན་མོངས་པ་ལ་ཉེ་བར་ལེན་པའི་ངོ་བོ་ཉིད་དག་པས་དེས་ལས་གསོག་པའི་བྱ་བ་བྱེད་མི་ནུས་ཤིང་། དེ་ལ་བརྟེན་པའི་བག་ཆགས་ཀྱང་འདུ་མི་བྱད་པས་སྤང་དུ་མེད་དེ། རྡོ་རྗེ་ལས། ཉོན་མོངས་རྣམས་ནི་སྒྱུ་འདྲ་ངོ་བོས་སྟོང་། །རང་གིས་མི་རྟག་རང་བཞིན་ཤེས་པས་གྲོལ། །ཞེས་དང་། ཕྱིར་མི་ལྡོག་པ་འཁོར་ལོའི་མདོ་ལས། མ་རིག་ནམ་མཁའ་ཇི་བཞིན་ཏེ། །ཆོས་རྣམས་ཐམས་ཅད་མཚན་ཉིད་མེད། །འདོད་ཆགས་མེད་ཅིང་ཞེ་སྡང་མེད། །ང་རྒྱལ་དང་ནི་ཕྲག་དོག་ཀུན། །སྒྱུའང་ངོ་བོ་ཉིད་མེད་དེ། །ཡོད་མེད་མི་དམིགས་རྟེན་དང་བྲལ། །ཞེས་སོ། །དེ་ཙམ་མ་རྟོགས་ཀྱང་ཐབས་ཀྱི་ཟིན་པས་མི་སྤང་བ་ནི། འདི་ལྟར་གསེར་འགྱུར་གྱི་རྩིས་ཟངས་གསེར་དུ་བསྒྱུར་ནུས་པ་ལྟར་དམིགས་པའི་རྣམ་པ་ལ་མཁས་པའི་ཐབས་ཁྱད་པར་ཅན་གྱི་མན་ངག་ལ་བརྟེན་ནས་རང་གི་རང་བཞིན་ཡེ་ཤེས་ལྔ་དག་པར་བྱ་བ་སྟེ། རྒྱ་མཚོ་ལས། ཉོན་མོངས་ལམ་ནི་དག་པ་ཆེ། །ཐབས་ཀྱི་འདོད་ཡོན་རྒྱན་གྱི་མཆོག །ཐམས་ཅད་ཐམས་ཅད་རོལ་པ་ཡིས། །མྱུར་དུ་ཧེ་རུ་ཀ་དཔལ་འགྱུར། །ཞེས་དང་། ཐོག་བསྡུས་ལས། ཐབས་ཆེན་རྣམས་དང་ལྡན་པ་ལ། །ཉོན་མོངས་བྱང་ཆུབ་ཡན་ལག་འགྱུར། །ཞེས་སོ། །སྐུ་དང་ཡེ་ཤེས་སུ་ཤེས་པས་མི་སྤོང་བ་ནི། །སྔགས་ཀྱི་ལམ་དུ་འགྲོ་བའི་རྒྱུན་གྱི་སེམས་སོ་ཅོག་སྐུ་དང་ཡེ་ཤེས་སུ་ལྷུན་གྱིས་གྲུབ་པའི་ཕྱིར་ཉོན་མོངས་པ་ལྔར་སྣང་དུས་ཉིད་ནས་རིགས་ལྔའི་རང་བཞིན་དུ་རྟོགས་པས་མི་སྤོང་བ་སྟེ་དམ་ཚིག་ཉེར་བརྒྱད་པ་ལས། ཕྲག་དོག་ལ་སོགས་ཉོན་མོངས་ལྔ་རྣམས་ནི། །ཡེ་ནས་རིགས་ལྔའི་རང་བཞིན་ཡིན་པའི་ཕྱིར། །ཞེས་སོ། །མདོར་ན་ཉན་འཐོས་ཀྱིས་སྤོང་། རང་རྒྱ་
གྱིས་འགེགས། བྱང་ཆུབ་སེམས་དཔས་དགེ་བའི་རྩ་བ་དང་མཚུངས་ལྡན་དུ་སྦྱོང་། སྔགས་ཕྱི་པས་བསྒྱུར་བ་དེ་བླ་མེད་ཀྱི་ཐེག་པའི་གནས་སྐབས་འདིར་ཆོས་མཉམ་པ་ཆེན་པོའི་ལྟ་བ་དང་། ཏིང་ངེ་འཛིན་གྱི་ཐབས་ལ་མཁས་པ་ཟུང་དུ་འཇུག་པས་ཉོན་མོངས་པའི་ཆོས་ཅན་གང་ཡིན་པ་ལ་རང་གི་ངོ་བོས་སྟོང་པའི་ཆོས་ཉིད་ཀྱིས་རྒྱས་ཐེབས་པས་རང་ལྡོག་ཅན་དུ་མི་གནས་པར་ལམ་དུ་སློང་བའི་ཚུལ་རྒྱས་པ་ལས། མ་འགགས་སྣང་བ་ཐབས་ཡིན་ཏེ། རང་བཞིན་མེད་པ་ཤེས་རབ་ཡིན། །ཞེས་དང་། སྤྱི་མདོ་ལས། ཉོན་མོངས་དུག་ལྟར་སྣང་བའི་རང་བཞིན་རྣམས། །རྣམ་གྲོལ་ཡེ་ཤེས་ལྔ་ཡི་དང་དུ་སྣང་། །ཞེས་སོ། །གསུམ་པ་དང་དུ་བླང་བ་ལྔ་ནི། དྲི་ཆེན་དྲི་ཆུ་མཾ་ས་རཀྟ་ཟིལ། །དང་ལེན་ལྔ་ལ་གཙང་སྨེའི་གཉིས་རྟོག་འབྲལ། དེ་སྐད་དུ་བམ་བརྒྱད་ལས། དྲི་ཆེན་དྲི་ཆུ་མཾ་ས་དང་། །རཀྟ་བྱང་ཆུབ་སེམས་འདི་ནི། །སེམས་ཅན་རྟོག་པ་ལྡོག་པའི་ཕྱིར། །གཙོ་རུ་དང་དུ་བླང་བར་བྱ། །ཞེས་རྟོག་པ་ལྡོག་པས་ཆོས་ཉིད་རང་བཞིན་དང་། རང་གི་ངོ་བོས་སངས་རྒྱས་ལྔར་བསྒྲུབ་པ་དང་། ནུས་མཐུས་ནད་སེལ་བ་དང་། བྱིན་རླབས་ཀྱིས་དངོས་གྲུབ་བསྒྲུབ་པའི་རྫས་ཁྱད་པར་ཅན་ཡིན་པས་དང་དུ་བླང་བ་སྟེ། གསལ་བཀྲ་ལས། ནད་ལྔ་བསལ་ཕྱིར་བླང་བ་དང་། །གཙང་སྨེའི་རྟག་པ་སྦྱང་ཕྱིར་དང་། །ཐུན་མོང་དགོས་པ་ལྔ་ཕྱིར་དང་། །རིགས་ལྔ་གྲུབ་པའི་ཡོན་ཏན་དང་། །སྡུག་བསྔལ་ལས་གྲོལ་དངོས་གྲུབ་ཐོབ། །ཅེས་སོ། །དེ་ལ་བྱང་སེམས་ཀྱིས་ཆེ་བའི་ནད་སེལ། མི་བརྗེད་པའི་གཟུངས་ཐོབ། རྡོ་རྗེའི་རིགས་དང་མེ་ལོང་ལྟ་བུའི་ཡེ་ཤེས་འཐོབ། རཀྟས་གྲང་བའི་ནད་སེལ། བཀྲག་མདངས་རྐྱས། པདྨའི་རིགས་
དང་སོ་སོར་རྟོག་པའི་ཡེ་ཤེས་འཐོབ། དྲི་ཆེན་གྱིས་དུག་ནད་སེལ། ཚེ་རིང་། དེ་བཞིན་གཤེགས་པའི་རིགས་དང་ཆོས་དབྱིངས་ཡེ་ཤེས་འཐོབ། དྲི་ཆུས་གག་པ་སེལ། སྐད་སྙན། ལས་ཀྱི་རིགས་དང་བྱ་གྲུབ་ཡེ་ཤེས་ཐོབ། ཤ་ཆེན་གྱི་དྭངས་མས་མཛེ་ནད་སེལ་མཐུ་ཆེ། རིན་པོ་ཆེའི་རིགས་དང་མཉམ་ཉིད་ཡེ་ཤེས་འཐོབ་པའོ། །དེ་སྐད་དུ་མཁའ་འགྲོ་མ་རྡོ་རྗེ་གུར་ལས་ཀྱང་། མི་བསྐྱོད་བསྟེན་པའི་རྣལ་འབྱོར་པ། །ནད་ཀུན་རྣམ་པར་སྤོང་བར་འགྱུར། །རྟག་པ་ཡིས་ནི་མདངས་ཆེན་འགྱུར། །རྡོ་རྗེ་ཉི་མ་རྒས་པ་མེད། །རྡོ་རྗེ་ཆོས་ནི་བསྟེན་པ་ཡིས། །བུད་མེད་ཀུན་ལ་ལོངས་སྤྱོད་དོ། །སྲོག་ཆགས་ལུས་འབྱུང་རྡོ་རྗེ་དག །དོན་ཡོང་རྒྱལ་པོ་ཆེན་པོ་སྟེ། །དཔལ་ལྡན་དོན་ཀུན་གྲུབ་པ་དང་། །རྣལ་འབྱོར་བ་དེས་ཞི་བར་གཏོང་། །མི་བསྐྱོད་བཏུང་བའི་སྦྱོར་བ་ཡིས། །སྟོང་ཕྲག་ལྔར་ནི་འཚེ་བར་འགྱུར། །རྟག་པ་ཡིས་ནི་ཁྲི་རུ་བརྗོད། །རྡོ་རྗེ་ཉི་མས་བྱ་བར་སྟེ། །ཚེ་དཔག་མེད་ཀྱིས་གྲངས་མེད་ཚེ། །ནམ་མཁའ་ཇི་སྲིད་རྟ་བདུན་པས། །དཔག་མེད་རྡོ་རྗེའི་ཉི་མ་གཉིས། །འཁོར་བ་བསྒྲུབ་པའི་རྩ་བ་སྟེ། །འདི་དག་རྣལ་འབྱོར་པས་བསྟེན་ན། །སྐལ་བཟང་རྣམས་དང་མཉམ་པར་འགྱུར། །ཞེས་སོ། །དེ་ཡང་སྦས་དོན་དུ་རང་ལུས་ཀྱི་དྭངས་མ་འཛག་མེད་དུ་འཆིང་ཞིང་། གཞན་ལུས་ཀྱི་བཅུད་ལེན་པའོ། །བཞི་པ་ཤེས་པར་བྱ་བ་ལྔ་ནི། ཕུང་པོ་འབྱུང་ཡུལ་དབང་པོ་ཁ་དོག་ལྷར། །ཤེས་བྱ་ལྔ་ནི་ཤེས་རབ་སྟོབས་ཀྱིས་སྤྱོད། །དལ་གཟུགས་ཀྱི་ཕུང་པོ་རྣམ་པར་སྣང་མཛད། །ཚོར་བའི་ཕུང་པོ་རིན་ཆེན་འབྱུང་ལྡན། །འདུ་ཤེས་ཀྱི་ཕུང་པོ་སྣང་བ་མཐའ་ཡས། །འདུ་བྱེད་ཀྱི་ཕུང་པོ་དོན་ཡོད་གྲུབ་པ། རྣམ་ཤེས་ཀྱི་ཕུང་པོ་མི་བསྐྱོད་པར་ཤེས་པས་མཚོན། འབྱུང་བ་ལྔ་ནི་ཡུམ་ལྔ། དབང་པོ་དང་དབང་ཤེས་ལྔ་སེམས་
དཔའ། ཡུལ་ལྔ་སེམས་མ། ཁ་དོག་ལྔ་རིགས་ལྔ། ཡེ་ཤེས་ལྔར་ཤེས་པ་སྟེ། འདི་ལྟར་མ་དག་པའི་གནས་སྐབས་ན་ཀུན་གཞི་ལས་རྣམ་པར་ཤེས་པའི་ཚོགས་དང་། དབང་པོ་དང་། དབང་ཤེས་དང་། ཡུལ་ལ་སོགས་པར་གྱིས་ཀྱང་། རང་བཞིན་ཤེས་ནས་དག་པས་གནས་སྐབས་ན་ལྷ་དང་། དེའི་ཆོས་ཉིད་ཡེ་ཤེས་སུ་ཤེས་པའི་དག་པ་དྲན་པ་སྟེ། དམ་ཚིག་གསུམ་བཀོད་ལས། ཕུང་པོ་ལྔ་དང་འབྱུང་བ་རྣམ་པ་ལྔ། །རྣམ་ཤེས་དབང་པོ་ཡུལ་ལ་སོགས་པ་རྣམས། །ལྷ་དང་དཀྱིལ་འཁོར་རང་བཞིན་ཤེས་པར་བྱ། །ཞེས་པས་རྡོ་རྗེ་ཐེག་པའི་ལུགས་སུ་སྲིད་གསུམ་གྱི་རང་བཞིན་རང་མཚན་དུ་བལྟ་བ་ལས་ལོག་སྟེ་སངས་རྒྱས་ཀྱི་དཀྱིལ་འཁོར་འབའ་ཞིག་ཏུ་བལྟ་དགོས་པ་ཡིན་ནོ། །ལྔ་པ་བསྒྲུབ་པར་བྱ་བ་ལྔ་ནི། རྡོ་རྗེ་རིན་ཆེན་པདྨ་ལས་དེ་བཞིན། །བསྒྲུབ་བྱ་ལྔ་ནི་རྟོགས་གོམས་མཐུ་ཡིས་བསྒྲུབ། །འདི་དག་དམ་ཚིག་གསལ་བཀྲའི་དགོངས་པ་སྟེ། བཤད་མ་ཐག་པའི་ཤེས་བྱ་ལྔ་པོ་དེ་རྟོགས་གོམས་ཀྱི་མཐུས་རང་རྒྱུད་ལ་མངོན་སུམ་དུ་བསྒྲུབ་པའི་ཐབས་ལ་བརྩོན་པ་སྟེ། དེ་ཉིད་ལས། བསྒྲུབ་པར་བྱ་བའི་དམ་ཚིག་རྣམ་ལྔ་ནི། །ཕུང་པོ་ལྔ་དང་འབྱུང་བ་ལྔ་རྣམས་དང་། །རྣམ་ཤེས་ཡུལ་རྣམས་དཀྱིལ་འཁོར་བསྒྲུབ་བྱེད་པ། །ཏིང་འཛིན་གསུམ་དང་ཆོ་ག་ལྔ་རྫོགས་ནས། །རྒྱལ་བ་རིགས་ལྔའི་དཀྱིལ་འཁོར་བསྒྲུབ་བྱེད་པ། །ཏིང་འཛིན་ཆོ་ག་ལྔ་ཡིས་སེམས་རྩོལ་བྱེད། །ཅེས་སོ། །དེ་ལྟར་ཤེས་པར་བྱ་བ་ལྔ་དང་། །བསྒྲུབ་པར་བྱ་བ་ལྔ་པོ་ནི་ཕན་ཚུན་དུ་ལྟོས་གྲུབ་ཅན་ཡིན་ཏེ། ཤེས་པར་བྱ་བ་ལྟ་བའི་དམ་ཚིག་གང་ཡིན་པ་དེ་ཉིད་རྟོགས་ན་བསྒྲུབ་པར་བྱེད་པ་ནི་བསྒོམ་པའི་དམ་
ཚིག་ཡིན་པས་ལྟ་བསྒོམ་ཟུང་འཇུག་ཏུ་ཉམས་སུ་བླང་ལ། དེའི་ངང་ནས་སྤྱད་པ་དང་། མི་སྤོང་བ་དང་། དང་དུ་བླང་བ་གསུམ་ནི་སྤྱད་བྱའི་དམ་ཚིག་ཡིན་ཡང་། ལས་དང་པོ་པས་ཡིད་ཀྱིས་མི་སྤོང་བས་གུས་པ་དང་བཅས་ཤིང་། ལུས་ཀྱིས་མི་སྤྱོད་པ་ངོ་ཚ་དང་། ཁྲེལ་ཡོད་དང་། འཇིགས་པ་གསུམ་གྱིས་ཁ་ན་མ་ཐོ་བ་མེད་པ་ཉིད་དུ་སྤྱད་ལ་རང་གི་རང་ལ་མི་ཁྲེལ་བ་གཙོ་བོར་བྱའོ། །དེ་ཡང་ཐོས་པ་ཉུང་ཞིང་བདུད་ཀྱིས་ཕྱོགས་བསླད་པའི་བླུན་པོ་མ་རབས་པ་ཁ་ཅིག་སྟོང་ཉིད་རྟོགས་སོ་སྙམ་ནས་སྤྱོད་པ་འདོད་རྒྱལ་དུ་སྤྱོད་པ་ཡོད་ཀྱིས་རྟོགས་སོ་སྙམ་པ་དེ་ཉིད་རང་མ་རྟོགས་པའི་མངོན་རྟོགས་མ་ནོར་བ་ཡིན་པས་རྣམ་རིག་སྐྱོན་ཅན་གྱི་སྐྱེས་བུ་རྣམས་ལའང་སྔགས་ཀྱི་ལམ་འདི་འཕུང་འཚེངས་ཤིན་ཏུ་ཆེ་བ་ཡིན་ནོ། །ཉམས་མྱོང་ལ་དྲོད་ཅུང་ཟད་ཐོབ་ནས་གནང་བཀག་གི་རིམ་པ་མ་བརྗེད་པས་ཉིན་མཚན་དུ་ཡིད་ལ་བྱེད་ཅིང་། རྟོག་དཔྱོད་དང་བཅས་པས་དམ་ཚིག་དང་འགལ་ན་སྤང་། མི་འགལ་ན་བསྒྲུབ་པ་ཡིན་ཡང་ཇི་སྲིད་སེམས་ལ་འཁུ་འཕྲིག་ཡོད་པ་དེ་སྲིད་དུ་ལས་དང་ལས་ཀྱི་འབྲས་བུའང་དེའི་རྗེས་སུ་གདོན་མི་ཟ་བར་འཇུག་པས་དུས་ཚོང་དང་མ་འབྲེལ་བའི་ཉེས་སྤྱོད་ཀྱི་མཚན་ཉིད་ཤེས་པར་བྱས་ནས་ཀུན་ཏུ་བཟང་པོའི་སྤྱོད་པ་ཁྲེལ་བག་ཡོད་པ་ཉིད་ལ་བསླབ་པོ། །གསུམ་པ་ལྷག་པའི་དམ་ཚིག་ནི་ཕུར་བ་མྱང་འདས་ཆེན་པོའི་རྒྱུད་ལས། གཅན་གཟན་རྒྱལ་པོ་སེང་གེ་གསད་མི་བྱ། །ཟ་མ་ཏོག་དུ་ངན་པའི་དུག་མི་སྤྱོ། །རིན་པོ་ཆེའི་ལྕུག་མ་རྩར་མི་བཅད། །གངས་ཀྱི་ཞུན་ཆུ་ཁོལ་མ་ཡོང་མི་བཏུང་། པདྨ་རྒྱས་པའི་ཟེ་འབྲུ་ཁ་མི་དབྱེ། །བུག་རྡོལ་ཅན་གྱི་སྣོད་དུ་བཅུད་མི་བླུག །མ་བརྟགས་པ་ཡི་ནོར་དང་ཟས་མི་བསྲེལ། །ཤེལ་གོང་དཀར་པོ་རྫབ་ཏུ་བསྣུབ་མི་
བྱ། །སྣོད་ངན་ནང་དུ་སེང་གེའི་ཞི་མོ་བཞོ། །ཡིད་བཞིན་ནོར་བུ་ཐབ་ཏུ་བསྲེག་མི་བྱ། །བྱ་ཡི་རྒྱལ་པོ་ཁྱུང་གི་གཤོག་མི་བཅག །གནམ་ལྕགས་སྡེར་མོ་ས་ལ་བརྡབ་མི་བྱ། །སྟག་གཟིག་རོལ་པའི་ཟས་ཀྱི་ལྷག་མི་བཟའ། །རྡོ་རྗེའི་གཏམ་པའི་བྲག་རྣམས་ཡོངས་མི་བཤིག །རྡོ་རྗེའི་རྭ་བས་བསྐོར་བའི་གོ་མི་ཧྲལ། །མུན་པ་སེལ་བའི་སྒྲོན་མེ་ཡོངས་མི་གསོད། །རྡོ་རྗེའི་ཆུ་བོའི་འོལ་ཀ་བཅད་མི་བྱ། །རྒྱལ་པོའི་རྟགས་ཀྱི་ཕྱག་རྒྱ་སྦྱིན་མི་བྱ། །རྡོ་རྗེའི་མཁར་རྫོང་གཏམས་པའི་རྨང་མི་བཟག །རྒྱལ་མཚན་རྩེར་བཏགས་ནོར་བུ་རིན་པོ་ཆེ། །འདོད་པར་གྱུར་བའི་མཚན་མས་དཔོག་མི་བྱ། །ཞེས་ལྡེམ་དགོངས་ཀྱི་སྒྲས་སྤྱི་དང་ཁྱད་པར་གྱི་དམ་ཚིག་ལ་གནས་ནས་ཚོགས་ཆེན་གྱི་བསྒྲུབ་པ་ལ་སོགས་པའི་གནས་སྐབས་སུ་བསྲུང་བ་ལྷག་པར་དུ་བསྟན་པས་ལྷག་པའི་དམ་ཚིག་སྟེ། རིམ་པ་ལྟར། བླ་མ་ལ་མི་བརྙས། ཡུམ་ལ་མི་གཙེ། དད་པ་ཅན་གྱི་ཚོགས་མི་བཅད། དཀོར་ལ་མི་འབགས་ཅིང་འཁུང་ཀྲོལ་གྱི་རྩ་བ་ཆང་མྱོས་པར་མི་འཐུང་། མཆེད་ཀྱི་རིག་མ་མི་སྤྱད། མཚན་ངན་མི་བསྲེལ། འདྲེ་ཅན་དང་རྩོད་ཅན་གྱི་ནོར་མི་བསྟེན་ཞིང་བྱིན་གྱིས་མ་བརླབས་པའི་ཟས་མི་ཟ། སེམས་བསྐྱེད་ཉམས་སུ་མི་གཞུག །སྣོད་མིན་ལ་གདམས་པ་མི་སྟོན། སྣོད་ལྡན་གྱི་སློབ་མ་མི་སྤོང་། ཡབ་ཡུམ་མི་འབྲལ་བའི་དོན་བདེ་སྟོང་ལ་སྦྱོར། མཆེད་ལྕམ་ནད་འཐབ་མི་བྱེད། གཞན་གྱིས་འབགས་ལྷག་མི་སྤྱོད། །བླ་མའི་གདན་ས་མི་བརླམ། རང་གཞན་གྱི་མཚམས་རྒྱ་མི་དཔྲལ། །ཏིང་འཛིན་དང་ལྷག་མཐོང་མི་འབྲལ། བཟླས་བརྗོད་དང་ཆོ་གའི་རྒྱུན་མི་ཚིག་གི་བར་མི་གཅོད། དབང་རྟགས་ཀྱི་ཕྱག་རྒྱ་ལས་མི་འདའ་
ཞིང་རྒྱུད་ནས་གསུངས་པའི་བརྡའ་གཞན་ལ་མི་བརྗོད། དཀྱིལ་འཁོར་མི་དཀྲུག་ཅིང་ཉམས་པའི་མཐུ་བཟློག་མི་བྱེད། རིགས་ཀྱི་བདག་པོ་བླ་མ་མི་སྤོང་བ་རྣམས་སོ། །དེ་བཞིན་དུས་འཁོར་བརྟུལ་ཞུགས་ཉི་ཤུ་ལྔ། དེ་ལ་དུས་ཀྱི་འཁོར་ལོ་ལས། བསླབ་པའི་གཞི་སྡིག་པ་ལྔ། ཉེ་བའི་སྡིག་པ་ལྔ་དང་། གསོད་པ་ལྔ་དང་། འཁུ་བ་ལྔ་དང་། ཆགས་པ་ལྔ་སྟེ་ལྔ་ཚན་ལྔ་སྤོང་བའི་བརྟུལ་ཞུགས་ཉི་ཤུ་བསྟན་པའི་དོན་ལས། དང་པོ་སྡིག་པ་ལྔ་སྤོང་བ་ནི། སྲོག་ཆགས་ཕྲ་མོ་ཡོན་ཆོད་ཀྱི་སྲོག་ལ་འཚེ་བ་སྨོས་ཅི་དགོས། ཀུན་ནས་མནར་སེམས་པ་དང་། །བསླུ་བའི་བསམ་པ་ཅན་རྫུན་སྨྲ་བ་དང་། དུད་འགྲོ་ཡན་ཆོད་ཀྱིས་བདག་གིར་བྱས་པའི་རྫས་བརྐུ་བ་དང་། འདོད་པས་ལོག་པར་གཡེམ་པ་དང་། འཕུང་ཀྲོལ་ཐམས་ཅད་ཀྱི་འབྱུང་གནས་ཆང་གི་བཏུང་བས་མྱོས་པར་བྱེད་པ་དང་ལྔ་ནི་འཁོར་བའི་གནས་སུ་འཆིང་བ་ལ་རྡོ་རྗེའི་ཞུགས་པ་དང་མཚུངས་ཤིང་། རང་གཞན་གྱི་དགེ་ཚོགས་ཐམས་ཅད་འཇོམས་པར་བྱེད་པས་དེ་རྣམས་ཕྱོགས་མཐུན་ཆ་དང་བཅས་པའང་སྤང་བའོ། །གལ་ཏེ་དེ་ལྔ་བསྲུང་མི་ནུས་ན་བརྟུལ་ཞུགས་ལྷག་མ་རྣམས་ཀྱང་མི་སྦྱིན་པས་བསླབ་པའི་གཞི་ལྔ་ཞེས་བྱའོ། །གཉིས་པ་ཉེ་བའི་སྡིག་པ་ལྔ་ནི། ཆོ་ལོ་དང་། མིག་མང་ལ་སོགས་ཏེ་རྒྱན་པོ་འགྱེད་པ་དང་། བཟའ་བ་དང་རིན་གྱི་དོན་དུ་གསད་པའི་ཤ་ལ་སོགས་པ་ཁ་ན་མ་ཐོ་བའི་ཟས་དང་། དམག་འཁྲུག་དང་ཚོང་གི་གཏམ་ལ་སོགས་པའི་དག་འཁྱལ་གྱི་རིམ་པ་དང་། ཕ་མེས་ཀྱི་མཚུན་གསོལ་བ་དང་ནད་པའི་དོན་དུ་ཕྱུགས་ཀྱི་མཆོད་སྦྱིན་བྱ་བ་ལ་སོགས་འབྱུང་པོའི་ཆོས་ལུགས་པ་དགའ་བ་དང་། རང་གི་བསད་པའི་ཤ་མ་གཏོགས་གཞན་པ་མི་བཟའ་ཞིང་གོས་དཀར་དང་། བྱ་གག་གི་བཏུང་
བ་འབའ་ཞིག་བསྟེན་པ་སོགས་ལྷ་མིན་གྱི་འཇུག་པ་ཅན་ཀླ་ཀློའི་ཆོས་ལུགས་ལ་སྤྱོད་པ་དང་ལྔ་ནི་ཉེ་བའི་སྡིག་པ་ཡིན་པས་སྤང་ངོ་། །གསུམ་པ་གསོད་པ་ལྔ་ནི། མཐོ་རིས་འདོད་པའི་མཆོད་སྦྱིན་ལ་དམིགས་ནས་བ་ལང་གསོད་པ་དང་། མ་མོ་མཆོད་པ་ལ་བྱིས་པ་གསོད་བ་དང་། སྐྱེས་པའི་དོན་དུ་སྐྱེས་པ་དང་། བུད་མེད་ཀྱི་དོན་དུ་བུད་མེད་གསོད་པ་སྟེ་མིའི་མཆོད་སྦྱིན་གཉིས། །ལྷ་མིའི་བླ་མ་གསོད་པ་ཞེས་བྱ་བ་རྒྱལ་བ་སྲས་དང་བཅས་པའི་སྐུ་གཟུགས་དང་བཀའི་གླེགས་བམ་དང་། མཆོད་རྟེན་རྣམས་བསྣུན་ཏེ་བཤིག་པ་ལ་གསོད་པའི་སྒྲས་བཏགས་པ་སྟེ། འདི་དག་ནི་འཚེ་བ་ཆོས་སུ་སྨྲ་བ་ཀླ་ཀློའི་གྲུབ་མཐའ་ལ་ཞུགས་པ་རྣམས་སྡིག་པའི་ལས་རྔམ་པོ་ཆེའང་དགེ་བར་འདོད་པའི་སྐབས་ཡོད་པས་སྡིག་པ་ལྔའི་དང་པོ་ལས་ལོགས་སུ་དགར་ནས་དེ་ལས་ལྡོག་པའི་དོན་དུ་བཤད་པ་སྟེ། དེས་ན་དཀོན་མཆོག་བསྙེན་བཀུར་ལ་བསྙད་ནས་ཕྱུགས་ལུག་གསོད་པ་ཡང་ཀླ་ཀློའི་གྲུབ་མཐའ་མི་ཤེས་ཀྱང་སྤྱོད་པ་ལ་མཚུངས་ལྡན་དུ་སློབ་པ་ཡིན་ནོ། །བཞི་པ་འཁུ་བ་ལྔ་ནི། དགེ་བའི་གྲོགས་ཕོ་དང་། རྗེ་བོའི་རྒན་རབས་དང་། སངས་རྒྱས་དང་། དགེ་འདུན་དང་། བླ་མ་དང་མཁན་སློབ་སྟེ་ཡུལ་ལྔ་པོ་དེ་དག་ལ་ཁོང་ཁྲོ་ཞིང་འཁུབ་སྟེ་ལྔ་ཚན་བཞི་པོ་ནི་ཡིད་ཀྱིས་སྡོམ་ཞིང་སྤྱོད་ལམ་གྱི་སྒོ་ནས་སྤང་བར་བྱའོ། །ལྔ་པ་ཆགས་པ་ལྔ་ནི། ཐེག་པ་ཆེན་པོའི་སྡེ་སྣོད་ཐམས་ཅད་ནས། མིག་གི་འདུས་ཏེ་རེག་པའི་རྐྱེན་གྱིས་ཚོར་བ་དང་། ཞེས་པ་ནས་ལུས་ཀྱི་བར་གསུངས་པས་མཚོན་ཏེ། དབང་ཤེས་ཕན་ཚུན་རྟེན་དང་བརྟེན་པར་འབྲེལ་བ་ལས་ཡུལ་ལྔ་ལ་ཞེན་ཅིང་ཆགས་ནས་ཡང་སྲིད་འཕེན་ནུས་ཀྱི་ལས་སུ་རྫོགས་པས་དེ་དག་
སྤང་བར་བྱ་སྟེ། དེ་ལྟར་སྤང་ཚུལ་བསྐྱེད་རིམ་གྱི་སྒོ་ནས་དབང་ཡུལ་དང་། རེག་བྱ་རེག་ཤེས་ལ་སོགས་པ་ལྷ་སྐུར་སྦྱང་ཞིང་། རྫོགས་རིམ་གྱི་སྒོ་སོ་སོར་སྤུད་བའི་ཤེས་རབ་ཀྱིས་དབང་པོ་ལྔ་ཡུལ་ལྔ་ལ་འཇུག་པའི་རྒྱུན་གཅོད་པ་སྟེ། དཀོན་བརྩེགས་ལས། འོད་སྲུང་མ་འོངས་པའི་དུས་ན་དགེ་སློང་མངོན་པའི་ང་རྒྱལ་ཅན་ཁྱི་རྡོ་ལ་བསྙེགས་པ་དང་མཆུངས་པ་འབྱུང་ངོ་། །འོད་སྲུང་ཇི་ལྟར་ཁྱི་རྡོ་ལ་བསྙེག་པ་དད་མཚུང་པ་བ་དག་གང་ཡིན་ཞེ་ན། ཁྱི་རྡོ་དེ་ཉིད་ཀྱིས་འཇིགས་པ་ལས། རྡོ་དེ་ཉིད་ཀྱི་ཕྱིར་བསྙེག་གིས། རྡོ་དེ་སུས་འཕངས་པ་ལ་མི་བསྙེག་གོ །འོད་སྲུང་། འདི་ལྟར་དགེ་སློང་དང་བྲམ་ཟེ་ཁ་ཅིག །གཟུགས་དང་། སྒྲ་དང་། དྲི་དང་། རོ་དང་། རེག་བྱ་རྣམས་ཀྱི་ནང་དུ་སོ་སོར་རྟོག་པ་ལ་མངོན་པར་བརྩོན་ཏེ། མི་རྟག་པ་དང་། བསླུ་བ་དང་། འཇིག་པའི་ཆོས་སུ་རྟོག་ཀྱང་དེ་དག་གང་ལས་བྱུང་མི་ཤེས་པས། གྲོང་དང་། གྲོང་ཁྱེར་དང་། གྲོང་རྔལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དུ་སོང་ན་ཡང་གཟུགས་དང་། སྒྲ་དང་། དྲི་དང་། རོ་དང་། རེག་བྱ་རྣམས་ཀྱིས་གནོད་པར་འགྱུར་རོ། །ཞེས་པ་ནས། འོད་སྲུང་ཕྱི་མའི་དུས་ན་དགེ་སློང་རྣལ་འབྱོར་སྤྱོད་པ་བ་ཁྱི་རྡོ་ལ་བསྙེག་པ་མི་འདྲ་བ་དག་ནི། དཔེར་ན་སེང་གེ་ལ་རྡོ་འཕངས་ན་རྡོ་གང་ནས་བྱུང་ཤེས་པས་རྡོ་ལ་མི་བསྙེག་པར་རྡོ་འཕང་བར་བྱེད་པ་དག་ལ་བསྙེགས་པ་ཕྱིས་རྡོ་འབྱུང་བར་མི་འགྱུར་རོ། །དེ་བཞིན་དུ་དགེ་སློང་རྣལ་འབྱོར་སྤྱོད་པ་བ་ཕྱི་རོལ་གྱི་འདོད་པའི་ཡོན་ཏན་མཐོང་བ་དེའི་ཚེ་སེམས་ལས་བྱུང་བར་ཤེས་ནས་སེམས་ལ་བརྟགས་པས་དངོས་པོ་མེད་པར་ཤེས་ནས་གྲོལ་བར་འགྱུར་རོ། །ཞེས་སོ། །འདི་ནི་དྲན་པ་ཉེ་བར་གཞག་པ་རྣམས་ཀྱི་གནད་དམ་པ་
ཀུན་ལ་གཅེས་པའི་ཆིངས་སུའང་ཤེས་པར་བྱའོ། །དེ་ལྟར་ཆགས་པ་ལྔ་སྤང་བ་ནི་བརྟུལ་ཞུགས་ཀྱི་གཙོ་བོ་ཡིན་ཏེ། སྤོང་བའི་ཐབས་ནི་སོ་སོར་སྡུད་པ་ཞེས་རྒྱུད་སྡེ་འདིའི་ཐ་སྙད་དུ་གྲགས་ཀྱང་། དབང་པོ་ཡུལ་ལ་ཡན་དུ་མི་འཇུག་པར་ནང་དུ་ཡང་དག་སྡུད་པའི་རྫོགས་རིམ་མམ་ཤེས་རབ་ཀྱི་ཆ་ལ་མཉམ་པར་འཇོག་པ་ཐམས་ཅད་ཀྱི་སྤྱི་དོན་ཡིན་ནོ། །དེ་ཡང་རྒྱུད་འགྲེལ་ལས། སྲིད་པའི་བདག་པོ་རྡོ་རྗེ་སེམས་དཔའི་བརྟུལ་ཞུགས་ཉེར་ལྔ་ཞེས་བཤད་པའི་དོན་ཡང་ཉི་ཤུ་རྩ་ལྔ་པོའི་གྲངས་ངེས་སུ་དམ་འཆའ་བ་ལས་འདའ་བར་བྱ་བ་མ་ཡིན་པ་དམ་ཚིག་དང་། སྒོ་གསུམ་དེའི་ངོ་བོར་སོན་པ་ཉིད་ཀྱིས་ན་བརྟུལ་ཞུགས་ཞེས་གྲགས་པའོ། །ད་ནི་རྒྱུད་སྡེ་གསར་རྙིང་གཉིས་ཀའི་སྤྱི་དོན་དུ་གྱུར་པ་རིགས་ལྔའི་སྡོམ་པ་ལ་ཕྱི་ནང་གཉིས་ལས་དང་པོ་སྟོན་པའི་ཕྱིར། སྔོན་དང་ཕྱིན་ཆད་འགྱུར་བའི་རྒྱུད་སྡེ་ཡི། །སྤྱི་དོན་གྱུར་པ་རིགས་ལྔའི་སྡོམ་པ་ལ། །སངས་རྒྱས་རྣལ་འབྱོར་སྨོན་འཇུག་ཚུལ་ཁྲིམས་གསུམ། །མི་བསྐྱོད་རྡོར་དྲིལ་ཕྱག་རྒྱ་བླ་མ་གཟུང་། །རིན་འབྱུང་ཆོས་ནོར་མི་འཇིགས་བྱམས་པ་སྦྱིན། །སྣང་མཐའ་ཐེག་པ་གསུམ་འཛིན་ཆོས་རྣམས་བཤད། །དོན་གྲུབ་མཆོད་བསྟོད་ཕྲིན་ལས་ཀུན་ལ་གུས། །དེ་ལ་འདིར་སྨོན་འཇུག་གི་སེམས་བསྐྱེད་དང་ཚུལ་ཁྲིམས་རྣམ་པ་གསུམ་སོགས་བྱང་ས་དང་མཐུན་པར་འབྱུང་བས་ཐུན་མོང་བའི་སྡོམ་པའང་ཡིན་ལ། སྤྱིར་རིགས་བྱེ་བྲག་པ་ལ་ཞུགས་པས་རིགས་ལྔ་ཀའི་སྡོམ་པ་བསྲུང་མ་དགོས་པ་མ་ཡིན་ཀྱང་། རང་རིགས་གང་ཡིན་པའི་སྡོམ་པ་ལ་ཁྱད་པར་བྱ་དགོས་པས་རིགས་ལྔ་སོ་སོའི་སྡོམ་པའི་དམ་ཚིག་
ཅེས་གྲགས་པའོ། །དེ་ལ་དང་པོར་དེ་བཞིན་གཤེགས་པའི་རིགས་རྣམ་སྣང་གི་སྡོམ་པ་ནི། བདག་རྡོ་རྗེ་སེམས་དཔར་གྱུར་ནས་སེམས་ཅན་ཐམས་ཅད་ཀྱང་དེའི་གོ་འཕང་ལ་འགོད་པར་བྱའོ་སྙམ་པའི་སྨོན་སེམས་བླངས་ནས་ཉེས་སྤྱོད་སྡོམ་པ་དང་། དགེ་བ་ཆོས་སྡུད་དང་། སེམས་ཅན་དོན་བྱེད་ཀྱི་ཚུལ་ཁྲིམས་གསུམ་བརྟན་པོར་གཟུང་བས་འཇུག་སྡོམ་ཤུགས་ལ་བླང་བ་སྟེ། དེ་ཡང་དང་པོས་སེམས་གནས་པ་དང་། གཉིས་པས་རང་རྒྱུད་ལ་སངས་རྒྱས་ཀྱི་ཆོས་སྨིན་པ་དང་། གསུམ་པས་གཞན་རྒྱུད་སྨིན་པར་བྱ་བ་བྱང་ས་དང་འདྲ་ལ། བྱེ་བྲག་ཏུ་ཐ་མལ་གྱི་སྣང་ཞེན་ལས་ལྡོག་པའི་ཉེས་སྤྱོད་སྡོམ་པ། འཁྲུལ་སྣང་ཡེ་ཤེས་སུ་སྡུད་པའི་དགེ་བ་ཆོས་སྡུད། ལས་བཞིའི་ཕྲིན་ལས་ལ་འཇུག་པའི་སེམས་ཅན་དོན་བྱེད་དེ་སྔགས་སྡོམ་གྱིས་བསྡུས་པའི་ཚུལ་ཁྲིམས་བྱེ་བྲག་པ་གསུམ་གྱི་སྦས་དོན་ཕྱེད་པ་དང་། སྡོམ་པ་དེ་ཐམས་ཅད་ཀྱི་རྟེན་ནི་སྐྱབས་འགྲོ་ཡིན་པས་དེའི་ཞིང་དཀོན་མཆོག་གསུམ་བཟུང་བས་འཇུག་བསྡུས་པ་སྟེ། རྩེ་མོ་ལས། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པོར་བཟུང་པར་བགྱི། །སངས་རྒྱས་ཆོས་དང་དགེ་འདུན་དང་། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་བྱུང་བའི། །སྡོམ་པ་དེང་ནས་བརྟན་པར་བཟུང་། །ཞེས་སོ། །གཉིས་པ་རྡོ་རྗེའི་རིགས་མི་བསྐྱོད་པའི་རིགས་ཀྱི་དམ་ཚིག་ནི་རྒྱུད་སྡེ་ཕྱི་ནང་ཐུན་མོང་དུ་རྟགས་ཀྱི་རྡོར་དྲིལ་རྡོ་རྗེ་མཁའ་འགྲོ་ལ་སོགས་པའི་རྒྱུད་ནས་གསུངས་པའི་ཚད་
དང་མཚན་ཉིད་ལྡན་པ་རང་ཉིད་རྣམ་སྣང་ལ་སོགས་པའི་ལྷ་སྐུ་ཕྱག་རྒྱ་ཆེན་པོར་མོས་ནས་འཛིན་པ་སྟེ། དེ་ཉིད་འདུས་པ་ལས། དེ་ཉིད་ཀྱིས་ནི་རྡོ་རྗེ་བཟུང་། ཆོས་ཀྱི་ དྲིལ་བུ ་དཀྲོལ་བར་བྱ། དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབས་ཀྱི་སྙིང་པོ་བཟླ། །ཞེས་སོ། །དེ་ཉིད་དྲན་པའི་སྒོ་ནས་འཛིན་ཚུལ་ནི། །རྒྱལ་བ་རྣམས་ཀྱི་ཐུགས་གཉིས་སུ་མེད་པའི་ཡེ་ཤེས་ནི་གང་དུའང་མི་འགྱུར་ལ། མཚན་མའི་རྣམ་རྟོག་གིས་མི་ཤིགས་པ་སོགས་རྡོ་རྗེའི་ཆོས་བདུན་དང་ལྡན་པས་ན་རྡོ་རྗེ་སྟེ། མི་བསྐྱོད་པའི་བདག་ཉིད་ཅན་ནོ། །དེའི་མཚན་ཉིད་དོན་དམ་བྱང་ཆུབ་སེམས་ཀྱི་ངོ་བོ་དྲན་པའི་སྒོ་ནས་རྟགས་ཀྱི་རྡོ་རྗེ་འཛིན་པའོ། །དེ་བཞིན་དུ་དྲིལ་བུའང་། ཐམས་ཅད་ནམ་མཁའི་མཚན་ཉིད་ཅན། །ནམ་མཁའ་ལའང་མཚན་ཉིད་མེད། །ནམ་མཁའ་མཉམ་པ་ཉིད་སྦྱོར་བའི། །ཀུན་མཆོག་མཉམ་པ་ཉིད་དུ་གསལ། །ཞེས་པའི་སྒྲ་ དྲིལ་བུས་སྒྲོག་པར་མོས་ནས་དཀྲོལ་ཞིང་དེའི་སྒྲ་ལ་དེས་ཤེས་དྲངས་པའི་འབྲས་བུ ་ནི། རང་གི་སེམས་ནམ་མཁའི་མཚན་ཉིད་ཙམ་དུ་མཆན་ཀྱང་། ནམ་མཁའ་ལའང་མཚན་ཉིད་མེད་པས་དེའི་དཔེས་བསྒྲུན་དུ་མེད་པའི་ཕྱིར་རྟོག་དཔྱོད་ལས་འདས་པའི་ཡེ་ཤེས་རྣམ་པར་མི་རྟོག་པ་ལ་མཉམ་པར་འཇོག་པ་ནི་ཤེས་རབ་ཀྱི་རང་བཞིན་དོན་དམ་པའི་དྲིལ་བུའི་དེ་ཁོ་ན་ཉིད་འཛིན་པ་སྟེ། རྟ་མཆོག་རོལ་པ་ལས། སེམས་ཉིད་ནམ་མཁའ་ལ་གནས་ཏེ། །ནམ་མཁའི་ཅིར་ཡང་མི་གནས་པས། །དེ་ཕྱིར་དཔྱོད་པའི་བྱ་བྱེད་བྲལ། །བྱར་མེད་བསམ་བྲལ་བརྗོད་བཟླས་རྟོགས། །ཞེས་སོ། །རྒྱུད་སྡེ་ཕྱི་ནང་གཉིས་ཀར་རྡོ་རྗེ་ དྲིལ་བུ ་འཛིན་ངེས་ཀྱིས་སོ་སོའི་དག་པ་དྲན་པར་མ་བྱས་ན་དམ་
ཚིག་ལས་འདའ་བར་འགྱུར་ཏེ། དེ་ཉིད་སེམས་མེད་རྣལ་འབྱོར་པ། །གླང་པོ་ དྲིལ་བུ ་འཁྲོལ་དང་མཚུངས། །ཞེས་སོ། །ཁྱད་པར་གསང་སྔགས་ནང་པ་ལྟར་ན་རྡོ་རྗེ་ནི་ཐབས་ཀྱི་ནོར་བུ་དང་། དྲིལ་བུ ་ནི་ཤེས་རབ་ཀྱི་པདྨ་སྟེ། དེ་གཉིས་ཕན་ཚུན་མཉམ་པར་སྦྱར་བའི་རྒྱས་གདབ་པ་ནི་ཕྱག་རྒྱའི་དམ་ཚིག་གོ །དེ་བཞིན་དུ་གསང་བར་ཁམས་དཀར་དམར་གཉིས་ཞུ་བདེའི་རྐྱེན་གྱིས་ཟུང་དུ་འཇུག་པ་བདེ་སྟོང་ལྷན་ཅིག་སྐྱེས་པའི་ཡེ་ཤེས་ཀྱི་དེ་ཁོ་ན་ཉིད་རྣམ་པ་གཞན་དུ་འགྱུར་བ་མེད་པའི་བདེ་ཆེན་ཡེ་ཤེས་ཀྱི་རྡོ་རྗེ་དང་། རྣམ་ཀུན་མཆོག་ལྡན་གྱི་སྟོང་པ་ཉིད་ཤེས་རབ་དྲིལ་བུའི་ཆོས་ཉིད་དུ་ཟུང་དུ་འཇུག་པའི་ཡེ་ཤེས་ཀྱི་སྐུ་ནི་ཕྱག་རྒྱ་ཆེན་པོའོ། །དེ་དག་གི་དོན་ཕྱིན་ཅི་མ་ལོག་པར་བརྡའ་དོན་རྟགས་གསུམ་གྱི་སྒོ་ནས་སྟོན་པར་བྱེད་པ་ནི་རྡོ་རྗེ་སློབ་དཔོན་ཁོ་ན་ལ་རག་ལུས་པས་ན་རང་གི་བླ་མའམ་སློབ་དཔོན་གྱི་དབང་བསྐུར་བ་ལ་འདོད་པའང་ཡོད་དེ་ཞར་བྱུང་དུ་བསྟན་པས་སོ། །ཇི་ལྟར་ཡང་། དེ་ཉིད་བསྙེན་བཀུར་གྱི་སྒོ་ནས་བཟུང་བ་སྟེ། རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་བཟུང་བར་བགྱི། །སློབ་དཔོན་དག་ཀྱང་བཟུང་བར་བགྱི། །ཞེས་སོ། །གསུམ་པ་རིན་ཆེན་རིགས་རིན་འབྱུང་གི་དམ་ཚིག་ནི། ཕྱི་ལྟར་དུ་ཟང་ཟིང་གི་སྦྱིན་པ་གཏོང་བ་ཆེ་ཆུང་གི་དབྱེ་བས་བཞག་པ་དང་། ཆོས་ཀྱི་སྦྱིན་པ་དང་། མི་འཇིགས་པ་སྐྱབས་ཀྱི་སྦྱིན་པ་དང་། འགྲོ་བ་ཐམས་ཅད་བླ་ན་མེད་པའི་བདེ་བ་ལ་རེག་འདོད་བྱམས་པའི་སྦྱིན་པ་དང་བཞི་པོ་ཉིན་རེ་བཞིན་ཡང་དུས་དྲུག་ཏུ་སྦྱིན་པ་སྟེ། དེའང་རིན་ཆེན་ནི་མཉམ་པ་ཉིད་ཀྱི་ཡེ་ཤེས་ཡིན་ལ། རིགས་ནི་དེ་ལས་དགོས་འདོད་འབྱུང་བས་ན་རིན་ཆེན་འབྱུང་ལྡན་དང་། དམ་ཚིག་ནི་སྦྱིན་པ་ལ་དགའ་བ་རྣམས་
དེ་ལ་སྦྱོར་བའི་ངོ་བོ་སྟེ། དེ་ཡང་ཉིན་རེ་བཞིན་དེ་ལྟར་མ་ནུས་ན་རང་གི་ལུས་ལོངས་སྤྱོད་དགེ་བའི་རྩ་བ་དང་བཅས་པ་གཞན་ལ་གཏོང་བའི་བསམ་པ་དང་ཚད་མེད་བཞིའི་དང་མཐའ་གཉིས་སམ་བཞི་ག་བསྒོམས་ཀྱང་ལེགས་པ་ཡིན་ནོ། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་ཡང་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །ཞེས་སོ། །བཞི་པ་པདྨའི་རིགས་སྣང་མཐའི་དམ་ཚིག་ནི། ཕྱི་ཉན་རང་བྱུང་སེམས་ཀྱི་ཐེག་པ་དང་། ནང་བྱ་སྤྱོད་རྣལ་འབྱོར་གྱི་ཐེག་པ། གསང་བ་བསྐྱེད་རྫོགས་གསུམ་གྱི་ཐེག་པ་སྟེ། རྒྱལ་བས་གདུལ་བྱའི་ཁམས་དང་དབང་པོ་དང་བསྐལ་པའི་རྗེས་སུ་འཚམ་པར་གསུངས་པ་མཐའ་དག་དངོས་སུ་ཅི་ནུས་བཟུང་ཞིང་གལ་ཏེ་མ་ནུས་ཀྱང་ཡིད་ཀྱིས་མི་གཏོང་བ་སྟེ། བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་ནང་གསང་བ་ཐེག་པ་གསུམ། །དམ་པའི་ཆོས་ནི་མ་ལུས་བཟུང་། །ཞེས་སོ། །ལྔ་པ་ལས་ཀྱི་རིགས་དོན་གྲུབ་ཀྱི་དམ་ཚིག་ནི། ལས་ཐམས་ཅད་པ་ཡིན་པས་རིགས་བཞི་པོ་ཐམས་ཅད་ལ་གུས་ཤིང་དང་དུ་བླང་བའི་སྟེང་དུ་ཡོ་ག་དང་བླ་མེད་ཀྱི་རྒྱུད་སྡེ་རྣམས་ནས་བཤད་པའི་ཕྱི་ནང་གསང་བའི་མཆོད་པ་དང་། གཏོར་མ་དང་། སྦྱིན་སྲེག་ལ་སོགས་ཕྲིན་ལས་ཀྱི་རིམ་པ་ཐམས་ཅད་དང་དུ་བླང་བ་སྟེ། ལས་ཀྱི་རིགས་མཆོག་ཆེན་པོ་ལ། སྡོམ་པ་ཐམས་ཅད་ལྡན་པ་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །ཞེས་སོ། །དེ་དག་ཀྱང་ཉིན་མཚན་ཆ་དྲུག་ཏུ་བཅད་པའི་སོ་སོའི་ཁོངས་སུ་རྒྱུན་མི་འཆད་པར་ངང་དུ་བླང་བའི་
སེམས་དང་ལྡན་པར་དགེས་ཏེ། རྩེ་མོ་ལས། སྔ་དྲོ་སྡོམ་པ་བླང་བྱ་སྟེ། །དེ་ཉིད་ཉིན་ཕྱེད་དང་མཚམས་སུ། །ཉིན་དང་མཚན་མོ་ལན་གསུམ་དུ། །སངས་རྒྱས་རྡོ་རྗེ་ནོར་བུ་དང་། །པདྨོར་བྱེད་པའི་རྣལ་འབྱོར་གང་། །རྣམ་པ་བཞི་པོ་དེ་ལས་སྦྱོར། །སངས་རྒྱས་ཆོས་དང་ཚོགས་བྱང་ཆུབ། །ཉིན་དང་མཚན་མོ་དུས་དྲུག་ཏུ། །རྡོ་རྗེ་ དྲིལ་བུ ་ཚོགས་སློབ་དཔོན། །རྡོ་རྗེ་ཅན་ལའང་དེ་བཞིན་དྲུག །ཅེས་པ་ནི་ཀུན་ལ་མཚུངས་པའོ། །དེའང་དུས་ཀྱི་འཁོར་ལོ་ལྟར་ན་བསྡུས་རྒྱུད་ལས། །འདོད་པའི་རྡོ་རྗེ་ལ་ནི་རྡོ་རྗེ་ དྲིལ་བུ ་ཕྱག་རྒྱ་བླ་མ་དག་ཀྱང་བཟུང་བར་བགྱི། །རིན་ཆེན་ལ་ནི་སྦྱིན་པ་སྦྱིན་བགྱི་འཁོར་ལོ་འདི་ལ་རྒྱལ་བ་མཆོག་གི་དམ་ཚིག་བསྐྱང་བར་བགྱི། །རལ་གྲི་ལ་ནི་མཆོད་པ་བགྱི་སྟེ་གསལ་བར་ཆུ་སྐྱེས་རིགས་ལ་སྡོམ་པ་དག་ནི་བསྐྱང་བར་བགྱི། །སེམས་ཅན་རྣམས་ནི་ཐར་པའི་སླད་དུ་རྒྱལ་བ་བསྐྱེད་མཛད་རིགས་ལ་བྱང་ཆུབ་བདག་གི་སྤྱོད་པར་བགྱི། །ཞེས་པས་གཞན་རྣམས་ཕལ་ཆེར་འདྲ་བ་ལ་རྣམ་སྣང་གི་རིགས་ལ་ཤ་ལྔ་བདུད་རྩི་ལྔ་བསྟོན་པ་དང་། ཆུ་སྐྱེས་ཏེ་པདྨའི་རིགས་ལ་འཛག་མེད་ཀྱི་ཚུལ་ཁྲིམས་བརྟན་པའི་ཞུ་བདེས་ཕུང་ཁམས་ཀྱི་ལྷ་རྣམས་ཚིམ་པའི་བྱེད་པ་བསྒྲུབ་པ་སྟེ། དེ་དག་ཀྱང་བསོད་ནམས་དང་། ཚུལ་ཁྲིམས་དང་། ཡེ་ཤེས་ཀྱི་ཚོགས་གསུམ་གྱིས་བསྡུ་བའོ། །ཁྱད་པར་བླ་མེད་རིགས་ལྔའི་སྡོམ་པ་ནི། །རྡོ་རྗེའི་རིགས་གྱུར་སྲོག་ལ་འཚེ་བའང་། །ཞིང་བཅུ་ལས་གཞན་དབུ་མར་རླུང་རྟོག་གསོད། །རིན་ཆེན་རིགས་ལ་མ་བྱིན་བླང་བྱ་ནི། །མཚན་ལྡན་གཟུངས་དང་སྐལ་མེད་སྐྱེ་བོར་ནོར། །རྫོགས་པའི་བྱང་ཆུབ་རང་སྟོབས་མཐུ་ཡིས་བླང་། །པདྨའི་རིགས་ལ་རི་དྭགས་མིག་ཅན་མཆོག །སྟོང་པ་ཉིད་ཀྱི་བུད་མེད་ཀུན་ཏུ་སྤྱོད། །ལས་
ཆོས་དམ་ཚིག་ཕྱག་རྒྱ་ཆེན་པོ་བསྟེན། །འཁོར་ལོའི་རིགས་ལ་ཤ་ཆེན་ལྔ་དང་ཆང་། །ལས་ལ་བརྫུན་ཚིག་སྒྱུ་མ་ལྟ་བུར་སྒྲོག །དེ་ལ་རྟེན་གྱི་གང་ཟག་རྣལ་འབྱོར་བླ་མེད་ཀྱི་ལྟ་བསྒོམ་སྤྱོད་པའི་གནས་གང་ཡིན་པ་གདེངས་སུ་གྱུར་ཅིང་རིགས་ལྔ་སོ་སོའི་དམ་ཚིག་བསྟེན་པ་ལ་ནུས་པ་རྙེད་པས་རང་གཞན་གྱི་དོན་དུ་འགྱུར་བ་ངག་ལ་སྒྲ་ཇི་བཞིན་པ་དང་། གཞན་དུ་སྔགས་ལམ་ལ་ཞུགས་པ་ཅན་ཙམ་ལ་དགོངས་པ་ཅན་དུ་གསུངས་པའི་ཁྱད་པར་གཉིས་གཉིས་སུ་སྟོན་པ་ལས། རྡོ་རྗེའི་རིགས་ཀྱི་དམ་ཚིག་སྲོག་ལ་འཚེ་བའང་། ཞེ་སྡང་རང་རྒྱུད་ལྡན་དུ་མི་གནས་པའི་སྙིང་རྗེ་ཆེན་པོས་ཞིང་བཅུ་ཚང་བའམ། ཉམས་པ་བདུན་དང་ལྡན་པའི་ངང་ཚུལ་ངན་པ་ཅན་གྱི་ལས་ངན་པའི་རྒྱུན་ཐབས་གཞན་གང་གིས་གྱང་གཅད་པར་མི་ནུས་ན། །དྲག་ཤུལ་གྱི་ཆོ་གས་གསད་པར་བྱ་བ་སྟེ། ངེས་བརྗོད་ལས། སངས་རྒྱས་བསྟན་ལ་གནོད་བྱེད་དང་། །བླ་མ་དམོད་བརྩོན་མ་རུངས་དང་། །རྟག་ཏུ་སེམས་ཅན་གནོད་བརྩོན་པ། །མཁས་པས་བསྒྲིམས་ཏེ་གསད་པར་བྱ། །ཞེས་དང་། རྒྱུད་གཞན་ལས་ཀྱང་། ཨེ་མ་ཧོ་གསོད་པ་འདི་ནི་བཟང་། །ཞེས་སོགས་བསྟན་པ་བཞིན་ནོ། །དེ་ལས་གཞན་དུ་ནི་ངེས་པའི་དོན་ལ་དམིགས་པའི་དགོངས་པ་ཅན་ཡིན་ཏེ། འདི་ལྟར་སྲིད་པ་བསྐྱེད་པའི་རྒྱུའི་གཙོ་བོ་སྲོག་གི་རླུང་སྟེ་རོ་རྐྱང་ནས་འཇུག་པའི་གཟུང་འཛིན་གྱི་ལས་རླུང་དབུ་མར་ཞུགས་གནས་ཐིམ་གསུམ་གྱིས་ངེས་པས་གསོད་པ་སྟེ། བརྟག་གཉིས་ལས། སེམས་གཅིག་སྲོག་ཆགས་གསོད་པ་ནི། །གང་ཕྱིར་སྲོག་ནི་སེམས་སུ་བརྗོད། ཅེས་དང་། འབུམ་ལྔ་ལས། སྲོག་རླུང་ངེས་པར་འགགས་པ་ནི། །
བྱང་ཆུབ་སེམས་ནི་འགག་པའོ། །ཞེས་སོ། །དེ་བཞིན་དུ་རིན་པོ་ཆེའི་རིགས་ཀྱི་དམ་ཚིག་མ་བྱིན་བླང་བའང་། འཛག་བདེའི་རྒྱུན་ལམ་ཁེགས་བཞིང་ཉོན་མོངས་པའི་རང་བཞིན་ལྷན་ཅིག་སྐྱེས་དགར་སྦྱོར་བའི་དཔའ་བོས་ལམ་གྱི་ཡོན་ཏན་མངོན་དུ་བསྒྲུབ་བར་སེམས་བསྐྱེད་ནས་རྣམ་པར་སྨིན་པའི་ལུས་ཅན་མཚན་ཉིད་དང་ལྡན་པའི་གཟུངས་སུ་གྱུར་བ་གང་ཞིག་གཞན་དབང་དུ་གྱུར་ཀྱང་འཕྲུལ་དགའི་ལོངས་སྤྱོད་ལྟར་བདག་ཉིད་ལས་སྤྲུལ་པར་བསྟན་ནས་བླང་བར་བྱ་བའི་ཚུལ་སྒྱུ་འཕྲུལ་ལས། འཕྲུལ་དགའི་ཚུལ་ཏེ་ཐ་དད་མིན། །གཞན་དུ་མ་བྱིན་ལེན་པའི་ཕྱིར། །བླངས་མེད་ཐམས་ཅད་ཉིད་ཀྱིས་དབྱིངས། །ཞེས་དང་། དེ་ལྟར་བླངས་ནས་ཀྱང་དེ་ཉིད་ཀྱི་དྭངས་མ་རླུང་གི་སྟོབས་ཀྱིས་མ་བྱིན་བླང་བའི་ཚུལ་བརྟག་གཉིས་ལས། བཙུན་མོའི་ཁུ་བ་མ་བྱིན་བླངས། །གཞན་གྱི་བུད་མེད་དང་མཚུངས་མཛེས། །ཞེས་སོ། །དེ་བཞིན་དུ་སྐལ་མེད་ཀྱི་ལག་ཏུ་གནས་མ་ཡིན་པར་འཁྱམས་པའི་དམ་ཚིག་གི་རྫས་ཁྱད་པར་བ་གང་ཡིན་པ་སྔགས་ཀྱི་མཐུས་འཕྲོག་པའམ། མིན་ནའང་འཇུངས་པ་ལ་ཕན་གདགས་པའི་སེམས་གྱིས་བླངས་ཏེ་གཞན་དོན་བསྒྲུབ་པའི་ཚུལ། རྡོ་རྗེ་ལས། འཇུངས་པ་རྣམས་ལས་ནོར་བླངས་ལ། །སེམས་ཅན་བཀྲེན་ལ་སྦྱིན་པར་བྱ། །དེ་ཕྱིར་མི་ཡི་བདག་པོ་དང་། །ཕྱུག་པོ་རྣམས་ཀྱི་ནོར་འཕྲོག་གོ །ཞེས་སོ། །དེ་ལས་གཞན་དུ་ནི་དགོངས་པ་ཅན་ཏེ། །བླང་བྱའི་རྫས་རྫོགས་པའི་བྱང་ཆུབ་ཀྱི་གོ་འཕང་རྟོགས་པའི་དེ་ཁོ་ན་ཉིད་ཀྱི་བདག་ཉིད་ཅན་སུས་ཀྱང་མ་བྱིན་བཞིན་དུ་རང་སྟོབས་ཀྱི་མཐུས་ལེན་པ་སྟེ། མདོ་ལས། གང་ཕྱིར་ཐེག་པ་ཆེན་པོ་འདི། །གང་གིས་ཀྱང་ནི་བྱིན་མ་ལགས། །དེ་ཉིད་རྟོགས་པས་མ་བྱིན་
བླང་། །ཞེས་སོ། །པདྨའི་རིགས་ཀྱི་དམ་ཚིག་ཏུ་ཕྱག་རྒྱ་བཞི་བསྟེན་པ་ལས་ལས་རྒྱ་ནི། ཞུ་བ་དེའི་རང་བཞིན་འཕོ་མེད་དུ་བརྟན་ནས་ལྷན་ཅིག་སྐྱེས་དགའི་ཡེ་ཤེས་འདྲེན་ནུས་ན་རི་དྭགས་མིག་ཅན་གྱི་མཆོད་པ་དང་དུ་བླང་བ་སྟེ། རྡོ་རྗེ་ལས། སངས་རྒྱས་རྣམས་ནི་མཉེས་བྱ་དང་། །དམ་ཚིག་རྣམས་ནི་བསྲུང་བ་དང་། །གསང་སྔགས་རིག་པ་བསྒྲུབ་པའི་ཕྱིར། །གཞན་གྱི་བུད་མེད་བསྟེན་པར་བྱ། །ཞེས་སོ། །དེ་ལ་དངོས་རིག་ལས་ཀྱི་ཕྱག་རྒྱའི་ཡན་ལག་ཏུ་ནི་གཏུམ་མོའི་དམ་ཚིག་གི་ཕྱག་རྒྱ་དང་། །ཡིད་རིགས་ཆོས་ཀྱི་ཕྱག་རྒྱ་དང་། ཕྱག་རྒྱ་ཆེན་པོ་མཆོག་ཏུ་མི་འགྱུར་བའི་རང་བཞིན་གསུམ་ཡང་འདུ་བ་ཡིན་ཏེ། རིམ་བཞིན་ཐབས་ཀྱིས་ཟིན་པའི་སྤྱོད་པ་དང་། འདུ་ཤེས་གསུམ་ལྡན་གྱི་བསྒོམ་པ་དང་། རྟོགས་གོམས་གདེངས་སུ་གྱུར་པའི་ལྟ་བ་སྟེ། །ཕྱག་རྒྱ་གསུམ་དང་མཚུངས་པར་ལྡན་པ་ལ་བརྟེན་ནས་ཞུ་བདེས་དྲངས་པའི་དཔེའི་ཡེ་ཤེས་བསྐྱེད་པས་ཀུན་རྫོབ་པའི་ཁམས་འགྱུར་མེད་དུ་བརྟན་ཅིང་། དོན་དམ་ལྷན་ཅིག་སྐྱེས་པའི་ཡེ་ཤེས་འགྱུར་བ་མེད་པ་མངོན་དུ་བྱེད་པའོ། །དེ་ལས་གཞན་དུ་དགོངས་པ་ཅན་ནི་ཤེས་རབ་ཀྱི་རང་བཞིན་སྟོང་ཉིད་རྣམ་ཀུན་མཆོག་ལྡན་ལ་བུད་མེད་ཀྱི་སྒྲར་བཏགས་ནས་དེ་རིག་པ་ཡེ་ཤེས་ཀྱི་ཕྱག་རྒྱ་ཆེན་པོ་དང་སྦྱོར་བའི་ཚུལ། རྒྱུད་ལས། རྣམ་པ་ཀུན་གྱི་མཆོག་ལྡན་མ། །སྟོང་ཉིད་ཤེས་རབ་མཛེས་མ་ཉིད། །རྒྱལ་བ་ཐམས་ཅད་བསྐྱེད་པའི་ཡུམ། །དེ་ཉིད་མ་བསྟེན་འཚང་མི་རྒྱ། །ཞེས་སོ། །འཁོར་ལོའི་རིགས་ཀྱི་དམ་ཚིག་ཏུ་ཤ་དང་ཆང་ལ་སྤྱོད་པའང་། རིགས་དང་ང་རྒྱལ་གྱི་དྲེགས་པ་དང་། གཙང་སྨེའི་རྟོག་པ་གཞིག་པའི་དོན་དུ་ཤ་ལྔ་བདུད་རྩི་ལྔ་གནང་ཞིང་། །དེ་ཡང་རང་གི་
བཟའ་བའི་དོན་དུ་དམིགས་ནས་གསད་པ་ནི་མ་ཡིན་ཏེ། སོ་སོའི་ལས་ཀྱིས་གཞན་དབང་དུ་སོང་བའི་ཤ་དང་། དམ་ཚིག་གི་རྫས་སུ་དམིགས་པ་གང་ཡིན་པའོ། །དེ་བཞིན་དུ་ཆང་ཡང་རང་ལུས་གདན་གསུམ་ཚང་བའི་དཀྱིལ་འཁོར་དུ་ངེས་ཤིང་མཆོད་རྫས་ལ་དམིགས་པའི་ཐབས་ཀྱིས་ཟིན་པས་བསོད་ནམས་སུ་འབྱུར་ལ། ཤེས་རབ་ཀྱི་ཆ་ནས་ངོ་བོ་ཡེ་ཤེས་ཀྱི་བདུད་རྩི་ལ་རྣམ་པ་སྦྱངས་རྟོགས་སྦར་གསུམ་གྱིས་དངོས་ཞེན་དག་པར་བྱས་པས་མཆོད་པའི་ཕྱག་རྒྱ་ཆེན་པོ་ཟག་མེད་ཀྱི་བཅུད་ལེན་དུ་འགྱུར་བ་ལས་མྱོས་པའི་སྐྱོན་གྱིས་མ་གོས་པ་གཏི་མུག་རྣམ་པར་དག་པའི་དམ་ཚིག་སྟེ། བརྟག་གཉིས་ལས། དེ་ལ་ག་བུར་རྒྱུ་ཡི་ཕྱིར། ཤ་ནི་བཟའ་བ་ཉིད་དུ་བྱ། །ཁྱད་པར་དུ་ཡང་ཆང་ཉིད་དོ། །ཞེས་སོ། །དེ་བས་ན་གཞན་དུ་ཤ་ལྔ་བཟའ་བ་ནི་དབང་པོ་ལྔའི་དྭངས་མ་བཅིངས་པས་རྣམ་རྟོག་གི་ས་བོན་རྣམ་པར་མི་རྟོག་པའི་ཆོས་ཉིད་ཀྱིས་བཟའ་བ་དང་། ཆང་འཐུང་བའི་སྒྲས་ནི་ཡས་འབབ་ཀྱི་ཞུ་བདེ་མས་བརྟན་ལྷན་ཅིག་སྐྱེས་པའི་ཡེ་ཤེས་ཀྱིས་བཅིངས་པ་ལས་ཐིག་ལེའི་རྡུལ་ཕྲ་རབ་ཀྱི་ཚོགས་ཡེ་ཤེས་ཆེན་པོའི་རང་བཞིན་དུ་བཏུང་བའི་དོན། རྣམ་རྟོག་དང་ནི་ཀུན་རྟོག་གི །དངོས་དང་དངོས་མེད་སོགས་འཁྲུལ་བ། །རྣམ་རྟོག་དྲྭ་བའི་ས་བོན་ཚོགས། །རྣམ་པར་མི་རྟོག་པ་ཡིས་བཟའ། །སྙིང་རྗེའི་སྣོད་ཀྱི་མཆོག་ཏུ་ནི། །ཡེ་ཤེས་ཆེན་པོ་མཉམ་བཞག་ནས། །བཏུང་ཞིང་རྟག་ཏུ་བཏུང་བར་བྱ། །ཕྱག་རྒྱའི་དམ་ཚིག་ཅེས་སུ་བཤད། །ཅེས་སོ། །ལས་ཀྱི་རིགས་ཀྱི་དམ་ཚིག་རྫུན་དུ་སྨྲ་བ་ཡང་། བྱང་ཆུབ་སེམས་དཔའ་གཞན་དོན་སྤྱོད་པ་ལ་གནང་བའི་ལུས་ངག་གི་ལས་བདུན་གྱི་ཡན་ལག་གཞན་ལ་ཕན་འགྱུར་གྱི་བསམ་པས་རྫུན་དུ་སྨྲ་བ་སྟེ། རྡོ་རྗེ་ལས་
སེམས་ཅན་རྣམས་ལ་ཕན་སྤྱོད་པ། །རྟག་ཏུ་དམ་ཚིག་བླ་མའི་ནོར། །སེམས་ཅན་སྲོག་ནི་བསྲུང་བའི་ཕྱིར། །རྫུན་དུ་ཡང་ནི་སྨྲ་བར་བྱ། །ཞེས་སོ། །དེ་ལས་གཞན་དུ་ཆོས་ཉིད་དང་ཐ་སྙད་གཉིས་རྫས་འགལ་བའི་ཕྱིར་འཁོར་བ་པའི་གནས་ཚུལ་ལས་གཞན་དུ་གྱུར་པའི་རྫུན་ཚིག་སྒྱུ་མ་ལྟ་བུའི་རང་བཞིན་སེམས་ཅན་གྱི་ཁམས་ཐམས་ཅད་འཁོར་བ་ལས་བསྒྲལ་བའི་དོན་དུ་སྨྲ་བ་སྟེ། བརྟག་གཉིས་ལས། འཇིག་རྟེན་བསྒྲལ་བ་ཞེས་བྱ་བ། །རྫུན་གྱི་ཚིག་ནི་རབ་ཏུ་བསྒྲག །ཅེས་དང་། འཇམ་དཔལ་གྱིས་བསྟན་པའི་མདོ་ལས། བདག་དང་སེམས་ཅན་མི་དམིགས་ལ། །འཁོར་བ་ལས་སྒྲོལ་རྫུན་གྱི་ཚིག །ཅེས་སོ། །དེ་ཡང་སྦས་དོན་དུ་ངག་གི་རྩ་བ་རླུང་གི་རང་བཞིན་སྙིང་གའི་འཁོར་ལོ་ལ་ཐིམ་པས་རང་སྣང་ལ་གཞོམ་མེད་ཀྱི་སྒྲ་རྣམ་པ་ཐམས་ཅད་པ་དང་། གཞན་སྣང་ལ་སེམས་ཅན་གྱི་མོས་པ་དང་མཐུན་པའི་སྐད་ཀྱིས་སྒྲ་དང་དོན་དུ་འགལ་བ་རྫུན་པའི་ཚིག་ལྟ་བུའི་ཆོས་ཀྱིས་ཕན་གདགས་པ་སྟེ། རྡོ་རྗེ་སྙིང་འགྲེལ་ལས། གང་གིས་སྲོག་རླུང་ཟོས་པ་ན། །གཅིག་ཆར་འགྲོ་ཀུན་སྐད་ཀྱིས་ནི། །གང་དང་གང་ལ་དེ་དང་དེ། །མཐུན་པའི་ཆོས་སྟོན་རྫུན་པའི་ཚིག །ཅེས་སོ། །དེ་དག་ཀྱང་དུས་ཀྱི་འཁོར་ལོ་ལས་གྲི་གུག་གི་སྒྲས་མཁའ་གསང་མི་སྨད་ཅིང་རང་ལུས་གཏོང་བའི་ཁྱད་པར་ཙམ་ལས་གཞན་དུ་མཐུན་པར་གསུངས་པའི་ཚུལ། ངེས་པར་རྡོ་རྗེའི་རིགས་ལ་སྲོག་གཅོད་པ་སྟེ་རལ་གྲི་ལ་ཡང་བདེན་པ་མིན་པའི་ཚིག །རིན་ཆེན་ལ་ནི་གཞན་ནོར་འཕྲོག་བྱ་མཆོག་གི་པདྨའི་རིགས་ཉིད་ལ་ཡང་གཞན་གྱི་བུད་མེད་འཕྲོག །ཆང་དང་སྒྲོན་མ་སངས་རྒྱས་རྣམས་དང་བཟང་
པོའི་ཡུལ་རྣམས་མཐའ་དག་འཁོར་ལོ་ལ་ནི་བསྟེན་པར་བྱ། གཡུང་མོ་ལ་སོགས་མཐའ་དག་བུད་མེད་རྣམས་ནི་གྲི་གུག་ལ་ཡང་མཁའ་ཡི་པདྨ་སྨད་མི་བྱ། །སེམས་ཅན་དོན་གྱི་སླད་དུ་ནོར་དང་བཅས་པའི་ལུས་འདི་སྦྱིན་པར་བྱ་སྟེ་ཁྱོད་ཀྱིས་བསྲུང་མི་བྱ། ཞེས་སོ། །དེ་ཡི་ཡན་ལག་ཚིག་གིས་གབ་པ་ནི། །མ་བསྒྲལ་བསྒྲལ་སོགས་བྱང་ས་དང་ཐུན་མོང་། །ལྷ་དང་ལྷ་མིན་གསང་བ་པ་མི་བརྙས། །ཕྱག་རྒྱ་བཞོན་པ་མཚོན་ཆ་མཚན་མ་ལ། །སྨད་པར་མི་བྱའི་གཉིས་ནི་དངོས་བསྟན་ཏེ། །གསང་བ་གནོད་སྦྱིན་ཕྱག་རྒྱ་སྐུ་གཟུགས་རྫོགས། །བཞོན་པ་བླ་མའི་སྟན་དང་ཚིགས་ལ་སོགས། །མཚོན་ཆ་ལྷ་ཡི་ཆེད་དུ་བྱས་པའི་རིགས། མཚན་མ་ཕྱག་མཚན་ལྷ་དང་བླ་མ་དང་། །མཆོད་རྟེན་གྲིབ་མ་འགོམ་ལ་སྨད་པའི་སྒྲ། །དེ་བཞིན་མཆོད་རྫས་རྙིངས་ལ་དམན་མར་གྲགས། །ཕྱག་མཚན་རྣམ་པའང་བཟའ་བར་བཀག་པ་ཡིན། །དེ་ལ་སྨོན་འཇུག་གི་དོན་བསྡུའི་རྗེས་རིགས་ལྔའི་སྡོམ་བཟུང་གི་ཡན་ལག་མ་བསྒྲལ་བསྒྲལ་བ་ནི་ཤེས་སྒྲིབ་ཀྱི་བག་ཆགས་ལས་མ་བསྒྲལ་བའི་ཉན་རང་དགྲ་བཅོམ་པའི་ཚོགས་དང་། མ་གྲོལ་བ་ནི་སྒྲིབ་གཉིས་ཀྱི་འཆིང་བ་ལས་མ་གྲོལ་བ་ཚངས་པ་ལ་སོགས་སོ་སྐྱེ་ནས་སློབ་པ་འཕགས་པའི་བར་རོ། །དབུགས་མ་ཕྱིན་པ་ནི་དམྱལ་བ་པ་སོགས་སྡུག་བསྔལ་གྱི་མནར་བ་ལས་དབུགས་མ་ཕྱིན་པ། མདོར་ན་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པ་ལ་དགོད་པར་དམ་འཆའ་ཞིང་གཞན་ཡང་རྩེ་མོ་ལས། ལྷ་དང་ལྷ་མིན་གསད་བ་པ། །ཁྱོད་ཀྱིས་བརྙས་པར་མི་བྱ་ཞིང་། །ཕྱག་རྒྱ་བཞོན་པ་མཚོན་ཆ་དང་། །མཚན་མ་འགོམ་པར་མི་བྱའོ། །ཞེས་པ་ལས་ལྷ་དང་ལྷ་མིན་
གསང་བ་པ་གསུམ་ལས་དང་པོ་གཉིས་དངོས་བསྟན་དང་། གསང་བ་པ་གནོད་སྦྱིན་ཏེ་སྟོན་པའི་དམ་ཚིག་ཤེས་ཤིང་དེ་ལ་གནས་པས་བསྟན་པ་སྐྱོང་བ་མི་བརྙས་པ་དང་། ཕྱག་རྒྱ་ནི་སྤྱིར་ཆོས་རྒྱ། ལས་རྒྱ། དམ་རྒྱ། ཕྱག་རྒྱ་ཆེན་པོ་བཞི་ཀ་མི་སྨད་ཅིང་། ཁྱད་པར་ལྷའི་སྐུ་གཟུགས་རྫོགས་པ་ནི་མངོན་གྱུར་པའོ། །བཞོན་པ་ནི་བླ་མའི་ཁྲི་སྟན་དང་ཆིབས་ལ་སོགས་པའོ། །མཚོན་ཆ་ནི་རལ་གྲི་དང་གཏུན་ཤིང་ལ་སོགས་ལྷའི་ཕྱག་མཚན་གྱི་ཆེད་དུ་བྱས་པ་དང་། མཚན་མ་ནི་རིགས་ལྔའི་མཚན་མ་དང་། གཞན་ཡང་བླ་མ་དང་མཆོད་རྟེན་གྱི་གྲིབ་མ་འགོད་པ་ལ་སྨད་པའི་སྒྲར་བསྟན་ལ། དེ་བཞིན་དུ་དམན་མ་ནི་མཆོད་རྫས་རྙིང་པ་མེ་ཏོག་དང་མཆོད་ཡོན་པ་རྗེས་པ་ལ་སོགས་པ་སྟེ་དེ་དག་ལ་མི་འགོད་ཞིང་མི་བཟའ། འགོད་བའི་སར་ཁྱབ་གདལ་དུ་མི་འདོར་བ་ལ་སོགས་པ་དང་། ཅི་ནས་རང་དབང་མི་འདུ་བ་མཆོད་རྟེན་གྱི་གྲིབ་མ་ལྟ་བུའི་སྟེང་དུ་འགྲོ་དགོས་ན། བཛྲ་བེ་ག་ཨ་ཀྲམ་ཧཱུཾ་ཞེས་རྡོ་རྗེ་ཤུགས་ཀྱི་ལས་སྔགས་དང་བཅས་པས་བཏེག་པའི་འོག་ཏུ་འཛུལ་བར་བསམ་ཏེ་རྩེ་མོ་ལས། འཁོར་ལོ་རྡོ་རྗེ་པདྨ་སོགས། །མཚན་མའི་ཕྱག་རྒྱ་གང་ཡིན་པ། །འགོང་པ་ཉིད་དུ་མི་བྱ་ཞིང་། །བཟའ་བར་ཡང་ནི་མི་བྱའོ། །དེ་བཞིན་དམན་མ་ལྷ་ཡི་གྲིབ། །རྐང་པ་དག་གིས་བརྫི་མི་བྱ། །དེ་ཡི་སྟེང་དུ་འདུག་མི་བྱ། །སླར་ཡང་གཞག་པར་མི་བྱའོ། །ལྷ་ཡི་ཕྱག་མཚན་བཟང་པོ་དང་། །ལྷ་ཡི་བཞོན་པའི་མཚན་མ་རྣམས། །འགོང་ཞིང་བརྙས་པར་མི་བྱ་སྟེ། །སེམས་ཅན་ལ་ནི་གནོད་མི་བྱ། །ཞེས་སོ། །ལྷ་ཡི་སྐུ་དང་ཕྱག་མཚན་དང་། །ལྷ་ཡི་བཞོན་པ་དག་དང་ནི། །
དམན་མ་ལྷ་ཡི་གྲིབ་མ་དང་། །ལྷ་ཡི་མཚན་མ་ཐམས་ཅད་དང་། །བཟའ་བ་དག་ནི་སྣ་ཚོགས་པ། །མཚན་མའི་གཟུགས་སུ་བྱས་པ་དག །ནམ་ཡང་བརྫི་བར་མི་བྱའོ། །ཞེས་སོ། །ཁྱད་པར་གསོད་དང་མ་བྱིན་ལེན་པ་སོགས། །དངོས་བསྟན་ཉིད་དམ་དགོངས་བ་ལུང་སྔོན་གྱི། །རྣམ་དབྱེ་མ་ཕྱེད་སྔགས་པ་ཐུར་ལ་ལྟུང་། །དེ་ལ་སྤྱིར་ཐེག་པ་ཆེན་པོའི་གནས་སྐབས་ཐམས་ཅད་དུ་དྲང་ངེས་ལྡེམ་དགོངས་བཞིར་བསྟན་པས་བཀའི་དོན་ཐམས་ཅད་སྒྲ་ཇི་བཞིན་དུ་འཛིན་པ་ཡང་མ་ཡིན་ལ། སྒྲ་ཇི་བཞིན་པ་ལས་འགལ་བ་ཤ་སྟག་གོ་ཞེས་ཀྱང་འཛིན་པ་མ་ཡིན་ཏེ། དེ་བཞིན་གཤེགས་པའི་གསུང་ནི་རྣམ་པ་ཐམས་ཅད་པ་སྒྲ་ཚིག་གི་གཞན་དབང་དུ་གྱུར་པ་མ་ཡིན་པས་སོ། །ཁྱད་པར་དུ་སྔགས་ཀྱི་ཚུལ་ལས་ནི་མོས་པས་སྤྱོད་པ་ཙམ་ལ་དགོངས་པ་དང་། རྟོགས་གོམས་མཐར་ཕྱིན་པའི་གང་ཟག་ལ་གནང་བའི་ཁྱད་པར་རྣམ་པ་ཀུན་ནས་རིག་པར་མ་བྱས་ན། ལྡེམ་པོར་དགོངས་པ་ལ་སྒྲ་ཇི་བཞིན་པར་སྤྱད་པས་ངན་སོང་དུ་འཕེན་པའི་ཚུལ་ཁམས་ལེའི་འགྲེལ་ཆེན་ལས། སྔགས་ཀྱི་ཐེག་པ་ལ་ལྡེམ་པོར་དགོངས་པའི་སྐང་གཞན་གྱིས་མི་ཤེས་པས་སྲོག་གཅོད་པ་ལ་སོགས་པ་དང་། ཚོགས་ཁང་དང་གཙུག་ལག་ཁང་གི་རྫས་ཉེ་བར་ལོངས་སྤྱོད་པ་བྱས་པ་དང་། །རྟག་པ་དང་ཆད་པའི་ཕྱོགས་བཟུང་བས་ཕྱི་རོལ་གྱི་ཡུལ་ཉེ་བར་ལོངས་སྤྱོད་པ་ལ་ཆགས་པར་གྱུར་ན་སློབ་དཔོན་གྱི་ཆ་ལུགས་ཀྱིས་དཀོན་མཆོག་གསུམ་ལ་ཅོ་འདྲི་བྱས་ནས་དམྱལ་བར་འགྲོ་བར་འགྱུར་རོ། །ཞེས་སོ། །དེ་བས་ན་རྡོ་རྗེ་ཐེག་པའི་གཞུང་འདིར་གབ་པའི་གསང་བ་འབྱིན་པའི་སྐབས་སུ་ཚིག་བྱིངས་ཆེ་བ་རྣམས་ལ་ཕྱི་ནང་
གསང་བ་གསུམ་གྱི་སྒོ་ནས་རྒྱུད་ཀྱི་དགོངས་པ་མི་འགལ་བར་སྟོན་པ་དང་། དོན་མི་འཚམ་པ་ལ་འཚམ་པར་གནས་པའི་སྐབས་སུ་ཡང་རང་བཞིན་དང་། དགོངས་པ་ཅན་དང་། དོན་རྟགས་འབྲེལ་བ་ཅན་གྱི་སྒོ་ནས་དངོས་ལ་མི་འགལ་ཞིང་རྣམ་པ་ལ་འཚམ་པར་སྟོན་པ་ཡིན་ནོ། །དེའི་ཕྱིར་སྒྲ་གཅིག་ལ་དངོས་བསྟན་དང་དགོངས་པ་ལུང་སྟོན་གྱི་ཆ་གཉིས་སུ་ཕྱེ་བ་ཡང་དོན་གྱི་གནས་ལ་འགལ་བ་མི་འདུ་བ་ཡིན་ཏེ། འདིར་དངོས་བསྟན་གྱི་གནས་སྐབས་ལ་མཚོན་ན། འདི་ལྟར་གབ་པའི་གསང་བ་ཆོས་ཉིད་ཇི་ལྟ་བའི་དོན་རྟོགས་པའི་གང་ཟག་གིས་ནི་ཐབས་སྙིང་རྗེ་ཆེན་པོའི་གཞན་དབང་དུ་གྱུར་པའི་དུས་ན་སྦས་པའི་གསང་བ་ཏ་ན་དང་། ག་ན་ལ་སོགས་པ་རྣམས་ལ་བླ་ན་མེད་པའི་དམ་ཚིག་ཆོས་མཉམ་པ་ཆེན་པོའི་བརྟུལ་ཞུགས་འདྲེས་པས་སྒྲ་ཇི་བཞིན་པར་འཇུག་པའི་ཚུལ་ཡང་ཐབས་དང་ཤེས་རབ་ཆེན་པོའི་ཡང་ཆེན་པོས་ཡོངས་སུ་ཟིན་ནས་གནས་འགྱུར་བའི་ཚུལ་གྱིས་རྣམ་པར་དག་པ་ཡིན་ནོ། །འོན་ཀྱང་སོ་སོ་ཐར་པའི་སྡོམ་པའི་གནས་སྐབས་ན་ནི་སྲོག་གཅོད་པ་ལ་སོགས་པའི་ཕས་ཕམ་པ་བཞི་བྱུང་ན་རྩ་བ་བཞི་ཞིག་པར་འགྱུར་ཞིང་། དེ་ཐམས་ཅད་ཀྱི་མི་དགེ་བའི་བཤེས་གཉེན་ཆང་དང་བཅས་པ་ལྔ་ནི་འདིར་རིགས་ལྔའི་དམ་ཚིག་ཏུ་སྤྱོད་པས་དེ་ལྟ་བུའི་རྫས་འགལ་དོན་མཐུན་པར་བསྡུ་བའི་རྒྱུ་མཚན་མེད་དོ་སྙམ་ནས་མངའ་བདག་ལྷ་བླ་མ་ལྟ་བུས་ཀྱང་མདོ་སྔགས་ཆོ་ག་འགལ་བར་མངོན་ཞིང་ཕྱག་ཆེན་ཐིག་ལེའི་རྒྱུད་ལ་སོགས་པ་མ་དག་པར་འཛིན་ཏོ། །དེ་ལ་བཤད་པར་བྱ་སྟེ། འདི་ལྟར་ཉན་ཐོས་ཀྱི་
སྡོམ་པ་ནི་དངོས་པོར་བལྟ་བའི་རྣམ་པར་རིག་པ་ཅན་གྱིས་བསྐྱེད་པ་གཟུགས་ཅན་གྱི་སྡོམ་པ་སྟེ། དཔེར་ན་སྲོག་གཅོད་པའི་དུས་ཉིད་ན་འདུ་ཤེས་རང་རྒྱུད་པ་རྣལ་དུ་གནས་པ་ཉིད་ཀྱིས་ཞེ་སྡང་ལས་གྱུར་པའི་ཉོན་མོངས་པ་ཉམས་སུ་མྱོང་། དེའི་ངང་གསོད་པའི་བསམ་པ་དང་བཅས་པས་སྦྱོར་བ་དང་དུ་བླངས། མཐར་ཐུག་ཕ་རོལ་པོའི་སྲོག་འགགས་པར་བྱས་པས་སྲོག་གཅོད་ཀྱི་ཕམ་པའི་ཡན་ལག་རྫོགས་པས་སྡོམ་པའི་རྩ་བ་ཞིག་པ་ཡིན་ལ། བྱང་ཆུབ་སེམས་དཔའི་སྡོམ་པའི་གནས་སྐབས་སུ་ནི་ཕ་རོལ་ལ་གནོད་པའི་སེམས་ལས་ལོག་གི་སྟེང་དུ་ཐབས་གཙོ་བོར་གྱུར་པ་སྙིང་རྗེ་ཆེན་པོའི་དབང་གིས་ཕན་འདོགས་པ་ལ་ཞུགས་པས་ཡན་ལག་དེ་ལྟ་བུ་ཚང་བའི་སྡིག་ཏོ་མི་དགེ་བ་ལས་འདས་པ་ཡིན་ནོ། །སྔགས་ཀྱི་གནས་སྐབས་སུ་ནི། ཐབས་ཀྱི་ཆ་ནས་སྙིང་རྗེ་ཆེན་པོའི་བློས་བསྐྱེད་ཅིང་། ཤེས་རབ་ཀྱི་ཆ་ནས་དངོས་པོར་བལྟ་བ་དང་བྲལ་ཏེ་མཚན་མར་ཞེན་པའི་ལོག་རྟོག་ལས་འདས་པས་སྲོག་གཅོད་ཀྱི་ཡན་ལག་མི་རྫོགས་པའི་ཚུལ་སྒྱུ་འཕྲུལ་ལས། ཡོད་མེད་དབུ་མར་མི་དམིགས་ཤིང་། ཞེས་པས་དོན་དམ་པའི་དབང་དུ་གྱུར་པ་ཡིན་ལ། སྒྱུ་མ་མིག་ཡོར་ལྟ་བུའི་ཚུལ། ཞེས་པས་ཀུན་རྫོབ་ཀྱི་བདེན་པ་བསྟན་ལ། སྲོག་མེད་སྲོག་ཀྱང་གཅད་དུ་མེད། ཅེས་པས་རང་གི་ངོ་བོས་མ་གྲུབ་པ་དང་། དེ་ལྟར་མ་གྲུབ་པས་ལས་ཀྱང་རྫུན་པ་དང་། བཞི་མ་གྲུབ་པར་བསྟན་ལ། སྲོག་དང་སྐྱེས་བུ་ལོག་རྟོག་ཙམ། ཞེས་པས་བྱེད་པ་པོ་དང་ལས་གཉིས་ཀ་ཡང་འཁྲུལ་སྣང་ལས་གྲུབ་པའི་ལོག་པར་རྟོག་པ་ཙམ་དུ་སྣང་བས་རང་བཞིན་མེད་པར་བསྟན་པ་སྟེ། དེ་བཞིན་དུ་མ་བྱིན་བླང་
བ་ལའང་བདག་དང་གཞན་གྱི་རྒྱུད་གཉིས་སུ་མེད་པར་རྟོགས་ན། དེས་མ་བྱིན་པ་ཡང་མི་དམིགས། དེ་ལས་བླང་པའང་མི་དམིགས་པ་སྟེ། དཔེར་ན་འཕྲུལ་དགའི་ལྷ་རྣམས་རང་གིས་སྤྲུལ་པའི་ལོངས་སྤྱོད་ལ་རང་གི་སྤྱོད་པས་གནས་དེ་ན་མ་བྱིན་པར་ལེན་པའི་ཉེས་པ་མེད་པ་བཞིན་ནོ། །དེས་མཚོན་ནས་ཚངས་སྤྱོད་ལ་གནས་པའི་དགེ་སློང་གིས་ནུས་པ་ཡོད་བཞིན་དུ་དབང་པོའི་སྒོ་བསྡམ་པས་ཉེས་སྤྱོད་ཀྱིས་མ་གོས་པ་དང་། དབང་གསུམ་པའི་ལམ་ཉམས་སུ་མྱོང་བའི་རིག་པ་འཛིན་པས་བདག་ལ་ཕོ་དང་གཞན་ལ་མོར་འཛིན་གྱི་ལོག་པའི་དངོས་ཞེན་ལས་འདས་ཤིང་། ཡུལ་སེམས་གཉིས་སུ་མེད་པའི་ཡེ་ཤེས་ལ་མངའ་དབང་ཆུབ་པའི་ལྟ་བ་དང་། འདུ་ཤེས་གསུམ་ལྡན་གྱི་བསྒོམ་པ་དང་། ཐབས་ཀྱིས་ཟིན་པའི་སྤྱོད་པ་གསུམ་དུ་ཚོགས་པའི་སྒོ་ནས་ཁམས་འཛག་མེད་དུ་འཆིང་ཞིང་། ཆགས་རྟོག་ཐ་མལ་པའི་དྲི་མ་མེད་པས་སྤང་གཉེན་རོ་གཅིག་པའི་ཡེ་ཤེས་ཀྱིས་དགག་དགོས་གནད་གཅིག་པར་འགྱུར་པའང་། པདྨ་ཅོད་པན་ལས། དབང་གསུམ་བགྲོད་པའི་རྣལ་འབྱོར་པ། །དེ་ནི་དགེ་སློང་ཆེན་པོར་གསུངས། །དེ་ཡིས་ཐམས་ཅད་བྱ་བ་ཉིད། །ཅེས་སོ། །ཁྱད་པར་དབང་གསུམ་པའི་ལམ་ནི་གང་དུ་བགྲོད་བྱའི་ལུས་ཕྱག་རྒྱ་ཆེན་པོར་བྱིན་གྱིས་བརླབས་པས་ཇི་ལྟ་བ་བཞིན་མཐོང་བའི་ཉེས་པ་མེད་ཀྱི་སྟེང་། མཁའ་དབྱིངས་སུ་རྡོ་རྗེ་བཅིང་པ་དམ་ཚིག་གི་ཕྱག་རྒྱར་བྱིན་གྱིས་བརླབས་པས་རེག་བྱའི་ལུས་ཚང་ཞིང་ཉམས་པ་མེད་པའི་ཡན་ལག་དང་ལྡན་པ་ཡང་མ་ཡིན་ནོ། །དེ་ཡང་ཐབས་དང་ཤེས་རབ་
གཉིས་སུ་མེད་པའི་རང་བཞིན་ཆོས་ཀྱི་ཕྱག་རྒྱར་རྟོགས་པ་ལས་མཚན་ནོར་བུ་འདས་པ་ཞེས་བྱ་བའི་ཡན་ལག་དང་ལྡན་པར་ལྟ་ག་ལ་ཞིག །འདི་ལྟར་དུས་གསུམ་གྱི་འཕགས་པ་ཐམས་ཅད་ཐབས་ཤེས་གཉིས་སུ་མེད་པའི་བྱང་ཆུབ་ཀྱི་སེམས་ཕྱག་རྒྱ་ཆེན་པོའི་ངང་ན་རྟག་པ་རྒྱུན་གྱི་འཁོར་ལོར་མི་གནས་པ་མེད་པས་དབང་གསུམ་པའི་ཐབས་དེའི་ཡན་ལག་རྫོགས་ནས་བཞི་པའི་དོན་གྱི་ཡེ་ཤེས་མཐོང་བའི་ཚེ་ཞུ་བདེ་ཉམས་སུ་མྱོང་བ་ཞེས་བྱ་བའི་ཡན་ལག་དང་ལྡན་པ་མ་ཡིན་ནོ། །དེ་སྐད་དུ་ས་ར་ཧས་ཐབས་ཀྱི་རྒྱལ་སྲིད་ཀུན་ལ་དབང་བསྒྱུར་བའི། །སེམས་ཉིད་དེ་ནི་གྲུབ་པའི་རྣལ་འབྱོར་མ། །ལྷན་ཅིག་སྐྱེས་པའི་སྡོམ་པར་ཤེས་པར་བྱ། །ཞེས་སོ། །དེ་བཞིན་དུ། རྫུན་དུ་སྨྲ་བ་ལའང་དབང་པོ་དྲུག་གི་སྤྱོད་ཡུལ་དུ་སྣང་ཚོད་ལྟར་གནས་པའི་ཆོས་རྣམས་ནི། དོན་ལ་དེ་བཞིན་དུ་ཡོད་པ་མ་ཡིན་པས་གདོད་མ་ནས་རྫུན་པའི་རང་བཞིན་ཅན་ནོ། །དེ་ལྟ་བས་ན་བརྗོད་པའི་ཡུལ་དང་། རྗོད་བྱེད་ཀྱི་ཤེས་བྱ་རྣམས་ཀྱང་རྫུན་པའི་ཆོས་ཉིད་དུ་གཅིག་ན། རི་བོང་གི་རྭ་ལ་རྣོ་རྟུལ་བརྗོད་པ་བཞིན་དུ་རྗོད་བྱེད་ཙམ་དུའང་མི་རུང་བས་དེ་ལ་ལྟོས་པའི་རྫུན་ཀྱང་བླ་དྭགས་སུ་བཏགས་པ་ཙམ་ཡིན་པའི་ཚུལ། ཆོས་ཀུན་སྒྱུ་མ་ལྟ་བུ་དང་། །མིང་དང་ཚིག་ཏུ་བཏགས་པ་རྫུན། །རྫུན་ཉིད་ལ་ནི་རྫུན་སྤྱོད་པ། །རྫུན་ཞེས་བཏགས་པའང་ཡོད་མ་ཡིན། །ཞེས་སོ། །དེས་མཚོན་ནས་རྡོ་རྗེ་ཐེག་པའི་དམ་ཚིག་གི་གནས་གང་ཡིན་ཡང་འདོད་པའི་ཕྱོགས་ལ་གདུང་ཞིང་ཡིད་དུ་མི་འོང་བ་འདོར་བ་ལྟ་བུའི་རང་ཉམས་ཀྱིས་མ་ཡིན་པར་སྤྱོད་པ་དུས་ཚོད་དང་འབྲེལ་བའི་གནང་བཀག་དང་མི་འགལ་བ་རྣམས་ལ་ཐེག་པ་འོག་མ་ནས་བཀག་པའི་ལུས་ངག་གི་མི་དགེ་བ་བདུན་
རྣམ་སྣང་མངོན་བྱང་ལ་སོགས་པའི་རྒྱུད་ནས་གནང་བ་ལྟར་འོག་མ་དང་འགལ་བ་མི་འདུ་བའི་སྟེང་བསོད་ནམས་ཀྱི་ཚོགས་སུ་འགྱུར་བའི་ཚུལ་ཡང་སྒྱུ་འཕྲུལ་ལས། བླ་མེད་ཐེག་པར་རབ་ངེས་ན། །ཉོན་མོངས་དུག་ལྔ་ཀུན་སྤྱད་ཀྱང་། །བྱས་ལ་མིག་སོག་ཚོགས་འགྱུར་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །ཞེས་སོ། །དེའི་ཚུལ་ཡང་བྱང་ཆུབ་ཀྱི་སེམས་བརྟན་པའི་རྒྱུ་ལས་ཤེས་རབ་རྣམ་པར་དག་པ་སྟེ་ཡིད་དཔྱོད་ལས་འདས་པའི་སྟོང་པ་ཉིད་ཀྱི་ལྟ་བ་ཟ་མོའི་དབང་དུ་གྱུར་པའི་དུས་ན་འབྲས་བུའི་ཚུལ་ཁྲིམས་རྣམ་པར་དག་པའི་གཤིས་སུ་འོག་མའི་སྡོམ་པ་རྣམས་གནས་གྱུར་པ་སྟེ་འཕགས་པ་ཆོས་ཐམས་ཅད་འབྱུང་བ་མེད་པར་བསྟན་པ་ལས་སུ་ཞིག་ཚུལ་ཁྲིམས་རྣམ་རྟོག་དེ་ལ་ནི། །ཚུལ་ཁྲིམས་མེད་དོ་མཐོང་ན་ཚུལ་ཁྲིམས་ཡིན། །ཚུལ་ཁྲིམས་འཆལ་དང་ཚུལ་ཁྲིམས་མཚན་ཉིད་གཅིག །དེ་ལྟར་ཤེས་ན་དེ་ནི་མགོན་པོར་འགྱུར། །ཚུལ་ཁྲིམས་འཆལ་དང་ཚུལ་ཁྲིམས་བྱས་པ་རྣམས། །རྨོངས་པས་ཡང་དག་མ་ཡིན་ཡོངས་སུ་བརྟགས། །དེ་ལ་ཚུལ་ཁྲིམས་འཆལ་མེད་ཚུལ་ཁྲིམས་མེད། །དེ་ལྟར་ཤེས་ན་དེ་ནི་མགོན་པོར་འགྱུར། །ཞེས་པ་ལྟར་སྡོམ་པའི་ཕན་ཡོན་ལ་བརྟེན་ནས་བླང་བ་དང་། ཉམས་པའི་ཉེས་དམིགས་ལ་འཇིགས་ནས་བསྲུང་བ་དང་། དག་པའི་འབྲས་བུ་ལ་བྲོད་ནས་གོང་ནས་གོང་དུ་སྤེལ་བ་ལ་སོགས་མཐའ་དག་བློས་བཏགས་ཤིང་འདུ་ཤེས་ལ་བརྟེན་པ་ཁོ་ན་ཡིན་ཏེ་ལང་ཀར་གཤེགས་པ་ལས། ཇི་སྲིད་སེམས་ནི་འཇུག་གི་བར། །དེ་སྲིད་འཇིག་རྟེན་རྒྱང་འཕེན་པ། །ཞེས་པ་ལྟར་འདུ་ཤེས་ནི་འཁོར་བའི་རང་བཞིན་འདུས་བྱས་ཀུན་རྫོབ་པ་ཡིན་པས་སྔགས་སུ་ལྷའི་རྣལ་འབྱོར་ལ་བརྟེན་ནས་གནས་དག་པར་བྱེད་
པ་ལམ་མྱུར་ཏེ་དག་པའི་འབྲས་བུ་ནི་བཅོམ་ལྡན་འདས་འདུ་ཤེས་ཀྱི་རྒྱལ་པོ་འདི་སྣང་མཐའ་ཡས་པ་ཉིད་ཡིན་ནོ། །དེ་ཉིད་ཀྱང་ཆོས་ཀྱི་སྐུ་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་ཡེ་ཤེས་ཆེན་པོར་གནས་པའི་ཚུལ། བླང་པོ་དང་མཚུངས་པའི་མདོ་ལས། ཚུལ་ཁྲིམས་ཅན་དུ་གང་རྟོག་དང་། །ཚུལ་ཁྲིམས་ལོག་པར་རྟོག་པ་ཡང་། །གཉིས་ཀ་ཚུལ་ཁྲིམས་ལོག་པར་བཤད། །གཉིས་མེད་ཚུལ་ཁྲིམས་མ་ལོག་པའོ། །ཞེས་སོ། །དེ་ཡང་སྔགས་ཀྱི་བརྟུལ་ཞུགས་ལས་ཐབས་དང་ཤེས་རབ་ཆེན་པོའི་ཡང་ཆེན་པོས་ཟིན་པའི་ཚེ་ན་དགག་དགོས་གནད་གཅིག་པ་དཔེར་ན་འདོད་པའི་ཉེས་དམིགས་ལ་མཚོན་ན་རྒྱུད་ལས། འདོད་ཆགས་མེ་ཡིས་འཚིག་པ་ལ། །འདོད་ཆགས་ཉིད་ཀྱིས་གྲོལ་བར་འགྱུར། །ཞེས་དང་། ཁྱད་པར་གཤིས་ཀྱི་བཞུགས་ཚུལ་མངོན་དུ་གྱུར་པའི་ཚེ་བཅས་པའི་ལྟུང་བ་ནི་ཆོས་ཅན་ཀུན་རྫོབ་བདེན་པའི་ངོ་བོ་གསོག་དང་། གསོ་བ་དང་། རྨི་ལམ་ལྟ་བུ་ཡ་མ་བརླའི་རང་བཞིན་སྐྱེ་འཇིག་དང་བཅས་པས་རང་མཚན་འཛིན་པར་མི་ནུས་པས་ཆོས་ཀྱི་དབྱིངས་དགེ་སྡིག་བླང་དོར་ལས་འདས་པའི་དང་དུ་ཐོབ་ཤོར་མེད་པའི་ཚུལ་གྱིས་གནས་གྱུར་པ་ཡིན་ཏེ། འབུམ་ཕྲག་ལྔ་པའི་རྒྱུད་ལས། རྡོ་ཡི་རིགས་ཀྱི་བྱེ་བྲག་ཞིག །བཞུ་བས་ལྕགས་དང་ནངས་དངུལ་འབྱུང་། །གསེར་འགྱུར་རྩི་ཡི་དངོས་པོ་ཡིས། །ཀུན་ཀྱང་གསེར་དུ་བསྒྱུར་བར་བྱེད། །དེ་བཞིན་སེམས་ཀྱི་བྱེ་བྲག་གིས་རིགས་ཅན་གསུམ་གྱི་སྡོམ་པ་ཡང་། །དཀྱིལ་འཁོར་ཆེན་པོ་འདིར་ཞུགས་ན། །རྡོ་རྗེ་འཛིན་པ་ཞེས་བྱའོ། །ཞེས་པས་གསལ་ལོ། །ད་ལྟ་ན་རིགས་ཅན་གསུམ་གྱི་སྡོམ་པ་ཡང་སྔགས་ཀྱི་དཀྱིལ་འཁོར་ཆེན་པོར་ཞུགས་པ་ཙམ་གྱིས་དངོས་པོ་གནས་གྱུར་
བ་ལྟ་བུར་འདོད་པས་སྡོམ་པ་འོག་མ་གཉིས་སྔགས་སུ་རྫས་གཅིག་པར་ཁས་བླངས་སོ་སྙམ་ན། སྤྱིར་སྔགས་ཀྱིས་བཏབ་པའི་ས་བོན་ཉི་མ་གཅིག་ལ་ལོ་ཐོག་ཏུ་སྨིན་པ་ལྟར་རྡོ་རྗེ་ཐེག་པའི་ལམ་ནི་ཐབས་ཁྱད་པར་ཅན་དང་ལྡན་པས་དབང་པོ་རྣོན་པོའི་དབང་དུ་གྱུར་ན་རྒྱལ་པོ་ཨིནྡྲ་བྷཱུ་ཏི་སྔགས་ཀྱི་དཀྱིལ་འཁོར་དུ་སྡོམ་གསུམ་ཚིག་རྫོགས་སུ་གྱུར་ཅིང་མཐོང་ལམ་སྐྱེས་པ་ལྟར་དབང་དུ་མཉམ་པ་ཆེན་པོའི་ཤེས་རབ་མཐོང་བའི་རིགས་ཅན་ལ་དེ་ལྟར་ཡིན་ཏེ། དེས་རྟགས་དང་ཆོ་ག་བྱ་མི་དགོས་པའང་དཔུང་བཟང་ལས། སྔགས་པ་ཁྱིམ་པས་རྟགས་དང་ཆོ་ག་སྤང་། ཞེས་བཅས་རྐྱང་རྣམས་བཞག་ནས་འདུལ་བའི་སོ་ཐར་དུ་བསྡུས་པ་གང་ཞིག་གི་སྟེང་དུ་གོང་མ་གཉིས་རྫོགས་པའང་བརྟག་གཉིས་ལས། །སངས་རྒྱས་ཀུན་གྱི་སྡོམ་པ་ནི། །ཨེ་ཝཾ་རྣམ་པར་རབ་ཏུ་གནས། །དབང་ལས་ཡང་དག་ཤེས་པར་འགྱུར། །ཞེས་སོ། །དེ་བས་ན་དེ་བཞིན་གཤེགས་པ་ཐམས་ཅད་ཀྱི་སྡོམ་པའི་མཚན་ཉིད་ཇི་ལྟ་བ་ནི་དབང་གི་དུས་སུ་ཐོབ་པར་གསུངས་པའི་ཕྱིར་རོ། །དེ་ལྟ་མོད་ཀྱི་སྡོམ་པ་གསུམ་ཀ་གང་ཟག་གཅིག་གི་རྒྱུད་ལ་བརྟེན་ཚུལ་དང་མཐར་གྱི་ཇི་ལྟར་གནས་གྱུར་མི་གྱུར་ནི་སོ་སོའི་རྒྱུད་ཀྱི་རྟོགས་གོམས་དང་ཤེས་རབ་ཀྱི་རྗེས་སུ་སོན་པར་འགྱུར་བས་ན་ལྡོག་པ་དུ་མས་དབྱེ་བའི་ཚུལ་འོད་ཕྲེང་ལས། གཞན་ཡང་ཁ་ཅིག་སྡོམ་པ་གསུམ། །ས་ཆུ་གྲུ་འདྲ་གཞི་རྟེན་དུ། །འདོད་ཅེས་སྒྲོག་པ་འཁྲུལ་གནས་ཡིན། །བདག་ཉིད་ཆེན་པོ་རྟ་དབྱངས་དང་། །སློབ་དཔོན་སྒེག་པའི་རྡོ་རྗེ་སོགས། །དོན་འདི་ལྡོག་པ་དུ་མས་འབྱེད། །ཅེས་སོ། །དེའང་
དབང་རྣོན་སྔགས་སྡོམ་ནས་གཅིག་ཆར་དུ་འཇུག་པ་དང་། དབང་འབྲིང་བྱང་སྡོམ་ནས་འཇུག་པ་དང་། རྟུལ་པོ་རིམ་འཇུག་གི་ཁྱད་པར་བཤད་པ་ལས། ཕྱི་མའི་དབང་དུ་ན། བརྟག་གཉིས་ལས། སྐལ་མེད་སེམས་ཅན་གདུལ་དཀའ་བ། །གང་གིས་འདུལ་བར་འགྱུར་པ་ལགས། །བཅོམ་ལྡན་འདས་ཀྱིས་བཀའ་སྩལ་པ། །དང་པོར་གསོ་སྦྱོང་སྦྱིན་པར་བྱ། །ཞེས་ཐོག་མ་ནས་སྔགས་ཀྱི་སྣོད་ལྡན་མ་ཡིན་པའམ། མོས་པས་སྤྱོད་ལ་རིམ་གྱིས་བཀྲི་བ་ཕལ་མོ་ཆེ་ནི་དངོས་པོར་བལྟ་བ་ལས་མ་ལོག་ཅིང་རྣམ་རིག་གི་གཞན་དབང་དུ་གྱུར་པའི་ཕྱིར་དབང་བསྐུར་ཐོབ་པ་ཙམ་གྱིས་སྡོམ་རྫས་འོག་མ་གཉིས་སྔགས་སུ་གནས་གྱུར་པ་མི་སྲིད་དོ། །གལ་ཏེ་དབང་བསྐུར་ཐོབ་པའི་དུས་ན་དཔེའི་ཡེ་ཤེས་ལ་བརྟེན་པའི་མཐོང་ལམ་སྐྱེས་ཀྱང་། དེ་ནི་ཆོས་མཆོག་ཐོབ་པའི་རྗེས་མཐོང་ལམ་དངོས་བསྟན་མ་ཡིན་པས་སྐད་ཅིག་དང་པོ་ལ་སྐྱེས་ཀྱང་གཉིས་པ་ལ་འགགས་པ་མང་བས་གནས་གྱུར་པའི་ཚུལ་ཡང་དེའི་རྗེས་སུ་འབྲང་བ་ཡིན་ནོ། །དོན་འདི་ཉིད་ཁོང་དུ་མ་ཆུད་པ་དག་གསང་བ་སྤྱོད་པའི་རྒྱུད་ལས། དཔེར་ན་རྡོ་ལས་ཟངས་སུ་འགྱུར་ཟངས་ལས་གསེར་གྱི་རྣམ་པ་སྟེ། །ཟངས་ཀྱི་དུས་ན་རྔོ་མེད་ཅིང་། །གསེར་དུ་གྱུར་པས་ཟངས་མི་སྣང་། །རིག་འཛིན་ནང་གི་དགེ་སློང་ལ། །སོ་སོ་ཐར་དང་བྱང་ཆུབ་སེམས། །གཉིས་པོ་གནས་པ་ཉིད་དུ་ནི། །སངས་རྒྱས་ཉིད་ཀྱིས་མ་གསུངས་སོ། །ཞེས་པའི་ལུང་གི་དབྱིངས་འཇལ་བ་ལ་རྨོངས་པར་གྱུར་ནས་སྔགས་སྡོམ་གྱི་དུས་སོ་བྱང་གཉིས་མེད་པར་འགྱུར་བའི་ལུང་དུ་འཁྲུལ་ནས། དེའི་མཚུངས་དཔེར་སྡོམ་པ་གསུམ་ཆུ་ལ་ཆུ་བཞག་གི་རིག་པ་བསྒྲེ་ཡང་། ཆུ་ནི་དང་པོ་ནས་དངོས་རྫས་གཅིག་པ་ཡིན་ལ།
འབུམ་སྤྱོད་གཉིས་ཀྱི་ལུང་ནི་རྫས་ལྡོག་རྣམ་པ་ཐ་དད་པས་རང་གི་ངོ་བོ་ཉིད་དུ་མི་རུང་བ་བཞུ་བཏུལ་གྱིས་རུང་བར་བྱེད་པའི་དཔེས་ཐེག་པ་ཆེ་ཆུང་གི་བློ་ངོར་དངོས་པོར་འཛིན་པ་དང་། ཐབས་ལ་མི་མཁས་པ་དང་། ཀུན་ཏུ་རྟོག་པ་ཅན་གྱི་སེམས་ཐབས་དང་། ཤེས་རབ་དང་། ཆོས་མཉམ་པ་ཆེན་པོའི་བརྟུལ་ཞུགས་ཀྱིས་གནས་གྱུར་པའི་ཚུལ་མགོ་བའི་རྣམ་འགྱུར་དུ་གསལ་བས། སྡོམ་གསུམ་གནས་གྱུར་ངོ་བོ་གཅིག་ལ་ལྡོག་པ་ཐ་དད་དུ་བཞེད་པའི་མཁས་པ་ཆེན་པོ་ཆོས་ཉིད་ཀྱི་བདེན་པ་གཟིགས་པ་རྣམས་ཀྱི་གཞུང་ལ་སྐབས་འཚོལ་བར་མི་བྱའོ། །གལ་ཏེ་ཆོས་མཉམ་པ་ཆེན་པོའི་བརྟུལ་ཞུགས་ལས་འདུས་བྱས་ཀྱི་ཚུལ་ཁྲིམས་དང་སྡོམ་པའི་ངོ་བོ་གནས་གྱུར་པའི་ཚུལ་གྱིས་རྣམ་པར་དག་པ་མཐར་ཐུག་གི་གནས་སྐབས་སུ་ཡང་ཁས་མི་ལེན་ན། དབུ་མ་རྒྱན་ལས། ཚུལ་ཁྲིམས་ཀྱིས་ནི་བདེ་འགྲོར་འགྲོ། །ལྟ་བས་གོ་འཕང་མཆོག་ཏུ་བྱེད། །ཚུལ་ཁྲིམས་ལས་ནི་ཉམས་སླ་ཡི། །ལྟ་ལས་དེ་ལྟ་མ་ཡིན་ནོ། །ཞེས་པས་མཐར་གྱིས་ལམ་བདེན་འདུས་བྱས་པ་ཐམས་ཅད་སྟོང་པ་ཉིད་ཀྱིས་རྗེས་སུ་མི་སོན་པ་གང་ཡང་མེད་ཅིང་། དེའི་ཚུལ་ཁྲིམས་ཀྱང་སློབ་དཔོན་འཕགས་པ་ཉིད་ཀྱིས། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བ་ཡིན། །གང་ལ་སྟོང་ཉིད་མི་རུང་བ། །དེ་ལ་ཐམས་ཅད་རུང་མ་ཡིན། །ཞེས་པ་དང་འགལ་ཞིང་། ཉེ་བར་ལེན་པའི་ཕུང་པོ་ལྔ་དང་། འདུས་བྱས་ཀྱི་རང་བཞིན་རྣམ་པར་ཤེས་པའི་ཚོགས་བརྒྱད་པོའི་རུམ་དུ་སྡོམ་གསུམ་རྫས་ཐ་དད་པ་ཁོ་ནར་བཞུགས་པས་ལོངས་
སྤྱོད་རྫོགས་པའི་སྐུ་རྣམས་དང་། ཉེ་བའི་སྲས་བརྒྱད་ལ་སོགས་པ་རྣམས་དང་། རྣལ་འབྱོར་གྱི་དབང་ཕྱུག་ཆེན་པོ་ས་ར་ཧ་དང་། པདྨ་དང་། ཤ་ཝ་རི་པ་ལ་སོགས་པའི་གྲུབ་ཆེན་རྣམས་ཀྱང་དགེ་སློང་གི་བརྟུལ་ཞུགས་བོར་བས་སྡིག་ཅན་དུ་འགྱུར་ཞིང་། སྤྱི་དང་བྱེ་བྲག་གི་ལྟུང་བ་ཉམས་སུ་མྱོང་བ་ཉིད་དུ་ཐལ་བར་འགྱུར་ཏེ། ས་ར་ཧས། ཀྱེ་ལགས་ང་ནི་བྲམ་ཟེ་སྟེ། །སྨྱིག་མཁན་མོ་དང་ལྷན་ཅིག་སྤྱོད། །ཅེས་དང་། ཁ་སང་ཕན་ཆད་དགེ་སློང་མིན། །དེ་རིང་ཚུན་ཆད་དགེ་སློང་ཡིན། །ཧེ་རུ་ཀ་དཔལ་དགེ་སློང་མཆོག །ཅེས་གསུངས་པའི་རྗེས་ལ་ཀླུ་སྒྲུབ་ཀྱི་མཁན་པོ་མཛད་པའི་ཕྱིར་རོ། །དེ་སྐད་དུ་འཕགས་པ་སྡུད་པ་ལས། གལ་ཏེ་བྱང་ཆུབ་སེམས་དཔའ་རྒྱལ་བའི་ལམ་སྤྱོད་པ། །སེམས་ཅན་འདི་དག་ཁྲིམས་ལྡན་འདི་དག་ཁྲིམས་འཆལ་ཞེས། །སྣ་ཚོགས་འདུ་ཤེས་ཞུགས་པ་ཤིན་ཏུ་ཚུལ་ཁྲིམས་འཆལ། །ཚུལ་ཁྲིམས་ཉམས་ཤིང་དེ་ལ་ཡང་དག་ཚུལ་ཁྲིམས་མེད། གང་ལ་བདག་གི་འདུ་ཤེས་སེམས་ཅན་འདུ་ཤེས་མེད། །འདུ་ཤེས་འདོད་ཆགས་བྲལ་ལ་སྡོམ་མིན་ག་ལ་ཡོད། །གང་ལ་སྡོམ་དང་སྡོམ་པ་མ་ཡིན་རློམ་སེམས་མེད། །འདི་ནི་ཚུལ་ཁྲིམས་སྡོམ་པར་རྣམ་པར་འདྲེན་པས་གསུངས། །ཞེས་སོ། །དེ་ལྟ་མོད་ཀྱི་འདུས་མ་བྱས་པའི་ཚུལ་ཁྲིམས་བླ་ན་མེད་པ་གང་ཞིག་ནི་འཕགས་པའི་བདེན་པ་མཐོང་བའི་རྣལ་འབྱོར་གྱི་དབང་ཕྱུག་ཆེན་པོ་རྣམས་ལ་རང་བཞིན་གྱིས་འབྱུང་བའི་སྤྱོད་ཡུལ་ལས་སོ་སོ་སྐྱེ་བོའི་རང་ཉམས་ཀྱི་གོ་བས་དཔགས་པའི་རྗེས་སུ་མི་འཇུག་པའི་ཕྱིར་ན་མོས་པས་སྤྱོད་པའི་ལམ་དུ་དགོངས་པ་ལུང་སྟོན་གྱི་ཕྱོགས་ཁོ་ན་ལ་གུས་པར་བྱས་ནས། འདུས་བྱས་ཀྱི་
ཚུལ་ཁྲིམས་ལ་ཐབས་དང་ཤེས་རབ་ཀྱིས་ཡོངས་སུ་ཟིན་པས་སྤྱད་པར་བྱ་ལ། གལ་ཏེ་དེ་གཉིས་དང་མི་ལྡན་པའི་རང་བཞིན་གྱིས་ཉོན་མོངས་པ་ཅན་ནི་སླར་གསོར་མི་རུང་བས་ན། མདོར་ན་གབ་པའི་གསང་བ་མ་རྟོགས་པ། །སྦས་པའི་གསང་བར་མངོན་འཆེལ་ཀུན་ལ་གཟུང་། ཞེས་འདོམས་པའོ། །དེ་ལྟར་རྡོ་རྗེ་ཐེག་པའི་ལམ་ལ་གནང་བཀག་ཚུལ་བཞིན་དུ་ཤེས་པར་སྤྱད་ན་ལམ་གཞན་ལས་ཁྱད་དུ་འཕགས་ཤིང་མྱུར་བའི་ཚུལ། ཉིན་བཞིན་བྲམ་ཟེ་གསོད་དང་མཚམས་མེད་སྤྱོད། །སྔགས་སྡོམ་སྐྱེ་བའི་རྟེན་དུ་རུང་བས་ན། །གསང་སྔགས་ཐབས་ཀྱིས་ཆེ་བ་སྨོས་ཅི་དགོས། །དེ་ལ་ཐེག་པ་གཞན་གྱིས་སྤངས་པའི་གདུལ་བྱ་མཚམས་མེད་ལ་སོགས་པའི་ལས་དང་ལྡན་པ་ཞིག་ཡིན་དུ་ཟིན་ཀྱང་སྔགས་སྡོམ་སྐྱེ་བའི་རྟེན་དུ་རུང་ཞིང་། ཇི་སྲིད་འགྱོད་པ་དང་བཅས་ཤིང་ལས་ངན་པ་དེ་ལས་ལྡོག་པའི་ཕྱི་ནས་ལམ་སྟོན་གྱི་བླ་མ་མཚན་ཉིད་དང་ལྡན་པ་གཅིག་ལ་སངས་རྒྱས་སུ་བལྟས་ནས་དེའི་བཀའ་བཞིན་བསྒྲུབ་པ་ལས་གཞན་དུ་མ་གཡོས་ན་བླ་མ་ཉིད་ལས་ཀྱང་ཕ་རོལ་ཏུ་ཕྱིན་བ་མན་ཆད་དུ་འབྱུང་མི་ཤེས་པའི་སངས་རྒྱས་ཀྱི་བྱིན་རླབས་སྔགས་ཀྱི་གནས་སྐབས་སུ་འབྱུང་བ་དང་། དམ་ཚིག་གི་ཆ་རེ་རེ་ལ་གུས་པར་བལྟས་ཤིང་དང་དུ་བླངས་པ་ལས་ཀྱང་སྒྲིབ་པ་དཔག་ཏུ་མེད་པ་འཛད་ཅིང་ཚོགས་ཆེན་པོ་རྫོགས་པ་དང་། ཐབས་ཟབ་ལ་རྣམ་གྲངས་མང་བ་ཡོད་པས་དབང་པོ་རྣོན་པོའི་དབང་དུ་གྱུར་ཏེ། ཚེ་གཅིག་ལ་གྲོལ་བའི་འཐད་པ་ཡང་གདན་གཞི་ལས། ཉིན་བཞིན་བྲམ་ཟེ་གསོད་བ་དང་། །མཚམས་མེད་ལྔ་ནི་བྱེད་པ་དང་། །ཆོམ་རྐུན་ལས་ཀྱིས་ལོངས་སྤྱོད་པ། །འདི་ཡི་ལམ་གྱིས་གྲོལ་འགྱུར་ཏེ། །སྡིག་པས་གོས་པར་མི་འགྱུར་རོ། །ཞེས་
དང་། །དམ་པ་དང་པོ་ལས། །གོང་ལ་སྨྱིག་མ་མཁན་སོགས་དང་། །མཚམས་མེད་ལྔ་ནི་བྱེད་པ་རྣམས། །སྔགས་ཀྱི་སྤྱོད་པ་རྗེས་སྤྱད་ན། །ཚེ་འདི་ཉིད་ལ་སངས་རྒྱས་འགྱུར། །ཞེས་སོ། །དེ་ལྟ་ནའང་བླ་མ་སྨོད་པས་ནི་འགྲུབ་པ་མ་ཡིན་ཏེ། འདུས་པ་ལས། །སེམས་ཅན་མཚམས་མེད་པ་སོགས་པའི། །སྡིག་པ་ཆེན་པོ་བྱེད་པ་ཡང་། །རྡོ་རྗེ་ཐེག་པ་རྒྱ་མཚོ་དང་། །ཐེག་པ་མཆོག་ནི་འདི་ལ་འགྲུབ། །སྙིང་ནས་སློབ་དཔོན་སྨོད་པ་དག །བསྒྲུབས་ཀྱང་འགྲུབ་པར་ཡོང་མི་འགྱུར། །ཞེས་སོ། །དེ་བས་ན་ལྟུང་མཚམས་མེ་ཤེས་བླ་མར་མི་གུས་དང་། །བག་མེད་ལ་གོམས་ཉོན་མོངས་མཐུ་ཆེ་ཞིང་། །ལྟུང་བ་འབྱུང་པའི་སྒོ་བཞི་དེའི་སྟེང་དུ། །བརྗོད་པས་ཆེ་དང་དྲན་པ་མི་གསལ་བ། །བསྣན་པ་དམ་ཚིག་ཉམས་པའི་རྒྱུ་དྲུག་ཡིན། །དེ་བས་དྲན་དང་ཤེས་བཞིན་གཉེན་པོ་ཡི། །ལོང་བ་དབྱེ་བའི་གནས་སྐབས་ཐོབ་པའི་བག །བསྲུང་བ་ཇི་བཞིན་ཉིན་མཚན་ཐུན་དྲུག་ཏུ། །སྤང་བླང་གནས་ལ་བསྒྲིམས་ཤིང་བསྒྲིམས་ཤིང་དཔྱད། །དེ་ལ་དམ་ཚིག་ཡལ་བར་འདོར་འདོད་མ་ཡིན་པས་མི་ཆོག་སྟེ་ལྟུང་བ་སོ་སོའི་བླང་དོར་གྱི་མཚམས་མི་ཤེས་པ་ལྟུང་བ་འབྱུང་བའི་སྒོ་དང་པོ་ཡིན་ལ། དེ་ལྟར་ཤེས་ཀྱང་བླ་མར་མི་གྲུས་པས་དེས་འདོམས་པའི་གནས་ལ་ཆེ་ཐང་དུ་མི་བྱེད་པ་དང་། གུས་ཀྱང་བག་མེད་པའི་གནས་ལ་དགའ་བས་དེ་ཉིད་འདོད་རྒྱལ་དུ་གཏོང་བ་དང་། གལ་ཏེ་བག་བསྲུང་བའི་བློ་ཅུང་ཟད་ཡོད་ཀྱང་དུག་གསུམ་རང་རྒྱུད་པའི་ཕྱོགས་ལ་གཉེན་པོ་བསྟེན་མེ་ནུས་པས་སེམས་ཟིལ་གྱིས་ནོན་པ་སྟེ་བཞིའི་སྟེང་དུ་བརྗེད་ངས་ཆེ་ལ་དྲན་ཤེས་ཉུང་བ་དང་། དྲན་པ་མི་གསལ་ལ་གྲིམས་ཆ་ལྷོད་པ་གཉིས་བསྣན་པས་དྲུག་ཏུ་འགྱུར་བའི་ཚུལ་མཁའ་འགྲོ་མ་སྡོམ་པའི་རྒྱུད་ལས། མི་ཤེས་པ་དང་བག་མེད་དང་། ཉོན་མོངས་མང་
དང་མི་གུས་དང་། །བརྗེད་ངས་དྲན་པ་མི་གསལ་བ། །འདི་དྲུག་དམ་ཚིག་ཉམས་པའི་རྒྱུ། །ཞེས་སོ། །དེ་བས་ན་དེ་དག་ལས་མི་ཉམས་པར་བསྲུང་བའི་ཚུལ་ཡང་འདི་ལྟར་ལོ་གྲངས་མང་པོར་མིག་གི་དབང་པོ་དང་བྲལ་བའི་ལོང་བ་ཞིག་ནམ་ཞིག་སྨན་པ་མཁས་པའི་ཐུར་དཔྱད་ལས་དབྱེ་བའི་གནས་སྐབས་ཐོབ་ན། དེའི་དཔྱད་ཁ་མ་ཟུམ་བར་དུ་ཉིན་དང་མཚན་མོ་མེད་པར་བག་ཟོན་ཅིང་ཤིན་ཏུ་གྲིམས་པ་བཞིན་དུ་སྔར་བཤད་པའི་ཉིན་མཚན་ཐུན་དྲུག་གི་ཆ་ལ་ཤེས་བཞིན་དང་བཅས་པའི་དྲན་པས་བདག་ཉིད་ནི་ལྟུང་བ་འབའ་ཞིག་གི་སྣོད་དང་ལྡན་པ། ཡོན་ཏན་གྱི་ཆ་ལས་ལྡོག་པ་ཅན་ནོ་སྙམ་པས་ང་རྒྱལ་བཅོམ་སྟེ་བག་མེད་དང་བཅས་པའི་འཁྲུལ་བ་བསྲུང་བའི་ཚུལ་ཡང་། དེ་བས་ང་རྒྱལ་བཅོམ་ནས་ནི། །བདག་ཉིར་མ་འཁྲུལ་ཤེས་པར་བྱ། །ཞེས་པས་བསྟན་པ་བཞིན་ནོ། །དེ་ལྟ་བུའི་བག་ཡོད་ཀྱི་སེམས་དང་ལྡན་པའི་ཚོར་བ་ཉམས་སུ་མྱོང་བ་རྣམས་ནི། ཉམས་ན་གསོ་བའང་འོག་མ་ལས་འཕགས་ཏེ། ཉན་ཐོས་སྡོམ་ཁྲིམས་འཆབ་སེམས་མ་སྐྱེས་ན། །ལན་བདུན་གསོར་ཡོད་འཆབ་བཅས་ལན་གཅིག་ཀྱང་། །གསོ་བའི་ཡུལ་མེད་རྫ་བེའུ་ཆག་པ་བཞིན། །བྱང་སྡོམ་རིན་ཆེན་ཉེར་སྤྱད་ཆག་དང་འདྲ། །གཞན་རྐྱེན་དགེ་བའི་བཤེས་ལ་བསྟེན་ནས་གསོ། །གསང་སྔགས་སྡོམ་པ་རིན་ཆེན་སྣོད་ཞོམ་ལྟར། །རང་སྟོབས་མཐུ་ཡིས་གསོ་རུ་བྱར་ཡོད་པས། །བླ་མ་སྤུན་བརྙེས་འཕྲལ་དུ་མཉེས་བྱས་བསྐང་། །གསུང་གི་ཐ་ཚིག་ཉམས་ན་རྡོ་རྗེ་ཆོས། །བསྒོམས་ལ་སྙིང་པོའམ་ཡིག་བརྒྱ་འབུམ་ཐེར་གདོན། །ཐུགས་ལས་ཉམས་ན་ལོ་གསུམ་སྨྲ་བ་བཅད། །གཅིག་ཏུ་མཉམ་པར་གཞག་
པ་གསོ་བའི་ཐབས། །དེ་ལ་སྤྱིར་ལུས་ངག་གི་གྲོགས་སུ་སེམས་ཀྱི་བརྩམ་པ་སྔོན་དུ་མི་འགྲོ་བ་ནི་གཏི་མུག་སྟུག་པོ་དང་། ཚོར་བ་མ་ཡིན་པས་གཟིར་བ་འགའ་ཙམ་གྱི་གནས་སྐབས་ལས་མེད་པས་ཉེས་པ་ལ་འཆབ་སེམས་སྐྱེས་པ་ནི་མདོ་སྔགས་གཉིས་ཀའི་གནས་སྐབས་སུ་གསོ་བར་དཀའ་བས་ན་ཕུང་པོ་གསུམ་པ་ལས་ཀྱང་མི་འཆབ་བོ། །མི་སྦེད་དོ། །ཞེས་བསྟན་ལ། ཁྱད་པར་སོ་སོ་ཐར་བའི་སྡོམ་པ་ནི་ཡུལ་ལ་དངོས་པོར་བལྟ་བའི་དབང་དང་། ལུས་ངག་གིས་བསྡུས་པའི་གཟུགས་ཅན་གྱི་སྡོམ་པ་ཡིན་པས་རྫ་གྱོ་མོ་ཆག་པ་དང་འདྲ་བར་འགྱུར་ཏེ། གལ་ཏེ་འཆབ་བཅས་གསོར་ཡོད་པའང་དགེ་འདུན་ལྷག་མའི་གནས་ལ་ཞུགས་པས་དེའི་སྡོམ་པ་ནི་མེད་པ་དང་འདྲའོ་ཞེས་སྔར་བསྟན་པ་བཞིན་ནོ། །བྱང་ཆུབ་སེམས་དཔའི་སྡོམ་པ་ནི་ཆོས་རྣམས་གཟུགས་བརྙན་དང་སྒྱུ་མ་ལྟ་བུར་རྟོགས་ཤིང་། སེམས་ཀྱི་ལས་གཙོ་ཆེ་བས་ཉམས་པ་རྣམས་ནི་དགེ་བའི་བཤེས་གཉེན་ལ་བསྟེན་ནས་སོར་ཆུད་པར་བྱ་བར་རུང་ཡང་གཞན་རྐྱེན་ལ་ལྟོས་པ་ཅན་མགར་གྱི་ལས་ཐབས་ལ་གོམས་པས་རིན་པོ་ཆེའི་སྣོད་ཆག་གྲུམས་སུ་གྱུར་པ་བཞུ་བཏུལ་ལ་སོགས་པའི་སྦྱོར་བས་སྔར་བཞིན་བསྒྲུབ་པ་ལྟ་བུའོ། །གསང་སྔགས་ཀྱི་དམ་ཚིག་ནི་འཁོར་འདས་ཀྱི་ཆོས་ཐམས་ཅད་མཉམ་པ་ཉིད་དུ་རྟོགས་པའི་དབང་དང་། བདག་ཉིད་ཀྱི་རང་བཞིན་ལྷ་དང་གཞལ་ཡས་སུ་ཤེས་པ་ལ་སོགས་པའི་བརྟུལ་ཞུགས་མཆོག་ལ་གནས་པས་དགེ་བའི་བཤེས་གཉེན་ལ་མ་བསྟེན་ཀྱང་རང་ཉིད་ཀྱིས་སོར་ཆུད་པར་བྱར་ཡོད་དེ། །དཔེར་ན་གསེར་དངུལ་གྱི་ཉེར་སྤྱད་ཞོམ་པ་ནི་བདག་ཉིད་ཀྱིས་སྲོང་བར་ནུས་པ་བཞིན་ནོ། །དེ་བས་ན་རྩ་ལྟུང་དང་པོ་དང་གསུམ་བ་ལྟ་བུས་ནི་
གཙོ་བོར་སྐུའི་དམ་ཚིག་ཉམས་པ་ལ་སྦྱོར་བས་འཕྲལ་དུ་དག་ཚངས་བྱ་ཞིང་ཚོགས་དང་ཞབས་ཏོག་ལ་སོགས་པས་སོར་ཆུད་པར་བྱ་སྟེ། བཀོད་པ་ཆེན་པོ་ལས། བླ་མ་དང་ནི་ཉེ་བའི་འཁོར། །རྡོ་རྗེ་སྤུན་དང་སྲིང་མོ་ལ། །ངན་སྨྲས་ཚིག་གི་ཟུར་ཙམ་ཡང་། །བརྡའ་འམ་དངོས་པོས་བརྗོད་མི་བྱ། །གལ་ཏེ་རྨི་ལམ་དག་ཏུ་ཡང་། །བྱུང་ན་ཡིད་ཀྱིས་བཤགས་པར་བྱ། །དངོས་དང་ཞེ་ཡིས་བྱས་པ་དང་། །གལ་ཏེ་དྲན་པས་མ་ཟིན་པར། །ཐལ་བར་གྱུར་ཀྱང་མ་བཤགས་ན། །ཐུར་དུ་བལྟས་ཏེ་དམྱལ་བར་འགྲོ། །ཞེས་སོ། །གསུང་གི་དམ་ཚིག་ཉམས་ན་རྩ་བའི་བླ་མ་ཉིད་དེ་བཞིན་གཤེགས་པ་ཐམས་ཅད་ཀྱི་གསུང་རྡོ་རྗེའི་ངོ་བོ་སངས་རྒྱས་རྡོ་རྗེ་ཆོས་སྐུ་མདོག་དམར་པོར་བསྒོམས་ལ་སྙིང་པོའམ་ཡིག་བརྒྱ་འབུམ་ཐེར་གདོན་ཅིང་བླ་མའི་ཡོན་ཏན་བརྗོད་པ་འབའ་ཞིག་དོན་དུ་གཉེར། ཐུགས་དང་འགལ་བའི་ཉེས་པ་ལ་རང་རྡོར་སེམས་སུ་གསལ་བའི་སྤྱི་བོར་བླ་མ་བསྒོམས་ལ་ཡན་ལག་བདུན་པ་ཕུལ་ནས་དབང་བཞི་བླངས་རྗེས་བླ་མ་རང་ཉིད་ལ་བསྟིམ་ནས་སྨྲ་བ་བཅད་དེ་ཐུགས་ཡིད་བསྲེས་པའི་ངང་ལ་ལོ་གསུམ་དུ་མཉམ་པར་འཇོག་པ་སྟེ་རྔམ་གློག་ལས། བླ་མ་སྤུན་ལ་སྨད་གྱུར་ན། །ཚེ་འདི་ཉིད་ལ་མཉེས་བྱས་ཏེ། །མཐོལ་བཤགས་དྲག་པོས་འགྱོད་བྱས་ན། །དེ་ནི་བསྐང་བའི་མཆོག་ཏུ་གྱུར། །གལ་ཏེ་བདག་གམ་བླ་མ་སྤུན། །མ་བསྐངས་བར་དུ་ཚེ་འཕོས་ན། །དེ་ནི་བསྐང་བའི་ཚད་ལས་འདས། །གསུང་གི་ཐ་ཚིག་རལ་གྱུར་ན། །རྡོ་རྗེ་ཆོས་སུ་བདག་བསྒོམས་ཏེ། །ཐ་ཚིག་གང་བཀླགས་འབུམ་འབུམ་འདོན། །ཐུགས་ཀྱི་དམ་ཚིག་རལ་གྱུར་ན། །རྡོ་རྗེ་སེམས་
དཔར་བདག་བསྒོམས་ལ། །ལོ་གསུམ་བར་དུ་མི་སྨྲ་བར། །བསམ་གཏན་སྦྱོར་བ་རབ་ཏུ་བྱ། །ཡན་ལག་ཐ་ཚིག་རལ་གྱུར་ན། །སོ་སོ་རང་རང་རིགས་ཀྱིས་བསྐང་། །ཞེས་སོ། །དྲུག་ཆ་ལས་ཐལ་ཐུན་ཚོད་འདའ་བའི་མཚམས། །འགལ་དང་ཉམས་དང་འདས་དང་རལ་བ་ཞེས། །ཞག་དང་ཟླ་བ་ལོ་གཅིག་ལོ་གཉིས་འདས། །གསོ་བར་རུང་སྟེ་ཕྱི་མ་ཕྱི་མ་ལྕི། །ལོ་གསུམ་འདས་ན་གསོ་བར་རུང་མ་ཡིན། །འགལ་ན་ཚོགས་འཁོར་ཉམས་ན་བདོག་དགུས་བསྐང་། །འདས་ན་བུ་དང་ཆུང་མ་ནོར་དང་དབྱིག །རལ་ན་སྲོག་གི་གསོ་པའི་རྣམ་གཞག་རྣམས། །རྡོ་རྗེ་ཉི་མ་རྣམ་པར་བཀོད་ལས་གསུངས། །དེ་ལ་སྤྱིར་ལྟུང་བ་ཕལ་ལ་ཡན་ལག་བཞི་དང་ལྡན་དགོས་ཏེ། ལྟུང་བ་འབྱུང་བའི་ཡུལ། དེར་འདུ་ཤེས་པའི་བསམ་པ། ལུས་ངག་དང་འབྲེལ་ན་དེའི་སྦྱོར་བ། སྒོ་གསུམ་གང་གིས་གྲུབ་པའི་ལས་ལམ་རྫོགས་པའི་མཐར་ཐུག་བཞི་ཚང་ན་སྔགས་སྡོམ་གཏོང་བས་ཕམ་པ་ཞེས་བརྗོད་པའི་རྒྱུ་མཚན་སྔར་བཀོད་ཟིན་ལ། ཡིད་ཀྱིས་འགྲུབ་པའི་རྩ་ལྟུང་གང་རུང་གཉེན་པོ་དང་སྤེལ་ནས་སྐྱེས་ན་དངོས་གཞི་མི་ཚང་ཡང་དེ་ལ་བཤགས་པ་མ་བྱས་པར་དྲུག་ཆ་འདས་ན་ཐུན་ཚོད་འདས་པའི་ལྟུང་བ་ཞེས་བྱ་སྟེ་ཕས་ཕམ་པའི་འོག་ནས་ལྕི་བ་སྟེ་སློབ་དཔོན་མཚོ་སྐྱེས་ཀྱིས། རྩ་བ་དུས་འདས་ཕམ་པ་འདྲ། །ཆོད་ལྡན་ལྟུང་བར་བཤད་པ་ཡིན། །ཡན་ལག་གཙོ་བོ་དུས་འདས་ལ། །ལྕི་བ་ཞེས་ནི་བཤད་པ་སྟེ། །སྦྱོར་བ་མ་རྫོགས་སྦོམ་པོའོ། །ཡན་ལག་ཕྲ་བ་ཉེས་བྱས་སོ། །ཞེས་ཀྱང་བཤད་དོ། །དེའང་ངོ་བོ་ལ་ལྟོས་པའི་ཉམས་པ་དང་། དུས་ལ་ལྟོས་པའི་འགལ་ཉམས་ལ་སོགས་པ་བཞི་ནི་བཤགས་བྱའི་ལྕི་ཡང་གི་རིམ་པ་ལ་ལྟོས་ནས་
བསྟན་པ་སྟེ། དམ་ཚིག་བཀོད་པའི་རྒྱུད་ལས། སྤྱིར་ན་དམ་ཚིག་ཁྱད་པར་ལས། །དུས་ལ་ཁྱད་པར་དེས་ཕྱེ་བ། །དམ་ལས་འགལ་ཞེས་ཉེས་བྱས་གང་། །ཞག་གིས་བར་མ་ཆོད་པ་ནི། །དམིགས་པའི་ཡུལ་ལ་བཤགས་བྱས་ན། །དེས་ནི་སོར་ཡང་ཆུད་པའོ། །ཉམས་ཞེས་ཟླ་བས་མ་ཆོད་པར། །འགྱོད་པ་དྲག་པོས་བཤགས་པས་སོ། །དམ་ལས་འདས་ན་ལེ་དག་གིས། །བར་དུ་མཆོད་བཤགས་པས་སོ། །ལོ་ནི་གཅིག་དང་གསུམ་དག་ལས། །དམ་ཚིག་རལ་པ་ཞེས་བྱ་བ། །མཆོག་ཏུ་དྲག་ན་གསོ་དུ་རུང་། །ལོ་གསུམ་དག་ལས་འདས་པ་ནི། །དེ་ནས་གསོ་རུ་མི་རུང་སྟེ། །གལ་ཏེ་བླངས་ན་གཉིས་ཀ་འཚིག །ངེས་པར་ས་སྤྱོད་སྡུག་བསྔལ་ལ། །རྒྱུན་དུ་སྤྱོད་པ་ཁོ་ནའོ། །ཞེས་སོ། །དེ་ལྟར་བཤགས་བྱ་ལ་ལྕི་ཡང་ཡོད་པ་ལྟར་བཤགས་ཚུལ་ཡང་ཇེ་ཆེར་སྟོབས་བསྐྱེད་པའི་ཚུལ། དེ་ཉིད་ལས། འགལ་ན་ཚོགས་ཀྱི་འཁོར་ལོས་བསྐང་། །ཉམས་ན་རང་གི་བདོག་པས་བསྐང་། །འདས་པ་བུ་དང་ཆུང་མ་དང་། །ཉེ་འཁོར་ལུས་དང་ངག་དག་དང་། །ཡིད་དང་བདོག་པར་བཅས་པས་བསྐང་། །རལ་ན་རང་གི་སྲོག་གིས་བསྐང་། །ཞེས་སོ། །དེ་ལྟར་རྒྱུད་སྡེ་ཐ་དད་ནས་གསུངས་པ་སྤྱི་དོན་བསྡུས་པའི་དམ་ཚིག་གི་ཆིངས་རྣམ་པར་བཤད་ནས་ཕྱིར་བཅོས་ཀྱི་དོན་བསྡུ་བ་ནི། གཞན་ཡང་དབང་བཞི་བསྐྱར་དང་བདག་འཇུག་བླང་། །བསྐྱེད་རྫོགས་བཟླས་བརྗོད་འཕོ་མེད་ཚུལ་ཁྲིམས་དང་། །ཐིག་ལེའི་རྣལ་འབྱོར་སྦྱིན་སྲེག་གཏོར་མ་གཏོང་། །དྲལ་བའི་སྔགས་རྒྱ་བཀྲུ་དང་གཏུམ་མོས་བསྲེག །ཚོགས་སམ་རྟེན་གྱི་མདུན་དུ་ཉེས་པ་བསྒྲགས། སྲོག་བསླུ་བསུང་རབ་བཀླག་
དང་ཡིག་བརྒྱ་བཟླ། །མཎྜལ་ཡན་ལག་བདུན་དང་མཆོད་རྟེན་བཞེངས། །ལ་སོགས་ཐབས་ཀྱིས་གཏུགས་པ་མ་ཡིན་པ། །ཁྱད་པར་དོང་སྤྲུག་བཤགས་པས་མི་འདག་མེད། །དམིགས་བཅས་ཀུན་ལ་འགྱོད་སེམས་ལྷག་པར་གཅེས། །དེ་ལ་སྤྱིར་དབང་བཞི་བསྐྱར་བ་དང་། བདག་འཇུག་བླང་བས་གསང་སྔགས་ཀྱི་སྡོམ་པ་དང་དམ་ཚིག་དག་པར་འགྱུར་བའི་ཚུལ་སྡོམ་འབྱུང་ལས། དབང་བསྐུར་འདི་དང་ཡང་དག་ལྡན། །དེ་ནི་དམ་ཚིག་ཅན་ཞེས་བྱ། །ཞེས་དང་། ཧེ་རུ་ཀ་མངོན་འབྱུང་ལས། །དཀྱིལ་འཁོར་རྒྱལ་པོ་མཐོང་བ་ནི། །ཅུང་ཟད་དེ་ནི་མི་འགྲུབ་མེད། །སྡིག་པ་ཀུན་ལས་རྣམ་པར་གྲོལ། །ཞེས་སོ། །དེ་ལྟ་ནའང་དུས་ཀྱི་འཁོར་ལོ་ལས་དབང་ཐོབ་མཚམས་ཐ་དད་པའི་དབང་གིས་དེ་ལ་བལྟོས་པའི་ལྟུང་བ་སྤྱོད་ཚུལ་ཐ་དད་པའང་འདི་ལྟར་རང་ལུགས་ཀྱི་བུམ་དབང་བདུན་ཐོབ་པས་དཀྱིལ་འཁོར་གྱི་ལྷ་གྲངས་རེ་རེའམ་གཙོ་བོའི་བཟླས་པ་སྟོང་ཕྲག་སུམ་ཅུ་རྩ་དྲུག་གིས་སྦྱང་བ་དང་། གསང་དབང་ཐོང་བས་དེའི་སྟེང་དུ་སློབ་དཔོན་གྱི་བསྒོས་པའི་ཆད་ལས་ཀྱི་བརྟུལ་ཞུགས་སྤྱད་པས་སྦྱང་བ་དང་། ཤེར་དབང་ཐོབ་པས་དབེན་པར་བསྐྱེད་རྫོགས་སྤྱི་དང་ཐིག་ལེའི་རྣལ་འབྱོར་གྱིས་རང་རྒྱུད་སྦྱངས་ཤིང་བྱིན་གྱིས་བརླབས་ནས་དག་པའི་མཚན་མ་མཐོང་བ་ན་སླར་དཀྱིལ་འཁོར་དུ་ཞུགས་ནས་དབང་བླང་བར་བྱ་ཞིང་། དེའི་ཚེ་སྔར་གྱི་དབང་ཐོབ་དུས་ཀྱི་བསླབ་གྲལ་དང་རྙེད་བཀུར་ལེན་པ་སོགས་མི་བྱ་བའི་ཚུལ་ཡང་འདུལ་བའི་སྡེ་སྣོད་དང་སྒོ་བསྟུན་པར་སྣང་སྟེ་དགེ་འདུན་ལྷག་མའི་སྤོང་སྤྱོད་བཞིན་ནོ། །དེ་བཞིན་དུ་སྤྱི་མདོ་ལས་ཉམས་ཚུལ་ལྔ་ལ་བལྟོས་ནས་བཅོས་པའི་ཚུལ་བསྟན་ཏེ། ལངྒའི་འདག་པོ་གང་འདི་ལས་ཉམས་པར་
གྱུར་པ་ཞེ་ན། ཀུན་ཏུ་ཉམས་པ་ཆེན་པོ་དང་། །རྩ་བ་ཉམས་དང་ཡན་ལག་ཉམས། །དེ་བཞིན་ཟླས་ཉམས་ཞར་ཉམས་ལྔ། །ཞེས་ཀུན་ནས་ཉོན་མོངས་པ་ཆེན་པོ་ནི་ཀུན་དཀྲིས་དྲག་པོའི་སྒོ་ནས་བཤགས་ཡུལ་སུན་ཕྱུང་བ་ཡིན་ལ། རྩ་བ་དང་ཡན་ལག་ན་སྤྱི་དང་མཚུངས་པ་ཉིད་དེ་བསྐང་བའི་ཚུལ་ཡང་དེ་ཉིད་ལས། ལས་དང་རྫས་དང་འདུན་པ་དང་། །ཏིང་ངེ་འཛིན་དང་དེ་ཉིད་དོ། །ཞེས་པ་ལས། ལས་ཀྱི་བསྐང་བ་ནི་སྦྱིན་སྲེག་དང་གཏོར་མ་དང་བཟླས་བརྗོད་ལ་བརྟེན་པ་སྟེ། དེ་ཡང་ཀུན་ནས་ཉམས་པ་ལ་ཆིག་འབུམ་སུམ་ཁྲི། རྩ་བ་ཉམས་པ་ལ་ལྔ་ཁྲི་སུམ་སྟོང་། ཡན་ལག་ཉམས་པ་ལ་ལྔ་སྟོང་སུམ་བརྒྱ། ཟླས་ཉམས་པ་ལ་ལྔ་བརྒྱ་ཕྲག་གསུམ། ཞར་གྱིས་ཉམས་པ་ལ་ལྔ་བཅུ་རྩ་གསུམ་མོ། །ད་ལ་ཟླས་ཉམས་པ་ཞེས་བྱ་བ་ནི་གང་ཟག་གང་ཞིག་བདག་ཉིད་ཉམས་པར་འགྱུར་བཞིན་དུ་གསོ་བའི་ཐབས་ལ་མི་བརྩོན་པ་སྟེ། དེ་ལྟ་བུ་དང་སྐད་ཅིག་ཙམ་ཡང་ཕྲད་པ་དང་སྨྲ་བ་བྱ་བར་མ་ཡིན་ན་དེའི་མགོན་བྱ་ཞིང་དེ་དང་ལྷན་ཅིག་མ་ནལ་བལྟ་ཅི་སྨོས་ཏེ། རྣལ་འབྱོར་གང་ཞིག་དམ་ཚིག་ཉམས་པ་དང་། །སྐད་ཅིག་ཙམ་ཡང་ཕྲད་པར་མི་བྱ་ཞེས། །སོགས་པས་བསྟན་ཏེ། མདོ་ནས་འཚོ་བ་པོ་བསོད་ནམས་བརླག་པ་གཅིག་གིས་ལྷན་ཅིག་གནས་པའི་འཚོ་བ་པོ་ཐམས་ཅད་ཀྱིས་འཚོ་བའི་སྒོ་ཡང་བཀག་པར་གསུངས་པ་བཞིན་ཟླས་ཉམས་པའི་སྐྱོན་གྱིས་ཕོག་བཞེས་བྱ་བ་འདི་ནི་ཉེས་པ་ཆེན་པོ་དང་ལྡན་པ་འོ་མ་རུལ་བའམ་ལག་འགྲོ་རྨ་ཅན་དང་འདྲ་བས་ལུང་པ་གཅིག་གི་ཆུ་ལའང་མི་བཏུང་སྟེ་ཀུན་འདུས་ལས། ཇི་ལྟར་འོ་མ་རུལ་བདག །འདྲེས་པས་འོ་མ་ཀུན་རུལ་ལྟར། །རྣལ་འབྱོར་ཉམས་
གྱུར་གཅིག་གིས་ནི། །རྣལ་འབྱོར་ཅན་ཀུན་མ་རུང་བྱེད། །ཅེས་སོ། །རྫས་ཀྱི་བསྐང་བ་ནི་རིགས་ལྔ་གང་གི་དམ་ཚིག་ཉམས་པའི་ཁྱད་པར་དང་བསྟུན་ནས་མི་རིགས་ལྔར་དབྱེ་བའི་བླ་མ་སློབ་དཔོན་ཏེ། དེར་མོས་པ་དེ་བཞིན་གཤེགས་པ་ལྔའི་རང་བཞིན་ཅན་དུ་བལྟས་ལ་རིགས་དང་མཐུན་པའི་རིན་པོ་ཆེ་འཕངས་པ་མེད་པར་སྟོབ་པའོ། །འདུན་པས་བསྐང་བ་ནི། ཧེ་རུ་ཀ་གལ་པོ་ལས། མི་དག་སྡིག་པའི་བག་ཆགས་རྣམས། །གདུང་བའི་གླུ་དང་བཅས་པས་བཤགས། །ཞེས་པ་ལྟར་གནོང་འགྱོད་ཀྱིས་མངོན་རྟོགས་དང་། འདུན་པའི་རྣམ་འགྱུར། གདུང་བའི་གླུས་དོང་མ་པའི་ཚུལ་གྱིས་བཤགས་པའོ། །ཏིང་ངེ་འཛིན་གྱིས་བསྐང་བ་ནི། མན་ངག་དང་ལྡན་པ་དག་གིས་ཐིག་ལེའི་རྣལ་འབྱོར་དང་། འཕོ་མེད་ཀྱི་ཚུལ་ཁྲིམས་ལ་སོགས་པས་བསྐང་ལ། དང་པོའི་ལས་ཅན་གྱིས་བཤགས་ཡུལ་ཉིད་བླ་མ་མན་ན་དེ་ཡི་དམ་ལ་སོགས་པར་བསྒོམས་ནས་སྟོབས་བཞིའི་སྒོ་ནས་བཤགས་པས། དེའི་གནས་གསུམ་གྱི་འོད་ཟེར་ལས་རང་གི་ཉམས་ཆགས་ཉེས་ལྟུང་སྦྱངས་པར་བསམ་པའོ། །དེ་ཁོ་ན་ཉིད་ཀྱིས་སྦྱང་བ་ནི། །བདག་དང་གཞན་དང་། གཉིས་ཀ་མི་དམིགས་པ་སྟེ་འཁོར་གསུམ་ཡོངས་དག་ཆེན་པོའི་ཤེས་རབ་ཀྱིས་སྦྱང་བ་སྟེ། །ཕྱོགས་སུ་རྒྱས་པའི་མདོ་ལས། གང་ཞིག་འགྱོད་འཚངས་བྱེད་འདོད་ན། །དྲང་པོར་འདུག་ལ་ཡང་དག་ལྟོས། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ནས་རྣམ་པར་གྲོལ། །འདི་ནི་འགྱོད་ཚངས་མཆོག་ཅེས་བྱ། །ཞེས་སོ། །དེ་ལས་གཞན་པ་ཡོ་ག་ནས་བཤད་པའི་དྲལ་བའི་སྔགས་རྒྱ་གཉིས་ཏེ་ལྟུང་བ་སློང་བའི་ཕྱག་རྒྱ་དང་། དེའི་སྔགས་ཀྱི་རིམ་པ་ལ་བརྟེན་ནས་ངན་འགྲོ་དགུག་དྲལ་དང་། དེ་བཞིན་དུ་རྡོ་རྗེ་ཡང་ཏོག་
གི་རྒྱུད་ལས། ཡིག་འབྲུ་སྔགས་ཀྱིས་སྦྱང་བ་ནི། །རྐང་མཐིལ་གཉིས་སུ་ཡཾ་གཉིས་བསམ། །གསང་བའི་སྒོ་རུ་རཾ་བསམ་མོ། །ལྟེ་བར་རིགས་དྲུག་ཡིག་འབྲུ་བསམ། །སྙིང་གར་ཕཊཀྱི་གདན་དག་ལ། སྐུ་གསུང་ཐུགས་ཀྱི་སྙིང་པོ་བསམ། །ཡཾ་ལས་ཡེ་ཤེས་རླུང་བྱུང་སྟེ། །རཾ་ལས་ཡེ་ཤེས་མ་སྤར་ནས། །རིགས་དྲུག་བག་ཆགས་ཐམས་ཅད་བསྲེག །སྒོ་གསུམ་སྐུ་གསུང་ཐུགས་སུ་འགྱུར། །ཕཊཀྱིས་ཆོས་ཉིད་དབྱིངས་སུ་འཕངས། །ཞེས་པའང་མན་ངག་ཤིན་ཏུ་ཟབ་ལ། །གཞན་ཡང་ཕྱི་ནང་གི་འབྱུང་བ་ལ་བརྟེན་ནས་སྦྱོང་བ། ཆུ་ཀླུང་ལ་སོགས་བཾ་ལས་མཱ་མ་ཀིའི་བདག་ཉིད་དུ་མོས་པ་ལ་སྤྱོད་པའི་བརྟུལ་ཞུགས་ཀྱིས་ལུས་བཀྲུ་བ་དང་། མདོར་ན་སོ་སོ་སྐྱེ་བོ་ནས་སློབ་པའི་ལམ་གྱིས་ཉེས་བྱས་ཐམས་ཅད་གྲིབ་ཏུ་མི་འགྱུར་བ་མེད་པས་དེའི་གཉེན་པོར་རྣམ་འཛམས་ལ་སོགས་པའི་བུམ་ཆུས་དངོས་སུ་བཀྲུ་བཤལ་དང་། མཁའ་དབྱིངས་སུ་ཤར་བའི་དབང་ལྷ་ལས་རིག་པའི་དབང་ལྔ་བླངས་ནས་ལུས་བཀྲུ་བའི་འདུན་པ་དང་། གཏུམ་མོའི་མེས་ལྟེ་བར་ཀཾ་ཡིག་དང་སྙིང་གར་ཤ་ཟའི་གཟུགས་ཀྱི་སྡིག་པ་བསྲོག་པའམ། བཛྲ་ཌཱ་ཀི་ལ་བརྟེན་ནས་ཏིལ་དང་བཅས་བསྲེག་པ་དང་། རླུང་ལ་བརྟེན་ནས་སྦྱང་བ་གཙུག་ལག་ཁང་ལ་སོགས་པར་ས་འཕན་སྦྲེང་བ་དང་། སཙྪ་གདན་པ་དང་། ཚོགས་པ་མང་པོའི་དབུས་སམ་རྟེན་གྱི་དྲུང་དུ་བདག་ལ་ཉེས་ལྟུང་འདི་ལྟ་བུ་བྱུང་བས་ཚངས་པར་སྩོལ་ཅིག་ཅེས་འཆབ་པར་མི་བྱེད་པ་ནི་སྡིག་ལྟུང་འདག་ཚབས་ལྷག་པར་ཆེ་བ་ཡིན་ནོ། །གཞན་ཡང་ཚོགས་ཀྱི་འཁོར་ལོ་དང་། ཚོགས་ཀྱི་མཆོད་པ་དང་། དཔའ་བོ་དང་དཔའ་མོའི་སྟོན་མོ་དང་། ཉེའུ་
འདོན་པ་དང་། ཆུ་མིག་དང་ལྟེང་ཀ་ལ་ཐེབས་པའི་སྲོག་ཆགས་འདོན་པ་དང་། སྦྲང་རྩི་བསླུ་བ་དང་། རྙི་ལས་དགྲོལ་བ་དང་། རྔོན་པ་ལ་བརྔན་སྟེར་བ་དང་། ནད་པ་ལ་ཕན་གང་བྱས་པ་དང་། མཚོན་ཆའི་འོག་ནས་ཐར་དུ་འཇུག་པ་སྟེ་སྲོག་བསླུའི་རིམ་པ་མཐའ་མ་འགགས་པ་དང་། །བླ་མ་དང་དཀོན་མཆོག་གི་སྐུ་གཟུགས་བཞེད་པ་དང་། བསྙེན་བཀུར་བ་དང་། གང་དག་ལ་སྙིང་ཐག་པ་ཉིད་ཀྱིས་གུས་པས་སྐྱབས་སུ་མཆིའོ་ཙམ་བརྗོད་ཀྱང་དེའི་འབྲས་བུ་བསླུ་བ་མེད་པ་རྒྱལ་བའི་གསུང་རབ་བཀླག་པ་དང་། རྒྱུད་ལས། འདི་ནི་སངས་རྒྱས་ཐམས་ཅད་ཀྱི། །ཐུགས་ཀྱི་སྙིང་པོ་ཡིན་པའི་ཕྱིར། །ཞེས་པའི་ཡི་གེ་བརྒྱ་པ་གདོན་པ་དང་། དེ་བཞིན་གཤེགས་པ་རྣམས་ཀྱིས་སྤངས་རྟོགས་ཀྱི་གཟུགས་བརྙན་མཆོད་རྟེན་བཞེངས་པ་དང་། ཡན་ལག་བསྐྱོད་པ་ཙམ་ལ་ཕན་ཡོན་ཆེ་བ་མཎྜལ་འབུལ་བ་དང་། ཚོགས་ཐམས་ཅད་ཀྱི་སྒོ་ཡན་ལག་བདུན་པ་དང་། སྡིག་ལྟུང་གི་སྒོ་འཚམས་པ་ཕུང་པོ་གསུམ་པ་འདོན་པ་སོགས་ལ་སྙིང་པོ་རྒྱན་དུ་བཏུས་པའི་ཕྱིར་བཅོས་ཉེར་ལྔ་ཡང་ཚང་ཞིང་། ཁྱད་པར་རྣལ་འབྱོར་སྤྱི་ཁྲུས་དོང་སྤྲུག་གི་བཤགས་པས་མི་འདག་པ་མེད་པ་ནི། མར་མེ་བརྒྱ་རྩའི་ཆོ་ག་དང་། སླང་སྒོང་བརྒྱ་རྩ་འདོན་པ་དང་། །བཤགས་པ་རྣམ་པ་སྣ་ཚོགས་བྱ། །དེས་ནི་བྱང་བའི་ཡོན་ཏན་འཐོབ། །ཅེས་པ་སྟེ། དེ་ལ་ཕྱི་མཆོད་ཚོགས་ཀྱི་ཡོ་བྱད། ནང་ཕུང་པོ་རྟེན་གྱི་ཡན་ལག །གསང་བ་བྱང་ཆུབ་སེམས་ལ་བརྟེན་ནས་བསྐང་ཞིང་བཤགས་པ་རྣམ་པ་གསུམ་དུ་ཚོགས་པས་ཉམས་ཆགས་དང་ཉེས་ལྟུང་མཐའ་དག་འདག་པའི་ཚུལ་དཀྱིལ་འཁོར་གྱི་ལྷ་ལ་ཕྱག་བཅོལ་བའི་ཕན་ཡོན་ཀྱང་། གང་གི་སྒྱུ་འཕྲུལ་ཞི་ཁྲོ་ཡི། །དཀྱིལ་འཁོར་ལྟ་ལ་ཕྱག་བཙལ་ན། །ཉམས་ཆགས་ཐམས་ཅད་བྱང་གྱུར་ཏེ། །མཚམས་མེད་ལྔ་ཡི་སྡོག་ཀྱང་བྱང་། །
ན་རག་གནས་ཀྱང་དོང་སྤྲུག་སྟེ། །རིག་འཛིན་རྒྱལ་བའི་ཞིང་དུ་གྲགས། །ཞེས་པ་ལྟར་རོ། །དེ་ལྟར་དམིགས་བཅས་ཀྱི་བཤགས་པ་ཐམས་ཅད་ཀྱི་བསམ་པའི་རྟེན་ནི་འགྱོད་པ་དྲག་པོ་དང་བཅས་པ་ཁོ་ན་ཡིན་ཏེ། འགྱོད་པ་མེད་ན་ཁ་ན་མ་ཐོ་བའི་ཚོགས་ལ་སུན་འབྱིན་པའི་སེམས་ཉམས་སུ་མི་མྱོང་བས་བཤགས་ཡུལ་རྟེན་གྱི་སྟོངས་ཀྱང་བསླུས་པར་འགྱུར་ཞིང་། ཕྱིན་ཆད་ཀྱི་སྡོམ་སེམས་ཀྱང་མཐུ་ཆུང་ལ་དེས་གཉེན་པོ་ཀུན་ཏུ་སྤྱོད་པའི་སྟོབས་ཀྱིས་ནུས་པ་འཕྱིན་པ་ལ་བསྒྲིབ་པའི་ཕྱིར་རོ། །དེ་ཡང་སློབ་དཔོན་གྱིས་ཤེས་པ་བཅུས་བསྲུང་ལ། སློབ་མས་མི་ཤེས་པས་སློབ་དཔོན་གྱི་བཀའ་བཞིན་བསྲུང་བ་སྟེ། ཤེས་པ་བཅུ་ནི་ཚིག་དོན་གྱི་གནད་ཤེས་པ་དང་། དྲི་བའི་ལན་ཤེས་པ་དང་། དབང་དང་མན་ངག་གི་སྐབས་ཤེས་པ་དང་། ལྟ་བ་ཡངས་པར་ཤེས་པ་དང་། བསྒོམ་པའི་ངང་ཆེ་བར་ཤེས་པ་དང་། འཁོར་བ་དང་མ་འདྲེས་པར་ཤེས་པ་དང་། ཆོས་ཉིད་ཟབ་པར་ཤེས་པ་དང་། འདས་པའི་ས་ལ་གནས་པར་ཤེས་པ་དང་། རང་དང་སྤྱིའི་ཆོས་དང་ཆོས་ཅན་གྱི་མཚན་ཉིད་ཤེས་པ་སྟེ་རྒྱུད་ལས། ཤེས་པ་གཅིག་གི་ཁྱད་པར་གྱིས། །ཁྱད་པར་བཅུ་ཡི་བསྲུང་ཐབས་འཕགས། །ཞེས་སོ། །ཕྱིར་བཅོས་མ་བྱས་པའི་ཉེས་པ་ནི། །མ་བཤགས་ཚེ་འདིར་བདེ་ལེགས་ཡོན་ཏན་འགྲིབ། །དོ་ཟླ་མེད་པའི་རྡོ་རྗེའི་དམྱལ་བར་ལྟུང་། །དེ་སྐད་དུ་སྒྱུ་འཕྲུལ་ལས། །རྩ་བའི་དམ་ཚིག་ཉམས་གྱུར་ན། སྒྲུབ་པ་ཐམས་ཅད་ལོག་པར་འགྱུར། །ཡིད་དུ་མི་འོད་སྣ་ཚོགས་པའི། །འབྲས་བུ་མི་འདོད་བཞིན་དུ་འདུ། །ཞེས་ཚེ་འདིར་ཇི་ཙམ་བརྩོན་ཀྱང་དངོས་གྲུབ་མེད་པའི་རྟེན་སྐུའི་དམ་ཚིག་ཉམས་པས་མཛོ་ནད་ལ་སོགས་པ་དང་། རྒྱལ་
པོའི་ཆད་པ་དང་། ཆོམ་རྐུན་དང་། གཅན་གཟན་དང་། གདོན་ཕྲ་མོ་དག་གིས་ཀྱང་འཚོ་ཞིང་། གསུང་ཉམས་པ་ལས་སྐྱེ་བོའི་ཡ་ག་དང་། ངག་མི་བཙན་པ་དང་། ཐུགས་ཉམས་པ་ལས་སྨྱོ་འབོག་དང་། རླུང་ནང་དྲག་པོ་དང་། སེམས་ལས་སུ་མི་རུང་བ་དང་། འདོད་པ་ཐོག་ཏུ་མི་འགྲུབ་པ་ལ་སོགས་པས་གནས་སྐབས་ཀྱི་བདེ་ལེགས་ཀྱང་འགྲིབ་ལ། ཕྱི་མ་སྔགས་ཀྱི་དམ་ཚིག་པ་ཉམས་པ་རྣམས་ཀྱི་ལས་སྣང་ལས་གྲུབ་པའི་མནར་མེད་ཀྱི་སེམས་ཅན་དམྱལ་བ་ཆེན་པོས་ཀྱང་དེའི་དོ་ཟླ་མི་སྤོབས་པའི་རྡོ་རྗེའི་དམྱལ་པར་སོན་པར་འགྱུར་བའི་ཚུལ་གསལ་བཀྲ་ལས། རྩ་ཀུན་ཉམས་པའི་འཆལ་བ་དག །གསོ་ལ་ཉེ་བར་མི་བརྩོན་ན། །རྡོ་རྗེ་དམྱལ་བར་དེ་ལྟུང་སྟེ། །དམྱལ་བ་ཕལ་པ་ཐམས་ཅད་ཀྱི། །སྡུག་བསྔལ་གཅིག་ཏུ་བསྡོམས་པས་ནི། །དེ་ཡི་འབུམ་གྱི་ཆར་མི་ཕོད། །སངས་རྒྱས་སྟོང་གི་འོད་ཟེར་དང་། །བྱང་ཆུབ་སེམས་དཔའི་ཕྲིན་ལས་ཀུན། །རྒྱུན་དུ་མཛད་ཀྱང་ཕན་མི་འགྱུར། །བསྐལ་པ་ཐེར་འབུམ་ལ་སོགས་སུ། །དེ་ནི་འཐོན་པར་མི་འགྱུར་རོ། །འཇིག་རྟེན་འཇིག་ན་གཞན་དུ་འཕོ། །ཞེས་སོ། །དམ་ཚིག་བསྲུངས་པའི་ཕན་ཡོན་ནི། དམ་ཚིག་ལྡན་པ་སྐྱེ་བ་བཅུ་དྲུག་གམ། །མྱུར་ན་འདིའམ་འཆི་ཁ་བར་མ་དོར། །གྲུབ་པ་བརྒྱད་དང་དབང་བཅུ་ཕྱི་ནང་གཉིས། །དབང་ཕྱུག་བརྒྱད་དང་རིག་འཛིན་རྣམ་པ་བཞི། །མཆོག་གི་དངོས་གྲུབ་ཁ་སྦྱོར་ཡན་ལག་བདུན། །སྐུ་ལྔའི་ཞིང་བགྲོད་འགྲོ་དོན་ལྷུན་གྱིས་གྲུབ། །དེ་ལ་དམ་ཚིག་ནི་མདོ་སྔགས་གཉིས་ཀའི་ཚུལ་ཁྲིམས་ཀྱི་བསླབ་པ་ཡོན་ཏན་ཐམས་ཅད་ཀྱི་གཞི་རྟེན་ཡིན་པས་སློབ་དཔོན་འཕགས་པས་ཀྱང་། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལགས་པར་གསུངས། །ཞེས་པ་
ལྟར། འདིར་སྔགས་ཀྱི་ཚུལ་ཁྲིམས་སམ་དམ་ཚིག་དང་སྒོམ་པའི་གནས་གང་ཡིན་པ་ནི་དབང་དང་བསྐྱེད་རྫོགས་ལས་བྱུང་བའི་ཡོན་ཏན་ཐམས་ཅད་ཀྱི་གཞི་ཡིན་ཏེ། འདི་ལྟར་ཕ་རོལ་ཏུ་ཕྱིན་པས་བསྐལ་པ་གྲངས་མེད་གསུམ་ལ་སོགས་པར་ཚོགས་གཉིས་ལ་བརྟེན་གོམས་སུ་གྱུར་ནས་སངས་རྒྱས་སུ་འགྲུབ་པའི་འབྲས་བུ་སྔགས་སུ་དབང་དང་བསྐྱེད་རྫོགས་ཟབ་མོའི་ཐབས་ལ་བརྟེན་ནས་ཚེ་གཅིག་ལ་སོགས་པར་ཐོད་རྒལ་དུ་འགྲུབ་པའང་དམ་ཚིག་བསྲུངས་པའི་སྟོབས་ལས་འབྱུང་བ་སྟེ། ཅིའི་ཕྱིར་ན་བྱིན་རླབས་ཆེ་བས་ལམ་མྱུར་བ་དང་། ཐབས་ཟབ་པས་འཇུག་པ་བདེ་བ་བསྐྱེད་རྫོགས་གཉིས་ཡིན་ཀྱང་། དེ་དག་གི་རྟེན་གཞི་ནི་དམ་ཚིག་འབའ་ཞིག་ཡིན་པས་དམ་ཚིག་ཉམས་ན་དབང་དང་བསྐྱེད་རྫོགས་ལས་བྱུང་བའི་ཡོན་ཏན་མི་འགྲུབ་སྟེ། འབྲས་བུ་འབྱུང་བའི་རྒྱུ་ས་བོན་ཡིན་ཀྱང་ས་བོན་གྱི་རྟེན་གཞི་ས་ལ་མ་བརྟེན་ན་མྱུ་གུ་སྐྱེ་བའི་གཞི་མ་གྲུབ་པ་བཞིན་ཏེ། སྤྱི་མདོ་ལས། ཇི་ལྟར་ས་གཞི་གཤིན་པ་ལ། །བརྟེན་ནས་ས་བོན་བཏབ་པ་ལས། །འབྲས་བུ་སྨིན་པར་གྱུར་པ་ཡིས། །གང་དག་འཚོ་བའི་སྲོག་འཛིན་ལྟར། །ཆོས་རྣམས་ཀུན་གྱི་གཞིར་གྱུར་པ། །དམ་ཚིག་འདི་ལ་གནས་པ་ན། །བླ་མེད་བྱང་ཆུབ་རྣམ་སྨིན་པས། །དགེ་བའི་སྲོག་འཛིན་དམ་པའོ། །ཞེས་སོ། །དེ་བས་ན་དམ་ཚིག་དང་ལྡན་པ་རྣམས་ནི་གནས་སྐབས་སུའང་བསམ་དོན་ཡིད་བཞིན་དུ་འགྲུབ། ཀུན་གྱིས་ཡིད་དུ་འོང་། །འཇིག་རྟེན་གྱི་ལྷ་ཆེན་པོ་དག་གིས་བཀུར། རྒྱལ་དང་རྒྱལ་སྲས་རྣམས་ཀྱི་དགོངས་པར་མཛད་པའི་ཚུལ་དམ་ཚིག་གསུམ་བཀོད་ལས། གསང་སྔགས་
རྡོ་རྗེའི་དམ་ལ་གནས། །དེ་ཡིས་སྨེན་པ་ཀུན་འགྲུབ་ཅིང་། །ལྷ་རྣམས་ཀྱིས་ཀྱང་རྟག་ཏུ་བསྲུང་། །རྒྱལ་བ་རྒྱལ་མཆོག་སྲས་བཅས་ཀྱིས། །བུ་བཞིན་དགོངས་པ་དམ་པ་མཛད། །ཏིང་འཛིན་ཡོན་ཏན་དཔག་ཡས་ཤིང་། །ཀུན་བཟང་རིགས་ཀྱི་དམ་པ་འགྲུབ། །ཅེས་སོ། །མཐར་ཐུག་གི་འབྲས་བུ་ནི་ལམ་ལ་འབད་པ་ཆུང་ཡང་སྐྱེ་བ་བཅུ་དྲུག་ཚུན་ཆད་ནས་དངོས་གྲུབ་ཐོབ་པའི་ཚུལ་དམ་ཚིག་ལྔ་པ་ལས། །གལ་ཏེ་ལྟུང་བ་མེད་གྱུར་ན། །སྐྱེ་བ་བཅུ་དྲུག་དག་ལས་འགྲུབ། །ཅེས་དང་། ཐབས་བརྩོན་ཤེས་རབ་ཀྱི་དབང་དུ་གྱུར་པ་དག་ནི་རབ་ཚེ་འདི་ཉིད་ལ་གྲོལ་བའི་ཚུལ་རྡོ་རྗེ་གསང་བའི་རྒྱུད་ལས། བླ་མེད་སྔགས་ཀྱི་དངོས་གྲུབ་གང་། །ཤིན་ཏུ་བརྩོན་པས་གང་བསྒྲུབས་པ། །ཚེ་འདི་ཉིད་ལ་སངས་རྒྱས་ཏེ། །གདུལ་བྱའི་ཞིང་དུ་མཛད་པ་སྟོན། །གྲངས་མེད་རྡོ་རྗེ་འཆང་རྣམས་ཀྱི། །ཟབ་མོའི་ཉམས་ལེན་མཐར་ཐུག་པའོ། །ཞེས་སོ། །འབྲིང་རྣམས་འཆི་སྲིད་ཀྱི་སྡུད་རིམ་མཐར་དཔེ་དོན་གྱི་འོད་གསལ་གཉིས་མ་བུ་འདྲེས་ནས་སློབ་པའི་ཟུང་འཇུག་གི་སྐུར་ལྡང་ནུས་ལ། གལ་ཏེ་སད་དུས་ན་དོན་གྱི་འོད་གསལ་མངོན་དུ་གྱུར་པ་ཞིག་ཡིན་ན། དེ་གཞི་དུས་ཀྱི་འོད་གསལ་དང་གཉིས་སུ་མེད་པས་ཡང་དག་པའི་ཡེ་ཤེས་ཀྱི་མཐའ་མངོན་སུམ་དུ་གྱུར་ནས་མི་སློབ་པའི་ཟུང་འཇུག་གི་སྐུར་ལྡང་བའི་སྒོ་ནས་མངོན་པར་སངས་རྒྱ་བ་ཡིན་ནོ། །ཁྱད་པར་རྩ་རླུང་ཐིག་ལེ་གསུམ་ལས་སུ་རུང་ཞིང་སེམས་རྒྱུད་ལ་ཏིང་ངེ་འཛིན་དང་ཟག་མེད་ཀྱི་ཡོན་ཏན་ཇེ་ཆེར་འཕེལ་བས་ཐུན་མོང་གི་དངོས་གྲུབ་གྲུབ་པ་བརྒྱད་འཐོབ་པ་ཡང་། ཇི་སྐད་དུ། མཁའ་སྤྱོད་རལ་གྲི་རིལ་བུ་དང་། །རྐང་མགྱོགས་བུམ་པ་གནོད་སྦྱིན་ཁོལ། །བཅུད་ལེན་དང་ནི་མིག་སྨན་ནོ། །དེ་ལ་མཁའ་སྤྱོད་ན་
མཁའ་ལ་གནས་ནུས་ཤིང་འཆི་བ་མེད་པའོ། །རལ་གྲི་ནི་ཕ་རོལ་ལས་རྒྱལ་བར་བྱེད་པའོ། །རིལ་བུ་ནི་སྨན་གང་དག་བསྒྲུབས་པ་ལག་ཏུ་ཐོགས་པས་ལུས་མི་སྣང་བའོ། །རྐང་མགྱོགས་ནི་མཆིལ་ལྷྭམ་གྲུབ་སྟེ་གྱོན་པས་ཡུད་ཙམ་ལ་རྒྱ་མཚོའི་མཐའ་ཡང་འཁོར་བའོ། །བུམ་པ་ནི་དེའི་ནང་དུ་ཟད་མི་ཤེས་པའི་འདོད་དགུའི་གཏེར་འབྱུང་བའོ། །གནོད་སྦྱིན་གྱི་ཁོལ་པོ་ནི། དེས་བྲན་བྱས་ནས་ཅི་དགོས་པ་གྲུབ་ཅིང་མི་འབུམ་ཕྲག་གིས་བསྒྲུབ་དགོས་པའི་ལས་ཉིན་གཅིག་ལ་ཟིན་པ་རྒྱལ་པོ་མྱ་ངན་མེད་ཀྱི་ཙཻཏྱ་སྟེ་མཆོད་རྟེན་བྱེ་བ་ནུབ་གཅིག་ལ་བཞེངས་པ་ལྟ་བུའོ། །བཅུད་ལེན་ནི་ཉི་ཟླའི་ཚེ་གླང་པོ་ཆེའི་སྟོབས་པདྨའི་མདངས་དང་ལྡན་ཤིང་། ལྡང་བན་ཤིང་བལ་ལས་ཡང་བ་སློབ་དཔོན་ཆེན་པོ་པདྨ་ལྟ་བུ་སྟེ་སྐྱེ་འཆི་མེད་པའི་སྐུ་བརྙེས་ཤིང་དབང་ཕྱུག་བརྒྱད་དང་ལྡན་པས་ནམ་མཁའ་ལ་སྤྱོད། སྟོབས་ཀྱིས་མང་ཡུལ་གྱི་རི་བོ་དཔལ་འབར་ཕན་ཚུན་བརྗེས་པ་ལྟ་བུའོ། །མིག་སྨན་ནི་མིག་ལ་བྱུགས་པས་ས་འོག་གི་གཏེར་མཐོང་བ་ཁྱིམ་བདག་མགོན་མེད་ཟས་སྦྱིན་བཞིན་ནོ། །ཁྱད་པར་དུས་དང་པོ་ནས་བདུན་པའི་བར་ལ་དབང་བཅུ་ཕྱི་ལྟར་བ་ཡོད་དེ། །ཚེ་ལ་དབང་བས་བསྐལ་པ་ཇི་ཙམ་འདོད་པར་གནས་པ་དང་། སེམས་ལ་དབང་བས་ཏིང་ངེ་འཛིན་དཔག་ཏུ་མེད་པ་ལས་སྐད་ཅིག་རེ་རེར་མཉམ་པར་འཇོག་ཅིང་ལྡང་ནུས་པ་དང་། ཡོ་བྱད་ལ་དབང་བས་བསམ་པ་ཙམ་གྱིས་འཇིག་རྟེན་དུ་ཟས་ནོར་སྣ་ཚོགས་གང་བར་ནུས་པ་དང་། ལས་ལ་དབང་བས་བཟོ་དང་ལས་ཀྱི་གནས་ཐམས་ཅད་ལ་ཇི་ལྟར་འདོད་པ་བཞིན་སྤྱོད་པ་དང་། སྐྱེ་བ་ལ་དབང་བས་ལྷ་དང་མིའི་གནས་གང་འདོད་དུ་སྐྱེ་བ་དང་། མོས་པ་ལ་དབང་བས་ས་གཞི་ཐམས་ཅད་རིན་པོ་ཆེ་སྣ་ཚོགས་སུ་བསྒྱུར་བ་
ལ་སོགས་མདོར་ན་དངོས་པོ་ཐམས་ཅད་ཇི་ལྟར་འདོད་འདོད་སེམས་ཅན་སྤྱིའི་སྣང་ངོར་མཐུན་སྣང་གྲུབ་པར་བསྒྱུར་བ་དཔེར་ན་སློབ་དཔོན་སངས་རྒྱས་གཉིས་པས་བསམ་ཡས་ཀྱི་གསེག་མ་ནེ་སིང་དུ་བསྒྱུར་ནས་ཀུན་གྱི་ལོངས་སྤྱད་དུ་རུང་བ་ལྟར་དང་། སྨོན་ལམ་ལ་དབང་བས་འཇིག་རྟེན་ཐམས་ཅད་སངས་རྒྱས་ཀྱིས་གང་བ་ལ་སོགས་ཇི་ལྟར་སྨོན་པ་བཞིན་འགྲུབ་པ་དང་། རྫུ་འཕྲུལ་ལ་དབང་བས་ཞིང་ཁམས་དཔག་ཏུ་མེད་པ་སྐྲ་རྩེ་གཅིག་གིས་ནམ་མཁར་འཛིན་པ་ལ་སོགས་གང་འདོད་དུ་སྤྲུལ་ནུས་པ་དང་། ཡེ་ཤེས་ལ་དབང་བས་ཤེས་བྱ་གང་ཤེས་པར་འདོད་པ་དེ་ཤེས་པ་དང་། ཆོས་ལ་དབང་བ་ནི་ཆོས་ཐམས་ཅད་ཀྱི་མིང་དང་དོན་རྣམ་པར་བཞག་པ་ལ་མཁས་པའོ། །དེ་ཡང་དབང་བཅུ་ཕུལ་བྱུང་ནི་དག་པ་ས་གསུམ་ནས་ཡོད་པས་ནང་དུ་བཞག་ལ། དེ་སྐད་དུ། འདུལ་བ་ལུང་ལས། གང་ཚེ་མར་མེ་མཛད་ཀྱིས་དང་། ལུང་བསྟན་གྱུར་པ་དེ་ཡི་ཚེ། །ས་བརྒྱད་པ་ནི་ཐོབ་གྱུར་ཅིང་། །དབང་བཅུ་དག་ཀྱང་ཐོབ་པར་འགྱུར། །ཞེས་དང་། དེ་ཉིད་ཀྱི་རྒྱུན་མཐར་འོད་ཟེར་ཆེན་པོའི་དབང་བསྐུར་བ་ཡོད་པའི་ཚུལ་མདོ་སྡེ་དཀོན་མཆོག་སྤྲིན་ལས། བྱང་ཆུབ་སེམས་དཔའ་ས་ཆེན་པོ་ཐོབ་པ། འོད་ཟེར་གྱི་སྤྲིན་ཆེན་པོའི་དབང་བསྐུར་བས་དབང་བསྐུར་བ། དབང་བཅུ་ཐོབ་པ་ཤ་སྟག་ཏུ་གྱུར་ཏེ། ཞེས་སོ། །དབང་བཅུ་ཤིན་ཏུ་རྣམ་དག་ནི་སངས་རྒྱས་ཀྱིས་ན་ཡོད་པའོ། །དབང་ཕྱུག་བརྒྱད་ནི། དབང་བཞི་པའི་སློབ་པའི་ལམ་གྱི་མཐའ་ལ་བླ་མ་ངོ་བོ་ཉིད་ཀྱི་སྐུ་ལས་སྒོ་གསུམ་གྱི་དབང་མཐར་ཕྱིན་པའི་ལམ་ནས་རྡོ་རྗེའི་རྦ་རླབས་ཀྱིས་སྲིད་པའི་ལུས་ངག་ཡིད་གསུམ་དང་། རླུང་ལྡང་འཇུག་གནས་གསུམ། སེམས་སྣང་གསུམ་གྱིས་བསྡུས་པའི་ཁམས་གསུམ་རྣམས་ཉོན་སྒྲིབ་ལས་དག་པ་དང་། ཤེས་སྒྲིབ་
ལས་རྣམ་པར་དག་པར་བྱེད་ཅིང་དེ་ཁོ་ན་ཉིད་གཙོ་བོར་གྱུར་པས་མཚན་ཉིད་ཐེག་པ་དང་ཐུན་མོང་བའི་འཕགས་ལམ་བརྒྱད་ཀྱི་གཉེན་པོ་མཐར་ཕྱིན་པས་རྫས་ཐ་དད་པའི་རྣམ་ཤེས་བརྒྱད་ཡེ་ཤེས་སུ་གནས་འགྱུར། གཟུང་འཛིན་གྱི་རྩ་གཉིས་ཀྱི་སྲོག་རྩོལ་ཨ་ཝ་དྷཱུ་ཏིས་ཕྲོགས་པས་གཟུང་བའི་རླབས་ཉེ་བར་ཞི་ནས་སྐུ་རྣམ་དག་དང་འཛིན་པའི་རླབས་ཞིབས་གསུང་རྣམ་དག་གི་འབྲས་བུ་ཐོབ་པའི་སྦྱོར་བ་བརྩམ་ཞིང་རིག་འཛིན་བཞིའི་ལུས་རྟེན་ལ་སོགས་པར་དབང་ཕྱུག་གི་དོན་བརྒྱད་འཆར་བའང་། ཕྲ་ཞིང་ཡང་བ་ཕྲ་བར་ནུས་པ་དང་། །སྤྱོད་པར་ནུས་དང་བདག་ཉིད་ཆེན་པོ་དང་། །དགའ་མགུར་བྱེད་དང་ཐམས་ཅད་དབང་དུ་འགྱུར། །ཅི་འདོད་བྱེད་དང་དབང་ཕྱུག་དོན་བརྒྱད་དོ། །དེ་ལ་ཕྲ་ཞིང་ནི་འཁོར་འདས་ཀྱི་ཆོས་ཐམས་ཅད་དབུ་མའི་རང་བཞིན་དུ་མཐོང་བའོ། །ཡང་བ་ནི་ཡེ་ཤེས་ཀྱི་རླུང་སྟེ་དེའི་སྟོབས་ཀྱིས་མཁའ་ཁྱབ་ཀྱི་འཇིག་རྟེན་གྱི་ཁམས་སུ་རྫུ་འཕྲུལ་གྱིས་སྐད་ཅིག་ཙམ་ལ་འགྲོ་བ་དང་བལྟ་བར་ནུས་པའོ། །ཕྲ་བར་ནུས་པ་ནི་དབུ་མར་རླུང་སེམས་ཞུགས་པས་བདག་གཞན་མཐའ་དག་སྟོང་པ་ཉིད་དུ་ཐིམ་པར་རྟོགས་པས་གཉིས་སྣང་ཐམས་ཅད་ནུབ་པའོ། །སྤྱོད་པར་ནུས་པ་ནི་ནང་གི་བཙུན་མོ་དབུ་མ་ཡིན་པས་དེར་རླུང་སེམས་ཞུགས་པའི་རྟེན་འབྲེལ་གྱིས་ཕྱི་རོལ་ཏུ་གཟུགས་རྡོ་རྗེའི་བདག་ཉིད་ཅན་ལ་སོགས་པ་ཟག་མེད་ཀྱི་འདོད་ཡོན་ལྔ་ལ་སྤྱོད་པའོ། །བདག་ཉིད་ཆེན་པོ་ནི་མཚན་དཔེ་འབར་བ་ལ་སོགས་པ་དང་། བདུད་བཞི་ལས་རྣམ་པར་རྒྱལ་བ་དང་། མཐུ་སྟོབས་ཀྱི་བདག་པོར་གྱུར་པའོ། །དགའ་མགུར་བྱེད་པ་ནི་འགྲོ་བ་རྣམས་ལ་ཇི་ལྟར་འདོད་པའི་སྐུ་དང་གསུང་ལ་སོགས་པའི་རྣམ་པར་འཕྲུལ་པ་སྣ་
ཚོགས་བསྟན་ནས་བསམ་བ་ཚིམ་པར་བྱེད་ནུས་པའོ། །ཐམས་ཅད་དབང་དུ་འགྱུར་བ་ནི། སེམས་ཅན་རྣམས་ཚོགས་གཉིས་རྫོགས་པའི་གོ་འཕང་ལ་འགོད་ནུས་པས་གཞན་དོན་དུ་མི་འགྱུར་བ་སྐད་གཅིག་ཀྱང་མེད་པའོ། །ཅི་འདོད་བྱེད་པ་ནི་རང་གཞན་གཉིས་ཀའི་དོན་དུ་གནམ་རྡོ་ལྷུང་བ་དང་། རྒྱ་མཚོ་འཁྲུགས་པའི་སྒྲ་དང་། གཅིག་ལས་དུ་མ་དང་། དུ་མ་ལས་གཅིག་ཏུ་བྱེད་པ་ལ་སོགས་པའི་རྫུ་འཕྲུལ་ལ་དབང་ཐོབ་པའོ། །དེ་ཀུན་ཀྱང་རང་གི་བཞེད་བཅམ་ལ་རག་ལས་པ་ཡིན་པས་ཟག་མེད་ཀྱི་ཡོན་ཏན་མ་ལུས་པ་ལ་དབང་འབྱོར་བའི་ཕྱིར་དབང་ཕྱུག་དང་ལྡན་པ་ཞེས་བྱའོ། །དེ་ལྟར་ས་བཅུ་གསུམ་པའི་སྦྱོར་བའི་གནས་སྐབས་དེ་ཉིད་ལས་འབྲས་བུའི་དངོས་གཞི་ཟུང་འཇུག་གི་སྐུ་ཁ་སྦྱོར་ཡན་ལག་བདུན་ལྡན་ཏེ། སྐུ་རྣམ་པ་ཐམས་ཅད་པ་ཤེས་བྱའི་སྣང་བརྙན་ཡོད་དགུར་འཆར་བ་ནི་ཁ་སྦྱོར་དང་། གསུང་རྣམ་པ་ཐམས་ཅད་པ་སྒྲ་ཚིག་གི་སྒྲིབ་པ་དང་བྲལ་བ་ནི་ལོངས་སྤྱོད་རྫོགས་པ་དང་། ཐུགས་རྣམས་ཐམས་ཅད་པ་གཟུང་འཛིན་གྱི་རྟོག་པ་ལས་གྲོལ་ཞིང་འགྱུར་བ་མེད་པའི་བདེ་ཆེན་ལ་རོལ་པ་དང་། དེའང་རང་བཞིན་མེད་པ་སྟེ་མེད་དགག་གི་དཔྱད་མཐའ་ལས་གྲོང་བའི་སོ་སོ་རང་རིགས་ཀྱི་མཚན་ཉིད་ཅན་བཞིས་རང་དོན་ཕུན་སུམ་ཚོགས་པ་དང་། སྙིང་རྗེས་ཡོངས་སུ་གང་བ་ལས་ཡིད་བཞིན་གྱི་ནོར་བུའམ། དཔག་བསམ་ཤིང་ལྟར་གཞན་དོན་འབད་མེད་དུ་འབྱུང་བ་དམིགས་པ་མེད་པའི་ཐུགས་རྗེ་དང་། ཐུགས་རྗེ་ཆེན་པོ་དེ་ཉིད་ནམ་དུའང་རྒྱུན་ཆད་མེད་པས་རྟག་པ་དང་། གདུལ་བྱའི་མོས་པ་དང་དབང་པོ་ལ་འཚམས་པའི་གཟུགས་སྐུའི་སྣང་བརྙན་དང་ཆོས་ཀྱི་སྒོ་མཐའ་ཡས་པ་ནམ་ཡང་འགོག་པ་མེད་པར་འཆར་
པ་དང་གསུམ་གྱིས་གཞན་དོན་ཕུན་སུམ་ཚོགས་པ་ཤུགས་ལས་འགྲུབ་པས་དོན་གཉིས་ལྷུན་གྱིས་གྲུབ་པའི་སངས་རྒྱས་ཞེས་བྱ་སྟེ། ཆོས་ཉིད་གང་དུའང་མི་འགྲོ། །གང་དུའང་མི་གནས། བརྗོད་པ་མེད་པ། འཁོར་འདས་ཐམས་ཅད་དུ་ཁྱབ་པར་སོན་པ། གདུལ་བྱའི་ངོར་ཐམས་ཅད་མཁྱེན་པ། རྣམ་པ་དང་། དོན་ཐམས་ཅད་པ་སེམས་ཅན་ཐམས་ཅད་ཀྱི་རྒྱུད་ལ་གནས་པ། སྡིག་པ་ཐམས་ཅད་ལས་རྣམ་པར་གྲོལ་བ། ཡོན་ཏན་ཐམས་ཅད་ཀྱིས་ཉེ་བར་བརྒྱན་པ་སྟེ། དེ་གང་ལས་བྱུང་ན། ཤེས་བྱའི་བུད་ཤིང་སྐམ་པོ་མ་ལུས་པ་རྣམ་པར་མི་རྟོག་པའི་མེས་བསྲེགས་ནས་མངོན་དུ་མཛད་པ་ལ་བྱིས་པ་རྣམས་སྐྲག་པ་སྤང་བའི་ཕྱིར་དེ་བཞིན་གཤེགས་པའི་ཚིག་བླ་དགས་སུ་བཏགས་པ་སྟེ། འཇམ་དཔལ་སྐྱེ་བ་མེད་ཅིང་འགག་པ་མེད་པ་འདི་ནི་དེ་བཞིན་གཤེགས་པའི་ཚིག་བླ་དགས་སོ། །ཞེས་དང་། འཇིག་རྟེན་འདས་ལེར། སངས་རྒྱས་རྣམས་ནི་ཆོས་ཀྱི་སྐུ། །རྣམ་དག་ནམ་མཁའ་ལྟ་བུ་ཡིན། །ཞེས་སོ། །ཡོན་ཏན་རིན་པོ་ཆེའི་མཛོད་ལས། རིག་པ་འཛིན་པའི་སྡེ་སྣོད་སྤྱི་གཏན་ལ་ཕབ་པའི་ཚོམས་ཏེ་ལེའུ་བཅུ་པའི་འགྲེལ་པའོ། །