ཤོག་ལྷེབ་ ༣༠༡ ནས་ ༣༦༤ བར།
ཡིན་ནོ། །ནམ་མཁའི་རྡོ་རྗེ་ནི་སྙིང་ཁའི་མི་ཤིགས་པའོ། །ཕྱེད་ཅེས་པ་ནི་སྲོག་མེད་ཀྱི་ཡི་གེ་ཡི་གེ་ཕྱེད་དུ་བཤད་ལ་རྡོ་རྗེ་འཕྲེང་བ་ལས། དེ་ནས་དབྱངས་མེད་ཡི་གེ་ཧ། །ཞེས་གསུངས་པ་ལྟར། དབྱངས་སྲོག་ཏུ་མེད་པའི་ཡི་གེ་ཧའམ་ཨ་ཐུང་ངོ༌། །དེ་དང་གཅིག་ཏུ་སྦྱོར་བ་ནི་རྡོར་བཟླས་ཀྱི་མཐུས་མཐར་རླུང་རྣམས་དེར་ཐིམ་པའོ། །དེ་ནི་འོད་ཟེར་ལྔར་འགྱུར་ཞེས་པ་ནི་རྡོར་བཟླས་བྱེད་པ་ན་མི་ཤིགས་པ་དེ་ལས་ནི་འོད་ཟེར་ལྔ་པ་ཅན་གྱི་རླུང་ལྡང་བ་དང་འཇུག་པ་དང་གནས་པར་བྱེད་པའོ། །དེ་ལྟར་ན་ཕྱག་རྒྱ་གཅིག་པའི་ལྷ་བསྒོམས་པས་རྣམ་སྣང་དང་རྡོ་རྗེ་ཆོས་དང་རྡོ་རྗེ་ཐུགས་དང་འདྲ་བར་འགྱུར་བར་གསུངས་པའི་ངེས་དོན་ནི་རྡོར་བཟླས་བྱ་བའི་ཡུལ་རླུང་བཞི་དང༌། གཞི་གང་ལ་བརྟེན་ནས་རྡོར་བཟླས་བྱེད་པ་སྙིང་ཁའི་མི་ཤིགས་པ་དང་ཇི་ལྟར་བྱེད་པའི་ཚུལ་ཡི་གེ་གསུམ་དང་སྦྱར་ཏེ་བྱས་པའི་མཐུས། མཐར་རླུང་རྣམས་མི་ཤིགས་པ་ལ་སྡུད་པར་གསུངས་པས་ཟབ་མོ་རྡོ་རྗེའི་བཟླས་པ་ལ་ངེས་པ་ཤིན་ཏུ་བརྟན་པར་བྱེད་པའི་ཐབས་སུ་ཤེས་པར་གྱིས་ཤིག ༈ །འོད་ཟེར་འབར་བའི་ཡི་གེ་ཐླ່ཱ་ཞེས་སོགས་ཀྱི་སྐབས་སུ་བསྐྱེད་རིམ་པས་མངོན་ཤེས་སྒྲུབ་པའི་ཚུལ་གཉིས་བཤད་པ་ནི་བསྐྱེད་རིམ་ཕྲ་རགས་གཉིས་ཀ་མཐར་ཕྱིན་ནས་སྤྱོད་པ་བྱས་པའི་འོག་ཏུ་ལས་སྒྲུབ་པ་ཡིན་ནོ། །འདི་རྒྱས་པའི་ལས་སུ་བྱ་དགོས་པར་མངོན་པས་ལས་དེའི་སྒྲུབ་ཚུལ་དང་ཕལ་ཆེར་མཐུན་པར་བྱ་ལ། ལྷའི་རྣལ་འབྱོར་ནི་རང་གི་ལྷའི་རྣལ་འབྱོར་ལ་འདོད་པ་
ཡོད་ཀྱང༌། རྡོ་རྗེ་འཆང་གི་རྣལ་འབྱོར་གྱིས་སྒྲུབ་པ་འགྲེལ་པའི་དགོངས་པའོ། །ས་གང་ལ་བརྟེན་ནས་མངོན་ཤེས་སྒྲུབ་པ་ནི། མཛོད་རྩ་འགྲེལ་ལས། བསམ་གཏན་དང་པོའི་ཉེར་བསྡོགས་དང༌། དང་པོའི་དངོས་གཞི་ཁྱད་པར་ཅན་ལ་བརྟེན་ནས་དབང་པོ་རྟུལ་པོས་མངོན་ཤེས་སྒྲུབ་ན་ལམ་ཡང་དཀའ་ལ་མངོན་ཤེས་ཀྱང་བུལ་བ་དང༌། ཡང་ས་དེ་གཉིས་ལ་བརྟེན་ནས་དབང་པོ་རྣོན་པོས་མངོན་ཤེས་སྒྲུབ་ན་ལམ་དཀའ་ལ་མངོན་ཤེས་མྱུར་བ་དང༌། དང་པོའི་དངོས་གཞི་ཙམ་པོ་དང༌། བསམ་གཏན་གཞན་གསུམ་གྱི་དངོས་གཞི་ལ་བརྟེན་ནས་དབང་པོ་རྟུལ་པོས་མངོན་ཤེས་སྒྲུབ་ན་ལམ་སླ་ལ་མངོན་ཤེས་བུལ་བ་དང༌། ཡང་ས་དེ་བཞི་ལ་བརྟེན་ནས་དབང་པོ་རྣོན་པོས་མངོན་ཤེས་སྒྲུབ་ན་ལམ་ཡང་སླ་ལ་མངོན་ཤེས་ཀྱང་མྱུར་བའི་མུ་བཞི་བཤད་ཅིང༌། མངོན་ཤེས་ཀྱང་མངོན་པ་ནས་སྣ་ལྕེ་ལུས་གསུམ་གྱི་ཤེས་པས་ཕྲད་ནས་ཡུལ་འཛིན་པས་དེ་གསུམ་ལ་མངོན་ཤེས་མི་སྒྲུབ་པས། མིག་རྣའི་ཤེས་པ་ལ་བརྟེན་ནས་མིག་དང་རྣ་བའི་མངོན་ཤེས་སྒྲུབ་པར་བཤད་དོ། །སྔགས་ཀྱི་གཞུང་ཚད་ལྡན་དུ་མ་ནས་དབང་ཤེས་ལྔ་ཀའི་མངོན་ཤེས་སྒྲུབ་པར་གསུངས་སོ། །དེ་ལྟར་མི་མཐུན་པ་གཉིས་འོང་བ་ནི་ལམ་འདིར་བསྐྱེད་རིམ་མཐར་ཕྱིན་པ་དང༌། སྤྱོད་པ་བྱས་པའི་མཐུས་ལྷ་རྣམས་ཀྱིས་ལས་དེ་ལྟར་འགྲུབ་པའི་ནུས་ལྡན་དུ་བྱིན་གྱིས་རློབ་པ་ཡོད་ལ། མངོན་པ་བ་སོགས་ལ་དེ་མེད་པས་རྒྱུ་ཁྱད་པར་ཅན་ཚང་མ་ཚང་གི་དབང་གིས་མི་མཐུན་པར་བྱུང་ངོ༌། །རྫོགས་རིམ་ལ་ཡང་རླུང་འབྱོངས་བ་ལ་
སོགས་པའི་དབང་གིས་མངོན་ཤེས་ལྔ་སྒྲུབ་པ་ཡིན་པས་རྒྱུ་ལ་མཆོག་དམན་གྱི་ཁྱད་པར་ཤིན་ཏུ་ཆེའོ། །སོ་སོ་སྐྱེ་བོའི་སྐབས་སུ་བསམ་གཏན་གྱི་དངོས་གཞི་རྒྱུད་ལ་སྐྱེད་ན་འདོད་པའི་ཉོན་མོངས་མངོན་གྱུར་སྤངས་པ་དགོས་ལ། དེ་ཡང་ཞི་རགས་ཀྱི་རྣམ་པ་ཅན་གྱི་ལམ་སྒོམ་པ་མེད་ན་མི་འགྲུབ་པ་ནི་འདིར་ཡང་འདྲ་ལ། རྒྱུད་སྡེ་བཞི་ཀའི་ལམ་དུ་ཞི་རགས་ཀྱི་རྣམ་པ་ཅན་གྱི་ལམ་བསྒོམས་ནས་འདོད་ཡོན་ལ་ཆགས་པ་དང་བྲལ་བར་བྱེད་ཚུལ་མ་བཤད་ལ། ཁྱད་པར་དུ་དབང་པོ་གཉིས་སྦྱོར་གྱི་ཆགས་པ་ལམ་དུ་བྱེད་པ་བླ་མེད་ཀྱི་སྐབས་འདིར་ཞི་རགས་ཀྱི་རྣམ་པ་ཅན་གྱི་ལམ་སྒོམ་པ་གོལ་ས་ཡིན་པས་མི་འདོད་དོ། །དེ་ལྟ་ནའང་སྒོམ་བྱུང་གི་མངོན་ཤེས་མཚན་ཉིད་པ་རྒྱུད་ལ་སྐྱེད་པ་ལ། སྔོན་དུ་བསམ་གཏན་དང་པོའི་ཉེར་བསྡོགས་ཀྱིས་བསྡུས་པའི་ཞི་གནས་མཚན་ཉིད་ཚང་བ་ཅིག་ཐོབ་དགོས་མོད་ཀྱང༌། དེ་ནི་ལམ་འདིའི་རིམ་པ་དང་པོའི་ཏིང་ངེ་འཛིན་ཤིན་ཏུ་བརྟན་པ་ཐོབ་པའི་སྐབས་སུ་སྐྱེ་བས་དེ་ལ་རྟེན་ནས་མངོན་ཤེས་སྒྲུབ་པ་ཡིན་ཏེ། དང་པོའི་ཉེར་སྡོགས་ཀྱིས་བསྡུས་པའི་ཞི་གནས་ཀྱི་ཏིང་ངེ་འཛིན་རྫོགས་པར་སྐྱེད་ཚུལ་དང༌། ཞི་གནས་གྲུབ་པའི་ཚད་རྣམས་ཐེག་པ་ཐུན་མོང་གི་ལམ་གྱི་རིམ་པར་རྒྱས་པར་བཤད་ཟིན་ཏོ། །མདོ་སྡེ་རྒྱན་ལས། ཇི་ལྟར་རྣམ་གནས་ཡིད་ལ་བྱེད་པ་ལས། །མཐུ་འགྲུབ་པ་ཡི་དམ་པ་ཐོབ་པར་འགྱུར། །ཞེས་མཐུ་སྟེ་མངོན་ཤེས་འགྲུབ་པ་ལ་རང་རང་གི་རྣམ་གནས་
དགོས་པར་གསུངས་པ་ནི། བསྐྱེད་རིམ་པའི་མངོན་ཤེས་སྒྲུབ་པ་དང་རྫོགས་རིམ་པས་ཡན་ལག་གི་རླུང་གི་རྡོར་བཟླས་ཀྱིས་མངོན་ཤེས་སྒྲུབ་པ་གཉིས་ཀ་ལ་ཡང་དགོས་ལ་དེ་ཡང་རྒྱུད་འགྲེལ་གྱི་མཆན་དུ་བཤད་ཟིན་ཏོ། ༈ །རྡོ་རྗེ་ཆེན་པོ་རྩེ་ལྔ་པ་ཞེས་སོགས་ཀྱི་སྐབས་སུ་རྫོགས་རིམ་པས་དབང་པོ་སྒོ་ལྔའི་མངོན་ཤེས་ལྔ་ཡན་ལག་གི་རླུང་གི་རྡོར་བཟླས་ཀྱིས་སྒྲུབ་པར་བཤད་པའི་སྐབས་ནི་ཁ་ཅིག་སློབ་པའི་ཟུང་འཇུག་ཐོབ་པ་ལ་འཆད་མོད་ཀྱང༌། ལྷན་ཅིག་སྐྱེས་པའི་བདེ་བ་ཆེན་པོ་དང་དེ་ཁོ་ན་ཉིད་ཀྱི་ལྟ་བ་གཉིས་དབྱེར་མེད་དུ་བསྐྱངས་པ་ལ་གོམས་པ་ཉིད་ཀྱི་མཐུས་མངོན་ཤེས་ལྔ་འདྲེན་པར་གཞུང་ཚད་ལྡན་མང་པོ་ནས་གསུངས་པ་ནི་དོན་གྱི་ལྷན་སྐྱེས་མངོན་དུ་གྱུར་པའི་མཇུག་ཐོགས་སུ་ངེས་པར་བཞག་དགོས་པས། ལམ་འདིའི་ས་ཐོབ་པ་དེས་མངོན་ཤེས་ལྔ་ལོགས་སུ་སྒྲུབ་མི་དགོས་པར་སེམས་སོ། །དེས་ན་སྒྱུ་ལུས་ཐོབ་པ་ནས་རླུང་གི་བཟླས་པའི་མཐུས་མངོན་ཤེས་རྣམས་སྒྲུབ་ནུས་པར་མངོན་ནོ། །རྡོར་སེམས་ཀྱི་སྒྲུབ་ཐབས་ལས། སངས་རྒྱས་དཀྱིལ་འཁོར་དབུས་གནས་པར། །རྡོ་རྗེ་མི་བསྐྱོད་རབ་ཏུ་བསྒོམ། །སྙིང་ཁར་ཡི་གེ་ཧཱུཾ་བསྒོམས་ནས། །སེམས་ནི་ཐིག་ལེར་གྱུར་པར་གཞག །ཅེས་པ་བཞི་བསྐྱེད་རིམ་པའི་སེམས་དཔའ་གསུམ་རྩེགས་ཀྱི་སྐབས་ཀྱི་ཏིང་ངེ་འཛིན་སེམས་དཔའ་ལ་སྦྱར་བ་དང༌། འཕགས་པའི་མདོ་བསྲེ་ལས། རྐང་པ་ཕྱི་མ་གཉིས་བསྐྱེད་རིམ་པའི་ཏིང་ངེ་འཛིན་སེམས་དཔའ་ལ་སྦྱར་བ་དང༌། འགྲེལ་པར་ཚིགས་
བཅད་དེ་རྫོགས་རིམ་པའི་རིལ་འཛིན་གྱི་བསམ་གཏན་གྱི་སྐབས་དང༌། ཧཱུཾ་ཡིག་ཡེ་ཤེས་སེམས་དཔའ་དང༌། དེའི་ཐིག་ལེ་ཏིང་ངེ་འཛིན་སེམས་དཔའ་དང༌། དེའི་ཚེ་རང་མི་བསྐྱོད་པར་སྒོམ་པར་བཤད་ཅིང༌། བསྒྲུབ་ཐབས་ཀྱི་སེམས་དཔའ་སུམ་བརྩེག་གི་སྐབས་སུ་རང་རྡོ་རྗེ་འཆང་དུ་སྒོམ་པར་བཤད་པ་ཡང་མི་འགལ་བ་ནི་སྔར་མང་དུ་བཤད་པ་བཞིན་དུ་ཤེས་པར་བྱ་ཞིང༌། རྐང་པ་དང་པོ་གཉིས་ཀྱི་དོན་ནི་རང་དང་ཁམས་གསུམ་པའི་སེམས་ཀྱི་རང་བཞིན་དབྱེར་མེད་པར་ཤེས་པར་བྱེད་པ་ཡིན་ལ། དེ་ཉིད་སྒྲུབ་ཐབས་ཀྱི་སྐབས་སུ་མི་འགལ་ལ་དེ་ལྟར་སྒོམ་པ་དེ། མི་བསྐྱོད་པ་ཞལ་ཕྱག་གི་རྣམ་པ་ཅན་དུ་སྒོམ་པ་མིན་ཡང༌། དེའི་མཚོན་དོན་ཐུགས་ཀྱི་རྡོ་རྗེ་ཡིན་པ་ལ་དགོངས་ནས་དེ་ལྟར་གསུངས་སོ། །ལེའུ་བཅུ་གཅིག་པའི་མཐའ་གཅོད་དོ།། ༒ །།ཆོས་རྣམས་རང་བཞིན་དག་པ་ལས། །རོལ་མོ་འདི་དག་རབ་ཏུ་བསྒོམ། །ཞེས་པའི་འོག་ཏུ། ལུང་སྟོན་ལས། མ་འོངས་པའི་སྐྱེ་བོ་རྒྱུད་དོན་མ་རྟོགས་པར་རྒྱུད་ཀྱི་དོན་ལ་ལོག་པར་འཇུག་པ་རྣམས་ཀྱི་ཀུན་སྤྱོད་མང་དུ་ཞུས་པའི་ལན་དུ། རྡོ་རྗེ་ཐལ་མོ་ལས་བརྩམས་པའི་ངེས་དོན་མང་དུ་གསུངས་པའི་གཙོ་བོ་རྣམས་ནི་རྣམ་གཞག་གི་རྣམ་བཤད་དུ་རྒྱས་པར་བཤད་ཟིན་ཏོ། །དབྱངས་གསལ་གྱི་ཡི་གེ་ལས་བརྩམས་པའི་དགོངས་བཤད་དང་ངེས་དོན་གྱི་བཤད་པ་མང་དུ་འབྱུང་བ་རྣམས་ནི་ཁ་ཅིག་གོ་སླ་ཞིང་ཁ་ཅིག་ཞིབ་
ཏུ་མ་བཤད་ན་མི་རྟོགས་ལ། ཞིབ་ཏུ་བཤད་ན་ཚིག་ཧ་ཅང་མངས་བས་འཇིགས་ནས་མ་བྲིས་སོ། །རྒྱུད་འདིར་འོད་གསལ་འདྲེན་པའི་ནང་གི་ཐབས་ལ་ལེའུ་འགའ་ཟུང་མ་གཏོགས་པ། ལེའུ་ཐམས་ཅད་དུ་ཡི་གེ་གསུམ་གྱི་རྡོ་རྗེ་བཟླས་པ་ཤིན་ཏུ་མང་བར་གསུངས་པའི་གནད་རྣམས་ཁོང་དུ་ཆུད་པར་བྱའོ། །ལེའུ་འདིར་རྒྱུད་འགྲེལ་དུ་ཡང་བཤད་རྒྱུད་འདི་ཆེར་མ་དྲངས་ལ། རྒྱུད་ཕྱི་མའི་སྦྱོར་དྲུག་གི་སྐོར་རྣམས་མང་དུ་དྲངས་ཤིང་བཤད་པ་ཡང་ཞིབ་ཏུ་མཛད་པའི་སྐབས་སུ། བསྐྱེད་རིམ་གྱི་བསྙེན་བསྒྲུབ་ཡན་ལག་བཞི་དང་རྫོགས་རིམ་གྱི་བསྙེན་བསྒྲུབ་ཡན་ལག་བཞི། བསྙེན་པ་མ་གཏོགས་པ་གསལ་བར་མ་གསུངས་ཤིང༌། རྒྱུད་ཕྱི་མ་ཉིད་ལས་ཀྱང་རྟོགས་དཀའ་བར་ཡོད་པ་གནད་ཆེ་བར་མཐོང་ནས་ནཱ་རོ་པའི་འགྲེལ་པ་ལ་བརྟེན་ཏེ་མཆན་དུ་གསལ་བར་བཤད་དོ། །འཕགས་ལུགས་ལ་རྡོ་རྗེ་འཕྲེང་བ་ལ་བརྟེན་པའི་རིམ་ལྔ་དང་ལུས་དབེན་གྱི་རྫོགས་རིམ་ནི་གཞུང་ཕྲན་རྣམས་ལས་གསལ་བར་འཆད་པས་རྟོགས་སླ་བར་སྣང་ལ། རྒྱུད་ཕྱི་མ་ལ་བརྟེན་པའི་རྫོགས་རིམ་སྦྱོར་བ་ཡན་ལག་དྲུག་ནི་རྒྱུད་འགྲེལ་འདིར་བཤད་པ་མ་གཏོགས་པ། ཡབ་སྲས་ཀྱི་གཞུང་གཞན་ནས་མི་འབྱུང་ཞིང༌། ལུས་དབེན་སོགས་རིམ་པ་དྲུག་ཏུ་སྦྱོར་བ་ཡན་ལག་དྲུག་འདུ་ཚུལ་ཡང་རྟོགས་དཀའ་བར་ཡོད་པས་འདིར་ཅུང་ཟད་ཅིག་བཤད་པར་བྱའོ། །འདིར་སྡུད་བྱེད་ནི་ལུས་དབེན་དང་བཅས་
པའི་རིམ་པ་དྲུག་གོ །བསྡུ་བྱ་ནི་སྦྱོར་བ་ཡན་ལག་དྲུག་ཡིན་ལ། དེ་ལ་ཡང་བྱང་ཆུབ་སེམས་དཔའི་འགྲེལ་པ་སྐོར་གསུམ་གྱི་ལུགས་དང༌། འཇམ་དཔལ་ཞལ་ལུང་རྗེས་འབྲང་དང་བཅས་པའི་ལུགས་དང༌། སྙིམ་པའི་མེ་ཏོག་གི་ལུགས་དང་མན་ངག་སྙེ་མའི་ལུགས་དང༌། བདེ་མཆོག་ལཱུ་ཨི་པའི་དབང་དུ་བྱས་ནས་དེ་བཞིན་གཤེགས་པའི་རྡོ་རྗེས་བཤད་པའི་སྦྱོར་དྲུག་ལ་སོགས་པ་ནི་མིང་འདྲ་ཡང་དོན་མི་མཐུན་པ་དུ་མ་ཞིག་ཡོད་པས་འདིར་དེ་རྣམས་ཀྱི་སྡུད་ཚུལ་སྟོན་པ་མིན་གྱི། རྒྱུད་ཕྱི་མའི་གཞུང་གི་དོན་སྒྲོན་གསལ་ལས་བཤད་པའི་ཡན་ལག་དྲུག་གི་སྡུད་ཚུལ་སྟོན་པ་ཡིན་ནོ། །འདི་ལ་འགྲེལ་པ་ཟླ་འོད་ལས་མདོར་བསྡུས་ཀྱི་རིམ་པ་བསྐྱེད་རིམ་གྱིས་སོར་བསམ་གཉིས་བསྡུས་པའི་སོར་སྡུད་ནི་ལྷ་བསྒོམ་པ་སྟེ། དེ་ཀུན་རྫོབ་དང་དོན་དམ་པའི་ཚུལ་གྱིས་བརྟག་པ་ལ་རྟོག་དཔྱོད་དང༌། དེ་ནས་དེ་ཁོ་ན་ཉིད་ལ་འཇུག་པ་ལ་མངོན་པར་ཕྱོགས་པས་དགའ་བདེ་དང༌། སྟོང་ཉིད་གཅིག་པུ་ལ་སེམས་གཏད་པ་ནི་སེམས་རྩེ་གཅིག་པ་སྟེ་བསམ་གཏན་གྱི་ཡན་ལག་ལྔའོ། །གཞོམ་དུ་མེད་པ་ལ་རླུང་བསྡུས་པ་སྲོག་རྩོལ་དུ་བཤད་ནས་རིམ་ལྔའི་འདིས་བསྡུས་མ་བཤད་ཀྱང་རྡོར་བཟླས་སུ་བསྡུའོ། །སྒྱུ་མའི་རང་བཞིན་རྡོ་རྗེ་འཛིན་པའི་སྐུ་འོད་གསལ་གྱི་བདག་ཉིད་ནི་འཛིན་པའོ་ཞེས་བཤད་པས་འཛིན་པ་ནི་སྒྱུ་ལུས་དང་འོད་གསལ་དུ་བསྡུའོ། །འོད་གསལ་གྱི་རྗེས་སུ་སྐད་ཅིག་གིས་རྡོ་རྗེ་
འཛིན་པའི་སྐུར་རྫོགས་པ་ནི་རྗེས་དྲན་དང༌། དེ་ཉིད་ཟུང་འཇུག་གི་བདག་ཉིད་དུ་སྒོམ་པ་ནི་ཏིང་ངེ་འཛིན་ཏེ་ཡན་ལག་ཐ་མ་གཉིས་ཟུང་འཇུག་ཏུ་བཤད་དོ། །འདི་ནི་སྒྲོན་གསལ་གྱི་རྗེས་སུ་འབྲང་བ་བསྡུས་ཤིང་སྙིང་པོར་གྱུར་པའི་བཤད་པ་ཡིན་ཞེས་གསུང་ངོ༌། །སྒྲོན་མ་རབ་གསལ་ལས། སོར་བསམ་གཉིས་སེམས་དབེན་དང་སྲོག་རྩོལ་རྡོར་བཟླས་དང༌། འཛིན་པ་འོད་གསལ་དང༌། རྗེས་དྲན་དང་ཏིང་ངེ་འཛིན་ཟུང་འཇུག་ཏུ་འདུས་པར་བཤད་དེ། སྙིང་གི་མེ་ལོང་ཡང་དེ་དང་འདྲའོ། །དེ་གཉིས་ཀྱང་སྒྲོན་གསལ་གྱིས་བཤད་པའི་སྦྱོར་དྲུག་རིམ་ལྔར་སྡུད་ལུགས་སོ། ༈ །སྔོན་གྱི་འགོས་ལུགས་པ་མཁས་པ་གླན་གྱིས། ཡན་ལག་དྲུག་ནི་དེ་ཁོ་ན་ཉིད་ཀྱི་ཏིང་ངེ་འཛིན་དང་དེ་དང་རྗེས་སུ་མཐུན་པའི་སྤྱོད་པ་གཉིས་སུ་འདུ་ལ། སོར་སྡུད་ཀྱི་སྒྱུ་ལུས་ཀྱི་སྐབས་ཀྱི་སྤྱོད་པ་དང༌། ཡན་ལག་ལྷག་མ་ལྔས་ཏིང་ངེ་འཛིན་སྟོན་ནོ། །དེ་ལ་བསམ་གཏན་གྱི་ཡན་ལག་རྟོག་དཔྱོད་གཉིས་ཀྱིས་ལུས་དབེན་དང༌། དགའ་བས་ལུས་དབེན་གྱི་ཕན་ཡོན་དང༌། སྲོག་རྩོལ་གྱིས་ངག་དབེན་དང༌། བདེ་བས་དེའི་ཕན་ཡོན་དང༌། སེམས་རྩེ་གཅིག་པས་སེམས་དབེན་དང༌། སངས་རྒྱས་ཀུན་དངོས་ཞེས་པ་བསམ་གཏན་གྱི་ཕན་ཡོན་གྱིས་སྒྱུ་ལུས་དང༌། འཛིན་པས་འོད་གསལ་དང༌། རྗེས་དྲན་དང་ཏིང་ངེ་འཛིན་གྱིས་ཟུང་འཇུག་བསྟན་པར་འདོད་དེ། འདིའང་སྒྲོན་གསལ་གྱི་བཤད་པའི་སྦྱོར་དྲུག་གི་བསྡུ་ལུགས་སོ། །བོད་ཀྱི་ཕྱིས་ཀྱི་མཁས་པ་ཁ་ཅིག །ཨ་བྷྱས་སོར་བསམ་
གཉིས་བསྐྱེད་རིམ་དུ་བཤད་པ་མི་འཐད་དེ། རྒྱུད་ཕྱི་མ་ལས། བསྐྱེད་རིམ་དང་འབྲེལ་བའི་བསྙེན་པ་རྡོ་རྗེ་བཞི་ཐུན་མོང་གི་དངོས་གྲུབ་སྒྲུབ་བྱེད་དུ་བཤད་ལ། ཡན་ལག་དྲུག་གིས་བསྒྲུབས་པ་ལས་གཞན་དུ་བསྒྲུབས་ན་མཆོག་མི་འགྲུབ་ཅེས་གསུངས་པས། ཡན་ལག་དྲུག་མཆོག་སྒྲུབ་བྱེད་ཀྱི་བསྙེན་པ་ཐུན་མོང་མ་ཡིན་པ་དང༌། བསྐྱེད་རིམ་མཆོག་སྒྲུབ་བྱེད་མ་ཡིན་པར་བཤད་པ་དང་འགལ་ལོ། །གླན་གྱིས། སོར་སྡུད་ཀྱིས་སྤྱོད་པ་དང་བསམ་གཏན་གྱིས་ལུས་དབེན་བསྟན་ཞེས་པ་ཤིན་ཏུ་མི་འཐད་དེ། མཆོག་སྒྲུབ་པའི་དང་པོ་ཉིད་དུ་སྤྱོད་པ་འོང་བ་གོ་རིམ་འགལ་བའི་ཕྱིར་དང༌། ལུས་དབེན་ལ་ཤེས་དང་ཤེས་བྱ་བྱུང་ཟད་ཀྱི་ཕན་ཡོན་མི་འོང་བའི་ཕྱིར་རོ། །དེས་ན་དྲི་མེད་འོད་ལས། བདག་བྱིན་བརླབ་པ་དག་ནི་སྟོང་པ་ལ། །ཁམས་གསུམ་པོ་ནི་མཐོང་བར་འགྱུར་བའི་མཚན། །ཞེས་དང༌། ཕྱག་རྡོར་བསྟོད་འགྲེལ་ལས། འདིར་རང་བྱིན་གྱིས་བརླབ་བ་ཞེས་བྱ་བ་ནི། །སོ་སོར་སྡུད་པས་དུ་བ་ལ་སོགས་པ་ཀུན་རྫོབ་ཀྱི་བདེན་པ་མཐོང་བའོ། །ཞེས་གསུངས་པས། སོར་བསམ་གཉིས་སྒྱུ་ལུས་སུ་འདུ། སྲོག་རྩོལ་ནི་རྡོ་རྗེ་བཟླས་པ། འཛིན་པ་ནི་འོད་གསལ། རྗེས་དྲན་ནི་སྔར་སོར་སྡུད་ཀྱི་སྐབས་སུ་མཐོང་བ་དང་འདྲ་བར་དག་པའི་གཟུགས་བརྙན་མཐོང་བའི་ཆ་ནས་སྒྱུ་ལུས། དེའི་དུས་སུ་ཞུ་བདེ་ཉམས་སུ་མྱོང་བའི་ལམ་གྱི་ཆ་ནས་སེམས་དབེན་སྟེ། སེམས་དབེན་ནི་སྣང་མཆེད་ཐོབ་
གསུམ་ལམ་དུ་བྱེད་པ་ཡིན་ལ། དེ་ནི་དགའ་བ་གསུམ་དང་རྣམ་གྲངས་ཡིན་པའི་ཕྱིར་རོ། །ཏིང་ངེ་འཛིན་ནི་ཟུང་འཇུག་གོ་ཞེས་འཆད་དོ། །འདིས་ནི་དུས་འཁོར་བའི་སྦྱོར་དྲུག་རིམ་ལྔ་སྡུད་ལུགས་བཤད་དོ། །ལུགས་དེ་དག་གི་འཐད་མི་འཐད་དཔྱད་པ་ལ། འགྲེལ་བྱེད་རྣམས་ཀྱི་ལུགས་འཐད་མི་འཐད་དཔྱད་ན། ཟླ་འོད་ལས་སོར་བསམ་གཉིས་བསྐྱེད་རིམ་དུ་བསྡུས་པ་འགོག་པ་ལ། བསྐྱེད་རིམ་ཐུན་མོང་གི་དངོས་གྲུབ་དང་ཡན་ལག་དྲུག་མཆོག་གི་སྒྲུབ་བྱེད་དུ་གསུངས་པས་མི་གནོད་དོ། །གནོད་ན་ལམ་གཅིག་གིས་དངོས་གྲུབ་གཉིས་ཀ་སྒྲུབ་པ་འགལ་བར་འགྱུར་ལ། དེ་ལྟ་ན་རྫོགས་རིམ་གྱི་ལམ་གྱིས་ཐུན་མོང་གི་དངོས་གྲུབ་མི་འགྲུབ་པར་འགྱུར་རོ། །ཡན་ལག་དྲུག་གིས་བསྒྲུབས་པ་ལས་གཞན་དུ་བསྒྲུབས་ན་མཆོག་མི་འགྲུབ་ཅེས་པས་ནི། ཡན་ལག་དྲུག་མཆོག་གིས་བསྒྲུབས་པ་ལས་གཞན་དུ་སྟེ་དེས་མ་བསྒྲུབས་ན་མཆོག་མི་འགྲུབ་པར་སྟོན་པ་ཡིན་གྱི། ཡན་ལག་དྲུག་ལས་གཞན་པའི་ལམ་མཆོག་སྒྲུབ་བྱེད་མིན་པར་སྟོན་པ་གཏན་མིན་ནོ། །བསྐྱེད་རིམ་གཅིག་པུས་བསྒྲུབས་པས་མཆོག་མི་འགྲུབ་ཀྱང༌། བསྐྱེད་རིམ་མཆོག་གི་དངོས་གྲུབ་ཀྱི་རྒྱུར་འགྱུར་བ་ཅི་ཞིག་འགལ་ཏེ་གཞན་དུ་ན་རྫོགས་རིམ་ལའང་མཚུངས་པ་དང༌། རྫོགས་རིམ་གྱི་ཡན་ལག་དྲུག་རེ་རེས་ཀྱང་མི་འགྲུབ་པས། དེ་རྣམས་ཀྱང་མཆོག་སྒྲུབ་པའི་ལམ་མ་ཡིན་པར་འགྱུར་རོ། །བསྐྱེད་
རིམ་མཆོག་སྒྲུབ་བྱེད་དུ་གཏན་མི་རུང་ན་བསྙེན་པ་ལ་ཐུན་མོང་དང་མཆོག་གི་བསྙེན་པ་གཉིས་གསུངས་པའི་ཐུན་མོང་གི་དོན་ལ་རྒྱུ་ཐུན་མོང་བ་དངོས་གྲུབ་གཉིས་ཀའི་རྒྱུར་རང་གིས་བཤད་པ་དང་ཡང་ཇི་ལྟར་མི་འགལ་ལ། བཅོམ་ལྡན་འདས་མི་བསྐྱོད་པ་དང་འཁོར་ལོ་བདེ་མཆོག་སོགས་ཀྱི་སྒྲུབ་ཐབས་སུ་བཤད་པའི་དོན་ཀྱང་མ་ངེས་པ་དང༌། དེ་དག་བསྒོམས་པའི་ཕན་ཡོན་གྱི་སྐབས་སུ་སངས་རྒྱས་འཐོབ་པའི་ཐབས་སུ་གསུངས་པ་ཐམས་ཅད་དང་འགལ་བར་འགྱུར་རོ། །གལ་ཏེ་ལམ་གཉིས་ཀ་དངོས་གྲུབ་གཉིས་ཀའི་ཐབས་ཡིན་ན། དེ་གཉིས་ལ་ཐུན་མོང་དང་མཆོག་སྒྲུབ་བྱེད་སོ་སོར་གསུངས་པ་ཅི་ཡིན་སྙམ་ན། རྫོགས་རིམ་ལ་མ་ལྟོས་པར་ཡང་བསྐྱེད་རིམ་གྱིས་ཐུན་མོང་གི་དངོས་གྲུབ་འགྲུབ་པས་ཐུན་མོང་གི་དངོས་གྲུབ་སྒྲུབ་བྱེད་དང༌། བསྐྱེད་རིམ་རྫོགས་རིམ་གྱི་རྟོགས་པ་སྐྱེ་བའི་དགེ་རྩ་སྨིན་བྱེད་ཡིན་གྱི་མཆོག་སྒྲུབ་པའི་ལམ་གྱི་གཙོ་བོ་རྫོགས་རིམ་ཡིན་པས་དེ་ལ་མཆོག་སྒྲུབ་བྱེད་དུ་གསུངས་ཀྱི་སྒྲུབ་བྱེད་གཉིས་འགལ་བ་མིན་ནོ། །སོར་བསམ་ནི་ཚད་ལྡན་གཞན་གྱི་རྫོགས་རིམ་གྱི་སྒོ་ནས་བཤད་ལ། ཞལ་ལུང་གི་དགོངས་པས་བསྐྱེད་རིམ་ལའང་བཤད་དགོས་པར་སྣང་བས། སྤྱིར་སོར་བསམ་རིལ་པོ་བསྐྱེད་རིམ་མམ་རྫོགས་རིམ་དུ་མི་བྱའི་ཆ་གཉིས་ཀ་ཁས་བླང་ངོ༌། །བྱེ་བྲག་ཏུ་རང་གི་གཞུང་གང་ནས་རིམ་གཉིས་གང་གི་ཆ་བཤད་པ་དེ་བཞིན་དུ་བྱ་
སྟེ། དེ་ལྟར་ན་འཕགས་ལུགས་ལྟར་ན་རྫོགས་རིམ་གྱི་ཆ་བཤད་པར་བྱས་ན་ལེགས་པས། ལུགས་འདི་ལ་སོར་བསམ་གཉིས་བསྐྱེད་རིམ་དུ་འཇོག་པ་མིན་ནོ། །འཛིན་པས་སྒྱུ་ལུས་བསྟན་པ་དང་འོད་གསལ་གྱི་རྗེས་སུ་སྐད་ཅིག་གིས་རྡོ་རྗེ་འཛིན་པའི་སྐུ་རྫོགས་པ་རྗེས་དྲན་དང༌། རྗེས་དྲན་དེ་ཉིད་ཟུང་འཇུག་གི་བདག་ཉིད་དུ་སྒོམ་པ་ཏིང་ངེ་འཛིན་གྱི་ཡན་ལག་ཏུ་འཆད་པ་ནི་སྒྲོན་གསལ་དང་མི་མཐུན་ནོ། །སྒྲོན་མ་རབ་གསལ་ལས། ཡུལ་ལ་སྤྱོད་པའི་དུས་སུ་དབང་པོ་སོགས་གསུམ་རིགས་ལྔའི་བདག་ཉིད་དོ་ཞེས་རྟོག་པ་རྟོག་པ་དང༌། དེ་རྣམས་ཡེ་ཤེས་ལྔའི་བདག་ཉིད་དོ་ཞེས་རྟོག་པ་དཔྱོད་པ་དང༌། དེ་ཁོ་ན་ཉིད་ལ་མངོན་དུ་གྱུར་པ་ནི་བདག་ཡིན་ནོ་ཞེས་བསམས་པས་དགའ་བའི་ཁྱད་པར་སྐྱེས་པ་དགའ་བ་དང༌། སེམས་ཀྱི་བདེ་བ་དེ་ཐོབ་ནས་ལུས་ཤིན་སྦྱངས་སུ་གྱུར་པ་བདེ་བར་བཤད་ཅིང༌། རྟོག་དཔྱོད་གཉིས་སྣང་བ་དང༌། དགའ་བ་མཆེད་པ་དང༌། བདེ་བ་ཉེར་ཐོབ་ཏུ་བཤད་དེ་སེམས་དབེན་གྱི་ཡེ་ཤེས་གསུམ་ལ་འདོད་པར་སྣང་ངོ༌། །འདི་ནི་ཡེ་ཤེས་གསུམ་ཡེ་ཤེས་རྡོ་རྗེ་ཀུན་ལས་བཏུས་ལས་གསུངས་པའི་དོན་སྤྱོད་བསྡུས་སུ་སེམས་དབེན་གྱི་སྐབས་སུ་བཤད་པའི་དམིགས་པ་གང་ཡིན་པ་དང༌། དེ་ལ་འཛིན་སྟངས་ཀྱི་རྣམ་པ་ཇི་འདྲ་ཞིག་གིས་བཟུང་བའི་ཚུལ་ལེགས་པར་མ་ངེས་པའི་སྐྱོན་ནོ། །སློབ་དཔོན་སྒྲ་དབྱངས་བཅུ་གཅིག་པས། སོར་སྡུད་ལུས་དབེན་གྱི་གཞིར་བཤད་པ་ནི། སྒྲོན་གསལ་ལས། སོར་སྡུད་སྦྱང་བྱ་དང་བསམ་གཏན་དེ་སྦྱོང་བྱེད་དུ་བཤད་པའི་
དོན་དུ་བསམས་སོ། །རང་དབང་ཞེས་པ་གཉིས་ཀྱིས་བསྟན་པའི་འཛིན་པ་སེམས་དབེན་དང༌། སོ་སོར་སྣང་བ་ཞེས་པས་སྒྱུ་ལུས་དང་ཡན་ལག་ཐ་མ་སྟོན་པའི་རྐང་པ་གསུམ་གྱི་བསམ་གཏན་གཉིས་དང༌། ཟུང་འཇུག་ཏིང་ངེ་འཛིན་གྱི་ཡན་ལག་ལས་ཟུར་དུ་འཆད་ཅིང༌། ཟུང་འཇུག་ལས་ལོགས་སུ་ལྷུན་གྲུབ་ཀྱི་ལམ་རྐང་པ་ཐ་མ་གསུམ་གྱིས་བསྟན་པར་འདོད་པ་རྣམས་མི་རིགས་པ་ནི་གཞུང་དེ་རྣམས་ཀྱི་བཤད་པ་འགྲེལ་པ་ལས་གསུངས་པའི་དོན་མཆན་དུ་ཞིབ་ཏུ་བཤད་པ་ལས་ཤེས་ཏེ། སློབ་དཔོན་འདིས་ཀྱང་སྒྲོན་གསལ་ལ་བརྟེན་ནས་བཤད་པར་སྣང་ངོ༌། ༈ །བོད་ཀྱི་བླ་མ་རྣམས་ཀྱི་སྡུད་ཚུལ་འཐད་མི་འཐད་དཔྱད་ན། མཁས་པ་ཁ་ཅིག་གིས་གླན་གྱིས་སོར་སྡུད་ཀྱིས་སྤྱོད་པ་བསྟན་པར་འདོད་པ་འགོག་པ་ན། མཆོག་སྒྲུབ་པའི་ཐོག་མར་སྤྱོད་པ་འོང་བ་གོ་རིམ་འགལ་ཞེས་པ་ནི་རང་ལུགས་ལ་ཡང་མཚུངས་པ་ཡིན་ཏེ། དེ་ལྟར་ན་སོར་བསམ་གཉིས་སྒྱུ་ལུས་སུ་སྟོན་པ་ཡང་མི་འཐད་དེ། མཆོག་སྒྲུབ་པའི་ཐོབ་མར་སྒྱུ་ལུས་འོང་བ་དེ་ལས་ཀྱང་འགལ་བའི་ཕྱིར་རོ། །ཐོག་མར་བཤད་པས་ཐོག་མར་འོང་མི་དགོས། ཞེས་སྨྲ་ན་ནི་སྤྱོད་པ་ལ་ཡང་མཚུངས་སོ། །གོ་རིམ་འགལ་བའི་སྐྱོན་སྟོན་ན་ནི་སྦྱོར་དྲུག་དང་རིམ་ལྔ་གཉིས་འདྲ་བས། སྲོག་རྩོལ་རྡོ་རྗེ་བཟླས་པའི་སྔོན་དུ་སོར་བསམ་སྒྱུ་ལུས་སྐྱེ་བ་དང༌། འཛིན་པ་འོད་གསལ་གྱི་མཇུག་ཏུ་རྗེས་དྲན་གྱི་སེམས་དབེན་དང༌། རིམ་པ་གསུམ་པའི་སྒྱུ་ལུས་སྐྱེ་བ་ཤིན་ཏུ་
ཡང་འགལ་ལོ། །གཞན་ཡང་རིམ་ལྔ་ལ་སྲོག་རྩོལ་གྱི་ལམ་དང་སེམས་དབེན་དང་སྒྱུ་ལུས་སྔ་ཕྱིར་རིམ་ཅན་དུ་སྐྱེ་བར་ངེས་པས་དུས་འཁོར་གྱི་ལུགས་ལའང་སྲོག་རྩོལ་གྱི་རྡོར་བཟླས་དང༌། རྗེས་དྲན་གྱི་སེམས་དབེན་གཉིས་སོར་བསམ་གྱི་སྒྱུ་ལུས་ཀྱི་སྔོན་དུ་འགྲོ་དགོས་པར་འགྱུར་ཞིང༌། རྗེས་དྲན་གྱི་ཆ་གཅིག་འཛིན་པའི་སྔོན་དུ་སྐྱེ་དགོས་པར་འགྱུར་ཏེ། དེ་རྣམས་དོན་གཅིག་ཏུ་ཁས་བླངས་པའི་ཕྱིར་རོ། །འདི་འདྲ་བའི་སྐྱོན་ནི་དོན་གཅིག་ཏུ་བཤད་དུ་མི་རུང་བ་རྣམས་ནན་གྱིས་གཅིག་ཏུ་བཤད་པའི་སྐྱོན་ནོ། །དེ་བཞིན་དུ་སྒྱུ་ལུས་ས་བཅུ་གཅིག་པ། འོད་གསལ་ས་བཅུ་གཉིས་པ། དེ་ཉིད་མོས་སྤྱོད་ཀྱི་ས་ནས་བགྲངས་པས་བཅུ་གསུམ་པར་རང་ཉིད་བཞེད་པས་ས་བཅུ་གཉིས་འཕགས་པའི་ས་ཡིན་ལ། དེ་ལྟ་ནའང་འཕགས་པའི་ས་བཅུ་གཅིག་པའི་སྒྱུ་ལུས་མཆོག་སྒྲུབ་པའི་ཐོག་མར་སོར་སྡུད་ནས་འཐོབ་པ་སོགས་དང༌། དུས་འཁོར་བའི་ཏིང་ངེ་འཛིན་གྱི་ཡན་ལག་སོ་སྐྱེའི་ས་ནས་ཀྱང་འཐོབ་པ་དང་དེ་ཟུང་འཇུག་ཏུ་མཛད་པ་སོགས་ཀྱང་འགལ་བར་མཐོང་ངོ༌། །བསམ་གཏན་གྱིས་ལུས་དབེན་བསྟན་པ་མི་འཐད་པའི་རྒྱུ་མཚན་དུ། ལུས་དབེན་ལ་ཤེས་དང་ཤེས་བྱ་བྱུང་ཟད་ཀྱི་ཕན་ཡོན་མི་འོང་བའི་ཕྱིར་རོ་ཞེས་གསུངས་པ་ནི། ཕྱོགས་སྔ་མ་སྨྲ་བས་ཤེས་དང་ཤེས་བྱ་བྱུང་ཟད་ཀྱི་སེམས་རྩེ་གཅིག་པ་སེམས་དབེན་དུ་འདོད་པར་སྣང་བས་དེ་ལ་སྐྱོན་དེ་མི་འཇུག་གོ །དེའི་ཕྱིར་འཕགས་པ་ཡབ་སྲས་ཀྱིས་བཤད་པ་དང༌། དུས་འཁོར་
གྱི་སྐོར་ནས་བཤད་པའི་བདག་བྱིན་བརླབས་དང་ཀུན་རྫོབ་བདེན་པ་ཞེས་པ་གཉིས་མིང་གཅིག་ཀྱང་དོན་མི་གཅིག་སྟེ། དཔེར་ན་ དྲིལ་བུ 
་ཞབས་ཀྱི་རིམ་ལྔར་སྙིང་ཁར་ཐིག་ལེ་སྒོམ་པ་བདག་བྱིན་བརླབས་སུ་བཤད་པ་བཞིན་ཏེ་དེ་འདྲ་བ་མང་ངོ༌། །དེས་ན་རྒྱུད་ཕྱི་མའི་སྦྱོར་དྲུག་གི་གཞུང་རྣམས་ནཱ་རོ་པས་ཀྱང་རྒྱུད་ཕྱི་མའི་འགྲེལ་པར་སྒྲོན་གསལ་ཇི་བཞིན་དུ་བཤད་ལ། དབང་མདོར་བསྟན་གྱི་འགྲེལ་པར་དུས་འཁོར་བཞིན་དུ་བཤད་དེ། དེ་ལྟར་དོན་གཅིག་ཏུ་བཤད་དུ་མི་རུང་ཡང་དེའི་དོད་ཐུབ་ཇི་ལྟར་ཡིན་དཔྱོད་ན་ནི་ལེགས་ཏེ། དེ་ལྟར་བྱས་ན་རྒྱུད་སོ་སོའི་མན་ངག་གི་མཐའ་ཆོད་པར་འགྱུར་བའི་ཕྱིར་རོ། །འདི་ལ་ཡང་དུས་འཁོར་གྱི་ཡན་ལག་དྲུག་གི་གནད་ཞིབ་ཏུ་བཤད་དགོས་པར་སྣང་ན་ཡང་ཚིག་མངས་པས་འཇིགས་ཤིང་དོན་རགས་པ་བཤད་ནའང་རྒྱུད་སྡེ་མང་པོ་ལ་གོ་བ་ཆེ་བར་སྣང་བས་ཅུང་ཟད་བཤད་ན། དུས་འཁོར་བའི་ལུགས་ཀྱི་སོར་བསམ་ནི་རླུང་གཉིས་དབུ་མར་འཛུད་པའི་སྲོག་རྩོལ་བུམ་པ་ཅན་ལ་སོགས་པའི་སྔོན་དུ་འགྲོ་བ་རྩ་དབུ་མ་སྦྱོང་བྱེད་ཡིན་པས་དེ་ནས་བཤད་པ་ཇི་ལྟ་བ་བཞིན་དུ་མི་སྒོམ་ཡང་རྩ་དབུ་མ་སྦྱོང་བྱེད་དུ་འགྲོ་བར་སྣང་ན་དེའི་དོད་ཡིན་ནོ། །དེ་བཞིན་དུ་དུས་འཁོར་བའི་སྲོག་རྩོལ་བུམ་པ་ཅན་ལ་སོགས་པ་ནི། རླུང་ལ་དངོས་སུ་དམིགས་པའི་རླུང་གི་རྣལ་འབྱོར་གྱིས་སྲོག་དབུ་མར་འཛུད་བྱེད་ཡིན་ལ། བཙུད་པ་དེ་འཁོར་ལོ་རྣམས་ཀྱི་ལྟེ་
བར་གཡོ་མེད་དུ་འཛིན་པ་ནི་འཛིན་པ་ཡིན་པས། དེ་ནས་བཤད་པ་ཇི་མ་ཇི་བཞིན་གྱི་སྲོག་རྩོལ་དང་འཛིན་པ་སྒོམ་པ་མ་ཡིན་ཀྱང༌། དགོས་པ་དེ་སྒྲུབ་པའི་ཐབས་སུ་སྣང་ན་དེ་གཉིས་ཀྱི་དོད་དང་དེ་བཞིན་དུ་ཐབས་དེ་དག་ལ་བརྟེན་ནས་སྒོམ་པའི་ཐབས་ཀྱིས་གཏུམ་མོ་སྦར་ཏེ་བྱང་སེམས་བཞུས་པས་གསང་གནས་ཀྱི་རྩེའི་བར་དུ་འབེབས་པའི་དགའ་བ་མྱོང་བ་ནི་རྗེས་དྲན་དང༌། བྱང་སེམས་འཕོ་མེད་དུ་བཟུང་བའི་འགྱུར་མེད་ཀྱི་བདེ་བ་ནི་ཏིང་ངེ་འཛིན་ཡིན་པས། དེ་ནས་བཤད་པ་ཇི་མ་ཇི་བཞིན་དུ་མི་སྒོམ་ཡང་དགོས་པ་དེ་སྒྲུབ་ནུས་པའི་ལམ་དུ་འདུག་ན། དེ་གཉིས་ཀྱི་དོད་ཐུབ་ཏུ་འོང་ངོ༌། །དེས་ན་དགོས་པ་དེ་སྒྲུབ་ནུས་ཀྱི་ངོས་ནས་རིམ་ལྔ་སོགས་ལམ་གཞན་ལ་དཔྱད་དེ་ལམ་ཕན་ཚུན་དུ་སྡུད་ཚུལ་བྱེད་ན་ནི་དེ་རྣམས་དོན་གཅིག་ཏུ་མ་བཤད་ཀྱང་སྐབས་དོན་འགྲུབ་པས། རྒྱུད་སོ་སོའི་ལམ་གྱི་གནད་གང་དུ་སོང་ལ་མི་འཇིགས་པ་འཐོབ་པར་འགྱུར་ཏེ་རིགས་པ་དེ་ལམ་གཞན་ལ་ཡང་ཤེས་པར་བྱའོ། །འདི་ནི་བློ་གྲོས་ཆེན་པོ་རྣམས་ཀྱི་དཔྱོད་ཚུལ་ཐུན་མོང་མ་ཡིན་པར་ཟུངས་ཤིག །གླན་གྱིས་སོར་སྡུད་སྤྱོད་པ་ལ་སྦྱར་བ་ནི་མཚན་ཉིད་མཚུངས་པ་ཙམ་ཡོད་ཀྱང༌། རྒྱུད་ཕྱི་མ་ལས་ཡན་ལག་དྲུག་ལས་ལོགས་སུ་སྤྱོད་པ་གསུངས་པས་མི་འགྲིག་ཅིང༌། སངས་རྒྱས་ཀུན་དངོས་ཞེས་པའི་རྐང་པ་གཉིས་ཀྱིས་སེམས་རྩེ་གཅིག་པ་སྟོན་པར་འགྲེལ་པ་ལས་གསལ་བས། དེ་དག་གིས་རིམ་པ་སོ་སོའི་ལམ་སྟོན་པར་འདོད་པ་ཡང་མི་འཐད་དོ། ༈ །རང་གི་ལུགས་ཀྱིས་རྫོགས་རིམ་གྱི་རིམ་པ་དྲུག་ལ་
ཡན་ལག་དྲུག་སྦྱོར་ན། སོར་བསམ་གཉིས་ལུས་དབེན་ལ་སྦྱོར་བ་སྒྲ་དབྱངས་བཅུ་གཅིག་པ་ལྟར་ལེགས་སོ། །སྒྲོན་གསལ་ནས་བཤད་པ་ལ་སྣ་རྩེ་གསུམ་དུ་སྒོམ་པའི་སྲོག་རྩོལ་གསུམ་ཡོད་པས། ངག་དབེན་དང་རྡོར་བཟླས་དངོས་མིན་པའི་སྲོག་རྩོལ་ཡོད་ཀྱང༌། དེ་གཉིས་སྲོག་རྩོལ་གྱི་གཙོ་བོའི་སྒོ་ནས་ཀྱི་མིང་འདོགས་སུ་བྱས་ན་དེ་གཉིས་སུ་འདུའོ། །སེམས་དབེན་ནི་བསམ་གཏན་གྱི་རྩེ་གཅིག་པ་དང་འོད་གསལ་དུ་འཇུག་པའི་སྔོན་གྱི་སྟོང་པ་གསུམ་དང་མཚན་ཉིད་མཚུངས་པའི་སྒོ་ནས་གོ་ས་ཡོད་པ་མ་གཏོགས་པ་ཚིག་ཟིན་ལ་མེད་དོ། །འཛིན་པ་ནི་འོད་གསལ་དང་དོན་གཅིག་ཏུ་སྒྲོན་གསལ་ལས་བཤད་པས་དེས་སེམས་དབེན་དང་སྒྱུ་ལུས་སྟོན་པ་མི་འགྲིག་གོ །རྗེས་དྲན་ནི་འོད་གསལ་ལས་ལུགས་ལྡོག་ཏུ་ལངས་པའི་སྣང་བ་རྣམས་ཀྱི་འཆར་ཚུལ་དང༌། ཏིང་ངེ་འཛིན་ནི་ཟུང་འཇུག་ཡིན་པ་སྒྲོན་གསལ་ལས་ཤིན་ཏུ་གསལ་བས་དེ་ལས་གཞན་དུ་འཆད་པ་དོན་མིན་ནོ། །རིམ་པ་གསུམ་པའི་སྒྱུ་ལུས་ནི་ཟུང་འཇུག་གི་སྒྱུ་མའི་སྐུ་དང་མཚན་ཉིད་མཚུངས་པའི་སྒོ་ནས་གོ་ས་ཡོད་པ་མ་གཏོགས་པ་ཡན་ལག་དྲུག་གི་གཞུང་འགྲེལ་པས་བཤད་པའི་དངོས་ཀྱི་ཚིག་ཟིན་ལ་མེད་དོ། །ཡན་ལག་དྲུག་པོ་དེ་དག་གི་དོན་རྒྱས་པར་བཤད་ན་སྒྱུ་ལུས་དང་སེམས་དབེན་ཡང་ཐོན་པར་འགྱུར་བས་ཡན་ལག་དྲུག་གི་ལམ་དུ་རྫོགས་རིམ་གྱི་མཆོག་སྒྲུབ་པའི་ལམ་གལ་ཆེ་བ་རྣམས་མ་འདུས་པའི་སྐྱོན་ཡང་མེད་དོ། །མདོར་ན་བསྐྱེད་རིམ་གྱི་སྒྲུབ་ཐབས་ཕལ་མོ་ཆེ་དང་པོ་
སྦྱོར་བ་ལ་སོགས་པའི་ཏིང་ངེ་འཛིན་གསུམ་གྱིས་བསྡུས་པར་འདྲ་མོད་ཀྱང༌། དེ་གསུམ་གྱི་དོན་དུ་ཇི་ཙམ་ཞིག་བྱ་དགོས་པ་མི་མཐུན་པ་དུ་མ་ཡོད་པ་བཞིན་དུ། རྫོགས་རིམ་ལ་ཡང་ཡན་ལག་དྲུག་གི་རྣམ་གཞག་བྱ་དགོས་པར་མཚུངས་ཀྱང༌། དོན་མི་འདྲ་བ་དུ་མ་ཞིག་འོང་བས་སོར་སྡུད་ལ་སོགས་པའི་མིང་འདྲ་བས་དོན་གཅིག་ཏུ་བྱ་དགོས་པ་མ་ཡིན་ཏེ། མིང་གཅིག་ལ་དོན་དུ་མ་དང་དོན་གཅིག་ལ་མིང་དུ་མ་འཇུག་པ་ནི་མདོ་སྔགས་ཀྱི་ཕྱོགས་རྣམས་ལ་མཐའ་ཡས་པ་ཞིག་སྣང་བའི་ཕྱིར་རོ། །དེས་ན་ཁུངས་ཐུབ་ཀྱི་ལུགས་མི་འདྲ་བ་དུ་མ་བྱུང་བ་ལ་བཤད་པ་གཅིག་ཚད་མར་བཟུང་ནས་གཞན་རྣམས་འདོར་བ་དང་མི་འགྲིག་བཞིན་དུ་དེ་དག་གི་དོན་གཅིག་ཏུ་འཆད་པ་ནི་ལུགས་སོ་སོའི་གནད་ཐུན་མོང་མ་ཡིན་པ་སོ་སོར་བཤད་པ་རྣམས་བློའི་ནུས་པས་མ་རྟོགས་ཤིང༌། རྒྱུད་སྡེ་དུ་མ་ལ་སྦྱངས་པ་ཆུངས་བའི་སྐྱོན་ཡིན་པས་རྣམ་དཔྱོད་ཆེན་པོ་དང་ལྡན་པས་དེ་གཉིས་ཀ་སྤང་བར་བྱའོ། །ལེའུ་བཅུ་གཉིས་པའི་མཐའ་གཅོད་དོ།། ༒ །།བརྗོད་ནས་རྡོ་རྗེ་སྤྲོ་བ་ནི། །རྫོགས་ནས་རབ་ཏུ་བསྡུ་བར་བྱ། །ཞེས་པ་འདི་འཕགས་པའི་མདོ་བསྲེ་ལས། ངག་གི་བཟླས་བརྗོད་རྫོགས་པའི་མཇུག་ཏུ། བསྡུ་བ་ལ་སྦྱར་བ་དང་འགྲེལ་པའི་བཤད་པ་གཉིས་དོན་གཅིག་ཏུ་མ་བྱུང་ཡང་མི་འགལ་བ་ནི་སྔར་བཞིན་ནོ། །རིག་པ་ཆེན་མོ་སྤྱན་ལ་སོགས། །ཞེས་པའི་སྐབས་སུ་པད་མ་ཅན་ལ་སོགས་པའི་བུད་མེད་རིགས་བཞིས་འདོད་པའི་ལོངས་སྤྱོད་ཇི་ལྟར་བདེ་བར་བརྟེན་ན་རྡོ་རྗེ་འཆང་ཆེན་
པོའི་གོ་འཕང་འགྲུབ་པ་དང༌། བཤད་པ་དེ་ཡང་སྒྲ་ཇི་བཞིན་པར་གསུངས་པས་ཚེ་འདི་ལ་མཆོག་འགྲུབ་པའི་རིན་པོ་ཆེ་ལྟ་བུའི་གང་ཟག་ནི་སྐྱེས་པ་ཁོ་ནར་མ་ཟད་བུད་མེད་ལ་ཡང་ཡོད་དོ། །འོ་ན་བསྐྱེད་རྫོགས་ཀྱི་ལམ་རྒྱུད་ལ་སྐྱེད་པའི་གཞུང་ཚད་ལྡན་རྣམས་སུ་སྐྱེས་པའི་རྟེན་ལ་བཤད་པ་བཞིན་དུ། སྒྲུབ་པ་པོ་བུད་མེད་གྱི་རྟེན་གྱི་དབང་དུ་བྱས་ནས་ཀྱང་རིམ་པ་དང་པོ་དང༌། རིམ་པ་གཉིས་པའི་ཏིང་ངེ་འཛིན་རྫོགས་པར་སྐྱེད་ཚུལ་གསལ་བར་མི་འཆད་པ་ཇི་ལྟར་ཡིན་སྙམ་ན། འདི་ལ་རྣམ་དཔྱོད་ཅན་ལ་དོགས་པ་དེ་ལྟ་བུ་སྐྱེ་བ་ནི་ཤིན་ཏུ་ལེགས་སོ། །འདི་ལ་ལེའུ་དྲུག་པ་རྩ་འགྲེལ་དུ། བུད་མེད་ཀྱི་རྟེན་གྱིས་པདྨའི་སྣ་རྩེར་ཕྲ་མོ་སྒོམ་པར་བཤད་པ་ལྟ་བུ་ལམ་གྱི་ཆ་ཕྱོགས་རེ་བའི་སྒོམ་ཚུལ་བཤད་པ་མང་དུ་ཡོད་ཀྱང༌། གཞུང་རྣམས་ནས་བུད་མེད་ཀྱི་རྟེན་གྱིས་མཆོག་སྒྲུབ་པའི་རིམ་པ་གཉིས་རྫོགས་པར་སྐྱེད་ཚུལ་ཕལ་ཆེར་མི་གསལ་བའི་དགོངས་པ་ནི། གྲུབ་ཆེན་མཚོ་སྐྱེས་ཀྱི་ཀྱཻ་རྡོར་གྱི་སྒྲུབ་ཐབས་ལས། དགྱེས་པའི་རྡོ་རྗེ་སྒྲུབ་པར་འདོད་པས་རིག་མ་དང་ལྷན་ཅིག་དུ་དུར་ཁྲོད་ལ་སོགས་པ་ཡིད་དུ་འོང་བའི་གནས་སུ་འདུག་ནས། ཞེས་གསུངས་པ་ལྟར་སྒྲུབ་པ་པོ་གཞུང་ནས་བཤད་པའི་མཚན་ཉིད་ཚང་བས་ནི། རིམ་པ་དང་པོ་ལ་སློབ་པ་ནས་ཀྱང་རིག་མའི་གྲོགས་དང་ལྷན་ཅིག་ཏུ་སློབ་ལ། བུད་མེད་ལམ་སྒྲུབ་པའི་རྟེན་གྱི་མཚན་ཉིད་ཚང་བས་ཀྱང༌། ཐབས་ཀྱི་གྲོགས་དང་ལྷན་ཅིག་ཏུ་གནས་ནས་རིམ་
པ་གཉིས་ཀྱི་ལམ་ལ་དམིགས་བསལ་ཅན་འགའ་ཞིག་མ་གཏོགས་པ་མཚུངས་པར་སློབ་བོ། །དེའི་ཕྱིར་ཐབས་ཀྱི་སྒྲུབ་པ་པོའི་དབང་དུ་བྱས་པའི་ལམ་ལ་སྦྱོང་ཚུལ་ཉིད་ཤེས་རབ་མའི་ཡང་སྦྱོང་ཚུལ་དུ་འགྱུར་བས་ལམ་བསྒྲུབ་ཚུལ་རྒྱས་པ་ལོགས་སུ་མ་མཛད་དོ། དེ་ལ་ལྷན་སྐྱེས་ཀྱི་བདེ་ཆེན་འདྲེན་པའི་ཐབས་རང་གི་ལུས་ཀྱི་ནང་གི་གནད་ཆེ་ས་རྣམས་སུ་ཐིག་ལེ་ལ་སོགས་བསྒོམ་པ་རྣམས་ལ་རྡོ་རྗེའི་སྣ་རྩེར་སྒོམ་པར་བཤད་པ་ལྟ་བུ། པདྨའི་སྣ་རྩེ་ལ་འདོན་པ་སྤོ་བ་ལ་སོགས་པ་འགའ་ཟུང་མ་གཏོགས་པ་ཐབས་ཀྱིས་སྒོམ་པ་དང་འདྲ་ལ། རྡོ་རྗེ་བཟླས་པ་དང་བུམ་པ་ཅན་ལ་སོགས་པའི་རླུང་སྦྱོར་སྒོམ་པ་ཡང་ཐབས་དང་འདྲའོ། །རང་ཉིད་མི་བསྐྱོད་རྡོ་རྗེ་དང་བདེ་དགྱེས་སོགས་སུ་བསྒོམས་ནས། ཡེ་ཤེས་ཀྱི་ཕྱག་རྒྱ་ལ་བརྟེན་ནས་བདེ་ཆེན་བསྐྱེད་པ་ཡང་འདྲའོ། །འདི་ལ་ཀྱཻ་རྡོ་རྗེ་ལས། བདག་མེད་རྣལ་འབྱོར་ལྡན་པ་ཡིས། །ཕྱག་རྒྱ་ཉིད་ཅེས་ཇི་ལྟར་བརྗོད། །ཕྱག་རྒྱ་ཕྱག་རྒྱ་གཉིས་དག་གིས། །ཕྱག་རྒྱའི་དངོས་གྲུབ་ཇི་ལྟར་འགྱུར། །ཞེས་རྟེན་གཉིས་པོ་གང་ཡིན་ཀྱང་བདག་མེད་མས་དཀྱིལ་འཁོར་གྱི་གཙོ་བོ་བྱས་པའི་རྣལ་འབྱོར་དང་ལྡན་པ་ཡིས། ལམ་དེ་བསྒོམས་པས་ཕྱག་རྒྱའི་དངོས་གྲུབ་ཏུ་ཇི་ལྟར་འགྱུར། ཞེས་པའི་དོགས་གཅོད་རྒྱས་པ་ལུ་ཨི་པའི་སྒྲུབ་ཐབས་ཀྱི་འགྲེལ་པར་གཏན་ལ་ཕབ་ཟིན་པས་འདིར་ཚིག་མངས་སུ་དོགས་པས་མ་བྲིས་སོ། །སྐྱེས་པའི་རྟེན་གྱིས་ལས་རྒྱ་ལ་བརྟེན་ནས་དགའ་བ་བཞི་བསྐྱེད་པའི་དོན་ནི། བུད་མེད་ཀྱི་རྟེན་གྱི་སྒྲུབ་པ་པོས་རང་གི་ཡབ་
ལ་བརྟེན་ནས་དགའ་བ་བཞི་སྐྱེད་པ་ཡིན་ལ། དེ་ལ་ཡང་ཡས་བབས་དང་མས་བརྟན་གྱི་དགའ་བཞི་དང༌། ལུགས་མཐུན་དང་ལུགས་ལྡོག་གི་སྟོང་པ་བཞི་རྣམས་སྐྱེས་ཚུལ་དང༌། དགའ་བ་བཞི་པ་དང་ལུགས་མཐུན་གྱི་སྟོང་པ་བཞི་པའི་དུས་སུ་བདེ་སྟོང་སྦྱར་ནས་སྒོམ་ཚུལ་སོགས་ཀྱང་འདྲ་བ་ཡིན་ནོ། །ཡུམ་ལ་བརྟེན་ནས་ཡབ་ཀྱི་རྒྱུད་ལ་དགའ་བ་བཞི་སྐྱེད་པ་བཞིན་དུ། ཡབ་ལ་བརྟེན་ནས་ཀྱང་ཡུམ་གྱི་རྒྱུད་ལ་དགའ་བཞི་སྐྱེ་བ་ལ་ཁུངས་ཅི་ཞིག་ཡོད་སྙམ་ན། འདི་ནི་དཔལ་ཀྱཻ་རྡོ་རྗེ་ལས། རྡོ་རྗེ་དང་པདྨ་བྱིན་གྱིས་རློབ་པའི་སྔགས་གསུངས་པ་ལས་ཤིན་ཏུ་གསལ་བར་ཤེས་པ་ཡིན་པས་དེ་བཤད་པར་བྱའོ། །དེ་ལ་པདྨ་བྱིན་གྱིས་རློབ་པའི་སྔགས་ནི། ༀ་པདྨ་སུ་ཁ་དྷ་ར་མཧཱ་རཱ་ག་སུ་ཁ་ད་དྷ། ཙ་ཏུར་ཨཱ་ནནྟ་བྷ་ག་བི་ཤྭ་ཧཱུཾ་ཧཱུཾ་ཧཱུཾ་ཀརྱཾ་ཀུ་རུ་ཤྭ་མེ། ཞེས་པའོ། །སྔགས་ཀྱི་དོན་ནི་པདྨ་ནི་ཡུམ་གྱི་པདྨ་དང༌། སུ་ཁ་ནི་བདེ་བ་དང༌། དྷ་ར་ནི་འཛིན་པ་དང༌། མཧཱ་ཆེན་པོ་དང༌། ར་ག་ནི་ཆགས་པ་དང༌། སུ་ཁ་ནི་བདེ་བ་དང༌། ད་དྷ་ནི་སྟེར་བའམ་སྦྱིན་པ་དང༌། ཙ་ཏུར་ནི་བཞི་དང༌། ཨཱ་ནནྟ་ནི་དགའ་བ་དང༌། བྷ་ག་ནི་ཡུམ་གྱི་པདྨ་དང༌། བི་ཤྭ་ནི་སྣ་ཚོགས་པ་དང༌། ཀརྱཾ་ནི་བྱ་བ་དང༌། ཀུ་རུ་ནི་མཛོད་ཅིག་པ་དང༌། ཤྭ་མེ་ནི་བདག་གི་ཞེས་པའོ། །དེ་ལ་ཀརྱཾ་ཀུ་རུ་ཤྭ་མེ་ཞེས་བདག་གི་བྱ་བ་མཛོད་ཅིག་ཅེས་པའི་བྱ་བ་ནི་དགའ་བཞི་སྐྱེད་པའི་བྱ་བ་ཡིན་ཏེ། དེ་ནི་ཙ་ཏུར་ཨཱ་ནནྟས་བསྟན་ནོ། །དེ་ཡང་མཧཱ་ར་ག་སུ་
ཁ་ད་དྷ་ཞེས་ཆགས་པ་ཆེན་པོས་བདེ་བ་སྦྱིན་པ་ཚུལ་གྱིས་མཛོད་ཅིག་ཅེས་པའོ། །པདྨ་སུ་ཁ་དྷ་རའི་པདྨ་དང་བྷ་ག་ནི་དོན་གཅིག་ལ། དེས་བདེ་བ་འཛིན་པ་ནི་ཕྱག་རྒྱ་རིགས་བཞིའི་པདྨའི་ཁྱད་པར་གྱིས། བདེ་བའི་རྟེན་ཡབ་ཀྱི་བྱང་སེམས་མི་འཕོ་བར་བྱེད་པ་ཡིན་ཏེ། རྡོ་རྗེ་མཁའ་འགྲོ་ལས། རྩུབ་ཅེས་བྱ་བ་ནི་བ་ལང་གི་ལྕེ་ལྟར་རྩུབ་པའོ། །འཇམ་པ་ནི་པདྨ་ཅན་ཞེས་བྱ་བའོ། །སྲ་བ་ནི་ཁུ་བ་སྲ་བ་སྟེ་གང་གི་ཁུ་བ་འཐས་པར་གྱུར་པའོ། །འཛེར་པ་ཅན་ནི་དུང་ཅན་མ་སྟེ་པདྨ་ལ་ཤ་འཛེར་ཡོད་པའོ། །བུད་མེད་འདི་དག་ནི་བཅུད་བཅིང་བ་ལ་དབང་བར་གྱུར་པ་ཡིན་ནོ། །ཞེས་གསུངས་པས་ཤེས་ཏེ། བཅུད་ནི་ཡབ་ཀྱི་བྱང་སེམས་ཀུནྟ་ལྟ་བུའོ། །ཡང་དེ་ཉིད་ལས། དྲུག་པོ་དེ་དག་ནི་སྐལ་བཟང་མ་སྟེ་སུ་བྷ་ག་ཡིན་ལ། དེ་དག་ནི་སྒྲུབ་པ་པོ་ལ་མཆོག་སྟེར་བ་ཡིན་ནོ། །ཞེས་རུས་སྦལ་གྱི་རྒྱབ་ལྟར་མཐོ་བ་སོགས་ཀྱི་མཚན་ཉིད་དྲུག་ཚང་བའི་བྷ་ག་དང་ལྡན་པ་ནི་སྐལ་བཟང་མ་སྟེ། དེ་དང་འདུས་པས་སྒྲུབ་པ་པོ་ལ་མཆོག་སྟེར་བས། སུ་བྷ་ག་ཞེས་པ་སྐལ་བཟང་མའམ་བྷ་ག་བཟང་པོ་མ་ཞེས་པའི་དོན་ནོ། །བི་ཤྭ་ནི་བྷ་གར་རྩོལ་བའི་བྱ་བ་སྣ་ཚོགས་པ་དགའ་བའི་བསྟན་ཆོས་ལས་བཤད་པ་སྟེ་ཐབས་དེས་སོ། །ཧཱུཾ་རྣམས་ནི་དོན་དེ་ལ་སྐུལ་བར་བྱེད་པའོ། །བདག་གི་བྱ་བ་མཛོད་ཅིག་ཅེས་པའི་སྨྲ་བ་པོ་ནི་ཡབ་ཡིན་ལ་སྨྲ་བའི་ཡུལ་ནི་ཡུམ་མོ། །རྡོ་རྗེ་བྱིན་གྱིས་རློབ་པའི་སྔགས་ནི། ༀ་བཛྲ་མཧཱ་དྭེ་ཥ་ཙ་ཏུར་ཨ་ནནྟ་ད་ཡ་ཀ་ཀཱ་མུ་ཁ་ཨེ་ཀ་ར་སོ་ནཱ་ཐ། ཧཱུཾ་ཧཱུཾ་ཧཱུཾ་ཀརྱཾ་ཀུ་རུ་ཤྭ་མེ་
ཞེས་པའོ། །འདི་ལ་ཡང་ཀརྱཾ་ཀུ་རུ་ཤྭ་མེ་ནི་བདག་གི་བྱ་བ་མཛོད་ཅིག་ཅེས་པའོ། །བྱ་བ་ནི་ཙ་ཏུར་ཨཱ་ནནྟ་ད་ཡ་སྟེ་དགའ་བ་བཞི་སྦྱིན་པའི་བྱ་བའོ། །གང་གིས་ན་བཛྲ་མཧཱ་དྭེ་ཥ་ནི་ཞེ་སྡང་ཆེན་པོའི་རྡོ་རྗེ་སྟེ། ཡབ་ཧེ་རུ་ཀར་བྱས་པའི་གསང་བའི་རྡོ་རྗེས་སོ། །དེ་ལྟར་ཡུམ་གྱིས་ཡབ་ལ་དགའ་བ་བཞི་སྟེར་བ་དང༌། ཡབ་ཀྱིས་ཡུམ་ལ་དགའ་བཞི་སྟེར་བའི་ཚུལ་ནི། ཀ་ཀཱ་མུ་ཁ་ཨེ་ཀ་ར་སོ་ནཱ་ཐ་ཞེས་པས་སྟོན་པའི་ཀ་ཀཱ་ནི་བྱ་རོག་གོ །མུ་ཁ་ནི་གདོང་སྟེ་བྱ་རོག་གདོང་དང༌། བྱ་གདོང་མ་དང་མཁའ་འགྲོ་གདོང་ཞེས་གྲགས་པ་སྟེ་གཉིས་ཀའི་དབུ་མའི་མར་སྣའོ། །ཨེ་ཀ་ནི་གཅིག་པ་སྟེ་དེ་ཡང་ར་སོ་འམ་ར་ས་ཞེས་པས་རོ་གཅིག་པའོ། །དེའི་དོན་ནི་རྩ་གཉིས་པོ་ཕན་ཚུན་ཕྲད་པས་དམ་དུ་བཅིངས་ཏེ་གཅིག་ཏུ་བྱས་པའི་མཐུ་ལས། ནཱ་ཐ་སྟེ་མགོན་པོ་བདེ་བ་ཆེན་པོ་བསྐྱེད་པའོ། །ཕྱི་མ་འདིར་བདག་གི་བྱ་བ་མཛོད་ཅིག་ཅེས་པའི་སྨྲ་བ་པོ་ནི་ཡུམ་ཡིན་ལ། གང་ལ་སྨྲ་བའི་ཡུལ་ནི་ཡབ་བོ། །དེའི་ཕྱིར་རྗེ་བཙུན་མར་པའི་རྒྱུད་འཛིན་རྣམས་ཡབ་ཀྱིས་ཡུམ་གྱི་པདྨ་བྱིན་གྱིས་རློབ་ཅིང༌། ཡུམ་གྱིས་ཡབ་ཀྱི་རྡོ་རྗེ་བྱིན་གྱིས་རློབ་པ་ཡིན་ཞེས་སྨྲ་བ་ཡང་འཐད་པར་སྣང་ངོ༌། །འདིར་ཤེས་བྱེད་ཀྱི་ཁུངས་དངོས་ནི་སྔགས་ཕྱི་མའོ། །འདི་ལེགས་པར་ཤོད་པ་ཉུང་བར་བྱུང་སྣང་བས་ཞིབ་ཏུ་བཤད་དེ། འདི་ནི་ཕྱག་རྒྱ་སྲོག་རྩོལ་དུ་འགྲོ་བའི་གནད་ལེགས་པར་ཤེས་པ་ལ་བརྟེན་ནས་ཤེས་དགོས་པར་ཡོད་དོ། །རྡོ་རྗེ་མཁའ་འགྲོ་ལས་ཀྱང༌། བུད་མེད་ཀུན་གྱི་སྒྱུ་མའི་རྒྱ། །འདི་ནི་གཉིས་མེད་ཡེ་ཤེས་མཆོག །རྙེད་
དང་བདེ་བ་ཀུན་མོས་པས། །ངན་པར་སྤྱོད་པའང་འགྲུབ་པར་འགྱུར། །ཞེས་གསུངས་པའི་འགྲེལ་པ་ལས། ངན་པར་སྤྱོད་པ་སྟེ་སྒྲུབ་པ་པོ་གང་གི་རང་བཞིན་ཉོན་མོངས་པ་བདོ་བ་ཡིན་ཡང་དེ་དག་ལ་རྣལ་འབྱོར་མ་རྣམས་ཀྱིས། དོན་དམ་པའི་ཡེ་ཤེས་ཀྱི་དངོས་གྲུབ་སྟེར་བར་འགྱུར་བའོ། །འང་ཞེས་བྱ་བའི་སྒྲས་ནི་རྣལ་འབྱོར་མ་རྣམས་ལ་ཡང་དེ་དག་གི་དོན་དམ་པའི་ཡེ་ཤེས་སྟེར་བར་འགྱུར་རོ་ཞེས་བལྟ་བར་བྱ་སྟེ། དེ་ལྟར་ན་ལམ་འདིས་སྐྱེས་པ་དང་བུད་མེད་དག་ཀྱང་ཚེགས་མེད་པར་འགྲུབ་པར་འགྱུར་རོ་ཞེས་བྱ་བར་དགོངས་སོ། །ཞེས་གསལ་བར་གསུངས་སོ། །ཁྲོ་བོ་ཆེན་པོ་གཤིན་རྗེ་གཤེད། །ཅེས་པ་ལ་སོགས་པའི་ཚིགས་སུ་བཅད་པ་བཅུ་གོ་སླར་བཞག་པ་རྣམས་ཅུང་ཟད་གསལ་བར་བཤད་ན། དྲག་པོའི་འོད་བཟང་བ་ནི་འོད་ཟེར་གྱི་འཕྲེང་བ་ཅན་ནོ། །རབ་ཏུ་གཏུམ་པས་ན་རྣོན་པོའོ། །འཇིགས་པའང་ནི་གཤིན་རྗེའོ། །འོད་ཟེར་མང་པོ་རབ་ཏུ་འཕྲོ་བ་ནི་གཟི་བརྗིད་དང་ལྡན་པའོ། །སྦྱོར་བ་སྟེ་རྣལ་འབྱོར་ཅན་གྱིས་རྟག་ཏུ་བསྒོམ་མོ། །རྡོ་རྗེ་མི་འཆི་ནི་བདུད་རྩི་ཐབས་སྦྱོར་རོ། །འོད་ཟེར་འཕྲོ་བ་རབ་ཏུ་འཁྲུག་དྲག་པོ་ཞེས་པ་ནི་བགེགས་འཇོམས་པ་མྱུར་བའི་དཔེ་སྟེ། དྲག་པོའི་འཁོར་ལོ་འབར་བ་འདྲ་བའི་འོད་ཟེར་གྱིས་བསྐོར་བའོ། །འཇིགས་པ་དག་ཀྱང་ཞེས་པ་ནི་གནོད་སྦྱིན་དང་ལོག་འདྲེན་གྱི་གདོན་ནོ། །ཊཀྐི་ནི་འདོད་པའི་དོན་ཡིན་ལ། དེ་འགུགས་པའི་ཕྱིར་འདོད་པའི་རྒྱལ་པོའོ། །དེའི་དེ་ཁོ་ན་ཉིད་ཡིད་ཀྱིས་འཛིན་པ་ནི་འདོད་པའི་ཡེ་ཤེས་སོ། །འགྱུར་རྙིང་ལས་ཞལ་གསུམ་པ་ནི་འཇིགས་པར་བྱེད། །ཅེས་པ་ལ་པ་ཚབ་ཀྱི་འགྱུར་
ལས། ཞལ་གསུམ་འཇིགས་པ་གསུམ་སྟེར་བ། །ཞེས་འབྱུང་ལ། དེའི་ལྟར་ན་སྐུ་གསུང་ཐུགས་གསུམ་གྱི་སྒོ་ནས་གདུག་པ་རྣམས་ལ་འཇིགས་པ་གསུམ་སྟེར་བའོ། །ཕྱག་བཞི་པ་ལ་ཤཱནྟི་པའི་འགྲེལ་པར། ལོངས་སྤྱོད་བཞི་དང་ཡང་དག་ལྡན། །ཞེས་འབྱུང་ལ། རྒྱལ་བས་བྱིན་གྱིས་ཡུམ་ལ་འཁྱུད་པའི་ཕྱག་གཉིས་མ་གཏོགས་པ་ལ་བཤད། ཙི་ལུ་པས་ཕྱག་མཚན་འཛིན་པའི་དབང་དུ་བྱས་ནས་བཤད་མོད་ཀྱང༌། འདིར་ནི་རྩ་ཕྱག་གཉིས་ཀྱིས་འཇིག་རྟེན་གསུམ་རྒྱལ་གྱི་ཕྱག་རྒྱ་མཛད་པ་དོར་བའི་ཕྱག་ལྷག་མའི་དབང་དུ་བྱས་ནས་ཕྱག་བཞི་ཞེས་གསུངས་པར་བྱའོ། །དེ་ནི་བདེན་བྲལ་གྱི་གདོན་འཇིགས་པར་བྱེད་པའི་མཆོག་གོ །ཁྲོ་བོ་ཆེན་པོ་ཡིན་པས་རྡོ་རྗེ་ཆེའོ། །འཇིག་རྟེན་གསུམ་གྱི་མི་ཤེས་པའི་མུན་པ་སེལ་བ་དང་གདུག་པ་དབང་ལྡན་གྱི་གདོན་ལ་སོགས་པ་གདོན་ཐམས་ཅད་འཇོམས་པར་བྱེད་པའོ། །ས་འོག་ས་སྟེང་ས་བླའི་ཁམས་གསུམ་གྱི་རླུང་ལྷའི་གདོན་ལ་སོགས་པ་འཇིགས་པར་བྱེད་པ་དང༌། རྡོ་རྗེ་གསུམ་དབྱེར་མི་ཕྱེད་པ་རྡོ་རྗེ་འཆང་ལས་བྱུང་བ་དང༌། འོད་ཟེར་རྣོན་པོ་འབར་བས་རབ་ཏུ་བསྐོར་བའོ། །ཁྲོ་བོ་ཡིན་པས་ན་རྡོ་རྗེ་དང༌། ཐུགས་རིན་པོ་ཆེ་མི་གཡོ་བར་འཛིན་པའི་རྣལ་འབྱོར་གྱིས་བརྟན་པར་བྱེད་པའི་ཕྱིར་མི་གཡོ་བའོ། །རྡོ་རྗེ་སེམས་དཔའ་ལས་བྱུང་བས་ན་རྡོ་རྗེ་ལས་བྱུང་བའོ། །མི་གཡོ་བ་ཞེས་པ་གཉིས་པ་ལ་ཤཱནྟི་པའི་འགྲེལ་པར་ཟུར་གྱིས་བལྟ། ཞེས་བྱ་བ་ནི་ཤིན་ཏུ་ཆགས་པས་ཡོན་པོར་བལྟ་བའི་
ཕྱིར་རོ། །ཞེས་འབྱུང་ཡང༌། འདིར་ནི་སྤྱན་གཡོ་བ་ཞེས་པ་ཚབ་ཀྱིས་བསྒྱུར་བ་ལྟར་བྱའོ། །ཞི་བ་ནི་རྒྱལ་བས་བྱིན་ལ་སོགས་པས་འདི་སྒེག་པའི་ཁྲོ་བོར་འདོད་པ་ཡིན་ཀྱང་འཕགས་ལུགས་ལ་ཁྲོ་བོ་བཅུ་པོ་ཐམས་ཅད་མི་སྡུག་པའི་ཁྲོ་བོ་ཡིན་པས་ཤིན་ཏུ་གཞོན་ཤ་ཆགས་པ་ལ་བཤད་པ་ལྟར་བྱའོ། །གཙུག་ཏོར་ཆེན་པོ་ནི་གཙུག་ཏོར་འཁོར་ལོས་སྒྱུར་རྒྱལ་ཡིན་ལ། ཡི་གེ་གཅིག་ནི་ཙི་ལུ་པ་ལ་སོགས་པས་བྷྲུཾ་ཡིག་ལས་བསྐྱེད་པ་ལ་འདོད་ཀྱང༌། འདིར་བྷྲུཾ་ཡིག་གི་ངོ་བོར་བཤད་པ་བཞིན་དུ་བྱའོ། །འཁོར་ལོ་ཅན་ཞེས་པ་ནི་ལུགས་གཞན་ལས་ཕྱག་ན་འཁོར་ལོ་བསྣམས་པ་ལ་བཤད་ཀྱང༌། འདིར་ནི་འཁོར་ལོ་བསྒྱུར་བ་ཞེས་པའི་མཚན་ཅན་ལ་བྱའོ། །གནོད་མཛེས་ནི་ཡེ་ཤེས་མཆོག་སྟེ་ཡེ་ཤེས་ལྔའི་བདག་ཉིད་ཀྱི་རྡོ་རྗེ་འཛིན་པར་བྱེད་པའོ། །པ་ཚབ་ཀྱི་འགྱུར་ལས། གནོད་མཛེས་ཡེ་ཤེས་འཛིན་དྲག་པོ། །འཇིགས་པའི་རྒྱ་མཚོ་མཚུངས་འོད་ཅན། །ཞེས་པ་ལྟར་ན་ཤིན་ཏུ་འཇིགས་པའི་རྒྱ་མཚོའི་ཁ་དོག་ལྟར་མཐིང་ནག་གི་འོད་ཅན་ནོ། །འདི་དང་གཙུག་ཏོར་གཉིས་ཀའི་མཐར། །བསམ་གཏན་དཀྱིལ་འཁོར་ལ་བསྒོམ་བྱ། །ཞེས་འབྱུང་ངོ༌། །གཟི་བརྗིད་ཕུང་པོ་གཙུག་ཏོར་རྒྱལ། །ཞེས་པའི་རྐང་པ་བཞིའི་དོན་གསང་འདུས་ལུགས་གཞན་ལས་བཤད་ཚུལ་ནི། ཤཱནྟི་པ་དང་རྒྱལ་བས་བྱིན་གྱིས་རྒྱུད་གཞན་ལས་གསུངས་པའི་ལྷ་གང་ཡིན་པ་དེ་དག་ཀྱང་འདིར་བསྒོམས་ན་འགྲུབ་པར་འགྱུར་བས་དེའི་ཏིང་ངེ་འཛིན་རྐང་པ་བཞི་པོ་འདིས་སྟོན་པར་བཤད་དོ། །དེ་ཡང་སྙིམ་པའི་མེ་ཏོག་ལས། གང་གཞན་
ནི་འདིར་གསུངས་པ་ལས་གཞན་པའོ། །སྔགས་ཀྱི་འཁོར་ལོ་ཅན་ཞེས་པའི་སྔགས་ནི་དཔའ་བོ་གཅིག་པུའོ། །འཁོར་ལོ་ཅན་ནི་དཀྱིལ་འཁོར་གྱི་བདག་པོ་རྣམས་ཏེ། དེ་ཡང་གཙུག་ཏོར་གྱེན་དུ་འབྱུང་བ་དང༌། ཆེར་འབྱུང་བ་ལ་སོགས་པའི་ཁྲོ་བོ་རྣམས་དང་བློ་གྲོས་མི་ཟད་པ་དང༌། སྤོབས་པ་བརྩེགས་པ་ལ་སོགས་པའི་བྱང་ཆུབ་སེམས་དཔའ་རྣམས་དང༌། འོད་ཟེར་ཅན་དང་རི་ཁྲོད་ལོ་མ་ཅན་ལ་སོགས་པའི་ལྷ་མོ་རྣམས་སོ། །དེ་དག་ཐམས་ཅད་ཀྱང་དམ་ཚིག་ལོངས་སྤྱོད་འདི་རྣམས་ཀྱིས་ཏེ། ཇི་སྐད་དུ་བཤད་པའི་ཞལ་གསུམ་ཕྱག་དྲུག་ལ་སོགས་པ་འཆད་པར་འགྱུར་བས། ཆོས་འབྱུང་བའི་གཞལ་ཡས་ཁང་དུ་རྡོ་རྗེ་འཆང་ཡོངས་སུ་གྱུར་པ་ལ་སོགས་པ་ཏིང་ངེ་འཛིན་འཁོར་དང་བཅས་པ་རྣམས་ཀྱིས་སོ། །སོ་སོ་དག་ཏུ་ཞེས་བྱ་བ་ནི་གང་ཇི་ལྟར་རིགས་པ་དང༌། གང་ཞིག་གང་གི་སྔགས་དང་མཚན་མ་ལ་སོགས་པ་རང་རང་གི་རྒྱུད་དང་འགལ་བ་མེད་པར་བླང་བར་བྱ་སྟེ་རྒྱུད་སྣ་ཚོགས་ལས་གསུངས་པ་རྣམས་དང༌། ཉེ་བའི་རྒྱུད་ལས་གསུངས་པ་འདིར་མ་གསུངས་པ་འགལ་བ་མེད་པ་གཟུང་བར་བྱའོ་ཞེས་བྱ་བའི་དོན་ཏོ། །ཞེས་འདུས་པ་འདིར་མ་བཤད་པ་རྒྱུད་གཞན་ནས་གསུངས་པའི་ཁྲོ་བོ་དང་བྱང་སེམས་དང༌། ལྷ་མོ་རྣམས་དཀྱིལ་འཁོར་གྱི་བདག་པོར་བསྒོམ་པར་བྱ་ཞིང༌། དེ་ཡང་ཞལ་གསུམ་ཕྱག་དྲུག་པའི་རྣམ་པ་ཅན་དུ་བྱ་བ་དང༌། སྔགས་དང་ཕྱག་མཚན་ལ་སོགས་པ་རྒྱུད་གཞན་ལས་གསུངས་པ་དང་མི་འགལ་བར་བྱ་ཞེས་བཤད་དོ། །གཙོ་བོར་བྱས་པའི་ཚེ་ཡབ་ཡུམ་ཅན་དུ་བྱ་
དགོས་ལ། མཚན་མའི་སོགས་ཁོངས་ནས་སྐུ་མདོག་འདོན་པ་འདྲའོ། །འདིར་ནི་རྒྱུད་འགྲེལ་ལས། རྒྱུད་གཞན་དུ་གསུངས་པའི་ཁྲོ་བོ་རྣམས་དང་བྱམས་པ་ལ་སོགས་པའི་ལྷ་ལྷག་མ་རྣམས་རང་རང་གི་རིགས་ཀྱིས་ཕྱེ་བའི་ཕྱག་མཚན་བསྣམས་པའི་སྒོ་ནས་སོ་སོར་ཐ་དད་དུ་བསྒོམ་པར་གསུངས་ཏེ། བྱམས་པ་ནི་འདིར་བཤད་པ་ལྟར་མིན་པའི་གཞན་དུ་མི་འདྲ་བར་བཤད་པ་ལ་བྱ་དགོས་པར་མངོན་དེ་དེས་གཞན་རྣམས་ཀྱང་མཚོན་ནོ། །འདིར་བཤད་པའི་ཆོ་གས་སྒོམ་པ་ཡིན་ཡང་དཔའ་བོ་གཅིག་པ་དང་དཀྱིལ་འཁོར་གྱི་འཁོར་ལོའི་བདག་པོ་དང་འཁོར་དུ་སྒོམ་པ་གང་ཡིན་མི་གསལ་ཡང༌། དཔའ་བོ་གཅིག་པ་དང་བདག་པོ་སྒོམ་པ་གཉིས་ལ་བྱ་དགོས་པ་འདྲའོ། །ལྷ་རྣམས་ཀྱི་ཏིང་ངེ་འཛིན་དཔག་ཏུ་མེད་པར་འགྲེལ་ཚུལ་ནི་ཁྲོ་བོ་རེ་རེ་ལ་ཡང་བྲན་ཕོ་མོ་ལ་སོགས་པའི་འཁོར་གྱིས་ཕྱེ་བ་ལ་བཤད་དོ། །དེས་ན་ཁྲོ་བོ་དང་སེམས་དཔའ་ལ་སོགས་པ་ནང་ཚན་རིགས་མི་འདྲ་བ་མང་པོའི་སྒོ་ནས་མང་པོར་འབྱེད་པ་ནི་གཞུང་སྔ་མས་བསྟན་ལ། འཁོར་གྱི་སྒོ་ནས་མང་པོར་འབྱེད་པ་ཁྲོ་བོ་ལ་གསུངས་པ་ནི་མཚོན་པ་ཙམ་དུ་མངོན་ནོ། །ལེའུ་བཅུ་གསུམ་པའི་མཐའ་གཅོད་དོ།། ༒ །།ཞི་བ་དང་ནི་རྒྱས་པ་དག །ཅེས་སོགས་ཀྱི་སྐབས་སུ། ཞི་སོགས་ཀྱི་ལས་སྒྲུབ་པར་བསྟན་པ་ལ། འཇིག་རྟེན་པའི་དངོས་གྲུབ་ནི་གཉིས་ཏེ། ཞི་སོགས་བྱ་བའི་ཆོ་ག་དང༌། །དེ་བཞིན་གྲུབ་པ་བརྒྱད་དང་ནི། །ཞེས་གསུངས་པའི་དངོས་གྲུབ་འབྲིང་པོ་གྲུབ་པ་བརྒྱད་དང༌། དངོས་གྲུབ་ཆུང་ངུ་ཞི་བ་ལ་སོགས་པའི་དངོས་གྲུབ་བོ། །འདི་ལ་སྤྱོད་བསྡུས་ལས། འཇིག་རྟེན་
པའི་དངོས་གྲུབ་ཕྲ་མོ་དང༌། གྲུབ་པ་ཆེན་པོ་བརྒྱད་དོན་དུ་གཉེར་བར་མི་བྱ་སྟེ། རྣམ་པར་གཡེང་བར་འགྱུར་བ་དང༌། ཕྱིར་ལྡོག་པར་འགྱུར་བའི་ཕྱིར་རོ་ཞེས་གསུངས་པ་ནི་རྫོགས་རིམ་པ་ལ་དགོངས་པ་ཡིན་ལ། འགྲེལ་པར་རྫོགས་རིམ་པས་ཞི་བ་ལ་སོགས་པའི་དངོས་གྲུབ་ཐུན་མོང་བ་མང་པོ་སྒྲུབ་པར་གསུངས་པ་གཉིས་མི་འགལ་བའི་ཚུལ་ནི། བསྐྱེད་རིམ་གྱི་བསྙེན་པ་མཐར་ཕྱིན་པའི་མཚམས་ནས་སློབ་པའི་ཟུང་འཇུག་མ་ཐོབ་ཀྱི་བར་དུ་རྫོགས་རིམ་གྱི་རྟོགས་པ་སྐྱེད་པའི་ཡན་ལག་ཏུ་ངེས་པར་དགོས་པ་འགའ་ཞིག་མ་གཏོགས་པར་རྫོགས་རིམ་ཉིད་ལ་འདྲིལ་བ་ནི་ལུང་སྔ་མའི་དོན་ཡིན་ལ། ལུང་ཕྱི་མའི་དོན་ནི་གཙོ་བོར་སློབ་པའི་ཟུང་འཇུག་ཐོབ་པའི་རྗེས་སུ་བྱེད་པ་ཡིན་པས་དེ་གཉིས་ཀྱི་ཁྱད་པར་ཕྱེད་པར་བྱའོ། །དེ་ལ་ཙན་དན་ལྟ་བུ་ལ་སོགས་པའི་གང་ཟག་བཞིས་ནི་ཕུགས་སུ་མཆོག་གི་དངོས་གྲུབ་དོན་དུ་གཉེར་བ་ཡིན་མོད་ཀྱང༌། འཕྲལ་དུ་བསྐྱེད་རིམ་མཐར་ཕྱིན་པ་ལ་བརྟེན་ནས་རྫོགས་རིམ་གཙོ་བོར་མི་བྱེད་པར་འགྱུར་བས་དེ་རྣམས་ཀྱི་དོན་དུ་བསྐྱེད་རིམ་ལ་བརྟེན་ནས་ལས་ཚོགས་སྒྲུབ་པ་མང་དུ་གསུངས་པ་ཡིན་ནོ། །དེ་ལྟར་བསྐྱེད་རིམ་ལ་བརྟེན་ནས་ལས་ཚོགས་སྒྲུབ་པ་རྣམས་ལ་ཐུན་མོང་དུ་རྗེས་སུ་འགྲོ་བའི་ཁྱད་པར་བརྒྱད་ཡོད་དེ། གང་དུ་ཁ་ལྟ་བའི་ཕྱོགས་ཀྱི་ཁྱད་པར་དང༌། དུས་ནམ་གྱི་ཚེ་བྱེད་པའི་དུས་ཀྱི་ཁྱད་པར་དང༌། ལྷ་དང་ཆོས་གོས་ལ་སོགས་པའི་ཁ་དོག་ཇི་ལྟར་བྱེད་པའི་ཁ་དོག་གི་ཁྱད་པར་དང༌། ལས་གང་བསམ་པ་གང་གིས་བྱེད་པའི་བསམ་པའི་ཁྱད་པར་
ཏེ། ཁྱད་པར་བཞི་ནི་འདིར་དྲངས་པའི་རྡོ་རྗེ་འཕྲེང་བ་ལས་གསུངས་སོ། །ཁྱད་པར་གཞན་བཞིའི་གནས་ཀྱི་ཁྱད་པར་ལ་དྲག་ལས་ཀྱི་གནས་ནི། བཅུ་བཞི་པ་ལས་མ་མོའི་གནས་སམ་དུར་ཁྲོད་དམ། །ཞེས་པའི་རྐང་པ་བཞིས་བསྟན་ཏོ། །ཞི་སོགས་གསུམ་སྒྲུབ་པའི་གནས་ནི་བཅུ་གཅིག་པ་ལས། རྣམ་པར་དབེན་པའི་རི་བོ་དང༌། །ཞེས་པའི་རྐང་པ་བཞི་དྲང་དོན་དུ་བཤད་པས་བསྟན་ཏོ། །གང་ལ་ལས་བྱ་བའི་ཡུལ་གྱི་ཁྱད་པར་ནི། བཅུ་གསུམ་པ་ལས་མ་དད་སྨྲ་བའི་སེམས་ཅན་དང༌། །ཞེས་སོགས་ཀྱིས་མངོན་སྤྱོད་བྱ་བའི་ཡུལ་བསྟན་ལ་དེས་མཚོན་ནས་ལས་གཞན་གང་ལ་བྱ་བའི་ཡུལ་ཡང་ཤེས་པར་བྱའོ། །ལས་སྒྲུབ་དུས་སུ་ཟ་བའི་ཁ་ཟས་ཀྱི་ཁྱད་པར་ནི། དྲག་པོའི་ལས་ཀྱི་རིགས་སོ་སོ་ལ་ཤ་ཆེན་ལ་སོགས་པ་བཟའ་བར་ལེའུ་དྲུག་པའི་འགྲེལ་པ་ལས་གསུངས་ཏེ། དེས་གཞན་ཡང་མཚོན་ནོ། །ལས་རྣམས་ཇི་ལྟར་བྱེད་པའི་ཆོ་གའི་ཁྱད་པར་ནི། སྒྲུབ་གྲོགས་ཕྱག་རྒྱ་མ་ལ་བརྟེན་ནས་རང་རང་སོ་སོའི་ཆོ་ག་བཤད་པ་བཞིན་དུ་བྱེད་པ་སྟེ། བཅུ་གཉིས་པ་ལས། ལམ་གྱི་བཞི་མདོའམ་ཤིང་གཅིག་དྲུང༌། །ཞེས་པ་བཞིས་དེ་ལྟར་གསུངས་ཤིང༌རྣམ་པར་དབེན་པའི་རི་བོ་དང༌། །ཞེས་པ་བཞི་ངེས་དོན་དུ་བཤད་པ་ལ་གསུངས་ལ་འཕགས་པའི་མདོ་བསྲེ་ལས། ཞི་སོགས་ཀྱི་ལས་སྒྲུབ་པ་ཐམས་ཅད་ལ། དབང་པོ་གཉིས་ཀྱི་སྦྱོར་བ་ཡིས། །དངོས་པོ་ཐམས་ཅད་བརྟག་པར་བྱ། །ཞེས་པའི་ཚིག་ཟིན་ལྟར་བྱ་བར་གསུངས་སོ། །དེ་ལ་རྒྱུད་འདིར་དབུ་ཞབས་སུ་དངོས་གྲུབ་དང་ལས་ཚོགས་སྟོན་པའི་གཞུང་བརྒྱ་ལྔ་བཅུ་ང་ལྔ་ལེའུ་དགུ་པའི་དམ་ཚིག་ལྔ་ལ་དྲང་
ངེས་གཉིས་སུ་ཕྱེ་བའི་དྲང་དོན་གྱི་ལྔ་དང་བཅས་པས་བརྒྱ་དྲུག་ཅུར་འགྱུར་རོ་ཞེས་བོད་ཀྱི་མཁས་པ་དག་གསུང་ངོ༌། །སྤྱན་མའི་སྔགས་ཀྱིས་ལས་སྒྲུབ་པའི་སྐབས་སུ་ནད་ཞི་བ་དང༌། རྒྱས་པ་སོགས་ཀྱི་ལས་རྣམས་ཀྱང་སྒྲུབ་པར་འགྱུར་ཚུལ་མཆན་དུ་བཤད་ཟིན་ལ། ཤི་བ་སོས་པར་བྱེད་པར་གསུངས། ཞེས་པ་ལ་ཤི་བ་སློང་བ་དང་འཆི་བར་ཕྱོགས་པའི་སྲོག་ཀྱང་འཛིན་པར་བྱེད་པའི་ལས་སྦྱོར་ཤེས་པར་འདོད་ན་སྙིམ་པའི་མེ་ཏོག་ལས་ཤེས་པར་བྱའོ། །གོས་དཀར་མོའི་སྐབས་སུ་གཞན་འདྲ་བ་ལ་འོད་ཟེར་གྱིས་ལུས་ཉམས་པ་དང་སྤྲོ་བ་ཉམས་པ་བསྲེགས། དེ་བཞིན་གཤེགས་པ་ཐམས་ཅད་ཀྱི་སྟོབས་དང་བརྩོན་འགྲུས་འོད་ཟེར་སེར་པོའི་ཚུལ་དུ་བསྡུས་ནས་གང་བར་བསམས་ཏེ་སྔགས་ལ། ཆེ་གེ་མོའི་ཀ་ཡ་པ་ལ་པུཥྚ່་ཀུ་རུ་བཽ་ཥ་ཊ་ཞེས་བཟླས་ན་ལུས་དང་སྤྲོ་བ་རྒྱས་པར་འགྱུར་རོ། །དེ་རྣམས་རང་དོན་དུ་བྱེད་ན། ཆེ་གེ་མོ་ཞེས་པའི་སྐབས་སུ་མེ་ཞེས་གཞུག་ཅིང་དབང་བསྐུར་བ་ལ་སོགས་པ་རྣམས་རང་ལ་བྱའོ། །ཕན་ཚུན་དཀྲི་བའི་ཚུལ་དུ་བྱ། །ཞེས་བྱ་བ་ལ་སོགས་པའི་སྐབས་སུ་བསྐྱེད་རིམ་པའི་ཕུར་གདབ་གསུམ་གསུངས་པའི་ཕུར་གདབ་དང་པོ་ལ་ལྷའི་རྣལ་འབྱོར་མི་བསྐྱོད་པ་ཡབ་ཡུམ་གྱིས་བྱ་བར་གསུངས་ཤིང༌། ཕུར་གདབ་གཞན་གཉིས་ལ་ལྷའི་རྣལ་འབྱོར་མི་གསལ་ཡང༌། དང་པོ་དང་འདྲ་བར་བྱ་བ་འགྲེལ་པའི་དགོངས་པའོ། །འདི་ལ་རྫོགས་རིམ་པའི་ཕུར་གདབ་གསུམ་ཡང་ཡོད་ལ། དེ་ཡང་རྒྱུད་ཕྱི་མ་ལས། རིགས་ཀྱི་དབྱེ་བའི་སྦྱོར་བས་ནི། །རྡོ་རྗེ་
ཕུར་བུས་ཕུར་བུ་གདབ། །ཞེས་གསུངས་པའི་དོན་འགྲེལ་པར་རྣམ་པར་སྣང་མཛད་ཀྱི་སྦྱོར་བ་དང་ལྡན་པས། སངས་རྒྱས་སྤྱན་མདུན་དུ་བཞག་ལ། ལག་པ་ཕན་ཚུན་འཁྱུད་པ་དང་དཀྲི་བ་ལ་སོགས་པ་བྱ་བ་ནི་སྐུའི་ཆོ་གའོ། །སྣང་བ་མཐའ་ཡས་ཀྱི་སྦྱོར་བ་དང་ལྡན་པས་གོས་དཀར་མོ་མདུན་དུ་བཞག་ལ། སྣང་བ་དང་སྣང་བ་མཆེད་པ་དང་སྣང་བ་ཐོབ་པ་གསུམ་འབྱུང་བའི་པདྨ་ལྷ་མོའི་བྷ་ག་ལ་རྡོ་རྗེ་རྩེ་ལྔ་པ་བསྒོམས་ལ་ཆོས་འབྱུང་ཡོད་པའི་ནང་དུ་ཆུད་པར་བྱའོ། །མི་བསྐྱོད་པའི་སྦྱོར་བ་དང་ལྡན་པས་མཱ་མ་ཀཱི་མདུན་དུ་བཞག་ལ་རང་གི་རྡོ་རྗེ་རྩེ་མོ་ལྔ་པར་བསྒོམས་ལ། རང་གི་ཕྱག་རྒྱའི་ཆོས་འབྱུང་གི་ནང་དུ་ཆུད་པའི་མེའི་དཀྱིལ་འཁོར་དང་ལྡན་པར། རང་གི་རྡོ་རྗེས་གདན་བརྡབས་ཤིང་བརྡུངས་ན་འོད་གསལ་བ་འཐོབ་པར་འགྱུར་རོ། །ཞེས་ལྷའི་རྣལ་འབྱོར་རིགས་གསུམ་གྱི་དབྱེ་བས་རྡོ་རྗེ་དང་པདྨ་སྦྱོར་བའི་ཕུར་གདབ་གསུམ་བཤད་པ་ནི། རིགས་ཀྱི་དབྱེ་བའི་སྦྱོར་བ་ཞེས་གསུངས་པའི་དོན་ཡིན་ལ་དེ་ཡང་རྫོགས་རིམ་པའི་དབང་དུ་བྱས་པ་སྟེ། བསྐྱེད་རིམ་པའི་ལྷ་ལ་ཕུར་གདབ་བྱེད་ན་བསྒྲུབ་བྱ་མ་གཏོགས་པ་འགྲེལ་པར་བཤད་པ་བཞིན་ཡིན་ནོ། །ཕུར་གདབ་བྱེད་ཚུལ་ནི་ཐུགས་ཀའི་འོད་ཟེར་གྱིས་ཡེ་ཤེས་ཀྱི་དཀྱིལ་འཁོར་གྱི་ལྷ་སོ་སོའི་ཡུམ་གྱི་པདྨའི་ནང་གི་མེའི་དཀྱིལ་འཁོར་གྱི་སྟེང་དུ་བཀུག་ནས་ལིང་ག་ཕུར་བུའི་རྣམ་པ་ཅན་དུ་བསམས་ཏེ། སྙོམས་པར་འཇུག་བཞིན་པའི་ངང་ནས་ལྷ་རྣམས་ཀྱི་སྐུ་ལ་ཕུར་བུས་བཏབ་པར་བསྒོམ་པའོ། །དེ་ལྟར་བྱས་ན་འོད་གསལ་བ་ཐོབ་
པར་འགྱུར་རོ། །ཞེས་པའི་འོད་གསལ་ནི་དོན་གྱི་འོད་གསལ་ཡིན་ལ། དེ་ཐོབ་ན་དེའི་མཇུག་ཐོགས་ཉིད་དུ་སློབ་པའི་ཟུང་འཇུག་ཐོབ་པར་འགྱུར་བས་འདིར་ཕུར་འདེབས་བྱེད་པ་པོ་ནི་སྒྱུ་ལུས་ཐོབ་ནས་སྤྱོད་པ་བྱས་པའོ། །དེ་ནི་སློབ་པའི་ཟུང་འཇུག་ཐོབ་པའི་རྗེས་སུ་ཡང་སྤྱོད་པ་བྱས་པས་དུས་འདི་ཙམ་ན་དབང་ཕྱུག་གི་ཡོན་ཏན་གྱི་མཚན་མ་འབྱུང་ཞེས་པ་དང༌། མཆོག་འགྲུབ་ཅེས་གསུངས་པ་ལྟར་དུས་ཚིགས་དེ་ལ་མ་གྲུབ་ན་ལྷ་ལ་དྲག་ཤུལ་བྱ་བ་ཡང་མཚོན་པར་ཤེས་པར་བྱ་སྟེ། གང་ཚེ་བྱང་ཆུབ་མ་གྲུབ་ན། །དྲག་ཤུལ་སྦྱོར་བས་བསྒྲུབ་པར་བྱ། །ཞེས་གསུངས་པའི་དོན་ཡིན་པའི་ཕྱིར་རོ། །ལེའུ་བཅུ་བཞི་པའི་མཐའ་གཅོད་དོ།། ༒ །།རྡོ་རྗེ་ཉི་མ་ནུབ་ནས་ནི། །བསྒྲུབ་པ་ཀུན་ཏུ་བརྩམ་པར་བྱ། །ཞེས་པའི་རྐང་པ་བཞི་ཕྱི་ནང་གི་མངོན་པར་བྱང་ཆུབ་པ་གཉིས་ལ་སྦྱར་ཏེ་འགྲེལ་པར་བཤད་ལ། ཕྱི་ནང་གི་བྱང་ཆུབ་པ་གཉིས་རིམ་ལྔ་ལས་བཤད་ཚུལ་ནི། མཚན་མོ་སྣང་བའི་ཆ་སྟེ་གསལ་བ་ཉི་མའི་ཟེར་འགྱེད་སྣང་བ་མཆེད་པ་ཡིན། །མཚམས་ནི་སྣང་བ་ཐོབ་པར་རང་གི་རང་བཞིན་རྣམས་ཀྱིས་ལན་ཅིག་མིན་པར་འགྲོ ། མཚན་མིན་ཉིན་པར་མ་ཡིན་མཚམས་མིན་གང་ཞིག་རང་བཞིན་རྣམས་དང་རྣམ་བྲལ་བ། །དེ་ནི་བྱང་ཆུབ་སྐད་ཅིག་ཡིན་པར་བླ་མ་མཆོག་བཤད་རྣལ་འབྱོར་པ་ཉིད་ཡུལ། །མཚམས་ཀྱི་མཐའ་ནི་འཇིག་མིན་མུན་ནག་ཚོགས་ནི་མ་ལུས་གང་དུ་འདས་པ་དང༌། །ཇི་སྲིད་ཉི་མ་མ་ཤར་སྐད་ཅིག་འདིར་ནི་དྲི་མེད་ཡང་དག་མཐའ་རུ་བཤད། །སློབ་
དཔོན་མཆོག་ནི་རབ་རིབ་བྲལ་བས་སློབ་མ་ལ་ནི་ཕྱི་རོལ་བྱང་ཆུབ་བསྟན། །ནང་གི་བདེ་བ་རྙོག་བྲལ་སངས་རྒྱས་བྱང་ཆུབ་སྐད་ཅིག་དག་གིས་ཐོབ་པར་འགྱུར། །ཞེས་གསུངས་སོ། །དེའི་རྐང་པ་ཐ་མས་ནང་གི་མངོན་བྱང་བསྟན་ལ་ལྷག་མ་རྣམས་ཀྱིས་ཉིན་ཞག་གཅིག་ལ་བཞི་ཆར་བྱས་པ་སྟོང་པ་བཞི་དང་སྦྱར་ནས་ཕྱིའི་མངོན་བྱང་བསྟན་ནོ། །མཚན་མོ་སྣང་བའི་ཆ་སྟེ་ཞེས་པ་ནི་མཚམས་ཀྱི་སྨག་འཐུག་པོ་ཡལ་བ་ནས་བཟུང་སྟེ། ཐོ་རངས་ལ་མ་སླེབས་པའི་བར་གྱི་མཚན་མོ་ནམ་མཁའ་གཡའ་དག་ལ་ཟླ་བ་ཤར་བའི་དུས་ལ་སྣང་བ་བཞག་པའོ། །གསལ་བ་ཉི་མའི་ཟེར་འགྱེད་སྣང་བ་མཆེད་པ་ཡིན། ཞེས་པ་ནི་ནམ་མཁའ་གཡའ་དག་ལ་ཉི་འོད་དང་པོ་ཤར་ནས་མ་ནུབ་ཀྱི་བར་གྱི་དུས་ལ་སྣང་བ་མཆེད་པར་བཞག་པའོ། །མཚམས་ནི་སྣང་བ་ཐོབ་པ་ཞེས་པ་ནི་ཉི་འོད་ཕྲ་མོ་ཡང་འདས་ནས་སྨག་འཐུག་པོ་མ་སངས་ཀྱི་བར་གྱི་མཚམས་ཀྱི་མུན་པས་ནམ་མཁའ་གཡའ་དག་ལ་ཁྱབ་པའི་དུས་ལ་ཉེར་ཐོབ་བཞག་པའོ། །རང་གི་རང་བཞིན་རྣམས་ཀྱིས་ཞེས་པ་ནི་སྣང་བ་གསུམ་པོ་རང་རང་གི་རང་བཞིན་གྱི་རྟོག་པ་སྡེ་ཚན་གསུམ་དུ་བཅད་པ་རྣམས་སོ། །ལན་ཅིག་མིན་པར་འགྲོ་བ་ནི་ཡང་དང་ཡང་དུ་སྣང་བ་གསུམ་ལས་ཀུན་རྟོག་རྣམས་སྐྱེ་བ་དང་ཐིམ་པའི་རིམ་གྱིས་འཇུག་པའོ། །མཚན་མིན་ནས་རྣམ་བྲལ་བ་ཞེས་པའི་བར་ནི། སྣང་བ་གསུམ་དང་རང་བཞིན་བརྒྱད་ཅུའི་རྟོག་པ་དང་བྲལ་བ་ཡིན་ལ། དེ་ནི་མངོན་པར་བྱང་ཆུབ་པའི་སྐད་ཅིག་མ་ཡིན་པར་བླ་མ་མཆོག་རྣམས་ཀྱིས་བཤད་
ཅིང་རྣལ་འབྱོར་པ་མཆོག་ཉིད་ཀྱི་ཡུལ་ལོ། །དེ་གང་ལ་བཞག་པའི་དུས་ནི་མཚམས་ཀྱི་མཐའ་ནི་ཉེར་ཐོབ་གང་ལ་བཞག་པའི་དུས་སོ། །འགྱུར་རྙིང་ལས། འཇིག་མིན་ཞེས་འབྱུང་ཡང༌། ཆག་འགྱུར་ལས། དེ་ལ་རྣམ་པར་ཟད་ཅེས་འབྱུང་བ་ལྟར་དུས་དེ་དང་སྣང་བ་གང་ལ་བཞག་པའི་དུས་མུན་ནག་གི་ཚོགས་གཉིས་པོ་མ་ལུས་པར་འདས་པ་ནས་ཇི་སྲིད་དུ་ཉི་འོད་དང་པོ་མ་ཤར་བའི་དུས་འདི་ནི་ཡང་དག་པའི་མཐའ་འོད་གསལ་དུ་བཤད་པའི་ཕྱིའི་བྱང་ཆུབ་འདི་ནི་སློབ་དཔོན་གྱིས་སློབ་མ་ལ་བསྟན་ཞེས་པའོ། །སྤྱོད་བསྡུས་ལས་གསུངས་ཚུལ་གྱི་ཕྱིའི་མངོན་བྱང་ནི་ཐོ་རངས་ཀྱི་ཐུན་མཚམས་སུ་མ་རིག་པའི་སྣང་བ་འདས་ནས་ཇི་སྲིད་ཉི་མ་གསལ་བར་མ་གྱུར་བ་སྟེ་འདི་ལ་ནི་འོད་གསལ་ཐམས་ཅད་སྟོང་པའོ། །ཞེས་བཤད་པའི་དོན་ནི་རིམ་ལྔ་ལས། ཐོབ་པ་དང་སྣང་བའི་མཚན་གྱི་དུས་གཉིས་འདས་ཤིང་ཉི་མ་མ་ཤར་བའི་བར་ལ་བཤད་པའི་ཐོ་རངས་སོ། །ཉི་མ་ཤར་བ་ན་སྣང་བ་མཆེད་པ་དང་ཉི་མ་ནུབ་པའི་མཚམས་སུ་མ་རིག་པ་དང་ཟླ་བ་ཤར་བའི་ཚེ་སྣང་བའོ་ཞེས་བཤད་དེ་འདི་རིམ་ལྔ་དང་སྦྱར་བ་ལ་བརྟེན་ནས་ཤེས་པར་ནུས་སོ། །ནང་གི་མངོན་བྱང་སྟོན་པ་ན་དང་པོར་སྨིག་རྒྱུ་ལྟ་བུ་ལ་འོད་ཟེར་ལྔའི་ཚོགས་དང་ལྡན་པར་མཐོང་ངོ༌། །གཉིས་པ་ནི་སྣང་བ་སྟེ་ཟླ་བའི་འོད་ཟེར་ལྟ་བུའོ། །གསུམ་པ་ནི་སྣང་བ་མཆེད་པ་སྟེ་ཉི་མའི་འོད་གཟེར་ལྟ་བུའོ། །བཞི་པ་ནི་སྣང་བ་ཐོབ་པ་སྟེ་མུན་པ་ལྟ་བུའོ། །དེ་ནས་མུན་པ་དང་བྲལ་བའི་སྐད་ཅིག་ལ་འོད་གསལ་བ་སྟེ་ཤིན་ཏུ་གསལ་བ་རྟག་
ཏུ་སྣང་བའི་མཚན་ཉིད་ཅན། དོན་དམ་པའི་བདེན་པའི་རང་གི་མཚན་ཉིད་ཡེ་ཤེས་ཀྱི་མིག་གིས་མཐོང་བ་ཞེས་གསུངས་སོ། །འདི་ལ་དཔྱད་པར་བྱ་སྟེ་སློབ་མ་ལ་བླ་མས་ཕྱི་ནང་གི་བྱང་ཆུབ་པ་གཉིས་སྟོན་པའི་དང་པོ་ནི། ཕྱིའི་ཞག་གཅིག་ལ་བཞི་ཆར་བྱས་ནས་སྟོང་པ་བཞི་བཤད་པ་སོར་བཞག་ཏུ་བྱེད་ན་སྟོང་པ་བཞི་པ་བྱང་ཆུབ་ཀྱི་སྐད་ཅིག་ཡིན་པ་དང༌། རྣལ་འབྱོར་པ་ཉིད་ཀྱི་ཡུལ་ཡིན་པ་སོགས་མི་འཐད་ལ། དེའི་དུས་ཀྱི་ནམ་མཁའ་བཞི་དཔེར་བྱས་ནས་སྟོང་པ་བཞི་སྟོན་པ་ལ་བྱེད་ན་ནི་ནང་གི་སྟོང་པ་བཞི་ཡང་དེ་ལྟར་ཡིན་པས། ཕྱི་ནང་གི་ཁྱད་པར་དབྱེ་མི་ནུས་ཏེ། ནང་གི་སྐབས་སུ་ཡང་ཟླ་ཉི་དང་མུན་པ་དཔེར་བཀོད་ནས་བསྟན་པའི་ཕྱིར་རོ། །དུས་དེ་བཞི་རེ་རེའི་དུས་ལ་སྟོང་པ་བཞིའི་ཡེ་ཤེས་རེ་རེ་སྐྱེ་བ་ལ་བྱེད་ན་དུས་དེ་བཞིའི་རེ་རེའི་དུས་ལ་སྟོང་པ་བཞི་ཚང་བ་སྐྱེ་བ་མེད་པར་འགྱུར་བས། ཕྱི་ནང་གི་བྱང་ཆུབ་གཉིས་ཀྱི་ཁྱད་པར་གང་ནས་འབྱེད་པ་ཡིན་སྙམ་ན། འདི་ལ་རྗེ་འགོས་ཀྱིས་ནཱ་རོ་པའི་བཞེད་པ་དང༌། བཙུན་མོ་ཅན་དང་ནག་པོ་དམ་ཚིག་རྡོ་རྗེ་གཉིས་ཀྱི་བཞེད་པ་སྟེ་ལུགས་གཉིས་བཀོད་པའི་དང་པོ་ནི། ཞག་གཅིག་གི་བཞི་ཆ་སྟོང་པ་བཞིར་བཤད་པ་ནི། ཆོས་ཉིད་ཀྱི་དཔེ་དང་དུས་དང་རྟགས་དང་མཚོན་བྱེད་ཡིན་པས་དྲང་དོན་ཏེ་ཕྱིའི་མངོན་བྱང་དང་ངེས་དོན་ནི་ནང་གི་མངོན་བྱང་ཡིན་ཏེ། ལས་རྒྱ་དང་སྙོམས་པར་ཞུགས་པས་བྱང་སེམས་རྡོ་རྗེ་རྩ་བ་དང་རྐེད་པ་དང་རྡོ་རྗེའི་བུམ་པར་སླེབ་པ་ན། བདེ་བ་དེ་གསུམ་ལ་སྟོང་པས་རྒྱས་བཏབ་སྟེ་བསྒོམས་པ་ན། ལམ་གྱི་
སྣང་བ་གསུམ་དང་ཐིག་ལེ་གཉིས་ཤོར་གཉིས་གནས་ཀྱི་དུས་སུ་ངོ་བོ་ཉིད་ཀྱི་རྟོག་པ་ལོག་པའི་བདེ་བའི་ཡེ་ཤེས་ནི་ཐམས་ཅད་སྟོང་པ་འོད་གསལ་ལོ། །གཉིས་པ་ནི། ཕྱིའི་དཔེ་བཞིས་དགག་བྱ་གློ་བུར་བའི་རྟོག་པ་དང་བྲལ་བ་བཞིའི་ཆ་ནས་མཚོན་པ་ནི་ཕྱིའི་བྱང་ཆུབ་དང་བསམ་གཏན་གཉིས་ཀྱིས་སྒྱུ་མ་འོད་གསལ་དུ་བཅུག་པའི་ཉམས་མྱོང་གི་ཆ་ནས་བསྟན་པ་ནི་ནང་གི་མངོན་བྱང་དུ་བཤད་དོ། །ལཀྵ་མཱིས་ནི། ཞག་གི་ཆ་སྟོང་པ་བཞིར་བཤད་པ་ནི། དེ་དག་གི་མིང་ཅན་གྱི་ནང་གི་སྟོང་པ་བཞི་ལ་འདོད་ཅིང༌། ལས་ཀྱི་ཕྱག་རྒྱ་ལ་བརྟེན་པའི་སྟོང་པ་བཞི་པ་དང་ཡེ་ཤེས་ཀྱི་ཕྱག་རྒྱ་ལ་བརྟེན་པའམ་སྨིག་རྒྱུ་ལ་སོགས་པའི་མཚན་མ་ལྔའི་རིམ་གྱིས་ཐོབ་པའི་སྟོང་པ་བཞི་པ་ནི་ནང་གི་མངོན་བྱང་དུ་བཤད་དོ། །འགྲེལ་པ་ཟླ་འོད་དང་དོན་གསལ་དང་དམ་ཚིག་རྡོ་རྗེའི་འགྲེལ་པ་དང་ཐུབ་པ་དཔལ་གྱིས་ཀྱང་ཕྱིའི་སྐབས་སུ་བཤད་པའི་སྟོང་པ་བཞི་ནང་གི་སྟོང་པ་བཞི་ལ་བཤད་ཅིང༌། ཕྱི་ནང་གི་ཁྱད་པར་གསལ་བར་མ་ཕྱེའོ། །སྔར་བཤད་པ་ལྟར་དཔྱད་ན་ནི་ཕྱི་ནང་གི་ཁྱད་པར་ཕྱེ་བ་དེ་རྣམས་ཀྱིས་ལན་མི་ཐེབས་ཤིང༌། ཁྱད་པར་མ་ཕྱེ་བ་རྣམས་ཀྱི་བཤད་པས་ཀྱང་ལན་ཐེབས་པར་མི་སྣང་ལ། གནས་འདི་ཤིན་ཏུ་རྟོགས་དཀའ་ཞིང་གལ་ཡང་ཆེ་བར་སྣང་བས་དཔྱད་དགོས་སོ། །དེ་ལ་མངོན་པར་བྱང་ཆུབ་པ་གཉིས་ནི་དོན་གྱི་འོད་གསལ་ལ་བྱའོ། །དེ་ཉིད་ལ་ཕྱི་ནང་གི་བྱང་ཆུབ་པ་གཉིས་སུ་འཇོག་ཚུལ་ནི་རྒྱུད་འགྲེལ་ལས། ཕྱིའི་མངོན་བྱང་ལ་སྦྱར་བའི་དུས་སུ་སྐྱ་རེངས་
འཆར་བའི་དུས་སུ་ནི། །སྒོམ་པ་མཆོག་གིས་འགྲུབ་པར་འགྱུར། །ཞེས་གསུངས་པའི་སྐྱ་རེངས་འཆར་བའི་དུས་སུ་ཞེས་པ་ཐོ་རངས་ཀྱི་དུས་ལ་བཤད་ཅིང༌། ནང་གི་མངོན་བྱང་དང་སྦྱར་བའི་ཚེ་དུས་ཚིགས་དེའི་དོན། ཉེར་ཐོབ་འདས་པའི་དུས་སུ་འགྲུབ་པ་ལ་བཤད་པས། དོན་གྱི་འོད་གསལ་མངོན་དུ་འགྱུར་བ་ཐོ་རངས་ཀྱི་དུས་ཁྱད་པར་ཅན་ལ་ལྟོས་པའི་སྒོ་ནས་ཕྱིའི་མངོན་བྱང་ཞེས་བྱ་ལ། དེ་ཡང་ནང་གི་སྟོང་པ་བཞིའི་རིམ་གྱིས་མངོན་དུ་བྱས་པའི་ཆ་ནས་ནང་གི་མངོན་བྱང་ཞེས་བྱའོ། །དེའི་ཕྱིར་ཞག་གཅིག་གི་དུས་ཚིགས་གཞན་གསུམ་སྟོང་པ་གསུམ་དུ་བྱས་པ་ནི་སྔར་སེམས་དབེན་དུ་བཤད་པ་ལྟར་དེའི་དུས་ཀྱི་ནམ་མཁའི་དཔེ་མཚོན་པ་ཡིན་ཀྱང་ཕྱི་ནང་གི་ཁྱད་པར་དབྱེ་མི་ནུས་པའི་སྐྱོན་མེད་དོ། །མི་སློབ་པའི་ཟུང་འཇུག་ཀྱང་རིམ་ལྔ་དང་སྤྱོད་བསྡུས་དང་གྲོལ་བའི་ཐིག་ལེ་ལས་ཐོ་རངས་ཀྱི་དུས་སུ་འཐོབ་པར་གསུངས་ཏེ། དུས་འདིར་འཐོབ་པ་ནི་སློབ་པའི་ཟུང་འཇུག་ལ་ཡང་འདྲའོ། །རྡོ་རྗེ་གུར་ལས་ཀྱང༌། བསམ་གཏན་གནས་སུ་རབ་འདུག་སྟེ། །ཕྱག་རྒྱར་ལན་གཅིག་རབ་ཞུགས་ནས། །རྡོ་རྗེ་སྦྱོར་བ་ཡང་དག་བརྩམ། །རྡོ་རྗེ་ཉི་མ་ནུབ་ནས་ནི། །སྦྱོར་བ་འདི་ནི་རབ་བརྩམས་ན། །སྐྱ་རེངས་འཆར་བའི་དུས་སུ་ནི། །འགྲུབ་འགྱུར་འདི་ལ་ཐེ་ཚོམ་མེད། །ཅེས་འདུས་པ་ནས་བཤད་པ་དང་མཐུན་པར་གསུངས་སོ། །མཆོག་འགྲུབ་པའི་ཚེ་སྒྲུབ་པ་པོ་རང་ཉིད་ཁོ་ནར་མ་ཟད། ཕྱག་རྒྱ་མས་ཀྱང་མཆོག་འགྲུབ་པར། །མི་སྣང་བདག་པོ་དཔལ་དང་ལྡན། །ཞེས་པའི་ལེའུ་འདི་ཉིད་ཀྱི་འགྲེལ་
པར་བཤད་དོ། །རྣམ་པར་སྣང་མཛད་འོད་འདྲ་ཞིང༌། །ཞེས་པའི་རྐང་པ་གསུམ་འཕགས་པའི་མདོ་བསྲེ་ལས། བསྲུང་འཁོར་གྱི་དབུས་སུ་རྡོ་རྗེ་འཆང་དཀར་པོ་སྒོམ་པ་ལ་སྦྱར་ཞིང༌། རྡོར་སེམས་ཀྱི་སྒྲུབ་ཐབས་ལས། རྐང་པ་དང་པོ་གཉིས་མངོན་བྱང་ལྔ་སྐྱེད་ཀྱི་སྐབས་སུ་དང་པོའི་མགོན་པོ་བསྐྱེད་པ་ལ་སྦྱར་བ་དང་འགྲེལ་པར་དེ་གསུམ་གྱི་དོན། སྤྱོད་པ་བྱས་པས་རིགས་ལྔ་དང་མཉམ་པར་འགྱུར་བ་ལ་བཤད་པ་རྣམས་དོན་གཅིག་ཏུ་མ་བྱུང་ཡང་མི་འགལ་བ་ནི་སྔར་བཞིན་ནོ། །ལེའུ་བཅོ་ལྔ་པའི་མཐའ་གཅོད་དོ།། ༒ །།ལེའུ་བཅུ་དྲུག་པ་འདིར་སློབ་དཔོན་གྱི་ལས་དང༌། དངོས་གྲུབ་སྒྲུབ་པ་དང་བརྟུལ་ཞུགས་ཀྱི་སྤྱོད་པ་རྣམས་བསྟན་ལ། སློབ་དཔོན་གྱི་ལས་ཀྱི་སྐབས་སུ་དཀྱིལ་འཁོར་བྲི་བ་ལ་རྒྱུད་ཕྱི་མ་ལས། བཞི་པ་དང་ནི་བཅུ་དྲུག་པ། །བརྒྱད་པ་དེ་བཞིན་བཅུ་གཉིས་པ། །སློབ་དཔོན་སྤྱིའི་ལས་དང་ནི། །དངོས་གྲུབ་བརྟུལ་ཞུགས་སྡོམ་པ་ཡིན། །ཞེས་པའི་དོན། དེའི་འགྲེལ་པར། བདག་གི་དོན་དུ་དཀྱིལ་འཁོར་བྲིས་ཏེ། རིག་པ་བརྟུལ་ཞུགས་ཀྱི་སྤྱོད་པས་དངོས་གྲུབ་སྒྲུབ་པར་བྱ་ཞིང༌། གཞན་གྱི་དོན་དུ་དཀྱིལ་འཁོར་བྲིས་ཏེ་སློབ་མ་གཞུག་པའི་ཆོ་གས་བཅུག་ལ་དབང་རྣམ་པ་བཞི་སྐུར་བར་བྱེད་པ་ནི་སྒྲུབ་པ་ཡིན་ནོ་ཞེས་གསུངས་ཏེ། དེ་ལྟར་ན་ལེའུ་འདིར་དཀྱིལ་འཁོར་གཉིས་བྲིས་པར་གསུངས་པ་ལ། དཀྱིལ་འཁོར་ལ་བརྟེན་ནས་དངོས་གྲུབ་བསྒྲུབ་པའི་ཚེ་བརྟུལ་ཞུགས་ཀྱི་སྤྱོད་པ་དང་འབྲེལ་ལ། སློབ་དཔོན་གྱི་ལས་ཀྱི་ཚེ་སློབ་མ་ཡོངས་སུ་སྨིན་
པ་དང་འབྲེལ་བའི་ཚུལ་གཉིས་སུ་ཤེས་པར་བྱའོ། །གཞན་ཡང་ལེའུ་འདིར་གསུངས་པའི་རི་ལུ་ཐོད་པ་ཁ་སྦྱོར་གྱི་ནང་དུ་འཇོག་པ་དང༌། བཅུ་གཉིས་པ་ནས་གསུངས་པའི་ཕྱིའི་རྫས་ལས་བྱས་པའི་འཁོར་ལོ་ལ་སོགས་པ་ཡང་དཀྱིལ་འཁོར་གྱི་དབུས་སུ་བཞག་ནས་སྒྲུབ་པ་ཡང་ཡོད་དོ། །རྒྱུད་འདིར་བླ་མ་ལ་ལྟོས་པར་བྱ་བའི་ཕྱིར་ཡེ་ཤེས་དབབ་པ་དང་དཀྱིལ་འཁོར་དུ་ཞུགས་པའི་འོག་ཏུ། སངས་རྒྱས་ཀུན་གྱིས་ནམ་མཁའི་ཁམས། །ཡོངས་སུ་གང་བར་རབ་ཏུ་བསྒོམ། །ཞེས་པའི་འགྲེལ་པར་དཀྱིལ་འཁོར་པའི་ལྷ་དམ་ཚིག་པ་རྣམས་ལ་ཡེ་ཤེས་པ་ཞུགས་པའི་དཀྱིལ་འཁོར་སྒྲུབ་པ་དང༌། བྱང་ཆུབ་རྡོ་རྗེས་གསོལ་བ་བཏབ་པའི་འོག་ཏུ་ལྷ་ངོ་སྟོན་པ་སོགས་གོ་རིམ་འཁྲུགས་པ་མང་ངོ༌། །དེ་ལ་འཁྲུགས་སྡེབ་པ་དང་དཀྱིལ་འཁོར་བྲི་བར་གསུངས་པ་སོགས་ཀྱི་གཞུང་ལ་བརྟེན་ནས་དཀྱིལ་འཁོར་སྒྲུབ་པའི་ཚུལ་ལེའུ་འདིར་བཤད་དགོས་ཏེ། ལེའུ་འདིའི་མཚམས་སྦྱོར་དུ། དཀྱིལ་འཁོར་གྱི་སྒྲུབ་པའི་ཐབས་བསྟན་པར་བྱ་བའི་ཕྱིར་ཞེས་གསུངས་པས་སོ། །དེ་ལ་སྐུ་དཀྱིལ་གྱི་སྐབས་སུ། དབུས་སུ་རྣམ་པར་སྣང་མཛད་གནས། །མི་བསྐྱོད་པ་ལ་སོགས་པའང་བྲི། །ཞེས་པ་ནས། ཁྲོ་བོ་རྣམས་ཀྱང་སྒོར་བྲིའོ་ཞེས་པ་དང༌། གསུང་དཀྱིལ་གྱི་སྐབས་སུ། མདོར་ན་ཕྱག་རྒྱ་ཐམས་ཅད་ནི། །ཆོ་ག་བཞིན་དུ་བྲི་བར་བྱ། །ཞེས་གསུངས་པ་ལ་བྲི་བ་ལ་འགྲེལ་པའི་སྐབས་གཞན་དུ་ལག་པས་བྲི་བ་དང་ཡིད་ཀྱིས་བྲི་བ་གཉིས་ཀ་ལ་བཤད་པ་ཡོད་པས། བྲི་ཞེས་པ་ལག་པས་ལྷའི་མཚན་མ་
བྲི་བ་དང་ཡིད་ཀྱིས་ལྷ་རྣམས་སྒོམ་པ་གཉིས་ཀ་ལ་བཤད་ནས་ཡིད་ཀྱིས་བྲི་བ་དམ་ཚིག་པ་རྣམས་སྐྱེད་པ་ལ་བྱ་སྟེ། འགྲེལ་པར་སངས་རྒྱས་ཐམས་ཅད་ཅེས་པ་རྫོགས་པར་གྱུར་པ་འདུས་ནས་ནམ་མཁའི་དཀྱིལ་འཁོར་ལ་བཞུགས་པ་བཀུག་ནས། གནས་ཇི་ལྟ་བ་བཞིན་བཞུགས་པ་ལ་བསྟིམ་ལ་མཆོད་པར་བྱའོ། །ཞེས་དང༌། བདག་ཉིད་ཀྱིས་བྲིས་པའི་རྡུལ་ཚོན་གྱི་དཀྱིལ་འཁོར་བསྒོམ་པར་བྱ་ཞིང་རིམ་པ་ཇི་ལྟ་བ་བཞིན་དུ་བསྟིམ་པར་བྱའོ། །ཞེས་གསུངས་པས་སྔོན་དུ་དམ་ཚིག་པ་རྣམས་བསྐྱེད་ནས་ཕྱིས་ཡེ་ཤེས་ཀྱི་དཀྱིལ་འཁོར་བསྟིམ་པར་གསུངས་ལ། དེ་ཡང་སྔར་བཤད་པའི་གཞུང་གི་འཆད་ཚུལ་ལྟར་མ་བྱས་ན། དམ་ཚིག་པ་བསྐྱེད་པ་རྒྱུད་ཀྱི་གཞུང་འདིས་བསྟན་ཞེས་བཞག་ཏུ་མེད་པའི་ཕྱིར་རོ། །དེ་ནས་སྐུ་དཀྱིལ་གྱི་སྐབས་སུ། རྡོ་རྗེ་གསང་བ་རབ་བསྒོམས་པས། །ཆོ་ག་སྔགས་ཤེས་པ་ཡིས་བྱ། །ཞེས་དང༌། གསུང་དཀྱིལ་ཀྱི་སྐབས་སུ། ཡོངས་སུ་གསལ་བར་ཆོ་ག་བཞིན། །དཀྱིལ་འཁོར་དམ་པ་བྱས་ནས་ནི། །དེ་ནས་གསང་བའི་མཆོད་པ་བྱ། །ཞེས་པའི་འགྲེལ་པར་སྔ་མ་ལ་དཀྱིལ་འཁོར་གྱི་དབུས་སུ་ཡབ་ཡུམ་སྙོམས་པར་ཞུགས་ནས་གསང་མཆོད་བྱ་བར་བཤད་པ་ནི་ཕྱི་མ་ལ་ཡང་འདྲ་ལ། དེ་ཡང་ཀླུ་བྱང་གི་དཀྱིལ་ཆོག་གི་དགོངས་པས། རང་དང་དཀྱིལ་འཁོར་གྱི་གཙོ་བོ་ཐ་མི་དད་དུ་བྱས་སྟེ་ཡབ་ཡུམ་སྙོམས་པར་ཞུགས་པའི་བྱང་ཆུབ་ཀྱི་སེམས་ལས་དཀྱིལ་འཁོར་པའི་ལྷ་
རྣམས་སྐྱེད་པར་བཤད་པ་ལྟར། ཡུམ་གྱི་པད་མར་དཀྱིལ་འཁོར་པའི་ལྷ་སྐྱེད་པ་དང༌། དཀྱིལ་འཁོར་བསྒྲུབས་ཟིན་པའི་འོག་ཏུ་གསང་མཆོད་ཀྱི་མཆོད་པ་བྱེད་པ་གཉིས་ཀ་གཟུང་བར་བྱའོ། །པད་མར་སྐྱེད་པའི་ལྷ་ཕྱིར་སྤྲོས་པ་རྣམས་ཀྱིས་རང་རང་གི་མཛད་པ་སོགས་མཛད་པའི་མཐར། རང་རང་གི་སངས་རྒྱས་ཀྱི་ཞིང་དུ་གཤེགས་ཏེ་སོ་སོའི་ཡེ་ཤེས་པ་དང་གཅིག་ཏུ་གྱུར་ནས། སླར་འབྱོན་པར་བཞེད་པའི་སྒོ་ནས་བཞུགས་པར་བསམ་མོ། །དེ་ནས་གནོད་མཛེས་ལ་བཀའ་བསྒོས་པའི་རང་འདྲའི་ཡེ་ཤེས་པ་དེ་རྣམས་སྤྱན་དྲངས་ནས་རང་འདྲའི་དམ་ཚིག་པ་སོ་སོ་ལ་ཐིམ་པར་བསམ་པ་ནི་སྔར་འགྲེལ་པར་དྲངས་པ་ལས་ཡེ་ཤེས་པ་ལ་དམ་ཚིག་པ་བཞུག་པར་བཤད་པ་སྔ་མ་ཡིན་ནོ། །དེ་ནས་སླར་ཡང་ཡེ་ཤེས་པ་རྣམས་སྤྱན་དྲངས་ཏེ་ནམ་མཁར་བཞུགས་པ་ལ་མཆོད་ནས་དམ་ཚིག་པ་སོ་སོ་ལ་བསྟིམ་པ་ནི་འགྲེལ་པར། དམ་ཚིག་པ་ལ་ཡེ་ཤེས་པ་གཞུག་པར་བཤད་པ་ཕྱི་མའི་དོན་ནོ། །འདི་རྣམས་ལེའུ་འདི་རྩ་འགྲེལ་དང་ཀླུ་བྱང་གི་དཀྱིལ་ཆོག་གཉིས་བསྒྲིགས་ནས་ཤེས་པར་བྱ་བའི་དཀའ་གནས་སུ་སྣང་བས་བཤད་ཀྱི། ཆོ་ག་ལྷག་མ་རྣམས་ནི་དཀྱིལ་འཁོར་གྱི་ཆོ་ག་ཞིབ་ཏུ་བཤད་པ་ལས་ཤེས་པར་བྱའོ། ༈ །གསང་བ་སྦྱིན་པ་བརྩམ་པར་བྱ། །ཞེས་པའི་རྐང་པ་ལྔ་སྙིམ་ཏོག་ལས་གསང་དབང་བསྐུར་བ་ལ་སྦྱར་ལ། འདིར་ཡང་གསང་དབང་བསྐུར་བ་ལ་ཤིན་ཏུ་གསལ་བས་གསང་དབང་ལ་སྦྱར་རོ། །འདིར་འགྲེལ་པར་བདུད་རྩི་
ལྔ་ཡི་གེ་གསུམ་གྱིས་བསྔགས་ནས། སྦྱང་བ་ལ་སོགས་པའི་ཆོ་གས་བདུད་རྩིར་བྱས་པ་སློབ་མ་ཟར་གཞུག་པར་གསུངས་པས་ནི། ཡབ་ཡུམ་གྱི་བྱང་སེམས་གཉིས་ཀྱི་བདུད་རྩི་ལྕེ་ཐོག་ཏུ་འཇོག་པའི་གསང་དབང་ཡང་མཚོན་པས་ན། སྔར་བཤད་པའི་གསང་དབང་གཉིས་ཀ་ཤེས་པར་བྱའོ། །རྣམ་པ་འདི་བཞི་གསང་ཆེན་ཏེ་ཞེས་པ་བཞི་སྙིམ་ཏོག་ལས་ཤེས་རབ་ཡེ་ཤེས་ཀྱི་དབང་བསྐུར་བ་ལ་སྦྱར་ལ། འདིར་རྩ་འགྲེལ་དུ་ཤེས་རབ་ཡེ་ཤེས་ཀྱི་དབང་བསྐུར་ལ་སྦྱར་བའི་མིང་འདོགས་དངོས་སུ་མ་མཛད་ཀྱང༌། དབང་གསུམ་པ་ལ་ངེས་པར་སྦྱར་དགོས་ལ། གསང་ཆེན་ཞེས་པའི་དོན་ཡང་གསང་དབང་ལས་ཀྱང་དབང་འདི་ཤིན་ཏུ་གསང་བའི་དོན་ནོ། །དབང་འདི་བསྐུར་བའི་ཚེ་སློབ་མ་དང་རིག་མ་དྲིས་ལན་བྱ་བ་སོགས་ཀྱི་ཆོ་ག་རྣམས་ནི་འདིའི་བཤད་རྒྱུད་རྡོར་འཕྲེང་ལས་གསུངས་པ་རྣམས་དཀྱིལ་ཆོག་ཏུ་བཤད་ཟིན་ཏོ། །དབང་འདི་བསྐུར་བའི་ཚེ་སློབ་མ་ཡབ་ཡུམ་ལྷ་གང་དུ་བསྒོམ་པའི་ཚུལ་ནི། འདུས་པ་ཕྱི་མ་ལས། བླ་མས་དེ་ནི་བྱིན་བརླབས་ཏེ། །སྒྲུབ་པ་པོ་ལ་སྦྱིན་པར་བྱ། །རྨོངས་པའི་གཏི་མུག་བདག་ཉིད་སྦྱོར། །གཏི་མུག་དགའ་དང་ཡང་དག་ལྡན། །གཏི་མུག་རྒྱུན་གྱིས་དབང་བསྐུར་ན། །གཏི་མུག་རྡོ་རྗེ་བདག་ཉིད་འགྱུར། །ཞེ་སྡང་སྡང་བའི་བདག་ཉིད་སྦྱོར། །ཞེ་སྡང་དགའ་དང་ཡང་དག་ལྡན། །ཞེ་སྡང་རྒྱུན་གྱིས་དབང་བསྐུར་ན། །ཞེ་སྡང་རྡོ་རྗེ་བདག་ཉིད་འགྱུར། །ཆགས་ལ་འདོད་ཆགས་བདག་
ཉིད་སྦྱོར། །འདོད་ཆགས་དགའ་དང་ཡང་དག་ལྡན། །འདོད་ཆགས་རྒྱུན་གྱིས་དབང་བསྐུར་ན། །འདོད་ཆགས་རྡོ་རྗེ་བདག་ཉིད་འགྱུར། །ཤེས་རབ་ཡེ་ཤེས་བདག་ཉིད་སྦྱོར། །རྡོ་རྗེ་དགའ་དང་ཡང་དག་ལྡན། །ཡེ་ཤེས་རྒྱུན་གྱིས་དབང་བསྐུར་ན། །ཤེས་རབ་ཡེ་ཤེས་བདག་ཉིད་འགྱུར། །ཞེས་སློབ་མ་རྣམ་སྣང་དང༌། མི་བསྐྱོད་པ་དང་སྣང་མཐའ་དང༌། ཤེས་རབ་ཀྱི་ཡེ་ཤེས་འཛིན་པ་དོན་གྲུབ་ཏུ་སྒོམ་པ་དང༌། རིག་མ་ནི་རིམ་པ་བཞིན་དུ། གཏི་མུག་དགའ་མ་དང༌། ཞེ་སྡང་དགའ་མ་དང༌། འདོད་ཆགས་དགའ་མ་དང༌། རྡོ་རྗེ་དགའ་མར་བསྒོམས་ནས་དབང་བསྐུར་བར་བཤད་དེ། སྐུ་དཀྱིལ་དང༌། ཐུགས་དཀྱིལ་དང༌། གསུང་དཀྱིལ་དང༌། དོན་གྲུབ་ཀྱིས་གཙོ་བོ་བྱས་པའི་དཀྱིལ་འཁོར་ལ་བརྟེན་ནས་དབང་གསུམ་པ་བསྐུར་བའི་ཚུལ་ལོ། །དེ་ལྟར་ཤེས་རབ་ཡེ་ཤེས་ཀྱི་དབང་བསྐུར་ཚུལ་བཞི་བཤད་པ་འདི་ནི། རྩ་རྒྱུད་ལས། རྣམ་པ་འདི་བཞིའི་གསང་ཆེན་ཏེ། །ཞེས་གསུངས་པའི་དོན་བཤད་པ་ཡིན་པར་ཤེས་པར་བྱའོ། །སྔགས་ཀྱི་དཀྱིལ་འཁོར་བུད་མེད་གཟུགས། །ཞེས་པའི་དོན་ནི། སྔར་ལེའུ་དང་པོའི་གཟུངས་དཀྱིལ་དུ། རྣམ་སྣང་ལ་སོགས་པས་སྐྱེས་པའི་སྐུ་མི་སྣང་བར་མཛད་ནས། སྤྱན་མ་ལ་སོགས་པའི་ལྷ་མོའི་གཟུགས་སུ་མཛད་པ་བཞིན་དུ་འགྲེལ་པར་བཤད་དོ། །དེ་འདིར་སྟོན་པའི་རྒྱུ་མཚན་ནི། སྔར་ལེའུ་དང་པོར་དེ་ལྟར་མཛད་པ་དེ་མཆོག་ཏུ་དགའ་བའི་ཡེ་ཤེས་རྣལ་འབྱོར་པའི་རྒྱུད་ལ་སྐྱེད་པའི་དོན་དུ་ཡིན་པར་གསུངས་པ་དེ་ཡིན་ལ། དེ་འགྲེལ་པས་སྐབས་འདིར་དངོས་སུ་མ་བཤད་ཀྱང་སྔར་བསྟན་ཟིན་པས་
འདིར་ཤེས་དགོས་སོ། །དེ་ལྟར་བྱས་ན་སྤྱན་མ་སོགས་ཀྱི་རིགས་ཀྱི་བུད་མེད་བཞི་དང༌། ཕྱག་རྒྱ་མ་སྤྱན་མ་སོགས་སུ་བསྒོམས་པ་བཞི་ལ་བརྟེན་ནས་དབང་གསུམ་པ་བསྐུར་བ་འདི་ཡང༌། སློབ་མའི་རྒྱུད་ལ་ལྷན་ཅིག་སྐྱེས་པའི་བདེ་བ་ཆེན་པོ་སྐྱེད་པའི་དོན་དུ་ཡིན་ནོ་ཞེས་ཤེས་པའི་ཕྱིར་དུ་དེ་ལྟར་གསུངས་སོ། །བདེ་བ་ཆེན་པོ་དེ་ལྟར་བསྐྱེད་པ་དེའི་དགོས་པ་ནི་མྱུར་དུ་རྡོ་རྗེ་འཆང་གི་གོ་འཕང་ཐོབ་ནས། སེམས་ཅན་ཐམས་ཅད་ཀྱི་དོན་མཛད་པའི་ཕྱིར་ཡིན་ནོ་ཞེས་པ་ནི་སེམས་ཅན་དོན་སྤྱོད་ཕྱིར་གནས་པའོ། །ཞེས་གསུངས་པའི་དོན་ཡིན་པས་གཟུངས་དཀྱིལ་གྱི་སྐབས་སུ་གསུངས་པ་དང་འདིར་གསུངས་པའི་དགོས་པ་གཉིས་ཀ་ཤེས་པར་བྱའོ། །སློབ་མ་མི་བསྐྱོད་པར་བསྐྱེད་པའི་ཚེ་ནི། རིག་མ་མཱ་མ་ཀཱི་དང་རེག་རྡོ་རྗེ་མར་བསྐྱེད་པ་གདམ་ང་ཅན་ནོ། ༈ །དབང་བཞི་པ་ནི་འདི་ལྟར་ཡིན་ཞེས་རྩ་རྒྱུད་ལས་གསལ་བར་མ་གསུངས་ཤིང༌། བཤད་རྒྱུད་གཞན་དུ་ཡང་མི་གསལ་ལ། རྡོ་རྗེ་འཕྲེང་བ་ལས། བཞི་པ་དོན་ནི་དམ་པའོ། །ཞེས་དང༌། བཞི་པ་འབྲས་བུར་ཤེས་པར་བྱ། །ཞེས་དོན་གྱི་དབང་བཞི་པ་རིམ་ལྔ་ནས་གསུངས་པ་ལྟར་དོན་དམ་པའི་བྱང་ཆུབ་ཀྱི་སེམས་ལ་བཤད་པ་དང༌། འདུས་པ་ཕྱི་མ་ལས། དེ་ཡང་བཞི་པ་དེ་བཞིན་ནོ་ཞེས་དབང་གསུམ་པ་དང་དཔེ་དོན་དུ་བྱས་ནས་གསུངས་པའི་ཚུལ་ནི་དཀྱིལ་ཆོག་ཏུ་རྒྱས་པར་བཤད་ཟིན་ཏོ། །ཡང་རྡོར་འཕྲེང་ལས། དབང་བཞི་པའི་སྐབས་སུ། བསྐྱེད་པའི་རིམ་པ་བསྒོམ་པ་
ཡི། །འདི་ནི་མན་ངག་ལས་ནི་ཤེས། །ཞེས་དབང་བཞི་པ་འདི་ནི་བསྐྱེད་རིམ་སྒོམ་པའི་མན་ངག་ལས་ཤེས་པར་བྱ། ཞེས་གསུངས་པའི་དོན་ནི་དབང་གསུམ་པའི་དུས་སུ་རང་དང་རིག་མ་འདོད་ལྷ་ཡབ་ཡུམ་དུ་སྒོམ་པའི་བསྐྱེད་རིམ་དཔེར་བྱས་ནས། ཟུང་འཇུག་རྡོ་རྗེ་འཆང་ཡབ་ཡུམ་དོན་གྱི་དབང་བཞི་པ་ཤེས་པར་བྱེད་པ་ཡིན་ཏེ། བཞི་པ་དེ་ཡང་དེ་བཞིན་ནོ་ཞེས་པའི་དོན་ཡང་དེའོ། །དྲིལ་བུ་པའི་དབང་ཆོག་ལས་ཀྱང༌། རིམ་པ་གསུམ་པོ་དེའི་བླ་མ། །མན་ངག་གིས་ནི་འདིར་ཤེས་བྱ། །ཞེས་བུམ་པ་དང༌། གསང་བ་དང་ཤེས་རབ་ཡེ་ཤེས་ཀྱི་དབང་གསུམ་པོ་དེའི་བླ་མ་སྟེ་གོང་མ་དབང་བཞི་པ་མན་ངག་གིས་ཤེས་པར་བྱ་བའི་མན་ངག་ཀྱང༌། རིམ་པ་ལྔ་པ་བསམ་མི་ཁྱབ་ཀྱི་རིམ་པའི་དེ་ཁོ་ནའི་མན་ངག་ལས་ཤེས་པར་བྱ་བར་གསུངས་ཏེ་ལུགས་དེའི་བསམ་མི་ཁྱབ་ཀྱི་རིམ་པ་དང༌། གསང་འདུས་པའི་ཟུང་འཇུག་གི་རིམ་པ་གཉིས་དོན་གཅིག་ཏུ་ཡོད་པས་དོན་གྱི་དབང་བཞི་པ་ཟུང་འཇུག་གི་རིམ་པའི་གོ་བ་བསྐྱེད་པ་ལ་བརྟེན་ནས་སྣོད་རུང་དུ་སྒྲུབ་པའི་དུས་ཀྱི་ཚིག་དབང་རིན་པོ་ཆེའི་དབང་བཞི་པ་བསྐུར་བའོ། །རྒྱུད་འདིར་དཀྱིལ་འཁོར་བྲི་སྒྲུབ་དང༌། སྟ་གོན་དང༌། དབང་བསྐུར་བའི་ཆོ་ག་རྣམས་འགའ་ཞིག་མ་བཤད་ཅིང༌། འགའ་ཞིག་དོན་མདོར་བསྡུས་པ་དང༌། འགའ་ཞིག་གིས་ཕྱོགས་རེ་ཙམ་ལ་མ་བཤད་པ་ནི། རྩ་བཤད་ལེགས་པར་སྦྱོར་ཤེས་པའི་བླ་མ་ལ་རག་ལས་པར་བྱ་བའི་ཕྱིར་ཡིན་པས་བཤད་རྒྱུད་གཉིས་ལ་སོགས་པའི་རྒྱུད་རྣམས་
དང་ཀླུ་བྱང་གི་དཀྱིལ་འཁོར་གྱི་ཆོ་ག་རྣམས་ལེགས་པར་བསྒྲིགས་ནས་རྩ་བའི་རྒྱུད་ཀྱི་དོན་རྒྱས་པར་ཤེས་དགོས་པར་ཡོད་དོ། །སྔགས་རྣམས་ཀུན་གྱི་ཡི་གེ་ༀ། །བསྒོམས་ན་དེ་མ་ཐག་ཏུ་འབར། །ཞེས་པའི་སྐབས་སུ་བདུད་རྩི་ལྔ་དང་ཤ་ལྔ་སྦྱང་སྦར་རྟོགས་པར་བྱས་ནས་རྟེན་ཚུལ་རྩ་རྒྱུད་ལས་གསུངས་པ་རྒྱུད་ཕྱི་མ་ལས་བཤད་པ་ནི། ཐ་མལ་ལུས་ཀྱི་ཆོས་ལ་ནི། །དྲི་མ་ལྔ་རྣམས་སྣང་བ་ནི། །ཡེ་ཤེས་ལྔ་ཡིས་བྱིན་བརླབས་པས། །བདུད་རྩི་ལྔ་ཞེས་བྱ་བར་བཤད། །སྦར་དང་དེ་བཞིན་བསྲེག་པ་དང༌། །སྣང་བར་བྱ་དང་གཟུགས་སྣང་བ། །སྔགས་ཀྱི་ལུས་སུ་རབ་སྦྱོར་བས། །བདུད་རྩི་ལྔ་ནི་བཟའ་བར་བྱ། །རྡོ་རྗེ་ཧཱུཾ་ལས་བྱུང་བ་ནི། །བར་སྣང་ལ་གནས་བསམ་པར་བྱ། །ཨཱཿ ལས་བྱུང་བའི་པདྨ་ནི། །དེ་ཡི་འོག་ཏུ་བསྒོམ་པར་བྱ། །ༀ་གྱིས་མཚན་པའི་བདུད་རྩི་ནི། །དེ་ཡི་དབུས་སུ་བཞག་པར་བྱ། །རྡོ་རྗེ་པདྨ་མཉམ་སྦྱོར་བས། །འབར་བས་རྣལ་འབྱོར་ཚིམ་པར་བྱ། །ཤེལ་དང་མཚུངས་པར་སྣང་གྱུར་ཅིག །ཡེ་ཤེས་ཉི་མ་གཉིས་པར་འགྱུར། །ཕྱོགས་བཅུའི་འཇིག་རྟེན་ཁམས་རྣམས་ཀྱི། །མཚོན་ཆ་མཆོག་གིས་དྲངས་ནས་ནི། །བདུད་རྩི་དེ་རུ་ཕབ་ནས་ཀྱང༌། །བཟའ་བའི་སྦྱོར་བས་བཟའ་བར་བྱ། །བསྒྲུབ་བྱའི་དངོས་གྲུབ་ཆོ་ག་ཡིས། །དེ་བཞིན་དཔའ་བོ་ལྔ་རྣམས་བཟའ། །ཡིག་གསུམ་ས་བོན་ལས་བསྐྱེད་བྱ། །གཞན་དུ་དེ་ནི་འགྲུབ་མི་འགྱུར། །ཞེས་གསུངས་པའོ། །རྐང་པ་དང་པོ་གཉིས་ཀྱི་དོན་ནི། ལུས་ལས་བྱུང་བའི་
བདུད་རྩི་ལྔའོ། །འདིར་བདུད་རྩི་ལྔ་པ་མཆིལ་མ་ལ་རྒྱུད་ཕྱི་མའི་འགྲེལ་པར་བཤད་དོ། །དེ་ལྔ་ཐ་མལ་པ་དྲི་མ་ཅན་ཡིན་ཡང༌། ཡེ་ཤེས་ལྔའི་ངོ་བོར་བྱིན་གྱིས་བརླབས་པས་བདུད་རྩི་ལྔ་བཤད་དེ། འདིས་ནི་ཡེ་ཤེས་ལྔ་སྟེ་རིགས་ལྔའི་ས་བོན་ལས་བདུད་རྩི་ལྔ་བསྐྱེད་པར་བསྟན་ནོ། །ཐུབ་པ་དཔལ་གྱི་ཀྱང༌། བྲུྃ་ཨྃ་ཛྲྃ་ཁྃ་ཧཱུྃ་ལས་ཤ་ལྔ་དང་བདུད་རྩི་ལྔ་བསྐྱེད་ཅིང༌། དེ་ཡང་སྔོན་དུ་ཤ་ལྔ་བསྐྱེད་པར་བཤད་པ་ནི། ལེའུ་དྲུག་པའི་འགྲེལ་པར་ཤ་ལྔ་དེ་བཞིན་གཤེགས་པ་ལྔའི་རིགས་སུ་བཤད་ཅིང༌། རྡོར་འཕྲེང་ལས། བདུད་རྩི་ལྔ་ཡང་དེ་བཞིན་གཤེགས་པ་ལྔར་བཤད་པ་དང་མཐུན་ནོ། །དེས་ན་ལུགས་འདི་ལ་ཤ་དང་བདུད་རྩི་གང་རུང་གཅིག་ཕྱོགས་དང༌། གང་རུང་གཅིག་མཚམས་སུ་བྱེད་པ་མིན་པར་དེ་བཞིན་གཤེགས་པ་ལྔ་དབུས་དང་ཕྱོགས་ཉིད་དུ་བཞུགས་པ་དང་མཐུན་པར་ལྔ་ཚན་གཉིས་ཀ་དབུས་དང་ཕྱོགས་ཉིད་དུ་བསྐྱེད་དོ། །ཧཱུཾ་ལས་བྱུང་བའི་རྡོ་རྗེ་ནི་ཐུབ་པ་དཔལ་གྱིས་དཀར་པོ་དང་ཤཱན་ཏི་པས་སྔོན་པོ་གྱེན་དུ་འགྲེང་བར་བཤད་ལ། རྡོ་རྗེ་ཉི་གདན་ལ་གནས་པར་རྒྱུད་ཕྱི་མའི་འགྲེལ་པར་བཤད་དོ། །ཨཱ་ལས་བྱུང་བའི་པདྨ་ནི་ཐོད་པའོ། །དེའི་དབུས་སུ་ༀ་གྱིས་མཚན་པའི་བདུད་རྩི་ནི་བདུད་རྩི་ལྔ་ཀ་ལ་ཐུན་མོང་དུ་མཚན་པའོ། །ཐོད་པའི་འོག་ཏུ་རླུང་མེ་གཉིས་སྒོམ་པ་ནི་འདིར་མ་བཤད་ཀྱང་རྒྱུད་ཕྱི་མའི་འགྲེལ་པར་བཤད་ལ། དེའི་སྐྱེད་ཆོག་ནི་ཐུབ་པ་དཔལ་གྱིས། ཧཱུྃ་ཡྃ་ཧཱུྃ་དང༌། ཧཱུྃ་རྃ་ཧཱུྃ་ལས་སྐྱེད་པར་བཤད་དོ། །དེ་ནས་གོང་གི་སྦར་བ་ནི། རྡོ་རྗེའི་ལྟེ་
བའི་ཧཱུཾ་ཡིག་གི་འོད་ཟེར་གྱིས་གཡོས་པའི་རླུང་གིས་མེ་སྦར་བའོ། །མེ་དེས་ཐོད་པ་གདུངས་ཤིང་རྫས་རྣམས་བསྐོལ་བ་ནི་བསྲེག་པའོ། །དེ་ནས་རྡོ་རྗེ་ཉི་གདན་དང་བཅས་པ་ཐོད་པར་ལྷུང་ནས་དཀྲུགས་པས་རྫས་རྣམས་རོ་མཉམ་དུ་གྱུར་ཏེ་ཤེལ་དང་མཚུངས་པར་སྣང་བ་ནི་སྣང་བར་བྱའོ། །དེ་ནས་ཐོད་པའི་ནང་གི་པདྨ་དང་ཨཱཿ ཡིག་ཞུ་བས་ཡེ་ཤེས་ཀྱི་བདུད་རྩི་ཉི་མ་གཉིས་པ་ལྟར་གྱུར་པ་ལ་ནི་དམར་སེར་གྱི་གཟུགས་སུ་སྣང་བའོ། །བར་སྣང་གི་རྡོ་རྗེ་ཐོད་པར་ལྷུང་ནས་རོ་མཉམ་དུ་གྱུར་པ་རྡོ་རྗེ་པདྨ་མཉམ་སྦྱོར་གྱི་དོན་དུ་ཐུབ་པ་དཔལ་བཞེད་ལ། རང་ཡབ་ཡུམ་གྱི་སྦྱོར་མཚམས་ནས་འོད་ཟེར་མཚོན་ཆ་མཆོག་སྟེ་ལྕགས་ཀྱུའི་རྣམ་པ་ཅན་འཕྲོས་པ་དང༌། ༀ་ཡིག་གི་འོད་ཟེར་དེ་ལྟ་བུས་ཕྱོགས་བཅུའི་འཇིག་རྟེན་གྱི་ཁམས་ན་གནས་པའི་དེ་བཞིན་གཤེགས་པའི་ཡེ་ཤེས་ཀྱི་བདུད་རྩི་བཀུག་ནས་དམ་ཚིག་གི་བདུད་རྩི་ལ་བཅུག་པ་ནི་འབར་བར་བྱས་པ་སྟེ་མང་པོར་སྤེལ་བའོ། །དེ་གསུམ་ནི་ཡི་གེ་གསུམ་གྱིས་སྦྱང་བ་དང་རྟོགས་པ་དང་སྦར་བར་བྱས་པའོ། །མཐར་ཡི་གེ་གསུམ་ལན་བདུན་དུ་བརྗོད་པས་བྱིན་གྱིས་བརླབ་པར་བྱའོ་ཞེས་ཐུབ་པ་དཔལ་གྱིས་བཤད་དོ། །བསྒྲུབ་བྱའི་དངོས་གྲུབ་སྒྲུབ་པའི་བདུད་རྩི་བྱིན་གྱིས་བརླབ་པའི་ཆོ་ག་ཡིས། དཔའ་བོ་ལྔ་སྟེ་ཤ་ལྔ་ཡང་དེ་ལྟར་བྱ་བ་ནི་དེ་བཞིན་ཞེས་པའི་དོན་ནོ། །བདུད་རྩི་དང་ཤ་རྣམས་ཟ་བ་ན་སྔགས་ཏེ་ལྷའི་ལུས་སུ་རབ་སྦྱོར་
བ་སྟེ་བསྒོམས་ནས་བཟའ་སྟེ་དེས་ནི་ལྕེའི་སྐྱེད་ཆོག་དང་སྙིང་ཁ་དང་ལྐོག་མ་སྦྱང་བ་ཡང་ཤེས་པར་བྱའོ། །ཡིག་གསུམ་ཞེས་པ་གཉིས་ཀྱི་དོན་ནི། ས་བོན་གྱི་ཡི་གེ་གསུམ་ལས་ཁ་ཟས་ཀྱི་དྲི་མ་སྦྱང་བ་དང༌། བདུད་རྩིར་བྱ་བ་དང་མང་པོར་སྤེལ་བ་བསྐྱེད་པར་བྱའི། གཞན་དུ་སྟེ་དེ་ལྟར་མ་བྱས་པར་ཟོས་ན་ཕན་ཡོན་བཤད་པ་རྣམས་འགྲུབ་པར་མི་འགྱུར་ཞེས་པའོ། །ལེའུ་བཅུ་དྲུག་པའི་མཐའ་གཅོད་དོ།། ༒ །།ཁམས་གསུམ་དག་གི་ལམ་མཆོག་ན། །བུད་མེད་ཇི་སྙེད་ཡོད་པ་རྣམས། །ཐམས་ཅད་ཆོ་ག་བཞིན་དུ་སྤྱད། །གསུང་གི་རྡོ་རྗེ་མི་སྨད་དོ། །ཞེས་པའི་སྐབས་སུ། ངག་གི་རྡོ་རྗེ་སྟེ་རོ་འཛིན་གྱི་བྱ་བས་བསྐྱོད་ལ། ཞེས་རྩ་གསུམ་པོ་ལྕེས་བསྐྱོད་པར་གསུངས་ལ། གླུས་བསྐུལ་བ་ལས་བཞེངས་པའི་སྐབས་སུ་རྩ་སྦུབས་གསུམ་སོར་མོ་གསུམ་གྱིས་བསྐྱོད་ཅིང་ཞེས་སོར་མོས་བསྐྱོད་པ་དང་གཉིས་བཤད་དོ། །འདི་ལ་རྡོ་རྗེ་མཁའ་འགྲོ་ལས། ཆགས་པ་སྲ་བ་དང་རྒན་པ་སོགས་ལ་ནི་སོར་མོ་རིང་པོ་གསུམ་སྦྲུལ་གྱི་མགོ་ལྟར་བྱས་ནས་དྲུད་པར་བྱ་བ་དང༌། གཞོན་ཞིང་ཆགས་པ་མཉེན་པ་རྣམས་ལ་ནི་འོད་དང་ལྡན་པའི་བྱང་ཆུབ་ཀྱི་སེམས་འབབ་པའི་རྩར། རྡོ་རྗེ་ལྕེའི་ཐུར་མ་བཅུག་སྟེ་བསྐྱོད་པར་གསུངས་ཏེ། ཡུལ་སོ་སོར་མཛད་པ་ནི་སོར་མོ་གསུམ་གྱིས་བྱེད་པ་ལ་དགོངས་སོ། །དཀྱིལ་ཆོག་རྡོ་རྗེ་འཕྲེང་བ་ལས། མཛུབ་མོ་དང་ལྕེའི་རྩེ་མོ་ལ་ཡི་གེ་ཧྲཱིཿ དམར་པོ་བཀོད་པས་རྩ་བསྐུལ་བར་བཤད་པ་ལྟར་ན། ཡུལ་
གཅིག་ལ་ཡང་སོར་མོ་དང་ལྕེ་གཉིས་ཀས་བསྐུལ་བ་ནི་སོར་མོ་གཅིག་པའི་ཁྱད་པར་རོ། །དུས་ཇི་ཙམ་དུ་བསྐུལ་བ་ནི། པ་ཚབ་ཀྱི་འགྱུར་ལས། རོ་འཛིན་གྱི་བྱ་བ་དག་གིས་མ་ཕྱིན་གྱི་བར་དུ་བསྐྱོད་པར་བྱ་ཞིང་ཞེས་འབྱུང་བ་ལྟར་ན། ཡུམ་གྱི་དབུ་མའི་མར་སྣ་བྱེ་ནས་བདུད་རྩི་འཛག་པ་མ་བྱུང་གི་བར་དུའོ། །རྡོ་རྗེ་མཁའ་འགྲོ་ལས། ཡུལ་ལ་སྲིད་ཅེས་བྱ་བའི་སྔགས་འབྱུང་གི་བར་དུ་དྲུད་པར་གསུངས་ལ། དེ་ནི་ཡུལ་དེས་ཆེད་དུ་བྱས་ནས་སྔགས་དེ་བཏོན་པ་མིན་པར་རང་ཤུགས་ཀྱིས་སྔགས་དེ་ཟློས་པར་བྱུང་བའོ། །དེ་ཡང་རྡོ་རྗེ་མཁའ་འགྲོ་ལས། དེ་ལྟར་སྒྲུབ་པ་པོས་ཡང་དང་ཡང་དུ་བསྐུལ་བས་སྙིང་འདར་བ་དང་དགའ་བས་མྱོས་ཤིང་སེམས་ཀྱི་རྡུལ་ཕྲ་མོའི་ཆུ་འཛག་ལ། ངོ་ཚ་ལ་སོགས་པ་དང་བྲལ་སྟེ་བ་སྤུ་ལངས་ནས་ཤིན་ཏུ་ཆགས་པས་ལྟ་ཞིང་འཁྱུད་པ་ལ་གུས་པར་གྱུར་ཅིང་སྲིད་ཅེས་ཟེར་བ་དང་ཞེས་གསུངས་པ་ལྟར་ཡིན་ལ། དེ་རྣམས་ནི་སོར་མོ་དང་ལྕེས་བསྐུལ་བས་རྩ་ཁ་བྱེ་བའི་རྟགས་སོ། །སེམས་ཀྱི་རྡུལ་ཕྲ་མོའི་ཆུ་ནི་བྱང་ཆུབ་ཀྱི་སེམས་ཀུནྡ་ལྟ་བུའི་ཆུའོ། །རྡོ་རྗེ་གུར་ལས་ཀྱང༌། རྡོ་རྗེ་སེར་མོའི་རབ་སྦྱོར་གྱིས། །རྡོ་རྗེའི་ས་གཞི་རབ་བསྐུལ་ཏེ། །རྡོ་རྗེའི་སེམས་སུ་རབ་ཕྱུང་ལ། །རྡོ་རྗེ་ལྕེ་ཡིས་བཟའ་བར་བྱ། །ཕྱི་ནས་དེ་ཡིས་བདེ་ལྡན་དུ། །རྡོ་རྗེ་སེམས་དཔའ་རབ་བཅུག་སྟེ། །རྡོ་རྗེ་བཅིང་པའི་སྦྱོར་བ་ཡིས། །རྡོ་རྗེ་མཆོད་པ་རབ་ཏུ་བརྩམ། །ཞེས་གསུངས་ཏེ། རྡོ་རྗེ་ས་གཞི་ནི་གསང་གནས་ཀྱི་རྡོ་རྗེའི་རྟེན་ཡུམ་གྱི་པདྨའོ། །རྡོ་རྗེའི་སེམས་སུ་ཞེས་
པ་ནི་ཀུནྡ་ལྟ་བུའོ། །ཕྱི་ནས་ཞེས་པ་ནི་རྩ་སད་པར་བྱས་པའི་རྗེས་སུའོ། །རྡོ་རྗེ་སེམས་དཔའ་ནི་ཡབ་ཀྱི་གསང་བའི་རྡོ་རྗེའོ། །རྡོ་རྗེ་བཅིང་བ་ནི་རྩ་གཉིས་མི་འབྲལ་བར་བཅིངས་པའོ། །འདོད་པའི་བསྟན་བཅོས་རྣམས་ལས་པདྨ་ཅན་དང་དུང་ཅན་མ་ལ་སོགས་པའི་བུད་མེད་ཀྱི་མཚན་ཉིད་སྟོན་པ་ཡོད་པར་སྣང་ནའང་མན་ངག་འདི་ནི་དེ་དག་ལ་གཏན་མེད་པར་ཤེས་པར་བྱའོ། ༈ །གང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྗོགས་པའི་སངས་རྒྱས་མར་མེ་མཛད་འདས་པ་ནས་ཞེས་སོགས་ཀྱི་སྐབས་སུ། གསང་འདུས་ཀྱི་འགྲེལ་པ་རྣམས་ལས་སྒྲ་སོར་བཞག་ལས་གཞན་པའི་བཤད་པ་མ་བྱུང་ལ། འགྲེལ་ཆེན་དྲི་མེད་འོད་ལས། མཚན་བརྗོད་ལས། འདས་པའི་སངས་རྒྱས་རྣམས་ཀྱིས་གསུངས། །མ་འོངས་རྣམས་ཀྱང་གསུང་འགྱུར་ལ། །ད་ལྟར་བྱུང་བའི་རྫོགས་སངས་རྒྱས། །ཡང་ཡང་གསུངས་པ་གང་ཡིན་དང༌། །ཞེས་སོགས་ཁུངས་སུ་མཛད་ནས། མཚན་ཡང་དག་པར་བརྗོད་པ་གསོལ་བ་འདེབས་པའི་ཚིག་འདིའི་ཕྱིར། དེ་བཞིན་གཤེགས་པ་ཐམས་ཅད་ཀྱིས་སྔགས་ཀྱི་ཐེག་པ་གསུངས་པ་ཡིན་ནོ། །འདིར་འདུས་པ་ལས། དེ་བཞིན་གཤེགས་པ་མར་མེ་མཛད་ནས་ཤཱཀྱ་ཐུབ་པའི་བར་དུ་དེ་བཞིན་གཤེགས་པ་གང་གིས་ཀྱང་སྔགས་ཀྱི་ཐེག་པ་མ་གསུངས་སོ་ཞེས་པ་གང་ཡིན་པ་དེ་ནི་དེའི་ཚེ་དེའི་དུས་ན་ཞེས་པ་སྟེ་འཕགས་པའི་ཡུལ་དུ་ཆོས་སྟོན་པའི་དུས་ན། རིགས་བཞིའི་མངོན་པའི་ང་རྒྱལ་དང་ལྡན་ཞིང་སྐལ་བ་མེད་
པའི་སེམས་ཅན་རྣམས་ཀྱི་བསམ་པའི་དབང་གིས་འཕགས་པའི་ཡུལ་དུ་འཁོར་རྣམས་ལ་མ་བསྟན་ཏེ། དུས་གཞན་དུ་ཡུལ་གཞན་གྱི་འཇིག་རྟེན་གྱི་ཁམས་ཀྱི་འཁོར་ལ་ཡང་མ་བསྟན་པ་ནི་མ་ཡིན་ནོ། །དེ་བཞིན་གཤེགས་པའི་གསུང་འདིའི་ཕྱིར། དེ་བཞིན་གཤེགས་པ་ཐམས་ཅད་ཐེག་པ་གསུམ་སྟོན་པར་བྱེད་པ་པོ་ཡིན་ནོ། །རྣམ་པ་གཞན་དུ་ན་ཐམས་ཅད་མཁྱེན་པ་ཉིད་དུ་མི་འགྱུར་ཏེ་རྡོ་རྗེའི་ཐེག་པ་སྟོན་པར་བྱེད་པ་པོ་ཉིད་མ་ཡིན་པའི་ཕྱིར་རོ། །ཞེས་ཡུལ་དུས་ཁྱད་པར་བ་འཕགས་པའི་ཡུལ་དུ་ཆོས་སྟོན་པའི་དུས་དང་གདུལ་བྱ་ཁྱད་པར་བ་རིགས་བཞིའི་གང་ཟག་མངོན་པའི་ང་རྒྱལ་ཅན་ལ་མ་གསུངས་པ་ཡིན་གྱི། ཡུལ་དུས་གཞན་དང་སྐལ་བ་དང་ལྡན་པའི་གདུལ་བྱ་གཞན་ལ་མ་གསུངས་པ་མིན་པར་བཤད་དོ། །དེ་ལྟར་གདུལ་བྱ་དེ་དག་ལ་འཆད་མི་འཆད་ཀྱི་རྒྱུ་མཚན་ནི། དེའི་དུས་ན་སེམས་ཅན་རྣམས་ལ་སྐལ་བ་མེད་པའི་ཕྱིར་རོ་ཞེས་གསུངས་པའི་སྐལ་བ་ཡོད་མེད་ཀྱི་དོན་ནི། དབང་པོ་ཤིན་ཏུ་རྣོ་བ་དབང་པོ་གཉིས་སྦྱོར་གྱི་ཆགས་པ་ལམ་དུ་བྱེད་པ་ལ་མོས་ཤིང་དེ་ལས་བཟློག་པ་ལ་མི་མོས་པ་དང༌། འདོད་ཡོན་ལ་ཆགས་པ་ལམ་དུ་བྱེད་པ་དང་བྲལ་བའི་ལམ་གྱིས་བྱང་ཆུབ་སྒྲུབ་པ་ལ་མོས་ཤིང༌། འདོད་ཡོན་ལ་ཆགས་པ་ལམ་དུ་བྱེད་པ་ལ་མི་མོས་པ་སྔ་མ་ལ་ལྟོས་ན་དབང་པོ་བརྟུལ་པའོ། །འདུས་པ་ཕྱི་མ་ལས་ཀྱང༌། རིག་མའི་བརྟུལ་ཞུགས་སྟེར་བ་ན། །འདི་ནི་སངས་རྒྱས་ཐམས་ཅད་
ཀྱི། །རིག་པའི་བརྟུལ་ཞུགས་བླ་མེད་པའོ། །རྨོངས་པ་གང་ཞིག་འདས་གྱུར་ན། །དེ་ཡིས་དངོས་གྲུབ་མཆོག་མི་འགྲུབ། །ཅེས་དང༌། རྡོ་རྗེ་གུར་ལས་ཀྱང༌། འདོད་ཆགས་ཀྱིས་བསྐྱེད་འཇིག་རྟེན་པ། །འདོད་ཆགས་སྤངས་པས་བརླག་པར་འགྱུར། །རྡོ་རྗེ་ཆགས་པ་ཡོངས་ཤེས་ན། །ཡིད་ནི་རྡོ་རྗེ་སེམས་དཔར་འགྱུར། ཞེས་དང༌། ཆགས་དང་བྲལ་བའི་བྱང་ཆུབ་ནི། །ཆགས་པ་མཆོག་ལྡན་རྣམས་ཀྱིས་སྨད། །ཅེས་གསུངས་པས་ད་ལྟ་ནས་ལམ་འདིའི་རིགས་ནུས་ཁྱད་པར་ཅན་འཇོག་པའི་མོས་པ་སྤྱོད་ལུགས་ཁྱད་པར་ཅན་རྣམས་ལེགས་པར་ཤེས་པར་བྱས་ནས་ལམ་འདིའི་རིགས་ངེས་པའི་ཐབས་ལ་འབད་པར་བྱའོ། ༈ །གསང་བ་འདུས་པ་འདི་ལ་སྐད་ཅིག་ཐང་ཅིག་ཡུད་ཙམ་གྱིས་སངས་རྒྱས་ཀྱི་བྱང་ཆུབ་རྫོགས་པར་བྱེད་དོ་ཞེས་པས་ནི་ལམ་འདིས་བྱང་ཆུབ་ཏུ་བགྲོད་པའི་དུས་སྟོན་པ་མིན་གྱི། འགྲེལ་པར་བཤད་པ་ལྟར་ལམ་གྱི་མཐར་ལམ་དུས་ཀྱི་འོད་གསལ་ལ་བརྟེན་ནས་མི་སློབ་པའི་ཟུང་འཇུག་མངོན་དུ་བྱེད་པའི་ཡུན་ཚད་སྟོན་པ་ཡིན་ནོ། །ལམ་འདིས་བྱང་ཆུབ་ཏུ་བགྲོད་པའི་ཡུན་ནི་གསང་བ་འདུས་པ་ལ་མངོན་པར་དགའ་བའི་བྱང་ཆུབ་སེམས་དཔའ་ཚེ་འདི་ཉིད་ལ་ཞེས་པས་སྟོན་ནོ། །གང་གཱའི་ཀླུང་གི་བྱེ་མ་དུ་མ་སྙེད་ཀྱི་བསྐལ་པར་བྱང་ཆུབ་སེམས་དཔའ་རྣམས་ཀྱིས་འབད་ཅིང་བཙལ་ཀྱང་བྱང་ཆུབ་ཐོབ་པར་མི་འགྱུར་བ་དེ། །ཞེས་པ་ནི་ཕར་ཕྱིན་གྱི་ཐེག་པས་བྱང་ཆུབ་ཏུ་བགྲོད་པའི་བྱང་སེམས་སོ། །འོ་ན་
ལམ་དེར་གྲངས་མེད་གསུམ་གྱིས་བྱང་ཆུབ་འཐོབ་པར་གསུངས་པ་རིང་མཐའ་མ་ཡིན་ནམ། གངྒཱའི་ཀླུང་གི་བྱེ་མ་སྙེད་ཀྱི་བསྐལ་པར་ཞེས་པ་ཇི་ལྟར་རིགས་སྙམ་ན། འདི་ལ་ངེས་པ་དང་མ་ངེས་པ་ལ་འཇུག་པའི་ཕྱག་རྒྱའི་མདོ་བསླབ་བཏུས་སུ་དྲངས་པ་ལས། ཕྱུགས་ཀྱི་ཤིང་རྟ་ལྟ་བུས་འགྲོ་བའི་བྱང་ཆུབ་སེམས་དཔའ་གང་ཞེ་ན། འདི་ལྟ་སྟེ་དཔེར་ན། སྐྱེས་བུ་ལ་ལ་ཞིག་སངས་རྒྱས་ཀྱི་ཞིང་ལྔའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདའ་བར་འདོད་ནས་དེ་ཕྱུགས་ཀྱི་ཤིང་རྟ་ལ་ཞོན་ཏེ་ལམ་དུ་ཞུགས་ནས་དེ་ཡུན་རིང་པོས་ལམ་རིང་པོར་དཔག་ཚད་བརྒྱར་ཕྱིན་པ་ལས། དེ་དེར་རླུང་གི་དཀྱིལ་འཁོར་ཆེན་པོས་བཟློག་ནས་དཔག་ཚད་ཁྲིར་དེད་དེ་ཕྱིར་ཕུལ་ན། སྐྱེས་བུ་དེ་ཕྱུགས་ཀྱི་ཤིང་རྟས་འཇིག་རྟེན་གྱི་ཁམས་དེ་དག་འདའ་བའམ་བསྐལ་པ་ནས་བརྗོད་དུ་མེད་པའི་ཡང་བརྗོད་དུ་མེད་པའི་བསྐལ་པར་འཇིག་རྟེན་གྱི་ཁམས་གཅིག་ཀྱང་འདའ་བར་ནུས་སམ། གསོལ་པ་བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་དུ་གང་ལ་ལ་ཞིག་གིས་བྱང་ཆུབ་ཏུ་སེམས་བསྐྱེད་ལ་ཐེག་པ་ཆེན་པོ་མི་འཛིན་མི་ཀློག་པར། ཉན་ཐོས་ཀྱི་ཐེག་པ་བ་རྣམས་ལ་བསྙེན་ཅིང་དེ་དག་དང་ལྷན་ཅིག་ཏུ་བརྟེན་པར་བྱེད། ཉན་ཐོས་ཀྱི་ཐེག་པ་ཀློག་ཅིང་ཁ་ཏོན་བྱེད་དཔྱོད་ཅིང་ཁོང་དུ་ཆུད་པར་བྱེད་ལ། གཞན་དག་ཀྱང་ཀློག་ཏུ་འཇུག་པ་ནས་ཁོང་དུ་ཆུད་པར་བྱེད་པའི་བར་དུ་བྱེད་ན་དེ་ནི་དེས་ཤེས་རབ་རྟུལ་པོར་འགྱུར་ཏེ།
བླ་ན་མེད་པའི་ཡེ་ཤེས་ཀྱི་ལམ་ལས་སླར་དྲངས་ནས་ཕྱིར་ལྡོག་གོ །བྱང་ཆུབ་སེམས་དཔའ་འདིའི་བྱང་ཆུབ་ཀྱི་སེམས་བསྒོམས་པ་ལས་བྱུང་བའི་ཤེས་རབ་ཀྱི་དབང་པོ་དང་ཤེས་རབ་ཀྱི་མིག་གང་ཡིན་པ་དེ་ཡང་རྟུལ་པོར་སྒྱུར་ཞིང་ཉམས་པར་བྱེད་དེ། འདི་ནི་ཕྱུགས་ཀྱི་ཤིང་རྟ་ལྟ་བུས་འགྲོ་བའི་བྱང་ཆུབ་སེམས་དཔའོ་ཞེས་གསུངས་པ་ལྟ་བུའི་བྱང་ཆུབ་སེམས་དཔའི་ལམ་བགྲོད་ཚུལ་ཡང་ཡོད་པས་བསྐལ་པ་ཆེན་པོ་གྲངས་མེད་པ་གསུམ་གྱིས་འཚང་རྒྱ་བར་གསུངས་པ་ནི་ཕར་ཕྱིན་གྱི་ཐེག་པའི་ལམ་གྱི་རིང་མཐའ་མ་ཡིན་ནོ། །དེ་བཞིན་དུ་མདོ་དེ་ལས། གླང་པོ་ཆེའི་ཤིང་རྟ་ལྟ་བུས་འགྲོ་བ་དང་། ཉི་མ་དང་ཟླ་བ་ལྟ་བུས་འགྲོ་བ་དང་ཉན་ཐོས་ཀྱི་རྫུ་འཕྲུལ་ལྟ་བུས་འགྲོ་བ་དང༌། དེ་བཞིན་གཤེགས་པའི་རྫུ་འཕྲུལ་ལྟ་བུས་འགྲོ་བའི་བྱང་ཆུབ་སེམས་དཔའ་ཡང་གསུངས་པས། ཕ་རོལ་ཏུ་ཕྱིན་པའི་ཐེག་པ་ལ་བརྟེན་ནས་ལམ་བགྲོད་པའི་མྱུར་བུལ་མཐའ་གཅིག་ཏུ་མ་ངེས་སོ། །འོན་ཀྱང་འདུས་པར་སྔར་བཞིན་དུ་གསུངས་པས་ནི་གྲངས་མེད་གསུམ་གྱིས་འཚང་རྒྱ་བ་ཡང་མཚོན་པར་བྱའོ། །འོ་ན་ཕར་ཕྱིན་གྱི་ཐེག་པ་རྐྱང་པས་འབད་ཅིང་བཙལ་ཡང་འཚང་རྒྱ་བར་མི་ནུས་པར་གསུངས་ལ་ལམ་དེས་ཇི་ཙམ་ཞིག་གི་བར་དུ་བགྲོད་པ་དང༌། ལམ་དེ་ལ་སྣོན་པ་གདབ་རྒྱུའི་སྔགས་ཀྱི་ལམ་ཅི་ཙམ་ཞིག་ཡིན་སྙམ་ན་འདི་ལ་ཐེག་པ་ཆེན་པོ་དབུ་མ་པས་ཐེག་པ་གསུམ་དུ་གསུངས་པ་དྲང་དོན་དང་ཐེག་པ་གཅིག་ཏུ་གསུངས་པ་ངེས་དོན་དུ་བཞེད་
པས་མཐར་ཐུག་ལ་ལྟོས་པའི་རིགས་སོ་སོར་ངེས་པ་མེད་ཀྱང་གནས་སྐབས་སུ་ཉན་རང་གི་ཐེག་པར་ཞུགས་ནས་རང་རང་གི་བྱང་ཆུབ་མ་ཐོབ་བར་དུ་ལམ་གཞན་དུ་མི་འཇུག་པར་རང་གི་ཐེག་པ་དེ་ཉིད་ཀྱིས་བགྲོད་པའི་རིགས་ངེས་པ་འདོད་པ་མི་འགལ་བ་བཞིན་དུ། འདིའི་ལུགས་ཀྱིས་ཀྱང༌། མཐར་ཐུག་བླ་ན་མེད་པའི་ཐེག་པ་འདི་ལ་ལྟོས་དགོས་པར་འདོད་ཀྱང༌། གནས་སྐབས་སུ་ཕར་ཕྱིན་གྱི་ཐེག་པ་འདིས་ཅི་ཙམ་ཞིག་ཏུ་བགྲོད་པ་ཡིན་ཞེས་པའི་གནས་སྐབས་ཀྱི་རིགས་ངེས་པ་འདོད་དགོས་སོ། །དེ་ལྟར་བྱས་ན་ཕར་ཕྱིན་གྱི་ཐེག་པའི་གདུལ་བྱ་རབ་ཀྱིས་རང་གི་ཐེག་པ་དེ་ཉིད་ཀྱིས་ས་བཅུ་པའི་བར་བགྲོད་པས་དེའི་དབང་དུ་བྱས་ནས་གནས་སྐབས་ཀྱི་རིགས་ངེས་པ་བཞག་ལ། ས་བཅུ་པ་བ་སྲིད་པ་ཐ་མ་པའི་མཇུག་ཏུ་ཐེག་པ་བླ་ན་མེད་པའི་ལམ་འོད་གསལ་དང་ཟུང་འཇུག་བསྣན་ནས་བླ་ན་མེད་པའི་བྱང་ཆུབ་ཏུ་འཚང་རྒྱ་བའི་ཚུལ། རིམ་ལྔ་དང་སྤྱོད་བསྡུས་དང༌། ལས་མཐའ་རྣམ་འབྱེད་དང་གྲོལ་བའི་ཐིག་ལེ་དང་མན་ངག་སྙེ་མ་སོགས་ཀྱི་གཞུང་མང་པོ་ལ་བརྟེན་ནས་རིམ་ལྔ་གསལ་སྒྲོན་དུ་རྒྱས་པར་བཏན་ལ་ཕབ་ཡོད་པས་རྒྱས་པར་ཤེས་པར་འདོད་ན་དེ་ལས་ཤེས་པར་བྱའོ། ༈ །རྒྱུད་གཏད་པའི་སྐབས་སུ། འཁོར་གྱི་སངས་རྒྱས་བྱང་སེམས་སྤྱི་ལ་རྒྱུད་འདི་ཕྱོགས་ཀུན་ཏུ་གཞན་ལ་སྟོན་ཅིག་ཅེས་བསྒོ་བ་དང༌། ཁྱད་པར་དུ་རྡོ་རྗེ་ཆོས་
ལ་གཏད་པ་ནི་སྔོན་བྱུང་ཙམ་དུ་མ་ཟད་རྗེས་འཇུག་ལ་ཡང་སྦྱར་དགོས་པས་སྦྱར་ན་མ་འོངས་པའི་རྟེན་འབྲེལ་ཁྱད་པར་ཅན་འགྲིག་པའི་རྒྱུར་འགྱུར་རོ། །དེས་ན་རྒྱུད་ཀྱི་བཤད་པ་རྫོགས་པའི་མཇུག་ཏུ། གནས་དེ་སྔོན་བྱུང་ལྟར་གྱི་རྟེན་གྱི་དཀྱིལ་འཁོར་དུ་མོས་པ་བྱ། འཆད་པ་པོ་རང་ཉིད་རྒྱུད་ཀྱི་སྟོན་པ་རྡོ་རྗེ་འཆང་གི་ང་རྒྱལ་དུ་བྱ། ཉན་པ་པོའི་འཁོར་རྣམས་ཀྱང་སྔོན་བྱུང་བཞིན་དུ་དཀྱིལ་འཁོར་པའི་སངས་རྒྱས་དང་བྱང་ཆུབ་སེམས་དཔར་མོས་པ་བྱས་ལ། འཆད་པ་པོས་རིགས་ཀྱི་བུ་ཁྱེད་རྣམས་ཀྱིས་འཇིག་རྟེན་གྱི་ཁམས་ཐམས་ཅད་དུ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་འདི་བསྒོ་བར་གྱིས་ཤིག །དེ་ཅིའི་ཕྱིར་ཞེ་ན། ཕྱོགས་བཅུ་ན་བཞུགས་པའི་བྱང་ཆུབ་སེམས་དཔའ་དེ་རྣམས་ཆོས་ཀྱི་རྣམ་གྲངས་འདི་ལ་སྐལ་བ་ཡོད་པའི་ཕྱིར་རོ། །ཁྱེད་རྣམས་ཀྱིས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་དེ་ཁོ་ན་ཉིད་འདི་ཟུངས་ཤིག་ཅེས་བཀའ་བསྒོ།དེ་ནས་འཁོར་རྣམས་ཀྱིས་ཀྱང༌། རྡོ་རྗེ་འཆང་དངོས་ཀྱིས་བཀའ་བསྒོས་པར་མོས་ནས་བྱང་ཆུབ་སེམས་དཔའ་ཕྱག་ན་རྡོ་རྗེ་ང་རྒྱལ་གྱིས་དེ་བཞིན་དུ་བགྱིའོ་ཞེས་ཁས་བླང་ངོ༌། །རྩ་རྒྱུད་སྟོན་པས་གསུངས་པའི་མཐར་ཉན་པ་པོའི་འཁོར་གྱིས་སྟོན་པ་ལ་བསྟོད་པ་བྱ་བར་མ་གསུངས་ཀྱང༌། འདུས་པའི་ལེའུ་བཅོ་བརྒྱད་པ་རྫོགས་པའི་མཐར་ཉན་པ་པོའི་འཁོར་བྱང་སེམས་རྣམས་ཀྱིས། རྒྱུད་ཀྱི་སྟོན་པ་ལ་སོགས་པའི་དེ་བཞིན་གཤེགས་པ་ཐམས་
ཅད་ལ་བསྟོད་པ་དང་རྗེས་སུ་ཡི་རང་བ་དང༌། རྒྱུད་སྟོན་པ་པོ་ལ་ལེགས་སོ་མཛད་པར་གསུངས་པ་ལྟར་རྗེས་འཇུག་གིས་ཀྱང་དེ་ལྟར་བྱའོ། །དེ་ལ་བསྟོད་པ་ནི་མཚོན་པ་ཙམ་ཡིན་པས་རྩ་རྒྱུད་དང་པོ་གསུང་བའི་དུས་སུ་མཆོད་པའི་སྤྲིན་གྱིས་མཆོད་ནས་གསོལ་བ་བཏབ་པ་ལྟར། གཏང་རག་ལ་ཡང་མཆོད་པ་བྱས་ཏེ། ཕྱི་དང་ནང་དང་གསང་བ་དང་དེ་ཁོ་ན་ཉིད་ཀྱིས་མཆོད་པ་བཞི་བྱའོ། །དེ་ནས་བསྟོད་པ་ནི། རྒྱུད་ཕྱི་མར། དུས་གསུམ་རྡོ་རྗེ་ཐུགས་ཡིན་ཞེས་པ་ནས། དད་པར་བྱེད་ཅིང་ཕྱོགས་གཅིག་ཙམ་ཞིག་འཛིན་པ་དག །བྱང་ཆུབ་རྡོ་རྗེ་འདྲར་ལྟ་དེ་ལ་རྟག་ཕྱག་འཚལ། །ཞེས་པའི་བར་གྱི་ཚིགས་སུ་བཅད་པ་བཅུ་གསུངས་པས་བསྟོད། འདི་སྔོན་བྱུང་ལ་འཁོར་གྱི་བྱང་ཆུབ་སེམས་དཔའ་ཐམས་ཅད་ཀྱིས་མགྲིན་གཅིག་ཏུ་གསུངས་པ་ལྟར། རྗེས་འཇུག་གི་འཁོར་ཐམས་ཅད་ཀྱིས་ཀྱང་དེ་ལྟར་གྲུབ་ན་ལེགས་སོ། །རྗེས་སུ་ཡི་རང་བ་ནི། ལེའུ་གཉིས་པ་ལས། །ཨེ་མའོ་སངས་རྒྱས་ཨེ་མའོ་ཆོས། །ཞེས་རྐང་པ་བཞི་གསུངས་པའི་ཆེད་བརྗོད་ཀྱིས་བྱའོ། །ལེགས་སོ་འབུལ་བ་ཡང་རྒྱུད་ཕྱི་མ་ལས། འདུས་པ་གསང་བ་ལས་བྱུང་བ། །ཞེས་པ་བཞི་དང་ལེགས་སོ་ལེགས་ཞེས་པའི་རྐང་པ་བཞིས་བྱའོ། །བཤད་རྒྱུད་རྡོ་རྗེ་འཕྲེང་བ་གསུངས་ཟིན་པའི་མཐར། སྟོན་པའི་ལེགས་བཤད་མིག་སྨན་དང༌། མིག་ཐུར་ལྟ་བུས་འཁོར་རྣམས་ཀྱི་འཁྲུལ་པའི་ལོང་བ་
བསལ་ནས་ཡང་དག་པའི་དོན་མཐོང་བ་ན་འཁོར་རྣམས་ཀྱིས་ཡང་དང་ཡང་དུ་ཕྱག་བྱས་ཏེ་མིག་མཆི་མ་དང་བཅས་པས་ལན་གསུམ་དུ་བསྐོར་བ་བྱས་ནས་རྡོ་རྗེ་འཆང་ལ་ཡང་དག་པར་བསྟོད་པའི་ཚིག །ཨེ་མའོ་ཀུན་འགྲོ་ཀུན་དབང་ཕྱུག །ཞེས་པའི་ཚིགས་སུ་བཅད་པ་བཞིས། བསྟོད་པ་ཡང་བསྟོད་པའི་སྐབས་སུ་བྱས་ན་ཤིན་ཏུ་ལེགས་སོ། །རྒྱུད་དེར་བསྟོད་པ་ཟིན་མ་ཐག་བཅོམ་ལྡན་འདས་ཀྱི་སྐུ། འཇིག་རྟེན་གསུམ་རྒྱལ་གྱི་ཁྲོ་བོའི་སྐུར་གྱུར་ཏེ་ཁྲོ་བོ་བཅུ་བཀུག་ནས་རྒྱུད་ཀྱི་བཤད་པ་རིང་དུ་གནས་པ་དང༌། དེ་ལྟར་བྱེད་པ་རྣམས་ལ་རྒྱུན་ཏུ་བགེགས་ཀུན་ལས་སྲུངས་ཤིག་ཅེས་བཀའ་བསྒོས་ཤིང༌། ཡུལ་ཁམས་དེར་བསྲུངས་བའི་དོན་དུ་ཁྲོ་བོ་རང་རང་གི་འཕྲེང་སྔགས་ཀྱིས་ཁྲོ་བོ་རྣམས་ལ་གཏོར་མ་དབུལ་བར་གསུངས་པ་ལྟར། ཁམས་གསུམ་རྣམ་རྒྱལ་གྱི་རྣལ་འབྱོར་ལ་གནས་ནས་ཁྲོ་བོ་བཅུ་ལ་གཏོར་མ་ཕུལ་ཏེ་བཀའ་བསྒོ་བའི་ཚིག །རྒྱུད་ལས་གསུངས་པ་བཞིན་དུ་བྱས་ན་ཁྱད་པར་ཆེའོ། །དེ་ནས་འདུས་པ་ལས་བརྩམས་པའི་བསྔོ་བ་དང་སྨོན་ལམ་དང་ཤིས་བརྗོད་བྱས་ཏེ། ཕྱོགས་དུས་ཀུན་ཏུ་བཀྲ་ཤིས་དང་བདེ་ལེགས་ཀྱི་དཔལ་རྒྱུན་མི་འཆད་དུ་འབྱུང་བར་བྱའོ། །ལེའུ་བཅུ་བདུན་པའི་མཐའ་གཅོད་དོ།། ༒ །།གང་གིས་རྨད་བྱུང་ཐམས་མཁས་ཀྱིས། །ཉོན་མོངས་རྒྱ་མཚོ་བྱིང་བ་ཡང༌། །ཚེ་འདི་ཉིད་ལ་རྒྱལ་གནས་སུ། །བདེ་བླག་ཉིད་དུ་འཁྲིད་པའི་ཐབས། །རྣལ་འབྱོར་བླ་ན་མེད་པའི་རྒྱུད། །དུང་ཕྱུར་གཉིས་
དང་བྱེ་བ་གཉིས། །ལེགས་པར་གསུངས་པའི་རྒྱུད་ཀུན་གྱི། །བླ་ལ་ལས་ཀྱང་བླ་མ་སྟེ། །སྙིང་པོ་ལས་ཀྱང་སྙིང་པོ་མཆོག །འཇིག་རྟེན་གསུམ་གྱི་རིན་ཆེན་གཅིག །དབང་པོ་རྣོན་པོའི་མཐར་ཐུག་པའི། །འཇུག་ངོགས་དཔལ་ལྡན་འདུས་པའོ། །རྣམ་དཀར་ལས་ཀྱིས་འཕངས་པའི་ལུས་ཐོབ་ཀྱང༌། །ཆོས་འདིའི་མིང་ཙམ་ཐོས་པའི་སྐལ་མེད་མང༌། །གསུང་རབ་མཐར་ཐུག་ཡིན་ཞེས་ཐོས་མོད་ཀྱང༌། །ཐོས་བསམ་བསྒོམ་པས་འཇུག་པའི་སྐལ་བ་མེད། ཚུལ་འདིར་ཞུགས་ཀྱང་ཇི་བཞིན་མི་རྟོགས་པས། །རིན་ཆེན་གླིང་སོན་སྟོང་པར་ལོག་པའང་མང༌། །ད་ལྟའི་དུས་འདིར་གྲུབ་ཆེན་ཀླུ་སྒྲུབ་ཀྱི། །དགོངས་པ་སྐོང་བྱེད་དཔལ་ལྡན་འཕགས་པ་ལྷ། །ཀླུ་བྱང་ཤཱཀྱ་བཤེས་གཉེན་ཟླ་གྲགས་ཀྱི། །ལེགས་པར་བཤད་པའི་མིག་སྨན་བསྟེན་པ་ཡིས། །བློ་མིག་རབ་རིབ་བསལ་བས་བཤད་རྒྱུད་ལྔས། །རྩ་རྒྱུད་བཤད་པའི་གནད་དོན་གསལ་བར་མཐོང༌། །གང་གི་འཕྲིན་ལས་ཟེགས་མའི་ཆ་ཤས་ཙམ། །སྙིང་ལ་ཞུགས་པ་ཡིས་ཀྱང་རྙེད་དཀའ་བ། །ཤིན་ཏུ་སྦས་དོན་ལྷང་ངེར་གསལ་མཛད་པ། །འཇམ་དབྱངས་བླ་མའི་དྲིན་གྱིས་རྟག་སྐྱོངས་ཤིག །འདི་འདྲའི་ཐེག་མཆོག་དགའ་སྟོན་མྱོང་བའི་ཚེ། །ལམ་མཆོག་འདི་ཡིས་ཉིན་མཚན་མི་འདའ་བར། །ཤིང་གི་སྣོད་དུ་བསྐོལ་བ་ཇི་བཞིན་དུ། །དང་པོ་གང་ཡིན་ཐ་མར་འགྱུར་བ་ཡི། །ཚེ་འདིའི་ཕུན་ཚོགས་ལྷུར་ལེན་སུ་ཞིག་ཡོད། །སྦུན་པ་
འཕྱར་ལ་ཀུན་ནས་འབད་པ་བཞིན། །སྙིང་པོ་མེད་པའི་བྱ་བས་གཡེངས་གཡེངས་ནས། །དོན་ཆེན་སྒྲུབ་པ་སུ་ཞིག་ཡལ་བར་འདོར། །འདོད་ལྡན་སྙིང་ལ་སྨིན་ལེགས་གཟུགས་ཀྱིས་བཞིན། །གང་ཞིག་མཐོང་ཞིང་དེ་དོན་བསམས་པ་ན། །མཁས་པའི་ཡིད་ནི་རབ་ཏུ་འཕྲོག་བྱེད་པའི། །གཞུང་འདིར་འབད་ལས་བདག་གིས་དཀར་པོའི་ལས། །ཇི་སྙེད་བསགས་པ་དེ་ཡིས་འགྲོ་ཀུན་གྱིས། །ཤིན་ཏུ་དབྱེ་བར་དཀའ་བའི་རྒྱུད་སྡེའི་གནད། །ཇི་བཞིན་ལེགས་པར་རྟོགས་ནས་དེ་ཡི་དོན། །བསྒྲུབས་པས་རྡོ་རྗེ་འཛིན་པའི་སར་བགྲོད་ཤོག །ཇི་སྲིད་གླིང་གི་པད་མ་འདབ་བརྒྱད་ཀྱི། །ཟེའུ་འབྲུར་ལྷུན་པོ་གནས་པ་དེ་སྲིད་དུ། །ལེགས་བཤད་འདིས་ཀྱང་སྐལ་བཟང་འགྲོ་བ་ལ། །ལམ་གྱི་མཐར་ཐུག་རིང་དུ་གནས་བྱེད་ཤོག །བདག་ཀྱང་དེང་ནས་ཚེ་རབས་ཐམས་ཅད་དུ། །ལམ་གྱི་མཐར་ཐུག་འདི་དང་མི་འབྲལ་ཞིང༌། །ལེགས་ཚོགས་ཀུན་གྱི་རྩ་བ་ཟླ་མེད་པ། །བཤེས་གཉེན་དམ་པ་རྟག་ཏུ་མཉེས་བྱེད་ཤོག །རྒྱུད་ཀྱི་རྒྱལ་པོ་དཔལ་གསང་བ་འདུས་པའི་རྒྱ་ཆེར་བཤད་པ་སྒྲོན་མ་གསལ་བའི་དཀའ་བའི་གནས་ཀྱི་མཐའ་གཅོད་རིན་པོ་ཆེའི་མྱུ་གུ་ཞེས་བྱ་བ་འདི་ནི། དཔལ་གསང་བ་འདུས་པའི་རྣལ་འབྱོར་པ་མང་དུ་ཐོས་པའི་དགེ་སློང་ཤར་ཙོང་ཁ་པ་བློ་བཟང་གྲགས་པའི་དཔལ་གྱིས། འཕགས་པ་ཡབ་སྲས་ལྔའི་སྔགས་དང༌ཕ་རོལ་ཏུ་ཕྱིན་པའི་གཞུང་ཀུན་ལ་རིང་དུ་ལེགས་པར་སྦྱངས་ཤིང༌། ཁྱད་པར་དུ་གསང་བ་འདུས་
པ་འཕགས་པའི་སྐོར་བོད་དུ་འགྱུར་རོ་ཅོག་དང༌། མར་འགོས་ཀྱི་ལུགས་ཀྱི་བཤད་པ་དང༌གདམས་ངག་རྣམས་ལའང་འདྲིས་པར་བྱས་ནས། །རྩ་བ་དང་བཤད་པའི་རྒྱུད་རྣམས་ལེགས་པར་སྦྱོར་བའི་ཚུལ་ལ་མི་འཇིགས་པའི་སྤོབས་པ་རྙེད་པའི་ཚེ། འབྲོག་རི་བོ་ཆེ་དགེ་ལྡན་རྣམ་པར་རྒྱལ་བའི་གླིང་དུ་སྦྱར་བའོ། །འདིས་ཀྱང་བསྟན་པ་རིན་པོ་ཆེ་ཕྱོགས་དུས་ཀུན་དུ་རྒྱས་པར་བྱེད་ནུས་པར་གྱུར་ཅིག ། ཨོཾ་སྭ་སྟི། རྒྱལ་བསྟན་པད་ཚལ་ཕན་བདེའི་དྲི་བསུང་ཅན། །བཤད་སྒྲུབ་འདབ་རྒྱས་རྣམ་གྲོལ་སྦྲང་རྩིའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུ་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ། །མངྒ་ལཾ། །