རྣམ་ཤེས་གོང་དུ་འཕོ་བའི་རྒྱ་ཆེར་བཤད་པ་གསེར་གྱི་སྒོ་འབྱེད་པ།
རྣམ་ཤེས་གོང་དུ་འཕོ་བའི་རྒྱ་ཆེར་བཤད་པ་གསེར་གྱི་སྒོ་འབྱེད་པ་བཞུགས་སོ། །
རྒྱུད་ཀྱི་རྒྱལ་པོ་ཁ་སྦྱོར་གྱི་བརྟག་པ་བརྒྱད་པའི་རབ་བྱེད་གསུམ་པ། རྣམ་ཤེས་གོང་དུ་འཕོ་བའི་རྒྱ་ཆེར་བཤད་པ་གསེར་གྱི་སྒོ་འབྱེད་པ་ཞེས་བྱ་བ། རྗེ་བཙུན་བླ་མ་འཇམ་པའི་དབྱངས་ཀྱི་ཞབས་ཀྱི་པདྨོ་ལ་གུས་པས་ཕྱག་འཚལ་ལོ། །ཡེ་ཤེས་དབང་པོ་སྟོན་པ་བཅོམ་ལྡན་འདས། །འཁོར་གྱི་གཙོ་བོ་རྡོ་རྗེ་སྙིང་པོ་དང་། །ལམ་འདིའི་ལྷ་མཆོག་ཡེ་ཤེས་མཁའ་འགྲོ་དང་། །འཇམ་དབྱངས་བླ་མའི་ཞབས་ལ་གུས་ཕྱག་འཚལ། །རྣམ་ཤེས་གོང་དུ་འཕོ་བའི་གདམས་ངག་ནི། །ལུགས་འདི་ཁོ་ན་ཤིན་ཏུ་ཟབ་པོ་ཞེས། །བྱང་ཕྱོགས་འདི་ན་ཤིན་ཏུ་མང་མོད་ཀྱང་། །རྒྱུད་དོན་ཇི་བཞིན་བཤད་པ་ཉུང་མཐོང་ནས། །རྡོ་རྗེ་མཁའ་འགྲོ་རྡོ་རྗེ་གདན་བཞི་དང་། །སྡོམ་འབྱུང་འཇམ་དཔལ་ཞལ་གྱི་ལུང་
རྣམས་ཀྱི། གནད་ཀུན་བསྡུས་ནས་ཁ་སྦྱོར་རྒྱུད་ཀྱི་དོན། །རྒྱུད་སྡེའི་མཐར་སོན་གདམས་པའི་མཛོད་གྱུར་པ། །མཁས་པ་འཇིགས་མེད་འབྱུང་གནས་སྦས་པ་ཡི། །རྒྱ་ཆེར་འགྲེལ་པའི་རྗེས་སུ་འབྲངས་ནས་ནི། བཤད་ཀྱིས་འཕོ་བའི་གནས་ཀུན་ཤེས་འདོད་པའི། །རྣམ་དཔྱོད་ལྡན་རྣམས་གུས་པས་མཉན་པར་གྱིས། །དཔལ་ཡང་དག་པར་སྦྱོར་བའི་རྒྱུད་ཀྱི་བརྟག་པ་བརྒྱད་པའི་རབ་ཏུ་བྱེད་པ་གསུམ་པ། མུ་སྟེགས་ཀྱི་ཡེ་ཤེས་འཇིག་པར་བྱེད་པ་ཞེས་བྱ་བ་འཕོ་བའི་རབ་བྱེད་ལ་གཉིས། རབ་ཏུ་བྱེད་པ་དངོས་བཤད་པ་དང་། རབ་ཏུ་བྱེད་པའི་མཚན་བསྟན་པའོ། །དང་པོ་ལ་གཉིས། རྒྱས་པར་བཤད་པ་དང་། དོན་བསྡུ་བའོ། །དང་པོ་ལ་གསུམ། ཡེ་ཤེས་གོང་དུ་འཕོ་བའི་ཚུལ་
བཤད་པ་དང་། ཡེ་ཤེས་ཀྱི་ཁྱད་པར་བསྟན་པ་དང་། རྣལ་འབྱོར་གྱི་བསྟན་བཅོས་ཀྱི་ཆེ་བ་བསྟན་པའོ། །དང་པོ་ལ་ལྔ། འཕོ་བའི་མཚན་ཉིད་སྤྱིར་བསྟན་པ་དང་། འཕོ་བའི་ལམ་ཉིད་བཤད་པ་དང་། ཞར་ལ་གྲོང་འཇུག་དང་ཚར་བཅད་རྗེས་འཛིན་བསྟན་པ་དང་། དོན་བསྡུས་ཏེ་བསྟན་པ་དང་། འཕོ་བའི་རྣལ་འབྱོར་གང་གི་དོན་དུ་གསུངས་པ་བསྟན་པའོ། །དང་པོ་ལ་དྲུག །འཕོ་བའི་གདམས་པ་ཉན་པར་བསྐུལ་བ་དང་། དོན་དེ་ཞུས་པ་དང་ལན་གྱིས་ཡང་དག་པར་བཤད་པ་དང་། དབང་པོའི་སྒོ་རེངས་པར་བྱེད་པའི་ཐབས་བསྟན་པ་དང་། ཡི་གེ་ཕྱེད་དང་གཉིས་ཀྱིས་བསྐུལ་བ་ཞར་བྱུང་དང་བཅས་པ་དང་། འཕོ་བའི་ཕན་ཡོན་བསྟན་པ་དང་། འཕོ་བའི་དུས་བསྟན་པའོ། །དང་པོ་ནི། སྔགས་སྤྱོད་པའི་གནས་ཁྱད་པར་ཅན་དུ་གྱེན་དུ་བགྲོད་པ་ནི་འཕོ་བའོ། །དེའི་རྣལ་འབྱོར་ནི་དེའི་དོན་དུ་འཇུག་པའི་ཏིང་ངེ་འཛིན་ནོ། །ཏིང་ངེ་འཛིན་དེའི་མཚན་ཉིད་དེ་རང་བཞིན་ནམ་རང་གི་ངོ་བོའི་ཁྱད་པར་དེ་ཉིད་ཇི་ལྟ་བ་གང་ཡིན་པ་དེ་རྡོ་རྗེ་སྙིང་པོ་ཞེས་བོས་ནས་ཉོན་ཅིག་ཅེས་གསུངས་སོ། །བཟང་པོའི་ལམ་གྱིས་ཏེ་འཕོ་བའི་ལམ་ཁྱད་པར་ཅན་གྱིས་དེ་བསྒོམ་པའི་རྣལ་འབྱོར་པ་རིག་པ་འཛིན་པའི་རྟེན་ཁྱད་པར་ཅན་གྱི་འགྲོ་བ་མཛེས་པར་འགྲོ་བའི་ཐབས་ཁྱོད་ལ་བསྟན་པར་བྱའོ། །འཕོ་བའི་རྣལ་འབྱོར་འདི་གཤིན་རྗེ་གཤེད་དམར་པོའི་རྒྱུད་ནས་མདོར་བསྡུས་པ་ཞིག་གསུངས་པ་དང་། འཇམ་དཔལ་ཞལ་ལུང་ནས་གསུངས་པ་མ་གཏོགས་པ། གསང་འདུས་ལ་སོགས་པ་ཕ་རྒྱུད་ཀྱི་སྐོར་ན་མི་གསལ་
ལོ། །རྣལ་འབྱོར་མའི་རྒྱུད་ལ་ཡང་རྡོ་རྗེ་གདན་བཞི་དང་། ཐུན་མོང་གི་བཤད་རྒྱུད་སམྦུཊི་དང་། བདེ་མཆོག་གི་སྒོས་ཀྱི་བཤད་རྒྱུད་སྡོམ་འབྱུང་རྣམས་ནས་གསུངས་ལ། དེ་ཡང་འཕོ་བའི་སྤྱི་ཁོག་གི་གནད་རྣམས་ཇི་ལྟ་བ་བཞིན་དུ་མཐུན་པར་ཡོད་དོ། །གཞན་ཡང་འཕོ་བའི་རྣལ་འབྱོར་གྱི་སྐབས་སུ་འཆི་བ་བླུ་བ་དང་། རིམས་དང་དུག་འཇོམས་པ་དང་། གཏུམ་མོ་སྦར་ནས་དགའ་བཞི་བསྐྱེད་པ་སོགས་ཀྱི་དགོས་པ་མང་དུ་གསུངས་སོ། །འདི་གང་ལ་གསུངས་པའི་གང་ཟག་ནི། རབ་ཚེ་འདི་ལ་འཚང་རྒྱ་བ་དང་། འབྲིང་བར་དོར་འཚང་རྒྱ་བ་དང་། ཐ་མ་སྐྱེ་བ་བརྒྱུད་ནས་འཚང་རྒྱ་བ་གསུམ་གྱི་ནང་ནས། ཕྱི་མ་ཉིད་ཀྱི་དབང་དུ་བྱས་ནས་གསུངས་སོ་ཞེས་བླ་མ་གོང་མ་རྣམས་འཆད་དོ། །འོན་ཀྱང་གང་ཟག་དང་པོའི་དབང་དུ་བྱ་བ་མིན་ཡང་། གཉིས་པའི་དབང་དུ་བྱས་ནས་འཕོ་བའི་རྣལ་འབྱོར་གསུངས་པ་འཇམ་དཔལ་ཞལ་ལུང་ན་ཡོད་ལ། གཞན་ནི་སྐྱེ་བ་བརྒྱུད་ནས་འཚང་རྒྱ་བའི་དབང་དུ་མཛད་ནས་གསུངས་སོ། །གཉིས་པ་ལ་ལྔ། སྟོན་པ་ལ་ཞུ་བ་འབུལ་བ་དང་། ཞུས་པའི་ལན་རྒྱས་པར་བཤད་པ་དང་། བཤད་པ་དེ་རྣམས་ཀྱི་དོན་བསྡུ་བ་དང་། འཆི་ལྟས་ཀྱི་མཚན་མ་བསྟན་པ་དང་། འཕོ་བའི་རྣལ་འབྱོར་མཆོག་ཏུ་འགྱུར་ཚུལ་ལོ། །དང་པོ་ནི། རྣམ་ཤེས་འཕོ་བའི་སྒོ་རྣམ་དགུ་ནི་ཇི་ལྟར་ལགས་པ་དང་། ཡེ་ཤེས་ཏེ་རྣམ་ཤེས་འཕོ་བའི་སྒོ་ཡི་དབྱེ་བ་ལ་བརྟེན་པ་ནི། བདེ་འགྲོར་སྐྱེ་བའི་ཡོན་ཏན་དང་། ངན་འགྲོར་
སྐྱེ་བའི་སྐྱོན་ཇི་ལྟར་ལགས་པ་ཡེ་ཤེས་ཀྱི་དབང་པོ་ཞེས་སྟོན་པ་ལ་བོས་ནས་བདག་ཅག་རྣམས་ཉན་པར་འཚལ་བ་སྟེ་འདོད་དོ་ཞེས་ཞུས་སོ། །རྡོ་རྗེ་མཁའ་འགྲོ་ལས། ཞུ་བ་འདི་སྔོན་དུ་བཏང་ནས་དེའི་འོག་ཏུ་སྔར་གྱི་བཤད་པར་ཞལ་གྱིས་བཞེས་པ་འབྱུང་ངོ་། །འཆི་རྟགས་བྱུང་ནས་བཟློག་ཐབས་བྱས་ཀྱང་མ་བཟློག་པའི་དུས་སུ་སྲོག་ནི་འཆད་པ་སྟེ་འཆི་བར་འགྱུར་བའི་ཡང་དག་པ་སྟེ་འདོད་པའི་དོན་ལ་མི་བསླུ་བ་རབ་ཏུ་སྦྱོར་བ་སྟེ་རྗེས་སུ་སྒྲུབ་པ་ཉོན་ཅིག་ཅེས་རྡོ་རྗེ་སྙིང་པོ་ལ་ཉན་པར་གདམས་སོ། །འདི་ནི་དུས་སུ་ཞེས་གསུངས་པས། སྔར་བཤད་པའི་དུས་ལ་བབ་པ་ན། འཕོ་བའི་སྒོ་ནས་སྲོག་འདོར་བའི་དུས་ཡིན་གྱི་འཆི་ནད་ཀྱིས་ཐེབས་པའི་སྲོག་ཆད་པ་ལ་མི་བཟུང་སྟེ། དེ་ནི་འོག་ནས་བཀག་པའི་ཕྱིར་རོ། །དེའི་ཕྱིར་འགྱུར་གཞན་ལས། སྲོག་ནི་ཆད་པའི་དུས་དག་ཏུ། །ཡང་དག་སྦྱོར་བ་ཞེས་འབྱུང་བ་ནི། འགྱུར་གྱིས་མ་ཐོན་པའོ། །གཉིས་པ་ནི། དེ་ལྟར་དྲིས་པའི་ལན་སྟོན་པ་ན། ཐོག་མར་སྒོ་དགུ་དང་། དེ་ནས་འཕོ་བའི་སྐྱོན་ཡོན་སྟོན་པ་ནི། འབྲོག་འགྱུར་ལས་ལེགས་པའི་ལམ་ནི་མཛེས་པའི་གནས། །ངན་པའི་ལམ་ཡང་སྐྱོན་རྣམས་ཉིད། ཅེས་འབྱུང་བ་ལ། འགོས་འགྱུར་ལས། ལམ་བཟང་པོ་ཡིས་ཡིད་འོང་གནས། །ལམ་ངན་གྱིས་ནི་སྲིད་པར་སྐྱོན། །ཞེས་འབྱུང་བ་བདེ་བས་སྒོ་བཟང་པོ་ནས་འཕོ་བའི་ལམ་བཟང་པོ་ཡིས་ནི་ཡིད་དུ་འོང་བའི་གནས་ཏེ་བདེ་འགྲོར་སྐྱེ་བ་དང་། འཕོ་བའི་སྒོ་ངན་པའི་ལམ་གྱིས་ནི་སྲིད་པར་སྐྱོན་ནི་ངན་འགྲོ་གསུམ་དུ་སྡུག་
བསྔལ་བར་གནས་པའོ། །རྣམ་ཤེས་འཕོ་བའི་སྒོ་དགུ་ནི། ཡོངས་སུ་གྲགས་པའི་ལྟེ་བའི་སྒོའི་མཚན་ཉིད་དང་། ལྷག་མ་བརྒྱད་ལ་ཡང་སྒོའི་མཚན་ཉིད་ཅེས་སྦྱར་རོ། །སྟེང་གི་སྒོ་ནི་སྤྱི་གཙུག་དང་། ཐིག་ལེའི་སྒོ་སྨིན་མཚམས་དང་། མིག་དག་དང་སྣའི་སྒོ་གཉིས་དང་། སོགས་ཀྱིས་བསྡུས་པ་སྲིད་པའི་སྒོ་ཞེས་པ་ཁའི་སྒོ་ལ་བཤད་དོ། །རྣ་བ་དག་གི་སྒོ་ནི་རྣ་བའི་བུག་པ་གཉིས་སོ། །བཏུང་བའི་སྒོ་ནི་གཅི་བའི་ལམ་གྱི་སྒོའོ། །བཏུང་བ་མིན་པའི་སྒོ་ནི་བཤང་བའི་ལམ་གྱི་སྒོའོ། །མིག་དང་རྣ་བ་དང་སྣ་ལ་བུག་པ་གཉིས་གཉིས་ཡོད་ཀྱང་སྒོ་དགུར་བྱེད་པ་ན་སྒོ་རེ་རེར་བྱའོ། །སྨིན་དབུས་ཀྱི་ཤ་དང་པགས་པ་ལ་བུག་པ་མེད་ཀྱང་རུས་པ་ལ་བུག་པ་ཡོད་པས་སྒོར་བཞག་སྟེ། སྤྱི་གཙུག་བཞིན་ནོ། །སྒོ་དེ་དག་ནས་འཕོས་པས་འགྲོ་བ་གང་དུ་སྐྱེ་བ་སྟོན་པ་ནི། ལྟེ་བའི་སྒོ་ནས་རྣམ་ཤེས་འཕོས་པས་འདོད་པ་ཅན་ཏེ་འདོད་ཁམས་ཀྱི་མཐོ་རིས་ཏེ་ལྷར་སྐྱེའོ། །ཐིག་ལེའི་གནས་སྨིན་མཚམས་ཀྱི་སྒོ་ནས་རྣམ་ཤེས་འཕོས་པས། །གཟུགས་ཁམས་ཀྱི་ལུས་ཅན་གྱི་ལྷར་སྐྱེའོ། །འདིར་འབྲོག་འགྱུར་ལས། སྟེང་ནི་སྟེང་དུ་གནས་པ་ཡི། །འགྲོ་དང་འོང་བར་ཡོངས་སུ་གྲགས། །ཞེས་འབྱུང་ལ། འགོས་འགྱུར་ལས། སྟེང་ནས་འགྲོ་བ་སྟེང་གི་ནི། །འགྲོ་བ་དག་ཏུ་རབ་ཏུ་བརྟག །ཅེས་གསུངས་པའི་འགྱུར་ཕྱི་མ་ལེགས་ཏེ། རྡོ་རྗེ་མཁའ་འགྲོ་ལས་ཀྱང་། སྟེང་ནས་འགྲོ་བ་སྟེང་གི་ནི། །མྱུར་དུ་འགྲོ་བ་བྱེད་པར་འགྱུར། །ཞེས་གསུངས་
ཤིང་། མན་ངག་སྙེ་མ་དང་། རྡོ་རྗེ་མཁའ་འགྲོའི་འགྲེལ་པ་ལས་ཀྱང་། འོང་བ་ཞེས་པ་མི་འབྱུང་བར་སྟེང་ནས་ཏེ་སྤྱི་གཙུག་གསེར་གྱི་སྒོ་ནས་རྣམ་ཤེས་འཕོས་པས། སྟེང་གི་འགྲོ་བ་སྟེ་འགྲོ་བ་ཁྱད་པར་ཅན་དུ་སྐྱེ་བར་བཤད་པའི་ཕྱིར་རོ། །སྟེང་གི་འགྲོ་བ་ནི་བྱང་ཆུབ་སེམས་དཔའ་ལ་སོགས་པའི་གནས་རྣམས་སུ་གནས་པའི་འགྲོ་བ་གཞན་ཁྱད་པར་ཅན་དུ་འགྲོ་བར་མན་སྙེ་ལས་བཤད་དོ། །འོ་ན་སྡོམ་འབྱུང་ལས། སྟེང་གིས་གཟུགས་མེད་ཁམས་སུ་སྟེ། །དེ་ནི་བཟང་པོར་འགྲོ་དབྱེ་འོ། །ཞེས་གསེར་གྱི་སྒོ་ནས་འཕོས་ན། གཟུགས་མེད་ཁམས་སུ་སྐྱེ་བར་བཤད་ཅིང་། ཞལ་ལུང་ལས་ཀྱང་། སྤྱི་གཙུག་ཡེ་ཤེས་འཕོ་བ་ན། །གཟུགས་མེད་ཁམས་སུ་སྐྱེ་བར་འགྱུར། །ཞེས་གསུངས་པའི་ཕྱིར་ན་གསེར་གྱི་སྒོ་ནས་འཕོས་ཀྱང་། སྔགས་སྤྱོད་པའི་རྟེན་ཁྱད་པར་ཅན་དུ་སྐྱེ་བར་མ་ངེས་སོ་ཞེ་ན། སྐྱོན་མེད་དེ་འདིར་སྒོ་འདི་ནས་འཕོས་ན་འདིར་སྐྱེ་ཞེས་བཤད་པ་རྣམས་ནི། འཕོ་བ་བསྒོམས་པའི་འབྲས་བུའི་དབང་དུ་བྱས་ནས་བཤད་པ་ཁོ་ན་མ་ཡིན་ཏེ། སྒོ་ངན་པ་གསུམ་ནས་འཕོས་ན་ངན་སོང་གསུམ་དུ་སྐྱེ་བར་བཤད་པ་བཞིན་ནོ། །དེས་ན་གཞི་དུས་ཀྱི་རྣམ་གཞག་བསྟན་པ་ཡིན་ལ། དེ་ཡང་གཟུགས་མེད་ཁམས་སུ་སྐྱེ་ན་སྤྱི་གཙུག་ནས་འཕོ་བ་དང་། གཟུགས་ཁམས་སུ་སྐྱེ་ན་སྨིན་དབུས་ནས་རྣམ་ཤེས་འཕོ་བ་སོགས་བསྟན་པ་ཡིན་གྱི། སྤྱི་གཙུག་ནས་རྣམ་ཤེས་འཕོས་ཚད་གཟུགས་མེད་དུ་སྐྱེ་བར་སྟོན་པ་མ་ཡིན་ནོ། །དེས་ན་འཕོ་བ་སྦྱངས་ནས་སྤྱི་གཙུག་
གསེར་གྱི་སྒོ་ནས་རྣམ་ཤེས་འཕོས་པས་བྱང་ཆུབ་སེམས་དཔའི་གནས་སུ་སྐྱེ་བར་སྟོན་པ་ལ་འགལ་བ་མེད་དོ། །སྣའི་སྒོ་གཉིས་དག་ལས་རྣམ་ཤེས་འཕོས་པས། གནོད་སྦྱིན་དུ་སྐྱེ་བར་འགྱུར་ལ་རྣ་བའི་སྒོ་གཉིས་དག་ལས་རྣམ་ཤེས་འཕོས་ན་གྲུབ་པའི་ལྷར་སྐྱེ་བར་འདི་དང་རྡོ་རྗེ་མཁའ་འགྲོར་བཤད་ལ། ཞལ་ལུང་ལས་རིག་པ་འཛིན་པའི་གནས་སུ་སྐྱེ་བ་དང་། སྡོམ་འབྱུང་ལས་མིའམ་ཅིར་སྐྱེ་བར་བཤད་དོ། །གལ་ཏེ་མིག་གཉིས་ལས་རྣམ་པར་ཤེས་པ་འགྲོ་བ་སྟེ་འཕོས་ན། མི་རྣམས་ཀྱི་རྒྱལ་པོར་སྐྱེ་བར་འདི་དང་རྡོ་རྗེ་མཁའ་འགྲོ་དང་། གདན་བཞི་དང་སྡོམ་འབྱུང་དང་ཞལ་ལུང་རྣམས་ལས་བཤད་ལ། མན་ངག་སྙེ་མ་ལས། མིག་ནས་མིའི་འགྲོ་བར་རོ། །ཞེས་བཤད་པ་ལྟར་ན་རྒྱལ་པོ་ནི་མཚོན་པ་ཙམ་ཡིན་པས། མིའི་འགྲོ་བ་སྤྱི་ལ་བཤད་དོ། །སྲིད་པའི་སྒོ་ལས་རྣམ་ཤེས་འཕོས་ན་ཡི་དྭགས་སུ་སྐྱེ་སྟེ། དེ་བཞིན་དུ་གཅི་བ་དྲི་ཆུའི་ལམ་ནས་རྣམ་ཤེས་འཕོས་ན་བྱོལ་སོང་སོགས་སུ་སྐྱེའོ། །བཏུང་བ་མིན་པ་བཤང་བའི་ལམ་ནས་རྣམ་ཤེས་འཕོས་པས། ཚ་བ་ལ་སོགས་པའི་དམྱལ་བ་བརྒྱད་དུ་ནི་སྐྱེའོ། །དེ་ལྟར་ན་སྤྱི་གཙུག་གསེར་གྱི་སྒོ་ནི་རབ་བོ། །སྨིན་མཚམས་དང་མིག་དང་རྣ་བ་དང་སྣ་དང་ལྟེ་བའི་སྒོ་ལྔ་ནི་འབྲིང་པོའོ། །བཤང་གཅི་དང་ཁའི་སྒོ་གསུམ་ནི་སྒོ་ཐ་མའོ། །ཚ་དམྱལ་ནི་གཙོ་བོ་ཡིན་པས་འདི་དང་གདན་བཞི་ལས་བཤད་ཀྱི། རྡོ་རྗེ་མཁའ་འགྲོ་དང་སྡོམ་འབྱུང་དང་ཞལ་ལུང་ལས་དམྱལ་བ་སྤྱི་ལ་བཤད་
དོ། །ལྷ་མ་ཡིན་མ་བཤད་པ་ནི། གཞུང་གཞན་ནས་ལྷ་མ་ཡིན་རྣམས་དུད་འགྲོར་བཤད་པ་དང་། ཡང་ཁ་ཅིག་ནས་ལྷ་མ་ཡིན་འགའ་ཞིག་ལྷ་དང་འགའ་ཞིག་དུད་འགྲོར་བསྡུས་ནས་བཤད་པ་ལ་དགོངས་པ་འདྲའོ། །ཚུལ་འདི་དང་འཕགས་པ་ཐོགས་མེད་ཀྱིས་མངལ་སྐྱེས་རྣམས་ལ་དང་པོར་བར་དོའི་རྣམ་ཤེས་ཁུ་ཁྲག་གི་དབུས་གང་དུ་ཞུགས་པའི་གནས་དེ་ཕྱིས་སྙིང་གར་འགྱུར་ཞིང་། ལུས་འདོར་བ་ན་སྙིང་ག་ནས་རྣམ་ཤེས་འཕོ་བར་བཤད་པ་དང་མི་འགལ་ཏེ། ནང་ནས་རྣམ་ཤེས་འཕོ་བ་ན་སྙིང་ག་ནས་རྣམ་ཤེས་འཕོ་བ་ཡིན་ཡང་། ལུས་ཀྱི་སྒོ་སོ་སོ་ནས་ཕྱི་རོལ་ཏུ་རྣམ་ཤེས་འཕོ་བ་ན། འདི་ནས་གསུངས་པ་བཞིན་དུ་འཕོ་བའི་ཕྱིར་རོ། །འོ་ན་མཛོད་འགྲེལ་ལས། འཆི་བ་ན་ལུས་ཀྱི་ཕྱོགས་གང་དུ་རྣམ་པར་ཤེས་པ་འགག་ཅེས་དྲིས་པའི་ལན་དུ་ཅིག་ཅར་འཆི་བ་ནི་ཡིད་དང་བཅས་པའི་ལུས་ཀྱི་དབང་པོ་མོད་ལ་འགག་པར་འགྱུར་རོ། །ཞེས་བཤད་དེ་ཅིག་ཅར་འཆི་བ་ནི་འདིར་འདོད་གཟུགས་ཀྱི་སེམས་ཅན་རྫུས་སྐྱེས་འཆི་བའོ། །རིམ་གྱིས་འཆི་བ་ནི་སྐྱེ་གནས་གཞན་གསུམ་གྱིས་འཆི་བའོ། །གལ་ཏེ་རིམ་གྱིས་འཆི་ན་ངན་སོང་དུ་སྐྱེ་ན་རྐང་པ་དང་། མིར་སྐྱེ་ན་ལྟེ་བ་དང་། ལྷར་སྐྱེ་བ་དང་དགྲ་བཅོམ་པ་འཆི་ན་ནི་སྙིང་གར་རྣམ་ཤེས་འགག་གོ་ཞེས་གསུངས་པ་དང་། འདིར་བཤད་པ་མི་མཐུན་པ་ཇི་ལྟར་ཡིན་ཞེ་ན། མཛོད་ལས། རྐང་པ་དང་། ལྟེ་བ་སྙིང་གར་ཡིད་འཆི་འཕོ། ཞེས་གསུངས་པའི་ཡིད་འཕོ་བའི་དོན་ནི། འགྲེལ་པ་ལས་གནས་དེ་དག་ཏུ་
ཡིད་འགགས་པའི་དོན་དུ་བཤད་ལ། དེ་ཡང་ལུས་ཀྱི་དབང་པོ་མ་ལུས་པར་རྐང་པ་ལ་སོགས་པའི་གནས་སུ་འགགས་པའི་སྟོབས་ཀྱིས། ཡིད་ཀྱི་རྣམ་ཤེས་འགགས་པར་འགྲེལ་བཤད་ལས་བཤད་པ་ལྟར་ཡིན་པས། གང་དུ་ལུས་དབང་འགགས་པས་ཡིད་ཀྱི་རྣམ་ཤེས་འགག་ཚུལ་སོ་སོ་བ་སྟོན་པ་ཡིན་གྱི། གནས་དེ་དག་ནས་རྣམ་ཤེས་ཕྱི་རོལ་ཏུ་འཕོ་བར་སྟོན་པ་མིན་པས་འགལ་བ་མེད་དོ། །གསུམ་པ་ནི། རྡོ་རྗེ་སྙིང་པོ་ལ། རིགས་ཀྱི་བུ་ཞེས་བོས་ནས། སྔར་བཤད་པ་དེ་ལྟར་ན་གང་གི་ཕྱིར་སྲིད་པ་འཕོ་བའི་མཚན་ཉིད་ནི་རྣམ་ཤེས་འཕོ་བའི་སྒོའི་ཁྱད་པར་ཏེ། མཆོག་དམན་ལས་ནི་བདེ་འགྲོ་དང་ངན་འགྲོའི་འཁོར་བའི་སྒོ་མཆོག་དམན་གྱི་ཁྱད་པར་གྱི་དབྱེ་བ་ཡང་དག་པར་འབྱུང་བ་དེའི་ཕྱིར་རྣལ་འབྱོར་པས་ནི་མཉམ་པར་བཞག་པས་ཏེ་རྩེ་གཅིག་ཏུ་ལས་གཞན་མེད་པར་སྒོ་མཆོག་ནས་རྣམ་ཤེས་འཕོ་བའི་རྣལ་འབྱོར་ལ་བརྩོན་པར་བྱའོ། །སྤང་ཕྱིར་ཞེས་པ་འགྱུར་གཞན་ལ་མེད་ཅིང་། མན་སྙེ་ལས་ཀྱང་དེའི་དོན་མ་བཤད་དོ། །བཞི་པ་ནི། འཆི་བའི་དུས་ཀྱི་སྟེ་དུས་ཐོབ་པ་རྣམས་ཀྱི་འཆི་བའི་མཚན་མ་སྟེ་འཆི་ལྟས་རྒྱུད་རྣམས་ལས་བསྟན་པ་ཉིད་ཤེས་པར་བྱའོ། །འདིར་འཕོ་བ་ལ་འཕོ་བའི་དུས་ལ་མ་བབ་པར་འཕོས་ན། ཉེས་དམིགས་ཆེན་པོ་གསུངས་པས་དུས་ངེས་པ་གལ་ཆེ་ལ། དེ་ལ་ཡང་འཆི་ལྟས་བྱུང་བ་ལ་འཆི་བླུ་བྱས་པས་ཟློག་མི་ནུས་ན།
འཕོ་བ་བྱེད་པས་འཆི་ལྟས་ལ་མཁས་པར་བྱའོ། །འདི་ལ་གསུམ། ཕྱིའི་འཆི་ལྟས་དང་། ནང་གི་འཆི་ལྟས་དང་། འཆི་བ་བླུ་བའི་ཚུལ་ལོ། །དང་པོ་ནི། སྡོམ་འབྱུང་ལས་རྐང་མཐིལ་དག་ཏུ་ཕུག་པ་དང་། །གང་ཚེ་ལྟེ་བར་ཕུག་སྙམ་གྱུར། །དེ་ཚེ་ཉི་མ་གསུམ་ཕ་རོལ། །ལྔ་ཡི་གོང་དུ་འགྲོ་བར་འགྱུར། །བཤང་གཅི་ཟག་པའི་དུས་དག་ཏུ། །དུས་མཚུངས་སྦྲིད་པ་བྱུང་གྱུར་ན། །དེ་ཉིད་ཀྱི་ནི་དུས་ཚོད་ལ། །ལོ་གཅིག་གིས་ནི་འཆི་བར་འགྱུར། །རྟགས་དང་བྷ་ག་མཉམ་སྦྱོར་བའི། །བར་དང་ཐ་མར་སྦྲིད་པ་བྱུང་། །དེ་ཚེ་དུས་མཚུངས་ཟླ་བ་ན། །ངེས་པར་འཆི་བ་དག་ཏུ་འགྱུར། །སྙིང་ག་ལྐོག་མའི་དབུས་དག་ཏུ། །གང་ཚེ་དུས་མཚུངས་ཟུག་གཟེར་བྱུང་། གལ་ཏེ་ཆོས་ལ་མི་བརྟེན་ན། །ཕྱོགས་གསུམ་ ཟླ་ཕྱེད་གསུམ། གྱིས་ནི་འཆི་བར་འགྱུར། །མིག་གཡོན་འབྲས་བུའི་གཟུགས་བརྙན་ནི། །གང་ཞིག་མེ་ལོང་ལ་མ་མཐོང་། །གལ་ཏེ་ཟློག་པར་མི་བྱེད་ན། །ཞག་བདུན་ནས་ནི་ངེས་པར་འཆི། །རྣ་བའི་རྩ་བ་ གཉིས་དང་། སྨིན་མའི་དབུས། །སྤྱི་དཀྱིལ་རྣམས་སུ་ཟུག་གཟེར་ནི། །བཞི་པོ་མཚུངས་པར་གཟེར་བྱུང་ན། །དེ་ཚེ་འཕྲལ་དུ་འཆི་བར་འགྱུར། །གློ་བུར་དུ་སྐྱེས་ཚོན་པོ་དང་། །རིད་དང་ཁྲོ་དང་འཇིགས་པས་འཁྲུགས། །གལ་ཏེ་ཆོས་ལ་མི་བརྟེན་གང་། །དེ་ནི་ལོ་ཡིས་འཆི་བར་འགྱུར། །དཀར་པོ་ཡི་ནི་ཚེས་གཅིག་ལ། །གལ་ཏེ་ཁུ་བ་ནག་པོར་འགྱུར། །དེ་ཚེ་ཟླ་བ་དྲུག་གིས་འཆི། །དམར་པོས་ནད་འབྱུང་མཚོན་པ་སྟེ། །རྟག་ཏུ་འཛག་པའི་མིག་དང་ལྡན། །
གཟུགས་ལ་བལྟས་ཀྱང་རྣམ་པར་འཁྲུལ། །གང་ཞིག་མེ་ལོང་ཆུ་ལ་ཡང་། །རང་གི་གྲིབ་མ་མ་མཐོང་དང་། །མཚན་མོ་དབང་པོའི་གཞུ་དང་ནི། །ཉིན་མོ་སྐར་མའི་དཀྱིལ་འཁོར་མཐོང་། །སྤྲིན་མེད་པར་ནི་ལྷོ་ཕྱོགས་སུ། །རྟེན་པའི་གློག་འགྱུ་མཐོང་བ་དང་། །ཉིན་པར་གྲིབ་མའི་ལམ་ དགུ་ཚིགས། མཐོང་དང་། །སྐར་མདའ་ལྟུང་བར་གྱུར་པ་དང་། །ངང་བ་བྱ་རོག་རྨ་བྱ་རྣམས། །གཅིག་ཏུ་འདུས་པ་མཐོང་བ་དང་། །ཟླ་བ་གཉིས་དང་ དུས་གཅིག་ཏུ་མཐོང་བ་དང་། ཉི་མ་གཉིས། །དེ་བཞིན་རང་གི་མགོ་བོར་འབར། །ཤིང་རྩེ་རི་ཡི་རྩེ་མོ་ལ། །དྲི་ཟའི་གྲོང་ཁྱེར་མཐོང་བ་དང་། །ཡི་དྭགས་ཤ་ཟ་མཐོང་བའམ། །གཞན་ཡང་འཇིགས་སུ་རུང་བ་མཐོང་། །གློ་བུར་དུ་ནི་རབ་ཏུ་འདར། །ཡང་དང་ཡང་དུ་བརྒྱལ་བ་དག །དེ་རྣམས་ལས་གཅིག །མཐོང་བར་གྱུར་ནའང་གཅིག་པུ་དེ། །ཟླ་བའི་ཁོངས་སུ་འཆི་བར་འགྱུར། །ཟླ་བ་ར་རི་སྤངས་པ་དང་། །ཉི་མ་འོད་ཟེར་དང་བྲལ་བ། །མཚན་མོ་ཉི་མ་ཉིན་མོ་ཟླ། །དེ་བཞིན་རང་ སྟེ་རང་གི་མིག །གི་འདྲེན་བྱེད་འབར། །སྐར་མ་ལྷུན་པོའི་ཚད་དང་ནི། །རྒྱ་མཚོ་ཡང་ནི་ཆུ་བོ་བཞིན། །བཤང་དང་གཅི་བའི་དུས་དག་ན། །མཚུངས་པར་ཁུ་བ་ལྷུང་གྱུར་པ། །གལ་ཏེ་ཆོས་ལ་མི་བརྟེན་ན། །ཕྱོགས་གཅིག་ལ་ནི་འཆི་བར་འགྱུར། །འཆི་བླུ་ལས། དེར་ཡང་ཞེས་པའི་གོང་དུ། སྔ་དྲོའི་ཡང་ན་ཕྱི་དྲོ་འམ། །ཟླ་ཟེར་དག་ལ་ཡུན་རིང་དུ། །དཔུང་པ་བརྐྱང་བའི་གྲིབ་མ་ལ། །བལྟས་ཏེ་རིམ་གྱིས་མཁའ་ལ་བལྟ། །ཞེས་ཚིགས་བཅད་ཅིག་འབྱུང་ངོ་། །དེར་ཡང་སྐྱེ་བོའི་གཟུགས་ཅན་གྱི། གྲིབ་མ་ལ་ནི་ཉིན་མོ་
བལྟ། །མགོ་བོ་མ་མཐོང་བ་ལས་དེ། །ལོ་ཡི་ནང་དུ་འཆི་བར་འགྱུར། །ལག་པ་གཡོན་པ་མ་མཐོང་བས། །བུ་དང་ཆུང་མ་རྣམ་པར་ཉམས། །གཡས་མ་མཐོང་བས་ཕ་དང་ནི། །ཆུང་མ་ལ་སོགས་ཚོགས་ཆེན་འཆི། །དྲི་ཆུའི་རྒྱུན་ནི་མངར་གྱུར་དང་། །གཡོན་ནས་འཁོར་ཞིང་དྲི་ང་དང་། །དྲི་ཆུ་སྐྱུར་བ་ལ་སོགས་གྱུར། །ཟླ་བ་དྲུག་གི་ནང་དུ་འཆི། །ཞེས་གསུངས་ལ།རྨི་ལམ་གྱི་འཆི་ལྟས་ཀྱང་དེ་ཉིད་ལས། གང་ཞིག་གིས་ནི་རྨི་ལམ་མཐར། །བྱེ་མའམ་ཐལ་བའི་ཕུང་པོ་འམ། །ལྷ་ཁང་མཆོད་སྡོང་ལ་འཛེགས་ཉིད། །དེ་ནི་སྔ་མ་བཞིན་དུ་འཆི། གལ་ཏེ་བོང་བུའམ་སྤྲེའུ་ཞོན། །གྲོག་མཁར་ཕྱག་དར་ཕུང་པོ་ལ། །མངོན་འཛེགས་ལྷོ་ཕྱོགས་འགྲོ་བ་ནི། །གང་གི་རྨི་ལམ་མཐར་མཐོང་དང་། །བུད་མེད་གང་ཞིག་གོས་ནག་ཅིང་། །མདོག་ནག་འདོད་པ་སྤྱོད་པའི་མི། །དེ་ནི་དུས་མཚན་མོར་ཤེས་བྱ། །གཤིན་རྗེ་རུ་ནི་འགྲོ་བར་བསྟན། །བྱ་རྒོད་ཅེ་སྤྱང་ཁྱི་དང་ཝ། །དྲེད་དང་ཡི་དྭགས་ཤ་ཟ་ཡིས། །ཟ་བར་རྨི་ལམ་མཐོང་ན་ནི། །ངེས་པར་ལོ་གཅིག་དག་གིས་སོ། །གོས་དམར་ལུས་ལ་རབ་གཡོགས་དང་། །ཕྲེང་བ་དམར་པོས་རྣམ་བརྒྱན་དང་། །གང་ཚེ་ཏིལ་མར་བཀུས་པ་རྨི། །དེ་ནི་ཟླ་དྲུག་ལས་མི་འཚོ། །ཞེས་གསུངས་ཏེ་དེ་རྣམས་ཕྱིའི་འཆི་ལྟས་སོ། །ཕྱིའི་འཆི་ལྟས་རྒྱས་པར་ཤེས་པར་འདོད་ན། ངག་དབང་གྲགས་པའི་འཆི་བླུའི་མན་ངག་ལས་ཤེས་པར་བྱའོ། །གཉིས་པ་ནི། ནང་གི་རླུང་གི་འཆི་ལྟས་ངེས་པར་མ་བྱས་པར། ཕྱིའི་འཆི་ལྟས་ཙམ་གྱིས་འཆི་བའི་ངེས་པ་མེད་ལ། ཕྱི་ནང་གཉིས་ཀ་ངེས་པར་
བྱས་ན་གསལ་བ་ཡིན་ནོ། །ཞེས་འཆི་བླུ་དང་མན་ངག་སྙེ་མ་ལས་གསུངས་པས་ན་ནང་གི་འཆི་ལྟས་རྟོག་པ་གལ་ཆེའོ། །དེ་ཡང་སྡོམ་འབྱུང་ལས། དཀར་པོ་རྣམས་ཀྱི་ཚེས་གཅིག་ནས། །ཡང་དག་བརྩམས་ཏེ་ཉིན་གསུམ་རླུང་། །ཟླ་བ་ལ་རྒྱུ་ཐུན་ཕྱེད་ལ། །དེ་ནས་ཉིན་གསུམ་ཉི་མ་ལ། །ཡོངས་རྒྱུའི་ཚུལ་གྱིས་ཇི་སྲིད་རླུང་། །དཀར་པོའི་ཚེས་ནི་བཅོ་ལྔའི་བར། །ནག་པོ་རྣམས་ཀྱི་ཚེས་གཅིག་ནས། །བརྩམས་ཏེ་ཉི་མ་གསུམ་དུ་རླུང་། །ཉི་མར་བརྗོད་ལས་སྔ་དྲོ་རྒྱུ། །ཇི་སྲིད་ཚེས་ནི་བཅོ་ལྔའི་བར། །ཞེས་གསུངས་སོ། །དེ་དག་གི་དོན་ནི་དཀར་པོ་ཞེས་པའི་རྐང་པ་དྲུག་གིས། ཟླ་བ་ཡར་ངོའི་རླུང་རྒྱུ་ཚུལ་སྟོན་ཏེ། ཡར་ཚེས་གཅིག་ནས་བརྩམས་ཏེ་ཉི་མ་གསུམ་དུ་དང་པོར་ཟླ་བ་ལ་སྟེ་སྣ་བུག་གཡོན་པ་ནས་ཐུན་ཕྱེད་དུ་རླུང་འབབ་བོ། །དེ་ནས་ཚེས་བཞི་ནས་བརྩམས་ཏེ་ཉི་མ་གསུམ་དུ་དང་པོར་ཉི་མ་ལ་སྟེ་སྣ་བུག་གཡས་པ་ནས་ཡོངས་སུ་རྒྱུ་བའི་ཚུལ་གྱིས་ཐུན་ཕྱེད་དུ་རླུང་འབབ་བོ། །ཇི་སྲིད་ནས་བཅོ་ལྔའི་ཞེས་པའི་དོན་ནི་སྔ་མ་བཞིན་དུ། རླུང་ཇི་སྲིད་བཅོ་ལྔའི་བར་དུ་ཡང་རྒྱུ་བ་སྟེ། ཚེས་བདུན་ནས་བརྩམས་ཏེ་དགུའི་བར་ཉི་མ་གསུམ་དུ་སྣ་བུག་གཡོན་པ་ནས་དང་པོར་རྒྱུ། བཅུ་ནས་བརྩམས་ཏེ་བཅུ་གཉིས་ཀྱི་བར་ཞག་གསུམ་དུ་ཐོག་མར་སྣ་བུག་གཡས་ནས་དང་བཅུ་གསུམ་ནས་བརྩམས་ཏེ་བཅོ་ལྔའི་བར་དུ་ཞག་གསུམ་དུ་ཐོག་མར་གཡོན་ནས་རླུང་འབབ་བོ། །ནག་པོ་ཞེས་པ་བཞིའི་དོན་ནི། མར་ངོའི་ཚེས་གཅིག་ནས་བརྩམས་ཏེ་ཞག་གསུམ་དུ་ཉི་མར་བརྗོད་
པ་སྟེ། སྣ་བུག་གཡས་ནས་རླུང་རྒྱུ་བ་དང་། དེ་ནས་ཞག་གསུམ་གྱི་བར་དུ་གཡོན་ནས་རྒྱུ། དེ་ནས་ཞག་གསུམ་གྱི་བར་དུ་གཡས་ནས་དང་། དེ་ནས་ཞག་གསུམ་གྱི་བར་དུ་གཡོན་ནས་དང་། དེ་ནས་ཞག་གསུམ་གྱི་བར་དུ་དང་པོ་གཡས་ནས་རླུང་ཐུན་ཕྱེད་དུ་རྒྱུའོ། །ཚུལ་དེ་འདྲ་དེ་ནི། འཆི་བླུ་ལས། གོ་རིམ་འདི་ནི་ངེས་པ་ཡིན། ཞེས་གསུངས་པས། འོག་ནས་འཆད་པའི་འཆི་ལྟས་སོགས་ཀྱི་སྐྱོན་མེད་ན། རྒྱུ་ཚུལ་དེར་ངེས་པ་ཡིན་ནོ། །དང་པོར་རྒྱུ་བའི་དུས་སྡོམ་འབྱུང་དང་། འཆི་བླུ་ལས་མི་གསལ་ཡང་། མན་སྙེ་ལས་ཚེས་གཅིག་སོགས་ཀྱི་ཐོ་རངས་ཀྱི་དུས་ལ་བཤད་དོ། །ཞག་གི་ཐོ་རངས་ཀྱི་དུས་ཀྱང་ཞག་གསུམ་གྱི་རྣམ་དབྱེ་ལ་བརྟེན་ནས། མི་འདྲ་བ་མང་དུ་ཡོད་ཀྱང་། འདིར་ནི་འཇིག་རྟེན་ན་ཚེས་གཅིག་ལྟ་བུའི་ཐོ་རངས་ནི་ཚེས་གཅིག་གི་ཉི་མ་མ་ཤར་བའི་སྔ་རོལ་ཏུ་སོང་ཟིན་པ་ལ་བྱེད་ཅིང་། ཞག་དེ་ལ་ཉིན་མཚན་གཉིས་ཡོད་པའི་ཉིན་གྱི་དུས་མཚན་གྱི་དུས་ལས་དང་པོར་འོང་དགོས་པས། ཚེས་གཅིག་སོགས་ཀྱི་སྐྱ་རེངས་དང་པོ་ནི། ཞག་དེའི་ཉིན་གྱི་ཐོག་མ་ཡིན་པས། དེ་ནས་བཟུང་སྟེ་ནམ་ལངས་ཀྱི་བར་ལ་བྱའོ། །དེ་ཉིད་སྔ་དྲོ་དང་པོ་ཡང་ཡིན་པས། སྔ་དྲོ་ཞེས་གསུངས་པ་ཡང་མི་འགལ་ལོ། །ཐུན་ཕྱེད་ནི་རྒྱུད་དེ་ཉིད་ལས། ཐུན་ནི་བརྒྱད་ཆ་ཞེས་པ་དྲན། །ཞེས་གསུངས་པས། ཞག་གཅིག་ལ་ཐུན་ཕྱེད་བཅུ་དྲུག་ཡོད་པའི་ལུགས་ཡིན་ལ། ཐུན་ཕྱེད་རེ་ལ་ནི་ཕྱེད་དང་བཅས་པའི་དབུགས་བརྒྱ་ཕྲག་བཅུ་གསུམ་རེའོ། །མན་སྙེ་ལས་ཐོ་རངས་ཀྱི་དུས་སུ་དུས་སྦྱོར་གཅིག་གམ་ཐུན་ཕྱེད་ཀྱི་རླུང་རྒྱུ་ཞེས་དེ་གཉིས་
གདམ་ང་ཅན་དུ་བཤད་ལ། དུས་སྦྱོར་གཅིག་གི་རླུང་ནི་དབུགས་བརྒྱ་ཕྲག་བཅོ་བརྒྱད་ལ་བཤད་ཅིང་། ཐུན་ཕྱེད་ཀྱི་རླུང་ནི་སྔར་དང་འདྲའོ། །ཡར་ངོ་མར་ངོའི་ཐོག་མའི་རྒྱུ་ཚུལ་གྱི་རླུང་ལྟས་དེ་ཞག་དྲུག་དང་། ཕྱོགས་གཅིག་སྟེ་ཟླ་ཕྱེད་དང་། ཕྱོགས་གཉིས་ཏེ་ཟླ་ཕྱེད་གཉིས་དང་། ཕྱོགས་གསུམ་སྟེ་ཟླ་ཕྱེད་གསུམ་དུ་གོ་རིམ་ལོག་ན། སྐྱོན་ཅི་འབྱུང་བའང་སྡོམ་འབྱུང་ལས། གཅིག་དང་གཉིས་གསུམ་བཞི་དང་ལྔ། །ཉི་མ་དྲུག་ཏུ་ཟློག་པ་ལས། །གལ་ཏེ་རླུང་ནི་རྒྱུ་བ་ན། །དེ་ཚེ་རྩོད་པ་ཆེན་པོ་འབྱུང་། །ཕྱོགས་གཅིག་ཕྱིན་ཅི་ལོག་པ་ལས། །ནད་ནི་ཀུན་ཏུ་ཆེན་པོ་འབྱུང་། །ཕྱོགས་གཉིས་ཕྱིན་ཅི་ལོག་པ་ལས། །སྙིང་སྡུག་གཉེན་རྣམས་རྒུད་པར་འགྱུར། །ཕྱོགས་གསུམ་ཕྱིན་ཅི་ལོག་པ་ལས། །ཟླ་དྲུག་རྣམས་ཀྱིས་འཆི་བར་འགྱུར། ཞེས་སོ། །འོ་ན་ཡར་ངོ་མར་ངོའི་རླུང་གི་བརྟག་པ་འདི་ཟླ་བ་གང་ལ་བྱེད་པའི་ཟླ་བའི་ངེས་པ་ཡོད་དམ་མེད་ཅེ་ན། སྡོམ་འབྱུང་དང་མན་སྙེ་ལས་ཟླ་བའི་ངེས་པ་ཡོད་མེད་གསལ་བར་མ་བཤད་ཀྱང་། འཆི་བླུ་ལས། དགུན་ཟླ་འབྲིང་སོགས་འཕོ་བ་ཡི། །ཟླ་བ་ཉ་སོགས་ཐམས་ཅད་ལ། །འཆི་བའི་མཚན་ཉིད་སྤྱི་ཡི་ནི། །ནང་པར་ཐོག་མར་བརྟག་པར་བྱ། །ཞེས་ཟླ་བ་བཅུ་གཉིས་པོ་ཐམས་ཅད་ལ་འཆི་བ་སྤྱིའི་མཚན་ཉིད་ནང་པར་བརྟག་པར་གསུངས་སོ། །འོ་ན་ཟླ་བ་ཕྱེད་དང་གཉིས་ཀྱི་བར་དུ་རླུང་བལྟས་མ་ལོག་པར་བྱུང་ན། དེ་ལ་འབྲས་བུ་ཅི་ཞིག་འབྱུང་ཞེ་ན། འདི་ལ་གསལ་བར་བཤད་པ་མི་སྣང་། མ་ལོག་པ་ལ་སྐྱོན་ཡོན་གང་རུང་ཞིག་བསྐྱེད་དགོས་
ལ། ལོག་པ་ལ་སྐྱོན་བསྐྱེད་པས། མ་ལོག་ན་ཡོན་ཏན་བསྐྱེད་དགོས་ལ། དེའང་ནད་མེད་པ་དང་། གཉེན་མི་རྒུད་པ་དང་། མི་འཆི་བ་ལ་བྱ་དགོས་ཤིང་། དེ་རྣམས་ཀྱང་སྐྱོན་གྱི་ཕྱོགས་ལ་བཤད་པའི་རིགས་པས། ཡོན་ཏན་གྱི་ཕྱོགས་ལའང་ཟླ་བ་དྲུག་ཚུན་ཆད་དུ་མི་འཆི་བ་སོགས་ལ་བྱ་དགོས་སམ་སྙམ་སྟེ་བློ་གྲོས་དང་ལྡན་པ་རྣམས་ཀྱིས་དཔྱད་པར་བྱའོ། །གཞན་ཡང་འཆི་བླུ་ལས། ལམ་གསུམ་ སྣ་བུག་གཉིས་དང་ཁའི། རྟོགས་པར་རླུང་རྒྱུ་ན། །སླར་གསོ་བར་ནི་ནུས་མ་ཡིན། །ཉི་མ་ཕྱེད་ནི་འདས་ནས་འཆི། །རླུང་ནི་འཕོ་བ་མེད་པ་ རུ། །ལམ་ནི་གཉིས་ཀ་དག་ལས་ཀྱང་། །ཞག་བཅུའི་བར་དུ་རྒྱུ་གྱུར་ ནམ་སྣ་བུག་གཡས་གཡོན 
་དུ། ན། །འཕོ་བའི་ཚེ་ན་དེ་འཆིའོ། །ཉིན་ཞག་ གང་ལ་སྣ་བུག་གི་རླུང་གཉིས། མཉམ་ སྟེ་མཉམ་པོར་རྒྱུ་བ་ཐོབ་པའི་སྐད་ཅིག་དེ་ལ། འདྲ་སྐད་ཅིག་ཐོབ། །གང་གི་མིག་ནི་འགུལ་འགྱུར་བ། །དེ་ཡི་སྲོག་ནི་ཉིན་ཞག་ནི། །གཅིག་ན་འཇིག་པར་གདོན་མི་ཟ། །ཞེས་དང་། སྣ་བུག་གཉིས་སྤངས་ནས་རྣ་བ་ནས་རྒྱུ་ན། ཉིན་ཞག་དེ་ཁོ་ན་ལ་འཆི་བར་བཤད་ལ། ཡང་མན་སྙེ་ལས། དགུན་ཟླ་ར་བའི་འཕོ་བའི་དུས་བརྩམས་ནས་ཉིན་ལྔར་ཉི་མའི་ལམ་ནས་རྒྱུ་ན་ལོ་བཅོ་བརྒྱད་རྣམས་ཀྱིས་སོ། །ཐ་སྐར་ཅན་ལ་དེ་ལྟར་རྒྱུ་ན་ལོ་བཅོ་ལྔ་རྣམས་ཀྱིས་སོ། །དབྱར་ཟླ་ཐ་ཆུང་ལ་དེ་ལྟར་རྒྱུ་ན་ལོ་བཅུ་གཉིས་རྣམས་ཀྱིས་སོ། །དབྱར་ཟླ་ར་བ་ལ་དེ་ལྟར་རྒྱུ་ན་ལོ་དགུ་རྣམས་ཀྱིས་སོ། །ནག་པ་ཅན་གྱི་ལ་དེ་ལྟར་རྒྱུ་ན་ལོ་དྲུག་རྣམས་ཀྱིས་སོ། །མཆུ་ཅན་གྱི་ལ་དེ་ལྟར་རྒྱུ་ན་ལོ་གསུམ་རྣམས་ཀྱིས་སོ་ འཆི་བླུ་ལས་དགུན་ཟླ་འབྲིང་པོ་ལ་བཤད། །ཞེས་གསུངས་སོ། །དེ་རྣམས་ནི་འཆི་བླུའི་གཞུང་ལ་བརྟེན་ནས་
མན་སྙེ་ལས་བཤད་པ་ལྟར་ཡིན་ལ། རྒྱས་པར་ཤེས་པར་འདོད་ན་འཆི་བླུ་ལས་ཤེས་པར་བྱའོ། །དེ་ལྟར་འཆི་ལྟས་རྟོག་པ་ཡང་ཁམས་སྙོམས་ཤིང་བདེ་བར་གནས་པའི་ལུས་ལས་བརྟག་དགོས་པར་འཆི་བླུ་ལས། གལ་ཏེ་འགའ་ཞིག་འཆི་བ་ཡི། །མཚན་ཉིད་ཤེས་པར་འདོད་གྱུར་ན། །དེར་ནི་བདེར་གནས་ལུས་ལས་ནི། །ཤེས་བྱ་གཞན་དུ་ཡིད་གཉིས་འགྱུར། །ཁམས་མི་སྙོམས་དང་འདོད་ཆགས་དང་། །རབ་རིབ་ལ་སོགས་དབང་གྱུར་དང་། །འཇིགས་དང་མྱ་ངན་སོགས་པའི་རྒྱུས། །གང་ཕྱིར་གཞན་དུ་སོ་སོར་སྣང་། །ཞེས་གསུངས་སོ། །གསུམ་པ་ནི། འཆི་བླུ་ལས། འཁོར་བར་སྲོག་ལས་གཅེས་པ་ནི། །ཅི་ཡང་ཡོད་པར་མ་མཐོང་སྟེ། །དེ་བས་མྱུར་དུ་ཐབས་མང་པོས། །འཆི་བ་བླུ་བ་ཀུན་ཏུ་སྤྱོད། །གང་ཕྱིར་རིགས་པར་ཐབས་སྦྱར་བས། །དཀའ་བ་ཅུང་ཟད་ཡོད་མ་ཡིན། །ནོར་བུ་སྔགས་དང་སྨན་རྣམས་ཀྱི། །མཐུ་ནི་ཐམས་ཅད་འདོད་པ་ཡིན། །འཆི་བའི་མཚན་ཉིད་ལས་རིང་ནས། །ཤེས་པར་བྱས་ནས་རིགས་པས་བཅོ། །སྤྱི་བོར་ཐོག་ནི་བབས་པ་ལ། །རབ་ཏུ་མཁས་ཀྱང་ཅི་བྱར་ཡོད། །ཅེས་སྲོག་ལས་གཅེས་པ་གཞན་མེད་པས་འཆི་བླུའི་ཐབས་ཀྱིས་བཅོས་ན། ཕལ་ཆེར་འཆི་བ་བླུ་ཐུབ་པ་དང་། དེ་ཡང་སྔོན་དུ་རིང་མོ་ནས་འཆི་ལྟས་ཀྱི་མཚན་ཉིད་ཤེས་པར་བྱས་ནས་བཅོས་དགོས་པར་གསུངས་པ་ལྟར་འཆི་ལྟས་མཐོང་བ་དེས་སྔ་མོ་ནས་འཆི་བ་བླུ་བ་ལ་འབད་པར་བྱའོ། །སྡོམ་འབྱུང་ལས་ཀྱང་དེ་ལྟའི་གདམས་ངག་ལྡན་རྣམས་ཀྱིས། །འཆི་བ་བླུ་བར་འགྱུར་བ་སྟེ། །དེ་ཉིད་ཀྱིས་ནི་འཆི་ལས་རྒྱལ། །ཆོས་
ཀྱིས་འཆི་ལས་རྒྱལ་བ་སྟེ། །དེ་ཕྱིར་ཆོས་ནི་མཆོག་ཏུ་བསམ། །ཞེས་འཆི་བླུའི་སྒོས་ཀྱི་གདམས་ངག་དང་། སྤྱིར་ཆོས་ལ་བརྟེན་པས་འཆི་བ་བླུ་བར་གསུངས་སོ། །འཆི་བླུའི་སྒོས་ཀྱི་གདམས་ངག་རྒྱུད་དེ་ལས་བཤད་པ་ནི་གསུམ་སྟེ། དང་པོ་ནི་ལྷའི་རྣལ་འབྱོར་སྔོན་དུ་བཏང་ནས་ཐོ་རངས་རླུང་སྟོང་ཕྲག་རེ་མ་ཆག་པར་བགྲངས་པས་འབུམ་ཕྲག་གཅིག་གིས་བཟླས་པ་རྫོགས་ན། ཚེ་ཟད་པ་ཡང་ལོ་ལྔ་རུ་འཚོ་བར་ཐེ་ཚོམ་མེད། ཅེས་གསུངས་པ་ འཆི་བླུ་ལས། འཇུག་པའི་རླུང་འབུམ་ཕྲག་ཏུ་བགྲང་བ་ལ་བཤད་ཅིང་། ཉིས་འབུམ་ལ་སོགས་ཟློས་པ་ཉིད། །ཚེ་འཕེལ་བར་ནི་བསྒྲེ་བར་བྱ། །ཞེས་འབུམ་ཕྲག་གཉིས་བཟླས་ན་ལོ་ལྔ་ཉིས་འགྱུར་དུ་ཚེ་འཕེལ་བ་དང་འབུམ་ཕྲག་གསུམ་བཟླས་ན་སུམ་འགྱུར་དུ་འཕེལ་བ་སོགས་བཤད་དོ། །དང་། ལྷའི་རྣལ་འབྱོར་སྔོན་དུ་འགྲོ་བས་སྤྱི་བོ་ནས་རྐང་མཐིལ་གྱི་ བར་ཐམས་ཅད་རླུང་གིས་བཀང་ནས་འཛིན་པའི་བུམ་པ་ཅན་ལ་གོམས་པར་བྱས་པས། ལག་པ་ལན་གསུམ་མཉེ་ཞིང་ལན་དྲུག་སེ་གོལ་བརྡབས་པ་ལ་གཅིག་ཏུ་བྱས་པའི་རབ་བརྒྱ་རྩ་བརྒྱད། འབྲིང་བདུན་ཅུ་དོན་གཉིས། ཐ་མ་སུམ་ཅུ་རྩ་དྲུག་གི་ བར་དུ་རླུང་ནང་དུ་འཛིན་པར་ནུས་པ་བྱུང་ན་ཡང་འཆི་བ་བླུ་བར་བཤད་ཅིང་། གཞན་ཡང་ལྷའི་རྣལ་འབྱོར་སྔོན་དུ་འགྲོ་བས་སྙིང་གའི་པདྨའི་ལྟེ་བར་ཟླ་གདན་ལ་གནས་པའི་ཧཱུཾ་ཡིག་དཀར་པོ་ལ་སེམས་བརྟན་པར་བྱས་ཏེ། སྟེང་འོག་གི་རླུང་ཁ་སྦྱར་བའི་སྙིང་གའི་བུམ་པ་ཅན་བསྒོམས་ན་ཡང་འཆི་བ་བླུ་བར་གསུངས་སོ། །འཆི་བླུའི་མན་ངག་ལས། འཆི་བདག་བླུ་བར་འབད་པ་ནི། །དད་པ་ཡིས་ནི་བྱེད་པར་ནུས། །དེ་བས་དད་པ་བརྟན་པར་བྱ། །གཞན་དུ་ངལ་བ་དོན་མེད་འགྱུར། །ཞེས་དཀོན་མཆོག་དང་བླ་མ་ལ་དད་པ་བརྟན་པོ་བསྐྱེད་པ་འཆི་བླུའི་གལ་ཆེ་ཤོས་སུ་གསུངས་ལ།
བྱ་དང་ཉ་དང་རི་དྭགས་སྦྲུལ། །རྐུན་པོ་གསོད་པའི་ཕྱོགས་གཏོགས་རྣམས། །སྲོག་སྐྱབས་པ་ཡིས་འཕྲལ་དུ་ནི། །ཚེ་ཐུང་བ་ཡང་ཚེ་རིང་འགྱུར། །ཞེས་དང་། མི་དགེ་བཅུ་ནི་སྤངས་པ་དང་། །དེ་བཞིན་གསུམ་ལ་སྐྱབས་འགྲོ་དང་། །བསླབ་པ་ལྔ་དང་བརྒྱད་བསྲུངས་ན། །འཆི་བདག་ཐག་ནི་བསྲིང་བར་འགྱུར། །བཙོན་རར་བཅུག་དང་ནད་ཆེན་གདུངས། །དེ་བཞིན་འཇིགས་པས་ཉེན་པ་རྣམས། །སྐྱབས་བྱས་ན་ནི་ངེས་པ་རུ། །ཚེ་རིང་འཆི་བདག་བླུ་བྱེད་འགྱུར། །དམན་དང་མགོན་མེད་ངོ་མཚར་བཅས། །ཚུལ་ཁྲིམས་ལྡན་ལའང་གུས་པ་ནི། །འདོད་པའི་དོན་ནི་རབ་སྟེར་བས། །ཚེ་ནི་ངེས་པར་འཕེལ་བར་འགྱུར། །ཕ་དང་མ་དང་བླ་མ་རྒན། །ཤེས་པས་རྒན་སོགས་ལ་གུས་ཤིང་། །མཆོད་དང་བཀུར་སྟི་བྱིན་པས་ཀྱང་། །འཆི་བདག་དང་ནི་ཉེ་མི་འགྱུར། །རང་གི་འདོད་ལྷ་དེ་ལ་གུས། །དཀའ་ཐུབ་ཅན་ལའང་གུས་པ་ཡིས། །རྟག་ཏུ་ནང་པར་ལྷ་ཕྱག་བྱ། །བྱས་པས་ཚེ་ནི་འཕེལ་བར་འགྱུར། །མཆོད་རྟེན་གས་དང་འཇིག་པ་ལ། །སོ་ཕག་ལ་སོགས་ཀྱིས་བཅོས་ན། །ཚེ་ཐུང་ཚེ་ནི་རིང་བར་འགྱུར། །དགེ་སློང་བསོད་སྙོམས་པ་དང་མཚུངས། །ལྷ་ཁང་སྐུ་གཟུགས་མཆོད་རྟེན་སོགས། །བྱེད་དང་ཀུན་དགའ་ར་བ་འཛུགས། །མཆོད་རྟེན་ཆེ་བརྒྱད་སོགས་མཆོད་ཀྱིས། །རྟག་ཏུ་ཚེ་ནི་འཕེལ་བར་འགྱུར། །འདུན་པས་སློང་བ་ལས་རྙེད་པས། །རྫས་ཀྱིས་དགེ་འདུན་མཆོད་སྟོན་གསོལ། །ཞག་བདུན་ཚེ་ཐུང་ཚེ་རིང་འགྱུར། །ཆོས་རྒྱལ་མྱ་ངན་མེད་དང་མཚུངས། །བྱེ་མའི་མཆོད་རྟེན་བྱེད་པ་དང་། །དེ་བཞིན་ཚ་ཚ་འདེབས་པ་དང་། །མཆོད་རྟེན་ལ་སོགས་
ཕྱག་བྱས་པས། །ཚེ་ནི་ངེས་པར་འཕེལ་བར་འགྱུར། །འདུས་པ་ཆེན་པོའི་མདོ་དང་ནི། །ཨ་ཏ་ན་ཏི་ཀ་ཡའི་མདོ། །ཕྲ་མོར་བཅས་དང་སྤྲིན་ཆེན་དང་། །ཤིན་ཏུ་བཀྲ་ཤིས་ཚིགས་བཅད་རྣམས། །གུས་པས་དགེ་སློང་འདོན་འཇུག་པའམ། །རང་ཉིད་ཀྱིས་ནི་རབ་བཏོན་ན། །དེ་བཞིན་ཚེ་རིང་འཐོབ་འགྱུར་ཞིང་། །འཆི་བདག་བླུ་བར་འགྱུར་བ་ཡིན། །ཐེག་པ་ཆེན་པོ་སྟོན་བྱེད་དང་། །སྡོང་བོ་རྒྱན་སོགས་མདོ་སྡེ་རྣམས། །རྟག་ཏུ་རྩེ་གཅིག་པས་བཀླགས་ན། །འཆི་བདག་བླུ་བར་འགྱུར་བ་ཡིན། །སངས་རྒྱས་ཀྱིས་གསུངས་རྣལ་འབྱོར་གྱི། །རྒྱུད་སོགས་མ་ལུས་བཀླགས་པའམ། །སྲུང་བ་ལྔ་ཡི་ཆོ་གས་ཀྱང་། །འཆི་བདག་བླུ་བར་འགྱུར་བ་ཡིན། །གཙུག་ཏོར་བཅུག་པའི་མཆོད་རྟེན་སོགས། །སྐོར་བ་དག་ནི་བྱས་པ་དང་། །གཟུངས་ནི་བཟླས་པ་བྱས་པས་ཀྱང་། །འཆི་བདག་གི་ནི་བརྩོན་པ་འཇོམས། དཀོན་མཆོག་སྒྲོན་མ་བཟླས་པ་དང་། །གཟུངས་ཀྱི་ཚོགས་ལས་གསུངས་པ་ཡི། །གཟུངས་སྔགས་ཟློས་ལ་བརྩོན་པས་ནི། །མཁས་པ་རྣམས་ནི་འཆི་བ་དང་། །ཉེ་བའང་རིང་དུ་གནས་པར་བྱེད། །དཀྱིལ་འཁོར་འདྲི་དང་སྦྱིན་སྲེག་དང་། །ཕྱག་རྒྱ་འཆིང་བར་བྱེད་པ་དང་། །གཏོར་མ་དང་ནི་ཚོགས་འཁོར་ལོ། །རབ་སྦྱིན་འཆི་བདག་བླུ་བ་ཡིན། །ཕྱོགས་བཞིའི་འཕགས་པའི་དགེ་འདུན་ལ། །མཆོད་བསྟོད་མལ་ཆ་སྦྱིན་སོགས་དང་། །ཆོས་གོས་ཙམ་ཞིག་འཆང་བ་ལའང་། །སྦྱིན་པ་འཆི་བདག་བླུ་བྱེད་འགྱུར། །ཞེས་གསུངས་ལ། གཞན་ཡང་ཨིནྡྲ་ནཱི་ལ་ལ་སོགས་པའི་ནོར་བུ་ཆེན་པོ་བཅངས་པས་ཀྱང་། འཆི་བ་བླུ་བར་བཤད་ཅིང་། སྒྲོལ་དཀར་གྱི་འཆི་བླུའང་གསུངས་ཏེ། པདྨ་དཀར་པོའི་དབུས་གནས་པའི། །ཟླ་བའི་གཟུགས་
ཀྱི་གདན་སྟེང་དུ། །རྡོ་རྗེ་སྐྱིལ་ཀྲུང་བཅས་ནས་སུ། །མཆོག་སྦྱིན་པ་དང་ཨུཏྤལ་བསྣམས། །སྟོན་ཀའི་ཟླ་བའི་མདངས་འདྲ་བའི། །ཟླ་བ་ཡི་ནི་རྒྱབ་བརྟེན་པ། །རྒྱན་རྣམས་ཐམས་ཅད་ཡོངས་སུ་རྫོགས། །བཅུ་དྲུག་ལོ་ལོན་ལུས་དང་ལྡན། །རྫོགས་སངས་རྒྱས་ཀུན་དེ་ཡི་སྲས། །མཆོག་སྦྱིན་ཀུན་ནི་འཆང་བའི་སྐུ། །འཕགས་མ་སྒྲོལ་མའི་སྙིང་གར་སྒོམ། །དེ་ཡི་འཁོར་ལོ་འོད་ཟེར་དཀར། །རྩིབས་བརྒྱད་ལ་ནི་ཡི་གེ་ནི། །བརྒྱད་ཀྱིས་ཡོངས་སུ་བསྐོར་བ་ལས། །ལྟེ་བར་ༀ་དང་ཧ་ཡིག་གི །དབུས་ནི་བསྒྲུབ་བྱའི་མིང་དང་ལྡན། །ཟླ་དྲུག་བརྟན་ཞིང་ངེས་པས་ནི། །རྩེ་གཅིག་པ་ཡི་སེམས་ཀྱིས་བསྒོམ། །ཡི་གེ་བཅུ་ཡི་སྔགས་འདི་ནི། །སྐྱོ་བར་མ་གྱུར་སེམས་ཀྱིས་བཟླས། །དང་པོར་ༀ་ནི་བཞག་ནས་སུ། །དེ་འོག་ཏཱ་རེ་རབ་ཏུ་སྦྱར། །དེ་འོག་ཏུཏྟཱ་རེ་ཏུ་རེ། །སྭཱ་ཧཱ་མཐའ་ཅན་ལས་ཀུན་བྱེད། །ཅེས་སོ། །འདི་ལའང་ཞོ་དང་མངར་གསུམ་གྱིས་བསྐུས་པའི་སྦྱིན་སྲེག་མང་དུ་བྱས་ན་སྔོན་གྱི་ལས་ལས་བྱུང་བའི་འཆི་བའང་ངེས་པར་ཟློག་པར་བྱེད་དོ་ཞེས་གསུངས་སོ། །དེ་བཞིན་དུ་གསང་འདུས་ནས་འབྱུང་བའི་སྤྱན་མའི་སྔགས་ཀྱི་བཟླས་པ་དང་། དེ་ལ་བརྟེན་པའི་དུར་བ་ལ་སོགས་པའི་སྦྱིན་སྲེག་བྱེད་པ་དང་། ལྕེ་ཆུང་བའི་བདུད་རྩི་འཐུང་བའང་འཆི་བླུ་བསྔགས་པ་ཅན་དུ་བཤད་ལ། སྟོང་ཉིད་རྒྱུན་ལྡན་དུ་བསྒོམས་པའང་འཆི་བླུ་རུ་གསུངས་པ་སོགས་མང་དུ་གསུངས་སོ། །ལྔ་པ་ནི། འབྲོག་འགྱུར་ལས། རིམས་ལ་སོགས་པས་མ་ཕྱེ་བའི། །འཕོ་བའི་རྣལ་འབྱོར་དམ་པ་ཉིད། །ཅེས་འབྱུང་ལ། འགོས་འགྱུར་ལས། རྣལ་འབྱོར་པས་རིམས་ལ་སོགས་པས་མ་ཕོག་
པར་སྒོ་ཁྱད་པར་ཅན་ལས་ཤིན་ཏུ་མཉམ་པར་བཞག་པས་འཕོ་བའི་སྦྱོར་བ་བྱ་སྟེ། ཞེས་འགྱུར་མི་འདྲ་བ་གཉིས་འབྱུང་ངོ་། །མན་ངག་སྙེ་མར་འཆི་བའི་དུས་ལ་མ་བབ་པ་ཁོ་ནར་རྒས་པ་དང་ནད་རྣམས་ཀྱིས་གདུངས་པས་ནི། རྣམ་ཤེས་དབྱེ་མི་བྱ་སྟེ་འཕོ་བར་མི་བྱའོ། ཞེས་རིམས་ལ་སོགས་པས་དབྱེ་མི་བྱ་ཞེས་པའི་དོན་དུ་བཤད་དོ། །ཁ་སྦྱོར་ལས་གསུངས་པ་དེ་ལྟར་ཡིན་ཡང་གདན་བཞི་ལས། འཆི་འཕོ་མཚན་མ་མཐོང་བ་ཡིས། །འཆི་བར་འགྱུར་བའི་དུས་བྱུང་ན། །རིམས་ལ་སོགས་པས་མ་ཕོག་པར། །འཕོ་བ་སྦྱོར་བའི་མཆོག་ཡིན་ནོ། །ཞེས་རིམས་ལ་སོགས་པས་མ་ཕོག་པའི་གོང་དུ་སྒོ་བཟང་པོ་ནས་འཕོ་བ་ནི་འཕོ་བའི་རྣལ་འབྱོར་གྱི་མཆོག་ཏུ་གསུངས་ལ། །ཞལ་ལུང་ལས་ཀྱང་། གང་ཞིག་དུས་ནི་ཕྱི་ཞིག་ལ། །འཆི་བའི་མཚན་མ་བདག་གིས་མཐོང་། །འཆི་བར་འགྱུར་བའི་དུས་བྱུང་ན། །ནད་ཀྱིས་ཡང་དག་མ་རྙོངས་པར། །འཕོ་བའི་སྦྱོར་བ་ཡང་དག་བྱ། །ཞེས་གདན་བཞི་དང་མཐུན་པར་གསུངས་པས། རྒས་པ་དང་ནད་ཀྱིས་གདུངས་ནས་འཕོ་བས་རྣམ་ཤེས་ལུས་ལས་འབྱེད་པ་དང་། ནད་ཀྱིས་མ་ཕོག་པའི་གོང་དུ་རྣམ་ཤེས་འཕོ་བའི་རྣལ་འབྱོར་བྱེད་པ་གཉིས་ཀ་ཤེས་པར་བྱའོ། །དེས་ན་བོད་ཀྱི་གདམས་ངག་ཁ་ཅིག་ལས། རྒས་པས་ཤིན་ཏུ་སྡུག་བསྔལ་བར་མཐོང་ནས། འཕོ་བ་བྱ་ཞེས་ཟེར་བ་ནི། དེ་ལྟར་བྱས་ན་དམྱལ་བར་ལྟུང་བར་གསུངས་པས། ཕྱིན་ཅི་ལོག་ཏུ་སྨྲ་བ་ཆེན་པོའོ། །གསུམ་པ་ལ་གཉིས། སྔོན་དུ་ཇི་ལྟ་བུ་ཞིག་བྱས་ནས་འཕོ་བ་བྱ་བ་དང་། དབང་པོའི་སྒོར་རླུང་རེངས་པར་བྱེད་པའི་ཐབས་དངོས་སོ། །དང་པོ་ནི། འཕོ་བ་བྱེད་པར་འདོད་པས། ལས་ལ་སྦྱོར་བའི་དང་པོར་ཏེ་སྔོན་དུ་བུམ་པ་ཅན་གྱི་རླུང་
སྦྱོར་བརྩམས་ནས་གོམས་པར་བྱས་ཏེ། དེས་ནི་མིག་ལ་སོགས་པའི་དབང་པོའི་སྒོ་རྣམས་ཐམས་ཅད་དུ་རེངས་པར་བྱེད་པ་སྟེ་རླུང་ཕྱིར་འགྲོ་བ་འཇོམས་པར་འགྱུར་རོ། །མིག་ལ་སོགས་པའི་སྒོར་ཡི་གེ་བཀོད་ནས་རླུང་ཕྱིར་འགྲོ་བ་འགོག་པ་ཡང་བུམ་པ་ཅན་གྱིས་རླུང་རེངས་པར་བྱེད་པའི་ལྷན་ཅིག་བྱེད་རྐྱེན་ཡིན་པས་དེ་དང་བཅས་པའི་བུམ་པ་ཅན་བསྒོམ་པ་ཡིན་གྱི། བུམ་པ་ཅན་རྐྱང་བ་སྒོམ་པ་མིན་ནོ། །རྡོ་རྗེ་མཁའ་འགྲོ་ལས་ཀྱང་། གནས་ཀྱི་མཐའ་ནི་དག་པར་བྱ། །དག་པས་སྲིད་པ་འཕོ་བྱ་ཡི། །གཞན་དུ་ན་ནི་དོན་མེད་འགྱུར། །ཞེས་གསུངས་ལ། དེའི་དོན་བྷ་བ་བྷ་དྲས་བདེ་སྡུག་གི་སྣོད་ཡིན་པས་གནས་ནི་ལུས་ཏེ། གཏུམ་མོའི་རྣལ་འབྱོར་བསྒོམས་པས་ལུས་དག་པ་སྟེ་སྦྱངས་པའོ། །གནས་ཀྱི་མཐའ་ནི་ནང་སྟེ། ནང་གི་སྒོ་རྣམས་དག་པ་སྟེ་སྦྱངས་པའོ། །གཞན་དུ་ན་ནི་ཞེས་བྱ་བ་ནི། སྦྱང་བ་དེ་གཉིས་དང་བྲལ་ན་འཕོ་བ་བྱས་པའི་འབྲས་བུ་ཐོབ་པར་མི་འགྱུར་རོ། །ཞེས་གསུངས་ཤིང་། ཡང་རྡོ་རྗེ་མཁའ་འགྲོ་ལས། བུམ་པ་ཅན་གྱིས་སྒོ་བཅིངས་ན། །སྒོ་ཡི་བུ་ག་དག་པར་འགྱུར། །ཞེས་གསུངས་པ་བཞིན་གདན་བཞི་ལས་ཀྱང་གསུངས་སོ། །བུམ་པ་ཅན་སྦྱང་བར་གསུངས་པའི་དོན་ལ། བོད་མང་པོས་སྔར་བཤད་པའི་བུམ་པ་ཅན་རབ་འབྲིང་ཐ་མ་གསུམ་གྱི། ཐ་མ་ཡོད་ན་དེས་ཆོག་ཟེར་བ་ནི་རྒྱུད་ཀྱི་དོན་མ་རྟོགས་བཞིན་དུ་སྨྲ་བའོ། །རྒྱུད་སྡེ་ནས་བཤད་པའི་འཕོ་བས་ནི། བྷ་བ་བྷ་དྲས་འགྲོ་བ་ཁྱད་པར་ཅན་དུ་སྐྱེ་བར་བཤད་པ་དང་། མན་སྙེར་བྱང་ཆུབ་སེམས་དཔའ་ལ་སོགས་པ་གནས་པའི་གནས་སུ་གནས་པའི་འགྲོ་བ་ཁྱད་པར་
ཅན་དུ་སྐྱེ་བར་བཤད་ལ། དེ་ཡང་སྤྱི་གཙུག་གསེར་གྱི་སྒོ་ནས་འཕོ་ཐུབ་པའི་འབྲས་བུར་གསུངས་པས། ལྷ་མིའི་རྟེན་ཙམ་དུ་འཕོ་ཐུབ་པ་ལ་མི་བྱེད་དེ། སྒོ་གཞན་རྣམས་ནས་འཕོ་བ་བཀག་ནས་གསེར་གྱི་སྒོ་ནས་འཕོ་དགོས་པར་གསུངས་པའི་ཕྱིར་རོ། །རྟེན་ཁྱད་པར་ཅན་དེའང་ཞལ་ལུང་ལས། གལ་ཏེ་སྐུ་གསུམ་མ་གྲུབ་ན། །རིག་པ་འཛིན་པའི་གཙོར་འགྱུར་ཏེ། །རིམ་གྱིས་ཕྱག་རྒྱ་ཆེན་པོ་འགྲུབ། །ཅེས་འཕོ་བས་འཆི་བའི་འོད་གསལ་གྱི་དུས་སུ་ལམ་གྱི་ཆོས་སྐུ་དང་། བར་སྲིད་འགྲུབ་པའི་དུས་སུ་ལམ་དུས་ཀྱི་ལོངས་སྐུ་དང་། སྐྱེ་བ་ལེན་པའི་དུས་སུ་ལམ་དུས་ཀྱི་སྤྲུལ་སྐུ་འགྲུབ་པར་བཤད་པ་ལྟར་མ་གྲུབ་ན། རིག་པ་འཛིན་པའི་གཙོ་བོར་འགྱུར་བ་འཕོ་བའི་རྣལ་འབྱོར་གྱི་འབྲས་བུར་གསུངས་པ་ལྟ་བུའི་སྔགས་སྤྱོད་པའི་རིག་འཛིན་གྱི་རྟེན་ཁྱད་པར་ཅན་འགྲུབ་པ་ཡིན་ནོ། །ཡང་ཞལ་ལུང་ལས། །དེ་བས་བཀའ་ལུང་རབ་ཐོབ་ནས། །དམ་སྡོམ་རྣམ་པར་བསྲུང་བྱ་སྟེ། །ཞེས་གསུངས་པ་ལྟར་དབང་བསྐུར་བ་རྣམ་པར་དག་པ་ཐོབ་ནས་དམ་ཚིག་དང་སྡོམ་པ་ཚུལ་བཞིན་དུ་བསྲུང་བ་གཅིག་གིས་འགྲུབ་པར་གསུངས་ཀྱི། དེ་དག་མེད་པ་དང་སྦྱང་བ་གཉིས་སྔོན་དུ་མ་བཏང་བར་དང་པོ་ཉིད་ནས་རྣམ་ཤེས་འདོན་པའི་དམིགས་པ་ལ་གོམས་སུ་འཇུག་པ་གདམས་ངག་མང་པོ་ལ་འདུག་པ་ལྟར་གྱི་འཕོ་བས་ནི་བདེ་འགྲོའི་རྟེན་ཙམ་དུ་འཕོ་ཐུབ་ཏུ་ཆུག་ཀྱང་གཞུང་ཁུངས་ཐུབ་ནས་གསུངས་པའི་རྟེན་ཁྱད་པར་ཅན་འགྲུབ་པ་ཤིན་ཏུ་དཀའ་སྟེ། གཞན་དུ་ན་ནི་དོན་མེད་འགྱུར། །ཞེས་གསུངས་པའི་ཕྱིར་རོ། །དེས་ན་འཕོ་བའི་གདམས་ངག་བྱས་པས་སྤྱིར་འཕོ་ཐུབ་པ་ཙམ་དང་། སྒོ་འབྲིང་པོ་ལྔ་ནས་འཕོ་ཐུབ་པས་མི་ཆོག་
གི །གསེར་གྱི་སྒོ་ནས་འཕོ་དགོས་པར་རྒྱུད་ཀྱི་དོན་དུ་ཤེས་པར་གྱིས་ཤིག །གཉིས་པ་ལ་གཉིས། མིག་ལ་སོགས་པའི་སྒོར་ཡི་གེ་དགོད་པ་དང་། རླུང་བུམ་པ་ཅན་སྒོམ་པའོ། །དང་པོ་ནི། འབྲོག་འགྱུར་ལས། མཆོད་རྟེན་རྣམས་ཀྱི་ལྕགས་སྒྲོག་ལྔ། །ཞེས་འབྱུང་ཡང་། མན་ངག་སྙེ་མ་འགྱུར་གསར་ལས། འབུར་བོ་ལྔ་ཅན་མཆོད་རྟེན་སྒོ། །ཞེས་བསྒྱུར་བ་ལེགས་པས། འབུར་བོ་ལྔ་ཞེས་པ་མངལ་གྱི་སྐབས་ལ་བཤད་པ་དང་འདི་མི་འདྲ་བས། ལག་པ་གཉིས་དང་། རྐང་པ་གཉིས་དང་། མགོ་དང་ལྔའོ། །ལྔ་པོ་དེ་དག་དང་ལྡན་པ་ཅན་ནི་ལུས་ཡིན་ལ། མཆོད་རྟེན་ནི་ལུས་དེའི་མགོ་བོའོ། །འབྲོག་འགྱུར་ལས། སྒོ་ཡི་བུག་པའི་སྒོམ་པ་ནི། །ཞེས་འབྱུང་བ་ལས། མན་སྙེ་འགྱུར་གསར་ལས། དེ་ཡི་བུག་པར་སྒོམ་པ་སྟེ་ཞེས་བསྒྱུར་བ་ལེགས་པས། མགོ་བོ་ལ་སྟེང་གི་སྒོ་དང་སྨད་ཀྱི་སྒོ་གཉིས་ལས། མགོ་བོའི་སྟེང་གི་སྒོ་ནི་སྤྱི་གཙུག་གསེར་གྱི་སྒོ་དང་སྨིན་མའི་དབུས་སོ། །གསེར་གྱི་སྒོ་དེ་ཡི་བུག་པར་ཀྵུཾ་དང་ཀྵུཾ་གྱི་འོག་ཧཱུཾ་བཀོད་དེ་བརྩེགས་པ་བསྒོམ་པར་བྱའོ། །སྨིན་དབུས་གནད་འབྱེད་བའི་སྒོར་ནི། ཧཱུཾ་དང་དེའི་ནང་བདེ་ཆེན་གྱི་འཁོར་ལོའི་ལྟེ་བར་ཧཾ་བཀོད་དོ། །མཆོད་རྟེན་དེའི་སྟེང་གི་སྒོ་དེ་བས་དམའ་བའི་སྒོ་ལྕེའི་རྩ་བ་དང་། མགྲིན་པའི་བུ་གའི་སྒོ་ཉིད་དུ་ནི་རིམ་པ་བཞིན། ས་བོན་སུཾ་དང་སྨྼྻུཾ་ཆུ་ལྟ་བུར་དཀར་བ་ཉིད་དགོད་དོ། །བཏུང་བ་དང་བཏུང་མིན་གྱི་སྒོ་དང་། དེ་ཡི་སྟེ་ལྟེ་བའི་སྒོ་གསུམ་དུ་མེ་ཡི་ནི་ས་བོན་ཀྵྨཾḈྻུ་མེ་འབར་བ་ལྟ་བུར་དམར་བ་དགོད་དོ། །འབྲོག་འགྱུར་ལས། དེ་ཡི་དང་པོ་དབུགས་ཀྱི་ཡང་། ཞེས་པ་ལ། འགོས་
འགྱུར་ལས། དེ་ལ་ཤིན་ཏུ་མཉམ་གཞག་པས། །དབུགས་ནི་སྔོན་བཞིན་བསྒོམ་པར་བྱ། །ཞེས་འབྱུང་བ་རྡོ་རྗེ་མཁའ་འགྲོ་དང་མཐུན་པས་ཤིན་ཏུ་ལེགས་ལ། དོན་ནི་ས་བོན་གྱི་ཡི་གེ་བཀོད་པ་དེ་རྣམས་ལ། ཤིན་ཏུ་མཉམ་པར་བཞག་པས་ཏེ་ཡིད་རྩེ་གཅིག་ཏུ་བྱས་ནས། དབུགས་ནི་སྔོན་དུ་བཤད་པ་བཞིན་དུ་བུམ་པ་ཅན་དུ་བྱས་ཏེ་བསྒོམ་པར་བྱ་སྟེ། ཡི་གེ་བསྒོམ་པ་འདི་རྣམས་བུམ་པ་ཅན་གྱིས་རླུང་རེངས་པར་བྱེད་པའི་ལྷན་ཅིག་བྱེད་རྐྱེན་ཡིན་པའི་ཕྱིར་རོ། །མན་སྙེ་ལས། རླུང་འཆིང་བ་ནི། འདི་རྣམས་ཀྱི་དགོས་པའོ། །ཞེས་མངོན་པར་དགོངས་པའོ་ཞེས་མིག་ལ་སོགས་པའི་སྒོར་ཡི་གེ་བཀོད་པ་ནི། ནང་དུ་རླུང་འཆིང་བའི་ལྷན་ཅིག་བྱེད་རྐྱེན་དུ་གསུངས་པས། བུམ་པ་ཅན་བྱས་ནས་ཡི་གེས་མི་འགོག་པའམ། ཡི་གེས་སྒོ་རྣམས་བཀག་ནས་བུམ་པ་ཅན་མི་བྱེད་པ་ལྟ་བུ་མ་ཡིན་པར་གཉིས་ཀ་བསྒོམ་པར་བྱའོ། །ཞེས་པ་སྟེ་གཉིས་ཀ་བྱས་ན་རླུང་འགོག་མྱུར་བའི་དགོས་པ་ཡོད་པར་གསལ་ལོ། །རླུང་གི་ཁ་དོག་ཅན་སྔོན་པོ་ལུས་ཏེ་ཧཱུཾ་ཡིག་ནི་རླུང་གི་དཀྱིལ་འཁོར་རྣམ་པར་བཞག་པའི་སེམས་ཀྱིས་བསྒོམ་སྟེ། མིག་གི་སྒོ་གཉིས་སུ་དགོད་དོ། །ཧཱུཾ་ཡིག་འདི་ནི་འཕོ་བ་ལ་སོགས་པ་ལ་ཁ་དོག་དཀར་པོ་ཁོ་ནར་བྱའོ། །འདི་དང་ས་བོན་གཞན་རྣམས་ཀྱིའང་སྔོན་པོ་ཉིད་ནི་ལས་གཞན་སྒྲུབ་པ་ལ་ཁ་དོག་གཞན་ཉིད་མཚོན་པའོ། །རླུང་གི་ས་བོན་ནི་ཡཾ་ཡིན་ལ། ཡཾ་ས་བོན་དུ་ཡོད་པ་ཅན་གྱི་རླུང་ནི་འཁོར་འདས་ཀུན་གྱི་རྩ་བ་ཡིན་ནོ། །ཞེས་པ་སྟེ་ཞར་བྱུང་ངོ་། །མན་སྙེའི་འགྱུར་ལས། རླུང་གི་ས་བོན་རྩ་བ་ཅན། །ཞེས་
འབྱུང་ངོ་། །རླུང་ནི་ས་ཡི་རྩ་བ་ཅན། །ཞེས་པ་ལ། འགྲེལ་པས་བཤད་པ་མ་མཛད་ཅིང་། རྐང་པ་སྔ་མ་ལས་དོན་ཟུར་པ་མེད་ལ། རྡོ་རྗེ་མཁའ་འགྲོ་ན་ཡང་མེད་དོ། །ཐིག་ལེ་ནི་ཀླད་ཀོར་དང་ནཱ་ད་བསྒྱུར་ན་སྒྲ་ཙམ་ཡིན་ཡང་། འདིར་ནཱ་ད་ཨུ་ཡིག་ཏུ་མན་སྙེ་ལས་བཤད་པས། འདི་གཉིས་ལྡན་པའི་ཡུཾ་ཞེས་པའི་ས་བོན་རྣ་བའི་སྒོ་གཉིས་དང་སྣའི་སྒོ་གཉིས་ལ་བཀོད་དེ་བསྒོམ་མོ། །དེ་ལྟར་སྒོ་སོ་སོར་ས་བོན་གྱི་ཡི་གེ་བཀོད་པ་རྣམས་སེམས་ཀྱིས་ཡོངས་སུ་བསྒོམ་པ་ཉིད་ཀྱིས་རླུང་ཕྱིར་འགྲོ་བ་དགུག་པ་སྟེ་དགག་པར་བྱ་ལ་ནང་དུ་གཞུག་པར་བྱའོ། །འབྲོག་འགྱུར་ལས། རྡོ་རྗེ་ཅན་གྱི་ཡོན་ཏན་གྱིས། །འཇིགས་པའི་ལྕགས་ཀྱུ་ལ་སོགས་སྦྱར། །ཞེས་པ་ལ། མན་སྙེ་འགྱུར་གསར་ལས། །རྡོ་རྗེ་མ་ཞེས་དང་། འཇིགས་མ་ཞེས་བསྒྱུར་བ་ལེགས་ལ། དོན་ནི་ཡེ་ཤེས་མཁའ་འགྲོ་མ་ལྷ་བཅུ་གསུམ་གྱི་འཁོར་གྱི་ལྷ་མོ་རྡོ་རྗེ་མཁའ་འགྲོ་མ་དང་སེང་གེ་མའི་ས་བོན་སུཾ་དང་སྨཾḈྻུ་སྟེ། སྔར་ལྕེའི་རྩ་བ་དང་མགྲིན་པར་བཀོད་པའོ། །འཇིགས་མའི་ས་བོན་ནི་ཀྵུཾ་སྟེ་སྔར་སྤྱི་གཙུག་ཏུ་བསྒོམ་པར་བསྟན་པའོ། །སོགས་ཀྱིས་བསྡུས་པ་ལྷ་མོ་ལྷག་མ་རྣམས་ཀྱི་ས་བོན་གྱི་ཡི་གེ་ལྷག་མ་རྣམས་བཟུང་ངོ་། །སྔར་བཤད་པ་ལྟར་སྒོ་སོ་སོར་ས་བོན་གྱི་ཡི་གེ་རྣམས་སྒོ་སོ་སོའི་ནང་དུ་དགོད་དོ། །གཉིས་པ་ནི་བུམ་པ་ཅན་གྱིས་རླུང་རེངས་པར་བྱེད་ཚུལ་ནི། གནས་བཅུ་ནི་སྔར་བཤད་པའི་སྒོ་དགུའི་སྟེང་དུ་སྙིང་གའི་སྒོ་བསྣན་པས་བཅུའོ། །མགོ་བོ་དང་། སྤྱི་གཙུག་དང་། སྨིན་དབུས་དང་། མིག་དང་། རྣ་བ་གཡས་པ་དང་།
རྣ་བ་གཡོན་པ་དང་། སྣ་དང་། ཁ་དང་། མགྲིན་པ་དང་། རྒྱབ་སྟོད་ལྟག་པ་དང་། ཕྲག་པ་དང་། མཆན་ཁུང་དང་། ནུ་མ་དང་། སྙིང་ག་དང་། ལྟེ་བ་དང་། ཕོ་མཚན་དང་། རྟགས་དང་། བཤང་སྒོ་དང་། བརླ་དང་། པུས་མོ་དང་། བྱིན་པ་དང་། རྐང་པའི་རྒྱབ་དང་། མཐེ་བོང་དང་། སོར་མོ་སྟེ་ལུས་ཀྱི་ཉི་ཤུ་རྩ་བཞིའི་གནས་ལས་འཇིགས་མས་ཏེ། གཏུམ་མོ་ཨཾ་ཡིག་གི་འོད་ཟེར་ལྕགས་ཀྱུ་ལྟ་བུས་དགུག་ཅིང་སྣ་བུག་ནས་ནང་དུ་འདྲེན་པའི་དགང་བ་ལ་སོགས་པས་ཀྱང་བཀུག་ནས། གསང་གནས་ཀྱི་འཁོར་ལོའི་དབུས་སུ་རླུང་གོང་བུ་གཅིག་ཏུ་བྱས་ཏེ། དེའི་དྷཱུ་ཏཱིར་དམིགས་པ་གཏད་ནས་གསང་གནས་ཀྱི་བུམ་པ་ཅན་བསྒོམ་པར་བྱའོ། །དེ་ལྟར་གོམས་པར་བྱས་པ་དེས་སྦར་བའི་གཏུམ་མོ་འབར་བའི་ལྕགས་ཀྱུ་འོག་ནས་འཆད་པའི་སྙིང་གའི་རླུང་གི་དཀྱིལ་འཁོར་ལ་སོགས་པ་རྣམས་ལ་སྦྱར་བར་བྱའོ། །རླུང་བུམ་པ་ཅན་སྒོམ་པའི་བཤད་པ་གཞན་རྣམས་ལ་སྟེང་གི་སྣ་སྒོ་ནས་སྟེང་རླུང་ཕྱིར་འཐེན་པ་དང་། ལུས་ཀྱི་སྨད་ནས་འོག་གི་རླུང་གྱེན་དུ་འཐེན་པ་ཙམ་གྱི་ཁ་སྦྱར་ལས་མ་བཤད་ལ། འདིར་ནི་ཕྱིར་རྒྱུ་བའི་རླུང་འཐེན་པར་མ་ཟད། ཕྱིར་མི་རྒྱུ་བའི་ཁྱབ་བྱེད་ཀྱི་རླུང་སྤྱི་བོ་དང་། སྤྱི་གཙུག་ལ་སོགས་པའི་ལུས་ཀྱི་ནང་གི་གནས་རྣམས་ལ་བཀུག་སྟེ། བུམ་པ་ཅན་བསྒོམ་པར་བཤད་པས་གཞན་རྣམས་ལས་ཁྱད་པར་དུ་འགྱུར་རོ། །ནད་བསྐྱེད་པ་རྣམས་ཕལ་ཆེར་ཁྱབ་བྱེད་ཀྱིས་བསྐྱེད་པར་བཤད་པས། ཁྱབ་བྱེད་ཀྱི་རླུང་བསྡུས་ཏེ་དུལ་བར་བྱེད་པ་ནི། ནད་འཕྲོག་པ་ལ་བསྔགས་སོ། །རྡོ་རྗེ་མཁའ་འགྲོའི་འགྲེལ་པར་འཕོ་བ་ལ་སྔོན་དུ་
གཏུམ་མོ་བསྒོམས་ནས་ལུས་སྦྱང་དགོས་པར་བཤད་པ་ཡང་གསང་གནས་ཀྱི་བུམ་པ་ཅན་བསྒོམ་པ་དང་ལྷན་ཅིག་ཏུ་རྩ་གསུམ་འཁོར་ལོ་བཞི་དང་བཅས་པ་གསལ་བཏབ་ནས། རྩ་འདབ་ལ་ཡི་གེ་དགོད་པ་མ་བྱུང་ཡང་། དབུས་ཀྱི་ཡི་གེ་བཞི་བཀོད་དེ་འབར་འཛག་གི་དམིགས་པ་ལ་སེམས་གཏོད་པར་བྱས་ན་ལེགས་པར་སེམས་སོ། །དེ་ལྟར་འཕོ་བ་ལ་དབང་པོའི་སྒོར་འགྲོ་བའི་རླུང་ནང་དུ་ལྡོག་པ་བྱེད་པ་དང་། གསང་གནས་ཀྱི་བུམ་པ་ཅན་གྱིས་རླུང་འཆིང་བ་ནི་སྲོག་དབུ་མར་འཇུག་པའི་ཆེད་ཡིན་ལ། སྲོག་དབུ་མར་འཇུག་པ་སྔོན་དུ་འགྲོ་དགོས་པ་ནི། སྲོག་དབུ་མར་ཞུགས་པ་ན་འཆི་བའི་རིམ་པ་དང་རྗེས་སུ་མཐུན་པའི་རླུང་ཐིམ་པར་འགྱུར་བ་་ཡིན་ལ། དེ་བྱུང་ན་འཕོ་བས་རྣམ་ཤེས་ལུས་ལས་འདོན་པའི་རིམ་པ་རྣམས་འགྲུབ་པར་སླ་བའི་ཆེད་ཡིན་ཏེ། གྲོང་འཇུག་ལ་སྦྱང་བ་འདི་རྣམས་སྔོན་དུ་གཏོང་བའི་རྒྱུ་མཚན་ཡང་དེས་ཤེས་པར་བྱའོ། །བྷ་བ་བྷ་དྲས་གཏུམ་མོ་བསྒོམས་ནས་ལུས་སྦྱོང་བ་སྔོན་དུ་གཏོང་དགོས་པར་བཤད་པ་ཡང་། གཏུམ་མོ་འབྱོངས་ན་བྱང་སེམས་དཀར་དམར་གཉིས་ལུས་ཀྱི་གནས་རྣམས་ལས་བསྐྱེད་པ་བདེ་བླག་ཏུ་ནུས་ལ། དེ་ལྟར་ནུས་ན་སེམས་རྟེན་དུ་གྱུར་པའི་ཐིག་ལེ་དཀར་དམར་ཡང་བསྐྱོད་པར་ནུས་པ་ལ་དགོངས་པར་མངོན་ཏེ། གནད་འདི་རྣམས་འཕོ་བ་ལ་དགོས་པར་ཤེས་པ་ཤིན་ཏུ་གལ་ཆེ་བར་སྣང་ངོ་། །དེས་ན་འཕོ་བའི་སྔོན་དུ་ལུས་དང་། ལུས་ཀྱི་མཐའ་སྦྱོང་ལུགས་རྣམས་ནི་རྫོགས་རིམ་གྱི་ཡང་གནད་དམ་པར་སྣང་བས། འདི་རྣམ་
ཤེས་ལུས་ལས་འདོན་པའི་འཕོ་བ་ཙམ་གྱི་དབང་དུ་བྱས་པ་མིན་པར་ཤེས་པར་བྱའོ། །བཞི་པ་ནི། འབྲོག་འགྱུར་ལས། གོ་འཕང་གནས་ཀྱི་གོ་འཕང་སྟེ། །ཞེས་པ་ལ། མན་སྙེ་འགྱུར་གསར་ལས། གོ་འཕང་གནས་ཀྱི་གཞི་ལ་ཅི། །ཞེས་འབྱུང་བ་ལེགས་ལ། གོ་འཕང་ནི་འཕོ་བའི་འབྲས་བུ་རྟེན་ཁྱད་པར་ཅན་ནོ། །དེའི་གནས་ནི་འཕོ་བའི་རྣལ་འབྱོར་རོ། །དེ་ལ་གོམས་པས་གནས་ནས་གཞི་ལས་ཏེ། རྣམ་ཤེས་འདོན་པའི་རྟེན་དམིགས་པ་ལ། གོང་དུ་བསྐྱོད་པའི་ས་བོན་ཅི་ལ་སྦྱར་ཞེས་དྲིས་ལ། དེའི་ཤུགས་ཀྱིས་འོག་གི་གནས་སུ་ས་བོན་ལ་སྦྱར་བའང་གསུངས་སོ། །དེའི་ལན་དུ། ཡི་གེ་ཕྱེད་དང་གཉིས་བུག་པའི་སྒོ་དགུའི་སྟེང་དུ་སྟེ། གསེར་གྱི་སྒོ་ལ་དག་པའམ་སྦྱང་བར་བྱའོ་ཞེས་པས་ལན་བསྟོན་ནོ། །མཛོད་སྤུ་ནི་སྨིན་དབུས་སོ། །དེར་སྐྲ་དཀར་ཉམས་པར་བྱེད་པ་ཉེ་བར་མཚོན་པའི་ས་བོན་ཧཾ་དང་ཧཱུཾ་དགོད་ལ། ས་བོན་དེ་གཉིས་ཀྱིས་སྐྲ་དཀར་ཉམས་པར་བྱའོ། །དྲག་པོ་ནི་འཆི་བའི་རྒྱུའོ་ཞེས་པས། འཚོ་བ་འཛིན་པ་རྣམས་ཀྱི་སྒྲ་སྐད་དེ། དེའི་སྟེང་དུ་གསང་ཆེན་པོར། །ནང་གི་བརྗོད་པས་བསྐུལ་བར་བྱ། ཞེས་སྦྲེལ་ལོ། །དེ་ཡི་གེ་ཅི་ཡི་གདངས་ཡིན་ཞེ་ན། ཨ་ཀ་ཙ་ཊ་ཏ་པ་ཡ་ཤ་སྟེ་སྡེ་པ་བརྒྱད་རྣམས་ཀྱི་མཐའ་ནི་ཧ་ཡིག་སྟེ། དེ་ས་བོན་ཨ་ཡིག་གིས་ཁྱད་པར་དུ་བྱས་ན་ནི། དྲག་པོ་ཡི་གེ་ཕྱེད་ཀྱིས་སྦྱར་བའོ། །ཡི་གེ་ཕྱེད་དང་གཉིས་ནི་སྦྱར། །ཞེས་པ་ལ་མན་སྙེ་འགྱུར་གསར་ལས། ས་བོན་ཡི་གེ་ཕྱེད་ཀྱིས་སྦྱར། །ཞེས་འབྱུང་ངོ་། །ཡི་གེ་ཕྱེད་པ་དེ་གང་ཞེ་ན། སྡེ་པ་བརྒྱད་པོ་རྣམས་ཀྱི་སྔ་མ་
དབྱངས་ཀྱི་སྡེ་པ་གང་གི་དང་པོ་ཡིན་པ་དེ་ནི། སྡེ་པ་སྔ་མ་དང་པོ་ཅན་ཏེ་ཀ་སྡེའོ། །དེ་ཡི་སྔ་མ་ཀ་ཡི་ས་བོན་ནོ། །འབྲོག་འགྱུར་ལས། འཇིགས་དང་འཇིགས་པའི་སྡེ་ཚན་གྱི། །དང་པོ་ལ་སོགས་དང་པོ་ནི། །ཞེས་པ་འགྱུར་མི་ལེགས་པས། མན་སྙེའི་འགྱུར་ལས་སྡེ་པ་སྔ་མ་དང་པོ་ཅན་ཞེས་པ་འགྱུར་ལེགས་ཏེ། མདོར་བསྡུ་ན། ཧ་ཡི་གེ་གང་བོ་དང་། ཀ་དབྱངས་མེད་ཡི་གེ་ཕྱེད་པར་བྱས་པའི་ཧིཀ་གོ །མན་སྙེ་ལས། སྒྲ་ཡི་སྒྲས་ཞེས་འབྱུང་བའི་སྒྲ་ནི། འོག་གི་གསང་གནས་ཀྱི་རླུང་ངོ་། །སྒྲས་ཞེས་པ་ནི་རླུང་དེས་སྦར་བའི་གཏུམ་མོའི་སྒྲ་ཡིས་སོ། །རླུང་གི་ས་བོན་ནི་ཡུཾ་སྟེ། འོག་མ་ལས་ཞེས་པ་ནི། ཡི་གེ་དེ་རླུང་གི་དཀྱིལ་འཁོར་གྱི་འོག་གི་མཐར་འགོད་ཅིང་། སྟེང་གི་མཐར་ཡང་རླུང་གི་ས་བོན་དེ་དགོད་ལ། འདི་ཐམས་ཅད་རླུང་གི་དཀྱིལ་འཁོར་ལ་གནས་པར་སེམས་ཀྱིས་བསྒོམས་པས། ནང་གི་གལ་ཏེ་གནས་ནི་ཉི་ཤུ་རྩ་བཞི་རྣམས་ནས་བསྐྱོད་པའི་རླུང་བཀུག་ནས། དེ་ནས་གསང་བའི་འཁོར་ལོ་ལས་སྟེང་དུ་ལྟེ་བ་དང་སྙིང་ག་དང་། དེ་ལས་སྟེང་དུ་མགྲིན་པ་དང་། སྨིན་དབུས་ཀྱི་མཚམས་དང་། དེ་ལས་གོང་དུ་འཕོ་བའི་དུས་སུ་བསྐུལ་བར་བྱ་བ་ནི་མཆོག་གོ །རྣལ་འབྱོར་པ་ཡིས་གལ་ཏེ་སླར་ཡང་འཆི་བ་བཅོམ་ནས་སྐྲ་དཀར་ལ་སོགས་པ་ཉམས་པར་འདོད་པ་དེའི་ཚེ། འཕོ་བའི་ཐབས་བསྒོམ་པ་བོར་ནས་གཞན་རྣམས་བསྒོམ་ཞིང་། སྟེང་གི་ཡི་གེ་སྐྲ་དཀར་ཉམས་བྱེད་ཀྱི་ས་བོན་ཧཾ་དང་། ཧཱུཾ་ནག་པོར་བསྒོམས་ལ་བཟའ་བར་བྱ་བ་སྟེ། འོད་ཟེར་
ནག་པོ་རྣམས་ཀྱིས། བདུད་རྩིའི་ཆར་བས་ཁྱབ་པར་བྱས་ནས་མགོ་བོ་དང་། གཞན་དུ་ཡང་སྐྲ་དཀར་དང་སྤུ་དཀར་པོ་བསལ་བར་བྱའོ། །འདི་ཡང་ཉེ་བར་མཚོན་པ་སྟེ། གདམས་ངག་ཇི་ལྟ་བར་བསྒོམ་པའི་དབྱེ་བ་ལས། གཉེར་མ་དང་ནད་དང་འཆི་བ་ཉམས་པར་བྱེད་པ་སོགས་ལའང་བྱའོ། །འདིར་ནུས་པ་མེད་པ་ཡང་མཆོག་ཏུ་བསྐུལ་བར་བྱའོ། །ཞེས་གསུངས་སོ། །དེའི་ཚེ་ནི་བུག་གུ་སྟེ་སྒོ་དགུའི་སྟེང་མ་མཆོག་སྟེ་སྤྱི་གཙུག་གསེར་གྱི་སྒོ་ཕྱེ་ནས་འཕྲལ་དུ་ཡིད་ཉིད་འཕོ་བར་བྱེད་དོ། །ལྔ་པ་ནི། གལ་ཏེ་སྒོ་མཆོག་ནས་འཕོ་བ་དེ་སྡིག་པ་ཅན་གྱི་གང་ཟག་གིས་བྱེད་པར་མི་ནུས་སམ་སྙམ་ན། དེ་ལ་ཡང་སྒོ་མཆོག་ནས་འཕོ་བ་ཡོད་པར་སྟོན་པ་ནི། ཉིན་བཞིན་ཞེས་པ་ལ་སོགས་སོ། །སི་པུ་ཊའི་འགྱུར་གཉིས་དང་རྡོ་རྗེ་མཁའ་འགྲོ་དང་གདན་བཞི་ལས། ཉིན་ཞིང་དང་ཉིན་རེ་ཞེས་འབྱུང་ལ། མན་སྙེ་ལྟར་ན། ལྷ་དང་བྲམ་ཟེ་གསོད་པ་དང་། །ཞེས་འབྱུང་ངོ་། །དེ་ལ་ལྷའི་སྐུ་གཟུགས་ལ་སོགས་འཇིག་པའམ། ཉིན་རེ་ཞིང་བྲམ་ཟེ་སྟེ་སྡིག་པ་དང་བྲལ་བའི་མི་རྣམས་གསོད་པ་དང་། ཕ་མ་དང་དགྲ་བཅོམ་པ་གསོད་པ་དང་། དགེ་འདུན་གྱི་འཁོར་ལོའི་དབྱེན་བྱེད་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པ་སྟེ། མཚམས་མེད་པ་ལྔ་ནི་བྱེད་པ་དང་། ཆོམ་རྐུན་ལ་ལོངས་སྤྱོད་པ། ཞེས་པ་ལ། རྡོ་རྗེ་མཁའ་འགྲོ་ལས། རྐུ་འཕྲོག་འདོད་ལ་སྤྱོད་པའང་། །ཞེས་འབྱུང་བ་ལེགས་པས། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་ཡང་།
གསེར་གྱི་སྒོ་ནས་འཕོ་བའི་ལམ་འདིས་གྲོལ་བར་འགྱུར་རོ། །གྲོལ་བའི་དོན་ནི་འཕོ་བའི་ལམ་གྱིས་སྔོན་བག་མེད་པ་བྱས་པའི་སྡིག་པས་གོས་པར་མི་འགྱུར་བ་སྟེ། དེའི་དབང་གིས་ངན་སོང་དུ་མི་འགྲོའོ། །མང་པོས་ཅི་བྱ་སྟེ། སྲིད་པ་འཁོར་བའི་སྐྱོན་ཉོན་མོངས་ལ་སོགས་པ་དང་། ནད་དང་རྒ་བ་ལ་སོགས་པ་ལས་རིང་དུ་འགྱུར་ཏེ། འཕོ་བའི་མཐུས་བདེ་འགྲོར་སྐྱེས་པ་ན། བྱང་ཆུབ་སེམས་དཔའ་ལ་སོགས་པ་དང་མཇལ་བས་སྐྱོན་དེ་རྣམས་རྩད་ནས་འབྱིན་པའི་ཐབས་སྒྲུབ་པའི་ཕྱིར་རོ། །དཔེར་ན་འདམ་ལས་སྐྱེས་པའི་པདྨ་གཟི་བརྗིད་དྲི་མ་མེད་པ་དང་ལྡན་པ་དེ་བཞིན་དུ། འདམ་སོགས་ཞེས་པའི་སོགས་ཀྱི་སྐད་དོད། མན་སྙེར་དང་པོའི་དོན་དུ་བཤད་པ་ལེགས་པས། འདམ་ལྟ་བུའི་སྡིག་པ་རྣམས་ཀྱིས་དང་པོར་ལུས་ལ་གོས་པ་ཡིན་ཡང་། འཕོ་བ་བྱས་པས་སྲིད་པ་བར་དོ་ལ་སོགས་པ་རྣམས་སུ་ཡེ་ཤེས་ཏེ། ཡིད་ཀྱི་རང་བཞིན་གྱི་སྐུ་སྟེ་ལུས་ཀྱིས་རང་འདོད་པའི་གནས་སུ་སྤྱོད་པར་འགྱུར་རོ། །དེ་ལྟར་དུ་རྒྱུད་མང་པོ་ལས་གསུངས་པས་ཤིན་ཏུ་དོན་ཆེ་བའི་ཕྱིར་ཚུལ་འདི་ལ་འབད་པར་བྱ་དགོས་སོ། །དྲུག་པ་ནི། འཕོ་བའང་འཆི་བའི་དུས་ཐོབ་པ་སྟེ། དུས་ལ་བབ་ན་འཕོ་བྱ་སྟེ། དུས་མ་ཡིན་པར་འཕོ་བ་བྱས་ན། ལྷ་གསོད་པའི་སྡིག་པར་འགྱུར་ཏེ། དེའང་། ཕུང་པོ་སངས་རྒྱས་ལྔ་བདག་ཉིད། །དེ་ལ་སྨོད་པ་བརྒྱད་པ་ཡིན། །ཞེས་པས་ཉེས་པ་འབྱུང་བས། ཡོན་ཏན་མི་སྐྱེ་བར་མ་ཟད་སྐྱོན་བསྐྱེད་པས་འཕོ་བར་མི་བྱའོ། །དུས་སུ་འཕོ་བར་བྱའི་དུས་མ་
ཡིན་པར་འཕོས་ན། ཉེས་པ་བསྐྱེད་པ་དེའི་ཕྱིར། ལུས་ཀྱི་སྟེ་ལུས་ལ་འཆི་བའི་མཚན་མ་སྟེ་རྟགས་བྱུང་བ་ཤེས་ནས་བློ་སྟེ་རྣམ་དཔྱོད་དང་ལྡན་པས་འཕོ་བའི་རྣལ་འབྱོར་བརྩམ་པར་བྱ་སྟེ། གདན་བཞི་ལས། དེ་བས་ལུས་ལ་རྟགས་བྱུང་ན། །བློ་དང་ལྡན་པས་སྦྱོར་བ་བརྩམ། །ཞེས་གསུངས་སོ། །རྡོ་རྗེ་མཁའ་འགྲོ་དང་སྡོམ་འབྱུང་ལས་ཀྱང་། ལྷ་རྣམས་གསོད་པ་ཙམ་གྱིས་ནི། །དམྱལ་བར་ངེས་པར་བསྲེག་པར་འགྱུར། །དེ་བས་འཆི་བའི་མཚན་མ་ནི། །མཁས་པས་འབད་དེ་ཤེས་པར་བྱ། །ཞེས་འཕོ་བའི་ནུས་པ་ཐོབ་ཀྱང་། དུས་མ་ཡིན་པར་འཕོས་ན་དམྱལ་བར་ལྟུང་བར་བཤད་པའི་ཉེས་དམིགས་ཤིན་ཏུ་ཆེ་བས་འཕོ་བའི་དུས་གང་ཡིན་པ་ཤེས་པ་ཤིན་ཏུ་གལ་ཆེ་བར་སྣང་ངོ་། །དེ་ལ་འཕོ་བའི་དུས་ནི་འདི་ཡིན་ཏེ། ཞེས་རྒྱུད་རྣམས་ལས་གསལ་བར་མ་བཤད་ཀྱང་། དེའི་ཕྱིར་ལུས་ཀྱི་མཚན་ཤེས་ནས། །ཞེས་པ་དང་། དེ་བས་འཆི་བའི་མཚན་མ་ནི། །ཤེས་པར་བྱ་ཞེས་པ་རྣམས་ཀྱི་དོན་གདན་བཞི་ལས། ལུས་ལ་འཆི་ལྟས་ཀྱི་རྟགས་བྱུང་ན་འཕོ་བ་བརྩམ་ཞེས་གསུངས་པ་ལྟར་ཤེས་པར་བྱའོ། །དེའང་འཆི་ལྟས་ཀྱི་རྟགས་བྱུང་བ་ཙམ་ནས་རྣམ་ཤེས་ལུས་ལས་འདོན་པའི་འཕོ་བ་བྱེད་པ་མ་ཡིན་གྱི། འཆི་རྟགས་བྱུང་ནས་འཆི་བླུ་བྱས་ཀྱང་མི་ཟློག་པར་མཐོང་བ་དགོས་སོ། །འོ་ན་འཆི་བླུ་བྱས་ནས་མི་ཟློག་པར་མཐོང་ན། དེ་ཙམ་ནས་འཕོས་པས་ཆོག་གམ་སྙམ་ན་དེས་ཀྱང་མི་ཆོག་སྟེ། དཔེར་ན་སྔར་བཤད་པ་ལྟར་གྱི་འཆི་རྟགས་བྱུང་ནས་ལོ་བརྒྱད་ན་འཆི་བ་སོགས་ལ་འཆི་བླུ་བྱས་ཀྱང་
ཟློག་མི་ནུས་པར་མཐོང་བ་ཙམ་ནས་འཕོ་བ་བྱས་ན། དུས་མིན་ལྷ་རྣམས་གསོད་པར་འགྱུར། །ཞེས་པའི་སྐྱོན་དུ་འགྱུར་བའི་ཕྱིར་རོ། །འོ་ན་དེ་དག་ལ་འཕོ་བའི་དུས་ནམ་ཡིན་སྙམ་ན། གདན་བཞིའི་འགྲེལ་པ་ལས། རིམས་ལ་སོགས་པས་མ་ཕོག་པར། །ཞེས་བྱ་བ་ནི། རིམས་ལ་སོགས་པས་ཕོག་པ་ན། གོང་དུ་འཕོ་བའི་སྦྱོར་བ་མི་ནུས་པའི་ཕྱིར་དང་། འཇིག་རྟེན་པས་བརྙས་པའི་ཕྱིར་དུས་ཟད་པ་ལས། ཟླ་བ་དྲུག་གི་གོང་རོལ་ཏུ་སྟོན་ནོ། །ཞེས་འདི་ཙམ་ན་འཆིའོ་ཞེས་པའི་དུས་ཟད་པ་ལས། ཟླ་བ་དྲུག་གི་གོང་དུ་འཕོ་བར་གསུངས་ཏེ། འཆི་ལྟས་བྱུང་ནས་ལོ་གཅིག་ནས་འཆི་བ་ཡན་ཆད་ཀྱི་དབང་དུ་བྱའོ། །སྔར་བཤད་པ་ལྟར་རིམས་ལ་སོགས་པའི་ནད་ཀྱིས་མ་གདུངས་པའི་གོང་དུ་འཕོ་བ་བྱ། ཞེས་པའི་དགོངས་པ་འཕོ་བའི་རྣལ་འབྱོར་གྱི་ནུས་པ་ཐོབ་པ་རྣམས་ཀྱང་ནད་ཀྱིས་མནར་བ་ན་གོང་དུ་འཕོ་མི་ནུས་པ་དང་། འཕོ་མ་ནུས་པ་ན་འཇིག་རྟེན་པས་ཀྱང་བརྙས་ཤིང་། མི་སྙན་པ་སྒྲོག་པའི་ཕྱིར་ན་ནད་ཀྱིས་མ་ཕོག་པའི་གོང་དུ་འཕོ་བ་བྱ་ཞེས་བསྟན་པ་ལྟར་ཡིན་པས། འཆི་བའི་ནད་ཀྱིས་ཐེབས་པའི་དུས་སུ་འཕོ་བ་བྱེད་པ་ནི་རྒྱུད་རྣམས་ཀྱི་དོན་དུ་མི་སྣང་ངོ་། །འཆི་ལྟས་བྱུང་ནས་འདི་ཙམ་ན་འཆི་ཞེས་པའི་ངེས་པ་མ་ཐོབ་པ་རྣམས་ལ། འཆི་བླུ་བྱས་ཀྱང་མི་ཟློག་པའི་མཚན་མ་མཐོང་ན། ཇི་ལྟར་བརྟགས་པས་ཇི་ལྟར་འོས་པ་ཞིག་གི་མཚམས་སུ་འཕོ་བ་བྱས་ན། དུས་མ་ཡིན་པར་འཕོས་པའི་ཉེས་པ་མེད་དམ་སྙམ་སྟེ། དཔེར་ན་པཎྜི་ཏ་ག་ཡ་དྷ་རའི་རྣམ་པར་ཐར་པ་བཞིན་
ནོ། །དེས་ན་མན་སྙེ་ལས། དུས་ལ་བབ་པ་ན་འཕོ་བར་གསུངས་པའི་འབྲུ་གནོན་ལ། འཆི་བའི་དུས་ལ་བབ་པ་ན། །ཞེས་བཤད་པའང་འཆི་ལྟས་བྱུང་བ་ལ་ཟློག་ཐབས་བྱས་ཀྱང་མ་ཟློག་པའི་དུས་ལ་བྱའི། །འཆི་ནད་ཀྱིས་ཐེབས་པའི་དུས་ལ་མི་བཟུང་ངོ་། །གཉིས་པ་འཕོ་བའི་ལམ་ཉིད་བཤད་པ་ལ་གཉིས། ཚིག་གི་དོན་སོ་སོར་བཤད་པ་དང་། ཉམས་སུ་བླང་བའི་རིམ་པ་བསྡུས་ཏེ་བསྟན་པའོ། །དང་པོ་ལ་གསུམ། ཡེ་ཤེས་མཁའ་འགྲོ་མ་སྒོམ་པའི་གཞུང་བཤད་པ་དང་། དེའི་སྒོ་རྣམས་སུ་ས་བོན་གྱི་ཡི་གེ་བཀོད་ནས་རླུང་གཡོ་བ་མེད་པར་བྱ་བ་དང་། འཕོ་བའི་དམིགས་པ་དངོས་བསྟན་པའོ། །དང་པོ་ནི། སྟོང་པ་ཉིད་དང་སྙིང་རྗེའི་བདག་ཉིད་ཀྱིས་འཕོ་བ་བསྒྲུབ་པར་བྱ་བ་སྟེ། བྱེད་པའི་ཁྱད་པར་ལས་ཏེ་ལྷའི་རྣལ་འབྱོར་ཁྱད་པར་བས་ཇི་ལྟར་འཕོ་བའི་དེ་ཉིད་སྒྲུབ་པར་བྱེད་པ་རྡོ་རྗེ་སྙིང་པོ་ཉོན་ཅིག །སེམས་ཀྱི་དངོས་པོ་སྟེ་རང་བཞིན་གྱིས་ནི་རོ་གཅིག་པའི་མཉམ་པ་ཉིད་སྔར་རབ་བྱེད་དང་པོར་གསུངས་པའི་ཁམས་བཅོ་བརྒྱད་ཀྱི་མཚན་ཉིད་ཐམས་ཅད་ལ་སྔར་རབ་བྱེད་དང་པོར་གསུངས་པའི་སྟོང་པ་ཉིད་ཀྱི་ནི་མཚན་ཉིད་ཡང་དག་པ་དང་ལྡན་པར་གཟུགས་སོགས་ཐམས་ཅད་གཞིག་པར་ཏེ་མི་དམིགས་པར་བྱ་བ་ནི། སྔར་གྱི་སྟེ་སྔོན་དུ་བསྒོམ་པར་བྱའོ། །དེ་ནས་རང་གི་སྙིང་གའི་ཟླ་བའི་དཀྱིལ་འཁོར་གྱི་དབུས་སུ་སངས་རྒྱས་ལྔ་སྟེ། ཡེ་ཤེས་ལྔའི་བདག་ཉིད་ཅན་གྱི་ས་བོན་ཧཱུཾ་འོད་ཟེར་དམར་པོ་དང་ཧཱུཾ་ཡིག་འདི་ནི་འོད་ཟེར་ཉི་མའི་འོད་ཟེར་ལྟ་བུ་འབར་བའི་ངོ་བོ་སེམས་ཀྱིས་མཚན་པར་བྱ་བ་སྟེ་བསྒོམས་པར་བྱ་ལ། ཧཱུཾ་
ལ་གནས་པའི་འོད་ཟེར་གྱིས་ཡེ་ཤེས་མཁའ་འགྲོ་མ་མདུན་དུ་བཀུག་པར་སེམས་ཀྱིས་ནི་བསམ་ཞིང་། མཆོད་པ་དང་སྐྱབས་སུ་འགྲོ་བ་དང་སྡིག་པ་བཤགས་པ་དང་སེམས་བསྐྱེད་པ་ལ་སོགས་པ་བྱས་ནས། སྣ་ཚོགས་པདྨ་དང་ཟླ་བའི་དཀྱིལ་འཁོར་གྱི་དབུས་སུ་ཡང་། ས་བོན་ཧཱུཾ་དཀར་པོའི་གཟུགས་ཀྱིས་ནི་ཡེ་ཤེས་མཁའ་འགྲོ་མའི་གཟུགས་བསྐྱེད་ནས་པདྨ་དང་ཟླ་བའི་གདན་ལ་བཞུགས་པར་ནི། ཡེ་ཤེས་མཁའ་འགྲོ་མར་བདག་ཉིད་བསམ་པར་བྱ་སྟེ། ཞལ་གསུམ་མ་དང་ཕྱག་དྲུག་ཉིད་དང་། ཞལ་རེ་རེ་ལ་སྤྱན་གསུམ་གསུམ་དང་དབུ་རྒྱན་གྱིས་ནི་བརྒྱན་པ་དང་། རྩ་བའི་ཞལ་བཞད་ཅིང་དཀར་བ་དང་། གཡས་ཞལ་ཁྲོས་ཤིང་ནག་པ་དང་། གཡོན་ཞལ་སྒེག་ཅིང་དམར་བ་དང་། རིན་པོ་ཆེའི་རྒྱན་རྣམས་ཀུན་གྱིས་རྣམ་པར་བརྒྱན་ཅིང་། ཀུནྡ་དང་ཟླ་བའི་མདོག་ལྟར་དཀར་བ། ཤིན་ཏུ་མཛེས་པའི་སྣ་ཚོགས་པའི་གོས་ཀྱིས་བརྒྱན་ཅིང་། སྐྲའི་ཞགས་པ་འཆོས་ལེགས་པ་དང་། སངས་རྒྱས་སྤྲིན་ནི་སྤྲོ་བ་རྣམས་ཀྱིས་ནམ་མཁའི་ཁམས་འགེངས་པ། སེམས་དཔའི་སྐྱིལ་མོ་ཀྲུང་དུ་གནས་པ་བསམ་མོ། །ཕྱག་གཡས་ཀྱི་དང་པོར་མདའ་ནི་དགོད་པར་བྱ་ལ། དེ་བཞིན་དུ། གཉིས་པར་ལྕགས་ཀྱུ་ཉིད་དང་། གསུམ་པར་རྡོ་རྗེ་འཕྱར་བའོ། །གཡོན་གྱི་དང་པོར་སྙིང་གར་སྡིགས་མཛུབ། ཞགས་པ་དང་བཅས་པ་ཉིད་དང་། གཉིས་པར་དཔག་བསམ་གྱི་ཤིང་གི་ལྷུག་མ་དང་། གསུམ་པར་གཞུ་ཡི་གོ་ཆས་ཁྱབ་ཅེས་པ་ལ། འགྲེལ་པར་སྟེང་དུ་གོ་གོན་པའི་གཞུ་བསྣམས་པ་ཞེས་འབྱུང་བ་
ནི། གདན་བཞི་ལས། སྟེང་དུ་གཞུ་ནི་འགེངས་པ་སྟེ་ཞེས་འབྱུང་བ་ལྟར་བྱ་སྟེ་གཡས་པའི་ཕྱག་ཚན་རྣམས་ནི་ཡས་རིམ་དང་། གཡོན་པའི་ཕྱག་མཚན་རྣམས་ནི་མས་རིམ་ནས་འགོད་པའོ། །འོད་ཟེར་གྱི་འཕྲེང་བ་དུ་མ་ཅན་དབུགས་ཀྱི་རླུང་ནི་ཕྱིར་གཡོ་བ་མེད་པར་བསྒོམ་པར་བྱའོ། །གཉིས་པ་ནི། དབུགས་མི་གཡོ་བ་ཉིད་ཇི་ལྟར་བྱ་ཞེ་ན། ཧཱུཾ་སུཾ་ཡུཾ། ཀྵུཾ་སྨྲྻུཾ་ཧྨྲྻུཾ་ཡྨྲྻུཾ་ཀྨྲྻུཾ་ཞེས་པའི་ས་བོན་བརྒྱད་ནི་བརྩོན་པ་དང་ལྡན་པ་ཡིས་ཡི་གེའི་གཟུགས་ཀྱི་རྣམ་པར་དགོད་པའི་སྒོ་ནས་མིག་ལ་སོགས་པའི་སྒོར་དགོད་པར་བྱའོ། །དེ་ལའང་གོ་ཆའི་དོན་དུ་ཕྲག་པ་གཉིས་ལ་ཧྨྲཾཡུ་དང་སྙིང་གར་ཡྨྲཾཡུ་དགོད་ལ། ལྷག་མ་དྲུག་སྒོ་དགུར་དགོད་དོ། །ལྕེའི་རྩ་བར་སུཾ་དང་མགྲིན་པའི་བུ་གར་སྨྲྻུཾ་སྟེ་གཉིས་ནི་ཁའི་སྒོ་གཅིག་ཏུ་བགྲང་བ་ལ་གཉིས་དགོད་པའོ། །འོ་ན་སྒོ་ལྷག་མ་བརྒྱད་ཡོད་པ་ལ་ཡི་གེ་ཚན་པ་བཞིར་བྱེད་པ་ཇི་ལྟར་ཡིན་ཞེ་ན། ཧཱུཾ་ལ་གསུམ་ཡོད་ཀྱང་ཀྵཱུཾ་གི་འོག་གི་ཧཱུཾ་མི་བརྩི་བས་ཧཱུཾ་གཉིས་དང་། ཡུཾ་ལ་གཉིས་དང་། ཀྵྨྲྻུཾ་ལ་གསུམ་དུ་བྱེད་པས་སྐྱོན་མེད་དོ། །འདིར་སྨིན་མཚམས་ཀྱི་ཧཱུཾ་གི་ནང་དུ་ཧཾ་བཀོད་པ་མ་བགྲངས་འདུག་གོ །ས་བོན་དེ་རྣམས་ཀྱང་ཨཱ་ལི་ཀཱ་ལི་རབ་ཏུ་སྦྱར་བ་ལས། ཇི་ལྟར་རིགས་པར་བཏུས་པ་ཅན་ཏེ་མན་སྙེ་ལས་ས་བོན་ལྡན་ཞེས་པའི་དོན་དུ་བཤད་དོ། །གལ་ཏེ་ཡང་ཡི་གེ་རྣམས་སྔར་ཁ་དོག་སྣ་ཚོགས་པར་བརྗོད་མོད་ཀྱང་། །འདིར་ས་བོན་ཐམས་ཅད་ཁ་དོག་དཀར་པོ། ཟླ་བའི་འོད་ཟེར་ལྡན་པ་སྟེ་འོད་ཟེར་དཀར་པོ་ཅན་རྣམས་སོ། །འདིར་མན་སྙེ་ལས། འོད་ཟེར་འཐུག་པོ་རྣམས་ཀྱིས་བར་མཚམས་མེད་པར་
བྱས་ནས་ནང་དུ་མགོ་བོ་བསྟན་པ་རྣམས་བསམ་མོ། །ཞེས་གསུངས་པས། ཡི་གེ་རྣམས་མགོ་བོ་ནང་དུ་བསྟན་པ་ལ། འོད་ཟེར་འཐུག་པོ་རྣམས་ཀྱིས་སྒོ་སོ་སོའི་བུག་གུ་བར་མཚམས་མེད་པར་བཀག་པར་སྒོམ་དགོས་ཏེ། ཕྲག་པ་དང་སྙིང་གའི་གོ་ཆའི་ཡི་གེ་ལ་དེ་ལྟར་མི་དགོས་སོ། །དེ་ལྟར་སྒོ་རེ་རེ་ལ་དམིགས་པ་གཏད་དེ་བསྒོམས་ན་དམིགས་པ་གསལ་བ་དང་། དེ་ལ་སེམས་ཟིན་པ་རྣམས་ཀྱིས་ཡུན་མི་རིང་བར་སྣ་སྒོའི་རླུང་ཕྱིར་འགྲོ་བ་ནང་དུ་ཟློག་པ་འོང་བར་སྣང་ལ། དེ་ནི་སྒོ་གཞན་ལའང་མཚུངས་ཏེ་སྲོག་དྷཱུ་ཏཱིར་འཛུད་པའི་ཐབས་ཀྱི་དམིགས་པ་ཤིན་ཏུ་ཟབ་པ་ཡིན་པར་སྣང་བས། འཕོ་བ་མིན་པའི་སྲོག་དབུ་མར་འཛུད་པའི་ཐབས་ལ་ཡང་འདི་རྣམས་བསྒོམས་ན་ཤིན་ཏུ་ལེགས་པར་གོའོ། །གསུམ་པ་ནི། པདྨ་སྙིང་གར་གནས་པའི་རྩ་འཁོར་ལ་བྱ་སྟེ། མན་སྙེ་འགྱུར་གསར་ལས། སྙིང་གར་པདྨ་ཆུ་ཤིང་གི །ཞེས་འབྱུང་བ་ལྟར་རོ། །ཆུ་ཤིང་མེ་ཏོག་གི། ཞེས་པ་ནི་རྒྱུད་འདིའི་རབ་བྱེད་ཉེར་གསུམ་པར། རྩ་དབུ་མ་འཆད་པའི་སྐབས་སུ། ཆུ་ཤིང་གི་ནི་མེ་ཏོག་ལྟར། །བརྐྱང་ཞིང་ཁ་ནི་འོག་ཏུའོ། །ཞེས་ཆུ་ཤིང་གི་མེ་ཏོག་ཁ་ཅུང་ཟད་ཕྱེ་བ་དང་། ཁ་ཐུར་དུ་བསྟན་པ་བཞིན་དུ་སྙིང་གའི་རྩ་འཁོར་གྱི་དབུས་ཀྱི་དབུ་མ་ཡང་ཁ་ཐུར་དུ་བསྟན་པ་དང་ཁ་ཅུང་ཟད་དབྱེ་བར་བཤད་ལ། སྙིང་གའི་རྩ་འཁོར་ཡང་ཁ་ཐུར་བསྟན་ཏོ། །སྙིང་གའི་དབུ་མའི་དབུས་སུ་སྒོང་སྐྱེས་ཏེ་ཧཱུཾ་ཡིག་གཞག་པར་བྱའོ། །དེ་ཡི་དབུས་སུ་སྟེ་སྙིང་གའི་པདྨའི་དབུས་སུ་རྣམ་ཤེས་ཀྱི་བཞོན་པར་གྱུར་པའི་
སྲོག་འཛིན་གྱི་རླུང་མཚོན་པའི་རླུང་གི་དཀྱིལ་འཁོར་འགོད། དེའི་སྟེང་དུ་ཡེ་ཤེས་ཏེ་རླུང་གི་བཞོན་པ་ཅན་གྱི་རྣམ་ཤེས་མཚོན་བྱེད་ཧཱུཾ་ཡིག་དགོད། རྣམ་པར་ཤེས་པ་ལྷན་ཅིག་པས་ཞེས་པའི་དོན་ནི། ཧཱུཾ་གི་སྟེང་དུ་ཡུཾ་དང་། ཧཱུཾ་གི་འོག་ཏུ་ཡུཾ་དང་། །ཡུཾ་སྔ་མའི་དབུས་སུ་ཧི་དང་། གཉིས་པའི་སྟེང་དུ་ཀ་དགོད་པ་ཡིན་ནོ། །སྡོམ་འབྱུང་ལས། སྙིང་གར་ཡི་གེ་ཧཱུཾ་སྦྱར་ཏེ། །ཡི་གེ་ཕྱེད་དང་གཉིས་པོ་ནི། །འོག་དང་སྟེང་དུ་གཞག་པར་བྱ། །དེའི་འོག་གི་ཆར་རླུང་གི །ས་བོན་འོག་ཏུ་བལྟས་པའོ། །རླུང་གི་ས་བོན་གཉིས་བྱ་སྟེ། །རྣལ་འབྱོར་ལྡན་པས་ཁ་སྦྱོར་བྱ། །ཞེས་གསུངས་སོ། །ཡུཾ་ཧིཀ་ལ་སོགས་པ་རྣམས་སྔོན་པོ་དང་ཧཱུཾ་ཡིག་ལ་སོགས་པ་རྣམས་འོག་ཏུ་མགོ་བསྟན་པར་སྒོམ་མོ། །འབྱུང་བས་ན་དངོས་པོ་སྟེ་ཁམས་བཅོ་བརྒྱད་ཀྱི་ངོ་བོ་རང་བཞིན་མེད་པའི་སྟོང་པ་ཉིད་དང་སྙིང་རྗེ་ཟུང་དུ་འབྲེལ་བ་འདི་ཐམས་ཅད་བསྒོམ་པར་བྱ་ཞེས་པའི་དོན་ནོ། །གཡོ་བ་མེད་ཅིང་འཚེ་བ་མེད། །ཅེས་པ་ལ། གདན་བཞིར། འཇིགས་པ་མེད་ཅིང་འཚེ་མེད་པར། །ཞེས་འབྱུང་སྟེ་སྒོམ་པའི་གནས་བསྟན་ཏོ། །དེ་ནས་ཕྱི་རོལ་ཏེ་རང་ལས་གཞན་པའི་རྣམ་ཤེས་འཕྲོག་པའི་རྣལ་འབྱོར་རྣམས་ལ་རྣམ་པར་མཁས་པས་གཟུང་བར་བྱ་བ་སྟེ་བསམ་པར་བྱའོ། །འདི་འོག་གི་ཚར་བཅད་དང་རྗེས་འཛིན་གྱི་སྐབས་དང་འབྲེལ་བ་ཡིན་ནོ། །ལུས་ཀྱི་སྟེང་དང་འོག་གི་གནས་གཉིས་ཀྱི་སྟེང་གཉིས་སུ་སེམས་པར་བྱེད་པས་ན་སེམས་ཏེ། སྟེང་འོག་གི་སྒོ་ནས་རྒྱུ་བའི་རླུང་རྣམས་སོ། །རླུང་དེ་རྣམས་ཀྱིས་དགང་བ་དང་བུམ་པ་ཅན་དང་ཞི་བྱེད་རྣམས་ཀྱིས་སྡུད་པས། ལྟེ་བའི་འོག་ཏུ་སོར་བཞི་དོར་
ནས་རླུང་གི་དཀྱིལ་འཁོར་བསྒོམ་པའི་སེམས་ཀྱིས་བཟླས་པ་བྱ་ཞེས་འོག་ཏུ་འབྲེལ་ལོ། །གསང་གནས་ཀྱི་རླུང་དེའི་སྟེང་དུ་དབུས་སུ་མེ་ཉིད་དེ་མེའི་དཀྱིལ་འཁོར་རོ། །གསང་གནས་དེའི་སྟེང་དུ་ལྟེ་བ་ལ་ཉི་མ་སྟེ་རྡུལ་ལོ། །དེར་ཨཱ་ལིའི་གཙོ་བོ་ས་བོན་ཨཾ་སྟེ་ནཱ་དའི་ངོ་བོའོ། །ཀཱ་ལིར་ལྡན་པའི་ས་བོན་ཧཱུཾ་སྟེ་སྔར་སྙིང་གར་བཀོད་པའོ། །དེ་ཉིད་དེ་དེ་ཁོ་ནར་ནི་ཨཾ་གི་ས་བོན་དེ་ཁ་དོག་དམར་པོར་བྱའོ། །དེ་ཁོ་ན་དམར་པོ་ཞེས་པའི་ཁོ་ནས་གང་ལས་ཁྱད་པར་བྱེད་ཅེ་ན། ཧཱུཾ་ཡིག་ལས་ཁྱད་པར་དུ་བྱེད་པས་ཨཾ་ཡིག་ཁོ་ན་དམར་པོར་བྱ་ཞེས་པའོ། །ཁ་ཅིག་རྒྱུད་ནས་དེ་ལྟར་གསུངས་པ་ལས་ཟློག་ནས་ཧཱུཾ་དམར་མོ་ཞེས་པའི་འཕོ་བ་བྱེད་པར་སྣང་ངོ་། །འདིར་རྣལ་འབྱོར་པས་ཁྱད་པར་དུ་བྱ་བ་ནི། འབྱུང་དང་རྔུབ་པ་ཞེས་པ་ཐམས་ཅད་མན་ངག་སྙེ་མར། ཁྱོགས་དང་འཁྱེར་བྱེད་ཅེས་པའི་དོན་དུ་བཤད་དོ། །དེ་ལ་སེམས་ཀྱི་རྒྱལ་པོ་ཞོན་པའི་ཕྱིར་ཁྱོགས་དང་འདྲ་བས་ཁྱོགས་ཏེ། སྟེང་དུ་རྗེས་སུ་འགྲོ་བའི་རླུང་ངོ་། །འཁྱེར་བར་བྱེད་དོ་ཞེས་པས་ཁྱེར་བ་ཁོ་ན་འཁྱེར་བྱེད་དེ་རླུང་ནང་དུ་འཇུག་པའི་ཚེ་འོག་ཏུ་འཇུག་པའོ། །དེ་དག་གིས་བཟླས་པ་བྱ་བ་སྟེ་གོམས་པར་བྱ་བའོ། །སྙིང་གའི་དབུས་སུ་གནས་པའི་ཡེ་ཤེས་ཏེ། སེམས་མཚོན་བྱེད་ཀྱི་ས་བོན་ནི་ཧཱུཾ་དང་དེ་གང་གི་དབུས་སུ་བཞག་པ་སྔར་བཤད་པའི་རླུང་དཀྱིལ་ཡུཾ་ལ་སོགས་པའི་ཡི་གེ་དང་བཅས་པ་འབྱུང་བ་ཡིས་ནི་སྟེ་རླུང་ཕྱིར་འབྱུང་བའི་ཚེ་བསྣུན་བྱ་ཞིང་སྟེ་སྤྱི་བོ་ཇི་སྲིད་པར་ལུས་ཀྱི་སྟོད་དུ་འདྲེན་ནོ། །དེའི་རྗེས་སུ་རླུང་ནང་དུ་རྔུབ་པས་སམ། ཁྱེར་བྱེད་ཀྱིས་སྙིང་གའི་ཡེ་ཤེས་ཏེ་ཧཱུཾ་ཡིག་འཁོར་དང་བཅས་པ་ནི་བསྣུན་པར་བྱ་བ་སྟེ་སྙིང་ག་སྲིད་པར་ཚུར་འདྲེན་ནོ། །
དེ་ལྟར་ཀ་ཤིའི་མེ་ཏོག་བཞིན་འདྲེན་པ་དང་། ཚུར་འདྲེན་པ་ནི་རྣམ་པར་ཤེས་པ་ཁྱེར་བར་བྱེད་དོ། །སྙིང་གའི་འཁོར་ལོ་ཁ་ཐུར་བལྟ་ཡིན་ཞིང་། སྟེང་དུ་བསྣུན་པའི་ཚེ་རྩ་འཁོར་ཕྱི་ནང་ལོག་ནས་སྟེང་དུ་ཕྱོགས་པ་དང་། སྙིང་གར་འཁྱེར་བྱེད་ཀྱིས་ཁྱེར་བའི་ཚེ་འཁོར་ལོ་དང་རྩ་འཁོར་ལ་སོགས་པ་ཐམས་ཅད་ཁ་འོག་ཏུ་ཕྱོགས་ཏེ་དང་པོར་གནས་པ་བཞིན་གནས་པར་བསམ་མོ། །རྣམ་ཤེས་ལུས་ལས་འདོན་པའི་དམིགས་པའི་བྱེད་ཚུལ་འདིར་བཤད་པ་ལྟར་ན་འཆི་བའི་ཚེ། སྙིང་གའི་རྩ་འཁོར་ཁ་གྱེན་དུ་ལྡོག་པ་འདྲའོ། །འབྱུང་དང་འབྱུང་མིན་ནས་རྔུབ་པའི་ཞེས་པའི་བར་གྱི་དོན། ཁྱོགས་ཀྱི་སྟེ་སྟེང་དུ་འགྲོ་བའི་རླུང་གིས་ཁྱོགས་ཞེས་པ། སྙིང་གའི་ཧཱུཾ་ཡིག་འཁོར་བཅས་གྱེན་དུ་སྐྱོད་པར་བྱེད་པའོ། །ཁྱོགས་ཀྱི་རྗེས་ཐོགས་སུ་འཁྱེར་བྱེད་ཀྱང་། བཟླས་པས་སྲོག་རླུང་དབང་དུ་བྱས་ནས། རྣལ་འབྱོར་པས་བདག་ཉིད་ཀྱི་ལུས་ལས་ཕྱི་རོལ་ཏུ་ཡང་གོམས་པར་བྱའོ། །ཕྱི་རོལ་ཏུ་གོམས་པར་བྱེད་ཚུལ་ཇི་ལྟ་བུ་ཞེ་ན། འདེགས་པ་ནི་ཁྱོགས་ཏེ་སྙིང་ནས་ཕྱི་རོལ་ཏུ་འདྲེན་པའོ། །དེས་རླུང་ལ་སོགས་པ་མཚོན་པར་བྱ་བས་ན་མཚན་ཉིད་དེ་ཁྱེར་བ་ནི་འཁྱེར་བྱེད་དེ་སྙིང་ག་ཇི་སྲིད་པར་འཇུག་པའོ། །དེ་ཉིད་མཚན་ཉིད་དེ་བློས་མཚོན་པར་བསམ་པར་བྱའོ། །དེ་ལྟར་མཉམ་པར་བཞག་པ་སྟེ་རྣམ་གཡེང་མེད་པར་ཇི་ལྟར་འགྱུར་བ་དེ་ལྟར་ཡང་དང་ཡང་དུ་གོམས་པས། འབྱུང་བ་སྟེ་ཁྱོགས་དང་རྔུབ་པ་སྟེ་འཁྱེར་བྱེད་ཀྱི་རྣལ་འབྱོར་གྱི་ཏིང་ངེ་འཛིན་ལས་མཉམ་པ་ཉིད་དེ་རོ་གཅིག་པ་ཉིད་རང་གི་ངང་གིས་འབྱུང་བ་ཉིད་དེ་འགྲུབ་པར་འགྱུར་རོ། །རླུང་དང་རྣམ་ཤེས་ཀྱི་དེ་ཁོ་ན་ཉིད་
རོ་མཉམ་ཉིད་དང་དེ་ལྟར་བསྒོམས་པ་དེ་རང་གི་ངང་གིས་འབྱུང་བ་འགྲུབ་པར་འགྱུར་བ་འདི་ལ་ཐེ་ཚོམ་མེད་དོ། མདོར་ན་སྟེང་དུ་འགྲོ་བའི་རླུང་གིས་རབ་ཏུ་སྦར་བའི་ལྟེ་བའི་ཨི་ཡིག་གི་མེ་གྱེན་དུ་སོང་བས་བསྣུན་པའི་མཐུས། རླུང་ཕྱིར་འབྱུང་བའི་ཚེ་སྙིང་གའི་རྩ་འཁོར་ཕྱི་ནང་ལོག་ནས་ཧཱུཾ་ཡིག་འཁོར་བཅས་སྤྱི་བོ་རུ་ཡར་ལ་འདྲེན་པ་དང་། རླུང་ནང་དུ་འཇུག་པའི་ཚེ་ཧཱུཾ་ཡིག་འཁོར་བཅས་སྙིང་གར་ཕབ་ནས་མགོ་ཐུར་དུ་བལྟ་བ། རླུང་འབྱུང་འཇུག་གཉིས་ལ་ཡང་དང་ཡང་དུ་གོམས་པར་བྱས་པས། རང་གི་ངང་གིས་འཇུག་པར་འགྱུར་བ་འགྲུབ་འགྲུབ་ཀྱི་བར་དུ་བྱེད་པའོ། །གཉིས་པ་ནི། སྔར་བཤད་པ་དེ་དག་གི་དོན་ཉམས་སུ་ལེན་པའི་རིམ་པར་བསྡུས་ཏེ་བསྟན་ན། ཡེ་ཤེས་མཁའ་འགྲོ་མ་ལྷ་བཅུ་གསུམ་གྱི་དཀྱིལ་འཁོར་རམ། བདེ་དགྱེས་ལ་སོགས་པའི་དཀྱིལ་འཁོར་དུ་དབང་བསྐུར་བ་ལེགས་པར་ཐོབ་ཅིང་། དམ་ཚིག་དང་སྡོམ་པ་ཚུལ་བཞིན་བསྲུང་བའི་གང་ཟག་གིས། སྔར་བཤད་པ་བཞིན་དུ་སྟོང་པ་ཉིད་སྒོམ་པ་དང་། སྦྱོར་བ་ཚོགས་བསགས་ནས་བརྩམས་ཏེ། ཡེ་ཤེས་མཁའ་འགྲོ་མར་བསྐྱེད་པ་རྫོགས་ཀྱི་བར་དུ་བྱས་ལ། ཡེ་ཤེས་མཁའ་འགྲོ་མའི་སྐུ་ལ་དམིགས་པ་གསལ་བ་དང་། སེམས་གནས་པ་བྱུང་བྱུང་གི་བར་དུ་བསླབ་བོ། །དེ་ནས་སྤྱི་གཙུག་གི་སྒོར་ཀྵུཾ་དགོད་ལ་དེའི་འོད་ཟེར་གྱིས། སྤྱི་གཙུག་གི་སྒོ་བར་མཚམས་མེད་པར་དགག །ཀྵུཾ་གི་འོག་ཏུ་ཧཱུཾ་ཡིག་དགོད། སྨིན་མཚམས་ཀྱི་བུ་གར་ཧཱུཾ་ཡིག་བཀོད་ནས་སྒོ་འགོག་པ་སྔར་བཞིན་བྱ། ཧཱུཾ་བཀོད་པ་དེའི་ནང་དུ་ཧཾ་
དགོད། ལྕེའི་རྩ་བར་སུཾ་དང་དེའི་ཐད་ཀའི་མགྲིན་པའི་བུག་པར་མིག་གཉིས་ལ་ཧཱུཾ་དང་། རྣ་བའི་བུག་པ་གཉིས་དང་།སྣ་བུག་གཉིས་ལ་ཡུཾ་དང་། ལྟེ་བའི་སྒོ་དང་དྲི་ཆུའི་སྒོ་དང་དྲི་ཆེན་གྱི་སྒོ་གསུམ་གར་ཀྵྨྲྱུཾ་རེ་དགོད། ཡི་གེ་རྣམས་ཉལ་སྟབས་སུ་གནས་ཤིང་མགོ་ནང་དུ་བསྟན་པ། ཁ་དོག་དཀར་པོ། དེ་དག་གི་འོད་ཟེར་དཀར་པོ་འཐུག་པོ་རྣམས་ཀྱིས་སྒོ་སོ་སོ་རྣམས་བར་མཚམས་མེད་པར་བཀག་པར་བསྒོམས་ཏེ། དེ་ཡང་སྒོ་སོ་སོའི་སྒོ་རེ་རེའི་ཡི་གེ་འོད་ཟེར་དང་བཅས་པ་ལ་རིམ་པ་བཞིན་དུ་གསལ་སྣང་དང་དེ་ལ་སེམས་གནས་པ་གཉིས་བསྒྲུབས་ལ་རླུང་ནང་དུ་ལྡོག་པའི་རྟགས་བྱུང་བྱུང་གི་བར་དུ་བསྒོམ་མོ། །ཕྲག་པ་གཉིས་ལ། ཧྨྲཾཡུ་ རེ་དང་སྙིང་གར་ཡྨྲཾཡུ་གི་གོ་ཆ་དགོད་དོ། །དེའི་རྗེས་སུ་སྙིང་གར་ཁ་ཐུར་དུ་བལྟས་པའི་རྩ་འཁོར་གྱི་དབུས་སུ། ཐུར་དུ་ཕྱོགས་པའི་སྲོག་གི་རླུང་གི་དཀྱིལ་འཁོར་དང་དེའི་དབུས་སུ་རྣམ་ཤེས་ཀྱི་ངོ་བོ་ཧཱུཾ་དེའི་སྟེང་གི་མཐར་ཡུཾ་ཡུཾ་གྱི་དབུས་སུ་ཧི། ཧཱུཾ་ཡིག་གི་འོག་གི་མཐར་ཡུཾ་ཡུཾ་གྱི་སྟེང་དུ་ཀ་ཡིག་སྟེ། ཡི་གེ་ལྔ་པོ་ཐམས་ཅད་ཁ་དོག་སྔོན་པོ་མགོ་བོ་ཐུར་དུ་བསྟན་པའོ། །དེ་རྣམས་ཀྱི་གོམས་པ་སྔོན་དུ་བཏང་ནས་ཁྱད་པར་དུ་བུམ་པ་ཅན་བསྒོམ་པ་ནི། སྐྱིལ་ཀྲུང་བཅས་ནས་ལུས་དྲང་བོར་བྱས་ཤིང་མིག་སྣ་རྩེར་གཏད་ལ། སྔར་བཤད་པའི་ལྟེ་བར་བཀོད་པའི་ཨི་ཡིག་དམར་པོའི་འོད་ཟེར་གྱི་ལྕགས་ཀྱུས་ལུས་ཐམས་ཅད་ལ་སོང་བའི་ཁྱབ་བྱེད་ཀྱི་རླུང་བཀུག་སྟེ། ལྟེ་བའི་ནང་དགང་བར་བྱའོ། །དགང་བའི་རླུང་སྦྱོར་གྱིས་དུག་དང་གདུང་བ་དང་རིམས་ལ་སོགས་པ་ཞི་བར་བྱེད་པའི་འབྲས་བུ་མཐོང་བས་ནི། ལྟེ་བ་ཁོ་ནར་
རླུང་དང་སེམས་རབ་ཏུ་ཞུགས་པ་བུམ་པར་ཆུ་མི་འབོ་བར་གནས་པ་ལྟ་བུའི་བུམ་པ་ཅན་བྱའོ། །དེས་ནི་སྒོ་དགུ་པོ་རྣམས་ཀྱི་རླུང་རེངས་པར་འགྱུར་རོ། །དེ་ཡང་ཐོག་མར་ཟུག་མི་བསྐྱེད་ཙམ་གྱི་བར་དུ་རླུང་བཀག་སྟེ་བསྒོམས་ལ། རྩོལ་བས་རླུང་བཀག་པ་རྐྱང་བ་མིན་པར་རླུང་རང་ཤུགས་ཀྱིས་གནས་པའི་འགོ་རྩོམ་པ་ནས་རླུང་ནང་དུ་འཛིན་པ་ཡུན་རིང་དུ་བྱ། གཏོང་བའི་ཚེ་ཁ་ནས་མི་གཏོང་བར། སྣ་བུག་ནས་དལ་བུས་གཏོང་། དེའི་རྗེས་སུ་དལ་བུས་ལུས་ཐམས་ཅད་ལ་སོང་བའི་རླུང་གསང་གནས་ཀྱི་འཁོར་ལོའི་ལྟེ་བ་ཁོ་ནར་རིལ་བོ་གཅིག་ཏུ་བྱས་པ་འབྱུང་བ་དང་འཇུག་པ་དང་བྲལ་བའི་བུམ་པ་ཅན་བསྒོམ་པར་བྱའོ། །ཞེས་པ་རབ་ཏུ་ཞི་བའི་མཐར་ཐུག་པས་རླུང་དབང་དུ་བྱའོ། །དེ་ལྟར་བྱས་པས་སྟེང་དུ་འགྲོ་བའི་རླུང་གིས་རབ་ཏུ་སྦར་བའི་ལྟེ་བའི་ཨཾ་ཡིག་གི་མེ་གྱེན་དུ་སོང་བས་བསྣུན་པའི་མཐུས། སྙིང་གའི་པདྨ་ཁ་གྱེན་དུ་ཕྱོགས་པར་བྱས་ནས། དེར་སོན་པའི་རླུང་གི་དཀྱིལ་འཁོར་ཡི་གེ་དང་བཅས་པ་སྟེང་དུ་ཕྱོགས་ཏེ། ཧི་དང་ཀ་ཧཱུཾ་ཡིག་གི་སྟེང་དང་འོག་ཏུ་གནས་པའི་ཧི་འོག་དང་། ཀ་སྟེང་དུ་གནས་པར་གྱུར་པ་དག་མན་ངག་ཇི་ལྟ་བར་ནང་གི་བཟླས་པ་བྱེད་ཅིང་། བདེ་བ་ཆེན་པོའི་འཁོར་ལོ་ཇི་སྲིད་པར་དྲང་བར་བྱའོ། །དེའི་རྗེས་སུ་རླུང་འོག་ཏུ་འཇུག་པའི་འཁྱེར་བྱེད་ཀྱིས་སྔར་བཞིན་དུ་ཐམས་ཅད་འོག་ཏུ་ཕྱོགས་ཤིང་ཀ་དང་ཧི་དག་ཀྱང་། རང་གི་གནས་སུ་སླར་དྲང་བར་བྱའོ། །དེ་ལྟར་ཡུད་ཙམ་སོ་སོ་ལ་དེ་ལྟ་ཁོ་ནར་འདྲེན་པ་དང་སླར་འདྲེན་པ་དག་གིས་རྣམ་ཤེས་ཀྱི་བཞོན་པ་སྲོག་རླུང་དབང་དུ་བྱས་ཏེ། སྟེང་དུ་དབྱུང་བ་དེ་ཁོ་ནས་སྟེང་གི་སྒོ་ཕྱེ་ནས་འཕོ་
བར་རུང་བ་ཉིད་ཀྱི་ཆེད་དུ་ཕྱི་རོལ་ཏུ་ཡང་དེ་ལྟ་ཁོ་ནར་དེ་དག་གི་དབང་དུ་བྱའོ། །ཞེས་དང་། འཆི་བ་ནི་ཇི་ལྟར་བཤད་པའི་གཏུམ་མོའི་རྣལ་འབྱོར་གོམས་པ་རབ་ཏུ་གྱུར་པ་ཁོ་ན་ལས་ངེས་པར་བླུ་བར་བྱེད་ཅིང་། གཉེར་མ་ལ་སོགས་པ་སྤངས་ཏེ། དེ་ཁོ་ན་ལས་རླུང་དབང་དུ་གྱུར་པ་ལ་སོགས་པ། ཡོན་ཏན་རིན་པོ་ཆེའི་ཕུང་པོ་བསྐྱེད་པའི་ཕྱིར་ཞེས་མན་སྙེ་ལས་བཤད་དོ། །དེ་ལྟར་དབུགས་འབྱུང་རྔུབ་གཉིས་དང་མཉམ་པོར་སྲོག་གི་རླུང་ཡི་གེ་དང་བཅས་པ་སྤྱི་བོའི་བར་དུ་འདྲེན་པ་དང་། སླར་ཡང་སྙིང་གར་འབེབས་པ་ལ་རང་གི་ངང་གིས་འཇུག་ཐུབ་ཐུབ་ཀྱི་བར་དུ་གོམས་པར་བྱེད་པ་ནི། རྣམ་ཤེས་ཀྱི་བཞོན་པའི་སྲོག་རླུང་ལ་དབང་བྱེད་པའི་ཆེད་དུ་སྣང་ལ། མཚམས་དེ་ནས་སྤྱི་གཙུག་གི་ཕྱི་རོལ་ཏུའང་འབྱུང་འཇུག་གི་དམིགས་པ་སྔར་བཞིན་བྱ་སྟེ། སྲོག་གི་རླུང་དབང་དུ་བྱེད་པར་སྣང་སྟེ། དེ་ཉིད་ནི་རྣམ་ཤེས་ཀྱི་བཞོན་པའི་རླུང་གི་གཙོ་བོ་ཡིན་པའི་ཕྱིར། སྡོམ་འབྱུང་ལས། རྣམ་ཤེས་བཞོན་པ་རླུང་ཡིན་ཏེ། །གང་དང་གང་དུ་བགྲོད་པ་ཡི། །རླུང་གི་སྒོར་ནི་བསམ་བྱས་ན། །གྲོལ་བའི་དངོས་གྲུབ་སྟེར་བྱེད་པའི། །ཞེས་སྲོག་གི་རླུང་གི་དབང་དུ་བྱས་ནས་གསུངས་སོ། །ལུགས་འདི་ལ་སྦྱོང་བའི་དུས་སུ་དང་པོར་སྤྱི་གཙུག་ཏུ་འཕུལ་བ་ཁོ་ན་བྱས་པའི་མཐར། ལུས་ཀྱི་ནང་དུ་འབེབས་པ་མ་ཡིན་གྱི་དང་པོ་ནས་ཡང་འཕུལ་དང་མར་འབེབས་གཉིས་རེ་མོས་སུ་བྱེད་པས། སྔར་བཤད་པ་ལྟར་བཟླས་པ་གཉིས་ཀྱི་དམིགས་པ་རང་གི་ངང་གིས་འཇུག་ཐུབ་ཀྱི་བར་ལ་མཚམས་བྱས་པར་སྣང་གི །སྤྱི་གཙུག་ན་བ་ལ་སོགས་པའི་བར་ལ་བཟུང་བར་མི་སྣང་ངོ་། །སྔར་
ཡི་གེ་ཕྱེད་དང་གཉིས་སྐད་གསང་མཐོན་པོས་བརྗོད་ནས་གྱེན་དུ་སྐྱོད་པར་བྱེད་པ་སྐབས་འདིར་མན་སྙེ་ལས་མ་གསུངས་པ་ནི། སྦྱོང་བའི་དུས་སུ་དེ་མི་དགོས་པས། ལས་སྦྱོར་གྱི་དུས་སུ་བྱེད་པར་གསལ་ལ། ཧི་ཀའི་གྲངས་ཀྱང་སྡོམ་འབྱུང་ལས། ཉི་ཤུ་རྩ་གཅིག་རིམ་པ་ཡིས། །ཡི་གེ་ཕྱེད་དང་གཉིས་སྔར་བརྗོད། །ཅེས་གསུངས་པ་ལྟར་རོ། །གསུམ་པ་ཞར་ལ་གྲོང་འཇུག་དང་ཚར་བཅད་རྗེས་འཛིན་བསྟན་པ་ནི། སྔར་བཤད་པ་ལྟར་ཡེ་ཤེས་མཁའ་འགྲོ་མ་བསྒོམ་པ་དང་། ཡི་གེ་བཀོད་ནས་དབང་པོའི་སྒོ་རེངས་པར་བྱེད་པ་དང་། བུམ་པ་ཅན་སྒོམ་པ་སྔོན་དུ་བཏང་སྟེ་ཁྱོགས་དང་འཁྱེར་བྱེད་ཀྱི་བཟླས་པ་རང་གི་ངང་གིས་འཇུག་ཐུབ་པ་དེ་ནས། སྒྲུབ་པ་པོ་རང་གི་ལུས་ལས་རྣམ་པར་ཤེས་པ་བཏོན་ནས། ཕྱི་རོལ་ཏུ་རྣམ་པར་ཤེས་པ་སྲིད་པ་བར་དོ་ལ་སོགས་པར་སྤྲུལ་པ་དང་། ཕ་རོལ་གྱི་ལུས་ཀྱི་གྲོང་དུ་སྤྲུལ་པ་སྟེ། འཇུག་པར་འགྱུར་བ་དང་། གཞན་གྱི་སེམས་ལུས་ལས་ཕྲལ་ནས། རང་གི་ལུས་ལ་བཅུག་སྟེ་གསང་གནས་ཀྱི་མེ་ལ་བཟུང་བའི་རྗེས་སུ། གཞན་གྱི་སེམས་གཞན་གྱི་སྙིང་གར་བཅུག་ནས་རྗེས་སུ་སེམས་པ་ལ་རྣམ་པར་མཁས་པར་ཤེས་པར་བྱའོ། །དེ་ལྟར་ཚར་བཅད་དང་རྗེས་བཟུང་ནུས་པ་འདི་ནི། བདག་ཉིད་ཆེན་པོ་ཞེས་གཞན་ལ་རྟོགས་སུ་གཞུག་པར་བྱའོ། །རྟོགས་ན་ཕ་རོལ་བསྟན་པ་ལ་སོགས་པ་ལ་གནོད་པ་བྱེད་པ་སྤངས་ནས་ཕན་པ་བྱེད་པ་ལྟ་བུར་བྱེད་པར་འགྱུར་རོ། །ཚར་བཅད་དང་རྗེས་འཛིན་བྱེད་པའི་ཚུལ་ནི། གཏུམ་མོའི་ས་བོན་གྱི་ཐིག་ལེ་ལས་བྱུང་བའི་འོད་ཟེར་དང་བཅས་པ་འབར་བས། རང་གི་རྣམ་ཤེས་ཀྱི་ངོ་བོ་ཧཱུཾ་ཡིག་
ཨཱ་ལི་ཀཱ་ལིའི་ཕྲེང་བ་དང་ལྷན་ཅིག །སྣ་གཡས་ནས་བྱུང་སྟེ་བསྒྲུབ་བྱའི་སྣ་བུག་གཡོན་ནས་ཞུགས་ནས། སྙིང་གའི་ཆུ་སྐྱེས་སུ་སོང་བའི་འབར་བའི་རིན་པོ་ཆེའི་རྣམ་པ་ཅན་གྱི་རྣམ་ཤེས་ལ་ཁྱབ་པར་བྱས་ཏེ། རྣམ་ཤེས་དེ་དྲངས་ནས་བསྒྲུབ་བྱའི་སྣ་གཡས་པ་ནས་བྱུང་ཞིང་། རང་གི་སྣ་བུག་གཡོན་པ་ནས་ཞུགས་གསང་གནས་ཀྱི་མེར་བཅུག་ལ་བསྲེག་ཅིང་ཚར་བཅད་དོ། །དེའི་རྗེས་སུ་བསྒྲུབ་བྱ་གནོད་པ་བྱེད་པ་ལ་སོགས་པའི་བསམ་པ་ལོག་པ་དེ། མེ་དང་བྲལ་བའི་གསང་གནས་ཀྱི་རླུང་ལ་བཞག་པ་ལ་བདུད་རྩིའི་རྒྱུན་དཀར་པོ་རྣམས་ཀྱིས་དབང་བསྐུར་བ་ལས། ནད་ལ་སོགས་པ་རབ་ཏུ་ཞི་ཞིང་། སེར་པོ་རྣམས་ཀྱིས་ཡོན་ཏན་གྱི་ཚོགས་རྒྱས་ལ། དམར་པོ་རྣམས་ཀྱིས་དབང་དུ་བྱས་པ་དེ་ཁོ་ན་ལྟར་སྟོན་ནོ། །བཅུག་ནས་སྙིང་གའི་ཆུ་སྐྱེས་སུ་གནས་སུ་བཅུག་པས་རྗེས་སུ་འཛིན་ནོ། །ཨཱ་ལི་ཀཱ་ལིའི་ཕྲེང་བ་དང་ལྡན་པའི་རྣམ་ཤེས་འདོན་འཇུག་གི་དམིགས་པ་འདིར་མི་གསལ་ཡང་། སྡོམ་འབྱུང་ལས། རྣམ་ཤེས་དབྲོག་པའི་སྦྱོར་བ་དང་། །གཞན་ཡང་ཕ་རོལ་བགྲོད་པ་ལ། ཨ་ལི་ཀཱ་ལིའི་མཉམ་ལྡན་པར། །མཁས་པ་ཡིས་ནི་སྦྱར་བར་བྱ། །ཞེས་གསུངས་པའི་དོན་ནོ། །ཕ་རོལ་བགྲོད་པ་ནི་གཞན་གྱི་ལུས་ཀྱི་གྲོང་དུ་འཇུག་པ་ཡིན་ལ། དེ་ཡང་རང་གི་སེམས་ཀྱི་ངོ་བོ་ཧཱུཾ་ཡིག་ཨཱ་ལི་ཀཱ་ལིའི་ཕྲེང་བ་དང་བཅས་པ། རང་གི་ལུས་ལས་སྣ་བུག་གཡས་ནས་ཐོན་ནས། རོའི་སྣ་བུག་གཡོན་ནས་ཞུགས་ཏེ། སྙིང་གར་གནས་པ་ཡིན་ནོ། །འདི་ལ་བོད་ཀྱི་བླ་མ་འགའ་ཞིག་གིས་དམིགས་པ་མང་པོ་བཤད་ཀྱང་། རྒྱུད་ནས་འབྱུང་བའི་ཚུལ་ནི་
འདི་ཙམ་མོ། །བཞི་པ་ནི། ཡེ་ཤེས་མཁའ་འགྲོ་མ་སྒོམ་པ་དང་ཁྱོགས་དང་འཁྱེར་བྱེད་ཀྱི་བཟླས་པ་མཉམ་པར་བཞག་པ་སྟེ། རྩེ་གཅིག་པའི་སེམས་ཀྱིས་ནི། ལེགས་པ་སྟེ་གསེར་གྱི་སྒོ་ལ་སོགས་པའི་ལམ་ནི་བསམ་པར་བྱས་ན་འགྲུབ་པར་འགྱུར་བ་འདི་ལ་ཐེ་ཚོམ་མེད་ཅེས་དོན་བསྡུས་སོ། །འཕོ་བའི་རྗེས་ཐོགས་དེ་ནས་ཀྱང་ཡེ་ཤེས་གཟུགས་ཏེ། ཡིད་ཀྱི་རང་བཞིན་གྱི་ལུས་སུ་གྱུར་ནས་རང་དང་གཞན་གྱི་མུན་པ་འཇོམས་པའི་ཕྱིར་མར་མེ་བཞིན་དུ་དེ་ཁོ་ན་ཉིད་སྣང་བའི་སེམས་ཀྱིས་ཡུལ་རྣམས་ཀྱིས་སེང་གེ་བཞིན་དུ་དོགས་པ་མེད་པར་རྣམ་པར་རོལ་ཞིང་། རང་དང་གཞན་ལ་ཕན་པའི་ལས་བྱའོ། འདིར་སེང་གེ་རྣམ་རོལ་གྱི་ཕྱག་རྒྱ་བྱེད་པའི་གཞུང་ཞིག་ཡོད་པར་སྣང་སྟེ་འབྲོག་མི་དང་འགོས་འགྱུར་ལ་ཆད་དོ། དེའི་ཕྱིར་ཞེས་པ་འགོས་འགྱུར་ལ་མེད་ཅིང་། མན་ངག་སྙེ་མར་ཡང་བཤད་པ་མེད་དོ། །ལྔ་པ་ནི། འོ་ན་འདི་ཐམས་ཅད་ལེགས་པར་བཤད་པ་ཁོ་ན་སྟེ། འདི་འདྲ་བའི་ཆ་ཤས་ཀྱང་ལྟ་བ་གཞན་ལ་ཡོད་པ་མ་ཡིན་མོད། འོན་ཀྱང་བདེ་སྟོང་གི་དེ་ཁོ་ན་ཉིད་ལ་གོམས་པ་དང་ལྡན་པའི་གང་ཟག་ནི། དེ་ཁོ་ན་ལས་འདོད་པ་ཐམས་ཅད་འགྲུབ་པའི་ཕྱིར་ན་འཕོ་བའི་ཐབས་བྱས་པས་ཅི་ཞིག་བྱ་ཞེ་ན། ཉན་ཐོས་ལ་སོགས་ནི་ཐེག་པ་འདིར་རིགས་མ་ངེས་པའི་གང་ཟག་རྣམས་སོ། །དེ་རྣམས་སྐྱེ་བ་གཅིག་ལ་བདེ་སྟོང་གི་དེ་ཁོ་ན་ཉིད་ལ་ལྷག་པར་མོས་པ་བརྟན་པ་མ་ཡིན་པས། འདིར་འཕོ་བ་ལ་སོགས་པའི་དེ་ཉིད་ལེགས་པར་བཤད་པ་ནི་བསྒྲགས་པ་ཉིད་ཡིན་ནོ། །གང་དག་ཤིན་ཏུ་ཡུན་
རིང་པོར་བསོད་ནམས་བསགས་པའི་རིགས་ཆེན་པོ་སད་པའི་གང་ཟག་རྣམས་ནི། ཐེ་ཚོམ་དང་བཅས་པའི་དྲི་མས་མ་རྙོག་པ་ཉིད་ཀྱིས་ཤེལ་ལྟར་དག་པའི་སེམས་ནི་བརྟན་པར་བྱས་ནས་གང་ཟག་སྔ་མ་ལྟ་བུ་ལ་ཕན་པའི་ཆེད་དུ་གསུངས་པ་རྟོགས་ནས་སྤྲོས་པ་རྣམས་དོར་བར་བྱའོ། །མར་མེའི་རྣམ་པ་ལྟ་བུ་འོད་གསལ་བའི་སེམས་ཀྱིས་ཀྱང་སྔོན་དུ་སྤྲོས་པ་ཐམས་ཅད་དམིགས་ནས་ནི། སྤྲོས་པ་ཉིད་ནི་ཐམས་ཅད་རྫོགས་རིམ་གྱིས་སྤྲོས་པ་མེད་པར་བྱེད་དེ། སྟོང་པ་ཉིད་དང་སྙིང་རྗེ་དབྱེར་མེད་པའི་རྣལ་འབྱོར་ཁོ་ན་ལ་དམིགས་ནས་ནི། འཕོ་བ་ལ་སོགས་པས་འདི་དག་ཐམས་ཅད་ཡོངས་སུ་སྤོང་། དེ་ནི་བདེ་སྟོང་དབྱེར་མེད་ཀྱི་ལྷན་སྐྱེས་ཀྱི་ཡེ་ཤེས་ལ་གོམས་པ་ཤིན་ཏུ་བརྟན་པོ་བྱར་ཡོད་པ་རྣམས་ཀྱིས་འཕོ་བ་ལ་སོགས་པ་མ་བྱས་ཀྱང་། ལམ་དེ་ཉིད་བསྐྱངས་པས་ཆོག་པར་སྟོན་པ་ཡིན་གྱི་གང་ཡང་རུང་བ་མ་ཡིན་ནོ། །གཉིས་པ་ཡེ་ཤེས་ཀྱི་ཁྱད་པར་བསྟན་པ་ནི། སྔར་ལྷ་ལ་སོགས་པའི་འགྲོ་བ་རྣམས་ཀྱི་རྣམ་ཤེས་སྒོ་འདི་ནས་འཕོས་ན། འདིར་སྐྱེ་ཞེས་གསུངས་པ་ལས་འཕྲོས་ནས་ཀྱཻ་བཅོམ་ལྡན་འདས་ཞེས་བོས་ནས། ལྷ་ལ་སོགས་པའི་འགྲོ་བ་རྣམས་ཀྱི་ཡེ་ཤེས་ཏེ་རྣམ་ཤེས་ཀྱི་ཁྱད་པར་ཇི་ལྟ་བུ་ལགས་ཞེས་ཞུས་སོ། །འབྲོག་འགྱུར་ལས། གང་གི་ཡེ་ཤེས་ཁྱད་པར་པ་ལགས། ཞེས་འབྱུང་བ་ནི་འགྱུར་མ་ལེགས་པས། འགོས་འགྱུར་ལས། ཡེ་ཤེས་ཀྱི་ཁྱད་པར་གང་ལགས་ཞེས་འབྱུང་བ་ལྟར་བྱ་སྟེ། མན་ངག་སྙེ་མར་ཡང་དེ་ལྟར་དུ་བཤད་དོ། །དྲི་བ་དེའི་ལན་བཅོམ་ལྡན་འདས་ཀྱིས་བཀའ་སྩལ་པ། ཡེ་
ཤེས་ནི་ལྷ་དང་ལྷ་མ་ཡིན་དང་། ཡི་དྭགས་དང་དམྱལ་བ་དང་བྱོལ་སོང་གི་ཤེས་པ་སྟེ་རྣམ་པ་ལྔ་རུ་གསུངས་སོ། །འགྲོ་བ་དམན་པ་རྣམས་ཀྱི་སྤྱོད་ཡུལ་མ་ཡིན་པས་ན་གསང་བ་དང་། ཡུལ་ལ་སྤྱོད་པའི་ཤེས་པ་རྣམས་མེ་ལོང་བཞིན་དུ་དྭངས་ཤིང་། ཕལ་ཆེར་མི་དགེ་བ་མི་སྤྱོད་པའི་ཕྱིར། མེ་ལོང་ཡེ་ཤེས་ནི་ལྷའི་ཡེ་ཤེས་སོ། །ལྷ་མ་ཡིན་རྣམས་ཀྱི་ཡེ་ཤེས་ནི། ལྷའི་ཕུན་སུམ་ཚོགས་པ་ལ་མི་བཟོད་པ་འབར་བའི་ཁྲོ་བའི་སེམས་སོ། །ཡི་དྭགས་ཀྱི་ཡེ་ཤེས་བཀྲེས་པ་ལ་སོགས་པའི་སྡུག་བསྔལ་གྱིས་འཁྲུགས་པས། དམན་པའམ་ཞན་པའི་ཡིད་ཅན་ནོ། །འགོས་འགྱུར་ལས། ཡི་དྭགས་ཡེ་ཤེས་ཞན་པ་སྟེ། །འབྱུང་བ་མན་སྙེ་དང་མཐུན་ནོ། །དམྱལ་བ་པ་རྣམས་ཀྱི་ཡེ་ཤེས་སམ་ཤེས་པ་ནི། གཤིན་རྗེའི་སྐྱེས་བུ་རྣམས་ཀྱི་ལས་མི་མཉམ་པའི་སྡུག་བསྔལ་གྱིས་ངུ་བ་དང་། འཇིགས་པས་ནོན་པའི་སེམས་རྣམས་སོ། །བྱོལ་སོང་སྟེ་དུད་འགྲོ་རྣམས་ཀྱི་ཡེ་ཤེས་ནི། ཤིན་ཏུ་བརྟན་པའི་གཏི་མུག་དང་རྨོངས་པ་དང་ལྡན་པའི་སེམས་སོ། དེ་ལྟར་ལྔ་ཡི་དབྱེ་བས་ཡེ་ཤེས་ལྔར་བསྒྲགས་སོ། །མི་རྣམས་ཀྱི་ཡེ་ཤེས་ནི་ཤིན་ཏུ་དང་བ་དགེ་བ་ལ་གཞོལ་བ་ཡིན་པས། ལྷའི་ཡེ་ཤེས་ལས་ཟུར་དུ་མ་སྨོས་སོ། །འོ་ན་ཤིང་རྣམས་ནི་སེམས་པ་ཅན་ཡིན་ཏེ། མཚན་མོ་ཉལ་བའི་ཕྱིར་རོ་ཞེས་ཕྱོགས་ཀྱི་གོས་ཅན་གཅེར་བུ་པ་རྣམས་འདོད་པའི་ཡེ་ཤེས་ཀྱི་ཁྱད་པར་དེ་ཇི་ལྟ་བུ་ཡིན་ཞེ་ན། དེ་འདྲ་བ་ནི་ཅི་ཡང་མེད་དེ། ཤིང་རྣམས་ལ་སེམས་པ་མེད་པ་ཁོ་ནའི་ཕྱིར་རོ་ཞེས་གསུངས་པ་ནི། རྒྱུན་རིང་དུ་གནས་པ་ཤིང་སྡོང་བོ་ལ་སོགས་པ་བརྟན་པ་
དང་། ལ་སོགས་པས་བསྡུས་པ་དུས་ཐུང་ངུར་གནས་པ་གློག་ལ་སོགས་པ་ནི་སེམས་མེད་པ་ཁོ་ནའོ། །ཉལ་བ་ལ་སོགས་པའི་སྒྲུབ་བྱེད་ནི་ཕྱོགས་གཞན་དུ་ཤིང་རྟ་ཆེན་པོ་རྣམས་ཀྱིས་སུན་ཕྱུང་ཟིན་ཏོ། །སྔར་བཤད་པའི་རྣམ་པ་དེ་ལྟ་བུའི་ཤེས་པ་ཅན་འཁོར་བ་པ་ལྷ་ལ་སོགས་པ་འདི་རྣམས་ནི་གླེན་པ་སྟེ། མ་རིག་པས་ཡང་དག་མ་ཡིན་པ་སྒྲོ་བཏགས་པའི་འདོད་ཆགས་ལ་སོགས་པས་ངན་པར་སེམས་པའི་ཕྱིར་རོ། །ཁེབས་པ་ནི་འདོད་ཆགས་ལ་སོགས་པས་ཁྱབ་པས་ལུས་ཀྱིས་ཉེས་པར་སྤྱད་པ་སྤྱོད་པའི་ཕྱིར་རོ། །ལྐུགས་པ་ནི་ཡང་དག་པའི་དོན་གྱི་དེ་ཁོ་ན་ཉིད་སྨྲ་བར་མི་ནུས་པའི་ཕྱིར་རོ། །མན་སྙེ་འགྱུར་གསར་ལས། གླེན་པ་ཁེབས་པ་ལྐུགས་པ་རྣམས། ཞེས་འབྱུང་ངོ་། །རྒྱུ་མཚན་དེ་རྣམས་ཀྱི་ཕྱིར་བྱིས་པ་སྟེ། སེམས་ཀྱིས་བསམ་པ་ངན་པ་སེམས་ཤིང་ལུས་ཀྱིས་བྱ་བ་ངན་པ་བྱེད་ལ། ངག་གིས་སྨྲ་བ་ངན་པ་སྨྲ་བའི་ངང་ཚུལ་ཅན་ནི་བྱིས་པའོ། །ཞེས་གསུངས་སོ། །དེ་རྣམས་ཀྱི་བྱིས་པའི་ཤེས་པའི་ཤེས་པ་སྟེ་བསམ་པ་ཅན་ནི་འཁོར་བ་པའོ། །གསུམ་པ་རྣལ་འབྱོར་གྱི་བསྟན་བཅོས་ཀྱི་ཆེ་བ་བསྟན་པ་ནི། དེ་འདྲ་བའི་འཁོར་བའི་བག་ཆགས་སྤོང་བར་འདོད་པས། དེ་ཁོ་ན་ཉིད་ཁྱད་པར་ཅན་བདེ་སྟོང་དབྱེར་མེད་པར་སྦྱོར་བའི་ཡེ་ཤེས་ནི། ཤེས་རབ་དང་ཐབས་དབྱེར་མེད་པ་གསལ་བར་བྱེད་པའི་ཕྱིར་རྣལ་འབྱོར་དང་། ཉོན་མོངས་པའི་དགྲ་འཆོས་པ་དང་ངན་འགྲོའི་འཇིགས་པ་ལས་སྐྱོབ་པས་ན་བསྟན་བཅོས་ཏེ། རྒྱུ་རྒྱུད་དང་ཐབས་རྒྱུད་དང་འབྲས་བུའི་རྒྱུད་གསུམ་བསྡུས་པ་རྫོགས་པ་སྙིང་པོའི་དོན་རབ་ཏུ་གསལ་བར་བྱེད་པས་ན་ཁྱད་པར་ཏེ། རྒྱུད་གཞན་རྣམས་ལས་ཁྱད་པར་དུ་འཕགས་པ་
དཔལ་ཡང་དག་པར་སྦྱོར་བའི་རྒྱུད་འདི་ལས་རྟོགས་པར་བྱའོ། །རྒྱུད་འདིའི་ཆེ་བའི་བདག་ཉིད་གསལ་བར་བྱེད་པ་གཞན་གསུངས་པ་ནི། རྣལ་འབྱོར་གྱི་བསྟན་བཅོས་འདི་སྐྱེ་བ་བྱེ་བ་སྟོང་ཕྲག་ཏུ་ཤིན་ཏུ་རྙེད་དཀའ་བ་སྟེ། འདུས་པའི་ལེའུ་བཅུ་བདུན་པ་ལས་བཤད་པ་ལྟར་བཅོམ་ལྡན་འདས་མར་མེ་མཛད་ཚུན་ཆད་དུ་སངས་རྒྱས་ཀྱི་ཞིང་འདིར་བསྐལ་པ་ཤིན་ཏུ་མང་པོ་རྣམས་ལ་རྒྱུད་མ་ལུས་པའི་སྙིང་པོ། རྒྱུད་སྡེ་རིན་པོ་ཆེ་འདི་བདག་ཁོ་ནས་བཤད་ཀྱི། སངས་རྒྱས་གཞན་རྣམས་ཀྱིས་ནི་མ་ཡིན་ནོ། །དེ་ཕྱིར་ང་ཡིས་ཏེ་བདག་གིས་འདིར་བཤད་པའི་གཉིས་སུ་མེད་པའི་ཡེ་ཤེས་ཀྱིས་བསྐུལ་བའི་རྣལ་འབྱོར་གྱི་བསྟན་བཅོས་འདི་ཁོ་ན་ལ། ཀྱེ་ཐར་པ་འདོད་པ་རྣམས་འབད་པས་དད་པ་བསྐྱེད་པར་བྱས་ཏེ་འཇུག་པར་གྱིས་ཤིག་དང་། མཁས་པ་སྟེ་དེ་ཁོ་ན་ཉིད་ཁྱད་པར་ཅན་ཤེས་པ་དང་ལྡན་པ་ཤིན་ཏུ་བར་འགྱུར་རོ། །ཕྱི་རོལ་བསྟན་བཅོས་སྒྲ་ལ་སོགས། །ཞེས་འབྱུང་བ་ཡང་། མན་སྙེར། ཕྱི་རོལ་བསྟན་བཅོས་སྒྲ་བཀོད་པ་ཞེས་པ་ལྟར་ལེགས་པས་འབྱུང་བ་ལྷ་མོ་ཨུ་མའི་བདག་པོ་དབང་ཕྱུག་ལ་སོགས་པས་བཤད་པ། བླ་ན་མེད་པའི་དེ་ཁོ་ན་ཉིད་ལས་ཕྱིར་ཕྱོགས་པ་ཕྱི་རོལ་གྱི་བསྟན་བཅོས་རྒྱུད་ལ་སོགས་པའི་སྒྲ་བཀོད་པ་རྣམས་ལས། དེ་ཁོ་ན་ཉིད་ཁྱད་པར་ཅན་གྱི་ཡེ་ཤེས་བཙལ་ཡང་རྙེད་པ་མིན་ཏེ། དེ་རྣམས་དཔེར་ན་གར་གྱི་གནས་ཀྱི་ས་གཞི་ལ། གསར་དུ་ཚིག་བཀོད་པ་འཐད་པ་དང་བྲལ་བ་ཉིད་ཀྱིས་ན། ལྟད་མོ་བ་རྣམས་རངས་པ་ཙམ་གྱིས་ཡིད་ཆགས་པར་བྱེད་པའི་ཕྱིར་གར་མཁན་གྱི་ཚིག་དང་འདྲའོ། །ཁ་དོག་
བཞིན་ཞེས་པ་མེད་པར་གར་གྱི་གནས་ཀྱི་གཞི་དང་མཚུངས་ཞེས་པའི་དོན་དུ་འགྲེལ་པས་བཤད་དོ། །དེས་ན་སྔར་བཤད་པའི་རྣལ་འབྱོར་གྱི་བསྟན་བཅོས་ཁྱད་པར་ཅན་རྗེས་སུ་བཙལ་བ་ཁོ་ན་ལས། འགོས་འགྱུར་ལས། སྤྱོད་དང་གྲོལ་བའི་འབྲས་བུ་ཐོབ། ཅེས་འབྱུང་བ་ལྟར། འདོད་པའི་ཡོན་ཏན་གྱི་ཡུལ་ལ་ཡང་དག་པར་སྤྱོད་པ་དང་རྣམ་པར་གྲོལ་བའི་འབྲས་བུ་འཐོབ་པའི་ཆེད་དུ་རྣལ་འབྱོར་ལ་འབད་པས་བསྒྲུབ་པར་བྱའོ། གཉིས་པ་དོན་བསྡུ་བ་ནི། དོན་འདི་ཁོ་ན་སྙིང་པོ་ལས་ཏེ་བསྐྱེད་པའི་རིམ་པ་ལས་སྙིང་པོ་ལ་རྫོགས་པའི་རིམ་པའི་སྙིང་པོ་མཆོག །རྣམ་འབྱོར་ཞལ་མཆོག་སྟེ་ཞལ་མཛེས་པ་ཁྱོད་ལ་བཤད་དོ། །གཉིས་པ་རབ་ཏུ་བྱེད་པའི་མཚན་བསྟན་པ་ནི། ཁ་སྦྱོར་ལ་བརྟག་པ་བཅུ་ཡོད་པའི་བརྒྱད་པ་ལས་མུ་སྟེགས་ཅན་གྱི་བདེ་འགྲོ་དང་། ངན་འགྲོར་འཕོ་བའི་ལམ་ཕྱིན་ཅི་ལོག་ཏུ་སྟོན་པའི་ཡེ་ཤེས་ཏེ་ཤེས་པ་འཇིག་པར་བྱེད་པ་ཞེས་བྱ་བ་སྟེ་རབ་ཏུ་བྱེད་པ་གསུམ་པའོ། །འགོས་འགྱུར་ལས། མུ་སྟེགས་ཅན་གྱི་ཡེ་ཤེས་ཀྱི་ཚུལ་བསྟན་པ་ཞེས་འབྱུང་ཡང་སྔ་མ་ལེགས་ལ། མན་སྙེར་མཚན་དེ་ལ་བཤད་པ་མ་བྱུང་ངོ་། །འཕོ་བའི་རྣམ་གཞག་རྣམས་ལེགས་པར་དམིགས་མ་ཕྱེད་པའི་འཕོ་བ་ལ་ཡང་ཕན་ཡོན་ཅུང་ཟད་འབྱུང་མོད་ཀྱང་། གོ་བས་ལེགས་པར་དམིགས་ཕྱེད་པ་དང་ཁྱད་པར་ཤིན་ཏུ་ཆེའོ། །དེའི་ཕྱིར་རྡོ་རྗེ་མཁའ་འགྲོ་དང་། གདན་བཞི་དང་། སྡོམ་འབྱུང་དང་། ཞལ་ལུང་དང་། ཁ་སྦྱོར་དང་། དེ་དག་གི་འགྲེལ་པ་རྣམས་ལ་བརྟེན་ནས་གཞུང་དེ་རྣམས་ལེགས་པར་གུང་བསྒྲིགས་ཏེ་མཁས་པ་ཆེན་པོ་ཨ་བྷ་ཡཱ་ཀ་རའི་བཤད་པ་ཞིབ་པར་མཛད་པའི་རྗེས་སུ་འབྲངས་
ཏེ་བཤད་པ་ཡིན་པས། བསྟན་བཅོས་འདི་ལ་བརྟེན་ནས་འཕོ་བའི་གནད་རྣམས་ལེགས་པར་ཤེས་པར་བྱས་ཏེ། འཕོ་བའི་གདམས་ངག་ལ་སྦྱངས་ན་འཕྱུག་པ་མེད་པའི་གདམས་པར་ཡོད་པས་སྒོ་ཁྱད་པར་ཅན་སྤྱི་གཙུག་གསེར་གྱི་སྒོ་འབྱེད་པར་ནུས་ལ། དེ་མ་ནུས་ནའང་སྒོ་འབྲིང་པོ་ནས་འཕོས་པའི་རྟེན་ཁྱད་པར་ཅན་དུ་སྐྱེས་ནས། བླ་ན་མེད་པའི་ལམ་རྣམས་ལེགས་པར་བགྲོད་ནུས་པར་འགྱུར་རོ། །ཤིན་ཏུ་ཟབ་པའི་རྒྱུད་སྡེ་མང་པོ་ནས། །གསུངས་པའི་འཕོ་བའི་གནད་རྣམས་དབྱེ་དཀའ་བའི། །རྡོ་རྗེའི་ཚིག་གིས་དམ་དུ་བཅིངས་པ་རྣམས། །མཁས་པ་འཇིགས་མེད་འབྱུང་གནས་རྗེས་འབྲངས་ཤིང་། །རྡོ་རྗེ་མཁའ་འགྲོ་རྡོ་རྗེ་གདན་བཞི་ཡི། །འགྲེལ་པ་སོགས་ལ་བརྟེན་ནས་ལེགས་པར་བཤད། །འདིར་ནི་ནོངས་གང་སྙིང་ནས་བདག་གིས་འཆགས། དགེ་བས་འགྲོ་ཀུན་ཡང་དག་ལམ་བགྲོད་ཤོག །ཅེས་རྒྱུད་ཀྱི་རྒྱལ་པོ་ཁ་སྦྱོར་གྱི་བརྟག་པ་བརྒྱད་པའི་རབ་བྱེད་གསུམ་པ། རྣམ་ཤེས་གོང་དུ་འཕོ་བའི་རྒྱ་ཆེར་བཤད་པ། གསེར་གྱི་སྒོ་འབྱེད་པ་ཞེས་བྱ་བ། རྒྱུད་གདན་བཞི་དང་། ཞལ་གྱི་ལུང་རྣམས་ལེགས་པར་གུང་བསྒྲིགས་ཤིང་། དེ་དག་གི་འགྲེལ་པ་རྣམས་ལ་འདྲིས་པར་བྱས་ནས། མང་དུ་ཐོས་པའི་དགེ་སློང་ཤར་ཙོང་ཁ་པ་བློ་བཟང་གྲགས་པའི་དཔལ་གྱིས་འབྲོག་རི་བོ་ཆེ་དགའ་ལྡན་རྣམ་པར་རྒྱལ་བའི་གླིང་དུ་སྦྱར་བའི་ཡི་གེ་པ་ནི་སྡོམ་བརྩོན་དགེ་སློང་བསོད་ནམས་བློ་གྲོས་སོ། །འདིས་ཀྱང་བསྟན་པ་རིན་པོ་ཆེ་ཕྱོགས་དུས་ཀུན་ཏུ་རྒྱས་པར་
བྱེད་ནུས་པར་གྱུར་ཅིག །སྭ་སྟི། རྒྱལ་པད་ཚལ་ཕན་བདེའི་དྲི་བསུང་ཅན། །བཤད་སྒྲུབ་འདར་རྒྱས་རྣམ་གྲོལ་སྦྲང་རྩའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ། །སརྦ་མངྒ་ལཾ། །