དཔལ་རྡོ་རྗེ་འཇིགས་བྱེད་ཀྱི་འཕྲིན་ལས་བཞིའི་སྦྱིན་སྲེག་དངོས་གྲུབ་ཀྱི་རྒྱ་མཚོ།
དཔལ་རྡོ་རྗེ་འཇིགས་བྱེད་ཀྱི་འཕྲིན་ལས་བཞིའི་སྦྱིན་སྲེག་དངོས་གྲུབ་ཀྱི་རྒྱ་མཚོ་བཞུགས་སོ། །
དཔལ་རྡོ་རྗེ་འཇིགས་བྱེད་ཀྱི་འཕྲིན་ལས་བཞིའི་སྦྱིན་སྲེག་དངོས་གྲུབ་ཀྱི་རྒྱ་མཚོ་ཞེས་བྱ་བ། བླ་མ་དང་འཇམ་པའི་རྡོ་རྗེའི་ཞབས་ལ་གུས་པས་ཕྱག་འཚལ་ལོ། །རྣམ་དག་ཚུལ་ཁྲིམས་འཇུག་ངོགས་ཁྲུས་ལ་བརྩོན། །ཁྲེལ་ཡོད་ཤིང་ཤུན་གོས་གྱོན་བཟོད་མཆོག་གི །སེ་རལ་ཕྲེང་དཀར་དད་པའི་རིལ་བ་ཐོགས། །བརྩོན་འགྲུས་རལ་བའི་ཁུར་བཅིངས་སྙིང་རྗེ་ཡི། །གཡང་གཞི་ནག་པོ་འཆང་ཞིང་ཐེག་ཆེན་གྱི། །དབེན་པའི་ནགས་ཚལ་དམ་པར་རབ་ཏུ་རྒྱུ། །ཏིང་འཛིན་རྩ་བ་འབྲས་བུའི་ཁ་ཟས་ཅན། །ཡིན་ལུགས་འབྱེད་པའི་ཤེས་རབ་མེ་ཐབ་ཏུ། །ཉེས་པའི་ཡམ་ཤིང་མ་ལུས་བསྲེག་མཛད་པའི། །
དྲང་སྲོང་ཆེན་པོ་རྨད་བྱུང་སྦྱིན་སྲེག་མཁན། །དེ་ཡི་ཞབས་ལ་སྤྱི་བོས་ཕྱག་བྱས་ནས། །སྦྱིན་སྲེག་གསུམ་གྱི་དབྱེ་བ་བདག་གིས་བཤད། །གསེར་བཟང་བཞུས་པའི་ཁུ་བ་འཐོར་འདྲ་ཡི། །རབ་མཆོག་མེ་ལ་མཆོད་སྦྱིན་བྱས་པ་ཡིས། །རང་གི་ལྷ་ལ་དགྱེས་པ་བསྐྱེད་འདོད་རྣམས། །རྩེ་གཅིག་ཡིད་ཀྱིས་གུས་པ་བསྐྱེད་དེ་ཉོན། །འདིར་དངོས་གྲུབ་ཀྱི་རྩ་བ་སྦྱིན་སྲེག་གིས་རང་གི་ལྷ་མགུ་བར་བྱེད་པ་འཆད་པ་ལ་དྲུག །སྦྱིན་སྲེག་བྱས་པའི་དགོས་པ། བྱེད་པའི་གནས་དང་དུས། བྱེད་པ་པོ་དང་གང་ལ་བྱ་བའི་ཡུལ། བཞིར་སྡུད་པའི་རྒྱུ་མཚན་དང་བྱ་བའི་ཚུལ། སྦྱིན་སྲེག་གི་རབ་
ཏུ་དབྱེ་བ། ཕྱེ་བ་སོ་སོའི་དོན་བཤད་པའོ། །དང་པོ་ནི། སྔགས་པས་ཕན་ཡོན་ཅི་ཞིག་མཐོང་ནས་སྦྱིན་སྲེག་གི་ལས་ལ་འཇུག་པ་ཡིན་སྙམ་ན། བྱང་ཆུབ་སེམས་དཔའ་གསང་སྔགས་ཀྱི་སྒོར་སྤྱོད་པས་ནི་ཞི་བ་ལ་སོགས་པའི་ལས་རབ་འབྱམས་ཀྱིས་རང་གཞན་གྱི་དོན་བསྒྲུབ་དགོས་ལ། དེ་ནི་བསྒོམ་པ་དང་བཟླས་པས་རང་གི་ལྷ་ཉེ་བར་བྱས་པ་མེད་པ་མ་ཡིན་ཞིང་ལྷའི་ཐུགས་བསྐུལ་བའི་བཟླས་པའི་ཆད་ལྷག་གི་སྐྱོན་ཡང་སྦྱིན་སྲེག་གིས་དག་པར་བྱེད་ཅིང་བསྒོམས་པས་རང་ལ་ལྷ་ཉེ་བར་གྱུར་པ་ཡང་སྦྱིན་སྲེག་གིས་ལྷ་ཚིམ་པར་བྱས་པ་ལ་བལྟོས་པའི་ཕྱིར་སྦྱིན་སྲེག་ལ་བསྔགས་པ་མཛད་དེ། སཾ་པུ་ཊ་ལས། སྦྱིན་སྲེག་ལྷ་རྣམས་ཚིམ་པར་བྱེད། །ཚིམ་པ་ལས་ནི་དངོས་གྲུབ་སྩོལ། །སྔགས་ནི་ལྷག་གམ་མ་ཚང་ན། །ཐམས་ཅད་སྦྱིན་སྲེག་དག་གིས་སྐོང་། །དེ་བས་སྐུ་གསུམ་མཆོག་བསྐྱེད་པས། །སྦྱིན་སྲེག་གི་ནི་བསྔགས་པ་མཛད། ཅེས་སོ། །སྦྱིན་སྲེག་གིས་ཞི་སོགས་ཀྱི་དངོས་གྲུབ་བཞི་བསྒྲུབ་པ་ནི་རྒྱུད་ཕལ་ཆེ་བ་ལས་གསུངས་ལ། རིག་པ་མཆོག་ལ་སོགས་པ་ལས་ནི་ཚེའི་རིག་འཛིན་ལ་སོགས་པ་དངོས་གྲུབ་ཁྱད་པར་ཅན་མང་པོ་ཡང་སྦྱིན་སྲེག་གིས་འགྲུབ་པར་གསུངས་སོ། གཉིས་པ་ནི། སཾ་པུ་ཊ་ལས། ཕྱོགས་ཀྱི་ཆ་ནི་བཤད་པར་བྱ། །ཤར་གྱི་ཕྱོགས་སུ་ཞི་བ་ཡིན། །ལྷོ་ཡི་ཕྱོགས་སུ་མངོན་སྤྱོད་ཉིད། །ནུབ་ཏུ་དབང་དང་དགུག་པ་སྟེ། །བྱང་དུ་རྒྱས་པའི་ཐབ་ཁུང་ཉིད། ཅེས་གསུངས་པ་ལྟར་བྱ་བའམ།
ཡང་ན་འོད་ཀྱི་སྙེ་མ་ལས་དཀྱིལ་འཁོར་གྱི་ཁང་བ་ལ་སོགས་པའི་ཤར་ལ་སོགས་པའི་ཕྱོགས་བཞིར་རིམ་པ་བཞིན་དུ་ཞི་བའི་དང་། རྒྱས་པའི་དང་དབང་དང་དེའི་དགུག་པའི་དང་མངོན་སྤྱོད་དང་དྲག་པོའི་དགུག་པའི་ཐབ་བྱ་བར་གསུངས་པ་ལྟར་གཞན་མང་པོས་ཀྱང་བཤད་པ་བཞིན་བྱའོ། །ཉིན་མོ་འབྱུང་གནས་ཀྱིས་དབང་ནི་དཀྱིལ་འཁོར་གྱི་ཤར་ནུབ་གང་རུང་དང་དབང་གི་དགུག་པ་ནི་དེའི་ནུབ་ཉིད་དུ་བྱ་བར་བཤད་ཅིང་གཞན་འདྲའོ། །འོད་སྙེར་རྨོངས་རེངས་ཀྱི་ཐབ་བྱང་ཤར་དང་སྐྲོད་པའི་ཐབ་ཤར་ལྷོ་དང་དབྱེ་བའི་ཐབ་ལྷོ་ནུབ་ཏུ་བྱ་བར་བཤད་ཀྱང་འདིར་དེ་རྣམས་ཀྱང་བྱང་དུ་བྱའོ། །ལས་ཐམས་ཅད་པའི་ཐབ་རྣམས་ནི་རྒྱས་པ་ལ་ལས་ཐམས་ཅད་པའི་ཐབ་དཀྱིལ་འཁོར་གྱི་ཤར་ལྷོ་གཉིས་གདམ་ང་ཅན་དུ་ཉིན་མོ་འབྱུང་གནས་ཀྱིས་བཤད་ཀྱང་ཤཱནྟི་པས་དཀྱིལ་འཁོར་གྱི་ལྷོར་བྱེད་པར་བཤད་པས་ལས་སོ་སོ་བ་དང་འདྲའོ། །སྦྱིན་སྲེག་བྱ་བའི་དུས་ནི་དགྲ་ནག་ལས། ཚེས་གཅིག་ལ་ནི་ཞི་བ་བྱ། །ཟླ་བ་ཉ་ལ་རྒྱས་པ་སྟེ། །བཅུ་བཞི་ལ་ནི་མངོན་སྤྱོད་དོ། །དབང་གི་ལས་ནི་ཚེས་ བརྒྱད་ལའོ། ཞེས་གསུངས་ཏེ། གསུམ 
་པ་ནི་མར་ངོ་དང་བཞི་པ་ནི་ཡར་ངོ་ལ་འགྲེལ་པས་བཤད་དོ། །དཀར་པོའི་ཚེས་གཅིག་ནི་དེ་ནས་བརྩམས་ཏེ་བྱ་བར་འོད་སྙེ་ལས་བཤད་པ་བཞིན་ཡིན་ཏེ། ལེགས་གྲུབ་ལས། ཞི་བར་གྱུར་པས་ཞི་བ་ཡི། །བཟླས་པའམ་ཡང་ན་སྦྱིན་སྲེག་བྱ། །ཟླ་བ་ཡར་
གྱི་ཚེས་གཅིག་ནས། །ལས་རྣམས་རབ་ཏུ་བརྩམ་པར་བྱ། ཞེས་སོ། །དེ་རྣམས་སྤྱིར་ཞི་བའི་དུས་ལ་འདྲ་མོད་ཀྱང་དེ་དག་གི་སྲོད་རྣམས་ནི་ཞི་བ་བསྒྲུབ་པའི་དུས་ཁྱད་པར་ཅན་དང་དེའི་རྒྱུ་མཚན་ཡང་ལེགས་གྲུབ་ལས། བྱེ་བྲག་ཏུ་ནི་སྲོད་ལ་སྟེ། །དེ་ནི་ཞི་བའི་ལས་ཀྱི་དུས། །གནས་གཙང་མ་ཡི་ལྷ་རྣམས་དག །དེ་ནི་ཀུན་ཏུ་གཟིགས་པས་ན། །ལས་རྣམས་མྱུར་དུ་འགྲུབ་པར་འགྱུར། །དེ་བས་དེར་ནི་གུས་བརྩམ་མོ། ཞེས་སོ། །རྒྱས་པའི་དུས་ཀྱང་དེ་ནས་འགོ་རྩོམ་པ་ཡིན་ཏེེ། ལེགས་གྲུབ་ལས། རྒྱས་པ་དག་གིས་རྒྱས་པ་ཡི། །བཟླས་པའམ་ཡང་ན་སྦྱིན་སྲེག་བྱ། །ཟླ་བ་ཉ་ནས་ཀུན་བརྩམས་ཏེ། །ཕྱི་མའི་ཉ་ཡི་བར་དུ་བྱ། ཞེས་སོ། །དུས་དེ་རྣམས་ཐམས་ཅད་ལ་རྒྱས་པ་བྱས་པས་ཆོག་མོད་ཀྱང་དེའི་དུས་ཁྱད་པར་བ་སྔ་དྲོ་ཡིན་པ་དང་། དེའི་རྒྱུ་མཚན་ཡང་དེ་ཉིད་ལས། རྒྱས་པ་དག་གི་ལས་རྣམས་ལ། །བྱེ་བྲག་ཏུ་ནི་སྔ་དྲོ་ཤིས། ཞེས་དང་། ལྷ་རྣམས་མ་ལུས་པ་དག་ཀྱང་། །དེ་ཡི་དུས་སུ་རྒྱུ་བས་ན། །ལས་སུ་བྱ་བ་ཐམས་ཅད་ལ། །དུས་དེ་ཁོ་ན་རབ་ཏུ་ཤིས། །ནངས་པར་དུས་ན་ལྷ་རྣམས་ནི། །ཡིད་དགར་གྱུར་ནས་མཆོག་སྦྱིན་མཛད། ཅེས་སོ། །དབང་དང་དེའི་དགུག་པ་ལ་མཚོ་སྐྱེས་ཀྱིས་དགོངས་ཁ་དང་མི་ཐུབ་ཟླ་བས་མཚན་ཕྱེད་དང་རིན་ཆེན་འབར་བ་ལས་ཉིན་ཕྱེད་ལ་བྱ་བར་བཤད་ཅིང་། འོད་སྙེར་མཚན་ཕྱེད་དང་གཞན་དུ་ཡང་བྱ་བར་གསུངས་པས་དེ་དག་ཐམས་ཅད་ལ་བྱའོ། །དྲག་པོ་ལ་མར་གྱི་བཅུ་
བཞི་ནི་མཚོན་པ་ཙམ་སྟེ། ལེགས་གྲུབ་ལས། ཁྱད་པར་དུ་ནི་མར་གྱི་ངོ་། །ཉི་མའི་གུང་ངམ་ནམ་ཕྱེད་ན། །དྲག་ཤུལ་སྤྱོད་པ་བརྩམ་པར་བྱ། ཞེས་སོ། །དེར་བྱེད་པའི་རྒྱུ་མཚན་ཡང་དེ་ཉིད་ལས། གང་ཕྱིར་དེ་ན་ཡི་དྭགས་དང་། །ཤ་ཟ་འབྱུང་བོ་སྲིན་པོའི་ཚོགས། །དྲག་པོ་རྣམས་ནི་བྱིན་རློབ་པས། །དེ་ཕྱིར་དེ་ན་ལས་རྣམས་འགྲུབ། ཅེས་གསུངས་ཤིང་། ཡང་ན་ནམ་ཁྲོས་པའི་དུས་ཉིད་ན་བྱ་སྟེ་དྲག་པོའི་ལྷས་ཁྲོས་པ་ལ་བྱིན་གྱིས་རློབ་པའི་ཕྱིར་རོ་ཞེས་ཀྱང་གསུངས་སོ། །དབང་གི་དུས་ཀྱི་རྒྱུ་མཚན་ཡང་གཞན་གསུམ་པོའི་རྒྱུ་མཚན་ལས་དཔགས་ཏེ་ཤེས་པར་བྱའོ། །གསུམ་པ་ནི། སྔོན་དུ་བཟླས་པ་ཅི་ཙམ་ཞིག་སོང་བ་དགོས་པ་ནི། ཁ་སྦྱོར་ལས། དང་པོར་སྔགས་པས་འབུམ་བཟླས་ནས། །ཕྱིས་ནས་ལས་ནི་ཡང་དག་བརྩམ། །ཞེས་གསུངས་ཏེ། དབང་བསྐུར་བ་ཐོབ་ཅིང་དམ་ཚིག་དང་སྡོམ་པ་བསྲུང་བ་རང་གི་ལྷའི་སྔགས་འབུམ་གྱི་བཟླས་པ་དང་ལྷ་བསྒོམ་པའི་བསྙེན་པ་སྔོན་དུ་སོང་བ་ཞིག་གིས་སྦྱིན་སྲེག་བྱའོ། །ལས་བཞི་གང་ལ་བྱ་བའི་བསྒྲུབ་བྱ་ནི་ཉིན་མོ་འབྱུང་གནས་ཀྱིས་བཤད་པ་ལྟར་ཞི་རྒྱས་ནི་རང་དང་གང་ཟག་གཞན་གཉིས་ཀ་ལ་བྱེད་ལ་དབང་དང་དྲག་པོ་ནི་སེམས་ཅན་གཞན་ཁོ་ན་ལའོ། །གང་གི་ཆེད་དུ་བྱེད་པ་ལ་ནི་རང་གཞན་རེ་རེའི་ཕྱིར་དུ་ཡང་ལས་བཞི་ག་ལ་འཇུག་ཏུ་རུང་ངོ་། །དེ་ཡང་ལེགས་གྲུབ་ལས། སེམས་ཅན་ཕོངས་
ལ་ཞི་བ་བྱ། །བདེ་བར་གནས་ལ་རྒྱས་པ་སྟེ། །གང་ཕྱིར་དྲག་ཤུལ་སྤྱོད་པའི་ལས། །དེ་དག་དགྲ་ལ་སྤྱད་པར་བྱ། །ཞེས་གསུངས་པས། ནད་དང་གདོན་ལ་སོགས་པས་མནར་བ་ལ་ཞི་བ་བྱའོ། །འོན་ཀྱང་ད་ལྟ་དེ་དག་མེད་ཀྱང་འབྱུང་བའི་མཚན་མ་མཐོང་ནའང་ཞི་བ་བྱ་སྟེ། དཔེར་ན་རྨིས་ལྟས་ངན་པ་མཐོང་བ་ན་ཞི་བའི་སྦྱིན་སྲེག་བྱ་བར་གསུངས་པ་བཞིན་ནོ། །རྒྱས་པ་བྱེད་པ་ནི་མི་འདོད་པའི་ཕྱོགས་ཀྱིས་མནར་བ་ལ་མི་ལྟོས་པས་བདེ་བར་གནས་པ་ཞེས་བྱ་ཡི། །འདོད་པའི་དོན་གྱིས་འབྱོར་བ་མིན་ཏེ་ལོངས་སྤྱོད་དང་ཤེས་རབ་ལ་སོགས་པ་གང་མ་འབྱོར་བ་ལ་དེ་དག་རྒྱས་པའི་ལས་བྱའོ། །དྲག་ཤུལ་ནི་དཀོན་མཆོག་གསུམ་ལ་གནོད་པ་བྱེད་པ་སོགས་ཀྱི་དགྲ་ལ་བྱེད་ཀྱི་རང་ལ་གནོད་པ་ཙམ་གྱི་དགྲ་མིན་ནོ། །དབང་ནི་གང་དབང་དུ་བྱས་ན་བསྟན་པ་དང་སེམས་ཅན་གྱི་དོན་འགྲུབ་པའི་གང་ཟག་ལ་བྱའོ། །དེ་དག་ཀྱང་ཕལ་ཆེར་མིའི་འགྲོ་བ་ལ་གསུངས་ཀྱང་བཞི་ག་ལ་མི་དང་དེ་ལས་གཞན་པའི་འགྲོ་བ་གཉིས་ཀ་ཡོད་དོ། །བཞི་པ་ནི། མཚོ་སྐྱེས་དང་ནག་པོ་སྤྱོད་པས། ལས་ཀྱི་དབྱེ་བས་བཞི་རུ་འགྱུར། །ཞེས་གསུངས་པ་ལྟར་སྦྱིན་སྲེག་གིས་དངོས་གྲུབ་བསྒྲུབ་པ་ལ་ལས་ཀྱི་དབྱེ་བས་བཞིར་གསུངས་པ་འདིའི་རྒྱུ་མཚན་གང་ཡིན་སྙམ་ན་སྔགས་པས་དོན་བྱ་བའི་གཞི་ནི་རང་གཞན་གཉིས་སུ་ངེས་ལ། དེའི་དོན་བྱེད་པ་ཡང་མི་འདོད་པའི་ཕྱོགས་སེལ་བ་དང་འདོད་པའི་ཕྱོགས་བསྒྲུབ་པ་གཉིས་སུ་ངེས་པས་ཞི་བ་དང་རྒྱས་པ་བསྒྲུབ་པའི་ལས་གཉིས་གསུངས་
སོ། །དེ་ལྟ་ན་དབང་དང་དྲག་པོའི་ལས་གཉིས་གསུངས་པ་དོན་མེད་དོ་སྙམ་ན། སྐྱོན་མེད་དེ་རང་ངམ་གཞན་ལ་དོན་གཉིས་བསྒྲུབ་པའི་ཡན་ལག་ཏུ་དེ་གཉིས་དགོས་པའི་ཕྱིར་ཏེ། འདི་ལྟར་སེམས་ཅན་ཁ་ཅིག་དབང་དུ་མ་འདུས་ན་དོན་གཉིས་བསྒྲུབ་པའི་མཐུན་རྐྱེན་མི་ཚང་བ་དང་། ཁ་ཅིག་དྲག་པོས་ཚར་མ་བཅད་ན་དོན་གཉིས་བསྒྲུབ་པའི་འགལ་རྐྱེན་མི་བཟློག་པའི་ཕྱིར་རོ། །གལ་ཏེ་སྡིག་པ་ཞི་བ་སོགས་སུ་གྱུར་ན་ཡོན་ཏན་རྒྱས་པར་འགྱུར་ལ་ནོར་ལ་སོགས་པ་རྒྱས་ནའང་དབུལ་བ་སོགས་ཞི་བར་འགྱུར་བས་ཞི་རྒྱས་གཉིས་ལས་སོ་སོར་འཇོག་པར་མི་འཐད་དེ་རེ་རེ་ཡང་གཉིས་ཀར་འགྱུར་བའི་ཕྱིར་རོ་སྙམ་ན། སྐྱོན་མེད་དེ་ཞི་བའི་ལས་ནི་མི་འདོད་པའི་ཕྱོགས་ལ་དམིགས་ཏེ་ཞི་བར་འདོད་ནས་བྱེད་པས་སྐབས་ཀྱི་མི་འདོད་པ་ཞི་ན་དེ་ཙམ་གྱིས་དེའི་བྱ་བ་རྫོགས་པས་ཡོན་ཏན་གཞན་འབྱུང་བ་ལ་མི་ལྟོས་པའི་ཕྱིར་དང་། རྒྱས་པའི་ལས་ཀྱང་འདོད་པའི་དོན་ལ་དམིགས་ཏེ་འབྱོར་བར་འདོད་ནས་བྱེད་པས་དམིགས་པ་དང་རྣམ་པ་ཤིན་ཏུ་མི་འདྲ་བའི་ཕྱིར་རོ། །འོ་ན་མངོན་སྤྱོད་བྱེད་པའི་ཡུལ་ཡང་དབང་གི་ལས་ཀྱིས་སྡུད་ནུས་ན་དྲག་ལས་མི་རིགས་ལ་མི་ནུས་ན་དབང་དུ་བྱ་བར་འདོད་པ་ཡང་དབང་དུ་བྱ་མི་ནུས་པར་འགྱུར་རོ། །དེས་ན་ལས་གསུམ་དུ་འགྱུར་རོ་སྙམ་ན། སྐྱོན་མེད་དེ་དབང་དུ་བསྡུས་ཀྱང་ཉེས་སྤྱོད་ལས་བཟློག་མི་ནུས་པ་ཡོད་པའི་ཕྱིར་དང་། དྲག་པོའི་ལས་མ་བརྩམས་པར་ཉེས་སྤྱོད་ལས་བཟློག་མི་ནུས་
པ་ལ་མངོན་སྤྱོད་ལ་འཇུག་དགོས་པས་སོ། །དེ་ལྟར་ན་ལས་བཞི་པོ་དེ་བྱེད་ཚུལ་ཡང་རང་ངམ་གཞན་ལ་དོན་གཉིས་བསྒྲུབ་པ་ན་གཞན་དབང་དུ་སྡུད་པ་དང་ཚར་བཅད་པ་ལ་མི་ལྟོས་པར་བསྒྲུབ་ནུས་ན་ནི་ཞི་རྒྱས་གཉིས་བྱེད་ལ། གཞན་དུ་ན་སྔོན་དུ་གཞན་གཉིས་བྱས་ནས་དེ་ནས་དེ་གཉིས་བྱའོ། །ཞི་རྒྱས་ལ་ཡང་སྔོན་དུ་ཞི་བ་བྱས་ནས་རྒྱས་པ་ལ་འཇུག་པ་ཡོད་དེ། ཡུན་རིང་དུ་བསྒྲུབས་ཀྱང་མ་གྲུབ་ན་བགེགས་དང་སྡིག་པ་སྦྱངས་ནས་དེ་ནས་ཡོད་ཏན་བསྐྱེད་པ་བཞིན་ནོ། །སྔོན་དུ་རྒྱས་པ་བྱེད་པའང་ཡོད་དེ་ཤེས་རབ་བསྐྱེད་ནས་དེ་ནས་སྡིག་པ་སྦྱང་བ་སོགས་བྱེད་པ་བཞིན་ནོ། །ལྔ་པ་ནི། མཚོ་སྐྱེས་ཀྱིས། བླ་མེད་ནང་དང་ཕྱི་རོལ་ཏེ། །སྦྱིན་སྲེག་དབྱེ་བ་རྣམ་པ་གསུམ། །ཞེས་ཕྱི་ནང་གི་སྦྱིན་སྲེག་གཉིས་དང་བླ་ན་མེད་པའི་སྦྱིན་སྲེག་གསུམ་དུ་མཛད་དེ། ནག་པོ་སྤྱོད་པ་དང་ཡེ་ཤེས་ཞབས་ཡབ་སྲས་གཉིས་དང་འོད་སྙེས་ཀྱང་སྦྱིན་སྲེག་མ་ལུས་པའི་དབྱེ་བ་གསུམ་དུ་བཤད་དོ། །དྲུག་པ་ལ་གསུམ། ཕྱིའི་དང་། ནང་གི་དང་། བླ་ན་མེད་པའི་སྦྱིན་སྲེག་བཤད་པའོ། །དང་པོ་ལ་གཉིས། ཕྱི་རོལ་གྱི་རྫས་ལ་བརྟེན་པའི་དང་། ཡིད་ཀྱི་སྦྱིན་སྲེག་གོ །དང་པོ་ལ་གཉིས། ཆོ་གའི་ཡན་ལག་དང་། ཆོ་གའི་རིམ་པའོ། །དང་པོ་ལ་ལྔ། ཐབ་ཁུང་གི་རབ་བྱེད། དགང་བླུགས་ཀྱི་རབ་བྱེད། རྫས་ཀྱི་རབ་བྱེད། མེའི་རབ་བྱེད། ཇི་ལྟར་སྒྲུབ་པའི་རབ་བྱེད་དོ། །དང་པོ་ལ་གཉིས། ལས་སོ་སོ་བའི་ཐབ་དང་། ལས་ཐམས་ཅད་པའི་ཐབ་བོ། །དང་པོ་ལ་གཉིས། ཞི་རྒྱས་ཀྱི་ཐབ་དང་། དབང་དྲག་
གི་ཐབ་བོ། །དང་པོ་ནི། ཉི་མ་བཟང་པོ་ལ་རང་གི་ལྷའི་རྣལ་འབྱོར་དང་ལྡན་པས་གཏོར་མ་དབུལ་བ་སྔོན་དུ་འགྲོ་བས་ས་སྦྱང་བ་དང་བཟུང་བ་རྒྱས་པའམ། ཡང་ན་ལག་པ་གཡས་པ་ས་ལ་བཞག་སྟེ། ༀ་ཨཱ་ཿ ཧཱུཾ་དང་ༀ་ཧ་ན་ཧ་ན་ཀྲོ་དྷ་ཧཱུཾ་ཕཊ་ཅེས་པའམ། རང་གི་ལྷའི་སྔགས་བརྒྱ་རྩ་བརྒྱད་བཟླས་ཏེ་ཀུན་རྫོབ་ཀྱི་དག་པའམ་སྟོང་ཉིད་ཀྱི་དག་པས་ཀྱང་རུང་སྟེ་ས་སྦྱང་ལ་ས་རྐོ་ན་ལྟོ་འཕྱེའི་མཆན་གྱི་ཆ་ལ་བརྐོ་བར་བྱའོ། །ས་གཞི་རང་བཞིན་གྱིས་དཀར་བའམ་ས་དཀར་པོས་བྱུགས་པ་ལ་ཞི་བའི་ཐབ་བྱའོ། །དེའི་དབྱིབས་ནི་འཁོར་ལོའི་རྣམ་པ་ལྟར་ཟླུམ་པོ་དང་རྒྱར་ནི་ཁྲུ་གང་ཟབས་སུ་ཁྲུ་ཕྱེད་ཡིན་ལ་ཐབ་ཀྱི་སྟེང་ནས་མུ་རན་ནམ་ཆུར་སོར་བཞི་དོར་བར་རྒྱ་དང་དཔངས་སོར་བཞི་པའི་ཁ་ཁྱེར་བགས་ཀྱིས་ནང་དུ་གཞོལ་བ་ཁོར་ཡུག་ཏུ་བྱའོ། །ཁ་ཁྱེར་ལ་འཁོར་ལོའི་འཕྲེང་བས་བསྐོར་རོ། །མི་ཐུབ་ཟླ་བས་མུ་རན་ལ་གེ་སར་དང་ཁ་ཁྱེར་ལ་པད་འདབ་ཀྱི་རྣམ་པ་ཅན་བྱ་ཞེས་འཆད་ལ། འོད་སྙེ་ལས་དེ་ལས་ཐམས་ཅད་པའི་ཐབ་ཀྱི་ཁྱད་ཆོས་སུ་བཤད་དེ། མར་མེ་མཛད་བཟང་པོ་དང་དཔལ་འཛིན་དང་ཡང་མཐུན་ནོ། །ཐབ་ཀྱི་ཕྱི་རོལ་ཏུ་སོར་གཉིས་དོར་ནས་སྟེགས་བུ་གྲུ་བཞི་པས་བསྐོར་བའི་ཟུར་བཞིར་ཟླ་ཕྱེད་ཀྱི་སྟེང་དུ་རྡོ་རྗེ་རྩེ་གསུམ་པ་བྱེད་པ་དཔལ་འཛིན་གྱིས་ཞི་བ་ལས་ཐམས་ཅད་པ་ལ་བཤད་པ་ནི་གཞན་གསུམ་ལ་ཡང་འདྲ་བས་རང་རང་གི་ཐབ་ཀྱི་རྒྱ་ཚད་ཀྱི་བཅུ་གཉིས་ཆ་དོར་བའི་སྟེགས་བུ་བྱའོ། །
གདན་བཞི་ལས་ཀྱང་། ཟླ་གམ་རྡོ་རྗེ་རབ་མཛེས་རྣམས། །གྲྭ་དང་གྲྭ་རུ་གཞག་པར་བྱ། །ཞེས་ཐབ་རྣམས་ལ་ཐུན་མོང་དུ་ཟླ་ཕྱེད་རྡོ་རྗེ་བྱ་བར་གསུངས་སོ། །ཐབ་ཀྱི་དབུས་སུ་པདྨ་འདབ་བརྒྱད་ཀྱི་ལྟེ་བར་རྡོ་རྗེ་རྩེ་ལྔ་པ་སྲིད་དུ་སོར་བརྒྱད་པ་དཔངས་སུ་སོར་གཅིག་པ་དང་ཤར་ལ་སོགས་པའི་ཕྱོགས་བཞིར་འཁོར་ལོ་དང་རིན་པོ་ཆེ་དང་པདྨ་དང་རལ་གྲི་སོར་དྲུག་པ་བྱ་བར་དཔལ་འཛིན་གྱིས་ཞི་བ་ལས་ཐམས་ཅད་པ་ལ་བཤད་ལ། འོད་སྙེར་ཞི་རྐྱང་ལ་དབུས་སུ་འཁོར་ལོ་རྡོ་རྗེ་གདམ་ང་ཅན་དུ་མཛད་དོ། །ཐབ་ཁུང་ལ་ས་དཀར་པོ་དང་ཕྱི་རོལ་ཏུ་བའི་ལྕི་བས་བྱུགས་ནས་དེ་གཉིས་ལ་བདུད་རྩི་དཀར་པོ་དང་ལྡན་པའི་དྲི་དཀར་པོས་བྱུགས་ལ་ཐུན་མོང་དུ་མེ་ཏོག་དཀར་པོའི་སིལ་མ་གཅལ་དུ་དགྲམ་པར་བྱའོ། །ས་གཞི་སེར་པོ་ལ་རྒྱས་པའི་ཐབ་བྱ་སྟེ་དབྱིབས་ནི་རྫིང་བུའི་རྣམ་པ་ལྟར་གྲུ་བཞི་དང་རྒྱར་ནི་ཁྲུ་དོ་ཟབས་སུ་ཁྲུ་གང་ཡིན་ལ། སྟེང་ནས་མུ་རན་སོར་བརྒྱད་དོར་བར་རྒྱ་དང་དཔངས་སོར་བརྒྱད་པའི་ཁ་ཁྱེར་དང་དེ་ལ་རིན་པོ་ཆེའི་ཕྲེང་བས་བསྐོར་རོ། །ཐབ་ཀྱི་དབུས་སུ་འོད་སྙེར་འཁོར་ལོ་རྩིབས་བརྒྱད་པའི་ལྟེ་བ་ལ་སོར་དྲུག་པའི་རིན་པོ་ཆེ་རྡོ་རྗེས་མཚན་པ་བཤད་ལ། གཞན་ནས་རིན་པོ་ཆེས་མཚན་པར་བཤད་དོ། །ཐབ་ཁུང་ལ་ས་སེར་པོ་དང་ཕྱི་རོལ་ཏུ་བ་ལྕིས་བྱུགས་ཏེ་དེ་གཉིས་ལ་བདུད་རྩི་སེར་པོ་དང་ལྡན་པའི་དྲི་སེར་པོས་བྱུགས་ལ་མེ་ཏོག་དགྲམ་མོ། །གཉིས་པ་ནི། ས་གཞི་དམར་པོའམ་གཞན་ཡང་རུང་བ་ལ་དབང་དང་དེའི་དགུག་པའི་ཐབ་བྱ་སྟེ། དབྱིབས་ནི་ཟླ་གམ་
གྱི་རྣམ་པ་དང་རྒྱ་དཔངས་ནི་རྒྱས་པའི་ཐབ་དང་འདྲ་བར་དགྲ་ནག་ལས་བཤད་ལ་མུ་རན་ལ་སོགས་པའི་ཚད་ཀྱང་དེ་བཞིན་ནོ། །ཐབ་ཀྱི་དབུས་སུ་དབང་ལ་ནི་པདྨ་དམར་པོ་རྡོ་རྗེས་མཚན་པའོ། །ཁ་ཁྱེར་ལ་ནི་པདྨའི་ཕྲེང་བས་བསྐོར་རོ། །ཐབ་ཁུང་དང་ཕྱི་རོལ་གཉིས་ས་དམར་པོ་དང་བདུད་རྩི་དང་ལྡན་པའི་དྲི་དམར་པོས་བྱུགས་ལ་མེ་ཏོག་དམར་པོ་དགྲམ་པར་བྱའོ། །དབང་གི་དགུག་པ་ལ་དབུས་སུ་པདྨ་དམར་པོ་རྡོ་རྗེ་ལྕགས་ཀྱུས་མཚན་པའོ། །ས་གཞི་གས་པ་དང་ཚྭ་སྒོ་ཅན་དང་རྩུབ་པ་དང་ནམ་མཁའ་ལྟར་ནག་པ་ལ་བསད་པའི་ཐབ་བྱ་སྟེ། དབྱིབས་ནི་ནམ་མཁའི་ཁམས་ཏེ་ཆོས་འབྱུང་གི་རྣམ་པ་ལྟར་གྲུ་གསུམ་པ་རྩེ་མོ་བྱང་དུ་ཕྱོགས་པ་དང་། རྒྱར་ནི་ལོགས་རྣམས་ལ་སོར་ཉི་ཤུ་པ་དང་དཔངས་སུ་སོར་བཅུ་པའོ། །འདི་ལ་གཞོན་ནུ་ཟླ་བས་མུ་རན་དང་ཁ་ཁྱེར་མི་བྱ་བར་བཤད་ལ། དཔལ་འཛིན་གྱིས་གཤིན་རྗེ་གཤེད་ཀྱི་དྲག་པོའི་སྦྱིན་སྲེག་ལས་ཀྱང་མུ་རན་དང་ཁ་ཁྱེར་མ་བཤད་དོ། །འོད་སྙེ་ལས་ནི་མུ་རན་སོར་གསུམ་དོར་བས་རྒྱ་དང་དཔོངས་སུ་ཁ་ཁྱེར་སོར་གསུམ་པ་ཁ་ཕྱིར་གཞོལ་བ་ལ་ཁྲོ་བོའི་རྡོ་རྗེས་བསྐོར་བར་བཤད་དོ། །ཐབ་ཀྱི་དབུས་སུ་ནི་འོད་སྙེ་ལས་པདྨ་ནག་པོ་ལ་གནས་པའི་ཁྲོ་བོའི་རྡོ་རྗེ་སོར་
བརྒྱད་པ་དང་རྩེ་གསུམ ་ལ་གནས་པའི་ཁྲོ་བོའི་རྡོ་རྗེ་གདམ་ང་ཅན་དུ་མཛད་པའི་ཕྱི་མ་ནི་དཔལ་འཛིན་གྱིས་ཀྱང་མཛད་དོ། །ཐབ་དང་ཕྱི་རོལ་ཏུ་བདུད་རྩི་དང་བཅས་པའི་ས་ནག་པོ་དང་རོ་ཐལ་དང་བོང་བུ་དང་རྔ་མོ་སོགས་
ཀྱི་སྦངས་གང་རྙེད་པས་བྱུགས་ཏེ། དྲི་ངན་པའམ་དྲི་མེད་པའི་མེ་ཏོག་སྔོན་པོའམ་དམར་པོ་དང་འབྲུའི་ཕུབ་མ་ལ་སོགས་པ་རྣམས་གཏོར་ལ་མིའི་ཞུན་ལ་སོགས་པའི་མར་མེ་དང་ལྡན་པར་བྱའོ། །སོ་ན་ཤྲཱི་དང་རྡོ་རྗེ་གྲུབ་པའི་རྟོག་བདུན་གྱི་འགྲེལ་པར་དབྱེ་བའི་ཐབ་བསད་པ་དང་འདྲ་ལ་བསྐྲད་པའི་ཐབ་དབྱིབས་གཞུ་འདྲ་བ་ཁ་དོག་སྔོན་པོ་རྒྱར་ཁྲུ་དོ་ཟབས་སུ་ཁྲུ་གང་བ་རྡོ་རྗེའི་ཕྲེང་བས་བརྒྱན་པ་བྱ་བར་བཤད་ནས་རྨོངས་རེངས་ཀྱི་ཐབ་མ་བཤད་ལ། གཞོན་ནུ་ཟླ་བས་རེངས་པའི་ཐབ་རྒྱས་པ་དང་འདྲ་སྟེ་དེ་གཉིས་ལྷའི་རྣལ་འབྱོར་མཚུངས་པའི་ཕྱིར་རོ། །བསད་བསྐྲད་དབྱེ་བ་གསུམ་གྱི་ཐབ་འདྲ་བར་དགྲ་ནག་གི་འགྲེལ་པར་བཤད་ནས་རྨོངས་པའི་ཐབ་མ་བཤད་དོ། །འདིར་ནི་བསྐྲད་པའི་ཐབ་བསད་ཐབ་དང་མི་འདྲ་སྟེ། རྟོག་བདུན་ལས། བསྐྲད་པའི་ཐབ་ཀྱི་སྐབས་སུ་རླུང་གི་དཀྱིལ་འཁོར་ཞེས་བཤད་ལ་དེ་ནི་ཐབ་ཀྱི་དབྱིབས་ལ་བྱ་དགོས་པའི་ཕྱིར་དང་། གཞོན་ནུ་ཟླ་བས་ཀྱང་། རྟོག་བདུན་གྱི་འགྲེལ་པར་རླུང་གི་དཀྱིལ་འཁོར་ནི་ཟླ་གམ་གྱི་རྣམ་པའི་ཐབ་ཁུང་ལ་བཤད་པའི་ཕྱིར་རོ། །རེངས་པའི་ཐབ་རྒྱས་པ་དང་འདྲ་བ་ནི་རྟོག་བདུན་ལས་ཀྱང་གྲུ་བཞིར་གསུངས་པ་དང་མཐུན་ལ། རྨོངས་རེངས་གཉིས་རྒྱས་པ་དང་འདྲ་བར་འོད་སྙེ་དང་མན་སྙེ་ལས་བཤད་དེ་འདིར་ཡང་དེ་མི་འགལ་ཞིང་ཐབ་གཉིས་ནི་ཡུང་བ་ལ་སོགས་པས་བྱུག་པའམ་བྲིའོ། །དཱ་རི་ཀ་པས་བསྐྲད་པ་དང་དབྱེ་བ་ལ་དབུས་སུ་རལ་གྲི་དང་རྨོངས་པ་ལ་སྦྲུལ་དང་རེངས་པ་ལ་ལྕགས་སྒྲོག་བྲི་བར་བཤད་ལ། འོད་
སྙེར་དམིགས་བསལ་མེད་པ་རྣམས་ཀྱི་ཁ་ཁྱེར་ལ་གཙོ་བོའི་མཚན་མས་བརྒྱན་པར་བཤད་དོ། །གཉིས་པ་ནི། ལས་ཐམས་ཅད་པའི་ཐབ་ནི་སྡོམ་འབྱུང་སོགས་ལས་ཞི་བའི་ཐབ་དང་མཚུངས་པར་བཤད་པ་ནི་དབྱིབས་དང་རྒྱ་དཔངས་ཀྱི་ཚད་མཚུངས་ཀྱི་ཁ་དོག་མི་འདྲ་སྟེ། བཞི་བརྒྱ་ལྔ་བཅུ་པའི་འགྲེལ་པར་ཤཱནྟི་པས་རྒྱར་ཁྲུ་གང་དང་ཟབས་སུ་ཁྲུ་ཕྱེད་པའི་ཐབ་ཟླུམ་པོར་བྱས་པའི་སྦྱིན་སྲེག་ས་གཞི་དྲི་སེར་པོས་བྱུགས་པ་ལ་ཆས་གོས་དང་སྲེག་རྫས་སེར་པོས་བྱ་བར་གསུངས་པའི་ཕྱིར་རོ། །འོ་ན་གཞུང་དེར་སྔགས་པ་ཤར་དུ་ཁ་བལྟས་ཏེ་ཞེས་གསུངས་པ་ཇི་ལྟར་ཡིན་སྙམ་ན། དེའི་དོན་ནི་ཤཱནྟི་པས་ཤར་ནི་ཚང་བར་བྱེད་པ་དང་ཁ་ནི་གཙོ་བོའི་དོན་ཏེ་རྫོགས་པར་བྱས་པ་གཙོ་བོར་གྱུར་པས་གནས་པར་བྱ་བའི་དོན་དུ་བྱས་ནས་ལྷོ་ནས་ཁ་བྱང་དུ་བལྟ་བར་བཤད་དོ། །དེ་ལྟར་བཤད་དགོས་པ་ནི་གཞུང་དེར། པད་གནས་ས་བོན་རཾ་ལས་བྱུང་། །སེར་ཞིང་ཞལ་རས་གསུམ་པ་ལ། ཞེས་མེ་ལྷ་སེར་པོར་བཤད་པའི་གནད་ཀྱིས་སོ། །ཉིན་མོ་འབྱུང་གནས་ཀྱིས་ཀྱང་ཐབ་ཀྱི་དབྱིབས་དང་ཚད་དེ་ལས་སེར་པོས་བྱུགས་ནས་རྒྱས་པའི་སྦྱིན་སྲེག་བྱ་བར་བཤད་ལ། འོད་སྙེ་ལས་ཀྱང་ལས་ཐམས་ཅད་པའི་ཐབ་ཁུང་ནི་ལས་དང་རྗེས་སུ་མཐུན་པའི་ས་གཞི་ལ་ཞི་བའི་ཐབ་དང་མཚུངས་པ་སྟེ། ཞེས་ལས་སོ་སོའི་ཁ་དོག་དང་མཐུན་པའི་ས་གཞི་ལ་བྱ་བར་གསུངས་སོ། །འདི་ལ་པྲཛྙཱ་ཨིནྡྲ་རུ་ཙིས། རང་འདོད་ལྷ་ཡི་རྣལ་འབྱོར་གྱིས། །
ལས་ཀུན་པ་ཡི་སྦྱིན་སྲེག་སྟེ། །ཚད་དང་དབྱིབས་དང་ཁ་དོག་དང་། །ཞི་བ་དང་མཐུན་ཤར་ལྟའོ། ཞེས་ལས་ཐམས་ཅད་པ་ལ་ཁ་དོག་དཀར་པོ་ཁོ་ན་དང་ཁ་ཤར་ཕྱོགས་ཁོ་ནར་བལྟ་བར་བཤད་པ་འཐད་པ་མ་མཐོང་ངོ་། །ཐབ་ཁྲུ་གང་ཟླུམ་པོ་ལ་ཁ་དོག་དཀར་པོའི་སྒོ་ནས་ཞི་བ་ལས་ཐམས་ཅད་པ་ནི་དཔལ་འཛིན་གྱིས་དམར་ནག་གི་དཀྱིལ་ཆོག་གཉིས་ཀར་བཤད་དོ། །ཡང་ཐབ་དེ་ལ་ཁ་དོག་དམར་པོར་བྱས་པའི་སྒོ་ནས་དབང་ཐབ་ལས་ཐམས་ཅད་པ་ཡང་ཡོད་དོ། །སློབ་དཔོན་བློ་གྲོས་བཟང་པོས། དེ་ནས་ལས་ཐམས་ཅད་པའི་ཐབ་ཁུང་དུ་ཆོ་ག་བཞིན་དུ་མངར་གསུམ་གྱིས་བསྐུས་པའི་མེ་ཏོག་དམར་པོ་སྟོང་ཕྲག་བཅུ་སྦྱིན་སྲེག་བྱ་སྟེ། ཞེས་སྲེག་རྫས་དམར་པོས་ལས་ཐམས་ཅད་པའི་ཐབ་ཏུ་ལྷ་དབང་དུ་བྱེད་པའི་སྦྱིན་སྲེག་བྱ་བར་གཤེད་དམར་གྱི་མངོན་རྟོགས་ལས་གསུངས་པའི་ཕྱིར་རོ། །འོད་སྙེ་ལས་ཐབ་ཀྱི་ས་གཞི་དང་བུད་ཤིང་དང་མེའི་སྐབས་སུ་ལས་ཐམས་ཅད་པ་ལ་ལས་སོ་སོ་དང་རྗེས་སུ་མཐུན་པར་བྱ་བར་གསུངས་པ་ཙམ་ལས་ལས་བཞི་ག་འོང་མི་འོང་མི་གསལ་ཡང་བཞི་ག་ཡོད་པ་ཡིན་ཏེ་དཀྱིལ་ཆོག་རྡོར་ཕྲེང་ལས། དེ་ལྟར་ལས་ཐམས་ཅད་པའི་ཐབ་ཁུང་དུ་ཞི་བ་དང་རྒྱས་པ་དང་དབང་དང་མངོན་སྤྱོད་ལ་སོགས་པ་རྣམས་འགྲུབ་ཀྱང་སོ་སོ་ལ་ཐབ་ཁུང་ཐ་དད་དུ་རྒྱུད་རྣམས་སུ་གསུངས་སོ་ཞེས་གསུངས་པའི་ཕྱིར་རོ། །ལས་ཐམས་ཅད་པའི་ཐབ་ནི་རྒྱ་དང་དབྱིབས་ཞི་བའི་ཐབ་དང་འདྲ་ཡང་ཁྱད་པར་ནི་མུ་རན་ལ་གེ་སར་དང་བཅས་པའི་ཟེའུ་འབྲུ་དང་ཁ་ཁྱེར་པདྨའི་འདབ་
མའི་རྣམ་པའོ། །དེ་ལ་ཕྱོགས་དང་མཚམས་རྣམས་སུ་རྡོ་རྗེའམ་སྣ་ཚོགས་རྡོ་རྗེའམ་རལ་གྲིས་བསྐོར་ཞིང་། ཐབ་ཀྱི་ནང་དུ་རྡོ་རྗེ་ཕྲེང་བས་བསྐོར་བའི་པད་འདབ་ལ་གནས་པའི་འདབ་མའི་ཚད་ཀྱི་དེ་བཞིན་གཤེགས་པ་བཞིའི་མཚན་མའི་ནང་དུ་རྒྱར་སོར་བརྒྱད་དཔངས་སུ་སོར་གཅིག་པའི་རང་གི་མཚན་མ་དང་ལྡན་པ་དང་། མཚན་མ་ཡང་རྣམ་སྣང་གི་འཁོར་ལོའམ་རྡོ་རྗེ། རིན་འབྱུང་གི་རིན་པོ་ཆེ། འོད་དཔག་མེད་ཀྱི་པདྨ། མི་བསྐྱོད་པའི་ཁྲོ་བོའི་རྡོ་རྗེ། དོན་གྲུབ་ཀྱི་རལ་གྲིའམ་སྣ་ཚོགས་རྡོ་རྗེ་བྱེད་པའི་རང་ལུགས་དང་། ཁ་ཁྱེར་ལ་མཚམས་མ་གཏོགས་པ་ཕྱོགས་རྣམས་སུ་རྡོ་རྗེ་མེད་ཅིང་ཐབ་ཀྱི་ནང་དུ་རྡོར་ཕྲེང་མེད་པའི་ལུགས་དང་ཐབ་ཁུང་ཐམས་ཅད་ལ་ལྟེ་བར་རང་གི་འདོད་པའི་ལྷའི་མཚན་མ་འགོད་པའི་ལུགས་གསུམ་འོད་སྙེ་ལས་བཤད་དེ་རང་ལུགས་ལ་ལས་སོ་སོ་བ་རྣམས་ལ་ཤར་ལ་སོགས་པའི་མཚན་མ་བཞི་མ་བཤད་དོ། །མཚན་མ་རྣམས་ཀྱི་ཁ་དོག་ནི་རང་རང་གི་ལྷའི་ཁ་དོག་དང་མཐུན་ལ་བྲིས་ཐབ་ཀྱང་ཁ་སྦྱོར་གྱི་དགོངས་པར་མན་སྙེར་བཀྲལ་ཞིང་མཚོ་སྐྱེས་དང་ནག་པོ་སྤྱོད་པ་དང་འོད་སྙེ་ལས་ཀྱང་བརྐོ་བ་དང་བྲི་བ་གདམ་ང་ཅན་དུ་བཤད་དོ། །ཉིན་མོ་འབྱུང་གནས་དང་ཛ་ཡ་སེ་ནས་སྔ་མ་མ་གྲུབ་ན་ཕྱི་མ་བྱ་བར་བཤད་དོ། །ནག་པོ་སྤྱོད་པས། རྡུལ་ཚོན་གྱིས་ནི་རྫོགས་པར་བྲི། །ཡང་ན་མེ་ཏོག་དག་ཀྱང་རུང་། །ཞེས་ཚོན་དང་མེ་ཏོག་གིས་བྲི་བ་གདམ་ང་ཅན་དུ་གསུངས་པ་བཞིན་དུ་མཚོ་སྐྱེས་ཀྱང་བཞེད་པས་མེ་
ཏོག་བཀྲམ་སྟེ་བྲིས་པ་ཡང་རུང་ངོ་། །གཉིས་པ་ནི། དགང་བླུགས་ཀྱི་རྒྱུ་ནི་དཱ་རི་ཀ་པས། གསེར་དངུལ་ཟངས་ལྕགས་ར་གན་མི་རུས་སྦྱིན་སྲེག་གི་ཤིང་སྟེ་བདུན་གང་རུང་ལས་བྱ་བར་བཤད་པ་ལྟར་རོ། །དགང་གཟར་གྱི་ཡུ་བའི་སྲིད་ནི་ཚད་ལྡན་གྱི་མཐེབ་སོར་ཉེར་བཞི་པ་ཡུ་བའི་འོག་ཏུ་རིན་པོ་ཆེ་སོར་གསུམ་པ་དེའི་འོག་ཏུ་སོར་གསུམ་པའི་རྡོ་རྗེའོ། །དེ་གཉིས་དང་བཅས་ན་ཡུ་བ་ལ་སོར་སུམ་ཅུ་སྟེ་བླུགས་གཟར་གྱི་ཡུ་བ་ལ་ཡང་དེ་བཞིན་ནོ། །དགང་གཟར་གྱི་སྦོམ་གྱི་ཚད་ནི་རྡོ་རྗེ་དང་བཅས་པའི་ལག་པས་བདེ་བར་བཟུང་དུ་རུང་བ་ཡིན་ལ་བླུགས་གཟར་གྱི་སྦོམ་ནི་དགང་གཟར་གྱི་སྦོམ་ལས་ཕྱེད་ཀྱིས་ཕྲ་བའོ། །དགང་གཟར་གྱི་ཡུ་བའི་སྟེང་དུ་ནི་གྲུ་བཞི་པ་རྒྱར་སོར་བཞི་པའི་དབུས་སུ་ཟབས་སུ་སོར་གཉིས་ཀྱིས་དམའ་བ་ལ་རྡོ་རྗེ་རྩེ་ལྔ་པ་སོར་གཉིས་པས་མཚན་པ། གྲུ་བཞི་པའི་སྟེང་གི་རྒྱར་སོར་ཕྱེད་ལ་རྡོ་རྗེའི་ཕྲེང་བས་བསྐོར་བ། གྲུ་བཞི་པའི་སྟེང་དུ་པདྨའི་འདབ་མའི་དབྱིབས་ཅན་སོར་བཞི་པ་ཟབས་སུ་མཐེའུ་ཆུང་གི་ཚད་ལ་སོར་བཞི་པའི་རྡོ་རྗེས་མཚན་པ་སྲིད་དུ་བཅུད་འཛག་པའི་བུ་ག་མཐེ་བོང་ངམ་མཐེའུ་ཆུང་གི་ཚད་ཙམ་དེའི་སྟེང་དུ་རྡོ་རྗེ་རྩེ་ གསུམ་པ་སོར་བཞི་པའོ། །ཡང་ན་ཡུ་བའི་སྟེང་གི་ཆར་པད་འདབ་ཀྱི་རྣམ་པ་སྲིད་དུ་སོར་བརྒྱད ་པ་ཇི་ལྟར་མཛེས་པ་ལ་རྒྱར་གྲུ་བཞི་པ་སོར་བཞི་པ་ཟབས་སུ་སོར་གཉིས་ཀྱིས་དམའ་བའི་དབུས་སུ་རྡོ་རྗེ་སོར་བཞི་པ་རྩེ་གསུམ་པའམ་རྩེ་ལྔ་པས་མཚན་པ་སྟེ་ཡུ་བའི་སྐོར་དང་བཅུད་ཀྱི་བུ་ག་འདྲའོ། །བླུགས་གཟར་གྱི་ཡུ་བའི་སྟེང་དུ་ཁ་པད་འདབ་ལྟ་
བུ་རྒྱར་སོར་གཉིས་པ་ཟབས་སུ་སོར་གཅིག་པ་དབུས་སུ་རྡོ་རྗེ་རྩེ་ལྔ་པས་མཚན་པའོ། །དགང་བླུགས་མེད་ན་ལག་པའི་སོར་མོ་ལྔ་སྦྱར་བས་དགང་བླུགས་དང་སོར་མོ་གསུམ་སྦྱར་བས་སྲེག་བླུགས་དབུལ་བ་དང་བླུགས་གཟར་མེད་ན་སྲེག་བླུགས་ཀྱང་དགང་གཟར་གྱིས་བྱ་སྟེ་དེ་ཐམས་ཅད་འོད་སྙེའི་ལུགས་སོ། །དགྲ་ནག་ལས་ཀྱང་། དགང་བླུགས་ཀྱི་ཡུ་བ་ཁྲུ་གང་དང་སོར་བཞི་པའི་དབུས་སུ་ཟབས་སུ་སོར་གཉིས་པ་དང་བླུགས་གཟར་པད་འདབ་འདྲ་བའི་ཁ་ལ་མཐེབ་སོར་གཉིས་དང་ཟབས་སུ་མཐེབ་གང་བཤད་དེ་འོད་སྙེའི་ལུགས་སྔ་མ་དང་མཐུན་ནོ། །དེ་ཡང་གཙོ་བོར་ཕྱེད་བཅས་བཞི་བརྒྱ་པ་རྩ་འགྲེལ་གྱི་རྗེས་སུ་འབྲངས་པ་ཡིན་ལ་དེར། སོར་བཞིའི་མཐར་ནི་རྡོ་རྗེ་སྟེ། །བར་དུ་པདྨའི་འདབ་མའི་དབྱིབས། །ཞེས་གསུངས་པ་ལ་ཤཱནྟི་པས་མཐར་ཞེས་པ་ཐམས་ཅད་ཀྱི་སྟེང་དུ་རྡོ་རྗེ་རྩེ་གསུམ་པ་ཡོད་པ་དང་བར་དུ་ཞེས་པ་རྩེ་གསུམ་པ་དང་ཟུར་བཞིའི་བར་དུ་པད་འདབ་ཀྱི་དབྱིབས་འདྲ་བ་ཡོད་པ་ལ་བཤད་པས་འོག་གི་སོར་བཞི་པ་གྲུ་བཞི་པའི་སྟེང་གི་མཐའ་ནས་གྱེན་དུ་མཐེའུ་ཆུང་གི་ཚད་སོང་བའི་སྟེང་དུ་རྡོ་རྗེ་རྩེ་གསུམ་པ་ཕྱོགས་བཞིར་བྱ་ཞིང་། དེ་དང་ནང་གི་ཟུར་འོག་མ་བཞིའི་བར་དུ་པད་འདབ་ཀྱི་རྣམ་པ་བྱའོ། སོར་ཕྱེད་པ་ལ་བསྐོར་བའི་རྡོར་ཕྲེང་ནི་སོར་བཞི་པའི་དབུས་སུ་རྒྱར་སོར་གསུམ་པ་དང་དཔངས་སུ་སོར་གཉིས་པའི་བུག་པ་ཡོད་པའི་སྟེང་ངོས་ནས་ཕྱོགས་སུ་སོར་ཕྱེད་རེ་ཡོད་པ་ལ་བྱའོ། །དཱ་རི་ཀ་པས་དགང་གཟར་གྱི་ལྟེ་བ་ཞི་བ་ལ་ཟླུམ་པོ་སོགས་ཐབ་ཀྱི་དབྱིབས་
འདྲ་བའི་དབུས་སུ་རང་རང་གི་མཚན་མས་མཚན་པ་ལས་སོ་སོ་ལ་ཤིས་པར་བཤད་ཅིང་། སངས་རྒྱས་གསང་བས་ཀྱང་ཞི་རྒྱས་དྲག་གསུམ་ལ་དབུས་སུ་ཟླུམ་པོ་གྲུ་བཞི་གྲུ་གསུམ་གྱི་དབུས་སུ་འཁོར་ལོ་རིན་ཆེན་རྡོ་རྗེ་དང་བླུགས་གཟར་གྱི་དབུས་སུ་ཡང་མཚན་མ་དེ་གསུམ་བྱ་བར་བཤད་པས། གྲུབ་ན་དེ་བཞིན་བྱ་ལ་མ་གྲུབ་ན་མཚོ་སྐྱེས་དང་འོད་སྙེ་སོགས་ཀྱི་ལས་བཞིའི་སྦྱིན་སྲེག་གི་དགང་བླུགས་འཆད་པ་ན་མི་འདྲ་བ་མ་བཤད་པ་ཡང་མང་བས་དེ་བཞིན་དུ་བྱའོ། །གསུམ་པ་ལ་གསུམ། མཆོད་རྫས། སྲེག་རྫས། སྦྱངས་ཏེ་འབུལ་བ་དང་དགོད་པའི་གནས་སོ། །དང་པོ་ནི། ཞི་བ་ལ་དུང་ངམ་ཉ་ཕྱིས་ཀྱི་སྣོད་དུ་འོ་མ་དང་མེ་ཏོག་དཀར་པོའི་ཆུ། རྒྱས་པ་ལ་གསེར་གྱི་སྣོད་དུ་ཏིལ་དང་ཞོ་དང་མེ་ཏོག་སེར་པོ་དང་དྲི་སེར་པོའི་ཆུ། དབང་ལ་ཟངས་ཀྱི་སྣོད་དུ་མེ་ཏོག་དམར་པོ་དང་དྲི་དམར་པོའི་ཆུ། དེ་གསུམ་ལ་ཐུན་མོང་དུ་ནས་དང་ཏིལ་ནག་ཀུ་ཤ་འབྲས་ཡོས་བདུད་རྩི་ལྔ་རྣམས་ཀྱང་བླུག་གོ །བསད་བསྐྲད་དང་དབྱེ་བ་ལ་ལོངས་སྤྱོད་པའི་རྫ་ཕོར་ལ་སོགས་པའི་དུམ་བུའི་སྣོད་དུ་བ་དང་བོང་བུའི་ཆུ་ཁྲག་དང་བཅས་པ་དང་དྲི་ང་བ་དང་དྲི་མེད་པའི་མེ་ཏོག་ནག་པོ་ལ་སོགས་པ་དང་། རྨོངས་རེངས་ལ་ནི་དྲི་ང་བའམ་དྲི་མེད་པའི་མེ་ཏོག་སེར་པོ་སོགས་བླུག་གོ །དྲག་པོ་ལ་གུ་གུལ་དང་གཞན་རྣམས་ལ་སྤོས་ཞིམ་པོས་བདུགས་ཏེ་རང་གི་ལྷའི་སྔགས་སམ་ལས་ཐམས་ཅད་པའི་སྔགས་ཀྱི་མཐར་རིམ་པ་བཞིན་དུ་སྭཧཱ་དང་། ༀ་དང་ཧོཿ དང་ཕཊ་ཅེས་སྦྱར་ནས་ལན་བརྒྱའམ་བདུན་བཟླའོ། །དབང་གི་དགུག་པ་ལ་ནི་ཛཿ ཞེས་པའོ། །ཆུ་བཞིའི་
སྣོད་གསུམ་གྱི་མདུན་དུ་ཡང་བཟེད་ཞལ་གྱི་སྣོད་གསུམ་མཉྫི་ལ་སོགས་པའི་སྟེང་དུ་བཞག་གོ །རིན་ཆེན་འབར་བ་ལས། མེ་ཏོག་ལ་སོགས་རྫས་རྣམས་ནི། །ལས་ཀྱི་དབྱེ་བས་ཁ་དོག་དབྱེ། །ཞེས་བཤད་པ་ལྟར་མེ་ཏོག་ལ་སོགས་པའི་རྫས་རྣམས་ལས་སོ་སོའི་ཁ་དོག་དང་མཐུན་པར་བྱ་སྟེ། ཞི་བ་ལ་དྲི་ཞིམ་པོའི་མེ་ཏོག་དཀར་པོ་འོ་མས་སྦྲུས་པའི་ལྷ་བཤོས། རྒྱས་པ་ལ་དྲི་ཞིམ་པོའི་མེ་ཏོག་སེར་པོ་ཞོས་སྦྲུས་པའི་ལྷ་བཤོས། གཉིས་ཀ་ལ་ཐུན་མོང་དུ་ག་པུར་ལ་སོགས་པའི་སྤོས། མར་དཀར་གྱི་མར་མེ། ཙནྡན་ལ་སོགས་པའི་དྲི། དབང་དང་དེའི་དགུག་པ་ལ་དྲི་ཞིམ་པོའི་མེ་ཏོག་དམར་པོ་དང་མངར་གསུམ་དང་སྦྱར་བའི་ལྷ་བཤོས་ལ་སོགས་པའོ། །བསད་བསྐྲད་དང་དབྱེ་བ་ལ་དྲི་ང་བ་དང་དྲི་མེད་པའི་མེ་ཏོག་ནག་པོ་དང་། རྨོངས་རེངས་ལ་དེ་ལྟ་བུའི་མེ་ཏོག་སེར་པོ་དང་། ཐུན་མོང་དུ་སྤོས་དཀར་དང་གུ་གུལ་དང་ཤ་ཆེན་གྱི་སྤོས་དང་མི་དང་ཉ་ལ་སོགས་པའི་ཞག་དང་ཡུངས་མར་ཚ་བའི་མར་མེ་དང་དུ་རུ་ཀ་དང་འོལ་མ་སེ་ལ་སོགས་པའི་དྲི་དང་ཁ་བ་དང་ཚ་བ་དང་ཡིད་དུ་མི་འོང་བའི་བཟའ་བ་དང་ཤ་ཁྲག་ལ་སོགས་པའི་ལྷ་བཤོས། ཁ་སྒྱུར་དགོས་པ་རྣམས་ལས་མཐུན་གྱི་ཁ་དོག་གིས་ཁ་བསྒྱུར་རོ། །ལས་མཐུན་གྱི་གོས་ཟུང་དང་ཞི་སོགས་གསུམ་ལ་རྡོ་ཐལ་མེད་པའི་སོ་རྩི་དང་། དྲག་པོ་ལ་རྡོ་ཐལ་དང་བཅས་པའི་སོ་རྩིའོ། །གཉིས་པ་ལ་གཉིས། ཡམ་ཤིང་དང་བུད་ཤིང་གི་རྫས་དང་། སྲེག་རྫས་ལྷག་མ་བསྟན་པའོ། །དང་པོ་ནི། ཞི་བའི་ཡམ་ཤིང་ནི་གཞུང་གཞན་རྣམས་ནས་བྱུང་བ་རྣམས་འདིར་མི་རྙེད་ལ། རྡོ་རྗེ་
མཁའ་འགྲོ་ལས་འོ་མ་ཅན་གྱི་ཤིང་ལས་བྱ་བར་གསུངས་པས། འོམ་བུ་ལ་སོགས་པ་དྲི་ཞིམ་པོ་དང་ལྡན་པའི་འོ་མ་ཅན་གྱི་ཤིང་གི་རྩེ་མོའི་ཕྱོགས་སྲིད་དུ་སོར་བཅུ་གཉིས་པ་སྦོམས་སུ་མཐེའུ་ཆུང་གི་ཚད་ལོ་མ་མ་རྙིང་པ་རླན་དང་བཅས་པ་མཉམ་པོར་བཅད་པ་རྩེ་མོ་གཉིས་སྦྲང་རྩི་དང་འོ་མ་དང་མར་དུ་བསྙུགས་པ་བདུད་རྩི་དང་དྲིའི་ཆུས་བྲན་པའོ། །དེ་ཡང་འོད་སྙེ་ལས། རྙིང་ལྕི་ཕྲ་དང་ཀྱོག་པོ་དང་། །རིང་ཐུང་ལོ་མ་མེད་པ་དང་། །སྲོག་ཆགས་གྱིས་ཟོས་རུལ་བ་དང་། །ཤུན་བྲལ་ཆག་དང་བུ་ག་ཅན། །རྩེ་མོ་གཉིས་ལྡན་སྦོམ་པ་སྤངས། །རྙིང་པ་ཡིས་ནི་འཆི་བར་འགྱུར། །ཀྱོག་པོས་སྐལ་བ་ངན་པར་འགྱུར། །རིང་ཐུང་རིག་པ་འཕྲལ་དུ་ཉམས། །ལོ་མ་མེད་པས་ན་ཚ་འབྱུང་། །སྦོམ་པོས་ཕུན་སུམ་ཚོགས་པ་ཉམས། །སྐམ་པོས་གཞན་ཡང་མི་འདོད་པར། །ཤེས་བྱ་ཞེས་གསུངས་པས་སྐྱོན་དེ་དག་དང་བྲལ་བར་བྱ་སྟེ་དྲག་པོ་ལ་ནི་དེ་དག་ཤིས་པར་གསུངས་སོ། །རྒྱས་པའི་ཡམ་ཤིང་ནི་རྒྱུ་སྔར་དང་འདྲ་བའི་ཤིང་གི་དབུས་ཀྱི་ཆ་ལས་བྱུང་བ་སྲིད་དུ་ཁྲུ་གང་བ་སྦོམས་སུ་འཆང་བའི་ཚད་བདུད་རྩི་དང་བཅས་པའི་དྲི་སེར་པོའི་ཆུས་བྲན་པ་ཞོ་དང་འོ་མ་དང་མར་དུ་བསྙུགས་པ་མངར་གསུམ་གྱིས་སྦགས་པའོ། །འདིའི་སྲིད་ཀྱི་ཚད་ལ་བཟང་པོ་ཡོངས་བཟུང་དང་རིན་ཆེན་འབར་བ་དང་གཞོན་ནུ་ཟླ་བས་སོར་བཅུ་བཞིར་བཤད་ལ་དབང་ལ་ནི་སྔར་བཤད་པའི་སྐྱོན་དང་བྲལ་བའི་ཤིང་དམར་པོའམ་ནིམ་པ་དང་ཐང་ཤིང་དང་ཤིང་སྐྱུར་བ་མེ་ཏོག་དང་བཅས་པ་སྟེ་སོར་ལྔ་པའོ། །དབང་གི་དགུག་པ་ལ་ནི་ཚེར་མ་ལྕགས་ཀྱུ་ལྟ་བུའི་ཤིང་རྣམས་ཏེ་ཚད་སྔར་
བཞིན་ནོ། །མངོན་སྤྱོད་རྣམས་ལ་ནི་རོ་ཚ་བ་དང་ཁ་བ་དང་ཚེར་མ་ཅན་གྱི་ཤིང་ངམ་རོ་བསྲེགས་པའི་མགལ་དུམ་གྱི་རྩ་བའི་ཆ་ལས་བྱུང་བ་བཀས་པ་སོར་བཅུ་པ་རྩེ་མོ་གཉིས་རྣོན་པོར་བཞོགས་པ་ལ་དུག་དང་ཁྲག་དང་ཡུངས་མར་གྱིས་བསྐུས་པའོ། །བྷ་བ་བྷ་དྲས་རྨོངས་པའི་ཡམ་ཤིང་གི་ཚད་ནི་བསད་པ་དང་འདྲ་བར་བཤད་དེ་དེས་རེངས་པ་དང་དབྱེ་བ་ཡང་གོ་བར་བྱའོ། །ལས་ཐམས་ཅད་པའི་ཡམ་ཤིང་ནི་ཨུ་དུམྦ་ར་ལ་སོགས་པ་བཅུ་གཉིས་བཤད་པ་རྣམས་འདིར་མི་རྙེད་པས་ལས་སོ་སོ་བ་དང་མཐུན་པར་བྱའོ། །ཚད་ནི་འོད་སྙེར་མཛུབ་གང་བར་བཤད་ལ་ཤཱནྟི་པས་རྒྱས་པ་ལས་ཐམས་ཅད་པ་ལ་འཆང་གང་ཁྲུ་གང་བར་བཤད་དོ། །ལས་སོ་སོ་བའི་བུད་ཤིང་ནི་ཡམ་ཤིང་དང་རྒྱུ་འདྲ་བ་སྲོག་ཆགས་མེད་པས་ཐབ་ལས་ཅུང་ཟད་དམའ་བར་ཐབ་སོ་སོ་བཞིན་དུ་བརྩིག་གོ །ཞི་བ་ལ་ནི་དགོན་པའི་བ་ལང་གི་ལྕི་བས་ཀྱང་རུང་ངོ་། །ལས་ཐམས་ཅད་པའི་བུད་ཤིང་ཡང་ལས་སོ་སོ་དང་མཐུན་པར་བྱའོ། །མེ་ཚང་འཆའ་ན་དཱ་རི་ཀ་པས་ལས་མཐུན་གྱི་ཕྱོགས་ནས་མེ་སྦར་བར་གསུངས་པ་ལྟར་ན་ཞི་བ་ལ་ཤར་དུ་བཅའ་བ་སོགས་སམ་ཡང་ན་ཤར་ལྷོར་བྱའོ། །གཉིས་པ་ནི། ཞི་བའི་རྫས་ཁྱད་པར་བ་ནི་འབྲུ་མར་གྱིས་བྱུགས་པའི་ཀུ་ཤ་ནས་ཏིལ་ཞོ་འོ་མ་འབྲས་ཟན་དུར་བ་ཙནྡན། པྲི་ཡང་ཀུ་ཐང་ཆུ་དྲི་ཞིམ་པོའི་མེ་ཏོག །འབྲས་ཡོས་རྣམས་སྦྲང་རྩི་སོགས་སུ་བསྙུགས་པ་དང་ནང་གི་བདུད་རྩི་ལྔའོ། །རྒྱས་པའི་རྫས་ཁྱད་པར་བ་ནི་འབྲས་ཆན་ཞོ་དང་བསྲེས་པ་ལ་མངར་གསུམ་གྱིས་སྦགས་པའི་ཟས་མཆོག་དང་། ཞོ་
དང་སྦྲང་རྩི་དང་ཏིལ་ནག་དང་ཞོ་ཟན་དང་ཞུན་མར་དང་བཅས་པའི་འབྲས་དང་པདྨ་གེ་སར་དང་ན་ག་གེ་སར་དང་འབྲས་བུ་རྣམས་སོ། །དབང་ལ་མེ་ཏོག་དང་འབྲས་བུ་སྐྱུར་མོ་དང་མེ་ཏོག་དམར་པོ་དྲི་ཞིམ་པོའོ། །དྲག་པོ་ལ་ཡུངས་ཀར་དང་ཡུངས་མར་ཚ་བ་དང་ཁྲག་དང་ལན་ཚྭ་དང་སྐེ་ཚེ་དང་ནིམ་པའི་ལོ་མ་དང་རོ་ཐལ་དང་རྐང་རྗེས་ཀྱི་རྡུལ་དང་བོང་བུ་ལ་སོགས་པའི་སྦངས་དང་སྐྲ་དང་ཁྱིམ་བྱའི་ཚིལ་དང་ཚེར་མ་དང་རུས་ཕྱེ་ལ་སོགས་པ་ཇི་ལྟར་རྙེད་པའམ་རྫས་རེ་རེ་ལ་དུག་ཁྲག་ལན་ཚྭ་རྣམས་བསྲེས་པའོ། །མར་ནི་འོད་སྙེ་ལས་དྲག་པོ་ལ་དམིགས་བསལ་གསུངས་པ་མ་གཏོགས་པ་མ་བཤད་པས་འཇམ་པོ་གསུམ་ལ་མར་དཀར། དྲག་པོ་ལ་འབྱོར་ན་མི་ལ་སོགས་པའི་ཞུན་དང་མ་འབྱོར་ན་མར་ནག་ལ་དུག་ཁྲག་གིས་སྦགས་པའོ། །རྫས་རྣམས་ཀྱི་བྱེད་ལས་སོ་སོ་བ་ནི་སྡོམ་འབྱུང་ལས། མར་གྱིས་འབྱོར་བ་ཐམས་ཅད་བྱེད། །ཡམ་ཤིང་གཟི་བརྗིད་རྣམ་པར་འཕེལ། །བུད་ཤིང་ལྷག་པར་དཔའ་བར་བྱེད། །ཀུ་ཤས་ཐམས་ཅད་སྲུང་བར་བྱེད། །ཡུངས་ཀར་དག་ནི་ཞི་བར་བྱེད། །འབྲས་ཀྱིས་རྒྱས་པར་བྱེད་པར་འདོད། །ཏིལ་ནི་སྡིག་འཕྲོག་རིག་པར་བྱེད། །སོ་བས་ནོར་དང་འབྲུ་རྣམས་འགུགས། །མཱ་ཤས་སྟོབས་ནི་ཆེན་པོར་བཤད། །ནས་ནི་རླུང་གི་ཤུགས་རབ་སྟེར། །དུར་བས་ཚེ་ནི་འཕེལ་བར་བྱེད། །གྲོས་ནི་ནད་རྣམས་འཇོམས་པར་བྱེད། །འོ་ཞོ་སྦྲང་རྩིས་ཤེས་རབ་སྟེར། །ཞོ་ཟན་བདེ་བ་ཐམས་ཅད་སྟེར། །ཞེས་གསུངས་པ་ལྟར་ཡིན་པས། དེ་དག་འདོད་པས་ཞི་རྒྱས་ཀྱི་སྦྱིན་སྲེག་བྱའོ། ཀུ་ཤ་ནི་སྔོ་ལྗང་རྩ་བ་རྩེ་མོ་མ་ཉམས་ཤིང་འདབ་མ་
མ་གྲུགས་པ་མར་དང་འོ་མ་ལ་སྦགས་པ་དང་། དུར་བ་ནི་སྔོན་པོ་རྩ་བ་དང་རྩེ་མོ་མ་ཉམས་པ་འོ་མས་སྦགས་པའོ། །འབྲས་ནི་མ་གྲུགས་པའོ། །བགེགས་ཞི་བ་ལ་གུ་གུལ་གྱི་རིལ་བུ་མར་ལ་བསྙུགས་པ་བསྲེག་པར་རིག་པ་མཆོག་ལས་སོ། །བཟླས་པ་དང་ཆོ་གའི་ཆད་ལྷག་གི་ཉེས་པ་ཁ་སྐོང་ནི་ཞི་བའི་སྦྱིན་སྲེག་དང་། དཀྱིལ་འཁོར་མཆོད་པའི་སྦྱིན་སྲེག་ནི་ཤཱནྟི་པ་དང་དཔལ་འཛིན་གྱིས་བཤད་པ་ལྟར་ཞི་བའམ་རྒྱས་པ་གང་རུང་གིས་སོ། ལྷ་ཉེ་བར་བྱེད་པའི་སྦྱིན་སྲེག་ནི་སྔར་སློབ་དཔོན་བློ་གྲོས་བཟང་པོའི་ལུང་དྲངས་པ་ལྟར་ལས་ཐམས་ཅད་པའི་དབང་ཐབ་ཏུ་བྱ་སྟེ་སྲེག་རྫས་ཁྱད་པར་བ་ནི་མེ་ཏོག་དམར་པོའོ། །སློབ་དཔོན་དེས་བཟླས་པ་འབུམ་སོང་བའི་མཐར་མཚན་ཐོག་ཐག་གཅིག་ཏུ་བཟླས་པ་བྱས་ནས་དེའི་འོག་ཏུ་སྔགས་རེ་རེ་ནས་བཟླས་ནས་བྱེད་དེ་ལས་སྒྲུབ་པ་ཐམས་ཅད་ལ་བྱའོ་ཞེས་གསུངས་པ་ནི་བཟླས་པ་འབུམ་ལ་མེ་ཏོག་གི་སྦྱིན་སྲེག་ཁྲི་བྱ་བར་བཞེད་པས་ལས་སྒྲུབ་པའི་སྔ་རོལ་ཏུ་ནུས་པ་བསྐྱེད་པའི་བཅུ་ཆའི་སྦྱིན་སྲེག་གོ །བསད་པའི་རྫས་ཁྱད་པར་བ་ནི་སྔར་བཤད་པའི་དྲག་པོའི་རྫས་སམ་ཡང་ན་ཐལ་བ་དང་སོལ་བ་དང་ཕུབ་མ་ལ་སོགས་པ་ལས་དགྲའི་གཟུགས་བྱས་ལ་དུག་དང་ད་དུ་རའི་ཁུ་བ་ལ་སོགས་པས་བསྒྲུབ་བྱའི་མིང་སྤེལ་ཚིག་དང་བཅས་པ་བྲིས་ལ་གཟུགས་དེའི་སྙིང་གར་གཞུག་དུག་དང་ཁྲག་ལ་སོགས་པས་བསྐུས་ཏེ་བཞག་གོ །བསྐྲད་པ་ལ་ནི་ཆེ་གེ་མོ་ཨུ་ཙྪ་ཊ་ཡ་ཧཱུཾ་ཕཊ་། ཅེས་བྲིས་པའི་ཁྭ་དང་བྱ་རོག་གི་གཤོག་པ་དང་རྟོག་བདུན་ལས་བྱ་རོག་གི་ཤ་དང་རྔ་མོའི་བྲུན་
དང་ཆང་རྣམས་དུར་ཁྲོད་ཀྱི་ཤིང་ལ་མེ་སྦར་བ་ལ་བསྲེག་པ་སོགས་གསུངས་སོ། །དབྱེ་བ་ལ་ནི་རྟོག་བདུན་ལས་བྱ་རོག་དང་འུག་པ་དང་སྦྲུལ་དང་རྟའི་ཤ་ལ་སོགས་པ་དང་སྐྲ་དང་འབྲས་ཕུབ་རྣམས་དུར་ཁྲོད་ཀྱི་མེ་ལ་བསྲེག་པར་གསུངས་ཏེ་དང་པོ་གཉིས་ཀྱི་སྒྲོ་ཡང་སྲེག་རྫས་སོ། །རེངས་པ་ལ་ནི་བ་བླ་དང་ཡུང་བ་དང་ལྡོང་རོས་དང་གི་ཝཾ་གིས་དེའི་ཐབ་བྱ་བར་རྟོག་བདུན་ལས་གསུངས་ཏེ་སྲེག་རྫས་ཀྱང་ཡིན་ལ་དེ་ཡང་དུར་ཁྲོད་ཀྱི་མེ་ལ་བསྲེག་གོ །རྨོངས་པ་ལ་ནི་གདན་བཞི་ལས། ཤ་དང་ཉ་ལ་སོགས་པའི་རྫས། །ཐམས་ཅད་འབྲུ་དང་བག་ཕྱེ་དང་། །ཁྲག་དང་སྦྲང་རྩི་བསྲེས་པ་དང་། །བྱ་རོག་སྒྲོས་ནི་སྦྱར་བྱས་པ། །བྱ་རོག་ཚང་གི་ཤིང་དག་དང་། །སོ་ཤིང་དག་གི་ལྷག་མ་ཡིས། །དེ་དག་ལས་སུ་བྱས་ན་ནི། །བྱ་བ་ཐམས་ཅད་རྨོངས་པར་འགྱུར། །ཞེས་གསུངས་པ་ལྟར་རོ། །དབང་དགུག་ལ་སོགས་པའི་རྫས་ཀྱི་ཁྱད་པར་ཞིབ་པར་ནི་རྟོག་བདུན་ལ་སོགས་པའི་རྒྱུད་རྣམས་ལས་བསྒྲུབ་བྱ་སོ་སོ་ལ་ལྟོས་ཏེ་རྒྱས་པར་གསུངས་པ་ལས་ཤེས་པར་བྱའོ། །དེ་ལྟར་ན་སྦྱིན་སྲེག་གང་བྱེད་ཀྱང་མར་ཁུ་དང་ཡམ་ཤིང་ངེས་པར་དགོས་ལ་རྫས་གཞན་རྣམས་སྐབས་དང་སྦྱར་བས་ཆོག་གོ །གསུམ་པ་ནི། སྲེག་རྫས་རྣམས་ལ་གདན་བཞི་ལས། སྔགས་དང་ཕྱག་རྒྱས་བསང་བ་དང་སྦྱོང་བའམ་དག་པར་བྱེད་པ་བཤད་ཀྱི་རྫས་ཀྱི་བསྐྱེད་ཆོག་མ་བྱུང་ལ། འོད་སྙེ་ལས་བསྲེག་བྱའི་རྫས་ཐམས་ཅད་བཤང་བ་ལ་སོགས་པའི་བདུད་རྩི་ལྔས་བྲན་ཞིང་། བདུད་རྩིའི་ངོ་བོར་བསྒོམས་པས་སྲེག་བླུགས་བྱའོ་ཞེས་མན་ངག་རིག་ཅིང་མང་དུ་མཁྱེན་པ་རྣམས་གསུངས་སོ་ཞེས་བཤད་ལ། དཔལ་འཛིན་གྱིས་
ཀྱང་བདུད་རྩི་ལྔའི་ངོ་བོར་བསྐྱེད་ལ་བསྲེག་པར་བྱའོ་ཞེས་གསུངས་པས། འཆད་པར་འགྱུར་བ་ལྟར་བསང་བ་དང་སྦྱང་བའི་སྔགས་ཀྱིས་བསང་སྦྱངས་བྱས་ནས་སྲེག་རྫས་ཐམས་ཅད་ནང་གི་བདུད་རྩི་ལྔའི་ངོ་བོར་བསྐྱེད་ལ་དབུལ་བར་བྱའོ། །རིགས་པ་འདིས་རྒྱུད་སྡེ་འོག་མ་གསུམ་ལ་ཕྱིའི་བདུད་རྩི་ལྔའི་ངོ་བོར་བསྐྱེད་དུ་རུང་ངམ་བརྟག་གོ །རྫས་སྦྱོང་བའི་ཕྱག་རྒྱ་ནི་ལག་པ་གཉིས་ཀྱི་ཁུ་ཚུར་ཁ་སྦྱར་བའི་གུང་མོ་གཉིས་བསྒྲེངས་ནས་རྩེ་སྤྲད་པའོ། །འབུལ་བའི་གོ་རིམ་ནི། མར་མེ་མཛད་བཟང་པོས། ཡམ་ཤིང་མེ་ལ་མར་དང་ཏིལ། །མ་གྲུགས་དུར་བ་འབྲས་ཆན་ཞོ། །ཀུ་ཤ་ཆོ་གའི་རིམ་པ་ཡིན། །ཞེས་གསུངས་ཏེ་འོད་སྙེ་ཡང་འདིའི་རྗེས་སུ་འབྲང་ངོ་། །འོན་ཀྱང་འབྲས་མ་གྲུགས་པ་ཏིལ་གྱི་འོག་ཏུ་བཤད་ལ་ཀུ་ཤའི་རྗེས་སུ་སོ་བ་དང་ནས་དང་སྲན་མ་དང་གྲོ་རིམ་པ་བཞིན་དུ་འབུལ་བར་བཞེད་དོ། །འབུལ་བའི་ཚུལ་ནི་མར་ཁུ་བླུགས་གཟར་རྐྱང་བ་དང་དགང་བླུགས་གཉིས་ཀ་སྦྲགས་ནས་འབུལ་བ་གཉིས་ལས་ཕྱི་མ་ནི་ཤཱནྟི་པ་དང་ཨ་བྷ་ཡཱ་ཀ་ར་རཏྣ་རཀྴི་ཏ་རྣམས་ཀྱིས་དགང་གཟར་མར་གྱིས་བཀང་བའི་བར་བླུགས་གཟར་མར་གྱིས་བཀང་བ་གན་རྐྱལ་དུ་བཞག་ནས་འབུལ་བར་བཞེད་ལ། གདན་བཞིའི་འགྲེལ་པར་མར་གྱིས་བཀང་བའི་གཟར་བུ་ཆེན་པོ་དང་ཆུང་ངུ་ཁ་སྤྲད་དེ་དགང་བླུགས་གཅིག་ཕུལ་ལ། ཞེས་དགང་གཟར་གྱི་ཁར་བླུགས་གཟར་ཁ་ཕུབ་ནས་འབུལ་བ་ཡང་བྷ་བ་བྷ་དྲས་བཤད་དོ། །ཡམ་ཤིང་དང་དུར་བ་དང་ཀུ་ཤ་རྣམས་མཐེ་བོང་དང་མིང་མེད་ཀྱིས་དབུལ་ཞིང་འབྲུ་ལ་སོགས་པ་བླུགས་གཟར་གྱིས་བཟུང་དུ་རུང་བ་རྣམས་ནི་དེ་ཉིད་ཀྱིས་
སོ། །ཡམ་ཤིང་ནི་གཉིས་གཉིས་སམ་རེ་རེ་དང་ཀུ་ཤ་དང་དུར་བ་རྣམས་ནི་གཉིས་གཉིས་སྦྱར་ལ་དབུལ་ལོ། །སྲེག་རྫས་རེ་རེ་ལ་གྲངས་ཇི་ཙམ་ཞིག་དབུལ་བ་ལ་ནི་ངེས་མེད་དེ་ཤཱནྟི་པས། དེ་ཡང་རྫས་རེ་རེ་ལ་སྲེག་བླུགས་གཅིག་གམ་ གསུམ་མམ་བདུན་ནམ་ཉི་ཤུ་རྩ་གཅིག་གམ་བརྒྱ་རྩ་བརྒྱད ་དམ་སྟོང་དབུལ་བར་བྱའོ། །ཞེས་གསུངས་པ་བཞིན་ནོ། །འབུལ་བའི་གནས་ནི་ཁུ་བའི་རྫས་རྣམས་ནི་ཞལ་དང་ཡམ་ཤིང་དུར་བ་ཀུ་ཤ་བདུག་སྤོས་རུས་ཕྱེ་སོགས་ནི་ལྷ་རྣམས་ཀྱི་སྐུའི་འོད་ཀྱི་དཀྱིལ་འཁོར་དང་ཞོ་ཟན་བཟའ་བ་ཞལ་བསིལ་ཏིལ་ནས་ལ་སོགས་པ་ནི་ཕྱག་དང་དྲི་ཐུགས་ཀ་དང་མེ་ཏོག་ནི་དབུ་དང་ཞབས་བསིལ་ནི་ཞབས་དང་མར་མེ་མཆོད་ཡོན་ནི་མདུན་དུ་དབུལ་བར་ཤཱནྟི་པ་དང་ཨ་བྷ་ཡ་བཞེད་དེ་རེ་རེ་ཙམ་མ་གཏོགས་པ་སྡོམ་འབྱུང་དང་མཐུན་ནོ། །དགོད་པའི་ཚུལ་ལ་བོད་ཀྱི་བླ་མ་མང་པོས་སྲེག་རྫས་གཡས་ལ་མཆོད་རྫས་གཡོན་ཞེས་བཞེད་ལ། ཁ་ཅིག་སློབ་དཔོན་ཀུན་དགའ་སྙིང་པོས་མཆོད་རྫས་ཀྱང་གཡས་སུ་དགོད་པར་བཤད་ཅིང་དྲག་པོ་མ་གཏོགས་པ་ལ་མཆོད་རྫས་གཡོན་དུ་དགོད་པ་རྒྱུད་འགྲེལ་རྒྱ་གཞུང་ལས་བཤད་པ་མི་སྣང་བས་གཡས་སུ་དགོད་དོ་གསུངས་སོ། །ཆེན་པོ་རྣམས་ཀྱི་བཞེད་པ་ནི་ཕྱི་མ་དང་མཐུན་པར་སྣང་བས་འཇམ་པོ་གསུམ་ལ་ཆུ་རྣམས་དང་བསང་ཆུའི་སྣོད་གཡོན་དང་གཡས་སུ་སྲེག་རྫས་རིམ་པ་བཞིན་དུ་བསྒྲིགས་པའི་ནང་ན་མར་མཆོད་རྫས་ཚར་གཉིས་ཀྱང་བཤམས་ལ་མེ་ལྷའི་མཆོད་རྫས་ཀྱི་མཐར་དེའི་གཏོར་མ་ཡང་བཤམ་སྟེ། དྲག་པོ་རྣམས་ལ་ནི་དེ་ལས་བཟློག་སྟེ་བཤམ་མོ། །མར་ཁུ་དང་དགང་བླུགས་མདུན་དང་རྡོར་དྲིལ་གཡོན་དུ་འཇོག་
པར་མཚོ་སྐྱེས་དང་ནག་པོ་སྤྱོད་པས་བཤད་དོ། །ནང་མཆོད་མདུན་དུ་བཞག་ཅིང་རླུང་ཡབ་དང་མེ་གསོ་བའི་ཆས་དང་ཀུ་ཤ་ཡང་སྟ་གོན་བྱ་ལ་རྫས་ཐམས་ཅད་ལ་བདུད་རྩི་རིལ་བུ་བཏབ་པའི་ནང་མཆོད་ཀྱིས་བྲན་ནོ། །དཱ་རི་ཀ་པས་མཆོད་ཡོན་དང་གཟར་བུའི་གདན་དང་སློབ་དཔོན་གྱི་གདན་ཡང་ཐབ་ཁུང་འདྲ་བ་བྱ་བར་བཞེད་དོ། །བཞི་པ་ནི། ཞི་བ་ལ་ཤིང་འོ་མ་ཅན་དང་གཙུབ་ཤིང་ལས་བྱུང་བའི་མེ་དང་མེ་ཐ་མལ་བ་དང་དགོན་པའི་མེ་དང་སྦྱིན་སྲེག་གི་མེ་ཡང་རུང་ངོ་། །ཕྱི་མ་ལ་མཆོད་སྦྱིན་གྱི་ཤིང་ལས་བྱུང་བའི་མེ་ཞེས་ཀྱང་འབྱུང་ངོ་། །རྒྱས་པ་ལ་རྒྱལ་པོའམ་རྒྱལ་རིགས་ཀྱི་ཁྱིམ་ནས་བྱུང་བ་དང་ནགས་མེས་ཚིག་པ་དང་ནོར་བུ་ལས་བྱུང་བ་དང་དགེ་འདུན་གྱི་ཚང་མང་ལས་བྱུང་བའི་མེའོ། །དབང་ལ་སྨད་འཚོང་དང་རྗེ་རིགས་ཀྱི་ཁྱིམ་གྱི་མེ་དང་དབང་གི་དགུག་པ་ལ་གར་མཁན་དང་འགྲོན་པོས་བུས་པའི་མེས་སོ། །དྲག་པོ་ལ་ནི་མི་རུས་བསྲེགས་པ་དང་རྡོ་ལས་བྱུང་བ་དང་གདོལ་བའི་ཁྱིམ་གྱི་མེའོ། །དུར་ཁྲོད་ཀྱི་ཤིང་ལས་བྱུང་བ་ཡང་ཉིན་མོ་འབྱུང་གནས་ཀྱིས་སོ། །རྨོངས་རེངས་ལ་རྗེ་རིགས་བླུན་པོ་དང་བསྐྲད་དབྱེ་ལ་ཐ་མལ་བའི་མེས་བྱ་བར་དཱ་རི་ཀ་པས་བཤད་དོ། །མེའི་ལྟས་རྟོག་པའི་སྐབས་ནི་སྡོམ་འབྱུང་ལ་སོགས་པ་གཞུང་མང་པོས་མེ་ལྷ་ལ་ཐོག་མར་དགང་བླུགས་ཕུལ་བའི་རྗེས་དེ་མ་ཐག་རྟོག་པར་བཤད་པ་ལྟར་ཡིན་ལ། ཚད་ལྡན་གྱི་གཞུང་འགའ་ཞིག་ཏུ་དང་པོར་མེ་སྦར་བའི་སྐབས་སུ་ལྟས་རྟོག་པ་བཤད་པའི་དགོངས་པ་ཡང་སྔ་མ་དང་མཐུན་པར་བྱའོ། །དམ་ཚིག་དང་སྡོམ་པ་ཚུལ་བཞིན་དུ་བསྲུང་ཞིང་བཟླས་
སྒོམ་བཤད་པ་བཞིན་སྔོན་དུ་སོང་བས་བཤད་པ་ལྟར་གྱི་སྦྱིན་སྲེག་བྱེད་པའི་མེ་ལྟས་ལ་ཡིད་ཆེས་པར་བྱའོ། །དེས་ན་མེ་ལ་བགེགས་ཡོད་མེད་ནི་རྟགས་ཀྱི་སྒོ་ནས་ཤེས་པར་བྱ་བའི་རྟགས་ནི། མེའི་ཁ་དོག་དང་སྒྲ་དང་དྲི་དང་དབྱིབས་བཞི་ཡིན་ཏེ། སྡོམ་འབྱུང་ལས། མཁས་པས་མདོག་དང་སྒྲ་དང་ནི། །དྲི་དང་འབར་བའི་དབྱིབས་བརྟག་སྟེ། །དེ་བཞིན་མེ་ཡི་དགེ་མི་དགེའི། །མཚན་མ་ཉེ་བར་མཚོན་པར་བྱ། །ཞེས་སོ། །དགེ་པའི་རྟགས་ནི་སྡོམ་འབྱུང་ལས། མེ་ནི་རྩེ་མོ་གཅིག་འབར་བ། །ཕུན་སུམ་ཚོགས་པ་ཐམས་ཅད་བྱེད། རྩེ་མོ་གཉིས་ནི་མི་འཁྲུག་པ། །ཀུན་ཏུ་འབར་བ་འབྲིང་ཞེས་བྱ། །རྩེ་མོ་བཞི་ནི་མཉམ་འབར་བས། །རྒྱས་པའི་དངོས་གྲུབ་བརྟན་པར་གནས། །ཀུནྡ་ཟླ་བ་དང་མཚུངས་སྣུམ། །གཟུགས་བཟང་བཻ་ཌཱུརྱ་འདྲའི་འོད། །དྲི་བྲལ་དུ་བ་མེད་པའི་མེ། །ནད་མེད་པ་དང་རིགས་འཕེལ་བྱེད། །ཟླ་བ་ཆུ་ཤེལ་ནོར་བུའི་འོད། །ཁ་བ་ཡི་ནི་མདོག་ལྟ་བུ། །པུས་པ་རཱ་གའི་མདོག་མཚུངས་པ། །སྡིག་པ་ཐམས་ཅད་འཇིག་པར་བྱེད། །མེ་ཏོག་བན་དུ་ཀ་མཚུངས་ཤིང་། །ཛ་བའི་མེ་ཏོག་དང་འདྲ་བ། །བཙོ་མ་གསེར་གྱི་མདོག་ལྟ་བུ། །དབང་ཕྱུག་རྒྱལ་སྲིད་རབ་ཏུ་སྟེར། །ཙ་པག་པདྨ་ཨུཏྤལ་དྲི། །ཨུ་ཤིར་མཱ་ལ་ཏིསཱི་ཏ། །ག་པུར་ཨ་ཀ་རུ་ཡི་དྲིས། །དགེ་ཞིང་གནས་ཀྱི་བདག་པོ་མཆོག །པི་ཝང་རྒྱུད་མངས་རྫ་རྔ་དང་། །དུང་དང་ཟངས་དུང་ལྟར་སྒྲ་སྙན། །ཤིན་ཏུ་ཟབ་པའི་སྒྲ་སྙན་པའི། །མི་མཐོང་བདེ་བ་འབྱུང་བར་བྱེད། །དཔལ་བེའུ་གདུགས་དང་ཆུ་སྐྱེས་དུང་། །རྩེ་གསུམ་པ་དང་བུམ་པའི་དབྱིབས། །རྒྱལ་མཚན་རྔ་ཡབ་རྡོ་རྗེ་བཟང་། གཡུང་དྲུང་རྟ་དང་གླང་པོའི་
དབྱིབས། །སྒྲ་མེད་གཡས་སུ་འཁྱིལ་བ་དང་། །དུམ་བུ་གཅིག་པ་དོན་ཆེན་སྟེར། །འདི་དག་དགེ་བ་ཕུན་སུམ་ཚོགས། །ཚེ་རིང་ནད་མེད་ཕུན་སུམ་ཚོགས། ཞེས་སོ། །འོད་སྙེ་ལས། ཞི་སོགས་བཞི་ལ་དཀར་སེར་དམར་ནག་དགའ་བ་དང་མེ་རྩེ་གསུམ་པ་སྤྲིན་དང་འདྲ་བ་ཤིན་ཏུ་དམན་པར་བཤད་དོ། །མི་དགེ་བའི་ལྟས་ཀྱང་སྡོམ་འབྱུང་ལས། གཡོ་ཞིང་མདུན་གྱི་ཕྱོགས་སུ་འབར། །རྩེ་གསུམ་དུ་བའི་ཚོགས་མང་དང་། །འཁོར་ཞིང་མེ་སྟག་དང་བཅས་པ། །རྣམ་པར་འཕྲོ་བས་ནད་འཕེལ་བྱེད། །མེ་གང་ཡང་ཡང་རབ་ཏུ་འདར། །ཡང་ཡང་རབ་ཏུ་རྒོད་པ་དང་། །ཡང་ཡང་གཡོན་དུ་འཁོར་བ་དང་། །ཡང་ཡང་ས་ལ་རེག་བྱེད་ཅིང་། །ཐིག་ལེ་ནག་པོ་སོལ་བའི་མདོག །མྱུར་དུ་རིགས་ནི་ཟད་འགྱུར་ངེས། །གང་ཞིག་རྒྱལ་པོའི་དྲུང་གནས་པའི། །སྡེ་དང་བདག་པོ་འཇོམས་པར་སྟོན། །མདོག་ངན་དུ་བའི་མདོག་ལྟར་གནག །མདོག་ལྗང་སྣ་ཚོགས་མདོག་རྩུབ་པ། །པ་ལ་ཤ་དང་འབྲུ་མར་མདོག །འདོད་པའི་དོན་རྣམས་ཉམས་པར་བྱེད། །རོ་དྲི་ཉ་ཡི་དྲི་ལྟར་ངན། །ཆུ་སྐྱེས་སྲོག་ཆགས་དྲི་དང་ལྡན། །གལ་ཏེ་མེ་ནི་འདི་ལྟར་འགྱུར། །གཙོ་བོ་རྣམ་པར་ལྟུང་བར་བརྗོད། །ཙ་ཌ་ཙ་ཌ་ཞེས་སྒྲ་དང་། །ཚམ་ཚམ་ཞེས་པའི་སྒྲ་དང་ལྡན། །སིམ་སིམ་གྱིས་ནི་སྒྲ་བདག་ཉིད། །རྡོ་རྗེའི་སྒྲ་ནི་དོན་ཉམས་བྱེད། །མདུང་དང་རལ་གྲི་མདའ་དང་སྦྲུལ། །རྔ་མོ་བ་ལང་མགོ་ལྟ་བུ། །འཇིགས་རུང་རྣམ་པ་གང་དེ་མཐོང་། །ཞེས་གསུངས་སོ། །རྡོ་རྗེ་མཁའ་འགྲོ་ལས། སྲེག་རྫས་ཚིག་པ་ཧ་ཅང་མྱུར་བ་ཡང་ངན་པ་དང་མངོན་སྤྱོད་ལ་དེ་དག་བཟང་བ་དང་དེ་ལ་
བཟང་བ་གཞན་རྣམས་ལ་མི་ཤིས་པར་བཤད་ལ། སྔགས་མཁན་མེས་ཧ་ཅང་གདུང་བ་ཡང་མི་དགེ་བའི་ལྟས་སོ། །བགེགས་ཡོད་པར་ཤེས་ན་དེའི་ཉེས་དམིགས་བཟློག་ཐབས་འོག་ནས་འབྱུང་བ་ལྟར་བྱའོ། །འདིར་ཤཱནྟི་པ་དང་འོད་སྙེས་མར་གྱི་སྲེག་བླུགས་འབུལ་བར་བཤད་པ་དང་། རྡོ་རྗེ་མཁའ་འགྲོ་དང་སྡོམ་འབྱུང་ལས་དགང་བླུགས་འབུལ་བར་བཤད་པ་མི་འགལ་ཏེ། ཉིན་མོ་འབྱུང་གནས་ཀྱི་དཀྱིལ་ཆོག་ལས་མར་གྱིས་བསྲེག་པས་ལན་བདུན་བསྲེག་པར་བྱའོ་ཞེས་སྐབས་འདིར་གསུངས་པ་ལྟར་མར་གྱིས་ལན་བདུན་བསྲེགས་པ་ལ་སྲེག་བླུགས་ཞེས་བཏགས་པའམ་ཡང་ན་གཞུང་དེར་རྫོགས་པའི་སྲེག་བླུགས་དང་ཅིག་ཤོས་ཀྱི་སྲེག་བླུགས་ཞེས་དགང་བླུགས་ལ་རྫོགས་པའི་སྲེག་བླུགས་སུ་བཤད་པ་ལྟར་ཡིན་པའི་ཕྱིར་རོ། །ལྔ་པ་ལ་གཉིས། ཁ་བལྟ་ཕྱོགས་དང་འདུག་སྟངས་ལ་སོགས་པའི་ཁྱད་པར་དང་། བདག་མདུན་གྱི་ལྷའི་རྣལ་འབྱོར་ལ་སོགས་པའི་ཁྱད་པར་རོ། །དང་པོ་ནི། ཁ་བལྟ་ཕྱོགས་ནི་རྟོག་བདུན་ལས། ཞི་བ་ལ་ཤར་དང་རྒྱས་པ་ལ་བྱང་དབང་ལ་ནུབ་དང་བསད་བསྐྲད་ལ་ལྷོ་དང་རེངས་པ་ལ་བྱང་དུ་བལྟ་བར་བཤད་དོ། །དབང་གི་དགུག་པ་ནི་དབང་དང་འདྲ་བ་ལ་ཁ་གྱེན་དུ་བལྟའོ། །ལྷ་མཉེས་པར་བྱེད་པ་ལ་ཡང་ཁ་ནུབ་ཏུ་བལྟ་བར་འོད་སྙེ་ལས་གསུངས་ཏེ་འདི་ནི་སྔར་བཤད་པའི་ལྷ་དབང་དུ་བྱེད་པའོ། །དྲག་པོའི་དགུག་པ་ཡང་དྲག་པོ་དང་འདྲ་ལ་དབྱེ་བ་བསད་པ་དང་རྨོངས་པ་རེངས་པ་དང་འདྲ་བར་བྱའོ། འོད་སྙེ་ལས། རྨོངས་རེངས་ལ་དབང་ལྡན་དང་བསྐྲད་པ་ལ་མེ་དང་དབྱེ་བ་ལ་སྲིན་པོར་བལྟ་བར་བཤད་དེ་འདི་དང་ཅུང་མི་འདྲའོ། ཁ་ཅིག་དབང་དགུག་དང་ཞི་
བ་ལ་དཀྱིལ་འཁོར་དང་མ་འབྲེལ་ན་སྔར་ལྟར་ཡིན་ལ་འབྲེལ་ན་སྔ་མ་ལ་ཤར་དང་ཕྱི་མ་ལ་ནུབ་ཏུ་བལྟ་བ་ཡིན་ཞེས་གསུངས་མོད་ཀྱང་། དཔལ་འཛིན་གྱིས་དཀྱིལ་འཁོར་མཆོད་པའི་ཞི་བའི་སྦྱིན་སྲེག་ལ་ཁ་ཤར་དུ་བལྟ་བ་དང་། འོད་སྙེ་ལས་ཀྱང་། ཞི་རྒྱས་དབང་དང་མངོན་སྤྱོད་ལ། །དཀྱིལ་འཁོར་གྱི་ནི་ཤར་དང་ལྷོ། །ནུབ་དང་བྱང་དུ་ཐབ་ཁུང་རྣམས། །ཤར་བྱང་ནུབ་ལྷོ་ཁ་བལྟས་པའི། །ཞེས་གསུངས་ཤིང་ཉིན་མོ་འབྱུང་གནས་ཀྱིས་དཀྱིལ་འཁོར་དང་འབྲེལ་བ་ལ་ཡང་སྔར་བཞིན་བཤད་དོ། །འདུག་སྟངས་ནི་ཞི་བ་ལ་འཇམ་ཞིང་བདེ་བའི་སྟན་ལ་པདྨའི་འདུག་སྟངས་བྱ་སྟེ་དེ་ནི་བྱིན་པ་གཡས་པར་བྱིན་པ་གཡོན་པ་བཞག་སྟེ་པུས་མོ་གཉིས་སྨད་པའོ། །རྒྱས་པ་ལ་བཟང་པོའི་འདུག་སྟངས་ཏེ་དེ་ནི་སྟན་མཐོན་པོ་ལ་གནས་ཏེ་རྐང་པ་གཉིས་དྲང་བོར་བསྲང་བའོ། །དབང་དང་དེའི་དགུག་པ་ལ་མཐོ་ཞིང་བདེ་བའི་སྟན་ལ་རྡོ་རྗེ་སྐྱིལ་ཀྲུང་བྱ་སྟེ་དེ་ནི་བརླ་གཡས་པ་དང་བྱིན་པའི་དབུས་སུ་རྐང་པ་གཡོན་པ་བཞག་ནས་དེའི་སྟེང་དུ་བརླ་གཡོན་པ་དང་བྱིན་པའི་དབུས་སུ་རྐང་པ་གཡས་པ་བཞག་པའོ། །མངོན་སྤྱོད་ལ་སྟན་སྲ་བའམ་བསྒྲུབ་བྱའི་གཟུགས་བརྙན་གྱི་བྲང་ལ་གནས་པའམ། སྟན་མེད་པར་ཙོག་པུར་གནས་ཏེ་རྐང་པས་རྐང་པ་མནན་པ་དང་ཁྲོ་བོའི་སྐྱིལ་ཀྲུང་སྟེ་དྲག་པོའི་དགུག་པ་ལ་ཡང་དེ་ལྟར་དང་རྨོངས་རེངས་ལ་རྡོ་རྗེ་སྐྱིལ་ཀྱུང་དང་དབྱེ་བ་ལ་རྐང་པ་བཟློག་སྟེ་འདུག་པར་འོད་སྙེ་ལས་བཤད་དོ། །བསམ་པ་ནི་ཞི་བ་ལ་བྱམས་པ་དང་སྙིང་རྗེའི་སེམས་དང་རྒྱས་པ་ལ་དགའ་ཞིང་ཚིམ་པའི་ཡིད་དང་དབང་ལ་ཆགས་པའི་སེམས་དང་དྲག་པོ་ལ་རྒྱུའི་
ཀུན་སློང་གི་ཚེ་སྙིང་རྗེ་དང་དུས་ཀྱི་ཀུན་སློང་ནི་རྩུབ་པའི་སེམས་དང་ལྡན་པས་བྱ་སྟེ་ཕྱི་མ་ལ་སོས་སོ་འཆའ་ཞིང་མིག་གདོང་ཚུགས་སུ་བལྟ་ལ་བཞིན་ཁྲོ་གཉེར་ཅན་དུ་བྱའོ། །ཆས་གོས་ནི་འཇམ་པོ་གསུམ་ལ་ཁྲུས་བྱས་ལུས་དྲི་ཞིམ་པོས་བྱུགས་ལ་གོས་དཀར་པོ་དང་རྒྱན་དང་ཕྲེང་བ་སེར་པོ་ཅན་གྱི་གོས་སྣ་ཚོགས་པ་དང་རྒྱན་དང་གོས་དམར་པོ་ཅན་ནོ། །དྲག་པོ་ལ་ནི་རྒྱན་དང་གོས་སྔོན་པོའམ་ཁྲག་གམ་ཆུས་གཤེར་བའི་གོས་ཏེ་རྨོངས་རེངས་ལ་སེར་པོའོ། །ལས་ཐམས་ཅད་པ་ལ་ནི་ལས་སོ་སོ་དང་མཐུན་ནོ། །གཉིས་པ་ལ་ནི་གཉིས། བདག་མདུན་གྱི་ལྷའི་རྣལ་འབྱོར་ཇི་ལྟར་བྱ་བ་དང་། མེའི་མཆོད་སྦྱིན་གྱིས་དངོས་གྲུབ་འགྲུབ་པའི་སྒོ་བཤད་པའོ། །དང་པོ་ནི། མེ་ལྷ་ཐོག་མཐའ་གཉིས་ཀྱི་སྐབས་སུ་བདག་མདུན་གྱི་ལྷ་གཉིས་འདྲ་བ་མི་དགོས་མོད། འོན་ཀྱང་བར་གྱི་སྐབས་སུ་སྦྱིན་སྲེག་འབུལ་བའི་ལྷའི་གཙོ་བོ་དང་བདག་བསྐྱེད་ཀྱི་ལྷ་གཉིས་འདྲ་བ་དགོས་སམ་མི་དགོས་སྙམ་ན་འདི་ལ་འོད་སྙེ་ལས། རང་ཡང་རང་གི་ལྷག་པའི་ལྷ་ཉིད་ལས་དང་རྗེས་སུ་མཐུན་པའི་རྣལ་འབྱོར་དང་ལྡན་པའམ་ཡང་ན་ཐབ་ཁུང་དུ་བཀོད་པའི་ལྷའི་རྣལ་འབྱོར་དང་ལྡན་པའོ། །ཞེས་ཐབ་ཁུང་དུ་ལྷ་གང་བྱེད་ཀྱང་བདག་བསྐྱེད་རང་གི་ལྷག་པའི་ལྷ་གཅིག་པུས་བྱེད་པ་དང་ཐབ་ཀྱི་ལྷའི་རྣལ་འབྱོར་གྱིས་བྱེད་པ་གཉིས་གསུངས་ལ། ལས་ཐམས་ཅད་པ་ལ་ཐབ་ཁུང་དུ་རང་གི་ལྷག་པའི་ལྷ་ཉིད་འགོད་པར་གསུངས་ཀྱང་དེའི་བདག་བསྐྱེད་ལའང་སྔར་ལྟར་གཉིས་གསུངས་པས་རང་གི་ལྷག་པའི་ལྷ་ཁོ་ན་ཐབ་ཁུང་དུ་འགོད་པར་མ་ངེས་སོ། །མེ་ལྷ་ལས་གཞན་པའི་འཇིག་རྟེན་པའི་ལྷ་ཐབ་ཏུ་བཀོད་ནས་སྦྱིན་སྲེག་བྱེད་ན་ནི་ཕལ་
ཆེར་ལྷ་གཉིས་མི་འདྲ་བར་བྱའོ། །དེའི་བྱེད་ཚུལ་ནི་འོད་སྙེ་ལས། དམ་ཚིག་པ་བསྐྱེད་པ་དང་ཡེ་ཤེས་པ་གཞུག་པ་དང་དམ་ཚིག་བསྒྲག་པ་དང་དེ་ལ་མཆོད་པ་དང་སྲེག་རྫས་དབུལ་བ་དང་མཐར་གཤེགས་པ་རྣམས་མེ་ལྷ་བཞིན་དུ་བྱ་བར་གསུངས་ཏེ་སྔ་རྟིང་དུ་མེ་ལྷ་ལ་སྦྱིན་སྲེག་བྱེད་པ་འདི་ལའང་བྱའོ། །ལྷའི་ཁ་དོག་ནི་རྟོག་བདུན་ལས། ལས་ཀྱི་རྗེས་སུ་འབྲང་བའི་ལྷའི་སྦྱོར་བ་དམིགས་ནས་ཞེས་གསུངས་ཤིང་དབང་གི་སྐབས་སུ་དམར་པོ་བསྒོམ་པར་བཤད་པས་ཞི་སོགས་གསུམ་ལ་དཀར་སེར་དམར་པོ་དང་བསད་བསྐྲད་དབྱེ་བ་གསུམ་ལ་ནག་པོ་དང་རྨོངས་རེངས་ལ་སེར་པོར་བྱའོ། །འོད་སྙེ་ལས། ལས་སོ་སོ་བ་དང་ཐམས་ཅད་པ་གཉིས་ཀ་ལ་ལྷའི་གཟུགས་དང་རྒྱན་ལ་སོགས་པ་ལས་སོ་སོའི་ཁ་དོག་དང་མཐུན་པར་གསུངས་པས་དཀྱིལ་འཁོར་མཆོད་པ་དང་། བསྙེན་པའི་ཁ་སྐོང་དང་ལས་ཐམས་ཅད་པ་རྣམས་ལའང་ལས་སོ་སོའི་ཁ་དོག་ཅན་དུ་བྱ་དགོས་སོ། །རྟོག་བདུན་གྱི་འགྲེལ་པ་གཉིས་དང་། ཨ་མོ་གྷ་ཆུང་བའི་སྦྱིན་སྲེག་གཉིས་སུ་འདས་པའི་ལྷ་གཙོ་བོ་རྐྱང་བ་ལ་གཞལ་ཡས་ཁང་མེད་པར་བསྐྱེད་པ་ལྟར་ན་རླུང་གི་གདན་བསྒོམ་པ་ནས་བྱ་བའམ། ཡང་ན་གཞལ་ཡས་ཁང་དང་བཅས་པ་སྒྲུབ་ཐབས་བཞིན་བསྐྱེད། ལྷ་ཞེ་དགུ་མ་ལ་སོགས་པ་ཡིན་ན་གཞལ་ཡས་ཁང་ལྷ་རྫོགས་པ་དང་བཅས་པ་སྒྲུབ་ཐབས་བཞིན་དུ་བསྐྱེད་དོ། །ཨ་མོ་གྷ་ཆུང་བས་དྲག་པོའི་སྦྱིན་སྲེག་ཏུ་ཞལ་དགུ་གའི་ཁ་དོག་སོར་བཞག་བྱས་ལ་འོད་སྙེ་ལས་ཀྱང་ལས་བཞིའི་མེ་ལྷའི་སྐབས་སུ་རྩ་ཞལ་གྱི་ཁ་དོག་ལས་སོ་སོ་དང་མཐུན་པར་མཛད་ནས་ཞལ་ལྷག་མ་རྣམས་ཀྱི་
ཁ་དོག་མི་བསྒྱུར་བ་མཛད་དོ། །མེ་ལྷའི་སྙིང་གར་བསྐྱེད་པ་ལ་དེ་ཁོ་ན་ཉིད་ཀྱི་ཡེ་ཤེས་དང་མེ་ལྷ་གཉིས་ངོ་བོ་གཅིག་ཏུ་བལྟས་ནས་བསྐྱེད་པར་འོད་སྙེ་ལས་བཤད་དེ་མར་མེ་མཛད་བཟང་པོའི་གདམས་པའོ། །གཙོ་བོ་ལ་འབུལ་བའི་ཚེ་དེའི་ལྗགས་ལ་སྟོབ་པས་ལྷ་ཐམས་ཅད་ཀྱིས་གསོལ་བར་མོས་པའམ་ལྗགས་ཐམས་ཅད་ཐ་མི་དད་དུ་མོས་ནས་ཕུལ་ན་ལྷ་ཐམས་ཅད་ལ་ཕུལ་བར་འགྱུར་བར་ཤཱནྟི་པས་བཤད་དོ། །སྦྱིན་སྲེག་གི་འཁོར་གསུམ་ཐམས་ཅད་དེ་ཁོ་ནར་ཅིར་ཡང་མ་གྲུབ་པར་ངེས་པ་བསྐྱེད་ནས་བདག་དང་ལྷ་དང་མཆོད་སྦྱིན་གྱི་རྫས་དང་ཐབ་དང་དགང་བླུགས་ལ་སོགས་པ་རྣམས་སྒྱུ་མ་ལྟ་བུར་ཤར་བའི་ངང་ནས་སྦྱིན་སྲེག་བྱེད་པ་ཤིན་ཏུ་གལ་ཆེ་བར་གསུངས་པས་ཡང་ཡང་དེའི་དྲན་པ་གསོ་བར་བྱའོ། །གཉིས་པ་ནི། ཞིང་དང་རྟེན་དང་བསམ་པ་དང་མཆོད་སྦྱིན་གྱི་རྫས་མཚུངས་ཀྱང་མེ་ལ་མཆོད་སྦྱིན་བྱས་པ་ནི་ལྷ་ཚིམ་པ་དང་དངོས་གྲུབ་འགྲུབ་པ་ལ་གཞན་ལས་ཆེས་མཆོག་ཏུ་གསུངས་པ་ནི་མཆོད་སྦྱིན་བྱེད་པའི་སྒོ་མེའི་དེ་ཉིད་ཤེས་པ་ལ་རག་ལས་སོ། །དེ་ཡང་ཁ་སྦྱོར་ལ་སོགས་པའི་རྒྱུད་རྣམས་ལས། ལྷ་ཡི་ཁ་ནི་མེ་རུ་གསུངས། །ཞེས་མེ་ལྷའི་ཞལ་དུ་གསུངས་པའི་མེ་ནི་མེ་ལྷ་ཡིན་ཏེ་རིག་པ་མཆོག་ལས། དྲང་སྲོང་ཆེན་པོ་ཁྱོད་ནི་ལྷ་ཐམས་ཅད་ཀྱི་ཞལ་ཡིན་ནོ་ཞེས་མེ་ལྷ་ལ་གསུངས་པའི་ཕྱིར་རོ། །འོ་ན་མེ་ལྷ་ལྷ་རྣམས་ཀྱི་ཞལ་ཇི་ལྟར་ཡིན་སྙམ་ན། སྦྱིན་སྲེག་གི་མེ་ནི་ལྷ་ལ་ཕུལ་བའི་སྲེག་རྫས་རྣམས་ཟ་བའི་སྒོ་ཡིན་པས་ན་ལྷའི་ཁ་ཞེས་པའི་ཐ་སྙད་འཐོབ་ལ་མེ་དེ་ཉིད་ནི་མེ་ལྷའི་ངོ་བོར་བསྐྱེད་དགོས་པའི་ཕྱིར་མེ་ནི་ལྷ་རྣམས་ཀྱི་ཞལ་དུ་གསུངས་སོ། །རཾ་ལས་མེ་ལྷ་
བསྐྱེད་པ་ཡང་རཾ་གྱིས་མཚོན་པའི་མེ་ཉིད་མེ་ལྷར་བསྐྱེད་པའི་དོན་ཡིན་ཏེ། རང་གི་ས་བོན་ལས་གཟུགས་ཕུང་རྣམ་སྣང་དུ་བསྐྱེད་པ་དང་འདྲའོ། །དེས་ན་མེ་ལྷ་གཤེགས་གསོལ་གྱི་སྐབས་སུ་མཚོ་སྐྱེས་ལ་སོགས་པས་ཀྱང་ཡེ་ཤེས་པ་གཤེགས་ནས་དམ་ཚིག་པའི་མེ་ལྷ་མེ་འབར་བའི་རྣམ་པར་གྱུར་པར་བཤད་པས་སྦྱིན་སྲེག་གི་མེ་དང་མེ་ལྷ་གཉིས་ངོ་བོ་གཅིག་ཏུ་མོས་པར་བྱས་ནས་མེ་ལ་སྲེག་རྫས་བསྲེག་དགོས་སོ། །མེ་དང་མེ་ལྷ་ངོ་བོ་གཅིག་ཏུ་བསྐྱེད་པའི་དམ་ཚིག་པ་ལ་ཡེ་ཤེས་པའི་མེ་ལྷ་སྤྱན་དྲངས་ནས་བྱིན་གྱིས་བརླབས་པའི་མེ་ལ་རྫས་རྣམས་བསྲེགས་པས་འཇིག་རྟེན་ལས་འདས་པའི་ལྷས་དངོས་གྲུབ་སྩོལ་བའི་སྒོར་འགྱུར་བས་ཐོག་མར་མེ་ལྷ་བསྐྱེད་ནས་སྦྱིན་སྲེག་བྱེད་པ་ཡིན་ཏེ། རིག་པ་མཆོག་ལས། གནོད་སྦྱིན་གྱི་བདག་པོ། བདག་འོང་བ་ནི་དངོས་གྲུབ་འགྲུབ་པའི་རྒྱུར་འགྱུར་ཏེ་གང་གིས་བདག་འོང་བར་འགྱུར་བའི་བདག་སྤྱན་དྲངས་པའི་གསང་སྔགས་བཤད་པར་བྱའོ་ཞེས་མེ་ལྷས་ཕྱག་རྡོར་ལ་གསུངས་པའི་ཕྱིར་རོ། །དེ་ལྟར་ན་སྦྱིན་སྲེག་གིས་དངོས་གྲུབ་སྒྲུབ་པ་ལ་ཐོག་མར་མེ་ལྷ་ཐབ་ཏུ་འགུགས་པར་ནུས་པ་ཞིག་གལ་ཆེ་ལ་དེ་ཡང་རིག་པ་མཆོག་ལས། ལས་ཐམས་ཅད་ལའང་ཐོག་མར་པ་ལ་ཤའི་ཤིང་གི་མེ་སྦར་ནས་འབྲས་ཡོས་ཞོ་དང་སྦྲང་རྩི་དང་མར་དང་སྦྱར་བས་མེ་ལྷ་ལ་ལན་སྟོང་ཕྲག་བརྒྱད་སྦྱིན་སྲེག་བྱས་ན་ལས་འགྲུབ་པ་དང་མེ་ལྷ་བྱོན་པའི་རྟགས་ཀྱང་མེའི་དབུས་སྔོ་བྲེང་ངེ་འདུག་པ་དང་མཐའ་སྔོ་བ་དང་མེའི་རྩེ་མོ་རྒྱས་པ་དང་རྩ་བ་སྔོ་ཞིང་མགྱོགས་པ་རྣམས་ཡིན་པར་
གསུངས་སོ། །འདི་ནི་ལྷ་དབང་དུ་བྱེད་པའི་སྦྱིན་སྲེག་ལྟར་བྱའོ། །གཉིས་པ་ལ་གཉིས། སྤྱིར་བཏང་ཞི་བའི་ཆོ་ག་དང་། ལས་གཞན་རྣམས་ཀྱི་ཆོ་གའི་དམིགས་བསལ་ལོ། །དང་པོ་ལ་གསུམ། སྔོན་དུ་བྱ་བའི་ཆོ་ག་དང་། དངོས་གཞིའི་ཆོ་ག་དང་། མཇུག་གི་ཆོ་ག་བསྟན་པའོ། །དང་པོ་ནི། སྔར་བཤད་པ་བཞིན་ཆོ་གའི་ཡན་ལག་ཐམས་ཅད་ཚོགས་པར་བྱས་ལ་པདྨའི་འདུག་སྟངས་ཀྱིས་ཁ་ཤར་དུ་ཕྱོགས་ཏེ་འདུག་ནས་བདག་བསྐྱེད་ཀྱི་མཆོད་རྫས་རྣམས་བསང་བ་དང་སྦྱང་བ་དང་བསྐྱེད་པ་དང་བྱིན་གྱིས་བརླབས་ནས་ཞི་བའི་ལས་ཀྱི་ཁ་དོག་དང་མཐུན་པར་བདག་བསྐྱེད་རྫོགས་པར་སྒྲུབ་ཐབས་བཞིན་དུ་བསྒོམ་མོ། །དེ་ནས་སྨྲ་བ་གཞན་བཅད་དེ་རྡོ་རྗེ་ནི་ཐབས་དང་དྲིལ་བུ་ནི་ཤེས་རབ་དང་གཉིས་ཀ་ཡང་དོན་དམ་པའི་བྱང་ཆུབ་ཀྱི་སེམས་ཀྱི་རང་བཞིན་ནོ་སྙམ་དུ་མོས་པ་ཤིན་ཏུ་བརྟན་པར་བྱས་ནས། ༀ་སརྦ་ཏ་ཐཱ་ག་ཏ་སིངྔྷི་བཛྲ་ས་མ་ཡེ་ཏིཥྛ་ཨེ་ཥ་སྟཾ་དྷཱ་ར་ཡཱ་མི་ཧི་ཧི་ཧི་ཧི་ཧི་ཧཱུཾ་ཧཱུཾ་ཧཱུྃ་ཕཊ་སྭ་ཧཱ། ཞེས་བརྗོད་ཅིང་རྡོ་རྗེ་གཡས་པའི་མཐེ་བོང་དང་མིང་མེད་དང་ༀ་བཛྲ་གྷཎྜ་ཧཱུཾ། ཞེས་བརྗོད་ཅིང་དྲིལ་བུ་གཡོན་པའི་མཐེ་བོང་དང་མིང་མེད་ཀྱིས་བཟུང་ནས་དེ་གཡོན་པའི་དཀུར་བཞག་ལ་རྡོ་རྗེ་སེམས་དཔའ་ལ་སོགས་པ་རྣམས་མཉེས་པར་བྱའོ་སྙམ་དུ་བསམས་ནས་ཧཱུཾ་ཡིག་བརྗོད་པ་སྔོན་དུ་འགྲོ་བས། སེམས་ཅན་རྨོངས་དང་འབྲལ་བ་ཡི། །རྡོ་རྗེ་གསོར་བ་མཛེས་པ་ཡིས། །རྣམ་ཐར་ཆོས་ཀྱི་བྱ་བ་སྟེ། །སྤྲོད་དང་བཅས་པས་རྡོ་རྗེ་བཟུང་། །ཧཱུཾ་ཧཱུཾ་ཧཱུཾ་ཧོ་ཧོ་ཧོ། ཞེས་བརྗོད་ཅིང་རྡོ་རྗེ་གསོར་བར་བྱའོ། །དེ་ནས་རྡོ་རྗེ་གཡས་པའི་དཀུར་བཟུང་བའམ་གསོར་ཞིང་ༀ་བཛྲ་དྷ་རྨ་ར་ཎི་ཏ་པྲ་ར་ཎི་ཏ་སཾ་པྲ་ར་ཎི་ཏ་སརྦ་བུདྡྷ་ཀྵེ་ཏྲ་
པྲ་ཙ་ལི་ནེ་པྲཛྙཱ་པཱ་ར་མི་ཏ་ནཱ་ད་སྭ་བྷ་ཝེ་བཛྲ་ས་ཏཱ་ཧྲི་ད་ཡ་སནྟོ་ཥ་ནི་ཧཱུཾ་ཧཱུཾ་ཧཱུཾ་ཧོ་ཧོ་ཧོ་སྭཱཧཱ། ཞེས་བརྗོད་ཅིང་དྲིལ་བུའི་དབུས་ཀྱི་ཕྱོགས་བརྒྱད་དུ་ལྕེ་བསྐྱོད་པས་དཀྲོལ་བར་བྱའོ། །དེ་ནས་བསང་ཆུའི་སྣོད་ནས་ཀུ་ཤའི་རྩེ་མོས་ལག་པ་གཡས་པས་ཆུ་བླངས་ཏེ། ལས་སྔགས་བཟླ་ཞིང་རང་གི་གཡོན་ངོས་ནས་གཡས་སྐོར་དུ་ཐབ་དང་རྫས་ཐམས་ཅད་དང་དགང་བླུགས་དང་རང་ལ་ཡང་བསང་གཏོར་བྱ་སྟེ་ནང་མཆོད་ཀྱིས་ཀྱང་བསངས་ལ་མེ་ལྷའི་མཆོད་རྫས་རྣམས་སྦྱང་ཞིང་བསྐྱེད་དེ་བྱིན་གྱིས་བརླབ། སྔར་བཤད་པའི་ཕྱག་རྒྱ་བཅིངས་ལ་ༀ་སྭཱཧཱ། ཞེས་པས་རྫས་རྣམས་བཀྲུས་པར་བསམ། ༀ་ཨཱཿ སྭཧཱས་ཡམ་ཤིང་དང་། ༀ་ཤྲཱི་སྭཱཧཱས་ཞུན་མར་དང་། ༀ་ཛྲཱྃ་སྭཱ་ཧཱས་འབྲུ་དང་། ༀ་ཀུ་རུ་ཀུ་རུ་སྭཱ་ཧཱ། ཞེས་བརྗོད་པས་དེ་དག་ལས་གཞན་པའི་རྫས་རྣམས་ཀྱི་མཚན་ཉིད་དང་མི་ལྡན་པའི་ཉེས་སྐྱོན་ཐམས་ཅད་སྦྱངས་ཤིང་དག་པར་བསམས་ལ་སྲེག་རྫས་ཐམས་ཅད་བདུད་རྩི་ལྔའི་ངོ་བོར་བསྐྱེད་དོ། །སྔར་བཤད་པའི་མེ། ཡི་གེ་གསུམ་བརྗོད་དེ་སྣོད་ཀྱི་ནང་དུ་བཞག །ཞུན་མར་གྱི་སྒྲོན་མེས་སྦར་བས་ལས་སྔགས་བརྗོད་ལ་འོ་མ་ཅན་གྱི་ཤིང་ལ་སོགས་པ་ལ་མེ་སྦར་ནས། ལས་སྔགས་བརྗོད་པའི་ཀུ་ཤའི་རྩེ་མོས་ཆུ་བླངས་པ་དང་ནང་མཆོད་ཀྱིས་ལན་གསུམ་དུ་གཡས་སྐོར་དུ་བསངས་ལ། གཙང་ཞིང་ཤིན་ཏུ་སྐམ་པའི་རྩྭའི་ཆུན་པོ་དང་བཅས་པ་དུ་བ་མེད་པ་ཐབ་ཏུ་བཅུག་ནས་ༀ་ཛྭ་ལ་ཛྭ་ལ་ཧཱུཾ་དང་ཧཱུཾ་ཡིག་བརྗོད་དེ་རླུང་ཡབ་ཀྱིས་མེ་སྦར་རོ། །ལས་སྔགས་ལན་བདུན་བཟླས་ཏེ་མར་ཁུ་བླུགས་གཟར་བདུན་གྱིས་རབ་ཏུ་སྦར་བར་བྱའོ། །དེ་
ནས་ཀུ་ཤ་རྣམས་ལ་ༀ་བཛྲ་ས་ཏྭ་ཨཱཿ ཞེས་པ་འདི་ལན་བདུན་བཟླས་ནས་ཀུ་ཤ་སྔོ་ལྗང་དྲི་མ་མེད་པ་མ་གས་ཤིང་འདབ་མ་མ་གྲུགས་པ་ཧ་ཅང་ཡང་མི་རིང་བ་གཉིས་གཉིས་རྩེ་མོ་གཤིབས་པ། རང་གི་གཡོན་ངོས་ནས་ཐབ་ཀྱི་ཁ་ཁྱེར་ལ་རང་ཁ་གང་དུ་བལྟ་བའི་ངོས་ལ་ཤར་དུ་བྱས་པའི་ལུགས་ཀྱིས་རྩེ་མོ་ཤར་དང་ལྷོ་དང་ནུབ་དང་བྱང་དུ་བསྟན་པ་སྔ་མའི་རྩེ་མོས་ཕྱི་མའི་རྩ་བ་ནོན་པ་དགྲམ་ཞིང་། ཐབ་ཁུང་དུ་རྩེ་མོ་ཤར་དུ་བསྟན་པའི་ཀུ་ཤ་བ་ལང་གི་རྣ་བ་ལྟ་བུ་ཧ་ཅང་མི་རིང་བས་གཡོག་གོ །གཉིས་པ་ལ་གསུམ། ཐོག་མར་འཇིག་རྟེན་པའི་མེ་ལྷ་མཆོད་པ། བར་དུ་འཇིག་རྟེན་ལས་འདས་པའི་མེ་ལྷ་མཆོད་པ། མཐར་འཇིག་རྟེན་པའི་མེ་ལྷ་མཆོད་པའི་ཆོ་གའོ། །དང་པོ་ལ་གསུམ། ཐབ་དང་མེ་ལྷ་བསྐྱེད་ཅིང་ཡེ་ཤེས་པ་དང་བསྲེ་བ། མཆོད་ཅིང་བསྟོད་དེ་དམ་ཚིག་བསྒྲག་པ། སྲེག་རྫས་ཕུལ་ནས་སླར་ཡང་མཆོད་པའོ། །དང་པོ་ནི། བསང་ཆུས་ཐབ་བསངས་ཏེ། སྭ་བྷ་ཝས་སྟོང་པར་སྦྱངས། སྟོང་པའི་ངང་ལས་སྣ་ཚོགས་པདྨ་དང་ཟླ་བའི་སྟེང་དུ་སཾ་དང་རྡོ་རྗེ་ལས་རྡོ་རྗེ་འཛིན་པ་དཀར་པོ་དཀར་མཐིང་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་པ་གཡས་འོག་མ་གཉིས་རྡོ་རྗེ་དང་རལ་གྲི་གཡོན་འོག་མ་གཉིས་རིན་པོ་ཆེ་དང་པདྨ་འཛིན་པ་ཞུ་བ་ལས་བྱུང་བའི་ཡེ་ཤེས་ཀྱི་ཐབ་ཁ་དོག་དཀར་ཞིང་དབྱིབས་ཟླུམ་པ་མུ་རན་དང་ཁ་ཁྱེར་དང་བཅས་པ། ཁ་ཁྱེར་ལ་འཁོར་ལོའམ་རྡོ་རྗེའི་ཕྲེང་བས་བསྐོར་བ་གྲྭ་བཞིར་ཟླ་ཕྱེད་རྡོ་རྗེས་མཚན་པ་དྭངས་ཤིང་ཐོགས་པ་མེད་པར་བསྐྱེད་པའི་ནང་དུ། རཾ་ལས་སྐྱེས་པའི་མེ་གྲུ་གསུམ་གྱི་དབུས་སུ་སྣ་ཚོགས་པདྨའི་
ལྟེ་བར་རཾ་ལས་བགྲང་ཕྲེང་དེ་ཡོངས་སུ་གྱུར་པ་ལས་མེ་ལྷ་སྐུ་མདོག་དཀར་པོ་དཀར་ནག་དམར་བའི་ཞལ་གསུམ་ཕྱག་དྲུག་པ་གཉུག་མར་གནས་པའི་རིག་མ་དང་གཉིས་སུ་མེད་པའི་སྐུ། ཕྱག་གཡས་ཀྱི་དང་པོ་ན་བགྲང་ཕྲེང་། གཉིས་པས་མི་འཇིགས་པ་སྦྱིན་པ། གསུམ་པ་ན་གྲི་གུག །གཡོན་གྱི་དང་པོ་ན་དབྱུག་གུ་རྩེ་གསུམ་པ། གཉིས་པ་ན་སྤྱི་བླུགས། གསུམ་པ་ན་ཐོད་པ་བསྣམས་པ། གཡོན་བརྐྱང་བའི་སྟབས་ཀྱིས་བཞུགས་པ། ཁྲོ་བའི་རྒྱན་རྣམས་ཀྱིས་བརྒྱན་པའི་ཐུགས་ཀར་མེ་གྲུ་གསུམ་པ་རཾ་གྱིས་མཚན་པ་བསྒོམ་མོ། །དཔལ་འཛིན་གྱི་དགྲ་ནག་གི་དཀྱིལ་ཆོག་ཁ་ཅིག་ལས། ཕྱག་གཡས་དང་པོས་སྤྱི་བླུགས་དང་། གཡོན་གཉིས་པས་ཕྲེང་བ་བསྣམས་ཤིང་གཡས་བརྐྱངས་སུ་བཤད་ཀྱང་། དཔལ་འཛིན་གྱི་རྗེས་སུ་འབྲང་བའི་རྡོ་རྗེ་གྲུབ་པའི་འགྲེལ་པར་སྔར་བཤད་པ་བཞིན་འབྱུང་ལ་དཔལ་འཛིན་གྱི་གཤེད་དམར་གྱི་དཀྱིལ་ཆོག་ཏུ་ཡང་གཡོན་བརྐྱང་དང་བགྲང་ཕྲེང་གཡས་དང་སྤྱི་བླུགས་གཡོན་དུ་བཤད་པས་འགྱུར་རམ་ཡི་གེ་ཅུང་མ་དག་པར་མངོན་ནོ། །དམ་ཚིག་པའི་ཐུགས་ཀའི་ས་བོན་གྱི་འོད་ཟེར་ལས་སྤྲོས་པའི་ཁྲོ་བོ་འདོད་རྒྱལ་གྱིས་ཤར་ལྷོ་ནས་བསྒོམས་པ་དང་འདྲ་བའི་མེ་ལྷ་དྲང་སྲོང་གི་འཁོར་གྱིས་བསྐོར་བ་སྤྱན་དྲངས་པར་བསམས་ལ་གཡས་པ་མི་འཇིགས་པའི་ཕྱག་རྒྱས་མཐེ་བོང་གཡོབ་ཅིང་། ༀ་ཚུར་སྤྱོན་ཚུར་སྤྱོན་འབྱུང་བོ་ཆེ། །ལྷ་ཡི་དྲང་སྲོང་བྲམ་ཟེ་མཆོག །སྲེག་བླུགས་ཞལ་ཟས་བཞེས་སླད་དུ། །འདིར་ནི་ཡང་དག་བསྙེན་པར་མཛོད། །ༀ་ཊཀྐི་ཧཱུཾ་ཛཿ ཞེས་པས་
སྤྱན་དྲངས་ལ་ཐབ་ཀྱི་མེ་མཚམས་ཀྱི་ཁ་ཁྱེར་གྱི་ཀུ་ཤའི་གདན་ལ་བཞུགས་པར་བསམ་མོ། །ལས་ཀྱི་སྔགས་དྷིཿ ཥྚྲཱི་དང་བསང་ཆུ་གཏོར་ལ་ཕྱི་འབྲང་གི་བགེགས་བསྐྲད་ལ་ཆུ་བཞི་ཕུལ་བའམ་བསྡུས་པ་ལ་མོས་ན་དེ་མ་བྱས་པར་ༀ་མུད་ག་ར་ཛཿ ཞེས་པས་དམ་ཚིག་པ་དང་ཉེ་བར་དགུག །ༀ་དཎྜ་ཧཱུཾ་གིས་དམ་ཚིག་པ་ལ་གཞུག །ༀ་པདྨ་བཾ་གྱིས་དབྱེར་མེད་དུ་བཅིང་། ༀ་ཁངྒ་ཧོཿ ་ས་དབང་དུ་བྱ་སྟེ་རྡོར་དྲིལ་གྱིས་འཁྱུད་པའི་ཚུལ་དང་ལྡན་པའི་ཕྱག་རྒྱ་གཉིས་ཀྱིས་སེ་གོལ་གཏོགས་པ་སྔོན་དུ་འགྲོ་བས་གཞུག་པ་སོགས་བྱའོ། །གཉིས་པ་ནི། དེ་ནས། ༀ་ཨཱཿ ཧྲཱི་པྲ་ཝ་ར་སད་ཀ་རཾ་པྲོཀྵ་ཎཾ་པྲ་ཏཱི་ཙྪ་ཧཱུཾ་སྭཱཧཱ། ཞེས་པས་ཀུ་ཤའི་ཆུན་པོས་ཞལ་བསིལ་གྱི་སྣོད་ནས་བཟེད་ཞལ་དང་པོར་ལན་གསུམ་བསང་གཏོར་དབུལ་ལོ། །སྣོད་དེ་ཉིད་ནས་མཛུབ་མོས་མེ་ཏོག་བླངས་ཏེ་ཁུ་ཚུར་ཁ་འོག་ཏུ་བསྟན་ནས་མཐེའུ་ཆུང་ནས་རིམ་གྱིས་དགྲོལ་བའི་ཕྱག་རྒྱ་དང་བྲོཀྵཎཾ་གྱི་གནས་སུ། ཨཱཉྩ་མ་ཎཾ་བཅུག་ལ་བཟེད་ཞལ་དང་པོར་ཞལ་བསིལ་དང་། རྡོ་རྗེ་སྙིམ་པ་ཁ་ཕྱེ་བའི་ཕྱག་རྒྱ་དང་ཨརྒྷཾ་གྱིས་བཟེད་ཞལ་གཉིས་པར་མཆོད་ཡོན་དང་ཁུ་ཚུར་བཅངས་ནས་མེ་ཏོག་བླངས་ཏེ་ལན་གསུམ་བསྐོར་ནས་ཁུ་ཚུར་ཁ་གྱེན་དུ་བསྟན་པའི་མཛུབ་མོ་ནས་རིམ་གྱིས་དགྲོལ་བའི་ཕྱག་རྒྱ་དང་པཱདྱཾ་གིས་བཟེད་ཞལ་གསུམ་པར་ཞབས་བསིལ་དབུལ་ཞིང་། མེ་ལྷའི་སྔགས་ཀྱི་མཐར་ༀ་བཛྲ་པུ་ཥྤེ་ཨཱཿ ཧཱུཾ། ཞེས་སོགས་བཏགས་ལ་ཉེར་སྤྱོད་རོལ་མོ་དང་བཅས་པ་དང་ནང་མཆོད་ཀྱིས་ཀྱང་མཆོད་དེ། འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །མེ་ལྷའི་རྒྱལ་པོ་ཊཀྐིས་
དབང་བསྐུར་བ། །ཤེས་རབ་མཆོག་གིས་ཉོན་མོངས་ཐམས་ཅད་བསྲེག །འཛིན་བྱེད་མེ་ལྷ་ཉིད་ལ་རྣམ་པར་འདུད། །ཚངས་པ་འཇིག་རྟེན་མགོན་གྱི་སྲས། །མེ་ལྷའི་རྒྱལ་པོ་དྲང་སྲོང་མཆོག །འབྱུང་བོ་ཡོངས་སུ་བསྐྱང་བའི་ཕྱིར། །ཐུགས་རྗེའི་དབང་གིས་སྐུར་སྤྲུལ་པ། །རིག་སྔགས་གྲུབ་པའི་དྲང་སྲོང་ཚུལ། །ཉོན་མོངས་བསྲེག་པའི་ཤེས་རབ་འོད། །བསྐལ་པའི་མེ་བཞིན་གཟི་བརྗིད་འབར། །མངོན་ཤེས་རྫུ་འཕྲུལ་ཞབས་དང་ལྡན། །ཐབས་ཀྱིས་སྤྲུལ་པའི་ཐེག་པ་བཅིབས། །རིག་སྔགས་གསུང་ཞིང་བགྲང་ཕྲེང་འཛིན། །བདུད་རྩི་བཅུད་ལྡན་གྷུཎྜེ་བསྣམས། །ཆོས་ཀྱི་བདུད་རྩི་ཡོངས་ལ་བསིལ། །ཉེས་པའི་སྐྱོན་བྲལ་ཚངས་པར་སྤྱོད། །འཇིག་རྟེན་གནས་ཀྱང་མྱ་ངན་འདས། །ཞི་བ་བརྙེས་ཀྱང་ཐུགས་རྗེ་ཆེ། །དེ་བས་བསྟོད་དེ་ཕྱག་ཀྱང་འཚལ། །ཞེས་པས་བསྟོད་དོ། །ༀ་བཛྲ་ཨ་ན་ལ་མཧཱ་བྷཱུ་ཏ་ཛྭ་ལ་ཛྭ་ལ་ཡ་སརྦ་བྷ་སྨི་ཀུ་རུ་སརྦ་དུཥྚན་ཧཱུཾ་ཕཊ་ཏྲི་ཤྱ་ཛཿ ཧཱུཾ་བཾ་ཧོཿ ས་མ་ཡ་སྟྭཾ་ས་མ་ཡ་ཧཾ། ཞེས་ལན་གསུམ་དུ་དམ་ཚིག་བསྒྲག་གོ །གསུམ་པ་ནི། དེ་ནས་མེ་ལྷའི་ལྗགས་རྡོ་རྗེའི་རྣམ་པ་ཅན་དཀར་པོ་ལ་རཾ་ཡིག་དང་། དགང་བླུགས་ཀྱི་ཁ་ལ་ཡཾ་ཡིག་འོད་ཟེར་དང་བཅས་པ་དགོད་དོ། །ཁ་ནི་མཚོ་སྐྱེས་དང་དམ་ཚིག་རྡོ་རྗེས་དགང་བླུགས་ཀྱི་ནང་དུ་དང་མི་ཐུབ་ཟླ་བས་དགང་བླུགས་ཀྱི་ནང་གི་རྡོ་རྗེའི་མཚན་མ་ལ་ས་བོན་བཀོད་པར་བཤད་པ་ལྟར་ཡིན་ནོ། །ལག་པ་གཡོན་པ་ཁུ་ཚུར་བཅངས་པའི་སྟེང་ནས་མཐེ་བོས་བཀབ་པ་དེ་
བཞིན་གཤེགས་པའི་ཁུ་ཚུར་དུ་བྱས་པའི་མཛུབ་མོ་བརྐྱངས་ལ་གན་རྐྱལ་དུ་བྱས་པས་དགང་གཟར་མར་གྱིས་བཀང་བ་བཟུང་། གཡས་པ་ཡང་དེ་བཞིན་གཤེགས་པའི་ཁུ་ཚུར་དུ་བྱས་པ་ཁ་ཐུར་དུ་སྦུབ་པས་བླུགས་གཟར་གྱི་ཡུ་བ་བཟུང་བ་གཡོན་པའི་མཛུབ་མོའི་ཐད་ཀར་གཡས་པའི་ཁུ་ཚུར་བཞག་ནས་དགང་གཟར་གྱི་ཁར་བླུགས་གཟར་གྱི་མགོ་བཞག་ནས་འཛིན་པ་བྱང་ཆུབ་མཆོག་གི་ཕྱག་རྒྱས་ལག་པ་གཉིས་པུས་མོའི་ནང་ནས་ཕྱིར་མི་འདའ་བར་གཡས་སུ་བསྐོར་ཏེ་མེ་ལྷའི་ཞལ་ཅུང་ཟད་གདངས་པར་དགང་བླུགས་གསུམ་མམ་བདུན་མེ་ལྷའི་སྔགས་སམ་དགང་བླུགས་ཀྱི་སྔགས་སམ་མར་གྱི་སྲེག་བླུགས་ཀྱི་སྔགས་ལ་སྤེལ་ཚིག་བཏགས་པས་ཕུལ་ནས་འདོད་དོན་ལ་གསོལ་བ་བཏབ་པས་འཕྲིན་ལས་མཛད་པར་ཞལ་གྱིས་བཞེས་པར་བསམ་མོ། །སྔགས་དང་པོ་ནི། ༀ་ཨགྣ་ཡེ་ཨཱ་དིབྱཱ་ཨཱ་དིབྱཱ་ཨཱ་བི་ཤ་ཨཱ་བི་ཤ་མཧཱ་ཤྲི་ཡེ་ཧ་བྱ་ཀ་བྱ་ཧ་ནཱ་ཡ་སྭཱཧཱ། ཞེས་པའོ། །གཉིས་པ་ནི། ༀ་ན་མཿ ས་མནྟ་བུདྡྷཱ་ནཱཾ་ཨགྣ་ཡེ་སྭཧཱ། ཞེས་པའོ། །གསུམ་པ་ནི། ༀ་ཨགྣ་ཡེ་སྭཧཱ། ཞེས་པ་སྟེ་དེ་དག་ལ་སྭཱཧཱའི་སྔོན་དུ་སྡིག་པའམ་ནད་དམ་གདོན་ལ་སོགས་པ་ཐམས་ཅད་ཤཱིནྟཾ་ཀུ་རུ་ཞེས་སྦྱར་རོ། །སྐབས་འདིར་མེ་ལ་བགེགས་ཡོད་མེད་བརྟགས་ཏེ་མེད་ན་མི་དགོས་ལ་ཡོད་ན་མེ་ལ་བསང་གཏོར་དང་ཧྲཱིཿ ཥྚྲིཿ ས་བསྲུངས་ཏེ་སྔགས་དེ་ལ་བགེགས་ཐམས་ཅད་ཤཱིནྟཾ་ཀུ་རུ་ཞེས་སྤེལ་ཚིག་དང་སྦྱར་ཏེ་དགང་བླུགས་བདུན་མེ་ལྷ་ལ་ཕུལ་ནས་སླར་ཡང་མེ་ལྷའི་སྔགས་སམ་ལས་སྔགས་ཀྱིས་བསང་གཏོར་བྱས་ནས་དགང་བླུགས་བདུན་ནམ་གསུམ་མམ་གཅིག་
མེ་ལྷའི་སྔགས་ཀྱིས་དབུལ་ལོ། །དེ་ནས་ཡམ་ཤིང་རྣམས་བྱང་ཆུབ་ཀྱི་ཤིང་གི་རང་བཞིན་གྱི་བདུད་རྩིར་མོས་ནས་ཕུལ་བའི་འོག་ཏུ་མར་ཁུ་དང་དེ་ནས་སྔར་བཤད་པའི་རིམ་པ་བཞིན་དུ་དབུལ། དེ་དག་གི་སྔགས་ནི། ༀ་པོ་དྷི་བྲཱི་ཀྵཱ་ཡ་སྭཧཱ། བྱང་ཆུབ་ཀྱི་ཤིང་གིའོ། །ༀ་ཨགྣ་ཡེ་སྭཧཱ། མར་ཁུའིའོ། །ༀ་སརྦ་པཱ་པཾ་ད་ཧ་ན་བཛྲ་ཡེ་སྭཧཱ། ཏིལ་གྱིའོ། །ༀ་བཛྲ་ཨཱ་ཡུ་ཥེ་སྭཧཱ། དུར་བའི་འོ། །ༀ་བཛྲ་པུཥྚ་ཡ་སྭཱཧཱ། འབྲས་མ་གྲུགས་པའིའོ། །ༀ་སརྦ་སཾ་པཱ་དེ་སྭཱ་ཧཱ། ཞོ་ཟན་དང་ཟས་མཆོག་གིའོ། །ༀ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། ཀུ་ཤའི་འོ། །ༀ་སརྦ་ཨརྦ་སིདྡྷ་ཡེ་སྭཧཱ། ཡུངས་ཀར་གྱིའོ། །ༀ་བཛྲ་བི་ཛཱ་ཡ་སྭཧཱ། སོ་བའི་འོ། །ༀ་མ་ཧཱ་བེ་གཱ་ཡ་སྭཱཧཱ། ནས་ཀྱིའོ། །ༀ་མ་ཧཱ་བ་ལཱ་ཡ་སྭཱཧཱ། སྲན་མའི་འོ། །ༀ་བཛྲ་གྷསྨ་རི་སྭཱཧཱ། གྲོའི་འོ། དེ་རྣམས་ལ་སྭཧཱའི་སྔོན་དུ་སྤེལ་ཚིག་བཏགས་ཏེ་དཔེར་ན་སྡིག་པ་ཞི་བའི་སྦྱིན་སྲེག་བྱེད་ན་གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པ་དང་སྡིག་པ་ཐམས་ཅད་ཤཱིནྟཾ་ཀུ་རུ་ཞེས་སྤེལ་བ་ལྟ་བུའོ། །བསྒྲུབ་བྱའི་མིང་བཅུག་པའམ་མ་བཅུག་ནའང་དེའི་སྡིག་པ་སོགས་ཞི་བའི་དོན་དུ་བསམས་ནས་བྱས་པས་ཀྱང་འགྲུབ་པར་འོད་སྙེ་ལས་གསུངས་སོ། །ཡམ་ཤིང་དང་ཀུ་ཤ་དང་དུར་བ་རྣམས་ལག་པ་གཡས་པའི་མཐེབ་སྲིན་གྱིས་མཆོག་སྦྱིན་པའི་ཕྱག་རྒྱས་རྩེ་མོ་ལྷ་ལ་བསྟན་ལ་དབུལ་ལོ། །དེ་ལྟར་སྲེག་རྫས་རྣམས་སྙན་པའི་གདངས་ཀྱིས་ཕུལ་ནས་ཞལ་བསིལ་དང་བསང་གཏོར་བྱའོ། །སྐབས་འདིར་མེ་མཚམས་སུ་བཞག་པ་དང་མེ་འབར་བའི་རྣམ་པར་གྱུར་པ་སོགས་ལྔ་གསུངས་
ཀྱང་འདིར་ནི་ཐུགས་ཀར་འདས་པའི་ལྷ་བསྐྱེད་པས་བཞུགས་སུ་གསོལ་བར་བྱའོ། །གཉིས་པ་ནི། དཀྱིལ་འཁོར་སྒྲུབ་མཆོད་དང་འབྲེལ་ན་མེ་ལྷའི་ཐུགས་ཀར་བྷྲུཾ་ལས་གཞལ་ཡས་ཁང་གདན་དང་བཅས་པ་བསྐྱེད་ལ་ལྷ་རྣམས་ཀྱི་སྔགས་ཟློ་ཞིང་། མེ་ཏོག་གིས་ལྷ་རྣམས་སྤྱན་དྲངས་ལ་མེེ་ཏོག་ཐབ་ཏུ་དོར་བས་ལྷ་རྣམས་རང་རང་གི་གདན་ལ་བཞུགས་པར་བསམ། དཀྱིལ་འཁོར་དང་མ་འབྲེལ་ན་སྔར་བཤད་པ་བཞིན་བསྐྱེད་ནས་ཆུ་བཞི་དང་བཅས་པའི་མཆོད་པ་དང་བདུད་རྩི་མྱང་བ་དང་བསྟོད་པ་བྱའོ། །དེ་ནས་ལྷའི་ལྗགས་རྡོ་རྗེའི་རྣམ་པ་ཅན་ཁ་དོག་དཀར་པོ་ལ་རཾ་བཀོད་ལ་ལས་སྔགས་ལ་སྤེལ་ཚིག་བཏགས་པའི་དགང་བླུགས་གསུམ་མམ་བདུན་ཕུལ་ནས་གསོལ་བ་བཏབ་པས་འཕྲིན་ལས་མཛད་པར་ཞལ་གྱིས་བཞེས་པར་བསམ་མོ། །ཡམ་ཤིང་ལ་སོགས་པ་རྣམས་ལ་ལས་སྔགས་ལ་རྫས་སྔགས་སྤེལ་ཚིག་དང་བཅས་པ་བཏགས་པའམ། དེ་མ་གྲུབ་ན་ལས་སྔགས་རྐྱང་བ་ལ་སྤེལ་ཚིག་གདགས་ལ་དབུལ་ཏེ་སྤེལ་ཚིག་རེ་རེ་ནས་སྦྱར་མ་ནུས་ན་བདུན་བདུན་གྱི་མཐར་དང་དེ་ཡང་མ་གྲུབ་ན་ཐོག་མཐའ་གཉིས་སུ་གདགས་སོ། །འཁོར་གྱི་ལྷ་ལ་ནི་བདུན་ནམ་གསུམ་ལ་སོགས་པ་ཅི་ཙམ་འབྱོར་བ་རང་རང་གི་སྔགས་ལ་སྤེལ་ཚིག་གདགས་ལ་དབུལ་ལོ། །དེ་ལྟར་རྫས་རྣམས་ཕུལ་ནས་ལས་བཅོལ་བའི་དུས་སུ་ལྷ་རྣམས་ཀྱི་ཐུགས་ཀ་ནས་སྤྲོས་པའི་སངས་རྒྱས་རྣམས་ཀྱིས་བུམ་པ་དཀར་པོ་བདུད་རྩི་དཀར་པོས་བཀང་བ་ཐོགས་ནས། བསྒྲུབ་བྱ་ཟླ་བའི་དཀྱིལ་འཁོར་ལ་གནས་པ་ལ་ཁྲུས་བྱས་པས། སྡིག་སྒྲིབ་དང་ནད་གདོན་
ལ་སོགས་པ་ཐམས་ཅད་དག་ནས་ལུས་ཤེལ་ལྟར་གྱུར་པར་བསམ་མོ། །རྫོགས་པའི་མཐར་ཡང་དགང་བླུགས་འབུལ་ཞིང་ལས་སྔགས་ཀྱིས་མཆོད་ཡོན་ཕུལ་ཏེ་བསང་གཏོར་དང་ཞལ་བསིལ་དང་ༀ་བཛྲ་ཝ་ས་སྱ་སྭཱཧཱས། གོས་གསར་བ་དང་། ༀ་བཛྲ་ཏམྦུ་ལ་སྭཱཧཱས། །སོ་རྩི་ཕུལ་ལ་ནང་མཆོད་དང་བཅས་པས་མཆོད་བསྟོད་དེ་ཕྱག་བྱས་མཆོད་ཡོན་དབུལ་ལོ། །དེ་ནས་མེ་ཏོག་དང་བཅས་པའི་ཐལ་མོ་སྙིང་གར་སྦྱར་ནས་ཡོ་བྱད་མ་ཚང་བ་ལ་སོགས་པའི་ཉེས་པ་ཞི་བའི་དོན་དུ། གང་ཡང་བདག་བློ་རྨོངས་པ་ཡིས། །ཉེས་བྱས་ཅུང་ཟད་གང་བགྱིས་པ། །གང་ཕྱིར་ལུས་ཅན་སྐྱབས་ཡིན་ཕྱིར། །མགོན་ཁྱོད་དེ་ཀུན་བཟོད་པར་མཛོད། །མ་རྙེད་ཡོངས་སུ་མ་ཤེས་དང་། །གང་ཡང་ནུས་པ་མ་མཆིས་པས། །འདིར་ནི་བྱ་བ་གང་བགྱིས་པ། །དེ་ཀུན་གཙོ་བོས་བཟོད་མཛད་རིགས། ཞེས་བརྗོད་དེ་བཅོམ་ལྡན་འདས་ལ་བཟོད་པར་གསོལ་ནས་ནད་གདོན་ཞི་བ་ལ་སོགས་པའི་འདོད་དོན་འགྲུབ་པར་གསོལ་བ་བཏབ་སྟེ་ཆད་ལྷག་གི་ཉེས་པ་ཞི་བརབྱ་བའི་སེམས་ཀྱིས་ༀ་བཛྲ་སཏྭ་ཨཱཿ ཞེས་མང་དུ་བརྗོད་ནས་གཤིན་རྗེ་གཤེད་ཀྱི་ཡི་གེ་བརྒྱ་པ་བཟླས་པར་བྱའོ། །དེའི་རྗེས་ལ། ༀ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །ཞེས་པས་བསྐུལ་ནས་ༀ་ཨཱ་ཿ ༀ་ཡ་མཱན་ཏ་ཀ་ཧཱུཾ་ཕཊ་ཧཱུཾ་མུཿ ཞེས་བརྗོད་དེ་ཡེ་ཤེས་པ་གཤེགས་ནས་དམ་
ཚིག་པ་བདག་ལ་བསྡུའོ། །གསུམ་པ་ནི། དེ་ནས་སླར་ཡང་ཐབ་ཀྱི་མེ་ལྷ་ལ་ཕྱི་ནང་གི་མཆོད་པས་མཆོད་ནས་བསང་གཏོར་དང་ཞལ་བསིལ་དང་སོ་རྩི་དང་གོས་གསར་བ་ཡང་ཕུལ་ལ་སྲེག་རྫས་ལྷག་མ་རྣམས་ཀྱིས་སྦྱིན་སྲེག་བྱས་པའི་མཐར་དྲིལ་བུ་དཀྲོལ་ཞིང་བསྟོད་དོ། །རབ་གནས་ལ་སོགས་པའི་སྐབས་སུ་གཞན་དོན་དུ་སྦྱིན་སྲེག་སྒྲུབ་ན་ནི་ཡོན་ཕུལ་བའི་སློབ་མའི་མཐེ་བོང་གཡས་པ་རང་གི་གཡོན་པའི་མཐེའུ་ཆུང་གིས་བཟུང་སྟེ་ཐབ་ཁུང་ལ་ལན་གསུམ་དུ་བསྐོར་བ་བྱས་ཏེ་བླུགས་གཟར་གྱིས་དེའི་མགོ་ལ་གཡས་སྐོར་དུ་བསྐོར་ཏེ་ལན་བདུན་དུ་སྲེག་བླུགས་བྱས་ཏེ་དགང་བླུགས་འབུལ་དུ་གཞུག་གོ །འཁྱིལ་བ་བཟླས་པའི་བསྲུང་སྐུད་དཀར་པོ་སློབ་མའི་ལག་པ་ལ་བཅིངས་ལ་བསང་གཏོར་བྱའོ། །རྒྱལ་པོ་དང་འཇིག་རྟེན་སྐྱོང་བ་དང་སེམས་ཅན་ཐམས་ཅད་དང་སློབ་མ་རྣམས་དང་གང་ལ་མངོན་པར་འདོད་པ་རྣམས་ཀྱི་རེ་རེ་ཞིང་ལན་གསུམ་མམ་རེ་རེའི་སྲེག་བླུགས་དབུལ་བར་བྱའོ། །ཡོན་ཡང་འབུལ་དུ་གཞུག་གོ །ཞེས་གསུངས་པས་འབྱོར་ན་དེ་དག་གི་ཡང་དགེ་བར་དམིགས་ལ་དགང་བླུགས་དབུལ་ཞེས་འོད་སྙེར་སྐབས་འདིར་གསུངས་ལ། ཉིན་མོ་འབྱུང་གནས་ཀྱིས་དཀྱིལ་འཁོར་སྒྲུབ་མཆོད་ཀྱི་འོག་བདག་འཇུག་གི་གོང་དུ་ལྷ་མཆོད་པའི་སྦྱིན་སྲེག་འདས་པའི་ལྷ་ལ་རྫས་རྣམས་ཀྱི་སྲེག་བླུགས་ཚར་ནས་དགང་བླུགས་མ་ཕུལ་བའི་གོང་དུ་བྱེད་པར་བཤད་ཅིང་བྱ་བའི་ཡུལ་ནི་དབང་ཞུ་བའི་སློབ་མ་ལ་སོགས་པ་དང་བྱེད་པ་པོ་ནི་སློབ་དཔོན་རང་ངམ་གཞན་གྱིས་ཀྱང་བྱ་བར་བཤད་དོ། །དེ་ལ་སྔ་མ་ལྟར་ན། འཇིག་རྟེན་པའི་མེ་ལྷ་ལ་དབུལ་ལ་ཕྱི་མ་ལྟར་ན་འདས་པའི་ལྷ་ལ་འབུལ་
བའོ། །དེ་ནས་ཞལ་བསིལ་ཕུལ་ལ་བསང་གཏོར་དང་མཆོོད་པས་མཆོད་ནས་གཏོར་མ་སྒྲུབ་ཐབས་བཞིན་བྱིན་གྱིས་བརླབས་ཏེ་མེ་ལྷའི་སྔགས་ལ་ཨ་ཀཱ་རོ་བཏགས་པས་ལན་གསུམ་དུ་ཕུལ་ཏེ་ཉེར་སྤྱོད་ལྔས་མཆོད། །མེ་སྟེ་བསྲེག་བྱ་ཟ་བའི་ལྷ། །ཞེས་སོགས་ཀྱིས་བསྟོད། མཆོད་སྦྱིན་གཏོར་མ་འདི་སྣོམས་ལ། །ཞེས་སོགས་ཀྱིས་ཕྲིན་ལས་བཅོལ་ལ། མཆོད་ཡོན་ཕུལ་བཟོད་པར་གསོལ་ཏེ་འདོད་པའི་དངོས་གྲུབ་ཞུས་ནས། ༀ་བཛྲ་སཏྭ་ཨཱཿ ཞེས་བརྗོད་དོ། །རང་གི་དོན་དང་གཞན་གྱི་དོན། །སྒྲུབ་བྱེད་བསྲེག་བྱ་ཟ་བ་གཤེགས། །ཇི་བཞིན་དུས་སུ་ཚུར་སྤྱོན་ཞིང་། །བདག་གི་དངོས་གྲུབ་ཐམས་ཅད་སྒྲུབས། །ཞེས་པས་བསྐུལ་ལ། །ༀ་མུཿ ཞེས་བརྗོད་ཅིང་ཡེ་ཤེས་པ་རང་གནས་སུ་གཤེགས་ནས་དམ་ཚིག་པ་མེ་འབར་བའི་རྣམ་པར་འགྱུར་བར་བསམ་མོ། །གསུམ་པ་ནི། སྲེག་རྫས་ཀྱི་ལྷག་མའི་རྫས་ལྔའི་འོ་ཐུག་སྦྱིན་སྲེག་གི་མེ་ལ་བསྒྲུབས་ནས་ལོངས་སྤྱད་ན་སྡིག་པ་འདག་པར་གསུངས་པས་དེ་བསྒྲུབ་པའི་ཚུལ་ནི་འོ་མ་དང་འབྲས་མ་གྲུགས་པ་དང་མར་དང་སྦྲང་རྩི་དང་ཀ་ར་རྣམས་རང་གི་ལྷའི་ས་བོན་ལས་བྱུང་ཞིང་། ལས་དང་རྗེས་སུ་མཐུན་པའི་དྲིས་བྱུགས་པ་མགུལ་བར་མེ་ཏོག་ཕྲེང་བས་བཅིངས་པའི་སྣོད་ནག་པོ་མ་ཡིན་པ་ཐབ་ཁུང་གི་མེ་ལ་མཉྫིའི་སྟེང་དུ་བཞག་པའི་ནང་དུ་གཟར་བུ་གཉིས་གང་རུང་གིས་བླུགས་ལ་རང་གི་བདག་པོའི་སྔགས་འགྱིང་བ་དང་བཅས་པས་ཟློས་ཤིང་བསྐོལ་ཏེ་བདུད་རྩིའི་རང་བཞིན་གྱི་འོ་ཐུག་བསྒྲུབ་པར་བྱའོ། །དེ་ནས་འོ་ཐུག་ལ། ༀ་དཱི་བྱ་ཨཱགྣེ་ས་མཱ་དྷི་དྷྱཱན་པྲཱི་ཎ་ནེ་སྭཱཧཱ། ཞེས་པས་བསྔགས་ཏེ་
རང་ཉིད་རྣལ་འབྱོར་ལ་གནས་ནས་ལྷ་དང་འཇིག་རྟེན་སྐྱོང་བ་དང་བདག་ཉིད་ཚིམ་པར་བྱའོ། །དེ་བཞིན་གཤེགས་པའི་ལྷག་མ་འདི། །སྡིག་པ་རྣམ་པར་ཉམས་བྱེད་གསོལ། །ཞེས་པས་སྦྱིན་བདག་དང་ལྷག་མ་དོན་དུ་གཉེར་བ་རྣམས་ལ་བགོ་བཤའ་བྱ་ལ་བསྔོ་བ་དང་ཤིས་བརྗོད་བྱའོ། །ལོང་ཡོད་ན་མེ་མ་ཤིའི་བར་དུ་དཀྲུག་པ་དང་བརྡལ་བར་མི་བྱ་སྟེ་འགོམ་པར་ཡང་མི་བྱའོ། །མེད་ན་ཞི་བ་ལ་འོ་མ་དང་རྒྱས་པ་ལ་དྲིའི་ཆབ་སེར་པོ་དང་དབང་ལ་འོ་མ་དམར་པོ་དང་དྲག་པོ་ལ་འོ་མ་ནག་པོས་མེ་གཞིལ་ལ་ཐབ་ཀྱི་ཐལ་བ་ལ་སོགས་པ་རྣམས་ལས་བུམ་དུ་བླུགས་ལ་ཆུ་བོ་ལ་སོགས་པ་ལ་བསྐུར་རོ། །གཉིས་པ་ལ་གཉིས། དབང་དྲག་དང་རྒྱས་པའི་ཁྱད་པར་སྤྱིར་བསྟན་པ་དང་། འཕྲིན་ལས་བསྒྲུབ་པའི་ཁྱད་པར་བྱེ་བྲག་ཏུ་བཤད་པའོ། །དང་པོ་ནི། སྔར་བཤད་པའི་ཞི་བའི་ཆོ་ག་བཞིན་དུ་རྒྱས་པ་ལ་སོགས་པ་གཞན་གྱིའང་བྱ་སྟེ་ཁྱད་པར་ནི་སྲེག་རྫས་ལ་སོགས་པ་དང་སྦོར་བའི་མེ་གཡས་པས་གཡས་སྐོར་དུ་བསང་བ་ནི་འཇམ་པོ་གསུམ་འདྲ་ལ་དྲག་པོ་ལ་གཡོན་པས་གཡོན་སྐོར་དུའོ། །སྦོར་བའི་ཤིང་ཡང་ཞི་རྒྱས་གཉིས་འདྲ་ལ། དབང་ལ་རང་གི་བུད་ཤིང་སྐམ་པོ་དུ་བ་མེད་པའི་རྩྭ་དང་བཅས་པའོ། དྲག་པོ་ལ་རློན་པ་ཚེར་མ་ཅན་དུ་བ་དང་བཅས་པ་སྟེ་སྦོར་བའི་སྒྲོན་མེ་དང་གསོ་བའི་མར་ཡང་ཚ་བའི་ཏིལ་མར་རམ་མར་ནག་གོ །ཐབ་ཀྱི་སྟེང་གི་ཀུ་ཤ་ནི་རྒྱས་པ་ལ་རྩེ་མོ་བྱང་དང་དབང་ལ་ནུབ་དང་དྲག་པོ་ལ་ལྷོར་བསྟན་ཅིང་དང་པོ་གཡོན་ངོས་ནས་ཁ་ཁྱེར་ལ་འགྲེམས་པའི་ཀུ་ཤ་གཉིས་ཀྱི་རྩེ་མོ་ཡང་དེ་ལྟར་རོ། །ཐབ་ཀྱི་བསྐྱེད་ཆོག་ནི་གཞུང་གཞན་རྣམས་ལས་རང་གི་ལྷའི་ས་བོན་ལས་བསྐྱེད་པ་མང་ཡང་
དཔལ་འཛིན་གྱི་བཞེད་པས་རྡོ་རྗེ་འཛིན་པ་ཡོངས་སུ་གྱུར་པ་ལས་བསྐྱེད་པ་ཡིན་ལ། དེའང་ཆོས་འབྱུང་སྐྱེད་བྱེད་ཀྱི་རྡོ་རྗེ་འཛིན་པའམ་ཀུན་ཏུ་བཟང་པོ་ཞེས་པ་དེ་ཡིན་ཏེ་འཇིགས་བྱེད་ལ་ལཱ་ལི་ཏས་སྔར་བཤད་པ་ལྟ་བུའི་རྡོ་རྗེ་སེམས་དཔའ་ལས་ཆོས་འབྱུང་བསྐྱེད་པར་བཤད་པས་དེའི་དབང་དུ་བྱས་པའོ། །གདན་ལ་སྣ་ཚོགས་པདྨ་དཔལ་འཛིན་གྱིས་ལས་ཐམས་ཅད་པའི་སྐབས་སུ་བཤད་པ་ལྟར་རྡོ་རྗེ་གྲུབ་པ་དང་སོ་ན་ཤྲཱི་གཉིས་ཀྱིས་དྲག་པོ་ལ་ཡང་དེ་ལྟར་བཤད་པས་དེའི་ལུགས་ཀྱིས་ལས་སོ་སོ་དང་འདྲའོ། །མེ་ལྷ་ཡང་དཔལ་འཛིན་གྱིས་དགྲ་ནག་གི་ལས་ཐམས་ཅད་པའི་སྦྱིན་སྲེག་ལ་བཤད་པ་ཉིད་སློབ་དཔོན་དེ་ཉིད་ཀྱིས་འཇིགས་བྱེད་ཀྱི་དྲག་པོའི་སྦྱིན་སྲེག་ལ་ཡང་བཤད་པས་ཁ་དོག་མ་གཏོགས་པ་ལས་བཞི་ག་ལ་ཞལ་ཕྱག་སོགས་འདྲ་བར་བྱའོ། །དཔལ་འཛིན་གྱིས་དྲག་པོའི་སྦྱིན་སྲེག་ཏུ་དེ་དང་མི་འདྲ་བར་བཤད་དེ་གང་རུང་གིས་ཆོག་གོ །ཞལ་གསུམ་གྱི་མདོག་ནི་རྩ་ཞལ་དཀར་ན་གཡས་གཡོན་གཉིས་ནག་པོ་དང་དམར་པོ་དང་། རྩ་ཞལ་སེར་པོ་དང་དམར་པོ་དང་ལྗང་གུ་ཡིན་ན། གཡས་གཡོན་གཉིས་སྔོན་པོ་དང་དཀར་པོ་དང་སྔོན་པོ་ཡིན་ན་གཡས་གཡོན་གཉིས་དཀར་པོ་དང་དམར་པོར་འོད་སྙེ་ལས་སོ། །ལྷའི་ལྗགས་ནི་རང་རང་གི་ཁ་དོག་ཅན་གྱི་རྡོ་རྗེ་སྦུ་གུའི་རྣམ་པ་ཅན་ནོ། །དགང་བླུགས་འབུལ་བའི་དུས་སུ་ལག་པ་པུས་མོའི་ནང་ནས་ཕྱིར་མི་འདའ་བ་དང་གཡོན་པས་དགང་གཟར་དང་གཡས་པས་བླུགས་གཟར་འཛིན་པ་དང་། གཡས་སུ་བསྐོར་ནས་ཞལ་ཅུང་ཟད་གདངས་པར་སྙན་པའི་གདངས་ཀྱིས་འབུལ་བ་ནི་འཇམ་པོ་གསུམ་འདྲ་ལ། དྲག་
པོ་ལ་དེ་གསུམ་གོ་ལྡོག་པ་དང་ཞལ་ཤིན་ཏུ་གདངས་པར་ང་རོ་ཆེན་པོས་དབུལ་ལོ། །རྒྱས་པའི་དགང་བླུགས་ནི་ལག་པ་གཉིས་ཁུ་ཚུར་དུ་བྱས་པའི་མཐེབ་མཛུབ་གཉིས་རྩེ་སྤྲད་པའི་རིན་པོ་ཆེའི་ཁུ་ཚུར་དང་། དབང་ལ་ཁུ་ཚུར་གཉིས་ཀྱི་མཐེབ་མཛུབ་རྩེ་སྤྲད་པ་ཟླུམ་པོར་བྱས་པའི་མཛུབ་མོའི་ཕྱི་ནས་གུང་མོས་དཀྲིས་པའི་པདྨའི་ཁུ་ཚུར་དང་། དྲག་པོ་རྣམས་ལ་རྡོ་རྗེའི་ཁུ་ཚུར་གཉིས་ཀྱི་མཛུབ་མོ་བསྒྲེངས་པའི་ཁྲོ་བོའི་ཁུ་ཚུར་གྱིས་བཟུང་ངོ་། །སྤེལ་ཚིག་ནི་མིང་འཇུག་མི་འཇུག་སྔར་དང་འདྲ་ཞིང་། རྒྱས་པ་ལ་ཚེ་དང་བསོད་ནམས་སོགས་པུཥྚ່་ཀུ་རུ་ༀ་དང་། དབང་ལ་བ་ཤཾ་ཀུ་རུ་ཧོཿ དང་། དེའི་དགུག་པ་ལ་ཆེ་གེ་མོ་ཨ་ཀརྵ་ཡ་ཛཿ དང་། བསད་པ་ལ་ཆེ་གེ་མོ་མཱ་ར་ཡ་ཕཊ། བསྐྲད་པ་ལ་ཆེ་གེ་མོ་ཨུཙྪ་ཊ་ཡ་ཧཱུཾ་ཕཊ། དབྱེ་བ་ལ་ཆེ་གེ་མོ་དང་ཆེ་གེ་མོ་བི་དྭེ་ཥ་ཡ་ཕཊ། །རེངས་པ་ལ་ཆེ་གེ་མོ་སྟཾ་བྷ་ཡ་ལཾ། རྨོངས་པ་ལ་ཆེ་གེ་མོ་མོ་ཧཱ་ཡ་ཕཊ། ཅེས་གདགས་སོ། །ལྷ་དབང་དུ་བྱེད་པ་ལ་ནི། ༀ་ཧྲིཿ ཥྚྲཱིཿ ཝི་ཀྲྀ་ཏ་ན་ན་མཱ་ན་ཏྲ་སིདྡྷི་མ་མེ་དྲཱི་ཧཱུྃ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་སློབ་དཔོན་བློ་གྲོས་བཟང་པོས་གཤེད་དམར་ལས་གསུངས་པ་ལས་དཔགས་ཏེ་ཤེས་པར་བྱའོ། །འཇམ་པོ་གསུམ་ལ་ཡམ་ཤིང་སོགས་གཡས་པའི་མཐེབ་སྲིན་གྱིས་འབུལ་བར་འདྲ་ལ། དྲག་པོ་ལ་ནི་གཡོན་པའི་མཐེབ་སྲིན་གྱིས་སོ། །དབང་དང་དྲག་པོའི་སྲེག་རྫས་རྣམས་ལ་རྫས་སྔགས་སོ་སོ་བ་མི་སྣང་བས་གང་ལ་དབུལ་བའི་ལྷའི་སྔགས་ཉིད་ཀྱིས་བྱའོ། །རྒྱས་པ་སོགས་གསུམ་ལ་ཡང་འདས་པའི་ལྷ་མེ་ལྷའི་སྙིང་གར་བསྐྱེད་པ་འདྲ་ལ། །ཁ་དོག་ནི་རྒྱས་པ་ལ་སེར། དབང་དང་དེའི་
དགུག་པ་ལ་དམར། བསད་པ་དང་དགུག་པ་དང་བསྐྲད་པ་དང་དབྱེ་བ་ལ་ནག་པོ། རྨོངས་རེངས་ལ་སེར་པོའོ། །གཉིས་པ་ནི། བསྒྲུབ་བྱ་ལ་འཕྲིན་ལས་མཛད་པའི་དམིགས་པ་ནི། རྒྱས་པ་ལ་ཟླ་བ་སེར་པོ་ལ་གནས་པའི་བསྒྲུབ་བྱ་སེར་པོར་བསམས་ལ། ལྷ་རྣམས་ཀྱི་ཐུགས་ཀ་ནས་སྤྲོས་པའི་སངས་རྒྱས་རྣམས་ཀྱིས་བུམ་པ་སེར་པོ་ནས་བདུད་རྩི་སེར་པོས་དབང་བསྐུར་བས་ལུས་དང་དབང་ཐང་དང་ཚེ་དང་ཤེས་རབ་སོགས་རྒྱས་པ་དང་བུམ་པ་ནས་རིན་པོ་ཆེའི་ཆར་བབས་པས་ཁྱིམ་གང་བར་བསམ་མོ། །དབང་ལ་ཟླ་བ་དམར་པོ་ལ་གནས་བའི་བསྒྲུབ་བྱ་ཁ་དོག་དམར་པོར་བསམས་ཏེ་འོད་ཟེར་དམར་པོ་ལྕགས་ཀྱུ་ལྟ་བུས་བཀུག་ནས་རྐང་པ་གཉིས་ཀྱི་དྲུང་དུ་ལྷགས་པར་བསམ་པ་དང་དེའི་དགུག་པ་ལ་རླུང་གི་དཀྱིལ་འཁོར་ལ་གནས་པའི་ཡི་གེ་དམར་པོའི་སྟེང་དུ་བསྒྲུབ་བྱ་སྐྲ་བཤིག་ནས་གནས་པའི་སྙིང་ནས་ལྕགས་ཀྱུས་ཕུག །མགྲིན་པ་ཞགས་པས་བཅིངས་ནས་འོང་བར་བསམ་པར་དགྲ་ནག་ལས་གསུངས་ཏེ་ཡི་གེ་ནི་ཨ་དམར་པོར་དམ་ཚིག་རྡོ་རྗེས་བཤད་དོ། །འོད་སྙེར་སྤྲོས་པའི་ལྷས་ཨུཏྤལ་དམར་པོ་ཁ་མ་ཕྱེ་བ་འདྲ་བའི་མདས་སྙིང་ཕུག་ནས་དབང་དུ་སྡུད་པ་དབང་དང་ལྕགས་ཀྱུས་ཕུག་ཅིང་ཞགས་པས་བཅིངས་ནས་འགུགས་པ་དེའི་དགུག་པའི་ཁྱད་པར་དུ་བཤད་དོ། །རྟོག་བདུན་ལས་བསྒྲུབ་བྱ་བྱེ་བྲག་པ་ལ་ལྟོས་པའི་དབང་དགུག་བཤད་ཀྱང་འདིར་སྤྱིའི་དབང་དུ་བྱས་པ་བཤད་པའི་སྐབས་སོ། །བསད་པ་ལ་ནི་རང་གི་མདུན་དུ་མེའི་དཀྱིལ་འཁོར་གྱི་སྟེང་ན་བསྒྲུབ་བྱ་གཅེར་བུ་སྐྲ་བཤིག་པ་ཉམ་ཐག་པ་གནས་པར་བསམ། དེ་ནས་རང་གི་སྙིང་གའི་ས་བོན་
ལས་བྱུང་བའི་ཁྲོ་བོའི་ཚོགས་ཀྱིས་བསྐོར་བའི་སྤྲུལ་པའི་གཟུགས་སོང་སྟེ་དེའི་སྙིང་གར་ཞུགས་ནས་དེ་བྱིན་གྱིས་རློབ་པའི་ལྷ་རྣམས་ལ་མཆོད་ནས་འདི་ནི་འདི་ལྟ་བུའི་སྡིག་པའི་ལས་བྱེད་པས་ན་ངེས་པར་དམྱལ་བར་འགྲོ་བས། འདི་ནི་ཁྱེད་རྣམས་ཀྱིས་བཏང་ནས་བྱོན་འཚལ་ཞེས་གསོལ་བ་གདབ་པ་ལ་ལྷ་དང་བཅས་པའི་བསྲུང་བ་རྣམས་ཁྱེར་ནས་འོངས་པ་ལ་མཆོད་པ་ཕུལ་ཏེ། དེ་ལ་བསྲུང་བའི་ལྷ་རྣམས་ཁྲོ་བོ་རྣམས་ཀྱིས་ཁྱེར་ཏེ་ནམ་མཁའ་ལ་གཤེགས་ཤིང་སྤྲོས་པའི་ཁྲོ་བོ་རྣམས་རང་གི་ཁ་ནས་ཞུགས་ཏེ་སྙིང་གར་བཀོད་ལ་མཉེས་པར་བྱའོ། དེ་ནས་རང་གི་སྙིང་ག་ནས་སྤྲོས་པའི་འོད་ཟེར་ལྕགས་ཀྱུ་འདྲ་བས་བསྒྲུབ་བྱ་བཀུག་སྟེ་སྔར་གྱི་གཟུགས་བརྙན་ལ་བསྟིམས་པས་དེ་ཉིད་བསྒྲུབ་བྱ་དངོས་སུ་བསམ་མོ། །ཁྲོ་བོ་སྣ་ཚོགས་པ་མཚོན་ཆ་སྣ་ཚོགས་འཕྱར་བ་སྤྲུལ་ཏེ་བསྣུན་ཞིང་དུམ་བུ་བརྒྱ་སྟོང་དུ་བྱས་ནས་ཤ་ཚིལ་དང་རུས་པ་རྣམས་ཟ་ཞིང་ཁྲག་ཀྱང་འཐུང་བ་དང་མདུན་དུ་གཤིན་རྗེ་ནག་པོ་མ་ཧེ་ལ་གནས་པ་དབྱུག་ཏོ་དང་ཞགས་པ་འཛིན་པ། ལྟོ་བ་ཆེ་ལ་ཞལ་གདངས་པ་དེའི་སྙིང་གར་གནས་ནས་ཟ་བར་བསྒོམ་ཞིང་། གཟུགས་བརྙན་གྱི་རྐང་པ་གཡོན་པ་ནས་བརྩམས་ཏེ་དུམ་བུར་བཅད་ཅིང་སྲེག་རྫས་སུ་ཕུལ་བས་ལྷ་རྣམས་ཀྱང་གསོལ་བར་བསམ་མོ། །བསད་པ་ལ་ཡཾ་ལས་རྔ་མོ་དང་དེའི་རྒྱབ་ཏུ་ཡཾ་ལས་རླུང་གི་དཀྱིལ་འཁོར་ཟླ་ཕྱེད་ལྟ་བུའི་སྟེང་དུ་བསྒྲུབ་བྱ་གཅེར་བུ་སྐྲ་བཤིག་པ་བྲེད་པ་བསམས་ལ། དེའི་རྒྱབ་ཏུ་གཤིན་རྗེ་སྐྲ་སིལ་བ་ལག་ན་དབྱུག་པ་ཐོགས་པས་ལྷོ་ཕྱོགས་སུ་བདས་པར་བསམ་མོ། །དབྱེ་བ་ལ་བསྒྲུབ་བྱ་གཉིས་གཅིག་རྟ་དང་ཅིག་ཤོས་མ་ཧེའི་སྙིང་གར་
གནས་ཤིང་མི་མཐུན་པར་བསམས་ནས་རྟ་དང་མ་ཧེ་གཉིས་འཐབ་པར་བསམ་མོ། །དགྲ་ནག་ལས་རྟ་དང་མ་ཧེའི་རྒྱབ་ཏུ་ཞོན་པའི་བསྒྲུབ་བྱ་གཉིས་ལག་ན་མཚོན་ཆ་སྣ་ཚོགས་ཐོགས་པ་དང་། སྤྲོས་པའི་ཁྲོ་བོའི་ཚོགས་ཀྱང་ཕྱོགས་གཉིས་ཀར་འཁོད་ནས་འཐབ་པར་བསམ་པར་བཤད་དོ། །རེངས་པ་ལ་སའི་དཀྱིལ་འཁོར་གྱི་སྟེང་ན་བསྒྲུབ་བྱ་སེར་པོར་བསམས་ལ། དེའི་སྟེང་དུ་རི་རབ། དེའི་སྟེང་དུ་སའི་དཀྱིལ་འཁོར། དེའི་སྟེང་དུ་སྣ་ཚོགས་རྡོ་རྗེས་མནན་པར་བསྒོམ་མོ། །རྨོངས་པ་ལ་བསྒྲུབ་བྱ་ལུག་གི་སྙིང་གར་བཀུག་ནས་སའི་དཀྱིལ་འཁོར་བཞི་ཟ་མ་ཏོག་བཞིན་དུ་ཁ་སྦྱོར་བྱས་པའི་ནང་དུ་གནས་པར་བསམ་མོ། །དེ་ནས་མཐར་འདོད་པའི་དོན་ལ་གསོལ་བ་གདབ་སྟེ། རྒྱས་པ་ལ་ཤེས་རབ་དང་ཏིང་ངེ་འཛིན་སོགས་འཕེལ་བ་དང་དབང་ལ་ལྷ་རྣམས་དབང་དུ་འདུ་ཞིང་གང་ཞིག་དབང་དུ་བྱས་ན་བསྟན་པ་དང་སེམས་ཅན་གྱི་དོན་རྒྱ་ཆེན་པོ་འགྲུབ་པའི་སེམས་ཅན་རྣམས་བདེ་བླག་ཏུ་དབང་དུ་སྡུད་ཅིང་འགུགས་པར་ནུས་པ་དང་། དྲག་པོ་ལ་བསྟན་པ་འཇིག་ཅིང་དཀོན་མཆོག་གསུམ་ལ་གནོད་པ་བྱེད་པ་ལ་སོགས་པའི་སེམས་ཅན་དྲག་པོ་མིན་པའི་ཐབས་ཀྱིས་མི་འདུལ་བ་རྣམས་སྙིང་རྗེ་ཆེན་པོས་ཇི་ལྟར་འཚམ་པར་བདེ་བླག་ཏུ་ཚར་གཅོད་ནུས་པ་སོགས་ཀྱི་འཕྲིན་ལས་འགྲུབ་པའོ། །ཁྱད་པར་གཞན་རྣམས་ནི་སྔར་བཤད་ཟིན་ཏོ། །གཉིས་པ་ནི། སྦྱིན་སྲེག་གི་རྫས་རྣམས་མ་འབྱོར་བ་དང་ཡོད་ཀྱང་བྱ་བའི་སྐབས་མེད་ན་ནི་སྔར་བཤད་པ་ཐམས་ཅད་བསྒོམས་པ་ཁོ་ནས་བྱ་སྟེ་ངེས་པར་འདོད་པ་རྣམས་
འགྲུབ་བོ། །ཡང་ན་མེ་ལྷའི་སྙིང་གར་གནས་པའི་ལས་སོ་སོའི་ཁ་དོག་ཅན་མདུན་གྱི་ནམ་མཁར་དཀྱིལ་འཁོར་གྱི་དབུས་སུ་བསྒོམས་ལ་རང་གི་ལོགས་སུ་རིན་པོ་ཆེ་སྣ་བདུན་གྱི་རང་བཞིན་གྱི་སྣོད་མར་དང་སྦྲང་རྩིས་གང་བ་བཞག་ནས་རིན་པོ་ཆེ་སྣ་བདུན་གྱི་དགང་བླུགས་ཀྱི་སྲེག་བླུགས་ཡིད་ཀྱིས་བྱ་སྟེ་ཡིད་ཀྱི་སྦྱིན་སྲེག་གི་ཚུལ་གཉིས་སོ། །ཕྱི་རོལ་གྱི་རྫས་ཡོད་པ་ལ་ཡང་ཡིད་ཀྱི་སྒོམ་པ་ཉིད་ཀྱིས་རྫོགས་པར་བྱ་དགོས་པས་ན་འདི་ནི་བླ་ན་མེད་པའི་ཡིད་མངོན་པར་འདུ་བྱེད་པའི་རྒྱུ་ཡིན་པའི་ཕྱིར་རོ། །གཉིས་པ་ནི། ཕྱིའི་རྫས་ལ་བརྟེན་པའི་ནང་གི་སྦྱིན་སྲེག་ནི་རང་གི་འདོད་པའི་ལྷའི་རྣལ་འབྱོར་དང་ལྡན་པས་རང་གིས་ལྷའམ་རྡོ་རྗེ་སེམས་དཔའ་མ་རྣམ་སྣང་ལ་སོགས་པ་ལྔ་རིམ་པ་བཞིན་དུ་འདོད་ཡོན་ལྔའི་ངོ་བོར་བལྟས་ལ་ཇི་ལྟར་རྙེད་པ་ལ་ཐེ་ཚོམ་མེད་པར་ལོངས་སྤྱད་པར་བྱའོ། །བཟའ་བའི་དུས་སུ་ནི་བཟའ་བཏུང་ཐམས་ཅད་མཉམ་པ་ཉིད་ཀྱི་དག་པས་བདུད་རྩིར་བྱས་ནས་ལྟེ་བའི་ཐབ་ཁུང་གི་མེས་འཁྱུད་པའི་སྙིང་གར་སོན་པའི་རང་གི་ལྷའི་འཁོར་ལོ་ལ་ལག་པའི་དགང་གཟར་ལ་སོགས་པས་ཆོ་ག་བཞིན་དུ་ཚིམ་པར་བྱའོ། །ཕྱིའི་རྫས་ལ་མ་བརྟེན་པའི་ནང་གི་སྦྱིན་སྲེག་ནི། ཁ་སྦྱོར་ལས། ཐོད་པ་འདི་ནི་མགོ་བོ་ཉིད། །སྲེག་རྫས་ཀྱི་ནི་སྣོད་དུ་གསུངས། །བླུགས་གཟར་རོ་མར་བཤད་པ་སྟེ། །སྙིང་གི་འཁོར་ལོ་རྐྱང་མ་དག །དགང་གཟར་ཞེས་བྱ་ཡང་དག་བརྗོད། །ཐབ་ཁུང་ལྟེ་བའི་དཀྱིལ་འཁོར་དུ། །ལས་ཀྱི་རླུང་གིས་བསྐྱོད་པ་ཡིས། །ཚངས་པའི་མེ་ནི་སུམ་མདོར་གནས། །ཞེས་གསུངས་སོ། །དེ་ལ་ལྟེ་བ་ནས་མགྲིན་པའི་འཁོར་ལོ་ལ་མ་ཐུག་ཚུན་ཆད་ཀྱི་རོ་མ་ནི་
བླུགས་གཟར་གྱི་ཡུ་བ་རྡོ་རྗེ་རིན་པོ་ཆེའི་བར་དང་། མགྲིན་པའི་འཁོར་ལོ་ན་གནས་པའི་རོ་མ་ནི་བླུགས་གཟར་གྱི་མགོ་བོ་དང་། ལྟེ་བ་ནས་སྙིང་གའི་འཁོར་ལོའི་ལྟེ་བ་ལ་མ་ཐུག་པའི་བར་ནི་དགང་གཟར་གྱི་ཡུ་བ་རྡོ་རྗེ་རིན་ཆེན་གྱི་བར་དང་། སྙིང་གའི་འཁོར་ལོའི་ལྟེ་བ་ན་གནས་པའི་རྐྱང་མ་ནི་དགང་གཟར་གྱི་མགོ་བོའོ། །ལྟེ་བའི་འཁོར་ལོ་ནི་ཐབ་ཁུང་དང་སྤྱི་བོའི་འཁོར་ལོ་ནི་སྲེག་རྫས་ཀྱི་སྣོད་དེ་མགོ་ཐོད་ཀྱང་ངོ་། །སྲེག་རྫས་ནི་བྱང་སེམས་ཀུནྡ་ལྟ་བུ་ཡིན་ལ་སྦྱིན་སྲེག་གི་མེ་ནི་གཏུམ་མོ་རྡུལ་གྱི་ངོ་བོ་བྱང་སེམས་དམར་པོ་མེའི་རང་བཞིན་ཅན་ནོ། །ཁུ་བའི་སྲེག་རྫས་སྤྱི་བོར་གནས་པ་ཞུ་བར་བྱེད་པ་ནི་རྡུལ་གྱི་མེ་ཁྲག་གི་ཁམས་ཡིན་ལ། དེ་ཤས་ཆེར་རོ་མ་ནས་གྱེན་དུ་རྒྱུ་བས་ན་དེ་གནས་པའི་རྩ་ལ་བླུགས་གཟར་ཞེས་བྱ་སྟེ་བཅུད་འཆུ་བར་བྱེད་པའི་རྩ་ཡིན་པའི་ཕྱིར་རོ། །བཞུགས་པའི་ཁུ་བ་ཤས་ཆེར་ནི་རྐྱང་མར་འབབ་པས་ན་རྩ་དེ་ལ་དགང་བར་བྱ་བའི་གཟར་བུ་ཞེས་བྱ་སྟེ་རོ་མས་བཅུས་པའི་བཅུད་ཀྱིས་དེ་འགེངས་བའི་ཕྱིར་རོ། །ཚངས་པའི་མེ་རྡུལ་གྱི་ངོ་བོ་ནི་ལྟེ་བའི་འོག་གསང་བའི་ཆུ་སྐྱེས་སུ་གནས་པ་ལ་ཤས་ཆེ་བ་དུས་རྟག་ཏུ་ལྟེ་བར་གནས་པ་ལ་དགོངས་ནས་ལྟེ་བར་གནས་པར་ཡང་བཤད་དོ། །མེ་དེ་སྦོར་བའི་རླུང་ཡབ་ཀྱི་དོད་ནི་ལས་ཞེས་པ་སྟེ་བསྒོམ་པའི་བྱ་བ་དང་དབང་པོ་གཉིས་སྦྱར་བའི་བྱ་བའོ། །རྣལ་འབྱོར་གྱི་གཏུམ་མོའི་མེ་དེ་ལྷན་སྐྱེས་ཀྱི་གཏུམ་མོ་བསྒོམ་པའི་བྱ་བས་སེམས་བརྟན་པ་ན་རོ་རྐྱང་གི་རླུང་དབུ་མར་འདུས་ནས་ཚངས་པའི་མེ་དང་རོ་གཅིག་ཏུ་འགྱུར་
ལ་དེས་གཏུམ་མོ་སྦར་བས། སྲེག་རྫས་ཞུ་ནས་ལྷན་སྐྱེས་ཀྱི་བདེ་བ་སྟེར་རོ། །གསུམ་པ་ནི། ཁམས་གསུམ་པོ་ཐམས་ཅད་རང་བཞིན་གྱིས་སྟོང་པའི་སྟོང་པ་ཉིད་དང་སྙིང་རྗེ་དབྱེར་མེད་པ་འཁོར་ལོའི་རྣམ་པའི་ཡེ་ཤེས་ཀྱི་མེ་ལ་ཕུང་པོ་ལ་སོགས་པའི་གཟུང་འཛིན་གྱི་སྤྲོས་པའི་བུད་ཤིང་བསྲེག་པ་ནི་བླ་ན་མེད་པའི་སྦྱིན་སྲེག་གོ །སྟོང་པ་དང་སྙིང་རྗེ་ནི། ཁ་སྦྱོར་ལས། དམིགས་མེད་གནས་སུ་ཤེས་རབ་དང་། །དམིགས་མེད་སྙིང་རྗེ་ཆེན་པོ་ཉིད། །བློ་དང་ལྷན་ཅིག་གཅིག་གྱུར་པ། །ནམ་མཁར་ནམ་མཁའ་ཇི་ལྟ་བའོ། །ཞེས་གསུངས་པ་ལྟར་རོ། །དེ་ལྟར་ན་ཕྱི་དང་ཕྱིའི་རྫས་ལ་བརྟེན་པའི་ནང་གི་སྦྱིན་སྲེག་གིས་རང་གི་ལྷ་མཉེས་པ་ལས་ལྷས་བྱིན་གྱིས་བརླབས་པ་ན་ལྟེ་བའི་གཏུམ་མོའི་མེ་ལ་སྤྱི་བོའི་བྱང་སེམས་བསྲེག་པའི་ནང་གི་སྦྱིན་སྲེག་ནུས་པར་འགྱུར་ཏེ། །དེས་རྫོགས་རིམ་གྱི་རྟོགས་པ་བསྐྱེད་པའི་རྒྱུད་སྨིན་པར་བྱས་པའི་ཕྱིར་རོ། །དེས་ན་བཅོས་མའི་དཀྱིལ་འཁོར་དང་བཟླས་པ་དང་སྦྱིན་སྲེག་ནི་རྣལ་མའི་སྦྱོར་བ་རྟོགས་པར་བྱ་བའི་དོན་དུ་གསུངས་སོ། །ནང་གི་སྦྱིན་སྲེག་ཁྱད་པར་ཅན་ནུས་པ་ན་ཁམས་གཉིས་ཀྱི་ཞུ་བདེའི་མཐུས་གཉིས་སྣང་གི་རྟོག་པ་རགས་པ་རྣམས་ཞི་བར་འགྱུར་ལ། དེའི་ཡས་བབས་དང་མས་བརྟན་གྱི་ལྷན་སྐྱེས་འཆར་བའི་དུས་སུ་ཆོས་ཐམས་ཅད་རང་བཞིན་གྱིས་སྟོང་པའི་སྟོང་པ་ཉིད་ཀྱི་ཕུ་ཐག་ཆོད་པའི་ལྟ་བ་དྲན་པར་བྱས་ནས་སྐྱོང་བ་ནི་བླ་ན་མེད་པའི་སྦྱིན་སྲེག་གོ །དེའི་མཐར་ལྡང་བ་ན་རང་གི་འདོད་པའི་ལྷའི་སྐུ་སྒྱུ་མ་ལྟ་བུར་ལངས་ཏེ་སླར་ཡང་སྔར་ལྟར་སྦྱིན་སྲེག་བྱེད་པའི་རིམ་པས་ལམ་བགྲོད་པར་བྱའོ། །རང་བཞིན་མེད་
པའི་དོན་ངེས་པའི་ལྟ་བ་སྐྱོང་རྒྱུ་མེད་ན་རོ་རྐྱང་གི་རླུང་དབུ་མར་ཚུད་པའི་འབར་འཛག་གི་སྦྱིན་སྲེག་གིས་རྟོག་པ་རགས་པ་རེ་ཞིག་ཞི་ཡང་དེ་ཁོ་ན་ཉིད་ཀྱི་དོན་ལ་བློ་ཁ་ཕྱོགས་པ་མིན་པ་ལ་དགོངས་ནས་རྫས་ལ་མ་བརྟེན་པའི་ནང་གི་སྦྱིན་སྲེག་ལས་བླ་ན་མེད་པའི་སྦྱིན་སྲེག་ལོགས་སུ་འོད་སྙེ་ལས་གསུངས་ཏེ། ལེགས་པ་ཡིན་ནོ། །དེ་ལྟར་ཕྱི་ནང་གི་སྦྱིན་སྲེག་དང་པོ་གཉིས་ནི་ནང་གི་སྦྱིན་སྲེག་ཁྱད་པར་བའི་ཆེད་དུ་དམིགས་ནས་བྱ་དགོས་ལ། དེ་ཡང་བླ་ན་མེད་པའི་སྦྱིན་སྲེག་གི་ཕྱིར་དུ་དམིགས་ནས་བྱ་དགོས་པའི་ཚུལ་རྣམས་ལེགས་པར་ཤེས་ནས། སྦྱིན་སྲེག་བྱེད་པ་ནི་རྫོགས་རིམ་སྐྱེ་བའི་རྒྱུད་སྨིན་པར་འགྱུར་བ་ལ་ཁྱད་ཤིན་ཏུ་ཆེ་བས་དེ་དག་ཚང་བར་བཤད་དོ། །དྲི་མེད་དབང་ཐོབ་བསྲུང་སྡོམ་དག་གྱུར་ཅིང་། །ཐུན་བཞིར་བསྒོམ་དང་བཟླས་ལ་མངོན་བརྩོན་པས། །ཕྱི་ནང་ལྷ་ཚོགས་འཁོར་གསུམ་ཡོངས་དག་གི །མཆོད་སྦྱིན་རྫས་ཀྱིས་མཉེས་པར་བྱས་པའི་མཐུས། །ཨ་ཐུང་མེ་ཡིས་ཧཾ་ཡིག་བཞུས་ནས་ནི། །དྷཱུ་ཏཱིའི་ནང་དུ་སྦྱིན་སྲེག་ནུས་པ་ན། །ཟབ་མོ་དབུ་མའི་ལྟ་བ་ལེགས་སྐྱོང་བའི། །བླ་ན་མེད་པའི་སྦྱིན་སྲེག་བྱ་འོ་ཞེས། །སྦྱིན་སྲེག་གསུམ་གྱི་ལམ་གྱི་རིམ་པ་ཡིས། །རྣལ་འབྱོར་བླ་མེད་རྒྱུད་དོན་གསལ་བྱེད་པའི། །ཚུལ་འདི་གཞན་ལ་ཕན་པའི་བསམ་པས་བཤད། །འདི་ན་སྦྱིན་སྲེག་གཞུང་སྦྱར་མི་ཉུང་མོད། །རི་དྭགས་ཁྲོད་ན་གདོང་ལྔ་པ་བཞིན་དུ། །རྨད་བྱུང་གཏམ་གྱིས་ཁྱད་ཞུགས་གྱུར་པ་ཡི། །རིག་པ་རྩོམ་པ་བློ་ལྡན་སུ་ཞིག་བཤོལ། །འོན་ཀྱང་བྱིས་བློ་ཤིན་
ཏུ་མཐུ་ཆུང་ཞིང་། །སྦྱིན་སྲེག་རྣམ་གསུམ་དཔག་པར་དཀའ་བས་ན། །འདིར་ནི་བདག་གིས་གང་ཞིག་ནོངས་པ་རྣམས། ། ཚད་མར་གྱུར་པ་རྣམས་ལ་བཟོད་པར་གསོལ། །དེར་འབད་དགེ་བས་སྐྱེ་དགུའི་ཉེར་འཚོའི་གཞི། །བསྟན་པ་རིན་ཆེན་འཕྲིན་ལས་རྣམ་བཞི་ཡིས། །སྐྱེ་བ་ཀུན་ཏུ་རྒྱས་པར་བྱེད་པ་དང་། །སྦྱིན་སྲེག་གསུམ་གྱིས་འགྲོ་རྣམས་སྒྲོལ་བར་ཤོག །ཚུལ་འདིས་འཇམ་པའི་རྡོ་རྗེ་གཤིན་རྗེ་གཤེད། །མཉེས་པར་གྱུར་ནས་མཆོག་རྣམས་ལེགས་སྩོལ་ཞིང་། །རིག་སྔགས་འཆང་གི་དངོས་གྲུབ་རྒྱ་མཚོ་ཡིས། །དགའ་སྟོན་ཆེན་པོས་འགྲོ་བ་དབུགས་འབྱིན་ཤོག །ཅེས་དཔལ་རྡོ་རྗེ་འཇིགས་བྱེད་ཀྱི་ཕྲིན་ལས་བཞིའི་སྦྱིན་སྲེག་དངོས་གྲུབ་ཀྱི་རྒྱ་མཚོ་ཞེས་བྱ་བ་འདི་ནི་དོན་གཉེར་ཅན་མང་པོ་ལ་ཕན་པར་མཐོང་ནས། དོན་ཡོད་རྡོ་རྗེ་ཆུང་བའི་སྦྱིན་སྲེག་གཉིས་ལ་ཡིད་གཏད་མི་རུང་བ་མང་དུ་སྣང་བས་བཏང་སྙོམས་སུ་བཞག་ཅིང་། རྟོག་བདུན་གྱི་འགྲེལ་པ་གཉིས་སུ་དགྲ་ནག་དང་དེའི་སྦྱིན་སྲེག་དཔལ་འཛིན་གྱིས་མཛད་པ་བཞིན་མདོར་བསྡུས་བཤད་པ་ལེགས་པར་མཐོང་ནས། དགྲ་ནག་དང་དཔལ་འཛིན་གྱི་སྦྱིན་སྲེག་ལ་གཞི་བྱས་སྦྱིན་སྲེག་ཐམས་ཅད་ཀྱི་སྤྱིའི་ཆོ་ག་འོད་ཀྱི་སྙེ་མས་ཁ་བསྐངས་ཤིང་གཞུང་གཞན་རྣམས་ནས་ཀྱང་ཅུང་ཟད་བླངས་ཏེ། གཤིན་རྗེ་གཤེད་ཀྱི་རྣལ་འབྱོར་པ་བློ་བཟང་གྲགས་པའི་དཔལ་གྱིས་འོ་དེ་གུང་རྒྱལ་གྱི་ལྷ་ཞོལ་བྱམས་པ་གླིང་དུ་སྦྱར་བའོ། །དགྲའོ། །