ལེའུ་དང་པོ། འགྲེལ་གཞུང་གི་མཆོད་བརྗོད་དང་རྩོམ་པར་དམ་བཅའ་བ།

ན་མོ་གུ་རུ་དྷརྨ་ཀཱ་ཡ་སམྦྷོ་ཀཱ་ཡ་ནིརྨ་ཀཱ་ཡ་སརྦ་སིདྡྷི་ཕ་ལ་ཧཱུཾ། གང་ཞིག་རྣམ་གྲོལ་དཔལ་ཡོན་ཕུང་པོ་སྲིད་ཞིའི་སྒྲོ་སྐུར་བྲལ་བ་ཆོས་ཀུན་མཉམ་པ་ཆེན་པོའི་ངང་། །སྤྲོས་ཚོགས་ཡོངས་སྤངས་ཅིར་ཡང་མི་དམིགས་གནས་ལུགས་གཉུག་མ་སྐྱེ་འགག་གནས་གསུམ་བྲལ་བའི་བདག་ཉིད་ཅན། །ཀུན་རྫོགས་སྒྱུ་མ་རང་ངོར་གྲོལ་བས་ཤེས་དང་ཤེས་བྱ་རོ་གཅིག་བཟླུམ་པ་བདེན་ཆེན་སྒྱུ་མའི་སྐུ། །རིགས་བརྒྱའི་ཁྱབ་བདག་ཀུན་བཟང་རྡོ་རྗེ་འཆང་ཆེན་བདེ་ཆེན་འཁོར་ལོའི་རྒྱན་དུ་བཞུགས་ནས་བྱིན་གྱིས་རློབས། །རང་བཞིན་དབྱིངས་སུ་འཁོར་འདས་ཐབས་ཅད་ལྷུན་གྱིས་གྲུབ་ཅིང་སྐྱེ་མེད་ངང་དུ་རོ་གཅིག་པ། །མཁྱེན་གཉིས་ཡེ་ཤེས་རྟོགས་པའི་རྒྱུན་ལས་ཡོངས་སུ་གྲོལ་བ་མི་འགྱུར་ཐིག་ལེའི་ངང་ཉིད་ལས། །སྐྱེ་བའི་ཆོ་འཕྲུལ་སྒྱུ་མའི་རོལ་གར་བསམ་ཡས་སྐུར་སྟོན་དཔལ་ལྡན་སངས་རྒྱས་པདྨ་སྐྱེས། །འཇའ་ལུས་མཆོག་གི་སྐུ་བརྙེས་དྲི་མེད་བཤེས་གཉེན་ལ་སོགས་སྔ་འགྱུར་བསྟན་པའི་གསལ་བྱེད་རྣམས་ལ་འདུད། །གང་གི་ཞིང་ཁམས་བྷོ་ཊའི་ལྗོངས་སུ་མདོ་སྔགས་བསྟན་པ་སྤེལ་ཕྱིར་དུ། །འཁོར་བའི་མཚང་ལས་ངེས་པར་གྲོལ་ཡང་སྲིད་པར་འཇུག་ལ་སྐྱོ་མེད་བཞིན། །དཔག་མེད་འགྲོ་རྣམས་ཕན་བདེའི་ལམ་དུ་བཀྲི་མཛད་མཁྱེན་བརྩེ་ནུས་པའི་བདག །རིགས་གསུམ་རྣམ་སྤྲུལ་མེད་དབོན་གསུམ་གྱི་བཀའ་དྲིན་དྲན་བཞིན་སྙིང་ནས་མོས། །མཐའ་མཁོབ་པྲེ་ཏ་པུ་རི་རྨོངས་པའི་ཐུན་གསུམ་འཐིབས་པའི་སྨག་རུམ་དུ། །དགེ་ལེགས་འོད་སྟོང་རབ་ཏུ་འབར་བས་མདོ་སྔགས་བསྟན་པ་གསལ་མཛད་ཅིང་། །འཕྲལ་ཕུག་ཕན་དག་བདེ་བའི་པས་ཚལ་ཀུན་ནས་རབ་ཏུ་རྒྱས་མཛད་པ། །བཻ་རོ་ཙ་ན་ཀ་ཅོག་རྨ་གཉགས་ལ་སོགས་ལོ་པཎ་ཡོངས་ལ་འདུད། །མདོ་སྒྱུ་སེམས་གསུམ་ཡང་ཕུར་ལ་སོགས་དཀྱིལ་འཁོར་རྒྱ་མཚོའི་མངའ་བདག་རིམ་གཉིས་འབྲས་སྨིན་རྗེ། །ཡེ་ཤེས་སྒྱུ་མའི་རོལ་རྩལ་དཔག་མེད་ཐབས་མཁས་ཐུགས་རྗེའི་ཆོ་འཕྲུལ་ངོ་མཚར་རྒྱ་ཆེན་པོས། །འཁོར་བའི་མཚོར་ལྟུང་ཉམ་ཐག་འགྲོ་ལ་སྨིན་གྲོལ་བདུད་རྩིའི་ཆར་ཆེན་འབེབས་མཛད་གྲུབ་བརྙེས་མཆོག །སོ་ཟུར་གནུབས་གསུམ་བསྟན་པ་རྒྱ་མཚོའི་རི་དབང་སྤོ་ན་མངོན་པར་མཐོ་འདི་བསྟོད་བསྔགས་ཡུལ། །སྔ་འགྱུར་བསྟན་པའི་འོད་ཟེར་འབུམ་ལྡན་ལྔ་བདོའི་ཆུ་འཛིན་རུམ་དུ་ཡིབ་ལ་ཉེ་བའི་ཚེ། །ཐོས་བསམ་སྒོམ་པའི་ཤེས་རབ་འཐོར་རླུང་དྲག་པོའི་རྩལ་ཤུགས་རབ་ཏུ་གཡོས་པའི་ནུས་སྟོབས་ཀྱིས། །རྒོལ་ངན་སྤྲིན་ནག་རིང་དུ་བསྐྲད་ དང་ཆབས་ཅིག་མ་ཧཱ་སནྡྷའི་ཉིན་བྱེད་གསལ་བ་དང་། །བསྟན་འཛིན་ཆུ་སྐྱེས་ཚལ ་རྒྱས་གྲུབ་གཉིས་དྲི་བཟང་སྲིད་འདིར་སྤྲོ་བྱེད་ཀློང་ཆེན་པ་ཁྱོད་རྒྱལ། །ཇི་ལྟ་བ་དང་ཇི་སྙེད་མཁྱེ༷ན་པའི་མངའ་བདག་འཇམ་དཔལ་རྣོན་པོའི་རྗེས་འགྲོ་དམ་པའི་མགོན། །བྱམས་སྡང་རིས་བྲལ་ཐུགས་བརྩེའི་གཏེར་མཛོད་ཕྱག་ན་པདྨ་ཟློས་པའི་སྒྱུ་འཕྲུལ་སྤྲུལ་པའི་སྐུ། །བདུད་སྡེའི་དཔུང་ཚོགས་གཞོམ་ནུས་འོད༷་ཟེར༷་བརྒྱ་པས་མུན་པར་ཇི་བཞིན་གསང་བདག་རྡོ་རྗེ་འཛིན། །རིགས་གསུམ་གཞན་མེད་དེ་རྒྱལ་བསྟན་༔ཛུན་མཆོག་འཇི༷གས་མེ༷ད་གླིང༷་པ༷་གཏན་གྱི་སྐྱབས་སུ་གྲུབ། །རྒྱལ་བས་གསུངས་པའི་མདོ་སྔགས་ཆོས་སོ་ཅོག །ཉུང་ངུའི་ཚིག་གིས་ཇི་བཞིན་རྟོགས་ནུས་གཞུང་། །ཡོན་ཏན་རིན་ཆེན་མཛོད་ཀྱི་སྒོ་བརྒྱའི་ལྕགས། །འབྱེད་ནུས་བསྡུས་ལྡེ་རྒྱ་མཚོའི་ཆུ་ཐིག་ནོར། །ཁོ་བོའི་སྐལ་བར་ཐོབ་བཞིན་དོན་གཉེར་མཁན། །བློ་གསལ་ཆི་མེད་ནེ་གུའི་གཙུག་རྒྱན་དུ། །སྦྱིན་ལ་དད་དང་ཐོས་བསམ་བྱི་དོར་དང་། །གཞན་ཕན་སྨོན་ལམ་སེམས་མཆོག་བསྐྱེད་དང་ཀྭ་ཡི། །ཞེས་མཆོད་པར་བརྗོད་པ་དང་རྩོམ་པར་དམ་བཅའ་བའི་ཚིག་གི་མདུན་བསུས་ནས་འགྲེལ་པ་དངོས་ལ་འཇུག་པ་ལ་ཀླད་ཀྱི་དོན་དང་། གཞུང་གི་དོན་དང་། མཇུག་གི་དོན་དང་གསུམ་མོ། །དང་པོ་ལ་ནི་གཞུང་འདིའི་མཚན་བསྟན་པ་དང་། དེ་ཉིད་རྩོམ་པ་ལ་བར་ཆད་མེད་ཅིང་བྱིན་རླབས་འཇུག་པའི་ཕྱིར་མཆོག་གསུམ་རིན་པོ་ཆེར་ཕྱག་འཚལ་བ་དང་། རྩོམ་པར་དམ་བཅའ་བའོ། །གཉིས་པ་ལ་གཉིས་ཏེ། རྒྱུ་ཕར་ཕྱིན་ཐེག་པའི་ས་ལམ་འབྲས་བུ་དང་བཅས་པ་བསྟན་པ་དང་། འབྲས་བུ་གསང་སྔགས་རྡོ་རྗེའི་ཐེག་པ་སྤྱི་དགོས་ཀྱི་སྨིན་གྲོལ་གཉིས་དང་བསྐྱེད་རྫོགས་གཉིས་ཀྱི་དམ་ཚིག་གི་འབྲས་བུ་དང་བཅས་པ་བསྟན་པའོ། །གསུམ་པ་ལ་སྦྱར་བྱང་དགེ་བསྔོ་ལ་སོགས་པའོ། །བསྡུས་འགྲེལ་དངོས་ལ་འཇུག་པ། དང་པོ། ཀླད་ཀྱི་དོན། གཅིག །གཞུང་འདིའི་མཚན་བསྟན་པའི་ཐོག་མར་རྒྱ་སྐད་དུ་སྨྲོས་པའི་དོན། དང་པོ་མཚན་བསྟན་པའི་ཐོར་མར་རྒྱ་སྐད་སྨོས་པའི་དོན་ནི། སྤྱིར་འདྲེན་པ་སྟོང་གི་འབྱོན་བཞུགས་ཀྱི་ཡུལ་ཡིན་པ་དང་མདོ་སྔགས་ཀྱི་ཆོས་ཐམས་ཅད་ཀྱི་འབྱུང་ཁུངས་ཡིན་པའི་ཕྱིར་རོ། །དེ་ཡང་རྒྱ་ལ་དཀར་ནག་གཉིས་ཡོད་པ་ལ་སྔོན་མ་ནི་གོས་རྒྱན་དཀར་པོ་ལ་རྟེན་འབྲེལ་བཟང་པོར་འཇོག་ཅིང་། རྗེས་མས་ནག་པོ་གཙིགས་སུ་བྱེད་པ་དང་ཆོས་དང་འཇིག་རྟེན་གལ་ཆེ་ཆུང་ཡང་དེ་མཚུངས་བྱེད་པ་སོགས་ཀྱི་ཁྱད་པར་རོ། །རྒྱ་དཀར་པོའི་སྐད་ལ་རྒྱ་གར་སྐད་དུ་ཞེས་བྲིས་པའི་དགོས་ཆེན་ནི་ལོ་ཙཱ་བས་སུམ་རྟགས་དང་བསྟུན་ནས་འཇུག་པ་བདེ་བའི་ཕྱིར་དེ་ལྟར་བསྡེབས་པའོ། །དེ་ཡང་འདི་སྐད་ཅེས་སྨོས་ན། །རྒྱ་གར་སྐད་དུ། གུ་ཎ་ཀོ་ཥ་རཏྣ་པྲ་མོ་དྷ་པྲྀ་ནཱ་མ། བོད་སྐད་དུ། ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ། ཞེས་པའི་དོན་ནི། རྒྱ་བོད་ཀྱི་སྐད་གཉིས་ཤན་སྦྱར་བ་ཤེས་པར་བྱས་ནས། ཚིག་འགྲེལ་ལ་འཇུག་པ་ནི། གཞུང་འདིའི་ནང་ན་རིམ་དགུའི་ཐེག་པའི་ཡོན་ཏན་ཐམས་ཅད་ཚང་བ་ནི་རིན་པོ་ཆེའི་གཏེར་མཛོད་ལྟ་བུ་ཡིན་ལ་གང་ཞིག་ཤེས་བྱ་དོན་དུ་གཉེར་བ་རྣམས་ཀྱི་མི་ཤེས་པའི་ཐ་བ་བརླན་ནས་བློ་གྲོས་ཀྱི་ལོ་འབྲས་རྒྱས་པར་བྱེད་པ་ལ་དགའ་བའི་དཔེ་སོ་ནམ་པའི་ཞིང་སར་ཆར་རྒྱུན་དུས་སུ་བབས་པ་དང་ཆོས་མཚུངས་པ། ཞེས་བྱ་བ་ནི། མཚན་གོང་དུ་གསལ་བའི་གཞུང་ངོས་བཟུང་བའོ། ། ༈ གཉིས། མཆོད་པར་བརྗོད་པ། སྤྱི་དོན་དང་པོའི་གཉིས་པ་མཆོད་བརྗོད་ནི། དཀོན་མཆོག་གསུམ་ལ་ཕྱག་འཚལ་ལོ། །ཞེས་པ་ནི། རྣམ་སྣང་མངོན་བྱང་ལས། འཇིག་རྟེན་འདི་ན་ཀུན་མཁྱེན་དག །ཨུ་དུམ་ཝཱ་རའི་མེ་ཏོག་བཞིན། །ཞེས་གསུངས་པ་ལྟར་འཇིག་རྟེན་ན་དཀོན་པའི་ཡིད་བཞིན་ནོར་བུ་ལ་སོགས་པའི་རིན་པོ་ཆེའི་རིགས་རྣམས་དཀོན་ཡང་མཆོག་མ་ཡིན་དེ་འབད་རྩོལ་གྱིས་བསྒྲུབ་ཏུ་ཡོད་པ་དང་འཇིག་རྟེན་གྱི་འདོད་པ་འཇོ་བ་ཙམ་ལས་ཐར་པ་དང་རྣམ་མཁྱེན་སྟེར་མི་ནུས་པས་དམན་ཞིང་། སངས་རྒྱས་ནི་བསྐལ་པ་གྲངས་མེད་མང་པོར་ཚོགས་བསགས་པའི་མཐུས་ཐོབ་དགོས་པས་རབ་ཏུ་དཀོན་པའི་མཆོག་ཏུ་གྱུར་པ་དང་། དམ་པའི་ཆོས་ཀྱང་སངས་རྒྱས་ཀྱིས་གསུང་དགོས་པ་དང་། དེ་ཉིད་ཉམས་སུ་བླངས་ན་གང་ཟག་གི་བློ་རིམ་བཞིན་མངོན་མཐོ་དང་ངེས་ལེགས་ཀྱི་གོ་འཕང་། སྟེར་ནུས་པས་དེ་ལྟ་བུའི་དངོས་པོ་དཀོན་པ་དང་། དགེ་འདུན་ཡང་སངས་རྒྱས་ཀྱི་ཞལ་སྐྱིན་དམ་ཆོས་ཀྱི་འབྱུང་ཁུངས་ཚོགས་བསགས་པའི་ཞིང་མཆོག་ཡིན་པས་དེ་ཡང་དཀོན་པའོ། །ཡུལ་དེ་གསུམ་ལ་དད་གུས་མོས་གསུམ་གྱི་ཕྱག་རྒྱ་ནི་ལག་པའི་འདུ་བྱེད་དེ་ཐལ་མོ་པདྨ་ཁ་འབུས་བཞིན་སྤྱི་མགྲིན་སྙིང་ག་གསུམ་དུ་བཞག་པས་སྒོ་གསུམ་གྱི་སྒྲིབ་པ་འདག་པར་གསུང་ཕྱིར་དེ་ལྟར་འཚལ་ལོ་ཞེས་འགྲེལ་ལ། དེ་ཡང་གཞུང་འདི་བརྩམས་པའི་ཐོག་མར་རྩོམ་པ་པོས་མཆོད་པར་བརྗོད་པ་དང་རྗེས་སུ་ཐོས་བསམ་བྱེད་པ་དག་གིས་ཀྱང་དེ་ལྟར་དྲན་དགོས་པ་ཡིན་ནོ། །དེ་ལྟར་དཀོན་མཆོག་གསུམ་གྱི་ཁུངས་དང་རྒྱུ་མཚན་ཅུང་ཟད་བསྟན་ནས་ད་ནི་ཕན་ཡོན་དང་འབྲེལ་བས་སྤྲོ་བ་བསྐྱེད་པ་ནི། རྩ་བ། རིན་ཆེན་རྣམ་གསུམ་གྲགས་པའི་སྤྲིང་ཡིག་གིས། །མུ་ཏིག་འཁྲི་ཤིང་རབ་ཏུ་དགའ་བྱས་ནས། །བདུད་ཀྱི་བུ་མོའི་བཞིན་རས་ཀུནྡའི་ཚལ། །སྐལ་ངན་བགྱིད་ལ་མངོན་ཕྱོགས་སངས་རྒྱས་མཐུ། །ཞེས་སྨོས་ཏེ། ཇི་སྐད་དུ། སྟོན་པ་བླ་མེད་སངས་རྒྱས་རིན་པོ་ཆེ། །སྐྱོབ་པ་བླ་མེད་དམ་ཆོས་རིན་པོ་ཆེ། །འདྲེན་པ་བླ་མེད་དགེ་འདུན་རིན་པོ་ཆེ། །བླ་མེད་དཀོན་མཆོག་གསུམ་ལ་ཕྱག་འཚལ་ལོ། །ཞེས་གསུངས་པ་ལྟར་སྤྱིར་དཀོན་མཆོག་གསུམ་ཞེས་གྲགས་པའི་སྤྲིང་ཡིག་གི་སྒྲ་དབྱངས་རྒྱ་ཆེ་རྒྱུན་མི་འཆད་པར་དེ་ཉིད་མི་ཁོམ་པ་བརྒྱད་ཀྱི་གནས་སུ་གྲགས་ཀྱང་ཚུལ་བཞིན་ཐོས་པ་དང་ཉམས་ལེན་གྱི་སྐལ་བས་དམན་ཞིང་། དེ་མ་ཡིན་པ་གང་དུ་གྲགས་པའི་ཡུལ་མཆོག་དམན་སུ་ལ་ཡང་དགེ་ཞིང་ལེགས་པའི་ས་བོན་ཐོབ་ངེས་པ་དང་། སྔོན་བྱུང་གི་གཏམ་རྒྱུད་དང་སྦྱར་ནས་སྟོན་པ་སྟེ། དཔག་བསམ་འཁྲི་ཤིང་ལས། ནོར་ཆེན་ཞེས་བྱའི་ཚོང་པ་ནི། །ཝཱ་ར་ཎཱ་སིར་སྔོན་བྱུང་གྱུར། །དེ་ཡི་ཁྱིམ་ཐབ་བསོད་ནམས་ཅན། །རིན་ཆེན་ལྡན་ཞེས་བྱ་བར་གྱུར། །བདག་པོ་ལྔ་པ་ཉིད་གྱུར་ཚེ། །བུད་མེད་དེ་ཡིས་མཆོད་རྟེན་རྩེར། །དོ་ཤལ་ཆེན་པོ་གུས་ལྡན་པས། །མཆོད་པ་བྱས་ནས་ཕུལ་བར་གྱུར། །བསོད་ནམས་རྣམ་སྨིན་དེས་དེ་ཉིད། སིངྒ་ལ་ཡི་བདག་པོ་ཡི། །བུ་མོ་མུ་ཏིག་ཁྲི་ཤིང་གྱུར། །དེ་ཉིད་སྐྱེ་བ་གཞན་ལ་ནི། །ཕྱུག་པས་རྒྱགས་ཤིང་རྨོངས་གྱུར་ནས། །མཆོད་པ་སྨོད་ཅིང་སྒྲིན་གྱུར་པ། །དེ་ཡིས་ཡུན་རིང་འབངས་མོར་གྱུར། །དགེ་དང་མི་དགེའི་ལས་གང་དང་། །སྐྱེ་བའི་ཞིང་ལ་སྐྱེ་བོས་བཏབ། །ཅེས་པ་ལྟར་ཤཱཀྱའི་ཁྱིམ་དུ་འབངས་མོ་རོ་ཧི་ཏ་ཞེས་པར་སྐྱེས་ཚེ་སྟོན་པས་ཆོས་གསུངས་པ་མཉམ་ཕྱིར་ཤཱཀྱའི་མིང་ཅན་གྱི་ཆུང་མ་དང་འབངས་མོ་གཉིས་ཀ་ཕྱིན་ཚེ་དཔོན་མོའི་མུ་ཏིག་གི་དོ་ཤལ་ཁྱིམ་དུ་ལུས་པ་བྲན་མོ་ལེན་དུ་མངགས་ཚེ་མོའི་བསམ་པ་ལ་འདི་ལྟ་བུའི་ཆོས་ཟབ་མོ་ཉན་དབང་མེད་པར་འགྲོ་དགོས་པ་སྐལ་བ་ཤིན་དུ་དམན་ནོ་སྙམ་བཞིན་འགྲོ་གྲབ་བྱས་ཚེ། སྟོན་པས་དེའི་བསམ་པ་མཁྱེན་ནས་ཆོས་ཚིགས་སུ་བཅད་པ་གཅིག་བསླབས་པ་འདོན་བཞིན་སོང་བ་ལམ་དུ་བ་དྲུས་མ་ཞིག་གིས་བརྡུངས་ཏེ་ཚེ་འཕོས་འཕྲལ་སིངྒ་ལའི་རྒྱལ་པོའི་བུ་མོར་སྲིད་པ་བཟུང་ནས་བཙས་མ་ཐག་ཏུ་མུ་ཏིག་གི་ཆར་ཆེན་པོ་བབས་པས་མུ་ཏིག་ཅན་ནམ་མུ་ཏིག་འཁྲི་ཤིང་དུ་བཏགས། དེ་ཡི་བསོད་ནམས་ཀྱི་མཐུས་མཉན་ཡོད་ཀྱི་ཚོང་པ་རྣམས་རྒྱ་མཚོ་བརྒལ་ནས་སིངྒ་ལར་སླེབས་པའི་མཚན་ཐུན་ལ་སྟོན་པས་གསུངས་པའི་ཚིགས་བཅད་འགའ་ཞིག་གླུར་བླངས་ཚེ་བུ་མོས་ཐོས་པས་ཡིད་ཕྲོགས་ཏེ་བཟང་པོ་དག་གླུ་དེ་ད་དུང་ལོངས་དང་ཟེར་བས་ཚོང་པས་འདི་ནུ་གླུ་མ་ཡིན་དེ་སངས་རྒྱས་ཀྱི་གསུང་ཡིན་ཚུལ་བཤད་པས་སངས་རྒྱས་ཀྱི་མཚན་ཐོས་པའི་མོད་ལ་མུ་ཐིག་ཅན་རྨ་བྱས་དབྱར་རྔ་ཐོས་པ་ལྟར་གྱུར་ནས་སངས་རྒྱས་ཀྱི་ལོ་རྒྱུས་དྲིས་ཚེ། ཚོང་པ་རྣམས་ཀྱིས་ཅི་ནུས་བཞིན་རྣམ་ཐར་བརྗོད་པས་བུ་མོ་དེ་སྔོན་ལས་ཀྱང་དགའ་བ་ཆེར་སྐྱེས་ནས་སྟོན་པའི་ཞབས་དྲུང་དུ་སྤྲིང་ཡིག་འདི་བཞིན་ཕུལ་བ་མཁྱེན་བཞིན་དུ་བཀླགས་པར། ཀྱེ་མ་བསོད་ནམས་ཚོང་ཟོང་དག་གིས་རྙེད་པར་གྱུར་པ་ཁྱོད་ནི་དྲན་པ་ཉིད། །རྒུད་དང་གདུང་བ་དང་ནི་སྲེད་པ་འཇོམས་པའི་སྲིད་པའི་སྨན་བཟང་ཅི་ཡང་ཡིན། །བཅོམ་ལྡན་ལས་བྱུང་གཏམ་གྱིས་ཉེར་བསྐྲུན་ཡང་དག་རིན་པ་མྱོང་བའི་ས། །བཅོམ་ལྡན་འདི་དེ་བདག་གི་བདུད་རྩི་ཡང་དག་བགོ་སྐལ་ཆེན་པོར་གྱུར་པ་ཡིན། །ཞེས་པ་ལ་གཟིགས་ནས་རི་མོ་མཁན་གྱིས་བྲི་བར་མི་ནུས་པའི་རང་གི་སྐུ་གཟུགས་རས་ཀྱི་ངོས་ལ་འོད་ཟེར་བཀྱེ་བ་ལྟར་བཀོད་ནས་བཀའི་ཚིགས་བཅད་འགའ་དང་བཅས་བུ་མོ་དེ་ལ་སླར་སྤྲིང་བར་མཇལ་མ་ཐག་རུ་སྐྱབས་སུ་འགྲོ་བ་གསུམ་དང་། བསླབ་པའི་གནས་ལྔ་དང་། རྟེན་ཅིང་འབྲེལ་བར་འབྱུང་བ་དང་། འཕགས་པའི་ལམ་ཡན་ལག་བརྒྱད་པ་ལ་སོགས་པའི་རང་བཞིན་ཤེས་ནས་རྒྱུན་དུ་ཞུགས་པའི་འབྲས་བུ་ལ་མངོན་པར་སྤྱོད་དོ། །དེ་ནས་བུ་མོས་ཡུལ་དེའི་མི་རྣམས་བསྟན་པའི་སྒོར་བཅུག །དཀོན་མཆོག་གསུམ་ལ་མུ་ཏིག་མཆོག་མ་ག་དྷའི་བྲེ་རེ་རེ་ཕུལ། བུ་མོར་གནང་བའི་སྐུ་དེ་ལ་ཐུབ་པ་འོད་ཟེར་མར་གྲགས་ཏེ་སྐུ་གཟུགས་ཀུན་གྱི་ཐོག་མའོ། །ཚུལ་དེ་འདྲ་བར་བསམས་ན་མཆོག་གསུམ་རིན་པོ་ཆེའི་རྒྱུ་འབྲས་མཐའ་དག་དང་འབྲེལ་བའི་ཆོས་ཀྱི་གཏམ་ཡང་དག་པ་ནི་འགྲོ་བ་ཡོངས་ཀྱི་མཉམ་པར་འོས་པ་སྤྲིང་ཡིག་ལྟ་བུའང་ཡིན་ལ། །འཁོར་བའི་རང་བཞིན་ཉོན་མོངས་པ་དང་རྣམ་རྟོག་ལས་གྱུར་པའི་འཇིག་རྟེན་ཆོས་བརྒྱད་ཀྱི་ཁུར་འཁྱེར་བ་ལ་བདུད་ཀྱི་བུ་མོ་ཞེས་སྨད་པའི་སྒྲ་སྦྱར་ཏེ། དེ་ཉིད་ལ་སངས་རྒྱས་ཀྱི་བཀའི་འབྲེལ་བ་མ་ཐོབ། རྣམ་དཀར་ལ་བློ་ཕྱོགས་པར་མ་གྱུར་ཚེ་དེའི་བཞིན་རས་ཞེས་གདོང་མེ་ཏོག་ཀུནྡྷའི་ཚལ་ལྟར་མཛེས་པ་དེ་ཡང་སྔོན་ཆད་སྐལ་བ་ངན་པའོ་ཞེས་སྐྱོན་མཚང་ལས་ལྡོག་པར་བགྱིད་པ་ལ་མངོན་པར་ཕྱོགས་པ་དེ་ཡང་སངས་རྒྱས་ཀྱི་མཐུའོ། །ཞེས་འགྲེལ་ནས། ། ༈ གསུམ་པ། རྩོམ་པར་དམ་བཅའ་བ། རྩོམ་པར་དམ་བཅའ་བ་ནི། རྩ་བ། བློ་མཆོག་རྣམས་ཀྱི་ཡོན་ཏན་དག་བྱེད་གཏེར། །གཅིག་ཏུ་བརླིངས་ནས་སྤྱི་བརྟོལ་བླབས་ཕྲེང་གི། །ཅ་ཅོ་སྒྲོགས་འདི་མཛེས་པ་མི་ངོམ་ཡང་། །དམ་ཆོས་བརྗོད་ལ་བརྟེན་སླད་མཉན་པར་འོས། །ཞེས་པ་ནི། འདི་ལྟར་བློ་མཆོག་རྒྱལ་བ་རྣམས་ཀྱིས་མདོ་སྔགས་ཀྱི་སྡེ་སྣོད་རྒྱ་མཚོ་ལྟ་བུ་དང་། འཕགས་པའི་གང་ཟག་རྣམས་ཀྱིས་ཆིངས་ཆེན་པོ་ལྔ་དང་དགོས་འགྲེལ་ཡན་ལག་བཞིས་གཏན་ལ་དབབ་པའི་བསྟན་བཅོས་སོགས་བཀའ་དང་དགོངས་འགྲེལ་མཆིས་བཞིན་དུ་ཆོས་ཉིད་ཀྱི་བདེན་པ་མ་མཐོང་ལྷས་གནང་བ་མ་ཐོབ། རིག་པའི་གནས་ལྔ་ལ་མ་སྦྱངས་པ་དག་གིས་སྤྱི་བརྟོལ་བསྐྱེད་པའི་གཞུང་ངན་དག་ལ་ནང་པའི་ཚུལ་གསུམ་ཉུང་ཞིང་ཕྱི་རོལ་པའི་ངན་པ་དྲུག་ཀྱང་འདྲེས་སྲིད་པའི་དཔེ་གཅོང་རོང་གི་འབབ་ཆུ་དྲག་ཤུལ་ཅན་ཅ་ཅོའི་སྒྲ་བར་མེད་དུ་སྒྲོགས་པ་ལྟ་བུ་ལ་ཡོན་ཏན་གྱི་མཛེས་ཆ་གང་ཡང་ངོམ་རྒྱུས་དབེན་ཡང་། གཞུང་འདི་ནི་དེ་ལྟར་མ་ཡིན་ཏེ་དེ་རྩོམ་པའི་རྒྱུ་གསུམ་གྱི་དོན་ལ་རང་དབང་བསྒྱུར་ཞིང་དམ་པ་གསུམ་དང་འབྲེལ་བའི་བསྟན་བཅོས་འཛམ་གླིང་རྒྱན་དྲུག་མཆོག་གཉིས་སོགས་འཕགས་བོད་ཀྱི་མཁས་གྲུབ་སྔོན་བྱོན་རྣམས་ཀྱི་རྗེས་སུ་འགྲོ་བར་གདོན་མི་ཟ་བས་སོམ་ཉི་སྤོངས་ལ། ཐོས་བསམ་སྒོམ་གསུམ་འཆད་རྩོད་རྩོམ་གསུམ་སོགས་དམ་པའི་ཆོས་ནི་བརྗོད་པ་ལ་བརྟེན་དགོས་པའི་སླད་དུ་མཉམ་པར་འོས་སོ། །ཞེས་འདོམས་ནས། གཉིས་པ། གཞུང་དོན་ལ། དལ་འབྱོར་རྙེད་དཀའ་བསྟན་པ། གཞུང་དོན་ལ་འཇུག་པའི་ཐོག་མར་འཁོར་བའི་སྐྱོན་མཚང་སྟོན་པ་སྟེ། རྩ་བ། ཐོག་མ་མེད་ནས་སྐྱེ་རྒ་ན་འཆི་ཡི། །རིམས་ཀྱིས་བཏབ་པར་སྨན་ཆེན་བདུད་རྩིའི་རོ། །དམ་ཆོས་ལག་ཏུ་མཆིས་པ་སྤོང་བྱེད་པའི། །སྐྱེ་བོ་རྣམས་ལ་བདག་གིས་ཇི་ལྟར་འདོམས། །དེ་ཡང་འཁོར་བའི་ཐོག་མ་འདི་འདྲའོ་ཞེས་དཔོགས་པར་ནུས་པ་མ་ཡིན་བཟིན་སྐྱེ་རྒ་ན་འཆི་བཞིས་རྟག་པར་མནར་བའི་དཔེ་རིམས་ནད་ཀྱིས་བཏབ་པའི་ནད་པའི་ཚོགས་ལ་ཕན་བྱེད་ཀྱི་སྨན་ཆེན་པོ་བདུད་རྩིའི་རོ་ལྟ་བུ་ནི་དམ་པའི་ཆོས་ཁོ་ན་ལས་གཞན་མ་མཆིས་ན། དེ་ཉིད་ལག་ཏུ་མཆིས་པ་ཞེས་དགེ་སྒྲུབ་སྡིག་སྤག་སོགས་རྣམ་དཀར་སྒྲུབ་མིན་རང་ལ་རག་ལུས་པའི་དུས་འདིར་སྒོ་གསུམ་སྡིག་ལ་བསྒྱུར་བཞིན་དགེ་ཚོགས་སྤངས་ན་ཐར་ལམ་དང་འབྲེལ་བ་གཏན་ཆད་དུ་འགྱུར་བར་ངེས་པས་དགེ་སྡིག་གོ་ལོག་ཏུ་སྤྱོད་པའི་སྐྱེ་བོ་རྣམས་ལ་བདག་གིས་ཇི་ལྟར་བཤད། བཤད་ཀྱང་ཕན་ཐོགས་པར་དཀའ་ཞེས་ཤུགས་ཀྱིས་བསྟན་པའོ། །དེ་ནས་དལ་འབྱོར་རྙེད་པར་དཀའ་བ་སྟོན་པའི་ཕྱིར་མི་ཁོམ་པ་བརྒྱད་ཀྱི་སྐྱོན་མཚང་འཆད་པ་ནི། རྩ་བ། རིང་ནས་བཤེས་པ་འཁོར་བའི་འབྲོག་དགོན་དུ། །མགོ་དང་ཡན་ལག་བཅད་པས་གདུངས་བྱས་ཤིང་། །ཕྱིན་ཆད་གདུང་འགྱུར་ལྐོག་ཏུ་གྱུར་པ་རྣམས། །ད་དུང་མཐོ་རིས་བདེ་ལ་སྲེད་ཅིང་རྨོངས། །ཞེས་པ་ནི། དུས་ཐུང་ངུ་ཙམ་མ་ཡིན་ཞིང་ཡུན་ཤིན་ཏུ་རིང་བ་ཐོག་མ་མེད་པའི་དུས་ནས་འཁོར་བའི་འབྲོག་དགོན་དུ་ཞེས་པ་ཕན་འདོགས་མཁན་གྱི་མི་མེད་ཅིང་དགྲ་ཇག་ཆོམ་རྐུན་དག་གཅན་གཟུན་དུག་སྦྲུལ་སོགས་ཀྱིས་གནོད་འཚེ་སྦྱོར་བའི་ཡུལ་ངན་ལྟ་བུའི་མི་ཁོམ་པ་བརྒྱད་ཀྱི་གནས་རིགས་སུ་ཡང་ཡང་འཁོར་ཚེ་མགོ་དང་ཡན་ལག་སོགས་བཅད་གཏུབས་བགྱིས་པས་རབ་ཏུ་གདུངས་ཤིང་ད་ལྟའི་གནས་སྐབས་འདིར་ཡང་མིའི་ལུས་རྟེན་ཙམ་ཐོབ་དམ་པའི་ཆོས་ཀྱི་སྒོར་ཞུགས་ནས་ལྟར་སྣང་ལེགས་པ་ཙམ་མང་ཡང་འཇིག་རྟེན་ཆོས་བརྒྱད་ལས་མ་འདས་ཤིང་བརྟག་དཔྱད་ཞིབ་ཏུ་བྱས་ན་ཆུང་མ་མེད་པ་ཁོ་ན་ལ་རབ་བྱུང་མཆོག་ཏུ་བརྩི་བ་དང་། །འདྲེ་རྡུང་གི་ལག་ལེན་ཤེས་པ་ལ་རྡོ་རྗེའི་ཐེག་པ་བར་བརྩི་བ་སོགས་། ལ་ཕུགས་བཅོལ་ནས་དད་དམ་དག་སྙིང་རྗེ་སོགས་ཅང་མི་སེམས་པར་རྒྱ་གར་གྱི་ཕྱི་རོལ་པ་ལ་ལ་དང་བོད་ཀྱི་བོན་པོ་འགའ་དང་བོད་ཀྱི་བོན་པོ་འགའ་ཞིག་བཞིན་ཤ་ཁྲག་གི་དམར་སྟོན་རྒྱ་ཆེན་པོ་བསྟར་ནས་ཚེ་ལྡན་གྱི་རིམ་གྲོ་དང་གཤིན་པོར་དགེ་རྩ་སྒྲུབ་རློམས་བྱེད་པ་སོགས་སྒོ་གསུམ་མི་དགེར་འཇུག་པའི་སྐྱེ་བོ་མཐའ་དག་དང་ཁྱད་པར་ཆོས་ལ་ཁུངས་བཅོལ་ནས་སྲོག་གཅོད་སོགས་ཀྱི་མཆོད་སྦྱིན་བྱེད་པ་རྣམས་སྐྱེ་བ་འདིའི་འོག་ཏུ་ངན་སོག་གསུམ་སོགས་མི་ཁོམ་པའི་གནས་རིགས་ཐ་ཆད་དུ་སྐྱེས་ནས་སྡུག་བསྔལ་དཔག་མེད་མྱོང་བ་གདོན་མི་ཟ་ཡང་ད་ལྟའི་དུས་འདིར་ཁྱབ་པ་འདུ་བྱེད་ཀྱི་སྡུག་བསྔལ་བལྟར་མི་མངོན་བཞིན་ཕྱི་མ་བཟོད་པར་དཀའ་བའི་སྡུག་བསྔལ་ལྐོག་ཏུ་གྱུར་པ་རྣམས་ཀྱང་། ད་དུང་ལྟ་མིའི་གནས་སུ་ཨེ་སྐྱེས་རེ་བ་བྱེད་པ་རྣམས་ནི་བདེ་བ་འདོད་བཞིན་སྡུག་བསྔལ་གྱི་རྒྱུ་ལ་སྤྱོད་པའི་རྨོངས་པ་བ་ལང་ལྟ་བུའོ། །རྩ་བ། བསམ་བརླག་དེ་ནི་འདི་ནས་ཡང་ལྟུང་ལ། །ངན་སོང་གསུམ་དང་འདུ་ཤེས་མེད་པའི་ལྷ། །མཐའ་འཁོབ་དབང་པོ་མ་ཚང་བ་ལྟ་བ་ལོག །སངས་རྒྱས་འབྱུང་བ་མེད་པ་དག་ཏུ་འཁྱམས། །ཞེས་པ་བསམ་བརླག་ནི་བསམ་པ་མི་དགེ་བ་སྐྱེས་པར་གཉེན་པོས་སླེབ་རྒྱུ་བྲལ་བཞིན་ཕྱིར་ཞིང་སེམས་པའི་ལས་ཀྱིས་སྡིག་ལ་སྤྱོད་པ་ནི་རང་གི་བདེ་བ་གཏན་བརླག་ཏུ་འགྲོ་བར་ངེས་ཤིང་དེ་ལྟ་བུའི་མི་རྣམས་ནི་འཇིག་རྟེན་འདི་ནས་ཕྱི་མི་འགྲོ་ཚེ་དམྱལ་བ་ཡི་དྭགས་དུད་འགྲོ་གསུམ་དང་ལྷ་ཚེ་རིང་པོ་སྟེ་གཟུགས་མེད་ཁམས་མཐའ་འཁོབས་སམ་ཀླ་ཀློ་སོགས་དགེ་སྡིག་གོ་ལོག་ཏུ་སྤྱོད་པ་རྣམས་དང་དབང་པོ་མ་ཚང་བ་མིག་རྣ་བ་ལྕེ་གསུམ་ལ་སྐྱོན་བྱུང་ན་རིམ་བཞིན་ཆོས་མི་མཐོང་མི་ཐོས་བརྗོད་མི་ཤེས་པ་སོགས་ཀྱི་སྐྱོན་དང་ཡིད་དབང་སྨྱོ་འབོག་སོགས་ཀྱིས་དྲན་པ་ལས་སུ་མི་རུང་བ། ལྟ་བ་ལོག་པ་ནི་དགེ་སྡིག་གི་རྣམ་སྨིན་གྱི་འབྲས་བུས་བདེ་སྡུག་བསྐྱེད་པ་མིན་ཞེས་རྒྱུ་འབྲས་ལ་སྐུར་པ་འདེབས་པའོ། །སངས་རྒྱས་འབྱུང་བ་མེད་པ་ནི་རྩོད་ལྡན་གྱི་དུས་འདིར་སྟོན་པ་འཇིག་རྟེན་དུ་བྱོན་ཡང་མི་རྣམས་ཚེ་ལོ་རིམ་གྱིས་དམན་ཞིང་ནད་མཚོན་མུ་གེས་མནར་བས་རྒྱལ་བསྟན་ཡང་རེ་ཞིག་ནུབ་སྐབས་དང་སངས་རྒྱས་སྟོང་གི་བསྟན་པ་བརྫོགས་ནས་འབྱུང་འགྱུར་གྱི་མུན་བསྐལ་ཤར་ཚེ་སྲིད་པ་བཟུང་བ་རྣམས་སོ། །རྩ་བ། ཐང་གཅིག་སྐབས་བཙལ་མ་ཡིན་ལྕགས་སྲེག་གཞིར། །མཚོན་གྱི་ཆད་པ་རྩུབ་མོས་ཡང་དང་ཡང་། །སྲོག་འཕྲོག་འཆི་བར་མི་ནུས་དམྱལ་བ་པ། །ད་དུང་ཁོང་ཁྲོའི་ལས་ངན་རྙི་ལ་ཐོགས། །ཞེས་པ་ནི། མི་ཁོམ་པ་བརྒྱད་ཀྱི་དང་པོ་དམྱལ་བ་ལ་ཚད་དམྱལ་བརྒྱད་དང་གྲང་དམྱལ་བརྒྱད་ཉི་ཚེ་ཉེ་འཁོར་བ་གཉིས་དང་བཅོ་བརྒྱད་དུ་གསུངས་པས་དེ་དག་སོ་སོའི་སྡུག་བསྔལ་ལ་སྤྱོད་ཀྱང་དེར་སྐྱེ་བའི་རྣམ་སྨིན་མ་ཟད་པར་འཆི་བར་མི་ནུས་ཤིང་ད་དུང་ཡང་ཁོང་ཁྲོའི་སེམས་དང་བཅས་ཏེ་ལས་ངན་གྱི་འཕྲོ་རྙི་ལྟ་བུ་ལ་ཐོགས་ནས་ཐར་པའི་གོ་སར་སླེབས་མི་ཐུབ་པས་ཆོས་བྱེད་དུ་མི་ཁོམ་པ་དག་། ཡི་དྭགས་ལ་ཡང་བྱིངས་ན་གནས་པ་དང་མཁའ་རྒྱུ་གཉིས་ཏེ་སྤྱི་མཐུན་དུ་བཀྲེས་སྐོམ་གྱི་སྡུག་བསྔལ་ལ་རྟག་ཏུ་སྤྱོད་པས་ཆོས་བྱེད་དུ་མི་ཁོམ་པའོ། །དུད་འགྲོ་ལ་ཡང་སྤྱི་མཐུན་དུ་རྨོངས་ཤིང་གཏི་མུག་གི་མུན་པ་འཐིབས་པའི་དགེ་སྡིག་མི་ཤེས་པ་དང་ཕན་ཚུན་གཅིག་གིས་གཅིག་ལ་འཚེ་བ་ལ་སོགས་པས་སྡུག་བསྔལ་ཞིང་། བྱེ་བྲག་མི་ཡུལ་ན་ཡོད་པ་རྣམས་སྲོག་གཅོད་ཁྲག་བཙགས་སྤུ་བཏོག །ཁལ་འགེལ་བ་དང་ཞོན་པའི་ཆེད་དུ་བཀོལ་ཞིང་རྟ་དྲེལ་ལ་སྲབ་དང་མཛོ་ཁལ་ལ་སྣ་ཟུང་སྒྲོག་དང་ཐ་གུས་འཆིང་བ་སོགས་མདོར་ན་རང་གིས་ཅི་དགར་སྤྱོད་ཆོག་པའི་ཕྱིར་ལུས་འདུལ་བའི་མནར་སྤྱོད་སེམས་ལ་འཛིན་པས་ལས་ཆོས་བྱེད་དུ་མི་ཁོམ་པའོ། །རྩ་བ། རྣག་ཁྲག་ཕྱི་ས་སོགས་ཀྱང་མི་རྙེད་པའི། །ཡི་དྭགས་ཕོངས་པས་ཉམ་ཐག་སྨོས་ཅི་དགོས། །ཆུ་ཀླུང་ལྗོན་པ་བལྟས་པའི་མོད་ལ་བསྐམས། །ནང་ཁྲོལ་འཚིག་པའི་སྡུག་བསྔལ་ཟད་མི་ཤེས། །སྒྲིབ་པའི་མཐུས་བྱས་ཚེ་ཚད་ངེས་པ་མེད། །དུད་འགྲོ་ཕན་ཚུན་གཅིག་ལ་གཅིག་བཟའ་ཞིང་། །རྔོན་པའི་དམ་བཞག་རྩུབ་མོས་སྲོག་འཕྲོག་དང་། །བཀོལ་ཕྱིར་འདུལ་བ་འཛིན་པས་ཉམ་ཐག་པའི། །གནས་སུ་སྐྱེ་བ་ཐོབ་ན་ཅི་བྱར་ཡོད། །ཅེས་པ་རྣམས་ནི་འོག་ཏུ་འཁོར་བའི་ཉེས་དམིགས་ཀྱིས་སྐབས་སུ་འཆད་དགོས་པ་དང་བཤད་མ་ཐག་པར་འཐུས་སོ། །རྩ་བ། འཚོ་བའི་ལས་མཐའ་ཤིན་ཏུ་རིང་པོས་བསྲིང་། །སྐྱེ་བའི་གོ་སྐབས་མི་དབྱེ་གཟུགས་མེད་དང་། །ཐོས་བསམ་རྟེན་འགགས་འདུ་ཤེས་མེད་པའི་ལྷ། །འཆི་ཁར་ལོག་པར་ལྟ་བས་ཁོམ་ལྡན་མིན། །ཞེས་པ་ཡང་། གཟུགས་མེད་ཁམས་སུ་སྐྱེས་པ་དག་ཚེ་རིང་པོར་འཚོ་ཡང་རྩ་ཐིག་རླུང་གསུམ་ལ་བརྟེན་པའི་ལུས་རྟེན་མིན་ཕྱིར་ཤེས་བྱ་ལ་འཇུག་པའི་སྐབས་དང་བྲལ་བས་མིཁོམ་པའོ། །རྩ་བ། རྐང་པ་གཉིས་པའི་ཁྱོགས་ལ་རབ་བརྟེན་ཡང་། །དེ་ཡི་འདུ་ཤེས་བསོད་ནམས་མ་ཡིན་པས། །དམ་ལ་བཞག་ཅིང་གཞུངས་པའི་ཀླ་ཀློ་རྣམས། །བླང་དོར་ཤིན་ཏུ་འཆོལ་བའི་ནང་ན་འཁྱམས། །ཞེས་པ་ནི། ཀླ་ཀློ་ནི་རྐང་པ་གཉིས་ཀྱིས་བཏེགས་ནས་འགྲོ་བ་དང་ཕུང་ཁམས་སྐྱེ་མཆེད་རྣམ་པ་མི་དང་འདྲ་ཡང་བསམ་སྤྱོད་བྱེད་ལས་ཐམས་ཅད་མི་དགེ་བ་ཁོ་ན་ཡིན་པས་ཆོས་བྱེད་དུ་མིཁོམ་པའོ། །རྩ་བ། དབང་པོའི་དམ་བཅའ་ཉམས་པའི་ལྐུགས་པ་རྣམས། །འཕགས་པའི་དེད་དཔོན་དག་དང་ཕྲད་གྱུར་ཀྱང་། །བྲག་ཅའི་ཆོ་གས་བཟུང་བའི་ཅ་ཅོ་བཞིན། །བརྡའ་མི་འཕྲོད་པའི་འབྲོག་དགོན་ཆེན་པོར་གདུངས། །ཞེས་པ་ནི། གང་ལྐུགས་པས་ཚིག་གི་བརྡའ་མི་འཕྲོད་པ་དང་ཡིད་ལྐུགས་པས་སྐྱེས་བུ་དམ་པ་དང་འབྲེལ་ཡང་དགེ་སྡིག་གི་བླང་དོར་ལ་རྨོངས་པས་མི་ཁོམ་པའོ། །རྩ་བ། སྐྱེ་བའི་རྒྱ་མཚོ་བརྒལ་བའི་གྲུ་བོ་ཆེ། །རྣམ་རིག་བ་དན་གཡོ་བ་ཐོབ་ནས་སླར། །སངས་རྒྱས་འབྱུང་ལ་མཉེས་པར་མི་བགྱིད་པའི། །ལོག་པར་བལྟ་བ་འཛིན་དེ་བདུད་ཀྱིས་གཙེས། །ཞེས་པ་ནི། གང་དག་གཟུགས་དང་ལོངས་སྤྱོད་ལྡན་ཞིང་རྣམ་རིག་ཤིན་ཏུ་གྲུང་པའི་ཚུལ་གྱིས་གཞན་ལ་ཕན་སློབ་ཉེས་ལྡོག་གི་རྣམ་འགྱུར་ངོམ་ཡང་སངས་རྒྱས་འབྱུང་བ་ལ་མཉེས་པར་མི་བགྱིད་ཅིང་བརྙས་སྨོད་ཀྱི་སྒོ་ནས་ལས་དགེ་སྡིག་གི་འབྲས་བུ་བདེ་སྡུག་དང་ཚེ་ཕྱི་མ་མེད་ཅེས་མུ་སྟེགས་བྱེད་དང་མཚུངས་པར་སྨྲ་བ་ནི་ལོག་པར་བལྟ་བ་འཛིན་པ་སྟེ། །དགེ་བའི་ལས་ལ་རྒྱབ་ཀྱིས་ཕྱོགས་པས་མི་ཁོམ་པའོ། །རྩ་བ། ཐུབ་པ་རྣམས་ཀྱིས་སྤངས་པའི་བསྐལ་པ་ཡི། །གཅོང་རོང་མུན་ནག་འཐིབས་པོར་ལྷུང་དེ་སླར། །ལྡང་བར་བརྩོན་ཀྱང་ལམ་མིན་རྒྱུན་ལྡན་ཏེ། །ཉམ་ངའི་ལྟུག་བར་འོག་ནས་འོག་ཏུ་འགྲོ། །ཞེས་པ་ནི། བསྐལ་པ་བཟང་པོའི་སངས་རྒྱས་སྟོང་གི་བསྟན་པ་ཇི་སྲིད་གནས་ཀྱི་བར་ལ་སྒྲོན་བསྐལ་དང་། བསྟན་པ་ནུབ་ཚེ་ཐུབ་པ་རྣམས་ཀྱིས་སྤངས་པའི་མུན་བསྐལ་གཅོང་རོང་མུན་ནག་འཐིབས་པ་ལྟ་བུ་དེར་སྐྱེས་ཚར་ནས་ལམ་མིན་རྒྱུན་ལྡན་དུ་ཞུགས་པ་སྐྱེས་བུ་རྐང་པ་ཆག་པ་ཞིག་མཚན་མོ་རྦབ་ཏུ་ཤོར་བ་ལྟར་འོག་ཏུ་ལྷུང་བ་ལས་ཡར་ཐར་པའི་ཐབས་ཟད་པ་ལྟ་བུའི་མི་ཁོམ་པའོ། །དེ་ནས་གཞུང་འདིའི་རྩ་བ་ན་མི་གསལ་ཡང་འགྲེལ་པ་ན་སྐབས་འདིར་མི་ལུས་ཐོབ་ཀྱང་མི་ཁོམ་པ་བཅུ་དྲུག་ཡོད་ཚུལ་གསུངས་པ་ནི་འདི་ལྟ་སྟེ། ཡིད་བཞིན་རིན་པོ་ཆེར། དུག་ལྔ་འཁྲུགས་དང་བླུན་རྨོངས་བདུད་ཀྱིས་ཟིན། །ལེ་ལོ་ཅན་དང་ལས་ངན་མཚོ་ཆེན་བརྡོལ། །གཞན་དབང་འཇིགས་སྐྱོབ་ཆོས་ལྟར་བཅོས་པ་སྟེ། །འཕྲལ་བྱུང་རྐྱེན་གྱིས་མི་ཁོམ་རྣམ་པ་བརྒྱད། །ཐར་ལམ་ཆོས་ཀྱི་སྣོད་མིན་ཕྱིན་ཅི་ལོག །ཅེས་པ་ནི། དུག་ལྔ་གཅིག་ལས་གཅིག་མཐོ་བ་ཆུ་བོ་དབའ་ཀློང་འཁྲུགས་པ་ལྟ་བུས་རྒྱུད་མི་དགེ་བ་ལ་སྦྱར་བ་དང་། རང་རྒྱུད་བླུན་ཞིང་རྨོངས་པས་སྡིག་གྲོགས་ཀྱི་དབང་དུ་སོང་བ་དང་། བདུད་ཀྱི་བཤེས་གཉེན་དང་འཕྲད་ནས་ལྟ་སྤྱོད་ཕྱིན་ཅི་ལོག་དང་། ཆོས་ལ་དང་བ་ཙམ་ཡོད་ཀྱང་བརྩོན་འགྲུས་མེད་པའི་ལེ་ལོ་ཅན་དང་། ལས་ངན་གྱི་མཚོ་རྡོལ་བ་ཞེས་དགྲ་གྱོད་མི་ཁ་ན་ཚ་སོགས་ཀྱི་འགལ་རྐྱེན་བྱུང་བ་ལམ་ཁྱེར་མ་ཤེས་ནས་བར་ཆོད་དུ་སོང་བ། ཆོས་སྒོར་འཇུག་བློ་ཡོད་ཀྱང་ལུས་ངག་གཞན་དབང་དུ་སོང་བ། ལྟོ་གོས་དང་དཔྱ་ཁྲལ་ཁོ་ནས་འཇིགས་སྐྱོབ་དོན་དུ་གཉེར་ནས་བསྟན་ལ་ཞུགས་བརྫུ་བྱས་ཀྱང་ཆོས་མིན་གྱི་བསམ་སྤྱོད་འབའ་ཞིག་ལ་བརྩོན་པ། སེམས་རྒྱུད་ཆོས་དང་འགལ་ཡང་གཞན་ངོར་ཆོས་ལྟར་བཅོས་ནས་རྙེད་བཀུར་དང་གྲགས་པ་སྒྲུབ་པ་རྣམས་སོ། །ཡང་སྔ་མ་ལས། འཆིང་བ་དམ་ལྡན་ཀུན་སྤྱོད་ཤིན་རུ་ངན། །འཁོར་བར་མི་སྐྱོ་དད་པ་ཅུང་ཟད་མེད། །མི་དགེ་སྡིག་སྤྱོད་ཆོས་ལ་སེམས་པ་མེད། སྡོམ་དང་དམ་ཚིག་ཉམས་པ་ཞེས་བྱ་བ། རིས་ཆད་བློ་ཡི་མི་ཁོམ་རྣམ་པ་བརྒྱད། །ཆོས་ལས་རིང་འགྱུར་ཐར་ལམ་སྒྲོན་མེ་ནུབ། ཅེས་པ་ཡང་། རྫས་དང་ཡོ་བྱད་མཆོད་སྦྱིན་ལ་མི་གཏོང་བ་ཧ་ཅང་འཆིང་བ་དམ་པ་དང་། མི་གཞི་ངན་པས་བསམ་སྦྱོར་གང་ཡང་སྡིག་སྤྲུལ་ལྟ་བུ་དང་། འཁོར་བའི་སྐྱོན་མཚང་ཇི་ཙམ་མཐོག་ཞིང་ཐོས་ཀྱང་ངེས་འབྱུག་དང་སྐྱོ་ཤས་མི་སྐྱེ་བ་ཆོས་སྣང་བའི་སྒོ་དད་པ་གཏན་ནས་མེད་པ་སྒོ་གསུམ་ཤིན་ཏུ་རྩིངས་པས་ཉེས་སྤྱོད་ཁོ་ནས་དུས་འདས་བ། མཆོག་གསུམ་རིན་པོ་ཆེའི་ཡོན་ཏན་མཐོང་ཐོས་སུ་གྱུར་ཀྱང་དང་གུས་མི་སྐྱེ་བ། བསྟན་ལ་ཞུགས་པར་རློམས་ཀྱང་སྡོམ་གསུམ་སོ་སོར་ཉེས་འགལ་བྱུང་བ་ལ་ཅི་མི་སྙམ་པ་སྟེ། འདི་དག་གི་སྐྱོན་སེལ་དང་མཐུན་སྒྲུབ་ལ་བརྩོན་པ་གལ་ཆེ་ཞེས་པའོ། །རྩ་བ། སྡིག་སྡུག་འཐོར་རླུང་འཁྲུགས་པའི་གནས་རིགས་སུ། །ངལ་ཞིང་སྐྲག་བཅས་བསོད་ནམས་རྙོག་པ་ཅན། ཆོས་ལ་ཕྲག་པ་དོག་པ་མི་ཁོམ་བརྒྱད། །བསམ་ནས་རང་གི་དལ་བ་དོན་ཡོད་མཛོད། །ཅེས་པ་ནི། སྡིག་པའི་ལས་ཀྱིས་འཕངས་པས་སྡུག་བསྔལ་འཐོར་རླུང་ལྟར་འཁྲུགས་པའི་གནས་རིགས་མིཁོམ་པ་བརྒྱད་དུ་སྐྱེས་ན་འཕྲལ་ཕུགས་གཉིས་ཀ་བདེ་བའི་ཐབས་ལ་རྨོངས་ཤིང་སྡུག་བསྔལ་ཁོ་ནའི་རྒྱུ་བསྒྲུབ་པ་ལ་ནན་ཏན་བགྱིས་པས་ངལ་ཞིང་སྐྲག་པ་དང་བཅས་པའི་བསོད་ནམས་རྙོག་པ་ཅན་ནི་བསོད་ནམས་མ་ཡིན་པའི་ལས་མི་དགེ་བ་བཅུ་ཡིན་ལ། དེ་དག་ནི་ཆོས་དང་རྒྱབ་འགལ་ལྟ་བུ་ཡིན་ཕྱིར་ཕྲག་པ་དོག་པའི་ཐ་སྙད་བཞག་པ་ཡིན་ལ་དེ་ལྟ་བུའི་མི་ཁོམ་པའི་སྐྱོན་དང་དལ་འབྱོར་གྱི་ཡོན་ཏན་ལ་བསམས་ནས་རང་གི་དལ་རྟེན་དོན་ཡོད་པར་མཛོད་ཅེས་གདམས་པའོ། །རྩ་བ། ཡུལ་དབུས་ས་གཞི་གཙང་མར་དབང་པོ་དང་། །ཡན་ལག་རབ་རྫོགས་དད་པའི་གནས་ལ་དད། །ལས་མཐའི་མེ་ཏོག་སྡིག་ཏོས་མ་བཅོམ་པའི། །མིར་གྱུར་དཔག་བསམ་ལྗོན་པ་ཤིན་ཏུ་དཀོན། །རྒྱལ་བ་ཨུ་དུམ་ཝཱ་ར་འཇིག་རྟེན་བྱོན། །ཆོས་ཀྱི་མེ་ཏོག་ཁ་ཕྱེ་བསྟན་པའི་ཚལ། །ནུབ་པ་མེད་པར་གནས་ལ་ཡང་དག་ཞུགས། །དམ་པའི་གྲིབ་གསིལ་ལ་རྟེན་དེ་བས་ཉུང་། །ཞེས་པ་ནི། །རང་འབྱོར་ལྔ་དང་གཞན་འབྱོར་ལྔ་སྟེ། དང་པོ་ནི། དམ་པའི་ཆོས་གང་དུ་དར་བའི་ཡུལ་དེ་ཉིད་ས་གཞི་གཙང་མ་ལྟ་བུར་དབང་པོར་ཚང་ཞིང་ཡན་ལག་ལ་སྐྱོན་མེད་པ་དང་དད་པ་ཡོད་པ་ལ་སོགས་པ་དང་། །དམག་དཔོན་ཚོང་དཔོན་རྔོན་པ་ཉ་པ་སོགས་སྡིག་སྤྱོད་ཆོས་ལ་འཇུག་པའི་སྐལ་བ་དམན་པའི་རིགས་སུ་མ་སྐྱེས་པ་ལ་ལས་མཐའི་མེ་ཏོག་སྡིག་ཏོས་མ་བཅོམ་པའི་ཞེས་རྟེན་མིར་གྱུར་པ་ནི་དཔག་བསམ་ལྗོན་པ་ལྟ་བུ་ཤིན་ཏུ་རྙེད་པ་དཀོན་ཚུལ་དཔེར་སྦྱར་བ་དང་། དེ་ཡང་མི་ལུསཐོབ་པ་དང་། ཆོས་དར་བའི་ཡུལ་དུ་སྐྱེས་པ་དང་། དབང་་པོ་ཚང་ཞིང་། ལས་མཐའ་ལ་ལོག་པ། རྒྱལ་བསྟན་པ་དད་པ་ལྔ་ནི་རང་འབྱོར་ལྔའོ། །གཉིས་པ་ནི། འཁོར་བའི་སྐྱོན་མཚང་གིས་འཇིགས་པ་ལས་རྒྱལ་བ་སངས་རྒྱས་འཇིག་རྟེན་དུ་འབྱོན་པ་ནི་ཨུ་དུམ་ཝཱ་རའི་མེ་ཏོག་ལྟར་དཀོན་ཡང་སྟོན་མཆོག་ཐུབ་པའི་དབང་པོ་འཇིག་རྟེན་དུ་བྱོན་པ་དང་ཆོས་ཀྱི་མེ་ཏོག་ཁ་ཕྱེ་ཞེས་པ་ནི་བསྟན་པའི་པད་ཚལ་རབ་ཏུ་རྒྱས་ཤིང་། དེ་ཉིད་ཀྱང་ནུབ་པ་མེད་པར་མདོ་སྔགས་གང་ལ་འཇུག་འདོད་པའི་གནས་དེ་ལ་ཡང་དག་པར་ཞུགས་པ་དང་། དེར་འཇུག་པའི་ཐབས་སྟོན་པའི་སྐྱེས་བུ་དམ་་པའི་སྐྱབས་འོག་ལ་བརྟེན་པ་ནི་རིམ་བཞིན་དཀོན་པར་གསུངས་སོ། །དེ་ཡང་སངས་རྒྱས་བྱོན་པ་དང་། དེས་ཆོས་གསུངས་པ་དང་། གསུངས་པའི་ཆོས་མ་ནུབ་པ་དང་། རང་ཉིད་ལེགས་སུ་འདོད་པ་རྣམས་དེར་སྤྱོད་པ་དང་། དེ་བཞིན་སྙིང་ནས་ཆོས་སྒྲུབ་པ་རྣམས་ལ་ཡུལ་གོང་མས་བྱམས་བརྩེས་སྐྱོང་བ་དང་། འོག་མས་ཀྱང་དད་འདུན་གྱི་བརྩེ་སེམས་ཡོད་པ་སོགས་ནི་གཞན་འབྱོར་ལྔའོ། །དེ་ལྟ་བུའི་དལ་འབྱོར་བཅོ་བརྒྱད་དང་ལྡན་པའི་ལུས་རྟེན་དེ་ཉིད་ཤིན་ཏུ་རྙེད་པར་དཀའ་བའི་ཚུལ་ནི། རྩ་བ། གང་ཕྱིར་རང་ཉིད་འབྱོར་པའི་ལྗོན་པ་དང་། །གཞན་དབང་རྐྱེན་གྱིས་འབྱོར་བའི་ཨུ་དུམ་ཝཱར། །གཉིས་ཀའི་ཡོན་ཏན་འབྱོར་པ་རྣམ་པ་བཅུས། །དལ་བ་བརྒྱད་ལ་འཁྱུད་འདི་སླར་མི་རྙེད། །གང་ཕྱིར་ཞེས་དོན་ཅིའི་སླད་དུ་ན་རང་འབྱོར་ལྔ་ནི་དཔག་བསམ་གྱི་ལྗོན་པ་ལྟར་དཀོན་ཞིང་དེ་ལས་ཀྱང་གཞན་འབྱོར་ལྔ་པོ་ནི་ཨུ་དུམ་ཝའ་རའི་མེ་ཏོག་བཞིན་རབ་ཏུ་དཀོན་ཞིང་། རང་གཞན་གཉིས་ཀའི་ཡོན་ཏན་འབྱོར་པ་རྣམས་པ་བཅུས་དལ་བ་བརྒྱད་ཀྱི་རྟེན་མི་ལུས་ལ་འཁྱུད་པ་འདི་འདྲ་བ་སླར་མི་རྙེད་དོ། །ཞེས་སོ། །རྩ་བ། ཅི་ཕྱིར་རུས་སྦལ་མགྲིན་དང་གཉའ་ཤིང་དཔེ། །གྲངས་ནི་མི་དང་དུད་འགྲོ་ཉིན་མཚན་གྱི། །སྐར་མས་ཕྱེ་བ་དེ་སྙེད་ཡི་དྭགས་དང་། །དམྱལ་བ་རྣམས་ལ་རིམ་པས་ཤེས་པར་འགྱུར། །ཞེས་པ་ནི། སྟོན་པ་ཤཱཀྱ་ཐུབ་པས་དགེ་སློང་དག་འཇིག་རྟེན་ཁམས་འདི་རྒྱ་མཚོ་ཆེན་པོ་གཅིག་ཏུ་གྱུར་པའི་གཏིང་རུམ་ན་རུས་སྦལ་ལོང་བ་ཞིག་ཡོད་པ་དེ་ཉིད་ལོ་བརྒྱ་རེ་ལོན་པའི་འཕྲོར་རྒྱ་མཚོའི་ཁར་ལན་རེ་རྒྱུ་བ་ན། རྒྱ་མཚོ་དེའི་ཁ་ན་གཉའ་ཤིང་བུག་པ་གཅིག་པ་ཞིག་ཕྱོགས་བཞིའི་རླུང་གིས་རྒྱུ་ཕྱོགས་སོ་སོར་བསྒྱུར་བ་ཞིག་ཡོད་པའི་གཉའ་ཤིང་དེའི་བུག་པར་རུས་སྦལ་གྱི་མགྲིན་པ་ཚུད་པ་ལས་ནི་མི་ལུས་ཐོབ་པར་དཀའ་ཞེས་མདོ་སྡེ་ལས་རྒྱས་པར་བསྟན་པའི་ཚིག་སྣ་བསྟུངས་ཏེ་བཤད་པ་ནི་དཔེའི་སྒོ་ནས་རྙེད་པར་དཀའ་ཚུལ་དང་། གྲངས་ཀྱི་སྒོ་ནས་རྙེད་པར་དཀའ་བ་ནི་མིའི་འགྲོ་བ་ཉིན་མོའི་སྐར་མ་ཙམ་དུད་འགྲོ་མཚན་མོའི་སྐར་མ་ཙམ། དེ་བཞིན་དུ་ཡི་དྭགས་དང་དམྱལ་བར་འགྲེས་ཤེས་པར་བྱའོ། །རྩ་བ། དེ་ཕྱིར་དལ་བའི་གྲུ་ཆེན་འཛིན་པའི་དུས། །སྡུག་བསྔལ་ཆུ་གཏེར་ཕ་མཐའ་མ་བརྒལ་ན། །ཆོས་ལམ་མགྲོན་པོས་གཉེར་ཞིང་སྐབས་བཙལ་བའི། མཉན་པ་འབྲས་མེད་བགྱིད་ལ་ཕྱོགས་པ་ཡིན། །ད་རེས་མི་ཁོམ་པ་བརྒྱད་དུ་མ་སྐྱེས་ཤིང་དལ་འབྱོར་གྱི་མི་ལུས་རིན་པོ་ཆེ་ཐོབ་པ་འདི་ནི་རྒྱ་མཚོ་སྒྲོལ་བའི་གྲུ་བོ་ཆེ་ལྟ་བུ་འདི་ཉིད་མ་ཞིག་པར་འཛིན་པའི་དུས་འདིར། འཁོར་བ་སྡུག་བསྔལ་གྱི་རྒྱ་མཚོ་ལས་སྒྲོལ་བའི་ཐབས་ཞིག་མ་བྱས་ན་ཆོས་ལ་འཇུག་བློ་ཙམ་ཡོད་ཀྱང་ལམ་ཞུགས་ཀྱི་མགྲོན་པོས་རིན་པོ་ཆེ་དོན་དུ་གཉེར་ཕྱིར་གྲུར་ཞུགས་ནས་རྒྱ་མཚོ་བརྒལ་བའི་སྐབས་བཙལ་ཡང་ཐོག་ཏུ་མ་ཁེལ་བ་ལྟ་བུའི་ཚེ་འདིར་སྣང་གི་དབང་དུ་སོག་བ་རྣམས་ལ་སྐྱོན་མཚང་བསྟན་ཕྱིར་ལུས་ཀྱི་གྲུ་ལ་སེམས་ཀྱི་མཉན་པ་ཁྱོད་ཀྱིས་འཁོར་བ་སྡུག་བསྔལ་གྱི་རྒྱ་མཚོ་མ་བསྒྲལ་ན་དལ་འབྱོར་བཅོ་བརྒྱད་དང་ལྡན་པའི་མི་ལུས་རིན་པོ་ཆེ་འབྲས་བུ་མེད་པ་ལ་ཕྱོགས་པར་བྱས་སོ། །ཞེས་འགྲེལ་ནས། ཡོན་ཏན་རིན་པོ་ཆེའི་མཛོད་ཀྱི་སྒོ་ལྕགས་འབྱེད་བྱེད་བསྡུས་འགྲེལ་རྒྱ་མཚོའི་ཆུ་ཐིགས་རིན་པོ་ཆེའི་ལྡེ་མིག་ལས་ལེའུ་དང་པོའི་སྐབས་སོ།། །།