བཀའ་བཞི་བརྒྱུད་པའི་གསོལ་འདེབས།

༄༅། །གང་གི་འཁོར་བའི་ཉེས་པ་རྣམས། །དྲན་པ་ཙམ་གྱིས་འཇོམས་མཛད་ཅིང་། །བླ་མེད་བྱང་ཆུབ་ཐོབ་མཛད་པའི། །བླ་མ་རྣམས་ལ་ཕྱག་འཚལ་ལོ། །དུས་གསུམ་སངས་རྒྱས་སྐུ་གསུང་ཐུགས། །ཡོན་ཏན་འཕྲིན་ལས་དཔག་ཡས་ཀུན། །དབྱེར་མེད་གཅིག་དུ་གྱུར་པ་ཡི། །རྡོ་རྗེ་འཆང་ལ་ཕྱག་འཚལ་ལོ། །ས་བཅུའི་དབང་ཕྱུག་ཆོས་ཀྱི་མཛོད། །གདུལ་དཀའ་མ་ལུས་འདུལ་མཛད་ཅིང་། །དཔག་ཡས་གསང་བའི་མཛོད་འཛིན་པའི། །རྡོ་རྗེ་ཅན་ལ་ཕྱག་འཚལ་ལོ། །དྲི་མེད་ས་ལ་རབས་བཞུགས་ཤིང་། །རྒྱལ་བས་ལུང་བསྟན་ཐེག་པའི་མཆོག །རབ་དུ་སྟོན་པའི་ཐུགས་རྗེ་ཅན། །ན་ག་འཛུ་ན་ལ་ཕྱག་འཚལ་ལོ། །སིང་གྷ་ལ་རུ་སྐུ་འཁྲུངས་ཤིང་། །རྒྱལ་བས་ལུང་བསྟན་སྨོན་ལམ་ཅན། །མུ་སྟེགས་རྒོལ་བ་བཟློག་མཛད་པའི། །འཕགས་པ་ལྷ་ལ་ཕྱག་འཚལ་ལོ། །སྦྱངས་སྟོབས་དཔག་ཏུ་མེད་པ་ཡི། །གནས་ལྔ་རིག་པའི་པཎྜྻི་ཏ། །དེ་ཉིད་ཅི་བཞིན་རིག་པའི་མཆོག །ཟླ་བ་གྲགས་པ་ལ་ཕྱག་འཚལ། །བླ་མས་བྱིན་རླབས་དངོས་གྲུབ་བརྙེས། །བརཏལ་ཞུགས་སྤྱོད་པའི་རྣལ་འབྱོར་པ། །ཡོན་ཏན་ཀུན་གྱི་གཏེར་གྱུར་པའི། །མ་ཏང་ཀི་ལ་ཕྱག་འཚལ་ལོ། །བྲམ་ཟེའི་རིགས་འཁྲུངས་རྣལ་འབྱོར་པ། །མཁའ་འགྲོས་བྱིན་བརླབས་དངོས་གྲུབ་བརྙེས། །བརཏལ་ཞུགས་སྤྱོད་པའི་འགྲོ་བ་འདུལ། །ཌོཾ་བྷི་བ་ལ་ཕྱག་འཚལ་ལོ། །བླ་མས་བྱིན་བརླབས་དངོས་གྲུབ་ཐོབ། །ཟག་མེད་བཏུབ་པས་ཚིམ་གྱུར་ཅིང་། །ལྷན་ཅིག་སྐྱེས་པའི་དོན་སྟོན་པ། །བྷི་ན་ས་ལ་ཕྱག་འཚལ་ལོ། །འོད་གསལ་ཐུགས་སུ་ཆུད་གྱུར་ཅིང་། །ཨུ་རྒྱན་གནས་སུ་སྤྱོད་པ་མཛད། །མཁའ་འགྲོས་བྱིན་བརླབས་རྣལ་འབྱོར་པ། །ལ་བ་པ་ལ་ཕྱག་འཚལ་ལོ། །ཐབས་ལ་མཁས་པའི་སྤྱོད་པ་ཅན། །རྡོ་རྗེ་འཆང་གིས་བྱིན་བརླབས་པ། །རྒྱལ་སྲིད་དང་བཅས་དངོས་གྲུབ་བརྙེས། །ཨིན་ཏྲ་བྷོ་ཏི་ལ་ཕྱག་འཚལ། །བླ་མས་བྱིན་བརླབས་རི་ཁྲོད་པ། །མཁའ་འགྲོས་ལུང་བསྟན་དངོས་གྲུབ་ཐོབ། །དཀའ་ཐུབ་མཐར་ཕྱིན་རྣལ་འབྱོར་མཆོག །ལུ་ཧི་པ༴ རིགས་བྱེད་འདོན་པའི་རྣལ་འབྱོར་པ། །འབྲས་བསྡུད་པ་ཡི་བསམ་གཏན་ཅན། །སློབ་མའི་ཚོགས་དང་མཁའ་ལ་གཤེགས། །ལྡིང་གི་པ༴ རྒྱལ་སྲིད་སྤངས་ནས་སྤྱོད་པ་མཛད། །དངོས་གྲུབ་མཆོག་བརྙེས་རྣལ་འབྱོར་བ། །བསྐྱེད་རྫོགས་མཐར་ཕྱིན་སྤྱོད་པ་ཅན། །དྷ་རི་ཀ༴ བྱིན་རླབས་མཆོག་ཐོབ་རྣལ་འབྱོར་མ། །ཐབས་ཀྱིས་སྤྱོད་པས་འགྲོ་བ་འདུལ། །ལྷན་ཅིག་སྐྱེས་པའི་དོན་སྟོན་མ། །སུ་ཀ་དྷ་རི་ལ་ཕྱག་འཚལ། །དུས་གསུམ་རྒྱལ་བ་བསྐྱེད་པའི་ཡུམ། །སྣ་ཚོགས་ཐབས་ཀྱི་འགྲོ་བ་འདྲེན། །བདེ་བ་ཆེན་པོ་སྟེར་མཛད་པའི། །སྐལ་བ་བཟང་མོ༴ མ་ཧ་སིད་དྷིས་བྱིན་བརླབས་པ། །དུར་ཁྲོད་གནས་སུ་སྤྱོད་པ་མཛད། །ཐབས་མཁས་སྙིང་རྗེའི་བདག་ཉིད་ཅན། །ཐང་ལོ་པ༴ ལྷན་ཅིག་སྐྱེས་པའི་དོན་རྟོགས་ཅིང་། །ལྗོན་པའི་ཁྲོད་ན་བསམ་གཏན་མཛད། །ཤིང་ལོ་པ༴ དགེ་སློང་ཚུལ་འཛིན་རྣལ་འབྱོར་པ། །ཐབས་ཀྱིས་སྤྱོད་པ་མཐར་ཕྱིན་ཞིང་། །ཀརྞ་རི་ལ་བསམ་གཏན་མཛད། །དྲིལ་བུ་པ༴ བཀའ་བཞི་རྒྱུད་པའི་བྱིན་བརླབས་ཤིང་། །དག་སྣང་རྡོ་རྗེ་འཆང་དང་འཇལ། །ས་བཅུ་དབང་ཕྱུག་རྣལ་འབྱོར་པ། །ཏཻ་ལོ་པ༴ གནས་ལྔ་རིག་པའི་པཎྜྻི་ཏ། །དཀའ་བ་སྤྱོད་པའི་རྣལ་འབྱོར་པ། །མཁས་པ་ཀུན་གྱི་གཙུག་གི་རྒྱན། །ན་རོ་པ༴ །ས་ར་ཧ་ཡིས་བྱིན་བརླབས་ཤིང་། །མཐའ་བྲལ་དོན་རྟོགས་རྣལ་འབྱོར་པ། །ཕྱག་རྒྱ་ཆེ་ལ་མངའ་བརྙེས་པའི། །མཻ་ཏྲི་པ༴ སྦྱངས་སྟོབས་དཔག་ཏུ་མེད་པ་ཡི། །རྒྱུད་དོན་ཇི་བཞིན་གཟིགས་པ་པོ། །ཡོན་ཏན་དུ་མས་རབ་རྒྱན་པའི། །ལྷོ་བྲག་པ༴ མཁའ་འགྲོ་མཆོག་གིས་བྱིན་བརླབས་ཤིང་། །ན་རོ་མཻ་ཏྲིའི་ཐུགས་ཀྱི་སྲས། །རྣལ་འབྱོར་དབང་ཕྱུག་ཏེ་ཕུ་པ། །དྲི་མེད་བཤེས་གཉེན་ལ་ཕྱག་འཚལ། གངས་ཅན་རྒྱུད་དུ་སྐུ་འཁྲུངས་ཤིང་། །འཇིག་རྟེན་སྐྱོན་གྱི་མ་གོས་པ། །རླུང་གི་ཡོན་ཏན་མཐར་ཕྱིན་པའི། །མི་ལ་མཆོག༴ དེ་བཞིན་གཤེགས་པའི་ལུང་བསྟན་ཅིང་། །སྙིགས་མའི་དུས་སུ་འགྲོ་དོན་མཛད། །ཕྱག་རྒྱ་ཆེ་ལ་མངའ་བརྙེས་པའི། །ཟླ་འོད་གཞོན་ནུ༴ བཤེས་གཉེན་མཆོག་གིས་བྱིན་བརླབས་ཤིང་། །ཐབས་ཀྱི་ཡོན་ཏན་གནད་དུ་བསྣུན། །ཡིད་བཞིན་ནོར་བུ་ལྟ་བུ་ཡི། །རས་ཆུང་ཞབས༴ རྫོགས་པའི་སངས་རྒྱས་འཇིག་རྟེན་དུ། །ཐུགས་རྗེ་ཆེན་པོ་རབ་འབྱོན་ཅིང་། །ཡོན་ཏན་མ་ལུས་རབ་རྫོགས་པའི། །དུས་གསུམ་མཁྱེན་ལ། །ཟག་མེད་ཡོན་ཏན་རབ་རྒྱས་ཤིང་། །ཤེས་བྱའི་གནས་ལུགས་མཁྱེན་པ་པོ། །རྒྱལ་བའི་བསྟན་བསྲུང་མཛད་པ་ཡི། །འགྲོ་བའི་མགོན༴ བླ་མའི་བཀའ་བཞིན་སྙིགས་དུས་སུ། །བསྒྲུབ་པ་སྙིང་པོར་ལེན་མཛད་ཅིང་། །ཡོན་ཏན་ཀུན་གྱི་གཏེར་གྱུར་པའི། །སྤུངས་བྲག་པ༴ བསམ་ཤིང་སྲིད་པར་སྐུ་འཁྲུངས་ཤིང་། །ཐམས་ཅད་མཁྱེན་པའི་ཐུགས་མངའ་བ། །ཐུགས་རྗེའི་མངའ་བདག་འཛམ་གླིང་རྒྱན། ཀརྨ་པ༴ །བརཏལ་ཞུགས་སྤྱོད་པས་རབ་བརྒྱན་ཅིང་། །སྙིང་པོ་དོན་གྱི་བརྒྱུད་པ་འཛིན། །ཤེས་བྱ་ཀུན་ལ་ཐོགས་མེད་པའི། །ཨུ་རྒྱན་པ༴ མངལ་གྱི་དྲི་མས་མ་གོས་པར། །དེང་སང་བོད་ཡུལ་ཞིང་ཁམས་སུ། །ཐུབ་པ་མཆོག་གི་བསྟན་པ་འཛིན། །དཔལ་ལྡན་བླ་མ་ལ་ཕྱག་འཚལ། །སངས་རྒྱས་ཀུན་གྱིས་བྱིན་བརླབས་ཅན། །སྙིགས་མའི་དུས་སུ་སྐུར་བྱོན་ནས། །འགྲོ་བ་བཉེན་ཞིང་གྲོལ་མཛད་པའི། །རང་བྱུང་རྡོ་རྗེ་ལ་ཕྱག་འཚལ། །རྩ་བ་རྒྱུད་པར་བཅས་པ༴ དད་ཅིང་གུས་པས་གསོལ་བཏབ་ན། །བདག་དང་འགྲོ་དྲུག་སེམས་ཅན་རྣམས། །རྣམ་པ་ཀུན་མཁྱེན་ཐོབ་པར་ཤོག །བྱང་ཆུབ་སྙིང་པོ་མཆིས་ཀྱི་བར། །རྟག་ཏུ་བཤེས་གཉེན་བརྟེན་པ་དང་། །ཐེག་པ་མཆོག་གིས་རྗེས་འཛིན་ཅིང་། རྟག་ཏུ་ཚེ་རབས་དྲན་པར་ཤོག །ཉོན་མོངས་བདུན་པོ་རབ་སྤངས་ནས། །ཡོན་ཏན་བདུན་དང་ལྡན་པ་དང་། །བྱང་ཆུབ་ཡན་ལག་བདུན་པོ་ཡི། །རིན་ཆེན་བདུན་དང་ལྡན་པར་ཤོག །ཞེས་པ་འདི་བཀའ་རྒྱུད་རིན་པོ་ཆེ་ལ་དད་པ་དང་ལྡན་པའི་ཤཱཀྱའི་དགེ་སྦྱོང་རང་བྱུང་རྡོ་རྗེས་སྙན་ངག་གི་ཚིག་སྤངས་ནས། །ལྷས་སྟེངས་སུ་གསོལ་བ་བཏབ་པའོ།། །།སྦྱོར་དྲུག་བརྒྱུད་པའི་གསོལ་འདེབས་བཞུགས་སོ། །ན་མོ། མ་དཔེ་ལས་མི་གསལ། སྟོང་རང་བཞིན་སྐུ། ཇི་སྙེད་ཀུན་ཁྱབ་དུས་འཁོར་ལོ། །ཐུབ་དབང་ཉི་མའི་སྤྱན་མངའ་བ། །རྩོད་དུས་རྒྱལ་བའི་དབང་པོ་ལ། །བདག་ནི་གུས་པས་གསོལ་བ་འདེབས། །ཁྱེད་དང་མཉམ་པར་བྱིན་གྱིས་བརློབས། །ཨ་ལི་ཀ་ལི་དབྱེར་མེད་པ། འགོག་ལམ་དོན་སྟོན་སྒྱུ་འདྲར་སྣང་། །བྲག་ཆ་ལྟ་བུར་འགྲོ་ལ་སྟོན། །དམ་པ་དང་པོའི་དམ་ཆོས་ལ། །བདག་ནི། འགྲེ། ཁྱེད་དང་། དཔལ་ལྡན་དྷ་ན་ཀ་ཌ་རུ། །རྒྱལ་བས་དབང་བསྐུར་ལུང་བསྟན་པ། །རྒྱལ་སྲས་ལྷ་མོ་སྣ་ཚོགས་གཟུང་། །ཚོགས་མཆོག་དགེ་འདུན་མཚུངས་མེད་ལ། །བདག་ནི། ཁྱེད་དང་། །གསང་བདག་ཟླ་བ་བཟང་པོ་དང་། ལྷ་དབང་ལ་སོགས་སེམས་དཔའ་དྲུག །སྡུད་མཛད་མི་དབང་གྲགས་པ་དང་། །འཇིགས་རྟེན་དབང་ཕྱུག་པད་དཀར་ལ། །བདག་ནི། ཁྱེད་དང་། །གཤིན་རྗེའི་གཤེད་སོགས་ཁྲོ་བཅུ་དང་། །བྱང་ཆུབ་སེམས་དཔའ་བཅུའི་དངོས། གྲགས་པ་དག་དང་འཁོར་ལོ་ཆ། །སེང་གེའི་གདན་དང་རིགས་ལྡན་ལ། །བདག་ནི། ཁྱེད་དང་། །བྲམ་ཟེ་ཉི་མའི་ཤིང་རྟ་དང་། །རིགས་ལྡན་བྱིན་རླབས་རྩེ་ལུ་པ། །དུས་འཁོར་དོན་རྟོགས་པུ་ཏོ་བ། །རྒྱུད་དོན་རྟོགས་པའི་དུས་ཞབས་ཆེ། བདག་ནི། ཁྱེད་དང་། །མཁས་པའི་གཙུག་རྒྱན་དུས་འཁོར་ཞབས། མཁས་མཆོག་བྷོ་དྷེ་བྷ་ཏྲ་དང་། །མཁས་པ་སངས་རྒྱས་གྲགས་པ་དང་། །སྐད་གཉིས་སྨྲ་བའི་སེང་ལོ་ལ། །བདག་ནི་ཁྱེད་དང་རྒྱུ་འཛིན་གཉོན་བསྒོམ་འོད་མ་དང་། །སྦྱངས་ལྡན་བཀྲ་ཤིས་རིན་ཆེན་ཞབས། །མཁས་པ་བྱང་པ་དུས་འཁོར་བ། །མཁས་གྲུབ་བླ་མ་བརྒྱུད་པ༴ བདག་ནི་ཁྱེད་དང་། །བཅོམ་ལྡན་འདས་མས་བྱིན་བརླབས་ཤིང་། ཨོ་རྒྱན་དབང་ཕྱུག་རིན་ཆེན་དཔལ། །བཤད་བསྒྲུབ་ཀུན་གྱི་ནུས་པ་ཅན། མཁས་པ་ཀུན་དགའ་དོན་གྲུབ་ལ། བདག་ནི་ཁྱེད་དང་། །རྒྱུད་ཀྱི་དགོངས་པ་མ་ལུས་ཤེས། །ཁྱད་པར་སྙིང་པོ་རྣལ་འབྱོར་གསུམ། ལེགས་པར་རྟོགས་པའི་ཉམས་ཤར་བས། རང་བྱུང་རྡོ་རྗེས་གསོལ་བ་བཏབ། མཁའ་མཉམ་སེམས་ཅན་ཐམས་ཅད་ཀྱང་། ཡེ་ཤེས་སྐུ་ཉིད་ཐོབ་པར་ཤོག །ཅེས་པ་འདི་རང་བྱུང་རྡོ་རྗེས་བདེ་ཆེན་དུ་སྦྱར་བའོ།། །།

བཅོམ་ལྡན་ཐུབ་པ་ཆེན་པོ་ཐུགས་རྗེ་ཅན། །སྙིགས་མའི་དུས་འདིར་ཁྱེད་ཀྱི་བསྟན་པ་ལ། །ཞུགས་པའི་བདག་ཅག་དམུ་ལོང་ལྟ་བུ་རྣམས། །ཐམས་ཅད་མཁྱེན་པའི་ལམ་ལ་དྲང་དུ་གསོལ། ཀྱེ་མ་མ་ཕམ་རྒྱལ་བའི་སྲས་པོ་ཁྱེད། གྲངས་མེད་སྨོན་ལམ་དང་གྱུར་ཏེ། །ཕྱི་དུས་གདུལ་བྱ་ཁྱོད་ཀྱི་ཞིང་ཡིན་ན། །ད་ལྟར་འགྲོ་རྣམས་ཐུར་དུ་གཞོལ་གྱུར་ཅིང་། །སྡུག་བསྔལ་རབ་འཇིགས་ཁྲོད་དུ་འཁྱམས་གྱུར་ལ། བྱམས་པ་ཁྱོད་ཀྱིས་བཟློག་པར་ཅིས་མི་མཛད། །ཀྱེ་མ་བློ་གྲོས་དབང་ཕྱུག་འཇམ་དཔལ་དབྱངས། །ཐུགས་རྗེའི་དབང་ཕྱུག་མགོན་པོ་སྤྱན་རས་གཟིགས། མཐུ་སྟོབས་དཔག་མེད་རྗེ་བཙུན་གསང་བའི་བདག །དེང་སང་འགྲོ་བ་རྣམས་ལ་གཟིགས་སུ་གསོལ། ཁྱེད་རྣམས་ཐུགས་རྗེ་དཔག་ཏུ་མེད་གྱུར་བ། །འགྲོ་རྣམས་ངན་སོང་འགྲོ་ལས་ཅིས་མི་བཟློག །དཔའ་བོ་ཁྱོད་ཀྱི་རྫུ་འཕྲུལ་དཔག་མེད་ཀྱིས། །སྲེག་པའི་སྐལ་པ་རབ་ཏུ་ཞི་མཛད་ན། དམྱལ་བའི་མེ་ལ་སྨོས་ཀྱང་མ་འཚལ་ན། །ཅིའི་ཕྱིར་ན་འགྲོ་བ་ཚ་བར་འཇོག །ཁྱེད་མཐུས་རྒྱ་མཚོ་མེར་ཡང་ནུས་གྱུར་ན། །འགྲོ་གཞན་རབ་གྲང་སོགས་ལས་འབྱིན་མི་མཛད། ཁྱེད་ཀྱི་སྦྱིན་པའི་མཐུན་ནི་དཔག་མེད་ན། ཡི་དྭགས་འགྲོ་གཞན་ཤིན་ཏུ་དབུལ་གྱུར་རྣམས། །ཅིའི་ཕྱིར་ན་རབ་ཏུ་ཚིམ་མི་མཛད། ཁྱེད་ཀྱི་ཐབས་མཁས་སྤྱོད་པ་དཔག་མེད་ན། ཅི་ཕྱིར་ངན་པར་དཔྱོད་པའི་འགྲོ་བ་རྣམས། །བཟང་པོའི་སྤྱོད་ལ་རབ་ཏུ་འཇུག་མི་བགྱིད། ཁྱེད་ཀྱི་འཕྲུལ་གྱིས་སྟོང་གསུམ་ཐམས་ཅད་ཀུན། །བ་སྤུ་གཅིག་གིས་དྲངས་ཏེ་འཇིག་རྟེན་ཁམས། དཔག་མེད་འཕངས་ཀྱང་ཉམས་དཔའ་མི་མངའ་ཡང་། །འགྲོ་གཞན་ཞིང་དག་རྣམས་སུ་སྐྱེལ་མི་མཛད། ཁྱེད་རྣམས་ཀྱི་ཤེས་རབ་མཐུ་ནི་སེམས་ཅན་རྣམས། །ཀུན་གྱི་སེམས་ཡིད་གནས་རྣམས་རབ་མཁྱེན་ན། འགྲོ་བ་རབ་ཏུ་བླུན་ལ་ཅི་མི་དགོངས། །ཤེས་རབ་སྣང་བ་སྒྲོན་པར་མི་མཛད་དམ། །གལ་ཏེ་སོ་སོའི་ལས་མཐུན་ཡིན་ན་ནི། །མགོན་པོ་ཁྱེད་མཐུས་ཅི་ཞིག་མཛད་ལགས་གྲངས། ཁྱེད་སྐུ་མཚན་དང་དཔེ་བྱད་ཀྱིས་སྤྲས་པ། མཐོང་ན་དགའ་བར་མི་མཛད་གནས་མེད་ལ། །དེ་ལ་མོས་པས་འཁོར་ལོ་བསྒྱུར་བ་ཡང་། །གྲོ་བས་བདེ་བླག་ཐོབ་ན་ཅིའི་ཕྱིར། ཁྱེད་ཞལ་འགྲོ་བ་རྣམས་ལ་སྟོན་མི་མཛད། །གལ་ཏེ་བསྟན་ཀྱང་མཐོང་བར་མི་འགྱུར་ན། མགོན་པོའི་སྤྲུལ་པའི་སྐུ་ཡིས་ཅི་ཞིག་མཛད། །ཀྱེ་མ་རྒྱལ་བ་སྲས་དང་བཅས་པ་རྣམས། །འགྲོ་བ་འཁོར་བའི་མུན་ཁྲོད་གནས་པ་ལ། །ཐུགས་རྗེའི་འོད་ཟེར་སྣང་བ་སྐྱེད་དུ་གསོལ། །སྡུག་བསྔལ་མཚོའི་གཏིང་མཐར་བྱིང་བ་ལ། ཐབས་མཁས་ཐུགས་རྗེའི་ལྕགས་ཀྱུས་དྲང་དུ་གསོལ། ཞེས་བྱ་བ་འདི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་རྗེ་ལ་བསྐུལ་བའི་ཕྱིར། རང་བྱུང་རྡོ་རྗེས་སྦྱར་བའོ།། །།

མ་དཔེ་ལས་མི་གསལ། པའི་ལྷ་ལ་ཕྱག་འཚལ་ལོ། །རང་བྱུང་སྟོང་ཉིད་ཡེ་ཤེས་རྡོ་རྗེ་ཡིས། །རང་གཞན་སྒྲིབ་པའི་བྲག་རི་འཇོམས་བྱེད་ཅིང་། །རང་བཞིན་རྟོག་བྲལ་ཕག་མོར་བརྟག་ཁྱོད་ལ། །རང་གཞན་ཀུན་མཁྱེན་ཐོབ་ཕྱིར་བསྟོད་པར་བགྱི། །མ་རིག་མཚན་མ་རྣམ་དག་ཡེ་ཤེས་སྐུ། །མ་ལུས་རྒྱལ་བའི་ཡུམ་གྱུར་ཕ་རོལ་ཕྱིན། མ་ལྟར་རྩེ་བས་འགྲོ་ལ་ཉེ་བའི་ལམ། མ་ནོར་ཇི་བཞིན་སྟོན་མཛད་ཁྱོད་ལ་འདུད། །རྣམ་དག་ཉེས་པའི་སྐྱོན་བྲལ་ཆུས་སྐྱེས་དབུས། རྣམ་གཡེང་སྒྲིབ་སེལ་ཉི་མའི་གདན། རྣམ་རྟོག་དབྱིངས་དང་རོ་གཅིག་བམ་ཆེན་སྟེང་། རྣམ་ཤེས་ཡེ་ཤེས་གནས་གྱུར་ཁྱོད་ལ་བདུད། སྤྲིན་བྲལ་ཟླ་འདྲ་ཞལ་གཅིག་ཕྱག་གཉིས་མ། སྤྲོས་པའི་མཚན་མ་གཅོད་བྱེད་གྲི་གུག་གཡས། སྤྲས་པའི་རྒྱན་མཆོག་ཐོད་ཁྲག་གཡོན། སྤྲུལ་པའི་རྣམ་འཕྲུལ་དཔག་ཡས་ལ་ཕྱག་འཚལ། འཇིག་བྱེད་ཁྲོ་མོའི་ཚུལ་འཆང་གཞོན་ནུ་མ། །འཇམ་མཉེན་སྐུའི་དབྱིབས་སྡུག་ནུ་འབུར་མཛེས། འཇིགས་རུང་ཐོད་འཕྲེང་རུས་པའི་རྒྱན་གྱིས་སྤུད། འཇོ་སྒེག་སྒྱུ་མའི་རོལ་གར་མཛད་ལ་འདུད། ཅི་སྙེད་ཅི་བཞིན་གཟིགས་པ་བརྩེ་བའི་ཐུགས། གང་ལ་གང་གིས་འདུལ་བའི་སྣ་ཚོགས་སྐུར། དེ་ཡིས་དེ་ཉིད་སྒྲོལ་བའི་གསུང་མཆོག་གི །སྐྱེ་བ་སྐྱེ་མེད་ཐོབ་མཛད་ཁྱེད་ལ་འདུད། འགྲོ་ཀུན་འགྲོ་མགོན་ཁྱོད་ཀྱི་མ་སླུ་བར། གང་གིས་གང་འདོད་སྟེར་ནའང་བདག་བློ་ཡི། ཤེས་རབ་ཤེས་བྱ་འབྱེད་པར་གསོལ་བཏབ་ཀྱང་། ཅི་ལྟར་ཅི་བཞིན་ཐོབ་པར་མ་གྱུར་ན། དེ་གང་འཕྲིན་ལས་དུས་ལས་མ་གཡེལ་ལམ། །དེ་ལྟར་མིན་ཡང་མ་དཔེ་ཡིག་འབྲུ་མི་ཚང་། ཤེས་རབ་འོད་སྟོང་འབར་བའི་དྲ་བ་ཡིས། བླུན་བྱེད་མུན་པའི་ཚང་ཚིང་ཀུན་བསལ་ནས། བློ་གསལ་པད་མའི་ཚལ་རབ་རྒྱས་བྱེད་ཅིང་། བླང་དོར་གཉིས་མེད་ཡེ་ཤེས་རོ་གཅིག་པ། བླ་མེད་བསྒྲུབ་མཆོག་སྲིད་དང་ཞི་བའི་དཔལ། བླ་མའི་བླ་མ་ཁྱོད་ཀྱི་མྱུར་དུ་བརྩོལ། སྐྱེ་བ་སྐྱེ་བ་ཀུན་ཏུའང་སྐྱེ་བ་ན། འཁོར་བ་འཁོར་བའི་འཁོར་ལོས་མི་སྐྱོད་ཅིང་། འཇིག་རྟེན་འཇིག་རྟེན་འདས་པའི་འཇིག་མེད་པར། རྒྱལ་བར་རྒྱལ་བའི་ཡུམ་གྱིས་རྒྱལ་བར་མཛོད། ཕག་མོ་ཤེས་རབ་གསལ་བྱེད་ལ་བསྟོད་ཅིང་གསོལ་བ་བློ་ཡིས་མུན་སེལ་ཞེས་བྱ་བ་རང་བྱུང་རྡོ་རྗེས་སྦྱར་བའོ། །མྃགྷ་ལྃབྷ་ཝནྟུ། །ཤུབྷྃ།།

བཅོམ་ལྡན་འདས་མགོན་པོ་འཇམ་དཔལ་དབྱངས་ཀྱི་འཕྲིན་ལས་ཕྱོགས་ཅིག་ལ་བསྟོད་པ་བཞུགས་སོ། །བཅོམ་ལྡན་འདས་འཇམ་པའི་དབྱངས་ཀྱི་ཕྲིན་ལས་ཕྱོགས་གཅིག་ལ་བསྟོད་པ་ཞེས་བྱ་བ། བྱང་ཆུབ་སེམས་དཔའ་སེམས་དཔའ་ཆེན་པོ་གསུང་གི་མངའ་བདག་ལ་ཕྱག་འཚལ་ལོ། །དཔལ་དང་ཡོན་ཏན་ཀུན་གྱིས་བརྒྱན། དཔག་མེད་ཤེས་བྱའི་གནས་ལུགས་མཁྱེན། དཔའ་བོ་བདུད་ལས་རྣམ་པར་རྒྱལ། དཔལ་ལྡན་འཇམ་དཔལ་དབྱངས་ལ་བསྟོད། ཁྱོད་སྐུ་ནམ་མཁའི་མཐའ་འདྲ་ཡང་། གཞོན་ནུའི་ཆ་ལུགས་འཆང་བ་པོ། མཚན་གྱི་མེ་ཏོག་རབ་རྒྱས་པ། དཔེ་བྱད་ཀྱི་འབར་ཕྱག་འཚལ་ལོ། །རྒྱལ་བ་ཀུན་གྱི་གསུང་འཛིན་ཀྱང་། སེམས་ཅན་སྒྲ་དང་མཐུན་པར་འཇུག །ཡན་ལག་དྲུག་ཅུ་སྙན་པའི་སྒྲ། མཐའ་ཡས་སྟོན་ལ་ཕྱག་འཚལ་ལོ། །ཡེ་ཤེས་སྐུ་སྟེ་རང་བྱུང་བ། ཡེ་ཤེས་གསུང་ཉིད་འཛིན་པར་མཛད། ཡེ་ཤེས་མིག་གཅིག་དྲི་མ་མེད། ཡེ་ཤེས་ཐུགས་ལ་ཕྱག་འཚལ་འདུད། རྒྱལ་བའི་སྲས་པོ་མཐུ་ཆེན་འཇམ་དཔལ་དབྱངས། ཡེ་ཤེས་སྐུ་འཆང་གཞོན་ནུའི་སྐུ་འཛིན་པ། བག་ཆགས་སྒྲིབ་པ་རྒད་པོ་རྣམ་བསལ་ཅིང་། །སྲིད་དང་ཞི་བ་རྣམ་སྤངས་རྣམ་གྲོལ་སྐུ། །ཁྱོད་གྱི་སྔོན་གྱི་དམ་བཅས་ལས། །མྱང་ངན་འདས་འགྱུར་བྱང་ཆུབ་མི་འདོད་དེ། །སེམས་ཅན་ཀུན་དོན་སྤྱད་པར་བྱའོ་ཞེས། །གསུང་ནས་ནམ་མཁའ་སྐྲག་ནས་མཐའ་མེད་བྱེད། ཁྱེད་ཐུགས་ནམ་ཡང་སྐྲག་དང་ཞུམ་མེད་པས། ནམ་མཁའ་ཞུམ་ནས་དངོས་མེད་གྱུར་པ་སྙམ། །དེ་བས་ཁྱོད་ཀྱི་ཐུགས་རྗེ་ཅི་དལ་དེ། །དངོས་མེད་མ་ལགས་འཕྲིན་ལས་འོད་སྟོང་འཕྲོ། །དེ་བས་བདག་གིས་ཁྱོད་ཀྱི་མཛད་པ་རྨད་བྱུང་ལ། དད་པར་གྱུར་ནས་རྗེས་སུ་བསྙགས་པར་མ་ནུས་པས། རྣམ་པ་ཀུན་ཏུ་ཡིད་ནི་རྩེ་ཅིག་གྱུར་པ་ཡིས། མ་མཐོང་གྱུར་ཀྱང་ཁྱོད་ཀྱི་རྗེས་སུ་བསྙགས། རེས་འགའ་གསེར་སྦྱང་གུར་གུམ་མདོག་དང་མཚུངས་གྱུར་ཅིང་། ཅོད་པན་ཟུར་ཕུད་ལྔ་ལྡན་ཆུས་སྐྱེས་དུམ་འཁྲུགས་པའི། ཕྲེང་མཛེས་རིན་ཆེན་རྒྱན་འཕྲེང་ལྷག་གེར་འདུག་པ་ནི། པྲ་ཏི་སེ་ན་ལྟ་བུར་སྣང་དེ་ཁྱོད་ཡིན་ཞེས། ཐོས་ཀྱང་ཁྱེད་སྐུ་ཕྱོགས་བཅུའི་ཞིང་ཁམས་རབ་འབྱམས་ན། དཔལ་ལྡན་པད་མ་ཟླ་བ་ཀུན་དྷ་ལྟར་དཀར་དང་། པད་མ་ར་ག་བན་དུ་ཛི་བ་བྱི་རུ་བཞིན། མར་གད་དུར་བ་ཨིན་ཏྲ་ནི་ལ་མཐོན་ཀ་ཆེ། སྣ་ཚོགས་ཀུན་ལྡན་མཁའ་འདྲ་རྣམ་པ་ཀུན་ལྡན་པ། ལྷ་དང་ལྷ་མིན་མི་དང་ལྟོས་འགྲོ་ཆེ། ལུས་ངན་བརྒྱ་བྱིན་ཚངས་དང་སྲེད་མེད་བདག་པོ་དང་། ཉི་མ་ཟླ་བ་འོག་མིན་ལྷ་དབང་ལྟ་བུར་མཐོང་། དེ་བས་སེམས་ཅན་ཁམས་འདི་མཐའ་མེད་ལུས་འཛིན་པ། ཁྱོད་ཀྱི་སྐུའི་རྣམ་འཕྲུལ་འདི་ལ་འགྲན་པ་སྙམ། དེ་ལྟར་མིན་ན་སེམས་ཅན་ཐམས་ཅད་མྱ་ངན་འདས། བསྣོན་པ་མེད་བཞིན་འཁོར་བ་སྟོང་པར་ཅིས་མི་འགྱུར། ཨེ་མ་ཧོ། རྒྱལ་སྲས་མཐུ་ཆེན་རྒྱལ་བ་ཀུན་གྱི་ཡོན་ཏན་ལྡན། །ངོ་མཚར་དཔལ་ལྡན་མཐུ་ཆེན་དཔལ་མཆོག་ཀུན་ལ་བརྩོལ་བར་མཛད། །ཡ་མཚན་རྨད་བྱུང་མཐུ་ཆེན་རྨད་བྱུང་ཀུན་ཏུ་སྟོན་པའི་དཔལ། །ཨེ་མ་ཐུགས་རྗེའི་མཐུ་ཆེན་ཐུགས་ལྡན་ཀུན་བརྩེ་འཇམ་དཔལ་དབྱངས། །མཁྱེན་པའི་དཀྱིལ་འཁོར་མཐུན་ཆེན་དཀྱིལ་དུ་ཀུན་ནས་མ་སོན་མེད། །དེ་སླད་ཡེ་ཤེས་མཐུ་ཆེན་ཡེ་ནས་མངའ་བ་ཀུན་ཀྱང་ཁྱོད་མཚུངས་མེད། ཁྱོད་ནི་སེམས་ཅན་བསམ་པ་ཅི་བཞིན་སྣ་ཚོགས་ཐབས་ཀྱི་སྐུར་སྟོན་མཛད། །ཞི་བས་འདུལ་ལ་རང་རྒྱལ་དགྲ་བཅོམ་གཅིག་དུ་ཞི་བས་རྣམ་གྲོལ་སྟོན། །ཆགས་ལྡན་འདུལ་ཕྱིར་མཛེས་པའི་སྐུ་ལྡན་མཛེས་པའི་ཆ་ལུགས་རྒྱན་མང་སྤུད། རིན་ཆེན་ཁང་བཟང་ལོངས་སྤྱོད་དཔག་མེད་གླུ་གར་མཛེས་པ་ཅན། །རོ་མཆོག་བཟའ་བཏུང་སྣ་ཚོགས་གོས་དང་པད་ཆར་ལང་ལོང་འདུ་བར་སྟོན། །དྲག་པོ་འདུལ་ཕྱིར་གཤིན་རྗེ་མཐར་བྱེད་འཇིགས་དུས་ཆར་སྤྲིན་ནག་པོའི་མདོག དུས་མཐའམ་འབར་འཕྲེང་རབ་ཏུ་འཁྲུག་ཅིང་མཚོན་ཆ་འབར་བ་དུ་མ་ཅན། སྒྲ་ཆེན་སྔགས་ཀྱི་སྒྲ་དབྱངས་ནམ་མཁའ་འགྲལ་བ་ལྟ་བུའི་ཧཱུཾ་ཕཊ་བསྒྲོགས། །དྲག་པོའི་ཚོགས་རྣམས་སྤུ་ལོང་གྱུར་ཏེ་མགོན་པོ་ཁྱོད་ཀྱིས་རྗེས་སུ་འཇུག །དེ་ལ་སོགས་པ་ཁྱོད་ཀྱི་ཐུགས་རྗེའི་སྒྱུ་མ་སུ་ཞིག་གིས་བརྗོད་པར་ནུས། །ཁྱོད་ཀྱིས་ལ་ལར་རྒྱལ་བའི་མཛད་པ་སུམ་ཅུ་རྩ་གཉིས་མཚན་དང་དཔེ་བྱད་ལྡན། །དག་པའི་ཞིང་ཁམས་ནམ་རིན་ཆེན་བཞི་དང་སྣ་ཚོགས་ལྗོན་པ་མེ་ཏོག་ཆར་ལྟར་འབེབས། །ཡན་ལག་བརྒྱད་ལྡན་ཆུ་བོ་ཆོས་ཀྱི་སྒྲ་འབྱིན་ཞིང་དུ་དག་པའི་གདུལ་བྱ་ལ། །ཐེག་མཆོག་ཆོས་ཀྱི་འཁོར་ལོ་བསྐོར་བར་བྱེད་ཅིང་མྱ་ངན་འདས་པའང་སྟོན། །ཡང་དག་དཔའ་བོ་ཐབས་ལ་མཁས་པ་སྔོན་གྱི་སྐལ་པ་རང་རྒྱལ་ཚུལ་དུ་དཔག་མེད་བསྟན། །སྔོན་འདས་རྒྱལ་བ་ཀླུ་དབང་གྱུར་ཅིང་ད་ལྟར་བྱང་ཕྱོགས་རྟག་པར་འདུད་ཅིང་མོས་པ་ན། །སངས་རྒྱས་མོས་པ་རབ་ཏུ་དགའ་བའི་སྙིང་པོ་རིན་ཆེན་ནོར་བུ་བརྩེགས་པའི་རྒྱལ་པོ་ཞེས། ཁྱེད་ལ་གྲགས་ཏེ་ཞིང་ཁམས་འདི་ནས་གང་གི་ཀླུང་ནི་བཞི་བཅུ་རྩ་གཉིས་བྱེ་མའི་གྲངས། །འདས་པ་ཡིན་ཞེས་ཐུབ་པའི་དབང་པོས་སོར་མོའི་འཕྲེང་བའི་མདོ་ལས་གསུངས་པ་མངོན་སུམ་ཐོས། །དེའི་སླད་དུ་བདག་ནི་ཁྱོད་ལ་རྒྱལ་ལ་མིན་ཞེས་ཐེ་ཚོམ་མ་མཆིས་སྐྱབས་སུ་མཆིས། །བྱང་ཆུབ་ལམ་ལ་རིང་པོར་མི་མངའ་བས་ན་སྐད་ཅིག་ཡུད་ལ་ཁྱོད་ནི་བྱང་ཆུབ་མཐར་གཤེགས་གྱུར། །གྱུར་ཀྱང་ཕྱི་མའི་མུ་མཐར་ཐུག་པའི་སེམས་ཅན་དོན་དུ་རྒྱལ་སྲས་ཚུལ་འཛིན་འཁོར་བ་སྟོངས་མི་མཛད། །སྐལ་པ་གྲངས་མེད་བཞུགས་པར་གྱུར་ཀྱང་སྐད་ཅིག་ཉིད་ཙམ་དངོས་པོར་མི་མཛད་རྣམ་པར་མི་རྟོགས་ལ། །ནམ་མཁའི་མཐར་ཐུག་རྫུ་འཕྲུལ་སྟོན་གཡོ་བ་མི་མངའ་སྐུ་ནི་གཅིག་པུ་འཛིན་པར་མཛད། །སྟོབས་དང་མི་འཇིགས་མ་འདྲེས་རྫུ་འཕྲུལ་རྐང་པའི་མཐར་སོན་ཁྱོད་ནི་དང་པོའི་ཚུལ་ལས་གཡོས་མ་ལགས། །སྐལ་པ་གཅིག་ལ་རྒྱལ་བ་སྟོང་གི་མཛད་མི་མྱོང་པའི་སེམས་ཅན་ཁམས་ལ་ཁྱོད་ཀྱིས་སྒྲོལ་མཛད་ཀྱང་། །ཆོག་ཤེས་མི་མངའ་རྒྱ་མཚོར་ཆུ་འདྲ་དཔག་མེད་བ་ཡི་ཆོས་འཛིན་མཛད་པ་དེ་བས་ངོམས་ཤེས། ཁྱོད་ཀྱི་མཐུ་འདི་ས་ཡིས་ཐེག་ཅིང་མཁའ་འདི་རལ་བར་མ་གྱུར་པ་ལ་བདག་ནི་ངོ་མཚར་སྐྱེས། །ཨེ་མའོ་དཔལ་ལྡན་འཇམ་པའི་དབྱངས། རྒྱལ་བ་ཀུན་ཀྱིས་རབ་སྔགས་པ། །ཡོན་ཏན་རྒྱ་མཚོ་མངའ་བ་ལགས། །དེ་ཕྱིར་སྔགས་འོས་ཁྱེད་ལགས་སོ། །མ་འོངས་ཞིང་ཁམས་རྣམ་དག་ནོར་བུ་བརྩེགས་པ་ཞེས། རྒྱལ་བ་ཀུན་གྱི་འཇིག་རྟེན་ཁམས་མང་བསྡུས་གྱུར་བདེ་བ་ཅན་གྱིས་ནི། །སྐྲ་རྩེའི་ཆུ་ཙམ་ལྷག་མ་རྒྱལ་མཚོ་ཆེ་ལྟ་ཡི། །ཞིང་དེར་ཁྱེད་ནི་མངོན་པར་བྱང་ཆུབ་སྟོན་འགྱུར་ཏེ། སྟོང་གསུམ་བཅུ་ཕྲག་གཅིག་གི་ཚད་ལྡན་བྱང་ཆུབ་ཤིང་དབང་དྲུང་གཤེགས་ཏེ། རྒྱལ་བ་ཀུན་ཏུ་གཟིགས་པ་ཞེས་བྱར་ནམ་མཁའི་མཐར་གཏུགས་གྲགས། གཡོ་བ་མ་མཛད་ཕྱོགས་བཅུར་གཤེགས་ཤིང་སྤྲུལ་པ་དུ་མ་སྟོན་པར་མཛད། ཐེག་མཆོག་ཚུལ་གཅིག་སྟོན་པར་མཛད་ཅིང་རྒྱལ་བའི་དབང་པོར་ལུང་ཡང་སྟོན། དེ་སླད་རྒྱལ་བའི་སྲས་ཁྱོད་ནི། རྣམ་མི་རྟོག་ལ་ཐམས་ཅད་མཛད། ཕྱོགས་བཅུར་ཆོས་ཀྱི་རྔ་བོ་ཆེ། གཟུགས་མེད་གཟུགས་བཟང་སྒྲོག་པར་མཛད། ཁ་དོག་དང་བྲལ་ཁ་དོག་ཁྱད་པར་མཛེས་པར་ལྟར། འཇིག་རྟེན་སྒྲ་མིན་འཇིག་རྟེན་འདས་པའི་སྒྲ་དབྱངས་བསྒྲོགས། རྣམ་པར་མི་རྟོག་རྣམ་པ་ཀུན་མཁྱེན་རྨད་བྱུང་ཆེ། ལྟར་མི་སྣང་ལ་ལྟ་བ་མི་ངོམས་ཁྱོད་ཕྱག་འཚལ། །ཕྱོགས་དུས་ཀུན་ནས་ཡོན་ཏན་བསྔགས་པའི་སྒྲ་དབྱངས་དར་དིར་བསྒྲོགས་པ་ཡིས། རྒྱལ་དང་རྒྱལ་སྲས་དྲེགས་དང་ཞུམ་པ་མི་མངའ་གྱུར་ཀྱང་ཞུམ་པ་བཞིན། བདུད་ཀྱི་དགྲ་བོ་ཁྲོ་བ་མི་མངའ་བདུད་ལས་རྣམ་རྒྱལ་རྒྱལ་བའི་སྲས། །སྒྲ་ཚིག་ཀུན་གྱིས་ཁྱོད་ཀྱིས་ཡོན་ཏན་བསྟོད་མི་ནུས་ཀྱང་ཁྱོད་ལ་བསྟོད། ཁྱོད་ཀྱི་ཐུགས་རྗེའི་མཐུ་འདི་ཡིན། །བེམས་པོས་ཆོས་ཀུན་སྒྲ་འབྱིན་ཞེས། ཐོས་ན་རྣམ་པར་ལྡན་རྣམས་ཀྱང་། ཁྱོད་གསུངས་ཐོས་འདི་མཚར་བྱས། རྣམ་གྲོལ་ཤེས་རབ་མཁའ་འདྲ་ཡང་། བླུན་པོའི་སྙིང་ལ་སོན་མ་གྱུར། རང་གིས་རང་ཉིད་འཆིང་བྱེད་པའི། ཉམས་ཐག་འགྲོ་ལ་མི་དགོངས་སམ། སྙིགས་དུས་ཉམས་ངའི་འགྲོ་བ་འདི་དག་ཐམས་ཅད་ལ། རྒྱལ་སྲས་ཁྱེད་ལྷའི་ཐུགས་རྗེ་འཇུག་པར་མི་འགྱུར་ན། ལྷག་པའི་རྫུ་འཕྲུལ་མངའ་བར་གྱུར་ཀྱང་ཅི་ཞིག་བགྱི། འཇིག་རྟེན་འཇིག་རྟེན་འདས་པའི་དཔལ་འབྱོར་བརྩལ་དུ་གསོལ། ལས་ཀྱི་མུན་པ་ཡེ་ཤེས་མཐུ་ཡིས་མི་བསལ་ན། ཕྲིན་ལས་རྡོ་རྗེ་གང་དུ་འཚལ་བར་འགྱུར་བ་ལགས། དེ་བས་འགྲོ་བ་ཉོན་མོངས་བྲག་རི་གཞོམ་པ་དང་། སེམས་ཀྱི་རིན་ཆེན་འོད་ལྡན་མངོན་གསུམ་སྣང་བར་མཛོད། ཀྱེ་མ་འགྲོ་འདི་ཕུང་པོ་ཡི། རི་གླིང་བརྟན་ཅེས་མི་གསུང་པར། ཡེ་ཤེས་ཕུང་པོའི་སྐུ་ཡིས་ནི། ལོག་རྟོག་བག་ཆགས་བཟློག་དུ་གསོལ། །ལས་དང་ཉོན་མོངས་ཆུ་བོ་འདི། །གཏིང་དཔག་བཀའ་ཞེས་མི་གསུང་པར། །ཡེ་ཤེས་མེ་ཆེན་རབ་འབར་བས། །གཏན་ནས་སྐམ་པར་མཛད་དུ་གསོལ། །ཚུལ་བཞིན་མ་ཡིན་རླུང་འདི་ནི། ཞི་བར་བཀའ་ཞེས་མི་གསུང་པར། རྡོ་རྗེ་ལྟ་བུའི་ཏིང་འཛིན་གྱིས། འདུ་བྱེད་གཡོ་བ་གཞོམ་དུ་གསོལ། །གལ་ཏེ་ཁྱོད་འདྲའི་མཐུ་ཆེན་ལྡན་རྣམས་ལོག་པའི་སེམས་ཅན་བརྟེན་མིན་ཞེས། །དམན་པ་འདོར་ན་རང་རྒྱལ་རྣམས་ལ་ཅིའི་ཕྱིར་ན་སྨད་པ་གསུང་། ཐབས་མཁས་ཐུགས་རྗེས་སླང་པར་མི་སྤྱོད་སེམས་ཅན་ཁམས་ལ་མཆིས་མ་ལགས། དེ་ནས་མགོན་པོ་ཐུགས་རྗེའི་མངའ་བདག་བདག་ཅག་འགྲོ་ཀུན་སྐྱབ་དུ་གསོལ། རྣམ་པར་གྲོལ་བའི་ཡེ་ཤེས་སྟོབས། གཅིག་གི་མཐའ་ཡང་ནམ་མཁའ་ལ། གཟུགས་ཅན་གྱུར་ན་ཤོང་མིན་ན། ཅི་སླད་སྲིད་ཞི་གྲོལ་མི་མཛད། གཟུང་འཛིན་ཀུན་རྟོག་ཕྲ་མོ་འདི། ཁྱོད་ཀྱི་ཤེས་རབ་མཐའ་ཡས་པའི། རལ་གྲིས་གཅོད་པར་མ་མཛད་ན། མགོན་ཁྱོད་ཐུགས་ལས་ཆུང་གྱུར་ཏམ། །བདག་གིས་ལུས་དང་ལོངས་སྤྱོད་ཀུན། གང་ཡང་མ་བཟུང་མཆོད་པའི་ཚོགས། ལྟོས་མེད་ཁྱོད་ལ་འབུལ་ལགས་ཀྱིས། བཞེས་ཤིང་བདག་ལ་དགོངས་པར་མཛོད། སྔོན་གྱི་ལས་དང་བག་ཆགས་ཀུན། ལྟོས་མེད་རྒྱལ་སྲས་ཀུན་ལ་བཤགས། གང་ཡང་ཕྱོགས་བཅུ་ནམ་མཁའ་ཡིས། རྒྱལ་བ་དེ་དག་ཐམས་ཅད་ལ། །ཐེག་མཆོག་འཁོར་ལོ་བསྐོར་བར་བསྐུལ། མྱ་ངན་མི་འདས་གསོལ་བ་འདེབས། །གང་ཡང་བདག་གིས་དགེ་བ་ཅུང་ཟད་བསགས་པ་རྣམས། །རྒྱ་མཚོ་ཆེ་ལྟར་ཁྱོད་ཀྱི་ཡེ་ཤེས་ངང་ཉིད་དུ། །རོ་ཅིག་གྱུར་ཏེ་ནམ་མཁའ་ཟད་པར་མ་གྱུར་བར། །འགྲོ་ཀུན་ཕན་བྱེད་འབྲས་བུ་དཔག་མེད་འབྱིན་པར་ཤོག །ཀྱེ་མ་འགྲོ་བ་མ་རིག་པ། །རང་རིག་གསལ་བའི་སྣང་བ་འདི། གཉིས་འཛིན་བདུད་ཀྱི་མཛེས་བྱེད་ལ། །ད་དུང་བུང་བ་ལྟར་འཁོར་བྱེད། །མི་བསལ་སྲེད་པའི་ཆུ་རྒྱུན་ལས། ཁམས་སུ་འདས་པའི་ཆགས་བྲལ་ཀྱང་། ཁ་མེད་ལྗོན་ཤིང་ཆུ་ཕྲད་ལྟར། །ཇི་སྲིད་རྐང་ཐུང་ཁ་མེད་བཞིན། །ཕྱི་རོལ་ཉན་ཐོས་དེ་དག་ཀྱང་། གང་ཟག་བདག་མེད་ང་རྒྱལ་གྱིས། །རིན་ཆེན་རང་གི་གཡས་གཡོགས་ལྟར། །རྒྱལ་བའི་སྙིང་པོ་སྒྲིབ་པར་བྱེད། །དེ་ཕྱིར་རྒྱལ་སྲས་འཇམ་པའི་དབྱངས། ཁྱེད་ལ་བདག་ནི་གསོལ་བ་འདེབས། །དེ་བཞིན་གཤེགས་པའི་སྙིང་པོ་འདི། དྲི་མེད་སྔོན་དུ་སྣང་བ་མཛོད། བཅོམ་ལྡན་འདས་འཇམ་དཔལ་དབྱངས་ཀྱི་ཡོན་ཏན་ཕྱོགས་ཙམ་ལ་བསྟོད་ཅིང་གསོལ་བ་བཏབ་པ་ཞེས་བྱ་བ་རྒྱ་མཚོའི་ཕྲེང་བ་ལྟ་བུའི་ཚིགས་སུ་བཅད་པ། དུས་རིང་མོ་ནས་དེ་ཉིད་ཀྱིས་རྗེས་སུ་བཟུང་ཞིང་། ད་དུང་རྗེས་སུ་འཇུག་པ་རང་བྱུང་རྡོ་རྗེ་ཞེས་བྱ་བ་བདེ་ཆེན་སྟེངས་ཀྱི་རི་ཁྲོད་དུ་བྲིས་པའོ།། །།

འཕགས་པ་སྤྱན་རས་གཟིགས་དབང་ཕྱུག་གི་ཡོན་ཏན་གྱི་ཆ་ཤས་ལ་བསྟོད་པ་བཞུགས་སོ། །ན་མོ་ལོ་ཀི་ཤྭ་ར་ཡ། ཧྲཱིཿ དཔལ་ལྡན་ཡོན་ཏན་ཀུན་གྱིས་རབ་རྒྱན་དྲི་མེད་ཟླ་བ་ལྟར་དཀར་བ། ནག་པོའི་རྩ་ལག་ཀུན་ནས་འདུལ་མཛད་ཉིན་མོར་བྱེད་པའི་འོད་ཟེར་ཅན། །གཅིག་ཉིད་ནའང་རྣམ་པ་ཀུན་ལྡན་སྣ་ཚོགས་ནོར་བུའི་སྐུ་འཆང་པ། །ཐུགས་རྗེའི་མངའ་བདག་སྤྱན་རས་གཟིགས་དབང་ཁྱེད་ལ་བདག་ནི་གསོལ་བ་འདེབས། །ཅི་སླད་ཅེ་ན་ཁྱེད་ནི་བྱམས་དང་སྙིང་རྗེའི་ནམ་མཁའི་མཐའ་འདྲ་ཞིང་། །སྨོན་ལམ་མཐའ་ཡས་རྒྱ་མཚོའི་རྒྱུན་གྱི་འཕྲོ་བ་བཞིན་དུ་ཟད་མི་མངའ། །མངའ་བ་དེ་ལྟར་མཐུན་པའི་སྤྱོད་པས་རྫུ་འཕྲུལ་བརླབས་ཀྱིས་ནམ་མཁའ་ཁྱབ། །ཤེས་རབ་མཐུ་ཡིས་ཆགས་པ་མི་མངའ་འཁོར་བ་ཇི་སྐད་བཞུགས་ཅེས་གྲགས། །དམྱལ་བའི་མེ་ལྕེ་ལས་ཀྱིས་རབ་འབར་ཁྲོད་ན་ཚིར་ཚིར་སྲེག་པ་དག །ཁྱོད་ཀྱི་ཡེ་ཤེས་ཐུགས་རྗེའི་ཆུའི་བརླབས་ཀྱིས་ཆིལ་ཆིལ་བསིལ་བར་མཛད། །མཚོན་ཆའི་ཆར་དྲག་རབ་ཏུ་འབབ་པས་ལུས་ཀུན་ཐོར་ཐོར་གཅོད་པ་རྣམས། །ཐུགས་རྗེའི་མངའ་བདག་བྱམས་པའི་ཟེར་གྱི་པད་ཆར་ལོང་ལོང་བསྒྱུར་མཛད་ཅིང་། །རོ་ཉེའི་རྒྱུ་ལྡེང་ཁའི་ནང་དུ་ལུས་ཀུན་མྱལ་མྱལ་ཞུ་བ་དག །ཁྱེད་ཀྱི་མཐུ་ཡིས་བདེ་ལྡན་ཆུར་གྱུར་བདེ་བ་ཕྲིལ་ཕྲིལ་སྟེར་བར་མཛད། །གཤིན་རྗེའི་སྐྱེས་བུ་མི་སྡུག་ཁྲོས་པའི་བཞིན་ལྡན་རྣམས་ཀྱིས་ཁྱོད་མཐོང་ནས། །བརྩེ་བའི་ཡིད་གྱུར་ཞི་བའི་བཞིན་གྱིས་ཁྱོད་ལ་བསྙེན་པར་བསྟོད་པར་བྱེད། །ཉམས་ཐག་འགྲོ་རྣམས་ཐུགས་རྗེའི་མངའ་བདག་ཁྱོད་མཐོང་དབུགས་ཀྱང་ཕྱིན་གྱུར་ནས། །ཐུགས་རྗེའི་འོད་ཀྱིས་གདོང་གི་ཆུ་སྐྱེས་འཛུམ་པར་གྱུར་ཅིང་ཐལ་མོ་ཡིས། །མྱུ་གུ་སྦྱར་བའི་ཁ་འབུས་གྱུར་ཏེ་བདེ་བ་ཅན་དུ་འགྲོ་བར་མཛད། །དེའི་སླད་དུ་མགོན་པོ་ཁྱོད་ཀྱིས་དུས་ཀུན་མཉམ་པར་གཤེགས་ཞེས་གྲགས། །རྒྱལ་བའི་སྲས་པོ་རང་རྒྱལ་ཚོགས་རྣམས་འཁོར་བའི་བདེ་ལ་སྐྲག་ཅེས་ཐོས། ཁྱོད་ནི་རྩེ་བས་ངན་འགྲོ་ཡི་སྡུག་བསྔལ་ཀུན་ཀྱང་དང་དུ་ལེན་པར་གྱིས། །ཉམས་ངའི་ཡི་དྭགས་ཡན་ལག་འཁྲུལ་ཅིང་མེ་འབར་བཀྲེས་པས་གདུངས་གྱུར་པས། །རྒྱ་མཚོ་ལས་ཀྱིས་སྐེམས་པར་བྱེད་ཅིང་རང་སྣང་འཁྲུལ་པས་གཙེས་པ་དག །ཁྱོད་ཀྱི་བྱམས་དང་སྦྱིན་པའི་རྒྱུ་ཡིས་བ་སྤུའི་སྒོ་ནས་ཆུ་བོའི་ཚོགས། །ཡན་ལག་བརྒྱད་ལྡན་རྒྱུན་རྣམས་སྤྲོས་ནས་བཀྲེས་བསྐོམ་སྡུག་བསྔལ་ཞི་མཛད་ཅིང་། །ལྷའི་ལུས་ལྟར་མཛེས་པར་གྱུར་ནས་ཁྱོད་སྐུ་དྲི་མེད་ལ་དད་པས། བདེ་བ་ཅན་དུ་སྐད་ཅིག་ཡུད་ཀྱིས་འགྲོ་ཞིང་མྱ་ངན་རྒྱུན་གཅོད་མཛད། སྣ་ཚོགས་ལྷན་གྱི་དུད་འགྲོའི་ཚོགས་རྣམས་གཏི་མུག་མུན་ནག་ལྡན་པ་ཀུན། །ཀུན་ནས་འགྲོ་བའི་སྡུག་བསྔལ་གྱིས་གདུངས་ཆགས་དང་ཕྲག་དོག་གི་གཙེས་རྣམས། །རྣམ་པ་ཀུན་དུ་ཁྱོད་མཐོང་གྱུར་ནས་ཤེས་རབ་རབ་ཏུ་རྣམ་པར་གསལ། །གསལ་བའི་མཐུ་ཡིས་བྱམས་ཤིང་དགའ་བས་ཁྱབ་པར་གྱུར་ནས་མགོན་ཁྱོད་ལྟ། དེ་སླད་འཕགས་མཆོག་ཕ་དང་མ་དང་བྱམས་པའི་གཉེན་གྱུར་པ། །ཁྱོད་ལ་བདག་ནི་རྟག་ཏུ་གསོལ་འདེབས་ངན་འགྲོ་ཐམས་ཅད་སྟོངས་པར་མཛད་དུ་གསོལ། །གང་དུ་སྐལ་པ་དམན་པར་གྱུར་པའི་མིའི་འཇིག་རྟེན་ཀུན་ཏུ་ཡང་། ཁྱོད་ཀྱི་མཚན་དང་རིགས་སྔགས་སྒྲ་ཐོས་བདེ་བ་ཅན་དུ་འགྲོ་ཞེས་གྲག །གང་དུ་སྐལ་ལྡན་ཁྱོད་རྗེས་འཇུགས་ལ་སྣ་ཚོགས་ཐབས་ཀྱི་སྐུ་སྟོན་ཅིང་། །ཞལ་གཅིག་ཕྱག་ནི་གཉིས་པ་ལྡན་ཅིང་སྐར་མའི་འོད་ཟེར་ལྡན་པ་ནས། །བཅུ་གཅིག་ཞལ་ལྡན་བསིལ་ཟེར་བྱེད་པ་བརྒྱ་སྟོང་འོད་ལས་ལྷག་པ་དང་། །འབུམ་ཕྲག་ཞལ་ལྡན་བྱེ་བའི་ཡན་ལག་ཉིན་མོར་བྱེད་པ་གྲངས་མེད་ཚོགས། །ལྷ་ཀླུ་དྲི་ཟ་འོག་མིན་བདག་པོའི་འོད་ཀུན་ཟིལ་གནོན་སྟོན་པར་མཛད། །གླིང་བར་མུན་ནག་སྐལ་པར་བསགས་པ་ཁྱོད་ཀྱི་འོད་ཟེར་གཅིག་གིས་གསལ། །མི་རྣམས་འཇིགས་པ་སེང་གེ་སྦྲུལ་ཆེན་མེ་དང་ཆུ་བོ་འཁྲུགས་པ་དང་། །མཁའ་འགྲོ་ཤ་ཟ་ས་བདག་ཁྲོས་དང་ཆོམ་རྐུན་དགྲ་བོ་ཅི་སྙེད་པ། ཁྱོད་ཞབས་དྲན་པས་སྐད་ཅིག་གིས་སེལ་སྐྱེ་རྒ་ན་དང་འཆི་བ་ཡི། །སྡུག་བསྔལ་གྱུར་ལ་ཁྱོད་ཀྱིས་དབུགས་འབྱིན་བར་དོར་རལ་པའི་ཅོད་པན་ཅན། །མཛེས་པའི་གཟུགས་ཀྱིས་མི་འཇིགས་སྒྲ་འབྱིན་བདེ་བ་ཅན་དུ་ཁྲིད་པར་མཛོད། །ཨེ་མའོ་མཚུངས་མེད་སྐྱབས་མཆོག་ཁྱོད་ལ་བདག་ནི་སྐྱབས་སུ་མཆི། །གང་དུ་ལྷ་རྣམས་བདེ་བའི་རོས་མྱོས་བག་མེད་གྱུར་པ་གཟིགས་ནས་ནི། ཁྱོད་ཀྱིས་སྣ་ཚོགས་འཇིགས་དང་ལྷུང་བའི་སྡུག་བསྔལ་བསྒྲགས་ནས་བཟློག་མཛད་ཅིང་། འདོད་པའི་དབང་ཕྱུག་མཐུ་བོ་ཆེ་ནི་ཁྱོད་ཀྱི་ཚེམས་ལས་སྤྲུལ་ཞེས་ཐོས། །ཉི་མ་ཟླ་བ་གཉིས་ནི་སྤྱན་ལ་སྨོན་ལམ་དབང་གིས་བྱུང་པར་གྲགས། གཟུགས་ཁམས་ཀུན་བདག་མིན་གནས་སུ་དབང་ཕྱུག་ཁྱོད་ཀྱི་ཐུགས་ལས་སྤྲུལ། །སྙན་ངག་ལྷ་མོ་དབྱངས་ཅན་ཁྱོད་ཀྱི་ཞལ་གྱིས་མཆིལ་མ་ལས་བྱུང་ཞིང་། །ནོར་གྱི་དབང་ཕྱུག་མཛེས་བྱེད་གཞོན་ནུ་མདུང་ཐུང་ཅན་དང་འཁོར་ལོ་ཅན། ཀླ་ཀློ་མཐར་བྱེད་འདི་རྣམས་ཁྱོད་ཀྱི་འཕྲིན་ལས་ཆ་ལས་བྱུང་བར་ཐོས། འདི་དག་འཇིག་རྟེན་ཁམས་འདིར་སེམས་ཅན་དོན་དུ་ཁྱོད་ཀྱིས་བསྟན། །དེ་བས་དཔག་མེད་ཡོན་ཏན་ནམ་མཁའི་མཐའ་འདྲ་སུ་ཞིག་གིས་བརྗོད་ནུས། ཕྱོགས་བཅུའི་ཞིང་ཁམས་ནམ་མཁའ་མཐའ་ཁྱབ་རྒྱལ་བ་ཀུན་གྱི་སྤྱན་མངའ་ན། །ཕྱག་ན་པདྨོ་རྒྱལ་བ་གཉིས་པ་སངས་རྒྱས་ཀུན་གྱི་ཐུགས་རྗེ་ནི། བསྡུས་པའི་སྟོབས་ལས་གྲུབ་པ་གྱུར་ཞེས་རྒྱལ་བ་ཀུན་གྱི་བསྔགས་པར་མཛད། རྒྱལ་སྲས་མཐུ་ཆེན་ཀུན་གྱིས་ཡོན་ཏན་རྒྱ་མཚོ་དཔག་མེད་ཞེས། །རྒྱལ་སྲས་བསྒྲིབ་པ་ཐམས་ཅད་སེལ་བས་ཁྱོད་ཀྱི་བ་སྤུའི་ཁུང་ཅིག་ཏུ། སྐལ་པ་གྲངས་མེད་རྫུ་འཕྲུལ་ཤུགས་ཀྱིས་སོང་པར་གྱུར་ཀྱང་གཏིང་མ་མཐོང་། བདུད་རྩི་ལྡན་ཅེས་བྱ་བའི་བ་སྤུའི་ཁུང་བུ་གཅིག་ན་དག་པ་ཡི། །ལྷུན་མོ་བྱེ་བ་ཁྲག་ཁྲིག་གནས་ལ་རེ་རེའང་ལྷ་དང་དྲི་ཟ་དག །དག་པའི་ས་ལམ་རབ་དགའ་ནས་བཟུང་བཅུ་པའི་བར་ཐོབ་གྲངས་མེད་གནས། ཞེས་སོགས་སྔགས་པ་ཐུབ་པའི་དབང་པོས་མངོན་སུམ་མདོར་གསུངས་བདག་གིས་ཐོས། །འོན་ཀྱང་ཁྱོད་ནི་བདེ་བ་ཅན་ན་རྒྱལ་བ་འོད་དཔག་མེད་པའི་དྲུང་། །ལྷུན་པོ་ལྟ་བུའི་སྐུ་ལྡན་རྒྱལ་སྲས་གཞོན་ནུའི་ཚུལ་འཛིན་བཞུགས་སོ་ཞེས། །ཐོས་པར་གྱུར་ནས་སྐལ་པ་བཅུ་ལོན་ད་དུང་སྐལ་པ་གྲངས་མེད་པ། །གྲངས་མེད་དང་ནི་དེ་འོག་ཏུ་ཡང་གྲངས་མེད་རྒྱལ་བའི་ཆོས་འཛིན་ཅིང་། ཞིང་དེ་ནས་ནི་གཡོ་བ་མི་མཛད་ཕྱོགས་བཅུའི་ཞིང་ཁམས་ཐམས་ཅད་དུ། །རྒྱལ་བ་ཀུན་མཆོད་ཆོས་རྣམས་འཛིན་ཅིང་སྣ་ཚོགས་རྫུ་འཕྲུལ་དུ་མ་ཡིས། ཞིང་ཀུན་རིན་ཆེན་གཞིར་མཛད་ནོར་བུའི་བླ་རེས་རྒྱུན་འཆང་མཛེས་པ་དག །སྣ་ཚོགས་མེ་ཏོག་ཆར་དུ་འབེབས་ཤིང་དྲི་ཞིམ་གདུག་སྤོས་ངད་ལྡན་ཞིང་། ཀུན་བཟང་མཆོད་སྤྲིན་སྤྲིན་ཕུང་ཚོགས་ཀྱིས་རྒྱལ་བ་སྲས་བཅས་མཉེས་བྱེད་ལ། སྣ་ཚོགས་འགྲོ་བ་ཉམས་ཐག་རྣམས་ལ་སྤྲུལ་པ་དུ་མས་དབུགས་འབྱིན་མཛད། འོད་དཔག་མེད་དྲུང་ལྷགས་པའི་རྒྱ་མཚོ་ཅི་སྙེད་འདུས་པ་རྣམས། །ལུང་སྟོན་མཛད་དེ་ཁྱེད་ཀྱི་ཞུ་བས་རྒྱལ་སྲས་དེ་རྣམས་ཚིམ་པར་མཛད། ཨེ་མ་ངོ་མཚར་ཁྱེད་ཀྱི་མཛད་འདི་རྒྱལ་སྲས་ཀུན་པས་ལྷག་པ་སྙམ། སྣ་ཚོགས་རིན་ཆེན་བཻ་ཌཱུརྻ་དང་པད་མ་ར་ག་ཨན་དྷ་སྙིལ། པདྨ་པདྨ་པད་ཆེན་ཟླ་བཟང་ཨ་ཏི་མུག་ཏ་སྐྱར་སྣར་དང་། །དཀར་དང་དམར་པོ་ལྗང་ཁུ་སྔོན་པོ་གསེར་མདོག་ཁ་དོག་ཁྱད་པར་རྣམས། གང་ཡང་འདྲར་སྣང་གང་ཡང་མ་ཡིན་དངོས་དང་དངོས་མེད་མ་ཡིན་སྐུ། སྒྲ་དང་སྒྲ་མིན་ཡན་ལག་དྲུག་བཅུ་གྲངས་མེད་སྒྲ་དབྱངས་སྒྲ་མིན་གསུངས། །ཐུགས་རྗེ་དཔག་མེད་ཐུགས་ནི་སྟོབས་བཅུ་མི་འཇིགས་བཞི་དང་མ་འདྲེས་ཆོས། །རྒྱལ་བའི་ཡོན་ཏན་ཐམས་ཅད་ཁྱོད་ལ་མི་མངའ་གང་ཡང་མཆིས་མ་ལགས། །འོན་ཀྱང་དུས་རིངས་རྒྱལ་སྲས་ཚུལ་སྟོན་སྒྱུ་མའི་རྣམ་འཕྲུལ་རྨད་དུ་བྱུང་། འདས་པའི་དུས་ན་རྒྱལ་བ་མེ་ཏོག་ལས་བྱུང་རྗེས་སུ་ནོར་བུ་བརྩེགས་པའི་རྒྱལ་པོར་འགྱུར། མ་འོངས་དུས་ན་ཞིང་ཁམས་རྣམ་དག་རིན་ཆེན་དུ་མ་བརྩེགས་པ་དེར། །འོད་ཟེར་ཀུན་ནས་འཕགས་པའི་དཔལ་བརྩེགས་རྒྱལ་པོ་ཞེས་ཀྱང་གྲགས་པར་འགྱུར། །རྒྱལ་བ་ཀུན་པས་རྒན་པར་གྱུར་ཀྱང་རྒྱལ་སྲས་གཞོན་ནུའི་ཚུལ་འཛིན་ཅིང་། །སེམས་ཡིད་རྣམ་ཤེས་སྤངས་པར་གྱུར་ཀྱང་སེམས་ཅན་ཀུན་གྱི་སེམས་ལ་འཇུག །སྤྲོས་པ་མཁའ་ལྟར་དག་པར་གྱུར་ཀྱང་སྤྲོས་པ་ཐམས་ཅད་མངོན་གསུམ་མཁྱེན། །དེ་ཕྱིར་བདག་གིས་བརྗོད་བྱ་མིན་ཀྱང་ཁྱོད་ལ་གུས་པས་མཆོད་ཅིང་བསྟོད། །སྔོན་བྱས་མི་དགེ་ཐམས་ཅད་བཤགས་ཤིང་དགེ་བ་ཀུན་ལ་རྗེས་ཡིད་རང་། རྟག་ཏུ་བླ་མེད་འཁོར་ལོ་བསྐོར་ཞིང་མྱ་ངན་མི་འདའ་གསོལ་བ་འདེབས། །སྤྱན་རས་གཟིགས་དབང་ཁྱེད་ཀྱི་རྗེས་སློབ་སེམས་ཅན་ཐམས་ཅད་དེ་འདྲར་འགྱུར། །དེ་སྲིད་བདག་ཀྱང་ཐུགས་རྗེའི་མངའ་བདག་མཐུ་ལྡན་ཁྱོད་དང་མཚུངས་པར་ཤོག །རྒྱ་མཚོ་ལས་ནི་སྐྲ་རྩེའི་ཆུ་ཙམ་བརྗོད་ཅིང་བསོད་ནམས་མཐུས། །སེམས་ཅན་ཐམས་ཅད་རྒྱལ་བའི་དབང་པོ་འོད་དཔག་མེད་པས་ལུང་སྟོན་ཤོག །འཕགས་པ་སྤྱན་རས་གཟིགས་དབང་ཕྱུག་གི་ཡོན་ཏན་གྱི་ཆ་ཤས་ལ་བསྟོད་པ་ཞེས་བྱ་བ། །དུས་ཡུན་རིང་མོ་ནས་དེ་ཉིད་ཀྱིས་རྗེས་སུ་བཟུང་བ་རང་བྱུང་རྡོ་རྗེ་ཞེས་བྱ་བས་བསྙན་ངགས་ཀྱི་ཚིག་མེད་པར་སྦྱར་བ་རྫོགས་སོ།། །།

དཔལ་ཀུན་ཏུ་བཟང་པོ་ལ་བསྟོད་ཅིང་སྨོན་ལམ་བཏབ་པ་ཞེས་བྱ་བ་བཞུགས་པ་ལགས་སོ་ཨང་། །དེ་བཞིན་གཤེགས་པ་ཐམས་ཅད་ཀྱི་གསང་བའི་མངའ་བདག་བྱང་ཆུབ་སེམས་དཔའ་ཆེན་པོ་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །དཔལ་ལྡན་གསང་བ་ཀུན་བདག་དཔལ། །མཁྱེན་པའི་སྐད་ཅིག་ཤེས་བྱ་མཁྱེན། མཐའ་མེད་ཡེ་ཤེས་ཐུགས་ཆུད་མཐའ། །མཆོག་སྦྱིན་རྡོ་རྗེ་མཆོག་ཁྱོད་འདུད། །ཞི་བའི་རང་བཞིན་སྣ་ཚོགས་རབ་ཏུ་སྣང་། །དཔག་ཡས་མཁྱེན་ལྡན་ཅིར་ཡང་གཟིགས་མི་མཛད། །རྒྱལ་སྲས་གཞོན་ནུ་རྒྱལ་བ་ཀུན་པས་རྒན། །ཀུན་དང་མི་མཐུན་ཀུན་བཟང་ཁྱོད་ཕྱག་འཚལ། །འདས་པའི་མཐའ་བཞིན་རྣམ་རྟོག་མྱ་ངན་འདས། །མ་འོངས་མཐའ་བཞིན་རྒྱལ་སྲས་ཀུན་གྱི་མ། །གནས་པའི་མཐའ་བཞིན་མཁའ་དབྱིངས་ཀུན་ན་གནས། །རྨད་བྱུང་ཁྱོད་ཀྱི་རྣམ་ཐར་རྒྱ་མཚོའི་རྨད། །ནམ་མཁའི་མཐའ་ནི་དཔག་མེད་གཅིག་པུ་ཀུན་སྟོང་པ། །ཆོས་དབྱིངས་མཐའ་ནི་དཔག་མེད་གཅིག་པུ་རབ་དག་པ། སེམས་ཅན་ཁམས་ནི་དཔག་མེད་གཅིག་དུ་སྒྱུ་འདྲ་བ། ཁྱོད་ཀྱི་མཛད་པ་དཔག་མེད་གཅིག་དུ་མ་འཚལ་ཏོ། །བཞིན་ཀྱང་ཐུབ་དབང་རྨད་བྱུང་བྱང་ཆུབ་ཤིང་དྲུང་དུ། བདུད་ཀྱི་མཐུ་བཅོམ་རྨད་བྱུང་མངོན་པར་སངས་རྒྱས་བསྟན། །དཔག་མེད་རྒྱལ་སྲས་རྨད་བྱུང་འདུས་པར་གྱུར་པའི་ཚེ། ཁྱོད་ཀྱི་རྣམ་ཐར་རྨད་བྱུང་དཔག་མེད་གསལ་བར་གྲགས། དེ་སླད་བདག་གི་ཁྱོད་ལ་ཐེ་ཚོམ་སྐྱེས་གྱུར་པས། །རབ་དང་སེམས་ཀྱི་རྣམ་ཐར་ཆ་ལ་བསྟོད་པར་བགྱི། །རང་བྱུང་དཔའ་བོ་བདུད་ཀྱི་སྒྲ་གཅིག་རྒྱལ་བའི་སྲས་པོ་ཀུན་གྱི་དཔལ། །སྔོན་གྱི་སྐལ་པ་གྲངས་མེད་རྒྱ་མཚོར་སངས་རྒྱས་རྒྱ་མཚོར་བསྟན་གྱུར་ཀྱང་། །ཕྱི་མའི་མཐར་ཐུག་རྒྱ་མཚོར་འབྱུང་བའི་རྒྱལ་བ་རྒྱ་མཚོ་ཀུན་མཆོད་ཅིང་། །ཐུབ་པའི་གསང་འཛིན་རྒྱ་མཚོ་ལྟར་ཟབ་ཕྱོགས་བཅུ་རྒྱ་མཚོའི་མཐར་ཐུག་པ། །རྒྱལ་བ་ཀུན་གྱི་དྲུང་ན་ཁྱོད་སྣང་ཁྱོད་ནི་གར་ཡང་འགྲོ་འོང་བྲལ། །དུས་གསུམ་གཤེགས་པའི་རྒྱལ་བ་ཀུན་དང་ཐུགས་ཀྱི་དགོངས་པ་རབ་མཉམ་ཞིང་། །རྒྱལ་བ་ཀུན་གྱི་གསུང་དབྱངས་ཅི་སྙེད་ཁྱོད་ཀྱི་གསུང་དང་དབྱེར་མེད་འདྲེས། །དེ་རྣམས་སྐུའི་སྤྲུལ་པ་ཅི་སྙེད་ཁྱོད་ཀྱི་སྤྲུལ་པའང་དེ་སྙེད་དེ། །འོན་ཀྱང་བདག་ནི་ལམ་ལ་སློབ་ཅེས་རྒྱལ་སྲས་འདུས་པ་ཀུན་ལ་སྟོན། ཁྱོད་ཀྱི་སྒྱུ་མ་རབ་ཏུ་འཇིགས་མེད་ནམ་མཁའི་དབྱིངས་པས་སྲ་བ་འདི། །རྡོ་རྗེ་རིན་ཆེན་དཔལ་ལྡན་དབང་པོའི་སྤྱོད་ཡུལ་ཀུན་ལས་འདས། །སྐད་ཅིག་དབང་བསྐུར་འོད་ཟེར་ཆེན་པོས་དུས་གསུམ་རྒྱལ་བ་ཀུན་ཀྱིས་མཛད། །སེམས་ཅན་ཁམས་ཀུན་མཐུན་པར་འཇུག་ཅིང་རྒྱལ་བ་རྣམས་དང་གཅིག་པའི་འཕྲུལ། འདི་ཡི་ཚུལ་མཐོང་སེམས་འདི་སྒྲག་ནས་ཞིག་པར་མ་གྱུར་ཁྱོད་ཀྱི་མཐུ། ཁྱོད་ཀྱི་མཛད་པ་འདི་ཤོང་གྱུར་པའི་ནམ་མཁའ་འདི་མ་རལ་བ་འཇིགས། །ཉན་རང་རྒྱལ་སྲས་དཔའ་བོ་སྟོབས་ལྡན་ཀུན་ཀྱང་འདི་ཡིས་སྐྲག་མིན་ནམ། །ཨོཾ་ངོ་མཚར་བ་སྤུའི་ཁུ་བུ་གཅིག་ནས་སེམས་ཀྱི་སྐད་ཅིག་གཅིག་ལ་ནམ་མཁའི་ཁྱོན། །མེ་ཏོག་བདུག་པ་སྒྲོན་མེའི་ཚོགས་དང་དྲི་ཆབ་ཞལ་ཟས་རོ་མཆོག་སིལ་སྙན་དཔག་མེད་སྤྲིན། །གདུགས་དང་བླ་རེས་ན་བཟའ་ལྡ་ལྡི་རབ་བཀྲ་དྲི་མེད་རིན་ཆེན་ཁྲོ་མཆོག་དཔག་མེད་སྤྲིན། །རིན་ཆེན་རྒྱན་མཆོག་དབུ་རྒྱན་དཔུང་རྒྱན་སྣང་བྱེད་དོ་ཤལ་ཡན་ལག་སྤྲས་པའི་སྤྲིན། །ལྷ་དང་ལྷ་མོ་མཛེས་པའི་གར་བྱེད་དབྱངས་ཀྱི་ཡན་ལག་རྒྱ་མཚོ་བསྟོད་པའི་སྒྲ་དབྱངས་སྤྲིན། །རབ་ཏུ་སྤྲོ་བྱེད་རྒྱལ་བ་གཅིག་ལ་མཆོད་པར་བྱེད་ལྟར་དུས་གསུམ་རྒྱལ་བ་ཐམས་ཅད་མཆོད། །སེམས་ཅན་ཁམས་དང་མཉམ་པའི་སྤྲུལ་པ་སྣ་ཚོགས་དཔག་ཏུ་མེད་པའི་ཕྲན། ལྷ་དབང་ཚངས་པ་འཕྲོག་བྱེད་ཞི་བ་ལུས་ངན་འཇིག་རྟེན་སྐྱོང་འདྲ་དང་། །ཉི་མ་ཟླ་བ་དབང་ཕྱུག་ཆེན་པོ་ལྷ་མིན་དབང་པོ་ནམ་མཁའ་ལྡིང་། །འཁོར་ལོས་སྒྱུར་དང་མཛེས་པའི་མི་མོ་སྣ་ཚོགས་ཚུལ་ལྡན་ཡིད་གཡོ་དང་། ལ་ལར་གཤིན་རྗེ་མཐར་བྱེད་ཁྲོ་ཚོགས་རབ་འབར་བཟོད་པར་བཀའ་བའི་སྤྲིན། །ལ་ལར་ཉན་ཐོས་རྣམ་ཐར་ཞི་བ་རང་རྒྱལ་ལྟ་བུ་དང་། །ལ་ལར་ས་བཅུའི་དབང་ཕྱུག་སྣ་ཚོགས་ཕྱིན་བཅུ་སྤྱོད་མཛད་ཅིང་། །ལ་ལར་མཆོག་གི་སྤྲུལ་པ་ཆེན་པོ་མཛད་པ་བཅུ་གཉིས་མཛད་པའི་སྤྲིན། །སེམས་ཀྱི་སྐད་ཅིག་རེ་རེ་ལ་ཡང་ཆོས་དབྱིངས་ནམ་མཁའི་མཐར་ཁྱབ་སྟོན། །དུས་གསུམ་གཤེགས་པའི་སངས་རྒྱས་ཐམས་ཅད་ཞིང་དང་འཁོར་དུ་བཅས་པ་ཡང་། །རང་གི་བ་སྤུའི་ཁུང་བུ་གཅིག་དུ་སྟོན་པའི་རྫུ་འཕྲུལ་སྟོབས་མངའ་བ། གསུང་གཅིག་ལ་ཡང་དེ་སྙེད་ཆོས་ཀུན་ཚིག་གཅིག་མ་ལུས་སྒྲ་དབྱངས་སྟོན། ཏིང་འཛིན་གཅིག་གིས་ཤེས་བྱའི་གནས་རྣམས་ཀུན་དང་མཉམ་པའི་ཏིང་འཛིན་འཇུག །རྟོག་པ་མི་མངའ་སེམས་ཅན་ཁམས་ཀྱི་རྣམ་རྟོག་ཀུན་དང་དུས་གཅིག་མཁྱེན། །སྨོན་ལམ་རྣ་ཐར་ཚུལ་འདི་མཐོང་པའི་རྒྱལ་སྲས་དཔའ་བོ་མ་ལུས་པ། ཀུན་བཟང་སྤྱོད་ལ་གནས་པར་ཤོག་ཤེས་དུས་གསུམ་ཀུན་དུ་དར་དིར་བསྒྲོགས། ཁྱེད་ཀྱི་མཚན་ཐོས་སྐད་ཅིག་ཞག་དང་ཟླ་བ་ལོ་དང་སྐལ་པ་དང་། བསྐལ་པ་བརྒྱ་སྟོང་གྲངས་མེད་དཔག་མེད་ཡོངས་སུ་སྨིན་པའི་སེམས་ཅན་ཁམས། །སྐད་ཅིག་རེ་རེ་སྟོང་གསུམ་རྡུལ་ཕྲན་གྲངས་པས་མང་པ་རྣམ་པར་གྲོལ། །མཆོག་གི་སྤྲུལ་པ་རྒྱལ་བ་ཀུན་གྱི་མཛད་མི་སྤྱོད་པ་སྐད་ཅིག་མཛད། །འོན་ཀྱང་མོས་དང་ཆོག་ཤེས་མི་མངའ་འདོད་ཆགས་འདི་འདྲ་ཀྱེ་མ་མཚར། །བདུད་དང་ལོག་འདྲེན་མཐུ་ཆེན་འཇོམས་པའི་ཞེ་སྡང་འདི་འདྲ་ཀྱེ་མ་འཇིགས། །རྟོག་པའི་མཚན་མ་རྡུལ་ཙམ་མི་གཡོ་གཏི་མུག་ཆེན་པོར་ཞུགས་པ་དམ། །དུས་གསུམ་རྒྱལ་དང་འཕྲིན་ལས་མཉམ་ཞེས་ང་རྒྱལ་འདི་འདྲ་གསུང་པ་ཐོས། །རྣམ་ཐར་འདི་འདྲ་བདག་གི་སྟོན་ཅེས་ཕྲག་དོག་ཆེན་པོ་སྲིད། །འདི་འདྲའི་ཡེ་ཤེས་ཉོན་མོངས་མིང་ཅན་མཉམ་པར་འཛིན་པ་གསང་བདག་ཅེས། །རྡོ་རྗེ་ཐེག་པ་བསྡུས་པར་བྱེད་པ་རྡོ་རྗེ་ཟླ་བ་དྲི་མེད་ཅན། །རྒྱལ་བ་ཀུན་གྱི་སྙན་དུ་གྱུར་པ་གསུང་གི་དབང་ཕྱུག་རྡོ་རྗེ་ཆོས། དྲུག་པ་ཡིད་རྣམས་ཀུན་དང་འདྲེས་གྱུར་ཀུན་ཏུ་བཟང་པོ་རྒྱལ་བའི་ཐུགས། །དེ་ལ་སོགས་པའི་མཚན་གྱི་རྣམ་གྲངས་སེམས་ཅན་ཀུན་གྱི་མིང་པས་མང་། །རྣམ་ཐར་ཚུལ་འདི་ཐུབ་པའི་དབང་པོས་ཤིན་ཏུ་རྒྱས་པའི་མདོ་ལས་གསུངས། །དེའི་སླད་དུ་མོས་པའི་རྡུལ་ཕྲན་འཐོར་བའི་ཚིག་འདི་ཆ་ཤས་ཙམ། །ཨེ་མའོ་རྒྱལ་སྲས་ཀུན་ཏུ་བཟང་། །སྔོན་གྱི་སྐལ་པ་རྒྱ་མཚོ་ནས། དུས་རིང་རྗེས་སུ་སྐྱངས་གྱུར་ཀྱང་། །ད་དུང་ཁྱོད་རྗེས་མི་འཇུག་པའི། །འགྲོ་བའི་ཀུན་རྟོག་མཐུ་དང་ལྡན། །སངས་རྒྱས་ཀུན་གྱི་ཁྱོད་བསྔགས་ཀྱང་། །བསྟོད་པའི་ཚིག་གཅིག་མ་བརྗོད་པའི། །བདག་ཅག་སེམས་ཅན་ཤིན་ཏུ་རྨོངས། །འཇམ་དབྱངས་སྤྱན་རས་གཟིགས་སོགས་ཀྱང་། །ཁྱོད་ཀྱི་རྣམ་ཐར་རྗེས་སློབ་ན། །ཆ་ཤས་ཙམ་ཡང་མི་འཇུག་པའི། ཁམས་གསུམ་འགྲོ་བ་འདི་ཅི་ཞིག །རྒྱལ་བ་ཀུན་གྱི་སྲས་ཀྱི་མཐུ་བོ་པ། །གང་གི་མིང་ནི་ཀུན་ཏུ་བཟང་ཞེས་བྱ། །མཁས་པ་དེ་དང་མཚུངས་པ་ཡོད་མིན་ཞེས། །ཐུབ་དབང་གིས་གསུངས་རྗེས་སུ་ཡིད་རང་སད། །དེ་ཕྱིར་ཞིང་ཀུན་མཚོའི་མཆོད་སྤྲིན་དང་། །ལུས་དང་ལོངས་སྤྱོད་ཀུན་གྱིས་ཁྱོད་རབ་མཆོད། སྔོན་གྱི་སྡིག་པ་མི་དགེ་ཅི་ཡོད་དང་། །ལྟུང་བའི་ཉེས་པ་ལས་ཀྱི་སྒྲིབ་པ་ཀུན། །ཤིན་ཏུ་འགྱོད་པས་ཁྱོད་དྲུང་བཤགས་པར་བགྱི། །སླད་ཆད་ནམ་ཡང་བགྱི་པར་མ་གྱུར་ཅིག །ཕྱོགས་དུས་རྒྱ་མཚོར་བཞུགས་པའི་རྒྱལ་བ་ལ། །འགྲོ་བའི་བློ་མུན་སེལ་བར་བྱ་བའི་ཕྱིར། །ཆོས་ཚུལ་རྒྱ་མཚོའི་འཁོར་ལོ་བསྐོར་བར་བསྐུལ། །སྐལ་པ་རྒྱ་མཚོའི་འཁོར་ལོ་བསྐོར་བར་བསྐུལ། །སྐལ་པ་རྒྱ་མཚོའི་དཔག་ཏུ་མེད་པ་རུ། །མྱ་ངན་མི་འདའ་བཞུགས་པར་གསོལ་བ་འདེབས། །སྦྱིན་དང་ཚུལ་ཁྲིམས་བཟོད་དང་བརྩོན་འགྲུས་དང་། །བསམ་གཏན་ཤེས་རབ་ཐབས་མཁས་རྨད་བྱུང་དང་། །སྨོན་ལམ་སྟོབས་དང་ཡེ་ཤེས་རྒྱ་མཚོ་ཡིས། །སྤྱོད་པ་ཐམས་ཅད་ཡོངས་སུ་རྫོགས་གྱུར་ཅིག །བྱང་ཆུབ་སེམས་ནི་ནམ་ཡང་རྗེད་མ་གྱུར། །སངས་རྒྱས་རྒྱ་མཚོ་རྟག་ཏུ་མཐོང་བར་ཤོག །ཆོས་ཚུལ་རྒྱ་མཚོ་རྟག་ཏུ་ཉན་པ་དང་། ཚུལ་ཁྲིམས་རྒྱལ་མཚོའི་དྲི་བསྲུང་སྣོམ་པ་དང་། ཐེག་ཆེན་རྒྱ་མཚོའི་རོ་རྣམས་མྱོང་བ་དང་། ཏིང་འཛིན་རྒྱ་མཚོའི་རེག་བྱ་ཀུན་མྱོང་ནས། ཡེ་ཤེས་རྒྱལ་མཚོའི་རྟོགས་པ་ཐོབ་གྱུར་ཅིག །ཞིང་ཁམས་རྒྱ་མཚོ་རྟག་ཏུ་སྦྱོང་བ་དང་། རྒྱལ་བ་རྒྱལ་མཚོ་ཐམས་ཅད་མཉེས་བགྱིད་ཅིང་། །སེམས་ཅན་རྒྱ་མཚོའི་སྡུག་བསྔལ་སེལ་བ་དང་། བདེ་མཆོག་རྒྱ་མཚོ་རྟག་ཏུ་སྦྱིན་གྱུར་ཅིག །རྒྱལ་སྲས་རྒྱ་མཚོ་ཀུན་དང་འགྲོགས་པ་དང་། ཐེག་མཆོག་རྒྱ་མཚོའི་ཐབས་རྣམས་ཀུན་བཟུང་ནས། །ཉོན་མོངས་རྒྱ་མཚོ་ཤིན་དུ་དག་བྱེད་ཅིང་། །རྣམ་ཐར་རྒྱ་མཚོ་སྒྱུ་མ་ལྟར་སྦྱོང་ཤོག །ཚེ་རབས་རྒྱ་མཚོ་སྐྱེ་བ་ཐམས་ཅད་དུ། །མི་ཁོམ་རྒྱ་མཚོ་ཐམས་ཅད་རབ་སྤངས་ནས། །དལ་འབྱོར་རྒྱ་མཚོའི་ཡོན་ཏན་མ་ལུས་པ། །སེམས་ཅན་རྒྱ་མཚོས་རྟག་ཏུ་ཐོབ་པར་ཤོག །བདག་ནི་རྟག་ཏུ་མ་སྲས་པོ་དང་། །སྤྱན་རས་གཟིགས་དབང་མགོན་པོ་འཇམ་དཔལ་དབྱངས། ཀུན་ཏུ་བཟང་པོ་ཁྱོད་དང་མི་འབྲལ་ཞིང་། རྣམ་ཐར་ཚུལ་ལ་མཉམ་པར་འཇུག་པར་ཤོག །བདག་གིས་ཅུང་ཟད་དང་བས་གསོལ་བ་ཡིས། །སྨོན་ལམ་འདི་ལ་དགེ་བ་ཅི་ཡོད་པས། རྒྱལ་བ་ཀུན་གྱིས་སྤངས་པའི་སེམས་ཅན་རྣམས། །བདག་གིས་ལམ་ལ་འགོད་པའི་རྒྱུར་གྱུར་ཅིག སེམས་ཅན་གང་དག་བདག་ལ་སྡང་པ་དང་། ཆགས་པའི་རྣམ་རྟོག་ཚུལ་མིན་སྐྱེས་པ་དང་། །མཐོང་དང་ཐོས་དང་རེག་དང་དྲན་རྣམས་ཀྱང་། །མྱུར་དུ་ཕྱིར་མི་ལྡོག་པ་ཐོབ་གྱུར་ཅིག །བདག་གི་སྨོན་ལམ་ཤིན་ཏུ་འགྲུབ་པར་ཤོག བཅོམ་ལྡན་འདས་ཀུན་ཏུ་བཟང་པོ་ལ་བསྟོད་ཅིང་སྨོན་ལམ་བཏབ་པ་ཞེས་བྱ་བ། །ཀུན་ཏུ་བཟང་པོ་རྣམ་པར་ཐར་པ་ལ་མོས་པ་ལམ་དུ་བྱེད་པའི་རང་བྱུང་རྡོ་རྗེའི། སྙན་ངག་གི་སྡེབས་སྦྱོར་མེད་པར་གོ་བདེ་བའི་ངག་ཏུ། ནགས་ཕུ་དཔལ་གྱི་རི་ཁྲོད་དུ་སྦྱར་བའོ། །རྗེས་འཇུག་ཀུན་གྱིས་འདོན་པ་ལ་བརྩོན་པར་མཛད་པར་ཞུ།། །།

མཚུར་ཕུའི་བསྟོད་པ་བཞུགས་སོ། །བཅོམ་ལྡན་འདས་ཐུགས་རྗེ་ཆེན་པོ་དང་ལྡན་པ་ཤཱཀྱ་ཐུབ་པ་ཕྱག་འཚལ་ལོ། །བདེ་ལེགས་དང་ལྡན་སུམ་ཅུའི་མཚན་དཔེས་བརྒྱན་པའི་སྐུ། །ཡན་ལག་དྲུག་བཅུའི་ཆོས་སྒྲ་མ་ལུས་སྟོན་པའི་གསུང་། །ཇི་ལྟ་བ་དང་ཇི་སྙེད་མ་ལུས་མཁྱེན་པའི་ཐུགས། མགོན་པོ་བཅོམ་ལྡན་ཐུགས་རྗེ་ཅན་ལ་གུས་པས་འདུད། །དུས་གསུམ་རྒྱལ་སྲས་རྒྱལ་བ་རྒྱ་མཚོ་ཡི། །བྱིན་རླབས་མཆོག་ཐོབ་བཀའ་བརྒྱུད་བླ་མ་དང་། གྲུབ་ཐོབ་བྱོན་གནས་དཔལ་གྱི་མཚུར་ཕུ་ཡི། །མཚན་ཉིད་ཇི་ལྟར་བརྗོད་པར་མི་ནུས་ཀྱང་། །རེ་ཤིག་རྟེན་པས་མངོན་དུ་གྱུར་པ་དང་། །ཞིང་འདིའི་ཡོན་ཏན་བརྗོད་ལ་སྤྲོ་གྱུར་པས། །མཚན་ཉིད་ཆ་སྨོས་བདག་གིས་བརྗོད་པར་བྱ། །སྟོང་གསུམ་འཇིག་རྟེན་ཡ་མཚན་ཕུལ་བྱུང་པའི། །དྲི་མེད་གནས་མཆོག་འཛམ་གླིང་འདི་ཉིད་དང་། །ཡ་མཚན་མཚར་སྡུག་ལྡན་པའི་སྙིང་པོ་འདི། །རི་རྒྱལ་ཆེན་པོ་གངས་རིའི་ཤར་ཕྱོགས་ལས། །བསིལ་བའི་ཆུ་རྒྱུན་ལོ་ཧི་ཏ་འབབ་ཅིང་། །དེ་རྒྱུད་དབུས་གཙང་རིག་པའི་འབྱུང་གནས་ཀྱི། །མཆོད་གནས་དམ་པ་ཤཱཀྱའི་རྒྱལ་པོའི་སྐུ། །དེ་དང་ཉེ་བའི་ས་ཕྱོགས་མཚུར་གྱི་ཕུ། །གནས་འདིའི་བྱིན་བརླབས་མདོ་ཙམ་བརྗོད་པ་ན། །ཤཱཀྱའི་རྒྱལ་པོ་མངོན་པར་སངས་རྒྱས་ནས། །སྟོང་གསུམ་ཀུན་ཏུ་ཞབས་ཀྱིས་བཅགས་པ་ན། །གནས་འདིར་བཅོམ་ལྡན་རྒྱལ་སྲས་རྒྱ་མཚོའི་ཚོགས། །བྱོན་ཅིང་བྱིན་བརླབས་ཞབས་ཀྱིས་བཅག་པར་ཁུམས། །གཞན་ཡང་བཅོམ་ལྡན་ཐུབ་ཆེན་སེང་གེ་ཡིས། །ལུང་བསྟན་རྒྱལ་སྲས་ཟླ་འོད་གཞོན་ནུ་ཡིས། །མཛད་པའི་འཕྲིན་ལས་བོད་འདིར་མཛད་པའི་དུས། །རྒྱལ་སྲས་བྱིན་བརླབས་སེང་གེ་སྒྲ་དེ་ལ། །ལུང་བསྟན་མཛད་ཅིང་སྣང་བ་འདི་ལྟར་མཛད། །རི་བོ་རིན་ཆེན་མཆོག་འདྲའི་ངོས་ལ་ནི། །རྒྱལ་བས་བཞུགས་པའི་རྒྱབ་ཡོལ་པད་འདབ་ལྟར། ཤིན་ཏུ་མཛེས་གནས་བྱམས་པའི་སྐུ་ཡོད་ས། །དེར་སོང་དངོས་གྲུབ་དམ་པ་མཆོག་ཐོབ་ཅེས། །ལུང་བསྟན་མཛད་ཅིང་རྗེས་སུ་གནང་བ་ཐོབ། །དེ་ནས་ཅུང་ཞིག་ལོན་ནས་དམ་པ་ཡིས། གནས་འདི་བྱིན་བརླབས་དག་པའི་སྣང་བ་གཟིགས། །དེ་ནས་གཞན་ཡང་དཔལ་ལྡན་རིན་ཆེན་གྱིས། །བྱོན་ཅིང་བྱིན་བརླབས་ཡོན་ཏན་དམ་པ་ཐོབ། །དེ་ནི་སྔོན་དུ་བྱུང་བའི་གཏམ་རྒྱུད་ཡིན། །ད་ནི་རི་རྒྱལ་མཆོག་གི་བསྟན་ཚིགས་བཤད། །ཡ་མཚན་མཚར་སྡུག་ལྡན་པའི་རི་བོ་འདི། །ལྷ་དབང་བརྒྱ་བྱིན་གདན་བཞུགས་ལྟ་བུར་གནས། །རི་ཕྲན་རྣམས་ནི་ལྷའི་དབང་པོ་ལ། །ཉེ་དབང་སྲིད་ཞུ་འདུད་པའི་ཚུལ་དུ་གནས། །རི་དེ་ཉིད་ནི་རིན་ཆེན་སྤུངས་པ་ལྟར། །ཡ་མཚན་མཚར་སྡུག་ལྡན་པའི་འོད་ཟེར་ཅན། །འདི་འདྲ་གང་ཞིག་མཐོང་བ་དཔལ་ཡོན་ཅན། །འདིར་གནས་བྲག་རི་ཁྱུང་ཆེན་ལྡིང་བ་འདྲ། རང་བྱོན་ལྷ་ཚོགས་ཡིག་འབྲུ་སྣ་ཚོགས་གནས། །རིན་ཆེན་དང་མཚུངས་བྲག་རི་འོད་འབར་བ། །ཀུན་ནས་བལྟས་པས་སྐྱེ་དགུའི་ཡིད་འཕྲོག་བྱེད། །སྐབས་སྐབས་དག་ན་ཤིན་ཏུ་བདེ་ཡངས་པའི། །སྤང་གནས་དེ་ནས་མེ་ཏོག་ཚོགས་བསྐྱེད་པ། །སེར་བུས་སྐྱེད་པས་དྲི་བསུང་ངད་ལྡན་ཞིང་། བདེ་གནས་བུང་བའི་ཚོགས་རྣམས་མ་ལུས་ཀུན། །སྙན་པའི་མདངས་ཆགས་དང་ཡིད་འཕྲོག་བྱེད་ཡིན། །འདིར་ནས་མེ་ཏོག་རིགས་ནི་བརྒྱ་ཕྲག་གཅིག །སྡུག་བསྔལ་ནད་ཀྱི་ཟུག་རྔུ་སེལ་བྱེད་པ། །སྨན་གྱི་མཆོག་གྱུར་རྣམས་ཀྱང་བརྒྱ་ཕྲག་སྟེ། །སྨན་དང་མེ་ཏོག་བསྐྱེད་བྱེད་བརླན་པ། བྱེད་འགྱུར་ཆུ་མིག་རྒྱ་དང་རྩ་བརྒྱད་ཡོད། །གྲུབ་ཐོབ་རྣམས་ཀྱི་བཞུགས་གནས་ཕུག་པ་བརྒྱ། །སྔོ་ལྡུམ་ཟས་ཀྱི་བྱེ་བྲག་བརྒྱ་རྣམས་དང་། །ཤིང་མཆོག་རིགས་ནི་བྱེ་བྲག་བརྒྱ་རྣམས་ཡོད། །དེར་གནས་སེམས་ཅན་རི་དྭགས་ཚོགས་རྣམས་ཀྱང་། །ཕན་ཚུན་འཇིགས་དང་བག་ཚའི་སེམས་བྲལ་ཞིང་། མིག་ཟུམ་མགྲིན་པ་སྐྱོགས་ཏེ་དེར་གནས་པ། རྩེ་དགར་རོལ་མོའི་དཔལ་མཆོག་དཔལ་གྱིས་མཛེས། །རི་འདི་སྤྱན་རས་གཟིགས་ཀྱི་བྱིན་བརླབ་པས། །འདིར་དུས་དད་ལྡན་ལྷ་མིར་བཅས་པ་ཀུན། སྙིང་རྗེའི་བསམ་པས་འགྲོ་ལ་བུ་བཞིན་རྩེ། །གཞན་ཡང་རི་འདིའི་རྩེ་ནས་བལྟས་པའི་ཚེ། །ཤར་གྱི་ཕྱོགས་རོལ་དཔག་ཚད་གསུམ་ཙམ་མཐོང་། །བཅོམ་ལྡན་རྒྱལ་བ་ཉིད་ཀྱི་བྱིན་བརླབས་པའི། །ཤཱཀྱའི་རྒྱལ་པོ་བཅུ་གཉིས་པ་དང་ནི། །བརྒྱད་པའི་མཚན་དང་ངོ་མཚར་མཆོག་གྱུར་པ། །ལྷ་མིའི་རིན་ཆེན་སྣ་བདུན་ལས་གྲུབ་པའི། །བཟོ་རྒྱལ་ལྷ་མཆོག་ཉིད་ཀྱིས་བཞེངས་པ་ཡི། །ཡ་མཚན་ཕུལ་བྱུང་ཤཱཀྱའི་རྒྱལ་པོའི་སྐུ། །བཞུགས་པའི་ལྷ་ཁང་ངོ་མཚར་ཅན་དེ་མཐོང་། །གཞན་ཡང་བྱང་ཆུབ་སེམས་དཔའ་སྤྱན་རས་གཟིགས། །ཉིད་ཀྱི་སྤྲུལ་པའི་རྒྱལ་པོ་ཆེན་པོ་ཡིས། །ཐུགས་དམ་རང་བྱོན་སྤྱན་རས་གཟིགས་ཀྱི་སྐུ། །བྱིན་རླབས་ལྡན་པའི་ལྷ་མཆོག་དེ་ཡང་མཐོང་། སྤྱན་རས་གཟིགས་དབང་སྤྲུལ་པའི་རྒྱལ་པོ་ཡིས། །བྱོན་པའི་ཕོ་བྲང་ཉིད་ཀྱང་གསལ་བར་མཐོང་། །གཞན་ཡང་འཇམ་པའི་དབྱངས་ཀྱི་རྣམ་འཕྲུལ་གྱི། །རྒྱལ་པོ་ཆེན་པོ་བཞུགས་པའི་རི་ཡང་མཐོང་། །གཞན་ཡང་མཐུ་སྟོབས་གསང་བའི་བདག་པོ་ཡི། །སྤྲུལ་པའི་རྒྱལ་པོ་རལ་པ་ཅན་བྱོན་པའི། ཕོ་བྲང་རི་བོ་དེ་ཡང་མཐོང་བ་ཡིན། །འདས་དང་མ་འོངས་ད་ལྟར་གསུམ་མཁྱེན་པའི། །རྒྱ་གར་མཁས་པ་བརྒྱ་དང་སུམ་བཅུ་གཉིས། །བྱོན་དང་བཞུགས་པའི་རི་ཡང་མཐོང་བ་ཡིན། །དེ་སོགས་ཡ་མཚན་ཕུལ་བྱུང་པ། །བསམ་གྱིས་མི་ཁྱབ་བརྗོད་ཀྱིས་མི་ལངས་སྟེ། །མཐོང་ཚུལ་མདོ་ཙམ་འདིར་ནི་བཀོད་པ་ཡིན། །ས་སྟེང་ཡ་མཚན་རི་བོ་ཕུལ་བྱུང་པ། །བསིལ་བའི་མདངས་ཆགས་གངས་རིའི་མཐའ་བསྐོར་ཅན། །ཡ་མཚན་རྨད་བྱུང་དཔག་ཏུ་མེད་པ་གནས། །དེ་ནས་མདུན་གནས་རི་བོའི་མཚན་ཉིད་ནི། །གཞན་དག་ཚུལ་མཐུན་གོང་དང་འདྲ་གནས་ཤིང་། ཁྱད་པར་དུ་ཡང་ལྗོན་པའི་ཚོགས་གནས་པ། །དཔྱིད་དུས་བཟང་ལ་ལོ་འདབ་ལྷག་འགྱུར་ཏེ། མེ་ཏོག་ཚོགས་ཀྱིས་ཡོངས་སུ་བཀྲ་བར་གནས། །རླུང་གིས་བསྐྱོད་པའི་གར་ཐབས་གཡོ་བ་ལས། །མེ་ཏོག་རྣམས་མང་སྤུང་སྤུང་འཐོར་བར་བྱེད། གཞན་ཡང་དེ་ལྟར་དེ་གནས་ཕུ་དེ་ན། །ཀུ་མུད་དཔུངས་པའི་རི་བོ་དངས་བསིལ་བ། །རྒྱལ་བའི་མིང་ཅན་གནས་ཤིང་དེ་ནས་ནི། །ཟིལ་དངར་ལྡན་པའི་རྒྱུན་འབབ་བྱེད་ཅིང་། །འགྲོ་ཚོགས་སྐོམ་པའི་སྡུག་བསྔལ་སེལ་བྱེད་ཡིན། །གཞན་ཡང་ལྷ་ཚོགས་མཚན་མའི་ཁྱད་པར་ནི། །རྒྱབ་ཀྱི་རི་ལ་རྟ་མཆོག་ཧེ་རུ་ཀ །དེ་ལྟར་དེ་འདྲར་ཤཱཀྱའི་རྒྱལ་པོའི་སྐུ། །དེ་མདུན་རི་ལ་སྒྲོལ་མའི་སྐུ་ཉིད་དང་། །གཞན་ཡང་བསམ་གྱི་མི་ཁྱབ་གནས་བོད་ཀྱི། །རྒྱས་པར་བརྗོད་ཀྱིས་མི་ལང་གྲངས་ལས་འདས། །སྤྱིའི་བསྟན་ཚིགས་མདོ་ཙམ་བརྗོད་པ་ཡིན། །ནམ་ཟླ་དུས་བཞི་སོ་སོའི་ཁྱད་པར་ནི། །དཔྱིད་དུས་གསུམ་གྱི་རྣམ་པ་འདི་ལྟ་སྟེ། །དུས་མཐུན་བསིལ་ཡབ་རྗེས་མཐུན་རླུང་བཅས་ཞིང་། །ལྗོན་སོགས་ལོ་འདབ་གསེར་བུ་རབ་ཏུ་འཁྲུངས། སིལ་སྙན་ཚོགས་རྣམས་སྒྲ་སྙན་རྒྱུན་དུ་འཁྲོལ། །སྤྲིན་དཀར་ཞི་བ་མེ་ཏོག་ཆར་དཀར་འབབ། །མཐོ་ཁྱད་ལྷུན་མཛེས་ལྡན་པའི་རི་བོ་དང་། །བདེ་གནས་སྤང་ཚོགས་སྔོ་ལྡུམ་རྒྱས་པར་བྱེད། །དབྱར་གསུམ་དུས་ཀྱི་རྣམ་པ་འདི་ལྟ་སྟེ། །ཤིང་མཆོག་མེ་ཏོག་སྣ་ཚོགས་བཀྲ་བ་དང་། །ལྗོན་ཚོགས་སྟེང་ན་བྱ་སྐད་སྙན་སྒྲོགས་པ། །ལྷའམ་དྲི་ཟའི་གླུ་དབྱངས་ཟིལ་གྱིས་ནོན། །སྤྲིན་དཀར་ཞི་བའི་འཇའ་འོད་ཚོགས་བཅས་རྣམས། །འབྲུག་སྒྲ་ཆེམ་ཆེམ་མཁའ་ལ་སྒྲོགས་པ་དང་། །བསིལ་བའི་ཆར་རྒྱུན་མཁའ་ལ་འབབ་པ་དང་། །བསིལ་བྱེད་སེར་བུ་ཅུང་ཟད་བསྐྱོད་པ་ཡིས། །མེ་ཏོག་དག་ལ་དྲི་ཞིམ་སྣ་ཚོགས་ལྡན། །བཻ་ཌཱུར་སྔོ་བའི་མདངས་གསལ་ནས། །སྟོན་གསུམ་དུས་ཀྱི་རྣམ་པ་འདི་ལྟ་སྟེ། །རྩི་ཤིང་སྔོ་ལྡུམ་འབྲས་བུའི་ཚོགས་རྣམས་སྨིན། །ས་དང་རི་ངོས་གསེར་གཙོ་ལྟར་དུ་སེར། །དངས་བསིལ་ཀུ་མུད་ཆར་ལྟར་འབབ་པའི་དུས། །རི་བོ་དཀར་བསིལ་ཤིན་ཏུ་དངས་པར་བྱེད། །གཞན་ཡང་དགུན་གསུམ་རྣམ་པ་འདི་ལྟ་སྟེ། །བསིལ་ཆགས་ཟིལ་མངར་སྟོང་གི་ངར་བ་ལྟར། །འོད་ཆགས་སྤྲིན་དཀར་ཞི་བའི་གདུགས་མཛེས་ཤིང་། །ཉི་མ་ཟླ་བའི་ཅོད་པན་གྱིས་མཛེས་པ། །དུས་མཐུན་མཚར་ཆགས་ལྡན་པ་བསིལ་བ་ཡིན། །མཆོག་གནས་གནས་འདི་ཤིན་ཏུ་ངོ་མཚར་གནས། །གང་གིས་མཐོང་དང་ཐོས་དང་དྲན་ཙམ་གྱིས། ཡོན་ཏན་བསམ་འདས་བརྗོད་ཀྱིས་མི་ལང་བ། །ཡོད་པའི་གནས་མཆོག་དམ་པ་འདི་རེ་མཚར། །དེ་ལྟར་དེ་དབུས་དགོན་པ་འདི་ཉིད་ནི། །ཤཱཀྱའི་རྒྱལ་པོ་སྟོན་པ་འདི་ཉིད་ཀྱི། །སྐུ་གཟུགས་རིན་ཆེན་མཆོག་ལས་བྱས་པ་ཡིས། །འདོམ་པ་བདུན་དང་ལྡན་པའི་རྟེན་ཡང་ཡོད། །དགྲ་བཅོམ་ཉི་མ་གུང་གི་ཚེམས་ཀྱང་བཞུགས། །རྣལ་འབྱོར་དབང་ཕྱུག་མིད་ལའི་གསོལ་ཞལ་དང་། གཞན་ཡང་རྟེན་ཚོགས་བསམ་གྱིས་མི་ཁྱབ་པ། །བཞུགས་ཤིང་འཇིག་རྟེན་མཆོད་པའི་གནས་གྱུར་ཡོད། །འདོམ་བདུན་ལྷུན་པོའི་དཔལ་དང་ནི། །བྱང་སེམས་རིགས་ལྔའི་སྐུ་དག་དང་། །བྱམས་མགོན་སྤྱན་རས་གཟིགས་དབང་དང་། །ཐུགས་རྗེ་ལྡན་པའི་སྐུ་ཡང་བཞུགས་པ་ཡིན། ཁ་སར་པཱ་ནིའི་ལྷ་ཁང་དང་མཚུངས་པའི། །མགོན་པོ་ཐུགས་རྗེ་ལྡན་པའི་ལྷ་ཁང་ཡོད། །གཞན་ཡང་དཔལ་ལྡན་བླ་མའི་སྐུ་དང་ནི། །རྒྱ་གར་ཤར་ཕྱོགས་དབུས་འགྱུར་གནས་པ་ཡིན། །དཔལ་ལྡན་འབྲས་ཕུང་ཉིད་དང་མཚུངས་པ་ཡི། །མཚར་སྡུག་ཡ་མཚན་ལྡན་པའི་མཆོད་བརྟེན་དང་། །རྟེན་གྱུར་མཆོད་པའི་བྱེ་བྲག་དཔག་མེད་ཡོད། རྒྱས་པར་བདག་གིས་བརྗོད་ཀྱིས་མི་ལང་བས། །མཚན་ཉིད་ཅུང་ཟད་ཙམ་ཅིག་སྨོས་པ་ཡིན། །གཞན་ཡང་ཡ་མཚན་དག་ནི་བསམ་འདས་སྟེ། །ཉ་དང་སྟོང་དང་ཚེས་བརྒྱད་ལ་སོགས་སྟེ། ཚེས་གསུམ་ལ་སོགས་དུས་བཟང་ཐམས་ཅད་ལ། །ནམ་མཁའ་འཇའ་འོད་འཁྱིལ་པས་གང་བ་དང་། གཉིས་དང་གསུམ་ལ་སོགས་པས་བསྐོར་བ་དང་། །ལུང་པའི་རྣམ་པ་མ་ལུས་ཁེངས་པ་དང་། །ཤར་དང་ནུབ་དང་སྟེང་འོག་འཕྱང་བ་དང་། །མེ་ཏོག་ཆར་དང་འཇའ་འོད་སྣ་ཚོགས་ལྡན། །གསེར་གྱི་མེ་ཏོག་གསེར་གྱི་འོད་འབྱིན་དང་། །དུང་ལྟར་དཀར་བའི་དུང་གི་འོད་འབྱིན་དང་། །བཻ་ཌཱུར་ལྟར་སྔོ་བཻ་ཌཱུར་འོད་འབྱིན་དང་། །ཨི་ཏྲ་ལྟར་ལྗང་ལྗང་ཁུ་འོད་འབྱིན་དང་། ཁྲ་བོར་སྣང་དང་གཉིས་པ་སྣང་བ་དང་། །གསུམ་དུ་སྣང་དང་དེ་བཞིན་བཞིར་སྣང་དང་། །བསམ་གྱི་མི་ཁྱབ་སྣང་བའི་མེ་ཏོག་ཚོགས། །དྲི་ཞིམ་ཡིད་འོང་སྣ་ཚོགས་མདངས་གསལ་ནས། །གཞན་ཡང་ཚུལ་ལུགས་བརྗོད་ན་བསམ་མི་ཁྱབ། །ཅུང་ཟད་བདག་ཡིད་མོས་པས་བརྗོད་པ་འདི། །སྙན་ངག་སྡེབས་སྦྱོར་ཚིག་གིས་མ་འབྲེལ་དང་། །དེ་སོགས་སྐྱོན་ལ་མཁས་རྣམས་བཟོད་པར་མཛོད། །འདི་བརྩམས་དགེ་བས་ནམ་མཁའི་མཐས་ཁྱབ་པའི། །འགྲོ་བ་མ་ལུས་བྱང་ཆུབ་མཆོག་ཐོབ་ཤོག །བསྟོད་པ་དམ་པ་གནས་ཀྱི་ཚུལ་གསལ་བར་བྱེད་པ་སྙན་ངག་རྒྱན་གྱི་མེ་ཏོག་གསལ་བའི་སྒྲོན་མེ་རྫོགས་སོ། །ཤུབྷཾ།།

དབེན་གནས་ཆེན་པོ་བདེ་ཆེན་གྱི་བསྟོད་པ་བཞུགས་སོ། །ཐམས་ཅད་མཁྱེན་པ་ལ་ཕྱག་འཚལ་ལོ། །དབེན་གནས་དབེན་པའི་རྐྱེན་གྱུར་ཉོན་མོངས་རབ་དབེན་རྒྱུ། །མ་རིག་མ་ལུས་རྐྱེན་གྱུར་ཆོས་ཚུལ་དག་མ་ལགས། །རབ་ཡངས་རབ་དུ་རྐྱེན་བྲལ་ཞི་བ་དེ་རབ་མཆོག །བདེ་ཆེན་བདེ་ལྡན་རྐྱེན་གྱུར་བསམ་གཏན་བསྐྱེད་བདེ་བ། །ཕྱོགས་དང་ཕྱོགས་འཚམས་རྐྱེན་མེད་སྙན་སྒྲོགས་དཀར་ཕྱོགས་ཀྱི། །ཚུལ་ལྡན་ཚུལ་མིན་རྐྱེན་བྲལ་ཕྱོགས་སུ་གྲགས་ཚུལ་བརྗོད། ལྷུན་པོའི་རྒྱལ་པོ་གླང་པོ་ཆེ། །ས་སྲུངས་གཙུག་གི་ཅོད་པན་ལ། །ལྷ་དབང་འགྱིང་པས་བརྟན་ལྡན་ཞིང་། །ཉེ་དབང་བཀྲམ་པས་བཀོད་པ་སྙམ། །རྡོ་རྗེའི་སྙིང་པོའི་བརྒྱན་ཕྲེང་གིས། ཕྱོགས་རྣམས་ཀུན་ནས་རབ་ཏུ་བརྒྱན། སྤང་རི་འཚམས་ཀྱི་སྟོད་གཡོགས་ལ། །མེ་ཏོག་སྣ་ཚོགས་ཚོམ་བུས་རྒྱན། ན་བུན་དཀར་པོའི་ཅོད་པན་ལ། །སྤྲིན་དཀར་ཞི་བའི་གདུགས་ཀྱི་མཛེས། །དངས་པའི་ཆུ་མིག་རབ་དངས་པ། །མིག་སྟོང་ཕྱོགས་རྣམས་ལྟས་པ་བཞིན། །རི་ཕྲན་ཉེ་དབང་ལྷ་ཚོགས་ལ། །འབབ་ཆུའི་ན་ཆུང་རྐང་ཐུང་གིས། བརྒྱན་ཅིང་ཡལ་ག་གཡོ་བས་མཛེས། །མཛེས་པའི་བྱ་ཚོགས་དུ་མ་དང་། །བུང་བའི་གཞོན་ནུ་དུ་མ་ཀྱང་། འཁོར་ཞིང་ལྡིང་བར་བྱེད་པ་ནི། །དགའ་ཚལ་ཚུལ་མཚུངས་འགྲན་སྙམ་བགྱི། འདི་འདྲ་བསམ་གཏན་འཕེལ་བ་སྙམ། །རབ་དཀར་ཆོས་བཟང་བདེ་ཆེན་བདུན་ས་ན། །བསམ་གཏན་མཆོག་ལྡན་དབང་པོ་ཉེ་དབང་བཅས། །ལྷ་མིན་བདུད་ཀྱི་དཔུངས་ཚོགས་གཞོམ་པའི་ཕྱིར། །རྩེ་ཅིག་ཆོས་དོན་བགྲོ་བར་བྱེད་པ་ན། །ཤེས་རབ་རྔ་བོ་ཆེའི་སྒྲ་སྐད་ཀྱི། །ཐབས་མཁས་བསྐུལ་བར་བྱེད་ལ་ཡ་མཚན་མེད། །རྣམ་རྟོག་ནག་ཕྱོགས་ཀླུའི་སྔ་སྒྲ་དག །དཔའ་གོང་བྱེད་པ་སྙིགས་དུས་ཡ་མཚན་ཆེ། །འོག་གི་ཕྱོགས་ཀྱི་ལྷུན་པོ་རབ་བརྟན་པ། །བྲག་རིའི་མཆེ་བ་གྱེན་དུ་འཕགས་པ་དང་། །སྒང་སྒུད་སྣ་ལྗགས་ཕྱོགས་སུ་རྐྱང་བྱས་ནས། །ནགས་ཚལ་རྒྱན་ཕྲེང་བཀོད་པའི་རྒྱན་གྱིས་སྤྲས། སྣ་ཚོགས་ལོ་ཐོག་བསྐྱེད་ཚལ་རྣམས་ཀྱིས་བསྐོར། །ཡན་ལག་བརྒྱད་ལྡན་ཆུ་བོ་དུ་མ་རྣམས། །དངས་ཞིང་བསིལ་བྱེད་སྒྲ་སྙན་ལྷུང་ལྷུང་སྒྲགས། །པད་མའི་མཚོ་ན་གནས་པ་ཡིན་ནམ་སྙམ། །འདི་ཅི་དགའ་བའི་ཚལ་ཁྲོད་ན། །པད་མ་ལང་ལོང་ཨུཏྤལ་གྱིས། །འོག་ཕྱོགས་མཉམ་ལ་རྨི་ཉམས་བཞིན། བདེ་ཆེན་བཞི་པའི་དེ་མཚུངས་ལྟ། །ཆུ་བྲན་རླུང་གི་སྒྲ་དབྱངས་རྣམས། །སྣ་ཚོགས་རོལ་མོ་བརྡུངས་བ་བཞིན། །ཉི་མ་ཟླ་བ་སྐར་མ་རྣམས། །རིན་ཆེན་ཕྲེང་ལྡན་ལྷའི་བུ། །མཐུ་ཆེན་མཁའ་ལ་བསྐོར་བྱེད་ཅིང་། དུས་སུ་ལྷ་དབང་ཞབས་དྲུང་དུ། །བསྐོར་ཞིང་ཡང་ཡང་འདུ་བྱེད་ལ། །ཕན་ཚུན་གསལ་བར་མཛེས་པར་བྱེད། །ཀྱེ་མ་སྤྲིན་གྱི་རྔ་སྒྲ་རབ་གྲགས་པ། །ནམ་མཁའ་རྒོད་ཤིང་དབུགས་འབྱིན་བྱེད་པ་བཞིན། གསེར་འོད་རབ་འབར་གློག་ཕྲན་འགྱུར་བ་བཞིན། །ཡན་ལག་གར་མཛེས་བྱེད་པའི་གཟུགས་ལྡན་ཞིང་། །ཆར་ཕྲན་རིན་ཆེན་ཕྲེང་བ་འཐོར་བ་ཡིས། །སྐབས་སུ་བབ་ཚེ་སྐྱེ་འགྲོ་ལྷ་ཚོགས་རྣམས། །མགུ་བར་བྱེད་ཅིང་སེར་བུའི་ངད་ལྡན་པས། །དྲི་ཞིམ་ཕྱོགས་ཀུན་ལྡང་བའི་རོལ་མོ་མཁན། །རྣམ་གཡེང་གཉིས་བྲལ་བསམ་གཏན་རྗེས་སུ་མཐུན། །འདི་འདྲའི་དུས་ཚིགས་ལྷའི་རོལ་མོ་མཁན། །དེའི་དུས་ན་འདོད་ལྷའི་བུ་མོ་རྣམས། །ལ་ལོང་འདུ་བར་བྱེད་པ་འདི་རེ་མཚར། །བདེ་ལྡན་བདེ་བྱེད་བདེ་ལྡན་བདེ། །རབ་མཆོག་རབ་བྱུང་རབ་མཆོག་རབ། །བླ་མེད་བླ་མ་བླ་མེད་བླ། །བསྟོད་བྱེད་བསྟོད་པ་བསྟོད་བྱེད་བསྟོད། །ལྷ་ཡང་ཡིད་རབ་དད་བྱེད་ཅིང་། །ལྷ་མ་ཡིན་རས་གཡོ་བ་དང་། །མི་ལས་གཞན་རབ་ཕུལ་བྱུང་དུ། །ལྷ་མོ་མཆོག་རབ་མཛེས་པ་བཞིན། །གནས་དང་བསྟོད་པའི་ཟློས་གར་དག །ཕན་ཚུན་བསྟོད་པའི་ཟློས་གར་གནས། །གར་གནས་བསྟོད་ཀྱང་བཟློས་ཕན་ཚུན། །གར་གནས་བསྟོད་པ་བཟློས་པ་ཡིན། །བྲིས་པ་དགའ་བྱེད་བླུན་པོ་མོས་པར་བྱེད། །མཁས་པ་མགུ་བྱེད་ཚིག་ལ་ཡི་རང་བྱེད། །བསམ་གཏན་བསྐྱེད་བྱེད་རབ་གསལ་བར་བྱེད། །འདི་ལྟར་སྨྲ་བྱེད་ཁྱབ་འཇུག་ལས་གཞན་བྱད། །ཀྱེ་མ་ཁྱབ་འཇུག་འཕྲོག་བྱེད་ལྷ་དབང་གཞོན་ནུ་དང་། །དབྱངས་ལྡན་ལྷ་མ་སྙན་ངག་མཁན་ནི་ཁོ་བོ་ལ། །ནམ་མཁའ་འདི་ནི་སྐྲག་ཅིང་ཕྱོགས་ཀུན་འགྲན་འདོད་ནས། མཐའ་མེད་བྱས་ནས་སྣ་ཚོགས་འཇིག་རྟེན་བཀོད་པ་སྙམ། །དཔའ་བོ་ཞེས་བྱས་སྙན་ངག་བྱས་པ་བདེན། །རྒྱལ་བའི་ཡོན་ཏན་ཚད་མེད་གྱུར་པ་བདེན། །དེང་སང་བླུན་པོ་ཅ་ཅོ་སྒྲོགས་པ་བདེན། །དབེན་གནས་ཞི་བར་ཆོས་དང་མཐུན་པ་བདེན། །འཇིག་རྟེན་སྒྱུ་མས་བྲིད་ནས་འཁོར་བ་རྫུན། །མཚན་ཉིད་མི་ལྡན་བསྟོད་པ་བརྗོད་པ་རྫུན། །མི་རྟག་པ་ལ་རྟག་པ་འདོད་པ་རྫུན། །སྒྲ་ལ་དོན་དུ་བྱས་པར་བྱས་ཀྱང་རྫུན། །ཚུལ་མིན་བཟློས་ནས་མཁས་གྲུབ་ལྡན་པ་རྣམས། །གནས་འདིར་ཡོན་ཏན་སྙན་ངག་མེ་ཏོག་གི །ཕྲེང་བ་དུ་མ་འཐོར་བར་མཛད་མཐོང་ནས། །རང་བྱུང་གིས་ཀྱང་གནས་འདི་ལྷ་དབང་དང་། །ས་བསྲུངས་དེ་དང་གཟུགས་ཅན་རབ་རྟོག་དང་། ཟུང་ལྡན་ཟུང་ལྡན་ཆེན་པོ་ཁྱེད་འཁོར་ལྡན། །རང་བཞིན་བརྗོད་པའི་སྲད་བུས་སྤེལ་བ་ལ། མཁས་མཆོག་རྣམས་ཀྱིས་བཟོད་པར་མཛད་དུ་གསོལ། བདེ་ཆེན་སྟེངས་ཀྱི་ཕྱོགས་གཅིག་བརྗོད་པའི་ངག་རྫོགས་སོ།། །།

དུས་བཞིའི་གནས་ལ་བསྔགས་པ་བཞུགས་སོ། །བཅོམ་ལྡན་འདས་ངག་གི་དབང་ཕྱུག་ལ་ཕྱག་འཚལ་ལོ། །ཐུགས་རྗེའི་མངའ་བདག་རྒྱལ་བ་སྲས་དང་བཅས་པ་དང་། དཔལ་ལྡན་འགྲོ་མགོན་བླ་མ་རྣམས་ལ་ཕྱག་འཚལ་ལོ། །བསྟན་པ་རིན་ཆེན་མཆོག་ཏུ་ཟབ་ཡངས་ཆུ་གཏེར་གྱི། །ཡོན་ཏན་གནས་ལ་མངོན་པར་ཕྱོགས་ཏེ་འདུག་པ་རྣམས། །དལ་འབྱོར་གྲུབ་ཆེན་བླ་མ་རྣམས་ཀྱིས་མཉམ་པ་ཡིས། །ལེགས་པར་ཟིན་གྱུར་ཚེ་ན་མྱུར་དུ་བརྩོན་པར་མཛོད། །གང་དག་ཚུལ་གནས་ཐོས་དང་ལྡན་པ་དེ་དག་ཀུན། །བསམ་གཏན་གནས་མཆོག་རྣམས་སུ་འབད་དེ་བསྒྲུབ་པར་བྱ། །རྒྱལ་བས་བསྔགས་ཤིང་ཡོན་ཏན་ཀུན་གྱི་གནས་སུ་གྱུར། །དེ་བས་རེ་ཤིག་དབེན་པའི་ཡོན་ཏན་མཁྱེན་པར་མཛོད། །གང་དག་དབེན་དང་དབེན་པའི་གནས་ཀྱི་རང་དབང་མྱོང་། །དེ་དག་མི་ཁོམ་ཉམས་པའི་ཁྲོད་དུ་གནས་སུ་མཉམ། །དེ་ཕྱིར་འདིར་ནི་ངག་དང་ཚིག་རྣམས་དྲི་མེད་པས། །མདོ་ཙམ་བརྗོད་པས་འདི་ལ་རྗེས་སུ་ཡི་རང་གྱིས། །རྒྱལ་བས་རྒྱུད་དང་མདོ་རྣམས་ལས་གསུངས་སྤྱི་དང་བྱེ་བྲག་ཁྱད་པར་གྱི། །གནས་དེ་རྣམ་པ་བསམ་གྱིས་མི་ཁྱབ་འདིར་ནི་རགས་པ་སྤྱིར་བཤད་པ། དགུན་གྱི་དུས་སུ་རྡོ་རྗེའི་བྲག་རི་ནགས་ཚལ་ཚོགས་ཀྱིས་སྤེལ་བྱས་པ། །རིན་ཆེན་འོད་འབར་འབར་བའི་ཕུང་པོ་འཕྲོ་བ་ལྟ་བུའི་འོད་གསལ་ཞིང་། །ཨུད་པ་ལ་དང་དངས་པའི་རིན་ཆེན་རྡོ་རྗེ་རལ་གྲི་བསྣམས་པ་ལས། །ལྟ་བུར་མཛེས་ཤིང་ཤིང་རྣམས་ཡལ་ག་ཡན་ལག་གར་མཛེས་བྱེད་པ་བཞིན། །ལོ་མའི་ལྡིང་ཁང་ཁང་མཛེས་བཞི་ལྟར་ཀུན་ནས་གསལ་བའི་ཕྱོགས་དག་ན། །ཚང་ཚིང་ནགས་ཚལ་སྤྲིན་ཕུངས་ལ་ལར་ཕྲེང་བ་བཀོད་པ་འདྲ། དགའ་དགའ་ལྟར་སྣང་སྤོས་ཀྱི་ངད་ལྡང་ལ་ལར་ཆུ་གཙང་སྔོན་པོ་འབབ། །སྐབས་སྐབས་དག་ན་དངས་པའི་ཆུ་མིག་ལ་ལར་ཤེལ་གྱི་ཆུན་པོ་བཞིན། །ལྷང་ལྷང་འཚེར་བའི་ཟར་བུས་བརྒྱན་ཅིང་ལ་ལར་རླུང་གིས་འཕོག་པའི་སྒྲ། འུར་འུར་དལ་བུས་སྒྲོག་པར་བྱེད་ཅིང་ལ་ལར་རོལ་མོ་བརྡུངས་པ་འདྲ། །རྩ་བའི་ཚོགས་རྣམས་སྣ་ཚོགས་རོ་ལྡན་དྲི་རབ་དང་ལྡན་བཟར་རུང་པ། །ས་ཕྱོགས་དེ་འདྲ་རྩ་རླུང་གནད་རྣམས་སྒོམས་ན་ཚེ་འདིར་དངོས་གྲུབ་ཐོབ། སོས་ཀའི་དུས་ལ་བབ་པའི་ཚེ་ན་མཚོ་འགྲམ་རབ་ཏུ་ཡིད་འོང་པ། ཨན་དྷ་སྙིལ་གྱི་དུམ་བུ་འདྲ་བ་རླབས་ཀྱི་ཕྲེང་བ་འཕྲོ་བ་དག །པདྨ་དཀར་པོ་ལྟ་བུ་ཆིལ་ཆིལ་སྒྲ་སྒྲོགས་ཤིང་། །བྲག་ལ་ཕོག་པའི་བརླབས་ཕྲེང་རྣམས་ནི་མུ་ཏིག་ཕྲེང་བ་མཐོར་བ་བཞིན། །མྱུ་གུ་ལྡུམ་བུ་གསར་པ་རྣམས་ནི་ཀུན་ནས་ཁ་འབུས་འཛུམ་པ་འདྲ། །ལྗོན་པའི་ལྕུག་ཕྲན་སྣ་ཚོགས་རིན་ཆེན་དུམ་བུའི་ཕྲེང་བ་འཁྲུགས་པ་བཞིན། །ས་རླངས་གཡོས་པ་ལྷུན་པོའི་རྩེ་མོར་རབ་དཀར་ཅོད་པན་གཡོ་བ་འདྲ། །གཞན་དག་ནམ་མཁའ་ཕང་ཕུང་འདུ་ཞིང་ཕྱོགས་ཀྱི་ཐ་གྲས་འཇལ་བ་བཞིན། །ཀུན་ཏུ་ཁྱབ་བྱེད་ས་གཞི་བསྣུམ་པར་བྱེད་པ་བཞིན་དུ་དགའ་བའི་གནས། དེ་འདྲ་རྣམས་སུ་བསམ་གཏན་བདེ་བ་རྦ་རླབས་མེད་པ་ཐོབ་པ་ཡིན། །དབྱར་གྱི་དུས་ལ་བབ་པའི་ཚེ་ན་ཕྱོགས་རྣམས་རབ་ཏུ་མཛེས་པ་ཡི། །གངས་རི་དཔལ་ལྡན་ཀུ་མུ་ཏའི་འོད་དང་ཟླ་འོད་ཕྲད་པ་བཞིན། །ཀུན་ནས་བསྐོར་ཞིང་སྤང་ལྗོངས་རྣམས་ནི་ཀུན་ཏུ་ལག་མཐིལ་ལྟར་མཉམ་པ། །རྨ་བྱ་དང་ནི་ནེ་ཚོའི་མགྲིན་ལྟར་འཚེར་ལ་འཇམ་ཞིང་སྔོ་བ་ཡི། །ནེ་སིང་ཀུན་ནས་མེ་ཏོག་སྣ་ཚོགས་བཀྲ་ཞིང་འབར་བར་བྱེད་པ་བཞིན། །དུས་ཀྱི་རླུང་གི་བསྐྱོད་པའི་སྤྲིན་རྣམས་སྦྲུལ་མགོའི་གདེང་ཀ་འཕྱོ་བ་ཡི། །ཀླུ་རྒྱལ་ཚོགས་རྣམས་གུས་པས་འདུད་འདྲ་བླ་རེས་བྲེས་པ་བཞིན། །གློག་ཕྲན་འགྱུ་བའི་གར་མཛེས་བྱེད་ཅིང་སྤྲིན་གྱི་སྔ་སྒྲ་རྒོད་པ་འདྲ། མཛེས་པའི་ཆར་ཕྲན་མུ་ཏིག་གཏོར་བ་བཞིན་དུ་འབབ་པས་ངད་ལྡང་ཞིང་། །གཤོང་བུ་རྣམས་སུ་རང་གི་སྦུ་བས་བརྒྱན་པའི་ཆུ་རྣམས་འགྲན་པ་བཞིན། །ལྷུང་ལྷུང་སྒྲ་སྒྲོགས་ཡན་ལག་བརྒྱད་ཀྱི་སྒྲ་སྙན་འབྱིན་པ་ལྟ་བུས་བརྒྱན། །བྱ་ཚོགས་དུ་མས་བསྟོད་པར་བྱེད་ཅིང་བུང་བའི་ན་ཆུང་གླུ་ལེན་པ། །རི་དྭགས་རྣམས་ཀྱིས་མཛེས་པར་སྤྲས་པའི་དབེན་གནས་རྣམས་སུ་རྣལ་འབྱོར་ཅན། །རྒྱལ་བའི་གསུང་ལྟར་ཉམས་སུ་བླངས་ན་ལྷག་མཐོང་ཡེ་ཤེས་སྐྱེ་བར་འགྱུར། །སྟོན་གྱི་དུས་ན་སྤང་རི་མཛེས་པ་རིན་ཆེན་དུ་མའི་ཕུང་ཕུང་པོ། །ཅུང་ཟད་སྔོ་བ་དུས་ཚིགས་རྐྱེན་གྱིས་གཙོ་མའི་གསེར་སྦྱངས་ཕྱིས་པ་དང་། །མར་གད་རིན་ཆེན་སྤེལ་བ་བཞི་མཛེས་འབྲས་བུའི་ཚོགས་རྣམས་དུ་མ་རྣམས། །གཡོ་ཞིང་འདུད་པ་རླུང་གིས་གཡོས་པས་སྣ་ཚོགས་སྤོས་ཀྱི་ངད་ལྡང་ཞིང་། །ཡན་ལག་བརྒྱད་ལྡན་ཆུ་ཕྲན་རྣམས་ནི་རོལ་མོ་བསིལ་བཀྲོལ་བྱེད་པ་བཞིན། །ལྟེང་ཀ་འབབ་ཆུས་ཉི་མའི་འོད་ཀྱིས་གནམ་སྔོན་ཞུ་བ་ལྟར་སྔོ་བ། །རང་གི་རླབས་ཀྱི་ཡན་ལག་བསྐྱེད་པས་ཟླ་བའི་འོད་ཟེར་འཕྲོ་བ་བཞིན། །ལ་ལ་དག་ན་རླུང་གིས་ཕོག་པ་ཤེལ་གྱི་དུམ་བུ་ལྟ་བུ་ཡི། ཆུ་རྣམས་ཉི་མའི་འོད་ཟེར་གྱིས་ཕོག་པས་དགའ་བས་ས་སྟེངས་རྒྱུ་བ་འདྲ། །ཟླ་བ་སྐར་མའི་ཚོགས་རྣམས་འབར་ཞིང་ནམ་མཁའ་རྒོད་པར་བྱེད་པ་བཞིན། །ཀུན་ནས་བཀྲ་ཞིང་སེར་བུ་བསིལ་བ་རླུང་ཡབ་དལ་གྱི་གཡོས་པ་འདྲ། །དེ་འདྲའི་གནས་སུ་བྱང་ཆུབ་སེམས་ལྡན་བསམ་གཏན་སྔས་ནི་གཞན་དོན་བྱུང་། །དེ་ལྟ་མོད་ཀྱིས་འཁོར་བ་འདིར། །དཔག་མེད་དུས་རིང་འཁོར་བྱས་ཏེ། །ད་རུང་སྐྱེ་བར་མ་གྱུར་པ། །ཀྱེ་མ་སྲེད་པའི་སྟོབས་འདི་ལ་མཚར། །རྒྱལ་བས་སྐྱོབ་པ་དེ་རྣམས་ཀྱི། ཐུགས་རྗེའི་སྟོབས་ཀྱང་ཆུང་བ་བཞིན། །རྒྱལ་བས་ས་སྟེངས་སྣང་མཛད་ཆེ། །ཚངས་དང་འཕྲོག་བྱེད་ལ་སོགས་ལྷ། །ཐམས་ཅད་ཡན་ལག་ཐལ་མོ་ཡིས། །ཀུ་མུ་ཏ་རྣམས་ཟུམ་གྱུར་ཅིང་། །གདོང་གི་ཆུ་སྐྱེས་པད་མོ་ལས། བསྟོད་པའི་སྦྲང་རྩི་མ ཐོན་གྱུར་ཅིང་། །མ་རིག་མུན་པ་ཀུན་གསལ་ནས། །དེ་བཞིན་གཤེགས་པ་གཤེགས་བཞིན་ནོ། །མཛད་རྣམས་དོན་ལྡན་དོན་རྣམས་མཛད། །སླད་བྱུང་གང་དེ་གང་འབྲས་སླད། །འདིས་ནི་དོན་མཛད་དོན་ནི་འདི། །གཞན་ཕྱིར་ཡིན་པས་ཡིན་ཕྱིར་གཞན། །མི་མཛད་དེ་ནི་མི་ལྡན་ཞེས། །བསྒྲགས་པ་མིན་ཀྱང་སྙན་པར་བསྒྲགས། །དེ་ལྟར་ཐམས་ཅད་མཁྱེན་པས་རྗེས་བཟུང་ཚེ། །ནོར་འདོད་པ་དག་གཏེར་ནི་མཐོང་བ་བཞིན། །འཕགས་པའི་རིན་ཆེན་ཐོབ་པར་མི་བྱེད་གང་། དེ་ནི་ཁྱུ་མཆོག་འཁོར་གྱི་ཚོགས་ཡིན་ནོ། །བླུན་པོ་དེ་དག་ཚེ་འདིའི་དཔལ་ལ་ཡང་། །རྩེ་བ་མེད་པར་མྱོས་ནས་རིག་རིག་ལྟར། །བདེ་བ་ཟིལ་མནན་སྡུག་བསྔལ་ཁུར་ཆེན་གྱི། །འོག་ནས་འོག་ཏུ་གཞོལ་བ་ཀྱེ་ཧུད་ཉམས། དེ་བས་དེ་ཕྱིར་དེ་ལ་དེ་མཐར་ཕྱིན། །དཔལ་ལྡན་དཔལ་མཆོག་དཔལ་སྣང་དཔལ་གྱི་ལམ། །ཐོབ་བྱ་ཐོབ་རྒྱུ་ཐོབ་དེ་ཐོབ་ནས་ཀྱང་། །ཚུལ་མིན་ཚུལ་སྤངས་ཚུལ་ཁྲིམས་ཚུལ་བསྟན་མཛོད། །དེ་དང་ཉེར་ལྡན་བསམ་གཏན་གཏན་བྱས་ཤིང་། །དྲི་མེད་ལྷག་མཐོང་ཤེས་རབ་རབ་སྤེལ་ན། །སྒྲིབ་པ་ཀུན་ཟད་ཡེ་ཤེས་ཤེས་བྱ་ལ། །མངོན་སུམ་ལྟ་བུར་ཆོས་ཉིད་རྟོགས་པར་འགྱུར། །རྒྱལ་བའི་ཞལ་གྱི་དཀྱིལ་འཁོར་ལས་བྱུང་རྣམ་དག་ཆོས་ཀྱི་འོད་ཟེར་གྱིས། །ཕོག་པའི་བློ་མཆོག་པད་མོ་ཀུན་རྒྱས་ཡོན་ཏན་མཆོག་གི་ཟེ་འབྲུ་བཀྲ། །དེ་ལྟ་མོད་ཀྱི་བདུད་ཀྱི་ན་ཆུང་བཞིན་མཛེས་པད་མའི་ནགས་ཚལ་དག བདག་པོར་ལྟ་བས་དུང་དུང་ཡང་ཟེར་གྱིས་ཕོག་པ་བཞིན་དུ་འཛུམ། །དེ་ལྟར་མཐོང་ནས་དགའ་བྱེད་ལ་སོགས་ཡུལ་འདི་སྨད་པ་མི་ནུས་ཀྱང་། །མཆོག་གི་བླ་མ་མཆོག་ཏུ་ཉེར་བསྟན་རོ་མཆོག་མྱོང་ནས་འདིར་བྲིས་སོ། །རྣམ་དག་མིང་ཅན་དམ་པ་རྣམས་ཀྱིས་མཐོང་ན་མིག་ནི་མི་གཡོ་པར། །ཅུང་ཟད་དགོངས་ཅིག་བཀོད་པའི་ཚུལ་འདི་རྒྱལ་བས་གསུངས་དང་མཐུན་པ་མཉམ། །འདི་ལྟར་དོན་མེད་བྲིས་པ་འདི། །རང་བྱུང་མིང་ཀྱང་རང་བྱུང་མིང་། །རྡོ་རྗེ་ཞེས་བྱ་རྡོ་རྗེ་ཡི། །གནས་ལུགས་སྟོང་པ་ཉིད་དོན་ལ། །ཀུན་རྫོབ་ཚུལ་དང་འདྲེས་མཐོང་པ། །དེ་ཡིས་རེ་ཤིག་བྲིས་པ་ཡིན། །བདག་ནི་སྙན་ངག་མཁན་མིན་ཅིང་། མངོན་བརློམ་གྱིས་དྲེགས་མ་ཡིན་ཏེ། །འོན་ཀྱང་ངག་ཚིག་རྒྱ་མཚོ་ལས། །སྡེབས་སྦྱོར་སྦྲང་རྩི་ལེགས་པར་རྙེད། །ཡིག་གེ་མ་ནིང་ཕོ་མོ་དང་། །འབྱུང་བའི་གནས་དང་ཡོན་ཏན་ཀུན། །ལམ་དང་མཐུན་པར་བསྡུད་བྱེད་པར། བློའི་སྟོབས་ཀྱིས་མཐོང་བ་ཡིན། །སླད་ཀྱིས་རྩོམ་པ་བཞེད་རྣམས་ཀྱང་། །དེ་རྣམས་ཚུལ་བཞིན་རྟོགས་པར་མཛོད། །དུས་བཞིའི་གནས་ལ་བསྔགས་པ་སྡེབས་སྦྱོར་སྣང་བ་ཞེས་བྱ་བའོ།། །།

རོང་བཙན་ཁ་བ་དཀར་པོའི་བསྟོད་པ་བཞུགས་སོ། །གནས་ཀྱི་མཚན་ཉིད་རབ་ཏུ་གསལ་བར་བྱེད་པ་ལྷུན་པོའི་བརྒྱན་ཞེས་བྱ་བའི་བསྟོད་པ། །བླ་མ་དམ་པ་རྣམས་ལ་ཕྱག་འཚལ་ལོ། །བསྟན་པ་དྲི་མ་མེད་དང་རབ་བསྟན་ནས། །མ་རིག་དྲི་བསལ་དྲི་མ་མེད་ལམ་སྟོན། །ས་ལམ་དྲི་མ་ཀུན་བཅོམ་དྲི་མེད་བརྙེས། །ཤེས་བྱའི་དྲི་མ་བྲལ་ལ་ཕྱག་འཚལ་ལོ། །སྙིགས་མའི་དུས་ན་བྱང་ཆུབ་སེམས་དཔའ་རྣམས། །བསྒྲུབ་པའི་སྙིང་པོ་ཉམས་སུ་ལེན་བྱེད་པ། དེ་ཉིད་རྐྱེན་གྱུར་དབེན་པ་བརྟེན་བྱ་ཞིང་། །མདོ་ལས་བྱུང་བ་དེ་དང་མཐུན་གྱུར་པ། །རི་བྲག་བས་མཐའ་ཆེན་པོར་གནས་པ་རྣམས། །ཕྱོགས་སུ་བསྔགས་ཤིང་ཉི་ཤུ་རྩ་བཞིའི་གནས། །རྒྱུད་སྡེའི་མཆོག་ལས་སྙིང་པོར་གསུངས་པའི་ཕྱིར། །གནས་འདིའི་ཡོན་ཏན་ཅུང་ཞིག་བརྗོད་པར་བྱ། །བསིལ་ཟེར་འཕྲོ་བའི་ཆུ་གཏེར་པད་མོ་ལ། །རི་རབ་གླིང་བཞིར་བཅས་པའི་ཟེ་འབྲུ་བཀྲ། །ཁྱད་པར་དམ་ཆོས་རྩི་བཅུད་ལེགས་ལྡན་པའི། །འཛམ་གླིང་ཡོན་ཏན་ཚོགས་ཀྱིས་བཀྲ་བའི་དབུས། །རྡོ་རྗེ་གདན་ལས་བྱང་ཕྱོགས་གངས་རིའི་ཞོལ། །གྲུབ་པའི་གནས་མཆོག་མཁས་གྲུབ་གྱིས་བསྟེན་པ། །གངས་ཅན་པོ་ཏ་ཝ་རིའི་ཤར་གྱི་ཕྱོགས། །ཁྱད་པར་འཕགས་པའི་གནས་སུ་གྱུར་པ་ཡིན། །བྱང་ཕྱོགས་ལི་ཡི་ཡུལ་ཞེས་གྲགས་པ་ན། །རྒྱལ་བའི་བྱིན་བརླབས་གླང་རུའི་རི་དང་བཅས། བྱང་ཆུབ་སེམས་དཔའ་རྣམས་ཀྱི་བྱོན་པའི་གནས། །གྷྲི་ཧ་དེ་བའི་ཡུལ་ལས་ལྷོ་ཕྱོགས་ཡིན། ཤར་ཕྱོགས་གྷ་དྷ་ར་ཞེས་གྲགས་པའི་ཡུལ། །ཀླུའི་རྒྱལ་པོ་ཨེ་ལའི་འདབ་ཀྱིས་བསྲུངས། །རྒྱལ་བའི་བསྟན་ལ་དད་པ་རྒྱས་གྱུར་པའི། །ལོངས་སྤྱོད་ལྡན་པའི་ཡུལ་གྱི་ནུབ་ཕྱོགས་ཡིན། །དབུས་འགྱུར་འཆང་ལས་ཤར་གྱི་ཕྱོགས་གྱུར་པ། །གྲུབ་པའི་སྐྱེས་བུ་རྣམས་ཀྱིས་བསྟེན་པའི་ཞིང་། འདོད་པའི་གཟུགས་ཅན་ལྷ་མོ་བྱུང་བའི་གནས། །ཀ་མ་རུ་པའི་གནས་ཀྱི་བྱང་ཕྱོགས་ཡིན། །དེ་དག་རྣམས་ཀྱི་དབུས་ཀྱི་ཆར་གནས་པ། །པྲེ་ཏ་པུ་རིའི་གནས་ཀྱི་མཚན་ཉིད་ལྡན། །སྙིགས་མའི་དུས་ཀྱི་བསྒྲུབ་པའི་གནས་གྱུར་པ། །ཀུན་གྱི་བགྲོད་དཀའ་མ་མོ་མཁའ་འགྲོའི་གནས། །དཔལ་ལྡན་བླ་མ་རྣམས་ཀྱིས་ལུང་བསྟན་པའི། །རི་འདིའི་མཚན་ཉིད་མདོ་ཙམ་བརྗོད་པ་ནི། །རི་བོ་དངས་བསལ་ཤིན་དུ་དཀར་བའི་འོད། ཀུ་མུ་ཏ་དང་ཟླ་བ་སྤུངས་པ་བཞིན། །རབ་དཀར་ལྷུན་མཐོ་མཐོ་ཁྱད་ལྷག་པར་འཕགས། །སྤྲིན་དཀར་ཞི་བའི་ཅོད་པན་རྣམ་པར་མཛེས། འདིའི་ཤར་ཕྱོགས་ལྷའི་ཁང་པ་སྟེང་། །རྡོ་རྗེ་དྲག་འདུལ་འཁོར་དང་བཅས་པ་གནས། །ཕལ་གྱིས་བགྲོད་དཀའ་འཇིགས་པའི་སྒྲ་འབྱིན་པ། །ཆུ་རྣམས་རང་གི་སྦུ་བས་གཡོ་བར་འབབ། །རི་བྲག་རྣམས་ཀྱང་མཚོན་ཆའི་རྣམ་པ་ལྟར། །རབ་འཇིགས་ནགས་ཚལ་ཚོགས་ཀྱིས་ལེགས་པར་བརྒྱན། །དེའི་དབུས་ན་ནེའུ་སིང་རབ་མཛེས་པ། །ཆོས་ཀྱི་འབྱུང་གནས་ལྟ་བུའི་དབྱིབས་ལྡན་པའི། །ཤིན་ཏུ་མཛེས་པའི་ལྟེང་ཀས་བརྒྱན་པ་ཡོད། སྔོན་ཚེ་སློབ་དཔོན་པད་མ་འབྱུང་གནས་དང་། །བླ་མ་བྷེ་རོའང་འདི་རུ་བྱོན་ཞེས་གྲགས། །འདི་ནི་མཁའ་འགྲོ་རྣམས་ཀྱི་གནས་མཆོག་སྟེ། །བཟང་པོའི་དུས་ལ་འདུས་ཤིང་ཚོགས་མཛད་དེ། །སྐལ་ལྡན་རྣམས་ལ་བྱིན་གྱིས་བརློབ་ཅེས་གྲགས། །དེའི་ལྷོ་ཕྱོགས་ངོས་ཀྱི་རྒྱུད་ལ་ནི། །རབ་འཇིགས་དུར་ཁྲོད་བདག་པོའི་ཆས་ལྡན་པ། །ལྷ་དམག་འབུམ་གྱིས་བསྐོར་བ་ཡོད་ཅེས་གྲགས། །འདི་ནའང་དྲག་པོའི་མངོན་སྤྱོད་གྲུབ་པའི་གནས། །དཔག་མེད་ཡོད་ཅིང་ཁྱད་པར་ལྷའི་གནས། །དེ་ཉིད་མཆོག་ཏུ་གྱུར་པར་བསྔགས་པ་ཡིན། །འདིའི་ནུབ་ཀྱི་ཕྱོགས་དང་ཉེ་བ་ན། དམར་མོ་ཁྲག་མདོག་བསེའི་ལན་ཕྲན་ཅན། །མ་མོ་བྱེ་བའི་ཚོགས་ཀྱིས་ཡོངས་བསྐོར་བར། །ཐུན་མོང་ལས་རྣམས་ཐོགས་པ་མེད་འགྲུབ་པ། །གནས་ཤིང་དེའི་སྐུ་དང་བཅས་པའང་ཡོད། །འདི་ནི་རབ་ཏུ་ཆོ་འཕྲུལ་ཆེ་བའི་གནས། །བགྲོད་པར་དཀའ་ཞེས་དཔལ་ལྡན་བླ་མས་གསུངས། །འདིའི་བྱང་གི་ཕྱོགས་སུ་གནས་པ་ནི། །གནོད་སྦྱིན་དྲེལ་ལ་དགའ་བ་ཞེས་བྱ་པ། །གནོད་སྦྱིན་དུ་མའི་འཁོར་དང་བཅས་པ་གནས། འདི་དང་ཉེ་བའི་གནས་ཀྱི་ཕུག་པ་ན། །བསྒྲུབ་པའི་གནས་མཆོག་ཆོས་འབྱུང་གིས་བརྒྱན་པ། །ཆོ་འཕྲུལ་དུ་མ་སྟོན་པ་ཡོད་ཅེས་གྲགས། །དེ་ལྟར་གྲུབ་པའི་གནས་མཆོག་གིས་བསྟེན་པ། །འདི་ནི་རོང་བཙན་ཁ་བ་དཀར་པོ་ཞེས། །ཀུན་ཏུ་ཁྱབ་པའི་མིང་གིས་མཚན་པ་ཡིན། །འདིའི་ཕྱོགས་རྣམས་ཀུན་ནས་རབ་བསལ་བའི། །ཆུ་བོ་སྒྲ་སྙན་འབྱིན་པའི་ཚོགས་རྣམས་དང་། །ལྟ་བས་མི་ངོམས་ཤིན་ཏུ་རབ་མཛེས་པ། །མཚོ་དང་ལྟེང་ཀའི་ཚོགས་ཀྱིས་བཀྲ་བར་གནས། འདིའི་འཁོར་དུ་གངས་རིའི་ཕྲེང་བ་ནི། །ཤར་ཕྱོགས་གྷན་དྷ་རིའི་ས་མཚམས་ནས། །རྡོ་རྗེ་འབར་བའི་གནས་ཀྱི་བར་དུ་ཡིན། །གནས་འདིའི་ཉེ་འཁོར་ཁོ་ར་ཁོར་ཡུག་ན། །དུས་མིན་འཆི་དང་མུ་གེའི་འཇིགས་པ་བྲལ། །ཨ་ཀ་རུ་དང་ཙན་དྷན་རྒུན་འབྲུམ་ཤིང་རྩ་སོགས། ཤིང་མཆོག་རིགས་ནི་དཔག་ཏུ་མེད་པ་ཀུན། །དེ་དག་རྣམས་ཀྱང་སྨན་གྱི་ནུས་པར་ལྡན། ཉི་མ་བྱང་བགྲོད་ཤིན་ཏུ་དྲོ་བའི་དུས། །འདི་ནི་རབ་བསིལ་གངས་རིའི་ཕྲེང་བར་ལྡན། །ཉི་མའི་ལྷོར་བགྲོད་ཤིན་ཏུ་བསིལ་བའི་ཚེ། །འདི་ནི་མྱུ་གུ་ལ་ལ་འབྲས་བུའི་ཚོགས། སྨིན་ཅིང་ཨིན་ཏྲའི་མདངས་ཅན་ཉིད་དུ་གནས། །རབ་བསལ་ཚོན་རྣམས་ཀུན་གྱིས་བསྒྱུར་འདྲ་བའི། །དྲི་ཞིམ་མེ་ཏོག་བརྒྱ་ཕྲག་དུ་མ་དང་། ལོ་མ་འབྲས་བུའི་ཚོགས་རྣམས་བསམ་མི་ཁྱབ། །ཕྱོགས་རྣམས་ཀུན་ནས་སྤོས་ཀྱི་ངད་ལྡན་པ། །ལྷའི་རོལ་མོ་སྒྲ་སྙན་བསྒྲོགས་པ་དང་། །ངོ་མཚར་ཆེ་བའི་རྣམ་པ་དུ་མ་རྣམས། །དག་པའི་ཡིད་ཅན་རྣམས་ཀྱིས་སྣང་བ་ཡིན། །འདིའི་རྣམ་པ་དཔག་མེད་ཡོད་མོད་ཀྱི། །འདིར་ནི་རེ་ཤིག་མདོ་ཙམ་བརྗོད་པ་ཡིན། །རྒྱས་པར་བླ་མ་རྣམས་ཀྱིས་མཛད་པ་ཡི། །གསུང་དང་གནས་འདི་ཉིད་ལ་རྟོགས་པར་བྱ། །འདི་ནི་རེ་ཤིག་གནས་ལ་དད་པ་ཡི། །སྐྱེས་བུ་རྣམས་ཀྱིས་ཅུང་ཟད་བསྐུལ་བའི་ངོར། །སྙན་ངག་སྡེབས་སྦྱོར་ཚིགས་རྣམས་སྤངས་ནས་ནི། །ཉུང་བསྡུས་གསལ་བར་སྦྱར་བའི་དགེ་བ་དེ། འགྲོ་རྣམས་ཉོན་མོངས་གཡེང་བ་རབ་སྤངས་ནས། །བསམ་གཏན་ནད་མེད་བདེ་བ་མཆོག་ཐོབ་ཤོག མཐར་ཐུག་སྲིད་ཞི་གཉིས་ལས་འདས་པ་ཡི། །ཐམས་ཅད་མཁྱེན་པའི་གོ་འཕང་ཐོབ་པར་ཤོག སྤྲེལ་ལོ་ཟླ་བ་གསུམ་པ་ཡི། ཚེས་བཅུའི་ཉིན་པར་རང་བྱུང་རྡོ་རྗེས་གནས་སྒོར་སྦྱར་བའོ།། །།

མཚུར་ཕུའི་བསྟོད་པ་ཐུང་བ་བཞུགས་སོ། །ཨོཾ་སརྦ་སྭ་སྟི་སིདྷཾ་ཧཱུཾ། རང་བཞིན་དོན་ལ་མཉམ་མེད་ཆོས་ཀྱི་རྗེ། །འགྲོ་བའི་དོན་དུ་ཐུགས་རྗེ་སྤྲུལ་པའི་སྐུ། །དུས་གསུམ་མཁྱེན་དང་ཆོས་རྗེ་རིན་ཆེན་གྱི། །དགོངས་པ་མ་ལུས་ཡོངས་སུ་རྫོགས་པ་ཡིས། །དབེན་གནས་ཆེན་པོ་མཚུར་ཕུ་དེ་ཉིད་ཀྱི། །བསྟོད་པ་ཅུང་ཞིག་བདག་གིས་བཀོད་པར་བྱ། །དབེན་ཞིང་ཉམས་དགའ་བའི་ས་ཕྱོགས་མཚུར་ཀྱི་ཕུ། །ཟླ་འོད་གཞོན་ནུ་ཉིད་ཀྱིས་ལུང་བསྟན་ཅིང་། །བསྒྲུབ་པའི་གནས་མཆོག་ཁྱད་འཕགས་ཆེན་པོ་ཡི། །རྒྱབ་རི་དག་ནི་མཆོད་རྟེན་རྣམ་པ་ལ། བྱ་དང་གཅན་གཟན་རི་དྭགས་ཚོགས་རྣམས་ནི། །སྐད་སྙན་བསྒྲོགས་ཤིང་གར་ཐབས་རྩེ་བའི་ས། །སྐབས་སྐབས་དག་ན་ལྷ་གནས་འདྲ་བ་ཡི། །སྤང་ལྗོངས་དག་ལ་མེ་ཏོག་སྣ་ཚོགས་ནི། །ཨུཏྤལ་སྤང་བརྒྱན་ཤང་ཤང་ལ་སོགས་པའི། །མེ་ཏོག་རིགས་ནི་བསམ་གྱིས་མི་ཁྱབ་སྟེ། དེ་དག་ཀུན་ཡང་དྲི་ཞིམ་ངད་དང་ལྡན། །དེ་ལྟར་མེ་ཏོག་རིགས་བཞིན་སྨན་རྣམས་ཀྱང་། །བསམ་གྱི་མི་ཁྱབ་མཐའ་ཡས་སྣ་ཚོགས་པ། །སོ་སོ་རང་རང་དྲི་ཞིམ་ངད་དང་ལྡན། །དེ་བཞིན་མེ་ཏོག་སྨན་རྣམས་བསྐྱེད་བྱེད་པའི། །ཆུའི་མཆོག་གྱུར་བསམ་གྱིས་མི་ཁྱབ་པ། །གནས་ཤིང་འགྲོ་བ་སྐོམ་གྱིས་གདུངས་བ་རྣམས། །སྐོམ་སེལ་དབུགས་ཀྱང་ཕྱིན་ཅིང་མཆོག་དགའ་ཐོབ། །དེ་ལྟར་རིའི་མཆོག་གྱུར་དེ་ལ་ནི། །རང་བྱོན་ལྷ་དང་ཡིག་འབྲུ་བསམ་མི་ཁྱབ། །དེ་བཞིན་སེམས་ཅན་དབུགས་སྲོག་བསྐྱེད་བྱེད་པ། །སྔོ་སྡུམ་ཟས་ཀྱི་བྱེ་བྲག་བསམ་མི་ཁྱབ། །དེ་ལྟར་མདུན་གྱི་རི་བོ་དེ་ཉིད་ལ། །སེམས་ཅན་གོས་ཀྱིས་གདུངས་བར་གྱུར་པ་ལ། ཤིང་གི་རིགས་ནི་ཁྲི་ཕྲག་དུ་མ་ཡི། །མེ་ཡིས་དྲོད་ནི་ཆེན་པོ་བསྐྱེད་ནས་ཀྱང་། །འཁྱགས་པའི་སྡུག་བསྔལ་མ་ལུས་སེལ་བར་བྱེད། །དེ་བཞིན་སྨན་དང་མེ་ཏོག་ཆུ་ལ་སོགས། གོང་དང་འདྲ་ཞིང་རི་དྭགས་ཀུན་ཀྱང་གནས། བྱ་དང་གཅན་གཟན་ལ་སོགས་ཐམས་ཅད་ཀྱང་། །བདེ་བར་འཚོ་ཞིང་འཇིགས་པ་ཀུན་དང་བྲལ། །དེ་ལྟར་ལུང་པ་དེའི་ཕུ་ཉིད་ན། །སྤང་གཤོང་དག་ནི་གསེར་གྱི་མཎྜྻལ་འདྲ། །དབེན་ཞིང་ཉམས་དགའ་ལྷའི་གནས་ལྟ་བུ། །དེའི་རྩ་ན་གངས་ཀྱི་རྒྱལ་པོ་ནི། །རྒྱལ་བའི་མིང་ཅན་གནས་ཤིང་དེ་ནས་ནི། །ཆུ་རྒྱུན་བསིལ་བའི་ངད་ནི་འབབ་བྱེད་ཅིང་། །སེམས་ཅན་མིའི་འགྲོ་བ་ཐམས་ཅད་ལ། ཕན་བདེ་སྣ་ཚོགས་འབྱུང་ཞིང་སྐོམ་པ་སེལ། །དེ་ལྟ་བུའི་གནས་མཆོག་དེ་ཉིད་ན། །ཉ་དང་སྟོང་དང་ཚེས་བརྒྱད་ལ་སོགས་དང་། ཚེས་གསུམ་ལ་སོགས་དུས་བཟང་ཐམས་ཅད་ལ། །ནམ་མཁའ་ལ་ནི་འཇའི་གུར་ཕུབ་ཅིང་། །མེ་ཏོག་ཆར་པ་ལ་སོགས་འབྱུང་བའི་གནས། །དེའི་དབུས་ན་མཚུར་ཕུའི་དགོན་པ་ནི། ཇི་ལྟར་སྤང་ལ་མེ་ཏོག་བཀྲམ་པ་བཞིན། །ཇི་ལྟ་ཇི་བཞིན་ལྷ་ངེ་ལྷམ་མེ་བ། །ཀུན་གྱི་མཆོག་གྱུར་དཔལ་ལྡན་མཚུར་གྱི་ཕུ། །ཡ་མཚན་ཅན་གྱི་གནས་མཆོག་དེ་ལ་འདུད། །མཚུར་ཕུའི་བསྟོད་པ་རང་བྱུང་རྡོ་རྗེས་བྲིས་པའོ།། །།

རི་ཆོས་དངོས་གྲུབ་ཕྲེང་བ་བཞུགས་སོ། །རྡོ་རྗེ་འཆང་ལ་གསོལ་བ་འདེབས། །དད་ལྡན་སྐྱེས་བུ་སྦྱངས་སྟོབས་ཅན། །བསྒོམ་ཆེན་རྣམས་ཀྱི་དོན་དུ་ནི། །གདམས་པ་ཅུང་ཞིག་བྲི་བར་བྱ། །ཆོས་སྐུ་མཁའ་ལྟར་དག་པ་ཡི། །དོན་མཆོག་ཡེ་ཤེས་ཕྱག་རྒྱ་ཆེ། །སྙིང་པོ་དོན་གྱི་ལྟ་བ་མཆོག །བསྒོམ་ཆེན་ཕྱག་རྒྱ་ཆེན་པོ་ཡི། དོན་རྟག་བདེ་ཆེན་ཏེ་ལོ་བ། །སྤྲུལ་སྐུ་དེའི་ཡོན་ཏན་ཡང་། །རི་ཁྲོད་འགྲིམས་པ་བདག་ལས་བྱུང་། །དེ་རྗེས་འཇུག་པའི་སྐལ་ལྡན་ནི། །དབྱེར་མེད་མཁའ་ལྟར་དོན་རྟོགས་ཤིང་། བདེ་ཆེན་མཆོག་གི་རྣལ་འབྱོར་པ། །རྗེ་བཙུན་ན་རོ་ཆེན་པོ་ཡང་། །རི་ཁྲོད་འགྲིམས་པས་རྫོགས་སངས་རྒྱས། །དམ་པ་དེའི་ཞབས་དྲུང་དུ། །བློ་གྲོས་རིན་ཆེན་རྣམ་པར་འཕྲུལ། །ཟབ་མོ་སྔགས་ཀྱི་སྒོ་འབྱེད་ཅིང་། གདམས་ངག་ཀུན་ལ་མཁས་པའི་མཆོག །ལྷོ་བྲག་པ་ཞེས་བྱ་བ་ཡང་། རི་ཁྲོད་འགྲིམས་པའི་བྱིན་བརླབས་ཀྱིས། །ལྟར་མེད་རྣམ་དག་ཕྱག་ཆེན་རྟོགས། །རྗེ་བཙུན་དེའི་ཞབས་དྲུང་དུ། །འཇམ་དཔལ་གཤིན་རྗེའི་རྣམ་པར་འཕྲུལ། །བསྒོམ་ཆེན་རྣམས་ཀྱིས་ཆེ་བ་སྟོན། །རྗེ་བཙུན་མིད་ལ་ཉིད་ཀྱང་ནི། །རི་ཁྲོད་འགྲིམས་པའི་ཡོན་ཏན་གྱིས། །མཐར་ཐུག་ཕྱག་རྒྱ་ཆེན་པོ་རྟོགས། །རས་པ་དེའི་ཞབས་དྲུང་དུ། །ལས་དང་ཐུགས་རྗེས་བྱོན་པ་ཡི། །ཟླ་འོད་གཞོན་ནུའི་རྣལ་པར་འཕྲུལ། །བླ་མ་དྭགས་པོ་རིན་ཆེན་ཡང་། རི་ཁྲོད་འགྲིམས་པའི་ཡོན་ཏན་གྱིས། །བརྟགས་བཅུ་ཡོན་ཏན་བརྒྱད་ལ་སོགས། །འཕྲིན་ལས་བསམ་གྱིས་མི་ཁྱབ་པ། །རི་ཁྲོད་འགྲིམས་པའི་ཤུགས་ལས་བྱུང་། །རྒྱལ་སྲས་དེའི་ཞབས་དྲུང་དུ། །དགོངས་པ་མཆོག་ལྡན་སེང་གེ་སྒྲ། །ཐོས་བསམ་ལུང་རིགས་མཐར་ཕྱིན་ཅིང་། །ལྷོ་བྲག་གྲུབ་པའི་གནས་བདུན་དུ། མཉམ་མེད་གྲུབ་པ་ཐོབ་ཚུལ་བསྟན། །རྟོགས་ལྡན་དེའི་ཞབས་དྲུང་དུ། །འགྲོ་མགོན་བླ་མ་རིན་ཆེན་ཡང་། །རི་ཁྲོད་འགྲིམས་པས་དོན་མཆོག་བརྙེད། །གང་ཟག་དེའི་ཞབས་དྲུང་དུ། །རིན་ཆེན་པུནྱ་བཛྭ་ཡང་། །རི་ཁྲོད་འགྲིམས་པའི་ཡོན་ཏན་གྱིས། །མཐར་ཐུག་ཕྱག་རྒྱ་ཆེན་པོ་རྟོགས། དེ་རྗེས་ཞུགས་པའི་སྐལ་ལྡན་ནི། །སྦྱངས་པ་མཐར་ཕྱིན་རིན་པོ་ཆེ། །དཀའ་ཐུབ་བསམ་གྱིས་མི་ཁྱབ་པས། །ཤར་ཕྱོགས་སྤུང་རིའི་གནས་མཆོག་ཏུ། །བཅུ་གཉིས་བར་དུ་དཀའ་སྤྱད་ཅིང་། །གྲུབ་པ་ཐོབ་པའི་ཚུལ་བསྟན་ནས། །སེམས་ཅན་ཀུན་གྱི་སྨིན་གྲོལ་མཛད། །གྲུབ་ཐོབ་དེའི་ཞབས་དྲུང་དུ། །རང་ཅག་བླ་མ་རིན་ཆེན་ཡང་། །ཏིང་འཛིན་མཆོག་གིས་བྱིན་བརླབས་ཤིང་། །ཨུ་རྒྱན་ལ་སོགས་གནས་རྣམས་སུ། །བསྒོམ་ཚུན་བསྟན་ཅིང་ཕྱག་ཆེན་རྟོགས། །སྐྱེས་ཆེན་དེའི་ཞབས་དྲུང་དུ། །དུས་མཐའ་རྣལ་འབྱོར་རང་ཅག་ཀྱང་། རི་ཁྲོད་འགྲིམས་པས་ཡོམ་ཏན་རྫོགས། །དེ་རྗེས་འཇུག་པའི་སྐལ་ལྡན་རྣམས། །ཀུན་ཀྱང་རི་ཁྲོད་འགྲིམ་བྱ་ཞིང་། འཇིག་རྟེན་བྱ་བ་སྤངས་ནས་སུ། ཕྱོགས་མེད་པ་ཡི་རི་ཁྲོད་དུ། །ལྟེམ་བརྐྱང་མེད་པར་བསྒྲུབ་པ་བགྱིས། །ཆགས་སྡང་ཐམས་ཅད་སྤང་བྱ་ཞིང་། །ནགས་འདབ་རི་ཁྲོད་དགོན་པ་རུ། །གཅིག་པུ་ཉིད་དུ་བསྡད་བྱ་ཞིང་། །ལྟོས་གོས་འཁྲི་བ་གཅད་བྱས་ནས། །ཞེན་མེད་གཅིག་ཏུ་རི་ཁྲོད་འགྲིམས། །འཁོར་དང་མྱ་ངན་འདས་པ་ཡི། །དམ་ཆོས་མ་ལུས་ཐམས་ཅད་ཀྱང་། །ཀུན་ཀྱང་ཕྱག་རྒྱ་ཆེན་པོ་ཡི། །དོན་མཆོག་ཉིད་ཀྱང་བསྒོམ་པར་བྱ། །རི་ཁྲོད་བསྒོམས་པའི་ལྷ་འདྲེ་དང་། །བར་དུ་གཅོད་པའི་མི་མ་ཡིན། །དེ་དག་མ་ལུས་ཐམས་ཅད་ཀྱང་། །སྙིང་རྗེ་ཆེན་པོའི་སེམས་ཀྱིས་ནི། །ཐམས་ཅད་བླ་མར་བསྒོམ་བྱ་ཞིང་། །བྱིན་གྱིས་བརློབ་པའི་ཚུལ་དུ་བསམ། །རང་ཉིད་གཅིག་པུར་འདུག་པའི་ཚེ། །འཁོར་ལོ་ལྔ་ལ་སོགས་པ་ཡི། །རྩ་འདབ་རྣམ་པ་ཐམས་ཅད་དུ། །རླུང་སེམས་འདུས་པའི་རྟགས་སུ་ནི། །རྒྱལ་བ་རིགས་ལྔའི་ཞིང་ཁམས་དང་། །གསང་སྔགས་ལྷ་ཚོགས་ལ་སོགས་དང་། །བར་ཆོད་བྱེད་སྙམ་འབྱུང་བ་དང་། །དེ་བཞིན་འདར་དང་ན་བ་དང་། །རྫུ་འཕྲུལ་སྟོན་ནུས་སྙམ་པ་ཡི། །གེགས་དང་ཡོན་ཏན་ཆ་མང་འབྱུང་། །དེ་ལྟ་བུ་ཉིད་བྱུང་བའི་ཚེ། །ཏིང་འཛིན་བསམ་གྱི་མི་ཁྱབ་པས། །ཀུན་ཀྱང་བླ་མར་བསྒོམ་བྱ་ཞིང་། །ཞུམ་པ་མེད་པའི་སེམས་བསྐྱེད་ན། །རྣལ་འབྱོར་ཆེ་བ་དགྲ་འདྲེས་འདོན། །དེ་ལ་སོགས་པའི་ཡོན་ཏན་དང་། །དེ་བཞིན་གེགས་དང་སྐྱོན་ལ་སོགས། །གདམས་ངག་ཟབ་ཆོས་ནང་ན་གསལ། །རི་ཁྲོད་འགྲིམས་པའི་སྐྱེས་བུ་རྣམས། །རི་ཁྲོད་མཆོག་ལ་རབ་ཞུགས་ན། །མཆོག་དང་ཐུན་མོང་ལ་སོགས་པའི། །དངོས་གྲུབ་རབ་མཆོག་ཐོབ་པར་འགྱུར། །དཔེར་ན་གངས་རིའི་རྒྱལ་པོ་ལ། །སེང་གེའི་ཚོགས་རྣམས་བཙུན་པ་ལྟར། །རི་ཁྲོད་འགྲིམས་པའི་སྐྱེས་བུ་རྣམས། རི་ལ་བཞུགས་ན་ཡ་མཚན་ཆེ། །མཐོ་གཉན་གངས་རིའི་གཞི་བདག་རྣམས། །གཞན་ཡང་འབྱུང་པོ་མི་ལ་སོགས། །དབང་དུ་འདུ་ཞིང་ཞབས་རྟོག་བྱེད། །བསྒོམ་ཞིང་བསྒྲུབ་པའི་ས་ལ་ནི། །ས་མཚམས་བྱེད་པ་གལ་ཆེ་སྟེ། ཁྱད་པར་ཙ་རི་ཏྲ་མཆོག་ཡིན། །ཉི་ཤུ་རྩ་བཞིའི་གནས་མཆོག་དང་། །མཁའ་འགྲོ་འདུ་བའི་གནས་མཆོག་དང་། །བརྒྱ་དང་བཅུ་གསུམ་ལ་སོགས་ཀྱི། །ནང་ནས་ཁྱད་པར་ཙ་རི་སྟེ། །བོད་ན་ཡོད་པའི་གནས་མཆོག་ནི། །ཉི་ཤུ་རྩ་བཞི་གསུང་གི་མཆོག །ཀ་མ་རུ་པ་ཉིད་དང་ནི། ཀམ་པོ་གནས་ནང་མཆོག་ཏུ་བཤད། །དེ་རྗེས་གནས་མཆོག་སྤུང་རི་དང་། རོང་བཙང་ལ་སོགས་རྣམས་ཀྱང་སྔགས། །ཁྱད་པར་གནས་མཆོག་མཚུར་ཕུ་ཉིད། །དེ་ལ་སོགས་པའི་རི་ཁྲོད་དུ། །བདག་ཉིད་གཅིག་པུར་བསྒོམ་བྱ་ཞིང་། མོས་གུས་རྩེ་ཅིག་གསོལ་བཏབ་ན། །ཡོན་ཏན་བསམ་གྱིས་མི་ཁྱབ་འབྱུང་། །རི་ཁྲོད་དགོན་པ་ཉམས་དགའ་བར། གཅིག་པུར་བསྒོམ་པའི་དུས་ཚོད་དུ། །བཟང་དང་ངན་པའི་རྣམ་རྟོག་སོགས། །དེ་དག་མ་ལུས་ཐམས་ཅད་ཀྱང་། །སྟོང་པ་ཉིད་ཀྱི་ངོ་བོ་མཆོག །འོད་གསལ་ཟུང་འཇུག་བསྒོམ་བྱ་ཞིང་། །འགྲོ་བ་འདི་དག་ཐམས་ཅད་ལ། སྙིང་རྗེ་ཆེན་པོའི་འདུ་ཤེས་བསྐྱེད། །སྐྱེས་ཆེན་སྐྱེས་བུ་དམ་པ་རྣམས། །རི་ཁྲོད་འགྲིམས་པས་ཡོན་ཏན་རྫོགས། །དུས་གསུམ་སངས་རྒྱས་ཐམས་ཅད་ཀྱང་། །རི་ཁྲོད་མཆོག་ལ་རབ་ཏུ་ཞུགས། །ཡི་དམ་ལྷ་ཚོགས་མ་ལུས་ཀྱང་། །རི་ཁྲོད་ཉིད་ལ་བཞུགས་པ་ཉིད། །མཁའ་འགྲོ་ཆོས་སྐྱོང་རི་ལ་བཞུགས། རི་ཁྲོད་འགྲིམས་པའི་ཡོན་ཏན་ནི། །མཐར་ཐུག་ཕྱག་རྒྱ་ཆེན་པོ་རྟོགས། །བཟང་དང་ངན་པའི་མཚན་མ་དང་། དུག་ལྔ་དུག་གསུམ་ལ་སོགས་རྣམས། །ཐམས་ཅད་རང་བཞིན་གྲོལ་ནས་འཆི། །བདག་ཉིད་གཅིག་པུར་འདུག་པའི་ཚེ། །ཉམས་དང་ཞི་གནས་ལྷག་མཐོང་སོགས། །འཕྲའུ་ཡི་རྣམ་རྟོག་མ་ལུས་དང་། །མཐར་ཐུག་ཕྱག་རྒྱ་ཆེན་པོ་གཉིས། །ནོར་དོགས་ཡོད་པས་གཟོབས་ལས་མཛོད། །འདི་ཉིད་གཅིག་པུར་འདུག་པའི་ཚེ། །རྩ་གནས་འཁོར་ལོ་རྣམས་ལྔ་རུ། །བཟང་ངན་རྟོག་པར་འཁྲུལ་པ་ནི། །སྤྱི་བོར་བདེ་ཆེན་འཁོར་ལོ་རུ། །རླུང་སེམས་འདུས་པའི་རྟགས་སུ་ནི། སངས་རྒྱས་དང་ནི་ཡི་དམ་ཚོགས། །ཀུན་ཀྱང་དཀར་པོ་ཉིད་དུ་མཐོང་། །མགྲིན་པ་ལོངས་སྤྱོད་འཁོར་ལོ་རུ། །རླུང་སེམས་འདུས་པའི་རྟགས་སུ་ནི། །ལོངས་སྤྱོད་རྫོགས་སྐུ་མཁའ་འགྲོའི་ཚོགས། །ཀུན་ཀྱང་དམར་པོ་མཐོང་མཉམ་བྱེད། །སྙིང་ཁ་ཆོས་ཀྱིས་འཁོར་ལོ་རུ། །རླུང་སེམས་འདུས་པའི་རྟགས་སུ་ནི། །བྱང་ཆུབ་སེམས་པའི་ཚོགས་བཅས་རྣམས། །དེ་དག་བཟང་པོའི་འཁྲུལ་སྣང་བྱུང་བ་དག །སྔོན་པོའི་སྣང་བ་བྱུང་བ་དག དངོས་སམ་རྨི་ལམ་ཉིད་དུ་མཐོང་། །ལྟེ་བ་སྤྲུལ་པའི་འཁོར་ལོ་རུ། །རླུང་སེམས་འདུས་པའི་རྟགས་སུ་ནི། གསང་སྔགས་ལྷ་ཚོགས་མ་ལུས་ཀུན། ལྗང་ཁུ་ཉིད་དུ་མཐོང་མཉམ་བྱེད། །དེ་དག་བཟང་པོའི་འཁྲུལ་པ་སྟེ། ངན་འཁྲུལ་རྣམ་པ་འདི་ལྟར་བྱུང་། །སྤྱི་བོ་བདེ་ཆེན་འཁོར་ལོ་རུ། །ཉོན་མོངས་རླུང་རྣམས་འདུས་པ་དང་། གཞན་ཡང་འཁོར་ལོ་རྣམས་ལྔ་ཡི། །ནང་དུ་ལོག་པའི་རླུང་རྣམས་ནི། །ཞུགས་ཚེ་རྣམ་རྟོག་འདི་ལྟར་བྱུང་། གཏི་མུག་རི་ལྟར་སྤུང་པ་དང་། །འདོད་ཆགས་ཆུ་ལྟར་གཡོ་བ་དང་། །ཞེ་སྡང་མེ་ལྟར་འབར་བ་དང་། །ཕྲག་དོག་རླུང་ལྟར་འཚུབ་པ་དང་། །དེ་ལ་སོགས་པའི་ང་རྒྱལ་དག །ཐམས་ཅད་ཕྱག་རྒྱ་ཆེན་པོའི། ངང་དུ་མ་ཡེངས་མཉམ་པར་ཞོག །དེ་རྣམས་གེགས་ལས་གྲོལ་བའི་ཚེ། །ས་བཅུ་ལམ་ལྔ་བགྲོད་ཚུལ་དང་། །སྤྱན་ལྔ་མངོན་ཤེས་དྲུག་ལ་སོགས། །དེ་དག་སོ་སོའི་རྟགས་རྣམས་བྱུང་། །དེ་ལྟར་དེ་དག་རྫོགས་པ་དང་། །འོད་གསལ་ཟུང་འཇུག་ཕྱག་རྒྱ་ཆེ། །སྙིང་པོའི་དོན་གྱི་མཐར་ཐུག་མཆོག །མ་རྟོགས་མ་སྐྱེས་རྒྱུས་མ་མཛད། །གང་ནས་མ་འོངས་གར་མི་འགྲོ། །ཐམས་ཅད་ངོ་བོ་ཆེན་པོ་ཉིད། །འོད་གསལ་ཟུང་འཇུག་མངོན་དུ་གྱུར། །དེ་ལྟ་བུ་ལ་གོམས་ལགས་ན། །མཁའ་འགྲོ་དཔའ་བོ་ཆོས་སྐྱོང་ཚོགས། །ཡང་ཡང་ཐམས་ཅད་ཀུན་ཀྱང་མཐོང་། ཡོན་ཏན་འཕྲིན་ལས་འགྲོ་དོན་རྣམས། །རྒྱལ་བ་རྣམས་དང་མཉམ་པར་འགྱུར། དེ་ལྟ་བུའི་གདམས་ངག་འདི། །ཁོ་བོ་རང་བྱུང་རྡོ་རྗེ་ཡིས། །བསྒྲུབ་གནས་ཆེན་པོ་ཁྱུང་རྫོང་དུ། །ཉམས་ལ་ཤར་ནས་བཀོད་པ་ཡིན། །སྐལ་ལྡན་ཀུན་གྱི་གདམས་ངག་མཛོད། །རི་ཆོས་དངོས་གྲུབ་ཕྲེང་བ་ཞེས་བགྱི་བ། རི་ཁྲོད་འགྲིམས་པ་རྣམས་ཀྱི་དོན་དུ་བཀོད་པའོ། །གདམས་པ་འདི་རང་བྱུང་རྡོ་རྗེས་སྤྲེའུ་ལོ་ཟླ་བ་དྲུག་པའི་ཚེས་བཅོ་ལྔ་ལ། མཚུར་ཕུའི་དབེན་གནས་ཁྱུང་རྫོང་དུ་གསུངས་པའོ།། །།

ཨང་ཡིག་བཞུགས་སོ། །ཀྱེ་ཧོ་དཔལ་ལྡན་འགྲོ་མགོན་རིན་པོ་ཆེ། སྐལ་ལྡན་བདག་ལ་བྱིན་གྱིས་བརླབ་དུ་གསོལ། བདག་འདྲ་བློ་དམན་རྣལ་འབྱོར་རི་ཁྲོད་པ། །རང་ལ་གྲོས་འདེབས་གསལ་བའི་མེ་ལོང་བྲི། དཔལ་ལྡན་བླ་མ་དམ་པ་རྗེ། །སྐལ་ལྡན་ལམ་སྣ་དྲང་དུ་གསོལ། །རྗེ་ལ་གསོལ་བ་བཏབ་ལགས་པས། །སྙིང་ལ་གདམ་ངག་གདུད་རྩི་ཞུགས། །དམ་ཆོས་ཐུགས་ཀྱི་ཉིང་ཁུ་བྱུང་། །སྙིང་ལ་གདམ་ངག་བྱོན་ལགས་ཀྱང་། བདག་གིས་བསྒྲུབ་པ་མ་བྱུང་བས། །རང་གིས་རང་ལ་ཁྲེལ་ལོ་ཨང་། །ད་ལྟར་འཇིག་རྟེན་སྣང་བ་ལ། །ཚུལ་ཆོས་གང་ཆེ་ཆོས་པ་བཟང་། །ཤིན་ཏུ་དགའ་བར་འདོད་ལགས་ཀྱང་། ཡིག་འབྲུ་མི་གསལ། བདག་བསྟོད་གཞན་ལ་སྨོད་བྱེད་པ། མ་དྲིས་ཚེ་ན་བདེན་བདེན་འདྲ། འདྲིས་ནས་ཁྲེལ་དགོས་ཡོད་དེ་ཨང་། འདིའི་བདེ་བ་ཡུད་ཙམ་ལ། །བལྟས་ན་ཁེ་དང་བསོག་འཇོག་བྱེད། །རྟག་མེད་སྒྱུ་མ་ལྟ་བུ་ལ། །གཞན་ཕམ་རང་རྒྱལ་མ་བྱེད་ཨང་། ད་ལྟར་འཇིག་རྟེན་འདི་ཉིད་དུ། །མི་རྟག་ཚ་ཚ་མི་བཟོད་ན། །རིགས་དྲུག་བར་དོའི་སྡུག་བསྔལ་ལ། །བཟོད་རེ་བྱེད་པ་འཁྲུལ་ལོ་ཨང་། །ད་ལྟར་བདག་གི་ཡིད་འདི་ལ། །ཚིག་ངན་ཙམ་ཡང་མི་བཟོད་ན། །གཞན་ལ་ངན་དུ་སྨྲ་བ་ནི། །འཁྲུལ་པ་བས་ཀྱང་འཁྲུལ་ལོ་ཨང་། །འཁོར་བ་པ་ལ་བདེ་བ་མེད། །སྲིད་པའི་མུ་མཐར་ཐུག་པ་ཡི། སྡུག་བསྔལ་རྣམ་པ་གྲངས་མཐའ་ཡས། །འདི་ལ་ཞེན་པར་མ་བྱེད་ཨང་། །ཕྱིའི་ཡུལ་དྲུག་དཔེར་བཞག་ནས། །ནང་གི་སྐྱོན་དྲུག་རྟོགས་མཛོད་ལ། །སྤོངས་ལ་ཡོན་ཏན་དྲུག་པོ་ལོང་། འབྲས་བུ་དྲུག་པོ་འབྱུང་ངོ་ཨང་། །བདེ་གཤེགས་བཀའ་དང་བླ་མའི་གསུང་། །ཐོས་ནས་མཐའ་རུ་འདོན་བྱ་ཞིང་། །ནང་ནུབ་རྒྱུན་དུ་སྐྱོན་བརྟགས་ཏེ། །སྐྱོན་དེ་སྤངས་ཤིང་ཡོན་ཏན་འགྲུབ། །དེ་ལ་རྒྱུན་དུ་འབད་གཅིག་ཨང་། །ཡོན་ཏན་ཀུན་གྱི་གཏེར་གྱུར་པ། །བླ་མ་སངས་རྒྱས་ཀུན་དག་ལ། །ངེས་ཤེས་ཆེན་པོ་རྒྱུན་དུ་སྒོམ། །གསང་བསྒྲུབས་བྱང་ཆུབ་ཐོབ་པོ་ཨང་། །ཨ་ཙ་མ་ན་སེམས་ཅན་ཀུན། །ཡི་རེ་མུག་ན་སེམས་ཅན་ཚོ། །ཡ་རེ་ཆ་ན་འཁྲུལ་སྣང་ཅན། །རང་ལ་ཞེས་ཁྲེལ་བསྒོམས་ཅིག་ཨང་། །རྟག་པ་མེད་དོ་འཁོར་བ་ཡི། །མཚན་ཉིད་སྒྲིབ་གཡོགས་འཐུག་པོ་ཡིས། །སྒྲིབ་པས་ད་རུང་འཁོར་བར་འཁྱམ། །རང་ལ་ཡི་མུག་བསྒོམས་ཅིག་ཨང་། །འཁོར་བ་དོན་མེད་སྡུག་བསྔལ་རུ། །སྙིང་པོ་མེད་པ་ཡིན་པ་ལ། །ད་རུང་རྟག་པའི་མཐའ་ཅན་ཟུང་། །སྣང་སེམས་གཉིས་ཀ་རུལ་ལོ་ཨང་། །ད་ལྟར་འཇིག་རྟེན་སྣང་བ་ལ། །བདག་གཞན་གཉིས་སུ་རྟོགས་པའི་ཕྱིར། །གཅིག་པས་གཉིས་ཀ་འཛིན་པ་ཆེ། །རང་ལ་སྙིང་ནས་ཁྲེལ་ལོ་ཨང་། །ཀུན་རྫོབ་རྒྱུན་དུ་སྣང་བ་ཡི། །ཞེན་པ་དང་བཅས་རང་གི་སེམས། །བཟང་ངན་འཁྲུལ་པ་བསམ་མི་ཁྱབ། །འདི་ལ་བདེན་འཛིན་མ་ཆེ་ཨང་། །འཇིག་རྟེན་སྒྱུ་མ་ལྟ་བུ་ལ། །དངོས་འཛིན་བྱུང་ན་བདུད་ཀྱི་ལས། །ཡིན་པར་ཤེས་པར་གྱིས་མཛོད་ལ། །བདེན་འཛིན་མ་བྱེད་ཐོང་ཅིག་ཨང་། །གཞན་དོན་ཇི་ལྟར་སྣང་བ་དེ། བདག་ལའང་དེ་ཙམ་སུ་ཡོད་ཀྱི། །གཞན་ལའང་ཁྲེལ་དུ་མ་ལྟ་བར། །རང་ལ་བསམ་གཞིག་ཐོང་ཅིག་ཨང་། །བླ་མ་དམ་པའི་སྐུ་དྲིན་གྱིས། །ལྷན་ཅིག་སྐྱེས་པའི་ཡེ་ཤེས་འདི། །སྤྲོས་བྲལ་ཆོས་སྐུའི་ངོ་བོ་དེ། །བརྗོད་ཡུལ་བློ་ལས་འདས་སོ་ཨང་། །བདག་འདྲའི་རྣལ་འབྱོར་རི་ཁྲོད་པ། །ལྟོ་གོས་བསྟན་ནས་མེད་ལགས་ཀྱང་། །གཏུམ་མོའི་དྲོད་དང་བཅུད་ལེན་གྱིས། །ཆོག་པའི་མདུན་བསམ་ཡོད་དོ་ཨང་། །ད་ལྟར་བསྡུག་བསྔལ་ཅི་བྱུང་ཡང་། །སྔོན་གྱི་དུས་ན་བསགས་པས་ལན། །དེ་ཕྱིར་རྐྱེན་ངན་འཕྲ་མོས་ཀྱང་། །སྔར་གྱི་ལས་ངན་སེལ་ལོ་ཨང་། །ཇི་ལྟར་བྱས་ཀྱང་ཆོས་ལས་མེད། །ཆོས་བྱས་རང་རྒྱུད་དུལ་ལས་མེད། །ཉོན་མོངས་དུལ་བར་གྱིས་ཅིག་ཨང་། །འཇིག་རྟེན་མི་རྟག་འཁོར་བ་འདི། །ཡང་དག་དོན་ལ་མ་འདས་ཀྱི། །ཆགས་འཛིན་བདེན་བསམ་མ་བྱེད་པར། །སྤྲོས་མེད་དོན་མཆོག་བསྒོམས་ཅིག་ཨང་། །འཇིག་རྟེན་འདི་ན་གནས་པ་ཡི། །ཕན་གནོད་ལྷ་འདྲེར་མིང་བརྟགས་རྣམས། །དོན་ལ་བདེན་པར་མི་བདོག་གིས། དེར་འཛིན་ཞེན་པ་ཐོང་ཅིག་ཨང་། །ཕ་རོལ་ཕྱིན་པའི་དོན་མཆོག་ཉིད། །བདེན་མེད་བརྒྱད་ཀྱི་རྣམ་གྲངས་ཅན། །སྨྲ་བརྗོད་བློ་འདས་དེ་རང་ཉིད། །བསྟེན་མེད་གཟགས་གཏད་བྲལ་ལོ་ཨང་། དེ་ལྟར་ཡིན་ཡང་རྣལ་འབྱོར་བདག །རྒྱུན་དུ་བླ་མ་བསྟེན་ནོ་ཨང་། །རི་ཁྲོད་དགོན་པ་འགྲིམ་མོ་ཨང་། །ལས་ནག་ཕྱོགས་ལ་འཛེམ་མོ་ཨང་། །དཀར་པོ་རིམས་ཀྱིས་བསྒྲུབ་པ་ཨང་། །བློ་བསྐྱེད་རིམས་ཀྱིས་འདོན་ནོ་ཨང་། །ཐམས་ཅད་ཆོས་དབྱིངས་བསྔོའོ་ཨང་། །བཀྲ་ཤིས་དམ་པ་འབྱུང་ངོ་ཨང་། །རང་བྱུང་རྡོ་རྗེ་རང་ལ་གྲོས་འདེབས་པའི་ཕྱིར་སྦྱར་བའོ།། །།

ཀ་ཁའི་ཚིགས་བཅད་གཉིས་བཞུགས་སོ། །བཅོམ་ལྡན་འདས་ཐམས་ཅད་མཁྱེན་པ་ཐུགས་རྗེའི་མངའ་བདག་ལ་ཕྱག་འཚལ་ལོ། །བླ་མེད་བླ་མ་སྲིད་ཞི་ཀུན་ལས་རྣམ་གྲོལ་ཐུགས་རྗེའི་སྟོབས་མངའ་བ། །གཟུང་འཛིན་གཉིས་མེད་ཆོས་ཉིད་སྟོབས་ཀྱི་ཡེ་ཤེས་ཉིད་དུ་སྟོན་མཛད་པ། །གང་ལ་རྟེན་ནས་འགྲོ་བློའི་མ་རིག་སེལ་མཛད་བླ་མ་ཆོས་ཀྱི་རྗེ། ཐུབ་པའི་དབང་པོ་སྲས་དང་བཅས་རྣམས་ཀུན་ལ་བདག་ཡིད་དང་བས་འདུད། །གསུང་རབ་དྲི་མེད་ཀུན་ཀྱི་གཞིར་གྱུར་གྱུར་པ་གང་དེས་འགྲོ་བ་ཡི། །དགེ་ལེགས་ཡོན་ཏན་ཐམས་ཅད་རབ་སྟེར་སྟེར་བར་མཛད་པ་གང་ཞིག་ནི། །དེང་འདིར་རྩ་བའི་ཡིག་གེ་ལས་སྤེལ་སྤེལ་བར་བྱེད་པ་གང་ཡིན་པ། །ཅུང་ཟད་ཙམ་ཞིག་རང་བྱུང་རྡོ་རྗེས་རྡོ་རྗེའི་ཚིག་ཏུ་རབ་སྤེལ་བྱ། ཀ་ཤི་ཀ་ཞེས་གྲགས་པའི་ཡུལ་དུ་ཀ་ལ་པིང་ཀའི་སྒྲ་དབྱངས་ཀྱིས། ཁ་ན་མ་ཐོ་མེད་པའི་ཆོས་གསུངས་ཁ་བ་ཅན་དུ་ལེགས་དར་བས། །ག་ལ་བ་དེར་མ་རིག་ནད་རྣམས་ག་པུར་ལྟ་བུར་རབ་སེལ་བ། ང་རུ་འཛིན་པ་འཇོམས་མཛད་དེ་ལ་ངར་འཛིན་མེད་པས་ཕྱག་འཚལ་ལོ། །ཅ་ཅོའི་རང་བཞིན་སེམས་ཅན་རྣམས་ནི་ཅི་བཞིན་ཡེ་ཤེས་མ་རྟོགས་པས། །ཆ་ཤས་ཙམ་གྱི་འཆིང་བ་འདི་ལས་ཆའི་ཆ་ཡིས་རབ་བཅིངས་པ། །ཇའི་རོ་སོགས་འདོད་ཡོན་གྱིས་བཅིངས་ཇ་བཞིན་འཁོར་བའི་རྒྱ་མཚོར་འཁོར། ཉ་སོགས་ངན་སོང་གསུམ་དུ་འཁོར་ཞིང་ཉན་རང་ཙམ་ཡང་ཐོབ་མི་བྱེད། །ཏཀྵ་ཀའི་རྒྱན་ལྟར་རང་བྱུང་ཏ་ལེ་རང་ལ་གནས་པའི་དོན། །ཐ་གྲུ་དཔག་མེད་དཔག་པར་རབ་དཀར་ཐ་དད་བྲལ་བའི་ངོ་བོ་ཉིད། །ད་ལྟ་མ་རིག་དྲི་མ་དང་བཅས་ད་ནི་དད་པ་བླ་མེད་པས། །ན་སོགས་སྲིད་པའི་འཆིང་བ་བཅད་ནས་ནད་མེད་བྱང་ཆུབ་བརྩལ་བར་བྱ། །པ་བ་སངས་ལྟར་རབ་དཀར་ཆོས་ནི་པ་ལའི་དྲི་ལྟར་རབ་དངས་པ། །ཕ་རོལ་ཕྱིན་ལྔ་མཆོག་གྱུར་ཤེས་རབ་ཕ་རོལ་ཕྱིན་ལ་ལེགས་བསྟེན་ན། །བ་མཆོག་ལྟ་བུར་ཡོན་ཏན་ཀུན་འབྱུང་བ་སྤུ་གཡོ་བའི་སྙིང་རྗེ་ཡིས། །མ་སོགས་འགྲོ་ལ་ཐེག་ཆེན་ཆོས་ཀྱིས་མ་རིག་སྒྲིབ་པ་ལས་གྲོལ་བྱ། །ཙ་རིའི་རི་སོགས་བསམ་གཏན་གནས་མཆོག་ཙན་དན་དྲི་ལྟར་དངས་པའི་གནས། །ཚང་ཚིང་ནགས་ཚལ་རབ་དབེན་ཉོན་མོངས་ཚ་གདུང་ཞི་བྱེད་ལྷ་རྣམས་ཀྱི། །ཛ་ཌའི་ཅོད་པན་གྱིས་གཏུགས་བཏུད་ནས་ཛ་ཧཱུཾ་སྔགས་ཀྱིས་བདུད་བཏུལ་ནས། །ཝ་ལྟར་ཞུམ་ཞིང་མྱུར་དུ་ཝ་སྒེགས་མཚན་མའི་སྒྲིབ་པ་སྦྱོང་། །ཞ་ཉེའི་ཁམས་པས་མཉེན་པའི་སེམས་འདི་ཞ་ལ་དགའ་བར་མ་བྱེད་པར། ཟང་ཟིང་ལས་གྲོལ་རྒྱལ་བའི་སྲས་ལྟར་བཟའ་བཏུང་ལ་སོགས་སྦྱིན་པར་བྱ། །འ་ཞིའི་སྦྲུལ་སོགས་གནས་པའི་མ་འོངས་པ་ན་འ་སྒྲའི་སྡུག་བསྔལ་སེལ་བྱེད་པ། །ཡང་དང་ཡང་དུ་བརྩོན་འགྲུས་བསྐྱེད་ནས་ཡ་རབ་དམ་པའི་ཚུལ་གནས་བྱ། །ར་བས་དམ་བཅིངས་འགྲོ་ལ་ཡེ་ཤེས་རང་བྱུང་དྲི་མེད་བསྟན་བྱའི་ཕྱིར། ལ་ལར་ཉན་རང་ཐེག་པ་བསྟན་ཅིང་ལ་ལར་བྱང་ཆུབ་མཆོག་གི་ལམ། ཤཱཀྱའི་གསུང་ལ་མངོན་ཤེས་རྫུ་འཕྲུལ་ཤཱཀྱའི་སྤྱན་ལ་སོགས་པ་རྣམས། །ས་དང་ལམ་མཆོག་ཐོབ་པར་བྱ་ཕྱིར་ས་སྟེངས་མ་ནོར་སྦྱང་པར་བྱ། །ཧ་ཅང་མྱུར་བར་ཚོགས་གཉིས་བསགས་ན་ཧ་ཅང་མྱུར་བར་བྱང་ཆུབ་ཐོབ། ཨ་ལ་ལ་སྟེ་འགྲོ་བའི་དེད་དཔོན་ཨེ་མ་འདི་ནི་ཤིན་ཏུ་མཚར། །དེ་ལྟར་རྒྱལ་བའི་གསུང་རབས་གཞིར་གྱུར་སུམ་ཅུར་གྱུར་པའི་བདག་ཉིད་དེ། །འདིར་ནི་ཟབ་མོ་གནད་ཀྱི་གདམས་པ་རབ་ཏུ་ཟབ་པའི་སྡེབ་སྦྱོར་འདི། །དཔལ་ལྡན་ལྷ་སྟེངས་ཞེས་བྱ་བའི་གནས་སུ་བྲིས་པའི་དགེ་བས་འགྲོ་ལ་དཔལ་གྱུར་པའི། །ཡོན་ཏན་གང་ཡིན་དེ་ཉིད་སེམས་ཅན་ཀུན་ལ་འབྱུང་བར་འགྱུར། །སྦྲུལ་ལོ་ཟླ་བ་བདུན་པའི་ཚེས་བརྒྱད་ལ་བྲིས། བཀྲ་ཤིས་དཔལ་འབར་འཛམ་གླིང་བརྒྱན་དུ་ཤོག། །།

༈ བླ་མ་དང་དཀོན་མཆོག་གསུམ་ལ་ཕྱག་འཚལ་ལོ། །ཀ་རྒྱུད་བླ་མ་དཔལ་ལྡན་ཡིད་བཞིན་ནོར་བུའི་གསུང་། །མཁའ་འགྲོའི་སྙན་རྒྱུད་ཟབ་གདམས་གནད་ལས་ལེགས་འོངས་པས། །གང་དེའི་འོད་ཟེར་གདུལ་བྱའི་སྙིང་པོ་ལེགས་སྤྲོས་ནས། །ང་སོགས་མ་རིག་དྲི་མ་སྦྱོང་མཛད་ཨེ་མ་མཚར། །ཅ་ཅོའི་སྒྲ་སོགས་ཅི་བཞིན་རྣམ་རྟོག་འཁྲུལ་པ་འདི། །ཆ་ཤས་ཙམ་གྱིས་འཁོར་བའི་བཙོན་རར་འཆིང་བྱེད་པ། །ཇའི་རོ་སོགས་ཡུལ་ལ་མངོན་པར་ཆགས་པས་བྱུང་། །ཉ་ལྟར་འདོད་ཡོན་རོ་ལ་ཆགས་པར་མ་བྱེད་ཅིག །ཏ་རེ་ལ་སོགས་བསྐྱེད་རིམས་ལྷའི་རྣལ་འབྱོར་རྣམས། །ཐ་དད་བྲལ་བའི་ཚུལ་དུ་མ་ནོར་ལེགས་བསྒོམས་ནས། །ད་ནི་གཟུང་འཛིན་ལུས་ཀྱི་འཆིང་བ་རབ་ཆད་ནས། །ན་རྒས་འཆི་བ་མྱུར་དུ་ཡོང་བར་འགྱུར་བ་ཡིན། །པ་ལའི་དྲི་ལྟར་ཡིད་འོང་གནད་ཀྱི་གདམས་པ་ཡིས། །ཕ་རོལ་ཡུལ་སྣང་སྒྱུ་མ་ལྟ་བུར་དབང་བསྒྱུར་ཚེ། །བ་བཞོན་ལྟ་བུར་ཐུན་མོངས་དགོས་འདོད་ཤུགས་ལས་འབྱུང་། །མ་རིག་འཁོར་བ་འདི་ལས་མྱུར་དུ་ཐར་བར་བྱེད། །ཙ་རི་ཏྲ་སོགས་སུམ་ཅུ་རྩ་གཉིས་གནས་མཆོག་ཏུ། །ཚ་རེག་རང་བཞིན་ཙན་ཌ་ལི་སོགས་རབ་བསྒོམ་ཞིང་། །ཛ་ཧཱུཾ་སྔགས་ཀྱི་རང་བཞིན་རྡོ་རྗེའི་བཟླས་པ་ཡིས། །ཝ་བགེགས་མཚན་མའི་རྣམ་རྟོག་འཇོམས་པར་བྱེད་པ་ཡིན། །ཞ་ལྟར་དཔལ་ལྡན་བླ་མ་སྤྱི་བོའི་གཙུག་ཏུ་ཁུར། །ཟག་མེད་ཏིང་འཛིན་རྩེ་ཅིག་རྒྱུན་དུ་མཉམ་བཞག་བྱ། །འ་ཞའི་ཡུལ་སོགས་གནས་པ་འགྲོ་ལ་སྙིང་རྗེ་བསྒོམ། །ཡང་དང་ཡང་དུ་གོམས་པར་བྱས་ན་བྱང་ཆུབ་ཐོབ། །རང་བཞིན་སྤྲོས་པའི་མཐའ་བརྒྱད་བྲལ་བ་ཟབ་མོའི་དོན། ལ་ལ་གདུལ་བྱའི་དུ་མར་བསྟན་པ་ཡང་། །ཤཱཀྱའི་རྒྱལ་པོས་གསུངས་པས་ཤེས་རབ་ཕ་རོལ་ཕྱིན། །ས་ལམ་མྱུར་བགྲོད་མཐར་ཕྱིན་སྐུ་བཞིའི་མངའ་བདག་འགྱུར། །ཧ་ཧ་འདི་ལྟར་གཞི་ལམ་འབྲས་བུ་ཨེ་མ་མཚར། །ཨ་ལ་ལ་སྟེ་གསུང་རབ་རྒྱ་མཚོའི་སྙིང་པོ་ཡིན། འདི་ལྟར་ཀུན་གཞིར་གྱུར་པའི་ཡི་གེ་སུམ་བཅུ་ཡིས། །སྤེལ་ཚིག་འདི་ནི་རང་བྱུང་རྡོ་རྗེས་ལེགས་པར་སྦྱར། །འདི་ལས་བྱུང་བའི་དགེ་བ་དྲི་མ་མེད་པ་དེས། །ནམ་མཁའི་མཐས་ཁྱབ་སྙིང་པོའི་དོན་ལ་འཁོད་པར་ཤོག །སྦྲུལ་ལོ་ཟླ་བ་དྲུག་པའི་ཚེས་བརྒྱད་ལ་ལྷ་སྟེངས་ཞེས་བྱ་བའི་རི་ཁྲོད་དུ་བྲིས་པའོ།། །།

གསང་ཕུ་པ་ལ་སྤྲིང་ཡིག་བཞུགས་སོ། །བླ་མ་དང་སངས་རྒྱས་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དཔལ་ལྡན་བླ་མ་འཇིག་རྟེན་ཀུན་ལ་བརྩེ་བ་ཅན། །ཉེས་པའི་སྐྱོན་བཅོམ་འཇིག་རྟེན་ཀུན་ལས་འདས་པ་པོ། །ལམ་བཟང་དྲི་མེད་འཇིག་རྟེན་ཀུན་གྱིས་མ་སྨད་པ། །ཕན་བདེ་མཆོག་གྱུར་འཇིག་རྟེན་ཀུན་ལ་སྣང་མཛད་རྒྱལ། ཐུབ་བསྟན་ཟབ་ཡངས་ཆུ་གཏེར་གཏིང་དཔག་དཀའ་བ་གང་། རུ་སྦལ་ཕྲ་མོ་ཉ་སོགས་བློ་ཡིས་ཇི་ལྟར་འཇལ། དེད་དཔོན་ཆེན་པོས་རྒྱ་མཚོར་ཀུན་ནས་སྤྱོད་པ་གང་། །འཇིག་རྟེན་ཀུན་ལ་འདི་པས་གྲགས་པ་ཐོབ། །དལ་འབྱོར་རིན་ཆེན་ཡོན་ཏན་ཀུན་གྱིས་བསྟེན་པ་གང་། ཚུལ་ཁྲིམས་རྒྱན་བཟང་བཟོད་པའི་ལྷབ་ལྷུབ་ཀྱིས་བཀྲ་ཤིས་ཤིང་། །ཤེས་རབ་འོད་སྟོང་འབར་བས་ས་སྟེངས་གསལ་གྱུར་ཚེ། །རྡོ་རྗེ་ཐེག་པ་སྣ་ཚོགས་ཐབས་ཀྱིས་རྒྱན་ལ་ཞོན། །བསམ་གཏན་འཚོ་བས་ལུས་སེམས་ཀུན་ཏུ་ཚིམ་བྱེད་ཅིང་། །བཤེས་གཉེན་གྲོགས་ཀྱི་ཕྱི་བཞིན་འགྲོ་བར་བྱེད་པ་གང་། །ཤིན་ཏུ་རྙེད་དཀའ་སྐལ་པ་དུ་མར་བསྒྲུབ་པ་དཀའ། །བསྒྲུབས་ན་བདེ་ཞིང་རྒྱལ་བ་ཀུན་གྱི་བསྔགས་པར་མཛད། །གང་གིས་དཀའ་སྤྱད་དཔེ་མེད་ལྷ་དང་མི་རྣམས་ཀྱིས། །སྤྱད་པར་མི་ནུས་རབ་སྤྱད་རྡོ་རྗེའི་གདན་ལ་བཞུགས། །ཕྱི་ནང་སྣང་བའི་གྲོགས་བཅས་བདུད་རྣམས་མངོན་དུ་བཅོམ། །དེས་མཛད་མཛད་པའི་འཇིག་རྟེན་ཀུན་གྱིས་བགྲོད་པའི་འོས། །ཀྱེ་མ་ཐོག་མེད་བག་ཆགས་ཆགས་པའི་མཐུ་བཅོམ་ཞིང་། །ལོག་པའི་ཀུན་རྟོག་རབ་འབར་འབར་བའི་མེ་སྐྱོད་རླུངས། །འུར་འུར་འབར་བས་ལྷག་མ་བསལ་བ་རྨོངས་བྱས་ནས། །མ་རབས་སྤྱོད་པ་འཇིག་རྟེན་བརྟེན་པ་ཀྱི་ཧུད་ཉམས། །ཐོས་དང་བསམ་པ་ཏིང་འཛིན་བསྒོམ་པ་མཐར་ཕྱུང་སྟེ། །མངོན་ཤེས་རྫུ་འཕྲུལ་ལྡན་པས་གཞན་དག་དཀྲི་བྱ་ཞེས། །འཇིག་རྟེན་གསུམ་གྱི་བླ་མས་བསྟན་པ་མི་སྤྱོད་པར། །དེང་སང་དུས་ན་ཤཱཀྱའི་བསྟན་ལ་བརྩོན་ཏེ་ཞེས། །ཡུལ་གྱི་སྲེད་པའི་ཞགས་པ་ཐོགས་པའི་སྡིག་ཅན་གྱིས། །དབང་མེད་བཅིང་ནས་སློབ་དཔོན་སློབ་མའི་ཚུལ་བཟུང་ནས། ཁེ་དང་གྲགས་པས་འཇིག་རྟེན་སྨ་བབས་སྤྱོད་པ་གང་། །མཁས་པ་རྣམས་ཀྱིས་སྨད་འཚོང་བུད་མེད་བཞིན་དུ་སྨོད། དགེ་བཅུའི་ལམ་སྟེན་འཇིག་རྟེན་ཕན་པར་སེམས་དཔའ་གང་། །བྲན་མོ་ཞིག་ཀྱང་ཕྱི་མར་མཐོ་རིས་བདེ་ལེགས་སྤྱོད། །མི་དགེ་བཅུ་སྟེན་འཕགས་པའི་རྒྱལ་མཚན་ཐོགས་པ་སྤངས། །སྲིད་པ་གཞན་དུ་ཀྱེ་མ་ཀྱི་ཧུད་འབོད། སྨན་པ་རྣམས་ཀྱང་མཁས་ཤིང་སྙིང་རྗེའི་ཚུལ་ལྡན་པས། །ནད་རྣམས་སེལ་བར་བརྩོན་པར་བྱེད་ཀྱང་ནད་པ་དེ། །སྨན་རྣམས་མི་བསྟེན་རང་སྲོག་གཅོད་པར་བྱེད་པ་གང་། །སུ་ཞིག་གིས་བསྟེན་བསྟེན་ཀྱང་ཉམས་པར་འགྱུར། །ཆོས་ཀྱི་བླ་མ་འཇིག་རྟེན་མཐུན་འཇུག་བསྟན་པ་གང་། །སྲིད་ཡུལ་འཐིབས་པོར་ཞུགས་པའི་རིགས་ལྡན་སྐྱེས་བུ་ལ། །དེ་དང་དེ་ལྟར་བློ་ལ་སྟོན་མཛད་རིགས་མེད་རྣམས། །ས་བོན་རུལ་པ་ལྟ་བུར་རང་གི་ཉེས་པས་འདོར། །དེ་ཕྱིར་མཁས་རྣམས་བླང་དང་དོར་བའི་ཚུལ་ཤེས་ནས། བདེ་བར་གཤེགས་པས་བསྔགས་པའི་ལམ་ལ་གཞོལ་བར་མཛོད། །ཀྱེ་མ་སེམས་ཀྱི་གླང་ཆེན་སྨྱོན་པ་འདི། །དྲན་པའི་ལྕགས་ཀྱུས་དབང་དུ་མ་བྱས་ན། །སྲེད་པའི་ལན་ཚས་བྲིད་དེ་ངན་འགྲོ་ཡི། །ཅོང་རོང་རྩུབ་མོར་ལྷུང་ནས་ཉམས་ཐག་འགྱུར། །ཡུལ་གྱི་ཀུན་རྟོག་ཞེན་པ་མ་བཅད་ན། །ལྕགས་ཀྱུའི་ཟས་ལ་ཞེན་པའི་ཉ་བཞིན་དུ། །དབང་མེད་བཅིངས་ཏེ་བདུད་ཀྱི་ཕོ་ཉ་ཡིས། དྲངས་ནས་ཐར་པའི་རིན་ཆེན་སྲོག་དང་བྲལ། །ཆོས་རྣམས་རང་གི་སེམས་སུ་མ་ཤེས་ན། །ཚིག་ལ་རྟོག་པ་བྲག་ཆའི་སྒྲ་བཞིན་དུ། །རྐྱེན་མ་ཟད་པས་ཟད་པར་འགྱུར་བ་མེད། །དེས་ན་མིང་དང་ཚིག་གི་སྤྲོས་པ་ཆོད། རྒྱལ་དང་རྒྱལ་སྲས་རྣམས་ཀྱིས་བསྟེན་པའི་ལམ། །ལམ་དང་ལམ་མིན་བླང་དང་དོར་བ་ཤེས། །ཤེས་དང་ཤེས་བྱ་མི་རྟོག་རབ་ཏུ་ཞི། །ཞི་བ་ཞི་གྱུར་ནགས་སུ་གནས་པ་བདེ། །མི་བསྲུན་མི་བྱེད་སྣ་ཚོགས་ཤིང་དང་ཆུང་ཡང་སྤྱད། །ཚུལ་མིན་མི་བྱེད་སྣ་ཚོགས་རི་དྭགས་སྡུག་གུ་རྣམས། །མི་བསྙན་མི་བྱེད་སྣ་ཚོགས་རྒྱུན་སྒྲའི་འབབ་ཆུ་བཞིན། །རྩུབ་མོར་མི་བྱེད་སྣ་ཚོགས་ནིའུ་སིང་སྔོན་པོ་ཡིན། །ཀྱེ་མ་མཁས་རྣམས་བདེ་བའི་ནགས་ཁྲོད་རྣམས་སྤངས་ནས། །བསྐྱེད་ཚལ་ལྗོན་པ་ངན་ངོན་ཁྲོད་ལ་རབ་ཞེན་པ། མཚོན་སྔོན་འབར་བཅས་ཀྱེ་ཧུད་ཆོ་ངེའི་སྒྲ་འབྱིན་པའི། །འགལ་དུམ་རང་རོད་ཅན་ལ་མངོན་པར་སྨོན་གྱུར་ཏམ། ཤིན་དུ་འཇམ་འཚེར་སྤང་ལྗོང་ཞི་བ་རྣམས་སྤངས་ནས། །ཁྲད་ཁྲོད་ཞིང་རོལ་ལྗ་ལྗིན་ཁྲོད་ལ་མངོན་ཞེན་པ། །རོ་ཉེ་མི་གཙང་མར་ཀོ་ཏི་ཡིས་གང་གྱུར་པར། །མེ་འབར་མཚོན་ཆས་གཏམས་པའི་ལམ་ལ་དགར་འགྱུར་གཏམ། ཞི་བའི་ལྷ་དང་ཞི་བའི་གྲོགས་ལ་མི་བསྟེན་པར། །མཛེམ་མིན་ཚུལ་མིན་སྤྱོད་པའི་གྲོགས་ལ་བསྟེན་བྱེད་པ། །གཤིན་རྗེའི་སྐྱེས་བུ་བེ་ཅོན་ལག་ཐོགས་རབ་གཡེངས་པའི། །ཁྲོད་དུ་མཉམ་དང་ཤུགས་ནར་འཁོད་པར་སྤྲོ་གྱུར་ཏམ། །ཨེ་མ་མཚོ་གནས་མེ་ཏོག་ལྗོན་པ་རབ་བཀྲ་བར། །ཞི་བའི་བདེ་བས་འཇིག་རྟེན་ཅ་ཅོ་རྣམས་སྤངས་ཏེ། །ཆོས་ཀྱི་རོ་མྱོང་དགའ་བས་བསྐྱེད་པ་གང་། །དེ་ཅི་འདྲེས་པའི་ཚལ་ན་བདེ་བ་འདི་ཡོད་དམ། །སྣ་ཚོགས་བྱ་དང་བུང་བ་མྱོས་པས་སྒྲ་འབྱིན་ཅིང་། །ཆབ་སྒྲ་ལྷུང་ལྷུང་དམ་བུས་རླུང་སྒྲས་སྐྱོད་པ་གང་། རྣམ་གཡེང་སྤངས་པའི་རྣ་བའི་དབང་པོ་ཚིམ་བྱེད་པའི། །འདི་ཅི་དྲི་ཟའི་གླུ་དབྱངས་ལ་ཡང་འདི་ཡོད་དམ། །དུས་ཀྱི་རླུང་གིས་རླན་དང་བཅས་པའི་ས་ཕྱོགས་ན། །སྨན་དང་མེ་ཏོག་དྲི་ཞིམ་ངད་ལྡན་ལ་ཕྲོགས་ཏེ། དལ་བུས་དབེན་གནས་ཀུན་ཏུ་ཁྱད་པར་བྱེད་པ་གང་། །འདི་ཅི་སྤོས་ངད་ལྡན་པའི་ཚལ་ན་འདི་ཡོད་དམ། བསམ་གཏན་ལྡན་པས་ཡུལ་རྣམས་སྒྱུ་མ་ལྟར་མཐོང་ཞིང་། མ་བརྟགས་གཟུགས་རྣམས་དབང་པོའི་གཟུགས་ལྟར་སྣང་གྱུར་ཏེ། །རྣམ་པར་མི་གཡེང་དུ་མར་གསལ་གྱུར་པ། །འདི་ཅི་ཚངས་པའི་གཞལ་མེད་ཁང་ན་འདི་ཡོད་དམ། །བྲག་ཆའི་ཚུལ་དུ་ལྷ་དང་ལྷ་མིན་མི་རྣམས་ཀྱིས། སྒྲ་སྐད་ཐོས་ཤིང་ཉིན་མཚན་ཆོས་ཀྱི་སྒྲ་སྙན་དག །ཟུག་རྔུ་མེད་པར་ཐོས་པ་དང་ཞིང་ཞི་བ་གང་། །དེ་ཅི་ལྷའི་རྔ་བོ་ཆེ་ལ་འདི་ཡོད་དམ། །འདོད་དང་རྟོག་དཔྱོད་གཡོ་བའི་སེམས་རབ་བྲལ་བ་ཡི། །བསམ་གཏན་བདེ་བ་ཟུག་རྔུ་མེད་པས་ཁྱབ་པ་གང་། དེ་ཚེ་ལྷ་དབང་ཐིག་ལེ་མཆོག་ལ་གྱེས་གྱུར་པ། །ཕུལ་དུ་གྱུར་པ་གང་དེ་ལ་ཡང་འདི་ཡོད་དམ། །ཆོས་རྣམས་ཚུལ་མཐོང་འགྲོ་ལ་བརྩེ་བས་འཁྱུད་གྱུར་ཅིང་། །ཕྱོགས་བཅུའི་རྒྱལ་བས་ཡོན་ཏན་བསྔགས་པའི་མེ་ཏོག་འཐོར། འདོད་པའི་བདུད་ཀྱིས་མ་འཕྲོགས་ཤུགས་ཀྱང་ནར་ཞེས་འབྱིན། །འདི་ཉན་རང་དགྲ་བཅོམ་ལ་ཡང་འདི་ཡོད་དམ། །ཀྱེ་མ་ཆོས་རྣམས་གཅིག་ཏུ་མ་རྟོགས་བླུན་པོ་ཡིན། །ཡུལ་སྣང་རྐྱེན་རྣམས་སྒྱུ་མར་མ་མཐོང་ལོང་བ་ཡིན། །སྣ་ཚོགས་སྒྲ་རྣམས་བྲག་ཆར་མ་ཤེས་འོན་པ་ཡིན། །ཚུལ་ཁྲིམས་དྲི་བསུང་མ་ཚོར་སྣ་དེ་ཞོམ་པ་ཡིན། །བསམ་གཏན་རོ་མཆོག་མ་མྱོང་ལྕ་དེ་ཆད་པ་ཡིན། །ཤེས་རབ་བདེ་བ་མ་མྱོང་ལུས་དེ་རུལ་བ་ཡིན། །ངེས་འབྱུང་དྲན་པ་གཏོར་བའི་སེམས་དེ་སྨྱོན་པ་ཡིན། ཁེ་ཕྱིར་དམ་ཆོས་སྤྱོད་པར་བྱེད་པ་ལོག་འཚོ་ཡིན། །ཀྱེ་མ་ཕྱེ་མ་ལེབ་ཁྱེད་མར་མེས་ཅི་ཞིག་བྱེད། རི་དྭགས་ཁྱོད་ལ་བཤུགས་པའི་སྒྲ་ཡིས་ཅི་ཞིག་ཕན། །བུང་བ་ཁྱོད་ལ་མེ་ཏོག་དྲི་ཡིས་ཅི་ཞིག་བདེ། གསེར་མིག་ཅན་ལ་ལྕ གས་ཀྱུའི་ཟས་ཀྱིས་ཅི་ཞིག་ལྟས། །རྨ་གཡའ་ཕྲུགས་པ་བདེ་བར་སེམས་པ་ཅི་ཞིག་ཡིན། འདི་ལྟར་འཇིག་རྟེན་སྤྱོད་པ་མཁས་རྣམས་བཟློག་ན་ལེགས། །མུན་པའི་གདོང་ལ་ཟླ་བའི་ཟེར་ལྡན་ལྷ་མོ་དེ། །ཉི་མའི་ཁྲོད་དུ་དྲང་པའི་རེག་པས་ཀར་བཅོལ་ཏེ། །ལྷ་གཅིག་ངུ་ལ་གཞན་དག་འཕྲུལ་བྱེད་ལྷ་རྣམས་རྒོད། །ཅིའི་ཕྱིར་ན་དཔལ་ལྡན་ཤུགས་ཀྱང་ནར་གྱིས་འབྱིན། །དེ་ལྟར་བརྗོད་ལ་ཅུང་ཟད་དགོས་པའི་མཐུ་ཡོད་ན། །བདུད་ཀྱི་སྟོབས་བཅོམ་གཡེང་བའི་དྲ་བ་བྲལ་བྱས་སྟེ། །མཁའ་མཉམ་དོན་དུ་ཞི་བ དེ་མཆོག་ཏུ་སོན་པ་དང་། །རྒྱལ་བའི་བསྟན་པ་སྐྱོན་མེད་ཡུན་རིང་རྒྱས་པར་ཤོག །ཚིགས་སུ་བཅད་པ་སུམ་བཅུ་རྩ་གཉིས་པ། རང་བྱུང་རྡོ་རྗེས་སྙིགས་དུས་ཀྱི་སྤྱོད་པ་མཐོང་ནས་རེ་ཤིག་སྦྱར་བ་རྫོགས་སོ།། །།

རྒྱལ་བ་ཡེ་ཤེས་ལ་སྤྲིང་ཡིག་བཞུགས་སོ། །ཨོཾ་སརྦ་སྭ་སྟི་སིདྷི་ཧཱུཾ། །བླ་མ་དམ་པ་རྣམས་ལ་ཕྱག་འཚལ་ལོ། །དཔག་མེད་དུས་ལ་དཔག་ཏུ་མེད་གཟིགས་ཤིང་། །གཞན་ལ་ཕན་བྱེད་གཞན་དོན་ཁོ་ན་དགོངས། །ཉིད་ཀྱི་ཐུགས་ནི་ཉི་མའི་དཀྱིལ་འཁོར་བཞིན། ཀུན་ཏུ་གསལ་མཛད་ཀུན་ལ་ཕྱག་འཚལ་ལོ། །རང་བྱུང་མིན་ཀྱང་རང་བྱུང་ལ་དད་པས། །རྡོ་རྗེ་བཞིན་དུ་རྡོ་རྗེའི་ཐེག་པ་བསྟེན། །མིང་ལ་དམིགས་ཀྱང་མིང་དུ་གྲགས་པ་ཡིན། །མཐུན་འཇུག་མིན་ཀྱང་མཐུན་པར་གསོལ་བའི་ཚིག །བྱང་ཆུབ་སེམས་དཔའ་སྤྱན་རས་གཟིགས་དབང་གིས། །རྗེས་འཇུག་རྒྱལ་བའི་ཡེ་ཤེས་ལ་དད་ཅིང་། བསགས་སྦྱངས་སྔོན་དུ་སོང་བའི་ངང་ཆ་ཅན། །དམ་པ་ཁྱེད་ཀྱི་སྙན་དུ་འདི་སྤྲིང་ངོ་། །བརྩེ་བའི་ཐུགས་ལྡན་ཞལ་གྱི་པད་མོ་ནས། །ཚིག་གི་ཟེ་འབྲུའི་ཕྲེང་བ་སྤེལ་ལེགས་ཤིང་། །སྡེབས་སྦྱོར་དོན་གྱི་སྦྲང་རྩི་ལྡན་པ་དག །རྣམ་ཤེས་སྐྱེ་བོའི་ཡན་ལག་གཡོ་བ་ཡིས། གཏོར་བར་གྱུར་པ་འདི་ནི་སྔོན་དུ་བབས། །བདག་གིས་ཤར་ཕྱོགས་ཡུལ་དུ་ཆོས་ཀྱི་ལམ། ཕྱོགས་ཙམ་བྱིས་པ་བྲིད་པ་བཞིན་དུ་བསྟན། །གནས་དེར་སྐུ་ཡངས་ཉི་མའི་སྙིང་པོ་དེ། །ནུབ་པར་གྱུར་ཀྱང་མཚན་མོའི་ཟླ་འོད་བཞིན། །དག་པའི་ལམ་ལ་འཇུག་འདོད་སྐྱེས་བུ་ལ། །ཐམས་ཅད་མཁྱེན་པའི་ལམ་ལ་དཀྲི་བྱའི་ཕྱིར། །བསམ་གཏན་ལམ་གསལ་མཛད་པ་བདག་ཡིད་རང་། །ཨེ་མའོ་ཐུབ་པའི་བསྟན་པ་འདི། །ངོ་མཚར་རྨད་དུ་བྱུང་པའི་ཕྱིར། །རྒྱུར་གྱུར་ཤིང་རྟ་འཁོར་ལོ་ཅན། རྒྱུར་གྱུར་རྡོ་རྗེའི་ཐེག་པ་ཡི། །ཤིང་རྟ་ཕྱི་ནང་འཁོར་ལོ་ཅན། །ཞོན་པའི་དུས་ལ་བཤད་མོད་ཀྱང་། ཁ་ཅིག་མེས་པོའི་དབང་དུ་གྱུར། །གཞན་དག་ཇི་བཞིན་དགྲ་ལ་ཞེན། །ལ་ལ་གཞིའི་སྟེང་དུ་ལུས། །དེ་བཞིན་ཐབས་ཀྱི་བསྒྲོག་གིས་བཅིང་། །ཡུལ་དང་ཡུལ་ཅན་ཐ་དད་ཀྱི། །རྟོག་པའི་འཆིང་བས་ལེགས་དཀྲིས་པ། །ཕལ་ཆེར་བཅིངས་པའི་དག་ཉིད་གྱུར། །ཀྱེ་མ་འཁོར་བའི་རྒྱ་མཚོར་དལ་འབྱོར་གྲུ་ཆེན་བླ་མ་མཆོག་གིས་མཉན་པ་ཡིས། །ལེགས་པར་བསྐྱེད་ཚེ་ལེ་ལོ་མེད་པར་མཆོག་གི་གདམས་པ་དོན་དུ་གཉེར་བར་བྱ། །དབང་པོ་དང་ནི་ཡུལ་དང་ཤེས་པ་ལ་སོ་སོར་སྣང་བ་ལེགས་པར་བསྡུས་ཏེ་དེ་ཡི། །རང་བཞིན་སྒྱུ་མ་ལྟ་བུར་རྟགས་དང་རྟགས་ཅན་སྡུད་བྱེད་རྩ་དང་གཟའ་རྣམས་བཅིང་། །རྟོགས་དཔྱོད་ནུས་དང་དགའ་དང་བདེ་བའི་མཐའ་ཅན་ཞེན་པ་རབ་གཅད་པ། །རྣམ་པར་སྦྱང་ནས་སྲོག་དང་རྩོལ་བའི་མཐུ་ཡི་ལྔ་དང་ལྔ་པོ་དགག་བྱ་ཞིང་། །དུས་སྦྱོར་དང་ནི་སྟོང་པ་དགའ་དང་དབུག་ཀྱི་སུམ་ཅུ་སོ་གཉིས་ཆ་ཤས་ཀྱི། །རང་བཞིན་བསྟན་པས་ཐུགས་ཀྱི་འཁོར་ལོའི་དང་པོའི་སྒོར་ནི་ཞུགས་ཤིང་དབང་ཐོབ་པ། །དེ་ནས་བཟུང་སྟེ་བ རྒྱ་ཕྲག་བཅོ་བརྒྱད་དྲུག་པས་ཟུང་གྱུར་འགགས་ཤིང་དག་གྱུར་པ། །དེ་ནི་རྣམ་དག་དགྲ་གཅན་དུས་མེའི་ཟླ་བའི་རང་བཞིན་བཅུ་དྲུག་བཅུ་དྲུག་གི །དགའ་དང་སྐད་ཅིག་ཆ་ཤས་རྐང་པ་རྡོ་རྗེ་འབེབ་པ་འབེབས་པ་ཆེན་པོ་ཡིས། རང་བཞིན་དག་བྱས་བྷ་གའི་དབུས་སུ་རྣམ་པར་སོང་ལས་སྤྲོ་དང་བསྡུ་བ་ཡི། །སེམས་ཀྱི་གཟུགས་བརྙན་རྗེས་ཆགས་རྗེས་ཆགས་མིན་དང་རོ་གཅིག་ཚུར་དུ་འཕྲོ་བའི་སྤྲིན། །དག་བྱས་སྐུ་དང་ཐིག་ལེ་ཡེ་ཤེས་དཀྱིལ་འཁོར་རྣམ་པར་དག་པའི་མཐར་སོན་པ། །འདི་ནི་རྒྱལ་བས་བསྟན་པའི་ལམ་བཟང་དྲི་མེད་ཡིན་ཞེས་སྤྱན་རས་གཟིགས་ཀྱིས་གསུངས། །དེས་ན་ལམ་མཆོག་དཔལ་ལྡན་འདི། །བརྩོན་འགྲུས་ཞན་ལ་བསྟན་མི་བྱ། །གང་དག་དཔེར་བརྗོད་པ་ཡི་ཆོས། །དོན་དུ་རྟོགས་པ་སྲིད་ཕྱིར་རོ། །སེམས་བྱུང་རྣམ་པར་རྟོགས་པ་འདིས། །སྲིད་འདི་འཁོར་བའི་རྩར་གྱུར་པར། །འདས་དང་མ་འོངས་ལ་རྟོགས་པ། །ཀུན་ནས་འཇིག་ཚོགས་བསྐྱེད་པའི་གཞི། །ཡིན་ཕྱིར་འདི་ཉིད་རིག་བྱ་ཞིང་། །དེ་ཉིད་སྟོང་ལས་གཞན་མིན་པ། །སྒྱུ་མ་ལ་སོགས་དཔེ་ཡིས་ནི། །གསུང་བཞིན་རྗེས་སུ་བལྟ་བར་བྱ། །དེ་ལྟར་རྟོགས་པའི་གང་ཟག་ལ། །བསམ་གཏན་གྱི་ནི་རོ་འདི་ཡིས། །ཀུན་འགྲོའི་རྟོག་པ་བཅིང་བྱས་སྟེ། རོ་མྱང་མེད་པས་བསྒོམས་ཤིག་ཅེས། ཁྱེད་ཀྱིས་རྗེས་སུ་བསྟན་པར་མཛོད། །གང་ཞིག་ལྷ་དང་རྗེས་འབྲེལ་པའི། །སྒོམས་པ་གཡོས་པར་གྱུར་པ་ཡང་། སྤྱོད་པ་དང་ནི་བསྲེ་བྱ་ཞིང་། །མཐའ་གཉིས་མེད་པར་བསྟན་པར་བྱ། རྒྱལ་ལ་ཆགས་པ་ཕྲ་མོས་ཀྱང་། །སྒྲིབ་བྱེད་སྤྲིན་པའི་ཆ་ཤས་ཀྱིས། །འབྲས་བུར་བཅས་པའི་ལམ་ལ་ཡང་། །འདོད་དང་རོ་མྱང་མི་བྱ་ཞེས། །རང་བྱུང་རྡོ་རྗེ་སྨྲས་པ་ཡིན། །དེ་ལྟར་རང་གཞན་དོན་གཉིས་བསྒྲུབ་བྱེད་ཅིང་། །ལྷག་པའི་བསམ་དང་ལྡན་པས་བརྗོད་པ་འདི། །དེང་སང་ཕལ་ཆེར་སྐྱེ་བོ་ཕལ་པ་རྣམས། །དོན་རྗེས་མི་འཇུག་རང་གི་གཞུང་ལུགས་སྨྲ། །ཆོས་ལམ་ཁྱད་བསད་སྒྲིབ་པའི་གནས་ལ་འཇུག །དེ་ནས་ཇི་བཞིན་བརྗོད་པར་འཐད་མིན་ཀྱང་། ཁྱེད་ཀྱི་ཆོས་ཀྱི་ཚུལ་བཞིན་སྤྱོད་པ་དང་། །གཞན་ཕན་སྙིང་རྗེའི་གནས་ལ་ཞུགས་པའི་ཕྱིར། །བདག་ཉིད་ཆེ་བའི་ཡོན་ཏན་ལྡན་རིག་ནས། །དོན་འདི་སྙན་ངག་སྤངས་ཏེ་གསོལ་བ་ལགས། །ད་ཡང་སླད་ཀྱི་གནས་སྐབས་ཞུ་བའི་དོན། །གཞན་གྱི་དོན་དུ་བསྟན་པའི་ཐུགས་མཛད་ནས། །རྨད་དུ་བྱུང་བའི་ཆོས་ཀྱི་སྦྱིན་པ་དང་། །ཏིང་འཛིན་གྲགས་པ་ཕྱོགས་སུ་རྒྱས་པར་མཛོད། །དེ་ལྟར་གསོལ་ནས་ཡིག་གེ་གཟིགས་པའི་རྟེན་དུ། བདག་གིས་གོ་བ་དང་ཉམས་སུ་མྱོང་བ་ལ་བརྟེན་ནས། །བྲིས་པའི་རྟགས་པ་བརྗོད་པའི་བསྟན་བཅོས་དང་། །བསམ་གཏན་གྱི་མན་ངག་བྱང་ཆུབ་ཀྱི་ཕྱོགས་དང་མཐུན་པ་ཞེས་བྱ་བ་རང་གི་རྒྱུད་འདྲིས་པར་བྱ་བའི་དོན་དུ་བཀོད་པ་ཞིག་ཡོད་པས། དོན་དང་ལྡན་པར་དགོངས་ནས་སྣོད་དུ་རུང་བ་རྣམས་ལ་ཆོས་ཀྱི་དགའ་སྟོན་གྱི་ཡན་ལག་མཛད་པར་ཞུ། དྭགས་པོའི་ཕྱོགས་ནས་འོངས་པའི་ཕྲེང་བ་དངུལ་གྱི་རྡོ་རྗེའི་ལ་སོགས་འཛིན་ཅན་གཅིག་དང་། འཇང་ཡུལ་གྱི་བསེ་སྡེར་གཅིག་ཀྱང་རྟེན་འབྲེལ་གྱི་མཚོན་པ་བགྱེད་པ་ལགས། །གླང་ལོ་ཟླ་བ་གསུམ་པའི་ཉི་ཤུ་གསུམ་ལ། མཚུར་ཕུ་ནས་བཀྲ་ཤིས་དཔལ་འབར་འཛམ་གླིང་བརྒྱན་དུ་ཤོག

༈ ལྷ་སྟེང་པ་གཞོན་ནུ་འབུམ་ལ་སྤྲིང་ཡིག་བཞུགས་སོ། །སྣ་ཚོགས་ཤེས་བྱའི་གནས་ལུགས་ཉམས་དགའ་བ། །བདེན་གཉིས་རྫུན་པ་སྤངས་པ་ཆུ་ཟླ་འདྲ། །བདེན་པར་རྟོག་པའི་བྱིས་པ་གར་མཁན་བཞིན། །ཞེན་པ་བྲལ་བ་སྒྱུ་མ་མཁན་ལྟར་སྤྱོད། །སེམས་ཀྱི་རྩ་བ་མེ་ལོང་དྲི་མེད་འདྲ། །འདུ་བྱེད་རྐྱེན་གྱི་གཟུགས་བརྙན་འབྲེལ་བ་བཞིན། །བག་ཆགས་འཇོག་པ་གཟུགས་བརྙན་སྣང་དང་མཚུངས། །ཚོགས་དྲུག་ཤེས་པ་ཕྱི་རོལ་རྐྱེན་སྣང་བཞིན། །འོན་ཀྱང་ཕྱི་ནང་གཉིས་སུ་གྲུབ་པ་མེད། །རང་རིག་པ་ལ་མི་རྟོག་མར་མེ་འདྲ། །སྟོང་དང་མི་སྟོང་སྣ་ཚོགས་གཟུགས་སོགས་ཀུན། །འོད་ཀྱི་སྣང་བ་ཕྱི་རོལ་གསལ་བ་བཞིན། །འོད་དང་མར་མེ་གཅིག་དང་ཐ་དད་མེད། ཐ་དད་རྟོག་པ་དར་གྱི་སྲིན་བུ་བཞིན། །བཟང་ངན་ཞེན་པ་གསེར་སྒྲོག་ཐག་སྒྲོག་འདྲ། །ཀུན་གཞིའི་རྒྱལ་མཚོ་དངས་པར་གྱུར་པ་ལ། །འདུ་བྱེད་རླུང་གི་རྣམ་རྟོག་རྦ་བརླབས་འབྱུང་། །ལས་དང་རྣམ་སྨིན་ལྦུ་བའི་ཕྲེང་བ་བཞིན། །ལུས་ངག་ཡིད་ཀྱི་གཡོ་བ་མ་དངས་པར། །ལས་མི་མཛད་ཅིང་ཀུན་གཞི་མཐོང་མི་འགྱུར། །བདེ་གཤེགས་སྙིང་པོ་མཁའ་ལྟར་འདུས་མ་བྱས། །ལས་དང་རྣམ་རྟོག་རྐྱེན་གྱིས་མི་སྐྱོད་ཀྱང་། ཚུལ་མིན་ཡིན་བྱེད་ཀུན་རྟོག་རླུང་དང་འདྲ། །ཐ་དད་གྲུབ་ཅིང་རྟེན་པར་བྱེད་པ་ཡིན། །དེས་ཡི་བསྒྲུབ་པའི་རྣམ་རྟོག་སྤྲིན་ཚོགས་ལས། །ལས་དང་ཉོན་མོངས་ཆུ་ཡི་ཕུང་པོ་འགྲུས། །ཡུལ་དང་ཡུལ་ཅན་རྟོགས་པས་བཀྲུགས་པ་ལས། །ཕུང་ཁམས་སྐྱེ་མཆེད་པ་ཡི་འཁོར་ལོ་བཞིན། །རྒྱལ་དང་བླ་མས་བསྟན་པའི་མན་ངག་གིས། །གཟུང་འཛིན་གཉིས་སུ་རྟོག་པ་བཤིག་པའི་ཚེ། །མ་དག་ཕུང་ཁམས་སྐྱེ་མཆེད་གང་དུ་ཞུགས། །དག་པ་ཕུང་པོའི་ཁམས་དང་སྐྱེ་མཆེད་ཀྱང་། །ས་བཅུ་རྒྱུན་མཐའ་བར་དུ་འཛིན་མོད་ཀྱིས། །ཟག་མེད་ལས་དང་བསམ་མི་ཁྱབ་འཕོ་བའི། །འཆི་བ་ཡོད་ཕྱིར་གཙང་རྟག་བདེ་བ་མིན། །བླ་མའི་གདམས་པས་འདུ་བྱེད་རྟོགས་པའི་ཚེ། །ཕྱི་རུ་བལྟས་པས་ཚོགས་དྲུག་རྩ་བར་མཐོང་། །ནང་དུ་བལྟས་པས་ཀུན་གཞི་དབྱིངས་ནས་གཡོ། །བདེན་ཞེན་སྐྱེས་ན་བདག་དང་ཅི་མ་མཉམ། །གསལ་ལ་མ་འདྲེས་ཡིད་ཀྱི་མཚང་རྟོགས་ཚེ། །ལས་དང་ཉོན་མོངས་ཆུ་ཚོགས་གང་དུ་སོང་། །དེ་ལ་ཉོན་མོངས་སྐྱོན་དང་བྲལ་བའི་ཚེ། །ཟག་པ་མེད་པའི་ལས་ཞེས་རྒྱལ་བས་གསུངས། །འདི་ཡང་རྡོ་རྗེ་ལྟ་བུས་གཞོམ་བྱ་ཡིན། །དེ་ཉིད་དག་པས་བདག་གིས་ཕ་རོལ་ཕྱིན། །ཚུལ་འདི་མ་ཤེས་འཇིག་རྟེན་འདིར་གནས་པའི། །མཁས་གྲུབ་རྣམས་ཀྱང་ལོང་བའི་གར་སྟབས་ཡིན། །ཀྱེ་མ་རྒྱལ་བའི་བསྟན་པ་ནུབ་ཏུ་ཉེ། །དད་པ་ཅན་རྣམས་ཁ་ལན་རྗེས་སུ་འབྲེང་། །སེམས་ལས་གཞན་པའི་སངས་རྒྱས་ཕྱི་རོལ་འདོད། ཚོགས་གཉིས་མ་བསགས་སངས་རྒྱས་ཐོབ་དུ་རེ། །རྟོག་པའི་བཞུགས་པ་མ་མཐོང་མཁས་པར་བརློམ། །བུ་ལའང་བརྩེ་བ་མེད་པར་སེམས་པ་སྨྲ། །འདིའི་དུས་ན་གཅིག་པུའི་སྐྱོན་ལ་བརྟག །ཀུན་ལ་དག་པའི་སྣང་བ་བསྐྱེད་པར་བྱེད། །མི་ཁོམ་གནས་གཞན་མཐོང་བའི་ཚེ། །མི་ལུས་ཐོབ་པའི་བསོད་ནམས་དཔག་ཏུ་མེད། །དཀར་པོའི་ལས་མིན་ཞུགས་པའི་སྐྱེ་བོ་རྣམས། །མཐོང་ཚེ་ཐོས་ལ་འདུན་པ་བླ་ན་མེད། །ཐོས་པས་ཉོན་མོངས་དགྲ་རྣམས་མ་ཆོམས་པས། །བཟོད་པའི་གོས་གྱོན་འདུན་པའི་རྟ་དང་བཅས། །རྣམ་གཡེང་དགྲ་འཇོམས་དབེན་པའི་གནས་རྟེན་ནས། །བསམ་གཏན་སྤེལ་བྱེད་དེ་བས་ཡ་མཚན་ཆེ། །བསམ་གཏན་བདེ་བས་རང་རྒྱུད་ཚིམ་བྱས་ནས། །དེ་ལ་མ་ཆགས་ཤེས་རབ་སྒྲོལ་མ་ཡིས། །བློའི་མུན་པ་བཅོམ་པ་བླ་ན་མེད། །སྙིང་རྗེས་གཞན་དོན་བྱེད་པ་བརྒྱ་ལ་འགའ། །དེ་ཕྱིར་ཆོས་ཀྱི་སྣང་བ་རྒྱ་ཆེན་འདི། བློ་གྲོས་ཞན་རྣམས་མོས་པར་མི་ནུས་ཀྱང་། བདག་གིས་ཚུལ་བཞིན་ཁྱེད་ཀྱིས་སྤེལ་བར་མཛོད། རྫོགས་སོ།། །།

རབ་སྒང་བ་གྲགས་པ་རྒྱལ་མཚན་ལ་སྤྲིང་ཡིག་བཞུགས། །ཨོཾ་སརྦ་སྭ་སྟི་སིདྷི་ཧཱུཾ། །བླ་མ་དང་དཀོན་མཆོག་གསུམ་ལ་གུས་པས་ཕྱག་འཚལ་ལོ། །སྒྲིབ་གཉིས་སྤྲིན་བྲལ་ཆོས་དབྱིངས་ནམ་མཁའ་ལ། །གཟུགས་སྐུའི་དཀྱིལ་འཁོར་འཕྲིན་ལས་འོད་སྟོང་བ། །སྒྲིབ་པའི་མུན་སེལ་ཐར་པའི་ལམ་སྟོན་ཅིང་། །དོན་གཉིས་གྲུབ་མཛད་བླ་མ་ལ་ཕྱག་འཚལ། །སྙིགས་དུས་རྒྱལ་བའི་བསྟན་ལ་ཞུགས་པ་རྣམས། །ལེ་ལོ་མ་མཛད་ཁོ་བོའི་ཚིག་ལ་གསོན། །ངན་འགྲོ་ལོག་པར་ལྟུང་བའི་འགྲོ་བ་ལ། །ལྟས་ན་མི་ལུས་ཐོབ་པ་སྲིད་པ་ཙམ། །སྙིགས་དུས་མི་རྣམས་བསོད་ནམས་དམན་པའི་དུས། བསྟན་ལ་མོས་ཤིང་ཞུགས་པ་བ རྒྱ་ལམ་འགའ། །བཤེས་གཉེན་བཟང་པོས་རྗེས་སུ་ཟིན་པ་དང་། །བསླབ་གསུམ་རྣམ་དག་རྒྱུད་ལ་ཐོབ་ནས་ཀྱང་། །ཐོས་བསམ་ལེགས་པར་སྦྱོར་བ་ཤིན་ཏུ་དཀོན། །ཚུལ་བཞིན་བསྒྲུབ་པ་ཉིན་མོའི་སྐར་མ་ཙམ། །ཐོགས་མེད་སྲེད་པའི་བག་ཆགས་ངན་པ་ཡིས། །བསྐུལ་ནས་བདུད་ཀྱི་ཕོ་ཉ་རྣམས་པ་བཞི། །ཆགས་བྱེད་གཡེང་བྱེད་འཁྲུལ་པར་བྱེད་པ་དང་། །རྨོངས་པར་བྱེད་པས་ཐར་པའི་རིན་ཆེན་འཕྲོག །ཁ་ཟས་དུག་ཅན་ལྟ་བུའི་འདོད་ཡོན་ལ། །རོ་མྱང་བྱེད་པས་ངན་འགྲོའི་གནས་སུ་ལྷུང་། །ལོག་མཚོའི་ལོངས་སྤྱོད་བ སོག་པར་བྱེད་པ་གང་། ཁྲེལ་མེད་དད་པས་སྦྱིན་པ་ཆུད་གསོན་ཞིང་། །དཀོར་ལ་མི་མཛེམ་ཤ་ཆང་བག་མེད་སྤྱོད། །ཚུལ་འཆོས་སྤྱོད་ཅིང་མི་དགེའི་དབང་སོང་པས། །ཤི་མ་ཐག་དང་ངན་འགྲོའི་གནས་སུ་ལྷུང་། །དམྱལ་བའི་གཤེད་པོ་བེ་ཅོན་ལག་ཐོགས་པ། །འཇིགས་སུ་རུང་བ་ལས་ཀྱི་ཞགས་པས་ཁྲིད། །མེ་འདག་སྤུ་གྲིའི་ཆར་གྱིས་ཤ་རུས་འབྲལ། །ཟངས་ཁུ་འཐུང་པས་ལུས་ཀྱི་ནང་ཁྲོལ་བསྲེགས། །སྐྱབས་མེད་ཀྱེ་མ་ཀྱི་ཧུད་སྒྲ་ཆེན་འབྱིན། །འདི་འདྲ་སོམས་ལ་ཚེ་འདིའི་མི་དགེ་སྤོངས། །མི་རྟག་ཟིལ་པ་འདྲ་བའི་ལོངས་སྤྱོད་ལ། །བདེན་མེད་མངོན་ཞེན་སྤོངས་ལ་སྦྱིན་པ་ཐོང་། །རྨ་གཡའ་ཕྲུགས་པས་ཕྱིར་ཞིང་བྱེད་ལྟ་ཡི། །ཚོར་བའི་བདེ་ལ་སྲེད་པར་མ་བྱེད་པར། །ལྷག་པའི་ཚུལ་ཁྲིམས་རིན་ཆེན་བརྟན་པོར་བཟུང་བྲག་ཆའི་སྒྲ་ལྟར་བདེན་པ་མེད་པ་ཡི། །སྙན་གྲགས་ཆེ་གཏོར་རྗེས་སུ་མ་འབྲེང་པ། །རང་གི་སེམས་ལ་ཏིང་འཛིན་ཤེས་རབ་བསྐྱེད། །ཤིན་ཏུ་བརྟགས་ཀྱང་ལོ་བརྒྱར་བསྡད་པ་མེད། སྐྱེས་ནས་འཆི་བ་རྗེས་སུ་འབྲང་བ་སྟེ། །དར་བར་གྱུར་པ་གང་ཡིན་རྒྱུད་པའི་མཐའ། །རྩིགས་པར་གྱུར་པའི་མཐའ་མ་འཇིག་པ་སྟེ། །ཀུན་ལ་དབང་བྱེད་ས་བདག་རྒྱལ་པོ་ཡང་། །དབང་མེད་སྲིད་གནན་འགྲོ་བ་མ་མཐོང་ངམ། །དེ་བས་རྒྱལ་སྲས་ཀུན་གྱི་རབ་བསྔགས་པའི། །འདུ་འཛི་སྤངས་པའི་དབེན་གནས་ཞི་བ་བསྟེན། གངས་རི་དཔལ་ལྡན་ཟླ་འོད་སྤུངས་འདྲ་དང་། །དངས་པའི་མཚོ་འགྲམ་བརླབས་ཀྱི་ཕྲེང་བ་ཅན། །གཅན་གཟན་མེད་པའི་ལྷུན་པོ་ནགས་ཚལ་མཛེས། །མཛེས་ཤིང་ཡིད་འོང་སྤང་ལྗོངས་རྨ་བྱའི་མདངས། །མདངས་ལེགས་འབབ་ཆུའི་སྒྲ་སྙན་སྒྲོགས་པའི་གནས། །ཞི་བའི་བྱ་དང་རི་དྭགས་གྱིས་བསྟེན་པ། །འཇིག་རྟེན་རྣམ་གཡེང་རིང་དུ་གྱུར་པར་དེར། །བསམ་གཏན་བྱེད་པ་དཔལ་དང་ལྡན། འདི་འདྲའི་བདེ་བ་ལྷའི་ནའང་མེད། །དེ་ཕྱིར་རྩེ་ཅིག་བསམ་གཏན་བསྒོམ་བྱ་ཞིང་། །རྒྱལ་བས་གསུངས་པའི་ཡང་དག་དོན་ལ་བལྟར། །སྣང་བ་ཐམས་ཅད་རང་གི་སེམས་ཡིན་ཕྱིར། །བླང་དོར་མ་བྱེད་རང་གསལ་གཅིག་ཏུ་ཞོག །བདེ་གསལ་མི་རྟོག་ཉམས་ཀྱིས་བརྒྱན་པ་ཡི། །བསམ་གཏན་རྒྱུད་ལ་བསྟེན་པར་མ་བྱས་ན། །ཤེས་པས་མི་ཕན་འཇིག་རྟེན་རོལ་མོ་མཁན། །ཉམས་སུ་མྱོང་ལ་མཚན་མར་འཛིན་བྱེད་པ། །མཛེས་འདོད་གསེར་གྱི་སྒྲོག་དུ་བཅུག་པ་འདྲ། དེ་ཕན་གང་ལའང་མངོན་ཞེན་རབ་སྤངས་ནས། ཞི་ལྷག་ཟུང་དུ་འབྲེལ་བའི་ཉམས་ལེན་བྱ། ཉམས་ལེན་རང་དོན་གཅིག་པུར་མ་སོང་པར། །སྙིང་རྗེ་རྒྱ་ཆེན་བསྔོ་བས་ལེགས་ཟིན་བྱ། །ཐབས་དང་མི་ལྡན་དམན་པའི་སྤྱོད་དོར་ཞིང་། །རང་གཞན་དོན་གཉིས་འགྲུབ་པའི་སྤྱོད་པ་རྟེན། །ཐེག་དམན་འབྲས་བུ་དོན་དུ་མ་གཉེར་བར། །སྐུ་གསུམ་ལྷུན་གྲུབ་མཐར་ཕྱིན་བསྒྲུབ་པར་བྱ། །དེ་ནི་རྒྱལ་བའི་གསུང་དང་མི་འགལ་བར། །སྙན་ངག་སྡེབས་སྦྱོར་ཚིག་གིས་མ་སླད་ཅིང་། གོ་བདེའི་ངག་ཏུ་རང་བྱུང་རྡོ་རྗེས་བསྙད། འགྲོ་ཀུན་ཐར་པའི་ལམ་ལ་འཇུག་པར་ཤོག བསྐུལ་བྱེད་བསོད་ནམས་རྒྱལ་མཚན་ལ་སོགས་པ། །མ་ནོར་ཚུལ་བཞིན་ཉམས་སུ་བླང་བར་མཛོད། །ཁྱེད་ཀྱི་བསམ་པ་རྣམ་པར་དག་པའི་སྒོ་ནས། །ཡི་གེ་གསེར་ཞོ་དོ་དང་བཅས་པ་བསྐུར་འདུག་པ་འཕྲོད་ཅིང་། ཁྱེད་བཞེད་པའི་བསྟན་བཅོས་རྒྱས་པ་བརྩོམ་པའི་ལོང་མ་བྱུང་ནའང་། །བསྡུས་པ་གཅིག་བྱས་ནས་བསྐུར་བདོག་པས། སྔར་བཞིན་དུ་ཉམས་ལེན་ལ་བརྩོན་པར་མཛོད། སླད་གྱི་ཅི་མྱུར་གྱིས་འཇལ་བ་བགྱིད། །སྟག་ལོ་ཟླ་བ་དྲུག་པའི་ཚེ་ལྔ་ལ་མཚུར་ཕུའི་རི་ཁྲོད་བདེ་ཆེན་ནས། བཀྲ་ཤིས་དཔལ་འབར་འཛམ་གླིང་བརྒྱན་དུ་ཤོག། །།

༈ ཞྭ་ལུ་བ་དགེ་བཤེས་རྡོ་རྗེ་དཔལ་བཟང་ལ་སྤྲིང་ཡིག་བཞུགས་པ་ལགས་སོ། །ཨོཾ་སརྦ་སྭ་སྟི་སིདྷི་ཧཱུཾ། རང་བྱུང་རྡོ་རྗེས། དགེ་བཤེས་རྡོ་རྗེ་དཔལ་བཟང་པོའི་ཕྱག་ཏུ་སྤྲིང་བ། ཉམས་ལེན་རྩེ་ཅིག་ཏིང་འཛིན་འཕེལ་བའི་ངང་། །མོས་པས་ལོངས་སྤྱོད་སྙིང་པོ་བླང་བའི་ཕྱིར། །དངོས་པོ་རྣམ་པར་དག་པའི་འབུལ་བ་དང་། །ཆབ་ཚར་བཅས་པ་འཕྲོད་པས་ཡིད་དགའ། །དེ་ཡང་བླ་མའི་གདམ་ངག་ཉམས་ལེན་ལ། །རང་སྣང་ཐ་མལ་ཤེས་པ་ཐུག་ཕྲད་འདི། །དྲན་པའི་སོ་པས་སྣང་སྟོང་རྩལ་སྦྱོང་ཞིང་། །གཟུང་འཛིན་དང་བྲལ་གཤིས་ལ་གནས་པའི་སྟོན། དེ་ཉིད་དབྱིངས་སུ་བླང་དོར་མེད་པར་སྦྱང་། །རང་གི་སེམས་ཉིད་བླ་མ་ཡིན་པ་ལ། །སངས་རྒྱས་ཀུན་དང་དབྱེར་མེད་གཅིག་ཏུ་བསྲེ། །སྣང་བ་སྣ་ཚོགས་གདམས་པའི་རང་བཞིན་ཡིན། །བྲག་ཆའི་སྒྲ་རྣམས་སེམས་ཀྱི་རང་བཞིན་ཏེ། གང་ཤར་གདམས་པ་ཡིན་པས་ངེས་ཤེས་བསྐྱེད། སངས་རྒྱས་ཞིང་ཁམས་སེམས་ལ་འཆར་བ་དང་། ཆོས་རྣམས་ཐམས་ཅད་ནང་ནས་འཆར་འགྱུར་ཞིང་། སེམས་དང་བླ་མ་འདུ་འབྲལ་མེད་པ་རུ། །འགྱུར་ཞིང་དེ་དོན་མཁྱེན་པས་ཉམས་ལེན་མཛོད། བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། །།

༈ དཔལ་འབུམ་ལ་གདམས་པ་བཞུགས་སོ། །དལ་འབྱོར་མི་ལུས་རིན་ཆེན་ཐོབ་དུས་སུ། ཐེག་ཆེན་སྟོན་པའི་དགེ་བའི་བཤེས་གཉེན་ལ། མོས་གུས་བསྐྱེད་ཅིང་བླ་མའི་རྣལ་འབྱོར་བསྒོམ། །གསོལ་བ་བཏབ་པས་བྱིན་བརླབས་སེམས་ལ་འཇུག །ལོངས་སྤྱོད་གཡོ་བ་སྙིང་པོ་མེད་པ་ལ། །ཕྱོགས་མེད་སྦྱིན་པ་རྒྱ་ཆེན་བཏང་ནས་ཀྱང་། །མ་ཆགས་གཞན་དོན་བསྔོ་བའི་རྒྱ་ཡིས་གདབ། །མི་དགེ་ཀུན་སྤངས་དག་པའི་ཚུལ་ཁྲིམས་བསྲུངས། །སྨིན་པར་བྱེད་པའི་དབང་བསྐུར་ཐོབ་ནས་ཀྱང་། །རྒྱུན་དུ་ཡི་དམ་བསྐྱེད་རིམས་བསྒོམ་པ་དང་། །ངག་ཏུ་གསང་སྔགས་བཟླས་བརྗོད་ཅི་ནུས་བྱ། །ཐོག་མེད་དུས་ནས་འཁོར་བར་ཁྲིད་བྱེད་པ། །རྣམ་རྟོག་ཡིན་པར་རང་ངོ་ཤེས་པར་བྱ། །མ་ཡེངས་རྩེ་ཅིག་མཉམ་པར་བཞག་བྱ་ཞིང་། བསམ་གཏན་ཏིང་འཛིན་རྩེ་ཅིག་བསྒོམ་པ་དང་། །འཁོར་འདས་ཐམས་ཅད་སྒྱུ་མ་རྨི་ལམ་ལྟར། །སྣང་སྟོང་དབྱེར་མེད་རང་གི་ངོ་བོར་ལྟོས། །ཐ་མལ་ཤེས་པ་རྒྱལ་བའི་སྙིང་པོར་སྟེ། །དེ་ཉིད་རྟོགས་ན་སངས་རྒྱས་ཐོབ་པ་ཡིན། །དེ་ཉིད་ཉམས་ལེན་ཡིན་པས་ཉམས་སུ་ལོངས། །ཡོན་བདག་མོ་དཔལ་འབུམ་ལ་གདམ་པའོ།། །།

རྨི་ལམ་གྱི་ཚིག་བཅད་བཞུགས་པ་ལགས་སོ། །ཕ་བླ་མ་རྣམས་ལ་ཕྱག་འཚལ་ལོ། །བཀའ་དྲིན་ཅན་ལ་སྐྱབས་སུ་མཆི། །དྲིན་ཅན་ཉིད་ཀྱིས་བྱིན་གྱིས་བརློབས། །བདག་འདྲ་འཁོས་ཆུང་རི་ཁྲོད་པས། །སྲོད་ལ་རྗེ་ལ་གསོལ་བ་བཏབ། །ཐོ་རངས་མཚན་བརྟས་འདི་ལྟར་བྱུང་། །སྤྱིར་སྲོད་ཀྱི་རྨི་ལམ་བག་ཆགས་ཡིན། །ནམ་ཕྱེད་ཀྱི་རྨི་ལམ་གདོན་དབང་ཡིན། །ཐོ་རངས་གང་བྱུང་བདེན་ནོ་ཞེས། །བླ་མ་མར་པའི་ཞལ་ནས་གསུངས། །དེ་ཕྱིར་རྣལ་འབྱོར་བདག་འདྲ་ཡང་། །ཅུང་ཟད་རྨི་ལམ་ཡི་གེར་བཀོད། །ལར་བདག་ལ་འཛིན་ཆགས་ཡོད་མིན་ཀྱང་། །ཕ་བླ་མ་བྱང་ཆུབ་སེམས་པའི་ཚོགས། ལུང་བསྟན་མཛད་པ་ངོ་མཚར་ཆེ། །ཐོ་རངས་གཉིད་ཀྱི་རྨི་ལམ་ན། །རི་རིན་ཆེན་མཆོག་འདྲའི་ངོས་ལ་ཡང་། །ལྷ་གནས་ཕོ་བྲང་ཉམས་དགའ་བར། །རྣལ་འབྱོར་བདག་ཉིད་ཕྱིན་པ་ལས། །ཐུགས་རྗེ་ལྡན་པའི་སྤྱན་རས་གཟིགས། །མི་བདག་གི་མདུན་དུ་བཞུགས་ནས་ཀྱང་། །འཁོར་བས་འཇིགས་པའི་བརྡ་གཅིག་བསྟན། །འདི་ལྟའི་ཟང་ཟིང་གཡེང་བ་འདིས། །ཅིས་ཀྱང་སླུ་བའི་བརྡ་གཅིག་བསྟན། །རྗེས་སུ་དག་པའི་གསུངས་སྐད་ཀྱིས། །ཚིག་དོན་རྣམ་པར་ཀྲོལ་བ་ནི། །སྤྱིར་འགྲོ་དྲུག་ཐམས་ཅད་མ་ཡིན་པས། །ཁྱོད་སྙིང་རྗེ་ཆེན་པོ་བསྒོམས་གཅིག་གསུང་། འཁོར་བ་དུག་དང་ཚེར་འདྲ་ཡིན། །འདི་ལ་བདེན་འཛིན་མ་བྱེད་གསུང་། །སྐལ་ལྡན་སློབ་མ་ནོར་བུ་འདྲ། །བཟང་པོ་གང་བྱུང་སྐྱོངས་ཅིག་གསུང་། །དེ་ནས་སྤྱན་རས་གཟིགས་དབང་གི །དྲུང་ན་འདུག་པའི་རྣལ་འབྱོར་པ། །གཅིག་གི་ཞལ་ནས་འདི་སྐད་གསུངས། །ཕ་སྤྲུལ་སྐུ་ཏེ་ལོ་ཆེན་པོ་ཡང་། །བླ་མ་བསྟེན་ཅིང་དཀའ་ཐུབ་ཉིད། །དམ་པ་བྱས་པས་ཕྱག་ཆེན་རྟོགས། །དེ་བཞིན་བླ་མ་ན་རོ་པས། །བཅུ་གཉིས་བར་དུ་དཀའ་བ་སྤྱད། །བླ་མ་ཏེ་ལོ་ཆེན་པོ་བསྟེན། །དེ་ནས་ཕྱག་རྒྱ་ཆེན་པོ་རྟོགས། །དེ་ལྟར་མར་པ་ཉིད་དང་ནི། །མིད་ལ་གཞན་ཡང་བརྒྱུད་པ་རྣམས། བླ་མ་བསྟེན་ཅིང་རི་ཁྲོད་འགྲིམས། །དཀའ་བ་ཆེན་པོས་ཉམས་སུ་བླངས། །དེ་ཡིས་ཕྱག་རྒྱ་ཆེན་པོ་རྟོགས། །ཁྱོད་ཀྱང་གཡེང་བ་མ་བྱེད་པར། །ཁེ་དང་གྲགས་པ་མ་བསྒྲུབ་པར། །ཆོས་བརྒྱད་མགོ་བོ་འབུར་འཇོམས་གྱིས། །སུས་ཀྱང་མཐོང་ཚོར་མེད་པར་གྱིས། །མིད་ལ་རྣལ་འབྱོར་ལྟ་བུ་གྱིས། །དེ་ལྟར་བྱས་ན་ཤིན་དུ་ལེགས། །དེ་སྐད་གསུང་པ་རྣམ་པར་ཐོས། །སྐད་ཅིག་དེ་ལ་གཉིས་ཀྱང་སད། །མ་རྗེད་དྲན་པའི་ལྕགས་ཀྱུས་ཟིན། །སྔར་གང་བྱེད་གང་བྱེད་བསམ་པ་དེ། །བློ་ཡང་ང་མེད་པའི་ཕུ་ཐག་ཆོད། །ད་ལྟ་ལྷ་དབང་བྱུང་ནས་ཀྱང་། །མན་སྟོང་དུ་བཤོལ་ཀྱང་གཏད་ས་མེད། །རི་ཁྲོད་འགྲིམས་པ་མ་བྱུང་ན། ཅི་ལྟར་བྱས་ཀྱང་གཏད་ས་མེད། །སྙིང་ནས་ཆོས་གཅིག་མ་བྱུང་ན། །གང་ལྟར་བྱས་ཀྱང་གཏད་ས་མེད། །དཔལ་ལྡན་བླ་མས་ཡང་ཡང་དུ། །ཐུགས་བརྩེ་བས་བུ་བཞིན་སྐྱངས་པའི་ཕྱིར། །རྗེ་མི་འབྲལ་སྤྱི་གཙུག་བརྒྱན་དུ་བཞུགས། །སྐལ་ལྡན་བདག་ལ་བྱིན་གྱིས་བརློབས། །ཁམས་གསུམ་འཁོར་བ་ཐུགས་རྗེས་བཟུང་། །མ་རིག་སྒྲིབ་པ་དང་བཅས་པའི། །ཁམས་གསུམ་འཁོར་བ་འདི་རྣམས་ཀུན། །རྗེ་མཉམ་མེད་བླ་མ་དཔའ་བོ་རྗེ། །རྡོ་རྗེ་འཆང་དང་ས་ར་ཧ། །ཏེ་ལོ་ན་རོ་མེ་ཏྲི་པ། གྲུབ་ཐོབ་རྣམས་ཀྱིས་བྱིན་བརླབས་པ། །ལྷོ་བྲག་མར་པ་ལོ་ཚ་དང་། །ཞབས་ཀྱིས་རྡུལ་རེག་གྱུར་པ་ཡི། །སྐྱེས་མཆོག་བཞེད་པའི་རྡོ་རྗེ་དང་། མཁའ་འགྲོའི་དབང་ཕྱུག་ལྷའི་ལྷ། །བཀའ་བརྒྱུད་ནོར་བུ་རིན་པོ་ཆེ། །དེའི་མཛད་པའི་བསྒྲུབ་པ་ལྟར། །དུས་ད་ལྟ་བསྟན་པའི་སྙིགས་མ་ལ། །ལོག་རྟོགས་སྐྱེ་བོ་ཕྲག་དོག་ཆེ། །དགེ་བཤེས་རྣམས་ཀྱི་འགྲན་པ་དང་། ཆོས་བྱེད་ཀུན་གྱི་ཉོན་མོངས་རྣང་། །འགྲོ་དྲུག་རྒྱུད་ངན་རེངས་པ་ལ། །མི་བདག་གིས་དཀའ་བ་མ་སྤྱད་ན། །བསྒྲུབ་རྒྱུད་བསྟན་པའི་རྒྱལ་མཚན་ནུབ། །བཀའ་བརྒྱུད་ནོར་བུ་རིན་ཆེན་འཆེར། །དེ་ཕྱིར་བདག་ཉིད་བསྒྲུབ་པ་བྱེད། །ཆོས་བརྒྱད་རྟ་ལ་ཞོན་པ་ཡི། །དགེ་བཤེས་གཞན་མ་རྣམས་ཀྱི་མཆོག །ང་ཆེ་ང་བཟང་ཟེར་བ་ཡི། །གྲགས་པ་ཅན་ནི་གཞན་གྱི་མཆོག །སྐུ་བསོད་ཟང་ཟིང་ཆེ་བ་ཡི། །ངོ་མཚར་ཅན་ཀྱང་གཞན་གྱིས་འཆི། །སངས་རྒྱས་བསྟན་པའི་སྙིགས་མ་ལ། །ཁེའུ་བདག་གིས་མ་སྐྱུངས་ན། །གཞན་པ་སྐྱུངས་མཁན་མི་གདའ་ན། །བདག་འདྲ་རྣལ་འབྱོར་རི་ཁྲོད་པ། །དཀའ་ཐུབ་དམ་པ་ནུས་པར་ཤོག །བསྒྲུབ་པ་མཐའ་རུ་ཐོན་པར་ཤོག། །།

རྟོགས་པ་བརྗོད་པའི་ཚིགས་གཅད། །འཕགས་པ་འཇམ་དཔལ་གཞོན་ནུ་གྱུར་པ་ལ་ཕྱག་འཚལ་ལོ། །གང་གིས་རྟེན་ཅིང་འབྲེལ་འབྱུང་པ། །ཡོད་དང་མེད་དང་ཡོད་མེད་དག །མཐའ་ལས་གྲོལ་བར་རབ་གསུངས་པའི། །དེ་བཞིན་གཤེགས་ལ་ཕྱག་འཚལ་ལོ། །གང་ཚེ་ཆོས་རྣམས་ཐམས་ཅད་ཀུན། །རབ་ཏུ་སྐྱེ་བ་རྣམ་དག་པ། །འགག་པ་དམིགས་པར་གྱུར་མ་ཡིན། །མ་སྐྱེས་པའི་དངོས་བཞིན་ནོ། །གང་ཚེ་སེམས་དང་སེམས་འབྱུང་དག །དམིགས་པ་མེད་པར་རབ་གྱུར་པ། །དེ་ཚེ་གཟུགས་སོགས་རང་བཞིན་རྣམས། །སྣང་བ་ཅི་ལྟར་འཐད་པར་འགྱུར། །སྣང་བ་མེད་ཅིང་མཐོང་མེད་པའི། །ཆོས་དེ་གང་ལ་སྐྱེ་བར་འགྱུར། །ཡེ་ནས་དག་པའི་ཆོས་ཉིད་དེ། །སྐྱེ་དང་འགག་པར་རྟོགས་བྱེད་ན། །མཁའ་ལ་མདུད་པ་བྱས་ལྟར་འགྱུར། །དེ་ལྟར་གནས་པའི་དོན་དེ་ལ། །རྨི་ལམ་དུས་ཀྱི་བདེ་སྡུག་ལྟར། །བྱིས་པ་རབ་ཏུ་འཁྲུལ་གྱུར་པས། །བདག་དང་བདག་གིར་རབ་ཏུ་ཞེན། །འཇིག་རྟེན་རང་གི་རྟོག་པས་བརྟགས། རྟོག་པ་རྟོག་པར་བདེན་མ་ཡིན། །འདས་པ་རྟོག་མིན་མ་འོངས་མིན། །དབུ་མ་གང་དུ་རྣམ་པར་རྟོག །དུས་གསུམ་ལས་གཞན་རྟོག་པ་ཡི། །སྐྱེ་བའི་གནས་དེ་གང་ཞིག་ཡིན། །རེ་ཞིག་མིང་ཡང་གཟུགས་དག་ལས། །སྐྱེ་མཆེད་དེ་ལས་རེག་པ་དང་། སྲེད་ལེན་སྲིད་པ་འབྱུང་ངོ་ཞེས། །རྒྱལ་བ་སངས་རྒྱས་ཀྱིས་གསུངས་པ། །དམ་པའི་དོན་དུ་དག་མ་ཡིན། །ཅི་ཕྱིར་ཞེ་ན་ཀུན་མཁྱེན་གྱིས། །སྐྱེ་དང་འགག་པ་མ་གཟིགས་ཕྱིར། །ཡང་དག་མ་ཡིན་ཀུན་རྟོག་པ། །འདུ་བྱེད་རབ་ཏུ་གཡོ་མེད་པ། དེ་ཚེ་རྣམ་ཤེས་ཅི་ལྟར་འགྱུར། ཀུན་འགྲོ་བ་ཡི་འདུ་བྱེད་ཉིད། །གང་ལས་རབ་ཏུ་སྐྱེ་བར་འགྱུར། །དེའི་བྱེད་པོ་གང་ཞིག་ཡིན། །འདི་ནི་རབ་དུ་ཟབ་པ་ཉིད། །གང་ཞིག་ཀུན་གཞིའི་རྣམ་པར་ཤེས། །ལེན་པའི་ཆ་དང་བཅས་པ་འདི། །ཆུ་དང་གསེར་དང་ནམ་མཁའ་ལྟར། །ཡེ་ནས་དག་ཅིང་འོད་གསལ་བ། །འདི་འོང་ཐ་དད་གཅིག་མེད་པས། །རྟེན་ཅིང་འབྲེལ་བར་འབྱུང་བའི་དོན། འདི་ཉིད་རབ་ཏུ་མ་རྟོགས་པས། །ཀུན་འབྱུང་སྡུག་བསྔལ་རབ་བསྐྱེད་དོ། །འགོག་ལམ་རྟོགས་པར་བྱ་བའི་ཕྱིར། །བདེན་པ་གཉིས་ལས་ཡང་དག་རྟེན། །དྲན་པ་ཉེར་བཞག་ནས་བཟུང་ནས། །སངས་རྒྱས་ཉིད་ཀྱི་མཐར་ཐུག་པ། །འདི་ནི་རབ་ཏུ་ཟབ་པ་ཉིད། །སེམས་ཅན་རབ་ཏུ་མི་དམིགས་ཕྱིར། །སྙིང་རྗེ་ཇི་ལྟར་དམིགས་པར་འགྱུར། །དེས་ན་འདི་ནི་ཚད་མེད་ཕྱིར། །རྒྱལ་སྲས་རྣམས་ཀྱིས་སེམས་བསྐྱེད་དོ། །ལུས་ལ་ལུས་ཀྱིས་རབ་དབེན་ཕྱིར། །གཟུགས་ནི་ལྦུ་བ་རྡོལ་བ་འདྲ། །ཚོར་བ་རབ་ཏུ་དབེན་པའི་ཕྱིར། །ཆུ་བུར་ལྟ་བུའི་ཚུལ་དུ་ཤེས། །སྨིག་སྒྱུ་ཆུ་ཤིང་སྒྱུ་མ་ལྟར། །འདུ་ཤེས་འདུ་བྱེད་རྣམ་པར་ཤེས། །གདོད་ནས་རྣམ་པར་དག་པའི་ཕྱིར། །སེམས་དང་ཆོས་ནི་རབ་རྟོགས་འགྱུར། །འདི་ཡིས་ཡང་དག་སྤོང་བ་ཡི། ཆོས་རྣམས་མངོན་དུ་བྱེད་པའོ། །འདི་ལ་བརྟེན་ནས་རྫུ་འཕྲུལ་རྐང་། །རབ་ཏུ་ཟབ་པ་ཐོབ་པ་ཉིད། །དད་དང་དྲན་དང་བརྩོན་འགྲུས་དང་། ཏིང་འཛིན་ཤེས་རབ་དབང་པོ་ལྔ། །འདི་ལ་བརྟེན་ནས་སྟོབས་སུ་འགྱུར། །གཟུང་བ་རབ་ཏུ་དབེན་རྟོགས་པས། །འཛིན་པ་གང་དུ་གནས་པར་འགྱུར། །རི་བོང་ར་མཐོང་ཇི་བཞིན་ནོ། །འོན་ཀྱང་སྒྱུ་མའི་ཚུལ་ཉིད་དུ། །སེམས་ཅན་ལ་ནི་གནས་པར་བྱ། །བྱང་ཆུབ་ཡན་ལག་བདུན་པོ་དང་། །མཐོང་བས་སྤངས་པའི་ཆོས་རྣམས་ཀུན། རབ་དབེན་ལྟ་བས་རྣམ་གྲོལ་བས། །ཡང་དག་ལྟ་བས་འདི་རབ་སྦྱང་། །མཐའ་བྲལ་ལྟ་བ་འདི་རྟོགས་པས། །ཡང་དག་རྟོགས་པ་ཕུན་སུམ་ཚོགས། །གང་དང་འཚོ་བ་ལས་ཀྱི་མཐའ། །རྩོལ་བ་དྲན་དང་ཏིང་ངེ་འཛིན། །འཕགས་ལམ་མཆོག་རྣམས་ཐོབ་བྱེད་དེ། །སྟོང་ཉིད་མཚན་མེད་སྨོན་པ་བྲལ། །འདི་ནི་ཏིང་ངེ་འཛིན་གྱི་སྒོ། །སྦྱིན་དང་ཚུལ་ཁྲིམས་བཟོད་པ་དང་། །བརྩོན་འགྲུས་བསམ་གཏན་འདི་དག་ལྔ། །དོན་འདི་ལ་གནས་རབ་སྤྱད་པས། །ཕ་རོལ་ཕྱིན་པའི་མང་འཐོབ་འགྱུར། །འདི་ནི་ཤེས་རབ་ཕ་རོལ་ཕྱིན། །དམིགས་མེད་ཐབས་ལ་མཁས་པ་ཉིད། །འདིར་ངོས་མི་ཟད་ནམ་མཁའ་འདྲ། །འདི་ནི་སྟོབས་ལྡན་གོ་ཆ་མཆོག །མཁའ་ལྟར་སྨོན་ལམ་ཚད་མེད་འགྱུར། །འདི་རྟེན་ཡེ་ཤེས་ཚད་མེད་ཅིང་། ཏིང་འཛིན་གཟུངས་དང་མི་འཇིགས་དང་། སོ་སོ་ཡང་དག་རིག་པ་དང་། མ་འདྲེས་བཅོ་བརྒྱད་ལ་སོགས་པ། །སངས་རྒྱས་ཆོས་ཀུན་འདི་ལས་བྱུང་། འདི་ནི་ཐེག་པ་ཆེན་པོ་སྟེ། སྲིད་ཞི་རྣམ་པར་སྤངས་པའོ། །འདི་ལ་སྐྲག་པའི་རིགས་མ་ཡིན། །གང་ཞིག་འདི་ལ་མི་འཇུག་པ། །གང་གིས་ཕ་རོལ་ཕྱིན་པར་འགྱུར། འཇམ་པའི་དབྱངས་དང་སྤྱན་རས་གཟིགས། །མི་ཕམ་རྒྱལ་བའི་སྲས་རྣམས་ལ། །དད་པས་མངོན་བྱས་ཚིག་འདི་ནི། །རང་བྱུང་རྡོ་རྗེས་ཞེས་བྱ་བས། །འདི་ནི་ལྷ་སྟེངས་གནས་སུ་བྱས། །འདི་ལ་ནོར་བར་གྱུར་སྲིད་ནི། །ཉེས་པའི་སྒྲིབ་པར་མ་གྱུར་ཅིག །ཅུང་ཟད་དགེ་བ་ཡོད་པ་ན། །འགྲོ་ཀུན་སྒྲོལ་བའི་གཞིར་གྱུར་ཅིག། །།

༈ ཐེག་པ་མཐའ་དག་གི་དོན་གསལ་བ་བཞུགས་སོ། །དཔལ་ལྡན་བླ་མ་རྣམས་ལ་ཕྱག་འཚལ་ལོ། །ཇི་བཞིན་མཁས་པ་ཐུགས་རྗེའི་དཀྱིལ་འཁོར་ཅན། །རྣམ་འཕྲུལ་མཛད་པའི་འོད་ཟེར་སྟོང་འགྱེད་པ། །རིན་ཆེན་གཙོ་བོ་མཆོག་ལ་གུས་པས་འདུད། །དཔལ་ལྡན་མཆོད་འོས་ཀུན་ལ་མཆོད་པའི་གཙོ། །མཆོད་བྱེད་མན་ངག་ཇི་སྙེད་ཟིལ་གནོན་པ། །སྡེ་སྣོད་རྒྱུད་སྡེའི་པད་མོ་སྤེལ་ལེགས་པའི། །སྙིང་པོ་བསྒྲུབ་པའི་ཟེ་འབྲུ་ཆེར་བཀྲས་མཆོད། །ཀྱེ་མ་འདི་ལྟར་མ་རུངས་སྙིགས་མའི་དུས། །གངས་ཅན་རི་བོའི་ཞོལ་ལས་ཤར་གྱི་ཕྱོགས། །ཞིང་འདིར་གནས་ཤིང་ཐེག་ལ་བློ་གཞོལ་བ། །སྐྱེས་བུ་འགའ་ལ་རེ་ཤིག་ཕན་འགྱུར་རམ། །འོན་ཀྱང་རྒྱལ་བའི་བསྟན་ལ་སྒོར་ཞུགས་ཤིང་། །ཐེག་པའི་འབྲས་བུ་དོན་དུ་གཉེར་བ་རྣམས། །ཚིག་འདི་ཐོས་ནས་མངོན་པར་སྤྲོ་འགྱུར་རམ། །རང་གི་རྒྱུད་ལ་གོམས་བྱེད་འདི་ལྟར་བརྗོད། །སྙིགས་དུས་སྙིགས་མ་ལྔ་བདོའི་དུས་འདི་རུ། །ཚེ་ལ་ལོང་མེད་འཆི་རྐྱེན་བསམ་མི་ཁྱབ། །ཟས་ནོར་མི་རྟག་གཞན་གྱི་འཕྲོག་ཅིང་སྤྱོད། །གོས་ནི་མི་རྟག་ནམ་མཁའི་འཇའ་འོད་འདྲ། །བདེ་སྐྱིད་མི་རྟག་རྩ་ཁའི་ཟིལ་པ་འདྲ། །སྙན་གྲགས་མི་རྟག་ནམ་མཁའི་འབྲུག་སྒྲ་འདྲ། །སྐྱེས་བུའི་ཚོགས་ཀྱིས་འདི་ལྟར་མ་དགོངས་སམ། །སྐྱེ་བོ་བསྒྲིབ་བྱེད་སྟོང་གིས་བསྒྲིབས་པ་ཡི། །ཚང་ཚིང་དང་བཅས་དར་གྱི་སྲིན་བུ་བཞིན། །བདག་དང་བདག་གིར་ཞེན་པའི་འཆིང་བ་ཅན། །སྡུག་ལ་མངོན་པར་ཞེན་པ་སྙིང་རེ་རྗེ། །འདི་ལ་ཐར་པར་འདོད་རྣམས་འདི་ལྟར་མཛོད། །ཡོན་ཏན་ལྡན་པའི་དཔལ་ལྡན་བླ་མ་རྟེན། །ཡིད་བཞིན་ནོར་བུས་རེ་བ་རྫོགས་པ་འདྲ། །གཟུགས་རྙན་ཆོས་བརྒྱད་ཅན་རྣམས་རིང་དུ་སྤོངས། །དུག་ཅན་གཟེབ་ལ་སྡུག་བསྔལ་རྒྱུར་འགྱུར་རོ། །ལྷག་པའི་ཚུལ་ཁྲིམས་རིན་ཆེན་བརྟན་པོར་བཟུང་། །ཐར་པའི་ཐེམ་སྐས་ལེགས་པ་ཚུགས་པ་ཡིན། །ཚུལ་ཉམས་ཚུལ་ཅན་གཟུགས་ལ་བསྟེན་མི་བྱ། །ཆགས་པའི་དོང་དུ་གནས་ནས་ཅི་ཞིག་བྱ། །བློ་ཡི་བང་མཛོད་སྡེ་སྣོད་ནོར་གྱིས་དགང་། །འཇིག་རྟེན་འཇིག་རྟེན་འདས་པའི་རྒུད་པ་སེལ། །སེར་སྣའི་རྐྱལ་པ་རྨུགས་པས་དགང་མི་བྱ། །ལོག་པའི་ལམ་ལ་སྤྱད་ཀྱང་སྡུག་བསྔལ་ཡིན། །རྒྱུད་སྡེའི་ཚིག་དོན་ཇི་བཞིན་བརྟག་པ་བྱ། །སྒྲ་དང་སྒྲ་མིན་ཤེས་ན་ལམ་གྱི་མཆོག །རྨོངས་པའི་ཚིག་ལ་ངེས་ཤེས་བསྐྱེད་མི་བྱ། །སྨྱོན་པའི་ཚིག་ལ་བདེན་པ་ཡོད་དམ་ཅི། །འདུ་འཛིས་སྐྱོ་ན་རི་ཁྲོད་བས་མཐའ་བརྟེན། །དབེན་པའི་གཞི་མ་ལེགས་པར་ཚུགས་པ་ཡིན། །གནས་དང་གྲོགས་ཀྱི་ཞེན་པས་ཅི་ཞིག་བྱ། །ཉ་དག་ལྕགས་ཀྱུའི་ཟས་ལ་ཞེན་པ་བཞིན། །གསང་བའི་སྙིང་པོ་བསྐྱེད་རིམས་ལེགས་པར་བསྒོམས། །ལུས་ཀྱི་བདག་འཛིན་ལེགས་པར་སྤངས་བར་འགྱུར། །རང་གཟུགས་བདེན་པའི་དངོས་པོར་ལྟ་མི་བྱ། མཁའ་རྒྱུའི་ཚོགས་རྣམས་ངན་འགྲོར་ལྟུང་བ་ཡིན། །རྩ་རླུང་བྱང་ཆུབ་སེམས་ཀྱི་གནད་རྣམས་ཀུན། །ལེགས་པར་བསྒོམས་ན་ཐུན་མོང་ཡོན་ཏན་འཕེལ། །གདམས་པ་བྲལ་ཞིང་རྩོལ་བར་བྱེད་པ་གང་། རླུང་གི་ནད་ལ་ག་པུར་འཐུང་བ་བཞིན། །བདེ་བའི་ཏིང་འཛིན་རྩེ་ཅིག་མཉམ་གནས་བྱ། གང་གི་རྣམ་རྟོག་གཡེང་བ་འཇོམས་པ་ཡིན། དེ་ཉིད་ཀུན་ཏུ་རུ་ལ་ཚོལ་བྱེད་གང་། །ས་སྤྱོད་མེའི་ཁྲོད་དུ་ཅི་ཞིག་བདེ། །གསལ་བའི་ཏིང་འཛིན་རྩེ་ཅིག་མཉམ་བསྒོམ་བྱ། །སྤྱན་དང་མངོན་པར་ཤེས་པ་ཐོབ་པར་འགྱུར། རྣམ་རྟོག་འཛིན་པ་ཕྱོགས་བཅུར་སྤྲོ་མི་བྱ། །རྣམ་གཡེང་བྱང་ཆུབ་ལམ་ལས་རིང་བ་ཡིན། །མི་རྟོག་སྟོང་པའི་ཏིང་འཛིན་ལེགས་བསྒོམ་བྱ། །སྣང་གྲགས་དངོས་པོའི་ཞེན་པ་ལྡོག་པ་ཡིན། །ཆད་པ་མུ་མེད་དུས་རིང་བསྒོམ་བྱས་ཀྱང་། །ཚེ་རིང་པོ་དག་འོག་མའི་གནས་སུ་ལྟུང་། །ཁམས་གསུམ་ཏིང་འཛིན་རྒྱས་གདབ་སྲེས་ཏེ་བསྒོམ། སྲིད་ཞི་གཉིས་ལས་འཕགས་པའི་འབྲས་བུ་ཐོབ། །རྒྱས་གདབ་དང་བྲལ་ཏིང་འཛིན་མང་བསྒོམས་ཀྱང་། འཆིང་བུའི་ཚོགས་ལ་བྱི་དོར་བྱེད་པ་འདྲ། །ཐེག་གསུམ་འབྲས་བུ་མངོན་པར་ཐོབ་འདོད་རྣམས། །ལུང་རིགས་ཐུར་མ་བློ་ཡིས་ལེགས་བསྣོམས་ལ། །མ་རིག་མིག་ཕྱེ་ཤེས་རབ་ལྡེ་མིག་གིས། །མཐའ་བརྒྱད་ཚིག་གི་སྒྲོལ་ནས་དོན་གྱི་ནོར། །མ་ནོར་གུས་པས་སྤྱི་བོས་ལེགས་བླངས་ནས། །དལ་འབྱོར་ཐོབ་པའི་འབྲས་བུ་ཡོད་པར་བྱ། འདི་ལྟར་ཐེག་པའི་སྤྱི་དོན་རྟོགས་བྱའི་ཕྱིར། །རང་གི་ཡིད་ལ་བསྒོམ་ཕྱིར་སྡེབས་པ་ཡིན། །ཚོང་འདུས་ཆེན་པོའི་ལོངས་སྤྱོད་བཀོད་པ་བཞིན། །འདིའི་སྤང་དང་བླང་བྱ་བརྟག་པར་བྱ། །རྟོགས་ན་དོན་གྱི་འབྲས་བུ་ཅི་སྙེད་པ། །མངོན་གྱུར་ཆོས་ཀྱི་སྤྱན་དང་ལྡན་པར་ཤོག །ཞེས་བྱ་བ་འདི་ནི་ཐེག་པ་མཐའ་དག་གི་དོན་གང་ཟག་གཅིག་གིས་རྒྱུད་ཐོག་ཏུ་ཉམས་སུ་བླང་བ་བྱ་བ་དང་། མ་རིག་པའི་བླུན་པོ་དག་བདག་ཏུ་ལྟ་བ་དུ་མ་དག་གིས་འཆིང་ཞིང་འདུག་པ་དག་ལ་སྙིང་བརྩེ་བའི་སླད་དུ་རང་བྱུང་རྡོ་རྗེས་འབྲུག་ལོ་ཟླ་བ་དྲུག་པའི་ཚེས་ཉི་ཤུ་དྲུག་གི་ཉིན་པར་ལྷ་སྟེངས་ཞེས་བྱ་བའི་རི་ཁྲོད་དུ་ཡོངས་སུ་སྦྱར་བ་རྫོགས་སོ།། །།

ཨུ་རྒྱན་པ་རྨི་ལམ་དུ་འཇལ་ལུགས་བཞུགས་པ་ལགས་སོ། །བླ་མ་དམ་པ་རྣམས་ལ་ཕྱག་འཚལ་ལོ། །སྤྲེའུ་ལོ་ཟླ་གཉིས་པའི་ཚེས་བརྒྱད་ཀྱི་ནུབ་མོ་རྨི་ལམ་འཁྲུལ་པའི་སྣང་བ་ལ་ཡ་མཚན་ཆེ་བ་ཅུང་ཟད་ཙམ་སྣང་བ་འདི་ལྟ་སྟེ། ཐོག་མེད་དུས་ནས་བག་ཆགས་རྗེས་འབྲེངས་པ། །ཀུན་གཞི་ལ་གནས་ཡིད་ཀྱིས་རྗེས་འགྲོ་བ། །རབ་རིབ་གཉིད་ཀྱི་རྨི་ལམ་འཁྲུལ་པ་ལས། །ཐོ་རངས་དུས་སུ་ས་ཡི་ཕྱོགས་ཅིག་ན། ཨུ་རྒྱན་པ་ཞེས་གྲགས་པའི་བླ་མ་དེ། མངོན་གསུམ་ལྟ་བུར་གསལ་བར་བཞུགས་གྱུར་ཅིང་། །གདམས་པའི་ཚིག་འདི་གསལ་བར་བཀའ་སྩལ་ཏོ། །སྐྱེས་བུ་ཆེན་པོ་དུས་ཀྱི་སྙིགས་མར་གྱུར། །རྒྱལ་བའི་བསྟན་ལ་ཐོས་བསམ་བསྒོམ་པ་ཉུང་། དགེ་བཤེས་རང་བྱུང་འདུ་འཛིའི་གཡེང་བས་ཁྱེར། །རྒྱལ་བའི་སྐུ་གདུང་མཆོད་པ་བྱེད་པ་ཉུང་། རྒྱལ་པོ་རྣམས་ཀྱང་ཆོས་བཞིན་མི་བྱེད་པར། །སྐྱེ་བོའི་ཚོགས་ཀྱིས་རྣམ་པར་འཁྲུལ་པར་འགྱུར། །འདོད་ལྷའི་གཙོ་བོ་དགའ་མགུ་སྐྱེ་བར་འགྱུར། ནག་པོའི་རྩ་ལག་ཀུན་ཏུ་འཁྲུགས་གྱུར་པས། དུས་མིན་ནད་དང་མུག་གེ་སྣ་ཚོགས་འབྱུང་། །མི་རྣམས་ཚེ་ཐུང་ལོངས་སྤྱོད་ཞན་པར་གྱུར། །རྒྱལ་བའི་བསྟན་ལ་འབྲས་བུ་འདོད་རྣམས་ཀྱང་། །སྡིག་པའི་གྲོགས་དང་བདུད་ཀྱི་བྱིན་གྱིས་ནི། །ཉིན་རེ་བཞིན་དུ་ལེ་ལོའི་དབང་དུ་གྱུར། །དེ་ལྟར་གྱུར་པས་རྒྱལ་བའི་བསྟན་འདི་ཡང་། །རིང་པོར་མི་ཐོགས་གཟུགས་བརྙན་མཚུངས་པར་འགྱུར། འདིའི་དུས་སུ་བརྩོན་པ་བསྐྱེད་པར་བྱ། །འདི་དུས་བརྩོན་དང་མི་བརྩོན་ཁྱད་པར་ནི། འདི་དང་མཚུངས་ཞེས་རྨ་བྱའི་སྒྲོ་འགའ་ཞིག །བདག་ལ་བྱིན་ཅིང་དེ་ནས་མི་སྣང་གྱུར། །བརྡ་དེ་བདག་གིས་བསམ་པས་འདི་ལྟར་གོ དུག་གིས་འགྲོ་བ་ཐམས་ཅད་འཆིང་བྱེད་ཅིང་། །སྙིགས་དུས་ལོག་པར་ཕྱོགས་པ་ངན་འགྲོར་འགྲོ། །རྨ་བྱས་དུག་ཟོས་མདོངས་ཀྱི་ཁ་དོག་འཕེལ། །སྤུ་མཛེས་ཀུན་གྱི་ལྟ་བའི་འོས་སུ་འགྱུར། །སྙིགས་མའི་དུས་སུ་བརྩོན་པའི་སྟོབས་བསྐྱེད་ནས། །དབེན་པར་གནས་ཤིང་ཆོས་ལ་འབད་གྱུར་ན། །སྙིགས་མའི་དུག་ཀྱང་ཡོན་ཏན་གསལ་བྱེད་པའི། །གྲོགས་སུ་འགྱུར་ཞིང་རྒྱལ་བས་བསྔགས་པར་འགྱུར། །བརྡ་དེ་མངོན་དུ་གྱུར་པས་རྟོགས་པ་ཡིན། །རྨི་ལམ་བག་ཆགས་འཁྲུལ་པ་ཡིན་མོད་ཀྱང་། རྒྱལ་བའི་གསུངས་དང་མཐུན་པའི་ཚིག་འདི་དག །ཐོས་པར་བཀའ་བས་ཡིག་གེར་བྲིས་པ་ཡིན། །སྐྱེས་བུའི་ཚོགས་ཀྱིས་འདི་ལ་ལེགས་བརྟགས་ཏེ། །ངེས་འབྱུང་ཡོན་ཏན་བརྩོན་པ་བསྐྱེད་པར་བྱ། །ཅེས་བྱ་བ་འདི་ནི་གནས་སྒོ་དཔལ་གྱི་དགོན་པར་བཞུགས་དུས་གསུངས་པའོ།། །།

ཡར་ལ་ཤམ་པོར་གསུངས་པའོ། །བླ་མ་དམ་པ་རྣམས་ལ་ཕྱག་འཚལ་ལོ། །ཀྱེ་ཀྱེ་བརྩེ་བ་ཆེན་པོས་རབ་གང་བའི། །ཐུགས་རྗེ་ལྡན་པ་རྣམས་ལ་ཕྱག་འཚལ་ལོ། །ཐོགས་མེད་དུས་ནས་རྗེས་སུ་འབྲེལ་གྱུར་པའི། །བག་ཆགས་སྐྱོན་རྣམས་ཞི་བར་མཛད་དུ་གསོལ། །སེམས་ཀྱི་གསར་སྐྱེས་རྒྱལ་བས་མ་གཟིགས་ཤིང་། ཐོགས་མེད་དུས་ཅན་སྐད་ཅིག་ཤེས་པའི་ཡུལ། །འགག་པའི་རང་བཞིན་རྣམ་པར་དག་གྱུར་པ། །འདི་དང་ཉེ་འབྲེལ་ཀུན་ཏུ་གཡོ་བའི་ཡིད། །མ་རྟོགས་ཡུན་རིང་འགྲོ་འདིར་འཁོར་བྱས་པས། །ཡུལ་མེད་པ་ལ་ཡུལ་དུ་རབ་གཟུང་སྟེ། །གཟུགས་སྒྲ་དྲི་རོ་རེག་བྱ་ཐ་དད་པའི། །བདེ་སྡུག་ཡུལ་གྱི་རོ་ལ་མྱོས་གྱུར་པས། །སྐྱེ་རྒས་ན་འཆི་ཟོ་ཆུ་བཞིན་དུ་འཁོར། །དམྱལ་བ་ཡི་དྭགས་དུད་འགྲོའི་འཇིག་རྟེན་དང་། ལྷ་དང་ལྷ་མིན་སྲིད་པ་གཞན་དག་ཏུ། །དཀར་ནག་ལས་ཀྱིས་སོ་སོར་འཕངས་གྱུར་ཅིང་། །སོ་སོའི་ལས་དང་སྐྱིད་སྡུག་བྱེད་པ་དག །མྱོང་བ་དེ་ཡང་མ་རིག་གིས་སྒྲིབས་པས། །མི་དྲན་བཞིན་དུ་སྤྱོད་པ་འདི་རེ་མཚར། །ཐུགས་རྗེ་ལྡན་པའི་རྒྱལ་བ་དཔག་མེད་རྣམས། །བགྲང་ལས་འདས་པ་མྱ་ངན་འདས་གྱུར་ཀྱང་། །ཀུན་གྱི་ཐུགས་རྗེའི་ལྕགས་ཀྱུས་མ་ཟིན་ཅིང་། དོན་མེད་རྣམ་རྟོག་ཅི་ཞིག་ལྟར་བྱོལ་ཏེ། །ད་དུང་འཁོར་བའི་ཀློང་ན་འཁོར་བ་མཚར། །ཀྱེ་མ་ཐུགས་རྗེའི་མངའ་བདག་ཐུབ་པ་ཆེ། །ཁྱེད་ཀྱི་ཐུགས་རྗེ་ཆེན་པོའི་འོད་ཟེར་གྱིས། །ཅུང་ཟད་ཙམ་ཞིག་ཕོག་པར་གྱུར་མོད་ཀྱང་། བདག་བློའི་ཤེས་རབ་སྟོབས་ནི་ཞན་གྱུར་ཅིང་། །མ་རིག་སྒྲིབ་པ་ཤིན་ཏུ་འཐུག་གྱུར་པས། རང་གི་བློ་ལ་ཤིན་ཏུ་རྨོངས་གྱུར་ཏེ། །ད་ནི་སངས་རྒྱས་སྟོབས་དང་མི་འཇིག་དང་། །ཡོན་ཏན་དཔག་མེད་ཁྱེད་ཀྱི་ཐུགས་རྗེ་ཡིས། །སྐད་ཅིག་ཉིད་ལ་འཕགས་པའི་ས་ལམ་དང་། །ཡེ་ཤེས་སྣང་བ་བསྐྱེད་པར་མཛད་དུ་གསོལ། །ཀྱེ་མ་བདག་ནི་ཐོག་མེད་ནས། །སྦྱིན་པ་མཐུ་ནི་ཆུང་གྱུར་ཅིང་། །ཚུལ་ཁྲིམས་སྟོབས་ཀྱང་རབ་དམན་པས། །དུས་འདིར་འགྲོ་བ་དབུལ་བ་རྣམས། །ཕུན་ཚོགས་ལོངས་སྤྱོད་ཀྱིས་ཚིམ་ཞིང་། ཆོས་ཀྱིས་ཡོངས་སུ་བསྐྱང་པ་དང་། །ནག་ནོག་འདྲེས་མར་མ་གྱུར་པས། །འཕགས་པའི་དགེ་འདུན་སྤྲིན་ཚོགས་ལ། །རྣམ་པར་དག་པའི་ཆོས་སྟོན་ཅིང་། ཐེ་ཚོམ་གཅོད་པར་མ་གྱུར་ཏེ། །འོན་ཀྱང་སྙིགས་མའི་དུས་སུ་ནི། །རྒྱལ་སྲས་རྣམས་ཀྱི་རྗེས་འཇུག་ཏུ། །བློའི་སྟོབས་ཀྱིས་འབད་བྱས་ཤིང་། །སེམས་ཅན་དོན་ནི་ཅི་གྲུབ་ཏུ། །དམ་པའི་ཆོས་ནི་བསྲུང་བའི་ཕྱིར། །ལུས་ངག་ཡིད་ཀྱིས་འབད་པར་བྱ། །སངས་རྒྱས་བྱང་ཆུབ་སེམས་དཔའ་རྣམས། །སྨོན་ལམ་ཆེན་པོའི་དབང་གིས་ནི། །གང་གིས་སྲིད་པ་ཇི་སྲིད་བར། །སྣ་ཚོགས་ཐབས་ཀྱི་རོལ་པ་མཛད། །དེ་དག་རྗེས་སུ་བསླབ་བྱ་ཞིང་། །སེམས་ནི་མཐུ་དང་ལྡན་པར་བྱ། །གང་ཞིག་དམིགས་པ་ཅན་རྣམས་ཀྱིས། །རྒྱལ་སྲས་སྤྱོད་ལ་འཇུག་མིན་པ། །ཇི་ལྟར་སྒྱུ་མ་རྨི་ལམ་ལྟར། །དངོས་རྣམས་ཞེན་པ་མེད་པའི་བློས། །རྟག་ཏུ་རྫས་སུ་སྤྱད་པར་བྱ། །དངོས་རྣམས་ཀུན་ལ་ཆགས་མེད་པས། །བཟའ་བའང་གཞན་དོན་གྱུར་ཅིག་ཅེས། །བློ་ནི་རྟག་ཏུ་གོམས་པར་བྱ། །ཇི་ལྟར་ལུས་ངག་ཡིད་གསུམ་གྱིས། །རྣམ་པ་གཞན་གྱི་དོན་འགྱུར་པར། །ཉོན་མོངས་བཅས་ཀྱང་བློའི་མཐུ། །འགྲོ་ལ་ཕན་པར་དཔྱད་པར་བྱ། །ཇི་ལྟར་ཕྱི་རོལ་ཡུལ་སྣ་ཚོགས། །ནུས་ལྡན་ནུས་ལྡན་མི་སྣང་ཡང་། ཆོས་རྣམས་རོ་གཅིག་ཉིད་ཡིན་ཞེས། །སྟོང་པ་ཉིད་ལ་བཟོད་པར་བྱ། །བརྩོན་པའི་སྟོབས་ཆུང་ཉིད་གྱུར་ཀྱང་། །བྱང་ཆུབ་འགྱུར་རམ་མི་འགྱུར་ཞེས། །ཐེ་ཚོམ་འགྱུར་བའི་བློ་སྤངས་ནས། རྟག་ཏུ་རྒྱལ་སྲས་རྗེས་སུ་བསླབ། །རྟོག་དཔྱོད་ལ་སོགས་བསམ་གཏན་རྣམས། །མངོན་དུ་ཐོབ་པར་མ་གྱུར་ཀྱང་། །དྲན་རིག་འགྱུ་བ་སྣ་ཚོགས་འདི། །མ་ཡེངས་ཤེས་པ་རྩེ་ཅིག་བསྐྱངས། །ཤེས་རབ་ལམ་ལ་འཇུག་པའི་སྒོ། །ཐོས་བསམ་རྣམ་པར་བརྩོན་པ་ཡི། །རྒྱལ་བའི་གསུང་རབས་ལ་སྦྱང་བྱ། །ཆོས་རྣམས་གདོད་ནས་རྣམ་དག་པ། །སྐྱེ་འགག་ཉེ་བར་ཞི་བའི་དོན། །གཟུགས་སོགས་འདུ་མི་བྱེད་པ་ཡི། །དོན་ལ་རྟག་ཏུ་བལྟ་བྱ་ཞེས། །འཇམ་དཔལ་གྱིས་ནི་གང་གསུངས་པ། །དབུ་མའི་རྗེས་སུ་འཇུག་པར་བྱ། །དེ་ལྟར་རྒྱལ་སྲས་རྣམས་ཀྱིས་ལེགས་གསུངས་ཤིང་། །བླ་མ་དམ་པ་རྣམས་ཀྱི་མཛད་པ་ལྟར། །བསྒྲུབ་པར་ནུས་མིན་བརྩོན་པའི་མཐུ་ཆུང་བ། །རང་བྱུང་མིང་ཅན་གྱིས་ནི་སྦྱར་བ་ཡིན། །ཡར་ལ་ཤམ་པོར་གསུངས་པའོ།། །།

སེམས་འཁྲུལ་ཚུལ་བརྗོད་པ་བཞུགས་སོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །སེམས་འཁྲུལ་པའི་ཚུལ་བརྗོད་པའོ། །སེམས་དང་ཡིད་དང་རྣམ་པར་ཤེས་པ་རྣམས། །རང་བཞིན་དག་ཅིང་འོད་གསལ་འགག་པ་མེད། །སྤྲོས་བྲལ་སྤྲོས་འཛིན་སྣ་ཚོགས་འཇུག་བྱེད་པ། །གཅིག་དང་གཉིས་གསུམ་དྲུག་ཏུ་རྟོག་པ་ཅན། །ཁྱོད་ནི་རང་གསལ་གཅིག་ཏུ་མི་སྡོད་པ། །ང་ཞེས་ཀུན་ནས་རང་གིས་རང་བཅིངས་ནས། གཟུགས་སྒྲ་དྲི་རོ་རེག་བྱར་རྟོག་པ་ཡི། །ཡུལ་དང་ཡུལ་ཅན་གཉིས་སུ་རབ་བརྟགས་ཏེ། །བླང་དོར་བྱས་པས་རང་ལ་རང་གིས་བསླུས། །གར་མཁན་བཞིན་དུ་མི་བརྟན་ཁྱོད་ཀྱི་ཚུལ། །ཁམས་གསུམ་གནས་སུ་བཞད་རྒད་གནས་སུ་འགྱུར། །ཁྱོད་ཀྱི་བྱེད་ལུགས་ཅུང་ཟད་བརྗོད་ཀྱི་ཉོན། །མིང་དང་གཟུགས་ཀྱིས་མཚན་མ་བསྐྱེད་པས་འཁོར་བ་ན། །འདོད་ཆགས་ཞེ་སྡང་གཏི་མུག་རབ་ཏུ་རྒྱས་པ་ཡིས། །དུམ་བུ་དྲུག་ཏུ་སྐྱེ་ཞིང་འཁོར་བར་གར་བྱེད་པ། །མཁས་པ་རྣམས་ཀྱིས་བཞད་རྒད་ལྟད་མོའི་ཡུལ་དུ་འགྱུར། །རེ་འགའ་བདེ་འདོད་འདོད་པའི་ཁམས་ཀྱི་མིར་གྱུར་ནས། །མི་གཙང་མུན་ཁུང་མངལ་གནས་ནག་པོར་ཞུགས་གྱུར་ཏེ། །ཁུ་ཁྲག་གཤང་གཅི་སྲིན་བུ་ལྕིགས་ལྕིགས་འདུག་པའི་ས། །དྲི་ངན་ཤིན་དུ་མནམ་པའི་ནང་དུ་འགྲེ་ལྡོག་ཅིང་། རླུང་འཁྱིམས་མི་གཙང་ཟ་བར་རྩོམ་ཡང་ནུས་པ་མེད། །འཁྲུལ་འཁོར་བཙིར་བཞིན་ཤ་རུས་མྱགས་ཤིང་སྐྱེ་བ་དང་། །སར་ལྷུང་ལྤགས་པ་བཤུས་འདྲ་ཉི་ཟེར་འབར་བ་དང་། རླུང་གིས་རེག་པས་ཁོ་ནས་གདུངས་པས་སྐད་འདོན་ཀྱང་། །ཤིན་ཏུ་བཅོམ་ཆུང་དྲན་པ་སྟོར་བ་བཞིན་དུ་གྱུར། །གནས་འདི་མཐོང་ནས་སྐྲག་པར་མི་འགྱུར་ཀྱེ་མ་མཚར། །བྱིས་པར་གྱུར་ཚེ་བྱ་མིན་རྣམས་ཀྱང་བྱེད་འགྱུར་ཞིང་། །སྨྲ་མི་ནུས་ལ་སྨྲ་བ་གཞན་གྱིས་བྱེད་མི་འགྱུར། །དབུལ་པོའི་ལུགས་བཞིན་ལོངས་སྤྱོད་རྣམས་ཀྱང་སྤྱོད་མི་ནུས། །བྲན་དང་ཁྱི་བཞིན་གཞན་གྱིས་བསྲུངས་བའི་ཡུལ་དུ་མཐོང་། །དམ་བཅའ་ཞུམ་ཞིང་རབ་ཏུ་མྱོས་པར་གྱུར་མཐོང་ནས། འཇིག་རྟེན་རྣམས་ལ་སུ་ཞིག་དགའ་བའི་བློ་བསྐྱེད་འགྱུར། །དར་ལ་བབ་ཚེ་ལང་མཚོ་རྒྱས་པར་གྱུར་པའི་ཚེ། །འདོད་པའི་ཞགས་པས་སེམས་ལ་བསྣུན་པར་གྱུར་པ་ན། །ལུས་སེམས་སྲེད་པས་ཀུན་ཏུ་བཅིངས་ཏེ་མ་རངས་སྤྱོད། །ཤ་ཁྲག་མི་གཙང་སྲིན་བུས་གང་བའི་ལུས་མཐོང་ནས། །རྩོག་པར་མི་མཐོང་སྐྱེས་པ་བུད་མེད་འདུ་ཤེས་ཀྱིས། །འདོད་པའི་མེ་འབར་དབང་པོའི་བུད་ཤིང་རབ་ཏུ་བསྲེག །ལོག་པར་འཁྲུལ་ཏེ་དར་གྱི་སྲིན་བཞིན་འཆི་བར་འགྱུར། །ཀྱེ་མ་ལོག་པར་རྟོགས་པས་བསྐུལ་བའི་ཚེ། །མིན་ལ་ཡིན་པར་རྟོག་འདི་མཚར་བ་སྙམ། །ནག་པོའི་སྐྲ་འདི་བུང་བ་མིན་ཡང་ནག །དཀར་པོའི་སོ་འདི་ཟླ་བ་མིན་ཡང་དཀར། །དམར་བའི་མཆུ་འདི་བྱི་རུ་མིན་ཡང་དམར། །འཇམ་པའི་ལྕེ་འདི་པད་མོ་མིན་ཡང་འཇམ། །བཟང་མོ་གཟུགས་བཟང་ཡོན་ཏན་བདེ་ལེགས་ལྡན་པ་མཆོག །མཆོག་ཏུ་མཛེས་པ་དཀར་ཟླུམ་ཟླ་བ་རྒྱས་འདྲའི་གདོང་། །གདོང་པ་འཇམ་གསལ་སྨིན་ཚུགས་ནག་ཅིང་འཁྱོག་ལ་གཡོ། །གཡོ་སྒྱུས་འབྲི་བཞིན་མིག་གི་བུང་བ་ན་སོ་འཁོར། །འཁོར་ལོ་བཞིན་དུ་རྣ་ཆེ་འཁོར་བར་མཆུ་གཡོ་མ། །མ་འདྲ་ཡིད་འཇུག་ཁྱེད་ལ་དགའ་ཞེས་འདོད་པ་རྫུན། །གང་ན་ལྤགས་པའི་ནང་ན་ཆུ་སེར་ཁྲག་རུལ་ཤིན་ཏུ་མནམ་པ་དང་། །རྒྱུ་ལྟོ་སྔོན་པོ་རྣག་དང་བད་ཀན་གཤང་གཅི་ཉལ་ཉིལ་རྣམས། །སྲིད་བུ་རྣམས་ཀྱི་ལྕིག་ལྕིག་གང་ཞིག་གཡོ་བཞིན་ཟ། །དབང་མེད་ཀུན་ནས་རུལ་མྱགས་དྲི་འབྱུང་འདི་མཐོང་ཚེ། །དྲི་བགོས་གོས་གྱོན་རིན་ཆེན་བརྒྱན་རྣམས་ཀྱིས་བརྒྱན་ཀྱང་། །ཀྱི་ཧུད་འདི་ཅི་དགའ་བ་འདི་ཀོས་ད་ཅི་བྱ། །ཀྱེ་མ་འཁོར་བ་སྙིང་པོ་མེད་དང་ལུས་ལ་མངོན་པར་ཞེན་པས་རྨོངས། ཡུལ་ལ་བདེན་པར་ཞེན་པས་བཅིངས། མི་གཙང་དོང་ལ་ཆགས་པ་མཚར། །རྨི་ལམ་འདྲ་ལ་རབ་ཞེན་པ། རྣམ་དག་སྐྱེ་བོས་སྨོད་བྱེད་ཅིང་། གཞན་དུ་ཕྱིར་ཞིང་མི་ཁོམ་སྐྱེ། །ལོག་པར་རྟོགས་པས་མཚར་ཅིག་བྱས། སྔོན་གྱི་སྨོན་ལམ་མཐུ་ཡིས་ནི། །ཚེ་འདིར་ལོངས་སྤྱོད་ཕུན་སུམ་ཚོགས་གྱུར་ཀྱང་། །རྒྱུ་ལ་རྨོངས་པས་མ་བྱིན་ལེན་ལ་སོགས། །སྤྱད་པས་ཕྱིར་ཞིང་སྡུག་བསྔལ་རྒྱུ་ལ་འཇུག །ཀྱེ་མ་རྩ་ཁའི་ཟིལ་པ་གཡོ་ལྟར་ལོངས་སྤྱོད་ཚོགས་ཀུན་གཡོ་བ་ཡིན། བརྒྱ་ཕྲག་གོས་ཀྱང་གཅིག་གཉིས་མ་རྟོགས་སྤྱད་པའི་མཐུ་ཡང་ཡོད་མ་ཡིན། །རྟ་དང་གླང་ཆེན་ཤིང་རྟ་རྣམས་ཀྱང་གཅིག་ལས་གཞོན་པའི་འོས་མ་ཡིན། །འོན་ཀྱང་སྲིད་པའི་ཀུན་རྟོག་གང་། ཁྱི་བཞིན་ཀུན་ཏུ་སྤྱོད་པ་ཡིན། །བདེ་བར་གནས་པའི་སྲོག་ཆགས་རྣམས། །དུམ་བུར་བྱས་ཤིང་ཞིམ་བཞིན་ཟ། །ཕ་མར་གྱུར་ཀྱང་འཛེམ་པ་མེད། །དེའི་འབྲས་བུ་ཇི་ལྟར་འགྱུར། །ཀུ་མུ་ཏ་དང་ཟླ་འོད་འདྲ། །མངར་ཞིང་ཞིམ་པའི་འོ་མ་རྣམས། །འཐུང་བར་མི་བྱེད་དུག་ལྟ་བུ། །དྲི་ང་རུལ་པ་མྱོས་བྱེད་པའི། །བཏུང་བ་འཐུང་ན་མྱོས་གྱུར་ཅིང་། །བྱ་མིན་སྤྱོད་ཅིང་སྤྱོད་པ་ཉམས། །ལུས་གཟིར་ནད་ཀྱིས་གཙེས་གྱུར་ཚེ། །དགའ་བར་སེམས་དཔའ་འདི་ཅི་ཡིན། །གང་དག་སྔོན་གྱི་ཕ་མར་གྱུར་པ་ལ། །ལོག་པར་རྟོགས་པས་དགྲ་བོའི་འདུ་ཤེས་ཀྱིས། །མི་སྙན་ཚིག་རྩུབ་རྫུན་ལ་སོགས་པ་ཡི། །དགེ་བའི་རྟོག་པ་བསྲེགས་ཤིང་རབ་འབར་བས། །བསོད་དང་འཆི་བ་སྣ་ཚོགས་མི་དགེ་སྤྱོད། །རེས་འགའ་མལ་བསྟན་འཇམ་པར་འདུག་བྱེད་ཅིང་། །ཚེར་མ་གཅིག་མཐོང་སྐྲག་ནས་མྱུར་དུ་འདོར། །ལུས་ལ་དེ་ཙམ་བརྩེ་བར་བྱེད་པ་གང་། །མཚོན་ཆ་འཁྲུག་པའི་གཡུལ་རབ་མི་ཟད་པའི། །སྣ་ཚོགས་གོ་བགོས་འོད་ཟེར་འབར་འབར་ལྟར་འདུག་ཅིང་། །རྟ་དང་གླང་པོ་སྟོབས་འགྱེད་འུར་འུར་སྒྲ་འབྱིན་པ། །མདའ་རྡོ་ལ་ལོང་ཐོག་ཐོག་ས་རྡུལ་འཁྲིགས་པའི་ནང་། །ཞེ་སྡང་རླུང་གྱིས་སྐྱོད་པས་འཇུག་པར་བྱེད་པ་གང་། །བདེ་བར་འདོད་པའི་སེམས་འདི་འཁྲུལ་པ་མ་ཡིན་ནམ། ཀྱེ་མ་ཐོག་མེད་མ་རིག་འཁྲུལ་པའི་རྒྱ་མཚོ་ཆེ། །འདོད་ཆགས་བརླབས་གཡོ་ཞེ་སྡང་ཆུ་སྲིན་དུ་མས་གང་། །སྲིད་པའི་ཀློང་དྲག་ལོག་ཚིག་ཆིལ་ཆིལ་སྒྲ་སྒྲོགས་པ། །རྟོག་པའི་རླུང་གིས་རྣམ་བསྐྱོད་ལྟ་ངན་ལྦུ་བ་ཅན། །བདེ་གཤེགས་སྙིང་པོའི་ནོར་བུའི་གཏིང་སྒྲིབས་ནི། །དོན་གཉེར་བཤེས་གཉེན་དག་དང་མ་འཕྲད་རྒྱུ་ངན་ཅིང་། །སྦྱིན་པའི་རྒྱུ་ངན་ཚུལ་ཁྲིམས་བསྡམས་པ་མ་བྱས་ཤིང་། །བཟོད་པའི་སྐྱོར་མ་བརྩོན་འགྲུས་ཟགས་ལྡན་ངན་པོ་གང་། །བསམ་གཏན་འཁྲུལ་འཁོར་ཤེས་རབ་རླུང་དར་དམན་པ་དེ། །འབད་ཀྱང་འཁོར་ཞིང་ཕྱིར་ཕྱིར་སྐྱབས་མེད་འོ་དོད་འབོད། །རྟག་དང་ཆད་ཞུགས་རྒྱ་མཚོའི་ཀློང་ལས་འབྱུང་མི་ནུས། །སྒྲ་ཚིག་ཙམ་གྱིས་དུས་འདས་དལ་འབྱོར་གྲུ་ཞིག་ནས། །ངན་འགྲོའི་ཁར་སིང་ཡི་ཆད་རིགས་ཉམས་གྱུར་པ་ཡིན། །ཀྱེ་མ་སྣ་ཚོགས་རྣམ་རྟོག་ཡིས། གོམས་པ་ཐོག་མ་མེད་དུས་ཅན། ཡུལ་ལ་བདེན་པར་རྟོག་མི་དགོས། །ང་དང་ང་ཡིར་འཛིན་པ་ཡིས། །སྔར་ཡང་ལྕགས་ཀྱུའི་ཟས་བཞིན་བྲིད། །བདེ་འདོད་མུན་པའི་ཁྲོད་དུ་ཉལ། །ཡུལ་སྣང་བྱེ་ཚན་དུ་ནང་འགྲེ། །ཐར་པའི་རིན་ཆེན་སྲོག་དང་བྲལ། །ཀྱེ་ཧུད་རྣམ་རྟོག་ཁྱོད་ཅི་རུང་། བསོད་ནམས་ཅན་ལ་འགྲན་སེམས་ཕྲག་དོག་བྱེད་པ་དང་། །གཞན་བདེ་བ་ལ་སྡུག་བསྔལ་བསྐྱེད་པར་བྱེད་པ་དང་། །ལོངས་སྤྱོད་ལྡན་ལ་འདོད་པ་བརྣབ་སེམས་བསྐྱེད་པ་དང་། །ཡོན་ཏན་ལྡན་ལ་ལོག་པར་སྨོད་པར་བྱེད་པ་གང་། །རང་ལ་ཕན་མེད་མྱུར་དུ་སྡུག་བསྔལ་བསྐྱེད་པ་ཡིན། །ཤིན་ཏུ་རྟག་ཀྱང་ལོ་བརྒྱ་མིན། །བདེ་བ་མྱོང་ཡང་མི་འགྱུར་མིན། །དབང་ཆེ་གྱུར་ཀྱང་མི་འཆི་མིན། །ལོང་སྤྱོད་ཡང་ཡང་མི་མཛད་མིན། །རྩིགས་པར་གྱུར་ཀྱང་མི་འཇིག་མིན། །སྐྱེས་པར་གྱུར་ཀྱང་མི་འཆི་མིན། །འགྲོ་བ་དྲུག་ཏུ་འཁོར་བ་གང་། །བདེ་བ་ཅུང་ཟད་ཡོད་མ་ཡིན། །བདག་བདེ་ཞི་བ་ཐོབ་གྱུར་ཀྱང་། །བདག་ཉིད་གཅིག་པུ་ཁྲེལ་མེད་གྱུར། །རྒྱལ་དང་དེ་སྲས་མཆོག་རྣམས་ལ། །རྗེས་སུ་ཞུགས་ན་བདེ་བ་ཡིན། །དེ་ལྟར་རྟོག་པ་ཁྱོད་འཁྲུལ་ཚུལ་བརྗོད་པས། །རྨོངས་པ་རྣམས་ཀྱང་རྣམ་འབྱེད་ཤེས་རབ་སྐྱེ་བ་དང་། །སྒྲ་ཚིག་ཞེན་རྣམས་གཉིས་མེད་མཐོང་བ་དང་། །ཟུང་འཇུག་བསྒོམས་རྣམས་མྱུར་དུ་རྟོགས་པར་ཤོག །སེམས་འཁྲུལ་པའི་གཏམ་ཕྱོགས་ཙམ་བརྗོད་པ་ཞེས་བྱ་བ་རེ་ཤིག་བྲིས་པའོ། །ཡོས་ལོ་ཟླ་བ་བཅུ་གཉིས་པའི་ཟད་མཚམས་སུ་བཀོད་པའོ།། །།

བདུད་ངོས་འཛིན་བཅོ་ལྔ་པ་བཞུགས་སོ། །སྐྱབས་ཤཱཀྱའི་རྒྱལ་པོ་བཀའ་དྲིན་ཅན། །ཐུགས་རྗེའི་རྣམ་ཐར་དཔག་མེད་ཀྱིས། །མཛད་པ་མ་ལུས་མཐར་ཕྱུང་པ། །སྙིགས་དུས་སེམས་ཅན་སྐྱབས་སུ་གསོལ། །སྙིགས་མ་ལྔ་ལྡན་མར་འགྲིབ་དུས། །ཁྱེད་ཀྱིས་ཐུགས་རྗེས་བཟུང་ལགས་ཀྱང་། །རྣམ་རྟོག་བདུད་ཀྱི་ཆོ་འཕྲུལ་གྱིས། །ཕལ་ཆེར་ལོག་པའི་ལམ་དུ་ཁྲིད། །ཐེག་ཆེན་བླ་མ་རིན་ཆེན་ལ། །སངས་རྒྱས་དངོས་སུ་མ་ཤེས་པས། །དཔོན་གཡོག་ཟོལ་འགྲོགས་འདུ་ཤེས་བྱུང་། འདི་རྩ་བ་འཆུགས་པའི་བདུད་གཅིག་ཡིན། །བླ་མའི་རྣམ་ཐར་གཞན་དོན་ལ། །དག་པའི་སྣ་བ་མ་སྐྱེས་པས། རང་གི་འདོད་པའི་སྦར་ཚོད་བྱེད། །འདི་རྟེན་འབྲེལ་གཞི་ནས་འཆུགས་པའི་བདུད། །རྒྱལ་བའི་ཟབ་དོན་མི་ཞུ་བར། །ཟས་ནོར་ཐུགས་ལ་གང་འདོགས་སྙམ། །བྱིན་ནས་ཐོབ་བློ་བསྐྱེད་པ་འདི། །བསོད་ནམས་ཟད་བྱེད་བདུད་ཀྱིས་ཁྱེར། །ཅི་གསུང་གདམས་པར་མ་གོ་བར། །ཆེ་གཏོར་བཏང་ན་རང་མཐོང་སྐྱེ། །བཀའ་བཀྱོན་བྱས་ན་ལོག་ལྟ་བསྒོམ། །འདི་དམྱལ་བར་འཁྲིད་པའི་བདུད་དུ་གདའ། །རབ་བྱུང་སྡོམ་གསུམ་ཞུས་ནས་ཀྱང་། ཚུལ་བཞིན་མི་སྲུང་ངོ་ལྐོག་ཅན། །སྤྱོད་ངན་སྣ་ཚོགས་ཕག་དུ་བྱེད། །ཕྱི་མར་མི་ཁོམ་བཏུང་བའི་བདུད། །ཕོ་ཚུགས་ཆོས་བརྒྱད་བཟུང་ནས་ཀྱང་། །རང་སྐྱོན་བཤགས་བསྡམས་མི་བྱེད་པར། །གཞན་སྐྱོན་བརྗོད་ཅིང་འཆར་ཀ་གཏོང་། །བསྟན་པ་ཉམས་པར་བྱེད་པའི་བདུད། །དད་ལྡན་ཚོགས་བསོགས་བྱེད་པ་ལ། །ཡི་རང་མི་བྱེད་ཆུད་གསོན་བྱེད། །བྱུང་ན་སྐལ་བ་གཉིས་འདབ་ལེན། །ཡི་དྭགས་གནས་སུ་སྐྱེ་བའི་བདུད། །ཐོས་པ་ཚུལ་བཞིན་མི་བྱེད་དང་། །ཅུང་ཟད་ཙམ་གྱིས་ང་རྒྱལ་སྐྱེ། །ང་མཁས་གཞན་ལ་ཟུར་ཟ་གཏོང་། །རྟག་དུ་དུད་འགྲོར་འཁྲིད་པའི་བདུད། །འཁོར་འདས་གཞི་རྩ་མ་ཆོད་པར། །ཡིག་ནག་བསགས་ལ་མཁས་པར་རློམ། དགེ་བཤེས་བླུན་པོར་འཆི་བ་འདི། །ཆོས་གཏིང་ནས་མ་གོ་བའི་བདུད། །སློབ་དཔོན་ཚུལ་བཟུང་སྟོང་སྐད་སྨྲ། །ཁ་ལ་ཐམས་ཅད་བདེན་མེད་ཟེར། །ལག་ལེན་ཁྱི་དང་བོང་བུ་འདྲ། །དཔོན་སློབ་མནར་མེད་འགྲོ་བའི་བདུད། །གདན་སའི་སྲོག་ཤིང་བྱེད་དོ་ཞེས། །གཡོ་རྒྱུ་ཟོལ་ཁྲམ་ནོར་བསོག་བྱེད། །ཕོ་རྒོད་སྨྲ་མཁས་ཚུལ་ཆོས་ཅན། །མ་ཚོར་སྡོམ་པ་འཆོར་བའི་བདུད། །གསང་སྔགས་ཐབས་ལམ་བསྒོམ་ཟེར་ཞིང་། སྣོད་མིན་དྲུང་དུ་ཤ་ཆང་ཟ། །དགེ་བཙུན་སྡོམ་ལྡན་ཁྱིམ་པར་འབེབས། །རང་གཞན་ལོག་པར་སྦྱོར་བའི་བདུད། །རོ་སྙོམས་སྤྱོད་པ་བྱེད་དོ་ཞེས། །ངོ་ཚ་བཏང་ནས་གྲོང་ཡུལ་འཁྱམས། །སྡིག་པ་བསོག་ཅིང་དགེ་བ་སྤོང་། འདི་ཕྱི་གཉིས་ཀ་ལོག་པའི་བདུད། །ཆེན་པོའི་ཕོ་ཚུགས་བཟུང་ནས་ཀྱང་། །དད་ལྡན་ལོག་པའི་ལམ་དུ་ཁྲིད། །རང་གི་རྣམ་ཐར་འདི་བཟུང་ཞེས། །སྟོན་པ་བདུད་ཀྱི་ཕོ་ཉ་ཡིན། །འདི་འདྲ་དཔག་མེད་ས་སྟེང་གང་། །བསྟན་པའི་ཉི་མ་ནུབ་ལ་ཁད། དེ་ཕྱིར་རང་བྱུང་ཕྱིར་མེད་པ། གཞན་གྱི་ཁ་ལ་མི་ཉན་ནོ། །མི་ཚེ་མི་རྟག་ཡུད་ཙམ་ལ། །སང་ཙམ་འཆིའམ་སུས་ཤེས་ཀྱི། །དད་ལྡན་ཁ་ལ་ཉན་པ་ཀུན། །བརྩོན་འགྲུས་བསྐྱེད་ལ་རྒྱགས་ཕྱེ་བསྒྲུབ། ཞེས་བྱ་བ་འདི་གཞན་ལ་ཟུར་ཟ་བ་མ་ཡིན་པ་རང་ལ་བསྐུལ་བའི་ཕྱིར་ནགས་ཕུ་དཔལ་གྱི་རི་ཁྲོད་དུ་བྲིས་པའི་བདུད་ངོས་འཛིན་བཅོ་ལྔ་པ་ཞེས་བྱ་བ་ཤུ་ལོ་ཀ་བཅོ་བརྒྱད་བདོག་གོ། །།

༈ བསམ་གཏན་གྱི་སྐྱོན་ངོས་འཛིན་བཞུགས་སོ། །བླ་མ་དམ་པ་རྣམས་ལ་ཕྱག་འཚལ་ལོ། །ཉམས་སུ་ལེན་པའི་གང་ཟག་གིས། །བསམ་གཏན་སྐྱོན་རྣམས་བཤད་པར་བྱ། །བྱ་ར་གཡེང་བ་ཆགས་པའི་སྐྱོན། །འདོད་པ་གཙོ་དང་གནོད་པའི་སེམས། །ཏིང་འཛིན་མ་ཐོབ་ལས་བྱེད་པ། །འདི་རྣམས་བསམ་གཏན་མི་མཐུན་ཕྱོགས། །རི་ཟུར་ལམ་གྱི་གཞི་མདོར་བསྡད། །སྣ་ཚོགས་འགྲོ་འདུག་དུད་འགྲོ་བགྲང་། །རང་གི་རྣམ་རྟོག་ངོ་མ་ཤེས། སོ་པ་འདྲ་ལ་བསྒོམ་དང་རིང་། །ཕོ་ཟོ་མཐོ་ལ་ཁ་རྒྱུ་བཟང་། །རོགས་ལ་དགའ་ཞིང་ཟས་ལ་བཟང་། །མི་གསུམ་འཛོམ་སར་ལབ་པ་ཡི། །ཚོང་དཔོན་འདྲ་ལ་བསམ་གཏན་རིང་། །ཕོ་མོ་གཟུགས་བཟང་ཡུལ་བཟང་ལ། སེམས་འཕྲོ་ལོ་རྒྱུས་ལ་སྲེད་ཅིང་། །གཞན་ལ་ཕྲག་དོག་ཟུར་ཟ་སྨྲ། །ཁྱི་རྒན་འདྲ་ལ་ཏིང་འཛིན་རིང་། །དཀོན་མཆོག་བླ་མའི་རྫས་ལ་སྲེད། །ཚོང་དང་ཁེ་སྤོགས་དོན་དུ་གཉེར། །ཟ་འདོད་སླུ་བའི་སེམས་དང་ལྡན། །བྱ་རོག་ལྟ་བུར་བསྒོམ་དང་མཁོན། །ཕྱི་ཆིས་ཚེ་ལ་རྟག་སེམས་ཅན། །མི་རྟག་མ་དྲན་རྣམ་གཡེང་དགའ། །ཁོང་ཡངས་ཞེ་བ་ངན་པ་ཡི། །གཙོ་བོ་འདྲ་དེ་བདུད་ཀྱི་ཁྱེར། །ཁ་འཇམ་ཁོ་ན་རྒྱུ་དང་བཅས། །ཅུང་ཟད་ཙམ་ལ་མཁོན་དུ་འཛིན། །ཞེ་སྡང་སྡེར་མོ་རྣོ་བ་ཡི། །མི་དེ་བསམ་གཏན་རླན་དང་བྲལ། །ཁ་དད་ཆེ་ལ་ང་ལོ་ཡངས། །ཁ་ལ་བསྒོམ་ཟེར་གར་ཡང་སླེབ། །ཅོལ་ཆུང་ཟས་ལ་གདུང་བ་ཡི། །མི་དེ་བསམ་གཏན་རླན་དང་བྲལ། །དད་བླངས་མཁན་ལ་བསྒོམ་དང་རིང་། །དེ་ལྟར་བདུན་པོ་རབ་སྤངས་ལ། །བླ་མའི་བཀའ་བསྒྲུབ་གདམ་ངག་བསྒོམས། །ཀུན་ལ་དག་སྣང་བསྐྱེད་བྱས་ན། །བསྒྲུབ་པོ་དེ་ལ་བསམ་གཏན་སྐྱེ། །མདོ་རྒྱུད་ལས་བཤད་རང་བྱུང་གི། །བརྗོད་ལ་རྗེས་སུ་ཡི་རང་གྱིས། །ཅེས་པའི་འདི་རང་བྱུང་རྡོ་རྗེས་ནགས་ཕུའི་རི་ཁྲོད་དུ་སྦྱར་བའོ།། །

བསྟན་བཅོས་འཐོར་བུ་བ་བརྒྱ་བཅུ་རྩ་གཉིས་བཞུགས། སངས་རྒྱས་རྡོ་རྗེ་འཆང་ལ་ཕྱག་འཚལ་ལོ། །བླ་མ་ཆེན་པོ་ན་རོ་པའི་གདམས་པ་ཚེ་གཅིག་ལུས་གཅིག་ལ་སངས་རྒྱ་བར་བྱེད་པ། །གདམས་ངག་ཐམས་ཅད་ཀྱི་ཡང་རྩེ། ལྷོ་བྲག་མར་པ་ལོ་ཙྪའི་ཐུགས་ཀྱི་ཉིང་ཁུ་ཁྱད་པར་ཅན་ཅིག་སྟོན་པར་བྱེད་པ་ཡིན། །དེ་ལ་མོས་གུས་ཀྱིས་རྒྱུད་ཆུན་ན་བྱིན་བརླབས་རང་ཤུགས་ལས་འབྱུང་གི །གསོལ་བ་ཕུར་ཚུགས་སུ་ཐོབ་ཅིག །ལྟ་སྟངས་ཀྱིས་རིག་པ་སྟོད་ལ་ནོན་ན། །ཕྲ་རགས་ཀྱི་རྟོག་པ་རང་འགགས་སུ་འགྲོ་ཡིས། །རླུང་སེམས་གནད་དུ་ཆུན། །རྣམ་རྟོག་དུམ་བུར་གཏུབས་ན་ལས་ལ་བསགས་པ་མེད་ཀྱིས། །ཐུགས་ཕྲད་ཉམས་སུ་ལོང་ཅིག །ཅི་དགའ་ཆོས་ཀྱི་རྒྱལ་པོ་ཡིན་གྱིས། །གང་དགའི་ཉམས་གུ་ཡངས་སུ་སྐྱོངས་ཅིག །སངས་རྒྱས་སེམས་ལ་ཡོད་ཀྱིས། །རེ་ དོགས་གཞན་དུ་མཁྱེན་པར་རིགས་པ ་ལ་རྩལ་སྦྱོང་གྱིས་ཅིག །སྙིང་རྗེ་ཕྱོགས་མེད་དུ་ཤར་ན། འགྲོ་དོན་ལྷུན་གྱི་གྲུབ་ཀྱིས་བསྒྲུབ་པ་གདན་ཐོག་ཏུ་སྲིངས་ཅིག ཚོགས་གཉིས་ཀྱི་ནུས་པ་རྫོགས་ན་འཕགས་པའི་ས་ལམ་བགྲོད་ཀྱིས། ཟུང་འཇུག་གནད་དུ་ཁྱེར་ཅིག །རྗེ་བཙུན་མིད་ལའི་ཉམས་ལེན། རྣལ་འབྱོར་ངའི་ཁྱད་ཆོས། ལ་སྟོད་གླང་འཁོར་དུ་གསུངས་པའོ། །ཨོཾ་སརྦ་སྭ་སྟི་སིདྷི་ཧཱུཾ། བླ་མ་ཨུ་རྒྱན་པས་ཁྱེད་ཀྱི་ཞལ་འདི་ལ་ཉི་མ་མི་འོང་བ་ཅི་ལགས་ཞུས་པས། །ལན་གསུངས་པ། བདག་དོན་ལྷུན་གྲུབ་གྱི་ཞའུ་ལ། །གཞན་དོན་སྣ་ཚོགས་ཀྱི་དར་སྣས་བརྒྱན། །གཉིས་མེད་དོན་རྟོགས་ཀྱི་མགོ་ལ་གོན། །མ་རིག་མུན་བསིལ་གྱི་ཟླ་བ་ཚེས་པས་བརྒྱན། །སེམས་ཅན་འགྲོ་དོན་ཉི་མ་བཟོད་དེ་འཆར། ཞེས་གསུངས་སོ། །ཨོཾ་སརྦ་སྭ་སྟི་སིདྷི་ཧཱུྃ། འཛིན་པ་བདུད་ཡིན། རྩོལ་བ་ནད་ཡིན། དགོས་པ་འདྲེ་ཡིན། བཞག་པ་གཞི་ཡིན། ཅིར་སྣང་གྲོགས་ཡིན། སངས་རྒྱས་སེམས་ཡིན། སེམས་ནམ་མཁའ་ཡིན། ལུས་རོ་ཡིན། སྐྱུར་ལ་ཞོག །སྐྱུར་མཁན་སེམས་ཡིན། །གློད་ལ་ཞོག །ལ་སྟོད་སྦུད་ཏྲ་རུ་གསུངས་པའོ། །ཨོཾ་སརྦ་སྭ་སྟི་སིདྡྷི་ཧཱུཾ། ལོ་ངོ་ལྔ་བཞེས་ནས། བླ་མ་ཨུ་རྒྱན་པའི་དྲུང་དུ་བྱོན་ཙམ་ན། །སྐྱིད་པར་བྱུང་ངམ་གསུངས་པས། ཇ་ཤ་ཐུད་གསུམ་རི་བོང་ར་དང་མཚུངས། མར་དང་བུ་རམ་ནམ་མཁའི་མེ་ཏོག་བཞིན། བྲའུ་སྐྱོ་ཚ་ཡུལ་ངན་ཉི་མ་འདྲ། འོན་ཀྱང་ལྷ་ཆོས་བྱེད་པས་ང་རེ་སྐྱིད་གསུངས། ཨོཾ་སརྦ་སྭ་སྟི་སིདྷི་ཧཱུཾ། སྙེ་ནམ་ཚོང་འདུས་སུ་ཚེམས་གཅིག་བུད་ནས་བྱུང་པ་ལ། །རྒད་པོ་གཅིག་གིས་ཞུས་པས། །རིན་ཆེན་དཔལ་འབར་སེའུ་བུད་པ་ལ། ང་ལ་མི་བདེ་ཅི་ཡང་མེད། །དུང་སོ་འཁོར་མ་བཟོད་དེ་སྐྱེས་ཏེ་མཆི། ཞེས་གསུངས་སོ། །ཡང་སྙེ་ནམ་ཚོང་འདུས་སུ། རྩེ་སྐྱུ་མཛད་པས། བརྡབ་འགྱེལ་བ་ལ་གསུངས་པ། །སྤྱོད་པ་མ་ཟོ་ཀྱུ་མོ་བྱ། །གོམས་པ་མ་ཟོ་བརྡབ་ཚན་ཕོག །ལུས་འདི་ས་རྡོ་བེམ་པོ་གཅིག །སེམས་འདི་སྟོང་པ་ངོས་བཟུང་མེད། །དེ་ལ་ཟུག་གཟེར་འཛིན་པ་ངོ་མཚར་ཆེ། །ཡང་གསུངས་པ། བསྒོམ་པ་མ་ཡེངས་པ་ལ་གྱིས། །སྤྱོད་པ་མ་བཅོས་པ་ལ་གྱིས། །ལྟ་བ་མ་ལོགས་པ་ལ་གྱིས། །འབྲས་བུ་རེ་ དོགས་མེད་ལ་གྱིས། །དད་པ ་བསྐྱེད་ལ་སྦྱིན་པ་ཐོང་། །རང་བྱུང་རྡོ་རྗེས་བ་རི་བ་བདེ་ཆེན་སེང་གེ་ལ་གསུངས་པའོ། །ཨོཾ་སརྦ་སྭ་སྟི་སིདྷི་ཧཱུཾ། རྒྱལ་པོ་མ་སྐྱེས་དགྲའི་རྩོན་རའི་མིང་། །བདེ་བ་ཅན་ཞེས་བྱ་བར་བཅུག་པའི་ཚེ། སྤྱོད་ལམ་གང་བདེ་གཅིག་གིས་འདའ་བ། དེ་ནི་སྡུག་བསྔལ་ཀུན་གྱི་རྩ་བས་ཏེ། །གང་ཞིག་རྟོགས་ན་ཐར་པའི་གླིང་དུ་འདྲེན། །བྲམ་ཟེ་ཆེན་པོ་ས་ར་ཧ་ཡིས་ཀྱང་། །བཅིངས་པ་དག་ནི་ཕྱོགས་བཅུར་གྲོལ་བར་བརྩོན། ཞེས་སྦུད་ཏྲ་རུ་གསུངས་པའོ། །ཨོཾ་སརྦ་སྭ་སྟི་སིདྷི་ཧཱུཾ། །ཇ་ཤ་ཐུད་གསུམ་རྡོ་བ་བཞིན་དུ་རྡོལ། །མར་དང་བུ་རམ་ཆུ་བོ་བཞིན་དུ་འབྲུག །བྲའུ་སྐྱོ་ཚ་རྒྱ་མཚོ་བཞིན་དུ་འཁྱིལ། །འོན་ཀྱང་ལྷ་ཆོས་བྱས་པས་ང་རེ་སྐྱིད། ཞེས་པ་འདི་ས་སྐྱར་གསུངས་སོ། །ཨོཾ་སརྦ་སྭ་སྟི་སིདྷི་ཧཱུཾ། ངས་ནི་སྐྱེ་བ་ཕྱོགས་མེད་བླངས། །གཙུག་ལག་ཁང་སོགས་དགོན་པ་ནི། །ཕྱོགས་མེད་བཏབ་ཅིང་དགོན་པ་ནི། །རི་ཁྲོད་རིམས་པའི་ཡོན་ཏན་གྱིས། །མཐར་ཐུག་ཕྱག་རྒྱ་ཆེན་པོ་རྟོགས། །ཡིད་བྱེད་ཆོས་རྣམས་ཐང་ལ་སྐྱུར། །ཐང་ཀ་དངོས་པོ་ཅན་འདི་ལ། །ཡིད་བྱེད་ཆོས་འདི་སྐྱུར་བ་མིན། །སངས་རྒྱས་པའི་ཐང་ག་ལ། །དེ་འདྲ་དགོས་པ་ཅི་ཞིག་ཡོད། ཁོ་བོས་ཕྱག་རྒྱ་ཆེན་པོ་རྟོགས། །རྟོག་པའི་རྒྱུ་མཚན་དེ་ལྟར་ཡིན། །ང་ནི་ཕུང་འདྲེ་ཆེན་པོ་ཡིན། །གཟུང་འཛིན་གཉིས་ཀ་ཕུང་བར་བྱེད། །དེས་ན་ཕུང་འདྲེ་ཆེན་པོ་ཡིན། །ཕུང་འདྲེ་ཟེར་ན་ང་ལ་གྱིས། །ང་ནི་ཇག་པ་ཆེན་པོ་ཡིན། །དུག་ལྔ་འཇོམས་པར་གཅིག་པ་ཡི། །ཇག་པ་ཆེན་པོ་ཡིན་ནོ་ཨང་། །ཇག་པ་ཟེར་ན་ང་ལ་གྱིས། །ང་ནི་དཔའ་བོ་ཆེན་པོ་ཡིན། །ཉོན་མོངས་ཐམས་ཅད་མནོན་པར་བྱེད། །དེས་ན་དཔའ་བོ་ཆེན་པོ་ཡིན། །ང་ནི་གྲུབ་ཐོབ་ཆེན་པོ་ཡིན། །རང་ཙམ་པའི་གྲུབ་ཐོབ་མིན། །ང་ཡི་གྲུབ་ཐོབ་དེ་ཉིད་ནི། །གཟུགས་ནི་མཁའ་ལྟར་དག་པ་ལ། །འགྲོ་དོན་ཕྱོགས་མེད་བྱེད་པ་དེ། །ངའི་གྲུབ་ཐོབ་དེ་ཡིན་ནོ། །ཁྱེད་ཀྱི་གྲུབ་ཐོབ་དེ་ཉིད་ནི། ས་ལ་འཛུལ་དང་མཁའ་ལ་འཕུར། ཆུ་ལ་མི་བྱིང་མི་འཆི་བ། གྲུབ་ཐོབ་ཡིན་ཟེར་གདའ་ལགས་ཏེ། །དེ་རྣམས་གྲུབ་ཐོབ་ཡིན་སྲིད་ན། །བྱི་བ་དང་ནི་བྱ་རྣམས་དང་། །ངང་པ་དང་ནི་ཉ་རྣམས་ནི། །ཆུ་ལ་མི་བྱིང་མི་འཚུབ་གདའ། །བྱི་བས་ས་ལ་འཛུལ་ཤེས་གདའ། །བྱ་ཡིས་ནམ་འཕུར་མི་ལྷུང་གདའ། །འོ་ན་དེ་རྣམས་གྲུབ་ཐོབ་ཡིན། །འོན་ཀྱང་མི་ཡིས་གནམ་ལ་འཕུར་ཤེས་དང་། །ས་ལ་འཛུལ་ན་ཤེས་པ་དང་། །ཆུ་ལ་མི་བྱིང་མི་འཚུབ་པ། །མ་དག་སྣང་ངོར་གྲུབ་ཐོབ་ཡིན། །ང་ནི་ཡེ་ཤེས་ཆེན་པོ་ཡིན། །དུག་ལྔ་འཇོམས་པར་བྱེད་པ་ཡི། །ཡེ་ཤེས་ངོ་བོ་ང་ལ་གྱིས། །ང་ནི་དུག་ལྔའི་ངོ་བོ་ཡིན། །དུག་ལྔ་ཡེ་ཤེས་ལྔའི་སྐུ། །དེས་ན་ང་ནི་དུག་ལྔ་ཡིན། རིགས་ལྔའང་དུག་ལྔའི་ངོ་བོ་ཡིན། །དེ་ནི་ཀུན་གྱིས་ཤེས་པར་མཛོད། །དུག་ལྔའི་ངོ་བོའི་རྒྱུ་མཚན་ཡིན། །ངེས་དོན་དྲང་གཉིས་ཀ་ཤན་འབྱེད་ནི། །འདིའི་ཁོག་ན་ཐམས་ཅད་འདུས་པ་ཡིན། །འདི་ནི་ཁྱེད་རྣམས་ཀུན་གྱིས་གོ་བར་མཛོད། བཀྲ་ཤིས་དཔལ་འབར་རབ་འབར་ཀུན་མཁྱེན་རྒྱལ་པོ་འགྲོ་དྲུག་སེམས་ཅན་ཐར་པའི་ལམ་ལ་འགོད་གྱུར་མི་ནུབ་རྒྱལ་མཚན་སྟག་གཟིགས་གོས་དང་མཛེས་པའི་རྒྱན་བཞིན་འཛམ་གླིང་རྒྱན་དུ་ཤོག རང་བྱུང་རྡོ་རྗེའི་ཆུ་ཕོ་འབྲུག་གི་ལོ་ཟླ་བ་ལྔ་པའི་ཚེས་ཉི་ཤུ་གཅིག་ལ་བཀོད་པའོ། །ཨོཾ་སརྦ་སྭ་སྟི་སིདྷི་ཧཱུཾ། ས་ར་ཧའི་ལུང་། རང་བྱུང་རྡོ་རྗེའི་གཏམ། །ཕྱག་རྒྱ་ཆེན་པོ་སྐད་པ་དེ། །སྣང་ལ་རང་བཞིན་མེད་པ་ཡིན། །ཁམས་གསུམ་རང་གྲོལ་ཆེན་པོ་ཡིན། །དེའི་ནང་ནས་མཆོག་གྱུར་པ། །རྟོགས་རྒྱུ་མེད་པའི་དོན་གཅིག་དགོས། །དེ་ལྟར་བྱུང་བར་གྱུར་སྲིད་ན། རང་སེམས་སངས་རྒྱས་ཡིན་པ་ལ། །གཞན་དུ་མ་འཚོལ་བསྒོམ་ཆེན་ཚོ། །སེམས་ཅན་ཆོས་སྐལ་དེ་ལ་མཛོད། །བཀྲ་ཤིས་དཔལ་འབར་རབ་འབར་ཕྱག་ཆེན་རྟོགས་འབར་འཛམ་གླིང་རྒྱལ་མཆོག་རྒྱལ་བ་ཉིད་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། སྔགས་འཆང་རང་བྱུང་རྡོ་རྗེའི་གདུལ་བྱར་གྱུར་པའི་བུ་སློབ་རྣམས་ལ་གདམས་པ། ཕྱག་རྒྱ་ཆེན་པོ་སྐད་པ་དེ། ནམ་མཁའི་རང་བཞིན་ལྟ་བ་འདྲ། །བསྒོམ་ཡང་ཕར་ལ་མི་བསྒོམ་ལ། །ཡེངས་ཀྱང་ཚུར་ལ་མི་ཡེངས་པར། །མ་བཅོས་གཉུག་པའི་ངང་ལ་འཇོག །ཕྱག་རྒྱ་ཆེན་པོ་ཟེར་བ་ཡིན། །སྐལ་ལྡན་རྣམས་ཀྱིས་གོ་བར་མཛོད། །ཨོཾ་སརྦ་སྭ་སྟི་སིདྷི་ཧཱུཾ། རྟོགས་ན་གང་གིས་འཆིང་བ་ཡིན། སེམས་ཉིད་དངོས་པོ་མ་ཡིན་པ། །གཞན་དུ་རྩལ་ནས་འཇོམས་མི་ནུས། རྟོགས་ན་ནམ་མཁའ་ལྟ་བུ་ཉིད། །གོ་བར་གྱིས་ཅིག་སྒོམ་ཆེན་རྣམས། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། སེམས་དཔའ་རང་བྱུང་རྡོ་རྗེའི་གཏམ། །སེམས་ཅན་འགྲོ་དོན་བྱེད་པ་ལ། སྤྲུལ་པ་ཕྱོགས་བཞི་མཚམས་བརྒྱད་དུ། །འགྱེད་ཅིང་སེམས་ཅན་འགྲོ་དོན་བྱེད། །སྤྲུལ་པས་ཕྱོགས་བཅུར་ཁྱབ་ལགས་ཀྱང་། །མ་དག་སྣང་ངོ་དེ་ཉིད་དུ། །མོས་གུས་དད་པ་མ་སྐྱེས་ན། །ཁོ་བོའི་ཞལ་ནི་ག་ལ་མཐོང་། །དེ་ཕྱིར་མོས་གུས་དད་པ་གཅེས། །དེ་ལྟར་གོ་བར་གྱུར་སྲིད་ན། དམྱལ་བར་མི་འགྲོ་ཐེ་ཚོམ་མེད། །དམྱལ་བར་རང་བཞིན་མེད་པ་ལ། །སེམས་ཅན་འཁྲུལ་པས་སླད་པ་ཡིན། །གོ་བར་གྱིས་ཤིག་སེམས་ཅན་རྣམས། བཀྲ་ཤིས་དཔལ་འབར་རབ་འབར་མི་ནུབ་བསྟན་པའི་བདག་པོར་ཤོག །ཨོཾ་སརྦ་སྭ་སྟི་སིདྷི་ཧཱུཾ། ཤཱཀྱ་ཐུབ་པའི་ལུང་། ཐུགས་རྗེ་ཆེན་པོའི་གཏམ། །རང་བྱུང་རྡོ་རྗེས་བཟློ་བ། །སྙིགས་མའི་དུས་འདིར། །འགོང་པོ་སྣ་དགུ་དར་བའི་དུས། ཤ་ཟ་ལ་སོགས་བདུད་དང་ལྷ་འདྲེ་རྣམས་ཀྱིས། སེམས་ཅན་རྣམས་ཀྱི་སྲོག་གཅོད་ཅིང་། བར་གཅོད་བྱེད་པ་ལ། ཐམས་ཅད་ཀྱིས་བླ་མ་ཡི་དམ་མཁའ་འགྲོ་ལ་གསོལ་བ་ཐོབ་ཅིག །མོས་གུས་གྱིས་ཤིག །དེ་ལྟར་དུ་བྱས་ན་བར་ཆད་ཞི་བ་ལ་ཐེ་ཚོམ་མེད་པས་ཀུན་གྱིས་གོ་བར་གྱིས། བཀྲ་ཤིས་དཔལ་འབར་རབ་འབར་འགོང་པོ་ཞི་བར་འཛམ་གླིང་རྒྱན་མཆོག་རྒྱལ་བ་ཉིད་དུ་ཤོག ཨོཾ་སརྦ་སྭ་སྟི་སིདྷི་ཧཱུཾ། ཡེ་ཤེས་དབྱིངས་ཕྱུག་བསྟན་པའི་མངའ་བདག་འགྲོ་བ་མགོན་པོ་ཀུན་མཁྱེན་རྒྱལ་བ་འགྲོ་དྲུག་ཡོངས་ཀྱི་དཔལ་མགོན་བྱང་ཆུབ་ཐར་ལམ་ཐོབ་མཛད་ཐུབ་པོ་ས་ལམ་ཡོངས་བགྲོད་འཛམ་གླིང་སྐྱེས་མཆོག་ཐུབ་ཆེན་སངས་རྒྱས་ལ་བསྟོད། ཚེག་བར་བཞི་བཅུ་ཞེ་ལྔ་པས་ཡང་དག་པར་རྫོགས་པའི་སངས་རྒྱས་ལ་རང་བྱུང་རྡོ་རྗེས་བསྟོད་པའོ། །ཨོཾ་སརྦ་སྭ་སྟི་སིདྷི་ཧཱུཾ། སེམས་ཅན་འགྲོ་དོན་བྱེད་པའི་དཔལ། །རྡོ་རྗེ་འཆང་དང་ས་ར་ཧ། ཤཱཀྱ་ཐུབ་དང་ཁོ་བོ་ཉིད། །དེ་བཞི་ལ་ནི་ཟེར་བ་ཡིན། །དེའི་རྗེས་སུ་འབྲང་བ་ཡི། །བླ་མེད་བྱང་ཆུབ་ཐོབ་འདོད་པའི། །སྡིག་པ་མི་དགེ་ཐམས་ཅད་ཀྱང་། །རང་བཞིན་ཉིད་ཀྱི་དག་པར་བྱེད། །དེ་འདྲའི་རྣལ་འབྱོར་དེ་ཉིད་ནི། །ཐམས་ཅད་འགྲོ་དོན་བྱེད་པའི་དཔལ། །དེ་མིན་བསྒོམ་ཆེན་དེ་ཉིད་ནི། །ཁ་བསྒོམ་བསྒོམ་མོ་ཟེར་ནས་ཀྱང་། །ལྷན་ཅིག་འཚོགས་ནས་ཆགས་སྡང་བྱེད། །ནུབ་མོ་གཏི་མུག་གཉིད་ལ་རེ། །ཚེ་ཕྱི་མའི་རྒྱགས་ཕྱེ་མི་འཐག་པར། །ཁས་ཕྱག་ཆེན་རྟོགས་སོ་ཟེར། །དེ་འདྲའི་བསྒོམ་ཆེན་ཨ་རེ་འཁྲུལ། །ཆགས་སྡང་ལོག་ཀྱོག་བྱེད་པ་དེ། །དེ་འདྲའི་བསྒོམ་ཆེན་ཨ་རེ་འཁྲུལ། །ཨོཾ་སརྦ་སྭ་སྟི་སིདྷི་ཧཱུཾ། སེམས་ཅན་འགྲོ་དོན་བྱེད་ལགས་ཀྱང་། རང་སེམས་དངོས་མེད་བྱ་བ་འདི། དགེ་སྡིག་རྣམས་ལ་རྟོགས་པ་ཡིན། རྟོག་པ་མ་རྟོགས་བར་ལ་ནི། ལག་པ་ལྟོ་རྒྱབ་བར་ཙམ་ཡིན། ཕྱག་རྒྱ་ཆེན་པོ་མ་རྟོགས་ན། རྟོགས་དང་མ་རྟོགས་འཁྲུལ་པ་ཡིན། མཉམ་ཉིད་རྟོགས་པའི་བསྒོམ་ཆེན་ལ། འཁྲུལ་པ་མ་འཁྲུལ་གཉིས་སུ་མེད། གཉིས་མེད་ངང་ལ་བསྒོམ་མཁན་སྟོར། དེ་འདྲའི་བསྒོམ་ཆེ་ཨ་རེ་སྐྱིད། གོ་བར་གྱིས་ཞིག་འགྲོ་དྲུག་སེམས་ཅན་རྣམས། ཨོཾ་སརྦ་སྭ་སྟི་སིདྷི་ཧཱུྃ། ཁོ་བོ་ལ་སྟོད་ཕྱོགས་སུ་སྐྱེ་བ་བླངས། །ཆོས་ཀྱི་སྐྱབ་པར་མིང་ཡང་གྲགས། །ང་བཙུན་པ་བྱང་རྒྱུ་མ་བདོག་ཏེ། མ་བཅོས་གཉུག་མའི་ངང་ལས་ཡང་། །འཕོ་འགྱུར་མེད་པའི་སྡོམ་པ་བླངས། །མིང་ཡང་རང་བྱུང་རྡོ་རྗེ་གྲགས། །ཀུན་རྫོབ་ཙམ་དུ་དེ་སྐད་ལགས། །མ་དག་སྣང་ངོ་དེ་ཉིད་དུ། །བཙུན་པ་བྱེད་ལུགས་དེ་ཉིད་ནི། །སྡོམ་པ་ལེན་ནོ་ཟེར་ནས་ཀྱང་། །ཁ་ཐོན་སློབ་པ་ཁ་སྐད་ཟེར། ཆོས་ནི་སློབ་པོ་ཟེར་ནས་ཀྱང་། །ཡིག་ནག་བསགས་ཤིང་རྫུན་རྣམས་ཟེར། །ཆགས་སྡང་བྱེད་པ་ཨ་རེ་འཁྲུལ། བདག་འཛིན་རྣམས་ནི་མ་ཐོངས་སྤར། །སེམས་ཅན་སེར་སྣའི་རྫོང་ལ་ཞེན། །ཐོངས་པའི་ཐབས་ནི་འདི་འདྲ་བདོག །ཞེན་ཆགས་མེད་པ་ཕུལ་ནས་ནི། །ངར་འཛིན་གྲོལ་ན་དེ་ལ་ཕན། །འགྲོ་དྲུག་ཀུན་གྱི་གོ་བར་གྱིས། ཁ་ཕྱར་ཁ་འཁྱིལ་ཡོངས་ལ་བསྒྲོགས། །ཨོཾ་སརྦ་སྭ་སྟི་སིདྷི་ཧཱུཾ། མིང་ཡོངས་སུ་གྲགས་པ་ཀརྨ་པའི་གདུལ་བྱར་གྱུར་པའི་མཁྱེན་པ་གཉིས་དང་ལྡན་པའི་བུ་སློབ་རྣམས་ལ་གདམས་པ། །རྡོ་རྗེ་ནས་བརྒྱུད་པའི། །བཀའ་ལུང་བསྟན་ཆོས་ཐམས་ཅད་ཀྱང་། །མ་དག་སྣང་ངོར་སོ་སོར་གོ །དག་པའི་སྣང་ངོར་གཅིག་ཏུ་སྣང་། སྣང་ལ་རང་བཞིན་མེད་པ་ཡི། །ཁམས་གསུམ་རང་གྲོལ་ཆེན་པོར་གྱུར། །འགྲོ་དང་ཉལ་དང་ཟ་བ་དང་། །ན་དང་སྐྱེ་དང་རྒས་པས་དང་། །དེ་རྣམས་ཐམས་ཅད་རང་གི་སེམས། །སོ་སོར་འཛིན་ན་འཁྲུལ་པ་ཡིན། འཛིན་པ་མེད་པའི་སེམས་ཉིད་འདི། །དངོས་པོར་འཛིན་ན་འཁྲུལ་པ་ཡིན། །རྣམ་རྟོག་ཆོས་སྐུར་ངོ་ཤེས་ན། དུག་ལྔ་བྱ་བའི་མིང་ཡང་མེད། །མིང་མེད་བསྒོམ་ཆེན་དེ་ཉིད་ནི། །ན་བའི་དུས་སུ་འདི་སྐད་ཟེར། །ཨ་ཙ་མ་ཞེས་བརྗོད་པ་ཡིན། །ཨ་ནི་སྐྱེ་བ་མེད་པ་ཡིན། །ཙ་ནི་འགགས་པ་མེད་པ་ཡིན། །མ་ནི་སེམས་ཅན་ཀུན་གྱི་མ། །མ་དག་སྣང་ངོ་དེ་ཉིད་ལགས། །དག་པའི་སྣང་ངོ་དེ་ཉིད་ལགས། །དག་པའི་སྣང་ངོར་ན་རྒྱུ་མེད། །ཁོ་བོ་ན་བའི་དུས་ཚོད་སུ། །མ་དག་འཁྲུལ་སྣང་ན་བས་ཐེབས། །སེམས་ལ་འཆི་རྒྱུ་ཡོད་མ་ཡིན། ལུས་འདི་འཕོ་བ་ཀུན་གྱི་ལུགས། །གདུལ་བྱ་རྣམས་ཀྱིས་གོ་བར་མཛོད། །ཁ་ཕྱར་ཁ་འཁྱིལ་ཡོངས་ལ་བསྒྲོགས། །བཀྲ་ཤིས་དཔལ་འབར་འཇིག་རྟེན་རྒྱས་འབར་སྟོང་གསུམ་རབ་བརྟན་རྒྱལ་བ་ཉིད་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། སེམས་དཔའ་རང་བྱུང་རྡོ་རྗེས། གདུལ་བྱར་གྱུར་པའི་མཁྱེན་པ་གཉིས་དང་ལྡན་པའི་བསྒོམ་ཆེན་རྣམས་ལ་གདམས་པ། རྡོ་རྗེ་འཆང་ཏེ་ལོ་ན་རོ་བཀའ་བཞིའི་རྒྱུད་པ་བར་མ་ཆད་པའི་གནད་བཞི་ཆོས་ཀྱི་འཁོར་ལོ་རྒྱུན་མ་ཆད་པར་བསྒོམས་ན་རླུང་སེམས་ཀྱི་རྩལ་རྫོགས་ཤིང་ཕྱག་རྒྱ་ཆེན་པོ་རྟོགས་པ་ལ་སྐད་ཅིག་ཙམ་ཡང་མི་འགོར་ཞིང་སེམས་ཅན་ཐམས་ཅད་ཀྱི་འདྲེན་པའི་དཔལ་དུ་འགྱུར་རོ། ཁོ་བོ་ཡང་གནད་གཞིའི་ཆོས་ཀྱི་འཁོར་ལོ་རྒྱུན་པར་བསྒོམས་པས་རླུང་སེམས་ལ་རྩལ་རྫོགས་ཤིང་སྐྱོ་དུབ་མེད་པས་སེམས་ཅན་གྱི་དོན་ནུས་པ་བྱུང་བ་ཡིན། དེའི་ཕྱིར་ན་ཐམས་ཅད་ཀྱིས་རླུང་སེམས་ཀྱི་རྩོལ་བ་དྲག་དུ་གྱིས། ཁ་ཕྱར་ཁ་འཁྱིལ་ཡོངས་ལ་བསྒྲོགས། བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། འགྲོ་དྲུག་སེམས་ཅན་ཐམས་ཅད་ཀྱི། །རྒྱུད་ལུང་ཐམས་ཅད་འཁྲུལ་པར་སྣང་། །རྒྱལ་བའི་བཀའ་ཐམས་ཅད་ནི། སེམས་ཉིད་ཡེ་ཤེས་ཕྱག་རྒྱ་ཆེ། །སྙིང་པོ་དོན་གྱི་མཐར་ཐུག་ཏུ། །སྣང་བ་ཀུན་ཁྱབ་སེམས་ཅན་འདྲེན། །སེམས་ཅན་དག་པ་སངས་རྒྱས་ཏེ། །སེམས་ཅན་མ་དག་རྒྱུད་འཛིན་པ། །ཁ་བཤད་རྒྱུད་འཛིན་མང་ལགས་ཀྱང་། མཐར་ཐུག་རྒྱུད་འཛིན་རྟོགས་པ་ཉུང་། སེམས་ཚད་གཞལ་མེད་མང་ལགས་ཀྱང་། །ཚད་ནི་གཞལ་བ་ཅུང་ཙམ་དཀའ། །ཚད་མེད་སེམས་ཅན་དེ་ཉིད་ནི། །རང་བྱུང་ཡེ་ཤེས་ཆོས་ཀྱི་སྐུ། །ཀུན་ཁྱབ་རྒྱལ་བའི་རྟོགས་པ་འཛིན། །གོའམ་ཐོས་སམ་སྐལ་ལྡན་ཀུན། །མི་ལུས་ཐོབ་པ་ཀུན་གྱི་མཆོག །བྱ་དང་བྱོལ་སོང་ཁྱི་རྣམས་ནི། །ལུས་ནི་ཐོབ་ཀྱང་དོན་མེད་ཡིན། །མི་ལུས་ས་བཞིན་བཟང་དང་མཚུངས། །བླ་མ་བཟང་པོ་ནས་འབྲུ་སྟེ། །རི་ལ་ཕྱིན་ནས་མྱུ་གུ་སྐྱེ། །རྟོགས་པ་རྙེད་ན་ཚད་དུ་རྒྱས། སེམས་ཅན་འགྲོ་དོན་བྱེད་པའི་ནི། །ནས་ནི་ཟ་བའི་དཔེ་དང་མཚུངས། །གོ་བར་གྱིས་ཅིག་སྐལ་ལྡན་རྣམས། །འདི་འདྲའི་དོན་ཅིག་མ་རྟོགས་པར། །འཁྲུལ་རྒྱུད་མང་པོས་ཅི་ཞིག་བྱ། །གོ་བར་གྱིས་ཅིག་འགྲོ་དྲུག་རྣམས། བཀྲ་ཤིས་དཔལ་འབར་རབ་འབར་དོན་རྟོགས་འཛམ་གླིང་རྒྱན་མཆོག་རྒྱལ་བ་ཉིད་དུ་ཤོག །མཚུར་ཕུར་གསུངས་པའོ། །ཨོཾ་སརྦ་སྭ་སྟི་སིདྷི་ཧཱུཾ། རྟོགས་པའི་དོན་ལྡན་རྣལ་འབྱོར་པ། །མཐར་ཐུག་ཕྱག་རྒྱ་ཆེན་པོ་ཡི། །སྙིང་པོའི་དོན་གྱི་རྒྱུད་པ་འཛིན། །གྲུབ་ཐོབ་ཀུན་ཁྱབ་ཆོས་ཀྱི་སྐུ། །རྡོ་རྗེ་འཆང་སོགས་བཀའ་བརྒྱུད་ཀྱི། །བསྟན་པ་བསྲུང་བའི་ཆོས་སྐྱོང་དང་། །ཡི་དམ་ལྷ་ཚོགས་འཁོར་དང་བཅས། །སྙིགས་མའི་དུས་འདིར་འགྲོ་དོན་མཛད། །དེ་རྗེས་རྒྱུད་པའི་སྐལ་ལྡན་རྣམས། །ཆོས་སྐྱོང་བསྲུངས་མ་ཡིད་དམ་ལ། །གསོལ་བ་ཐོབ་ཅིང་མོས་གུས་གྱིས། །དེ་ལྟར་བྱས་པར་གྱུར་སྲིད་ན། །འགྲོ་དོན་འབྱུང་ཞིང་དགྲ་ཚོགས་རྣམས། །ཉི་མས་སྐར་མ་ཟིལ་མནོན་ལྟར། །དགྲ་བགེགས་ཐམས་ཅད་འབྱུང་མི་སྲིད། གོ་བར་གྱིས་ཅིག་བསྒོམ་ཆེན་རྣམས། །བཀྲ་ཤིས་དཔལ་འབར་བདུད་ཚོགས་ཞི་འབར་རང་བྱུང་ཡེ་ཤེས་འཛམ་གླིང་རྒྱན་མཆོག་རྒྱལ་བ་ཉིད་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། བདུད་ཚོགས་འདྲེ་ཚོགས་མ་ལུས་པ། །འཇོམས་བྱེད་ཁྲོ་བོ་མང་ལགས་ཀྱང་། །ཀུན་གྱི་ནང་ནས་མཆོད་སྡོང་ལྟར། གྱུར་པ་དཔལ་ཆེན་ཕྱག་རྡོར་ཡིན། །སེམས་ཅན་འདྲེན་པར་བྱེད་པ་ཡིན། །ཐུགས་རྗེ་ཆེ་བ་མང་ལགས་ཀྱང་། །ཀུན་གྱི་ནང་ནས་མཆོད་སྡོང་ལྟར། །དོན་མཛད་ཐུགས་རྗེ་ཆེན་པོ་ཡིན། །དོན་བསྒྲུབ་ཆོས་སྐྱོང་མང་ལགས་ཀྱང་། །ཀུན་གྱི་ནང་ནས་མཆོད་སྡོང་ལྟར། །དཔལ་ལྡན་མ་མགོན་ལྕམ་དྲལ་ཡིན། །བར་ཆད་སེལ་ཞིང་ཐུགས་རྗེས་འདྲེན། །ཡི་དམ་ལྷ་ཚོགས་འཁོར་བཅས་ལ། །གསོལ་བ་ཐོབ་ཅིང་མོས་གུས་གྱིས། །དེ་ལྟར་བྱས་པར་གྱུར་སྲིད་ན། །སེམས་ཅན་བདེ་བར་ཐེ་ཚོམ་མེད། །གོ་བར་གྱིས་ཅིག་འགྲོ་དྲུག་རྣམས། །བཀྲ་ཤིས་དཔལ་འབར་བདུད་ཚོགས་ཞི་འབར་ཐུགས་རྗེ་ཆེ་འབར་བར་ཆད་སེལ་བར་འཛམ་གླིང་རྒྱན་མཆོག་རྒྱལ་བ་ཉིད་དུ་ཤོག །རང་བྱུང་རྡོ་རྗེས་སྦྲུལ་ལོ་ཟླ་བ་བརྒྱད་པའི་ཚེས་བཅུ་གསུམ་ལ་བཀྲ་ཤིས་གསར་མར་སྦྱར་བའོ། །ཨོཾ་སརྦ་སྭ་སྟི་སིདྷི་ཧཱུཾ། རྣམ་པ་ཐམས་ཅད་མཁྱེན་དེ་ལུས་ཀྱིས་སྲས། །མ་རིག་འཁྲུལ་འཁོར་འདི་ལས་ཀྱི་རྐྱེན། །དེ་ལ་རྒྱུད་འཁྲུལ་འཁོར་བ་མང་པོ་འབྱུང་། །འཁྲུལ་འཁོར་དེ་ཉིད་མ་རིག་པའི་རྒྱུ། །མ་རིག་དེ་ཉིད་རྟོགས་སངས་རྒྱས་ཏེ། མ་རྟོགས་པ་ཡིས་སེམས་ཅན་བྱུང་བ་ཡིན། །སེམས་ཅན་འདི་ཉིད་རྒྱུ་དང་རྐྱེན་ལས་ནི། རྒྱུ་རྐྱེན་དེ་ཉིད་ཤེས་པ་གང་ཡང་མེད། །ཤེས་པ་ཡོད་ན་སངས་རྒྱས་མངོན་སུམ་པ། །མངོན་སུམ་ཞེས་གྲགས་དེ་ཉིད་གང་ལས་བྱུང་། །བྱུང་བ་དེ་ཉིད་རྒྱུ་རྐྱེན་གང་ལས་བྱུང་། །སངས་རྒྱས་ལ་ནི་རྒྱུ་རྐྱེན་མེད་པ་ཡིན། །རྒྱུ་རྐྱེན་ཡོད་ན་སངས་རྒྱས་མེད། །སངས་རྒྱས་ཞེས་བྱ་བ་དེ་ཉིད་གང་ལས་བྱུང་། །གང་ལས་བྱུང་སྟེ་སུ་ཡིས་ཤེས་པ་ཡིན། །ཤེས་པ་ཡོད་ན་བར་སྣང་ལག་པས་བཟུང་། དེ་ཉིད་རྟོགས་ནས་སངས་རྒྱས་མངོན་སུམ་པ། །མངོན་སུམ་ཞེས་གྲགས་དེ་ཉིད་གང་ལས་བྱུང་། །སེམས་ཉིད་འདི་ལ་རྒྱུ་རྐྱེན་ཡོད་པ་སེམས་ཉིད་མིན། །དེ་ལྟར་གྱུར་པ་སེམས་དཔའ་རང་བྱུང་སྟེ། །གཅིག་ཤེས་ཀུན་ལ་མཁས་པ་དེ་ཉིད་ཡིན། །དེ་ཉིད་ཟེར་བ་དེ་རང་གང་ལས་བྱུང་། གང་ལས་བྱུང་དེ་ཕུ་ཐག་གཅོད་མི་འདོད། གནོད་དུ་འདོད་པ་དེ་ཉིད་གང་ལས་ཡོང་། གང་ལས་ཡོང་བ་དེ་ཡང་གང་ཡིན་པ། །མ་རྟོགས་ལོགས་རྟོགས་དེ་ཉིད་གང་ལས་བྱུང་། དེ་ལྟར་ཀུན་གྱི་གོ་བར་མཛོད། བཀྲ་ཤིས་དཔལ་འབར་རབ་འབར་རབ་བརྟན་རྒྱལ་བའི་རྒྱན་དུ་ཤོག །མཚུར་ཕུར་སྦྲུལ་ལོ་དཔྱིད་ཟླ་ར་བ་ལ་བྲིས་པའོ། །ཨོཾ་སརྦ་སྭ་སྟི་སིདྷི་ཧཱུཾ། རྡོ་རྗེ་འཆང་དང་ས་ར་ཧ། །བཀའ་རྒྱུད་བླ་མ་ཐམས་ཅད་ལ། །གསོལ་བ་འདེབས་སོ་བྱིན་གྱིས་བརློབས། །ཁོ་བོ་རྣམ་འབྱོར་འདུག་པ་འདི། །འདུག་པ་མཉམ་ཉིད་ངང་ལ་འདུག །ལྟད་མོ་ཆོས་ཉིད་ངང་ལ་ལྟ། །རྩེད་མོ་ཕྱག་ཆེན་ངང་ལ་བྱེད། །ཟ་བ་བདེན་པའི་ངང་དུ་ཟ། །འགྲོ་བ་དོན་དམ་ངང་ལ་འགྲོ། །འཆི་བ་ལྟ་བའི་ངང་ལ་འཆི། །ཀུན་རྫོབ་སེམས་ཅན་ཐམས་ཅད་ཀྱི། །ཨེ་མ་ཀརྨ་པ་ཞེས་ནི། །ཇེ་ངན་ཇེ་ངན་འགྲོ་ལོ་སྐད། །ཅི་ཡིན་བྱས་ནས་ངན་པ་ན། །སྤྲང་པོའི་བུ་རུ་སྐྱེས་སོ་སྐད། སེམས་ཅན་རྨོངས་པས་དེ་སྐད་ཟེར། དེ་མིན་པ་ལ་གཏུགས་ཙམ་ན། །བཟང་པོ་ཡིན་པར་གོ་བ་ཡིན། །གཏན་ཚིགས་ཅི་ཡིན་བྱས་པ་ལ། །དཔེར་ན་རྒྱལ་པོ་ལྟ་བུ་ཡིན། །བུ་རུ་སྐྱེས་པར་གྱུར་སྲིད་ན། །འགྲོ་དྲུག་སེམས་ཅན་ཐམས་ཅད་ཀྱིས། །མིག་ཀྱང་ལྟ་བར་མི་རྙེད་དོ། །དེ་ཕྱིར་སྤྲང་པོའི་བུ་རུ་སྐྱེས། །འགྲོ་དྲུག་སེམས་ཅན་ཐམས་ཅད་ཀྱིས། །ཞལ་ཉིད་བལྟ་དང་བྱིན་བརླབས་དང་། །ཐམས་ཅད་ཅི་བདེར་འགྲུབ་པར་འགྱུར། དེའི་ཕྱིར་ན་བཟང་བར་བཤད། །གོ་བར་གྱིས་ཅིག་འགྲོ་དྲུག་རྣམས། །བཀྲ་ཤིས་དཔལ་འབར་རབ་འབར་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། ང་ནི་ངན་པ་ངན་པ་ཡིན། །རྡོ་རྗེ་འཆང་གི་ངན་པ་ཡིན། །བཀའ་བརྒྱུད་བླ་མའི་ངན་པ་ཡིན། །ཡི་དམ་ལྷ་ཚོགས་ཐམས་ཅད་ཀྱི། །ངན་པའི་གཏན་ཚིགས་ཁོ་བོ་ཡིན། །ཆོས་སྐྱོང་བསྲུངས་མ་ཐམས་ཅད་ཀྱི། །ངན་པའི་མཚན་ཉིད་ཁོ་བོ་ཡིན། ངན་པའི་བསྟན་ཚིགས་འདི་ལྟ་བུ། །བྲག་ཆ་ཙམ་དུ་ཕྱུང་པ་ཡིན། གོ་བར་གྱིས་ཅིག་འགྲོ་དྲུག་རྣམས། །བཀྲ་ཤིས་དཔལ་འབར་རབ་འབར་འཛམ་གླིང་རྒྱན་དུ་ཤོག །ང་ནི་ཆུང་ཆུང་ཆུང་ཆུང་ཡིན། །རྡོ་རྗེ་འཆང་གི་ཆུང་ཆུང་ཡིན། །ཏེ་ལོ་པ་ཡི་ཡང་ཆུང་ཡིན། །ན་རོ་པ་ཡི་དེ་ཆུང་ཡིན། བཀའ་བརྒྱུད་བླ་མའི་ཡང་ཆུང་ཡིན། །ཆུང་ཆུང་རྒྱུད་ལ་འདི་ལྟར་བཤད། །བསྒོམ་དུ་མེད་པའི་སེམས་ཉིད་འདི། །རྣམ་རྟོག་འཛིན་ཞིང་བསྒོམ་པ་ལ། །ཞེན་ཆགས་མེད་ན་འཁྲུལ་པ་ཡིན། །འཁྲུལ་པའི་ངང་ནས་ཆུང་བ་ཡིན། ཞེན་ཆགས་མེད་པས་ཆུང་བ་ཡིན། །ཆུང་བ་བདུན་གྱི་དབྱངས་ཆུང་འདི། །དོན་དམ་གྱི་ངང་ནས་དེ་སྐད་ལོ། །བཀྲ་ཤིས་དཔལ་འབར་རྟོགས་པའི་དོན་དང་ལྡན་པར་ཤོག །ཨོཾ་སརྦ་སྭ་སྟི་སིདྷི་ཧཱུཾ། །ང་ནི་ཆེན་པོ་ཆེན་པོ་ཡིན། སེམས་ཉིད་ཆེ་བས་ཆེན་པོ་ཡིན། །རྟོགས་པ་ཆེ་བས་ཆེན་པོ་ཡིན། །ཀུན་ཆེ་རྒྱལ་པོ་དེ་ཉིད་ནི། །མ་ཤེས་མི་ཤེས་ཤེས་མི་འགྱུར། །ཤེས་པ་མེད་པའི་སེམས་ཉིད་འདི། །ཆེན་པོ་ཡིན་པར་གོ་བར་བྱ། ཀུན་ལ་ཆེ་བའི་དབྱངས་ཆུང་འདི། །དོན་དམ་ངང་ནས་དེ་སྐད་ལོ། །གོ་བར་གྱིས་ཅིག་སྐལ་ལྡན་ཀུན། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། ཁོ་བོའི་སྤྱི་བོའི་གཙུག་རུམ་ན། །བྱ་མགོ་འདོད་ཆགས་རང་བཞིན་སྐྱེས། །དཔུང་པ་གཡས་ཕྱོགས་མགོ་བོ་ན། །གཏི་མུག་ཕག་གི་མགོ་བོ་སྐྱེས། །དཔུང་པ་གཡོན་པའི་མགོ་བོ་ན། །ཞེ་སྡང་སྦྲུལ་གྱི་མགོ་བོ་སྐྱེས། །མགོ་བོ་གསུམ་པོ་རལ་གྲིས་གཅད། །སྤྱི་བོར་བྱ་མགོ་གཅོད་པ་དེ། འདོད་ཆགས་མ་དག་གཅད་པའི་བརྡ། །གཡས་སུ་ཕག་མགོ་གཅད་པ་དེ། །གཏི་མུག་རྩད་ནས་གཅད་པའི་བརྡ། །གཡོན་པ་སྦྲུལ་མགོ་གཅད་པ་དེ། །ཞེ་སྡང་རང་བཞིན་གཅད་པའི་བརྡ། །ཉོན་མོངས་དུག་གསུམ་རྩད་ནས་གཅད། །གོ་བར་གྱིས་ཅིག་འགྲོ་དྲུག་རྣམས། །བཀྲ་ཤིས་དཔལ་འབར་དུག་གསུམ་ཞི་འབར་འཛམ་གླིང་རྒྱན་དུ་ཤོག །ཅེས་པ་འདི་རྣམས་སྦྲུལ་ལོ་ཟླ་བ་བཅུ་གཉིས་པའི་ཚེས་བཅུ་གསུམ་ལ་སྦྱར་བའོ། །ཨོཾ་སརྦ་སྭ་སྟི་སིདྷི་ཧཱུཾ། སྐུ་བཞི་ལྷུན་གྲུབ་རྫོགས་པ་ཡི། །མཉམ་རྗེས་མེད་པའི་ཆུ་བོའི་གཞུང་། གཟུགས་སྐུ་བཞི་རུ་བྱུང་བ་ཡིན། །རྒྱུ་མཚན་གཏན་ཚིགས་བཤད་པར་བྱ། །གཉིས་མེད་སྐུ་ཉིད་ས་ར་ཧ། སངས་རྒྱས་སེམས་ཅན་མེད་པར་ཡང་། །གཉིས་སུ་མེད་པའི་སྐུ་རུ་བཤད། །རྟག་ཆད་ལྟ་བ་མ་གྲུབ་པས། །གཉིས་སུ་མེད་པའི་སྐུ་རུ་བསྟན། གཉིས་མེད་ཡེ་ཤེས་ཆེན་པོ་ཉིད། །སྣང་བ་དང་བཅས་མ་གྲུབ་པའི། །ཆོས་ཀྱི་སྐུའི་གཏན་ཚིགས་སུ། །སྨྲ་བསམ་བརྗོད་ལས་འདས་པ་ནི། །ཆོས་ཀྱི་སྐུའི་མཚན་ཉིད་ནི། །གཉིས་མེད་ཀུན་ལ་འགག་མེད་པ། ལོངས་སྤྱོད་རྫོགས་པའི་སྐུ་རུ་བཤད། །དོན་དམ་ཆོས་སྐུ་སྨྲ་བརྗོད་པ། ལོངས་སྤྱོད་རྫོགས་པའི་སྐུ་ཡིན་ནོ། །ཀུན་ལ་སྣང་བཞིན་འགྲོ་དོན་བྱེད། །སྤྲུལ་པའི་སྐུའི་མཚན་ཉིད་དོ། །འགྲོ་བ་འདྲེན་ཅིང་ཆོས་ཀྱང་སྟོན། །སྤྲུལ་སྐུ་རང་བྱུང་རྡོ་རྗེ་ནི། །སྐུ་བཞི་རྫོགས་པའི་ཡོན་ཏན་བཤད། །བཀྲ་ཤིས་དཔལ་འབར་སྐུ་བཞི་རབ་འབྱམ་འཛམ་གླིང་རྒྱན་དུ་ཤོག །སྐུ་བཞིའི་གཏན་ཚིགས་བསྟན་པ་འདི་སྦྲུལ་ལོ་ཟླ་བ་བཅུ་གཉིས་པའི་ཚེས་བཅོ་བརྒྱད་ལ་མཚུར་ཕུར་སྦྱར་བའོ། །ཨོཾ་སརྦ་སྭ་སྟི་སིདྷི་ཧཱུཾ། རྣལ་འབྱོར་རང་བྱུང་རྡོ་རྗེ་ཡིས། ཀུན་མཁྱེན་སེམས་དཔའ་ཆེན་པོ་ལ། །གདམས་ངག་ངོ་སྤྲོད་འདི་ལྟར་ཕོག །སེམས་ཅན་རྒྱུད་ཉིད་སངས་རྒྱས་ཏེ། །དྲི་མ་བྱུང་བས་སེམས་ཅན་ཉིད། །དག་དང་མ་དག་སོ་འཚམས་ན། །འཁྲུལ་དང་མ་འཁྲུལ་གཉིས་གཉིས་བྱུང་། །འཁྲུལ་དང་མ་འཁྲུལ་གཉིས་པོ་ཡི། །གཏན་ཚིགས་རྒྱུ་མཚན་བཤད་པར་བྱ། །འཁྲུལ་པའི་དོན་ནི་འདི་ལྟ་བུ། །ང་རྒྱལ་རི་ལྟར་སྤུངས་པ་དང་། །ཞེ་སྡང་རླུང་ལྟར་འཚུབ་པ་དང་། །འདོད་ཆགས་མེ་ལྟར་འབར་བ་དང་། །དེ་ལ་སོགས་ཏེ་སེམས་ཅན་རྣམས། །འཁྲུལ་པའི་རྣམ་རྟོག་ཡིན་པར་བཤད། །མ་འཁྲུལ་དོན་ནི་འདི་ལྟ་བུ། །ཀུན་ལ་སྙིང་རྗེ་ཆེ་བ་དང་། །ཕན་པའི་བློ་ནི་ཁོ་ན་གཏོང་། །དེ་ཉིད་མ་འཁྲུལ་ཡིན་པར་བཤད། །གོ་བར་གྱིས་ཅིག་རིགས་ཀྱི་བུ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། དོན་དམ་ཆོས་ཉིད་བདེན་པ་ལ། །སེམས་ཉིད་ནམ་མཁའ་ལྟ་བུ་སྟེ། །ལུས་འདི་བེམས་པོ་ཡིན་པ་ལ། ཕྱག་རྒྱ་ཆེན་པོ་རྟོགས་ཚུལ་བསྟན། །ཐམས་ཅད་ནམ་མཁའ་ལྟ་བུ་ཉིད། །གོ་བར་གྱིས་ཅིག་སྐལ་ལྡན་ཀུན། །ཨོཾ་སརྦ་སྭ་སྟི་སིདྷི་ཧཱུཾ། །དོན་དམ་ཆོས་ཉིད་བདེན་པ་ལ། །སེམས་ཉིད་ནམ་མཁའ་ལྟ་བུ་སྟེ། །འབྱུང་བ་བཞིའི་རྩོན་རར་ཚུད་པ་དེ། །འོ་ན་གང་ཡིན་བྱས་ཙམ་ན། །རྟོག་པ་འདུས་པས་ལན་པ་ཡིན། །གོ་བར་གྱིས་ཅིག་རིགས་ཀྱི་བུ། །ཨོཾ་སརྦ་སྭ་སྟི་སིདྷི་ཧཱུཾ། །ཕྱག་རྒྱ་ཆེན་པོ་བསྒོམ་དུ་མེད། །བསྒོམ་དུ་ཡོད་ན་ཕྱག་ཆེན་མིན། །སེམས་ཉིད་དངོས་པོར་རྟོག་རྒྱུ་མེད། །རྟོག་རྒྱུ་བྱུང་ན་སེམས་ཉིད་མིན། །གོ་བར་གྱིས་ཅིག་རིགས་ཀྱི་བུ། །རྟ་ལོ་ཟླ་བ་དང་པོའི་ཚེས་བརྒྱད་ལའོ། །ཨོཾ་སརྦ་སྭ་སྟི་སིདྷི་ཧཱུཾ། །ཐུགས་རྗེ་ཆེན་པོའི་ལུང་། །རང་བྱུང་རྡོ་རྗེའི་གཏམ། ཕྱག་རྒྱ་ཆེན་པོ་སྐད་པ་དེ། །སྣང་ལ་རང་བཞིན་མེད་པ་ཡི། །ནམ་མཁའ་འདྲ་དང་མི་འདྲ་བའི། །དམིགས་མེད་རང་གྲོལ་ཆེན་པོ་ཡི། །དོན་དམ་དམིགས་མེད་འགྲོ་བ་ཀུན། །དག་པའི་སྣང་བ་ཕྱག་རྒྱ་ཆེ། །མ་དག་དངོས་པོ་སྣང་བ་ཅན། །གང་ཡང་མེད་པའི་རྣལ་འབྱོར་པ། །ཐམས་ཅད་ཆོས་ཉིད་ངང་ལ་སྡོད། །གོ་བར་གྱིས་ཅིག་རིགས་ཀྱི་བུ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སི་སིདྷི་ཧཱུཾ། །ང་རྒྱལ་རྩོངས་པས་རྫ་དུག་བུ་རུ་སྐྱེས། །འདི་ནས་ཤི་འཕོས་དགའ་ལྡན་གནས་སུ་འགྲོ། །འགྲོ་ལ་སེམས་རྩེ་གདུལ་བྱ་གར་ཡོད་འབྱུང་། བདག་ལ་གཞན་དོན་མིན་པ་བྱ་བློ་མེད། །ཡེ་ཤེས་རྟོགས་པས་གཟུང་འཛིན་རྩད་ནས་དག དཔལ་ལྡན་སྐུ་གསུམ་རྒྱལ་སྲས་ཐོབ་པར་ཤོག །གནས་སྐབས་བཞི་པོས་སྐུ་བཞི་ལྷུན་གྱི་གྲུབ། །དེ་ལྟར་བདག་གི་འགྲུབ་པར་ཤོག །ལ་སྟོད་བྱང་དུ་གསུངས། །ཨོཾ་སརྦ་སྭ་སྟི་སིདྷི་ཧཱུཾ། ཕྱག་རྒྱ་ཆེན་པོ་སྐད་པ་དེ། །འཛིན་མེད་རང་གྲོལ་ཆེན་པོ་ཡིན། །རྟོགས་པས་ཁྱད་འཕགས་དམ་ཆོས་ལ། །རྒྱུད་སྡེ་འབུམ་དང་སྟོང་གི་ནི། །མན་ངག་ཐམས་བཅད་བསྡུ་ལགས་ཀྱང་། །འདི་ལས་ཁྱད་པར་འཕགས་པ་ནི། །ཆོས་ཉིད་གཞན་དུ་ཡོང་མི་སྲིད། འོན་ཀྱང་ང་རྒྱལ་ཆེན་བ་མིན། །རྡོ་རྗེ་འཆང་དང་ས་ར་ཧ། །བཀའ་རྒྱུད་བླ་མ་ཐམས་ཅད་ཀྱི། །དོན་དམ་ཆོས་ཉིད་བསྡུས་པ་ཡིན། །སྙིང་པོ་འདི་ནི་གོ་བར་གྱིས། །བསྒོམ་ཆེན་གྲ་པ་བུ་སློབ་དང་། །འགྲོ་དྲུག་སེམས་ཅན་ཐམས་ཅད་ཀྱིས། །སྙིང་པོ་མཐར་ཐུག་ཐམས་ཅད་ནི། །རིམས་ཀྱིས་པའི་དམ་ཆོས་ཡིན། །གཅིག་ཆར་བའི་དམ་ཆོས་ནི། །འདི་ལྟ་བུའི་དོན་གཅིག་ཡིན། །མཐར་ཐུག་ཕྱག་རྒྱ་ཆེན་པོ་ནི། །བློ་དང་ཚིག་དང་སྒྲ་དང་ནི། ཡུལ་དང་གཉེན་པོ་ཁ་ཟས་དང་། །དེ་རྣམས་ཐམས་ཅད་མ་ཡིན་པ། །སྣང་ལ་རང་བཞིན་མེད་པ་ཡི། །ཆུ་ལ་ཆུ་བཞག་ལྟ་བུ་ཡང་། །དེ་ནི་རྟོགས་པའི་ཡེ་ཤེས་མིན། །རྟོགས་པའི་ཡེ་ཤེས་བྱ་བ་དེ། །དཔེ་དོན་ཚད་དུ་མེད་པ་ཡི། །སྟོང་པ་ནམ་མཁའ་ལྟ་བུ་ཉིད། །དེ་ཡང་འགྲོ་དྲུག་སེམས་ཅན་གྱིས། །ཆད་པར་ལྟ་བར་འདོད་ལགས་ཀྱང་། །ཡང་དག་རྫོགས་པའི་སངས་རྒྱས་ཀྱིས། །ཕྱག་རྒྱ་ཆེན་པོ་བསྒོམ་དུ་མེད། །བསྒོམ་དུ་ཡོད་ན་ཕྱག་ཆེན་མིན། །གོ་ཡུལ་རྟོགས་ཡུལ་བློ་ཡུལ་མིན། །གོ་ཡུལ་བློ་ཡུལ་བྱུང་སྲིད་ན། །ཉམས་ནི་རྩེ་མོ་རྟོགས་ཙམ་ཡིན། །རྟོགས་རྒྱུ་མེད་པའི་དོན་རྟོགས་ན། །དོན་དམ་བདེན་པ་སྣང་སྲིད་ཀྱིས། །སྣོད་བཅུད་ཐམས་ཅད་གཅིག་ཏུ་སྣང་། །ཐམས་ཅད་ཐམས་ཅད་གཅིག་ཏུ་སྣང་། །གཅིག་ཀྱང་མི་སྣང་ཕྱག་རྒྱ་ཆེ། །སྣང་ལ་རང་བཞིན་མེད་པ་ཡིན། །དོན་ནི་དེ་ལྟར་ཤེས་པར་གྱིས། །གོའམ་ཐོས་སམ་སྐལ་ལྡན་ཀུན། །འདི་འདྲའི་དོན་ཆེན་འདི་ཉིད་ནི། སྐལ་མེད་རྣམས་ཀྱི་བློར་མི་ཤོང་། །སྐལ་ལྡན་རྣམས་ཀྱི་སྤྱོད་ཡུལ་ཡིན། །འོན་ཀྱང་སེམས་ཅན་ཐམས་ཅད་ལ། །གོར་ཆུག་ཐོས་ཆུག་བྲི་རུ་ཆུག །ཀློག་ཆུག་མོས་ཆུག་བྱེད་དུ་ཆུག། དེ་ལྟར་བྱས་པར་གྱུར་སྲིད་ན། །ཐམས་ཅད་རང་གྲོལ་ཆེན་པོར་འགྱུར། །གོ་བར་གྱིས་ཅིག་འགྲོ་དྲུག་རྣམས། །དེ་རྣམས་ཐམས་ཅད་བསྡུས་པ་ནི། །ཕྱག་རྒྱ་ཆེན་པོ་སྐད་པ་དེ། །སྣང་ལ་རང་བཞིན་མེད་པ་ཡི། །ནམ་མཁའ་རང་བཞིན་ལྟ་བ་འདྲ། །བསྒོམ་ཡང་ཕར་ལ་མི་བསྒོམ་པར། །ཡེངས་ཀྱང་ཕར་ལ་མ་ཡེངས་པར། །མ་བཅོས་གཉུག་མའི་ངང་ཉིད་དོ། །གོ་བར་གྱིས་ཅིག་སྐལ་ལྡན་ཀུན། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། ཨོཾ་སརྦ་སྭ་སྟི་སིདྷི་ཧཱུཾ། ཕྱག་རྒྱ་ཆེན་པོ་སྐད་པ་དེ། །བྱ་བའི་དོན་ནི་འོག་མ་རྣམས་ཀྱི་ཚིག་འདི་འདྲ་བ་གཅིག་ཡོད་ཟེར་བ་ཡིན། །འཛིན་མེད་རང་གྲོལ་ཅེས་བྱ་བའི་དོན་ནི་འཛིན་པ་མེད་པར་རང་སར་གྲོལ་བ་སྣང་སྲིད་ཐམས་ཅད་དོན་དམ་ཆོས་ཀྱི་སྐུར་འཆར་བ་གཅིག་ལ་ཟེར་བ་ཡིན། །རྟོགས་པ་ཁྱད་འཕགས་དམ་ཆོས་ལ་ཞེས་པའི་དོན་ནི། །ཁྱད་པར་དུ་འཕགས་པ་དུས་གསུམ་གྱི་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་བཅུད་བསྡུས་པའོ། །རྒྱུད་སྡེ་འབུམ་དང་སྟོང་གི་ནི། །ཞེས་པ་ནས། འོན་ཀྱང་ང་རྒྱལ་ཆེ་བ་མིན་ཞེས་པའི་བར་གྱིས་བཀའ་རྒྱུད་སྡེ་ལ་སོགས་པ་སངས་རྒྱས་ཀྱི་གསུང་ཐམས་ཅད་ཀྱི་དོན་ཤེས་ཀྱང་རྩ་བ་འདི་ལ་ཐུག་པ་ཡིན་བྱ་བའི་དོན་ནོ། །རྡོ་རྗེ་འཆང་དང་ས་ར་ཧ་སྙིང་པོའི་དོན་ནི་གོ་བར་གྱིས། ཞེས་པའི་བར་གྱིས། རྡོ་རྗེ་འཆང་དང་ས་ར་ཧ་དང་བཀའ་བརྒྱུད་བླ་མ་ཐམས་ཅད་ཀྱི་དོན་དམ་ཆོས་ཉིད་ཕྱག་རྒྱ་ཆེན་པོ་བསྡུས་པའི་ངོ་བོ་ཡིན་པས་གོ་བར་གྱིས་ཅིག །བྱ་བའི་དོན་ནོ། །བསྒོམ་ཆེན་གྲྭ་པ་བུ་སློབ་དང་། ཞེས་པ་ནས་རིམ་གྱིས་པའི་དམ་ཆོས་ཡིན་ཞེས་པའི་བར་ལ། དེ་ཡང་འགྲོ་དྲུག་སེམས་ཅན་ཐམས་ཅད་ཀྱི་བཙུན་ཤ་དང་། ཕྱག་བརྡར་དང་། འདོན་པ་བྱེད་པ་དང་། མ་ཎི་བགྲང་བ་དང་། འཇིག་རྟེན་གྱི་ནག་པ་གང་དགའ་བྱེད་པ་དེ་མ་ཟེར་བ་ཡིན་ནོ། །གཅིག་ཆར་བའི་དམ་ཆོས་ནི་ཞེས་བྱ་བ་ནི། གཅིག་ཆར་བའི་གདམ་ངག་གོ་བར་བྱེད་པའི་མགོ་ཡིན་ནོ། །མཐར་ཐུག་ཕྱག་རྒྱ་ཆེན་པོ་ནི། ཞེས་པ་ནས། དེ་རྣམས་ཐམས་ཅད་མ་ཡིན་པ་ཞེས་པའི་བར་ནི་གོང་དུ་རྒྱས་པར་བསྟན་པའོ། །སྣང་ལ་རང་བཞིན་མེད་པ་ཞེས་པ་ནི་ནམ་མཁའ་ལྟ་བུ་དེས་འཇོག་ཏེ་གཟུང་རྒྱུ་མེད་གང་ནས་ཀྱང་མ་འོངས། གང་དུ་ཡང་མི་འགྲོ། འདུས་མ་བྱས་པ་དེ་ལྟ་བུ་ལ་ཟེར་བ་ཡིན་ཏེ། ཆུ་ལ་ཆུ་བཞག་ལྟ་བུ་ཡང་། དེ་ནི་རྟོག་པའི་ཡེ་ཤེས་མིན། ཞེས་པའི་དོན་ནི། འོག་ནས་རྒྱས་པར་འཆད་དོ། །རྟོགས་པའི་ཡེ་ཤེས་ཤེས་བྱ་བ་དེ། དཔེ་དོན་ཚད་མེད་ཞེས་པ། ནམ་མཁའ་ལ་དཔེ་འཇོག་ཏེ་གོང་དུ་བསྟན་ནོ། །དེ་ཡང་འགྲོ་དྲུག་སེམས་ཅན་ཐམས་ཅད་ཀྱིས། ཆད་པར་ལྟ་བར་འདོད་པའི་རྒྱུ་མཚན་ནི། སྟོང་པ་རང་དངས་སུ་སོང་ཟེར་ཏེ། དེ་ཡང་མ་ཡིན་པ་དེའི་དོན་ལ་ཡང་དག་པར་རྫོགས་པའི་སངས་རྒྱས་ཀྱིས། །ཕྱག་རྒྱ་ཆེན་པོ་བསྒོམ་དུ་མེད། །བསྒོམ་དུ་ཡོད་ན་ཕྱག་ཆེན་མིན། ཞེས་བསྟན་ནོ། །གོ་ཡུལ་རྟོག་ཡུལ་ཞེས་པ་ནི། །ཉམས་ནི་རྩེ་མོ་རྟོགས་ཙམ་ཡིན། ཞེས་པ་དང་། གོང་གི་རྟོགས་པའི་ཡེ་ཤེས་མིན་པའི་དོན་སྟོན། དེ་ཡང་ཉམས་ཏིང་ངེ་འཛིན་ཆུ་བཞག་པ་ལྟ་བུ། མར་ལ་མར་བཞག་པ་ལྟ་བུ། དེ་ལྟ་བུའི་ཉམས་བྱུང་ཡང་ཉམས་ཀྱི་ཆ་ཙམ་རྩེ་མོ་ཙམ་གཅིག་སྟོན་ཡིན་པས། ང་རྒྱལ་དང་ཕྲག་དོག་ལ་སོགས་པ་མ་ཉན་ཞེས་པའོ། །རྟོགས་རྒྱུ་མེད་པའི་དོན་རྟོགས་ན། ཞེས་པ་ནས། དོན་ནི་དེ་ལྟར་ཤེས་པ་ཡིན། །ཞེས་པའི་བར་གྱིས། །སྣང་སྲིད་སྣོད་བཅུད་ཐམས་ཅད། སེམས་མཉམ་པ་ཉིད་ཀྱི་ཡེ་ཤེས། དུ་མ་རོ་གཅིག་ཏུ་ངོ་ཤེས་བྱ་བའི་འཛིན་པ་དེ་རྟོགས་དགོས། འཛིན་པ་དེ་མ་རྟོགས་ན། དུག་ལྔའི་རྒྱུ་ཡིན་པས་ཅི་ཡང་མི་བཏུབ། དེའི་ཕྱིར་ན་བསྒོམ་ཅི་ཙམ་སྐྱེས་ཀྱང་གཟུང་དང་འཛིན་པ་དང་། ང་རྒྱལ་གྱི་སེམས་མི་བྱའོ། །དེས་ཕྱག་རྒྱ་ཆེན་པོའི་དོན་བསྟན་ནོ། །དེའི་བསོད་ནམས་ཀྱིས་སེམས་ཅན་ཐམས་ཅད་ཕྱག་རྒྱ་ཆེན་པོའི་ཡེ་ཤེས་ཐོབ་པར་ཤོག་ཤིག །དེ་ནས་དེ་རྣམས་ཐམས་ཅད་དུ་མ་རོ་གཅིག་ཏུ་ངོ་ཤེས་ཀྱང་དུ་མ་རོ་གཅིག་ཏུ་སྣང་ལ་རང་བཞིན་མེད་པར་ངོ་མ་ཤེས་ན་དུག་ལྔར་འཁྲུལ་འགྲོ་སྟེ། འཁྲུལ་པ་དེ་ཡང་ངོ་མི་ཤེས་སྟེ། འཁྲུལ་པ་དེ་ངོ་མི་ཤེས་པ་དེ་ཤེས་པའི་ཐབས་སྟོན། སྔར་མེད་པའི་བག་ཚ་བ། ཞེ་སྡང་ཆེ་བ། ཕྲག་དོག་ཆེ་བ། ཕྱག་རྒྱ་ཆེན་པོ་འདི་ཡིན་བསམ་ནས་གཉིད་ལོག་པ་ལ་དགའ་བ། དེ་ལྟ་བུ་བྱུང་ན་དུག་ལྔར་འཁྲུལ་པ་ཡིན་པས་ངོས་ཟིན་པར་བྱས་ལ་ཚིག་པ་ཟ་མཁན་གྱི་སེམས་ལྟས་ནས་ལྷོད་ཀྱི་ཀློད་ནས་རླུང་བཟུང་། དེ་ལྟར་གཏི་མུག་དང་འདོད་ཆགས་དང་ང་རྒྱལ་དང་ཕྲག་དོག་ལ་སོགས་པ་གང་བྱུང་ཡང་དེ་ལྟར་དུ་བྱའོ། །ཕྱག་རྒྱ་ཆེན་པོའི་གེགས་སེལ་བདེན་ངོ་ཤེས་པ་འདི་འོང་བ་ཙམ་མི་འོང་། བརྒྱ་ལ་གེགས་བྱུང་ཡང་བྱུང་བ་ཁ་སྐད་མི་ཟེར། དེ་ལྟ་བྱས་པས་སེལ་ལོ། །གཞན་ལ་སྟོན་དགོས་བྱུང་ན་ཡང་མོས་གུས་དང་ལྡན་པ་དམ་ཚིག་དང་ལྡན་པ། ཚེ་ཕྱི་མ་དང་དུ་ལེན་པ། སྙིང་དང་འདྲ་བ་རེ་རེ་ལ་བསྟན་པར་བྱའོ། །ཀུན་ལ་སྤེལ་བ་དང་བཅོས་པ་ལ་སོགས་པ་བྱུང་ན། དཔལ་མ་མགོན་ལྕམ་དྲལ་གྱིས་དེའི་སྙིང་ཕྱུང་ལྕེ་ཆོད། རྟ་ལོ་ཟླ་བ་བཅུ་གཉིས་པའི་ཚེས་བཅུ་བདུན་ལ་བཀྲ་ཤིས་གསར་མར་གསུངས་པའོ། །ཨོཾ་སརྦ་སྭ་སྟི་སིདྷི་ཧཱུཾ། སངས་རྒྱས་རྣམས་ལ་སྐྱབས་སུ་མཆི། །པད་མ་མཆོག་ལ་གསོལ་བ་འདེབས། །དུས་གསུམ་མཁྱེན་པས་བྱིན་གྱིས་བརློབ། །རྣལ་འབྱོར་ཉམས་ཀྱི་སྣང་བ་ལ། །འདི་ལྟར་ཤར་བའི་དབྱངས་ཆུང་འདི། །སྐལ་ལྡན་རྣམས་ཀྱིས་ཉམས་སུ་མྱོང་། ཕྱག་རྒྱ་ཆེན་པོ་སྐད་པ་དེ། །འཛིན་པ་མེད་པ་ཆོས་ཀྱིས་སྐུ། །སྣང་སྟོང་དབྱེར་མེད་ཆུ་ཟླ་འདྲ། ཟུང་འཇུག་བསྒོམ་བྱ་བསྒོམ་བྱེད་མེད། །འཛིན་བྱ་མེད་ཅིང་འདུ་ཤེས་མེད། །ཐམས་ཅད་ཆོས་དབྱིངས་ཆེན་པོར་གསལ། གཉིས་མེད་ཡེ་ཤེས་ངོ་བོ་ལ། །རྟོགས་དང་མ་རྟོགས་གང་ཡང་མེད། །སེམས་ཅན་འགྲོ་དྲུག་གང་ཡང་མེད། །ཐམས་ཅད་སྟོང་པ་ཆོས་ཀྱི་སྐུ། །འཛིན་མེད་ཆེན་པོའི་ངང་ལ་བཞག །ཐམས་ཅད་ཆོས་ཀྱི་དབྱིངས་སུ་བསྔོ། །འགྲོ་དྲུག་སེམས་ཅན་ཐམས་ཅད་ཀྱང་། ཀུན་ཀྱང་ཕྱག་ཆེན་རྟོགས་པར་ཤོག །བཀྲ་ཤིས་དཔལ་འབར་རྟོགས་པ་རབ་འབྱམས་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། རྡོ་རྗེ་འཆང་དང་སོགས་བཀའ་བརྒྱུད་རྣམས། བྱིན་གྱིས་བརླབ་པར་མཛད་དུ་གསོལ། །ཕྱག་ཆེན་སྣང་བ་འདི་ཉིད་ནི། །གང་དུ་མ་འདྲེས་ཆོས་ཀྱི་སྐུ། །ཅི་ཡང་བསམ་བྱེད་ཐོགས་པ་མེད། གང་དུ་འཛིན་མེད་ཕྱོགས་བཅུར་རྒྱུག །གཅིག་མེད་གཉིས་མིན་གང་ཡང་མིན། ཐམས་ཅད་མིན་པའི་ངོ་བོ་ལ། དོན་དུ་མི་འགྱུར་གང་ཡང་མེད། །ཐམས་ཅད་ཆོས་དབྱིངས་ཆེན་པོ་ཡི། །རབ་འབྱམས་རྒྱལ་བའི་དགོངས་པ་དང་། །རྟོགས་ལྡན་གྲུབ་ཐོབ་ཐམས་ཅད་ཀྱིས། རྟོགས་དང་མན་ངག་ཐམས་ཅད་ཀྱང་། །རྩ་བ་གཅིག་ལས་མེད་པ་ཡིན། །ཐམས་ཅད་དེའི་ངོ་བོ་ཉིད། །རབ་འབྱམས་རྟོགས་པ་ཐོབ་པར་ཤོག །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། ཤཱཀྱ་ཐུབ་སོགས་སངས་རྒྱས་དང་། ཉན་ཐོས་ཆེན་པོ་བརྒྱད་ལ་སོགས། །དུས་གསུམ་དབྱེ་རུ་མེད་པ་ཡི། །ཐམས་ཅད་བྱིན་གྱིས་བརླབ་དུ་གསོལ། །ཚད་མ་པ་ཞེས་གྲགས་པ་ཡང་། །རང་གི་སེམས་ཉིད་ཆེན་པོ་དེ། །སྣང་བ་དབྱེ་རུ་མེད་པ་ཡི། །དོན་ཆེན་དེ་ཉིད་མ་ཤེས་པས། །ཐ་མལ་རིག་པ་འཁྲུལ་པ་ཡིན། །དེ་བས་ཕྱག་རྒྱ་ཆེན་པོ་ནི། །བསྒོམ་དུ་མེད་པའི་ངང་གནས་པས། །རྟོགས་དང་མ་རྟོགས་འཛིན་པ་མེད། །ཆོས་དབྱིངས་རབ་འབྱམས་ཀུན་གྱི་གཞི། །རྟོགས་པ་མཐར་ཐུག་མང་ལགས་ཀྱང་། །དོན་དུ་བསྡུས་ན་གཅིག་ལས་མེད། །སྣང་སྟོང་དབྱེར་མེད་ནམ་མཁའ་འདྲ། །འཕོ་འགྱུར་མེད་པས་ཆོས་ཀྱི་སྐུ། །རང་གི་སེམས་འདི་ཡིན་པར་གསུངས། །ཐམས་ཅད་སེམས་ལ་ཐུག་པ་ཡིན། །སྟོང་པ་རང་དངས་སུ་ཤོར་ན་ཡང་། །མི་ཉན་པ་རུ་གསུངས་པ་ཡིན། །གང་ཡིན་བྱས་ན་འདི་ཉིད་ཡིན། །དངོས་པོ་ཡང་ནི་མ་ཡིན་ཞིང་། །སྟོངས་པ་ཡང་ནི་མ་སྤེལ་ཞིང་། །གཉིས་མེད་ཡེ་ཤེས་ཆེན་པོའི་ངང་། །རྟོགས་དང་མ་རྟོགས་ཐམས་ཅད་ཀྱང་། །རང་གི་སེམས་ལ་དྲིས་ཤིང་མཛོད། །འགྲོ་དྲུག་སེམས་ཅན་ཐམས་ཅད་ཀྱང་། །རྣམ་མཁྱེན་སངས་རྒྱས་ཐོབ་པར་ཤོག །བཀྲ་ཤིས་དཔལ་འབར་སེམས་ཅན་ཐམས་ཅད་ཡེ་ནས་སངས་རྒྱས་རྫོགས་པ་གཉིས་མེད་ཡེ་ཤེས་ཆེན་པོ་ཐོབ་པར་ཤོག །ཨོཾ་སརྦ་སྭ་སྟི་སིདྷི་ཧཱུཾ། དེ་བཞིན་གཤེགས་པ་བཅོམ་ལྡན་འདས། །འགྲོ་བའི་སྟོན་པ་ཐམས་ཅད་མཁྱེན། །བྱིན་གྱིས་བརླབ་པར་མཛད་དུ་གསོལ། །དབུ་མ་པ་ཞེས་གྲགས་པ་ཡང་། །རང་རིག་དོན་གྱི་སྣང་བ་ལ། །ཆོས་ལ་ཆགས་པ་ཆེན་པོ་ཡིས། །མ་རྟོགས་རྒྱུ་ཉིད་བྱེད་པ་ཡིན། །དབུ་མ་ཆེན་པོའི་དོན་རྟོགས་ནས། །འཁོར་བར་མི་ལྟུང་སངས་རྒྱས་འཐོབ། ཕྱག་རྒྱ་ཆེན་པོ་ཐོབ་པ་ལ། གང་གིས་ཀྱང་ནི་མི་ཕན་ཏེ། །རང་བཞིན་ཉིད་ལ་འཆར་བའོ། །འོན་ཀྱང་མ་དག་སྣང་ངོ་ལ། །ཁྲིད་དང་དམ་ཆོས་ཞུ་བ་དགོས། །རིམ་གྱིས་བགྲོད་པས་སངས་རྒྱས་འབྱུང་། །འོན་ཀྱང་ཕྱག་རྒྱ་ཆེན་པོ་དེས། །རིམས་ཀྱིས་ཀྱང་ནི་མི་འབྱུང་སྟེ། །ཅིག་ཆར་རྟོགས་པའི་སེམས་ལས་འབྱུང་། །སེམས་ཉིད་ཀུན་གྱིས་གོ་བར་མཛོད། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། རྡོ་རྗེ་འཆང་དང་ས་ར་ཧ། །ཏེ་ལོ་ན་རོ་མར་པ་དང་། །མིད་ལ་ཆོས་རྗེ་སྒམ་པོ་བ། །དུས་གསུམ་མཁྱེན་དང་འགྲོ་བའི་མགོན། །པུ་ནྱ་བཛྭ་རིན་པོ་ཆེ། །བཀའ་བརྒྱུད་རྣམས་ལ་ཕྱག་འཚལ་ལོ། །འཛིན་པ་ཕྱག་རྒྱ་ཆེན་པོ་དེ། སེམས་ཅན་ཀུན་གྱི་སྤྱོད་ཡུལ་མིན། །གང་ཟག་རེ་རེ་གཉིས་གཉིས་ཀྱིས། །རྩོད་མེད་ཕྱག་རྒྱ་ཆེན་པོ་རྟོགས། །འོན་ཀྱང་སེམས་ཅན་ཐམས་ཅད་ལ། །སངས་རྒྱས་རྒྱུ་ཉིད་ཡོད་ལགས་ཀྱང་། །འཁྲུལ་པའི་སྣང་ངོས་བསྒྲིབས་པ་ཡིན། །ཐམས་ཅད་ཀུན་ལ་འཆར་མི་འགྱུར། །དེ་ཡང་ཀྱེའི་རྡོ་རྗེ་ལས། །སེམས་ཅན་ཐམས་ཅད་སངས་རྒྱས་ཉིད། །འོན་ཀྱང་བློ་བུར་དྲི་མས་བསྒྲིབས། །དེ་ཉིད་བསལ་ན་སངས་རྒྱས་ཉིད། །དེ་སྐད་ཅེས་ནི་གསུངས་པའི་དོན། །ཐམས་ཅད་ཀྱིས་ནི་གོ་བར་མཛོད། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་རྩ་བ་རང་གི་སེམས་ཉིད་དུ་འདུས་པ་སྟེ། ཆོས་ཀྱི་སྐུ་ཐམས་ཅད་ཀྱང་དོན་དུ་མི་འགྱུར་བ་གང་ཡང་མེད་པའི་ཕྱིར། སེམས་ཅན་ཐམས་ཅད་ཀྱི་འགྲོ་བའི་འདྲེན་པར་འགྱུར་བ་ཡིན། སེམས་ཅན་ཐམས་ཅད་ཀྱང་རྒྱུ་སངས་རྒྱས་ལས་མ་གྲུབ་པ་གཅིག་ཀྱང་མེད་པའི་ཕྱིར་ན་སེམས་ཅན་ཐམས་ཅད་ཀྱང་སངས་རྒྱས་དང་སེམས་ཉིད་ལ་མ་སྤྲུལ་པ་གང་ཡང་མེད་པའི་ཕྱིར་ཐམས་ཅད་ཀུན་ཀྱང་གཅིག་གིས་གཅིག་ལ་སངས་རྒྱས་ཀྱི་འདུ་ཤེས་བསྐྱེད་པར་བྱའོ། །དེ་ལྟ་བུའི་འདུ་ཤེས་བསྐྱེད་ན་ནི་ཡོན་ཏན་དཔག་དུ་མེད་པ་དང་ལྡན་ཞིང་། སྐྱོན་ཐམས་ཅད་ཞི་བར་འགྱུར་བ་ཡིན་པས་ན། །ཐམས་ཅད་ཀྱི་དེ་ལྟར་མཁྱེན་པར་མཛོད། བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། དུས་གསུམ་མཁྱེན་ལ་གསོལ་བ་འདེབས། །ཀརྨ་པ་ལ་སྐྱབས་སུ་མཆི། །རིན་པོ་ཆེ་ཡིས་བྱིན་གྱིས་བརློབ། །མ་དག་སྣང་ངོ་དེ་ཉིད་དུ། །བཙུན་པ་བྱེད་དང་བསྒོམ་པ་དང་། །ཉན་དང་འཆད་དང་བརྩོམ་པ་ལ། ཀློག་དང་ཁ་ཏོན་བྱེད་པ་སོགས། །ཐམས་ཅད་དག་དག་བདེན་བདེན་འདྲ། །དབྱེར་མེད་ཕྱག་རྒྱ་ཆེན་པོ་ལ། །ཐམས་ཅད་འཛིན་མེད་ངང་ལ་ཞོག །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། རང་བྱུང་ཡེ་ཤེས་གསུངས་པའི་ཆོས་ཉིད་འདི། །སེམས་ཅན་ཀུན་གྱིས་གོ་བར་མཛོད། །རྒྱུད་ཀྱི་རྒྱལ་པོ་ཆེན་པོ་ཉིད། །གསང་བ་སྙིང་པོ་དེ་ཉིད་ལས། །མ་རྟོགས་པ་དང་ལོག་པར་རྟོགས། །དགོངས་པ་འདུལ་བ་གསར་པ་དང་། །ཕྱོགས་རྟོགས་ཡང་དག་ཉིད་མ་རྟོགས། །དོན་དམ་འདི་ལ་ཐེ་ཚོམ་ཟ། །ཞེས་ནི་གསུངས་པའི་དོན་འདི་ཡང་། འགྲོ་བ་རིགས་དྲུག་མུ་སྟེགས་ལ། །ཉན་རང་པ་ལ་སོགས་པ་དང་། །དེ་རྣམས་ལ་ནི་དགོངས་པ་ཡིན། །ཅིག་ཆར་རྟོགས་པའི་སྣང་ངོ་ལ། །མུ་སྟེགས་སངས་རྒྱས་གཉིས་མེད་ཅིང་། །བསྒོམ་བྱ་བསྒོམ་བྱེད་གཉིས་མེད་ཅིང་། །སྣང་བ་དག་བྱ་གཉིས་ཀྱང་མེད། །སྟོང་མེད་དངོས་པོ་ཡོད་མ་ཡིན། །ཐམས་ཅད་མེད་པའི་རང་བཞིན་ལས། ཡོད་པ་དེ་ཉིད་ཡང་དག་གནས། །སངས་རྒྱས་མུ་སྟེགས་གཉིས་ཀྱང་ཡོད། །ཐེགས་པ་ཆེ་ཆུང་གཉིས་ཀྱང་ཡོད། །དོན་དམ་ཀུན་རྫོབ་གཉིས་ཀྱང་ཡོད། །དགག་བྱ་བསྒྲུབ་པ་གཉིས་ཀྱང་ཡོད། །ཐམས་ཅད་ཡོད་པའི་ངང་ཉིད་ཡིན། །ཡོད་དང་མེད་པའི་སོ་མཚམས་ན། །དེ་ལ་ཆགས་པར་གྱུར་སྲིད་ན། །ཡོད་མིན་མེད་མིན་སྐྱེ་མཆེད་དུ། །རྒྱལ་བས་གོལ་བར་གསུངས་པ་ཡིན། །གང་ཡང་མ་ཡིན་སྟོང་པའི་ངང་། །སྣང་བ་ཐམས་ཅད་དགག་བསྒྲུབ་མེད། །ཐམས་ཅད་ཆོས་ཀྱི་ངང་ཉིད་ཡིན། །ཡིན་ཞེས་བྱ་བ་ཐ་སྙད་མེད། །ཐ་སྙད་བྱས་ཀྱང་དོན་ཉིད་ཡིན། །དོན་ཉིད་བྱས་ཀྱང་ཐ་སྙད་ཡིན། །གང་ཡང་ཡིན་པའི་སྣང་བ་ལ། ཐམས་ཅད་མིན་པའི་ངོ་བོར་ཤེས། །སྣང་བ་དགག་བསྒྲུབ་ཐམས་ཅད་ཀྱང་། །གཉིས་མེད་ཆོས་ཀྱི་སྐུ་རུ་ཤེས། །ཤེས་རྒྱུ་མེད་པའི་ངང་ཉིད་ལ། །ཐམས་ཅད་ཆོས་དབྱིངས་ཆེན་པོར་བསྔོ། །སྤྲོས་བྲལ་ཡེ་ཤེས་ངོ་བོ་ཉིད། རྟོག་པ་རབ་འབྱམས་ཁྱད་འཕགས་མཆོག །བདག་གིས་འདི་བཀོད་དགེ་བ་ཡིས། །ཐམས་ཅད་ཕྱག་ཆེན་རྟོགས་པར་ཤོག །རང་བྱུང་རྡོ་རྗེའི་གདམས་ངག་རིན་ཆེན་ཕྲེང་བ་ཞེས་བྱ་བ་ཕྱག་རྒྱ་ཆེན་པོ་བསྒོམ་པའི་རྣལ་འབྱོར་པ་རྣམས་ལ་གདམས་པ་བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། སློབ་དཔོན་པད་མ་འབྱུང་གནས་སོགས། །གྲུབ་ཐོབ་རྣམས་ལ་ཕྱག་འཚལ་ལོ། །རྟོགས་ལྡན་རྣམས་ཀྱིས་བྱིན་གྱིས་བརློབས། །དུས་གསུམ་འཕོ་འགྱུར་མེད་ན་ཡང་། །རབ་འབྱམས་རྒྱལ་བའི་བཀའ་ལུང་རྣམས། །འདུལ་བ་མངོན་པ་མདོ་སྡེ་དང་། །གསང་སྔགས་ཕྱི་ནང་ཐམས་ཅད་ཀྱང་། །མངོན་དུ་བསྡུས་ན་ཕྱག་ཆེན་ཡིན། །དེ་ལྟར་ཀུན་གྱི་གོ་བར་མཛོད། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །འདི་ནི་རང་བྱུང་རྡོ་རྗེས་ལུག་ལོ་ཟླ་བ་དང་པོ་ལའོ། །ཨོཾ་སརྦ་སྭ་སྟི་སིདྷི་ཧཱུཾ། །མཉམ་ཉིད་རབ་འབྱམས་རྟོགས་པ་ཡི། །ཡེ་ཤེས་ངོ་བོ་ཕྱག་ཆེན་ཉིད། རྟོགས་པ་དོན་གྱི་རྣལ་འབྱོར་པ། །རང་བྱུང་རྡོ་རྗེས་དབྱངས་ཅིག་ལེན། །ས་ར་ཧ་དང་རྡོ་རྗེ་འཆང་། །གྲུབ་ཐོབ་རྣམས་ལ་གསོལ་བ་འདེབས། །བླ་མ་རྣམས་ཀྱིས་བྱིན་གྱིས་བརློབས། །བདག་ཉིད་རྣལ་འབྱོར་འདུག་པ་འདི། །མཉམ་ཉིད་ཆོས་ཀྱི་དབྱིངས་ན་འདུག །རྣམ་དག་འོད་གསལ་ངོ་བོའི་ངང་། །མཉམ་མེད་ཡེ་ཤེས་དོན་ལ་གནས། །རྟོགས་པ་རབ་འབྱམས་མཐའ་དབུས་མེད། །བསྒོམ་བྱ་བསྒོམ་བྱེད་དབྱིངས་ལས་གྲོལ། །རང་བྱུང་ཡེ་ཤེས་ངོ་བོ་གཅིག །འགྲོ་དོན་ཤུགས་ལས་འབྱུང་བ་ཡི། །གཉིས་མེད་ཡེ་ཤེས་ཆེན་པོ་ཡོད། །དེ་ལྟར་ཀུན་གྱིས་གོ་བར་མཛོད། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག རྗེ་རང་བྱུང་རྡོ་རྗེས་ལུག་ལོ་ཟླ་བ་དང་པོའི་ཚེས་བཅུ་གསུམ་ལ་མཚུར་ཕུར་གསུངས། ཨོཾ་སརྦ་སྭ་སྟི་སིདྷི་ཧཱུཾ། ཕྱག་རྒྱ་ཆེན་པོའི་རྣམ་འབྱོར་པ། །གྲུབ་ཐོབ་རྣམས་ལ་གསོལ་བ་འདེབས། །འཛིན་མེད་ཕྱག་རྒྱ་ཆེན་པོ་དེ། །རྣམ་གྲོལ་རང་གསལ་དགག་པ་མེད། །ཞི་བ་ལྷུན་གྲུབ་འདུས་མ་བྱས། །རང་རིག་སྣང་སྟོང་ཆུ་ཟླ་འདྲ །འཛིན་མེད་རང་གྲོལ་ཆེན་པོ་ཡི། །ཕྱག་རྒྱ་ཆེན་པོ་གོ་བར་གྱིས། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །རང་བྱུང་རྡོ་རྗེས་ལུག་ལོ་ཟླ་བ་དང་པོའི་ཚེས་བཅུ་གསུམ་ལ་བྲིས་པའོ། །ཨོཾ་སརྦ་སྭ་སྟི་སིདྷི་ཧཱུཾ། དུས་གསུམ་སངས་རྒྱས་ཐམས་ཅད་དང་། །བླ་མ་བཀའ་བརྒྱུད་ཡི་དམ་བཅས། སྐྱོབས་པ་དམ་ཆོས་དགེ་འདུན་སོགས། །ཐམས་ཅད་ཀུན་ལ་ཕྱག་འཚལ་བསྟོད། །འགྲོ་དྲུག་སེམས་ཅན་ཐམས་ཅད་ནི། འཁོར་བའི་གནས་ན་འཁྱམ་པ་ཡང་། །མཉམ་ཉིད་ཆེན་པོའི་ཐུགས་རྗེ་ཡིས། །མྱུར་དུ་བདེ་བའི་གནས་སུ་དྲོངས། །འགྲོ་དྲུག་སེམས་ཅན་ཐམས་ཅད་ལ། །ཕྱག་རྒྱ་ཆེན་པོ་སྟོན་པ་དང་། །བླ་མེད་འབྲས་བུ་ཐོབ་བྱའི་ཕྱིར། །རྫོགས་པའི་སངས་རྒྱས་ཐམས་ཅད་དང་། །གྲུབ་ཐོབ་བཀའ་བརྒྱུད་ཐམས་ཅད་ཀྱིས། འགྲོ་དྲུག་ཀུན་གྱི་ལམ་སྣ་དྲོངས། ཕྱག་རྒྱ་ཆེན་པོ་ཞེས་བྱ་བ་འགྲོ་དྲུག་གི་སེམས་ཅན་ཐམས་ཅད་ཀྱིས་ཐོས་ཤིང་བསྒོམས་པ་དང་། ཉན་ཞིང་འཆད་པ་ལ་སོགས་པ་མང་ན་ཡང་གང་དང་གང་གིས་སྐལ་པ་གྲངས་མེད་རྣམས་སུ་ཚོགས་བསགས་ནས་སྨོན་ལམ་དཔག་ཏུ་མེད་པ་བཏབ་པ་རྣམས་ཀྱིས་ནི་ཚེ་གཅིག་ལུས་གཅིག་གིས་ཕྱག་རྒྱ་ཆེན་པོ་མངོན་པར་འཐོབ་ཅིང་། ཚེ་འདི་ལ་མངོན་པར་རྫོགས་པར་སངས་རྒྱས་པ་ཡིན། དབང་པོ་ཡང་རབ་གཅིག་ཆར་བ་རྣམས་ནི། །འདུས་བྱས་འདུས་མ་བྱས་པ་བདེ་བ་ཆེན་པོ། རྒྱུ་འབྲས། རྒྱུ་རྐྱེན་གང་ལ་ཡང་མ་རྟེན་པར་ཕྱག་རྒྱ་ཆེན་པོའི་དོན་སྐད་ཅིག་གིས་མཐོང་ཞིང་། འགྲོ་བ་མང་པོ་ལ་དོན་བྱེད་པ་དང་། སེམས་ཅན་གྱི་དོན་གྱི་ཕྱིར། ལུས་དང་སྲོག་དང་དབང་པོ་དང་། དོན་སྙིང་ལ་སོགས་པ་ཐམས་ཅད་སྦྱིན་པར་གཏོང་ཞིང་། སྐད་ཅིག་མ་གཅིག་ཀྱང་སེམས་ཅན་གྱི་དོན་མ་རྟོགས་པ་མི་བྱེད་ཅིང་། སྙིང་རྗེ་བྱམས་པ་བྱང་ཆུབ་ཀྱི་སེམས་རྒྱུན་མ་ཆད་པར་བསྒོམ་ཞིང་དབང་པོ་ལྔ་ཡང་གཅིག་ཆར་བའི་ལྟ་བའོ། །དེ་མ་ཡིན་པ་ནི་སེམས་ཅན་ཐམས་ཅད་དགེ་བ་བསྒྲུབ་ཅིང་སྡིག་པ་སྤོང་། སེམས་ཅན་ཐམས་ཅད་ལ་བཟོད་པ་བསྒོམ། ཚུལ་ཁྲིམས་བསྲུངས་བ་ལ་སོགས་པ་ཐམས་ཅད་ནི་ཀུན་རྫོབ་ཙམ་དུ་ནི་བདེན་པ། མཐོ་རིས་མི་དང་ལྷའི་གོ་འཕངས་ཐོབ་ཅིང་། རིམས་ཀྱིས་རྒྱུད་ནས་སངས་རྒྱས་སོ། །གཅིག་ཆར་བ་དང་རིམས་ཀྱིས་པ་ལ་སོགས་པ་ཐམས་ཅད་ཀྱི་སྣང་ངོར་ཉི་མ་གྲིབ་མ་ལྟ་བུར་འབྱུང་ཞིང་། ཡོད་པ་ཐམས་ཅད་ནི་སེམས་ཅན་ཐམས་ཅད་ཀྱི་སྣང་ངོར་གཅིག་ཅར་རིམས་ཀྱིས་པ་གཉིས་སུ་འབྱུང་ཞིང་། རང་གིས་རང་ངོ་མ་ཤེས་པ་འདྲ་བའི་དཔེ་བཞིན་དུ་གཅིག་ཆར་བ་དང་རིམ་གྱིས་པ་ལ་སོགས་སུ་ངོས་བཟུང་བས་སེམས་ཅན་ཁམས་གསུམ་འཁོར་བ་ན་འཁྱམ་པ་ཡིན། དེ་རྣམས་གང་དང་གང་མེད་པ། །རྣལ་འབྱོར་རང་བྱུང་རྡོ་རྗེ་ཡིས། །ཉམས་ལ་ཤར་བའི་ལྟ་བ་འདི། །ཐམས་ཅད་ཀུན་གྱིས་མཁྱེན་མཛོད། །ཕྱག་རྒྱ་ཆེན་པོ་སྐད་པ་དེ། །རིག་དང་མ་རིག་གཉིས་དང་ནི། དོན་དམ་ཀུན་རྫོབ་གཉིས་དང་ནི། ཐམས་ཅད་ཀུན་ཀྱང་མ་ཡིན་ཞིང་། སྣང་བ་ཐམས་ཅད་དགག་སྒྲུབ་བྲལ། །འཛིན་དང་མི་འཛིན་རང་སར་གྲོལ། །གྲོལ་བས་སྟོང་ཉིད་མཉམ་པའི་ངང་། །ནམ་མཁའ་ལྟ་བུ་ཆོས་ཀྱི་སྐུ། གསལ་དང་འཛིན་ལ་རྙོག་པ་མེད། །སྣང་སྟོང་དབྱེར་མེད་དམ་ཆོས་འདིས། སེམས་ཅན་ཀུན་གྱིས་གོ་བར་མཛོད། །ཡང་འགྲོ་བ་རིགས་དྲུག་བར་དོ་དང་བཅས་པ་ཐམས་ཅད་འཁྲུལ་དང་མ་འཁྲུལ་པའི་སྣང་བ་ཐམས་ཅད་བདེན་མེད་དུ་ཤེས་པའི་གདམ་ངག་འདི་ཤེས་པར་མཛོད། །ཕྱག་རྒྱ་ཆེན་པོ་ཞེས་བྱ་བ་འདི་ནི་མིང་ཙམ་དུ་གྲུབ་ལ། མངོན་སུམ་དུ་མ་གྲུབ་ཅིང་། སྣང་བ་འདི་དགག་བསྒྲུབ་ཐམས་ཅད་དང་བྲལ་བ། འཛིན་པ་མེད་པ་ངོ་བོ་མཚན་ཉིད་ཐམས་ཅད་ནི་མ་གྲུབ་ཅིང་། བདེ་བ་དང་སྡུག་བསྔལ་གང་ཡང་མ་གྲུབ་པའི་གདམས་ངག་འདི་ཀུན་གྱིས་ཤེས་པར་མཛོད། བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག ལུག་ལོ་ཟླ་བ་བཞི་པའི་ཚེས་ལྔ་ལ་མཚུར་ཕུར་སྦྱར་བའོ། །ཨོཾ་སརྦ་སྭ་སྟི་སིདྷི་ཧཱུཾ། རྡོ་རྗེ་འཆང་ལ་གསོལ་བ་འདེབས། །ས་ར་ཧ་ཡིས་བྱིན་གྱིས་བརླབས། །རྣལ་འབྱོར་རང་བྱུང་རྡོ་རྗེ་ནི། །འགྲོ་དྲུག་སེམས་ཅན་ཐམས་ཅད་ཀྱི། །སྣང་ངོར་སྤྲུལ་པའི་སྐུ་ཉིད་དུ། །བྱུང་ཞིང་ཀུན་གྱི་ཕྱག་ཆེན་གྱི། །དོན་ཉིད་རྟོགས་པར་བྱེད་པ་ཡིན། །འགྲོ་དྲུག་སེམས་ཅན་ཐམས་ཅད་ཀྱང་། ཀུན་ཀྱང་རྣམ་རྟོག་བཅོམ་ནས་ནི། །ཞི་བ་ཆེན་པོ་ཡེ་ཤེས་ཀྱི། །ཏིང་འཛིན་གཅིག་ཏུ་གསན་པར་ཞུ། །ཕྱག་རྒྱ་ཆེན་པོ་སྐད་པ་དེ། །འདུས་བྱས་འདུས་མ་བྱས་པ་ཡི། །དངོས་པོ་རྣམ་རྟོག་སྟོང་པ་ཉིད། ཐམས་ཅད་མ་ཡིན་མ་གྲུབ་པ། །ཅིག་ཆར་བའི་འདོད་ལུགས་ཡིན། །ཏེ་ལོ་ཆེན་པོའི་ཞལ་སྔ་ནས། །ཞལ་ནས་དོན་ཆེན་གསུངས་པ་ཡི། །ངོ་བོའི་མཚན་ཉིད་འདི་ལྟར་གསུངས། །ཕྱག་རྒྱ་ཆེན་པོ་བསྟན་དུ་མེད་ཀྱིས་ཀྱང་། དཔེར་ན་ནམ་མཁའ་གང་ལ་གང་གིས་བསྟེན། །དེ་བཞིན་རང་སེམས་ཕྱག་རྒྱ་ཆེ་ལ་བརྟེན་ཡུལ་མེད། །མ་བཅོས་གཉུག་མའི་ངང་ལ་གློད་ལ་ཞོག །ཅེས་གསུངས་པ་དང་། སྔགས་སུ་སྨྲ་དང་ཕ་རོལ་ཕྱིན་པ་དང་། འདུལ་བ་མདོ་སྡེ་མངོན་པ་ལ་སོགས་པ། །རང་རང་གཞུང་དང་གྲུབ་པའི་མཐའ་ཡིས་ནི། །འོད་གསལ་ཕྱག་རྒྱ་ཆེན་པོ་མཐོང་མི་འགྱུར། །ཞེ་འདོད་བྱུང་བས་འོད་གསལ་མཐོང་བས་སྒྲིབས། །ཞེས་གསུངས་པ་ལ་སོགས་པ་ཡང་དོན་འདི་ལ་དགོངས་པའོ། །ཡང་ཕྱག་རྒྱ་ཆེན་པོ་ཞེས་བྱ་བ་མཚན་ཉིད་འགགས་པ་མེད་པ་དང་། ངོ་བོ་ཀུན་ལ་ཁྱབ་པ་སྟེ། བདེན་དང་རྫུན་པ་གང་མེད་པ། །གཉིས་མེད་རྣམ་གྲོལ་ཆོས་ཀྱི་སྐུ། འགག་མེད་འཛིན་མེད་ངང་ལ་ཞོག །ཐམས་ཅད་རིག་པ་སྟོང་གསལ་དུ། རྟོགས་པར་གྱིས་ཅིག་སེམས་ཅན་རྣམས། །དེ་ཡང་སེམས་ཉིད་འོད་གསལ་བ་ཞེས་བྱ་བ་འདི། ཀུན་རྫོབ་དོན་དམ་མ་གྲུབ་ཅིང་། སྣང་བ་ཐམས་ཅད་མ་གྲུབ་པ། སེམས་ཉིད་གཅིག་པུའི་ངང་ལ་ཞོག །དེ་ཡང་རྗེ་བཙུན་ན་རོ་པའི། ཞལ་ནས་གདམ་ངག་འདི་སྐད་གསུངས། །སྣང་ཞིང་སྲིད་པའི་ཆོས་འདི་རྣམས། །རང་གི་སེམས་ལས་གུད་ན་མེད། །ཞེས་གསུངས་པ་དང་། གཞན་ཡང་ཕྱག་ན་རྡོ་རྗེའི། །གསང་རྒྱུད་ལེའུ་བཅུ་པ་ནས། འདི་སྐད་གསུངས་ཞིང་འདི་སྐད་དུ། །སེམས་ཉིད་རིག་པ་སྟོང་གསལ་དུ། རྟོགས་ན་རྡོ་རྗེ་གཏུམ་པོ་འགྲུབ། །ཞེས་ཀྱང་གསུངས་པ་ཡིན་པའོ། །དེ་ལྟར་དུའང་མ་རྟོགས་ན། སེམས་ཉིད་རང་བཞིན་སྣང་བ་འདི། བློ་ཡིས་བཅོས་སུ་མི་འདོད་དེ། རང་གི་སེམས་ཉིད་རྟོགས་ལས་བྱུང་། དེ་ཡང་བྲམ་ཟེ་ཆེན་པོ་ཡི། ཞལ་ནས་སྙན་རྒྱུད་འདི་སྐད་གསུངས། སེམས་ཉིད་གཅིག་པུ་ཀུན་གྱི་ས་བོན་ཏེ། གང་ལ་སྲིད་དང་མྱ་ངན་འདས་འཕྲོ་བ། འདོད་པའི་འབྲས་བུ་ཐམས་ཅད་སྟེར་མཛད་པའི། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་གསུངས་པ་དང་། གཞན་ཡང་བྲམ་ཟེ་ཆེན་པོའི་ཞལ་ནས། འཁོར་འདས་ཀུན་གྱི་རྩ་བ་རང་གི་སེམས་ཡིན་ཏེ། རྟོགས་ནས་བསྒོམ་དུ་མེད་པས་མ་བཅོས་ལྷུག་པར་ཞོག །རང་ལ་བཞག་ནས་གཞན་དུ་འཚོལ་བ་ཨ་རེ་འཁྲུལ། འདི་ཡིན་འདི་མིན་མེད་དེ་ཐམས་ཅད་གཉུག་མའི་ངང་། ཞེས་གསུངས་སོ། །དེའི་དོན་གྱིས་ན་ཕྱག་རྒྱ་ཆེན་པོ་ཞེས་བྱ་བ་ནི་རྩ་བ་རང་གི་སེམས་ལ་རག་ལས་པ་ཡིན་ནོ། །ཡང་དེ་ལྟར་ན་ཕྱག་རྒྱ་ཆེན་པོ་ཞེས་བྱ་བ་ཡང་། འཁོར་བ་སྣང་སེམས་རྒྱུ་འབྲས་དང་། ལམ་དང་འབྲས་བུ་གཞི་སོགས་རྣམས། །ཐམས་ཅད་མ་གྲུབ་གྲུབ་པ་རྣམས། །སངས་རྒྱས་དང་ནི་སེམས་ཅན་དང་། །འཁོར་བ་མྱང་ངན་འདས་པ་རྣམས། །སེམས་ཀྱི་བྱེ་བྲག་ཡིན་པར་གསུངས། །སེམས་ཉིད་སངས་རྒྱས་ཡིན་པ་སྟེ། སེམས་ཉིད་ཉིད་ཀྱང་སེམས་ལས་བྱུང་། །སངས་རྒྱས་ཉིད་ཀྱང་སེམས་ལས་བྱུང་། །དེ་ཡང་དགྱེས་པ་རྡོ་རྗེ་ལས། །སེམས་ཅན་ཐམས་ཅད་སངས་རྒྱས་ཉིད། །འོན་ཀྱང་གློ་བུར་དྲི་མས་སྒྲིབས། །དེ་ཉིད་བསལ་ན་སངས་རྒྱས་ཉིད། །ཞེས་ནི་གསུངས་པའི་དོན་ཉིད་དོ། །གོ་བར་གྱིས་ཞིག་སེམས་ཅན་རྣམས། །ཡང་ནི་སེམས་ཅན་ཀུན་ཉིད་ལ། །འཁྲུལ་པ་དུག་ལྔ་ཡོད་པ་ཡིན། །དེ་ཕྱིར་སེམས་ཀྱང་ཡོད་པ་ཡིན། །དེ་དང་ཕྱག་རྒྱ་ཆེན་པོ་ཉིད། །དུས་མཚུངས་ཡིན་པར་རྒྱལ་བས་གསུངས། །དེ་ཕྱིར་སེམས་ཅན་ཐམས་ཅད་ཉིད། །རང་གི་སྔོན་གྱི་ལས་འཕྲོ་དང་། བླ་མ་ཉིད་ཀྱི་ལུང་བསྟན་དང་། སངས་རྒྱས་རྣམས་ཀྱི་དམ་ཆོས་ཀྱིས། །འབྲེལ་ནས་སངས་རྒྱས་ཐོབ་པར་བཤད། །རིམས་ཀྱིས་པ་ཡི་བཞེད་ལུགས་ཡིན། དེ་ལྟར་སེམས་ཅན་ཐམས་ཅད་ཀྱང་། །བསོད་ནམས་ཚོགས་དང་ཡེ་ཤེས་ཚོགས། །གཉིས་ཉིད་དུས་མཚུངས་བསགས་ནས་ཀྱང་། །ཀུན་ཀྱང་རིམ་གྱིས་སངས་རྒྱས་ཤོག བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ལུག་ལོ་ཟླ་བ་བཞི་པའི་ཚེས་བཅུ་ལའོ། །ཨོཾ་སརྦ་སྭ་སྟི་སིདྷི་ཧཱུཾ། མཚུར་ཕུ་དགོན་པ་འདི་ཉིད་མེ་ཏོག་བཞིན་དུ་མཛེས། །མེ་ཏོག་ནང་ན་ལྷ་ཚོགས་རྣམས་ནི་རྨ་བྱའི་མདོངས་བཞིན་མཛེས། །མཛེས་པའི་ནང་ནས་འོད་ཟེར་ཕྱོགས་བཅུར་འཕྲོ། །ཤཱཀྱ་ཐུབ་པའི་སྐུ་ལ་ཕྱག་འཚལ་ལོ། །མ་ཎི་འབྲུག་སྒྲ་བསྒྲོགས་ཕྱིར་བཀྲ་ཤིས་བྱེད། །དགོན་པ་རྣམས་ཀྱི་མགོ་ནི་མཚུར་ཕུ་ཡིན། །ཆུ་མིག་བརྒྱ་རྩའི་མགོ་བཞིན་མཛེས་པ་ཡིན། །ཤཱཀྱ་ཐུབ་པའི་གསུང་ལ་ཕྱག་འཚལ་ལོ། །གང་ཞིག་སེམས་ཅན་འགྲོ་དོན་བྱེད་པའི་དཔལ། སངས་རྒྱས་ཀུན་གྱི་གཙོ་བོར་གྱུར་པ་ཡིན། །ཤཱཀྱ་ཐུབ་པའི་ཐུགས་ལ་ཕྱག་འཚལ་ལོ། །འགྲོ་དྲུག་སེམས་ཅན་མ་ལུས་པ། །སྐུ་གསུང་ཐུགས་སུ་བྱིན་གྱིས་བརླབ་དུ་གསོལ། བཀྲ་ཤིས་དཔལ་འབར་རབ་འབར་མི་ནུབ་རྒྱལ་མཚན་བཞིན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། མཉམ་ཉིད་དབྱིངས་ཀྱི་དཀྱིལ་འཁོར་ནས། བདག་གཞན་དགོས་འདོད་འབྱུང་བ་ཡི། །མཉམ་མེད་བླ་མེད་སྤྲོས་པ་ཡི། །མཐའ་བྲལ་གཉུག་མ་དོན་གྱི་ངང་། སྟོང་ཉིད་གསལ་བ་ནམ་མཁའི་དབྱིངས། །དགག་བྱ་དགག་བྱེད་བྲལ་བ་ཡི། །རང་བྱུང་ཡེ་ཤེས་མངོན་དུ་གྱུར། །མཐའ་བྲལ་ཆོས་སྐུའི་ངང་ཉིད་ལས། །བསྒོམ་བྱ་བསྒོམ་བྱེད་མེད་པ་ཡི། །རྟོགས་པ་རབ་འབྱམས་མཐའ་ཡས་པ། །འཁོར་བའི་བློ་ཡི་ཁྱད་པར་ལས། །མ་བྱུང་ཡེ་ནས་རྫོགས་པ་ཡི། །རབ་འབྱམས་ངོ་བོ་ཕྱག་ཆེན་ཉིད། །མ་རྟོགས་ཡང་དག་རྟོགས་པའི་ངང་། དོན་དམ་དབྱིངས་ཀྱི་དཀྱིལ་འཁོར་ནས། །མ་བྱུང་རང་བྱུང་ཡེ་ཤེས་རྫོགས། །ཀུན་གཞི་འཁོར་བར་སྒྲིབ་མི་ནུས། །མ་རིག་ལོག་པའི་ཕུང་པོ་འཇོམས། །ཡེ་ཤེས་དོན་གྱི་རྣལ་འབྱོར་གྱིས། །མ་རིག་འཁྲུལ་པ་འཇོམས་པ་ཡི། །རང་བཞིན་ཡེ་ཤེས་ནམ་མཁའི་དབྱིངས། །རྟོགས་པ་རབ་འབྱམས་མཐའ་ཡས་པ། །རང་བྱུང་ཡེ་ཤེས་ཐུགས་ལ་གསལ། །འགྲོ་བའི་དོན་ལ་སྒྲིབ་པ་མེད། །བླ་མེད་སྙིང་པོ་དམ་པའི་མཆོག འགྲོ་དྲུག་སེམས་ཅན་ཐམས་ཅད་ཀྱི། །རྒྱུད་ལ་ཡེ་ཤེས་ཐོབ་པར་ཤོག །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། སྤྲོས་དང་བྲལ་བའི་མཐའ་ཉིད་ནི། །མ་རྟོགས་རྒྱུ་དང་རྟོགས་པའི་རྒྱུ། །སེམས་ཅན་དངོས་པོ་མ་ཡིན་པ། །གང་ཡང་མཐའ་བྲལ་ཡོད་པ་མིན། །དེ་ལྟར་ཀུན་གྱིས་གོ་བར་མཛོད། །མཐའ་བྲལ་ཆོས་སྐུའི་ངང་ཉིད་ལས། བརྩོན་འགྲུས་དཀར་པོའི་ས་བོན་རྣམས། །རིམ་གྱིས་བསགས་ནས་ཆེན་པོར་སྤེལ། དེ་བཞིན་ནག་པོའི་ས་བོན་རྣམས། །ཇི་ལྟར་བྱ་སྒྲོ་མེ་སྲེགས་བཞིན། ཇེ་ཆུང་ཇེ་ཆུང་ཉམས་པར་གྱིས། །གཉིས་མེད་མཐའ་དང་བྲལ་བ་ཡི། །ཕྱག་རྒྱ་ཆེན་པོ་རྟོགས་པར་གྱིས། །མཐའ་དབུས་མེད་པའི་ངང་ལ་ཞོག །དེ་ལྟར་ཀུན་གྱིས་གོ་བར་མཛོད། །ཨོཾ་སརྦ་སྭ་སྟི་སིདྷི་ཧཱུཾ། ཆོས་ཀྱི་རྗེ་རང་བྱུང་རྡོ་རྗེ་ལ། བསྒོམ་ཆེན་གྲགས་པ་རིན་ཆེན་གྱིས་ལྟ་བ་ཡང་དག་པ་དེ་ཇི་ལགས་ཅེས་ཞུས་པས། བླ་མ་རིན་པོ་ཆེའི་ཞལ་ནས། ལྟ་བ་ཞེས་བྱ་བ་ངོ་བོ་ལ་མུ་དང་མཐའ་དང་རྟག་པ་དང་ཆད་པ་དང་། གཟུང་བ་དང་འཛིན་པའི་ཡུལ་མེད་པར་གསུངས་པ་ཡིན་ཏེ། དེ་ཡང་ཏེ་ལོ་པའི་ཞལ་ནས། མུ་མཐའ་ཡོངས་གྲོལ་ལྟ་བའི་རྒྱལ་པོ་མཆོག །ཞེས་གསུངས་པས་ན། དེ་ལྟ་བུ་ལ་དཔེ་ཙམ་དུ་འཇོག་པ་ཡིན་ཏེ། དེ་ཡང་ཡང་དག་པའི་ལྟ་བ་དེ་ཉིད་ནི་ལྟ་བ་དང་ལྟ་བྱེད་ལ་སོགས་པ་གང་ཡང་ཡོད་པ་མ་ཡིན་ཏེ། རྗེ་བཙུན་མི་ལའི་ཞལ་ནས། ལྟ་བ་ལྟ་བྱའི་ཡུལ་དང་བྲལ། ལྟ་རྒྱུ་བྱུང་ན་གོལ་བ་ཡིན། ཞེས་གསུངས་པའི་ཕྱིར་ན། ལྟ་བ་ཞེས་བྱ་བ་མིང་ཙམ་མ་རྟོགས་པ་དོན་ལ་ལྟ་བ་ཞེས་བྱ་བ་ཡོད་པ་མ་གསུང་ཡང་ཞུས་པ། མཉམ་པར་བཞག་པ་དང་མ་བཞག་པ་ལ་ཁྱད་པར་ཡོད་དམ་མེད། ཞུས་པས། བླ་མ་རིན་པོ་ཆེའི་ཞལ་ནས། རྟོགས་པ་དེ་མཐར་ཕྱིན་པའི་དུས་སུ། དྲན་པས་ཡང་ཡང་ཟིན་དགོས་པ་ཡིན་ཏེ། དེ་ཡང་དྭགས་པོ་ལྷ་རྗེའི་ཞལ་ནས། མ་ཡེངས་རྒྱུན་གྱི་དྲན་པ་དེ། དུས་གསུམ་སངས་རྒྱས་གཞུང་ལམ་ཡིན། ཞེས་གསུངས། རྟོགས་པ་དེ་མཐར་ཕྱིན་ན་གཅིག་ཤེས་པ་ཀུན་གྲོལ་བ་ཡིན་ཏེ། དེ་ཡང་རིན་པོ་ཆེའི་ཞལ་ནས། གཅིག་ཤེས་ཀུན་གྲོལ་མཁྱེན་པ་ཡོད། ཅེས་གསུངས་སོ། །ཡང་རྟོགས་པ་དེ་ཉིད་མཐར་ཕྱིན་པའི་དུས་སུ། དྲན་པ་དེ་ཡེ་ཤེས་ཡིན་ནམ་མིན་ཞུས་པས། བླ་མ་རིན་པོ་ཆེའི་ཞལ་ནས། སེམས་ཉིད་དེ་རྟོགས་པའི་དུས་སུ་རྣམ་རྟོག་གང་བྱུང་ཡང་ཡེ་ཤེས་ཀྱི་ཆོ་འཕྲུལ་ཡིན་པས་བཀག་མི་དགོས་ཤིང་། བཀག་པས་ཀྱང་མི་ཁེགས་ཏེ། ཁེགས་ན་སེམས་ཉིད་རྒྱུན་ཆགས་སུ་འགྱུར་ཞིང་། རྟག་པར་ལྟ་བའི་སར་གོལ་བའི་སྐྱོན་ཡོད། དེ་ཡང་ཏེ་ལོ་པའི་ཞལ་ནས། བློའི་ཆོས་ཀྱིས་བློ་འདས་དོན་མ་མཐོང་། བྱས་པའི་ཆོས་ཀྱིས་བྱར་མེད་དོན་མ་རྟོགས། །ཞེས་བྱ་བ་དང་འགལ་བའི་སྐྱོན་ཡོད་གསུང་རྣམ་རྟོག་དེ་ཉིད་བཀག་ན་བྱས་པའི་ཆོས་ཡིན་ཞིང་། མ་བཀག་ན་རང་བཞིན་གྱི་ཕྱག་རྒྱ་ཆེན་པོ་ཡིན། དེ་ཡང་བྲམ་ཟེ་ཆེན་པོའི་ཞལ་ནས། འཁོར་འདས་ཀུན་གྱི་རྩ་བ་རང་གི་སེམས་ཡིན་ཏེ། རྟོགས་ན་བསྒོམ་དུ་མེད་པས་མ་བཅོས་ལྷུག་པར་ཞོག །རང་ལ་བཞག་ནས་གཞན་དུ་འཚོལ་བ་ཨ་རེ་འཁྲུལ། འདི་ཡིན་འདི་མིན་མེད་དོ་གཉུག་མའི་ངང་། ཞེས་གསུངས་སོ། །ཡང་ཏེ་ལོ་པའི་ཞལ་ནས། ནམ་མཁའི་དཀྱིལ་ལྟས་མཐོང་བ་འགག་པར་འགྱུར། དེ་བཞིན་རང་གི་སེམས་ལ་ལྟ་བྱས་ན། །རྣམ་རྟོག་ཚོགས་འགག་བླ་མེད་བྱང་ཆུབ་འཐོབ། ཞེས་གསུངས་པས་རྟོག་པ་བཀག་པས་ཁེགས་ཞེས་བྱ་བ་དང་། བཀག་དགོས་ཞེས་བྱ་བ་མ་གསུངས་པ་ཡིན་པས་ན། བསྒོམ་ཆེན་པ་ཀུན་གྱིས་གོ་བར་མཛོད་གསུང་། ཡང་སྤྱོད་པ་ཞེས་བྱ་བའི་དོན་ཅི་ལགས་ཞུས་པས། བླ་མ་རིན་པོ་ཆེའི་ཞལ་ནས། སྤྱོད་པ་ཞེས་བྱ་བ་གཉིས་ཡིན། དོན་དམ་པའི་སྤྱོད་པ་དང་། ཀུན་རྫོབ་ཀྱི་སྤྱོད་པ་དང་། དེ་ལ་ཀུན་རྫོབ་གྱིས་སྤྱོད་པ་ནི། བྱ་བ་དང་། བྱ་བའི་ཡུལ་དང་། བྱེད་པ་པོ་དང་། རྩོལ་བ་དང་། བསྒྲུབ་པ་དང་། དེ་རྣམས་གང་ཡང་མི་བྱེད་ཅིང་། ཉམས་ལ་ཤར་བ་དེ་ཉིད་མི་འགོག་པ་དེ་ཉིད་སྤྱོད་པ་ཡིན་པར་གསུངས་ཏེ། དེ་ཡང་ཏེ་ལོ་པའི་ཞལ་ནས། བྱ་རྩོལ་མེད་ན་སྤྱོད་པའི་རྒྱལ་པོ་ཡིན། གསུང་། དོན་དམ་པའི་སྤྱོད་པ་ནི་སེམས་ཉིད་རྣལ་མའི་དོན་དེ་ཉིད་ཀྱི་ངང་ལ་སྤྱོད་པ་ཞེས་བྱ་བ་ཡིན་གསུངས། ཡང་འབྲས་བུ་ཡང་དག་པ་བྱ་བ་ཅི་ལ་ཟེར་བ་ལགས་ཞུས་པས། བླ་མ་རིན་པོ་ཆེའི་ཞལ་ནས། འབྲས་བུ་ཞེས་བྱ་བ་འདི། ལྟ་བ་དང་། བསྒོམ་པ་དང་། སྤྱོད་པ་གསུམ་ཀའི་མཐའ་དང་བྲལ་བ་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ལ་རེ་བ་དང་ དོགས་པ ་གང་ཡང་མེད་པའི་འབྲས་བུའི་མཆོག་ཡིན་ཏེ། དེ་ཡང་ཏེ་ལོ་པའི་ཞལ་ནས། རེ་དོགས་མེད་ན་འབྲས་བུ་མངོན་དུ་གྱུར། ཞེས་གསུངས་སོ། །དེ་ལྟར་འབྲས་བུ་རིམས་ཀྱིས་བསླབ་དགོས་ཏེ། དེ་ཡང་ཏེ་ལོ་པའི་ཞལ་ནས། ལས་ནི་དང་པོ་ཅོང་རོང་ཆུ་དང་འདྲ། བར་དུ་ཆུ་བོ་གང་ག་དལ་གྱི་གཡོ། ཐ་མ་ཆུ་རྣམས་མ་བུ་ཕྲད་པ་འདྲ། །ཞེས་པ་དང་མཚུངས་པ་བཞིན་དུ། དང་པོ་མ་བསློབས་ན་འབྲས་བུ་མི་འབྱུང་། རིམ་གྱིས་བསློབ་པའི་ཐབས་ཇི་ལྟར་དུ་སློབ་ན། ཐེག་པ་ཆུ་ངུ་ནས་ཆེན་པོའི་བར་དུ་རིམ་གྱིས་སློབ་དགོས་ཏེ། དེ་ཡང་ཐེག་པ་ཆེན་པོ་དེ་མངོན་དུ་གྱུར་ན་འབྲས་བུ་མངོན་དུ་གྱུར་པའོ། །ཞེས་གསུངས་སོ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། དཔལ་ཀུན་ཏུ་བཟང་པོ་རྡོ་རྗེ་འཆང་དང་ཐ་དད་མེད་པ་སྟོན་པ་སངས་རྒྱས་བཅོམ་ལྡན་འདས་ལ་ཕྱག་འཚལ་ལོ། །འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་རྩ་བ་རང་གི་སེམས་སུ་འདུས་པར་གསུངས་ཏེ། དེ་ཡང་བྲམ་ཟེ་ཆེན་པོའི་ཞལ་ནས་ཀྱང་། སེམས་ཉིད་གཅིག་པུ་ཀུན་གྱི་ས་བོན་ཏེ། གང་ལ་སྲིད་དང་མྱ་ངན་འདས་འཕྲོ་བ། །འདོད་པའི་འབྲས་བུ་ཐམས་ཅད་སྟེར་མཛད་པ། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་གསུངས་པ་ཡང་རྩ་བ་རང་གི་སེམས་སུ་འདུས་པ་སྟེ། འཁོར་བ་ཡང་སེམས་ལས་བྱུང་ཞིང་མྱ་ངན་ལས་འདས་པ་ཡང་སེམས་ལ་བྱུང་བའི་དོན་ནོ། །དེ་ལྟར་ཡང་སེམས་ཉིད་ཅེས་བྱ་བ་ཡང་། སྟོང་ཞིང་འོད་གསལ་བ། འདུས་མ་བྱས་པ། ལྷུན་གྱིས་གྲུབ་པ་སྟེ། སྐུ་གསུམ་སྐུ་བཞི་སྐུ་ལྔ་དེ་རྣམས་ཐམས་ཅད་ཡོངས་སུ་རྫོགས་པ་སྟེ། དེ་ལྟ་བུའི་དོན་དེ་ཉིད་རྟོགས་ན་སངས་རྒྱས། །མ་རྟོགས་ན་འགྲོ་བ་རིགས་དྲུག་སྟེ། རྟོགས་མ་རྟོགས་གཉིས་ཀྱི་སོ་འཚམས་ན། ཉི་མ་དང་གྲི་མའི་སོ་འཚམས་ལག་པའི་ལྟོ་རྒྱབ་ཙམ་ཡང་མེད་པ་ཡིན་ཏེ། དེ་སེམས་ཅན་རྣམས་ཀྱིས་མ་རྟོགས་ཤིང་འཁོར་བར་འཁྱམས་པ་ཡིན་ནོ། །རྟོགས་པར་བྱེད་པའི་ཐབས་ལ་ནི་བླ་མ་བྱིན་བརླབ་དང་ལྡན་པ་དང་རང་གི་དད་པའི་སྟོབས་ཀྱིས་ཕྱག་རྒྱ་ཆེན་པོ་རྟོགས་པའོ། །དབང་པོ་ཡང་རབ་གཅིག་ཆར་བའི་ལུགས་ཀྱིས་རྒྱུ་རྐྱེན་རྒྱུ་འབྲས་གང་ལ་ཡང་མ་རྟེན་པར་སྐད་ཅིག་ཙམ་གྱི་རྟོགས་པའོ། །རང་ཉིད་ཀྱིས་དེ་ལྟར་རྟོགས་ཀྱང་སེམས་ཅན་གདུལ་བྱ་མཐའ་དག་གི་སྣང་ངོར་གང་ལ་གང་འདུལ་གྱི་ཚུལ་གྱིས་འགྲོ་བའི་དོན་བྱེད་དགོས་པ་ཡིན་ཏེ། དེ་ལྟ་བུ་འབྱུང་བ་ལ་བསྒོམ་དགོས་པ་ཡིན་པས། གདུལ་བྱ་ཐམས་ཅད་ཀྱིས་བསྒོམས་ཤིང་ཕྱག་རྒྱ་ཆེན་པོ་ལ་མཉམ་པར་ཞོག་དང་འགྲོ་བའི་དོན་དཔག་ཏུ་མེད་པ་འབྱུང་ཞིང་། མཐོང་ཐོས་དྲན་རེག་ཐམས་ཅད་འཁོར་བ་ལས་སྒྲོལ་ནུས་པ་ཡིན་པའི་ཕྱིར་ན་ཀུན་གྱི་ཕྱག་རྒྱ་ཆེ ན་པོ་བསྒོམས་ཤིང་། ཐམས་ཅད་ལ་སྟོན་ཅིག་ཤོད་ཅིག མཚུར་ཕུར་ལུག་ལོ་ལ་བཀོད་པ་བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། འགྲོ་དྲུག་སེམས་ཅན་རྣམས་ལ་ཐུགས་རྗེས་འགྲོ་དོན་མཛད། །བླ་མེད་བྱང་ཆུབ་ཐོབ་མཛད་ཐུགས་རྗེ་ཅན་ལ་བསྟོད། འཁོར་བ་དང་མྱང་ངན་ལས་འདས་པའི་ཆོས་ངོ་བོ་གདོད་མ་ནས་མ་གྲུབ་པ། མཚན་ཉིད་འགགས་པ་མེད་པ། ངོ་བོ་སྟོང་པ། རང་བཞིན་གསལ་བ། དབྱིངས་ཀུན་ལ་ཁྱབ་བོ། །རང་སེམས་ཐུགས་རྗེ་ཆེན་པོ་དང་ཐ་དད་མེད་པ་སྟེ། དེའི་ཕྱིར་ན་ཀུན་གྱིས་ཐུགས་རྗེ་ཆེན་པོ་ལ་གསོལ་བ་ཐོབ། མོས་གུས་གྱིས་ཅིག དེ་ལྟར་བྱས་ན་དམྱལ་བར་མི་ལྟུང་འགྲོ་བའི་དོན་དཔག་ཏུ་མེད་པ་འབྱུང་ཞིང་སངས་རྒྱས་ཐོབ་པར་འགྱུར་བའོ། །དེའི་ཕྱིར་ན་ཐམས་ཅད་ཀྱིས་ཐུགས་རྗེ་ཆེན་པོ་བསྒོམས་ཤིག །མ་ཎི་པདྨེ་བགྲོངས་ཤིག །དེ་ལྟར་ཀུན་གྱིས་ཉམས་སུ་ལོང་ཤིག །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། དཔལ་རྡོ་རྗེ་འཆང་ལ་ཕྱག་འཚལ་ལོ། །སྤྱིར་ཆོས་ཐམས་ཅད་ནི་སོ་སོ་མ་ཡིན་ཞིང་གཅིག་ཡིན་པའི་ཕྱིར་ན། གང་ཟག་སོ་སོའི་སེམས་རྒྱུད་ལ་རྟོགས་ཚུལ་གྱིས་སྣང་བ་མང་པོ་ཐ་དད་དུ་བྱུང་བ་སྟེ། དེ་ལྟར་ཡིན་ཀྱང་ཆོས་ལ་འཇུག་པའི་ཚུལ་ནི་ཐེག་པ་ཆུང་ངུ་ནས་རིམ་གྱིས་འཇུག་དགོས་པ་ཡིན། ཉམས་སུ་ལེན་པ་ནི་རང་གི་རྩ་བའི་བླ་མས་གསུངས་པ་དང་། ཐེག་པ་ཆེན་པོའི་ཆོས་ཉམས་སུ་ལེན་དགོས་པ་ཡིན། ཐམས་ཅད་ཀྱི་འབྲས་བུ་ནི་སྐྱེ་འགག་གནས་གསུམ་དང་བྲལ་བའི་སེམས་ཉིད་འོད་གསལ་བ་དེ་ལ་འདུས་པ་ཡིན། ཆོས་བྱེད་པའི་སྐལ་བ་སེམས་ཅན་ཀུན་ལ་ཡོད་པར་གསུངས་ཏེ། དེ་ཡང་རྒྱུད་ཀྱི་ནང་ནས། སེམས་ཡོད་པས་ནི་དེ་རྟོགས་ཤིང་། །སེམས་མེད་པས་ནི་དེ་མི་རྟོགས། ཞེས་གསུངས་པའི་ཕྱིར་ན་སེམས་ཡོད་ཚད་ལུས་ཡོད་ཚད། སྣ་ཁུང་ནས་དབུགས་རྒྱུ་ཚད། ཉོན་མོངས་པ་དུག་ལྔ་ཡོད་ཚད་ཀྱིས་འོད་གསལ་ཕྱག་རྒྱ་ཆེན་པོ་དེ་ཉིད་རྟོགས་པ་ཡིན་པས་ན། དེ་ལྟར་དུ་ཤེས་པར་གྱིས་ཤིག །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། བཅོམ་ལྡན་འདས་ཐུགས་རྗེ་ཆེན་པོ་ལ་ཕྱག་འཚལ་ལོ། །འཁོར་དང་མྱ་ངན་འདས་པ་ཡི། །ཆོས་རྣམས་མ་ལུས་མཐར་ཕྱིན་ཅིང་། སྙིགས་མའི་དུས་སུ་འགྲོ་བའི་མགོན། ཆོས་ཀྱི་རྗེ་ལ་གསོལ་བ་འདེབས། །དུས་གསུམ་རྒྱལ་བ་ཐམས་ཅད་ཀྱི། །དགོངས་པའི་མཐར་ཐུག་ཕྱག་རྒྱ་ཆེ། །སྙིང་པོ་དོན་གྱི་སེམས་ཉིད་དེ། མ་རྟོགས་རྒྱུ་དང་རྟོགས་པའི་རྒྱུ། །ཐམས་ཅད་བྱེད་ཅིང་འཁོར་བ་ཡི། གནས་དང་དེ་བཞིན་བདེན་པའི་གནས། །ཐམས་ཅད་ཀུན་ཀྱང་སེམས་ཉིད་དེ། །སེམས་ཉིད་དེ་ཉིད་ནམ་མཁའི་དབྱིངས། །སྟོང་གསལ་འོད་གསལ་མཐའ་དབུས་མེད། །སྤྲོས་དང་བྲལ་བ་ཕྱག་རྒྱ་ཆེ། སྙིང་པོ་དོན་གྱི་ཕྱག་རྒྱ་ཆེ། །འགྲོ་བ་ཀུན་གྱི་སེམས་ཉིད་ལ། །དེ་ཉིད་ཡེ་ནས་གནས་མོད་ཀྱང་། །འཕྲལ་སྣང་རྐྱེན་གྱི་བག་ཆགས་ཀྱིས། །སྒྲིབས་ཤིང་མ་རྟོགས་རྒྱུ་ཉིད་བྱེད། །དེའང་ཀྱེའི་རྡོ་རྗེ་ལས། སེམས་ཅན་ཐམས་ཅད་སངས་རྒྱས་ཏེ། །འོན་ཀྱང་བློ་བུར་དྲི་མས་བསྒྲིབས། །དེ་བསལ་ན་ནི་སངས་རྒྱས་ཉིད། །སྟོན་པ་ཉིད་ཀྱིས་དེ་སྐད་གསུངས། །འཁོར་དང་མྱ་ངན་འདས་པ་ཡི། །དོན་རྣམས་མ་ལུས་ཐམས་ཅད་ཀྱང་། རྩ་བ་རང་གི་སེམས་ཉིད་དེ། །འཁོར་འདས་གཉིས་མེད་ཕྱག་ཆེན་ཉིད། །འགྲོ་དྲུག་སེམས་ཅན་ཐམས་ཅད་ཀྱི། །རྒྱུད་ལ་དེ་ཉིད་ཐོབ་པར་ཤོག །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །སྤྲེའུ་ཡི་ལོ་ལ་མཚུར་ཕུར་གསུངས། ཨོཾ་སརྦ་སྭ་སྟི་སིདྷི་ཧཱུཾ། བཅོམ་ལྡན་འདས་ཤཱཀྱ་ཐུབ་པ་ལ་ཕྱག་འཚལ་ལོ། །འགྲོ་བ་རིགས་དྲུག་བར་དོ་དང་བཅས་པ་ཐམས་ཅད་ནི་འཁྲུལ་ཞིང་རང་གི་སེམས་ཉིད་ངོ་མ་ཤེས་ཤིང་། བདེ་བ་དང་སྡུག་བསྔལ་བ་དང་། འཁོར་བ་དང་མྱ་ངན་ལས་འདས་པ་ཐམས་ཅད་བྱུང་ཞིང་འཁྲུལ་པ་ཡིན་ཀྱང་དེ་ལས་གྲོལ་བར་བྱེད་པའི་ཐབས། བཅོམ་ལྡན་འདས་དེ་བཞིན་གཤེགས་པ་ཉིད་ཀྱི་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་། ཉོན་མོངས་པ་བརྒྱད་ཁྲི་བཞི་སྟོང་གི་གཉེན་པོར་གསུངས་ཤིང་། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ཀྱང་རྩ་བ་སྟོང་པ་ཉིད་དུ་གཏན་ལ་ཕབ་ཏེ། ཐམས་ཅད་སྟོང་པ་ཉིད་ཀྱི་ངང་ལ་ཞོག་ཅིག །བཅོམ་ལྡན་འདས་དེ་བཞིན་གཤེགས་པ་ཉིད་དང་། བཅོམ་ལྡན་འདས་ཇོ་བོ་ཐུགས་རྗེ་ཆེན་པོ་ཉིད་ལ་གསོལ་བ་ཐོབ་ཅིག །མོས་གུས་གྱིས་དང་། བྱིན་བརླབས་བསམ་གྱིས་མི་ཁྱབ་པ་འབྱུང་ཞིང་། འོག་མིན་གྱི་གནས་བདེ་བ་ཅན་དུ་སྐྱེ་བར་འགྱུར་རོ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། །།མཚུར་ཕུར་གསུངས། །

ཨོཾ་སརྦ་སྭ་སྟི་སིདྷི་ཧཱུཾ། ཀུན་ཏུ་བཟང་པོ་ལ་གསོལ་བ་འདེབས། །རྡོ་རྗེ་འཆང་ལ་སྐྱབས་སུ་མཆི། ས་ར་ཧ་ཡིས་བྱིན་གྱིས་བརློབས། སྔགས་འཆང་རང་བྱུང་རྡོ་རྗེ་ནི། ཆོས་རྣམས་མ་ལུས་ཐམས་ཅད་ཀྱང་། དེ་ཉིད་ཡེ་ཤེས་མཐར་ཕྱིན་ཅིང་། རྟོགས་པའི་ཡེ་ཤེས་མངོན་དུ་གྱུར། །བསྒོམ་བྱ་བསྒོམ་བྱེད་མེད་པ་ཡི། །རང་བྱུང་ཡེ་ཤེས་མཐར་ཕྱིན་ཅིང་། །བདེ་ཆེན་ནམ་མཁའི་ངོ་བོ་ཉིད། །མཐའ་བྲལ་ཆོས་སྐུའི་ནམ་མཁའི་དབྱིངས། །ཟག་པ་མེད་པ་སྤྲོས་དང་བྲལ། །བདེ་ཆེན་ཡེ་ཤེས་མཐའ་དབུས་མེད། །ནམ་མཁའ་ལྟ་བུར་སྤྲོས་དང་བྲལ། །འཁོར་དང་མྱ་ངན་འདས་མེད་ཅིང་། སངས་རྒྱས་སེམས་ཅན་གཉིས་མེད་དེ། འགྲོ་དྲུག་བར་དོ་ཀུན་ཀྱང་མེད། །འཁོར་དང་མྱ་ངན་འདས་པ་ཡི། །དམ་ཆོས་མ་ལུས་ཐམས་ཅད་ཀུན། །རྩ་བ་རང་གི་སེམས་ཉིད་དེ། །ཐམས་ཅད་ཕྱག་རྒྱ་ཆེན་པོའི་ངང་། །ཡིན་པར་ཀུན་གྱིས་མཁྱེན་པར་མཛོད། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །མཚུར་ཕུར་གསུངས། ཨོཾ་སརྦ་སྭ་སྟི་སིདྷི་ཧཱུྃ། བླ་མ་རྣམས་ལ་ཕྱག་འཚལ་ལོ། །རྣམ་པར་རྟོག་པ་གང་དུ་ཡང་མི་འཕྲོ་བ་དེ་ཞི་གནས་ཀྱང་ཡིན་ལ། ཉམས་ཀྱི་ཆ་ཡང་ཡིན། དེ་རྒྱུན་དུ་གནས་ན་ཕྱི་སྣང་བའི་ཡུལ་གྱི་རྣམ་རྟོག་མཚོན་བྱ་མཚོན་བྱེད་གང་ལ་ཡང་ཆགས་པ་དང་ཞེན་པའི་རྣམ་པར་རྟོག་པ་མེད་ཅིང་། རྒྱ་མཚོ་གཏིང་གི་ཆུ་ལྟ་བུར་མི་གཡོ་བ་དེ་ཉམས་ཡིན་པས་དེ་ལ་སྦྱངས་ཤིང་མཐར་ཕྱིན་ན་ལྷག་མཐོང་འབྱུང་བ་ཡིན། །དང་པོ་བར་སྐབས་སུ་གནས་པ་ལ་ཆགས་པ་དང་། ཞེན་པ་གང་ཡང་མི་བྱ། ཆགས་ཞེན་བྱས་ན་འགག་པའི་རྒྱུ་ཡིན། དེའི་ཕྱིར་ན་ན་ཚ་ལ་སོགས་པ་གང་བྱུང་ཡང་། ན་ཚར་འཛིན་པ་དེ་ལ་ལྟས་ནས་མཉམ་པར་བཞག་པས་རང་གྲོལ་ལ་འགྲོ་བ་ཡིན། དེ་ལྟར་དུ་ཤེས་པར་བྱའོ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག མཚུར་ཕུར་གསུངས་སོ། །ཨོཾ་སརྦ་སྭ་སྟི་སིདྷི་ཧཱུཾ། རྣམ་འབྱོར་རང་བྱུང་རྡོ་རྗེ་ཡིས། །ཀུན་བྱེད་རྒྱལ་པོ་དེ་ཉིད་ནི། །འདི་ལྟར་བུ་རུ་གདམས་པའོ། །སེམས་ཅན་རྣམས་ནི་སངས་རྒྱས་ཏེ། །འོན་ཀྱང་བློ་བུར་དྲི་མས་སྒྲིབས། དེ་བསལ་ནས་ནི་ཀུན་གྱི་དཔལ། །ཨེ་མ་ངོ་མཚར་མི་ཆེའམ། །འགྲོ་དྲུག་སེམས་ཅན་ཐམས་ཅད་ཀྱང་། །འདི་ལྟའི་དོན་འདི་མ་རྟོགས་པར། །མཁས་པར་འདོད་པ་ཨ་རེ་མཚར། །འདི་འདྲའི་དོན་ཞིག་རྟོགས་པར་མཛོད། བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །མཚུར་ཕུར་གསུངས་སོ། །ཨོཾ་སརྦ་སྭ་སྟི་སིདྷི་ཧཱུྃ། སེམས་དཔའ་རང་བྱུང་རྡོ་རྗེ་ཡིས། །གདུལ་བྱར་གྱུར་པའི་བུ་སློབ་རྣམས་ལ་གདམས་པ། །རྒྱ་གར་དང་འཛམ་བུའི་གླིང་ཐམས་ཅད་ན་གྲུབ་ཆེན་གནས་ཐམས་ཅད་དང་། དཔལ་འཁོར་ལོ་སྡོམ་པ་ནས་གསུངས་པའི་གནས་ཉི་ཤུ་རྩ་བཞི་ཐམས་ཅད་ཀྱི་གཙོ་བོར་གྱུར་པ་ཙ་རི་ཏྲ་ཡེ་ཤེས་ཀྱི་འཁོར་ལོ་ཡིན་པ་སྟེ། དེ་ཡང་གསང་བ་རིན་པོ་ཆེ་བདུད་རྩིའི་བུམ་པའི་རྒྱུད་ལས། ཉི་ཤུ་རྩ་བཞིའི་ཡུལ་རྣམས་ཀྱི་གཙོ་བོ་འཇམ་དཔལ་གཤིན་རྗེ་གཤེད་ཀྱིས་བཞེད་པའི་ས། གནས་བརྒྱད་དུར་ཁྲོད་ཆེན་པོ་རྔམ་པའི་མགོ །མཆོག་དང་ཐུན་མོང་དངོས་གྲུབ་ཐམས་ཅད་ཀྱང་སྟེར་ཞིང་མཁའ་འགྲོས་བྱིན་བརླབས་པའི་ས། ཞེས་གསུངས་པའི་ཕྱིར་ན་ཙ་རི་ཏྲ་ཡེ་ཤེས་ཀྱི་འཁོར་ལོར་ཞག་གཅིག་ཕྱག་རྒྱ་ཆེན་པོ་བསྒོམས་པ་དང་། གཞན་དག་ཏུ་ལོ་གཅིག་བསྒོམས་པ་གཉིས་ཀྱང་ཙ་རི་ཏྲར་ཞག་གཅིག་བསྒོམས་པ་ཡོན་ཏན་ཆེ་བ་ཡིན་པའི་ཕྱིར། འགྲོ་འདོད་པ་ཐམས་ཅད་ཙ་རིར་སོང་དང་མཆོག་དང་ཐུན་མོང་གི་དངོས་གྲུབ་ཐམས་ཅད་ཚེ་འདི་ཉིད་ལ་ཐོབ་ནས་སེམས་ཅན་གྱི་དོན་འབྱུང་ཞིང་མཁའ་འགྲོ་དང་ཆོས་སྐྱོང་ཐམས་ཅད་ཀྱིས་སྡོང་གྲོགས་བྱེད་པ་ཡིན་པའི་ཕྱིར་ན། ཙ་རིར་ཕྱིན་པ་ཐམས་ཅད་ཀྱིས་ཀྱང་། ཐ་མར་གྱུར་ནའང་ལོ་དྲུག་དང་བདུན་ལ་སོགས་པ་བསྒོམ་ཞིང་རླུང་སེམས་ཀྱི་འཁོར་ལོ་བསྐོར་ཞིང་མོས་གུས་བསམ་གྱིས་མི་ཁྱབ་པ་གྱིས་ཤིག་དང་། ཡོན་ཏན་དང་རྟོགས་པ་བྲམ་ཟེ་ཆེན་པོ་དང་མཉམ་པར་འགྲོ་བ་རྣམས་ཀྱི་དཔལ་མགོན་དང་བསོད་ནམས་བསགས་པའི་ཞིང་དམ་པར་འགྱུར་བ་སྟེ། དེའི་ཕྱིར་ན་ཙ་རི་ཏྲ་ཡེ་ཤེས་འཁོར་ལོར་འགྲོ་འདོད་པ་ཐམས་ཅད་དེར་སོང་ཞིང་བསྒོམས་དང་ཙ་རིའི་ཕྱོགས་སུ་བསྒོམ་པ་ལ་སེམས་ནས་གོམས་པ་བདུན་བོར་ནས་ཤི་བར་གྱུར་ནའང་ངན་སོང་དུ་མི་ལྷུང་ཞིང་སྣང་བ་མཐའ་ཡས་ཀྱི་ཞིང་དུ་སྐྱེ་བར་འགྱུར་རོ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །མཚུར་ཕུར་གསུངས། ཨོཾ་སརྦ་སྭ་སྟི་སིདྷི་ཧཱུཾ། བཅོམ་ལྡན་འདས་རྒྱལ་བ་ཤཱཀྱ་ཐུབ་པ་ལ་ཕྱག་འཚལ་ལོ། །སེམས་ཅན་ཉོན་མོང་པའི་རང་བཞིན་ཅན་རྣམས་ལ་བྱིན་གྱིས་བརླབས་དུ་གསོལ། བདེ་གཤེགས་སངས་རྒྱས་ཐམས་ཅད་དང་། །དུས་གསུམ་རྒྱལ་བ་ཐམས་ཅད་ཀྱི། སྙིགས་མའི་དུས་ཀྱི་གདུལ་བཀའ་བ། །མ་དག་པ་ཡི་སེམས་ཅན་ཀུན། མཁྱེན་པའི་སྤྱན་གྱི་གཟིགས་སུ་གསོལ། །འཁོར་དང་མྱ་ངན་འདས་པ་ཡིས། །དམ་ཆོས་བསམ་གྱིས་མི་ཁྱབ་པ། །ཐམས་ཅད་ཀུན་ཀྱང་སེམས་ཉིད་དེ། །ཟབ་མོ་སྤྲོས་དང་བྲལ་བའི་དོན། །མཐའ་བྲལ་ཕྱག་རྒྱ་ཆེན་པོ་ཉིད། ཁམས་གསུམ་སེམས་ཅན་ཐམས་ཅད་ཀྱི། རྒྱུད་ལ་དེ་ཉིད་གནས་མོད་ཀྱང་། །གློ་བུར་དྲི་མས་སྒྲིབ་པ་ཡི། །མ་རྟོགས་རྒྱུ་དང་རྟོགས་པའི་རྒྱུ། །གཉིས་ཀ་བྱེད་ཅིང་འཛིན་པར་ཞེན། །དེ་ལས་གྲོལ་བར་བྱེད་པའི་ཐབས། །བརྒྱད་ཁྲི་བཞི་སྟོང་གསུངས་པ་ཡང་། །བག་ཆགས་དྲི་མ་སེལ་བའི་དོན། །དོན་དེ་མཐའ་རུ་འདོན་འདོད་ན། །རང་སེམས་རྩ་བ་བཅད་ནས་ཀྱང་། །རྟོགས་པའི་དྲི་མ་དངས་སུ་ཆུག །དེས་ན་དོན་མཆོག་ཐོབ་པར་ངེས། །དོན་ནི་ཕྱག་རྒྱ་ཆེན་པོའི་དོན། །ཕྱག་ཆེན་དོན་ལ་འགྱུར་མེད་སེམས་ཉིད་ཕྱག་རྒྱ་ཆེ། །ཕྱག་ཆེན་དོན་དེ་རྟོགས་པར་གྱིས། །དོན་དེ་རྟོགས་ནས་གོམས་པར་གྱིས། །གོམས་ཤིང་འདྲིས་ན་འགྲོ་དོན་འབྱུང་། །འགྲོ་དྲུག་ཀུན་གྱི་དཔལ་དུ་ཤར། སེམས་ཅན་ཆོས་བསྐལ་དེ་ལ་མཛོད། བཀྲ་ཤིས་དཔལ་འབར་ཐུགས་རྗེ་ཆེ་འབར་ན། འཛམ་གླིང་རྒྱན་མཆོག་རྒྱལ་བ་ཉིད་དུ་ཤོག །ཨོཾ་སརྦ་སྭ་སྟི་སིདྷི་ཧཱུྃ། སྙིགས་མའི་དུས་སུ་ཐུགས་རྗེའི་བདག །སྤྱན་རས་གཟིགས་ཀྱི་འགྲོ་དོན་མཛད། དེ་རྗེས་འཇུག་པའི་སྐལ་ལྡན་རྣམས། ཀུན་ཀྱང་ཐུགས་རྗེ་ཆེན་པོ་བསྒོམ། །སངས་རྒྱས་འབྱུང་བར་ཐེ་ཚོམ་མེད། །འགྲོ་དང་ཉལ་དང་ཟ་བ་དང་། །ན་དང་རྒས་དང་སྡུག་བསྔལ་སོགས། །གང་རུང་དུས་རྣམས་ཀུན་དུ་ཡང་། །ཐུགས་རྗེའི་བདག་པོ་དྲན་པར་གྱིས། བྱིན་གྱིས་བརློབ་པར་ཐེ་ཚོམ་མེད། །དུས་གསུམ་བདེ་གཤེགས་ཐམས་ཅད་ཀྱི། །ཐུགས་རྗེའི་མངག་བདག་སྤྱན་རས་གཟིགས། །ནམ་མཁའི་ཁམས་ཀྱི་མཐས་ཁྱབ་པར། སྤྲུལ་དང་ཡང་སྤྲུལ་བསམ་མི་ཁྱབ། ཁམས་གསུམ་སེམས་ཅན་ཐམས་ཅད་ལ། །འཁོར་བ་མ་སྟོངས་བར་དུ་ནི། །སེམས་ཅན་འདྲེན་པར་ཞལ་བཞེས་པ། །ཐུགས་རྗེའི་བདག་པོ་ཁྱེད་ཡིན་པས། །ཁམས་གསུམ་སེམས་ཅན་ཐམས་ཅད་ལ། །བདེ་བའི་གནས་སུ་དྲངས་དུ་གསོལ། འགྲོ་དྲུག་སེམས་ཅན་ཐམས་ཅད་ཀྱང་། སྤྱན་རས་གཟིགས་ལ་གསོལ་བ་ཐོབ། །ཐུགས་རྗེས་གཟིགས་པར་ཐེ་ཚོམ་མེད། །དེ་ལྟར་ཀུན་གྱིས་མཁྱེན་པར་མཛོད། བཀྲ་ཤིས་དཔལ་འབར་བདེ་ཆེན་ཡེ་ཤེས་འཛམ་གླིང་རྒྱན་མཆོག་རྒྱལ་བ་ཉིད་དུ་ཤོག །སྤྲེའུ་ལོའི་ཆོ་འཕྲུལ་ཆེན་པོའི་ཚེས་ལྔ་ལ་བཀྲ་ཤིས་གསར་མར་བཀོད་པའོ། །ཨོཾ་སརྦ་སྭ་སྟི་སིདྷི་ཧཱུཾ། འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །སྤྱན་རས་གཟིགས་ཀྱི་འོད་ཟེར་གྱིས། །སེམས་ཅན་ཀུན་ལ་ཁྱབ་པ་སྟེ། །ནམ་མཁའི་ཁམས་ཀྱི་མཐས་ཁྱབ་པའི། རིགས་དྲུག་བར་དོར་བཅས་པ་རྣམས། །ཐུགས་རྗེའི་མངའ་བདག་སྤྱན་རས་གཟིགས། །ཀུན་ཀྱང་བྱིན་གྱིས་བརླབ་དུ་གསོལ། །ཁོ་བོ་རང་བྱུང་རྡོ་རྗེ་དང་། །མཐོང་ཐོས་དྲན་རེག་འགྲོ་བ་ཀུན། བཟང་དང་ངན་འབྲེལ་གང་ཡོད་པ། །སྣང་བ་མཐའ་ཡས་ཞིང་ཁམས་སུ། །སྤྱན་རས་གཟིགས་ཀྱི་འོད་ཟེར་གྱིས། །བདེ་བའི་གནས་སུ་འདྲེན་པ་ཡིན། །ཐམས་ཅད་ཀུན་ཀྱང་དགའ་བ་བསྒོམས། །དེ་ལྟར་ཀུན་གྱིས་ཤེས་པར་མཛོད། བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། བཅོམ་ལྡན་འདས་ཐུགས་རྗེ་ཆེན་པོ་ལ་ཕྱག་འཚལ་ལོ། །སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོའི་རྒྱུད་ལས། འོད་ཟེར་འགྲོ་དྲུག་བར་དོ་དང་བཅས་པའི་གྲངས་དང་མཉམ་པར་རྣམ་པར་འཕྲུལ་ཞིང་། སེམས་ཅན་རེ་རེའི་རྩ་ན་ཡང་ཐུགས་རྗེ་ཆེན་པོ་རེ་རེ་བཞུགས། །དགོས་སུ་ཡང་སེམས་ཅན་ཐུགས་རྗེ་ཆེན་པོ་ལ་མོས་པ་རྣམས་ཀྱི་རྩ་ན་སྤྲུལ་པའམ་དངོས་ཀྱི་ཚུལ་གྱིས་བཞུགས་པ་ཡིན་ཀྱང་། སྣང་བ་མ་དག་ཅིང་འཁྲུལ་པས་ངོ་མ་ཤེས་པས་ཏེ། དེ་ལྟར་དུ་ངོ་མ་ཤེས་ཀྱང་དད་པ་ཡོད་པ་ཙམ་གྱིས་ཐམས་ཅད་འདྲེན་ནུས་པ་ཡིན་ཞིང་བྱིན་གྱིས་བརློབ་པའོ། །དེའི་ཕྱིར་ན་ཐམས་ཅད་ཀུན་གྱི་ཐུགས་རྗེ་ཆེན་པོ་བསྒོམ་ཞིང་མ་ཎི་པདྨེེ་གྲོངས་དང་ཚེ་འདི་དང་ཨ་ཅང་ཆེ་སྟེ། ཚེ་ཕྱི་མ་ལ་ཡང་ནད་དང་གནོད་པ་དང་རྐྱེན་ངན་ཞི་བྱེད་བྱིན་གྱིས་བརློབས་པའོ། །དེའི་ཕྱིར་ན་ཐམས་ཅད་ཀྱི་སེམས་རྒྱུད་ལ་ཐུགས་རྗེ་ཆེན་པོའི་འོད་ཟེར་བཀྱེ་ཞིང་བྱིན་གྱི་བརླབས་ནས། དགྲ་དང་བགེགས་དང་གནོད་པ་གང་ཡང་མི་འབྱུང་ཞིང་། འབྱུང་པོ་མི་དང་མི་མ་ཡིན་པའི་ཚོགས་ཐམས་ཅད་ཀྱི་སེམས་རྒྱུད་ལ་ཐུགས་རྗེ་ཆེན་པོའི་འོད་ཟེར་བཀྱེ་ཞིང་ཐམས་ཅད་ཟིལ་གྱིས་གནོན་པའོ། །དེའི་ཕྱིར་ན་སེམས་ཅན་ཐམས་ཅད་ཀྱིས་བླ་མ་ཡི་དམ་མཁའ་འགྲོ་ཆོས་སྐྱོང་གི་ཚོགས་མ་ལུས་པ་ལ་གསོལ་བ་ཐོབ་ཅིག །མོས་གུས་དྲག་དུ་གྱིས། ཐུགས་རྗེ་ཆེན་པོ་ལ་གསོལ་བ་ཐོབ མ་ཎི་གྲོངས་ཐུགས་རྗེ་ཆེན་པོའི་གཟུངས་ཐོན། དེ་ལྟར་བྱས་ན་ཡོན་ཏན་བསམ་གྱིས་མི་ཁྱབ་པ་འབྱུང་ཞིང་། བྱིན་གྱིས་བརློབ་པར་འགྱུར་རོ། །གཞན་ཡང་ཐུགས་རྗེ་ཆེན་པོའི་མདོ་ལས། གང་དག་ཐུགས་རྗེ་ཆེན་པོའི་གཟུངས་དང་སྙིང་པོ་འདོན་པ་དེ་ཡིས་ཆུ་ཀློང་ངམ་རྒྱ་ཚོ་ཆེན་པོར་ཞུགས་ཏེ་ཁྲུས་བྱས་པའི་ཆུ་དེ་དག་སེམས་ཅན་ཆུའི་ནང་ན་གནས་པའི་སེམས་ཅན་གྱི་རིགས་ཀྱི་ལུས་ལ་ཆུ་དེ་དག་ཕོག་པར་གྱུར་ན་སེམས་ཅན་དེ་དག་གི་སྡིག་པ་དང་སྒྲིབ་པ་མ་ལུས་པར་དག་ནས་སྐྱེ་གནས་བཞིའི་ལུས་ངན་མི་ལེན་ཅིང་། རྫུ་འཕྲུལ་གྱིས་འཇིག་རྟེན་གྱི་ཁམས་གཞན་དག་ན་པདྨོ་ལ་རྫུས་ཏེ་སྐྱེ་བར་འགྱུར་རོ། །ཞེས་གསུངས་པའི་ཕྱིར་ན་ཐམས་ཅད་ཀྱིས་ཐུགས་རྗེ་ཆེན་པོ་བསྒོམས་མ་ཎི་པདྨེ་གྲོངས། ཐུགས་རྗེ་ཆེན་པོའི་མདོ་ཟ་མ་ཏོག་བཀོད་པ་ལས། རིགས་ཀྱི་བུ་འདི་ལྟ་སྟེ། རྐང་པ་བཞི་པའི་རིགས་བ་གླང་དང་། མ་ཧེ་དང་། རྟ་དང་། གླང་དང་། རྔ་མོང་དང་། ཁྱི་དང་། འཕར་བ་དང་། སྲམ་དང་། རི་བོང་ལ་སོགས་པ་དེ་དག་ཐམས་ཅད་ཀྱི་སྤུའི་ཚད་བགྲང་བར་ནུས་ཀྱི། ཡིག་གེ་དྲུག་པའི་རིགས་སྔགས་འདི་འདོན་ཅིང་འཛིན་པའི་བསོད་ནམས་ཀྱི་ཕུང་པོའི་ཚད་ནི་བགྲང་བར་མི་ནུས་སོ། །ཞེས་གསུངས་པའི་ཕྱིར་ན། ཐམས་ཅད་ཀྱིས་ཐུགས་རྗེ་ཆེན་པོ་རྒྱལ་བ་རྒྱ་མཚོ་བསྒོམས་ཤིག །མ་ཎི་པདྨེ་གྲོངས་དང་ངན་སོང་གསུམ་ལས་ཐར་ཞིང་བླ་ན་མེད་པའི་བྱང་ཆུབ་ཐོབ་པ་ཕྱིར་ཡིན་པའི་ཕྱིར་ན། ཐམས་ཅད་སེམས་རྩེ་ཅིག་པར་བཅོམ་ལྡན་འདས་རྒྱལ་བ་རྒྱ་མཚོའི་ལྷ་ཚོགས་མ་ལུས་དང་བས་ཕྱག་འཚལ་ཞིང་། སེམས་དང་བས་མཆོད་པ་འབུལ། ངག་དང་བས་སྐྱབས་སུ་མཆི། ཞེས་བརྗོད་ནས་སྐྱབས་འགྲོ་བྱ་ཞིང་མ་ཎི་པདྨེ་འདོན་པར་བྱའོ། །དེ་ལྟར་བགྲངས་པའི་ཕན་ཡོན་ནི། བསམ་གྱི་མི་ཁྱབ་བརྗོད་ཀྱིས་མི་ལང་ཀྱང་། ཐུགས་རྗེ་ཆེན་པོའི་རྒྱུད་སྒོ་དྲུག་པ་ལས། བསོད་ནམས་ཚོགས་གཉིས་ལས་ནི་བྱུང་བའི་སྐུ། །རྒྱལ་བའི་བ་སྤུ་གཅིག་གི་བུ་ག་ཡང་། སྐལ་པ་སྟོང་དུ་ལྟས་ཀྱང་ཆོག་མི་ཤེས། དེ་ལ་མཁས་པ་སུ་ཞིག་དང་མི་འདྲེན། འདོད་ཆགས་ཞེ་སྡང་གཏི་མུག་བཅོམ་གྱུར་པའི། །རྨི་ལམ་ན་ཡང་རྫུན་གྱི་ཚིག་མི་མངའ། །དེ་ལ་སྐྱེ་བུ་སུ་ཞིག་ཡིད་མི་ཆེས། །རྣམ་པར་རྟོག་པ་ཀུན་བཅོམ་དྲི་མ་སྤངས། ཡེ་ཤེས་ཀྱིས་ནི་ཆོས་རྣམས་ཐུགས་སུ་ཆུད། །ཤེས་བྱ་རྒྱ་མཚོ་ལྟ་བུ་མངའ་བརྙེས་པ། སྐྱེ་བུ་དེའི་ཐུགས་ལ་སུ་ཞིག་སྐྱོབ། །འདི་ནི་ཅང་པའི་བསམ་པ་རབ་ལྡན་པ། འབྲི་དང་ཉན་དང་ཡོན་ཏན་འཆད་པ་དང་། །གང་དུ་སྐྱབས་སུ་འགྲོ་བ་བྱེད་པ་ནི། མི་སྐྱོ་ཐེ་ཚོམ་མེད་པར་མྱུར་དུ་འགྲུབ། ཞེས་གསུངས་པ་ཡིན་པའི་ཕྱིར་ན། ཐམས་ཅད་ཀྱིས་ཐུགས་རྗེ་ཆེན་པོ་བསྒོམས་ཤིང་། མ་ཎི་པདྨེ་གྲོངས་དང་། ཚེ་འདི་དང་ཕྱི་མ་བར་དོ་གསུམ་དུ་ཐུགས་རྗེ་ཆེན་པོ་ཉིད་ཀྱིས་འདྲེན་ཞིང་བྱིན་གྱིས་བརློབ་པ་ཡིན་གྱིས། ཐམས་ཅད་ཀྱིས་ཤིན་ཏུ་སྙིང་གི་དཀྱིལ་ན་བསྒོམས་ཤིང་། ངག་ཏུ། ཨོཾ་མ་ཎི་པདྨེ་ཧཱུཾ། ཞེས་བརྗོད་ན་ཡོན་ཏན་བསམ་གྱིས་མི་ཁྱབ་པ་འདི་ལྟ་སྟེ། ཐུགས་ཆེན་པོའི་རྒྱུད་ལས་འདི་སྐད་དུ་རིགས་ཀྱི་བུ་འདི་ལྟ་སྟེ། ཕྱིའི་རྒྱ་མཚོ་ཆེན་པོ་ནི་ཐིགས་པ་རེ་རེ་ནས་བགྲང་བར་ནུས་གྱི། ཡིག་གེ་དྲུག་པའི་གསང་སྔགས་ཆེན་པོ་ལན་གཅིག་བགྲངས་པའི་བསོད་ནམས་ཀྱི་ཕུང་པོའི་ཚད་ནི་བགྲང་བར་མི་ནུས་སོ། །ཞེས་གསུངས་པ་ཡིན་པའི་ཕྱིར། །ད་སྙིགས་མའི་དུས་སུ་ཐུགས་རྗེ་ཆེན་པོ་ཉིད་མ་གཏོགས་པ་སངས་རྒྱས་ཀུན་ཀྱི་ཐུགས་རྗེའི་སྟོབས་ཅི་ཙམ་རྒྱ་ཆེན་པོས་གཟིགས་ཀྱང་། སེམས་ཅན་རྣམས་ཀྱི་ལས་ཟད་ནས། ཐུགས་རྗེ་ཆེན་པོ་ཉིད་མ་གཏོགས་པས་སེམས་ཅན་མི་ཐུལ་ཞིང་བྱིན་གྱིས་བརློབ་མི་ནུས་པ་ཡིན་པའི་ཕྱིར་ན་ཐམས་ཅད་ཀྱིས་བླ་མ་ཡི་དམ་མཁའ་འགྲོའི་ཚོགས་དང་། ཐུགས་རྗེ་ཆེན་པོའི་ལྷ་ཚོགས་ཐམས་ཅད་ལ་དངོས་སམ་ཡིད་ཀྱིས་མཆོད་པ་རྒྱ་ཆེན་པོ་ཕུལ་ཞིང་གསོལ་བ་བཏབ་ན། ཐུགས་རྗེ་ཆེན་པོ་ཉིད་ཀྱི་འདྲེན་ཞིང་བྱིན་གྱིས་བརློབ་པ་ཡིན་པའི་ཕྱིར་ན། ཐུགས་རྗེ་ཆེན་པོ་ལ་དད་པ་མོས་གུས་བསམ་གྱིས་མི་ཁྱབ་པའི་སྒོ་ནས་མ་ཎི་པདྨེ་གྲོངས། ཐུགས་རྗེ་ཆེན་པོ་བསྒོམས། དེ་ལྟར་དུ་ཐམས་ཅད་ཀྱིས་གོ་བར་གྱིས་ཤིག །ཐུགས་རྗེ་ཆེན་པོའི་ཡོན་ཏན་དང་འཕྲིན་ལས་བརྗོད་ན་སྐལ་པའི་བར་དུ་ཡང་བརྗོད་ཀྱིས་མི་ལང་པ་ཡིན་པས་མཁྱེན་པར་མཛོད་ཅིག །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །བླ་མ་རྣམས་ལ་ཕྱག་འཚལ་ལོ། །བྱང་ཆུབ་བསྒྲུབ་པའི་གང་ཟག་གིས། རི་ཁྲོད་དགོན་པར་ཕྱིན་ནས་ཀྱང་། ཐུན་དྲུག་བཅད་ལ་སྲོག་རྩོལ་བསྒོམ། གསང་སྔགས་བཟླས་བརྗོད་བསྒོམ་པ་དང་། ཏིང་འཛིན་གཏོར་མ་ལ་སོགས་དང་། སྡིག་སྦྱངས་བསོད་ནམས་ཚོགས་བསགས་པ། །འདི་དག་ཡོངས་སུ་རྫོགས་པར་བྱ། །ཅི་ཙམ་འདུག་ཀྱང་རི་ཁྲོད་འགྲིམས། །གང་ལྟར་བྱས་ཀྱང་བླ་མ་བསྟེན། །བསྡུས་ན་དེ་ལས་མེད་པའོ། །བླ་མ་རྣམས་ལ་ཕྱག་འཚལ་ལོ། །བདག་འདྲའི་རྣལ་འབྱོར་རི་ཁྲོད་པས། །གདམས་པ་ཅུང་ཞིག་བཀོད་པར་བྱ། །བསྒོམ་ཆེན་རྣམས་ཚོ་སྙན་གསན་འཚལ། །དབེན་ཞིང་ཉམས་དགའི་ས་ཕྱོགས་སུ། །བདག་ཉིད་གཅིག་པུས་ཉམས་སུ་བླང་། །ཅི་ཉན་ཙམ་གྱི་སྤྱིལ་བུ་རུ། །བདག་དྲོས་ཙམ་གྱི་གོས་གྱོན་ཅིང་། །མི་བཀྲེས་ཙམ་གྱི་ཟས་ལ་རྟེན། །དེ་ནས་འདི་ཉིད་རྩམ་པར་བྱ། དེ་ལ་ཉམས་སུ་བླང་བ་འདི་ལ། དང་པོ་ཁོ་ནར་ཆུ་ཤིང་འཛོམ་པའི་རི་ཁྲོད་དུ། རྫས་འཚོགས་པར་བྱས་ལ། མདུན་དུ་བདག་གི་མོས་གུས་ཀྱི་རྟེན་དང་། །དཔེ་ཆ་ཉུང་ཟད་བཞུགས་སུ་བཅུག་ནས། དེ་ནས་དགེ་སྦྱོར་ཐུན་དྲུག་དུ་བཅད་ལ་སྔ་དྲོ་ཁོ་ནར་ལུས་སྦྱོང་རླུང་བཟུང་། དེ་ནས་གྲོ་ཁའི་དུས་སུ་ལུས་སྦྱོང་ཡང་མི་བྱ། བླ་མའི་རྣལ་འབྱོར་གྱི་ངང་ལ་མཉམ་པར་བཞག་ཅིང་སེམས་ཀྱི་ངོ་བོ་ཡེ་གདོད་མ་ནས་གནས་པ་དེའི་ངོ་བོ་ལྟ་ཞིང་ས་ལེ་སང་ངེ་ཧྲིག་གེ་བའི་ངང་ལ་མཉམ་པར་བཞག་ཅིང་དེ་ནས་ཉི་མ་རྒས་གྱི་བར་དུ་ལུས་སྦྱོང་བྱ། རླུང་རྩོལ་ཅི་ནུས་ཀྱི་བར་བྱའོ། །དེ་ནས་སྲོད་ལ་ཡི་དམ་ལྷའི་རྣལ་འབྱོར་དང་། སྔགས་བཟླས་པ་དང་། སྔགས་ཀྱི་གཏོར་མ་ལ་སོགས་པ་བྱའོ། །དེ་ནས་གུང་ལ་འོད་གསལ་སྦྱང་ང་ངོ་། །དེ་ནས་ཐོ་རངས་ཀྱི་དུས་སུ་སྡིག་པ་སྦྱང་བའི་ཡན་ལག་དང་། བསོད་ནམས་ཀྱི་ཚོགས་བསགས་པའི་ཡན་ལག་དང་བླ་མའི་རྣལ་འབྱོར་བསྒོམ་ཞིང་དེ་ཁོ་ན་ཉིད་ཀྱི་ངང་ལ་མཉམ་པར་བཞག་པར་བྱའོ། །དེ་མ་གཏོགས་པ་ཐུན་མཚམས་སུ་གཏོར་མ་ལ་སོགས་པ་བྱའོ། །དེ་ནི་ཐུན་མཚམས་དང་བཅས་པའོ། །ཡང་བླ་མ་རྣམས་ཀྱི་གསུང་བཞིན་དུ་བདག་གིས་གདམས་པ་ཅུང་ཟད་ཅིག་བགྱི་ན། མ་ཤིའི་བར་དུ་རི་ཁྲོད་འགྲིམ། བླ་མ་ལ་སངས་རྒྱས་ཀྱི་འདུ་ཤེས་སྐྱེད། །སྤྱོད་ལམ་རྣམ་བཞི་ཅི་བྱེད་ཀྱང་། ལྷ་དང་བླ་མ་དང་མི་བྲལ་བར་བསྒོམས། གཟུང་དང་འཛིན་པ་ཐམས་ཅད་སྤོངས། དེ་ཁོ་ན་ཉིད་ཀྱི་ངང་ལ་མཉམ་པར་བཞག་གོ །དེ་ལྟ་བུར་ཆོས་ཐམས་ཅད་ཉམས་སུ་བླངས་ན་དེ་ཁོ་ན་ཉིད་ཕྱག་རྒྱ་ཆེན་པོ་རང་གི་རྒྱུད་ལ་སྐྱེ་བ་ཡིན། དེ་ལྟར་ཉམས་སུ་མ་བླངས་ན། ཇི་ལྟར་བྱས་ཀྱང་བྱང་ཆུབ་མི་ཐོབ་པས། ཅི་ནས་ཀྱང་བླ་ན་མེད་པའི་བྱང་ཆུབ་བསྒྲུབ་དགོས་སྙམ་པ་ཅིག་བྱས་རི་ཁྲོད་དགོན་པར་བསྡད་ནས་ཉམས་སུ་ལེན་དགོས་པ་ལགས་སོ། །དེ་ལྟར་དུ་ཐམས་ཅད་ཀྱི་ཉམས་སུ་ལོང་ཅིག །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཨེ་མ་ཧོ་དུས་གསུམ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ངོ་བོ་ཉིད། །ཆོས་སྐུ་རྡོ་རྗེ་འཆང་ཆེན་ལ། གསོལ་བ་འདེབས་སོ་བྱིན་གྱིས་བརློབ། བཀའ་རྒྱུད་བླ་མ་ཐམས་ཅད་ཀྱིས། ཁ་བ་ཅན་ལྗོངས་བྱིན་གྱིས་བརླབས། །གང་ན་འདུག་ཀྱང་བདེ་བ་ཐོབ། །ང་ནི་རང་བྱུང་ཆེན་པོ་སྟེ། །ཅ་ཅོའི་འཛིན་པ་མི་གདའ་འོ། །ཆ་ཤས་འཛིན་པ་གཏན་ནས་གྲོལ། །ཇ་སོགས་བཟའ་བཏུང་ཐམས་ཅད་ཀུན། །ཉ་སོགས་སྦྱིན་པ་བགྱི་ལགས་པས། །ཏ་རེ་ལྟ་བུའི་ཡེ་ཤེས་རྟོགས། །ཐ་དད་འཛིན་པ་མེད་ལགས་པས། །ད་ནི་མཉམ་མེད་ལྟ་བ་རྟོགས། །ནཱ་རོ་པཎ་ཆེན་གྱི་རྗེས་ཞུགས་པས། །པ་མ་བལ་བུའི་ནགས་གསེབ་དུ། །ཕ་རོལ་གྱི་སེམས་རྒྱུད་བསྐུལ་ལམ་སྙམ། །བ་སྤུ་ཡན་ཆོད་ཐམས་ཅད་ཀྱང་། །མ་རིག་ཡེ་ཤེས་ཉིད་དུ་ཤར། །ཙ་རླུང་གི་གདམས་ངག་ཉམས་སུ་ལེན། །ཚ་རེག་རང་བཞིན་ཤུགས་ལ་སྐྱེ། །ཛ་ཧཱུཾ་ཡེ་ཤེས་ཆེན་པོ་ཡིས། །ཝ་བགེགས་ཀྱི་བསམ་རྟོག་ཀུན་དང་བྲལ། ཞ་བོ་ལ་སོགས་སེམས་ཅན་ཀུན། །ཟ་རྒྱུའི་རེ་བས་ཉམས་ཐག་པ། །འ་སྒྲའི་སྡུག་སྐད་དང་བཅས་ལ། །ཡ་རབས་ཀུན་སྦྱིན་བཏོང་བྱ་རེ་རན། །ར་གན་འཁར་བ་ཐམས་ཅད་ལ། །ལ་ལས་སྡིག་པ་བྱས་ནས་ཀྱང་། །ཤ་མར་ལ་འཚོང་བ་འོ་བརྒྱལ། །ས་སྟེངས་ན་དེ་འདྲ་བྱེད་པ་མང་། །ཧ་ཧ་ཤིན་ཏུ་རྒོད་རེ་བྲོ། །ཨ་སྐྱེ་བ་མེད་པའི་དོན་རྟོགས་ཤོག །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །བླ་མ་རྣམས་ལ་སྐྱབས་སུ་མཆི། དཀའ་བ་སྤྱད་པའི་སྐྱེས་བུ་མཆོག །ཁ་བ་ཅན་དུ་སྤྲུལ་པའི་སྐུ། གང་ནས་བལྟས་ཀྱང་སྤྲུལ་པའི་སྐུ། །ང་སོགས་འགྲོ་བ་ཐམས་ཅད་ལ། །བྱིན་གྱིས་བརླབ་པར་མཛད་དུ་གསོལ། །ཅིས་ཀྱང་མི་ཕན་ཆོས་ཅིག་མཛོད། །ཆོས་བྱས་གནད་དུ་བསྣུན་པར་མཛོད། །ཇི་ལྟར་བྱས་ཀྱང་བླ་མ་བསྟེན། ཉམས་མྱོང་བཟང་པོ་སྐྱེས་ཏེ་མཆི། །ཏེ་ལོ་བཟང་པོ་ཇི་བཞིན་དུ། །ཐོགས་བབས་ཕྱག་ཆེན་གདམ་ངག་བསྒོམས། དེ་ནས་བླ་མའི་བྱིན་བརླབས་ཀྱིས། ན་རོ་པཎ་ཆེན་ལྟ་བུ་འབྱུང་། །བས་མཐའ་ལ་སོགས་ནགས་གསེབ་དུ། །ཕ་བླ་མ་མ་ཡེངས་བསྒོམས་བྱས་ནས། །བོད་ཁམས་འདི་ནི་འགྲན་ཟླ་མེད། །མ་རིག་མུན་སེལ་ཆེན་པོར་འགྱུར། །ཙ་རླུང་ཐབས་ལམ་བསྒོམ་ལགས་ན། །ཚ་རེག་རང་བཞིན་ཤུགས་ལས་སྐྱེས། །ཛ་ཧཱུྃ་ཏིང་འཛིན་བསྒོམས་ལགས་ན། ཝ་བགེགས་ལྷ་འདྲེས་གནོད་མི་ཚུགས། །ཞེན་པ་གཏན་ནས་བཟློག་བྱས་ན། །ཟ་རྒྱུ་ཐམས་ཅད་ཤུགས་ལས་འབྱུང་། །འོ་ན་སྐལ་ལྡན་བསྒོམ་ཆེན་རྣམས། །ཡང་ན་བླ་མའི་རྣལ་འབྱོར་བསྒོམ། །རང་བཞིན་མེད་པར་ཤེས་པར་མཛོད། །ལར་ཅིས་ཀྱང་རྩ་རླུང་མ་བསྒོམས་ན། །ཤ་ཆང་ཟོས་ཀྱང་དགོས་པ་ཆུང་། སེམས་ཉིད་གཏན་ལ་ཕོབ་མཛོད་ཅིག །ཧེ་ཧེ་རང་གི་བརྩན་ས་བཟུང་། །ཨ་ཙ་མ་ནི་སེམས་ཅན་རྣམས། །ཆོས་སྐུ་ཉིད་དང་མཚུངས་པར་ཤོག །ཚུལ་འདི་རང་བྱུང་རྡོ་རྗེ་བྱི་བ་ལོ་ཟླ་བ་གསུམ་པའི་ཚེས་བརྒྱད་གྱི་ཉིན་པར་བསྒྲུབ་གནས་དཔལ་གྱི་ཁྱུང་རྫོང་དུ་གསུངས་པའོ། །ཨོཾ་སརྦ་སྭ་སྟི་སིདྷི་ཧཱུཾ། །དུས་གསུམ་སངས་རྒྱས་རྒྱལ་བ་སྲས་དང་བཅས་པ་ཐམས་ཅད་ཀྱིས་བྱིན་གྱིས་བརླབས་ཀྱིས་མིང་ཡོངས་སུ་གྲགས་པ་ཀརྨ་པ་དང་ཐ་དད་མེད་པའི་སེམས་དཔའ་རང་བྱུང་རྡོ་རྗེ་ཡིས། །བསྒོམ་ཞིང་བསྒྲུབ་པ་ལ་གཞོལ་བ་རྣམས་ལ་གདམས་པ། །ཆོས་ཐམས་ཅད་ཀྱི་དེ་ཁོ་ན་ཉིད་སྤྲོས་པའི་མཐའ་ཐམས་ཅད་དང་བྲལ་བ་ཡིན་པས། མི་དམིགས་པའི་ངང་དུ་མཉམ་པར་ཞོག །བསོད་ནམས་ཀྱི་ཚོགས་བསགས་པའི་ཡན་ལག་ཡིན་ཏེ། འདུས་བྱས་ཀྱི་དགེ་བའི་ལས་ཅི་ནུས་ལ་འབུངས། དེ་ལྟར་སློབ་པའི་ལམ་བྱམས་པ་དང་སྙིང་རྗེ་ལ་རྩལ་སྦྱོང་། བླ་མའི་རྣལ་འབྱོར་དང་། བཅོམ་ལྡན་འདས་ཇོ་བོ་ཐུགས་རྗེ་ཆེན་པོ་དུས་རྒྱུན་དུ་བསྒོམ། གཟུགས་མཐོང་བ་ཐམས་ཅད་བཅོམ་ལྡན་ཇོ་བོ་ཐུགས་རྗེ་ཆེན་པོའི་སྐུར་བསྒོམ་ཞིང་ངེས་ཤེས་བསྐྱེད་སྒྲ་ཐོས་པ་ཐམས་ཅད་གསུང་ཡིག་གེ་དྲུག་མ་ཡིན་ཨང་སྙམ་དུ་བསྒོམ་ཞིང་ངེས་ཤེས་སྐྱེ། བདག་གིས་སྤྱོད་ལམ་རྣམས་བཞི་གང་བྱེད་ཀྱང་། བཅོམ་ལྡན་འདས་ཇོ་བོ་ཐུགས་རྗེ་ཆེན་པོ་དང་མ་བྲལ་བར་བསྒོམ་ཞིང་རྩལ་སྦྱངས་ན་ཡོན་ཏན་བསམ་གྱིས་མི་ཁྱབ་པ་འབྱུང་བ་ཡིན་པས། དེ་ཡང་ཐུགས་རྗེ་ཆེན་པོའི་རྒྱུད་ལས། །ཐངས་ཅིག་མོས་པ་བྱས་པས་བརྗོད་པ་ན། སེམས་ཅན་དམྱལ་བའི་ནད་ལས་ཐར། །ཐངས་གཉིས་བརྗོད་ན་ཡི་དྭགས་ཀྱི། །འགྲོ་བའི་སྒོ་ཡང་འགག་པར་བྱེད། །གསུམ་བརྗོད་དུད་འགྲོའི་སྒོ་ཡང་འགག །ཞེས་གསུངས་པ་དང་། གཞན་ཡང་གཟུངས་ལས། འདིའི་ཡོན་ཏན་རྒྱས་བརྗོད་ན། སྐལ་པར་བརྗོད་ཀྱང་བརྗོད་མི་ལང་། ཞེས་གསུངས་པས་ཐུགས་རྗེ་ཆེན་པོ་བསྒོམ། མ་ཎི་པདྨེེ་གྲོངས། དོན་དམ་པར་ཐུགས་རྗེ་ཆེན་པོ་བསྒོམ་ཞེས་བརྗོད་ཀྱང་། སྙིང་རྗེ་ཆེན་པོ་བསྒོམ་པ་ཡིན་པས། འགྲོ་བ་རིགས་དྲུག་བར་དོ་དང་བཅས་པ་ཐམས་ཅད་ལ་སྙིང་རྗེ་ཆེན་པོ་དང་། ཚེ་འདི་ལ་ཡང་བླ་ན་མེད་པའི་བྱང་ཆུབ་ཐོབ་པར་འགྱུར་རོ། །དེ་ལྟར་ཀུན་གྱིས་ཉམས་སུ་ལོང་ཅིག །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག། །བླ་མ་རྣམས་ལ་ཕྱག་འཚལ་ལོ། །རྣལ་འབྱོར་བདག་གི་གདམས་པ་ནི། རྟག་ཏུ་བླ་མའི་རྣལ་འབྱོར་བསྒོམས། ཉིན་མཚན་ཀུན་ཏུ་གསོལ་བ་ཐོབ། །རང་རྒྱུད་གྲོལ་བའི་དངོས་གྲུབ་འབྱུང་། །རྒྱུ་འབྲས་རྣམས་ལ་ངེས་ཤེས་བསྐྱེད། སེམས་ཅན་རྣམས་ལ་སྙིང་རྗེ་བསྒོམས། །རང་དབང་མེད་པའི་རྟོགས་པ་སྐྱེ། །བྱ་ཆའི་ཆོས་ལ་བརྩོན་པར་གྱིས། །དམ་པའི་ཆོས་ལ་ཡིད་ཆེས་བསྐྱེད། །གཟུང་འཛིན་སྤོངས་ལ་རི་ཁྲོད་འགྲིམས། །གདམ་པ་རྣམས་ལ་ཡིད་ཆེས་མཛོད། །བཀའ་ཐུབ་ཉིད་ལ་རྟག་ཏུ་འབད། །གཏུམ་མོའི་གདམ་ངག་བསྒོམ་པར་མཛོད། །དེ་ལྟར་ཀུན་གྱིས་ཉམས་སུ་ལོངས། བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །བླ་མ་དམ་པ་རྣམས་ལ་ཕྱག་འཚལ་ལོ། །རྣལ་འབྱོར་རི་ཁྲོད་པ་བདག་གིས། བསྒོམ་ཆེན་པ་རྣམས་ལ་གྲོས་འདེབས་ཀྱི་གདམས་པ་གཅིག་བགྱིའོ། །དེ་ལ་ད་རེས་མི་ལུས་རིན་པོ་ཆེ་ཐོབ་ཅིང་། སངས་རྒྱས་ཀྱི་བསྟན་པའི་སྒོར་རབ་ཏུ་བྱུང་ནས། སྔོན་དུ་བཤད་པ་དང་། བསྒོམ་པ་དང་ཉན་པའི་ལས་བྱེད་པ་ཐམས་ཅད་ཧྲིལ་གྱིས་དྲིལ་ནས། ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་ཀྱི་སྟེང་དུ་འདུས་སྟེ། ཤེས་རབ་ཀྱི་ཕ་རོལ་དུ་ཕྱིན་པ་ཡང་། བསྒོམ་པ་ཉིད་ཡིན་པས་བསྒོམ་པ་གལ་ཆེ་སྟེ། དེ་ཡང་བསྒོམ་པའི་མཐའ་ཉོན་མོངས་པའི་དབང་དུ་མ་སོང་པ་སེམས་ཅན་ལ་སྙིང་རྗེ་ཆེ་བ་བླ་མ་ལ་དད་པ་ཆེ་བ། བརྩོན་འགྲུས་དང་ཞེ་བཅད་ཆེ་བ། མི་ཆོས་དང་འཇིག་རྟེན་དོན་དུ་མི་གཉེར། ཕྱི་མ་ལ་བསམ་པ་ཡང་དག་པའི་དོན་ལ་མོས་པ། དེ་ལྟ་བུ་གཅིག་གིས་བླ་མའི་གདམས་ངག་ལ་བརྟེན་ནས་རི་ཁྲོད་དབེན་ཞིང་ཉམས་དགའ་བར་ཤེས་རབ་ཀྱི་ཕ་རོལ་དུ་ཕྱིན་པའི་དོན་ཉམས་སུ་བླང་ང་ངོ་། །དེ་ཡང་ཉམས་སུ་ལེན་པ་ཅི་འདྲ་བ་ཅིག་དགོས་ན། འདི་འདྲ་བ་ཅིག་དགོས་ཏེ། དམ་པ་རིན་པོ་ཆེའི་ཞལ་ནས། རྣལ་འབྱོར་པ་བཟང་པོ་བྱ་བ་འཕྲིན་པའི་ལྕེ་ཆོད། བང་ཆེན་པའི་རྐང་པ་ཁྱིགས། ཕྱག་ཚང་བའི་ལག་པ་བཅད། །ཁྱིའི་སྙིང་ཕྱུང་ན་ཟ་བར་མཆི། ཞེས་གསུངས་པ། ངག་སྨྲ་བརྗོད་ཉུང་བ། འགྲོ་བདུག་དང་ཙབ་ཙུབ་མི་མང་པ། ལག་པས་ལས་མི་བྱེད་ཅིང་། གང་ལ་ཡང་གཙང་གཙོག་མི་བྱེད་པ། དེ་ལྟ་བུ་ཅིག་འཚལ། མི་དགེ་བ་ལུས་དང་སྲོག་གི་ཕྱིར་ཡང་མི་བྱེད་པ་ཅིག་འཚལ། བྱམས་པ་སྙིང་རྗེ་ཁང་བཟང་ལ་མེ་ཤོར་བའི་ནང་དུ་ཚུད་ཀྱང་མི་འཆོར་ན་ཅིག་འཚལ། བླ་མ་ལ་དད་པ་ཇི་ལྟར་དུ་གྱུར་ཀྱང་མི་ལྡོག་པ་ཅིག་འཚལ། གོས་དང་ཟས་མེད་ཀྱང་བླ་མའི་གདམ་ངག་གིས་ཆོག་པ་གཅིག་འཚལ། ན་ཚ་དང་སྡུག་བསྔལ་ཅི་བྱུང་རྐྱེན་ངན་གྲོགས་སུ་འགྲོ་བ་ཅིག་འཚལ། ཁམས་གསུམ་གྱི་སེམས་ཅན་ཐམས་ཅད་ལ་ཕ་དང་མར་འདུ་ཤེས་པ་ཅིག་འཚལ་ལོ། །དེ་ལ་ཡང་དམ་པའི་ཞལ་ནས། བོད་ཀྱི་ཆོས་པ་འདི་ཚོ་ལ་རྒོད་བྲོ་གསུང་། དེ་ཙུག་ལགས་ཞུས་པས། ཉམས་སུ་མི་ལེན་པར་འབྲས་བུ་འདོད། བསྒྲུབ་པ་མེད་པར་ཉམས་མྱོང་འདོད། བྱས་པ་མེད་པར་ངོ་སོ་འདོད། །རི་ཕུག་ཏུ་ཟླ་བ་རེ་བསྡད་ཀྱང་མིས་ཐོས་སུ་རེ། འཕྲལ་གྱི་དགེ་སྦྱོར་བག་རེ་བྱས་ཀྱང་གཞན་དགའ་ལ་རེ། གཞན་གྱིས་ཐོས་སུ་རེ། ངས་མི་ལ་ཇི་ལྟར་བྱས་ནས་བསྟན་སྙམ་ནས་བྱེད་པ་དེ་ཆོས་ག་ན་མཆི་གསུང་ང་ངོ་། །ད་དུས་ཀྱི་དབང་དུ་སོང་བས་གཤའ་མར་ཞེ་ཐག་པ་ནས་ཆོས་བྱེད་མཁན་མི་གདའ། ཨ་ཙ་མ་ན། ཡི་རེ་མུག དེང་སང་དུས་ལ་བབ་པའི་སྐབས་འདིར། ཆོས་མི་བྱེད་པའི་བྱེད་ན། ཚུལ་འཆོས་ཀྱི་ཆོས་པ། ཡོན་བདག་ཕོ་མོའི་ངོ་སྲུངས། མི་ཚེ་འདིའི་བྱས་ལོ། ད་ལྟར་གྱི་སོ་ནམ། ཕྱི་མའི་རྒྱགས་ཕྱེ་ཡིན་ནོ་ཟེར་ནས །འདུ་འཛི་དང་འཇིག་རྟེན་སྤངས་པོ་ངན་པ་ལ་མཚམས་བྱེད། བཟང་པོ་ལ་དི་རིང་འདིར་ཡོངས་སམ། སང་ཡང་བྱོན་ཅིག དེ་མིན་ཡང་སྐབས་སུ་བྱོན་ཅིག་ཞེས་ཟེར་བ་དེས་ཆོས་པ་མི་མཆི། ཆོས་གཤའ་མ་ཅིག་བྱེད་ན་བཟང་ངན་རྣམ་རྟོག་ཐམས་ཅད་སྤངས་ནས་གང་གི་ཡང་རྟོག་པ་མེད་ཅིང་ཐམས་ཅད་ལ་ཕྱོགས་ཆ་དང་ཞེ་འཛིན་མེད་པ། འཁོར་བའི་ཆོས་འདི་དག་ཐམས་ཅད་ལ་བདེ་བ་མེད་པར་ཤེས་པ་ཅིག་གིས་བླ་མ་དམ་པའི་གདམས་ངག་བསྒོམ་ཞིང་རླུང་སེམས་གནད་ཀྱི་འཁོར་ལོ་བསྐོར་ན། ཆོས་ཐམས་ཅད་ཀྱི་དེ་ཁོ་ན་ཉིད་སྤྲོས་པའི་མཐའ་ཐམས་ཅད་དང་བྲལ་བ་དེ་ཉིད་རྟོགས་ནས་བླ་ན་མེད་པའི་བྱང་ཆུབ་ཐོབ་པར་འགྱུར་རོ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །ཨོཾ་སརྦ་སྭ་སྟི་སིདྷི་ཧཱུཾ། བཅོམ་ལྡན་འདས་ཇོ་བོ་ཐུགས་རྗེ་ཆེན་པོ་རྒྱལ་བ་རྒྱ་མཚོ་ལ་ཕྱག་འཚལ་ལོ། །ཞི་བའི་ངང་ནས་ཞི་བའི་ངང་ཚུལ་ཅན། གང་གི་མཚུངས་མེད་མགོན་པོ་སྐྱབས་གཅིག་པུ། །བླ་མེད་མགོན་པོ་སྟོན་པ་བཅོམ་ལྡན་འདས། །ཐུགས་རྗེའི་མངའ་བདག་ཆེན་པོ་ཕྱག་འཚལ་ལོ། །མཁྱེན་བརྩེའི་བདག་ཉིད་དམ་པ་ཉིད། གསེར་མདོག་ཅན་ལ་སོགས་པ་ཡི། །སངས་རྒྱས་བྱང་སེམས་ཀུན་ལ་འདུད། །ཀུན་ཏུ་བཟང་དང་རྡོ་རྗེ་འཆང་། །ས་ར་ཧ་དང་བཀའ་བརྒྱུད་རྣམས། །སྙིང་པོ་མ་ནོར་སྟོན་པ་བརྩེ། །སེམས་ཅན་རྗེས་སུ་བཟུང་རེ་རན། སྙིགས་མའི་དུས་མཆོག་འདི་ཉིད་དུ། །རྣམ་པ་ལྔ་དག་འབྱུང་དུས་འདིར། །སངས་རྒྱས་རྣམས་ཀྱང་མི་བཞུགས་ཤིང་། །དམ་ཆོས་རྣམས་ཀྱང་ཟད་པ་ན། །དགེ་འདུན་ཕྱོགས་ནི་ག་ལ་བཞུགས། །དེ་ཕྱིར་སྙིགས་མའི་དུས་འདི་རུ། །སྙིང་པོའི་དོན་མཆོག་མ་ནོར་བ། །སྟོན་པའི་བླ་མ་མི་བཞུགས་ན། །ཀྱེ་མ་སེམས་ཅན་སྡུག་རེ་བསྔལ། །སངས་རྒྱས་རྣམས་ཀྱང་ཐུགས་རྗེ་ཆུང་། །དམ་ཆོས་རྣམས་ཀྱིས་འདྲེན་པ་ཟད། །ཕལ་ཆེར་སྙིགས་མའི་དུས་འདི་རུ། །རྟགས་ཙམ་འཛིན་ཀྱང་ཅུང་ཟད་ཙམ། །ཐེག་པ་ཆེ་ལ་བསྐུར་པ་འདེབས། །ཝ་ཁེངས་སེང་གེའི་ཆ་བྱད་ཅན། །གང་ཡིན་དེ་དག་སྙིང་རེ་རྗེ། །ཀྱེ་མ་ཀྱི་ཧུད་སེམས་ཅན་རྣམས། སྡུག་བསྔལ་ཆུ་ལས་སྒྲོལ་འདོད་ན། །ཐོས་དང་བསམ་པ་སྔོན་སོང་ཅིང་། འཛིན་དང་ཞེན་ཆགས་བྲལ་བྱས་ནས། །བསྒོམ་པ་མེད་པར་གྱུར་པ་དང་། །ཐོས་དང་ཞེན་ཅིང་འཛིན་པ་རྣམས། །ནམ་ཡང་མི་གྲོལ་ཆོས་ཉིད་ཡིན། གསེར་མདོག་ཅན་གྱིས་ཆོས་གསུངས་པ། །གཟུགས་ནས་རྣམ་མཁྱེན་བར་དག་ཏུ། །སྟོང་པ་ཉིད་དུ་གཏན་ལ་ཕབ། །དེ་ལ་མི་བསྒོམ་གོམས་པར་བྱ། །དེ་ཕྱིར་བསྒོམ་པའི་མཚན་ཉིད་དོ། །འགྲོ་མགོན་སྟོན་པ་བཅོམ་ལྡན་འདས། །བླ་མེད་མ་ནོར་སྟོན་པ་ཉིད། །བསམ་དང་བསྒོམ་དང་ཐོས་པ་སོགས། །རང་རང་མ་ནོར་བློ་བཞིན་ཉོན། །ད་ལྟར་སྙིགས་མའི་དུས་འདི་རུ། །དེ་བཞིན་གཤེགས་པ་ལུང་བསྟན་ལྟར། །ཇི་ལྟ་བ་ཡི་ཆ་བྱད་ཅན། །རྣམ་པ་འདི་དག་སྙིང་རེ་རྗེ། །དེ་ལྟར་ཏིང་འཛིན་མདོ་ལས་ཀྱང་། །སྙིགས་མའི་སེམས་ཅན་མ་དག་པ། །སྦྱིན་པའི་སྔགས་པ་བརྗོད་བྱེད་ཅིང་། །སྦྱིན་པ་དོན་དུ་གཉེར་བ་ཉུང་། །ཚུལ་ཁྲིམས་བསྔགས་པ་བརྗོད་བྱེད་ཅིང་། ཚུལ་ཁྲིམས་དོན་དུ་གཉེར་བ་ཉུང་། །བཟོད་པའི་བསྔགས་པ་བརྗོད་བྱེད་ཅིང་། །བཟོད་པ་དོན་དུ་གཉེར་བ་ཉུང་། །བརྩོན་འགྲུས་བསྔགས་པ་བརྗོད་བྱེད་ཅིང་། །བརྩོན་འགྲུས་དོན་དུ་གཉེར་བ་ཉུང་། བསམ་གཏན་བསྔགས་པ་བརྗོད་བྱེད་ཅིང་། བསམ་གཏན་དོན་དུ་གཉེར་བ་ཉུང་། །ཤེས་རབ་བསྔགས་པ་བརྗོད་བྱེད་ཅིང་། །ཤེས་རབ་དོན་དུ་གཉེར་བ་ཉུང་། དེ་ལྟར་མ་ནོར་སྟོན་པ་པོ། །མགོན་པོ་སེམས་ཅན་འདྲེན་རེ་རན། །སྙིགས་མའི་སེམས་ཅན་འདི་དག་ཀུན། །བླ་མེད་སྟོན་པས་དྲང་དུ་གསོལ། །ད་ལྟ་སྙིགས་མའི་དུས་འདི་རུ། །བསྒོམ་ཆེན་པ་དག་བཤད་པ་རེམས། །བཤད་པ་བ་དག་བསྒོམ་ལ་རེམ། །དེ་ལྟར་དམ་ཆོས་འཆོལ་བའི་དུས། །ད་ལྟ་བྱུང་བ་ཨ་ཙ་མ། །སྤྱན་རས་གཟིགས་དབང་ཐུགས་རྗེ་ཅན། །དེ་དང་དབྱེར་མེད་རིན་པོ་ཆེ། སྙིགས་མའི་དུས་འདིར་ཐུགས་རྗེ་ཆུང་། །ཀྱེ་མ་འགྲོ་བ་དྲང་དུ་གསོལ། །འདི་ལྟའི་དུས་ཀྱི་སེམས་ཅན་རྣམས། །མ་དག་པ་ཡི་ཞིང་བཞིན་དུ། །བསྟན་ཀྱང་གོ་བར་མི་འགྱུར་ན། །དེ་བས་བདག་ཉིད་བསྒོམ་པར་རིགས། གང་དག་བསྒོམ་པར་གྱུར་པ་ལ། །གཤེ་བར་གྱུར་པའི་སེམས་ཅན་རྣམས། །མནར་མེད་པ་དང་མི་ཁོམ་བརྒྱད། །འབྱུང་འགྱུར་འདི་ལ་ཐེ་ཚོམ་མེད། །ཇི་ལྟར་གཞན་ལ་བསྐུལ་བ་དག །ཕ་བོང་བྱིས་པས་བྱས་ལྟར་འགྱུར། དེ་བས་བདག་ཉིད་བསྒོམ་པར་རིགས། །ཇི་ལྟར་བདག་ཉིད་བསྒོམ་པ་ལ། །གཞན་གྱི་གེགས་སུ་བྱེད་པ་དག །ལྷ་བྱིན་དེ་ལ་ཐེ་ཚོམ་མེད། །ཇི་ལྟར་སྟོན་པ་བཅོམ་ལྡན་གྱིས། །སྐུ་ལ་བྱ་བར་མ་ནུས་པས། །འགྱུར་མེད་གཅིག་ཏུ་གྱུར་པ་ན། །དེ་ནི་ཤིན་ཏུ་ཨེ་མ་ཧོ། །ཇི་ལྟར་གྱུར་ཞིང་མི་བརྟན་པ། གོང་བུའི་འཆི་བ་ལྟར་གྱུར་ན། །དེ་ནི་རྣམ་བཞི་བཟུང་བར་རིགས། །ཇི་ལྟར་བསྒོམས་པའི་ང་རྒྱལ་གྱིས། །རྒྱགས་ཤིང་དྲེགས་པར་གྱུར་པ་དེ། སྙིགས་མའི་དུས་སུ་གྱུར་པས་ལན། །ཇི་ལྟར་གྱུར་ཀྱང་སྔ་མ་དང་། །མ་ཆགས་མི་འབྲལ་གྱུར་པ་ལེགས། །ཀྱེ་མ་འཁོར་བའི་སེམས་ཅན་རྣམས། །སངས་རྒྱས་རྣམས་ཀྱི་ཐུགས་རྗེ་ཡིས། །སེམས་ཅན་རྣམས་ཀྱང་དྲང་དུ་གསོལ། །འདི་ལྟའི་དུས་ཉིད་བྱུང་བའི་ཚེ། །བླ་མ་རྣམས་ཀྱི་བྱིན་བརླབས་ཀྱིས། །བདག་འདྲ་ཡི་རྣལ་འབྱོར་རི་ཁྲོད་པ། །ཉན་དང་བསམ་པ་མ་བྱུང་ཡང་། གཅིག་ཤེས་ཀུན་གྲོལ་མཁྱེན་པ་རྒྱས། །དེ་བཞིན་གཤེགས་པའི་ཆོས་རྣམས་ལ། །སེམས་ཉིད་འདི་རུ་གཏན་ལ་ཕེབས། །གསུམ་དང་བརྒྱད་ཁྲི་བཞི་དང་དགུ། །ཀུན་གྱིས་དེ་ཉིད་ཁོང་དུ་ཆུད། །ཉི་ཤུ་རྩ་བཞི་གཏན་ལ་ཕེབས། །དེ་ལྟར་གྱུར་པའི་རྣལ་འབྱོར་བདག །སྤྲོས་དང་བྲལ་བ་ཨེ་མ་ཧོ། །ཁམས་གསུམ་སེམས་ཅན་ཐམས་ཅད་ཀྱང་། །ཇི་ལྟར་མ་ཞིག་བར་དུ་ཡང་། །བདེ་ཆེན་ངང་ལ་བཀོད་པར་གྱིས། །ཁམས་གསུམ་སེམས་ཅན་ཐམས་ཅད་ཀྱང་། །མྱུར་བ་ཉིད་དུ་སངས་རྒྱས་ཤོག །དེ་ལྟ་བུ་རུ་རྟོགས་ལགས་ཀྱང་། །གཞན་དང་མཐུན་ཞིང་དྲང་བའི་ཕྱིར། །རི་ཁྲོད་དགོན་པ་འགྲིམ་བྱ་ཞིང་། །གཅིག་པུར་ཞེན་པ་བཟློག་བྱས་ནས། །ཕྱོགས་རིས་མེད་པའི་རི་ཁྲོད་དུ། །ལྟེམ་ཀྱང་མེད་པའི་བསྒྲུབ་པ་བྱེད། །འཁྲི་བ་བརྩད་ནས་བཅད་བྱ་ཞིང་། །ཕྱག་ཆེན་མན་ངག་བསྒོམ་བྱས་ན། །ཕྱོགས་རིས་མེད་པའི་ལྟ་བ་རྟོགས། །ཇི་ལྟར་བྱས་ཀྱང་བླ་མ་བརྟེན། །ངན་འགྲོ་དེ་དག་ག་ལ་ཡོད། །བདེན་པ་མེད་པར་ཤེས་ལགས་ན། །འདི་ཕྱི་བྱ་བའི་མིང་ཡང་མེད། །འཁོར་དང་མྱ་ངན་འདས་པ་ཡི། །དམ་ཆོས་འདི་དག་ཐམས་ཅད་ཀུན། །བདག་གི་སེམས་ཉིད་འདི་ཉིད་དང་། །འཁྲུལ་པ་མེད་པའི་ལྟ་བ་འདི། །བདེ་བ་ཆེན་པོ་ཨེ་མ་ཧོ། །ཁམས་གསུམ་སེམས་ཅན་ཐམས་ཅད་ནི། །ཕྱག་རྒྱ་ཆེན་པོ་ཐོབ་པར་ཤོག །བྱི་བ་ལོ་ཟླ་བ་དང་པོའི་ཚེས་ལྔ་ལ་ཁྱུང་རྫོང་དུ་བཀོད་པའོ།། །།

ཨོཾ་སརྦ་སྭ་སྟི་སིདྷི་ཧཱུཾ། ཆོས་ཀྱི་རྩ་བ་ཧྲིལ་གྱིས་དྲིལ་ནས་བསྒོམ་པར་བྱེད་པ་ལ། །བསོད་ནམས་ཀྱི་ཚོགས་དང་ཡེ་ཤེས་ཀྱི་ཚོགས་གཉིས་སུ་འདུས་ཏེ། བསོད་ནམས་ཀྱི་ཚོགས་ལ་རྣམ་པ་གསུམ་ཡིན། སྦྱིན་པ་དང་། ཚུལ་ཁྲིམས་དང་། བཟོད་པ་གསུམ་ཡིན། སྦྱིན་པ་ཉམས་སུ་ལེན་པར་བྱེད་པ་ནི་གསུམ་ལས། ཆོས་ཀྱི་སྦྱིན་པ། ཟང་ཟིང་གི་སྦྱིན་པ། སྐྱབས་ཀྱི་སྦྱིན་པ་དང་གསུམ་ལས། དེ་ཡང་སྦྱིན་པ་ནི་ཆུང་ངུ་ནས་བསླབ་དགོས་ཏེ། དེ་སྐད་དུ་ཡང་། སྦྱིན་པ་དང་པོ་ཆུ་ལ་བསླབ། དེ་ནས་ཟན་ཁམ་ཙམ་ལ་བསླབ། དེ་ནས་བྲེ་ཕུལ་ཙམ་ལ་བསླབ། ཐ་མར་མགོ་དང་རྐང་ལག་སོགས། །གཏོང་ཡང་དཀའ་བ་མ་ཡིན་ཏེ། །དཔེར་ན་རྒྱལ་པོ་ཟླ་འོད་བཞིན། ཞེས་བཤད་པས། རིམ་གྱིས་སྦྱིན་པ་ལ་བསླབ་པར་བྱའོ། །དེ་བཞིན་དུ། ཚུལ་ཁྲིམས་དང་། བཟོད་པ་ལ་ཡང་འབད་དེ་བསླབ་པར་བྱའོ། །དེ་དག་ཐམས་ཅད་བརྩོན་འགྲུས་ཆེན་པོས་དང་དུ་བླང་བར་བྱའོ། །དེ་ཡང་གཙོ་བོ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་པས། དེ་སྐྱེ་བར་བྱེད་པ་ལ་བསམ་གཏན་བསྒོམ་དགོས་ཏེ། དེ་ཡང་བླ་མ་དམ་པའི་གདམ་ངག་གིས། རྩ་རླུང་ལ་སོགས་པ་སེམས་རྩེ་གཅིག་ཏུ་ཉམས་སུ་བླངས་པས། ཅི་ཞིག་ལྟར་ལ་བདག་མེད་པའི་ཡེ་ཤེས་སྐྱེ་བར་འགྱུར་ཏེ། གང་ནས་ཀྱང་མ་འོངས། གང་དུ་ཡང་མི་འགྲོ། སྔ་ཕྱི་མེད་ཅིང་འདུས་མ་བྱས་ལྷུན་གྱིས་གྲུབ་པ་དེ་ལྟ་བུའི་དོན་ལ་མཉམ་པར་བཞག་པར་བྱའོ། །ཨོཾ་སརྦ་སྭ་སྟི་སིདྷི་ཧཱུཾ། རང་བྱུང་རྡོ་རྗེ་ཡིས། །གདུལ་བྱ་རྣམས་ལ་གདམས་པ་འདི་སྟ་སྟེ། ཆོས་ཐམས་ཅད་ཀྱི་རྩ་བ་བྱང་ཆུབ་ཀྱི་སེམས་སྙིང་རྗེ་ཆེན་པོ་བསྒོམ་དགོས་པ་ཡིན་པས། །དུས་དང་གནས་སྐབས་ཐམས་ཅད་དུ་སྙིང་རྗེ་ཆེན་པོ་བསྒོམ་པ་ལ་འབད་པ་འདོན་པར་བྱའོ། །གཞན་ཡང་གང་དང་གང་དུ་འགྲོ་བ་ལ་སོགས་པ་བྱེད་པའི་དུས་སུ་ཡང་བླ་མ་དམ་པ་བསྒོམ་ཞིང་བྱ་བ་དང་སྤྱོད་ལམ་ཅི་བྱེད་ཀྱང་ཆོས་སུ་འགྱུར་བ་བྱེད་པ་དང་། སེམས་ཅན་ཐམས་ཅད་ལ་སྦྱིན་པ་རྒྱ་ཆེན་པོ་གཏོང་བ་དང་། དེ་ལ་སོགས་པའི་བསོད་ནམས་ཀྱི་ཚོགས་ལ་འབད་ཅིང་མཐར་ཡེ་ཤེས་ཀྱི་ཚོགས་དམིགས་པ་མེད་པས་རྒྱས་འདེབས་པ་དང་། གཞན་ཡང་ཆོས་ཀྱི་བྱ་བ་ལ་བཀོད་ཅིང་། རང་ཡང་དུས་དང་གནས་སྐབས་ཐམས་ཅད་དུ་ཆོས་ཀྱི་བྱ་བ་མ་གཏོགས་པ་སྐད་ཀྱང་མི་བྱེད་པར་འབད་ན་ཡོན་ཏན་ཕུན་སུམ་ཚོགས་པ་ཐོབ་པར་འགྱུར་རོ། །བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག ཨོཾ་སརྦ་སྭ་སྟི་སིདྷི་ཧཱུཾ། །གང་གི་བརྟེན་ཅིང་འབྲེལ་འབྱུང་བ། །རྣམ་པར་དམིགས་པ་མི་མཛད་ཅིང་། །དམིགས་མེད་ཉིད་ཀྱང་དམིགས་མི་མཛད། །གདོད་ནས་མ་སྐྱེས་འདི་ཕྱག་འཚལ། །ཆོས་རྣམས་བདེན་པར་མ་གྲུབ་ཀྱང་། །ཀུན་རྫོབ་དོན་དམ་དབང་གིས་སུ། །རྣམ་པར་ཞེན་པ་སྤང་བའི་ཕྱིར། །རིམ་གྱིས་སྦྱིན་པ་ལ་གོམས་བྱ། །དེ་ལྟར་ཚུལ་ཁྲིམས་བཟོད་པ་ཡང་། །བརྩོན་པས་རྣམ་པར་གོམས་པར་བྱ། །དེ་བཞིན་བསམ་གཏན་ཉིད་ཀྱང་བསྒོམ། མཐར་ཐུག་ཤེས་རབ་ཕ་རོལ་ཕྱིན། དངོས་པོ་མ་ཡིན་སྟོང་མ་ཡིན། །གཉིས་ཀ་མ་ཡིན་གཉིས་མེད་མིན། །དེས་ན་སྤྲོས་པ་རྣམ་བཞི་བྲལ། །སྐྱེ་འགག་རྟག་ཆད་འགྲོ་འོང་དང་། །དོན་ཅིག་དོན་ནི་མང་པོ་དག དམིགས་པར་མི་འགྱུར་མཐའ་བརྒྱད་བྲལ། །དེ་ནི་མཐར་ཐུག་དོན་དམ་འདོད། ཚིག་ཡིན་དོན་དམ་སྤྲོས་དང་བྲལ། །འདི་དོན་རིག་ཅིང་སུས་རྟོགས་པ། །ས་བཅུ་ལས་འདས་ཐོབ་པར་འགྱུར། །རྣམ་པ་འདི་ནི་མ་ཤེས་པའི། དམིགས་པ་ཅན་རྣམས་རབ་ཏུ་བརླག །འགྲོ་དྲུག་སེམས་ཅན་ཐམས་ཅད་ཀྱིས། །འདི་དོན་ལེགས་པར་རྟོགས་པར་ཤོག །ཤུབྷཱཾ།།