ཆོས་སྡེ་ཆེན་པོ་དགའ་ལྡན་གྱི་དཀར་ཆག
རིགས་དང་དཀྱིལ་འཁོར་ཀུན་གྱི་ཁྱབ་བདག་རྡོ་རྗེ་འཆང་ཆེན་པོ་དཔལ་ལྡན་བླ་མ་དམ་པ་འཇམ་དབྱངས་བཞད་པའི་རྡོ་རྗེས་མཛད་པའི་ཆོས་སྡེ་ཆེན་པོ་དགའ་ལྡན་གྱི་དཀར་ཆག་བཞུགས་སོ། །
ཨོཾ་བདེ་ལེགས་སུ་གྱུར་ཅིག །ལྷ་མིའི་རྣམ་འདྲེན་ཟླ་མེད་ཟས་གཙང་སྲས། །སྲས་ཀྱི་ཐུ་བོ་རྒྱལ་ཚབ་མི་ཕམ་མགོན། །རྒྱལ་ཀུན་ཡབ་གཅིག་རྒྱལ་སྲས་འཇམ་དབྱངས་ཞབས། །སྐྱབས་མཆོག་སངས་རྒྱས་སྲས་བཅས་གཙུག་གིས་མཆོད། །སྙིགས་དུས་ལོག་སྤྱོད་ཐུན་གསུམ་མུན་ཚོགས་ཀུན། །སེལ་བྱེད་ལེགས་སྨོན་མཁྱེན་རབ་འོད་ཟེར་འབུམ། །ཐུབ་བསྟན་བཅུ་གཉིས་གླིང་བདག་ཉི་མ་མཆོག །རྒྱལ་བ་གཉིས་པའི་ཞབས་སེན་གཙུག་ན་མཛེས། །སངས་རྒྱས་ཀུན་གྱིས་ལུང་བསྟན་གངས་ཅན་གྱི། །རྡོ་རྗེ་གདན་དངོས་གཉིས་པ་དཔའ་བོ་དང༌། །མཁའ་འགྲོ་ཆོས་སྐྱོང་སྤྲིན་བཞིན་མངོན་རྒྱུ་བའི། །དགའ་ལྡན་རྟེན་གསུམ་འགའ་ཙམ་ལོ་རྒྱུས་བྲི། །
༈ དེ་ཡང་རྟེན་འདི་དག་གི་ལོ་རྒྱུས་རྒྱས་པར་མི་ལྕོགས། མཚོན་ཙམ་བཤད་ན། མཁན་ཆེན་ཕྱག་རྡོར་པ་ལ་དཔལ་གསང་བའི་བདག་པོས་ལུང་བསྟན་པ་ལས། བློ་བཟང་གྲགས་པ་འདི་ཉིད་ནི། །སངས་རྒྱས་ཀུན་གྱི་སྤྲུལ་པ་སྟེ། །པཎ་ཆེན་རྐྱང་གི་ལུས་བཟུང་ནས། །མདོ་དང་སྔགས་ཀྱི་དོན་བཤད་ཅིང༌། །ངེས་པ་ཁོ་ནར་འཚང་རྒྱའོ། །ཞེས་གསུངས་པ་ལྟར་སངས་རྒྱས་ཐམས་ཅད་ཀྱི་སྤྲུལ་པ་ཡིན་ལ། སྤྲུལ་ཚུལ་ཡང་སྙིགས་དུས་ཀྱི་ལོག་སྤྱོད་མཐའ་དག་ཟིལ་གྱིས་མནན་ནས་བསྟན་པའི་བདུད་རྩིའི་འོད་སྣང་གིས་ས་གསུམ་ཁྱབ་པའི་ཆེད་དུ་ཕྱོགས་བཅུའི་སངས་རྒྱས་ཐམས་ཅད་ཀྱིས་སྔོན་རྒྱལ་བ་དབང་པོའི་ཏོག་གི་དུས་ནས་དེ་ལྟར་འགྱུར་བར་བྱིན་གྱིས་བརླབས་ཤིང་ཐུགས་བསྐྱེད་པའི་མཐུས་འཇིག་རྟེན་ཐམས་ཅད་དུ་མདོ་སྔགས་ཀྱི་ཆོས་ཀྱི་བདུད་རྩིས་ཁྱབ་པར་མཛད་པ་ཡིན་ཏེ། འཇམ་དཔལ་རྩ་རྒྱུད་ལས། ཡི་གེ་དང་པོ་པ་གྲགས་པ། །སྡོམ་བརྩོན་ཐམས་ཅད་གྲགས་པ་ཡང༌། །སྟོན་པའི་བསྟན་པ་གསལ་བྱེད་པ། །བསྟན་པ་དེ་ཚེ་ས་སྟེང་དུ། །རྣམ་པར་ཉམས་ཤིང་སྣང་མེད་ལ། །བསྟན་པའི་གཟུགས་བརྙན་ཡིད་དུ་འོང༌། །བྱེད་པར་འགྱུར་བ་ཐེ་ཚོམ་མེད། །ཅེས་སོགས་དང༌། མ་ཅིག་ལབ་སྒྲོན་གྱིས། དགེ་སློང་ཚུལ་འཛིན་གྲགས་པའི་མཚན་ཐོགས་ཏེ། །ལུང་རིགས་སེང་གེའི་ང་རོ་རབ་བསྒྲགས་པས། །ཁྲིམས་འཆལ་ལོག་སྤྱོད་སྤོབས་པ་ཟིལ་གྱིས་གནོན། །ཁྲིམས་འཆལ་དཔག་མེད་ཡང་དག་ཁྲིམས་ལ་སྦྱོར། །ཐུབ་པ་ཉིད་ཀྱི་སྲོལ་ལུགས་ཇི་བཞིན་མཚུངས་པ་ཡི། །འདུལ་ཁྲིམས་སྲོལ་གཏོད་སྟོན་པའི་ཆས་རྟགས་འཛིན། །ཞེས་གསུངས་ཤིང༌། གཏེར་ཁ་གོང་དང༌། རཏྣའི་སྤྱི་ལུང་སོགས་ལས་ཀྱང་དེ་ལྟར་བཤད་པ་དང༌། མ་ཅིག་ལབ་སྒྲོན་གྱིས། བསྟན་པ་གསལ་བར་བྱེད་པའི་སྐྱེས་བུ་དེ་ནི། ཞེས་པ་ནས། རེས་སྤྱན་རས་གཟིགས་དབང་བོ་ལ་ཆོས་ཞུ་བ། རེས་མགོན་པོ་བྱམས་པ་ལ་ཆོས་ཞུ་བ། རེས་མགོན་པོ་ཚེ་དཔག་མེད་ལ་ཆོས་ཞུ་བ། རེས་མགོན་པོ་འཇམ་དཔལ་དང་ཀུ་ཀུ་རི་བ་ལ་ཆོས་ཞུ་ནུས་པ། སེམས་ཅན་གྱི་དོན་བྱེད་པ་ལ་ཐུགས་བསྐྱེད་ཤིན་ཏུ་ཆེ་བ། ཞེས་པ་ནས། འདིར་བྱོན་ནས་དགེ་སློང་གི་ཆས་སུ་ཞུགས་ནས་སངས་རྒྱས་ཀྱི་བསྟན་པ་གསལ་བར་བྱེད་པ་ཡིན་ནོ། །དེའང་ཐུབ་པ་ཉིད་ཀྱི་ལུང་བསྟན་ཐོབ་པ་དང༌། ཞེས་དང༌། འཇམ་དབྱངས་ཁ་ཆེས་ཀྱང༌། ཏ་ཐཱ་ག་ཏས་ལུང་བསྟན་རྒྱལ་བའི་སྲས། །ཞེས་སོགས་ལྟར་ལུང་བསྟན་ཚུལ་ཡང་ཤིན་ཏུ་མང་སྟེ། དེའི་ནང་ནས། འཇམ་དཔལ་རྩ་རྒྱུད་ལས། ང་ནི་མྱ་ངན་འདས་པའི་ཚེ། །ས་ཡི་སྟེང་འདི་སྟོངས་པ་ན། །ཁྱོད་ཉིད་བྱིས་པའི་གཟུགས་ཅན་གྱིས། །སངས་རྒྱས་མཛད་པ་བྱེད་པར་འགྱུར། །དེ་ཚེ་དགོན་ཆེན་རབ་དགའ་བ། །ཁ་བ་ཅན་ན་ཡོད་པ་ཡིན། །ཞེས་སངས་རྒྱས་མྱ་ངན་ལས་འདས་རྗེས་འཇམ་དབྱངས་བྱིས་པ་སྟེ་སོ་སྐྱེའི་ཚུལ་བཟུང་ནས་སངས་རྒྱས་ཀྱི་མཛད་པ་བྱེད་པ་དང༌། དགོན་པ་ཆེན་པོ་དགའ་ལྡན་ཞེས་གངས་ཅན་དུ་འབྱུང་བར་ལུང་བསྟན་པ་ལྟར་རྣམ་ཐར་ཟུར་འདེབས་ལས་ཀྱང༌། སྤྲེའུ་ལོའི་མཇུག་ཏུ་ཡབ་ཀྱི་མནལ་ལམ་དུ་རྒྱ་ནག་རི་བོ་རྩེ་ལྔ་ནས་འོང་ཟེར་བའི་བཙུན་པ་མེ་ཏོག་ཕྲེང་བ་དུ་མ་སྦྲེལ་བའི་ཆོས་གོས་དང༌། སུམ་ཅུ་རྩ་གསུམ་གྱི་ཤིང་ལོ་ཡིན་ཟེར་བ་དར་སེར་པོ་འདྲ་བའི་ཤམ་ཐབས་ཅན། པོ་ཏི་ཁྱེར་བ་ཞིག་བྱུང་ནས། ང་ཁྱེད་ལ་གནས་ཞིག་གཡོར་བ་ཡིན་ཟེར་ནས། ཞེས་པ་ནས། འཇམ་དབྱངས་ཀྱི་རྣམ་འཕྲུལ་ཡིན་སྙམ་པ་བྱུང་སྐད་ཅེས་དང༌། དཔལ་གསང་བའི་བདག་པོ་མིའི་རྣམ་པར་རོལ་བ་མཁན་ཆེན་ཕྱག་རྡོར་བའི་གསུང་འབུམ་ལས། གསང་བའི་བདག་པོས། བྱམས་པས་བྱིན་གྱིས་བརླབས་པའི་གང་ཟག་འཇམ་དཔལ་དབྱངས་དང་གཉིས་སུ་མེད་པ། ལྷ་མོ་དབྱངས་ཅན་མས་རིག་པ་སྟེར་བར་བྱེད་པ་ཕུན་སུམ་ཚོགས་པ་གཅིག་དང་བཅོ་ལྔའི་གོང་ནས་འབྲེལ་བ་ཡོད་ཅིང༌། ཞེས་སོགས་དང༌། མཁས་གྲུབ་ཐམས་ཅད་མཁྱེན་པའི་རྣམ་ཐར་གཟིགས་པ་ལྔ་ལྡན་ལས། སང་ཉིན་རྗེ་ལ་མཇལ་དུས་མདངས་རྨི་ལམ་འདི་ལྟ་བུ་གཅིག་རྨིས་པ་ཇི་ལྟར་ལགས་ཞུས་པས། ཁྱེད་ཀྱིས་བླ་མ་དང་ཡི་དམ་དབྱེར་མེད་དུ་མཐོང་བ་ལེགས། ཁྱེད་སྔགས་ཀྱི་ཆེད་དུ་བྱ་བའི་གདུལ་བྱ་རིན་པོ་ཆེ་ལྟ་བུའི་གང་ཟག་གཅིག་ཡིན་པར་འདུག །ང་རྗེ་བཙུན་འཇམ་དབྱངས་སུ་མཐོང་བ་ལྟར་དོན་ལ་གནས་མོད། གཞན་བློ་དམན་པའི་གང་ཟག་གིས་ཐ་མལ་བར་མཐོང་འོང་བ་ཡིན། ཞེས་གསུངས་པ་ལྟར་དམིགས་བརྩེ་མའི་ཊཱིཀྐ་ཚིག་དོན་རབ་གསལ་དང༌། འཇིགས་བྱེད་ཆོས་འབྱུང་དང༌། རཏྣའི་སྤྱི་ལུང་སོགས་དུ་མས་བཤད། ཡང་དམིགས་བརྩེ་མའི་ཊཱིཀ་ཆེན་རྣམ་ཐར་ཟུར་འདེབས་སུ། དེ་ནས་བྱ་ལོ་ཟླ་བ་དང་པོའི་ཚེས་བཅུའི་ནུབ་མོ་ཡུམ་གྱི་མནལ་ལམ་དུ་དགེ་འདུན་ལ་སོགས་པའི་ཕོ་མོ་བསམ་གྱིས་མི་ཁྱབ་པས་རྒྱལ་མཚན་དང༌། རྔ་བོ་ཆེ་ལ་སོགས་པ་རོལ་མོའི་བྱེ་བྲག་མཐའ་ཡས་པ་བཟུང་སྟེ། སྤྱན་རས་གཟིགས་འབྱོན་པ་ལ་བསུ་བ་བྱེད་ཟེར་གྱིན་འདུག་པས། ཞེས་སོགས་ལྟར་སྤྲུལ་པའི་གླེགས་བམ་ལས་ཀྱང་དེ་ལྟར་བཤད་པས་སྤྱན་རས་གཟིགས་ཀྱི་སྤྲུལ་པ་དམ་པ་དང༌། ཡང་རྣམ་ཐར་ཟུར་འདེབས་ལས། ཡབ་ཀྱི་མནལ་ལམ་དུ་ལྕང་ལོ་ཅན་ནས་ཕྱག་ན་རྡོ་རྗེས་འཕངས་སམ་སྙམ་པའི་གསེར་གྱི་རྡོ་རྗེ་འབར་བ་ཞིག་ཡུམ་ལ་ཐིམ་པ་རྨིས་པས་བུ་སྟོབས་ལྡན་ཞིག་སྐྱེ་བ་ཡིན་ནམ། ཞེས་གསུངས་པ་ལྟར་མཁན་ཆེན་ཕྱག་རྡོར་ལ་གསང་བའི་བདག་པོས་ཀྱང༌། སོ་སོ་སྐྱེ་བོའི་སྣང་ངོར་སྦྱོར་ལམ་ལ་གནས་པར་གྲགས། ཁོ་བོ་ལག་ན་རྡོ་རྗེས་ཀྱང་འདིའི་ཡོན་ཏན་དཔག་པར་མི་ནུས་ཤིང་ལྷག་པའི་ལྷ་ཕྱི་ནང་གི་མང་པོས་རྗེས་བཟུང༌། རིགས་གསུམ་མགོན་པོས་ཀྱང་རྗེས་སུ་བཟུང་སྟེ་ལྷག་པའི་ལྷ་ཡིན། ཞེས་གསུངས་པ་ལྟར། དཔལ་གསང་བདག་ཕྱག་ན་རྡོ་རྗེ་དང་དབྱེར་མ་མཆིས་པ་དང༌། ཡི་དམ་རྒྱུད་སྡེ་བཞིའི་ལྷ་མཐའ་ཡས་པས་བྱིན་གྱིས་བརླབས་པ་ཡང་རྣམ་ཐར་ཟུར་འདེབས་སུ། ཆོས་རྗེ་དོན་གྲུབ་རིན་ཆེན་ལ་རྨི་ལམ་དུ་དཔལ་རྡོ་རྗེ་འཇིགས་བྱེད་ཞལ་གཟིགས་པས་ཡང་ཡང་ཞལ་གཟིགས་པར་གསོལ་བ་བཏབ་པས། སང་ཕོད་ད་ཙམ་ན་ལུང་པ་འདིའི་མདའ་རུ་ཡོང༌། དེ་བར་དུ་བདེ་བར་གྱིས་གསུངས་པས། དེ་གང་ཡིན་དཔྱད་པའི་ཕྱིར་ཏིང་ངེ་འཛིན་ལ་མཉམ་པར་གཞག་པས་ཁྱེད་ཀྱི་བུར་འདུག་པ་ཐིགས་པ་ཡིན། ཞེས་དང༌། གངས་ཅན་གྱི་རྒྱལ་བ་ཉི་མ་བདུན་གྱི་གཉིས་པ་རྒྱལ་བ་དགེ་འདུན་རྒྱ་མཚོས་གསུངས་པ་ལས་ཀྱང༌། རྒྱལ་བ་ཀུན་གྱི་ཡབ་གཅིག་འཇམ་པའི་དབྱངས། །མ་རུང་བདུད་དཔུང་འཇོམས་མཛད་གཤིན་རྗེ་གཤེད། །མི་ཡི་གཟུགས་ཀྱིས་རྣམ་རོལ་ཙོང་ཁ་པ། །ཞེས་གསུངས་པ་དང༌། རྒྱལ་བ་དགེ་འདུན་གྲུབ་ཀྱི་གསུང་ལས་ཀྱང༌། རྗེ་རིན་པོ་ཆེ་ལ་གཤེགས་པ་མི་མངའ་སྙམ་ཞེས་སོགས་གསུངས་པ་ལྟར། འཇམ་དབྱངས་ཁྲོས་པ་དཔལ་རྡོ་རྗེ་འཇིགས་བྱེད་མིའི་ཟློས་གར་མཛད་པ་དང༌། ཡང་མ་ཅིག་ལབ་སྒྲོན་གྱིས་ལུང་བསྟན་པ་ལས་སངས་རྒྱས་ཀྱི་བསྟན་པ་གསལ་བར་བྱེད་པའི་དགེ་སློང་གཅིག་འབྱུང་བྱས་པ་དེ། ད་ལྟར་བཤད་པའི་དགེ་སློང་གྲགས་པའི་མཚན་ཐོགས་པ་འདི་ཡིན། དགེ་སློང་དེས་བསྟན་པ་འཆོལ་བ་མང་དུ་འབྱུང་བ་རྣམས་ཚར་གཅོད་ཅིང༌། ཡང་དག་པའི་དོན་དང་བསྟན་པ་རྣམ་དག་གི་ཁྲིམས་སྲོལ་བཏོད་པ་ནི་འཛམ་བུ་གླིང་དུ་ཐུབ་པས་ཆོས་འཁོར་བསྐོར་བ་དང་སྙིགས་དུས་བོད་དུ་དགེ་སློང་གྲགས་པའི་མཚན་ཅན་བྱུང་ནས་ཆོས་སྲོལ་བཏོད་པ་ནི་མཚུངས་ཏེ། ཞེས་དང༌། འཇམ་དཔལ་རྩ་རྒྱུད་ལས། ཁྱོད་ཉིད་བྱིས་པའི་གཟུགས་ཀྱིས་ནི། །སངས་རྒྱས་མཛད་པ་བྱེད་པར་འགྱུར། །ཞེས་གསུངས་པ་དང༌། ལྷ་མོ་དྲི་མ་མེད་པས་ཞུས་པ་ལས་ཀྱང༌། བྱང་ཕྱོགས་གངས་རིའི་རྒྱུད་ཀྱི་ཆར། །དགེ་བ་ལྡན་པའི་ས་ཕྱོགས་སུ། །དམ་པའི་ཆོས་ནི་རྒྱས་པར་འགྱུར། །ཞེས་དང༌། མཁན་ཆེན་ཕྱག་རྡོར་བའི་ལུང་བསྟན་ལས་ཀྱང༌། འཕྲིན་ལས་བསམ་གྱིས་མི་ཁྱབ་པ་དཔག་མེད་འོང༌། ཆོས་སྡེ་ཆེན་པོ་ཁྱེད་ཀྱི་རིང་ལ་འདེབས། དགེ་འདུན་ཚན་ཆེ་བ་འདུ། འཕགས་པའི་སློབ་མ་ལྔ་དྲུག་འདུ། བསྟན་པ་དང་སེམས་ཅན་ལ་ཕན་ཆེ་བར་འབྱུང༌། མདོ་སྔགས་ཀྱི་གཞུང་ལུགས་ཀྱང་ཆེས་ཆེར་གསལ་བར་བྱེད་ཅིང༌། སངས་རྒྱས་འཇིག་རྟེན་དུ་བྱོན་པ་འདྲ་བའི་རིང་ལུགས་འོང༌། འགྲོ་བ་མང་པོ་ཞིག་ཐར་པའི་ལམ་ལ་འཁྲིད་པར་འདུག་པས་ཤིན་ཏུ་ངོ་མཚར་ཞེས་པ་ལྟར་མོ་ལའི་ལ་རྩར་བཞུགས་དུས་རྒྱལ་བ་བྱམས་པས། རིགས་ཀྱི་བུ་ཁྱོད་ཀྱིས་ནི་སངས་རྒྱས་འཇིག་རྟེན་དུ་བྱོན་པ་འདྲ་བ་ཞིག་འོང་བར་ཤེས་པར་བྱོས་ཤིག་ཅེས་སེང་གེའི་སྒྲས་དབུགས་དབྱུང། གཉལ་སྨད་སེང་གེ་རྫོང་དུ་བཅོམ་ལྡན་འདས་དུས་ཀྱི་འཁོར་ལོས། ཁྱོད་ཀྱིས་དུས་ཀྱི་འཁོར་ལོ་འདི་ལ་རྒྱལ་པོ་ཟླ་བ་བཟང་པོ་བྱོན་པ་འདྲ་བ་གཅིག་འོང་བ་ཡོད་དོ། །ཞེས་སྔགས་ཀྱི་འཁོར་ལོས་བསྒྱུར་བར་བྱིན་གྱིས་བརླབས་པ་དང༌། རྗེ་བཙུན་འཇམ་དབྱངས་ལ་གྲུབ་ཆེན་བརྒྱད་ཅུ་རྒྱན་དྲུག་གིས་བསྐོར་བ་ཡང་ཡང་གཟིགས་ནས། མདོ་སྔགས་ཀྱི་བདུད་རྩི་ཐོབ་པ་ཙམ་གྱིས་གྲོལ་བར་བྱིན་གྱིས་བརླབས་ཀྱི་བཀའ་བབས་ཀྱི་བདུད་རྩིས་གདུལ་བྱ་མཐའ་ཡས་མུ་མེད་པས་རྒྱལ་བ་སྲས་བཅས་ཀྱི་བཀོད་པས་ནམ་མཁའི་ཁྱོན་མ་ལུས་གང་བ་ཇི་ལྟར་དཔལ་གསང་བ་འདུས་པ་གསུངས་པའི་ཚེ་རྒྱལ་བ་སྲས་བཅས་ཏིལ་གྱི་གང་བུ་ལྟར་གང་བར་མཛད་པ་ལ། མཆོད་པ་དང་སྨོན་ལམ་རླབས་ཆེན་མཛད་པས་སྐྱེ་རྒུ་མཐོང་ཐོས་དྲན་རེག་འདྲེན་པའི་མཐོ་རིས་དང༌། ཐར་པ་དང༌། ཐམས་ཅད་མཁྱེན་པའི་ལམ་སྲོལ་རྒྱ་ཆེ་ཞིང༌། བསྟན་པ་དག་ཞིང་ཆེན་པོས་འཇིག་རྟེན་ཁྱབ་པ་ལྟ་བུ་མཛད། དམ་ཚིག་གི་དྲི་བསུང་མཆོག་ཏུ་དགའ་བ་དང༌། བཤད་སྒྲུབ་ཀྱི་རྔ་བོ་ཆེ་བརྡུངས་པས་འཇིག་རྟེན་ལས་འདས་པའི་དཔའ་བོ་དང་ཡེ་ཤེས་ཀྱི་མཁའ་འགྲོ་མ་ཆོས་སྐྱོང་བའི་སྲུང་མ་ཐམས་ཅད་དབྱར་དུས་ཀྱི་སྤྲིན་བཞིན་འདུ་ཞིང་ལུས་དང་གྲིབ་མ་བཞིན་འབྲལ་བ་མེད་པར་བླ་མ་དང་རྡོ་རྗེ་འཇིགས་མཛད་ཀྱི་བཀའ་བཞིན་དུ་རང་གི་རྗེས་འཇུག་གདུལ་བྱ་བསྟན་པ་འཛིན་སྐྱོང་སྤེལ་བ་ལ་གཡེལ་བ་མེད་པར་བཞུགས་པ་ཀུན་གྱིས་མངོན་སུམ་ལྟ་བུར་གྲུབ་ཅིང༌། ཤེས་བྱེད་ཀྱང་མདོ་རྒྱུད་ལུང་བསྟན་ཆེས་མང་བ་ལགས། སངས་རྒྱས་ཐམས་ཅད་ཀྱིས་བྱིན་གྱིས་བརླབས་པའི་རྗེ་རྒྱལ་བ་གཉིས་པ་དེ་ཉིད་ཀྱིས་བདུད་བཏུལ་བ་དང༌། ཆོས་འཁོར་བསྐོར་བའི་གནས་ནི། འཇམ་དཔལ་རྩ་རྒྱུད་ལས། དུས་ཀྱི་ཐ་མ་དེ་ལ་ནི། །སེམས་ཅན་ཀུན་ལ་མཆོག་སྦྱིན་བྱེད། །འཇིག་རྟེན་པ་ནི་མྱ་ངན་འདས། །ས་ཡི་སྟེང་ནི་སྟོངས་གྱུར་ན། །ཁྱོད་ཉིད་བྱིས་པའི་གཟུགས་ཀྱིས་ནི། །སངས་རྒྱས་མཛད་པ་བྱེད་པར་འགྱུར། །དེ་ཚེ་དགོན་ཆེན་རབ་དགའ་བ། །ཁ་བ་ཅན་ན་ཡོད་པ་ཡིན། །ཆུ་བོ་གསེར་དང་ལྡན་འགྲམ་དུ། །ང་ནི་མྱ་ངན་འདའ་བར་འགྱུར། །ཞེས་ཁ་བ་ཅན་དུ་དགའ་ལྡན་ཞེས་པའི་དགོན་གནས་སོགས་ལུང་བསྟན་པ་འདི་ཡིན་ལ། དེ་ཡང་གཞན་གྱི་ལུང་བསྟན་ལ་ཧམ་ཚོད་ལྟ་བུ་ཡང་མིན་པ་ནི་དགོན་པའི་མིང་དང་གང་དུ་འདེབས་པའི་ལུང་ལག་ཚུན་ཆད་གསལ་བར་བཤད་པ་ནི་སངས་རྒྱས་མྱ་ངན་ལས་འདའ་ཁར། འོད་སྲུངས་དང་ཀུན་དགའ་བོ་ལ་མདོ་སྡེ་གདམས་ངག་འབོགས་པ་བཀའ་སྩལ་པའི་མདོ་འདིའི་ལེའུ་བཞི་བཅུ་པ་བསྟན་པ་དྭངས་སྙིགས་འབྱེད་པའི་ལེའུ་ནས་དུ་མ་ལུང་བསྟན་པ་དེ་ཟུར་དུ་ཕྱུང་བ་ལས། ཀུན་དགའ་བོས་ཞུས་པ་ལས། བཅོམ་ལྡན་འདས་ཀྱིས། ཀུན་དགའ་བོ་བསྟན་པ་གསོ་བའི་གང་ཟག་འདི་ལྟར་རོ། །ད་ལྟར་ང་ལ་ཤེལ་དཀར་གྱི། །ཕྲེང་བ་ཕུལ་ནས་སེམས་བསྐྱེད་པ། །ང་ཡི་བསྟན་པ་གསོ་བྱེད་ལ། །མཐའ་འཁོབ་ཁ་བ་ཅན་ལྗོངས་སུ། །འབྲི་དང་ལྡན་གྱི་ས་མཚམས་སུ། །དགའ་ཞེས་བྱ་བའི་དགོན་པ་འདེབས། །བློ་བཟང་ཞེས་བྱའི་མཚན་ཅན་འབྱུང༌། །ཞེས་སྟོན་པ་སངས་རྒྱས་ལ་ཤེལ་དཀར་གྱི་འཕྲེང་བ་ཕུལ་ནས་ལྟ་སྤྱོད་རྣམ་དག་སྤེལ་བའི་སྨོན་ལམ་བཏབ་སྟེ་སེམས་བསྐྱེད་པས། སངས་རྒྱས་ཀྱིས་ཁྱེའུ་པདྨའི་ངང་ཚུལ་འདི་མ་འོངས་པ་ན་ཁ་བ་ཅན་དུ་འབྲི་གུང་དང༌། དེའི་ཚུ་རོལ་དུ་ལྡན་གཉིས་ཀྱི་ས་མཚམས་འགོག་པ་རིའམ། འབྲོག་རིའི་ངོས་སུ་དགོན་པ་དགའ་ལྡན་ཞེས་བྱ་བ་དང༌། ཁྱེའུ་པདྨའི་ངང་ཚུལ་གྱིས་མཚན་བློ་བཟང་གྲགས་པ་ཞེས་བྱ་བ་འབྱུང་ཞེས་པ་ཡིན་ཏེ། དེ་དུས་ཀྱི་ཤེལ་ཕྲེང་འབུལ་བའི་ཁྱེའུ་མཚན་པདྨའི་ངང་ཚུལ་ཡིན་པ་ནི། བླ་མ་དབུ་མ་པས་རྗེ་བཙུན་འཇམ་དབྱངས་ལ་ཞུས་པ་ནི། སྔོན་སངས་རྒྱས་འཇིག་རྟེན་ན་བཞུགས་པའི་དུས་སུ་བླ་མ་འདི་རྒྱ་གར་དུ་བྲམ་ཟེའི་ཁྱེའུ་ཞིག་ཏུ་འཁྲུངས། དེའི་ཚེ་དགེ་སློང་གི་ཆ་ལུགས་འཛིན་པའི་བྱང་ཆུབ་སེམས་དཔའ་མོས་པའི་བློ་གྲོས་ཞེས་བྱ་བ་དང་མཇལ་ནས་དེ་ཉིད་མཉེས་པར་བྱས་ཤིང་ཞབས་འབྲིང་དུ་ཆོས་མང་དུ་གསན། དེས་ཁྲིད་དེ་སྟོན་པ་ཤཱཀྱ་ཐུབ་པར་མཇལ་ཞིང་སེམས་བསྐྱེད། དེའི་ཚེ་སྟོན་པ་ལ་ཤེལ་དཀར་པོ་དྲི་མ་མེད་པ་བརྒྱ་རྩའི་ཕྲེང་བ་ཞིག་དང་བས་ཕུལ་ནས་སྨོན་ལམ་བཏབ་པས་སྟོང་པ་ཉིད་ཀྱི་ལྟ་བ་ཕྱིན་ཅི་མ་ལོག་པར་རྟོགས་པའི་ས་བོན་བཞག་པ་ཡིན་ཞེས་གསུངས་པ་དང༌། ལང་གཤེགས་རྒྱ་ནག་མ་ལས། སྟོན་པ་འཁོར་བཅས་མཚོ་མ་ཕམ་པའི་འགྲམ་དུ་དབྱར་གནས་པར་ཞལ་གྱིས་བཞེས་པའི་ཚེ། ཀླུའི་རྒྱལ་པོ་མ་དྲོས་པས་དུང་ཞིག་ཕུལ་བས་བཅོམ་ལྡན་འདས་ཀྱིས་མོའུ་འགལ་གྱི་བུ་ལ། ཁྱོད་རྫུ་འཕྲུལ་གྱིས་སོང་ལ་དུང་འདི་བོད་གདོང་དམར་ཅན་གྱི་ཡུལ་དུ་སྦོས་ཤིག །མ་འོངས་པའི་དུས་ན་འཁོར་འདིའི་ནང་ནས་དགེ་སློང་པདྨའི་ངང་ཚུལ་གྱིས་ངའི་བསྟན་པ་རྒྱས་པར་བྱེད་པའི་དུས་དགེ་འདུན་གྱི་ཚོགས་དུང་བྱེད་ཀྱི། དེའི་གཏེར་བདག་ཏུ་ཚོགས་བདག་སྤྲེའུ་གཟུགས་སུ་བྱས་ཏེ་སྲུང་དུ་ཆུག །ཅེས་བཤད་པ་དང༌། ལུང་བསྟན་གསང་བའི་མེ་ལོང་ལས་ཀྱང༌། བྱ་རྒོད་ཕུང་པོའི་རིར་སྟོན་པ་སངས་རྒྱས་ལ་ཀླུའི་རྒྱལ་པོ་མ་དྲོས་པས་དུང་ཕུལ་བ་རེ་ཞིག་ཆོས་དུང་མཛད། དེ་རྗེས་སྟོན་པ་འཁོར་བཅས་ཁ་ཆེར་ཕེབས་དུས། ད་ལྟའི་སློབ་མ་དགེ་སློང་པདྨའི་ངང་ལྡན་འདི་བོད་གདོང་དམར་ཅན་གྱི་ཡུལ་དུ་བློ་བཟང་གྲགས་པ་ཞེས་བྱ་བའི་དགེ་སློང་དུ་གྱུར་ནས་ཤེས་རབ་ཀྱི་ཕ་རོལ་དུ་ཕྱིན་པ་དང་མདོ་སྔགས་ཟུང་དུ་འབྲེལ་བའི་བསྟན་པ་རྒྱས་པར་བྱེད་པ་འོང་གསུངས་ཏེ། ཀུན་དགའ་བོ་ལ་བཀའ་སྩལ་ནས། ཀུན་དགའ་བོས་དུང་བསྣམས་ནས་རྫུ་འཕྲུལ་གྱིས་བྱོན། འབྲོག་རི་བོ་ཆེར་གཏེར་དུ་སྦས། གཏེར་བདག་ཚོགས་བདག་ལ་བཅོལ་བ་སྤྲེའུའི་གཟུགས་སུ་ཡོད། ཅེས་གསུངས་ལ། གསང་བའི་བདག་པོ་མཁན་ཆེན་ཕྱག་རྡོར་པའི་ལུང་བསྟན་ལས་ཀྱང༌། ཆོས་རྗེ་བློ་བཟང་གྲགས་པ་ཁྱེད་དགོན་གནས་གར་བཏབ་ན་ལེགས་གསུངས་པ་ཁྱེད་རང་གིས་བླ་མ་དང་ཡི་དམ་དབྱེར་མེད་དུ་མཛོད་ལ་གསོལ་བ་ཐོབ་དང༌། ད་དུང་ཞིབ་ཆ་འདྲ་བ་ཅིག་འཇམ་དབྱངས་ཀྱིས་གསུངས་པར་འདུག །འོན་ཀྱང་ང་ལ་ལྷག་པའི་ལྷས་གསུངས་དུས། དབང་བསྐུར་རི་ཡི་འདབས་དག་ཏུ། །བཙུན་མོ་སྡིང་གི་ངོས་ཕྱོགས་སུ། །དགེ་འདུན་དཔག་མེད་འདུ་བར་འགྱུར། །རི་ནི་གང་ཡིན་འཇམ་དབྱངས་འཆད། །དབུས་གཙང་མདོ་ཁམས་རྒྱ་ཡུལ་གྱི། །མཆོད་ཡུལ་དམ་པ་ཚོགས་སོག་རྟེན། །མངའ་རིས་བྱང་ཁམས་ཀུན་གྱི་སྐྱབས། །ཟེར་བ་སོགས་བྱུང་སྟེ། ངའི་འདི་ཟུར་ཙམ་ཡིན། ཁྱེད་རང་གང་དགོས་ཡི་དམ་ལ་ཞུས་པས་ཡོངས་པར་སྣང༌། ཞེས་གསུངས་ལ། དེ་ཡང་དབང་བསྐུར་རི་ནི་དགོན་པའི་མདུན་གྱི་རི་དེ་ལ་ཆོས་རྒྱལ་སྲོང་བཙན་སྒམ་པོ་བཞུགས་ནས་དགོན་པ་ངོས་ཀྱི་སྡིང་དེ་ལ་བཙུན་མོ་བཞུགས་ནས་དབང་བསྐུར་བའི་ཕྱག་ནས་ཀྱི་རྗེས་ཀྱང་རྡོ་ལ་ཡོད་པས། དགོན་པའི་གཡོན་གྱི་སྡིང་ནི་བཙུན་མོ་ཡིན་པས། དེའི་ངོས་ཕྱོགས་སུ་དགེ་འདུན་དཔག་མེད་འདུ་བ་རི་དང་སྡིང་གང་ཡིན་འཇམ་དབྱངས་ལ་དྲིས་ན་འདི་ཡིན་ཞེས་བཤད་པ་ཡོངས་ལ། དགོན་པའི་མ་རྟེན་འབྲེལ་གྱིས་བཙུན་མོ་སྡིང་ངོས་ལ་བཏབ་ན། དབུས་གཙང༌། མདོ་སྨད་དང༌། ཁམས་དང༌། ཆེན་པོ་རྒྱ་ཧོར་གྱི་ཡུལ་གྲུའི་བར་གྱི་མངའ་རིས་ཀྱི་སྐྱེ་འགྲོ་ཁ་ཆེ་ནས་བྱང་ཕྱོགས་ཀྱི་རྒྱ་མཚོ་དང་ཤར་མཐའི་རྒྱ་མཚོའི་བར་དུ་ཁྱབ་ལ། དེ་ཡང་དཔལ་གསང་བ་འདུས་པའི་རྒྱུད་ཕྱི་མ་ལས། གང་ཞིག་ཐུན་བཞིའི་རྡོ་རྗེ་དག་ནི་སྒྲུབ་བྱེད་ཅིང༌། །མི་སྣང་ལ་སོགས་སྣ་ཚོགས་མཆོག་དང་དམན་གྲུབ་ཅིང༌། །བླ་མའི་དྲིན་གྱིས་འདི་ན་མ་ནོར་ལམ་རྟོགས་པ། །བྱང་ཆུབ་རྡོ་རྗེ་འདྲར་བལྟ་དེ་ལ་རྟག་ཕྱག་འཚལ། །ཞེས་སོགས་བཤད་པ་ལྟ་བུའི་ཡོན་ཏན་དང་ལྡན་པའི་མདོ་སྔགས་ཟུང་འབྲེལ་གྱི་རྡོ་རྗེ་འཛིན་པ་ཆེན་པོ་སངས་རྒྱས་ཀྱིས་ཀྱང་ཕྱག་མཛད་པའི་ཡུལ་དམ་པ་དག་གིས་ས་ཀུན་ཁྱབ་ཚུལ་རྣམ་ཐར་དད་པའི་འཇུག་ངོགས་ལས། ཚེ་འདི་ཉིད་ལ་རྡོ་རྗེ་འཆང་གི་གོ་འཕང་འཐོབ་པར་ནུས་པའི་མན་ངག་གི་གནད་གྲུབ་ཆེན་གྱི་དགོངས་པ་ལྟར་འཁྲུལ་མེད་དུ་གོ་ནས། ཞེས་པ་ནས། བོད་ལ་གྲུབ་ཐོབ་ཏུ་གྲགས་པ་དུ་མ་ཞིག་གིས་བསྐྲུན་པར་མི་ནུས་པའི་ཏིང་ངེ་འཛིན་བརྟན་པོ་རྙེད་པ་དང༌། ལྷག་པའི་ལྷས་བྱིན་གྱིས་བརླབས་ཤིང་བསྙེན་སྒྲུབ་དང་བཟླས་པ་ལ་གོམས་པ་རྨད་དུ་བྱུང་བས། རང་གཞན་གྱི་བདུད་དང་བར་དུ་གཅོད་པ་ཚར་གཅོད་པ་ལ་ཐོགས་པ་མེད་པའི་ནུས་པ་དང་ལྡན་པ་ལ་སོགས་པ་མདོར་ན་རྒྱུད་སྡེ་དང་མཐུན་པའི་རྡོ་རྗེ་འཛིན་པ་སོ་སོར་ཐར་པ་དང་འདུལ་བའི་ཀུན་སྤྱོད་རྣམ་པར་དག་ཅིང་བྱང་ཆུབ་སེམས་དཔའི་བསླབ་པའི་གནས་དག་ལ་ཐེག་པ་ཆེན་པོའི་སྡེ་སྣོད་དང་མཐུན་པར་གཅེས་སྤྲས་སུ་བྱེད་པ། སྡོམ་པ་གསུམ་གྱི་ཆུ་བོ་ཡན་ལག་བརྒྱད་དང་ལྡན་པས་ཐུགས་རྒྱུད་རྙོག་པ་མེད་པར་ལེགས་པར་གཏམས་པའི་སྡེ་སྣོད་འཛིན་པ་སྟོང་ཕྲག་མང་པོ་ཞིག་གིས། ནུབ་ཕྱོགས་ཛ་ལན་དྷ་ར་ནས་བཟུང་སྟེ། ཤར་ཕྱོགས་རྒྱ་མཚོ་ཆེན་པོ་ལ་ཐུག་པའི་རྒྱ་ནག་གི་རྒྱལ་ཁམས་ཡན་ཆད་དུ་ཅི་རིགས་པར་ཁྱབ་པར་འགྱུར་བ་འདི་ལྟ་བུ་ནི་རྗེ་བླ་མ་འདི་ཉིད་འབའ་ཞིག་གི་རྨད་དུ་བྱུང་བའི་འཕྲིན་ལས་དཔག་པར་དཀའ་བ་ཡིན་ནོ། །ཞེས་གསུངས་པ་ནི་རང་བཞིན་བརྗོད་པ་ཁོ་ན་ཡིན་ཏེ། འཇམ་དཔལ་རྩ་རྒྱུད་ལས། སངས་རྒྱས་མཛད་པ་བྱེད་པར་བཤད་པར་མ་ཟད། མ་ཅིག་ལབ་སྒྲོན་གྱིས་ཀྱང༌། མཐའ་ཡས་རྒྱུད་སྡེའི་ཚོགས་ལ་དབང་བསྐུར་ཞིང༌། །རྒྱུད་སྡེ་རྒྱ་མཚོའི་དགོངས་པའི་བཅུད་ཕྱུང་ནས། །གདུལ་བྱར་གྱུར་པའི་སྐལ་ལྡན་ཚིམ་པར་མཛད། །ཅེས་དང༌། རྡོ་རྗེ་གླིང་བའི་གཏེར་ལས་ཀྱང༌། དེ་ཡི་ཆོས་རྒྱུད་འཛིན་རྣམས་ཚེ་གཅིག་སངས་རྒྱས་ཡིན། །ཞེས་གསུངས་སོ། །སྤྲུལ་པའི་གླེགས་བམ་གྱི་མ་འོངས་ལུང་བསྟན་གྱི་ཐོག་མར་སྦས་པའི་བརྟུལ་ཞུགས་མཛད་པའི་བཟང་པོ་འགའ་རེ་འོང་སྟེ་དེ་པའང་བཤད་མི་འཚལ། གོང་བཞིན་དུ་རིགས་གསུམ་གྱི་སྐུའི་ངོ་བོ་གྱུར་པ་དགེ་སློང་བྱང་ཆུབ་སེམས་དཔའི་རིགས་བསྐྱེད་པ། དེའང་ཐམས་ཅད་ཐམས་ཅད་ལ་མཁས་མོད་ཀྱི། འོན་ཀྱང་གཅིག་གིས་ཁོ་བོའི་གཞུང་ལུགས་རྒྱ་མཚོ་ལྟ་བུ་འབྱེད་ཅེས་གསུངས་པས་རྗེ་བདག་ཉིད་ཆེན་པོ་ལུང་བསྟན་ཀྱང༌། གསལ་བར་མི་འཆད་པ་དང༌། གོ་རིམ་དང་ཆད་པ་ལྟ་བུར་ཚང་བར་མི་སྟོན་པ་དང༌། སྣར་ཐང་དང་དགའ་ལྡན་ཡང་ཡང་བསྐྱར་བས་ལྷག་པ་ཡིན་ཀྱང་དགོས་དབང་ཡིན་ཚུལ་སོགས་མ་འོངས་ལུང་བསྟན་ལས། ཇོ་བོས་དཔང་མཛོད་གྲོགས་པོ་རྣམས། །དེ་རིང་ཡོད་ངེས་དམ་པ་རྣམས། །གང་ནས་ཟིན་ཟིན་ཐོར་བུར་བསྒྲགས། །དེ་ལ་ཉེས་གང་མཐོལ་ལོ་བཤགས། །ལ་ལ་ཆད་དང་ལྷག་སྲིད་ནའང༌། །དགོས་པའི་དབང་ཡིན་ནོངས་པ་མེད། །ཅེས་སོགས་ཀྱི་ལྡེ་མིག་བྱས་ནས་དཔྱད་དགོས་ལ། ལུང་བསྟན་དེ་ཉིད་ལས། བྱང་རི་ལྷུན་པོ་བརྟན་པའི་རྩེར། །ཞེས་པ་ནས། དེ་ནི་རྡོ་རྗེ་གདན་དང་མཚུངས། །ལྷ་དང་ཀླུ་དང་གནོད་སྦྱིན་དང༌། །མི་དང་དྲི་ཟ་དག་གིས་མཆོད། །གང་ནས་བལྟས་ཀྱང་ལྷང་ངེར་གསལ། །ཞེས་ལྷ་ཀླུ་མི་སོགས་ཀྱི་སྐྱབས་གནས་གཅིག་པུ་དང༌། དགའ་ལྡན་སོགས་དགོན་པའི་མ་དང་ཡན་ལག་ཀྱང་མ་འོངས་ལུང་བསྟན་གྱི་འོག་གི་འཕྲོ་དེ་ཉིད་ལས། དེའི་རྒྱུད་པ་ལ་ཡང་བཀའ་གདམས་གཞུང་བར་གྲགས་ནས་གཞུང་བའི་ཆོས་གྲྭ་རྒྱ་མཚོ་ལྟ་བུ་དབུས་གཙང་གཉིས་སུ་ལྔའམ་དྲུག་ལ་ཉེ་བ་འོང༌། དབུས་སུ་གཞུང་ཀུ་པོར་གྲགས་ཏེ་དེ་དག་གི་མ་ལག་ལུང་པའི་སུལ། ཞེས་པ་ནས། ཉུང་ཤོས་དཔོན་གཡོག་གཉིས་གཉིས་ནས་བཟུང་སྟེ། བཞི་སྡེ། ལྔ་སྡེ། བརྒྱད། བཅུ། ཉི་ཤུ་ཙམ། བཞི་བཅུ་ལྔ་བཅུ་མན་ཆོད་རྡོ་རྗེ་གདན་གྱི་མཆོད་རྟེན་བཞིན་དུ་དཀར་པོ་སིབ་སིབ་ཏུ་འབྱུང་ཞེས་གསུངས། འདི་དང་མཐུན་པར་འོག་གི་ལུང་བསྟན་ལས་ཀྱང༌། མདོར་ན་གནས་མཆོག་དེ་དག་ཏུ། །དང་པོ་བཞི་གྲྭ་ནས་བཟུང་སྟེ། །ཐ་མར་སྟོང་ཕྲག་ཕྱེད་དང་གསུམ། །བསླབ་པ་གསུམ་ལྡན་ཤཱཀྱའི་སྲས། །འགྲོ་བ་ཀུན་གྱི་མགོན་དུ་འགྱུར། །ཞེས་གསུངས་པའི་དོན་གནས་གཅིག་ལ་གྲ་སོགས་མིན་པར་སྔར་བཤད་པ་ལྟར་རྒྱ་བོད་ཁམས་སོག་གི་ཡུལ་ཀུན་ཏུ་འབྱུང་བའི་དོན་ཡིན། སྤྱིར་སྤྱོད་འཇུག་ལས། གང་ལ་སེམས་ཀྱི་དམ་པ་རིན་ཆེན་དེ། །སྐྱེས་པ་དེ་ཡི་སྐུ་ལ་ཕྱག་འཚལ་ཞིང༌། །གང་ལ་གནོད་པ་བྱས་ཀྱང་བདེར་འབྲེལ་བ། །བདེ་བའི་འབྱུང་གནས་དེ་ལ་སྐྱབས་སུ་མཆི། །ཞེས་དང༌། འཇིག་རྟེན་ལྷ་མིར་བཅས་པའི་ཕྱག་བྱར་འགྱུར། །ཞེས་གསུངས་པ་ལྟར་ཡིན་ལ། དེའི་ནང་ནས། རྗེ་བདག་ཉིད་ཆེན་པོ་མཐོང་ཐོས་དྲན་ཞིང་རེག་ཚད་ཐམས་ཅད་ལ་མངོན་མཐོ་ངེས་ལེགས་ཀྱི་ཕན་ཡོན་འབྱུང་ངེས་ཡིན་པ་ནི། འཇམ་དཔལ་རྩ་རྒྱུད་ལས། ཐམས་ཅད་བྱང་ཆུབ་ལུང་བསྟན་ཏེ། །ང་ཡི་བྱང་ཆུབ་མཆོག་ཐོབ་སྟེ། །དེ་ནི་འཇིག་རྟེན་སྦྱིན་གནས་འགྱུར། །སྲིད་པ་གསུམ་གྱི་མཐར་ཡང་བྱེད། །སྔགས་དང་རྒྱུད་ལ་མངོན་བརྩོན་པ། །གྲགས་པ་འཛིན་པ་ཤེས་པར་བྱ། །ཞེས་དང༌། མདོ་སྡེ་གདམས་ངག་འབོགས་པའི་བསྟན་པ་དྭངས་སྙིགས་འབྱེད་པའི་ལེའུ་ལས་ཀྱང༌། རྨད་བྱུང་བཀོད་མཛེས་ཞིང་ཁམས་སུ། །རྒྱལ་བ་སེང་གེའི་ང་རོར་འགྱུར། །དེ་ལ་དད་བྱེད་ཞིང་དེར་སྐྱེ། །ཞིང་མཆོག་དེ་ནི་ཁྱད་པར་འཕགས། །ཞེས་དང༌། གསང་བའི་བདག་པོས་མཁན་ཆེན་ཕྱག་རྡོར་པ་ལ་ལུང་བསྟན་པ་ལས་ཀྱང༌། ཁོ་བོ་ལག་ན་རྡོ་རྗེས་ཀྱང་འདི་ཡི་ཡོན་ཏན་དཔག་པར་མི་ནུས་ཤིང༌། ཞེས་པ་ནས། མཐོང་ཐོས་རེག་གསུམ་གྱིས་ཕན་ཡོན་ཐོབ་པའི་གང་ཟག་ཡིན་པས། ཁོང་གི་རྒྱུད་ཚོད་གཞན་གྱིས་རྟོགས་པར་མི་ནུས་སོ། །ཞེས་དང༌། མ་ཅིག་ལབ་སྒྲོན་གྱིས་ཀྱང༌། དགེ་སློང་དེ་དང་ཐུག་པའི་སེམས་ཅན་གང་དག་རྣམས་ནི་དམུ་རྒོད་བོད་དུ་བསྟན་མཐར་སྐྱེས་ཀྱང་དོན་ཆེན་འགྲུབ་པ་ཡིན་ནོ། །ཞེས་སོགས་དང༌། མཐོང་ཐོས་རེག་གསུམ་འདྲེན་པར་ལུང་བསྟན་པའི་རྗེ་རྒྱལ་བ་གཉིས་པས་སྔར་སངས་རྒྱས་བྱང་སེམས་དུ་མས་བྱིན་གྱིས་བརླབས་ཤིང་ལུང་བསྟན་པའི་དགོན་པ་ཆེན་པོ་དགའ་ལྡན་རྣམ་པར་རྒྱལ་བའི་གླིང་འདི་བཏབ་ཅིང་གནས་འདི་ནི། སྤྲུལ་པའི་གླེགས་བམ་ལས། དེ་ནི་རྡོ་རྗེ་གདན་དང་མཚུངས། །ལྷ་དང་ཀླུ་དང་གནོད་སྦྱིན་དང༌། །མི་དང་དྲི་ཟ་དག་གིས་མཆོད། །གང་ནས་བལྟས་ཀྱང་ལྷང་ངེར་གསལ། །ཞེས་གསུངས་པ་ལྟར་ནག་ཕྱོགས་སྡེ་རིས་མཐའ་དག་མཐུ་སྟོབས་དང༌། བསྟན་བསྲུང་རྣམས་ཀྱིས་ཚར་བཅད་ཅིང༌། རྟག་ཆད་ལྟ་བའི་རི་བོ་མཐའ་དག་བཅོམ་ཞིང་བར་དོ་ལོངས་སྐུར་སངས་རྒྱས་པར་མཛད་པས་གངས་ཅན་གྱི་རྡོ་རྗེ་གདན་ཆེན་པོ་ལྷ་ཀླུ་གནོད་སྦྱིན་མི་དང་དྲི་ཟ་སོགས་ཀྱིས་མཆོད་པར་མཛད་པའི་གནས་མཆོག་འདི། ཇོ་བོ་ཡབ་སྲས་སམ། རྗེ་བདག་ཉིད་ཆེན་པོ་རང་ཉིད་ཀྱི་སྤྲུལ་པ་སྣ་ཚོགས་པ་དུ་མ་འོངས་ཤིང་གནས་འདི་སྐྱོང་ཚུལ་ནི། སྤྲུལ་པའི་གླེགས་བམ་ལས། བདག་གི་སྤྲུལ་པ་དམ་པ་ཞིག །རེས་འགའ་དགེ་སློང་ཉིད་དུ་སྤྲུལ། །རེས་འགའ་བྱིས་པའི་གཟུགས་སུ་འོང༌། །རེས་འགའ་དབུལ་ཕོངས་སྤྲང་པོའི་གཟུགས། །རེས་འགའ་བྱོལ་སོང་བྱ་ཁྱིའི་གཟུགས། །ཞེས་པས་གང་ཟག་སྣ་ཚོགས་དང་གཟུགས་ཀྱི་སྤྲུལ་པ་དང༌། ཡང་གླེགས་བམ་ལས། རེས་འགའ་གསོལ་འདེབས་དབྱངས་ཀྱི་གཟུགས། །རེས་འགའ་ཡིག་འབྲུ་གཟུངས་ཀྱི་གཟུགས། །གྲགས་པ་ཅན་གྱི་དགེ་སློང་ངོ༌། །བསྟན་གནས་བར་དུ་ཡང་ཡང་འོང༌། །ཞེས་གསུངས་པ་ལྟར་སངས་རྒྱས་ཀྱི་བསྟན་པ་གནས་ཀྱི་བར་དུ་སྤྲུལ་པ་སྣ་ཚོགས་ཡང་ཡང་འོང་བ་དང༌། སྔོན་རྗེ་ཞལ་བཞུགས་དུས་ཀྱང་གཎྜིའི་སྒྲ་གྲག་པ་དང༌། རིའི་ཕྱོགས་བཞིའི་ཤར་གྱི་རྡོ་རྗེ་འཇིགས་བྱེད་དཔའ་གཅིག་རང་བྱོན་དང༌། དུང་དང་དམིགས་བརྩེ་མ་རང་བྱོན་སོགས་དང༌། ཕྱོགས་སོ་སོར་གྲགས་ཆེ་བས། རི་འདི་ཡང་པཎ་ཆེན་ཐམས་ཅད་མཁྱེན་པ་ཆེན་པོས་རང་བྱོན་གྱི་ཕུང་པོ་འཁོར་ལོ་སྡོམ་པའི་ཕོ་བྲང་དུ་འདུག་གསུངས་པ་ལྟར་དོན་ལ་གནས་པས་བརྗོད་ཀྱིས་མི་ལངས་ཤིང༌། དགོན་པ་འདིའི་རྟེན་གཅོ་བོ་ལྷ་མིའི་མཆོད་གནས་མཐོང་ཐོས་དོན་ལྡན་བྱེད་པའི་རྟེན་མཐའ་ཡས་པ་ལས་རགས་རིམ་བརྗོད་ན། ཡངས་པ་ཅན་གྱི་གཙང་ཁང་དུ་ལྷ་བཟོའི་བཟོ་ཐིག་སོགས་ཕལ་བ་མིན་པར་སྐུ་རྒྱུའི་བྱིན་རླབས་བཟོ་བོའི་སྐྱེད་ཆོག་དང་ལག་ཆ་གང་དགོས་རྒྱུད་སྡེའི་དགོངས་པ་ལྟར་གྱི་སྐྱེད་ཆོག་སོགས་རྗེ་རང་ཉིད་ཀྱིས་མཛད་ནས་བྱིན་རླབས་ཀྱི་ཕུང་པོར་བསྐྲུན་པར་མ་ཟད། ཕྱག་ཚད་ཀྱང་ཤཱ་རིའི་བུ་དང༌། ཚངས་པ་ཨེ་ཊའི་བུ་ལ་སོགས་པས་ཞུས་པར་གྲགས་པ་སོགས་ཡོད་ཀྱང༌། གཙོ་བོར་འཁྲུལ་མེད་ནི་བདེ་མཆོག་སྡོམ་འབྱུང་གིས་སངས་རྒྱས་བྱང་སེམས་ལྷ་ཞི་ཁྲོ་དུ་མའི་ཕྱག་ཚད་སྟོན་པ་དང༌། དེའི་འགྲེལ་པ་རཏྣ་རཀྵི་ཏས་མཛད་པ་དང༌། གཤིན་རྗེ་གཤེད་དམར་ནག་གི་རྒྱུད་གཉིས་ཀྱི་ལེའུ་རེ་རེས་ཕྱག་ཚད་སྟོན་པ་རྣམས་གུང་བསྒྲིགས་ནས་ཚད་དང་ལྡན་པར། སྟོན་པའི་སྐུ་གཟུགས་ཇོ་བོའི་སྐུ་ཚད་ལས་ཅུང་ཆེ་བ་གསེར་ཟངས་ལས་བསྒྲུབ་པ། པད་སྦྲགས་དང་བཅས་པའི་དཔངས་གཞུ་འདོམ་གང་སོར་བཅུ་ཡོད་པ། ནང་རྟེན་སོགས་རྗེ་བླ་མ་ཉིད་ཀྱིས་མཛད་པ། རབ་གནས་རྒྱས་པར་མཛད་པས་ཚུལ་ཁྲིམས་ཀྱི་དྲི་ངད་ལྡང་བ་ཐུབ་པ་ཚུལ་ཁྲིམས་མར་གྲགས་པ། རྗེ་རིན་པོ་ཆེས་མ་འོངས་པ་ན་ཇོ་བོ་རིན་པོ་ཆེ་ཀླུས་གདན་དྲངས་པའི་ཚེ་འདི་ཇོ་བོའི་སྐུ་ཚབ་ཡོངས་པར་ལུང་བསྟན་པར་གྲགས་པ། ལན་རེ་མཐོང་བས་ཀྱང་སངས་རྒྱས་ཀྱི་སྨོན་ལམ་དང་རྗེ་བཙུན་ཙོང་ཁ་པ་ཆེན་པོའི་ཐུགས་རྗེའི་ཤུགས་ཀྱིས་མངོན་མཐོ་ངེས་ལེགས་ཀྱི་ས་བོན་བསྐྲུན་ངེས་འདི་བཞུགས། རྗེ་འདིས་དེ་ལྟར་ཕྱག་ཚད་མཛད་པས་དེའི་སྲས་ཀུན་གྱིས་ཀྱང་དེ་ལྟར་བྱས་ཤིང་ཕྱག་ཚད་ཀྱི་ཟིན་བྲིས་ཡང་ཡོད་ཅིང༌། ཁྱད་པར་དུ་རྒྱལ་བ་དགེ་འདུན་གྲུབ་པས་བཀྲ་ཤིས་ལྷུན་པོར་དེ་ལྟར་མཛད་པས་སྨན་ཐང་བ་སྔ་ཕྱིའི་ཟིན་བྲིས་དང༌། སྨན་བླ་དོན་གྲུབ་དང༌། སྤྲུལ་སྐུ་ང་ལ་གཟིགས་སམ་འཕྲང་ཁང་པ་དཔལ་ལྡན་བློ་གྲོས་གཉིས་ཀྱིས་ཡིག་ཆ་ལེགས་པ་རེ་མཛད་པས་དེང་སང་ཕྱོགས་ཐམས་ཅད་དུ་ཁྱབ་པར་གྱུར་ཏོ། །དེ་ཡང་འདིའི་རྒྱབ་ཡོལ་དུ་སངས་རྒྱས་སོ་ལྔའི་སྐུ། གཡས་ གཡོན་དུ 
་ལྡེམ་དང་བཅས་པ་གཟི་བྱིན་བླ་ན་འབར་བ་དང༌། དེའི་
གཡོན་དུ ་རྒྱལ་ཚབ་དར་མ་རིན་ཆེན་གྱིས་རྒྱུ་ཕྱག་ཚད་སྔ་མ་ལྟར་མཛད་ནས་ནང་རྟེན་དུ། གསེར་ཟངས་ལས་གྲུབ་པའི་འོད་དཔག་མེད་སྐུ། རྗེ་དེ་སོགས་དམ་པ་དུ་མས་ཕྱག་ནས་འཐོར་བའི་བྱིན་རླབས་ཤིན་ཏུ་ཆེ་བ་དང༌། གཡོན་དུ ་མཁས་གྲུབ་ཐམས་ཅད་མཁྱེན་པ་སོགས་འབྲི་ཕག་སོ་སོས་རྗེ་བདག་ཉིད་ཆེན་པོའི་དགོངས་རྫོགས་སུ་ཟངས་ཀྱི་དད་འབུལ་མང་པོ་བྱུང་བ། མཁས་གྲུབ་ཐམས་ཅད་མཁྱེན་པས་རྒྱུའི་བྱིན་རླབས་ཕྱག་ཚད་ཞིབ་ཐིག་གནང་ནས་རབ་གནས་མཛད་པ། གསེར་ཟངས་ལས་གྲུབ་པའི་ཐུབ་དབང་གི་ཚད་གཞུ་འདོམ་གང་དང་སོར་དགུ་ཡོད་པ། བྱིན་རླབས་དང་གཟི་བྱིན་ཕན་ཚུན་འགྲན་པ་ལྟ་བུ། རྒྱབ་ཡོལ་སངས་རྒྱས་སོ་ལྔ་དང༌། གསོལ་ལྷུང་དང་བཅས་པ་འདི་བཞུགས། དེའི་ གཡོན་དུ ་རྗེ་བཙུན་འཇམ་དབྱངས་ཀྱིས་བསྐྱེད་རྫོགས་གྱི་རྟོགས་པ་ཁྱད་པར་ཅན་འཁྲུངས་པའི་སློབ་མ་བདུན་ལུང་བསྟན་པའི་ནང་ཚན་དང༌། རྗེ་བཙུན་གྱིས་འཁོར་དག་པ་རྣམ་བརྒྱད་ཕྱག་གཡོག་ཏུ་གནང་བའི་ནང་ཚན་དུས་འཁོར་གྱི་སྟོང་གཟུགས་དང༌། གསང་བདེ་འཇིགས་བྱེད་ཀྱི་རིམ་གཉིས་ཀྱི་རྟོགས་པ་ཁྱད་པར་ཅན་སྐྱེས་པར་ཞང་ཞུང་ཆོས་དབང་གྲགས་པའི་བསྟོད་ཚོགས་སོགས་ནས་བཤད་པ་ལྟར་མངའ་བ། ཤར་གྱི་གདན་ས་ཡང་འདིའི་གདན་ས་ཡིན་པ། དེའི་དགོངས་རྫོགས་ལ་བཞེངས་པའི་གསེར་ཟངས་ཀྱི་ཐུབ་དབང་སྐུ་བྱིན་ཅན་འདི་བཞུགས། དེའི་གཡོན་གྱི་རྣམ་རྒྱལ་མཆོད་རྟེན་འདོམ་ཕྱེད་དོ་བ་འདི་ནི། རྗེ་བཙུན་གྱིས་ལུང་བསྟན་པའི་འཁོར་དག་པ་རྣམ་བརྒྱད་ཀྱི་ཐོག་མ་འཇམ་དཀར་བ། རྟོགས་པའི་ཡོན་ཏན་གྱི་ཕུང་པོ་དེའི་གདུང་ཐལ་ལས་གྲུབ་པ་ཡིན་ལ། གདུངས་འབུམ་དགའ་ལྡན་གྱི་སྐོར་ལམ་གྱི་ནང་གི་དེ་ཡིན་པར་ངག་རྒྱུན་དང༌། པཎ་ཆེན་རིན་པོ་ཆེས་གསུངས་ཚུལ་དེ་མོ་སྤྲུལ་སྐུ་ངག་དབང་དགེ་ལེགས་ཀྱི་རྣམ་ཐར་ན་ཡོད། དེའི་གཡོན་གྱི་རྒྱལ་བ་སེང་གེའི་ང་རོའི་གསེར་སྐུ་འདི་ནི། འཇམ་དབྱངས་གཙང་པ་བདུན་གྱི་ནང་ཚན་ལྔ་པ་བ་སོ་ཆོས་ཀྱི་རྒྱལ་མཚན་རང་ཉིད་ཀྱིས་རྒྱུ་ཐིག་ཚད་སྔར་བཞིན་མཛད་ནས་བཞེངས་ཤིང་རབ་གནས་སོགས་མཛད། བྱིན་རླབས་རྒྱལ་བ་སེང་གེ་ང་རོ་དང་མཚུངས་པར་གྲགས་པ་འདིའི་ཁྲི་འདི་ཡང་རྒྱལ་བ་ཙོང་ཁ་པ་ཆེན་པོའི་འོད་གསལ་གཟིམས་ཁྲི་ཡིན་ནོ། །སྤྲུལ་པའི་གླེགས་བམ་ལས། ཁྲིམས་འཆལ་བྱོལ་སོང་སྐྱོང་བར་བྱེད། །སྡིག་གྲོགས་འཕེལ་ཞིང་སྐྱོན་གྱིས་གང༌། །རང་ཉིད་མི་བསྲུན་གཞན་ལ་འཕྱ། །ནོར་བདུན་འདོར་ཞིང་ནོར་མིན་སྒྲུབ། །ཅེས་སོགས་ལྟར་བཀའ་གདམས་ཀྱི་བསྟན་པ་སྔ་མ་ཡང་དེ་འདྲར་གྱུར་སྐབས་སུ་ལྔ་བརྒྱའི་ཐ་མར་བསྟན་པའི་མེ་རོ་གསོ་ཞིང༌། གྲགས་པ་བྱང་རིའི་རྩེ་མོར་སྐུ་གདུང་དམ་པ་བཞག་ནས་ཐུགས་རྗེའི་འོད་ཟེར་གྱིས་དད་ལྡན་དཔག་མེད་སྡུད་ཚུལ་དང༌། བསྟན་པ་གནས་ཀྱི་བར་དུ་སྤྲུལ་པ་ཡི་གེ་དང༌། འོད་ཟེར་དང༌། དབྱངས་དང༌། གཟུགས་བརྙན་དང༌། གང་ཟག་སྣ་ཚོགས་འབྱོན་ལ། རྒྱ་མཚོ་ལྟ་བུའི་དགོན་པ་འོང་བར་བཤད་པས། རྗེ་རྒྱལ་བ་ཁོ་ན་ལུང་བསྟན་དང༌། དགའ་སྣར་ཐང་བྱང་ཆེན་དང༌། སངས་རྒྱས་སེང་གེའི་ལུང་བསྟན་ཁྱད་པར་མི་ཚང་ལས། ལུང་བསྟན་འདི་ལ་སེང་གེའི་མཚན་ཉིད་མི་ལྡན་བཞིན་དུ་རི་བོང་གིས་ཨང་ཉན་མི་བྱེད་པར་ལུང་བསྟན་ཚུལ། ཇི་སྐད་དུ། གླེགས་བམ་གྱི་སྔར་གྱི་ལུང་བསྟན་གྱི་འཕྲོ་ཉིད་དུ་གླེགས་བམ་ལས། འོན་ཀྱང་ལྔ་བརྒྱའི་ཐ་མར་ཡང༌། །བསྟན་པའི་མེ་རོ་དེ་ན་གནས། །རྒྱལ་བ་མྱ་ངན་འདས་པ་ཡི། །རིང་བསྲེལ་སྐྱེ་རྒུས་མཆོད་པར་བྱེད། །བྱང་རི་ལྷུན་པོ་བརྟན་པའི་རྩེར། །བྱང་ཆུབ་གནས་ཞེས་གྲགས་པའི་སར། །བདག་གིས་བྱིན་རླབས་སེང་གེའི་སྒྲ། །སྐུ་གདུང་དམ་པ་དེར་གནས་ཏེ། །ཐུགས་རྗེས་འོད་ཟེར་ཕྱོགས་བཅུར་འཕྲོ། །ཞེས་པ་ནས། བསྟན་གནས་བར་དུ་ཡང་ཡང་འོང༌། །ཞེས་གསུངས་པ་ལྟར་གནས་འདིར། སྔར་ནས་སངས་རྒྱས་ཟིན་ཀྱང་ཚུལ་བསྟན་ལ་རྗེ་བདག་ཉིད་ཆེན་པོས་བདུད་རིགས་ཚར་བཅད། བར་དོ་ལོངས་སྤྱོད་རྫོགས་པའི་སྐུར་སངས་རྒྱས་པའི་ཚུལ་བསྟན་པའི་གནས་ཡིན་པས་བྱང་ཆུབ་ཀྱི་གནས་དང༌། རྡོ་རྗེ་གདན་དང་མཚུངས་པར་ལུང་བསྟན་པའི་སྐུའི་རགས་པའི་ཟུང་འཇུག་གི་ཟ་མ་ཏོག་བསྟན་པ་ཡུན་རིང་དུ་གནས་པའི་རྟེན་འབྲེལ་དུ། མ་ཉམས་པར་ཙན་དན་འབའ་ཞིག་ལས་བསྒྲུབ་པའི་སྒྲོམ་དུ་བཞུགས་པ། སོ་སོས་དད་འབུལ་གྱི་དངུལ་བྲེ་ཆེན་བཅོ་བརྒྱད་སོགས་ཀྱིས་གདུང་རྟེན་སྔར་བཤད་པ་ལྟར་མཆོད་རྟེན་གྱི་ཆ་ཚད་ཕུན་སུམ་ཚོགས་པ་རིན་པོ་ཆེའི་ཕྲ་སྣ་ཚོགས་པས་སྤྲས་པ་བཞེངས་ཏེ། དེ་དག་གི་བུམ་པར་སྐུ་གདུང་སྣམ་སྦྱར་གྱིས་དྲིལ་བ་ཙན་དན་གྱི་སྒྲོམ་དང་བཅས་པ་བཞུགས་ཤིང༌། རིམ་གཉིས་ཀྱི་ཏིང་ངེ་འཛིན་ཕ་རོལ་ཏུ་ཕྱིན་པའི་རྡོ་རྗེ་སློབ་མ་དག་པ་རྣམ་བརྒྱད་ཀྱི་ལྷག་བདུན། རྒྱལ་ཚབ། འདུལ་འཛིན། མཁས་གྲུབ་ཐམས་ཅད་མཁྱེན་པ་སོགས་ཀྱིས་རབ་གནས་རྨད་བྱུང་གནང་བ་དངུལ་གདུང་མཐོང་བ་དོན་ལྡན་དུ་གྲགས་པ་མིང་དོན་གནས་ཀྱི་བྱིན་རླབས་ཀྱི་སྐྱེ་དགུའི་ནོར་བུ་འདི་ལ་ཡང་ཕྱི་དུས་སུ་དཔའ་རིས་གསེར་ཏོག་ནང་སོས་དེ་ནང་རྟེན་བྱས་ཏེ་རྣམ་རྒྱལ་མཆོད་རྟེན་ཕྲ་རྒྱན་ཕུན་སུམ་ཚོགས་པ་སྟེང་འོག་བར་གསུམ་ལ་འོས་པའི་བླ་མ་ཡི་དམ་ཆོས་སྐྱོང་སྐུ་དུ་མས་སྤྲས་པ་ཁྱད་འཕགས་འདི་བྱས་སོ། །དེའི་མདུན་དུ་རྗེ་བདག་ཉིད་ཆེན་པོའི་སྐུ་འོད་ཟེར་མར་གྲགས་པ་འདི་ལ་འོད་ཟེར་འཕྲོས་པ་གཙང་ཁང་གི་ཐུབ་པ་དང་འོད་གསལ་ཕུག་གི་ལྡེབ་རིས་རྗེ་བདག་ཉིད་ཆེན་པོ་རང་གི་འདྲ་སྐུ་གསུམ་འབྲེལ་བྱུང་བས་དེ་ལྟར་གྲགས་ཤིང༌། ད་ལྟ་ཡང་དུས་བཟང་ལ་དེ་ལྟར་འོང་བར་གྲགས་ཤིང༌། རྒྱལ་བ་གོང་མ་དག་དང༌། པཎ་ཆེན་གོང་མ་དང༌། གཟིམས་ཁང་གོང་མ་དག་བྱོན་དུས་མཆོད་རྟེན་དང་སྐུ་འདི་དག་ལ་འོད་སོགས་བྱུང་བ་རྣམ་ཐར་དང་ངག་རྒྱུན་ལ་གྲགས་ཤིན་ཏུ་ཆེ་བ། བྱིན་རླབས་རྗེ་རང་ཉིད་དང་ཆ་འདྲ་བ། མདུན་དུ་རྗེ་རང་གི་གསོལ་ལྷུང་གསོལ་དཀར་དང་བཅས་པ་ལགས། འདིའི་གཡས་སྐུ་འདི་རྒྱལ་ཚབ་རིན་པོ་ཆེའི་སྐུ་དང༌། གཡོན་སྐུ་མཁས་གྲུབ་རིན་པོ་ཆེའི་སྐུ་ཡིན། བདེ་མཆོག་དཔུང་སྐུ་རྒྱ་གར་མ་དང༌། རྒྱ་ནག་མར་གྲགས་པ་གཉིས་རང་རང་གི་བླ་མའི་སྐུ་མདུན་དུ་ཡོད་པ་བླ་མ་གཉིས་ཀྱི་ཐུགས་དམ་གྱི་རྟེན་དུ་གྲགས། འཇམ་དབྱངས་སེང་ཞོན་མ་རྗེའི་ཐུགས་དམ་གྱི་རྟེན་ཁྱད་འཕགས་ཕྲ་རྒྱན་ཕུན་སུམ་ཚོགས་པ་འདི་ལ་སོགས་པ་སྐུ་རྟེན་བྱིན་རླབས་ཅན་དུ་མ་བཞུགས། དཔལ་གསང་བདག་གྲུབ་ཆེན་ལས་ཀྱི་རྡོ་རྗེའི་ལུང་བསྟན་ལས། ཆོས་རྗེ་བློ་བཟང་གྲགས་པ་ཁྱེད་རང་གི་གདན་ས་འཛིན་མཁན། མཁས་ཤིང་གྲུབ་པ་བརྙེས་པ་མང་པོ་ཡོངས་པ་འདུག ཁྱེད་རང་གི་རྗེས་ལ་གཙང་པའི་དགེ་བའི་བཤེས་གཉེན་ཁྱེད་རང་གི་ཐུགས་ཁེངས་པ་བདུན་འབྱུང་ཞེས་གསུངས་པ་ལྟར། འཇམ་དབྱངས་གཙང་པ་བདུན་བརྒྱུད་ཀྱི་ཐོག་མ། རྗེ་རིན་པོ་ཆེ་ལ་བཅོམ་ལྡན་འདས་དུས་ཀྱི་འཁོར་ལོས། ཟླ་བ་བཟང་པོ་ཁྱོད་ཀྱི་རིགས་ལྡན་པདྨ་དཀར་པོ་དང༌། འཇམ་དཔལ་གྲགས་པ་གཉིས་རྗེས་སུ་ཟུངས་ཤིག་ཅེས་ལུང་བསྟན་པའི་པདྨ་དཀར་པོ་ནི་རྒྱལ་ཚབ་དང༌། འཇམ་དཔལ་གྲགས་པ་མཁས་གྲུབ་རྗེ་ཡིན་པར་གྲགས་ཆེ་བ་ལྟར། རིགས་ལྡན་པད་དཀར་གྱི་རྣམ་འཕྲུལ་རྒྱལ་ཚབ་ཐམས་ཅད་མཁྱེན་པའི་གདུང་ཞུགས་ལ་ཕུལ་བར་རིང་བསྲེལ་ཤེལ་ལྟ་བུ་དཔག་མེད་ཕེབས་པ་ཕལ་ཆེར་ནང་ དུ་བཞུགས་པའི་མཆོད་རྟེན་གཡས་ཀྱི་དང་པོ་འདི་ལགས། དངུལ་གདུང་ཆེན་མོའི་གཡོན ་གྱི་མཆོད་རྟེན་འདི་ནི་འཇམ་དབྱངས་བདུན་བརྒྱུད་ཀྱི་གཉིས་པ། རིགས་ལྡན་འཇམ་དཔལ་གྲགས་པའི་རྣམ་སྤྲུལ། མ་འོངས་པ་ན་དྲག་པོ་འཁོར་ལོ་ཅན་དུ་སྤྲུལ་པ་འཛམ་གླིང་མཁས་པའི་གཙུག་ནོར་མཁས་གྲུབ་ཐམས་ཅད་མཁྱེན་པའི་སྐུ་གདུང་ཞུགས་ལ་ཕུལ་བས་ཞུན་ཐིག་ལས་བདེ་མཆོག་དྲིལ་བུ་པའི་སྐུ་བལྟ་བས་ཆོག་མི་ཤེས་པ་དང༌། རིང་བསྲེལ་ཁ་དོག་སྣ་ལྔ་དུ་མ་ཕེབས་པར་དགའ་ལྡན་གྱི་གདན་རབས་ལས་བཤད་པ་ལྟར་ཕལ་ཆེར་ནང་རྟེན་དུ་བཞུགས་པས་བྱིན་རླབས་ཤིན་ཏུ་ཆེ་བ་ལགས། རྒྱལ་ཚབ་ཀྱི་རྟེན་གྱི་གཡས་སུ་མཐུ་སྟོབས་དབང་ཕྱུག །མ་རུང་བ་མཐའ་དག་གི་གཉེན་པོ། དཔལ་གསང་བའི་བདག་པོ་དང་རྡོ་རྗེ་འཇིགས་བྱེད་གཉིས་སུ་མེད་པ། རྗེ་རང་ཉིད་ཀྱིས་སངས་མ་རྒྱས་བར་དུ་ཐུགས་རྗེས་འཛིན་པར་ཞལ་གྱིས་བཞེས་པ། འཇམ་དབྱངས་བདུན་གྱི་གསུམ་པ་རྗེ་ལེགས་པ་རྒྱལ་མཚན་གྱི་གདུང་གི་དབུ་ཀླད་ཞུན་ཐིགས་ལས་རྡོ་རྗེ་འཇིགས་བྱེད་ཀྱི་སྐུ་ཞལ་ཕྱག་ཡོངས་རྫོགས་པ་ནང་དུ་བཞུགས། མཁས་གྲུབ་རྟེན་གྱི་ གཡོན་དུ ་འཇམ་དབྱངས་བདུན་གྱི་བཞི་པ་རྗེ་བློ་གྲོས་ཆོས་སྐྱོང་གི་དངུལ་གདུང་བཀྲ་ཤིས་སྒོ་མང་རྗེ་ཆོས་སྐྱོང་རང་གིས་བཞེངས་ཤིང་རབ་གནས་མཛད་པ་དང༌། ཞྭ་ལུ་བའི་མཆོད་རྟེན་གྱི་གཡས་སུ་བདེ་སྟོང་གི་ཏིང་ངེ་འཛིན་ཟབ་མོ་སྐྱེས་པ་འཇམ་དབྱངས་བདུན་གྱི་ལྔ་པ་བ་སོ་ཆོས་ཀྱི་རྒྱལ་མཚན་གྱི་དངུལ་གདུང་བྱང་ཆུབ་མཆོད་རྟེན་ཁྱད་འཕགས། མཁས་གྲུབ་ཆོས་རྗེའི་རྟེན་གྱི་ གཡོན་དུ ་རྩེ་ཤར་ཁྲི་གསུམ་དུ་གྲགས་པའི་བྱང་རྩེའི་ཁྲིའི་ཐོག་མ་མཁས་གྲུབ་ཟུང་དུ་འབྲེལ་བ། རྗེ་བདག་ཉིད་ཆེན་པོའི་ཉེ་གནས་ལོ་བཅུ་གཉིས་མཛད་ནས་བྱང་ཆུབ་ཀྱི་སེམས་ཞུས་པས་བདག་པས་གཞན་གཅེས་པའི་བྱང་ཆུབ་སེམས་ཀྱི་གཏེར་ཆེན་པོ་ཧོར་སྟོན་ནམ་མཁའ་དཔལ་གྱི་རྟེན་དངུལ་གྱི་མཆོད་རྟེན་བཀྲ་ཤིས་སྒོ་མང་རྟེན་ཕྲ་སྐུ་སོགས་བཀོད་པས་མཛེས་པ་བྱིན་རླབས་ཅན་འདི་ལགས། དེའི་ གཡོན་དུ ་འཇམ་དབྱངས་བདུན་གྱི་དྲུག་པ་མཁས་གྲུབ་ཆེན་པོ་བློ་གྲོས་བསྟན་པ་ཞེས་པ་པོ་ཏི་ཆེས་མང་པོར་ཐུགས་བཤད་མཛད་པ། དྭགས་པོ་གྲྭ་ཚང་སོགས་དགེ་འདུན་གྱི་སྡེ་ཆེ་ཆུང་དུ་མ་བཙུགས་པ་དེའི་དངུལ་གདུང་བཀྲ་ཤིས་སྒོ་མང་སངས་རྒྱས་བྱང་སེམས་ཀྱི་སྐུ་གདུང་དུ་མས་སྤྲས་པ་འདི་ལགས། རྒྱ་གུར་གྱི་གོས་འདི་བྱམས་ཆེན་ཆོས་རྗེས་དངུལ་གདུང་མཐོང་བ་དོན་ལྡན་ལ་ཕུལ་བར་ཕྱིས་སུ་ཡར་རྒྱབ་པས་ལེན་འདོད་ཀྱིས་དམག་ལན་གསུམ་བྱས་ཀྱང༌། མཐུ་སྟོབས་དབང་ཕྱུག་འཇམ་དབྱངས་བདུན་པ་སྨོན་ལམ་དཔལ་བས་མགོན་པོའི་གཏོར་ཆེན་གྱི་བཟློག་པར་དེབ་ཐེར་གཞོན་ནུའི་དགའ་སྟོན་ལྟར་ལགས་ལ། ལ་ལས་དེ་དུས་སམ་དེའི་གོང་ནས་ཀྱང་མགོན་ཆོས་ཀྱི་སྐུ་མི་གསལ་ཙམ་རང་བྱོན་བྱུང་བ་རྗེ་སྨོན་ལམ་དཔལ་བས་རི་མོར་བྱས་པར་གྲགས་ཤིང༌། གང་ལྟར་ཡེ་ཤེས་པ་མངོན་སུམ་པ་ལྟར་ཡོད་སྣང༌། རྒྱ་གུར་གྱི་སྒོའི་གཡས་སུ་ཁྲི་རིན་པོ་ཆེ་སངས་རྒྱས་དཔལ་བཟང་གི་དངུལ་གདུང༌། གཡོན་དུ ་མཁས་གྲུབ་ཆེན་པོ་སྒོམ་སྡེ་ནམ་མཁའ་རྒྱལ་མཚན་གྱི་དངུལ་གདུང་ཡོད། འདིའི་ཁྲི་པ་སོ་སོའི་རྟེན་གྱི་ལོ་རྒྱུས་གདན་རབས་གཉིས་ལས་བྲིས། ཡངས་པ་ཅན་གྱི་བྱང་གི་གཙང་ཁང་དུ་རྗེ་རང་གིས་རྒྱུ་དང་བཟོ་བོ་ལག་ཆ་ཚོན་སོགས་ལ་བྱིན་རླབས་གནང་ཞིང༌། སྔར་ལྟར་ཕྱག་ཚད་རྗེ་རང་ཉིད་ཀྱིས་བཀོད་པ་གནང་སྟེ། རྒྱུ་གོས་དར་བཟང་པོ་ཁོ་ན་བརྡུངས་པའི་དར་འདག་འབའ་ཞིག་ལས་གྲུབ་པའི་རྡོ་རྗེ་འཇིགས་བྱེད་ཞལ་ཕྱག་ཡོངས་རྫོགས་བཞེངས་པ། འདིའི་རྩ་ཞལ་ནི་རྣམ་ཐར་ཟུར་འདེབས་སུ། གཞན་ཡང་རྡོ་རྗེ་འཇིགས་བྱེད་ཆེན་པོ་བཞེངས་དུས་རྩ་ཞལ་རང་བྱོན་པ་དང་ཞེས་གསུངས་པ་ལྟར་རྩ་ཞལ་རང་བྱོན་པ་དང༌། ཡང་རྣམ་ཐར་ཟུར་འདེབས་ལས། རྡོ་རྗེ་འཇིགས་བྱེད་ཆེན་པོའི་རབ་གནས་ཀྱི་ཉིན་པར་ནམ་མཁའ་དྭངས་པའི་དཀྱིལ་ནས། སྒྲ་ཆེན་པོ་འབྲུག་སྒྲ་ཙམ་ཞིག་བྱུང་ནས་མཆོད་ཁང་དུ་ཞུགས་པ་ཀུན་གྱིས་ཚོར་ལ། དེ་དང་མཚུངས་པའི་གསང་འདུས་རིམ་ལྔ་དང༌། བདེ་མཆོག་རིམ་ལྔའི་རྣལ་འབྱོར་པ་འགས་རྡོ་རྗེ་འཇིགས་བྱེད་ཀྱི་དཀྱིལ་འཁོར་ནམ་མཁའ་གང་བ་ཙམ་ཕྱོགས་བཞི་ཀ་ནས་བྱུང་ནས་ལྡེར་སྐུ་ལ་ཐིམ་པ་སོགས་སུ་གཟིགས་སོ། །ཞེས་གསུངས་པ། རྗེ་བདག་ཉིད་ཆེན་པོ་རང་གིས་རབ་གནས་མཛད་དེ་ཡེ་ཤེས་པ་མངོན་སུམ་དུ་བཞུགས་ཤིང༌། ཐུགས་ཀ་ན་དྲོད་ལྕོག་སྒོང་ཙམ་ཡོད་པར་གྲགས་ལ། དེ་བཞིན་དུ་རྗེ་རང་གི་ཞལ་བཀོད་ལྟར་རྒྱལ་ཚབ་རྗེས་མགོན་པོ་སོགས་བཞེངས་པས་རང་བྱོན་ལྟར་བྱུང་བར་རྣམ་ཐར་ཟུར་འདེབས་སུ་བཤད་པ་འདི་ན་མགོན་ཆོས་གཉིས་སོགས་མངོན་སུམ་ལྟར་རྒྱུ་བའི་ལོ་རྒྱུས་དང་རྟགས་མཚན་མང༌། སྟེང་གི་བློས་བསླང་འདི་ཡང་རྗེ་བདག་ཉིད་ཆེན་པོ་རང་གིས་ཕྱག་ཚད་བྱིན་རླབས་སོགས་མཛད་པས་ལུགས་ཕུད་ལ་ཁཎྜ་ཀཱ་པ་ལ་འཇའ་ཚོན་མ་དང༌། རྡོར་དབྱིངས་ཀྱི་ཡང་རྡོ་རྗེ་རྒྱལ་པོ་དང༌། རྡོ་རྗེ་ཆགས་པ་གཉིས་འཇའ་ཚོན་མར་བྱུང་ཚུལ་ཡང༌། གནས་རྙིང་ཀུན་དགའ་བདེ་ལེགས་ཀྱི་རྗེའི་རྣམ་ཐར་ལས། ཁྱད་པར་དུ་གཞལ་ཡས་ཁང་རྣམས་ཀྱི་ལུགས་ཕུད་ལ་དཔའ་པོ་ཁཎྜ་ཀཱ་པ་ལ་འཇའ་ཚོན་མ་བྱུང་སྟེ། ཞེས་དང༌། ཡང་དེ་ཉིད་ལས། གཞན་ཡང་རྡོར་དབྱིངས་ཀྱི་རྡོ་རྗེ་རྒྱལ་པོ་དང༌། རྡོ་རྗེ་ཆགས་པ་གཉིས་ཀྱང་འཇའ་ཚོན་མར་བྱོན་ནོ། །ཞེས་གསུངས་པ་ལྟར་ཡིན་ལ། སྐུ་འདི་དག་ལ་ད་ལྟ་སོ་སོ་ལ་མཐོང་སྣང་འཇའ་ཚོན་ཡོད་མེད། ཟངས་དང་གསེར་སྐུ་མཐོང་ཚུལ་སྣ་ཚོགས་པ་འབྲས་སྤུངས་འཇིགས་བྱེད་དང༌། གསང་ཕུའི་བསེ་ཁྲབ་པའི་སྐུ་སོགས་དང་འདྲ་བར་སྣང་ལ། བློས་བསླང་གསུམ་ཀའི་གཙོ་བོ་གསུམ་རང་བྱོན་ལྟར་བྱུང་བ་དང། བདེ་མཆོག་གི་གཙོ་བོའི་ཐུགས་ཀ་ནས་དྲོད་རྟ་རྔ་ཙམ་རྗེའི་རྣམ་ཐར་ཟུར་འདེབས་སོགས་ལས་བཤད་ཅིང༌། མཐོང་ཐོས་ཐམས་ཅད་ལ་དངོས་གྲུབ་ཆེན་པོ་སྩོལ་པའི་སངས་རྒྱས་དངོས་ཀྱི་རྣམ་པར་བཞུགས་པ་འདི་ལགས་སོ། །