ཡི་རངས་ཤིང་བསྡུས་ཏེ་གདམས་པ།
གསུམ་པ་ཡི་རངས་ཤིང་བསྡུས་ཏེ་གདམས་པ་ལ་གསུམ། ཡི་རངས་ཤིང་གུས་པས་བསྟོད་ཅིང་ངོ་མཚར་ཆོས་ཀྱི་སྒྲོན་མེ་གཞན་ལ་གསལ་བར་མཛད་པར་བསྐུལ་ཞིང་གསོལ་བ་གདབ་པ། ཆོས་ཕྱོགས་འཛིན་ཅིང་ཤོང་བའི་སྣོད་བསྟན་པ། བསྡུས་ཏེ་སྙིང་པོའི་གདམས་པ་དངོས་སོ། །
དང་པོ། དེ་ལྟར་ཟབ་མོའི་སོགས་ཚིགས་བཅད་བཅུས་བསྟན་ཏེ། དེ་ལྟར་ཤིན་ཏུ་རྟོགས་པར་དཀའ་བའི་དོན་ཟབ་མོའི་གནས་ལ་ཇི་སྐད་བསྟན་པའི། དྲི་བ་རྣམ་པ་བདུན་པོ་ཟབ་རྒྱས་སམ་ཟབ་པ་དང་རྒྱ་ཆེ་བའི་དོན་ཅན་རྣམས་དེ་ལྟར་ལུང་རིགས་དྲི་མ་མེད་པས་
ལེགས་པར་བཤད་པའི་ཚིག་རྣམས་ཀྱིས་ཡང་དག་པར་བཀྲོལ་བའི་ཚེ་ན་ཐོལ་བྱུང་ལྡོམ་བུ་པའི་དྲི་བ་པོ་དེ་ཡང་ཟབ་མོ་ཤིན་ཏུ་རྟོགས་པར་དཀའ་བའི་གནས་བདུན་པོའི་དོན་ལ་ངེས་པའི་ཤེས་པ་ཐེ་ཚོམ་གྱི་སྨག་དང་བྲལ་བར་གྱུར་ཏེ། དགའ་མགུ་ཡི་རང་ནས་ལུས་གུས་པ་དང་བཅས་ཏེ་ངག་གིས་འདི་སྐད་དུ་ཀྱེ་མ་ཞེས་སྐྱོ་བའི་ཉམས་ཀྱིས་དཔེར་ན་ཁྲོན་པའི་ཆུ་མིག་ཆུང་ངུ་ལ་གནས་པའི་རུས་སྦལ་གྱིས་ཆུ་མིག་ཆུང་ངུ་དེ་རྒྱ་མཚོ་ཆེན་པོར་རློམས་པས་མཆོག་ཏུ་སྙེམས་པས་ཁེངས་པར་གྱུར་པ་ཡང་གཟོད་རྒྱ་མཚོ་ཆེན་པོ་མཐོང་བས་བསྙིལ་ཞིང་བརྒྱལ་ཏེ་ཤི་བར་གྱུར་པ་བཞིན་དུ་རང་ལ་མ་གྲགས་པའི་གཞན་གཞུང་མདོ་རྒྱུད་ཟབ་མོའི་ཆོས་ཀྱི་ཚུལ་རྒྱ་མཚོ་ཆེན་པོའི་འཇིངས་ལྟ་བུ་རང་གི་ཇི་བཞིན་མ་མཐོང་ཞིང་མ་རྟོགས་པར་རང་གཞུང་ཚུར་མཐོང་གི་བཞེད་པ་ཁྲོན་པའི་ཆུ་མིག་ལྟ་བུ་མཆོག་ཏུ་རློམ་ཞིང་སྙེམས་པས་དྲེགས་པའི་རོ་རབ་ཏུ་མྱོང་བ་དང་ལྡན་པའི་བདག་ཅག་རྣམས་ཀྱི་མཆོག་ཏུ་རློམས་པའི་ཁེངས་པ་ཁྱེད་གསུང་ངོ་མཚར་ཟབ་མོའི་གཏམ་འདི་རྨང་མེད་དུ་བསྙིལ་བར་མཛད་པ་འདི་ནི་ཤིན་ཏུ་ཡི་རངས་ཤིང་གུས་པའི་གནས་མཆོག་ཏུ་གྱུར་པའོ། །དེ་ཕྱིར་ཤིན་ཏུ་ཟབ་པ་དང་རྒྱ་ཆེ་བས་ངོ་མཚར་གཏམ་གྱི་འབྱུང་གནས་ཀུན་མཁྱེན་གཉིས་པ་རོང་ཟོམ་མ་ཧཱ་པཎྜི་ཏ་ཆོས་བཟང་དང་རྒྱལ་བའི་དབང་པོ་ཀུན་མཁྱེན་ཀློང་ཆེན་རབ་འབྱམས་ཞེས་མཚན་སྙན་གྱི་གདུགས་དཀར་པོ་ས་གསུམ་ན་མངོན་པར་མཐོ་ཞིང་གྲགས་པ་རྗེ་བཙུན་ངག་གི་དབང་པོ་ངུར་སྨྲིག་གར་
གྱིས་རོལ་བར་བསྟན་པའི་འཇམ་དཔལ་དགྱེས་པའི་ཟློས་གར་འཕགས་མཆོག་རྣམས་གཉིས་ཀྱི་ཐུགས་གཉིས་སུ་མེད་པའི་ཡེ་ཤེས་ཀྱི་རྒྱ་མཚོ་ཆེན་པོ་ཡི་ཀློང་ན། ཐུན་མོང་མ་ཡིན་པའི་མདོ་རྒྱུད་སྣ་ཚོགས་པའི་ངེས་དོན་ཟབ་མོའི་ནོར་བུའི་ཆོས་མཛོད་རབ་ཏུ་མང་པོ་བསམ་གྱིས་མི་ཁྱབ་པ་མངའ་བ་ལས་ལེགས་པར་འཁྲུངས་པའི་ཆོས་ཚུལ་ཟབ་མོའི་དགོངས་འགྲེལ་ནོར་བུ་རིན་པོ་ཆེ་དབང་གི་རྒྱལ་པོ་ལྟ་བུ་ད་ལྟ་མངོན་སུམ་དུ་བཞུགས་པ་དེ་དག་རྣམས་སྤངས་ནས་དེ་དག་ལ་བསྐྲུན་ན་གཞན་གྱི་གཞུང་ལུགས་ནོར་བུ་འཆིང་བུར་རེ་ཞིང་མཆོད་པར་རློམས་པ་རྣམས་འཁྲུལ་བའི་གཞན་དབང་གིས་ཐུན་མོང་མིན་པའི་ངེས་དོན་ཟབ་མོའི་ནོར་བུ་རིན་པོ་ཆེ་མཆོག་གི་བགོ་སྐལ་ལས་རེ་ཞིག་རང་རང་ཕྱི་བཤོལ་དུ་གྱུར་པ་ནི་ཀྱེ་མའོ་དམན་པའི་གནས་ལ་ཕྱིན་པའོ། །དེས་ན་བདེན་པ་གཉིས་ཀྱི་ཆོས་ཀྱི་ཚུལ་ཤིན་ཏུ་བཟང་པོར་བདེན་གཉིས་དཔྱོད་པའི་ཚད་མ་ཡང་དག་པའི་རིགས་པས་རྣམ་པར་དཔྱད་པས་ངེས་པའི་ཤེས་པ་ཐེ་ཚོམ་གྱི་སྨག་ཐམས་ཅད་དང་བྲལ་བ་མཆོག་ཏུ་རྙེད་པའི་བསམ་པ་ཅན་ནམ་བློ་གྲོས་ཅན་ལུང་དང་རིགས་པ་ཟབ་མོ་ལ་དབང་འབྱོར་བ་རྣམས་ནི་དུས་རྟག་ཏུ་མདོ་རྒྱུད་ངེས་དོན་ཟབ་མོ་ལས་བློ་ཕྱིར་བཟློག་པའི་བདུད་དང་ཕས་ཀྱི་རྒོལ་བ་གང་གིས་ཀྱང་མི་ཚུགས་ཤིང་བར་ཆད་བྱེད་པ་མེད་པས་གཡུལ་ལས་མཆོག་ཏུ་རྣམ་པར་རྒྱལ་ཏེ་ལོག་སྨྲ་ཚར་གཅོད་པ་དང་། སྐལ་ལྡན་རྗེས་སུ་འཛིན་པ་ལ་གཞན་ལས་མཆོག་ཏུ་འཕགས་ཤིང་འགྲན་ཟླ་ཀུན་
དང་བྲལ་བ་ཁོ་ན་ཡིན་ནོ། །དེ་ཡི་ཕྱིར་ན་ཚུར་མཐོང་བྱིས་པའི་རི་དྭགས་སུས་ཀྱང་བཟོད་པར་དཀའ་བའི་མདོ་རྒྱུད་ཟབ་མོའི་བདེན་གཉིས་དཔྱོད་པའི་རིགས་ལམ་སེངྒེའི་སྒྲ་བོ་ཆེ་ཇི་སྐད་བསྟན་པར་རབ་ཏུ་བསྒྲགས་པས་དཔལ་ལྡན་སངས་རྒྱས་པདྨ་སྐྱེས་སམ་ཨོ་རྒྱན་མཚོ་སྐྱེས་རྡོ་རྗེའི་བསྟན་པའི་རིང་ལུགས་སྔ་འགྱུར་གྱི་མདོ་རྒྱུད་ཟབ་མོའི་ཁྱད་པར་མཆོག་ལ་གཞན་དྲིངས་མི་འཇོག་པའི་ཡིད་ཆེས་ཟབ་མོ་རྙེད་པར་གྱུར་ཅིང་རང་མཐོང་གི་མདོ་རྒྱུད་དགོངས་འགྲེལ་ཕྱོགས་རེས་ཁེངས་ཤིང་དྲེགས་པས་མཆོག་ཏུ་བསྙེམས་པས་གཞན་ཕྱོགས་ཀྱི་གྲུབ་མཐར་སུན་འབྱིན་སྤྲོ་བར་བྱེད་པ་གཞན་དག་སུས་ཀྱང་མི་བཟློག་པའམ་མི་འཕྲོག་པའི་ཚད་མ་བདེན་གཉིས་དཔྱོད་པའི་ཤེས་རབ་ཀྱི་རལ་གྲིའི་ཡུ་བ་མཆོག་ལ་ཡང་དག་པར་བརྟེན་པའི་སྐལ་བ་བཟང་པོའི་གོ་སྐབས་གཞན་པ་དེ་དག་ལ་གནང་ཞིང་སྦྱིན་པར་མཛོད་ཅིག་དང་། ཟབ་མོའི་ཆོས་ཀྱི་ཕོངས་རྒུད་དང་བྲལ་ཞིང་མདོ་རྒྱུད་ངེས་དོན་མཆོག་ལ་ངེས་པ་རྙེད་པའི་སྐལ་བཟང་དམ་པར་འགྱུར་རོ། །དེས་ན་མདོ་སྔགས་ཀྱི་ཆོས་ཚུལ་ཐུན་མོང་པ་མང་དུ་ཐོས་པ་རོ་བཅུད་ཞིམ་མངར་ལྡན་པའི་བདུད་རྩིའི་རྒྱ་མཚོ་ཆེན་པོ་དང་འདྲ་བའི་ཐུན་མོང་མ་ཡིན་པའི་མདོ་རྒྱུད་ཟབ་མོའི་དགོངས་དོན་ཕུན་སུམ་ཚོགས་པ་གང་ཡིན་པ་དེ་ནི་བདུད་རྩིའི་རྒྱ་མཚོ་དེ་ཡི་ཡང་སྙིང་པོར་གྱུར་པ་ཡིད་བཞིན་གྱི་ནོར་བུ་དབང་གི་རྒྱལ་པོ་བཞིན་དུ་གནས་པ་དེ་དག་རང་དང་གཞན་གྱི་གང་ཟག་གང་གི་སྙིང་ན་ངེས་པར་གནས་ཤིང་བཞུགས་པར་གྱུར་ན་དེ་ཉིད་ལྟར་སྣང་ལ་མཆོག་དམན་བཟང་ངན་ཅི་འདྲར་
སྣང་ཀྱང་རུང་རང་མཐོང་གིས་སྙེམས་པ་མེད་པར་འབད་རྩོལ་བརྒྱ་ཕྲག་དག་གིས་གུས་པ་མཆོག་གིས་བླང་བར་བྱ་སྟེ། ཟབ་མོའི་དོན་གྱིས་དབུལ་ན་གང་ཟག་སུ་ཡང་ལྟར་སྣང་ཅི་ཙམ་བཟང་ཡང་མི་ཕན་པས་གང་ཟག་ལ་མི་རྟོན་ཆོས་ལ་རྟོན་དགོས་པའི་ཕྱིར་ན་གྲགས་སྙན་གྱིས་རྗེས་སུ་འབྲང་བར་མི་བྱ་བར་ངེས་དོན་ཟབ་མོའི་དོན་ལ་རྟོན་པས་བརྩོན་པས་འབད་པ་རྣལ་འབྱོར་དུ་བྱ་དགོས་སོ། །དེ་ཡི་ཕྱིར་ན་ཐུན་མོང་མ་ཡིན་པའི་མདོ་རྒྱུད་ངེས་དོན་ཟབ་མོའི་དགོངས་དོན་ཉིད་ཐུན་མོང་གི་མདོ་སྔགས་རིགས་གནས་དང་བཅས་པ་མང་དུ་ཐོས་ཤིང་ལུང་རིགས་མང་དུ་སྨྲ་བས་ཀྱང་རང་གར་རྟོགས་པ་མིན་ལ་དེར་མ་ཟད་སྔོན་བསགས་སྐྱེས་ཐོབ་ཀྱི་ཤེས་རབ་ཆེ་ཞིང་ད་ལྟར་སྦྱངས་བརྩོན་མི་དམན་པས་བློ་གྲོས་ཟབ་ཟབ་མོ་ལྟར་སྣང་བ་རྣམས་ཀྱིས་གཏན་ཚིགས་ཀྱིས་དཔྱད་པས་ཀྱང་མི་ཕིགས་པའམ་མི་རྟོགས་པའི་ངེས་པའི་མདོ་རྒྱུད་ཟབ་མོའི་དགོངས་དོན་ས་འོག་ན་གནས་པའི་ཡིད་བཞིན་གྱི་ནོར་བུ་རིན་པོ་ཆེའི་གཏེར་བཟང་པོ་དང་འདྲ་བ་ལྟར་སྣང་ཇི་འདྲར་གནས་ཀྱང་གང་ཟག་གང་གིས་འདི་ཉིད་རང་གིས་འཛིན་ཅིང་གཞན་ལ་སྤེལ་བ་དེ་ནི་ཚོགས་བསགས་སྒྲིབ་པ་དག་པའི་བློ་གྲོས་མཆོག་དང་ལྡན་པས་གཞན་ལས་ཁྱད་པར་དུ་འཕགས་པའི་སྐྱེས་བུ་དམ་པ་ཉིད་དུ་འབྲས་བུའི་རྟགས་ཀྱིས་ཤེས་ཤིང་རྟོགས་ནུས་པའི་ཕྱིར་ན་དུས་རྟག་ཏུ་དེ་ལ་གུས་པ་མཆོག་གིས་བརྟེན་ཅིང་མཉེས་པར་བྱས་ཏེ་གདམས་པའི་བདུད་རྩི་རབ་ཏུ་མྱོང་བར་བྱ་དགོས་སོ། །དེས་ན་
མདོ་རྒྱུད་སྙིང་པོའི་དགོངས་དོན་ཟབ་མོ་ཇི་བཞིན་རྟོགས་པའི་བློ་གྲོས་ཀྱི་གཏེར་ཟབ་མོ་འབུམ་ཕྲག་ནོར་བུའི་སྣོད་མཆོག་ཉིད་དུ་ཕྱོགས་རེར་ཞེན་པའི་བདག་གི་བློ་འདི་ཡང་ཟབ་ཅིང་ཡངས་པ་རྒྱ་མཚོ་ཆེན་པོའམ་ཆེར་བསྒྲུབས་པའི་ཟབ་མོའི་གདམས་པའི་ལེགས་བྱས་མཆོག་སློང་བའི་དུས་ལ་བབ་པར་རིགས་ནས་ཀླུ་ཡི་དབང་པོ་བློ་གྲོས་མཆོག་གི་མཐུ་དཔལ་གྱི་བྱུང་བའི་ཟབ་རྒྱས་ཀྱི་གདམས་པའི་རྒྱ་མཚོར་གུས་པ་ཆེན་པོས་དགའ་མགུ་ཡི་རང་བཞིན་དུ་ལེགས་པར་འཐུངས་ཞིང་ཚིམ་པར་བྱའོ། །གང་གི་ཐུགས་གཉིས་སུ་མེད་པའི་བློ་གྲོས་ཟབ་མོའི་མཐུ་ལས་བབས་པའི་ལེགས་པར་བཤད་པའི་ཟབ་རྒྱས་ཀྱི་གདམས་པ་ ཆུ་ཀླུང་བཟང ་པོ་དག་གིས་དེ་ཉིད་གང་ལས་བྱུང་བའི་རྣམ་པར་དཔྱོད་པའི་བློ་གྲོས་ཟབ་ཅིང་རྒྱ་ཆེ་བ་ཡི་རྒྱ་མཚོ་ཟབ་ཅིང་ཁྱོན་ཡངས་པར་ངེས་པར་རྟོགས་པར་འགྱུར་ལ། དེ་འདྲའི་བློ་གྲོས་མཆོག་རྒྱ་མཚོ་ཆེན་པོ་ལྟ་བུ་དེ་ཡི་འབྱུང་གནས་ཀླུ་ཡི་དབང་པོའམ་རྒྱལ་པོ་ལྟ་བུ་ནི་སྔ་འགྱུར་རིག་འཛིན་བརྒྱུད་པའི་ཞལ་ལུང་མདོ་རྒྱུད་མན་ངག་ཟབ་མོ་ཉིད་དུ་ངེས་པར་རྟོགས་པར་ཡང་འགྱུར་རོ། །དེས་ན་ཐུན་མོང་མིན་པའི་མདོ་རྒྱུད་མན་ངག་ཟབ་མོའི་དགོངས་དོན་ནམ་མཁའ་ལྟ་བུ་ཕ་མཐའ་དང་བྲལ་བ་བློ་གྲོས་ཆེན་པོའི་ཧུབ་ཀྱིས་ཏེ་ཧུབ་གཅིག་གིས་སྐད་ཅིག་ཉིད་དུ་འདྲེན་ཅིང་ཟོས་པའི་དགོངས་བཅུད་ཟབ་མོའི་སྙིང་ལ་ཀུན་ཏུ་ཕན་པའི་བདུད་རྩིའི་རྒྱ་མཚོ་ཆེན་པོའི་དཔྱིད་དཔལ་ཉིད་དུ་ལེན་པའི་མཐུ་ཆེན་པོ་བློ་ལ་མྱུར་དུ་ཐོབ་པར་མཛད་པའི་ངོ་མཚར་
རྨད་དུ་བྱུང་བ་ཐུན་མོང་མ་ཡིན་པའི་མདོ་རྒྱུད་མན་ངག་ཟབ་མོའི་ཆོས་ཀྱི་སྒྲོན་མེ་བཟང་པོ་མཆོག་ཏུ་འབར་བ་བསྐལ་བཟང་དམ་པ་རྣམས་ལ་གསལ་ཞིང་སྣང་བར་མཛོད་ཅིག་ཅེས་བསྐུལ་ཞིང་གསོལ་བ་གདབ་པའོ། །
གཉིས་པ། དེ་སྐད་ཟེར་ཞིང་སོགས་ཚིགས་བཅད་གཉིས་ཀྱིས་བསྟན་ཏེ། གོང་དུ་བསྟན་པ་དེ་སྐད་ཟེར་ཞིང་གུས་པ་མཆོག་གིས་བཏུད་དེ་གནས་པའི་ཚེ་གཟུ་བོར་གནས་པའི་དྲང་སྲོང་མཆོག་དེ་ཡིས་དྲི་བ་བོ་དེ་ལ་ཡང་བློ་གྲོས་ཆུང་ཞིང་ཟབ་པ་མིན་པ་ཉིད་བློ་གྲོས་ཆེ་ཞིང་ཟབ་རྒྱས་སུ་བསྒྲུབ་པར་བྱེད་པ་གོང་དུ་ཇི་སྐད་བསྟན་དག་གིས་དོན་རྣམས་བསྡུས་ནས་འདི་ལྟར་གདམས་ཏེ། དེ་ལ་ཡང་དང་པོ་ཆོས་མཆོག་མདོ་རྒྱུད་ཟབ་མོ་སེངྒེའི་འོ་མ་ལྟ་བུ་འདི་ནི་བློ་གྲོས་ཟབ་མོའི་སྣོད་བཟང་པོ་རིན་ཆེན་གསེར་སྣོད་མཆོག་ལྟ་བུ་ཁོ་ནས་འཛིན་ཅིང་སྣོད་གཞན་ཕལ་པ་གང་དུ་ཇི་ལྟར་འབད་ཀྱང་མི་གནས་པར་སྣོད་ཀྱང་འཆག་ལ་བཅུད་ཀྱང་ཟག་ནས་ཆུད་ཟ་བ་ལྟར་བློ་གྲོས་དམན་པ་དག་གིས་ཇི་ལྟར་འབད་ཀྱང་མདོ་རྒྱུད་མན་ངག་ཟབ་མོའི་དོན་བློ་ལ་མི་ཤོང་ཞིང་མི་རྟོགས་པས་འཛིན་པར་མི་ནུས་པས་ཆུད་གཟན་པར་འགྱུར་ལ། ཆོས་མཆོག་མདོ་རྒྱུད་མན་ངག་ཟབ་མོའི་དོན་འདི་ཤོང་ཞིང་འཛིན་པའི་སྣོད་ནི་བློ་གྲོས་བཟང་པོ་ཟབ་ཅིང་རྒྱ་ཆེ་བ་འདི་ཁོ་ན་ཡིན་ནོ། །
གསུམ་པ་བསྡུས་ཏེ་སྙིང་པོའི་གདམས་པ་དངོས་ནི། ཨ་ནི་མ་སྐྱེ་སོགས་ཚིགས་བཅད་ལྔ་དང་རྐང་པ་གཅིག་གིས་བསྟན་ཏེ། དེ་ལ་གོང་གི་དོན་ཇི་ལྟར་བསྡུས་ཏེ་གདམས་ན། མདོ་
རྒྱུད་ཐམས་ཅད་ཀྱི་གནད་དྲིལ་བའི་མན་ངག་ཟབ་མོ་འདི་ལ། ཨ་ཞེས་པའི་ཡི་གེ་འདི་ནི་སྐྱེ་བ་མེད་པས་མེད་དགག་ཡིན་བཞིན་དུ་རང་སྣང་བ་སྟེ། དེས་ན་བདེན་པ་གཉིས་ཆར་མི་སྐྱེ་བར་བསྟན་པས་སྐྱེ་བ་མེད་པའི་སྒོ་མཚོན་བྱེད་ཡིན་པས་མ་སྐྱེས་པའི་ཆོས་ཀྱི་སྒོ་ཞེས་བྱའོ། །དེ་བཞིན་དུ་ར་ཞེས་པ་འདི་ནི་རྡུལ་མེད་པས་མཉམ་པ་ཉིད་རྟོགས་པ་ལ་རང་དོན་དུ་སྲིད་པ་དང་ཞི་བ་ལ་དགའ་བའི་ཡིད་ཀྱི་ཆགས་རྡུལ་མེད་པར་འཇུག་དགོས་པའི་སྒོ་མཚོན་བྱེད་ཡིན་པས་རྡུལ་དང་བྲལ་བའི་སྒོ་ཞེས་བྱའོ། །པ་ཞེས་པ་འདི་ནི་མཉམ་བཞག་ཡང་དག་པ་ལ་འཛིན་སྟངས་ཅི་ཡང་མེད་ཀྱང་དྲན་མེད་མུན་པ་འཐུམས་པོ་ལྟ་བུ་ལྷག་མཐོང་གི་སྣང་བ་དང་བྲལ་བའང་མིན་པས་དོན་དམ་མཐར་ཐུག་མཐོང་བའི་སྒོ་མཚོན་བྱེད་ཡིན་པས་དོན་དམ་སྣང་བའི་སྒོ་ཞེས་བྱའོ། །ཙ་ཞེས་པ་འདི་ནི་དཔྱད་པ་ཡང་དག་པས་མཐའ་བཞིའི་སྤྲོས་པ་ཉེ་བར་ཞི་བའི་ངེས་ཤེས་ཟབ་མོས་དྲངས་པའི་མཉམ་པར་འཇོག་པ་ཁྱད་པར་ཅན་ཡིན་པས་རྣམ་པར་རྟོག་པའི་འགྱུར་བའམ་བློས་བྱས་ཀྱི་འཆི་འཕོ་མེད་པར་མཉམ་པ་ཉིད་ཆོས་ཀྱི་སྐུར་གནས་པའི་སྒོ་མཚོན་བྱེད་ཡིན་པས་འཆི་འཕོ་སྐྱེ་བ་མེད་པའི་སྒོ་ཞེས་བྱའོ། །ན་ཞེས་པ་འདི་ནི་བདེན་པ་གཉིས་ལ་གཙོ་ཆེ་ཆུང་རྣམ་པ་ཀུན་ཏུ་མེད་དེ་སྣང་སྟོང་གཉིས་འབྲལ་མི་ཤེས་པའི་ཕྱིར་མེ་དང་ཚ་བ་བཞིན་ནོ། །དེ་གཉིས་ཐ་སྙད་དུ་ནི་མགོ་མཉམ་སྟེ་ཐ་སྙད་སྒྲ་རྟོག་གི་ཡུལ་ཡིན་པས་སོ། །དོན་དམ་པར་དེ་གཉིས་དབྱེར་མེད་པའི་གནས་ལུགས་ནི་སྒྲ་རྟོག་གི་ལམ་ལས་འདས་པ་ན་མིང་དང་བྲལ་ཏེ་བསམ་གྱིས་
མི་ཁྱབ་པར་སྟོན་པའི་སྒོ་མཚོན་བྱེད་ཡིན་པས་མིང་དང་བྲལ་བ་ཉིད་ཀྱི་སྒོ་ཞེས་བྱའོ། །དྷཱི་ཞེས་པ་འདི་ནི་དེ་འདྲའི་སྣང་སྟོང་བདེན་པ་དབྱེར་མེད་པའི་དོན་ཟབ་མོ་ཉིད་ཆོས་ཅན་རྡུལ་ཕྲན་ལྟ་བུ་གཅིག་གི་སྟེང་དུ་ད་ལྟ་ནས་གཏན་ལ་ཕབ་ཏེ་ཆོས་ཐམས་ཅད་མཉམ་པ་ཉིད་ཚུར་མཐོང་ལས་འདས་པའི་དོན་ཟབ་མོ་ཤེས་ཤིང་རྟོགས་ན་ཡང་མཐུན་སྣང་གི་བལྟ་བྱའི་སྣང་བ་ལ་དཔྱད་དེ། དེ་དཔེར་བཟུང་ན། དོན་དམ་སྤྲོས་བྲལ་ཁས་ལེན་མེད་པའི་ཚུལ་དང་། ཐ་སྙད་ཁས་ལེན་ཡོད་པའི་ཚུལ་དང་། དེ་གཉིས་མི་འགལ་བར་སྦྱར་ནས་ཐ་སྙད་ཀྱི་ཁས་ལེན་ཚུལ་མཐོང་གི་རྣམ་བཞག་ཕར་ཕྱིན་ཐེག་པ་ནས་གསང་སྔགས་རྡོ་རྗེ་ཐེག་པའི་བར་དུ་ཤེས་པའི་སྒོའམ་མཚོན་བྱེད་ཡིན་པས་བློ་གྲོས་ཟབ་མོའི་སྒོ་ཞེས་བྱའོ། །དེ་ལ་དྲི་བ་དང་པོ་དངོས་གཞི་སྣང་སྟོང་ཟུང་འཇུག་གི་ཚུལ། གཉིས་པས་དེ་ཉན་རང་སོགས་ཀྱི་སྤྱོད་ཡུལ་མིན་པས་ཟབ་པར་བསྟན་ནོ། །གསུམ་པས་ཟུང་འཇུག་དེ་ཇི་ལྟར་སྒོམ་ཚུལ། །བཞི་པས་བསྒོམ་པ་དེ་རྒྱུད་ལ་ཇི་ལྟར་སྐྱེད་ཚུལ། ལྔ་པས་ཟབ་མོའི་རྟོགས་པ་རྒྱུད་ལ་སྐྱེས་པའི་ངོར་བདེན་གཉིས་ཇི་ལྟར་འཆར་ཚུལ་དང་། དྲུག་པ་དེའི་ངོར་ཆོས་ཐམས་ཅད་མཉམ་པ་ཉིད་དུ་འཆར་ཚུལ་གཉིས། བདུན་པ་རང་གིས་རྟོགས་པ་བཞིན་གཞན་ལ་ཟབ་མོའི་ལྟ་བ་འདོམས་ཚུལ་བསྟན་ནོ། །དེ་ལྟར་རྒྱལ་བས་གསུང་བའི་རྒྱུ་འབྲས་ཐེག་པའི་མདོ་འགགས་ཐམས་ཅད་དེར་འདུས་པ་ཡིན་པས་འདིའི་གནད་དོན་ཚུལ་བཞིན་དུ་ཤེས་པར་གྱུར་ན་མདོ་སྔགས་རྒྱ་མཚོའི་
འགགས་མདུད་ཁྲོལ་བས་རང་གིས་རྟོགས་པ་དང་གཞན་ལ་འདོམས་པའི་སྤོབས་པའི་གཏེར་ཆེན་པོ་བརྒྱད་ཀྱི་སྒོ་འབྱེད་པ་ཡིན་ནོ། །དེས་ན་ཡི་གེའི་སྒོ་རེ་རེ་ལས་ཕྱོགས་དུས་ཀྱིས་བསྡུས་པའི་ཆོས་ཚུལ་ཚད་མེད་པ་གོ་ཞིང་རྟོགས་པ་ནི་བརྡའ་ཞེས་བྱ་བ་ཡིན་ལ། དོན་གཅིག་ལས་བརྩམས་ཏེ་དོན་ཀུན་བསྐལ་བ་ནས་བསྐལ་བར་བརྗོད་ཀྱང་ཟད་པར་མི་འགྱུར་བས་བློ་གྲོས་མི་ཟད་པའང་ཡིན། དོན་གཅིག་གི་ནང་དུ་ཆོས་ཀུན་འདུ་ཞིང་དོན་གཅིག་གིས་ཀྱང་ཆོས་ཀུན་སྟོན་པར་ནུས་པ་ནི་ཆོས་ཀྱི་གཏེར་འདོན་པའང་ཡིན། ཡི་གེ་གཅིག་གི་ནང་དུ་ཡི་གེ་ཀུན་བསྡུ་ཞིང་མཉམ་པ་ཉིད་དུ་ངེས་པའང་ཡིན་ལ་ཐམས་ཅད་བསྡོམས་ནས་མཉམ་པ་ཉིད་ཟུང་འཇུག་གི་ཡེ་ཤེས་གཅིག་ཉིད་གཏན་ལ་ཕབས་པའང་ཡིན་ནོ། །དེ་ནི་ཆོས་ཀྱི་གཏེར་འདོན་པའི་མན་ངག་ཟབ་མོ་ཡང་ཡིན་ཏེ་ཡི་གེའི་སྒོ་ཨ་ལ་སོགས་པ་དྲུག་པོ་དེ་དག་རེ་རེར་ཡང་བདེན་པ་གཉིས་གཉིས་ཀྱི་ཚུལ་གྱིས་སྣང་སྟོང་བདེན་གཉིས་དབྱེར་མེད་ཟུང་འཇུག་སྐྱེ་འགགས་དང་བྲལ་བར་དམིགས་ནས་སུ་སྟེ། འདི་ལྟ་ཡི་གེ་ཨ་ལྟ་བུ་བརྗོད་བྱེད་དང་མ་སྐྱེ་བས་ལྟ་བུ་བརྗོད་བྱའི་དོན་དག་ཀྱང་གདོད་མ་ནས་སྐྱེ་བ་མེད་པ་ཡིན་པས་མཉམ་པ་ཉིད་ཡིན་ལ་མཉམ་པ་ཉིད་ཀྱིས་མཉམ་པ་ཉིད་ལ་བརྗོད་དུ་མེད་དེ་ནམ་མཁའ་ལ་ནམ་མཁས་རི་མོ་བྲིས་པ་བཞིན་ཏེ། དེ་ལྟ་ནའང་བརྗོད་མེད་བརྗོད་པ་ཀུན་གྱི་རྒྱུ་མཆོག་ཡིན་པས་བསྐལ་པ་ནས་བསྐལ་བར་བརྗོད་ཀྱང་ཆོས་ཀྱི་དབྱིངས་ལ་བྲི་གང་ངམ་ཟད་འཕེལ་ཡོང་ཡེ་མེད་ཅིང་ཆོས་ཐམས་ཅད་བརྗོད་པ་ཙམ་དུ་ཤེས་པ་ནི་དོན་དམ་པར་དམིགས་པའི་སྒོ་དང་། དེ་བཞིན་དུ་བརྗོད་བྱེད་ར་དང་བརྗོད་བྱ་རྡུལ་དང་བྲལ་བ། བརྗོད་བྱེད་པ་དང་བརྗོད་བྱ་དོན་དམ་འོད་གསལ། བརྗོད་བྱེད་ཙ་དང་བརྗོད་བྱ་འཆི་འཕོ་མེད་པ། །བརྗོད་བྱེད་ན་དང་བརྗོད་བྱ་མིང་དང་
བྲལ་བ། དྷིཿལྟ་བུ་བརྗོད་བྱེད་ཟུང་འཇུག་གཉིས་སུ་མེད་པའི་ཡེ་ཤེས་ཟབ་མོ་ལྟ་བུ་བརྗོད་བྱའི་དོན་དེ་དག་ཀྱང་རེ་རེ་བཞིན་དུ་བརྗོད་བྱེད་དང་བརྗོད་བྱ་གཉིས་སྐྱེ་བ་མེད་པས་མཉམ་པ་ཉིད་ཡིན་པས་གང་གིས་གང་ཞིག་བརྗོད་དེ་རྗོད་དུ་མེད་པར་ཡེ་ནས་གནས་པའི་གནད་ཀྱིས་བསྐལ་པར་བརྗོད་ཀྱང་བྲི་གང་བྲལ་བའི་ཆོས་ཀྱི་དབྱིངས་ཟད་འཕེལ་མེད་ཅིང་། ཆོས་ཐམས་ཅད་མིང་ངམ་བརྗོད་པ་ཙམ་དུ་ཤེས་པ་ནི་དོན་དམ་པར་དམིགས་པའི་སྒོའོ། །དེ་ལྟར་མཉམ་པ་ཉིད་ལས་མ་གཡོས་མི་གཡོ་གཡོ་བར་མི་འགྱུར་བཞིན་དུ་ཨ་ལས་གྱུར་པའི་ཡི་གེ་སྐྱེ་གནས་ཨ་ཉིད་མགྲིན་རྐན་སྤྱི་བོ་མཆུའི་གནས་ལྔར་བྱེད་རྩོལ་གྱིས་བསྒྱུར་བའི་ངོར་སྣང་བ་ཡིན། མཆན། ལྔ་པ་ཅན་ཨ་ར་པ་ཙ་སོགས་འདི་དག་དང་ཡི་གེ་གཞན་རྣམས་ཀྱིས་ཀྱང་། ཀུན་བྱང་གིས་བསྡུས་པའི་ཆོས་ཀུན་ཤེས་ཤིང་གོ་བར་བྱེད་པ་ནི་རྟེན་འབྱུང་བསླུ་མེད་ཙམ་སྟེ། ཤིན་ཏུ་ངོ་མཚར་རྨད་དུ་བྱུང་བའི་ཆོ་འཕྲུལ་ཆེན་པོ་ཀུན་ཏུ་ཉེ་བར་སྟོན་པའོ་ཞེས་ཤེས་པ་ན་ཀུན་རྫོབ་ལ་དམིགས་པའི་སྒོ་སྟེ། དེ་གཉིས་དབྱེར་མེད་ཟུང་དུ་ཆུད་པ་ཡི་ངང་ནས་བློ་གྲོས་ཀྱི་གཏེར་ལ་སོགས་པའི་སྤོབས་པའི་གཏེར་ཆེན་པོ་བརྒྱད་ཀྱི་སྒོ་མྱུར་དུ་འབྱེད་པའི་རྒྱུ་སྒྱུ་མའི་སྟེ་སྒྱུ་མ་ལྟ་བུའི་ཏིང་ངེ་འཛིན་མཆོག་ཏུ་གྱུར་པ་བསྒྲུབ་པར་བྱས་ན་མདོ་རྒྱུད་མན་ངག་ཟབ་ཅིང་རྒྱ་ཆེ་བ་ཕ་མཐའ་མེད་པའི་རྒྱ་མཚོ་ཆེན་པོའི་ཆུ་ཉིད་བློ་གྲོས་ཟབ་མྱུར་གྱི་ཧུབ་ཀྱི་སྟེ་ཧུབ་གཅིག་གིས་ལྟོ་བར་འདྲེན་ནུས་པའི་སྙིང་གའི་ནོར་བུ་གཉིས་སུ་མེད་པའི་ཡེ་ཤེས་དྲི་མ་མེད་པ་ལ་གཟུངས་དང་སྤོབས་པ་བློ་ཡི་དཔལ་ཕུན་སུམ་ཚོགས་པ་ཉིད་དུ་རབ་ཏུ་འབར་བར་འགྱུར་རོ། །དེ་ལྟར་སྣང་སྟོང་ཟུང་འཇུག་ཟབ་
མོའི་དོན་ལ་རང་བྱན་ཆུད་པའི་སྒོ་ནས་མཐའ་བཞི་སྤྲོས་པ་ཐམས་ཅད་ཁེགས་པའི་ཟབ་མོའི་ངེས་ཤེས་ཀྱི་ལམ་ནས་ཆོས་ཐམས་ཅད་ཀྱི་ཡིན་ལུགས་ཇི་ལྟ་བ་བཞིན་གཤིས་སུ་སོན་པ་ཡི་གནས་ལུགས་སེམས་དང་སེམས་བྱུང་གི་བློ་ལས་རབ་ཏུ་འདས་པ་ཡི། དབྱིངས་ཡེ་གཉིས་སུ་མེད་པའི་འོད་གསལ་གཉུག་མའི་དབྱིངས་ངེས་པ་དོན་གྱི་འཇམ་དཔལ་རིག་སྟོང་དབྱེར་མེད་འོད་གསལ་རྫོགས་པ་ཆེན་པོའི་ངང་དུ་མ་བཅོས་པར་མཉམ་པར་ཞོག་ཅིག་དང་། མཐའ་བྲལ་ལྟ་བའི་རྒྱལ་པོ་རིག་སྟོང་དབྱེར་མེད་འོད་གསལ་རྫོགས་པ་ཆེན་པོ་ཀུན་མཉམ་ཡངས་པའི་ཀློང་ཆེན་པོར་ཇི་བཞིན་མཉམ་པར་བཞག་པའི་བདེན་དོན་འོད་གསལ་རྫོགས་པ་ཆེན་པོའི་ཆོས་ཉིད་མངོན་སུམ་དུ་མཐོང་བ་ལས་ཡོད་མེད་ལ་སོགས་པའི་མཐའ་བཞིའི་འཛིན་སྟངས་ཀྱི་བློ་ངན་མུན་པའི་སྣང་བ་ཐམས་ཅད་ཀུན་ངང་གིས་དྭངས་ཤིང་འགགས་པའི་འོད་གསལ་བའི་མཁྱེན་གཉིས་ཡེ་ཤེས་ཀྱི་ཉི་མ་ཁོང་ནས་འཆར་བར་གྱུར་ཏེ་ཇི་ལྟ་དང་ཇི་སྙེད་ཀྱི་དགོངས་པ་ཡེ་ཤེས་ཀྱི་ཀློང་རྡོལ་ཏེ་མགྲིན་པའི་རྩ་འཁོར་གསུང་ཡི་གེའི་འཁོར་ལོའི་སྤྲིན་དུ་དྭངས་པས་འཆད་རྩོད་རྩོམ་པ་གང་ལ་ཡང་ཐོགས་པ་མེད་པས་སུས་ཀྱང་མི་འཕྲོག་པའི་རྣམ་དཔྱོད་འགྲན་ཟླ་ཐམས་ཅད་དང་བྲལ་བ་ལ་དབང་འབྱོར་བར་གདོན་མི་ཟ་བ་ཁོ་ན་ཡིན་ནོ། །
བཞི་པ་ཇི་ལྟར་བསྟན་པའི་དོན་བསྡུ་བ་ནི། གཟུར་གནས་དཔྱོད་པ་སོགས་ཚིགས་བཅད་གཉིས་ཀྱིས་བསྟན་ཏེ། གང་ལ་འདྲི་བའི་གནས་རྩོམ་པ་པོ་རང་གི་བློ་ཕྱོགས་སུ་མ་ལྷུང་བའི་གཟུར་གནས་ཏེ་གཟུར་བོར་གནས་པའི་རྣམ་པར་དཔྱོད་པ་དྲང་
པོ་ཉིད་མཁས་པའི་དྲང་སྲོང་ཆེན་པོ་ཉིད་དུ་བཀོད་པ་སྟེ། གང་གིས་དྲི་བ་པོ་ཡང་རང་གི་བློ་ཟབ་མོའི་གནས་ལ་འགལ་འདུའི་དོགས་པ་ཐོལ་བྱུང་གི་རྣམ་པར་རྟོག་པ་དེ་ཉིད་ལྡོམ་བུ་པ་རྟོག་གེའི་བརྒལ་བརྟགས་བྱེད་པ་པོར་བཀོད་དེ་བརྗོད་ནས། དྲང་སྲོང་དེ་ལ་ལྡོམ་བུ་པ་དེས་དྲིས་ཤིང་བརྒལ་ལན་གྱིས་ཚུལ་གྱིས་ནི་ཤིན་ཏུ་རྟོགས་པར་དཀའ་བའི་གནད་ཟབ་མོ་རྒྱལ་སྲིད་རིན་པོ་ཆེ་སྣ་བདུན་གྱི་གྲངས་དང་ལྡན་པ་རབ་ཏུ་གསལ་བས་ལེགས་པར་བཤད་པ་ཡིན་ནོ། །དེ་ཡང་བློ་གྲོས་ན་ཚོད་མ་སྨིན་པས་ཆུང་བ་རྟོག་གེ་བ་བདག་འདྲ་ཡིས་སྐྱེས་སྦྱངས་བློ་མཆོག་མངའ་བར་གྲགས་པའི་ཆེན་པོ་རྣམས་ཀྱང་སོམ་ཉིའི་དྲ་བར་འཕྱན་པའི་གནས་ཤིན་ཏུ་ཟབ་ཅིང་རྟོགས་པར་དཀའ་བ་རྟོག་གེའི་རིགས་མདུད་འབུམ་གྱིས་མི་ཕིགས་པའི་རབ་ཏུ་བརླིང་བའི་དོན་དེ་རྣམས་བློ་གྲོས་ཆེན་པོ་མངའ་བའི་འཕགས་པའི་གང་ཟག་མཆོག་རྣམས་ཀྱི་ཐུགས་གཉིས་སུ་མེད་པའི་ཡེ་ཤེས་ཟབ་པ་དང་རྒྱ་ཆེ་བའི་མཁྱེན་པའི་གཏེར་གསང་བ་ཟབ་མོ་ནས་ཀྱང་ཡང་དག་པར་བླང་པ་ཇི་ལྟ་བ་བཞིན་དུ་གཟུར་གནས་དམ་པ་ཡོངས་ཀྱི་དཔྱིད་དཔལ་དུ་འདི་ན་ལེགས་པར་བཀོད་པར་བྱས་པ་ཡིན་ནོ། །
གསུམ་པ་ཐ་མར་དགེ་བ་མཇུག་གི་དོན་ལ་གསུམ། ལྷག་བསམ་ཤེས་རབ་ཀྱིས་གོ་ཕྱེས་པ་དང་། གཞན་ཕན་སྙིང་རྗེས་ཇི་ལྟར་བརྩམ་པའི་མཛད་བྱང་དང་། ཚུལ་འདིར་བརྟེན་ན་ཐེག་པ་མཆོག་གི་ལམ་བཟང་རྙེད་པས་བརྟེན་པར་གདམས་པའོ། །
དང་པོ། དེ་སྐད་སྨྲས་པ་སོགས་ཚིགས་བཅད་གཅིག་གིས་བསྟན་ཏེ། དེ་སྐད་ཟབ་དོན་ཡང་དག་པར་སྨྲས་པའི་ལེགས་པར་བཤད་པའི་འབྲུག་སྒྲ་སྙན་པར་སྒྲོགས་པ་དང་བཅས་པའི་ཆོས་ཀྱི་ཆར་རབ་ཏུ་བཟང་པོ་འབབ་པར་རྒྱལ་བའི་སྲས་པོ་མཁས་མཆོག་བྱེ་བས་ཟབ་མོའི་དགོངས་དོན་ཡང་དག་པར་བགྲོད་པའམ་རྟོགས་པར་འདོད་ཅིང་ཡིད་དད་པས་དགའ་བཞིན་གྱིས་མཉན་ཅིང་སེམས་པས་དོན་ཆེན་པོ་ཐོབ་པར་སེམས་པའི་ལྷག་པའི་བསམ་པ་ཡིས་གང་ཞིག་དྲིས་པ་རྣམས་ལ་དགའ་སྤྲོ་ཡི་རངས་པའི་ཚུལ་གྱིས་ལན་གྱིས་ཁྱད་པར་ཟབ་མོའི་ཆོས་ཀྱི་བདུད་རྩིའི་ཆར་ཆེན་པོའི་གོ་སྐབས་འདི་ཉིད་ལེགས་པར་དབྱེ་བར་བྱས་སོ། །
གཉིས་པ། དེ་ཕྱིར་དེ་བས་སོགས་ཚིགས་བཅད་གཅིག་གིས་བསྟན་ཏེ། གང་མདོ་རྒྱུད་ཟབ་མོའི་དགོངས་དོན་ཇི་བཞིན་རྙེད་པའི་ལམ་དངོས་ཡང་དག་པར་མཐོང་བའི་མིག་ཏུ་གྱུར་པ་བདེན་པ་གཉིས་ཀྱི་དེ་ཁོ་ན་ཉིད་དཔྱོད་པའི་ཚད་མའི་ལམ་ནས་ངེས་པའི་ཤེས་པ་ཟབ་མོ་ཐེ་ཚོམ་གྱི་སྨག་ཐམས་ཅད་དང་བྲལ་བ་ཉིད་དགོས་པ་ཡིན་པ་དེ་ཡི་ཕྱིར་ན་ཚད་མ་དང་བྲལ་ན་ངེས་ཤེས་ཟབ་མོ་མི་རྙེད་པས་ལམ་གྱི་གཟུགས་བརྙན་དུ་འགྱུར་བ་དེ་ལྟ་བས་ན། དཔལ་ཆོས་ཀྱི་གྲགས་པ་དང་དཔལ་ལྡན་ཟླ་བའི་རིང་ལུགས་བཞིན་བདེན་གཉིས་སོ་སོར་དཔྱོད་པའི་ཚད་མ་དང་མཐར་ཐུག་བདེན་གཉིས་དབྱེར་མེད་ཟུང་འཇུག་ངེས་པའི་ཚད་མའི་མིག་བཟང་པོ་དཔྱད་གསུམ་གྱིས་སྦྱངས་ཤིང་བགྲད་དེ་མདོ་རྒྱུད་ཟབ་མོའི་གནས་ལ་གཞན་དྲིང་མི་འཇོག་
པར་ཡང་དག་པར་ཞུགས་དགོས་པའི་ཚུལ་དེ་ལྟར་ཡང་དང་ཡང་དུ་མདོ་རྒྱུད་ཟབ་རྒྱས་ཀྱི་དོན་རྟོགས་པར་འདོད་ཅིང་སེམས་པའི་བློ་ལྡན་གཟུ་བོར་གནས་པའི་སྐལ་བཟང་དུ་མའི་དོན་དུ་ཡང་ཟབ་རྒྱས་ཀྱི་དོན་ལ་ཇི་བཞིན་རྟོག་པའི་ཡིད་ཀྱི་མེ་ལོང་དྲི་མ་མེད་པའི་ངོས་ལ་ཇི་ལྟར་ཤར་བ་བཞིན་དུ་རྣམ་དཔྱོད་བློ་ཡི་རྩེད་འཇོའི་རོལ་བས་དྷཱིཿམིང་ཅན་གྱིས་ཏེ་བློ་གྲོས་དྲི་མེད་ཀྱིས་ལེགས་པར་ཡང་དག་པར་སྤེལ་བའོ། །
གསུམ་པ། བདེ་གཤེགས་ཆོས་ཚུལ་སོགས་ཚིགས་བཅད་གཅིག་གིས་བསྟན་ཏེ། བདེ་བར་གཤེགས་པ་སངས་རྒྱས་བཅོམ་ལྡན་འདས་རྣམས་ཀྱི་བཀའ་མདོ་རྒྱུད་ཀྱི་ཆོས་ཚུལ་ཟབ་མོ་ནམ་མཁའི་མཐའ་དང་མཉམ་པ་ཇི་སྙེད་པ་ཐམས་ཅད་རྣམ་པ་ཀུན་ཏུ་སྒྲ་རྟོག་གི་བརྗོད་པར་མི་ནུས་ཤིང་ཟད་པར་ཡང་མི་འགྱུར་ཀྱང་མདོ་རྒྱུད་ཟབ་མོའི་གནད་ལ་ངེས་པའི་ཤེས་ཟབ་མོ་ཐེ་ཚོམ་གྱི་སྨག་ཐམས་ཅད་དང་བྲལ་བའི་སྣང་བ་མཆོག་ཏུ་གསལ་བར་བྱེད་པའི་རིན་པོ་ཆེ་ཡི་སྒྲོན་མེ་འདིར་ཡང་དག་པར་བརྟེན་ན་མདོ་རྒྱུད་ཐེག་མཆོག་ཟབ་མོའི་ལམ་བཟང་པོ་རང་གིས་ཇི་བཞིན་དུ་བདེ་བླག་ཏུ་རྙེད་ཅིང་རྟོགས་ནས་གཞན་ལ་ནོར་འཁྲུལ་མེད་པར་སྟོན་པར་ནུས་པས་ན་གཟུ་བོར་གནས་པའི་བློ་ཅན་ཆོས་ཀྱི་སྤྱན་ལྡན་སྐལ་བཟང་མཁས་པའི་ཚོགས་ཀྱིས་ལེགས་པར་བསྟེན་པར་མཛོད་ཅིག་ཅེས་ཡང་དག་པར་གདམས་པར་མཛད་པའོ། །
སླར་རྗེ་ཉིད་ཀྱི་གཟིགས་གནང་མཛད་པའི་ཞལ་བྱང་ནི། ངེས་ཤེས་རིན་པོ་ཆེའི་སྒྲོན་མེ་འདི་རང་ལོ་ཤིན་ཏུ་གཞོན་ཞིང་སློབ་གཉེར་
གསར་བུ་བའི་དུས་ཞིག་ན་འཕྲལ་དུ་ཡིད་ལ་ཤར་རྩོམ་སྟན་གཅིག་པར་བྲིས་པ་ཡིན་མོད། དོན་ལ་འགལ་བ་མེད་ཅིང་གོ་རྒྱུ་གནད་ཅན་འདུག་པས་མ་བཅོས་པར་དེ་གར་བཞག་པ་ཡིན་ནོ་ཞེས་མི་ཕམ་པས་རང་ལོར་བདུན་པར་སྨྲས་པ་དགེའོ། །ཞེས་པས་ཚིགས་གི་སྡེབས་སྦྱོར་ལྷུར་མ་བླང་བར་དོན་ལ་རྟོན་པར་བྱས་པ་ཡིན་ནོ་ཞེས་ཚིག་ལ་མི་རྟོན་དོན་ལ་རྟོན་པར་གདམས་པའི་ཤུགས་ཀྱིས་གང་ཟག་ལ་མི་རྟོན་ཆོས་ལ་རྟོན་པ་དང་། དོན་ལ་ཡང་དྲང་དོན་ལ་མི་རྟོན་ངེས་དོན་ལ་རྟོན་དང་། ངེས་དོན་ལ་ཡང་རྣམ་ཤེས་ཀྱི་སྤྱོད་ཡུལ་མི་རྟོན་ཡེ་ཤེས་ཡུལ་ལ་རྟོན་པར་གདམས་པར་མཛད་པ་འདི་ནི་མཁས་པ་ཡོངས་ཀྱི་ཐུགས་ཀྱི་རྣག་བྱ་གཡར་དམ་དུ་བྱ་བའི་གདམས་པ་ཕུན་སུམ་ཚོགས་པ་ཞིག་ལགས་སོ།། །།
འདིར་སྨྲས་པ། གང་ཡང་མདོ་རྒྱུད་ཟབ་མོའི་ལུང་རིགས་དག། ལེགས་པར་ཤན་མ་འབྱེད་པའི་གཉིད་འཐུག་པོར། །འཕྱན་པར་གྱུར་གང་བཙན་ཐབས་སློང་བྱེད་པ། །འཇམ་དབྱངས་རྣམ་པར་རྒྱལ་བའི་འབྲུག་སྒྲ་ཉིད། ༡། ཁྱོད་མེད་པས་ན་རྟོགས་དཀའ་ཟབ་མོ་འདིར། །སྐྱེས་སྦྱངས་བློ་གྲོས་ཟབ་ཟབ་ལྟར་སྣང་ཡང་། །ལུང་རིགས་འབུམ་ཕྲག་རྡོ་རྗེའི་ཁུར་ལྕི་བས། །སོམ་ཉིའི་དཔྱང་ཐག་དམ་པོས་གཉིད་དུ་ཡུར། ༢། སྐལ་བཟང་མཁས་པའི་མདུན་སར་རབ་གྲགས་པའི། །མདོ་རྒྱུད་གྲུབ་མཐའི་ལུང་རིགས་མན་ངག་དང་། །ཕྱོགས་རེར་ཞེན་པས་ཕན་ཚུན་འཐེན་ཁྱེར་གྱིས། །རྩོད་པའི་དྲྭ་བར་ཆུད་པའི་ཕྱང་མོ་ཉུག༣། མངོན་སུམ་ཆོད་ཅེས་འཇམ་པའི་རྡོ་རྗེ་ཡིས། །
ཡེ་ཤེས་ཕྱག་གི་རལ་གྲིའི་དབང་བསྐུར་ཞིང་། །དབུགས་དབྱུང་གསུང་གི་སྣང་དང་ཆབ་གཅིག་པར། །ངེས་ཤེས་རིན་ཆེན་སྒྲོན་མེ་མཆོག་ཏུ་འབར། ༤། ཆོས་སྤྱན་ལྡན་ལ་ཉིན་མོའི་སྣང་བ་བཞིན། །ཟབ་དོན་མངོན་སུམ་མཐོང་བའི་དཔྱིད་དཔལ་དེ། །གང་ལ་གཟེན་པར་གྱུར་ཀྱང་རང་སྐྱོན་ཉིད། །འདི་ཡི་སྐྱོན་དུ་བསྒྱུར་བས་ཅི་ཞིག་རུང་། ༥། དེང་དུས་སྙིགས་མའི་གཞན་དབང་ཆེར་བདོ་བས། །གཟུ་བོར་མི་གནས་བྱིས་པའི་རང་མཐོང་གིས། །ཆགས་སྡང་སྙེམས་པ་མཐོ་བས་སྤྱི་བརྟོལ་གྱིས། །ཆོས་དང་གང་ཟག་མཆོག་ལའང་སྐྱོན་འདོགས་བྱེད། ༦། ཡུལ་དུས་གང་ཟག་དམན་པ་བདག་འདྲ་ཡིས། །འཆད་རྩོད་རྩོམ་མིན་དུས་མིན་བདག་གིས་འཚལ། །དེ་ལྟ་ན་ཡང་འཁོར་ལོའི་མགོན་པོ་ཡི། །བཀའ་ཡི་གནང་བསྐུལ་དོན་ལྡན་མཐོང་ཕྱིར་དང་། ༧། བདག་ཡིད་གོམས་ཕྱིར་གཞན་དག་བསྐུལ་ཕྱིར་དང་། །ཕན་པའི་སེམས་ཕྱིར་ཚིག་གསལ་འདི་བྱས་སོ། །ཟབ་ཕྱིར་དངོས་བསྟན་ཙམ་ཡང་རྟོགས་མིན་ན། །ཚིག་ནུས་དང་ནི་ཤུགས་བསྟན་ལྟ་ཡང་ཅི། ༨། དེ་ཕྱིར་རང་མཐོང་བྱིས་པས་མ་རྟོགས་པས། །མ་ཚང་མ་འབྲེལ་མི་དགོས་ལ་སོགས་པའི། །ཉེས་པ་གང་མཆིས་རྩ་གསུམ་སྲུང་མ་དང་། །ཆོས་སྤྱན་ལྡན་ལ་འཆགས་ཀྱི་དག་ཚངས་སྩོལ། ༩། འདིས་མཚོན་དུས་གསུམ་དགེ་ཚོགས་ཅི་མཆིས་པ། །བསྟན་འཛིན་ཞབས་བརྟན་དགེ་འདུན་སྡེ་འཕེལ་ཞིང་། །བཤད་སྒྲུབ་བསྟན་པ་རྟག་ཏུ་དར་རྒྱས་ཏེ། །སྣོད་བཅུད་རྫོགས་ལྡན་འབྱོར་པའི་རྒྱུ་རུ་
བསྔོ། ༡༠། བདག་ཀྱང་དེང་ནས་བྱུང་ཆུབ་མཆོག་གི་བར། །འཇམ་པའི་དབྱངས་ཀྱིས་མངོན་སུམ་རྗེས་བཟུང་ནས། །བདུད་བཞིའི་གཡུལ་ལས་རྟག་ཏུ་རྣམ་རྒྱལ་ཏེ། །རྒྱལ་བ་ཀུན་གྱི་དམ་ཆོས་འཛིན་གྱུར་ཅིག༡༡། འདི་དང་གང་འབྲེལ་འཇམ་པའི་དབྱངས་ཉིད་ཀྱིས། །བྱིན་རླབས་རྗེས་བཟུང་ཚེ་རིང་ནད་མེད་ཅིང་། །ངེས་དོན་སྙིང་པོའི་ལམ་བཟང་མཐོང་གྱུར་ཏེ། །ཕྱོགས་དུས་ཀུན་ཏུ་འཛིན་སྐྱོང་སྤེལ་གྱུར་ཅིག༡༢། མཁའ་ཁྱབ་ཞིང་གི་རྒྱལ་བ་སྲས་བཅས་དང་། །རབ་འབྱམས་རྩ་གསུམ་རྒྱ་མཚོའི་བདེན་མཐུ་ཡིས། །ཇི་ལྟར་སྨོན་པ་འགྲུབ་པའི་མཐུན་གྱུར་དང་། །ཕྱོགས་དུས་ཀུན་ཏུ་དགེ་བའི་བཀྲ་ཤིས་སྩོལ། ༡༣། དེ་ལྟར་མདོ་རྒྱུད་གྲུབ་མཐའི་ཟབ་ཁྱད། ཉམས་ལེན་བསྒོམ་པའི་གནད་གསང་། ཁས་ལེན་ཤན་འབྱེད་ཀྱི་གསང་ལམ་ངེས་ཤེས་རིན་པོ་ཆེའི་སྒྲོན་མེ་འདི་རང་ཆུང་ནས་མཇལ་ཞིང་མོས་པས་ཞུགས་ཀྱང་ངེས་པའི་དོན་གྱིས་དབུལ་ན་ཡང་། གངས་ཅན་ན་མངོན་པར་མཐོ་བའི་མ་གྷ་དྷ་གཉིས་པར་གྲགས་པའི་ཤར་རྒྱལ་བ་ཀཿཐོག་རྡོ་རྗེའི་གདན་གྱི་གནྡྷོ་ལའི་བསྟན་པ་བཤད་སྒྲུབ་ལས་གསུམ་གྱིས་གཞིར་བཞེངས་སུ་མཛད་པའི་མཁྱེན་བརྩེ་ནུས་པའི་གཏེར་ཆེན་སི་ཏུ་རིན་པོ་ཆེས་གསར་དུ་བསྐྲུན་པའི་རྒྱུད་སྡེ་ལྷ་ཁང་ཐུབ་བསྟན་བཤད་སྒྲུབ་ནོར་བུའི་ལྷུན་པོར་རྗེ་ཉིད་ཀྱི་བདག་རྐྱེན་ལས་གཞུང་མང་རབས་ཀྱི་བཤད་པ་བགྱིད་ཚེ་གཞུང་འདི་འཆད་སྐབས། བཀའ་དྲིན་མཚུངས་བྲལ་བླ་མ་རིན་པོ་ཆེ་ཐུབ་བསྟན་རྒྱལ་མཚན་འོད་ཟེར་གྱི་ཞལ་སྔ་ནས་བཤད་ལུང་ལེགས་པར་མནོས་
ཤིང་བསྡུས་དོན་ཞིག་ཀྱང་བཀས་བསྐུལ་གནང་། ཁྱད་པར་ཕྱིས་སུ་ཡང་གདན་ས་རིན་པོ་ཆེ་དེར་ཀུན་མཁྱེན་སངས་རྒྱས་གཉིས་པ་རྗེ་འཇམ་དབྱངས་བླ་མའི་བཀའ་ཡི་བསྡུ་བའི་ཐུགས་སྩོལ་གནང་བའི་བདག་རྐྱེན་མཆོག་གིས་དཔལ་དུས་ཀྱི་འཁོར་ལོ་དང་། འདི་ཀ་སོགས་ཀྱི་བཤད་ལུང་ཕུལ་སྐབས། བདག་ཅག་གི་བཀའ་དྲིན་གསུམ་ལྡན་འཁོར་ལོའི་མགོན་པོ་མདོ་སྔགས་བསྟན་པ་ཡོངས་ཀྱི་རྒྱལ་མཚན་སྔ་འགྱུར་བསྟན་པའི་སྲོག་ཤིང་མཁས་གྲུབ་ཡོངས་ཀྱི་གཙུག་རྒྱན་མཚན་བརྗོད་པར་དཀའ་བ་དོན་གྱི་སླད་དུ་མཚན་ནས་སྨོས་ན། ༢འཇམ་མགོན་སི་ཏུ་རིན་པོ་ཆེ་ཀུན་གཟིགས་ཆོས་ཀྱི་རྒྱ་མཚོ་ཞེས་སྙན་པའི་བ་དན་སྲིད་ན་མངོན་པར་མཐོ་བ་གང་གིས་བཀྲ་ཤིས་པའི་ལྷ་རེག། གསང་བ་སྔགས་ཀྱི་ནང་གི་དམ་ཚིག་གི་རྟེན་མཆོག། དཀྱིལ་འཁོར་ཐམས་ཅད་ཀྱི་ངོ་བོ་རྡོ་རྗེ་དང་དྲིལ་བུ། རྡོ་རྗེའི་ལང་ཚོ་སྒྲུབ་པའི་རིན་པོ་ཆེའི་རིལ་བུ་དང་བྲི་གཞིའི་ཤོག་བུ་བཅས་བཀའ་ལུང་གསེར་གྱི་ཅོད་པན་སྤྱི་བོར་ཡང་ཡང་སྩལ་གནང་ཉིད། རྟེན་འབྲེལ་གྱི་དགོངས་གནད་ཆེ་བར་མོས་ཤིང་རང་ཡང་མཆོག་གི་བསྟན་བཅོས་ཀྱིས་བསྟན་རྒྱུན་སྲིད་མཐར་སྤེལ་བའི་ས་བོན་བཟང་པོ་རྩོམས་པའི་སྐལ་བཟང་དུ་བགྱིད་པའི་དད་མོས་ལེགས་མཐོང་དང་། གཞན་ཡང་ལུང་སྨྲ་བའི་ཆོས་ཀྱི་སྤྱན་ལྡན་དུ་མས་བཀའ་ཡི་བསྐུལ་ངོར་ཆུད་གསན་མ་ཕོད་པར་སྐྱེས་སྦྱང་བློ་གྲོས་ལྡན་ལ་འདི་འདྲས་ཅི་ཡང་
མི་མཁོ་བས་ན་རྗེ་ཀུན་མཁྱེན་འཇམ་དབྱངས་བླ་མའི་ལེགས་བཤད་སོགས་མཁས་པའི་རིགས་ལམ་ཟབ་མོ་རྣམས་བསྡུ་ཞིང་མདོ་རྒྱུད་ཟབ་མོའི་ལུང་སྦྱར་མང་དུ་འབྲི་བར་བྱས་ན། ཡི་གེ་མང་དུ་དོགས་ནས་རྒྱས་སྤྲོས་དང་ཚིག་གི་སྡེབས་སྦྱོར་བསྐྱུངས་ནས་རང་འདྲའི་སྐལ་མཉམ་ལས་དང་པོ་པ་ཤེས་བརྩོན་ཞན་པའི་རིགས་རྣམས་ལ་ཚིག་དོན་གསལ་བའི་འབྲུ་འགྲེལ་གོ་ཅི་བདེ་གཙོ་བོར་བྱས་ན་བློ་གྲོས་སྣང་བའི་སྒོ་འབྱེད་དུ་ཅུང་ཟད་ཕན་དུ་རེ་བས་སེམས་ཀྱིས་ཨོ་རྒྱན་འཇིགས་མེད་ཆོས་ཀྱི་དབང་པོ། ཨོ་རྒྱན་བསྟན་འཛིན་ནོར་བུ། འཇམ་དབྱངས་མཁྱེན་བརྩེའི་དབང་པོ། ཀོང་སྤྲུལ་རིན་པོ་ཆེ། ཀུན་མཁྱེན་འཇམ་དབྱངས་མི་ཕམ་རྣམ་རྒྱལ་རྒྱ་མཚོ་སོགས་མཁས་ཤིང་གྲུབ་པའི་དབང་ཕྱུག་མང་པོའི་ཞབས་རྡུལ་རེག་པའི་སློབ་འབངས་ཡོངས་ཀྱི་ཐ་ཤལ་ཤཱཀྱའི་བཙུན་གཟུགས་རྨོངས་བརྟུལ་གྱི་ན་བ་ཚེ་རབས་ཀུན་ཏུ་ཨོ་རྒྱན་པདྨའི་བྲན་དུ་སྨོན་པའི་ཡིད་ཅན་ཀུན་བཟང་དཔལ་ལྡན་ནམ་ཐུབ་བསྟན་ཀུན་བཟང་ཆོས་གྲགས་དུ་འབོད་པས། དཔལ་སྤྲུལ་རིན་པོ་ཆེའི་གདན་སའི་མཐིལ་དཀར་ཆུང་རི་ཁྲོད་དབེན་གནས་དམ་པའི་ཡོན་ཏན་ཕུན་སུམ་ཚོགས་པར་རིག་འཛིན་འཆི་མེད་གྲུབ་པའི་ཆོས་སྒར་ཐུབ་བསྟན་བཤད་སྒྲུབ་གླིང་དུ་ཨོ་རྒྱན་སངས་རྒྱས་གཉིས་པ་གངས་ལྗོངས་བོད་ཡུལ་དབུས་སུ་བྱོན་ཏེ་མདོ་སྔགས་ཀྱི་ཆོས་འཁོར་བསྐོར་བའི་ཚེས་བཅུའི་དུས་མཆོད་དང་བཅས་པར་རྫོགས་པར་བགྱིས་པ་འདིས་ཀྱང་ཕྱོགས་དུས་ཀུན་ཏུ་རིས་མེད་པའི་བསྟན་འགྲོ་ལ་སྨན་པར་
བསླུ་བ་མེད་པའི་བླ་མ་དཀོན་མཆོག་རྩ་གསུམ་རྒྱ་མཚོའི་ཐུགས་བསྐྱེད་དང་སྨོན་ལམ་བདེན་པ་ཆེན་པོའི་མཐུས་བྱིན་གྱིས་བརླབས་པར་མཛད་དེ་དར་ཞིང་རྒྱས་ལ་དགེ་ཞིང་བཀྲ་ཤིས་པར་གྱུར་ཅིག། ཤུབྷཾ། སརྦ་མངྒ་ལཾ།། །།