གུ་རུ་རྡོ་རྗེ་གྲོ་ལོད་ཀྱི་མཁའ་འགྲོ་མན་དྷཱ་ར་བའི་གསང་སྒྲུབ་བམ་སྒྲོལ་ལས་མཐའ།
གུ་རུ་རྡོ་རྗེ་གྲོ་ལོད་ལས༔ མཁའ་འགྲོ་མནྡྷཱ་ར་བ་ཡི༔ གསང་སྒྲུབ་བམ་སྒྲོལ་ལས་མཐའ་བཞུགས༔ སུས་ཀྱང་བཅོས་བསླད་མ་བསྲེ་ཞིག༔ ཤོག་དྲིལ་ལྕགས་སྦུབས་མ་ཡིན༔ ས་མ་ཡ༔ རྒྱ་རྒྱ་རྒྱ༔
༼ཀ༽ ༔ཤྲཱི་མ་ཧཱ་གུ་རུ་པདྨ་སཾ་བྷ་ཝ་ཡེ་ན་མོ༔ འཁོར་བ་དོང་སྤྲུག་འགྲོ་བའི་མགོན༔ བསྟན་པའི་སྒྲོན་མེ་སྙིང་རྗེའི་མཛོད༔ རིག་འཛིན་པདྨ་འབྱུང་གནས་ཀྱི༔ ཟབ་གནད་སྙིང་ཁྲག་ཐིགས་པ་འདི༔ ཡང་སྤྲུལ་བར་ཆད་བསལ་ཕྱིར་སྦས༔ མ་འོངས་སུམ་ཅུ་ཁ་རལ་དུས༔ ཕྱི་སྣོད་འཇིག་རྟེན་ཞིང་ཁམས་སུ༔ འདྲེ་སྲིན་འབྱུང་པོ་འུར་རྒྱུག་བྱེད༔ ནང་བཅུད་སྐྱེ་འགྲོ་ཐམས་ཅད་ཀྱི༔ ལུས་སྲོག་དུས་མིན་ངེས་མེད་འཇིག༔ འབྱུང་བཞིའི་ནད་ཀྱིས་འགྲོ་ཀུན་གཟིར༔ དབང་མེད་བར་དོར་དུས་མིན་འཁྱམ༔ ཆོས་བྱེད་ཡོངས་ཀྱི་འདུན་ས་ཞིག༔ དམ་སྲི་འབྱུང་པོའི་བསྟན་པ་དར༔ བོད་ཁམས་ཡོངས་ལ་ཧབ་ཐོབ་ཟ༔ བོད་ཀྱི་བསོད་ནམས་ངང་གིས་ཟད༔ སྐྱབས་དང་
དཔུང་གཉེན་དགྲ་ལ་བཙལ༔ ཐར་མེད་རྒྱལ་པོའི་ཆད་པས་གཙེས༔ རང་ནོར་རང་གཤེད་དགྲ་ཡི་གྲོགས༔ བདེ་བའི་གོ་སྐབས་ཡད་མ་ཡུད༔ དཔེར་ན་སྤྲིན་བར་ཉི་ཟེར་ལྟར༔ དེ་འདྲའི་བསྐལ་པ་ཤར་བའི་ཚེ༔ བདག་གི་སྤྲུལ་པ་མང་ལགས་ཀྱང་༔ ཕལ་ཆེར་བར་ཆད་བྱེད་དབང་འགྲོ༔ ཕལ་ཆེར་འཇིགས་པ་བརྒྱད་ཀྱིས་སྡང་༔ ཕལ་ཆེར་རིག་སྔགས་དུག་དང་མཚོན༔ བསམ་ངན་མཐོ་གནོན་ལོག་ལྟས་སྔང་༔ ཚེ་སྲོག་འཕྲོག་པའི་དུས་བསྐལ་དེར༔ རྟགས་ཙམ་འཛིན་པའི་བསྟན་པ་ཡིན༔ གསང་སྔགས་བསྐྱེད་རྫོགས་གདམས་པ་ནུབ༔ དགེ་སློང་མཚོན་ཆའི་འཁོར་ལོ་བསྐོར༔ སངས་རྒྱས་བསྟན་པ་ནང་འཁྲུགས་བྱེད༔ དགེ་བཤེས་ཆོས་གོས་ལེའུ་ནས༔ དུག་དང་མཚོན་གྱི་གཏེར་
ཁ་བརྡོལ༔ བསོད་ཟད་རྣམས་ལ་སྐོམ་དུ་སྟེར༔ ཞིམ་མངར་རོ་བཅུད་ཆེའོ་སྙམ༔ གཅེས་པར་བཟུང་དང་དུག་ལྔ་འཕེལ༔ བཅོམ་ལྡན་ཐུབ་པའི་བསྟན་པ་ནི༔ ཕྱི་ལེགས་ནང་སྐྱོན་མཐའ་དབུས་འཁྲུགས༔ པད་འབྱུང་བདག་གི་ཟབ་གཏེར་ཡང་༔ ཐེ་ཚོམ་སྐྱོན་ཡོན་ཟུང་འབྲེལ་འཆར༔ བསྟན་འཛིན་སྐྱེས་བུ་ཐམས་ཅད་ཀྱང་༔ ང་རྒྱལ་ཆེ་བཙན་ནུས་རྩལ་འགྲེན༔ མངའ་བདག་རྒྱལ་པོ་ཆོས་སྐྱོང་རྣམས༔ ང་བདག་རྩོད་པས་བསྟན་པ་བཤིག༔ གྲུབ་ཐོབ་རྟོགས་ལྡན་མང་གྱུར་ཀྱང་༔ གྲུབ་རྟགས་ཐོན་པ་ཉིན་སྐར་ཙམ༔ བདག་གི་སྤྲུལ་པ་ཡང་སྤྲུལ་ཡང༔ གཏེར་ཆོས་རྙེད་ངེས་ཉིན་སྐར་རྩམ༔ སྔགས་ནག་ཕུར་ཐོགས་མང་པོ་ཡང་༔ ཕ་རོལ་རྒོལ་འཇོམས་ཉི་སྐར་ཙམ༔ ཡོན་བདག་དམ་ཚིག་སྲུང་བ་ནི༔ བརྒྱ་སྙེད་ཙམ་ལས་རྡོག་པོ་གཅིག༔ དེ་ལྟར་བསྐལ་དུས་འཆར་བའི་ཚེ༔ བར་ཆད་བདུད་དཔུང་འཇོམས་པའི་ཕྱིར༔ ཡེ་ཤེས་མཁའ་འགྲོའི་གསང་སྒྲུབ་བསྟན༔ དེ་ཡང་ཕྱི་ནང་གསང་བ་གསུམ༔ ཐ་ཚིག་ལོ་རྒྱུས་འདི་ལྟ་སྟེ༔ ༼ཁ༽ ༔ཛྙཱ་ན་དྷཱ་ཀི་ན་མོ་ཡེ༔ སྔོན་བྱུང་སྲིད་པའི་དང་པོ་ལ༔ མཁའ་གསང་བདེ་གསལ་དཀྱིལ་འཁོར་ཤར༔ མ་འགགས་རོལ་རྩེད་རྟེན་འབྲེལ་ལས༔ བཅོམ་ལྡན་ཀུན་ཏུ་བཟང་མོ་བྱུང་༔ ཕྱི་ལྟར་ཕར་ཕྱིན་རྒྱལ་ཀུན་ཡུམ༔ ནང་ལྟར་རྡོ་རྗེ་ཕག་མོ་ཁྲོས༔ གསང་ལྟར་དྷཱ་ཀི་སེང་གེའི་གདོང༔ སྤྲུལ་པ་མཁའ་འགྲོ་སྡེ་ལྔར་ཤར༔
ཡང་སྤྲུལ་དབང་ཕྱུག་ཉེར་བརྒྱད་དང་༔ ཉིང་སྤྲུལ་མ་སྲིང་བརྟན་མར་བཅས༔ དེ་ནི་སྔོན་བྱུང་ལོ་རྒྱུས་སོ༔ ༼ཁ༽ ༔དེ་འོག་བར་གྱི་བསྐལ་པ་ལ༔ བཅོམ་ལྡན་ཐུབ་པའི་སྤྱན་སྔ་རུ༔ སྲིང་མོ་གངྒཱའི་ལྷ་མོས་ཀྱང་༔ བྱང་ཆུབ་མཆོག་ཏུ་སེམས་བསྐྱེད་ཅིང་༔ བསྟན་པའི་རྒྱལ་མཚན་ལེགས་པར་འཛུགས༔ འགྲོ་ཀུན་ཐར་པའི་ལམ་ལ་བཀོད༔ རྒྱལ་བའི་སྲིང་གྱུར་མནྡྷཱ་ར༔ དེ་ནི་བར་བྱུང་ལོ་རྒྱུས་སོ༔ ༼ང༽ ༔དེ་འོག་ཐ་མའི་བསྐལ་པ་ལ༔ ཟ་ཧོར་རྒྱལ་སྲས་མནྡྷཱ་ར༔ འཁོར་བ་ཞེན་ལོག་བྲམ་ཟེ་མོ༔ པད་འབྱུང་གསང་ཡུམ་དྷཱ་ཀི་མ༔ མེ་ཆུ་དུག་མཚོན་གཞོམ་གཞིག་བྲལ༔ འབྱུང་བཞིར་དབང་བསྒྱུར་སིདྡྷི་བརྙེས༔ ཡེ་ཤེས་མཁའ་འགྲོ་འབུམ་གྱི་རྒྱལ༔ པདྨ་བདག་དང་དགོངས་པ་མཉམ༔ རྩལ་ལྡན་བསིལ་ཁང་བྲག་ཕུག་ཏུ༔ འཆི་མེད་ཚེ་ཡི་རིག་འཛིན་བསྒྲུབས༔ ཚེ་དཔག་མེད་པ་དངོས་སུ་མཇལ༔ སྐྱེ་འཆི་མེད་པའི་ཡེ་ཤེས་སྐུ༔ མཁའ་སྤྱོད་གནས་བགྲོད་དངོས་གྲུབ་བརྙེས༔ དེ་ནི་ཐ་དུས་ལོ་རྒྱུས་སོ༔ ༼ཅ༽ ༔དེ་འོག་རྩོད་ལྡན་དང་པོའི་དུས༔ གདོང་དམར་སྲིན་པོའི་ཡུལ་ལྗོངས་སུ༔ རིགས་གསུམ་མགོན་པོའི་རྣམ་འཕྲུལ་གྱིས༔ སངས་རྒྱས་བསྟན་པའི་རྒྱལ་མཚན་བཙུགས༔ ལོ་པཎ་རྣམས་ཀྱི་ཉི་འོད་བརྡལ༔ པད་འབྱུང་བདག་གིས་བདུད་སྡེ་བཅོམ༔ འཇམ་དཔལ་སྤྲུལ་པས་དར་རྒྱས་མཛད༔ ཕྱག་རྡོར་སྤྲུལ་པས་སྲོལ་ཀ་བཏོད༔
རྗེ་འབངས་ཉེར་ལྔས་གྲུབ་པ་བརྙེས༔ དུས་དེར་ལྷ་ལྕམ་མནྡྷཱ་ར༔ འགྲོ་བའི་དོན་དུ་སྤྲུལ་སྐུར་བཞེངས༔ མཁར་ཆེན་མཚོ་རྒྱལ་ཞེས་སུ་གྲགས༔ མོན་ཁ་ནེ་རིང་གནས་མཆོག་ཏུ༔ ཕྲིན་ལས་ཕུར་པའི་ལྷ་ཚོགས་བསྒྲུབས༔ ཞལ་མཇལ་སིདྡྷི་རྣམ་གཉིས་ཐོབ༔ བསད་པ་གསོ་ནུས་དངོས་གྲུབ་བརྙེས༔ དེ་ནི་རྩོད་ལྡན་དང་པོར་བྱུང་༔ ༼ཆ༽ ༔དེ་འོག་ཟངས་མདོག་དཔའ་རིའི་རྩེར༔ པདྨ་འོད་ཀྱི་གཞལ་ཡས་སུ༔ པད་འབྱུང་བདག་ཀྱང་གཤེགས་པའི་རྗེས༔ ལྷོ་ནུབ་སྲིན་ཡུལ་འདུལ་བྱའི་ཕྱིར༔ བདེ་ཆེན་དབང་གི་རྒྱལ་མོ་ཞེས༔ སྲིན་ཚོགས་ཆོས་ལ་འཛུད་པར་འགྱུར༔ སྤྲུལ་པས་འཁོར་བ་དོང་ནས་སྤྲུག༔ རྗེས་འཇུག་བུ་སློབ་ཐམས་ཅད་ལ༔ ཞལ་བསྟན་ལུང་སྟོན་དངོས་གྲུབ་སྟེར༔ མཁའ་སྤྱོད་གནས་སུ་འདྲེན་མཛད་མ༔ ཡེ་ཤེས་ལུས་ཐོབ་ཕ་རོལ་ཕྱིན༔ བདེ་ཆེན་དབང་གི་རྒྱལ་མོར་གྲགས༔ དེ་ཡི་སྐུ་གསུང་ཐུགས་ཡོན་ཏན༔ ཕྲིན་ལས་སྤྲུལ་པ་སྣ་ཚོགས་ཏེ༔ གཅིག་ཏུ་མ་ངེས་རབ་འབྱམས་སྐུ༔ ཞི་རྒྱས་དབང་དྲག་ཕྲིན་ལས་སྟོན༔ དེ་ནི་རྩོད་ལྡན་གཉིས་པར་འབྱུང་༔ ༼ཇ༽ ༔དེ་ལྟར་དྡྷ་ཀི་མནྡྷཱ་རའི༔ གསང་སྒྲུབ་དབང་སྡུད་ལྕགས་ཀྱུ་བསྟན༔ རང་མདུན་མཁའ་དཀྱིལ་འོད་ཀྱི་གུར༔ ཁ་དོག་ལྔ་ལྡན་གསལ་བའི་དབུས༔ ཡུམ་མཆོག་ཡེ་ཤེས་མཁའ་འགྲོ་བསྐྱེད༔ རང་ཉིད་སྔགས་ཆས་བཟང་པོས་བཀླུབས༔ རིག་འཛིན་རྡོ་རྗེ་དྲག་པོ་རྩལ༔
ལས་གཞུང་རྩ་ཆིངས་ནང་ལྟར་བསྐྱེད༔ འོད་ཞུ་རང་ཉིད་མཁའ་འགྲོར་བསྒོམ༔ མདུན་དུ་པད་སྣོད་ཡངས་པའི་ནང་༔ བམ་རོ་ལེགས་གཟུགས་རྒྱན་ལྡན་བཤམས༔ མྱོས་བྱེད་ཆང་དང་སྟོབས་ལྡན་ཤ༔ ཐབས་ཤེས་ཟུང་འཇུག་གསང་རྫས་བཤམ༔ གཞན་ཡང་ཟས་སྣ་སྣ་ཚོགས་རྣམས༔ བམ་རོ་དེའི་མཐར་ལེགས་པར་བཀྲམ༔ མཁའ་འགྲོ་དབང་སྡུད་དར་སྣ་ལྔ༔ མདའ་ཡི་མགུལ་དུ་ལེགས་པར་བཏགས༔ སིནྡྷུ་ར་ཡིས་སྔགས་འདི་བྲི༔ ཨཱོཾ་ཧྲཱིཿདྷཱ་ཀི་ཛྙཱ་ན་སཱ་ག་ར་རཱ་ཛ་ཧ་རི་ནི་ས་མ་བྷྱོ༔ སིདྡྷི་སརྦ་ཛཿཧཱུྃ༔ ཡེ་ཤེས་མཁའ་འགྲོའི་སྲོག་སྔགས་འདི༔ ཡིག་འབྲུ་དབུ་ཅན་འབྲུ་ཚུགས་བཀོད༔ མཁའ་འགྲོ་དབང་སྡུད་བྱ་རྒོད་ལྤགས༔ དྲི་བཟང་བྱུགས་པའང་མགུལ་དུ་བཏགས༔ བསུར་ཆེན་དྲི་བཟང་སྤོས་དུད་སྒྲེངས༔ རྐང་གླིང་ཐོད་རྔ་རྔ་བོ་ཆེ༔ རོལ་ཆས་སྒྲ་ལྡན་གདུང་བའི་དབྱངས༔ བསྐྱེད་རྫོགས་གསལ་བས་འདི་སྐད་དོ༔ ༼ཉ༽ ཧཱུྃ་བྷྱོ༔ རིག་རྩལ་མ་འགགས་འཕྲོ་འདུ་ལས༔ འགྱུར་མེད་དབྱིངས་རིག་དཀྱིལ་འཁོར་ཤར༔ འཁོར་འདས་རབ་འབྱམས་ཀུན་ལ་ཁྱབ༔ མ་འགགས་རང་གསལ་འཕྲོ་འདུ་ལས༔ ཡེ་སྟོང་ཁྱབ་གདལ་ཕོ་བྲང་ཆེ༔ ཡེ་ཤེས་ལྔ་ཡི་འོད་ཟེར་འཕྲོ༔ ཕྱི་ནང་མ་སྒྲིབ་
འོད་ཀྱི་གུར༔ ༼ཏ༽ ༔དེ་དབུས་པད་ཉི་དབུགས་བྲལ་ཁྲིར༔ བྷྱོ་ལས་ཡེ་ཤེས་མཁའ་འགྲོ་མ༔ བདེ་ཆེན་དབང་ཕྱུག་མཚོ་རྒྱལ་མ༔ དཀར་གསལ་མུ་ཏིག་འོད་མདངས་འཚེར༔ ཞི་འཛུམ་སྤྱན་གསུམ་ངང་རྒྱུད་རིང་༔ དབུ་སྐྲ་ཐོར་ཚུགས་བཅིངས་ལྷག་གྲོལ༔ མེ་ཏོག་དམར་པོའི་ཕྲེང་བ་དང་༔ ཐོད་སྐམ་རིན་ཆེན་སྐྲ་མཚམས་བཅིངས༔ སྤྱི་བོར་སྣང་མཐའ་ཡབ་ཡུམ་བཞུགས༔ དར་སྣ་ལྔ་ཡི་ཅོད་པན་ལྡན༔ ཕྱག་གཡས་མདའ་དར་རྔ་ཡབ་དང་༔ རྡོ་རྗེ་རྩེ་ལྔ་ནམ་མཁར་ཕྱར༔ ཕྱག་གཡོན་ཐོད་པ་རིན་ཆེན་བུམ༔ ཟག་མེད་བདུད་རྩིས་ལེགས་པར་གཏམས༔ དཔག་བསམ་ཤིང་ལོ་མེ་ཏོག་རྒྱས༔ ཐུགས་ཀར་མཆོད་པའི་ཚུལ་གྱིས་བསྣམས༔ དཀུ་ལ་བརྟེན་ཅིང་མཁའ་ལ་གསོལ༔ དཀར་འཛིན་ཆུ་འཛིན་བདེ་བས་རྒྱས༔ དར་སྣ་ལྔ་ཡི་ན་བཟའ་གསོལ༔ སྙན་ཆ་མགུལ་རྒྱན་སེ་མོ་དོ༔ རིན་ཆེན་སྣ་ཚོགས་ཕྲེང་བས་བརྒྱན༔ ཞབས་གཉིས་གཡས་བསྐུམ་གཡོན་
བརྐྱང་གར༔ འཇའ་འོད་མེ་དཔུང་འཚུབས་ཀློང་གསལ༔ བདག་མདུན་མཁའ་འགྲོ་མཚོ་རྒྱལ་མའི༔ ཀླད་པ་དུང་ཁང་འོད་ཀྱི་གུར༔ ༼ཐ༽ ༔དེ་དབུས་པདྨ་འདབ་བཞིའི་སྟེང༔ དབུས་ལྟེར་རྡོ་རྗེ་ཕག་མོ་དམར༔ ཞལ་གཅིག་སྤྱན་གསུམ་མཆེ་བཞི་གཙིགས༔ རལ་གཡེང་ཐོད་སྐམ་སྐྲ་མཚམས་བཅིངས༔ སྤྱི་གཙུག་ཕག་ཞལ་ངུར་སྒྲ་ལྡིར༔ ཁྲོས་རྔམ་སྐུ་ལ་ཁྲོ་ཆས་རྫོགས༔ ཕྱག་གཡས་གྲི་གུག་ནམ་མཁར་འཕྱར༔ གཡོན་པས་ཐོད་ཁྲག་ཐུགས་ཀར་བསྣམས༔ ཁ་ཊྭཱཾ་མཆན་བཅུག་ཡབ་ཀྱི་ཚུལ༔ རུས་རྒྱན་མགོ་ཕྲེང་དོ་ཤལ་འཕྱངས༔ ཞབས་གཉིས་གཡས་བསྐུམ་གཡོན་བརྐྱང་གར༔ པད་ཉི་རོ་ཡི་གདན་སྟེང་འགྱིང་༔ སྐུ་ལ་མེ་འོད་གློག་སྟོང་འཁྱུག༔ དམར་གསལ་ཉི་མའི་མདོག་ལྟར་བསྐྱེད༔ མདུན་དུ་རྡོ་རྗེ་མཁའ་འགྲོ་མཐིང་༔ གཡས་སུ་རིན་ཆེན་མཁའ་འགྲོ་སེར༔ རྒྱབ་ཏུ་པདྨ་མཁའ་འགྲོ་དམར༔ གཡོན་ཏུ་ལས་ཀྱི་མཁའ་འགྲོ་ལྗང་༔ ཀུན་ཀྱང་
གཅེར་བུ་ཁྲོ་མོའི་གཟུགས༔ གྲི་ཐོད་ཁ་ཊྭཱཾ་ཕྱག་ན་བསྣམས༔ བརྐྱང་བསྐུམ་གར་གྱིས་གསལ་བར་བསྐྱེད༔ ༼ད༽ ༔མགྲིན་པ་གསུང་གི་གཞལ་ཡས་ན༔ སྟོང་གསལ་མ་འགགས་འོད་ལྔའི་གུར༔ དེ་དབུས་པདྨ་འདབ་བཞིའི་སྟེང༔ དབུས་ལྟེར་ཧཱུྃ་ལས་སེང་གདོང་མ༔ མཐིང་གསལ་ནམ་མཁའི་མདངས་དང་ལྡན༔ སེང་ཞལ་སྤྱན་གསུམ་དམར་ཟླུམ་འཁྱིལ༔ མཆེ་གཙིགས་ལྗགས་དམར་གློག་ལྟར་འཁྱུག༔ གཡུ་ཡི་རལ་གཡེང་ཐོད་སྐམ་ལྔས༔ སྐྲ་མཚམས་བཅིངས་ཤིང་དར་དཔྱངས་བརྒྱན༔ སེང་ཞལ་ང་རོས་སྲིད་གསུམ་འདིར༔ ཕྱག་གཉིས་གྲི་གུག་ཐོད་ཁྲག་ཐོགས༔ ཁ་ཊྲཱཾ་མཆན་བཅུག་མགོ་ཕྲེང་འཕྱངས༔ ཞབས་གཉིས་བརྐྱང་བསྐུམ་གར་སྟབས་རོལ༔ ཕྱོགས་བཞིའི་པད་སྟེང་མཁའ་འགྲོ་བཞི༔ དཀར་སེར་དམར་ལྗང་ཁྲོས་རྔམ་བརྗིད༔ སེང་ཞལ་ང་རོས་གནམ་ས་འདར༔ གྲི་ཐོད་ཁ་ཊྲཱཾ་ཕྱག་ན་བསྣམས༔ བརྐྱང་བསྐུམ་གར་གྱིས་རོལ་སྟབས་འཕྱོ༔
ཀུན་ཀྱང་སྐུ་ལ་མེ་དཔུང་འབར༔ གཏུམ་རྔམ་དྲག་ཤུལ་ལྡན་པར་བསྐྱེད༔ ༼ན༽ ༔སྙིང་ག་ཐུགས་ཀྱི་གཞལ་ཡས་ན༔ འཇའ་འོད་ལྔ་ལྡན་ཐིག་ལེའི་དབུས༔ པདྨ་འདབ་བརྒྱད་གེ་སར་རྒྱས༔ ཧྲཱིཿལས་རྡོ་རྗེ་དྲག་པོ་རྩལ༔ ཞི་མ་ཁྲོ་འཛུམ་སྐུ་མདོག་དཀར༔ པད་ཞྭ་ཕོད་ཀ་ཆོས་གོས་གསོལ༔ རྡོ་རྗེ་ཐོད་བུམ་ཁ་ཊྲཱཾ་བསྣམས༔ མཚན་དཔེས་རབ་བརྒྱན་འོད་ཟེར་འབར༔ རྡོར་སྐྱིལ་རྒྱ་ཡིས་ལྷམ་མེར་བཞུགས༔ མཐའ་བསྐོར་པད་འདབ་བརྒྱད་ཀྱི་སྟེང་༔ ཧྲཱིཿལས་པདྨ་འབྱུང་གནས་བརྒྱད༔ སྐུ་མདོག་ཕྱག་མཚན་གཙོ་བོ་ལྟར༔ མཚན་དཔེས་རབ་བརྒྱན་འོད་ཟེར་འབར༔ སྣང་སྲིད་ཟིལ་གནོན་ཚུལ་དུ་བསྒོམ༔ ༼པ༽ ༔ལྟེ་བ་ཡོན་ཏན་གཞལ་ཡས་སུ༔ རིན་ཆེན་འབར་བའི་འོད་ཀྱི་གུར༔ དེ་དབུས་པད་ཉི་རོ་ཡི་སྟེང་༔ ཧཱུྃ་ལས་རྡོ་རྗེ་གྲོ་ལོད་རྩལ༔ དམར་སྨུག་གཏུམ་རྔམ་སྤྱན་གསུམ་འབུར༔ ཞལ་བསྒྲད་མཆེ་གཙིགས་རལ་པ་གཡེང་༔ ཐོད་སྐམ་དབུ་རྒྱན་ཕྱག་
གཡས་ཀྱིས༔ རྡོ་རྗེ་བྱ་ཁྱུང་ནམ་མཁར་འཕྱར༔ ཕྱག་གཡོན་ལྕགས་ཕུར་སྡིག་པ་བསྣམས༔ ཆོས་གོས་དམར་པོ་འཆམས་སྟབས་གསོལ༔ རུས་རྒྱན་གོ་ཕྲེང་ག་ཤལ་འཕྱངས༔ ཞབས་གཉིས་འདོར་སྟབས་རྒྱ་སྟག་གི༔ སྟེང་དུ་གནས་བཞིན་མེ་དཔུང་འབར༔ རང་འདྲའི་ཁྲོ་བོ་བརྒྱད་ཀྱིས་བསྐོར༔ ཀུན་ཀྱང་སྐུ་ལ་མེ་འོད་འཕྲོ༔ ཁམས་གསུམ་དབང་སྡུད་ཚུལ་དུ་བསྐྱེད༔ ༼ཕ༽ ༔གསང་གནས་ཕྲིན་ལས་གཞལ་ཡས་སུ༔ ཨེ་ལས་ཆོས་འབྱུང་འབར་བའི་དབུས༔ པད་ཉི་རོ་ཡི་གདན་སྟེང་དུ༔ ཧེ་རུ་ཀ་དཔལ་ཏྲཀྴད་བདུད༔ མཐིང་ནག་ཁྲོ་གཏུམ་སྤྱན་གསུམ་གཡོ༔ ཞལ་གདངས་མཆེ་གཙིགས་ལྗགས་དམར་བསྐྱོད༔ རལ་གཡེང་ཐོད་སྐམ་ཕྲེང་བས་བརྒྱན༔ སྐུ་ལ་བདུད་ བེར 
་ལྷབ་ལྷུབ་གསོལ༔ ཕྱག་གཉིས་རུ་དར་ལྕགས་ཀྱུ་འཛིན༔ སྐུ་ལ་དུར་ཁྲོད་ཆས་ཀྱིས་བརྒྱན༔ འཁོར་གསུམ་བརྗིད་ལྡན་རྐེད་པར་བཅིངས༔ རྟ་ནག་རྒྱན་ལྡན་ཆིབས་སུ་བཅིབས༔ རང་འདྲའི་
བདུད་མགོན་བརྒྱད་ཀྱིས་བསྐོར༔ ཀུན་ཀྱང་མེད་རླུང་དབུས་སུ་འགྱིང་༔ ཆུང་སྲི་གནོད་བྱེད་འབྱུང་པོའི་ཚོགས༔ ཚར་གཅོད་ཕྲིན་ལས་སྒྲུབ་བཞིན་བཞུགས༔ དེ་ལྟར་བསྐྱེད་པའི་ལུས་དཀྱིལ་ལྷ༔ གསལ་འཚེར་ལྷུན་ཆགས་འོད་དུ་འབར༔ ༼བ༽ ༔རང་རང་ཐུགས་སྲོག་ཡིག་འབྲུ་ལས༔ འོད་ཟེར་དཔག་ཡས་འཕྲོས་པ་ཡིས༔ རབ་འབྱམས་རྒྱ་མཚོའི་ཞིང་ཀུན་ཁྱབ༔ གསང་སྔགས་མ་རྒྱུད་བླ་མ་ཡི༔ ལྷ་ཚོགས་མ་ལུས་འཁོར་བཅས་ཀྱི༔ ཐུགས་རྗེའི་ཐུགས་དམ་རྒྱུད་བསྐུལ་ཏེ༔ སྤྱན་དྲངས་རང་ལ་སིབ་སིབ་ཐིམ༔ དབང་བསྐུར་བྱིན་གྱིས་བརླབས་པར་གྱུར༔ ༼མ༽ ༔བདག་མདུན་དབྱེར་མེད་ཐུགས་ཀ་ནས༔ འོད་ཟེར་ལྕགས་ཀྱུའི་རྣམ་པ་ཅན༔ ཕྱོགས་བཅུའི་མཐའ་ཀླས་གང་བར་འཕྲོས༔ མ་ཚོགས་མཁའ་འགྲོ་དབང་དུ་བསྡུས༔ དྲེགས་པ་ལྷ་སྲིན་བྲན་དུ་ཁོལ༔ ཞི་རྒྱས་དབང་དྲག་ཕྲིན་ལས་ཀུན༔ ཐོགས་མེད་མྱུར་དུ་བསྒྲུབས་གྱུར་ཏེ༔ འགྱུར་
མེད་བདེ་བླག་འགྲུབ་པར་བསམ༔ ༼ཙ༽ ༔དེ་ནས་འཛབ་འདིས་སྤྱན་དྲངས་ཏེ༔ ཨཱོཾ་ཧྲཱིཿདྷཱ་ཀི་ཛྙཱ་ན་སཱ་ག་ར་རཱ་ཛ་ཧ་རི་ནི་ས་མ་བྷྱོ༔ སིདྡྷི་སརྦ་ཛཿཧཱུྃ༔ སྲོག་སྔགས་ཡིག་འབྲུ་ཉེར་གསུམ་འདི༔ མ་རྒྱུད་ཡོངས་ཀྱི་སྲོག་སྙིང་ཡིན༔ དེ་ལྟར་བདག་བསྐྱེད་གསལ་བར་བསྒོམ༔ ཕྱི་རིམ་འཁོར་ཚོགས་འདི་ལྟར་བསྐྱེད༔ ༼ཚ༽ ༔རང་ཉིད་ཡེ་ཤེས་མཚོ་རྒྱལ་གྱི༔ ཕྱོགས་བཞི་མཚམས་བཞི་སྟེང་འོག་ཏུ༔ ཤར་དུ་རྡོ་རྗེ་མཁའ་འགྲོ་འབུམ༔ རྡོ་རྗེ་ཐོད་པ་ཁ་ཊྭཱྃ་བསྣམས༔ དར་དཀར་ན་བཟའ་སྐུ་ལ་གསོལ༔ མེ་ཏོག་དཀར་པོས་ཕྲེང་བས་བརྒྱན༔ གདོན་བགེགས་ཞི་བའི་ལས་ལ་བརྩོན༔ ལྷོ་ཕྱོགས་རིན་ཆེན་མཁའ་འགྲོ་འབུམ༔ རིན་ཆེན་གཏེར་བུམ་ཕྱག་ན་བསྣམས༔ དར་སེར་ན་བཟའ་སྐུ་ལ་གསོལ༔ མེ་ཏོག་སེར་པོའི་ཕྲེང་བས་བརྒྱན༔ ཚེ་བསོད་རྒྱས་མཛད་ལས་ལ་བརྩོན༔ ནུབ་ཕྱོགས་པདྨ་མཁའ་འགྲོ་འབུམ༔ པདྨ་ལྕགས་ཀྱུ་ཕྱག་ན་བསྣབས༔ དར་དམར་ན་བཟའ་སྐུ་ལ་གསོལ༔ མེ་ཏོག་དམར་པོའི་ཕྲེང་བས་བརྒྱན༔
ཁམས་གསུམ་སྲིད་གསུམ་འགུགས་པར་བྱེད༔ བྱང་ཕྱོགས་ཀརྨ་མཁའ་འགྲོ་འབུམ༔ རྒྱ་གྲམ་ཐོད་ཁྲག་ཕྱག་ན་བསྣམས༔ དར་ལྗང་ན་བཟའ་སྐུ་ལ་གསོལ༔ མེ་ཏོག་ལྗང་གུའི་ཕྲེང་བས་བརྒྱན༔ གདོན་བགེགས་བསྒྲལ་བའི་ལས་ལ་བརྩོན༔ ཤར་ལྷོར་འགུགས་བྱེད་མཁའ་འགྲོ་འབུམ༔ ལྕགས་ཀྱུ་འཁོར་ལོ་ཕྱག་ན་བསྣམས༔ སྣང་སྲིད་འཁོར་འདས་འགུགས་པར་བྱེད༔ ལྷོ་ནུབ་འཆིང་བྱེད་མཁའ་འགྲོ་འབུམ༔ ཞགས་པ་པར་བུ་ཕྱག་ན་བསྣམས༔ སྣང་སྲིད་འཁོར་འདས་བཅིང་བར་བྱེད༔ ནུབ་བྱང་སྡོམ་བྱེད་མཁའ་འགྲོ་འབུམ༔ ལྕགས་སྒྲོག་ཧོམ་ཁུང་ཕྱག་ན་བསྣམས༔ སྣང་སྲིད་འཁོར་འདས་སྡོམ་པར་བྱེད༔ བྱང་ཤར་མྱོས་བྱེད་མཁའ་འགྲོ་འབུམ༔ རལ་གྲི་དྲིལ་བུ་ཕྱག་ན་བསྣམས༔ སྣང་སྲིད་འཁོར་འདས་མྱོས་པར་བྱེད༔ ༔སྟེང་ཕྱོགས་ཡེ་ཤེས་མཁའ་འགྲོ་འབུམ༔ ཕྱག་གཉིས་ཉི་ཟླའི་ཆ་ལང་རྡེབ༔ ཐབས་ཤེས་ཟུང་དུ་འཇུག་
པར་བྱེད༔ འོག་ཕྱོགས་འཇིག་རྟེན་མཁའ་འགྲོ་འབུམ༔ ཐོག་སེར་འབེབས་ཤིང་རི་རབ་བསྙིལ༔ ཁམས་གསུམ་མ་ལུས་ཟ་བར་བྱེད༔ ༔གཞན་ཡང་གིང་དང་དཔའ་བོའི་ཚོགས༔ ལ་ལས་རྒྱ་མཚོ་ཧུབ་ཀྱིས་འདེབས༔ ལ་ལས་མཚོན་ཆའི་འཁོར་ལོ་སྐོར༔ ལ་ལས་གནམ་ས་སྟེང་འོག་སྒྱུར༔ ལྷ་ཚོགས་དེ་དག་ཐམས་ཅད་ཀྱང་༔ ཐབས་ཤེས་ཟུང་འཇུག་ཉམས་རྩལ་འབར༔ ཧཱུྃ་ཕཊ་མ་བྷྱོ་ཕེཾ་གྱི་སྒྲས༔ འཁོར་འདས་རབ་འབྱམས་གཡོ་བར་བྱེད༔ གར་དབྱངས་རོལ་རྩེད་བྲོ་རྡུང་བས༔ རིགས་དྲུག་འཁོར་ལོ་གཞོམ་པར་བྱེད༔ དེ་ལྟར་འཁོར་གྱི་མཁའ་འགྲོ་ཡི༔ ཐུགས་སྲོག་འོད་ཀྱི་ལྕགས་ཀྱུ་ཡིས༔ ཨོ་རྒྱན་མཁའ་སྤྱོད་ཞིང་ཁམས་ནས༔ དཔའ་བོ་མཁའ་འགྲོ་གིང་གི་ཚོགས༔ སྐད་ཅིག་ཉིད་ལ་གནས་འདི་རུ༔ ཉི་ཟེར་རྡུལ་ལྟར་འཚུབས་པར་གྱུར༔ ཨཱོཾ་ཧྲཱིཿདྷཱ་ཀི་ཛྙཱ་ན་སཱ་ག་ར་རཱ་ཛ་ཧ་རི་ནི་ས་མ་བྷྱོ༔ སིདྡྷི་སརྦ་ཛཿཧཱུྃ༔ ༼ཛ༽ ༔ཧཱུྃ༑ ང་ནི་དཔལ་ཆེན་ཧེ་རུ་ཀ༔ རིག་
འཛིན་པདྨ་སཾ་བྷ་ཝ༔ ཁྲོ་རྒྱལ་རྡོ་རྗེ་གྲོ་ལོད་རྩལ༔ སྐུ་གསུམ་ཡེ་རྫོགས་ཆོས་ཀྱི་སྐུ༔ སྐུ་ལྔ་ཡེ་རྫོགས་འདུས་མ་བྱས༔ ང་ཡི་དབང་དུ་མི་འདུ་མེད༔ རབ་འབྱམས་ཞིང་ཀུན་རབ་གང་བའི༔ གསང་སྔགས་མ་རྒྱུད་བླ་མ་དང་༔ འཁོར་འདས་ཀུན་གང་དཔའ་བོའི་ཚོགས༔ སྲིད་གསུམ་གནས་གང་མཁའ་འགྲོའི་ཚོགས༔ ཡེ་ཤེས་ལས་དང་འཇིག་རྟེན་གྱི༔ དཔའ་བོ་མཁའ་འགྲོའི་ལྷ་ཚོགས་རྣམས༔ ཐུགས་རྗེའི་ཐུགས་དམ་རྗེས་དགོངས་ལ༔ མྱུར་བ་ཉིད་དུ་འདིར་འདུས་ཤིག༔ ཧཱུྃ༑ ང་ནི་ཡེ་ཤེས་མཚོ་རྒྱལ་མ༔ ཡེ་གདོད་ཉིད་ནས་ཆོས་ཀྱི་སྐུ༔ ཐབས་ཀྱི་ཆོ་འཕྲུལ་ལོངས་སྐུར་བསྟན༔ འགྲོ་བའི་དོན་ལ་སྤྲུལ་སྐུར་བཞེངས༔ ང་ཡི་དབང་དུ་མི་འདུ་མེད༔ རབ་འབྱམས་ཞིང་ཀུན་རབ་གང་བའི༔ གསང་སྔགས་མ་རྒྱུད་བླ་མ་དང་༔ འཁོར་འདས་ཀུན་གང་དཔའ་བོའི་ཚོགས༔ སྲིད་གསུམ་གནས་གང་མཁའ་འགྲོའི་ཚོགས༔ ཡེ་ཤེས་ལས་དང་འཇིག་རྟེན་
གྱི༔ ཡི་དམ་ཞི་ཁྲོ་རབ་འབྱམས་ཚོགས༔ སྔོན་གྱི་དམ་ཚིག་དྲན་མཛོད་ལ༔ སྐད་ཅིག་ཉིད་ལ་འདིར་འདུས་ཤིག༔ ཧཱུྃ༑ ང་ནི་གུ་རུ་ཡབ་ཡུམ་སྐུ༔ ཐབས་དང་ཤེས་རབ་གཉིས་སུ་མེད༔ རིག་འཛིན་རྡོ་རྗེ་དྲག་པོ་རྩལ༔ ང་ཡི་བཀའ་ལས་འདའ་མ་བྱེད༔ རབ་འབྱམས་ཞིང་ཀུན་རབ་གང་བའི༔ གསང་སྔགས་མ་རྒྱུད་བླ་མ་དང་༔ འཁོར་འདས་ཀུན་གང་དཔའ་བོའི་ཚོགས༔ སྲིད་གསུམ་གནས་གང་མཁའ་འགྲོའི་ཚོགས༔ ཡེ་ཤེས་ལས་དང་འཇིག་རྟེན་གྱི༔ ཆོས་སྐྱོང་སྲུང་མ་རྒྱ་མཚོའི་ཚོགས༔ ཁས་བླངས་དམ་བཅས་དྲན་མཛོད་ལ༔ དམ་སྲི་འདུལ་ཕྱིར་འདིར་འདུས་ཤིག༔ ལོག་འདྲེན་བསྒྲལ་ཕྱིར་གཤེགས་སུ་གསོལ༔ གདོན་བགེགས་བརླག་ཕྱིར་གནས་འདིར་བྱོན༔ ཨཱོཾ་ཧྲཱིཿདྷཱ་ཀི་ཛྙཱ་ན་སཱ་ག་ར་རཱ་ཛ་ཧ་རི་ན་ས་མ་བྷྱོ༔ སིདྡྷི་སརྦ་ཛཿཧཱུྃ༔ ༼ཝ༽ ༔ཧཱུྃ་བྷྱོ༔ རབ་འཇིགས་གཏུམ་རྔམ་དུར་ཁྲོད་ཆེ༔ འགྱུར་མེད་རྡོ་རྗེའི་བྲག་རི་མཛེས༔ པདྨ་ཉི་ཟླའི་དཀྱིལ་འཁོར་
གསལ༔ འབར་བའི་གདན་འདིར་བཞུགས་སུ་གསོལ༔ ༼ཞ༽ ༔ཧཱུྃ་བྷྱོ༔ ཡེ་ཤེས་མཁའ་འགྲོའི་ལྷ་ཚོགས་ལ༔ དད་གུས་དམ་ཚིག་གདུང་བའི་སེམས༔ དག་གཙང་དང་བའི་མོས་བློ་ཡིས༔ སྒོ་གསུམ་གུས་པས་ཕྱག་འཚལ་ལོ༔ ༼ཟ༽ ༔ཧཱུྃ་བྷྱོ༔ སྐུ་ལྔ་ལྷུན་གྱིས་གྲུབ་པའི་རྫས༔ ཤ་ཆེན་ལྔ་དང་བདུད་རྩིའི་མཚོ༔ རིག་རྩལ་མཐུ་སྟོབས་བསྐྱེད་པའི་རྫས༔ དཔའ་བོ་རྒྱས་པ་མྱོས་བྱེད་ཆང་༔ བདེ་སྟོང་ཉམས་རྩལ་འབར་བའི་རྫས༔ མཁའ་འགྲོ་དགྱེས་པ་རཀྟའི་ཚོགས༔ ཐབས་ཤེས་གཉིས་མེད་དམ་རྫས་འདི༔ མཆོད་དོ་འབུལ་ལོ་དགྱེས་པར་རོལ༔ བར་ཆད་གདོན་བགེགས་འདུལ་བར་མཛོད༔ ༼འ༽ ༔ཧཱུྃ་བྷྱོ༔ དག་པ་རིགས་ལྔའི་བྱང་སེམས་རྒྱུན༔ མི་གཙང་རྣམ་དག་ཁྲུས་ཆབ་བསིལ༔ མིག་འབྲས་ལྟར་སྲུང་དམ་ཚིག་རྫས༔ མེ་ཏོག་དཀར་དམར་ཕྲེང་བ་མཛེས༔ བསླབ་གསུམ་རྣམས་དག་བདུག་པའི་སྤྲིན༔ དྲི་ཞིམ་བདུག་སྤོས་སྤྲིན་ལྟར་
གཏིབས༔ མ་རིག་མུན་ཁྱབ་རབ་གསལ་བའི༔ ཞུན་ཆེན་སྣང་གསལ་ཉི་འོད་འབར༔ ཐོལ་སྐྱེས་རྦད་ཆོད་ཟང་ཐལ་རྟོགས༔ བདུད་རྩི་ལྔ་དང་བྱུག་པ་བརྡལ༔ སྟོབས་ཀྱི་ཕར་ཕྱིན་འབྲས་ཆེན་ཟན༔ ཆང་གིས་སྤགས་པའི་ཞལ་ཟས་བཀྲམ༔ སྟོང་ཉིད་བཅོ་བརྒྱད་ལེགས་སྟོན་བརྡའ༔ སྒྲགས་སྟོང་དབྱངས་སྙན་རོལ་མོའི་སྒྲ༔ མཐུན་པའི་ཡོ་བྱད་འདི་དག་ཀུན༔ མཆོད་དོ་འབུལ་ལོ་དགྱེས་པར་རོལ༔ བར་ཆད་གདོན་བགེགས་འདུལ་བར་མཛོད༔ ༼ཡ༽ ༔ཧཱུྃ་བྷྱོ༔ ཕ་རོལ་ཕྱིན་དྲུག་རྫོགས་པའི་རྫས༔ རུས་པའི་རྒྱན་དྲུག་ཁྲལ་ཁྲོལ་རྔམས༔ སྨོན་ལམ་བདེན་སྟོབས་འགྲུབ་པའི་རྫས༔ གར་གྱི་ཉམས་དགུའི་རོལ་རྩེད་འཕྱོ༔ སྟོབས་བཅུའི་རྫུ་འཕྲུལ་ཐོགས་མེད་བརྡའ༔ ཞིང་ཆེན་གླང་ཀོ་ལྷབ་ལྷུབ་བརྒྱན༔ ང་རྒྱལ་ཆེ་བཙན་གཞོམ་པའི་བརྡའ༔ སྟག་ལྤགས་འཇའ་འོད་དྲྭ་བས་འབྲེལ༔ འདུ་བྱེད་ལྔ་ཅུ་དག་པའི་རྫས༔ ཐོད་པ་སྐམ་རློན་ཕྲེང་བ་འཁྱུག༔ མི་རྟག་
རྒྱུད་ལ་བསྐུལ་བའི་རྫས༔ བམ་རོ་ཀེང་རུས་གཅལ་དུ་བཀྲམ༔ རྟག་འཛིན་ཞེན་ཆགས་ཟློག་པའི་རྫས༔ རོ་རས་བ་དན་རྒྱལ་མཚན་བསྐྱོད༔ སེམས་ཉིད་སྟོང་པར་སྟོན་པའི་བརྡའ༔ ཐལ་ཆེན་ཚོམ་བུ་སྐར་ལྟར་བཀྲ༔ འདུས་བྱས་སྒྱུ་མར་སྟོན་པའི་ཕྱིར༔ ཁྲག་གི་ཐིག་ལེ་ཉི་ལྟར་དམར༔ ཨ་འཐས་རེ་དོགས་སྤངས་པའི་ཕྱིར༔ ཞག་གི་སོར་རིས་ཟླ་ལྟར་དཀར༔ སྒྱུ་ལུས་མི་རྟག་འཇིག་པའི་བརྡའ༔ རྐང་གླིང་ཐོད་རྔ་དི་རི་རི༔ བླ་མེད་གསང་སྔགས་ཕྱག་རྒྱ་འདི༔ མཆོད་དོ་འབུལ་ལོ་དགྱེས་པར་རོལ༔ བར་ཆད་གདོན་བགེགས་འདུལ་བར་མཛོད༔ ༼ར༽ ༔ཧཱུྃ་བྷྱོ༔ སྐུ་ལྔ་ལྷུན་གྱིས་གྲུབ་པའི་རྫས༔ ཐོད་ཕྲེང་རིགས་ལྔའི་དབང་རྟགས་རྫོགས༔ སྐུ་བཞི་འདུ་འབྲལ་མེད་པའི་རྫས༔ རིན་ཆེན་སྣ་ལྔའི་ཕྲེང་བ་མཛེས༔ སེམས་ཉིད་རྣམ་པར་དག་པའི་རྫས༔ ཤེལ་དཀར་ཕྲེང་བ་ཕྱི་ནང་གསལ༔ འཁྲུལ་སྣང་རང་གཟུགས་སྟོན་པའི་རྫས༔ མེ་ལོང་གསལ་
དྭངས་སྣ་ཚོགས་འཆར༔ དུག་ལྔ་མ་སྤངས་རྣམ་དག་ཕྱིར༔ རྡོ་རྗེ་རྩེ་ལྔ་འོད་ཟེར་འབར༔ དུག་གསུམ་དབྱིངས་སུ་བསྒྲལ་བའི་རྫས༔ ཁ་ཊྲཱཾ་རྩེ་གསུམ་སྐུ་གསུམ་རྫོགས༔ སྐྱེ་འཆི་རྩད་ནས་གཅོད་པའི་རྫས༔ རལ་གྲི་གྲི་གུག་རྣོ་ངར་ལྡན༔ བླ་མེད་གསང་སྔགས་ཕྱག་རྒྱ་འདི༔ མཆོད་དོ་འབུལ་ལོ་དགྱེས་པར་རོལ༔ བར་ཆད་གདོན་བགེགས་འདུལ་བར་མཛོད༔ ༼ལ༽ ༔ཧཱུྃ་བྷྱོ༔ ཕྱི་ནང་གསང་བ་ཡང་གསང་གི༔ བརྡའ་དོན་རྟགས་ཀྱི་ཕྱག་རྒྱ་འདིས༔ བླ་མ་ཡི་དམ་ཐུགས་དམ་བསྐང༔ བར་ཆད་གདོན་བགེགས་གདུག་པ་ཟློག༔ དཔའ་བོ་མཁའ་འགྲོའི་ཐུགས་དམ་བསྐང་༔ བར་ཆད་གདོན་བགེགས་གདུག་པ་ཟློག༔ ཆོས་སྲུང་མའི་ཐུགས་དམ་བསྐང་༔ བར་ཆད་གདོན་བགེགས་གདུག་པ་ཟློག༔ དམ་ཅན་རྒྱ་མཚོའི་ཐུགས་དམ་བསྐང་༔ བར་ཆད་གདོན་བགེགས་གདུག་པ་ཟློག༔ བཀའ་སྲུང་གཏེར་བདག་ཐུགས་དམ་བསྐོང་༔ བར་ཆད་གདོན་བགེགས་གདུག་པ་ཟློག༔
༼ཤ༽ ༔ཧཱུྃ་བྷྱོ༔ སྐྱེ་ནས་སྐྱེ་བར་རྗེས་བཟུང་བའི༔ ཡེ་ཤེས་སྤྱན་ལྡན་ཁྱེད་རྣམས་ལ༔ སྐུ་གསུང་ཐུགས་ཀྱི་དམ་ཚིག་རྣམས༔ ཉམས་གྱུར་ཐམས་ཅད་གནོང་འགྱོད་བཤགས༔ ཡེ་དག་དབྱིངས་སུ་སོར་ཆུད་ཤོག༔ བསྐྱེད་རིམ་དངོས་པོར་བཟུང་བ་དང་༔ གསང་སྔགས་སྒྲ་ཟུར་ཉམས་པ་དང་༔ རྫོགས་རིམ་ལོག་པར་གོལ་བ་རྣམས༔ བླ་མའི་ཐུགས་དང་འགལ་བ་དང་༔ ཡི་དམ་ཆོས་སྐྱོང་སྨོད་པ་དང་༔ བཀའ་སྲུང་ཨར་ལ་གཏད་པ་རྣམས༔ ཡེ་དག་དབྱིངས་སུ་སོར་ཆུད་ཤོག༔ ལེ་ལོ་འཆལ་སྤྱོད་མངོན་ལྐོག་གིས༔ བསྟན་པའི་སྤྱི་སེམས་ཆུང་བ་དང་༔ ཉེས་མེད་སེམས་ཅན་མནར་བ་རྣམས༔ ཡེ་དག་དབྱིངས་སུ་སོར་ཆུད་ཤོག༔ གསང་སྔགས་ཆོས་ལ་མ་དད་དང་༔ མཐུན་པའི་དམ་རྫས་མ་སྤྱོད་དང་༔ མཚན་ལྡན་ཕྱག་རྒྱར་བརྙས་པ་རྣམས༔ ཆོས་དབྱིངས་ཀློང་དུ་མཐོལ་ལོ་བཤགས༔ གནོང་ངོ་འགྱོད་དོ་དག་གྱུར་ཅིག༔ ནོངས་པ་བཤགས་སོ་བྱང་
བར་མཛོད༔ ཉམས་གྱུར་ཐམས་ཅད་སོར་ཆུད་ཅིང་༔ མཉམ་ཉིད་གཉིས་མེད་གཅིག་འདྲེས་ཏེ༔ ཁྱེད་རྣམས་སྐུ་དང་གསུང་དང་ཐུགས༔ བདག་གི་ལུས་ངག་ཡིད་གསུམ་རྣམས༔ སྐྱེ་བ་འདི་ནས་སངས་རྒྱས་བར༔ དབྱེར་མེད་ཆུ་ལ་ཆུ་བཞག་ལྟར༔ ཐུགས་ཡིད་གཅིག་འདྲེས་དབྱེར་མེད་ཤོག༔ ༼ས༽ ༔ཧཱུྃ་བྷྱོ༔ ཡེ་གདོད་ལྷུན་གྲུབ་གཞལ་ཡས་ནས༔ ཉག་གཅིག་རྩད་ཆོད་སྐྱེ་འཆི་བྲལ༔ འགྱུར་མེད་རྡོ་རྗེའི་སྐུར་སྟོན་པ༔ རྡོ་རྗེ་ཕག་མོར་ཕྱག་འཚལ་བསྟོད༔ ཆོས་དབྱིངས་རང་འོད་འཕྲོ་འདུ་ལས༔ ཡེ་ཤེས་ལྔ་ཡི་རོལ་རྩེད་བསྒྱུར༔ མ་འགགས་སྣ་ཚོགས་སྤྲུལ་པར་ཤར༔ མཁའ་འགྲོ་སྡེ་ལྔར་ཕྱག་འཚལ་བསྟོད༔ ༼ཧ༽ ༔ཧཱུྃ་བྷྱོ༔ མཁའ་དབྱིངས་རྣམ་དག་དཀྱིལ་འཁོར་ལས༔ ཐབས་ཀྱི་ཆོ་འཕྲུལ་རྒྱན་རྣམས་རྫོགས༔ ཡེ་ཤེས་ཡོན་ཏན་བཀོད་པ་ལྡན༔ ཕྲིན་ལས་རབ་འབྱམས་འཛོད་འཛིན་མ༔ ཡེ་ཤེས་མཁའ་འགྲོ་སེ་གེའི་གདོང་༔ ཁྲོ་རྒྱལ་འབར་མ་སྟོབས་
ཆེན་མོ༔ སྣང་སྲིད་འཁོར་འདས་དབང་སྒྱུར་མ༔ དུག་གྲི་ནག་མོ་ཕྲིན་ལས་བདག༔ འཁོར་དང་བཅས་ལ་ཕྱག་འཚལ་བསྟོད༔ ༼ཨ༽ ༔ཧཱུྃ་བྷྱོ༔ འཁྲུལ་མེད་རང་གསལ་དཀྱིལ་འཁོར་ལས༔ རབ་འབྱམས་རྒྱལ་བའི་ཞིང་ཀུན་གྲུབ༔ ཆོས་སྒོ་གངྒཱའི་བྱེ་སྙེད་ཀྱི༔ ཐབས་སྟོན་འཁོར་བ་དོང་ནས་སྤྲུག༔ འགྲོ་འདུལ་ཐབས་མཁས་སངས་རྒྱས་ཀུན༔ དབྱེར་མེད་གཅིག་བསྡུས་ཧེ་རུ་ཀ༔ རྡོ་རྗེ་དྲག་པོ་རྩལ་ལ་བསྟོད༔ ༼གུ༽ ༔ཧཱུྃ་བྷྱོ༔ ཀུན་རྫོབ་བདེན་པའི་ཆོས་རྣམས་ཟད༔ དོན་དམ་ཨ་ཏི་དབྱིངས་སུ་འཕེལ༔ ཡོན་ཏན་མི་ཟད་མཛོད་འཛིན་ཅིང་༔ གངྒཱའི་བྱེ་སྙེད་སངས་རྒྱས་ཀྱི༔ ཕྲིན་ལས་རབ་འབྱམས་མྱུར་བསྒྲུབས་ནས༔ བར་ཆད་གདོན་བགེགས་ཞི་མཛད་པ༔ དཀྱིལ་འཁོར་ཀུན་བདག་དཔའ་བོ་ཆེ༔ རྡོ་རྗེ་གྲོ་ལོད་རྩལ་ལ་བསྟོད༔ ༼རུ༽ ༔ཧཱུྃ་བྷྱོ༔ འདས་དང་ད་ལྟ་མ་འོངས་ཀྱི༔ རྒྱལ་བ་རྒྱལ་བའི་མྱུ་གུ་ཡི༔ གསང་བའི་ཡུམ་གྱུར་མཚོ་རྒྱལ་མ༔
འཁོར་དང་བཅས་ལ་ཕྱག་འཚལ་བསྟོད༔ ཁྱོད་ནི་མཐོང་ཐོས་དྲན་རེག་ཀུན༔ བདེ་འགྲོའི་བདེ་བར་འདྲེན་མཛད་ཅིང་༔ རིགས་དྲུག་སྡུག་བསྔལ་སེལ་མཛད་མ༔ བདེ་ཆེན་དབང་གི་རྒྱལ་མོར་བསྟོད༔ འགྲོ་ཀུན་བུ་གཅིག་མ་བཞིན་དུ༔ དུས་ཀུན་ཐུགས་རྗེས་སྲུང་ཞིང་སྐྱོབ༔ སྤྲུལ་པས་འགྲོ་ཀུན་བདེ་འགྲོར་འདྲེན༔ སྤྲུལ་པའི་མཁའ་འགྲོ་རྣམས་ལ་བསྟོད༔ ༼པད༽ ༔ཧཱུྃ་བྷྱོ༔ རབ་འབྱམས་རྒྱལ་བའི་དཀྱིལ་འཁོར་གྱི༔ ཕྲིན་ལས་ཀུན་སྒྲུབ་ནག་པོ་ཆེ༔ བདུད་མགོན་ཏྲཀྴད་ནག་པོར་གྲགས༔ ཞི་རྒྱས་དབང་དྲག་ལས་རབ་སྒྲུབ༔ གསང་སྔགས་བཀའ་ཡི་བྱ་ར་བ༔ དམ་ཉམས་སྲོག་གི་སྤུ་གྲི་བདུད༔ དགྲ་སྲོག་མྱུར་གཅོད་ཤན་པ་ཆེ༔ འཁོར་དང་བཅས་ལ་ཕྱག་འཚལ་བསྟོད༔ ༼མ༽ ༔ཧཱུྃ་བྷྱོ༔ བསྟོད་བྱ་ཀུན་བཟང་རྣམ་དག་གསང་༔ བསྟོད་བྱེད་ཀུན་ཏུ་བཟང་མོའི་མཁའ༔ མཁའ་གསང་བདེ་གསལ་དཀྱིལ་འཁོར་ཆེ༔ ཆོས་དབྱིངས་ལྷུན་གྲུབ་ཆེན་པོར་བསྟོད༔
༼སིད༽ ༔ཧཱུྃ་བྷྱོ༔ རྒྱལ་བ་རབ་འབྱམས་རྒྱ་མཚོ་ཡི༔ སྐུ་གསུང་ཐུགས་ཡོན་ཕྲིན་ལས་ཀྱི༔ ཐུགས་རྗེའི་ནུས་རྩལ་བྱིན་རླབས་ཀུན༔ སྐུ་དང་ཡིག་འབྲུ་ཕྱག་མཚན་གྱི༔ རྣམ་པར་སྤྱན་དྲངས་ཚངས་བུག་ནས༔ རྡོ་རྗེ་ཕག་མོ་ལྷ་ལྔར་ཐིམ༔ འཆི་མེད་རྡོ་རྗེའི་སྐུ་མཆོག་ཐོབ༔ དེ་ལས་བྱིན་རླབས་བདུད་རྩིའི་རྒྱུན༔ ཆར་ལྟར་བབས་ཏེ་མགྲིན་པར་ཐིམ༔ མཁའ་འགྲོ་སེང་གདོང་ཐུགས་རྒྱུད་བསྐུལ༔ འཆད་རྩོད་རྩོམ་པའི་ཆོས་སྒོ་གྲུབ༔ དེ་ལས་བྱིན་རླབས་བདུད་རྩིའི་རྒྱུན༔ སྙིང་གའི་བླ་མའི་སྐུ་ལ་ཐིམ༔ གཅེར་མཐོང་ཤར་གྲོལ་རང་ས་ཟིན༔ འཆི་མེད་ཆོས་སྐུའི་གདེང་མཆོག་ཐོབ༔ དེ་ལས་བྱིན་རླབས་བདུད་རྩིའི་རྒྱུན༔ ལྟེ་བའི་གྲོ་ལོད་རྩལ་ལ་ཐིམ༔ ཡོན་ཏན་རྒྱ་མཚོའི་ཕ་རོལ་ཕྱིན༔ དེ་ལས་བྱིན་རླབས་བདུད་རྩིའི་རྒྱུན༔ གསང་བའི་ཏྲཀྴད་མགོན་པོར་ཐིམ༔ ཕྲིན་ལས་རབ་འབྱམས་ལྷུན་གྲུབ་གྱུར༔ གཞན་ཡང་ལུས་ཀུན་འོད་ཀྱིས་ཁེངས༔ ཡེ་ཤེས་ལུས་ཐོབ་
འཆི་མེད་འགྲུབ༔ སྙིང་གའི་གུ་རུའི་ཐུགས་ཀར་ཧཱུྃ༔ དེ་ལ་སྔགས་ཕྲེང་གཡོན་བསྐོར་གསལ༔ ཨཱོཾ་ཧྲཱིཿདྷཱ་ཀི་ཛྙཱ་ན་སཱ་ག་ར་རཱ་ཛ་ཧ་རི་ནི་ས་མ་བྷྱོ༔ སིདྡྷི་སརྦ་ཛཿཧཱུྃ༔ ༼དྷི༽ ༔སྔགས་ཕྲེང་གསལ་དྭངས་རང་སྒྲར་བཅས༔ རིམ་གྱིས་བླ་མའི་སྐུ་ལ་ཐིམ༔ གསང་བའི་མགོན་པོ་ལྟེ་བ་ཡི༔ རྡོ་རྗེ་གྲོ་ལོད་སྐུ་ལ་ཐིམ༔ རྡོ་རྗེ་གྲོ་ལོད་སྙིང་ག་ཡི༔ རྡོ་རྗེ་དྲག་པོ་རྩལ་ལ་ཐིམ༔ རྡོ་རྗེ་དྲག་རྩལ་མགྲིན་པ་ཡི༔ མཁའ་འགྲོ་སེང་གདོང་མ་ལ་ཐིམ༔ མཁའ་འགྲོ་སེང་གདོང་སྤྱི་བོ་ཡི༔ རྡོ་རྗེ་ཕག་མོའི་ཐུགས་ཀར་ཐིམ༔ སྟོང་རའི་ལྷ་སྐུ་རྐང་མཐིལ་ནས༔ འོད་ཞུ་རང་རིག་ཕག་མོར་ཐིམ༔ ཕག་མོ་དམིགས་མེད་སྟོང་པར་ཡལ༔ དྲན་རིག་རྗེན་པ་མཁའ་ལྟར་དག༔ འཆི་མེད་དོན་དམ་ཡེ་ཤེས་འགྲུབ༔ འགྱུར་མེད་ཀུན་བཟང་མྱུར་རྟོགས་ཤོག༔ ཨེ་མ་ཧོ༔ ཨ་ལ་ལ་ཧོ༔ ༼ཧཱུྃ༽ ༔དེ་ལྟར་མཁའ་འགྲོ་མཚོ་རྒྱལ་གྱི༔ སྙན་བརྒྱུད་གདམས་ངག་ཟབ་གནད་འདི༔ དངོས་གྲུབ་ཐོག་དམར་ལས་ཀྱང་མྱུར༔ ཚེ་འདིར་འགལ་རྐྱེན་བར་ཆད་ཞི༔
ནད་གདོན་བགེགས་ཀྱི་གཡུལ་ལས་རྒྱལ༔ ཕྱི་མ་ཨོ་རྒྱན་མཁའ་སྤྱོད་དུ༔ ལམ་སྣ་འདྲེན་པར་ཐེ་ཚོམ་མེད༔ མཆོག་གི་སིདྡྷི་ཚེ་འདིར་ཐོབ༔ འཆི་མེད་ཡེ་ཤེས་དངོས་གྲུབ་བརྙེས༔ ཐོད་པ་བོར་ཆོག་གདམས་ངག་འདི༔ གུ་རུ་རྡོ་རྗེ་གྲོ་ལོད་ཀྱི༔ གསང་བ་ཡུམ་གྱི་སྒྲུབ་ཐབས་ཡིན༔ དབང་བསྐུར་རང་དོན་གཞན་དོན་སོགས༔ ཀུན་བཟང་ཡབ་ཡུམ་གཞུང་དུ་གསལ༔ འདི་ཉིད་གུད་དུ་སྒྲུབ་པའི་ཚེ༔ སྔོན་འགྲོ་མཚམས་གཅོད་སྐྱབས་སེམས་སོགས༔ རྩ་ཆིངས་དྲག་པོ་རྩལ་ལྟར་བྱ༔ གྲོ་ལོད་རྩལ་དང་ཏྲཀྴད་བདུད༔ ལས་གཞུང་མཆོད་ཕྲེང་དབྱེར་མེད་སྒྲག༔ ༔འདི་ཡི་འགྲུབ་རྟགས་ཚར་ཚད་ནི༔ བུད་མེད་མང་པོ་འདུ་བ་དང༔ རོ་རུལ་དྲེ་དང་བྱ་རྒོད་དྲི༔ དངོས་སམ་ཉམས་སུ་གསལ་བར་འབྱུང་༔ དེ་ནི་ཕྱི་ཡི་འགྲུབ་རྟགས་སོ༔ ༔དེ་ནས་ནང་གི་འགྲུབ་རྟགས་ནི༔ བུད་མེད་དགའ་ཞིང་རྒོད་པ་དང་༔ ཐབས་ཤེས་ཟུང་འཇུག་བདེ་སྟེར་དང་༔ བུད་མེད་རྒན་ནམ་གཞོན་པ་ཡིས༔ བྷནྡྷ་སྨན་རཀ་གཏོར་མ་དང་༔ ཟས་སམ་འབྲུ་སྣ་ཆུ་ཆང་གིས༔ བཀང་ནས་བྱིན་ནམ་འཐུང་བ་དང་༔ གཞན་ཡང་རིན་ཆེན་དར་ཟབ་གོས༔ དངོས་གྲུབ་སྟེར་བའི་ངེས་ཤེས་འཆར༔ དེ་ནི་ནང་གི་འགྲུབ་རྟགས་ཡིན༔ ༔དེ་ནས་གསང་བའི་འགྲུབ་རྟགས་ནི༔ བུད་མེད་རྒན་ནམ་གཞོན་ཡང་རུང་༔ མདའ་དར་ཚེ་རིལ་ཚེ་ཆང་དང་༔ དཀར་གསུམ་མངར་
གསུམ་སྟེར་བ་དང་༔ ལུས་སྦྱོར་བདེ་བ་སྟེར་བ་དང་༔ བྷ་ག་བསྟན་ཅིང་དྲི་ཆུ་འཐོར༔ ཕྱག་མཚནཁ་ཊྲཱཾ་གྲི་གུག་སོགས༔ ཐོད་རྔ་རྐང་གླིང་རུས་རྒྱན་དང་༔ གཞན་ཡང་རྟགས་རྣམས་ངེས་པ་མེད༔ དེ་ནི་གསང་བའི་འགྲུབ་རྟགས་ཡིན༔ ༔དེ་ནས་སྦས་གསང་འགྲུབ་རྟགས་ནི༔ ཡེ་ཤེས་མཚོ་རྒྱལ་མཇལ་བ་དང་༔ རྡོ་རྗེ་ཕག་མོའམ་སེང་གདོང་མ༔ དངོས་སམ་ཉམས་སྣང་རྨི་ལམ་དུ༔ ཞལ་མཇལ་ལུང་སྟོན་འགྲོགས་པར་འགྱུར༔ དེ་ནི་སྦས་གསང་འགྲུབ་རྟགས་ཡིན༔ ༔དེ་ནས་དམ་ཚིག་གསོ་བའི་ཐབས༔ རྨི་ལམ་སྣང་བར་འདི་ལྟར་བརྟག༔ ངུ་དང་ངོ་ནག་ཁྲོས་པ་དང་༔ གོས་དང་རྒྱན་ཆ་ཤ་མདོག་ཉམས༔ ཉམས་ཆུང་སྤྲང་ནས་སྦྱིན་པ་སློང་༔ དེ་སོགས་དམ་ཚིག་ཉམས་པ་དང་༔ ཚོགས་གཏོར་ཞན་པའི་རྟགས་ཡིན་པས༔ བརྩོན་འགྲུས་དག་སྣང་མོས་གུས་བསྐྱེད༔ ལས་གཞུང་བསྐང་བཤགས་གཏོར་མར་བརྩོན༔ དེས་ནི་ཉམས་ཆག་བྱང་བར་འགྱུར༔ སིདྡྷི་རྣམ་གཉིས་མྱུར་དུ་ཐོབ༔ ཐོད་པ་བོར་ཆོག་གདམས་ངག་གོ༔ ༼མཱ༽ ༔གཟུགས་ཅན་གཟུགས་མེད་གང་ཞིག་གིས༔ ཐོ་འཚམས་གླགས་ལྟར་གྱུར་པ་ན༔ དེ་ཚེ་བམ་སྒྲོལ་ལས་མཐའ་འདི༔ མ་ཡེངས་རྩེ་གཅིག་ངང་དུ་བྱ༔ ༔ཧཱུྃ་བྷྱོ༔ བཅོམ་ལྡན་ཀུན་བཟང་སྣང་མཐའ་ཡས༔ རིག་འཛིན་གྲུབ་ཐོབ་རྒྱ་མཚོའི་ཚོགས༔ དཔའ་བོ་མཁའ་
འགྲོ་ཆོས་སྐྱོང་རྣམས༔ སྔོན་བྱུང་བསྐལ་བའི་དང་པོ་ལ༔ འགྱུར་མེད་ཡེ་ཤེས་སྐུར་བཞེངས་ཏེ༔ ཉོན་མོངས་དུག་ལྔ་དབྱིངས་སུ་བསྒྲལ༔ བདེ་བ་ཆེན་པོའི་བམ་ཆེན་རོལ༔ དེ་འོག་བར་གྱི་བསྐལ་པ་ལ༔ མ་ཏྲཾ་རུ་དྲ་སྟོབས་པོ་ཆེ༔ ཐབས་ཤེས་དབྱེར་མེད་ངང་དུ་བསྒྲལ༔ རུ་དྲ་ཐར་པའི་ལམ་ལ་བཀོད༔ གསང་སྔགས་བསྟན་པའི་གཞི་མར་གྲུབ༔ དགོས་འདོད་ཀུན་འབྱུང་བམ་ཆེན་རོལ༔ དེ་འོག་ཐ་མའི་བསྐལ་པ་ལ༔ དུར་ཁྲོད་ཆེན་པོའི་གནས་བརྒྱད་དུ༔ རིག་འཛིན་དཔའ་བོ་མཁའ་འགྲོའི་ཚོགས༔ ཉམ་ང་རྣམ་རྟོག་གཅད་པའི་ཕྱིར༔ བདག་མེད་མི་རོའི་བམ་ཆེན་རོལ༔ ཉག་གཅིག་ཆོས་སྐུའི་རང་ཞལ་མཐོང་༔ དེ་འོག་རྩོད་ལྡན་སྙིགས་མའི་དུས༔ རིག་འཛིན་པདྨ་སཾ་བྷ་ཝས༔ ཕྱི་རབས་རྗེས་འཇུག་སྐྱོབ་པའི་ཕྱིར༔ འབྲུ་བཅུད་སྟོང་སྦྱར་བམ་ཆེན་ལ༔ གདོན་བགེགས་བཀུག་པའི་ལས་བརྩམས་ཏེ༔ བསྒྲལ་བར་བྱ་བའི་བཀའ་ཡང་བསྒོས༔
བར་ཆད་ཞི་བར་ཞལ་ཡང་བཞེས༔ རྐྱེན་ངན་བཟློག་པར་དམ་ཡང་བཅས༔ ད་ལན་དེ་ཡི་དུས་ལ་བབ༔ དུས་ལ་བབ་པོ་ས་མ་ཡ༔ ༼ར༽ ༔ཧཱུྃ་བྷྱོ༔ བླ་མ་ཡི་དམ་ཞི་ཁྲོའི་ཚོགས༔ དཔའ་བོ་མཁའ་འགྲོ་ཆོས་སྐྱོང་རྣམས༔ ཐུགས་རྗེའི་གཏུམ་རྔམ་ཤུགས་ཕྱུང་ལ༔ བདེན་སྟོབས་ནུས་རྩལ་མཐུ་མ་ཆུང་༔ སྔོན་གྱི་སྨོན་ལམ་རྩལ་སྤྲུག་ལ༔ ལོག་འདྲེན་འགུགས་པའི་དུས་ལ་བབ༔ ཧཱུྃ་བྷྱོ༔ རིག་འཛིན་བདག་ལ་འཚེ་བྱེད་པའི༔ གཟུགས་ཅན་སྡང་དགྲ་གཟུགས་མེད་བགེགས༔ དམ་སྲི་འབྱུང་པོ་ལོག་འདྲེན་རྣམས༔ སྲིད་གསུམ་འཁོར་འདས་རིགས་དྲུག་གནས༔ གང་དུ་འདུག་ཀྱང་འདིར་ཁུག་ཅིག༔ མྱུར་བ་ཉིད་དུ་འདིར་ཁུག་ཅིག༔ བམ་རོ་འདི་དང་དབྱེར་མེད་གྱུར༔ རུ་དྲ་བིགྷྣཱན་སརྦ་ཨཾ་ཀུ་ཤ་ཛཿ ཛཿཧཱུྃ་བཾ་ཧོཿ ༼ཡ༽ ༔ཧཱུྃ་བྷྱོ༔ ང་ནི་སྣང་སྲིད་ཀུན་ཏུ་བཟང་༔ བམ་བསྒྲལ། མཁའ་གསང་ཐབས་ཤེས་དབྱིངས་རིག་སྐུ༔ གཞོམ་གཞིག་བྲལ་བའི་ཡེ་ཤེས་ཆེ༔ ཁྲོ་
རྒྱལ་རྡོ་རྗེ་གྲོ་ལོད་རྩལ༔ གཡས་ཀྱི་ཕྱག་ན་རྡོ་རྗེ་ཕྱར༔ དུག་ལྔ་ཡེ་ཤེས་ལྔ་རུ་བསྒྲལ༔ རྩེ་མོར་སྤྲུལ་པའི་བྱ་ཁྱུང་ལྡིང་༔ རྣམ་རྟོག་ཚོར་བའི་ཕུང་པོ་གསོད༔ གཡོན་གྱི་ཕྱག་ན་ཕུར་བུ་འདྲིལ༔ དུག་གསུམ་སྐུ་གསུམ་ཀློང་དུ་བསྒྲལ༔ རྒྱ་མདུད་སྟེང་ནས་སྡིག་པ་འགྱེད༔ དམ་སྲི་འབྱུང་པོ་ཧབ་ཧབ་ཟ༔ མ་རུང་གདུག་པའི་རུ་དྲ་རྣམས༔ ད་ལན་བསྒྲལ་བའི་དུས་ལ་བབ༔ ད་ལན་སྙིང་རྗེས་མ་བསྒྲལ་ན༔ ལས་ངན་དམ་ལོག་རུ་དྲ་རྣམས༔ ངན་སོང་གནས་སུ་ལྟུང་ངེས་པས༔ རྡོ་རྗེ་ཕུར་བུས་གདབ་པར་བྱ༔ ཀུན་བཟང་ཀློང་དུ་བསྟིམ་པར་བྱ༔ ཧཱུྃ་བྷྱོ་དྷརྨ་དྷཱ་ཏུ་ཛྙཱ་ན་བཛྲ་ཀཱི་ལ་ཡ༔ ཧཱུྃ་བྷྱོ་རྦད་ཡ་རུ་དྲ་ས་མཱ་ར་ཡ་ཕཊ༔ ༼ཧཱུྃ༽ ༔ཧཱུྃ་བྷྱོ༔ རྒྱལ་བ་རབ་འབྱམས་ཞི་ཁྲོའི་ལྷ༔ $བམ་ཤ་ཆང་གཏོར་མར་གསོ། སྙིང་རྗེ་ཆེན་པོས་གཏུམ་རྔམ་ཁྲོས༔ ཉི་ཟླ་ལྟ་བུའི་སྤྱན་གསུམ་བསྒྲད༔ གནམ་ས་ཙམ་གྱི་ཞལ་ཕྱེས་ལ༔ གངས་རི་ལྟར་དཀར་མཆེ་བ་གཙིགས༔ གློག་སྟོང་འཁྱུག་
འདྲའི་ལྗགས་དམར་བསྐྱོད༔ རྟོག་མེད་བམ་ཆེན་བ་ལིཾ་ཏ༔ དགྱེས་པ་ཆེན་པོར་བཞེས་སུ་གསོལ༔ དུག་ལྔ་བསྒྲལ་བའི་བམ་ཆེན་འདི༔ བརྩེ་བ་ཆེན་པོར་བཞེས་སུ་གསོལ༔ དུག་གསུམ་བསྒྲལ་བའི་ཤ་ཁྲག་རུས༔ གདུང་བ་ཆེན་པོར་བཞེས་སུ་གསོལ༔ རྣམ་རྟོག་བསྒྲལ་བའི་དོན་སྙིང་ཚོགས༔ ཆོས་དབྱིངས་ཀློང་དུ་བཞེས་སུ་གསོལ༔ ཚོགས་དྲུག་བསྒྲལ་བའི་སྐྱེ་མཆེད་ཚོགས༔ ཡེ་སྟོང་ཀློང་དུ་བཞེས་སུ་གསོལ༔ བཞེས་ཤིག་ཚིམ་པར་མཛད་དུ་གསོལ༔ བཞེས་ཤིག་ཐུགས་དམ་བསྐང་གྱུར་ཅིག༔ བར་ཆད་གདོན་བགེགས་གདུག་པ་ཟློག༔ ཧཱུྃ་བྷྱོ༔ བླ་མ་ཡི་དམ་ལྷ་ཚོགས་རྣམས༔ སྙིང་རྗེ་ཆེན་པོས་གཏུམ་རྔམ་ཁྲོས༔ ཉི་ཟླ་ལྟ་བུའི་སྤྱན་གསུམ་བསྒྲད༔ གནམ་ས་ཙམ་གྱི་ཞལ་ཕྱེས་ལ༔ གངས་རི་ལྟར་དཀར་མཆེ་བ་གཙིགས༔ གློག་སྟོང་འཁྱུག་འདྲའི་ལྗགས་དམར་བསྐྱོད༔ རྟོག་མེད་བམ་ཆེན་བ་ལིཾ་ཏ༔ དགྱེས་པ་ཆེན་པོར་བཞེས་སུ་གསོལ༔ དུག་ལྔ་བསྒྲལ་
བའི་བམ་ཆེན་འདི༔ བརྩེ་བ་ཆེན་པོར་བཞེས་སུ་གསོལ༔ དུག་གསུམ་བསྒྲལ་བའི་ཤ་ཁྲག་རུས༔ གདུང་བ་ཆེན་པོར་བཞེས་སུ་གསོལ༔ རྣམ་རྟོག་བསྒྲལ་བའི་དོན་སྙིང་ཚོགས༔ ཆོས་དབྱིངས་ཀློང་དུ་བཞེས་སུ་གསོལ༔ ཚོགས་དྲུག་བསྒྲལ་བའི་སྐྱེ་མཆེད་ཚོགས༔ ཡེ་སྟོང་ཀློང་དུ་བཞེས་སུ་གསོལ༔ བཞེས་ཤིག་ཚིམ་པར་མཛད་དུ་གསོལ༔ བཞེས་ཤིག་ཐུགས་དམ་བསྐང་གྱུར་ཅིག༔ བར་ཆད་གདོན་བགེགས་གདུག་པ་ཟློག༔ ཧཱུྃ་བྷྱོ༔ དཔའ་བོ་མཁའ་འགྲོའི་ལྷ་ཚོགས་རྣམས༔ སྙིང་རྗེ་ཆེན་པོས་གཏུམ་རྔམ་ཁྲོས༔ ཉི་ཟླ་ལྟ་བུའི་སྤྱན་གསུམ་བསྒྲད༔ གནམ་ས་ཙམ་གྱི་ཞལ་ཕྱེས་ལ༔ གངས་རི་ལྟར་དཀར་མཆེ་བ་གཙིགས༔ གློག་སྟོང་འཁྱུག་འདྲའི་ལྗགས་དམར་བསྐྱོད༔ རྟོག་མེད་བམ་ཆེན་བ་ལིཾ་ཏ༔ དགྱེས་པ་ཆེན་པོར་བཞེས་སུ་གསོལ༔ དུག་ལྔ་བསྒྲལ་བའི་བམ་ཆེན་འདི༔ བརྩེ་བ་ཆེན་པོར་བཞེས་སུ་གསོལ༔ དུག་གསུམ་བསྒྲལ་བའི་ཤ་ཁྲག་
རུས༔ གདུང་བ་ཆེན་པོར་བཞེས་སུ་གསོལ༔ རྣམ་རྟོག་བསྒྲལ་བའི་དོན་སྙིང་ཚོགས༔ ཆོས་དབྱིངས་ཀློང་དུ་བཞེས་སུ་གསོལ༔ ཚོགས་དྲུག་བསྒྲལ་བའི་སྐྱེ་མཆེད་ཚོགས༔ ཡེ་སྟོང་ཀློང་དུ་བཞེས་སུ་གསོལ༔ བཞེས་ཤིག་ཚིམ་པར་མཛད་དུ་གསོལ༔ བཞེས་ཤིག་ཐུགས་དམ་བསྐང་གྱུར་ཅིག༔ བར་ཆད་གདོན་བགེགས་གདུག་པ་ཟློག༔ ཧཱུྃ་བྷྱོ༔ ཆོས་སྐྱོང་སྲུང་མའི་ལྷ་ཚོགས་དང་༔ གཏེར་སྲུང་ཏྲཀྴད་ལྷ་ཚོགས་རྣམས༔ སྙིང་རྗེ་ཆེན་པོས་གཏུམ་རྔམ་ཁྲོས༔ ཉི་ཟླ་ལྟ་བུའི་སྤྱན་གསུམ་བསྒྲད༔ གནམ་ས་ཙམ་གྱི་ཞལ་ཕྱེས་ལ༔ གངས་རི་ལྟར་དཀར་མཆེ་བ་གཙིགས༔ གློག་སྟོང་འཁྱུག་འདྲའི་ལྗགས་དམར་བསྐྱོད༔ རྟོག་མེད་བམ་ཆེན་བ་ལིང་ཏ༔ དགྱེས་པ་ཆེན་པོར་བཞེས་སུ་གསོལ༔ དུག་ལྔ་བསྒྲལ་བའི་བམ་ཆེན་འདི༔ བརྩེ་བ་ཆེན་པོར་བཞེས་སུ་གསོལ༔ དུག་གསུམ་བསྒྲལ་བའི་ཤ་ཁྲག་རུས༔ གདུང་བ་ཆེན་པོར་བཞེས་སུ་གསོལ༔ རྣམ་རྟོག་བྲལ་བའི་དོན་སྙིང་
ཚོགས༔ ཆོས་དབྱིངས་ཀློང་དུ་བཞེས་སུ་གསོལ༔ ཚོགས་དྲུག་བསྒྲལ་བའི་སྐྱེ་མཆེད་ཚོགས༔ ཡེ་སྟོང་ཀློང་དུ་བཞེས་སུ་གསོལ༔ བཞེས་ཤིག་ཚིམ་པར་མཛད་དུ་གསོལ༔ བཞེས་ཤིག་ཐུགས་དམ་བསྐང་གྱུར་ཅིག༔ བར་ཆད་དོན་བགེགས་གདུག་པ་ཟློག༔ ཧཱུྃ་བྷྱོ༔ འཇིག་རྟེན་དྲེགས་བྱེད་ལྷ་ཚོགས་དང་༔ བསྟན་སྲུང་རྒྱ་མཚོའི་ལྷ་ཚོགས་རྣམས༔ སྙིང་རྗེ་ཆེན་པོས་གཏུམ་རྔམ་ཁྲོས༔ ཉི་ཟླ་ལྟ་བུའི་སྤྱན་གསུམ་བསྒྲད༔ གནམ་ས་ཙམ་གྱི་ཞལ་ཕྱེས་ལ༔ གངས་རི་ལྟར་དཀར་མཆེ་བ་གཙིགས༔ གློག་སྟོང་འཁྱུག་འདྲའི་ལྗགས་དམར་བསྐྱོད༔ རྟོག་མེད་བམ་ཆེན་བ་ལིཾ་ཏ༔ དགྱེས་པ་ཆེན་པོར་བཞེས་སུ་གསོལ༔ དུག་ལྔ་བསྒྲལ་བའི་བམ་ཆེན་འདི༔ བརྩེ་བ་ཆེན་པོར་བཞེས་སུ་གསོལ༔ དུག་གསུམ་བསྒྲལ་བའི་ཤ་ཁྲག་རུས༔ གདུང་བ་ཆེན་པོར་བཞེས་སུ་གསོལ༔ རྣམ་རྟོག་བསྒྲལ་བའི་དོན་སྙིང་ཚོགས༔ ཆོས་དབྱིངས་ཀློང་དུ་བཞེས་སུ་གསོལ༔ ཚོགས་དྲུག་
བསྒྲལ་བའི་སྐྱེ་མཆེད་ཚོགས༔ ཡེ་སྟོང་ཀློང་དུ་བཞེས་སུ་གསོལ༔ བཞེས་ཤིག་ཚིམ་པར་མཛད་དུ་གསོལ༔ བཞེས་ཤིག་ཐུགས་དམ་བསྐང་གྱུར་ཅིག༔ བར་ཆད་གདོན་བགེགས་གདུག་པ་ཟློག༔ ས་མ་ཡ་བྷྱོ་བྷྱོ་ཟློག་ཟློག༔ ཕཊ$ ༔ཧཱུྃ་བྷྱོ༔ བམ་སྒྲོལ་ལྷག་སྡུད་མཁའ་འགྲོ་ནི༔ ལོ་ཀ་དྷཱ་ཀི་སྤྱང་ཞོན་མ༔ མཐིང་ནག་གྲི་ཐོད་ཁ་ཊྲཱཾ་ཐོགས༔ ལྕགས་སྤྱང་མགོ་དགུ་རྟ་རུ་ཞོན༔ ཉི་མོ་སྒྲུབ་པའི་ཚོགས་ཁང་འགྲིམས༔ མཚན་མོ་དགྲ་བགེགས་སྲོག་ལ་ཉུལ༔ དུས་ཀུན་སྔགས་ཀྱི་རྣལ་འབྱོར་སྐྱོང༔ ཁྱོད་ནི་དམ་ལྡན་དྷཱ་ཀི་སྟེ༔ སྔོན་བྱུང་བསྐལ་པའི་དང་པོ་ལ༔ བཅོམ་ལྡན་རྡོ་རྗེ་ཕག་མོ་ཡིས༔ བཀའ་བསྒོས་དམ་བཞག་དབང་ཡང་བསྐུར༔ གསང་སྔགས་གཉན་གྱི་སྲུང་མར་བསྐོས༔ དེ་འོག་བར་གྱི་བསྐལ་པ་ལ༔ མཁའ་འགྲོ་སེང་གེའི་གདོང་ཅན་གྱིས༔ བཀའ་བསྒོས་དམ་བཞག་དབང་ཡང་བསྐུར༔ གསང་སྔགས་གཉན་གྱི་སྲུང་མར་བསྐོས༔ དེ་འོག་ཐ་མའི་བསྐལ་པ་
ལ༔ རིག་འཛིན་པདྨ་སཾ་བྷ་ཝས༔ དུར་ཁྲོད་ཆེན་པོའི་གནས་བརྒྱད་དུ༔ མ་མོ་མཁའ་འགྲོ་དབང་དུ་བསྡུས༔ བཀའ་བསྒོས་དམ་བཞག་དབང་ཡང་བསྐུར༔ དེ་ཚེ་མཁའ་འགྲོ་སྤྱང་ཞོན་གྱིས༔ དུས་གསུམ་དུས་མེད་ཐམས་ཅད་དུ༔ ཕྲིན་ལས་སྒྲུབ་པར་དམ་ཡང་བཅས༔ དམ་ཅན་མཁའ་འགྲོ་དམ་ཚིག་ཅན༔ དམ་ལས་མ་འདའ་གཞུང་མ་ངན༔ དམ་ཚིག་སྲུངས་ལ་ཕྲིན་ལས་སྒྲུབས༔ རྣལ་འབྱོར་བདག་ཅག་འཁོར་བཅས་ཀྱི༔ ནད་གདོན་བར་ཆད་ཞི་བར་མཛོད༔ ཚེ་དང་བསོད་ནམས་རྒྱས་པར་མཛོད༔ ནོར་དང་ལོངས་སྤྱོད་འཕེལ་བར་མཛོད༔ ཁམས་གསུམ་དབང་དུ་འདུས་པར་མཛོད༔ བསྟན་དགྲ་སྒོས་དགྲ་མྱུར་དུ་སྒྲོལ༔ བཅོལ་བའི་ལས་འདི་མྱུར་འགྲུབ་མཛོད༔ ཧཱུྃ་བྷྱོ་ལོ་ཀ་དྷཱ་ཀི་ཨུ་ཙྪིཥྚ་བ་ལིཾ་ཏ་ཁཱ་ཧི༔ ལོ་ཀ་དྷཱ་ཀི་ས་མ་ཡ་རཀྵ་ཧ་ན་ཧ་ན་རཀྵ་རཀྵ་ཧཱུྃ༔ ལྷག་གཏོར་ས་གཙང་གནས་སུ་བསྐྱལ༔ ཨེ་མ་ཧོ༔ གསང་སྔགས་བསྟན་སྲུང་མཐུ་རྩལ་ཅན༔ མཁའ་འགྲོ་སྤྱང་
ཞོན་དྷཱ་ཀི་མ༔ ཡུམ་མཆོག་རྡོ་རྗེ་ཕག་མོ་ཡི༔ ཕྲིན་ལས་ནུས་པའི་སྤྲུལ་པར་ཤར༔ དུག་གི་སྤུ་གྲི་རེག་གཅོད་སྟེ༔ དགྲ་བོའི་གཤེད་དེ་བཟློག་ཏུ་མེད༔ བླ་མེད་ཡང་གསང་སྲུང་མའོ༔ གསང་བ་གནད་ཀྱི་སྙན་བརྒྱུད་འདི༔ དམ་མེད་རྣམས་ཀྱིས་མཐོང་གྱུར་ན༔ མིག་འབྲས་ཐང་ལ་ལྷུང་བར་འགྱུར༔ དམ་ལྡན་སློབ་མའི་དོན་དུ་ཡང་༔ རྨི་ལམ་ཉམས་སྣང་དངོས་ཀྱང་འོང་༔ མཁའ་འགྲོའི་ལུང་བསྟན་གསལ་བའི་དུས༔ བསྟན་ཅིང་དམ་བཅས་འགགས་པར་བྱ༔ མ་འོངས་དུས་ཀྱི་ཐ་མ་ནི༔ སུམ་ཅུ་ཁ་རལ་བྱུང་བའི་ཚེ༔ ལྷ་སྲས་མུ་ཁྲིའི་ཆོས་སྐལ་དུ༔ གནམ་ལྕགས་འབར་བའི་སྦུ་གུར་བཅུག༔ རྡོ་རྗེེ་འབར་བའི་མཚོ་ལ་སྦས༔ སྙིང་གི་ཐུགས་སྲས་དེ་ཉིད་ཀྱི༔ བར་ཆད་སེལ་བའི་མཚོན་ཆར་ཤོག༔ ས་མ་ཡ༔ སྐུ་རྒྱ༔ གསུང་རྒྱ༔ ཐུགས་རྒྱ༔ ཡོན་ཏན་རྒྱ༔ ཕྲིན་ལས་རྒྱ༔ ཙིཏྟ་བཛྲ་ཛྙཱ་ན་མཱ་ཧ་བོདྷི་གརྦྷ་ངྷྭ་ཛ་ཏིཥྛ་མངྒ་ལམ༔ ༔རིག་འཛིན་མི་འགྱུར་རྡོ་རྗེ་དྲག་པོ་ནུས་ལྡན་རྩལ་གྱི་གཏེར་མ་བསླད་མེད་པའོ༔ ༈ མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།