ཡེ་གསང་ཐུགས་གཏེར་གྱི་ཟིན་བྲིས་ལས་མདོས་ཡས་ཟོར་གྱི་བཅའ་ཐབས་སྒོམ་དོན་རབ་གསལ།
ཡེ་གསང་ཐུགས་གཏེར་གྱི་ཟིན་བྲིས་ལས། ལས་མདོས་ཡས་ཟོར་གྱི་བཅའ་ཐབས་སྒོམ་དོན་རབ་གསལ་བཞུགས་སོ། །
ན་མོ་གུ་རུ་བཛྲ་པཱ་ཎི་ནཱ་ཐཱ་ཡ། ཡེ་གསང་གསང་བའི་ཐུགས་གཏེར་གཏེར་གྱི་མཆོག །ཟབ་དོན་དོན་གྱི་ཡང་སྙིང་སྙིང་པོའི་བསྟན། །དར་རྒྱས་རྒྱས་པའི་ཕྲིན་ལས་ལས་མགོན་མདོས། །སྒོམ་རིམ་རིམ་གཉིས་མདོ་དོན་དོན་བསྡུས་དབྱེ། །གཏེར་སྲུང་སྲུང་མས་རྗེས་གནང་གནང་བ་སྩོལ། །དེ་ལ་འདིར་ཕྲིན་ལས་མགོན་པོའི་ལས་མདོས་ལས་ཐོག་མར། གལ་ཆེ་བ་གསུམ་གྱིས་གཞི་བཟུང་སྟེ། གཞི་ལ་རང་འདོད་ཀྱི་ཞེན་པ་མ་ཞུགས་པས་བསྟན་པ་དང་སེམས་ཅན་གྱི་
དོན་དུ་དམིགས་ནས། ལམ་བསྐྱེད་རྫོགས་རིམ་པ་གཉིས་ཀྱིས་གཞུང་བསྲངས་ནས། འབྲས་བུ་མྱུར་དུ་ཐོབ་པར་བྱེད་པ་ལ། ཐེ་ཚོམ་དང་སོམ་ཉི་མེད་པའི་བློ་གཏད་ལིངས་སྐྱུར་གྱིས་རྩ་བའི་བླ་མ་དང་ཡི་དམ་ཆོས་སྐྱོང་ལ་ཡིད་ཆེས་པའི་དད་པ་བརྟན་པོ་དང་ལྡན་པས། བཅས་བཤམས་ཀྱི་རིམ་པ་རྣམས་གཞུང་གི་ཡིག་ཆུང་དང་། སྐྱབས་རྗེ་འཁོར་ལོའི་མགོན་པོ་སི་ཏུ་པདྨ་དབང་ཆེན་ཞབས་ཀྱི་ཟིན་བྲིས་ལྟར་དང་། གདན་ས་བར་ལུགས་ཀྱི་ཕྱག་བཞེས་མཐོང་
བརྒྱུད་ལྟར་ལག་ལེན་དུ་འདེབས་པ་གལ་ཆེ། འདིར་ཡང་ཟུར་གསལ་མི་བརྗེད་པའི་ཐོ་ལྟ་བུ་ལ། རི་རབ་བང་རིམ་བཞིའི་སྟེང་དུ་དམར་གཏོར་སྤྱི་འགྲེ་རྩེ་ཐོན་ལས་ཐོག་མདིལ་མི་མཛད་ལེབ་ཞལ་དུ་བཀོད། ཟློག་པའི་མེ་རི་རྟ་ཞོན་བྲིས་པས་བརྒྱན། གཏོར་མའི་མདུན་དུ་གཙོ་བོ་ཏྲཀྴད་འབུར་སྐུ་ལ་འཁོར་གཞུང་གསལ་ལྟར་འབུར་དུ་བཟོ་བའམ་སྤར་བཏབ་པ། བང་རིམ་དང་པོར་དམར་གཏོར་ཁྲག་བྱུག་པ་བཅུ་དྲུག་ལ་རུ་དར་བཙུགས་པ། བང་རིམ་གཉིས་པར་གཏོར་ཟོར་བཅུ་གསུམ་ནི། ཟོར་ཀོང་དུ་དམར་གཏོར་ཁྲག་བྱུག་པ་བཞག་ནས་ཟོར་གྱི་ཟུར་གསུམ་ནས་རྩང་ཐུར་བསྣོལ་མར་སྤྱི་ལྟར་བཙུགས་པ། བྱ་ནག་དགྲ་སྙིང་ཟ་བ་བཅུ་གསུམ་སྤར་བཏབ་པ། ནམ་མཁའ་ནག་རྐྱང་བཅུ་གསུམ། བདུད་ཞགས་དངོས་སམ་སྤར་བཏབ་པ་བཅུ་གསུམ། བང་རིམ་གསུམ་པ་ལ་ཀོང་བུ་ཟུར་གསུམ་དུ་ཁྲག་བླུགས་པ་བཅུ་གསུམ། མདའ་བཀྲ་བཅུ་གསུམ། ཁྱི་
ནག་དགྲ་སྙིང་ཟ་བ་བཅུ་གསུམ། རྟ་ནག་བཅུ་གསུམ། རོ་ལངས་ནག་པོ་ཁྲོས་པ་བཅུ་གསུམ། བང་རིམ་བཞི་པ་ལ་ཤྭ་རྡིལ་དཀར་ནག་བཅུ་གསུམ། ཁྲམ་ཤིང་བཅུ་གསུམ་ལ། གོང་འོག་དང་བར་ནས་རིམ་པ་གཉིས་རེ་དང་ལྡན་པའི་ཕོ་ཁྲམ་སྟེ་འདི་ཉིད་གཙོ་བོ་བདུད་མགོན་གྱི་ཕོ་མདོས་ཡིན་པས་སོ། །ནད་རྐྱལ་དངོས་དུག་སྣའི་ཐུམ་བུའམ་སྤར་བཏབ་པ་བཅུ་གསུམ། ཟོར་བཅུ་གསུམ། འཕང་བཀྲ་བཅུ་གསུམ། བར་བར་དུ་ཤ་ཁྲག་སྣ་ཚོགས་ཞེས་པ་ལ། དཔལ་མགོན་པོའི་གཞུང་ལས། སྟག་གཟིག་ལ་སོགས་གཅན་ཟན་གྱི་ཤ་ཁྲག །ཕོ་རོག་ལ་སོགས་བྱ་ནག་གི་ཤ་ཁྲག །རྟ་ནག་ལ་སོགས་རྨིག་པ་ཅན་གྱི་ཤ་ཁྲག །གཡག་ནག་ལ་སོགས་བྱོལ་སོང་ཆེན་པོའི་ཤ་ཁྲག་གོ །སྒོག་ཙོང་སོགས་གཞུང་ལྟར་ཚོགས་པར་བྱའོ། །ཧོམ་ཁུང་ནང་དུ་དགྲ་ལིང་༔ འདྲེ་ལིང་༔ གདོན་ལིང་༔ ཕ་རོལ་བྱད་མའི་ལིངྒ་ཐམས་ཅད་སྤྱི་དང་མཐུན་པ་མིང་གཟུགས་
སྤེལ་ཚིག་རྣམས་ཞིབ་ཏུ་བྱས་ཏེ༔ ཞེས་པར། སྲིད་པ་གཏེར་ཁྱིམ་ལས། དུག་ཤོག་ལ་ཁྱི་ཁྲག་དང་ར་ཁྲག་གིས་བྱ་ཤ་ཟན་གྱི་སྒྲོ་རྐང་གིས་བྲི༔ ཁྱད་པར་ཕོ་རོག་ཤིས༔ བྲི་དུས་ཐེབས་དང་བསྟུན་ལ༔ ཉི་མ་དམར་ཐག་འགྲོ་ཁར་དགྲ་བོ་རེ་ལ་ལིངྒ་རེ་བྲི༔ རང་གི་ལག་པ་བཀྲུས་ལ་ཁ་རླངས་དང་དྲི་མ་མ་ཕོག་པར་བྱ༔ གདོང་དང་ལག་པ་ལ་ཁྲག་བྱུགས༔ ཁ་ལ་ཤ་ཆེན་མུར༔ ཁ་ལྷོ་ནུབ་སྲིན་པོའི་ཕྱོགས་སུ་གྱུ་ལ་བྲི༔ འཁོར་ལོ་རྩིབས་དྲུག་གི་ལྟེ་བར་བྲི་བའམ༔ ཡང་ན་སྤྱི་ལྟར་བྲིས་ཀྱང་རུང་༔ ཕྱི་རོལ་སྤྱི་བོའི་ཐད་ནས་སྔགས་མགོ་ནང་བསྟན་ལ་བོན་སྐོར་གྱིས་རྦད་སྔགས་བྲི༔ སྤྱིར་བསད་པ་དང་དབང་དུ་བསྡུ་བ་ལ་སྔགས་མགོ་ནང་བསྟན། མནན་པ་ལ་སྔགས་མགོ་ཕྱི་བསྟན་དུ་གསུངས། ཡང་དེ་ཉིད་ལས། ལིངྒ་དུག་ཁྲག་གིས་བྲི་བ་དྲག་པོ༔ ནད་ཁྲག་གིས་བྲི་བ་རྩུབ་མོ༔ མཚལ་གྱིས་བྲི་བ་འཇམ་པོ༔ མཛེ་ཁྲག་གིས་བྲིས་ན་མཛེར་ཤི༔ ནད་ཁྲག་གིས་བྱུག་ན་
ནད་ཀྱིས་འཆི༔ གྲི་ཁྲག་གིས་བྱུག་ན་གྲིར་ཤི༔ ལིངྒ་རླུང་ལ་ཕྱར༔ མེ་ལྕེ་ལ་གཡུགས༔ ཁ་རླངས་དང་དྲི་མ་དག་པར་བྱ༔ རྫས་ནི། དུར་ཁྲོད་ཐལ་བ༔ རན་འཐག་ཡས་གཞིའི་རྡོ་ཕྱེ༔ མི་བསད་པའི་ལྕགས་ཕྱེཿ ཟངས་ཕྱེ༔ དུག་སྣ༔ གྲི་ཁྲག༔ ནད་ཁྲག་བྱུག༔ ཡུགས་སའི་ཤི་སྐྲས་བཅིངས་ན་དྲག་པོཿ ཁྱི་ནག་དང་ར་རོག་སྤུས་བཅིངས་པ་དྲག་ལ་རྩུབ་པ༔ སྣ་ལྔས་བཅིངས་པ་རྩུབ་མོའོ༔ ཞེས་གསུངས་སོ། །དགུག་གཞུག་དང་ལྷ་དབྱེ་བྱ། གུལ་རྒོད་བདུག །དབྱེ་རྫས་ཡོད་ན་ལིངྒའི་ནྲྀ་ཏྲིའི་སྟེང་དུ་བཞག་ཅིང་ལྟེ་བ་ལ་ཧོམ་ཁུང་སོགས་བཞག་གང་དགོས་སུ་བཞག ༈ ཐུན་ཟོར་ལ་ཐུན་རྫས་ཡུངས་ཀར་ནག ༈ ས་ཟོར་ལ་ཕུང་སའམ་གད་པ་ཆད་པའི་ས། ༈ ཆུ་ཟོར་ལ་དགུན་ཁ་ཆབ་རམ། ༈ མེ་ཟོར་ལ་དུག་ཤིང་གི་རལ་འབར་དང་མེ་རི་བྲིས་པ། ༈ རླུང་ཟོར་ལ་རླུང་གཡབ་ཤོག་བུ་ལ་བཟོས་པ། རྡོ་རྗེ། མདུང་ཞགས། ལྕགས་ཀྱུ། ཁ་ཊྭཱཾ། ཕུར་པ་རྣམས་
དངོས་སམ་བྲིས་པ། གཏོར་ཟོར་ལ་ཟོར་རྐང་དུ་དམར་གཏོར་བཀོད་པ་སོགས་དགོས་པའི་ཡོ་བྱད་ཐམས་ཅད་ཚོགས་པར་བྱའོ། །དེ་ཡང་སྤྱིར་བཏང་གི་མདོས་ལ་སྲུང་བའི་མདོས་དཀྱིལ་འཁོར་ལྟར་བཀོད་པ་ཞེས་གཙོ་བོ་ཞལ་ཤར་དུ་གྱུ་ཞིང་འཁོར་དང་མདོས་ཀྱི་རྒྱན་བཀོད་ཐམས་ཅད་ཞལ་ནང་དུ་ཕྱོགས་པ་དང་། ཟློག་མདོས་ཞེས་འཁོར་དང་རྒྱན་བཀོད་ཐམས་ཅད་ཕྱིར་བསྟན་པ་དང་། མགྲོན་ཐབས་དམག་མདོས་ཞེས་ཐམས་ཅད་ཞལ་ཤར་དུ་གྱུ་བའི་ལུགས་ཡོད་ཀྱང་འདིར་ཟློག་མདོས་ཀྱི་ལུགས་སུ་ད་ལྟ་གདན་ས་བར་པ་ནས་དམག་ཐབས་སུ་བཀོད་པ་ཡིན། མཆན། བཀོད་པའོ། །བརྟེན་མདོས་བསྐང་མདོས་གཏའ་རུ་གཟུག །ཟློག་མདོས་དྲག་པོའི་གཟེར་ཁས་བརྒྱན། །བསད་མདོས་སྲོག་ལས་ཨར་ལ་གཏད། །དགྲ་མདོས་དགྲ་བོའི་སྟེང་དུ་འཕེན། །ཅེས་སོ། །འདོན་འགྲིགས་ཕྱག་བཞེས་ཟིན་བྲིས་སྔ་མ་རྣམས་དང་མཐོང་བརྒྱུད་སློབ་དཔོན་ཞལ་ལུང་ལྟར་བྱ་བ་ལས་ཡང་
བསྐྱར་དུ་མ་བྲིས་པ་གཞུང་གི་ཡིག་ཆུང་རྩ་བར་བཟུང་ངོ་། །མདོས་བྱིན་གྱིས་བརླབས་ནས་མདོས་བསྐྱེད་ཀྱི་སྐབས་སུ། མདོས་ཀྱི་རྒྱུ་སྟོང་པ་ཉིད། རྐྱེན་སྣང་བ་སྣ་ཚོགས། རྒྱུ་རྐྱེན་རྟེན་འབྲེལ་ཕུན་སུམ་ཚོགས་པ་ལས་ངོ་བོ་སྣང་སྟོང་གཉིས་མེད། ངེས་ཚིག་ཡས་ཟོར་སྲིད་གསུམ་རླག་བྱེད༔ འབྱུང་བ་ལྔ་བརྩེགས་ཀྱི་དཀྱིལ་འཁོར༔ ཡས་ནི་སྲིད་པ་གསུམ་གྱི་ལྷ་འདྲེ་ཐམས་ཅད་ཚིམ་པར་བྱེད་པས་ཡས། ཟོར་ནི་དྲག་པོའི་ཟློག་ཟོར་མཚོན་ཆ་སྟེ། ཇི་སྐད་དུ་ཡང་། འཕང་བར་བྱེད་པ་ཟོར་གྱི་ལས༔ རྣོ་བར་བྱེད་པ་ཐུན་གྱི་རྫས༔ རླག་པར་བྱེད་པ་སྔགས་ཀྱི་དབལ༔ ཅེས་སོ། །ལྷ་ཀླུ་མི་ཡི་སྲིད་པ་གསུམ་གང་དུ་བྱང་ཆུབ་སྒྲུབ་པའི་བར་ཆད་གནས་པ་ཐམས་ཅད་རླག་པར་བྱེད་པ་སྟེ། ནུས་རྩལ་ཆེ་བའི་ཚད་དུ་སྲིད་པ་གསུམ་ཡང་སྐད་ཅིག་གིས་རླག་པར་བྱེད་ན། དགྲ་དང་བགེགས་ལ་ལྟ་ཅི་སྨོས་པའོ། །ཕྱི་སྣོད་སྣང་བ་ནང་བཅུད་སྲིད་པ་ཐམས་ཅད་
འབྱུང་བ་ལྔ་ལ་བརྟེན་ཏེ། ཕྱི་ལྟར་ན་ས་ཆུ་མེ་རླུང་ནམ་མཁའ། ནང་ལྟར་ན་ཤ་ཁྲག་དྲོད་དབུགས་སེམས། གསང་བ་ལྟར་ཡུམ་ལྔར་ཡེ་ནས་དག་པ་གང་གཙོ་བོ་ལ་འཁོར་གྱིས་བསྐོར་བས་དཀྱིལ་འཁོར་རོ། །དབྱེ་བ་ལས་བཞིའི་མདོས་ལས་དྲག་པོ་བསྟན་བཤིག་རྨིངས་ནས་སྐེམ་པའི་མཚོན་ཆ། གདུག་པ་དུག་གི་སྤུ་གྲི། གཏོར་བྱེད་རླུང་གི་མདོས་ཆེན། མདོས་རྫས་སྒོམ་ཚུལ་གཞུང་གསལ་ལྟར་ལས། ཀུན་ཁྱབ་ཀྱི་ནམ་མཁའ་སྲིད་གསུམ་ལྷ་འདྲེའི་བརྟེན་མཁར༔ ཞེས་པ་ལ་ལ་དག་གིས་ནམ་མཁའ་བོན་ལུགས་ཡིན་ཅིང་རྒྱ་གར་དུ་མེད་པར་སྨྲ་ཡང་། ཡོད་པའི་སྒྲུབ་བྱེད་མདོའི་ལུང་འདྲེན་དང་བཅས་མཁས་གྲུབ་སྔ་མ་རྣམས་ཀྱིས་བསྒྲུབས་ཟིན་པས་སླར་སྒྲུབ་མི་དགོས་ཤིང་མདོས་རྫས་ཀྱི་གཙོ་བོ་ཡིན་ཏེ། ཇི་སྐད་དུ་ཡང་། ཨོ་རྒྱན་ཆེན་པོས། ནམ་མཁའ་སྐྱེ་མེད་སྟོང་པ་ལས༔ སྐྱེ་བའི་ཆོ་འཕྲུལ་འོད་ལྔ་ཤར༔ འོད་ལྔ་ཐགས་སུ་བཏགས་པ་ཡི༔ གདུགས་
ཆེན་འབར་བའི་མཁའ་དབྱིངས་སུ༔ ཅེས་སོ། །གཞུང་ལྟར་དམིགས་འདོན་ཟུང་འབྲེལ་དུ་བྱའོ། །བརྟེན་པའི་དམ་རྫས་སྙིང་གསུམ་དར་གྱི་ཙིཏྟ༔ ཞེས་པ་ནི། གསང་སྒྲུབ་དཔེ་ཚན་བརྒྱད་པ་ལས། བྱ་ནག་ཁྱི་ནག་ལུག་ནག་གི༔ སྙིང་གསུམ་རྩ་སྦུབས་རྩ་སྔགས་བཅུག༔ དཀར་དམར་མཐིང་གསུམ་དར་དུ་དྲིལ༔ ཞེས་པ་དེ་ཡིན་ཏེ་སྒྲུབ་རྟེན་ནོ། །ཏྲཀྴད་བརྟེན་རྫས་ཀྱི་ཞལ་གདམས་མེ་འབར་རྡོ་རྗེ་ལ་གདམས་པས་ཚབ་རུང་བར་ངེས་ཏེ། ཡོངས་དགེའི་ཞལ་ལུང་དུ་ངེས་སོ། །དེ་ནས་སྒོམ་ཚུལ་དངོས་ནི། གཞུང་གི་ཡིག་ཆུང་ལས། སྣང་སྲིད་ཀུན་ཁྱབ་ཏིང་འཛིན་གྱིས༔ བདུད་མགོན་གནད་ནས་འགུགས་པར་བྱ༔ རེ་དོགས་མེད་པའི་ཉམས་མྱོང་གིས༔ ལས་མགོན་དགྲ་ལ་རྦད་པར་བྱ༔ ཉམས་ང་མེད་པའི་གདེངས་ཚད་ཀྱིསཿ སྲོག་བདུད་ལས་ལ་འགྱེད་པར་བྱ༔ ལེ་ལོ་མེད་པའི་བརྩོན་འགྲུས་ཀྱིས༔ སྒྲུབ་རྫས་ཡོ་བྱད་ཚོགས་པར་བྱ༔ ང་བདག་བྲལ་
བའི་བསྐྱེད་རྫོགས་ཀྱིས༔ བདག་མདུན་གཅིག་ཆར་དབྱེར་མེད་བསྒོམ༔ ཞེས་པ་ནི། བདག་ཉིད་དཔལ་ཆེན་ཁྲོ་རྒྱལ་རྡོ་རྗེ་གྲོ་ལོད་ཀྱི་ཏིང་ངེ་འཛིན་སྣང་སྲིད་ཀུན་ཁྱབ་འཁོར་འདས་གཞི་རྫོགས་ཀྱི་ངང་ལ་གནས་པས་བདུད་མགོན་སྤྱན་འདྲེན་ཅིང་། རང་ཉིད་ཧེ་རུ་ཀའི་ལྷར་སྣང་གི་ང་རྒྱལ་བརྟན་པོས་ལས་མགོན་ནག་པོ་དགྲ་ལ་རྦད་པ་ལ་རེ་བ་དང་དོགས་པ་སྤོང་བ་དང་། སྲིད་གསུམ་དགྲ་ལངས་ཀྱང་ཉམ་ང་མེད་པར་དཔའ་བའི་གདེངས་ཚད་ལྟ་བའི་རྫོང་ལ་ཞུགས་པ། སྒོམ་པའི་འཕྲང་ལས་གྲོལ་བས་ཤན་པ་སྲོག་བདུད་དགྲ་ལ་འགྱེད་པའོ། །ལེ་ལོ་ནི་ལམ་སྒྲུབ་པའི་དགྲ་དང་། བརྩོན་འགྲུས་ནི་ལམ་སྒྲུབ་པའི་གྲོགས་ཡིན་པས་འབད་པ་བསྐྱེད་དེ། སྒྲུབ་རྫས་ཡོ་བྱད་ཐམས་ཅད་ཚོགས་ན་བསྟན་སྲུང་དམ་ཅན་རྒྱ་མཚོ་ཤ་རུལ་ལ་སྦྲང་མ་འདུ་བ་ལྟར་རང་བཞིན་ཤུགས་ཀྱིས་འདུ་བར་གསུངས་སོ། །བདག་མདུན་གཅིག་ཆར་དབྱེར་མེད་ཅེས་པ་འདི། རྙིང་མ་
སྤྱིའི་བདག་མདུན་ཆིག་རྫོགས་ཟེར་བ་དེ་མ་ཡིན་ཏེ། འདིར་ནི་རང་ཉིད་རྡོ་རྗེ་གྲོ་ལོད་དང་མདུན་གྱི་ཏྲཀྴད་གཉིས་ངོ་བོ་གཅིག་པ་ལ་བཟང་ངན་དང་ཐ་དད་སྤུ་རྩེ་ཙམ་ཡང་མེད་པ་ལ་རྣམ་པ་ལས་མགོན་དྲེགས་པ་སྡེ་བརྒྱད་དུ་སྒོམ་དགོས་པའི་དོན་ཡིན་ཏེ། སྣང་བ་བསྐྱེད་རིམ་དུ་དཔའ་བ། སྟོང་པ་རྫོགས་རིམ་དུ་དཔའ་བ། ཟུང་འཇུག་དབྱེར་མེད་དུ་དཔའ་བའི་ངང་ནས། ལུས་ལྷའི་ངར། ངག་སྔགས་ཀྱི་ངར། ཡིད་ཏིང་ངེ་འཛིན་གྱི་ངར་གསུམ་དང་མ་བྲལ་བས་བཞེངས་བསྐུལ་དང་པོ་ལ། རང་ཉིད་རྡོ་རྗེ་གྲོ་ལོད་ཀྱི་དཀྱིལ་འཁོར་དུ་གསལ་བ་ལ། སླར་ཡང་རྡོ་རྗེ་གྲོ་ལོད་ཀྱི་དཀྱིལ་འཁོར་རབ་འབྱམས་ཞིང་ཀུན་འུར་འུར། སྟོང་གསུམ་སྟོང་ཆེན་ཆེམ་ཆེམ། ཁམས་གསུམ་གནས་རིས་ལྡིག་ལྡིག །སྲིད་གསུམ་འཇིག་རྟེན་ཤིག་ཤིག་གིས་དྲག་པོའི་ལས་ལ་བྱོན་ནས་སྣང་སྲིད་གཞིར་བཞེངས་ཀྱི་མདོས་ཟོར་ཡས་ཆེན་བཞེས་ནས། མངོན་སྤྱོད་དྲག་པོའི་
ཕྲིན་ལས་དམ་སྲི་དམ་ལོག་བསྟན་དགྲའི་དམག་དཔུང་ཟློག་པའི་ལས་ཞི་བས་མི་འདུལ་བ་རྣམས་དྲག་པོས་འདུལ་བར་སྔོན་ཚེ་ཞལ་གྱིས་བཞེས་པའི་ཐུགས་དམ་ལས་མ་འདའ་བར་རྣལ་འབྱོར་སྒྲུབ་པ་པོ་བདག་གིས་བཅོལ་པའི་ཕྲིན་ལས་འགྲུབ་པར་མཛོད་ཅིག །ཅེས་ཕྲིན་ལས་བཅོལ་བ་སྟེ་འོག་མ་ཀུན་ལ་འགྲེས་སོ། །མགོན་པོ་ཐམས་ཅད་ཀྱི་ནང་ནས་ཕྲིན་ལས་ཀྱི་མགོན་པོ་ཏྲཀྴད་ནག་པོ་འདི། ལས་ཤིན་ཏུ་མྱུར་བའི་རྒྱ་གར་སློབ་དཔོན་དྷ་ན་སཾ་ཀྲི་ཏས་སློབ་དཔོན་པདྨ་འབྱུང་གནས་ལ་གནང་། སློབ་དཔོན་པདྨ་འབྱུང་གནས་ཀྱིས་མ་འོངས་སུམ་ཅུའི་ཁ་རལ་དུས་སུ་སྙིང་པོའི་བསྟན་པ་སྲུང་བའི་བཙས་སུ་དགོངས་ཏེ་གཏེར་དུ་སྦས་པས་ཤིན་ཏུ་ཟབ་པ་སྙིང་ཁྲག་ལྟ་བུ་ཡིན། ལ་ལ་དག་གིས་ཏྲཀྴད་གཉོས་ལོ་ཙཱའི་བཀའ་སྲུང་ཡིན་པས་གཉོས་ཀྱིས་མར་པ་ལོ་ཙཱའི་དཔེ་བུམ་ཆུ་ནང་དུ་འཕངས་པས་ཀ་བརྒྱུད་པའི་སྲུང་མ་ཡོངས་གྲགས་མིན་སྨྲ་བ་ནི། ཕྱོགས་སྔའི་
ནམ་མ་ལངས་པར་དགག་སྒྲུབ་ཀྱི་ཉི་མ་ཤར་བ་རྫའི་ཁུར་པོ་ཁུར་ནས་རྡོ་བའི་གཡུལ་ངོར་ཞུགས་པ་དང་འདྲ་སྟེ། མཉམ་མེད་དྭགས་པོ་ལྷ་རྗེའི་བཀའ་སྲུང་ཐུན་མོང་མ་ཡིན་པ་མགོན་པོ་སྤུ་གྲི་གཅིག་ཞུར་ཏྲཀྴད་ཡིན་པའི་ཕྱིར་རོ། །བཞེངས་བསྐུལ་གཉིས་པ་ཕྲིན་ལས་ཀྱི་མགོན་པོ་སྤྱན་འདྲེན་པ་ལ། ཧཱུྃ་གསུམ་སྔར་དང་འདྲ་བས་ལྷ་ཀླུ་མིའི་སྲིད་པ་གསུམ་གྱི་གནས་ནས་ལེགས་ལྡན་གྱི་སྲས་ཏྲཀྴད་ནག་པོ་སྤྱན་འདྲེན་པ་སྟེ། དེ་ཡང་ལེགས་ལྡན་ལ་རིགས་གསུམ་སྟེ། དང་པོ་ཡེ་ཤེས་ཀྱི་ལེགས་ལྡན་ནི་ཐུགས་རྗེ་ཆེན་པོ་སྤྱན་རས་གཟིགས་ཁྲོས་པ་སྟེ། མདོ་སྡེ་ཟ་མ་ཏོག་ལས། སྤྱན་རས་གཟིགས་དེ་ཉིད་མགོན་པོ་ནག་པོ་ཆེན་པོས་འདུལ་བའི་སེམས་ཅན་ལ། ནག་པོ་ཆེན་པོའི་སྐུར་བཞེངས་ནས་སེམས་ཅན་གྱི་དོན་མཛད་དོ། །ཞེས་སོ། །གཉིས་པ་ལས་ཀྱི་ལེགས་ལྡན་ནི་བདུད་པོ་མ་ཏྲཾ་རུ་དྲ་སྟེ། དེ་ཉིད་དཔལ་ཆེན་ཧེ་རུ་ཀ་རིགས་ལྔས་དམ་ལ་བཏགས་
པས། ཁྲོ་བོའི་རྒྱུད་ཐམས་ཅད་དུ་མ་ཏྲཾ་རུ་དྲ་བསྒྲལ་ཚུལ་མང་དུ་འབྱུང་བ་དང་། དཔལ་མགོན་པོ་མ་ནིང་གི་རྒྱུད་ལྟར་ན། ཆེ་མཆོག་ཧེ་རུ་ཀ་མ་ནིང་མཆེད་གསུམ་དུ་སྤྲུལ་ནས་རུ་དྲ་སྡེ་གསུམ་དམ་ལ་བཏགས་པ་ཡིན་ཏེ། མ་ནིང་གི་བསྟོད་པ་ལས། འཇིག་རྟེན་འདས་པའི་དུས་ནས་སྔོན་བྱུང་བ༔ ཆེ་མཆོག་ཧེ་རུ་ཀ་དཔལ་སྐུ་གསུང་ཐུགས༔ སྲིད་རྩེའི་བདག་འཛིན་རུ་དྲ་སྡེ་གསུམ་འདུལ༔ རྩལ་ཆེན་ཕྲིན་ལས་རྫོགས་ལ་ཕྱག་འཚལ་བསྟོད༔ ཅེས་གསུངས་པས་སོ། །ཀུན་བཟང་ཆེ་མཆོག་བུདྡྷ་ཧེ་རུ་ཀས་བཏུལ་བ་དང་། དེ་བཞིན་དུ་ཡང་དག་འཁོར་ལོ་བདེ་མཆོག་བཛྲ་ཧེ་རུ་ཀ་དང་། རཏྣ་ཧེ་རུ་ཀ་འཇམ་དཔལ་གཤིན་རྗེ་དང་། པདྨ་ཧེ་རུ་ཀ་རྟ་མགྲིན་དང་། ཀརྨ་ཧེ་རུ་ཀ་ཕུར་པ་སོགས་ཐམས་ཅད་ཀྱིས་དམ་ལ་བཞག་པ་དོན་ལ་གནས་པ་སྟེ། ཇི་སྐད་དུ་ཡང་། རྒྱལ་བ་ཐམས་ཅད་ཡེ་ཤེས་ཀློང་དུ་གཅིག༔ ཆོས་ཉིད་དོན་ལ་ཆ་ལུགས་མི་མངའ་ཡང་༔ ཐབས་མཁས་
གང་འདུལ་སོ་སོའི་སྐུར་སྟོན་པ༔ ཐུགས་རྗེའི་སྤྲུལ་བསྒྱུར་འགྱེད་ལ་ཕྱག་འཚལ་བསྟོད༔ ཅེས་སོ། །དེ་ལྟར་མ་ཏྲཾ་རུ་དྲ་དམ་ལ་བཞག་པའི་རྣམ་ཤེས་དེ་ཉིད་མགོན་པོ་ལེགས་ལྡན་ནག་པོར་གྱུར་ནས་བསྐལ་བཟང་སངས་རྒྱས་སྟོང་གི་བསྟན་པ་སྲུང་བའི་སྐུར་བཞེངས། མ་འོངས་པ་ན་ཐལ་བ་ཞེས་བྱ་བའི་འཇིག་རྟེན་དུ་བདེ་གཤེགས་ཐལ་བའི་དབང་པོ་ཞེས་བྱ་བར་སངས་རྒྱས་པར་འགྱུར་བ་དེ་ལ་སྲས་མགོན་པོ་འབུམ་སྡེ་བྱུང་བས་ན། ལེགས་ལྡན་ནག་པོ་མགོན་པོ་ཀུན་གྱི་ཡབ། །ཅེས་གསུངས་ལ། དེ་དག་ཀྱང་རིགས་ལྔར་འདུ་བ་སྟེ། སྐུའི་མགོན་པོ་སྟག་ཞོན། གསུང་གི་མགོན་པོ་བིང་དམར། ཐུགས་ཀྱི་མགོན་པོ་གྲི་གུག་ཅན་ཏེ་བེར་ནག་ཅན། ཡོན་ཏན་གྱི་མགོན་པོ་སེང་ཞོན། ཕྲིན་ལས་ཀྱི་མགོན་པོ་ཏྲཀྴད་ནག་པོ་དང་ལྔའོ། །གསུམ་པ་འཇིག་རྟེན་གྱི་ལེགས་ལྡན་ནི། ལྷ་ཆེན་བརྒྱད་ཀྱི་ནང་དུ། ལེགས་ལྡན་སྨུག་ནག་ཕྱག་ན་བིང་ཆེན་བསྣམས། །
ཞེས་པ་དང་། དྲེགས་པའི་སྡེ་དཔོན་སུམ་ཅུའི་ནང་དུ། མགོན་པོའི་སྡེ་དཔོན་ལེགས་ལྡན་ནག་པོ་ཚོགས་ཀྱི་བདག་པོ་དེ་ཡིན་ནོ། །ཕྲིན་ལས་ཀྱི་མགོན་པོ་དེ་ཉིད་ལ་མཚན་གྱི་རྣམ་གྲངས་ཤིན་ཏུ་མང་བ་སྟེ། ཏྲཀྴད་ནག་པོ་སྟེ་ལས་མཁན་དང་མིག་གསུམ་དྲག་པོ་སོགས་ལ་འཇུག་པ་དང་། དུག་གི་སྤུ་གྲི་སོགས་མཚན་གཞན་རྣམས་གཞུང་གསལ་ལྟར་རོ། །བཞེངས་བསྐུལ་གསུམ་པ་འཁོར་སྡེ་བརྒྱད་ཀྱི་མགོན་པོ་བསྐུལ་བ་ལ་ནང་གསེས་སུ་བརྒྱད་ཡོད་ཀྱང་ཡི་གེའི་ཟོལ་ཡངས་པའི་ཕྱིར་ཕྱོགས་གཅིག་ཏུ་འདྲིལ་བ། ཤར་ཕྱོགས་དྲི་ཟའི་མགོན་པོ། ༼༡༽ ལྷོ་ཕྱོགས་གཤིན་རྗེའི་མགོན་པོ། ༼༢༽ ནུབ་ཕྱོགས་ཀླུ་བཙན་གྱི་ མགོན་པོ། ༼༣༽ བྱང 
་ཕྱོགས་གནོད་སྦྱིན་གྱི་མགོན་པོ། ༼༤༽ ཤར་ལྷོ་མེ་ལྷའི་མགོན་པོ། ༼༥༽ ལྷོ་ནུབ་གཟའ་བདུད་ཀྱི་
མགོན་པོ། ༼༦༽ ནུབ་བྱང ་རླུང་ལྷའི་ མགོན་པོ། ༼༧༽ བྱང ་ཤར་དབང་ལྡན་གྱི་མགོན་པོ། ༼༨༽ དང་བརྒྱད་པོ་
ཐམས་ཅད་ལ་འདྲེ་བདུད་སོགས་བདུད་ཀྱི་མིང་ཐོགས་པ་བདུད་མགོན་ཉིད་ཀྱི་རྣམ་རོལ་སྤྲུལ་པ་ཡིན་པས་སོ། །བཞེངས་བསྐུལ་བཞི་པ་དེའི་རྗེས་འབྲང་། སྟེང་ཕྱོགས་ལྷ་དམག །འོག་ཕྱོགས་ཀླུ་དམག །བར་ཕྱོགས་སྡེ་བརྒྱད་ཀྱི་དམག་རྣམས་བསྐུལ་བའོ། །སྡེ་བརྒྱད་ལ་དབྱེ་བསྡུ་དང་གྲངས་སྣ་ཚོགས་འབྱུང་བ་སྟེ་འདིར་ནི། ལྷ་བདུད་ཀླུ་བཙན་མ་མོ་གཟའ༔ རྒྱལ་པོ་གཤིན་རྗེ་ས་བདག་རྣམས༔ ཞེས་དགུར་གསུངས་པ་དང་། གྲོ་ལོད་ཀྱི་གཏོར་འབུལ་དུ་བཅུར་གསུངས་ཏེ། ལྷ་དང་གཤིན་རྗེ་བདུད་དང་བཙན༔ གཟའ་དང་རྒྱལ་པོ་མ་མོའི་ཚོགས༔ ཀླུ་དང་ས་བདག་ཐེའུ་རང་ཚོགས༔ ཅེས་དང་། དེར་མ་ཟད་བཀའ་སྲུང་ཐམས་ཅད་ཀྱི་རྣོ་མྱུར་ལས་བྱེད་ཀྱི་ཕོ་ཉ་ཡིན་ལ། ཕྱི་ལྟར་ན། ལྷའི་དབང་པོ་བརྒྱ་བྱིན་ལ་སོགས་པ་ལྷའི་སྡེ། ༼༡༽ ཐག་བཟང་རིས་སོགས་ལྷ་མ་ཡིན་གྱི་སྡེ། ༼༢༽ ཟུར་ཕུད་ལྔ་པ་སོགས་དྲི་ཟའི་སྡེ། ༼༣༽ ལྗོན་པ་རྟ་མགོ་
ཅན་ལ་སོགས་པ་མིའམ་ཅིའི་སྡེ། ༼༤༽ དགའ་བོ་འཇོག་པོ་ལ་སོགས་པ་ཀླུའི་སྡེ། ༼༥༽ བྱ་རོག་མགོ་བརྩེགས་ལ་སོགས་གྲུལ་བུམ་སྡེ། ༼༦༽ ཚངས་པ་ལ་སོགས་པ་གཉེན་གྱི་སྡེ། ༼༧༽ ལང་ཀ་མགྲིན་བཅུ་ལ་སོགས་པ་སྲིན་པོའི་སྡེ། ༼༨༽ ནང་ལྟར་ན། ལྷ་ཆེན་མ་ཧཱ་དེ་ཝ། ༼༡༽ སྨན་མོ་འབྲུག་སྒྲ་མ། ༼༢༽ མ་མོ་ཙ་མུནྟྲི། ༼༣༽ གཤིན་རྗེ་རཀྵ་དམར་པོ། ༼༤༽ གཟའ་མུན་པ་ནག་པོ། ༼༥༽ བཙན་གུར་པ་ཏི། ༼༦༽ ཀླུ་རྒྱལ་སོག་མ་མེད། ༼༧༽ བདུད་མོ་གསེར་མིག་གོ ༼༨༽ །གསང་བ་ལྟར་ན། ལྷ་ཆེན་དབང་ཕྱུག ༼༡༽ །ཀླུ་འཆི་བདག་མགོ་དགུ ༼༢༽ །གཤིན་རྗེ་ཆོས་ཀྱི་རྒྱལ་པོ། ༼༣༽ མ་མོ་ཨེ་ཀ་ཙ་ཏི། ༼༤༽ བདུད་རོལ་པ་སྐྱེས་གཅིག ༼༥༽ སྲིན་པོ་རཀྴ་ནག་པོ། ༼༦༽ གནོད་སྦྱིན་བྲ་མ་ར་ཙ། ༼༧༽ གཟའ་བདུད་ཁྱབ་འཇུག་ཆེན་པོའོ། ༼༨༽ །སྦས་པའི་སྡེ་བརྒྱད་ནི། བགེགས་བི་ན་ཡ་ཀ ༼༡༽ རྨུ་བདུད་ནག་པོ་ཧ་ལི་ཀ། ༼༢༽ དགྲ་ལྷའི་རྒྱལ་པོ་ཨུ་
ཙ་མའི། ༼༣༽ སྲིན་པོ་རཀྴ་ནག་པོ། ༼༤༽ མ་མོ་ནག་མོ་གསོད་བྱེད། ༼༥༽ ཀླུ་བཙན་རོལ་པ་གློག་འགྱུ། ༼༦༽ གཤིན་རྗེ་ཡཀྴ་ཧ་ལ། ༼༧༽ བདུད་པོ་བྱ་རོག་པོ། ༼༨༽ བསྟན་པ་སྐྱོང་བའི་སྡེ་བརྒྱད་ནི། བདུད་ཡབ་རྗེ་ནག་པོ། ༼༡༽ སྲོག་བདག་ཚངས་པ་དཀར་པོ་སྙིང་འབྱིན། ༼༢༽ ཀླུ་རྗེ་ཡུལ་ལྷ་ཕྱྭ་སངས། ༼༣༽ དཔལ་མགོན་པོ་ནག་པོ། ༼༤༽ དམ་ཅན་རྡོ་རྗེ་ལེགས་པ། ༼༥༽ སྲིན་པོ་ནག་པོ་སྲོག་གི་བདག་པོ། ༼༦༽ གནམ་ཐེལ་དཀར་པོ། ༼༧༽ སྒྲོལ་གིང་གཙོ་བོ་ཡམ་ཤུད་དམར་པོའོ། ༼༨༽ དྲག་པོ་སྔགས་ཀྱི་སྡེ་བརྒྱད་ནི། བཙན་སྦྲུལ་མགོ་ཅན། ༼༡༽ རྨུ་རྗེ་ཡ་བ་ཏེ། ༼༢༽ ཀླུ་བདུད་ནག་པོ། ༼༣༽ གནོད་སྦྱིན་ཡཀྴ་མེ་དབལ། ༼༤༽ མོན་མོ་ནག་མོ་ཁྲག་འཛག་མ། ༼༥༽ གཟའ་བདུད་མིག་མང་། ༼༦༽ སྔགས་ཀྱི་བདག་མོ། ༼༧༽ བདུད་ནག་པོ་བཀྲག་མེད་དོ། ༼༨༽ །ལས་བྱེད་མྱུར་མགྱོགས་ཀྱི་སྡེ་བརྒྱད་ནི། མ་མོ་སྦལ་མགོ་ཁྲག་མིག་མ།
༼༡༽ བཙན་རོལ་པ་ཤུ་ལ། ༼༢༽ རྒྱལ་པོ་ལིང་བྱིན་ཧར་ལེགས། ༼༣༽ གཤིན་རྗེ་ལིང་པ་དམར་པོ། ༼༤༽ གནོད་སྦྱིན་ཐོད་པ་དཀར་པོ། ༼༥༽ བདུད་ཤན་པ་དམར་པོ། ༼༦༽ ཀླུ་བགེགས་ཀྱི་དབང་པོ། ༼༧༽ དྲི་ཟ་སྨུག་པོ་ལྕགས་ཀྱི་ཐོ་བ་ཅན་ནོ། ༼༨༽ །བཏགས་ཤིང་ཆགས་པའི་སྡེ་བརྒྱད་ནི། ཡུལ་ལྷ་རུ་བཏགས་ཤིང་ཆགས་པ་ཐང་ལྷ། ༼༡༽ མ་སད་དུ་བཏགས་ཤིང་ཆགས་པ་གཡའ་སྤང་སྐྱེས། ༼༢༽ གྲི་བཙན་དུ་བཏགས་ཤིང་ཆགས་པ་སྐྱེས་བུ་ལུང་བཙན། ༼༣༽ རུ་དྲ་རུ་བཏགས་ཤིང་ཆགས་པ་རྡོ་རྗེ་བདུད་འདུལ། ༼༤༽ མཁའ་འགྲོར་བཏགས་ཤིང་ཆགས་པ་ཧེ་ལེ་འབར་མ། ༼༥༽ ཀླུར་བཏགས་ཤིང་ཆགས་པ་ཀླུ་རྒྱལ་གཙུག་ཕུད་ཅན། ༼༦༽ རྒྱལ་པོར་བཏགས་ཤིང་ཆགས་པ་ཤིང་བྱ་ཅན། ༼༧༽ ཐེའུ་རང་དུ་བཏགས་ཤིང་ཆགས་པ་བྱ་རོག་བདག་པོ་དང་བརྒྱད་དོ། ༼༨༽ །ཞེས་པ་འདི་ནི་འཇའ་ཚོན་མ་ནིང་དགོས་སྒྲུབ་ཀྱི་སྐབས་ལྟར་ཡིན་པས།
སྲིད་པ་གཏེར་ཁྱིམ་དང་ཕྱོགས་འདྲའོ། །གཏེར་ཁྱིམ་ལས། མྱུར་མགྱོགས་ཀྱི་སྡེ་བརྒྱད་ལ། གཤིན་རྗེ། ༼༡༽ མ་མོ། ༼༢༽ བདུད། ༼༣༽ བཙན། ༼༤༽ རྒྱལ་པོ། ༼༥༽ ཀླུ། ༼༦༽ གནོད་སྦྱིན། ༼༧༽ གཟའ་༼༨༽ དང་བརྒྱད་དུ་གསུངས་སོ། །བཞེངས་བསྐུལ་ལྔ་པ་ལས་མཁན་ཕོ་ཉའི་དམག་དཔུང་བསྐུལ་བ་ལ། ཕྱོགས་སྐྱོང་བཅུ་ནི། སྟེང་གི་ཚངས་པ། འོག་གི་ས་བདག །ཤར་གྱི་དྲི་ཟ། ལྷོའི་གཤིན་རྗེ། ནུབ་ཀྱི་ཆུ་བདག །བྱང་གི་གནོད་སྦྱིན། ཤར་ལྷོ་མེ་ལྷ། ལྷོ་ནུབ་སྲིན་པོ། ནུབ་བྱང་རླུང་ལྷ། བྱང་ཤར་དབང་ལྡན་ནོ། །རྒྱལ་ཆེན་བཞི་དང་། ལྷ་ཆེན་བརྒྱད། ཀླུ་ཆེན་བརྒྱད། གཟའ་ཆེན་བརྒྱད། རྒྱུ་སྐར་ཉེར་བརྒྱད། འཇིགས་བྱེད་དགུ་བཅས་བདུན་ཅུ་རྩ་ལྔ་ཡིན་ལ། གཙང་རིས་མགོན་པོ་བདུན་ཅུ་རྩ་གཉིས་དང་། རྩ་ལྔ་དང་། རྩ་བརྒྱད་སོགས་གྲངས་དང་འདྲེན་ཚུལ་འདྲ་མིན་འབྱུང་ཞིང་། ཞལ་ཆེམས་ལས་འགྱེད་ལས་དེ་ལས་མང་ཙམ་འབྱུང་
སྟེ། ལྷ་ཆེན་བརྒྱད་དང་ཀླུ་ཆེན་བརྒྱད༔ གཟའ་བརྒྱད་རྒྱུ་སྐར་ཉི་ཤུ་བརྒྱད༔ གནོད་སྦྱིན་བརྒྱད་དང་ཕྱོགས་སྐྱོང་བཅུ༔ འཇིགས་བྱེད་དགུ་དང་ལས་མཁན་བརྒྱད༔ གཙང་རིས་མགོན་པོ་བདུན་ཅུ་གཉིས༔ ཞེས་འབྱུང་བས་ཆོས་ཀྱི་སྤྱན་ལྡན་རྣམས་ཀྱིས་དཔྱད་པར་ཞུ། དབང་ཕྱུག་ཉེར་བརྒྱད་མ་སྲིང་ཆུང་མ་བྲན་མོའི་ཚུལ་ཡང་སྤྱི་ལྟར་རོ། །དྲེགས་པ་སྔགས་བདག་བཅོ་བརྒྱད་ནི། གཤིན་རྗེའི་སྔགས་བདག་འཆི་བདག་ནག་པོ། ༡ ཡུམ་གསོད་བྱེད་ནག་མོ་རལ་པ་ཅན། ༢ བདུད་ཀྱི་སྔགས་བདག་མེའི་ཁ་རླངས་ཅན། ༣ ཡུམ་བདུད་མོ་ནག་མོ་ཁྲག་འཐུང་མ། ༤ སྲིན་པོའི་སྔགས་བདག་གསོད་བྱེད་འབར་བ། ༥ ཡུམ་ཟ་བྱེད་ནག་མོ། ༦ གནོད་སྦྱིན་གྱི་སྔགས་བདག་གང་བ་བཟང་པོ། ༧ ཡུམ་ཤ་ཟ་སྔོན་མོ། ༨ ལྷའི་སྔགས་བདག་མ་ཧཱ་དེ་ཝ། ༩ རུ་དྲའི་སྔགས་བདག་ཐར་པ་ནག་པོ། ༡༠ རྨུའི་སྔགས་བདག་རྨུ་རྗེ་བཙན་པོ། ༡༡ མུ་སྟེགས་སྔགས་
བདག་གུ་ལང་ནག་པོ། ༡༢ གཟའི་སྔགས་བདག་རཱ་ཧུ་ལ་ནག་པོ། ༡༣ ཀླུའི་སྔགས་བདག་ཀླུ་རྒྱལ་སོག་མ་མེད། ༡༤ རྒྱལ་པོའི་སྔགས་བདག་ལི་བྱིན་ཧ་ར་ལེགས། ༡༥ འགོང་པོའི་སྔགས་བདག་ཁུ་ལེ་ལག་དགུ། ༡༦ དགྲ་ལྷའི་སྔགས་བདག་རྡོ་རྗེ་ལེགས་པ། ༡༧ བཙན་གྱི་སྔགས་བདག་ཡམ་ཤུད་དམར་པོ། ༡༨ དང་བཅོ་བརྒྱད་དོ། །འདི་རྣམས་ཀྱི་སྐུ་མདོག་ཕྱག་མཚན་བཀའ་བརྒྱད་དང་མཆོག་གླིང་གཏེར་བྱོན་དམོད་པ་དྲག་སྔགས་སུ་གསལ་བར་བཞུགས་ཀྱང་། འདིར་ཡང་འཁོར་མོས་སྒོམ་ཙམ་ཡིན་པ་དང་ཡི་གེ་མང་དུ་དོགས་པས་མ་བྲིས་སོ། །དྲེགས་པའི་སྡེ་དཔོན་སུམ་ཅུ་ནི་སྲིད་གསུམ་གཏིང་ཟློག་ཏུ་བཀོད་ཡོད་པས་འདིར་གཉིས་ཟློས་མ་བྲིས་པས་དེར་བལྟའོ། །བརྟན་མ་བཅུ་གཉིས་སྐྱོང་མ་བརྒྱ༔ ཞེས་པ་ནི། པདྨ་དབང་རྒྱལ་གྱི་བརྟན་མ་བཅུ་གཉིས་གནད་ཀྱི་ཡི་གེ་ལས། དེ་ལྟར་འདོད་ཁམས་དག་པ་སྨན་མོ་བཞི། །སྤྲུལ་
སྐུའི་ཕོ་ཉ་ལུས་ཀྱི་སྨད་ཀྱི་ཆ། །རྩ་རྣམས་དབང་དུ་སྡུད་ལ་ནན་ཏན་གཅེས། །གཟུགས་ཁམས་དག་པ་གནོད་སྦྱིན་ཆེན་མོ་བཞི། །ལུས་ཀྱི་སྐད་པ་ལོངས་སྐུའི་ཕོ་ཉ་མོ། །རླུང་རྣམས་དབང་དུ་སྡུད་ལ་ནན་ཏན་གཅེས། །གཟུགས་མེད་དག་པ་བདུད་མོ་ཆེན་མོ་བཞི། །སྟོད་ཀྱི་ཆར་རྫོགས་ཆོས་སྐུའི་ཕོ་ཉ་མོ། །ཐིག་ལེ་དབང་དུ་སྡུད་ལ་ནན་ཏན་གཅེས། །རྩ་རླུང་ཐིག་ལེའི་བླ་རྡོ་གསུམ་འཆང་བས། །སྐུ་གསུམ་ལྷུན་གྲུབ་འདུ་འབྲལ་མེད་པའི་དཔལ། །བདེ་གསལ་མི་རྟོག་ཡེ་ཤེས་དབང་དུ་འདུ། །ཟད་པར་ཟིལ་གནོན་རྟེན་འབྲེལ་བཅུ་གཉིས་རྫོགས། །མ་རིག་བདག་འཛིན་རིག་པ་ཡེ་ཤེས་ཏེ། །གཞན་གྱིས་མ་རྙེད་རང་གྲོལ་ངང་ལས་རྙེད། །འདི་དང་མི་ལྡན་རང་རྒྱུད་སུས་བཟུང་ཡང་། །གནས་སྐབས་ཙམ་ལས་མཐར་ཐུག་འགྲུབ་པར་དཀའ། །དེ་ཕྱིར་དཔལ་གྱི་རྡོ་རྗེ་ཧཱུྃ་ཡིག་གིས། །ཧ་ཧ་ཧི་ཧི་ཧུ་ཧུ་ཧེ་ཧེ་དང་། ཧོ་ཧོ་ཧཾ་ཧཾ་རླུང་རྣམས་དགུག་པར་བྱ། །
ཡན་ལག་བཅུ་གཉིས་སྲིད་རྩ་དག་པར་འགྱུར། རྟེན་འབྲེལ་བཅུ་གཉིས་བདེན་དོན་རྟོགས་པ་དང་། །བདེ་གཤེགས་བཅུ་གཉིས་གོ་འཕང་ཐོབ་པ་དང་། །མ་མོ་བཅུ་གཉིས་བདེ་ཆེན་དབྱིངས་སུ་རྫོགས། །སྐྱེ་དང་མཆེད་པ་བཅུ་གཉིས་ཡོན་ཏན་འཆར། །གནོད་སྦྱིན་སྡེ་དཔོན་བཅུ་གཉིས་ཕྲིན་ལས་སྒྲུབ། །སློབ་དང་མི་སློབ་རྣམ་པ་བཅུ་གཉིས་པ། །བཅུ་གསུམ་རྡོ་རྗེ་འཆང་གི་ས་མཐར་འཁྱོལ། །འདི་ཉིད་ཡིན་ནོ་བདེན་བཞིའི་རྣམ་པ་ཅན། །འབྱུང་བཞི་རིགས་བཞི་དབང་བཞི་ལམ་བཞི་དང་། །དུས་བཞི་སྐུ་བཞི་སྐྱེ་བ་བཞི་རྣམས་གྲོལ། །བཞི་གསུམ་བཅུ་གཉིས་བཅུ་དྲུག་ངོ་བོར་རྫོགས། །ཅེས་སོ། །བརྟན་མའི་ཡང་སྤྲུལ་སྐྱོང་མ་བཅུ་གཉིས། ཡ་མ་བཅུ་གཉིས་དང་། གཞན་ཡང་འབུམ་ཕྲག་ཉི་ཤུ་ཡང་གསུངས་ཏེ་བསམ་གྱིས་མི་ཁྱབ་བོ། །བཞེངས་བསྐུལ་དྲུག་པ་དམག་གི་རུ་འདྲེན་སྡེ་བཞི་བསྐུལ་བ་ལ་ནང་གསེས་སུ་བཞི་ལས། ཤར་ཕྱོགས་ཀྱི་རུ་
འདྲེན་འདོད་ཁམས་དབང་ཕྱུག་དམག་གི་རྒྱལ་མོ་རང་བྱུང་མ་དང་། ལྷོ་ཕྱོགས་ཀྱི་རུ་འདྲེན་གཤིན་རྗེ་ཡ་མ་རཱ་ཛ་སྲོག་བདག་དུག་གདོང་ཆོས་ཀྱི་རྒྱལ་པོ་དང་། ནུབ་ཕྱོགས་ཀྱི་རུ་འདྲེན་གཟའ་བདུད་མགོ་དགུ་རཱ་ཧུ་ལ་དང་། བྱང་ཕྱོགས་ཀྱི་རུ་འདྲེན་བྱ་རོག་གདོང་ཅན་དང་བཞི་ལ་ཕྱོགས་བཞིའི་རུ་འདྲེན་སྡེ་བཞི་ཞེས་བྱ་ལ། དེ་སྟེང་སྟེང་འོག་གཉིས་དབུས་ཀྱི་རུ་འདྲེན་དང་གསུམ་བཅས་བསྡོམས་པས་དམག་དཔོན་རུ་འདྲེན་སྡེ་བདུན་ཅེས་བྱའོ། །བཞེངས་བསྐུལ་བདུན་པ་སྟེང་གི་རུ་འདྲེན་རྒྱབ་བརྟེན་དཔུང་གྲོགས་ཡབ་ལེགས་ལྡན་ལྷ་དམག་དང་བཅས་བསྐུལ་བ་དང་། འོག་གི་རུ་འདྲེན་བསྡོང་ཟླ་ཀླུ་རྒྱལ་དུག་གདོང་བསྐུལ་བ་དང་། དབུས་ཀྱི་རུ་འདྲེན་གཉིས་མེད་ཐུགས་སྤྲུལ་སྲོག་བདུད་ཤན་པ་ལག་དམར་བསྐུལ་བ་རྣམས་གཞུང་གི་ཚིག་རིས་ལྟར་འདོན་སྒོམ་ཟུང་དུ་ཆུབ་པར་བྱའོ། །སྔ་འགྱུར་རྙིང་མ་ལྟར་ན་ལས་མགོན་སྲོག་བདུད་རྟ་ནག་ཅན་ཞེས་མགོན་པོ་
ཀུན་གྱི་རྣོ་མྱུར་ལས་བྱེད་ཀྱི་ཕོ་ཉ་ཀུན་གྱི་གཙོ་བོ་ཡིན་པས། ལོ་རྒྱུས་མགོན་པོའི་རྒྱུད་ལྟར་ཅུང་ཟད་བཤད་ན། ཆེ་མཆོག་མ་ནིང་ནག་པོས་རུ་དྲ་བསྒྲལ་ཞིང་། རི་བོ་མ་ལ་ཡ་གནམ་ལྕགས་འབར་བའི་རྩེ་མོ་དུར་ཁྲོད་ཐོད་མཁར་འབར་བའི་ནང་དུ། མ་ནིང་འཆོལ་བའི་བུ་ནག་པོ་ཆེན་པོ་མ་ནིང་གིས་རུ་དྲའི་ཆུང་མ་ལ་བསྐྲུན་པའི་བུ་རུ་དྲ་གསོད་པའི་སྲོག་བདུད། མཆན། བཞུགས་པའི་ཚེ་སྤྱན་གསུམ་གྱིས་སྟེང་ལྷའི་སྲིད་པ། འོག་ཀླུའི་སྲིད་པ། བར་མིའི་སྲིད་པ་གསུམ་ལ་གཟིགས་པས་ལྷ་དང་ལྷ་མིན་འཐབ་པ་ལ་ཐུགས་རྗེའི་འོད་ཟེར་སྤྲོས་ཏེ་བརྒྱ་བྱིན་ལ་ཐིམ་པས་ལྷའི་དབང་པོས་དགོངས་ཏེ་དམག་དཔོན་དུ་སྤྱན་དྲངས། ལྷའི་བུ་མོ་ཨུ་མ་དེ་ཝི་དང་རོལ་པས་བུ་ལེགས་ལྡན་ནག་པོ་དང་བུ་མོ་རེ་མ་ཏི་གཉིས་འཁྲུངས། སྲོག་བདུད་དམག་གི་ཆས་སུ་ཞུགས་ཏེ་ཡན་ལག་གི་ལྷུ་ཚིགས་བཞི་ལས་སྤྱན་བཞི་ཤར་བ་ལས་དམག་དཔོན་བཞི་རུ་སྤྲུལ་ཏེ། པྲ་མ་རཱ་ཛ་ལྷའི་དམག་
དཔོན། ཡ་མ་རཱ་ཛ་གཤིན་རྗེའི་དམག་དཔོན། ནཱ་ག་རཱ་ཛ་ཀླུའི་དམག་དཔོན། དུ་ཡག་རཱ་ཛ་བདུད་ཀྱི་དམག་དཔོན་དུ་སྤྲུལ་ཞིང་བདུད་རྟ་ནག་པོ་རྟིང་དཀར་ལ་ཆིབས་ནས་ཉི་ཟླ་འབུམ་གྱི་འོད་ཟེར་འབར་བ། བདུད་མདའ་སྟོང་དམར་དགྲ་སྙིང་ལ་གཟིར་ཞིང་འདེབས་པ། གྲི་གུག་དང་ལྕགས་པར་ཐོགས་ནས་ཁ་ཊྭཱཾ་མཆན་དུ་བཟུང་ཞིང་སྐད་ཅིག་གླིང་བཞི་བསྐོར་བ། སྣང་སྲིད་ཕོ་རྒྱུད་ཐམས་ཅད་ཕོ་ཉར་འགྱེད་ཅིང་། ལྷག་ཁུང་གིས་ན་གཅིག་གིས་སྣང་སྲིད་མོ་རྒྱུད་ཐམས་ཅད་དབང་དུ་སྡུད་པ། གནོད་སྦྱིན་བརྒྱད་ལྕགས་ཀྱི་བྱ་ཁྲ་རུ་སྤྲུལ་ནས་སྔོན་ལ་ལྡིང་ཞིང་དགྲ་བོའི་ཤ་དང་མིག་འབྲས་ལ(༡༢བ)རྔམ་པ། གཤིན་རྗེ་བརྒྱད་སྟག་གཟིག་དོམ་དྲེད་དུ་སྤྲུལ་ནས་ཉམས་པའི་ཁྲག་ལ་རོལ་པ། ཀླུ་ཆེན་བརྒྱད་གཡུ་འབྲུག་ཏུ་སྤྲུལ་ནས་གནམ་ལྕགས་ཐོག་གི་བུ་ཡུག་འཚུབ་པ། ཕྱོགས་སྐྱོང་བཅུ་ཁྱི་ནག་དུ་སྤྲུལ་ནས་ཁྲག་རྗེས་གཅོད་ཅིང་རྒྱུག་པ། ལྷ་ཆེན་བརྒྱད་ཁྲོ་
ཆུང་དུ་སྤྲུལ་ནས་དབུ་སྐྲའི་གསེབ་ནས་མཚོན་ཆའི་ཆར་འབེབས་པ། རྒྱལ་པོ་ཆེན་པོ་སྡེ་བཞིས་དམག་གི་རུ་འདྲེན་མཛད་ཅིང་ལྷ་མིན་གྱི་དཔུང་ཚོགས་ཕམ་པར་བྱས་སོ། །མགོན་པོ་ཐམས་ཅད་ཀྱི་ཕྲིན་ལས་ཀྱི་རྩལ་ཤུགས་ཐམས་ཅད་གཅིག་ཏུ་བསྡུས་པ་ཏྲཀྴད་ནག་པོའི་འཁོར་ཚོགས་དེ་དག་ཐམས་ཅད་ཕྲིན་ལས་དོན་ཡོན་གྲུབ་པ་དང་རྣམ་དབྱེར་མེད་པས་ངོ་བོ་ཡེ་ཤེས་ལྔ་ལས་མ་འདས་ཀྱང་རྣམ་པ་དུག་ལྔའི་ཆོ་འཕྲུལ། རླུང་ནག་དགུ་ཀློང་འཚུབ་ཤིང་འཁྲུགས༔ ཞེས་པ། རླུང་རི་རྡོ་རྗེ་རྒྱ་གྲམ་ཞིག་ནས་འཇིག་དུས་ཀྱི་མུན་པ་འཚུབས་པ་སྟེ་གཏི་མུག་གི་མུན་པ་འཐིབ་པ། སྣང་ཚད་སྲིད་ཚད་འཁོར་བའི་སེམས་ཅན། སྲིད་པ་ལས་འདས་པའི་སངས་རྒྱས་ཀྱི་སས་བསྡུས་པའི་ལྷ་འདྲེ་ཐམས་ཅད། ཞེ་སྡང་མེ་ལྟར་འབར། ང་རྒྱལ་ས་ལྟར་གཡོ། འདོད་ཆགས་ཆུ་ལྟར་ཁོལ། ཕྲག་དོག་རླུང་ལྟར་འཚུབ་པས། སྡང་དགྲ་ཞིང་བཅུ་ཚང་བའི་གཙོ་བོ་སྡེ་དཔུང་
ཐམས་ཅད་ཀྱི་གནས་གཞི་ཡུལ་མཁར་རྟེན་དང་བརྟེན་པར་བཅས་པ་མགོ་མཇུག་ལྡོག་སྟེ་ས་འོག་རིམ་པ་དགུའི་མར་ཞབས་སུ་ནོན་ཅིག་ཅེས་ཕྲིན་ལས་བཅོལ་བ་ཐམས་ཅད་ལ་མཚུངས་སོ། །མདོས་ཟོར་ཡས་ཆེན་འབུལ་ཞིང་བསྐང་མཆོད་བྱ་བ་ལ། ཧཱུྃ་གསུམ་ལྟ་བའི་གདེངས་དང་ལྡན་པས། རང་བྱུང་ཆོས་དབྱིངས་དེ་ཁོ་ན་ཉིད་མ་བཅོས་པའི་ཀློང་ནས་འཆི་མེད་རྡོ་རྗེའི་སྐུ་བརྙེས་པདྨ་འབྱུང་གནས་རྡོ་རྗེ་གྲོ་ལོད་རྩལ་དང་། ཡེ་ཤེས་མཁའ་འགྲོ་མཚོ་རྒྱལ་དྲག་ཏུ་ཁྲོས་པ་མཁའ་འགྲོ་བདུད་འདུལ་མ་སེང་གེའི་གདོང་པ་ཅན་གྱི་ཐབས་དང་ཤེས་རབ་ལས། སྣང་བའི་ཞི་ཁྲོ་རྒྱལ་བ་རབ་འབྱམས་ཀྱི་ལྷ་ཚོགས་ལ་དགོངས་གསོལ་སྔོན་དུ་འགྲོ་བས་མདོས་མཆོད་འབུལ་བ་ནི། ཕྱི་སྣང་བ་སྣོད་ཀྱི་འཇིག་རྟེན་ན་དག་པ་རབ་འབྱམས་ཀྱི་ཞིང་ཁམས་དང་བཅས་པ་མདོས་སུ་བཤམས་ནས། ནང་སྲིད་པ་བཅུད་ཀྱི་སེམས་ཅན་སངས་རྒྱས་དང་བཅས་མདོས་རྫས་སུ་དམིགས་ནས་
འབུལ་བ་སྟེ། འབུལ་བའི་ཚུལ་ནི། མདོས་རྫས་དངོས་སུ་ཅི་འབྱོར་བ་དེ་དམིགས་པའི་རྟེན་དུ་བྱས་ནས་ཡིད་ཀྱིས་དཔལ་ཆེན་ཧེ་རུ་ཀའི་དགྱེས་རྫས་འོག་མིན་དུར་ཁྲོད་མེ་རི་འབར་བ་དང་། རང་བྱུང་གི་དུར་ཁྲོད་བརྒྱད་ཀྱི་རྒྱན་བཀོད་པ་བསམ་ཡས་ལྷུན་གྲུབ་འཁོར་གསུམ་རྣམ་དག་གི་ལྟ་བས་ཟིན་པས་འབུལ་བ་སྟེ། མདོར་ན་དྲག་པོའི་མཐུན་རྫས་མཆོད་པའི་ཡོ་བྱད་དང་། མངོན་སྤྱོད་གསང་སྔགས་ཟབ་མོའི་སྒྲུབ་རྫས་དྲག་པོའི་མདོས་ཟོར་འཁོར་འདས་རང་གྲོལ་མཉམ་ཉིད་འཛིན་མེད་ཀྱི་ངང་ནས་འབུལ་བའོ། །འབུལ་ཡུལ་གོང་བཞེངས་བསྐུལ་གྱི་སྐབས་ལྟར་རྡོ་རྗེ་གྲོ་ལོད་ཡབ་ཡུམ། ལས་མགོན་ཡབ་དྲག་པོ་མིག་གསུམ་དང་། ཡུམ་ཆེན་ལྔ་དང་། སྡེ་བརྒྱད་ཀྱི་མགོན་པོ། སྟེང་འོག་བར་གསུམ་གྱི་དམག་ཚོགས་གཙང་རིས་ཀྱི་དཔལ་མགོན། སྔགས་བདག་བཅོ་བརྒྱད། སྡེ་དཔོན་སུམ་ཅུ། བརྟན་སྐྱོང་མ་མོ། རུ་འདྲེན་སྡེ་བདུན་དང་བཅས་
པ་གསལ་བ་སེམས་ཀྱི་སྣང་ཆ་ལྷའི་དཀྱིལ་འཁོར་ཚིག་རིས་དང་མཐུན་པ་ལམ་གྱིས་གསལ་བ་དང་། སྟོང་པ་སེམས་ཀྱི་ངོ་བོ་ཆོས་ཉིད་དེ་བཞིན་ལས་མ་གཡོས་པ་སྟེ་དབྱིངས་རིག་ཟུང་འཇུག་གི་ངང་ནས་བསྐང་ཟློག་གི་ཕྲིན་ལས་བཅོལ་བའོ། །དབྱངས་གདངས་རོལ་མོ་ཕྱག་ལེན་རྣམས་ཡིག་ཆུང་དང་༧སི་ཏུ་རིན་པོ་ཆེའི་ཟིན་བྲིས་ལྟར་བྱའོ། །དེ་ནས་ཕྲིན་ལས་གཏོར་འབུལ་རྣམ་གསུམ་ཞེས། ཟན་ལིང་དམར་བྱང་བརྒྱ། མཁར་ཐབས་བརྒྱ། འབྲུ་སྣ་ཤ་དུམ་བརྒྱ་རྣམས་མདོས་དྲུང་དུ་བཤམས་ལ། གཞུང་གི་ཡིག་ཆུང་ལྟར། འགུགས་གཞུག་ལྷ་དབྱེ་གཤེད་འབེབས་ཀྱི་དམིགས་པ་གསལ་བས་བསྒྲལ་ཆོག་མི་བྱ་བར་དངོས་སུ་ཞལ་དུ་བསྟབ་པ་སྟེ། དམིགས་རིམ་གཞུང་གི་ཡིག་ཆུང་ལྟར་རོ། །འགུགས་གཞུག་མཐའི་ཤེལ་ཤེལ་སོགས་སྲིད་པ་གཏེར་ཁྱིམ་གྱི་བླ་འགུགས་ཀྱི་སྔགས་ཏེ། རྨུག་རྨུག་དགྲ་བོའི་བླ་ལ་རྨུག་དཔེ་རྒྱུན་ལ་ལར་འདུག་པས་ར་
མགོ་ཡོད་ན་ལེགས་སྙམ། གཞུང་གི་ཡིག་ཆུང་དང་ཟིན་བྲིས་ལྟར་ཞལ་དབྱེ་རེ་དང་རྦད་སྔགས་ཉེར་ལྔ་རེའི་མཚམས་སུ་རྦད་བསྐུལ་གཏོར་འབུལ་དགོས་ཀྱང་། དུས་གཏོར་སྐབས་འགྲུབ་དཀའ་བས་ད་ལྟ་ཕྱག་ལེན་དུ་ཞལ་དབྱེ་རེ་དང་རྦད་སྔགས་མཐར་གཟུགས་ཕུང་ཁཱ་ཧི་བཏགས་པ་བརྒྱ་དང་བརྒྱད་ཀྱི་མཐར། ཧཱུྃ་མ་ཧཱ་ཀཱ་ལ་མཐུ་བོ་ཆེ༔ སོགས་ཀྱིས་གཏོར་མ་མདོས་ནང་དུ་འབུལ། དེ་བཞིན་དུ་ཞལ་དབྱེ་དང་རྦད་སྔགས་མཐར་ཡུལ་མཁར་བཏགས་པ་བརྒྱ་བརྒྱད་དང་། ཧཱུྃ་མ་ཧཱ་ཀཱ་ལའི་གཏོར་འབུལ་བྱ། ཡང་ཞལ་ཕྱེ་དང་རྦད་སྔགས་མཐར་ཡུལ་སྡེ་བཏགས་པ་བརྒྱ་བརྒྱད་དང་། ལས་འགྱེད་ཞལ་ཆེམས་ཀྱི་གཏོར་འབུལ་བྱ་བ་གདན་ས་བར་ལུགས་སོ། །རྒྱལ་བ་རབ་འབྱམས་ཀུན་འདུས་བདག༔ སོགས་ཀྱི་ཞལ་ཕྱེ་སྐབས་བདག་དང་སྣང་སྲིད་འཁོར་འདས་རབ་འབྱམས་རྡོ་རྗེ་གྲོ་ལོད་དང་། ལས་མགོན་ཏྲཀྴད་ཀྱི་དཀྱིལ་འཁོར་དུ་གསལ་བ་དང་།
ཁྱད་པར་ལས་གཏོར་མདོས་ཟོར་ལྷ་ཚོགས་དངོས་སུ་གསལ་བས་བཞེས་པར་དམིགས་ལ་རྦད་བསྐུལ་ལས་འགྱེད་ཀྱི་ཕྲིན་ལས་ནན་ཏན་དུ་བཅོལ་བར་བྱའོ། །གོང་དུ་སྟོབས་བཅུའི་རྩལ་ལྡན་ནག་པོ་ཆེ༔ ཞེས་དང་། བཞེངས་ཤིག་སྟོབས་བཅུ་མངའ་བའི་ལྷ༔ ཞེས་པ་ངེས་པའི་དོན་དུ་བདུད་མགོན་ཏྲཀྴད་ཉིད་སངས་རྒྱས་དོན་ཡོད་གྲུབ་པ་ཡིན་པས་སངས་རྒྱས་ཀྱི་ཐུགས་མཁྱེན་པའི་སྟོབས་བཅུ་ཡིན་མོད་ཀྱང་། འདིར་སྐུའི་སྟོབས་གཙོ་བོར་སྦྱར་ན་འཐད་ཆེ་བ་སྟེ། མངོན་པ་མཛོད་ལས། སྐུ་ལ་སྲེད་མེད་བུ་ཡི་སྟོབས། །གཞན་དག་ཚིག་ན་གླང་ཆེན་སོགས། །བདུན་ཅུས་ལྷག་པའི་སྟོབས་ཡིན་ནོ། །ཞེས་གསུངས་པ་ལྟར་རོ། །སྟོབས་བཅུ་ཡོངས་གྲགས་དང་འདི་དོན་བཤད་ན་ཡི་གེ་མང་དུ་དོགས་པས་གཞན་དུ་བྲི་བར་སེམས་སོ། །དང་པོ་སྣང་སྲིད་འཁོར་འདས་མདོས་སུ་འབུལ་བ་ནི། ཧཱུྃ་གསུམ་གྱི་དོན་སྔར་དང་འདྲ། རྒྱལ་བ་རྒྱལ་བའི་འཁོར་ལོ་
སོགས་ཚིག་རྒྱན་འདྲེས་མའི་ཟུང་ལྡན། རྒྱལ་བ་ནི་སྟོབས་བཅུ་མངའ་བའི་སངས་རྒྱས་ཁོ་ན། རྒྱལ་བའི་འཁོར་ལོའི་མྱུ་གུ་ནི་རྒྱལ་སྲས་བྱང་ཆུབ་སེམས་དཔའ་ས་དང་པོ་ནས་བཅུ་པའི་བར་དང་། འདས་མ་འོངས་ད་ལྟའི་དུས་གསུམ་དང་། མ་ངེས་པའི་དུས་སམ། བསམ་གྱིས་མི་ཁྱབ་པའི་དུས་སམ། དུས་མེད་པའི་དུས་སྟེ། དུས་བཞི་མཉམ་པ་ཉིད་ཅེས་གསང་ཆེན་རྙིང་མའི་ཆོས་སྐད་བླ་ན་མེད་པའོ། །བསྟན་དགྲའི་གཡུལ་ལས་རྣམ་པར་རྒྱལ་བའི་འཁོར་ལོ་མཐའ་ཀླས་པ་སྟེ་མཐའ་ཡས་པར་བསྐོར་བའི་ཐུགས་རྗེ་དང་བྱིན་རླབས་ཀྱིས་སྲིད་པ་འཁོར་བར་མི་འཁྲུལ་ཞིང་། ཞི་བ་མྱང་འདས་ལ་མི་གནས་པའི་དཔལ་དང་ལྡན་པའི་གོ་འཕང་ཐོབ་ནས་ཁྲོ་རྒྱལ་ནུས་པའི་འཁོར་ལོ་འབར་བ་ནམ་མཁའི་མཛོད་མི་ཟད་པ་རྒྱན་གྱི་འཁོར་ལོ། ཁྲག་འཐུང་འཇིག་རྟེན་གསུམ་མཆོག་ཌཱ་ཀི་སིངྷ་མུ་ཁ་ཡབ་ཡུམ་འཁོར་དང་བཅས་པ་ལ། སྟེང་ལྷའི་སྲིད་པ། བར་
མིའི་སྲིད་པ། འོག་ཀླུའི་སྲིད་པ་གསུམ་མདོས་སུ་བཀོད་ནས་འབུལ་བ་དང་། སྟོང་གསུམ་གྱི་སྟོང་ཆེན་པོ་དངོས་པོར་སྣང་བ་ཐམས་ཅད་མདོས་སུ་དམིགས་ནས་འབུལ་བ་ལགས་ན་ཁམས་གསུམ་འཁོར་བའི་འཁོར་ལོ་བརྗོད་མེད་འོད་གསལ་སྟོང་པའི་དབྱིངས་སུ་གཞིག་ཅིང་གཞོམ་མེད་མཛད་དུ་གསོལ་ཞེས་མདོས་སྤྱིར་འབུལ་བ་ཡིན་ལ། བྱེ་བྲག་ཏུ་ཕྱི་སྣོད་འབྱུང་བ་བཞི་རི་རབ་རི་བདུན་ཁོར་ཡུག་དང་བཅས་པ། ནང་བཅུད་མཐོ་རིས་གསུམ་ངན་སོང་གསུམ་གནས་ཡུལ་ལོངས་སྤྱོད་དང་བཅས་པ། མངོན་སྤྱོད་ཀྱི་གསང་བ་ཟབ་མོའི་སྒྲུབ་རྫས་མདོས་ཟོར་དང་བཅས་པ། དེ་དག་གི་རྒྱན་གྱི་ཁྱད་པར་རྒྱལ་མཚན། བ་ལིང་། ནམ་མཁའ། རུ་མཚོན་སོགས་གཞུང་གསལ་ལྟར་འབུལ་ཞིང་མཐར་དོན་བསྡུས་སྙིང་པོར་དྲིལ་ཏེ་འབུལ་བ་ནི། དངོས་སུ་འབྱོར་པ་དམིགས་པའི་རྟེན་སྒྱུ་མ་མཁན་གྱི་རྡེའུ་འམ་ཤིང་བུ་ལྟ་བུ་ལ་བརྟེན་ནས་ཡིད་སྤྲུལ་ཆོས་དབྱིངས་ཁྱབ་
པའི་མཆོད་སྤྲིན། དེ་ཡང་འབུལ་བའི་ཚུལ་ནི་དངོས་པོར་སྣང་བ་ཐམས་ཅད་བདེན་པར་མ་གྲུབ་པ་སྒྱུ་མ་མཁན་གྱི་སྒྱུ་མའི་འཁྲུལ་འཁོར་ལྟ་བུར་དངོས་མེད་རང་རིག་འོད་གསལ་འདུས་མ་བྱས་པའི་བྱེད་ལས། ཕྱིའི་ཡུལ་སྣང་། ནང་གི་སེམས་སྣང་། སྣོད་ཀྱི་འཇིག་རྟེན། བཅུད་ཀྱི་སེམས་ཅན་ཐམས་ཅད་སེམས་ཉིད་ཀུན་བྱེད་རྒྱལ་པོའི་སྣང་བ་ཙམ་ལས་བདེན་པར་མ་གྲུབ་པ། སྒྱུ་མ། སྨིག་རྒྱུ། མིག་ཡོར། བྲག་ཅ་ལྟ་བུ་བདེན་མེད་རྫུན་མེད་ཆུ་ཟླའི་རོལ་གར་སེམས་ཀྱི་གཤིས་ཡེ་ནས་དག་ཅིང་སྟོང་པས་ཡེ་སྟོང་། སེམས་ཀྱི་སྟོང་ཆ་ཀ་དག་གི་ངོས་ནས་གང་དུ་ཡང་མ་གྲུབ་པས་ཡེ་མེད། སེམས་ཀྱི་སྣང་ཆ་ལྷུན་གྲུབ་ཀྱི་ངང་ནས་འཁོར་འདས་འཆར་གཞི་བྱེད་པས་ཡེ་གནས་ཀྱི་རོལ་པའམ་རང་བཞིན་མདོས་སུ་འབུལ་བའོ། །སྨྲ་བསམ་བརྗོད་མེད་བློ་འདས་གདོད་མའི་དབྱིངས་སུ་མདོས་བཞེས་ལ་དུས་གསུམ་རྒྱལ་བའི་བསྟན་པ་ནམ་མཁའི་མཐའ་
ཀླས་པར་འཕེལ་ཞིང་རྒྱས་པའི་ཞི་རྒྱས་དབང་དྲག་གང་བཞེད་པའི་དོན་ཐམས་ཅད་སྒྲུབ་པར་མཛོད་ཅིག་པའོ། །མདོས་འབུལ་གྱི་འགྲེས་ཐམས་ཅད་མཚུངས་སོ། །དེ་ནས་ཕྲིན་ལས་ཀྱི་འཁོར་ལོའི་སྣང་ཆ། རབ་འབྱམས་རྒྱལ་བའི་གསང་བ་བསམ་གྱིས་མི་ཁྱབ་པའི་མཛོད་འཛིན། ཡོན་ཏན་མི་འཛད་པ་རྒྱ་མཚོའི་འཁོར་ལོའི་མེལ་ཚེ་མཁན། ཡེངས་མེད་དྲན་རིག་ཡིད་ཀྱི་འཁོར་ལོས་སྲུང་ཞིང་སྐྱོབ་པ་དང་། གཡོ་མེད་ཡོངས་གྲུབ་ཆོས་ཉིད་རྟག་པའི་འཁོར་ལོ་རྒྱས་པར་བྱེད་ཅིང་། ཀུན་ཁྱབ་མཐའ་ཡས་རྫུ་འཕྲུལ་གྱི་འཁོར་ལོ་བར་མེད་དུ་བསྐོར་བ་དང་། གཞོམ་མེད་ཆོས་སྐུའི་འཁོར་ལོ་རྡོ་རྗེའི་ཆོས་བདུན་དང་ལྡན་པའི་ངང་ལས་མ་གཡོས་བཞིན་དུ་དྲག་པོ་མངོན་སྤྱོད་ཀྱི་འཁོར་ལོའི་མཚོན་ཆ་འཛིན་པ། རྒྱལ་བ་ཞི་ཁྲོ་རབ་འབྱམས་ཀྱི་ཕྲིན་ལས་གཅིག་ཏུ་བསྡུས་པའི་བདག་ཉིད། སྣང་སྲིད་འཁོར་འདས་གཉིས་ལ་དབང་བསྒྱུར་བའི་འཁོར་ལོ་འཆང་བ་པོ་
སྲིད་གསུམ་འཇིག་བྱེད་བདུད་ནག་པོ་བཀྲག་མེད་ཅེས་ཞིང་སྐྱོང་ཀུན་དགའ་གཞོན་ནུ་ཡང་ཡིན་པར་བཞེད་ལ། སྲོག་བདུད་རྟ་ནག་ཅན་དང་། ཕུར་པའི་ཤྭ་ན་མུ་ཁ་ཏྲཀྴད་རྣམས་ངོ་བོ་གཅིག་པར་གཏེར་ཆེན་རྡོ་རྗེ་འཆང་གིས་གསུངས་སོ། །འདི་སྐབས་གོང་འོག་གི་འཁོར་ལོ་ཞེས་པ་ཐམས་ཅད། ངོ་བོ་ཆོས་ཀྱི་འཁོར་ལོ་མཐོང་བའི་ལམ་དང་། འཕགས་ལམ་ཡན་ལག་བརྒྱད་ལས་མ་འདས་ཀྱང་རྣམ་པ་མངོན་སྤྱོད་དྲག་པོ་ལས་ཀྱི་འཁོར་ལོ་དམ་བཅའ་བཞི་ལྡན་བརྒྱ་བྱིན་གྱི་རྡོ་རྗེ་དང་ཁྱབ་འཇུག་གི་འཁོར་ལོ་བཞིན་དུ་ཕྲིན་ལས་མགོན་པོའི་རྩལ་ཤུགས་ནུས་པ་ལ་སྦྱར་བའོ། །འཁོར་ལོའི་སྒྲ་བཤད་མངོན་པ་མཛོད་ལྟར་ན། འཁོར་ལོ་རིན་ཆེན་མྱུར་དུ་འཁོར་བ་དང་། མ་རྒྱལ་བ་ལས་རྒྱལ་བ་དང་། རྒྱལ་བ་རྣམས་རྣལ་དུ་འགོད་པ་དང་། ས་མཐོ་བ་ལ་འཕར་བ་དང་། དམའ་བ་ལ་འབབས་པ་ལྟར་རོ། །རྩིབས་བརྒྱད་འཕགས་ལམ་ཡན་ལག་བརྒྱད་ལ་
སྦྱར་བ་སོགས་སྤྱིའི་གོ་བྱ་ཡིན་ཀྱང་ཡི་གེ་མང་དུ་དོགས་པས་མ་བྲིས་སོ། །འཁོར་སྡེ་བརྒྱད་མགོན་པོ། ཡེ་ཤེས་ལས་དང་འཇིག་རྟེན་མགོན་པོའི་དམག་ཚོགས། གཙང་རིས་བརྟན་སྐྱོང་དྲེགས་པའི་དམག་དཔུང་། རུ་འདྲེན་སྡེ་བདུན་དང་བཅས་པ་ལ་གཞུང་གསལ་ལྟར་མདོས་འབུལ་བར་བྱའོ། །དེ་ནས་དྲེགས་པའི་རྒྱལ་པོ་ལས་ལ་བསྐུལ་བ། སྤྱན་འདྲེན་སྔགས་མཐར་བསྟན་དགྲ་རུ་དྲ་ཁཱ་ཧི༔ བརྒྱ་རྩ་བཟླ། གདན་ས་བར་ལུགས་སུ་སྔར་དུས་ཏྲཀྴད་རྦད་སྔགས་ཀྱི་ཨཿཡཿམཿདུཿརུཿཙཿཤཿནཿའི་མཐར་བསྟན་དགྲ་རུ་དྲ་ཁཱ་ཧི༔སྦྱར་བ་ཡིན། ཕྱིས་སུ་ཀུན་མཁྱེན་ལུགས་སུ་སྡེ་བརྒྱད་སྔགས་རྐྱང་པ་བཏགས་པ་ཡིན། དེ་ཡང་སྔ་མ་ཏྲཀྴད་ཀྱི་སྔགས་དང་སྦྲེལ་བ་ནི་ཀླད་ནོན་རྒྱལ་པོ་ལྟ་བུའི་སྔགས་ཡིན་པས་རང་ལ་མི་ལྡོག་ཅིང་ལས་འགྲུབ་པ་སོགས་ནུས་པ་ཆེ། ཕྱི་མ་སྡེ་བརྒྱད་རྐྱང་པ་ལ་བཏགས་པ་ནི། སྔགས་པ་ཤིན་ཏུ་ནུས་ལྡན་གྱིས། སྡེ་བརྒྱད་ཁྱི་ལྟར་རྦད་
པ་ཞེས་གོང་བསྙེན་ཆེར་མེད་པ་ལ་རྩུབ་ཆ་ཆེ་ཞིང་བཀའ་གཉན་ནོ། །ལར་བཀའ་སྲུང་ཐམས་ཅད་ཀྱི་རྣོ་སོ་ནི་སྡེ་བརྒྱད་ཁོ་ན་ཡིན་ཏེ། དཔལ་མགོན་པོའི་རྒྱུད་ལས། དམག་འགྱེད་བྲན་ཕོ་བརྟེན་པ་ནི༔ དྲེགས་པ་ལྷ་སྲིན་སྡེ་བརྒྱད་ཡིན༔ སྨྱོ་འབོགས་གཏོང་བ་རྒྱལ་པོའི་སྡེ༔ མཛེ་ཤུ་གཏོང་བ་ས་བདག་ཀླུ༔ ཐོག་སེར་གཏོང་བ་གཟའ་ཡིན་ནོ༔ རིམ་ནད་གཏོང་བ་མ་མོ་སྟེ༔ གཟེར་ཐབས་གཏོང་བ་བཙན་ཡིན་ནོ༔ འཐིབ་ནད་གཏོང་བ་རྨུ་ཡིན་ཏེ༔ ཁྲོམ་ལ་འདེབས་པ་བདུད་ཡིན་ནོ༔ ཕོ་ལྷོག་གཏོང་བ་སྲིན་པོ་སྟེ༔ དྲག་པོར་གཟིར་ཞིང་གནད་ཀྱིས་གཅུན༔ ཅེས་སོ། །འདི་དག་དང་རྦད་སྔགས་དམ་བཞག་རྣམས་ཀྱི་དམིགས་རིམ་གཞུང་གི་ཡིག་ཆུང་དུ་གསལ་བ་དེ་ཉིད་དོ། །སྲིད་གསུམ་གཏིང་ཟློག་ལ་འཇུག་ཚུལ་རིག་གཟིགས་དང་ཕྱག་བཞེས་ལྟར་བྱའོ། །གཏོར་རྒྱག་ཉིན་བསྐང་བ་ཕུལ་ཟིན་ནས་འཁོར་འདས་རབ་འབྱམས་སོགས་ཀྱི་མཐར་ལས་
ཟོར་བསྒུལ་ཞིང་ལས་ཟོར་གྱི་དམག་དཔུང་ལས་ལ་ཆས་པར་བསམ་མོ། །དུ་བརྒྱད་ནི་བདུད་པོ་སྡེ་བརྒྱད། མ་བཞི་ནི་མ་མོ་ཡུམ་བཞི། བྷྱོ་ནི་མ་མོ་མཁའ་འགྲོ་འབུམ་སྡེ། ཡ་ནི་གཤིན་རྗེའི་དམག་ཚོགས། རཀྵ་སྲིན་པོ་དང་གནོད་སྦྱིན། མ་ཧཱ་ཀཱ་ལ་མགོན་ཆེན་སྡེ་ལྔ་སོགས་མགོན་པོ་འབུམ་སྡེ། མགོན་ཆེན་སྡེ་ལྔ་ནི། དཔལ་མགོན་པོའི་རྒྱུད་ལས། སྐུ་ཡི་མགོན་པོས་ཨ་ཀར་རུ་དྲ་བཏུལ༔ གསུང་གི་མགོན་པོས་ཁ་ཊྭཱཾ་རུ་དྲ་བཏུལ༔ ཐུགས་ཀྱི་མགོན་པོས་མ་ཏྲཾ་རུ་དྲ་བཏུལ༔ ཡོན་ཏན་མགོན་པོས་ཕོ་རྒྱུད་རུ་དྲ་བཏུལ༔ ཕྲིན་ལས་མགོན་པོས་མོ་རྒྱུད་རུ་དྲ་བཏུལ༔ ཞེས་སོ། །ཀཾ་ཀ་ནི་ལས་མགོན་བྱ་རོག་གདོང་ཅན་ཏེ། གསང་སྔགས་གསར་མ་ལྟར་ན། མགོན་པོ་ཐམས་ཅད་ཀྱི་རྣོ་མྱུར་འདི་ཡིན་ཏེ་སྲོག་ཟན་ནག་པོའི་རྒྱུད་ལས། དེ་ཡི་བཀའ་སྡོད་ལས་མཁན་ནི༔ སྲོག་བདུད་གཤེད་པོ་བྱ་རོག་གདོང་༔ ཞེས་གསུངས་པ་ལྟར། ཡབ་རྣམ་ཐོས་སྲས། ཡུམ་མཁའ་འགྲོ་མ་བྱ་
རོག་གདོང་གི་སྲས། ཡབ་གནོད་སྦྱིན་ཡིན་པས་དངོས་གྲུབ་ཆེ་ཞིང་ལྷའི་ཆས། ཡུམ་འཇིག་རྟེན་གྱི་ཌཱ་ཀི་ཡིན་པས་ནུས་རྩལ་ཆེ་ཞིང་དུར་བྱའི་གདོང་ཅན་ཏེ་གནོད་སྦྱིན་བྱ་རོག་གདོང་ཅན་དང་། བདུད་པོ་བྱ་རོག་གདོང་ཅན་ནི་ཡབ་གནོད་སྦྱིན་དུག་གི་མཆུ་ཅན་དང་། ཡུམ་ཀླུ་བདུད་ནག་མོ་ཁྲག་གི་རལ་པ་ཅན་ལ། བདུད་པོ་བྱ་རོག་གདོང་ཅན་དང་། དམར་པོ་རྩ་འཇིབ་མ་ལྕམ་དྲལ་འཁྲུངས་པ་ཡིན་ཅིང་། རིགས་བཞིར་ཡང་གསུངས་ཏེ། གསང་བ་སྲོག་གཟེར་སྦས་པའི་རྒྱུད་ལས། ཤར་ན་སྲོག་བདག་བྱ་རོག་གདོང་། ལྷོ་ན་གཤིན་རྗེ་བྱ་རོག་གདོང་། ནུབ་ན་བདུད་པོ་བྱ་རོག་གདོང་། བྱང་ན་གནོད་སྦྱིན་བྱ་རོག་གདོང་། ཞེས་སོ། །བིང་ཛཿནི་རྒྱབ་བརྟེན་གྱི་མགོན་པོ ་བིང་འཛིན་དང་། ཨ་གྷོ་ར་ལྷ་དམག་འབུམ་སྡེ་དང་བཅས་པ་སྟེ་རྒྱུད་ཁྲག་མཚོ་ཁོལ་མ་ལས་བིང་འཛིན་པ་ནི་གདོང་དམར་གྱི་བྲག་ལ་གནས་སོ། །བིང་འཛིན་བར་མ་ཨ་གྷོ་ར་ནི་རྒྱ་ནག་
རི་བོ་རྩེ་ལྔ་ལའོ། །ཞེས་གསུངས་པ་དེའོ། །ནཱ་ག་བཛྲ་རཱ་ཛ་ནི་ཀླུ་རྒྱལ་དུང་སྐྱོང་གི་སྲས་པོ་གཉན་ཆེན་མཁར་ནག་རྡོ་རྗེ་རྒྱལ་པོ་སྟེ་བསྡོང་ཟླ་ཀླུ་བདུད་དྲེགས་པའི་དམག་དཔུང་དང་བཅས་སོ། །མ་ཧཱ་ཀཱ་ལ་ནག་པོ་ཆེན་པོ། ཏྲཀྴད་དྲག་པོ་མིག་གསུམ། ས་མ་ཡ་དམ་ལས་མ་འདའ། ཧཱུྃ་གཉིས་ཐུགས་རྒྱུད་གནད་ནས་བསྐུལ་བ། ཕཊ་གཉིས་དྲག་པོའི་ལས་ལ་ཆས་པ། ཕཊ་ཀྱི་མཐའ་བརྟེན་སྭཱ་ཧཱས་བརྒྱན་པ་ནི་ཞི་དྲག་གཉིས་འདྲེས་སྦྱིན་བདག་དང་འཁོར་ལ་མི་རྩུབ་ཅིང་བཀྲ་ཤིས་པའི་གནད་ལྡན་དྲག་པོའི་མཐའ་ལ་ཞི་བའི་སྔགས་ཀྱིས་བརྟེན་པའོ། །དེ་ནས་ཞལ་ཆེམས་ལས་འགྱེད། ཧཱུྃ་འབོད་དོ་བསྐུལ་ལོས་དམ་ཚིག་གི་གནད་ལ་དབབ་ཅིང་། བསྐུལ་ལོ་རྦད་དོ་རབ་འབྱམས་ཞི་ཁྲོའི་ལྷ༔ སོགས་ཀྱིས་གནད་ནས་ད་བསྐུལ་དུས་བབས་ཀྱི་གཏོར་རྫོངས་དང་བཅས་ཏེ། མདོས་ཆེན་གྱི་རྫས་སུ་ཏྲཀྴད་དང་གྲོ་ལོད་ཀྱི་གཏོར་ཟློག་གཉིས་བཅས་བཏེགས་ཏེ་སེར་ཕྲེང་
བཅས་འབུལ་སར་སླེབ་ནས་འགུག་གཞུགས་རྒྱས་པ་ཚར་གཅིག་བསྡུས་པ་ཚར་གཉིས། མཆན། ལན་གསུམ། རང་བཟོ་མངོན་སྤྱོད་གསེར་སྐྱེམས། དམ་བརྡར་གྱིས་ཕྲིན་ལས་བཅོལ་ཞིང་། དཀོན་མཆོག་ཀུན་འདུས་ངོ་བོ་ཉིད་ཀྱིས་གསེར་སྐྱེམས་མཆོད་པ་ནི། རྡོ་རྗེ་གྲོ་ལོད་ཧེ་རུ་ཀའི་དཀྱིལ་འཁོར་གདོད་ནས་ལྷུན་གྲུབ་ཏུ་བཞུགས་པ་ལ་འབུལ་བ་སྟེ། ཕྱི་ནང་གསང་བའི་དཀོན་མཆོག་རྩ་གསུམ་ཀུན་འདུས་གུ་རུ་རྡོ་རྗེ་གྲོ་ལོད་དང་། དེའི་རྣམ་ཤེས་ཚོགས་བརྒྱད་གནས་སུ་དག་པའི་ཁྲོ་བོ་བརྒྱད། ཡུལ་བརྒྱད་གནས་སུ་དག་པའི་ཁྲོ་མོ་བརྒྱད། འབྱུང་བཞི་གནས་དག་གི་སྒོ་མ་བཞི་སོགས་གཙོ་འཁོར་ཡོངས་རྫོགས་ཡེ་གནས་གཞིའི་དཀྱིལ་འཁོར་ལ་འབུལ་བའོ། །འབྱུང་བ་བཞི་ལས་ནམ་མཁའ་མེད་པ་ཅི་ཞེ་ན། ནམ་མཁའ་ནི་འབྱུང་བ་ཀུན་ལ་ཁྱབ་པས་སོ། །དེ་ནས་རྡོ་རྗེ་སློབ་དཔོན་དགོངས་པ་དེ་བཞིན་ཉིད་ལས་མི་འདའ་བའི་ངང་ལས་རྣམ་པ་ལྷའི་གསལ་
སྣང་གཏུམ་དྲག་དང་ལྡན་པས་བཞེས་འབོད་སྡང་བ་རྣམ་སྲེག་རིག་སྔགས་གྲུབ་རྒྱལ་གྱིས་མཛད་པ་གསལ་ཞིང་དག་པར་བསྒྲགས། དེ་ཚེ་དཔོན་སློབ་ཐམས་ཅད་ཀྱིས་ཡེ་ཤེས་དང་འཇིག་རྟེན་ལས་གྲུབ་པའི་ལྷ་ཚོགས་མངོན་སུམ་དུ་བཞུགས་ནས་ཕྲིན་ལས་མཛད་དོ་སྙམ་པའི་འདུན་པ་རྩེ་གཅིག་པས་རིག་པ་ཧུར་ཕྱུང་ངོ་། །དེ་ནས་ཟོར་འཕེན་པ། ཧཱུྃ་གསུམ་གྱི་དོན་ལ་གནས་བཞིན་པས། ཐུན་ཟོར་ཐོགས་ལ། ཧཱུྃ་སྔོན་འབྱུང་བསྐལ་པའི་དང་པོ་ལ༔ སོགས་ཀྱིས་གཞུང་ལྟར་ཟོར་རྣམས་འཕེན་ཅིང་། དམིགས་རིམ་ནི་ཐུན་ཟོར་གནམ་ལྕགས་ཐོག་སེར་གྱིས་དགྲ་བོའི་ལུས་ངག་ཡིད་གསུམ་ཐལ་བ་རྡུལ་དུ་བརླགས་པར་དམིགས། ས་ཟོར་རི་རབ་འབར་བའི་ཚོགས་ཀྱིས་བསྟན་དགྲའི་ཡུལ་མཁར་སྡེ་དང་བཅས་པ་ས་གཏིབ་འོག་ཏུ་མནན་ནས་ས་རིམ་པ་དགུའི་འོག་ཏུ་ཐིམ་པར་བསམ། ཆུ་ཟོར་བསྐལ་པ་འཇིག་པའི་ཆུས་བཤལ་ཞིང་སྦྱངས་པར་དམིགས། མེ་
ཟོར་བསྐལ་པ་འཇིག་པའི་མེས་བསྲེགས། རླུང་ཟོར་གྱི་ཚེ་མེས་བསྲེགས་པའི་ཐལ་བའང་རྗེས་མེད་དུ་གཏོར་བར་དམིགས། མཁས་གྲུབ་འཇམ་དབྱངས་རྣམ་རྒྱལ་གྱིས་ཟིན་བྲིས་སུ། ཆོས་སྐུ་ཀུན་བཟང་ཡབ་ཡུམ། སངས་རྒྱས་སྤྱན་མ། མ་མཱ་ཀི། གོས་དཀར་མོ། དམ་ཚིག་སྒྲོལ་མ་རྣམས་ལས་སྤྲུལ་པའི་ཐུན་རྫས་དཔག་ཏུ་མེད་པས་དགྲ་བོའི་ལུས་ངག་ཡིད་གསུམ་ཐལ་བར་བརླགས། ཕུང་ཁམས་སྐྱེ་མཆེད་ཐམས་ཅད་ལྷ་མོ་ལྔའི་རང་བཞིན་རང་ཞི་རང་དག་དམིགས་མེད་ཁྱབ་གདལ་ངང་ལ་གནས་པར་བསམ། དེ་བཞིན་ཕྱག་མཚན་ལྔ་ཡང་རྒྱལ་བ་རིགས་ལྔ་ལས་སྤྲུལ་པའི་མཚོན་ཆ་ལྔས་དགྲ་བགེགས་བྱད་མའི་ཕུང་པོ་ལྔ་དང་ཉོན་མོངས་ལྔ་བཅོམ་སྟེ་སྐུ་ལྔ་ཡེ་ཤེས་ལྔའི་རང་བཞིན་རང་ཞི་རང་དག་ཏུ་བསམ་མོ་ཞེས་གསུངས་པ་ལྟར་རོ། །གཏོར་ཟོར་གནམ་ལྕགས་འབར་བའི་ཐོག་རྒོད། སྣང་སྲིད་འཁོར་འདས་བརླག་པའི་མཚོན་ཆ་ཕྱག་ཏུ་
ཐོགས་སྟེ་གསོར་བ་ཙམ་གྱིས་སྲིད་པ་གསུམ་འཇོམས་པར་བྱེད་པ། ཕྱར་བ་ཙམ་གྱིས་སྟོང་གསུམ་གྱི་འཇིག་རྟེན་བརླག་ནུས་པ། ནུས་པའི་དུག་གཟེར་བཏབ་པ་ཙམ་གྱིས་སྲིད་གསུམ་འདུལ་བ། འཕང་པ་ཟོར་གྱི་ལས་ཀྱིས་སྣང་སྲིད་འཁོར་འདས་ཀྱི་གཟུགས་ཅན་གཟུགས་མེད་ཀྱི་དགྲ་བགེགས་རྨིངས་ནས་སྐེམ་པའི་ལས་མཛད་པར་བསམ་མོ། །དེ་ནས་ཧཱུྃ་མ་ཧཱ་ཀཱ་ལ་མཐུ་བོ་ཆེའི་མཐར་རྦད་སྔགས་རོལ་མོ་འབེབས་ཆེན་དང་བཅས་པས་མདོས་ཆེན་དང་ལས་མགོན་གཏོར་ཟློག་རྒྱག །རྡོ་རྗེ་དྲེགས་འཇོམས་ལྷ་ཚོགས་སོགས་ནས་ཐུགས་རྗེའི་གཏུམ་རྔམ་དགྲ་ལ་མཱ་ར་ཡ་ཕཊ༔ བར་གྱི་གཞུང་གི་ཚིག་རིས་ལྟར་དམིགས་འདོན་ཟུང་དུ་ཆུབ་པར་བྱ། ཁྲོ་རྒྱལ་འབར་བ་ཚར་གསུམ་དང་སྔགས་མཐར་རོལ་མོ་འབེབས་ཀྱི་སྐབས་གྲོ་ལོད་བཟློག་གཏོར་མེ་ཐབ་ཏུ་འཕེན་ཅིང་མཱ་ར་ཡའི་རོལ་ཆེན་ལྡིར་ཞིང་འབྱུང་བཞི་རི་རབ་དང་བཅས་པའི་དཀྱིལ་འཁོར་མགོ་
མཇུག་ལྡོག་སྟེ། གནམ་ས་གཉིས་པོ་སྟེང་འོག་འདྲེས་ནས་དམིགས་བྱའི་དགྲ་བགེགས་དམ་སྲི་གང་ཡིན་པ་དེའི་རྗེས་ཤུལ་ཙམ་ཡང་མེད་པར་རྡུལ་དུ་བརླགས་པར་བསམས་ལ་སྟོང་ཉིད་དུ་བཞག་ལ། རིགས་ལྔ་སྟོང་ཉིད་ཀྱི་ཟློག་པས་རྒྱས་གདབ་བོ། །སྒོ་དྲུང་དུ་ཡར་བྱོན་ནས་གཏོར་གཞོང་སྦུབས་ལ། ཧཱུྃ། དཀོན་མཆོག་གསུམ་དང་ཡི་དམ་ལྷ༔ མཁའ་འགྲོ་ཆོས་སྐྱོང་བདེན་པའི་མཐུས༔ བར་ཆད་བྱེད་པའི་དམ་སྲི་རྣམས༔ གཏོར་གཞོང་རི་རབ་འབར་བའི་འོག་ཏུ་ཁུག༔ རུ་དྲ་སརྦ་ཨཾ་ཀུ་ཤ་ཛཿ ཛཿཧཱུྃ་བྃ་ཧོཿ ཞེས་རྩ་གསུམ་བདེན་པས་ལན་གསུམ་བཀུག་ལ། ཧཱུྃ་ཞེས་ཡེ་ཤེས་ཆོས་སྐུ་ཐིག་ལེ་ཉག་གཅིག་གི་ངང་དུ་གནས་བཞིན་པས། ཕྱི་སྣང་བ་སྣོད་ཀྱི་འཇིག་རྟེན་དངོས་པོར་སྣང་བ་ཐམས་ཅད་སེམས་སུ་གཏན་ལ་ཕབ་ནས་སེམས་ཀྱི་སྣང་བ་ཙམ་དུ་ཤེས་ཤིང་རང་དབང་དུ་མ་འདུས་པར་ཨ་འཐས་སུ་ཤོར་ན། འཁྲུལ་པའི་སྣང་བ་སེམས་སུ་འདུས་
པའི་ཐབས་མེད་དེ། བདེན་པར་མ་གྲུབ་པ་ལ་གྲུབ་པར་བཟུང་ནས་ཞེན་ཅིང་འཁྲུལ་པ་དངོས་འཛིན་གྱིས་འཁོར་བར་འཆིང་བས། བྲོ་ཡང་དངོས་པོར་སྣང་བའི་སྟེང་དུ་བརྡུང་ནས་ང་བདག་གཉིས་འཛིན་གྱི་ཞེན་པ་མེད་པར་སེམས་ཉིད་གདོད་མའི་ངང་དུ་འབོལ་ལེ་ཤིགས་སེ་ཞོག་ཨང་། དེ་ཡང་སྣང་སྲིད་འཁོར་འདས་ཀྱི་ཆོས་ཐམས་ཅད་སེམས་ཡིན་ཏེ། ས་བཅུ་པའི་མདོ་ལས། ཀྱེ་རྒྱལ་བའི་སྲས་དག་ཁམས་གསུམ་པོ་འདི་དག་ནི་སེམས་ཙམ་མོ། །ཞེས་གསུངས་པ་ལྟར་རོ། །འོ་ན་ཕྱི་རོལ་དངོས་པོའི་སྣང་བ་རི་བྲག་ས་རྡོ་རྩི་ཤིང་ནགས་ཚལ་འདི་རྣམས་ཇི་ལྟར་ཡིན་ཞེ་ན། སེམས་འཁྲུལ་པའི་བག་ཆགས་བརྟས་པའམ་རྒྱས་ཤིང་གོམ་པས་ཕྱི་རོལ་གྱི་དངོས་པོ་སྲ་མཁྲེགས་སུ་སྣང་བ་སྟེ། དེ་ཡང་བསྐལ་པ་ཆགས་པའི་དུས་སུ་རླུང་ཆུ་ལ་ཞུགས་ནས་དཀྲུགས་པས་ས་རྡོའི་གཟུགས་སུ་གྲུབ་པའོ། །སམྦུ་ཊི་ལས། ཆོས་རྣམས་སེམས་ཀྱི་འཁྲུལ་པ་སྟེ། །སེམས་ལས་མ་
གཏོགས་ཆོས་རྣམས་མེད། །ཅེས་དང་། ས་ར་ཧས། རླུང་གིས་ཆུ་ལ་ཞུགས་ཤིང་དཀྲུགས་པ་ཡིས། །འཇམ་པའི་ཆུ་ཡང་རྡོ་ཡི་གཟུགས་སུ་འགྲོ། །རྟོག་པས་དཀྲུགས་པའི་རྨོངས་པ་གཟུགས་མེད་ལ། །ཤིན་ཏུ་སྲ་ཞིང་མཁྲེགས་པ་ཉིད་དུ་གྱུར། །ཞེས་སོ། །སྣང་བ་སེམས་སུ་ཤེས་པར་བྱས་ནས་འཛིན་མེད་ཀྱི་ངང་དུ་ཉམས་སུ་བླངས་པས་གཉིས་སྣང་གི་འཛིན་པ་དག་ནས། སྣང་སེམས་གཉིས་མེད་ཆོས་ཀྱི་སྐུར་སངས་རྒྱས་པ་ཡིན་ལ། སེམས་ཅན་རྣམས་ནི་དང་པོར་ང་དང་བདག་ཏུ་འཛིན་པས་དངོས་སྣང་ལ་ཞེན་པ་བཞུགས་ནས་འཁྲུལ་སྣང་གི་བག་ཆགས་མེད་པ་ལ་ཡོད་པར་འཛིན། མི་རྟག་པ་ལ་རྟག་པར་འཛིན། མི་བདེན་པ་ལ་བདེན་པར་འཛིན་པས་འཁོར་བའོ། །རྗེ་བཙུན་བཞད་པ་རྡོ་རྗེས། སྣང་བ་སེམས་སུ་མ་ཤེས་ན། །དངོས་པོར་དགག་པས་ག་ལ་ལོངས། །ཞེས་སོ། །སྣང་བ་ལ་འཁྲུལ་སྣང་ལས་སྣང་དག་སྣང་གསུམ་མོ། །དང་པོ་
འཁྲུལ་སྣང་ལ་རྟོག་བཅས་སུ་འཁྲུལ་པ་དང་རྟོག་མེད་དུ་འཁྲུལ་པ་གཉིས། དང་པོ་ནི། དུང་ལ་སེར་པོར་སྣང་བ། ཐོ་ཡོར་མིར་སྣང་བ། ཐག་ཁྲ་སྦྲུལ་དུ་འཁྲུལ་པའོ། །གཉིས་པ་ནི། ང་མེད་པ་ལ་ང་རུ་བཟུང་བ་སོགས་ཕྱིན་ཅི་ལོག་གི་བློའོ། །ལས་སྣང་ནི། དམྱལ་བ་ཡི་དྭགས་དུད་འགྲོ་ལ་སོགས་རིགས་དྲུག་གི་དངོས་སྣང་ངོ་། །དག་སྣང་ལའང་ཉམས་དང་དག་པ་དངོས་གཉིས། རྣལ་འབྱོར་པ་ལ་ཉམས་སྣང་། ས་ཐོབ་པ་ལ་དག་པའི་སྣང་བའོ། །དེ་ཡང་ངན་རྫོང་སྟོན་པས། ངན་སོང་གསུམ་གྱི་སྡུག་བསྔལ་རྣམས། །དེ་ཡང་སེམས་ཀྱི་ཆོ་འཕྲུལ་ཡིན། །མཐོ་རིས་གསུམ་གྱི་བདེ་བ་རྣམས། །དེ་ཡང་སེམས་ཀྱི་ཆོ་འཕྲུལ་ཡིན། །ཅེས་དང་། ཆོས་སྐུ་ལོངས་སྐུ་སྤྲུལ་སྐུ་གསུམ། །སེམས་བདེ་གསལ་མི་རྟོག་འབྲས་བུ་སྟེ། །དེ་ཡང་སེམས་ཀྱི་ཆོ་འཕྲུལ་ཡིན། །ཅེས་སོ། །ཧཱུྃ་དགུ་ནི་ཐེག་པ་རིམ་པ་དགུ་དང་། ཡེ་ཤེས་ཐིག་ལེ་དགུའི་ངོ་བོའོ། །གཏོར་གཞོང་རྣམས་ཁ་
གྱེན་དུ་བསྟན་ལ་འབྲུ་འཐོར་ཞིང་སྨོན་ལམ་བྱ། མཁའ་ཁྱབ་ཞིང་གི་རྩ་གསུམ་རྒྱལ་བ་རབ་འབྱམས་ལ་དགོངས་གསོལ་ལན་གསུམ། དང་པོ་སྙན་གསན་ཕབས། བར་དུ་བརྩེ་བས་དགོངས། ཐ་མ་ཞལ་གྱིས་བཞེས་ཏེ། ཧཱུྃ་གསུམ་གཞི་ལུས་ངག་ཡིད་གསུམ། ལམ་རྩ་ཐིག་རླུང་གསུམ། འབྲས་བུ་སྐུ་གསུམ་དག་པའི་ངང་ནས། སྣང་སྲིད་འཁོར་འདས་དཀྱིལ་འཁོར་འདིར༔ སོགས་ནི་བར་ཆད་བདུད་བཞིའི་གཡུལ་ལས་རྣམ་པར་རྒྱལ་བ་ལ་དགའ་བ་བསྒོམ་ཞིང་ཕྱོགས་བཅུའི་ཞིང་ཁམས་རྒྱ་མཚོ་ནས། རྩ་གསུམ་དམ་ཅན་རྒྱ་མཚོའི་ཚོགས་ཀྱང་དགོངས་གཅིག་དང་དབྱངས་གཅིག་གིས། སངས་རྒྱས་ཆོས་ཀྱི་ཆབ་སྲིད་རྒྱ་ཆེ་ཞིང་གཏིང་ཟབ་པ་རྒྱ་མཚོ་ལྟ་བུ། ཐོགས་མེད་ཀུན་ལ་ཁྱབ་པ་ནམ་མཁའ་ལྟ་བུ། ནམ་ཡང་འཕོ་འགྱུར་མེད་པར་རབ་ཏུ་བརྟན་པ། འགྱུར་མེད་ཡོངས་གྲུབ་རྡོ་རྗེའི་ཆོས་བདུན་གྱིས་བཀྲ་ཤིས་དཔལ་འབར་རྒྱན་གྱི་འཁོར་ལོར་
མངའ་གསོལ་ཞིང་དབང་འབྱོར་བར་བསམ་མོ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།