དབང་རྣམས་ཀྱི་མཐའ་རྟེན་དངོས་གྲུབ་བླངས་པའི་ཆོ་ག
དབང་རྣམས་ཀྱི་མཐའ་རྟེན། དངོས་གྲུབ་བླངས་པའི་ཆོ་ག་བཞུགས་སོ། །གཉིས་པ་དངོས་གྲུབ་ལེན་པ་ལ་གཉིས་ཏེ། འཆི་མེད་ཚེའི་དངོས་གྲུབ་ལེན་པ་དང་། དམ་རྫས་ལ་རྟེན་ནས་སྐུ་གསུང་ཐུགས་ཀྱི་དངོས་གྲུབ་ལེན་པའོ། །དང་པོ་ལ་གཉིས་ཏེ། དཀྱིལ་འཁོར་ལས་ཀྱི་རིམ་པ་དང་། །འཇུག་ཅིང་དབང་གི་རིམ་པའོ། །དང་པོ་ནི། ཚད་དང་ལྡན་པའི་ས་སྟེགས་ལ། བའི་རྣམ་ལྔས་བྱུག་ཅིང་། ཐིག་སྐུད་རབ་གནས་དང་ལྡན་པས། ཆ་ཆེན་བཅུ་དྲུག་གདབ། ཆ་ཕྲན་ནི། དང་པོ་ཕྱེད་གདབ་ཕྱི་མ་གདབ། །གཉིས་པ་ཆ་བཞི་མཉམ་དུ་གདབ། །གསུམ་པ་བཞི་པ་ཕྱི་མ་གདབ། །ལྔ་པ་དབུས་དོར་མཐའ་གཉིས་གདབ། དྲུག་པ་ཕྱེད་གདབ་ཕྱི་མ་གདབ། །བདུན་པ་ཆ་བཞི་མཉམ་དུ་གདབ། །བརྒྱད་པ་དབུས་དོར་མཐའ་གཉིས་གདབ། །ཆ་ཆེན་གཅིག་ནས་ལྟེ་བ་སྐོར། །ཆ་ཆེན་གཉིས་ནས་རྩིབས་བཞི་བསྐོར། །ཆ་ཆེན་གསུམ་ནས་རྩིབ་བཞི་བསྐོར། །ཆ་ཆེན་བཞི་ནས་རྩིབས་བཅུ་བསྐོར། །ཆ་ཆེན་བདུན་དུ་གླང་གུར་དང་རྡོ་ར་བསྐོར། ཆ་ཆེན་བརྒྱད་ཀྱི་ཕྱིར་རོལ་པདྨ་དང་། རྡོ་ར་དང་། མེ་རི་རྣམས་བསྐོར། དབུས་ལྟེ་བ་ཟླུམ་པོ། དེ་རྒྱབ་འཁོར་ལོ་རྩིབས་བཞི། དེའི་རྒྱབ་ཏུ་ཡང་འཁོར་ལོ་རྩིབས་བཞི། དེ་རྒྱབ་ཏུ་འཁོར་ལོ་རྩིབས་བཅུ་གྲུ་ཆད་སྒོ་ལ་སོགས་དལ་སྤྱི་དང་མཐུན་པར་བྲིའོ། །དེ་ནས་ཚོན་རྩི་རབ་གནས་དང་ལྡན་བས། དབུས་ལྟེ་བ་དམར་པོ། རྩིབས་བཞི་སེར་པོ། རྩིབས་མཆན་སྔོན་པོ། ཡང་རྩིབས་བཞི་སེར་པོ། རྩིབས་མཆན་དམར་པོ། རྩིབས་བཅུ་དཀར་པོ། རྩིབས་མཆན་ལྗང་ཁུ། གྲུ་ཆད་ཕྱོགས་མདོག །སྒོ་ལ་སོགས་དཀྱིལ་འཁོར་སྤྱི་དང་མཐུན་པར་མཛེས་ཤིང་། ཡིད་དུ་འོང་བར་བྱའོ། །དེ་ནས་ལྷ་གྲངས་དང་མཉམ་པའི་ཚོམ་བུ་དང་། ཙ ཀ་ལི་རྣམས་ལྷ་རང་གནས་སུ་དགོད། རྣམ་རྒྱལ་བུམ་པ་དང་། ལས་བུམ་རྣམས་གང་བདེར་བགོད། ཚེ་ནས་དང་། ཚེ་ཟན་དང་། ཚེ་འབྲང་དང་། ཚེ་ཆང་རྣམས་གང་བདེར་བཤམས། བྱང་ཤར་དུ་མཚམས་འཛིན་གྱི་མེ་ཏོག །ཤར་དུ་མཆོད་ཡོན། ཤར་ལྷོར་ཞབས་བསིལ། ལྷོར་མེ་ཏོག །ལྷོ་ནུབ་ཏུ་བདུག་སྤོས། ནུབ་ཏུ་སྣང་གསལ། ནུབ་བྱང་དུ་དྲི་མཆོག །བྱང་དུ་ཞལ་ཟས་རྣམས་བཤམས། དེ་ནས་ཤར་ལྷོར་བླ་མའི་གཏོར་མ། ཤར་དུ་ཡི་དམ་ཚེ་དཔག་མེད་ཀྱི་གཏོར་མ། དེའི་ཞབས་སུ་སྨན། རཀྟ། རྒྱུན་གཏོར་རྣམས་བཤམས། བྱང་ཤར་དུ་མཁའ་འགྲོ་མའི་གཏོར་མ། བྱང་དུ་ཆོས་སྐྱོང་མ་མོ་ནུབ་ བྱང་དུ་མགོན་པོ 
། ནུབ་དུ་རྣམ་སྲས། ལྷོ་ནུབ་དུ་འགར་བ། ལྷོར་ཚོགས་གཏོར་རྣམས་བཤམས། གཏོར་མ་རྣམས་ལ་ཆབ་དང་། ཆང་གིས་བྲན། དེ་ནས་དཔོན་སློབ་རྣམས་གདན་ལ་བཞུགས་ལ་རབ་གནས་ཀྱི་དོད་དུ། བདག་བསྐྱེད། བུམ་བསྐྱེད། མདུན་བསྐྱེད་གསུམ་གྱི་དང་པོ་ནི། མདུན་གྱི་ནམ་མཁར་དཀོན་མཆོག་དྲུག་པོ་སྒོམ་ལ། བདག་དང་འགྲོ་བ་ནམ་མཁའ་དང་མཉམ་པའི་སེམས་ཐམས་ཅད། དུས་འདི་ནས་བཟུང་སྟེ་བྱང་ཆུབ་མ་ཐོབ་ཀྱི་བར་དུ། བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ༴ ཆོས་ལ་སྐྱབས༴ དགེ་འདུན་ལ༴ ཡི་དམ་གྱི་ལྷ་ཚོགས་རྣམས་ལ་སྐྱབས་སུ༴ མཁའ་འགྲོ་དང་ཆོས་སྐྱོང་རྣམས་ལ་སྐྱབས་སུ་མཆིའོ། །ལན་བདུན་ལ་སོགས་བརྗོད། དེ་ནི་སྐྱབས་འགྲོའོ། །སེམས་བསྐྱེད་ནི། སེམས་ཅན་ཐམས་ཅད་ཀྱི་དོན་དུ་བདག་སངས་རྒྱས་ཐོབ་པར་བྱ། དེའི་ཆེད་དུ་མགོན་པོ་ཚེ་དཔག་ཏུ་མེད་པའི་བསྒོམ་བཟླས་ཀྱི་རིམ་པ་ལ་འཇུག །སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ལ་གནས་པར་གྱུར་ཅིག །ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ལ་གནས་པར་གྱུར་ཅིག །དེ་ནས་རྟེན་གཞལ་ཡས་ཁང་བསྐྱེད་པ་ནི། ༀ་སྭ་བྷ་ཝ་ཤུད་དྷ་སརྦ་དྷརྨ་སྭ་བྷ་ཝ་ཤུ་དྷོ་ཧཾ། སྟོང་པའི་ངང་ལས་བྷཱུཾ་ལས། རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་། ཕྱི་བུམ་པའི་དབྱིབས་ཅན། ནང་པདྨ་ར་ག་ལས་གྲུབ་པ་གྲུ་བཞི། སྒོ་བཞི། སྒོ་ཁྱུད་རྟ་བབ། གདུགས། རི་དྭགས། ཆོས་འཁོར། དྲ་བ་དང་དྲ་ཕྱེད། དྲིལ་བུ་དང་དྲིལ་བུ་ཆེན་པོའི་སྒྲ་འཁྲོལ་བ། དར་དཔྱངས། བླ་བྲེས། ལྡ་ལྡི་དང་། ཁྲི་ཡུལ། རཏྣའི་ཤིང་ལྗོན་པ་ལ། གཟུགས་སྒྲ་དྲི་རོ། རེག་བྱ་དང་ལྡན་པ། ཞིང་ཁམས་རྣམ་པར་དག་པའི་དབུས་སུ། གསེར་ལས་གྲུབ་པའི་འཁོར་ལོ་རྩིབས་བཞི་ཉིས་རིམ། དེའི་རྒྱབ་ཙཀྲ་རྩིབས་བཅུ་དཀར་པོ། དབུས་ཀྱི་ལྟེ་བར་རིན་ཆེན་ཁྲི་རྨ་བྱ་བརྒྱད་ཀྱི་ཉེ་བར་བཏེག་པ། དར་ལྗང་ཁུའི་ཁྲི་ཁེབས་དེའི་སྟེང་དུ་པདྨ་ཉི་མ་ཟླ་བའི་གདན། རྩིབས་ཕྱི་ནང་བརྒྱད་ལ་ཟླ་བའི་གདན། རྩིབ་བཅུ་ལ་ཉི་མ་བཅུ། སྒོ་བཞི་ལ་ཟླ་བའི་གདན་ནོ། དེ་ནས་བརྟེན་པ་ལྷ་བསྐྱེད་པ་ནི། དབུས་ཀྱི་གདན་གྱི་སྟེང་དུ། རང་གི་སེམས་ཀྱི་ངོ་བོ་ཧཱུཾ་དམར་སེར། འོད་ཟེར་ཁ་དོག་ལྔ་འཕྲོས་པ། །དེ་ལས་འོད་ཟེར་འཕྲོས་འཕགས་པ་མཆོད། སེམས་ཅན་དོན་གྱི་བྱས། བྱིན་རླབས་དངོས་གྲུབ་ནུས་མཐུ་ཐམས་ཅད་ཚུར་འདུས་ཧཱུཾ་ལ་ཐིམ། དེ་འོད་དུ་ཞུ། ཡོངས་སུ་གྱུར་པ་ལས། སྔགས་གསུམ་བརྗོད་པས། བདག་ཉིད་ཚེ་དཔག་ཏུ་མེད་པ། །སྐུ་མདོག་དམར་སེར་ཞལ་གཅིག་ཕྱག་གཉིས། །སྤྱན་གསུམ་ཁྲོ་འཛུམ་དུ་འདུག་པ། །ཕྱག་གཡས་སྐྱབས་སྦྱིན་གྱི་ཕྱག་རྒྱ་ཐུགས་ཀར་མཛད་པ། གཡོན་པ་མཉམ་བཞག་གི་སྟེང་དུ། གསེར་ལས་གྲུབ་པའི་བུམ་པ། འཆི་མེད་བདུད་རྩི་བཀང་ནས་འཛིན་པ། དར་དམར་པོའི་མགུལ་ཆིངས་དང་། དཔག་བསམ་ཤིང་ལྗང་ཁུའི་ཁ་བརྒྱན་ཅན། །ཞབས་རྡོ་རྗེ་སྐྱིལ་དཀྲུངས་གིས་བཞུགས་པ། དར་སེར་པོའི་སྟོད་གཡོགས་ཁ་དོག་ལྔའི་སྨད་དཀྲིས། རིན་པོ་ཆེའི་དབུ་བརྒྱན་དང་། རྣ་བརྒྱན། མགུལ་བརྒྱན། དཔུང་བརྒྱན། དོ་ཤལ། སོར་གདུབ། ཞབས་གདུབ། དར་གྱི་ཕུར་ལྕེ་དང་། སྐུ་ལ་མཚན་བཟང་པོ་སུམ་བཅུ་རྩ་གཉིས་དང་། །དཔེ་བྱད་བཟང་པོ་བརྒྱད་བཅུ་དང་ལྡན་པ། །འོད་ཟེར་སྟོང་ཕྲག་དུ་མ་དང་ལྡན་པ། །དེའི་པང་དུ། ཡུམ་སངས་རྒྱས་སྤྱན་མ་སྐུ་མདོག་དཀར་མོ། །ཕྱག་གཡས་པ་ཚེ་འཛིན་པའི་ལྕགས་ཀྱུ་བསྣམས་ནས་ཡབ་ལ་འཁྱུད་པ། གཡོན་པས་ཚེའི་བུམ་པ་བསྣམ་པ། དེ་ནི་སྐུ་མཆོག་ཉིད་ཀྱི་ཕྱག་རྒྱའོ། །དེ་ནས་ཡབ་ཀྱི་ཐུགས་ཀར་རྡོ་རྗེ་རྒྱ་གྲམ་གྱི་གུར་ཁང་། དེའི་ནང་དུ་ཉི་ཟླ་གའུ་ཁ་སྦྱོར་གྱི་གུར་ཁང་། དེ་གཉིས་ནི་ཐབས་ཤེས་ཀྱི་ཕྱག་རྒྱའོ། །དེའི་ནང་དུ་འཁོར་ལོ་དཀར་པོ་ༀ་གྱིས་འ ཁྲིགས་པའི་གུར། དེའི་ནང་དུ་པདྨ་དམར་པོ་ཨས་འཁྲིགས་པའི་གུར། དེའི་ནང་དུ་རྡོ་རྗེ་སྔོན་པོ་ཧཱུཾ་གིས་འ ཁྲིགས་པའི་གུར་ཁང་། དེ་ནི་སྐུ་གསུང་ཐུགས་ཀྱི་ཕྱག་རྒྱའོ། །དེའི་ནང་དུ་འོད་ཟེར་དཀར་པོ་ༀ་གྱིས་འཁྲིགས་པ། སྔོན་པོ་ཧཱུཾ། སེར་པོ་སྭོ། དམར་པོ་ཨཾ་འོད་ཟེར་ལྗང་ཁུས་ཧས་འཁྲིགས་པའི་གུར་ཁང་། དེ་ནི་ཡེ་ཤེས་ལྔའི་ཕྱག་རྒྱའོ། །དེའི་ནང་དུ་གསེར་ལས་གྲུབ་པའི་ཙཀྲ་རྩིབས་བརྒྱད་པ་མགོ་མའི་རིའུ་མིག་བརྒྱད་ལ་གསེར་གྱི་ཟོར་བ་སོ་ཕྱིར་བསྟན་པ། ཡུ་བ་ལ་ཡི་གེ་ཏྲཾ་གྱིས་མཚན་པ། བརྒྱད་ལངས་བར་བསམ། དེ་ནི་གསེར་གྱི་ཟོར་པའི་ཕྱག་རྒྱའོ། །དེའི་ནང་པད་ཉིའི་གདན་ལ། ཧྲིཿདམར་པོ་ཟུང་གཅིག་འོད་དུ་ཞུ། །ཡོངས་སུ་གྱུར་པ་ལས། །དཔལ་རྟ་མགྲིན་སྐུ་མདོག་དམར་སེར། །ཞལ་གཅིག་ཕྱག་གཉིས། སྤྱན་གསུམ་པ། ཕྱག་གཡས་ཚེ་འཛིན་པའི་ལྕགས་ཀྱུ་བསྣམས་པ། །གཡོན་པས་ཚེའི་བུམ་པ་བསྣམས་པ། །ཞབས་གཉིས་རྐྱང་བརྐུམ་གྱིས་འགྱིང་བཞིན་བཞུགས་པ་རྟ་མགོ་ལྗང་ཁུ་རྔོག་མ་ལེབ་རྒན་ནམ་མཁའི་དབྱིངས་སུ་འཚེར་བ། །དེའི་པང་དུ་ཡུམ་རྡོ་རྗེ་ཕག་མོ་སྐུ་མདོག་དམར་མོ། །ཕྱག་གཡས་ཚེ་འཛིན་པའི་ལྕགས་ཀྱུ་བསྣམས་ནས་ཡབ་ལ་འཁྱུད་པ། །གཡོན་པ་ཚེའི་བུམ་པ་བསྣམས་པ་ཡབ་ཡུམ་གཉིས་ཀ་དཔལ་ཆས་དང་། དུར་ཁྲོད་ཀྱིཆས་ཀྱིས་བརྒྱན་པ། འཚམས་རྔམ་གཟི་བྱིན་དང་བཅས་ནས་བསྐལ་པའི་མེ་དཔུང་གི་ནང་དུ་བཞུགས་པ། དེ་ནི་རྟ་མཆོག་དབང་གི་ཕྱག་རྒྱའོ། །ཡབ་རྟ་མགྲིན་གྱི་ཐུགས་ཀར། བདག་གི་བཀྲག་མདངས་ཀྱི་ངོ་བོ་འོད་ཕུང་དཀར་པོ་ཚོན་གང་ཙམ་གཅིག་མར་མེ་རླུང་གི་མ་སྐྱོད་པ་ལྟ་བུ་གཅིག་བསམ། དེའི་ནང་དུ་རྣམ་ཤེས་ཀྱི་ངོ་བོ་ཧཱུཾ་དམར་སེར་འབུར་དུ་ལངས་པ་གཅིག་བསམ། དེའི་ཞབས་ཀྱུ་ནང་དུ། ཚེའི་ངོ་བོ་ཨ་དཀར་པོ་གཅིག་བསམ། དེའི་དཔུང་བ་གཡས་ཀྱི་ནང་དུ། སྲོག་གི་ས་བོན་ཎྲྀ་དཀར་ལྗང་རེ་ཀྲངས་ཀྱིས་བསམ། དཔུང་པ་གཡོན་དུ་མིང་ཡིག་དང་པོ་ཀྲངས་ཀྱི་བསམ། བར་དུ་བླའི་ངོ་བོ་སྤུ་དམར་སེར་ཀྲངས་ཀྱིས་བསམ། དེ་རྣམས་ཀྱི་སྟེང་དུ་ༀ་དཀར་པོ། མདུན་དུ་ཧཱུཾ་སྔོན་པོ། གཡས་སུ་ཏྲཾ་སེར་པོ། རྒྱབ་ཏུ་ཧྲི་ཿདམར་པོ། གཡོན་དུ་ཧཱ་ལྗང་ཁུ། དེ་རྣམས་ཀྱི་རྒྱབ་དུ་ༀ་ཨ་ཡུ་བྷི་རུ་ཛྙ་ན་བཛྲ་ས་མ་ཡ་ཧཱུཾ། ཚེ་བྷྲུཾ་ཎི་ཛཿ ༀ་པུཎྱེ་པུཎྱེ་མ་ཧཱ་པུཎྱེ། །ཨ་པ་ར་མི་ཏ་ཨ་ཡུཿཔུཎྱེ་ཛྙ་ན་རོ་པ་ཙིཏྟ་སྭཱ་ཧཱ། ༀ་ཚེ་པུཎྱེ་མཧཱ་པུཎྱེ། ཨ་ཡུ་པུཎྱེ་། བྷྲུཾ་ཀ་བ་ཙ་རཀྴ་རཀྵ་ཧཱུཾ། །ཅེས་པས་ཉི་ཤུས་འཁོར་ལོ། །དེ་ནི་ཆོས་ཀྱི་དབྱིངས་ཀྱི་ཕྱག་རྒྱའོ། གཙོ་བོ་ཚེ་དཔག་མེད་ཡབ་ཡུམ་གྱི་ཕྱི་རོལ་དུ་པད་ཉིའི་གདན་ལ་རྟ་མགྲིན་གོང་དུ་བསྒོམ་པ་ལྟ་བུ་གཤོག་རྩེ་བསྣོལ་བའི་གུར་ཁང་གཅིག་སྒོམ་པ་ནི་གཙོ་བོ་ཡུམ་བསྐྱེད་པའོ། །དེའི་རྒྱབ་རྩིབས་ནང་མ་བཞི་ལ། །ཧཱུཾ་དཀར་སེར་དམར་ལྗང་བཞི་ལས་འོད་ཟེར་འཕྲོས། །འཕགས་པ་མཆོད། སེམས་ཅད་གྱིས་དོན་བྱས། །ཚུར་འདུས་ཡོངས་སུ་གྱུར་པ་ལས། །ཤར་དུ་ཚེའི་ལྷ་མོ་དཀར་མོ། །ཕྱག་གཡས་པས་ཚེ་འཛིན་པའི་ལྕགས་ཀྱུ། །གཡོན་ཤེལ་གྱི་ཚེ་བུམ་བསྣམས་པ། ལྷོར་ཚེའི་ལྷ་མོར་སེར་མོ། གཡས་ཚེ་འཛིན་པའི་ལྕགས་ཀྱུ། །གཡོན་པས་བཻ་ཌཱུརྱའི་ཚེ་ཡི་བུམ་པ་བསྣམས་པ། །ནུབ་དུ་ཚེའི་ལྷ་མོར་དམར་མོ། །གཡས་པ་ཚེ་འཛིན་པའི་ལྕགས་ཀྱུ། གཡོན་པས་བྱི་རུའི་ཚེ་ཡི་བུམ་པ་བསྣམས་པ། བྱང་དུ་ཚེའི་ལྷ་མོ་ལྗང་ཁུ། །གཡས་པས་ཚེ་འཛིན་པའི་ལྕགས་ཀྱུ། །གཡོན་པས་ཨིནྟྲ་ནི་ལའི་ཚེ་བུམ་བསྣམ་པའོ། །རྩིབས་ཕྱི་མ་བཞི་ལ། ཛ་དཀར་པོ། ཧཱུཾ་སེར་པོ། བཾ་དམར་པོ། ཧོ་ལྗང་ཁུ་བཞི་ལ་འོད་འཕྲོས་འདུས་ཡོངས་སུ་གྱུར་བ་ལས། ཤར་དུ་དབྱིངས་ཀྱི་ལྷ་མོ་དཀར་མོ། །གཡས་པས་ཚེ་འཛིན་པའི་ལྕགས་ཀྱུ། །ལྷོར་དབྱིངས་ཀྱི་ལྷ་མོ་སེར་མོ། །གཡས་པས་ཚེ་འཛིན་པའི་ཞགས་པ། །ནུབ་དུ་དབྱིངས་ཀྱི་ལྷ་མོ་དམར་མོ། །གཡས་པས་ཚེ་འཛིན་པའི་ལྕགས་སྒྲོགས། །བྱང་དུ་དབྱིངས་ཀྱི་ལྷ་མོ་ལྗང་ཁུ། །གཡས་པས་ཚེ་འཛིན་པའི་དྲིལ་བུ་བསྣམས་པ། །གཡོན་པ་བཞི་ན་ཚེའི་བུམ་བ་བསྣམས་པའོ། །དེའི་རྒྱབ་རྩིབས་བཅུ་ལ། །ཧཱུཾ་དཀར་པོ་བཅུ་ལས་འོད་ཟེར་འཕྲོ་འདུས་ཡོངས་སུ་གྱུར་པ་ལས། །ཁྲོ་བོ་དཀར་པོ་བཅུ། །ཕྱག་གཡས་པ་བཅུ་ན་ཚེ་འཛིན་པའི་ལྕགས་ཀྱུ། །གཡོན་པ་བཅུ་ན། །ཚེའི་བུམ་བསྣམས་པ། སྤྱན་གསུམ་སྟག་ཤམ་སྤྲུལ་བརྒྱན་དང་། །རིན་པོ་ཆེ་རྒྱན་གྱིས་བརྒྱན་པའོ། །དེའི་རྒྱབ་སྒོ་བཞིར། ཛ་དཀར་པོ་། ཧཱུཾ་སེར་བོ། བཾ་དམར་པོ། ཧོ་ལྗང་ཁུ་བཞི་ལས་འོད་ཟེར་འཕྲོ་འདུས་ཡོངས་སུ་གྱུར་པ་ལས། ཤར་སྒོར་སྟག་གདོང་མ་དཀར་མོ། །གཡས་པས་ཚེ་འཛིན་བའི་ལྕགས་ཀྱུ། །ལྷོ་སྒོར་ཕག་གདོང་མ་སེར་མོ། །གཡས་པས་ཚེ་འཛིན་པའི་ཞགས་པ། །ནུབ་སྒོར་ཁ་གདོང་མ་དམར་མོ་ཉི་ཟླའི་སྤྱན་ཅན། །གཡས་པ་ལྕགས་སྒྲོགས། །བྱང་སྒོར་འུག་གདོང་མ་ལྗང་ཁུ། །གཡས་པས་དྲིལ་བུ། །གཡོན་བ་བཞི་ན་བུམ་པ་བསྣམས་པའོ། །ལྷ་མོ་བཅུ་གཉིས་པོ་དེ་དག་རྣམས་ནི། །སྤྱན་གསུམ་ཁྲོ་འཛུམ་དུ་འདུག་པ། །ཞབས་གཉིས་རྐྱང་སྐུམ་གར་ཐབས། །རུས་བརྒྱན་དང་། རཏ་ནའི་ཕྲེང་བ། དར་དཔྱངས་དང་ལྡན་པའོ། །གཞལ་ཡས་ཁང་དེའི་རྒྱབ་ཕྱི་བུམ་པའི་ནང་དུ། །ཉི་མའི་གདན་ལ། ཧཱུཾ་ནག་པོ་བཅུའི་འཕྲོ་འདུ་ལས། །ཁྲོ་བོ་ནག་པོ་བཅུ་། །གཡས་པ་བཅུས་ཐོ་བ། །གཡོན་པ་བཅུས་ལྕགས་ཀྱུ་བསྣམས་པ། །སྤྱན་གསུམ་འཇིགས་པའི་འཚམས་རྔམ་མེ་རི་དང་བཅས་པ། །ཞལ་ཕྱིར་གྱུར་ནས་ཚེའི་བར་ཆད་ཀྱི་བགེགས་བསྐྲད་པས་བསྒོམ་མོ། །དེ་རྣམས་ནི་འཁོར་ལོ་བསྐྱེད་པའོ། །དེ་ནས་དངོས་གྲུབ་ཀྱི་བཅུད་བསྡུ་བ་ནི། །རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས། །རྟ་མགྲིན་གྱི་མགྲིན་པ་ནས། །ཤངས་ཁུང་ནས་ཚེ་དཔག་མེད་ཀྱི་མགྲིན་པ་ནས་ཤངས་ཁུང་ནས་འཕྲོས། ཕྱི་སྣོད་ཀྱི་འཇིག་རྟེན་ལ་ཕོག །ས་ཞོམ་པ་ཡང་སྤང་སྔོ་ཀད་ཀྱི་གྱུར། རྩྭ་སྐམ་ཡང་མེ་ཏོག་བཀྲ་ཀད་ཀྱི་གྱུར། ཤིང་སྐམ་པོ་ཡང་ལོ་འདབ་སྔོ་དཔར་གྱིས་གྱུར། ཆུ་སྐམ་པོ་ཡང་དཀར་ནར་གྱིས་གྱུར། །གཞན་ཡང་ས་རྡོ་རྗེ། རྩི་ཤིང་ནགས་ཚལ་ཐམས་ཅད་འོད་ཟེར་ཚ་ལེར་གྱུར་པར་བསམ། །འོད་ཟེར་སྔ་མ་དེས་སྦྲང་མས་སྦྲང་རྩི་བསྡུད་པ་ལྟར། །ཤིང་དང་ས་ཆུ་མེ་རླུང་གི་སྣོད་འབྱུང་བ་ཆེན་པོའི་བཅུད་བཀྲག་མདངས་རྣམས་འུབ་ཀྱི་བསྡུས་ནས། རང་ཚེ་དཔག་མེད་ཀྱི་ཤངས་ཁུང་ནས་རིམ་བཞི་སྔར་ཡར་རྒྱུད་པ་ལྟར་བརྒྱུད་ནས་ཐུགས་ཀའི་ཧཱུཾ་ཨ་ཎྲྀ་ལ་སོགས་ཐིམ་པས་ཚེ་བསོད་ནམས་ཐམས་ཅད་བཀྲག་གཟི་མདངས་ལ་སོགས་པ་རྒྱས་ཤིང་། ཚེའི་དངོས་གྲུབ་ཐོབ་བར་བསམ་ལ། །ༀ་ཨ་ཡུ་བྷི་རུ་ཛ་ན་བཛྲ་ས་མ་ཡ་ཧཱུཾ། ཚེ་བྷྲུཾ་ཎྲིི་ཛ་བགྲང་ངོ་། །ཡང་ཐུགས་ཀའི་ཧཱུཾ་ལས་འོད་ཟེར་སྔ་མ་བཞིན་སྤྲོས། །ནང་བཅུད་ཀྱི་སེམས་ཅན་ཐམས་ཅད་ལ་ཕོག་པས། །སེམས་ཅན་ཐམས་ཅད་ཚེ་ཉམས་པ་ཐམས་ཅད་སོར་ཆུད། རལ་བ་གྲུབ། འཁྱམས་པ་བཀུག་ནས། མི་དང་མི་མ་ཡིན་པ། ལྷ་ཀླུ་སྡེ་བརྒྱད་ལ་སོགས་པ། ཚེ་བཀྲག་མདངས་དང་ལྡན་པར་བསམ། །དེ་ནས་འོད་ཟེར་སྔ་མ་དེས། །མི་དང་མི་མ་ཡིན། ལྷ་ཀླུ་སྡེ་བརྒྱད་ཁྱད་པར་དུ་ཡང་བྱད་མ་ལྷ་དང་བཅས་པའི་ཚེ་དང་བསོད་ནམས་དཔལ་དང་འབྱོར་པ་བཀྲག་མདངས་ཐམས་ཅད་བཀུག་ནས། རང་གི་ཤངས་ཁུངས་ནས་ཡར་བརྒྱུད་པ་བཞིན་བཀུག་ནས། ཐུགས་ཁའི་འོད་ཕུང་དང་ཧཱུཾ་ཨ་ཎྲྀ་ཡིག་འབྲུ་རྣམས་ལ་ཐིམ་པས། །ཚེ་དང་བསོད་ནམས་དཔལ་དང་འབྱོར་པ་ཉམས་པ་སོར་ཆུད་པ་དང་། །རྟོགས་པ་སྐུ་དང་ཡེ་ཤེས་ཐམས་ཅད་རྒྱས་པར་བསམ་ལ། ༀ་ཨ་ཡུ་བྷི་དུ་ཛྙཱ་ན་བཛྲ་ས་མ་ཡ་ཧཱུཾ། ཚེ་བྷྲུཾ་ཎྲྀ་ཛཿབགྲང་། །དེ་ནས་ཡེ་ཤེས་པ་སྤྱན་དྲངས་ནས་ཆོས་སྤྱོད་བྱེད་པ་ནི། །ལྷ་ཚོགས་ཐམས་ཅད་ཀྱི་སྤྱི་བོར་ༀ། མགྲིན་པར་ཨཱ། ཐུགས་ཁར་ཧཱུཾ་ལས་འོད་ཟེར་འཕྲོས། ཕྱོགས་བཅུའི་སངས་རྒྱས་ཐམས་ཅད་ལ་ཕོག །མཉེས་པས་མཆོད། །ཆོས་ཀྱི་སྐུ་རྣམས་གཟུངས་ཀྱི་སྐུར་བཞེངས། །དེ་རྣམས་ཡང་ཚེ་དཔག་མེད་འཁོར་དང་བཅས་པར་གྱུར་ནས་མདུན་གྱི་ནམ་མཁར་སྤྱན་དྲངས། ཧྲིཿ ནུབ་ཕྱོགས་བདེ་བ་ཆེན་པོའི་ཕོ་བྲང་ནས། །བཅོམ་ལྡན་མགོན་པོ་ཚེ་དཔག་མེད། །ཚེའི་ལྷ་མོ་རྣམས་ཀྱིས་འཁོར་གྱི་བསྐོར། །ཡེ་ཤེས་ཁྲོ་བོ་ཆེན་པོ་བཅུ། །སྒོ་མ་བཞི་པོ་འཁོར་དང་བཅས། །གནས་འདིར་སྤྱན་འདྲེན་གཤེགས་སུ་གསོལ། །བཛྲ་ས་མ་ཡ་ཛ་ཛཿ ཛཿཧཱུཾ་བཾ་ཧོཿགཉིས་སུ་མེད་པར་བསྟིམ། སླར་ཡང་དབང་གི་ལྷ་ཚོགས་རྣམས་སྤྱན་དྲངས་བས་དབང་བསྐུར་བར་བསམ་ལ། །ཧཱུཾ་བཅོམ་ལྡན་མགོན་པོ་ཚེ་དཔག་མེད། །ཐུགས་རྗེའི་སྐུ་མཆོག་ཡོན་ཏན་རྒྱ་མཚོའི་གཏེར། །མཁའ་དབྱིངས་རྣམ་དག་ཡུམ་གྱི་གཞལ་ཡས་ནས། །ཚེའི་ལྷ་མོ་ཡེ་ཤེས་གཡུང་དྲུང་དཔལ་གྱི་སྐུ། །གཉིས་མེད་བྱང་ཆུབ་བདེ་མཆོག་རོལ་པ་ཐབས་ཀྱི་གཙོ། །གཉིས་མེད་བྱང་ཆུབ་སེམས་ཀྱི་དཀྱིལ་འཁོར་ནས། །བྱང་ཆུབ་སེམས་རྒྱུན་ཡེ་ཤེས་བདུད་རྩི་འདིས། །སྐལ་ལྡན་རྣམས་ལ་ཚེའི་དངོས་གྲུབ་སྩལ་དུ་གསོལ། །ཨ་བྷི་ཥིཉྩ་ཧཱུཾ། ཞེས་བྱང་ཆུབ་སེམས་ཀྱི་བདུད་རྩིས་དབང་བསྐུར། །དྲི་མ་དག་ཆུ་ལྷག་མ་ཡར་ལུད་པས་རིགས་ལྔས་དབུ་བརྒྱན། སྐུ་གསུང་ཐུགས་ཡོན་ཏན་འཕྲིན་ལས་ལྔས་བྱིན་གྱིས་རླབས། །དེ་ནས་རང་གིས་ཐུགས་ཀ་ནས་ཧཱུཾ་དཀར་དམར་ལྗང་གི་ཚོགས་སྤྲོས། །མཆོད་ཡོན་མ་སོགས་ལ་ཕོག་འོད་དུ་ཞུ་བ་ལས། མཆོད་ཡོན་མ་དཀར་མོ་ཕྱག་ན་མཆོད་ཡོན། །བསྣམས་པའི་ཚོགས་དཔག་ཏུ་མེད་པ་སྤྲོས་ནས། །ལྷ་ཚོགས་རྣམས་ལ་མཆོད་པར་ཕུལ་བར་བསམ། །མེ་ཏོག་ལ་སོགས་ཀྱང་དེས་འགྲེ། གཙང་ཞིང་གཙང་མར་སྦྱར་བ་ཡིས། །ལྷ་རྫས་བཟང་པོའི་མཆོད་ཡོན་རྣམས། །བཅོམ་ལྡན་མགོན་པོ་ཚེ་དཔག་མེད། །ཚེ་སྲིང་སྲོག་སྐྱོབ་ལྷ་ལ་འབུལ། །བཞེས་ན་ཚེའི་དངོས་གྲུབ་སྩོལ། །ༀ་བཛྲ་ཨརྒཾ། པྲ་ཏི་པུ་ཙ་ཧོ། གཙང་ཞིང་གཙང་མར་སྤྱར་བ་ཡིས། །ལྷ་རྫས་བཟང་པོའི་མེ་ཏོག་རྣམས། །བཅོམ་ལྡན་མགོན་པོ་ཚེ་དཔག་མེད། །ཚེ་སྲིང་སྲོག་སྐྱོབས་ལྷ་ལ་འབུལ། །བཞེས་ནས་ཚེའི་དངོས་གྲུབ་སྩོལ། །ༀ་བཛྲ་པུཥྤེ༴ གཙང་ཞིང་གཙང་མར་སྤྱར་བ་ཡིས། །ལྷ་རྫས་བཟང་པོའི་བདུག་སྤོས་འདི། །བཅོམ་ལྡན་མགོན་པོ་ཚེ་དཔག་མེད། །ཚེ་སྲིང་སྲོག་སྐྱོབས་ལྷ་ལ་འབུལ། །བཞེས་ནས་ཚེའི་དངོས་གྲུབ་སྩོལ། །ༀ་བཛྲ་དྷུཔེ༴ གཙང་ཞིང་གཙང་མར་སྦྱར་བ་ཡིས། །ལྷ་རྫས་བཟང་པོའི་སྣང་གསལ་འདི། །བཅོམ་ལྡན་མགོན་པོ་ཚེ་དཔག་མེད། །ཚེ་སྲིང་སྲོག་སྐྱོབ་ལྷ་ལ་འབུལ། །བཞེས་ནས་ཚེའི་དངོས་གྲུབ་བསྩོལ། །ༀ་བཛྲ་ཨ་ལོ་ཀེ༴ གཙང་ཞིང་གཙང་མར་སྦྱར་བ་ཡིས། །ལྷས་རྫས་བཟང་པོའི་དྲི་ཆབ་རྣམས་། །བཅོམ་ལྡན་མགོན་པོ་ཚེ་དཔག་མེད། །ཚེ་སྲིང་སྲོག་སྐྱོབ་ལྷ་ལ་འབུལ། །བཞེས་ནས་ཚེའི་དངོས་གྲུབ་བསྩོལ། །ༀ་བཛྲ་གྷནྷེ༴ གཙང་ཞིང་གཙང་མར་སྦྱར་བ་ཡི །ལྷ་རྫས་བཟང་པོའི་ཞལ་ཟས་རྣམས། །བཅོམ་ལྡན་མགོན་པོ་ཚེ་དཔག་མེད། །ཚེ་སྲིང་སྲོག་སྐྱོབ་ལྷ་ལ་འབུལ། །བཞེས་ནས་ཚེའི་དངོས་གྲུབ་བསྩོལ། །ༀ་བཛྲ་ནེ་ཝི་ཏེ༴ གཙང་ཞིང་གཙང་མར་སྦྱར་བ་ཡིས། །ལྷ་རྫས་བཟང་པོའི་སྒྲ་སྙན་རྣམས་། །བཅོན་ལྡན་མགོན་པོ་ཚེ་དཔག་མེད། །ཚེ་སྲིང་སྲོག་སྐྱོབ་ལྷ་ལ་འབུལ། བཞེས་ནས་ཚེའི་དངོས་གྲུབ་བསྩོལ། ། ༀ་ན་མ་སརྦ་ཏ་ཐཱ་ག་ཏ་བཛྲ་ཤབྟ་པུ་ཙ་མེ་ག་ས་མུ་ཏྲ་སྥ་ར་ན་ས་མ་ཡེ་ཧཱུཾ། དེ་ནས་བྷྲུཾ་ལས་བྷན་དྷའི་ནང་དུ། །ༀ་ཨཱཿ྄ཧཱུཾ་སྭཱ་ཧཱ། ལྔ་ལས་རིགས་ལྔ་ཡབ་ཡུམ་བསམ། །ས་འོད་དུ་ཞུ་བ་ལས། ཟག་མེད་ཡེ་ཤེས་ཀྱི་བདུད་རྩི་བསམ། ༀ་ཨཱཿཧཱུཾ་མཧཱ་སརྦ་པཉྩ་ཨ་མྲི་ཏ་ཧཱུཾ་ཧྲཱིི་ཐཱ། རྩ་བརྒྱད་སྟོང་ལ་སྦྱར་བའི་སྨན། །རིགས་ལྔ་དམ་ཚིག་ལྔ་ཡིས་དངོས། །རྒྱུད་ལྔའི་སེམས་ཅན་ཀུན་སྒྲོལ་བ། །དུག་ལྔ་སེལ་བའི་བདུད་རྩི་འདི། །བཅོམ་ལྡན་མགོན་པོ་ཚེ་དཔག་མེད། ཚེ་སྲིང་སྲོག་སྐྱོབ་ལྷ་ལ་འབུམ། བཞེས་ནས་ཚེའི་དངོས་གྲུབ་བསྩོལ། །མ་ཧཱ་ཨ་མྲི་ཏ་ལ་ཁ་ཧི། །་གཏོར་སྣོད་བྷྲུཾ་ལས་བྷན་དྷའི་སྣོད། །བཅུད་ཡིག་འབྲུ་ལྔ་ལ་རིགས་ལྔ། །དེ་འོད་དུ་ཞུ་བ་ལས། །གཏོར་མ་དགྲ་བགེགས་ཀྱི་ཤ་ཁྲག་བདུད་རྩི་རྒྱ་མཚོ་བཅུད་འདོད་ཡོན་གྱི་ལྷ་མོར་བསམ་ལ། །ༀ་ཨཱཿ་ཧཱུཾ་མ་ཧཱ་བྷ་ལིང་ཏ་ཏེ་ཛྭ་བྷ་ལིང་ཏ་བྷ་ལ་ལིང་ཏ་བྷ་ལ་བྷ་ཏི་གུ་ཧྱ་ས་མ་ཡ་ཧཱུཾ། གཏོར་སྣོད་བྷན་དྷའི་གཞལ་ཡས་ཁང་། །བཅུད་ནི་ཤ་ལྔ་བདུད་རྩི་ལྔ། །བདུད་རྩི་འདོད་ཡོན་ལྷ་མོའི་ཚོགས། །བཅོམ་ལྡན་མགོན་པོ་ཚེ་དཔག་མེད། །ཚེ་སྲིང་སྲོག་སྐྱོབ་ལྷ་ལ་འབུལ། །བཞེས་ནས་ཚེའི་དངོས་གྲུབ་བསྩོལ། །ༀ་མ་ཧཱ་བྷ་ལི་ཏ་ཁ་ཧི། །དེ་ནས་རཀྟའ་ིསྣོད་བྷྲུཾ་ལས་ཀ་པཱ་ལ། །བཅུད་ར་ལས་རཀྟའ་ིརྒྱ་མཚོ་ཆེན་པོར་བསམ་ལ། །ༀ་ཨཱཿ་ཧཱུཾ་མ་ཧཱ་རཀྟ་ཛྭ་ལ་མཎྜ་ལ་ཧཱུཾ་ཧཱུཾ་ཧཱུཾ། སྣོད་ནི་བྷན་དྷ་ཀ་པཱ་ལ། །བཅུད་ནི་རཀྟ་རྒྱ་མཚོར་འཁྱིལ། །བཅོམ་ལྡན་མགོན་པོ་ཚེ་དཔག་མེད། །ཚེ་སྲིང་སྲོག་སྐྱོབ་ལྷ་ལ་འབུལ། །བཞེས་ནས་ཚེའི་དངོས་གྲུབ་བསྩོལ། །ༀ་མ་ཧཱ་རཀྟ་ལ་ཁ་ཧི། དེ་ནས་བསྟོད་པ་ནི། དྲི་མེད་རྣམ་དག་པདྨ་ར་གའི་མདོག །མཚན་དང་དཔེ་བྱད་རིན་ཆེན་བརྒྱན་གྱིས་སྤྲས། །ཕྱག་ནི་སྐྱབས་སྦྱིན་བདུད་རྩི་བུམ་པ་བ སྣམས། །ཚེ་དཔག་མེད་པའི་སྐུ་ལ་ཕྱག་འཚལ་བསྟོད། །ཐེག་མཆོག་སྟོན་པ་ཡན་ལག་དྲུག་ཅུའི་དབྱངས། སེང་གེ་སྒྲ་ཡིས་བདུད་དང་གཤིན་རྗེའི་ཚོགས། །ཀུན་ཏུ་འཇོམས་བྱེད་གདུལ་བྱའི་ཚོགས་སྐྱོང་བ། །ཚེ་མགོན་རྒྱལ་བའི་གསུང་ལ་ཕྱག་འཚལ་བསྟོད། །རྣམ་པར་མི་རྟོགས་མཁྱེན་པ་ནམ་མཁའི་ཐུགས། །ཐུགས་རྗེས་འགྲོ་བ་ཀུན་ལ་ཁྱབ་མཛད་ཅིང་། །དབྱིངས་དང་ཡེ་ཤེས་ཀུན་ཏུ་རོ་གཅིག་པའི། །ཡེ་ཤེས་ལྔའི་ཐུགས་ལ་ཕྱག་འཚལ་བསྟོད། །ཡོན་ཏན་རྒྱ་མཚོའི་གཏིང་དཔག་མཐའ་ཡས་ཅིང་། །མི་འགག་འགྱུར་མེད་རི་རབ་ལྷུན་པོ་ལྟར། །དངོས་གྲུབ་སྣ་ཚོགས་རིན་ཆེན་གཏེར་ལྡན་པའི། །ཡོན་ཏན་དཔག་མེད་ལྡན་ལ་ཕྱག་འཚལ་བསྟོད། །རང་བཞིན་ཆོས་སྐུའི་ངང་ལས་མ་གཡོས་ཀྱང་། །སྣ་ཚོགས་འཕྲིན་ལས་འོད་ཟེར་རབ་ཏུ་འགྱེད། །མ་རིག་མུན་སེལ་ཚེ་དང་ཡེ་ཤེས་ཀྱི། །སྣང་བ་ཐམས་ཅད་བསྐྱེད་པར་མཛད་ལ་བསྟོད། །དངོས་སུ་བཤམ་དང་ཡིད་ཀྱིས་སྤྲུལ་པ་ཡིས། །ཕྱི་ནང་གསང་བའི་མཆོད་པ་བཞེས་མཛོད་ལ། །འཆི་མེད་ཚེའི་དངོས་གྲུབ་བསྩལ་དུ་གསོལ། །ཡང་སངས་རྒྱས་ཀུན་གྱིས་ཡེ་ཤེས་ཚེ། །དཔག་ཏུ་མེད་པའི་འོད་དང་ལྡན། །འགྲོ་བ་ཀུན་གྱི་ཚེའི་དཔལ། །འོད་དཔག་མེད་ལ་ཕྱག་འཚལ་བསྟོད། །ཤར་ཕྱོགས་འཁོར་ལོའི་རྩིབས་སྟེང་ན། །ལྷ་མོར་དཀར་མོ་འོད་འཕྲོ་མ། །ཕྱག་ན་ཤེལ་གྱི་ཚེ་བུམ་བསྣམས། །གསང་བའི་ཡུམ་ལ་ཕྱག་འཚལ་བསྟོད། །ལྷོ་ཕྱོགས་འཁོར་ལོའི་རྩིབས་སྟེང་ན། །ལྷ་མོ་སྨུག་མོ་འོད་འཕྲོ་མ། །ཕྱག་ན་བཻ་ཌཱུརྱའི་ཚེ་བུམ་བསྣམས། །གསང་བའི་ཡུམ་ལ་ཕྱག་འཚལ་བསྟོད། །ནུབ་ཕྱོགས་འཁོར་ལོའི་རྩིབས་སྟེང་ན། །ལྷ་མོ་དམར་མོ་འོད་འཕྲོ་མ། །ཕྱག་ན་བྱི་རུའི་ཚེ་བུམ་བསྣམས ། །གསང་བའི་ཡུམ་ལ་ཕྱག་འཚལ་བསྟོད། །བྱང་ཕྱོགས་འཁོར་ལོའི་རྩིབས་སྟེང་ན། །ལྷ་མོ་ལྗང་མོ་འོད་འཕྲོ་མ། །ཕྱག་ན་བཻ་ཌཱུ རྱའི་ཚེ་བུམ་བསྣམས། །གསང་བའི་ཡུམ་ལ་ཕྱག་འཚལ་བསྟོད། །རྡོ་རྗེ་དབྱིངས་ཀྱི་དཀྱིལ་འཁོར་ན། །རྡོ་རྗེ་ལྷ་མོ་ལྕགས་ཀྱུ་མ། །ལྷ་མོ་དཀར་མོ་གཟི་བརྗིད་འབར། །ཁམས་གསུམ་སྒྲོལ་ལ་ཕྱག་འཚལ་བསྟོད། །རིན་ཆེན་དབྱིངས་ཀྱི་དཀྱིལ་འཁོར་ན། །རིན་ཆེན་ལྷ་མོ་ཞགས་པ་མ། །ལྷ་མོ་སེར་མོ་གཟི་བརྗིད་འབར། །དུག་གསུམ་འཇོམས་ལ་ཕྱག་འཚལ་བསྟོད། །པདྨ་དབྱིངས་ཀྱི་དཀྱིལ་འཁོར་ན། །པདྨའི་ལྷ་མོ་ལྕགས་སྒྲོགས་མ། །ལྷ་མོ་དམར་མོ་གཟི་བརྗིད་འབར། །མཆོག་གསུམ་འདུས་ལ་ཕྱག་འཚལ་བསྟོད། །ལས་ཀྱི་དབྱིངས་ཀྱི་དཀྱིལ་འཁོར་ན། །ལས་ཀྱི་ལྷ་མོ་དྲིལ་འཁྲིལ་མ། །ལྷ་མོ་ལྗང་མོ་གཟི་བརྗིད་འབར། །སྲིད་གསུམ་སྒྲོལ་ལ་ཕྱག་འཚལ་བསྟོད། །མི་དགེ་བཅུ་པོ་ཚར་གཅོད་ཅིང་། །ཕྱོགས་སྐྱོང་བཅུ་པོ་འདུལ་བར་མཛད་། །ཕྱོགས་བཅུའི་ཚེ་ལ་མངའ་མཛད་པ། །ཁྲོ་བོ་བཅུ་ལ་ཕྱག་འཚལ་བསྟོད། །ཞི་རྒྱས་དབང་གིས་ལས་མཛད་པ། །ལྕགས་ཀྱུ་ཞགས་པ་ལྕགས་སྒྲོགས་དྲིལ། །ཕྱོགས་བཞི་ཚེ་དབང་འགུག་མཛད་ལ། །སྒོ་མ་བཞི་ལ་ཕྱག་འཚལ་བསྟོད། །དེ་ནས་བསྙེན་པའི་ཚེ་འགུག་བསྟིམ་བྱེད་པ་ནི། ཚེ་དཔག་ཏུ་མེད་པའི་ལྷ་ཚོགས་རྣམས་སྐུ་ཆེ་བའི་ཡོན་ཏན་མཐུ་སྟོབས་ཆོས་ཀྱི་དབྱིངས་གྱི་ཁྱབ་ཚད་ཙམ་དུ་གྱུར་ནས། སྣང་སྲིད་ཐམས་ཅད་ཟེར་མ་གཡེལ་མདོར་བཅར་བ་བཞིན་དུ་བྱས་པས། །ཚེ་རྐུས་པ་འཁྱམས་པ། །ས་འོག་སར་བླ་གར་ཡོད་ཀྱང་། །ས་སྟེང་དུ་སྐར་མ་སྤ་བ་སངས་ཐང་ལ་བུད་པ་ལྟར། །བཀྲ་ཀད་ཀྱིས་གྱུར་པར་བསམ་ལ། །ཧཱུཾ་སྤོ་ཊ་བཾ་བཾ་བཾ། རྡོ་རྗེ་ནང་བསྡམ་དང་བཅས་པས་བརྗོད། །དེ་ནས་རང་གི་ཐུགས་ཀ་ནས། །ལྷ་མོ་དཀར་སེར་དམར་ལྗང་གི་ཚོགས་དཔག་ཏུ་མེད་པ་གཡས་ལྕགས་ཀྱུ། །གཡོན་བུམ་པ་བསྣམས་པའི་ཚོགས་སྤྲོས་ནས། །ཚེའི་ངོ་བོ་སྐར་མ་ལྟ་བུ་དེ་རྣམས་། །ལྕགས་ཀྱུས་སླངས། །བུམ་པར་སྩལ་ནས། །ལྷ་མོ་དང་བཅས་པ་ཐུགས་ཀ་ཐིམ་པ་ཙམ་གྱིས། །ཚེ་དང་བསོད་ནམས་བཀྲག་གཟི་མདངས་མཐུ་བྱིན་རླབས་ཐམས་ཅད་རྒྱས་པར་བསམ་ལ། །ཧཱུཾ་འགྲོ་བ་ཡོངས་གྱི་ཚེ་ལ་མངའ་མཛད་མ། །དཀར་མོ་འགྱོགས་བྱེད་ཞི་བའི་ལས་བྱེད་ཚོགས། །ཚེ་དང་གཟི་བརྗིད་འདྲེན་པའི་ལས་མཛད་ལ། །རྡོ་རྗེ་ཚེ་མཆོག་འགུགས་པའི་ལས་མཛོད་ཅིག །འགྲོ་བ་ཡོངས་ཀྱི་ཚེ་ལ་མངའ་མཛད་མ། །སེར་མོ་འགྱོགས་བྱེད་རྒྱས་པའི་ལས་བྱེད་ཚོགས། །ཚེ་དང་གཟི་བརྗིད་འདྲེན་པའི་ལས་མཛད་མ། །རིན་ཆེན་ཚེ་མཆོག་འགུགས་པའི་ལས་མཛོད་ཅིག །འགྲོ་བ་ཡོངས་ཀྱི་ཚེ་ལ་མངའ་མཛད་མ། །དམར་མོ་འགྱོགས་བྱེད་དབང་གི་ལས་བྱེད་ཚོགས། །ཚེ་དང་གཟི་བརྗིད་འདྲེན་པའི་ལས་མཛད་མ། །པདྨ་ཚེ་མཆོག་འགུགས་པའི་ལས་མཛོད་ཅིག །འགྲོ་བ་ཡོངས་ཀྱི་ཚེ་ལ་མངའ་མཛད་མ། །ལྗང་མོ་འགྱོགས་བྱེད་དྲག་པོའི་ལས་བྱེད་ཚོགས ། །ཚེ་དང་གཟི་བརྗིད་འདྲེན་པའི་ལས་མཛད་མ། །ལས་ཀྱི་ཚེ་མཆོག་འགུགས་པའི་ལས་མཛོད་གཅིག །ༀ་ཨ་ཡུ་བྷི་དུ་ཛྙཱ་ན་བཛྲ་ས་མ་ཡེ་ཧཱུཾ། །ཚེ་བྷྲུཾ་ནྲྀ་ཛ་བརྒྱ་བཟླ། །དེ་ནས་ཚེའི་ལྷ་མོ་བཞི་ལ་ཚེའི་ལྷ་མོ་དཀར་སེར་དམར་ལྗང་གི་ཚོགས་ལྕགས་ཀྱུ་དང་བུམ་པ་ཅན་སྤྲོས་པས། ཤར་ཕྱོགས་དྲི་ཟ ། ལྷོ་གཤིན་རྗེ། ནུབ་ཆུ་ལྷ། བྱང་གནོད་སྦྱིན་ལ་སོགས་པའི་ལག་དུ་ཚེ་འཁྱམས་པ། རྐུས་པ། གབ་པ། སྤས་པ་རྣམས་རང་དབང་མེད་པར་ལྕགས་ཀྱུས་བླངས། །བུམ་པར་བླུག་གནས། རང་གི་ཐུགས་ཁར་ཐིམ་པས། །ཚེ་བསོད་ནམས་ཤིན་ཏུ་རྒྱས་པར་བསམ་ལ། །ཧཱུཾ་ཤར་གྱི་ཕྱོགས་ནས་ཚེ་འགུགས་མ། །ཚེ་དང་ཡེ་ཤེས་འགུགས་པའི་ལས་མཛད་མ། །ཤར་ཕྱོགས་དྲི་ཟ་ཕོ་མོའི་ལག་ནས་ཚེ་འགུགས་མ། །བདག་དང་རྒྱུ་སྦྱོར་ཡོན་བདག་ལ། །འཆི་མེད་ཚེ་ཡིས་དངོས་གྲུབ་བསྩལ་དུ་གསོལ། །ཧཱུཾ་ལྷོའི་ཕྱོགས་ནས་ཚེ་འགུགས་མ། །ཚེ་དང་གཟི་བརྗོད་འདྲེན་པའི་ལས་མཛད་མ། །ལྷོ་ཕྱོགས་གཤིན་རྗེ་ཕོ་མོའི་ལག་ནས་ཚེ་ཁུག་ལ། །བདག་དང་རྒྱུ་སྦྱོར་ཡོན་བདག་ལ། །འཆི་མེད་ཚེའི་དངོས་གྲུབ་བསྩལ་དུ་གསོལ། །ཧཱུཾ་ནུབ་ཀྱི་ཕྱོགས་ནས་ཚེ་འགུགས་མ། །ཚེ་དང་གཟི་བརྗིད་འདྲེན་པའི་ལས་མཛད་མ། །ནུབ་ཕྱོགས་ཀླུ་གདོན་ཕོ་མོའི་ལག་ནས་ཚེ་ཁུག་ལ། །བདག་དང་རྒྱུ་སྦྱོར་ཡོད་བདག་ལ། །འཆི་མེད་ཚེའི་དངོས་གྲུབ་བསྩལ་དུ་གསོལ། །ཧཱུཾ་བྱང་གི་ཕྱོགས་ནས་ཚེ་འགུགས་མ། །ཚེ་དང་གཟི་བརྗིད་འདྲེན་པའི་ལས་མཛད་མ། །བྱང་ཕྱོགས་གནོད་སྦྱིན་ཕོ་མོའི་ལག་ནས་ཚེ་ཁུག་ལ། །བདག་དང་རྒྱུ་སྦྱོར་ཡོན་བདག་ལ། །འཆི་མེད་ཚེའི་དངོས་གྲུབ་བསྩལ་དུ་གསོལ། །ༀ་ཨ་ཡུ་བྷི་དུ་ཛྙཱ་ན་བཛྲ་ས་མ་ཡེ་ཧཱུཾ། ཚེ་བྷྲུཾ་ནྲྀ་ཛཿ བརྒྱ་བཟླས། དེ་ནས་དབྱིངས་ཀྱི་ལྷ་མོ་བཞི་ལ་སྤྲུལ་པ་གོང་བཞིན་མང་དུ་སྤྲོས་ནས། ཁམས་གསུམ་། དུག་གསུམ་ཚོགས་གསུམ་ཏེ། ལྷ་མཆོག་ཚངས་པ། གཟའ་མཆོག་ར་ཧུ་ལ། ཀླུ་མཆོག་གཙུག་ན་རིན་ཆེན་གསུམ་དང་། སྲིད་པ་གསུམ་གྱི་གནས་ནས་སྔར་བཞིན་ཚེ་འགུགས་བསྟིམ་གྱི་དམིགས་པ་བྱེད་ལ། ༈ །ཧཱུཾ་ཤར་གྱི་ཕྱོགས་ནས་ཚེ་འགུགས་མ། །རྡོ་རྗེ་ལྷ་མོ་ལྕགས་ཀྱུ་མ། །ལྕགས་ཀྱུ་མང་པོའི་འཕྲོ་འདུ་ཡིས། །ཁམས་གསུམ་གནས་ནས་ཚེ་འགུགས་མ། །བདག་དང་རྒྱུ་སྦྱོར་ཡོན་བདག་ལ། །འཆི་མེད་ཚེའི་དངོས་གྲུབ་བསྩལ་དུ་གསོལ། །ལྷོའི་ཕྱོགས་ནས་ཚེ་འགུགས་མ། །རིན་ཆེན་ལྷ་མོ་ཞགས་པ་མ། །ཞགས་པ་མང་པོ་འཕྲོ་འདུ་ཡིས། །དུག་གསུམ་གནས་ནས་ཚེ་ཁུག་ལ། །བ དག་དང་རྒྱུ་སྦྱོར་ཡོན་བདག་ལ། །འཆི་མེད་ཚེའི་དངོས་གྲུབ་བསྩལ་དུ་གསོལ། །ནུབ་ཀྱི་ཕྱོགས་ནས་ཚེ་འགུགས་མ། །པདྨའི་ལྷ་མོར་ལྕགས་སྒྲོགས་མ། །ལྕགས་སྒྲོགས་མང་པོའི་འཕྲོ་འདུ་ཡིས། །མཆོག་གསུམ་གནས་ནས་ཚེ་ཁུག་ལ། །བདག་དང་རྒྱུ་སྦྱོར་ཡོན་བདག་ལ། །འཆི་མེད་ཚེའི་དངོས་གྲུབ་བསྩལ་དུ་གསོལ། །བྱང་གི་ཕྱོགས་ནས་ཚེ་འགུགས་མ། །ལས་ཀྱི་ལྷ་པོ་དྲིལ་འཁྲོལ་མ། །དྲིལ་འཁྲོལ་མང་པོའི་འཕྲོ་འདུ་ཡིས། །སྲིད་གསུམ་གནས་ནས་ཚེ་དྲོངས་ལ། །བདག་དང་རྒྱུ་སྦྱོར་ཡོན་བདག་ལ། །འཆི་མེད་ཚེའི་དངོས་གྲུབ་བསྩལ་དུ་གསོལ། །ༀ་ཨ་ཡུ་བྷི་དུ་ཛྙཱ་ན་བཛྲ་ས་མ་ཡ་ཧཱུཾ། ཚེ་བྷྲཱུཾ་ནྲྀ་ཛ། བརྒྱ་བཟླ། དེ་ནས་ཁྲོ་བོ་བཅུ་ལ། སྤྲུལ་པ་མང་པོ་ཡིས། ཕྱོགས་སྐྱོང་བཅུའི་ལག་ནས་སྔར་བཞིན་ཚེ་བཀུག་ལ། ༈ ཧཱུཾ། གལ་ཏེ་ཤར་ཀྱི་ཕྱོགས་སུ་ཚེ་ཉམས་ན། །ཁྲོ་བོ་ཆེན་པོ་རྣམ་པར་རྒྱལ་བ་ཡིས། །དྲི་ཟའི་ལག་ནས་ཚེ་ཁུགས་ལ། །བདག་དང་རྒྱུ་སྦྱོར་ཡོན་བདག་ལ། །འཆི་མེད་ཚེའི་དངོས་གྲུབ་བསྩལ་དུ་གསོལ། །གལ་ཏེ་ཤར་ལྷོའི་མཚམས་སུ་ཚེ་ཉམས་ན། ཁྲོ་བོ་ཆེན་པོ་དབྱུག་པ་སྔོན་པོ་ཡིས། །མེ་ལྷ་ཕོ་མོའི་ལག་ནས་ཚེ་ཁུག་ལ། །བདག་དང་རྒྱུ་སྦྱོར་ཡོན་བདག་ལ། འཆི་མེད་ཚེའི་དངོས་གྲུབ་བསྩལ་དུ་གསོལ། གལ་ཏེ་ལྷོའི་ཕྱོགས་སུ་ཚེ་ཉམས་ན། །ཁྲོ་བོ་ཆེན་པོ་གཤིན་རྗེ་གཤེད་པོ་ཡིས། །གཤིན་རྗེ་ཕོ་མོའི་ལག་ནས་ཚེ་ཁུག་ནས། །བདག་དང་རྒྱུ་སྦྱོར་ཡོན་བདག་ལ། །འཆི་མེད་ཚེའི་དངོས་གྲུབ་སྩོལ། །གལ་ཏེ་ལྷོ་ནུབ་མཚམས་སུ་ཚེ་ཉམས་ན། །ཁྲོ་བོ་ཆེན་པོ་མི་གཡོ་མགོན་པོ་ཡིས། །སྲིན་པོ་ཕོ་མོའི་ལག་ནས་ཚེ་ཁུག་ལ། །བདག་དང་རྒྱུ་སྦྱོར་ཡོན་བདག་ལ། །འཆི་མེད་ཚེའི་དངོས་གྲུབ་བསྩལ་དུ་གསོལ། །གལ་ཏེ་ནུབ་ཀྱི་ཕྱོགས་ཀྱི་ཚེ་ཉམས་ན། །ཁྲོ་བོ་ཆེན་པོ་རྟ་མགྲིན་རྒྱལ་པོ་ཡིས། །ཀླུ་གདོན་ཕོ་མོའི་ལག་ནས་ཚེ་ཁུག་ལ། །བདག་དང་རྒྱུ་སྦྱོར་ཡོན་བདག་ལ། །འཆི་མེད་དངོས་གྲུབ་བསྩལ་དུ་གསོལ། །གལ་ཏེ་ནུབ་བྱང་མཚམས་ནས་ཚེ་ཉམས་ན། །ཁྲོ་བོ་ཆེན་པོ་གཞན་གྱིས་མི་ཐུབ་པ། །རླུང་ལྷ་ཕོ་མོའི་ལག་ནས་ཚེ་ཁུག་ལ། །བདག་དང་རྒྱུ་སྦྱོར་ཡོན་བདག་ལ། །འཆི་མེད་ཚེ་ཡིས་དངོས་གྲུབ་བསྩལ་དུ་གསོལ། །གལ་ཏེ་བྱང་གི་ཕྱོགས་ནས་ཚེ་ཉམས་ན། །ཁྲོ་བོ་ཆེན་པོ་བདུད་རྩི་འཁྱིལ་པ་ཡིས། །གནོད་སྦྱིན་ཕོ་མོའི་ལག་ནས་ཚེ་ཁུག་ལ། །བདག་དང་རྒྱུ་སྦྱོར་ཡོན་བདག་ལ། །འཆི་མེད་ཚེ་ཡིས་དངོས་གྲུབ་བསྩལ་དུ་གསོལ། །གལ་ཏེ་བྱང་ཤར་མཚམས་སུ་ཚེ་ཉམས་ན། །ཁྲོ་བོ་ཆེན་པོ་ཁམས་གསུམ་རྣམ་རྒྱལ་གྱིས། །དབང་ལྡན་ཕོ་མོའི་ལག་ནས་ཚེ་ཁུག་ལ། །བདག་དང་རྒྱུ་སྦྱོར་ཡོན༴ འཆི་མེད་ཚེ་ཡིས་དངོས་གྲུབ་བསྩལ་དུ་གསོལ། །གལ་ཏེ་སྟེང་གི་ཕྱོགས་སུ་ཚེ་ཉམས་ན། །ཁྲོ་བོ་ཆེན་པོ་ཧཱུཾ་ཆེན་ཀ་ར་ཡིས། ཉི་ཟླ་ཕོ་མོའི་ལག་ནས་ཚེ་ཁུག་ལ། བདག་དང་རྒྱུ་སྦྱོར་ཡོན་བདག་ལ། འཆི་མེད་ཚེའི་དངོས་གྲུབ་བསྩལ་དུ་གསོལ། །གལ་ཏེ་འོག་གི་ཕྱོགས་སུ་ཚེ་ཉམས་ན། །ཁྲོ་བོ་ཆེན་པོ་སྟོབས་པོ་ཆེན་པོ་ཡིས། །ས་བདག་ཕོ་མོའི་ལག་གནས་ཚེ་ཁུག་ལ། །བདག་དང་རྒྱུ་སྦྱོར་ཡོན་བདག་ལ། །འཆི་མེད་ཚེའི་དངོས་གྲུབ་བསྩལ་དུ་གསོལ། །ༀ་ཨཱཿཡུ་བྷི་དུ་ཛྙཱ་ན་བཛྲ་ས་མ་ཡེ་ཧཱུཾ། ཚེ་བྷྲཱུཾ་ནྲྀ་ཛཿབརྒྱ་བཟླའོ། །ཧཱ་དེ་ནས་སྒོ་བ་བཞི་ལ་སྤྲུལ་པ་མང་དུ་སྤྲོས་ནས་ཚེ་བཀུག་བསྟིམ་བྱེད་པར་བསམ་ལ། ༈ ཧཱུཾ་ཤར་གྱི་ཕྱོགས་ནས་ཚེ་འགུགས་མ། །རྟ་གདོང་དཀར་མོ་ལྕགས་ཀྱུ་མ། །དྲི་ཟ་ཕོ་མོའི་ལག་ནས་ཚེ་ཁུག་ཤིག །ཚེ་འདི་ཁུག་ལ་སྲོག་འདི་སྐྱོབས། །བདག་དང་རྒྱུ་སྦྱོར་ཡོན་བདག་ལ་། །འཆི་མེད་ཚེ་ཡི་དངོས་གྲུབ་བསྩོལ། །ལྷོ་ཡི་ཕྱོགས་ནས་ཚེ་འགུགས་མ། །ཕག་གདོང་སེར་མོ་ཞགས་པ་མ། །གཤིན་རྗེ་ཕོ་མོའི་ལག་ནས་ཚེ་ཁུགས་ཤིག །ཚེ་འདི་ཁུག་ལ་སྲོག་འདི་སྐྱོབས། །བདག་དང་རྒྱུ་སྦྱོར་ཡོན་བདག་ལ། །འཆི་མེད་ཚེ་ཡི་དངོས་གྲུབ་སྩོོལ། །ནུབ་ཀྱི་ཕྱོགས་ནས་ཚེ་འགུགས་མ། །ཁ་གདོང་དམར་མོ་ལྕགས་སྒྲོགས་མ། ཀླུ་གདོན་ཕོ་མོའི་ལག་ནས་ཚེ་ཁུག་ལ། །བདག་དང་རྒྱུ་སྦྱོར་ཡིན་བདག་ལ། །འཆི་མེད་ཚེ་ཡི་དངོས་གྲུབ་བསྩལ་དུ་གསོལ། །བྱང་གི་ཕྱོགས་ནས་ཚེ་འགུགས་མ། །འུག་གདོང་ལྗང་ཁུ་དྲིལ་ཁྲོལ་མ། །གནོད་སྦྱིན་ཕོ་མོའི་ལག་ནས་ཚེ་ཁུག་ལ། །བདག་དང་རྒྱུ་སྦྱོར་ཡོན་བདག་ལ། །འཆི་མེད་ཚེ་ཡིས་དངོས་གྲུབ་བསྩལ་དུ་གསོལ། །ཁུགས་ཤིག་དྲོངས་ཤིག་བཛྲ་གྷན་དྷེ་ཧོ། །ༀ་ཨ་ཡུ་བྷི་དུ་ཛྙཱ་ན་བཛྲ་ས་མ་ཡེ་ཧཱུཾ། །ཚེ་བྷྲཱུཾ་ནྲི་ཛཿབརྒྱ་བཟླས། ཞར་ལ་ཁྲོ་བོ་ནག་པོ་བཅུའི་འཕྲོ་འདུ་བྱེད་ལ། །འབུམ་དུ་བཟླ། བསྙེན་པ་འདི་རྣམས་ལ་ཚེ་ཁུགས་པའི་རྟགས་བྱུང་ན། །པུ་ཎྱེ་ཅི་རིགས་པར་བཟླ། །མཐར་སྦས་སྔགས་ཀྱང་བདུན་ཙམ་བཟླས་དེ་ནས་མཆོད་བསྟོད་བསྡུས་པ་བྱའོ། །སྤྱི་དོན་གཉིས་པ་བུམ་བསྐྱེད་ནི། ༈ ༀ་སྭ་བྷ་ཝ་ཤུདྷ༴ བུམ་པ་མི་དམིགས་སྟོང་བའི་ངང་ལས། །རང་གི་ཐུགས་ཀ་ནས། །བྷྲཱུཾ་གཅིག་སྤྲོས་པ་འོད་དུ་ཞུ་བ་ལས། །རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་། ཕྱི་བུམ་པའི་དབྱིབས་ཅན། ལ་སོགས་ནས། །བསྙེན་པ་ཡན་ཆོད་བདག་བསྐྱེད་དང་མཚུངས་པ་ལ། བར་སྐབས་ཀྱི་ཚིག་ཁ་བསྒྱུར་རོ། །ཞར་ལ། ལས་བུམ་དང་། ཚེ་ནས། ཚེ་ཟན། ཚེ་འབྲས། ཚེ་ཆང་། ཚེ་གཏོར་རྣམས་ཀྱང་། །བུམ་བསྐྱེད་དང་མཐུན་པར་བྱའོ། ༈ །སྤྱི་དོན་གསུམ་པ་མདུན་བསྐྱེད་ནི། ༀ་སྭ་བྷ་ཝ༴ རྡུལ་ཚོན་མི་དམིགས་པ་སྟོང་པའི་ངང་ལས། རང་གི་ཐུགས་ཁ་ནས་བྷྲཱུཾ་གཅིག་འཕྲོས་པ་འོད་དུ་ཞུ། །ཡོངས་སུ་གྱུར་པ་ལས། རིན་ཆེ་པོ་སྣ་ཚོགས་ལས་གྲུབ་པའི་གཞལ་ཡས་ཁང་། ཕྱི་བུམ་པའི་དབྱིབས་ཅན། །ཞེས་སོགས་ནས། བསྙེན་པ་ཡན་བདག་བསྐྱེད་དང་མཚུངས་པ་ལ། །བར་སྐབས་སུ་འདོད་པ་ཁ་བསྒྱུར་རོ། །གཉིས་པ་འཇུག་གི་དབང་གི་རིམ་པ་ལ་གཉིས་སྟེ། སློབ་དཔོན་བདག་ཉིད་འཇུག་ཅིང་དབང་ལེན་པ་དང་། སློབ་མ་བཞུག་ཅིང་དབང་བསྐུར་བའོ། །དང་པོ་ནི། དབང་ཕྱུག་འཇུག་དང་བཟོད་གསོལ་དང་། །ཅེས་པས། སློབ་མ་དཀྱིལ་འཁོར་བཞུགས་ཅིང་དབང་བསྐུར་བ་ལྟར་སློབ་དཔོན་བདག་གིས་ཀྱང་འཇུག་ཅིང་དབང་ལེན་ནོ། །གཉིས་པ་སློབ་མ་དཀྱིལ་འཁོར་དུ་གཞུགས་ཅིང་དབང་བསྐུར་བ་ལ། ཁྲུས་དག བ་དྲི་དང་ལུས་འབུལ་དང་། །བགེགས་བསྐྲད་ལྷར་རླབས་དམ་ཚིག་སྤྱིན། །དེ་ཉིད་དབོག་དང་ཆུ་ནན་དང་། །བསྒྲགས་དང་རིན་ཆེན་དོར་བ་དང་། །ལྷ་དབབ་བ་དང་ནན་ཏན་དང་། །སྤྱན་དབྱེ་དཀྱིལ་འཁོར་ལེགས་བསྟན་དང་། །ཚོགས་མཆོད་ཡོན་དང་། ཅེས་གསུངས་པ་ལྟར། བཅུ་དྲུག་དང་པོ་ཁྲུས་ནི། དབང་གི་རྒྱལ་ཐེབས་ཀྱིས། ལས་བུམ་གྱིས་སློབ་མ་རྣམས་བཀྲུ་ཞིང་། །ཇི་ལྟར་བལྟམས་པ་ཙམ་གྱི་ནི་སོགས་ཀྱིས་ལུས་ངག་ཡིད་གསུམ་གྱི་སྡིག་པ་དག་ནས། །ལུས་ཤེལ་གོང་ཕྱིས་པ་ལྟར་བསྒོམས་ཤིག །གཉིས་པ་མིག་དར་དགབ་པ་ནི། དར་དམར་པོས་མིག་དགབ་ལ། དེ་སྔ་ཕན་ཆད་དཀྱིལ་འཁོར་མི་མཐོང་བའི་བརྡའོ། །གསུམ་པ་དྲི་བ་ནི། བླ་མས་བུ་དགའ་ཅི་ལ་དགའ། །བུ་ཁྱོད་སྤྲོ་བ་ཅི་ལ་སྤྲོ། །ཞེས་དྲིའོ། །སློབ་མས་བདག་ནི་ཚེ་དཔག་མེད་པ་ཡི། །དཀྱིལ་འཁོར་བཞུགས་ཅིང་དབང་ཞུ་སྤྲོ། །གསུམ་མོ། །བཞི་པ་ལུས་འབུལ་བ་ནི། རྒྱལ་ཐེབས་ཀྱིས་སློབ་མ་དཀྱིལ་འཁོར་གྱི་ལྷོ་སྒོའི་ནང་ཕྱོགས་སུ་ཁྲིད་དེ། ཕྱག་འཚལ་ཞིང་ལུས་འབུལ་བར་བསམ་ལ། །དཀྱིལ་འཁོར་གྲོང་ཁྱེར་དམ་པའི་ས། །ལྷོའི་ཕྱོགས་སུ་བརྟེན་ནས་ནི། །སྐུའི་དངོས་གྲུབ་ཐོབ་བྱའི་ཕྱིར། །བདག་གི་ལུས་འབུལ་ཕྱག་འཚལ་ལོ། །ནུབ་སྒོའི་ནང་དུ་ཁྲིད་ལ། །དཀྱིལ་འཁོར་དམ་པ་གྲོང་ཁྱེར་གྱིས། །ནུབ་ཀྱི་ཕྱོགས་སུ་བརྟེན་ནས་ནི། །གསུང་གི་དངོས་གྲུབ་ཐོབ་བྱའི་ཕྱིར། །བདག་གི་ལུས་འབུལ་ཕྱག་འཚལ་ལོ། །བྱང་སྒོའི་ནང་དུ་ཁྲིད་ལ། །དཀྱིལ་འཁོར་དམ་པའི་གྲོང་ཁྱེར་གྱིས། །བྱང་གི་ཕྱོགས་སུ་བརྟེན་ནས་ནི། །འཕྲིན་ལས་དངོས་གྲུབ་ཐོབ་བྱའི་ཕྱིར། །བདག་གི་ལུས་འབུལ་ཕྱག་འཚལ་ལོ། །ཤར་སྒོར་ཁྲིད་ལ། དཀྱིལ་འཁོར་དམ་པ་གྲོང་ཁྱེར་གྱིས། །ཤར་གྱིས་ཕྱོགས་སུ་བརྟེན་ནས་ནི། །ཐུགས་ཀྱི་དངོས་གྲུབ་ཐོབ་བྱའི་ཕྱིར། །བདག་གི་ལུས་འབུལ་ཕྱག་འཚལ་ལོ། །ལྔ་པ་བགེགས་བསྐྲད་པ་ནི། །སློབ་མ་ལ་ཡུངས་དཀར་གཏོར་ཞིང་བགེགས་བསྐྲད་པར་བསམ་ལ། །ༀ་ཧྲཱིིཿཔདྨ་ཏ་ཀྲི ཏ་བཛྲ་ཀྲོ་ཏ་ཧྱ་གྷྲི་ཝ་ཧུ་ལུ་ཧུ་ལུ་ཧཱུཾ་ཕཊ། བརྗོད་དོ། །དྲུག་པ་ལྷར་བརླབས་པ་ནི། །འོད་ཁྱེད་རང་རྣམས་ཚེ་དཔག་ཏུ་མེད་པ། །སྐུ་མདོག་དམར་པོ་ཞལ་གཅིག་ཕྱག་གཉིས་པ་རེ་རེ་གསལ་བའི་སྤྱི་བོ་ༀ་དཀར་པོ་མགྲིན་པར་ཨཱཿདམར་པོ། །ཐུགས་ཀར་ཧཱུཾ་སྔོན་པོ་རེ་རེར་བསྒོམས་གནས་གསུམ་དུ་དྲི་བཟང་གི་ཐིག་ལེ་རེ་རེ་བྱེད་དོ། །བདུན་པ་དམ་ཚིག་སྦྱིན་པ་ནི། །བླ་མས། ཀྱཻ་རྣལ་འབྱོར་དམ་པ་རྣམས། །གསང་སྔགས་ཐེག་པ་འདིར་བཞུགས་ན། །དམ་མེད་འདི་ཕྱི་གཉིས་ཁར་ལྷུང་། །དམ་ཚིག་ཚུལ་བཞིན་བསྲུངས་ནུས་སམ། །ཞེས་དྲི་སློབ་མ། སྐུ་གསུང་ཐུགས་ཀྱི་དམ་ཚིག་ནི། །མ་གྲུབ་བར་དུ་མ་ལྟུང་ན། །ཡང་ནས་ཡང་དུ་བཅས་པ་བཞིན། །ལུས་དང་སྲོག་ལ་བབས་ཀྱང་བསྲུངས། །ས་མ་ཡ་ཧཱུཾ། བརྒྱད་པ་དམ་ཚིག་དབོག་བ་ནི། །སྙིང་ཁར་རྡོ་རྗེ་བཟུང་ལ། །དུས་གསུམ་བདེ་གཤེགས་རྣམས་ཀྱི་སྙིང་པོ་ནི། །འདས་དང་མ་བྱུང་ད་ལྟར་གསུམ་གྱི་ལྷ། །རྣལ་འབྱོར་པའི་བསྙེན་ཅིང་བསྒྲུབ་པ་འདི། །ད་ལྟ་ཉིད་དུ་ཁྱོད་ལ་འབོགས་པར་བྱ། །ༀ་བཛྲ་སརྦ་ས་མ་ཡ་ཧཱུཾ། །དགུ་པ་དམ་ཆུ་བླུད་པ་ནི། །བདུད་རྩི་ལྕེ་ལ་བཞག་ལ། །འདི་ནི་འདའ་ཀ་དམ་ཚིག་སྟེ། །སྐལ་ལྡན་ཁྱོད་ཀྱིས་གསང་བའི་མཆོག །སངས་རྒྱས་ཀུན་དང་མཉམ་སྦྱོར་བའི། བདག་གི་བཀའ་ལ་མ་འདའ་བསྲུངས། །ཨི་ཏན་ཏི་ན་ར་ཀན། ཡང་དེ་རིང་ཕྱིན་ཆད་བུ་ཁྱོད་ཀྱིས། །གསང་ཆེར་ང་ཡིན་བརྙས་པ་སྤོངས། །བརྙས་ན་སངས་རྒྱས་ཀུན་བརྙས་པས། །ཚེའི་དུས་བྱས་དམྱལ་བར་སྐྱེ། །ཅེས་བརྗོད་དོ། །བཅུ་པ་དམ་ཚིག་བསྒྲག་པ་ནི། ༈ །བུ་ཁྱོད་བླ་མེད་སེམས་ཀྱི་སངས་རྒྱས་རིགས། །སངས་རྒྱས་ལྷའི་ས་ལ་གནས་གྱུར་གྱི། །མོས་པས་ཞུགས་ལ་བླ་མེད་སྒྲུབས་པའི་ཕྱིར། །རྒྱལ་བའི་དམ་ཚིག་གཉིས་མེད་སེམས་ཀྱི་སྤྱོད། །ཅེས་དམ་ཚིག་བཤད། །བཅུ་གཅིག་པ་མེ་ཏོག་དོར་བ་ནི། །མེ་ཏོག་ཅོད་པཎ་ཐལ་མོའི་བར་དུ་གཟུང་ལ། །འདི་སྐད་བརྗོད། །ཚེ་དཔག་མེད་པའི་དཀྱིལ་འཁོར་དུ། །རིན་ཆེན་བྱང་ཆུབ་སེམས་ཀྱི་མེ་ཏོག་འདི། །སྐུ་གསུང་ཐུགས་ཀྱི་དབྱིབས་སུ་བདག་འབུལ་ན། །དངོས་གྲུབ་རྣམ་གསུམ་བདག་ལ་སྩལ་དུ་གསོལ། །པུཥྤེ་པྲ་ཏི་ཛ། ཅེས་དཀྱིལ་འཁོར་གྱི་དབུས་སུ་གཏད་ཅིང་འཕང་ངོ། །བཅུ་གཉིས་པ་ལྷ་དབབ་ནི། མེ་ཏོག་དང་། མེ་ཏོག་ཕོག་པའི་ལྷ་དབྱེར་མེད་གནས་གསུམ་དུ་གཏུགས་ལ། སྐུ་གསུང་ཐུགས་ཀྱི་དཀྱིལ་འཁོར་དུ། །མེ་ཏོག་དོར་བའི་བྱིན་རླབས་ཀྱིས། །སྐུ་གསུང་ཐུགས་ལ་ཐིམ་ནས་ཀྱང་། དངོས་གྲུབ་རྣམས་གསུམ་ཁྱོད་ལ་སྦྱིན། །ཀ་ཡ་ཝ་ཀྐ་ཙིཏྟ་སིདྡྷིི་ཧཱུཾ། བཅུ་གསུམ་པ་ལྷ་བསྒོམས་པར་ནན་ཏན་བྱ་བ་ནི། ཕོ་ཐམས་ཅད་ལ། ཀྱེ་དཔལ་རྡོ་རྗེ་སེམས་དཔའ་ལ་སོགས་པའི་གསང་མཚན་བཏགས། །མོ་ཐམས་ཅད་ཀུན་ཏུ་བཟང་མོ་ལ་སོགས་པའི་གསང་མཚན་བཏགས་ལ། །འོ་ཁྱེེར་རང་རྣམས་ཀྱི་མེ་ཏོག་ཕོག་པའི་ལྷ་མགོན་པོ་ཚེ་དཔག་ཏུ་མེད་པ་ཡིན་པས། །ལྷ་ཚོགས་རྣམས་ཀྱི་སྐུ་སྣང་ལ་རང་བཞིན་མེད་པ། །མེ་ལོང་ནང་གི་གཟུགས་བརྙན་བཞིན་དུ་བསྒོམ་ཞིང་བསྒྲུབ་པ་ལ་ནན་ཏན་མཛོད་ཅིག །བཅུ་བཞི་པ་སྤྱན་དབྱེ་བ་ནི། །ཐུར་མས་སྤྱན་དར་བསལ་ལ། །ཉོན་མོངས་འཁོར་བར་འཁྱས་པ་ཡི། །བུ་ཁྱོད་ཀྱི་ནི་ཤེས་པ་ཡི། །མ་རིག་མིག་གིས་ལིང་ཏོག་རྣམས་། །བདེ་གཤེགས་དགོངས་པས་གསལ་བར་བགྱི། །ཙཀྱུ་པྲ་བེ་ཤ་ཡ། བཅོ་ལྔ་པ་དཀྱིལ་འཁོར་བསྟན་པ་ནི། །ཐུར་མས་དཀྱིལ་འཁོར་བསྟན་ལ། །ཧོ་དཀྱིལ་འཁོར་ལྷ་ཚོགས་འདི་ལ་ལྟོས། །སྔོན་ཆད་མ་བརྙེད་དེ་རིང་རྙེད། །སྔགས་དང་ཕྱག་རྒྱའི་དངོས་གྲུབ་ཐོབ། །རྟག་ཏུ་དམ་ཚིག་ཐུབ་པར་བསྲུངས། འོ་རྡུལ་ཚོན་གྱི་དཀྱིལ་འཁོར་མཐོང་བ་ཙམ་གྱིས། །སྐྱེ་བ་བདུན་ཚུན་ཆོད་དུ། མ་བསྒོམ་ཀྱང་སངས་རྒྱས་ཐོབ་པ་ལ་སོགས་པ་ཕན་ཡོན་དུ་མ་ཡོད་དོ། །བཅུ་དྲུག་པ་ཚོགས་མཆོད་ཡོན་འབུལ་བ་ནི། །ཚོགས་མཆོད་རྒྱས་བསྡུས་ཅི་རིགས་པ་བྱས་ཤིང་། །ལྷ་ཚོགས་དང་མི་ལ་བྱས་ཤིང་། །ལྷ་ཚོགས་དང་མི་ལ་འབུལ་ལོ། །ཡོན་ནི་ཅི་འབྱོར་པའི་ཡོན་ཕུལ་ལ། །རྒྱལ་སྲིད་དང་ནི་རང་གི་ལུས། བུ་དང་ཆུང་མ་ནོར་གྱི་དབྱིག །རབ་ཏུ་གཅེས་དང་ཡིད་འཐད་འབུལ། །རྟག་དུ་ཐུགས་རྗེས་གཟུང་དུ་གསོལ། ལན་གསུམ། དེ་ལྟར་དཀྱིལ་འཁོར་དུ་བཞུགས་པའི་ཡོན་ཏན་ནི། ལས་དང་པོ་བ་བཞུགས་ཡིན་ཀྱང་། །འོག་མིན་དུ་ཐར་ལམ་པ་ཞུགས་པ་དང་བསྐལ་བ་མཉམས་པའི་ཡོན་ཏན་ནོ། ༈ །དབང་གི་དངོས་གཞི་ལ་གསུམ་གྱི་དང་པོ་སྔོན་འགྲོ་ནི། །སློབ་མས་མཎྚལ་ཕུལ་ལ། །གསོལ་བ་གདབ་པའི་རྗེས་བཟློས་མཛོད་ཅིག ༈ །བཅོམ་ལྡན་མགོན་པོ་ཚེ་དཔག་མེད། །ཕྱོགས་བཅུའི་རྒྱལ་བ་སྲས་བཅས་ཀྱི། རྡོ་རྗེ་ཚེ་དབང་རིན་པོ་ཆེ། །དེང་འདིར་བདག་ལ་བསྩལ་དུ་གསོལ། །ལན་གསུམ་བརྗོད། དེ་ནས་སློབ་དཔོན་གྱི་དབུ་བརྒྱན་ལ་སོགས་པའི་ཆས་གོས་རྣམས་བརྣབ། བུམ་པ་ཕྱག་ཏུ་ཐོགས་ལ། འོ་ཁྱེད་རང་རྣམས་དམིགས་པ་འདི་བཞིན་དུ་མཛོད། །བླ་མ་དང་དཀྱིལ་འཁོར་ཀྱི་ཐུགས་ཀ་ནས་འོད་ཟེར་སྤྲོས། །ཕྱོགས་བཅུའི་སངས་རྒྱ་ལ་ཕོག །དེ་ཡང་ཆོས་ཀྱི་སྐུ་རྣམས་གཟུགས་ཀྱི་སྐུར་བཞེངས། །གཟུགས་ཀྱི་སྐུ་རྣམས་ཡང་མགོན་པོ་ཚེ་དཔག་ཏུ་མེད་པ་འཁོར་བཅས་ཀྱི་སྐུར་བཞེངས་ནས། མདུན་བསྐྱེད་དང་གཉིས་སུ་མེད་པར་ནམ་མཁར་སྒོམ་ལ། །དེ་ཡང་ཚེ་དཔག་མེད་ལ་སོགས་རིགས་ལྔས་བཀྲ་ཤིས་པའི་དགོངས་པ་མཛད། སངས་རྒྱས་སྤྱན་མ་ལ་སོགས་ཡུམ་ལྔས། །རིན་པོ་ཆེའི་བུམ་པ་བྱང་ཆུབ་སེམས་ཀྱིས་ཆུས་གང་བ་ཐོགས་ནས་དབང་བསྐུར་ཚེའི་ལྷ་མོ་དང་དབྱིངས་ཀྱི་ལྷ་མོས་བཀྲ་ཤིས་བརྗོད་ཅིང་གླུ་ལེན། ཁྲོ་བོ་བཅུས་བར་ཆད་ཀྱི་བགེགས་བསྐྲད། །སྒོ་མ་བཞི་ཕྱི་ནང་གསང་བའི་མཆོད་པ་འབུལ་བར་བསྒོམ་མཛོད། །ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །ཅེས་སོགས་ཚང་བར་བརྗོད། གཞན་ཡང་། རྫོགས་སངས་རྒྱས་ནས་ད་ལྟའི་བར། །བུམ་པ་གཅིག་ནས་གཅིག་བྱོ་དང་། །མར་མེ་གཅིག་ནས་གཅིག་སྤར་ལྟར། །དུས་རྒྱུན་ཆད་མེད་པའི་བཀྲ་ཤིས་བརྗོད། །དངོས་གཞི་ལ་བཞི་སྟེ། བུམ་བའི་དབང་དང་། གསང་བའི་དབང་གི་དོད་དང་། ཤེས་རབ་ཡེ་ཤེས་ཀྱི་དབང་གི་དོད་དང་། དབང་བཞི་པ་ཚིག་དབང་རིན་པོ་ཆེ་དེའི་དོད་དོ། །དང་པོ་ནི། དམིགས་པ་བསམ་རྒྱུད་གོང་བཞིན་ལ་བསྒྲག་ཚིག་ནི། །ༀ་རིན་ཆེན་སྣ་ཚོགས་རྒྱུ་ལས་བྱུང་། །ཁ་དོག་དབྱིབས་སུ་ལྡན་པ་ཡིས། །ཤེས་རབ་ཡུམ་གྱིས་བུམ་པ་འདིས། །སྤྱི་བོའི་གཙུག་ཏུ་དབང་བསྐུར་བ། །དབང་མཆོག་དམ་པ་ཐོབ་གྱུར་ཅིག །ༀ་བཛྲ་ཀ་ལ་ཤ་ཨ བྷི་ཥིཉྩ་ཧཱུཾ། བུམ་ཆུ་བླུག །བུམ་པའི་ཆུས་དབང་བསྐུར་བས། ལུས་ངག་ཡིད་གསུམ་གྱི་སྡིག་སྒྲིབ་དག་པར་གྱུར་ཅིག །ཚེ་དཔག་མེད་ཡབ་ཡུམ་གྱི་ཙ་ཀ་ལི་སྤྱི་བོར་བཞག་ལ། འོ་བདེ་བ་ཅན་དང་མདུན་བསྐྱེད་དང་། བླ་མའི་ཐུགས་ཀ་ནས་ཚེ་དཔག་མེད་ཡབ་ཡུམ་བྱོན་ནས། འཆི་མེད་ཚེ་ཡི་བདུད་རྩིས་བཀང་བའི་བུམ་པས་སྤྱི་བོ་ནས་དབང་བསྐུར་བས་ཐུགས་ཀར་ཐིམ་པར་བསྒོམས་མཛོད་ཅིག །ༀ་བཅོམ་ལྡན་མགོན་པོ་ཚེ་དཔག་མེད། །ཐུགས་རྗེའི་སྐུ་མཆོག་ཡོན་ཏན་རྒྱ་མཚོའི་གཏེར། །མཁའ་དབྱིངས་རྣམ་དག་ཡུམ་གྱི་གཞལ་ཡས་ནས། །རྡོ་རྗེ་ཚེའི་ལྷ་མོ་ཡེ་ཤེས་གཡུང་དྲུང་དཔལ་གྱིས་སྐུ། །བྱང་ཆུབ་བདེ་མཆོག་རོལ་པ་ཐབས་ཀྱི་གཙོ། །གཉིས་མེད་བྱང་ཆུབ་སེམས་ཀྱི་དཀྱིལ་འཁོར་ནས། །བྱང་ཆུབ་སེམས་ཀྱི་ཡེ་ཤེས་བདུད་རྩི་འདིས། །སྐལ་ལྡན་རྣམས་ལ་ཚེ་ཡིས་དངོས་གྲུབ་བསྩལ་དུ་གསོལ། །ༀ་ཨ་ཡུ་བྷི་དུ་ཛྙཱ་ན་བཛྲ་ས་མ་ཡེ་ཧཱུཾ། ཚེ་བྷྲཱུཾ་ནྲྀ་ཛཿཨ་བྷི་ཥིཉྩ་ཧཱུཾ། གཙོ་བོ་ཡབ་ཡུམ་ཀྱི་སྐུ་ལས་སྤྲུལ་བའི་ལྷ་མོ་བཞིའི་སྐུ་སྦྱི་བོར་བཞག་ལ། འོག་མིན་དང་། མདུན་བསྐྱེད་དང་། བླ་མའི་ཐུགས་ཀ་ནས་བྱུང་པའི་སྤྲུལ་པའི་ལྷ་མོར་བཞིས་འཆི་མེད་བདུད་རྩིས་གང་པའི་བུམ་པ་སྦྱི་བོ་ནས་དབང་བསྐུར། །ལྷ་མོ་བཞི་ཐུགས་ཀར་ཐིམ་པར་བསྒོམ་མཛོད་ཅིག །ཧཱུཾ་འགྲོ་བ་ཡོངས་ལ་ཚེ་ལ་མངའ་མཛད་མ། །དཀར་མོ་འགྱོགས་བྱེད་ཞི་བའི་ལས་བྱེད་ཚོགས། །ཚེ་དང་གཟི་བརྗིད་འདྲེན་པའི་ལས་མཛད་མ། །རྡོ་རྗེ་ཚེ་མཆོག་འགུགས་པའི་དབང་བསྐུར་རོ། །ༀ་ཨ་ཡུ༴ ཨ་བྷི་ཥིཉྩ་ཧཱུཾ། ཧཱུཾ་འགྲོ་བ་ཡོངས་ཀྱི་ཚེ་ལ་མངའ་མཛད་མ། །སེར་མོ་འགྱོགས་བྱེད་རྒྱས་པའི་ལས་བྱེད་ཚོགས། །ཚེ་དང་གཟི་བརྗིད་འདྲེན་པའི་ལས་མཛད་མ། །རིན་ཆེན་ཚེ་མཆོག་འགུགས་པའི་དབང་བསྐུར་རོ། །ༀ་ཨ་ཡུ༴ ཨ་བྷི་ཥིཉྩ་ཧཱུཾ། ཧཱུཾ་འགྲོ་བ་ཡོངས་ཀྱི་ཚེ་ལ་མངའ་མཛད་མ། །དམར་མོ་འགྱོགས་བྱེད་དབང་གི་ལས་བྱེད་ཚོགས། །ཚེ་དང་གཟི་བརྗིད་འདྲེན་པའི་ལས་མཛད་མ། །པདྨ་ཚེ་མཆོག་ཐོབ་པའི་དབང་བསྐུར་རོ། །ༀ་ཨཱཿཡུ༴ ཨ་བྷི་ཥིཉྩ་ཧཱུཾ། ཧཱུཾ་འགྲོ་བ་ཡོངས་ཀྱི་ཚེ་ལ་མངའ་མཛད་མ། །ལྗང་མོ་འགྱོགས་བྱེད་དྲག་པོའི་ལས་བྱེད་ཚོགས། །ཚེ་དང་གཟི་བརྗིད་འདྲེན་པའི་ལས་མཛད་མ། །ལས་ཀྱི་ཚེ་མཆོག་འགུགས་པའི་དབང་བསྐུར་རོ། །ༀ་ཨཱཿཡུ༴ ཨ་བྷི་ཥིཉྩ་ཧཱུཾ། ཚེའི་ལྷ་མོ་བཞིའི་སྐུ་སྤྱི་བོར་བཞགས་ལ། འོག་མིན་དང་མདུན་བསྐྱེད་དང་། བླ་མའི་ཐུགས་ཀ་ནས་བྱུང་བའི་ཚེའི་ལྷ་མོ་བཞི། །འཆི་མེད་ཚེའི་བདུད་རྩིས་གང་བའི་བུམ་བ་སྤྱི་བོར་ནས་དབང་བསྐུར། ཚེའི་ལྷ་མོ་བཞི་ཐུགས་ཀར་ཐིམ་པར་བསྒོམས་མཛོད་ཅིག །ཧཱུཾ་ཤར་ཕྱོགས་འཁོར་ལོའི་རྩིབས་སྟེངས་ནས། །ལྷ་མོ་དཀར་མོ་འོད་འཕྲོ་མ། །སྐལ་ལྡན་བུ་ལ་དབང་བསྐུར་བས། །འཆི་མེད་ཚེ་དབང་ཐོབ་པར་ཤོག །ༀ་ཨཱཿཡུ་བྷི་དུ་ཛྙཱ་ན་ས་མ་ཡེ་ཧཱུཾ། ཨ་བྷི་ཥིཉྩ་ཧཱུཾ། ལྷོ་ཕྱོགས་འཁོར་ལོ་རྩིབས་སྟེངས་ནས། །ལྷ་མོ་སྨུག་མོ་འོད་འཕྲོ་མ། སྐལ་ལྡན་བུ་ལ་དབང་བསྐུར་བས། །འཆི་མེད་ཚེ་དབང་ཐོབ་པར་ཤོག །ༀ་ཨ་ཡུ༴ ཨ་བྷི་ཥིཉྩ་ཧཱུཾ། ཧཱུཾ་ནུབ་ཕྱོགས་འཁོར་ལོའི་རྩིབས་སྟེངས་ནས། །ལྷ་མོ་དམར་མོའི་འོད་འཕྲོ་མ། །སྐལ་ལྡན་བུ་ལ་དབང་བསྐུར་བས། །འཆི་མེད་རིག་འཛིན་ཐོབ་པར་ཤོག །ༀ་ཨ་ཡུ༴ ཨ་བྷི་ཥིཉྩ་ཧཱུཾ། །ཧཱུཾ་བྱང་ཕྱོགས་འཁོར་ལོའི་རྩིབས་སྟེངས་ནས། །ལྷ་མོ་ལྗང་མོ་འོད་འཕྲོ་མ། །སྐལ་ལྡན་རྣམས་ལ་དབང་བསྐུར་བས། །འཆི་མེད་ཚེ་དབང་ཐོབ་བར་ཤོག །ༀ་ཨ་ཡུ༴ ཨ་བྷི་ཥིཉྩ་ཧཱུཾ། དབྱིངས་ཀྱི་ལྷ་མོ་བཞིའི་སྐུ་སྤྱི་བོར་བཞག་ལ། །འོག་མིན་དང་། མདུན་བསྐྱེད་དང་། བླ་མའི་ཐུགས་ཀ་ནས་བྱུང་བའི་དབྱིངས་ཀྱི་ལྷ་མོ་བཞིས་འཆི་མེད་བདུད་རྩིས་གང་བའི་བུམ་པ་སྤྱི་བོ་ནས་དབང་བསྐུར། དབྱིངས་ཀྱི་ལྷ་མོ་བཞི་ཐུགས་ཀར་ཐིམ་པར་སྒོམ་མཛོད་ཅིག །ཧཱུཾ་རྡོ་རྗེ་དབྱིངས་ཀྱི་དཀྱིལ་འཁོར་ནས། །ལྷ་མོ་དཀར་མོ་གཟི་བརྗིད་འབར། །སྐལ་ལྡན་རྣམས་ལ་དབང་བསྐུར་བས། །འཆི་མེད་ཚེ་དབང་ཐོབ་པར་ཤོག །ༀ་ཨཱཿཡུ་བྷི་དུ་ཛྙཱ་ན་བཛྲ་ས་མ་ཡེ༴ ཧཱུཾ་རིན་ཆེན་དབྱིངས་ཀྱི་དཀྱིལ་འཁོར་ནས། །ལྷ་མོ་སེར་མོ་གཟི་བརྗིད་འབར། །སྐལ་ལྡན་བུ་ལ་དབང་བསྐུར་བས། །འཆི་མེད་ཚེ་དབང་ཐོབ་པར་ཤོག །ༀ་ཨཱ་ཡུ༴ ཨ་བྷི་ཥིཉྩ་ཧཱུཾ། ཧཱུཾ་པདྨ་དབྱིངས་ཀྱི་དཀྱིལ་འཁོར་ནས། །ལྷ་མོ་དམར་མོ་གཟི་བརྗིད་འབར། །སྐལ་ལྡན་རྣམས་ལ་དབང་བསྐུར་བས། །འཆི་མེད་ཚེ་དབང་ཐོབ་པར་ཤོག །ༀ་ཨ་ཡུ༴ ཨ་བྷི་ཥིཉྩ་ཧཱུཾ། ཧཱུཾ་ལས་ཀྱི་རིགས་ཀྱི་དཀྱིལ་འཁོར་ནས། ལྷ་མོ་ལྗང་མོ་གཟི་བརྗིད་འབར། །སྐལ་ལྡན་རྣམས་ལ་དབང་བསྐུར་བས། །འཆི་མེད་རིག་འཛིན་ཚེ་དབང་ཐོབ་པར་ཤོག །ༀ་ཨཱ་ཡུ༴ ཨ་བྷི་ཥིཉྩ་ཧཱུཾ། ཁྲོ་བོ་བཅུའི་སྐུ་སྤྱི་བོར་བཞག་ལ། འོག་མིན་དང་། མདུན་བསྐྱེད་དང་། བླ་མའི་ཐུགས་ཀ་ནས་བྱོན་པའི། ཁྲོ་བོ་བཅུའི་ཕྱག་ནས་འཆི་མེད་ཚེའི་བདུད་རྩིས་གང་བའི་བུམ་པ་ཐོགས་ནས་སྤྱི་བོ་ནས་དབང་བསྐུར། ཁྲོ་བོ་བཅུའི་ཐུགས་ཀར་ཐིམ་པར་སྒོམ་མཛོད་ཅིག། ཧཱུཾ་ཤར་ཕྱོགས་འཁོར་ལོ་དཀར་པོའི་རྩིབས་སྟེངས་ནས། །ཁྲོ་བོ་ཆེན་པོ་རྣམ་པར་རྒྱལ་བ་ཡིས། །སྐལ་ལྡན་བུ་མཆོག་རྣམས་ལ་དབང་བསྐུར་བས། །འཆི་བ་མེད་པ་ཚེའི་དབང་ཐོབ་ཤོག །ༀ་ཨཱ་ཡུ་བྷི་ཏི་ཛྙཱ་ན་བཛྲ་ས་མ་ཡེ་ཧཱུཾ། ཨ་བྷི་ཥིཉྩ་ཧཱུཾ་། ཧཱུཾ་ཤར་ལྷོ་འཁོར་ལོ་དཀར་པོའི་རྩིབས་སྟེངས་ནས། ཁྲོ་བོ་ཆེན་པོ་དབྱུག་པ་སྔོན་པོ་ཡིས། །སྐལ་ལྡན་བུ་མཆོག་རྣམས་ལ་དབང་བསྐུར་བས། །འཆི་བ་མེད་པ་ཚེའི་དབང་ཐོབ་ཤོག །ༀ་ཨཱ་ཡུ༴ ཨ་བྷི་ཥིཉྩ་ཧཱུཾ་། ཧཱུཾ་ལྷོ་ཕྱོགས་འཁོར་ལོ་དཀར་པོའི་རྩིབས་སྟེང་ནས། །ཁྲོ་བོ་ཆེན་པོ་གཤིན་རྗེ་གཤེད་པོ་ཡིས། །སྐལ་ལྡན་བུ་མཆོག་རྣམ་ལ་དབང་བསྐུར་བས། །འཆི་བ་མེད་པ་ཚེའི་དབང་ཐོབ་ཤོག །ༀ་ཨཱ་ཡུ༴ ཨ་བྷི་ཥིཉྩ་ཧཱུཾ། ཧཱུཾ་ལྷོ་ནུབ་འཁོར་ལོ་དཀར་པོའི་རྩིབས་སྟེངས་ནས། ཁྲོ་བོ་ཆེན་པོ་མི་གཡོ་མགོན་པོ་ཡིས། །སྐལ་ལྡན་བུ་མཆོག་རྣམས་ལ་དབང་བསྐུར་བས། །འཆི་བ་མེད་པ་ཚེའི་དབང་ཐོབ་ཤོག །ༀ་ཨ་ཡུ༴ ཨ་བྷི་ཥིཉྩ་ཧཱུཾ། ཧཱུཾ་ནུབ་ཕྱོགས་འཁོར་ལོ་དཀར་པོའི་རྩིབས་སྟེངས་ནས། །ཁྲོ་བོ་ཆེན་པོ་རྟ་མགྲིན་རྒྱལ་པོ་ཡིས། སྐལ་ལྡན་བུ་མཆོག་རྣམས་ལ་དབང་བསྐུར་བས། །འཆི་བ་མེད་པའི་ཚེ་དབང་ཐོབ་ཤོག །ༀ་ཨཱ་ཡུ༴ ཨ་བྷི་ཥིཉྩ་ཧཱུཾ། ཧཱུཾ་ནུབ་བྱང་འཁོར་ལོ་དཀར་པོའི་རྩིབས་སྟེངས་ནས། །ཁྲོ་བོ་ཆེན་པོ་གཞན་གྱིས་མི་ཐུབ་པ། སྐལ་ལྡན་བུ་མཆོག་རྣམས་ལ་དབང་བསྐུར་བས། །འཆི་བ་མེད་པ་ཚེའི་དབང་ཐོབ་ཤོག །ༀ་ཨཱ་ཡུ༴ ཨ་བྷི་ཥིཉྩ་ཧཱུཾ། ཧཱུཾ་བྱང་ཕྱོགས་འཁོར་ལོ་དཀར་པོའི་རྩིབས་སྟེངས་ནས། །ཁྲོ་བོ་ཆེན་པོ་བདུད་རྩི་འཁྱིལ་བ་ཡིས། །སྐལ་ལྡན་བུ་མཆོག་རྣམས་ལ་དབང་བསྐུར་བས། །འཆི་བ་མེད་པ་ཚེ་ཡི་དབང་ཐོབ་ཤོག །ༀ་ཨཱ་ཡུ༴ ཨ་བྷི་ཥིཉྩ་ཧཱུཾ། ཧཱུཾ་བྱང་ཤར་འཁོར་ལོ་དཀར་པོའི་རྩིབས་སྟེང་ནས། ཁྲོ་བོ་ཁམས་གསུམ་རྣམ་པར་རྒྱལ་བ་ཡིས། །སྐལ་ལྡན་བུ་མཆོག་རྣམས་ལ་དབང་བསྐུར་བས། །འཆི་བ་མེད་པ་ཚེའི་དབང་ཐོབ་ཤོག །ༀ་ཨཱ་ཡུ༴ ཨ་བྷི་ཥིཉྩ་ཧཱུཾ། །ཧཱུཾ་འཁོར་ལོ་དཀར་པོའི་སྟེངས་ཕྱོགས་ནས། འཁོར་ལོ་ཆེན་པོ་ཧཱུཾ་ཆེན་ཀ་ར་ཡིས། །སྐལ་ལྡན་བུ་མཆོག་རྣམས་ལ་དབང་བསྐུར་བ། །འཆི་བ་མེད་པ་ཚེ་ཡིས་དབང་ཐོབ་ཤོག །ༀ་ཨ་ཡུ༴ ཨ་བྷི་ཥིཉྩ་ཧཱུཾ། ཧཱུཾ་འཁོར་ལོ་དཀར་པོའི་འོག་ཕྱོགས་ནས། །ཁྲོ་བོ་ཆེན་པོ་སྟོབས་པོ་ཆེན་པོ་ཡིས། །སྐལ་ལྡན་བུ་མཆོག་རྣམས་ལ་དབང་བསྐུར་བས། ། འཆི་བ་མེད་པ་ཚེའི་དབང་ཐོབ་ཤོག །ༀ་ཨ་ཡུ༴ ཨ་བྷི་ཥིཉྩ་ཧཱུཾ། སྒོ་མ་བཞིའི་སྐུ་སྤྱི་བོར་བཞག་ལ། འོག་མིན་དང་། མདུན་བསྐྱེད་དང་། བླ་མའི་ཐུགས་ཀ་ཕྱོགས་ནས་བྱོན་པའི་སྒོ་མ་བཞིའི་ཕྱག་ན་འཆི་བ་མེད་པའི་བདུད་རྩིས་དཀང་བའི་བུམ་བས་སྤྱི་བོར་ནས་དབང་བསྐུར་། །སྒོ་མ་བཞི་ཐུགས་ཁར་ཐིམ་པར་སྒོམས་མཛོད་ཅིག །ཧཱུྃ། ཤར་སྒོ་ཟླ་བའི་གདན་སྟེངས་ནས། །སྟག་གདོང་དཀར་མོ་ལྕགས་ཀྱུ་མས། །སྐལ་ལྡན་བུ་ལ་དབང་བསྐུར་བས། །འཆི་མེད་ཚེ་དབང་ཐོབ་པར་ཤོག །ༀ་ཨ་ཡུ་བྷི་དུ་ཛྙཱ་ན་ཚེ་བྷྲུྂ་ཎི་ཛཿ ཨ་བྷི་ཥིཉྩ་ཧཱུཾ། ཧཱུཾ་ལྷོ་སྒོ་ཟླ་བའི་གདན་སྟེངས་ནས། །ཕག་གདོང་སེར་མོ་ཚེ་ཞགས་མས། །སྐལ་ལྡན་བུ་ལ་དབང་བསྐུར་བས། །འཆི་མེད་ཚེ་དབང་ཐོབ་པར་ཤོག །ༀ་ཨ་ཡུ༴ ཨ་བྷི་ཥིཉྩ༴ ཧཱུཾ་ནུབ་སྒོ་ཟླ་བའི་གདན་སྟེངས་ནས། །ཁ་གདོང་དམར་མོ་ལྕགས་སྒྲོགས་མས། །སྐལ་ལྡན་རྣམས་ལ་དབང་བསྐུར་བས། །འཆི་མེད་ཚེ་དབང་ཐོབ་པར་ཤོག །ༀ་ཨ་ཡུ༴ ཨ་བྷི་ཥིཉྩ་ཧཱུཾ། ཧཱུཾ་བྱང་སྒོ་ཟླ་བའི་གདན་སྟེངས་ནས། །འུག་གདོང་ལྗ་ཁུ་དྲིལ་འཁྲོལ་མས། །སྐལ་ལྡན་རྣམས་ལ་དབང་བསྐུར་བས། །འཆི་མེད་ཚེ་དབང་ཐོབ་པར་ཤོག །ༀ་ཨ་ཡུ་བྷི་དུ་ཛྙཱ་ན་བཛྲ་ས་མ་ཡེ་ཧཱུཾ། ལུས་ཀྱི་སྡིག་པ་དང་། །ལམ་བསྐྱེད་རིམ་བྷེཾེཾ་པ་ལ་དབང་། །སྤྲུལ་སྐུའི་ས་བོན་རྒྱུད་ལ་སྐྱེ་བའི་དབང་དམ་པ་ཐོབ་པར་གྱུར་ཅིག །དེས་བུམ་པའི་དབང་དེ་སོང་ནས། །རྡོ་རྗེ་རྩེ་མོའི་རྒྱུད་ལས། ༀ་ནི་བཀྲ་ཤིས་དཔལ་དང་ལྡན། །དམ་བཅའ་བ་དང་མཆོག་གཏེར་དང་། ཞེས་དང་། རིག་བྱེད་ཀྱི་གཞུང་ལས་ཀྱང་། ཐིག་ལེ་ཨ་ཐ་ཡི་གེ་ༀ། །ཡི་གེ་གཉིས་པོ་སྔོན་ཚང་བའི། །ཁུར་ཚོས་བརྡོལ་ལས་བྱུང་བས་ན། །དེས་ན་དེ་དག་བཀྲ་ཤིས་བརྗོད། ཅེས་སོ། །གཉིས་པ་གསང་དབང་ནི། བདུན་རྩི་ལྕེ་ལ་བཞག་ལ། ༈ འོ་ཁྱེད་རང་རྣམས་ཀྱི་སྤྱི་བོར་ༀ་དཀར་པོ་རེ་རེ་བྷཻ། དེ་ལས་འོད་ཟེར་འཕྲོས་པས། འོད་དཔག་དང་། མདུན་བསྐྱེད་དང་། བླ་མའི་སྤྱི་བོར་ཕོག །བྱིན་གྱིས་བརླབ་ནུས་མཐུ་ཐམས་ཅད་ཚུར་འདུས། །ཁྱེད་རང་རྣམས་ཀྱི་སྤྱི་བོའི་ༀ་ལ་ཐིམ། །འོད་དུ་ཞུ་བ་ལས་རྣམ་པར་སྣང་མཛད་ཡབ་ཡུམ་དུ་གྱུར་པས་སྐུའི་གསང་དབང་བསྒོམ་ཅིག །སྤྱི་གཙུག་ཟླ་བའི་དཀྱིལ་འཁོར་དུ་ཡི་གེ་ༀ་ནི་རབ་ཏུ་བསྒོམ། །ཡི་གེ་ༀ་གྱི་འཕྲོ་འདུ་ལས། །རྣམ་པར་སྣང་མཛད་ཡབ་ཡུམ་བྷཻ། །དེ་ཡི་ཆེ་བའི་བྱིན་རླབས་ཀྱིས། །ཚེ་ཡང་རབ་ཏུ་བརྟན་པ་དང་། །དབང་ཡང་རབ་དུ་བསྐུར་བར་བྱ། །ༀ་བྷྲཱུཾ་ཨ་ཡུ་ཤེ་ༀ། ཁྱེད་རང་རྣམས་ཀྱི་མགྲིན་པར་པདྨའི་སྟེང་དུ་ཨ་དམར་པོ་རེ་རེ་བསྒོམ། དེ་ལས་འོད་འཕྲོས་པས། འོད་དཔག་ཏུ་མེད་དང་། མདུན་བསྐྱེད་དང་། བླ་མའི་མགྲིན་པར་ཕོག །བྱིན་རླབས་ནུས་མཐུ་ཐམས་ཅད་ཚུར་འདུས། །ཁྱེད་རང་རྣམས་ཀྱི་མགྲིན་པའི་ཨ་ལ་ཐིམ། །འོད་དུ་ཞུ་བ་ལས་སྣང་བ་མཐའ་ཡས་ཡབ་ཡུམ་དུ་གྱུར་པས །གསུང་གི་གསང་དབང་ཐོབ་པར་བསྒོམས་ཅིག །ལྕེ་པདྨ་འདབ་བརྒྱད་ལ་ཡི་གེ་ཨ་ནི་རབ་ཏུ་བསྒོམ། ཡི་གེ་ཨ་ཡི་འཕྲོ་འདུ་ལས། །སྣང་བ་མཐའ་ཡས་ཡབ་ཡུམ་བསྒོམས། །དེ་ཡི་ཆེ་བའི་བྱིན་རླབས་ཀྱིས། །ཚེ་ཡང་རབ་ཏུ་བརྟན་པ་དང་། །དབང་ཡང་རབ་ཏུ་བསྐུར་བར་བྱ། །ཨ་བྷྲཱུཾ་པདྨ་ཨ་ཡུ་ཨ། །འོ་ཁྱེད་རང་རྣམས་ཀྱི་ཐུགས་ཀར། །ཉི་མའི་སྟེང་དུ་ཧཱུཾ་སྔོན་པོ་རེ་རེ་བྷཻ། དེ་ལས་འོད་ཟེར་འཕྲོས་པས། འོད་དཔག་མེད་དང་། མདུན་བསྐྱེད་དང་། བླ་མའི་ཐུགས་ཕོག །བྱིན་རླབས་ནུས་མཐུ་ཐམས་ཅད་བསྡུས་ནས་ཁྱེད་རང་རྣམས་ཀྱིས། ཐུགས་ཀའི་ཧཱུཾ་ལ་ཐིམ། འོད་དུ་ཞུ་བ་ལས། རྡོ་རྗེ་སེམས་དཔའ་ཡབ་ཡུམ་དུ་གྱུར་པ་ལས་ཐུགས་ཀྱི་གསང་དབང་ཐོབ་པར་བསྒོམས་ཤིག །ཐུགས་ཀར་ཉི་མའི་དཀྱིལ་འཁོར་དུ། །ཡི་གེ་ཧཱུཾ་ནི་རབ་ཏུ་བསྒོམ། །ཡི་གེ་ཧཱུཾ་གིས་འཕྲོ་འདུ་ལས། །རྡོ་རྗེ་སེམས་དཔའ་ཡབ་ཡུམ་བསྒོམ། །དེའི་ཆེ་བའི་བྱིན་རླབས་གྱིས། །ཚེ་ཡང་རབ་ཏུ་བརྟན་པ་དང་། །དབང་ཡང་རབ་དུ་བསྐུར་བར་བྱ། །ཧཱུཾ་བྷྲུཾ་བཛྲ་ཨ་ཡུ་ཧཱུཾ། ཁྱེད་རང་རྣམས་ཀྱི་ལྟེ་བ་ཏྲཾ་སེར་པོ་རེ་རེ་བསྒོམ་དེ་ལས་འོད་ཟེར་འཕྲོ་བས། འོད་དཔག་མེད་དང། མདུན་བསྐྱེད་དང་། བླ་མའི་ལྟེ་བ་ཕོག །བྱིན་རླབས་ནུས་མཐུ་ཐམས་ཅད་བསྡུས་ནས། ཁྱེད་རང་རྣམས་ཀྱི་ལྟེ་བའི་ཏྲཾ་ལ་ཐིམ། འོད་དུ་ཞུ་བ་ལས། རིན་ཆེན་འབྱུང་ལྡན་ཡབ་ཡུམ་དུ་གྱུར་པས་ཡོན་ཏན་གྱི་གསང་དབང་ཐོབ་པར་བསྒོམས་ཤིག །ལྟེ་བ་རིན་ཆེན་ཟུར་བརྒྱད་ལ། །ཡི་གེ་ཏྲཾ་ནི་རབ་ཏུ་བསྒོམ། །ཡི་གེ་ཏྲཾ་གི་འཕྲོ་འདུ་ལས། རིན་ཆེན་འབྱུང་གནས་ཡབ་ཡུམ་བསྒོམ། །དེ་ཡི་ཆེ་བའི་བྱིན་རླབས་ཀྱིས། །ཚེ་ཡང་རབ་དུ་བརྟན་པ་དང་། །དབང་ཡང་རབ་ཏུ་བསྐུར་བར་བྱ། །ཏྲཾ། བྷྲུཾ། རཏ་ན། ཨ་ཡུ་ཏྲཾ། འོ་བྱང་སེམས་བདུད་རྩིའི་ལྷག་མ་ཡར་ལུད་པ་ལས། །རྣ་ལྟག་གཡོན་དུ་དོན་ཡོད་གྲུབ་པས་དབུ་བརྒྱན། །དེའི་སྐུ་ལུས་ལ་རལ་གྲིའི་ཆར་བབ་པས། །ལུས་རལ་གྲིའི་གོ་ཁྲབ་དང་ཞུ་ལུགས་སུ་གྱུར་པར་བསྒོམས། །ཨིན་ཏྲ་ནི་ལའི་མདོག་འདྲ་ལས། །གཡོན་དུ་དོན་ཡོད་གྲུབ་པ་ཧ། །ཅིས་ཀྱང་མི་ཆོད་མི་ཤིག་པའི། །རལ་གྲིའི་གོ་ཆ་བླ་ན་མེད། །རལ་གྲིའི་གོ་ཆས་བསྲུངས་དུ་གསོལ། །ལུས་ལ་གོ་སྐོན་སེམས་ལ་དབང་བསྐུར་བས། བླ་ན་མེད་པར་བསྲུངས་པར་ཤོག །རལ་གྲི་བསྐོར་བ་ལྟ་བུ། ཕྲིན་ལས་ཀྱི་ཚེ་དང་ལྡན་པར་གྱུར་ཅིག ། ༈ །འོ་ཁྱེད་རང་རྣམས་ཀྱི་གསང་གནས་སུ་ཧ་ལྗང་ཁུ་རེ་རེ་བསྒོམས། དེ་ལས་འོད་ཟེར་འཕྲོས་པས། །འོད་དཔག་མེད་དང་། །མདུན་བསྐྱེད་དང་། བླ་མའི་གསང་གནས་སུ་ཕོག །བྱིན་རླབས་ནུས་མཐུ་ཐམས་ཅད་བསྡུས་ནས། །ཁྱེད་རང་རྣམས་ཀྱི་གསང་གནས་ཀྱི་ཧ་ལ་ཐིམ། །འོད་དུ་ཞུ་བ་ལས། །དོན་ཡོད་གྲུབ་པ་ཡབ་ཡུམ་དུ་གྱུར་པས། །འཕྲིན་ལས་ཀྱི་གསང་དབང་ཐོབ་པར་གྱུར་ཅིག །གསང་གནས་རྒྱ་གྲམ་དཀྱིལ་འཁོར་དུ། །ཡི་གེ་ཧ་ནི་རབ་ཏུ་བསྒོམ། །ཡི་གེ་ཧ་ཡིས་འཕྲོ་འདུ་ལས། །དོན་ཡོད་གྲུབ་པ་ཡབ་ཡུམ་བསྒོམ། །དེའི་ཆེ་བའི་བྱིན་རླབས་ཀྱིས། །ཚེ་ཡང་རབ་ཏུ་བརྟན་པ་དང་། །དབང་ཡང་རབ་ཏུ་བསྐུར་བར་བྱ། །ཧ་བྷྲཱུཾ་ཀར་མ་ཨ་ཡུ་ཧ། དེ་ནས་གསང་བའི་དབང་ཐོབ། །ངག་གིས་སྒྲིབ་པ་དང་། མཐར་ཐུག་ལོངས་སྤྱོད་རྫོགས་པའི་སྐུ་ཐོབ། །གསུམ་པ་ཤེས་རབ་ཡེ་ཤེས་ཀྱི་དབང་ནི། ༈ འོ་ཁྱེད་རང་རྣམས་ཀྱི་སྤྱི་བོར་རྣམ་པར་སྣང་མཛད་ཡབ་ཡུམ་སྦྱོར་བ་མཛད་པའི་བྱང་ཆུབ་སེམས་ཀྱི་བདུད་རྩིས་ལུས་ཕྱི་ནང་གི་སྡིག་པ་དག །ལུས་ཀྱི་ཕྱི་ནང་འཆི་མེད་ཚེའི་བདུད་རྩིས་གང་ལ། བ་སྤུའི་བུ་ག་ཐམས་ཅད་དུ། འཁོར་ལོ་ཟིལ་པ་ཕྲོམ་གྱིས་གྱུར་པར་བསྒོམ་མཛོད་ཅིག །སྤྱི་གཙུག་ཟླ་བའི་དཀྱིལ་འཁོར་དུ། །བཅོམ་ལྡན་རྣམ་པར་སྣང་མཛད་དང་། །ཀུན་ཏུ་བཟང་མོ་གཉིས་མེད་འཁྲིལ། །གཉིས་མེད་ཐུགས་ཀྱི་དཀྱིལ་འཁོར་ནས། །བདག་དང་རྒྱུ་སྦྱོར་ཡོན་བདག་ལ། །འཆི་མེད་ཚེའི་དབང་བསྐུར་རོ། །ༀ་བུདྡྷ་བེ་རོ་ཙ་ན་ༀ། ཨ་བྷི་ཥིཉྩ་ཧཱུཾ། འོ་བྱང་ཆུབ་བདུད་རྩིའི་ཆུ་ཡར་ལུད་པ་ལས། ཁྱེད་རང་རྣམས་ཀྱི་སྤྱི་བོར། རྣམ་པར་སྣང་མཛད་ཀྱི་དབུ་བརྒྱན། དེའི་སྐུ་ལུས་ལས་འཁོར་ལོའི་ཚོགས་འཕྲོས་པས། ལུས་འཁོར་ལོའི་གོ་ཁྲབ་ཞུ་ལབས་དང་། །ཞུ་ལུབས་སུ་གྱུར་པར་བསྒོམ་མཛོད་ཅིག །གསེར་གྱི་རི་བོ་ལྟ་བུ་ལ། །སྤྱི་བོར་རྣམ་པར་སྣང་མཛད་ༀ། །ཅིས་ཀྱང་མི་ཆོད་མི་ཤིགས་པའི། །འཁོར་ལོའི་གོ་ཆ་བླ་ན་མེད། །འཁོར་ལོའི་གོ་ཆ་བསྲུངས་དུ་གསོལ། །ལུས་ལ་གོ་སྐོན་སེམས་ལ་དབང་བསྐུར་བས། །བླ་ན་མེད་པར་བསྲུངས་བར་ཤོག །འཁོར་ལོ་བསྐོར་བ་ལྟ་བུའི་སྐུ་ཚེ་དང་ལྡན་པར་གྱུར་ཅིག །འོ་ཁྱེར་རང་རྣམས་ཀྱི་མགྲིན་པའི་སྣང་བ་མཐའ་ཡས་ཡབ་ཡུམ་སྦྱོར་བ་མཛད་བའི་བྱང་ཆུབ་སེམས་ཀྱི་བདུད་རྩིས། ལུས་ཕྱི་ནང་གི་སྡིག་པ་དང་། ཚེའི་བར་ཆད་དག །ལུས་ནང་འཆི་མེད་ཚེའི་བདུད་རྩིས་གང་། ཕྱིར་བ་སྤུའི་བུ་ག་ཐམས་ཅད་པདྨའི་ཟིལ་པ་ཕྲོམ་པར་གྱུར་པར་བསྒོམས་ཤིག །ལྕེ་ཡི་པད་མ་འདབ་བརྒྱད་ལ། །བཅོམ་ལྡན་སྣང་བ་མཐའ་ཡས་དང་། །ན་བཟའ་དཀར་མོ་གཉིས་མེད་འཁྲིལ། །གཉིས་མེད་ཐུགས་ཀྱི་དཀྱིལ་འཁོར་ནས། །བདག་དང་ཡོན་གྱི་བདག་པོ་ལ། །འཆི་མེད་ཚེ་ཡི་དབང་བསྐུར་རོ། །ༀ་པདྨ་ཨ་མི་དྷེ་ཝ་ཧྲཱིིཿ ཨ་བྷི་ཥིཉྩ་ཧཱུཾ། འོ་བྱང་སེམས་བདུད་རྩིའི་ལྷག་མ་ཡར་ལུད་པ་ལས། །ཁྱེད་རང་རྣམས་ཀྱི་ལྟག་པར་སྣང་བ་མཐའ་ཡས་ཀྱི་དབུ་བརྒྱན། དེའི་སྐུ་ལུས་ལ་པདྨའི་ཆར་བབས་པས། ལུས་པདྨའི་ཞུ་ལབས་དང་། ཞུ་ལུབས་སུ་གྱུར་པར་བསྒོམས་ཅིག །བྱི་རུའི་སྡོང་པོ་ལྟ་བུ་ལ། །རྒྱབ་དུ་སྣང་བ་མཐའ་ཡས་ལ། །ཅིས་ཀྱང་མི་ཆོད་མི་ཤིགས་པའི། །པདྨའི་གོ་ཆ་བླ་ན་མེད། །པདྨའི་གོ་ཆ་བསྲུངས་དུ་སོལ། །ལུས་ལ་གོ་སྐོན་སེམས་ལ་དབང་བསྐུར་བས། །བླ་ན་མེད་པར་བསྲུངས་བར་ཤོག །པདྨ་བརྩེགས་པ་ལྟ་བུ་གསུང་གི་ཚེ་དང་ལྡན་པར་གྱུར་ཅིག །འོ་ཁྱེད་རང་རྣམས་ཐུགས་ཀའི་རྡོ་རྗེ་སེམས་དཔའ་ཡབ་ཡུམ་སྦྱོར་བ་མཛད་པའི་བྱང་ཆུབ་སེམས་ཀྱི་བདུད་རྩིས་ལུས་ཕྱི་ནང་གི་སྡིག་སྒྲིབ་དང་ཚེའི་བར་ཆད་དག་ནས། ལུས་ཀྱི་ནང་འཆི་མེད་ཚེའི་བདུད་རྩིས་གང་། ཕྱི་བ་སྤུའི་བུ་ག་ཐམས་ཅད་རྡོ་རྗེ་ཟིལ་པས་ཁྲོམ་གྱིས་གྱུར་པར་བསྒོམ། །ཐུགས་ཁ་ཉི་མའི་དཀྱིལ་འཁོར་ནས། །བཅོམ་ལྡན་རྡོ་རྗེ་སེམས་དཔའ་དང་། །སངས་རྒྱས་སྤྱན་མ་གཉིས་མེད་འཁྲིལ། །གཉིས་མེད་ཐུགས་གྱི་དཀྱིལ་འཁོར་ནས། །བདག་དང་ཡོན་གྱི་བདག་པོ་ལ། །འཆི་མེད་ཚེའི་དབང་བསྐུར་རོ། །ༀ་བཛྲ་ས་ཏྭ་ཧཱུཾ། ཨ་བྷི་ཥིཉྩ་ཧཱུཾ། འོ་བྱང་སེམས་བདུད་རྩི་དེའི་ལྷག་མ་ཡར་ལུད་པ་ལས། དཔྲལ་བར་རྡོ་རྗེ་སེམས་དཔས་དབུ་བརྒྱན། དེའི་སྐུ་ལུས་ལ་རྡོ་རྗེའི་ཆར་བབས་པས། ལུས་རྡོ་རྗེའི་གོ་ཁྲབ་ཞ་ལུབས་དང་ཞུ་ལུབས་སུ་གྱུར་པར་བསྒོམས་ཤིག །སྐར་མ་རྒྱལ་ཤར་ལྟ་བུ་ལ། །དཔྲལ་བར་རྡོ་རྗེ་སེམས་དཔའ་ཧཱུཾ། །ཅིས་ཀྱང་མི་ཆོད་མི་ཤིགས་པའི། །རྡོ་རྗེའི་གོ་ཆ་བླ་ན་མེད། །རྡོ་རྗེའི་གོ་ཆས་བསྲུང་དུ་གསོལ། །ལུས་ལ་གོ་བསྐོན་སེམས་ལ་དབང་བསྐུར་བས། །བླ་ན་མེད་པར་བསྲུངས་བར་ཤོག །རྡོ་རྗེ་གསོར་བ་ལྟ་བུ་ཐུགས་ཀྱི་ཚེ་དང་ལྡན་པར་གྱུར་ཅིག །འོ་ཁྱེད་རང་རྣམས་ཀྱི་ལྟེ་བའི་རིན་ཆེན་འབྱུང་གནས་ཡབ་ཡུམ་སྦྱོར་པ་མཛད་པའི། །བྱང་ཆུབ་སེམས་ཀྱི་བདུད་རྩིས་ལུས་ཕྱི་ནང་གི་སྡིག་སྒྲིབ་དག །ཚེའི་བར་ཆད་དང་། ལུས་ཀྱི་ནང་བདུད་རྩིས་གང་། །ལུས་ཀྱི་ཕྱི་བ་སྤུའི་བུ་ག་ཐམས་ཅད་རིན་པོ་ཆེའི་ཟིལ་བ་ཕྲོམ་གྱི་གྱུར་པར་བསྒོམས་ཤིག །ལྟེ་བ་རིན་ཆེན་ཟུར་བརྒྱད་ལ། །བཅོམ་ལྡན་རིན་ཆེན་འབྱུང་ལྡན་དང་། མ་མ་ཀི་དང་གཉིས་མེད་འཁྲིལ། །གཉིས་མེད་ཐུགས་ཀྱི་དཀྱིལ་འཁོར་ནས། །བདག་དང་ཡོན་གྱིས་བདག་པོ་ལ། །འཆི་མེད་ཚེ་ཡི་དབང་བསྐུར་རོ། །རཏ་ན་སྭ་བྷ་ཝ་ཏྲཾ། ཨ་བྷི་ཥིཉྩ་ཧཱུཾ། འོ་བྱང་སེམས་བདུད་རྩིའི་ལྷག་མ་ཡར་ལུད་པ་ལས། རྣ་ལྟག་གཡས་སུ། རིན་ཆེན་འབྱུང་ལྡན་གྱི་དབུ་བརྒྱན། དེའི་སྐུ་ལུས་ལ་རིན་པོ་ཆེའི་ཆར་བབས་པས། ལུས་རིན་པོ་ཆེའི་ཞ་ལུབས་དང་། །ཞུ་ལུབས་སུ་གྱུར་པར་བསྒོམས་ཤིག ། ༈ བཻཌཱུརྱའི་མདོག་འདྲ་ལས། །གཡས་སུ་རིན་ཆེན་འབྱུང་ལྡན་ཏྲཾ། །ཅིས་ཀྱང་མི་ཆོད་མི་ཤིགས་པའི། །རིན་ཆེན་གོ་ཆ་བླ་ན་མེད། །རིན་ཆེན་གོ་ཆ་བསྲུངས་དུ་གསོལ། །ལུས་ལ་གོ་བསྐོན་སེམས་ལ་དབང་བསྐུར་བས། །བླ་ན་མེད་པ་བསྲུངས་བར་ཤོག །རིན་ཆེན་འབར་བ་ལྟ་བུ་ཡོན་ཏན་གྱི་ཚེ་དང་ལྡན་པར་གྱུར་ཅིག །འོ་ཁྱེད་རང་རྣམས་ཀྱི་གསང་གནས་དོན་ཡོད་གྲུབ་པ་ཡབ་ཡུམ་སྦྱོར་བ་མཛད་པའི་བྱང་སེམས་ཀྱིས་བདུད་རྩིས། ལུས་ཕྱི་ནང་གི་སྡིག་སྒྲིབ་དང་། །ཚེ་ཡི་བར་ཆད་ཐམས་ཅད་དག་ནས། །ལུས་ཀྱི་ནང་བདུད་རྩིས་གང། །ལུས་ཀྱི་ཕྱི་བ་སྤུའི་བུ་ག་ཐམས་ཅད་དུ། །རྒྱ་གྲམ་ཟིལ་པ་ཕྲོམ་གྱིས་གྱུར་པར་བསྒོམས་ཤིག །གསང་གནས་རྒྱ་གྲམ་དཀྱིལ་འཁོར་དུ། །བཅོམ་ལྡན་དོན་ཡོད་གྲུབ་པ་དང་། །ལྷ་མོ་སྒྲོལ་མ་གཉིས་མེད་འཁྲིལ། །གཉིས་མེད་ཐུགས་ཀྱི་དཀྱིལ་འཁོར་ནས། །བདག་དང་ཡོན་གྱི་བདག་པོ་ལ། །འཆི་མེད་ཚེའི་དབང་བསྐུར་རོ། །ཀར་མ་ཨ་མོ་ག་སིདྡྷི་ཧ། ཨ་བྷི་ཥིཉྩ་ཧཱུཾ། དེ་ནས་གཏོར་མ་སྤྱི་བོར་བཞག་ལ། འོ་གཏོར་མ་འདི་དང་གཉིས་སུ་མེད་པར། མགོན་པོ་ཚེ་དཔག་ཏུ་མེད་པའི་ལྷ་ཚོགས་བཞུགས་པར་བསྒོམས་ཅིག །དེའི་སྐུ་ལུས་ལ་ཟག་མེད་ཡེ་ཤེས་ཀྱི་བདུད་རྩི་འབྱུང་། ཁྱེད་རང་རྣམས་ཀྱི་སྤྱི་བོ་ནས་བབས། ལུས་ཕྱི་ནང་གི་སྡིག་སྒྲིབ་དག་ནས། རང་གི་ལུས་ཀྱི་ནང་ཟག་མེད་ཡེ་ཤེས་ཀྱི་བདུད་རྩིས་གང་བ། གང་ནས་འཆི་མེད་ཚེ་ཡི་དངོས་གྲུབ་ཐོབ་པར་བསྒོམས་ཤིག །སངས་རྒྱས་ཀུན་གྱི་ཡེ་ཤེས་ཚེ་དཔག་དུ་མེད་པའི་འོད་དང་ལྡན། རིགས་མཆོག་ཕྱག་རྒྱ་ལྔ་ལྡན་པའི། ཁམས་གསུམ་བདག་པོར་དབང་བསྐུར་རོ། །བྷ་ལིང་ཏ་ཨ་བྷི་ཥིཉྩ་ཧཱུཾ། །མེ་ཏོག་གཏོར་ཞིང་ཡེ་དྷརྨ་བརྗོད། བུམ་ཆུ་བླུད་ལ། སྐྱོད་པས་མི་ཐུབ་མི་གཡོ་ཚེའི་རང་བཞིན་ལ། །སྤྲོས་པས་ཁམས་གསུམ་ཀུན་གྱི་བཀྲག་དང་ལྡན། །བརྟན་པས་མི་གཡོ་རྡོ་རྗེ་ལྷུན་པོ་འདྲ། །བཅིངས པས་མི་ཤིག་རྡོ་རྗེ་ལུ་གུ་རྒྱུད། ཚེ་བུམ་རིན་ཆེན་གཞལ་ཡས་ཁང་དུ་བྱིན་རླབས་པས། །ཐུགས་ཀྱི་དཔལ་བེའུ་ལྟ་བུར་འགྲུབ་བར་ཤོག །ན་མོ་དེ་བཞིན་གཤེགས་པའི་རིགས་དང་། རྡོ་རྗེའི་རིགས་དང་། རིན་ཆེན་རིགས་དང་། །པདྨའི་རིགས་དང་། ལས་ཀྱི་རིགས་དང་། རིགས་ལྔའི་མགོན་པོ་ནས་བྱིན་གྱིས་བརླབས་ཀྱི་ཡེ་ཤེས་ཚེའི་རང་བཞིན་གསོ་བྱེད་ཚེའི་བཅུད། ཡོན་ཏན་སྲོག་གི་འཁོར་ལོ་ལུས་སེམས་མཐུན་པའི་དབྱིངས། སྨན་མཆོག་སེམས་ཀྱི་བརྒྱན། བདུད་རྩི་སྨན་གྱི་རིལ་བུ། ནད་བཞི་བརྒྱ་རྩ་བཞི་སེལ་བར་བྱེད་པ། ལས་དང་ཉོན་མོངས་པའི་གནས་ནས་འདྲེན་པར་བྱེད་བའི། འཆི་མེད་ཚེ་ཡི་དངོས་གྲུབ་འདི་གསོལ་བས། འཁོར་ལོ་བསྐོར་བ་ལྟ་བུའི་སྐུའི་ཚེ་དང་ལྡན་པར་གྱུར་ཅིག །པདྨ་བརྩེགས་པ་ལྟ་བུ་གསུང་གི་ཚེ་དང་ལྡན་པར་གྱུར་ཅིག །རྡོ་རྗེ་གསོར་བ་ལྟ་བུ་ཐུགས་ཀྱི་ཚེ་དང་ལྡན་པར་གྱུར་ཅིག །རིན་ཆེན་འབར་པ་ལྟ་བུར་ཡོན་ཏན་གྱི་ཚེ་དང་ལྡན་པར་གྱུར་ཅིག །རལ་གྲི་བསྐོར་བ་ལྟ་བུར་འཕྲིན་ལས་ཀྱི་ཚེ་དང་ལྡན་པར༴ སྐྱེ་ཤི་མེད་པ་ཚེའི་གཡུང་དྲུང་ཐོབ་པར་གྱུར་ཅིག །བགེགས་དང་ལོག་འདྲེན་གང་གིས་ཀྱང་མི་ཚུགས་པར་གྱུར་ཅིག །ཚེ་དབང་རྡོ་རྗེ་བཞིན་མི་འགྱུར་བར་གྱུར༴ ལུས་ངག་ཡིད་གསུམ་རྡོ་རྗེ་མི་ཕྱེད་པའི་དབང་དམ་པ་ཐོབ་པར་གྱུར་ཅིག །རྡོ་རྗེ་སྙིང་པོ་ལྟར་སྲ་ཞིང་འཁྲེག་པར་གྱུར་ཅིག༴ ཚེ་ལ་མུན་པ་དང་། བདུད་དང་། དགྲ་དང་། སྲི་ཅན་དང་། འབྱུང་བོ་དང་། །བྱད་ལྟེམས་དང་། གནོད་བྱེད་གང་གིས་ཀྱང་མི་ཚུགས་པར་གྱུར་ཅིག །ༀ་ཨ་ཡུ་བྷི་དུ་ཛྙཱ་ན། ཨ་ལ་ལ་ཧོ། རཀྵ་རཀྵ་སྭཱ་ཧཱ་བརྗོད་བླ་མའི་སྐུ་གསལ་བར་བསྒོམ་དུ་བཞུགས་ལ། སྤྱོད་པས་མི་ཐུབ་ཚེའི་རང་བཞིན་ལ། །ཅེས་སོགས་དང་། རྡོ་རྗེ་སློབ་དཔོན་ཕྱག་རྒྱ་གསལ་བསྒོམས་པས། །མི་འགྱུར་གཡུང་དྲུང་ལྟ་བུར་འགྲུབ་བར་ཤོག །ན་མོ་དེ་བཞིན་གཤེགས་པའི་རིགས་དང་ལ་སོགས་བརྗོད། ཕྱག་མཚན་འཁོར་ལོ་ལ་སོགས་པ་ལྔ་སྤྱི་བོར་བཞག་ལ། ༈ སྐྱོད་པས་མི་ཐུབ་མི་གཡོ་ལ་སོགས་དང་། །ཕྱག་མཚན་རྡོ་རྗེ་ལྟ་བུར་བྱིན་བརླབས་པས། །འཆི་མེད་རྡོ་རྗེ་ལྟ་བུར་འགྲུབ་པར་ཤོག །ན་མོ་ཞེས་སོགས་འགྲེེ། །ཚེ་ནས་སྤྱིན་ལ། བསྐྱོད་པས་མི་ཐུབ་མི་གཡོ་ཞེས་སོགས་དང་། །ཚེ་ནས་ཡེ་ཤེས་ལྷ་ཚོགས་ལྟ་བུར་བྱིན་རླབས་པས། །མི་ནུབ་རྒྱལ་མཚན་ལྟ་བུར་འགྲུབ་པར་ཤོག །ན་མོ་ཞེས་སོགས་འདྲེ། །ཚེ་ནས་སྤྱིན་ལ། སྤྱོད་པ་མི་ཐུབ་ལ་སོགས་དང་། །ཚེ་ཟན་སྦྱིན་ལ། བསྐྱོད་པས༴ ཚེ་ཟན་འབྱུང་བ་ལྔ་རུ་བྱིན་རླབས་པས། ། དེ་བཞིན་གཤེགས་པའི་རིགས་སུ་གྲུབ་པར་ཤོག །ན་མོ་ཞེས་སོགས་འདྲེ། །ཚེ་འབྲས་སྦྱིན་ལ། སྐྱོོད་པས་མི་ཐུབ་སོགས་དང་། །ཚེ་འབྲས་ཡེ་ཤེས་ལྔ་རུ་བྱིན་རླབས་པས། །རིག་ལྔའི་སངས་རྒྱས་ལྔ་རུ་འགྲུབ་པར་ཤོག །ན་མོ་སོགས་འགྲེ། ཚེ་ཆང་སྦྱིན་ལ། སྐྱོོད་པ་མི་ཐུབ་མི་གཡོ་ཚེའི་རང་བཞིན་ལ་སོགས་དང་། ཚེ་ཆང་བདུད་རྩི་ལྟ་བུར་བྱིན་རླབས་པས། འགྱུར་མེད་བྱང་ཆུབ་སེམས་སུ་འགྲུབ་པར་ཤོག །ན་མོ་སོགས་འགྲེེ། བཀྲ་ཤིས་རྫས་བརྒྱད་སྤྱིའམ་བྱེ་བྲག་ཏུ་འགྲིམ་ལ། བསྐྱོོད་པས་མི་ཐུབ་མི་གཡོ་ལ་སོགས་དང་། །ཡོ་བྱད་བཀྲ་ཤིས་རྫས་སུ་བྱིན་རླབས་པས། །བཀྲ་ཤིས་ལྷ་མོ་བརྒྱད་དུ་འགྲུབ་པར་ཤོག །ན་མོ་དེ་བཞིན་གཤེགས་པའི་རིགས་དང་། སོགས་འགྲེ། དེ་དག་རྒྱས་པར་བྱེད་ན། །བཀྲ་ཤིས་རྫས་བརྒྱད་ལས་སྔགས་ཀྱི་གསང་ལ། །ལྷ་མོ་བརྒྱད་དུ་རླབས། དང་པོ་ཡུངས་དཀར་སྦྱིན་ལ། སྔོན་བཅོམ་ལྡན་ཤཱཀྱ་ཐུབ་པ་ལ། །གསང་སྔགས་རིགས་སྔགས་བདག་པོ་ཕྱག་ན་རྡོ་རྗེས། སྒྲུབ་པའི་རྫས་བརྒྱད་ཡུངས་དཀར་ཕྱག་དུ་ཕུལ་ཏེ། བཀྲ་ཤིས་པའི་རྫས་སུ་བྱིན་གྱིས་རླབས་པ། དེ་བཞིན་དུ། དེང་འདིར་སློབ་མ་རྣམས་ལ། ཡུངས་དཀར་དུ་རྫས་ཀྱི་བཀྲ་ཤིས་པར་གྱུར་ཅིག །ཡུངས་དཀར་རྡོ་རྗེའི་རིགས་ཏེ་ཐམས་ཅད་དུ། །བགེགས་རྣམས་མ་ལུས་དག་པར་བྱེད་པ་སྟེ། །མཐུ་སྟོབས་ཡོན་ཏན་ཕུན་སུམ་ཚོགས་པ་ཡིས། །བཀྲ་ཤིས་དེས་ཀྱང་བགེགས་རྣམས་ཞི་བྱེད་ཤོག །ༀ་ཨ་བྷི་ཥིཉྩ་ཧཱུཾ། དུར་བ་གཏད་ལ། སྔོན་བཅོམ་ལྡན་འདས་ཤཱཀྱ་ཐུབ་པ་ལ། །རྩྭ་འཚོང་གི་ཁྱེའུ་བཀྲ་ཤིས་ཀྱི་རྩྭ་དུར་བ་ཕྱག་ཏུ་ཕུལ་ཏེ། །བཀྲ་ཤིས་པའི་རྫས་སུ་བྱིན་གྱིས་རླབས་པ། །དེ་བཞིན་དུ། དེང་འདིར་སློབ་མ་རྣམས་ལ། །དུར་ཝའི་རྫས་ཀྱི་བཀྲ་ཤིས་པར་གྱུར་ཅིག །དུར་བས་ཚེ་ནི་འཕེལ་བར་བྱེད་པ་སྟེ། །རྡོ་རྗེ་སེམས་དཔའ་ཚེ་ནི་རབ་བསྒྲུབ་ཕྱིར། །ཉོན་མོངས་སྐྱེ་ཤི་རྒྱུན་ཆད་གྱུར་པ་ཡིས། །བཀྲ་ཤིས་དེས་ཀྱང་ཚེ་ནི་འཕེལ་བར་ཤོག །ༀ་ཨ་པྲ་ཏ་ཧ་ཏ། ཨ་བྷི་ཥིཉྩ་ཧཱུཾ། ཤིང་ཐོག་བིལ་བ་གཏད་ལ། སྔོན་བཅོམ་ལྡན་འདས་ཤྭཀྱ་ཐུབ་པ་ལ། །ལྷ་ཚངས་པས་ཤིང་ཐོག་བིལ་བ་ཕྱག་ཏུ་ཕུལ་ཏེ། །བཀྲ་ཤིས་པའི་རྫས་སུ་བྱིན་གྱིས་བརླབས་པ་དེ་བཞིན། །དེང་འདིར་སློབ་མ་འདི་རྣམས་ལ། །བིལ་བ་རྫས་ཀྱི་བཀྲ་ཤིས་པར་གྱུར་ཅིག །བིལ་བས་རྒྱུ་རྐྱེན་འབྲས་ལྡན་པ་ཡིས། །འཇིག་རྟེན་འཇིག་རྟེན་འདས་པའི་སྤྱོད་པ་རྣམས། །སྙིང་རྗེ་བྱང་ཆུབ་མཆོག་ཏུ་དག་གྱུར་བས། །བཀྲ་ཤིས་དེས་ཀྱང་དོན་ཀུན་གྲུབ་པར་ཤོག །ༀ་བིལ་བ་ཨ་བྷི་ཥིཉྩ་ཧཱུཾ། །གྷི་ཝཾ་ཕྱག་དུ་གཏད་ལ། སྔོན་བཅོམ་ལྡན་འདས་ཤཱཀྱ་ཐུབ་པ་ལ། །གླང་པོ་ཆེ་ནོར་སྐྱོང་གི་བུས། །གྷི་ཝཾ་ཕྱག་དུ་ཕུལ་བ་སྟེ། །བཀྲ་ཤིས་པའི་རྫས་སུ་བྱིན་གྱིས་བརླབས་པ་དེ་བཞིན་དུ། དེང་འདིར་སློབ་མ་འདི་རྣམས་ལ། །གྷི་ཝཾ་གི་རྫས་ཀྱི་བཀྲ་ཤིས་པར་གྱུར་ཅིག །གྷི་ཝཾ་དུག་གསུམ་འཇོམས་པ་ནད་ཀྱི་སྨན། །སྨན་མཆོག་ཆོས་ཉིད་རབ་ཏུ་རྟོགས་གྱུར་ནས། །ཉོན་མོངས་ཟུང་ངུ་མེད་པར་གྱུར་པ་ཡིས། །བཀྲ་ཤིས་དེས་ཀྱང་སྡུག་བསྔལ་ཞི་གྱུར་ཅིག །གྷི་ཝཾ་ཨ་བྷི་ཥིཉྩ་ཧཱུཾ། མཚལ་ལི་ཁྲི་གཏད་ལ། སྔོན་བཅོམ་ལྡན་ནས་ཤཱཀྱ་ཐུབ་པ་ལ། །བྲམ་ཟེ་སྐལ་རྒྱལ་གྱི་བུས། སྨན་ལི་ཁྲི་ཕྱག་ཏུ་ཕུལ་ཏེ། །བཀྲ་ཤིས་པའི་རྫས་སུ་བྱིན་གྱིས་བརླབས་པ་དེ་བཞིན་དུ། དེང་འདིར་སློབ་མ་རྣམས་ལ། །ལི་ཁྲི་རྫས་ཀྱི་བཀྲ་ཤིས་པར་གྱུར་ཅིག །ལི་ཁྲི་དམར་པོ་དབང་གི་རང་བཞིན་ཏེ། །ཆོས་རྣམས་མ་ལུས་ཡོངས་སུ་གྱུར་ནས་ཀྱང་། །ཆོས་ཀྱི་རྒྱལ་སྲིད་རབ་ཏུ་བརྟན་གྱུར་པའི། །བཀྲ་ཤིས་དེས་ཀྱང་རྒྱལ་སྲིད་བརྟན་གྱུར་ཅིག །ༀ་ལི་ཁྲི་ཨ་བྷི་ཥིཉྩ་ཧཱུཾ། ཞོ་གཏད་ལ། སྔོན་གཅོམ་ལྡན་འདས་ཤཱཀྱ་ཐུབ་པ་ལ། ཞིང་པའི་བུ་མོ་ལེགས་སྐྱེས་མས། །ཞོ་ཕྱག་ཏུ་ཕུལ་ཏེ། བཀྲ་ཤིས་པའི་རྫས་སུ་བྱིན་གྱིས་རླབས་པ་དེ་བཞིན་དུ། །དེང་འདིར་སློབ་མ་རྣམས་ལ། །ཞོའི་རྫས་ཀྱི་བཀྲ་ཤིས་པར་གྱུར་ཅིག །ཞོ་ནི་ཀུན་གྱི་སྙིང་པོར་གྱུར་པ་ཡིས། །སྙིང་པོ་ཆོས་ཉིད་ཡེ་ཤེས་རྣམས་རྟོགས་ནས། །ཡོན་ཏན་ཀུན་གྱི་དབྱིངས་སུ་གྱུར་བ་ཡིས། །བཀྲ་ཤིས་དེས་ཀྱང་དུག་གསུམ་ཞི་བྱེད་ཤོག །ༀ་དྷ་ར་ཏི་ར་ཨ་བྷི་ཥིཉྩ་ཧཱུཾ། མེ་ལོང་བཏད་ལ། སྔོན་བཅོམ་ལྡན་འདས་ཤཱཀྱ་ཐུབ་པ་ལ། གཟུགས་ཀྱི་ལྷ་མོ་འོད་འཆང་མས་མེ་ལོང་ཕྱག་དུ་ཕུལ་ཏེ། བཀྲ་ཤིས་པའི་རྫས་སུ་བྱིན་གྱིས་རླབས་པ་དེ་བཞིན་དུ། དེང་འདིར་སློབ་མ་རྣམས་ལ། མེ་ལོང་གི་རྫས་ཀྱིས་བཀྲ་ཤིས་པར་གྱུར་ཅིག །མེ་ལོང་ཡེ་ཤེས་རྒྱ་མཚོ་ཆེན་པོ་ཡིས། །ཡེ་ཤེས་རྒྱ་མཚོ་མཆོག་ཏུ་དག་གྱུར་སྟེ། །རྣམ་དག་ཆོས་ལ་ཐོགས་མེད་ལུང་སྟོན་པའི། །བཀྲ་ཤིས་དེས་ཀྱང་སྒྲིབས་པ་དག་གྱུར་ཅིག །ༀ་ཨ་དར་ཤ་ཨ་བྷི་ཥིཉྩ་ཧཱུཾ། དུང་གཏད་ལ། སྔོན་བཅོམ་ལྡན་འདས་ཤཱཀྱ་ཐུབ་པ་ལ། ལྷའི་དབང་པོ་བརྒྱ་སྦྱིན་གྱིས། དུང་གཡས་སུ་འཁྱིལ་བ་ཕྱག་དུ་ཕུལ་སྟེ། །བཀྲ་ཤིས་བའི་རྫས་སུ་བྱིན་གྱིས་རླབས་པ་དེ་བཞིན་དུ། །དེང་འདིར་སློབ་མ་འདི་རྣམས་ལ་དུང་གི་རྫས་ཀྱིས་བཀྲ་ཤིས་པར་གྱུར་ཅིག །དུང་ནི་ཆོས་ཀྱི་སྒྲ་རྣམས་སྒྲོགས་པའི་ཚུལ། །ཡེ་ཤེས་རྒྱ་མཚོ་ཉིད་དུ་དག་གྱུར་ཏེ། །ཆོས་རྣམས་མ་ནོར་ཡོངས་སུ་སྟོན་པ་ཡི། །བཀྲ་ཤིས་དེས་ཀྱང་ཚིག་དབང་ཐོབ་པར་ཤོག །ༀ་མངྒ་ལ། ཨ་བྷི་ཥིཉྩ་ཧཱུཾ། ན་མོ་དེ་བཞིན་གཤེགས་པའི་རིགས་དང་སོགས་བརྫོད་དོ། །དེས་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་སྒྲིབ་པ་དག །རྫོགས་རིམ་བདེ་སྟོང་བསྒོམས་པ་ལ་དབང་། མཐར་ཐུག་ཆོས་ཀྱི་སྐུ་ཐོབ་པར་གྱུར་ཅིག །བཞི་པ། དབང་བཞི་པ། དེ་ཁོ་ན་ཉིད་ཀྱིས་དབང་བསྐུར་བ་ནི། ཕྱི་སྣོད་ཀྱི་རང་བཞིན་འོད་དུ་ཞུ་ནས། །ནང་བཅུད་ཀྱི་སེམས་ཅན་ལ་ཐིམ། ནང་བཅུད་ཀྱི་སེམས་ཅན་འོད་དུ་ཞུ་ནས། ཁྱེད་རང་རྣམས་ལ་ཐིམ། ཁྱེད་རང་རྣམས་ཀྱང་འོད་དུ་ཞུ་ནས་མི་དམིགས་པ་སྟོང་པ་ཉིད་དུ་དར་གཅིག་བསྒོམ། ཆོས་ཉིད་འགྱུར་བ་མེད་པའི་དབྱིངས་ཉིད་ལ། རྣལ་འབྱོར་ཨ་ཡུ་དམར་པོས་ཚེ་སྦས་པས། དེ་ལས་ཕྱག་རྒྱ་བདུན་གྱིས་བརྒྱས་ནི་གདབ་བར་བྱ། དང་པོ་སྐུ་མཆོག་ཉིད་ཀྱི་རྒྱ། །གཉིས་པ་ཐབས་དང་ཤེས་རབ་རྒྱ། །གསུམ་པ་སྐུ་གསུང་ཐུགས་ཀྱི་རྒྱ། །བཞི་པ་ཡེ་ཤེས་ལྔའི་རྒྱ། །ལྔ་པ་གསེར་གྱི་འཁོར་ལོའི་རྒྱ། །དྲུག་པ་རྟ་མཆོག་དབང་གི་རྒྱ། །བདུན་པ་ཆོས་ཉིད་དབྱིངས་ཀྱི་རྒྱ། །ཆོས་ཉིད་དབྱིངས་སུ་ཚེ་སྤས་པས། །དུས་གསུམ་སངས་རྒྱས་དགྲར་ལངས་ཀྱང་། །དེ་ལ་གཟུང་ཞིང་གཅད་དུ་མེད། །བརྒྱས་འདེབས་མས་ནི་རྒྱས་གདབས་པས། །བྲན་གྱིས་འགལ་བར་མི་བྱེད་ཅིང་། །བདེ་བ་མོས་ནི་ཚེ་བསྲུང་བས། །བདུད་དང་མུ་གེ་གང་གིས་ཀྱང་། །འདི་ལ་གནོད་པར་མི་ནུས་སོ། །གསང་བ་མོས་ནི་ཚེ་སྤས་པས། །མི་ཤོར་བས་ནི་དམ་དུ་བསྡོམས། །ཚེ་འཕེལ་མས་ནི་ཚེ་བསྲུངས་བས། །རྟག་ཏུ་གཡུང་དྲུང་ཚེ་འཕེལ་འགྱུར། །ༀ་ན་མོ་བྷ་ག་ཝ་ཏེ་ཨ་པ་ར་མི་ཏ། ཨཱ་ཡུར་ཛྙཱན། སུ་བྷི་ནི་ཙི་ཏ་ཏེ་ཛྭ་ར་ཙ་ཡ། ཏ་ཐཱ་ག་ཏ་ཡ། ཨརྷ་ཧ་ཏེ་སམ་མྱ་ཀྶཾ་བུདྡྷ་ཡ། ཏདྱ་ཐཱ། ༀ་པུཎྱཻ་པུཎྱཻ། མ་ཧཱ་པུཎྱཻ། ཨ་པ་ར་མི་ཏ། པུཎྱཻ། ཨ་པ་ར་མི་ཏ་པུ་པུཎྱཻ་། ཛྙཱ་ན་སམ་བྷ་རོ་པ་ཙི་ཏེ། ༀ་སརྦ་སམ་སྐ་རི་པ་རི་ཤུ་དྷ། དྷརྨ་ཏེ་ག་ག་ནི། ས་མུད་ག་ཏེ་སྭ་བྷ་ཝ་བྷི་ཤུད་དྷེ་མ་ཧཱ་ཡ་ན་བ་རི་ཝ་རེ་སྭཱ་ཧཱ། ཞེས་མཎྜལ་དང་བསྔོ་བ་སྨོན་ལམ་བཀྲ་ཤིས་བརྗོད། །དེས་དབང་བཞི་པ་དེ་ཁོ་ན་ཉིད་ཚིག་དབང་རིན་པོ་ཆེ་ཐོབ། །སྒོ་གསུམ་ཐ་དད་དུ་འཛིན་བའི་སྒྲིབས་པ་དག །རྫོགས་རིམ་ཕྱག་རྒྱ་ཆེན་པོ་སྒོམ་པ་ལ་དབང་། །མཐར་ཐུག་ངོ་བོ་ཉིད་ཀྱི་སྐུ་ཐོབ་པར་གྱུར་ཅིག །དེས་དབང་བཞི་པ། དེའི་གོང་དུ་ཤེས་རབ་ཡེ་ཤེས། །དེའི་གོང་དུ་གསང་དབང་། དེའི་གོང་དུ་བུམ་དབང་། དེ་བཞིས་དངོས་གཞི་དེ་སོང་ནས། རྗེས་ནི། དེ་ནས་མཆོད་པ་གོང་བཞིན་བྱེད། །བསྔོ་བ་སྨོན་ལམ་སྤྱི་དང་མཐུན་པར་བྱ། །གང་ཡང་བདག་བློ་གཏི་མུག་སོགས་ཀྱིས་ཉེས་པ་བཟོད་པར་གསོལ། །ༀ་ཁྱེད་ཀྱི་སེམས་ཅན་དོན་ཀུན་མཛད། །ཅེས་སོགས་ཀྱིས། བུམ་བསྐྱེད་དང་། མདུན་བསྐྱེད་ཀྱི་ཡེ་ཤེས་པ་གཤེགས། །དམ་ཚིག་པ་རང་ལ་བསྡུ། །དེ་ནས། ཚེ་དང་ཡེ་ཤེས་རྒྱ་མཚོའི་གཏེར། །འོད་དཔག་མེད་པའི་བཀྲ་ཤིས་ཤོག །ཡེ་ཤེས་བཞིའི་རང་བཞིན་ཅན། རིགས་ཀྱི་ཡུམ་བཞིའི་བཀྲ་ཤིས་ཤོག །གསང་བ་ཡུམ་གྱི་ལྷ་མོ་བཞི། །དབྱིངས་ཀྱི་ལྷ་མོའི་བཀྲ་ཤིས་ཤོག །མི་དགེ་བཅུ་པོ་ཚར་གཅོད་ཕྱིར། །ཁྲོ་བོ་བཅུ་ཡིས་བཀྲ་ཤིས་ཤོག །ཞི་རྒྱས་དབང་དྲག་རང་བཞིན་ཅན། །སྒོ་མ་བཞིའི་བཀྲ་ཤིས་ཤོག །དངོས་གྲུབ་མ་ལུས་བསྩོལ་བ་ཡི། །རྡོ་རྗེ་ལྷ་མོའི་བཀྲ་ཤིས་ཤོག །ཀ་ཡ། ཝཀྐ། ཙི་ཏ་སིདྡྷི་ཧཱུཾ །དེ་ནས་རྡུལ་ཚོན་བསྡུས་ལ་ཆུ་ཆེན་ནང་དུ་དོར་རོ། །བདག་བསྐྱེད་ཀྱི་དཀྱིལ་འཁོར་རིམ་པ་བཞིན་དུ་བསྡུ། །མི་དམིགས་པའི་རྒྱས་གདབ། སླར་ཚེ་དཔག་མེད་དུ་གསལ་བས་སྤྱོད་ལམ་བྱའོ། །བཅོམ་ལྡན་མགོན་པོ་ཚེ་དཔག་མེད་པ་ཡིས། །ཐུགས་ཀྱི་དགོངས་པ་རྒྱུད་སྡེའི་དོན་རྣམས་རྫོགས། །ཐུགས་རྗེའི་ཆུ་རྒྱུན་རིམ་པར་ལེགས་བརྒྱུད་ནས། །བདག་ཉིད་སྨིན་ཅིང་གྲོལ་བའི་བྱིན་རླབས་ནི། །ཚེ་བསྒྲུབ་དབང་མཆོག་བདུད་རྩིའི་ཆར་རྒྱུན་གྱི། །གདུལ་བྱ་ལས་དང་སྐལ་བ་ལྡན་པ་རྣམས། །ཚེ་དཔལ་བསོད་ནམས་རྒྱ་ཆེན་རྒྱས་པར་བྱས། །ལེགས་བཤད་འདི་ནི་རྡོ་རྗེ་བཟང་པོ་ཡིས། །གནས་མཆོག་བསྒྲུབ་སྡེ་བཟང་པོ་མངོན་དགའ་རུ། བྲིས་པའི་དགེ་བས་ཕན་ཐོག་དར་རྒྱས་ཤོག །རྫོགས་སོ།། །།བཀྲ་ཤིས་དཔལ་འབར་འཛམ་གླིང་བརྒྱན་གྱུར་ཅིག །དེས་འཆི་མེད་ཚེའི་དངོས་གྲུབ་ལེན་པ་དེ་སོང་ནས། ༈ །གཉིས་པ་དམ་རྫས་ལ་བརྟེན་ནས་སྐུ་གསུང་ཐུགས་ཡོན་ཏན་འཕྲིན་ལས་ཀྱི་དངོས་གྲུབ་ལེན་པ་ནི། དངོས་གྲུབ་ཀྱི་རྫས། ཞི་རྒྱས་དབང་དྲག་ལྷུན་གྲུབ་ཀྱི། །གཟུགས་ཟན་ལ་གཟོ་ཞིང་མར་གྱི་བརྒྱན་ཆ་ཅན་དང་། བཀྲ་ཤིས་བྱ་ཁ་སྤྲོད། ལ་སོགས་དངོས་གྲུབ་ཀྱི་རྫས་སྣ་ཚོགས། །ཟས་སྣ་ཚོགས། བཏུང་བའི་རིགས་སྣ་ཚོགས་བཤམས་ལ། །ཕུད་ཀྱིས་བྲན། འདུས་པ་མདོའི་ལྷ་ཚོགས་ལ་སོགས་བསྒོམ་ལ་མཆོད་བསྟོད་བྱ་ཞིང་། བསྙེན་པ་དང་། ཉེ་བསྙེན་གྱི་སྒྲུབ་པ་དང་། བསྒྲུབ་པ་ཆེན་པོའི་སྒོ་ནས་བཟླས་བརྗོད་ཀྱི། ། བསྙེན་པ་བརྒྱ་འམ་སྟོང་ལ་སོགས་འབུལ་གཟུངས་ཐག་ལ་བརྟེན་ནས་དངོས་གྲུབ་ཀྱི་དམིགས་པའི་འཕྲོ་འདུས། རུ་ལུ་དང་། ཀ་ཡ་སིདྡྷི་ༀ་ༀ། ཝ་ག་སིདྡྷི་ཨ་ཨཱ། ཙིཏྟ་སིདྡྷི་ཧཱུྃ་ཧཱུྃ། རཏྣ་སིདྡྷི་ཏྲཾ་ཏྲཾ། ཀར་མ་སིདྡྷི་ཧ་ཧ་ལ་བསྙེན་ནོ། །དེས་ནས། ཧཱུཾ་ཆོས་ཉིད་བདེ་བ་ཆེན་པོའི་སྐུར་བྱུང་བ། །བཅོམ་ལྡན་ཆེ་མཆོག་ཡབ་ཡུམ་དངོས་གྲུབ་སྩོལ། །དུར་ཁྲོད་དྲེགས་པའི་ཚོགས་རྣམས་འཇོམས་མཛད་པའི། །རྒྱུད་ལུང་ཁྲོ་རྒྱལ་ཡབ་ཡུམ་དངོས་གྲུབ་སྩོལ། །ཡེ་ཤེས་འབར་བ་བརྒྱད་ཀྱི་དཀྱིལ་འཁོར་ནས། །ཀོ་རི་ཁྲོ་མོ་བརྒྱད་ཀྱིས་དངོས་གྲུབ་བསྩོལ། །ཆོས་ཉིད་མཁའ་ལྟར་དག་པའི་དཀྱིལ་འཁོར་ནས། །སིང་ཧ་ཕྲ་མེད་བརྒྱད་ཀྱིས་དངོས་གྲུབ་བསྩོལ། །ཚད་མེད་བཞི་རྫོགས་གསང་བའི་དཀྱིལ་འཁོར་ནས། །རྟ་གདོང་སྒོ་མ་ཚོགས་བཅས་དངོས་གྲུབ་བསྩོལ། །འབར་བའི་བར་ཁྱམས་དུར་ཁྲོད་ནང་ག ཤེད་ནས། །སྤོར་མ་གསང་ཡུམ་ཚོགས་བཅས་དངོས་གྲུབ་སྩོལ། །དམ་ཚིག་ལྷུན་གྱིས་གྲུབ་པའི་དཀྱིལ་འཁོར་ནས། །དབང་ཕྱུག་མ་སྲིང་ཚོགས་ཀྱིས་དངོས་གྲུབ་བསྩོལ། །དུར་ཁྲོད་འབར་བ་ཆེན་པོའི་དཀྱིལ་འཁོར་ནས། །མཁའ་གྲོ་སུམ་བཅུ་རྩ་གཉིས་དངོས་གྲུབ་བསྩོལ། །འཕྲིན་ལས་མྱུར་འགྱོགས་ཆེན་པོའི་དཀྱིལ་འཁོར་ནས། །མ་བདུན་སྲིང་མོ་བཞི་ཡིས་དངོས་གྲུབ་བསྩོལ། །སྒྲོལ་བྱེད་འབར་བའི་ཆེན་པའི་དཀྱིལ་འཁོར་ནས། །རྡོ་རྗེ་གིང་ཆེན་བཅྭོ་བརྒྱད་དངོས་གྲུབ་བསྩོལ། །ཞིང་ཆེན་འབར་བ་ཐུགས་ཀྱི་དཀྱིལ་འཁོར་ནས། །ཁྲོ་རྒྱལ་ཡབ་ཡུམ་དྲུག་བཅུས་དངོས་གྲུབ་བསྩོལ། །ཅི་བགྱིས་བཀའ་ཉན་ལས་ཀྱི་དཀྱིལ་འཁོར་ནས། །ཕོ་ཉ་དྲུག་བཅུ་རྩ་བཞིས་དངོས་གྲུབ་བསྩོལ། །ལས་རྣམས་ཡོངས་སུ་གྱུར་པའི་དཀྱིལ་འཁོར་ནས། །མ་མོ་དྲུག་བཅུའི་ཚོགས་ཀྱིས་དངོས་གྲུབ་སྩོལ། །སྡོམ་པའི་ས་ལ་གནས་པའི་དཀྱིལ་འཁོར་ནས། །རིག་འཛིན་རྩལ་ཆང་ཚོགས་ཀྱིས་དངོས་གྲུབ་བསྩོལ། །གནས་མཆོག་ཡང་དག་དོན་གྱི་འོག་མིན་ནས། །རྒྱལ་བ་ཀུན་བཟང་ཡབ་ཡུམ་དངོས་གྲུབ་བསྩོལ། །འོག་མིན་དབང་ཕྱུག་ཆེན་པོའི་གནས་མཆོག་ནས། །གསང་སྔགས་རྡོ་རྗེ་ཐེག་པ་འབྱུང་བའི་གནས། །རྡོ་རྗེ་སེམས་དཔའ་རིགས་ལྔ་ཡུམ་དང་བཅས། །ལོངས་སྤྱོད་རྫོགས་པ་སྐུ་ཡི་དངོས་གྲུབ་བསྩོལ། །ལྷ་ཀླུ་གནོད་སྦྱིན་སོ་སོའི་གནས་མཆོག་ནས། །བཅོམལྡན་རིགས་གསུམ་མགོན་པོས་དངོས་གྲུབ་བསྩོལ། །ཨོ་རྒྱན་དྷ་ན་ཀོ་ཤའི་གླིང་ཕུག་ཏུ། རྡོ་རྗེ་སེམས་དཔའི་ཐུགས་སྤྲུལ་དགའ་རྡོར་དང་། །རྒྱལ་པོའི་བུ་མོ་རིན་ཆེན་གསལ་སྒྲོན་ལ། །རྡོ་རྗེ་སེམས་དང་གསང་བདག་དངོས་བྱོན་ནས། །དབང་བཞི་རྫོགས་བསྐུར་རྟོགས་ཚོགས་ལྷ་ངོ་སྤྲད། །དབང་རྟགས་ཆགས་ཤིང་མེ་ལོང་རྣམ་གཉིས་སྦྱིན། །རིག་འཛིན་ཁྲི་ཕྲག་དུ་མ་སངས་རྒྱས་ནས། །དེའི་དངོས་གྲུབ་དམ་པ་ཆ་གཅིག་ཀྱང་། །དེ་རིང་གསང་བའི་གནས་མཆོག་ཆེན་པོ་འདིར། །བསྒྲུབ་མཆོག་སྐལ་ལྡན་བདག་ལ་སྩལ་དུ་གསོལ། །རྒྱ་གར་ཡུལ་གྱི་ཕ་རོལ་ན། །ཨོ་རྒྱན་ཡུལ་གྱི་ཚུར་མཚམས་ན། །མ་ག་ཏའི་བྲག་ཕུག་ཏུ། །ཨོ་རྒྱན་རྒྱལ་པོ་དྷརྨ་ཀ་ཡ་དང་། །ཀླུའི་རྒྱལ་པོ་བུ་མོ་གཉིས། །དགའ་རབ་རྡོ་རྗེ་སྤྱན་དྲངས་ནས། །ཚོམ་བུ་སྟོང་གི་དཀྱིལ་འཁོར་བསྒྲུབས། །ཁྲི་ཕྲག་གཅིག་ཏུ་སངས་རྒྱས་པ། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། ། སྒྲུབ་མཆོག་བདག་ལ་སྩལ་དུ་གསོལ། །རྒྱ་གར་ཡུལ་གྱིས་མར་མཚམས་ན། །ཟ་ཧོར་ཡུལ་གྱི་ཡར་མཚམས་སུ། རྡོ་རྗེ་འོད་འཕྲོ་གླིང་འཚལ་དུ། །རྒྱལ་པོ་ཨིནྟྲ་བོ་དྷི་དང་། །སྲས་མོ་ནི་ལན་དྷ་ར་གཉིས། །ཚོམ་བུ་ལྔ་བརྒྱའི་དཀྱིལ་འཁོར་བསྒྲུབས། །ཁྲི་ཕྲག་དུ་མ་སངས་རྒྱས་པ། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་སྩལ་དུ་གསོལ། །རྒྱ་གར་ཡུལ་གྱི་མར་མཚམས་སུ། །སིང་ག་དྷ་ཡི་ཡར་མཚམས་སུ། །གཡུ་མཚོ་གླིང་དགུའི་བྲག་ཕུག་ཏུ། །སིང་ཧ་ཨུ་པ་ར་ཙ་དང་། །སྲས་མོ་མགོ་མ་དི་བྱི་གཉིས། །ཚོམ་བུ་ལྔ་བཅུའི་དཀྱིལ་འཁོར་བསྒྲུབས། །རྒྱ་ཕྲག་དུ་མ་སངས་རྒྱས་པ། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །རྒྱ་གར་ཡུལ་གྱི་དབུས་ཤོད་དུ། །བ་ར་ན་སཱིའི་གནས་དག་ཏུ། །དགེ་སློང་ཉི་བྱེད་སེང་གེ་དང་། །སྲིན་པོ་སྣམས་བུའི་བུ་མོ་ན་ཤི་གཉིས། །ཚོམ་བུ་གསུམ་པའི་དཀྱིལ་འཁོར་བསྒྲུབས། །འཁོར་ནི་ལྔ་བརྒྱ་སངས་རྒྱས་ཏེ། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །རྒྱ་གར་ཡུལ་གྱི་ཚུར་མཚམས་ན། །བལ་པོ་ཡུལ་གྱི་ཚུར་མཚམས་སུ། །དགེ་སློང་སོགས་ཀྱ་དེ་བ་དང་། །ལྷ་མོ་མང་གྷ་སིདྡྷི་གཉིས། །ཚོམ་བུ་གཅིག་པའི་དཀྱིལ་འཁོར་བསྒྲུབས། །འཁོར་ནི་ལྔ་བརྒྱ་སངས་རྒྱས་ཏེ། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབས་མཆོག་བདག་ལ་བསྩལ་དུ་གསོལ། །རྒྱ་གར་ཡུལ་གྱི་ཚུར་མཚམས་སུ། །བལ་པོ་ཡུལ་གྱི་ཡར་མཚམས་སུ། །ཡང་ལེའི་ཤོད་ཀྱི་བྲག་ཕུག་དུ། །དགེ་སློང་པདྨ་འབྱུང་གནས་དང་། །བལ་མོ་བཟའི་ཤཱཀྱ་གཉིས། །ཚོམ་བུ་ལྔ་བའི་དཀྱིལ་འཁོར་བསྒྲུབས། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབས་མཆོག་བདག་ལ་བསྩལ་དུ་གསོལ། །རྒྱ་གར་ཡུལ་གྱིས་ཡར་མཚམས་སུ། །སྟག་གཟིག་ཡུལ་གྱིས་མར་མཚམས་སུ། །ཨ་སུ་ར་བའི་བྲག་ཕུག་ཏུ། །སློབ་དཔོན་ཏི་ར་མ་ཏི་དང་། །བུ་མོ་གྷ་གྷ་སིདྡྷི་གཉིས། །ཇི་ལྟར་བསྒྲུབས་ཅིང་བསྙེན་པ་ཡིས། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །བོད་ཀྱི་ཡུལ་གྱི་ཡར་མཚམས་སུ། །ཞང་ཞུང་ཡུལ་གྱི་མར་མཚམས་སུ། །གངས་དཀར་ཏེ་སེའི་བྲག་ཕུག་ཏུ། །སློབ་དཔོན་སངས་རྒྱས་གསང་བ་དང་། །ལྷ་མོ་དམར་མོ་ཆོས་མཚོ་གཉིས། །ཇི་ལྟར་བསྒྲུབ་ཤིང་བསྙེན་པ་ཡིས། །དེ་ཡི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབས་མཆོག་བདག་ལ་བསྩལ་དུ་གསོལ། །བོད་ཀྱི་ཡུལ་གྱིས་ཕར་མཚམས་སུ། །མོན་གྱི་ཡུལ་གྱི་ཚུར་མཚམས་སུ། །སྤ་གྲོ་སྟག་ཚང་སེང་གེ་བྲག་ཕུག་ཏུ། །སློབ་དཔོན་པདྨ་འབྱུང་གནས་དང་། །མཁར་ཆེན་བཟའི་མཚོ་རྒྱལ་གཉིས། །ཇི་ལྟར་བསྒྲུབས་ཅིང་བསྙེན་པ་ཡིས། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །བོད་ཀྱི་ཡུལ་གྱི་མར་མཚམས་སུ། །འཁམས་ཀྱི་དན་ཏིང་བྲག་ཕུག་ཏུ། །སློབ་དཔོན་རྒྱལ་བའི་བློ་གྲོས་དང་། །ལྷ་མོ་སུམ་ཟ་སེར་མོ་གཉིས། །ཇི་ལྟར་བསྒྲུབས་ཅིང་བསྙེན་པ་ཡིས། །དེ་ཡི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །བོད་ཡུལ་གཙང་གི་གཡས་རུའི་ཕྱོགས། །ཉུག་གི་རྡོ་རྗེ་སྒྲོམ་བུ་རུ། །གནུབ་བན་སངས་རྒྱས་ཡེ་ཤེས་ཀྱིས། །རང་བྱུང་ཐིག་ལེ་ཉག་གཅིག་དོན། །ཟླ་བ་དགུ་ཡིས་སེམས་ཉིད་གྲོལ། །དངོས་པོའི་གནས་ལུགས་གཏན་ལ་ཕེབས། །དེ་ཡི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །ཁུ་ལུངས་ཡོན་ཏན་རྒྱ་མཚོ་ནི། །ཐུགས་སྲས་ནང་ནས་མཆོག་དུ་གྱུར། །སྤྲུལ་པ་མང་པོའི་ཞལ་གཟིགས་པས། །མཆོག་དང་ཐུན་མོངས་དངོས་གྲུབ་བརྙེས། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །ལྡན་གྱི་ཕྱག་ཤམ་དགོན་པ་རུ། །སོ་ནི་ཡེ་ཤེས་དབང་ཕྱུག་གིས། །ཆོས་ཉིད་རང་གྲོལ་དོན་དམ་ཐུགས་སུ་ཆུད། །རྫོགས་ཆེན་ལྟ་བའི་བཀའ་ཡང་བབ། །དེ་ཡི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །ཤོ་ཡགས་སྡིངས་ཀྱི་གནས་མཆོག་དུ། །དབང་བཞི་ཆུ་བོའི་བཀའ་བབས་པས། །སྲུ་ནི་ལེགས་པའི་སྒྲོལ་མ་ཡིས། །དགེ་མཆེད་བཅོ་ལྔའི་སློབ་བུ་སྨིན། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །དེ་དག་ནང་ནས་བཞུའི་རུས། །བསོད་ནམས་ཤཀྱ་ཞེས་སུ་གྲགས། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །བོད་ཡུལ་གཙང་གི་གཡོན་རུའི་ཕྱོགས། །འུག་པ་ལུང་གི་ཡང་དབེན་དུ། །ཟུར་ཆེན་ཤཱ ཀྱ་འབྱུང་གནས་ཀྱིས། །བཀའ་རྒྱུད་ལུང་དང་མན་ངག་ལ། །ཕུལ་གྱུར་ཤེས་བྱ་མ་ལུས་མཁྱེན། །རྒྱལ་བ་སངས་རྒྱས་ཐམས་ཅད་ཀྱིས། །བསྟན་པའི་བདག་པོར་ལུང་བསྟན་པ། །དེ་ཡིས་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །གཡས་རུ་རྒྱ་བོ་གྱེ་གནས་སུ། །ཟུར་ཆུང་ཤེས་རབ་གྲགས་པ་ནི། །ལྟ་དགོངས་རྩེ་མོའི་ཕུལ་དུ་གྱུར། །སྣང་གྲགས་སྒྱུ་མར་མཁྱེན་པ་ཡིས། །སྐལ་ལྡན་གདུལ་བྱ་སྨིན་གྲོལ་མཛད། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། ། གཡས་རུ་ཆུ་བར་ལི་ཐུང་དུ། །གླན་སྟོན་ཤཱཀྱ་བཟང་པོ་ནི། །སྣང་སྲིད་ལྷ་འདྲེ་བྲན་དུ་འཁོལ། །འཕྲིན་ལས་སྤྱོད་ལ་ཐོགས་པ་མེད། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་སྩལ་དུ་གསོལ། །གཡས་རུ་ཤངས་ཀྱི་ཉ་ཚལ་གྱིས། །ཁང་སྟོད་མན་ངག་འབྱུང་བ་རུ། །ལྷ་རྗེ་ཤཱཀྱ་བྱང་ཆུབ་ནི། །རྫོགས་ཆེ་ལྟ་བའི་ཕུལ་དུ་གྱུར། །ཤེས་བྱ་ཐོགས་མེད་མ་ལུས་མཁྱེན། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། ། བསྒྲུབ་མཆོག་བདག་ལ་བསྩལ་དུ་གསོལ། །འོག་གདོང་ལྷ་རྗེ་འགར་ཞེས་གྲགས། །ཡེ་ཤེས་མཁའ་འགྲོའི་བྱིན་རླབས་པ། །ཟག་མེད་བདེ་བའི་ཉམས་དང་ལྡན། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །མཆིམས་ཀྱི་འཆད་མགོ་གནས་མཆོག་ཏུ། །སྲེགས་སྟོན་རྡོ་རྗེ་རྒྱལ་མཚན་ནི། །ཡོན་ཏན་བསམ་གྱིས་མི་ཁྱབ་མངའ། །དབང་གི་ཆུ་བོའི་བཀའ་རྣམས་རྫོགས། །དེའི་དངོས་གྲུབ་ཆ་གཅིག་ཀྱང་། དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །ཤ་རི་མོ་རྒྱ་གར་གླིང་ཆུང་དུ། །མཁས་པ་གླན་བན་རྡོ་རྗེ་འོད། །གསང་བདག་ཞལ་གཟིགས་དུས་སུ་མཁྱེན། །ཤམ་བྷ་ལ་རུ་མ་འོངས་འཁོར། །འདྲེན་པར་ལུང་བསྟན་ཆོས་མིག་ཅན། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །དམ་ཆོས་འབྱུང་གནས་ཤ་རི་མོར། །གླན་སྟོན་བརྩོན་འགྲུས་སེང་གེ་ནི། །གདུལ་བྱ་ཡང་དག་ས་ལ་འགོད། །སྤྲུལ་བས་འགྲོ་བ་མ་ལུས་འདྲེན། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །གུ་ཐང་དཔལ་གྱི་དགོན་པ་རུ། །མཁས་པ་བསོད་ནམས་རྒྱལ་པོ་ཡིས། །དབང་གིས་ཆུ་བོ་གདུལ་བྱ་ཡིས། །འགྲོ་བ་ཐམས་ཅད་སྨིན་པར་མཛད། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །སྤྲུལ་སྐུ་ལྷ་རྗེ་ལྷ་འབུམ་གྱིས། །དྲག་པོ་གདུལ་བྱ་འགྲོ་བ་སྨིན། །སྤྲུལ་པ་མི་ནི་སྐུར་གཤེགས་པ། །དེ་ཡི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདིར་རུ། །བསྒྲུབ་མཆོག་བདག་ལ་བསྩལ་དུ་གསོལ། །ཤང་མོ་རྒྱ་གར་གླིང་ཆུང་དུ། །རླངས་སྟོན་ཆོས་ཀྱི་སེང་གེ་ནི། །ཏིང་འཛིན་སྒོམ་པའི་དྲོད་དང་ལྡན། །བསྐྱེད་རྫོགས་གསུམ་གྱི་དགོངས་པ་རྫོགས། །དེ་ཡི་དངོས་གྲུབ༴ ལྗང་ལུང་དཔག་གྱི་དགོན་པ་རུ། མཚན་ནི་སངས་རྒྱས་དཔལ་དུ་གྲགས། །དབང་གི་ཆུ་བོ་རྫོགས་པ་ཡིས། །སྙིགས་མའི་དུས་སུ་འགྲོ་དོན་མཛད། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །ཉ་ཚལ་ཆོས་ཀྱི་འབྱུང་གནས་སུ། །གླན་སྟོན་བསོད་ནམས་མགོན་པོ་ནི། །བསྐྱེད་རྫོགས་གསུམ་གྱི་བཅུད་བསྡུས་ཤིང་། །དབང་ལུང་མན་ངག་བདག་པོར་གྲགས། །དེ་ཡི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །གཙང་གི་བྱེ་མ་སེང་སེང་རུ། །འབྲོ་སྟོན་བསམ་འགྲུབ་རྡོ་རྗེ་ནི། །རྡོ་རྗེ་སེམས་དཔའི་ལུང་བསྟན་གསན། །ཧེ་རུ་ཀའི་སྐུ་རུ་གཟིགས། །སྔགས་འཆང་ཀུན་གྱི་སྤྱི་དཔལ་བཞུགས། །དེའི་དངོས་གྲུབ་ཆ་གཅིག་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །ཀ་ཐོག་ཆོས་ཀྱི་རྒྱ་མཚོ་ཆེར། །ཡོ་ག་གསུམ་གྱིས་ཡིད་བཞིན་བརྙེས། །ཀུན་ཏུ་བཟང་པོའི་རྒྱལ་ཐབས་འཛིན། །ཏིང་འཛིན་རྡོ་རྗེ་བཟང་པོར་གྲགས། །དེའི་བྱིན་རླབས་དངོས་གྲུབ་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་བདག་ལ་བསྩལ་དུ་གསོལ། །དར་ལུང་དཔལ་གྱི་གནས་མཆོག་དུ། །གསང་སྔགས་དངོས་གྲུབ་དམ་པ་བརྙེས། །གྲུབ་མཆོག་རྡོ་རྗེ་རྣམ་རྒྱལ་ཞབས། །དེའི་བྱིན་རླབས་དངོས་གྲུབ་ཀྱང་། །དེ་རིང་གསང་བའི་གནས་འདི་རུ། །བསྒྲུབ་མཆོག་ལ༴ བྱམས་སྡིང་གྲུབ་པའི་གནས་མཆོག་ཏུ། །མཁས་གྲུབ་དཔལ་འབྱོར་རྒྱལ་མཚན་ནི། གསང་ཆེན་ཟབ་མོའི་དངོས་གྲུབ་བརྙེས། །དེའི་བྱིན་རླབས་དངོས་གྲུབ་ཀྱང་། དེ་རིང་གསང་བའི་གནས་འདི་རུ། །བསྒྲུབ་མཆོག་བདག༴ བྱང་ཆུབ་གླིང་གི་བསྒྲུབ་གནས་སུ། །རིག་འཛིན་རྒྱུད་པའི་ལུང་བསྟན་བརྙེས། །རྒྱ་ཆེན་ཆོས་ཀྱི་སྤྱན་དང་ལྡན། །རྗེ་བཙུན་དོན་འགྲུབ་དཔལ་འབར་བ། །དེའི་དངོས་གྲུབ༴ དེ་རིང་གནས༴ བསྒྲུབ་མཆོག༴ ཡང་འདིར་འདུས་པ་མདོའི་དངོས་གྲུབ་གསལ་ཞིང་ལེན་པའི་དབང་དུ་གསུངས་ཏེ་ཞི་བའི་ལྷ་ཁྲོ་བོ་ལ་གནས་འགྱུར་དུ་ཡོད་པས། ཁྲོ་བོ་ལ་བླངས་པ་དེ་ཀ་ཞི་བ་ལ་བླངས་པ་ཡིན་པས། དེའི་ཕྱག་བཞེས་ལས། འབྲང་རྒྱས་ལ་གསལ་ཞིང་། གོ་རིམ་པ་བཅུ་བཞིས་མཐོ་དམ ན་ཡོད་པར་གསལ་བར་བྱས་པ་དེ་ལ་ཡེ་ཤེས་ལྷ་དང་། མཚན་མ་རྫས་གཉིས་ཀ་འབྱུང་བར་བྱས་པ་ཡིན་ཏེ། དེའི་ཆོ་གའི་ལས་རིམ་ལ། སྤྱན་དྲངས་མཆོད་པ་བཟླས་པ་དང་། བསྟོད་པ་དང་། སྨོན་ལམ་གདའ་བ་དྲུག །ཅེས་གསུངས་པས། འདིའི་ལས་ཀྱི་རིམ་པ་ནི། ཕོ་བྲང་ན་དཔལ་གྱི་མར་མེ་བཀོད་པ་དེ། འདུས་པ་ཆེན་པོ་ཁྲོ་བོའི་ལྷ་ཚོགས་དཀྱིལ་འཁོར་ན་ཇི་ལྟར་ཡོད་པ་བཞིན་གསལ་བར་བསྐྱེད། དེ་ལ་དབང་བསྐུར་བྱིན་གྱིས་རླབས། སྙན་གསན་དབབ། དཀྱིལ་འཁོར་གྱི་ལྷ་ཚོགས་ཉིད་སྤྱན་དྲངས། བསྟིམ། བསྟན་ལ་སྤྱན་དྲང་པ་ནི། ཕོ་བྲང་གི་མར་མེ་ལ་དབུས་ན་ཆེ་མཆོག །དབང་མཆོག་བཛྲ་ཧེ་རུ་ཀ །དེ་ལྟར་གསུམ་པོ་ཡུམ་དང་བཅས་པ་གསལ་བར་བསྐྱེད་དེ། དེས་ལྕགས་ཀྱུའི་ཕྱག་རྒྱ་བཅས་ལ། ༀ་ཨ་ཁྲ་མ་ཧཱ་ཀྲོ་དྷ་ཤྲཱི་ཧེ་རུ་ཀ་ཧཱུཾ། ཀ་ཏ་མཧཱ་ཀྲོ་ཏི་ཤྭ་རི་ཧཱུཾ། སརྦ་ཏ་ཐཱ་ག་ཏ་མ་ཧཱ་ཤྲི་ཧེ་རུ་ཀ་ཧཱུཾ། སརྦ་ཏ་ཐཱ་ག་ཏ་ཀྲོ་ཏི་ཤྭ་རི་ཧཱུཾ། བཛྲ་མ་ཧཱ་ཤྲི་ཧེ་རུ་ཀ་བཛྲ་ཀྲོ་ཏི་ཤྭ་རི་ཧཱུཾ། བཛྲ་ཨང་གུ་ཤ་ཛ་ཛཿ ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཞེས་བརྗོད་ལ་གསལ་ཤིང་ལ་མེ་སྤར་མེ་འབར་བ་དང་། འོད་དང་སྤྲུལ་པར་ཆེས་ནས་གསལ། ཤིང་རྩེ་ལ་བྱོན་པར་གསལ། གཉིས་པ་མཆོད་པ་འབུལ་བ་ནི། བདུད་རྩི། གཏོར་མ། རཀྟ་གསུམ་པོ་རྩ་སྔགས་ཀྱིས་དབུལ། གསུམ་པ་བཟླས་པ་ནི། བསྐུལ་ཚིག་དང་། འཛབ་བྱ་བ་གཉིས་ཡིན་སྟེ། དེ་ལ་བསྐུལ་བ་ནི། བཅོམ་ལྡན་ཆེ་མཆོག་ཡབ་ཡུམ་དང་། །དབང་མཆོག་ཧེ་རུ་ཡབ་ཡུམ་དང་། །བཛྲ་ཧེ་རུ་ཀ་ཡབ་ཡུམ་དང་། །གཙོ་བོ་རྣམས་ཀྱི་ཐུགས་ཁ་ནས། །ཟུར་བརྒྱད་དཀྱིལ་ནས་འབྲུ་བརྒྱད་དང་། །སྙིང་པོ་རུ་ལུ་འབྲུ་བརྒྱད་དང་། །གུ་ཡ་ཛྙཱ་ནའི་འོད་ཟེར་འཕྲོས། །ཡར་འཕྲོས་དཔལ་གྱི་ཐུགས་དམ་བསྐངས། །ཚུར་འདུས་བདག་ལ་དངོས་གྲུབ་སྩོལ། ༀ་ཨ་ཁྲ་མཧཱ་ཀྲོ་ཏ་ཤྲི་ཧེ་རུ་ཀ་ཧཱུཾ། ཀ་ཏ་མ་ཧཱ་ཀྲོ་ཏི་ཤཱ་རི་ཧཱུཾ། ༀ་རུ་ལུ༴ ༀ་སརྦ་ཏ་ཐཱ་ཏ་མ་ཧཱ་ཤྲཱི་ཧེ་རུ་ཀ་ཧཱུཾ། སརྦ་ཏ་ཐཱ་ག་ཏ་ཀྲོ་ཏི་ཤྭ་རི་ཧཱུཾ། ༀ་རུ་ལུ༴ ༀ་བཛྲ་མ་ཧཱ་ཀྲོ་ཏི་ཤྭ་རི་ཧེ་རུ་ཀ་བཛྲ་ཀྲོ་ཏི་ཤྭ་རི་ཧཱུཾ། ༀ་རུ་ལུ༴ ༀ་གུ་ཧྱ་ཛྙཱ་ན་བོ་དྷི་ཙིཏྟ་མ་ཧཱ་སུ་ཀ་ཧཱུཾ། བཞི་པ་བསྟོད་པ་ནི། ༀ་བཅོམ་ལྡན་ཆེ་མཆོག་ཧེ་རུ་ཀ །བླ་མེད་ཡུམ་ཆེན་ཁྲོ་མོ་རྒྱལ། །མཐིང་ནག་འཇིགས་སྐུ་བདུད་བཞི་འདུལ། །ཉི་ཤུ་རྩ་གཉིས་མངོན་སངས་རྒྱས། །ཞབས་བརྒྱད་ཏིང་འཛིན་དབྱིངས་སུ་སྦྱོར། །བརྒྱན་རྣམས་མ་ལུས་སྐུ་ལ་རྫོགས། །ཁྲོ་རྒྱལ་སྐུ་ལ་ཕྱག་འཚལ་བསྟོད། །བཅོམ་ལྡན་དབང་མཆོག་ཧེ་རུ་ཀ །དབུ་དགུ་ཕྱག་ནི་བཅྭ་བརྒྱད་དེ། །སྟོང་པ་བཅྭ་བརྒྱད་ཡོངས་སུ་རྫོགས། །མཐིང་ནག་དགྱེས་པ་ཆེན་པོའི་སྐུ། །ཞབས་བརྒྱད་རུ་ཏྲ་ཕོ་མོ་མནན། འཇིགས་བྱེད་སྐུ་ལ་ཕྱག་འཚལ་བསྟོད། །ཧཱུཾ་རྡོ་རྗེ་རིགས་མཆོག་བདུད་བཞི་འདུལ་བའི་གཙོ། །གདུག་པ་ཆེན་པོ་ཐབས་ཀྱི་བཏུལ་ནས་ནི། །བདུད་ཀྱི་རིགས་རྣམས་རྡུལ་དུ་རླག་མཛད་པ། །དཔལ་ཆེན་ཡབ་ཡུམ་སྐུ་ལ་ཕྱག་འཚལ་བསྟོད། །ༀ་རུ་ལུ༴ ༀ་གྷུ༴ ལྔ་པ་སྨོན་ལམ་གདབ་བ་ནི། ཧོ་བཅོམ་ལྡན་འདས་ཆེ་མཆོག་ཧེ་རུ་ཀ་ཡབ་ཡུམ་དང་། དབང་མཆོག་ཆེན་པོ་ཡབ་ཡུམ་དང་། དཔལ་ཆེན་པོ་ཧེ་རུ་ཀ་ཡབ་ཡུམ་ལ་སོགས་པ་རྣམས་ལ། དངོས་གྲུབ་ཏུ་གསོལ་བའི་མདོ་ནི། བདག་ཅག་རྣལ་འབྱོར་པ་ཚོགས་ཀྱི་དཀྱིལ་འཁོར་ཆེན་པོ་འདིར་འཚོགས་པ་རྣམས་ལ། ཤེས་བྱའི་ཆོས་ཐམས་ཅད་ལ་ཐོགས་པ་མེད་པའི་ཤེས་པའི་ཤེས་རབ། མི་བརྗེད་པའི་གཟུངས། མངོན་པར་ཤེས་པ་དྲུག །རྒྱུན་གྱི་ཏིང་འཛིན་། རྡོ་རྗེ་ལྟ་བུའི་ལུས། གཡུང་དྲུང་ལྟ་བུའི་ཚེ། གཞན་ཡང་སྣང་བ་དང་། མི་སྣང་བ་དང་། རྡོ་རྗེ་སྤྱན་ལ་སོགས་པའི་དངོས་གྲུབ་ཐོབ་པ་དང་། ཁྱད་པར་དུ་ཡང་། ཐུན་མོང་གི་དངོས་གྲུབ། བུ་ཚ་དང་། རིགས་རྒྱུད་འཕེལ་བ་དང་། ཚེ་རིང་པ་དང་། ནད་མེད་པ་དང་། དཔལ་དང་གཟི་མདངས་དང་། ཟས་དང་ནོར་ལ་སོགས་པ་འབྱོར་པའི་ཡོ་བྱད་ཐམས་ཅད་རྒྱས་ཤིང་འཕེལ་ནས། འདོད་པའི་ཡོན་ཏན་ལྔ་ལ་ལོངས་སྤྱོད་པ་དང་། སངས་རྒྱས་ཀྱི་བསྟན་པ་དར་ཤིང་རྒྱས་པ་དང་། འཁོར་དང་ལོངས་སྤྱོད་འཕེལ་ཞིང་རྒྱས་པའི་དངོས་གྲུབ་བསྩལ་དུ་གསོལ། །ཁྱད་པར་གྱིས་རྡོ་རྗེ་སེམས་དཔའི་མཚན་ཡོངས་སུ་རྫོགས་པའི་དངོས་གྲུབ་ཀྱི་སྐུ་ཐོབ་པར་བསྩལ་དུ་གསོལ། །དྲུག་པ་བསྡུ་བ་ནི། བཛྲ་ཨདྒུ་ཤ་ཛ་ཛཱཿཞེས་པ་ལན་གསུམ་བརྗོད་པས། དང་པོ་འོད་དང་སྤྲུལ་པ་གཉིས་པས་ཡིག་འབྲུ་གསུམ་པ་འོད་དུ་ཞུ་ནས་བདག་ཉིད་ལ་ཐིམ་པས། བདག་སྐུ་གསུང་ཐུགས་ཡོན་ཏན་འཕྲིན་ལས་གཟི་བརྗིད་དང་ལྡན་པར་བསམ་མོ། །དེ་ནས་གསལ་ཤིང་གིས་རིམ་བ་གཉིས་པ་ལ་རྒྱུད་ཀྱི་ཧེ་རུ་ཀ་བཞིའི་དངོས་གྲུབ་བླངས་ཏེ། དེ་ལ་ཡང་དོན་དྲུག་གི་དང་པོ་སྤྱན་དྲངས་བ་ནི། ཕོ་བྲང་གིས་མར་མེ་ལ། རིགས་བཞི་ཧེ་རུ་ཀ་ཕྱོགས་བཞི་ནས་བསྐྱེད་པ་སྟེ། ལྕགས་ཀྱུའི་ཕྱག་རྒྱ་བཅས་སྟེ། །ༀ་བུདྡྷ་ཤྲི་ཧེ་རུ་ཀ་བུ་དྷ་ཤི་ཧེ་རུ་ཀྲོ་ཏི་ཤྭ་རི་ཧཱུཾ། བཛྲ་ཨདྒུ་ཤ་ཛ་ཛ། ༀརུ་ལུ༴ རད་ན་ཡབ་ཡུམ། ཨདྒུ་ཤ་ཛཱཿ ༀ་རུ༴ པདྨ་ཡབ་ཡུམ། ཨདྒུ༴ ༀ་རུ༴ ཀརྨ་ཡབ་ཡུམ༴ ཨདྒུ༴ ༀ་རུ་ལུ༴ ཞེས་བཞེས་བརྗོད་ལ་གསལ་ཤིང་གཉིས་པ་ལ་མེ་སྦར། མེ་འབར་བ་དང་གཉིས་སུ་མེད་པར་འོད་དང་བཅས་ནས་བྱོན་པར་བསམ། གཉིས་པ་མཆོད་པ་འབུལ་བ་ནི། རིགས་བཞི་ཧེ་རུ་ཀ་ལ་ཞེས་པས། གཏོར་མ། བདུད་རྩི། རཀྟ་གསུམ་འབུལ། གསུམ་པ་བསྐུལ་ཚིག་ནི། རིགས་བཞིའི་ཧེ་རུ་ཀའི་ཐུགས་ཁ་ནས། ཟུར་བརྒྱད་དཀྱིལ་ནས་འབྲུ་བརྒྱད་ཤར། སྙིང་པོ་རུ་ལུ་འབྲུ་བརྒྱད་དང་། །གྷུ་ཡ་ཛྙཱ་ནའི། ཕར་འཕྲོས་དཔལ་གྱི་ཐུགས་ཀ་ནས། །ཚུར་འདུས་བདག་ལ་དངོས་གྲུབ་བསྩོལ། །འཛབ་ནི། བུདྡྷ། རཏྣ། པདྨ། ཀརྨཱ་ཡབ་ཡུམ་སྔགས་ལ་རུ་ལུ་རེ་རེ་དང་། གྷུ་ཧྱ་རེ་རེ་གདགས་སོ། །བཞི་པ་བསྟོད་པ་ནི། ཆོས་དབྱིངས་དག་པ། ཕུན་ཚོགས་འཛིན། གསུང་མཆོག་ཆོས། ནན་དབང་དྲག་ཤུལ་བཞིས་བསྟོད། །ལྔ་པ་སྨོན་ལམ་ནི། ཧོ་བཅོམ་ལྡན་རིགས་བཞིའི་ཧེ་རུ་ཀ་ཡབ་ཡུམ་ལ་དངོས་གྲུབ་དུ་གསོལ་བའི་མདོ་ནི་བདག་ཅག་རྣལ་འབྱོར་པ་ཚོགས་ཀྱི་དཀྱིལ་འཁོར་ཆེན་པོ་འདིར་འཚོགས་པ་རྣམས། ཤེས་བྱའི་ཆོས་ཐམས་ཅད་ལ་ཅེས་པ་མན་ཆད་འགྲེའོ། །དྲུག་པ་བསྡུ་བ་གོང་བཞིན་བྱའོ། །དེ་ནས་གསལ་ཤིང་རིམ་པ་གསུམ་པ་ལ་ལུང་གི་ཧེ་རུ་ཀ་བཞིའི་དངོས་གྲུབ་བླངས་པ་ལའང་དོན་དྲུག་གིས་སྟོན་པའི་དང་པོ་སྤྱན་དྲངས་བ་ནི། ཕོ་བྲང་གི་མར་མེ་ལ་ལུང་གི་ཧེ་རུ་ཀ་ཡབ་ཡུམ། མཚམས་བཞིའི་རྩིབས་ལ་བསྐྱེད་པ་དེ་ལྟ་བུའི་ཕྱག་རྒྱས་སྤྱན་དྲངས་སྟེ། ༀ་རཀ་ཤ་ཤྲི་ཧེ་རུ་ཀ །རཀྴ་ཀྲོ་ཏི་ཤཱ་རི་ཧཱུཾ། ༀ་རུ་ལུ༴ གྷུ་ཧྱ་ཛྙཱ་ན༴ ས་ནུ་ཡབ་ཡུམ། རུ་ལུ། གྷུ་ཡ། གྷུ་ཧྱ་ཡབ་ཡུམ། རུ་ལུ། གྷུ་ཡ་ཛྙཱ་ན། རཀ་ཤ་ཡབ་ཡུམ། ༀ་རུ་ལུ། གྷུ་ཧྱ་ཛྙཱ་ན་རྣམས། སྔགས་རིམ་པར་བརྗོད་ལ། གསལ་ཤིང་གསུམ་པ་ལ་མེ་སྦར། །འབར་བ་དང་གཉིས་སུ་མེད་པར་བྱོན་པར་བསམ། དེ་ནས་གཉིས་པ་མཆོད་པ་འབུལ་བ་ནི། ལུང་གི་ཧེ་རུ་ཀ་ཡབ་ཡུམ་རྣམས་ལ་གཏོར་མ། བདུད་རྩི། རཀྟ་གསུམ་དབུལ། གསུམ་པ་བསྐུལ་ཚིག་དང་འཛབ་གཉིས་ཀྱི་དང་པོ་བསྐུལ་བ་ནི། ༀ་ལུང་གི་ཧེ་རུ་ཀའི་ཐུགས་ཀ་ནས། ཟུར་བརྒྱད་དཀྱིལ་ནས་འབྲུ་བརྒྱད་ཤར། །སྙིང་པོ་རུ་ལུ་འབྲུ་བརྒྱད་དང་། །གྷུ་ཧྱ་ཛྙཱ་ནའི་འོད་ཟེར་ནི། །ཕར་འཕྲོས་པས་ནི་ཐུགས་ཀ་ཐིམས། ཚུར་འདུས་བདག་ལ་དངོས་གྲུབ་གསོལ། །འཛབ་ནི་རཀ་ཤ །ས་ནུ། གྷུ་ཡ། ཡཀ་ཤ་བཞིའོ། །རུ་ལུ་རེ་རེ་དང་གུ་ཧྱ་རེ་རེ་སྤེལ་གྱིས་གདགས་སོ། །བཞི་པ་བསྟོད་པ་ནི། ཧཱུཾ་སྤྱོར་བ་དམ་ཚིག་གསང་བའི་སྒྲོལ་མའི་དབྱིངས། །ལོག་ལྟ་མྱང་བྱེད་སྐྱེ་གནས་རེག་བྱ་འཇོམས། ག་ན་ཉམས་པ་མཚན་མ་སྒྲོལ། ལུང་གི་ཁྲོ་རྒྱལ་ཚོགས་ལ་ཕྱག་འཚལ་བསྟོད། །ལྔ་པ་སྨོན་ལམ་ནི། ཧོ་བཅོམ་ལྡན་ལུང་གི་ཧེ་རུ་ཀ་ཡབ་ཡུམ་གྱི་ཚོགས་ལ་དངོས་གྲུབ་དུ་གསོལ་བའི་མདོ་ནི། བདག་ཅག་རྣལ་འབྱོར་པ་ཚོགས་ཀྱི་དཀྱིལ་འཁོར་ཆེན་པོ་འདིར་འཚོགས་པ་རྣམས་ལ། ཤེས་བྱའི་ཆོས་ཐམས་ཅད་ལ་ཞེས་པ་མན་ཆད་གང་གིས་ཤེས་སོ། །དྲུག་པ་བསྡུ་བ་གོང་བཞིན་ནོ། །གསལ་ཤིང་གི་རིམ་པ་བཞི་པ་ལ་ཁྲོ་མོ་བརྒྱད་ཀྱི་དངོས་གྲུབ་བླངས་པ་ལ། དྲུག་གི་དང་པོ་སྦྱན་དྲངས་པ་ནི། མར་མེ་ལ་ཁྲོ་མོ་བརྒྱད་བསྐྱེད་པ། དེ་ལྟ་བུའི་ཕྱག་རྒྱས་སྤྱན་དྲངས་བ་ནི། ཀེ་རི་བརྒྱད་པོའི་རྩ་སྔགས་རྫོགས་པ ར་བརྗོད་ལ། བཛྲ་ཨདྒུ་ཤ་ཛཱ་ཛཱ། ཞེས་པས་བརྗོད། རུ་ལུ་དང་གྷུ་ཡ་བཟླས། སྨན་རག་གཏོར་གསུམ་ཁའི། ཀི་རི་བརྒྱད་ཀྱི་ཐུགས་ཀའི། སྙིང་པོའི་གྷུ་ཧྱ་ཛྙཱ་ནའི་འོད་འཕྲོས་བས། ཕར་འཕྲོས་པས་ནི། ཚུར་འདུས་བདག་ལ། འཛབ་བྱ། བསྟོད་པ། ཀེའུ་རི་ལ་སོགས་ཁྲོ་མོ་བརྒྱད་རྣམས་ནི། གདུག་པ་ཐབས་ཀྱིས་འདུལ་པའི་དྲག་ཤུལ་ཅན། །སྐུ་མདོག་ཕྱག་རྒྱ་སྣ་ཚོགས་ཅིར་ཡང་སྟོད། །ཡེ་ཤེས་ཁྲོ་མོ་བརྒྱད་ལ་ཕྱག་འཚལ་བསྟོད། །ཁྲོ་མོ་བརྒྱད་ཀྱི་དངོས་གྲུབ་དུ་གསོལ་བའི་མདོ་ནི། ཞེས་པ་ལ་སོགས་པ་དང་བསྡུ་བ་གོང་བཞིན་ནོ། །གསལ་ཤིང་གི་རིམ་པ་ལྔ་པ་ལ་ཕྲ་མེན་བརྒྱད་དང་སྒོ་མ་བཞིའི་དངོས་གྲུབ་བླངས་ལ་དྲུག་གི་དང་པོ་སྤྱན་དྲངས་པ་ནི། ཕོ་བྲང་གི་མར་མེའི་བར་འཁྱམས་དང་པོ་ལ་སིངྷ་བརྒྱད་དང་། སྒོ་མ་བཞི་བསྐྱེད་པ་ལྟ་བུའི་ཕྱག་རྒྱ་བཅས་ལ། བཛྲ་སིངྷ་མུ་ཁ་ཧེ། ཞེས་རྩ་སྔགས་བརྒྱད་བརྗོད། བཛྲ་ཨུདྒུ་ཤ་ཛཱ་ཛཱ། ༀ་རུ་ལུ༴ ཞེས་བརྗོད། ཡང་སྒོ་མ་བཞིའི་རྩ་སྔགས། བཛྲ་ཨརྻ་ཏེ་ཛ་ཏེ་ང་ཛཿ ལ་སོགས་པ་བཞི་བརྗོད། བཛྲ་ཨདྒུ་ཤ་ཛ་ཛ། ལ་སོགས་གསལ་ཤིང་ལྔ་པ་ལ་མེ་སྤར། འོད་དང་བཅས་ནས་བྱོན་པར་བསམ། གཉིས་པ་མཆོད་པ་སྨན་རག་གཏོར་གསུམ་གྱིས་དབུལ། གསུམ་པ་བཟླས་པ་ལ། གཉིས་ཀྱིས་བསྐུལ་ཚིག་ནི། ༀ་སིང་ཧ་ཕྲ་མེད་བརྒྱད་རྣམས་དང་། །སྒོ་མ་བཞིའི་ཐུགས་ཁ་ནས། སྙིང་པོ་རུ་ལུ༴ གྷུ་ཡ་ཛྙཱ་ནའ༴ ཕར་འཕྲོས་པས་ནི་མཆོད། ཚུར་འདུས་བདག་ལ་དངོས༴ བཟླས་པ་ནི་སིངྷ་བརྒྱད་པོའི་རྩ་སྔགས་དང་། །སྒོ་མ་བཞིའི་རྩ་སྔགས་རུ་ལུ་སྤེལ་མར་བཟླས་སོ། །གྷུ་ཧྱ་བཟླས། བཞི་པ་བསྟོད་པ་ནི། ཧཱུཾ་སིང་ཧ་ལ་སོགས་ཕྲ་མེན་བརྒྱད་རྣམས་ལ་ཕྱག་འཚལ་བསྟོད། སྟག་གདོང་ལ་སོགས་སྒོ་མ་བཞི་རྣམས་ནི། །ཚད་མེད་བཞི་ཡིས་འགྲོ་བའི་དོན་མཛད་པ། །ཤར་ལྷོ་ནུབ་བྱང་སྒོ་བཞི་ཐུབ་པར་བསྲུངས། །སྒོ་སྐྱོང་ཁྲོ་མོ་བཞི་ལ་ཕྱག་འཚལ་བསྟོད། །ལྔ་པ་སྨོན་ལམ་ནི། ཕྲ་མེན་བརྒྱད་ལ་དངོས་གྲུབ་ཏུ་གསོལ་བའི་མདོ་ནི། ཤེས་བྱའི་ཆོས༴ ཞེས་པ་དང་། །དྲུག་པ་བསྡུ་བ་གོང་བཞིན་ནོ། །གསལ་ཤིང་གི་རིམ་པ་དྲུག་པ་ལས། སྤོར་མ་བརྒྱད་དང་། གསང་ཡུམ་བཞིའི་དངོས་གྲུབ་བླངས་པ་ལ་དྲུག་གི་དང་པོ་སྤྱན་དྲངས་པ་ནི། ཕོ་བྲང་གི་མར་མེའི་བར་འཁྱམས་གཉིས་པ་ལ་བསྐྱེད་པ་སྟེ། ལྕགས་ཀྱུའི་ཕྱག་རྒྱ་ལ། ༀ་བཛྲ་ཨ་པྲ་ཏི་ཧ་ཨརྱ་ནི་ཙ་ཏུར་ཏ་ར་ཕཊ། ཨ་རག་མོ་ཧཱུཾ་ཞེས་པ་བརྒྱད་དང་། ཤྲི་བཛྲ་མུད་ཀ་ར་ཤ་ར་ལུ་ཤྲི་བཛྲ་ར་ག་ཤ་ར་ཡ་ཡ་ན་མ། རུ་ལུ་ཤྲི་བཛྲ་གྷན་དྷ་པྲ་ཛྭ་ལ་རུ་ལུ། ༀ་རུ་ལུ་སྤེལ་ལ་བརྗོད། ༀ་བཛྲ་ཨདྒུ་ཤ་ཛཱ་ཛཱ། ཞེས་བརྗོད་ལ་གསལ་ཤིང་དྲུག་པ་ལ་མེ་སྤར། འོད་དང་བཅས་དེ་བྱོན་པར་བསམ། གཉིས་པ་མཆོད་པ་སྨན་རག་གཏོར་གསུམ་སྔགས་ཀྱི་དབུལ། གསུམ་པ་ལ་གཉིས་ཀྱི་བསྐུལ་ཚིག་ནི། ༀ་སྤོར་བྱེད་ཆེན་མོ་བརྒྱད་རྣམས་དང་། གསང་བ་ཡུམ་བཞིའི་ཐུགས་ཀ་ནས། སྙིང་པོ་རུ་ལུ༴ གྷུ་ཡ་ཛྙཱ་ནའི༴ ཕར་འཕྲོས་པས་མཆོད། ཚུར་འདུས་བཟླས་པ་ནི། ཨ་རག་མོ་ཧཱུཾ་ཞེས་པ་བརྒྱད་དང་། རུ་ལུ་དང་། གྷུ་ཧྱ་སྤེལ་མ་བཟླས་སོ། །བཞི་པ་བསྟོད་པ་ནི། ཧཱུཾ་ཆོས་ཉིད་རྣམ་དག་ངང་ལས་རང་སྣང་བའི། །སྣ་ཚོགས་ཅིར་སྣང་འགྱུར་བའི་སྐུ་མངའ་ཞིང་། །སྲིད་གསུམ་ཞིང་དུ་སྦྱོར་བས་གཡང་གཞི་གསོལ། །སྤོར་བྱེད་ཆེན་མོ་བརྒྱད་ལ་ཕྱག་འཚལ་བསྟོད། །བར་འཁྱམས་དེའི་ཤར་ལྷོ་ནུབ་བྱང་སྒོར། །དགྱེས་པ་བསྐྱེད་བ་གསང་བའི་ཡུམ་ཆེན་བཞི། །གཉིས་མེད་རོལ་པའི་བྱིན་རླབས་སྣ་ཚོགས་འཕྲོ། །ཤེས་རབ་ཡུམ་ཆེན་བཞི་ལ་ཕྱག་འཚལ་བསྟོད། །ལྔ་པ་སྨོན་ལམ་ནི། ཧོ་སྤོར་མ་ཆེན་མོ་བརྒྱད་དང་བཞི་ལ་གསང་བའི་ཡུམ་ཆེན་པོ་དངོས་གྲུབ་དུ་གསོལ་བའི་མདོ་ནི་ཞེས་པ་དང་། དྲུག་པ་བསྡུ་བ་ལ་གོང་བཞིན་ནོ། །ཡང་གསལ་ཤིང་གི་རིམ་བདུན་པ་ལ་དབང་ཕྱུག་མ་ཉེར་བརྒྱད་ཀྱི་དངོས་གྲུབ་བླངས་པས་དོན་དྲུག་གི་དང་པོ་སྤྱན་འདྲེན་པ་ནི། ཕོ་བྲང་གི་མར་མེ་བར་འཁྱམ་གསུམ་པ་ལ་དབང་མོ་བསྐྱེད་པ་དེ། ལྕགས་ཀྱུའི་ཕྱག་རྒྱ་བཅས་ལ། བྷྱོ་བཛྲ་མ་ནུ་རག་ཤ་སི་བྷྱོ། ལ་སོགས་པའི་རྩ་སྔགས་ཚང་པར་བརྗོད་ལ། ༀ་རུ་ལུ་བཟླས། བཛྲ་ཨདྒུ་ཤ་ཛཱ་ཛཱ། ཞེས་བརྗོད་ལ་གསལ་ཤིང་བདུན་བ་ལ་མེ་སྦར། འོད་ཟེར་དང་བཅས་ནས་བྱོན་པར་བསམ། གཉིས་པ་མཆོད་སྨན་རག་གཏོར་གསུམ་སྔགས་ཀྱིས་དབུལ། གསུམ་པ་བཟླས་པ་ལ་གཉིས་ཀྱི་དང་པོ་བསྐུལ་ཚིག་ནི། ༀ་དབང་ཕྱུག་ཉི་ཤུ་རྩ་བརྒྱད་ཐུགས་ཀ་ནས། །སྙིང་པོ་རུ་ལུ་གྷུ་ཧྱ་ཛྙཱ་ནའི་འོད་འཕྲོས། །ཕར་འཕྲོས་དཔལ༴ ཚུར་འདུས་བདག༴ རྩ་སྔགས་ཉེར་བརྒྱད་བཟླས་ལ། །རུ་ལུ་དང་གྷུ་ཧྱ་སྤེལ་ལ་བཟླས་སོ། །བཞི་པ་བསྟོད་པ་ནི། ཧཱུཾ་སྲིན་མོ་ལ་སོགས་དབང་ཕྱུག་ཉི་ཤུ་བརྒྱད། །དྲེགས་པའི་ལྷ་ཆེན་རྣམས་ཀྱི་ཆུང་མ་དེ། །དབང་དྲག་ལས་ལ་ཐོགས་པ་མེད་པར་སྤྱོད། །ཉི་ཤུ་རྩ་བརྒྱད་ཚོགས་ལ་ཕྱག་འཚལ་བསྟོད། །ལྔ་པ་སྨོན་ནི། དབང་ཕྱུག་མ་ཉི་ཤུ་རྩ་བརྒྱད་ལ་དངོས་གྲུབ་དུ་གསོལ་བའི་མདོ་ནི། ཞེས་པ་དང་། དྲུག་པ་བསྡུ་བ་འདྲེའོ། །གསལ་ཤིང་བརྒྱད་པ་ལ། མཁའ་འགྲོ་སུམ་བཅུ་རྩ་གཉིས་ཀྱི་དངོས་གྲུབ་བླངས་པ་ལ་དྲུག་གི་དང་པོ་ནི་སྤྱན་དྲངས་པ་ནི། ཕོ་བྲང་གི་མར་མེ་ལ། བར་འཁྱམས་བཞིའི་མཁའ་འགྲོ་མ་སུམ་ཅུ་སོ་གཉིས་བསྐྱེད་པ་དེ། ལྕགས་ཀྱུའི་ཕྱག་རྒྱ་བཅས་ལ། ཨེ་ཨ་ར་ལི་ཧཱུཾ་ཞེས་པ་སོ་གཉིས་བརྗོད། རུ་ལུ་བཟླས། བཛྲ་ཨངྒུ་ཤ་ཛཱ་ཛཱ། ཞེས་བརྗོད་ལ་གསལ་ཤིང་བརྒྱད་པ་ལ་མར་མེ་སྤར། འོད་དང་བཅས་ནས་བྱོན་པར་བསམ། །གཉིས་པ་མཆོད་པ་སྨན་རག་གཏོར་གསུམ་སྔགས། གསུམ་པ་བཟླས་པ་ལ་གཉིས་ཀྱི་བསྐུལ་ཚིག་ནི། ༀ་མཁའ་འགྲོ་སོ་གཉིས་ཐུགས་ཀ་ནས། སྙིང་པོ་རུ་ལུ། གྷུ་ཡ་ཛྙཱ་ནའི་འོད་འཕྲོས་པས། ཕར་འཕྲོས་པས། ཚུར་འདུས། ཨེ་ཨཱ་ར་ལི་ཧཱུཾ་དང་། རུ་ལུ་གྷུ་ཡ་རྣམས་སྤེལ་ལ་བཟླས་སོ། །བཞི་པ་བསྟོད་བ་ནི། ཧཱུཾ་ནམ་མཁའི་ལུས་ཅན་གར་ཡང་ཐོགས་མེད་ཅིང་། །འདོད་དགུར་བསྒྱུར་བའི་གཟུགས་ཅན་འཕྲུལ་མོ་ཆེ། །མ་སྲིང་བྱམས་པའི་ཚུལ་གྱིས་གྲོགས་མཛད་མ། །མཁའ་འགྲོ་སུམ་བཅུ་གཉིས་ལ་ཕྱག་འཚལ་བསྟོད། །ལྔ་པ་སྨོན་ལམ་ནི། མཁའ་འགྲོ་སུམ་བཅུ་གཉིས་ལ་དངོས་གྲུབ་གསོལ་བའི་མདོ་ནི། ཞེས་པས། དྲུག་པ་བསྡུ་བ་འདྲེ། གསལ་ཤིང་དགུ་བ་ལ་མ་མོ་བདུན་དང་སྲིང་མོ་བཞིའི་དངོས་གྲུབ་བླངས་ལ། དྲུག་གི་དང་པོ་སྤྱན་དྲངས་པ་ནི། ཕོ་བྲང་གི་མར་མེའི་བར་འཁྱམས་ལྔ་པ་ལ་མ་མོ་བདུན་དང་། །སྲིང་མོ་བཞི་བསྐྱེད་ནས་ཡོད་པ་དེ། །ལྕགས་ཀྱུའི་ཕྱག་རྒྱ་བཅས་ལ། །མ་མ་དྷཱ་དུ་ཧཱུཾ་བདུན་དང་རུ་ལུ་སྤེལ། །བཛྲ་དུན་ཏིང་བྷྱོ་ཞེས་པ་བཞི་དང་རུ་ལུ་སྤེལ་ལ། །བཛྲ་ཨངྒུ་ཤ་ཛཱ་ཛཱ་ཞེས་བརྗོད་ལ་གསལ་ཤིང་དགུ་པ་ལ་མེ་སྤར། འོད་དང་བཅས་ནས་བྱོན་པར་བསམ། །གཉིས་པ་མཆོད་པ་སྨན་རག་གཏོར་གསུམ་པ་བཟླས་པའི་བསྐུལ་ཚིག་ནི། ༀ་མ་བདུན་སྲིང་མོའི་སྙིང་པོ་རུ་ལུ་གྷུ་ཧྱ། ཕར་འཕྲོས། ཚུར་འདུས། མ་མ་དྷ་དུ་ཧཱུཾ་བདུན་དང་། །རུ་ལུ་བཛྲ་དུན་ཏིང་བྷྱོ་བཞི་དང་། །རུ་ལུ་སྤེལ་ལ་བཟླས་སོ། །བཞི་པ་བསྟོད་པ་ནི། །ཧཱུཾ་འཇིག་རྟེན་དྲེགས་པ་འདུལ་བ་མ་མོའི་ཚོགས། །ཕྱི་འཁོར་འདུལ་ཞིང་ནང་འཁོར་སྐྱོངས་མཛད་པ། །དུར་ཁྲོད་མ་བདུན་ལས་ཀྱི་སྲིང་མོ་བཞི། །བགེགས་བསྲུངས་མ་མོ་རྣམས་ལ་ཕྱག་འཚལ་བསྟོད། །ལྔ་པ་སྨོན་ལམ་ནི། མ་སྲིང་བཞི་ལ་དངོས་གྲུབ་དུ་གསོལ་བའི་མདོ་ནི། ཞེས་པ་དང་། དྲུག་པ་བསྡུ་བ་ནི་གོང་དང་འདྲེའོ། །གསལ་ཤིང་བཅུ་པ་ལ་གིང་བཅྭ་བརྒྱད་ཀྱི་དངོས་གྲུབ་བླངས་པ་ལ་དྲུག་གི་དང་པོ་སྤྱན་དྲངས་པ་ནི། ཕོ་བྲང་གི་མར་མེའི་བར་འཁྱམས་དྲུག་པ་ལ་གིང་བཅྭ་བརྒྱད་བསྐྱེད་པ་དེ། ལྕགས་ཀྱུའི་ཕྱག་རྒྱ་བཅས་ལ། ཀིང་ཀ་ར་ཧ་ཧ་རུ་ལུ་རུ་ལུ་ཧཱུྃ་བྷྱོ་ཧཱུྃ་དང་། རུ་ལུ་སྤེལ། བཛྲ་ཨདྒུ་ཤ་ཛཱ་ཛཱ། གསལ་ཤིང་རིམ་པ་བཅུ་པ་ལ་མེ་སྦར། །འོད་དང་བཅས་ནས་བྱོན་པར་བསམ། །གཉིས་པ་མཆོད་པ་སྨན་རཀ་གཏོར། གསུམ་པ་བཟླས་པའི་བསྐུལ་ཚིག་ནི། །ༀ་གིང་ཆེན་བཅྭ་བརྒྱད་ཐུགས། །སྙིང་བོ་རུ་ལུ། གྷུ་ཡ་ཛྙཱ་ནའི། ཕར་འཕྲོས། ཚུར་འདུས། ཀིང་ཀ་ར་ཧ་ཧ་རུ་ལུ་རུ་ལུ་བྷྱོ། ཞེས་བཅོ་བརྒྱད་དང་། རུ་ལུ་སྤེལ། བཞི་པ་བསྟོད་པ་ནི། ཧཱུཾ་ཁམས་གསུམ་སྒྲོལ་བའི་གིང་ཆེན་བཅྭ་བརྒྱད་ནི། །སྲིད་གསུམ་ལས་ལ་ཐོགས་མེད་སྒྲོལ་ལ་བརྩོན། །བསྒྲལ་བའི་ཞིང་བཅུ་གཏན་ནས་རླགས་པར་བྱེད། །གིང་ཆེན་གིང་ལྕགས་ཚོགས་ལ་ཕྱག་འཚལ་བསྟོད། །ལྔ་པ་སྨོན་ལམ་ནི། གིང་ཆེན་བཅྭ་བརྒྱད་ལ་ཞེས་པ་དང ། །དྲུག་པ་བསྡུ་པ་འགྲེེའོ། །གསལ་ཤིང་གི་རིམ་པ་བཅུ་དྲུག་པ་ལ། །སྟེང་ཕྱོགས་ཀྱི་ཁྲོ་བོ་ཁྲོ་མོ་དྲུག་བཅུའི་དངོས་གྲུབ་བླངས་བ་ལ་དྲུག་གིས་སྤྱན་དྲངས་བ་ནི། །ཕོ་བྲང་གི་མར་མེའི་འཁྱམས་བདུན་པ་ལ། ཁྲོ་བོ་ཁྲོ་མོ་དྲུག་བཅུ་བསྐྱེད་དེ། ལྕགས་ཀྱུའི་ཕྱག་རྒྱས། ཀྲོ་ཏ་ཀྲོ་དྷི་ཧཱུཾ། ཞེས་པ་དང་། རུ་ལུའི་སྤེལ་བ་བཅུ་དྲུག་བཟླ། བཛྲ་ཨདྒུ་ཤ་ཛཱ་ཛཱ། ཞེས་བརྗོད་ལ་གསལ་ཤིང་བཅུ་གཅིག་པ་ལ་མེ་སྤར། གཉིས་པ་མཆོད་པ་སྨན་རཀ་གཏོར་གསུམ་སྔགས་ཀྱིས་མཆོད་དོ། གསུམ་པ་བཟླས་པ་ལ་གཉིས་ཀྱི་དང་པོ་བསྐུལ་ཚིག་ནི། ༀ་ཁྲོ་བོ་ཁྲོ་མོ་དྲུག་བཅུའི་ཐུགས་ཁ་ནས། སྙིང་པོ་རུ་ལུ། གྷུ་ཡ་ཛྙ་ནའི། ཕར་འཕྲོས། ཚུལ་འདུས་ཀྲོ་དྷ་ཀྲོ་ཏི་ཧཱུྃ། རུ་ལུ། གྷུ་ཡ་སྤེལ་ལ་བཟླས། བཞི་པ་བསྟོད་པ། བཅོམ་ལྡན་ཧཱུྃ་མཛད་ས་གསུམ་བརྗིད་ཀྱིས་གནོན། །ཁམས་གསུམ་འདུལ་མཛད་ཡེ་ཤེས་ལྷའི་ལྷ། །འཇིགས་བྱེད་འབར་བས་གདུག་པའི་ཚོགས་རྣམས་འཇོམས། །ཁྲོ་བོ་ཁྲོ་མོ་རྣམས་ལ་ཕྱག་མཚལ་བསྟོད། །ལྔ་པ་སྨོན་ལམ། ཁྲོ་བོ་ཁྲོ་མོ་དྲུག་བཅུ་ལ་དངོས་གྲུབ་ཅེས་པ་དང་། །དྲུག་པ་བསྡུ་བ་གོང་དང་མཐུན་ནོ། །གསལ་ཤིང་གི་རིམ་པ་བཅུ་གཉིས་པ་ལ་ཕྱོགས་བཞིའི་ཕོ་ཉ་ཉིས་བ རྒྱ་དང་བཞི་བཅུ་དངོས་གྲུབ་བླངས་པ་ལ་དྲུག་གིས་དང་པོ་སྤྱན་དྲངས་པ་ནི། ཕོ་བྲང་གི་མར་མེའི་བར་འཁྱམས་བརྒྱད་པ་ལ། །ཤར་དུ་བྷ་ན་བྷ་ན། །ཨདྒུ་ཤ་ཇ་ཞེས་པ་དྲུག་བཅུས། །དུང་གི་ཕོ་ཉ་དྲུག་བཅུ། །ལྷོར་ཧ་ལ་ཧ་ལ་པ་ཤ་ཧཱུཾ་ཞེས་པ་དྲུག་ཅུས། །ལྕགས་དང་གསེར་གྱི་ཕོ་ཉ་དྲུག་ཅུ། །ནུབ་ཕྱོགས་སུ་གརྫ་གརྫ་པོ་ཏ་བཾ། །ཞེས་བསེའི་ཕོ་ཉ་དྲུག་ཅུ། །བྱང་ཕྱོགས་སུ་པ་ཙ་པ་ཙ་གྷཎྜེ་ཧོ། །ཞེས་གཡུའི་ཕོ་ཉ་དྲུག་ཅུ། བཛྲ་ཨདྒུ་ཤ་ཛཱ་ཛཱ་ཞེས། །ལྕགས་ཀྱུའི་ཕྱག་རྒྱས་སྤྱན་དྲངས། །གསལ་ཤིང་བཅུ་གཉིས་པ་ལ་མེ་སྤར། །འོད་དང་བཅས་ནས་བྱོན་པར་བསམ། །གཉིས་པ་མཆོད་པ་སྨན་རག་གཏོར་གསུམ་སྔགས་ཀྱི་དབུལ། །གསུམ་པ་བཟླས་པ་ལ་བསྐུལ་ཚིག །སྔགས་གཉིས་ཀྱི་བསྐུལ་ཚིག་བརྗོད་པ་ནི། ༀ་ཕོ་ཉ་ཉིས་བརྒྱ་བཞི་བཅུའི་ཐུགས་ཀ་ནས། །སྙིང་པོ་རུ་ལུ་གྷུ་ཡ་ཛྙཱ་ནའི། ཕར་འཕྲོས། ཚུར་འདུས་བདག་ལ། བྷ་ན་བྷ་ན་ཨདྒུ་ཤ་ཛ། རུ་ལུ། ཧ་ལ་ཧ་ལ་པ་ཤ་ཧཱུཾ་རུ་ལུ༴ །གརྫ་གརྫ་སྤོ་ཊ་བཾ། རུ་ལུ༴ པ་ཙ་པ་ཙ་གཎྜེ་ཧོ། རུ་ལུ༴ གྷུ་ཡ༴སྤེལ་ལོ། བཞི་པ་བསྟོད་པ། ཧཱུཾ་ཡེ་ཤེས་ཐུགས་རྗེས་ཕྱོགས་བཅུར་ཁྱབ་པ་ཡིས། གདོན་བགེགས་འདུལ་བའི་ལས་ལ་ཐོགས་པ་མེད། ཅི་བགྱིས་བཀའ་ཉན་ལས་རྣམས་མྱུར་མཛད་པའི། ཕྱོགས་བཞི་ཕོ་ཉའི་ཚོགས་ལ་ཕྱག་འཚལ་བསྟོད། །ལྔ་པ་སྨོན་ལམ། ཕྱོགས་བཞིའི་ཕོ་ཉ་གཉིས་བརྒྱ་བཞི་བཅུ་ལ་དངོས་གྲུབ་དུ་གསོལ་བའི་ཞེས་ལ་སོགས་པ་དང་། དྲུག་པ་བསྡུ་བ་འདྲེའོ། །གསལ་ཤིང་གི་རིམ་པ་བཅུ་གསུམ་པ་ལ་འོག་ཕྱོགས་ཀྱི་མ་མོ་དྲུག་བཅུའི་དངོས་གྲུབ་བླངས་ལ་དྲུག་གི་དང་པོ་སྤྱན་དྲངས་པ་ནི། ཕོ་བྲང་གི་མར་མེའི་བར་ཁྱམས་དགུ་པ་ནི། མ་མོ་ཤྭ་ར་ཧཱུཾ་ཞེས ། མ་མོ་དྲུག་བཅུ་བསྐྱེད་པ་དེ། །བཛྲ་ཨངྒུ་ཤ་ཛཱ་ཛཱ། ཞེས་ལྕགས་ཀྱུའི་ཕྱག་རྒྱས་སྤྱན་དྲངས། །གསལ་ཤིང་བཅུ་གསུམ་པ་ལ་མེ་སྦར། །འོད་དང་བཅས་ནས་གསལ་ཤིང་རྩེར་བྱོན་པར་བསམ། །གཉིས་སྨན་རག་གཏོར་གསུམ་སྔགས་ཀྱི་དབུལ། །གསུམ་པ་བཟླས་པ་ལ་གཉིས་ཀྱི་དང་པོ་བསྐུལ་ཚིག་བརྗོད་པ་ནི། ༀ་མ་མོ་དྲུག་བཅུའི་ཐུགས་ཀ་ནས། སྙིང་པོ་རུ་ལུ་གྷུ་ཡ་ཛྙཱ་ནའི། ཕར་འཕྲོས་པས་མཆོད། ཚུར་འདུས་བདག་ལ། མ་མ་ཤྭ་ར་ཧཱུཾ། རུ་ལུ༴ གྷུ་ཡ༴ བཞི་པ་བསྟོད་པ་ནི། ཧཱུཾ་སྟོང་ཁམས་ཡོངས་སུ་ལས་ལ་དབང་བ་ཡི། །མ་ཆེན་རྒྱལ་མོ་སྲིད་པ་གསུམ་གྱི་བདག ། ཡུམ་ཆེན་ལས་ལ་དབང་བའི་དབང་མོ་ཆེ། །མ་མོ་དྲུག་བཅུའི་ཚོགས་ལ་ཕྱག་འཚལ་བསྟོད། །ལྔ་པ་སྨོན་ལམ། འོག་ཕྱོགས་ཀྱི་མ་མོ་དྲུག་བཅུ་ལ་དངོས་གྲུབ་དུ་གསོལ་བ་ནི། ཞེས་པ་ལ་སོགས་པ་དང་། དྲུག་པ་བསྡུ་བ་འདྲེའོ། །དེ་ནས་གསལ་ཤིང་རིམ་པ་བཅུ་བཞི་པ་ལ་རིག་འཛིན་རྩལ་འཆང་གི་དངོས་གྲུབ་བླངས་པ་ལའང་དོན་དྲུག་གི་དང་པོ་སྤྱན་དྲངས་པ་ནི། ཕོ་བྲང་གི་མར་མེའི་བར་འཁྱམས་བཅུ་པ་ན། །ༀ་མ་ཧཱ་གྷུ་རུ་ཤྭ་རི་རམ། །གྱི་ལི་ཧཱུཾ། ༀ་ཡོ་ཀི་ནི་གུ་རུ་ས་མ་ཡེ་ཛཿ ཞེས་རིག་འཛིན་རིག་པ་འཛིན་ཚོགས་བསམ་གྱིས་མི་ཁྱབ་ལ་བསྐྱེད་པ་དེ། །གསལ་ཤིང་གི་རིམ་བཅུ་བཞི་པ་ལ། བཛྲ་ཨདྒུ་ཤ་ཛཱ་ཛཱ། ཞེས་ལྕགས་ཀྱུའི་ཕྱག་རྒྱ་བཅས་ལ་སྤྱན་འདྲེན། གསལ་ཤིང་བཅུ་བཞི་པ་ལ་མེ་སྦར། འོད་དང་བཅས་ནས་གསལ་ཞིང་གི་རྩེ་ལ་བྱོན་པར་བསམ། གཉིས་པ་མཆོད་པ་ནི། རྩ་སྔགས་ལ་། མ་ཧཱ་པཉྩ་ཨ་སྨྲི་ཏ་ཁ་ཧི། རཀྟ་ལ་ཁ་ཧི། མཧཱ་བྷ་ལིང་ཏ་ལ་ཁ་ཧི། ཞེས་གཏོར་མ་དབུལ་ལོ། །གསུམ་པ་བཟླས་པ་བསྐུལ་ཚིག་དང་། འཛབ་གཉིས་ཀྱི། དང་པོ་བསྐུལ་ཚིག་ནི། ༀ་མན་ངག་མདོ་ལུང་རྒྱུད་དང་བཅས་པ་ཡིས། །ཏིང་འཛིན་བླ་མ་རྣམས་ཀྱི་ཐུགས་ཁ་ནས། །སྙིང་པོ་རུ་ལུ་འབྲུ་བརྒྱད་དང་། །གྷུ་ཡ་ཛྙཱ་ནའི་འོད་འཕྲོས་བས། །ཕར་འཕྲོས་བས་ནི་མཆོད་པར་འབུལ། །ཚུར་འདུས་བདག་ལ་དངོས་གྲུབ་གསོལ། །བཟླས་པ་ནི། ༀ་མ་ཧཱ་གུ་རུ་ཤ་རི་རམ་གྱི་ལི་ཧཱུཾ། །བཛྲ་ཡོ་གི་གུ་རུ་ས་མ་ཡ་ཛ། །ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། །ༀ་གྷུ་ཡ་ཛྙཱ་ན་བྷོ་དྷེ་ཙིཏྟ་མ་ཧཱ་སུ་ཀ་ཧཱུཾ། བཞི་པ་བསྟོད་པ་ནི། ཧཱུཾ་རིག་འཛིན་བླ་མ་བྱིན་རླབས་ལྡན་པའི་ཚོགས། །ལྷུན་གྲུབ་ཕྱག་ཆེན་ཚེ་རྣམ་སྨིན། །རྒྱ་གར་བོད་ཀྱི་གྲུབ་ཐོབ་ཚོགས་བཅས་པའི། །བསྐྱེད་རྫོགས་གསུམ་གྱི་དངོས་གྲུབ་འདིར་སྩོོལ་ཅིག །ལྔ་པ་སྨོན་ལམ། བསྐྱེད་རྫོགས་གསུམ་གྱིས་རིག་འཛིན་རྩལ་འཆང་བའི་ལྷ་ཚོགས་རྣམས་ལ་དངོས་གྲུབ་དུ་གསོལ་བའི་མདོ་ནི། ཞེས་པ་ལ་སོགས་པ་རྣམས་གོང་ཇི་ལྟ་བ་བཞིན་བྱའོ། །དྲུག་པ་བསྡུ་བ་ནི། བཛྲ་ཨངྒུ་ཤ་ཛ་ཛཱ། ཞེས་ལན་གསུམ་བརྗོད་པས། དང་པོས་འོད་དང་སྤྲུལ་པ། གཉིས་པས་ཡིག་འབྲུ། གསུམ་པས་འོད་དུ་ཞུ་ནས་བདག་ཉིད་ལ་ཐིམ་པས། བདག་ལ་སྐུ་གསུང་ཐུགས་ཡོན་ཏན་འཕྲིན་ལས་ཀྱིས་གཟི་བྱིན་དང་ལྡན་པར་བསམ་མོ། །དེ་ལྟར་ཆོ་གའི་རིམ་པ་རྣམས་ཚར་བ་དང་། གསལ་ཤིང་གི་འབྲང་རྒྱས་ཏེ། །དཔོན་སློབ་རྣམ་གྲངས་མཉམ་པར་བཀྲམ་ལ། །དེའི་བར་ལ་སློབ་བུ་རྣམས་ཁྲུས་རིམ་ཞིག་བྱ་ནང་དུ་སླེབ་པ་དང་། འབྲང་རྒྱས་རེ། འཇམ་དེས་རེ། ཛ་གད་རེ། རྣལ་འབྱོར་པ་རྣམས་རོལ་ལ་དབང་བསྐུར་རོ། །གསལ་ཤིང་གི་ཆོ་ག་ཨཐྎ། །དེ་ནས་ཞལ་ཟས་ཀྱི་དབང་བསྐུར་བ་ནི། ལས་མཁན་གྱི་ཚོགས་མཆོད་ཟུར་ཙམ་བྱས་ལ། །ཟླ་ཁམ་ཞབས་ཀྱི་དཀྱིལ་འཁོར་དུ། །རང་རིག་ཡེ་ཤེས་མངོན་སྣང་བའི། །འདོད་ཡོན་གསལ་བའི་ལོངས་སྤྱོད་བརྒྱན། །ཡོངས་སུ་རྫོགས་པའི་སིདྡྷིི་བསྩོལ། །བདག་ཉིད་རྡོ་རྗེ་སློབ་དཔོན་མཆེད་དང་ལྕམ་དྲལ་རྣམས་ཀྱིས་རྡོ་རྗེ་ཚེ་གསོལ་བས་ཚེ་དབང་ཕུན་སུམ་ཚོགས་པའི་སྐལ་བ་དང་ལྡན་པར་གྱུར་ཅིག །མཧཱ་མཱཾ་ས་གསོལ་བས་རྣལ་འབྱོར་གྱིས་དབང་ཕྱུག་ཆེན་པོ་ཐོབ་པར་གྱུར་ཅིག །འཛའ་གད་དཔའ་བོ་གསོལ་བས། །འགྲོ་བ་མང་པོ་དབང་དུ་འདུ་བར་གྱུར་ཅིག །ཟླ་རྒྱས་གསོལ་བས་ཚོགས་གཉིས་རྒྱུན་དུ་རྫོགས་པར་གྱུར་ཅིག །གལ་ཕྱེ་གསོལ་བས་བསམ་པ་ཐམས་ཅད་ལྷུན་གྱིས་གྲུབ་པར་གྱུར་ཅིག །ཟླ་ཕྲོམ་གསོལ་བས་གསང་བ་ཆོས་ཉིད་ཞི་བའི་ཏིང་ངེ་འཛིན་དང་ལྡན་པར་གྱུར་ཅིག །འཇམ་དེས་གསོལ་བས་བྱང་ཆུབ་ཀྱི་སེམས་དང་ལྡན་པར་གྱུར་ཅིག །ཞལ་ཟས་ཁ་བ་དང་། མངར་བ་དང་། སྐྱུར་བ་དང་། རོ་རྣམ་པ་སྣ་ཚོགས་གསོལ་བས་ཞི་ཁྲོ་སྤྲུལ་པའི་ཚོགས་ལ་མངའ་བརྙེས་པར་གྱུར་ཅིག །ཐུགས་རྗེ་ཆེན་པོས་དགོངས་ཞིང་བཞེས་ནས་བདག་ཉིད་ལ། སྐུ་གསུང་ཐུགས་ཀྱི་སིད་དྷི་དུས་ད་ལྟ་ཉིད་དུ་ཐོབ་པར་བསྩལ་དུ་གསོལ། །ཞེས་བརྗོད་ལ་སིདྡྷིའི་ཞལ་ཟས་རྣམས་ཀུན་གྱི་རིམ་པར་བསྩལ་དུ་གསོལ། །ཞེས་བརྗོད་ལ་སིད་དྷིའི་ཞལ་ཟས་ཀུན་གྱི་རིམ་པ་གསོལ་ལོ། །དེ་ནས་དངོས་གྲུབ་ཀྱི་ལྷག་མ་གསུམ་ལ། །ཡིད་དམ་ལྷའི་སྐལ་བ་རྡོ་རྗེ་སློབ་དཔོན་གྱིས་རོལ། །དལ་ལྷའི་སྐལ་བ་རྒྱས་ཐེབ་ལ་བྱིན། །རིག་འཛིན་རྩལ་འཆང་གི་སྐལ་བ་དེ། །དེ་ན་ཡོད་པའི་སློབ་བུ་ལས་ཅན་ཅིག་ལ་སྦྱིན་ནོ། །དེ་ནས་གཞན་རྣམས་ཅི་རིགས་པར་སྦྱིན་ལ་སྤྱད། ཀ་ཡ་ཝ་ཀ་ཙིཏྟ་ཏིཥྛ་བཛྲ། བརྗོད། སིདྷི་བརྟན་པར་བྱ་བའི་ཕྱིར་དང་། །སེམས་ཅན་གྱི་དོན་བྱ་བའི་ཕྱིར། །མེ་ཏོག་ལག་ཏུ་འགྲིམ་ལ་རྟེན་འབྲེལ་སྙིང་པོས་རབ་གནས་བྱེད་དོ། །དེ་ནས་མར་མེ་བླངས་ལ། འདུས་པ་ཆེན་པོའི་ལྷ་ཚོགས་ལ་སོགས་པ་རྣམས་ཀྱིས། མི་གནས་པའི་ཡེ་ཤེས། སྟོང་པ་ཉིད་ཀྱི་ཡེ་ཤེས་དང་། །མེ་ལོང་ལྟ་བུའི་ཡེ་ཤེས་དང་། །མཉམ་པ་ཉིད་ཀྱི་ཡེ་ཤེས་དང་། །སོ་སོར་རྟོག་པའི་ཡེ་ཤེས་དང་། བྱ་བ་གྲུབ་པའི་ཡེ་ཤེས་དང་། །ཀློང་དུ་གྱུར་པའི་ཡེ་ཤེས་དང་། །དབྱིངས་སུ་སྒྲོལ་བའི་ཡེ་ཤེས་དང་། །མ་འགགས་ཐུགས་ཀྱི་ཡེ་ཤེས་དང་། །ཐུགས་ཡེ་ཤེས་དགུའི་ནང་ནས་འཆར་བའི་སིདྡྷི་བདག་ཅག་རྡོ་རྗེ་སློབ་དཔོན་དང་། མཆེད་དང་། ལྕམ་དྲལ་རྣམས་ཀྱིས་ཐོབ་པར་མཛད་དུ་གསོལ། །ཨ་ལ་ལ་ཧོ། ཅེས་པས་ཀུན་ལ་འགྲིམ། དེ་ནས་མར་མེའི་སྨོན་ལམ་གདབ་བ་ནི། ཀུན་གྱི་སྲིན་ལག་སྦྲེལ་ཞིང་མར་མེ་འཛིན་ལ། ༈ ཧཱུཾ་དུར་ཁྲོད་གསང་བ་མཆོག་གི་དཀྱིལ་འཁོར་དུ། །རྡོ་རྗེ་སློབ་དཔོན་གཉེན་གྱི་དབུ་གཟུང་ནས། །རྒྱལ་བའི་གདུང་ཚོབ་མཆེད་དང་ལྕམ་དྲལ་རྣམས། ། ནམ་ཞིག་བྱང་ཆུབ་ལམ་དུ་ཞུགས་བའི་ཚེ། །འཁོར་བའི་གཡང་ས་ཆེན་པོའི་མི་གཏུང་ཞིང་། །གཅན་ག ཟན་གདུག་པའི་སྒྲ་སྐད་མི་གྲགས་དང་། །མ་རིག་མུན་པའི་ནང་དུ་མི་བཏང་ཞིང་། །གཅོང་རོང་ཟབ་མོའི་ནང་དུ་མི་སྐྱེ་དང་། །དམྱལ་བའི་ཟངས་ཁར་ནང་དུ་མི་ལྟུང་ཞིང་། །མཚོན་རྣོན་གདུག་པའི་དབལ་གྱིས་མི་འཕོག་ཤོག །དགེ་བའི་བཤེས་གཉེན་སྐུ་དྲིན་ཆེ་བ་དང་། །དམ་ཚིག་གཅིག་པའི་རྡོ་རྗེ་མཆེད་ལྕམ་རྣམས། །དམ་ཚིག་དབང་གིས་འབྲེལ་བའི་གཟུངས་མ་གསུམ། །ཚེ་རབས་འདི་དང་ཚེ་རབས་ཐམས་ཅད་དུ། །མི་འབྲལ་འགྲོགས་པའི་ཏིང་འཛིན་རྩེ་གཅིག་གིས། །ས་བཅུ་ཁྱད་པར་རིམ་གྱི་བསྒྲོད་གྱུར་ཅིག །ནམ་ཞིག་ཚེ་འཕོས་ལུས་བརྗེས་དུས་བྱུང་ཚེ། །མ་རིག་གཏི་མུག་མུན་པའི་སྡུག་བསྔལ་རྣམས། །འཁོར་པའི་གཡང་ས་ཆེན་པོར་ལྟུང་སྲིད་ན། །གསལ་བའི་མར་མེ་ཐུགས་རྗེ་དེར་མ་ཆུང་། །སྣང་བའི་གོ་འབྱེད་ཞུན་མར་མདངས་ལྡན་འདི། །རིག་འཛིན་སྒྲུབ་པ་པོའི་ཤུལ་མཚོན་ཅིག །ཞེ་སྡང་འབར་བ་ལས་ཀྱི་སྡུག་བསྔལ་གྱིས། དམྱལ་བའི་ཟངས་ཁང་ལམ་དུ་ལྟུང་སྲིད་ན། །གསལ་བའི་མར་མེ་ཐུགས་རྗེ་དེར་མ་ཆུང་། །སྣང་བའི་གོ་འབྱེད་ཞུན་མར་མདངས་ལྡན་འདི། །རིག་འཛིན་སྒྲུབ་པ་པོ་ཡི་ཤུལ་མཚོན་ཅིག །ང་རྒྱལ་ཁྲོ་གཏུམ་ཁེངས་པའི་སྡུག་བསྔལ་གྱིས། །གཅན་གཟན་གདུག་པའི་སྒྲ་སྐད་ཐོས་སྲིད་ཀྱིས། །གསལ་བའི་མར་མེ་ཐུགས་རྗེ་དེར་མ་ཆུང། །སྣང་བའི་གོ་འབྱེད་ཞུན་མར་མདངས་ལྡན་འདི། །རིག་འཛིན་སྒྲུབ་པ་པོ་ཡི་ཤུལ་མཚོན་ཅིག །འདོད་ཆགས་འཛིན་པ་ལས་ཀྱི་སྡུག་བསྔལ་གྱིས། །གཅོང་རོང་ཟབ་མོའི་གནས་སུ་ལྟུང་སྲིད་ཀྱིས། །གསལ་བའི་མར་མེ་ཐུགས་རྗེ་དེར་མ་ཆུང་། །སྣང་བའི་གོ་འབྱེད་ཞུན་མར་མདངས་ལྡན་འདི། །རིག་འཛིན་སྒྲུབ་པ་པོ་ཡི་ཤུལ་མཚོན་ཅིག །ཕྲག་དོག་ཟུག་རྔུའི་ལས་ཀྱི་སྡུག་བསྔལ་གྱིས། །མཚོན་རྣོ་གདུག་པའི་སྤལ་གྱི་ཕོག་སྲིད་ཀྱིས། །གསལ་བའི་མར་མེ་ཐུགས་རྗེ་དེར་མ་ཆུང་། །སྣང་བའི་གོ་འབྱེད་ཞུན་མར་མདངས་ལྡན་འདི། །རིག་འཛིན་བསྒྲུབ་པ་པོ་ཡི་ཤུལ་མཚོན་ནས། །ས་བཅུ་ཁྱད་པར་རིམ་གྱིས་བསྒྲོད་པའི་ཚེ། །ཉོན་མོངས་བག་ཆགས་མ་ལུས་བྱང་ནས་ནི། །འགྲོ་དོན་ཐོགས་པ་མེད་པའི་བརྩོན་འགྲུས་ཀྱིས། །ས་བཅུ་ཁྱད་པར་རྫོགས་གྱུར་ནས། །བྱང་ཆུབ་སེམས་མ་རྣམས་ཀྱིས་མདུན་བསུས་ཅིག །བྱང་ཆུབ་སེམས་དཔའ་རྣམས་ཀྱི་མཐའ་སྐྱོངས་ཤིག །ཁྲོ་བོ་ཁྲོ་མོ་རྣམས་ཀྱིས་རྒྱབ་བརྟེན་ཅིག །ས་བཅུའི་ཁྱད་པར་རྩེ་མོར་ཕྱིན་པའི་ཚེ། །ཕྱིར་མི་ཟློག་པའི་དངོས་གྲུབ་དེ་ཐོབ་པོ། །ཀུན་ཏུ་འོད་ཀྱི་ས་ལ་ཕྱིན་པའི་ཚེ། །ཡི་དམ་ལྷའི་སྔོན་ནས་ཤུལ་མཚོན་ཅིག །བཀྲ་ཤིས་ལྷ་མོ་བརྒྱད་ཀྱི་མཐའ་རྟེན་ཅིག །མ་ཚོགས་དབང་ཕྱུག་མའི་མཐའ་སྐྱོངས་ཤིག །སྟུག་པོ་བཀོད་པའི་ས་ལ་ཕྱིན་པའི་ཚེ། །རྡོ་རྗེ་ཁྲོ་རྒྱལ་རྣམས་ཀྱི་ཞལ་མཐོང་ནས། །རིག་འཛིན་རྣམས་ཀྱིས་ཞབས་དྲུང་སྐྱེས་ནས་ཀྱང་། །བླ་མེད་སྐུ་གསུང་ཐུགས་སུ་འགྲུབ་པར་སྨོན། །ཤེས་བྱའི་སྒྲིབ་པ་ཕྲ་མོ་སྤངས་ནས་ནི། །ཡི་གེ་གསུམ་གྱི་གོལ་ས་དེར་བསྐོད་དེ། །དེ་བས་ཀུན་ཏུ་འོད་ཀྱི་ས་ལ་ཕྱིན་པའི་ཚེ། །ཆེ་མཆོག་ཧེ་རུ་ཀ་ཡི་མདུན་བསུས་ཤིག །གསང་བའི་ཡུམ་ཆེན་བཞིའི་མཐའ་སྐྱོངས་ཅིག །ཡི་དམ་ལྷའི་རྒྱབ་ནས་སྲོག་རྟེན་ཅིག །ཀུན་བཟང་དབྱེར་མེད་ས་ལ་ཕྱིན་པའི་ཚེ། །ཀུན་ཏུ་བཟང་པོ་ཡབ་ཀྱི་མདུན་བསུས་ཤིག །ཀུན་ཏུ་བཟང་མོ་ཡུམ་གྱིས་མཐའ་སྐྱོངས་ཅིག །ཡི་དམ་ལྷ་ཡིས་རྒྱབ་ནས་སྲོག་རྟེན་ཅིག །རྡོ་རྗེ་སེམས་དཔའི་རིག་འཛིན་སར་ཕྱིན་ཚེ། །རྒྱལ་བའི་ཏིང་ངེ་འཛིན་གྱིས་ཤུལ་མཚོན་ནས། །མཉམ་པའི་ཏིང་འཛིན་གྱིས་མཐའ་སྐྱོངས་ཅིག །ཡིད་དམ་ལྷའི་རྒྱབ་ནས་སྲོག་རྟེན་ཅིག །ལྕང་ལོ་ཅན་གྱི་ས་ལ་ཕྱིན་པའི་ཚེ། །དབྱེར་མེད་ཏིང་ངེ་འཛིན་གྱི་ཤུལ་མཚོན་ཅིག །བསྒྲུབ་པའི་ཏིང་ངེ་འཛིན་གྱིས་མཐའ་སྐྱོངས་ཤིག །རྫོགས་པ་བླ་མའི་ས་ལ་ཕྱིན་པའི་ཚེ། །ཁྱབ་བརྡལ་རིག་འཛིན་རྣམས་ཀྱི་ཤུལ་མཚོན་ཅིག །འུབ་ཆུབ་ཏིང་ངེ་འཛིན་གྱི་མཐའ་བསྡུས་ཤིག །སྲིད་གསུམ་ངང་རྫོགས་ས་ལ་ཕྱིན་པའི་ཚེ། །ཐིག་ལེ་ཆེན་པོའི་ངང་དུ་ལྷུན་གྲུབ་ནས། །བྱ་བརྩོལ་གཉིས་ཀྱི་མཐའ་ལས་དེར་འདས་ཚེ། ཆོས་སྐུ་སྐྱེ་བ་མེད་པའི་དོན་ཐོབ་ནས། །ལོངས་སྐུ་སྤྲུལ་སྐུས་འགྲོ་དོན་བྱེད་པར་ཤོག །ཅེས་སྨོན་ལམ་རྒྱ་ཆེན་པོ་བཏབ་བོ། །དེ་ནས་དངོས་གྲུབ་ཀྱི་དྲིན་ལན་གསོ་བའི་ཕྱིར། ཚོགས་ལ་སོགས་པ་ཡོན་ཕུལ་སྟེ། རྒྱལ་སྲིད་དང་ནི་རང་གི་ལུས། །ཅེས་དང་། རྡོ་རྗེ་ཐེག་པའི་གཞུང་ལས་ཀྱང་། །ཆེ་བ་རྒྱལ་སྲིད་དང་ཡུལ་འཁོར། །གཅེས་པ་བུ་སྨད་དང་ཕྱག་རྒྱ་མ། འཕངས་པ་ནོར་དང་དབྱིག་དཀའ་བ་ལུས་དང་སྲོག །མཁོ་བ་ཐུགས་དང་གང་འཐད། རྒྱུན་དུ་ཟས་དང་གོས་ཡུན་དུ་དད་པ་དང་དམ་ཚིག །ཞུ་ཁར་སྲིད་ཞུ་དང་གུས་པ། །མཆོག་དུ་བརྩེ་སེམས་དང་གདུང་བ་ལ་སོགས་པ་མཉེས་པ། སྣ་ཚོགས་ཆུ་བོའི་གཞུང་བཞིན་འབུལ་ལོ། །དེ་ནས་གུ་རུའི་ཞབས་སློབ་བུའི་སྤྱི་བོར་བཞག ། ༈ དེ་རིང་ཕན་ཆོད་བུ་ཁྱོད་ཀྱིས། །རྡོ་རྗེ་སེམས་དཔའ་ང་ཡིན་གྱིས། །ང་ཡི་བསྒོ་བ་ཅི་ལྟར་བཞིན། །བུ་ཁྱོད་ཀྱི་ནི་བྱ་དགོས་སོ། །སློབ་བུས། བླ་མ་རྡོ་རྗེ་རྒྱལ་པོ་ལ། ། དད་མོས་གུས་པའི་སེམས་ལྡན་པས། བཀའ་ཡིས་ཅི་ལྟར་བསྒོ་བ་བཞིན། ལུས་ངག་ཡིད་གསུམ་གཉེན་གྱིས་བླངས། དེ་ནས་བཀྲ་ཤིས་བརྫོད། སློབ་དཔོན་གྱིས་དཀྱིལ་འཁོར་བསྡུ། ལས་བཞིའི་བྲོ་བྱ། ལྷག་མ་བཏང་ལས་མཁན་དང་། མཆེད་ལྕམ་གྱིས་ཕྱིར་བསྟན་མ་སྐྱོངས། །སློབ་དཔོན་དང་རྒྱལ་ཐེབས་ཀྱི་ནང་དུ། དུག་གསུམ་གྱིས་སྦྱིན་བསྲེགས་བྱ། གཏེར་སྦ། རྒྱལ་ཐེབས་ཀྱི་ཐོ་རྒྱལ་ཆེན་ལ་ཡ་ཧི་ག་ཚས་གཤེགས་སུ་གསོལ། །མཚམས་ཕུར་དང་། ཡེ་ཤེས་ལྷ་ཡི་སྒོ་བྱང་ལ། སྐུ་ཁྲུས་གསོལ་ལ་འཚག་བྱ། བར་ཆད་བགེགས་ཀྱི་སྒོ་བྱང་། མཆོག་ཕུར་དར་གྱི་ཅོད་པན་གཅིག་བདུད་རྩི་འཁྱིལ་པར་བསྐྱེད། སྐུ་གསུང་ཐུགས་བྱིན་གྱིས་རླབས་ལ་སྒོ་བྱང་དེ་དཀྱིལ་འཁོར་གྱི་འོག་དུ་བཅུག །ཕུར་བ་དེ་གྷ་ཏས་དྲིལ་ནས་སྒོ་བྱང་ལ་གདབ། དེར་བདུད་རྩི་ཐིག་པ་བླུག་ནས། །བྱང་ཆུབ་ཀྱི་སེམས་མ་སྐྱེས་ཀྱི་བར་དུ་ཐར་པ་མེད་པར་བསམ་སྟེ། དེས་ནི་ལས་རྗེས་ཤིས་པར་བྱ་བའི་དགོས་པ་ཡོད་དོ། །དེ་ནས་སློབ་དཔོན་ཀུན་འདུས་ལས་བཀྲ་ཤིས་བྱ། སྟོན་མོ་བྱེད། ཞག་གཅིག་གནས་བསྲུང་ངོ་། །སྤྱི་དོན་གཉིས་པ་གྲོལ་བྱེད་ཀྱི་གདམས་པ་ནི། ཐོས་བསམ་སྒོམ་གསུམ་ལ་རྟེན་ནས་ཁྲིད་འདེབས་པ་སྟེ། བླ་མའི་ཞལ་ལས་ཤེས་པར་གྱིས་ཤིག །སྤྱི་དོན་གསུམ་པ་རྩིས་ཆེ་བས། གདམས་ཤིང་གཏད་པ་ནི། གང་གིས་གཏད་ན། སྟོན་པ་མཛོད་ལྡན་ཆུ་བོ་རྫོགས། །གཉེར་ལྡན་རྒྱུད་དང་ལས་ལ་མཁས། །མན་ངག་དྲོད་འཆང་བརྒྱད་འཆང་བ། །ཅེས་གསུངས་པ་ལྟར། ཡོན་ཏན་བརྒྱད་དང་ལྡན་པའི་སྟོན་པ་རྡོ་རྗེ་རྒྱལ་པོ་རྡོ་རྗེ་རིན་ཆེན་དཔལ་བཟང་པོས་གདམས་ཤིང་གཏད། གང་ལ་གཏད་ན། བསྡུད་པ་པོ་དང་། གང་ཟག་ཆོས་ཀྱི་མིག་ཅན་དང་། །མཁའ་འགྲོ་ཆོས་སྐྱོང་རྣམས་ལ་གཏད། །དགོས་ཕྱེད་གང་གི་ཆེད་དུ་གཏད་ན། ཆོས་འདི་མི་ནུབ་པར་བྱ་བའི་ཕྱིར་བསྡུད་པ་པོ་ལ་གཏད། ཆོས་འདི་དར་ཞིང་རྒྱས་པའི་ཕྱིར་གང་ཟག་ཆོས་ཀྱི་སྤྱན་ལྡན་ལ་གཏད། ཆོས་འདི་བཀའ་བཙན་བྱིན་རླབས་ཆེ་བའི་ཕྱིར། །མཁའ་འགྲོ་དང་ཆོས་སྐྱོང་རྣམས་ལ་གཏད་དགོས་སོ། །ཚུལ་ཇི་ལྟར་དུ་གཏད་ན། དེ་ནི་དེ་ཡིས་ཐུགས་སྐྱེས་ཕྱིར། དེ་ཡི་དོན་ནི་དེས་བསྡུས་རིགས་ཅེས་གསུངས་པ་ལྟར། རྡོ་རྗེ་སློབ་དཔོན་གྱིས་ཐུགས་ལས་སྐྱེས་པའི། །གཉིས་སུ་མེད་པ་ཡིས། མཐོ་བརྟེན་མྱུར་རྣོ་རྒྱ་ཆེ་ཡངས། །ཟབ་ཡོད་རྒྱུའི་གང་ཟག་གིས། ཅེས་གསུངས་པ་ལྟར། བློ་ཡི་མཚན་ཉིད་བདུན་དང་ལྡན་པའི་བསྡུད་པ་པོ་བཛྲ་བྷ་ཏྲ་ལ། གདམས་ཞིང་གཏད་པས། བསྡུད་པ་པོ་དེས་ཀྱང་། སྟོན་པ་རྡོ་རྗེ་རྒྱལ་པོས་ཅི་ལྟར་གསུངས་པའི་དོན་རྣམས། མི་བརྗེད་པའི་དྲན་པའམ། གཟུངས་དང་ལྡན་པས་བསྡུད་པ་པོ་མཛད་དེ། དེ་ཡང་ཐོག་མར་ཀླད་དོན་ལ། མཚན་བསྟན་པ་དང་། མཆོད་པར་བརྗོད་པ་དང་། བཤད་པར་དམ་བཅའ་བ་དང་གསུམ་དུ་བསྡུས། གཞུང་དོན་ལ། ཡིད་ཆེས་ཤིང་ཁུངས་བཙུན་པར་བྱ་བའི་ཕྱིར། རྒྱུད་མ་ཧཱ་ཡོ་ག །སྒྱུ་འཕྲུལ་དབང་གི་རྒྱུད་པ་རྣམས་དང་། ལུང་ཨ་ནུ་ཡོ་ག་མདོ་དབང་གི་རྒྱུད་རིམ་རྣམས་དང་། མན་ངག་རྫོགས་པ་ཆེན་པོ་ཨ་ཏི་ཡོ་ག་སེམས་སྡེ་བཅོ་བརྒྱད་ཀྱི་དབང་གི་རྒྱུད་པའི་རིམ་པ་དང་གསུམ་དུ་བསྡུས། དེ་ལས་བྱུང་བའི་གདམས་ངག་ལ། དབང་རྫོགས་སྒྲུབ་པ་དང་། མ་སྨིན་པ་སྨིན་པར་བྱེད་པ། དབང་བསྐུར་བ་དང་། སྨིན་པ་གྲོལ་བར་བྱེད་པའི་གདམ་ངག་དང་གསུམ། དང་པོ་བསྒྲུབ་པ་ལ། ཕུན་སུམ་ཚོགས་པ་ལྔའམ། དྲུག་གིས་བསྒྲུབས་པའི་གཞི་གཟུང་བ་དང་། བསྙེན་སྒྲུབ་རྣམས་པ་བཞིས་སྒྲུབ་པའི་གཞུང་བསྲང་བའི་ཚུལ་དུ་བསྡུས། སྨིན་བྱེད་ཀྱི་དབང་ལ། ནུབ་དང་པོ་ས་ཆོག །ནུབ་གཉིས་པ་སྟ་གོན། ནུབ་གསུམ་པ་དངོས་གཞི་དང་གསུམ། དང་པོ་ས་ཆོག་ལ། ས་གཞི་སྤྱིའི་མཚན་ཉིད་བརྟགས་པ་དང་། རང་གི་མཚན་ཉིད་བརྟགས་པ་དང་། ས་བསླང་བ་དང་། ས་དབང་དུ་བྱ་བ་དང་། ས་སྦྱང་བ་དང་། ས་བྱིན་གྱིས་བརླབས་པ་དང་། ས་བསྲུངས་བ་དང་། ས་གཟུངས་བ་དང་བརྒྱད་དུ་བསྡུས། ནུབ་གཉིས་པ་སྟ་གོན་ལ་བཅའ་བཀོད་ལེགས་པར་ཚར་ནས། སློབ་དཔོན་སྟ་གོན་དང་། བུམ་པ་སྟ་གོན་དང་། ཀ་པཱ་ལ་སྟ་གོན་དང་། །དཀྱིལ་འཁོར་སྟ་གོན་དང་། ཐིག་སྟ་གོན་དང་། ཚོན་སྟ་གོན་དང་། རྡོ་རྗེ་དྲིལ་བུ་ལ་སོགས་ཕྱག་ཆ་སྟ་གོན་དང་། ཙ་ཀ་ལི་ལ་སོགས་དབང་རྫས་སྟ་གོན་དང་། ཡོ་བྱད་སྟ་གོན་དང་བཅུ་གཅིག་དུ་བསྡུས། ནུབ་གསུམ་པ་དངོས་གཞི་ལ། ཕྱི་དབང་རྒྱུད་ཀྱི་ཆུ་བོ་དང་། ནང་དབང་འབྱུང་པའི་ཆུ་བོ་དང་། བསྒྲུབ་དབང་གྲགས་པའི་ཆུ་བོ་དང་། གསང་དབང་མན་ངག་གི་ཆུ་བོ་དང་བཞི། ཕྱི་དབང་རྒྱུད་ཀྱི་ཆུ་བོ་ལ། ལྷ་མའི་དབང་དང་། ཉན་ཐོས་ཀྱི་དབང་དང་། རང་སངས་རྒྱས་ཀྱི་དབང་དང་བཞི། བྱང་ཆུབ་སེམས་དཔའི་དབང་དང་། ཀྲྀ་ཡའི་དབང་། ཡོ་གའི་དབང་དང་དྲུག །དེ་རེ་རེ་ལའང་། དཀྱིལ་འཁོར་ལས་ཀྱི་རིམ་པ་དང་། འཇུག་ཅིང་དབང་གི་རིམ་པ་གཉིས། དཀྱིལ་འཁོར་ལས་ཀྱི་རིམ་པ་ལ། དཀྱིལ་འཁོར་གྱི་ཚད་དང་། ཐིག་དང་། བྲི་བ་དང་། ཚོན་དང་། རྣམ་པ་དགོད་པ་དང་། རབ་གནས་དང་། སྤྱིན་སྲེག་དང་། བདུན་བདུན་གྱི་ཚུལ་དུ་བསྡུས། འཇུག་ཅིང་དབང་གི་རིམ་པ་ལ། སློབ་དཔོན་འཇུག་ཅིང་དབང་ལེན་པ་དང་། སློབ་མ་བཞུག་ཅིང་དབང་བསྐུར་བ་དང་གཉིས། དེ་གཉིས་གང་ལ་ཡང་། འཇུག་ཆོས་བཅྭ་བརྒྱད་ཡོན་དང་བཅས་པ་དྲུག་དྲུག་དང་། དབང་ལ། ཕྱི་ཕན་བའི་དབང་བཅུ། ནང་ནུས་པའི་དབང་ལྔ། གསང་བ་ཟབ་མོའི་དབང་གསུམ་གྱིས་དོད་དང་བཅས་པ་དྲུག་ཏུ་བསྡུས། །ནང་དབང་འབྱུང་བའི་ཆུ་བོ་ལ་ཡང་། ཞི་བའི་དབང་བསྐུར་བ་དང་། ཁྲོ་བོའི་དབང་བསྐུར་བ་ལ་གཉིས། དེ་རེ་རེ་ལའང་། དཀྱིལ་འཁོར་ལས་ཀྱི་རིམ་པ་དང་། འཇུག་ཅིང་དབང་གི་རིམ་པ་གཉིས། དཀྱིལ་འཁོར་ལས་ཀྱི་རིམ་པ་ལ། དཀྱིལ་འཁོར་ཆེ་ཆུང་གི་ཚད་དང་། དཀྱིལ་འཁོར་གྱི་ཐིག་གདབ་པ་དང་། དཀྱིལ་འཁོར་བྲི་བ་དང་། དཀྱིལ་འཁོར་གྱི་ཚོན་འགྱེད་པ་དང་། དཀྱིལ་འཁོར་ལ་རབ་གནས་བྱེད་པ་དང་། སྦྱིན་སྲེག་བྱེད་པ་དང་། བདུན་བདུན་དུ་བསྡུས། འཇུག་ཅིང་དབང་གི་རིམ་པ་ལ། །སློབ་དཔོན་འཇུག་ཅིང་དབང་ལེན་པ་དང་། སློབ་མ་འཇུག་ཅིང་དབང་བསྐུར་བ་ལ་གཉིས། དེ་རེ་རེ་ལའང་འཇུག་པ་དང་། དབང་གཉིས། འཇུག་པ་ལ། ཁྲུས་དང་། སྤྱན་དར་དགབ་པ་དང་དྲི་བ་དང་། ལུས་འབུལ་བ་དང་། བགེགས་བསྐྲད་པ་དང་། ལྷར་རླབས་པ་དང་། དམ་ཚིག་སྦྱིན་པ་དང་། དམ་ཚིག་འབོག་པ་དང་། དམ་ཆུ་བླུད་པ་དང་། དམ་ཚིག་སྒྲག་པ་དང་། མེ་ཏོག་དོར་བ་དང་། ལྷ་དབབ་བ་དང་། ལྷ་སྒོམ་པར་ནན་ཏན་བྱ་བ་དང་། མིག་དབྱེ་བ་དང་། དཀྱིལ་འཁོར་བསྟན་པ་དང་། ཚོགས་མཆོད་དང་། ཡོན་འབུལ་བ། བཟོད་པར་གསོལ་བ་དང་བཅྭ་བརྒྱད་བཅྭ་བརྒྱད་དུ་བསྡུས། དབང་ལ་ཡང་ཕྱི་དབང་དང་། ནང་དབང་དང་། གསང་དབང་བསུམ། དང་པོ་ཕྱི་དབང་ལ། བུམ་པའི་དབང་དང་། སྙིང་པོ་ལྔའི་དབང་དང་། དབུ་བརྒྱན་གྱི་དབང་དང་། ཅོད་པན་གྱི་དབང་དང་། ཕྲེང་བའི་དབང་དང་། རྒྱལ་མཚན་གྱི་དབང་དང་། གདུགས་ཀྱི་དབང་དང་། བཟའ་བཏུང་གི་དབང་དང་། ཕྱག་རྒྱའི་དབང་དང་བཅུ་བཅུར་བསྡུས། ནང་དབང་ལ། ཉན་པའི་དབང་དང་། བསྒྲུབ་པའི་དབང་དང་། འཆད་པའི་དབང་དང་། འཕྲིན་ལས་ཀྱི་དབང་དང་། རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་དང་ལྔ་ལྔར་བསྡུས། གསང་བ་ལ། གསང་དབང་དང་། ཤེས་རབ་ཡེ་ཤེས་ཀྱི་དབང་དང་། ཚིག་དབང་རིན་པོ་ཆེ་དང་གསུམ་གསུམ་དུ་བསྡུས། གསུམ་པ་བསྒྲུབ་དབང་གྲགས་པའི་ཆུ་བོ་ལའང་། དཀྱིལ་འཁོར་ལས་ཀྱི་རིམ་པ་དང་། །འཇུག་ཅིང་དབང་གི་རིམ་པ་དང་གཉིས། དང་པོ་ལའང་། དཀྱིལ་འཁོར་ཆེ་ཆུང་གི་ཚད་དང་། དཀྱིལ་འཁོར་ལ་ཐིག་གདབ་པ་དང་། དཀྱིལ་འཁོར་བྲི་བ་དང་། དཀྱིལ་འཁོར་ཚོན་འགྱེད་པ་དང་། རྣམ་པ་དགོད་པ་དང་། རབ་གནས་དང་། སྦྱིན་སྲེག་དང་བདུན་བདུན་དུ་བསྡུས། འཇུག་ཅིང་དབང་གི་རིམ་པ་ལ། །སློབ་དཔོན་བདག་ཉིད་འཇུག་ཅིང་དབང་ལེན་པ་དང་། །སློབ་མ་དཀྱིལ་འཁོར་ཞུགས་ཅིང་དབང་བསྐུར་བ་དང་གཉིས། འཇུག་པ་ལའང་། དཔོན་སློབ་གཉིས་ཀ་ལ་ཁྲུས་ལ་སོགས་པ་དོན་བཅོ་བརྒྱད་བཅོ་བརྒྱད་ཡོན་ཏན་དང་བཅས་པ་ལ་གཉིས་སུ་བསྡུས། དབང་ལའང་ཕྱི་དབང་། ནང་དབང་། བསྒྲུབ་དབང་། གསང་དབང་དང་བཞི། དང་པོ་ཕྱི་དབང་ལའང་། ཞི་བ་ཕྱག་རྒྱའི་དབང་དང་། ཕྱག་མཚན་གྱི་དབང་དང་། གཟུངས་མའི་དབང་དང་། བུམ་པའི་དབང་དང་། བཀྲ་ཤིས་རྫས་བརྒྱད་ཀྱི་དབང་དང་། རིན་ཆེན་སྣ་བདུན་གྱི་དབང་དང་། གདན་ཁྲིའི་དབང་དང་། བརྒྱན་ཆས་རྟགས་ཀྱི་དབང་དང་། རྡོ་རྗེ་མིང་གི་དབང་དང་། དབང་ཕྱུག་འཁོར་ལོའི་དབང་བཅུར་བསྡུས། གཉིས་པ་ནང་དབང་ལའང་། ཉན་པའི་དབང་དང་། འཕྲིན་ལས་ཀྱི་དབང་དང་། འཆད་པའི་དབང་དང་། རྡོ་རྗེ་སློབ་དཔོན་གྱི་དབང་དང་། གདན་ཁྲིའི་དབང་དང་། རིན་ཆེན་སྣ་བདུན་གྱི་དབང་དང་། ཕྱག་རྒྱ་ལྷའི་དབང་དང་། ཡེ་ཤེས་ལྔའི་དབང་དང་། སྐུ་གསུང་ཐུགས་ཀྱི་དབང་དང་། བཀྲ་ཤིས་རྟགས་བརྒྱད་ཀྱི་དབང་དང་། ཐིག་ལེ་མིང་གི་དབང་དང་། བཅུ་གཅིག་དུ་བསྡུས། གསུམ་པ་བསྒྲུབ་དབང་ལ། ཤེས་རབ་རིགས་པ་གཏན་ཚིག་གི་དབང་དང་། སྙིང་རྗེ་རྟགས་ཀྱི་དབང་དང་། འགྲོ་དོན་རྫོགས་པའི་དབང་དང་། དུག་ག སུམ་སྤྲུགས་པའི་དབང་དང་། སྲིད་གསུམ་སྒྲོལ་བའི་དབང་དང་། རྣམ་དག་པདྨའི་དབང་དང་། ལས་རྣམས་རྫོགས་པའི་དབང་དང་གཉིས་མེད་འཁྲིལ་བའི་དབང་དང་། གསང་བ་སྦྱོར་བའི་དབང་དང་། ཀུན་ལ་དབང་བ་འདོད་ཡོན་གྱི་དབང་དང་། དཀྱིལ་འཁོར་གཙོ་བོའི་དབང་དང་། ཐམས་ཅད་བསྒྲུབ་པ་རྫས་ཀྱི་དབང་དང་། །གཉིས་སུ་མེད་པ་རྡོ་རྗེ་མིང་གི་དབང་དང་བཅུ་གསུམ་དུ་བསྡུས། བཞི་པ་གསང་དབང་ལའང་། གསང་དབང་དང་། ཤེས་རབ་ཡེ་ཤེས་ཀྱི་དབང་གཉིས་སུ་བསྡུས་སོ། །བཞི་པ་གསང་བ་མན་ངག་གི་ཆུ་བོ་ལ འང་། །རྫོགས་ཆེན་སེམས་སྡེ་བཅོ་བརྒྱད་ཀྱི་དབང་དང་། ཞར་ལ་འཆི་བ་མེད་པ་ཚེའི་དངོས་གྲུབ་ལེན་པའི་ཆོ་ག་དང་། རྫས་ལ་བརྟེན་ནས་སྐུ་གསུང་ཐུགས་ཡོན་ཏན་འཕྲིན་ལས་ཀྱི་དངོས་གྲུབ་ལེན་པའི་ཆོ་ག་རྗེས་ཆོག་དང་བཅས་པར་བསྡུས། གཉིས་པ་གྲོལ་བྱེད་ཀྱི་གདམས་པ་ལ། རྩ་རྒྱུད་གསང་བའི་སྙིང་པོ། སྒྱུ་འཕྲུལ་སྡེ་བརྒྱད་ལ་སོགས་པའི་རྒྱུད་དང་། །རྒྱ་གཞུང་འགྲེལ་ཆེན་ལྔ། མན་ངག་ཕྲ་མོ་དྲུག་བཅུ། བུ་ལྔ་ལ་སོགས་རྣམས་པ་དང་། མདོའ་དགོངས་པ་འདུས་པ་ལ་སོགས་པའི་མདོ་སྔ་མ་བདུན། ཕྱི་མ་བདུན། སྡེ་བཅུ་བཞི། རྒྱ་གཞུང་། སྟོད་འགྲེལ་ཉི་མའི་འོད་ཟེར་། སྨད་འགྲེལ་མུན་པའི་གོ་ཆ་ལ་སོགས་རྒྱུད་རྒྱ་གཞུང་མན་ངག་རྣམས་དང་། རྫོགས་ཆེན་སེམས་སྡེའི་སྐོར། ཀློང་སྡེའི་སྐོར། མན་ངག་གི་སྐོར། ཀུན་བྱེད་མ་བུ་དགུ་བསྐོར་ལ་སོགས་རྒྱུད་རྒྱ་གཞུང་མན་ང ག་དང་བཅས་པ་ལ་ཐོས་བསམ་བྱས་ལ་ལྟ་བ་རྟོགས། སྒོམ་པ་རིམ་པ་གཅིག་ཆར་གྱིས་ཚུལ་དུ་སྒོམ་པ། སྦྱོད་པ་སྦྱོད་ལམ་རྣམ་བཞི་ལྟ་བྷཻ་ལ་མི་འདའ་བར་སྤྱོད། འབྲས་བུ་སྐུ་ལྔ། གསུང་ལྔ། ཐུགས་ལྔ། ཡོན་ཏན་ལྔ། འཕྲིན་ལས་ལྔ་ཏེ། སྐུ་རིགས་ཀྱིས་བརྒྱན་གྱི། འཁོར་ལོ་ཉི་ཤུ་རྩ་ལྔ་ཐོབ་པའི་ཐབས་ཟབ་མོར་བསྡུས་སོ། །གསུམ་པ་རྩིས་ཆེ་བའི་ཕྱིར། བཀའ་རྒྱས་གདབ་པ་འདི་དག་གོ །ཞབས་དོན་ལ་བརྩམ་པ་ཇི་ལྟར་བྱ་བའི་ཕྱིར་དང་། །བརྩམ་པའི་དགེ་བ་བསྔོ་ཞིང་། །སྨོན་ལམ་གདབ་པ་དང་། བརྩམས་པ་མཐར་ཕྱིར་པའི་རྒྱུ་མཚན་དང་གསུམ་དུ་བསྡུས་སོ། །གཉིས་པ་གང་ཟག་གི་སྤྱན་ལྡན་ལ་ཚུལ་ཇི་ལྟར་གཏད་ན། རྡོ་རྗེའི་སློབ་མ་ཆེ་གེ་མོ་དང་ཆེ་གེ། ཞེས་བྱ་བ་ལ་སོགས་པའི་བརྩམ་དུས་སུ། །རྡོ་རྗེ་འཆང་ཆེན་པོ་གཉིས་པ་ཀུན་བཟང་རྩེ་བ། །བསོད་ནམས་རྒྱལ་མཚན་དཔལ་བཟང་པོ་བ། །དྲུང་ཡེ་ཤེས་དབང་པོའི་སྡེ། །ལྷུན་སྡེ་རབ་འབྱམས་པ་དཔལ་འབྱོར་རྒྱལ་མཚན། །ལོ་ཙཱ་བ་ཆེན་པོ་གྲགས་པ་མཐའ་ཡས། །དང་པོ་རབ་འབྱམས་བ་དོན་འགྲུབ་རྒྱལ་མཚན་པ། །ལྟར་བ་ཀུན་དགའ་དཔལ་ལྡན་རྒྱལ་མཚན། །རབ་འབྱམས་པའི་རིན་ཆེན་རྒྱལ་མཚན། །བཀའ་བཅུ་པ་ཀུན་དགའ་རྒྱལ་མཚན། །སྨན་གཅིག་པ་སྐུ་སྐྱེ་བ་ལ་སོགས་པའི་དགེ་བའི་བཤེས་གཉེན་ཆོས་ཀྱི་སྤྱན་ཅན་ཁྱེད་རྣམས་ལ། རྡོ་རྗེ་སློབ་དཔོན་བདག་གིས་དབང་བསྐུར། །རྒྱུད་བཤད། །མན་ངག་གནང་བ་བརྟེན་ནས་ཁྱེད་རྣམས་ཀྱིས། །སྤྱིར་རྒྱུད་རྒྱ་གཞུང་མན་ང ག་བྱེ་བྲག་ཏུ་མདོ་རྒྱུ་སེམས་གསུམ་གྱི་དབང་དོན་ཟབ་མོ་འདི། འབྲི་བ་དང་། འཛིན་པ་དང་། འཆང་བ་དང་། ཀློག་པ་དང་། ཁ་དོན་བྱེད་པ་དང་། གཞན་ལ་དབང་བསྐུར་བ་དང་། བཤད་པ་དང་། ཁྲིད་འདེབས་པ་དང་། སྤེལ་བ་ལ་སོགས་དར་ཞིང་རྒྱས་པར་མཛོད་ཅིག །ཞེས་གདམས་པས། དེ་རྣམས་ཀྱི་ཀྱང་། དེ་ལྟར་དུ་མཛད་པ་ཞལ་གྱི་བཞེས་ཤིང་ད་ལན་ཡང་ཚེ་དང་ཆེ་གེ་ཞེས་དགོས་སོ། །བྱེ་བྲག་དུ་ཕྱག་དཔེ་ཡང་། ཆོས་རྗེ་ཀུན་བཟང་རྩེ་པ། དྲུང་ཡེ་ཤེས་དབང་པོའི་སྡེ། ལྷུན་སྡེར་རབ་འབྱམས་པ། དགས་པོ་རབ་འབྱམས་པ། གྲག་པ་མཐའ་ཡས། དཔལ་ལྡན་རྒྱན་པ། སྐྱོར་པོ་གོང་ཁ་བ། སྨན་གཅིག་སྐུ་སྐྱེ་བ། ཟུར་དབེན་པ། བཀྲ་ཤིས་དོ་ཀ་བ། སྨན་ཁང་པ། དོན་ཞིང་བ། གནས་ཏན་ཆོས་དཔལ་བ། རྟོགས་ལྡན་པ། བསོད་ནམས། བློ་གྲོས་པ་རྣམས་ཀྱིས་དབང་དཔེ་ཆ་ཚང་ཆ་བཅྭ་ལྔ་བྲི་བར་ཞལ་གྱིས་བཞེས་སོ་། །གསུམ་པ་མཁའ་འགྲོ་ཆོས་སྐྱོང་ལ་ཚུལ་ཅི་ལྟར་གཏད་ན། རྗེ་བཙུན་མ་ཁྲོས་མ་ནག་མོ་ལ་སོགས་པའི་དཀར་མོ་སྐུ་ཡི་མཁའ་འགྲོ། །དམར་མོ་གསུང་གི་མཁའ་འགྲོ། །ནག་མོ་ཐུགས་ཀྱི་མཁའ་འགྲོ། །སེར་མོ་ཡོན་ཏན་གྱི་མཁའ་འགྲོ། །ལྗང་མོ་འཕྲིན་ལས་ཀྱི་མཁའ་འགྲོ་ལ་སོགས་པ་མཁའ་འགྲོ་མའི་ཚོགས། །ཁྱད་པར་བདག་ཅག་ལ་མ་ལྟར་བྱམས་པའི་མཁའ་འགྲོ། །སྲིང་ལྟར་བརྩེ་བའི་མཁའ་འགྲོ། །གཟུངས་ལྟར་གདུང་པའི་མཁའ་འགྲོ་མ། །བྲན་ལྟར་མྱུར་བའི་མཁའ་འགྲོ་མ་འཁོར་དང་བཅས་པ་ཁྱེད་རྣམས་གྱི་ཞལ་དུ་པཉྩ་ཨ་མྲི་ཏ་ཁ་ཧི། བྷ་ལིང་ཏ་ཁ་ཧི། རཀྟ་ཁ་ཧི། སྐུ་གསུང་ཐུགས་ཀྱི་རྒྱུད་མཉེས་ཤིང་ཚིམས་ནས། །བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་དང་། ཁྱད་པར་དུ་ཡང་། མདོ་སྒྱུ་སེམས་གསུམ་གྱི་དབང་དཔེ་འདི། །འཛིན་སྐྱོང་སྤེལ་གསུམ་བྱེད་པའི་གང་ཟག་རྣམས་ཀྱིས་བསྲུང་སྐྱོབ་དང་འཕྲིན་ལས་དམ་པ་མཛད་དུ་གསོལ། །གལ་ཏེ་ཆོས་འདི་ལ་གནོད་པ་བྱེད་པ་སྟེ། དགག་པ་དང་། གཤེ་བ་དང་། སྤངས་པ་དང་། འཁུ་བ་ལ་སོགས་པའི་བསྟན་དགྲ་རྣམས་ཀྱི་སྲོག་ཆོད། མགོ་ཁོས། སྙིང་ཆུངས། ཐལ་བའི་རྡུལ་དུ་བརློག་ཅིག །ཅེས་གཉེར་གཏད་དོ། །ཆོས་སྐྱོང་ལ་གཏད་པ་ནི། ༀ་རུ་རུ་རོ་རུ་པ་ཙ་ལ་ཨ་ཤུག་མེ། །དཔལ་ལྡན་མ་ལྷ་མོ་ནག་མོ་རང་བྱུང་གི་རྒྱལ་མོ། །བདུད་ཀྱི་ཡུལ་གཤིན་རྗེའི་སྲིང། །འཁོར་མ་སྲིང་རྒྱ་མཚོའི་ཚོགས་དང་བཅས་པ་རྣམས་ཀྱི་ཞལ་དུ། ཨ་མྲི་ཏ་ཁ་ཧི། བྷ་ལིང་ཏ་ཁ་ཧི། རཀ་ཏ་ཁ་ཧི། སྐུ་གསུང་ཐུགས་མཉེས་ཤིང་ཚིམ་ནས་ཆོས་འདི་འཛིན་སྐྱོངས་སྤེལ་གསུམ་བྱེད་པའི་གང་ཟག་རྣམས་ཀྱི་བསྲུངས་མ་དང་སྡོང་གྲོགས་རྒྱ་ཆེན་པོ་མཛོད་ཅིག །ཆོས་འདི་བཀའ་བཙན་བྱིན་ཆེ་དར་ཞིང་རྒྱས་པར་མཛད་དུ་གསོལ། །ཆོས་འདིའི་བསྟན་དགྲ་ཐམས་ཅད་བསྒྲལ་བའི་འཕྲིན་ལས་རྒྱ་ཆེན་པོ་མཛོད་ཅིག །ཅེས་གཉེར་གཏད། ༀ་བུར་གུར་མཧཱ་པདྨ་རྡོ་བུར། །ཙི་འབུར་བྱི་ཁེ། །བྱི་མ་ན་སེ། །ཨེ་ཧོ་ཤྭ་མོ་ཀྲོ་ཏ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ། །དཔལ་ལྡན་མགོན་པོ་ནག་པོ། །ནག་པོ་སྟོང་། ཤ་ཟ་འབུམ། ལྷ་དམག་བྱེ་བ་དུང་ཕྱུར་གྱི་ཚོགས་དང་བཅས་པ་རྣམས་ཀྱི་ཞལ་དུ། པཉྩ་ཨ་མྲི་ཏ་ཁ་ཧི། བྷི་ལིང་ཏ་ཁ་ཧི། རཀ་ཏ་ཁ་ཧི། སྐུ་གསུང་ཐུགས་ཡོན་ཏན་འཕྲིན་ལས་ཀྱི་རྒྱུད་མཉེས་ནས། །སྔོན་དཔལ་ཆེན་པོའི་སྤྱན་སྔར་ཆོས་འདིའི་རྒྱུད་པ་འཛིན་པ་རྣམས་ཀྱི་བསྲུངས་མ་དང་འཕྲིན་ལས་མཛད་པར་ཁས་བླངས་པ་བཞིན་དུ་བསྲུང་བ་དང་འཕྲིན་ལས་མཛོད་གཅིག །ཅེས་གཉེར་གཏད་དོ། །ༀ་བཻ་ཤཱར་མ་ན་ཡེ། །རྒྱལ་པོ་ཆེན་པོ་རྣམ་ཐོས་སྲས་འཁོར་དང་བཅས་པ་རྣམས་ཀྱི་ཞལ་དུ། པན་ཙ་ཨ་མྲི་ཏ་ཁ་ཧི། །བྷ་ལིང་ཏ་ཁ་ཧི། རཀ་ཏ་ཁ་ཧི། ཁྱེད་རྣམ་ཀྱིས་ཆོས་འདི་འཛིན་སྐྱོང་སྤེལ་བ་ལ་སོགས་བྱེད་པའི་གང་ཟག་རྣམས་ཀྱིས། བསྲུང་མ་དང་མཐུན་པའི་སྒོ་ནས་འབྱོར་བ་ཕུན་སུམ་ཚོགས་པ་ལ་ལོངས་སྤྱོད་པའི་སྐལ་བ་ལྡན་པར་གྱུར་ཅིག །ཅེས་གཉེར་གཏད་དོ། །ༀ་བཛྲ་ས་དྷུ་ས་མ་ཡཱ། པན་ཙ་ཨ་མྲི་ཏ་ལ་ཁ་ཧི། བྷ་ལིང་ཏ་ཁ་ཧི། རཀྟ་ཁ་ཧི། ཕ་མོན་པ་ནག་པོ། མ་མོན་མ་ནག་མོ། བུ་དམ་ཅན་འགར་བ་ནག་པོ་ཤ་མེད་གངས་དཀར་མ། ཁ་རག་དཔལ་མོ་བཙུན། ཀོང་བཙུན་དེ་མོ། མཆེད་འཁོར་གསུམ་བརྒྱད་དྲུག་ཅུ། །ཡང་འཁོར་བཀའི་ལྷ་མ་སྲིན་སྡེ་བརྒྱད་ཀྱི་ཚོགས་དང་བཅས་པ་ཁྱེད་རྣམས་ཀྱིས། །ཆོས་འདི་འཛིན་སྐྱོང་སྤེལ་གསུམ་བྱེད་པའི་གང་ཟག་རྣམས་ཀྱིས་བསྲུངས་སྐྱོབས་རྒྱ་ཆེན་པོ་མཛོད་ཅིག །བསྟན་དགྲ་སྡིག་ཅན་རྣམས་ཐལ་བ་རྡུལ་བཞིན་བརླག་པའི་འཕྲིན་ལས་མཛོད་གཅིག །ཅེས་ཚུལ་དེ་ལྟར་དུ་གཏད་དོ། །ཞབས་དོན་ལ་གསུམ་སྟེ། ཅི་ལྟར་བརྩམ་པའི་ཚུལ་དང་། བརྩམས་པའི་དགེ་རྩ་བྱང་ཆུབ་ཏུ་བསྔོ་ཞིང་། །སྨོན་ལམ་གདབ་པ་དང་། །བརྩམས་པ་མཐར་ཕྱིན་པའི་རྒྱུ་མཚན་ནོ། །དང་པོ་ཅི་ལྟར་བརྩམ་པའི་ཚུལ་ནི། ཨེ་མ་ཧོ། ཆོས་ཀྱི་རྒྱལ་པོ་སྤྱན་སྔ་རིན་ཆེན་དཔལ། །ངག་དབང་གྲགས་པ་ཕྱོགས་ལས་རྣམས་པར་རྒྱལ། །མཐུན་རྐྱེན་བཟང་ལེགས་རྒྱ་ཆེ་ཕུན་སུམ་ཚོགས། །ཐུགས་དགོངས་རྣམ་དག་དགྱེས་ཚུལ་དུ་མར་བཅས། །ཐུགས་རྗེ་བཀའ་དྲིན་མཉམས་མེད་བྱིན་རླབས་དང་། །ཐམས་ཅད་མཁྱེན་པ་ཆོས་རྗེ་གཞོན་ནུ་དཔལ། །མཉེས་པའི་སྒོ་ནས་གནང་སྦྱིན་རིམ་པར་བཅས། །བསྟན་ལ་ཕན་ཕྱིར་མདོ་རྒྱུད་སེམས་གསུམ་གྱི། ། དབང་མཆོག་ལེགས་པར་བརྩམ་དགོས་བཀའ་བརྩལ་དང་། །སྤྲུལ་པའི་སྐུ་མཆོག་ཞ་དམར་ཅོད་པཎ་འཛིན། །ཆོས་ཀྱི་གྲགས་པ་ཡེ་ཤེས་དཔལ་བཟང་པོས། ། དགྱེས་པའི་ཚུལ་དྲུག་གསེར་གྱི་མེ་ཏོག་སོགས། །གནང་ནས་མདོ་དབང་བྲི་དགོས་གསུང་བ་དང་། །གཞུང་ལུགས་རབ་འབྱམས་ཐུགས་སུ་ཆུད་པ་ཡིས། །བསོད་ནམས་རྒྱལ་མཚན་དཔལ་བཟང་པོ་པ་ལ་སོགས་བཤེས་གཉེན་མང་པོས་བསྐུལ་བ་དང་། །བདག་ཀྱང་ལྷག་པའི་བསམ་པ་རྣམ་དག་གིས། །བླ་མ་རྣམས་ཀྱི་ཐུགས་དགོངས་རྫོགས་པ་དང་། །མཁའ་མཉམ་འགྲོ་རྣམས་བདེ་སྐྱིད་འབྱུང་བ་དང་། །མྱུར་དུ་སངས་རྒྱས་ཐོབ་པར་བྱ་ཕྱིར་སྟེ། །རྟེན་ཅིང་འབྲེལ་བར་འབྱུང་བ་ཕུན་ཚོགས་ལ། །བརྟེན་ནས་གསང་སྔགས་མདོ་རྒྱུ་སེམས་གསུམ་གྱི། །དབང་གི་ཆོག་འགྲིག་བསྒྲུབས་ཐབས་གསལ་བར་བརྩམས་། །དེ་འང་ཅི་ལྟ་བུ་ཞེ་ན། །ཀ་ཐོག་ཆོས་ཀྱི་རྒྱ་མཚོ་ཆུ་ཡི་གཏེར། །ཐོས་བསམ་སྒོམ་གསུམ་སྲུབས་ལས་ལེགས་པར་འཁྲུངས། ། སྔགས་འཆང་རྡོ་རྗེ་འཛིན་པ་ཚ་ཟེར་རྒྱས། །རྟ་བདུན་མཁའ་ལ་དབུས་ཀྱི་རི་རྒྱལ་སྐོར། །གདུལ་བྱ་མདོ་རྒྱུད་པད་ཚལ་རྒྱས་པར་བྱས། །རྣམས་དཔྱོད་བློ་ཡིས་བུང་བ་རྡོ་རྗེ་མཆུས། །རྒྱུད་གཞུང་མན་ངག་བཅུད་རྣམས་དུ་མ་བསྡུས། །དབང་མཆོག་སྦྲང་རྩིའི་རྒྱ་མཚོ་ཡོན་ཏན་ཚངས། །ཨེ་མ་འདི་ལ་མི་སེམས་སུ་ཞིག་ཡོད། །ཨེ་མ་འདི་ཡི་རོ་མཆོག་མྱོང་བར་བྱོས། །གཉིས་པ་བརྩམས་པའི་དགེ་རྩ་བྱང་ཆུབ་དུ་བསྔོ་ཞིང་སྨོན་ལམ་གདབ་པ་ནི། དེ་ལྟར་བརྩམ་པའི་དགེ་རྩ་དྲི་མེད་དང། །འཁོར་འདས་ལམ་གསུམ་བསྡུས་པའི་དགེ་རྩ་གཉིས། །ཕྱོགས་གཅིག་སྡོམ་པ་ཀུན་བཟང་མཆོད་པའི་སྤྲིན། །ཞི་བར་གཤེགས་པ་རྩ་བའི་བླ་མ་དང་། །བརྒྱུད་པའི་བླ་མ་ཐུགས་རྗེ་ཅན་རྣམས་ལ། །ལུས་ངག་ཡིད་གསུམ་མོས་པས་ཕུལ་བ་ཡིས། །ས་ལས་ཡོན་ཏན་གོང་དུ་འཕེལ་བ་དང་། །རྡོ་རྗེ་འཆང་བར་མྱུར་དུ་གཤེགས་ནས་ཀྱང་། །བདག་སོགས་འགྲོ་རྣམས་འདྲེན་སྟོན་མཛད་གྱུར་ཅིག །ཡངས་གཅིག་བརྩམས་པའི་དགེ་རྩ་དྲི་མེད་དང་། །སྦྱིན་པ་ཚུལ་ཁྲིམས་སྒོམ་ལས་བྱུང་བ་ཡིས། རབ་དཀར་དགེ་བའི་ཚོགས་རྣམས་བསམ་ལས་འདས། །གཞན་ཡང་ཕྱོགས་བཅུའི་དགེ་ཚོགས་ཕྱོགས་གཅིག་སྡོམ། །ཀུན་ཏུ་བཟང་པོ་མཆོད་པའི་སྤྲིན་ཕུང་གིས། །ཁམས་གསུམ་ཆོས་ཀྱི་རྒྱལ་པོ་མཉེས་ཕྱིར་འབུལ། །དེ་ལས་བྱུང་བའི་མཐུ་སྟོབས་བྱིན་རླབས་ཀྱིས། །སྐུ་ལ་མཚན་མཆོག་བཟང་པོ་སུམ་ཅུ་གཉིས། །དཔེ་བྱད་བཟང་པོ་བརྒྱད་བཅུས་རབ་ཏུ་སྤྲས། །དག་པའི་འཁོར་ཚོགས་ནམ་མཁའི་སྐར་ཚོགས་བཀྲ །སྐུ་མཆོག་རྒྱན་གྱིས་འཁོར་ལོ་ཐོབ་གྱུར་ཅིག །གསུང་ལ་དབྱངས་ཀྱི་ཡན་ལག་དྲུག་ཅུ་དང་། །ཆོས་ཀྱི་དུང་ཆེན་གསུང་ལྔ་ལྷུན་གྱིས་གྲུབ། །ཆོས་ཀྱི་གྲགས་པས་ཕྱོགས་བཅུར་ཁྱབ་གྱུར་ཅིག །གསུང་མཆོག་བརྒྱན་གྱི་འཁོར་ལོ་ཐོབ་གྱུར་ཅིག །ཐུགས་ནི་ཅི་ལྟ་ཅི་རྙེད་དབྱེར་མེད་མཁྱེན། །ཆོས་དབྱིངས་མེ་ལོང་མཉམ་ཉིད་སོ་སོར་རྟོགས། །བྱ་བ་གྲུབ་པའི་ཡེ་ཤེས་རྣམ་པ་ལྔ། །ཏིང་འཛིན་འབུམ་ཕྲག་དུ་མ་ཐུགས་ཆུད་པའི། །ཐུགས་མཆོག་བརྒྱན་གྱི་འཁོར་ལོ་ཐོབ་གྱུར་ཅིག །སྣ་ཚོགས་རིན་ཆེན་ས་གཞི་མནན་ན་ནེམ། །བཏེག་ན་འཕར་ལ་མིག་མང་རིས་སུ་བྲིས། །རྒྱ་མདོ་ཐམས་ཅད་རིན་ཆེན་ཚོམ་བུས་སྤྲས། །ལྟར་མི་བཟོད་པའི་འོད་དང་ལྡན་པ་ཡིས། །ཡོན་ཏན་ཞིང་ཁམས་སྣ་ཚོགས་ཐོབ་གྱུར་ཅིག །རཏྣ་སྣ་ཚོགས་ལས་གྲུབ་གཞལ་ཡས་ཁང་། །གྲུ་བཞི་སྒོ་བཞི་རྟ་བབས་ཆོས་འཁོར་གདུགས། །བརྒྱན་རྣམས་སྣ་ཚོགས་དུ་མས་སྤྲས་པ་ཡི། །གཞལ་ཡས་ཡོན་ཏན་ལྡན་པ་ཐོབ་གྱུར་ཅིག །རིན་པོ་ཆེའི་ཁྲི་ལ་མཛོད་མིག་ལྡན། །སེང་གེ་གླང་ཆེན་རྟ་མཆོག་རྨ་བྱ་དང་། །ཤང་ཤང་བརྒྱད་བརྒྱད་རྣམས་ཀྱི་བཏེགས་པའི་སྟེང་། །མུ་ཐིག་དྲ་བ་ལ་སོགས་ཁྲི་ཁེབས་ལྡན། །པདྨ་སྟོང་ལྡན་ཉི་མ་ཟླ་བ་ཡིས། །གདན་ཁྲི་ཡོན་ཏན་ཅན་ལ་བཞུགས་གྱུར་ཅིག །དར་དང་རིན་ཆེན་རུས་པ་དུ་མ་ཡིས། །དབུ་རྒྱན་སྙན་ཆ་མགུར་ཆུ་ཕྲེང་བ་དང་། །དཔུང་རྒྱན་ཕྱག་གདུབ་ཞབས་གདུབ་སོར་གདུབ་སོགས། །རྒྱན་ཆ་ཡོན་ཏན་ལྡན་པས་རྒྱན་གྱུར་ཅིག །སྔོན་པོ་དཀར་པོ་སེར་པོ་དམར་པོ་ལྗང་། །ཉི་ཤུ་རྩ་ལྔ་སྟོང་ཕྲག་དུ་མ་ཡིས། །མཛེས་ཤིང་ཡིད་དུ་འོང་བ་གུར་དུ་ཕུབ། །འོད་ཟེར་ཡོན་ཏན་ལྡན་པ་འཕྲོ་གྱུར་ཅིག །ནད་དང་གདོན་དང་སྡིག་སྒྲིབ་ཐམས་ཅད་དང་། །དགྲ་དང་བགེགས་དང་བར་དུ་གཅོད་པ་ཡིས། །སྤངས་བར་འོས་པ་ཅི་མཆིས་ཐམས་ཅད་ཀུན། །ཞི་པའི་འཕྲིན་ལས་ཆེན་པོ་འགྲུབ་གྱུར་ཅིག །ཚེ་དང་བསོད་ནམས་བཀྲག་དང་གཟི་བརྗིད་དང་། །འཁོར་དང་ལོངས་སྤྱོད་དཔལ་དང་འབྱོར་པ་དང་། །ཉམས་དང་རྟོགས་པ་སྐུ་དང་ཡེ་ཤེས་སོགས། །རྒྱས་པའི་འཕྲིན་ལས་ཐམས་ཅད་འགྲུབ་གྱུར་ཅིག །ལྷ་འདྲེ་མི་གསུམ་ཁམས་གསུམ་སྲིད་པ་གསུམ། །ཟས་ནོར་ལོངས་སྤྱོད་འདོད་དགུ་གང་དགོས་པ། །ཇི་ལྟར་འོས་བའི་དངོས་པོ་ཐམས་ཅད་ཀུན། །དབང་དུ་འདུས་པའི་འཕྲིན་ལས་ཐོབ་གྱུར་ཅིག །ནང་གི་ནད་གདོན་སྡིག་སྒྲིབ་བག་ཆགས་དང་། །ཕྱི་ནས་སྡོ་བའི་དགྲ་བོ་དམག་ཚོགས་དང་། །བགེགས་ཀྱི་རིགས་ལ་སྟོང་ཕྲག་བརྒྱད་བཅུ་དང་། །ཡེ་འབྲོགས་སུམ་བརྒྱ་དང་ནི་དྲུག་བཅུ་སོགས། །དྲག་པོས་ཐམས་ཅད་བརྡུལ་དུ་བརླག་གྱུར་ཅིག །ཡང་གཅིག་དགེ་རྩ་མཆོད་སྤྲིན་རྒྱ་མཚོ་ཡིས། །རྩ་བའི་བླ་མ་བཀའ་དྲིན་ཆེན་པོ་དང་། །གནས་ལྔ་པཎ་ཆེན་མངོན་དགའ་ཆོས་རྫོང་པ། །ཞྭ་དམར་ཅོད་པཎ་འཛིན་པ་བཞི་པ་བ། །བཤེས་གཉེན་རྒྱ་མཚོ་དང་བཅས་རྣམས་ལ་འབུལ། །སྤངས་རྟོགས་མཐར་ཕྱིན་རྡོ་རྗེ་འཆང་ཐོབ་ནས། །འགྲོ་དྲུག་སེམས་ཅན་ཐར་ལམ་བཀོད་གྱུར་ཅིག །ཡང་གཅིག་འདི་ལྟར་བསྒྲུབ་པའི་དགེ་རྩ་དེས། །དཀྱིལ་འཁོར་གཅིག་ཏུ་ཞུགས་པ་སྐལ་བར་ལྡན། །ཐམས་ཅད་ཀུན་རིག་ཀུན་བཟང་རྩེ་པ་སོགས། །རིག་འཛིན་བསྒྲུབ་མཆོག་འཁོར་དང་བཅས་པ་རྣམས། །མཐོ་རིས་ཡོན་ཏན་བདུན་ལྡན་ཐོབ་ནས་ཀྱང་། །སྐུ་ལྔ་ལྷུན་གྲུབ་ཚེ་གཅིག་མངོན་སངས་རྒྱས། །འཁོར་བ་མ་སྟོངས་བར་དུ་བརྟེན་མཛད་པའི། །དེད་དཔོན་དམ་པ་མཆོག་ནི་ཐོབ་གྱུར་ཅིག །དེ་རྣམས་ལས་བྱུང་དགེ་བའི་རྩ་བ་དེས། །དུས་གསུམ་ཕ་མ་སྦྱིན་བདག་གྲོགས་མཆེད་དང ། །ཟབ་དོན་ཆོས་དང་དཀར་ནག་ལས་ཀྱིས་འབྲེལ། །སྒྲིབ་གསུམ་བག་ཆགས་བཅས་པ་དག་ནས་ཀྱང་། །ཉེ་འཁོར་དམ་པ་ཉིད་དུ་སངས་ནི་རྒྱས་གྱུར་ཅིག །གཞན་ཡང་འགྲོ་དྲུག་སེམས་ཅན་ཐམས་ཅད་རྣམས། །མྱུར་དུ་སངས་རྒྱས་གོ་འཕང་ཐོབ་གྱུར་ཅིག །སྨོན་ལམ་གདབ་པ་ནི། ༀ་སྭ་སྟི། 
བྱང་ཆུབ་སེམས་དཔའ་ཏོག་དཀར་གྱིས། །རྒྱལ་ཚབ་མི་ཕམ་མགོན་པོ ་ལ། །དབུ་ལ་སྲོག་ཞུ་ཕུལ་བ་ལྟར། །ཆོས་ཀྱི་རྒྱལ་པོ་བློན་འཁོར་བཅས། །བླ་མ་དགེ་བའི་བཤེས་གཉེན་སོགས། །རྒྱུ་སྦྱོར་ཡོན་བདག་འཁོར་དང་བཅས། །འདིར་ཚོགས་དཔོན་སློབ་བཀྲ་ཤིས་ཤོག །ཅེས་པ་ལྟར་འོག་མ་རྣམས་ལའང་། །སྤྱི་བྱེ་བྲག་ཅི་རིགས་པར་སྦྱརོ། །ཡུམ་ནི་སྒྱུ་མ་ལྷ་མཛེས་ཀྱིས། །སེམས་ཅན་རྣམས་ལ་དབང་བསྐུར་བས། །ན་ཚའི་སྡུག་བསྔལ་ཞི་བ་ལྟར། །འདིར་ཚོགས་དཔོན་སློབ་བཀྲ་ཤིས་ཤོག །ཐུབ་པ་ཡུམ་ལས་བལྟམ་པའི་ཚེ། །སེང་སྤྲུག་གཉིས་ཀྱིས་དབང་བསྐུར་བས། །བསྡོ་བ་ཟིལ་གྱི་མནོན་པ་ལྟར། །འདིར་ཚོགས་དཔོན་སློབ་བཀྲ་ཤིས་ཤོག ། ཡུམ་ནི་སྒྱུ་མ་ལྷ་མཛེས་ལ། །གླང་སྤྲུག་གཉིས་ཀྱི་དབང་བསྐུར་བས། །འཇིག་རྟེན་འདེགས་པའི་སྟོབས་ལྡན་ལྟར། །འདི་ཚོགས་དཔོན་སློབ་བཀྲ་ཤིས་ཤོག །ཐུབ་པ་ཡུམ་ལ་ལྟམས་པའི་ཚེ། །ཚངས་དང་རྒྱ་བྱིན་དབང་བསྐུར་བས། །མཁྱེན་པའི་བྱེ་བྲག་མཁས་པ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །ཐུབ་པ་ལྟམས་ནས་ཞག་བདུན་ཚེ། །ཤཱཀ་རིགས་འཚོགས་ནས་དབང་བསྐུར་བས། །ཤེས་བྱ་མ་རྨོངས་དབང་ཐོབ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །དོན་འགྲུབ་ཡི་གེ་སློབ་པའི་དུས། །ཡིག་མཁན་སློབ་དཔོན་དབང་བསྐུར་བས། །ལྷ་མི་ཡི་གེ་མཁས་པ་ལྟར། །འདིར་ཚོགས་དཔོན་སློབ་བཀྲ་ཤིས་ཤོག །སྔོན་གྱི་རྒྱལ་བུ་དོན་འགྲུབ་ལ། །ཀོ་ཏས་བརྒྱན་གྱི་དབང་བསྐུར་བས། །ས་དང་རྡོ་ཡིས་ཕྱག་འཚལ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །དོན་འགྲུབ་ལྷས་སྦྱིན་རྩལ་འདྲེན་ཚེ། །ཡབ་ཀྱི་གཞུའི་དབང་བསྐུར་བས། །བདུད་ཀྱི་སྒྱུ་རྩལ་འདུལ་བ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །སྔོན་གྱི་རྒྱལ་བུ་དོན་འགྲུབ་ལ། །དྲང་སྲོང་སྐར་མ་ལ་དགའ་བས། །འདོད་འཇོའི་ཞོ་ནི་ཕུལ་བ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །སྔོན་གྱི་རྒྱལ་པོ་དོན་འགྲུབ་ལ། །འཁོར་ལོས་བསྒྱུར་བར་དབང་བསྐུར་བས། །མི་རྟག་མཁྱེན་པའི་དབང་ཐོབ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །སྔོན་གྱི་རྒྱལ་པོ་དོན་འགྲུབ་ལ། །འབངས་ཀྱིས་ཆིབས་ཕུལ་རབ་བྱུང་བས། །ཉོན་མོངས་ཐར་བའི་དབང་ཐོབ་ལྟར། །འདིར་ཚོགས་དཔོན་སློབ་བཀྲ་ཤིས་ཤོག །སྔོན་གྱི་དོན་འགྲུབ་རབ་བྱུང་ཚེ། །ལྷ་བུས་ཤན་གྲིས་དབང་བསྐུར་བས། །ཉོན་མོངས་སྒྲིབ་པ་གཅོད་པ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །དོན་འགྲུབ་དཀའ་ཐུབ་རྫོགས་པ་ལ། །ལྷ་བུས་བསྲེགས་པར་དབང་བསྐུར་བས། །འགྲོ་དོན་རྫོགས་པའི་དབང་ཐོབ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་བསྙེན་པ་རྫོགས་པ་ལ། །ལྷ་བུས་ན་བཟའ་ངུར་སྨྲིག་གསོལ། །ཉོན་མོངས་སྲིད་སྐྱོབ་དབང་ཐོབ་ལྟར། །འདིར་ཚོགས་དཔོན་སློབ་བཀྲ་ཤིས་ཤོག །བཅོམ་ལྡན་བསོད་སྙོམས་གཤེགས་པ་ལ། །སྤྲེའུའི་རྒྱལ་པོས་སྦྲང་རྩི་ཕུལ། །བཀྲ་ཤིས་རྫས་མཆོག་དམ་པར་ལྡན། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་དཀའ་ཐུབ་རྫོགས་པའི་ཚེ། །ལེགས་འོང་བུ་མོས་འབྲས་ཆེན་ཕུལ། །སྐུ་གསེར་ཕྱིས་པ་ལྟ་བུར་འགྱུར། །འདིར་འཚོགས་དཔོན་སློབ་བཀྲ་ཤིས་ཤོག །ཐུབ་པ་ཤིང་དྲུང་གཤེགས་པའི་དུས། །རྩྭ་འཚོང་རྩྭ་མཆོག་བཀྲ་ཤིས་མས། །རྩྭ་ཕུལ་གདིངས་བས་བདུད་བཏུལ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་གྱད་ཀྱི་ཉེ་འཁོར་བཞུགས། །ཚངས་པ་ཉེ་འཁོར་ལེགས་སྐྱབས་ཀྱི། །བུམ་རམ་ཤིང་དང་སྦྲང་རྩི་ཕུལ། །འདིར་འཚོགས་དཔོན་སློབ་བཀྲ་ཤིས་ཤོག །མཛད་པ་བཅུ་གཉིས་རྫོགས་དུས་སུ། །དཔལ་ཆེན་ཕྱག་ན་རྡོ་རྗེ་ལ། །མཆོད་རྟེན་གཉིས་སོགས་དབང་བསྐུར་བས། །འདིར་འཚོགས་དཔོན་སློབ་བཀྲ་ཤིས་ཤོག །ཐུབ་པ་གྱད་ཀྱི་ཉེ་འཁོར་བཞུགས། །དཔལ་ཆེན་ཕྱག་ན་རྡོ་རྗེ་ལ། །དཔག་བསམ་དབང་བསྐུར་དགོས་འདོད་འབྱུང་། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་རྒྱ་མཚོ་གླིང་བཞུགས་དུས། །དཔལ་ཆེན་ཕྱག་ན་རྡོ་རྗེ་ལ། །རྒྱ་མཚོས་དབང་བསྐུར་སྐྱེ་མེད་རྟོགས། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་ཟོམ་དུ་ཆོས་འཁོར་སྐོར། །ཕྱག་ན་རྡོ་རྗེ་རི་རབ་དབང་བསྐུར་བས། །མཐུ་སྟོབས་ཕུན་སུམ་ཚོགས་པ་ལྟར། ། འདིར་ཚོགས་དཔོན་སློབ་བཀྲ་ཤིས་ཤོག །བཅོམ་ལྡན་རྡོ་རྗེ་གདན་བཞུགས་དུས། ཕྱག་རྡོར་ས་བཞིས་དབང་བསྐུར་བས། །བཀྲ་ཤིས་བྱིན་ཆགས་དབང་བསྐུར་བས། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་བ་ར་ཎ་སཱིར་བཞུགས། །ཕྱག་རྡོར་བདུད་རྩིས་དབང་བསྐུར་བས། །སྐྱེ་ཤི་མེད་པའི་དབང་ཐོབ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་རི་རབ་ཟམ་ལ་བཞུགས། །བརྒྱ་བྱིན་དར་གྱི་ན་བཟའ་ཕུལ། །ཆོས་སྒྲ་ཆེན་པོའི་བྱིན་རླབས་ལྡན། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་རྩ་གསུམ་ན་བཞུགས་དུས། །བརྒྱ་བྱིན་རིན་ཆེན་ཁྲི་རྐང་ཕུལ། །ཆོས་ཤེས་རྒྱུད་ལ་གོ་བ་སྒྲོགས། །འདིར་ཚོགས་དཔོན་སློབ་བཀྲ་ཤིས་ཤོག །བཅོམ་ལྡན་ཆོས་འཁོར་བསྐོར་བ་ལ། །བརྒྱ་བྱིན་མེ་ཏོག་སྔོན་པོ་ཕུལ། །འཁོར་བ་བསླུ་བྲིད་དབང་ཐོབ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་རི་རབ་ཁང་བཟང་བཞུགས། །ལྷ་བུ་དམ་པ་འོད་ཞེས་པས། །རྔ་ཡབ་ཕུལ་བས་གཟི་མདངས་ལྡན། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་རྒྱལ་པོའི་ཁབ་ན་བཞུགས། །ལྷ་བུ་འོད་ཟེར་བརྡུལ་ཡབ་ཕུལ། །ཆོས་ལ་སྐྱོན་གྱིས་མ་གོས་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་ནགས་ཚལ་དགོན་པར་བཞུགས། །རྩ་གསུམ་ལྷ་བུས་སྦྲང་གཡབ་ཕུལ། །སེམས་ཅན་འཛིན་ཆགས་སྐྱོན་གྲོལ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་རྒྱལ་པོའི་ཁབ་ན་བཞུགས། །འཁོར་ནི་རྣམ་བཞིས་བླ་བྲེས་ཕུལ། །ཉོན་མོངས་གདུང་བ་སེལ་བ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བྱ་རྒོད་ཕུང་པོར་ཆོས་འཁོར་བསྐོར། །འཁོར་ནི་རྣམ་བཞིས་རྒྱལ་མཚན་ཕུལ། །ཆེ་བའི་ཡོན་ཏན་མི་ནུབ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག ། བཅོམ་ལྡན་སྐྱེད་མོས་ཚལ་བཞུགས་དུས། །འཁོར་ནི་རྣམ་བཞིས་གདུགས་ཕུལ་བས། །ཚ་བའི་སྡུག་བསྔལ་བསིལ་བ་ལྟར། །འདིར་ཚོགས་དཔོན་སློབ་བཀྲ་ཤིས་ཤོག །ཡངས་པ་ཅན་གྱི་དྲུང་བཞུགས་དུས། །ཉ་པ་རྣམས་ཀྱི་ཉ་བརྒྱ་ཕུལ། །ཉ་པ་ལྔ་བརྒྱ་སངས་རྒྱས་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་སྐྱེད་མོས་ཚལ་དུ་གཤེགས། །ཁྱིམ་བདག་བུ་མོ་བཟང་ལྡན་མས། །སྐུ་རེག་གསོལ་བས་སྐུ་རྟེན་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་ཁ་བ་ཅན་བཞུགས་དུས། །གནོད་སྦྱིན་རྣམས་ཀྱི་སྤོས་ལྔ་ཕུལ། །དབང་པོ་ལྔ་ཚིམ་གྱུར་པ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་ནགས་ཚལ་ཆེན་པོར་བཞུགས། །ཀླུ་ཡིས་སྙིང་པོ་ལྔ་རྣམས་ཕུལ། །མི་མཛད་མཛོད་དུ་ཞུགས་པ་ལྟར། །འདིར་ཚོགས་དཔོན་སློབ་བཀྲ་ཤིས་ཤོག །བཅོམ་ལྡན་གྲུ་འཛིན་རི་ལ་བཞུགས། །གནོད་སྦྱིན་རིན་ཆེན་སྣ་ལྔ་ཕུལ། །མི་ཟད་ནོར་མཛོད་ལྡན་གྱུར་ལྟར། །འདིར་ཚོགས་དཔོན་སློབ་བཀྲ་ཤིས་ཤོག །ཨ་གྷ་མ་གྷ་དྷ་ན་བཞུགས། །རྒྱལ་པོ་གསལ་རྒྱལ་འབྲུ་ལྔ་ཕུལ། །མི་གེའི་སྡུག་བསྔལ་ཞི་བ་ལྟར། །འདིར་ཚོགས་དཔོན་སློབ་བཀྲ་ཤིས་ཤོག །བཅོམ་ལྡན་ཙན་དན་ཚལ་དུ་གཤེགས། །གཅན་གཟན་སྟག་གི་སྨན་ལྔ་ཕུལ། །བཀྲ་ཤིས་ཕུན་ཚོགས་དབང་ཐོབ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་སེང་ལྡེང་ཚལ་དུ་གཤེགས་། །གཅན་ཟན་རྒྱལ་པོ་སེང་སྤྲུག་གིས། །སེང་ཁྲི་ཕྱག་ཕུལ་བཀྲ་ཤིས་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་བཏང་བཟང་ཆེན་པོར་བཞུགས། །སོག་པོས་འབྲི་ཧ་ཕྱག་དུ་ཕུལ། །སྨན་མཆོག་སྣ་ལྔའི་བཀྲ་ཤིས་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རྒྱལ་བྱེད་ཚལ་དུ་བཅོམ་ལྡན་བཞུགས། །ལྷའི་དབང་པོ་བརྒྱ་བྱིན་གྱིས། །ཧ་ས་དེ་ཕུལ་བཀྲ་ཤིས་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་ནགས་ཚལ་གསེབ་དུ་གཤེགས། །ཤིང་གི་ལྷ་མོ་འོད་འཆང་མས། །ཀ་ཏ་ཀ་རི་ཕུལ་བ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་ཀུན་རིགས་ཀྱིས། །དོན་འགྲུབ་སོགས་ལ་ཕྱག་རྒྱ་ཡིས། །དབང་བསྐུར་སྐུ་དང་ཡེ་ཤེས་ཐོབ། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་རྣམ་པར་སྣང་མཛད་ཀྱིས། །འཁོར་ལ་སྙིང་པོ་སྔགས་དབང་བསྐུར་། །ཚེ་དང་ཡེ་ཤེས་ཕུན་གསུམ་འཚོགས། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་སྣང་མཛད་ཀྱིས། །འཁོར་ལ་གསེར་ཐུར་དབང་བསྐུར་བས། །མ་རིག་བསལ་ནས་ཡེ་ཤེས་གསལ། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་སྣང་མཛད་ཀྱིས། །འཁོར་ལོ་མེ་ལོང་དབང་བསྐུར་བས། །ཆོས་རྣམས་སྣང་ལ་རང་བཞིན་མེད། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་རྣམ་སྣང་གིས། །འཁོར་ལ་འཁོར་ལོས་དབང་བསྐུར་བས། །འགྲོ་དོན་ཐོགས་པ་མེད་པ་ལྟར། །འདིར་འཚོགས་དཔོན་སློབ༴ བཅོམ་ལྡན་འདས་ལ་ལྷ་དབང་གིས། །གཡས་འཁྱིལ་དུང་ཕུལ་ཆོས་སྒྲ་སྒྲོགས། །གསུང་དབྱངས་ཡན་ལག་དྲུག་བཅུར་ལྡན། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་རྣམ་པར་སྣང་མཛད་ཀྱིས། །འཁོར་ལ་མེ་ཏོག་དབང་བསྐུར་བས། །ཚུལ་ཁྲིམས་འཕྲེང་བ་ཡོངས་སུ་རྫོགས། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་སྣང་མཛད་ཀྱིས། །འཁོར་ལ་རྡོ་རྗེས་དབང་བསྐུར་བས། །རྡོ་རྗེ་རིགས་ཀྱི་དབང་ཐོབ་འགྱུར། །འདིར་ཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་ཀུན་རིགས་ཀྱིས། །འཁོར་ལ་ཕྱག་རྒྱས་དབང་བསྐུར་བས། །ཡོན་ཏན་རིགས་གྱི་དབང་ཐོབ་འགྱུར ། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་རྣམ་སྣང་གིས། །འཁོར་ལ་པདྨས་དབང་བསྐུར་བས། །པདྨ་གསུང་གི་དབང་ཐོབ་འགྱུར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་རྣམས་སྣང་གིས། །འཁོར་ལ་རྒྱ་གྲམ་དབང་བསྐུར་བས། །རྡོ་རྗེ་རིགས་ཀྱི་དབང་ཐོབ་འགྱུར་། །འདིར་འཚོག་དཔོན་སློབ་བཀྲ་ཤིས་ཤོག །རི་རབ་རྩེ་མོར་རྣམ་སྣང་གིས། །འཁོར་ལ་སེང་གེས་དབང་བསྐུར་བས། །ལོགས་ཚོགས་ཟིལ་གྱིས་མནོན་པ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་རྣམས་སྣང་གིས། །འཁོར་ལ་ཉི་མས་དབང་བསྐུར་བས། །མ་རིག་མུན་པ་སེལ་བ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་སྣང་མཛད་ཀྱིས། །འཁོར་ལ་ཟླ་བས་དབང་བསྐུར་བས། །ཚ་བའི་སྡུག་བསྔལ་བསིལ་བ་ལྟར། །འདིར་ཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་སྣང་མཛད་ཀྱིས། །འཁོར་ལ་བདུད་རྩིས་བུམ་དབང་བསྐུར། །རྣམ་པར་རྟོགས་པ་སེལ་བ་ལྟར། །འདི་འཚོགས་དཔོན་སློབ་བཀྲ་ཤིས་ཤོག །རྒྱལ་པོ་རྒྱལ་རིགས་དབང་བསྐུར་དུས། །གསེར་གྱི་འཁོར་ལོ་རྩིབས་སྟོང་གིས། །སྐོར་བས་གླིང་བཞི་དབང་འདུས་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རྒྱལ་པོ་རྒྱལ་རིགས་དབང་བསྐུར་དུས། །རྟ་མཆོག་ཞོན་ནས་གླིང་བཞི་པོ། །ཉི་མ་ཤར་ཀ་གཅིག་ལས་བགྲོད། །འདིར་འཚོགས་དཔོན་སློབ་བཀྲ་ཤིས༴ །རྒྱལ་པོ་རྒྱལ་རིགས་དབང་བསྐུར་དུས། །གླང་པོ་རིན་ཆེན་གསེར་གྱི་དྲ་བ་གཡོགས། །གཡུལ་ལས་རྒྱལ་བའི་མཐུ་དང་ལྡན་པ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རྒྱལ་པོ་རྒྱལ་རིགས་དབང་བསྐུར་དུས། །ནོར་བུ་རིན་ཆེན་རྒྱལ་མཚན་རྩེར། །བཏགས་པས་ཐམས་ཅད་གསལ་བ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རྒྱལ་པོ་རྒྱལ་རིགས་དབང་བསྐུར་དུས། །བློན་པོ་རིན་ཆེན་ལྷ་མིག་ལྡན། །དཔག་ཚད་ཚུན་གྱིས་གཏེར་རྣམས་མཐོང་། །འདིར་འཚོགས་དཔོན་སློབ་བཀྲ་ཤིས་ཤོག །རྒྱལ་པོ་རྒྱལ་རིགས་དབང་བསྐུར་དུས། །གཟུགས་མཛེས་ལྟ་སྡུག་བཙུན་མོ་རིན་པོ་ཆེ། །རེག་ན་བདེ་ཞིང་ཡིད་དུ་འོང་བ་ལྟར། །འདིར་འཚོགས་དཔོན་སློབ་རྣམས་ལ་བཀྲ་ཤིས་ཤོག །རྒྱལ་པོ་རྒྱལ་རིག་དབང་བསྐུར་དུས། །དམག་དཔོན་རིན་ཆེན་རྒྱལ་པོ་བསམ་བཞིན་བྱེད། །ཕ་རོལ་དཔུང་འཇོམས་བསྡོ་བ་ཟིལ་གྱིས་ནོན། །འདིར་འཚོགས་དཔོན་སློབ་བཀྲ་ཤིས་ཤོག །རྒྱལ་པོ་རྒྱལ་རིགས་དབང་བསྐུར་དུས། །རི་རབ་རྩེ་མོར་སྣང་མཛད་ཀྱིས། །འཁོར་ལ་རལ་གྲིས་དབང་བསྐུར་བས། །ཉོན་མོངས་གཅོད་པའི་དབང་བསྐུར་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་རྣམ་སྣང་གིས། །འཁོར་ལ་མདའ་གཞུས་དབང་བསྐུར་བས། །ཐབས་དང་ཤེས་རབ་དབང་ཐོབ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་རྣམ་སྣང་གིས། །འཁོར་ལ་རྣམ་རལ་དབང་བསྐུར་བས། །བར་དུ་གཅོད་པའི་བདུད་འཇོམས་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་རྣམ་སྣང་གིས། །འཁོར་ལ་ཤན་གྲིས་དབང་སྐུར་བས། །འཁོར་བའི་སྒྲིབ་པ་གཅོད་པ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་ཀུན་རིགས་ཀྱིས། །ཉེ་བའི་རིན་ཆེན་དབང་བསྐུར་བས། །བགེགས་དང་ལོག་འདྲེན་མེད་པ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་རྣམ་སྣང་གིས། །འཁོར་ལ་ཚངས་པའི་ཁ་སྐུད་ཀྱིས། །དབང་བསྐུར་འདོད་ཡོན་ཐོབ་པ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་རྣམ་སྣང་གིས། །འཁོར་ལ་ན་བཟས་དབང་བསྐུར་བས། །གྲང་བའི་སྡུག་བསྔལ་ལ་སྐྱོབས་པ་ལྟར། །འདིར་ཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་རྣམས་སྣང་གིས། །འཁོར་ལ་ཆགས་ཀྱི་དབང་བསྐུར་བས། །འགྲོ་བའི་དོན་ལ་ཞབས་ཀྱི་འཆགས། འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོ་ཀུན་རིགས་ཀྱིས། །ཁྲི་སྙན་ས་ལེའི་སྤགས་པ་ཡིན། །དབང་བསྐུར་སྙིང་རྗེ་འདྲེན་པ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་འདས་ཀྱི་ཡུངས་དཀར་གྱིས། །རྒྱལ་པོ་བགེགས་ཀྱི་གཉན་པོར་རླབས། །སྟོང་ཕྲག་བརྒྱ་བཅུས་མི་ཚུགས་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །སྔོན་གྱིས་བཅོམ་ལྡན་ཤཱཀ་ཐུབ་ལ། ཁྱིམ་བདག་བཟང་སྐྱོངས་ཞོ་ཕུལ་བས། །གཟི་བརྗིད་མདངས་དང་ལྡན་པ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །སྔོན་གྱི་བཅོམ་ལྡན་ཤཱཀ་ཐུབ་ལ། །བྲམ་ཟེ་ཀུན་དྷས་རྩྭ་དུར་ཕུལ། །དགེ་རྩ་བརྒྱ་རྩར་འཕེལ་བ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །སྔོན་གྱི་བཅོམ་ལྡན་ཤཱཀ་ཐུབ་ལ། །སའི་ལྷ་མོས་ལི་ཁྲི་ཕུལ། །ཆགས་པས་སེམས་ཅན་མི་ལྟུང་བཞིན། །འདིར་འཚོགས་དཔོན་སློབ་བཀྲ་ཤིས་ཤོག །སྔོན་གྱི་བཅོམ་ལྡན་ཤཱཀ་ཐུབ་ལ། །གཟུགས་གྱི་ལྷ་མོས་མེ་ལོང་ཕུལ། །ཀུན་གཞི་གནས་གྱུར་ཡེ་ཤེས་མཐོང་། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་རྣམ་སྣང་གིས། །འཁོར་ལ་དུང་གིས་དབང་བསྐུར་གནས། །ཚངས་པའི་སྒྲ་སྒྲོག་གྱུར་པ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །སྔོན་གྱི་བཅོམ་ལྡན་ཤཱཀ་ཐུབ་ལ། །གླང་པོ་ཆེ་ན་ས་བསྲུང་གིས། །གྷི་ཧང་ཕུལ་བས་ནད་སེལ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །སྔོན་གྱི་བཅོམ་ལྡན་ཤཱཀ་ཐུབ་ལ། །ཤིང་ཏོག་བིལ་བ་ཕུལ་བ་ལྟར། །འབྲས་བུའི་ཆོས་རྣམས་ཡོངས་སུ་རྫོགས། །འདིར་འཚོག་དཔོན་སློབ་བཀྲ་ཤིས་ཤོག །བཅོམ་ལྡན་བདུད་ཀྱིས་བསྡོ་དུས་སུ། །ཐུགས་ཀྱི་དཔལ་བེར་བཀྲ་ཤིས་པས། །བསྡོ་བའི་ཕྱོགས་ལས་རྒྱལ་བ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་བདུད་ཀྱི་བརྒོལ་བའི་དུས། སྐུ་ལ་རྒྱལ་མཚན་བཀྲ་ཤིས་པས། །བསྡོ་བའི་ཕྱོགས་ལས་རྒྱལ་བ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་བདུད་ཀྱི་རྒལ་བའི་དུས། །ཕྱག་ཞབས་འཁོར་ལོའི་བཀྲ་ཤིས་པས། །བསྡོ་བའི་ཕྱོགས་ལས་རྒྱལ་བ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་བདུད་ཀྱིས་བསྡོ་དུས་སུ། །ལྗགས་ལ་པདྨའི་བཀྲ་ཤིས་པས། །བསྡོ་བའི་ཕྱོགས་ལས་རྒྱལ་བ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་བདུད་ཀྱི་རྒལ་བའི་དུས། །མགུལ་ལ་བུམ་པའི་བཀྲ་ཤིས་པས། །བསྡོ་བའི་ཕྱོགས་ལས་རྒྱལ་བ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་བདུད་ཀྱི་རྒལ་བའི་དུས། །དབུ་སྐྲ་གདུགས་སུ་བཀྲ་ཤིས་པས། །བསྡོ་བའི་ཕྱོགས་ལས་རྒྱལ་བ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་བདུད་ཀྱི་བརྒལ་བའི་དུས། །ཚེམ་ལ་དུང་གི་དབང་བསྐུར་བས། །བསྡོ་བའི་ཕྱོགས་ལས་རྒྱལ་བ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །བཅོམ་ལྡན་བདུད་ཀྱི་བསྡོ་བའི་དུས། །ཕྱག་ཞབས་ཉའི་བཀྲ་ཤིས་པས། །བསྡོ་བའི་བདུད་ལས་རྒྱལ་བ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་སྣང་མཛད་ཀྱིས། །འཁོར་ལ་རྒྱ་གྲམ་དབང་བསྐུར་བས། །འཕྲིན་ལས་རྣམ་བཞི་འགྲུབ་པ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་རྣམ་སྣང་གིས། །འཁོར་ལ་དར་འཕྱང་དབང་བསྐུར་བས ། །འཁོར་འདས་ཆོས་རྣམས་དབང་དུ་བྱས། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་རྣམ་སྣང་གིས། །འཁོར་ལ་པཱུ་ཙས་དབང་བསྐུར་བས། །རྒྱལ་ཐེབ་སྐར་མའི་དབང་ཐོབ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་བརྩེ་མོར་ཀུན་རིགས་གིས། །འཁོར་ལ་ཉན་པའི་དབང་བསྐུར་བས། །ཐ་དག་ཉན་པའི་དབང་ཐོབ་ལྟར། །འདིར་འཚོགས་དཔོན་སློབ་བཀྲིས་ཤོག །རི་རབ་རྩེ་མོར་སྣང་མཛད་ཀྱིས། །འཁོར་ལ་ཆགས་ཤིང་དབང་བསྐུར་བས། །ཆོས་རྣམས་འཆད་པའི་དབང་ཐོབ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་རྣམ་སྣང་གིས། །འཁོར་ལ་པོ་ཏིས་དབང་བསྐུར་བས། །ཆོས་ཀྱི་སྒོ་ལ་མཁས་པ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་ཀུན་རིགས་ཀྱིས། །འཁོར་ལ་རྡོར་དྲིལ་དབང་བསྐུར་བས། །ཡེ་ཤེས་ཆོས་དབྱིངས་རྟོགས་པར་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་ཀུན་རིགས་ཀྱིས། །འཁོར་ལ་བརྒྱན་གྱི་དབང་བསྐུར་བས། །ཆོས་ཀྱི་རྒྱ྄ལ་སྲིད་ཐོབ་པ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་རྣམ་སྣང་གིས། །འཁོར་ལ་དབུ་བརྒྱན་དབང་བསྐུར་བས། །མི་འཇིགས་པ་ལ་མངའ་མཉེས་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་ཀུན་རིགས་གིས། །འཁོར་ལ་ཞབས་གདུབ་དབང་བསྐུར་བས། །སྟོབས་བཅུ་མངའ་མཉེས་དབང་ཐོབ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་རྣམ་སྣང་གིས། །འཁོར་ལ་ཕྱག་གདུབ་དབང་བསྐུར་པས། །ཚུལ་ཁྲིམས་རྣམ་དག་དབང་ཐོབ་ལྟར། །འདིར་འཚོག་དཔོན་སློབ་བཀྲ་ཤིས་ཤོག །རི་རབ་རྩེ་མོར་ཀུན་རིགས་ཀྱིས། །འཁོར་ལ་དོ་ཤལ་དབང་བསྐུར་བས། །ཆེ་བའི་ཡོན་ཏན་རྒྱས་པ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་སྣང་མཛད་ཀྱིས། །འཁོར་ལ་ཅོད་པཎ་དབང་བསྐུར་བས། །བརྡུལ་གྱི་བག་ཆགས་བྲལ་བ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་སྣང་མཛད་ཀྱིས། །འཁོར་ལ་མིང་གི་དབང་བསྐུར་བས། །རྡོ་རྗེ་འཆང་གི་དབང་ཐོབ་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །རི་རབ་རྩེ་མོར་དོན་འགྲུབ་ལ། །སངས་རྒྱས་རྣམས་ཀྱི་དབང་བསྐུར་བས། །རྣམ་སྣང་ཉིད་དུ་སངས་རྒྱས་ལྟར། །འདིར་འཚོགས་དཔོན་སློབ་བཀྲ་ཤིས་ཤོག །སྐུ་ལྔ་ལྷུན་གྲུབ་རྒྱལ་བ་རྒྱ་མཚོ་དང་། གསུང་ལྔ་ལྷུན་གྲུབ་དམ་ཆོས་རྒྱ་མཚོ་དང་། །ཐུགས་ལྔ་ལྷུན་གྲུབ་རྒྱལ་སྲས་སྨིན་པའི་ཚོགས། །འདིར་འཚོགས་དཔོན་སློབ་རྣམས་ཀྱིས་བཀྲ་ཤིས་ཤོག །རྫོགས་སངས་རྒྱས་ནས་ད་ལྟའི་བར། །བུམ་ཆུ་གཅིག་ནས་གཅིག་བྱོ་དང་། །མར་མེ་གཅིག་ནས་གཅིག་སྤར་བཞིན། །དུས་རྒྱུན་འཆད་མེད་པའི་བཀྲ་ཤིས་ཤོག །གསུམ་པ་བརྩམ་པ་མཐར་ཕྱིན་པའི་རྒྱུ་མཚན་ནི། ཀུན་བཟང་རྡོ་རྗེ་འཆང་ཆེན་ནས། །བདག་གི་བར་དུ་རིམ་པ་བཞིན། །སྙན་བརྒྱུད་གདམས་པ་མ་འཆུགས་པའི། །ཆོ་ག་རིམ་བཞིན་བྲི་ཚར་བས། །དམ་བཅའ་དང་པོ་སངས་པ་ཡིས། །དབང་གི་ཆུ་བོ་རྣམ་པ་བཞི། །རྒྱ་མཚོ་ཆེན་པོར་བསྐྱིལ་བ་ཡིས། །ལེགས་བཤད་རིམ་པ་ཚར་བ་དང་། །དམ་བཅའ་གཉིས་པ་སངས་པ་ཡིན། །ཕུན་སུམ་ཚོགས་པ་རྣམ་པ་ལྔ། །བསྙེན་པ་དང་ནི་ཉེ་བའི་བསྙེན། །བསྒྲུབ་པ་དང་ནི་བསྒྲུབ་ཆེན་པོ། །ལེགས་པར་བཀོད་པ་གསུམ་པ་སངས། །རེ་ཤིག་བཤད་དུ་མ་མཆིས་པས། །རྫོགས་སོ་ཞེས་ནི་ཐ་སྙད་བརྗོད། །བཀྲ་ཤིས་དར་ཞིང་རྒྱས་པ་དང་། །ཕན་ཐོགས་འཛམ་གླིང་བརྒྱན་གྱུར་ཅིག །ཡེ་དྷ་རྨཱ། ཧེ་ཏུ་པྲ་བྷ་ཝ། ཧེ་ཏུ་ནྟེ། ཥཱན་ཏ་ཐཱ་ག་ཏོ། ཧྱ་ཝཱདཏཿཏེ་ཥིཉྩ་ཡོ། ནི་རོ་དྷ། ཨེ་བཾ་བཱ་དཱི། མ་ཧཱ་ཤྲ་མ་ཎ། སརྦ་མདྨ་ལཾ། དགེའོ།། །།