དམ་ཚིག་གསལ་བཀྲ། སློབ་དཔོན་ཆེན་པོ་སྒེག་པའི་རྡོ་རྗེ།

དམ་ཚིག་གསལ་བཀྲ་ཞེས་བྱ་བ་བཞུགས་སོ། །བཅོམ་ལྡན་འདས་བྱང་ཆུབ་ཀྱི་སེམས་རྡོ་རྗེ་ཀུན་ཏུ་བཟང་པོ་ལ་ཕྱག་འཚལ་ལོ། །དད་པའི་ལྷ་ལ་ཕྱག་འཚལ་ནས། །ཐམས་ཅད་མཁྱེན་ཉིད་མངོན་དད་པའི། །རྣལ་འབྱོར་ཆེན་པོ་རྣམས་དོན་ཕྱིར། །སེམས་བསྐྱེད་ཆོ་ག་བཤད་པར་བྱ། །བརྩོམ་པའི་དང་པོ་མེད་པས་ན། །དཔག་ཏུ་མེད་པའི་སྤྲོ་སྤྱོད་ཀྱང་། །ས་བོན་རྒྱ་མཚོ་འདི་མེད་པས། །མཐར་ཕྱིན་འབྲས་བུ་མི་སྣང་སྟེ། །དེ་ཉིད་སྡུག་བསྔལ་ས་བོན་འགྱུར། །དེ་བས་གཞི་འདི་གོམས་པར་བྱོས། །དེ་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཡོན་ཏན། འབྱུང་ཁུངས་ཀྱི་རྩ་བར་ངེས་པ་ནི་སེམས་ཡིན་ཏེ། གཞུང་ལས། དེ་བཞིན་གཤེགས་པ་རྣམས་ཀྱི་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ནི་བྱང་ཆུབ་ཀྱི་སེམས་སོ། །རྩ་བ་ནི་སྙིང་རྗེ་ཆེན་པོ་ལས་བྱུང་བའོ། །ཐབས་ཀྱི་མཐར་ཕྱིན་པའོ། །ཞེས་འབྱུང་བ་དང་། རིགས་ཀྱི་བུ་བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་བྱང་ཆུབ་སེམས་ཀྱི་ས་བོན་ལྟ་བུའོ། །ཞེས་པ་དང་། ཆོས་རྣམས་ཀུན་གྱི་ཡོ་བྱད་ནི། །སྙིང་རྗེ་བྱང་ཆུབ་སེམས་ཡིན་ཏེ། །ཡོ་བྱད་དེ་དང་མ་ལྡན་ན། །དོན་རྣམས་གྲུབ་པར་མི་འགྱུར་རོ། །ཚད་མེད་སྙིང་རྗེ་བསྐྱེད་པ་དང་། །བྱང་ཆུབ་སེམས་ལ་དགའ་བ་ནི། །སྔོན་དུ་འགྲོ་བའི་མཆོག་ཡིན་ཏེ། །བསྒྲུབ་པ་པོས་ནི་ནན་ཏན་བྱ། །རྩ་བ་བྱང་ཆུབ་སེམས་ཉིད་རྟོགས། །ཐབས་ཀྱི་ཕ་རོལ་ཕྱིན་པར་སྤྱོད། །སྙིང་རྗེས་ཆུད་མ་ཟོས་པར་ཟུང་། །གདོན་མི་ཟ་བར་འགྲུབ་ཅེས་གསུངས། །ཞེས་པ་ལ་སོགས་པ་རྒྱས་པར་གསུངས་སོ། །དེ་དག་གི་ཁྱད་པར་ནི། དཔེར་ན་ས་ཆེན་པོ་ནི་སེམས་ཅན་ཐམས་ཅད་ཀྱི་འཚོ་བ་སྟེ། འགྱུར་བ་མེད་ཅིང་ལན་དུ་ཕན་འདོགས་པ་ལ་རེ་བ་མེད་དོ། །དེ་བཞིན་དུ་སེམས་དང་པོ་སྐྱེད་པ་ཡང་། །སྙིང་པོ་བྱང་ཆུབ་ལ་ཐུག་གི་བར་དུ། །སེམས་ཅན་ཐམས་ཅད་ཀྱི་འཚོ་བ་སྟེ། །འགྱུར་བ་མེད་ཅིང་ལན་དུ་ཕན་འདོགས་པ་ལ་རེ་བ་མེད་པའོ། །དཔེར་ན། རྡོ་རྗེ་རིན་པོ་ཆེ་ཆག་ཀྱང་གསེར་གྱི་རྒྱན་ཁྱད་པར་ཅན་ཐམས་ཅད་ཟིལ་གྱིས་གནོན་པ་སྟེ། རྡོ་རྗེ་རིན་པོ་ཆེའི་མིང་ཡང་མི་དོར་ལ། དབུལ་བ་ཐམས་ཅད་ཀྱང་བཟློག་གི། དེ་བཞིན་དུ་ཐམས་ཅད་མཁྱེན་པ་ཉིད་དུ་སྐྱེད་པའི་སེམས་རིན་པོ་ཆེ་བསྒྲུབ་པ་དང་མ་ལྡན་ཡང་། ཉན་ཐོས་དང་རང་སངས་རྒྱས་ཐམས་ཅད་ཟིལ་གྱིས་གནོན་ཏེ། བྱང་ཆུབ་སེམས་དཔའི་མིང་ཡང་མི་འདོར་ལ། འཁོར་བའི་དབུལ་བ་ལས་ཀྱང་བཟློག་གོ། །དཔེར་ན་སེང་གེའི་ཕྲུ་གུའི་དྲི་མ་སྣམ་པའི་རྫི་ཕྱོགས་ན་གནས་པའི་གཅན་ཟན་ཐམས་ཅད་ཀྱང་འབྲོས་པར་འགྱུར་རོ། །དེ་བཞིན་དུ་སེམས་བསྐྱེད་པའི་བྱང་ཆུབ་སེམས་དཔའ་གང་དུ་ཕྱིན་པའི་ས་ཕྱོགས་ན་གནས་པའི་ལོག་པར་སྤྱོད་པའི་སེམས་ཅན་ཐམས་ཅད་སྐྲག་པར་འགྱུར་རོ། །གནས་འདིར་བསྐྱེད་པ་ཙམ་གྱིས་འཇིག་རྟེན་གསུམ་པོ་བླ་མར་བཅས་པའོ། །མཆོད་གནས་ཉན་ཐོས་བདུད་ཀྱི་སྡེ་རྣམས་ཟིལ་གྱིས་གནོན་ཞེས་གསུངས་སོ། །ཐབས་ཆེན་བྱང་ཆུབ་སེམས་དཔའི་གསང་བའི་སྤྱོད་པའང་འདི་ཉིད་དེ། འདི་མེད་རྒྱལ་པ་རྣམ་པར་སྣང་མཛད་ཐེག་པ་གསུམ་སྟོན་མི་སྲིད་དོ། །སྐད་ཅིག་ཙམ་ཡང་དད་པའི་ཤུགས་སྐྱེད་དེ་ཡང་མྱུར་དུ་འཇམ་དཔལ་གཞོན་ནུར་འགྱུར། །དཀྱིལ་འཁོར་གསང་བར་ཞུགས་ཤིང་ཐེག་ཆེན་དམ་ཚིག་མཆོག་ཀྱང་སྲུང་བ་ཡིན། །ཚུལ་ཁྲིམས་སྡོམ་པ་ཀུན་ཀྱང་བསྲུངས་ཤིང་སྦྱིན་གནས་དམ་པར་རབ་ཏུ་བསྔགས། །གང་དག་འདིར་ནི་མངོན་སྤྱོད་ལ། །དགའ་བའི་ཡིད་ཀྱིས་ཕྱོགས་བྱེད་པ། །དེ་ནི་དངོས་དང་འདྲ་བ་སྟེ། །འབྲས་བུ་ལ་ཡང་མཐོ་དམན་མེད། །བྱང་ཆུབ་སེམས་ཀྱི་བསོད་ནམས་གང་། །དེ་ལ་གལ་ཏེ་གཟུགས་ཡོད་ན། །ནམ་མཁའི་ཁམས་ནི་ཀུན་གང་སྟེ། །དེ་ནི་དེ་ལས་ལྷག་པར་འགྱུར། །ཅེས་པ་ལ་སོགས་པ་རྒྱས་པར་གསུངས་སོ། །དེ་ལ་སེམས་བསྐྱེད་མདོར་བསྟན་ཏེ། །དངོས་པོ་གཉིས་དང་རིམ་པ་བཞི། །གཞི་དང་དབང་པོ་ཡོ་བྱད་དང་། །ཚིག་རིམས་སེམས་བསྐྱེད་སྡོམ་པའི་དངོས། །སྒོ་གསུམ་ལས་ཀྱིས་སྤྱོད་པ་དང་། །ཤེས་བཞིན་བཤགས་པ་རྣམ་བཅུ་གཅིག །ལས་ཀྱི་གཙོ་བོར་གང་ལེན་པ། །དེ་ནི་ལྡོག་པར་མ་གསུངས་ཏེ། །ཅུང་ཟད་ཙམ་གྱི་ལས་རྣམས་ཀྱང་། །རྒྱ་མཚོ་བཞིན་དུ་མི་སྐམ་ཞིང་། །འབྲས་བུ་བདག་གཞན་གཉིས་ལ་སྣང་། །དེ་བས་ནན་ཏན་སྙིང་པོར་གྱིས། །ཀུན་རྫོབ་སེམས་ནི་སྙིང་རྗེའི་མཆོག །སྡུག་བསྔལ་བཅུ་གཅིག་ཡུལ་བྱས་ཏེ། །གདུང་བས་བསྐྱབ་པའི་སེམས་བཅས་པས། །མགོན་སྐྱབས་བདག་པོར་ཡིད་ལ་བྱེད། །བདག་བདེ་རྗེ་དང་དོན་འདོར་བ། །དེ་ནི་ལྡོག་པ་མ་གསུངས་སོ། །འཁོར་ལོས་དཔུང་གི་ཚོགས་འདྲེན་བཞིན། །དེ་ནི་སངས་རྒྱས་ཆོས་རྣམས་འདྲེན། །ས་དང་རྒྱ་མཚོ་ནོར་བུ་བཞིན། །ཡོན་ཏན་དོན་དང་སྣང་བ་རྣམས། །སྙིང་རྗེ་ཆེན་པོ་ཉིད་ལས་བྱུང་། །མེ་ལོང་ཆུ་བཞིན་བསྒྲིབ་བྱས་པ། །དངོས་གྲུབ་གེགས་སུ་བྲལ་གསུངས་སོ། །བུ་དང་ཞེ་འགྲས་སྤྱོད་པ་ཡིས། །བྱང་ཆུབ་སེམས་དཔའི་མིང་མེད་ན། །སངས་རྒྱས་ཁས་ཆེས་རྣལ་འབྱོར་ཅིག །དོན་དམ་ངེས་པར་རབ་བཤད་པ། །མ་གཡོས་ཀུན་གཞིའི་ངང་དུ་བཤད། །རང་བཞིན་སྣང་བའི་གསེར་ཚུལ་ལྟར། །གཉིས་སུ་མེད་པར་རྒྱལ་བས་བཤད། །དྲི་དང་ག་བུར་ནུས་པ་བཞིན། །མཚན་མ་མེད་པར་སེམས་མི་དམིགས། །སེམས་ཉིད་གང་ཡིན་ཆོས་ཉིད་དེ། །ཆོས་ཉིད་ཀྱང་ནི་དེ་བཞིན་ནོ། །ཆོས་སེམས་གཉིས་མེད་ལྡན་གྱུར་པས། །བླ་མེད་བྱང་ཆུབ་ཆེན་པོར་བཤད། །ནམ་མཁས་གར་ཁྱབ་ཆོས་ཀྱིས་ཁྱབ། །ཆོས་ཉིད་གར་ཁྱབ་སེམས་ཡིན་པས། །ཕྱི་ནང་གཉིས་མེད་སེམས་སུ་གསལ། །མོས་དང་རྒྱུན་དྲན་མངོན་འགྱུར་བར། །ཡིད་ལ་བྱེད་པའི་སེམས་དག་གིས། །དོན་འདི་ཡོངས་སུ་རྫོགས་པར་བརྗོད། །གཡོ་ཞིང་སྨོན་པར་བྱེད་པ་ནི། །རང་བཞིན་མཚུངས་པར་ལྡན་པ་དང་། །ཞར་བྱུང་ལྷན་ཅིག་བྱེད་པ་དང་། །ཡོན་ཏེན་མཐོང་ཐོས་རྗེས་འཇུག་དང་། །བྱིན་རླབས་ཤུགས་ཀྱིས་འབྲེལ་པ་བཞི། །རྐྱེན་གྱི་རྣམ་པ་འདུས་པ་ཡིན། །སྐད་ཅིག་ཅུང་ཟད་ས་བོན་ལས། །བཙའ་བ་བཞིན་དུ་སྐྱེ་བར་གསུངས། །ལྷག་པར་འཕེལ་བའི་གང་ཟག་གིས། །སྙིང་རྗེ་སྐྱེ་དང་ལྟར་ལྡན་པས། །དོན་གཉིས་རྒྱུ་རུ་འདིར་ཤེས་ནས། །གོམས་པ་མང་དུ་བྱས་པ་ཡིས། །ཟླ་བ་ཡར་གྱི་ངོ་བཞིན་དུ། །ཇེ་ཆེ་ཇེ་མང་མངོནའཕེལ་བར། །དམ་བཅའ་འཇུག་པར་བྱ་བ་ཡིན། །ལྷག་པའ་ིབསམ་པ་མངོན་བྱས་ཏེ། །འགྱུར་བ་མེད་པར་གནས་པར་བྱའོ། །དངོས་གཞི་གཉིས་ལ་རབ་བརྟན་པ། །འཇུག་པའི་སྐྱེས་བུར་དེ་བཤད་དོ། །ཕྱིས་འབྱུང་སྡོམ་པའི་དངོས་པོ་ལ། །རྒྱུན་དང་དུམ་བུར་གང་གནས་པ། །གནས་པའི་སེམས་སུ་རབ་ཏུ་བརྟན། །དེ་ཉམས་གསུམ་དུ་ཤེས་པར་བྱ། །གནས་པ་མང་པོའི་མཐུ་རྫོགས་པས། །མངོན་བྱས་རྐྱེན་གྱིས་མི་འཕྲོགས་ཤིང་། །བསྒྲུབ་བྱ་རྐྱེན་གྱིས་མཐར་ཕྱིན་པ། །ཀློང་ཡངས་ནམ་མཁའི་དཀྱིལ་འཁོར་ལ། །སྤྲིན་མེད་ཉི་མ་འབུམ་གྱིས་བརྡལ། །མི་སྐྱེ་མི་འགག་ངོ་བོ་ལས། །ཇི་ལྟར་བལྟས་དགུའི་དེར་སྣང་བས། །དོན་གཉིས་ལྷུན་གྲུབ་རྟོག་བྲལ་བ། །མཐར་རྫོགས་སེམས་སུ་རྒྱལ་བས་གསུངས། །བསྔོ་གཞི་སྒྲིབ་བྲལ་ཉིད་དུ་བསྟན། །ཡུལ་ཉིད་ལྔ་ཡི་དབང་པོ་ནི། །རིམ་པ་གསུམ་གྱི་མཚན་ཉིད་ཅན། །སྙིང་རྗེ་ཆེན་པོ་བརླན་ལྡན་པས། །ཁ་གྲགས་འདོད་པའི་སེམས་གསུམ་སྤངས། །ཤེས་བྱ་བར་མ་ཀུན་མཁྱེན་པས། །མ་འདྲེས་དོན་གྱི་ཐ་སྙད་རྣམས། །ནད་དང་སྨན་གྱི་རིམ་བཞིན་བྱེད། །སྟོན་པའི་མཆོག་ཏུ་འདི་གསུངས་པས། །དང་པོའི་རིམ་ལ་གནས་པའི་མིས། །བརྩོན་འགྲུས་དགའ་བའི་ལས་རྣམས་ཀྱིས། །འདུ་ཤེས་སྟོན་པར་བཞག་སྟེ་བླང་། །ཅུང་ཟད་འགལ་བའི་སེམས་མེད་པར། །རྟག་པ་གདུང་བས་རྨོངས་བྱེད་པ། །དེ་འདྲ་བྲལ་བས་མ་གསུངས་སོ། །དཔང་འགྱུར་རྡོ་རྗེ་དམ་ཅན་རྣམས། །བྱིན་རླབས་གཉེན་པའི་སེམས་དག་གིས། །ལས་ཀྱི་སྟོངས་སུ་འགྱུར་བའི་ཕྱིར། །ཞིང་ཁམས་བྱེ་བའི་རྡུལ་འདས་པའི། །སངས་རྒྱས་འཁོར་བཅས་བཞུགས་པར་བྱ། །དེ་དག་རྟག་ཏུ་མངོན་བསམ་སྟེ། །ཤེས་བཞིན་རང་གི་སྡམ་པ་བསྔོ། །སྨོན་ལམ་དབང་གིས་གཟིགས་པར་འགྱུར། །མཎྜལ་བདུད་རྩིའི་དྲིས་བྱུགས་པ། །ཙན་དན་བདུད་རྩིའི་ཆུས་སྦྱངས་པ། །དྲི་ཞིམ་ཆས་ཀྱིས་རབ་བརྒྱན་ཏེ། །རིན་ཆེན་འབྱོར་པ་ལག་ཐོགས་བྱ། །སྣ་ཚོགས་ཡོལ་བའི་ཕྱི་རོལ་འདུག །ཁ་སྦྱར་བན་དྷའི་བུམ་ཆུ་སྦྱིན། །དྲིལ་བུས་རྡོ་རྗེའི་མིང་བརྟགས་བྱ། །སངས་རྒྱས་འཁོར་བཅས་གཟུགས་བརྙན་དགྲམ། །སྣ་ཚོགས་མཆོད་པ་རྒྱས་པ་དག །འཁོར་གསུམ་དག་པའི་སེམས་ཀྱིས་དབུལ། །ཁ་གསིལ་རོལ་མོ་རྒྱས་པར་སྦྱིན། །འབྱུང་པོ་ཀུན་གྱི་གཏོར་མ་དང་། །འགྲོ་དྲུག་སྦྱིན་པ་ཆེན་པོའི་ངང་། །དུག་གསུམ་སྤངས་པའི་སེམས་ཀྱིས་གཏང་། །སེམས་སྐྱེད་མཚོན་པའི་རྡོ་རྗེ་ཡང་། །རྟག་ཏུ་བཅང་བར་བྱ་བ་ཡིན། །དང་པོ་འདས་དང་འཇུག་འདོད་དང་། །གཡོ་བར་མཁན་པོས་གསལ་བཏབ་པས། །མཁན་པོས་གསོལ་བ་བཏབ་ནས་ནི། །དད་པའི་སེམས་ལ་གནས་སུ་གཞུག །དགོས་པའི་ཡོ་བྱད་རང་འབྱོར་ནས། །དགེ་བའི་བར་ཆད་བཟློག་པའི་ཕྱིར། །རྡོ་རྗེ་མི་ཤིགས་གུར་བཅིང་བྱ། །བུམ་ཆུ་གསུམ་པོ་བྱིན་བརླབ་ཕྱིར། །བདུད་རྩི་འཁྱིལ་པའི་དྲན་པ་ཡིས། །བགེགས་བསྐྲད་པ་ཡི་རང་བཞིན་དུ། །འབྲུ་ལྔ་ཡེ་ཤེས་ཆུ་རྒྱུན་དགུག །མ་ལུས་འདུས་པའི་ཁྲོམ་བཞིན་ཚོགས། །བསྐྱེད་དང་སྤྱན་དྲངས་མཆོད་ཚོགས་སྦྱར། །སྔགས་བཟློས་གསོལ་བཏབ་བུ་བྱིན་བརླབ། །ཁྲུས་བྱས་དྲི་ཞིམ་རྒྱན་ལྡན་བུ། །ཡོལ་ཕྱིར་ཕྱག་བྱས་ཐལ་སྦྱར་ཏེ། །དཔལ་ལྡན་རྡོ་རྗེ་འཛིན་པའི་བདག །འཁོར་བ་འདོན་པའི་དེད་དཔོན་ཆེ། །སྡུག་བསྔལ་ཆུ་བོ་རྒྱུན་བཟློག་དང་། །དོན་གཉིས་བདག་གིས་མངོན་བྱེད་པའི། །ཐབས་ཀྱི་ལས་མཐའ་གང་ལགས་པ། །རིམ་པ་ཡང་དག་བསྟན་པའི་ཕྱིར། །ཐུགས་རྗེ་ཉེ་བར་སྐྱེད་མཛད་དེ། །དེ་རིང་གནང་བ་མཛད་པར་རིགས། །མ་ལུས་ཕྱོགས་བཅུ་ན་བཞུགས་པའི། །སྔོན་གྱི་དབང་པོ་ཇི་སྙེད་པ། །རྒྱས་པར་སྤྱན་དྲངས་མཆོད་པར་བྱ། །སངས་རྒྱས་ལྟ་བའི་མོས་བྱས་པས། །ལག་བཟུང་ནང་དུ་གནས་པར་བྱ། །ཐལ་སྦྱར་ཞིང་ལ་ལུས་དབུལ་བྱ། །བི་ཤུད་དྷེ་དང་སྦྱོར་སྔགས་ཀྱི། །ཙན་དན་བདུད་རྩི་ཆུ་སྦྱར་དེ། །དད་པའི་ལྷར་སྐྱེད་བྱིན་གྱིས་བརླབ། །རིན་ཆེན་བསྙེན་པས་གསོལ་བཏབ་པས། །རྒྱལ་བ་སྲས་དང་བཅས་རྣམས་ཀྱིས། །ཐུགས་རྗེ་ཉེ་བར་བསྐྱེད་མཛད་དེ། །དམ་ཚིག་དམ་བཅས་རིམ་པ་བཞིན། །བདག་ལ་བྱིན་གྱིས་བརླབས་པར་རིགས། །རབ་ཏུ་གཏོར་ཏེ་འབྲེལ་བ་བརྟག །རྡོ་རྗེའི་མིང་ཡང་སྤྱིན་པར་བྱ། །དིང་ཁྱོད་སངས་རྒྱས་དཀྱིལ་འཁོར་གྱིས། །རིམ་པར་རབ་བཞུགས་ངེས་པ་ཡིན། །དམ་ཚིག་འདོད་པའི་སེམས་སྐྱེད་ཅིང་། །གཞན་དོན་རབ་དགའི་སེམས་ལྡན་པས། །བཤགས་པའི་མཆོག་གིས་རབ་ཤོགས་ཏེ། །དག་པའི་སེམས་ཀྱིས་བརླབ་པར་གྱིས། །འདབ་བརྒྱད་པདྨའི་དཀྱིལ་འཁོར་ལ། །བརྟན་ནས་སྒུད་ཅིང་མོས་བྱེད་དེ། །མཐའ་རྣམས་བྲལ་བའི་བྱང་ཆུབ་སེམས། །མི་རྟོག་མི་གནས་ནམ་མཁའ་ཉིད། །ཆོས་རྣམས་དེ་འདྲར་མོས་པ་དང་། །མཐོང་སྒོམ་ལམ་ལ་གནས་པ་དང་། །མཐར་ཕྱིན་ཐམས་ཅད་མཉམ་སྦྱོར་བས། །དམ་བཅས་ཡིད་ཀྱིས་བརྟན་པར་བྱ། །རྒྱུན་ཡང་དེ་བཞིན་བསྟན་པར་གསུངས། །དེ་ཡི་ཡོན་ཏན་དཔེ་རྣམས་ཀྱི། །ངེས་པར་མཚོན་པ་བཞི་རུ་བཤད། །བརྟན་པའི་བྱང་ཆུབ་སེམས་བསྐྱེད་དོ། །མ་རིག་ཞི་དང་བཅས་པའི་སེམས། །སྐད་ཅིག་རྒྱུན་གྱི་ལས་ཉོན་མོངས། །མཐུན་པར་སྣང་བའི་བལྟོས་པའི་ཆོས། །རྨི་ལམ་བཞིན་དུ་ཉམས་ཐག་རྣམས། །དྲན་པའི་སྙིང་རྗེ་གདུང་སེམས་ཀྱིས། །ཁྱད་པར་ཞིང་དུ་མངོན་བྱས་པ། །སྡུག་བསྔལ་རྒྱ་མཚོ་བཟློག་པའི་ཕྱིར། །ཆོ་འཕྲུལ་ལས་དང་སྐུ་དོན་རྣམས། །རྒྱལ་བས་གྲངས་མཐའ་མི་རྫོགས་སོ། །མངོན་འདོད་བྱ་བའི་མོས་པ་དག །བརྟན་པར་བསྐྱེད་ཅིང་རྒྱུན་གནས་པ། །སེམས་ཀྱིས་སྔོན་བཞིན་གནས་པར་བྱ། །ཐལ་སྦྱར་གུས་པའི་ལུས་གནས་ཏེ། །དང་པོར་གསོལ་བའི་ཚིག་བཤད་བཞི། །སྔོན་དུ་བཏང་ནས་གཏམ་པར་བྱ། །དཀྱིལ་འཁོར་མཆོད་པ་སྦྱིན་སྲེག་སོགས། །གཞན་དོན་གྲངས་མང་ཇི་སྙེད་པ། །ཚེ་འདི་གནས་ཙམ་མཐར་ཐུག་པར། །ནམ་ཡང་རྒྱུན་ཆད་མ་གྱུར་ཅིག །ཐུན་མོང་ཐབས་ཀྱིས་སྤྱོད་དྲུག་དང་། །མི་མཐུན་འདུལ་བའི་སྤྱོད་པ་རྣམས། །དེ་བཞིན་བསྟན་པར་བསྒྲུབ་པ་ཡིས། །འགྲོ་བ་མི་འདུལ་མེད་པར་ཤོག །དམ་བཅས་རིམ་པའི་སྡོམ་པ་རྣམས། །ཚིགས་བཤད་བཞིན་དུ་སེམས་ཀྱིས་བསྒྲུབ། །དོན་གཉིས་འགྱུར་བའི་ལུས་སྤྱོད་དག །ལུས་ཀྱི་ལེ་ལོ་སྤངས་པས་བྱས། །དོན་མེད་སྤྱོད་པ་སེམས་ཀྱིས་མནན། །སྙིང་པོ་བཤད་དང་ཕན་པའི་གཏམ། །མ་གཏོགས་པ་ཡི་རྒྱུན་བཅད་དེ། །ལེ་ལོ་སྤངས་པས་གསུམ་བསྒྲུབ་བྱ། །ཅ་ཅོ་ནམ་ཡང་མ་ཡིན་པ། །སངས་རྒྱས་ཆོས་སུ་དེ་བཤད་དོ། །བསམ་གཏན་ཤེས་རབ་རབ་མ་དང་། །སྙིང་རྗེ་སྡོམ་པ་བསྔོས་པའི་སེམས། །གཡེང་དང་བྱིང་རྨུགས་རྣམས་སྤངས་པས། །བསམ་བྱ་རྟག་པར་གང་དྲན་པ། །སངས་རྒྱས་ཆོས་བཞིར་འདི་བཤད་དོ། །སྒོ་གསུམ་ཆུང་བར་མོས་གྲུབ་པས། །རྟག་ཏུ་རང་ཉམས་སྨོད་བྱེད་པ། །དམ་ཚིག་སྡོམ་པའི་གཞིར་ཤེས་བྱ། །སངས་རྒྱས་སྐུ་གསུང་ཐུགས་ཐོབ་འགྱུར། །རྒྱས་པར་ཡོན་ཏན་བརྗོད་མི་ལང་། །ཁུད་པའི་ཞིང་དུ་གྱུར་རྣམས་ལ། །སྡུག་བསྔལ་ཡིན་ཡང་མཐར་ཕན་སྤྱོད། །བསྟོད་ཅིང་མཐོ་སེམས་རབ་སྤངས་པས། །འཁྲུལ་པ་ཇི་སྙེད་བརྗོད་མི་ལང་། །འདི་འདྲ་བ་ཡང་སྣོད་མ་སྨྲ། །རྒན་པོ་བླ་མའི་འདུ་ཤེས་བྱེད། །ཕྲག་དོག་ཅན་ལ་སེམས་ངན་མེད། །དཔག་ཚད་དུ་མའི་མཐར་གནས་བྱ། །མན་ངག་ཟང་ཟིང་ལན་སྤངས་སྦྱིན། །འགྲོན་གཉེར་རྒོས་མེད་དབང་དུ་བྱ། །དོན་ཡོད་སྡིག་པ་དང་དུ་བླང་། །མ་བསྔོས་འཚོ་བ་རྟག་ཏུ་སྤང་། །གྲགས་དང་འགྲན་ནོར་དགེ་བ་དོར། །ཉམས་ལ་སྙིང་རྗེ་གཏང་སྙོམས་སྤང་། །དོན་འགྱུར་ཕྱིར་ན་བདག་དགེ་སྤང་། །དེ་ནི་ལྡོག་པར་མ་གསུངས་སོ། །འཛིན་པ་སྤངས་པའི་སྦྱིན་པ་བཞི། །འཆད་པས་སྦྱིན་པ་བཟློག་པར་བྱ། །ལུས་འདོད་དུམ་བུའི་སེམས་དག་གིས། །སྤྲུལ་སྐུ་ཐོབ་ཕྱིར་སྦྱིན་པར་བྱ། །ཉམ་སོད་ལོག་ལྟ་སུན་དབྱུང་ཕྱིར། །སྐལ་པའི་སྦྱིན་པས་བཟློག་པར་བྱ། །བསམ་གཏན་རོ་མཆོག་ཀླུང་གནས་ཀྱང་། །ཐེག་དམན་སྤྱོད་པ་དོར་བ་མེད། །འདོད་པའི་སེམས་ཀྱིས་གྲང་མི་གཉེར། །བཟློག་པའི་སེམས་ཀྱིས་གྲོང་རྒྱུ་བ། །ཆོས་ཀྱི་སྐྱེས་ཀྱིས་འགྲོ་བར་བྱའོ། །ནད་དང་སྡུག་བསྔལ་ཅན་གཡོས་བྱད། །ཚུལ་ཁྲིམས་བསམ་སྤྱོད་ལྷུར་མི་འཛིན། །མཉེས་དང་བྲལ་ན་དག་པར་གསུངས། །རྩོད་པའི་རྩ་བ་སེམས་དྲན་དང་། །རྣམ་སྨིན་དྲན་པས་བཟློག་པར་བྱ། །ཁོང་ཁྲོ་ཉེས་ཆེན་བྲལ་འགྱུར་བ། །འདི་ལྡན་བྱང་ཆུབ་སེམས་དཔའ་མེད། །ཆོས་སྤྱོད་བཅུ་ལ་དམ་བཅས་ནས། །ཐུན་མོང་ཞེན་པ་བཟློག་པར་བྱ། །སྡུག་བསྔལ་བསམ་པ་ནམ་མི་འདོར། །སྣོད་མ་བལྟས་ལ་སེམས་མི་བརྟན། །དེ་ལ་དོན་འགྱུར་སྤང་མི་བྱ། །ཕན་བྱེད་རྣམས་ལ་ལ་མི་གླན། །མྱ་ངན་ཅི་ཡང་བསད་པར་བྱ། །སྒྲོ་སྐུར་སྤངས་ཏེ་ཡོན་ཏན་བརྗོད། །ངན་བྱེད་མཐོང་བ་མེ་སྨོན་དང་། །སྔོས་ངན་མཐོང་བ་དེ་བཞིན་སྟེ། །སྨོན་ལམ་བདག་གི་ཞེང་དུ་བཏབ། །བཟང་པོར་སྤྱོད་དང་དངོས་པོ་བཟང་། །མཆོད་རྫས་མཐོང་བ་ཇི་སྙེད་པ། །བདག་ཞིང་ཀུན་གྱིས་སྤྱོད་པར་སྨོན། །གདུག་པ་སངས་ཞིང་གནས་དང་། །འགྲོ་བ་སྤྲུལ་པས་དོན་བྱེད་དང་། །བྱིན་པ་བསམ་གཏན་བདེན་པ་རྣམས་དང་། །བསམ་རྩིས་ཆོས་ཀྱི་བསམ་པ་དང་། །འགྲེང་བ་སེམས་ཅན་དོན་བསྟན་དང་། །དཔའ་བོ་བདུད་བཞི་གཡུལ་འཇོམས་དང་། །ཐམས་ཅད་སྤྱོད་བཞིན་མ་གོས་དང་། །སྲོག་གཅོད་ཁྲོ་བོའི་ཕྲིན་ལས་དང་། །འདོད་ཆགས་མཉམ་པར་སྦྱོར་བ་དང་། །རྐུ་བྱེད་དངོས་གྲུབ་ལེན་པ་དང་། །རི་བོ་རྟོག་པས་མི་ཕྲོགས་དང་། །ཆུ་རྒྱུན་ཆོས་སྤྱོད་རྒྱུན་ལྡན་དང་། །འབྲས་བུ་སྐུ་དང་ཡེ་ཤེས་དང་། །མེ་ཏོག་རྣམ་གྲོལ་ཕུང་པོ་དང་། །ཡུལ་ཁམས་རྣམ་དག་འཇིག་རྟེན་དང་། །ཁ་ཟས་ཏིང་འཛིན་རོ་མཆོག་དང་། །སྐོམ་དང་སྙིང་རྗེ་ཆུ་འཐུང་སོགས། །ཁམས་གསུམ་གནས་པའི་སེམས་ཅན་ལ། །སྨོན་ལམ་ཡིད་ཀྱིས་ཟིན་པར་བྱ། །གཞན་ཕྱིར་བདག་ཀྱང་དེ་བཞིན་སྨོན། །རྩ་བའི་སྤྱོད་པ་གསུམ་སོགས་པ། །སེམས་སྐྱེད་སྡོམ་པ་བླངས་ནས་མཐོང་། །ཉམས་མེད་བསམ་པའི་དྲན་པ་དང་། །ཤེས་བཞིན་ལྟ་བས་བརྟག་དངོས་ཏེ། །གང་ཞིག་སྔོན་གོམས་དབང་ཉམས་པ། །འགྱོད་དང་བཅས་པས་སོར་གཞུག་བྱ། །ཡི་གེ་ལ་སོགས་བཟོ་མཐའ་རྣམས། །རྩོལ་བས་རྒྱུན་ཏུ་འཇུག་བྱེད་པ། །གོམས་ཏེ་སླ་བར་མ་གྱུར་པའི། །དངོས་དེ་གང་ཡང་ཡོད་མ་ཡིན། །སྤྱོད་ལམ་རྣམ་གསུམ་དྲན་བྱ་བ། །བྱང་ཆུབ་སེམས་དཔའི་མིང་ཐོབ་སྟེ། །དེ་ནི་ལྡོག་པར་མི་འགྱུར་རོ། །དཔེར་ན་ཕྱུག་པོ་ནོར་སྡོད་པ། །མེད་པར་གྱུར་པ་སོར་འཇུག་བཞིན། །སྤྱོད་པ་མཉམ་པའི་རྣལ་འབྱོར་པས། །ཞིག་པ་བཞིན་དུ་མི་གནས་ཏེ། །གཞི་འམ་འོན་ཏེ་གཞན་དག་གམ། །དཔང་པོར་གྱུར་པའི་རྟེན་དག་ལ། །སྔོན་དུ་མཎྜལ་མཆོད་སྦྱར་ནས། །མེ་ཏོག་ཕྱག་འཚལ་ལུས་གུས་པས། །འགྱོད་སེམས་དངོས་པོ་གང་གིས་བཤགས། །དེ་བཞིན་སླར་ཡང་བླང་བར་བྱ། །བདག་དང་དངོས་པོ་འབྲས་བུ་རྣམས། །མི་དམིགས་སེམས་ཀྱི་བཤགས་བྱ་བར། །དེ་ནི་ཉེས་པར་མ་གསུངས་སོ། །འདི་ནི་ཤིན་ཏུ་གསང་བའི་ཆོས། །བདག་གཞན་གཉིས་ཀའི་དོན་འགྱུར་ཕྱིར། །སྡོམ་པ་རྣམ་གྲངས་འཕེལ་མི་བྱ། །འདོད་པ་སྦྱིན་པའང་དེ་བཞིན་ནོ། །ཐུན་མོང་རབ་ཏུ་ཞེན་པ་བཟློག་པ་དང་། །བསླབ་པ་མཐར་ཆུབ་དེ་ལས་གྲོལ་བའི་ཕྱིར། །ལས་མཐའ་སེམས་བསྐྱེད་ཆོ་ག་མདོར་བཤད་པས། །འགྲོ་བ་མཐའ་དག་བྱང་ཆུབ་སེམས་ལྡན་ཤོག །སེམས་སྐྱེད་པའི་ཆོ་ག་མདོར་བཤད་པ་རྫོགས་སོ། །རྡོ་རྗེ་འཛིན་ལ་ཕྱག་འཚལ་ལོ། །དེ་ལྟར་སྟོན་པ་མཆོད་བྱས་ནས། །ལམ་གྱི་རྣལ་འབྱོར་རྣམས་དོན་ཕྱིར། །རྒྱུད་གསུམ་ངེས་པར་གསལ་བྱེད་ཅིང་། །དམ་ཚིག་ཆེན་པོ་མདོར་བཤད་པ། །ལམ་གྱི་རྒྱུད་ལ་ཞུགས་པ་རྣམས། །བསླབ་པ་གསུམ་ལ་གནས་བྱས་ནས། །དོན་གཉིས་མངོན་དུ་བྱེད་པ་ཡང་། །ནང་རིས་ལ་ལ་མུན་སྣང་ཕྱིར། །གཅིག་གིས་འཐད་པ་མ་ཡིན་ལ། །ལ་ལ་ཆ་མཐུན་སྤྱད་པའི་རིགས། །གདུལ་བྱ་སྐབས་ཀྱིས་རིམ་སྤྱོད་པ། །སངས་རྒྱས་མཛད་པ་འདི་གསུངས་སོ། །གཉེར་འདི་ལུང་གིས་ལུས་བཞག་ན། །ངོ་བོ་རྣམ་གྲངས་བསྲུང་ཐབས་དང་། །ཉམས་རྒྱུ་སྔ་རྟགས་སྐྱོན་ཡོན་གཉིས། །སྐོང་ཐབས་དཔེ་དང་མདོ་བཅུར་བཅད། །ངོ་བོ་རྩ་བ་བཞི་དག་ནི། །ཐུན་མིན་ཐུན་མོང་ཡན་ལག་གཉིས། །རྩ་བ་ཆེན་པོ་མདོར་འབྲེལ་ལོ། །དམ་ཚིག་རྣམ་པའི་གྲངས་དག་ནི། །སེམས་ཅན་གྲངས་དང་ལོག་རྟོག་གྲངས། །སངས་རྒྱས་ཉིད་ཀྱིས་མི་མཁྱེན་ཕྱིར། །རྟོག་འདུལ་གཉེན་པོ་དམ་ཚིག་གྲངས། །རྒྱལ་བ་ཉིད་ཀྱིས་བརྗོད་ལས་འདས། །འོན་ཀྱང་རྨོངས་ལ་མདོར་གཟུང་བ། །བྱང་སེམས་རྣམ་གཉིས་སློབ་དཔོན་དྲུག །མཆེད་བཞི་སྔགས་གསུམ་ཕྱག་རྒྱ་བཞི། །གསང་བཅུ་རྩ་བར་ཤེས་པར་བྱ། །སྤྱད་པ་ལྔ་དང་མི་སྤང་ལྔ། །དང་དུ་བླང་དང་བསྒྲུབ་དེ་བཞིན། །ཤེས་བྱ་ལྔ་རྣམས་ཐུན་མིན་བཤད། །ཡན་ལག་སྐབས་སུ་ཤེས་པར་བྱ། །ཐུན་མོང་དམ་ཚིག་མདོར་བཤད་པ། །མདོར་བསྡུས་བདག་གཞན་དོན་གཉིས་སོ། །རྣམ་གྲངས་སྐབས་སུ་ཤེས་པར་བྱ། །བསྲུང་བའི་ཐབས་ནི་འདི་ལྟ་སྟེ། །རང་ལུས་རྒྱལ་བའི་ཕྱག་རྒྱ་ཆེ། །སེམས་ཅན་ཁམས་ཀྱང་དེར་ཤེས་ཤིང་། །སྣང་སྟོང་གཉིས་མེད་ཡེ་ཤེས་སྐུ། །བྱས་མཐོང་ཟོས་པ་ཐམས་ཅད་ལ། །སེམས་ཕྱིར་གང་ཡང་བྱས་སྣང་མེད། །དྲན་དང་ཤེས་བཞིན་མངོན་བསྟེན་ལ། །དུས་གསུམ་རྒྱུན་དུ་མ་དྲན་ན། །ཐེག་ཆེན་བསྔགས་པར་ཅི་ཞིག་ཚུད། །ལྟ་སྤྱོད་དམ་ཚིག་འབྲེལ་པ་ཡི། །སྤྱི་དང་འདྲེན་དང་དམ་ཚིག་དབང་། །ཉམས་ཆག་སྐོང་དང་ཤེས་རྒྱུད་འགྲོལ། །མན་ངག་ལུང་གི་སློབ་དཔོན་རྣམས། །ཡུལ་ལ་དབང་བའི་རྒྱལ་པོ་དང་། །ཁུ་བོ་མ་དང་ཕ་དང་མིག །སྙིང་བས་ལྷག་པའི་ཚུལ་བལྟས་ཏེ། །སྒོ་གསུམ་ཟོལ་སྒྱུ་མེད་པ་ནི། །ཡི་དམ་ལྷ་ལྟར་རྒྱུན་དུ་བསམ། །བསྲུང་རིམ་འཆད་བཞིན་ཤེས་པར་བྱ། །མཐའ་ཡས་སེམས་ཅན་རང་རིག་ཕྱིར། །གང་ཡང་བདག་ལས་གཞན་མིན་དང་། །བདེ་གཤེགས་སྙིང་པོ་སྤུན་རིང་ཕྱིར། །མ་འོངས་སངས་རྒྱས་རང་བཞིན་ཡིན། །སྤྱི་ཡི་མཆེད་དེ་ཕ་ཚན་བཞིན། །སངས་རྒྱས་ཆོས་ཞུགས་རིང་བ་དང་། །ལྟ་སྤྱོད་མཐུན་པས་ཉེ་བར་བཤད། །ཕ་གཅིག་དམ་ཚིག་ནང་འདྲེས་པ། །ཞང་ཚན་ཕ་སྤུན་སྤུན་པས་ཀྱང་། །ལྷག་པར་བལྟས་ཏེ་བསྲུང་བ་ནི། །ལུས་ཀྱི་ཟས་ནོར་མཉེས་བྱ་བ། །སྦུར་མ་ལྟ་བུར་འཕངས་པ་མེད། །གཏན་བཏིང་ཁུར་སོགས་ལས་བྱ་བ། །བྲན་བཞིན་ངེས་པར་དང་དུ་བླང་། །བླ་མའི་རིགས་འཁོར་དེ་བཞིན་དུ། །ནོར་ཟས་བླངས་པ་རྣམ་སྨིན་ཕྱིར། །ཏིལ་ཕུབ་ཙམ་ཡང་མི་འབག་ཅིང་། །མལ་གོས་ཆགས་སོགས་འགོང་མི་བྱ། །མཆོད་རྟེན་བཤིག་དང་འདྲ་བར་གསུངས། །བརྡེག་བསད་རྐུ་འཕྲོག་སྤྱོད་པ་ནི། །དངོས་སུ་བྱ་བ་ཅི་སྨོས་ཀྱི། །རྩེད་མོ་ལས་སུ་བྱ་བ་མིན། །ངག་གིས་སྐྱོན་སྦས་ཡོན་ཏན་བསྒྲགས། །ཚུལ་བརྗོད་པ་ནི་ཉམས་པར་འགྱུར། །སྐྱོན་སྐུར་ལ་སོགས་མཚན་ཉིད་དག །བྲེ་མོ་གཏམ་དུ་ཟུར་མི་བྱའོ། །ཡིད་ཀྱིས་གཡོ་རྒྱུ་ཕྲག་དོག་དང་། །ངན་སེམས་དཔྱ་སེམས་ནོར་ལ་བརྐམ། །སེ་གོལ་ཡུན་དུའང་བྱ་བ་མིན། །ཤིན་ཏུ་གདུང་ཞིང་བརྩེ་བར་བྱ། །སྤྱོད་ལམ་ཅིས་ཀྱང་མཉེས་བྱེད་ཅིང་། །བཀའ་ཡི་ཟུར་ཡང་མི་བཅག་པ། །དེ་ནི་ལྡོག་པར་མ་གསུངས་སོ། །རྩ་བ་བསྐྱེད་དང་ལས་སྔགས་ཀྱིས། །དམ་ཚིག་ལས་དང་ཆོས་དང་ནི། །སྐུ་ཉིད་ཕྱག་རྒྱ་ཆེན་པོ་བཞི། །རང་གི་སྒོ་གསུམ་ཡི་དམ་གྱི། །སྐུ་གསུང་ཐུགས་སུ་མངོན་སྦྱར་ལ། །རྟག་ཏུ་བཟླས་པ་བྱེད་པ་ནི། །བྱང་ཆུབ་གཟུང་ལ་ཞུགས་པ་ནི། །རབ་ཀྱིས་ཆུ་བོའི་རྒྱུན་བཞིན་ནས། །ཉིན་གསུམ་མཚན་གསུམ་ཉིན་ཅིག་དུ། །མ་ཡེངས་པ་ཡེ་ངག་གིས་བཟླས། །འབྲིང་གི་ཟླ་གཅིག་དུས་དྲུག་ཏུ། །དུས་བཞིའི་བར་དུ་མི་བཅད་ཅིང་། །ཐ་མ་བྱ་བའི་རྣལ་འབྱོར་པས། །ཟླ་རེ་འམ་ར་བའི་དུས་དག་ཏུ། །བརྩོན་པས་འབད་དེ་མི་བྱེད་པ། །བྱང་ཆུབ་ས་བོན་བརླག་པ་ཡིན། །ཚོགས་དང་གཏོར་མ་དེ་བཞིན་ཏེ། །ཐ་མ་ལོ་ཟླ་མི་འདའ་འོ། །ལྟ་ཟབ་སྤྱོད་པ་བརླང་པོ་དང་། །ལྷ་མིང་གཟུངས་དང་གྲུབ་རྟགས་རྣམས། །སྤྱི་གསང་རྣམ་པ་བཞིར་བཤད་དོ། །སྒྲུབ་པའི་གནས་དུས་གྲོགས་དང་རྫས། །བར་དུ་གསང་ལ་བསྒྲུབ་པར་བྱ། །གསང་བར་འོས་ལ་མདོར་བསྡུ་ན། །ཕུད་དང་གཏོར་མ་ཚོགས་དག་དང་། །བྷན་དྷ་ཕུར་པ་མར་མེ་སྣོད། །རྫས་དང་ལག་ཆ་དཀྱིལ་འཁོར་རྣམས། །སྐྱེ་བོས་མཐོན་བར་ཡོད་མི་བྱ། ། དྲིལ་བུ ་རྔ་ཆུང་ལ་སོགས་སྒྲ། །སྐྱེ་བོས་ཐོས་པར་ཡོང་མི་བརྡུང་། །གྲོགས་པོའི་སྤྱོད་དང་མཚན་རྣམས་དང་། །སེམས་ཅན་ཀུན་ཀྱང་ངན་སྤྱོད་དང་། །ཀུན་ལ་གནོད་པའི་སྤྱོད་པ་རྣམས། །ཤིན་ཏུ་གསང་ན་བྱང་ཆུབ་རྒྱུ། །གཉེར་གཏད་པ་ནི་གདམ་ངག་སྟེ། །སྔར་བཤད་སློབ་དཔོན་རྣམས་ཀྱིས་སོ། །གསང་སྔགས་སྐྱོན་ཡོད་མ་ཡིན་ཏེ། །སེམས་ཅན་དོན་ཕྱིར་རབ་ཏུ་གསང་། །གསང་ཐུབ་དངོས་གྲུབ་མི་ཡལ་བས། །ཤིན་ཏུ་གསང་ན་བྱང་ཆུབ་རྒྱུ། །གསང་ཕྱིར་གདམ་ངག་སྣ་ཚོགས་གསུངས། །དམ་ཉམས་དམ་ལས་ལོག་པ་དང་། །དམ་མེད་དཀྱིལ་འཁོར་མ་མཐོང་ཞིང་། །འདྲེས་དང་མ་འདྲེས་ཐམས་ཅད་ལ། །སེམས་ཀྱིས་བསྟན་པ་མི་བསམ་ཞིང་། །ལུས་ཀྱིས་ཐམས་ཅད་སྦས་ལ་སྤྱོད། །ངག་གི་རྡོ་རྗེ་ལྕེ་ཡོད་ཀྱང་། །བརྗོད་པ་དག་ཏུ་བྱ་བ་མེད། །དེ་དག་རྩ་བ་བཞིར་བཤད་དོ། །ཐུན་མིན་ཡན་ལག་བཤད་བྱ་བ། །སྦྱོར་སྒྲོལ་མ་བྱིན་ལེན་པ་དང་། །རྫུན་སྨྲ་ངག་བརླང་སྤྱད་བྱ་ལྔ། །རང་བཞིན་གྱི་ནི་སྦྱོར་སྒྲོལ་དང་། །དབང་པོ་ཡུལ་གྱི་སྦྱོར་སྒྲོལ་དང་། །ཏིང་ངེ་འཛིན་གྱི་སྦྱོར་སྒྲོལ་དང་། །མངོན་དུ་ཕྱུང་བའི་སྦྱོར་སྒྲོལ་ལྔའོ། །གཉིས་ནི་ཤེས་བྱ་ཐུན་མིན་བཤད། །ཏིང་འཛིན་བསླབ་པ་ཐུན་མོང་གསུངས། །མངོན་ཕྱུང་དམ་ཚིག་ཆེན་པོ་ལ། །བྱེད་པའི་ཚིག་ལྔ་ཤེས་པར་བྱ། །ལྟ་སྤྱོད་ཏིང་འཛིན་འབྲེལ་གོམས་པས། །དཀོན་མཆོག་སློབ་དཔོན་སྐུ་དགྲ་གཉིས། །དམ་ཉམས་ལོག་དང་འཁུས་པ་དང་། །འདུ་བར་འོངས་དང་ཡོངས་ལ་གནོད། །དམ་དགྲ་ངན་པའི་ངང་ཚུལ་ཅན། །ངན་སོང་གསུམ་དང་བཅུ་པོ་ནི། །རྣལ་འབྱོར་ཀུན་གྱིས་དང་དུ་བླང་། །གྲངས་ཀྱིས་རྩ་བ་བཅུ་བཞིའོ། །ཏིང་འ ཛིན་སྔགས་དང་ཕྱག་རྒྱ་རྣམས། །ཤིན་ཏུ་གོམས་པས་དབང་བསྐུར་རོ། །བྱང་ཆུབ་ཞིང་དུ་དགོད་པར་བྱ། །ཏིང་འཛིན་སྔགས་རྒྱས་བག་ཆགས་སྦྱངས། །རྣམ་ཤེས་ལྷར་སྐྱེད་འོག་མིན་འཕང་། །ཡེ་ཤེས་ཚོགས་ཀྱང་རྫོགས་པར་འགྱུར། །ཕུར་པོ་བྱིན་བརླབས་མཆོད་པར་བསྒོ། །བསོད་ནམས་མཆོག་ཏུ་འདིས་འགྱུར་རོ། །དེ་ལྟར་བསྒྲལ་བའི་དགོས་ཆེད་ཀྱང། །བྱང་ཆུབ་སྤྱོད་འཕེལ་སེམས་ཅན་བདེ། །ལྷ་མཉེས་བདག་གིས་དམ་བསྐོངས་ཤིང་། །ལས་ངན་བར་ཆད་སྡུག་ཡུན་ཐུང་། །རང་གིས་བསགས་མེད་ངན་སོང་ལས། །བདེ་ལམ་འདི་ལས་གཞན་མེད་དོ། །ཐབས་ཀྱི་སྤྱོད་པས་འཆིང་འགྱུར་ན། །བྱང་ཆུབ་སེམས་དང་འདུལ་དབང་གིས། །བརྔོན་དང་སྨད་འཚོང་སྟོན་ཡང་ལྟུང་། །ཁེ་དང་སྤྱོད་པས་དེ་མིན་ཕྱིར། །ཐབས་ཆེན་ལམ་ལ་གནས་པ་ཡི། །སྐྱེ་བོ་ཀུན་གྱིས་བྱ་བར་འབྱུང་། །ག་ནའི་དམ་ཚིག་ཆེན་པོ་ནི། །ལོག་ཆགས་ཡིད་འོངས་སྤངས་པ་ཡི། །དོན་གཉིས་མངོན་དུ་བྱེད་པ་ཡི། །པད་ཅན་དུང་ཅན་རི་མོ་ཅན། །བན་གླང་ཅན་དང་ལྕུག་ཕྲན་ཅན། །སྡོང་གཅིག་མེ་རེག་ཕྱལ་བ་བརྒྱད། །མཉེན་དྲང་སྐད་རིང་སྟོད་སྨད་ཕྱེད། །ཡན་ལག་འཕྲ་འཇམ་ཚིགས་དམིག་ཟླུམ། །དཔྲལ་བའི་དབྱེས་ཆེ་སྨིན་ཁྱུགས་རིང་། །མིག་ཕྲ་དཀྱིལ་ནས་ཨུཏྤལ་མདོག །ཆུ་ཞིང་གཉིས་ཀ་འབྲིང་དུ་བཤད། །ལུས་དང་ཆུ་རླུང་ག་བུར་དྲི། །གསང་ཐུབ་ཤེས་རབ་སྤྱོད་པ་དལ། །དད་ལྡན་འགྲོགས་ཤིང་དད་ཆེ་བ། །གསང་བའི་གནས་སུ་སྤྱད་པར་བྱ། །དབང་བསྐུར་དམ་ཚིག་ཆོས་གསུམ་བཤད། །ལུས་ལ་རིགས་ལྔའི་རྡུལ་ཚོན་དབྱེ། །ཐབས་ལ་མཁས་པས་སྐབས་ཀྱིས་སྦྱར། །དམ་ཚིག་རྣམ་གྲངས་བཅུ་གཉིས་ཀྱི། །དངོས་གྲུབ་ཡོན་ཏན་བསམ་མི་ཁྱབ། །སློབ་བུ་སྨིན་ཅིང་ལས་རྣམས་འགྲུབ། །སྐྱེ་གནས་ངན་འགྲོ་རིས་དྲུག་དེས། །ཐབས་ཀྱི་ཐེག་པ་འདི་བཤད་དོ། །མཚན་ཉིད་ཆད་དང་རྣམ་གྲངས་དང་། །ལྟོས་པའི་ཀུན་བརྟག་རྣམ་པ་གསུམ། །དངོས་པོ་དེ་ཉིད་ལ་རྫུན་ཤེས། །ཐམས་ཅད་རང་གི་སྣང་ཕྱིར་བདེན། །ཤེས་ནས་ཀུན་སྨྲ་སྐྱེས་བུའི་ཡུལ། །དཀོན་མཆོག་གསུམ་དང་སློབ་དཔོན་མཆེད། །སེམས་ཅན་གནོད་པར་འོངས་པ་ལ། །རྫུན་དུ་སྨྲ་བའི་དམ་ཚིག་བྱ། །གང་ལ་གསང་བར་བྱ་བ་རྣམས། །གསང་བཅུ་ལས་འདི་རྫུན་བཅུ་སྨྲ། །བསྲུང་བ་བཅུ་བདུན་ཉམས་སུ་བླངས། །ཞིང་བཅུར་གྱུར་པའི་ནོར་བཅུ་དང་། །མཚན་ལྡན་གཟུངས་དང་བཀྲ་ཤིས་རྫས། །སྦས་ཆོས་ཕལ་འཆང་བྱིན་ཅན་རྫས། །བསྲུང་བ་ཡོན་དམ་མེད་པའི་ནོར། །ཕྱུག་པོ་སེར་སྣས་བཅིངས་པའི་ནོར། །མིང་གིས་བླངས་ལ་ཚོགས་སུ་བསྔོ། །དམ་ཚིག་བཅུ་བདུན་སྤྱད་པར་བྱ། །ཞིང་བཅུར་གྱུར་པའི་སེམས་ཅན་ལ། །བརླང་ཚིག་བཅུ་ཡི་ཞེ་བཅད་ཅིང་། །དྲག་ཤུལ་སྤྱོད་པ་སྔགས་དག་དང་། །གཟུངས་ལ་བརླང་པོར་སྦྱོར་བའི་ཚིག །སློབ་བུ་སྣོད་བཅོས་ཞེ་གཅོད་དང་། །འབྱུང་པོ་ཞེ་གཅོད་རྔམ་པའི་སྒྲ། །སྣོད་ལྡན་བུ་ལ་རྔམ་ཆོས་བཤད། །ངག་གི་དམ་ཚིག་བཅོ་ལྔ་བསྲུང་། །མི་སྤང་དམ་ཚིག་བཤད་པར་བྱ། །ཡང་དག་དུག་ལྔ་ལོག་དུག་ལྔ། །བཤད་པའི་ཐབས་མཁས་འདོད་ཆགས་དང་། །འདོད་སྤྱོད་སེམས་ཀྱི་རྒྱན་ཤེས་ནས། །ཤིན་ཏུ་ཞེན་པ་ལམ་དུ་གསུངས། །ཞིང་བཅུ་བརླག་བྱེད་ཞེ་སྡོང་མཆོག །ལྷ་ངན་འཇོམས་པ་དེ་བཞིན་ཏེ། །ཐབས་ལ་མཁས་པའི་སྤྱོད་པ་ཡིན། །མངོན་པར་མཐོ་པའི་ལྟ་བ་དང་། །ཏིང་འཛིན་ངེས་པར་སྲན་ཚུགས་པ། །ཤིན་ཏུ་རྒྱལ་བའི་མཆོག་ཏུ་གསུངས། །ལྟ་བས་ཕྱོགས་རིས་མི་ཕྱེད་དང་། །སྤྱོད་པ་བླང་དོར་མི་བྱེད་པ། །ཐེག་པ་ཆེན་པོའི་གཏི་མུག་གོ། །ལྟ་སྤྱོད་དམན་ལ་ཕྲག་དོག་ཅིང་། །དམ་འདྲེས་ལ་སོགས་སྤོང་བྱེད་པ། །ཕྲག་དོག་དམ་ཚིག་བསྲུང་བའོ། །ལོག་དུས་སེམས་ཅན་ཀུན་ལྡན་པ། །དུག་ལྔར་རང་རིག་རང་སྣང་ཕྱིར། །དྲན་པ་ཐམས་ཅད་ཤེས་པ་ལ། །ཤེས་པ་ཐམས་ཅད་རྩོལ་བ་ཡིན། །རྩོལ་བ་སེམས་ཕྱིར་ཐབས་མཁས་པ། །ཐབས་མཁས་རང་རིག་ཡེ་ཤེས་ཏེ། །ཉི་མའི་དཀྱིལ་ན་མུན་མེད་ལྟར། །ཡེ་ཤེས་རང་སྣང་མ་རྟོགས་པ། །ཉོན་མོངས་འཁོར་བ་ངང་གིས་མེད། །དེ་ཤེས་རང་རིག་ཡེ་ཤེས་ལ། །སྤང་བར་བྱ་བ་དམིགས་མི་འགྱུར། །དམ་ཚིག་བཅོ་ལྔ་ལ་གནས་པའི། །རྣལ་འབྱོར་ཆེན་པོ་དོན་གཉིས་རྫོགས། །ཀུན་གྱིས་བླང་བའི་དམ་ཚིག་ལྔ། །དྲི་ཆེན་དྲི་ཆུ་མཾ་ས་དང་། །ཟིལ་མ་ལྷག་པའི་སེམས་རྣམས་ལ། །གྲུབ་པ་བཞི་ཡིས་བརྒྱན་པའི་ཕྱིར། །ནད་ལྔ་བསལ་ཕྱིར་བླང་བ་དང་། །གཙོག་དམེ་རྟོག་སྦྱང་ཕྱིར་བླང་དང་། །ཐུན་མོང་དགོས་པ་ལྔ་ཕྱིར་དང་། །རིགས་ལྔ་འགྲུབ་པའི་ཡོན་ཏན་ནོ། །སྡུག་བསྔལ་གྲོལ་བའི་ཡོན་ཏན་ནི། །བཅུད་ལྔ་བཏུང་དབང་ལམ་གྱི་མཆོག །ཐབས་ཀྱི་ལུས་ལ་བརྟན་ཤེས་ན། །ཡོན་ཏན་བརྗོད་ལས་འདས་པར་གསུངས་། །ཕྱེ་བའི་དམ་ཚིག་སུམ་ཅུ་ཉིད། །སྐབས་ཀྱིས་དང་དུ་བླང་བར་བྱ། །བསྒྲུབ་པར་བྱ་བ་ལྔ་རྣམས་ལ། །རིག་དང་ཡེ་ཤེས་ཡབ་ཡུམ་ལྔ། །གཅིག་ལ་ལྔ་ལྔར་ཤེས་པར་བྱ། །སྐུ་གསུང་ཐུགས་དང་ཡོན་ཏན་ལས། །གཅིག་ཀྱང་ལྔ་ལྔར་ཕྱེ་བས་ན། །བཞི་བཅུ་ལྔ་ཡི་བྱེ་བྲག་རྣམས། །མཚན་ཉིད་ཤེས་ནས་བསྒྲུབ་པར་བྱའོ། །ཤེས་བྱ་ལྔ་ལ་བྱེ་བྲག་དང་། །ཕུང་པོ་ལྔ་དང་འབྱུང་བ་ལྔ་དང་། །དབང་པོ་ཡུལ་དང་ཡན་ལག་སར། །ཉོན་མོངས་དམ་རྫས་ཤ་དང་ནི། །ཕྱོགས་དང་ཁ་དོག་འགྲོ་བ་དང་། །སྙིགས་མ་བག་ཆགས་ལྔ་ལྔ་པོ། །བདུན་ཅུ་ལ་སོགས་འཁོར་བའི་ཆོས། །ཡེ་ཤེས་སྐུ་རིགས་ཡབ་ཡུམ་སོགས། །རང་བཞིན་ངང་གིས་ཀར་དག་པ། །བློ་ལ་ཉམས་སུ་ལོན་པ་ནི། །སྤྱོད་ཡུལ་ཡོངས་དག་རྣལ་འབྱོར་བའོ། །ཐུན་མོང་དམ་ཚིག་མདོར་བསྡུས་ན། །བདག་གཞན་དོན་ཏུ་ཤེས་པར་བྱ། །རྐྱེན་འགྱེད་ལུས་མཛེས་འདུས་ལྟང་དང་། །ཆང་དང་དྲེགས་སྤྱོད་ཁེང་སེམས་དང་། །རྡོ་རྗེ་གསུམ་ཕོག་ཕྱག་བྱེད་དང་། །ཆེ་དག་དགེ་སྨོད་སྡིག་བསྟོད་དང་། །ལེ་ལོ་སེར་སྣ་གཉིད་གཡེང་དང་། །ཁྲོ་གཏུམ་ཤེས་བཞིན་སྔོན་མི་བཏང་། །བཀའ་གཅག་སྡིག་པའི་གྲོགས་བསྟེན་དང་། །བག་མེད་སྤྱོད་དང་དམ་བཅའ་འདོར། །ཆོག་མི་ཤེས་དང་ངོམ་ལ་དགའ། །སྤང་བྱ་ཉི་ཤུ་གཅིག་བཟློག་པ། །བདག་དོན་མཆོག་ཏུ་གྱུར་པ་སྟེ། །ཀུན་གྱིས་བདག་ཉིད་ཁུར་བར་འགྱུར། །ཕ་རོལ་ཕྱིན་དྲུག་ཆོས་སྤྱོད་བཅུ། །རྣམ་བཞི་ལས་ཀྱི་སྤྱོད་པ་དང་། །མཐུན་འཇུག་ཐབས་ཀྱི་སྤྱོད་པ་ནི། །ཐེག་པ་དགུ་དང་མུ་སྟེགས་དགུ། །འགྲོ་བ་དྲུག་གི་སྤྱོད་པ་རྣམས། །འཛིན་དང་ཉམ་པ་མེད་པར་སྤྱོད། །དོན་འགྱུར་ཅི་ཡང་ཉམས་སུ་བླང་། །བཞི་བཅུ་བཞི་ལ་སོགས་པ་ཡིས། །གདུལ་བྱ་མ་ལུས་དོར་མི་བྱ། །བསྲུང་བྱ་དེ་དག་གྲངས་བརྟབ་ལ། །དྲན་དང་ཤེས་བཞིན་གྱིས་སྡོད་པ། །རྣལ་འབྱོར་དབང་ཕྱུག་ཆེན་པོར་གསུངས། །ཉམས་པར་གྱུར་པའི་རྒྱུ་དག་ནི། །མི་ཆོས་བླུན་པོའི་ལས་བྱེད་དང་། །བདག་བསྟོད་གཞན་སྨོད་ཟུར་འཛིན་མཁས། །ཁེ་དྲགས་ཉིད་ཀྱིས་འདུ་སྟེ་བརྣབ། །རྫས་ལ་ཆགས་སེམས་རང་ཕྱོགས་ཆེ། །ཆང་དང་རང་མཐོང་ལྟ་སྤྱོད་སྙེམས། །ཆོས་ལ་ཕྱོགས་རིས་ངོམས་རྐྱེན་དང་། །གསང་ཆུང་ལེ་ལོ་གཙང་དམེ་བྱེད། །སྒྲོ་བསྐུར་གྲོགས་ཀྱི་ཉམས་ལེན་དང་། །འཁོར་བའི་རིགས་རྒྱུད་སྤེལ་འདོད་ཅིང་། །གཅིག་པུར་མི་གནས་འདུ་ལ་དགའ། །ཉི་ཤུ་ཉམས་པའི་རྒྱུར་འགྱུར་རོ། །སྔ་རྟགས་སྔོན་དུ་འབྱུང་བ་ནི། །ཉམ་ང་བ་ཡི་ནད་རྣམས་རུང་། །དགྲར་བགེག་གཉིས་ལ་བདེན་མི་འཇུག །འཁོར་དང་ལོངས་སྤྱོད་ཡིད་འོང་བྲལ། །ཡ་ཁ་མ་ཉེས་ཁ་ཡོགས་འབྱུང་། །བརྩམས་པའི་ལས་ལ་འབྲས་མེད་ཅིང་། །ཡིད་དུ་མི་འོང་སྣ་ཚོགས་འབྱུང་། །གལ་ཏེ་ཉམས་ལ་རྟགས་མེད་པར། །ལེགས་པར་སྣང་ན་མི་རུང་སྟེ། །བདེ་བ་ཟད་བྱས་གཏན་དུ་སྡུག །གལ་ཏེ་མ་ཉམས་རྟགས་བྱུང་ན། །སྔོན་གྱི་རྣམ་སྨིན་ཟད་འགྱུར་ཕྱིར། །སྐོང་གསོའི་ལས་ལ་བརྩོན་བྱས་ན། །ངན་སོང་སྡུག་བསྔལ་མྱོང་མི་འགྱུར། །ཉམས་པར་གྱུར་པའི་སྐྱོན་རྣམས་ནི། །བྱང་སེམས་དམ་ཚིག་སྤངས་པར་འགྱུར། །སྐལ་བར་དགེ་བ་ཅི་བསགས་ཀྱང་། །གཞི་རྟེན་མེད་པར་འགྱུར་བ་ཡིན། །འཁོར་བའི་ཁམས་སུ་ཟག་པར་འགྱུར། །སྐུ་ཡི་དམ་ཚིག་ཉམས་གྱུར་ན། །ཡ་ངའི་ནད་སོགས་སྡུག་བསྔལ་ཚེ། །དུས་མིན་ཚོ་ཟད་བར་ཆད་མང་། །སྐལ་བར་རྡོ་རྗེ་དམྱལ་བར་ལྟུང་། །བདེ་བས་རབ་ཏུ་བྲེལ་བར་འགྱུར། །གསུང་གི་དམ་ཚིག་ཉམས་གྱུར་ན། །བགེགས་རྣམས་ཐོགས་མེད་འོང་བ་དང་། །རྐྱེན་དང་ཡེ་འདྲོག་མང་བ་དང་། །ཆོས་ལ་བྱིན་རླབས་མེད་འགྱུར་ཞིང་། །སྐལ་པ་གཉིས་སུ་དམྱལ་བར་ལྟུང་། །བསྒྲུབ་པའི་ཐབས་ལས་འགྱངས་བར་འགྱུར། །ཐུགས་ཀྱི་དམ་ཚིག་ཉམས་གྱུར་ན། །སྨྱོ་འབོག་དབང་པོ་ཉམས་དག་བཅལ། །མྱོས་ཤིང་ལྐུགས་པའི་གནས་སུ་འགྱུར། །གང་ཡང་བསྒྲུབ་པ་རྟགས་མེད་ཅིང་། །ལྕེ་ལ་ཞིང་རྨོད་ལ་སོགས་པའི། །དམྱལ་བར་སྐལ་པ་གསུམ་དུ་གནས། །རྩ་བ་ཀུན་ཉམས་ཕྱལ་བ་དག །གསོ་བ་ཉེ་བར་མི་བརྩོན་ན། །རྡོ་རྗེ་དམྱལ་བར་དེ་ལྟུང་སྟེ། །དམྱལ་བ་ཕལ་པ་ཐམས་ཅད་ཀྱི། །སྡུག་བསྔལ་གཅིག་ཏུ་བསྡོམས་པས་ནི། །དེ་ཡིས་འབུམ་གྱི་ཆར་མི་ཕོད། །སངས་རྒྱས་སྟོང་གི་འོད་ཟེར་དང་། །བྱང་ཆུབ་སེམས་དཔའི་འཕྲིན་ལས་ཀུན། །རྒྱུན་དུ་མཛད་ཀྱང་ཕན་མི་འགྱུར། །བསྐལ་པ་ཐེར་འབུམ་ལ་སོགས་སུ། །དེ་ནི་ཐོན་པར་མི་འགྱུར་ཏེ། །འཇིག་རྟེན་འཇིག་ན་གཞན་དུ་འཕོ། །སེ་གོལ་གཅིག་གིས་ཕྱིན་པར་བྱེད། །དེ་བས་ཤིན་ཏུ་ནན་ཏན་གྱིས། །ཡན་ལག་དམ་ཚིག་ཉམས་གྱུར་ན། །ལོངས་སྤྱོད་མང་དུ་འཕེལ་མེད་དང་། །ཐེག་པ་ཆེ་ལ་འཕྱས་འདོགས་ཤིང་། །ཐུན་མོང་མཆོག་གི་དངོས་གྲུབ་རྣམས། །ཤིན་ཏུ་རིང་བར་གྱུར་བ་དང་། །གདུལ་བྱའི་དོན་རྣམས་ཡལ་བར་འགྱུར། །ལྟ་སྤྱོད་ཡ་ཆར་གྱུར་པ་ཡིས། །ཐེག་པ་ཕྱི་ནང་འདྲེས་པ་ཉིད། །བཀའ་ཡི་བྱིན་ཉམས་གྲུབ་པར་དཀའ། །བསྲུང་བའི་ལྷ་རྣམས་གཡེལ་བ་དང་། །ཟབ་མོའི་ཆོས་ལས་རིང་འགྱུར་ཞིང་། །སྐལ་པར་ངན་སོང་སྡུག་བསྔལ་མྱོང་། །རྣལ་འབྱོར་སྔོ་སྐམས་ཉིད་དུ་གྱུར། །རྣལ་འབྱོར་སྐྱེས་བུ་ཆེན་པོ་དེས། །དམ་ཚིག་མ་ཉམས་གཞུང་ཐུབ་ན། །ལུས་ལ་ནད་ཉུང་མཚན་ལྡན་ཞིང་། །འཁོར་དང་ལོངས་སྤྱོད་འཕེལ་བ་དང་། །ཐུན་མོང་ཉེས་བྱས་དག་གྱུར་དང་། །སྲིད་པ་གསུམ་ལ་དབང་སྒྱུར་ཞིང་། །ཐེག་ཆེན་ཟབ་མོ་དོན་ཐོབ་འགྱུར། །གསུང་གིས་ལྷ་མཉེས་དོན་ཐོབ་འགྱུར། །མཐུ་དང་བྱིན་རླབས་བསམ་མི་ཁྱབ། །ལས་རྣམས་དུས་སུ་འབྱུང་བར་འགྱུར། །བསམ་པ་ཐམས་ཅད་ཡོངས་སུ་འགྲུབ། །ཐུགས་ཀྱིས་སྐྱོ་དུབ་མེད་པ་དང་། །མན་ངག་སྣོད་གྱུར་དངོས་གྲུབ་ཉེ། །དགོངས་ཟབ་དོན་ལ་མཁས་པ་དང་། །ལྷ་རྣམས་ཀུན་གྱིས་དབང་བསྐུར་འགྱུར། །ཡན་ལག་དམ་ཚིག་མ་ཉམས་ན། །རྣལ་འབྱོར་སྐྱེས་བུ་ཆེན་པོ་ཡིས། །སྐྱོན་བཟློག་པ་ཉིད་ཡོན་ཏན་ཏེ། །བདུད་བཞི་འཇོམས་ཤིང་ངན་སོང་སྦྱོང་། །ཐེག་ཆེན་ལྟ་སྤྱོད་གཞུང་སྲང་བས། །ལྷ་རྣམས་འགོ་ཞིང་བསམ་པ་འགྲུབ། །དོན་གཉིས་ཡོངས་སུ་རྫོགས་པར་འགྱུར། །ཐེག་ཆེན་དམ་ཚིག་ལ་གནས་ཤིང་། །འོག་མའི་འདུལ་སྡོམ་དམ་ཚིག་གསུམ། །བསྲུངས་པ་མེད་པར་ཐུབ་པས་ན། །དགེ་སློང་བྱང་ཆུབ་སེམས་དཔའ་དང་། །དེ་ནི་རྣལ་འབྱོར་ཆེན་པོ་ཡིན། །ཉམས་ན་བསྐང་བའི་ཐབས་རྣམས་ནི། །བྱང་ཆུབ་སེམས་ཀྱི་དམ་ཉམས་པ། །མཁས་ལ་བླངས་ཏེ་གནས་པར་བྱའོ། །སྐུ་ཡི་དམ་ཚིག་ཉམས་འགྱུར་ན། །གང་ལ་ཉམས་པ་དེར་སོང་ལ། །ནོར་ཟས་འབྱོར་པ་མཉེས་ཕུལ་ནས། །གང་ཉེས་ཚིག་ཏུ་བཤགས་བྱས་ལ། །ཕྱིན་ཆད་སྡོམ་པ་ལེགས་པར་བཅའ། །གལ་ཏེ་གྲོངས་ཆད་གྱུར་པས་ན། །དེ་ཡི་སློབ་དཔོན་བཞུགས་པ་ལ། །དེ་ཚོ་གོང་མ་བཞིན་དུ་བཤགས། །མེད་ན་མཉམ་པ་བརྒྱ་ལ་བཤགས། །དེ་ཡང་རྙེད་པར་མ་གྱུར་ན། །དེ་དང་མཉམ་པ་གསུམ་བགུག་ལ། །སྦྱིན་སྲེག་མེ་ཐབ་རབ་བརྩིགས་ལ། །དཀྱིལ་འཁོར་ལྷ་ལ་མཆོད་རྫས་སུ། །སྤྱན་དྲང་གསང་མཚན་ལ་སོགས་མཆོད། །གོང་དུ་སྨོས་པའི་ཡོན་རྣམས་ནི། །དཔང་པོ་གསུམ་ལ་དབུལ་བར་བྱའོ། །གལ་ཏེ་གུས་པས་མི་ལེན་ན། །གཉིས་ཀ་རྡོ་རྗེ་དམྱལ་བར་ལྟུང་། །དེ་བས་མྱུར་དུ་ཚངས་པར་བྱ། །གསུང་གི་དམ་ཚིག་ཉམས་གྱུར་ན། །སྒོ་གསུམ་སྐུ་གསུང་ཐུགས་ཉིད་དུ། །ངེས་པར་ཤེས་ན་སྐོངས་པར་འགྱུར། །བཟླས་པ་བལྡབ་ཀྱིས་བསབ་པ་དང་། །བསྒྲུབ་པ་ཆེན་པོ་གསུམ་གྱིས་བསྐོང་། །ཐུགས་ཀྱི་དམ་ཚིག་ཉམས་གྱུར་ན། །འགྲོ་དྲུག་སེམས་སུ་གསལ་རྟོགས་ན། །བདག་ཉིད་བདག་ལ་གསང་བ་མེད། །མི་རྟོག་ཏིང་འཛིན་ཀློང་ཞུགས་ཏེ། །མ་ཡེངས་བློ་ལ་འདྲིས་པར་བྱ། །ཡན་ལག་དམ་ཚིག་ཉམས་གྱུར་ན། །གང་འདས་དེ་ཉིད་སོར་བཅུག་ལ། །བརྒྱ་རྩ་བརྒྱད་ཀྱིས་ཚོགས་ཀྱིས་བསྐང་། །དེ་ལྟར་ཉམས་སུ་བླངས་ན་འགྲུབ། །སྔ་རྟགས་སྡུག་བསྔལ་འབྱུང་མི་འགྱུར། །དམ་ཚིག་ཆེན་པོའི་དཔེ་བསྟན་པ། །ས་གཞི་ལྟ་བུའི་རང་བཞིན་པས། །ལས་དང་འབྲས་བུའི་ཆོས་རྣམས་ཀུན། །དམ་ཚིག་མེད་པར་འབྱུང་བ་མིན། །སོ་མཚམས་དག་གི་རང་བཞིན་པས། །བསྲུང་བ་ཐུབ་དང་མ་ཐུབ་ལས། །ཉེས་ལེགས་སྟོབས་ཆེན་འབྱེད་པའོ། །རིན་ཆེན་ལྟ་བུའི་རང་བཞིན་པས། །དངོས་གྲུབ་དགོས་འདོད་ཐམས་ཅད་འབྱུང་། །ནམ་མཁའ་ལྟ་བུའི་རང་བཞིན་པས། །འདི་ཡོད་ཐམས་ཅད་ཤོང་བར་འགྱུར། །རྣོ་རྦལ་མཚོན་གྱི་རང་བཞིན་པས། །འཁོར་བའི་དྲྭ་བ་མ་ལུས་གཅོད། །ཕ་མ་ལྟ་བུའི་རང་བཞིན་པས། །དུས་གསུམ་སངས་རྒྱས་མ་ལུས་བསྐྱེད། །རྒྱ་མཚོ་ལྟ་བུའི་རང་བཞིན་པས། །བརླབས་ཆེན་དུས་སུ་འབྱུང་བར་བྱེད། །མེ་དཔུང་ལྟ་བུའི་རང་བཞིན་པས། །གང་མཆོངས་ཐམས་ཅད་ཚིག་པར་བྱེད། །དེ་བཞིན་རྩི་སྨན་རང་བཞིན་པས། །འཁོར་བའི་གཅོང་རྙིང་མ་ལུས་འབྱིན། །རྒྱལ་པོ་ལྟ་བུའི་རང་བཞིན་པས། །ཕྱོགས་འགལ་བསྙན་པས་རིམ་གྱིས་འཚོ། །རྒྱ་མཚོར་ནོར་ལེན་ཚོང་དཔོན་བཞིན། །ཐོག་མ་ནས་མཐར་འདི་ཕྱིན་པས། །འདི་ལ་ཤིན་ཏུ་ནན་ཏན་བྱོས། །དམ་ཚིག་དམ་ཚིག་ཞེས་བྱ་བ། །གུད་ན་ཡོད་པ་མ་ཡིན་ཏེ། །རང་གི་སེམས་ཉིད་དམ་ཚིག་ཡིན། །ཇི་སྙེད་སྣང་བའི་ཆོས་རྣམས་སུ། །རང་རིག་རྐྱེན་འབྲས་ཉིད་སྣང་བས། །ཅིར་སྣང་ཅིར་སྲིད་རང་རིག་ཉིད། །འགྲེ་ལོག་སྤྱི་གཙུག་གར་འགྲོ་ཡང་། །སྙིང་པོའི་དོན་ལས་འདའ་མི་སྲིད། །རང་བཞིན་དམ་ཚིག་ཆེན་པོར་བཤད། །རང་བཞིན་ལྷུན་གྲུབ་དམ་ཚིག་ལ། །རིག་པས་ཕྱིན་ཅི་མ་ལོག་ན། །སྔོན་སྣང་བརྟག་པའི་ཆོས་མེད་པས། །ལྟ་བའི་དམ་ཚིག་ཆེན་པོར་བཤད། །དེ་དོན་བློ་ལ་འདྲིས་པ་ཡིས། །སྤྱོད་ལམ་ཀུན་ཏུ་྄མ་ཉམས་པར། །ཏིང་འཛིན་རྒྱན་གྱི་དམ་ཚིག་སྟེ། །སངས་རྒྱས་ཉིད་དང་སྤྱོད་ཡུལ་ཅིག །འདི་ལ་བསྲུང་བ་ཅི་ཡང་མེད། །ཉམས་པ་རྡུལ་ཙམ་འབྱུང་མི་སྲིད། །ནམ་མཁའི་སྤྱོད་པ་འཛིན་མེད་པས། །ལྟག་པའི་དམ་ཚིག་རྣམ་བཞིར་ལྡན། །སྲུང་བྱ་མ་ལུས་འདིར་འདུས་ཕྱིར། །དམ་ཚིག་ཀུན་གྱི་མདོ་ཞེས་བྱ། །སྒྱུ་འཕྲུལ་རྣམ་བཀོད་གཏོར་ཚོགས་རྒྱ་མཚོའི་རྒྱུད་ཆེན་ལས། །ལམ་འབྲས་སྙིང་པོ་མེ་ལོང་བཅུ་གཅིག་གིས་མཚོན་པ། །འཁོར་ལོ་ངང་མཆུའི་ཚུལ་གྱིས་སྒེགས་པའི་བློས་བསྡུས་པའི། །དགེ་རྩས་ཀུན་ཀྱང་དམ་གནས་འགྲོ་ཀུན་བྱང་ཆུབ་མྱུར་ཐོབ་ཤོག །དམ་ཚིག་གསལ་བཀྲ་ཞེས་བྱ་བ། །སློབ་དཔོན་ཆེན་པོ་སྒེག་པ་རྡོ་རྗེས་མཛད་པའོ། །རྫོགས་སོ། །བཅོམ་ལྡན་འདས་ཐུགས་རྡོ་རྗེ་ལ་ཕྱག་འཚལ་ལོ། །རང་གི་ལྷ་ལ་ཕྱག་བཙལ་ནས། །ལམ་བཞི་དག་ཡོད་བྱ་བའི་ཕྱིར། །ལས་སྣོད་སྐལ་བས་གནས་གྱུར་པ། །དམ་ཚིག་ཕྲ་རྒྱས་གསུངས་པ་དེ། །ཐུན་མོང་མཆོག་གི་སྲུང་བྱ་རྣམས། །རྣལ་འབྱོར་ཆ་ལ་གནས་པ་ཡི། །བདག་དང་གཞན་དང་ཆོས་ཀྱི་ཕྱིར། །གཞུང་ཚུལ་སྲུང་བ་འདི་མི་བྱ། །སྔ་མ་སྲུང་བར་བྱ་བ་ནི། །མཐའ་ཡས་གསུངས་པ་མདོ་ཙམ་དུ། །ངེས་འབྱུང་བཞི་ཡིས་བཞི་རྣམས་དང་། །དཀའ་ཐུབ་འཛིན་མེད་སེམས་ཀྱིས་བསྲུང་། །གཞི་ཕྱིར་གཞན་ཡང་ལུས་ངག་གི། །རྒྱན་པོ་འགྱེད་རྣམས་དོར་བ་དང་། །མཚོན་ཐོགས་འཕོང་རྩེད་མཆོང་རྒྱུག་དང་། །མ་རབས་ཐོར་བུའི་སྤྱོད་ཀུན་དོར། །ངག་གི་བཞི་དང་གྲོལ་ངག་རྣམས། །ནམ་ཡང་སྨྲ་བར་བྱ་བ་མིན། །ཉོན་མོངས་དྲུག་དང་བྱིང་རྒོད་སོགས། །སྐྱོན་སེམས་བྱེ་བྲག་བསམ་མི་ཁྱབ། །གང་དག་དོན་མེད་དེ་ལེན་པ། །ཁ་ན་མ་ཐོ་འཕེལ་བ་དང་། །སྐྱེ་བོའི་གནས་སུ་མི་འགྱུར་པས། །འཁོར་བའི་མཐའ་མར་སྤྱང་ཐག་ཡིན། །བྱང་ཆུབ་ཆེད་ཕྱིར་གང་ཡང་སྤྱད། །དེ་དག་ལས་ལྡོག་སྤྱོད་པ་གསུམ། །སེམས་ཀྱིས་ཟིན་པར་གང་སྤྱོད་པ། །སངས་རྒྱས་སྐུ་གསུང་ཐོབ་པར་འགྱུར། །ཕྱི་མ་རྩ་ལ་ཡན་ལག་པས། །ལྔ་བཅུའི་བརྒྱ་དང་དྲུག་ཅུ་དང་། །ཉིས་བརྒྱའི་སྲུང་བྱ་མ་ལུས་པ། །བཀའ་ལུང་གཉིས་ཀྱི་རྗེས་སུ་སྙེགས། །པན་ཙི་ཉིང་ལག་ཞེས་བྱ་བའང་། །དང་པོ་ཉིད་ནས་ཐབས་སྤྱོད་དང་། །ཤེས་རབ་ཉིད་ཀྱིས་ཉིས་འགྱུར་ཡིན། །དེ་དེས་སྲུང་བྱ་སུམ་བཅུ་སྟེ། །བྱང་ཆུབ་སེམས་ནི་བླ་མེད་ལྷ། །ཞི་ཁྲོའི་ལྷ་དགུ་ཉིད་དང་བཅུ། །བཅུ་གཉིས་བསམ་ལས་མི་འདའ་ཞིང་། །ཐུན་མོང་མཆོག་གིས་ཚད་མེད་བརྒྱད། །བདེན་གཉིད་བྱང་ཆུབ་རྣམ་པ་བཅུ། །བླ་མེད་གསལ་བས་ཉམས་མི་བྱ། །ལྷ་སྤངས་དགེ་སྤྱད་དོན་མེད་འགྱུར། །བདག་ཉིད་ལྷ་དང་མཉམ་སྦྱོར་ན། །ཡོན་ཏན་ཆུང་ཡང་འགྲུབ་པར་འགྱུར། །དེ་ཕྱིར་དུས་གསུམ་འདའ་མི་བྱ། །བླ་མ་བཀུར་བའང་སྒོ་གསུམ་གྱིས། །ལུས་ཀྱི་སྲུང་བའང་བརྡེག་སོགས་ལས། །ཐིང་སླད་ཙམ་དུའང་བྱ་བ་མིན། །འདོད་ཡོན་ལྔ་ཡི་མཆོད་པ་དང་། །གསང་བའི་སྣོད་དུ་དུག་མི་སྤྱོད། །འགྲོ་བ་དྲང་པོའི་ཕྱོགས་སྤང་དང་། །གདན་ས་གདན་སོགས་མི་བརླམ་དང་། །འགྲེང་འདུག་ངན་སྤྱོད་ལ་སོགས་སྤང་། །རྒྱན་འདོགས་ཟེ་ལྡིར་དེ་བཞིན་ཏེ། །མ་རབས་སྤྱོད་པ་ཀུན་སྤངས་ལ། །སྤྱོད་ལམ་ཟོན་ཆག་བསྟི་མི་གནས་བྱ། །རྫུན་དང་ཕྲ་མ་ངག་རྩུབ་དང་། །འཁྱལ་བ་ནམ་ཡང་མི་བྱ་སྟེ། །བེ་ཕོགས་མ་ཡིན་རྟ་བགད་དོར། །ལྐོག་ཏུ་ཚུལ་བརྗོད་ཉམས་པར་འགྱུར། །ཡོན་ཏན་བརྗོད་ཅིང་སྙན་པར་སྨྲ། །ཅ་ཅོ་ལ་སོགས་མ་ཡིན་པས། །སངས་རྒྱས་རྡོ་རྗེ་གསུང་ཐོབ་འགྱུར། །དམ་པ་སྟོན་པའི་བླ་མ་ལ། །ཆགས་སྡང་གཏི་མུག་ང་རྒྱལ་དང་། །ཕྲག་དོག་དུག་ལྔའི་སེམས་མི་བྱ། །ངན་དུ་མི་སེམས་ལྕི་བར་སེམས། །ཕ་མ་ཡི་དམ་འདྲ་བར་བསམ། །རྟག་ཏུ་གདུང་བ་རྒྱུན་མི་བཅད། །བྱང་ཆུབ་གཟུངས་ལ་ཞུགས་པ་ཡིན། །སྔགས་དང་ཕྱག་རྒྱ་རྒྱུན་མི་བཅད། །ཞི་ཁྲོའི་ཕྱག་རྒྱ་བདུན་གཉིས་དང་། །ཕྱོགས་བཅིང་རྟེན་དང་ཁང་པའི་སྔགས། །རྩ་སྐྱེད་ལས་རྣམས་བཞི་ཡི་སྔགས། །དབང་བསྐུར་བྱིན་བསྡུ་གསང་སྔགས་དང་། །སྤྱན་དྲངས་སྟིམ་བརྟན་ཕྱག་འཚལ་མཆོད། །དུས་གསུམ་རྒྱུན་དུ་གཞི་ཡིན་ཕྱིར། །ནམ་ཡང་རྒྱུན་བཅད་སྤང་མི་བྱ། །ཡང་དག་ལམ་དུ་ཞུགས་པའི་གྲོགས། །བསྣུན་དང་མ་བྱིན་བླང་མི་བྱ། །ཟླ་ཟེར་མ་ཡིན་གཟུངས་མི་བྱ། །ལྟ་སྤྱོད་མཐོ་བའི་གོང་མི་བཅད། །དབང་དང་དམ་ཚིག་དེ་བཞིན་སྟེ། །ཀུན་ཏུ་ཡངས་བག་ཟོན་ཕྲིག་ཅན། །བཀུར་སྟིས་མཆོད་བྱེད་དགའ་བར་སྤྱོད། །རྫུན་སོགས་རྣམ་བཞི་སྤང་བ་དང་། །གསང་བྱ་མི་སྨྲ་ཚུལ་མི་བརྗོད། །སྙན་སྨྲ་ཞེ་ས་གསོང་པོར་སྨྲ། །བདེན་ཚིག་སྲི་ཞུ་སྨྲ་བྱེད་པའོ། །སེམས་ཀྱི་སྔོན་བཞིན་དུག་ལྔ་དོར། །མངན་དང་དཔྱད་སེམས་སྤང་བ་དང་། །མིག་འདྲར་ལྟ་ཞིང་གདུང་བར་བྱ། །གནོད་སེམས་སྤང་དང་རྣམ་བཅུའོ། །གསང་བའི་དོན་ཕྱིར་མི་སྨྲ་བ། །སྤྱི་དང་བར་གསང་བཞི་བཞི་དང་། །འོས་དང་གཉེན་གཏད་རྣམ་པ་བཅུ། །སེམས་ཀྱིས་བསྟན་པར་མི་བསམ་ཞིང་། །ངག་གིས་བརྗོད་པར་ཡོངས་མི་བྱ། །ལུས་བརྡས་བསྟན་མིན་སུམ་ཅུའོ། །ཡན་ལག་དམ་ཚིག་ལྔ་གཉིས་ལ། །གཅིག་ལ་བཅུ་ཕྲག་གཉིས་སུ་དབྱེ། །དང་དུ་བླང་བའི་དམ་བསྒྲུབ་རྫས། །བསྒྲུབ་རྫས་ལྔ་ཡང་རྩ་བ་བརྒྱད། །བརྒྱད་ཆ་རེ་ཞིང་དང་སྙིགས་ལྔ། །རེ་རེའང་རྣམ་པ་བཅུ་རུ་འགྱུར། །ཞིང་བཅུའི་བདུད་རྩིའི་དེ་བཞིན་པས། །རྣམ་པར་དབྱེ་བ་ཉི་ཤུའོ། །བདག་གཞན་རང་བཞིན་ཞིང་དང་གཉིས། །རྫས་བཅུ་ཐབས་སྤྱོད་ཤེས་རབ་སྤྱོད། །བཅུ་གཉིས་ཉི་ཤུར་འགྱུར་བའང་རིགས། །མི་སྤང་ལྔ་ལ་བཅུ་གཉིས་ཏེ། །ཞིང་བཅུ་ཐབས་ཀྱི་མཛད་པས་འཇོམས། །ཤེས་རབ་རང་བཞིན་མེད་པར་གྲོལ། །ཐབས་དང་ཤེས་རབ་ཞེ་སྡང་གིས། །བདག་གཞན་དོན་རྣམས་རྫོགས་པར་བྱེད། །ཡན་ལག་བཅུ་ཡི་དམ་ཚིག་ལ། །ཐབས་ཀྱི་མཛད་པ་མི་འབྱེད་ཅིང་། །ཤེས་རབ་གཉིས་མེད་མི་འབྱེད་པའི། །གཏི་མུག་བཅུ་གཉིས་འདའ་མི་བྱ། །དེ་ལྟར་ཐབས་དང་ཤེས་རབ་བཅུ། །གཉིས་ནི་གདེང་དུ་གྱུར་པ་ཡི། །ལྷག་པའི་ང་རྒྱལ་མི་འདའ་བ། །ང་རྒྱལ་ཆེན་པོའི་དམ་ཚིག་གོ། །ཞིང་བཅུ་ཐུགས་རྗེས་མི་གཏོང་བ། །རིགས་ལྔའི་ཡུམ་ལ་ཐབས་ཀྱིས་རོལ། །ཏིང་འཛིན་ཐབས་དབང་རང་བཞིན་སྦྱར། །ཤེས་རབ་དོན་དང་འདུ་འབྲལ་མེད། །མ་རྟོགས་གཉིས་དང་ལོག་རྟོགས་གཉིས། །ཉན་ཐོས་རང་རྒྱལ་བྱང་ཆུབ་སེམས། །གསང་སྔགས་ཕྱི་པའི་ཐེག་པ་གསུམ། །གསང་སྒོར་མཛད་པས་མི་ཚུད་ཅིང་། །ཤེས་རབ་ལྟ་ངན་མི་ཆུད་པ། །ཕྲག་དོག་ཆེན་པོའི་དམ་ཚིག་གོ། །དེ་ལྟར་སུམ་བརྒྱ་དྲུག་ཅུ་རྣམས། །བདག་གི་རྡོ་རྗེ་མཆོག་གསུམ་པོས། །ལོག་པར་མི་སྟོང་སྡོམ་པའི་དངོས། །ས་གཞི་ལྟ་བུར་སྲུང་བ་ཡིན། །རྒྱས་འབྲིང་སྟོང་རྩ་བརྒྱད་དང་ནི། །ས་ཡ་འབུམ་སྡེ་བདག་གཞན་ཕྱིར། །སྲུང་བའི་རྒྱུད་དག་ལས་གྲགས་པ། །གསུམ་གྱི་སྲུང་པ་སྔོན་བཞིན་ནོ། །དམ་ཚིག་འདི་ནི་རྡོ་རྗེ་ཆེ། །སྐུ་གསུང་ཐུགས་ཀྱི་རྡོ་རྗེའི་བདག །འགྲུབ་འགྱུར་འདིར་བདེ་རྟག་པ་ཡི། །དབང་ཕྱུག་ཆེན་པོ་ཉིད་དུ་འགྱུར། །བྱིན་རླབས་གསུམ་གྱིས་མཛད་པ་དང་། །ཉེ་འདུ་ལས་བྱང་རྟག་ཏུ་སྲུང་། །ཡིད་འོང་གཏེར་འདོད་བསམ་འགྲུབ་ཅིང་། །ཕུན་སུམ་ཚོགས་ཡོན་རྒྱུད་ལས་འབྱུང་། །མྱོང་ལ་དམ་ཚིག་རྡོ་རྗེ་ཆུ། །བཞག་ཅིང་གོ་བས་བསྒྲགས་བྱས་ནས། །རྒྱུད་ལྔ་ཐ་ཚིགས་བྲལ་འགྱུར་ན། །རག་ཤ་ཡག་ཤར་གྱུར་ནས་ཀྱང་། །བསད་ནས་དམྱལ་བ་ཆེན་པོ་བརྒྱུད། །དེ་ཡི་སྡུག་བསྔལ་བཟོད་གླགས་ཆད། །ས་མ་ཡ་བི་ཏནྟྲ་ལས། །ཉེས་གསུམ་ཐོས་པའང་ཉམ་ང་ན། །འདི་ཕྱིས་མཐོང་མྱོང་སྨོས་ཅི་དགོས། །དེ་བས་རྒྱུན་དུ་མདོ་བཤགས་བསྔོ། །གང་དག་ས་གཞི་མེད་པ་དག །ཚུལ་འཆོས་ཕྱིར་ན་ཡོན་ཏན་བརྗོད། །ཉེས་སྨྲ་རྡོ་རྗེའི་དམ་ལྡན་མིན། །ལྷག་པར་བདག་ལྡན་སྨོས་ཕྱིར་རོ། །རྣལ་འབྱོར་ལམ་མཐར་ཕྱིན་བྱ་ཞིང་། །བདག་གཞན་དོན་ཕྱིར་ཕྲ་རྒྱས་བསྡུས། །ངལ་བའི་དགེ་རྩ་གང་ཡོད་པས། །མཐའ་ཡས་རྡོ་རྗེ་གསུམ་ཐོབ་ཤོག །དམ་ཚིག་ཕྲ་རྒྱས་བསྟན་པ་རྫོགས་སོ།། ། ༅། །སྒྱུ་འཕྲུལ་དམ་ཚིག་གསལ་བྱེད་སྤར། །བསྟན་གཉིས་དར་གླིང་ཆོས་གྲྭར་བསྐྲུན། །དགེ་བས་བདག་གཞན་འབྲེལ་བཅས་འགྲོ། །སྐྱེ་ཀུན་དམ་ཚིག་རྣམ་དག་ཤོག །དགེའོ། །དགེའོ། །དགེའོ། །བྱེ་སྤར་ལྟར་བྲིས་པའོ།།