དཔལ་སྤྱི་མདོ་དགོངས་པ་འདུས་པའི་འགྲེལ་པ་རྣལ་འབྱོར་ཉི་མ་གསལ་བར་བྱེད་པའི་ལེགས་བཤད་གཟི་ལྡན་འཆར་ཁའི་འོད་སྣང། མཁན་ནུས་ལྡན།

གསུང་པོད་གསུམ་པ་མ་རྟགས་ཅན།
དཔལ་སྤྱི་མདོ་དགོངས་པ་འདུས་པའི་འགྲེལ་པ་རྣལ་འབྱོར་ཉི་མ་གསལ་བར་བྱེད་པའི་ལེགས་བཤད་གཟི་ལྡན་འཆར་ཁའི་འོད་སྣང་གླེགས་བམ་གསུམ་པ་བཞུགས་སོ། །བཞི་པ་འདྲེན་པའི་ཡན་ལག་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི། དེ་ནས། ཞེས་པ་ནས། རྣམ་པར་སྦྱར་བ་ཡིན། །ཞེས་པའི་བར་གྱིས་བསྟན་ཏེ། ལེའུ་འདིས་དྲང་དོན་སྟོན་ནོ། །དགོས་འབྲེལ་བསྟན་མ་ཐག་པ་དེ་ནས་ཡན་ལག་བཞི་པ་བསྟན་པའི་ཕྱིར། སྟོན་པ་གསང་བ་པའི་བདག་པོ་དེས། ལང་ཀའི་བདག་པོ་ལ་བོས་ནས་བཀའ་སྩལ་ཏེ་སྨྲས་པ་ནི། སྡུད་པ་པོ་ལང་ཀའི་བདག་པོ། དེ་ལ་རྒྱུད་ཀྱི་འདྲེན་པའི་ཡན་ལག་གང་ཞེ་ན། དེ་ཉིད་ཉེ་བར་བསྟན་པ་དངོས་ནི། རྒྱུད་ཀྱི་ཚིག་གི་དངོས་པོ་གང་ལས་བཤད་པའི་ཐབས་ཀྱི་ཡན་ལག་གང་ཡིན་པ་ནང་རིས་མི་མཐུན་པར་སོ་སོ་ཉིད་དུ་ཡོངས་སུ་འདྲེན་པ་སྟེ། དེ་ཡང་འདི་ལྟར། རྒྱུད་དོན་འདྲེན་པའི་ཚིག་བཅུར་ཡོངས་སུ་འགྲོ་བ་གང་ཅི་ལྟར་ཡིན་པ་དེ་ལྟར་ཁྱེད་ལ་བཤད་དེ་རྣམ་པར་བགྲོ་བར་བྱའོ། །ཞེས་གནང་བའོ། །དེ་ཡང་ལང་ཀའི་བདག་པོ་འདི་ལྟ་སྟེ། ཞེས་རྒྱས་པར་བཤད་དེ་ཡོངས་སུ་འདྲེན་པའི་ཡན་ལག་ནི། རྣམ་གྲངས་བཅུ་ཕྲག་གཅིག་གིས་དོན་ལ་འདྲེན་པས་བཤད་ཐབས་སུ་རྣམ་པར་ཕྱེ་ནས་བསྟན་ན་ནི། ཇི་སྐད་བཤད་པའི་སྒྲ་བརྗོད་ཚིག་གི་ཡན་ལག་མཐར་ཕྱིན་པར་འགྱུར་ཏེ་ཡོངས་སུ་རྫོགས་པའོ། །རྣམ་གྲངས་བཅུ་པོ་གང་ཞེ་ན། གང་རང་བཞིན་ལ་ལྟ་བ་དང་། སྒོ་རྣམ་པར་འབྱེད་པ་དང་། སྤྱི་དོན་སྡུད་པ་དང་། འབྲེལ་པ་སྦྱོར་བར་འདྲེན་པ་དང་། རང་རྐྱེན་གཉེར་བ་དང་། གཞན་ལ་མི་འཚམས་པར་འཚམས་པ་ལྡེམ་དགོངས་དང་། དོན་གྱི་དམིགས་འཛིན་པའི་ཚིག་གཏར་ཀ་གེགས་སེལ་དང་། ཚད་མའི་བཀའ་མ་བཅོས་པ་དང་། མཚོན་པ་དཔེའི་མེ་ལོང་དང་། སྣོལ་མཚམས་སྣྲེལ་ཞི་གང་ཡིན་པའི་བཤད་ཐབས་བཅུ་པོ་རྣམས། འཆད་པའི་དཔེ་མེ་ལོང་བཅུ་ཡི་བྱེད་ལས་ཀྱིས་བརྟགས་པ་དང་མཐུན་པར་སྦྱར་བས། བཤད་ཐབས་ཀྱི་ཚིག་འདིས་རྒྱུད་ཀྱི་དོན་ལ་བཀབ་སྟེ་འདྲེན་པའི་ཚིག་དང་། དེས་དོན་མཚོན་ཚུལ་རྣམ་པར་སྦྱར་ཏེ་མ་འདྲེས་ཡོངས་རྫོགས་སུ་བཤད་པར་བྱ་བ་ཡིན་ནོ། །གཉིས་པ་ལ་བཅུ་སྟེ། རང་བཞིན་ལྟ་བའི་ཚིག་ཁྱུང་ནམ་མཁའ་ལ་ལྡིང་བ་ལྟར་བཤད་པ། རྣམ་པར་དབྱེ་བའི་ཚིག་སྟག་གི་མཆོང་སྟབས་ལྟར་བཤད་པ། སྤྱི་དོན་སྡུད་པའི་ཚིག་སེང་གེའི་མཆོང་རྩལ་ལྟར་བཤད་པ། འབྲེལ་བར་སྦྱོར་བའི་ཚིག་ངང་མོའི་འགྲོས་ལྟར་བཤད་པ། རང་རྐྱེན་གཉེར་གྱི་ཚིག་རུས་སྦལ་གྱི་ནུར་འགྲོས་ལྟར་བཤད་པ། ལྡེམ་དགོངས་མན་ངག་གི་ཚིག་རྣ་ཕྲུག་བྲག་ལ་འཛེགས་པ་ལྟར་བཤད་པ། གཏར་ཀ་གེགས་སེལ་གྱི་ཚིག་གླག་ཁྲ་མོ་གཟན་ལ་འཇུམས་པ་ལྟར་བཤད་པ ། ཚད་མ་བཀའ་གཞུང་གི་ཚིག་དུས་ཀྱི་འབྲུག་ཆར་ལྟར་བཤད་པ། མཚོན་པ་དཔེའི་ཚིག་མེ་ལོང་དྭངས་པའི་ངོས་ལྟར་བཤད་པ། བསྣོལ་མཚམས་འཕེན་སྡུད་ཀྱི་ཚིག་ཐགས་དང་སེང་ཕྲུག་རྩལ་སྦྱོང་བ་ལྟར་བཤད་པའོ། །དང་པོ་ནི། ལང་ཀའི། ཞེས་པ་ནས། ལྟ་འཕང་རླབས་སུ་གཅོད། །ཅེས་པའི་བར་གྱིས་བསྟན་ཏེ། དེ་དག་རེ་རེ་ནས་བསྟན་པའི་ཕྱིར། ལང་ཀའི་བདག་པོ། ཞེས་སྡུད་པ་པོ་ལ་བོས་ནས། གྲངས་བསྟན་པ་དེ་ཡང་འདི་ལྟ་སྟེ། ཐོག་མར་ལྟ་བ་ཉེ་བར་བསྟན་པ་ནི། རྒྱུད་ཀྱི་དངོས་པོ་གང་ལ་རང་བཞིན་གྱི་ལྟ་བར་བྱ་བའི་ཡུལ་དང་ལྟ་བར་བྱེད་པའི་ཤེས་པ་གཉིས་མེད་པར་ངང་གིས་གསལ་བའི་ལྟ་བ་མཆོག་གི་དོན་ནི། གང་གསང་བ་ཟབ་མོའི་ལྟ་བ་དེ་ཁོ་ན་ཉིད་ཀྱི་ཁྱུང་དབྱིངས་ཀྱི་ནམ་མཁའ་ལ་ལྡིང་བས་གཉིས་མེད་དུ་ངེས་པར་སྣང་བའི་སྐབས་འདིར། དཔེར་ན་བྱ་ཁྱུང་གི་ནམ་མཁའ་ལ་འཕུར་ཏེ་འགྲོ་བ་ནི། གཤོག་པའི་རྩལ་གྱིས་ནུས་པས་རི་བྲག་དང་གྱེན་ཐུར་ཐམས་ཅད་ཁོབ་འོག་ཏུ་ཆུད་པས་ནམ་འཕང་རླབས་སུ་གཅོད་དེ་ལྡིང་བ་ཡང་འཕང་མཐོ་ལ་ཉམ་ང་བ་དང་རྗེས་མེད་པ་ལྟར། དེ་བཞིན་དུ། རྣལ་འབྱོར་པ་ལམ་ཆེན་པོར་ངེས་པས། རྒྱུད་དོན་ཟབ་མོའི་ཆོས་ཉིད་དེ་བཞིན་ཉིད་ལྟ་བའི་དེ་ཁོ་ན་ཉིད་འདིར་བློ་ཤེས་རབ་ཀྱིས་རྟོགས་ནས་གཉིས་མེད་དུ་འགྲོ་བར་བྱེད་པ་ཉིད་ནི། འོག་མ་དང་མ་འདྲེས་པར་ལུང་དང་མན་ངག་གི་ཐབས་དང་ལྡན་པའི། ལྟ་བས་ཆོས་སོ་ཅོག་མ་འདྲེས་ཡོངས་རྫོགས་སུ་རྟོགས་ཏེ་སྤྱོད་ཡུལ་མེད་པར་ཡེ་ཤེས་ཆེན་པོར་རང་གསལ་བ་ལས། མུན་པ་དང་། ལོག་སྤྱོད་དང་བྱིས་པ་དང་ཕྱོོགས་སུ་རིག་པ་དང་མཐའ་དབུས་འབྱེད་པ་དང་། དམ་པ་ཆེན་པོའི་ཤེས་པ་དྲུག་གི་འཕང་བཅད་ནས་དོགས་ཐོགས་དང་། བླང་དོར་མེད་པར་སྤྱི་རྒྱ་རླབས་རྩལ་གྱིས་ཡོངས་སུ་གཅོད་པར་འགྱུར་རོ། །དེ་བས་ན་སྒྱུ་འཕྲུལ་ཐུགས་ཐིག་ལས་ཀྱང་། ག་རུ་ཊ་ཡི་ཆོས་བཞི་པོས། །རྣལ་འབྱོར་ཅན་གྱིས་ལྟ་འཕང་བཅད། །ཅེས་འབྱུང་བས། ཆོས་བཞི་སྟེ། ཇི་ལྟར་ཁྱུང་ནམ་མཁའ་ལ་ལྡིང་བའི་ཚེ། མིག་གྱེན་དུ་ལྟ་བ་དང་། གཤོག་པ་གཡོབ་པའི་རྩོལ་བ་མེད་པ་དང་། ངམ་གྲོག་དང་གཡང་སར་ཉམ་མི་ང་བ་དང་། བྱ་ལམ་ལ་རྗེས་མེད་པ་བཞིན་དུ། འདིའི་གོང་ན་རྟོགས་བྱ་གཞན་མེད་པས་རང་བཞིན་ལྟ་བའི་ཚིག་གིས་ཐེག་པ་ཐམས་ཅད་ཁོབ་འོག་ཏུ་འཇུག་པ་དང་། ལམ་བགྲོད་པའི་རྩོལ་བ་དང་བྲལ་བ་དང་། ལྟུང་གནས་སྲིད་པ་དང་ཞི་བའི་མཐའ་ལ་ཉམ་མི་ང་བ་དང་། བལྟ་བྱ་ལྟ་བྱེད་བློ་ཡུལ་དུ་བྱེད་པའི་རྟོག་པ་མེད་པའོ། །གཉིས་པ་ནི། བགྲོད་པར་བྱ་བའི། ཞེས་པ་ནས། ཚོམས་སུ་གཅོད། །ཅེས་པའི་བར་གྱིས་བསྟན་ཏེ། དཔེར་ན་ས་བཅད་པར་བྱ་བའི་ཕྱིར་ལམ་གྱི་རྒྱུད་ཀྱི་བགྲོད་པར་བྱ་བའི་ས་ཚིགས་དང་། སྟག་གིས་མཆོང་རྩལ་གྱི་ཚད་དག་གིས་སའི་ཚད་ཀྱང་ཚོམ་ཉིད་དུ་གཅོད་པ་ལྟར་དཔེ་དེ་བཞིན་དུ་འདིར་ཡང་དོན་གྱི་ཚོམས་གང་སྟོན་པ་དང་། དེའི་ཚིག་གི་དཀྱུས་ཀྱི་བར་མཚམས་དག་ས་གཅོད་ཀྱི་ལྡེའུ་མིག་གི་དབྱེ་བས་དོན་གྱི་ཚོམས་ཀྱི་དཀྱུས་ཚིགས་དང་དེའི་ཚིག་གི་མཚམས་ཀྱི་ཚོམས་སུ་གཞན་དང་མ་འདྲེས་པར་གཅོད་པར་བྱ་བའོ། །དེ་བས་ན་སྔ་མ་ལས་ཀྱང་། །བྱ་གྷྲྀ་མཆོང་བ་དེ་བཞིན་པས། །ཏནྟྲའི་ཚིག་དོན་དུམ་བུར་གཅོད། །ཅེས་པ་སྟེ། ཇི་ལྟར་སྟག་མཆོངས་པའི་ཚེ། བགྲོད་བྱའི་ས་ཚིགས་དུམ་བུར་དུམ་བུར་བཅད་ནས་མཆོངས་པ་བཞིན་དུ་རྣམ་པར་དབྱེ་བའི་ཚིག་གིས་ཚིག་དོན་གྱི་དམིགས་སོ་སོར་ཕྱེ་ནས་མིང་འདོགས་གསལ་བར་སྟོན་པའོ། །གསུམ་པ་ནི། ཇི་ལྟར་གང་གི། ཞེས་པ་ནས། གཅིག་ཏུ་སྡུད། །ཅེས་པའི་བར་གྱིས་བསྟན་ཏེ། དཔེ་ཇི་ལྟར་ན་སེང་གེའི་རྩལ་གྱིས་མཆོངས་པ་གང་གི་ཁོབས་འོག་ཏུ། ས་ཚིགས་རི་བྲག་ཡུལ་ཁམས་མང་པོ་འདུས་ཤིང་ཆུད་པ་ལྟར་དུ། རྐྱེན་ཡི་གེའི་རྒྱུད་ཀྱི་ཚིག་གི་ཁྱད་པར་གྱིས་དོན་ཇི་བཞིན་དུ་བརྗོད་པའི་བྱ་བ་བྱེད་པའི་རྒྱུད་དབུ་ཞབས་ཀྱི་རྣམ་གྲངས་མང་པོ་ཀུན་ཀྱང་དོན་གྱི་ཁོག་དབུབ་སྟེ་བརྗོད་བྱའི་ངོ་བོ་མ་ནོར་བར་དཀྱིལ་འཁོར་གསུམ་མམ་གཞི་ལམ་འབྲས་བུ་ལྟ་བུ་གང་གི་དོན་གྱི་ངོ་བོ་གཅིག་ཉིད་དུ་ཡོངས་སུ་སྡུད་དེ། དེ་ལས་སོ་སོའི་ཡན་ལག་རྣམས་འབྱུང་བར་ཤེས་པར་བྱ་བའོ། །དེ་བས་ན་དོན་ལྷུན་གྱིས་གྲུབ་པ་གཅིག་ལས་རྣལ་འབྱོར་གསུམ་དུ་ཕྱེ་ནས་འགྲེལ་པའང་ངོ་བོ་ཉིད་གཅིག་ཏུ་དབྱེར་མེད་པར་སྟོན་པའོ། །དེ་ལྟ་བས་ན་སྔ་མ་ལས། སེང་གེ་མཆོངས་པའི་ཆོས་གཅིག་ལྟར། །རྣམ་གྲངས་ཚིག་ལམ་དོན་གཅིག་སྡུད། །ཅེས་པ་སྟེ། ཇི་ལྟར་སེང་གེ་མཆོངས་པའི་ཚེ། ས་ཚིགས་དུ་མ་ཁོག་འོག་ཏུ་ཆུད་པ་བཞིན་དུ། ཚིག་དོན་གྱི་རྣམ་གྲངས་དུ་མ་རྣམས་སྤྱི་དོན་བསྡུ་བའི་ཚིག་གིས་དོན་གྱི་ངོ་བོ་གཅིག་ཏུ་སྡུད་པའོ། །བཞི་པ་ནི། གང་དག་གང་ལྟར། ཞེས་པ་ནས། འབྲེལ་བར་སྦྱོར། །ཞེས་པའི་བར་གྱིས་བསྟན་ཏེ། ཚིག་གི་མཚམས་སྦྲེལ་བ་ནི། དཔེར་ན་འདབ་ཆགས་ངང་པ་གང་དག་ཕྱོགས་གང་དང་གང་དུ་ཇི་ལྟར་འགྲོ་བ་ན་ཡང་དེ་དག་གི་གོམ་འགྲོས་དྲང་པོར་འབྲེལ་ཏེ་མི་འཁྱོག་པར་སྔ་རྗེས་ཉིད་ཕྱི་རྗེས་ཀྱིས་ནོན་པར་སྣང་བ་ལྟ་བུར་འབྲེལ་ཏེ་མཐར་ཆགས་སུ་གྱུར་པ་ལྟར། སྔར་བརྗོད་པའི་ཚིག་དང་ཕྱིས་བརྗོད་པའི་ཚིག་གི་གོང་འོག་གི་མཚམས་དག་འབྲེལ་བར་བྱས་ཏེ། གངས་བརྗོད་བྱ་རྒྱུད་ཀྱི་དོན་འདིར་ཡང་ངོ་བོ་མ་ནོར་བར་ས་གཅོད་པའི་ཚུལ་གྱིས་ཚིག་དོན་སྔ་ཕྱི་མི་འཁྲུགས་པར་གོང་འོག་གི་ཚིག་དོན་འབྲེལ་བ་དང་བཅས་ཏེ་ཞིབ་ཏུ་ངེས་པར་སྦྱོར་ནས་འདབ་འབྱོར་དུ་འཆད་པའོ། །དེ་བས་ན་སྔ་མ་ཉིད་ལས། ངང་མོའི་འགྲོས་ཆོས་རྣམ་གཉིས་ལྟར། །གཞུང་དོན་དབུ་ཞབས་ལེ་མཚམས་སྦྱོར། །ཞེས་པ་སྟེ། ཇི་ལྟར་ངང་མོ་འགྲོ་བའི་ཚེ། སྔ་ཕྱི་དྲང་པོར་འགྲོ་ཞིང་། སྔ་རྗེས་ཕྱི་རྗེས་ཀྱིས་ནོན་པར་འགྲོ་བ་བཞིན་དུ། འབྲེལ་མཚམས་སྦྱོར་བའི་ཚིག་གིས་ཚིག་འབྲེལ་དང་དོན་འབྲེལ་མ་ཆད་པ་སྦྱོར་བའོ། །ལྔ་པ་ནི། གང་འགྲོ་གནས་སུ། ཞེས་པ་ནས། དེ་བཞིན་སྦྱོར། །ཞེས་པའི་བར་གྱིས་བསྟན་ཏེ། རང་རྐྱེན་གཉེར་གྱི་ཚིག་ནི། དཔེར་ན་རུས་སྦལ་གྱི་དངོས་པོ་རྣམས་གང་དུ་འགྲོ་བར་འདོད་པའི་གནས་སུ་ནུར་འགྲོས་ཀྱིས་བགྲོད་པ་ནི། གཞན་གྱིས་གཡོ་འགུལ་དུ་འགྲོ་བར་མི་མཐོང་བས་ཆེར་མི་མངོན་ཀྱང་རང་གི་ནུར་བའི་ཤུགས་ཀྱིས་འགྲོ་བས་གནས་དེར་ཕྱིན་པ་ལྟར། དཀྱུས་ཀྱི་ཡི་གེ་དབུ་ཞབས་རྫོགས་པའི་ཚིག་ཏུ་བཤད་དེ་མཐར་ཆགས་སུ་བརྗོད་པ་དང་། མཐུན་པར་གནས་སྐབས་དོན་གྱི་གཏན་ཚིགས་ལུང་དང་མན་ངག་གི་གསང་བ་ཟབ་མོ་རྣམས་རང་རྐྱེན་གཉེར་གྱིས་ཚིག་གིས་གཞུང་གི་འབྲུ་གནོན་ལ་བརྟེན་ནས་དོན་གང་གི་དངོས་གཞིའི་ངོ་བོ་ཇི་ལྟར་ཡིན་པ་དེ་ཉིད། ཤུགས་ཀྱིས་གསལ་བར་བྱས་ནས་དེ་ཁོ་ན་བཞིན་དུ་སེལ་མེད་པར་ཞིབ་ཏུ་སྦྱོར་ཏེ་སྤྱིར་བཤད་ཚུལ་བཅུ་དང་གཞི་ལམ་འབྲས་བུ་གསུམ་སྦྱར་ཞིང་རྒྱུད་དྲུག་གམ་ཁྱད་པར་དུ་ཡང་ངེས་པའི་གསང་སྒོའི་རྒྱུད་གསུམ་པོ་རང་རང་གི་དཀྱུས་དོན་བརྡའ་འཕྲོད་ངེས་སུ་བཤད་དེ་བརྗོད་བྱའི་ཐོག་ཏུ་འབེབས་པར་བྱེད་པའོ། །དེ་བས་ན། སྔ་མ་ལས། རུས་སྦལ་འགྲོས་ཀྱི་ཆོས་གཉིས་པོས། །འབྲུ་སྟོང་མི་བཞག་གཟེར་བུ་གདབ། །ཅེས་པ་སྟེ། ཇི་ལྟར་རུས་སྦལ་འགྲོ་བ་ལ་ཆོས་གཉིས་ཏེ། གཡོ་འགུལ་མི་མངོན་པར་ཤུགས་ཀྱིས་འགྲོ་བ་དང་། ས་སྟོང་མི་ལུས་པར་རྗེས་ཀྱིས་ཁྱབ་པ་བཞིན་དུ། རང་རྐྱེན་གཉེར་གྱི་ཚིག་གིས་འབྲུ་སྟོང་མི་བཞག་པར་ཚིག་དོན་བརྡ་འཕྲོད་པར་བྱེད་པའོ། །དྲུག་པ་ནི། གང་ཞིག་གང་ལྟར། ཞེས་པ་ནས། དེར་འཚམ་སྦྱོར། །ཞེས་པའི་བར་གྱིས་བསྟན་ཏེ། ལྡེམ་དགོངས་མན་ངག་གི་ཚིག་གང་ཞེ་ན། དཔེར་ན་རྣ་ཕྲུག་ཆུང་ངུ་གང་ཞིག་གང་བྲག་གི་གཡང་སར་ཡང་བདེ་བླག་ལྟར་འཛེགས་ཏེ་གང་གི་ངོས་ལ་འགྲོ་བ་དེ་ནི། ཆུང་བས་རི་དྭགས་གཞན་པ་ལ་མི་འཚམས་ཤིང་མི་རིགས་པ་ཡིན་ན་ཡང་རྣ་ཕྲུག་ཁོ་ཉིད་ལ་བདེར་ཞེས་བདེ་བླག་ཏུ་འཚམས་པ་ལྟར་སྣང་བ་བཞིན་དུ། རི་དྭགས་གཞན་ལྟ་བུའི་སྔགས་ཕྱི་པ་གང་ལ་མི་འཚམས་པ། ལྔ་ཚོ་བཞི་སྤྱད་པ་ལྟ་བུ་སྤྱོད་པ་བརླང་པོ་དང་ཕ་རོལ་ལ་ཞེར་འདེབས་སུ་སྣང་བའི་སྒྲ་བརྗོད་འདོད་ཡོན་ལྔ་དང་མཚམས་མེད་ལྔ་སོགས་སྤྱོད་པར་གསུངས་པ་ལྟ་བུའི་སྐྱོན་ཚིག་བསྟན་པ་རྣམས་ཀྱང་། འདིར་བཤད་པ་ལྟར་དོན་གཞན་དུ་ལྡེམ་པོ་ལ་དགོངས་ནས་གསུངས་པས། དེ་ཡིས་དོན་འགྲུབ་པར་ཐེག་འོག་པ་གང་གི་རང་ཐད་དུ་མི་འཚམས་པ་ལྟར་སྣང་ཡང་། གསང་མཆོག་འདིར་ནི་ཐབས་དེ་ཉིད་ཀྱིས་འདུ་ཤེས་བསྒྱུར་ནས་འདུལ་བར་བྱེད་པས་གསང་ཆེན་ཐབས་ཀྱིས་ཟིན་པ་དེར་ཤིན་ཏུ་འཚམས་པར་ངེས་པས་ན་དེ་ལྟར་སྟོན་ཏེ་དོན་ལ་སྦྱོར་བའོ། །དེ་བས་ན་སྔ་མ་ལས། གནའ་ཕྲུག་འཛེགས་པའི་ཆོས་གཉིས་ལྟར། །ལྡེམ་དགོངས་གསང་བ་བརྒྱད་ཀྱིས་སྦྱར། །ཞེས་པ་སྟེ། ཇི་ལྟར་གནའ་ཕྲུག་བྲག་ལ་འཛེགས་པ་ལ་ཆོས་གཉིས་ཏེ། སྐྱེས་མ་ཐག་ཏུ་བྲག་མེ་ལོང་གི་ངོས་ལྟ་བུ་ལ་རྩེད་མོ་རྩེ་ཞིང་འགྲོ་བ་དང་། དེ་རི་དྭགས་གཞན་ལ་མི་འཚམས་ཀྱང་ཁོ་རང་ལ་འཚམས་པ་བཞིན་དུ། ལྡེམ་དགོངས་མན་ངག་གི་ཚིག་གིས་ཟབ་ལམ་སྦས་ཚུལ་དུ་བསྟན་པ་རྣམས་ཐབས་ཀྱིས་འབྱིན་པ་དང་། དེ་ཐེག་པ་འོག་མ་རྣམས་ལ་མི་འཚམས་ཀྱང་འདིར་འཚམས་པའོ། །བདུན་པ་ནི། གང་དག་ཡིད་ལ། ཞེས་པ་ནས། མངོན་པར་སྟོན། །ཞེས་པའི་བར་གྱིས་བསྟན་ཏེ། གཏར་ཀ་གེགས་སེལ་གྱི་ཚིག་ཇི་ལྟ་བུ་སྙམ་པ་ལ། དཔེར་ན་གླག་ཁྲ་མོ་གང་དག་གིས་རང་གི་བསམ་པས་ཡིད་ལ་བཏགས་པའི་འདོད་པ་ལྟར་ཁ་ཟས་ཀྱི་གཟན་ལ་འཇུམས་པའི་ཚེ། ཤ་གཡག་ལ་སོགས་པ་གང་གི་ཡང་ཐ་མལ་གྱི་ཤ་བོར་ཏེ་ཁོང་ནས་འདོད་པའི་སྙིང་ཕྱུང་སྟེ་བཅུད་འབྱིན་པར་བྱེད་པ་ལྟར་དུ། ཤེས་བྱའི་དངོས་པོ་གང་དང་གང་སྟོན་པའི་སྐབས་ཉིད་དུ་ཡང་གཏར་ཀ་དང་ཐེ་ཚོམ་གྱི་མདུད་པ་དེ་ཉིད་དམིགས་སུ་འཛིན་པ་ཡི་སྒོ་ནས་གང་མི་གསལ་ཞིང་མཐོང་དཀའ་བ་དེ་ཉིད་ལུང་དང་མན་ངག་གིས་བརྡ་འཇལ་བར་མངོན་དུ་བྱས་ཏེ་གསལ་བར་སྟོན་པས་ཐེ་ཚོམ་མེད་པར་བྱེད་པ་སྟེ། དེས་ན་རྒོལ་ཕྱི་རྒོལ་གང་གི་སྐབས་སུ་ཡང་ལན་ཐོགས་པ་མེད་པར་ཐེབས་ཏེ། དཀའ་བའི་གནད་ལ་མཁས་པར་འགྱུར་བའོ། །དེ་བས་ན། དེ་ཉིད་ལས། གླག་གི་གཟན་གྱི་ཆོས་གཉིས་ལྟར། །དོན་གྱི་དམིགས་བཟུང་གེགས་བསལ་ལོ། །ཞེས་པ་སྟེ། ཇི་ལྟར་གླག་ཁྲ་མོ་གཟན་ལ་བཅུམ་པའི་ཚེ། ཆོས་གཉིས་ཏེ། གང་ཡིད་ལ་བཏགས་པའི་ཟས་དང་། དེའི་ཁོང་གི་བཅུད་འབྱིན་པ་ལྟར། གཏར་ཀ་གེགས་སེལ་གྱི་ཚིག་གི་གཏན་ཚིགས་ཀྱིས་གཏན་ལ་ཕབ་ནས་གྲུབ་མཐའི་དོན་ལོངས་པར་བྱེད་པའོ། །བརྒྱད་པ་ནི། ཇི་ལྟར་སྒྲ་བརླན། ཞེས་པ་ནས། ཡིན་པར་ངེས། །ཞེས་པའི་བར་གྱིས་བསྟན་ཏེ། ཚད་མ་བཀའ་གཞུང་གི་ཚིག་ཇི་ལྟ་བུ་སྙམ་པ་ལ། དཔེ་ཇི་ལྟར་ན། དཔྱིད་དུས་སུ་འབྲུག་གི་སྒྲ་གྲགས་ཏེ་བརླན་པའི་ཆར་གྱི་རྒྱུན་བབ་ཅིང་དུས་ཀྱི་འབྲུག་ཆར་བྱུང་བ་ན། མི་རྣམས་ཀྱིས། གང་རྩི་ཐོག་དང་ལོ་འབྲས་ལ་སོགས་པ་སྐྱེའི་ཞེས་སྐྱེ་བར་འབྱུང་བའི་དབྱར་གྱི་དུས་སུ་སླེབ་ངེས་པར་ཡིད་ཆེས་སྐྱེས་ཏེ་ཐེ་ཚོམ་མེད་པར་འགྱུར་བ་ལྟར། དཔེ་དེ་བཞིན་དུ། སྒྲོ་སྐུར་དང་བྲལ་བས་རྫུན་ནོར་སྤངས་པའི་ལུང་ཟབ་མོ་ཚད་མའི་ཡུལ་དུ་ངེས་པའི་བཀའ་ལུང་གི་གསང་བ་དམ་པའི་གཞུང་གསུངས་ཏེ་བསྟན་པ་རིན་པོ་ཆེ་བྱུང་ན། ལུང་རིགས་མན་ངག་གསུམ་དང་། ཆོས་རྟགས་བཞི་དང་། ཐུན་མོང་མིན་པའི་ལུང་དང་མན་ངག་གིས་ལམ་པ་བློ་དང་ལྡན་པ་དག །དོན་མ་ནོར་བའི་ངོ་བོ་མ་བཅོས་པའི་ཆོས་ཉིད་ཇི་བཞིན་པ་དཀྱིལ་འཁོར་གསུམ་དབྱེར་མེད་པའི་དེ་ཁོ་ན་ཉིད་དེ་ཡིན་པར་བཀའི་གཏན་ཚིགས་ཀྱི་ཚད་མས་ངེས་ཏེ་ཕྱིར་མི་ལྡོག་པ་སྐྱེད་པར་བྱེད་པའོ། །དེ་བས་ན་སྔ་མ་ལས། དུས་ཀྱི་འབྲུག་ལྟར་ཆོས་གསུམ་པོས། །བཀའ་ཡི་ཚད་གསུམ་སྐབས་སྦྱར་ནས། །ཞེས་པ་སྟེ། ཇི་ལྟར་འབྲུག་གི་སྒྲ་ལའང་ཆོས་གསུམ་སྟེ། དུས་མིན་དུ་མི་འབྱུང་བ་དང་། དུས་སུ་འབྱུང་བ་དང་། དེས་དབྱར་དགུན་ལ་སོགས་པའི་དུས་ཀྱི་སྤྲོས་པ་ཆོད་པས་ཡིད་ཆེས་པ་བཞིན་དུ། བཀའ་ལུང་ཚད་མ་ཉིད་དྲང་ཡུལ་མ་ཡིན་པར་མི་དྲང་ཞིང་། སྐབས་དང་མཐུན་པར་དྲངས་པས་དོན་གྱི་སྒྲོ་འདོགས་ཆོད་པ་སྟེ། ཇི་སྐད་དུ། ལུང་ནི་ཡིད་ཆེས་ཚིག་ཡིན་ཏེ། །ཉེས་པ་ཟད་པས་རྫུན་གྱི་ཚིག །སྨྲ་བར་མི་འགྱུར་རྒྱུ་མེད་ཕྱིར། །ཉེས་ཟད་ལུང་དུ་ཤེས་པར་བྱ། །ཞེས་སོགས་གསུངས་པའི་ཕྱིར་རོ། །དགུ་པ་ནི། གང་འདིར་དག་པའི། ཞེས་པ་ནས། གསལ་བར་བྱེད། །ཅེས་པའི་བར་གྱིས་བསྟན་ཏེ། མཚོན་པ་དཔེའི་ཚིག་གང་ཞེ་ན། དཔེས་དོན་མཚོན་པ་གང་གི་དུས་འདིར་དཔེར་ན་གཡའ་དག་པའི་མེ་ལོང་གིས། བྱད་བཞིན་དང་ལྐོག་ཏུ་གྱུར་པའི་དངོས་པོ་དེ་དག་གཟུགས་བརྙན་དུ་སྣང་ནས་གསལ་བར་སྟོན་པར་ལྟར། དོན་གྱི་སྐབས་གང་རུང་དུའང་དོན་དེ་ཉིད་ཉེ་བར་མཚོན་ནས་རྟོགས་པར་བྱེད་པའི་དཔེ་ཡི་མེ་ལོང་ཕ་རོལ་ལའང་གྲགས་པའི་ཆོས་དག་གིས། དོན་གྱི་ངོ་བོ་གང་ཞིག་བརྟག་པར་དཀའ་ཞིང་ཕལ་པས་མི་མཐོང་བ་ཡང་དག་ངེས་པའི་དགོངས་པ་དེ་ཉིད་གསལ་བར་བྱེད་པ་ནི། དོན་དཔེར་སྦྱོར་བ་དང་། ཐ་སྙད་མཐུན་མི་མཐུན་དཔེར་སྦྱོར་བ་སྟེ། ཆོས་ཉིད་མ་སྐྱེས་པ་འདུས་མ་བྱས་པ་ཡིན་ཏེ། ལོག་རྟོག་ལྟ་བུའོ། །ཞེས་པ་དང་། དེ་ལྟར་ཡིན་ཏེ། ནམ་མཁའ་ལྟ་བུའོ། །ཞེས་པ་ལ་སོགས་པའོ། །དེ་བས་ན་སྔ་མ་ལས། མེ་ལོང་ཆོས་ལྟར་མཚོན་པའི་དཔེ། །ཀུན་ལ་དཔེས་མཚོན་ཐོག་ཏུ་དབབ། །ཅེས་པ་སྟེ། ཇི་ལྟར་རང་གི་བཞིན་རས་ལྐོག་ཏུ་གྱུར་པ་མེ་ལོང་གིས་གསལ་བ་བཞིན་དུ། ཤིན་ཏུ་ལྐོག་གྱུར་གྱི་གཞུང་དོན་རྣམས་ཀྱང་དཔེས་མཚོན་ནས་ངེས་པར་བྱེད་པའོ། །བཅུ་པ་ནི། ཇི་ལྟར་སྣྲེལ་ཞི། ཞེས་པ་ནས། ཉིད་དུ་སྦྱོར། །ཞེས་པའི་བར་གྱིས་བསྟན་ཏེ། བསྣོལ་མཚམས་འཕེན་སྡུད་ཀྱི་ཚིག་གིས་གོང་འོག་གི་འཁྲུགས་པ་བསྡེབས་པ་གང་ཞེ་ན། དཔེ་ཇི་ལྟར་ན་ཐགས་ཀྱི་བཀད་གོང་འོག་ཏུ་དགོས་པ་འོག་དང་སྟེང་ནས་འཆོལ་བར་ལེན་པ་ལྟར། རྒྱུད་ཀྱི་ཚིག་ཚོམས་སྣྲེལ་ཞིར་གྱུར་ཏེ་གོང་འོག་གི་ཚིག་དོན་གྱི་རིམ་པ་འཆོལ་ཞིང་འཁྲུགས་པ་ཡི་བར་རྣམས་བསྣོལ་མཚམས་འཕེན་སྡུད་ཀྱི་ཚིག་གིས་གོ་རིམ་འཆོལ་ཞིང་འཁྲུགས་པ་རྣམས་མཚམས་སྦྱོར་ཏེ། འབྲུའི་འདུག་ས་བསྒྱུར། ཚིག་གི་གོང་འོག་བརྗེ། དོན་གྱི་འཁྲུགས་པ་བསྡེབས་ནས་ཉམས་སུ་བླང་ཞིང་གོ་བདེ་བར་བྱེད་པ་དང་། ཡང་སེང་གེའི་ཕྲུག་གུས་མཆོངས་པ་སློབ་ནས་རྩལ་སྦྱོང་བའི་ཚེ། བསྣོལ་མར་མཆོངས་ཤིང་དྲང་པོར་འགྲོ་བ་ལ་སྦྱང་བས་རྩལ་ཆེན་པོར་རྫོགས་ཏེ་འབྱོངས་པ་ན་རོལ་པའི་སྟབས་ཆེན་གཅིག་ཏུ་འགྱུར་པ་ལྟར་རྒྱུད་ཀྱི་ཚིག་ཚོམས་དང་དོན་འཁྲུགས་མ་ལ་བར་དག་བཞག་ཅིང་དེ་ཉིད་ཀྱི་ངོ་བོ་གོ་རིམས་དང་འདུག་ས་བསྒྱུར་ཏེ་གོང་འོག་མཐུན་པར་ཤེས་པས་བརྗོད་བྱ་དོན་གྱི་རིག་པ་གང་ཡིན་པ་ཉིད་དུ་སྦྱོར་ཏེ་ཚིག་དོན་གཅིག་ཏུ་བསྡེབས་ནས་གནད་ལོངས་པར་བྱེད་པའོ། །དེ་བས་ན། ཐུགས་ཐིག་ཉིད་ལས། མི་འཇིགས་ཕྲུག་གུ་སྩལ་སྦྱོང་ལྟར། །འབྲུ་ཚིག་དོན་གྱི་གོ་རིམས་སྡེབས། །ཞེས་པ་སྟེ། ཇི་ལྟར་སེང་གེའི་ཕྲུག་གུ་རྩལ་སྦྱོང་བའི་ཚེ་ན། བསྣོལ་མར་མཆོངས་ནས་དྲང་པོར་འགྲོ་བ་བཞིན་དུ་བསྣོལ་མཚམས་འཕེན་སྡུད་ཀྱི་ཚིག་གིས། དོན་གྱི་འཁྲུགས་སྡེབས། དཀྱུས་ཀྱི་གོ་རིམ་བརྗེ། འབྲུའི་འདུག་ས་བསྒྱུར་ནས་སྒྲ་ཇི་བཞིན་པ་མ་ཡིན། དོན་ཐུན་མོང་མ་ཡིན་པའི་རྒྱུད་དོན་ཕྱིན་ཅི་མ་ལོག་པར་སྟོན་པའོ། །དེ་ལྟར་བཤད་ཐབས་འདྲེན་པའི་ཚིག་བཅུ་འདི་ཉིད་རྒྱུད་གཞུང་སྤྱིའི་ཚིག་དོན་གྱི་འཆད་ཐབས་ཡིན་པས་ཐུགས་ཐིག་ལས་གསུངས་པ་འདི་ཡང་ལུང་གི་འཆད་ཐབས་ཀྱི་མ་ཧཱའི་རྒྱུད་བཤད་པ་ལྟར་ཤེས་དགོས་ལ། དེ་ལྟར་བྱས་ནས་དེ་དག་ཀྱང་རིགས་བསྡུས་ན། རྗེ་སྒྲོ་ཕུག་པའི་ཁོག་དབུབ་ལས། དེ་ལ་རྣམ་པར་དབྱེ་བ། འབྲེལ་སྦྱོར་བ། རང་རྐྱེན་གཉེར་གསུམ་དཀྱུས་སུ་སྦྱར། གཞན་ལེའུ་གང་བཤད་ཀྱི་དཀྱུས་ཀྱི་ཐད་ཀར་ངོ་སྤྲད་དོ། །ཞེས་གསུངས་པ་ལྟར། སྤྱི་འགྲོ་རྣམ་པ་གསུམ་མ་གཏོགས་གསང་སྙིང་གི་ལེའུ་སོ་སོ་དང་སྦྱར་ཚུལ་རགས་ཙམ་རྗེ་སྒྲོལ་གཡུང་གཉིས་ཀྱི་ཁོག་དབུབ་ཏུའང་འབྱུང་ངོ་། །ཉང་ཊཱིཀ྄་པ་ནི། གསུམ་དུ་འདུས་པར་བཞེད་དེ། དཀྱུས་དབུ་ཞབས་ཐམས་ཅད་དུ་ཁྱབ་བྱེད་དུ་འཇུག་པ་གསུམ་ཁྱད་པར་དུ་འཇུག་པ་གསུམ། འཇུག་ཏུ་རུང་བ་བཞིའོ། །དང་པོ་ནི། རྣམ་དབྱེ། འབྲེལ་སྦྱོར། རང་རྐྱེན་ནོ། །གཉིས་པ་ནི། རང་བཞིན། ལྡེམ་དགོངས། སྤྱི་དོན་གསུམ་མོ། །གསུམ་པ་ནི། གཏར་ཀ །ཚད་མ་བཀའ་གཞུང་། མཚོན་དཔེ། བསྣོལ་མཚམས་འཕེན་སྡུད་དང་བཞིའོ། །ཞེས་གསུངས། འོན་ཀྱང་འདུས་མདོའི་རང་གཞུང་དང་སྦྱར་ན་ལུང་གི་འཆད་ཐབས་ཀྱིས་ལུང་གི་རྒྱུད་བཤད་པ་ལྟར་ཤེས་དགོས་པས་སྤྱིར་ཐུན་མོང་དུ་འགྲོ་བ་རྣམས་སྔ་མ་ལྟར་ལས། ཐུན་མོང་མིན་པའི་ཚིག་དོན་ནི། གོང་དུ་རྩ་བའི་འབྲུ་གནོན་དུ་བྱུང་བ་ལྟར་མདོ་ཆེན་པོའི་གཞུང་དང་སྦྱར་ནས་བཤད་པ་སྟེ། རྒྱས་པར་རང་སྐབས་ཀུན་དང་སྦྱར་ཏེ་འཆད་དགོས་ཀྱང་། སྤྱིར་འགྲོ་བའི་གནད་འགག་བསྡུ་ཚུལ་ཙམ་ནི། ལ་ཤན་ལྟ་བའི་མེ་ལོང་གི་འགྲེལ་པ་འཇམ་དཔལ་བཤེས་གཉེན་ཕྱི་མས་མཛད་པ་ལས། སྤྱི་དོན་སྡུད་པའི་ཚིག་སེང་ཆེན་གྱིས་མཆོང་སྟབས་ལྟ་བུས་ཁོག་དོན་རྣལ་འབྱོར་གསུམ་དང་སྣང་བ་སྦྱར་ཏེ་བསྟན་པར་བསྡུ་བ་ནི། རང་བཞིན་གྱི་རྣལ་འབྱོར་རམ་སྣང་བ་སྟེ་འཁྲུལ་སྣང་ཞོར་དུ་བསྟན་པ་དང་། ཉམས་སུ་ལེན་པའི་རྣལ་འབྱོར་གདུལ་བྱའི་སྣང་བ་དང་། འབྲས་བུའི་རྣལ་འབྱོར་དེ་བཞིན་གཤེགས་པའི་སྣང་བར་བསྟན་པའོ། །རང་བཞིན་ལྟ་བུའི་ཚིག་ཁྱུང་ལྡིང་བ་ལྟར་ཆོས་ཇི་བཞིན་པར་བསྟན་པ་དང་། རྣམ་པར་འབྱེད་པའི་ཚིག་སྟག་གི་མཆོངས་པ་ལྟར་ཚིག་དོན་བསྡུས་པས་ས་བཅད་པ་དང་། རང་རྐྱེན་གཉེར་གྱི་ཚིག་རུས་སྦལ་གྱི་ནུར་འགྲོས་ལྟ་བུས་འབྲུ་གཞོམ་པ་དང་། འབྲེལ་བར་སྦྱོར་བའི་ཚིག་བྱ་ངང་མོའི་འགྲོས་ལྟ་བུས་གོང་འོག་འབྲེལ་བར་བཤད་པ་དང་། ཚད་མ་བཀའ་གཞུང་གི་ཚིག་དུས་ཀྱི་འབྲུག་ཆར་ལྟ་བུས་སྐད་གཞན་གྱིས་སེལ་མ་ཞུགས་པར་བཤད་པ་དང་། ལྡེམ་དགོངས་མན་ངག་གི་ཚིག་རྣ་ཕྲུག་བྲག་ལ་འཛེགས་པ་ལྟ་བུས་གསང་བའི་ལྡེམ་དགོངས་བརྒྱད་ཀྱིས་མི་འཚམས་པར་བཤད་པ་དང་། གཏར་ཀ་གེགས་སེལ་གྱི་ཚིག་གླག་ཁྲ་མོ་གཟན་ལ་འཇུམས་པ་ལྟ་བུས་གནད་དུ་གལ་བཙུག་ལ་བཅུད་ཕྱིན་པར་བཤད་པ་དང་། མཚོན་པ་དཔེའི་ཚིག་མེ་ལོང་ལྟ་བུས་དཔེས་མཚོན་ཏེ་བཤད་པ་དང་། བསྣོལ་མཚམས་འཕེན་སྡུད་ཀྱི་ཚིག་སེང་ཕྲུག་རྩལ་སྦྱོང་བ་ལྟ་བུས་ཚིག་དང་འབྲུའི་གོ་རིམས་བསྡེབས་ཏེ་བཤད་པའོ། །ཞེས་གསུངས་པས། རྒྱུད་ལས་འཕགས་པའི་ལུང་ཆེན་པོའི་ཁྱད་པར་གྱི་ཆོས་རྣམས་ཀྱང་ངེས་པར་འགྱུར་རོ། །དེ་བཞིན་དུ། རིན་པོ་ཆེའི་རྒྱན་ལས། ལུང་གིས་མན་ངག་རྒྱུད་བཤད་པ། །འདྲེན་པའི་ཚིག་བཅུད་དྲངས་ཏེ་དགྲོལ། །དཀྱུས་ཚིག་དགྲོལ་བར་འཐད་པ་ཡིན། །ཞེས་གསུངས་པ་ལྟར་ལུང་གི་འཆད་ཐབས་ཀྱིས་མན་ངག་གི་རྒྱུད་བཤད་པ་ལའང་སྦྱར་བར་བྱ་སྟེ། ཅི་རིགས་པ་ནི་གཞུང་འདི་ལས་ཀྱང་སྟོན་མོད་དེ། རྒྱས་པར་ཡོངས་སུ་རྫོགས་པ་ནི་རྫོགས་པ་ཆེན་པོའི་རྒྱུད་དངོས་དང་སྦྱར་ཏེ་འདྲ་མཐུན་ཁྱད་འཕགས་ཀྱི་ཚུལ་དང་ལྡན་པས་ཚིག་དོན་བཤད་པ་ལ་མཁས་པར་བྱའོ། །དེར་མ་ཟད་ལེའུ་ཞེ་དྲུག་པ་ལས་གསུངས་པ་ལྟར་གསང་སྔགས་ཕྱི་པ་དང་ཡང་ཐུན་མོང་ཡིན་པས་སོ་སོའི་རྒྱུད་ཀྱི་རང་སྐབས་དང་སྦྱར་ནས་ཡོ་ག་འབྲོག་འཆོལ་བའི་སྐྱོན་དུ་མ་སོང་བར་འདྲེན་པའི་ཚིག་དོན་ལ་མཁས་པའི་བློ་གྲོས་དང་ལྡན་ན་གསང་དོན་མཐའ་དག་ལ་མཁྱེན་རབ་ཐོགས་མེད་དུ་རྒྱས་ཏེ་རལ་གྲི་ནམ་མཁའ་ལ་བསྐོར་བ་ལྟར་འགྱུར་རོ། །གསུམ་པ་ནི། ལང་ཀའི། ཞེས་པ་ནས། འབྱེད་པར་གྱུར་ཏོ། །ཞེས་པའི་བར་གྱིས་བསྟན་ཏེ། ལང་ཀའི་བདག་པོ། ཞེས་སྡུད་པ་པོ་ལ་བོས་ནས། བཤད་པ་རྣམ་པ་བཅུ་པོ་དེ་དག་ནི། གང་སྨྲ་བ་དང་བརྗོད་པའི་ཚིག་གིས་དོན་གང་དུ་འདྲེན་པ་ཡི་འཆད་ཐབས་ཀྱི་ཡན་ལག་དབུ་ཞབས་སུ་སྦྱར་བར་བྱ་བ་ཁོ་ནར་ཡང་དག་པར་ཤེས་པར་གྱིས་ཤིག །ཅེས་གསང་བ་པའི་བདག་པོ་ཆེན་པོས་དེ་སྐད་ཅེས་སྨྲས་ཏེ་བཀའ་སྩལ་པས། ལང་ཀའི་བདག་པོ་ལ་སོགས་པ། དམན་པའི་ལུས་ཀྱི་སེམས་དཔའ་ཆེན་པོ་རྣམས། ཆོས་ཐམས་ཅད་ལ་གང་འདྲེན་པའི་ཚིག་གིས་ཇི་ལྟར་དུ་སྨྲ་བའི་སྒོ་ཡོངས་སུ་འབྱེད་དེ་མཁས་པར་གྱུར་ཏོ། །ཚུལ་དེ་ནི་བསྟན་པའི་ཡོན་ཏན་གྱིས་འཁོར་རྣམས་ཀྱིས་ངེས་པར་གོ་བའོ། །ལེའུའི་མཚན་ནི། སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ཡོངས་སུ་འདྲེན་པའི་ཡན་ལག་རྣམ་པར་བགྲོས་ཏེ་བསྟན་པའི་ལེའུ་སྟེ། ལྔ་བཅུ་པ་གསལ་བར་བཤད་པའོ།། །།ལྔ་པ་ངེས་པའི་ཡན་ལག་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི། དེ་ནས་ཡང་། ཞེས་པ་ནས། དག་པ་ལྷ་ངེ་བའི། །ཞེས་པའི་བར་གྱིས་བསྟན་ཏེ། ལེའུ་འདིས་ངེས་དོན་དང་དྲང་དོན་གཉིས་ཀ་སྟོན་ནོ། །རྗེས་སུ་མཐུན་པར་བཤད་པའི་ཡན་ལག་ལྔ་པ་ངེས་དོན་བྱེ་བྲག་གི་གཏན་ཚིགས་གང་སྙམ་པ་ལ། འདྲེན་པ་ཚིག་གི་ཡན་ལག་བཤད་མ་ཐག་པ་དེ་ནས་ཡང་ངེས་པའི་ཡན་ལག་བཅུ་གཉིས་སྟོན་པའི་ཕྱིར། སྟོན་པ་གསང་བ་པའི་བདག་པོ་དེས། བསྡུས་པའི་དོན་གལ་ཆེ་བའི་ངོས་ནས། བྱང་ཆུབ་སེམས་དཔའ་ཆེན་པོ་ལང་ཀའི་བདག་པོ་དེ་ལ་ངེས་པར་བོས་ཏེ། གཏན་ཚིགས་མ་འདྲེས་པར་བྱ་བའི་ཕྱིར་རྣམ་པར་སྨྲས་ཏེ་བཤད་པར་མཛད་པ། སྡུད་པ་པོ་ལང་ཀའི་བདག་པོ་འདི་ལྟ་སྟེ། ཞེས་སྐབས་ཐམས་ཅད་དུ་ངེས་དོན་མ་འདྲེས་པར་ཉེ་བར་བསྟན་པ་ལ། རྒྱུད་དོན་གཏན་ལ་འབེབས་པའི་སྐབས་གང་དུ་རང་རང་དང་མཐུན་པར་དོན་ངེས་པར་བྱེད་པའི་ཡན་ལག་ཡང་དག་པར་ཤེས་པའི་མཚན་ཉིད་གང་ཡིན་པ་དེ་ནི། ཕྱག་མཆན་ཞིག་ན། ངོ་བོ་གང་ལ་དགོས་ཆེད་གང་གི་དབང་གིས་ངེས་པའི་ཚིག་དང་དོན་གྱི་དམིགས་བཟུང་ནས་གང་བརྗོད་དེ་བསྟན་པ་ཉིད། ཞེས་པར་འབྲེལ་ཚུལ་ཞིག་ཀྱང་བཞུགས་མོད། དེའི་འགྲེལ་ཚུལ་གཅིག་དང་འགྲེལ་མཆན་གཞན་ཀུན་མཚུངས་པར། སྡུད་པ་པོ་དང་འཁོར་གྱི་དངོས་པོའི་སྣོད་གང་ལ། སྟོན་པ་སྐུ་བཞིའི་ངོ་བོ་གང་གིས་བསྟན་པ་བཞིའི་དོན་གྱི་རྒྱུད་མཆོག་གང་འདི་བརྗོད་ཅིང་བཤད་པ་ལ། རྒྱུ་གླེང་གཞི་དང་རྩ་བ་གླེང་བསླང་བ་ནི་རྒྱུད་ཀྱི་རྒྱུ་རྐྱེན་དང་། དགོས་འབྲེལ་བཞི་སྤྱིའི་དོན་དང་། འདྲེན་པའི་ཡན་ལག་རྒྱུད་ཀྱི་བཤད་ཐབས་བཅུ་དང་ངེས་པར་སྦྱོར་བའི་ཡན་ལག་འཆད་པར་འགྱུར་བ་སྟེ། གླེང་གཞི་འཚོགས་ནས་གླེང་བསླང་བ་བརྗོད་པ་འབྱུང་བའི་རྩ་བ་དང་། དགོས་འབྲེལ་ཕུན་སུམ་ཚོགས་པ་དང་འཆད་ཐབས་ཀྱིས་འདྲེན་པའི་ཚུལ་དང་བདག་གཞན་དོན་ལ་སྦྱོར་བའི་ཐབས་ཆེན་གྱི་ཡན་ལག་ལྔས་སྣོད་བཞི་ལ་བསྟན་པ་བཞི་རུ་བརྗོད་པར་བྱ་བའི་ངེས་པའི་གསང་སྒོ་བླ་ན་མེད་པའི་རྒྱུད་ཀྱི་དོན་དྲི་མ་མེད་པར་ཡོངས་སུ་དག་པ་ཉིད་ལྷ་ངེ་བར་མ་འདྲེས་ཡོངས་རྫོགས་སྣང་ཞིང་གསལ་བར་བྱེད་པའི་ཕྱིར་འདི་ཉིད་ཀྱང་ཡན་ལག་སྟེ་དེ་ལྟར་དྲུག་གིས་འབྱེད་པའི་དོན་རྫོགས་པར་འགྱུར་རོ། །ཡང་ན། སྣོད་བཞི་ལ་སྟོན་པ་བཞིས་བསྟན་པ་བཞི་གསུངས་པ་དེ་ཡང་། ལས་དང་ཐུགས་རྗེར་འབྲེལ་བ་དང་། སྣོད་དང་བཅུད་དུ་འབྲེལ་བ་དང་། ཤེས་བྱ་དང་ཤེས་བྱེད་དུ་འབྲེལ་བ་དང་། ཐབས་དང་ཐབས་ལས་བྱུང་བའི་ཚུལ་དུ་འབྲེལ་བ་དང་བཞི་ཚང་བ་དེ་ཡང་། ངོ་བོ་ལ་སོགས་བ་གསང་སྔགས་ཀྱི་སྤྱི་ཐེམས་ཆེན་པོ་བཞིས་བཤད་པ་དང་སྦྱོར་ཏེ། དེ་ཡང་ཆོས་རྟགས་ཀྱི་ཕྱག་རྒྱ་བཞིར་ངེས་པའི་གཏན་ཚིགས་ཀྱིས་བརྗོད་ནས་རྒྱུད་ཀྱི་གསང་བའི་སྒོ་ཡོངས་སུ་དག་པ་ལྷ་ངེ་བར་གཏན་ལ་འབེབས་པའི་ཐབས་ཀྱི་ཡན་ལག་ཏུ། འདར་ཇོ་བཙུན་སོགས་ཀྱིས་བཞེད་པར་གསུངས་ཏེ་ཆོས་རྗེ་དམ་པ་རིན་པོ་ཆེའི་ཕྱག་མཆན་དུའང་ཟུར་ཙམ་འབྱུང་ངོ་། །དེས་ན་ངེས་དོན་གཏན་ཚིགས་ཀྱི་ཡན་ལག་འདི་ཉིད་གཏན་ཚིགས་བཞིས་ལེའུ་རྫོགས་པར་སྟོན་ཏེ། ཡོངས་སུ་འགྲེལ་པའི་གཏན་ཚིགས་བཤད་མ་ཐག་པ་རྣམས་དང་། དེ་ནས་སྣོད་བཞི་ལ་བསྟན་པ་བཞིར་བྱུང་བའི་གཏན་ཚིགས་དང་། དེ་ནས་གསང་སྔགས་ཀྱི་སྤྱི་ཐེམས་བཞིར་ངེས་པའི་གཏན་ཚིགས་དང་། དེ་ནས་ཆོས་རྟགས་ཀྱི་ཕྱག་རྒྱ་བཞིར་ངེས་པའི་གཏན་ཚིགས་རྣམས་སོ། །དེའང་དཔེས་མཚོན་ན། འདུལ་བྱེད་སྐུ་བཞི་སྨན་པ་ལྟ་བུ། གདུལ་བྱ་བཞི་ནད་པ་ལྟ་བུ། ཐེག་པ་བཞི་སྨན་ལྟ་བུ། ངོ་བོ་ངེས་ཚིག་སོགས་བཞི་སྨན་གྱི་དམིགས་བཟུང་བ་ལྟ་བུ་བཀའ་དོན་གཏན་ཚིགས་བཞི་སྨན་ལ་གཟུ་ལུམ་སྤང་བ་ལྟ་བུའོ། །གཉིས་པ་ལ་གསུམ་སྟེ། སྣོད་བཞི་ལ་བསྟན་པ་བཞིར་བཤད་པ། གཏན་ཚིགས་ཀྱི་ཡན་ལག་བཞིར་ངེས་པ། བཀའ་རྟགས་ཀྱི་ཕྱག་རྒྱ་བཞི་བཤད་པའོ། །དང་པོ་ནི། གང་ལ་སྤྱན་རས། ཞེས་པ་ནས། ངེས་པར་སྣང་། །ཞེས་པའི་བར་གྱིས་བསྟན་ཏེ། དེ་ཉིད་འབྱུང་བའི་རྒྱུ་ནི་གདུལ་བྱའི་དངོས་པོ་གང་ལ་གདུལ་བྱེད་ཐུགས་རྗེའི་མངའ་བདག་རྣམས་ཀྱིས་བྱ་ར་མཛད་དེ་མི་གཟིགས་པའི་དུས་མེད་པར་སྤྱན་རས་ཀྱིས་གཟིགས་ཏེ་མི་གཏོང་བར་རྟག་ཏུ་གསལ་བའི་དབང་གིས། འདིར་ཡང་གདུལ་བྱ་མང་པོ་མཐའ་ལ་ཐུག་པ་མེད་པའི་འགྲོ་བ་གང་དག་ཇི་སྙེད་པ་ཡང་། ཇི་ལྟར་གཟིགས་ན་ངེས་པའི་ཡན་ལག་འདི་ཉིད་ཀྱིས་ན་བསྟན་པའི་དོན་གྱི་སྣོད་རིགས་བཞི་ཁོ་ནར་ཡང་དག་པར་གཟིགས་ཤིང་མཁྱེན་ཏེ། བཞི་པོ་གང་ཞེ་ན། འདོད་པ་ལ་ཞེན་ཅིང་ཆགས་པའི་རིགས་ཅན་གྱི་སྣོད་ཀྱི་གདུལ་བྱ་དང་། ལོག་པའི་ལྟ་སྤྱོད་ལ་དགའ་ཞིང་སྲེད་པའི་སྣོད་མུ་སྟེགས་ཀྱི་རིགས་ཅན་ལྟ་བུ་བྱིས་པའི་གདུལ་བྱ་དང་། བྱང་ཆུབ་ཀྱི་སེམས་ངེས་པར་སྐྱེས་ཏེ་སྤྱོད་པ་བརྟུལ་ཕོད་པས་ཐེག་པ་ཆེན་པོ་གསང་སྔགས་ཀྱི་རིགས་རྒྱུད་ཅན་གྱི་སྣོད་དུ་ངེས་པའི་གདུལ་བྱ་དང་། གསང་སྔགས་ལ་ཅིག་ཆར་དུ་འཇུག་པའི་ཤེས་རབ་དང་ཏིང་ངེ་འཛིན་གྱི་བློ་གྲོས་ཅན་གྱི་སྣོད་མཆོག་དང་ལྡན་པའི་གདུལ་བྱ་དང་། གདུལ་བྱ་ཐམས་ཅད་དེ་ལྟར་སྣོད་ཀྱི་བྱེ་བྲག་གི་ཆ་བཞིར་ཡོངས་སུ་སྣང་ཞིང་གསལ་བ་སྟེ། བཞི་ཚོ་ཐོག་མའོ། །དེ་དག་ལ་ཐེག་པའང་རྣམ་གྲངས་བཞིར་བསྟན་ཏེ། ཆེད་དུ་སྔགས་ཀྱི་གདུལ་ཐབས་ནི། འདོད་པ་ཅན་ལ་གསང་བའི་སྐུའི་བསྟན་པ་ལྟར་འདོད་པ་རང་རྐྱེན་གྱི་ཚིག་གིས་ཇི་ལྟར་འདུལ་བ་བཞིན་དུ་སྟོན་པ་དང་། ལོག་སྲེད་ཅན་ལ་སྤྲུལ་སྐུའི་བསྟན་པ་ལྟར་ལྡེམ་དགོངས་སམ་བཀྲི་དྲང་བརྒྱུད་པའི་ཚིག་གིས་ཁྲིད་ཅིང་དྲང་བའི་ཐབས་སུ་ཇི་ལྟར་འདུལ་བ་བཞིན་སྟོན་པ་དང་། སེམས་སྐྱེས་པའི་རིགས་རྒྱུད་ཅན་ལ་ལོངས་སྐུའི་བསྟན་པ་ལྟར་ལྡེམ་དགོངས་སྦྱོར་བའི་ཚིག་གིས་གསང་བའི་དོན་ལ་ཇི་ལྟར་འདུལ་བ་བཞིན་གཞུག་པ་དང་། བློ་གྲོས་ཅན་ལ་ཆོས་སྐུའི་བསྟན་པ་ལྟར་དོན་དམ་ངེས་པར་སྣང་བའི་ཚིག་གིས་གསང་བ་ཟབ་མོའི་དོན་ལ་དུས་གཅིག་ཏུ་དགོད་པའོ། །དེ་དག་བཞི་ཕྲག་གཉིས་པའོ། །གཉིས་པ་ནི། དེ་དག་རེས་འགའ། ཞེས་པ་ནས། བཅས་པ་ལས། །ཞེས་པའི་བར་གྱིས་བསྟན་ཏེ། འོ་ན་རྒྱུད་དབུ་ཞབས་སུ་བསྟན་པ་བཞིར་འགྲོའམ་ཞེ་ན། གདུལ་ཐབས་ཀྱི་བསྟན་པ་བཞི་པོ་དེ་དག་ཀྱང་། དུས་སྐབས་ཀྱི་ལན་གྲངས་རེས་འགའ་འདུལ་བའི་ཆོས་ཀྱི་ཆ་ཡིས་དབྱེ་བས་རེ་རེ་ལའང་བཞི་ཕྲག་ཏུ་རྣམ་གྲངས་མཐུན་ལ་དོན་གྱི་ངོ་བོ་མི་མཐུན་པ་བཞི་ཞེས་སྟོན་པར་འགྱུར་ཏེ། གདུལ་བྱ་འདུལ་བའི་སྐབས་ལ་བབ་པ་གང་གི་དུས་ཉིད་དུ། འདོད་པའི་ཆོས་ལྟ་བུ་གཅིག་ལའང་དེའི་དོན་གྱི་ཉིང་དགོས་མཐར་ཕྱིན་པར་ངེས་པའི་དགོས་ཆེད་ཡོད་པ་དང་། དེ་ལ་དེ་སྐད་ཅེས་ཅིའི་ཕྱིར་བྱ་བའི་གང་རུང་གི་ངེས་པའི་ཚིག་དང་ལྡན་པ་དང་། བསྟན་པའི་དོན་རང་གི་ངོ་བོ་ཅི་ཞིག་ཡིན་པ་དང་། དོན་དེ་ལ་གལ་པོའི་དམིགས་བཙལ་ཏེ་འཐད་པ་བཟུང་ནས་བརྒལ་བརྟག་གིས་མཐར་དབྱུང་ཚུལ་དང་བཅས་པའི་རྣམ་གྲངས་ཕྱེ་བ་ལས། བཅས་ཞེས་སྦྲགས་མའི་སྒྲས་འདུལ་ཐབས་གཅིག་ལའང་བཞི་བཞི་ལྡན་པར་སྟོན་པའོ། །དེའང་འདོད་པ་རང་རྐྱེན་གྱི་ཐེག་པའི་དགོས་ཆེད་ནི། གང་ཟག་ཆགས་ཅན་གྱི་དོན་དུའོ། །ངེས་ཚིག་ནི་འདོད་པ་མ་བཀག་པར་རང་སོར་བཞག་པ་ཉིད་ཀྱིས་འབྲས་བུ་ཐོབ་པའོ། །ངོ་བོ་ནི་འདོད་ཆགས་ལ་བརྟེན་ཏེ་བདེ་སྟོང་གི་དོན་ཉམས་སུ་མྱོང་བའོ། །དོན་གྱི་དམིགས་བཟུང་བ་ནི། ཐབས་ལམ་གྱི་ཆ་རྐྱེན་རྣམས་འཚོགས་པ་དང་། དེས་ཉམས་སུ་ལོངས་པ་དང་། མི་མཐུན་པའི་ཕྱོགས་སུ་མི་འཆོར་བ་དང་། རྟོགས་པའི་དོན་རྙེད་པའོ། །གཞན་གསུམ་པོའང་དེས་འགྲེའོ། །ཆོས་རྟགས་བཞི་ཡང་བསྟན་པ་བཞི་སོ་སོ་དང་མཐུན་པའོ། །དེ་དག་བཞི་ཕྲག་གསུམ་པའོ། །གསུམ་པ་ནི། བཀའ་དོན་གཏན་ཚིགས། ཞེས་པ་ནས། རྒྱས་འཐད་སྦྱར། །ཞེས་པའི་བར་གྱིས་བསྟན་ཏེ། དེ་ལྟར་གཏན་ཚིགས་གང་གིས་ཡིད་ཆེས་པར་བྱེད་ཅེ་ན། རྒྱལ་བ་རྫོགས་པའི་སངས་རྒྱས་ཀྱི་ངེས་པ་དོན་གྱི་བཀའ་ལུང་ལས་སྣང་བར་ངེས་པ་དང་། ཤེས་བྱ་དང་རྟོགས་པར་བྱ་བའི་དོན་གྱི་ངོ་བོ་ཡིན་པ་དང་། རང་རང་ལ་བདེན་པར་གྲུབ་པའི་གཏན་ཚིགས་ཀྱིས་ཚད་མར་གྲུབ་པ་དང་། མངོན་སུམ་དང་འཐད་པ་སོགས་ཀྱི་རིགས་པ་ཡང་དག་པས་ཡིད་ཆེས་པར་བྱེད་པ་སྟེ། རྣམ་པ་བཞིས་ནོར་འཁྲུལ་དང་བྲལ་བར་ལུང་ཆེན་པོའི་གསང་དོན་དུ་ངེས་པའི་གདེངས་རྙེད་པའོ། །དེ་དག་ནི་བཞི་ཕྲག་བཞི་པའོ། །དེའང་གཏན་ཚིགས་ཀྱི་ཆོས་རྟགས་བཞིའི་སྒོ་ནས་ཚུལ་ཇི་ལྟར་སྦྱོར་བ་ནི། བཤད་པའི་བསྟན་པ་བཞིའི་ཆོས་གང་དང་གང་སྟོན་ན་ཡང་། རྒྱལ་བའི་བཀའ་ལུང་ལས་གསལ་བར་འབྱུང་ཞིང་ངེས་པ་སྣང་བ་ཞིག་དགོས་ཏེ། བཀའ་ལས་མི་སྣང་ན་ཡིད་ཆེས་མི་སྐྱེ་ཞིང་རྒྱབ་རྟེན་མེད་པར་འགྱུར་བ་དང་། དོན་གྱི་ངོ་བོ་ཆོས་ཉིད་དང་མི་འགལ་བ་ཞིག་དགོས་ཏེ། དོན་དང་འགལ་ན་སྙིང་པོ་མེད་པར་ཡ་ཆ་བར་འགྱུར་བ་དང་། ཚད་མའི་གཏན་ཚིགས་ཀྱིས་རྒྱས་པར་བསྟན་པ་ཞིག་དགོས་ཏེ། མ་རྒྱས་ན་ཇི་བཞིན་དུ་གཏན་ལ་མི་ཕེབས་པས་ཤེས་བྱའི་ལྷག་མ་ལུས་པར་འགྱུར་བ་དང་། དངོས་པོ་སྟོབས་ཞུགས་ཀྱི་རིགས་པ་མཆོག་གིས་འཐད་པར་གྲུབ་པ་ཞིག་དགོས་ཏེ། མ་འཐད་ན་ཡང་དག་པའི་དོན་དུ་མི་འོས་པས་རྟོགས་ཀྱང་འབྲས་བུ་ཐོབ་པར་མི་གཤའ་བས་ན། དེ་བཞི་དང་སྦྱར་ནས་ཡིད་ཆེས་པའི་གནས་སུ་གྱུར་ན་ནམ་ཡང་བསླུ་བ་མེད་པར་སྙིང་ནོར་དུ་རུང་བར་ངེས་པའོ། །དེ་དག་ནི་བཞི་ཕྲག་ལྔ་པ་སྟེ་ཁས་བླང་བའི་རྣམ་གྲངས་ཉི་ཤུའོ། །གསུམ་པ་ནི། ཐམས་ཅད་མེད་རྒྱུ། ཞེས་པ་ནས། རྙེད་པར་གྱུར་ཏོ། །ཞེས་པའི་བར་གྱིས་བསྟན་ཏེ། དེ་ལྟར་གཏན་ཚིགས་ཀྱིས་ངེས་པའི་དོན་གྱི་ཡིན་ལུགས་གང་སྙམ་པ་ལ། དངོས་པོར་སྣང་བའི་ཆོས་ཐམས་ཅད་རྐྱེན་ལས་བྱུང་བས་ཐེར་ཟུག་པ་མེད་པར་དེ་ཁོ་ན་ཉིད་མཐའི་དྲི་མ་རིལ་ཀ་ནས་དག་པ་ཉིད་ཐམས་ཅད་དུ་མ་བཀོལ་བར་སྣང་བ་ཡང་གཞི་རང་བཞིན་མེད་པ་ཇི་བཞིན་པའི་ངོ་བོ་ཉིད་རྒྱུ་ལྟར་གྱུར་པ་ཡིན་པས། དེ་ལ་རང་གི་བློས་མིང་གི་བླ་དྭགས་ཇི་ལྟར་བཏགས་པ་ལྟར་སྣང་ཞིང་ཆགས་པ་ཡིན་ལ། འབྲས་བུའི་དངོས་གཞིར་གྱུར་པའང་། ལམ་པས་ཇི་ལྟར་དོན་དུ་གཉེར་ནས་བསྒྲུབས་པ་ལྟར་འབྲས་བུ་ཐ་དད་དུ་འགྲུབ་ཅིང་། ལྟ་བས་ཇི་ལྟར་བལྟས་པའི་དོན་ཐ་དད་པར་ཡང་རང་བཞིན་གཅིག་ཏུ་མ་ངེས་པར་ཐེག་པ་སོ་སོའི་ངོ་བཞིན་དུ་ཡང་སྣང་ངོ་། །དེས་ན་གཏན་ཚིགས་ཀྱི་སྒོ་ནས་དོན་གྱི་ངོ་བོ་གང་དག་སྣོད་དུ་གྱུར་པའི་རྣལ་འབྱོར་པ་གང་སུ་ཞིག་གི་བློ་ལ་དོན་ཇི་ལྟ་བ་བཞིན་དུ་བརྡ་ལེགས་པར་སྤྲད་དེ་འཇལ་ངེས་སུ་བྱས་པས་དེ་ལྟར་གོ་བར་འགྱུར་བའི་ཕྱིར། ཤེས་བྱ་ཟབ་མོ་གང་གི་ངོ་བོ་མཐར་ཐུག་པའི་གསང་བ་ཉིད་དང་འཕྲད་ནས་དོན་དེ་བཞིན་དུ་ཉམས་སུ་ལེན་པ་ཉིད་དུ་ངེས་པ་ལ་བསླུ་ཞིང་རྫུན་པ་ནམ་ཡང་མེད་དོ། །དེ་བས་ན་བསྟན་པ་བཞིའི་དོན་མ་ནོར་བར་གོང་གི་བཞི་ཚོ་ཕྱི་མ་གཉིས་ཀྱིས་གཏན་ལ་འབེབས་པའི་ཕྱིར་གཏན་ཚིགས་བཀའ་དོན་ལ་སོགས་བཞི་སྨོས་ཏེ་ཡང་དག་པ་ཤེས་པར་བྱེད་པའི་མཚན་ཉིད་དོ། །ཞེས་བཤད་པ་བཞིན་ངེས་པ་དོན་གྱི་བྱེ་བྲག་གི་མཆོག་དམ་པ་ཉིད་མ་ནོར་བར་བགྲོས་ཏེ་བཤད་པས། འཁོར་དམན་པའི་ལུས་ཀྱི་སེམས་དཔའ་རྣམས་ཀྱིས་ཀྱང་གཏན་ཚིགས་རྒྱས་པར་ཁོང་དུ་ཆུད་པའི་རྒྱུས། ཆོས་ཐམས་ཅད་ཀྱི་དོན་ཡང་དག་པར་མཚོན་པའི་ཚིག་གི་བརྡ་སྨོས་པ་ཙམ་གྱིས་གང་གསང་སྔགས་ལུང་གི་དོན་ལ་ཚད་མས་ངེས་པ་རྙེད་ཅིང་རྟོགས་པའི་ཉམས་དང་ལྡན་པར་གྱུར་ཏོ། །འོ་ན་འདིར་བཤད་པའི་སྣོད་བཞི་དང་། ལེའུ་ཞེ་བཞི་པར་བཤད་པའི་གདུལ་བྱ་གསུམ་པོ་དེ་གཉིས་རྒྱ་གང་གི་ཆེ་ཞེ་ན། གདུལ་བྱ་གསུམ་གྱི་ཁོངས་སུ་སྣོད་བཞི་འདུས་ལ། སྣོད་བཞིའི་ཁོང་དུ་གདུལ་བྱ་གསུམ་མ་འདུས་པས་གདུལ་བྱ་གསུམ་རྒྱ་ཆེ་སྟེ། སྣོད་བཞི་པོ་ངེས་པར་འབྱུང་བའི་གདུལ་བྱའི་བྱེ་བྲག་ཡིན་པས། འདོད་ལ་ཞེན་པ་དང་གདུལ་དཀའ་དྲག་པོ་གཉིས་མ་འདུས་པས་སོ། །ལེའུའི་མཚན་ནི། སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ངེས་པ་དམ་པའི་ཡན་ལག་བགྲོས་ཏེ་ཚད་མའི་གཏན་ཚིགས་བསྟན་པའི་ལེའུ་སྟེ། ལྔ་བཅུ་རྩ་གཅིག་པ་ཉིད་རྣམ་པར་འགྲེལ་པའོ།། །།དྲུག་པ་སྦྱོར་བའི་ཡན་ལག་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། མཇུག་བསྡུ་བའོ། །དང་པོ་ནི། དེ་ནས་ཡང་། ཞེས་པ་ནས། རྟོགས་འཇུག་ཐབས་ཉིད་ནི། ཞེས་པའི་བར་གྱིས་བསྟན་ཏེ། ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །ཡན་ལག་ལྔ་པ་བཤད་མ་ཐག་པ་དེ་ནས་ཡང་དྲུག་པ་རྗེས་མཐུན་དུ་བསྟན་པའི་ཕྱིར་སྟོན་པ་གསང་བ་པའི་བདག་པོ་དེས། དམན་པའི་ལུས་ཀྱི་སེམས་དཔའ་ཆེན་པོ་ལང་ཀའི་བདག་པོ་ལ། རྟོགས་པ་ལྟ་བ་དང་ཉམས་སུ་བླང་བ་ཏིང་ངེ་འཛིན་གྱི་ཡིད་ངེས་པར་ཡོངས་སུ་འཇུག་པའི་ཐབས་ཀྱིས་བོས་ཏེ། ལུང་ཆེན་པོའི་སྦྱོར་བའི་ཡན་ལག་སྨྲས་ཏེ་བཀའ་སྩལ་པ། སྡུད་པ་པོ་ལང་ཀའི་བདག་པོ། ཡན་ལག་དྲུག་གི་ཐ་མ་འདིས་རྫོགས་པས་མཐར་ཟད་ཀྱི་རྗེས་མ་བསྟན་པ་ཡང་། རང་གི་དོན་དུ་དེ་ཁོ་ན་ཉིད་རྟོགས་ཤིང་དོན་ལ་འཇུག་པ་དང་གཞན་གྱི་དོན་དུ་ཐུགས་རྗེས་ཐབས་ལ་མཁས་པའི་ཡན་ལག་ཉིད་ནི། གནས་སྐབས་ཀྱི་དོན་དང་མཐར་ཐུག་གི་འབྲས་བུ་ལ་ངེས་པར་སྦྱོར་བས་མིང་ཡང་འགྲུབ་ལ། དབྱེ་བས་དྲུག་ཅུ་རྩ་གཅིག་ཏུ་བཤད་པའོ། །གཉིས་པ་ལ་གཉིས་ཏེ། །བདག་དོན་དུ་སྦྱོར་བ་སུམ་ཅུ་རྩ་གཉིས་བཤད་པ། གཞན་དོན་དུ་སྦྱོར་བ་ཉི་ཤུ་རྩ་བརྒྱད་བཤད་པའོ། །དང་པོ་ལ། བཞི་ཚོ་བརྒྱད་དེ། རྟོགས་པ་བཞི། མཚན་ཉིད་བཞི། དགོས་འབྲེལ་བཞི། དཀྱིལ་འཁོར་དུ་འཇུག་པའི་ཡན་ལག་བཞི། དལ་དུ་འཇུག་པའི་དཔེ་བཞི། ལམ་དུ་འཇུག་པའི་དཔེ་བཞི། བསྙེན་བསྒྲུབ་ཀྱི་ཡན་ལག་བཞི། མཚན་ཉིད་དང་སྦྱར་བ་བཞི་བཤད་པའོ། །དང་པོ་ནི། རང་བཞིན་འབྱུང་སྒོ། ཞེས་པ་ནས། ངེས་གཞག་བྱ། །ཞེས་པའི་བར་གྱིས་བསྟན་ཏེ། རྒྱུ་གཅིག་པ་ནི། ཆོས་ཐམས་ཅད་ཀྱི་རང་བཞིན་བརྟགས་ན་ངོ་བོ་མ་སྐྱེས་པ་ཞིག་པས་དམིགས་སུ་མེད་ལ་བསམ་ན་ཐམས་ཅད་དུ་མ་འགགས་པ་ཞིག་པས་ཅིར་ཡང་སྣང་བ་ཉིད་དོན་ལ་བདེན་པ་དབྱེར་མེད་པར་གཅིག་པའི་ངོ་བོ་དེ་ཁོ་ན་ཉིད་བཤད་པ་ལྟར་མེད་རྒྱུ་བཏགས་ཆགས་བསྒྲུབ་འགྲུབ་ཏུ་སྣང་བའི་གཞིར་གྱུར་པས་རྟོགས་བྱའམ་བསྒྲུབ་བྱའི་རང་བཞིན་རྒྱུ་གཅིག་པར་རྟོགས་པའོ། །ཡིག་འབྲུའི་ཚུལ་ནི། ཆོས་ཐམས་ཅད་སྐུ་གསུང་ཐུགས་ཀྱི་འབྲས་བུ་མཐར་ཐུག་པར་ངེས་པའི་རྟོགས་པ་འབྱུང་བའི་སྒོ་སྟེ། གསུང་སྐུ་ཐུགས་གསུམ། ཨ་ཨོ་ༀ་གསུམ་གྱིས་མཚོན་པའི་ཚུལ་གྱིས་ཨས་མཚོན་པའི་རང་བཞིན་ཆོས་སོ་ཅོག་རང་གི་སེམས་རྒྱུ་རྐྱེན་དང་བྲལ་བས་མཚན་ཉིད་གང་དུའང་མ་སྐྱེས་པར་གསལ་བའི་གསུང་དང་། དེ་ཉིད་ཉི་ཚེ་བའི་སྟོང་པ་མ་ཡིན་ཏེ་ཡེ་ཤེས་སུ་གསལ་བས་དབྱིངས་དང་ཡེ་ཤེས་གཉིས་སུ་མེད་པའི་ཆོས་ཀྱི་སྐུ་ཡི་གེ་ཆ་གཉིས་པ་ཨོ་ཡིས་མཚོན་པའི་ཚུལ་དང་། དེ་དག་ཀྱང་རང་བྱུང་གི་ཡེ་ཤེས་ཆེན་པོ་ཡེ་ཤེས་ལྔ་མ་བཙལ་བར་རྫོགས་པའི་ཐུགས་ཀྱི་ངོ་བོ་ཨཱོཾ་གྱི་ཡི་གེས་རྫོགས་ཚུལ་དུ་མཚོན་ཏེ་སངས་རྒྱས་པར་རིག་པ་ལ་གསལ་བའོ། །བྱིན་གྱི་རླབས་ཀྱིས་རྟོགས་པ་ནི། རྟོགས་པའི་མཐུས་རང་དབང་མེད་པར་དོན་ལ་སྦྱོར་བ་སྟེ། དཔེར་ན་རྒྱུ་རས་སྣམ་དཀར་པོ་ལས་ཁ་དོག་དམར་བོར་སྒྱུར་བའི་མཐུ་བཙོད་ལ་ཡོད་པ་དང་། སྔོན་པོར་བསྒྱུར་ན་རམས་ལ་ཡོད་བྱ་བ་ལྟར་ཁམས་གསུམ་རང་རིག་པ་རྣམ་པར་དག་པའི་སྣམ་བུ་ཡེ་ནས་ཡིན་པ་ཉིད། བཤད་པའི་རྟོགས་པ་གཉིས་ཀྱི་ཚོན་གྱིས་རང་རིག་པ་ལ་སྐུ་དང་ཡེ་ཤེས་འབྲས་བུའི་ཁ་དོག་ཏུ་སྣང་བར་བྱེད་པའི་སྣུམས་པ་ནི་རློབ་པ་དང་། དེ་ལྟར་རིག་པ་རང་ལ་ཤར་བ་ནི་བརླབས་པའོ། །འོན་ཀྱང་མིན་པ་ལས་ཡིན་པར་བསྒྱུར་བ་ནི་མེད་དོ། །མངོན་སུམ་པར་རྟོགས་པ་ནི། དེ་ལྟར་གསུམ་གྱི་ཡང་འབྲས་བུ་སྟེ། ཆོས་རྣམས་གསང་སྔགས་དེ་ཁོ་ན་ཉིད་དུ་ལྷུན་གྱིས་གྲུབ་པའི་དོན་རང་གི་རིག་པའི་མངོན་སུམ་དུ་རྟོགས་པ་ཡང་ཚིག་སྒྲ་ལ་རྟེན་པ་དང་དོན་ཞེ་ལ་འཛིན་པ་ཙམ་མ་ཡིན་པར་ཆོས་ཉིད་ཇི་བཞིན་པའི་དོན་ངེས་པར་ཁོང་དུ་ཆུད་དེ་རྟོགས་པའི་གདེངས་ཆེན་པོ་རྙེད་པའོ། །དེ་ལྟར་རྟོགས་པ་བཞི་ཡིས་དེ་ཁོ་ན་ཉིད་ཡང་དག་པའི་དོན་ལ་བློ་འཇུག་རིམ་ལྟར་ངེས་པར་གཞག་སྟེ་གོམས་པར་བྱའོ། །འདི་དག་ལྟ་བ་ཁོ་ན་སྟེ་བཞི་ཕྲག་དང་པོའོ། །གཉིས་པ་ནི། ཤེས་དང་འཇུག་དང་། ཞེས་པ་ནས། མཚན་ཉིད་ཡིན། །ཞེས་པའི་བར་གྱིས་བསྟན་ཏེ། མཚན་ཉིད་རྣམ་པ་བཞི་སྤྱི་དང་བྱེ་བྲག་ཏུ་བསྟན་པའི་ཕྱིར། དེ་ལྟར་མངོན་སུམ་པར་རྟོགས་པའི་ངོ་བོ་རང་གསལ་ཤེས་པའི་མཚན་ཉིད་ལྟ་བའི་དོན་ཡང་དག་པར་མཐོང་བ་དང་། དེ་ལྟར་མཐོང་བའི་དོན་ལ་གོམས་པར་གནས་པའི་ཏིང་ངེ་འཛིན་ཀྱིས་འཇུག་པ་དང་། དེ་ཉིད་རྐྱེན་དང་བསྲེས་ཏེ་རྗེས་མཐུན་དུ་སྤྱོད་པས་བོགས་འདོན་ལ་བརྟེན་ནས། དེ་ལྟར་འབད་པས་དྲོད་རྟགས་དང་ལྡན་པར་ཟུང་དུ་འབྲེལ་བའི་འབྲས་བུ་མཐར་ལམ་མན་ཆད་ཀྱི་རིག་འཛིན་དུ་གྱུར་པ་དང་། མཇུག་མ་བཙལ་བར་ལྷུན་གྱིས་གྲུབ་པས་རྒྱལ་བའི་གོ་འཕང་སྐྱེད་དུ་བྱ་བ་མེད་པའི་འབྲས་བུ་ཆེན་པོ་དང་བཞི་ནི་མཚན་ཉིད་བཞི་ཡིན་ནོ། །དེས་ན་རྣལ་འབྱོར་ལྔ་འམ་བཅུའི་རྒྱུ་ལས་མཐོང་ལམ་ཐོབ་ནས་རྐྱེན་བསྒོམ་སྤྱོད་གཉིས་ལ་རྗེས་སུ་ཞུགས་པས་ལམ་གྱི་རིག་འཛིན་དང་མཐར་འབྲས་མངོན་དུ་བྱས་པའམ། དེ་དག་ནི་རྣལ་འབྱོར་གསུམ་སྟེ། ཤེས་པ་གཞི། འཇུག་པ་དང་གནས་སྐབས་ཀྱི་འབྲས་བུ་ལམ། སངས་རྒྱས་ཉིད་འབྲས་བུའི་རྣལ་འབྱོར་གྱི་དོན་དུའང་འགྱུར་རོ། །གསུམ་པ་ནི། དེ་འབྲེལ་དེ་དགོས། ཞེས་པ་ནས། བྱེད་དགོས་ཡིན། །ཞེས་པའི་བར་གྱིས་བསྟན་ཏེ། དགོས་འབྲེལ་གང་ཞེ་ན། བསྙེགས་པའི་དོན་གྱིས་འདིར་རྣལ་འབྱོར་གསུམ་དང་ལམ་གྱི་དགོས་འབྲེལ་དུ་འགྱུར་ཏེ། སྟོན་པས་གསང་བ་ཟབ་མོའི་རྒྱུད་བཀའ་སྩལ་པས། དེའི་ཚིག་དོན་ངེས་པ་གང་གི་ཚེ་ན། རྒྱུ་ཤེས་པ་དང་། རྐྱེན་འཇུག་པ་དང་། ལམ་གྱུར་གྱི་གྲུབ་པ་དང་། མཐར་ཕྱིན་པའི་འབྲས་བུའི་མཚན་ཉིད་བཞི་ཡང་། དེ་དག་ངེས་པའི་འཇུག་རིམ་ལྟར་སྔ་མ་ནི་རྒྱུ་ལ་ཕྱི་མ་ནི་འབྲས་བུའི་ཚུལ་དུའང་འབྲེལ་ཏེ། སྔ་མ་ནི་ཐབས་སུ་གྱུར་ལ། ཕྱི་མ་ནི་ཐབས་ལས་བྱུང་བར་ཡང་འབྲེལ་བར་འགྱུར་རོ། །དེ་བས་ན་རྣལ་འབྱོར་ལྔ་དང་བཅུ་ཡང་རྗེས་སུ་མཐུན་པར་འགྱུར་རོ། །དེ་དག་གི་དགོས་པ་ནི་ལམ་སོ་སོའི་ཆ་རྐྱེན་ལྟར་ཡན་ལག་གིས་དང་དུ་བླང་དགོས་པའོ། །དེ་ལ་མཚོན་པ་ནི་བརྗོད་པ་སྟེ་དེ་ལ་བརྗོད་བྱ་རྗོད་བྱེད་དོ། །བརྗོད་བྱ་ནི་རྒྱུད་ཀྱི་དོན་ལམ་རིམ་དང་རྣལ་འབྱོར་གསུམ་གྱི་སྐབས་སྐབས་ཀྱིས་ཤེས་པར་བྱའོ། །རྗོད་བྱེད་ནི། རྐྱེན་ཚིག་དང་ཡི་གེ་རྣམས་ཀྱིས་མཚོན་ཞིང་ཐོབ་པར་བྱེད་པའོ། །འདིར་དགོས་པ་བརྗོད་པ་ནི་ཁྱད་པར་གྱི་དགོས་པ་སྟེ་བརྗོད་བྱ་མཚོན་དགོས་པས་སོ། །དེ་དག་ཀྱང་དོན་གྱི་ལམ་སྔ་མ་དེ་ཡི་རྗེས་སུ་བསྒྲུབ་པས་གོམས་པ་སྟོབས་སུ་གྱུར་ཏེ་ལས་སུ་རུང་ནས་མཐར་ཕྱིན་པ་ནི་འབྲས་བུ་མངོན་དུ་བྱེད་པ་ཡིན་པས་དགོས་པའི་ཡང་དགོས་པ་སྟེ་དེ་ཉིད་བསྒྲུབ་པར་བྱ་བ་ཡིན་ནོ། །དེ་ལྟར་བཞི་ཕྲག་གསུམ་པའོ། །བཞི་པ་ནི། ཐོས་ཆུང་གོམས་དང་ངེས་པར་གྱུར། །ཞེས་པས་བསྟན་ཏེ། འཇུག་པའི་ཡན་ལག་བཞི་ནི། སྤྱིར་བསླབ་པའི་མཐའ་བཅུ་ཡང་། རིམ་པ་བསྡུས་ན་ཐབས་ཀྱི་ཐེག་པའི་གཞུང་མ་ནོར་བར་ཐོས་པས་ཤེས་པ་ཡིན་པས་མཐའ་བཅུ་ཡང་དག་པར་ཤེས་པ་ཐོས་པ་ལ་རག་ལས་པས་ན་ཐོག་མར་ཐོས་པ་གཅེས་པ་དང་། དེ་ནས་ཐོས་པའི་སྒོ་ནས་དོན་གྱི་གདེངས་ཆུད་དེ་རྟོགས་པ་དང་། དེ་ལྟར་རྟོགས་པ་ལ་རྣལ་འབྱོར་དུ་བྱས་ཏེ་གོམས་པ་དང་། དེ་ལྟར་གོམས་པར་བྱས་པས་ལས་སུ་རུང་ནས་ངེས་པར་འབྲས་བུ་མཐར་ཕྱིན་ཏེ་མི་འགྱུར་བར་གྱུར་པའོ། །བཞི་ཕྲག་བཞི་པའོ། །ལྔ་པ་ནི། ཕྱེ་མཐོང་ཞུགས་དང་ཐོབ་པ་ཡིན། །ཞེས་པས་བསྟན་ཏེ། དེའི་དཔེ་དཀྱིལ་འཁོར་དུ་འཇུག་པའི་ཡན་ལག་བཞི་ནི། ཐོས་པའི་ཤེས་རབ་ཀྱི་མིག་ཤིན་ཏུ་དྭངས་པ་ཕྱེ་ནས་རང་བཞིན་ཕྱིན་ཅི་མ་ལོག་པར་ངེས་པ་ནི་དཔེར་ན་མིག་བྱེ་བ་ལྟ་བུའོ། །ཐོས་བསམ་གྱིས་དོན་གྱི་གདེངས་རྙེད་དེ་གསང་སྔགས་ཀྱི་དཀྱིལ་འཁོར་རྣམ་གསུམ་མཐོང་བ་ནི། དཔེར་ན་ཕྱིའི་ཡུལ་ལམ་དཀྱིལ་འཁོར་མཐོང་བ་དང་འདྲའོ། །རྟོགས་པའི་དོན་ལ་རྣལ་འབྱོར་དུ་བྱེད་པ་ནི་དཀྱིལ་འཁོར་གསུམ་དུ་ཞུགས་པ་སྟེ། དཔེར་ན་དཀྱིལ་འཁོར་དུ་བཅུག་པ་དང་འདྲའོ། །དེ་ལྟར་ཞུགས་ཏེ་འབད་པས་ས་འོག་མ་ནོན་ཏེ་གོང་མ་ཐོབ་ནས་འབྲས་བུ་ལྷུན་གྱིས་གྲུབ་པ་ནི། དཔེར་ན་དཀྱིལ་འཁོར་དུ་དབང་ཐོབ་པ་དང་འདྲ་བ་ཡིན་ཏེ། དེ་ལྟར་བཞི་ཕྲག་ལྔ་པའོ། །དེ་དག་ནི་ལམ་ཟག་པ་ལྔ་དང་པོ་དང་། དེ་ནས་མཐོང་བསྒོམ་དང་མཐར་ལམ་དུ་སྦྱར་རོ། །འཆད་པའང་རྗེས་སུ་མཐུན་ནོ། །དྲུག་པ་ནི། དེ་ཚོལ་དེ་རྙེད་འཇུག་མངོན་གྱུར། །ཞེས་པས་བསྟན་ཏེ། སེམས་འཇུག་ཅིང་སྐྱེ་བའི་ཡན་ལག་བཞི་གང་ཞེ་ན། དང་པོ་ཁོ་ནར་དེ་ཞེས་སྙེགས་པའི་སྒྲས། གསང་སྔགས་ལ་མིག་ཕྱེ་བའི་ཐབས་ཀྱིས་དོན་ཚོལ་བ་དང་། དེ་ལྟར་བཙལ་བས་གསང་སྔགས་ཀྱི་གདེང་རྙེད་དེ་བདེན་པ་མཐོང་བ་དང་། དེ་ཡི་དོན་ལ་འདྲིས་པར་བྱ་བའི་ཕྱིར་འཇུག་པ་དང་། གོམས་པར་བྱས་པས་དོན་མངོན་དུ་གྱུར་པའོ། །དེ་ལྟར་བཞི་ཕྲག་དྲུག་པའོ། །བདུན་པ་ནི། བསྙེན་པ་ཉེ་བསྙེན་བསྒྲུབ་དང་འགྲུབ། །ཅེས་པས་བསྟན་ཏེ། བསྙེན་བསྒྲུབ་རྣམ་བཞི་ནི། དང་པོར་ལམ་ཚོལ་བ་བསྙེན་པའོ། །རྟོགས་པ་ནི་ཉེ་བའི་བསྙེན་པའོ། །བསྒོམ་པ་ནི་བསྒྲུབ་པ་དང་། མཐར་ཕྱིན་ཏེ་འགྲུབ་པ་ནི་བསྒྲུབ་པ་ཆེན་པོའོ། །ཡང་ན་སེམས་ཉིད་དུ་ཤེས་པ་ནི་བསྙེན་པ་དང་། ལྷར་ཤེས་པ་ནི་ཉེ་བསྙེན་དང་། ཆོས་ཉིད་དུ་ཤེས་པ་ནི་བསྒྲུབ་པ་དང་། བུདྡྷ་ཐོབ་པ་ནི་འགྲུབ་པའོ། །ཞེས་དང་། ཡང་ན་ཆོས་ཉིད་ཀྱི་དོན་ཤེས་པས་བསྙེན་པ། དེའི་དོན་ལ་གནས་པས་ཉེ་བསྙེན། དོན་ལ་ཆེད་དུ་གནས་པས་ན་བསྒྲུབ་པ་དང་། མཐར་ཕྱིན་ཅིང་ཉམ་ང་དང་བྲལ་བས་འགྲུབ་པའོ། །ཞེས་དང་། འོག་གི་བཞི་ཚོའི་དབང་དུ་ནི། མཉམ་པའི་དོན་ཤེས་པ་ནི་བསྙེན་པའོ། །བསྒོམ་པ་ནི་ཉེ་བསྙེན་ནོ། །ལྟ་སྒོམ་གཉིས་སུ་མེད་པར་གྲུབ་པར་བསྒྲུབ་པའོ། །དེ་དག་ལས་སུ་རུང་ནས་མངོན་དུ་གྱུར་བ་བསྒྲུབ་པ་ཆེན་པོ་སྟེ་བཞི་ཕྲག་བདུན་པའོ། །འདི་ལ་མ་ཧཱ་ཡོ་ག་དང་ཚུལ་མཐུན་པར་ཡང་འཆད་དུ་ཡོད་པར་མངོན་ནོ། །བརྒྱད་པ་ནི། དེ་བཞིན་མཉམ་འགྱུར། ཞེས་པ་ནས། འཇུག་རིམས་ཡིན། །ཞེས་པའི་བར་གྱིས་བསྟན་ཏེ། ལྟ་བ་མཚན་ཉིད་དང་སྦྱར་བའི་ཡང་གྲུབ་པ་བཞི་ནི། བཤད་པ་དེ་བཞིན་དུ་རིམ་པ་ལྟར་འཇུག་པའམ་ཐོས་བསམ་གྱིས་མཉམ་པ་ཉིད་རྟོགས་པར་འགྱུར་བ་དང་། རྟོགས་ཏེ་རྣལ་འབྱོར་དུ་འདྲིས་གོམས་བྱེད་པས་འགྲུབ་པ་དང་། བསྒོམས་པས་ལྟ་བ་དང་ཏིང་ངེ་འཛིན་ཟུང་དུ་ལྷུན་གྱིས་གྲུབ་པ་དང་། དེ་ལྟར་གྱུར་པས་མཐར་ཕྱིན་ཏེ་འབྲས་བུར་གྲུབ་པས་ལས་སུ་རུང་བའོ། །དེ་ལྟར་བཞི་ཚོ་བརྒྱད་ནི་ངེས་པར་ལམ་དུ་འཇུག་པའི་རིམས་པ་ཡིན་ཏེ་བདག་གི་དོན་ཏོ། །སྤྱིར་གསང་སྔགས་འབྱུང་འཇུག་གི་ཡན་ལག་ནི། ལམ་ལ་རིམ་པར་ཞུགས་ནས་གོང་དུ་རིམ་པར་སྐྱེད་དུ་འབྱུང་བའོ། །ཡང་། གསང་སྔགས་ཀྱི་དོན་གྱི་འབྱུང་འཇུག་གི་རིམས་པ་གཉིས་ལས། འཇུག་རིམ་ནི། འཁོར་བ་དང་མྱ་ངན་ལས་འདས་པའི་དོན་ལ་འཇུག་པ་སྟེ། དོན་གྱི་ངོ་བོ་ཚོལ་བ། དོན་གྱི་ངེས་པ་རྙེད་པ། དོན་གྱི་རྗེས་སུ་འཇུག་པ། དོན་མངོན་དུ་གྱུར་པ་ལྟ་བུར་སྦྱར་རོ། །འབྱུང་རིམས་ནི། འཕགས་པའི་ས་ལས་འཁོར་བའི་ཁམས་ལ་ཐུགས་རྗེ་འབྱུང་བ་སྟེ། ཐུགས་རྗེ་ཆེན་པོ་གཡོ་བ། ཐུགས་རྗེ་ཆེན་པོ་འབྱུང་བ། གཟུགས་སྐུར་སྣང་བ། འགྲོ་དོན་མཛད་པའོ། །ཞེས་ཕྱག་མཆན་ལས་འབྱུང་ངོ་། །འདི་དག་ལས་དོན་གྱི་རྣལ་འབྱོར་ལྔ་དང་བཅུར་གྱེས་པའང་ཡིན་ལ་རྣལ་འབྱོར་གྱི་ཆ་རྐྱེན་སོ་སོའི་ཡན་ལག་ཏུའང་འགྱུར་རོ། །གཉིས་པ་ལ་ལྔ་སྟེ། ཆོ་འཕྲུལ་བཞི། མངོན་ཤེས་ལྔ། རང་བཞིན་ལྔ། ཐབས་དང་ཐབས་སྦྱར་ལྔ་ལྔ། ཕྲིན་ལས་བཞི་བཤད་པའོ། །དང་པོ་ནི། གཞན་གྱི་དོན་དུ། ཞེས་པ་ནས། སྦྱར་བ་ཡིན། །ཞེས་པའི་བར་གྱིས་བསྟན་ཏེ། གཞན་དོན་དུ་འབྱུང་འཇུག་གི་ཡན་ལག་ངེས་པར་གཟུང་བ་ནི་བདག་དོན་གྱི་འཇུག་པ་མཐར་ཕྱིན་ནས། གཞན་གྱི་དོན་དུ་ཐུགས་རྗེ་འབྱུང་བས་གཞན་ངེས་པར་དོན་ལ་སྦྱོར་བ་ཁོ་ན་ཉིད་དོ། །དེ་ལའང་རིམས་པ་བཞི་སྟེ། ཐུགས་རྗེ་ཆེན་པོ་ཀུན་ཏུ་གཡོ་ནས་ལྡང་ཞིང་སྐྱེ་བ་དང་། མཚན་ཉིད་མ་ངེས་པར་སྤྲུལ་པ་སྣ་ཚོགས་ཀྱི་ཆོ་འཕྲུལ་འབྱུང་བ་དང་། སྐུ་གསུང་ཐུགས་ཀྱི་མཛད་པའི་དངོས་པོ་གདུལ་བྱ་ལ་སྣང་བ་དང་དེས་ཇི་ལྟར་འཚམས་པར་དོན་མཛད་པ་དང་མཛད་སྤྱོད་བཞིའོ། །ཡང་ན། སྐུ་རྫུ་འཕུལ་གྱི་ཆོ་འཕྲུལ་གྱིས་སྣོད་བཅུད་ཀུན་བྱིན་རླབས་ཀྱིས་གཡོ་བར་མཛད་པ་དང་། ཐུགས་ཀུན་ཏུ་བརྗོད་པའི་ཆོ་འཕྲུལ་གྱིས་ཐུགས་རྗེ་རྒྱུན་དུ་འབྱུང་བ་དང་། ཕྲིན་ལས་ཆོས་སྣང་བའི་ཆོ་འཕྲུལ་གྱིས་མཛད་པ་གདུལ་བྱ་ལ་སྣང་བ་དང་། གསུང་རྗེས་སུ་བསྟན་པའི་ཆོ་འཕྲུལ་གྱིས་ཇི་ལྟར་འཚམས་པར་དོན་མཛད་པའོ། །དེ་དག་ནི་ཇི་ལྟར་བདག་དོན་གྱི་ཚུལ་དང་མཐུན་པར་གདུལ་བྱའི་བློའི་རིམས་པ་བཞིན་དུ་འགྲོ་བ་རྣམས་དོན་ལ་སྦྱོར་བའི་མཛད་པ་འབྱུང་འཇུག་གི་ཡན་ལག་ཡིན་ནོ། །གཉིས་པ་ནི། དེ་ཤེས་དེ་མ་སྐྱེས། ཞེས་པ་ནས། རིམས་བཞིན་ནོ། །ཞེས་པའི་བར་གྱིས་བསྟན་ཏེ། ཤེས་པ་ལྔ་གང་སྙམ་པ་ལ། དོན་བྱ་བའི་གདུལ་བྱའི་མཚན་ཉིད་ཇི་ལྟ་བ་དེ་བཞིན་དུ་མ་འདྲེས་པར་མཁྱེན་པའི་ཤེས་པ་དང་། ཡང་ན་ལྷའི་མིག་དང་རྣ་བའི་མངོན་ཤེས་དང་། དེ་ལྟ་བུའི་གདུལ་བྱའི་སེམས་ཀྱི་རང་བཞིན་མ་སྐྱེས་པར་སྟོང་བདག་མེད་དུ་ཡང་ཤེས་ནས་གདུལ་བའི་ཐབས་སྟོན་པའམ། ཡང་ན་ཟག་པ་ཟད་པའི་མངོན་ཤེས་དང་། དེ་ལྟར་མཁྱེན་ཅིང་དོན་བྱེད་པའི་དུས་ཤེས་པའམ། ཡང་ན་སྔོན་གནས་མཁྱེན་པའི་མངོན་ཤེས་དང་། བདག་གཞན་དང་ཐབས་ཀུན་སྣང་སྟོང་གི་དངོས་པོ་གཉིས་ཀའང་མེད་པར་མཁྱེན་པའི་ཤེས་པའམ། འཆི་འཕོ་དང་སྐྱེ་བ་མཁྱེན་པའི་མངོན་ཤེས་དང་། དེ་ཡང་འཕྲལ་དུ་བཙལ་བ་ལས་བྱུང་བ་མ་ཡིན་ཏེ། ཡེ་ཕྱི་མོ་ཉིད་ནས་མ་བཅོས་མ་བསླད་པར་ཐམས་ཅད་དུ་རང་གསལ་བར་མཁྱེན་པའི་ཤེས་པ་ཉིད་དེ། དེ་ལྟར་མཁྱེན་ནས་འགྲོ་དོན་སྐལ་བའི་རིམས་པ་བཞིན་མཛད་པའམ། ཡང་ན་ཕ་རོལ་གྱི་སེམས་ཤེས་པའི་མངོན་ཤེས་ཡིན་ནོ། །སྐབས་ཁ་ཅིག་ཏུ་གྲངས་ཀྱི་སྤྱི་དབང་གིས་ཐམས་ཅད་འདུས་པ་ཤེས་པ་ཞེས་བྱ་བའི་གྲངས་ལྔ་ཚོགས་སུ་སྦྱར་བར་ཡང་འགྱུར་ཏེ་ཤེས་པ་ལྔ་ཡང་བཞིར་བསྡུའོ། །གསུམ་པ་ནི། ཐམས་ཅད་མཉམ་ཉིད། ཅེས་པ་ནས། ལྔར་སྣང་བའོ། །ཞེས་པའི་བར་གྱིས་བསྟན་ཏེ། སྔགས་ཀྱི་སྤྱོད་པའི་རང་བཞིན་ལྔ་ཇི་ལྟ་བུ་ཞེ་ན། འཁོར་བའི་དངོས་པོ་བཞི་ལ་སོགས་པ་ཐམས་ཅད་བཟང་ངན་སྤོང་ལེན་མེད་པར་མཉམ་པ་ཉིད་དུ་གནས་པའི་གཞི་དང་། ཡེ་ནས་མ་བཅོས་པར་དེ་བཞིན་ཉིད་ཡིན་པའི་ལྟ་བའི་དོན་བརྗོད་པའི་ཕྱིར་དང་། ཡང་ན། མཚན་བཅས་དང་མཚན་མ་མེད་པའི་དེ་བཞིན་ཉིད་ལ་གནས་པའི་ཏིང་ངེ་འཛིན་དང་། ཞེས་ཀྱང་གསུང་ལ། གོང་གི་ཐབས་དེ་དག་གི་སྒོ་ནས་བདག་གཞན་གྱི་དོན་དུ་གཉེར་བའི་མཆོག་དང་ཐུན་མོང་གི་བསྒྲུབ་པའི་བྱེ་བྲག་རྣམས་དང་། སྤྱད་བྱ་དེ་དག་འགྲོ་དོན་དུ་སྤྱད་པར་བྱ་བ་ལས་མི་འདའ་བའི་དམ་ཚིག་མི་འགྱུར་བར་བྱིན་གྱིས་རློབས་པ་དང་། དབང་བསྒྱུར་བ་དང་ཐབས་ཀྱི་སྤྱོད་པ་ལ་སོགས་པ འི་སྤྱོད་པ་རྣམས་དང་། ལོག་སྲེད་ཅན་ལ་སོགས་པ་དང་ཐེག་པ་རྣམས་ཀྱི་སྤྱོད་པ་ཡོད་དོ་ཅོག་དང་མཐུན་པས་དོན་བྱ་བ་དམ་རྫས་ལྔ་ལ་སོགས་པའི་ཡོ་བྱད་དང་། གསང་སྔགས་ཀྱི་སྤྱོད་པའི་རང་བཞིན་རྣམ་པ་ལྔར་སྣང་བ་ཉིད་ནི་སྤྱིར་གསང་བ་ནང་པ། ཁྱད་པར་དུ་ཡང་རྒྱུད་འདི་ལས་བཤད་པའོ། །བཞི་པ་ནི། གང་མཁས་ཆེ་དང་། ཞེས་པ་ནས། བདེར་འཇུག་པའོ། །ཞེས་པའི་བར་གྱིས་བསྟན་ཏེ། ཐབས་རྣམ་པ་ལྔ་བསྟན་པའི་ཕྱིར། ཐབས་ཀྱི་དངོས་པོ་རྣམས་ལ་གང་ཕྱིན་ཅི་ལོག་གི་སྤྱོད་པས་ཀྱང་གདུལ་བྱ་ཆུད་མི་ཟ་བར་དོན་ལ་གཞུག་པས་ཐབས་མཁས་པ་དང་། ཉོན་མོངས་པ་ལྔ་དང་འདོད་ཡོན་ལྔ་དང་མཚམས་མེད་པ་ལྔ་ཡང་བྱང་ཆུབ་ཀྱི་ལམ་དུ་སློང་བས་ཐབས་ཤིན་ཏུ་ཆེ་བ་དང་། གདུལ་བྱའི་གྲངས་དང་མཐུན་པར་གདུལ་ཐབས་ཀྱི་སྒོ་བསམ་གྱིས་མི་ཁྱབ་པས་ཐབས་མང་བ་དང་། མཐས་གཏུག་པའི་ཆོས་ཐམས་ཅད་ཐབས་སུ་མ་གྱུར་པ་མེད་པས་གང་ཡང་མི་སྤང་བར་མཐའ་ལ་ཐུག་པ་མེད་པས་ཐབས་ཡས་པ་དང་། གསང་སྔགས་ཀྱི་སྒོར་མ་ཤོང་བ་དང་མི་སྤྱང་པ་མེད་པར་ཐབས་སུ་གྱུར་པས་ཐབས་ཡངས་པ་དང་ལྔའོ། །ཐབས་ཀྱི་བཤད་སྦྱར་ལྔ་ནི། གང་དུག་སྨན་དུ་བསྒྱུར་བ་ལྟར་འཁོར་བ་ཆོས་ཉིད་དང་ཉོན་མོངས་པ་ཉིད་ཡེ་ཤེས་སུ་བསྒྱུར་ནས་གྲོལ་བར་བྱེད་པས་ཐབས་ལ་མཁས་པར་ངེས་པ་དང་། གང་ལོག་སྲེད་ཅན་རྣམས་ཀྱང་ཡང་དག་པ་ལ་བཙུད་དེ་གདུལ་བྱའི་བློ་གང་ཡང་ཐུགས་རྗེས་མ་ཟིན་པ་མེད་པས་ཐབས་རླབས་ཆེན་པོ་ཡིན་པར་ངེས་པ་དང་། གདུལ་བྱའི་གྲངས་ལྟར་ཐབས་ཀྱི་སྒོ་བསམ་གྱིས་མི་ཁྱབ་པ་མང་པོ་ཅིར་ཡང་སྟོན་ཏེ་འདུལ་བར་བྱེད་པས་ཐབས་མང་བར་ངེས་པ་དང་། ཐབས་མཐའ་མེད་པ་ཀུན་ཤོང་བས་ནམ་མཁའི་མཐས་གཏུག་པའི་ཐབས་གང་ཡང་མ་འདུས་པ་མེད་པས་ཐབས་ཡས་པར་ངེས་པ་དང་། འཇིག་རྟེན་པ་དང་ལོག་སྲེད་ཅན་དང་ཐེག་པ་ཀུན་གྱི་སྤྱོད་པ་གང་ཡང་མི་སྤོང་བར་ཀུན་དང་མཐུན་པར་དོན་སྤྱོད་དེ་ཡང་དག་པའི་ལམ་ལ་བདེར་ཞེས་བདེ་བར་འཇུག་པས་ན་ཐབས་ཡངས་པར་ངེས་པའོ། །དེ་ལྟར་ཐབས་དེ་དག་གིས་གཞན་དོན་ལ་བདེ་བླག་ཏུ་འཇུག་པར་བྱེད་པས་གདུལ་བྱ་སྣོད་དུ་གྱུར་པ་ལ་ཐབས་ཆེན་མཆོག་གི་ཐེག་པར་ཡང་ཤིན་ཏུ་ངེས་པར་འགྱུར་རོ། །ལྔ་པ་ནི། བཅོམ་དང་ཞི་དང་། ཞེས་པ་ནས། ལས་བཞིའོ། །ཞེས་པའི་བར་གྱིས་བསྟན་ཏེ། ཕྲིན་ལས་རྣམ་བཞི་བསྟན་པ་ནི། དྲག་པོའི་ཕྲིན་ལས་ཀྱིས་གདུལ་དཀའ་གཞོམ་ཞིང་མཚན་མའི་རྟོག་པ་བཅོམ་པ་དང་། ཞི་བའི་ཕྲིན་ལས་ཀྱིས་གདུག་པ་ཅན་ལྷན་ནེར་འགྱུར་ཞིང་སྤྲོས་པའི་མཚན་མ་ཞི་བ་དང་། རྒྱས་པའི་ཕྲིན་ལས་ཀྱིས་ཚེ་དང་བསོད་ནམས་དཔལ་དང་གཟི་བརྗིད་མཐའ་ཡས་པར་འཕེལ་ཞིང་། ཤེས་བྱ་ལ་ཡེ་ཤེས་རྒྱས་པར་འགྱུར་བ་དང་། དབང་གི་ཕྲིན་ལས་ཀྱིས་རིལ་བདག་གི་བར་འགྱུར་ཞིང་དེ་ཁོ་ན་ཉིད་ཀྱི་ངང་དུ་འཁོར་འདས་ཐམས་ཅད་ཆུབ་པར་འདུས་པ་སྟེ། དེ་དག་ནི་ཐབས་དང་དོན་གྱི་ལས་རྣམ་པ་བཞིའོ། །དེ་ཡང་སྦྱིན་སྲེག་དང་རོ་སྲེག་ལྟ་བུར་ཡང་སྦྱར་བར་བྱའོ། །དེ་ལའང་ཆགས་གནས་འཇིག་སྟོངས་ལྟ་བུ་རང་བཞིན་གྱི་ལས་བཞི་དང་། སྤྱོད་པ་རྣལ་འབྱོར་པས་གང་དགོས་ཀྱི་ལས་བཞི་ལྟ་བུ་དང་། རང་སྣང་གི་མཛད་པ་འབྲས་བུའི་ལས་བཞི་རྣམས་ལས་འདིར་འབྲས་བུ་ཐུགས་རྗེའི་ལས་བཞིའོ། །གསུམ་པ་ནི། གང་དུ་སྦྱོར་བའི། ཞེས་པ་ནས། རྫོགས་པ་ཡིན། །ཞེས་པའི་བར་གྱིས་བསྟན་ཏེ། སྐབས་གང་ཞིག་ཏུ་བདག་དང་གཞན་གྱི་དོན་ལ་སྦྱོར་བའི་ཡན་ལག་དྲུག་ཅུ་རྩ་གཅིག་འདིས། དོན་དང་འབྲས་བུ་ལ་སྦྱོར་བའི་ལམ་གྱི་ཡན་ལག་ཐམས་ཅད་ངེས་པར་ཚང་ཞིང་རྫོགས་ནས་ཡང་དག་པར་འདུས་པ་ཡིན་ཏེ། དེ་ལ་གཞན་དོན་དུ་བཞི་ཚོ་གསུམ་དང་། ལྔ་ཚོ་གསུམ་གྱི་དབང་དུ་ནི་བདག་དོན་དང་བསྡོམས་པས་ལྔ་བཅུ་རྩ་དགུ། བདག་གཞན་གྱི་དོན་གཉིས་དང་དྲུག་ཅུ་རྩ་གཅིག་གོ། །རིམས་སུ་འཇུག་པ་དང་། རྒྱུད་མ་ཧཱ་ཡོ་གའི་རྐྱེན་བཤད་པ་སྟེ། སྔར་བཤད་པའི་རྗེས་བསྙགས་ན་ཤེས་པའང་ལྔར་འགྱུར་ཏེ། བཞི་ཕྲག་བཅུ་དང་། ལྔ་ཕྲག་བཞི་དང་དྲུག་ཅུ། རྩ་བ་ངེས་པར་སྦྱོར་བ་ཉིད་དང་དྲུག་ཅུ་རྩ་གཅིག་གོ། །འདི་ནི་གཞུང་གི་དེ་ལྟར་སྣང་ངོ་། །གསུམ་པ་འབྱེད་པའི་ལྡེའུ་མིག་གིས་ཞབས་བསྡུ་བ་ནི། ལང་ཀའི། ཞེས་པ་ནས། ཆུད་པར་གྱུར་ཏོ། །ཞེས་པའི་བར་གྱིས་བསྟན་ཏེ། ལང་ཀའི་བདག་པོ། ཞེས་བོས་ནས། དེ་དག་ནི་ཡན་ལག་ཡིན་ཏེ། ཡན་ལག་དྲུག་པོ་དེས་ངེས་པའི་གསང་སྒོའི་གང་ལྟར་བརྗོད་པ་ཐམས་ཅད་ལེགས་པར་ཁྲོལ་ནས་རྣམ་པར་དབྱེ་ཞིང་གསལ་བར་འབྱེད་པར་ཤེས་པར་བྱའོ། །དེ་སྐད་ཅེས་སྟོན་པ་གསང་བ་པའི་བདག་པོས་སྨྲས་པས། དམན་པའི་ལུས་ཀྱི་སེམས་དཔའ་རྣམས་ཀྱིས་ཆོས་ཐམས་ཅད་ཁོང་དུ་ཡོངས་སུ་ཆུད་པར་གྱུར་ཏོ། །ལེའུའི་མཚན་ནི། སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། བདག་དོན་དུ་འཇུག་པ་དང་གཞན་དོན་བྱེད་པའི་ཐབས་ཀྱི་ཡན་ལག་གི་སྦྱོར་བ་ལས། ཐབས་ཐམས་ཅད་འབྲེལ་བ་གཉིས་ཀྱིས་འབྲེལ་བར་བསྟན་ཏེ་རྣམ་པར་འགྲེལ་བའི་དོན་གྱི་ཚོམས་བསྟན་པའི་ལེའུ་སྟེ་ལྔ་བཅུ་རྩ་གཉིས་པ་ཉིད་གསལ་བར་བཀྲོལ་ཏེ་བཤད་པའོ།། །།གཉིས་པ་དགྲོལ་བའི་ལྡེའུ་མིག་མདོ་བཞི་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། མཇུག་བསྡུ་བའོ། །དང་པོ་ནི། དེ་ནས་ཡང་། ཞེས་པ་ནས། འབྱུང་བ་མེད་པའོ། །ཞེས་པའི་བར་གྱིས་བསྟན་ཏེ། ལེའུ་འདིས་ངེས་དོན་སྟོན་ནོ། །ལྡེའུ་མིག་དང་པོའི་དོན་རྣལ་འབྱོར་ཐ་མའི་རྐྱེན་རྫོགས་པ་སྟེ་འཆད་པའི་ལྡེའུ་མིག་གཉིས་ཡན་ལག་དང་བཅས་པའང་རྣལ་འབྱོར་དབུ་མའམ་ལམ་གྱི་རྣལ་འབྱོར་རོ། །ལྡེའུ་མིག་གཉིས་པ་གཅིག་ཆར་བའི་ཡུལ་རང་བཞིན་ལྟ་བའི་ཚིག་བཤད་པ་ལ་འཇུག་པའི་ཕྱིར། དང་པོ་རྫོགས་པ་དེ་ནས་ཡང་ལྡེའུ་མིག་བར་པ་ཞུ་བའི་ཕྱིར་སྡུད་པ་པོ་ལང་ཀའི་བདག་པོ་དེས། སྟོན་པ་གསང་བ་པའི་བདག་པོ་ལ་ཞུ་བ་མི་མཐུན་པ་ལེའུ་བཞི་བཅུ་བདུན་པ་ལས་གསུངས་པའི་ལྡེའུ་མིག་གི་དོན་ལ་དྲི་བ་དྲིས་པ། ཀྱེ་གསང་བ་པའི་བདག་པོ། གང་ལེའུ་དེ་ཉིད་ལས་གང་གི་ཡན་ལག་དྲུག་གི་ཡང་རྩ་བ་གསང་སྔགས་ཐུན་མོང་མ་ཡིན་པའི་མདོ་བཞི་ཡིས་ཡོངས་སུ་དགྲོལ་བ་ཞེས་བགྱི་བར་དཀའ་སྩལ་པ་དེ་ཉིད་ཇི་ལྟར་ཤེས་པར་བྱ་བ་ལགས། ཞེས་དེ་སྐད་ཅེས་དགྲོལ་ཐབས་དྲིས་པ་ལས། སྟོན་པ་གསང་བ་པའི་བདག་པོས་ལན་དུ་བཀའ་སྩལ་ཏེ་སྨྲས་པ། ལང་ཀའི་བདག་པོ། ཞེས་བོས་ནས་ལེའུ་ཞེ་དྲུག་པ་དང་ཞེ་བདུན་པའི་སྐབས་སུ་ནི་ཚིག་ཐམས་ཅད་ཀྱི་དོན་མདོ་བཞིར་བསྡུས་པ་དེ་ཉིད་དགྲོལ་བའི་ཐབས་ནི་འདི་ལྟར། གནས་གང་དུ་བརྒྱུད་ཚུལ་གང་ལྟར་བརྗོད་པ་དང་བཀའ་སྩལ་བའི་གཏན་ཚིགས་དང་ཐབས་ཐམས་ཅད་མདོ་བཞི་པོ་འདི་དག་ཁོ་ནར་ཟད་ཅིང་འདུས་པས་དེ་ལས་གཞན་མེད་པ་ཉིད་དོ། །ལང་ཀའི་བདག་པོ། བཞི་གང་ཞེ་ན། གྲངས་ཉེ་བར་བསྟན་པ་འདི་ལྟ་སྟེ། ཟག་བཅས་ཀྱི་སྐབས་སུ་ཆོས་ཀྱི་དངོས་པོ་ཇི་ལྟ་བུ་གང་ཐོས་པར་གྱུར་པས་འཚངས་རྒྱ་ཞིང་ངེས་པར་འབྱུང་བ་ཡི་མདོ་དང་། ཟག་མེད་མཐོང་ལམ་ཡན་ཆད་ལམ་པ་གང་ཞིག་གིས་དོན་ཇི་ལྟ་བར་མཐོང་བའམ་རྟོགས་པས་འཚངས་རྒྱ་ཞིང་ངེས་པར་འབྱུང་བ་ཡི་མདོ་དང་། རྣལ་འབྱོར་གྱི་དབང་ཕྱུག་གམ་རྫོགས་པའི་སངས་རྒྱས་གང་སུ་ཞིག་གིས་དེ་དོན་མངོན་སུམ་དུ་གྱུར་ཏེ་ཡོངས་སུ་ཆུབ་པར་ངེས་པར་འབྱུང་བ་ཡི་མདོ་དང་། གཞི་དངོས་པོའི་གནས་ལུགས་ལ་གང་དུས་ཀྱི་དངོས་པོ་ཐམས་ཅད་ནས་གང་ཐམས་ཅད་དུ་ངེས་པར་འབྱུང་ཞིང་འབྲས་བུ་དམ་པ་ཐོབ་པར་བྱར་ཡང་མེད་པ་ཡི་མདོའོ། །གཉིས་པ་ལ་བཞི་སྟེ། ཐོས་པས་ངེས་པར་འབྱུང་བའི་མདོ་བཤད་པ། མཐོང་བས་ངེས་པར་འབྱུང་བའི་མདོ་བསྟན་པ། མངོན་སུམ་པར་ངེས་པར་འབྱུང་བའི་མདོ་བཤད་པ། ངེས་པར་འབྱུང་བ་མེད་པའི་མདོ་བཤད་པའོ། །དང་པོ་ནི། ལང་ཀའི། ཞེས་པ་ནས། དེ་བཞིན་ཉིད་དུ་ཆུབ། །ཅེས་པའི་བར་གྱིས་བསྟན་ཏེ། དང་པོ་ཐོས་པའི་མདོ་བསྟན་པའི་ཕྱིར། ལང་ཀའི་བདག་པོ་ཞེས་བོས་ནས། དེ་ཡང་བཞི་ལ་སྙེགས་ཏེ་གང་ཐོས་པས་ངེས་པར་འབྱུང་བའི་མདོ་བཀར་ནས་སྟོན་པ་ནི། འཁོར་འདས་ཀྱི་ཆོས་སམ་དངོས་པོ་གཉིས་པ་ཀུན་གྱི་རང་བཞིན་ཡེ་ནས་མ་བཅོས་པར་ལྷུན་གྱིས་གྲུབ་པའི་དེ་བཞིན་ཉིད་བྱང་ཆུབ་ཀྱི་སྙིང་པོ་ཉིད་ལས་ཡོན་ཏན་གྱི་ཁྱད་པར་ཤེས་བྱའི་མདོ་བཞིར་བསྟན་པའི་དོན་གྱི་ངོ་བོ་གང་ཡིན་པ་དེ་ཉིད། རྣལ་འབྱོར་པ་གང་སུ་ཞིག་གིས་མ་ནོར་བར་ཐོས་ཏེ་བརྡ་འཇལ་བ་གང་གི་དུས་དེ་ཁོ་ནའི་སྐད་ཅིག་གི་ཚེ་ཉིད་དུ། ཆོས་སོ་ཅོག་ཐམས་ཅད་མ་སྤངས་བྲལ་ཏེ་སྐྱེ་བ་མེད་པར་རྟོགས་པས་དངོས་པོ་མེད་པར་སངས་ཤིང་ཡེ་ཤེས་ཆེན་པོ་ཀུན་ལ་སྣུམས་པས་ཁྱབ་གདལ་དུ་རྒྱས་པའི་དོན་དེ་ཤེས་ནས་དེ་བཞིན་ཉིད་ཁོང་དུ་ཆུབ་པས་འཁོར་བ་མ་སྤངས་པར་ངེས་པར་འབྱུང་བའི་ཕྱིར། གཅིག་ཤེས་ན་ཆོས་ཐམས་ཅད་སྐྱེ་བ་མེད་པར་ཤེས་པའམ་ཐོས་པ་ཞེས་བྱའོ། །དེ་ཡང་ཅིག་ཆར་དུ་རིམ་གྱིས་པའི་དབང་གིས། སྐད་ཅིག་གམ། ཚེ་གཅིག་དང་། དེར་མ་ཟད། གྲངས་མེད་དམ། གསུམ་མམ་སོ་གསུམ་ལྟ་བུ་ཡང་ཡིན་ནོ། །དེ་ཉིད་ཆོས་ཀྱི་དབྱིངས་སུ་སངས་རྒྱས་པའི་ཆེ་བའང་ཡིན་ནོ། །གཉིས་པ་ནི། ལང་ཀའི། ཞེས་པ་ནས། ཉིད་དེར་ཀུན་སངས་རྒྱས། །ཞེས་པའི་བར་གྱིས་བསྟན་ཏེ། རྟོགས་པ་སྒོམ་པའི་མདོ་བསྟན་པའི་ཕྱིར། ལང་ཀའི་བདག་པོ། ཞེས་བོས་ནས། མཐོང་ལམ་ཡན་ཆད་ཟག་མེད་ཀྱི་ལམ་པ་གང་གིས་སྐྱེ་བ་མེད་པའི་དོན་མཐོང་ཞིང་རྟོགས་པས་ངེས་པར་འབྱུང་བ་ཡང་དག་པར་འགྲུབ་པའི་མདོ་ཉེ་བར་བསྟན་པ་ནི་འདི་ལྟ་སྟེ། རྣལ་འབྱོར་པ་གང་གིས་གསང་བའི་གཞུང་ལ་བརྟེན་ནས་སྐྱེ་བ་མེད་པའི་ཆོས་ཉིད་དེ་བཞིན་ཉིད་ཀྱི་དོན་དེ་ཉིད་ལྷག་པའི་ཤེས་རབ་ཀྱིས་མཐོང་བ་མེད་པར་རྟོགས་ནས། ཅིར་ཡང་མ་མཐོང་བར་མཐོང་བས་སྣང་སྲིད་སྣོད་བཅུད་དུ་ཞེན་ཅིང་སྣང་བའི་མཐར་འཛིན་ཐམས་ཅད་མ་བཀོལ་བར་དེ་བཞིན་ཉིད་དུ་ཡོངས་སུ་དག་སྟེ་དྲི་མ་མེད་པར་གསལ་བ་ལ། ལས་དང་སྤྱོད་པ་དང་མཚན་མ་གང་ལའང་འཇིགས་ཤིང་ཉམ་ང་བ་ཡོད་པ་མ་ཡིན་ཏེ། ཇི་ལྟར་སྤྱད་ཀྱང་འཛིན་པ་དང་བྲལ་བས་འཁོར་བར་ལྟུང་བའི་དོགས་པ་མེད་པ་ཉིད་དེ། དེ་ཅིའི་ཕྱིར་ཞེ་ན། ཡེ་ཤེས་དེ་བཞིན་ཉིད་དེར་འཁོར་བའི་དངོས་པོ་ཀུན་བདེ་ལྡན་གྱི་ཞིང་དུ་སངས་རྒྱས་པའི་ཕྱིར་རོ། །དེ་ནི་དེ་ཉིད་ཡིན་པ་དང་བདག་ཉིད་ཆེན་པོར་སངས་རྒྱས་པའི་ཆེ་བའང་ཡིན་ནོ། །གསུམ་པ་ནི། ལང་ཀའི། ཞེས་པ་ནས། མངོན་སུམ་སངས་རྒྱས་ཡིན། །ཞེས་པའི་བར་གྱིས་བསྟན་ཏེ། བསྒོམས་པས་མངོན་དུ་གྱུར་པའི་མདོར་བསྟན་པ་ནི། ལང་ཀའི་བདག་པོ། དེ་བཞིན་གཤེགས་པ་གང་གིས་མངོན་སུམ་པར་སངས་རྒྱས་ཀྱི་སར་ངེས་པར་འབྱུང་བ་ཉིད་བཤད་པའི་རྗེས་སུ་བསྙད་པ་ནི་འདི་ལྟ་སྟེ། གང་སུ་ཞིག་གིས་མཐའ་གཉིས་དམིགས་སུ་མེད་པས་སྟོང་པ་ཉིད་ཆེན་པོའི་དོན་དེ་གོ་ཞིང་རང་རིག་བདེ་བ་ཆེན་པོར་གསལ་བར་ཤེས་པ་གང་གི་དུས་དེར་ནི་ཆོས་ཐམས་ཅད་ཀུན་དབང་པོའི་མངོན་སུམ་མམ་རང་རིག་པའི་མངོན་སུམ་དུ། ཇི་ལྟ་བ་དེ་ཁོ་ན་ཉིད་ཀྱི་སྟོང་པ་ཉིད་དུ་རང་ཤར་བར་ངེས་ཏེ་རང་གི་མཚན་ཉིད་རིག་པར་གསལ་བ་ལ་དམིགས་པའི་ཡུལ་དུ་བྱེད་པའི་ཕྲ་བའི་རྟོག་པའང་ཟད་ན་རགས་པ་དང་བྲལ་བ་ལྟ་ཅི་སྨོས་ཏེ། དེ་ལྟ་བུའི་སྐྱེས་ཆེན་ལ་རེ་དོགས་ཐམས་ཅད་དང་བྲལ་བའི་ཕྱིར་བག་ཚ་བ་གང་ཡང་མེད་དོ། །དེ་ལྟར་གསལ་བས་ཅིར་འགྱུར་ན། བདག་དང་ཆོས་ཐམས་ཅད་སྐྱེ་བ་མེད་པའི་རང་བཞིན་རྣམ་པའི་མཆོག་ཀུན་ལྡན་པའི་དེ་ཁོ་ན་ཉིད་ཀྱི་ངོ་བོར་མ་འདྲེས་ཡོངས་རྫོགས་སུ་མངོན་སུམ་པར་སངས་རྒྱས་པ་ཡིན་པས་རང་གསལ་ཉི་མའི་སྙིང་པོ་བཞིན་དུ་རྟོག་སྒྲིབ་བཙལ་གྱིས་མི་རྙེད་པ་ཉིད་དོ། །དེ་ཉིད་ཁོ་ན་མངོན་པར་རྫོགས་པར་སངས་རྒྱས་པ་ཉིད་དེ། ཨ་ནུའི་རང་ལུགས་སུ་རང་རིག་པའི་མངོན་སུམ་དུ་བཞེད་ཀྱང་། རྫོགས་པ་ཆེན་པོ་ལྟར་ན་དབང་པོའི་མངོན་སུམ་དུ་ཡང་ངེས་པར་བཞེད་དོ། །དེས་ན་བསམ་གཏན་མིག་སྒྲོན་ལས། རྣམ་གཅིག་ཏུ་དོན་གྱི་ངོ་བོ་ལ་ཡང་ཁྱད་པར་ཡོད་དེ། སྔགས་ཀྱི་དེ་བཞིན་ཉིད་ནི་རང་རིག་གཉིས་མེད་ཀུན་ཏུ་འོད་གསལ་བ་ཡིན་ལ། རྫོགས་ཆེན་ནི་ལྷུན་རྫོགས་དེ་བཞིན་ཉིད་མཐར་ཐུག་ཉིད་པས། གཉིས་མེད་ཆེན་པོ་དབྱེ་བ་མེད་པས་ཡེ་ཤེས་བླ་མའི་ས་ཡིན་པས་ཁྱད་པར་ཤིན་ཏུ་ཆེའོ། །ཞེས་གསུངས་པས་ཀྱང་གནད་གསལ་བར་ངེས་སོ། །དེ་ཉིད་མངོན་སུམ་པར་སངས་རྒྱས་པའི་ཆེ་བའང་ཡིན་ནོ། །དེ་ལྟར་མདོ་གསུམ་ནི་རང་རང་གི་སྐབས་ན་ཡེ་མཉམ་པའི་དོན་ཡོད་ཀྱང་རིམ་པས་མཐར་ཕྱིན་པའོ། །བཞི་པ་ནི། ལང་ཀའི། ཞེས་པ་ནས། དེ་ཉིད་ཁོ་ནའོ། །ཞེས་པའི་བར་གྱིས་བསྟན་ཏེ། མདོ་ཐ་མ་གང་ཞེ་ན། ལང་ཀའི་བདག་པོ། ཞེས་བོས་ནས། གཞིའི་གནས་ལུགས་དེ་ཉིད་ཡེ་སངས་རྒྱས་པའི་ཡེ་ཤེས་སུ་བསྟན་པས་དུས་གང་ནས་སྐབས་གང་དུའང་ངེས་པར་འབྱུང་བ་སངས་རྒྱས་པ་མེད་པར་མ་ཧཱ་ཡོ་ག་ཉིད་ལ་བཟླ་བ་ནི་འདི་ལྟ་སྟེ། དངོས་པོ་དང་སྟོང་པ་ཉིད་ཀྱི་ཆོས་ཐམས་ཅད། མཉམ་པ་ཆེན་པོ་མུ་མཐའ་མེད་པར་རིལ་གྱི་འབྱུང་གནས་སུ་གྱུར་པས་དེ་བཞིན་ཉིད་ཀྱི་དབྱིངས་སུ། ལམ་པས་བརྟགས་དཔྱད་ལས་བྱུང་བ་མ་ཡིན་པར་ཡེ་ཐོག་མ་མེད་པ་ནས་དེ་ཉིད་དུ་གྱུར་ཐེབས་ཏེ་རྣམ་རྟོག་གི་སེལ་མེད་པར་འབྲས་བུར་རང་གསལ་བའི་སངས་རྒྱས་འབའ་ཞིག་ལ་ད་གདོད་འཕྲལ་ལམ་གློ་བུར་དུ་རིག་པས་མངོན་སུམ་དུ་བཤད་པ་ལྟར་སངས་རྒྱས་སུ་གྱུར་ཏེ་ཞེན་མཐའ་དང་འབྲལ་དུ་ག་ལ་ཡོད་དེ་མེད་དོ། །དེ་བས་ན་གྲོང་ཁྱེར་གསུམ་ནི་ཡེ་ནས་བྱ་བཙལ་མེད་པར་མ་བཅོས་མ་བསླད་པའི་དེ་བཞིན་ཉིད་དེ་ཆོས་ཉིད་མ་ནོར་བའི་དེ་ཁོ་ན་ཉིད་དུ་ངེས་པ་ལས་སངས་རྒྱས་ཀྱི་བླ་དྭགས་ཉིད་དང་ཡེ་བྲལ་བའོ། །དེ་དག་ནི་འཚངས་རྒྱ་བར་འདོད་པའི་ཞེ་འདོད་དགག་པ་དང་། ངོ་བོ་དེ་ཁོ་ན་ཉིད་ལ་དགོངས་ཤིང་ལ་བཟླ་བའི་དགོས་པས་བསྟན་པ་སྟེ། ཀློང་རབ་འབྱམས་རྒྱལ་པོའི་རྒྱུད་ལས། དངོས་མེད་དེ་བཞིན་ཉིད་འདི་ལས། །ཆོས་རྣམས་མ་ལུས་འབྱུང་བའི་ཕྱིར། །འཁོར་འདས་གཉིས་ཀའི་གཞི་ཡིན་ཏེ། །དེ་ཡང་དབྱིངས་ཀྱི་རང་བཞིན་ཡིན། །རང་བཞིན་དེ་ལྟར་ཤེས་པས་ན། །ནམ་མཁའ་འོད་དུ་འབར་བ་བཞིན། །གཞི་ཤར་རང་གྲོལ་དོན་གྱི་གཏེར། །རང་བཞིན་གནས་པ་དགོངས་པའི་ཀློང་། །ཞེས་པ་ལ་སོགས་པ་ལྟར་ཤེས་པར་བྱའོ། །དེ་ཉིད་ནི་སངས་རྒྱས་མེད་པའི་ཆེ་བའང་ཡིན་ནོ། །དེ་དག་གིས་ནི་མདོ་བཞི་མངོན་དུ་བྱེད་པས་དགྲོལ་བར་འགྱུར་བའི་དོན་བསྟན་ཏོ། །གསུམ་པ་ནི། ལང་ཀའི། ཞེས་པ་ནས། ཆུབ་པར་གྱུར་ཏོ། །ཞེས་པའི་བར་གྱིས་བསྟན་ཏེ། ལང་ཀའི་བདག་པོ། ཞེས་བོས་ནས། བཤད་པ་དེ་དག་ནི་མདོ་སྟེ། སྟོན་པ་གང་གིས་འཁོར་གང་ལ་བརྒྱུད་ཚུལ་གང་ལྟར་བརྗོད་པའི་གཏན་ཚིགས་དང་ཐབས་བསྟན་པ་མཐའ་ཡས་པ་ཐམས་ཅད་མདོ་བཞི་པོ་དེ་དག་འབའ་ཞིག་ཁོ་ནར་ཟད་དེ། དེ་ལས་མེད་པས་ན་ཐམས་ཅད་འདུས་པས་མདོ་ཞེས་བརྗོད་པ་ཉིད་དོ། །དེ་དག་ནི་གདུལ་བྱ་གང་གི་ཞེན་འཛིན་གྱི་རྟོག་པས་མདུད་པ་རྣམ་པར་དགྲོལ་བ་སྟེ། ཆོས་ཐམས་ཅད་ཆོས་ཉིད་དུ་རྣམ་པར་འགྲོལ་ཞིང་དོན་ཟབ་པ་དང་རྒྱ་ཆེར་འགྲེལ་ཏེ་བསྟན་པ་ཉིད་དུ་ཤེས་པར་བྱའོ། །སྟོན་པ་གསང་བ་པའི་བདག་པོས་དེ་སྐད་ཅེས་སྨྲས་ཏེ་བཀའ་སྩལ་པས། དམན་པའི་ལུས་ཀྱི་སེམས་དཔའ་དམ་པའི་རིགས་ཅན་རྣམས། ཕྱོགས་ཐམས་ཅད་གསལ་བར་ཡོངས་སུ་ཆུབ་པར་གྱུར་ཏོ། །ལེའུའི་མཚན་ནི་སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། མདོ་བཞིའི་དོན་རྒྱ་ཆེར་འགྲེལ་ཏེ་བསྟན་པའི་ལེའུ་སྟེ། ལྔ་བཅུ་རྩ་གསུམ་པ་ཉིད་རྣམ་པར་བཤད་པའོ།། །།གསུམ་པ་འབྱིན་པའི་ལྡེའུ་མིག་རྩ་བ་གསུམ་བསྟན་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི། དེ་ནས་ཡང་། ཞེས་པ་ནས། ངེས་པའོ། །ཞེས་པའི་བར་གྱིས་བསྟན་ཏེ། ལེའུ་ཞེ་བདུན་པའི་ལྡེའུ་མིག་གསུམ་པ་བཤད་དེ་རྗེས་སུ་འགྲེལ་བའི་ཕྱིར། མདོ་བཞི་བསྟན་མ་ཐག་པ་དེ་ནས་ཡང་གཅིག་ཆར་བའི་ཡུལ་ཆེན་པོ་རྩ་བ་གསུམ་དྲི་བ་མི་མཐུན་པ་དེ་ཉིད། སྡུད་པ་པོ་ལང་ཀའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས། སྟོན་པ་གསང་བ་པའི་བདག་པོ་དེ་ལ། ཞུས་ཏེ་རྩ་བའི་དྲི་བ་ཉིད་གཞན་དོན་དུ་ཡོངས་སུ་དྲིས་པ། ཀྱེ་སྟོན་པ་གསང་བ་པའི་བདག་པོ། ཞེས་བོས་ནས། ཆོས་ཐམས་ཅད་ཀྱི་སྙིང་པོ་གསང་སྔགས་ནང་པ་གང་གི་རྩ་བ་ནི་གང་། དེ་ཉིད་མཐར་ངེས་པར་ཕྱིན་པར་བྱེད་པའི་ངོ་བོ་མ་ནོར་བར་གསལ་བར་མངོན་དུ་འབྱིན་པ་ནི་གང་ཇི་ལྟ་བུ་ཞིག་ཡིན་པར། གསང་བ་པའི་བདག་པོ་རང་གི་དོན་དུ་བཤད་པའི་གོ་དབྱེ་བར་གསོལ། སྨྲ་བའི་སེང་གེ་གཞན་དོན་དུ་ཤིན་ཏུ་གོ་དབྱེ་བར་གསོལ། དེ་སྐད་ཅེས་སྨྲས་ཏེ་གསོལ་བ་བཏབ་པ་ལས། སྟོན་པ་གསང་བ་པའི་མངའ་བདག་ཆེན་པོས་ལན་སྨྲས་པ། ལང་ཀའི་བདག་པོ། ཞེས་བོས་ནས། གང་གི་རྩ་བ་དྲིས་པ་ལ་ལེགས་པར་གནང་བ་གཉིས་ཏེ། དྲི་བ་ཡང་གཉིས་ཀྱི་ཕྱིར། དེ་ལྟར་རྩ་བ་དྲི་བ་དེ་ནི་རང་དོན་དུའང་ལེགས་སོ། །ངེས་པར་འབྱིན་པ་དྲི་བ་དེ་ནི་གཞན་དོན་དུའང་ཤིན་ཏུ་རབ་ཏུ་ལེགས་སོ། །དེས་ན་དེ་ཉིད་ཉེ་བར་བསྟན་པ་འདི་ལྟ་སྟེ། རྩ་བ་ནི། མེ་ལོང་མཚོན་དཔེའི་རྩ་བ་དང་། མི་མཐུན་པ་སྐྱོན་གྱི་རྩ་བ་དང་། ངེས་པ་སེམས་ཉིད་དོན་གྱི་རྩ་བའོ། །ཞེས་ལེའུ་ཞེ་བདུན་པའི་རྩ་བ་གསུམ་གཏན་ལ་འབེབས་ཤིང་ཉམས་སུ་ལེན་པའི་རྩ་བ་གསུམ་གྱི་གྲངས་ཏེ། ང་བཞི་པ་དང་། ང་ལྔ་པ་དང་། ང་དྲུག་པའི་ལུས་བསྟན་པའོ། །གཉིས་པ་ལ་གསུམ་སྟེ། མཚོན་པ་དཔེའི་རྩ་བ་བཤད་པ། མི་མཐུན་པ་སྐྱོན་གྱི་རྩ་བ་བསྟན་པ། དོན་ངེས་པའི་རྩ་བ་བཤད་པའོ། །དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི། ལང་ཀའི། ཞེས་པ་ནས། དེ་ལྟར་བལྟའོ། །ཞེས་པའི་བར་གྱིས་བསྟན་ཏེ། ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །ལང་ཀའི་བདག་པོ། ཞེས་བོས་ནས། ལེའུ་འདིས་དཔེའི་རྩ་བ་ལ་བརྟེན་པའི་སྒོ་ནས་དོན་གསལ་བར་བྱེད་པའང་། མེ་ལོང་ནི་དཔེ་སྟེ། འདི་ལྟར་ནམ་མཁའི་ངོ་བོ་ཆོས་དུ་དང་ལྡན་པ་ལྟར་དེ་ཁོ་ན་ཉིད་དང་ཡང་མཐུན་པའི་དཔེ་ཉེ་བར་བཟུང་ནས་བསྟན་པ་སྟེ། ནམ་མཁའ་ལ་ཆོས་ཇི་ལྟ་བར་ཡོད་པ་དེ་ལྟར། དམ་པ་གང་གིས་གསང་བའི་དབྱིངས་དེ་ཁོ་ན་ཉིད་ངེས་པ་ལའང་དེ་ལྟར་ཡོད་པར་སྦྱར་ཏེ་བལྟ་ཞིང་རྟོགས་པར་བྱ་བའོ། །གཉིས་པ་ལ་བཞི་སྟེ། ནམ་མཁའ་མཐའ་དང་བྲལ་བ་བཞིན་ཆོས་ཉིད་བསྟན་པ། ནམ་མཁའ་མི་འགྱུར་ཞིང་མ་བཅོས་པ་བཞིན་ཆོས་ཉིད་བསྟན་པ། ནམ་མཁའ་མ་བྱས་ལ་གཉེན་པོ་མེད་པ་བཞིན་ཆོས་ཉིད་བསྟན་པ། དཔེའི་སྒོ་ནས་དོན་མཐོང་ཚུལ་བཤད་པའོ། །དང་པོ་ནི། ལང་ཀའི། ཞེས་པ་ནས། མངོན་པར་འདུ་བྱེད་པ་མེད་པ་ཡིན་ནོ། །ཞེས་པའི་བར་གྱིས་བསྟན་ཏེ། དཔེའི་ཆོས་བསྟན་པའི་ཕྱིར། ལང་ཀའི་བདག་པོ། ཞེས་བོས་ནས། དེ་ལ་དཔེའི་མེ་ལོང་ནམ་མཁའ་གང་ཞེ་ན། དེ་ཉིད་ཉེ་བར་བསྟན་པ་འདི་ལྟ་སྟེ། ཞེས་མཚོན་དཔེའི་རྣམ་གྲངས་སུམ་ཅུ་སོ་བཞི་བཤད་པ་འདི་རྣམས་དང་མཚོན་བྱའི་དོན་སྦྱར་ནས་ཤེས་པར་བྱ་སྟེ། ནམ་མཁའ་ཞེས་བརྗོད་པ་ཐམས་ཅད་རང་བཞིན་སྟོང་པར་གཅིག་པ་ལྟར་གསང་བའི་དབྱིངས་དེ་ཁོ་ན་ཉིད་ཇི་བཞིན་པ་དེ་ཡང་རྣམ་གྲངས་ཇི་སྙེད་དུ་བརྗོད་ཀྱང་། རང་བཞིན་མཐའ་ཐམས་ཅད་ལས་གྲོལ་བར་གཅིག་པ་དང་། ཆར་རྡུལ་ལ་སོགས་པས་མི་གོས་པ་ལྟར། ལས་ཀྱི་བག་ཆགས་དང་དངོས་མཐའ་རིལ་གྱིས་མ་རིག་པས་མི་གོས་པ་དང་། ཆོས་ཅན་སྣ་ཚོགས་སྣང་བའི་གོ་འབྱེད་པ་ལྟར་འཁོར་བ་དང་མྱ་ངན་ལས་འདས་པའི་ཆོས་ཇི་སྙེད་པའི་གསལ་བྱེད་ཀྱི་རྒྱུ་ཡིན་པས་གོ་འབྱེད་པ་དང་། རྒྱུ་རྐྱེན་འདུས་པ་ལས་བྱུང་བ་མེད་པས་སྐྱེ་བ་མེད་པ་ལྟར། རང་གི་ངོ་བོ་གང་དུའང་སྣང་བ་མེད་པས་སྐྱེ་མེད་ཡིན་པ་དང་། གཉེན་པོས་འཇིག་པ་མེད་པ་ལྟར། སྲིད་གསུམ་ཆུ་ལྟར་འཁྲུག་སྟེ་འཁྲུལ་ཡང་བརླགས་པ་མེད་པ་དང་། གཟུགས་མེད་པས་དབྱིབས་འདི་འདྲར་བསྟན་དུ་མེད་པ་དང་། ཁ་དོག་མ་ངེས་པས་གཟུང་དུ་མེད་པ་ལྟར། བསམ་གྱིས་མི་ཁྱབ་པའི་དབྱིབས་དང་ཁ་དོག་ཅན་པས་རྣམ་པའི་དབྱིངས་ཁ་དོག་དང་བྲལ་བ་དང་། རྒྱུ་རྐྱེན་ལས་བྱས་པ་མ་ཡིན་པས་འདུས་མ་བྱས་པ་ལྟར། འཕྲལ་དུ་རྒྱུ་རྐྱེན་ལས་བྱས་པ་མ་ཡིན་པ་དང་། ནམ་མཁའ་ལ་ཡུལ་རང་གི་ངོ་བོ་གཟུང་བ་མེད་པ་དང་། དེ་ལྟར་འཛིན་པ་པོ་མེད་པ་ལྟར་དེ་ཁོ་ན་ཉིད་ཀྱང་རིལ་གཉིས་སུ་མེད་པའི་བྱང་ཆུབ་ཀྱི་སེམས་སྤྱོད་ཡུལ་དང་བྲལ་ཏེ་ཐ་སྙད་ལས་འདས་པ་ལ། གཟུང་འཛིན་གྱི་མཐའ་མེད་པ་དང་། དེ་བཞིན་དུ་མཐའ་ལ་ཐུག་པ་མེད་པ་དང་། དབུས་སུ་གཟུང་བ་མེད་པར་ལྟར། ཐམས་ཅད་དུ་མཉམ་ཞིང་གདལ་བར་གསལ་བ་དབུས་མཐའི་ཚད་བྲལ་བ་དང་། སྔ་མ་ལས་རྒྱ་ཁྱོན་དང་གྲངས་ཀྱི་འཕེལ་བ་མེད་པ་དང་ཕྱིས་དེ་ལས་ཆུང་ངུར་འགྲིབ་པ་མེད་པ་ལྟར། ཡེ་ནས་རྒྱུ་འབྲས་ལྷུན་གྱིས་གྲུབ་པའི་བདག་ཉིད་ལ་དབྲི་བསྣན་མེད་པའི་ཕྱིར་དང་། གནས་གཞན་ནས་གཞན་ཞིག་ཏུ་འགྲོ་བ་མེད་པ་དང་། སླར་འདིར་འོང་བ་མེད་པ་ལྟར། ཐམས་ཅད་རང་བྱུང་ཆེན་པོའི་ངོ་བོ་ལ་རྟེན་དང་བརྟེན་ཅན་གྱི་གནས་དང་ཕྱོགས་བྲལ་བའི་ཕྱིར་དང་། དཔེ་ནམ་མཁའ་ལ་ཕན་ཚུན་དུ་འབྱུང་བ་མེད་པས་གཡོ་བ་མེད་པ་ལྟར། དེ་བཞིན་ཉིད་ཀྱང་དངོས་པོ་གཉིས་པ་ཅིར་ཡང་སྣང་ཡང་དེ་ཉིད་ལས་མ་འདས་པའི་ཕྱིར་དང་། གཞན་དུ་བསྐྱོད་པས་འགུལ་བ་མེད་པ་ལྟར། ཐམས་ཅད་ལ་སོན་ཟིན་པའི་ཕྱིར་དང་། གང་ལའང་མ་ཞེན་པས་ཆགས་པ་མེད་པ་ལྟར། ཡུལ་ཇི་སྙེད་པའང་སེམས་ཀྱི་དེ་ཉིད་དུ་རང་གསལ་བ་ལ་ཞེན་པ་མེད་པ་དང་། རྟེན་དང་བྲལ་བས་གནས་པ་མེད་པ་ལྟར། མཚན་ཉིད་གང་དུའང་མི་ཟིན་པས་རྟེན་གནས་བྲལ་བ་དང་། རྐྱེན་གྱི་དངོས་པོས་འཇིག་པ་མེད་པ་ལྟར། མི་འགྱུར་བའི་ངོ་བོ་རྟག་པ་ཆེན་པོར་བཞུགས་པ་དང་། ཡང་ན། རྐྱེན་གྱིས་ནམ་མཁའི་དངོས་པོ་འཇིག་པ་མེད་པ། ཞེས་སྦྱར། ཞིག་ནས་ནམ་མཁའ་སྟོངས་པ་མེད་པ་ལྟར། ཅིར་ཡང་སྣང་བ་མི་འགོག་པ་དང་། སྔ་ཕྱི་མི་འདྲ་བར་འགྱུར་བ་མེད་པ་ལྟར། མཉམ་པ་ཆེན་པོ་སྐྱེ་འཇིག་དང་བྲལ་བས་མི་འདྲ་བ་ལས་མི་འདྲ་བར་སོང་བ་མེད་པ་དང་། འབྱུང་བ་གང་ལའང་ནམ་མཁས་མ་ཁྱབ་པ་མེད་པ་ལྟར། ཐ་སྙད་ཀྱི་ཆོས་སྣང་ཞིང་གྲགས་སོ་ཅོག་དེ་ཉིད་ཡིན་པས་ཀུན་ལ་གདལ་བ་དང་། ནམ་མཁའི་ངང་ལས་མི་སྣང་བ་མེད་པར་ཆོ་འཕྲུལ་ཅིར་ཡང་སྣང་བས་མི་འབྱུང་བ་མེད་པ་ལྟར། གསང་སྔགས་ཇི་བཞིན་པ་དེ་ཡང་བསམ་གྱིས་མི་ཁྱབ་པའི་ཆོས་ཐམས་ཅད་དུ་ཤར་བའི་ཕྱིར་དང་། ནམ་མཁའི་ངང་དུ་མ་འདུས་པ་མེད་པས་མ་ཆུབ་པ་མེད་པ་ལྟར། དངོས་པོ་གཉིས་པ་རིལ་དེར་བྱུང་ཐེབས་པའི་ཕྱིར་དང་། དུས་མཐར་གནས་ཀྱང་སྐྱོ་བ་མེད་པ་ལྟར། དུས་གསུམ་དུ་ཟླ་མེད་པར་བཞུགས་ཀྱང་དུབ་པ་མེད་པའི་ཕྱིར་དང་། ངོ་བོ་ཕྱིས་མི་སྣང་བར་འགྱུར་བ་མེད་པས་ནུབ་པ་མེད་པ་ལྟར། དབྱིངས་གཏིང་མཐའ་བྲལ་བ་ལ་འཕོ་འགྱུར་མེད་པའི་ཕྱིར་དང་། རང་གི་མཚན་ཉིད་ངེས་པར་གཟུང་དུ་མེད་པ་ལྟར་མཚན་ཉིད་ཐམས་ཅད་པ་ལ་རྣམ་པའི་མཚན་ཉིད་ཀུན་དང་བྲལ་བའི་ཕྱིར་དང་། སྐྱེད་བྱེད་མེད་པས་རྒྱུ་མེད་པ་དང་། སྨིན་པར་བྱེད་པའི་གྲོགས་མེད་པས་རྐྱེན་མེད་པ་ལྟར། གདོད་གྲུབ་ཟིན་པ་ལ་སྐྱེད་སྨིན་བྱེད་པ་མེད་པ་དང་། དེ་གཉིས་འཛོམ་ནས་བསྐྱེད་པས་ནམ་མཁར་གྲུབ་པའི་འབྲས་བུ་མེད་པ་ལྟར། རྒྱུ་རྐྱེན་ཡེ་ནས་བྲལ་བ་ལ་འཕྲལ་དུ་ངོ་བོ་བསྒྲུབ་པ་མེད་པ་དང་། ལས་ཀྱིས་ཚི་ཆད་པའི་རྩོལ་བ་མེད་པ་ལྟར། ཅི་སྣང་ཅིར་བྱུང་ཡང་འཕྲལ་དུ་ལས་བརྩམས་ནས་ཆེད་དུ་བྱ་བ་མེད་པ་དང་། འཕྲལ་དུ་ལས་མངོན་པར་རྩོལ་བའི་འདུ་བྱེད་པ་མེད་པ་ལྟར། མཛད་པ་ཇི་སྙེད་པས་འགྲོ་དོན་རྒྱུན་མི་འཆད་ཀྱང་འཕྲལ་དུ་རྩོལ་བ་མེད་པ་ཡིན་ནོ། །དེ་ལྟར་ཆོས་སུམ་ཅུ་རྩ་བཞི་དང་ལྡན་པས་ཀྱང་དཔེ་དོན་ཉེ་བར་སྦྱར་བར་བྱའོ། །གཉིས་པ་ནི། ལང་ཀའི། ཞེས་པ་ནས། དེའི་ཕྱིར་མ་བཅོས་པའོ། །ཞེས་པའི་བར་གྱིས་བསྟན་ཏེ། དེ་ཡང་ནམ་མཁའ་ལ་འཕོ་འགྱུར་དང་མཚན་མ་བྲལ་བས་ངོ་བོ་མ་བཅོས་པར་ངེས་པའི་དཔེ་དང་མཐུན་པར་དོན་བསྟན་ཏེ་མཐའ་གཉིས་པ་རིལ་བྲལ་བར་སྒྲུབ་པའི་ཕྱིར། ལང་ཀའི་བདག་པོ། ཞེས་སྡུད་པ་པོ་ལ་བོས་ནས། དཔེར་ན་ནམ་མཁའ་ནི་རྣམ་གྲངས་ཀྱི་ཆོས་ལྔ་བཅུ་དང་ལྡན་ཏེ། ཇི་ལྟར་ན། ནམ་མཁའི་ངོ་བོ་སྔར་ཡོད་པ་ལས་ཕྱིས་མེད་པར་གྱུར་པ་མ་ཡིན། སྔར་མེད་པ་ལས་ཕྱིས་ཡོད་པར་གྱུར་པ་ཡང་མ་ཡིན་ཏེ། དུས་སྔ་ཕྱིའི་ཆོས་འཆད་པ་ཀུན་རྗེས་སུ་འཐུན་པར་བསྙད་དོ། །དེ་དང་འདྲ་བར་ལྷུན་གྱིས་གྲུབ་པའི་དེ་བཞིན་ཉིད་ནི། དུས་གསུམ་དུ་མཉམ་པ་ཆེན་པོ་སྐད་ཅིག་མའི་རྒྱུན་ཡོད་མེད་ལས་ཀྱང་གྲོལ་བ་ལ། སྔར་ངོ་བོ་གྲུབ་པ་ཞིག་ཕྱིས་རླག་པ་དང་། སྔར་མ་གྲུབ་པ་ཞིག་ཕྱིས་ལམ་པའི་བློས་བྱས་ནས་ཡོད་པར་གྱུར་པ་མེད་དོ། །དེ་ལྟར་ན་དུས་གསུམ་ཉིད་མཉམ་པ་ཆེན་པོ་སྔ་ཕྱིའི་རྒྱུད་གྲོལ་བ་ལ་དུས་ཐོག་མཐའ་མེད་པར་རིལ་རྗེས་སུ་མཐུན་ཏེ་ཟུང་སྦྱར་བས་གཏན་ཚིགས་ཉེར་ལྔ་ཡིན་ནོ། །དེ་བས་ན་སྔ་མ་དེ་བཞིན་དུ། ནམ་མཁའ་ནི་སྔར་གསལ་བ་ལས་ཕྱིས་མི་གསལ་བར་གྱུར་པ་མེད་པ་དང་། སྔར་མི་གསལ་བ་ལས་ཕྱིས་གསལ་བར་གྱུར་པ་མེད་པ་ལྟར། གསང་བའི་དབྱིངས་ཀྱང་དེ་བཞིན་དུ་སྦྱར་ཏེ། བྱང་ཆུབ་ཀྱི་སེམས་ཡེ་ཤེས་ཆེན་པོའི་ཉི་མ་འཆར་ནུབ་དང་བྲལ་བའི་ཕྱིར་དང་། སྔར་ཐ་དད་པ་ལས་ཕྱིས་གཅིག་ཏུ་གྱུར་པ་དང་། སྔར་གཅིག་པ་ལས་ཕྱིས་ཐ་དད་པར་གྱུར་པ་ཡང་མེད་པ་ལྟར། དོན་ཆོས་ཉིད་ཀྱང་ཡིན་ཏེ། བྱང་ཆུབ་ཀྱི་སེམས་དེ་ཁོ་ན་ཉིད་བསམ་གྱིས་མི་ཁྱབ་པར་སྣང་ལ་གནས་པ་མེད་པའི་ཕྱིར་དང་། སྔར་ཡིན་པ་ལས་ཕྱིས་མིན་པར་གྱུར་པ་དང་། སྔར་མིན་པ་ལས་ཕྱིས་ཡིན་པར་གྱུར་པ་ཡང་མེད་པ་ལྟར། གསང་སྔགས་ཇི་བཞིན་པའང་མཚུངས་ཏེ། དེ་བཞིན་ཉིད་ནི་དུས་གསུམ་དུ་མ་ནོར་ངེས་པར་སྒྲོ་སྐུར་དང་བྲལ་བ་ཆེན་པོར་བྱུང་བའི་ཕྱིར་དང་། སྔར་ཉེ་བ་ལས་ཕྱིས་རིང་བར་གྱུར་པ་དང་། སྔར་རིང་བ་ལས་ཕྱིས་ཉེ་བར་གྱུར་པ་མེད་པ་ལྟར། བྱང་ཆུབ་ཀྱི་སེམས་ཀྱང་ཡིན་ཏེ། ཆོས་སོ་ཅོག་ཉིད་དུས་གསུམ་དུ་དེ་བཞིན་ཉིད་ཀྱི་ངང་དུ་རང་ཤར་བ་ལས་བསྒྲུབ་ཏུ་མེད་པའི་ཕྱིར་དང་། དེ་བཞིན་དུ། ཆེ་བ་ཆུང་བར་གྱུར་པ་དང་། ཆུང་བ་ཆེ་བར་གྱུར་པ་མེད་པ་ལྟར། རང་རིག་པའང་ཡིན་ཏེ། དེ་བཞིན་ཉིད་ལ་རང་བཞིན་གྱིས་ཆེ་ཆུང་གཉིས་མེད་པར་མཆོག་དང་མཐའ་བྲལ་བའི་ཕྱིར་དང་། དེ་ལྟར་སྦྱར་ཏེ། ནམ་མཁའ་ལ་བཟང་བ་དང་ངན་པར་གྱུར་པ་མེད་པ་ལྟར། དེ་ཁོ་ན་ཉིད་ཀྱང་ཡིན་ཏེ། གསང་བ་ཇི་བཞིན་པའི་དབྱིངས་དུས་གསུམ་དུ་ཟླ་དང་གཉེན་པོ་བྲལ་བ་ལས་བཟང་ངན་མ་དམིགས་པའི་ཕྱིར་དང་། བདེ་བ་དང་སྡུག་བསྔལ་བར་གྱུར་པ་མེད་པ་ལྟར། མཉམ་པ་ཉིད་ཀྱང་ཡིན་ཏེ། ཡེ་ནས་སྡུག་བསྔལ་ཆོས་ཉིད་ཀྱི་ལོངས་སྤྱོད་དུ་ཤར་བའི་ཕྱིར་དང་། ཁྱབ་པ་དང་མ་ཁྱབ་པར་གྱུར་པ་མེད་པ་ལྟར། ངེས་པའི་གསང་བའང་མཚུངས་ཏེ། ཆོས་ཐམས་ཅད་བྱང་ཆུབ་ཀྱི་སེམས་མ་ཡིན་པ་མེད་པའི་ཕྱིར་དང་། འབྱུང་བ་དང་མི་འབྱུང་བར་གྱུར་བ་མེད་པ་ལྟར། དོན་གྱི་ངོ་བོའང་ཡིན་ཏེ། སྤྲུལ་པ་དང་དངོས་གྲུབ་བརྩལ་བ་མེད་པར་རང་འཆར་བ་ལ་རྒྱུན་མེད་པའི་ཕྱིར་དང་། དག་པ་དང་མ་དག་པར་གྱུར་པ་མེད་པ་ལྟར། དབྱིངས་མཐའ་དང་བྲལ་བའང་མཚུངས་ཏེ། མཐའི་དྲི་མ་རིལ་ཡེ་ནས་མ་སྤངས་བྲལ་བ་ཆེན་པོར་བཞུགས་པའི་ཕྱིར་དང་། གྲུབ་པ་དང་མ་གྲུབ་པར་གྱུར་པ་མེད་པ་ལྟར། གནས་ལུགས་ཀྱང་ཡིན་ཏེ། ཁམས་གསུམ་སངས་རྒྱས་ཀྱི་སར་ཡེ་གསལ་བ་ལ་བླ་དྭགས་གཉིས་མེད་པའི་ཕྱིར་དང་། མཐོ་བ་དང་དམའ་བར་གྱུར་པ་མེད་པ་ལྟར། དོན་གྱི་སྙིང་པོའང་ཡིན་ཏེ། ཡེ་མཉམ་པ་ལ་ཆེ་ཆུང་ངང་གིས་མ་དམིགས་པས་རིམ་པ་བྲལ་བའི་ཕྱིར་དང་། ཡངས་པ་དང་དོག་པར་གྱུར་པ་མེད་པ་ལྟར། ཐིག་ལེ་ཆེན་པོའང་ཡིན་ཏེ། ཕྱིན་ཅི་ལོག་གི་ཆོས་སོ་ཅོག་ཀྱང་མ་བཀོལ་བར་ཆོས་ཉིད་དུ་འདུས་པ་ཆེན་པོ་ལ་ཚུད་པ་དང་མི་ཚུད་པ་གཉིས་མེད་པའི་ཕྱིར་དང་། དབྱིབས་དང་དབྱིབས་མེད་པར་གྱུར་པ་མེད་པ་ལྟར། བསམ་གྱིས་མི་ཁྱབ་པའི་དབྱིངས་ཀྱང་ཡིན་ཏེ། རིང་ཐུང་ལ་སོགས་པའི་དབྱིབས་ཐམས་ཅད་མ་སྤངས་པའི་ངང་ལས་རྣམ་པའི་དབྱིབས་ངེས་པར་གཟུང་བ་དང་བྲལ་བའི་ཕྱིར་དང་། ཁ་དོག་དང་ཁ་དོག་མེད་པར་གྱུར་པ་གཉིས་མེད་པ་ལྟར། རང་བཞིན་ཡང་ཡིན་ཏེ། ཁ་དོག་རྩ་ལྔ་ལ་སོགས་པ་རིལ་མ་བཀོལ་བ་ལ་ཕྱོགས་ཆའི་ཁ་དོག་ཡེ་བྲལ་བའི་ཕྱིར་དང་། ཕྱི་དང་ནང་དུ་གྱུར་པ་མེད་པ་ལྟར། ཆོས་ཀྱི་དབྱིངས་ཀྱང་ཡིན་ཏེ། སྣོད་བཅུད་དང་ཡུལ་སེམས་ཕྱི་ནང་ཐམས་ཅད་ཡེ་ཤེས་ཆེན་པོའི་ཀློང་དུ་ནུབ་པའི་ཕྱིར་དང་། སྐྱེ་བ་དང་འགག་པར་གྱུར་པ་མེད་པ་ལྟར། གཉུག་མའི་ངོ་བོའང་ཡིན་ཏེ། དེ་ཁོ་ན་ཉིད་ལ་སྐྱེ་ཤིའི་ཆོས་མ་སྤངས་བྲལ་བས་ངོ་བོ་གཟུང་ནུབ་ཡེ་མེད་པའི་ཕྱིར་དང་། འཕོ་བ་དང་མི་འཕོ་བར་གྱུར་པ་མེད་པ་ལྟར། རང་བྱུང་རིག་པའང་མཚུངས་ཏེ། གནས་རིས་ཐམས་ཅད་དེ་བཞིན་ཉིད་དུ་རང་གསལ་བ་ལ་འགྲོ་འོང་དུས་གསུམ་དུ་བྲལ་བའི་ཕྱིར་དང་། འགྱུར་བ་དང་མི་འགྱུར་པར་གྱུར་པ་མེད་པ་ལྟར། སྙིང་པོ་བྱང་ཆུབ་ཀྱང་ཡིན་ཏེ། བྱང་ཆུབ་ཀྱི་སེམས་མཚན་ཉིད་གང་དུའང་མ་ཟིན་པས་ཅིར་སྣང་དེ་ཉིད་ཡིན་པའི་ངོ་བོ་ལ་མི་འདྲ་བས་ཀྱང་མི་འདྲ་བར་གྱུར་པ་མེད་པའི་ཕྱིར་དང་། མུན་པ་དང་སྣང་བར་གྱུར་པ་མེད་པ་ལྟར། འོད་གསལ་བའི་ཡེ་ཤེས་ཀྱང་ཡིན་ཏེ། མཉམ་པ་ཆེན་པོ་ཡེ་ནས་མཐའི་སྒྲིབ་པ་མ་བསལ་བྲལ་བའི་ཕྱིར་དང་། སྔོན་དང་ཕྱི་མར་གྱུར་པ་མེད་པ་ལྟར། ངང་གི་ཐིག་ལེ་ཡང་ཡིན་ཏེ། དུས་གསུམ་མ་འགག་པའི་སེམས་ཉིད་མ་བཅོས་པའི་ངང་ལ་སྐད་ཅིག་མའི་རྒྱུན་མེད་པའི་ཕྱིར་དང་། མཐའ་དང་དབུས་སུ་གྱུར་བ་མེད་པ་ལྟར། རང་སྣང་རིས་མེད་ཀྱང་ཡིན་ཏེ། དེ་བཞིན་ཉིད་ནི་སྣང་བཞིན་མ་གྲུབ་ལ་མ་གྲུབ་བཞིན་མི་འགོག་པ་ལ་བར་གྱི་ཐ་སྙད་ཙམ་ཡང་མེད་པའི་ཕྱིར་དང་། བདག་དང་གཞན་དུ་གྱུར་པ་མེད་པ་ལྟར། སེམས་ཉིད་རང་གསལ་བའང་ཡིན་ཏེ། ཆོས་ཉིད་གསང་བའི་དབྱིངས་ལ་ཕྱོགས་རིས་དང་བྲལ་བའི་ཕྱིར་དང་། དེ་བཞིན་དུ་ནམ་མཁའ་ལ་བླངས་ནས་དོར་བར་གྱུར་པ་དང་། དོར་བ་ལས་བླངས་པར་གྱུར་པ་མེད་པ་ལྟར། གཤིས་ཀྱི་གནས་ལུགས་ཀྱང་ཡིན་ཏེ། ཐམས་ཅད་ཀྱང་དེ་ཉིད་དུ་རང་སྣང་བ་ལ་བཟང་ངན་བྲལ་བའི་ཕྱིར་ཏེ། དེས་ན་ནམ་མཁའ་རང་གི་ངོ་བོ་ནི་ཐམས་ཅད་ནས་ཐམས་ཅད་དུ་མ་བཅོས་པའོ། །དཔེ་དེ་བཞིན་དུ་དབྱིངས་རང་བཞིན་རྣམ་དག་དཀྱིལ་འཁོར་གསུམ་དབྱེར་མེད་པའི་ཆོས་ཉིད་རང་རིག་དོན་གྱི་ངོ་བོ་འདི་ཉིད་ཀྱང་སྦྱར་བར་བྱ་སྟེ། ཆོས་དབྱིངས་མཚོན་པའི་དཔེའི་རྣམ་གྲངས་དང་མཐུན་པར་ཐུན་མོང་མིན་པའི་གཏན་ཚིགས་དེ་དག་གིས་སྒྲུབ་པའི་དོན་གྱི་བླ་དྭགས་སུ་མ་བཅོས་པ་ཞེས་བསྙད་པས་ན། དེའི་ཕྱིར་གསང་བའི་དབྱིངས་ནི་རང་བཞིན་མ་བཅོས་པའོ། །ཞེས་གསུངས་ཏེ་བཀའ་སྩལ་བར་མཛད་དོ། །གསུམ་པ་ནི། ལང་ཀའི། ཞེས་པ་ནས། མ་བྱས་པས་གཉེན་པོ་མེད་དོ། །ཞེས་པའི་བར་གྱིས་བསྟན་ཏེ། དོན་མ་བཅོས་པ་དེ་ཉིད་མི་འཇིག་པར་མཚོན་པའི་ཕྱིར། ལང་ཀའི་བདག་པོ། ཞེས་བོས་ནས། དཔེའི་ཆོས་རྣམ་གྲངས་བཅུ་གཉིས་ཉེ་བར་བསྟན་པ་འདི་ལྟ་སྟེ། དཔེར་ན་ནམ་མཁའ་དེ་ནི་བྱེད་པ་པོ་སུས་ཀྱང་མ་བྱས། བྱེད་པ་པོ་དེ་ཉིད་ཀྱང་ཡེ་མེད། རྒྱུ་དྲུག་ལས་མ་བྱུང་། རྐྱེན་བཞི་ལས་མ་བསྐྱེད། དུས་ཐོག་མར་དང་པོ་མ་སྐྱེས། ཐ་མར་མི་འཇིག །ཐོག་མ་དང་ཐ་མར་ཡང་མི་དམིགས། དེ་བཞིན་དུ། ཐོབ་པ་དང་མ་ཐོབ་པ་ཡང་མེད་ལ། རེ་བ་དང་བརྩལ་བ་ཡང་མེད་དོ། །དེ་ལྟར་ཆོས་བཅུ་གཉིས་གཏན་ཚིགས་སུ་གྱུར་པ་དེའི་ཕྱིར་དཔེ་ནམ་མཁའ་ནི་སུས་ཀྱང་མ་བྱས་ལ་བྱས་པ་མེད་པས་གཉེན་པོ་མེད་པའི་དོན་གྱི་ངོ་བོར་གྲུབ་པ་ཉིད་དོ། །དཔེ་ཇི་ལྟ་བ་དེ་བཞིན་དུ་སེམས་ཀྱི་ཆོས་ཉིད་དེ་ཁོ་ཉིད་གསང་བའི་དབྱིངས་དེ་བཞིན་ཉིད་ཀྱི་ངོ་བོ་འདི་ཉིད་ཀྱང་། མཁན་པོས་མ་བསྒྲུབས་པས་སུས་ཀྱང་མ་བྱས། ཡེ་གྲུབ་ཟིན་པ་ལ་མཁན་པོ་ཉིད་ཀྱང་མ་དམིགས་པས་བྱེད་པ་པོ་ཡང་མེད། ཡེ་ནས་རྒྱུ་རྐྱེན་ཉིད་འབྲས་བུར་རྫོགས་ཏེ་གཉིས་མེད་ཆེན་པོར་གྲུབ་ཟིན་པས། རྒྱུ་ལས་མ་བྱུང་རྐྱེན་གྱིས་མ་བསྐྱེད་དེ་དེ་དག་གིས་འཕྲལ་དུ་མ་བསྒྲུབ། དེ་ལྟར་རྒྱུ་རྐྱེན་མེད་པར་དུས་གསུམ་གྱི་རྒྱུན་མ་འགགས་བྲལ་བའི་ངོ་བོ་ཉིད་རྒྱུ་རྐྱེན་དང་མི་མཐུན་པའི་ཕྱིར་དང་པོར་མ་སྐྱེས་ཤིང་། གཉེན་པོ་མེད་པས་ཐ་མར་མི་འཇིག །དུས་གསུམ་མཉམ་པ་ཉིད་ལ་ཡུལ་དང་བྲལ་ཞིང་ངོ་བོ་ལྷན་ཅིག་པ་མེད་པའི་ཕྱིར་ཐོག་མ་དང་ཐ་མར་མི་དམིགས། བདག་ཉིད་ཆེན་པོར་རྫོགས་པ་ལ་རེ་དོགས་དང་བྲལ་བའི་ཕྱིར་ཐོབ་པ་དང་མ་ཐོབ་པ་ཡང་མེད། དེ་བཞིན་ཉིད་བདག་ཉིད་ལས་གཞན་ནས་གཉེར་དུ་མེད་པས་བསྒྲུབ་ཏུ་མེད་པའི་ཕྱིར་རེ་པ་དང་བརྩལ་བ་མེད་དེ། དེ་ལྟར་གཏན་ཚིགས་བཅུ་གཉིས་ཀྱིས་གྲུབ་པས་ཆོས་ཉིད་འདུས་མ་བྱས་ནི་མ་བྱས་མ་བཏགས་ཏེ། དེ་ལ་འཇིག་པ་དང་བྲལ་བས་ཟིལ་གྱིས་གནོན་པའི་གཉེན་པོ་མེད་པའི་ཕྱིར། དེ་ཁོ་ན་ཉིད་རྩ་བ་ཆེན་པོ་གསང་བ་ཇི་བཞིན་པའི་དོན་མདོ་བཞིར་གྲགས་པའི་དབྱིངས་དམ་པ་ཉིད་དོ། །དེས་ལྟར་བྱེད་པ་པོ་དང་། འཇིག་པའི་གཉེན་པོ་བྲལ་ནས་དོན་ལ་སྦྱོར་བར་བྱའོ། །བཞི་པ་ལ་གཉིས་ཏེ། ལྟ་བ་བསྟན་པ། ཏིང་ངེ་འཛིན་བཤད་པའོ། །དང་པོ་ལ་གསུམ་སྟེ། དཔེས་དོན་མཐོང་ཚུལ། དོན་གྱི་རྣམ་གྲངས་ཆེ་བ་དང་བཅས་པ། དེའི་གོལ་སྒྲིབ་བཤད་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི། ལང་ཀའི། ཞེས་པ་ནས། སེམས་ཉིད་རྙེད་པའོ། །ཞེས་པའི་བར་གྱིས་བསྟན་ཏེ། རྩ་བའི་དཔེས་དབུ་མའི་དོན་བཙལ་ཐབས་མི་མཐུན་པ་བསྟན་པའི་ཕྱིར། ལང་ཀའི་བདག་པོ། ཞེས་བོས་ནས། མི་མཐུན་པའི་དཔེ་དོན་ཉེ་བར་བསྟན་པ་འདི་ལྟ་སྟེ། དཔེར་ན་མུ་སྟེགས་པའམ་ཐེག་འོག་པ་ལྟ་བུ། མི་གང་ཞིག་གིས་ནམ་མཁའི་མཐའ་ཚོལ་བར་རྩོམ་ནས་བཙལ་བ་ལ་ཞུགས་པ་ན། དེའི་མཐའ་བཙལ་དུ་མེད་པའི་ཕྱིར། ཚོལ་བར་བྱས་པས་མཐའ་ནམ་ཡང་རྙེད་པར་མི་འགྱུར་ཏེ་མཐའ་དང་བྲལ་བ་ཡིན་པ་ལྟར། དེ་བས་ན་གང་སུ་ཞིག་གིས་ནམ་མཁའི་དོན་ནི་གོ་སྐབས་འབྱེད་པ་ཙམ་དུ་ཡོད་པ་ཡིན་པར་གང་ཤེས་པ་དེ་ནི་ནམ་མཁའ་རང་གི་མཚན་ཉིད་ཤེས་ཤིང་མཐའ་ཡང་རྙེད་པ་ཁོ་ནའོ། །དཔེ་དེ་བཞིན་དུ། འདིར་ཡང་དཔྱད་པས་བཙལ་ཡང་དོན་མི་མཐོང་བའི་ཕྱིར། རང་གི་སེམས་མཉམ་པའི་དོན་ཉིད་ཀྱིས་དོན་གྱི་ངོ་བོ་སེམས་ཀྱི་ཆོས་ཉིད་གང་དེ་ཇི་ལྟ་བུ་ཡིན་པར་རྩད་གཅོད་དེ་ཡོད་མེད་རྟག་ཆད་སོགས་སུ་དཔྱོད་ཅིང་ཚོལ་བ་ལ་འབད་པས་ནི། དོན་ཆེན་པོ་ནམ་ཡང་མི་མཐོང་སྟེ། དེ་ཅིའི་ཕྱིར་ཞེ་ན། རང་རིག་པ་ནི་ཡེ་ནས་གཞི་དང་རྩ་བ་བྲལ་ཏེ་སྤྱོད་ཡུལ་དུ་བྱར་མེད་ཅིང་བསམ་དཔྱོད་ལས་འདས་པ་ལ་བསམ་དཔྱོད་བྱས་པས་རྙེད་པ་མ་ཡིན་པར་སླར་འཁྲུལ་པ་ཡིན་པའི་ཕྱིར་རོ། །འོ་ན་ཐབས་གང་གིས་ཤེས་པར་འགྱུར་ཞེ་ན། རང་རིག་པ་བྱང་ཆུབ་སེམས་བདེ་བ་ཆེན་པོ་རྟེན་པའི་གཞི་དང་སྐྱེད་པའི་རྩ་བ་མེད་པའི་ངོ་བོ་ཉིད་ལས་གང་ཅིར་ཡང་མ་ངེས་པར་འགག་པ་མེད་པར་ཀུན་འབྱུང་བའི་རང་བྱུང་གི་རིག་པ་མ་བསམ་མ་དཔྱད་པར་ཇི་བཞིན་པའི་ཆོས་ཉིད་དུ་དམ་པ་གང་གིས་ཤེས་པ་དེ་ནི། བྱ་བཙལ་གྱིས་བསླབ་པ་མེད་པའི་བསླབ་པ་ཆེན་པོ་ཉིད་པས་དོན་ཇི་བཞིན་པར་མ་བསམ་པས་ཕེབས་པ་དེ་ནི་སེམས་ཉིད་ཀྱི་དོན་རྙེད་པ་མེད་པའི་རྙེད་པ་ཡང་དག་པའོ། །དེ་བས་ན་ཅིར་ཡང་བསམ་དུ་མེད་པ་མ་བསམ་པ་ཉིད་འཆིང་བ་མ་དམིགས་པར་གྲོལ་བ་ཡིན་པའི་ཕྱིར། ནམ་མཁའ་ཆེ་ལས། ཆེ་བས་ཆེ་བ་ཟབ་མོ་ཡི། །ཡོན་ཏན་ཅིར་ཡང་བསྔགས་པ་མེད། །དོན་རྣམས་ཇི་བཞིན་མི་བསྐྱོད་དེ། །བྱ་བ་མེད་པས་གྲོལ་བའང་གྲོལ། །ཞེས་དང་། ཡེ་ཤེས་རྫོགས་པ་ལས། བསམ་མེད་རང་བཞག་ས་ལེ་བ། ཅི་ཡང་མ་ཡིན་གྱི་ན་བ། །རང་གསལ་ཡེ་ཤེས་ཉི་མའི་འོད། །ཀུན་བཟང་རྒྱལ་བའི་ཐུགས་དམ་མོ། །ཞེས་གསུངས་པའི་དོན་ནོ། །གཉིས་པ་ལ་གསུམ་སྟེ། སེམས་ཕྱོགས་བྲལ་དུ་རྟོགས་པ་ཉིད་རྙེད་པར་བསྟན་པ། རྙེད་པས་ཐམས་ཅད་གཉིས་སུ་མེད་པར་གསལ་བར་བསྟན་པ། རྙེད་པའི་ཡོན་ཏན་སྡུག་བསྔལ་མ་སྤང་བྲལ་བར་བསྟན་པའོ། །དང་པོ་ནི། སེམས་ཀྱིས་སེམས་བཙལ། ཞེས་པ་ནས། རྟོགས་ན་དེ་ཁོ་ན། །ཞེས་པའི་བར་གྱིས་བསྟན་ཏེ། དེ་བས་ན་རྩོལ་བས་བཙལ་བ་འཁྲུལ་པར་བསྟན་པའི་ཕྱིར། རང་གི་སེམས་ཉིད་མ་བཅོས་པ་ནི་དོན་གྱི་མཆོག་ཡིན་བཞིན་དུ་དེ་ཉིད་མི་ཤེས་པར་བློ་དམན་དག་སེམས་ཀྱི་རྟོག་དཔྱོད་དང་གཏན་ཚིགས་ཀྱིས་དངོས་པོར་དཔྱད་ནས་སེམས་ཀྱི་ངོ་བོའི་གྲུབ་པའི་མཐའ་ཉིད་གཞན་དུ་བཙལ་བས་ནི་གཉུག་མའི་སེམས་ནམ་ཡང་མི་རྙེད་པས་སེམས་ཀྱི་ངོ་བོ་དང་འཕྲད་པར་མི་འགྱུར་ཏེ་སླར་འཁྲུལ་པར་འཕྱན་པའོ། །དེས་ན་གང་ཟག་གང་སུ་ཞིག་གིས་རང་གི་སེམས་ཀྱི་མུ་དང་གཏིང་དང་གཞི་དང་རྩ་བ་ཚོལ་བའི་ཕྱིར་དཔྱོད་པ་སེམས་ཙམ་པ་ལྟ་བུ་དང་། བློ་ཆུང་གང་ཞིག་སེམས་ཀྱི་དབུས་དང་མཐའ་འབྱེད་ནས་མཐའ་སྤོང་བ་དབུ་མ་པ་ལྟ་བུ་དེ་དག་གིས་དོན་ཕྱོགས་མེད་ཀྱི་ངོ་བོ་ཉིད་རྩོལ་བས་བཙལ་བས་རྙེད་པ་ག་ལ་ཡིན་ཏེ་མ་ཡིན་པས་ན་ནམ་ཡང་རྙེད་པར་མི་འགྱུར་ཏེ། ཚོལ་བ་མེད་པ་ཉིད་བཙལ་བ་ཆེན་པོ་ཡིན་པ་ལས་གོལ་བའི་ཕྱིར་ཏེ། དཔྱད་པས་རྟོག་མཐའ་སྐྱེས་ཏེ་སྔ་མ་ལ་ཕྱི་མས་ལོངས་བཏགས་ནས་རྩོལ་སྒྲུབ་ཀྱིས་ཁ་འཁོར་བར་འགྱུར་རོ། །དེ་བས་ན་མན་ངག་ལས། མཚོན་ཅིང་རྟོགས་པར་བྱ་བ་དེ་ཉིད་ནི། །སྟོན་པའི་ལུང་བཞིན་ཚིག་གི་མཐའ་དཔྱོད་པ། །ཚད་མར་བཟུང་ཕྱིར་འཛིན་པ་དེ་སྐྱེས་ཏེ། །དེ་བས་མཚོན་བྱེད་སེམས་ཀྱི་རྒྱུད་ཁ་འཁོར། །ཞེས་དང་། གསང་བདག་དགའ་རབ་དཔའ་བོས་མཛད་པའི་ཐིག་ལེ་བཞི་པའི་བསམ་གཏན་ལས། དེ་དོན་རང་ལ་འཆར་བ་ལ། །རིང་ནས་འགྲུབ་ཏུ་རེ་བ་ནི། །ནམ་མཁའ་དག་ལ་མཐའ་ཚོལ་བཞིན། །གྲུབ་ཏུ་རེ་སྟེ་མི་འགྲུབ་བོ། །འཇུག་སྒོ་བཀག་པ་མ་ཡིན་ཏེ། །རང་བྱུང་ཡེ་ཤེས་འགྲུབ་མི་འགྱུར། །ཕྱི་ལམ་བཅད་པ་མ་ཡིན་ཏེ། །འཁྲུལ་པའི་ལོངས་བཏགས་འཆད་མི་འགྱུར། །ཞེས་གསུངས་པའི་དོན་ཏོ། །འོ་ན་ཐབས་མ་ནོར་བ་གང་ཡིན་ཞེ་ན། དཔེར་མཚོན་རྣོན་པོ་དང་འདྲ་སྟེ། རང་གི་སེམས་ཀྱིས་རང་སེམས་ཉིད་ལ་ཇི་ལྟར་མཚོན་ཏེ། མཐའ་གང་དུའང་མཚོན་དུ་མེད་དོ། །དེ་ཅིའི་ཕྱིར་ན། སེམས་ལ་བཙལ་བའི་དོན་གྱི་དངོས་པོ་ཞིག་ཡོད་དོ་ཅེའམ་དངོས་མེད་ཞིག་ཡིན་ནོ་ཞེས་སྨྲ་ན། ཡོད་ན་སེམས་ཀྱི་དངོས་པོ་གང་གིས་བྱ་ལ། མེད་ན་སེམས་ཀྱི་ཐ་སྙད་ཇི་ལྟར་གདགས་ཏེ། དེས་ན་འདི་འདྲར་བསྟན་དུ་མེད་དོ། ། འོ་ན་དེའི་ངོ་བོ་ཇི་ལྟ་བུ་ཞིག་ཡིན་ཞེ་ན། དེ་ཉིད་ངོ་བོ་ཉིད་ཀྱིས་དངོས་པོ་དང་དངོས་མེད་གང་དུའང་མ་གྲུབ་པར་ཇི་སྙེད་པའི་ཆོས་སྣ་ཚོགས་ཀྱི་དངོས་པོ་ལྟར་སྤྲུལ་ཏེ་ཅིར་ཡང་འཆར་ཞིང་རང་སྣང་ལ་གཉིས་ལས་གྲོལ་བའི་ངོ་བོ་ཆོས་ཉིད་བྱང་ཆུབ་ཀྱི་སེམས་ཡིན་ལ། དེས་ན་བྱང་ཆུབ་ཀྱི་སེམས་ཕྱོགས་ཐམས་ཅད་མ་སྤངས་བྲལ་བའི་དོན་ཆེན་པོ་ཉིད་ཅིར་ཡང་མ་བསམས་མ་དམིགས་པ་ཉིད་ཀྱིས་རྟོགས་པའི་རྣལ་འབྱོར་པ་གང་སུ་ཞིག་གི་རིག་པ་ལ་བདག་ཏུ་འཛིན་པའི་ཕྱོགས་གཅིག་ཉིད་མ་སྤངས་པར་བྲལ་བས་མཐའི་ཕྱོགས་ཇི་སྙེད་དུ་འཛིན་པ་ཀུན་ཀྱང་དེ་ལྟར་མ་སྤངས་བྲལ་ཏེ་ངང་གིས་དག་པས་ན། ཡང་དག་པའི་དོན་ཉིད་ནི་ཡེ་ཉིད་ནས་བདག་ཉིད་ཡིན་པ་དང་། ཡུལ་དུ་མེད་པ་དང་། མཚན་ཉིད་གང་དུའང་མ་གཡོས་པར་བརྟགས་པའི་སྤྱོད་ཡུལ་ཐམས་ཅད་ལས་འདས་པ་ཡིན་པས། དེ་ལ་ཇི་ཙམ་དུ་དཔྱད་ན་རྟོག་པ་སྐྱེ། བསམ་ན་དམིགས་པ་འབྱུང་། དམིགས་ན་འཛིན་པ་སྐྱེ་བས་ཡང་དག་པར་མི་མཐོང་བའི་ཕྱིར་དེ་དག་དང་བྲལ་བའོ། །དེས་ན་དེ་ལྟ་བུའི་དོན་དེ་ཉིད་ཇི་བཞིན་དུ་རང་རིག་པར་རྟོགས་ན་མ་བཅོས་པའི་ཆོས་ཉིད་སྐྱེ་བ་མེད་པ་ཡིན་པས། བློ་ཡིས་མ་བརྟགས་མ་བསམས་མ་དམིགས་ན། ཕྱི་མོའི་དོན་རྣལ་དུ་ཕེབས་པའང་དེ་ཁོ་ན་ཉིད་དེ་གཞན་དུ་བཙལ་བ་མེད་དོ། །དེ་ལྟར་ཡང་སྐུ་གསུམ་བཀོད་པའི་བསམ་གཏན་ལས། བརྗོད་མེད་ཕྱོགས་བྲལ་ནམ་མཁའི་ཀློང་། །ནམ་མཁའི་ཀློང་ན་སྐྱེ་ཤི་མེད། །སྐྱེ་ཤི་མེད་པ་བྱང་ཆུབ་སེམས། །འདུ་འབྲལ་མེད་པར་རང་ལ་གནས། །ཡེ་ནས་གནས་པས་སྒྲུབ་ཏུ་མེད། །མ་བསྒྲུབ་ལྷུན་གྲུབ་སྐུ་གསུམ་ཀློང་། །རང་ཤར་རང་གྲོལ་འགྱུར་མེད་སྲོག །ཟབ་ཅིང་བརྟག་དཀའ་ཕྲ་བའི་ལམ། །གཞན་གྱིས་རྟོགས་དཀའ་ཆེ་བའི་ཡུལ། །ཟབ་མོ་གཡང་ཆེན་རྣལ་འབྱོར་དོན། །ཕྲ་རགས་མེད་པར་གནས་མོད་ཀྱང་། །གཞན་དུ་ལྟ་བ་གོལ་བའི་ས། །ཞེས་སོ། །གཉིས་པ་ནི། སེམས་ཀྱིས་སེམས་བཙལ། ཞེས་པ་ནས། མ་རིག་གཉིས་སུ་སྣང་། །ཞེས་པའི་བར་གྱིས་བསྟན་ཏེ། དེ་ཡང་འདིར་འདུ་ཤེས་གང་དུའང་མ་ཞུགས་པའི་སེམས་ཀྱིས་ཅི་ཡང་ཚོལ་བ་མེད་པ་ཉིད་ཀྱིས་སེམས་ཉིད་ཀྱི་ངོ་བོ་བཙལ་བ་ནི་ཡང་དག་པའི་ཚོལ་བ་ཡིན་པས། དེ་ལྟར་བཙལ་བ་ན་གང་དུའང་མ་གཡོས་པའི་དོན་ཉིད་གར་ཡང་མ་གྲུབ་པའི་རིག་པ་མེད་པ་ཉིད་དུ་རང་རིག་པར་གྱུར་ནས་འཁོར་བ་ཆོས་ཉིད་དུ་སྣང་བའི་ལྟ་བས་དྲོད་མཆོག་ཅིག་རྙེད་ན་ཐ་སྙད་དུ་སེམས་ཀྱི་ཆོས་ཉིད་རྙེད་པ་སྟེ། དེ་ལྟར་ལྟ་བས་དྲོད་དམ་པ་དེ་རྙེད་ན་ངོ་བོ་ངེས་པ་མེད་པས་རང་བྱུང་གི་ཡེ་ཤེས་སྙིང་པོ་བྱང་ཆུབ་ཀྱི་སེམས་ཅིའང་མ་ཡིན་པར་བདག་ཉིད་ཆེན་པོ་ཡིན་པར་ཡང་དག་པར་རིག་པ་དེ་ཁོ་ན་དོན་ཡང་དག་པ་ཡིན་ནོ། །དེས་ན་ཕྱོགས་མེད་རང་གསལ་གྱི་ཀློང་ཆེན་པོ་དེ་ལ་ནི་ཡིན་མིན་དང་ཡོད་མེད་ཀྱི་རིས་དང་བྲལ་བས་རང་སྣང་གི་ཆོས་ཉིད་ཅི་ཡང་ཡིན་ནོ་གང་ཡང་རུང་བ་སྟེ་མཐའ་ཀུན་མ་སྤངས་ཡེ་ནས་བྲལ་བ་དེ་ཉིད་ནི་དངོས་པོའི་ཆོས་རྣམས་ཀྱི་རང་བཞིན་དེ་ཁོ་ན་ཉིད་ཆོས་ཐམས་ཅད་ཀྱི་དོན་གྱི་སྙིང་པོ་བྱང་ཆུབ་མཆོག་གི་གནས་ལུགས་སམ་གཙོ་བོ་དམ་པ་ཡིན་ནོ། །དེས་ན་དོན་གྱི་ངོ་བོ་མ་ནོར་བར་བསྟན་པའི་ཚུལ་གྱིས་འཁོར་བའི་སྣང་བ་དང་ངོ་བོའི་ཆོས་ཉིད་འདི་གཉིས་གཞི་དེ་བཞིན་ཉིད་ལ་གཉིས་སུ་ཡོད་པ་མ་ཡིན་ཏེ། ཐ་དད་མེད་པས་དུང་དང་དཀར་བ་བཞིན་ནོ། །འོ་ན་གཉིས་སུ་སྣང་བ་ཇི་ལྟར་ཡིན་ཞེ་ན། མ་རྟོགས་པ་རྣམས་ལ་འཁོར་བར་སྣང་བའི་དངོས་པོ་རྣམས་ཀྱི་རང་བཞིན་མ་བཅོས་པའི་དེ་བཞིན་ཉིད་གཉིས་སུ་མེད་པའི་དེ་ཁོ་ན་ཉིད་དེ་ནི། ཆོས་ཉིད་ཡིན་པར་རྣམ་འདྲེན་རྒྱལ་བ་རྣམས་ཀྱིས་ལུང་དུ་བསྟན་ཏེ་བཀའ་སྩལ་བར་མཛད་དོ། །དེ་ལྟ་བུའི་དོན་ནི་མ་མཐོང་བའི་དུས་དེང་སང་གི་སྔགས་པ་བློ་ཕད་ཧྲུལ་དུ་སྙུང་བླུགས་པ་ལྟར་དམིགས་པ་ལ་དགའ་བ་དག །དོན་ཆེན་པོ་མ་མཐོང་བའི་རང་ཉམས་ཀྱིས་བྱ་བ་མེད་པ་ནི་ཆོས་ཀྱི་གཞི་དང་ལས་སུ་རུང་བའི་སྤྱོད་ཡུལ་ཡིན་ནོ། །ཞེས་སྨྲ་ཞིང་། ལས་དང་པོ་པས་བསམ་དཔྱོད་དགོས་སོ་ཞེས་ཟེར་བ་ནི། ཐབས་ཆེན་པོ་དང་བྲལ་བས་ཅིག་ཆར་འཇུག་པའི་སྐལ་བ་མེད་པ་ཡིན་ཏེ། ཀྱེ་མ་ཐུགས་རྗེའི་གནས་སུ་གྱུར་པའོ། །དེས་ན་པཎ་ཆེན་འཇམ་དཔལ་བཤེས་གཉེན་གྱིས། སྐྱེ་བོ་སྐྱེ་བ་སྣ་ཚོགས་དག་ལས་སྐྱེས་ཤིང་སྐྱེ་དང་སྐྱེ་འགྱུར་སྐྱེ་བའི་རྒྱུན་གྱིས་དབང་སོང་བས། །རྟོག་མཐའ་མི་ཤེས་རྟོག་པས་བསླུས་ཤིང་རྟོག་པའི་རྒྱུན་འབྲངས་འཁྲུལ་རྟོག་ལས་ཕྱིར་ལྡོག་པ་མེད་གྱུར་པ། །སྒྱུ་མའི་སྒྱུ་ཤེས་དག་གིས་སྒྱུ་མའི་རྟ་གླང་འདྲ་བར་སྒྱུ་མ་རྨོངས་པའི་སྒྱུ་མ་རྣམས། །རྨི་ལམ་གྱིས་བསླད་བཞིན་དུ་རྨི་ཡིས་བདེན་པ་ཉམས་ཤིང་རྨི་ལམ་དབང་དུ་སོང་བའི་རྨི་ལམ་པ། །ལམ་འདི་སྤོང་ཞིང་མཐའ་དང་ལམ་གཞན་ལམ་དུ་བལྟས་ནས་མ་ནོར་ལམ་ཞེས་སྟོན་བྱེད་པ། །དེ་དག་རྡོ་ལ་གསེར་བཞིན་ཐུགས་རྗེར་རུང་ཞིང་ཐུགས་རྗེ་ཆེན་པོས་ཀྱེ་མའོ་ཕྲོགས་པ་ཡིན། །ཞེས་གསུངས་སོ། །དེའི་ཕྱིར་འཁོར་བར་སྣང་ལ་ངོས་བཟུང་མེད་པ་ལོག་རྟོག་འཁྲུལ་པའི་སྒྱུ་མ་དང་། འཁྲུལ་པ་རྣམ་པར་དག་པའི་སྐུ་དང་ཡེ་ཤེས་སྒྲིབ་པ་རྣམ་པར་བྱང་བའི་སྒྱུ་མ་གཉིས་རྐྱེན་གྱི་དབང་གིས་སེམས་ཅན་དང་སངས་རྒྱས་ཞེས་བརྟགས་པ་དང་ལྡོག་པའི་ཐ་དད་ཡོད་ཀྱང་། མི་མཐུན་པ་སྟོན་པས་ངོ་བོ་དེ་བཞིན་ཉིད་ལ་ནི་གཅིག་ཁོ་ན་ལས་ཐ་དད་པའི་རང་བཞིན་ཡོང་ཡེ་མེད་དོ། །དེ་བས་ན་གློ་བུར་གྱི་རྟོག་པའི་རྒྱུ་རྐྱེན་འཛོམ་པའི་སྣང་བ་ལ་མིང་བཏགས་པ་སོ་སོ་བ་ཙམ་ཡང་ངོ་བོ་ལ་གཉིས་པ་གཞི་ནས་མེད་པའི་ཕྱིར། འཁྲུལ་པའི་ངོ་ལ་གཉིས་སུ་སྣང་དུ་བཏུབ་པ་ཡང་། དཔེར་ན་རས་དང་སྣམ་བུའི་རྒྱུ་གཅིག་ལས་ཚོན་སྣ་ཚོགས་ཀྱི་རྐྱེན་གྱིས་མདོག་བསྒྱུར་བར་བྱས་ན། དམར་སེར་ལ་སོགས་པའི་ཁ་དོག་སྣ་ཚོགས་པ་ཐ་དད་དུ་སྣང་ཀྱང་། རས་བལ་ཉིད་ལས་གུད་དུ་སོང་བ་ག་ལ་ཡོད་དེ་མེད་དོ། །དེ་བཞིན་དུ་ལོག་རྟོག་ཉིད་སྨིན་པ་དང་ཡང་དག་པའི་རྟོག་པ་སྨིན་པ་ལས། འགྲོ་བ་སེམས་ཅན་ཞེས་བྱ་བ་དང་། སངས་རྒྱས་ཡེ་ཤེས་ཅན་ཞེས་བྱ་བར་དབྱེ་བ་འདི་དག །རྒྱུ་བྱང་ཆུབ་ཀྱི་སེམས་སུ་གཅིག་པ་ལས་རྟོགས་མ་རྟོགས་ཀྱི་རྐྱེན་གྱིས་བསྒྱུར་བ་ལས། སངས་རྒྱས་རིག་པ་ཅན་དང་སེམས་ཅན་མ་རིག་པ་ཅན་གཉིས་སུ་སྣང་གིས་དོན་ལ་དབྱེར་མེད་ཡིན་ནོ། །གསུམ་པ་ནི། འཁོར་བའི་སྡུག་བསྔལ། ཞེས་པ་ནས། ཡེ་ཤེས་རང་བྱུང་ཆེ། །ཞེས་པའི་བར་གྱིས་བསྟན་ཏེ། འོ་ན་གཏན་འབྲས་བུ་ཐོབ་ཏུའང་མེད་དམ་ཞེ་ན། འཁོར་བའི་འགྲོ་བ་གྲོང་ཁྱེར་གསུམ་གྱི་བདེ་བ་དང་སྡུག་བསྔལ་མྱོང་བ་ནི་མེད་བཞིན་དུ་སྣང་བ་རྨི་ལམ་དང་འདྲ་བ་ཡིན་ན། འཁོར་བ་ལས་དབུགས་ཆེན་པོ་ཕྱིན་ནས་གཉིད་སད་ཅིང་རྨི་ལམ་སངས་ན་སྡུག་བསྔལ་གྱི་སྤྱོད་ཡུལ་བྲལ་ཏེ་སད་པའི་བདེ་བ་ཉིད་དུ་སྣང་བ་ལྟར། དངོས་པོ་ཐམས་ཅད་ཡེ་ནས་ཆོས་ཉིད་བདེ་བ་ཆེན་པོ་བྱང་ཆུབ་ཀྱི་སེམས་ཇི་བཞིན་པའི་རང་བཞིན་དཔེར་ན་ནམ་མཁའ་ཀུན་ལ་ཁྱབ་པ་ལྟར་ཆོས་རིལ་ལ་བསྣུམས་ཚབས་ཆེ་ཆུང་མེད་པར་ལྷག་པའི་ཆོས་སྐུ་ཆེན་པོ་ཁྱབ་གདལ་ཉིད་དུ་སྣང་བའོ། །དེས་ན་རྨི་ལམ་ལྟ་བུར་གློ་བུར་རམ་འཕྲལ་དུ་རྟོག་པས་ནན་ཏན་བརྟགས་པས་འདུ་བྱེད་ཀྱི་ལས་སུ་གྱུར་པའི་ཐ་སྙད་ཀྱི་སྒྲིབ་པ་ཞེས་སུ་བཏགས་པའི་འཁྲུལ་པའི་སྣང་བ་ཡོད་དོ་ཅོག་ཀུན་རང་གི་རྟོག་པའི་རྒྱུ་རྐྱེན་འཛོམ་པ་ལས་སྣང་བས་འདུས་བྱས་ཁོ་ན་ཡིན་ཏེ། འདིར་ལས་ཉོན་དེ་གཉིས་ཀྱི་རང་བཞིན་ཡེ་ནས་མ་སྐྱེས་པའི་ཆོས་ཉིད་ལས་བཀོལ་བ་མེད་པར་ངོ་བོ་དེ་བཞིན་ཉིད་དེ་ཁྱབ་གདལ་ཆེན་པོའི་དབྱིངས་སུ་ཆུབ་པས་བཙལ་དུ་མེད་པར་སྒྲིབ་པ་ཉིད་ཡེ་ཤེས་ཕྱིན་ཅི་ལོག་ཉིད་བྱང་ཆུབ། ཉོན་མོངས་ཉིད་བདེ་བ་ཆེན་པོར་ཡེ་གྲོལ་བ་ཡིན་པས་མ་བསལ་དག་པ་ལ་དེའི་ཐ་སྙད་མེད་པའོ། །འོན་ཀྱང་སྒྲིབ་པ་ལ་སྦྱང་རྩོལ་མ་བྱས་པར་རང་བཞིན་གཉིས་མེད་དུ་ངེས་ནས་བཤད་པ་ལྟར་ཡེ་ཤེས་རང་བྱུང་ཆེན་པོ་རྟོགས་པས་སྤང་དུ་མེད་པར་ལྷུན་གྱིས་གྲུབ་པའི་ཁྱད་པར་གྱི་ཆེ་བ་དང་ལྡན་པ་ལ་འབྲས་བུ་རྒྱུ་རྐྱེན་ལ་རག་མ་ལས་པར་རང་གྲོལ་ཉིད་དུ་ཐོབ་པའི་སྒྲའོ། །དེ་དག་ནི་དོན་ནོར་མ་ནོར་ཤེས་པར་བྱ་བའི་ཕྱིར་བཀོད་པ་སྟེ་ལྟ་བའི་མི་མཐུན་པའོ། །དེ་ཡན་ཆད་ཀྱིས་བམ་པོ་བདུན་པ་སོང་ནས། བམ་པོ་བརྒྱད་པར་དབུ་ཟུག་པའོ། །གཉིས་པ་ལ་བདུན་ཏེ། ཡིན་པའི་ཆེ་བ་བདུན་དཔེས་བསྟན་པ། ངེས་པ་དྲུག་བཤད་པ། ཟིན་པ་དྲུག་བསྟན་པ། གཏན་ཚིགས་གསུམ་བཤད་པ། དྲོད་རྟགས་དྲུག་བཤད་པ། ཡིད་ཆེས་བཅུ་གཉིས་བཤད་པ། དེ་དག་གི་དོན་རང་ལས་འབྱུང་བར་བསྟན་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི། ལང་ཀའི། ཞེས་པ་ནས། རྣམ་པར་ངེས་པ་ཡིན། །ཞེས་པའི་བར་གྱིས་བསྟན་ཏེ། རྩ་བའི་ཐ་མ་དཔེས་ཆེ་བའི་དོན་ངེས་པར་མན་ངག་ཡིན་པ་དང་རྒྱུད་ཀྱི་ཆེ་བ་ཐུན་མོང་དུ་བསྟན་པ་གང་སྙམ་པ་ལ། ལང་ཀའི་བདག་པོ། ཞེས་སྡུད་པ་པོ་ལ་བོས་ནས་རྩ་བའི་དཔེ་གསུམ་གྱིས་མཚོན་ནས་ཐ་མ་དོན་མཐོང་བའི་ཚུལ་གྱིས་ངོ་བོ་ངེས་པར་བསྟན་པ་འདི་ཉིད་ནི་འདི་ལྟར། རྒྱུད་ཀྱི་རྒྱལ་པོ་འདིའི་དོན་ཕུན་སུམ་ཚོགས་པ་ཉིད་ཡིན་པར་ངེས་པའི་རྩ་བ་བདུན་གྱི་ངོ་བོ་ཡིན་པས་ཁྱད་པར་དུ་འཕགས་པ་དང་། དེས་ན་མན་ངག་ཨ་ཏི་ཡོ་གའི་ཐེག་པ་ཡང་ཡིན་པར་མངོན་པས་ངེས་པའི་གཏན་ཚིགས་ཀྱི་རྩ་བ་བསྡུས་པ་འདི་དག་གིས་རྒྱུད་ཀྱི་དོན་མ་ནོར་བ་དེ་ལ་བརྟགས་ཤིང་དཔྱད་པས་དོན་དེ་ཉིད་ཇི་ལྟ་བ་དེ་བཞིན་དུ་མཐོང་ནས་ཡང་དག་པར་རྟོགས་པ་ན། མཐོང་བ་པོ་ཡི་སྐྱེས་བུ་དེ་ཉིད་དེ་ལྟ་བུའི་གསང་དོན་ཟབ་མོ་རྣམ་པར་ངེས་ཏེ་མི་འགྱུར་བར་གདེང་དུ་ཆུད་པ་ཡིན་པས་མིང་ཡང་འགྲུབ་བོ། །གཉིས་པ་ལ་བདུན་ཏེ། ཐེག་པའི་ཡང་རྩེ་ཡིན་པར་ངེས་པའི་ཆེ་བ། རྒྱུད་ཀྱི་རྒྱལ་པོ་ཡིན་པར་ངེས་པའི་ཆེ་བ། ལུང་གི་སྤྱི་འགྲེལ་ཡིན་པར་ངེས་པའི་ཆེ་བ། མན་ངག་གི་རྩ་བ་ཡིན་པར་ངེས་པའི་ཆེ་བ། བསྟན་པའི་འབྱུང་གནས་ཡིན་པར་ངེས་པའི་ཆེ་བ། དོན་གྱི་མཇུག་སྡུད་ཡིན་པར་ངེས་པའི་ཆེ་བ། ཆོས་ཐམས་ཅད་ཀྱི་མེ་ལོང་ཡིན་པས་ངེས་པའི་ཆེ་བ་བཤད་པའོ། །དང་པོ་ནི། གླིང་དང་རི་བོ། ཞེས་པ་ནས། ཆེན་པོ་ཉིད་མཐོང་གསལ། །ཞེས་པའི་བར་གྱིས་བསྟན་ཏེ། དཔེར་ན་ཡུལ་གླིང་དང་ས་ཁམས་རི་བོ་དང་མཐའི་མུ་ཁྱུད་དང་བཅས་པ་ཐམས་ཅད། རི་རབ་ལྷུན་པོའི་རྩེ་མོ་ཉིད་ནས་བལྟས་ན། ཐམས་ཅད་ཀུན་གསལ་བ་དང་། ཁོབས་འོག་ཏུ་ཆུད་པ་དང་། མར་ལྟ་བའི་ཡུལ་ཁོ་ནར་མཐོང་བ་ལྟར། གྲངས་ཀྱི་བཀོད་པ་ཇི་སྙེད་དུ་སྣང་བའི་ས་དང་། ཐེག་པའི་རྣམ་གྲངས་དེ་སྙེད་ཐམས་ཅད་ཀུན་ཀྱང་། གསང་སྔགས་ཀྱི་གནས་ལུགས་དེ་ཁོ་ན་ཉིད་ཐེག་པ་ཆེན་པོ་ཇི་བཞིན་པ་རང་བྱུང་ལྷུན་གྱིས་གྲུབ་པའི་དོན་འདི་ཉིད་ཡང་དག་པར་མཐོང་ཞིང་རྟོགས་ན། དེ་དག་ཐམས་ཅད་མ་འདྲེས་ལ་ཡོངས་སུ་རྫོགས་པར་གསལ་བ་དང་། དམའ་བས་ཁོབས་འོག་ཏུ་ཆུད་པ་དང་། མར་ལ་ལྟ་བ་ཁོ་ནར་སྣང་བ། དེ་ལྟར་ངེས་པར་འདོགས་པའི་སྒོ་ནས་ཡི་གེ་འདི་ཡང་ཐེག་པ་ཐམས་ཅད་ཀྱི་ཡང་རྩེ་ཡིན་པར་ངེས་པའོ། །གཉིས་པ་ནི། འཇིག་རྟེན་འོད་ཀྱི། ཞེས་པ་ནས། ཆེན་པོ་དེ་ཉིད་དོ། །ཞེས་པའི་བར་གྱིས་བསྟན་ཏེ། དཔེར་ན་འཇིག་རྟེན་འོད་ཐམས་ཅད་ཀྱི་རྒྱལ་པོ་ནི། གཟི་ལྡན་གསལ་བའི་ཉི་མ་ཡིན་པ་ལྟར། ལམ་དང་འབྲས་བུའི་ཆོས་རྣམས་ཀུན་སྒྲོ་སྐུར་མེད་པར་བྱང་ཆུབ་ཀྱི་སེམས་ལ་བྱེ་བྲག་མ་འདྲེས་པར་ངོ་བོ་ཡོངས་སུ་རྫོགས་པར་འདུས་ཤིང་གསལ་ལ་འོག་མ་རྣམས་ཟིལ་གྱིས་གནོན་པ་ཉིད་པས། བསྟན་པ་ཀུན་སྣང་ཞིང་རིལ་གྱི་བདག་ཉིད་ཆེན་པོ་དེ་ཉིད་ཡིན་པའི་ཕྱིར། དེ་ལྟར་འདོགས་པའི་ཡི་གེ་འདི་ཡང་། རྒྱུད་དམ་ལུང་ཐམས་ཅད་ཀྱི་རྒྱལ་པོ་ཞེས་བྱ་བ་ཉིད་དོ། །གསུམ་པ་ནི། གོ་སྐབས་ཆེན་པོ། ཞེས་པ་ནས། བརྗོད་ཀུན་གསལ་བར་འགྲེལ། །ཞེས་པའི་བར་གྱིས་བསྟན་ཏེ། དཔེར་ན་གོ་སྐབས་ཆེན་པོ་འབྱེད་པའི་ནམ་མཁའ་ནི། ཕྱོགས་ལྷུང་བྲལ་བ་དང་། རང་བཞིན་སྟོང་བ་དང་། སྒོ་མི་འགག་པ་ཉིད་པས་འབྱུང་བ་ཆེན་པོ་བཞི་ཡི་དངོས་པོ་སོགས་ཀུན་གྱི་གོ་འབྱེད་ནས་ཐམས་ཅད་མ་སྒྲིབ་པ་སྣང་བ་ལྟར། བྱང་ཆུབ་ཀྱི་སེམས་བསྟན་ཅིང་བརྟགས་པར་དཀའ་བས་རང་བཞིན་གསང་བ་དེ་ཉིད་རིལ་གྱི་བཅུད་ཆེན་པོ་རྫོགས་ཤིང་དགོངས་པ་ཀུན་འདུས་པའི་དོན་དུ་གྱུར་བས་རང་རིག་པ་དེ་ཉིད་ཀྱང་ཕྱོགས་ལྷུང་དང་བྲལ་ཞིང་ངོ་བོ་རིས་སུ་མི་ཟིན་པར་བརྗོད་བྱ་དང་རྗོད་བྱེད་ཐམས་ཅད་ཀྱི་སྒོ་མི་འགག་པ་ཉེད་ཀྱིས་ཐེག་པ་སོ་སོས་བརྗོད་པའི་བསྟན་པ་ཐམས་ཅད་ཀྱི་བཀའ་ཡི་བརྗོད་པ་ཀུན་གྱི་དོན་ལྡེའུ་མིག་གསུམ་གྱིས་འབྱེད་ཅིང་གསལ་བར་འགྲེལ་བས་ན་ལུང་ཐམས་ཅད་ཀྱི་སྤྱི་འགྲེལ་ཡིན་ནོ། །བཞི་པ་ནི། གང་གིས་བཀའ་ཡི། ཞེས་པ་ནས། གང་ལའང་བརྩལ་མི་དགོས། །ཞེས་པའི་བར་གྱིས་བསྟན་ཏེ། དཔེར་ན་བློན་པོ་ལྟ་བུ་མི་གང་སུ་ཞིག་གིས་རྒྱལ་པོ་ཆེན་པོའི་བཀའ་ཡི་གསང་ལུང་ཚད་མ་དང་རྒྱ་རྟགས་ངེས་པར་ཐོབ་ན། མི་གང་གཞན་དམན་པ་སུ་ལ་ཡང་རག་མ་ལས་པར་རྒྱལ་པོའི་གྲོས་ལ་དབང་བསྒྱུར་བ་ལྟར་དུ། བསྟན་པའི་རྩ་བ་འདིའི་དོན་གསང་བའི་སྙིང་པོ་དབྱིངས་ལྷུན་གྲུབ་ཆེན་པོ་རྒྱལ་བའི་དགོངས་མཛོད་ཀུན་འདུས་པའི་ངོ་བོ་མ་ནོར་བར་ཁོང་དུ་ཆུབ་ན། གཞན་རྒྱུ་འབྲས་ཀྱི་ཐེག་པའི་ཚིག་གི་ཚོགས་ཇི་སྙེད་ཀྱི་སྨྲ་བ་དང་བརྗོད་པའི་ཐ་སྙད་གང་ཅི་ལའང་རྟེན་བཅའ་ཞིང་བྱ་བ་དང་འབད་པས་བརྩལ་མི་དགོས་པར་འདི་ཉིད་ཁོ་ནས་མཐར་ཐུག་གི་དོན་ལ་སྦྱོར་བས་མན་ངག་ཐམས་ཅད་ཀྱི་རྩ་བའང་ཡིན་ནོ། །ལྔ་པ་ནི། རྒྱུན་དང་བཅས་པའི། ཞེས་པ་ནས། ཟབ་མོའི་དབྱིངས་ནས་འབྱུང་། །ཞེས་པའི་བར་གྱིས་བསྟན་ཏེ། དཔེར་ན་རྒྱུན་དང་བཅས་པའི་འབྱུང་བ་ཆེན་པོ་བཞི་རྩི་ཤིང་དང་བཅས་པ་རྣམས་དུས་ཐམས་ཅད་དུ་བར་མ་ཆད་པར་རྒྱུའི་ངོས་ནས་འབྱུང་བ་ནམ་མཁས་གོ་ཕྱེ་ཞིང་ནམ་མཁའི་ངང་ལས་འབྱུང་ཞིང་སྣང་བ་ཡིན་ལ། དེ་བཞིན་དུ་རྒྱུ་དང་འབྲས་བུའི་བསྟན་པ་ཇི་སྙེད་པ་གདུལ་བྱ་ལ་སྨྲ་བརྗོད་འབྱུང་བའི་ཐེག་པར་སྣང་བ་མ་ལུས་པ་རྣམས་ཀྱང་དེ་ཉིད་ཇི་བཞིན་པར་ངེས་པའི་ལུང་ཟབ་མོའ་ི་བཀའ་གསང་གཏིང་དཔག་དཀའ་བ་འདིའི་དབྱིངས་ནས་བྱིན་རླབས་ཀྱིས་ཤར་ནས་ཁྱབ་གདལ་དུ་འབྱུང་བས་ན་བསྟན་པ་ཐམས་ཅད་ཀྱི་འབྱུང་གནས་ཀྱང་ཡིན་ནོ། །དྲུག་པ་ནི། དོན་དུ་བྱ་བའི། ཞེས་པ་ནས། དེ་བཞིན་ཉིད་དུ་འདུས། །ཞེས་པའི་བར་གྱིས་བསྟན་ཏེ། དཔེར་ན། འཇིག་རྟེན་གྱི་བསྒྲུབ་བྱ་ཁེ་སྤོགས་ལ་སོགས་པ་དོན་དུ་བྱ་བའི་རྣམ་གྲངས་མང་པོ་ཇི་སྙེད་ཀུན་བྱེད་པ་ཡང་། མཐར་གྱིས་འབྲས་བུ་གང་གྲུབ་པར་གྱུར་པ་ཐམས་ཅད་རང་ཁྱིམ་དུ་སྡུད་པས་ཐ་མ་དེར་འདུས་པ་ལྟར། རྒྱལ་བའི་བཀའ་ཡི་ཚིག་གི་རྣམ་གྲངས་མང་པོ་ཐེག་པ་དགུ་ལ་སོགས་པ་གདུལ་བྱའི་བློ་རིམ་ཇི་ལྟ་བར་རྒྱ་ཆེར་སྤྲོས་ཏེ་རྒྱས་པར་བརྗོད་ཅིང་བཤད་པར་མཛད་མོད་ཀྱང་། དེ་རྣམས་ཐམས་ཅད་ཀུན་དོན་གྱི་ངོ་བོ་གསང་སྔགས་ཇི་བཞིན་པ་དེ་བཞིན་ཉིད་ཀྱི་ངང་དུ་ཇི་ལྟ་བ་བཞིན་རྟོགས་པ་ན། ཀུན་འདུས་ཤིང་རྫོགས་པས་དེར་མ་འདུས་པ་མེད་པས་ན། རྒྱུད་འདི་ཉིད་དོན་ཐམས་ཅད་ཀྱི་མཇུག་སྡུད་ཀྱང་ཡིན་ནོ། །བདུན་པ་ནི། མེ་ལོང་གསལ་བའི། ཞེས་པ་ནས། རང་བཞིན་གསལ་བར་བྱེད། །ཅེས་པའི་བར་གྱིས་བསྟན་ཏེ། དཔེར་ན་མེ་ལོང་གསལ་བའི་སྙིང་པོས་ནི། བྱད་བཞིན་གྱི་གཟུགས་བརྙན་པ་གསལ་བར་སྟོན་པ་ལྟར། དེ་ཁོ་ན་ཉིད་གསང་བའི་སྙིང་པོ་འདིའི་དོན་ཡེ་གསལ་ཆེན་པོའི་ངང་དུ་གདལ་བའི་ཆོས་ཀྱི་མེ་ལོང་གིས། དངོས་པོ་དང་དངོས་པོ་མེད་པའམ་འཁོར་འདས་ལམ་གསུམ་གྱི་ཆོས་ཐམས་ཅད་ཀུན་གྱི་རང་བཞིན་མ་ནོར་བ་ཉིད་ཇི་ལྟ་བ་བཞིན་དུ་གསལ་བར་བྱེད་པས་ན། ཆོས་ཐམས་ཅད་ཀྱི་མེ་ལོང་ཡང་ཡིན་ནོ། །གཉིས་པ་ནི། ཀུན་གྱི་རྩ་བ། ཞེས་པ་ནས། བྱ་བ་ག་ལ་ཡོད། །ཅེས་པའི་བར་གྱིས་བསྟན་ཏེ། མན་ངག་ཡིན་པའི་རྗེས་སུ་ངེས་པའི་དོན་དྲུག་གིས་དེ་ཉིད་གསལ་བར་བསྟན་པའི་ཕྱིར། ཆོས་སོ་ཅོག་ཀུན་གྱི་གཞི་དང་རྩ་བ་སེམས་ཀྱི་ཆོས་ཉིད་འོད་གསལ་བ་ཉིད་རང་བྱུང་དུ་ཤར་བས་ན། ཐམས་ཅད་ཀྱི་ངོ་བོ་ལ་རང་བཞིན་གྱི་གཏན་ཚིགས་དང་ཆོས་ཉིད་ཀྱི་རིགས་པའི་དོན་གྱིས་བྱ་བ་ཐམས་ཅད་དང་བྲལ་བས། རང་བཞིན་ཅིས་ཀྱང་མ་བཅོས་པར་ངེས་ཏེ། མདོར་ན་ཆོས་ཐམས་ཅད་ཀྱི་རང་བཞིན་མ་བཅོས་པར་ངེས་པ་སྟེ། ངེས་པ་དང་པོའོ། །སྤྱོད་ཡུལ་ཀུན་མ་འདྲེས་ཡོངས་རྫོགས་སུ་ཤེས་པའི་རིག་པ་ཕྱོགས་ལྷུང་མེད་པ་ཉིད་གཉིས་མེད་ཡེ་ཤེས་ཆེན་པོའི་ཀློང་དུ་མི་འགག་པར་གསལ་བའི་ཉི་མ་འཆར་ནུབ་མེད་པར་གདལ་བས་ཆོས་སོ་ཅོག་ཀུན་རང་འོད་གསལ་བར་སྣང་བས་ཕྱོགས་ཀུན་ཡོང་གིས་འོད་གསལ་བར་མཐོང་བས་ན་ཡོང་གིས་འོད་གསལ་བར་ངེས་པ་སྟེ། གཉིས་པའོ། །དངོས་པོ་གཉིས་པའི་ཆོས་ཐམས་ཅད་ཀྱི་རང་བཞིན་ལྷུན་གྱིས་གྲུབ་པའི་དེ་བཞིན་ཉིད་དེར་འདུས་པས་ལྷག་མ་མེད་པར་སངས་རྒྱས་པ་ལ། མཐའ་གང་གིས་ཀྱང་མ་བསྒོས་ཏེ། དངོས་པོ་མེད་པའི་དེ་ཉིད་ཆེན་པོ་འབའ་ཞིག་ངོ་བོ་ཉིད་དུ་གསལ་བར་ཟད་པས། ཆོས་ཐམས་ཅད་ལྷུན་གྱིས་གྲུབ་པའི་ངང་དུ་ངེས་ཏེ། བདག་ཉིད་ཆེན་པོ་གཅིག་ཏུ་ལྷུན་གྱིས་གྲུབ་པར་ངེས་པ་སྟེ་གསུམ་པའོ། །ཆོས་ཉིད་མ་བཅོས་མ་བསླད་པའི་ངོ་བོ་དེ་བཞིན་ཉིད་དུ་ནི་ཡུལ་སེམས་སྣང་ཞེན་ཀུན་གྱི་རང་བཞིན་མཉམ་པར་གཅིག་པས། ལོག་ཞེན་ལ་གཉིས་སུ་སྣང་ཞིང་ཡུལ་དུ་བྱ་བའི་ཆོས་སོ་ཅོག་ཀུན། མ་སྤངས་པར་ཆོས་ཉིད་དུ་ནུབ་པ་ལ་ཐ་སྙད་ཅི་ཡང་མེད་པར་སྤྲོས་པ་ཀུན་དང་བྲལ་བའི་ཕྱིར་འཁོར་བ་ཆོས་ཉིད་དུ་ངེས་པ་སྟེ་བཞི་པའོ། །རྒྱུ་སེམས་ཅན་གྱི་སྒོ་གསུམ་ཉིད་སྣང་ལ་ངོ་བོ་མེད་པས་ཆོས་སྐུ་ཆེན་པོའི་འབྲས་བུར་ཡེ་རྫོགས་སུ་གསལ་བས། ཐོབ་ལྟུང་ལ་རེ་དོགས་གཉིས་དང་བྲལ་ཏེ། རྒྱུ་འབྲས་གཉིས་སུ་མེད་པའི་དེ་ཁོ་ན་ཉིད་དུ་ངེས་ཏེ་རྒྱུ་ཉིད་འབྲས་བུར་རྫོགས་པར་ངེས་པ་སྟེ་ལྔ་པའོ། །བཟང་ངན་དང་སྐྱོན་ཡོན་སྣང་གྲགས་ཀྱི་ཆོས་ཐམས་ཅད་དོར་བར་བྱ་བའི་དངོས་པོ་མེད་པར་གསང་བ་ཆེན་པོ་སེམས་ཀྱི་དཀྱིལ་འཁོར་འོད་གསལ་བ། དཀྱིལ་འཁོར་རྣམ་གསུམ་གྱི་ངོ་བོ་ཉིད་པས་གཞན་ནས་བླང་བར་བྱ་བ་ག་ལ་ཡོད་དེ་སྤང་བླང་གི་ཐ་སྙད་མ་སྤངས་ཡེ་ནས་བྲལ་བས་ན། སྐྱོན་དང་ཡོན་ཏན་བླང་དོར་མེད་པ་ངེས་པ་སྟེ་དྲུག་པའོ། །གསུམ་པ་ནི། མཐོང་ཟིན་སྦྱངས་ཟིན། ཞེས་པ་ནས། རྙེད་པ་ཉིད་ལས་བྱུང་། །ཞེས་པའི་བར་གྱིས་བསྟན་ཏེ། ཁས་བླངས་པའི་ཟིན་པ་དྲུག་གི་དོན་རྗེས་སུ་བསྟན་པ་གང་ཞེ་ན། ཡེ་ཤེས་ཆེན་པོ་རྒྱུན་ཆད་མེད་པར་རང་གསལ་བས་ཆོས་ཉིད་ཀྱིི་ནམ་མཁའ་མཐོང་ཟིན། ཐུགས་རྗེ་ཆེན་པོའི་རྒྱུན་དུ་འཆར་ཏེ། རྡོ་རྗེ་མཚོན་གྱིས་སྒྲིབ་པ་ཐམས་ཅད་ཡེ་ནས་བསྒྲལ་བས་འཁོར་བའི་སྡུག་བསྔལ་སྦྱངས་ཟིན། ཕྲིན་ལས་ལྷུན་གྱིས་གྲུབ་པས་སེམས་ཅན་རིལ་སངས་རྒྱས་ཀྱི་ས་ལ་མ་བཀོད་པར་རྫོགས་པའི་ཕྱིར་འགྲོ་བའི་དོན་བྱས་པ་ཟིན། སྐུ་དང་ཡེ་ཤེས་ཀྱི་འབྲས་བུ་རང་རིག་པ་ལ་ལྷུན་གྱིས་རྫོགས་ཏེ་དངོས་པོ་ཐམས་ཅད་ཆོས་ཉིད་དུ་ཤར་ནས་སྨོན་ལམ་རྒྱུན་དུ་གྲུབ་པས་འདོད་པ་གྲུབ་ཟིན། ཡེ་ཤེས་ཆེན་པོ་ལ་ཡོན་ཏན་ཐམས་ཅད་ལྷུན་གྱིས་གྲུབ་སྟེ་བདག་ཉིད་ཆེན་པོ་ཟླ་མེད་པར་བྱུང་བས་ཡོན་ཏན་གྱི་ཆེ་བ་སྤྱོམ་པ་ཟིན། དེ་བཞིན་དུ་ཁམས་གསུམ་སངས་རྒྱས་ཀྱི་ས་རུ་གྲོལ་ཏེ་ཆོས་ཅན་ཆོས་ཉིད་དང་། སེམས་ཅན་མྱང་འདས་སུ་ཤར་བ་ལ་འབྲས་བུ་གཞན་དུ་རག་མ་ལས་པས་དངོས་གྲུབ་ཆེན་པོ་གྲུབ་ཟིན་པས་དོན་བླ་ན་མེད་པ་ཡང་། ཡེ་ནས་དེ་ལྟ་བུའི་ངོ་བོ་ཉིད་དུ་གནས་པ་ཇི་ལྟ་བར་རྟོགས་ཏེ་གསང་བ་མཆོག་གི་དེ་ཁོ་ན་ཉིད་ཀྱི་ཉམས་རྙེད་ནས་གདེང་དུ་ཆུད་པ་ཉིད་ལས་སྐྱེས་ཆེན་དམ་པ་ལ་དེ་ལྟར་འབྲས་བུའི་དོན་རྣམས་རང་བྱུང་རང་ཤར་དུ་འཆར་བའོ། །དེ་ཉིད་ཅུང་ཟད་རྒྱས་པར་བཤད་ན། ཁྱུང་ཆེན་ལས། ཟིན་པས་ཆགས་དང་བྲལ་ཡང་ཞི། །དངོས་པོ་མེད་དང་རྣམ་པར་སྤངས། །བདུད་རྩི་ཆེན་པོའི་རང་བཞིན་ལ། །གཟའ་བའི་ཐབས་ལ་རག་པ་མེད། །ཅེས་དང་། རིན་པོ་ཆེ་ཀུན་འདུས་ལས། དེ་བཞིན་ཡེ་ནས་བདུད་རྩིས་ཟིན་པ་ལ། །བྱས་པས་ཟིན་པར་ཡོང་མི་འགྱུར། །མ་ལུས་ཟིན་པར་གྱུར་ཏེ་དབྱིངས་རྟོགས་ན། །རྣམ་པར་ཀུན་བྱས་བྱང་ཆུབ་མཆོག་གི་ངང་། །ཞེས་གསུངས་པ་ལྟར། རང་རིག་པ་ལྷུན་གྱིས་རྫོགས་པའི་དེ་བཞིན་ཉིད་མ་ནོར་བར་རྟོགས་ན། སེམས་ཅན་སངས་རྒྱས་བཀོད་པས་འགྲོ་དོན་ཡེ་ནས་བྱས་ཟིན། རང་བྱུང་དེ་བཞིན་ཉིད་ལ་རྒྱལ་བ་རིལ་མ་འདྲེས་ལ་ཡོངས་སུ་རྫོགས་པས་དཀྱིལ་འཁོར་ཡེ་ནས་བཀོད་ཟིན། སྟོང་གསུམ་ཡོངས་གྲོལ་གྱི་རང་བཞིན་པས། མཆོད་པ་ཡེ་ནས་ཕུལ་ཟིན། ཅི་བྱས་སངས་རྒྱས་ཀྱི་མཛད་པ་སྟེ་ཀུན་ཏུ་བཟང་པོའི་མཛད་པར་མ་གྱུར་པ་མེད་པས་སྤྱོད་པ་ཡེ་ནས་སྤྱད་ཟིན། ཐམས་ཅད་ཡེ་ཤེས་ཆེན་པོར་འཛིན་རྟོག་མེད་པར་རང་གསལ་བ་ལྟ་བས་རྟོགས་ཟིན། བདེ་བ་ཆེན་པོའི་ངང་ལ་དུས་གསུམ་དུ་འབྱུང་འཇུག་བྲལ་བས། བསྒོམ་པ་བྱས་ཟིན། ཇི་ལྟར་བྱས་ཀྱང་ཐེག་པ་ཆེན་པོ་ལས་འདའ་བ་མེད་པས་དམ་ཚིག་བསྲུངས་ཟིན། ལྷུན་གྱིས་རྫོགས་ཏེ་དོན་གཞན་དུ་མ་ལུས་པས་བསྒྲུབ་པ་བྱས་ཟིན། སྣང་སྲིད་སྐུ་དང་ཡེ་ཤེས་སུ་རང་ཤར་བས་དངོས་གྲུབ་ཐོབ་ཟིན། སྐུ་གསུམ་བྱང་ཆུབ་ཀྱི་སེམས་ཉིད་པས་ཚོགས་རྫོགས་ཟིན། དུས་གསུམ་མཉམ་པ་ཉིད་ཀྱི་ཀློང་ལས་མ་ཉམས་པས་དངོས་གྲུབ་བརྩམས་ཟིན། ཡེ་ཤེས་རང་བྱུང་རྒྱལ་པོ་བགྲོད་དུ་མེད་པས་ས་ནོན་ཟིན། ཐམས་ཅད་བདག་ཉིད་ཆེན་པོར་སྣུམས་པས་དབང་རྫོགས་ཟིན། དེ་ལྟར་མཐའ་མ་སྤངས་པའི་ཡེ་ཤེས་གང་དང་ཡང་ལྷན་མི་གཅིག་པས། སྒྲིབ་པ་སྦྱངས་ཟིན། ཅིར་སྣང་ཕྱག་རྒྱའི་ངོ་བོ་བས། ཕྱག་རྒྱ་བཅིངས་བསྒོམས་བྱས་ཟིན། སྒྲར་སྣང་བ་རྒྱལ་བའི་གསུང་ཡིན་པས་བཟླས་བརྗོད་བྱས་ཟིན། ཡེ་གཉིས་སུ་མེད་པའི་གཟུངས་ཀྱི་རྒྱལ་མོ་དང་འདུ་འབྲལ་མེད་པས་སྦྱོར་བ་བྱས་ཟིན། བྱུང་ཚོར་རྟོག་པ་ཡེ་ཤེས་སུ་གསལ་བ་ལ་རྣམ་རྟོག་མིང་མེད་པས་བསམ་སྐྱོན་བཅོས་ཟིན། རང་བྱུང་ཆེན་པོ་ཅིར་ཡང་མ་འགགས་པར་ཤར་བས་རྟགས་ཐོན་ཟིན། རང་རིག་མཉམ་པའི་ཀླུང་དུ་གཉིས་མེད་པས་དྲོད་རྙེད་ཟིན། དེ་ལྟར་ཟིན་པའི་དོན་ཉི་ཤུས་གཏན་ལ་ཕེབས་ཟིན་པ་ལ། སུ་ཞིག་གིས་གང་ཞིག་ལ་བརྩལ་ཏེ། རྩོལ་བ་པོ་དང་བཙལ་བ་ཀ་ནས་དག་གོ། །ཞེས་བསམ་གཏན་མིག་གི་སྒྲོན་མ་ལས་གསུངས་པ་སོགས་རྫོགས་པ་ཆེན་པོའི་གཞུང་ལས་ཤེས་པར་བྱ་སྟེ། བདེ་འབྱམས་ལས་ཀྱང་། བྱ་བ་མེད་པས་ཐིག་ལེ་བདེ། །དུས་གསུམ་མེད་པས་ཐིག་ལེ་བདེ། །བརྩལ་དུ་མེད་པས་ཐིག་ལེ་བདེ། །བརྩོལ་བར་འདོད་པས་དབྱིངས་མི་བསྐྱོད། །ཅེས་སོགས་ཚད་མེད་དོ། །བཞི་པ་ནི། ཀུན་བརྟགས་ཀུན་ཉིད། །ཅེས་པ་ནས། གཅིག་ལས་མེད་པ་ཡིན། །ཞེས་པའི་བར་གྱིས་བསྟན་ཏེ། མན་ངག་གཏན་ལ་དབབ་པའི་གཏན་ཚིགས་ཀྱི་དོན་བསྟན་པའི་ཕྱིར། ཚིགས་བཅད་གཅིག་དང་རྐང་པ་གཉིས་འདི་གསུངས་ཏེ། འདི་དག་སྤྱིར་ཐུན་མོང་གི་ཀུན་རྫོབ་ཀྱི་བདེན་པ་བརྟགས་པས་དབེན། མཐུན་པར་སྣང་། དོན་བྱེད་ནུས་ཞེས་པ་གསུམ་དང་། ཡང་དག་ལོག་པའི་ཀུན་རྫོབ་གཉིས་དང་། མདོར་ཀུན་རྫོབ་སྒྱུ་མ་གཅིག་ལྟ་བུར་སྣང་ན་ཡང་། འདིར་མན་ངག་ཟབ་མོའི་དོན་གྱིས་ངང་རང་བཞིན་བདག་ཉིད་ཆེན་པོ་གསུམ་དུ་འགྱུར་ཏེ། དངོས་པོ་གཉིས་པ་རིལ་ལྷག་པའི་རྣལ་འབྱོར་གྱི་ལུགས་ཀྱིས། ཀུན་ཏུ་བརྟགས་ཏེ་ཡུལ་དུ་ཞེན་པའི་ཆོས་སྣ་ཚོགས་སུ་སྣང་བ་བཟང་ངན་གཉིས་ཀའི་ངོ་བོ་ཀུན་བརྡ་ཡིས་ཕྱི་རོལ་དུ་འཛིན་ཅིང་ཞེན་པ་རིལ་དང་བཅས་པ་ཉིད་སྣང་རྟོག་བདོ་ཙམ་ན་མཉམ་པ་ཆེན་པོ་བྱང་ཆུབ་ཀྱི་སེམས་ལྷུན་གྱིས་གྲུབ་པའི་ངང་དུ་མཐའ་གང་གིས་ཀྱང་མ་རེག་པར་གསལ་བ་ནི་དབེན་པ་ཆེན་པོ་ཡིན་པས་ན་རང་བཞིན་ལྷུན་གྱིས་གྲུབ་པའི་སྣང་བའོ། །དེས་ན་ཀུན་ཏུ་བརྟགས་པའི་ཆོས་ཀུན་མི་རྟོག་པར་གསལ་བས་དབེན་ལ་དེས་ཀུན་ལ་ཁྱབ་པས་སྣང་བ་སྟེ། མ་གཡོས་པར་མཚོན་པ ས་ངང་གི་གཏན་ཚིགས་དང་། དེ་ལྟ་བུའི་ངང་ཆེན་པོ་དེ་ནི་ངོ་བོ་ཐམས་ཅད་པའི་ཕྱིར་གང་དང་ཡང་མི་ཕྱེད་པས་ཀུན་ལ་སྦྱོར་ཞིང་ཀུན་ཏུ་སྣང་བ། དེ་ཉིད་རང་བཞིན་སྣ་ཚོགས་སུ་ཤར་བས་ཆོས་བཟང་བ་དང་ངན་པ་འཁོར་བ་དང་མྱ་ངན་ལས་འདས་པ་ཇི་སྙེད་དུ་སྣང་ལ་མ་འགག་པར་ཤར་ཡང་། ངང་གིས་དོན་གྱིས་རང་རང་གི་བྱས་པ་སྣ་ཚོགས་པས་འགྲོ་བའི་དོན་གྱིས་བྱ་བ་བྱེད་ནུས་པ་རྣམས་ནི་རང་བཞིན་གྱི་ཆོས་སུ་གནས་པས་ཅིར་ཡང་སྣང་བར་མཚོན་པ་རང་བཞིན་གྱི་གཏན་ཚིགས་དང་། དེ་ལྟ་བུའི་ངང་དང་རང་བཞིན་གཉིས་སུ་མེད་པའི་དོན་འདིར་ཐེ་ཚོམ་ཆད་ནས་ཐབས་ཁྱད་པར་ཅན་གྱིས་རྟོགས་པའི་གདེངས་རྙེད་དེ་རང་བཞིན་ངང་དུ་ཕེབས་པས། དངོས་པོ་ཐ་དད་པ་ཐམས་ཅད་རང་བྱུང་ཡེ་ཤེས་བདག་ཉིད་ཆེན་པོའི་ངོ་བོར་གཅིག་ཏུ་མཐུན་པར་རང་སྣང་ཞིང་ལྷག་པའི་ཆོས་སྐུ་ཆེན་པོར་གསལ་བ་ལ་དབྱེར་མེད་མཚོན་པ་བདག་ཉིད་ཆེན་པོའི་གཏན་ཚིགས་ཞེས་བྱ་སྟེ། ཕྱོགས་ཐ་དད་པའི་ཡུལ་དུས་ཀྱི་སྣང་བའི་རིས་དང་བྲལ་བའོ། །དེ་ལྟར་ཡང་། ཡེ་ཤེས་གསང་བ་ལས། བྱང་ཆུབ་སེམས་ཀྱིི་ངོ་བོ་ནི། དམན་པའི་སེམས་ཀྱིས་མི་རྟོགས་ཏེ། །གཏན་ཚིགས་གསུམ་གྱིས་ཤེས་པར་བྱ། །ངང་ནི་རིག་པ་གསལ་བ་སྟེ། །རང་བཞིན་རིག་པ་ཅིར་ཡང་སྣང་། །བདག་ཉིད་སྣང་སྟོང་ཐ་དད་མེད། །བསྒྲུབ་བྱ་དག་གི་རང་བཞིན་ནི། །འཁྲུལ་པ་བྱང་ཆུབ་སེམས་སུ་ཤེས། །ཞེས་སོ། །མདོར་ན་ཨ་ཏི་ཡོ་གའི་ཆོས་རྣམ་གྲངས་ཇི་སྙེད་དུ་བཤད་པ་ཀུན་གྱི་མདོ་དེ་གསུམ་ཉིད་ཁོ་ན་ལ་འདུས་ཤིང་། ཡང་ན་དཔེ་དོན་རྟགས་གསུམ་གྱིས་མཚོན་པར་ཡང་རུང་ལ། ལར་ནི་རང་བཞིན་ངང་དུ་ཕེབས་པས་མ་དམིགས་པའི་ཕྱིར། ངང་དང་བདག་ཉིད་ཆེན་པོ་གཉིས་ཉིད་ཁོ་ནར་ཟད་པའམ། ཀུན་ཏུ་བཟང་པོ་དང་བཟང་མོའམ། དབྱིངས་དང་ཡེ་ཤེས་གཉིས་སུ་འདུས་པར་ཡང་རུང་ངོ་། །ངེས་པར་རང་བྱུང་གི་ཡེ་ཤེས་བདག་ཉིད་ཆེན་པོ་གཅིག་ལས་མེད་པ་ཡིན་པས་ཆོས་རྣམས་ཀྱི་དེ་ཁོ་ན་ཉིད་དེར་ལྷུན་གྱིས་རྫོགས་པ་ལས་གཞན་རྡུལ་ཙམ་གྱིས་ཐ་སྙད་གདགས་པར་བྱར་ཡང་མེད་དེ། སྔ་མ་ལས། བདག་ཉིད་ཆེན་པོའི་གཏན་ཚིགས་ཀྱིས། །ཐམས་ཅད་བྱང་ཆུབ་སེམས་སུ་ཤེས། །གང་ལྟར་གནས་ཀྱང་ཆོས་ཉིད་དོ། །ཞེས་སོ། །ཡང་ན་གཏན་ཚིགས་དྲུག་སྟེ། ངང་གིས་དབེན་པའི། དོན་བྱེད་ནུས་པའི། མཐུན་པར་སྣང་བའི། ངང་རང་བཞིན་བདག་ཉིད་ཆེན་པོ་གསུམ་དུ་འདུས་པའི། དབྱིངས་དང་ཡེ་ཤེས་གཉིས་སུ་འདུས་པའི། བདག་ཆེན་པོ་གཅིག་ལས་མེད་པའི་གཏན་ཚིགས་རྣམས་སོ། །ལྔ་པ་ནི། ཐམས་ཅད་འདིར་འདུས། ཞེས་པ་ནས། ཉིད་དེ་ཀུན་གྱི་མདོ། །ཞེས་པའི་བར་གྱིས་བསྟན་ཏེ། དེ་ཅིའི་ཕྱིར་ཞེ་ན། དོན་གྱིས་གང་ཡང་མ་བཀོལ་བ་ཆེན་པོ་ནི་ཐམས་ཅད་ཀྱི་གཞིར་གྱུར་པས་སེམས་ཉིད་གསང་བའི་སྙིང་པོ་འདིར་ཆོས་ཀུན་འདུས་པའི་བདག་ཉིད་ཆེན་པོའི་ངོ་བོ་སྟེ། དེ་བས་ན་ཆོས་ཐམས་ཅད་ཀྱང་འདི་ལས་བྱུང་བས་ཀུན་གྱི་འབྱུང་གནས་སུ་གྱུར་པའི་མ་ནོར་ངེས་པའི་རྩ་བ་འདི་ཡི་དོན་ཇི་བཞིན་དུ་ཤེས་ཤིང་རྟོགས་ནས་གོམས་པར་བྱས་ན། དབུགས་དལ་བ་ལྟ་བུ་སྦྱོར་བ་ནང་གི་དྲོད་དང་། ལུང་སྟོན་པ་ལྟ་བུ་མཚན་མ་ཕྱིའི་དྲོད་དང་། ལྟ་བ་རྟོགས་པ་ལྟ་བུ་རིག་པ་རང་བཞིན་གྱི་དྲོད་དང་། ལམ་གོང་འོག་ཀུན་རིག་པ་ལྟ་བུ་རང་བཞིན་ལུང་གི་དྲོད་དང་། རྟོགས་པའི་ངང་ལས་མི་འགྱུར་བར་གནས་པ་ལྟ་བུ་གནས་འགྱུར་ཆོས་ཉིད་ཀྱི་དྲོད་དང་། བདུད་ཀྱི་སྤྱོད་ཡུལ་བཅོ་བརྒྱད་ལྟ་བུ་མངོན་སུམ་མཚན་མའི་དྲོད་ཀུན་ཀྱང་འབྱུང་ལ། ཇི་ལྟར་བྱུང་ཡང་མངོན་ཞེན་མེད་པར་དངོས་སྣང་རིལ་ཡང་འཕྲལ་དུ་བློས་མ་བྱས་པར་ཆོས་ཉིད་མ་བཅོས་པའི་ངོ་བོ་ཇི་བཞིན་པ་དེ་བཞིན་ཉིད་དུ་རང་གསལ་བ་ནི། རིལ་གྱི་བདག་ཉིད་ཆེན་པོ་ཡིན་པས་དེ་ཐམས་ཅད་ཀུན་གྱི་མདོ་ཆེན་པོ་ཤིན་ཏུ་རྣལ་འབྱོར་འདི་ཉིད་ཡིན་པ་བདུན་གྱིས་ཉམས་སུ་མྱོང་ན་དྲོད་རྟགས་དང་རྟོགས་པ་ཡོངས་ཀྱི་རྩ་བ་རྒྱལ་བའི་དགོངས་པ་ཀུན་འདུས་པའི་དོན་བླ་ན་མེད་པར་བསྟན་པ་ཡིན་ནོ། །དྲུག་པ་ནི། སྒྱུ་མར་ཀུན་སྣང་། ཞེས་པ་ནས། ཡུལ་ན་བགྲོད་པ་མེད། །ཅེས་པའི་བར་གྱིས་བསྟན་ཏེ། དེའི་དོན་ལ་ཡིད་ཆེས་པ་དག་རྣམ་གྲངས་བཅུ་གཉིས་ཀྱིས་གསལ་བར་བསྟན་པའི་ཕྱིར། ཚུལ་ཇི་ལྟ་བར་མཐོང་བ་དང་རྟོགས་པའི་རྟགས་ནི། བློ་དང་ལྡན་པས་ཆོས་ཐམས་ཅད་སྒྱུ་མ་ལྟ་བུར་རྟོགས་པ་ན། ཡོན་ཏན་ཀྱང་སྒྱུ་མར་དུས་ཀུན་ཏུ་སྣང་བས་སྐྱོན་ལ་དངོས་གཞི་མེད་པར་ཡིད་ཆེས། བྱམས་པ་ལ་ཆགས་པ་མེད་པས་སྡང་བ་ལ་ཡིད་མི་འཁྲུག་པར་ཡིད་ཆེས། སྣང་སྲིད་ཆོས་ཉིད་ཀྱི་ནམ་མཁའི་ངང་ལ་རོ་གཅིག་ཏུ་གནས་པར་རྟོགས་པས་དངོས་པོ་ལ་རང་བཞིན་མེད་པར་ཡིད་ཆེས། རིག་པ་སྣང་བའི་སྤྱོད་ཡུལ་དང་བྲལ་ཏེ་མཚན་མར་བརྟག་ཏུ་མེད་པ་ཉིད་པས་ཡུལ་སེམས་ཀྱི་དངོས་པོ་དང་བྲལ་བར་ཡིད་ཆེས་པའམ། ཕུང་པོ་ལ་བརྟག་ཏུ་མེད་པས་ཀུན་གཞི་ལ་དངོས་པོ་མེད་པར་ཡིད་ཆེས། འབྲས་བུའི་རྩ་བར་ཆོས་ཉིད་ཀྱི་སྙིང་པོ་ཀུན་གཞིར་གྱུར་པས། སེམས་ཉིད་ལས་སངས་རྒྱས་གཞན་པ་ལོགས་ན་མེད་པར་ཡེ་སངས་རྒྱས་པར་ཡིད་ཆེས། དྲན་རིག་སྣ་ཚོགས་སུ་རྒྱུ་བ་ཡེ་ཤེས་ཇི་སྙེད་པར་ལྷུན་གྱིས་གྲུབ་སྟེ་དུས་གསུམ་དུ་གསལ་བ་དག་གིས། ཐུགས་རྗེ་རྒྱུན་དུ་འཆར་བར་ཡིད་ཆེས། ཡེ་ཤེས་གསལ་བའི་སྒྲོན་མར་ཡིད་ཀྱི་མེ་ལོང་ཉིད་རང་སྣང་བས་མ་རིག་པའི་མུན་པ་མིང་མེད་དུ་སེལ་བར་ཡིད་ཆེས། ཡོན་ཏན་གྱི་འབྱུང་གནས་ཡིད་བཞིན་ནོར་བུ་ལྟ་བུར་ཀུན་གཞི་ཉིད་གྱུར་པས། དངོས་གྲུབ་རང་གི་རྩལ་ཉིད་ལས་བྱུང་བར་ཡིད་ཆེས། སེམས་ཉིད་ལ་སྐྱེ་འགག་གི་འཕོ་འགྱུར་མེད་པས་སྐྱེ་ཤི་ལ་འཇིགས་པ་དང་བྲལ་བར་ཡིད་ཆེས། ངོ་བོ་ཅིར་ཡང་མ་ངེས་པར་རྟོགས་ནས་གནས་ལ་ངེས་པ་མེད་པས་འཕོ་འགྱུར་ལ་ཉམ་མི་ང་བར་ཡིད་ཆེས། མ་རྟོགས་པ་རྟོགས་པར་བྱར་མེད་པར་ཡེ་སངས་རྒྱས་པའི་དོན་དུ་ཆུབ་པས་ན་ཤེས་པ་བྱ་བརྩལ་ཀུན་དང་བྲལ་ཏེ་རྩོལ་སྒྲུབ་བྱ་མི་དགོས་པར་ཡིད་ཆེས། དོན་ངེས་ནས་གོ་བའི་ཡུལ་རྟོགས་ན་ཁམས་གསུམ་སངས་རྒྱས་ཀྱི་ཞིང་ཡིན་པས། སའི་རིམ་པ་ལ་བསྒྲོད་པ་མེད་པར་ཡིད་ཆེས་པ་རྣམས་ཀྱི་དོན་ཏོ། །བདུན་པ་ནི། དེ་ཉིད་ཆེན་པོའི་ཚིག །ཅེས་པ་ནས། དོན་ཉིད་ཉིད་ལས་བྱུང་། །ཞེས་པའི་བར་གྱིས་བསྟན་ཏེ། དེ་ལྟ་བུའི་མན་ངག་རིན་པོ་ཆེ་ཇི་ལྟར་སྣང་ནས་བརྒྱུད་ཚུལ་ནི། དེ་ཁོ་ན་ཉིད་ཀྱི་དོན་ཆེན་པོའི་ཡང་ཆེན་པོ་ཁྱད་པར་ཅན་གྱི་གསང་བ་ཟབ་མོ་འདིའི་ཚིག་རེ་རེར་ཡང་། རྒྱལ་བ་ཀུན་གྱི་དགོངས་པ་ལ་བརྒྱུད་དེ་དེ་ཁོ་ན་ཉིད་བྱིན་རླབས་ཀྱིས་རང་སྣང་བ་བཞིན་དང་མེ་ལོང་ལྟ་བུའོ། །རིག་འཛིན་རྣམས་ལ་རིག་པས་བརྒྱུད་པའང་ཚུལ་དེ་ཉིད་དེ་རང་གི་ངོ་བོ་རང་སྣང་བའོ། །དེ་དག་ནི་དོན་གཅིག་ལ་མཚོན་པའི་མིང་ཡང་གཅིག་གིས་ཕྱིར་ཚིག་རེ་རེར་བརྒྱུད་ཅེས་བསྙད་དེ་ཚིག་རྒྱས་པར་བསྙད་པ་མེད་དོ། །གང་ཟག་ལ་རྣ་བས་བརྒྱུད་པ་ནི། མན་ངག་གི་ཚིག་མ་ནོར་བ་དམ་པའི་མཛོད་གསུམ་དུ་བརྒྱུད་དེ་སྙན་ཁུངས་བརྒྱུད་པའི་མན་ངག་གོ། །དེ་ལྟ་བས་ན་སེམས་ཉིད་ལས་གཞན་དུ་བཙལ་ཏེ་ཐེག་པ་གཞན་གྱི་སྒོ་ནས་བློ་དང་གྲོས་དང་ཐབས་ཀྱི་རྩ་བ་གསུམ་གྱིས་རྩད་བཅད་པར་བྱས་ཀྱང་མི་རྙེད་དོ། །དེའི་ཕྱིར་མན་ངག་སྙན་ཁུངས་སུ་བརྒྱུད་པའི་གསང་བའི་དོན་ནི་གསང་སྔགས་ཀྱི་ཐེག་པ་འདི་ཉིད་ཁོ་ན་ལས་བྱུང་སྟེ། དེ་ཡང་མདོར་རང་རིག་པ་ཉིད་ལས་བྱུང་བའོ། །འདི་དག་ནི་རྫོགས་པ་ཆེན་པོའི་སྐབས་སུ་ཡང་མན་ངག་གི་སྙིང་པོ་དམ་པ་ཡིན་ཏེ། ལ་ཤན་ལྟ་བའི་སྒྲོན་མ་ལས། རྒྱས་པར་མདོ་བཞི་མེ་ལོང་དང་། །ངེས་བདུན་ངེས་ཟིན་གཏན་ཚིགས་དྲུག །ཚུལ་གྱིས་ངེས་པ་བཅུ་གཉིས་སོགས། །གཞུང་འདིར་ཚད་མས་བལྟ་བར་བྱ། །ཞེས་གསུངས་སོ། །གསུམ་པ་ལ་དྲུག་སྟེ། གོལ་སྒྲིབ་ཀྱི་ངོ་བོ་བཤད་པ། གོལ་སྒྲིབ་ཀྱི་རྒྱུ་བཤད་པ། རྟོགས་པ་མེད་པར་གླེགས་བམ་བཅངས་ཀྱང་གོལ་བར་བསྟན་པ། གོལ་བ་ཉིད་ལ་བཟླ་བའི་ཐབས་བཤད་པ། རྟོགས་པས་ཇི་ལྟར་སྤྱད་ཀྱང་མི་འཆིང་ཞིང་གྲོལ་བར་བསྟན་པ་གོལ་སྒྲིབ་སྤོང་བ་བྱ་བ་བྱེད་པའི་རྣལ་འབྱོར་དུ་གོལ་བར་བསྟན་པའོ། །དང་པོ་ནི། གང་ཞིག་གཞན་དུ། ཞེས་པ་ནས། རྟོག་པ་དེ་ཉིད་བགེགས། །ཞེས་པའི་བར་གྱིས་བསྟན་ཏེ། རྩ་བ་བར་མའི་དོན་གྱིས་རྗེས་སུ་གོལ་སྒྲིབ་བསྟན་པ་ནི། རྣལ་འབྱོར་པ་ཐ་ཤལ་གང་སུ་ཞིག་གིས་སེམས་ཉིད་རང་རིག་པ་ལས་གཞན་དུ་བསྙེགས་ཏེ་ལམ་དང་འབྲས་བུའི་དོན་ཟབ་མོ་གང་ཚོལ་བ་དེ་ཉིད་ནི། བདག་ཉིད་ཆེན་པོ་ལས་འཁྲུལ་པས་ཡུལ་འཛིན་གྱི་རྟོག་པར་གོལ་ནས་ནོར་བའི་ལམ་དུ་ཆུད་དེ་ལོག་པར་ཞུགས་པ་ཡིན་ནོ། །དེ་ཅི་སྟེ་ཞེ་ན། ཡུལ་གཞན་དུ་རྣམ་པར་རྟོག་པ་ནི་དོན་མཐོང་དུ་མི་སྟེར་བའི་མུན་པའི་སྒྲིབ་པར་གྱུར་པས་དེས་རྒྱུད་ནོན་ནས་རང་རིག་པའི་ཆོས་ཉིད་བསྒྲིབས་ཏེ་མ་མཐོང་བ་ནི་སྒྲིབ་པའི་ངོ་བོའོ། །དེས་ན་དོན་ལ་བསྒྲིབ་བྱ་སྒྲིབ་བྱེད་མེད་ཀྱང་། གང་ཆོས་ཉིད་རང་གསལ་དུ་མ་རིག་པར་ཡུལ་དུ་བྱེད་པ་དེ་ཉིད་ལྟ་བའི་སྒྲིབ་པ་ཡིན་ནོ། །དེ་བས་ན། ཆོས་ཉིད་མཚན་མར་བརྟག་ཏུ་མེད་པ་ལ་མཚན་མར་བརྟག་པའམ་དམིགས་པའི་ཡུལ་དུ་མེད་པ་ལ་ཡུལ་དུ་བྱེད་པའི་རྣམ་པར་རྟོག་པ་དེ་ཉིད་ལ་མིང་དུ་ཡང་ཡང་དག་པའི་བར་ཆད་བྱེད་པས་བགེགས་ཞེས་བྱ་བ་ཡིན་པས་གོལ་སྒྲིབ་ཏུ་འཕྱན་པ་ཉིད་དེ། ངེས་དོན་མདོ་བཅུ་ལས། སྤྲོས་པ་མེད་པའི་དོན་ཤོར་བས། །མཚན་མ་དག་གི་ལམ་ལ་བགྲོད། །སྒྲོ་སྐུར་བྲལ་བའི་ཆོས་ཉིད་ལ། །ཚིག་དང་ཡི་གེར་བརྗོད་པས་གོལ། །བརྗོད་ཡོད་རྟོག་པ་སྒྲིབ་པ་ཡིན། །ཞེས་སོ། །གཉིས་པ་ནི། བགེགས་ནི་དེ་ཉིད། །ཅེས་པ་ནས། སྐྱོན་དང་གོལ་སྒྲིབ་ཡིན། །ཞེས་པའི་བར་གྱིས་བསྟན་ཏེ། དེ་ལ་གོལ་སྒྲིབ་ཀྱི་བགེགས་དེའི་རྒྱུ་ནི་དེ་ཁོ་ན་ཉིད་བརྟག་ཏུ་མེད་པ་ལ་རྣམ་པར་རྟོག་ཅིང་དོན་ཆེད་དུ་གཉེར་བ་ཉིད་ཡིན་པས་འཁྲུལ་རྟོག་དེ་ལས་བྱུང་བའོ། །དེས་ན་སྐྱེས་མཆོག་གང་སུ་ཞིག་ལ། བདག་ཉིད་མཉམ་པའི་དོན་ཉིད་ཡེ་ནས་ཡིན་པར་རྟོགས་ཏེ་དེ་ཉིད་དུའང་འཛིན་པ་མ་སྐྱེས་པར་རྣམ་པར་རྟོག་པ་གང་ཡང་མ་བྱུང་ན། གཉིས་སུ་རྟོག་པའི་བདུད་ཅེས་བྱ་བ་ག་ལ་ཡོད་དེ་མིང་ཡང་མེད་དོ། །དེའི་ཕྱིར་བདུད་ནི་གང་ལས་བྱུང་བ་ཡིན་ཞེ་ན། རྒྱུ་ཉེ་བར་བསྟན་པ་ནི། ཆོས་ཉིད་བཙལ་བའི་རྒྱུ་དང་བྲལ་བས་བསམ་དཔྱད་མེད་པར་རང་གསལ་བ་ལ། དེ་ལྟར་མ་ཤེས་པར་ཡང་དག་པའི་དོན་གཅིག་བཟུང་ནས་དེ་ལ་མངོན་དུ་འདྲིས་པར་རྩོལ་ཞིང་རྟག་ཏུ་བརྩོན་འགྲུས་བྱེད་པ་ལས་བྱུང་བ་ཡིན་ཏེ། དེ་ལ་བདག་ཉིད་ཆེན་པོར་མ་ཤེས་པའི་ཕྱིར་རོ། །དེས་ན་ཆོས་ཉིད་བདག་ཉིད་ཆེན་པོར་ཤེས་ནས་དེ་ཉིད་དུའང་འདུ་ཤེས་མ་ཞུགས་པས་དངོས་སུ་རྩོལ་བསྒྲུབ་ཀྱིས་བརྩོན་འགྲུས་མེད་པ་ཉིད་ལས་བདུད་གཞན་གང་ཡང་མི་འབྱུང་སྟེ་གཉིས་འཛིན་མེད་པའི་ཕྱིར་རོ། །འོ་ན་ཡལ་བ་ཁོ་ནར་འདུག་གོ་ཞེ་ན། དེ་ཡང་རིགས་པ་མ་ཡིན་ཏེ། ཅི་ཡི་ཕྱིར་ན། མི་བསྒོམ་པའམ་བསྒོམ་པ་ཡལ་བར་འདུག་པའང་མེད་པའི་དོན་མ་མཐོང་བར་བརྩོན་པའི་ཐབས་ཀྱིས་མི་འགྲུས་པར་སྙོམས་ལས་ཀྱི་ལེ་ལོ་བྱེད་པ་དེ་ཉིད་ནི་དོན་མི་མཐོང་བའི་གཏན་ཚིགས་ཀྱིས་བདུད་ཅེས་བྱ་བར་བསྙད་དེ་ཡལ་བར་མི་འདུག་གོ། །འོ་ན་བསྒྲིམ་མོ་ཞེ་ན། ཇི་ལྟར་བཤད་པ་དེ་བཞིན་དུ་སྐྱོན་དང་གོལ་སྒྲིབ་དག་ནི་ཆོས་ཉིད་ལ་བཟང་ངན་གྱི་ཐ་སྙད་ཡེ་གྲོལ་བའི་ཕྱིར་དེ་ཉིད་དུ་བརྗོད་བསམ་བྱར་ཡང་མེད་པ་ལ་མཚན་མ་དང་བྲལ་བའི་ཆོས་ཉིད་མཉམ་པ་ཆེན་པོ་ཞེས་བྱ་བ་ཞིག་ཡོན་ཏན་དུ་བཟུང་བས་མཉམ་པ་ཉིད་ཡུལ་དུ་མཐོང་ནས་དང་དུ་ལེན་པ་ལས་བྱུང་བ་ཡིན་ནོ། །འོ་ན་ཐབས་མ་ནོར་བའི་དོན་གྱི་ངོ་བོ་ཉིད་གང་ཞེ་ན། གལ་ཏེ་སྐྱེས་བུ་དམ་པ་སུ་ཞིག་གིས་ལྟ་ངན་དེ་ལས་རྒྱལ་ནས། ཆོས་ཉིད་དོན་གྱི་གནས་ལུགས་དཀྱིལ་འཁོར་གསུམ་དབྱེར་མེད་ཀྱི་ངོ་བོར་ཡོན་ཏན་ལྷུན་གྱིས་གྲུབ་པར་རྫོགས་པ་དེ་ཉིད་ལ་ཡང་དེར་དམིགས་པའི་ཐ་སྙད་དང་ཡང་བྲལ་བར་གྱུར་ཏེ་མཉམ་ཉིད་ཆེན་པོ་ཡུལ་དུ་མཐོང་བ་མེད་པས་ན་དེ་ཉིད་དུ་ལྟ་ཞིང་སེམས་རྗེས་སུ་འབྲང་བའང་མེད་པར་མངོན་དུ་མི་བྱེད་དེ། འདུ་ཤེས་གང་དུའང་མ་ཞུགས་ཏེ་ཅིར་ཡང་མ་གཡོས་པའི་རྟོགས་པ་མཐའ་དབུས་དང་བྲལ་བའི་དགོངས་ཉམས་ཤར་སྲིད་པ་ལ་ནི། འཁྲུལ་བགེགས་ཀྱི་སྐྱོན་དང་གོལ་སྒྲིབ་ག་ལ་ཡོད་དེ། གཉིས་ལྟ་གཏན་ནས་དག་པའི་ཕྱིར། བཙལ་ཡང་མི་རྙེད་དོ། །དེ་བས་ན་ཆོས་ཟབ་མོ་ལ་སྤྱོད་པའི་སྐལ་ལྡན་དག་ནི་ཅི་ལའང་འཛིན་པ་མེད་དེ། དེ་ཉིད་ཆེད་དུ་བྱ་བ་དང་ཡང་བྲལ་བ་ཁོ་ནའོ། །དེའི་ཕྱིར་བྱ་བས་མ་བསླབ་པ་མེད་པ་དེ་ཉིད་ལ་ཆེད་དུ་བྱེད་ནའང་། རྩོལ་སྒྲུབ་ཀྱིས་ནོར་བས་སྐྱོན་དང་དོན་མི་མཐོང་བས་གོལ་སྒྲིབ་ཀྱི་བགེགས་ཆེན་པོ་ཡིན་ཏེ། གཉིས་སུ་འབྱེད་པའི་ཕྱིར། ངེས་དོན་མདོ་བཅུ་ལས། དེས་ན་སྒྲོ་སྐུར་གོལ་སྒྲིབ་འདི། །ཡོད་རྟོག་གང་ཟག་བློ་ལ་སྣང་། །རྟོག་འདས་ཏིང་འཛིན་བསམ་བྲལ་ལ། །གོལ་སྒྲིབ་ཡོད་པར་ངས་མ་གསུངས། །ཞེས་དང་། རང་གི་རང་བཞིན་མ་ཤེས་ན། །སྒྲིབ་པ་སྒྲིབ་པ་ཞེས་སུ་བཤད། །རང་གི་རང་བཞིན་མ་ཤེས་ནས། །འོག་མ་འོག་མ་ཡིན་སྨྲ་བ། །གོལ་ས་གོལ་ས་ཞེས་སུ་བཤད། །ཞེས་སོ། །དེ་བས་ན་ཅིར་ཡང་བསམ་ཞིང་དཔྱད་ཚོལ་མེད་པར་ཕྱི་མོའི་ཆོས་ཉིད་དུ་བློ་མ་ཕབ་པར་ཕེབས་ཟིན་ནས་ཀློང་ནས་གསལ་བར་འདུག་གོ། །གསུམ་པ་ནི། གང་ཉིད་མངོན་དུ། ཞེས་པ་ནས། ཐབས་མེད་གནས་ངན་འཁྱམས། །ཞེས་པའི་བར་གྱིས་བསྟན་ཏེ། དེ་བས་ན་རྟོགས་པས་ཐག་ཆོད་པ་གཅེས་ཏེ། ཇི་ལྟར་ཞེ་ན། གང་ཟག་གང་གིས་ཆོས་ཉིད་ཇི་བཞིན་པའི་ངོ་བོ་རང་རིག་པའི་མངོན་སུམ་དུ་མ་གྱུར་ཏེ་རྟོགས་པས་ཐག་མ་ཆོད་ན། གསང་བའི་དོན་རང་བྱུང་གི་ཡེ་ཤེས་མཚོན་པའི་ཟབ་མོའི་ལུང་གི་པོ་ཏི་དང་གླེགས་བམ་གང་ཇི་སྙེད་པ་འཆང་ཞིང་བསྲེལ་ན་ཡང་ཕན་པ་མེད་དེ། དཔེར་ན་ནད་པ་ཞིག་གིས་སྨན་མང་པོ་སྲེལ་ནས་ཡོད་ཀྱང་རང་གིས་ནད་ལ་བཏང་བའི་ཐབས་མི་ཤེས་ན་ནད་ཀྱིས་འཆི་བ་ལས་མེད་པ་བཞིན་དུ། ཚིག་ཙམ་ལ་བརྟེན་ཡང་དོན་ངེས་པར་རྟོགས་ནས་བྱང་ཆུབ་སྒྲུབ་པའི་གདམས་ངག་གི་ཐབས་མེད་ན་འཁོར་བའི་གནས་ངན་དུ་ལྟུང་ནས་འཁྱམས་པར་འགྱུར་བ་ལས་གྲོལ་བར་མི་ངེས་སོ། །དེ་ཡང་དོན་ཟབ་མོ་ལ་བསྐུལ་བའི་ཕྱིར་གསུངས་ཏེ་བཅངས་པའི་བསོད་ནམས་འགོག་པ་ནི་མ་ཡིན་ནོ། །བཞི་པ་ནི། ཡུལ་དང་མཚན་མ། ཞེས་པ་ནས། མུན་ཁུང་ཇི་བཞིན་ནོ། །ཞེས་པའི་བར་གྱིས་བསྟན་ཏེ། མཐོང་ཐོས་ལ་སོགས་པའི་གཟུགས་སྒྲ་སོགས་ཇི་སྙེད་པའི་ཡུལ་རྣམས་དང་། ཡོད་སྟོང་སོགས་མཚན་མ་དང་། སྣང་བརྟགས་ཀྱི་དངོས་པོ་དང་། ཡིད་དང་མཚུངས་པའི་དྲན་རྟོག་དང་མིག་གི་རྣམ་ཤེས་དང་རྣ་བའི་རྣམ་ཤེས་ཀྱིས་མཐོང་ཐོས་ལ་སོགས་པའི་རྟོག་ཚོགས་ཇི་སྙེད་པ་ཀུན་ཡིད་ཀྱི་རྣམ་ཤེས་ལས་དྲན་པ་དང་མཚུངས་པར་ལྡན་པའི་རྟོག་པ་ཉིད་ཇི་ལྟར་འགྱུས་པ་བཞིན་དུ་སེམས་ཀྱི་ཀུན་རྟོག་དེ་ཉིད་སྐད་ཅིག་མའི་ངོ་བོར་ཤེས་པ་ཉིད་དེ་ལྟར་སྣང་བའི་ཕྱིར་རྟག་པ་མེད་པར་ཡུན་དུ་མི་གནས་བཞིན་སྐད་ཅིག་མ་ཉིད་རྒྱུན་རིང་པར་ཡིད་མྱུར་བའི་རྣམ་པར་མི་རྟག་པར་སྣང་བ་ཅན་ནོ། །དེའི་རང་བཞིན་ཇི་ལྟ་བུ་ཞེ་ན། འཁྲུལ་པའི་དུས་སུ་སྐད་ཅིག་མའི་རྒྱུན་དེ་ཉིད་ཀྱི་དོན་རྟོགས་ན་ངོ་བོ་བྱང་ཆུབ་ཀྱི་སེམས་སྤྱོད་ཡུལ་ཀར་དག་པས་རྒྱུད་དུ་སྐྱེ་བ་མེད་པའི་ཕྱིར་མི་ནུབ་པ་དང་། དུས་གསུམ་དུ་རྟག་པ་ཆེན་པོ་ཟིན་ཆགས་མེད་པས་མ་ཆགས་པ་ལ། ཉོན་མོངས་པ་ཉིད་བདེ་བ་ཆེན་པོ་སེམས་ཉིད་མཉམ་པའི་ཀློང་དུ་གསལ་བ་ལ་གཡོ་ཞིང་མཐའ་ལ་ཐུག་པ་མེད་པའི་འཇིང་ཆེན་པོ་སེམས་ཀྱི་ཆོས་ཉིད་རང་གི་དབྱིངས་ལས་མ་གཏོགས་པ། དེར་མ་འདུས་པའི་ཆོས་གཞན་ནོར་འཁྲུལ་ཞེས་བྱ་བ་གང་ཡང་མེད་དེ་བཙལ་ཡང་མི་རྙེད་པས་ན། གོལ་སྒྲིབ་ཞེས་བྱ་བ་ག་ལ་ཡོད་དེ་ཀ་ནས་མ་གྲུབ་པས་དཔེར་ན་གསེར་ས་ལེ་སྦྲམ་བཞིན་ནོ། །དེ་བས་ན་དེ་ལྟ་བུའི་ངང་རྙེད་པའི་རྣལ་འབྱོར་པ་གང་སུ་ཞིག་གིས་གོལ་ས་དང་སྒྲིབ་པ་དོན་དུ་གཉེར་ཏེ་ཆེད་དུ་བཙལ་ཡང་ཚོལ་བ་པོ་གང་གིས་གོལ་སྒྲིབ་ཇི་ལྟར་རྙེད་དེ་མི་རྙེད་པས་གཉེན་པོས་བཅོས་ཤིང་དགག་ཏུའང་མེད་དོ། །ཅི་སྟེ་ཞེ་ན། གོལ་སྒྲིབ་ལས་བཀོལ་བའི་ཆོས་ཉིད་མེད་དེ། གོལ་སྒྲིབ་དེའི་རང་བཞིན་ཉིད་ཀྱང་དེ་ཁོ་ན་ཉིད་ཀྱི་དབྱིངས་ཡིན་ལ། དེ་ལྟར་གོལ་སྒྲིབ་རྩད་བཅད་དེ་བཙལ་བས་དེ་རང་ཡང་ཡེ་ཤེས་མཉམ་པའི་ངང་དེ་ལ་ཐུག་པས། གཞན་དུ་བཙལ་ཞིང་ལོགས་སུ་བཟུང་ཡང་གོལ་སྒྲིབ་ཉིད་སེམས་ཀྱི་ཀློང་དེ་ཉིད་ལས་ཤར་ནས་བྱུང་བ་ཡིན་པས། གོལ་སྒྲིབ་ཡུལ་དུ་སྣང་བ་ཉིད་ལ་རང་བཞིན་བརྟགས་ཤིང་བལྟས་པས་དེའི་དོན་གྱི་ངོ་བོ་མཐོང་བ་དང་རྟོགས་པའི་ལྟ་བས་མ་ཟིན་ཏེ་མཐའ་ལས་གྲོལ་བ་ཉིད་ལ་རང་བཞིན་བསྟན་དུ་མེད་པ་ནི། དཔེར་ན་ནམ་མཁའི་འཇའ་ཚོན་སྣང་བ་ལ་ངོ་བོ་མི་རྙེད་པ་དང་ཁང་སྟོང་གི་མུན་ཁུང་ལ་སྒྲོན་མེ་བཏེགས་ཏེ་བཙལ་ཡང་རྫས་མེད་པ་ཇི་ལྟ་བ་བཞིན་ནོ། །ལྔ་པ་ནི། དེ་ཉིད་མཐོང་བའི། ཞེས་པ་ནས། དེར་སྦྱངས་ལམ་གནས་མཆོག །ཅེས་པའི་བར་གྱིས་བསྟན་ཏེ། དེ་ལྟར་ཆོས་ཉིད་མཉམ་པའི་དབྱིངས་དེ་ཉིད་ཇི་ལྟ་བར་མཐོང་ནས་ངང་ལ་གནས་པའི་ཁྱད་པར་གྱི་ཆོས་དང་ལྡན་པས་རིལ་མཉམ་པའི་ཀློང་ལས་གཡང་ས་མེད་པར་ཐག་ཆོད་པའི་རྣལ་འབྱོར་ཆེན་པོས། སྒོ་གསུམ་གྱི་སྤྱོད་ལམ་འཁོར་བའི་དངོས་གཞི་སྤྱད་པར་བྱ་བ་ལྔ། མི་སྤང་བ་ལྔ། དང་དུ་བླང་བ་ལྔ། འདོད་ཡོན་ལྔའམ། ཡང་ན་འགྲོ་ཉལ་འདུག་འཆག་སོགས་གང་ལྟར་སྤྱད་ཀྱང་ཟིན་ཆགས་མེད་པས་འཆིང་བར་མི་འགྱུར་ཞིང་བག་ཆགས་ཀྱིས་གོས་པ་མེད་པར་གྲོལ་བར་འགྱུར་བ་ནི། སྤྱོད་ལ་མི་འཆིང་པའི་ཐབས་ཆེན་པོ་རྨད་དུ་བྱུང་བའོ། །དེ་ལྟར་ཆོས་ཐམས་ཅད་ཀྱི་ངོ་བོ་རིལ་ཆོས་ཉིད་དེར་སྦྱངས་ཏེ་ཀུན་ཏུ་བཟང་མོའི་སྤྱོད་པས་ཡོངས་སུ་དག་པ་ནི་ལམ་ལ་གནས་པ་རྣམས་ཀྱི་རྣལ་འབྱོར་མཆོག་གི་སྤྱོད་པ་སྟེ། རྣལ་འབྱོར་གྱི་ཡང་ཐོག་གསུམ་ལ་གནས་པའོ། །དྲུག་པ་ནི། གང་ཉིད་དོན་གྱི། ཞེས་པ་ནས། རྟོག་པ་ཡོངས་མ་ཆོམས། །ཞེས་པའི་བར་གྱིས་བསྟན་ཏེ། རྨད་དུ་བྱུང་བའི་དོན་མ་མཐོང་བའི་སྤྱོད་ཡུལ་བསྟན་པའི་ཕྱིར། དེ་ལྟ་བུའི་གནས་མ་ཆུད་པའི་ལམ་པ་གང་སུ་ཉིད་དོན་གྱི་ངོ་བོ་ཡུལ་དུ་བྱས་ནས་དེ་ལྟར་མཚོན་པའི་ཚིག་གི་རྗེས་སུ་དཔྱོད་པས་དོན་ཚོལ་ཞིང་གྲུབ་མཐའ་རྟོག་པས་གོལ་སྒྲིབ་སེལ་ཞིང་ཡོངས་སུ་གཅོད་པར་འདོད་པའི་རང་རང་གི་གྲུབ་མཐའ་འཛིན་པ་དག །གཅིག་ཏུ་བྲལ་ལ་སོགས་པའི་གཏན་ཚིགས་ཀྱིས་ཡོད་མེད་རྟག་ཆད་འགྲོ་འོང་གཅིག་དུ་མ་ལ་སོགས་པ་མཐའ་ཀུན་སེལ་བའམ་བསལ་ཞིང་སྤོང་ནས་དེ་དག་དང་བྲལ་བ་ལ་བློ་གནས་པར་བྱེད་པ་དབུ་མ་པ་དང་། ལྷན་ཅིག་དམིགས་ངེས་ལ་སོགས་པའི་གཏན་ཚིགས་ཀྱིས་ཆོས་ཀུན་སེམས་སུ་སྒྲུབས་ནས་གཟུང་འཛིན་གྱིས་སྟོང་པའི་རང་རིག་པའི་དོན་ལ་གནས་པར་འདོད་པ་རྣལ་འབྱོར་སྤྱོད་པའི་སེམས་དཔའ་སེམས་ཙམ་པ་ལ་སོགས་པ་རྣམས་ནི། རང་རང་གི་བསམ་པས་གཟུང་བའི་ལྟ་བ་གང་ལ་མོས་པ་ལྟར་སྣང་བ་དང་སྟོང་པ་དང་སྣང་སྟོང་གཉིས་དང་གཉིས་སུ་མེད་པ་ལྟ་བུ་གང་རུང་རེ་ལ་ཞེན་པའི་ཕྱོགས་བཟུང་སྟེ། དབུས་མཐར་ཕྱེ་ནས་མཐའ་དང་བྲལ་བའམ་མཐའ་དབུས་དང་བྲལ་བར་རྟོགས་པས་ལྟ་བ་ལ་དམིགས་ཏེ་དོན་དེ་མི་གཏོང་བར་བཟུང་བས་ཐབས་དེ་ཉིད་ཀྱིས་ཆོག་པར་བྱས་པའི་ཕྱོགས་གཅིག་གི་ལམ་ལ་ངེས་པའི་བློ་གྲོས་བརྟན་པ་ཅན་ཤིན་ཏུ་ལྷན་ཅིག་པའི་དོན་ལའང་ཀླན་དཀའ་བ་དང་ལྡན་པའི་ཨ་ནུ་ཡོ་ག་མན་ཆད་ཀྱང་རྫོགས་པ་ཆེན་པོ་ལ་ལྟོས་ན་ད་དུང་ངེས་པ་མ་རྙེད་པའི་ཕྱིར། རྒྱུའི་མི་རྟོག་པ་ལ་རྗེས་སུ་འཇུག་པའི་རྣལ་འབྱོར་དེ་ཀུན། རང་རང་གི་ལྟ་བའི་དོན་ལ་འདྲིས་པས་བསྒོམ་པའི་བྱ་བ་བྱེད་པའི་རྣལ་འབྱོར་ཡིན་མོད་ཀྱི་ཡང་གསང་སྔགས་ཆེན་པོ་ཇི་བཞིན་པ་བྱ་བསམ་མེད་པའི་ཀློང་དུ་མ་ཕེབས་པས་ཡང་དག་མཆོག་གི་དོན་ལ་རྣལ་དུ་མི་འབྱོར་ཏེ་ད་དུང་ཆེད་དུ་འདྲིས་གོམས་ཀྱི་ཡུལ་ཅན་ནོ། །དེ་བཞིན་དུ་རང་རང་གི་ཆོས་སྤྱོད་ཀྱི་སྤྱོད་ལམ་བཞིར་ཏིང་ངེ་འཛིན་དྲན་པ་ལ་བཏགས་ནས་རྣལ་དུ་འབྱོར་བས་བརྟན་པར་མངོན་དུ་བྱེད་མོད་ཀྱི། ཡེ་སྤྱོད་ཆེན་པོ་ཐུན་མཚམས་མ་སྤངས་བྲལ་བས་ཡེངས་སྒོམ་གཉིས་ཀའི་ཐ་སྙད་དང་བྲལ་བ་ཡང་དག་པའི་དོན་བླ་ན་མེད་པ་ཉིད་དུ་བློ་ངེས་པར་ཡོངས་སུ་མ་འབྱོར་ཏེ། མངོན་དུ་འདོད་པའི་འཇིག་རྟེན་གྱི་ནད་དང་མ་བྲལ་ལོ། །རང་རང་གི་བདེན་པ་གཉིས་ཕྱེ་ནས་དོན་དམ་པ་ཞིག་ཡུལ་དུ་བྱས་པའམ། རང་གཞུང་ལ་གྲགས་པའི་བདེན་གཉིས་ཀྱི་ལྟ་བའམ་གཉིས་མེད་ལ་སོགས་པ་ཕྱོགས་སུ་ལྟ་བ་དེ་ཉིད་ལ་བློ་གསལ་བར་འདོད་དེ་ཞེན་པས་མི་འབྲལ་བར་བརྟན་པ་ཐོབ་མོད་ཀྱི། གསང་སྔགས་མཆོག་གི་ལྟ་བ་མེད་པའི་ལྟ་བ་མཉམ་པ་ཆེན་པོ་དམ་པའི་དོན་དུ་ཡོངས་སུ་མ་ཞེན་པས་ཡང་དག་པར་མི་མཐོང་ངོ་། །འཕྲལ་སྣང་གློ་བུར་དུ་སྤྱད་པའི་དགེ་བའི་ལས་རྣམས་དང་། ཏིང་ངེ་འཛིན་ལ་ཆེད་དུ་བརྩལ་བའི་རོ་མྱང་ཞིང་ཚོར་མོད་ཀྱི། གསང་སྔགས་བླ་ན་མེད་པའི་ཆོས་ཉིད་མཉམ་པ་ཆེན་པོའི་དོན་གྱི་ངོ་བོ་ནི་ཉམས་དང་ཏིང་ངེ་འཛིན་གྱི་རོ་མྱོང་ཚོར་དང་བྲལ་བ་ཡིན་པས་དེ་ལྟར་ངེས་པའི་དོན་ཆེན་པོའི་རོ་མཆོག་ཉིད་མ་ཚོར་བས་མཐར་ཐུག་གི་བདེན་པ་མ་མཐོང་ངོ་། །སོ་སོར་རྟོག་པའི་ཤེས་རབ་ཀྱིས་རྩད་བཅད་དེ་གྲུབ་མཐའ་རྙེད་པས། ཚིག་ཏུ་བདག་མེད་གཉིས་རྟོགས་ཀྱི་ལྟ་བ་ཕྱོགས་རིས་སུ་སྣང་བ་ཐམས་ཅད་དང་བྲལ་བ་ཉིད་དོ། །ཞེས་སྨྲ་ཞིང་ཟེར་མོད་ཀྱི། མདོ་སྡེ་བདེན་པ་རེས་འཇོག་དང་། ས་བཅུའམ་གསང་སྔགས་ཨ་ནུ་མན་ཆད་གཉིས་མེད་ལ་ད་དུང་སེམས་དམིགས་པ་དང་མ་བྲལ་བ་ཉིད་ལྟོས་པའི་ཕྱོགས་ལྟ་ཉིད་པས་ཆོས་ཉིད་ཀྱི་ཕྱོགས་སུ་ལྟ་བ་དང་ཡོངས་སུ་མ་བྲལ་བའོ། །ཁྱད་པར་དུ་ཡང་ས་བརྒྱད་པའི་སེམས་དཔའ་དང་། མ་ཧཱ་ཡོ་ག་ལ་སོགས་པ། གནས་འགྱུར་ཐོབ་པའམ། ཐབས་ཀྱི་བརྟུལ་ཞུགས་དང་ལྡན་པས་གཙང་སྨེ་དང་བཟང་ངན་དུ་འཛིན་པའི་རྟོག་པ་ཆོམས་ནས་མི་གནས་མོད་ཀྱི། ཆོས་ཉིད་ཡུལ་དུ་བྱེད་དེ་ཆེད་དུ་བྱས་པའི་གཟུང་འཛིན་གྱི་རྟོག་པ་ཡོངས་སུ་མ་ཆོམས་པས། ཞེན་པ་ལ་བལྟས་པའི་གཟུང་འཛིན་ལ་གནས་ཏེ། ཀུན་འདུས་ལས། བྱང་ཆུབ་དེ་ཡང་མི་དམིགས་ཏེ། །མི་གནས་ཞེས་ནི་གང་བརྗོད་ཀྱང་། །གནས་དང་དམིགས་པའི་དོན་འཛིན་པ། །གཟུང་འཛིན་ཞེས་ནི་དེ་ལ་བྱ། །ཞེས་སོ། །དེ་བས་ན་ཐེག་པ་ཀུན་ལ་མཁས་པར་བྱས་ཏེ། གསང་བ་ཟབ་མོའི་དགོངས་པའི་མཐིལ་ལོན་པ་ནི་ཤིན་ཏུ་གཅེས་ཏེ། དེ་ཉིད་ལས། གཞན་ཡང་འདུས་པའི་རྣལ་འབྱོར་རྣམས། །དོན་གྱིས་རྗེས་ནི་ཚོལ་འདོད་ན། །ཚིག་འགའ་ཐོས་པ་ཙམ་གྱིས་ནི། །ཆོག་པའི་འདུ་ཤེས་མ་སྐྱེད་ཅིག །ཅེས་གདམས་པར་མཛད་དོ། །གཉིས་པ་ལ་གཉིས་ཏེ། རིམ་གྱིས་པའི་ཏིང་ངེ་འཛིན་བསྟན་པ། གཅིག་ཆར་བའི་ཏིང་ངེ་འཛིན་བཤད་པའོ། །དང་པོ་ལ་ལྔ་སྟེ། བློ་བཞག་ཐབས་བསྟན་པ། སྐྱོན་ངོས་གཟུང་བ། དེའི་བཅོས་ཐབས་བཤད་པ། ཏིང་ངེ་འཛིན་གྱི་ངོ་བོ་བསྟན་པ། དེ་ལྟར་གོམས་པའི་དྲོད་རྟགས་བཤད་པའོ། །དང་པོ་ནི། དབུས་མཐར་རྟོག་པའི། ཞེས་པ་ནས། ལོངས་སྤྱོད་རྫོགས་བདག་པོ། །ཞེས་པའི་བར་གྱིས་བསྟན་ཏེ། རྒྱུའི་ཐེག་པའི་དམིགས་པའི་བསྒོམ་ལུགས་ལ་བརྟེན་ནས་གསང་སྔགས་རིམ་འཇུག་གི་ཚུལ་གྱིས་མཐར་དོན་གྱི་ངོ་བོ་ལ་སྦྱོར་བའི་བཞག་ཐབས་བསྟན་པའི་ཕྱིར། དོན་གཞན་ལ་དགོངས་པ་དང་བརྡ་ཡི་སྒོ་ནས་འཆད་དེ། དེ་ལྟར་དབུས་མཐར་འབྱེད་པ་ལ་རྟོག་ཅིང་དོན་གྱི་རྗེས་སུ་བློ་འབྲངས་ཏེ་རྩོལ་བར་བྱེད་པའི་རྣལ་འབྱོར་པ་དག་གིས། ཐོས་བསམ་གྱི་ཤེས་རབ་ཀྱི་སྒོ་ནས་རྒྱུད་དོན་བརྗོད་པའི་ཚིག་གི་ལམ་གྱི་སྒྲོན་མ་ལྟ་བུ་ལ་བརྟེན་པ་ཡིས་ཡང་དག་དབུ་མའི་དོན་མཆོག་གསང་བའི་དབྱིངས་ཀྱི་ངོ་བོ་གསེར་ས་ལེ་སྦྲམ་དང་འདྲ་བ་ཉིད་ཚོལ་བ་ན། ལྟ་བས་ཇི་བཞིན་དུ་རྙེད་པའི་དོན་ལ། བསྒོམ་པའི་གོམས་པར་བྱས་ནས་འབྲས་བུའི་གསེར་སྦྱང་བཙོ་མ་མངོན་པར་བྱེད་འདོད་པ་རྣམས་ཀྱིས། ཀུན་ཏུ་འཇུག་པའི་ཡིད་ཤེས་གཏོགས་འདོད་སྤྲེལ་དང་འདྲ་བ་འདི་ཉིད་དྲན་རིག་དང་དམིགས་པའི་ཀ་བ་ལ་བཏགས་ཏེ་བཟུང་བར་བྱས་ནས་བསྒོམ་སྟེ། དེའང་སྤྲེའུ་ལ་ཆོས་གསུམ་སྟེ། ཀུན་ལ་འཇུག་པ་དང་། གཅོལ་ཆུང་བ་དང་། སྤྲེའུ་གཅིག་གིས་སྐར་ཁུང་ཀུན་ཁྱེད་པ་ལྟར། ཡིད་ལའང་ཆོས་གསུམ་སྟེ། ཡུལ་ཀུན་ལ་འཇུག་པ་དང་། རིགས་པའི་དོན་ལ་གཏད་དུ་མི་འཇུག་པར་དོན་མ་ཡིན་པ་ལ་གཏད་པ་དང་། ཡིད་གཅིག་གིས་སྒོ་ལྔ་ཀུན་ཁྱེད་པའོ། །དེ་བཞིན་དུ་ཉོན་མོངས་པ་ཅན་གྱི་ཡིད་རྐུན་མོ་བྱི་ལ་དང་འདྲ་བ་འདི་ཉིད་སྔ་མ་ལྟར་རྟོག་པའི་རྒྱུ་འགྲུལ་བཟུང་སྟེ་བདག་མེད་དོན་གྱི་ངོ་བོ་རང་རིག་པའི་ཕུར་པ་ལ་གདགས་པར་བྱས་ཏེ་དོན་མཐོང་བར་བྱ་སྟེ། དཔེར་ན་བྱི་ལ་ལའང་ཆོས་གསུམ་སྟེ། སྦར་མོ་བསྒུམ་ནས་སུས་མི་ཚོར་བར་བྱེད་པ་དང་། མི་འགུལ་བར་བསྐུམ་ནས་སྡོད་པ་དང་། དོན་དུས་ལ་བབ་ན་འཛིན་པ་ལྟར། ཉོན་ཡིད་ལའང་ཆོས་གསུམ་སྟེ། བག་ལ་ཉལ་བར་གནས་པ་དང་། དུས་ལ་མ་བབ་བར་དུ་མི་འཛིན་པ་དང་། འཛིན་ནས་མི་གཏོང་བའོ། །དེ་ལྟར་སྒོ་ལྔ་ཕྱི་ནང་གསལ་བར་བྱེད་པས་གསེང་ཁུང་སྐར་ཁུང་ལྟ་བུ་ཀུན་ཚོགས་ལྔའི་རྣམ་ཤེས་སུ་ཤར་ཏེ་སྒོ་རྣམས་ནས་ཅུད་ཟད་ཀྱང་ཡུལ་ལ་འཕྲོར་མི་གཞུག་པར་བཀག་སྟེ་ངང་ལ་གནས་པ་དང་། ཕུང་ཁམས་སྐྱེ་མཆེད་སོ་སོའི་བག་ཆགས་རེའུ་ཆ་ཕང་ཕུང་ལྟ་བུ་ཀུན་གཟུང་འཛིན་གྱི་རྟོག་པའི་ཕུང་པོ་མི་དམིགས་པར་བདག་འཛིན་མེད་པའི་ངང་དུ་བཀོལ་ཏེ་བཤིག་ནས་ནི། ཀུན་གཞི་སེམས་ཀྱི་ཆོས་ཉིད་བྱང་ཆུབ་ཀྱི་སེམས་རྟོགས་ན་འདོད་རྒུ་མི་ཟད་པར་འབྱུང་བས་རྒྱལ་པོའི་དཀོར་མཛོད་ལྟ་བུ་ཁ་ཕྱེ་ནས་གནས་ལུགས་མཉམ་པ་ཆེན་པོ་ཡོན་ཏན་ལྷུན་གྱིས་གྲུབ་པའི་ཆོས་ཉིད་གསལ་བར་བྱེད་ན། སོ་སོའི་གཞུང་དུ་བསྒོམ་པའི་རྣལ་འབྱོར་དེ་དག་གི་འབྲས་བུ་དཀྱིལ་འཁོར་གསུམ་དབྱེར་མེད་ཀྱི་དོན་ལ་མ་བཅོས་ངང་གིས་གདལ་བས་ཡང་དག་པར་ལོངས་སྤྱོད་ཀུན་རྫོགས་པའི་བདག་ཉིད་ཆེན་པོ་སངས་རྒྱས་ཀྱི་གོ་འཕང་དམ་པ་ཉིད་མངོན་དུ་གྱུར་པ་ཡིན་ནོ། །དེའང་དང་པོ་དང་གསུམ་པ་ཞི་གནས་ཀྱི་རྣལ་འབྱོར་དང་། གཉིས་པ་དང་བཞི་པ་ལྷག་མཐོང་གི་རྣལ་འབྱོར་ཡིན་པར་ཀུན་གཟིགས་རོང་ཟོམ་པཎྜི་ཏས་གསུངས་སོ། །དེ་སྐད་དུ། རྩ་བའི་རྒྱུད་ལས་ཀྱང་། ཐོས་པ་ཚིག་གི་སྒྲོན་མ་ཡིས། །ཡང་དག་དོན་གྱི་གསེར་བཙལ་ན། །གཏོགས་འདོད་སྤྲེའུ་འདི་བཟུང་ནས་ཀྱང་། །རྐུན་མོ་བྱི་ལ་བཏགས་བྱས་ཏེ། །གསེང་ཁུང་སྐར་ཁུང་ཀུན་བཀག་ཅིང་། །ཁང་སྟོང་ཕང་ཕུང་བཤིག་ནས་ནི། །རྒྱལ་པོའི་དཀོར་མཛོད་ཁ་ཕྱེ་ན། །དེ་དག་རྟག་ཏུ་སངས་རྒྱས་ཡིན། །ཞེས་སོ། །གཉིས་པ་ལ་གཉིས་ཏེ་ངོ་བོ་བཤད་པ། ཉེས་དམིགས་བསྟན་པའོ། །དང་པོ་ལ་གསུམ་སྟེ། རྟོག་པའི་སྐྱོན་བསྟན་པ། གཡེང་བའི་སྐྱོན་བཤད་པ། སྒྲིབ་པའི་སྐྱོན་བསྟན་པའོ། །དང་པོ་ནི། ཡང་དག་དབུ་མའི། ཞེས་པ་ནས། གཏམས་དང་བན་བུན་གཉིས། །ཞེས་པའི་བར་གྱིས་བསྟན་ཏེ། དེའི་དུས་སུ་སྒོམ་སྐྱོན་དངོས་ལས་སེམས་བཅོས་པའི་ཐབས་ནི། ཡང་དག་དབུ་མའི་ལམ་གྱིས་དོན་ཚོལ་བ་རྣམས་ཀྱིས་ཆོས་ཉིད་མཉམ་པའི་ངང་ལ་འདྲིས་པར་བྱེད་པའི་ཚེ། རྣམ་པར་རྟོག་པའི་སྐྱོན་འདི་ལྔ་སྤང་བར་བྱ་སྟེ། རྣམ་པའི་སྒོ་ནས་བཞག་པའི་རྟོག་པ་རགས་པའི་རི་བོ་དང་། འཛིན་པས་ཕྱེ་བའི་མཚན་མ་དང་། རྒྱུན་གྱིས་བཞག་པའི་རྒྱུ་བ་དང་། ཉམས་མྱོང་གི་བཞག་པའི་ཚོར་བ་དང་། སེམས་ཀྱི་བྱུང་ཚོར་འབྱུང་འཇུག་གིས་ཕྱེ་བ་དང་རྣམ་པ་ལྔ་ཡིན་ནོ། །དེ་ཡང་འདི་ལྟར་གཉིས་གཉིས་སུ་རྟོག་པར་བྱེད་དེ། རྣམ་པས་ཕྱེ་བའི་རྟོག་པ་གཞིག་དཀའ་བ་ལ་ཡང་གཉིས་ཡོད་དེ། རགས་པ་དང་ནི་ཕྲ་བའོ། །དེ་བཞིན་དུ་འཛིན་པས་ཕྱེ་བའི་མཚན་མ་ལ་ཡང་འདུ་ཤེས་ཀྱི་དབང་གིས་ཆེ་བ་དང་ཆུང་བ་གཉིས་དང་། དྲན་འཛིན་གྱི་ཡུན་གྱིས་ཕྱེ་བའི་རྒྱུ་བ་ལ་ཡང་རྒྱུན་རིང་པོ་དང་ཐུང་ངུ་གཉིས་དང་། ལུས་ཀྱི་མྱོང་བས་ཕྱེ་བའི་ཚོར་བ་ལའང་གསལ་བ་དང་མི་གསལ་བ་གཉིས་དང་། སེམས་ཀྱི་འབྱུང་འཇུག་གིས་ཕྱེ་བའི་བྱུང་ཚོར་ལའང་མྱུར་བ་དང་བུལ་བ་གཉིས་ཏེ་བཅུའོ། །འདི་དག་ནི་ཆོས་ཉིད་ཡང་དག་པའི་དོན་ལ་སྒྲིབ་སྟེ་མཐོང་དུ་མི་སྟེར་བ་ཡི་རྣམ་པར་རྟོག་པ་ཆེན་པོའི་བདུད་བགེགས་རྟོགས་པའི་གེགས་ཆེན་པོ་ཡིན་ནོ། །དེ་ཡང་དཔེ་ཡིས་གསལ་བར་བསྟན་པའི་ཕྱིར། དེ་ཁོ་ན་ཉིད་མཐོང་དུ་མི་སྟེར་བ་གཏན་ཚིགས་ཅི་ཡི་ཕྱིར་ཞེ་ན། ཆོས་ཉིད་དོན་གྱི་ངོ་བོའི་དབུས་ཉིད་མི་མཐོང་བར་བྱེད་པའི་ཕྱིར་ཏེ། རྟོག་པའི་དཔེ་མུན་པ་ལྟ་བུ་དང་ནི་མཚན་མའི་དཔེ་དཔྱིད་ཀྱི་དུས་རླུང་དམར་འཁྲིགས་པ་ལྟ་བུ་དང་། རྒྱུ་བའི་དཔེ་ཆར་སྤྲིན་ཀུན་ཏུ་འཐིབས་པ་ལྟ་བུ་དང་། ཚོར་བའི་དཔེ་སྤྲིན་ཕུང་འཁྱིལ་བ་ལྟ་བུ་དང་། བྱུང་ཚོར་གྱི་དཔེ་ན་བུན་དཀྲིགས་པ་ལྟ་བུས་སྒྲིབ་པ་ཡིས་ཆོས་ཉིད་དོན་གྱི་དབུས་ཉིད་མི་གསལ་བར་སྒྲིབ་པའི་སྐྱོན་གྱིས་ཡང་དག་པར་མཐོང་བར་མི་འགྱུར་བའི་ཚུལ་དེ་བས་ན་སྒྲིབ་པར་བྱེད་པའོ། །འདི་ལྔ་ལ་ཡང་རྣམ་པ་གཉིས་གཉིས་ཏེ། དོན་གྱི་ཤུགས་ཀྱིས་དཔེ་དང་གྲངས་རྗེས་སུ་མཐུན་པར་འགྱུར་བས། རྟོག་པ་མཚོན་པའི་མུན་པའི་རིགས་ལའང་། རྟོག་པ་ཕྲ་བ་དང་མཚུངས་པའི་མུན་པ་དང་། རགས་པ་དང་འདྲ་བའི་མུན་ནག་ཆེན་པོ་ལྟ་བུ་གཉིས་དང་། མཚན་མ་མཚོན་པས་འཁྲིགས་པ་ལའང་། མཚན་མ་ཆེན་པོ་དང་མཚུངས་པར་དཔྱིད་ཀྱི་དུས་སུ་ཤིན་ཏུ་རླུང་ཆེན་ཀུན་ཏུ་ལྡང་ནས་འཐིབས་པ་ལྟ་བུ་དང་། ཆུང་ངུ་དང་འདྲ་བར་ལུང་ཡོངས་སུ་འཁྲིགས་པ་དང་མཐུན་པར་བསྒྲིབས་པ་དང་། རྒྱུ་བ་མཚོན་པས་ཆར་སྤྲིན་ལའང་། རྒྱུ་བ་རིང་པོ་དང་མཚུངས་པར་ཆར་སྤྲིན་དྲག་པོ་ཤིན་ཏུ་འཐིབས་པས་སྒྲིབ་པ་ཆེན་པོ་དང་། ཐུང་ངུ་དང་འདྲ་བར་ཆར་སྤྲིན་ཆུང་ངུ་འཐིབས་པ་ལྟ་བུ་གཉིས་དང་། ཚོར་བ་མཚོན་པས་སྤྲིན་ལའང་། ཚོར་བ་གསལ་དང་མཚུངས་པར་ཆར་ཆད་དེ་སྤྲིན་གྱི་ཕུང་པོ་ཆེན་པོ་འཐིབས་པ་དང་། མི་གསལ་བ་དང་འདྲ་བར་འལ་འོལ་དུ་འཁྱིལ་བ་ལྟ་བུ་གཉིས་དང་། བྱུང་ཚོར་མཚོན་པས་ན་བུན་ལའང་། བྱུང་ཚོར་མྱུར་བ་དང་མཚུངས་པར་སྤྲིན་སངས་ཏེ་ན་བུན་གྱིས་ཀུན་ཏུ་གཏམས་པ་དང་། བུལ་བ་དང་འདྲ་བར་ན་བུན་བན་བུན་ཙམ་གྱིས་སྒྲིབ་པ་ལྟ་བུ་གཉིས་ཏེ། དེ་ལྟར་སྒྲིབ་ཚབས་ཆེ་ཆུང་གིས་རྣམ་པར་བཞག་པའོ། །ཕྱག་དཔེ་ལ་ལར། བན་བུན་གྱིས། །ཞེས་བཞུགས། གཉིས་པ་ནི། ཚིགས་བཅད་གཅིག་གི་འོག་ནས། སྒྲིབ་པར་གྱུར་བའི། ཞེས་པ་ནས། རབ་ཏུ་གསལ་བར་འདོད། །ཅེས་པའི་བར་གྱིས་བསྟན་ཏེ། དོན་མཐོང་དུ་མི་སྟེར་བའི་སྒྲིབ་པར་གྱུར་པའི་མུན་ནག་ལྟ་བུའི་གཡེང་བ་དྲུག་ནི། ཕྱི་ནང་གི་མཚན་མའི་ཡུལ་ལ་གཡེང་བ་རྣམ་པ་དྲུག་ཏུ་སྣང་བ་རྣམས་ཏེ། སྒོ་ལྔ་ལ་མཉམ་བཞག་གཏན་མེད་པས་སམ། ཆེད་བྱས་མེད་པར་ཡིད་ཕྱི་རོལ་གྱི་རྗེས་སུ་འཕྲོ་བ་རང་བཞིན་གྱི་གཡེང་བ་དང་། ཡིད་ཀྱི་རྣམ་ཤེས་འདོད་ཡོན་གྱི་ལོངས་སྤྱོད་ལ་འཕྲོ་ཞིང་ཡུལ་གྱི་རོ་མྱོང་བ་ཕྱི་ཡི་གཡེང་བ་དང་། བྱིང་རྒོད་དུ་གྱུར་པའམ་ཏིང་ངེ་འཛིན་གྱི་རོ་ལ་ཆགས་པ་ནང་གི་གཡེང་བ་དང་། གྲགས་པ་འདོད་པའི་ཕྱིར་དགེ་སྦྱོར་བྱེད་པ་དང་དམིགས་རྩོལ་གྱི་སྐབས་ལེན་པར་བྱེད་པ་མཚན་མ་ཉིད་ཀྱི་གཡེང་བ་དང་། དེ་ཁོ་ན་ཉིད་ལ་འདུ་ཤེས་ཀྱིས་གཟུང་བའམ། ཐེག་པ་གོང་མའི་དོན་བསྒོམ་པའི་ཚེ། འོག་མའི་དོན་ཡིད་ལ་བྱེད་པ་དང་། ཏིང་ངེ་འཛིན་སྔ་མ་བཏང་ནས་ཕྱི་མ་ཡིད་ལ་བྱེད་པ་རྣམས་ཡིད་ལ་བྱེད་པའི་གཡེང་བ་དང་། ང་དང་བདག་འཛིན་མ་བྲལ་བར་བདག་ཏུ་བཟུང་ནས་ངའོ་སྙམ་པ་ལ་བརྟེན་ཏེ་དགེ་བ་ལ་འཇུག་པ་ཡང་གནས་ངན་ལེན་གྱི་གཡེང་བ་སྟེ། འདི་དག་ཀྱང་ཅི་ཡང་ཡིད་ལ་མི་བྱེད་པའི་ཐབས་ཀྱིས་སྤོང་ཞིང་རབ་ཏུ་བསལ་ནས་རྟོགས་པའི་ཡེ་ཤེས་གསལ་བར་འདོད་དོ། །གསུམ་པ་ནི། གང་དུ་དབུ་མ། ཞེས་པ་ནས། སེམས་དཔའི་རྣལ་འབྱོར་འདོད། །ཅེས་པའི་བར་གྱིས་བསྟན་ཏེ། སྐབས་གང་ཞིག་ཏུ་དབུ་མ་ཉིད་ཀྱི་དོན་ལ་ལྟ་ཞིང་ཆོས་ཉིད་བསྒོམ་པའི་ཚེ་ན། དབུ་མའི་ལམ་ལ་བར་དུ་གཅོད་ཅིང་སྒྲིབ་པའི་སྐྱོན་གྱི་རྣམ་གྲངས་རྣམ་པ་ལྔ་བྱུང་ནས་དོན་གྱི་ངོ་བོ་གང་ཉིད་སྒྲིབ་པར་བྱེད་པ་ནི། ཡིད་ཀྱི་རྣམ་པའི་བྱུང་ཚོར་དང་། བྱིང་རྨུགས་སུ་གྱུར་པ་དང་། འཛིན་ཆགས་ཀྱི་ཞེན་པ་དང་། ཐེར་ཟུག་ཏུ་འཐས་པ་དང་། ངེས་པ་མེད་པར་ཕྱལ་བར་གྱུར་པའི་སྐྱོན་དང་ལྔའི་དབང་གིས་ན། བྱུང་ཚོར་གྱི་དབང་གིས་གཡེང་བར་འགྱུར་བ་མར་མེ་རླུང་གིས་བསྐྱོད་པ་ལྟ་བུ་དང་། བྱིང་རྨུགས་ཀྱི་དབང་གིས་འཐིབས་པར་འགྱུར་བ་འབེན་འཐིབས་པའི་མདའ་ལྟ་བུ་དང་། འཛིན་ཆགས་ཀྱི་དབང་གིས་འགོག་པ་ཁྱིམ་བདག་འཇུར་བུ་ཅན་ཞིག་མར་འདོད་ནས་བ་ཉོས་པས་ཞོ་ལ་ཆགས་པ་ལྟ་བུ་དང་། ཐེར་ཟུག་གི་དབང་གིས་ཀུན་ཏུ་རྟོག་པར་འགྱུར་བ་སྐྱེས་བུ་བྱ་རོག་གི་ཁུ་འཕྲིག་ཅན་ལྟ་བུ་དང་། ཕྱལ་བའི་དབང་གིས་དོན་མཐོང་བ་མེད་པ་ཁོ་ནར་གྱུར་པ་ཤེས་རྒྱ་ཆུང་བས་འཁོར་བར་ཆུད་པ་བྱ་མུན་ལ་ཐུག་པ་ལྟ་བུ་རྣམས་ཡིན་ནོ། །འདི་དག་དབུ་མའི་དོན་རྟོགས་པའི་ལྟ་བ་དང་བསམ་གཏན་གྱི་སྐྱོན་ཡིན་ནོ་ཞེས་དབུ་མར་གནས་ཏེ་དོན་བསྒོམ་པའི་བྱང་ཆུབ་སེམས་དཔའི་རྣལ་འབྱོར་པ་དག་འདོད་དོ། །གསང་སྔགས་ཀྱང་མི་འདོད་པ་ནི་མ་ཡིན་ཏེ། རྫོགས་ཆེན་ལྟར་ནའང་རིམ་གྱིས་པའི་སྐབས་ཡིན་པས་སོ། །གཉིས་པ་ནི། གོང་གི། གནས་ངན་གསུམ་དང་། ཞེས་པ་ནས། རང་རྒྱལ་སེམས་དཔར་ལྟུང་། །ཞེས་པའི་བར་གྱིས་བསྟན་ཏེ། སྐྱོན་དེ་དག་གིས་གང་དང་གང་དུ་གོལ་བར་འགྱུར་ཞེ་ན། དེ་དག་གི་ཉེས་དམིགས་བསྟན་པ་ནི། རྟོག་པ་ཆེ་ཕྲས་ངན་སོང་གི་གནས་ངན་གསུམ་དུ་ལྟུང་བ་དང་། མཚན་མ་ཆེ་ཆུང་གིས་ཉིན་མཚན་ཕྱེད་དུ་སྣང་བ་མིའི་གནས་སུ་ལྟུང་བ་དང་། རྒྱུ་བ་དང་། ཚོར་བ་དང་། བྱུང་ཚོར་དང་། སེམས་ཀྱི་ཆོས་དང་བཞིས། འདོད་པའི་ལྷའི་རིགས་རྒྱལ་ཆེན་རིས་བཞི། སུམ་ཅུ་རྩ་གསུམ། འཐབ་བྲལ། དགའ་ལྡན་བཞིའམ། ས་ལ་བརྟེན་པ་གཉིས་ནས་མཁའ་ལ་བརྟེན་པ། མཚེ་མ། དགའ་ལྡན། འཕྲུལ་དགའ། གཞན་འཕྲུལ་དབང་བྱེད་དང་བཞི་ཡི་བདེ་གནས་སུ་ལྟུང་ངོ་། །ཡང་ན། རྒྱུ་བས་རྒྱལ་ཆེན་དང་སུམ་ཅུ། ཚོར་བས་འཐབ་བྲལ། བྱུང་ཚོར་གྱིས་དགའ་ལྡན་དུ་ལྟུང་བ་དང་བཞིར་ཡང་གསུང་། གཞན་སེམས་ཡོད་མེད་ཀྱིས་མུ་སྟེགས་སུ་ལྟུང་བ་དང་། བྱིངས་རྨུགས་ཀྱིས་གཟུགས་ཁམས་བསམ་གཏན་བཞིའི་གནས་སུ་ལྟུང་བ་དང་། བྱུང་ཚོར་ལ་རྟེན་པའི་འདུ་ཤེས་ཀྱི་རྗེས་སུ་འབྲངས་པའི་རྒྱུན་གྱི་བྱེ་བྲག་ལས་གཟུགས་མེད་སྐྱེ་མཆེད་མུ་བཞིའི་གནས་སུ་ལྟུང་བ་ཡིན་ཞིང་། བདེན་བཞིའི་བླང་དོར་ལ་གནས་ཏེ་འཛིན་ཆ་དང་མ་བྲལ་ན་བདེན་པའི་དོན་མཐོང་བར་དཀའ་བས་ཉན་ཐོས་འགོག་པར་ལྟུང་བ་དང་། རྟེན་འབྲེལ་བཀག་པ་ལས་འབྲས་བུ་ཚོལ་བ་ལྟ་བུ་ཕྱལ་བར་གྱུར་ཏེ་ཞི་བ་ཕྱོགས་གཅིག་ལ་ལྟ་བས་རང་རྒྱལ་དུ་ལྟུང་བ་དང་། སྟོང་པ་ཉིད་ཡང་དག་པར་མ་མཐོང་སྟེ། བློ་ཐེར་ཟུག་ཏུ་འཐས་ནས། ཤེས་པ་འཁྲུལ་པར་སྣང་བ་ཙམ་དུ་ལྟ་བས་ན་རྣམ་རིག་གི་སེམས་དཔར་ལྟུང་བར་འགྱུར་བ་ཡིན་ནོ། །གསུམ་པ་ལ་གཉིས་ཏེ། རྟོག་པའི་སྐྱོན་བཅོས་ཐབས་བསྟན་པ། སྒྲིབ་པའི་སྐྱོན་བཅོས་ཐབས་བཤད་པའོ། །དང་པོ་ནི། འོག་ནས། དབུ་མར་ངེས་པའི་ཞེས་པ་ནས། ཅན་དུ་ལྟུང་མི་འགྱུར། །ཞེས་པའི་བར་གྱིས་བསྟན་ཏེ། དེ་དག་བསལ་བའི་ཐབས་གང་སྙམ་པ་ལ། རབ་ཏུ་འབྱེད་པ་མངོན་དུ་བྱེད་པས་བཅོས་ཐབས་བསྟན་ཏེ། སྐྱེས་བུ་གང་སུ་ཞིག་གིས་རྣམ་པར་མི་རྟོག་པའི་ཡེ་ཤེས་གསང་བའི་དབུ་མར་ངེས་པའི་ལམ་གྱི་དོན་གཉེར་ནས་ཡང་དག་པར་ཚོལ་བར་ཞུགས་ཏེ་ཕྱི་ནང་གི་དགོན་པ་འདུ་འཛི་དང་བྱ་བྱེད་གཉིས་དང་བྲལ་བའི་གནས་ཀྱི་རྒྱུད་དུ་རང་ཉིད་གཅིག་པུར་དབེན་པར་བཟུང་སྟེ་མངོན་སུམ་དང་རྗེས་དཔག་གམ་ལུང་དང་རིགས་པའི་ཚད་མ་གཉིས་ཀྱིས་ཐུན་མོང་དང་ཐུན་མོང་མ་ཡིན་པར་གཞལ་ཏེ་ངེས་པའི་གདེང་ཡོད་པའི་ཤེས་རབ་ཀྱི་བློས་སྒོམ་སྐྱོན་དུ་གྱུར་པའི་རྣམ་པར་རྟོག་པའི་ཡིད་ལ་བྱེད་པ་དག་རྗེས་གཅོད་པའམ་རྩད་གཅད་པར་བྱས་ཏེ་བརྟགས་པ་ན། ཆོས་རྣམས་ལ་ཡོད་པ་དང་མེད་པ་དང་སྔོན་གྱི་རྟོག་པ་དང་ཕྱིས་ཀྱི་རྟོག་པ་ལ་སོགས་པ་རྣམ་པར་རྟོག་པ་རྣམས་གང་ལས་བྱུང་བའི་རྒྱུ་རྩད་བཅད་ན། ངོ་བོ་མ་གྲུབ་པར་ནན་གྱིས་བརྟགས་པས་སྐད་ཅིག་སྔ་མའི་རྟོག་པ་ཉིད་མཐུ་བརྟས་པ་ལས་བྱུང་བར་ཤེས་པའི་ཚེས་བཅོས་པའི་ཐབས་ཀྱང་དེ་ལྟ་བུར་རྒྱུ་འཁྲུལ་རྟོག་བརྟན་པའི་རྟོག་པ་ཉིད་སྣང་ལ་རང་བཞིན་མ་གྲུབ་པར་བདེན་མེད་སྒྱུ་མར་རབ་ཏུ་ཤེས་པར་གྱུར་ན། རྟོག་པའི་རི་བོ་ཕྲ་རགས་དག་རབ་ཏུ་ཞི་ནས་ཡོངས་སུ་དག་པར་འགྱུར་རོ། །དེ་ལྟར་ཞི་བ་དེས་ནི་འབྲས་བུ་ངན་འགྲོའི་གནས་ངན་གསུམ་དུ་ནམ་ཡང་ལྟུང་བ་མིན་ནོ། །དེ་བཞིན་དུ་མཚན་མ་བཅོས་པའི་ཐབས་ཀྱང་། རྟོག་པ་བརྟས་པའང་རྒྱུ་གང་ལས་བྱུང་བ་ཡིན་ཞེ་ན། དེ་ཡང་ལུང་དང་མན་ངག་ལ་བརྟེན་ནས་ངེས་པར་བརྟགས་ཤིང་དཔྱད་པས། ཡུལ་ལ་མཚན་མར་འཛིན་པའམ་ཆོས་ཉིད་ལ་བཟུང་བ་ཉིད་ལས་བྱུང་བ་ཡིན་པར་ཤེས་པས། ཡུལ་དུ་ཞེན་པའི་མཚན་མ་ཡང་བཤད་པ་ལྟར་སྣང་ལ་རང་བཞིན་མེད་པའི་སྒྱུ་མར་རབ་ཏུ་ཤེས་པ་ན་མཚན་མའི་ཆོས་རྣམས་མི་ལྡང་བར་རྣམ་པར་ཞི་བར་འགྱུར་ལ། དེས་ནི་འདོད་པའི་ཁམས་ཀྱི་མཐོ་རིས་ཀྱི་གནས་ཐ་མ་མིའི་འགྲོ་བར་ལྟུང་བ་མིན་ནོ། །མཚན་མ་དེ་ཡང་རྒྱུ་ཇི་ལྟར་ཡིན་དཔྱད་ན། དེ་ཡང་དྲན་པ་རྒྱུ་བ་ནི་གཏིང་ཐོག་ཏུ་བྱུང་བས་འབྱུང་བ་ཞེས་བྱ་བས་ན་འབྱུང་བ་དག་ལས་བྱུང་བར་ཤེས་ཏེ་དྲན་པའི་ཤེས་པ་ཕྱི་ནང་དུ་རྒྱུ་བ་ན་སྐྱོན་དང་། དེ་ལྟར་དྲན་པའི་རྒྱུ་བ་རིང་ཐུང་རྣམས་སྣང་ལ་རང་བཞིན་མེད་པར་སྒྱུ་མ་ལྟ་བུར་རབ་ཏུ་ཞིར་ཞེས་ཞི་བར་ཤེས་ན། ཐབས་དེས་རྒྱུ་བའི་སྐྱོན་ཀུན་སེལ་ཞིང་ཆང་པར་བྱེད་པས། འདོད་ཁམས་ལྷའི་གནས་རྒྱལ་ཆེན་རིགས་བཞི་དང་སུམ་ཅུ་རྩ་གསུམ་གཉིས་ལོངས་སྤྱོད་མཚུངས་པས་གཅིག་པར་བརྩིས་ཏེ་རྟོགས་པ་དེ་དང་ལྡན་པ་དག་ཞེས་པའམ་གནས་རིས་དེ་དག་ཏུ་ལྟུང་བ་མིན་ནོ། །གོང་མ་ལྟར་རྒྱུ་བ་དེ་ཡང་གང་ལས་བྱུང་ཞེ་ན། དེ་ལྟར་རྩད་བཅད་པས་སྔ་མ་དེ་བཞིན་དུ་དེ་ཡང་དེ་ལྟར་བདེ་སྡུག་མྱོང་བའི་ཚོར་བ་ལས་བྱུང་བ་ཡིན་པར་ཤེས་ཏེ། ཚོར་བ་དེ་ཉིད་སྔ་མ་དེ་ལྟར་སྣང་ལ་མེད་པ་སྒྱུ་མར་ལྟ་བུར་ཤེས་པར་གྱུར་ན། སྐྱོན་གྱི་ཚོར་བ་སེལ་བར་བྱེད་དེ་མི་འབྱུང་བས། འདོད་ཁམས་ཀྱི་ལྷ་གནས་གསུམ་པར་འཐབ་བྲལ་དེ་རུ་ཡོང་ཡེ་ལྟུང་བ་མིན་ནོ། །ཚོར་བ་དེ་ཉིད་ཀྱང་དེ་ལྟར་གང་ལས་བྱུང་བ་དེ་ཉིད་རྩད་བཅད་ནས་བརྟགས་པ་ན། གང་དེ་ཡང་བྱུང་ཚོར་ཕྱི་ནང་ཉིད་དུ་འབྱུང་འཇུག་བྱེད་པའི་རྒྱུ་ཁོ་ན་ལས་བྱུང་བར་ཤེས་ཏེ་བྱུང་ཚོར་ངོས་ཟིན་ནས། བྱུང་ཚོར་དེ་ཉིད་སྐྱོན་ཏུ་གྱུར་པའང་སྒྱུ་མ་ལྟ་བུར་རང་བྱུང་རང་ཞིར་རབ་ཏུ་ཤེས་པས་ན་དགག་པ་དང་སྐྱེ་བའམ་ལྡང་བ་ཡང་ག་ལ་ཡོད་དེ་མེད་པས་ན་དེ་ནི་འདོད་ཁམས་བཞི་པ་དགའ་བ་དང་ལྡན་པར་ལྟུང་བ་མིན་ནོ། །བྱུང་ཚོར་དེ་ཡང་གང་ལས་སྐྱེ་ཞིང་མཆེད་ན། དེའི་རྒྱུ་སེམས་ཀྱི་ཆོས་ཤེས་རིག་གིས་འཛིན་པ་ལས་བྱུང་བར་གྱུར་པ་སྟེ། དེ་བས་ན་སེམས་ཉིད་ཀྱང་སྣང་སྟོང་གི་མཐའ་དང་བྲལ་བར་སྒྱུ་མ་ལྟ་བུར་རབ་ཏུ་ཤེས་ཤིང་རྟོགས་ན། སེམས་ཀྱི་ཆོས་སུ་གྱུར་པའི་དྲན་རྟོག་གིས་འཛིན་པ་རྣམས་མི་ལྡང་བར་ཞི་བར་འགྱུར་རོ། །དེ་ལྟར་རྟོགས་ན་ལུས་སུ་སྣང་བའི་གཟུགས་ཀྱི་ཕུང་པོ་ནི་སྣང་ལ་རང་བཞིན་མ་གྲུབ་པས་གཟུགས་བརྙན་དང་འདྲ་བ་ལ། སེམས་དང་སེམས་བྱུང་ནི་སྐད་ཅིག་མའི་རྒྱུན་དུ་བྲང་བྲེང་སྣང་ཡང་དངོས་པོ་མེད་པ་སྨིག་རྒྱུ་ལྟ་བུར་འདོད་པ་ཉིད་དེ་ཡོད་པ་དང་མེད་པ་གཉིས་ཀྱི་མཐའ་ལས་མ་སྤངས་པར་གྲོལ་བའི་ངོ་བོར་གསལ་བས་ན་དེ་ལྟར་ཤེས་ཤིང་རྟོགས་པ་དེས། འཕྲུལ་དགའ་དང་གཞན་འཕྲུལ་དབང་བྱེད་གཉིས་ལོངས་སྤྱོད་འཕྲུལ་ཚུལ་སྤྱིར་མཚུངས་པས་གཅིག་ཏུ་བརྩིས་ཏེ། འདོད་ཁམས་ཀྱི་ལྷ་གནས་ལྔ་པར་ལྟུང་བ་མིན་ནོ། །དེ་དག་ནི་འབྲས་བུ་ནས་དཔྱད་པས་རྒྱུ་ངོས་ཟིན་ནས་དེ་ཉིད་ཀྱང་དགག་པ་མེད་པར་ཤེས་པས་མི་ལྡང་བར་གྲོལ་བ་ནི། ཉོན་མོངས་པ་རབ་ཏུ་འབྱེད་དེ་དོན་མངོན་དུ་བྱེད་པས་སྤོང་བའོ། །གཞན་གཉེན་པོས་སྤངས་པ་དང་། རབ་ཏུ་འབྱེད་པ་མེད་པར་མངོན་དུ་མི་བྱེད་པས་སྤོངས་བ་ནི་སྔ་མ་བློ་ཆུང་བ་དང་། ཕྱི་མ་གཅིག་ཆར་འཇུག་པའི་ཐབས་སོ། །གཞན་ཡང་སེམས་ཉིད་སྣང་སྟོང་གི་མཐའ་ལས་གྲོལ་བར་རྟོགས་པས་རྟག་པ་བདག་དང་བདག་གིར་ཡོད་པའི་དངོས་པོའམ་ཆད་པ་སྔ་ཕྱི་རྒྱུ་འབྲས་མེད་ཅེས་བྱ་བར་མི་ལྟ་བར་མཐའ་ལ་མི་འཛིན་པས། འདིར་རྟག་ཆད་དུ་ལྟ་བ་སྤྱི་ལ་བསྟིང་བའི་ཚིག་གིས་ཡ་མཚན་ཅན་མུ་སྟེགས་བྱེད་དུ་ལྟུང་བར་མི་འགྱུར་རོ། །གཉིས་པ་ནི། བྱིངས་རྨུགས་ཅན་དུ། ཞེས་པ་ནས། རིམ་པའང་སྦྱོར་མ་ཡིན། །ཞེས་པའི་བར་གྱིས་བསྟན་ཏེ། བྱིངས་རྨུགས་ཀྱིས་འཐིབས་པ་ཅན་དུ་མ་གྱུར་ཏེ་རང་རིག་པ་ཡེ་ཤེས་སུ་གསལ་བས། འདུ་ཤེས་མེད་པ་དང་བསམ་གཏན་བཞིའི་སྐྱོན་དུ་དེ་ཉིད་ལྟུང་བར་མི་འགྱུར་རོ། །སེམས་ཅིར་ཡང་མི་རྟོག་པ་ཉིད་འདུ་ཤེས་ཀྱི་རྗེས་སུ་མ་འབྲངས་པས་ཐ་མལ་གྱི་འདུ་ཤེས་དང་སྐྱེ་མཆེད་མུ་བཞིའི་འདུ་ཤེས་སུ་མི་གོལ་བས་སེམས་ཅན་ཕལ་པ་དང་གཟུགས་མེད་རྒྱུན་བཞིའི་གནས་སུ་དེ་ཉིད་ལྟུང་བ་ཡོང་ཡེ་མིན་ནོ། །དེ་གཉིས་ཀྱི་སྔ་མ་ནི་བྱིངས་རྨུགས་ཀྱིས་འཐིབས་པ་བཅོས་ཐབས་དང་། ཕྱི་མ་ནི་ལུས་མེད་སེམས་ཀྱི་གཡོ་བ་བཅོས་པའི་ཐབས་སོ། །ཆོས་ཐམས་ཅད་པའི་རྩ་བ་ཀུན་འབྱུང་ཀུན་གཞི་ཉིད་རྟོགས་ཏེ་ཆོས་ཉིད་ཀྱི་བདེན་པ་མཐོང་བས། ཞི་བ་ཕྱོགས་གཅིག་པའི་མྱང་འདས་ཉན་ཐོས་འགོག་པའི་གནས་སུ་ཡོང་ཡེ་ལྟུང་བ་མ་ཡིན་ནོ། །འཁོར་བ་དང་མྱ་ངན་ལས་འདས་པའི་མཐའ་གཉིས་མེད་པར་རྟོགས་པ་ལ། རྟེན་འབྲེལ་ལུགས་འབྱུང་དུ་འཛིན་པ་ཞི་བས་འཁོར་བའི་སྐྱོན་ཆེད་དུ་ཞི་བར་མི་ལྟ་བས། རང་རྒྱལ་གྱི་གནས་སུའང་ག་ལ་ཡིན་ཏེ་མི་ལྟུང་ངོ་། །དེ་གཉིས་ཀྱི་སྔ་མ་ནི། འཛིན་ཆགས་ཀྱི་དབང་གིས་འགོག་པ་བཅོས་ཐབས་དང་། ཕྱི་མ་ནི་ཕྱལ་བས་མེད་པ་བཅོས་པའི་ཐབས་སོ། །རིལ་སེམས་ཀྱི་ཆོས་ཉིད་དུ་ཤེས་པ་ལ། ཉམས་མྱོང་གིས་འཐས་ཏེ་སེམས་སྣང་བའི་རྣམ་རིག་ཙམ་དུའང་མི་ལྟ་ཞིང་འཛིན་པ་མིན་པས་ན་སེམས་དཔའ་སེམས་ཙམ་པ་དེ་ལ་ཡང་སྐབས་དེར་གོལ་བ་མ་ཡིན་ནོ། །དེ་ཉིད་ཐེར་ཟུག་དབང་གིས་རྟོག་པ་བཅོས་ཐབས་སོ། །སྟོང་ཉིད་མཉམ་པའི་ངོ་བོ་མཐའ་གཉིས་བྲལ་བའི་དབུ་མ་ཆེན་པོའི་དོན་ལ་མཐའ་དབུས་འབྱེད་ཅིང་གོང་འོག་དང་མཉམ་རྗེས་སོ་སོར་ཐ་དད་ཀྱི་རིས་དང་བྲལ་ཏེ་བདེན་གཉིས་དབྱེར་མེད་མཉམ་པ་ཆེན་པོ་ཉིད་པས། དང་པོ་ནས་བཅུ་པའི་བར་གྱི་ས་ཡི་རིམ་པའང་སྦྱོང་སྟེ་ཀུན་ཏུ་འོད་ལ་བགྲོད་དུ་ཡོད་པ་མ་ཡིན་ནོ། །རྒྱུ་མཚན་འདིས་ན་ཚུལ་འདི་ཡང་སྔགས་ཀྱི་རྩོལ་བའི་རྣལ་འབྱོར་རིམ་གྱིས་འཇུག་པ་ལའང་སྦྱར་བར་གསལ་ལོ། །བཞི་པ་ནི། ཕྱོགས་ལྟ་མཐའ་འདས། ཞེས་པ་ནས། རྒྱུན་དུ་དྲན་པར་བྱ། །ཞེས་པའི་བར་གྱིས་བསྟན་ཏེ། བདེན་གཉིས་ཕྱོགས་རིས་སུ་ལྟ་བའི་མཐའ་ཐམས་ཅད་ལས་འདས་པའི་དབུ་མ་ཆེན་པོ་གསང་བའི་ཆོས་ཉིད་རང་བཞིན་འདི་འདྲར་མེད་པས་སྟོང་པ་ཉིད་གང་དུའང་མི་ཟིན་པ་ཡི་དེ་ཁོ་ན་ཉིད་ཀྱི་དོན་ལ། རང་རིག་པའི་སེམས་ཉིད་གྱི་ན་འདའ་བས་བསྒོམ་པའང་ལུས་སེམས་ཁོང་ཀློད་བག་བདལ་ཏེ་ཡང་བགས་སུ་བཞག་ལ་ཆེད་དུ་གྲིམས་ཕྱུང་བ་མེད་པར་བཏང་སྙོམས་ཀྱི་སྐད་ཅིག་མས་མ་བྲལ་མ་ཤོར་ཙམ་དུ་བློ་མི་གཡོ་བར་དལ་བའི་ངང་ལ་ཅིར་ཡང་མི་བསམ་པར་རྒྱུན་དུ་དྲན་པར་བྱས་ཏེ་བཞག་པར་བྱ་སྟེ་དེ་ལ་ཡུན་ཇེ་རིང་དུ་འབད་དོ། །ལྔ་པ་ལ་གཉིས་ཏེ། སྤྱིར་བསྟན་པ། ཡེ་ཤེས་བྱེ་བྲག་ཏུ་བཤད་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི། དེ་ལྟར་དེ་ལ། ཞེས་པ་ནས། དང་ནི་ཡེ་ཤེས་འབྱུང་། །ཞེས་པའི་བར་གྱིས་བསྟན་ཏེ། དེ་ལྟར་བསྒོམ་པའི་ངོ་བོ་བཤད་པའི་ཚུལ་དེ་ཁོ་ན་ལ་བློ་ཡུན་རིང་དུ་མཉམ་པར་བཞག་ནས་གོམས་པར་བྱས་ན། དོན་ལ་ཉེ་བའི་རྟགས་ཀྱི་ཚོར་བ་རྣམ་པ་ལྔ་ཉིད་འདི་ལྟར་འབྱུང་སྟེ། གང་ཞེ་ན། དྲོད་དང་རྟགས་དང་ཆོ་འཕྲུལ་དང་མངོན་ཤེས་དང་ནི་རྣམ་པ་ཐམས་ཅད་མཁྱེན་པའི་ཡེ་ཤེས་རྣམས་འབྱུང་ངོ་། །གཉིས་པ་ནི། དྲོད་ནི་གསོ་དང་། ཞེས་པ་ནས། མཐོང་དང་ཐམས་ཅད་གསལ། །ཞེས་པའི་བར་གྱིས་བསྟན་ཏེ། དེ་ཡང་དྲོད་ལ་ནི་མགོ་གཡོ་བ་དང་ལེགས་པར་ཐོབ་པ་གཉིས་དང་། དང་སྒྲའི་ཟུར་གྱིས་བརྟན་པ་དང་གསུམ་དུ་འགྱུར་ལ། རྟགས་ནི་མགོ་བྱུང་བ་དང་མི་འགྱུར་བར་བརྟན་པ་དང་། དང་སྒྲའི་ཟུར་གྱིས་ཐོབ་པ་དང་གསུམ་དུ་འགྱུར་རོ། །ཆོ་འཕྲུལ་ནི་མགོ་འབྱུང་བ་དང་ཡོངས་སུ་རྫོགས་པར་ཐོབ་པ་དང་གཉིས་སོ། །དེ་ནས་མངོན་པར་ཤེས་པ་ཡུལ་དྲུག་པོ་གང་དུ་ཡང་རིག་པ་གསལ་ཏེ་སྔོན་གྱི་གནས་དང་། ཕ་རོལ་གྱི་སེམས་དང་། ལྐོག་གྱུར་གྱི་སྒྲ་ལ་སོགས་པ་ཀུན་གསལ་བར་མཐོང་སྟེ་ཡེ་ཤེས་ཆེན་པོ་ཉིད་ལ་ལྟོས་ནས་ཕྲ་བའོ། །དེ་ནས་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱིས་ཇི་ལྟ་བ་དང་ཇི་སྙེད་པ་ཐམས་ཅད་གསལ་བར་མཁྱེན་ཏོ། །ལྔ་པོ་དེས་ནི་དྲོད་རྟགས་ཀྱི་དོན་རྣམས་ཡོངས་སུ་རྫོགས་ཏེ་བསྒྲུབ་བྱ་མཐར་ཕྱིན་པ་ཡིན་པས་སྐྱེད་དུ་བྱ་བ་མེད་པར་གྱུར་པའོ། །དེ་དག་འབྱུང་བའི་ཚུལ་ཇི་ལྟ་བུ་ཞེ་ན། དེ་ཡང་གཟུང་བ་ལ་རགས་པ་དང་ཕྲ་བ་དང་འཛིན་པ་ལ་རགས་པ་དང་ཕྲ་བ་དང་བག་ལ་ཉལ་བའི་རིམ་པས་དག་པའི་སྣང་བ་ནི། དཔེར་བྱ་ན་མུན་པ་སངས་ནས་གསལ་བ་ལྟ་བུ་དྲོད་དང་། སྐྱ་རེངས་ཤར་ནས་སྣང་བ་བྱུང་བ་ལྟ་བུའི་རྟགས་དང་། ནམ་མཁའ་ཤིན་ཏུ་དྭངས་པ་ལ་ཉི་མ་ཤར་བ་ལྟ་བུའི་ཆོ་འཕྲུལ་དང་། ཡུལ་ཁམས་ཀུན་ཏུ་མཐོང་བ་ལྟ་བུའི་མངོན་ཤེས་དང་། རྫས་རིལ་ལ་མ་ཁྱབ་ཅིང་མི་གསལ་བ་མེད་པར་ཐམས་ཅད་གསལ་བར་སྣང་བའི་ཉི་མ་ཤར་བ་ལྟ་བུའོ། །ཡང་ན། རྟོག་པ་གྲོལ་ཏེ་མུན་པ་སངས་པ་སྐྱ་རེངས་དང་པོ་ལྟ་བུ་དང་། མཚན་མ་དང་བྲལ་བས་སྣང་བ་བྱུང་བ་སྐྱ་རེངས་ཐ་མ་ལྟ་བུ་དང་། རྒྱུ་བ་སངས་པས་ནམ་མཁའ་གསལ་བ་ནམ་ལངས་པ་ལྟ་བུ་དང་། ཚོར་བ་དག་པས་ཀུན་ཏུ་མཐོང་བ་ཉི་མ་མ་ཤར་གོང་ལྟ་བུ་དང་། བྱུང་ཚོར་ཞི་བས་ཐམས་ཅད་གསལ་བ་ཉི་མ་ཤར་བ་ལྟ་བུའོ། །ཞེས་འབྱུང་སྟེ་ལུགས་གཅིག་གོ། །གཉིས་པ་ལ་གསུམ་སྟེ། ཡེ་ཤེས་ཤར་བའི་ཡོན་ཏན། ཤེས་རབ་མེད་པའི་སྐྱོན། མ་རྟོགས་པར་གཞན་ལ་བསྟན་པའི་སྐྱོན་བཤད་པའོ། །དང་པོ་ནི། དེས་ན་དེ་ཡི། ཞེས་པ་ནས། ཡིན་པས་དེ་ལ་ལྟོས། །ཞེས་པའི་བར་གྱིས་བསྟན་ཏེ། དེ་ལྟར་དྲོད་རྟགས་བྱུང་ནས་ཡེ་ཤེས་ཤར་བས་སྒྲིབ་པ་འདག་པའི་ཚུལ་ནི། ཏིང་ངེ་འཛིན་ལ་བརྟན་པ་ཐོབ་པ་དེས་ན་ཡོན་ཏན་ལྔ་སྐྱེས་པ་དེ་ཡི་མཐུ་དང་རྩལ་གྱི་ཁྱད་པར་གྱིས། ཀུན་གཞིའི་ཁམས་གང་དུ་སེམས་ལ་ཡོད་པའི་མ་རིག་པའི་བག་ཆགས་དང་། དེའི་དབང་གི་འཁྲུལ་བར་སྣང་བའི་མུན་པས་སྒྲིབ་པའི་ཚོགས་ཀྱི་དྲི་མ་མཐའ་དག་བསལ་བར་བྱས་ཏེ་དག་པར་བྱེད་པ་ནི། དཔེར་ཇི་ལྟར་ན། དྲག་པོའི་འཐོར་རླུང་གིས་སྤྲིན་ཕྱགས་པ་ལྟར་དུ་བྱ་བ་རྫོགས་པའི་སྐད་ཅིག་མ་ཙམ་གྱི་བར་དུ་ཡང་དག་པའི་དོན་ལ་རྣལ་དུ་འབྱོར་བའི་ཏིང་ངེ་འཛིན་གྱིས། སྒྲིབ་པར་གྱུར་པའི་མུན་པའི་ཁམས་དེ་དག་ཐམས་ཅད་རང་བཞིན་མེད་པའི་དབྱིངས་ཀྱི་ངང་དུ་ཕྱགས་ཏེ་དག་པར་འགྱུར་རོ། །དེས་ན་དོན་དུ་གཉེར་བའི་དགོས་པ་ཡང་དཔེ་ཇི་ལྟར་ན་མར་མེས་མུན་པ་བསལ་བར་བྱས་ན། མུན་པ་དེ་ཉིད་སྣང་བར་འགྱུར་བ་བཞིན་དུ། སེམས་སྐད་ཅིག་མ་ཡི་རང་བཞིན་དེ་ཉིད་ཡེ་ནས་ཆོས་ཉིད་ཡིན་པའི་དོན་དུ་རྟོགས་པའི་རིག་པ་ཡེ་ཤེས་གསལ་བར་གྱུར་པ་ན། སྔོན་ཐོག་མ་མེད་པ་ནས་ཀྱི་ལོག་པར་ཞེན་པ་དང་། ལམ་ལ་བསླབ་ནས་ཡང་དག་པར་ཞེན་པའི་བག་ཆགས་ཀྱི་མུན་པའི་མཐར་སྣང་མ་ལུས་པ་ཀུན་སེལ་ཏེ་དག་པར་བྱེད་དོ། །དེ་སྐད་དུའང་། ཀུན་འདུས་ལས། དེ་ལྟར་སེམས་ཀྱིས་སེམས་མཐོང་ན། །ཡེ་ཤེས་ཀྱིས་ནི་ཆོས་ཉིད་མཐོང་། །དུས་ཀུན་ཏུ་ནི་སྐྱེ་འགག་མེད། །སྔོན་མ་མཐོང་བའི་དོན་མཐོང་འགྱུར། །དེ་ཡང་དངོས་པོ་ཅང་མི་མཐོང་། །ཐམས་ཅད་རང་བཞིན་མེད་པ་ཞིག །བློ་ལ་འགྱུས་པ་ཁོ་ནར་ཟད། །དེ་ལྟ་བུ་ཡི་དོན་མཐོང་ན། །མཚན་མར་མཐོང་བ་ཅི་ཡང་མེད། །སྒྱུ་མ་ཙམ་དུ་ཚུལ་ཤེས་ན། །ནམ་མཁར་མཉམ་པའི་དོན་སྣང་འགྱུར། །ཞེས་དང་། དེ་ནས་དེ་མ་ཐག་ཏུ་ཡང་། །ཡིད་ཀྱི་རྒྱུ་བ་རྒྱུན་ཆད་ནས། །སྔར་འཁྲུལ་མཚན་མའི་ཆོས་བྲལ་ཏེ། །དེས་ནི་བདེན་པ་མཐོང་བ་ཡིན། །ཞེས་སོ། །དེ་ཉིད་རྟོགས་པའི་རྟགས་ནི། དེ་ལྟ་བུའི་ཆོས་ཉིད་ཀྱི་དོན་གང་ཡིན་པ་དེ་ཉིད་ངེས་པར་རིག་ཅིང་རྟོགས་པའི་རྣལ་འབྱོར་པ་དེ་དག་ནི། དོན་དེ་ཁོ་ན་ཉིད་དེ་ཡི་སྒོ་རྟོགས་པའི་རིག་པ་དེ་ཡིས་ཕྱེ་ཞིང་དེ་བཞིན་ཉིད་མཐོང་བའི་ཤེས་རབ་ཀྱི་མིག་གམ་སྤྱན་དང་དམ་པ་དེ་ཉིད་ལྡན་པས། མཐོང་ཐོས་ཀྱི་ཆོས་ཇི་སྙེད་པ་ཐམས་ཅད་ཚིག་གི་ལམ་གྱི་ལེའུ་བཞིར་བསྡེབས་ནས་ཚིག་བཞི་པའི་ཚིགས་སུ་བཅད་པའི་སྒོ་ནས་ལྟ་སྒོམ་སྤྱོད་འབྲས་ཀུན་གྱི་གནད་དོན་གསལ་བར་བྱེད་པ་དང་སྦྱར་ཏེ་སྨྲ་ཞིང་སྟོན་པ་དང་། གཏན་ཚིགས་ཟབ་མོ་རྣམས་ཀྱང་ཚིག་ལ་མ་བསླབས་པར་རིགས་པའི་རྩལ་གྱིས་འབྱིན་པར་ནུས་ཏེ། དེ་ལྟ་བུའི་རྟོགས་པ་དང་ལྡན་པ་དེ་ནི། ས་ལ་གནས་པའི་བྱང་ཆུབ་སེམས་དཔའ་ཆེན་པོའམ་རིག་པ་འཛིན་པའི་སྐྱེས་བུ་དམ་པ་ཡིན་པས་ན། དེ་ལྟར་དོན་ཆེན་པོ་དེ་ལ་ཡང་དག་པར་ལྟོས་ལ་རྟོགས་པར་གྱིས་ཤིག་པའོ། །གཉིས་པ་ནི། དེ་ཡི་མིག་དང་། ཞེས་པ་ནས། ངེས་ཀྱི་དམིགས་མི་ཕྱེད། །ཅེས་པའི་བར་གྱིས་བསྟན་ཏེ། དེ་ལྟར་དོན་མ་གོ་བའི་སྐྱོན་ནི། བཤད་མ་ཐག་པ་དེ་ལྟ་བུའི་ཆོས་ཉིད་རྟོགས་པའི་ཤེས་རབ་དེ་ཡི་སྤྱན་མིག་དང་མ་ལྡན་པར་རྟོགས་པའི་གདེང་དང་བྲལ་ན། དོན་གྱི་མཚོན་ཐབས་མུ་མཐའ་ཡས་པ་ཇི་སྙེད་པའི་ཚིག་གི་ལམ་གྱི་བརྗོད་པ་རྣམས་ཀྱིས། དོན་དེ་ལ་མཚོན་པའི་ཐ་སྙད་སྣ་ཚོགས་པ་ཇི་ལྟར་བརྗོད་དེ་བསྟན་ཀྱང་། ཇི་བཞིན་དུ་ངེས་སམ་མ་ངེས་པའི་ཁྱད་པར་དབྱེ་ནས་ནོར་མ་ནོར་གྱི་དམིགས་གནད་མི་ཕྱེད་པས་ཡང་དག་པར་དཔོགས་པར་མི་ནུས་སོ། །གསུམ་པ་ནི། ཚིག་ཕྱིར་བློ་འབྲངས། ཞེས་པ་ནས། ཆོས་སྨྲ་དེ་བས་ལྕི། །ཞེས་པའི་བར་གྱིས་བསྟན་ཏེ། དེའི་ཕྱིར་དོན་མ་ངེས་པར་ཚིག་གམ་སྒྲའི་ཕྱིར་བློ་འབྲངས་པས་བློ་གྲོས་རྩིང་ཞིང་རྣམ་པར་གཡེང་བའི་དམུ་རྒོད་དག །ངེས་པའི་དོན་ལ་གོམས་པར་བྱ་བའི་གསང་བ་མཆོག་གི་བསླབ་པའི་ས་དང་ལམ་ལ་གནས་པ་མ་ཡིན་ཏེ། ཚིག་ཙམ་ཤེས་ཀྱང་དོན་མ་ངེས་པས་སོ། །དེ་ལྟ་བུའི་གང་ཟག་དེས་གསང་དོན་མཚོན་པའི་ཚིག་གི་ལམ་གྱི་རྗོད་བྱེད་འབུམ་ཕྲག་ཏུ་གྱུར་པ་སྟོང་ཕྲག་བརྒྱ་ལྟ་བུ་ཇི་ལྟར་བརྗོད་ཀྱང་། དེ་དག་གཞན་ལ་སྟོན་ཞིང་སྨྲ་བར་བྱ་བ་མ་ཡིན་པས་གསང་བར་བྱ་སྟེ་སྨྲ་བར་མ་བྱེད་ཅིག །གལ་ཏེ་གང་ཟག་གང་ཞིག་རང་གིས་མ་རྟོགས་པར་གཞན་སྣོད་མ་ཡིན་པ་གང་ལ་གསང་དོན་སྨྲ་བ་དང་བཤད་པར་བྱེད་ན། ཆོས་མིན་ཆོས་སུ་སྨྲ་བས་ལོག་པར་སྨྲ་བ་རྡོ་རྗེ་གསང་བའི་ཐེག་པ་ཆེན་པོའི་བཀའ་རྐུན་བྱེད་པོ་དེ་ཉིད། ཐར་པའི་དུས་མེད་པར་རྡོ་རྗེ་དམྱལ་བའི་གནས་དེར་ལྟུང་ནས་སྡུག་བསྔལ་གྱིས་ཉམ་ཐག་པའི་ཉེས་པ་འབྱུང་ངོ་། །ཡང་ན། དཔེ་ལ་ལར། རྡོ་རྗེར་དེ་ལྟུང་འགྱུར། །ཞེས་འབྱུང་བས། རྡོ་རྗེར་གྲགས་པའི་དམྱལ་བ་དེར་ལོག་སྨྲ་དེ་ཉིད་ལྟུང་བར་འགྱུར་རོ། །ཞེས་སྦྱར། དེ་ཅིའི་ཕྱིར་ཞེ་ན། གསང་སྔགས་ཐེག་པ་ཆེན་པོའི་དོན་ངེས་པར་མ་གོ་བར་དོར་རམ་གཡོ་སྒྱུ་དང་ཚུལ་འཆོས་མཁན་དག་གིས། དོན་ཇི་བཞིན་དུ་ངེས་པའི་བློ་ཤེད་མ་བྱེ་བར་ཁྱད་པར་མཚོན་པའི་ཚིག་ལམ་སྒྲ་ཕྱིར་འབྲངས་པའི་མིང་ཚིག་གཉིས་ཀྱི་རྟེན་ཡི་གེས་ཁྲིད་ནས་ནི། གང་དོན་མ་ངེས་ཏེ་མི་ཤེས་པར་ཐེ་ཚོམ་ཟ་བཞིན་དུ་གཞན་ལ་གསང་སྔགས་ཀྱི་ཚིག་ལམ་བརྗོད་དེ་བཤད་ན། ཁམས་གསུམ་གྱི་སེམས་ཅན་སྲོག་ཆགས་པ་ཀུན་གྱི་སྲོག་ཕྲོགས་ཏེ་བསད་པའི་སྡིག་པ་བས་ཀྱང་། རང་གིས་མ་རྟོགས་ཏེ་ངེས་པ་མ་རྙེད་པར་གཞན་ལ་ཆོས་སྨྲ་བ་ནི་དེ་བས་ཀྱང་སྡིག་པ་ལྕི་བའི་ཕྱིར་ཏེ། དེས་ནི་ལོག་ལམ་དུ་བཙུད་པས་བདག་གཞན་ལ་ཐར་པའི་སྐབས་མེད་པར་འཁོར་བའི་གཏིང་རྡོ་བྱས་པའི་ཕྱིར་རོ། །གཉིས་པ་ལ་ལྔ་སྟེ། བློ་བཞག་ཐབས་བསྟན་པ། ཏིང་ངེ་འཛིན་གྱི་ངོ་བོ་བསྟན་པ། དེའི་ཡོན་ཏན་བཤད་པ། གོལ་ས་ངོས་གཟུང་བ། ལ་བཟླ་བའི་ཐབས་བཤད་པའོ། །དང་པོ་ནི། ཚིགས་བཅད་བདུན་གྱི་འོག་ནས། བསམ་དུ་མེད་པའི་ཆོས་ཉིད། ཅེས་པ་ནས། དེ་བཞིན་ཉིད་ལས་མེད། །ཅེས་པའི་བར་གྱིས་བསྟན་ཏེ། དེ་དག་གི་རྗེས་སུ་ཐེག་པ་ཆེན་པོ་གཅིག་ཆར་བའི་འཇུག་ཐབས་བསྟན་པའི་ཕྱིར། དེ་བས་ན་བློ་མཆོག་གཅིག་ཆར་བ་རྣམས་ཀྱིས་བློ་བཞག་ཐབས་ནི། གནས་ལུགས་རང་བཞིན་གྱི་སྣང་བ་བསམ་དུ་མེད་པའི་ཆོས་ཉིད་ཇི་བཞིན་པ་འདི་ནི། སེམས་ཀྱིས་གང་དུའང་བསམ་དཔྱད་མེད་པར་རིག་པའང་དེ་ཉིད་ཀྱི་ཕྱིར་རྟོག་པའི་བློས་ཅིར་ཡང་མི་བསམ་པ་ཁོ་ནར་ཆོས་ཉིད་མ་བཅོས་པའི་དེ་བཞིན་ཉིད་སྤྲོས་པ་དང་བྲལ་བའི་ངང་དུ་མ་གཡོས་པར་བཞག་ན་རྩོལ་བས་མ་བསླད་པའི་ཕྱིར་ཐབས་དམ་པ་ཉིད་དེ། ཀུན་འདུས་ལས། དེས་ན་ཏིང་འཛིན་ཁྱད་པར་འདི། །རྣལ་འབྱོར་ཅན་གྱིས་འདྲེས་པར་བསྒོམ། །ཐམས་ཅད་མི་རྟོག་སྐྱེ་མེད་ཅིང་། །རྟོག་པའི་མཐའ་སྤངས་ནམ་མཁའི་དབྱིངས། །ཞེས་སོ། །དེ་ལྟར་བཞག་ན་ཡིད་ཀྱི་བྱ་བས་མི་འཁྱུད་པས་བསམ་གྱིས་མི་ཁྱབ་པའི་འཁོར་འདས་ཀྱི་ཆོས་རྣམས་ཇི་སྙེད་པ་ཀུན་གྱི་དོན་ཡང་བསམ་དུ་མེད་པའི་ཆོས་ཉིད་གཟའ་གཏད་དང་བྲལ་བའི་དེ་བཞིན་ཉིད་ཀྱི་ངང་དུ་འདུས་པས། དེ་ལས་གཞན་དུ་གྱུར་པའི་ཆོས་གང་ཡང་མེད་པས་དེ་ལྟར་གཡོ་བ་མེད་པར་མི་གནས་པའི་གནས་པ་ཆེན་པོ་ནི་རང་སྣང་ལྷུན་གྲུབ་ཀྱི་ངང་དུ་རིག་པ་རང་གསལ་དུ་གདལ་བ་ཁོ་ནའོ། །གཉིས་པ་ནི། གོང་ནས་མཐའ་དང་དབུས་བྲལ། ཞེས་པ་ནས། སྣང་བའི་ཐ་སྙད་བྲལ། །ཞེས་པའི་བར་གྱིས་བསྟན་ཏེ། འོ་ན་ལྟ་བའི་དོན་མ་ནོར་བ་གསང་སྔགས་གཅིག་ཆར་བ་གང་ལྟར་འདོད་ཅེ་ན། མཐའ་དང་དབུས་ཀྱི་ཐ་སྙད་དང་ཡེ་ནས་བྲལ་བའི་གསང་བའི་ཆོས་ཉིད་དེ་ཁོ་ན་ཉིད་ཇི་བཞིན་པའི་དེ་བཞིན་ཉིད་ཇི་ལྟ་བར་ཁོང་དུ་ཆུད་ནས་ཐག་ཆོད་ན། བློ་ཅི་ལ་ཡང་རྟེན་བཅས་ཏེ། མི་གནས་པར་དབུ་མའམ་ཆོས་ཉིད་ཀྱང་དང་དུ་མི་ལེན་ལ། བཟང་ངན་ལ་སོགས་པའི་རིས་སུ་མི་འབྱེད་ཅིང་། ངོ་བོའམ་མཚན་ཉིད་མེད་པའི་ཆོས་ཉིད་ཅི་ཡང་མ་ཡིན་པ་ལ་མཐོང་ཐོས་ལ་སོགས་པ་མ་འགགས་ལ་བྲལ་བས་མཚན་མའི་ཐ་སྙད་གང་ཡང་མེད་པར་དོན་གྱི་དངོས་པོ་གང་ཅི་ཡང་མངོན་དུ་མི་བྱེད་དེ། སེམས་མི་རྟོག་པ་ཉིད་ཆེད་དུ་བྱ་བའི་རྩོལ་བ་ཙམ་དང་ཡང་བྲལ་བ་ཉིད་དོ། །དེ་ལྟ་བུའི་དོན་ནི་མཐའ་གང་དུའང་འབྱུང་མ་མྱོང་བས་སྣང་བ་མེད་པའི་ཆོས་ཉིད་དབུས་སུ་སྣང་བའི་ཐ་སྙད་དང་ཡང་བྲལ་བས། མཐའ་མེད་དོ་ཞེས་པའི་བཏགས་པའང་མེད་པས་དམིགས་བསམ་བརྗོད་པ་ཀུན་ལས་འདས་པའི་རང་རིག་པའི་ངོ་བོ་རྗེན་པར་མཐོང་ནས་དགོངས་པ་མི་གཡོ་བར་གནས་པ་སྟེ། རྒྱུད་ཀྱི་རྒྱལ་པོ་སེམས་ལུང་ཆེན་པོའི་མདོ་ལས ། ཆོས་ཉིད་མཚན་མ་མེད་པ་སྟེ། །ཆོས་ཉིད་དམིགས་པའི་ཡུལ་མེད་པས། །དབང་པོས་མཐོང་བར་བྱ་བ་མིན། །ཡུལ་མེད་ཁྱབ་པས་དེ་བཞིན་ཉིད། །ཅེས་དང་། གླེང་བྲལ་འདི་ལ་གནས་པ་ཡིས། །རྣལ་འབྱོར་འདི་ནི་སྐལ་བ་བཟང་། །ཆོས་ཉིད་གཏེར་ལྡན་ནམ་མཁའི་ཚུལ། །རྣལ་འབྱོར་ཆོས་ཉིད་ཡིན་པའི་ཕྱིར། །ཞེས་པ་ལ་སོགས་པ་ལྟར་རོ། །གསུམ་པ་ལ་གཉིས་ཏེ། ལས་དང་དུས་ལ་རག་མ་ལས་པར་བསྟན་པ། ཡོན་ཏན་བཞི་དང་ལྡན་པར་བཤད་པའོ། །དང་པོ་ནི། གོང་གི། དེས་ན་མཐའ་དབུས། ཞེས་པ་ནས། སྙམ་པའི་ཁར་མ་ལུས། །ཞེས་པའི་བར་གྱིས་བསྟན་ཏེ། རིམ་གྱིས་པས་ཡུན་རིང་མོས་ཆོས་ལྔ་ཐོབ་པའི་ཚུལ་དེས་ན། མཐའ་དབུས་དང་བྲལ་བས་མཉམ་ཉིད་ཆེན་པོའི་དོན་ལ། རིམ་པ་མེད་པར་སྤྱི་བླུགས་སུ་བཏུད་དེ་གཅིག་ཆར་དུ་གང་འཇུག་པ་ཡི་རྣལ་འབྱོར་རབ་མཆོག་དེ་དག་གི་བཞག་ཐབས་ནི་བཤད་ཟིན་ཏེ་བསམ་དཔྱོད་དང་བྲལ་བའོ། །དེ་ལྟར་གསང་སྔགས་ཀྱི་དོན་གོ་ནས་བསྒོམ་པ་ནི། འབྲས་བུ་ཉིད་ལ་ཞུགས་པ་ཡིན་པས་བརྩོན་པ་ཆེ་ན་བསྒོམ་གནས་ཡུན་རིང་ཐུང་ལ་རག་མ་ལས་པ་དང་དེ་བཞིན་དུ་ཡང་གང་ལས་འཕྲོ་ཡོད་པ་དང་མེད་པ་དང་། དུས་ནམ་ཞིག་ན་འགྲུབ་པར་འགྱུར་སྙམ་པའི་ཁར་ཡང་རག་མ་ལུས་ཏེ་གོལ་སྒྲིབ་མེད་པའི་སྙིང་པོ་ལ་གནས་པས་ལས་འཕྲོ་ཆེ་ཆུང་དང་རེ་རྩོལ་ལ་ལྟོས་པ་མེད་དོ། །གཉིས་པ་ནི། དེ་ལ་དེ་བཞིན། ཞེས་པ་ནས། གནས་སུ་དེ་དག་མིན། །ཞེས་པའི་བར་གྱིས་བསྟན་ཏེ། དེ་ཅིའི་ཕྱིར་ཞེ་ན། དེ་ཡང་ཆོས་ཉིད་ཇི་བཞིན་པའི་ངང་ལ་རིག་པ་དེ་ཡང་ཇི་བཞིན་པར་སྤྱི་བླུགས་སུ་མ་བཞག་པར་བཞག་པ་ལྟར་མཉམ་པ་ཉིད་ཀྱི་ངང་དེར་བཞག་ན། དུས་སྐད་ཅིག་ཙམ་ལས་མི་ཐོགས་པར་དེ་མ་ཐག་ཏུ་རང་བྱུང་གི་ཡེ་ཤེས་དེ་ཉིད་རང་ལ་སྣང་སྟེ། རང་རིག་པ་མཉམ་པའི་ཀློང་དུ་གསལ་བར་འགྱུར་ཏེ། དེ་ལྟ་བུ་ལ་རེ་དོགས་མེད་པའི་ཕྱིར་རོ། །དེ་བས་ན་འདིར་གསང་སྔགས་ཉིད་ཀྱི་རིམ་གྱིས་པའང་། ཟབ་མོ་གཅིག་ཆར་བ་ལ་ལྟོས་པས་རིང་བ་ལྟ་བུར་སྣང་ཡང་། རྒྱུ་འབྲས་གཉིས་མེད་ལ་སྦྱོར་བས་རག་ལུས་པར་མི་བྱེད་དོ། །གོལ་ས་རྣམས་ཀྱང་གཞིག་དཔྱད་མེད་པར་ཁེགས་ཏེ། གང་ཞེ་ན། གཅིག་ཆར་བས་མཉམ་པ་ཆེན་པོ་བྱང་ཆུབ་སེམས་ཀྱི་ཀློང་དེ་ལས་དོན་དེ་བཞིན་དུ་མ་གཡོས་ཏེ་འདུ་ཤེས་གང་དུའང་མ་ཞུགས་པས་ན་གཟུགས་ཁམས་ཀྱི་གྲོང་ཁྱེར་སྣང་བར་གོལ་བ་དེར་མི་འགྲོའོ། །ཆགས་ན་ལྷ་ལ་ཆགས་ཀྱང་འཆིང་བའི་རྒྱུ་དང་། རྟོག་ན་དོན་དུ་རྟོག་ཀྱང་བདུད་ཡིན་པས། མཉམ་པ་ཆེན་པོའི་ཏིང་ངེ་འཛིན་གྱི་རོ་དེ་ལ་དེ་ལྟར་མ་ཆགས་པས་ན་གཟུགས་མེད་ཀྱི་ཁམས་སྣང་བ་མེད་པར་ག་ལ་འགྲོ་སྟེ་མི་འགྲོ་བས་གོལ་ས་མེད་དོ། །སེམས་ཀྱི་དེ་ཉིད་མངོན་དུ་གྱུར་ཏེ་མཉམ་པའི་ཡེ་ཤེས་རང་གསལ་བས་ན་ཉན་ཐོས་ཞི་བ་ཕྱོགས་གཅིག་པའི་གནས་སུ་དེ་དག་གོལ་བ་མིན་པས་འགོག་པར་ལྟུང་བའང་མེད་དོ། །བཞི་པ་ལ་བདུན་ཏེ། ལྟ་བའི་གོལ་ས། ཐེག་པའི་གོལ་ས། དམ་ཚིག་གི་གོལ་ས། སའི་གོལ་ས། ཡེ་ཤེས་ཀྱི་གོལ་ས། བསྒོམ་པའི་གོལ་ས། སྤྱོད་པའི་གོལ་ས་བཤད་པའོ། །དང་པོ་ནི། ཡོད་དང་མེད་པའི། ཞེས་པ་ནས། འགྱེད་པ་དེ་ཉིད་ནད། །ཅེས་པའི་བར་གྱིས་བསྟན་ཏེ། ངེས་པར་བཟུང་བའི་སྐྱོན་གྱིས་དབུ་མར་གོལ་བའི་ཚུལ་འཆད་པ་ནི། སེམས་ཀྱི་ཆོས་ཉིད་ལ་ཡོད་པ་སྣང་བ་དང་མེད་པ་སྟོང་པའི་མཐའ་གཉིས་དང་བྲལ་བར་ཐག་ཆོད་དེ་ཆོས་ཐམས་ཅད་ཆོས་ཉིད་སྤྲོས་བྲལ་དུ་རྟོགས་ནས་ངང་ལས་མ་གཡོས་ན་མཐའ་ལས་འདས་པའི་རྣལ་འབྱོར་གྱི་དོན་ཟབ་མོ་མ་ནོར་བར་བསྒོམ་པ་ཉིད་དེ། སེམས་ལུང་ཆེན་པོའི་མདོ་ལས། ཆེ་བའི་ཡེ་ཤེས་རྙེད་དཀའ་བ། །ཟབ་ཅིང་ཕྲ་ལ་རྟོགས་པར་དཀའ། །ཆོས་ཉིད་མི་རྙེད་སྒྱུ་མར་བསྟན། །ཇི་ལྟར་སྒྱུ་མ་སྣང་གྱུར་ཡང་། །དེ་ལ་དངོས་པོ་ག་ལ་ཡོད། །ཅེས་དང་། བཙལ་དུ་མེད་པའི་ཆོས་ཉིད་ནི། །མ་བཙལ་བཞག་པས་བསྒོམ་པ་ཡིན། །ཆོས་ཉིད་ཇི་བཞིན་མཉམ་པའི་ཚུལ། །དམིགས་པ་མེད་པས་ཀུན་ཏུ་བཟང་། །ཞེས་སོ། །དེས་ན་གསང་སྔགས་གཅིག་ཆར་བའི་ལྟ་བས་སྐབས་གང་འདིར། དོན་མ་ནོར་བའི་དངོས་པོ་ནི་འདི་ལྟར་ངེས་པ་དམ་པ་དེ་ཁོ་ན་འོ་ཞེས་ཞེ་བས་འདོད་དེ་ངེས་པར་གཟུང་བ་གང་དག་འདི་ལྟར་ངེས་སོ་ཞེས་དབུ་མ་པ་ལྟར་དམ་འཆའ་བ་ནི། གསང་བ་ཆེན་པོའི་ཏིང་ངེ་འཛིན་རང་གསལ་བ་གང་ལ་རྟགས་མཚན་དང་གོལ་བ་ལ་རེ་བ་དང་དོགས་པ་མེད་པ་ཡི་དོན་ལས་འཁྲུལ་པས་གོལ་སྒྲིབ་ཉིད་དུ་ངེས་པར་སྣང་སྟེ་དོན་མཐོང་དུ་མི་སྟེར་བ་ཁོ་ནའོ། །དེ་ལྟར་ཞེ་ལ་འཛིན་པ་ཉིད་སྐྱོན་ཡིན་པའི་གཏན་ཚིགས་ནི། ཅི་ཡི་ཕྱིར་མངོན་ན་དོན་ལ་དབུས་མཐའ་འབྱེད་ཅིང་མཐའ་བསལ་ཏེ་དབུས་སྒྲུབ་པས་ན། དབུ་མའི་ཆོས་ཉིད་དུ་ངེས་པའི་དབུས་ཡོད་ན་དེ་ལ་ལྟོས་པའི་མཐའ་ཡང་རང་བཞིན་གྱིས་འབྱུང་ལ། ཡེ་ཉིད་ནས་མཐའ་དང་བྲལ་བས་དབུས་མེད་པ་ལ་མཐའ་ཡི་སྣང་བ་ཡང་ངང་གིས་མེད་པས་མཐའ་དབུས་སུ་འཛིན་པའི་རྟོག་ཞེན་གྱིས་དོན་དང་མི་མཐུན་པའི་སེལ་བའི་འདུ་ཤེས་གང་ཡང་མི་གནས་པ་ལ། ཆོས་ཉིད་དོན་དུ་གཉེར་བའང་མེད་ན་མཐའ་ག་ལ་འབྱུང་སྟེ། རང་བཞིན་གྱི་གཏན་ཚིགས་ཀྱིས་གསལ་ལོ། །དེ་བས་ན་དབུས་མཐར་དབྱེ་བ་དེ་ཉིད་དེ་ལྟར་དོན་ལས་ཉམས་པའི་ཕྱིར་གསང་བ་ཆེན་པོའི་ནད་ཡིན་ནོ། །གཉིས་པ་ནི། འོག་ནས། ས་དང་རྣམ་ཐར། ཞེས་པ་ནས། ཆེན་པོར་གྱུར་པ་ཡིན། །ཞེས་པའི་བར་གྱིས་བསྟན་ཏེ། དེ་བས་ན་བསྒོམ་པ་གོལ་བའི་ཕྱིར་རྒྱུའི་སྤྱོད་པ་འདིར་འདུས་ཏེ། ཕ་རོལ་ཏུ་ཕྱིན་པའི་ས་ཡི་རིམ་པ་བཅུ་དང་། རྣམ་པར་ཐར་པ་བརྒྱད་དང་གསུམ་ལ་སོགས་པ་ཞེས་བསྡུ་བའི་དོན་གྱིས་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་ལྟ་བུ་འབྲས་བུ་ཆོས་ཀྱི་སྐུ་ཡི་བྱང་ཆུབ་ཆེན་པོ་ཐོབ་པར་བྱེད་པའི་དཀར་པོའི་ཕྱོགས་སུ་བཞག་པའི་ལས་ཇི་སྙེད་པ་ཀུན་ཀྱང་ཡིད་ཀྱིས་བསམ་དུ་མེད་པ་ཡི་ཆོས་ཉིད་བྱ་རྩོལ་དང་བྲལ་བའི་དོན་གྱི་ངོ་བོ་མཐོང་དུ་མི་སྟེར་བའི་གོལ་སྒྲིབ་ཀྱི་གཡང་ས་དང་གེགས་ཆེན་པོར་གྱུར་པ་ཡིན་ནོ། །དེ་ཅི་སྟེ་ཞེ་ན། རིག་པ་ཅིར་ཡང་མ་བསམ་ན་མ་གཡོས་པ་ལ་བསམ་དཔྱད་བྱས་པས་རིག་པའི་རྒྱ་མཚོ་རྙོགས་ཏེ། རྟོག་དཔྱོད་ཀྱི་རྙོག་མ་མ་སངས་ན་མི་མཐོང་བའི་ཕྱིར་རོ། །གསུམ་པ་ནི། འདའ་དཀའ་ཆེན་པོའི། ཞེས་པ་ནས། མེད་ལས་གང་འཛིན་གོལ། །ཞེས་པའི་བར་གྱིས་བསྟན་ཏེ། ཤིན་ཏུ་རྣལ་འབྱོར་གྱི་དམ་ཚིག་འདའ་དཀའ་ཆེན་པོའི་དཀའ་ཐུབ་དམ་པ་ནི། སེམས་ཀྱི་ཆོས་ཉིད་ཐིག་ལེ་ཆེན་པོ་ཡེ་ནས་མ་བཅོས་པའི་དེ་བཞིན་ཉིད་ཇི་བཞིན་པའི་དེ་ཁོ་ན་ཉིད་ཀྱི་ངང་དེ་ལ་འདའ་ཉམས་དང་བསྲུང་བ་མེད་པ་ཉིད་དེ། དཔག་ཏུ་མེད་པའི་རྒྱལ་བ་དམ་པ་འདྲེན་མཆོག་བདེ་བར་གཤེགས་པ་ཇི་སྙེད་པ་ཀུན་ཀྱང་དེ་ལས་འདའ་བར་དཀའ་བས་ཐུགས་དམ་ཆེན་པོ་དེའི་ངང་ལས་མི་འདའ་བར་བཞུགས་པ་ཁོ་ནའོ། །དེ་ལྟ་བུའི་ངང་ལ་བསྲུང་མཚམས་གང་ཡང་གཟུང་དུ་མེད་པ་ལ་རྣལ་འབྱོར་པ་གང་གིས་ཕྱོགས་རིས་སུ་ཕྱེ་ནས་སྡོམ་པ་གང་གི་བསྲུང་མཚམས་འཛིན་པ་ནི་ཆོས་ཉིད་ཀྱི་དམ་ཚིག་བསྲུང་དུ་མེད་པ་ལས་གོལ་བ་ཡིན་པས་དོན་ལས་འཁྲུལ་པའོ། །བཞི་པ་ནི། གདལ་ཁྱབ་ཆེན་པོའི། ཞེས་པ་ནས། ས་བཀོད་གང་བགྲོད་ནོར། །ཞེས་པའི་བར་གྱིས་བསྟན་ཏེ། ཁམས་གསུམ་ཐམས་ཅད་གདལ་ཁྱབ་ཆེན་པོའི་ཆོས་ཀྱི་སྐུས་བསྣུམས་པའི་གཉིས་མེད་ཡེ་ཤེས་བླ་མའི་ས་མཆོག་འདི་ཉིད་ནི་ཡེ་ནས་རིམ་པས་མ་བགྲོད་པར་འགྲོ་བ་དྲུག་ཀུན་སངས་རྒྱས་ཀྱི་ས་ལ་རང་བཞིན་གྱིས་བཀོད་དེ་མ་བཅོས་རྫོགས་པའི་ས་ཆེན་པོ་ཉིད་ནོན་པས་སེམས་ཀྱི་ཆོས་ཉིད་ཀྱི་ཀློང་འདིར་མ་ཆུབ་པ་གང་ཡང་མེད་པས་སངས་རྒྱས་ཀྱི་ས་མ་ཡིན་པའི་ཆོས་གང་ཡང་མི་རྙེད་ལ། དེས་ན་ཀློང་ཆེན་པོ་གང་འདིར་སྟོང་གསུམ་ཐམས་ཅད་སངས་རྒྱས་ཀྱི་ས་ལ་མ་བཀོད་པར་ཡེ་ནོན་པ་ལགས་པས་གང་ས་བཅུའི་རིམ་པ་རྩོལ་བས་བགྲོད་པར་འདོད་པ་ནི་ཆེད་དུ་བྱས་པའི་གོལ་ས་སྟེ་ནོར་བའི་ལམ་ཡིན་ནོ། །ལྔ་པ་ནི། དེ་ཉིད་དེ་རིག །ཅེས་པ་ནས། དེ་ལས་ངེས་པར་གོལ། །ཞེས་པའི་བར་གྱིས་བསྟན་ཏེ། སེམས་ཀྱི་ཆོས་ཉིད་མཉམ་པ་ཆེན་པོ་དེ་བཞིན་ཉིད་དེ་ཉིད་རང་རིག་པ་དེ་ནི་རང་བྱུང་གི་ཡེ་ཤེས་འབྱུང་འཇུག་དང་བྲལ་བའི་ངོ་བོར་བགྲོད་དུ་མེད་པར་གདོད་ནས་གྲོལ་བ་ཡིན་པ་ལ། སུ་དག་ལམ་གྱི་ཡེ་ཤེས་བསྒོམ་ནས་རིག་པ་ལ་བོགས་དང་སྐྱེད་ཀྱི་ཁྱད་པར་རིམ་པར་སྐྱེས་ནས་མཐར་ཕྱིན་པའི་འབྲས་བུ་འབྱུང་བར་འདོད་པ་གང་དག་ནི། གཅིག་ཆར་བའི་དོན་ཆེན་པོ་གང་འདིར་རྨོངས་པས་གོལ་བ་ཁོ་ནའོ། །དེས་ན་སེམས་ཀྱི་ཆོས་ཉིད་རྒྱུ་རྐྱེན་མེད་པས་རང་བྱུང་གི་སྙིང་པོ་ཡེ་ནས་གནས་པའི་དོན་ཤེས་པའི་རང་རིག་པ་དེ་ལས་ངེས་པར་གོལ་བ་ལ་ཐེ་ཚོམ་ཡང་མེད་དོ། །དྲུག་པ་ནི། བསམ་ཡུལ་དམིགས་སུ། ཞེས་པ་ནས། སེམས་འཆོས་གོལ་སར་ཞུགས། །ཞེས་པའི་བར་གྱིས་བསྟན་ཏེ། སྒོ་གསུམ་བཅོས་པའི་སྐྱོན་འཆད་པ་ནི། འདིར་ཡེ་ཤེས་ཆེན་པོ་བསྒོམ་བསམ་སྤྱོད་ཡུལ་དམིགས་སུ་མེད་པའི་རང་གསལ་རིག་པ་གཉིས་མེད་ཆེན་པོ་ལ་དུས་གསུམ་དུ་དམིགས་པའི་འདུ་ཤེས་མེད་པར་བཏང་སྙོམས་ཆེན་པོའི་རྣལ་འབྱོར་པ་ཉིད་ནི་གང་དུའང་མ་གཡོས་པས་མ་བཅོས་རྣལ་མ་ཇི་བཞིན་པ་ཉིད་དང་བྲལ་བ་མེད་པར་ཡེ་ནས་ཡིན་བཞིན་དུ། དེ་ཉིད་ཡང་དག་པར་མ་རྙེད་པས་རྒྱུ་བ་དང་མ་བྲལ་བར་ལུས་དགོན་པར་འདུག་ནས་དབེན་པར་བྱས་ཏེ་སེམས་ཀྱི་བྱུང་ཚོར་འཆོས་བགེགས་ཀྱི་རྟོག་དཔྱོད་འཛིན་པ་དག་ནི་ཆོས་ཉིད་དང་མཚན་མ་རིས་སུ་བྱེད་པ་དང་མ་བྲལ་བས་གོལ་སར་ཞུགས་ཏེ་ལམ་འོག་མར་ཆུད་པའོ། །བདུན་པ་ནི། ཀུན་གྲོལ་ཆེན་པོ། ཞེས་པ་ནས། ཆེན་པོ་ཉིད་ལས་གོལ། །ཞེས་པའི་བར་གྱིས་བསྟན་ཏེ། ཆོས་ཀུན་སེམས་ཉིད་དུ་རང་གྲོལ་བས་གནས་ལུགས་ཆེན་པོ་དེ་ཉིད་ལ་ཡེ་ནས་བཅིངས་པ་མ་དམིགས་པས་མཐར་གྲོལ་བར་འདོད་པའི་འདུ་ཤེས་ཡང་མེད་པར་ལྷུན་མཉམ་རྫོགས་པའི་ངོ་བོར་ངེས་བཞིན་དུ། འོག་མ་པ་གང་འདིར་ལྡོང་པ་དག་དེ་ལྟར་བློར་མ་ཆུད་པས་རང་རང་གི་སྲུང་བར་བྱ་བ་རྩ་བ་དང་ཡན་ལག་གི་དཀའ་ཐུབ་ལ་རྟོག་པས་སྒོ་གསུམ་བཅིངས་ནས་བླང་དོར་བྱེད་པའི་ཀུན་སྤྱོད་ལ་གནས་པ་ནི། ཤིན་ཏུ་རྣམ་པར་གྲོལ་བའི་རྣལ་འབྱོར་ཆེན་པོ་ཉིད་ལས་གོལ་ཏེ་བཅིངས་གྲོལ་མེད་པའི་དོན་མ་མཐོང་བ་ཁོ་ནའོ། །ལྔ་པ་ནི། ཡེ་ནས་མ་བཅོས། ཞེས་པ་ནས། ཉིད་ཀྱང་དེ་ཁོ་ན། །ཞེས་པའི་བར་གྱིས་བསྟན་ཏེ། ཡེ་གདོད་མ་ནས་མ་བཅོས་མ་བསླད་པའི་ཆོས་ཉིད་དེ་ཁོ་ནར་དབྱིངས་དང་རིག་པ་གཉིས་སུ་མེད་པར་གང་གནས་ཏེ་སྒྲིབ་མེད་མཁྱེན་པའི་ཡེ་ཤེས་དེ་ཉིད་རང་ཤར་བ་ལ་བསམ་པའི་འདུ་ཤེས་གང་ཡང་མེད་པར་དེ་ཁོ་ན་ཉིད་དུ་གསལ་བ་ལ། ཐམས་ཅད་ཆོས་ཉིད་གདལ་བས་ན། གསང་སྔགས་གསང་བའི་སྙིང་པོ་དེ་ལ་སྐྱོན་གྱི་གོལ་ས་ག་ལ་ཡོད་དེ། གོལ་སྒྲིབ་ཉིད་ཀྱང་དེ་ཁོ་ན་ཉིད་དེའི་ངོ་བོ་ཡིན་པར་རྟོགས་པས་སྐྱོན་ཡོན་ཏན་དུ་ཤར་ཏེ་ཐིག་ལེ་ཉག་གཅིག་གི་ཀློང་ལ་སེལ་མེད་པས་གོལ་སྒྲིབ་ཀྱི་མིང་ཡང་མེད་དེ། ཀུན་འདུས་ལས། དེ་བས་འདུས་པ་ཆེན་པོའི་ཚོགས། །སེམས་ནི་ཡང་དག་ལམ་ཉིད་དེ། མཁའ་ལ་བྱ་ལམ་རྗེས་མེད་བཞིན། །གོལ་མེད་ལམ་ཞེས་འདྲེན་པས་བཤད། །ཅེས་སོ། །གསུམ་པ་ནི། དེ་སྐད་ཅེས། ཞེས་པ་ནས། ཆད་པར་གྱུར་ཏོ། །ཞེས་པའི་བར་གྱིས་བསྟན་ཏེ། དེ་སྐད་ཅེས་བགྲོས་ཏེ་བཀའ་སྩལ་པས། འཁོར་ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་ཀྱིས། འཁྲུལ་པའི་རྟོག་པ་གང་དང་གང་གིས་བཅིངས་པ་རྣམས་ལས་ཡོངས་སུ་གྲོལ་ཏེ། འབྲས་བུ་གཞན་ལ་རེ་རྩོལ་གྱི་ཐེ་ཚོམ་ཆད་ནས་ངེས་པའི་གདེངས་རྙེད་པར་གྱུར་ཏོ། །དེ་ལྟ་བུའི་རྟོགས་པ་ནི་བཤད་པ་ལྟར་རྣལ་འབྱོར་དབུ་མའི་དོན་ཏེ། དེ་ལ་རྣམ་གྲངས་བཅུ་ལས་ཡང་ཐོག་གི་ཡུལ་དུ་གྱུར་པའོ། །ལེའུའི་མཚན་ནི། སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། དོན་གྱི་གཙོ་བོ་ལས་ཆོས་ཐམས་ཅད་ཀྱི་མེ་ལོང་ནམ་མཁའ་མཐའ་དང་བྲལ་བ་བཞིན་ཆོས་ཉིད་མཐའ་བྲལ་དུ་བསྟན་པའི་ལེའུ་སྟེ་ལྔ་བཅུ་རྩ་བཞི་པ་ཉིད་གསལ་བར་འགྲེལ་ཏེ་བསྟན་པའོ།། །།གཉིས་པ་མི་མཐུན་པ་སྐྱོན་གྱི་རྩ་བ་བཤད་པ་ལ་བཞི་སྟེ། མདོར་བསྟན་པ། རྒྱས་པར་བཤད་པ། རྒྱུད་ལུང་མན་ངག་གི་དཔེས་མུན་པའི་ཐེ་ཚོམ་བསལ་བ། ཞབས་བསྡུ་བའོ། །དང་པོ་ནི། དེ་ནས་ཡང་། ཞེས་པ་ནས། མུན་སྣང་གཉིས་སུ་སྣང་བ་ཡིན་ཏེ། ཞེས་པའི་བར་གྱིས་བསྟན་ཏེ། ལེའུ་འདིས་དྲང་དོན་འབའ་ཞིག་སྟོན་ནོ། །མཚོན་པ་དཔེའི་རྩ་བ་བསྟན་པ་དེ་ནས་ཡང་སྡུད་པ་པོ་ལང་ཀའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས། སྟོན་པ་གསང་བ་པའི་བདག་པོ་ལ་ལྡེའུ་མིག་ཐ་མ་རྩ་བ་གསུམ་གྱི་དོན་ལས་བར་མ་ཆོས་ཐམས་ཅད་ཀྱི་མུན་པ་གང་གི་རྩ་བའི་རྣམ་གྲངས་ཆེན་པོའི་དོན་གྱི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། ཆོས་ཐམས་ཅད་ཀྱི་རྩ་བ་ཞེས་བགྱི་བ་དེ་ཡི་ངོ་བོ་གང་ལགས། དེ་ཉིད་ཐབས་གང་གིས་ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་རྣམ་གྲངས་གཉིས་དྲིས་པ་ལས། སྟོན་པ་གསང་བ་པའི་བདག་པོས་ལན་སྨྲས་ཏེ་བཀའ་སྩལ་པ། ཀྱེ་ལང་ཀའི་བདག་པོ། ཞེས་བོས་ནས་དྲི་བ་གཉིས་དྲིས་པ་ལ་ལེགས་པ་གཉིས་གནང་སྟེ། གང་དུ་དྲི་བ་དམ་པ་འདི་ནི་རང་དོན་དུ་ཡང་ལེགས་སོ། །གཞན་དོན་དུའང་ཤིན་ཏུ་རབ་ཏུ་ལེགས་སོ། །གང་ཆོས་ཐམས་ཅད་ཀྱི་རྩ་བ་ཞེས་བགྱི་བ་དེ་ནི་རྟོགས་ན་འདས་པ་དང་མ་རྟོགས་ན་འཁོར་བ་འབྱུང་བའི་རྩ་བ་ཆོས་ཉིད་བྱང་ཆུབ་ཀྱི་སེམས་ལ་བྱའོ། །ཞེས་ངོ་བོ་བསྟན་པའོ། །དེ་ཉིད་ཇི་ལྟར་ཤེས་པར་བྱ་བའི་ལན་བསྟན་ཏེ། བྱང་ཆུབ་ཀྱི་སེམས་དེ་ནི་འདི་ལྟར་ཉེ་བར་བསྟན་པའི་ཐབས་ཀྱི་སྒོ་ནས་ཡོངས་སུ་ཤེས་པར་བྱ་སྟེ། གང་སངས་རྒྱས་ཀུན་གྱི་ཐུགས་ཀྱི་ཆོས་ཉིད་དང་། སེམས་ཅན་ཀུན་གྱི་སེམས་ཀྱི་ཆོས་ཉིད་གཉིས་ཐ་སྙད་སོ་སོར་དབྱེ་ཡང་ངོ་བོས་དབྱེར་མེད་པའི་སྤྲོས་པ་དང་བྲལ་བའི་རང་བཞིན་དེ་ཉིད་དུ་ཤེས་པར་བྱའོ། །ཆོས་ཉིད་དེ་ནི་རྟོགས་མ་རྟོགས་ཀྱི་རྩ་བས་མུན་པ་འཁོར་བའི་སེམས་ཅན་དང་། སྣང་བ་མྱ་ངན་ལས་འདས་པའི་སངས་རྒྱས་གཉིས་སུ་སྣང་བ་ཡིན་ཏེ། ཚིག་ལྷག་མ་དང་བཅས་པ་ནི་དོན་དེ་ཉིད་རྒྱས་པར་སྟོན་པའི་ཁུངས་མཚོན་པའོ། །གཉིས་པ་ལ་གཉིས་ཏེ། མུན་པའི་གཞི་ཆོས་ཐམས་ཅད་ཀྱི་རྩ་བའི་དྲིས་ལན་བསྟན་པ། མུན་པའི་ཁམས་ཀྱི་ངོ་བོའི་དྲིས་ལན་བསྟན་པའོ། །དང་པོ་ལ་གཉིས་ཏེ། དྲིས་པ་དང་། ལན་བཤད་པའོ། །དང་པོ་ལ་གཉིས་ཏེ། སྟོན་པ་གསང་བའི་སྐུའི་ལོ་རྒྱུས་བཤད་པ། དྲིས་པ་དངོས་བསྟན་པའོ། །དང་པོ་ནི། ལང་ཀའི། ཞེས་པ་ནས། ཐེ་ཚོམ་ཆད་ནས་སླར་དོང་བ་དང་། ཞེས་པའི་བར་གྱིས་བསྟན་ཏེ། ལང་ཀའི་བདག་པོ། ཞེས་སྡུད་པ་པོ་ལ་བོས་ནས། གནས་ལུགས་དེ་ཡང་གསང་བའི་སྐུ་ལས་ཐོས་པའི་ཚུལ་འདི་ལྟར་རྟེན་འཛོམ་པའི་རིག་པ་སྐད་ཅིག་གིས་རྟོགས་པ་གསང་བའི་སྐུའི་ལོ་རྒྱུས་ཉིད་སྟོན་ཏེ། ཚུལ་འདི་ཉིད་ཇི་ལྟར་སྣང་ལུགས་ནི། གསང་བ་རྨད་དུ་བྱུང་བའི་ཐབས་ཆེན་པོས་སྐད་ཅིག་གིས་རྟོག་པ་བག་ཆགས་དང་བཅས་པ་བཅོམ་ཞིང་ཡོན་ཏན་རྫོགས་པར་ལྡན་ཀྱང་མཐའ་ཀུན་ལས་འདས་པའི་སྟོན་པ་གསང་བའི་སྐུ་གསང་སྔགས་ཀྱི་རྒྱལ་པོ་ཐམས་ཅད་ལ་ཁྱབ་ཀྱང་རྟོགས་པར་དཀའ་བས་གསང་བ་མཆོག་གི་བདག་པོ་འཁོར་འདས་དབྱེར་མེད་ཀྱི་ངོ་བོ་མཐའ་གང་ཡང་སྣང་བ་མེད་པ་དེ་ཉིད། རྒྱུ་ཡི་ཐེག་པས་མི་རྟོགས་པས་གསང་བའི་གནས་ཉེས་པས་མི་གོས་པས་པདྨོ་ཅན་ཞེས་བྱ་བ་ཐབས་ཀྱི་མཆོག་གི་རྡོ་རྗེའི་གཙུག་ཏོར་གྱི་རྟོག་པ་གཅོད་པའི་འཁོར་ལོས་བདེ་སྟོང་ལ་དབང་བསྒྱུར་བའི་ཆོ་འཕྲུལ་གྱིས་སྤྲུལ་པ་ཐམས་ཅད་གནས་པའི་ལྷུམས་ཡུམ་གྱི་མཁའ་གསང་བ་མཆོག་གི་ཕོ་བྲང་ན། ཡུན་དུས་མཐའི་སྐད་ཅིག་ལ་བཞུགས་ཏེ་ཆོས་སྟོན་པ་དེའི་ཚེ་དེའི་དུས་ན། གང་དེ་ཉིད་ཀྱི་འཁོར་རང་བཞིན་གྱི་སྐྱེས་བུ་དམ་པ་རྡོ་རྗེ་མྱུར་བ་ལ་སོགས་པ་དཔག་ཏུ་མེད་པ་མང་པོ་དག །རྡོ་རྗེའི་རྩེ་མོར་ལྷན་ཅིག་སྐྱེས་པའི་ངོ་བོ་དེ་ཁོ་ན་ཉིད་གསང་བ་དམ་པའི་དོན་ལ་སྔར་ངེས་པ་མ་རྙེད་པའི་ཐེ་ཚོམ་དག་དགའ་བ་བཞིའི་སྒོ་ནས་གཅོད་པ་དང་། སྦྱོར་བའི་བསྟན་བཅོས་ལྟར་ད་ལྟ་རྡོ་རྗེའི་ལམ་ནས་ཡོངས་སུ་ཞུ་བ་དང་། རྩ་གནས་རྣམས་ནས་གཡོ་ཞིང་ད་གདོད་ཞུ་བར་བསྡོག་པ་དང་། ཡེ་ཤེས་སྐྱེས་པས་ཐེ་ཚོམ་ཆད་ནས་སླར་རྩ་གནས་སུ་དོང་བ་དང་ལྡན་ཏེ་ལོངས་སྤྱོད་རྫོགས་པ་ཆེན་པོའི་གསང་བའི་ཐབས་མཆོག་གི་ཕུན་སུམ་ཚོགས་པར་ངེས་པ་ན། གཉིས་པ་ནི། གང་ཁོ་བོ་འཁོར་དེར། ཞེས་པ་ནས། ཞེས་ཞུས་པ་ལས། ཞེས་པའི་བར་གྱི་བསྟན་ཏེ། གང་དེའི་ཚེ་སྡུད་པ་པོ་གསང་བའི་བདག་པོ་ཕྱག་ན་རྡོ་རྗེ་ཁོ་བོ་གསང་བའི་སྐུའི་འཁོར་དེར་འདུས་པར་གྱུར་པས། བཅོམ་ལྡན་འདས་གསང་བའི་སྐུ་དེ་ལ་འདི་སྐད་ཅེས་གསོལ་ཏོ། །ཞེས་ཞུ་བ་བརྗོད་པ་ནི། སྤྱིར་དྲི་བ་ལྔ་ལས་འདིར་དགོས་པ་གཞན་དོན་དུ་ཐེ་ཚོམ་དང་མི་ཤེས་པ་དྲིས་པའོ། །འོ་ན་སྐབས་འདིར་གསང་བའི་སྐུ་ཁོ་ན་ལ་དྲི་བ་འབྱུང་བ་ཅིའི་ཕྱིར་ཞེ་ན། ཐབས་དང་ལྡན་མི་ལྡན་གྱིས་འཁོར་འདས་གཉིས་ཀའི་རྩ་བར་གྱུར་པའི་ཕྱིར་རོ། །དེ་ཡང་བཅོམ་ལྡན་འདས། ཞེས་སྟོན་པ་ལ་བོས་ནས། འཁོར་བདག་ཅག་གིས། དོན་ཆེན་པོ་བྱང་ཆུབ་ཀྱི་སྙིང་པོ་ཞེས་བགྱི་བ་འཁོར་འདས་ཀྱི་ཆོས་ཐམས་ཅད་ཀྱི་རྩ་བར་གྱུར་པ་དེ་ཉིད། མ་རིག་པས་སྒྲིབ་པས་མ་རྟོགས་ཏེ་ངོ་བོ་མ་མཐོང་། འདི་འདྲར་མ་དམིགས་ལགས་སོ། །ཡུལ་དུ་བྱེད་པས་ཡང་དག་པར་མ་རྙེད། ཐེ་ཚོམ་མེད་པར་ངེས་པར་མ་འཚལ་ལགས་སོ། །ཟབ་ཅིང་དཔག་པར་དཀའ་བས་བློ་ཡིས་བསྙགས་པས་མ་སླེབས། བགྲོད་ཀྱང་ཡངས་པས་མ་ཁྱབ་ལགས་ན། འདི་ཉིད་གནས་གང་ན་མཆིས། ས་གང་དུ་བཙལ། རིགས་གང་ཞིག་ལགས། ངོ་བོ་གང་ལ་བགྱི། ཁུངས་གང་དུ་སྟོར། ཞེས་པའི་དྲི་བ་བཅུ་གཅིག་དྲིས་པ་ནི། བཅོམ་ལྡན་འདས་ཐབས་ཀྱི་སྒོ་ནས་ཡེ་ཤེས་སྐྱེ་བའི་དུས་ཀྱི་སྐད་ཅིག་མ་འདི་ཉིད་དུ་བསྟན་དུ་གསོལ། དུས་དེ་ལ་ནན་ཏན་བརྣན་ནས་བདེ་བར་གཤེགས་པ་འདི་ཉིད་བསྟན་དུ་གསོལ། ཞེས་བདག་དང་གཞན་དོན་གཉིས་ཀྱི་ཕྱིར་ཡང་གསུངས་ཏེ། དེ་ལྟར་ཚིག་ཏུ་ཞུ་བ་དང་། ཏིང་ངེ་འཛིན་གྱིས་ཞུ་བ་དང་། བརྡ་ཡིས་ཞུ་བ་དང་། ཐབས་ཀྱིས་ཞུ་བ་རྣམས་ལས་ཐ་མ་གཉིས་ཀྱིས་ཞུས་པ་ལས། ཞེས་སོ། །འོ་ན་འདི་རྒྱུ་མཚན་ཉིད་ཀྱང་ཡིན་པ་ལ་གསང་བའི་སྐུའི་གླེང་གཞིར་བྱུང་བ་འགལ་སྙམ་ན། སྤྱིར་ཐེག་པ་ཆེན་པོ་ཀུན་ལ་གྲགས་ཀྱང་། འདིར་གསང་བའི་ལམ་དུ་ལྷན་ཅིག་སྐྱེས་པའི་ཡེ་ཤེས་སྐྱེས་ན་སངས་རྒྱ། ཐུན་མོང་འདོད་ཆགས་སུ་གོལ་ན་འཁོར་བར་སྣང་བའི་དོན་དཔེ་དེ་བཞིན་དུ་ཀུན་གཞི་ཉིད་ཀྱང་རྟོགས་ན་འཚང་རྒྱ་ལ་མ་རྟོགས་ན་འཁོར་བར་སྣང་བའི་ཕྱིར་ལུང་ཆེན་པོའི་ཐབས་ཆེན་གསང་བའི་སྒོ་དམ་པ་སྟེ་མ་ཧཱ་མན་ཆད་ཀུན་ལས་འཕགས་པར་ཡང་གསལ་ལོ། །གཉིས་པ་ནི། བཅོམ་ལྡན་འདས་དེས། ཞེས་པ་ནས། དེ་སྐད་ཅེས་བཀའ་སྩལ་བ་དང་། ཞེས་པའི་བར་གྱིས་བསྟན་ཏེ། སྤྱིར་མུན་པའི་སྤྱོད་ཡུལ་འདི་ལ་ས་བཅད་ལུགས་གཉིས་ཏེ། ལྷ་རྗེ་ཡང་ཁྱེད་ཀྱི་ལུགས་སུ་ས་བཅད་ན། མདོ་རྒྱས་འཇུག་སྡུད་གསུམ་ལས། རྒྱས་པ་ལ་གཉིས་ཏེ་མུན་པའི་གླེང་གཞི་ཆོས་ཐམས་ཅད་ཀྱི་རྩ་བའི་དྲིས་ལན་དང་། མུན་པའི་དྲིས་ལན་ནོ། །དང་པོ་ལ་གཉིས་ཏེ། དྲིས་པ་དང་ལན་ནོ། །དྲིས་པ་ནི། ལང་ཀའི་བདག་པོ་དེ་ཡང་འདི་ལྟར་བཅོམ་ལྡན་འདས་གསང་བ་མཆོག་གི་བདག་པོ་དེ། ཞེས་པ་ནས། བདེ་བར་གཤེགས་པ་འདི་བསྟན་དུ་གསོལ། ཞེས་ཞུས་པ་ལས། ཞེས་སོ། །ལན་ལ་གཉིས་ཏེ། ལན་མདོར་བསྟན་པ་ནི། བཅོམ་ལྡན་འདས་དེས་འདི་སྐད་ཅེས་བཀའ་སྩལ་ཏོ། །སེམས་དཔའ་ཆེན་པོ་བྱང་ཆུབ་ཀྱི་སྙིང་པོ། ཞེས་པ་ནས། གང་མུན་པའི་ཁམས་པ་དང་ཆ་གཅིག་ཏུ་ཤེས་པར་བྱའོ། །དེ་སྐད་ཅེས་བཀའ་སྩལ་པ་དང་། ཞེས་སོ། །ལན་རྒྱས་པ་ནི། འཁྲུགས་སྡེབས་ཏེ། ཚན་གཉིས་ལྷག་ཙམ་གྱི་འོག་ན། བཅོམ་ལྡན་འདས་དེས་བཀའ་སྩལ་པ སེམས་དཔའ་ཆེན་པོ་མུན་པ་དང་སྣང་བས་བསྡུས་པའི་ཆོས་ཐམས་ཅད་ཀྱི་རྩ་བ་ནི་གཞི་དང་རྩ་བ་མེད་པར་འདུས་པར་ཤེས་པར་བྱའོ། །ཞེས་པ་ནས། བླུན་པོའི་ཆེད་དུ་ཤེས་པར་གྱིས། ཞེས་པ་ཡན་ཆད་དོ། །མུན་པའི་དྲིས་ལན་ལ། མདོ་དང་རྒྱས་པའོ། །མདོར་བསྟན་པ་ནི། འདི་ཡང་འདི་ལྟར་ཡོངས་སུ་སྣང་། །ཡན་ལག་མདོ་དང་རྩ་བ་སྟེ། །འབྱེད་དང་འགྲེལ་དང་འབྱིན་པ་ཡིན། །ཞེས་པའོ། །རྒྱས་པ་ལ་གསུམ་སྟེ། མུན་པ་འབྱེད་པའི་ཡན་ལག་དྲུག་དང་། འགྲེལ་པའི་མདོ་བཞི་དང་། འབྱིན་པའི་རྩ་བ་གསུམ་མོ། །དེ་ལ་གཞིའི་མདོ་ཀུན་གཞི་ལ། དྲིས་པ་དང་ལན་དང་མཇུག་བསྡུ་བའོ། །དྲིས་པ་ནི་གོང་དུ་བཞག་པའི་ཁོ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་མུན་པ་འདི་ཅི་ལས་བྱུང་། ལ་སོགས་པ་དོན་བཅོ་ལྔ་དྲིས་པའོ། །ལན་ནི་འོག་ཏུ་འཁྲུགས་བྱས་ཏེ། ལང་ཀའི་བདག་པོ་དེ་ལ་གཞིའི་མདོ་ནི་འདི་ལྟ་སྟེ། ཞེས་པ་ནས་མར་ལན་འདེབས་སོ། །དེ་ལ་སྐྱོན་དུ་བྱ་བ་ཀུན་གཞི་ལ་དྲི་བའི་མཁན་པོ་ཡང་གསང་བདག་ཡིན་ལ། ལན་འདེབས་པ་ཡང་གསང་བདག་ཡིན་པས་མི་འཐད་དོ་ཞེ་ན། དེ་ནི་གསང་བདག་གིས་དྲིས་པ་ལས། སྔོན་བྱུང་དུ་སྟོན་པ་གསང་བ་མཆོག་གི་བདག་པོས་ལན་དོན་གྱིས་བཏབས་ཏེ། རྗེས་འཇུག་ཏུ་རིམ་ལ་ཡར་གསང་བདག་གིས་དམ་པའི་རིགས་ཅན་ལ་གསུངས་པའོ། །སྟོན་པས་ལན་བཏབས་པ་ཅིས་མངོན་ཞེ་ན། དེ་སྐད་གསང་བ་མཆོག་དེས་བཤད། །ཅེས་པས་མངོན་ནོ། །ས་བཅད་ལུགས་གཅིག་ལ། སྟོད་ཀྱི་འཁྲུགས་མེད་པར་བྱས་ལ། མུན་པའི་གཞི་ཆོས་ཐམས་ཅད་ཀྱི་རྩ་བའི་དྲིས་ལན་ལ། དྲིས་པ་དང་ལན་ནོ། །མུན་པའི་དྲིས་ལན་ལ། དྲིས་པ་དང་ལན་ནོ། །དེའང་དྲི་བ་བཅོ་ལྔ་ལ་ལན་བཅུ་གཉིས་སུ་བསྡུས་ནས་འདེབས་ཏེ། རྩ་བ་གང་། ཞེས་པ་དང་། རྩ་བ་གང་དུ་འདུས། ཞེས་པ་ལ་ལན་གཅིག་ཏུ་འདེབས། ཡན་ལག་དུ། ཞེས་པ་དང་། བྱེ་བྲག་ཏུ། ཞེས་པ་ལ་ལན་གཅིག་ཏུ་འདེབས། མུན་པ་ཞེས་ཅིའི་ཕྱིར་བགྱི། ཞེས་པ་དང་། འདི་ཅིའི་ཕྱིར་འཐིབས། །ཞེས་པ་ལ་ལན་གཅིག་ཏུ་འདེབས་སོ། །ཀུན་གཞིའི་མདོ་ལ། ཀུན་གཞིའི་མདོར་བསྟན། འོག་མ་ཀི་ནས། མུན་པའང་དེ་ཉིད་དེ་ལས་བྱུང་། །མུན་པའི་རང་བཞིན་ངོ་བོ་དང་། །མཚན་ཉིད་ཡན་ལག་རྩ་བ་དང་། །གནས་དང་སྒྲིབ་པ་བྱེ་བྲག་ཆོས། །གང་དུ་གང་གིས་གང་ཕྱིར་གང་། །དེ་དག་དེ་བས་དབྱེ་བར་བྱའོ། །ཞེས་པ་དེ་ཡར་བླང་ལ། མདོར་བསྟན་ནོ། །རྒྱས་པ་ནི། ལང་ཀའི་བདག་པོ་དེ་ལ་གཞིའི་མདོ་ནི་འདི་ལྟ་སྟེ། གཞི་ནི་བྱིས་པ་འདི་ལྟར་འདོད། །ཅེས་པ་ནས་མར་བཅོ་ལྔས་སྟོན་ཏོ། །འོན་ཀྱང་འདིར་ནི་ཀུན་མཁྱེན་དམ་པ་རིན་པོ་ཆེས་མཛད་པའི་བསྡུས་དོན་ལྟར་ཏེ། སྟོན་པ་བཅོམ་ལྡན་འདས་གསང་བ་མཆོག་གི་བདག་པོ་དེས་འདི་སྐད་ཅེས་བཀའ་སྩལ་ཏོ། །ལན་དེའང་། བྱིན་གྱིས་བརླབས་ཀྱིས་ལན་སྩལ་བ་དང་། དགོངས་པ་བརྡ་ཡིས་ལན་འདེབས་པ་དང་། ཚིག་ཏུ་བརྗོད་པས་ལན་གདབ་པ་དང་། ཐབས་དང་བརྡ་ཡིས་ལན་འདེབས་པ་ཐུན་མོང་བ་རྣམས་ལས། འདིར་དྲིས་ལན་གྱིས་ཐེ་ཚོམ་བཅད་པ་སྤྱིར་བསྟན་པ་ནི། བཤད་པ་དང་འཆད་པའི་དྲིས་ལན་ལའང་ཉེ་བར་སྦྱར་རོ། །དེ་བས་ན་འདིར་ཐ་མ་བཀའ་སྩལ་བར་མཛད་དེ། སེམས་དཔའ་ཆེན་པོ་ཞེས་བོས་ནས། ཆོས་ཉིད་བྱང་ཆུབ་ཀྱི་སྙིང་པོ་ཞེས་བྱ་བ་ཆོས་ཐམས་ཅད་ཀྱི་རྩ་བ་ཆེན་པོའི་དོན་བྱང་ཆུབ་ཀྱི་སེམས་ཐིག་ལེ་ཉག་གཅིག་དེ་ནི་འདི་ལྟར་དང་པོའི་ལན་རང་ངོ་མ་ཤེས་པའི་མ་རིག་པས་བསྒྲིབས་པས་མ་མཐོང་བ་ཡིན་ལ། དེ་ནས་རིམ་པ་བཞིན་སྦྱར་ཏེ། སྤྱོད་ཡུལ་དུ་བྱར་མེད་པས་མ་དམིགས་ཤིང་། གཏིང་ཟབ་པས་ཡང་དག་པའི་དོན་མ་རྙེད་པ་དང་། བློས་དཔག་པར་དཀའ་བས་ངེས་པར་མ་ཤེས། བྱང་ཆུབ་ཀྱི་སྙིང་པོ་རང་གི་ངང་ནི་ཤིན་ཏུ་མྱུར་བས་རྩོལ་བགྲོད་ཀྱིས་མ་སླེབས་ལ་དོན་དེ་ཉིད་མུ་མཐའ་མེད་དེ་ཡངས་པས་བློས་མ་ཁྱབ་པ་ཡིན་ཏེ། དེས་ན་འདི་ཉིད་འཇིག་རྟེན་འཁོར་བ་མུན་པའི་ཁམས་ན་ཡོད་པ་ཡིན་པས། རྟོགས་པར་བྱེད་ནས་དོན་ཚོལ་ན་གྲོང་ཁྱེར་གསུམ་དུ་བཙལ་ལ། འདི་ཡི་རིགས་ཀྱི་རང་བཞིན་གང་ཞིག་ཡིན་ན་ཡན་ལག་དྲུག་དང་། མདོ་བཞི་དང་། རྩ་བ་གསུམ་ཉིད་ཡིན་པས། དེའི་ངོ་བོ་ཆོས་ཐམས་ཅད་ཀྱི་ཆོས་ཉིད་དེ་ཁོ་ན་ཉིད་ལ་བྱ་ཞིང་། གར་སྟོར་ན་མ་རིག་བདག་ཏུ་རྟོག་པའི་མུན་པའི་ཁམས་སུ་སྟོར་བ་ཡིན་ནོ། །སེམས་དཔའ་ཆེན་པོ། ཞེས་བོས་ནས། གཏན་ཚིགས་དེ་ལྟ་བས་ན། ལན་གྱི་དོན་ཚུལ་གྱིས་རྩ་བ་མ་རིག་པའི་མུན་པ་འདི་ཉིད་བསལ་བའི་ཕྱིར། འདིའི་རང་བཞིན་ལ་མཁས་པར་བྱ་ཞིང་མཚན་ཉིད་ཇི་ལྟ་བར་རྟོགས་པར་གྱིས་ཤིག་པར་གདམས་པའོ། །རྟོགས་པར་བྱ་བའི་ཐབས་བསྟན་པའི་ཆེད་དུ། དེ་བཞིན་དུ། ཀུན་གཞི། ཉོན་ཡིད། ཡིད་ཤེས། སྒོ་ལྔ་དང་ཤེས་པ་བཞི་པོའི་རེ་རེ་ལའང་སྦྱར་ཏེ། མུན་པའི་ངོ་བོ་དང་། དེའི་མཚན་ཉིད་དང་། མུན་པའི་ཡན་ལག་དང་། ཇི་སྲིད་དུ་གནས་པའི་ཡུན་དང་། དེའི་བྱེད་ལས་དང་། མུན་པའི་རྣམ་གྲངས་དང་། མཚོན་བྱེད་ཀྱི་དཔེ་ལ་སོགས་པ་རྣམས་དང་། མུན་པ་འདི་ཉིད་བསལ་བའི་ཐབས་ལམ་གྱི་ཆོས་ཀྱི་མཚན་ཉིད་རིག་པ་རྣམས་ལ་ཡང་མཁས་པར་བྱའོ། །འདི་རྣམས་མ་ནོར་བར་ངེས་པ་ལ་ནན་ཏན་དུ་འབད་པར་བྱའོ། །དེའང་དོན་གཞན་དུ་ཚོལ་བའི་ཞེན་པ་དགག་པའི་ཕྱིར། གང་བློ་ཆུང་ངུའི་ཐེག་པ་འཛིན་པས་མུན་པའི་ཁམས་པ་དབུ་སེམས་དག་གིས་འདོད་པའི་མུན་པའི་ཁམས་དང་ཡང་བྱང་ཆུབ་སེམས་ཀྱི་ངོ་བོ་ནི་ཆ་གཅིག་ཏུ་བསྟུན་ཏེ་ཤེས་པར་བྱའོ། །ཞེས་ལྡོག་པའི་ཐ་དད་ཡོད་ཀྱང་ངོ་བོ་མུན་པའི་ཁམས་དང་བྱང་ཆུབ་སྙིང་པོ་དབྱེར་མེད་པའོ་ཞེས་གསུངས་ཏེ་དེ་སྐད་ཅེས་བཀའ་སྩལ་བར་མཛད་པ་དང་། གཉིས་པ་ལ་གཉིས་ཏེ། དྲིས་པ་དང་། ལན་བཤད་པའོ། །དང་པོ་ནི། ཁོ་བོས་འདི་སྐད། ཅེས་པ་ནས། དེ་སྐད་ཅེས་གསོལ་བ་དང་། ཞེས་པའི་བར་གྱིས་བསྟན་ཏེ། དེ་ཉིད་ཤེས་པར་བྱ་བའི་ཕྱིར་རྒྱས་པར་དྲིས་པ་ནི། གསང་བདག་ཆེན་པོ་ཕྱག་ན་རྡོ་རྗེ་ཁོ་བོས། སྟོན་པ་གསང་བའི་སྐུ་ལ་འདི་སྐད་ཅེས་གསོལ་ཏོ། །ཀྱེ་བཅོམ་ལྡན་འདས། དེ་ལྟ་བུའི་མུན་པ་འདི་ཉིད་རྒྱུ་ཅི་ལས་བྱུང་བ་ལགས། མུན་པ་འདིའི་རང་བཞིན་ཅི་ལྟ་བུ། མུན་པ་འདིའི་ངོ་བོ་གང་ཞིག་ཡིན། མུན་པ་འདིའི་མཚན་ཉིད་ཅི་ལྟ་བུ། མུན་པ་འདིའི་ཡན་ལག་གི་དབྱེ་བ་དུ། མུན་པ་འདིའི་རྩ་བ་གང་ཞིག་ཡིན། མུན་པ་འདི་ཇི་སྲིད་ཅིག་ཏུ་གནས། མུན་པ་འདིས་དོན་ཅི་ཞིག་ལ་སྒྲིབ། མུན་པ་འདིའི་བྱེ་བྲག་གི་རྣམ་གྲངས་དུ། མུན་པ་འདི་དཔེ་གང་དང་མཐུན། མུན་པ་འདི་གཞི་གང་དུ་འཐིབས། མུན་པ་འདི་ཐབས་གང་གིས་སེལ། མུན་པ་ཞེས་ངེས་ཚིག་ཅིའི་ཕྱིར་བགྱི། འདི་ཅིའི་ཕྱིར་འཐིབས་པ་ཡིན། འདི་ཉིད་རྩ་བ་གང་དུ་འདུས་ཞེས། དྲི་བ་བཅོ་ལྔ་པོ་འདི་ཉིད་དུས་ཀྱི་སྐད་ཅིག་འདི་རུ་ཡང་དག་པར་བཤད་དུ་གསོལ། སླར་ཡང་བརྣན་ཏེ། བདེ་བར་གཤེགས་པ་འདི་ཉིད་ངེས་པར་བཤད་དུ་གསོལ། དེ་སྐད་ཅེས་གསོལ་ཏེ་ཞུས་པ་དང་། ཞེས་སོ། །དེའང་སྤྱི་དང་ཁྱད་པར་ལས། ཁྱད་པར་དུ་ཡང་མུན་པའི་ཡན་ལག་དྲུག་དང་། མདོ་བཞི་དང་། རྩ་བ་གསུམ་གྱི་ངོ་བོ་ལས། མདོ་བཞི་ཤེས་པ་རེ་རེ་ལ་ལྡན་པའི་བྱེ་བྲག་བཞིར་ཉུང་བསྡུས་ནས་དྲིས་པའོ། །དེའང་མུན་པ་ནི་མ་རིག་པ་དང་མཚུངས་པའི་ཤེས་པ་སྟེ། ཀུན་གཞི་ལ་འདི་དག་རྒྱས་པར་ལྡན་ཏེ་འཆད་པར་འགྱུར་རོ། །གཉིས་པ་ལ་གཉིས་ཏེ། མུན་པ་སྤྱིའི་དྲིས་ལན། བྱེ་བྲག་གི་ལན་བསྟན་པའོ། །དང་པོ་ལ་བཅུ་གཅིག་སྟེ། རྩ་བ་གང་དང་གང་དུ་འདུས་ཀྱི་ལན་བྱང་ཆུབ་སེམས་སུ་འདུས་པར་བསྟན་པ། ཅིའི་ཕྱིར་འཐིབས་ཀྱི་ལན་རྟོགས་པར་དཀའ་བས་མཐར་ལམ་པས་ཀྱང་མ་མཐོང་བར་བསྟན་པ། རང་བཞིན་གྱི་ལན་དངོས་པོ་མེད་པས་མི་དམིགས་པར་བསྟན་པ། མཚན་ཉིད་ཀྱི་ལན་བཙལ་བས་མི་རྙེད་པས་ཆོས་ཀྱི་དབྱིངས་ལས་མ་གཡོས་པར་བསྟན་པ། ཅི་སྲིད་གནས་པ་དང་ཅི་ལ་སྒྲིབ་ཀྱི་ལན་བྱང་ཆུབ་ཀྱི་ཤིང་ལ་བསྟན་པ། མུན་པ་གང་དུ་འཐིབས་ཀྱི་ལན་རྟོགས་པར་དཀའ་བས་ཁམས་གསུམ་དུ་འཐིབས་པར་བསྟན་པ། ངོ་བོའི་ལན་ཤེས་པ་ཡུལ་ལ་འཇུག་ཅིང་ཆོས་ཉིད་མ་རིག་པར་བསྟན་པ། གང་དང་མཐུན་གྱི་ལན་མུན་ཁུང་དུ་གསེར་སྟོར་བ་ལྟར་བཤད་པ། མུན་པ་ཞེས་ཅིའི་ཕྱིར་བགྱི་བའི་ལན་རྟག་ཏུ་མུན་པའི་འདུ་ཤེས་སུ་འབྱུང་བས་ངེས་ཚིག་གྲུབ་པར་བསྟན་པ། ཅི་ལས་བྱུང་གི་ལན་རྒྱུའི་ཐེག་པ་བློ་ཆུང་བས་ཀུན་ཏུ་བརྟགས་པ་ལས་བྱུང་བར་བསྟན་པ། ཡན་ལག་དང་བྱེ་བྲག་གི་ལན་ཐུན་མོང་དུ་བསྟན་ཏེ་རྣམ་གྲངས་ངོས་གཟུང་བའོ། །དང་པོ་ནི། བཅོམ་ལྡན་འདས་དེས། ཞེས་པ་ནས། འདི་དག་ཉིད་དུ་འདུས། ཞེས་པའི་བར་གྱིས་བསྟན་ཏེ། དྲི་བའི་ལན་སྤྱི་དང་ཁྱད་པར་ལས། སྤྱིའི་དབང་དུ་ལན་ཐ་མ་བསྟན་པའི་ཕྱིར་དང་། ཆ་གཅིག་ཏུ་ཤེས་པར་བྱ་བའི་དོན་བསྟན་པའི་ཕྱིར། སྟོན་པ་བཅོམ་ལྡན་འདས་དེས་བཀའ་སྩལ་པ། བྱང་ཆུབ་སེམས་དཔའ་ཆེན་པོ། ཞེས་བོས་ནས། མ་རིག་པའི་མུན་པ་དང་། ཡེ་ཤེས་ཀྱི་སྣང་བས་བསྡུས་པའི་ཆོས་ཐམས་ཅད་ཀྱི་རྩ་བ་གང་ཉིད་ནི། རང་གི་སེམས་ཀྱི་རང་བཞིན་རྟེན་པའི་གཞི་དང་སྐྱེད་པའི་རྩ་བ་མེད་པར་སྙིང་པོ་བྱང་ཆུབ་ཀྱི་སེམས་ཉིད་དུ་འདུས་པས་བྱང་ཆུབ་ཀྱི་སེམས་རྒྱུ་རྐྱེན་དང་བྲལ་བར་ངང་གཅིག་ཏུ་གྱུར་པར་ཤེས་པར་བྱའོ། །དེས་ན་མུན་པའི་རྩ་བ་མ་རིག་པའི་སེམས་ཀྱང་དེར་འདུས་སོ། །དྲུག་པའི་ལན་བསྟན་པའི་ཕྱིར། དེ་ལྟར་ངོ་བོ་གཉིིས་མེད་ཆེན་པོ་ཉིད་མ་མཐོང་བའི་དོན་ཤེས་པར་བྱ་བའི་ཐབས་དམ་པ་མ་ནོར་བར་སྟོན་པའི་མདོ་ནི་འཆད་པའི་ཚུལ་ཉེ་བར་བསྟན་པ་འདི་ལྟ་སྟེ། ཡང་དག་པར་རྫོགས་པའི་སངས་རྒྱས་ཀྱི་བྱང་ཆུབ་ཆེན་པོ་ཆོས་ཀྱི་སྐུའི་ཡོན་ཏན་ཐམས་ཅད་འབྱུང་བ་ཡི་གཞི་དང་སྐྱེད་པར་བྱེད་ཅིང་རྩ་བའི་བཅུད་དུ་གྱུར་པའི་སེམས་ཀྱི་རང་བཞིན་བྱང་ཆུབ་ཀྱི་སྙིང་པོ་དེ་ཉིད་ནི། ཀུན་གཞི་མ་རིག་པ་དང་བཅས་པའི་ངོ་བོ་དེ་ཁོ་ན་ཉིད་ཡིན་པས། དཔེར་ན་མེ་ཏོག་པདྨོ་ཁ་འབུས་པའི་རྒྱུ་ཡི་རྩ་བའི་སྙིང་པོ་འདམ་ལ་ཟུག་ནས་ཡོད་པ་ལྟར། སྙིང་པོ་བྱང་ཆུབ་ཆེན་པོའི་རྩ་བ་ཡང་འཁོར་བའི་འདམ་ན་ཆོས་ཉིད་གཉིས་མེད་ཆེན་པོར་ཡོད་པ་ཁོ་ནའོ། །དེས་ན་ཀུན་གཞི་འཁྲུལ་པ་ཡང་ལྷན་ཅིག་སྐྱེས་པ་དང་ཀུན་ཏུ་བརྟགས་པའི་མ་རིག་པ་གཉིས་ལས་བྱུང་བ་སྟེ། ངེས་དོན་འདུས་པ་ཡེ་ཤེས་ནམ་མཁའ་དང་མཉམ་པའི་རྒྱུད་ལས། དེ་ཡང་འདུས་པའི་སྙིང་པོ་ཉོན། །ལྷན་ཅིག་ཀུན་བརྟགས་གཉིས་འཛོམ་པས། །ཀུན་གཞིའི་རྣམ་པར་ཤེས་པ་ཡིན། །དེས་བསྐྱེད་ཚོགས་བརྒྱད་ཁ་ཚང་བས། །འཁོར་བར་འཁྱམས་ཞེས་དེ་ལ་བྱ། །ཞེས་སོ། །དེའི་ཕྱིར་ལོག་པ་དང་མ་རིག་པའི་ཡང་རྩ་བ་རྟོགས་མ་རྟོགས་ཀྱིས་འཁོར་འདས་ལམ་གསུམ་གྱི་ཆོས་ཐམས་ཅད་འབྱུང་བ་ཡི་དངོས་གཞིའི་རྩ་བ་ངོ་བོ་འདི་འདྲར་མེད་པའི་སེམས་ཉིད་སྙིང་པོའི་རྩ་བ་ནི། དངོས་པོ་གཉིས་པའི་ཆོས་རྣམས་ཀུན་གྱི་རྩ་བ་ཡིན་པས། ཁམས་གསུམ་དུ་སྣང་བའི་མུན་པའི་ཆོས་འདི་དག་ཀུན་གྱི་རྩ་བ་ཡང་རང་གི་རིག་པའི་སེམས་ཉིད་དུ་འདུས་པར་ཤེས་པར་བྱའོ། །གཉིས་པ་ནི། ཆོས་འདི་ཟབ་སྟེ། ཞེས་པ་ནས། ཀྱང་ནི་མཐོང་མ་ཡིན། །ཞེས་པའི་བར་གྱིས་བསྟན་ཏེ། འདི་ཡང་། འགྲེལ་ཆེན་ལྟར་ན། གཉིས་པའི་ལན་བསྟན་པའི་ཕྱིར། རྐང་པ་སྔ་མ་གཉིས་དང་། བརྒྱད་པ་དང་བཅུ་གཅིག་པའི་ལན་གང་ཞེ་ན། རྐང་པ་ཕྱི་མ་གཉིས་ཀྱིས་བསྟན་པར་བཞེད་ནས། དེ་དག་གི་གཏན་ཚིགས་ཚིགས་བཅད་འོག་མས་བསྟན་པར་མཛད་དོ། །དེ་ལྟར་ན། མུན་པའི་རང་བཞིན་དང་། དོན་ཅི་ལ་སྒྲིབ་པ་དང་། རྒྱུད་གང་དུ་འཐིབས་པར་བསྟན་པ་ཡིན་ཀྱང་། བསྡུས་དོན་ལྟར་ན། བཅུ་བཞི་པའི་ལན་བསྟན་པའི་ཕྱིར། མུན་པའི་རང་བཞིན་རང་རིག་པ་བྱང་ཆུབ་སེམས་ཀྱི་ཆོས་ཉིད་འདི་ནི་དཔེར་ན་ནམ་མཁའི་གཏིང་མ་རྙེད་པ་བཞིན་དུ་ཤིན་ཏུ་ཟབ་སྟེ་དམིགས་པ་དང་བཅས་པའི་བློས་མཐོང་བར་དཀའ་ཞིང་གཏིང་དཔག་པར་མི་ནུས་པས་ངོ་བོ་ཇི་བཞིན་དུ་རྟོགས་པར་དཀའ་བའི་ཕྱིར་འདིའི་རང་བཞིན་ཡང་འདི་འདྲར་ཞེས་ནི་མཐོང་བར་མི་ནུས་ཏེ་ཡུལ་དང་དངོས་པོར་མ་གྲུབ་པས་སོ། །དེས་ན་སློབ་པའི་ས་ཡི་རིམ་པ་མཐར་ཕྱིན་ཏེ་ས་བཅུ་པ་ལ་གནས་པ་ཡི་བྱང་ཆུབ་སེམས་དཔའ་ཆེན་པོ་ཀུན་ཏུ་འོད་ལ་འཇུག་པ་ལའང་ཀུན་ནས་ཉོན་མོངས་པ་མེད་པའི་ལྷན་ཅིག་སྐྱེས་པའི་མ་རིག་པ་ཡོད་པས་ན། དེ་ལྟ་བུའི་སྐྱེས་བུས་ཀྱང་ནི་རྩ་བ་ཆེན་པོ་མཐོང་བ་མ་ཡིན་ཏེ། བག་ལ་ཉལ་བའི་མུན་པས་བསྒྲིབས་པའི་ཕྱིར་ཏེ། ཚུལ་དེའི་དབང་གིས་འཐིབས་པ་ཡིན་པས་ཀུན་ཏུ་འོད་དང་ས་བཅུ་མན་ཆད་ལ་སྒྲིབ་ཅིང་ས་ལ་གནས་པའི་སྐབས་སེམས་སྐྱེས་པ་ཡན་ཆད་དུ་རང་རང་ལ་སྒྲིབ་ཚབ་ཆེ་ཆུང་དང་ཕྲ་རགས་ཡོད་པའོ། །དེའི་ཕྱིར་སྒྲིབ་པས་མ་མཐོང་བར་ཡང་གསལ་ལོ། །གསུམ་པ་ནི། མེད་པས་སྟོང་པའི། ཞེས་པ་ནས། མི་རྟོག་སྐྱེ་བ་མེད། །ཅེས་པའི་བར་གྱིས་བསྟན་ཏེ། གཉིས་པའི་ལན་བསྟན་ཏེ། དེ་ལྟར་རྟོགས་པར་དཀའ་བ་ཅིའི་ཕྱིར་ཞེ་ན། དོན་གྱི་ངོ་བོའི་རང་བཞིན་སྤྱོད་ཡུལ་དུ་མེད་པས་གནས་ལུགས་མཐའ་ཐམས་ཅད་ཀྱིས་སྟོང་པའི་ཆོས་ཉིད་འདི་ལ། བློས་དམིགས་པའི་ཡུལ་དང་ཡུལ་ཅན་གྱི་མཚན་ཉིད་གཞི་ནས་བྲལ་བས་ཡོད་པའི་དངོས་པོར་ཡོང་ཡེ་མི་དམིགས་པའི་གཉིས་མེད་ཆེན་པོ་ཉིད་དུ་ངེས་པ་ཡིན་པས། དེ་ལྟ་བུའི་ངང་ལ་ཡེ་ཤེས་ཆོས་ཀྱི་དབྱིངས་རྒྱུན་དུ་སྐྱེ་བའི་ཐ་སྙད་མེད་པར་མར་མེ་ལྟར་རང་གསལ་བ་ཉིད་ལ་དམིགས་པ་དང་མི་དམིགས་པའི་ཚིག་ལམ་ཆད་དེ་བརྗོད་གཞི་དང་བྲལ་བའི་ངོ་བོ་མཐའ་དང་དབུས་སམ་ཡོད་མེད་གཉིས་དང་གཉིས་མེད་ཙམ་དུའང་གཟུང་འཛིན་དུ་རྣམ་པར་མི་རྟོག་པས་རང་བྱུང་རིག་པའི་ཡེ་ཤེས་ཐ་སྙད་ཐམས་ཅད་བྲལ་བ་ཡིན་པའི་ཕྱིར། སྐྱེ་བ་མེད་པའི་ཆོས་ཉིད་ཟབ་མོ་བསམ་བརྗོད་ཀྱི་ཡུལ་ལས་འདས་པ་ཉིད་དུ་ངེས་པས་སའི་ཞེན་མཐའ་མ་རྟོགས་པ་ཁོ་ནར་ཟད་དོ། །དེས་ན་མེད་པས་མ་དམིགས་པར་ཡང་ངེས་སོ། །བཞི་པ་ནི། གསལ་བས་དུས་མཐའ། ཞེས་པ་ནས། མ་ཕྱིན་ཕྱིན་པ་མེད། །ཅེས་པའི་བར་གྱིས་བསྟན་ཏེ། འགྲེལ་ཆེན་ལས། འདི་ནས་བཟུང་འོག་གི་ཚིགས་བཅད་གཅིག་ཡན་ཆད། བདུན་པའི་ལན་བསྟན་པའི་ཕྱིར་གསུངས་པས། དེ་ལྟར་མཚན་ཉིད་འདི་ལྟར་ངེས་ཏེ་ཡུལ་དུ་བྱེད་པས་དུས་གསུམ་དུ་མ་རྙེད་པས་མུན་ཁམས་འཁོར་བ་ཇི་སྙེད་པའི་ཡུལ་དུ་གནས་ཀྱང་བྱང་ཆུབ་སྙིང་པོའི་ཤིང་བུ་མངོན་དུ་གྱུར་པ་ན་ལྡོག་པར་བསྟན་པ་ཡིན་ལ། བསྡུས་དོན་ལྟར་ན། བཞི་པའི་ལན་བསྟན་ཏེ། བྱང་ཆུབ་ཀྱི་སྙིང་པོ་ནི་ཡེ་ནས་ཡུལ་མེད་རང་གསལ་གྱི་ངོ་བོ་ཉིད་ཡིན་པས། དྲན་རིག་སྒྲིབ་བྱེད་དང་བྲལ་བའི་སྒོ་ནས་དུས་ཐོག་མ་དང་ཐ་མ་བྲལ་བའི་མཐའ་ཡི་ཚད་གཟུང་མེད་པ་རུ་གནས་ཁམས་གསུམ་མ་ལུས་པར་ཁྱབ་པར་ཀུན་ཏུ་བཙལ་བར་བྱས་ན་ཡང་། སེམས་ཀྱི་ངོ་བོ་མཚན་ཉིད་འདི་ལྟར་ངེས་པ་ཞིག་གོ་ཞེས་བྱ་བའི་དངོས་པོ་ངེས་གཟུང་ཅན་ཞིག་སྔར་གྱི་སངས་རྒྱས་ཀུན་གྱིས་ཀྱང་མི་རྙེད་པའི་ངང་དེ་ལ་སེམས་ཅན་རྣམས་ཀྱིས་ད་ཡོང་བཙལ་ཡང་ཕྱིས་སུ་རྙེད་པར་མི་འགྱུར་རོ། །དེ་བཞིན་དུ་རྒྱལ་བ་ལྟ་བུའི་མཁས་པའམ་སྒྲ་དང་ཚད་མ་ལ་མཁས་ཤིང་གོམས་པར་བྱས་པས་ཀྱང་དུས་ཐོག་མཐའ་མེད་པ་རུ་བློ་སོ་སོར་རྟོག་པའི་ཤེས་རབ་ཀྱིས་ཤིན་ཏུ་བསྒྲིམས་ཏེ་མཐའ་བགྲངས་ནས་ཅིར་ཞེས་ཅི་ལྟར་བརྟགས་ཤིང་དཔྱད་པར་བྱས་པས་ཀྱང་། གང་སྙིང་པོ་བྱང་ཆུབ་ཀྱི་མཚན་ཉིད་འདིར་ངོ་བོ་ངེས་པ་ཅིར་ཡང་མཐོང་བ་མེད་དེ། སླར་ཡང་ཆེད་དུ་བྱས་པའི་སྒྲིབ་པར་འགྱུར་བས་སོ། །དེ་བས་ན་ཡུལ་དུ་བྱེད་པས་དུས་གསུམ་དུ་མི་རྙེད་པས་འཁོར་བ་ཇི་སྙེད་པའི་ཡུལ་དུ་རང་སྣང་དུ་གནས་པའོ། །ཚུལ་དེ་ལྟ་བས་ན། མཉམ་པ་ཆེན་པོ་མ་ཡིན་པ་མེད་པའི་ཕྱིར། དཔེ་ལྟ་བུར་མགྱོགས་པས་དུས་མཐའ་མེད་པ་རུ། ཉམ་ཐག་ཆད་པར་བརྒྱུགས་ཏེ་ཀུན་ཏུ་ཕྱིན་ཀྱང་ནི། ད་དུང་དེ་ཁོ་ན་ཉིད་ཆོས་ཀྱི་དབྱིངས་འདི་ཉིད་ལས་གཞན་གར་ཡང་མ་ཕྱིན་པས་ལོགས་སུ་གྱུར་པར་སྔར་ཡང་མ་སླེབས་པས་ན་ད་ཡང་ཕྱིན་པ་མེད་པར་གཞི་འདི་ཉིད་ཀྱི་ངང་ཁོ་ནའོ། །དེས་ནས་བགྲོད་དུ་མེད་པར་མུན་པའི་རང་བཞིན་དང་ཆ་གཅིག་ཏུ་གྱུར་པའོ། །དེ་དག་གི་ཕྱིར། ཟབ་པས་མ་རྙེད། དཀའ་བས་མ་ཤེས། མྱུར་བས་མ་སླེབ་པར་ངེས་པའང་ཡིན་ནོ། །ལྔ་པ་ནི། སྐྱེ་མེད་ཆོས་ཀྱི། ཞེས་པ་ནས། ཀུན་འབྱུང་བྱང་ཆུབ་ཤིང་། །ཞེས་པའི་བར་གྱིས་བསྟན་ཏེ། བདུན་པ་དང་བརྒྱད་པ་གཉིས་ཀྱི་ལན་གང་ཞེ་ན། རྣལ་འབྱོར་གྱི་དབང་གིས་རྒྱུའི་ཐེག་པ་ལས་རྣམ་པར་ཐར་པ་གསུམ་དུ་བསྟན་ཀྱང་། འདིར་ཐུན་མོང་མིན་པའི་གནས་ལུགས་དངོས་གཞི་དང་བྲལ་བས་སྐྱེ་བ་མེད་པའི་ཆོས་ཉིད་ཀྱི་སྡོང་པོ་ཀུན་གྱི་རྩ་བར་གྱུར་པས་དངོས་པོའི་དེ་ཁོ་ན་ཉིད་ལ། མ་རྟོགས་པའི་དུས་སུ་འཁོར་བའི་ཆོས་ཀྱི་ཡན་ལག་སྣ་ཚོགས་སུ་སྣང་ཡང་། མཚན་ཉིད་རྟོགས་པས་ལམ་པའི་བློ་ལ་ལམ་གྱི་ཆོས་སུ་སྣང་བས་ན། རང་བཞིན་དང་མཐུན་པར་སྟོང་པ་ཉིད་དང་། སྨོན་པ་མེད་པ། མཚན་མ་མེད་པ། རང་བཞིན་གྱིས་འོད་གསལ་བའི་མཚན་ཉིད་ཅན་གྱི་རྣམ་པར་ཐར་བའི་སྒོ་བཞི་ཡི་ཡེ་ཤེས་མ་འགགས་པར་སྣང་བས་ཡལ་ག་འགེལ་བའམ་ཡན་ལག་གེལ་པ་ནི་ཀུན་ནས་རྒྱས་པ་དང་ཕྱོགས་སུ་གྱེས་པར་བྱུང་བའོ། །དེ་ཉིད་ལམ་པས་དོན་དུ་གཉེར་ནས་འབད་པ་བྱས་པས་ལམ་གྱི་རྣམ་ཐར་བཞིས་འབྲས་བུའི་མཚན་ཉིད་བྱང་ཆུབ་བླ་ན་མེད་པའི་སྙིང་པོར་སྨིན་ཏེ་ཆོས་སྐུ་ཆེན་པོ་ཉིད་དུ་མཐར་ཕྱིན་པའོ། །ཆེ་བའི་ཡོན་ཏན་དེ་ལྟར་རྒྱས་པའི་སྙིང་པོའི་ལྗོན་པ་བཟང་པོ་དེ་ནི་ཡོན་ཏན་ཀུན་གྱི་འབྱུང་གནས་བྱང་ཆུབ་ཀྱི་ཤིང་བུ་དམ་པ་ཡིན་ནོ། །དེ་བས་ན་བྱང་ཆུབ་སྙིང་པོའི་ངོ་བོ་ལ་སྒྲིབ་ཅིང་དེ་ཉིད་མངོན་དུ་གྱུར་པ་ན་ལྡོག་གོ། །ཚུལ་དེའི་ཕྱིར་ཡངས་པས་མ་ཁྱབ་པར་ཡང་གསལ་ལོ། །དྲུག་པ་ནི། འཇུག་པ་དོན་ལ། ཞེས་པ་ནས། ཆེད་ལས་བྱེད་ལས་གྱུར། །ཞེས་པའི་བར་གྱིས་བསྟན་ཏེ། བསྡུས་དོན་ལྟར་ན་ཚིགས་བཅད་འདི་ཉིད་བཅུ་གཅིག་པའི་ལན་ཏེ། ཤེས་པ་ཚོགས་དྲུག་ཡུལ་དྲུག་ལ་འཇུག་པ་དང་བཅས་ཏེ་གཟུགས་སྒྲ་ལ་སོགས་པའི་ཡུལ་དོན་གྱི་དངོས་པོ་ལ་མ་རིག་པའི་དབང་གིས་ཞེན་ཅིང་ཆགས་པ་ནི་འདོད་པའི་ཁམས་ཀྱི་མ་རིག་པ་ཡིན་ལ། བསམ་གཏན་བཞིའི་ཏིང་ངེ་འཛིན་མངོན་དུ་བྱེད་ཅིང་དེ་ལ་ཉོན་ཡིད་ཀྱིས་བདག་ཏུ་འཛིན་པའི་འདུ་ཤེས་དང་མ་བྲལ་བ་ཉིད་གཟུགས་ཀྱི་ཁམས་ཀྱི་མ་རིག་པར་ངེས་སོ། །གཟུགས་མངོན་དུ་སྣང་བ་མེད་པར་ཀུན་གཞིའི་ངང་ལ་བསམ་པའི་འདུ་ཤེས་བཞི་རྒྱུན་མ་ཆད་པར་སྙོམས་འཇུག་བཞི་ལ་གནས་ཏེ་དམིགས་པ་དང་རྣམ་པར་རྒྱུ་བས་ཡང་དག་པའི་དོན་མ་རྙེད་པ་གཟུགས་མེད་པའི་ཁམས་ཀྱི་མ་རིག་པ་ཉིད་དེ་བྱེ་བྲག་གསུམ་གྱིས་ཆོས་ཉིད་རྟོགས་པར་དཀའ་བས་ན་ཁམས་གསུམ་དུ་འཐིབས་པ་ཡིན་ནོ། །དེས་ན་གང་ཤེས་པ་གསུམ་དུ་སྣང་བ་དེ་ཡི་རྒྱུ་ནི། ཇི་བཞིན་པ་མ་རིག་པ་ལས་རང་གི་ཡུལ་དང་ཏིང་ངེ་འཛིན་གྱི་དམིགས་པ་ལ་ཆེད་དུ་འཛིན་པའི་ལས་ཀྱི་བྱེད་པ་ལས་མ་རིག་པའི་རྒྱུན་གྱིས་ཁམས་གསུམ་དུ་སྣང་བར་གྱུར་བ་ཡིན་ནོ། །འགྲེལ་ཆེན་ལྟར་ན། རྐང་པ་སྔ་མ་གསུམ་དགུ་པའི་ལན་ཏེ། མ་རིག་པའི་བྱེ་བྲག་གིས་ཁམས་གསུམ་དུ་སྣང་བའོ། །དང་པོའི་ལན་བསྟན་པའི་ཕྱིར། རྐང་པ་བཞི་པ་གསུངས་ཏེ། མ་རིག་པའི་དབང་གིས་རང་ཡུལ་ཆེད་དུ་བྱེད་པ་ལས་གྲོང་ཁྱེར་གསུམ་དུ་བྱུང་བས་སོ། །ཚུལ་འདི་དག་ལ་བརྟེན་ནས་བཙལ་བའི་གནས་གྲོང་ཁྱེར་གསུམ་ཡིན་པར་ཤེས་པར་བྱའོ། །བདུན་པ་ནི། ཡུལ་དུ་གང་གྱུར། ཞེས་པ་ནས། ཉིད་མེད་དེ་ཉིད་དོ། །ཞེས་པའི་བར་གྱིས་བསྟན་ཏེ། གསུམ་པའི་ལན་ནི། དབང་པོའི་ཡུལ་དང་སེམས་ཀྱི་ཡུལ་ཏིང་ངེ་འཛིན་དུ་ཆགས་པས་ཁམས་གསུམ་གྱི་འགྲོ་བའི་ཡུལ་དུ་གང་གྱུར་པའི་དངོས་པོ་གང་ཡང་རུང་བ་ལ་ཤེས་པ་འཇུག་པ་ཉིད་ནི། ཡུལ་གང་ལ་འཇུག་ཀྱང་རུང་སྟེ་གཡོ་བ་དེ་ཉིད་ཁམས་གསུམ་གྱི་འཁྲུལ་པའི་རྣམ་པར་ཤེས་པ་དོན་ལ་མདོངས་པའི་ངོ་བོ་དེ་ཉིད་དོ། །དེས་ན་ཤེས་པས་ཟིན་པའི་ཡུལ་གང་དུ་སྣང་བར་གྱུར་པ་ན་ཡང་འགྲོ་བ་དེ་དག་གི་སྤྱོད་ཡུལ་དེ་ནི་མུན་པའི་ཁམས་སུ་གྱུར་པ་ཁོ་ན་ཡིན་ཀྱང་། མི་མཐུན་པ་ནི། མུན་པའི་ཁམས་ཉིད་ན་རང་རིག་པ་བྱང་ཆུབ་ཀྱི་སྙིང་པོའི་ངོ་བོ་དེ་ཉིད་སྣང་ཞིང་གཉིས་སུ་མེད་པར་གསལ་བར་ཡོད་པས་ནང་ཤེས་པའི་རྒྱུན་གསལ་བ་དེ་ནི་སྣང་བའི་ཁམས་ཡང་ཡིན་ནོ། །དེས་ན་བྱང་ཆུབ་ཀྱི་སེམས་འདི་ནི་མུན་པའི་ཁམས་ན་ཡོད་དོ། །དེ་ཡང་སེམས་དང་སེམས་བྱུང་དུ་སྣང་བ་དང་སེམས་སྣང་བའི་འོད་དུ་བྱུང་བའི་དངོས་པོ་གཉིས་པ་ཇི་སྙེད་པ་དེ་དག་སྐྱེ་བ་བཞི་དང་འབྱུང་བ་ལྔ་ལ་སོགས་པར་སྣང་བའི་ཡང་གཞི་དང་རྟེན་དུ་གྱུར་པས་རྩ་བའི་སྙིང་པོ་རང་རིག་པ་ཅིར་ཡང་སྣང་བ་ཉིད་ཡིན་པས་ཁམས་གསུམ་གྱི་འགྲོ་བ་ཀུན་གྱིས་དེ་ཉིད་ལ་ཀུན་གཞིའི་ཁམས་ཀྱི་དངོས་པོའི་ཕྱོགས་ཀྱི་ཁྱད་པར་ཙམ་དུ་རིག་ཅིང་མཐོང་ཡང་ངེས་པའི་དོན་ཇི་བཞིན་དུ་མ་རིག་པ་ཡི་ངོ་བོ་ཉིད་མེད་པས་ཕྱོགས་རིས་སུ་གཟུང་དུ་མི་བཏུབ་པའི་ཤེས་པ་མ་རིག་པ་དང་མཚུངས་པའི་རང་རིག་པ་དེ་ཉིད་ཡིན་པས་དོན་ལ་མུན་སྣང་དབྱེར་མེད་ཀྱི་ཆོས་ཉིད་བསམ་བརྗོད་ལས་འདས་པ་ཉིད་དོ། །དེས་ན་ངོ་བོ་དེ་ཁོ་ན་ཉིད་ལ་བྱ་བར་ཡང་གསལ་ལོ། །བརྒྱད་པ་ནི། མུན་ཁུང་གསེར་སྟོར། ཞེས་པ་ནས། སེམས་འདིི་སྟོར་བར་གྱུར། །ཞེས་པའི་བར་གྱིས་བསྟན་ཏེ། བསྡུས་དོན་ལྟར་ན། ཚིགས་བཅད་འདི་ཉིད་བཅུ་པའི་ལན་ཏེ། དེ་ལྟར་ཤེས་པ་མ་རིག་པ་དང་མཚུངས་པར་ལྡན་པས་རང་གི་ཆོས་ཉིད་མི་མཐོང་བ་ནི། དཔེར་ན་མུན་ཁུང་དུ་གསེར་སྟོར་བ་ཇི་ལྟ་བ་བཞིན་དུ། འཁོར་བའི་གནས་མུན་པ་མུན་ནག་གི་སྨག་རུམ་དང་འདྲ་བ་ཉིད་དུ། རིན་ཆེན་གསེར་དང་འདྲ་བ་ཡི་ཆོས་ཉིད་བྱང་ཆུབ་སེམས་ཀྱི་དོན་འདི་ཉིད་སྟོར་བར་གྱུར་ཏེ། མ་རིག་པས་དོན་མཐོང་དུ་མི་སྟེར་བའི་ཕྱིར་དཔེ་དོན་མཐུན་པར་ངེས་པའོ། །འགྲེལ་ཆེན་ལྟར་ན། རྐང་པ་དང་པོ་ནི། བཅུ་པའི་ལན་ཏེ། དཔེར་མུན་པར་གསེར་སྟོར་བ་དང་འདྲ་བའོ། །དེ་ནས་རྐང་པ་གསུམ་ལན་བཅུ་གསུམ་པ་སྟེ། འཁོར་བའི་སྨག་རུམ་དུ་རིན་ཆེན་སེམས་ཉིད་ཀྱི་དོན་སྟོར་ཏེ། མ་རིག་པས་དོན་མཐོང་དུ་མི་སྟེར་བའི་ཕྱིར་མུན་པ་ཞེས་བགྱི་བའི་གཏན་ཚིགས་སོ། །དེས་ན་མུན་པའི་ཁམས་སུ་སྟོར་བའོ། །དགུ་པ་ནི། མུན་པའི་ཁམས་སུ། ཞེས་པ་ནས། འདུ་ཤེས་ཉིད་དུ་འབྱུང་། །ཞེས་པའི་བར་གྱིས་བསྟན་ཏེ། བསྡུས་དོན་ལྟར་ན། བཅུ་གསུམ་པའི་ལན་ཏེ། མ་རིག་པ་གཉིས་ཀྱི་མུན་པའི་ཁམས་སུ་གྱུར་པའི་འགྲོ་བ་སེམས་ཅན་གྱི་གནས་སྐབས་དག་ཏུ། དཔེར་ན་མིག་གིས་མིག་མི་མཐོང་བ་ལྟར་སྤྱོད་ཡུལ་དང་བྲལ་བས་རང་གིས་རང་མ་མཐོང་སྟེ། ཤེས་པ་མ་རིག་པའི་རྒྱུད་དུ་གྱུར་པའི་ཕྱིར་མུན་པའི་འདུ་ཤེས་ཉིད་དུ་འབྱུང་བས་ན། སྔགས་ལ་ལྟོས་པའི་རྒྱུ་མཚན་ཉིད་ཀྱི་ཐེག་པའང་འདུ་ཤེས་དེ་དང་མ་བྲལ་བ་ཉིད་དེ། དེའི་ཕྱིར་མུན་པ་ཞེས་བགྱིའོ། །འགྲེལ་ཆེན་ལྟར་ན། ལན་བཅུ་བཞི་པ་སྟེ། མ་རིག་པ་ཤ་སྟག་ཏུ་གྱུར་པའི་འགྲོ་བ་རྣམས། མ་རིག་པ་གཉིས་ཀྱིས་ནོན་པ་ནི། དཔེར་མིག་གིས་མིག་མ་མཐོང་བ་ལྟར་ཡུལ་བྲལ་བས་རང་གིས་རང་མ་མཐོང་སྟེ། ཤེས་པ་མ་རིག་པ་རྒྱུད་དུ་གྱུར་པའི་ཕྱིར་མུན་པ་ཉིད་དུ་འཐིབས་པའོ། །བཅུ་པ་ནི། མུན་པའི་ཁམས་པས། ཞེས་པ་ནས། ཆེད་དུ་ཤེས་པར་གྱིས། །ཞེས་པའི་བར་གྱིས་བསྟན་ཏེ། བསྡུས་དོན་ལྟར་ན། དང་པོའི་ལན་ཏེ། ཁམས་གསུམ་གྱི་འགྲོ་བའི་མུན་པའི་ཤེས་པ་མ་ཟད་གསང་སྔགས་བླ་ན་མེད་པ་ལ་ལྟོས་ནས་མུན་པའི་ཁམས་པས་གྲུབ་མཐའ་སྨྲ་བ་དག་གིས་གང་ལྟར་ཤེས་པ་རྟོག་པའི་མཚན་ཉིད་ཕྲ་མོའི་ཕྲ་མོ་ཆ་ཤས་ཙམ་གྱི་དངོས་པོ་ཡན་ཆད་ཐམས་ཅད་མུན་པ་ཡིན་པས་དེའི་དངོས་དོན་གང་འདིར་བློ་ཆུང་བྱིས་པ་རྒྱུའི་ཐེག་པ་ཆེན་པོ་རྣམས་ཀྱི་ཆེད་དུ་སྟོན་པ་རྫོགས་པའི་སངས་རྒྱས་ཀྱིས་གླེང་གཞི་གང་ཞིག་བརྗོད་པ་དེ་ཉིད། འདི་ན་དོན་དང་མཐུན་པར་གསལ་བའི་ཕྱིར་གསང་སྔགས་ཐེག་པ་ཆེན་པོའི་བློ་དང་ལྡན་པ་ཀུན་ལ་ཡང་འདི་ལྟར་བརྗོད་ཅིང་བཤད་ཀྱིས། སེམས་དཔའ་ཆེན་པོ་ཁྱོད་ཀྱིས་ཀྱང་གཞན་གྱི་དོན་ཕྱིར་བླུན་པོའི་རིགས་ཅན་དྲང་བའི་ཆེད་དུ་ཤེས་པར་བྱོས་ལ་རྟོགས་པར་གྱིས་ཤིག་ཅེས་གདམས་པར་མཛད་པའོ། །ཚུལ་འདི་ལྟར་ན་མུན་པ་གང་གིས་སེལ་གྱི་ལན་འདིར་དངོས་སུ་མ་ཟིན་ཀྱང་འོག་ནས་འབྱུང་ངོ་། །འགྲེལ་ཆེན་ལྟར་ན། ལན་བཞི་པ་ནི། མུན་པའི་ཁམས་པར་གྱུར་པས་གྲོང་ཁྱེར་གསུམ་གྱི་འགྲོ་བ་རྣམས་ཀྱིས། གང་ཡུལ་གྱི་བྱེ་བྲག་ཤེས་པར་བྱེད་པའི་ཤེས་པ་དངོས་པོ་ལ་རིག་ཅིང་རྟོག་པའི་ངོ་བོ་ནི་མུན་པའི་མཚན་ཉིད་དེ། དེ་དག་གི་མཚན་ཉིད་ཕྲ་མོའི་ཆ་ཤས་ཙམ་ཡང་ཆད་ཕྲ་རགས་ཐམས་ཅད་ཇི་ལྟར་བསལ་བ་བཅུ་གཉིས་པའི་ལན་གྱིས་གསལ་བར་སྟོན་ཏེ། གང་འདིར་རྒྱུའི་ཐེག་པ་ཆེན་པོ་བློ་ཆུང་ཞིང་དོན་གྱི་བརྡ་ཤེད་མ་བྱེ་བ་རྣམས་ཀྱི་ཆེད་དུ་སྟོན་པས་གླེང་གཞི་གང་བརྗོད་ཅིང་བཀའ་སྩལ་པ་དེ་ཉིད། འདིར་གསལ་བའི་ཕྱིར་ཐེག་པ་ཆེན་པོའི་བློ་དང་ལྡན་པའི་རྣལ་འབྱོར་ཀུན་ལ་ཡང་འདི་ལྟར་བརྗོད་དེ་བཤད་ཀྱིས། ཁྱོད་ཀྱིས་ཀྱང་གཞན་བླུན་པོ་རྣམས་དྲང་བའི་ཆེད་དུ་ཤེས་པར་གྱིས་ཤིག་པར་གདམས་པའོ། །བཅུ་གཅིག་པ་ནི། འདིར་ཡང་འདི་ལྟར། ཞེས་པ་ནས། འགྲོ་ལ་དང་འབྱིན་པ་ཡིན། །ཞེས་པའི་བར་གྱིས་བསྟན་ཏེ། བསྡུས་དོན་ལྟར་ན་ལྔ་པ་དང་དགུ་པའི་ལན་དང་། འགྲེལ་ཆེན་ལས་ལྔ་པའི་ལན་དང་ཁྱད་པར་གྱིས་དེ་དག་གིས་ལན་གདབ་པ་ཐུན་མོང་དུ་བསྟན་པའི་ཕྱིར། མ་རིག་པའི་མུན་པ་མཚན་ཉིད་པས་མཐོང་བའི་དོན་འདི་ཡང་ཡན་ལག་འབྱེད་ན་འདི་ལྟར་ལྡེ་མིག་གསུམ་དུ་ཡོངས་སུ་སྣང་བ་ཉིད་དེ། ཡན་ལག་ཚོགས་དྲུག་དང་མདོ་ཤེས་པ་བཞི་དང་རྩ་བ་ལུས་ངག་ཡིད་གསུམ་སྟེ། ལྡེ་མིག་དང་པོས་འཁོར་བ་རྣམ་པར་འབྱེད་པ་དང་། བར་མས་འགྲོལ་བ་དང་། ཐ་མས་ངེས་པར་འབྱིན་པ་ཡིན་ཏེ། ཤུགས་ཀྱིས་བཅུ་གཉིས་པའི་ལན་དུའང་འགྱུར་རོ། །དེས་ན་བཀའི་ལུང་གཅིག་ལ་ཞུས་ལན་ཕྲ་མེན་རྒྱས་ན་རྒྱུད་དུ་འགྲོ་བའི་དཔེ་ལྟར། རྣམ་པར་ཤེས་པའི་རྒྱུད་གཅིག་ལ་དབང་པོ་དྲུག་གི་རྐྱེན་གྱིས་རྣམ་པར་ཤེས་པ་ཚོགས་དྲུག་དང་དམིགས་པའི་རྣམ་ཤེས་དང་བདུན་རྩ་བའི་རྣམ་ཤེས་དང་བརྒྱད་དུ་བྱུང་ནས་སྒོ་གསུམ་དུ་རྒྱས་ཤིང་འཕེལ་ན་རྒྱུད་དུ་འགྲོ་བའོ། །གཉིས་པ་ལ་གསུམ་སྟེ། མུན་པའི་ཡན་ལག་དྲུག་བཤད་པ། མུན་མདོ་བཞི་བསྟན་པ། མུན་པའི་རྩ་བ་གསུམ་བཤད་པའོ། །དང་པོ་ནི། ཡན་ལག་དྲུག་ཏུ། ཞེས་པ་ནས། གཅོད་པའི་ཡན་ལག་ཡིན། །ཞེས་པའི་བར་གྱིས་བསྟན་ཏེ། དེ་ལ་ཡན་ལག་དང་པོ་གང་ཞེ་ན། རྣམ་པར་ཤེས་པའི་རྒྱུད་གཅིག་ལ་དབང་པོ་དྲུག་གི་རྐྱེན་གྱིས་ཡན་ལག་དྲུག་ཏུ་གང་གྲགས་པ་ནི། མིག་གིས་མཐོང་བ་དང་། རྣ་བས་ཐོས་པ་དང་། སྣ་ཡིས་ཚོར་བ་དང་། ལྕེ་ཡིས་མྱོང་བ་དང་། ལུས་ཀྱིས་རེག་པ་དང་། ཡིད་ཀྱིས་ཀུན་ཤེས་པ་དང་རྣམ་པར་ཤེས་པའི་ཚོགས་དྲུག་སྟེ། དེ་ལའང་རྒྱུའི་ཡན་ལག་དྲུག་དང་། དམིགས་པའི་ཡན་ལག་དྲུག་དང་། གཅོད་པའི་ཡན་ལག་དྲུག་སྟེ། ཡུལ་ལ་ཕྱིར་འབྱུང་བ་ལྟ་བུ་དང་དངོས་སུ་ཡུལ་ལ་འཇུག་ཅིང་ཡུལ་གྱི་སྒྲོ་འདོགས་ཡོངས་སུ་གཅོད་པའི་ཡན་ལག་ཏུ་གྱུར་པ་རྣམས་ཡིན་ནོ། །དེ་དག་འདིར་མི་སྤྲོ་སྟེ། སྒོ་ལྔ་འཇུག་པའི་མདོ་དང་མཐུན། ཡིད་ཤེས་སྣང་བའི་མདོ་དང་མཐུན་པས་འཆད་པར་འགྱུར་རོ། །གཉིས་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི། ལང་ཀའི། ཞེས་པ་ནས། འཇུག་པ་ལུང་བཞིན་བཤད། །ཅེས་པའི་བར་གྱིས་བསྟན་ཏེ། ལང་ཀའི་བདག་པོ་ཞེས་བོས་ནས། མདོ་བཞི་བསྟན་པ་ནི་གང་ཞེ་ན། ལུང་གི་མདོ་བཞི་ནི་རྣམ་ཤེས་བཞི་སྟེ། ཆོས་ཐམས་ཅད་ཀྱི་མདོ་རྣམ་ཤེས་སུ་འདུས་པའི་ཚུལ་འདི་ལྟ་སྟེ། བག་ཆགས་བསགས་པའི་གཞིའི་མདོ་ཀུན་གཞི་དང་། དེ་ལ་བདག་ཏུ་ལྟ་བས་དམིགས་པའི་མདོ་ཉོན་ཡིད་དང་། ཕྱི་ནང་ཀུན་སྣང་བའི་མདོ་ཡིད་ཀྱི་ཤེས་པ་དང་། རང་ཡུལ་ཐུན་མིན་ལ་འཇུག་པའི་མདོ་སྒོ་ལྔའི་ཤེས་པའོ། །དེའང་འདི་ལྟར། མདོ་བཞི་པོ་གཞི་ཡི་མདོ་དང་དམིགས་པ་དང་སྣང་བ་དང་འཇུག་པ་ཡི་མདོ་བཞི་སྟོན་པ་མཆོག་གིས་དྲང་བའི་ལུང་བཞིན་དུ་གསལ་བར་བཤད་དེ་བཀའ་སྩལ་བའོ། །གཉིས་པ་ལ་བཞི་སྟེ། གཞིའི་མདོ་ཀུན་གཞི་བཤད་པ། དམིགས་པའི་མདོ་ཉོན་མོངས་པ་ཅན་གྱི་ཡིད་བཤད་པ། སྣང་བའི་མདོ་ཡིད་ཀྱིི་རྣམ་ཤེས་བཤད་པ། འཇུག་པའི་མདོ་སྒོ་ལྔའི་ཤེས་པ་བསྟན་པའོ། །དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི། ལང་ཀའི། ཞེས་པ་ནས། བྱིས་པ་འདི་ལྟར་འདོད། །ཅེས་པའི་བར་གྱིས་བསྟན་ཏེ། དེ་ལ་མུན་པའི་དྲིས་ལན་སོ་སོའི་བྱེ་བྲག་ཏུ་ཕྱེ་ནས་མདོ་དང་པོ་བསྟན་པའི་ཕྱིར། ལང་ཀའི་བདག་པོ། ཞེས་བོས་ནས། དེ་ལ་གཞིའི་མདོ་ཉེ་བར་སྟོན་པ་ནི་འདི་ལྟ་སྟེ། ཆ་ཕྲ་བའི་གཞི་དེ་ནི་མཚན་ཉིད་ཐེག་པ་དོན་ལ་ཤེད་མ་བྱེ་བའི་བྱིས་པ་རྣམ་རིག་པ་ལ་སོགས་པ་རྣམས་ཀུན་གཞིའི་རང་བཞིན་འདི་ལྟར་འདོད་དེ་དེ་ཉིད་འཐད་པར་སྒྲུབ་པར་བྱེད་དོ། །གཉིས་པ་ལ་བཅུ་གཉིས་ཏེ། རང་བཞིན་དངོས་པོ་མེད་ཅིང་ཀུན་ལ་ཁྱབ་པས་མ་བཅོས་པར་བསྟན་པ། མཚན་ཉིད་ཤེས་ལ་མི་གསལ་བས་ཚོར་བ་བཏང་སྙོམས་དང་ལྡན་ཏེ་སྐད་ཅིག་མའི་རྒྱུན་དང་བཅས་པར་བསྟན་པ། ངོ་བོ་ཕྱོགས་གཅིག་ཏུ་རྒྱ་མ་ཆད་པས་བག་ཆགས་ཐམས་ཅད་ཀྱི་གཞིར་བསྟན་པ། ཡན་ལག་ཐུན་མོང་དང་ཁྱད་པར་གྱི་འཁོར་དང་ལྡན་པས་བག་ཆགས་ཀྱི་གོ་འབྱེད་པར་བསྟན་པ། གནས་པའི་ཡུན་དང་ཅི་ལ་སྒྲིབ་ཀུན་ཐུན་མོང་དུ་བསྟན་པ། བྱེ་བྲག་འཁོར་འདས་གཉིས་ཀྱི་གཞི་རྟེན་དུ་གྱུར་པར་བསྟན་པ། རྩ་བ་གང་དང་གང་དུ་འདུས་པ་ཐུན་མོང་དུ་བསྟན་པ། མུན་པའི་རྒྱུ་ཅི་ལས་བྱུང་དང་ཀུན་གཞི་སྒྲུབ་བྱེད་ཀྱི་རིགས་པ་བཤད་པ། མུན་པའི་ཁམས་ཀྱི་ཀུན་གཞི་ཉིད་དཔེ་གང་དང་མཐུན་ཚུལ་བཤད་པ། མུན་པ་ཞེས་ཅིའི་ཕྱིར་བགྱི་བའི་ངེས་ཚིག་བཤད་པ། མུན་པ་ཉིད་ཅིའི་ཕྱིར་འཐིབས་པའི་རྒྱུ་མཚན་བཤད་པ། མུན་པ་གང་གིས་སེལ་བ་ཡེ་ཤེས་རང་སྣང་དུ་བསྟན་པའོ། །དང་པོ་ནི། གཟུགས་མེད་མིང་ལ། ཞེས་པ་ནས། མེད་པར་འདུས་མ་བྱས། །ཞེས་པའི་བར་གྱིས་བསྟན་ཏེ། སྤྱིར་ཀུན་གཞི་དང་མུན་པ་གཉིས་ངོ་བོ་གཅིག་ཡིན་ཀྱང་། ཐམས་ཅད་ཀྱི་གཞིར་གྱུར་པས་ཀུན་གཞི་དང་། དེ་མ་རྟོགས་པས་འཁོར་བར་སྣང་བས་མུན་པ་ཞེས་བསྟན་པ་ཡིན་ལ། དེ་བས་ན་གོང་གི་མུན་པའི་དྲིས་ལན་དང་ཀུན་གཞིའི་དྲིས་ལན་མཐུན་ནོ། །འོན་ཀྱང་གོང་གི་མུན་པ་གང་གི་ཆེད་དུ་ལན་མ་གསུངས་པ་རྣམས་འདིར་བསྟན་པར་མཛད་དོ། །དེ་ཡང་འཆད་པའི་དོན་གྱི་རྣམ་གྲངས་ཀྱིས་བཅུ་གསུམ་དུ་འགྱུར་བའི་ཕྱིར། ཁྱད་པར་དུ་མུན་པའི་རང་བཞིན་ཉིད་འཆད་དེ། དེ་ལ་སྦྱོར་བའི་ཀུན་གཞི་རང་བཞིན་ཆ་ཕྲ་བས་གཟུགས་ཀྱི་ཕུང་པོ་དངོས་སུ་སྣང་བ་མེད་པར་བརྟགས་པའི་མཚན་ཉིད་ཀྱི་མིང་བཞིའི་ཕུང་པོའི་མཚན་མའི་ཐ་སྙད་ཙམ་ལ་ཁ་བལྟས་ཏེ་མངོན་པར་ཞེན་ཅིང་རྟོག་པའི་ངོ་བོ་གསལ་བར་སྣང་བ་མེད་པ་དེ་ནི་གཟུགས་མེད་པའི་ཁམས་ལ་གནས་པ་ཉིད་ཡིན་པས་ཀུན་གཞི་དེ་ཡང་དེ་དང་ཆ་མཐུན་པ་ཁོ་ན་ཡིན་ཞིང་། ཀུན་གཞི་དེའི་བྱེད་པའི་ལས་ཀྱི་ཁྱད་པར་གྱིས་རྣམ་པར་ཤེས་པ་ཚོགས་བརྒྱད་དང་དྲུག་དང་སེམས་བྱུང་དང་བཅས་པ་ཀུན་གྱི་རྒྱུའི་ངོ་བོར་སྣང་བས་ཐམས་ཅད་འབྱུང་བའི་གཞིར་གྱུར་ལ། དེ་བས་ན་ཀུན་གཞི་དེ་ཉིད་རྒྱུའི་ཐེག་པ་སེམས་ཙམ་དང་དབུ་མའི་གྲུབ་མཐའ་འཛིན་པ་ཕལ་ཆེ་བས་སྣང་སེམས་ཀུན་གྱི་གཞི་ཤེས་པར་བྱ་བའི་ཆོས་སུ་བཞེད་པ་ཉིད་དེ། དེས་ན་འདིར་ཡང་དོན་གྱི་ཤེས་བྱར་མི་བཞེད་ཀྱང་། ཐ་སྙད་ཙམ་དུ། རྒྱན་སྟུག་པོ་བཀོད་པ་ལས། ཇི་ལྟར་ཁབ་ལེན་མཐོང་བ་དང་། །ལྕགས་ནི་མྱུར་བར་ཀུན་ཏུ་འཁོར། །འོན་ཀྱང་དེ་ལ་སེམས་པ་མེད། །སེམས་ལྡན་བཞིན་དུའང་རབ་ཏུ་སྣང་། །དེ་བཞིན་ཀུན་གཞི་རྣམ་ཤེས་ཀྱང་། །སེམས་མེད་སེམས་ཅན་ཇི་བཞིན་དུ། །འགྲོ་དང་འོང་བར་གཡོ་བ་སྟེ། །ས་རྣམས་འབྲི་བར་རབ་ཏུ་བྱེད། །ཅེས་དང་། འདི་ལྟར་སྣང་བ་གང་ཡང་རུང་། །མཚན་མ་གཟུགས་སུ་སྣང་བ་རྣམས། །བག་ཆགས་ལོག་པའི་ཀུན་གཞི་སྟེ། །ས་རྣམས་ཀུན་ན་གཟུགས་ལྟར་གནས། །ཇི་ལྟར་འོ་མ་གྱུར་པ་དང་། །ཡོན་ཏན་ཞོ་དང་དར་བར་སྣང་། །དེ་བཞིན་ཀུན་གཞི་རྣམ་ཤེས་ཀྱང་། །རྣམ་པར་གྱུར་ནས་གཟུགས་ལྟར་གནས། །ཞེས་དང་། གཟུགས་ཀྱི་ཡོན་ཏན་ལྡན་པའི་གཟུགས། །ཀུན་གཞི་གཟུགས་ལྟར་གནས་པ་སྟེ། །བྱིས་པ་ཇི་ལྟར་བརྟགས་པ་བཞིན། །གཟུགས་ནི་གུད་ན་ཡོད་པ་མིན། །ཞེས་གསུངས་པ་ལྟར། བརྟགས་པའི་སེམས་ཅན་དུ་སྣང་ཞིང་མཚན་མའི་དོན་དུ་སྣང་བའི་གཞིར་གྱུར་པས་ཕྱི་རོལ་གྱི་ཡུལ་སྣ་ཚོགས་པ་ཉིད་དུ་སྣང་བས་ན། དཔེར་ན་དགེ་སློང་མི་གཙང་བ་བསྒོམ་པས་སྤྱོད་ཡུལ་ཐམས་ཅད་རུས་པའི་ཕུང་པོར་སྣང་བ་ལྟ་བུར། ཡུལ་ཐམས་ཅད་ཀྱི་ཡང་རྩ་བ་ཀུན་གཞི་འཁྲུལ་པས་ཕྱི་རོལ་ཡུལ་གྱི་དངོས་པོ་སྣ་ཚོགས་སུ་སྣང་ཞིང་ས་བོན་ཐམས་ཅད་པ་ཡིན་པས་འཁོར་འདས་དང་དགེ་སྡིག་དང་ལམ་པའི་ལྟ་བ་ལ་སོགས་པ་ཀུན་ནས་ཉོན་མོངས་པའི་ཆོས་རྣམས་ཐམས་ཅད་འབྱུང་བར་བྱེད་པའི་རྒྱུ་དང་རྣམ་པར་བྱང་བའི་རྟེན་དུ་གྱུར་པ་ནི་སྦྱོར་བ་དོན་གྱི་ཀུན་གཞིའོ། །གཞི་དོན་གྱི་ཀུན་གཞིའི་རང་བཞིན་ནི། སྦྱོར་བ་དོན་གྱི་ཀུན་གཞི་རྐྱེན་བཞིས་འཁྲུལ་བདོ་ཙམ་ན། སྤྱིལ་པོའམ་ཁང་པ་ལྟ་བུར་རང་རེ་རྣམ་པར་གཙེས་པས་སྤྱི་འདུས་བདོ་བ་ཙམ་མེད་དེ། ཡེ་ཐོག་མ་ནས་རྣལ་མ་དོན་གྱི་ངོ་བོ་རང་བཞིན་ངང་གིས་མ་སྐྱེས་ལ་བྱེད་པ་པོས་མ་བཅོས་པར་ཐམས་ཅད་ལ་ཁྱབ་ཅིང་ངོས་བཟུང་དང་བྲལ་ཏེ་སྒྲིབ་བྱེད་མེད་པར་ཡོང་གིས་འོད་གསལ་བ་རྒྱུ་རྐྱེན་མེད་པར་རང་སྣང་ཡང་ངོ་བོ་འདུས་མ་བྱས་པ་ཆོས་ཉིད་སྐྱེ་བ་མེད་པའི་ངང་དེའོ། །དེའང་དྲི་བྲལ་གྱི་ཆོས་ཉིད་མིན་པར་དྲི་མ་དང་བཅས་པའི་གནས་ལུགས་ཡིན་པས། ཡང་འབྱེད་འཕྲུལ་གྱི་ལྡེ་མིག་ལས། ཀུན་གཞི་ཀུན་གཞི་ཞེས་བྱ་བ། །ཐམས་ཅད་ཀུན་གྱི་གཞིར་གྱུར་པས། །དེ་ཕྱིར་ཀུན་གཞིའི་མིང་དུ་བཏགས། །དཔེར་ན་ས་ལ་རྙོག་མི་ཟེར། །དེ་བཞིན་ཆུ་ལ་རྙོག་མི་ཟེར། །ས་ཆུ་འདྲེས་ལ་རྙོག་མར་བཏགས། །དེ་བཞིན་སེམས་ཅན་ཐམས་ཅད་ལ། །ཆོས་སྐུས་ཁྱབ་པར་གནས་པ་ལ། །དེ་ལ་ཀུན་གཞིར་མིང་མ་བཏགས། །རྣམ་རྟོག་མཚན་མར་གནས་པ་ལ། །དེ་ལ་ཀུན་གཞིར་མིང་མ་བཏགས། །ཆོས་སྐུ་ཆུ་དང་འདྲ་བ་ལ། །བག་ཆགས་ས་འདྲས་བསླད་པ་ལ། །ཀུན་གཞི་ཞེས་ནི་མིང་དུ་བཏགས། །ཞེས་གསུངས་པས་རང་བཞིན་གྱི་གསང་གནད་སྟོན་པའི་ངེས་ཚིག་འདི་ལ་བརྟེན་ནས་མཐར་ཐུག་གི་དོན་ལ་གསང་བ་སྙིང་ཏིག་གི་དགོངས་པ་ལྟར་ཀུན་མཁྱེན་ཆོས་ཀྱི་རྒྱལ་པོ་དང་དགོངས་པའི་བབ་སོ་གཅིག་ཏུ་ཤེས་པར་བྱའོ། །གཉིས་པ་ནི། ཡོངས་སུ་མ་ཆད། ཅེས་པ་ནས། སྐྱེ་འགག་བཅས་པའོ། །ཞེས་པའི་བར་གྱིས་བསྟན་ཏེ། ཀུན་གཞིའི་དམིགས་པའི་ཡུལ་ཇི་ལྟ་བུ་སྙམ་པ་ལ། བག་ཆགས་ཀྱི་ཀུན་གཞི་ནི། མིག་གི་རྣམ་པར་ཤེས་པས་གཟུགས་ཁོ་ན་ལ་དམིགས་པའམ། རྣ་བའི་རྣམ་པར་ཤེས་པས་སྒྲ་ཁོ་ན་ལ་དམིགས་པ་ལྟ་བུ་མ་ཡིན་པར་དམིགས་པ་དང་རྣམ་པ་ཡོངས་སུ་མ་ཆད་པར་དོན་དང་སེམས་ཅན་དང་ཀུན་བརྟགས་པའི་བག་ཆགས་ཐོག་མ་ནས་བསགས་པའི་དབང་གིས་གང་དུ་སྨིན་ཀྱང་དེའི་ཕྱི་སྣོད་དང་ནང་ཉེ་བར་ལེན་པའི་ཕུང་པོར་སྣང་བའི་ཡུལ་ཀུན་ལ་གཅོད་པ་ཡང་། ཡུལ་གྱི་རྣམ་པ་ཇི་ལྟ་བར་ཤེས་པ་ལ་ཚོགས་དྲུག་གི་རྟོག་པ་རགས་པས་སྒྲིབ་པས་གསལ་བར་མི་མངོན་པར་མི་གསལ་བའི་ཚུལ་དུ་བཤད་པ་བཞིན་དུ་ཚོགས་དྲུག་ལྟར་ཡུལ་རིགས་སུ་ཆད་པ་མ་ཡིན་པས་མ་སྒྲིབ་ལུང་མ་བསྟན་པའི་ངོ་བོས་ཡུལ་ལ་དམིགས་རྣམ་རྒྱུན་མ་ཆད་དེ་ལྔ་ཀུན་ཏུ་འགྲོ་བ་དང་བཅས་ཏེ་ཚོགས་དྲུག་སྐྱེ་བ་དང་ཡང་ལྷན་ཅིག་པར་འབྱུང་ངོ་། །ཆོས་ཐམས་ཅད་ལ་ཁྱབ་པར་འཇུག་ཅིང་ཡུལ་རིལ་ལ་གཅོད་པའང་སྒོ་ལྔ་ལྟར་རིས་མེད་པས་ཚོར་བ་བདེ་སྡུག་དང་མི་ལྡན་པར་བཏང་སྙོམས་ཀྱི་ཆོས་ཉིད་མ་ཆད་པ་དང་ལྡན་ཞིང་། རང་གི་ངོ་བོ་རགས་པའི་དངོས་པོ་མེད་པར་ཀུན་གཞིར་གྱུར་པའི་ས་བོན་ཐམས་ཅད་ལ་ཉིད་ཡིན་པས། ཡིད་ཀྱི་ཤེས་པ་ལ་སོགས་པ་ཚོགས་དྲུག་ལྟར་ཡུལ་ལ་གསལ་བའི་རྣམ་པར་མི་རྟོག་སྟེ། ཡུལ་ཅི་ལའང་འདི་དང་འདི་ཞེས་རགས་པའི་རྟོག་དཔྱོད་དང་བྲལ་བར་གནས་པའོ། །ཀུན་གཞིའི་མཚན་ཉིད་ཇི་ལྟ་བུ་ཞེ་ན། དེ་ལྟར་ཀུན་གཞི་ཅི་ལ་ཡང་མི་རྟོག་ཅིང་རིས་སུ་མ་དམིགས་པ་དེ་ཡི་ངང་དེ་ཉིད་ལ་ཤེས་པ་སྐད་ཅིག་མ་སྔ་ཕྱིར་རྒྱུ་བའི་གྲངས་མང་པོ་ཇི་སྙེད་པ་ཐམས་ཅད་བར་མ་ཆད་པར་རྒྱུན་དང་བཅས་པར་འབྱུང་བས་ན་དཔེར་ན་ཆུ་བོ་རྒྱུན་དུ་འབབ་པ་བཞིན་དུ། དེ་ཡང་སྐད་ཅིག་སྔ་མས་ཕྱི་མའི་རྒྱུ་བྱས་ནས་རྒྱུན་དུ་འབྱུང་ཞིང་ཕྱི་མ་སྐྱེ་ཙམ་ན་སྔ་མ་འགག་པ་དང་བཅས་ཏེ་སྤྱིའི་མཚན་ཉིད་སྐད་ཅིག་མའི་མི་རྟག་པ་དང་རྒྱུན་གྱི་རྟག་པའི་མཚན་ཉིད་དེ་དོན་གྱི་ངོ་བོ་གསང་བའི་དབྱིངས་ནི་མི་འགག་པར་གཟུགས་བརྙན་ལྟ་བུ་ལས་ངོ་བོའི་རྒྱུན་སྐད་ཅིག་མ་ལས་གྲོལ་བའོ། །གསུམ་པ་ནི། གཅིག་ཏུ་ཆད་པ་ཞེས་པ་ནས། ཐམས་ཅད་པ་ཉིད་དེ། །ཞེས་པའི་བར་གྱིས་བསྟན་ཏེ། དེ་ལ་ཀུན་གཞིའི་དམིགས་པའི་ཡུལ་དེ་ཡང་། གཏན་ལ་དབབ་པ་བསྡུ་བ་ལས། མདོར་བསྡུ་ན་ཀུན་གཞི་རྣམ་པར་ཤེས་པ་ནི་དམིགས་པ་རྣམ་པ་གཉིས་ཀྱི་འཇུག་སྟེ། ནང་གི་ལེན་པ་རྣམ་པར་རིག་པ་དང་། ཕྱི་རོལ་གྱི་སྣོད་རྣམ་པ་ཡོངས་སུ་མ་ཆད་པ་རྣམ་པར་རིག་པས་སོ། །དེ་ལ་ནང་གི་ལེན་པ་ནི་ཀུན་བརྟགས་པའི་ངོ་བོ་ཉིད་ལ་མངོན་པར་ཞེན་པའི་བག་ཆགས་དང་རྟེན་དང་དབང་པོའི་གཟུགས་སོ། །དེ་ཡང་གཟུགས་ཅན་གྱི་ཁམས་ནའོ། །གཟུགས་ཅན་མ་ཡིན་པ་ན་ནི་བག་ཆགས་ལེན་པ་ཁོ་ནར་ཟད་དོ། །དེ་ལ་ཕྱི་རོལ་གྱི་སྣོད་རྣམ་པ་ཡོངས་སུ་མ་བཅད་པ་རྣམ་པར་རིག་པ་ནི་ཀུན་གཞི་རྣམ་པར་ཤེས་པ་ནང་གི་ལེན་པའི་དམིགས་པ་གང་ཡིན་པ་དེ་ཉིད་ལ་བརྟེན་ནས། རྟག་ཏུ་རྒྱུན་མི་འཆད་པར་འཇིག་དང་སྣོད་ཀྱི་རྒྱུན་རྣམ་པར་རིག་པ་སྟེ། འདི་ལྟ་སྟེ། དཔེར་ན་མར་མེ་འབར་བ་ནི་སྙིང་པོ་དང་སྣུམ་གྱི་རྒྱུས་ནི་ནང་དུ་འཇུག་པར་འགྱུར་ལ། ཕྱི་རོལ་དུ་ནི་འོད་འབྱུང་བར་བྱེད་པ་བཞིན་དུ་ནང་གི་ལེན་པའི་དམིགས་པ་དང་། ཕྱི་རོལ་གྱི་དམིགས་པ་འདི་ལ་ཡང་ཀུན་གཞི་རྣམ་པར་ཤེས་པའི་ཚུལ་དེ་དང་འདྲ་བར་བལྟ་བར་བྱའོ། །དམིགས་པ་དེ་ནི་འཇིག་རྟེན་གྱི་མཁས་པ་རྣམས་ཀྱིས་ཀྱང་ཡོངས་སུ་གཅད་པར་དཀའ་བའི་ཕྱིར་ཕྲ་བ་ཡིན་ནོ། །ཞེས་དང་། རྒྱན་སྟུག་པོ་བཀོད་པ་ལས། ཀུན་གཞི་ཟབ་པ་ཉིད་དག་ཀྱང་། །བློ་ཆུང་རྣམས་ཀྱིས་མ་རིག་པས། །སྒྱུ་མའི་རི་དྭགས་བཞིན་དུ་འཁོར། །རང་བཞིན་གཅིག་མིན་ཤེས་པར་དཀའ། །ཞེས་གསུངས་པ་ལྟར་ཀུན་གཞིིའི་ཡུལ་མ་ཡིན་པར་མེད་པས། རང་གི་མཚན་ཉིད་ཕྱོགས་གཅིག་ཏུ་རྒྱ་ཡོངས་སུ་ཆད་པ་མེད་པ་ཡི་རྣམ་པར་ཤེས་པ་ཡིན་པས། དམིགས་རྣམ་སོ་སོ་ནས་གསལ་བའི་ཕྱོགས་རིས་ཅན་དུ་ཤར་བའི་ཚོགས་དྲུག་ལྟར་ཕྱོགས་གཅིག་པར་གྱུར་ཏེ་མི་སྣང་བ་ཉིད་དེ། དེས་ན་སུ་ཞིག་འདི་ནི་ཀུན་གཞིའི་ཡུལ་ལོ། །འདི་ནི་མ་ཡིན་ནོ། །ཞེས་ཀུན་གཞིའི་ཡུལ་ལ་བྱེ་བྲག་རྣམ་པར་འབྱེད་པ་ནི་འདི་དང་འདི་ཞེས་བློ་རྩིང་པོས་རྣམ་པར་དབྱེ་བ་ག་ལ་ཡོད་དེ་མེད་པས་ན་ཚོགས་དྲུག་དང་མི་མཚུངས་པའོ། །དེའི་ཕྱིར། དཔེར་ན་ཀུན་གཞི་རྒྱལ་པོ་ལྟ་བུ་དང་། ཡིད་བློན་པོ་ལྟ་བུ་དང་། སྒོ་ལྔ་དམངས་ལྟ་བུའོ། །དེ་ཅིའི་ཕྱིར་ཞེ་ན། ཡུལ་ཐམས་ཅད་ཀྱི་བདག་ཉིད་ཡིན་པས་ཕྱོགས་རིས་སུ་འཛིན་པ་དང་བྲལ་བས་འཁོར་བ་དང་མྱང་འདས་ཕྱི་སྣོད་དང་ནང་ཉེར་ལེན་གྱི་ཕུང་པོར་གྱུར་པའི་དགེ་སྡིག་དང་སྣོད་བཅུད་ཀྱི་དངོས་པོ་ཐ་སྙད་གཉིས་ཀྱིས་བསྡུས་པའི་ཆོས་ཇི་སྙེད་པར་གྲགས་པ་རིལ་ཡིན་པས། སྣོད་ཐམས་ཅད་དང་བཅུད་ཐམས་ཅད་པ་ཉིད་དེ་ཀུན་གྱི་བག་ཆགས་ཀྱི་གཞི་ཡིན་པའི་ཕྱིར་དམིགས་པ་རྒྱ་ཆེ་ཞིང་རྣམ་པ་མི་གསལ་བར་ངེས་པའོ། །བཞི་པ་ནི། ཀུན་འགྲོ་ཀུན་འཇུག །ཅེས་པ་ནས། གསོག་དང་ལེན་པ་ཡིན། །ཞེས་པའི་བར་གྱིས་བསྟན་ཏེ། དེའང་འཆད་པའི་འཁོར་ཀུན་ཏུ་འགྲོ་བ་ལྔ་དང་ལྡན་ཏེ་རྣམ་པར་ཤེས་པའི་ཚོགས་བདུན་པོ་ཀུན་དང་འཇུག་པ་མཚུངས་པར་མཐོ་རིས་དང་ངན་སོང་གི་ཡུལ་ཀུན་ལ་སྦྱོར་བར་བྱེད་པས་ཡུལ་གྱི་དངོས་པོར་རིག་ནས་དམིགས་པ་མ་ཆད་པར་གཅོད་ཀྱང་ངོ་བོ་བླུན་པར་གྱུར་པས་འདི་ནི་འདིའོ་ཞེས་ཡུལ་ཐ་དད་པ་སྣ་ཚོགས་སུ་དབྱེར་ཞེས་དབྱེ་སྟེ་མི་རིག་པས་བྱེ་བྲག་སོ་སོར་གཅོད་པར་མི་ནུས་སོ། །འོ་ན་ཀུན་གཞི་ཉིད་འཁོར་དུ་དང་མཚུངས་པར་ལྡན་ཞེ་ན། ཐུན་མོང་གི་འཁོར་ནི་ལྔ་ཀུན་ཏུ་འགྲོ་བ་དང་ལྡན་ཏེ། སུམ་ཅུ་པ་ལས། དེ་ལ་ཀུན་གཞི་རྣམ་ཤེས་ནི། །རྣམ་སྨིན་ས་བོན་ཐམས་ཅད་པ། །དེ་ནི་ལེན་པ་དག་དང་གནས། །རྣམ་པར་རིག་པ་མི་རིག་པ། །རྟག་ཏུ་རེག་དང་ཡིད་བྱེད་དང་། །ཚོར་དང་འདུ་ཤེས་སེམས་པར་ལྡན། །ཞེས་གསུངས་པ་ལྟར། སེམས་ཡུལ་ལ་གཡོ་ཞིང་བསྐྱོད་པར་བྱེད་པ་འདུ་བྱེད་སེམས་པ་ཉིད་དང་། སེམས་ཡུལ་ལ་གཏོད་ཅིང་རྣམ་པར་བཀོད་པའམ་འགོད་པར་བྱེད་པ་ཡིད་ལ་བྱེད་པ་དང་། ཡུལ་གྱི་དངོས་པོ་བཟང་ངན་གྱི་ཁྱད་པར་ཕན་པ་དང་གནོད་པ་དང་གཉིས་ཀ་ལས་ཟློག་པའི་མཚན་ཉིད་གང་ཡིན་པ་ཁོ་ན་ཡོངས་སུ་མྱོང་བར་བྱེད་པ་ཚོར་བ་དང་། གསུམ་འདུས་ནས་དམིགས་རྣམ་མ་ཆད་པར་ཡུལ་ཀུན་ཡོངས་སུ་གཅོད་པས་རེག་པ་དང་། ཡུལ་དེ་ཉིད་ལ་མཚན་མར་འཛིན་པར་བྱེད་པའི་འདུ་ཤེས་ཏེ། ལྔ་རྣམས་དང་མཚུངས་པར་ལྡན་ནོ། །དེས་ན་ལུང་ལས་ཀྱང་གསུམ་འདུས་པ་གང་ཡིན་པ་དེ་ནི་རེག་པའོ། །རེག་པ་དང་ལྷན་ཅིག་སྐྱེས་པ་ནི་ཚོར་བ་དང་སེམས་པ་དང་འདུ་ཤེས་ཡིན་པས་དབང་པོ་ཐ་མི་དད་པ་ཡིན་ལ། དེ་ལས་བྱུང་བ་ཡིད་ལ་བྱེད་པའང་ཉེ་བར་གནས་པར་འགྱུར་རོ། །ཞེས་གསུངས་པ་ཉིད་དོན་གསང་དུ་དྲངས་སོ། །དེ་བཞིན་དུ་ཁམས་གསུ མ་གྱི་སེམས་ཡོད་དོ་ཅོག་དང་ལྷན་ཅིག་འབྱུང་ཞིང་། རྣམ་ཤེས་བརྒྱད་ཆར་ལའང་རྫོགས་ཏེ་ལས་གསུམ་གྱི་སྐབས་སུ་འབྱུང་བའི་ཕྱིར། ཁྱད་པར་གྱི་འཁོར་ནི་ཀུན་གཞི་ཉིད་མ་ཡིན་པའི་སེམས་རྣམ་པར་ཤེས་པ་ཚོགས་བདུན་དང་ཡང་མེ་ལོང་དང་གཟུགས་བརྙན་ནམ་ཆུའི་རྒྱུན་དང་རྦ་རླབས་ལྟར་དུ་ལྡན་པ་ཉིད་ཡིན་ལ། དེ་ནི་འབྲས་བུའི་ཡན་ལག་ཀྱང་ཡིན་ནོ། །འོ་ན་ཚོར་བ་ལ་བདེ་སྡུག་བཏང་སྙོམས་གསུམ་ཡོད་པས་ཀུན་གཞི་གང་དང་མཚུངས་པར་ལྡན་ཞེ་ན། རྩ་བའི་རྣམ་ཤེས་དེ་ནི་ཡུལ་གྱི་ཆོས་ཀུན་ལ་བཏང་སྙོམས་དང་ལྡན་པ་ཡིན་པས། བདེ་བ་དང་སྡུག་བསྔལ་གཉིས་དང་མི་ལྡན་པར་ཚོར་བ་བཏང་སྙོམས་ཁོ་ན་དང་ལྡན་ཏེ། ཚུལ་དེས་ཀུན་འགྲོ་གཞན་ཀུན་ཡང་མཚོན་པར་ནུས་པས་ན། བསྡུ་བ་ལས། སེམས་ལས་བྱུང་བ་དེ་དག་ལས་ཀྱང་ཀུན་གཞི་རྣམ་པ་ཤེས་པ་དང་མཚུངས་པར་ལྡན་པའི་ཚོར་བ་གང་ཡིན་པ་དེ་ནི་གཅིག་ཏུ་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་དང་ལུང་དུ་མ་བསྟན་པ་ཡིན་ནོ། །དེ་ཉིད་ཀྱིས་དེ་ལས་གཞན་པའི་སེམས་ལས་བྱུང་བའི་ཆོས་རྣམས་ཀྱང་རྣམ་པར་བཤད་པ་ཡིན་ནོ། །ཞེས་སོ། །དེ་བཞིན་དུ་བསྒོ་བྱེད་ཚོགས་བདུན་གྱིས་བཞག་པས་འདྲིས་པའི་ལས་ཀྱི་བག་ཆགས་སྐྱེ་འགག་ལྷན་ཅིག་འབྱུང་བའི་ཚུལ་གྱིས་དགེ་སྡིག་ལུང་མ་བསྟན་གང་ཡང་རུང་བ་ཞེན་པ་དེ་ཉིད་འཛིན་ཅིང་དུས་ཀུན་ཏུ་མི་གཏོང་བ་ཉིད་དེ། བག་ཆགས་ཀྱི་ཡུལ་གནས་བཟང་ངན་ལྟ་བུ་རིས་སུ་འབྱེད་ནས་མི་ཤེས་སོ། །འོ་ཀུན་གཞིའི་ཆོས་ནི་གང་ཞེ་ན། ཀུན་གཞི་ལས་བག་ཆགས་ཀྱིས་འབྲས་བུ་སྐྱེད་པ་ནི། དཔེར་ན་ཀུན་འབྱུང་ཞིང་གོ་སྐབས་འབྱེད་པར་ཡོད་པས་མི་སྒྲིབ་པར་སྣང་བའི་ནམ་མཁའ་ལྟར་དུ། ཀུན་གཞི་ལ་འཁོར་བ་དང་མྱ་ངན་ལས་འདས་པའི་ཆོས་ཀུན་གྱི་གནས་པ་དང་འབྱུང་བའི་གོ་སྐབས་འབྱེད་པ་ཡོད་པ་ཉིད་པས་འཁོར་འདས་གཉིས་ཀ་འབྱུང་ཞིང་སྣང་བར་བྱེད་པའོ། །འོ་ན་ཀུན་གཞིའི་ལས་ཇི་ལྟ་བུ་ཞེ་ན། ལས་ཀྱི་བག་ཆགས་ཀྱིས་རྣམ་པར་ཤེས་པ་ཚོགས་བདུན་གྱི་བྱེ་བྲག་སྔར་མ་སྐྱེས་པ་སྐྱེད་པའི་རྒྱུའི་བྱ་བ་ཀུན་གཞི་བག་ཆགས་དང་བཅས་པས་མཚུངས་པར་བྱེད་པ་དང་། ཀུན་ནས་ཉོན་མོངས་པ་དང་རྣམ་པར་བྱང་བའི་ཡང་གཞི་དང་རྟེན་གྱི་ཕྱིར་རྣམ་པར་སྨིན་པའི་བག་ཆགས་རྣམས་མཐུ་བརྟས་ཏེ་སྨིན་པར་ངེས་པའི་སྟོབས་ཅན་དུ་བྱེད་པ་དང་རྒྱུ་མཐུན་པ་དང་རྣམ་པར་སྨིན་པའི་བག་ཆགས་གསོག་པའི་ཉོན་མོངས་རྣམས་ཀྱི་སྣོད་ལྟ་བུར་གྱུར་པ་དང་། སྐྱེ་བ་སྔ་ཕྱི་མཚམས་སྦྱོར་བར་བྱེད་པས་སྔར་མ་བླངས་པའི་ལུས་ལེན་པར་བྱེད་པ་ཡིན་པས་བྱེད་པའི་ལས་ནི་བཞི་བྱེད་པའོ། །ལྔ་པ་ནི། རྐྱེན་ནི་གཉིས་དང་། ཞེས་པ་ནས། གང་ཕྲད་དེ་ཉིད་དུའོ། །ཞེས་པའི་བར་གྱིས་བསྟན་ཏེ། ཀུན་གཞི་ནི་ལུང་དུ་མ་བསྟན་པ་ཡིན་པས། དགེ་བ་དང་སྡིག་པའི་རྐྱེན་ནི་གཉིས་དང་མངོན་དུ་མི་ལྡན་ཏེ། གཏན་ཚིགས་ཅིའི་ཕྱིར་ན་མཐོ་རིས་དང་ངན་སོང་གཉིས་ཀར་འགྱུར་བས་རིགས་མ་ངེས་པ་དེ་ཉིད་འདི་ཁོ་ན་དང་ལྡན་ནོ་ཞེས་ཕྱོགས་གཅིག་པར་གཟུང་དུ་མེད་པའི་ཕྱིར། ཞེས་པའམ། ཡང་ན་དེ་མ་ཐག་པ་དང་དམིགས་པའི་རྐྱེན་ནི་གཉིས་དང་མི་ལྡན་ཏེ། དེ་མ་ཐག་རྐྱེན་མེད་དེ། དེ་ནི་རྣམ་པར་ཤེས་པ་གང་ཞིག་མངོན་དུ་གྱུར་ན་རྣམ་ཤེས་གཞན་སྐྱེ་བའི་གེགས་བྱེད་པ་ལ་འགགས་ན་སྐབས་འབྱེད་པས་སྐྱེ་བ་དང་མཐུན་པར་འགྱུར་བའི་ཕྱིར་བཞག་པའི་སྐད་ཅིག་སྔ་མ་ཡིན་ན། སྔ་མ་འགགས་པས་ཕྱི་མ་ལ་ཕན་འདོགས་ན། ཁྱིམ་བྱ་ཤི་བ་ཡང་སྐད་འདོན་པར་འགྱུར་བ་ལྟར་བཤད་པས་དོན་གསང་ལས་ཀུན་གཞིའི་རྣམ་ཤེས་མངོན་དུ་གྱུར་བཞིན་དུ་འཇུག་པའི་རྣམ་ཤེས་སྐྱེ་བ་ཡོད་པར་གསུངས་པ་དང་། དམིགས་རྐྱེན་ཀྱང་མེད་དེ། སེམས་དང་སེམས་ལས་བྱུང་བ་ཐམས་ཅད་གང་ནས་འཆར་བའི་ཡུལ་ལོགས་སུ་མེད་པས་ན་མིག་ལ་སོགས་པའི་རྣམ་པར་ཤེས་པས་མངོན་སུམ་དུ་མི་དམིགས་པའི་ཕྱིར་རོ། །དེས་ན་དུས་དང་ཡུལ་རྒྱ་ཆད་ཅན་དུ་མ་ངེས་པར་ཀུན་གཞི་དེ་ཉིད་ལུང་མ་བསྟན་ཁོ་ན་ལ་ངེས་པ་ཡིན་ནོ། །ལམ་གྱི་དབང་དུ། དེ་མ་ཐག་པའི་རྐྱེན་རང་གི་ཤེས་རབ། དེའི་རྒྱུ་སྔ་མའི་བསགས་པ་དང་། དམིགས་པའི་རྐྱེན་གསང་བ་སྟོན་པའི་བླ་མ། དེའང་དབང་པོ་ཚང་བ་གཞན་ལ་ཕན་འདོགས་པའོ། །ཞེས་ཀྱང་གསུངས་པས་དེ་ལྟར་ཕྱོགས་གཅིག་གི་རྐྱེན་དུ་མ་ངེས་པའང་ཡིན་ནོ། །དེའི་ཕྱིར་ཆོས་མངོན་པའི་མདོ་ལས། ཆོས་ཀུན་ས་བོན་ཐམས་ཅད་པའི། །རྣམ་པར་ཤེས་པ་ཀུན་གཞི་སྟེ། །དེ་བས་ཀུན་གཞིའི་རྣམ་ཤེས་དེ། །དམ་པ་དག་ལ་ངས་བཤད་དོ། །ཞེས་གསུངས་པ་ལྟར། ས་བོན་དང་དུས་ཐམས་ཅད་པ་ཡིན་པས་རྡོ་རྗེ་ལྟ་བུའི་ཏིང་ངེ་འཛིན་མ་སྐྱེས་ཀྱི་བར་དུ་ནི་གནས་པ་ཡིན་པས་ཀུན་གཞིའི་ས་བོན་དེ་ཉིད་འཕྲལ་ལ་རྐྱེན་གྱིས་བསྒྱུར་ཏེ་ལས་དགེ་སྡིག་གི་རྐྱེན་ཉིད་གང་དང་ཕྲད་པ་དེ་ཉིད་ཀྱིས་བསྐུལ་བས་ས་བོན་བརྟས་པ་སད་པ་དེའི་དབང་དུ་འགྱུར་བས་བཟང་ངན་དུ་སྣང་བའི་གཞི་རྟེན་དུ་གནས་པའོ། །ཡང་ན་ལམ་གྱི་རྐྱེན་ཁྱད་པར་གང་དང་ཕྲད་པ་ལྟར་དེ་ཉིད་ཀྱི་རྟེན་དུའང་རུང་བའོ། །ས་བོན་གྱི་ཆ་དེ་ཉིད་ལྡོག་པའི་དུས་ནི་གཉིས་ཏེ་མཐོང་སྤང་གི་ས་བོན་གྱི་ཆ་ནི་མཐོང་ལམ་སྐྱེས་པ་ན་ལྡོག་ལ། སྒོམ་སྤང་གི་ས་བོན་གྱི་ཆ་ནི་སྒོམ་ལམ་སྐྱེས་པ་ན་ལྡོག་གོ། །དེས་ན་ས་བོན་དང་རྣམ་སྨིན་ཐམས་ཅད་ལྡོག་པའི་དུས་ནི་རྡོ་རྗེ་ལྟ་བུའི་ཏིང་ངེ་འཛིན་ནམ་མཐར་ལམ་ཐ་མ་སྐྱེས་པ་ནའོ། །དྲུག་པ་ལ་གཉིས་ཏེ། །མདོར་བསྟན་པ། རྒྱས་པར་བཤད་པའོ། །དང་པོ་ནི། ཆོས་རྣམས་རྩ་བར། ཞེས་པ་ནས། ཤེས་པའི་ཁྱད་པར་སྣང་། །ཞེས་པའི་བར་གྱིས་བསྟན་ཏེ། འོ་ན་དབྱེ་བ་དང་ཁྱད་པར་ཅི་ལྟ་བུ་ཞིག་ཞེ་ན། ཀུན་ནས་ཉོན་མོངས་པ་དང་། རྣམ་པར་བྱང་བའི་ཆོས་རྣམས་ཀུན་གྱི་རྩ་བར་ཀུན་གཞི་གྱུར་པར་དབྱེར་མེད་པར་གཅིག་པ་ལ། ཀུན་གཞི་དེ་ཡི་རྒྱུན་རིག་པ་དང་མ་རིག་པའམ་རྟོགས་མ་རྟོགས་ཀྱི་དབང་གིས་སྐད་ཅིག་མའི་རྒྱུན་གྱིས་བཟང་ངན་གྱི་ཁྱད་པར་དབྱེ་བའི་གྲངས་རྣམ་པ་གཉིས་སུ་སྣང་བ་ཉིད་དེ། གང་ཞེ་ན། འཁོར་བའི་གཞི་དང་མྱང་འདས་ཀྱི་རྟེན་ཞེས་པའི་དབྱེ་བ་གཉིས་སུ་གྲགས་པ་ཡིན་ལ། དེའང་ཀུན་ནས་ཉོན་མོངས་པའི་གཞིར་གྱུར་པས་རྨོངས་པ་དང་། རྣམ་པར་བྱང་་བའི་རྟེན་དུ་གྱུར་པས་ཡེ་ཤེས་དང་ལྡན་པའི་ཁྱད་པར་དུ་སྣང་བའོ། །དེ་ལྟར་ཀུན་གཞིས་དངོས་པོ་གཉིས་ཀྱི་ས་བོན་གཟུང་ནས་བསྐྱེད་པའི་ཚོགས་བདུན་ཉིད་ལས་ཀྱང་ཁྱད་པར་དུ་འཕགས་སོ། །དེར་མ་ཟད་ས་བོན་ཅན་གྱི་ཕྱིར་ཀུན་གཞི་ནི་རྒྱུ་དང་། དེ་ལས་ལས་དང་མཐུན་པའི་འབྲས་བུའི་རྒྱུད་དུ་སྣང་བའི་ཕྱིར་རྒྱུ་འབྲས་ཀྱི་དབྱེ་བར་ཡང་འགྱུར་རོ། །གཉིས་པ་ལ་གཉིས་ཏེ། འཁོར་བའི་གཞི་བཤད་པ། རྣམ་བྱང་གི་རྟེན་བསྟན་པའོ། །དང་པོ་ནི། གཞི་ལ་ཀུན་འགྲོ། ཞེས་པ་ནས། བསྟི་གནས་མེད། །ཅེས་པའི་བར་གྱིས་བསྟན་ཏེ། དེ་གཉིས་རེ་རེ་ནས་བསྟན་པའི་ཕྱིར། རྣམ་གྲངས་དང་པོ་ཀུན་ནས་ཉོན་མོངས་པའི་གཞི་རུ་གྱུར་པ་ལ་ནི། འགྲོ་བ་རིགས་དྲུག་གི་གནས་རིས་ཀུན་ཏུ་འགྲོ་ཞིང་སྐྱེ་བ་དང་། ཤེས་བྱ་ཀུན་ལ་རྨོངས་པར་སྣང་བས། ཀུན་ནས་ཉོན་མོངས་པའི་བག་ཆགས་འཁོར་བའི་ཆོས་ལ་རྣམ་པར་ཞེན་པ་དང་མི་འབྲལ་བའི་དབང་གིས། ས་བོན་ངན་པས་ནོན་ཞིང་བསྒོས་ཏེ། རྣམ་པར་ཐར་པའི་ལམ་རྣམས་དང་བྲལ་བའི་ཕྱིར། རྣམ་པར་བྱང་བའི་རྟེན་ཙམ་ལས་མེད་པའམ་འཁོར་བ་ལས་དབུགས་ཕྱིན་ནས་བསྟི་གནས་སུ་སྣང་བ་མེད་དེ། དཔེར་ན་དུག་གི་བུམ་པ་ལ་མ་གི་ཏའི་ཐིགས་པ་རྟེན་བཅས་པ་ལྟ་བུའོ། །གཉིས་པ་ནི། རྟེན་ནི་གཞི་སྦྱོར། ཞེས་པ་ནས། སྣང་བས་ལྔར་བཤད་དོ། །ཞེས་པའི་བར་གྱིས་བསྟན་ཏེ། འདི་དག་སྤྱིར་རྒྱུའི་ཐེག་པ་དང་རིམ་གྱིས་པ་ལའང་སྦྱར་ཏེ་གྲོང་ཁྱེར་གསུམ་གྱི་ལམ་ཞུགས་ལྟ་བུའོ། །ཕལ་ཆེར་གསང་སྔགས་ཀྱི་ལམ་ཡིན་པས་ཚེ་གཅིག་ལ་ལམ་ལྔ་རྫོགས་པ་དང་སྦྱར་རོ། །དེ་ཡང་རྣམ་པར་བྱང་བའི་རྟེན་དུ་གྱུར་པའི་ཚུལ་ནི། གཞི་ཉིད་རྒྱུའི་ཀུན་གཞི་འདུན་པའི་རྣལ་འབྱོར་པའི་དུས་དང་། སྦྱོར་བ་འདུན་པའི་ཀུན་གཞི་རིགས་ཆེན་འབྱེད་པ་པ་དང་། སྣང་བ་དོན་གྱི་ཀུན་གཞི་དབུགས་ཆེན་འབྱིན་པ་པ་དང་། འགྱུར་མེད་རྣམ་པར་དག་པའི་ཀུན་གཞི་ལུང་ཆེན་ཐོབ་པ་པ་དང་། བརྩལ་མེད་གནས་པའི་ཀུན་གཞི་རྩལ་ཆེན་རྫོགས་པ་པ་དང་ལྔ་སྟེ་ཐུན་མོང་དུ་ཚོགས་སྦྱོར་མཐོང་སྒོམ་ཁྱད་པར་རམ་མཐར་ལམ་དུ་གྱུར་པའོ། །དེ་ལྟར་ཀུན་གཞི་ལྔ་པོ་དེ་དག་རེ་རེ་ཞིང་ཡང་རྒྱུ་དང་འབྲས་བུ་གཉིས་སུ་ཡོད་པ་ནི། ཕལ་པའི་སེམས་བརྒྱད་སྐྱེས་ནས་འགྱུར་དབང་མ་ངེས་པ་ཡན་ཆད་ལམ་སྔ་མ་སྔ་མ་གང་དང་གང་ཡིན་པ་དག་ནི་རྒྱུ་ཡིན་ལ་ལམ་ཕྱི་མ་ཕྱི་མ་དག་ནི་སྨིན་པར་གྱུར་པའི་འབྲས་བུ་ཡིན་པས་དེ་ལྟར་རྒྱུ་འབྲས་ཀྱི་འབྲེལ་བ་ཡོད་པའི་རིམ་པ་ལྟར་བསྟན་པ་ཡིན་ནོ། །དེ་བཞིན་དུ་སྐབས་གང་ལའང་རྒྱུ་འབྲས་གཉིས་སུ་འབྲེལ་ཏེ་ཀུན་ཏུ་འཁོར་བར་འབྱུང་བ་ཡིན་ནོ། །དེ་བས་ན་རྩ་བའི་རྒྱུད་ལས་ཀྱང་། ཆོས་རྣམས་ཀུན་གཞིར་གཅིག་པ་ལ། །ཀུན་གཞི་གནས་གྱུར་རྣམ་པ་ལྔས། །བྱེ་བྲག་ལམ་གྱི་ཆོས་སུ་སྣང་། །གཞི་ཉིད་རྒྱུ་ཡི་ཀུན་གཞི་དང་། །སྦྱོར་བ་འདུན་པའི་ཀུན་གཞི་དང་། །སྣང་བ་དོན་གྱི་ཀུན་གཞི་དང་། །འགྱུར་བ་མེད་པའི་ཀུན་གཞི་དང་། །བརྩལ་མེད་གནས་པའི་ཀུན་གཞི་ལྔ། །སྐབས་ལྔ་དག་ཏུ་གནས་གྱུར་པས། །ས་ཡི་ཁྱད་པར་བགྲོད་པ་ཡིན། །དེ་ཡང་གཉིས་ཀྱི་ཆོས་འདི་དག །ཀུན་ཀྱང་ཡོངས་ཀྱི་རྣལ་འབྱོར་དང་། །འགྲོ་དོན་གསུམ་གྱིས་འགྲོ་བ་སྟེ། །དགེ་དོན་དང་ནི་སྒྲུབ་པ་པོ། །རིགས་འཛིན་ཞེས་ནི་རྫོགས་པ་ཡིན། །ཞེས་གསུངས་སོ། །དེ་ཡང་ས་བོན་རྒྱུའི་གཞི་རྟེན་ནི་རྐྱེན་གྱིས་བསྒྱུར་བ་ལས་ཀྱི་བག་ཆགས་དང་། ཉོན་མོངས་མངོན་དུ་རྒྱུ་བའི་བག་ཆགས་དང་། ལྟ་བར་ཆེད་དུ་འཛིན་པ་ཀུན་ཏུ་རྒྱུ་བའི་བག་ཆགས་དང་། སྒོམ་པ་ཆེད་དུ་བྱེད་པ་ལྷན་ཅིག་སྐྱེས་པའི་བག་ཆགས་དང་། ཀུན་གཞི་ཆ་ཕྲ་བའི་རང་ངོ་བག་ལ་ཉལ་བའི་བག་ཆགས་དང་ལྡ་ནི་རྟེན་དུ་གྱུར་པས་བག་ཆགས་དེ་དག་ཀུན་གཞི་ལ་གནས་པའང་རིམ་པ་བཞིན་དེ། དེ་ཡི་རྒྱུན་མ་ཆད་པའི་མཐུ་དང་སྟོབས་ཀྱི་དབང་གིས་ན། ཀུན་གཞི་འོག་ནས་གོང་དུ་གནས་གྱུར་པ་ལས་རྣལ་འབྱོར་ལྔར་སྣང་བ་ནི་བཤད་པའི་ལས་དང་པོ་པའམ་འདུན་པ་སེམས་པའི་རྣལ་འབྱོར་དང་། སྤྱོད་པ་རྒྱུན་གྱིའམ་རིགས་ཆེན་འབྱེད་པའི་རྣལ་འབྱོར་དང་། དབུགས་ཆེན་འབྱིན་པའི་རྣལ་འབྱོར་དང་། ལུང་ཆེན་ཐོབ་པའི་རྣལ་འབྱོར་དང་། རྩལ་ཆེན་རྫོགས་པའི་རྣལ་འབྱོར་དང་ལྔའོ། །གཉེན་པོ་ལྔ་ནི་ཤེས་པ་ལྔ་སྟེ། གང་ཞེ་ན། རིམ་པ་བཞིན་བྱང་ཆུབ་འདོད་པ་ཤེས་པ་དང་། ཆོས་ཀྱི་རྣམ་པར་ཤེས་པ་དང་། ཐམས་ཅད་ཤེས་པ་དང་། ཡོངས་སུ་ཤེས་པ་དང་། ཤེས་པ་ཆེན་པོའོ། །ལྔ་པོ་དེས་བག་ཆགས་ལྔ་འཇོམས་པ་དང་སྤོང་བ་གཉིས་ཀར་འགྱུར་རོ། །སར་སྨིན་པའི་དཔེ་ལྔ་ནི། ས་བོན་དང་། མྱུ་གུ་དང་། ལོ་འདབ་དང་། མེ་ཏོག་དང་། འབྲས་བུ་ལྟ་བུའོ། །ས་ལ་སྦྱོར་པའི་དཔེ་ཡང་སྔ་མ་དང་གྲངས་འདྲ་བར་ལྔ་སྟེ། རས་བལ་དང་། སྣམ་བུ་དང་། བཀྲུ་བཅག་དང་། ཇེ་ན་ཚུར་དང་། ཚོས་ལྟ་བུ་སྟེ་དེ་བཅུའང་སྐབས་ལྔ་ལ་རིམ་པར་འབྱུང་བའི་ཕྱིར། སེམས་ཅན་གྱི་སྐབས་དང་། འཕགས་པའི་སྐབས་དང་། ས་ཐོབ་པའི་སྐབས་དང་། རིག་འཛིན་བྱང་ཆུབ་ཐོབ་པའི་སྐབས་དང་། འབྲས་བུ་ཐོབ་པའི་སྐབས་སོ། །ལམ་ལྔ་ནི། ཚོགས་ལམ་དང་། སྦྱོར་ལམ་དང་། མཐོང་ལམ་དང་། སྒོམ་ལམ་དང་། མཐར་ཕྱིན་པའི་ལམ་མོ། །དེ་བཞིན་དུ་ས་ལྔ་སྟེ། འགྱུར་དབང་མ་ངེས་པའི་ས་དང་། བསོད་ནམས་གཏེར་གྱི་ས་དང་། རྟེན་པས་ཁྱད་པར་དུ་འགྲོ་བའི་ས་དང་། དམིགས་པས་འབྲས་བུ་ཐོབ་པའི་ས་དང་། གནས་པ་མི་འགྱུར་བའི་ས་དང་ལྔའོ། །དེ་ནས་ལམ་ལ་གནས་པ་དང་མཐུན་པའི་ས་ལྔ་སྟེ། མོས་པ་སྤྱོད་པའི་ས་དང་། སེམས་དཔར་སྦྱོར་བའི་སའམ་གལ་ཆེན་སྤྱོད་པའི་ས་དང་། མི་ལྡོག་གནས་པའི་ས་དང་། དམིགས་པས་འབྲས་བུ་སྐྱེ་བའི་ས་དང་། རྩལ་ཆེན་རྫོགས་པའི་སའོ། །འདི་དག་རིམ་པར་ངེས་པས་མཚོན་པར་ཟད་ཀྱིས། དོན་ལ་ཨ་ནུའི་ས་བཅུ་དང་སྦྱར་ཏེ། དང་པོ་ལྔ་འཇིག་རྟེན་པའི་ས་དང་། ཕྱི་མ་ལྔ་འདས་པའི་སར་བྱས་ནས་ལྔ་ཕྲག་གཉིས་སུ་བགྲང་ཡང་ས་ལམ་རྫོགས་པ་ན་གནད་གཅིག་ཏུ་འབབ་པར་འགྱུར་ཞིང་རྒྱུ་འབྲས་ཀྱི་ངེས་པར་ཡང་འགྲིག་གོ། །ས་འདི་རྣམས་ལའང་། རྒྱུའི་ཐེག་པས་ཞི་ལྷག་ལ་སྤྱོད་ཀྱང་། གསང་སྔགས་པས་སྣང་སྟོང་དབྱེར་མེད་དུ་གསལ་བར་བྱེད་དོ། །བསྟི་གནས་ལྔ་ནི། ལས་སྤྱོད་པའི་བསྟི་གནས། བསླབ་པ་སྤྱོད་པའི་བསྟི་གནས། མཚན་མའི་རྒྱུད་སྦྱོང་བའི་བསྟི་གནས། སྒྱུ་མ་སྦྱོང་བའི་བསྟི་གནས། ཡེ་ཤེས་རྩལ་གྱི་བསྟི་གནས་སོ། །དུས་ངེས་པ་ལྔ་ནི། དྲན་པ་ཐོབ་པའི་དུས་དང་། སྤྱོད་པ་ཐོབ་པའི་དུས་དང་། རྟོགས་པ་ཐོབ་པའི་དུས་དང་། གོམས་པ་ཐོབ་པའི་དུས་དང་། ངེས་པ་ཐོབ་པའི་དུས་དང་ལྔའོ། །གནས་ལྔ་ནི། འདོད་པ་གྲུབ་པ་མཐར་ཕྱིན་པའི་གནས་དང་། བཟོད་པ་གྲུབ་པ་འཕགས་པའི་གནས་དང་། བདེན་པ་གྲུབ་པ་ཡང་དག་པའི་གནས་དང་། ལས་སུ་རུང་བ་སྦྱོར་བའི་གནས་དང་། ལྷུན་གྱིས་གྲུབ་པ་མཉམ་པའི་གནས་སོ། །མཐར་ཕྱིན་པ་རྣམ་པ་ལྔ་ཡང་། སྔགས་ལ་ཞུགས་པའི་ལས་མཐར་ཕྱིན་པ་དང་། བསླབ་པའི་སྦྱོར་བ་མཐར་ཕྱིན་པ་དང་། བདེན་པ་མཐོང་བ་མཐར་ཕྱིན་པ་དང་། ཏིང་ངེ་འཛིན་གོམས་པ་མཐར་ཕྱིན་པ་དང་། འབྲས་བུ་གྲུབ་པ་མཐར་ཕྱིན་པ་སྟེ། རྟེན་སྐབས་སུ་སྐྱེད་དུ་བྱ་བ་མེད་པའི་ཕྱིར་མིང་ངེས་པར་འགྲུབ་སྟེ་བཤད་པ་རྣམས་ལའང་སྦྱར་རོ། །དེ་ལྟར་རྟེན་གྱི་ཀུན་གཞིའི་སྐབས་འདིར་དབྱེ་བའི་གྲངས་ཀྱི་འཇུག་པ་བསྡུ་བ་ལས། རྣམ་གྲངས་ལྔ་དང་བཅུ་ཕྲག་དྲུག་ལ་ནི་དྲུག་ཅུ་རྩ་ལྔ་སྟེ། ལྔ་ཕྲག་བཅུ་གསུམ་གྱི་ས་ལམ་རྫོགས་ཏེ་ལྔ་ལྔས་མཐར་ཕྱིན་པར་སྣང་བས། རྩ་བ་ལྔར་བསྡུས་ནས་ལྔ་ལས་མ་གཡོས་པར་བཤད་དེ་རིམ་པར་སྦྱར་བ་ཉིད་དོ། །འདི་དག་ཀྱང་རྒྱུ་འབྲས་ཐུན་མོང་བའི་ལམ་དང་། འབྲས་བུ་ཐུན་མོང་མ་ཡིན་པ་ཉིད་ཀྱི་ལམ་ལྔ་ཅི་རིགས་པར་སྦྱར་རོ། །བཤད་པའི་ཏིང་ངེ་འཛིན་ལྔ་དང་། ལྟས་ལྔ་དང་། དབང་ལྔ་དང་། སེམས་ལྔ་དང་། ལྔ་ཕྲག་སྤྱིར་བཅུ་བདུན་དུ་འགྱུར་ལ། དུ་མའི་གྲངས་སུ་འདྲེན་པ་དེས་ཐུན་མོང་མ་ཡིན་པའི་ལམ་ཡིན་པར་ཡང་གསལ་ལོ། །བདུན་པ་ལ་གཉིས་ཏེ། སྤྱིར་བསྟན་པ། བྱེ་བྲག་མིང་གི་རྣམ་གྲངས་བཤད་པའོ། །དང་པོ་ནི། ཆོས་རྣམས་ཀུན་གྱི། ཞེས་པ་ནས། མཐོང་ན་མྱ་ངན་འདས། །ཞེས་པའི་བར་གྱིས་བསྟན་ཏེ། ཆོས་རྣམས་ཀུན་གྱི་གཞིར་གྱུར་ཏེ་དངོས་པོ་བཟང་ངན་གཉིས་ཀའི་རྩ་བ་ཀུན་གཞིར་གཅིག་པ་ཡིན་པས། མཚན་ཉིད་མ་རྟོགས་ཏེ་མ་རིག་པས་ནོན་ནས་ནོར་བའི་དབང་གིས་གཟུང་འཛིན་དུ་འཁྲུལ་པའི་རྐྱེན་གྱིས་འཁོར་བར་སྣང་བས་ཀུན་ནས་ཉོན་མོངས་པ་གཞི་ཡིན་ལ། ཀུན་གཞིའི་རང་བཞིན་ཆོས་ཐམས་ཅད་ཀྱི་ཆོས་ཉིད་ཇི་ལྟར་ཡིན་པའི་དོན་གྱི་གནས་ལུགས་མ་ནོར་བར་རྟོགས་ཏེ་ངེས་པར་མཐོང་ན། སྐྱེ་རྒ་ན་འཆི་ལས་ཐར་པའི་འབྲས་བུ་མྱ་ངན་ལས་འདས་པ་ཐོབ་པའི་རྟེན་དུ་གྱུར་པའོ། །གཉིས་པ་ལ་གཉིས་ཏེ། འཁོར་བར་གྲགས་པའི་མིང་གི་རྣམ་གྲངས། མྱ་ངན་ལས་འདས་པར་གྲགས་པའི་མིང་གི་རྣམ་གྲངས་སོ། །དང་པོ་ནི། ཀུན་གྱི་གཞི་དང་། ཞེས་པ་ནས། འབྱུང་གནས་རྒྱུ་ཞེས་གྲགས། །ཞེས་པའི་བར་གྱིས་བསྟན་ཏེ། ཐེག་པ་ཐུན་མོང་དང་ཐུན་མོང་མ་ཡིན་པའི་གཞུང་རྣམས་སུ་ཀུན་གཞི་ལ་མིང་གི་རྣམ་གྲངས་ཐ་དད་དུ་གྲགས་པ་ལའང་གཉིས་ལས། འཁོར་བར་གྲགས་པའི་མིང་གི་རྣམས་གྲངས་ཇི་ལྟ་བུ་སྙམ་པ་ལ། ཀུན་ནས་ཉོན་མོངས་པའི་བག་ཆགས་ཀྱི་ས་བོན་ཐམས་ཅད་གསོགས་པའི་གཞི་ཡིན་པས་ཀུན་གྱི་གཞི་ཞེས་བྱ་བ་དང་། ལུས་དང་གྲུབ་སྡེ་གཅིག་པས་ཡུལ་གྱི་དངོས་པོ་གང་དེ་ཤེས་ཤིང་ཀུན་ཤེས་པའི་སེམས་ཉེ་བར་འཇོག་པར་ཀུན་གཞིའི་རྣམ་པར་ཤེས་པ་ཞེས་ཀྱང་བྱ་སྟེ། འཕགས་པ་རིན་པོ་ཆེ་བཀོད་པའི་མདོ་ལས། དེ་ལྟར་དེ་ནི་ལུས་འདི་ལ་གྲུབ་པ་དང་བདེ་བ་གཅིག་པའི་ཕྱིར་འབྲེལ་བ་དང་རབ་ཏུ་འབྲེལ་བས་ཀུན་གཞི་རྣམ་པར་ཤེས་པ་ཞེས་ཀྱང་བྱའོ། །ཞེས་གསུངས། འཁོར་བ་མ་སྟོངས་བར་དུ་གནས་ཏེ་སྲིད་པའི་ཆོས་ཀྱི་སྣང་བ་སྟོན་པའི་གཞིར་གནས་པ་ལས་ཕུང་པོ་ཐ་དད་སྣ་ཚོགས་སུ་སྣང་བས་འཁོར་བ་ཇི་སྲིད་ཀྱི་ཕུང་པོའམ་ཆོས་ཀྱི་ཕུང་པོ་ཞེས་ཀྱང་བྱའོ། །རྟེན་འབྲེལ་བཅུ་གཉིས་ཀྱི་གཞིར་གྱུར་པས་སྲིད་གསུམ་འབྱུང་བའི་ཡན་ལག་ཞེས་ཀྱང་བྱའོ། །རྩ་བ་ལ་བརྟེན་པའི་ལྗོན་ཤིང་བཞིན་ཚོགས་བདུན་པོ་དེ་དག་ཀུན་འབྱུང་བའི་རྩ་བ་ཡིན་པས་རྩ་བའི་རྣམ་པར་ཤེས་པ་ཞེས་ཀྱང་བྱའོ། །འདོད་གཟུགས་གཉིས་སུ་མིང་གཟུགས་ཀྱི་ཕུང་པོ་དང་གཟུགས་མེད་དུ་མིང་བཞིའི་ཕུང་པོ་ལེན་ཏེ་ཁམས་གསུམ་ཀུན་ཏུ་སྐྱེ་བ་མང་པོ་སྣ་ཚོགས་ཀྱི་ལུས་ཐམས་ཅད་ལེན་པས་ལེན་པའི་རྣམ་པར་ཤེས་པ་ཞེས་ཀྱང་བྱ་སྟེ། སྔ་མ་ལས། བློ་གྲོས་ཡངས་པ་རྣམ་པར་ཤེས་པ་དེས་དེ་ལྟར་ལུས་འདི་ཉེ་བར་བཟུང་ཞིང་བླངས་པས་ན་ལེན་པའི་རྣམ་པར་ཤེས་པ་ཞེས་བྱའོ། །ཞེས་སོ། །མུ་མཐའ་མི་རྙེད་པར་ཀུན་འབྱུང་བས་ཐོག་མ་མེད་པའི་དབྱིངས་ཞེས་པའམ་ཀུན་གྱི་འབྱུང་བ་ཞེས་ཀྱང་བྱ་བ་དང་། དངོས་པོ་ཕྱི་ནང་དུ་སྣང་བ་ཀུན་འབྱུང་ཞིང་ཀུན་གྱི་རྟེན་པའི་གནས་ཡིན་པས་ཐམས་ཅད་ཀྱི་གནས་སམ་ས་བོན་ཐམས་ཅད་པ་ཞེས་ཀྱང་བྱ་སྟེ། རྒྱན་སྟུག་པོ་བཀོད་པ་ལས། སྔོན་མེད་བག་ཆགས་ལྡན་པས་ན། །ཀུན་གཞི་ས་བོན་ཐམས་ཅད་ཅན། །རྒྱ་མཚོའི་རྦ་རླབས་ཇི་བཞིན་དུ། །རླུང་གི་རྐྱེན་གྱིས་བསྐྱོད་པ་ལྟར། །གར་བྱེད་ཅིང་ནི་རབ་ཏུ་འབྱུང་། །རྣམ་པར་རྒྱུན་ཀྱང་མི་འཆད་དོ། །ཞེས་སོ། །ཚོགས་བདུན་གྱི་ཡང་སྐྱེད་བྱེད་ཀྱི་རྒྱུ་ཡིན་པའམ། མཚན་ཉིད་གསུམ་གྱི་གཞིར་གྱུར་པས་ཆོས་ཀྱི་བག་ཆགས་ཀྱི་ས་བོན་སྣ་ཚོགས་ཀུན་བསགས་པའི་ཕྱིར་བཤད་པའི་ཀུན་གཞི་ལ་སེམས་ཞེས་དང་ཐམས་ཅད་བསྐྱེད་པའི་རྒྱུ་ཞེས་སུ་འཇིག་རྟེན་པ་ལ་རབ་ཏུ་གྲགས་སོ། །དེའང་། དང་པོའི་ས་བོན་ཙམ་དང་། གསུམ་པ་བཞི་པ་ལྔ་པ་རྣམས་ཐེག་པ་ཆུང་ངུ་ལ་གྲགས་པ་དང་། དང་པོ་གསལ་བར་བསྟན་ཅིང་གཉིས་པ་དང་དྲུག་པ་མན་ཆད་ཐེག་པ་ཆེན་པོ་ལ་གྲགས་པའོ། །གཉིས་པ་ནི། སྟོང་པ་ཉིད་དང་། ཞེས་པ་ནས། ཡེ་ཤེས་ཡིན་ཞེས་གྲགས། །ཞེས་པའི་བར་གྱིས་བསྟན་ཏེ། རྣམ་པར་བྱང་བ་ལ་གྲགས་པའི་མཚན་གྱི་རང་བཞིན་གང་སྙམ་པ་ལ། ཀུན་གཞི་བྱང་ཆུབ་སེམས་ཀྱི་རང་བཞིན་མཐའ་གཉིས་སུ་མ་གྲུབ་པས་སྟོང་པ་ཉིད་ཅེས་བྱ་བ་དང་། ངོ་བོ་ཕྱོགས་གཅིག་ཏུ་འདི་འདྲར་མི་ཟིན་པས་མཚན་ཉིད་མེད་པ་ཞེས་བྱ་བ་དང་། བྱེད་པ་པོ་མེད་པས་མ་བཅོས་པའི་ངོ་བོ་དེ་བཞིན་ཉིད་ཅེས་བྱ་བ་དང་། དེ་ཡང་དེ་བཞིན་གཤེགས་པའི་དགོངས་པ་ཉིད་ཡིན་པས་བདེན་པའི་དོན་མ་ནོར་བ་ཞེས་བྱ་བ་དང་། ཡེ་ནས་གཉེན་པོས་མ་བསླད་པའི་དོན་ཡིན་པས་མ་བཅོས་པ་ཞེས་བྱ་བ་དང་། དོན་ལོགས་ན་མེད་པའི་ཕྱིར་གཞན་མ་ཡིན་པ་དེ་བཞིན་ཉིད་ཅེས་བྱ་བ་དང་། རང་བཞིན་གསལ་ལ་མི་གཡོ་བས་ཏིང་ངེ་འཛིན་ཞེས་བྱ་བ་དང་། རྟོག་པ་རགས་པའི་བྱེ་བྲག་མེད་པས་སྟོང་པ་ཉིད་ཅེས་བྱ་བར་གྲགས་པ་དང་། ཡེ་ཉིད་ནས་ཀུན་གཞིའི་རང་བཞིན་མ་སྒྲིབ་པར་གསལ་བས་ལྷག་མཐོང་ཞེས་ཀྱང་བྱ་བ་དང་། སྤྲོས་པ་རྣམས་དང་བྲལ་བས་ཞི་གནས་ཞེས་བྱ་བ་དང་། ཡེ་ནས་གཟུང་འཛིན་དང་ལས་ཀྱིས་འཆིང་བ་མེད་པའི་ཕྱིར་རྣམ་པར་ཐར་པ་ཞེས་བྱ་བ་དང་། དེ་བཞིན་དུ་ཀུན་གཞིའི་རང་བཞིན་ལ་མི་གནས་པས་དབུ་མ་ཞེས་དང་། མཐའ་དང་བྲལ་བ་ཞེས་བྱ་བ་དང་། དངོས་པོར་གཟུང་བ་མེད་པ་ཞེས་ཀྱང་བྱའོ། །བདག་ཏུ་འཛིན་པ་མེད་པ་དང་། མ་འགག་པས་ཆད་པ་མེད་པ་དང་། མི་དམིགས་པས་རྟག་པ་མེད་པ་ཞེས་བྱ་བ་དང་། རང་བཞིན་སྐྱེ་འགག་དང་བྲལ་བས་སྐྱེ་བ་མེད་པ་དང་འགག་པ་མེད་པ་ཞེས་དང་། གཅིག་ཏུ་སྤྱིའི་རྟོག་པ་མེད་པ་དང་བྱེ་བྲག་གི་རྣམ་པར་རྟོག་པ་མེད་པ་དང་། སྤྲོས་པའི་མཚན་མ་མེད་པ་དང་དེ་བཞིན་དུ་དོན་དམ་ལ་བདག་མེད་ཅིང་གཞན་མེད་པ་ཞེས་བྱ་བ་དང་། ཆོས་ཀྱི་དབྱིངས་ལ་འགྲོ་བ་མེད་ཅིང་འོང་བ་མེད་པ་ཞེས་བྱ་བ་དང་། ཆོས་ཉིད་ལ་དྲི་མ་མེད་ཅིང་འདུ་བ་དང་འབྲལ་བ་མེད་པ་ཞེས་བྱ་བ་དང་། ཅིར་ཡང་མ་གྲུབ་པ་ལ་བྱེ་བྲག་ཏུ་ཕུང་པོ་མེད་ཅིང་ཁམས་མེད་ལ་སྐྱེ་མཆེད་མེད་པ་ཞེས་བྱ་བ་དང་། ཡུལ་གུད་པ་མེད་པ་དང་། ལས་བྱར་མེད་པ་དང་། སྐྱེད་པའི་རྒྱུ་མེད་པ་དང་སྨིན་པའི་འབྲས་བུ་མེད་པ་ཞེས་བྱ་བ་དང་། ངོས་གཟུང་ལས་འདས་པས་མ་སྐྱེས་པའི་ངོ་བོ་སྙིང་པོ་བྱང་ཆུབ་པའང་དམིགས་སུ་མེད་པ་དང་། བཅུ་ཕྲག་གསུམ་དང་བཞི་ལ་སོགས་པར་གྲགས་སོ། །ཀུན་གཞི་བྱང་ཆུབ་ཀྱི་སེམས་ནི་ཡེ་ནས་སངས་རྒྱས་ཆོས་དང་དགེ་འདུན་ཏེ་དོན་གྱི་དཀོན་མཆོག་གསུམ་དང་བྱང་ཆུབ་ཀྱི་སེམས་རྣམ་པ་གསུམ་དབྱེར་མེད་པའི་ངོ་བོར་གནས་པས་ཆོས་ཉིད་དེ་ནི་རྒྱུ་ལས་མི་སྐྱེ་རྐྱེན་གྱིས་མི་འགག་ལ། དེ་ལྟར་འདུས་མ་བྱས་པ་དེ་ནི་ངོ་བོ་ཡེ་མ་གྲུབ་པ་ལ་འཇིག་པ་མེད་པས་ནམ་མཁའ་ལྟ་བུ་དང་འདྲའོ། །འོན་ཀྱང་ཀུན་གཞི་དེ་ལྟ་བུའི་དོན་དམ་པ་མི་འགྱུར་བར་ཡོངས་སུ་གྲགས་པ་དེ་ནི། རྟེན་གྱི་ཚུལ་ནས་ཆོས་ཀྱི་དབྱིངས་ཉིད་ལ་ཆོས་ཀྱི་སྐུར་ཤེད་མ་བྱེ་བ་དག་འདོད་དོ། །དེ་ནི་རྣམ་པར་མི་རྟོག་པའི་ཡེ་ཤེས་ཀྱི་རང་བཞིན་ཡིན་པར་འདོད་པ་རྒྱུའི་ཐེག་པ་ཆེན་པོ་འཁོར་ལོ་ཐ་མའི་གཞུང་ལས་གྲགས་སོ། །ཐེག་པ་ཆེན་པོ་གསང་སྔགས་བླ་ན་མེད་པ་ཉིད་ནི། ཀུན་གཞི་མུ་མཐའ་བྲལ་བའི་ཆོས་ཀྱི་དབྱིངས་ཉིད་ཆོས་ཀྱི་སྐུ་ཆེན་པོ་ཡེ་ནས་རྣམ་པར་མི་རྟོག་པའི་ཡེ་ཤེས་ཉིད་དུ་གསལ་བ་ཡིན་ནོ་ཞེས་པར་རིག་འཛིན་མཆོག་ལ་གྲགས་སོ། །དེ་ལྟར་ཀུན་གཞིའི་བྱེ་བྲག་མིང་གི་རྣམ་གྲངས་འདི་དག་ལྷ་རྗེ་བ་རྣམ་གཉིས་ཐེག་པ་ཆེ་ཆུང་གཉིས་ཀ་ལ་གྲགས་བར་གསུངས་ཀྱང་། ཐེག་པ་ཆུང་ངུ་ལ་གྲགས་པ་རྣམས་ལ་རང་གི་སྒྲ་དང་རྣམ་གྲངས་ཀྱིས་ཅི་རིགས་སུ་བསྟན་པ་དག་གིས་ལམ་པོ་ཆེ་བཏོད་པ་ཙམ་ལས་ཀུན་གཞིའི་མཚན་ཉིད་དང་སྦྱར་ཏེ་བཀའ་སྩལ་བ་མེད་པས་འགྲེལ་ཆེན་ལས་ཐེག་ཆེན་ལ་གྲགས་པར་བཤད་དེ་འགྲེལ་ལུགས་འཐད་དེ། ཞེས་ཀུན་མཁྱེན་དམ་པ་རིན་པོ་ཆེས་གསུངས་སོ། །དེས་ན་བཤད་པའི་གཞི་ནི་བྱིས་པ་འདི་ལྟར་འདོད། ཅེས་པ་དང་། བློ་ལྡན་ཀུན་ལ་འདི་བརྗོད་ཀྱིས། །བླུན་པོའི་ཆེད་དུ་ཤེས་པར་གྱིས། །ཞེས་པའི་སྒྲས་འདི་དག་ཐེག་པ་དམན་པ་རྒྱུ་མཚན་ཉིད་ཀྱི་གཞུང་ཁོ་ནར་ངེས་པའོ། །སྐབས་སུ་རྣམ་པར་བྱང་བའི་རྟེན་བཤད་པའི་ལམ་རིམ་གྱིས་ངེས་པས་ཐེག་ཆེན་གསང་མཆོག་རྒྱལ་པོར་བཤད་དེ། ཐུན་མོང་དུ་བསྟན་ཏེ་མ་ངེས་པར་གྱུར་པས་གཉིས་ཀར་ཅི་རིགས་སུ་བཤད་པ་ཉིད་དོ། །དེ་ལྟར་གཞུང་གང་གི་རྟོགས་པ་མཐར་ཕྱིན་པ་ནི། ཀུན་གཞི་མེ་ལོང་ལྟ་བུའི་ཡེ་ཤེས་སུ་གནས་གྱུར་ཞེས་བྱ་སྟེ་གཏན་དུ་བར་གྱུར་བའོ། །བརྒྱད་པ་ལ་བཞི་སྟེ། མུན་པའི་རང་བཞིན་རྒྱུ་ལས་མ་བྱུང་རང་སྣང་དུ་བསྟན་པ། མུན་པའི་རྒྱུ་ཆེད་དུ་བྱས་པའི་ཀུན་བརྟགས་ལས་བྱུང་བར་བསྟན་པ། མུན་པ་ཇི་ལྟར་འགག་རིམ་བཞིན་ལམ་ལྔའི་སྐབས་ཀྱིས་ངེས་པར་འབྱུང་ཚུལ་བཤད་པ། བརྩད་པའི་དྲིས་ལན་གྱིས་མུན་པ་སྒྲུབ་བྱེད་ཀྱི་རིག་པ་བསྟན་པའོ། །དང་པོ་ནི། མ་བྱུང་ཡེ་ནས་རང་བཞིན་སྣང་། །ཞེས་རྐང་པ་གཅིག་གིས་བསྟན་ཏེ། གཞི་ཇི་ལྟ་བའི་ངོ་བོ་ནི་མཐའ་གང་དུ་ཡང་མི་སྣང་བས་རྒྱུ་རྐྱེན་ལས་མ་བྱུང་བར་ཡེ་ཐོག་མ་མེད་པ་ནས་རང་བཞིན་གྱིས་འོད་གསལ་བའི་ཆོས་ཉིད་དབྱིངས་ཀྱི་གནས་ལུགས་རང་སྣང་བའི་གསང་བ་དམ་པ་སྟེ་དོན་གྱི་ཆོས་བཞིའི་བདག་ཉིད་ཆེན་པོའོ། །གཉིས་པ་ནི། འོག་ནས། མུན་པའང་དེ་ཉིད་དེ་ལས་བྱུང་། །ཞེས་རྐང་པ་གཅིག་གིས་བསྟན་ཏེ། དེའང་མུན་པ་ནི་མ་རིག་པ་དང་མཚུངས་པར་ལྡན་པའི་གཟུང་འཛིན་གྱི་ཀུན་རྟོག་ཡིན་པས་ཆེད་དུ་བརྟགས་པའང་། དེ་ཉིད་དུ་ཟད་པ་དེས་ན་དེ་བྱང་ནས་འཚང་རྒྱ་བར་འདོད་པ་ནི་རྒྱུ་དེ་ལས་བྱུང་བའི་སྒྲིབ་པ་ཉིད་དེ་མུན་པའི་སྤྱོད་ཡུལ་ཁོ་ནའོ། །གསུམ་པ་ནི། གོང་གི་སྔར་གྱི་འཕྲོར། ཇི་སྲིད་ལེན་པའི། ཞེས་པ་ནས། སྐབས་ལྔས་ངེས་པར་འབྱུང་། །ཞེས་པའི་བར་གྱིས་བསྟན་ཏེ། དུས་འཁོར་བ་ཇི་སྲིད་དུ་ཐོག་མ་དང་ཐ་མ་མེད་པར་སྐྱེ་བ་ཐ་དད་པ་སྣ་ཚོགས་ཀྱི་ལུས་མ་བླངས་པ་ལེན་པར་བྱེད་ཅིང་བླངས་ནས་གནས་པར་བྱེད་པའི་ཀུན་གཞི་རྣམ་པར་ཤེས་པ་དེ་ལ་ཁམས་གསུམ་གྱི་བག་ཆགས་ཀྱི་ས་བོན་ཡོད་པ་དེ་རྣམས་རྐྱེན་དང་ཕྲད་ན་ཡོངས་སུ་རྫོོགས་པར་བྱེད་པའི་འབྲས་བུ་ནས་མིང་བཏགས་པས་སྲིད་པ་ཀུན་ནས་རྫོགས་པའི་བག་ཆགས་སྔ་མ་རྣམས་འཕེན་པའི་ཡན་ལག་གིས་འབྲས་བུ་མཐོ་དམན་དུ་སྨིན་པར་བྱེད་པས་ས་བོན་ངན་པ་དག་བག་ཆགས་ཀྱི་དངོས་པོར་གང་གནས་པ་རིམ་པར་སངས་ནས་བག་ཆགས་ཕྱི་མའི་དངོས་པོ་གང་ཡིན་པ་རྣམས་དག་པར་འབྱུང་བས་རྒྱུ་ལས་དང་ཉོན་མོངས་པ་འགགས་པའི་རིམས་པས་སྐད་ཅིག་མ་རྒྱུན་དུ་འབྱུང་བའི་བག་ཆགས་མཐུ་བརྟས་པས། རྒྱུད་གར་ལ་འབྲས་བུ་སྡུག་བསྔལ་གྱི་གདུང་བར་སྨིན་པར་བྱེད་པའི་བག་ཆགས་མང་པོ་དེ་དག་ཀུན་གཞི་སྐད་ཅིག་མའི་རྒྱུན་ལ་ཡོད་པ་རྣམས་གཉེན་པོ་ལམ་གྱི་ཡེ་ཤེས་ཀྱིས་གཏན་ནས་སྦྱངས་ཏེ་ཟད་པར་བསྲེགས་པས་ཀུན་གཞི་མེ་ལོང་ལྟ་བུའི་ཡེ་ཤེས་སུ་གྱུར་པ་ཡང་། གནས་འགྱུར་པའི་དུས་གོང་དུ་བཤད་པ་ལྟར་ལམ་གྱི་རྣལ་འབྱོར་ལྔའི་རིམ་པ་ལྟར་སྐབས་ལྔས་བོགས་དེར་གྱུར་ཏེ་མཐར་ཕྱིན་ནས་ཀུན་ཉོན་ལས་ངེས་པར་འབྱུང་སྟེ། ཀུན་གཞི་གཏན་དུ་ལྡོག་པར་བྱེད་པའོ། །བཞི་པ་ལ་གཉིས་ཏེ། ངོ་བོ་ལ་བརྩད་པའི་དྲིས་པ་དང་། དེའི་ལན་བཤད་པའོ། །དང་པོ་ནི། གཟུགས་མེད་མཐོང་མེད། ཅེས་པ་ནས། བྱ་བར་ག་ལ་རིགས། །ཞེས་པའི་བར་གྱིས་བསྟན་ཏེ། ཀུན་གཞི་ཡོད་པར་བསྒྲུབ་པའི་གཏན་ཚིགས་བསྟན་པ་ལ། ཀུན་གཞི་ལ་དབྱིབས་དང་ཁ་དོག་བྲལ་བས་གཟུགས་མེད་ལ། བརྟག་ཏུ་མི་བཏུབ་པས་སུས་ཀྱང་མཐོང་བ་མེད་པའི་ཕྱིར་ཡོད་པ་མ་ཡིན་ནོ་ཞེས་ཀྱང་བྱ་ལ། ཀུན་གཞི་ཡོད་པས་ན་སྣང་བའི་དངོས་ཡུལ་ཐ་དད་པ་དེ་དག་མཐོང་བའི་ཡུལ་དུ་གྱུར་པའི་ཕྱིར་ཡོད་པ་ཞེས་ཀྱང་བྱ་སྟེ། ངོ་བོ་ཡོད་མེད་ལས་གྲོལ་བའོ། །གལ་ཏེ་དེ་བས་ན་མཐོང་བ་མེད་ཅིང་མ་གྲུབ་པ་ཞིག་ཡུལ་དུ་མ་གྱུར་པ་ཉིད་ཀྱི་ཕྱིར། དེ་ལ་ཡོད་པ་ཞེས་བྱ་བར་གདགས་པར་ག་ལ་རིགས་ཏེ་རིགས་པ་མ་ཡིན་པས་ཀུན་གཞི་མེད་དོ་ཞེ་ན། གཉིས་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི། མུ་མཐའ་མེད་པར། ཞེས་པ་ནས། མེད་ན་ཀུན་དང་འགལ། །ཞེས་པའི་བར་གྱིས་བསྟན་ཏེ། དེ་ཡང་ལང་ཀར་གཤེགས་པ་རིན་པོ་ཆེའི་མདོ་ལས། དངོས་པོ་རྣམས་ནི་ཡོད་མ་ཡིན། །མེད་པའང་མ་ཡིན་ཤེས་པར་བྱ། །དེ་ནི་ཆོས་ཀྱི་ཆོས་ཉིད་དེ། །ཡོད་པར་གྱུར་ཕྱིར་མེད་པ་ཡོད། །མེད་པར་གྱུར་ཕྱིར་ཡོད་པ་ཡོད། །མེད་པར་ཡང་ནི་འཛིན་མི་བྱ། །ཡོད་པར་ཡང་ནི་མི་བརྟག་གོ། །ཞེས་དང་། ཡོད་པ་མ་ཡིན་མེད་པའང་མིན། །དེ་བཞིན་ཡོད་མེད་གཉི་ག་མིན། །དེ་ལྟར་འཇིག་རྟེན་རབ་མཐོང་ན། །སེམས་གྱུར་བདག་མེད་པའང་འཐོབ། །ཅེས་གསུངས་པ་ལྟར་མེད་པ་མ་ཡིན་པར་ངོ་བོ་ཡོད་མེད་ལས་གྲོལ་བའི་ཀུན་གཞི་ཡོད་པས་ཀུན་གྱི་རྒྱུ་བྱེད་པ་ཉིད་དོ། །དེ་ཡང་འདི་ལྟར་ཀུན་གཞི་ངོ་བོ་མུ་མཐའ་མེད་ཅིང་བློས་དཔག་ཏུ་མེད་པར་འཁོར་བ་དང་མྱ་ངན་ལས་འདས་པའི་དངོས་པོ་གཉིས་པའི་ཆོས་གཟུགས་ནས་རྣམ་པ་ཐམས་ཅད་མཁྱེན་པའི་བར་དུ་རིལ་སྐྱེད་ཅིང་འབྱུང་བའི་རྒྱུའམ་གཞིར་གྱུར་པ་ཡིན་པས་ཀུན་གཞི་ཞེས་བྱ་ལ། དེ་ཡང་ངོ་བོ་བཟང་ངན་ཐ་དད་དུ་གྱུར་པའི་དངོས་པོ་དང་གཟུང་འཛིན་དུ་སྣང་བའི་མཐར་གནས་པ་མེད་པར་རང་བཞིན་གཅིག་ཏུ་མཉམ་ན་ཡང་རྐྱེན་དང་འཕྲད་པས་འགྱུར་ཏེ། རྐྱེན་ངན་པ་དང་འཕྲད་པས་ཀུན་ནས་ཉོན་མོངས་པའི་གཞིར་འགྱུར་ལ། རྐྱེན་བཟང་པོ་དང་འཕྲད་པས་རྣམ་པར་བྱང་བའི་རྟེན་དུ་འགྱུར་བས་གཉིས་ཀའི་ངོ་བོ་ཉིད་དམ་རང་བཞིན་དུ་གནས་པའི་གཏན་ཚིགས་དེ་བས་ན། ཅིར་ཡང་སྣང་སྟེ། འཁོར་འདས་ཀྱི་དངོས་པོ་གཉིས་པ་བཟང་ངན་ཐ་དད་དང་དེ་རང་ལའང་མི་འདྲ་བའམ་མི་མཐུན་པ་མང་པོ་སྣ་ཚོགས་བར་སྣང་བའི་ཕྱིར་ཀུན་གཞི་ཡོད་པར་མངོན་ནོ། །དེས་ན་ཐམས་ཅད་ཀྱི་རྒྱུ་ཀུན་གཞི་བག་ཆགས་དང་བཅས་པའི་དབྱིངས་འདི་ཉིད་མེད་ན་འཆད་པར་ཀུན་ལས་འདས་ཏེ་འཁོར་བ་འབྱུང་ལྡོག་དང་རྣམ་བྱང་གི་འབྲས་བུ་གང་ཡང་མི་འབྱུང་བར་རྒྱུ་མ་ངེས་པའི་འགལ་བ་ཁོ་ནར་འགྱུར་རོ། །དེ་བས་ན་ལུང་ལས་ཀྱང་། ཐོག་མ་མེད་པའི་དུས་ཀྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །འདི་ཡོད་པས་ན་འགྲོ་ཀུན་དང་། །མྱ་ངན་འདས་པ་ཐོབ་པར་འགྱུར། །ཞེས་དང་། སྔ་མ་ལས། ཉེས་པ་ཀུན་ལས་རབ་གྲོལ་ཞིང་། །ང་ཡི་ཚུལ་ནི་རབ་རྟོག་ན། །དེ་ནི་ཡང་དག་རྟོགས་པ་སྟེ། །འདྲེན་པ་ཆེ་ལ་དེ་མི་སྨོད། །ཅེས་གསུངས་པ་ཡིན་ནོ། །གཉིས་པ་ལ་གསུམ་སྟེ། ཀུན་གཞི་མེད་ན་འཁོར་བ་ལས་ལྡོག་ཏུ་མི་རུང་བའི་ཚུལ་བསྟན་པ། ཀུན་གཞི་མེད་ན་འཁོར་བར་འཇུག་ཏུ་མི་རུང་བའི་ཚུལ་བཤད་པ། ཀུན་གཞིའི་མཚན་ཉིད་ལ་བརྩད་པའི་སྐྱོན་སྤང་བའོ། །དང་པོ་ལ་གཉིས་ཏེ། གཟུང་འཛིན་གྱིས་འཆིང་བ་ལས་མི་གྲོལ་བའི་ཚུལ། རྣམ་བྱང་གི་ས་བོན་བསགས་པ་མེད་ཚུལ་བཤད་པའོ། །དང་པོ་ནི། གལ་ཏེ་མེད་པ། ཞེས་པ་ནས། གྲོལ་འདོད་གྲོལ་མ་ཡིན། །ཞེས་པའི་བར་གྱིས་བསྟན་ཏེ། དེ་ལྟར་འགལ་བར་འགྱུར་བ་གཏན་ཚིགས་ཅིའི་ཕྱིར་ན། གལ་ཏེ་ཀུན་གཞི་མེད་ལ་གཟུང་བར་སྣང་བའི་ཡུལ་དུ་གྱུར་པ་གཅིག་ཡོད་དོ་ཞེ་ན། གཟུང་ཡུལ་དོན་ལ་ཡོད་པ་དེའི་ཕྱིར་ལུས་དང་གྲིབ་མ་ལྟར་ཤེས་པ་འཛིན་པའི་ཕྱོགས་ཀྱང་དེ་ལྟ་བར་ཡོད་པར་ངེས་པས་གཟུང་འཛིན་རང་རྒྱུད་པར་ཞེན་པ་དེ་བས་དུས་ནམས་ཀྱང་གྲོལ་བར་མི་འགྱུར་ཏེ། འཁྲུལ་རྟོག་རང་རྒྱུད་དུ་གྲུབ་པའི་གཟུང་འཛིན་གྱིས་འཆིང་བས་བསྡམ་ནས་སྲིད་པ་ལས་ནམ་ཡང་མི་ཐར་བའི་མདུད་པ་དམ་བོར་གྱུར་པས་སྐྱོན་ཆེན་པོ་དེ་ན་ཡོད་དོ། །གལ་ཏེ་གཟུང་འཛིན་ཡོད་ཀྱང་གྲོལ་ལོ་ཞེ་ན། མུ་སྟེགས་པ་ལ་སོགས་པ་གང་སུ་ཞིག་གིས་ཀུན་གཞི་ལ་མུ་མཐའ་བཙལ་ཏེ། ཡུལ་ཤེས་སྐད་ཅིག་མ་ཙམ་དང་རྟག་པའམ་ཆད་པའི་མུར་འཛིན་ཞིག་གཟུང་འཛིན་གྱི་མཐར་ལྟ་ངན་པ་ལ་ཞེན་པ་དེས་ནི་ཀུན་གཞི་བྱང་ཆུབ་ཀྱི་སེམས་མུ་མཐའ་མེད་པའི་ཆོས་ཉིད་ཀྱི་དོན་ཡང་དག་པར་མ་མཐོང་བར་ངེས་ཏེ་རྟག་ཆད་དང་གཟུང་འཛིན་གྱི་མུར་ལྟ་ཞིང་བརྟགས་པའི་ཞེན་འཛིན་ལས་མ་གྲོལ་བའི་ཕྱིར་དཔེར་ན་ནམ་མཁའ་ལ་མཐོས་འཇལ་ཏེ་ཚད་བགྲངས་པ་དང་འདྲའོ། །དེས་ན་ཀུན་གཞི་མུ་མཐའ་མེད་པའི་ཆོས་ཉིད་མ་བཅོས་རང་སར་གྲོལ་བའི་མཐའ་བྲལ་གྱི་དོན་རྟོགས་ནས་མཐའ་མི་ཚོལ་བ་གང་ཞིག་ནི་མཐས་མ་བཅིངས་པས་ན་གྲོལ་བར་བཤད་པ་ཡིན་གྱི། དེ་ལས་བཟློག་སྟེ་རྟག་ཆད་གཟུང་འཛིན་གྱི་མུར་འཛིན་དང་བཅས་བཞིན་དུ་ཐར་པ་དང་གྲོལ་བར་འདོད་ཀྱང་ཆེད་དུ་བྱས་པས་ཞེན་མཐས་འཆིངས་པས་ནམ་ཡང་གྲོལ་བ་མ་ཡིན་ཏེ་འཁོར་བའི་མཐའ་ལ་གནས་པའོ། །དེའི་ཕྱིར་དགོངས་པ་ངེས་པར་འགྲེལ་པ་ལས། ལེན་པའི་རྣམ་པར་ཤེས་པ་ཟབ་ཅིང་ཕྲ། །ས་བོན་ཐམས་ཅད་ཆུ་བོའི་རྒྱུན་བཞིན་འབབ། །བདག་ཏུ་རྟོག་པར་གྱུར་ན་མི་རུང་ཞེས། །དེ་ནི་བྱིས་པ་རྣམས་ལ་ངས་མ་བསྟན། །ཞེས་གསུངས་སོ། །དེས་ན་ཀུན་གཞི་མེད་ན་གཟུང་འཛིན་ལས་མི་གྲོལ་བའི་སྐྱོན་དུ་འགྱུར་རོ། །གཉིས་པ་ནི། བྱེ་མ་བསྐྱེད་ཀྱང་། ཞེས་པ་ནས། དེ་བཞིན་ཉིད་ཅེས་བསྔགས། །ཞེས་པའི་བར་གྱིས་བསྟན་ཏེ། དེ་བཞིན་དུ་ཀུན་གཞིའི་རྣམ་པར་ཤེས་པ་མེད་ན་བག་ཆགས་གསོག་ཏུ་མི་བཏུབ་སྟེ། དོན་གསང་བ་བསྡུས་པ་ལས། བརྟན་ལུང་མ་བསྟན་བསྒོ་བྱ་དང་། །བསྒོ་བར་བྱེད་དང་འབྲེལ་བ་དང་། །སྒོད་བྱེད་དེ་ལས་གཞན་ན་མེད། །འདི་ནི་བག་ཆགས་མཚན་ཉིད་དོ། །ཞེས་པས། བག་ཆགས་གང་དེ་རྒྱུན་བརྟན་པ་ལ་བསྒོད། མི་བརྟན་པ་ལ་མི་བསྒོད། ལུང་དུ་མ་བསྟན་པ་ལ་བསྒོད། ལུང་དུ་བསྟན་པ་ལ་མི་བསྒོད། བསྒོ་བར་བྱ་བའི་འོས་ལ་བསྒོད། འོས་མ་ཡིན་པ་ལ་མི་བསྒོད། བསྒོ་བར་བྱེད་པ་དང་འབྲེལ་བ་ལ་བསྒོད། མ་འབྲེལ་བ་ལ་མི་བསྒོད། སྒོད་བྱེད་དེ་ལས་གཞན་དུ་མེད་ན་བསྒོ་ཡིས། གཞན་དུ་གྱུར་ན་མི་སྒོད་དོ། །དེ་བས་ན་འདིར་ཡང་ཀུན་གཞི་མ་མཐོང་ན་མེད་པར་སྨྲ་ཞིང་ཐར་པ་འདོད་དེ་འཁོར་བ་སྤོང་བ་དེ་དག་གིས། ཀུན་ནས་ཉོན་མོངས་པའི་ས་བོན་རྣམ་བྱང་ལ་གསོག་ཏུ་མི་བཏུབ་སྟེ། གཉེན་པོ་ཡིན་པའི་ཕྱིར་དང་རྣམ་བྱང་གི་ས་བོན་ཀུན་ནས་ཉོན་མོངས་པ་ལ་གསོག་ཏུ་མི་བཏུབ་སྟེ་མི་མཐུན་པའི་ཕྱོགས་ཡིན་པའི་ཕྱིར་རོ། །དེས་ན་ཀུན་གཞི་ལ་མ་བརྟེན་པར་དགེ་བའི་བག་ཆགས་བདག་ཅེས་བྱ་བརྟག་པ་དེ་ལ་བསྒོས་ནས་ཐར་བར་འདོད་ན་ནི་རྣམ་བྱང་གི་ས་བོན་གྱི་བག་ཆགས་མེད་པར་འཁོར་བ་ལྡོག་ཏུ་མི་རུང་སྟེ་དཔེར་ན་བྱེ་མ་ལ་ས་བོན་བྱས་ནས་འབྲས་བུ་བསྐྱེད་ཀྱང་དེའི་འབྲས་བུ་ནས་འབྲས་སོགས་ཀྱི་འབྲུར་མི་སྨིན་པ་དང་འདྲའོ། །འོ་ན་འདུས་མ་བྱས་པ་ལ་བག་ཆགས་ཀྱི་ས་བོན་བསྒོའམ་ཞེ་ན། གཏན་མི་འགྱུར་ཞིང་རྣམ་པར་དག་པའི་ངོ་བོ་བརྟན་པ་ལ་བསྒོ་བྱའི་འོས་མ་ཡིན་པས་མི་རུང་ངོ་། །དེའི་ཕྱིར་ཀུན་གཞིའི་རང་བཞིན་ལ་མུ་མཐའ་མེད་པ་ཉིད་མཐར་བཟུང་ཡང་མ་རིག་པ་དང་མཚུངས་པའི་ཕྱིར་བག་ཆགས་ཀྱི་རྐྱེན་སྣང་སྣ་ཚོགས་སུ་སྣང་བ་ཙམ་ལས་དོན་གྱི་ངོ་བོ་ལ་མཐར་མི་འགྱུར་བ་ནི། དཔེར་ན་ཤེལ་སྒོང་རྐྱེན་གྱིས་བསྒྱུར་ཡང་གཏིང་ནས་མི་འགྱུར་བ་དང་འདྲའོ། །དེས་ན་རང་བཞིན་མ་ཡིན་པ་དེ་ལ་བརྟེན་ནས་ཐར་བར་མི་འགྱུར་བའང་དེ་བཞིན་དུ་ངེས་པས་ཀུན་གཞི་ཡོད་པར་མངོན་ནོ། །འོན་ཏེ་རྣམ་བྱང་གི་བག་ཆགས་ཉོན་མོངས་པ་ཅན་གྱི་ཡིད་ལ་བསྒོའམ་ཞེ་ན། དྲི་མའི་ངོ་བོ་ཡིན་པས་བསྒོ་རུ་མི་བཏུབ་པ་དང་། དེར་མ་ཟད་ཀུན་གཞི་མེད་ན་ཉོན་མོངས་པ་སྤངས་པའང་གང་ལ་གནས་ཏེ་སྤང་བར་བྱ་སྟེ། སྒོ་ལྔ་ལ་གནས་ཏེ་སྤོང་ན་ནི་མཐོང་སྒོམ་གྱི་ལམ་གྱི་དུས་སུ་འགགས་པས་མི་རུང་ཞིང་། ཉོན་མོངས་པ་ཅན་གྱི་ཡིད་ལ་གནས་ཏེ་སྤོང་ངོ་ཞེ་ན། དྲི་མའི་ངོ་བོ་དེ་ཉིད་སྤང་བའི་གཞིར་མི་བཏུབ་པས་དཔེར་ན་འཆིང་བུ་བསྒྱུར་ཡང་དངོས་སུ་ནོར་བུ་རིན་ཆེན་དུ་འགྱུར་བ་མིན་པ་བཞིན་ནོ། །དེ་བཞིན་དུ་འཁོར་བ་ལུགས་སུ་འབྱུང་བ་ཡང་ཀུན་གཞི་མེད་ན་བག་ཆགས་ཀྱི་ས་བོན་གང་ལ་བསྒོ་སྟེ། སེམས་ལས་བྱུང་བའི་དགེ་བ་ལ་བསྒོ་ན་གླ་རྩི་དང་འདྲ་ལ། མི་དགེ་བ་ལ་བསྒོ་ན་སྒོག་སྐྱ་དང་འདྲ་ཞིང་། ཡིད་ལ་བསྒོ་ན་གློག་དང་འདྲ་སྟེ་མྱུར་ལ་དྲག་གོ། །འོ་ན་གཟུགས་ཀྱི་ཕུང་པོ་ལ་བསྒོའོ་ཞེ་ན། འབྲེལ་བ་མེད་པས་བག་ཆགས་དང་འདྲེས་སུ་མི་བཏུབ་སྟེ། དཔེར་ན་ས་དང་རྡོ་བསྲེས་ཀྱང་འདྲེས་སུ་མི་རུང་བ་དང་འདྲའོ། །འོན་ཏེ་ཡིད་ཀྱི་རྣམ་པར་ཤེས་པ་ལ་བསྒོའམ་ཞེ་ན། གསལ་ལ་མི་བརྟན་པ་ཉིད་པས་མི་རུང་སྟེེ། དཔེར་ན་གློག་འགྱུ་བའི་གཞི་ལ་མུན་པ་མེད་པ་དང་འདྲ་བས་བག་ཆགས་ཀྱི་གཞིར་མི་རུང་ལ། དེར་མ་ཟད་འཁོར་བ་ལུགས་ནས་བཟློག་པར་ཡང་མི་བཏུབ་སྟེ། མཐོང་སྒོམ་གྱི་ཉོན་མོངས་པ་སྤངས་པའང་། ཉོན་ཡིད་དང་སྒོ་ལྔ་ལ་གནས་ཏེ་སྤོང་དུ་ནི་གོང་དུ་བཤད་པ་དང་འདྲ་ལ། ཡིད་ལ་གནས་ཏེ་སྤོང་ན་ནི། ལམ་གྱི་དུས་ན་ཡིད་གཉེན་པོ་ལམ་གྱི་ཡེ་ཤེས་སུ་གྱུར་བས་གཉེན་པོ་ལ་ཉོན་མོངས་པ་གནས་སུ་མི་རུང་སྟེ་དཔེར་ན་སྟྭར་ཚན་ལ་རྩི་སྦུར་མི་གནས་པ་དང་། གློག་ལ་མུན་པ་མེད་པ་དང་འདྲ་སྟེ། དེ་བས་ན་ཀུན་གཞི་ཡོད་དོ། །དེ་བཞིན་དུ་ཀུན་གཞི་མེད་ན། རྣམ་པར་བྱང་བ་ལ་འཇུག་པ་དང་འཁོར་བར་ལུགས་སུ་འབྱུང་བའི་བག་ཆགས་ཀྱང་མི་རུང་སྟེ། ཚོགས་དྲུག་གི་གཅིག་ལ་གཅིག་བསྒོའམ་ཞེ་ན། གནས་དང་དབང་པོ་དང་ཡུལ་ཐ་དད་པ་ལ་ཕན་ཚུན་སྤངས་ཏེ་གནས་པའི་འགལ་བ་ཡོད་པས་ཐ་དད་གསུམ་དང་འགལ་བའི་ཕྱིར་མི་བཏུབ་སྟེ། དཔེར་ན་མཚལ་བཞུ་བའི་ཟིལ་པ་དངུལ་ཆུ་དང་གསེར་ཞུན་མ་ཉིད་གཅིག་པ་མི་སྲིད་པ་དང་འདྲའོ། །འོ་ན་ཚོགས་དྲུག་རང་རེའི་བག་ཆགས་རང་རེ་ལ་བསྒོའོ་ཞེ་ན། མི་བརྟན་ལ་བསྒོ་གཞི་དང་འབྲེལ་བ་མེད་པར་བྱ་བྱེད་འགལ་བས་མི་བཏུབ་སྟེ། དཔེར་ན་སྐྱེས་བུ་ཇི་ལྟར་མཆོང་བ་ཆེ་ཡང་རང་གིས་རང་ཉིད་ལ་མཆོངས་པ་མི་སྲིད་པ་དང་འདྲའོ། །འོན་ཏེ་ཤེས་པ་སྔ་མས་ཕྱི་མ་ལ་བསྒོ་ཞིང་ཕྱི་མས་སྔ་མ་ལ་བསྒོའམ་ཞེ་ན། རྒྱུད་གཅིག་ལ་ལྷན་ཅིག་ཏུ་མི་གནས་པའི་འགལ་བ་ཡོད་པས་མི་བཏུབ་སྟེ། དཔེར་ན་ཆུ་བོ་སྔ་ཕྱི་གཉིས་རྒྱུན་མི་འཕྲད་པ་དང་འདྲའོ། །འོ་ན་ཤེས་པ་རིགས་མཐུན་པ་ཙམ་གང་དང་གང་ལའང་བསྒོའམ་ཞེ་ན། བསྒོ་བྱའི་འོས་མ་ཡིན་པས་མི་བཏུབ་སྟེ། ཤེས་པའི་རིགས་མང་པོ་གཞན་དང་གཞན་ཐམས་ཅད་ཆོས་མཐུན་པ་ཡིན་པས་ན་རིགས་མཐའ་ཡས་པ་ཀུན་གྱིས་ཀུན་ལ་བསྒོ་བར་ཐལ་ཏེ་དགྲ་བཅོམ་པའི་ཤེས་པ་ལའང་ཀུན་ནས་ཉོན་མོངས་པའི་བག་ཆགས་བསྒོད་པ་སོགས་སུ་འགྱུར་རོ། །དེ་བས་ན་ཀུན་གཞི་ཡོད་དགོས་སོ། །དེ་ཡང་དོན་གསང་ལས། ཐ་དད་གསུམ་དང་འགལ་བའི་ཕྱིར། །དྲུག་པོ་དག་ནི་འབྲེལ་མེད་དེ། །སྐད་ཅིག་ལྷན་ཅིག་མེད་པའི་ཕྱིར། །རིགས་ལ་བྱ་ན་གཞན་དུ་ཐལ། །ཞེས་ཐེག་བསྡུས་སུ་གསུངས་པར་བཤད་པའི་ཡང་དོན་ཏོ། །གཏན་ཚིགས་དེ་ལྟར་དུ་ངེས་པ་དེས་ན་འཁྲུལ་གྲོལ་གྱི་གཞིར་ཀུན་གཞིའི་དེ་བཞིན་ཉིད་ཡོད་པའི་གསང་དོན་ལ་བློ་གྲོས་གསལ་བ་དེ་ནི་དོན་ལ་མཁས་པ་ཉིད་ཅེས་བྱ་ཞིང་ཤིན་ཏུ་བསྔགས་པར་འོས་པ་སྟེ། རྩ་བའི་རྒྱུད་ལས། ཀུན་གཞི་ནམ་མཁའི་སྙིང་པོ་དེ། །ཉོན་མོངས་སྤྲིན་གྱིས་གཏིབས་སྦུངས་པ། །ཤེས་རབ་རླུང་གིས་མ་གཏོར་བར། །ག་ཞ་མཁན་གྱི་སྦྱོང་འདྲ་ཡིས། །སྒྲིབ་བསལ་ཆོས་ཉིད་གསལ་འདོད་པས། །ཇི་ལྟར་ཆུས་གཤེར་བྱིས་པ་དག །ཉི་མ་སྤྲིན་ལྡན་གྲིབ་མ་ཡིས། །ཤིན་ཏུ་སྒྲིབས་པར་གྱུར་པ་ན། །སྤྲིན་ཆེན་འདུས་པའི་ཕུང་པོ་ལ། །ཁ་ཡི་དབུགས་ཀྱིས་བུས་བྱས་ནས། །སྤྲིན་བསལ་ཉི་འོད་གསལ་འདོད་འདྲའོ། །དེ་ཕྱིར་རྣལ་འབྱོར་དབང་ཕྱུག་གིས། །སེམས་ཉིད་དོན་ལ་རྣམ་བརྟགས་ཏེ། །ཀུན་གཞི་རྩ་བར་ཤེས་པར་བྱ། །སེམས་ཉིད་དེ་ལ་བལྟས་གསལ་བ། །རྩ་བ་དང་ནི་གང་ལྡན་པ། །དུས་དང་ཚིགས་དང་ལོར་གྱུར་ཀྱང་། །ཡལ་ག་ལོ་འདབ་འབྲས་བུར་སྐྲུན། །རྩ་བའི་ས་བོན་མེད་མི་འགྱུར། །ཞེས་དང་། ཀུན་གཞི་ཀུན་ཏུ་ནམ་མཁའ་ལ། །ཡིད་ནི་མཁའ་ལ་ཉི་ཤར་འདྲ། །རྣམ་ཤེས་ཉོན་མོངས་སྤྲིན་གྱིས་ཁེབས། །འདུ་བྱེད་རླུང་གིས་ཀུན་བསྐྱེད་དེ། །གསལ་དང་འབྱུང་འཇུག་སངས་དང་འགག །རྣམ་ཤེས་མཚན་མའི་རྟོག་པ་ཡིས། །ཀུན་གཞི་ནམ་མཁའ་མཐོང་མི་སྟེར། །ཀུན་གཞི་མཐོང་ཉིད་ཆོས་སྐུ་སྟེ། །འདི་དོན་ནམ་མཁའ་མ་བརྗེད་པ། །ཏིང་འཛིན་ཆེན་པོ་རྒྱུན་མི་འཆད། །གང་ཞིག་འདི་དོན་ཡིད་འཆར་བ། །གཟུགས་ཀྱི་དངོས་པོ་ཅིར་སྣང་ཡང་། །སེམས་ནི་ཡེ་ནས་མྱ་ངན་འདས། །བདེ་ཆེན་སངས་རྒྱས་ཐམས་ཅད་ལ། །དགོངས་པ་འདི་ལས་ཡོང་མི་མངའ། །ཞེས་གསུངས་པ་དང་། ལང་ཀར་གཤེགས་པ་ལས་ཀྱང་། ཡིད་ཀྱི་ཤེས་ལས་བྱུང་བ་ཡི། །བག་ཆགས་དྲི་མ་བཞིན་དུ་ལྟོས། །སེམས་ནི་རས་ཡུག་དཀར་པོ་འདྲ། །བག་ཆགས་རྣམས་ཀྱིས་མི་མཛེས་སོ། །ཞེས་དང་། དེ་བཞིན་གཤེགས་པའི་སྙིང་པོ་ནི། །རྣམ་ཤེས་བདུན་དང་ལྡན་པ་ཡང་། །འཛིན་པ་གཉིས་ཀྱིས་རབ་འཇུག་སྟེ། །ཡོངས་སུ་ཤེས་པས་ལྡོག་པར་འགྱུར། །ཞེས་དང་། རྙོག་པ་སྤངས་པའི་སེམས་ཉིད་ནི། །ཡིད་ཀྱི་རྣམ་ཤེས་བཟློག་པ་སྟེ། །ཆོས་རྣམས་ཐམས་ཅད་ཤེས་པའི་ཕྱིར། །སེམས་ནི་སངས་རྒྱས་ཞེས་ང་འཆད། །ཞེས་སོགས་ཚད་མེད་དོ། །གཉིས་པ་ལ་གསུམ་སྟེ། སེམས་ཅན་གྱི་ལུས་བླང་དུ་མི་རུང་བར་བསྟན་པ། སྙོམ་འཇུག་གཉིས་ལས་ལྡང་དུ་མི་རུང་བར་བསྟན་པ། ཤེས་པ་ཆད་ནས་ལྡང་དུ་མི་རུང་བར་བསྟན་པའོ། །དང་པོ་ནི། དེ་ཉིད་མེད་ན། ཞེས་པ་ནས། ལེན་ཡོད་ག་ལ་སྲིད། །ཅེས་པའི་བར་གྱིས་བསྟན་ཏེ། དགོངས་པ་ངེས་པར་འགྲེལ་པའི་མདོ་ལས། བློ་གྲོས་ཡངས་པ་འགྲོ་བ་དྲུག་གི་འཁོར་བ་འདི་ན་སེམས་ཅན་གང་དང་གང་དག་སེམས་ཅན་གྱི་རིས་གང་དང་གང་དུ་ཡང་སྒོ་ང་ནས་སྐྱེ་བའི་སྐྱེ་གནས་སམ། ཡང་ན་མངལ་ནས་སྐྱེ་བའམ། ཡང་ན་དྲོད་གཤེར་ལས་སྐྱེ་བའམ། ཡང་ན་རྫུས་ཏེ་སྐྱེ་བའི་སྐྱེ་གནས་སུ་ལུས་མངོན་པར་འགྲུབ་ཅིང་འབྱུང་བར་འགྱུར་བ་དེར་དང་པོར་འདི་ལྟར་ལེན་པ་རྣམ་པ་གཉིས་པོ་རྟེན་དང་བཅས་པའི་དབང་པོ་གཟུགས་ཅན་ལེན་པ་དང་། མཚན་མ་དང་མིང་དང་རྣམ་པར་རྟོག་པ་ལ་ཐ་སྙད་འདོགས་པའི་སྤྲོས་པའི་བག་ཆགས་ལེན་པ་ལ་རྟེན་ནས་ས་བོན་ཐམས་ཅད་པའི་སེམས་རྣམ་པར་སྨིན་ཅིང་འཇུག་ལ་རྒྱས་ཤིང་འཕེལ་བ་དང་ཡངས་པར་འགྱུར་རོ། །དེ་ལ་གཟུགས་ཅན་གྱི་ཁམས་ན་ནི་ལེན་པ་གཉི་ག་ཡོད་ལ། གཟུགས་ཅན་མ་ཡིན་པའི་ཁམས་ན་ནི་ལེན་པ་གཉིས་སུ་མེད་དོ། །ཞེས་གསུངས་པ་ལྟར་གལ་ཏེ་ཀུན་གཞི་དེ་ཉིད་མེད་ན་ལུས་ཀྱི་རྒྱུ་བག་ཆགས་གསོག་ས་མེད་པས་དུས་གསུམ་ཐམས་ཅད་དུ་འཁོར་བ་ལུགས་ནས་འབྱུང་སྟེ་སྐྱེ་བ་བཞི་པོའི་ལུས་གང་ཡིན་པ་དེ་ཉིད་མ་བླང་བ་ལེན་པ་དང་བླངས་པ་གནས་པར་བྱེད་པ་གང་ཡང་ཡོད་པར་མི་རུང་བས་འཁོར་བ་སྣང་བར་ག་ལ་སྲིད་དེ་སྣང་དུ་མི་བཏུབ་བོ། །གལ་ཏེ་སྲིད་ན་ལུས་ལེན་པ་དེ་ཉིད་རྒྱུ་དང་འབྲེལ་བ་ཞིག་གམ། རྒྱུ་མེད་པ་ཞིག་ཡིན། ཕྱི་མ་ལྟར་ན་རྟག་ཏུ་ཡོད་པའམ་མེད་པར་ཐལ་ལོ། །དང་པོ་ལྟར་ན། རྒྱུ་རྟག་པ་ཞིག་གམ་མི་རྟག་པ་ཞིག་ཡིན། རྟག་ན་རིམས་དང་གཅིག་ཆར་གྱིས་དོན་བྱེད་པ་འགལ་ལོ། །མི་རྟག་པ་ཡིན་ན། གཟུགས་སམ་སེམས་གང་ཡིན། །དང་པོ་ལྟར་ན། རྩོམ་གཞི་གཟུགས་རྡུལ་ཕྲ་རབ་ཡིན་དགོས་པས། དེ་ལ་ཕྱོགས་ཆ་བརྟགས་ན་མ་གྲུབ་བས་འདུས་ནས་རྩོམ་པར་མི་རུང་ངོ་། །དེར་མ་ཟད་གཟུགས་མེད་དུ་མིང་བཞིའི་ཕུང་པོ་ལེན་པར་ཡང་འགལ་ལོ། །གཉིས་པ་ལྟར་ན་ཚོགས་བདུན་ནི་ས་བོན་ཐམས་ཅད་པ་མིན་པས་ལུས་ལེན་ཞིང་གནས་པའི་རྟེན་དུ་མི་རུང་ངོ་། །དེའི་ཕྱིར་ཀུན་གཞི་ལས་འོས་མེད་པའོ། །དེ་ལྟར་ཀུན་གཞི་མེད་ན་འཁོར་བ་ལས་ལྡོག་ཏུ་མི་བཏུབ་པ་བཞིན་དུ་འཁོར་བར་འཇུག་པའང་མི་རུང་ངོ་། །གཉིས་པ་ནི། དེ་ཉིད་མེད་ན། ཞེས་པ་ནས། ལྡང་སྟེ་གང་མི་འགྱུར། །ཞེས་པའི་བར་གྱིས་བསྟན་ཏེ། དེ་བཞིན་དུ་གལ་ཏེ་ཀུན་གཞི་དེ་ཉིད་མེད་ན་ཉན་ཐོས་གང་གིས་ཚོགས་དྲུག་གི་རྒྱུ་བ་ཉོན་ཡིད་དང་བཅས་པ་རྒྱུན་བཀག་ནས་བསྒོམས་ཏེ་འགོག་པ་ལ་སྙོམས་པར་ཞུགས་པ་ལས། དུས་བྱམས་པའི་བསྟན་པ་ལྟ་བུ་ཇི་སྲིད་ཅིག་ན་གཎྜི་བརྡུང་བའི་སྒྲ་ལ་སོགས་པ་རྐྱེན་གྱིས་བསྐུལ་ཏེ་འགོག་པ་ལས་སླར་ལྡང་བ་དེ་ཡང་རྒྱུ་གང་ལས་བྱུང་སྟེ་ཀུན་གཞི་མ་ཡིན་པ་གཞན་གང་ལས་ཀྱང་བྱུང་བ་མིན་པས་ཀུན་གཞི་ཡོད་པར་མངོན་ནོ། །དེ་བཞིན་དུ་གང་བག་ཆགས་ཀྱི་རྟེན་ཀུན་གཞི་ཉིད་མེད་ན་དེ་ལ་རྟེན་མེད་པས་འདུ་ཤེས་མེད་པ་བ་དང་འདུ་ཤེས་མེད་པའི་སྙོམས་པར་འཇུག་པ་གཉིས་ཀྱིས་ཚོགས་དྲུག་འགག་ནས་མེད་པར་གྱུར་བ་ན། ཕྱིས་དེ་ལས་ལྡང་བའང་རྒྱུ་གང་ལས་ལྡང་སྟེ་ཀུན་གཞི་མ་ཡིན་པ་གང་ནས་ཀྱང་འབྱུང་བར་མི་འགྱུར་བས་ཀུན་གཞི་ཡོད་པར་གསལ་ལོ། །གསུམ་པ་ནི། དེ་བཞིན་གང་གིས། ཞེས་པ་ནས། དུག་སྨན་ཇི་བཞིན་ནོ། །ཞེས་པའི་བར་གྱིས་བསྟན་ཏེ། དེ་བས་ན་སྔ་མ་དེ་བཞིན་དུ་བརྒྱལ་འབོགས་སམ་གཉིད་ལ་སོགས་པ་རྐྱེན་གང་གིས་དབང་ལས་ཚོགས་དྲུག་མྱོས་ཉེ་འགགས་པར་འགྱུར་པ་ན་ཡུན་སྐད་ཅིག་གམ་ཇི་སྲིད་ཀྱི་རིང་ཐུང་གི་ཡུན་དེ་སྲིད་ལོན་ཏེ་དེ་ནས་སླར་ལྡང་བའང་ཀུན་གཞི་ཡོད་པས་ལྡང་བའོ། །དེ་ལྟར་གསུམ་གྱི་དུས་སུ་འགག་པ་ལྡང་བའི་གཏན་ཚིགས་དེས་ན་ཀུན་གཞི་དེ་ཉིད་ལུས་ལེན་པ་སོགས་འཁོར་བར་འཇུག་ལྡོག་གི་གཞི་ཡིན་པར་མ་ཟད་ཤེས་པ་ཉམས་པ་སླར་གསོ་བ་ལ་སོགས་པ་ཀུན་གྱི་གཞི་ཡང་ཡིན་ཏེ། དཔེར་ན་ལུས་ཀྱི་འབྱུང་ཁམས་དང་ལུས་དུག་གིས་མྱོས་པ་སྨན་གྱིས་གསོ་བ་ཇི་ལྟ་བ་བཞིན་ནོ། །དེ་ལྟར་གཏན་ཚིགས་ཀྱི་རྩ་བ་བཞིས་ཀུན་གཞི་ཡོད་པར་མངོན་ནོ། །གསུམ་པ་ལ་གསུམ་སྟེ། གཅིག་དང་ཐ་དད་ལ་བརྩད་པའི་ལན་བསྟན་པ། བཙན་མི་བཙན་ལ་བརྩད་པའི་ལན་བསྟན་པ། ཀུན་གཞིའི་ཆོས་ཉིད་བསམ་གྱིས་མི་ཁྱབ་པར་བསྟན་ནས་མཚན་ཉིད་ངེས་པར་བྱ་བའོ། །དང་པོ་ནི། འཇུག་པ་ལྔ་ནི། ཞེས་པ་ནས། འོ་མའི་ཆུ་བཞིན་ནོ། །ཞེས་པའི་བར་གྱིས་བསྟན་ཏེ། འོ་ན་འཇུག་པ་སྒོ་ལྔའི་རྣམ་པར་ཤེས་པའི་ཚོགས་ལྔ་ནི་དངོས་པོ་མེད་པར་དཔེ་སྒྱུ་མ་ལྟ་བུའམ་རྨི་ལམ་དང་འདྲ་བར་མི་བརྟན་ལ་མི་རྟག་པས་བསླུ་བར་བྱེད་པ་ཡིན་ལ། ཀུན་གཞི་ནི་དེ་ལྟར་མིན་པར་བརྟན་པ་ལྟ་བུར་མི་བསླུ་བ་ཡིན་པའི་ཚུལ་དེ་ལྟར་ཡིན་ན་ཀུན་གཞི་དང་སྒོ་ལྔ་འདི་གཉིས་ངོ་བོ་གཅིག་པའམ་འོན་ཏེ་ཐ་དད་པ་ཞིག་ཡིན་ཞེ་ན་རྩོད་པར་བྱེད་ན། ལན་ནི། གལ་ཏེ་ངོ་བོ་གཅིག་པར་གྱུར་ཏེ། སྒོ་ལྔར་ངོ་བོ་གཅིག་ན་ནི། ཀུན་གཞི་ལ་མི་བརྟེན་པའི་ཕྱིར་སེམས་ཅན་གྱིས་འཇུག་གཞི་མཐོང་བས་གྲོལ་བར་ཐལ་བའི་སྐྱོན་དུ་འགྱུར་ལ། འོན་ཏེ་ཀུན་གཞིར་ངོ་བོ་གཅིག་ན་ནི་གཟུང་འཛིན་རགས་པའི་འཁྲུལ་སྣང་མ་ཤར་བས་འདོད་གཟུགས་ཀྱི་སེམས་ཅན་ལྟ་བུའི་ཉེས་སྤྱོད་ཅན་དུ་མི་རུང་བའི་སྐྱོན་དུ་ཐལ་བར་འགྱུར་རོ། །གལ་ཏེ་ཐ་དད་པར་གྱུར་ན་ཡང་། ངོ་བོ་འབྲེལ་མེད་དུ་འགྱུར་བ་དང་། ཀུན་གཞི་མཐོང་བས་བག་ཆགས་མི་འཇིལ་བ་ལ་སོགས་པའི་སྐྱོན་དུ་ཐལ་བར་འགྱུར་རོ། །དེས་ན་བསྒྲུབ་བྱའི་དོན་ནི། བྱེད་པའི་ལས་ཀྱིས་སོ་སོར་སྣང་ལ་ཤེས་པའི་རིགས་སུ་གཅིག་པ་ཡིན་པས་གཅིག་དང་ཐ་དད་ཀྱི་ངོ་བོ་ལས་གྲོལ་བ་ཡིན་ཏེ་དཔེར་ན་བག་ཆགས་སད་པའི་ཚེ། གཅིག་གྲུབ་ན་གཅིག་ཀྱང་འགྲུབ་པའམ། གཅིག་ཞིག་ན་གཅིག་ཀྱང་ཞིག་པར་འགྱུར་བ་དབྱིབས་སམ་ཁ་དོག་གམ། གཞི་དང་བཅས་པའི་དཔེ། བག་ཆགས་ངན་པར་སྣང་བ་རྙོག་མ་ཅན་ཡི་ཆུ་ལྟ་བུ་དང་། བག་ཆགས་བཟང་པོར་སྣང་བ་འོ་མའི་ཆུའམ་འོ་གའི་ཆུ་དྭངས་པ་ཇི་ལྟ་བ་བཞིན་ནོ། །གཉིས་པ་ནི། དེ་ན་དེ་ཉིད། ཅེས་པ་ནས། འབྱུང་བ་ཇི་བཞིན་ནོ། །ཞེས་པའི་བར་གྱིས་བསྟན་ཏེ། དེ་ལྟར་གཅིག་ཐ་དད་ལས་གྲོལ་བའི་ཚུལ་དེ་བཞིན་ཡིན་ནའམ་ཚུལ་དེས་ན་གཅིག་དུ་མ་ལས་གྲོལ་བ་དེ་ཉིད་ལ་སྒོ་ལྔ་ཡིད་ཤེས་དང་བཅས་པས་ཡུལ་བཅད་པའི་བག་ཆགས་ཀྱི་ངོ་བོ་ནུས་པ་དང་བཅས་པ་དེ་ཉིད་དབང་བཙན་ནམ། གལ་ཏེ་བག་ཆགས་ཚོགས་དྲུག་དང་བཅས་པ་དེ་ཡི་གཞི་ཡི་རང་བཞིན་ཀུན་གཞི་འདི་ཉིད་དབང་བཙན་པ་ཡིན་ཞེས་རྒོལ་བར་བྱེད་ན། ལན་དུ་ཀུན་གཞི་ཉིད་བཙན་པས་ཆོས་ཉིད་ཀྱི་རང་བཞིན་གང་དུའང་མི་གཡོ་ལ་མཚན་ཉིད་མཐའི་སྤྲོས་པ་ཅིར་ཡང་མི་འགྱུར་བས་དབང་བཙན་པར་གནས་ལ་སྒོ་ལྔ་ཡིད་དང་བཅས་པའི་བག་ཆགས་ཀྱི་སྣང་བ་རྣམས་ནི་ཀུན་ནས་གཡོ་བ་དང་སྤྲོས་མཐའ་སྣ་ཚོགས་སུ་འགྱུར་བས་མི་བཙན་ལ་དེ་བཞིན་དུ་ཀུན་གཞིའི་ངོ་བོ་ནི་འཕྲལ་དུ་མ་བྱུང་བ་དང་ཚོགས་དྲུག་གི་བག་ཆགས་ནི་སྔ་མར་བཤད་པ་དེ་བཞིན་འཕྲལ་དུ་ཡུལ་ཐ་དད་ལས་འབྱུང་བ་ཡིན་པས། དཔེར་ན་ཀུན་གཞི་ནམ་མཁའ་ལྟ་བུ་དང་། ཚོགས་དྲུག་གི་བག་ཆག་དེའི་ངང་ལས་འབྱུང་བ་དང་འཇའ་རླན་སོགས་ཀྱི་ཆོ་འཕྲུལ་འཆར་བ་ཇི་ལྟ་བ་བཞིན་ནོ། །གསུམ་པ་ནི། ཐོག་མ་ཐ་མ། ཞེས་པ་ནས། འབྱུང་རྒྱུ་དེ་ཉིད་དོ། །ཞེས་པའི་བར་གྱིས་བསྟན་ཏེ། དེ་བས་ན་རང་བཞིན་དོན་གྱི་ཀུན་གཞིའི་གནས་ལུགས་ནི། ཐོག་མ་དང་ཐ་མ་མེད་དེ་སྔ་ཕྱིའི་དུས་དང་བྲལ་བས་འབྱུང་བ་དང་སངས་པའི་ཁྱད་པར་མི་དམིགས་ཤིང་ཡེ་ཉིད་ནས་ཡང་དག་པར་གནས་པས་མ་ནོར་བའི་ངོ་བོ་རྒྱུ་རྐྱེན་གྱིས་བྱས་པ་མེད་པར་མ་བཅོས་པའི་ཆོས་ཉིད་མ་བསླད་པས་དེ་བཞིན་ཉིད་ཀྱི་རང་བཞིན་དུས་བཞི་ཀུན་ཏུ་མ་བསྒྲིབས་ཏེ་གསལ་བར་སྣང་བའི་དབྱིངས་མུ་མཐའ་མེད་པའི་གསང་བ་དམ་པ་ཡིན་ལ། དེའི་ངོ་བོ་ནི་མཐའ་གང་དུའང་མ་བྱུང་བས་ཕྱོགས་ཆའི་སྤྲོས་པ་གང་ཅིར་ཡང་མི་སྣང་སྟེ་ཡེ་ཤེས་ཆེན་པོའི་རང་བཞིན་དུ་ཡེ་གདོད་མ་ནས་རང་བྱུང་གི་རིག་པར་འོད་གསལ་བའོ། །འོ་ན་འཁོར་བའི་ཆོས་ཇི་སྙེད་པར་སྣང་བ་འདི་ཉིད་ཅི་ཞིག་ཉེས་ཞེ་ན། རང་བཞིན་དེ་ལྟར་དུ་གནས་པ་ཡིན་ཀྱང་རང་ངོ་རང་གིས་མ་མཐོང་བའི་ཆ་ལས་སྦྱོར་བ་དོན་གྱི་ཀུན་གཞིའམ་འཁོར་བའི་རྒྱུའི་བག་ཆགས་དེ་ཉིད་སྐད་ཅིག་མའི་རྒྱུན་དུ་བྱུང་བས་ཀུན་གཞིའི་རྣམ་པར་ཤེས་པ་ཞེས་ཀྱང་བྱ་བ་ཡིན་ཏེ། ལང་ཀར་གཤེགས་པ་ལས། སེམས་ཀྱི་ཆོས་ཉིད་དག་པ་སྟེ། །སེམས་ནི་ནོར་ལས་བྱུང་བ་ཡིན། །ནོར་བ་གནས་ངན་ལེན་པ་སྟེ། །དེ་ཡི་ཕྱིར་ན་སེམས་མི་མཐོང་། །ཞེས་དང་། སེམས་སླུ་བ་ཡི་སྨིག་རྒྱུ་བ། །ཇི་ལྟར་དཔྱིད་ཀ་གཡོ་བ་ན། །རི་དྭགས་རྣམས་ནི་ཆུར་འཛིན་ཏེ། །དེ་ལ་དངོས་པོ་ཡོད་པ་མིན། །དེ་བཞིན་རྣམ་ཤེས་ས་བོན་ཡང་། །ལྟ་བའི་ཡུལ་ལ་རབ་ཏུ་གཡོ། །བྱིས་པ་རྣམས་ནི་སྐྱེ་བར་འཛིན། །རབ་རིབ་ཅན་གྱིས་རབ་རིབ་བཞིན། །ཞེས་དང་། ཇི་ལྟར་རྒྱ་མཚོའི་རླབས་རྣམས་ནི། །རླུང་གི་རྐྱེན་གྱིས་བྱུང་བ་དག །གར་བྱེད་རབ་ཏུ་འཇུག་པར་འགྱུར། །རྒྱུན་ཀྱང་ཆད་པར་མི་འགྱུར་རོ། །དེ་བཞིན་ཀུན་གཞི་ཆུ་བོ་ཡང་། །རྟག་ཏུ་ཡུལ་གྱི་རྐྱེན་གྱིས་བྱུང་། །རྣམ་ཤེས་རྦ་རླབས་སྣ་ཚོགས་ཀྱིས། །གར་བྱེད་རབ་ཏུ་འདུད་པར་འགྱུར། །ཞེས་གསུངས་པ་ལྟར་དེ་ནི་རྣམ་ཤེས་ཚོགས་བདུན་གྱིའང་སྐྱེད་བྱེད་ཡིན་པས་ཀུན་ནས་ཉོན་མོངས་བའི་ཤེས་རྒྱུན་ཐམས་ཅད་སྐྱེ་ཞིང་འཁོར་བའི་ཆོས་རྣམས་འབྱུང་བའི་རྩ་བ་བག་ཆགས་སྣ་ཚོགས་ཀྱི་ནུས་པའི་མཐུ་ཡི་སྟོབས་ཅན་དང་བཅས་པས་འཁོར་བའི་གཞི་རྩར་གྱུར་པ་དེ་ཉིད་གཞིར་བཞག་པ་ལས་དངོས་པོ་གཟུང་འཛིན་སྣ་ཚོགས་སུ་འབྱུང་ཞིང་སྣང་བའི་རྒྱུ་དེ་ཉིད་ལ་བག་ཆགས་ཀྱི་ཀུན་གཞི་ཞེས་བརྗོད་པ་ཡིན་ཏེ། སྔ་མ་ལས། ཇི་ལྟར་མེ་ལོང་གཟུགས་བརྙན་དང་། །རབ་རིབ་ཅན་ལ་སྐྲ་འཛིངས་པ། །དེ་བཞིན་བག་ཆགས་ཀྱིས་གཡོགས་སེམས། །བྱིས་པ་རྣམས་ཀྱིས་མཐོང་བ་ཡིན། །ཞེས་དང་། ཀུན་གཞི་ལ་ནི་རྟེན་བཅས་ནས། །ཡིད་ཀྱང་ཤིན་ཏུ་འཇུག་པར་འགྱུར། །སེམས་དང་ཡིད་ལ་རྟེན་བཅས་ནས། །རྣམ་པར་ཤེས་པ་འཇུག་པར་འགྱུར། །ཞེས་དང་། འཇིག་རྟེན་དག་ན་སེམས་སླུ་བ། །ཅུང་ཟད་ཙམ་ནི་གང་ཡོད་པ། །རང་བཞིན་གཉིས་དང་འབྲེལ་བ་སྟེ། །ཀུན་གཞི་རྣམ་པར་ཤེས་པས་སྤྲུལ། །ཞེས་སོགས་གསུངས་པ་ཉིད་དོ། །འོན་ཀྱང་དེ་ཙམ་ཉིད་ནའང་རང་བཞིན་གང་དུའང་འབྱུང་ཞིང་སྣང་བར་གནས་པ་ནི་ངོ་བོ་ལ་མེད་པ་ཁོ་ནའོ། །དགུ་པ་ལ་བཅུ་གཅིག་སྟེ། བག་ཆགས་གློ་བུར་དུ་ལྡང་བའི་དཔེ་བཤད་པ། ཀུན་གཞིའི་རང་བཞིན་བག་ཆགས་དང་བྲལ་བའི་དཔེ་བསྟན་པ། རྩ་བའི་རྣམ་ཤེས་ལས་ཡན་ལག་འབྱུང་བས་འཁོར་བར་སྣང་བའི་དཔེ་བཤད་པ། བག་ཆགས་རྐྱེན་གྱིས་སློང་བའི་དཔེ་བསྟན་པ། རྨོངས་པའི་དབང་གིས་རང་བཞིན་གྱིའང་ལྡང་བའི་དཔེ་བསྟན་པ། ཀུན་གཞིས་བག་ཆགས་འཛིན་པའི་དཔེ་བཤད་པ། མ་རིག་པའི་མཐུན་རང་བཞིན་ལ་བག་ཆགས་བསྒོ་བའི་དཔེ་བསྟན་པ། བག་ཆགས་བསྣོན་མར་གསོགས་པའི་དཔེ་བཤད་པ། བག་ཆགས་བརྣན་ཏེ་བརྟས་པའི་དཔེ་བསྟན་པ། སྒྲིབ་པ་དག་ཅིང་འབྱངས་པའི་དཔེ་བསྟན་པ། བག་ཆགས་སྨིན་པའི་དུས་དང་དེའི་དཔེ་བཤད་པའོ། །དང་པོ་ནི། དྭངས་པའི་མཁའ་ལ། ཞེས་པ་ནས། སྤྲིན་ཕུང་འཐིབས་ཞེས་བྱ། །ཞེས་པའི་བར་གྱིས་བསྟན་ཏེ། ཀུན་གཞིའི་དཔེ་རྣམས་ཇི་ལྟ་བུ་སྙམ་པ་ལ། དཔེར་ན་ཤིན་ཏུ་དྭངས་པའི་ནམ་མཁའ་དག་པའི་རང་བཞིན་ལ་རྒྱུ་བའི་སྤྲིན་གྱི་རིགས་ལས་ཆེན་པོ་རྣམས་སྤྲིན་ཕུང་ཡིན་པ་ལྟ་ཅི་སྨོས་ཏེ་ཐ་ན་གསེར་གྱི་རླངས་པ་ཙམ་གྱི་སྤྲིན་ཆུང་ངུ་འབྱུང་བ་ཚུན་ཆད་ཀྱང་སྤྲིན་དུ་གཏོགས་པ་ཡིན་པས་ནམ་མཁའ་སྒྲིབ་པའི་ཁུག་རླངས་དང་སྤྲིན་ཕུང་འཐིབས་པ་ཞེས་བྱ་ཞིང་དེའི་རྒྱུ་ཡང་ནམ་མཁའ་ཡིན་པ་ལྟར་ཀུན་གཞི་ཉིད་ལ་བག་ཆགས་ཀྱིས་སྒྲིབ་པའང་བྱུང་ཚོར་ཤིན་ཏུ་ཕྲ་བའི་གཡོ་བ་ཚུན་ཆད་ཀྱང་བག་ཆགས་སུ་གཏོགས་པ་ཡིན་པས་བག་ཆགས་ཀྱི་སྒྲིབ་པ་ཞེས་བྱ་ཞིང་དེ་དག་གི་རྒྱུ་ཡང་ཀུན་གཞི་ཡིན་ནོ་བར་བསྟན་པའོ། །གཉིས་པ་ནི། འབྱུང་བའི་སྐད་ཅིག །ཅེས་པ་ནས། བྱེ་བྲག་དེ་ཙམ་མོ། །ཞེས་པའི་བར་གྱིས་བསྟན་ཏེ། དཔེར་ན་དེ་ལྟར་ནམ་མཁའ་ལ་སྤྲིན་འབྱུང་བའི་སྐད་ཅིག་དེ་ཡི་སྔོན་ཕན་ཆད་སྤྲིན་ཕྲ་རགས་མ་བྱུང་བའི་དུས་སུ་ཤིན་ཏུ་དང་བའི་ནམ་མཁའ་ཉིད་སྣང་བ་ཡིན་ཀྱང་སྤྲིན་ཕུང་དེ་ཉིད་འབྱུང་བའི་སྐད་ཅིག་ཙམ་དུ་སྣང་བ་དེ་ཚུན་ཆད་ནས་ཡུན་ཐུང་ངུ་དང་རིང་པོར་བྱུང་བ་གཉིས་ཀ་དང་པོའི་ནམ་མཁའི་ཆོ་འཕྲུལ་སྣང་བ་ཞེས་བྱ་སྟེ། ནམ་མཁའ་མེད་པར་སྤྲིན་ཡོད་པར་མི་རུང་བས་ནམ་མཁའ་ཉིད་རྒྱུ་ཡིན་པ་དེ་བཞིན་དུ་ཀུན་གཞི་དེ་ཉིད་བག་ཆགས་དེ་དག་ཐམས་ཅད་ཀྱི་གཞིར་བཞག་པའང་། ཀུན་གཞི་དང་བག་ཆགས་གཉིས་ལམ་པའི་གང་ཟག་གིས་ལམ་ལྔའི་ཡེ་ཤེས་རྒྱུད་ལ་སྐྱེས་ཏེ་བག་ཆགས་བསལ་བའི་རིམ་པ་བཞིན་ཆོས་ཉིད་གསང་བའི་ནམ་མཁའ་སྣང་ཞིང་མཐར་བག་ཆགས་དག་པའི་ཆོས་སྐུའི་སྣང་བ་ཡོད་པས་སྤྲིན་དང་བྲལ་བའི་ནམ་མཁའ་ཡོད་པ་ལྟར་ལྡོག་པ་ཐ་དད་ཀྱི་དབྱེ་བ་ཡོད་ཀྱང་། ཀུན་ནས་ཉོན་མོངས་པའི་དུས་ན་སོ་སོར་མི་ཕྱེད་པས་ཀུན་གཞི་དང་བག་ཆགས་དུས་མཚུངས་ཤིང་གྲུབ་པ་དང་བདེ་བ་གཅིག་པར་གྱུར་པ་ཡིན་པའི་ཕྱིར་གྱི་གཏན་ཚིགས་དེས་ན་ཀུན་གཞི་དེ་ཉིད་བག་ཆགས་ཀྱི་ངོ་བོར་སྣང་བ་ཡིན་ཏེ་དེ་བས་ན་ཀུན་གཞི་དང་བག་ཆགས་ཀྱི་དབྱེ་བའི་ཆ་སོ་སོའི་བྱེ་བྲག་དེ་ཙམ་མོ། །ཞེས་རྣམ་དབྱེ་དེ་ལས་བཏགས་ཏེ་དོན་ལ་རྟེན་དང་བརྟེན་པའི་ཚུལ་ཡིན་པས་ཀུན་གཞི་མེད་པར་བག་ཆགས་ཡོད་པར་མི་རུང་བས་རྒྱུའི་དཔེ་དོན་ནམ་མཁའ་དང་ཀུན་གཞི་སྦྱར་ཏེ་གསལ་བར་བསྟན་པ་སྟེ། དོན་གྱི་ངོ་བོ་ནི་ནམ་མཁའི་རང་བཞིན་ལྟར་ཆོས་གང་ལའང་གནས་པ་མ་ཡིན་ནོ། །གསུམ་པ་ནི། དེ་ཉིད་དེ་ཡི། ཞེས་པ་ནས། སྔངས་འཇིགས་དངོས་པོ་ཉིད། །ཅེས་པའི་བར་གྱིས་བསྟན་ཏེ། ཀུན་གཞི་ལས་འཁོར་བའི་ཚོགས་དྲུག་སྣང་བའི་ཚུལ་ནི། ཀུན་གཞི་དེ་ཉིད་བག་ཆགས་དང་བཅས་པ་དེ་ཡི་སྐད་ཅིག་མའི་རྒྱུན་གྱི་རྒྱུ་བ་ལས་འཇུག་པའི་རྣམ་པར་ཤེས་པ་ཚོགས་དྲུག་པོ་རྣམས་རྩལ་དུ་འབྱུང་སྟེ་རྒྱ་མཚོའི་རླབས་ལྟ་བུར་སྣང་བ་ཉིད་དེ། དགོངས་པ་ངེས་པར་འགྲེལ་བའི་མདོ་ལས། བློ་གྲོས་ཡངས་པ་ལེན་པའི་རྣམ་པར་ཤེས་པ་དེ་ལ་རྟེན་ཅིང་གནས་ནས་རྣམ་པར་ཤེས་པའི་ཚོགས་དྲུག་པོ་འདི་ལྟ་སྟེ། མིག་གི་རྣམ་པར་ཤེས་པ་དང་། རྣ་བ་དང་སྣ་དང་ལྕེ་དང་ལུས་དང་ཡིད་ཀྱི་རྣམ་པར་ཤེས་པ་དག་འབྱུང་ངོ་། །དེ་ལ་རྣམ་པར་ཤེས་པ་དང་བཅས་པའི་མིག་དང་གཟུགས་རྣམས་ལ་བརྟེན་ནས། མིག་གི་རྣམ་པར་ཤེས་པ་འབྱུང་སྟེ། མིག་གི་རྣམ་པར་ཤེས་པ་དེ་དང་ལྷན་ཅིག་རྗེས་སུ་འཇུག་པ། དུས་མཚུངས་པ། སྤྱོད་ཡུལ་མཚུངས་པ། རྣམ་པར་རྟོག་པའི་ཡིད་ཀྱི་རྣམ་པར་ཤེས་པ་ཡང་འབྱུང་ངོ་། །ཞེས་སོགས་དང་། ལང་ཀར་གཤེགས་པ་ལས། ཀུན་གཞི་ལས་ནི་སེམས་ཀུན་ཀྱང་། །རྦ་རླབས་བཞིན་དུ་འབྱུང་བར་འགྱུར། །ཐམས་ཅད་བག་ཆགས་རྒྱུ་ལས་བྱུང་། །རྐྱེན་བཞིན་དུ་ནི་འབྱུང་བའོ། །ཞེས་བཀའ་སྩལ་བ་བཞིན་ཏེ། དེ་ཡང་དེ་ལྟར་ཚོགས་དྲུག་ཏུ་སྣང་བས་ཡུལ་བཅད་དེ་ཀུན་གཞི་ལ་བག་ཆགས་ཡིད་ཀྱི་བསྒོས་པས། འཁོར་བའི་རྩ་བའམ་ས་བོན་རྒྱས་ཤིང་ནུས་པའི་མཐུ་ཆེན་པོར་འཕེལ་བའི་བག་ཆགས་སྟོབས་ཅན་དུ་གྱུར་བས་གནས་ཀྱི་དངོས་པོ་གང་དང་སྤྱོད་ཡུལ་གང་ཡིན་པ་དག་ཀྱང་བཟང་ངན་དང་མཐོ་དམན་དུ་སྨིན་ཅིང་གང་སྣང་དེར་འཛིན་ཞེན་དང་བཅས་ཏེ་ཉོན་མོངས་ཤིང་ཉམ་ཐག་པ་དང་དེ་ལས་ཡུལ་ཐ་དད་པའི་བདེ་སྡུག་གི་མཚན་མར་སྣང་བ་སྣ་ཚོགས་པ་དེ་དག་ཀུན་ལ་ཚོགས་དྲུག་གི་འཛིན་ཞེན་གྱི་དབང་གིས་ལས་མང་པོ་གསོགས་ཏེ་འདུ་བྱེད་ཀྱི་རླུང་གིས་གཡོ་འགུལ་དུ་བསྐྱོད་པས་འགྲོ་བ་རིགས་དྲུག་ཏུ་ཟོ་ཆུན་བརྒྱུད་པའི་ཆུ་རྒྱུན་ལྟར་ཕྱི་ནང་གི་རྟེན་ཅིང་འབྲེལ་བའི་ཡན་ལག་དང་མཐུན་པར་འཁོར་ཞིང་སྡུག་བསྔལ་བ་ཡིན་ཏེ། རིན་པོ་ཆེ་རྒྱན་ལས། ཡིན་པར་གནས་དང་མ་ཤེས་པ། །སྔ་ཕྱི་མི་གནས་ཐོག་མ་མེད། །ཚད་ལས་འདས་པས་ཐ་མའང་བྲལ། །རྒྱུན་དུ་མི་སྟོངས་འཁོར་ལོ་བསྐོར། །ཟོ་ཆུ་བརྒྱུད་པའི་འཁོར་ལོ་ལྟར། །ཕྱི་ནང་བཅུ་གཉིས་ཤུགས་ཀྱིས་བསྐྱར། །ཡོད་པ་མིན་ཀྱང་དོན་ལྟར་སྣང་། །རྐྱེན་གྱིས་དཀྲུགས་པའི་དབང་པོ་བཞིན། །ཞེས་སོ། །དེས་ན་ཀུན་གཞི་རྒྱུའི་རྐྱེན་དུའང་འགྱུར་རོ། །དེའང་ཀུན་གཞི་དང་བག་ཆགས་ལས་འབྲས་བུ་འཁྲུལ་པ་དངོས་ཡུལ་དུ་རང་སྣང་བ་གང་ཡིན་པ་དེ་ལ་ཚོགས་དྲུག་གིས་བྱེ་བྲག་ཏུ་བཟུང་ཞིང་སྤྱོད་ཡུལ་དེ་ལྟར་ཤེས་ཤིང་གསལ་བར་རིག་པའི་སྒོ་ནས་སྒོ་ལྔས་ཡུལ་ལྔར་བཅད་ཅིང་ཡིད་ཐུན་མོང་གི་རྗེས་སུ་འབྲང་བ་དེའང་ཀུན་གཞིའི་བག་ཆགས་ཀྱི་རྒྱུད་གང་དུ་དམིགས་ཏེ་ཡུལ་དུས་དབྱེ་བ་མེད་པར་རྣམ་པར་སྨིན་པའི་ཆ་ལ་ཉོན་མོངས་པ་ཅན་གྱི་ཡིད་ཀྱིས་བདག་ཏུ་ལྟ་བ་དང་གང་དེ་ལ་བདག་གིར་ཡང་འཛིན་པས་བརྟགས་པའི་རྟོག་པ་སྐད་ཅིག་མ་དེ་ཡི་རྒྱུན་ལས་ཐམས་ཅད་ཟག་བཅས་སུ་སོང་བ་དེ་ལས་ཀུན་གཞི་བག་ཆགས་དང་བཅས་པའི་འབྲས་བུ་དེ་ཡང་འཁོར་བའི་གཟུགས་དང་ཆོས་སྣ་ཚོགས་སུ་རེད་ཅིང་སྣང་བ་འདིར་སྨིན་པར་འབྱུང་སྟེ་འཁྲུལ་འཁོར་ཅན་དུ་འཕྱན་པའོ། །དེ་ལྟ་བུའི་གཟུང་འཛིན་གྱི་འཁོར་བར་སྣང་བའི་ཆོས་དེ་དག་ལའང་གང་གཟུགས་ཀྱི་ཕུང་པོའི་ཆ་ལ་བརྟེན་ནས་བདེ་སྡུག་བཏང་སྙོམས་ཀྱི་ཚོར་བ་གང་གི་ཡུལ་ལ་འདུ་ཤེས་ཀྱིས་མཚན་མར་འཛིན་པའི་བྱེ་བྲག་ཏུ་ཤེས་པས་འདུ་བྱེད་ལངས་བ་གང་དེ་ཡིས་ལས་སྣ་ཚོགས་སྤྱད་པས་རྣམ་པར་ཤེས་པས་དེ་དང་མཐུན་པར་རིག་སྟེ་ཡུལ་གྱི་རྐྱེན་སྣང་སྡུག་བསྔལ་གསུམ་དང་བརྒྱད་ལ་སོགས་པས་སྐྲག་ཅིང་སྔངས་པ་དང་འཇིགས་པ་བརྒྱད་ལ་སོགས་པས་ཡང་བའི་དངོས་པོ་ཅན་ཉིད་དུ་གྱུར་ཏེ་ཡུལ་རྐྱེན་ངན་པས་ཉམ་ཐག་ཅིང་ཐར་མེད་དུ་འཁྱམས་པ་ཡིན་ཏེ། སྔ་མ་ལས། མ་རིག་འདམ་གྱི་ཕུང་པོ་ལ། །ཉོན་མོངས་དུག་གི་གཞི་བཏབ་པས། །སྡུག་བསྔལ་སྣ་ཚོགས་ཉེས་པས་ཉེན། །ཐར་པ་བདེ་ཆེན་སྲོག་བྲལ་བའོ། །ཞེས་དང་། རང་བྱུང་བདེ་བའི་འཁོར་ལོའི་རྒྱུད་ལས། དེ་ཡང་ཀུན་གཞི་ངར་འཛིན་དང་། །བག་ཆགས་ཡོངས་སུ་མ་ཟད་པས། །ཆེ་བའི་ཡོན་ཏན་མི་རྫོགས་ཤིང་། །འཁོར་བའི་གནས་ལས་དེ་མི་ཐར། །ཞེས་སོ། །བཞི་པ་ནི། མེ་ལོང་ཤེལ། ཞེས་པ་ནས། ཕྲད་ན་དེ་བཞིན་འབྱུང་། །ཞེས་པའི་བར་གྱིས་བསྟན་ཏེ། ཀུན་གཞི་ལ་བག་ཆགས་རྐྱེན་གྱིས་སློང་ངོ་ཞེས་པའི་ཚུལ་ཇི་ལྟ་བུ་ཞེ་ན། དཔེར་ན་མེ་ལོང་གཡའ་ཅན་དང་། མེ་ཤེལ་དང་། ཆུ་ཤེལ་ལམ་བཙའ་རྡོ་དང་གཙུབ་ཤིང་མེ་འབྱུང་བ་གསུམ་ལ། གཟུགས་བརྙན་དང་མེ་ཆུ་འབྱུང་རུང་རང་རྒྱུད་དུ་ཡོད་པ་དེ་ཉིད་རྐྱེན་དྲི་སྣུམས་ཀྱིས་ཕྱིས་ཏེ་དྭངས་པ་ན་གཟུགས་དང་། ཉི་མའི་འོད་ཟེར་དང་། ཟླ་བའི་འོད་ཟེར་རམ་སྐྱེས་བུའི་རྩོལ་བས་བརྡབས་པ་དང་བཙུབ་པ་ཡིན་རྐྱེན་གང་དང་ཕྲད་ན་ཡང་གཟུགས་བརྙན་དང་མེ་དང་ཆུའམ་མེ་འབྱུང་བ་དེ་བཞིན་དུ་ཀུན་གཞི་ལ་བག་ཆགས་ཀྱི་ས་བོན་གང་འབྱུང་བའང་གློ་བུར་གྱི་ལས་ཀྱི་རྐྱེན་གང་གིས་བསྒྱུར་བ་དེ་ཉིད་སློང་ཞིང་སད་པར་བྱེད་དོ། །འདིར་ཕྱག་དཔེ་ལ་ལར། མེ་ལོང་མེ་ཤེལ་ཆུ་ཤེལ་གསུམ། །ཞེས་ཀྱང་འབྱུང་ངོ་། །ལྔ་པ་ནི། མེ་ལོང་མཚོ་རླབས། ཞེས་པ་ནས། རྒྱུ་ཡིས་རང་བཞིན་ལྡང་། །ཞེས་པའི་བར་གྱིས་བསྟན་ཏེ། ཇི་ལྟར་བསླང་བས་བག་ཆགས་རང་བཞིན་གྱིའང་ལང་བའི་ཚུལ་དཔེ་གང་གིས་མཚོན་ཞེ་ན། དཔེར་ན་མེ་ལོང་ལས་གཡའ་ལྡང་བ་དང་། མཚོ་ལས་ཡར་རླབས་མོ་ལྡང་བ་དང་། ས་ལས་རླངས་པ་འབྱུང་བའི་དཔེ་གསུམ་པོ་ཇི་ལྟ་བ་དེ་བཞིན་དུ་མ་རིག་པས་ནོན་ཏེ་ཡུན་ཇི་སྲིད་ཐོག་མ་མེད་པའི་དུས་ནས་བག་ཆགས་བསགས་པ་དེ་ཡི་སྐད་ཅིག་མའི་རྒྱུན་གྱི་བག་ཆགས་ཀྱི་བྱུང་ཚོར་རྒྱུ་བ་རྣམས་རྐྱེན་གྱིས་མ་བསླང་ཡང་སྔོན་དེ་ཉིད་ལ་གོམས་ཤིང་བརྟས་པའི་རྒྱུ་ཡིས་རང་བཞིན་དུའང་ལྡང་བར་འགྱུར་བ་ཡིན་ནོ། །དཔེ་གསུམ་ནི་རྣམ་པར་སྨིན་པའི་བག་ཆགས་ཀྱི་དཔེ་གཉིས་དང་། རྒྱུ་མཐུན་པའི་བག་ཆགས་ཀྱི་དཔེ་གཅིག་སྟེ་མཚོན་ཚུལ་གསུམ་གྱི་ཕྱིར་དང་། ཤེས་པ་ཐ་དད་དཔེ་མོས་ཕྱོགས་ནས་ཤེས་པར་བྱ་བའི་ཕྱིར་ཏེ་བཤད་པ་དང་འཆད་པ་ལའང་སྦྱར་རོ། །དྲུག་པ་ནི། མེ་འཛིན་དེ་འཛིན། ཞེས་པ་ནས། དེ་འཛིན་བྱེད་པ་ཡིན། །ཞེས་པའི་བར་གྱིས་བསྟན་ཏེ། ཀུན་གཞིས་བག་ཆགས་འཛིན་ཞིང་སྨིན་པར་བྱེད་པའི་ཐབས་སུ་གྱུར་པ་དེ་ཉིད་དཔེ་གང་གིས་མཚོན་ཞེ་ན། དཔེར་ན་རྩྭ་ཡིས་མེ་འཛིན་པ་དང་མངལ་གྱིས་ཕོའི་ས་བོན་དེ་ཉིད་འཛིན་པ་དང་སྦྲང་རྒྱས་འདབ་གཤོག་ཅན་གྱི་སྦྲང་མ་འཛིན་པ་དེ་ལྟར་བག་ཆགས་དེ་ཉིད་ཀྱང་ཀུན་གཞིའི་ཤེས་པ་དེ་ཡིས་སྔ་མའི་སྟོབས་ལས་ཕྱི་མ་འབྱུང་བ་དེ་ཡི་སྐད་ཅིག་མའི་རྒྱུན་ལ་ཡུལ་མང་དུ་བཅད་པས་བག་ཆགས་ཆེ་ཕྲ་གང་ཞེན་ཅིང་ཆགས་པ་དེ་ཉིད་མི་གཏོང་བར་འཛིན་ཅིང་དུས་སུ་སྨིན་པར་བྱེད་པ་ཡིན་ནོ། །བདུན་པ་ནི། རས་དཀར་ལ་སོགས། ཞེས་པ་ནས། བསྒོས་པ་དེ་ཉིད་དུའོ། །ཞེས་པའི་བར་གྱིས་བསྟན་ཏེ། དཔེར་ན་རས་དཀར་པོ་དང་། དར་དཀར་དང་སྣམ་བུ་དཀར་པོ་ལ་སོགས་པ་དེ་དག་རྣམས་ནི་ཚོན་དང་ཆོས་གང་གིས་བསྒོའི་ཞེས་བསྒོས་ཏེ་བསྒྱུར་བའི་དབང་དུ་རས་སྣམ་ལ་སོགས་པ་དེ་དག་ཉིད་འདུ་ཞིང་དངོས་པོའི་ཁ་དོག་དེར་འགྱུར་བའོ། །དཔེ་དེ་བཞིན་དུ་ཀུན་གཞི་ཉིད་ཀྱང་ཡེ་ནས་དྲི་མ་མེད་པའི་དར་དཀར་པོ་ལྟ་བུ་དེ་ལ་བག་ཆགས་དེ་ཡི་རྒྱུན་དག་ལས། ལས་གང་སྤྱད་ཅིང་གོམས་པ་ཉིད་ཀྱིས་བག་ཆགས་གང་ཇི་ལྟར་བསྒོས་པ་དེ་ཉིད་ཀྱི་དབང་དུ་ཀུན་གཞི་ཡང་འགྱུར་བས་ལས་སྣང་སྣ་ཚོགས་ལ་སྤྱོད་པའོ། །བརྒྱད་པ་ནི། གངས་དྲེག་ལ་སོགས། ཞེས་པ་ནས། དེ་དག་ཉིད་དུའོ། །ཞེས་པའི་བར་གྱིས་བསྟན་ཏེ། དཔེར་ན་གངས་རིའི་དྲེག་པ་དང་། ཐེར་སླང་གི་དྲེག་པ་དང་། ལ་སོགས་པ་ཞེས་དངོས་པོ་གཞན་བསྡུ་བ་ནི་ཕྲུ་ཟངས་ལ་སོགས་པ་སྟེ། དེ་དག་རྣམས་ནི་སྔ་མའི་སྟེང་དུ་ཕྱི་མ་སོགས་ཏེ་བསྣན་པས་དེ་དག་རྒྱུད་མཐུན་པར་འཕེལ་ཞིང་འཐུག་པར་གྱུར་པ་ཉིད་དུ་སྣང་བ་དེ་ལྟར་ཀུན་གཞི་སྐད་ཅིག་མ་དེ་ཡི་རྒྱུན་ལ་ཕྱི་མའི་འབྲས་བུ་འབྱུང་བའི་རྒྱུའི་བག་ཆགས་སྙིང་ཟུག་ཏུ་ཡོད་པ་གང་ཡིན་པ་དེ་དག་རྣམས་ལ་ནི་ཕྱིས་ཀྱི་དགེ་སྡིག་གི་ལས་ཀྱིས་བསྒོས་པས་ཀུན་གཞི་དེ་ཡང་བག་ཆགས་དེ་དག་དང་རྒྱུད་མཐུན་པར་གྱུར་པས་འཕེལ་ཞིང་འཐུག་པའི་བག་ཆགས་ཉིད་དུ་གྱུར་པའོ། །དགུ་པ་ནི། འོ་མ་ཆུ་དང་། ཞེས་པ་ནས། དེ་ལྟར་སྣང་བ་ཡིན། །ཞེས་པའི་བར་གྱིས་བསྟན་ཏེ། བག་ཆགས་བརྟས་པའི་དཔེ་ཇི་ལྟ་བུ་ཞེ་ན། དཔེར་ན་འོ་མ་ལས་ཞོར་གྱུར་པ་དང་། ཆུ་ལས་ཆབ་རོམ་དང་། ས་བོན་གཉིས་ལས་ལུས་སུ་གྱུར་པའང་འོ་མ་དང་ཆུ་དང་ས་བོན་ཡང་བརྟས་པའི་དངོས་པོ་དེ་གསུམ་ཉིད་མ་ཡིན་པས་འབྲས་བུ་དང་དངོས་སུ་མི་འདྲ་བར་གྱུར་པ་ལས་རུ་མ་དང་གྲང་རེག་དང་འབྱུང་བ་བཞིའི་རྐྱེན་གྱིས་དེ་རྣམས་བརྟས་ཏེ་ཞོ་དང་ཆབ་རོམ་དང་ལུས་སུ་གྱུར་པ་ཡིན་པ་ལྟར། བག་ཆགས་དེ་ཉིད་ཀུན་གཞི་དེ་ཡི་སྐད་ཅིག་མའི་རྒྱུན་དེ་ལ་ཡོད་པ་ལས་བརྟན་པར་མ་གྱུར་པ་དེ་ཡང་གློ་བུར་གྱི་ལས་དགེ་སྡིག་མང་དུ་སྤྱད་པས་དེ་ལྟར་འདྲིས་གོམས་སུ་བརྣན་པ་བཞིན་དུ་བག་ཆགས་དེ་ཡང་བརྟན་པར་གྱུར་ཏེ་མཐུ་ཅན་དུ་སྣང་བ་ཡིན་ནོ། །བཅུ་པ་ནི། གནས་པ་དེ་དག །ཅེས་པ་ནས། བ་དེ་དེ་ཉིད་དུའོ། །ཞེས་པའི་བར་གྱིས་བསྟན་ཏེ། བག་ཆགས་འབྱང་བའི་དཔེ་ནི། དཔེར་ན་རྙོག་ཆུ་མ་བསྒུལ་ན་ཆུ་དེར་རང་བཞིན་གྱིས་དྭངས་པ་ལྟར། ཀུན་གཞི་ལ་བག་ཆགས་ངན་པ་གནས་པ་དེ་དག་གིས་དག་པའི་ངོ་བོ་བསྒྲིབས་པ་གང་ཡིན་པ་དེའང་། རྣལ་འབྱོར་པས་ལྟ་བ་རྟོགས་ཏེ་ཏིང་ངེ་འཛིན་སྒོམས་པའི་དུས་ན་བག་ཆགས་ངན་པ་བྱང་ནས་དག་པའི་རང་བཞིན་དེར་འབྱུང་བ་དེ་ཡང་སེམས་ཀྱི་དེ་ཁོ་ན་ཉིད་དུ་ཆོས་ཉིད་ཀྱིས་འབྱངས་པ་ཁོ་ནའོ། །བཅུ་གཅིག་པ་ནི། མྱུར་སྨིན་དུས་སྨིན། ཞེས་པ་ནས། ཆེ་ཆུང་འཕེལ་འགྲིབ་དེའོ། །ཞེས་པའི་བར་གྱིས་བསྟན་ཏེ། བག་ཆགས་སྨིན་པའི་དུས་ཉིད་ནི། ཀུན་གཞི་ལ་བག་ཆགས་སྨིན་པ་མྱུར་བུལ་ཡོད་དེ། དཔེར་ན་ཤིང་ཏོག་པ་ན་སེ་ལྟ་བུར་འབྲུ་དུས་གཅིག་ལ་སྨིན་པ་དང་། དུས་གཉིས་ལ་སྨིན་པ་དང་། འབྲུ་དུས་གཉིས་ཀྱི་རྗེས་སུ་སྨིན་པའི་ཁྱད་པར་ཡོད་པ་ལྟར། བག་ཆགས་ཀྱི་འབྲས་བུ་དུས་མྱུར་བར་ཚེ་འདི་ལ་སྨིན་པ་མཐོང་ཆོས་མྱོང་འགྱུར་གྱི་ལས་ཏེ་དཔེར་ན་འགོག་པའི་སྙོམས་འཇུག་ལས་ལངས་པ་ལ་ཕན་གནོད་བྱས་པ་ལྟ་བུའོ། །དུས་ཕྱི་མ་ལ་སྨིན་པ་སྐྱེས་ནས་མྱོང་འགྱུར་གྱི་ལས་ཏེ་དཔེར་ན་མཚམས་མེད་བྱས་པ་དང་དམྱལ་བར་སྐྱེ་བ་ལྟ་བུའོ། །དུས་གཉིས་ཕན་ཆད་དུ་སྨིན་པ་ལན་གྲངས་གཞན་ལ་མྱོང་བ་འགྱུར་གྱི་ལས་ཏེ་དཔེར་ན་ཉི་མ་འཆར་བ་ལྟ་བུའོ། །སྨིན་པར་ངེས་པ་མེད་པ་མྱོང་བར་མ་ངེས་པའི་ལས་ཏེ་དཔེར་ན་མེ་བཀག་པ་ལྟ་བུ་དང་བཞིའོ། །དེ་ལྟར་སྨིན་པ་དེ་ཉིད་ཅིའི་ཕྱིར་ཞེ་ན། དཔེར་ན་རྒྱུ་ས་བོན་སྐྱོན་མེད་པ་ཆེ་ཆུང་ངམ་མང་ཉུང་དུ་བཏབ་པ་ལས་འབྲས་བུ་ཡང་འཕེལ་འགྲིབ་བམ་མང་ཉུང་དུ་འགྱུར་བ་ལྟར་བག་ཆགས་སྔ་མའི་ས་བོན་ཆེ་ཆུང་ལ་ཕྱི་མའི་དགེ་སྡིག་གི་ལས་ཆེ་ཆུང་གི་རྐྱེན་གྱིས་འཕེལ་འགྲིབ་ཏུ་གྱུར་ཏེ་དེ་དང་མཐུན་པར་སྣང་བའོ། །ཡང་ན་ཚིག་རྐང་གཉིས་ཀྱི་གོང་མ་དཔེ་དང་འོག་མ་དོན་དུ་སྦྱར་བར་བྱའོ། །བཅུ་པ་ལ་གསུམ་སྟེ། ཆོས་ཉིད་སྒྲིབ་ཅིང་མ་མཐོང་བས་མུན་པར་བསྟན་པ། བག་ཆགས་སྐྱེ་འགག་དང་བཅས་པས་འབྲས་བུ་ཐ་དད་འབྱུང་བ། རང་གི་རྩལ་ལས་ཚོགས་དྲུག་གི་འབྱུང་འཇུག་རྒྱུན་མི་འཆད་པའོ། །དང་པོ་ནི། སྤྲིན་དང་ལིང་ཏོག །ཅེས་པ་ནས། དེ་ཉིད་མཐོང་མ་ཡིན། །ཞེས་པའི་བར་གྱིས་བསྟན་ཏེ། བག་ཆགས་ཀྱིས་ཡང་དག་པའི་དོན་མཐོང་དུ་མི་སྟེར་བར་སྒྲིབ་པའི་དཔེ་ཇི་ལྟ་བུ་ཞེ་ན། དཔེར་ན་སྤྲིན་གྱིས་ནམ་མཁའ་དང་ཉི་མ་མི་མཐོང་བར་སྒྲིབ་པ་དང་ལིང་ཏོག་གིས་གཟུགས་སྣང་གི་ཡུལ་མི་མཐོང་བར་བྱེད་པ་དང་མུན་པ་ཡིས་གསེར་ལ་སོགས་པའི་རྫས་གང་ཡིན་པ་མི་མཐོང་བར་སྒྲིབ་པ་ལྟར་དུ། ཀུན་གཞི་དེ་ཡི་རྒྱུན་ལ་བག་ཆགས་ཀྱི་ཚོགས་སྟུག་པོ་དེ་ཉིད་འཁྲིགས་ཏེ་མུན་པ་ལྟ་བུ་དེ་ཡིས་ཤེས་པའི་རྒྱུད་སྒྲིབ་པས་བལྟ་བར་བྱ་བ་རྩ་བ་ཆེན་པོ་ཀུན་གཞིའི་དེ་ཁོ་ན་ཉིད་སྙིང་པོ་བྱང་ཆུབ་ཀྱི་དོན་ཉིད་མཐོང་དུ་སྟེར་བ་མ་ཡིན་པས་ཆོས་ཉིད་མཐོང་བར་མི་འགྱུར་རོ། །ཡང་ན། སྤྲིན་དང་ལིང་ཏོག་དང་མུན་པ་གསུམ་གྱིས་མཁའ་ཉི་དང་གཟུགས་དང་གསེར་ལ་སོགས་པའི་རྫས་གང་མི་མཐོང་ཞེས་སྦྱར་ཏེ་དོན་དུ་འདྲའོ། །གཉིས་པ་ནི། དང་པོ་གཉིས་དང་། ཞེས་པ་ནས། སྣ་ཚོགས་ཐ་དད་ལེན། ཞེས་པའི་བར་གྱི་བསྟན་ཏེ། ཚོགས་དྲུག་བར་མ་དོར་འགགས་པ་བག་ཆགས་ཀྱི་དབང་གིས་ཕྱིས་སྣང་དུ་འདོད་པའི་དཔེ་ནི། དཔེར་ན་ཏིལ་དང་མེ་ཏོག་སྣ་མ་ཡུན་རིང་དུ་ལྷན་ཅིག་བཞག་པས་ཏིལ་མར་ལ་སྣ་མའི་དྲི་འབྱུང་བ་བཞིན་སྔ་མའི་ལས་ཀྱི་བག་ཆགས་ཀྱིས་ཚོགས་དྲུག་དང་པོ་ཚེ་འདི་དང་གཉིས་པ་ཤི་ནས་བར་མ་དོ་དང་གསུམ་པ་སྐྱེ་བ་ཕྱི་མ་རྣམས་ལ་དང་པོ་ཚེ་འདིར་གསལ་བ་དང་བར་མ་དོར་འགགས་པ་དང་ཉམས་པར་གྱུར་ཀྱང་སླར་ཕྱི་མའི་སྐྱེ་བ་ལ་སྔ་མར་ཞེན་པའི་མཐུས་ཚོགས་དྲུག་མངོན་དུ་སྣང་སྟེ་ལས་གང་བྱེད་ཀྱི་འབྲས་བུ་སྤྱོད་ཡུལ་དང་ཚེ་ཚད་ལ་སོགས་པ་ཐ་དད་དུ་སྣང་བར་འགྱུར་བའོ། །འོ་ན་ཤེས་པ་ཐ་དད་ཡིན་ནམ་ཞེ་ན། ཤེས་པའི་རྒྱུན་ཐ་དད་མིན་ཡང་བག་ཆགས་ཀྱིས་འབྲས་བུ་ཐ་དད་ལེན་པའི་དཔེར་སྟོན་ཏེ། དཔེར་ན་ལག་པས་ཡེ་གེ་བྲིས་པའི་སྒྲ་ཐ་དད་པ་ལྟར། ཀུན་གཞི་བག་ཆགས་དང་བཅས་པ་དེ་ཉིད་ཆོས་ཀུན་གྱི་རྒྱུ་ཡིན་པས་དགེ་སྡིག་ལུང་དུ་མ་བསྟན་པའི་ཡུལ་ཀུན་ལ་ཚང་བར་འགྲོ་བའི་གཏན་ཚིགས་ཀྱི་ཕྱིར་ཀུན་གཞི་བག་ཆགས་དང་བཅས་པ་གཅིག་གིས་ལས་སྣ་ཚོགས་གསོགས་ཏེ་འབྲས་བུ་མཐོ་རིས་དང་ངན་སོང་ཐ་དད་པའི་སྐྱེ་གནས་མང་པོ་ལེན་པར་བྱེད་པའོ། །གསུམ་པ་ནི། དེ་ཉིད་རྩལ་ལས། ཞེན་པ་ནས། སྨིག་རྒྱུ་ཇི་བཞིན་ནོ། །ཞེས་པའི་བར་གྱིས་བསྟན་ཏེ། བག་ཆགས་རྒྱུ་བའི་དཔེ་སྤྱིར་བསྟན་པ་ནི། ཀུན་གཞི་དེ་ཉིད་ཀྱི་རྩལ་ལས་ཡུལ་ལ་འཇུག་པ་རྣམ་པར་ཤེས་པའི་ཚོགས་དྲུག་ཏུ་བྱུང་ནས་ཡུལ་བཅད་དེ་མགོ་མཉམ་དུ་ཚོགས་དྲུག་གི་ཡུལ་དང་ཤེས་པ་གཉིས་ཀའི་བག་ཆགས་ཀུན་གཞི་ལ་བསྒོས་ཏེ་སླར་འཇུག་པ་ཡང་མཚོ་རླབས་མཚོ་ལ་སྡུད་པ་ལྟར་ཀུན་གཞི་དེ་ཉིད་ལ་འདུ་ཞིང་བག་ཆགས་གསོགས་ལ་དེ་ལས་སླར་ཡང་འབྱུང་བའང་དཔེར་ན་རྒྱུན་མི་ཆད་པར་དུམ་བུ་དུམ་བུར་འབྱུང་བ་ཆར་རྒྱུན་ལྟ་བུ་དང་ཚ་སྒོ་དང་སེར་བུ་ལ་སོགས་པའི་རྐྱེན་གྱིས་ནམ་མཁའ་ལ་སྨིག་རྒྱུ་མེད་བཞིན་དུ་གཡོ་ཞིང་ཐ་མར་ཡང་ནམ་མཁར་འཇུག་པ་ཇི་ལྟ་བ་བཞིན་ནོ། །དེ་སྐད་དུ་ཡང་། ཐེག་བསྡུས་ལས། ཆོས་ཀུན་རྣམ་པར་ཤེས་ལ་སྦྱོར། །དེ་དག་ལ་ཡང་དེ་དེ་བཞིན། །ཕན་ཚུན་འབྲས་བུའི་དངོས་པོ་དང་། །རྒྱུ་ཡི་དངོས་པོ་དག་ཏུ་སྦྱོར། །ཞེས་ཆོས་མངོན་པའི་མདོ་ལས་གསུངས་པར་བཤད་དོ། །བཅུ་གཅིག་པ་ལ་ལྔ་སྟེ། ཀུན་གཞི་ལ་ཡུལ་སྣང་ཡང་བྱེ་བྲག་མི་གསལ་བའི་དཔེ། ཀུན་གཞི་དང་བག་ཆགས་འདྲེས་པ་ལས་འབྲས་བུའི་ནུས་པ་སྣང་བའི་དཔེ། བག་ཆགས་རྒྱུའི་དུས་ན་མི་སྣང་བར་འབྲས་བུའི་ཚེ་ན་སྣང་བའི་དཔེ། ཀུན་གཞི་དང་བག་ཆགས་མི་འདྲ་ཡང་བསྒོ་རུ་བཏུབ་པའི་དཔེ། བག་ཆགས་ཐེར་ཟུག་མ་ཡིན་པས་གནས་སྐབས་འགྱུར་བར་བསྟན་པའོ། །དང་པོ་ནི། མིག་ནད་དབང་གིས། ཞེས་པ་ནས། མ་ཡིན་ངོ་བོ་ཙམ། །ཞེས་པའི་བར་གྱིས་བསྟན་ཏེ། བག་ཆགས་མི་གསལ་བར་རྒྱུ་བའི་དཔེ་ནི། དཔེར་ན་རབ་རིབ་ཅན་དང་མིག་ནད་ཡོད་པའི་དབང་གིས་གཟུགས་སྣང་གི་ཡུལ་དག་མཐོང་ཡང་མི་གསལ་བ་ལྟར་དུ། ཀུན་གཞིའི་བག་ཆགས་ཀྱི་རྒྱུ་བའང་ཤིན་ཏུ་ཆ་ཕྲ་བ་ལ་ཡུལ་ཡོར་པོར་སྣང་ཡང་ཚོགས་དྲུག་གིས་བསྒྲིབས་པས་བྱེ་བྲག་ཐ་དད་དུ་གསལ་བ་མ་ཡིན་པར་སྤྱིར་རགས་པའི་ངོ་བོ་ཙམ་མཐོང་བ་ཡིན་པས་རིས་སུ་བཅད་དེ་བརྟགས་པར་དཀའ་བའོ། །གཉིས་པ་ནི། གང་དང་འདི་གཅིག །ཞེས་པ་ནས། ལས་བྱུང་དེ་རྣམས་འབྱེད། །ཅེས་པའི་བར་གྱིས་བསྟན་ཏེ། ཀུན་གཞི་རྒྱུའི་དུས་ཀྱི་བག་ཆགས་ངན་པ་སྤངས་ནས་འབྲས་བུའི་བག་ཆགས་བཟང་པོ་ལེན་པའི་དཔེ་ཇི་ལྟ་བུ་ཞེ་ན། ཀུན་གཞི་གང་དང་དགེ་སྡིག་གི་བག་ཆགས་འདི་གཉིས་ཚེ་འདིར་བསགས་པ་མཐུ་བརྟས་པ་དེས་གཅིག་པ་ལྟ་བུར་གྱུར་ཏེ་ཆུ་དང་འོ་མ་འདྲེས་པ་ལྟར་སྣང་བ་དག་ལས་ཀུན་ནས་ཉོན་མོངས་པའི་བག་ཆགས་སྤོང་ལ་རྣམ་པར་བྱང་བའི་བག་ཆགས་དང་དུ་ལེན་པ་ནི་དཔེར་ན་ངང་པའི་རྒྱལ་པོ་རབ་དགའི་མཆུ་ལ་སྐྱུར་རྩི་ཡོད་པའི་སྒྱུ་རྩལ་གྱི་ནུས་པས་ཆུ་དང་འོ་མ་འདྲེས་པ་དེ་གཉིས་འབྱེད་ནས་ཆུ་བཞག་ནས་འོ་མ་དེ་དག་ལེན་པ་ལྟར། ཀུན་གཞི་དེ་ཉིད་ལ་བག་ཆགས་གཉིས་གནས་པས་གནས་མཐོ་དམན་ཉིད་དུ་སྣང་བར་བྱེད་པའང་ཀུན་གཞི་གནས་གྱུར་པའི་རིག་པ་ལས་བྱུང་བའི་རྩལ་གྱིས་དགེ་སྡིག་གི་བག་ཆགས་དེ་རྣམས་འབྱེད་ཅིང་སྤོང་ལེན་བྱེད་པ་སྟེ། རྒྱན་སྟུག་པོ་བཀོད་པ་ལས། ཉི་མ་ཟླ་བའི་ནོར་བུ་དག །ཡོངས་སུ་དག་པའི་མཚན་ཉིད་ཅན། །ཉི་ཟླའི་ཟེར་གྱིས་ཕོག་པ་དང་། །དེ་དག་རང་གི་ཡོན་ཏན་འབྱིན། །དེ་བཞིན་ཀུན་གཞི་རྣམ་ཤེས་པ། །དེ་བཞིན་གཤེགས་པའི་དགེ་སྙིང་པོ། །ཟག་མེད་ལེགས་དང་ལྡན་གྱུར་ཏེ། །གཞན་དུ་གྱུར་ན་རབ་ཏུ་འབྱིན། །ཞེས་དང་། གང་ཚེ་ཀུན་གཞི་འདི་འདྲ་བར། །རྣམ་པ་སྣ་ཚོགས་ཀུན་མཐོང་སྟེ། །འགྲོ་བ་རང་སེམས་མཐོང་བ་དང་། །དེ་ཚེ་སེམས་ནི་ཕྱིར་ལོག་གོ། །ཆོས་རྣམས་ཐམས་ཅད་ཀུན་གྱི་གཞི། །བག་ཆགས་སྙེམས་ལ་སོགས་པ་དང་། །རྟོག་པས་རྙོག་པ་ཅན་དུ་བྱས། །གཞན་དུ་གྱུར་ནས་ཟག་པ་མེད། །ཅེས་སོགས་མང་ངོ་། །གསུམ་པ་ནི། གང་འདིར་སྦྱོར་ཞིང་། ཞེས་པ་ནས། དེ་དག་འབྱུང་པའོ། །ཞེས་པའི་བར་གྱིས་བསྟན་ཏེ། ཀུན་གཞིའི་བག་ཆགས་རྒྱུའི་དུས་ན་མི་མངོན་པ་ལས། འབྲས་བུའི་དུས་ན་མངོན་པའི་དཔེ་གང་ཞེ་ན། དཔེར་ན་དར་གྱི་བྱེ་བྲག་ཧཱ་རིས་ཅན་གྱི་ཚིག་གུའི་དངོས་པོ་གང་དེ་ཉིད་རྒྱུའི་དུས་འདིར་ནི་ཧཱ་རིས་ཀྱི་ཚོན་ལ་སྦྱོང་ཞིང་ཧཱ་དངོས་སུ་གསལ་བར་མི་སྣང་ཡང་། ཚོན་དང་རྐྱེན་མཚུར་གྱི་རྩི་གང་གི་དབང་གིས་ཚི་གུའི་རྣམ་པའི་རི་མོ་དང་ཕྲད་དེ་ཡང་ནས་ཡང་དུ་ཞེན་པའི་སྟོབས་ཀྱིས། ཧཱའི་ཚི་གུའི་རི་མོ་དང་བཅས་པ་འབྲས་བུའི་དུས་སུ་ཐ་དད་དུ་སྣང་ཞིང་ཤིན་ཏུ་གསལ་བར་མངོན་པ་ལྟར། ཀུན་གཞི་དེ་ཉིད་ལ་རྣམ་པར་སྨིན་པའི་བག་ཆགས་དགེ་མི་དགེ་མི་གཡོ་བའི་ལས་གསུམ་གྱི་སྒོ་ནས་ཇི་སྙེད་དུ་བསགས་པའང་རྒྱུའི་དུས་ན་མངོན་པར་གསལ་བ་མེད་ཀྱང་ལས་གསུམ་གང་ཡང་སྟོབས་ཅན་དུ་གྱུར་ཏེ་རྐྱེན་གྱི་སད་པར་བྱས་པ་ན་འབྲས་བུའི་ཁྱད་པར་དེ་ལྟར་བྱུང་ནས་སྔ་མའི་བག་ཆགས་དེ་ཉིད་ལས་རྣམ་སྨིན་མངོན་པར་སྣང་བ་ཡང་། དཔེ་ཇི་ལྟ་བ་དེ་བཞིན་དུ་རྒྱུ་དུས་ན་མི་གསལ་ཡང་འབྲས་དུས་ན་མཐོ་རིས་དང་ངན་སོང་དེ་དག་ཐ་དད་དུ་འབྱུང་བར་སྣང་བ་ལ་དཔགས་ནས་རྒྱུའི་ངོ་བོའང་ངོ་ཤེས་པར་འགྱུར་བའོ། །བཞི་པ་ནི། དྲི་ངའི་དྲི་འབྱུང་། ཞེས་པ་ནས། གཞན་ལ་དེ་རྒྱུན་གཞན། །ཞེས་པའི་བར་གྱིས་བསྟན་ཏེ། ཀུན་གཞི་ལ་བག་ཆགས་མེད་ཀྱང་བག་ཆགས་བསྒོ་རུ་བཏུབ་པའི་དཔེ་ནི། འོན་ཀྱང་གཞི་ལ་བག་ཆགས་བསྒོར་མི་བཏུབ་སྟེ། དེ་གཉིས་རང་ལྡོག་གི་མཚན་ཉིད་ཐ་དད་པའི་ཕྱིར་ཞེ་ན། ཐ་དད་ཡོད་ཀྱང་བསྒོར་བཏུབ་སྟེ། དཔེར་ན་སྒོག་པའི་དྲི་ངའི་ཞེས་དྲི་ང་བའི་དྲི་དེ་གཞན་ལ་བྱུང་བ་ཡང་སྒོག་པ་གང་གི་དྲི་ང་བ་དེ་ཉིད་ཕོར་བུ་གང་ལ་སྔོན་ཆད་མེད་ཀྱང་། སྒོག་པ་ཡུན་རིང་དུ་བརྡུངས་ན་སྒོག་པའི་དྲི་ཕོར་བུ་གང་ལ་ཞེན་ནས་འཇུག་ཏུ་སྒོག་པ་མེད་ཀྱང་ཕོར་བུ་ལ་བྲོ་ཞིང་མནམ་པ་དེ་ནི། སྒོག་པ་དང་ཕོར་པ་གཉིས་ངོ་བོ་མི་འདྲ་བས་མི་མཐུན་པར་ཐ་དད་ཡིན་ལ་རྒྱུ་ཡང་མི་གཅིག་པར་སོ་སོར་གྱུར་ཏེ་ཐ་དད་ཡིན་ཀྱང་ཡུན་རིང་ན་དེ་ཉིད་ལ་བསྒོར་བཏུབ་པས་ཕོར་པ་ལ་སྒོག་དྲི་འགོས་པ་ལྟར་ཀུན་གཞི་ལུང་མ་བསྟན་དེ་ཉིད་ཀྱང་གཞན་ལ་དགེ་སྡིག་གི་བག་ཆགས་ལུང་དུ་བསྟན་པ་དེ་དག་གི་རྒྱུན་ཡང་གཞན་དུ་གྱུར་མོད་ཀྱི། དེ་ལྟར་ན་ཡང་མ་རིག་པའི་དབང་གིས་ཚོགས་དྲུག་གི་ལས་མང་པོ་སྤྱད་པས་བག་ཆགས་བསྒོར་བཏུབ་སྟེ་ཀུན་གཞི་ཡང་བག་ཆགས་དང་མཐུན་པར་སྣང་བའོ། །ལྔ་པ་ནི། གང་གི་ངོ་བོ། ཞེས་པ་ནས། གནས་དང་སྐབས་ཀྱིས་འགྱུར། །ཞེས་པའི་བར་གྱིས་བསྟན་ཏེ། ཀུན་གཞི་རྒྱུ་འབྲས་གཉིས་ཀ་ཡིན་པའི་དཔེ་ནི་གང་ཞེ་ན། དཔེར་ན་ཤིང་ཏོག་པ་ན་སེ་སྨིན་པ་ལྟ་བུ་གང་གི་ངོ་བོར་གཅིག་པ་ལ་དེ་ཡང་གནས་དང་སྐབས་ཀྱི་ཆོས་སྔ་མའི་འབྲས་བུ་ཕྱི་མའི་རྒྱུར་འགྱུར་བ་ལྟར་དུ་ཀུན་གཞི་བག་ཆགས་དང་བཅས་པའི་ངོ་བོ་ཡང་སྐད་ཅིག་མ་དེ་ཡི་རྒྱུན་དུ་གཅིག་པ་ལ་སྔ་མ་དེ་ཡི་འབྲས་བུ་ཡང་ཕྱི་མ་དག་གི་རྒྱུར་འགྱུར་བས་དགེ་བ་དང་མི་དགེ་བའི་ལས་དང་མཐུན་པར་མཐོ་རིས་དང་ངན་སོང་ལ་སོགས་པར་གནས་དང་སྐབས་ཀྱིས་རྐྱེན་གྱི་དབང་ལྟར་འགྱུར་ཏེ་སྣ་ཚོགས་སུ་སྣང་བའོ། །མུན་པ་གང་དུ་འཐིབས་ཀྱི་ལན་འདིར་མ་ཟིན་ཀྱང་གོང་དུ་སོང་ངོ་། །བཅུ་གཉིས་པ་ནི། གང་ལ་བག་ཆགས། ཞེས་པ་ནས། སྤྱོད་ཡུལ་པ་དག་འཛིན། །ཞེས་པའི་བར་གྱིས་བསྟན་ཏེ། བག་ཆགས་བྱང་བའི་དཔེ་ནི། རྣལ་འབྱོར་པ་གང་སུ་ཞིག་གི་རིག་པ་ལ་བག་ཆགས་ཀྱི་སྒྲིབ་པ་གཏན་ནས་སྦྱངས་ཏེ་ཤིན་ཏུ་རྣམ་པར་དག་པའི་ཡེ་ཤེས་ཤར་བ་ན། དཔེར་ན་ནམ་མཁའ་དང་བ་ལ་ཉི་མ་ཤར་བས་མཐོང་སྣང་ཐམས་ཅད་གསལ་བ་བཞིན་དུ། ཀུན་གཞི་བག་ཆགས་དང་བཅས་པའི་སྒྲིབ་པ་དག་པས་ཆོས་ཐམས་ཅད་སེམས་ཀྱི་ཆོས་ཉིད་དེ་ཁོ་ན་ཉིད་རང་རིག་པའི་ཡེ་ཤེས་སུ་གསལ་བར་གྱུར་ནས་རྣལ་འབྱོར་པ་གང་ཞིག་གི་རྒྱུད་ལ་བག་ཆགས་ཀྱི་རྒྱུན་ཡོད་པའི་ས་བོན་སྣང་གཞི་དང་བཅས་པ་སངས་ཏེ་ཡང་དག་པར་སྦྱངས་པས་ཚོགས་གཉིས་དབྱེར་མེད་དུ་རྫོགས་ཤིང་ཡེ་ཤེས་ཀུན་ཁྱབ་ཏུ་རྒྱས་པར་གྲུབ་པ་ནི། མཐའ་དང་བྲལ་བས་དབུ་མ་ཆོས་ཀྱི་སྐུ་རྣམ་པར་དག་པ་དེ་ཉིད་ཡིན་ནོ་ཞེས་ཞེ་བས་འདོད་པ་ནི་གསང་སྔགས་ལ་ལྟོས་ཏེ་མུན་པའི་སྤྱོད་ཡུལ་དུ་གྱུར་པ་སེམས་ཙམ་པ་ལ་སོགས་པ་དག་བག་ཆགས་ངན་པ་བྱང་ནས་བཟང་པོ་ཐོབ་པར་འཛིན་པ་ལྟར་ཡིན་པས་རྒྱུའི་ཐེག་པ་མདོ་སྡེ་པའི་ལུགས་ཡིན་ནོ། །དེས་ན་འདིར་ནི་རང་བྱུང་བདེ་བ་འཁོར་ལོའི་རྒྱུད་ལས། ཀུན་གཞིའི་དོན་ནི་འདུས་བྱས་ལ། །དེ་ལ་གཉེན་པོ་མེད་མི་སྲིད། །ལྷག་མཐོང་རང་བྱུང་ཡེ་ཤེས་ཀྱིས། །ཀུན་གཞི་གཏན་ནས་འཇོམས་པར་བྱེད། །ཅེས་དང་། ཀུན་གཞི་རྣམ་པར་ཤེས་པ་ནི། །ཇི་ལྟར་གནས་པའི་དོན་རྟོགས་པས། །ཡོད་མེད་གང་ཡང་མི་ལྟུང་ཞིང་། །རྟག་ཆད་གཉིས་དང་བྲལ་བས་ན། །མྱ་ངན་འདས་པའི་འབྲས་བུ་ཡང་། །དེ་ཡི་ངང་གིས་ཐོབ་པར་འགྱུར། །ཞེས་དང་། ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས། མ་རིག་རྐྱེན་བཞིས་བསྐྱེད་པ་ཡི། །ཉོན་མོངས་བག་ཆགས་བསགས་པས་གོལ། །སྔ་ཕྱི་མེད་ཤེས་གདམས་ངག་གིས། །མཚན་ཉིད་བཞི་ལྡན་ཉམས་སུ་མྱོང་། །གཞི་ལ་སྔ་ཕྱི་དོན་ལ་མེད། །དེ་ཕྱིར་འབྲས་བུ་ཆོས་ཀྱི་སྐུ། །ཞེས་དང་། རིན་པོ་ཆེ་རྒྱན་ལས། རྒྱུ་ལས་རྐྱེན་གྱིས་བསྒྱུར་མིན་ལ། །མཐར་ཕྱིན་སྐྱེད་དུ་བྱར་མེད་པས། །སྨིན་པའི་འབྲས་བུ་བརྡར་བཏགས་པ། །མཐུན་པའི་མིང་དུ་ངེས་པ་ཡིན། །ཞེས་པ་ལ་སོགས་པ་ལྟར་རོ། །དེ་ཕྱིར་ངོ་བོ་བྱང་ཆུབ་ཀྱི་སེམས་སུ་འདུས་པས་རྣམ་བྱང་གི་རྩ་བར་བསྟན་པའང་ཡིན་ནོ། །གསུམ་པ་ནི། རྐང་པ་གཅིག་གི་འོག་ནས། མུན་པའི་རང་བཞིན། ཞེས་པ་ནས། ཆོས་རྣམས་གསུངས་པའོ། །ཞེས་པའི་བར་གྱིས་བསྟན་ཏེ། མུན་པར་དྲིས་པའི་ལན་རྣམས་བྱེ་བྲག་གི་ཁྱད་པར་གྱི་ལན་ཀུན་གཞིའི་སྐབས་སུ་མཇུག་བསྡུས་ཏེ་གསལ་བར་བསྟན་པའི་ཕྱིར། དེ་ལ་མུན་པའི་སྣང་བ་འདི་ཉིད་ཅི་ལས་བྱུང་ན་གཞན་ལས་མ་བྱུང་བར་མ་རིག་པའི་དབང་གིས་རང་སྣང་འཁྲུལ་ཏེ་ཡུལ་ཆེད་དུ་བྱེད་པ་ལས་བྱུང་བའོ། །རང་བཞིན་ནི་ཀུན་གཞིའི་རང་བཞིན་དུ་བསྟན་པའོ། །ངོ་བོ་ནི་ཚོར་བ་བཏང་སྙོམས་དང་ལྡན་པས་མི་གསལ་བའོ། །མཚན་ཉིད་ནི་སྐད་ཅིག་མའི་རྒྱུན་དུ་བསྟན་པའོ། །ཡན་ལག་ནི་འཁོར་ལྔ་བདུན་དང་ལྡན་པའོ། །རྩ་བ་ནི་རང་བཞིན་དོན་དུ་ཡོད་པར་སྒྲུབ་པ་སྟེ་མ་རྟོགས་པ་དང་བརྟགས་པའི་དབང་གིས་འཁོར་བའི་ཡན་ལག་ཏུ་སྣང་བའོ། །གནས་པའི་ཡུན་ནི་དཔེ་རྣམས་ཀྱིས་མཚོན་ཏེ་འཁྲུལ་སྣང་དང་བག་ཆགས་ཀྱི་གཞིར་བཞག་པའོ། །གང་ལ་སྒྲིབ་པ་ནི་སྤྲིན་དང་ལིང་ཏོག་ལྟར་དོན་མཐོང་བ་ལ་སྒྲིབ་པར་བསྟན་པ་སྟེ་ཀུན་གཞིའི་བྱེད་ལས་སོ། །བྱེ་བྲག་ནི་མིང་གི་རྣམ་གྲངས་དང་ཁྱད་པར་གཉིས་བསྟན་པའོ། །ཆོས་ནི་ཀུན་གཞིའི་ཆོས་དེ་གང་དང་མཐུན་པར་བསྟན་པའོ། །གང་དུ་འཐིབས་པའམ་སྒྲིབ་ན་མུན་པའི་ཁམས་སུ་འཐིབས་པས་ས་ལྔའི་སྐབས་སྐབས་སུ་ཕྲ་རགས་ཀྱིས་མཐོང་དུ་མི་སྟེར་བའོ། །གཉེན་པོ་གང་གིས་སེལ་ན་ས་ལྔ་པོའི་སྐབས་ཀྱི་ཡེ་ཤེས་ཀྱིས་སྤང་ངོ་། །སྒྲུབ་བྱེད་དང་ངེས་ཚིག་གང་གི་ཕྱིར་ན། དོན་མཐོང་དུ་མི་སྟེར་བའི་ཕྱིར་ཏེ་དམིགས་པའི་ཡུལ་དང་གནས་འགྱུར་གྱི་སྐབས་ལས་ཤེས་པར་བྱའོ། །གཏན་ཚིགས་ཅིའི་ཕྱིར་འཐིབས་ན་ཀུན་ནས་མུན་ཁམས་སུ་གྱུར་པས་དོན་མི་གསལ་བར་བག་ཆགས་མཐུ་ཅན་དུ་སྣང་བའོ། །རྩ་བ་གང་དུ་འདུས་ན། གཞི་རྩ་མེད་པའི་ཆོས་ཉིད་ཡེ་ནས་དག་པར་འདུས་སོ། །དེ་ལྟར་བཤད་པ་དེ་དག་ངེས་པར་རྣམ་པར་དབྱེ་སྟེ་རྣམ་གྲངས་ལྔ་གསུམ་གྱི་དབྱེ་བར་ཤེས་པར་བྱའོ། །དེ་དག་གི་གནས་སྣང་གི་དོན་ལ་མཁས་པར་གྱུར་ན་མུན་པའི་སྤྱི་དང་བྱེ་བྲག་གི་གནད་རྣམས་ཕྱིན་ཅི་མ་ལོག་བར་ངེས་ཏེ་ཟབ་གསང་སྙིང་པོའི་དོན་ལ་བློ་མིག་གསལ་བར་འགྱུར་རོ། །ལང་ཀའི་བདག་པོ་ཞེས་སྡུད་པ་པོ་ལ་བོས་ནས། ཇི་སྐད་བསྟན་པ་དེ་དག་ནི་གཞིའི་མདོ་ཞེས་བྱ་བ་སྟེ། ཐ་མལ་གྱི་སྐྱེ་བོའམ་རྒྱུའི་ཐེག་པ་ལྟ་བུ་གང་ཟག་གང་གི་དངོས་པོ་བློ་ཆུང་བས་མུན་པའི་སྤྱོད་ཡུལ་དུ་གྱུར་པ་རང་གི་ལས་ཀྱིས་བསྒྱངས་ཏེ་གདུང་བ་རྣམས་འདུལ་བ་ལ་དགོངས་ཏེ་མུན་པའི་ཁམས་སུ་སྣང་བའི་ཀུན་གཞིའི་ཆོས་རྣམས་འདིར་ཡང་གསུངས་ཏེ་རྒྱས་པར་བཀའ་སྩལ་པའོ། །གཉིས་པ་དམིགས་པའི་མདོ་ཉོན་མོངས་པ་ཅན་གྱི་ཡིད་བཤད་པ་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི། ལང་ཀའི། ཞེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ། མུན་པའི་ལན་མདོ་གཉིས་པའི་མཚན་ཉིད་ཇི་ལྟ་བུ་སྙམ་པ་ལ། ལང་ཀའི་བདག་པོ། ཞེས་བོས་ནས། དེ་ལ་དམིགས་པའི་མདོ་འཁོར་བའི་གཟུང་འཛིན་གྱི་རྟོག་པ་ཉོན་མོངས་པ་ཅན་གྱི་ཡིད་ཉེ་བར་བསྟན་པ་གང་ཞེ་ན། འདི་ལྟ་སྟེ། གཉིས་པ་ལ་བདུན་ཏེ། ཉོན་མོངས་པ་ཅན་གྱི་ཡིད་ཀྱི་གནས་གང་ཡིན་དང་མཚན་ཉིད་བཤད་པ། དེའི་དམིགས་པའི་ཡུལ་གྱི་ངོས་འཛིན་དང་རྣམ་པ་བསྟན་པ། ཉོན་ཡིད་ཀྱི་འཛིན་སྟངས་ལ་བརྟེན་པའི་ངེས་ཚིག་བཤད་པ། དེ་ཉིད་འཁོར་གང་དང་མཚུངས་པར་ལྡན་ཚུལ་བསྟན་པ། དེ་ཉིད་ཚོར་བ་གང་དང་ལྷན་ཅིག་ལྡན་ཚུལ་བཤད་པ། དེ་ཡི་ངོ་བོ་སྒྲིབ་ལ་ལུང་མ་བསྟན་དུ་ངེས་ཚུལ་བསྟན་པ། ཉོན་ཡིད་སྒྲུབ་བྱེད་ཀྱི་རིགས་པའི་རྣམ་གྲངས་བཤད་པའོ། །དང་པོ་ནི། གཟུགས་ཁམས་དེ་འཛིན་གནས་གཅིག་ཉིད། །ཅེས་པས་བསྟན་ཏེ། ཉོན་མོངས་པ་ཅན་གྱི་ཡིད་ནི་ཁམས་གསུམ་ལས་འཛིན་པ་རགས་པས་གཟུགས་ཁམས་དང་ཆོས་མཐུན་པའི་སྒོ་ནས་བཞག་ཅིང་ཀུན་གཞི་དེ་ཉིད་ལ་བདག་ཏུ་འཛིན་པས་གནས་ཀུན་གཞི་གཅིག་པུ་ལ་བརྟེན་ཏེ། བྱེད་ལས་ཀྱིས་ཡིད་ཤེས་ཀྱི་བདག་རྐྱེན་བྱེད་དེ། ཚོགས་དྲུག་ཟག་བཅས་ཀྱི་མཚན་མ་ལ་འཆིང་བ་དང་། དེ་དག་གིས་ཀུན་གཞི་ལ་ས་བོན་འདེབས་པར་བྱེད་པ་ཉིད་དེ། རྒྱན་སྟུག་པོ་བཀོད་པ་ལས། ཇི་ལྟར་ས་ལ་ཀུན་བརྟེན་ཅིང་། །ས་སྐྱེ་ཀུན་ཀྱང་འབྱུང་བ་བཞིན། །སེམས་ཅན་ཀུན་གྱི་གནས་ཡིན་ཏེ། །འབྱུང་ཁུངས་ཀུན་གྱི་ཁྱད་པར་དུ། །དེ་བཞིན་ཀུན་གཞི་རྣམ་ཤེས་ཀྱང་། །རྣམ་ཤེས་རྣམས་ཀྱི་གནས་ཡིན་ཏེ། །སེམས་དང་སེམས་ལས་བྱུང་བར་ལྡན། །དབའ་རླབས་བཞིན་དུ་རབ་ཏུ་འབྱུང་། །ཞེས་དང་། ཡིད་ནི་བདག་ལ་བདག་ཅེས་ཏེ། །ངར་སེམས་རབ་ཏུ་འཇུག་པ་ཡིན། །རྣམ་ཤེས་ཁ་དོག་ཁྱད་པར་དང་། །ཀུན་ཏུ་གཅོད་པར་རབ་ཏུ་བྱེད། །ཞེས་དང་། ལང་ཀར་གཤེགས་པ་ལས། ཀུན་གཞི་ཡིད་ཀྱི་བདག་ཡིན་ཏེ། །ཤེས་པ་ཉིད་ནི་བདག་གི་ཡིན། །གཉིས་སུ་འཛིན་པས་རབ་ཏུ་འཇུག །ཡོངས་སུ་རྟོགས་ན་ལྡོག་པར་འགྱུར། །ཞེས་དང་། བདག་གི་ས་བོན་གཟུང་འབྲེལ་ལས། །བདག་ཏུ་འཛིན་པ་རབ་ཏུ་འབྱུང་། །སེམས་ནི་བརྟགས་བྱར་འཇུག་པ་ཡིས། །ཆོས་སུ་འཛིན་པ་སྤོང་བར་འགྱུར། །ཞེས་དང་། སེམས་ནི་རང་བཞིན་དྭང་བ་སྟེ། །རྙོག་པར་བྱེད་པ་ཡིད་ཡིན་ནོ། །རྣམ་པར་ཤེས་དང་བཅས་པའི་ཡིད། །རྟག་ཏུ་བག་ཆགས་འདེབས་པར་བྱེད། །ཞེས་སོགས་གསུངས་པ་ལྟར་རོ། །དེའང་ཀུན་གཞི་ཉོན་ཡིད་ཀྱི་གནས་སུ་བཞག་པ་ནི། ཇི་ལྟར་མིག་གི་རྣམ་ཤེས་ལ་སོགས་པ་རྣམས་ཀྱི་གནས་མིག་ལ་སོགས་པ་ཡིན་པ་ལྟར་ཀུན་གཞི་རྣམ་པར་ཤེས་པ་ནི་དེའི་བག་ཆགས་ཀྱི་གནས་ཡིན་ཏེ། དེ་བས་ན་དེ་ལ་གནས་བཅས་ནས་འབྱུང་སྟེ་རྒྱུན་གྱིས་སྐྱེའོ་ཞེས་བྱ་བའི་ཐ་ཚིག་གོ། །གཉིས་པ་ནི། དེ་འཛིན་དེ་ཉིད་དེ་ལ་ལྟ། །ཞེས་པས་བསྟན་ཏེ། ཉོན་ཡིད་ཀྱི་ཡུལ་ཡང་ཐུན་མོང་མ་ཡིན་པའི་འཁོར་དང་བཅས་ཏེ་ཀུན་གཞི་དེ་ལ་དམིགས་ཏེ་བདག་ཏུ་འཛིན་ཅིང་གནས་སྐབས་གསུམ་མ་གཏོགས་པར་དེ་ཉིད་ལ་ངར་རློམ་སེམས་སུ་བྱེད་དེ་རྒྱུན་ལྡན་དུ་འབྱུང་བ་སྟེ། ལང་ཀར་གཤེགས་པ་ལས། གང་ཞིག་རྟོག་པས་བརྟག་བྱ་བ། །དེ་ནི་བརྟགས་པའི་མཚན་ཉིད་དེ། །བརྟགས་པ་ལ་ནི་རྟེན་བཅས་ཏེ། །རྣམ་པར་རྟོག་པ་རབ་ཏུ་འཇུག །ཕན་ཚུན་མ་ཕྱེས་འབྲེལ་བ་ཡིས། །བག་ཆགས་གཅིག་གི་རྒྱུ་ལས་བྱུང་། །ཞེས་དང་། རྒྱན་སྟུག་པོ་བཀོད་པར། རང་སེམས་བདག་ཉིད་ཡིད་ཡིན་ནོ། །ཞེས་སོ། །འོ་ན་བདག་ཏུ་ལྟ་བ་དང་མཚུངས་པར་ལྡན་པ་དེ་ཉིད་འཇིག་ཚོགས་ལ་ལྟ་བའང་ཡིན་ནམ་སྙམ་ན། གཞི་དང་སྣང་ཚུལ་གྱི་ཆ་ནས་ངེས་ཚིག་དང་འབྲལ་བའི་ཐ་སྙད་ཀྱི་དབང་དུ་ཉོན་མོངས་པ་ཅན་གྱི་ཡིད་དང་ཡིད་ཤེས་ཐུན་མོང་དུ་འཇུག་པ་ན་ཡིད་ཀྱི་རྣམ་པར་ཤེས་པ་ནི་འཁོར་འཇིག་ཚོགས་ལ་ལྟ་བ་དང་མཚུངས་པར་ལྡན་ཏེ། དེའང་འཇིག་ཚོགས་ནི་ཕུང་པོ་ཡིན་ཞིང་། དེ་ལ་བདག་དང་བདག་གིར་ལྟ་བ་དང་ལྡན་ལ། ཕུང་པོའི་གཞི་ནི་ཀུན་གཞི་ཡིན་པས་ཀུན་གཞི་ལ་བདག་ཏུ་ལྟ་བའི་ཚེ་ཉོན་ཡིད་ཀྱིས་ཀྱང་ཀུན་གཞི་ལ་བདག་ཏུ་ལྟ་བས་འཇིག་ཚོགས་ལྟ་བ་དང་མཚུངས་པར་ལྡན་པ་སྟེ། ལང་ཀར་གཤེགས་པ་ལས། བདག་ནི་བརྟགས་པའི་བདེན་པ་སྟེ། །རྫས་སུ་ཡོད་པ་མ་ཡིན་ནོ། །ཕུང་པོ་ཕུང་པོ་ཉིད་དེ་བཞིན། །བརྟགས་པས་ཡིན་གྱི་རྫས་སུ་མེད། །ཞེས་དང་། སེམས་དང་ཡིད་དང་རྣམ་ཤེས་དྲུག །དེ་དག་བདག་དང་ལྡན་པ་སྟེ། །གཅིག་དང་ཐ་དད་བྲལ་བ་ཡི། །ཀུན་གཞི་དེ་ནི་རབ་ཏུ་འཇུག །ཅེས་སོ། །དེ་ལ་དམིགས་པ་ཞེས་བྱ་བ་ནི་དཔེར་ན་མིག་གི་རྣམ་ཤེས་ལ་སོགས་པས་དམིགས་པ་གཟུགས་ལ་སོགས་པར་གྲགས་པ་བཞིན་དུ་ཉོན་མོངས་པ་ཅན་གྱི་ཡིད་ཀྱིས་ཀུན་གཞི་རྣམ་པར་ཤེས་པ་ཉིད་ལ་དམིགས་པ་སྟེ། འཇིག་ཚོགས་ལ་ལྟ་བ་ལ་སོགས་པ་དང་མཚུངས་པར་ལྡན་པས་ཀུན་གཞི་རྣམ་པར་ཤེས་པ་ལ་ང་དང་ང་ཡིར་དམིགས་པའི་ཕྱིར་རོ། །དེས་ན་འདིས་ནི་ཀུན་གཞི་རྣམ་པར་ཤེས་པ་དང་། འཇུག་པའི་རྣམ་པར་ཤེས་པ་ལས་རྣམ་པར་འབྱེད་པའང་ཡིན་ནོ། །དེ་ལྟར་གནས་དང་དམིགས་པ་གཉིས་ནི། སུམ་ཅུ་པར་ཡང་། དེ་ལ་གནས་ཏེ་རབ་འབྱུང་ཞིང་། །དེ་ལ་དམིགས་པ་ཡིད་ཅེས་བྱ། །ཞེས་གསུངས་པས་རྣམ་པར་ཤེས་པ་ཉིད་ནི་གནས་དང་དམིགས་པ་ལ་མི་ལྟོས་པར་མི་རུང་བས་ན་ཉོན་མོངས་པ་ཅན་གྱི་ཡིད་ཀྱི་གནས་དང་དམིགས་པ་ཁྱད་པར་དུ་བསྟན་པའོ། །གསུམ་པ་ནི། དེ་འཛིན་དེར་བྱེད་མུན་པ་ཅན། །ཞེས་པས་བསྟན་ཏེ། དེ་ལ་ཁམས་སམ་ས་གང་དུ་ཀུན་གཞི་རྣམ་པར་ཤེས་པ་རྣམ་པར་སྨིན་པ་ཐོབ་པ་དེ་ལ་ཉོན་ཡིད་ཀྱིས་བདག་ཏུ་འཛིན་པ་ཡིན་པས་ཉོན་ཡིད་དེ་ཡང་ཁམས་དེ་དང་ས་དེའི་ཡིན་ཏེ་མུན་གཞི་དེ་ལ་རག་ལས་པས་འཇུག་ལ། དེར་ཡང་བདག་གམ་ངའོ་སྙམ་དུ་རྟག་ཏུ་རློམ་སེམས་སུ་བྱེད་དེ་སྒྲིབ་པའི་མུན་པ་ཅན་དུ་གྱུར་པ་ཡིན་པས་ངེས་པའི་ཚིག་གི་ཚུལ་གྱིས་ཡིད་ཅེས་བྱ་སྟེ། ལང་ཀར་གཤེགས་པ་ལས། སེམས་ཀྱིས་སུ་ནི་ལུས་འཛིན་ཏེ། །ཡིད་ནི་རྟག་ཏུ་རློམ་སེམས་བྱེད། །རྣམ་པར་ཤེས་པ་སེམས་ཡུལ་ལ། །རྣམ་ཤེས་བཅས་པས་བྱེ་བྲག་འབྱེད། །ཅེས་དང་། སུམ་ཅུ་པ་ལས། རྣམ་ཤེས་ངར་སེམས་བདག་ཉིད་ཅན། །ཞེས་སོ། །བཞི་པ་ནི། ཕྱོགས་འཛིན་ཕྱོགས་མེད་རྣམས་དང་གཅིག །ཞེས་པས་བསྟན་ཏེ། དེ་ཡང་གཏན་ལ་དབབ་པ་བསྡུ་བ་ལས། ཡིད་གང་ཡིན་པ་དེ་ནི་དུས་རྟག་ཏུ་ཀུན་གཞི་རྣམ་པར་ཤེས་པ་དང་ལྷན་ཅིག་འབྱུང་ཞིང་འཇུག་སྟེ། དེ་ནི་ཡང་དག་པར་མ་བཅོམ་གྱི་བར་དུ་དུས་རྟག་པ་ཁོ་ནར་ལྷན་ཅིག་སྐྱེས་པའི་རང་བཞིན་འདྲ་བའི་ཀུན་ནས་ཉོན་མོངས་པ་རྣམ་པ་བཞི་པོ་འཇིག་ཚོགས་ལ་ལྟ་བའི་ཀུན་ནས་ཉོན་མོངས་པ་དང་། ངའོ་སྙམ་པའི་ང་རྒྱལ་གྱི་ཀུན་ནས་ཉོན་མོངས་པ་དང་། བདག་ལ་ཆགས་པའི་ཀུན་ནས་ཉོན་མོངས་པ་དང་། མ་རིག་པའི་ཀུན་ནས་ཉོན་མོངས་པ་དང་མཚུངས་པར་ལྡན་པ་ཡིན་པར་བལྟ་བར་བྱའོ། །ཞེས་སོགས་གསུངས་པ་ལྟར་ཉོན་མོངས་པ་ཅན་གྱི་ཡིད་ཀྱི་འཁོར་ནི་གཉིས་ཏེ། ཁྱད་པར་ཕྱོགས་འཛིན་གྱི་འཁོར་ནི། བཤད་མ་ཐག་པ་ལྟར། སུམ་ཅུ་པ་ལས། བསྒྲིབས་ལ་ལུང་དུ་མ་བསྟན་པའི། །ཉོན་མོངས་བཞི་དང་རྟག་ཏུ་འགྲོགས། །བདག་ཏུ་ལྟ་དང་བདག་ཏུ་རྨོངས། །བདག་རྒྱལ་བདག་ཆགས་འདུ་ཤེས་པ། །གང་དུ་སྐྱེས་པ་དེ་ཡིའོ། །ཞེས་པ་ལྟར་རྣམ་པ་བཞི་ནི། ཉེ་བར་ལེན་པའི་ཕུང་པོ་རྣམས་ལ་བདག་ཏུ་མཐོང་ནས་བདག་ཏུ་ལྟ་བ་དང་། དེ་ལ་རྨོངས་པས་བདག་མེད་མི་ཤེས་པས་བདག་ཏུ་རྨོངས་པ་དང་། བདག་ཡོད་པར་རློམ་པ་ལ་བརྟེན་ནས་བདག་གི་ཡུལ་ལ་ངར་སེམས་ཏེ་ངའོ་སྙམ་པའི་ང་རྒྱལ་དང་། བདག་ཏུ་བཟུང་བས་དེ་ལ་སྲེད་ཅིང་ཆགས་པ་དང་བཞིའོ། །དེའང་ཀུན་གཞི་རྣམ་པར་ཤེས་པའི་རང་གི་ངོ་བོ་ལ་རྨོངས་པར་གྱུར་ན་ཀུན་གཞི་རྣམ་པར་ཤེས་པ་ལ་བདག་ཏུ་ལྟ་བ་འབྱུང་ངོ་། །བདག་ཏུ་མཐོང་བས་སེམས་ཁེངས་པ་གང་ཡིན་པ་དེ་ནི་ངའོ་སྙམ་པའི་ང་རྒྱལ་ལོ། །དེ་གསུམ་ཡོད་ན་བདག་ཏུ་བསམ་པའི་དངོས་པོ་ལ་མངོན་པར་ཆགས་པ་གང་ཡིན་པ་དེ་ནི་བདག་ལ་ཆགས་པའོ། །དེ་བས་ན་སློབ་དཔོན་བློ་གྲོས་བརྟན་པས་སུམ་ཅུ་པའི་འགྲེལ་པ་ལས། མ་རིག་པ་དང་བདག་ལྟ་དང་། །ངའོ་ང་རྒྱལ་སྲེད་འདི་བཞིས། །ཀུན་གཞི་ཉོན་མོངས་ཅན་འགྱུར་ཡིད། །ངར་སེམས་པ་ཡི་མཚན་ཉིད་དེ། །ཕྱིན་ཅི་ལོག་གི་རྒྱུ་བྱེད་པའང་། །ཡིད་དེ་དེ་དག་ཉོན་མོངས་ཅན། །སེམས་དགེ་ལུང་དུ་མ་བསྟན་ཚེ། །རྟག་ཏུ་ངར་འཛིན་རྒྱུ་ཡིན་ནོ། །ཞེས་གསུངས་སོ། །འོ་ན་རང་གི་ས་པ་ཉིད་དང་མཚུངས་པར་ལྡན་ནམ། གཞན་གྱི་ས་པ་དག་དང་མཚུངས་པར་ལྡན་ཞེ་ན། ཁམས་དང་ས་གང་དུ་སྐྱེས་པ་དེ་ཡི་ཁམས་དེ་དང་ས་དེ་ཉིད་ཀྱི་དང་མཚུངས་པར་ལྡན་གྱི། ཁམས་དང་ས་གཞན་དག་དང་ལྡན་པ་མ་ཡིན་ནོ། །ཐུན་མོང་ཕྱོགས་མེད་ཀྱི་འཁོར་ནི་སུམ་ཅུ་པ་ལས། གཞན། རེག་སོགས་ཀྱང་དེ་དགྲ་བཅོམ་མེད། །ཅེས་སོགས་གསུངས་པ་ལྟར་ལྔ་ཀུན་ཏུ་འགྲོ་བ་དང་མཚུངས་པར་ལྡན་ཏེ། དེ་དག་ནི་རྣམ་པར་ཤེས་པ་ཐམས་ཅད་དང་མཚུངས་པར་ལྡན་པས་སོ། །དེ་དག་ཀྱང་གང་དུ་སྐྱེས་པ་དེ་ཉིད་དང་མཚུངས་པར་ལྡན་གྱི། ཁམས་དང་ས་གཞན་གྱི་དང་ནི་མ་ཡིན་ནོ། །འོན་ཀྱང་རྩ་བའི་རྣམ་པར་ཤེས་པའི་རེག་པ་ལ་སོགས་པ་ནི་མ་བསྒྲིབས་ལ་ལུང་དུ་མ་བསྟན་པ་ཡིན་ལ་ཉོན་མོངས་པ་ཅན་གྱི་ཡིད་ཀྱི་འཁོར་ནི་ཡིད་བཞིན་དུ་བསྒྲིབས་ལ་ལུང་དུ་མ་བསྟན་པ་ཡིན་པས་ཁྱད་པར་དབྱེ་བར་བྱའོ། །དེ་ལྟར་འཁོར་དགུ་པོ་རྣམས་དང་ལྷན་ཅིག་ཏུ་མཚུངས་པར་ལྡན་པ་གང་ཡིན་པའོ། །ལྔ་པ་ནི། མ་ངེས་སྤྱིར་འགྲོ་གཉིས་མི་དམིགས། །ཞེས་པས་བསྟན་ཏེ། ཉོན་མོངས་པ་ཅན་གྱི་ཡིད་དེ་ཚོར་བ་གང་དང་མཚུངས་པར་ལྡན་ན། བག་ཆགས་གང་འཛིན་ཕྱོགས་གཅིག་ཏུ་མ་ངེས་པས་སྤྱིར་ཐམས་ཅད་ཀུན་ལ་ཁྱབ་པར་འགྲོ་བས་ཚོར་བ་བཏང་སྙོམས་ཁོ་ན་དང་མཚུངས་པར་ལྡན་གྱི། བདེ་སྡུག་གཉིས་ཀྱི་ཕྱོགས་རིས་ཅན་དུ་མི་དམིགས་པས་དེ་གཉིས་དང་ལྡན་པ་མ་ཡིན་ནོ། །དྲུག་པ་ནི། སྣ་ཚོགས་མེད་དེ་བདག་ཉིད་འཛིན། །ཞེས་པས་བསྟན་ཏེ། དེ་ཡང་ཉོན་མོངས་པ་ཅན་གྱི་ཡིད་ནི་ས་བོན་གྱི་གནས་ལས་གཞན་པའི་ལྷན་ཅིག་འབྱུང་བའི་གནས་དང་ལྡན་པ་མ་ཡིན་པས་དགེ་བ་དང་མི་དགེ་བ་ལ་སོགས་པའི་ཆོས་ཀྱི་བྱེ་བྲག་སྣ་ཚོགས་སུ་གྱུར་པའི་ཐ་དད་ཀྱི་རིས་སུ་དབྱེ་བ་མེད་དེ། དེས་ན་ངོ་བོ་ནི་བསྒྲིབས་ལ་ལུང་དུ་མ་བསྟན་པ་ཁོ་ནར་ངེས་པ་ཡིན་པས། གཏན་ལ་དབབ་པ་བསྡུ་བ་ལས། དགེ་བ་ལ་སོགས་པ་དག་ལས་འགལ་བ་མེད་པར་འཇུག་པ་དང་། བསྒྲིབས་ལ་ལུང་དུ་མ་བསྟན་པ་ཡིན་པར་བལྟ་བར་བྱའོ། །ཞེས་སོ། །དེའི་ཕྱིར་བསྒྲིབས་ལ་ལུང་མ་བསྟན་གྱི་ཤེས་པ་རྒྱུན་བརྟན་པ་སྟེ། དེའང་ཟག་མེད་ཀྱི་ལམ་དང་ལྷན་ཅིག་མངོན་གྱུར་དུ་མི་འབྱུང་བས་ཐར་པ་ཐོབ་པ་ལ་སྒྲིབ་ཅིང་། དགེ་བ་དང་མི་དགེ་བ་ཉིད་དུ་ལུང་སྟོན་དུ་མེད་པའི་ཕྱིར་ལུང་དུ་མ་བསྟན་པ་ཡིན་ནོ། །ལས་ཀྱི་མཐུ་ལས་མཐོ་རིས་དང་ངན་སོང་གི་རྣམ་སྨིན་གྱི་འབྲས་བུ་བསྐྱེད་པར་མི་ནུས་པས་བདག་ཏུ་འཛིན་པ་ཉིད་ཀྱི་རྒྱུ་མཐུན་པའི་བག་ཆགས་ཀུན་གཞི་ལ་གསོགས་ཤིང་ངའོ་སྙམ་དུ་རློམ་སེམས་སུ་བྱེད་པ་མི་གཏོང་བར་འཛིན་པའི་རྣམ་པ་ཅན་ཡིན་ཏེ། སྔ་མ་ལས། འདི་ལྟར་ངར་འཛིན་པ་དང་། ངའོ་སྙམ་པའི་ང་རྒྱལ་དང་། རློམ་པའི་རྣམ་བ་ཅན་གྱི་ཡིད་གང་ཡིན་པ་དེ་ནི་སེམས་ཡོད་པ་དང་སེམས་མེད་པའི་གནས་སྐབས་དག་ན་ཡང་དུས་རྟག་ཏུ་ཀུན་གཞི་རྣམ་པར་ཤེས་པ་དང་ལྷན་ཅིག་འབྱུང་ཞིང་འཇུག་སྟེ། དེ་ནི་ཀུན་གཞི་རྣམ་པར་ཤེས་པ་ལ་ངའོ་སྙམ་པ་དང་བདག་གོ་སྙམ་དུ་དམིགས་ཤིང་རློམ་པའི་རྣམ་པ་ཅན་ཡིན་ནོ། །ཞེས་སོ། །བདུན་པ་ནི། དྲི་མེད་འཛིན་མེད། ཅེས་པ་ནས། གཉིས་པ་ཆགས་ཁམས་སོ། །ཞེས་པའི་བར་གྱིས་བསྟན་ཏེ། དེ་ཡང་དམིགས་པའི་མདོ་ཉོན་མོངས་པ་ཅན་གྱི་ཡིད་ཡོད་པར་སྒྲུབ་བྱེད་ཀྱི་རིགས་པ་འཆད་དེ། གལ་ཏེ་ཉོན་མོངས་པ་ཅན་གྱི་ཡིད་མེད་ན་སྐྱོན་ལྔ་གནས་ཏེ། དང་པོ་ཚོགས་དྲུག་གང་གིའང་འཁོར་དུ་མི་འབྱུང་བས་གཞན་དང་མ་འདྲེས་པའི་མ་རིག་པ་མེད་པར་འགྱུར་བའི་སྐྱོན་ནི། གཙོ་བོ་མེད་པར་འཁོར་ཡོད་པར་མི་སྲིད་པས་བདག་ཏུ་གཏི་མུག་ཅེས་བྱ་བའི་སེམས་ལས་བྱུང་བ་ང་མེད་བཞིན་དུ་བདག་ཏུ་རློམ་སེམས་སུ་འཛིན་པའི་མ་འདྲེས་པའི་མ་རིག་པ་དྲི་མ་ཅན་མེད་པར་འགྱུར་ཏེ། ཆོས་མངོན་པའི་མདོ་ལས། ཡང་དག་དོན་ལ་འཇུག་པ་ཡི། །སེམས་ཀྱི་གེགས་སུ་བརྟན་གྱུར་གང་། །དུས་རྣམས་ཀུན་ཏུ་འབྱུང་བ་དེ། །མ་འདྲེས་པ་ཡི་མ་རིག་འདོད། །ཅེས་གསུངས་པ་ལྟར། དེ་ཉིད་ཇི་སྲིད་རྒྱུད་ལ་ཡོད་ཀྱི་བར་ལ་བདག་མེད་མཐོང་བའི་ཡེ་ཤེས་འབྱུང་བའི་གེགས་བྱེད་ཅིང་། ཉོན་ཡིད་ཁོ་ནའི་འཁོར་དུ་རྒྱུན་བརྟན་པར་འབྱུང་ལ། ཆགས་སོགས་ཉོན་མོངས་པ་གཞན་ཡང་འདྲེན་པར་བྱེད་པ། ངའམ་བདག་ཏུ་རྨོངས་པའི་རྣམ་པ་ཅན་ནི་མ་འདྲེས་པའི་མ་རིག་པ་ཞེས་བྱ་སྟེ། གལ་ཏེ་སེམས་ཅན་གྱི་རྒྱུད་ལ་རྟེན་ཉོན་མོངས་པ་ཅན་གྱི་ཡིད་མེད་ན། བརྟེན་པ་མ་འདྲེས་པའི་མ་རིག་པའང་མེད་པར་ཐལ་བར་འགྱུར་ཏེ། དེ་ནི་ཚོགས་དྲུག་མི་བརྟན་པ་དང་དུས་མི་མཚུངས་ཤིང་། ཁྱད་པར་དུ་སྒོ་ལྔ་ཕྱིར་བལྟས་དང་དམིགས་པ་མི་མཚུངས་ལ། ཀུན་གཞི་མ་བསྒྲིབས་པ་དང་ངོ་བོ་མི་མཚུངས་པས། རྣམ་ཤེས་གཞན་ལ་བརྟེན་ནས་འབྱུང་བའང་མ་ཡིན་པའི་ཕྱིར་རོ། །དེ་བས་ན་མ་འདྲེས་པའི་མ་རིག་པ་ནི་ཡོད་པས་དེའི་རྟེན་ཉོན་ཡིད་ཀྱང་ཡོད་པར་གྲུབ་པའོ། །གཉིས་པ་ངེས་ཚིག་མེད་པར་འགྱུར་པའི་སྐྱོན་ནི། གལ་ཏེ་ཉོན་མོངས་པ་ཅན་གྱི་ཡིད་མེད་ན། དུས་རྟག་ཏུ་བདག་ཏུ་འཛིན་ཞིང་རློམ་པའམ་ངར་སེམས་པས་ན་ཡིད་ཅེས་བྱ་བའི་ངེས་ཚིག་ཏུ་འཇོག་པའི་གཞི་མེད་པར་འགྱུར་ཏེ། ཉོན་ཡིད་མ་གཏོགས་རྣམ་ཤེས་གཞན་ལ་དེ་ལྟར་བཤད་དུ་མི་རུང་བའི་ཕྱིར་ཏེ། སྒོ་ལྔ་ནི་རྟོག་མེད་ཡིན་ཞིང་། ཡིད་ཤེས་ནི་རེ་འགའ་བ་ཡིན་ལ། ཀུན་གཞི་ནི་མ་བསྒྲིབས་པ་ཡིན་པས་དེ་རྣམས་ལ་ངར་འཛིན་པ་མེད་པའི་ཕྱིར་རོ། །དེ་བས་ན། ལང་ཀར་གཤེགས་པ་ལས། ངར་སེམས་ཉིད་ནི་ཡིད་ཡིན་ནོ། །ཞེས་དང་། ཡིད་ནི་རྟག་ཏུ་རློམ་སེམས་བྱེད། །ཅེས་སོགས་ཀྱིས་ངེས་ཚིག་ཡང་དག་ཏུ་གསུངས་པས་དེའི་གཞི་ཉོན་ཡིད་ཡོད་པར་ངེས་པའོ། །གསུམ་པ་སྒོ་ལྔ་ལ་བདག་པོའི་རྐྱེན་དགོས་པ་དང་འདྲ་བར་ཡིད་ཀྱི་རྣམ་པར་ཤེས་པ་ལ་བདག་པོའི་རྐྱེན་མེད་པར་འགྱུར་བའི་སྐྱོན་ནི། གལ་ཏེ་ཉོན་ཡིད་མི་འདོད་ན་གཞན་དབང་ཤེས་ལྔ་པོ་ལ་ལྷན་ཅིག་སྐྱེ་བའི་གནས་ཀྱི་བདག་རྐྱེན་ཡོད་པ་དང་འདྲ་བ་མེད་པར། ཡིད་ཤེས་དེ་ཉིད་རང་ཡུལ་ལ་ཀུན་ནས་ཉོན་མོངས་པའི་མཚན་མ་ཅན་དུ་འཇུག་པར་བྱེད་པས་རྟེན་དུ་གྱུར་པའི་བདག་རྐྱེན་ཡོད་པ་མ་ཡིན་པར་ཐལ་བར་འགྱུར་ཏེ། དེའི་ལྷན་ཅིག་སྐྱེ་བའི་གནས་ཉོན་ཡིད་མེད་ཅིང་གཞན་ཡང་མེད་པའི་ཕྱིར་ཏེ། དྲུག་པོ་འདས་མ་ཐག་པའི་ཡིད་ནི་རྫས་སུ་མེད་ཅིང་ཡིད་ཤེས་དང་དུས་མི་མཉམ་པ་དེ་དབང་ཤེས་དང་འདྲ་བའི་ལྷན་ཅིག་འབྱུང་བའི་གནས་སུ་མི་རུང་བའི་ཕྱིར་དང་། སློབ་དཔོན་ཡོན་ཏན་འོད་ཀྱིས་སའི་རྣམ་བཤད་དུའང་། མཚན་མ་ལ་འཆིང་བའི་གནས་ནི་ཉོན་མོངས་པ་ཅན་གྱི་ཡིད་ཡིན་ཏེ། འདི་ལྟར་རྣམ་པར་གཏན་ལ་དབབ་པ་བསྡུ་བ་ལས་ཀྱང་། ཡིད་ཀྱི་རྣམ་པར་ཤེས་པ་དེ་ཡང་ཡིད་ལ་གནས་པ་ཞེས་བྱ་སྟེ། རྒྱུ་མཚན་གྱི་ཡིད་མ་འགགས་ན་རྣམ་པར་རིག་པ་རྣམས་ཀྱང་མཚན་མ་ལ་བཅིངས་པ་ལས་མི་འགྲོལ་ལ། འཕགས་ན་དེ་ལས་གྲོལ་བར་འགྱུར་རོ། །ཞེས་འབྱུང་བར་གསུངས་པ་ལ་སོགས་པའི་ཕྱིར་དང་། ཀུན་གཞིའམ་རྒྱུའི་རྐྱེན་ཡིན་གྱི་བདག་རྐྱེན་མ་ཡིན་པའི་ཕྱིར་རོ། །དེས་ན་ཡིད་ཤེས་ཀྱི་བདག་རྐྱེན་དུ་གྱུར་པའི་ཉོན་ཡིད་ནི་ཡོད་པ་ཉིད་དེ། ལང་ཀར་གཤེགས་པར་ཡང་། ཡིད་དང་རྣམ་པར་ཤེས་པ་དང་། །རྣམ་པར་སྨིན་པར་གྱུར་པ་སྟེ། །ཡིད་ནི་ཀུན་གཞི་ལས་བྱུང་བ། །རྣམ་པར་ཤེས་པ་ཡིད་ལས་བྱུང་། །ཞེས་སོ། །གལ་ཏེ་གནས་བརྟན་པའི་སྡེ་པ་དག་གིས། ཡིད་ཀྱི་བདག་པོའི་རྐྱེན་ནི་སྙིང་གིས་བྱའོ། །ཞེ་ན། གཟུགས་མེད་ཀྱི་སེམས་ཅན་ལ་སྙིང་མེད་པས་ཉོན་ཡིད་ཡོད་དགོས་པའོ། །གཞན་ཡང་དགེ་སློང་དག་ཡིད་ནི་ནང་གི་སྐྱེ་མཆེད་ཡིན་ཏེ། གཟུགས་ཅན་མིན་པ་བསྟན་དུ་མེད་ལ་ཐོགས་པ་མེད་པའོ། །ཞེས་གསུངས་པའི་ལུང་གིས་ཀྱང་གནོད་དོ། །བཞི་པ་སྙོམས་འཇུག་གཉིས་ལ་བྱེ་བྲག་མེད་པར་འགྱུར་བའི་སྐྱོན་ནི། ཉོན་ཡིད་མེད་ན་འདུ་ཤེས་མེད་པའི་སྙོམས་འཇུག་དང་འགོག་པའི་སྙོམས་པར་འཇུག་པ་གཉིས་ལ་ཁྱད་པར་མེད་པར་ཐལ་བར་འགྱུར་ཏེ། གཉིས་ཀའི་ཚོགས་དྲུག་བཀག་ཙམ་དུ་མཚུངས་པའི་ཕྱིར་རོ། །སྙོམས་འཇུག་གཉིས་ལ་ཁྱད་པར་མེད་མོད་སྙམ་པ་ལ། ཁྱད་པར་ཡོད་དེ། འདུ་ཤེས་མེད་པའི་སྙོམས་འཇུག་ནི་ཉོན་ཡིད་ཏིང་ངེ་འཛིན་གྱི་ངོ་བོར་བྱས་པ་ཡིན་པས་འཁོར་བ་ལས་མི་བརྒལ་ལ། འགོག་པའི་སྙོམས་འཇུག་ནི་ཟག་པ་མེད་པ་ཡིན་པས་ཏིང་ངེ་འཛིན་ལ་རྩལ་སྦྱངས་པས་སམ་མཐོང་ཆོས་ཞི་བས་འདས་པའི་འབྲས་བུ་འཐོབ་པའོ། །གཞན་ཡང་ས་དང་ཡིད་བྱེད་ལ་སོགས་པའི་ཁྱད་པར་ཡོད་ཀྱང་ངོ་བོ་ལ་ཁྱད་པར་མེད་ན་ནི། འདུ་ཤེས་དང་ཚོར་བ་ཞི་མ་ཞིའི་བྱེ་བྲག་ཀྱང་མེད་པར་ཐལ་བ་ལས་འགོག་སྙོམས་ནི་ཉོན་ཡིད་བཀག་སྟེ་ངར་འཛིན་ཞི་བ་ཁྱད་པར་དུ་འཕགས་པ་ཡིན་པས། དེའི་དགག་བྱ་ཉོན་ཡིད་ནི་ཡོད་པར་གྲུབ་པའོ། །དེར་མ་ཟད་རྟེན་ཉོན་ཡིད་མེད་ན་འདུ་ཤེས་མེད་པར་སྐྱེ་བའི་རྒྱུད་ལ་ངར་འཛིན་མེད་པར་འགྱུར་ཞིང་། དེ་ལྟར་ན་དེ་བཞིན་གཤེགས་པ་དང་འཕགས་པ་རྣམས་ཀྱིས་མི་ཁོམ་པའི་གནས་སུ་གཟིགས་ཏེ་སྨོད་ཅིང་སྤོང་བར་ཡང་མི་འགྱུར་ལ། འཇུག་ཤེས་དང་བྲལ་ཙམ་གྱིས་སྤངས་ན་ནི་འགོག་པའང་སྤངས་པར་རིགས་པས་ཧ་ཅང་ཐལ་བར་འགྱུར་རོ། །དེ་ནི་ཚོགས་དྲུག་བཀག་ཀྱང་ངར་འཛིན་ཡོད་པའི་ཕྱིར་ཉོན་ཡིད་ངེས་པར་གྲུབ་པའོ། །དེ་ལྟར་ནའང་ཕྱིར་མི་འོང་བ་ཅི་ཡང་མེད་པའི་སྐྱེ་མཆེད་ཀྱི་འདོད་ཆགས་དང་བྲལ་བས་འགོག་པའི་སྙོམས་འཇུག་ཐོབ་པ་ཡང་། འདས་ལམ་གྱི་སྟོབས་ཀྱིས་ཐོབ་པ་ཡིན་པས་སྙོམས་འཇུག་གི་དུས་ན་ཉོན་ཡིད་འགག་ཀྱང་འགོག་སྙོམས་ལས་ལངས་པ་ན་སླར་ཡང་ཀུན་གཞི་རྣམ་པར་ཤེས་པ་ཉིད་ལས་འབྱུང་ངོ་། །དེ་བཞིན་དུ་བདག་མེད་མཐོང་བ་ནི་བདག་ལ་སོགས་པར་ལྟ་བའི་གཉེན་པོ་ཡིན་ཞིང་། གཉེན་པོ་དང་མི་མཐུན་པའི་ཕྱོགས་གཉིས་ཅིག་ཆར་དུ་འཇུག་པ་མེད་པས་འཇིག་རྟེན་ལས་འདས་པའི་ལམ་གྱི་སྐབས་སུ་འགག་ཀྱང་དེ་ལས་ལངས་པའི་ཚེ་ས་བོན་རྩ་བ་ནས་མ་སྤང་བས་སླར་ཡང་ཀུན་གཞི་རྣམ་ཤེས་ཉིད་ལས་འབྱུང་ངོ་། །དགྲ་བཅོམ་པ་ནི་ཉོན་མོངས་མ་ལུས་པར་སྤངས་པ་ཡིན་པས་ཉོན་ཡིད་ས་བོན་དང་བཅས་པ་མེད་དེ། དེ་ནི་སྲིད་པའི་རྩེ་མོའི་ཉོན་མོངས་པ་སྒོམ་པས་སྤང་བར་བྱ་བ་བཞིན་དུ་དགྲ་བཅོམ་ཉིད་ཐོབ་པའི་ཚེ་བར་ཆད་མེད་ལམ་ཉིད་ཀྱིས་སྤོངས་ཏེ་ཟད་པ་དང་མི་སྐྱེ་བ་ཤེས་པ་ཐོབ་པར་འགྱུར་རོ། །བྱང་ཆུབ་སེམས་དཔའ་ས་བརྒྱད་པ་ལ་ཉོན་མོངས་པའི་དྲི་མ་རྩ་བ་དང་བཅས་པ་ཉེ་བར་ཞི་བས་ཉོན་ཡིད་ས་བོན་དང་བཅས་ཏེ་གནས་གྱུར་པའི་རྣམ་པར་མི་རྟོག་པའི་ཡེ་ཤེས་སོགས་ལ་དབང་ཐོབ་ཅིང་། མཐར་ཐུག་སངས་རྒྱས་ཀྱི་ས་རུ་མཉམ་པ་ཉིད་ཀྱི་ཡེ་ཤེས་སུ་གནས་འགྱུར་བ་ཡིན་ནོ། །ལྔ་པ་དུས་ཀུན་ཏུ་བདག་འཛིན་མེད་པར་འགྱུར་བའི་སྐྱོན་ནི། གལ་ཏེ་ཉོན་ཡིད་མེད་ན་ངར་འཛིན་གྱི་གནས་སུ་གྱུར་པའི་མ་རིག་པའི་རྟེན་གཞན་མེད་པས་དུས་གསུམ་གྱི་དུས་དང་གནས་སྐབས་རྣམས་སུ་ཀུན་གཞི་རྣམ་ཤེས་ཉེ་བར་ལེན་པའི་ཕུང་པོ་དེ་ལ་ངའམ་བདག་ཏུ་འཛིན་པ་དེ་ཉིད་མེད་པར་འགྱུར་ཏེ། །དགེ་བ་ལ་སོགས་པ་ཆོས་གསུམ་ཀའི་གནས་སྐབས་སུའང་ངར་འཛིན་པ་མི་འབྱུང་བས་དེ་དག་ངར་འཛིན་གྱིས་མ་བཅིངས་པའི་དགེ་བ་སོགས་སུ་ངེས་པར་འགྱུར་བ་ཡིན་པའི་ཕྱིར་རོ། །འདོད་པར་མི་ནུས་ཏེ། བྱིས་པ་རྣམས་ཀྱི་རྒྱུད་ལ་ང་སྦྱིན་པ་བྱེད་དོ་ཞེས་པ་ལ་སོགས་པ་དགེ་བ་དང་། ང་གནོད་པར་བྱེད་དོ། །ཞེས་པ་ལ་སོགས་པའི་མི་དགེ་བ་དང་། ང་བཟོ་གནས་བྱེད་དོ། །ཞེས་པ་ལ་སོགས་པའི་ལུང་དུ་མ་བསྟན་པའི་གནས་སྐབས་ཐམས་ཅད་དུ་ངར་འཛིན་པ་ཉིད་ཀུན་ཏུ་འགྲོ་བ་དང་འཇུག་པ་ཡིན་ལ། དེ་ཉིད་མ་རིག་པ་ལ་བརྟེན་ཞིང་། དེའང་ཉོན་ཡིད་ལ་བརྟེན་པ་ཡིན་པས་དེ་ནི་ཡོད་པར་གྲུབ་ཅིང་ཉོན་མོངས་གཞན་གྱི་རྩ་བའང་ཡིན་ཏེ། མདོ་སྡེ་སིལ་བུ་དག་ལས་ཀྱང་། ཉོན་མོངས་ཅན་ཡིད་རྟག་ཏུ་ཡང་། །ཉོན་མོངས་ལྷན་ཅིག་འབྱུང་བ་ཡང་། །ཉོན་མོངས་ལྷན་ཅིག་འབྱུང་ཞིང་འགག །དེ་ནི་ཉོན་མོངས་པ་དག་ལས། །གྲོལ་བར་མ་གྱུར་མི་འགྱུར་རོ། །ཞེས་སོ། །དེ་ལྟར་བཤད་པའི་རིགས་པ་དེ་དག་ནི། ཐེག་བསྡུས་སུ་ཡང་། ཉོན་མོངས་ཅན་གྱི་ཡིད་མེད་ན། །མ་འདྲེས་པ་ཡི་མ་རིག་དང་། །ལྔ་པོ་དག་དང་འདྲ་བ་དང་། །སྙོམས་པར་འཇུག་པའི་བྱེ་བྲག་དང་། །ངེས་ཚིག་མེད་པའི་སྐྱོན་དུ་འགྱུར། །འདུ་ཤེས་མེད་པར་སྐྱེ་བའི་རྒྱུད། །ངར་འཛིན་མེད་པའི་སྐྱོན་དུ་འགྱུར། །ངར་འཛིན་པ་དང་ལྡན་པ་ནི། །རྣམ་པ་ཀུན་ཏུ་མི་འཐད་དོ། །ཞེས་གསུངས་ཏེ་ཤིན་ཏུ་གསལ་བར་བསྟན་ལ། དེས་ན་ཉོན་ཡིད་མེད་ན་མ་འདྲེས་པའི་མ་རིག་པ་དང་ལྔ་པོ་དང་འདྲ་བ་གཉིས་མེད་པར་འགྱུར་ཞིང་། དེའི་འོག་མ་སྙོམས་པར་འཇུག་པའི་ཁྱད་པར་དང་། ངར་རློམ་པའི་ཡིད་ཀྱི་ངེས་ཚིག་དང་། འདུ་ཤེས་མེད་པར་སྐྱེ་བའི་རྒྱུད་ལ་ངར་འཛིན་ཡོད་པ་གསུམ་དང་འགལ་བར་འགྱུར་ལ། ཐ་མ་ཀུན་ཏུ་ཡོད་པར་མི་འགྱུར་བའི་ཕྱིར། གཉིས་མེད་གསུམ་དང་འགལ་བར་འགྱུར། །དེ་མེད་ན་ནི་ངར་འཛིན་པ། །ཀུན་ཏུ་ཡོད་པར་མི་འགྱུར་རོ། །ཞེས་གསུངས་སོ། །དེ་ལྟ་བུའི་འཛིན་སྟངས་ཅ ན་གྱི་ཉོན་ཡིད་དེ་ཡང་གཟུགས་ཀྱི་ཕུང་པོ་དེ་ལ་བདག་གིར་ལྟ་ཞིང་མིང་བཞིའི་ཕུང་པོ་དེར་ངར་འཛིན་པ་ཡིན་པས་དོན་དུ་འཛིན་སྟངས་དེ་གཉིས་ཁོ་ནས་ཉེར་ལེན་གྱི་ཕུང་པོའི་ཀུན་གཞི་རྣམ་ཤེས་ལ་དམིགས་ཏེ་རྟག་ཏུ་ངའམ་བདག་ཏུ་རློམ་པའི་ཚུལ་གྱིས་གཟུགས་ཕུང་དང་མིང་བཞིའི་ཕུང་པོ་གཉིས་ཏེ་ཀུན་གཞིའི་རྣམ་སྨིན་གང་བླངས་པའི་ཕུང་པོ་ལྔ་ཀ་ལ་ཆགས་ཤིང་ཞེན་པའི་ཁམས་སོ། །དེ་དག་ཀྱང་མུན་པའི་གྲངས་དྲིས་པའི་ལན་དུ་ཅི་རིགས་པར་སྦྱར་ཞིང་འཆད་པ་རྣམས་ལའང་སྦྱར་བར་བྱའོ། །གསུམ་པ་སྣང་བའི་མདོ་ཡིད་ཀྱི་རྣམ་པར་ཤེས་པ་བཤད་པ་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི། ལང་ཀའི། ཞེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ། མུན་པའི་ལན་མདོ་གསུམ་པ་བསྟན་པའི་ཕྱིར། ལང་ཀའི་བདག་པོ། ཞེས་བོས་ནས། དེ་ལ་ཕྱི་ནང་གི་ཡུལ་ཀུན་དང་རྟོགས་མ་རྟོགས་ཀྱིས་འཁོར་འདས་ཀྱི་ཆོས་སྣ་ཚོགས་པར་སྣང་བའི་མདོ་ཡིད་ཀྱི་རྣམ་པར་ཤེས་པ་ཉེ་བར་བསྟན་པ་གང་ཞེ་ན། འདི་ལྟ་སྟེ། ཞེས་པའོ། །གཉིས་པ་ལ་བརྒྱད་དེ། ཡིད་ཀྱི་རྣམ་པར་ཤེས་པའི་གནས་བསྟན་པ། དེ་ཡི་ཡུལ་གྱི་རྣམ་གྲངས་ངོས་གཟུང་བ། དེ་ཉིད་འཁོར་གང་དག་དང་མཚུངས་པར་ལྡན་ཚུལ་བཤད་པ། དེ་ཉིད་ཚོར་བ་གང་དག་དང་ལྡན་པའི་ཁྱད་པར་བསྟན་པ། ཡིད་ཡུལ་ལ་འཇུག་པའི་རྣམ་གྲངས་ཀྱི་དབྱེ་བ་བཤད་པ། དེ་ཡིས་རང་ཡུལ་གཅོད་ཅིང་དངོས་སྣང་ལ་འཇུག་ཚུལ་གྱི་མཚན་ཉིད་བསྟན་པ། དེ་ཉིད་རེ་ཞིག་ཏུ་ལྡོག་པའི་དུས་ཀྱི་རྣམ་གྲངས་བཤད་པ། ཡིད་ཤེས་གང་གི་ཐུན་མོང་དང་ཁྱད་པར་གྱི་བྱེད་ལས་བཤད་པའོ། །དང་པོ་ནི། འདོད་ཁམས་དེ་འཇུག །ཅེས་པ་ནས། འབྱུང་རྟེན་དེ་མ་ཐག །ཅེས་པའི་བར་གྱིས་བསྟན་ཏེ། ཡིད་ཀྱི་རྣམ་པར་ཤེས་པའི་གནས་འཆད་པ་ནི། ཁམས་གསུམ་ལས་འདོད་པའི་ཁམས་དང་ཆོས་མཐུན་པས་ཡིད་ཀྱི་རྣམ་ཤེས་དེ་ཉིད་ད་ལྟ་བ་ཡུལ་གང་དང་གང་སྣང་བ་ལྟར་ཐམས་ཅད་ལ་གསལ་བར་འཇུག་ལ་དྲན་པ་དང་མངོན་པར་འདོད་པའི་ཚུལ་གྱིས་དེ་ཉིད་འདས་པ་དང་མ་འོངས་པའི་ཡུལ་གྱིའང་རྗེས་སུ་འབྲང་བས་ཡུལ་གྱི་ཆོས་མང་པོ་ལ་གནས་ཏེ་ཡུལ་དང་ཡུལ་ཅན་དུ་འབྲེལ་བ་ནི་ཡིད་ཀྱི་རྣམ་པར་ཤེས་པ་སྣང་བའི་མདོ་ཞེས་བྱ་སྟེ། དེ་ལའང་གནས་གསུམ་དུ་ཡོད་པ་ཡིན་ཏེ། དེ་དག་ཀྱང་གང་ཞེ་ན་ནི། ས་བོན་ནམ་བག་ཆགས་ཀྱི་གནས་ནི་ཀུན་གཞི་དེ་ཉིད་ཡིན་ཏེ། ཕྱི་རོལ་གྱི་ཡུལ་མང་པོ་བཅད་ནས་ཀུན་གཞི་དེ་ལ་བག་ཆགས་གསོགས་པར་བྱེད་ལ། གོ་འབྱེད་པའི་གནས་ནི་སྐད་ཅིག་མ་སྔ་མས་གོ་ཕྱེས་ནས་ཡུལ་ཀུན་ལ་འབྱུང་ཞིང་འཇུག་སྟེ་རྗེས་སུ་འགྲོ་བ་ཡིན་ནོ། །ལྷན་ཅིག་འབྱུང་བའི་གནས་ནི་ཡིད་ཤེས་དེ་ཉིད་ཡུལ་ལ་དངོས་སུ་འབྱུང་འཇུག་བྱེད་པའི་རྟེན་དུ་གྱུར་པའི་དབང་པོ་སྟེ་དྲུག་པོ་དེ་ཉིད་འགགས་མ་ཐག་པའི་རྣམ་ཤེས་གང་ཡིན་པ་དེ་ཉིད་དེ་དེ་ལྟར་གནས་གསུམ་དང་ལྡན་པའོ། །གཉིས་པ་ནི། འདོད་པ་ལྔ་དང་ཆོས་གཉིས་སོ། །ཞེས་པས་བསྟན་ཏེ། ཡིད་ཀྱི་རྣམ་པར་ཤེས་པའི་ཡུལ་ནི་གཉིས་ཏེ་ཐུན་མོང་བ་འདོད་པའི་ཡོན་ཏན་རྣམ་པ་ལྔ་དང་ཐུན་མོང་མ་ཡིན་པ་འདུས་བྱས་རྣམ་པར་རིག་བྱེད་མ་ཡིན་པའི་གཟུགས་དང་། ཚོར་བ་དང་འདུ་ཤེས་དང་། འདུ་བྱེད་བཞི་དང་འདུས་མ་བྱས་ནམ་མཁའ་དང་འགོག་པ་གཉིས་དང་དེ་བཞིན་ཉིད་དང་བཞི་སྟེ་ཆོས་བརྒྱད་དུ་གྱུར་པ་ཡིན་པས་དེ་ལྟར་ཐུན་མོང་དང་ཁྱད་པར་གྱི་ཆོས་གཉིས་པོ་རྣམས་སོ། །གསུམ་པ་ནི། བྱེད་པ་ཀུན་དང་རྟག་ཏུ་གཅིག །ཅེས་པས་བསྟན་ཏེ། ཡིད་ཀྱི་རྣམ་ཤེས་ཀྱི་འཁོར་ནི་གཉིས་ཏེ། ཐུན་མོང་བ་ཀུན་ཏུ་འགྲོ་བ་ལྔ་དང་། ཐུན་མོང་མ་ཡིན་པ་རིགས་སྤྱིའི་དབང་དུ་བྱས་པས་འདུ་བྱེད་པ་ལྔ་བཅུ་རྩ་གཅིག་ཀུན་དང་ཡང་དུས་རྟག་ཏུ་མཚུངས་པར་ལྡན་ཏེ་ལྷན་གཅིག་པར་རྒྱུན་དུ་འགྲོགས་པ་ཞེས་བྱ་སྟེ་ཐམས་ཅད་ཡིད་ཀྱི་ཆ་ཡིན་པས་སོ། །བཞི་པ་ནི། རིགས་གསུམ་དག་དང་ཕྲད་རིག་འཛིན། །ཞེས་པས་བསྟན་ཏེ། དེ་ཉིད་ཚོར་བ་གང་དང་ལྡན་ན་བདེ་བ་དང་སྡུག་བསྔལ་དང་བཏང་སྙོམས་ཀྱི་རིགས་གསུམ་ག་དང་ལྡན་པས་དེ་དག་གང་དང་ཕྲད་ཀྱང་དེའི་ངོ་བོ་ཡང་གནས་པའི་ཚུལ་གྱིས་དགེ་བ་དང་མི་དགེ་བ་དང་ལུང་མ་བསྟན་གྱི་རིགས་སུ་གང་གྱུར་ལྟར་འཛིན་ཏེ་དོན་དུ་ཡིད་ཉེ་བར་རྒྱུ་བའི་ཚོར་བ་བཅོ་བརྒྱད་ལས་གང་ཕྲད་ཐམས་ཅད་འཛིན་ཞིང་གཞན་འགགས་པའོ། །ལྔ་པ་ནི། དེ་འཇུག་ཚོལ་གཅོད་འབེབས་པའོ། །ཞེས་པས་བསྟན་ཏེ། ཡིད་ཤེས་ཡུལ་ལ་འཇུག་པའི་རྣམ་གྲངས་ཀྱང་། ཡུལ་གང་དང་གང་སྣང་བ་དེ་ཡི་རྗེས་སུ་འཇུག་པའི་ཡིད་དང་། དང་པོ་ཡུལ་ཀུན་ཏུ་ཚོལ་བར་བྱེད་པའི་ཡིད་དང་། ཡུལ་ལ་རྣམ་པར་རྟོག་པའམ་དེ་ཉིད་ཡོངས་སུ་གཅོད་པའི་ཡིད་དང་། གང་དོན་དང་མཐུན་པར་གཏན་ལ་འབེབས་པའི་ཡིད་དེ་དེ་ལྟར་བཞིའམ། ཡང་ན་དོན་གྱིས་ངེས་པར་འཇོག་པའི་ཡིད་དང་རྣམ་གྲངས་ལྔར་བསྟན་པའོ། །དྲུག་པ་ནི། མ་འགགས་གང་དུ་རྒྱུན་ཁྱབ་འཇུག །ཅེས་པས་བསྟན་ཏེ། དེ་ཡང་ཡུལ་སྣང་གི་དངོས་པོ་མ་འགགས་པར་གསལ་བ་གང་དུ་ཡང་རྒྱུན་དུ་འདུག་པ་ཡིན་པས་སྒོ་ལྔའི་ཤེས་པ་ཀུན་ལའང་ཁྱབ་པར་རྒྱུ་ཞིང་དེ་དག་གི་རྗེས་སུའང་འཇུག་པར་བྱེད་པ་ཉིད་དེ། དེར་མ་ཟད་འགགས་པ་དང་འབྱུང་འགྱུར་གྱི་ཡུལ་ལའང་ཡོངས་སུ་རྟོག་པའི་མཚན་ཉིད་ཅན་དུ་ངེས་ཏེ། རྒྱན་སྟུག་པོ་བཀོད་པ་ལས། རྒྱུ་ལ་དམིགས་ཤིང་རྣམ་ཤེས་རྣམས། །སྐྱེ་སྟེ་གཞན་ནི་དེ་རྗེས་འབྲང་། །ཡིད་ལ་དམིགས་ཤིང་གཞན་དག་ཀྱང་། །མཐར་ཆགས་སུ་ནི་རབ་ཏུ་འབྱུང་། །ཡིད་རྙེད་ནས་ཀྱང་གཞན་དག་ནི། །དབང་གི་ཡོན་ཏན་རྣམས་ཀྱིས་བྱས། །དབང་ནི་ལྔ་དང་ལྷན་ཅིག་ཏུ། །རྣམ་པར་ཤེས་པ་རབ་ཏུ་བྱེད། །ཅེས་དང་། གཟུགས་དང་སྣང་བ་ཡིད་བྱེད་དང་། །རྣམ་ཤེས་ཡུལ་ལ་མངོན་གྱུར་པས། །མྱུར་ཕྱིར་ཁོང་དུ་མི་ཆུད་པ། །སྤྱོད་ཡུལ་དུ་ནི་སེམས་རྒྱུ་བའོ། །ཡིད་སྔོན་འགྲོ་བ་ཆོས་རྣམས་ཏེ། །ལུས་ཅན་ཀུན་གྱི་དེ་བཞིན་ནོ། །ཡིད་འགྲོ་ཡིད་ནི་གཅེས་པ་དག །ཡིད་དུ་འོང་བས་ཅིར་མི་བཤད། །ཅེས་སོ། །བདུན་པ་ནི། དུས་གསུམ་སྐབས་གསུམ་འཇུག་མེད་པའོ། །ཞེས་པས་བསྟན་ཏེ། དེ་ཡང་རེ་ཞིག་པ་དང་གཏན་དུ་ལྡོག་པའི་དུས་གཉིས་ལས། འདིར་རེ་ཞིག་པར་གྱུར་པ་རྟག་ཏུ་འདུ་ཤེས་མེད་པ་བ་དང་། འདུ་ཤེས་མེད་པའི་སྙོམས་པར་འཇུག་པ་དང་། འགོག་པའི་སྙོམས་པར་འཇུག་པའི་དུས་དང་གསུམ་དུ་ལྡོག་པ་དང་། དེ་བཞིན་དུ་ཤིན་ཏུ་མྱོས་པའི་གཉིད་ཀྱི་སྐབས་དང་། བརྒྱལ་བ་དང་འབོག་པའི་གནས་སྐབས་གསུམ་དུ་ལྡོག་པ་ཡིན་པས་དེ་ལྟར་དུས་སྐབས་དྲུག་ཏུ་འཇུག་པ་མེད་པའོ། །བརྒྱད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི། སྣ་ཚོགས་དེ་ཉིད། ཅེས་པ་ནས། ཐུན་མོང་དེ་ཁྱད་པར། །ཞེས་པའི་བར་དང་། འོག་གི། དྲུག་གཉིས་ལྔ་གསུམ། ཞེས་པ་ནས། དེ་འཇུག་བྱེད་པ་ཡིན། །ཞེས་པའི་བར་གྱིས་བསྟན་ཏེ། ཡིད་ཀྱི་རྣམ་པར་ཤེས་པའི་བྱེད་ལས་ནི། སྔ་མ་ལས། ཇི་ལྟར་རྒྱ་མཚོ་ཆུ་བོ་ཡིས། །ཉིན་གཅིག་བཞིན་དུ་དགང་བྱ་ཡང་། །ཆུ་བོ་རྣམས་ནི་རྒྱུན་མི་འཆད། །རྒྱ་མཚོ་རྟོག་པར་ཡོང་མི་བྱེད། །དེ་བཞིན་ཀུན་གཞི་རྣམ་ཤེས་ཀྱང་། །ཟབ་ཅིང་མཚོ་ལྟར་གནས་པ་སྟེ། །རྣམ་ཤེས་རྣམས་ཀྱིས་ཉིན་གཅིག་བཞིན། །བག་ཆགས་ཆུ་བོས་རབ་ཏུ་དགང་། །ཞེས་གསུངས་པ་ལྟར། ཡུལ་མང་པོ་བཅད་པའི་བག་ཆགས་སྣ་ཚོགས་བ་དེ་ཉིད་ཀུན་གཞི་དེ་ལ་འབེབས་ཤིང་བསྒོད་པར་བྱེད་པ་ཡིན་ཞིང་། དེ་ལ་ཡང་ལས་ཀྱི་འཇུག་པ་རྣམ་པ་གཉིས་སུ་གནས་ཏེ། སྒོ་ལྔ་དང་ཐུན་མོང་གི་ཚུལ་གྱིས་བྱེད་པའི་ལས་ལ་འཇུག་པ་དང་། ཡིད་ཤེས་དེ་ཡི་རང་གི་ཁྱད་པར་གྱི་ལས་ཀྱིས་ཐུན་མོང་མིན་པར་འཇུག་པའོ། །དེ་ཡང་རྣམ་གྲངས་བསྟན་པ་འདི་ལྟ་སྟེ། མདོར་བསྡུ་ན་ཡིད་ཀྱི་ལས་ནི་ཐུན་མོང་ལ་དྲུག་དང་གཉིས་པ་ལ་ལྔ་ཕྲག་གསུམ་སྟེ། སྤྱིའི་ལས་སུ་བཤད་པ་དྲུག་དང་འོག་གི་ལྔ་གསུམ་བཅོ་ལྔ་བསྡོམས་ཏེ། བཅུ་ཕྲག་གཉིས་དང་གཅིག་ཏུ་གྱུར་པས་ཉི་ཤུ་རྩ་གཅིག་གོ། །དེས་ན་ལས་ཀྱི་ཁྱད་པར་དེ་ལྟ་བུ་དང་ལྡན་པའི་སྒོ་ནས་ཐུན་མོང་དང་ཐུན་མོང་མ་ཡིན་པའི་ཡུལ་ཐམས་ཅད་ལ་ཡང་དེ་ལྟར་འཇུག་པ་བྱེད་པ་ཡིན་ནོ། །གཉིས་པ་ལ་གཉིས་ཏེ། ཐུན་མོང་གི་ལས་བསྟན་པ། ཁྱད་པར་གྱི་ལས་བཤད་པའོ། །དང་པོ་ནི། གོང་དུ་བཞག་པའི། ཡུལ་རིག་པ་དང་། ཞེས་པ་ནས། ཡོངས་སུ་མྱོང་བའོ། །ཞེས་པའི་བར་གྱིས་བསྟན་ཏེ། དེ་ཡང་ཡིད་ཀྱི་ལས་གཉིས་ཀྱི་ཐུན་མོང་བ་སྒོ་ལྔའི་རྣམ་ཤེས་ལྔ་པོ་རིག་པ་དང་། འདོད་ཡོན་གྱི་ཡུལ་རིག་པ་དང་། དུས་ད་ལྟ་བ་ཀུན་ཀྱང་རིག་པ་ཡིན་མོད་སྤྱིའི་ལས་རྣམས་སུ་འདུ་ལ། ཁྱད་པར་གྱི་ལས་ནི། ཡུལ་གྱི་ཆོས་སྣ་ཚོགས་པ་དང་སྤྱོད་ཡུལ་ཐམས་ཅད་རིག་པ་དང་། ཆོས་རྣམས་ཀྱི་སྤྱི་དང་རང་གི་མཚན་ཉིད་ཤེས་ཤིང་རིག་པ་དང་། དུས་གསུམ་ཐམས་ཅད་རིག་པ་དང་། དངོས་པོ་སྐད་ཅིག་མ་དང་ཤེས་པ་སྐད་ཅིག་མའི་རྒྱུན་རིག་ཅིང་ཤེས་པ་དང་། དགེ་མི་དགེ་ལུང་མ་བསྟན་གྱི་བྱ་བའི་ལས་གསུམ་ཀ་ལ་འཇུག་པ་ཤེས་པ་དང་། དགེ་སྡིག་གང་གི་རྣམ་སྨིན་གྱི་འབྲས་བུ་རྣམས་ཚོར་བའི་སྒོ་ནས་ཡོངས་སུ་མྱོང་བར་རིག་པ་སྟེ་དེ་ལྟར་རྣམ་གྲངས་དྲུག་ཏུ་བསྟན་པའོ། །གཉིས་པ་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ་ནི། ལང་ཀའི། ཞེས་པ་ནས། ཡུལ་འདི་རྒྱ་ཆེར་བཤད། །ཅེས་པའི་བར་གྱིས་བསྟན་ཏེ། ལང་ཀའི་བདག་པོ། ཞེས་བོས་ནས་ཁུངས་དང་འབྲེལ་བར་ཡིད་ཀྱི་ཁྱད་པར་གྱི་ལས་ཉེ་བར་སྟོན་པ་ནི་འདི་ལྟ་སྟེ། སྟོན་བ་གསང་བའི་སྐུ་གསང་བ་མཆོག་གི་བདག་པོ་དེ་ཉིད། གསང་བ་མཆོག་གི་དགྱེས་པའི་གནས་ཡུམ་གྱི་ལྷུམས་ན་བཞུགས་ནས་གསང་བའི་ཆོས་ཉིད་སྟོན་པ་ན། འགྲོ་བ་ལས་ཀྱི་བགོ་སྐལ་ལ་སྤྱོད་པ། ལས་ཀྱིས་བསྒྱངས་པ་ལ་སོགས་པ་རྣམས་ཀྱིས་གློ་བུར་གྱི་བསྒྲིབས་པས་ངེས་པའི་གསང་བ་མ་མཐོང་བར་མུན་པའི་སྤྱོད་ཡུལ་ཅན་དུ་གྱུར་པ་ལ་དགོངས་ཏེ། དེ་དག་འདུལ་བའི་ཆེད་དུ་མུན་པའི་ཡུལ་འདི་མཚན་མ་ཤ་སྟག་ཏུ་རྒྱ་ཆེར་བཤད་དེ་བཀའ་སྩལ་པར་མཛད་དོ། །དེ་ནི། བློ་ལྡན་རྣམས་ལ་འདི་བརྗོད་ཀྱིས། །བླུན་པོའི་ཆེད་དུ་ཤེས་པར་གྱིས། །ཞེས་གསུངས་པའི་ཡང་ཕྱིར་རོ། །གཉིས་པ་ལ་ལྔ་གསུམ་བཅོ་ལྔ་སྟེ། ལྔ་ཕྲག་དང་པོ་ཚེ་འདིའི་ལས་སུ་བསྟན་པ། ལྔ་ཕྲག་བར་པ་ཚེ་འདིའི་དབང་དུ་བསྟན་པ། ལྔ་ཕྲག་ཐ་མ་ཚེ་འདི་དང་བར་མ་དང་ཕྱི་མའི་དབང་དུ་བསྟན་པའོ། །དང་པོ་ལ་ལྔ་སྟེ། དམིགས་པ་ལ་རྣམ་པར་རྟོག་པའི་ལས་བཤད་པ། དམིགས་པ་ལ་ཉེ་བར་སེམས་པའི་ལས་བསྟན་པ། ར་རོ་བར་བྱེད་པའི་ལས་བཤད་པ། སྨྱོ་འབོག་ལ་སོགས་པར་བྱེད་པའི་ལས་བསྟན་པ། གཉིད་ལོག་པར་བྱེད་པའི་ཡིད་ཀྱི་ལས་བཤད་པའོ། །དང་པོ་ནི། དང་པོ་རྣམ་རྟོག །ཅེས་པ་ནས། རྣམ་པར་རྟོག་པའོ། །ཞེས་པའི་བར་གྱིས་བསྟན་ཏེ། དེ་ལ་ལྔ་ཕྲག་གསུམ་གྱི་དང་པོ་བསྟན་པའི་ཕྱིར་འདི་ལྟར་གསུངས་ཏེ། ལྔ་ཕྲག་ཐོག་མའི་དང་པོ་དམིགས་པ་ལ་རྣམ་པར་རྟོག་པའི་ཡིད་ཀྱི་ལས་དེ་ལའང་རྣམ་གྲངས་བདུན་དུ་རྣམ་པར་རྟོག་པ་ཡོད་དེ། གང་ཞེ་ན། སྔར་བྱུང་བའི་མཐོང་ཐོས་ཀྱི་ཐ་སྙད་ལ་མཁས་པ་མི་རྒན་ལྟར་དུ། སྔོན་མཐོང་བ་དང་ཐོས་པ་ལ་སོགས་པའི་རང་བཞིན་ལ་རྟོག་པའི་མཚན་མ་ཅན་དུ་གསལ་བར་ཉམས་སུ་མྱོང་བའི་དོན་དང་ཐ་སྙད་ལ་མཁས་པའི་རྣམ་པར་རྟོག་པ་དང་གཅིག །འབྱུང་བར་འགྱུར་བའི་མཐོང་ཐོས་ལ་དགའ་བ་བུ་ཆུང་ལྟར་དུ། ཐ་སྙད་ལ་མི་མཁས་ཀྱང་གང་མ་འོངས་པའི་ཡུལ་ལ་རྟོག་པ་སྒྲ་དོན་གྱི་སྤྱི་ཙམ་ལ་དཔྱད་པ་ལྟ་བུ་དང་། ཕྱིས་འབྱུང་བའི་ཐོས་པའི་དོན་དག་བློ་ལ་ཡོད་པ་རྣམས་ཀྱི་མིང་དང་དོན་ཡན་ཆད་སྦྱོར་ཞིང་དཔེ་དོན་བསྡེམས་ཏེ་བརྗོད་པ་ཞེའམ། འདུས་མ་བྱས་བཞི་ལ་རྟོག་པ་ལྟ་བུ་མཚན་མ་མིན་པ་ལ་རྣམ་པར་རྟོག་པ་དང་གཉིས། ཡིད་ཀྱི་ཡུལ་ཉེ་བར་གནས་པ་ལ་རང་གི་ངང་གིས་ཡུལ་གྱི་སྟོབས་ཀྱིས་འཇུག་བར་བྱེད་པའི་རྣམ་པར་རྟོག་པ་ཡིད་ཀྱི་ལས་སུ་གྱུར་པ་དང་གསུམ། ཡུལ་དཀར་ནག་ལ་སོགས་པ་གང་ཡང་ཀུན་ཏུ་ཚོལ་བའི་ཡིད་ཀྱིས་ཡོངས་སུ་ཚོལ་ཞིང་དཔྱོད་པའི་རྣམ་པར་རྟོག་པ་དང་གཏན་ལ་འབེབས་པར་བྱེད་པའི་ཡིད་ཀྱི་ལས་དང་བཞི། ཡུལ་དུ་བཞག་པ་གང་དེ་ལ་སོ་སོར་རྟོག་ཅིང་ཡུལ་ལ་གཅོད་དེ་སྤྱོད་བདོ་བའི་རྣམ་པར་རྟོག་པ་དང་། འདི་ཉིད་ཡིན་ནོ་ཞེས་ངེས་པར་འཇོག་པས་བྱེ་བྲག་ཕྱེད་པར་ཤེས་པའི་ཡིད་ཀྱི་ལས་གཉིས་གཅིག་ཏུ་བྱས་པ་དང་ལྔ། ཉོན་མོངས་པ་ཅན་གྱི་རྣམ་པར་རྟོག་པ་སྔོན་ཉམས་སུ་མྱོང་བའི་དོན་སྔར་འདས་པ་དང་མ་འོངས་པ་ལ་མངོན་པར་དགའ་བ་དང་ལྡན་ཞིང་། ད་ལྟར་བྱུང་བ་ལ་ཆགས་ཤིང་འདོད་པའི་རྟོག་པ་དང་གནོད་པའི་སེམས་རྟོག་གམ། ཉོན་མོངས་ཤིང་སྡུག་བསྔལ་བའམ་དེ་ལ་རྟོག་པའི་ཡིད་ཀྱི་ལས་དང་དྲུག །དགེ་སྡིག་དེ་གཉིས་གང་ཡང་མིན་པར་ལུང་མ་བསྟན་གྱི་སྤྱོད་ཡུལ་ལམ་བཟོ་གནས་བྱེད་པ་ལྟ་བུ་ལུང་དུ་མ་བསྟན་པའི་ལས་ལ་རྣམ་པར་རྟོག་པ་སྟེ་དེ་ལྟར་བདུན་དུ་ཡོད་པའོ། །གཉིས་པ་ནི། གཉིས་པ་ཉེ་བར། ཞེས་པ་ནས། རིགས་མིན་གཉིས་ཀ་མིན། །ཞེས་པའི་བར་གྱིས་བསྟན་ཏེ། ལྔ་ཕྲག་དང་པོའི་གཉིས་པ་དམིགས་པ་ལ་ཉེ་བར་སེམས་པའི་ཡིད་ཀྱི་ལས་ལའང་གསུམ་སྟེ། དང་པོ་རིགས་པ་དང་མཐུན་པས་བསྐྱེད་པའི་རྟོག་པ་ལའང་རིག་པའི་ཤེས་རབ་གསུམ་སྟེ། རང་གི་རྟོག་པ་ལས་བྱུང་བའི་ཤེས་པ་ནི་ཕྱིན་ཅི་ལོག་བཞི་ལ་སོགས་པ་མི་བདེན་པ་རྣམས་དང་བྲལ་ཏེ་སྒྲོ་སྐུར་མི་བྱེད་པའི་ཤེས་རབ་དང་། ལུང་བསྟན་པའི་ཤེས་པ་ཐོས་པ་ལས་བྱུང་བའི་ཤེས་རབ་ཀྱིས་གང་ཇི་ལྟ་བ་བཞིན་དུ་རྟོག་པ་དང་ཡོངས་སུ་ཤེས་པའོ། །ཡང་ན་སྒྲོ་སྐུར་མི་བྱེད་པ་འདི་ལ་སྦྱར་རོ། །མངོན་པར་རྟོགས་པ་ལས་བྱུང་བའི་ཤེས་པ་ནི་ཡང་དག་པ་ཇི་ལྟ་བ་བཞིན་དུ་ཤེས་པ་སྟེ། འཇིག་རྟེན་ལས་འདས་པ་མཐོང་བའི་ལམ་སྐྱེས་པ་ཡན་ཆད་དོ་དེ་ལྟར་གསུམ་མོ། །གཉིས་པ་གོང་མ་དེ་དག་དང་མི་ལྡན་པའི་རིགས་པ་མིན་པས་སྐྱེད་པའི་ཤེས་རབ་ནི་བཤད་པའི་ཤེས་པ་གསུམ་དང་མི་མཐུན་པའི་རྣམ་པར་རྟོག་པ་གསུམ་སྟེ་མི་བདེན་པ་རྣམས་སོ། །གསུམ་པ་གཉིས་ཀ་མིན་པའི་ཤེས་པ་སྐྱེ་བས་ཐོབ་པའི་ཤེས་རབ་ནི། ལུང་དུ་མ་བསྟན་པའི་ཤེས་པ་ཞེའམ། མདོར་ན་འགྲོ་བ་སྐྱེས་མ་ཐག་པར་ལྡན་པའི་ཤེས་རབ་བོ། །གསུམ་པ་ནི། གསུམ་པ་རྨོངས་བྱེད། ཅེས་པ་ནས། ཚད་ལས་འདས་པའོ། །ཞེས་པའི་བར་གྱིས་བསྟན་ཏེ། ལྔ་ཕྲག་དང་པོའི་གསུམ་པ་ར་རོ་བར་བྱེད་པའི་ཡིད་ཀྱི་ལས་ནི། དྲན་པ་རྨོངས་ཤིང་ཉམས་པར་བྱེད་པ་དང་སེམས་དཔའ་བ་དང་བག་མེད་པར་བྱེད་པའི་རྐྱེན་དུ་གྱུར་པའི་ཆང་དང་སྦྲང་ཆང་ལྟ་བུར་མྱོས་པར་འཐུང་། གང་གི་དུས་འདིར་ལུས་ཀྱི་འབྱུང་བ་བཞི་ཆ་མ་སྙོམས་པར་འགྱུར་བའི་དབང་གིས་དབང་པོའི་རྟེན་འགྱུར་བའི་ཕྱིར་དབང་པོའི་འབྱུང་བ་རྣམས་ཀྱང་འགྱུར་བའི་ཤུགས་ཀྱིས་རྣམ་ཤེས་རྣམས་ཀྱང་སྤྱོད་ཡུལ་སྔ་མ་ལས་འགྱུར་ཏེ་ངོ་བོ་འགྱུར་བ་དང་། རྣམ་ཤེས་གྱུར་བ་དེ་དང་ཆ་མཐུན་པར་ལུས་ཀྱི་འབྱུང་བའི་སྤྱོད་ཡུལ་ཡང་རྐྱེན་དེ་ཡིས་དེ་ལྟར་ཆ་མཐུན་ཅན་དུ་འགྱུར་བ་དང་། དེ་དག་གི་དབང་གིས་ལུས་ཉམས་ཆུང་བ་དང་། སྔར་འཐུང་བ་ལ་མ་གོམས་པའམ། སྔོན་གོམས་པ་རྣམས་ཀྱང་མ་གོམས་པ་ལྟར་ཤེས་པ་མྱོས་པས་བརྗེད་དེ་ཤེས་པའི་ལས་ཀུན་མི་ཤེས་པར་འགྱུར་བ་དང་། ཆང་བཟང་པོ་རྣོ་བའི་མཐུའམ། ཤེས་པ་སླར་དཔའ་བས་རྣོ་བར་འགྱུར་བ་དང་། ཆད་མང་པོ་ཚད་ལས་འདས་པར་འཐུང་བའམ། ཚད་ལས་འདས་ཏེ་ཤེས་པ་སྔོན་བས་གསལ་བར་འགྱུར་བ་སྟེ་དེ་ལྟར་དྲུག་པོ་གང་ཡིན་པའང་ཡིད་ཀྱི་ལས་སུ་གྱུར་པའོ། །བཞི་པ་ནི། བཞི་པ་བླ་འཁྱལ། ཞེས་པ་ནས། གྱུར་དང་གཞན་གྱིས་བརླམས། །ཞེས་པའི་བར་གྱིས་བསྟན་ཏེ། ལྔ་ཕྲག་དང་པོའི་བཞི་པ་སྨྱོ་འབོག་བྱེད་པའི་ཡིད་ཀྱི་ལས་ནི། བླ་འཁྱལ་བའམ་འཆལ་ཞིང་སྨྱོ་བར་བྱེད་པ་དང་། སྙིང་ཁྲིན་ནམ་སྙིང་སྲན་དུ་གྱུར་པའི་སྔོན་གྱི་མཁོན་རྙིང་ལྡང་བ་ཞེ་ལ་བྱེད་པ་དང་། ལུས་ཀྱི་ཁམས་གང་ཡིན་པ་མ་སྙོམས་པ་དང་། ཤིན་ཏུ་འཇིགས་ཤིང་སྐྲག་པ་ཡིད་ལ་བྱེད་པའི་སེམས་ཀྱི་ལས་དང་། ལུས་ཀྱི་གནད་དུ་ཡུལ་བས་སྟེ་བརྒྱབ་པས་གཟེར་ནད་ལ་སོགས་པ་ཚོར་བ་དྲག་པོའི་སྡུག་བསྔལ་དུ་གྱུར་པ་དང་། གདོན་བགེགས་དང་འབྱུང་པོ་ལ་སོགས་པ་གཞན་གྱིས་ཡིད་བརླམས་པས་འབོགས་པ་སྟེ། དྲུག་པོ་དེ་རྣམས་ཀྱང་ཡིད་ཀྱི་ལས་ཡིན་ནོ། །ལྔ་པ་ནི། ལྔ་པ་ནང་འཇུག །ཅེས་པ་ནས། གོམས་དང་གཞན་རྐྱེན་འགྱུར། །ཞེས་པའི་བར་གྱིས་བསྟན་ཏེ། ལྔ་ཕྲག་དང་པོའི་ལྔ་པ་གཉིད་ལོག་པར་བྱེད་པའི་ཡིད་ཀྱི་ལས་ནི། སེམས་རང་དབང་མེད་པར་ནང་དུ་འཇུག་པ་དང་། ལུས་ཉམ་ཆུང་བ་དང་། ལུས་སེམས་ངལ་ཞིང་དུབ་པ་དང་། གཉིད་ཀྱི་རྒྱུ་ཤ་ཆང་ལ་སོགས་པའི་ཟས་དྲགས་པར་ཟོས་པ་དང་། སེམས་རང་བཞིན་གྱིས་མྱོས་ཤིང་འཐིབས་པ་དང་། སེམས་ལས་ཀུན་བོར་ཏེ་བྱ་བ་བཏང་བ་དང་། གཉིད་ལང་ཅན་གཉིད་ལ་གོམས་ཤུགས་ཆེ་བ་དང་། ནད་ལ་སོགས་པའི་གཞན་རྐྱེན་གྱིས་དབང་དུ་གྱུར་པ་དང་བརྒྱད་ཀྱང་ཡིད་ཀྱི་ལས་སོ། །གཉིས་པ་ལྔ་ཕྲག་བར་མ་ལའང་ལྔ་སྟེ། ཡིད་ཕྱིར་འབྱུང་བར་བྱེད་པའི་ཡིད་ཀྱི་ལས་བསྟན་པ། ལུས་དག་གི་ལས་ལ་འཇུག་པར་བྱེད་པའི་ཡིད་ཀྱི་ལས་བཤད་པ། ཆགས་པ་དང་བྲལ་བར་བྱེད་པའི་ཡིད་ཀྱི་ལས་བསྟན་པ། ཆགས་པས་སེམས་ཉམས་པར་བྱེད་པའི་ཡིད་ཀྱི་ལས་བཤད་པ། དགེ་བའི་རྩ་བ་རྒྱུན་ཆད་པར་བྱེད་པའི་ཡིད་ཀྱི་ལས་བསྟན་པའོ། །དང་པོ་ནི། ལྔ་གཉིས་དང་པོ། ཞེས་པ་ནས། དེར་འཇུག་དེ་ཉིད་དོ། །ཞེས་པའི་བར་གྱིས་བསྟན་ཏེ། ལྔ་ཕྲག་བར་མ་འདི་ལ་སོ་སོའི་ཡན་ལག་གི་བྱེ་བྲག་རྣམས་བགྲང་ན་སུམ་ཅུར་འགྱུར་ཏེ། དེ་ཡང་ལྔ་ཕྲག་གཉིས་པའི་དང་པོ་ཉམས་བདེ་བའི་བྱེ་བྲག་གིས་སེམས་ཕྱིར་ཞེས་ཕྱི་རོལ་དུ་བྱུང་ཞིང་ཡུལ་ལ་འཇུག་པའི་ལས་བསྟན་པ་ལའང་། ལུས་ཀྱི་ཁམས་རྟས་པ་དང་། གང་འདིར་འཐིབས་པ་དང་གཉིས་ལས་སངས་པར་གྱུར་པ་དང་། ལུས་གང་དེ་སྒྱིད་ལུག་སྟེ་དྲན་པ་བློང་བས་ཀུན་དཀྲིས་ཀྱིས་ལུས་སྙོམས་པར་བྱེད་པའི་རྐྱེན་ཟད་པ་དང་། གང་བསམ་པའི་དམིགས་པ་སྔ་མོར་འདི་བྱ་སྙམས་ཏེ་ཆེད་དུ་གཟའ་གཏད་བྱས་པའི་རྐྱེན་གྱིས་དེ་དག་འཇོམས་ཤིང་འཇིག་པར་བྱེད་པ་དང་། ཕྱི་རོལ་གྱི་ཡུལ་གཞན་གྱི་རྐྱེན་གྱིས་ཡིད་སློང་བའམ། སྒྲ་དྲག་པོ་དང་བྱམས་པའམ་ཡིད་དུ་འོང་བའི་རྐྱེན་ལ་སོགས་པས་ལྡང་བར་འགྱུར་པའོ། །ཡང་ཡུད་ཙམ་སུམ་ཅུའི་ཆ་གཅིག་ལྟ་བུར་ཐང་ཅིག་སྟེ་དེ་ཙམ་དུ་སེམས་ཀྱི་དྲན་པ་འགགས་ཤིང་ཉམས་ཏེ་བརྒྱལ་འབོགས་སུ་གྱུར་པ་དང་། དེ་ལས་སླར་ཡང་སངས་པ་དང་། དེ་ལྟར་སངས་པ་དེ་ཡང་སླར་ལ་གཉིད་ལྟ་བུ་དེར་འཇུག་པར་བྱེད་པ་དང་དྲུག་པོ་དེ་དག་ཀྱང་ཡིད་ཀྱི་ལས་ཉིད་དོ། །གཉིས་པ་ནི། གཉིས་པ་གཉིས་བྱེད། ཅེས་པ་ནས། འབྱུང་བ་གཡོ་བར་བྱེད། །ཅེས་པའི་བར་གྱིས་བསྟན་ཏེ། ལྔ་ཕྲག་བར་མའི་གཉིས་པ་ལུས་ངག་གཉིས་ཀྱང་ལས་བྱེད་པ་ལ་འཇུག་པར་བྱེད་པ་བརྟས་པས་སྒོ་གསུམ་ལས་ལ་འཇུག་པའང་། ལས་བྱ་རྒྱུ་འདི་ཉིད་བྱའོ་སྙམ་དུ་སེམས་པ་སྔོན་དུ་འགྲོ་བའམ་སྐྱེ་བ་དང་། གང་བྱ་བར་བསམ་པའི་ལས་དེ་ལ་འདུན་ཏེ་མོས་པ་སྐྱེ་བ་དང་། དེ་ལ་འབད་རྩོལ་གྱིས་སྦྱོར་བའི་བརྩོན་འགྲུས་བྱེད་པ་དང་། དེ་དག་གི་སྒོ་ནས་སྒོ་གསུམ་གྱི་འདུ་བྱེད་ཐམས་ཅད་འབྱུང་བ་དང་གཡོ་ཞིང་སྐྱོད་པར་བྱེད་པ་དང་བཞི་པོ་དག་ཀྱང་ཡིད་ཀྱི་ལས་ཡིན་ནོ། །གསུམ་པ་ནི། གསུམ་པ་ཆགས་དང་། ཞེས་པ་ནས། ཡིད་ལ་བྱེད་པས་བྱེད། །ཅེས་པའི་བར་གྱིས་བསྟན་ཏེ། ལྔ་ཕྲག་གཉིས་པའི་གསུམ་པ་འདོད་ཆགས་དང་བྲལ་བར་བྱེད་པའི་ཡིད་ཀྱི་ལས་བསྟན་པ་ལའང་། སྔར་ཆགས་ཤིང་ཞེན་པའི་ཡུལ་དང་གནས་ལ་སེམས་རབ་ཏུ་སྐྱོ་ཞིང་སུན་པ་སྐྱེ་བ་དང་། ཡུལ་གནས་ཡིད་དང་འཐད་པ་གཞན་མཐོང་བའི་རྐྱེན་གྱིས་སྔ་མ་དང་བྲལ་བར་བྱེད་པ་དང་། གཉེན་པོ་སྐྱེས་པའི་རྐྱེན་གྱིས་ཆགས་པའི་བར་དུ་གཅོད་པ་དང་། ཡང་དག་པའི་ཆོས་ཉིད་ཀྱི་དོན་ཡིད་ལ་བྱེད་དེ་འདྲེས་གོམས་སུ་བྱས་པས་ཆགས་པ་དང་བྲལ་བར་བྱེད་པ་བཞི་ཡང་ཡིད་ཀྱི་ལས་ཡིན་ནོ། །བཞི་པ་ནི། བཞི་པ་ཆགས་པས། ཞེས་པ་ནས། གཞན་གྱིས་ཟིན་པའོ། །ཞེས་པའི་བར་གྱིས་བསྟན་ཏེ། ལྔ་ཕྲག་གཉིས་པའི་བཞི་པ་ཆགས་པ་དང་བྲལ་བ་ལས་སླར་ཡང་ཆགས་པས་ཉམས་པར་འགྱུར་བའི་ཡིད་ཀྱི་ལས་བསྟན་པ་ཡང་། ཆགས་པའི་ངོ་བོ་མ་རིག་པའམ་རྨོངས་པའི་ལྟ་བ་རྣམས་སྔར་སྟོབས་ཅན་དུ་བརྟན་པར་གནས་པ་དང་། གང་འདིར་ཡང་དག་པའི་ལྟ་བའི་དོན་ལ་མ་འདྲིས་པས་གོམས་པ་ཆུང་བ་དང་། ཆགས་ཡུལ་གྱི་དངོས་པོ་གང་ཡང་རུང་བའི་བྱེ་བྲག་གི་རྣམ་པ་དང་རྟགས་དང་མཚན་མ་ཡོངས་སུ་གཟུང་ནས་ཞེན་ཞིང་རྟོག་པ་དང་། ཇི་སྐད་དུ། ཕྲ་རྒྱས་སྤངས་པ་མ་ཡིན་དང་། །ཡུལ་ནི་ཉེ་བར་གནས་པ་དང་། །ཚུལ་བཞིན་མ་ཡིན་ཡིད་བྱེད་ལས། །ཉོན་མོངས་རྒྱུ་ནི་ཚང་བ་ཡིན། །ཞེས་འབྱུང་བ་ལྟར། གང་དེ་དག་ལ་བརྟེན་ནས་ཚུལ་བཞིན་མ་ཡིན་པར་ཡིད་ལ་བྱེད་པ་ལས་ཡིད་ཀྱི་ཤེས་པ་ཡང་དག་པའི་ལྟ་བ་མ་ཆགས་པ་ལས་ཉམས་པ་དང་། ལ་སོགས་ཞེས་དངོས་པོ་བསྡུ་བ་ནི། དེ་ལྟར་བསླད་པའི་ཞེན་པ་དེས་ཡིད་ལོག་པ་ལ་ཆགས་པར་འགྱུར་བ་ཡིན་ལ། དེ་བས་ན་རྒྱུ་དེས་འདོད་ཆགས་ཡང་དག་པར་བླངས་ཏེ་དང་དུ་ལེན་པ་དང་། ཆགས་པ་དེར་ངེས་པར་འཇུག་པར་བྱེད་པ་དང་། སྒྲིབ་པ་དེས་དམ་པའི་དོན་མཐོང་དུ་མི་སྟེར་བ་དང་། ཡུལ་སྡུག་གུ་གཞན་གྱིས་ཟིན་ཏེ་སེམས་རང་དབང་མེད་པར་ཕྲོགས་པ་དང་དགུ་ཡང་ཡིད་ཀྱི་ལས་སུ་གྱུར་པའོ། །ལྔ་པ་ནི། ལྔ་པ་དོན་རྒྱུན། ཞེས་པ་ནས། གནས་བྱེད་དོན་རྒྱུན་ཆད། །ཅེས་པའི་བར་གྱིས་བསྟན་ཏེ། ལྔ་ཕྲག་གཉིས་པའི་ལྔ་པ་ཡང་དག་པའི་དོན་གྱི་དགེ་བའི་རྩ་བ་རྒྱུན་གཅོད་པར་བྱེད་པའི་ཡིད་ཀྱི་ལས་བསྟན་པ་ལའང་མཚན་མའི་དངོས་པོར་ཞེན་པའི་ཡུལ་གསལ་བ་དང་། ཕྱིན་ཅི་ལོག་ཏུ་གྱུར་པའི་ལྟ་བ་སྟོབས་དང་ལྡན་པ་དང་། འདོད་པའི་ཡོན་ཏན་ཆང་ལ་སོགས་པའི་ལོངས་སྤྱོད་དམན་པ་ལོག་ལྟ་དང་མཐུན་པའི་རྐྱེན་དང་ཕྲད་པའམ་རང་དང་མཚུངས་པའི་སྡིག་པའི་གྲོགས་པོ་རྙེད་པ་དང་། འདོད་པ་དེ་དག་ལ་སྤྱོད་པའི་ཞེན་ཆགས་རྒྱུན་མི་འཆད་པར་དེ་དག་གི་རྗེས་སུ་སེམས་འགྲོ་ཞིང་རྟག་ཏུ་འབྲང་བར་བྱེད་པ་དང་། དེ་ལྟ་བུའི་དོན་མེད་པའི་ལས་ངན་པ་རྒྱུན་དུ་བྱེད་པ་དེ་ཡི་རྒྱུན་གཅོད་ཅིང་སྤོང་སྟེ་དེ་ལས་སླར་ལྡོག་པར་མི་བྱེད་པ་དང་། ལོག་པའི་ལྟ་སྤྱོད་དེ་ལ་རྒྱུན་དུ་གནས་ཏེ་བར་མ་ཆད་པར་བྱེད་པ་དང་། དེའི་དབང་གིས་ཡང་དག་པར་སྤྱོད་པའི་དགེ་བའི་ལས་ཀྱི་དོན་དུ་འཇུག་པ་རྒྱུན་ཆད་པར་བྱས་པ་དང་བདུན་ཡང་ཡིད་ཀྱི་ལས་ཡིན་ནོ། །དེ་དག་ནི་རྒྱན་སྟུག་པོ་བཀོད་པར། ཐོག་མ་མེད་ནས་བསགས་པ་ཡི། །མི་ཡི་རྣམ་སྤྲོས་བག་ཆགས་ཀྱིས། །སྣ་ཚོགས་གནས་ངན་ལེན་པ་དང་། །སྣ་ཚོགས་རྟོག་པས་ལས་སུ་བརྟགས། །ཞེས་སོགས་ལྟར་རོ། །གསུམ་པ་ལྔ་ཕྲག་ཐ་མ་བཤད་པ་ལ་ལྔ་སྟེ། དགེ་བའི་རྩ་བ་མཚམས་སྦྱོར་བར་བྱེད་ཚུལ་བསྟན་པ། འཆི་བར་བྱེད་པའི་ཆོས་ཀྱི་ཁྱད་པར་བཤད་པ། བར་དོའི་ཆོས་དང་མཚན་ཉིད་ཀྱི་རྣམ་བཞག་སྤྲོས་ཏེ་བསྟན་པ། སྐྱེ་གནས་རྣམས་སུ་ཇི་ལྟར་འཇུག་པར་བྱེད་ཚུལ་བཤད་པ། སྐྱེ་བར་བྱེད་པ་སྤྱི་དང་བྱེ་བྲག་གི་རྣམ་གྲངས་བསྟན་པའོ། །དང་པོ་ནི། ལྔ་གསུམ་དང་པོ། ཞེས་པ་ནས། ལྡོག་པའི་དོན་རྒྱུན་ལྡན། །ཞེས་པའི་བར་གྱིས་བསྟན་ཏེ། ལྔ་ཕྲག་གསུམ་པའི་དང་པོ་དགེ་བའི་རྩ་བ་རྣམས་མཚམས་སྦྱོར་བར་བྱེད་པའི་ཡིད་ཀྱི་ལས་བསྟན་པ་ནི། སྔར་བཤད་པ་ལྟར་སྔ་མའི་མི་དགེ་བའི་ཡིད་ཀྱི་ལས་ཕྱིན་ཅི་ལོག་པ་དེ་དག་ལས་སླར་ལྡོག་སྟེ་དགེ་བའི་ལས་ཀྱི་དོན་བཟང་པོ་དང་རྒྱུན་དུ་ལྡན་པར་བྱེད་པའི་ཡིད་ཀྱི་ལས་ཡིན་པས། དེས་ནི་སྔ་མ་ངན་འགྲོའི་སྐྱེ་བ་ལས་ཕྱི་མ་མཐོ་རིས་ཀྱི་སྐྱེ་གནས་སུ་ཡང་མཚམས་སྦྱོར་བར་བྱེད་དོ། །དེའང་སའི་དངོས་གཞི་ལས། ཇི་ལྟར་དགེ་བའི་རྩ་བ་རྣམས་མཚམས་སྦྱོར་བར་བྱེད་ཅེ་ན། རང་བཞིན་གྱིས་དབང་པོ་རྣོ་བ་དང་། མཛའ་བཤེས་དང་ཉེ་དུ་དང་རྟེན་གྲོགས་རྣམས་བསོད་ནམས་བྱ་བ་ལ་མངོན་པར་བརྩོན་པ་མཐོང་བ་དང་། སྐྱེས་བུ་དམ་པའི་ཐད་དུ་སོང་ནས་དམ་པའི་ཆོས་ཉན་པ་དང་། ཐེ་ཚོམ་སྐྱེ་ཞིང་ངེས་པར་རྟོགས་པར་བྱེད་དོ། །ཞེས་སོ། །གཉིས་པ་ལ་ལྔ་སྟེ། འཆི་བར་འགྱུར་བའི་དུས་བཤད་པ། དུས་མིན་པར་འཆི་བའི་རྐྱེན་བསྟན་པ། འཆི་བའི་འདུ་ཤེས་དང་ལྟས་བཤད་པ། འཆི་ཀའི་བསམ་པའི་ཁྱད་པར་བསྟན་པ། གནད་ཀྱི་སྡུག་བསྔལ་གང་ལ་ཡོད་ཚུལ་བསྟན་པའོ། །དང་པོ་ནི། གཉིས་པ་ཉིང་མཚམས། ཞེས་པ་ནས། དུས་མ་ཡིན་དེ་ལ། །ཞེས་པའི་བར་གྱིས་བསྟན་ཏེ། ལྔ་ཕྲག་གསུམ་པའི་གཉིས་པ་སྐྱེ་བ་སྔ་ཕྱིའི་སྲིད་པའི་ཕུང་པོ་ཉིང་མཚམས་སྦྱོར་བར་བྱེད་པ་ཡང་ཡིད་ཀྱི་ལས་ཏེ། དེའང་ཇི་ལྟར་ཞེ་ན། ཐ་སྙད་དུ་སྲོག་གི་དབང་པོ་རིས་གཞན་དུ་འཕོ་བར་འགྱུར་པ་ཡི་འཆི་བའི་ཆོས་དེ་ལ་ཡང་དབྱེ་བ་གཉིས་སུ་ཡོད་དེ། སྔར་གྱི་བསོད་ནམས་ཀྱི་རྒྱུན་ལས་སྐད་ཅིག་ཙམ་དུའང་གནས་པའི་སྐལ་པ་རྫོགས་ནས་ཚེ་ཟད་དེ་འཕོ་བ་ནི་དུས་སུ་འཆི་བ་སྟེ། སའི་དངོས་གཞི་ལས། འདི་ལྟ་སྟེ། འདི་ན་ཁ་ཅིག་ཇི་ལྟར་འཕངས་པའི་ཚེ་རིལ་གྱིས་ཟད་པར་གྱུར་ནས་འཆི་འཕོ་བ་སྟེ། དེ་ནི་དུས་ལ་བབ་ནས་འཆི་བ་ཞེས་བྱའོ། །ཞེས་གསུངས་པ་ཉིད་དང་། དེ་ལྟར་ཚེ་ཚད་མ་རྫོགས་པར་གློ་བུར་དུ་རྐྱེན་གྱིས་དབང་དུ་གྱུར་ནས་དུས་མ་ཡིན་པར་འཆི་འཕྲོ་བ་གང་ཡིན་པ་སྟེ། སྔ་མ་ལས། འདི་ལྟ་སྟེ། འདི་ན་ཁ་ཅིག་ཡོ་བྱད་མེད་པའི་འཆི་འཕོ་བ་ལྟ་བུ་ཡིན་ནོ། །ཞེས་སོ། །དེ་ལ་རྣམ་གྲངས་གཞན་ཡང་ཡོད་དེ་འབྱུང་མ་རག་པའོ། །གཉིས་པ་ནི། ཁ་ཅིག་དུས་མིན། ཞེས་པ་ནས། འགྲོ་དང་སྤྱོད་པས་ཉེས། །ཞེས་པའི་བར་གྱིས་བསྟན་ཏེ། དུས་སུ་འཕོ་བ་མ་ཡིན་པར་འགྲོ་བ་ཁ་ཅིག་དུས་མིན་པར་འཆི་བ་ཡི་ཚུལ་ནི། ཇི་ལྟ་བུ་ཞེ་ན། སྔ་མའི་རྒྱུ་དེ་ཉིད་ཡོད་ཀྱང་ཕན་སྟོངས་བྱེད་པའི་རྐྱེན་རླག་སྟེ་ཟད་པ་དང་། དེ་ལས་གཞན་པ་དུག་མཚོན་སོགས་གནོད་པའི་རྐྱེན་རྣམས་ཀྱི་དབང་དུ་གྱུར་པས་འཆི་འཕོ་བྱུང་བ་དེ་ཡི་ཚེ་བསོད་ནམས་ཀྱི་རྒྱུན་མ་ཟད་པས་ཡུན་རིང་དུ་གནས་པའི་རྒྱུ་ཡི་སྐལ་པ་ཡོད་ཀྱང་ཚེ་ཡུན་རིང་དུ་གནས་པའི་ཕན་པའི་རྐྱེན་མ་ཚང་བ་ཡིན་ནོ། །དེའི་རྒྱུ་ཡང་བར་བར་དུ་ཡ་ང་བའི་ལས་ཀྱི་སྤྱོད་ཡུལ་དུ་སྣང་བའི་སྡིག་པ་མ་སྤང་བར་སྤྱད་པའི་ལས་ཀྱི་རྐྱེན་དེ་ལས་གྱུར་པ་སྟེ། ཕྱི་ནང་གི་ལྷ་འཁྲུགས་པ་དང་མུ་གེ་དང་ཐོག་འབབས་པ་དེར་ཕྲད་པ་ལ་སོགས་པ་དང་། ཕྱི་ནང་གི་འབྱུང་བ་འཁྲུགས་ཏེ་འདུ་བ་བཞིའི་ནད་དང་མེ་ཆུ་ལ་སོགས་པ་འཇིགས་པ་བརྒྱད་ཀྱིས་འཆི་བ་དང་། གཉིས་ཀ་འཁྲུགས་པས་འཆི་བ་རྐྱེན་གྱི་དབང་གིས་ལྕེ་འབབས་པ་དང་། ནད་གཞི་གཉིས་ཀ་ལ་སོགས་པ་རྣམས་སོ། །གཞན་ཡང་རྐྱེན་བསྡུས་པ་དགུ་ཡོད་དེ། གང་ཞེ་ན། ཁ་ཟས་ཐང་མ་ལས་མང་དུ་ཟོས་ཏེ་ཚད་ལས་འདས་པ་དང་། ཡང་ན་མི་ཐུབ་པ་ལ་དོ་བསྡོས་ཏེ་ཚད་ལས་འདས་པའོ། །རང་གི་ནད་གཞི་ལ་མི་འཕྲོད་པའི་ཟས་མི་མཐུན་པ་ཟོས་པ་དང་། ཡང་ན་མི་འཕྲོད་པའི་གྲོགས་དང་འགྲོགས་པ་དང་། མི་མ་ཡིན་གཉན་པའི་ས་རུ་བསྡད་པ་དང་། འབྱུང་བཞི་མི་མཐུན་པའི་སར་བསྡད་པའོ། །ཟས་སྔ་མ་ཟོས་པ་གང་མ་ཞུ་བ་འམ་མ་སངས་པར་གང་ཕྱི་མའི་ཟས་ཀྱིས་ནོན་པར་ཟ་བ་དང་། ཡང་ན་མི་དང་མཁོན་སྔ་མ་མ་སྦྱང་བར་ཡང་འཐབ་པ་དང་། མི་མ་ཡིན་སྔ་མས་གནོད་པ་མ་བསལ་བར་ཕྱི་མ་དང་འགྲས་པའོ། །ཟས་ཟོས་པའི་བཤང་བའི་དྲི་མ་རྙིང་པ་བསགས་ཏེ་འཁྱིགས་པའམ་འཁྱིམས་པ་ཕྱིར་མི་ཐོན་པའམ་ཆེད་དུ་འབྱིན་པར་མི་བྱེད་པར་མི་འདོར་བར་བརྣགས་པ་དང་། གཞན་ཡང་འཁོན་རྙིང་དང་ནད་ཁྲག་ལྟ་བུ་མི་འབྱིན་པ་ཡང་ངོ་། །སྐྱུགས་སྨན་བཏང་ནས་གང་དེ་ཕྱིར་མི་སྐྱུག་པར་ནན་གྱིས་འགེགས་ཏེ་སྐྱུགས་པ་སྡོམ་པས་ཚེའི་རྒྱུན་འགོག་པ་དང་། རྩ་ཆུ་འགེགས་པ་ཡང་འདྲའོ། །ནད་ལ་ཕན་པའི་ཆ་རྐྱེན་ནད་སོ་སོའི་གཉེན་པོ་ལྟར་རྫས་དང་སྨན་མི་འཆང་ཞིང་ནད་གཡོག་བརྩེ་ལྡན་དང་སྨན་པའི་ངག་མི་ཉན་པར་ཁ་ཟས་སོགས་མཐུན་པ་བསྟེན་པར་མི་བྱེད་པ་དང་། སྔར་ནད་གང་ལ་གང་ཕན་གྱི་གསོ་བའི་ཐབས་ལ་མ་གོམས་པས་ནད་ཁམས་དང་མཐུན་ཞིང་འཕྲོད་པའི་མཚན་ཉིད་མི་ཤེས་པ་དང་། ཡང་ན་སྔར་ནད་གཡོག་ལ་མ་གོམས་པས་ནད་པ་ཟས་གང་ལེན་གྱི་མཐུན་འཕྲོད་མི་ཤེས་པའོ། །དགྲ་གདོན་དང་འཕྲད་ཅིང་གཡང་ཁ་སོགས་སུ་དུས་མིན་པར་མཚན་མོ་ལ་འགྲོ་བར་བྱེད་པ་དང་གཞན་གྱི་ཆུང་མ་ལ་མི་ཚངས་པར་སྤྱོད་པས་ཉེས་ཤིང་འཁྲུགས་པ་དང་དགུ་སྟེ། བཅོམ་ལྡན་འདས་ཀྱིས་ཀྱང་། ཚེ་མ་ཟད་པར་འཆི་བའི་དུས་བྱེད་པ་ནི་རྒྱུ་དགུ་དང་རྐྱེན་དགུ་ཡོད་དོ། །དགུ་གང་ཞེ་ན། ཁ་ཟས་ཚོད་མ་ཟིན་པར་ཟ་བ་དང་། མི་འཕྲོད་པ་ཟ་བ་དང་། མ་ཞུ་བར་ཟ་བ་དང་། མ་ཞུ་བ་བསགས་པ་འབྱིན་པར་མི་བྱེད་པ་དང་། སྨིན་པ་དགག་པ་དང་། སྨན་སོ་སོར་མི་བསྟེན་པ་དང་། གོམས་པ་དང་མ་གོམས་པ་མ་ཤེས་པ་དང་། དུས་མ་ཡིན་པར་འགྲོ་བ་དང་། མི་ཚངས་པར་སྤྱོད་པའོ། །ཞེས་གསུངས་ཏེ་དེ་དག་ནི་དུས་མིན་དུ་འཆི་བ་ཞེས་བྱ་སྟེ། དེ་ལྟ་བས་ན་ལུས་འཚོ་བའི་རིམ་གྲོ་ལ་ཆེར་འབད་པར་བྱའོ། །གསུམ་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི། དེ་ན་འདུ་ཤེས། ཞེས་པ་ནས། ལོག་པ་བཏང་སྙོམས་ལྡན། །ཞེས་པའི་བར་གྱིས་བསྟན་ཏེ། དེ་ལ་འཆི་ཀ་མའི་དུས་དེ་ཡི་ཚེ་ན་འདུ་ཤེས་གསུམ་མམ་སེམས་གསུམ་དང་ལྡན་ཏེ། དོན་དང་ལྡན་པ་དགེ་བའི་སེམས་དང་། དེ་ལ་ལོག་པ་སྡིག་པའི་སེམས་དང་། གང་དེ་གཉིས་སུ་ལུང་དུ་མ་བསྟན་པ་བཏང་སྙོམས་ཀྱི་སེམས་ཏེ་དེ་ལྟར་གསུམ་དང་ལྡན་པའོ། །གཉིས་པ་ལ་གསུམ་སྟེ། དགེ་བ་ཅན་གྱི་འདུ་ཤེས་དང་ལྟས་བསྟན་པ། སྡིག་པ་ཅན་གྱི་འདུ་ཤེས་དང་ལྟས་བཤད་པ། བཏང་སྙོམས་པའི་འདུ་ཤེས་དང་ལྟས་བསྟན་པའོ། །དང་པོ་ནི། དོན་དེ་གང་ལྡན། ཞེས་པ་ནས། གང་འབྱུང་བདེ་བའོ། །ཞེས་པའི་བར་གྱིས་བསྟན་ཏེ། དགེ་བ་ཅན་འཆི་ཀ་མའི་མཚན་ཉིད་ཇི་ལྟ་བུ་ཡིན་ཞེ་ན། དགེ་བའི་བག་ཆགས་ཀྱི་དོན་དེ་དང་གང་ཟག་གང་ཞིག་ཡང་དག་པར་ལྡན་པ་དེ་ཉིད་ནས་འཕོས་ཏེ་གནས་གཞན་གང་དུ་འགྲོ་བ་དེའི་ཚེ། སྔོན་དུ་དགེ་བའི་སྤྱོད་པ་དེ་ཉིད་བསྟེན་ཏེ་སྟོབས་ཅན་དུ་གྱུར་པའི་ལས་གང་དེ་རང་གིས་དྲན་ནས་དགེ་བའི་འདུ་ཤེས་དང་ལྡན་པར་འགྱུར་བས། དེ་ལ་མི་གཞན་གྱིས་དགེ་སེམས་མ་བསྐུལ་བར་མི་དགེ་བའི་སྡིག་སེམས་བསྐུལ་ཏེ་གསལ་བར་བྱས་ཀྱང་རུང་སྟེ། དེ་ནི་དགེ་བའི་ཤེས་པ་རགས་པར་རམ་གསལ་བར་འབྱུང་ཞིང་རྒྱུ་བ་དེ་ཡི་བར་དུ་དགེ་བ་ཅིའང་ཤེས་ལ་སྡིག་པའི་འདུ་ཤེས་མི་འབྱུང་བའོ། །དེ་ནས་ཚོགས་དྲུག་སོ་སོར་ཐིམ་ནས་ཕལ་པ་རྣམས་འདུ་ཤེས་ཆ་ཕྲ་བར་རྒྱུ་བ་དང་ལྡན་པའི་དུས་ཀྱི་ཚེ་ན་སྔར་གྱི་དོན་མི་གསལ་བས་དགེ་བའི་ཤེས་པ་དེ་ལས་ལྡོག་ཅིང་ཤེས་པ་བཏང་སྙོམས་དང་ལྡན་ཏེ་གནས་པའོ། །དེའང་གང་ཟག་དེ་ཡིས་སྔོན་དགེ་བའི་སྤྱོད་པ་དེ་ལ་བསྟེན་ཅིང་གོམས་པའི་མཐུས་འཆི་ཀའི་དུས་སུ་དགེ་བའི་སེམས་དེ་ཉིད་གསལ་བར་འབྱུང་ཞིང་དེ་དང་ཆ་མཐུན་ཅན་དུ་འགྱུར་ལ། དེས་ན་སྔར་གོམས་པ་མེད་པའི་ལས་གཞན་ལ་བརྩལ་བར་མི་ནུས་པས། གལ་ཏེ་མི་བསམ་ངན་ཅན་གཞན་དག་གིས་སྡིག་པའི་སེམས་སུ་བསྐུལ་བར་བྱས་ཀྱང་དྲན་ཞིང་གསལ་བར་ཡོང་ཡེ་མི་ནུས་ཏེ་སྔོན་དུ་འདྲིས་གོམས་མེད་པས་སོ། །དེ་བས་ན་འཆི་བའི་ཚེ་དེར་སྔར་དགེ་བ་སྤྱད་པའི་སེམས་ཀྱི་འདུ་ཤེས་དེ་དང་གང་ལྡན་པ་དག་ནི་ངན་སོང་གིས་འཇིགས་སྐྲག་མེད་པར་མཐོ་རིས་ཀྱི་གནས་སུ་བདེ་བར་འགྲོ་བ་སྟེ། དེ་ལ་གནད་ཀྱི་སྡུག་བསྔལ་མི་བཟད་པ་དྲག་པོའི་ཚོར་བ་ཡང་ཉམས་སུ་མྱོང་བར་མི་འགྱུར་ཏེ་བདེ་བར་འཆི་བའི་དུས་བྱེད་པར་འགྱུར་རོ། །དེ་ཡང་དགེ་བ་ཅན་གྱི་ལྟས་ནི། འཆི་ཀ་དེ་ཡི་དུས་ན་གཟུགས་ལ་སོགས་པ་གང་ཅི་ཞིག་མཐོང་བ་ན་ཡང་། སྤྱོད་ཡུལ་གང་དུ་སྔར་མ་མཐོང་བའི་གཟུགས་ལ་སོགས་པ་དེ་ལྟར་དགེ་བའི་ཆོས་ལ་ཉི་ཚེར་སྤྱོད་པ་འབའ་ཞིག་ཉིད་དུ་མཐོང་བར་འགྱུར་ཏེ། དཔེ་ཇི་ལྟར་ན་ཉི་མའི་དཀྱིལ་འཁོར་འཆར་བ་ཡང་འོད་རིམ་པར་འབྱུང་བའི་རྐྱེན་གྱིས་སྐྱ་རེངས་དང་པོ་ནས་སྣང་བ་ཁད་ཀྱིས་འབྱུང་སྟེ་ཇེ་གསལ་ཇེ་གསལ་དུ་གྱུར་པས་མུན་པ་ལས་ཉིན་མོར་འགྱུར་པ་བཞིན་དུ། གང་ཟག་དེ་ནི་ལུས་སྔ་མ་མུན་པའི་ཁམས་ནས་ཕྱི་མ་སྣང་བའི་མཐར་ཐུག་ཏུ་རིམ་པར་འབྱུང་བ་ཉིད་དོ། །དེ་ཡང་དཔེར་ན་རྨི་ལམ་ལྟ་བུར་གཟུགས་སྣང་མཐོང་བ་ཕྱི་མ་དག་ཀྱང་ཉི་མའི་སྣང་བ་ལྟར་ཡིད་དུ་འོང་བའི་གཟུགས་སྣང་སྣ་ཚོགས་སུ་མཐོང་བར་འགྱུར་ཞིང་། དེ་དག་ཀྱང་རང་གི་སེམས་ཀྱི་བག་ཆགས་རྣམ་པར་དཀར་བའི་དགེ་བ་ལ་གནས་པའི་མཐུ་བརྟས་པ་ཡིན་པས་ཉེ་འཁོར་དང་དྲུང་ན་ཡོད་པ་ཐམས་ཅད་ལྷ་དང་ལྷ་མོར་སྣང་ནས་མགོན་དང་སྐྱབས་སུ་མཐོང་ངོ་། །དེ་ལྟར་དགེ་བ་ཅན་དེ་ཡི་ཡང་དགེ་བའི་ཆོས་ཀྱི་སྤྱོད་ཡུལ་དེ་དག་ཀུན་ཤེས་ཤིང་མཐོང་བ་དག་པའི་ཡོན་ཏན་གྱི་མཐུ་དེས་དུས་གང་འདིར་རྣམ་པར་ཤེས་པས་ལུས་ཀྱི་རོ་སྨད་ནས་རིམ་པར་གྱེན་དུ་འགྲོ་བས་ལུས་འདོར་བར་བྱེད་དེ། དེས་ན་དེའི་སྨད་གྲང་མོར་གྱུར་ནས་དྲོད་ཀྱང་སྤྱི་བོ་ནས་འབྱུང་སྟེ་སྟེང་དུ་ཡལ་བར་འགྱུར་ཏེ། སྤྱི་གཙུག་གི་ཐོར་ཏོར་ཚངས་པའི་བུ་གར་ལུས་སེམས་རྟེན་པའི་དྲོད་གང་ཡིན་པ་འབྱུང་བ་དེ་ནི་བདེ་འགྲོ་མཐོ་རིས་ཀྱི་སར་སྐྱེ་བ་འབྱུང་བའི་སྔ་ལྟས་སུ་བསྟན་པའོ། །དེའི་ཚུལ་ཡང། ས་ཆུར་ཞུགས་ཆུ་མེར་ཞུགས་མེ་རླུང་ལ་འདུ། རླུང་ཡེ་ཤེས་སྙིང་པོ་ལ་འདུས་པས་ལུས་ཉམས་མེད་པ་དང་། བུ་ག་སྐམས་ནས་དྲོད་ཡལ་ཏེ་མེ་ལོང་ལ་ཧས་བཏབ་པའི་དབུགས་ལྟ་བུར་འདུས་ནས་མཐར་འདོན་པར་འགྱུར་རོ། །འོན་ཀྱང་མེ་ཤེལ་ཆུ་ཤེལ་དང་ས་བོན་དང་བྲག་ཆ་དང་། ཁ་ཐོན་དང་མར་མེ་དང་མེ་ལོང་དང་རྒྱ་ལྟ་བུར་སྣང་བས། དབུ་མ་རྟེན་འབྲེལ་སྙིང་པོ་ལས། ཁ་ཏོན་མར་མེ་མེ་ལོང་རྒྱ། །མེ་ཤེལ་ས་བོན་སྐྱུར་དང་སྒྲས། །ཕུང་པོ་ཉིང་མཚམས་སྦྱོར་བ་ཡང་། །མི་འཕོ་བར་ནི་མཁས་རྟོགས་བྱ། །ཞེས་གསུངས་པ་ལྟར་དོན་གྱི་ངོ་བོས་སྔ་ཕྱིར་འཕོས་པ་ནི་མེད་ཀྱི། རྟོག་པ་ཅན་ལ་སྐད་ཅིག་མ་སྔ་ཕྱིའི་སྤྱོད་ཡུལ་སྣ་ཚོགས་སུ་སྣང་བ་ནི་ཡོད་དེ། རྒྱན་སྟུག་པོ་བཀོད་པ་ལས། ཡིད་ཀྱི་སྲད་བུས་བཏགས་པ་དག །སེམས་ཅན་ཀུན་ཏུ་རབ་ཏུ་འཁོར། །རྣམ་པར་ཤེས་པ་བརྒྱད་ཀྱི་ཚོགས། །ཁམས་དང་སྐྱེ་མཆེད་ཕུང་པོ་སྟེ། །ཡིད་ཀྱི་སྲད་བུས་བཅིངས་བྱས་ཤིང་། །ལུས་དང་ལུས་ལ་རབ་ཏུ་རྒྱུ། །འདི་ནི་འགྲོ་བའི་སྐྱེས་བུ་སྟེ། །འགྲོ་བ་རྣམས་ཀྱི་དོན་དུ་བསྟན། །ཞེས་དང་། ལས་ཀྱི་སྐྱེས་བུ་བསྟན་པ་ནི། །འཁོར་རྣམ་རྟག་ཏུ་འཁོར་བ་སྟེ། །བདེ་དང་སྡུག་བསྔལ་མྱོང་བྱེད་པ། །བྱས་པའི་ལས་ཀྱི་ཆུད་མི་ཟ། །ཞེས་དང་། འགྲོ་བའི་སྐྱེས་བུ་དེ་ཡོད་ན། །སྲེད་པའི་འཁོར་ལོས་འཁོར་བར་འགྱུར། །འཁོར་དང་བྲལ་ན་ཐར་པ་སྟེ། །བློ་ཞན་རྣམས་ཀྱིས་མི་ཤེས་སོ། །ཞེས་དང་། ལས་བརྒྱ་པ་ལས། ལུས་ཅན་དག་གི་ལས་རྣམས་ནི། བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་གསུངས་པ་སོགས་ཤིན་ཏུ་མང་ངོ་། །ཚུལ་དེ་ནི་སྡིག་པ་དང་ལུང་དུ་མ་བསྟན་པའི་འཆི་འཕོ་ལའང་མཚུངས་སོ། །གཉིས་པ་ནི། གང་དུ་ལོག་པར། ཞེས་པ་ནས། མཐར་འབྱུང་མི་བདེ་བའོ། །ཞེས་པའི་བར་གྱིས་བསྟན་ཏེ། སྡིག་པ་ཅན་འཆི་ཀའི་མཚན་ཉིད་གང་ཞེ་ན། འཆི་ཀའི་དུས་གང་དུ་མི་དགེ་བའི་འདུ་ཤེས་ཕྱིན་ཅི་ལོག་གི་སེམས་དང་ལྡན་པས་ལོག་པར་ལྟུང་བ་ངན་སོང་གི་གནས་རིས་དེ་རུ་འགྲོ་བའི་སྡིག་པ་ཅན་འཆི་བའི་ཚུལ་བསྟན་པ་ཡང་། གོང་དུ་དགེ་བ་ཅན་འཆི་བའི་ལྟས་རྣམས་ལས་བཟློག་པ་ཇི་ལྟ་བ་བཞིན་དུ་དེ་དང་མི་མཐུན་པར་ཕྱིན་ཅི་ལོག་ཏུ་སྣང་བ་སྟེ། གནད་ཀྱི་སྡུག་བསྔལ་མི་བཟད་པ་དྲག་པོའི་ཚོར་བ་ཉམས་སུ་མྱོང་བས་ནི། ཤིན་ཏུ་ཟུག་གཟེར་མི་བཟོད་པར་གྱུར་ཏེ། ལུས་འགྲེ་ལྡོག་དང་ཡན་ལག་གཡོ་བ་སྟེ་གཡོ་འགུལ་བྱེད་དེ། ངག་ནས་མི་སྙན་པའི་ང་རོ་འདོན་ཞིང་མི་བཟོད་པའི་འོ་དོད་འབོད་པ་དང་། ཡིད་དུ་མི་འོང་བའི་ལྟས་སུ་གྱུར་པ་སེམས་འཁྲུལ་པའི་དབང་གིས་གཟུགས་གང་སྣང་ཞིང་ཅི་མཐོང་བ་ན་ཡང་། བྱམས་པའི་གཉེན་དང་ཕན་པར་བྱེད་པ་ལ་སོགས་པ་གང་སུ་ཞིག་མཐོང་ཚེ་ཕ་མ་དང་ཉེ་དུ་ལྟ་བུ་ཡིན་ཡང་དེ་དག་ནི་གཤེད་མ་དང་གཅན་གཟན་དང་སྲིན་པོ་འབར་བ་ལ་སོགས་པ་མི་འདོད་པའི་ལས་སྣང་དུ་གྱུར་པ་འཇིགས་སུ་རུང་བའི་གཟུགས་ཅན་ལག་ན་ནི་མཚོན་ཆ་སྣ་ཚོགས་སུ་གྱུར་པའི་ལག་ཆ་ཐོགས་པར་མཐོང་ཞིང་། ངུ་སྐད་ཐམས་ཅད་ཀྱང་སོད་རྒྱོབ་ལ་སོགས་པའི་ངན་འགྲོའི་སྒྲར་ཐོས་ཏེ་བྲོས་པར་འདོད་ཀྱང་འབྲོས་ས་དང་མགོན་སྐྱབས་བཙལ་ཡང་རྙེད་གནས་མེད་པས་ལུས་ལ་རྡུལ་འབྱུང་བ་དང་བ་སྤུ་ཐམས་ཅད་ཟིང་སྟེ་ཞུམ་པ་དང་སྐྲག་སྔངས་སུ་གྱུར་ཏེ་ཡན་ལག་རྣམས་གཡོབ་ཅིང་རྡེབ་པ་དང་ནམ་མཁའ་ལ་ཡང་བརྙེབ་པའམ་སྙེགས་པར་བྱེད་དེ་ཅི་བྱ་གཏོལ་མེད་དུ་གྱུར་ནས་འཇིགས་སྐྲག་ཆེ་བའི་རྟགས་སུ་ལུས་ལས་བཤང་གཅི་འབྱུང་ཞིང་མདངས་ནག་པོར་གྱུར་བས་བྲེད་ཤ་ཐོན་པའི་མིག་ཀྱང་བགྲད་དེ་མིག་རྩ་ཞན་ཅིང་གྱེན་དུ་ལྡོག་པར་བྱེད་ལ་ཁ་ནས་དབུ་བ་འབྱུང་བ་སོགས་སྡུག་བསྔལ་དང་བཅས་པས་འཆི་བའི་དུས་བྱེད་པར་འགྱུར་ཏེ། བཅོམ་ལྡན་འདས་ཀྱིས་དེ་ལ་དགོངས་ནས། དེ་སྔོན་སྡིག་པ་མི་དགེ་བའི་ལས་བྱས་ཤིང་བསགས་པར་གྱུར་པ་གང་ཡིན་པ་དེ་དེའི་ཚེ་དེ་ལ་ཕྱི་མ་རེད་ཀྱི་དུས་ཀྱི་ཚེ་རི་རྣམས་སམ་རིའི་རྩེ་མོ་རྣམས་ཀྱི་གྲིབ་མ་བཞིན་དུ་འབབ་ཅིང་། ལྷག་པར་འབབ་ལ་མངོན་དུ་འབབ་པར་འགྱུར་རོ། །ཞེས་གསུངས་ཏེ། དེ་ལྟ་བུའི་ལྟས་བྱུང་བ་ནི་ད་ལྟ་མཐོ་རིས་ཀྱི་གནས་བཟང་པོ་སྣང་བའི་ཁམས་ནས་ངན་འགྲོ་ལོག་པར་ལྟུང་བ་མུན་པའི་ཁམས་སུ་མཐར་ཐུག་པ་ཡི་སྤྱོད་ཡུལ་ཅན་དུ་འབྱུང་བར་གྱུར་པ་ཡིན་ནོ། །དེ་ཡི་དུས་ན་ཡང་ཐམས་ཅད་ཞེ་སྡང་གི་ཡུལ་དུ་སྣང་ནས་གནོད་པའི་ལས་ཅན་གྱི་ལོག་པར་སྣང་བ་དེ་དག་ཀུན་ཤེས་པར་འབྱུང་བས་ཡིད་འཁྲུགས་པ་དེའི་མཐུས་མུན་པའི་གནས་ངན་དུ་ལྟུང་བ་དང་མཐུན་པར་རྣམ་པར་ཤེས་པས་རོ་སྟོད་ནས་ལུས་འདོར་བར་བྱེད་དེ། ལུས་ཀྱི་དྲོད་གང་ཡིན་པ་དེ་ཡང་སྤྱི་བོ་ནས་ཡལ་ཏེ་རིམ་པར་མཐར་རྐང་མཐིལ་དུ་འབྱུང་སྟེ་དེ་ནི་ངན་འགྲོ་མི་བདེ་བའི་གནས་སུ་ལྟུང་བའི་རྟགས་སུ་བསྟན་པའོ། །གསུམ་པ་ལ་གཉིས་ཏེ། ངོ་བོ་བསྟན་པ། དབྱེ་བ་བཤད་པའོ། །དང་པོ་ནི། བཏང་སྙོམས་དེ་ཡིས། ཞེས་པ་ནས། མི་གསལ་བཏང་སྙོམས་སོ། །ཞེས་པའི་བར་གྱིས་བསྟན་ཏེ། ལས་ལུང་དུ་མ་བསྟན་པ་བྱེད་པའི་ལྟས་གང་ཞེ་ན། བཏང་སྙོམས་ཀྱི་འདུ་ཤེས་ཅན་ལུང་དུ་མ་བསྟན་པའི་སེམས་དང་ལྡན་པ་གང་གི་སྔར་དགེ་སྡིག་གང་ཡང་མ་སྤྱད་པར་ལུང་དུ་མ་བསྟན་པའི་ལས་ཙམ་བྱས་པ་དེ་ཡིས། འཆི་ཀའི་དུས་དེར་རང་གིས་དྲན་པའི་རྒྱུ་བར་དགེ་སྡིག་གང་རུང་གཅིག་ཀྱང་མ་གསལ་ལམ། དེ་ལ་མི་གཞན་གྱིས་ཀྱང་གསལ་གདབ་པར་མ་བྱས་པ་དེ་ནི་དགེ་སྡིག་གང་ཡང་རུང་བར་གསལ་བར་མི་འགྱུར་བའོ། །དེ་ལྟར་དགེ་སྡིག་གཉིས་སུ་ཡང་འདུ་ཤེས་མི་གསལ་བ་གང་ནི་རྟེན་གཉིས་ཀ་མ་ཡིན་པའི་ལས་ལ་བརྟེན་པའི་སེམས་བཏང་སྙོམས་སུ་གྱུར་པའི་ངང་ནས་འཆི་འཕོ་བྱེད་པ་དེར་ངེས་པར་འགྱུར་བས་སོ། །འོན་ཀྱང་ཕལ་ཆེ་བའི་དབང་དུ་བསྟན་པ་སྟེ། འདི་ལྟ་བུ་ལ་འཆི་ཀའི་གདམས་ངག་བཏབ་ན་ཤིན་ཏུ་ཕན་པར་འགྱུར་རོ། །གཉིས་པ་ནི། འོག་ནས། བཏང་སྙོམས་ཁ་ཅིག །ཅེས་པ་ནས། མི་འགྱུར་རྫོགས་མི་འགྱུར། །ཞེས་པའི་བར་གྱིས་བསྟན་ཏེ། བཏང་སྙོམས་ཀྱི་ལས་སྤྱོད་པ་ཁ་ཅིག་དག་ནི་བློ་རྐྱེན་དང་འཕྲད་པའི་ཁྱད་པར་ལྟར་དགེ་སྡིག་གང་ཡང་རུང་བར་གྱུར་ཏེ་རྣམ་སྨིན་གྱི་འབྲས་བུ་འབྱུང་བར་འགྱུར་བ་ཡིན་ལ། བཏང་སྙོམས་ཤིན་ཏུ་བརྟན་པ་ཁ་ཅིག་ལ་ནི་བཏང་སྙོམས་ཀྱི་ལས་ཁོ་ནས་རྣམ་སྨིན་དྲག་པོར་མི་འགྱུར་བས་རྣམ་པར་སྨིན་པ་རྫོགས་པར་མི་འབྱུང་སྟེ། ཅིའི་ཕྱིར་ཞེ་ན། རྐྱེན་གྱིས་འགྱུར་བར་མ་ངེས་པའི་ཕྱིར་ཏེ། ལས་དེ་ཉིད་ཀྱིས་དུས་དེར་འབྲས་བུ་དངོས་སུ་སྨིན་པར་མི་ནུས་པས་ཕྱི་མ་ལ་རྒྱུ་མཐུན་པའི་སྤྱོད་པ་ཙམ་མོ། །དེས་ན་སའི་དངོས་གཞི་ལས་ཀྱང་། དེ་ལ་ཁ་ཅིག་ནི་འགྱུར་རོ། །ཁ་ཅིག་ནི་མི་འགྱུར་ཏེ། ཀུན་རྫོགས་པར་མི་འབྱུང་ངོ་། །ཞེས་སོ། །གསུམ་པ་ནི། གོང་གི། འདི་དང་གང་ལྡན། ཞེས་པ་ནས། མི་འགྱུར་གཞན་མི་འཇུག །ཅེས་པའི་བར་གྱིས་བསྟན་ཏེ། འོ་ན་དེ་ལྟར་འདུ་ཤེས་ཀྱི་ཁྱད་པར་དང་ལྟས་གསུམ་དུ་འབྱུང་བ་དེ་ཉིད་ཅིའི་ཕྱིར་ཞེ་ན། གོང་དུ་བཤད་པའི་ལས་གསུམ་པོ་འདི་དག་ཀྱང་སྔར་གང་དང་གང་ལ་གོམས་ཏེ་སྤྱད་པ་ལྟར་འཆི་ཀར་གང་ལ་དྲན་པ་དང་ལྡན་པ་དེ་ནི་ཤི་ནས་གནས་རིས་བཟང་ངན་གང་དུ་འགྲོ་བ་ཡང་། སྔོན་གྱི་ལས་ཀྱི་ཁྱད་པར་གང་ལྟར་གོམས་ཤིང་མཐུ་སྟོབས་ཅན་གྱི་བག་ཆགས་ཡོད་པ་དེ་ཡི་ཤུགས་ཁོ་ནར་ངེས་པར་འགྱུར་བའི་རྒྱུ་མཚན་གྱི་དབང་གིས་ཡིན་ཏེ། ཅིའི་ཕྱིར་ན། སྔར་དགེ་སྡིག་གི་ལས་གང་ལ་གོམས་པ་དེ་ལ་སེམས་གཞོལ་ཞིང་དེ་ཉིད་སྟོབས་དང་ལྡན་པ་ཡིན་པའི་ཕྱིར་གང་དེའི་དབང་དུ་འགྱུར་བར་ངེས་པའོ། །དེས་ན་གང་སྔར་མ་གོམས་པ་དེ་ནི་གཞན་གྱིས་གསལ་གདབ་པར་བྱས་ཀྱང་དེའི་བག་ཆགས་སྔར་མ་ཞེན་ཏེ་སྟོབས་མེད་པའི་དབང་གིས་འདྲིས་གོམས་ཀྱི་བག་ཆགས་ཡོད་པ་ལྟར་དུ་མི་གསལ་བས་དྲན་པ་སླར་འགག་པར་འགྱུར་ཏེ། སྔ་མ་ལས། གལ་ཏེ་གང་ཟག་དགེ་བ་དང་མི་དགེ་བ་བྱེད་བྱེད་པ་འཆི་བ་ནི་སྔོན་གོམས་པའི་དགེ་བ་དང་མི་རྣམས་བདག་ཉིད་ཀྱིས་དྲན་ནམ། གཞན་དག་གིས་དྲན་པར་བྱས་ཀྱང་རུང་སྟེ་དེའི་ཚེ་དེས་གང་ལན་མང་དུ་གོམས་པར་བྱས་པ་དེ་ཆེས་སྟོབས་དང་ལྡན་པར་འགྱུར་ཏེ། དེས་སེམས་དེ་གཞོལ་བར་འགྱུར་ལ་གཞན་ནི་བརྗེད་པར་འགྱུར་རོ། །ཞེས་སོ། །གལ་ཏེ་གང་ཟག་གང་སུ་ཞིག་དགེ་སྡིག་དེ་དག་གཉིས་ཀ་ལ་མཚུངས་པར་སྤྱོད་སྤྱོད་དེ་སྔར་གྲངས་མཉམ་པ་ཙམ་དུ་གོམས་པ་ཞིག་ཡིན་ན། འཆི་བའི་དུས་དེར་ནི་ཐོག་མ་དང་པོར་གང་དགེ་བའི་ལས་བྱས་པ་ལྟར་རང་གི་སེམས་གསལ་ལམ། མི་གཞན་གྱིས་དགེ་བ་གསལ་གདབ་པར་བྱས་པ་ལས་སྡིག་པའི་དབང་དུ་མི་འགྲོ་བས་སླར་ལྡོག་པར་མི་འགྱུར་ཏེ་གཞན་སྡིག་སེམས་ལྟ་བུར་མི་འཇུག་པས་ངན་འགྲོའི་གནས་སུ་མི་ལྟུང་སྟེ། དེ་ཉིད་ལས། ཡང་གལ་ཏེ་གཉི་ག་ལ་མཚུངས་པར་གོམས་ན་ནི་དེ་ལས་གང་དང་གང་ཐོག་མ་ཁོ་ནར་དྲན་ནམ། དྲན་པར་བྱེད་དུ་བཅུག །དེ་ལས་ལྡོག་པར་མི་འགྱུར་ཏེ། གཞན་དུ་མི་འཇུག་གོ། །ཞེས་སོ། །བཞི་པ་ལ་གསུམ་སྟེ། སྔར་གང་གོམས་པ་ཉིད་གསལ་བར་འགྱུར་ཚུལ། འདི་ལ་ཞེ་སྡང་སྐྱེ་ཞིང་ཕྱི་མ་ལ་ཆགས་པ་འབྱུང་བ། འདའ་ཀ་མའི་གདམས་ངག་གཅེས་པར་གདམས་པའོ། །དང་པོ་ནི། ཐམས་ཅད་ཀྱང་། ཞེས་པ་ནས། གང་ཆགས་དེ་འབྱུང་ངོ་། །ཞེས་པའི་བར་གྱིས་བསྟན་ཏེ། དེ་ལྟར་སྲོག་ཆགས་པའི་སེམས་ཅན་འདུ་ཤེས་དེ་དག་དང་ལྡན་པ་ཐམས་ཅད་ཀུན་དང་ཁྱད་པར་དུ་ཡང་འདོད་པའི་མི་རིལ་ཐམས་ཅད་གང་ཡིན་ཀྱང་རུང་སྟེ་དེ་དག་རྣམས་ནི་གང་ནས་འཆི་ཞིང་འཕོ་བའི་ཚེ་ན་དུས་གང་འདིར་སྔར་དྲན་པ་གསལ་བ་ལས་ཕྱིས་འདུ་ཤེས་ཀྱི་རྒྱུ་བ་མི་གསལ་བར་གྱུར་པའི་སྐབས་སུ་མ་བབ་ཀྱི་བར་དག་གམ་དེ་ལ་ཐུག་པའི་བར་དུ། སྔོན་ཡུན་རིང་པོའི་དུས་ནས་བདག་ལ་ཆགས་པ་གོམས་པ་ཡི་དབང་གིས་དགེ་སྡིག་གི་ལས་གྲངས་མེད་པ་གང་དང་གང་སྤྱད་དེ་མཐུ་བརྟས་པ་དེ་དང་དེ་ལ་དྲན་པ་གང་ཡིན་པ་གསལ་བར་འགྱུར་ཞིང་ཞེན་པའི་བག་ཆགས་དེ་ཡི་རྒྱུ་བ་འཕྲོ་བ་ནི་འཆི་ཀའི་བསམ་པ་ཀུན་ལ་འབྱུང་ངོ་། །དེས་ན་འཆི་ཀར་ནད་པའི་སྣོད་བརྟགས་ལ་དགེ་བའི་གསོས་གདབ་པ་ནི་ཤིན་ཏུ་གཅེས་སོ། །དེ་ཡང་སྔ་མ་ལས། དེ་ཐམས་ཅད་ཀྱང་འཆི་བའི་ཚེ་ན་འདུ་ཤེས་མི་གསལ་བའི་སྐབས་སུ་མ་བབ་པའི་བར་དུ་ཡུན་རིང་པོ་ནས་གོམས་པས་བདག་ལ་ཆགས་པ་ཀུན་ཏུ་འབྱུང་ངོ་། །ཞེས་སོ། །གཉིས་པ་ནི། དེ་ལས་དེ་ཡི། ཞེས་པ་ནས། སྒྲུབ་པའི་རྟེན་ཡིན་ནོ། །ཞེས་པའི་བར་གྱིས་བསྟན་ཏེ། དེ་ནས་སྲིད་པ་བར་མ་སྣང་བའི་རྒྱུ་བསྟན་པའི་ཕྱིར། འཆི་བའི་སེམས་ཅན་དེ་ཡང་སྔ་མའི་ལས་དེ་ཡི་རྣམ་སྨིན་གྱི་འབྲས་བུ་དེ་ཉིད་ཀྱི་སྟོབས་སམ་མཐུའི་དབང་གིས་གནད་ཀྱི་སྡུག་བསྔལ་མྱོང་བ་ན། ད་ནི་ཚེ་འདིར་འདུག་པའི་ལས་དབང་དེ་མེད་པར་ངེས་པར་འཆི་བར་འགྱུར་རོ་སྙམ་དུ་འཆི་བའི་ཆ་ཡོད་པའི་དུས་ལ་བབ་པར་ངོ་ཤེས་ནས། གང་ཟག་དེ་ཡང་ད་ལྟའི་ལུས་འདི་ཉིད་ལ་མྱུར་དུ་ཤི་ན་རུང་སྙམས་ཏེ་ཞེ་སྡང་སྐྱེ་ཞིང་། ཅི་ནས་ཀྱང་ལུས་གཅིག་ཐོབ་ན་ཅི་མ་རུང་སྙམ་པས་གང་མ་འོངས་པ་ཕྱི་མའི་ལུས་བཟང་པོ་ཐོབ་པ་ལ་དགའ་བ་དང་ཆགས་པའི་སེམས་ཀྱི་འཇུག་པ་འབྱུང་བར་འགྱུར་རོ། །དེ་ལྟར་ད་ལྟར་གྱི་ལུས་འདི་ཉིད་བོར་བར་འདོད་པའི་ཞེ་སྡང་གི་བསམ་པ་མེ་ལྟ་བུ་དེ་ཡིས་ཟིལ་གྱིས་མནན་ཏེ་སྒོ་གསུམ་ལྡང་མི་ནུས་པར་བྱས་པས། ད་ལྟར་སྒོ་གསུམ་དུ་གནས་པ་འདི་ཡི་སྲོག་གི་དབང་པོའི་རྒྱུན་འགགས་ཏེ། གང་མ་བྱུང་བའམ་མ་འོངས་པའི་ཕུང་པོ་ལ་མངོན་པར་ཆགས་པ་སྐྱེ་བའོ། །དེ་ལྟར་འཆི་ཀའི་ཆགས་སྡང་དྲག་པོ་དེ་ནི་འདི་དང་ཕྱི་མ་བར་དོའི་སྲིད་པ་གསུམ་གྱི་བར་མའི་སྲིད་པ་ཞེས་བྱ་བ་དེའི་ཚེ་ཞག་བདུན་ཕྲག་ཅན་དུ་གྱུར་པ་གང་དེ་ཉིད་མངོན་པར་སྒྲུབ་ཅིང་རིགས་དྲུག་གང་རུང་དུ་སྣང་བར་བྱེད་པའི་རྒྱུའམ་རྟེན་དུ་གྱུར་པ་ཡིན་ནོ། །དེ་ལྟར་འཆི་བའི་སེམས་ལས་བར་མ་དོའི་སྲིད་པ་སྣང་བའི་རྒྱུ་བསྟན་པ་སྟེ། སྔ་མ་ལས། དེའི་འོག་ཏུ་དེའི་དབང་གིས་བདག་ནི་མེད་པར་འགྱུར་རོ་སྙམས་ནས་ཕྱི་མའི་ལུས་ལ་མངོན་པར་དགའ་བར་འགྱུར་ཏེ། དེ་ནི་དེའི་བར་མ་དོའི་སྲིད་པ་མངོན་པར་འགྲུབ་པའི་རྟེན་ཡིན་ནོ། །ཞེས་སོ། །གསུམ་པ་ནི། དེ་ཡི་དུས་ན། ཞེས་པ་ནས། དེ་འབྱུང་མི་འགྱུར་རོ། །ཞེས་པའི་བར་གྱིས་བསྟན་ཏེ། དེ་ལྟར་ནམ་འཆི་བ་དེ་ཡི་དུས་ན་རྣལ་འབྱོར་པ་རྣམས་ཀྱིས་འཆི་ཁའི་ཏིང་ངེ་འཛིན་བསྒོམ་པས་ལས་ཀྱི་རྒྱུན་གཅོད་པའི་དགོས་ཆེད་ཡོད་པ་ཡིན་པས་ནུས་པ་ཡོད་ན། འདུ་ལོངས་བསལ་བ་དང་། ཚོགས་བསགས་པ་དང་། རྟེན་བཀྲམ་པ་དང་། མཆོད་པ་བཤམས་པ་དང་། བཤེས་གཉེན་བསྟེན་པ་དང་། དགེ་བས་དུས་འདའ་བ་དང་བཅས་ཏེ་འདའ་ཀའི་ཏིང་ངེ་འཛིན་བསྒོམ་པ་ལ་བརྩོན་པར་བྱའོ། །དེ་ནི་འཆི་ཀ་ཁོ་ནར་མ་ཟད་སྔ་ནས་གོམས་པར་བྱས་པ་གཅེས་པས་དུས་ཀུན་ཏུ་དགེ་སྦྱོར་གང་བྱེད་ལ་ནན་ཏན་བགྱིད་པ་དེ་བཞིན་དུ་འདའ་ཀའི་གདམས་ངག་དེ་ལ་འདྲིས་ཤིང་གོམས་པར་བྱ་བ་ལ་ཆེད་དུ་འབད་པར་བྱེད་པ་ནི་ཤིན་ཏུ་གལ་ཆེ་སྟེ། དེའི་བསྒོམ་པའི་ཐབས་བླ་མའི་ཞལ་ལས་ཤེས་པར་བྱའོ། །གལ་ཏེ་འདའ་ཀ་མའི་ཏིང་ངེ་འཛིན་མེད་ཀྱང་སྔོན་ཆད་ཏིང་ངེ་འཛིན་གང་ལ་གོམས་པ་ཉིད་དྲན་པས་ཀྱང་ལས་རྒྱུན་གཅོད་པ་ཡིན་པས་འཆི་བའི་ཚེ་ངེས་པར་དྲན་པར་བྱའོ། །འོ་ན་དེ་ལྟ་བུའི་རྣལ་འབྱོར་པ་ལ་སྲིད་པ་ཕྱི་མའི་ཆགས་པ་འབྱུང་ངམ་ཞེ་ན། ཏིང་ངེ་འཛིན་གྱི་ཡོན་ཏན་འཆད་དེ། འཆི་བའི་དུས་ལ་བབ་པ་དེ་ཡི་ཚེ་ན་རྣལ་འབྱོར་པ་ལའང་མ་འོངས་པའི་ཕུང་པོ་ལ་སྲེད་པའམ་ཆགས་པ་ནི་འབྱུང་མོད་ཀྱི། འོན་ཀྱང་འཆི་ཀའི་ཏིང་ངེ་འཛིན་གྱི་མན་ངག་ལ་གོམས་པར་གྱུར་པའི་དོན་དེ་ཡི་ནུས་པའི་མཐུ་དང་སྟོབས་ཀྱིས། ཕྱི་མའི་ལུས་ལ་ཆགས་པའི་ཉོན་མོངས་པ་དེ་ཉིད་ཟིལ་གྱིས་གནོན་ཏེ་ལྡང་དུ་མི་སྟེར་བ་ནི་དཔེར་ན་མི་གང་དག་རྩལ་ཤུགས་ཆེན་པོ་དང་ལྡན་པ་ཅན་དེ་ཡིས། རྩལ་ཤུགས་མེད་པ་གང་དག་ལྡང་མི་ནུས་པར་གནོན་པར་བྱེད་པ་ཇི་ལྟ་བ་བཞིན་ནོ། །འདིར་སྔ་མ་ལས། དེ་ལ་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་ལ་ཡང་དེའི་ཚེ་བདག་ལ་ཆགས་པ་ཀུན་ཏུ་འབྱུང་མོད་ཀྱི། རྒྱུན་དུ་ཞུགས་པའམ་ལན་ཅིག་ཕྱིར་འོང་བ་དེས་ནི་བདག་ལ་ཆགས་པ་དེ་ཤེས་རབ་ཀྱིས་བརྟགས་ཤིང་མངོན་པར་སྤོང་བར་བྱེད་ཀྱི་དང་དུ་ལེན་པར་མི་བྱེད་དེ། དཔེར་ན་མི་ཆེས་སྟོབས་དང་ལྡན་པ་ནི། མི་ཆེས་སྟོབས་ཆུང་བ་དང་སྟོབས་འགྱེད་ན་སྟོབས་ཆུང་ངུ་རྡུང་བར་བྱེད་པ་དེ་བཞིན་དུ། འདི་ལ་ཡང་ཚུལ་དེ་དང་འདྲ་བར་བལྟ་བར་བྱའོ། །ཕྱིར་མི་འོང་བ་རྣམས་ནི་དེའི་ཚེ་བདག་ལ་ཆགས་པ་དེ་ཀུན་ཏུ་འབྱུང་བར་མི་འགྱུར་རོ། །ཞེས་གསུངས་ཤིང་། བྱང་ཆུབ་སེམས་དཔའ་འཕགས་པ་དང་སྔགས་ཀྱི་རིག་པ་འཛིན་པ་དང་། ཆོས་ཉིད་རྣལ་མའི་དོན་ལ་བློ་འབྱོར་བས་རྣལ་འབྱོར་པ་བཟང་པོ་རྣམས་ལ། གང་ཕྱི་མའི་ལུས་ལ་ཆགས་པའི་འདུ་ཤེས་དེ་ཉིད་སྐྱེ་ཞིང་འབྱུང་བར་མི་འགྱུར་ཏེ་མ་ཆགས་པ་དེ་ལ་སྡུག་བསྔལ་ཡང་མི་འབྱུང་བར་ས་དེ་ཉིད་ལ་སྦྱོར་བར་བྱེད་པའི་ཕྱིར་རོ། །དེས་ན་ནམ་འདའ་བའི་ཚེ་ཆགས་སྡང་གི་སེམས་ཡིད་ལ་མི་བྱའོ། །ལྔ་པ་ནི། གནད་ཀྱི་སྡུག་བསྔལ། ཞེས་པ་ནས། དེ་ལ་དེར་ཞེན་གཅེས། །ཅེས་པའི་བར་གྱིས་བསྟན་ཏེ། འོ་ན་དེའི་རྒྱུ་གནད་ཀྱི་སྡུག་བསྔལ་མི་བཟོད་པ་དེ་འགྲོ་བ་གང་དང་གང་ལ་ཡོད་ཅེ་ན། དེ་ལྟ་བུའི་འཆི་ཀའི་གནད་ཀྱི་སྡུག་བསྔལ་མི་བཟོད་པ་དེ་ནི། འགྲོ་བ་གང་ལ་ཡོད་ན་མཐོན་པོ་ལྷ་དང་དམན་པ་དམྱལ་བ་གཉིས་མ་གཏོགས་པ་གཞན་འགྲོ་བ་རིགས་བཞི་པོ་དག་ཀུན་ལ་འབྱུང་བ་ཡིན་ནོ། །དེའི་ཅིའི་ཕྱིར་ཞེ་ན། དམྱལ་བ་ནི་ཤིན་ཏུ་སྡུག་བསྔལ་གྱིས་ཉེན་ཏེ་གནད་ཀྱི་ངོ་བོར་འདུག་པས་དེ་ལས་ཕར་མནར་དུ་མེད་པའི་ཕྱིར་དང་ལྷ་ནི་བསོད་ནམས་ཀྱི་དགའ་བ་དང་ལྡན་ཏེ་བདེ་བ་ཚད་དུ་ཕྱིན་པས་དེ་ལས་འདའ་བ་མེད་པའི་ཕྱིར་རོ། །དེ་ཡང་འཆི་ཀའི་དུས་སུ་སྡུག་བསྔལ་ཆེ་ཆུང་གི་དབང་གིས་འགག་པའི་ཚུལ་ཡང་གཉིས་ཁོ་ན་ཡིན་པར་བསྟན་ཏེ་ངེས་པར་གཟུང་བ་ནི། གང་སྡུག་བསྔལ་ཆེན་པོར་གྱུར་པས་ནི་སྲོག་གི་དབང་པོ་འགག་པ་ཡང་ཅིག་ཆར་དུ་འགག་པར་འགྱུར་བ་དང་། སྡུག་བསྔལ་ཆུང་བར་གྱུར་པས་ནི་དབང་པོ་རིམས་ཀྱིས་འགག་པར་འགྱུར་བ་གཉིས་སུ་ངེས་པའོ། །དུས་དེར་ཡང་དམ་པ་གང་ཞིག་སྙིང་པོ་དེ་ཁོ་ན་ཉིད་ཀྱི་ཏིང་ངེ་འཛིན་ལ་གོམས་པས་བརྟན་ཏེ་བསྒོམ་བྱའི་ངོ་བོ་གང་ཡིན་པའི་ངེས་དོན་ནོར་འཁྲུལ་མེད་པ་ཉིད་མ་འགག་པར་གསལ་བ་དེ་ནི་མཆོག་ཏུ་གཙོ་བ་ཡིན་པས་ཆོས་ཉིད་རྟོགས་པ་དེ་ལ་དེར་ཞེན་ཏེ་ཡང་དག་པར་གོམས་པར་བྱེད་པ་ནི་ཤིན་ཏུ་གཅེས་པ་ཉིད་དེ། སློབ་དཔོན་ཆེན་པོ་འཇམ་དཔལ་བཤེས་གཉེན་གྱིས། དེ་ཉིད་ངང་གནས་འདྲེས་ཆེན་ལ། །གནས་ལམ་ཕྱོགས་མེད་ཡེ་ཁྱབ་གདལ། །བསྐུལ་ཞིང་གོམས་པ་ལས་རུང་ལ། །དེ་ཡི་ངང་འདའོ་བར་དོའི་ཚེ། །འདོང་ཁྲིད་རིག་པ་དེར་ཤེས་ནས། །ངང་དུ་གནས་པ་དེ་གྲོལ་བ། །གནད་ཀྱིས་རང་གྲོལ་ཉེ་དུས་ཡིན། །ཞེས་དང་། བདུད་རྩི་ཆུ་རྒྱུན་ལས། ཉིད་ཀྱིས་ཟིན་ན་མཉམ་པར་བཞག །ཐུན་གཅིག་དགོངས་པས་གྲོལ་བའང་ཡིན། །སྦྱངས་པའི་སྔར་ལས་ཤིན་ཏུ་གཅེས། །ཞེས་གསུངས་ཏེ་གང་ཟག་ཁྱད་པར་ཅན་གྱི་དབང་དུའོ། །སྤྱིར་ནི་དགེ་སྡིག་གང་ལ་ཡང་མ་གོམས་པ་ནི་བཤད་པ་ལྟར་གསལ་དུ་མི་བཏུབ་ལ། གོམས་པ་ནི་གསལ་བར་འགྱུར་བ་ཡིན་པས་དགེ་བ་ཉིད་ཁོ་ན་ལ་གོམས་ཤིང་བརྩོན་པར་བྱའོ། །དེ་ལྟར་བསྟན་པའི་གྲངས་དེ་དག་ཀྱང་ཡིད་ཀྱི་ལས་ཡིན་ནོ། །དེ་ལ་སོགས་པ་དོན་མང་པོ་རྣམས་ལ་དགོངས་ཏེ་བཅོམ་ལྡན་འདས་ཀྱིས། དྲུག་པ་བདག་པོ་རྒྱལ་པོ་ནི། །ཆགས་པར་གྱུར་ན་ཆགས་ཅན་ཡིན། །ཆགས་པ་མེད་ན་ཆགས་མེད་འགྱུར། །ཆགས་ན་བྱིས་པ་ཞེས་བྱའོ། །ཞེས་དང་། རིང་དུ་འགྲོ་ཞིང་གཅིག་པུར་རྒྱུ། །ལུས་ཡོངས་མ་ཡིན་ཕུག་གནས་པ། །འདུལ་དཀའི་སེམས་ནི་འདུལ་བ་དེ། །བྲམ་ཟེ་ཡིན་ཞེས་ང་སྨྲའོ། །ཞེས་བཀའ་སྩལ་བར་མཛད་དོ། །གསུམ་པ་བར་དོའི་ཆོས་བཤད་པ་ལ་བརྒྱད་དེ། བར་དོའི་སྲིད་པའི་ཆ་ལུགས་བསྟན་པ། བར་མར་གནས་པ་དེའི་ལུས་དང་སྤྱོད་ཡུལ་གྱི་སྣང་ཚུལ་བཤད་པ། དེའི་ཚེ་ཚད་དང་སྐྱེ་བ་ཕྱི་མ་ཅི་ཙམ་ན་ལེན་པར་བསྟན་པ། བར་མ་དོའི་ངེས་ཚིག་བཤད་པ། དེའི་མིང་གི་རྣམ་གྲངས་བསྟན་པ། ཁམས་གསུམ་ལ་བར་མ་དོ་ཡོད་མེད་ཀྱི་བྱེ་བྲག་བཤད་པ། སྔར་གྱི་ལས་གང་གོམས་ལ་དགའ་བར་བསྟན་པ། སྐྱེ་བ་ཇི་ལྟར་ལེན་པའི་ཚུལ་བཤད་པའོ། །དང་པོ་ནི། གསུམ་པ་སྲིད་གསུམ། ཞེས་པ་ནས། འཛིན་ཅིང་ཐོགས་པ་མེད། །ཅེས་པའི་བར་གྱིས་བསྟན་ཏེ། ལྔ་ཕྲག་གསུམ་པའི་གསུམ་པ་སྲིད་པ་གསུམ་གྱི་བར་མར་གནས་པ་དེའི་མཚན་ཉིད་བཤད་ན། ཚེའི་ཚད་ནི་ཞག་བདུན་པར་གྱུར་པ་སྟེ། དེ་ཡང་སྐྱེ་བ་བཞི་ལས་བརྫུས་ཏེ་སྐྱེས་ཤིང་དབང་པོ་ཀུན་ཚང་བར་ལྡན་ལ་སྔ་མའི་ལས་ཀྱི་འཕེན་པའི་སྟོབས་ཀྱིས་འགྲོ་བར་བྱེད་པའོ། །དེ་དག་ནི་གང་རིགས་མཐུན་པ་དང་ལྷ་མིག་དག་པས་མཐོང་བ་ཡིན་གྱི་གང་མ་དག་པ་དང་རིགས་མི་མཐུན་གཞན་དག་གིས་མཐོང་བ་མིན་ནོ། །བར་མ་དོའི་ལུས་ཀྱི་ཆ་ལུགས་ནི། གནས་ཤིན་ཏུ་བདེ་ཞིང་མཐོ་བ་ལྷ་དང་བདེ་བ་འབྲིང་དང་ལྡན་པ་མི་དང་སྡུག་བསྔལ་ཤིན་ཏུ་ཆེ་བས་དམན་པ་དམྱལ་བ་དང་། དེ་གསུམ་ལ་སོགས་པའི་འགྲོ་བ་རིགས་དྲུག་པོ་རྣམས་ཀྱི་གང་དུ་སྐྱེ་བར་འགྱུར་བ་དེའི་ཤ་ཚུགས་ལྟར་རང་གིས་མཐོང་བས་ཕྱི་མའི་ལུས་དེ་ཡི་དབྱིབས་འཛིན་ཅིང་ཆ་ལུགས་དེར་སྣང་སྟེ། སྤྱོད་པ་དང་ལས་ནི་བྲག་དང་རི་ལའང་ཐོགས་པ་མེད་པར་འགྲོ་བ་ཉིད་དེ། སློབ་དཔོན་ལྷའི་རྒྱལ་པོས་བྱང་སེམས་བདུད་རྩི་ཆུ་རྒྱུན་ལས། དེ་ཚེ་དྲི་ཟ་བར་བདུན་པ། །རྫུ འཕྲུལ་འོད་ལྡན་ཐོགས་རྡུག་མེད། །མངོན་ཤེས་ལྡན་ཞིང་རྫུས་ཏེ་སྐྱེ། །གདོས་པའི་ལུས་བྲལ་ཕྱིས་འབྱུང་གསལ། །དེ་ཚེ་བདུན་ཚིགས་གྲོགས་ཀྱིས་སྟོངས། །ཞེས་དང་། གཞན་དག་ལས་ཀྱང་། སྔོན་བྱུང་སྲིད་པའི་ཤ་ཚུགས་ཅན། །ཞེས་སོགས་གསུངས་སོ། །གཉིས་པ་ནི། དེ་ཡི་ལུས་སམ། ཞེས་པ་ནས། གོང་མ་ཉིད་བཞིན་ནོ། །ཞེས་པའི་བར་གྱིས་བསྟན་ཏེ། དེ་ལྟར་སྔ་ཕྱིའི་སྲིད་པའི་བར་དུ་གནས་པའི་འགྲོ་བ་དེ་ཡི་ལུས་སམ་སྤྱོད་ཡུལ་གྱི་མཐོང་ལུགས་ནི། གང་དག་སྡིག་པ་སྤྱོད་སྤྱོད་ཅིང་དྲི་མ་ཅན་དུ་གྱུར་པ་རྣམས་ཀྱིས་ནི། དཔེར་ན་མཚན་མོ་མུན་ནག་གི་ནང་དུ་ཕྱིན་ན་རྫས་ཐམས་ཅད་མི་གསལ་བར་མུན་ནག་ཏུ་མཐོང་བ་ལྟར་དུ། ཡུལ་དང་གནས་ཀྱི་སྣོད་ཐམས་ཅད་དང་བཅུད་ཐམས་ཅད་རྨུགས་ཤིང་མི་གསལ་བར་མུན་པ་མུན་ནག་གི་སྨག་ཏུ་མཐོང་བར་འགྱུར་ཏེ། སའི་དངོས་གཞི་ལས། ཉེས་པའི་ལས་བྱེད་བྱེད་པ་རྣམས་ཀྱི་བར་མ་དོའི་སྲིད་པ་ནི། དཔེར་ན། ཕྱར་བ་ནག་པོའམ། མཚན་མོའི་མུན་པ་མུན་ནག་ཏུ་སྣང་བ་ལྟ་བུའོ། །ཞེས་སོ། །གང་དག་དྲི་མ་མེད་པར་དགེ་བ་ལ་སྤྱོད་སྤྱོད་དེ་ལས་དག་པ་རྣམས་ཀྱིས་བར་མ་ན་འདུག་པའི་ཚེ་ན་མཐོང་ཡུལ་གསལ་བ་ནི། དཔེར་ན་ཟླ་བའི་འོད་ཟེར་དཀར་པོ་གང་དུ་ཤར་བ་དང་རྫས་ཐམས་ཅད་ཀྱང་དཀར་པོ་གསལ་བར་མཐོང་བ་ལྟར་ཡུལ་གནས་ཀྱི་སྣོད་དང་བཅུད་ཐམས་ཅད་གསལ་ཞིང་སྣང་བར་འགྱུར་ཏེ། སྔ་མ་ལས། ལེགས་པའི་ལས་བྱེད་བྱེད་པ་རྣམས་ཀྱི་ནི་དཔེར་ན། སྣམ་བུ་དཀར་པོའམ། ཟླ་བའི་འོད་དང་བཅས་པའི་མཚན་མོར་སྣང་བ་ལྟ་བུའོ། །ཞེས་སོ། །འོ་ན་དེ་དག་ལ་ཡིད་ཆེས་པའི་ལོ་རྒྱུས་ཅི་ཡོད། སུའི་སྤྱོད་ཡུལ་དུ་གྱུར་པ་ཡིན་ཞེ་ན། སྣང་ཚུལ་དེའི་ཤེས་བྱེད་བསྟན་པ་ནི། དེ་ལྟར་དགེ་སྡིག་གི་བར་མ་དོ་དེ་གཉིས་ཀྱིས་མུན་སྣང་གི་མཐོང་ཚུལ་དང་བཅས་པ་དེ་ནི་རྨུགས་པ་དང་གཉིད་རྒོད་པ་དང་ཐེ་ཚོམ་ཡིད་མི་བདེ་བ་དང་ལུས་ཀྱི་གནས་ངན་ལེན། སེམས་ཡ་ཡ་བོ། བག་ཚ་བ། འདུ་ཤེས་སྣ་ཚོགས། སྨྲ་བ་མང་པོ། བསྒོམ་དྲག་པ་སྟེ་སྐྱོན་བཅུ་གཅིག་དང་བྲལ་བའི་ལྷའི་མིག་རྣམ་པར་དག་པས་མཐོང་ཞིང་ཤེས་པའོ། །དེས་ན་སྔ་མ་ལས། དེ་ནི་ལྷའི་མིག་ཤིན་ཏུ་རྣམ་པར་དག་པའི་ཀུན་སྤྱོད་ཡུལ་ཡིན་ནོ། །ཞེས་སོ། །དེ་བས་ན་རིགས་མཐུན་པས་ཀྱང་མཐོང་མོད་ཀྱི། འོན་ཀྱང་དགེ་བ་ཅན་གྱི་བར་མས་ནི་སྡིག་པ་ཅན་གྱི་བར་མ་དང་བདག་དང་མཐུན་པར་རང་གི་རིགས་སུ་གྱུར་པ་མན་ཆད་གཉིས་ཀ་མིག་དག་པས་མཐོང་ལ། སྡིག་པ་ཅན་གྱི་བར་མས་དགེ་བ་ཅན་གྱི་བར་མ་མི་མཐོང་སྟེ་རྒྱུ་འབྲས་བཟང་ངན་གྱི་ཁྱད་པར་ཡོད་པས་སོ། །དེའི་ལུས་ཆེ་ཆུང་གི་ཚད་ནི། གང་བར་མ་དོ་དེ་ཡི་ལུས་དེ་ཉིད་ཆེ་ཆུང་གི་ཚད་ནི་འདོད་པའི་ཁམས་ཀྱི་མཐོ་རིས་ཀྱི་གནས་ཐ་མ་ཡི་སྤྲུལ་པའི་སྐུ་དམ་པ་དོན་གྲུབ་འབྱུང་བའི་མིའི་གནས་ཀྱི་འཛམ་བུ་གླིང་པའི་བྱིས་པ་ལོ་ལྔ་ལོན་པའི་ཚད་དང་མཉམ་བར་ཡོད་དོ། །ཡང་ལ་ལས། བསྐལ་པ་དང་པོའི་མི་བཞིན་དུ་འོད་ཀྱི་ལུས་ཅན་ཆུང་བ་ཞིག་ཡོད་པར་འདོད་དེ། སྔོན་བྱུང་སྲིད་པ། ཞེས་པས་སོ། །དེ་ལ་ལ་ལས་སྔོན་བྱུང་སྲིད་པ་སྐྱེ་བ་སྔ་མ་ལ་བཞེད་ཀྱང་། འདིར་ནི་སྔོན་ན་ཡོད་པས་སྐྱེ་བ་ཕྱི་མར་བཞེད་དེ། གོང་དུ་འབྱུང་བ་དང་མཐུན་པར་སྔ་མ་ལས་ཀྱང་། དེ་ནི་གང་དུ་སྐྱེ་བར་འགྱུར་བ་དེའི་ཤ་ཚུགས་ལྟ་བུར་བར་མ་དོའི་སྲིད་པར་སྐྱེ་སྟེ། སྐྱེ་བའི་གནས་མ་བླངས་ཀྱི་བར་དུ་དེའི་མིག་ལྷའི་མིག་ལྟ་བུར་ཐོགས་པ་མེད་དོ། །ཞེས་གསུངས་ཏེ། སྲིད་པ་བར་མའི་འགྲོ་བ་དེས་གང་དུ་སྐྱེ་བར་འགྱུར་བའི་གནས་ཀྱི་ཕྱི་མའི་ལུས་དེ་ཉིད་མ་བླངས་པའི་བར་དུ་བར་མ་དོ་ན་འདུག་པའི་ཚེ། བར་དོ་དེ་ཡི་མིག་དེ་ཉིད་ལྷའི་སྤྱན་ནམ་ལྷ་ཡི་མིག་ལྟ་བུར་གྱུར་པས་འདོད་ཁམས་ཀྱི་སྣོད་བཅུད་ཐམས་ཅད་ཉེ་རིང་མེད་པར་གསལ་བར་མཐོང་བ་དང་། འབྱུང་བ་ཆེན་པོ་བཞི་གང་ལ་ཡང་ཐོགས་པ་མེད་པའི་རྫུ་འཕྲུལ་ཅན་ཡིན་པས་འདོད་པའི་ལྷ་དང་སྐལ་བ་མཉམ་པའོ། །དེ་ནི་ལྷ་མི་སྟོད་རིམ་གྱི་དབང་དུ་བྱས་པའམ། ཡང་ན་དགེ་བ་ཅན་དང་ཏིང་ངེ་འཛིན་ཅན་གྱི་བར་མ་ཡིན་གྱི། སྡིག་པ་ཅན་གྱི་བར་མས་ནི་གང་དེ་ལྟར་ཀུན་ལ་མཐོང་བ་གསལ་བ་མ་ཡིན་ཏེ། རྒྱུན་གྱི་སྤྱོད་ཡུལ་རྣམ་པར་གནག་པའི་ཕྱིར་རོ། །ལྷ་མིག་དག་པ་ཞེས་པ་ནི། སྒོམ་པ་ལས་བྱུང་བ་དང་ཟག་པ་མེད་པའི་ལྷའི་མིག་གམ་སྤྱན་ལྟ་བུ་ཡིན་ནོ། །དེས་ན་སྔ་མར་ཡང་། འགྲོ་བ་ཡང་སྐྱེ་བའི་གནས་མ་བླངས་ཀྱི་བར་དུ་རྫུ་འཕྲུལ་དང་ལྡན་པ་བཞིན་དུ་ཐོགས་པ་མེད་དོ། །དེའི་མིག་དེས་བར་མ་དོའི་སྲིད་པ་བའི་སེམས་ཅན་བདག་དང་སྐལ་པ་མཉམ་པ་རྣམས་དང་། དེ་དག་གི་སྐྱེ་བའི་གནས་དང་། བདག་གི་སྐྱེ་བའི་གནས་ཀྱང་མཐོང་ངོ་། །ཞེས་གསུངས་ཏེ། གང་སྡིག་པ་ཅན་གྱི་བར་དོ་དེས་རང་བྱོལ་སོང་དང་དམྱལ་བ་དང་ཡི་དྭགས་གང་དུ་སྐྱེ་བའི་སྐལ་པ་མཉམ་པའི་སྐྱེ་གནས་དང་དེ་དག་གི་དངོས་པོ་ཡང་ཤེས་པར་འགྱུར་ཏེ། ལས་མཐུན་པའི་དབང་གིས་སོ། །དེ་བཞིན་དུ་དགེ་བ་ཅན་དྲི་མ་མེད་པ་དེས་ཀྱང་ཉེ་རིང་མེད་པར་རང་ལྷ་མི་དང་ལྷ་མ་ཡིན་གང་དུ་སྐྱེ་བར་འགྱུར་བའི་སྐལ་པ་མཉམ་པ་དེ་དག་ཉིད་ཀྱི་གནས་རིས་དང་དངོས་པོ་ཀུན་ཀྱང་མཐོང་ཞིང་ཤེས་པར་འགྱུར་ཏེ། རང་དང་དགེ་བའི་ལས་སྣང་མཐུན་པས་སོ། །དེའང་ལུས་ཀྱི་འགྲོ་ཚུལ་ནི། འགྲོ་བ་གང་དག་སྡིག་པ་མི་དགེ་བའི་ལས་ལ་སྤྱོད་པའི་དྲི་མ་ཅན་རྣམས་ནི་མིག་གི་སྤྱོད་ཡུལ་ཐུར་དུ་གསལ་བས་ལུས་ཀྱང་སྤྱིའུ་ཚུགས་སུ་འགྲོ་བ་སྙམ་བྱེད་དེ་འོག་ཏུ་བལྟས་ནས་འགྲོ་ལ་དེས་ན་མཐོ་རིས་ཀྱི་གནས་གཞན་རྣམས་ནི་མཐོང་བ་མིན་ནོ། །གལ་ཏེ་སྡིག་པའི་དྲི་བ་མེད་པའི་དགེ་བ་ཅན་རྣམས་ཀྱིས་ལུས་གྱེན་དུ་འགྲེང་བས་མངོན་མཐོར་གྱུར་པ་མཐོ་རིས་ཀྱི་མཐོང་བའི་སྤྱོད་ཡུལ་མཐའ་དག་གསལ་ཏེ་རང་ལྷ་མི་གར་སྐྱེ་བའི་སྐལ་པ་མཉམ་པ་ཀུན་ཀྱང་མཐོང་ལུགས་སྔར་བཤད་པ་ལྟར་དང་གཞན་ངན་སོང་གི་གནས་དང་སྤྱོད་ཡུལ་ཡང་མཐོང་སྟེ་ལས་འཕྲོ་མེད་པས་བློ་མི་འཇུག་པའམ། ཡང་ན་བཤད་མ་ཐག་པ་དེ་བཞིན་དུ་ངན་སོང་མཐོང་བ་མིན་ནོ། །དེ་བས་ན་དེ་ཉིད་ལས། ཉེས་པའི་ལས་བྱེད་བྱེད་པ་རྣམས་ཀྱི་མིག་ནི་ཐུར་དུ་གསལ་ཏེ། སྤྱིའུ་ཚུགས་སུ་འགྲོའོ། །ལྷར་སྐྱེ་བ་རྣམས་ནི་གྱེན་དུའོ། །མིར་སྐྱེ་བ་རྣམས་ནི་ཐད་གར་རོ། །ཞེས་གསུངས་པས། མིའི་བར་མས་མཐོང་སྟངས་བྱེ་བྲག་ཏུ་བསྟན་པའམ། གོང་དུ་བསྟན་པ་དེ་ལྟར་ལས་དཀར་ནག་གང་ལ་རང་གི་གོམས་པར་བྱས་པ་དེའི་ལས་སྣང་གང་དེ་རང་ཉིད་ཀྱི་ཐད་དུ་ལས་ཀྱི་དབང་གིས་སྐྱེ་བ་གང་དང་གང་ལེན་པའི་སྤྱོད་ཡུལ་དེ་ཉིད་རང་ངོ་ལ་སྣང་བར་འགྱུར་བའམ། ཡང་ན་འདི་ཉིད་དགེ་བ་ཅན་གྱི་བར་དོ་ཡིན་པས་རང་ཐད་ཀྱི་སྣང་བ་དཀར་བས་མཐོང་བ་རྒྱ་ཆེ་སྟེ། གོང་དུ་ལྷ་མིག་ཅེས་པས་འགྲོ་དྲུག་གི་གནས་ཀྱང་མཐོང་སྟེ། དེའང་འདོད་ཁམས་ཡིན་ལ་དཔེར་ན་དགའ་ལྡན་དུ་སྐྱེ་ན་དེའི་བར་དོས་དེ་མན་ཆད་མཐོང་བ་ལྟ་བུ་སྟེ། དེས་གཞན་ཀུན་འགྲེའོ་ཞེས་དམ་པ་རིན་པོ་ཆེའི་ཕྱག་མཆན་ལས་འབྱུང་ངོ་། །དེས་ན་སྐལ་མཉམ་གྱི་སྐྱེ་གནས་དང་སྤྱོད་ཡུལ་མཐོང་ཞིང་དེ་ལ་འཇུག་པ་ལས་དེ་ལས་བཟློག་པའམ་གོམས་པ་མེད་པའི་ལས་སྣང་གི་འགྲོ་བ་གཞན་རྣམས་མི་སྣང་བའམ་དེ་ལ་མི་འཇུག་པ་ནི་གོང་དུ་བཤད་མ་ཐག་པ་ཉིད་བཞིན་ཏེ། སྡིག་པ་ཅན་ལ་དགེ་བའི་ལྟས་མི་སྣང་བ་དང་ལས་ཀྱིས་མ་སྒྲུབས་པས་འབྲས་བུ་གང་དང་གང་ཡང་མི་འབྱུང་བར་ཡིད་ཆེས་པའི་གནས་སུ་ངེས་པ་ཡིན་པར་སྣང་ཚུལ་གང་ཡང་བག་ཆགས་དང་བཅས་པ་ལས་གཞན་དུ་མ་དམིགས་པ་བཞིན་ཡིན་ནོ། །གསུམ་པ་ནི། བར་བདུན་པ་ཡི། ཞེས་པ་ནས། དེ་མེད་ག་ལ་སྲིད། །ཅེས་པའི་བར་གྱིས་བསྟན་ཏེ། དེའི་ཚེ་ཚད་དང་སྐྱེ་བ་ཕྱི་མ་ཇི་ཙམ་དུ་ལེན་པ་ཐུན་མོང་དུ་བསྟན་པའི་ཕྱིར། །དེ་ཡང་། རྒྱན་སྟུག་པོ་བཀོད་པ་ལས། དང་པོ་ཚེས་པའི་ཟླ་མདོག་ལྟར། །བྱེ་བའི་ཞིང་དུ་སྣང་བ་སྟེ། །རི་རབ་གནས་ཤིང་འཁོར་བ་ཡང་། །དངོས་པོ་འཇིག་པ་མ་ཡིན་ནོ། །དེ་བཞིན་ཡིད་སེམས་རྣམ་པར་ཤེས། །སེམས་ཅན་ཁམས་ན་འཁོར་མོད་ཀྱི། །དེ་ལ་འཕེལ་ཞིང་འབྲི་མེད་དེ། །རྟག་ཏུ་རང་བཞིན་འོད་སྣང་བའོ། །ཞེས་དང་། ལང་ཀར་གཤེགས་པ་ལས། །སེམས་ཀྱི་རང་བཞིན་འོད་གསལ་བ། །ཡིད་ལ་སོགས་པའི་ཉོན་མོངས་དང་། །བདག་དང་ལྷན་ཅིག་ལྡན་པར་ནི། །སྨྲ་བའི་མཆོག་གིས་རབ་ཏུ་བསྟན། །ཞེས་གསུངས་པ་ལྟར། བར་མ་དོའི་སྲིད་པ་ཚེ་ཚད་ཞག་བདུན་དུ་སྡོད་པ་ཡི། སེམས་ཅན་ཆོས་ཉིད་བདེ་བར་གཤེགས་པའི་སྙིང་པོ་ཅན་དེ་ཉིད། ཕྱི་མར་སྐྱེ་བའི་གནས་ཀྱི་རྒྱུ་རྐྱེེན་མཐུན་པ་དེ་མ་རྙེད་པའམ་དེ་དང་མ་ཕྲད་ཀྱི་བར་དུ་ཡུན་རིང་པོ་ཇི་ལྟར་ཐོགས་ན་ཡང་བར་མ་དོར་ཞག་བདུན་གྱི་བར་དུ་ཐོགས་པ་སྟེ་དེ་ནས་སྔ་མའི་ལས་དྲན་ཏེ་སྐད་ཅིག་གིས་ལུས་བརྗེ་བའམ་སྐྱེ་བ་ལེན་པའོ། །གང་སྐྱེ་བ་ཕྱི་མ་ལེན་པའི་རྒྱུ་རྐྱེན་དེ་དང་ལྡན་ན་ནི། ངེས་པ་མེད་དེ། ཞག་གཅིག་གམ་གཉིས་སམ་གསུམ་ནའང་འཕོ་བར་འགྱུར་ཏེ་སྐྱེ་བ་ལེན་པར་བར་མ་ལས་འགྱུར་རོ། །གལ་ཏེ་ཕྱི་མ་ལེན་པའི་རྒྱུ་རྐྱེན་གང་དང་ཡང་མ་ལྡན་ཏེ་སྐལ་པ་མེད་ཅིང་འགལ་རྐྱེན་བྱུང་ན་བདུན་ཕྲག་དང་པོའི་སྐྱེ་བ་དེ་སྲང་མདའི་ཚུལ་དུ་བརྗེས་ནས་ཡང་བདུན་ཕྲག་གཉིས་པའི་བར་དུ་དེ་ན་གནས་པའོ། །དེ་ཡང་དམ་པ་རིན་པོ་ཆེས། ཞག་བདུན་བར་དོ་ན་གནས་ཚེ་བདུན་ཕྲག་གཅིག་པ་དང་། དེ་བས་མང་ན་བདུན་ལ་སྔ་མ་ཡིན་ལ། དེ་ནས་འཕོ་ཚུལ་བསྟན་ཏེ་ཕྱིན་ཆད་ཕྱི་མའོ། །གསུངས། གང་དེར་ཡང་འགལ་རྐྱེན་ཡོད་དེ་སྐྱེ་བ་དང་མཐུན་པའི་རྒྱུ་རྐྱེན་དེ་དག་གང་དང་ཡང་མི་ལྡན་པར་གྱུར་ཏེ་ཡུན་རིང་བོར་ཐོགས་ན། ཞག་བདུན་ཕྲག་བདུན་གྱི་བར་ཏེ་བཞི་བཅུ་རྩ་དགུའི་ཡུན་དག་ཏུ་ཐོགས་པ་ཡིན་ཏེ། སྔ་མ་ལྟར་ཞག་བདུན་ཚན་ཉིད་ཀྱི་སྐོར་རེ་ན་ལུས་དེ་རྒྱུད་མཐུན་པར་བརྗེ་ཞིང་འཕོ་སྟེ། ཞག་གྲངས་དེ་ཉིད་རྫོགས་པར་མ་གྱུར་པ་དེ་སྲིད་དུ་བར་མ་དོ་དེ་ན་གནས་ཤིང་སྡོད་དོ། །ཞག་གྲངས་དེས་ནི་བར་དོར་གནས་པ་དེ་ཡི་ཚེ་ཚད་ཀྱི་ལས་ཟད་དེ་མཐར་རྫོགས་ནས་འདུག་ཐབས་མེད་དེ་ཕྱི་མའི་སྐྱེ་བ་གཞན་གང་ཡང་རུང་བ་ཉིད་དུ་གནས་པ་དེ་ཡི་ལུས་ལ་འཛིན་པའི་འདོད་ཆགས་སྐྱེ་ཞིང་བར་མའི་ལུས་སྒྱུ་མ་དེ་ལ་ཞེ་སྡང་འབྱུང་བར་འཆད་པར་ཡང་འགྱུར་ཏེ། གང་གི་ལས་དེས་བར་མ་དོ་དེ་ཡི་སྲིད་པའི་ལས་དེ་ཟིལ་གྱིས་གནོན་ཏེ་ལྡང་མི་ནུས་ལ། དེ་ལྟར་ཞག་བདུན་ཕྲག་ཉིད་ནི་བདུན་གྱི་གྲངས་རྫོགས་པ་དེ་ཕྱིན་ཆད་སྐྱེ་བ་ཕྱི་མའི་རྐྱེན་དང་མི་ཕྲད་པ་མི་སྲིད་པས་ངེས་པར་ཕྱི་མ་ལེན་པའི་རྐྱེན་དེ་མེད་པར་རམ་མི་འཛོམ་པར་ག་ལ་སྲིད་དེ་མི་སྲིད་པ་ནི་ཁོ་རང་གི་ཆོས་ཉིད་ཀྱིས་ཡིན་ནོ། །དེ་ཡང་དམིགས་བསལ་དང་བཅས་ཏེ། སའི་དངོས་གཞི་ལས། ཞག་བདུན་གྱིས་ཤི་འཕོས་པ་དེ་ཡང་། ཡང་ན་ནི་དེ་ཉིད་དུ་མངོན་པར་འགྲུབ་པར་འགྱུར་རོ། །ཡང་ན་ནི་སྐལ་པ་མི་མཉམ་པ་གཞན་དུ་སྟེ། གལ་ཏེ་ལས་གཞན་གྱི་བྱ་བ་ཡོངས་སུ་གྱུར་པས། བར་མ་དོའི་སྲིད་པའི་ས་བོན་ཡོངས་སུ་འགྱུར་བར་བྱེད་པའི་ཕྱིར་རོ། །ཞེས་གསུངས་སོ། །བཞི་པ་ནི། གང་ནུབ་གང་སྣང་། ཞེས་པ་ནས། གནས་པས་བར་མ་དོ། །ཞེས་པའི་བར་གྱིས་བསྟན་ཏེ། འོ་ན་ཅིའི་ཕྱིར་བར་མ་ཞེས་བྱ་ཞེ་ན། སྐྱེ་བ་སྔ་མའི་སྲིད་པ་གང་ཡིན་པ་དེ་ནུབ་ཅིང་ཕྱི་མའི་སྲིད་པ་གང་གི་སྣང་བ་དེ་མ་བྱུང་བ་ཡི་གནས་སྐབས་ཀྱི་བར་ན་ཤེས་པ་སྐད་ཅིག་མའི་རྒྱུད་སྒྱུ་མའི་ཡིད་ལུས་སུ་གནས་པའི་སྲིད་པ་ཡིན་པས་བར་མ་དོ་ཞེས་པའི་ངེས་ཚིག་འགྲུབ་པའོ། །དེས་ན་སའི་དངོས་གཞི་ལས། དེའི་རྣམ་གྲངས་ནི་འཆི་བའི་སྲིད་པ་དང་སྐྱེ་བའི་སྲིད་པ་གཉིས་ཀྱི་བར་མ་དོར་འབྱུང་བས་ན་བར་མ་དོའི་སྲིད་པ་ཞེས་ཀྱང་བྱའོ། །ཞེས་སོ། །ལྔ་པ་ནི། བདུན་ཞིང་ནུབ་པའི། །ཞེས་པས་ནས། མཚམས་སྦྱོར་ཞེས་ཀྱང་བྱ། ཞེས་པའི་བར་གྱིས་བསྟན་ཏེ། དེའི་མིང་གི་རྣམ་གྲངས་ནི། སྐྱེ་རྒུའི་ཐོག་མ་སྟེ་འོད་གསལ་གྱི་ལྷ་ལས་བབས་པའི་ལུས་འཇའ་ཚོན་ལྟ་བུ་ཞེས་ཀྱང་ཟེར་ཏེ། དོན་དུ་བར་སྲིད་གང་ཡང་ཞག་བདུན་ཕྲག་རེ་ཞིང་ལུས་དེ་ནུབ་པའི་རང་བཞིན་ཅན་ཡིན་པས་ནུབ་པའི་སྲིད་པ་ཡིན་ནོ་ཞེས་ཀྱང་བཤད་དེ་ཕལ་ཆེ་བའི་དབང་དུ་བྱས་པའོ། །བར་དོར་སྐྱེ་ནས་ཞག་བདུན་ཉིད་ཀྱི་ཚེ་ཡི་བར་དུ་གནས་པས་ན། གང་དེ་ལ་སྲིད་པ་བར་བདུན་པ་ཞེས་ཀྱང་བྱའོ། །ཁ་ཟས་དྲི་ཡི་ཕྱིར་འབྲང་ཞིང་སྤྱོད་ལ་དྲི་ཡི་ཟས་ཀྱིས་ལུས་རྟས་པར་བྱེད་པས་ན་དྲི་ཟ་ཉེར་འགྲོའམ་ཉེ་བར་འཁོར་བ་ཞེས་ཀྱང་བྱ་སྟེ། དངོས་སུ་ཉེ་དུ་ལ་འཁོར་བའང་ཡིན་པར་གསུངས། དེ་གཉིས་ཐུན་མོང་སྟེ་གཞན་དག་ཀྱང་མཚུངས་སོ། །སྔ་མའི་ཡིད་དམ་པར་དོ་དེ་ལ་བརྟེན་ནས་ཕྱི་མའི་ལུས་དེ་བྱུང་བས་ན། དེ་ལས་བྱུང་བ་ཡིད་ཀྱི་གཟུགས་ཅན་ཞེས་ཀྱང་བྱའོ། །ཕྱི་མ་གང་དུ་སྐྱེ་བ་ལེན་པའི་ཤ་དབྱིབས་ཀྱི་ཚུགས་དེ་ཉིད་འཛིན་པས། སྔོན་དུ་བྱུང་བའི་སྲིད་པ་ཕྱི་མའི་ཚུལ་བཞིན་ཅན་ཞེས་ཀྱང་བྱའོ། །ཕྱི་མའི་སྐྱེ་བ་མངོན་དུ་སྣང་ཞིང་གྲུབ་པར་བྱེད་པས་ན་མངོན་དུ་གྲུབ་པ་ཞེས་ཀྱང་བྱའོ། །བར་མ་ན་རྟག་ཏུ་ཟས་ཡིད་ལ་བཏགས་ཏེ་ཉེར་འཁོར་བྱེད་པས་ཉེ་བར་འཁོར་བ་ཞེས་ཀྱང་བྱའོ། །ཚེ་སྔ་ཕྱིའི་སྲིད་པ་གཉིས་ཀྱི་བར་སྐབས་ཡིན་པས་ན་སྲིད་པ་མཚམས་སྦྱོར་བ་ཞེས་ཀྱང་བྱའོ། །དྲུག་པ་ནི། དེ་ནི་གཟུགས་ཅན། ཞེས་པ་ནས། བ་ཡི་གནས་མེད་དོ། །ཞེས་པའི་བར་གྱིས་བསྟན་ཏེ། དེ་ལྟར་གང་དུ་སྐྱེ་བ་ལ་བར་དོའི་སྲིད་པ་ཡོད་པར་བསྟན་ཏེ་དེའི་མཚན་ཉིད་བཤད་པ་དེ་དག་ནི་གཟུགས་ཅན་གྱི་ཁམས་སུ་གྱུར་པ་འདོད་ཁམས་དང་གཟུགས་ཁམས་ཀྱི་དབང་དུ་བཤད་པ་ཡིན་པས་ན། གཟུགས་མེད་པ་ཡི་ཁམས་སུ་སྐྱེ་བ་ལ་སྲིད་པ་བར་མའི་གནས་སྣང་གི་ཚུལ་དེ་མེད་དོ་ཞེས་ཤེས་པར་བྱའོ། །དེ་ཅིའི་ཕྱིར་ཞེ་ན། སྔོན་བྱུང་སྲིད་པའི་ཤ་ཚུགས་མེད་པའི་ཕྱིར་རོ། །དེ་བས་ན་གཟུགས་མེད་པའི་ཁམས་ནས་འཕོ་ན་ཡོད་དོ། །དེས་ན་ཁམས་གཉིས་སུ་སྐྱེ་བ་ལ་ཡོད་ཅེས་བྱ་སྟེ། སྔ་མ་ལས། བར་མ་དོའི་སྲིད་པ་དེ་ཡང་གཟུགས་མེད་པར་སྐྱེ་བའི་གནས་མ་གཏོགས་པར་བལྟ་བར་བྱའོ། །ཞེས་སོ། །བདུན་པ་ནི། དེ་ནས་གནས་པའི། ཞེས་པ་ནས། དེ་ལ་མངོན་པར་དགའ། །ཞེས་པའི་བར་གྱིས་བསྟན་ཏེ། སྲིད་པ་བར་མ་དེ་ཉིད་ལས་ཅི་ལ་དགའ་ཞེ་ན། དེ་ལྟར་བར་མ་དོ་དེ་ན་གནས་པའི་སྲིད་པ་བར་བདུན་པའི་སེམས་ཅན་དེ་ཉིད་སྔར་ཤི་བའམ་འགགས་པར་གྱུར་པ་ཡི་སྲིད་པ་དེའི་དུས་སུ་འདུ་ཤེས་གསུམ་དང་ལྡན་པས་ལུས་ཀྱིས་སྤྱད་པར་བྱས་པའི་སྒོ་གསུམ་གྱི་ལས་དགེ་བ་དེ་དང་དེ་མིན་པ་སྡིག་པ་མི་དགེ་བ་དང་བཏང་སྙོམས་ཏེ་ལུང་དུ་མ་བསྟན་པ་དང་གསུམ་ལ་སྤྱད་དེ་ཆགས་སྡང་རྨོངས་གསུམ་གྱི་དུག་གསུམ་དང་བཅས་པ་གང་ལ་ཞེན་ཅིང་གོམས་པར་བྱས་པས་གང་ཤི་བ་དེ་ཡི་སྔོན་གྱི་སྐྱེ་བས་ལས་གསུམ་པོ་གང་དང་གང་ལ་ཞེན་ཅིང་དགའ་བ་བཞིན་དུ་དེའི་འཕྲོས་ཡིན་པས་བར་དོའི་དུས་དེར་ཡང་ལས་གསུམ་པོ་གང་གོམས་པ་དེ་ལ་མངོན་པར་དགའ་བ་ཉིད་དེ། དགེ་བ་ཅན་གྱི་བར་མ་ནི་དགེ་བ་སྤྱོད་པ་ལ་དགའ་བ་ལ་སོགས་པ་ལྟ་བུའོ། །དེས་ན་རྣམ་པར་སྨིན་པ་ཡང་རྗེས་སུ་མཐུན་ཏེ་ཕལ་ཆེར་གྱི་དབང་དུ་བྱས་པའོ། །དེ་ཅིའི་ཕྱིར་ཞེ་ན། བར་དགའ་བསམ་གཏན་བཞི་པ་ཐོབ་པའི་དགེ་སློང་ལྟ་བུ་ཡང་བར་མར་སྡིག་བསགས་ནས་ངན་འགྲོ་ལྟུང་བའང་ཡོད་པའི་ཕྱིར་རོ། །བརྒྱད་པ་ལ་གཉིས་ཏེ། སྐྱེ་བ་ལེན་པའི་ལྟས་བསྟན་པ། སྐྱེ་བ་ལེན་ཚུལ་དངོས་བཤད་པའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི། སྔོན་ཚེ་ལེགས་ཉེས། ཞེས་པ་ནས། སྔ་ལྟས་འབྱུང་བར་འགྱུར། །ཞེས་པའི་བར་གྱིས་བསྟན་ཏེ། བར་མ་དོར་ཕྱིས་ཀྱི་གནས་རིས་མཐོན་མན་གང་དུ་སྐྱེ་བའི་ལྟས་འབྱུང་བའི་ཚུལ་ནི། སྔོན་གྱི་ཚེ་སྔ་མ་ལ་ལོགས་པའི་ལས་དཀར་པོ་དགེ་བ་དང་ཉེས་པའི་ལས་ནག་པོ་མི་དགེ་བ་དག་ལ་སྤྱོད་པའི་ཡུལ་ཉིད་གོམས་སྟོབས་ཆེ་བས་ཀླུང་དུ་གང་གྱུར་པ་དེ་ཉིད་ཀྱི་མཚན་མ་དངོས་པོ་མེད་ཀྱང་ཡིད་ཡུལ་དུ་རང་སྣང་བས་དེ་དག་རྨི་ལམ་གྱི་གཟུགས་བརྙན་བཞིན་དུ་མཐོང་ནས་གང་མཐོང་བ་དེའི་ལྟས་དེ་ཉིད་ལྟར་དུ་འཇུག་པའི་ཡུལ་དུ་མངོན་སུམ་དུ་སྣང་བར་འགྱུར་རོ། །དེ་ཡང་དཔེར་ན་རྨི་ལམ་གྱི་ལྟས་མངོན་དུ་གྱུར་པ་བཞིན་འདིར་ཡང་དང་པོ་ལྟས་ཙམ་ཕྱི་མ་ལ་མངོན་སུམ་དུ་གྱུར་པའོ། །དེས་ན་སྐབས་དེ་ཡི་ཚེ་དཔེར་ན་མིག་འཁྲུལ་པའི་རབ་རིབ་ཅན་གྱིས་སྐྲ་ཤད་སོགས་ཀྱི་གཟུགས་མཐོང་བ་ལྟར་དུ་སྔ་མའི་ལས་གང་གིས་དབང་ལྟར་ཕྱི་མར་གང་དུ་སྐྱེ་བ་ལེན་པའི་སྔ་ལྟས་བར་དོའི་དུས་དེར་སོ་སོར་འབྱུང་བར་འགྱུར་བ་སྟེ། གྲོག་སྦུར་དུ་སྐྱེ་ན་རྨི་ལམ་དུ་གྲོག་སྦུར་དང་འགྲོགས་པར་རྨི་བ་ལྟ་བུའོ། །གཉིས་པ་ལ་གཉིས་ཏེ། སྡིག་པ་ཅན་སྐྱེ་བ་ལེན་པའི་ལྟས་བསྟན་པ། དགེ་བ་ཅན་སྐྱེ་བ་ལེན་པའི་ལྟས་བཤད་པའོ། །དང་པོ་ནི། བདེ་རྐྱེན་མི་ལྡན། ཞེས་པ་ནས། འཇུག་པའི་མཚན་མ་འབྱུང་། །ཞེས་པའི་བར་གྱིས་བསྟན་ཏེ། དེ་ཡང་སོ་སོ་ནས་བསྟན་པར་བྱ་བའི་ཕྱིར། གལ་ཏེ་བདེ་བའི་གནས་ཐོབ་པར་བྱེད་པའི་དགེ་བའི་ལས་ཀྱི་རྐྱེན་དང་མི་ལྡན་པ་ཡིན་འགྲོ་བ་ཞིག་ཡིན་ན་ནི་བར་མ་དོ་དེ་ན་གནས་པའི་ཚེ་ཚད་དང་བར་མའི་ལུས་དེ་ནུབ་ནས་བརྗེས་པའི་ཚེ་ན། ཞེས་པ་འདིས་ཕལ་ཆེ་བའི་དབང་དུ་བར་དོའི་ཚེ་སྟོད་སྨད་གཉིས་སྐྱེ་བ་སྔ་ཕྱི་ལ་ཕྱོགས་པར་ཡང་གསལ་ལ། དེ་ནས་ཕྱི་མའི་སྐྱེ་བ་ལ་ངན་འགྲོ་དམན་པའི་འགྲོ་བར་ལྟུང་ཞིང་སྡུག་བསྔལ་ཅན་དུ་འབྱུང་བའི་སྔ་ལྟས་ཀྱི་མཚན་མ་ནི། ངན་སོང་གསུམ་གྱི་དམྱལ་བར་སྐྱེ་བ་ལེན་ཚུལ་འོག་ནས་འབྱུང་བས་འདིར་དུད་འགྲོའི་རིས་ཐམས་ཅད་དང་ཡི་དྭགས་ཀྱང་བསྟན་ཏེ། དེ་ཡང་སྲོག་ཆགས་ལྡེམ་བུ་དང་སྦྲང་བུ་ལ་སོགས་པའི་འགྲོ་བ་གནས་ངན་གང་དུ་འབྱུང་བའི་བདག་དང་རིགས་མཐུན་པ་མང་པོ་མཐོང་བ་འབྱུང་བ་དང་། འབྲུ་གསལ་བ་མེད་པའི་དུད་འགྲོ་ལ་སོགས་ཅ་ཅོའི་སྒྲ་ཐོས་པ་དང་རྩ་འདམ་བུའི་འཐིབས་པས་སའི་འདམ་པ་ཅན་དང་། མི་གསལ་བར་སྟུག་པའི་ནགས་ཚལ་འཐིབས་པོ་དང་། ལ་སོགས་པའི་ཞེས་དངོས་པོ་གཞན་བསྡུ་བ་ནི། མུན་པ་དང་སྤྲིན་ནག་དང་ན་བུན་ནམ་རླངས་པ་འཐིབས་པ་དང་། བྲག་གི་བར་དང་སྡོང་པོའི་གསེབ་ཀྱི་བུག་པ་དོག་མོ་རྣམས་དང་། དེ་བཞིན་དུ་ལྡུམ་བུའི་ཚལ་དཀྲིགས་པ་མཐོང་བ་དང་། དྲི་ང་ཞིང་མི་ཞིམ་པ་སྣ་ཚོགས་དང་། ཁ་ཟས་ངན་པ་དང་། རྫིང་ངན་པ་རྙོག་ཆུས་གང་བའི་འདམ་པ་ཅན་དང་། ཤིན་ཏུ་འཁྲིགས་ཤིང་གཏམས་པའི་སྤྲིན་ཆེན་གྱིས་འཐིབས་པའི་ནང་དུ་ཉམས་མི་དགའ་ཞིང་ཡིད་རྨོང་པར་གྱུར་ཏེ་འཇུག་པར་བྱེད་པའི་མཚན་མ་ལ་སོགས་པ་ཡིད་དུ་མི་འོང་བའི་ལྟས་རྣམས་འབྱུང་ཞིང་སྣང་བར་འགྱུར་རོ། །འོན་ཀྱང་རང་རྒྱུད་པ་མ་ཡིན་ཏེ། རང་གི་ལས་ཀྱི་རྐྱེན་གྱིས་མ་དག་པའི་སེམས་ཀྱི་སྣང་བའོ། །གཉིས་པ་ནི། གང་འདིར་དག་པ། ཞེས་པ་ནས། དག་པ་དེ་རིགས་མཐོང་། །ཞེས་པའི་བར་གྱིས་བསྟན་ཏེ། གལ་ཏེ་གང་འདིར་དགེ་བ་སྤྱོད་སྤྱོད་པས་དག་པའི་སྐྱེ་བ་ལེན་པར་བྱེད་པ་ཞིག་བར་མའི་གནས་སུ་འདུག་ན། རིགས་མངོན་མཐོར་འགྱུར་ཞིང་གྱེན་དུ་འབྱུང་བའི་སྔ་ལྟས་ནི། ཞི་བའི་ཡུལ་གཟུགས་བཟང་བ་སྣ་ཚོགས་པ་དང་སྙན་པར་གྱུར་པའི་སྒྲ་སྐད་སྣ་ཚོགས་པ་དང་མཐོང་ཞིང་ཐོས་པ་དང་། དེ་བཞིན་དུ་ཡིད་ཉམས་དགའ་བར་བྱེད་པ་དང་མིག་ལ་སོགས་པའི་དབང་པོ་ཚིམ་པར་བྱེད་དེ་འདོད་པའི་རེ་བ་སྐོང་བ་དང་། གང་དུ་འཇུག་པའི་གནས་རྣམས་ཀྱང་ས་ལ་བརྟེན་པའི་ཁང་བཟང་དང་ནི་ནམ་མཁར་ལྷའི་གཞལ་མེད་ཁང་དུ་སྣང་བ་དང་། དེ་བཞིན་དུ་ཡིད་དུ་འོང་བའི་སྐྱེད་མོས་ཚལ་དང་། རྫིང་བུ་མཛེས་པ་དང་། ཐང་བདེ་བ་དང་། དྲི་ཞིམ་པ་ལ་སོགས་པ་དེ་དག་རྣམས་ལ་ལོངས་སྤྱོད་པར་སྣང་བའི་ཡུལ་དུ་མངོན་པར་འབྱུང་སྟེ། རྣམ་དཀར་དགེ་བའི་མཚན་མ་བཟང་པོར་གྱུར་པའི་ལས་ཀྱི་ལྟས་སྣ་ཚོགས་པ་སྣང་བར་འགྱུར་ལ། བདག་དང་རིགས་མཐུན་པའི་ཡང་ལྷ་རྣམས་དང་འཁོར་ལོས་བསྒྱུར་བའི་རྒྱལ་པོ་དང་། རྒྱལ་ཕྲན་དང་བློན་པོ་དང་། བྲམ་ཟེ་དང་། རྗེའུ་རིགས་ཤིང་སཱ་ལ་ཆེན་པོ་ལྟ་བུ་ལ་སོགས་པ་བདག་གིས་གང་ཐོབ་པར་འགྱུར་བའི་ལས་དག་པ་ཅན་གྱིས་མཐོང་བས་སྤྱོད་ཡུལ་དག་པ་མངོན་པར་མཐོ་བ་མཐོ་རིས་དེ་ཡི་རིགས་སུ་གྱུར་པ་རྣམས་མཐོང་བར་འགྱུར་བ་ཡིན་ནོ། །གཉིས་པ་ལ་བཞི་སྟེ། དྲོད་གཤེར་ལས་སྐྱེ་བ་ལེན་པའི་ཚུལ། མངལ་དང་སྒོང་ངར་སྐྱེ་བ་ལེན་པའི་ཚུལ། དམྱལ་བར་སྐྱེ་བ་ལེན་པའི་ཚུལ། སྤྱིར་ལས་གང་གོམས་ཀྱི་འབྲས་བུར་སྐྱེ་བ་ལེན་ཚུལ་བཤད་པའོ། །དང་པོ་ནི། དེ་ན་གནས་པའི། ཞེས་པ་ནས། རྣམས་ཀྱི་སྤྱོད་ཡུལ་མིན། །ཞེས་པའི་བར་གྱིས་བསྟན་ཏེ། སྐྱེ་བའི་དབྱེ་བས་དྲོད་གཤེར་ལས་སྐྱེ་བ་གྲོག་སྦུར་ལ་སོགས་པའི་བར་མ་དོའི་སྐྱེ་བ་ལེན་པའི་ཚུལ་དང་ལྟས་ཇི་ལྟ་བུ་སྙམ་ན། དེ་ལྟར་བར་མ་དོའི་གནས་དེ་ན་འདུག་པའམ་གནས་པའི་སྲིད་པ་བདེ་བར་གཤེགས་པའི་སྙིང་པོ་ཅན་གྱི་སེམས་ཅན་དེ་ཉིད་དྲོད་གཤེར་ལས་སྐྱེ་བའི་རྒྱུ་ཅན་དུ་གྱུར་ན་རང་གི་འདོད་པའི་ཡུལ་ལ་ཤིན་ཏུ་ཞེན་པས་ཞེན་ཆགས་ཆེ་བའི་ཕྱིར། དྲི་ཟ་ཉེ་བར་འཁོར་བ་ཞེས་པའི་རྣམ་གྲངས་དང་མཐུན་པར། གནས་ཀྱིས་ཕྱོགས་གང་དུ་དྲི་འབྱུང་བ་དེར་འཇུག་ཅིང་ཟས་ཀྱི་རྗེས་སུ་འབྲངས་པས་ན་མི་གཙང་ཞིང་མི་ཞིམ་པའི་དྲི་ང་བ་དང་། གཙང་ལ་ཞིམ་པའི་མི་ང་བའི་དྲི་རྣམས་འབྱུང་བའི་ཡུལ་དེར་དྲི་དེ་གཉིས་ལ་ཆགས་ཏེ་ཞེན་པར་བྱས་པས་འདོད་པའི་སེམས་སིམ་པའམ་ཚིམ་པ་སྐྱེ་བར་འགྱུར་ཏེ། དེ་ལྟར་དྲི་སྤྱོད་ཅིང་ལན་གྲངས་མང་བས་དེར་ཀུན་ཏུ་འཁྲིགས་སེམས་སམ་ཆགས་པའི་སེམས་འཁྱིགས་པས་སྐབས་སུ་བར་མའི་ལུས་དེ་ལ་ཞེ་སྡང་འབྱུང་སྟེ་འདོར་འདོད་སྐྱེའོ། །རྒྱུ་དེས་ནི་བར་མ་དོ་ཚེ་ཞག་བདུན་པ་དེ་ཡི་རྒྱུན་འགགས་ཤིང་འཕོ་བར་བྱེད་དེ། དྲི་དེ་ལ་ཞེན་ཅིང་ཆགས་པའི་སྐད་ཅིག་གི་བར་དུ་བར་མ་དེ་ཡི་སྐལ་པའི་ཚེ་ཟད་ནས་ཕྱི་མ་ལ་ཆགས་པ་དེས་ནི་བར་མ་དེ་ཡང་བདག་ཉིད་དྲིའི་ཕྱིར་འབྲངས་པས་ཤེས་པ་དེས་བརྟས་ཏེ་ལས་ཀྱིས་སྣང་བའི་ལུས་ངན་གྲོག་སྦུར་ལ་སོགས་པ་དེར་སྐྱེ་བར་བྱེད་དོ། །དེ་ལྟར་གང་དུ་སྐྱེ་བ་བརྟས་པའི་སེམས་ཅན་གང་ཞིག་གསང་བའི་སྙིང་པོ་ལས། ཨེ་མ་ཧོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །ཞེས་སོགས་གསུངས་པ་ལྟར། ཆོས་ཉིད་བདེ་བར་གཤེགས་པའི་སྙིང་པོ་ཅན་ལས་གྲོག་སྤུར་ལ་སོགས་པའི་ལུས་ཅན་གཞན་ཐ་དད་པ་རྐྱེན་གྱིས་རིས་མཐུན་པ་གཟུགས་ཕུང་བཟུང་བའི་འགྲོ་བ་མི་འདྲ་བ་དག་ཀྱང་སྣང་བར་འགྱུར་ཏེ་མ་གྲུབ་བཞིན་དུ་ལས་མཐུན་པའི་དབང་གིས་སྔར་བར་མའི་དུས་སུ་ལྟས་སྣང་ཤར་བ་དང་མཐུན་པར་མཐོང་ངོ་། །ལུས་ལེན་པའི་ཚུལ་ནི། དེ་ལྟར་དྲོད་ཀྱི་རྐྱེན་དང་རླན་རྣམས་ཆ་སྙོམས་པའི་རྒྱུ་དེས་བར་མ་དོའི་ཤེས་པ་དེ་ཉིད་འཛིན་པར་རིགས་ཏེ། དེ་ཉིད་དེ་ལ་ཆགས་པའི་དབང་གིས་སོ། །དེས་ན་དྲོད་གཤེར་གྱི་རྐྱེན་དེ་མེད་ནས་དེ་དང་མ་འཕྲད་ན་གྲོག་སྦུར་ལ་སོགས་པའི་འགྲོ་བའི་ཁམས་སུ་བར་མ་དེ་སྐྱེ་བ་མི་འབྱུང་སྟེ། དགུན་ལྟ་བུ་དྲོད་གཤེར་དེ་ཡི་རྐྱེན་མེད་ན་དེར་སྐྱེ་བ་མ་ཡིན་པས་ན་བར་མ་ན་ནམ་མཁའ་ཡི་རྡུལ་དང་འདྲ་བར་འདུག་ཅིང་དབྱར་གྱི་དུས་དང་རྐྱེན་དང་ལྡན་པ་ཀུན་ན་སྐྱེ་བའོ། །གང་སྐྱེ་བའི་རྐྱེན་དེ་དག་ཚང་བར་ལྡན་པས་བདག་སྐྱེ་བའི་ཡུལ་གནས་མཐོང་བ་རྣམས་ནི་དཔག་ཚད་ལ་སོགས་པར་མི་དཔོག་པས་ཡུལ་གནས་གང་ནི་རྒྱང་རིང་བར་གྱུར་པ་ན་ཡོད་ཀྱང་དེར་འགྲོ་བ་ལ་ཐོགས་པ་མེད་དེ་ཡིད་དང་འདྲ་བར་མིག་གིས་རིས་སུ་བཅད་དེ་མཐོང་བ་དང་ཚོར་བ་ཙམ་གྱིས་དེར་ཕྱིན་པ་ཡིན་གྱི། གདོས་བཅས་ཀྱི་ལུས་ལྟར་མིག་གིས་མཐོང་ཞིང་ཚོར་ནས་ས་རིས་སུ་བཅད་དེ་དེར་འགྲོ་བ་ལྟ་བུ་མ་ཡིན་པར་སྔ་མའི་ལས་བསགས་པ་གང་གི་དབང་གིས་དེར་འགྲོའོ་སྙམ་པས་གར་འགྲོ་བའི་ཡུལ་གནས་དེ་ཉིད་རིག་པ་ཙམ་ཉིད་ན་དེར་ཕྱིན་པ་ཡིན་པས་བར་དོ་དེ་ལ་ལམ་དེ་ཉིད་རིང་ཐུང་གི་ཁྱད་པར་ཀྱི་ཐ་སྙད་མེད་པར་ཐོགས་མེད་དུ་འགྲོ་བ་ཡིན་ནོ། །དེའི་གཏན་ཚིགས་དེ་ཅི་ཕྱིར་ཞེ་ན་བར་མའི་ཡིད་ལུས་དེ་ཡིད་ལྟར་གང་དུའང་ཁྱབ་ཅིང་མྱུར་བར་འཇུག་པ་ཡིན་པས་ལུས་གང་དུ་ལེན་ཀྱང་འགྲོ་བ་ལ་ཐོགས་པ་མེད་པའི་གཏོགས་འདོད་ཅན་ཏེ། གདོས་པ་མེད་པ་དེའི་སྤྱོད་ཡུལ་ནི། ད་ལྟའི་བེམས་པོའི་གདོས་པ་དང་བཅས་པའི་ལུས་ཅན་རྣམས་ཀྱི་སྤྱོད་ཡུལ་མིན་པའི་ཕྱིར། ཉེ་རིང་དང་མྱུར་བུལ་མེད་ཅིང་དམིགས་པས་འགྲོ་བ་ལྟ་བུའང་མིན་ནོ། །གཉིས་པ་ནི། ལ་ལ་གང་ལ། ཞེས་པ་ནས། དེ་ཡི་གདོས་ཀྱིས་བཟུང་། །ཞེས་པའི་བར་གྱིས་བསྟན་ཏེ། མངལ་དང་སྒོང་ངར་འབྱུང་བའི་བར་མ་དོ་དེས་ཇི་ལྟར་མཐོང་ཞིང་སྐྱེ་བ་ལེན་ཞེ་ན། འགྲོ་བ་ལ་ལ་དག་བར་མ་ན་འདུག་པའི་ཚེ་འདོད་པའི་ཡུལ་གང་ལ་ཆགས་ཤིང་ཞེན་པའི་སྟོབས་ཀྱི་མཐུས་ལས་དང་བསོད་ནམས་མཐུན་པར་སྣང་བའི་རིགས་ཅན་གྱི་འགྲོ་བ་བདག་གིས་ཕ་མར་འགྱུར་བ་དག་གང་དུ་འཕྲོད་བྱེད་དེ་ཆགས་པ་སྤྱོད་པ་མཐོང་བར་འགྱུར་རོ། །དུས་དེ་ཡི་ཚེ་ན་བར་དོ་དེ་ཉིད་ན་གནས་པའི་སེམས་ཅན་དེ་ཡང་ཆགས་པ་སྐྱེས་ཏེ་གནས་དེར་ཁྱབ་པར་ཕྱིན་ཏེ་འཁྱིམས་ནས། གནས་དེ་ལ་བར་མ་དེ་འཁོར་ཞིང་འཁོད་དེ་ཆགས་པའི་མཚན་མ་དེ་ལ་རྟོག་ཅིང་དཔྱོད་པ་མ་བཏང་བར་ཡིད་ཀྱིས་འཛིན་པ་དང་བཅས་ཏེ་ཞེན་པ་བར་མ་ཆད་པར་བྱས་པས། རྒྱུ་དེ་ཡིས་བདག་ཀྱང་ཕ་མ་ལ་ཆགས་ཤིང་ཞེན་པའི་རྟོག་པ་རང་བཞིན་ངང་གིས་ལྡང་ཞིང་རྣམ་པར་སྐྱེའོ། །གང་ཆགས་པ་དེའི་དབང་གིས་སེམས་ཅན་དེ་ཡང་དོན་མ་མཐོང་བས་དེར་རྨོངས་ནས་བདག་གིས་ཀྱང་དེ་ལ་ཆགས་པ་སྤྱད་པའི་ཡུལ་དུ་སྣང་སྟེ་ཕྱིན་ཅི་ལོག་ཏུ་མཐོང་བར་འགྱུར་ཏེ། མོར་སྐྱེ་ན་ཕ་ལ་ཆགས་ཤིང་ཕོར་སྐྱེ་ན་མ་ལ་ཆགས་ཏེ་དངོས་པོ་ལ་མ་གྲུབ་ཀྱང་། དཔེར་ན་སྒྱུ་མ་མཁན་གྱིས་སྤྲུལ་པའི་སྐྱེས་པ་དང་བུད་མེད་བཟང་མོ་ཕྲད་པ་ལྟ་བུར་བདག་གིས་ཆགས་པ་སྤྱད་པར་མཐོང་བའི་འཁྲུལ་པར་སྣང་བ་འབྱུང་ངོ་། །གནས་གང་དུ་ཕ་མའི་གང་ཟག་དེ་གཉིས་ཀྱི་མངལ་དུ་ས་བོན་འདུ་འཕྲོད་བྱེད་པར་མཐོང་ནས་བར་དོ་དེ་ལ་སེམས་ཅན་སྐྱེ་འབྱུང་གི་གནས་དེ་སྣང་ཞིང་གསལ་བར་འགྱུར་ལ། དེ་ཡང་ཕ་ལས་ས་བོན་འབྱུང་བས་འབྱུང་བ་ཞེས་བྱ་ཞིང་མ་ཡི་ལྟོ་བར་རམ་མངལ་དུ་གནས་པས་གནས་པ་ཞེས་བྱ་སྟེ། གལ་ཏེ་བདག་ཉིད་མོར་སྐྱེས་ཏེ་གནས་པའི་ཆ་ལེན་པ་ཞིག་ཡིན་ན། ས་བོན་གྱི་གཞི་འབྱུང་བ་ཕའི་ས་བོན་དང་མཚན་མ་ལ་ཆགས་པའི་འདོད་པ་འབྱུང་ལ། གལ་ཏེ་དེ་ལས་བཟློག་སྟེ་འབྱུང་བ་ཕོར་སྐྱེ་བ་ལེན་པ་ཞིག་ཡིན་ན་ས་བོན་གྱི་གནས་མའི་ས་བོན་དང་མཚན་མ་ལ་ཆགས་པའི་འདོད་པ་འབྱུང་བའང་དེ་བཞིན་ཏེ། དེས་ན་གནས་པ་མོའི་ཆར་སྐྱེ་བར་འགྱུར་བ་ཞིག་ན་གནས་པ་མ་དང་བྲལ་བར་འདོད་པའི་སེམས་སྐྱེ་ལ། འབྱུང་བ་ཕོའི་ཆར་སྐྱེ་བར་འགྱུར་བ་ཞིག་ན་ཡང་གོང་མ་བཟློག་པ་དེ་བཞིན་དུ་འབྱུང་བ་ཕ་དང་བྲལ་བར་འདོད་པའི་སེམས་སྐྱེས་ཏེ། བདག་རང་ཉིད་ནི་གང་དུ་མི་འཕྲོད་པའམ་མི་འདོད་པར་བྲལ་བར་འདོད་པའི་གཟུགས་སམ་ལུས་གང་ཡིན་པ་དེ་ཁོ་ནར་མཐོང་བར་འགྱུར་རོ། །དེ་ལྟར་ཕོ་མོའམ་དེ་གཉིས་ཀྱི་མཚན་མ་གང་རུང་དེ་ལ་བར་དོ་དེ་ཉིད་ཆགས་ཞེན་སྐྱེས་པ་དེ་ཡི་དབང་གིས་གནས་པ་མོའི་མཚན་མའམ་འབྱུང་བ་ཕོའི་མཚན་མ་འབའ་ཞིག་ལས་མ་གཏོགས་པ་མཚན་མ་གང་ཡིན་པ་གཞན་ནི་སྣང་བར་མི་འགྱུར་རོ། །འོན་ཀྱང་ཕལ་ཆེ་བའི་དབང་སྟེ། གཉིས་ཀྱི་ཆ་འཛིན་པའི་མ་ནིང་ཡང་འབྱུང་ངོ་། །དེ་ནས་བར་མ་དེ་ཡིས་ཆགས་པའི་ཡུལ་གྱི་མཚན་མ་དེ་མཐོང་བས་དེ་ལ་ཆགས་ཞེན་རྨོངས་པས་སེམས་འཁྱིམས་པའམ་འཁྱིགས་ནས་བར་དོའི་ལུས་དེ་ལ་བར་མ་དེ་ཡི་སེམས་འཁྲིགས་ཏེ་ཞེ་སྡང་སྐྱེས་ནས་མ་རངས་པ་ལྟར་འབྱུང་ཞིང་ཕྱི་མ་ལ་ཆགས་པ་དང་གཉིས་ཀྱི་དབང་གི་རྒྱུ་དེ་ཡིས་བར་མ་དོ་དེ་ཡི་ཕོ་མོར་སྣང་བའི་རྒྱུན་འགགས་ནས་དཔེར་ན་སྦྲང་རྒྱ་གང་གིས་སྦྲང་མ་གང་ཟིན་པ་ཇི་ལྟ་བ་བཞིན་དུ་ཞེན་པའམ་ཆགས་པས་ས་བོན་གཉིས་ཀྱིས་སྲིད་པ་བར་མ་དོའི་ཤེས་པ་དེ་ཉིད་འཛིན་པར་བྱེད་དོ། །དེའང་ལྷ་མི་སྟོད་རིམ་པ་ནི་བར་དོས་ཕ་མའི་མགོ་ནས་རྟོག་དཔྱོད་བྱེད་པས་སྤྱི་བོ་ནས་ཞུགས་ཏེ་ཕའི་ས་བོན་དང་འདྲེས་པར་འགྱུར་རོ། །བར་པ་ནི་ཕ་མའི་གདོང་ནས་རྟོག་དཔྱོད་བྱེད་པས་ཕའི་ཁ་ནས་ཞུགས་ཏེ་ས་བོན་དང་འདྲེས་པ་ཡིན་ལ། དམན་པ་ནི་ཕ་མའི་རྟེན་མ་ནས་རྟོག་དཔྱོད་བྱེད་པས་བཤང་ལམ་དུ་ཞུགས་ཏེ་འདྲེས་པའོ། །དེ་ལྟར་རྣམ་ཤེས་གང་དེ་ཁུ་ཁྲག་གི་ས་བོན་གཉིས་པོ་དེ་ཡི་རྒྱས་བཏུམ་ནས་གདོས་པའི་ལུས་ཀྱིས་ཟིན་ཏེ་མིང་དང་གཟུགས་འབྱོར་བའི་ཕྱིར་རིགས་ཅན་དེ་ཡི་སྲིད་པ་བཟུང་བ་ཞེས་བྱའོ། །གསུམ་པ་ནི། དམན་འགྲོ་གང་དེ། ཞེས་པ་ནས། ལུས་བླངས་ཉོན་མོངས་མྱོང་། །ཞེས་པའི་བར་གྱིས་བསྟན་ཏེ། དམྱལ་བར་འགྲོ་བའི་བར་མ་དོ་ཇི་ལྟར་རྫུས་ཏེ་སྐྱེ་བ་ལེན་ཞེ་ན། གང་སུ་ཞིག་དམན་པ་དམྱལ་བར་འགྲོ་བ་གང་ཡིན་པ་དེ་ཡི་བར་དོའི་སྲིད་པ་ཚེ་ཞག་བདུན་པ་དེ་ནི། ཚེ་སྔ་མར་ཆགས་སྡང་གི་དབང་གིས་སེམས་ཅན་གསོད་ཅིང་སྲོག་གཅོད་པར་བྱེད་པ་དང་དེ་ལ་ལྷག་པར་ཞེན་ཏེ་གོམས་པར་བྱས་པ་དེ་ཡི་བག་ཆགས་ཡང་ཡང་བརྩེགས་ཤིང་བསྣན་ནས་སྟོབས་སུ་གྱུར་པས་ན། གང་དམྱལ་བའི་བར་མར་གནས་པའི་སྡིག་ཅན་གང་ཡིན་པ་དེ་ཡང་དེར་གནས་པའི་དུས་ན་ཡང་འདོད་ཆགས་དང་ཞེ་སྡང་གི་དབང་གིས་བསད་ཅིང་སྲོག་འཕྲོགས་ཏེ་བཅད་གཏུབ་བྱེད་པ་ལ་སོགས་པ་དེར་ཡང་ལས་ངན་བྱེད་པ་ཤ་སྟག་ཏུ་སྣང་བར་འགྱུར་ཏེ། གང་སེམས་ཅན་གསོད་པ་དེ་དག་བར་མ་དོ་དེ་ཡིས་མཐོང་མ་ཐག་ཏུ་སྤྱོད་ངན་དེ་ཉིད་སྔོན་དུ་ཚེ་སྔ་མ་ལ་གོམས་པར་བྱས་པའི་རྒྱུའི་ལས་ཀྱི་བག་ཆགས་དེ་རྐྱེན་དེས་བསླངས་པས་གསོད་གཅོད་བྱེད་པའི་རྒྱུ་དེ་དག་རིག་ཅིང་ཤེས་ནས། ཕ་རོལ་པོ་དེ་དག་གསད་པར་བྱའོ་སྙམ་དུ་སེམས་པའི་འདུ་ཤེས་ཀྱིས་དེར་གསོད་པ་ལ་འགྲོ་ཞིང་རྒྱུག་པར་བྱེད་དོ། །དེའང་ཆགས་སྡང་གིས་གསད་པའི་འདུ་ཤེས་སྐྱེ་བའི་ཡུལ་དགྲ་དང་ཤ་གཡག་ལ་སོགས་པའི་སྐྱེ་བའི་གནས་ཀྱི་འཁྲུལ་སྣང་གི་འགྲོ་བ་ལྟ་བུ་དེ་མཐོང་ནས་བར་མ་དོ་དེ་ཡང་གསད་པ་ལ་སོགས་པའི་ལས་བརྩམས་ཏེ་ཡང་ཡང་དུ་བྱས་པས་དེ་དག་གི་ལས་དེས་སེམས་འཁྱིགས་བའམ་འཁྱིམས་ནས་བར་དོའི་ལུས་ལ་ཞེ་སྡང་འབྱུང་སྟེ། རྒྱུ་དེ་ཡིས་དམྱལ་བའི་བར་བདུན་པའི་རྒྱུན་འགགས་པས་ཆ་ལུགས་དེ་ཉིད་འཕོས་ནས་སྐད་ཅིག་གིས་བརྫུས་ཏེ་སྐྱེ་བའི་དམན་པ་དམྱལ་བའི་ལུས་བླངས་ནས་སྡུག་བསྔལ་དྲག་པོར་སྨིན་པས་ཉོན་མོངས་ཤིང་ཉེན་ཏེ་རྣམ་སྨིན་དབལ་ཚ་བ་མྱོང་བར་འགྱུར་ཏེ། སའི་དངོས་གཞི་ལས། གལ་ཏེ་མི་དགེ་བའི་ལས་བྱེད་པ་ལུག་གསོད་པར་གྱུར་ཏམ། བྱ་གསོད་པར་གྱུར་ཏམ། ཕག་འཚོང་དུ་གྱུར་ཏམ། དེ་ལྟར་སྡོམ་པ་མ་ཡིན་པའི་རིས་གང་ཡང་རུང་བ་ལ་གནས་པ་དེས། སེམས་ཅན་དམྱལ་བར་སྐྱེ་བར་འགྱུར་བ་སྡིག་པ་མི་དགེ་བའི་ལས་བྱས་ཤིང་བསགས་པས་སྐྱེ་བའི་གནས་སུ་དེས་སེམས་ཅན་དེ་ལྟ་བུ་དག་དང་། ལས་དེ་ལྟ་བུ་དག་དང་། ལུས་ལ་སོགས་པ་དེ་དག་རྨི་ལམ་བཞིན་དུ་མཐོང་ནས། དེ་སྔོན་གོམས་པའི་མངོན་པར་དགའ་བས་དེ་ཉིད་དུ་རྒྱུག་གོ། །སྐྱེ་བའི་གནས་ཀྱི་གཟུགས་དེ་ལ་ཡང་ཁོང་ཁྲོ་བར་གྱུར་ནས་བར་མ་དོའི་སྲིད་པ་དེ་མེད་པར་འགྱུར་ལ། སྐྱེ་བའི་སྲིད་པ་ནི་འགྲུབ་པར་འགྱུར་རོ། །དེ་དེ་ནས་ཤི་འཕོས་པ་ན་སྔར་འཆི་བའི་སྲིད་པའི་ཚེ་འཁྲུལ་པའི་གཟུགས་མཐོང་བ་དེ་བཞིན་དུ་འབྱུང་བར་འགྱུར་རོ། །སྐྱེ་བ་དང་འགག་པའི་ཚུལ་ནི་སྔ་མ་བཞིན་དུ་བལྟ་བར་བྱའོ། །དེར་བརྫུས་ཏེ་སྐྱེས་ནས་སྐྱེ་མཆེད་དྲུག་ཡོངས་སུ་ཚང་བར་འགྱུར་ཏེ། དེ་འདི་སྙམ་དུ་བདག་འདི་དང་ལྷན་ཅིག་ཏུ་རྩེ་བར་བྱའོ། །དགའ་བར་བྱའོ། །དགའ་མགུ་སྤྱད་པར་བྱའོ། །བཟོ་ཡང་བསླབ་པར་བྱའོ། །སྙམ་དུ་སེམས་བཏང་བར་གྱུར་ལ། དེ་དེར་བཟློག་པར་ལས་ཀྱི་གནོད་པ་རྣམ་པ་སྣ་ཚོགས་ཀྱིས་གཟིར་བར་འགྱུར་ཏེ། ཡོངས་སུ་ཚབ་ཆེན་པོས་ཀྱང་རེག་པར་འགྱུར་རོ། །ཞེས་སོ། །འདི་དག་ནི་ཐུན་མོང་གི་དམྱལ་བ་ཕལ་ཆེ་བའི་དབང་དུ་གསུངས་པ་ཡིན་ལ། གསང་སྔགས་རྡོ་རྗེའི་ཐེག་པ་ཆེན་པོའི་རྩ་བ་དང་ཡན་ལག་ཉམས་པ་ལ་སོགས་པ་དག་ནི། ཤིན་ཏུ་ལས་དྲག་པས་རྣམ་སྨིན་དྲག་པ་ནི་ཤི་ནས་སྐད་ཅིག་གིས་ཕྱིན་པར་བྱེད་ལ། དེའི་འཇིག་རྟེན་ཞིག་ནའང་གཞན་གྱི་དམྱལ་བར་སྐད་ཅིག་གིས་ཕྱིན་པར་བྱེད་པས་བར་མ་དོ་མེད་དོ། །བཞི་པ་ནི། དེ་ལྟར་གང་དུ། ཞེས་པ་ནས། འབྱུང་བ་མ་བྱུང་ལེན། །ཞེས་པའི་བར་གྱིས་བསྟན་ཏེ། དེ་ལྟ་བས་ན། ཚུལ་དེ་དག་ལྟར་འགྲོ་བ་རིགས་དྲུག་གང་དུ་ཡང་སྐྱེ་བ་འབྱུང་བ་ཡི། གནས་རིས་རྣམས་ཀྱི་བར་དུ་སྲིད་པ་བར་བདུན་པ་དེ་ཉིད་གང་དུ་འབྱུང་བའི་གནས་ཞེ་ན་བར་མ་དོ་གང་ཞིག་ཡོད་པ་དག་གིས་སྔར་གོམས་པའི་ལས་ཀྱིས་སྤྱོད་ཡུལ་དེ་དང་མཐུན་པར་སྣང་ཞིང་དེར་འགྲོ་བ་ཡིན་ལ། དེར་ཡང་རང་ལུས་དེ་ལ་ཞེ་སྡང་ཞིང་སྤྱོད་པའི་ལས་ལ་སེམས་འཁྱིགས་པའམ་འཁྱིམས་ཏེ་སྐྱོ་བར་གྱུར་པས། སྡང་བ་སྐྱེ་བའི་རྒྱུ་དེ་ཡི་དབང་གིས་བར་མ་དོ་དེ་ཡི་ཚེའི་རྒྱུན་འགགས་ནས་རྒྱུ་དེས་ཕྱི་མ་དེ་ཡི་སྐྱེ་བ་གང་ཡིན་པ་ཉིད་སྣང་ཞིང་འབྱུང་བ་ཡིན་པས་སྔར་མ་བྱུང་བའམ་མ་བླངས་པ་ཡི་ལུས་གང་དེ་ཕྱིས་ལེན་པར་འགྱུར་བ་ཉིད་དེ། རྒྱུ་དེ་ལ་ཆགས་པའི་དབང་གིས་སོ། །དེས་ན་བར་མ་དང་ཕྱི་མ་འབྲེལ་བའི་རྒྱུ་དེ་ནི་སྐབས་དེ་ཉིད་ཀྱི་ཆགས་སྡང་དེ་ཡིན་ནོ། །དེ་ལྟར་བར་མའི་ཆོས་བཅུ་བཞིའང་ཡིད་ཀྱི་ལས་སོ། །བཞི་པ་སྐྱེ་གནས་རྣམས་སུ་ཇི་ལྟར་འཇུག་པར་བྱེད་པའི་ཚུལ་བཤད་པ་ལ་གཉིས་ཏེ། སྤྱིའི་འཇུག་ཚུལ་བཞི་བཤད་པ། བྱེ་བྲག་ཏུ་མངལ་དུ་འཇུག་ཚུལ་བཤད་པའོ། །དང་པོ་ནི། བཞི་པ་སྐྱེ་གནས། ཞེས་པ་ནས། བཞིན་དུ་འཇུག་གནས་འབྱུང་། །ཞེས་པའི་བར་གྱིས་བསྟན་ཏེ། ལྔ་ཕྲག་ཐ་མའི་བཞི་པ་སྐྱེ་གནས་སུ་འཇུག་པའི་ཆོས་ལ་དབྱེ་བའི་རྣམ་གྲངས་བཞི་རུ་བསྟན་པ་ཡིན་ཏེ། གང་ཞེ་ན། སངས་རྒྱས་རྣམས་དང་རིག་པ་འཛིན་པ་དང་བྱང་ཆུབ་སེམས་དཔའ་གང་མངལ་དུ་སྐྱེ་བ་རང་དབང་ཅན་དུ་འཇུག་པའང་། མི་དམིགས་པའི་ཡེ་ཤེས་ཆེན་པོའམ་ཤེས་རབ་དང་ལྡན་པའི་སྟོབས་ཀྱིས་མངོན་ཤེས་ཀྱང་ཡོད་ལ་སྒྲིབ་པའང་དག་པས་ན། མའི་མངལ་དུ་སྐྱེ་བའང་ཤེས་བཞིན་དུ་དེར་འཇུག་པ་དང་། ཤེས་བཞིན་དུ་དེ་ནས་གནས་པ་དང་། ཕྱི་རོལ་དུའང་ཤེས་བཞིན་དུ་འབྱུང་བ་དང་སྐྱེ་བ་ཡིན་ཏེ། དེ་རྣམས་ནི་གཞན་གྱི་དོན་དུ་སྐྱེ་བ་བཞེས་པའོ། །དེ་བཞིན་དུ་འཕགས་པ་ཉན་ཐོས་དང་རང་རྒྱལ་བ་རྣམས་ནི། རང་གི་ཏིང་ངེ་འཛིན་གྱིས་ཉོན་མོངས་པ་རགས་པ་སྤོང་བས་མངལ་དུ་ཤེས་བཞིན་དུ་འཇུག་ལ་ཤེས་བཞིན་དུ་དེ་ན་གནས་ཀྱང་བྱང་ཆུབ་སེམས་དཔའ་ལྟར་མི་དམིགས་པའི་ཤེས་རབ་མེད་པའི་རྒྱུས་མངལ་དུ་ཟླ་བ་ཚང་ནས་ཤེས་པ་དེ་ལ་ཉོན་མོངས་པའི་ཆགས་པ་སླར་ལ་ལངས་པས་མངལ་གྱི་དྲི་མས་སྒྲིབས་ཏེ་ཕྱིར་ལ་མི་ཤེས་བཞིན་དུ་འབྱུང་སྟེ་དེ་དག་བདག་གི་དོན་དུ་སྐྱེ་བ་བཞེས་པ་ཡིན་ཏེ། དེ་ནས་གཟོད་ལམ་གོང་མ་ལ་འཇུག་པ་དང་རྟེན་འབྲེལ་ལ་དཔྱོད་པ་དང་ཐེག་པ་ཆེན་པོར་འཇུག་པའི་ཡང་ཕྱིར་རོ། །འཁོར་ལོས་སྒྱུར་བའི་རྒྱལ་པོ་དང་ལྷ་མི་སྟོད་རིམ་རྣམས་ནི། རྣམ་པར་དཀར་བའི་ལས་ཆེར་སྤྱད་པ་དང་། བར་མ་དོར་དབང་པོ་དྭངས་པས་ཤེས་བཞིན་དུ་འཇུག་པ་ཡིན་ཀྱང་མངལ་ན་གནས་ཙམ་ན་ཁུ་ཁྲག་གདོས་པ་ཅན་གྱིས་བཟུང་བས་མི་ཤེས་བཞིན་དུ་དེར་གནས་ནས་མི་ཤེས་བཞིན་དུ་ཕྱིར་འབྱུང་ཞིང་སྐྱེ་བ་དང་། ལྷ་མི་ཕལ་པ་མན་ཆད་ཀྱི་སེམས་ཅན་རྣམས་ནི་ལས་ངན་པ་ཚན་ཆེ་བས་ཤེས་པ་ལས་ཀྱིས་བསྒྲིབས་ཤིང་རྙོགས་པར་བྱས་པས་མངལ་དུའང་རང་གི་གནས་སུ་མཐོང་ནས་དེར་འགྲོ་བས་མི་ཤེས་བཞིན་དུ་འཇུག་ཅིང་མི་ཤེས་བཞིན་དུ་དེ་ན་གནས་ཏེ། མི་ཤེས་བཞིན་དུ་ཕྱིར་ཡང་འབྱུང་ཞིང་སྐྱེ་བ་ཡིན་པས། དེ་ལྟར་རིམ་པའི་དབང་དུ་ན་སྐྱེ་བའི་ཁྱད་པར་དེ་ལ་རེ་རེ་ཡོད་དོ། །སྐབས་འདིར་འགྲེལ་ཆེན་ལས། དཀྲུགས་ན་ནི་ཁྱད་པར་ལྡབ་པ་དང་སུམ་གཉིས་དང་བྱེད་པ་དང་རེ་རེ་ཡོད་པར་འགྱུར་རོ། །ཞེས་གསུངས་ཏེ། འདི་ལ་སོ་སོར་འཇུག་པའི་རིགས་ཅན་གྱི་རྣམ་གྲངས་ལ་བརྟེན་ནས་ཁྱད་པར་དཀྲུགས་ཏེ་བརྗོད་པའི་འཆད་ཚུལ་ཡང་སྤྱིའི་བཀའ་སྲོལ་ལྟར་བྱས་ན་ཡོད་པར་མངོན་ཀྱང་། འདིར་ཡེ་ཤེས་སྣང་བ་རྒྱན་གྱི་མདོ་ལས་གསུངས་པ་བཞིན་ཏེ། ཞེས་བཞུགས་པའི་ཕྱིར། དེ་ལྟར་ན་མི་དམིགས་པའི་ཤེས་རབ་ཀྱི་ཁྱད་པར་ལ་སྦྱར་བར་གསལ་བས་ཁྱད་པར་ལྡབ་པ་ནི། དེ་ལྟར་འཇུག་པའི་ཆོས་བཞིའི་ཁྱད་པར་ལྡབ་ནས་བསྟན་པ་སྟེ། མདོ་ཉིད་ལས། དེ་བཞིན་ཉིད་ཅེས་བྱ་བ་དེ་ནི་དེ་ཁོ་ནའི་དོན་གྱི་ཚིག་བླ་དྭགས་ཡིན་ནོ། །དེ་ཁོ་ན་ཞེས་བྱ་བ་ནི་དེ་བཞིན་ཉིད་ཁོ་ནའོ། །དེ་བཞིན་ཉིད་དེ་ཁོ་ན་ནི་དེ་བཞིན་ཉིད་དོ། །དེ་བཞིན་ཉིད་དང་བདག་དེ་ནི་གཉིས་སུ་མེད་དེ་གཉིས་སུ་བྱར་མེད་དོ། །གཉིས་སུ་བྱར་མེད་པའི་དོན་གང་ཡིན་པ་དེ་ནི་བྱང་ཆུབ་སྟེ། བྱང་ཆུབ་ནི་དོན་རྟོགས་པའོ། །དོན་ཅེས་བྱ་བ་ནི་ཆོས་བསྟན་པ་ཐམས་ཅད་ལ་རྣམ་པར་ཐར་པའི་སྒོ་གསུམ་དུ་འཇུག་པ་ཤེས་པའོ། །ཤེས་པ་ཞེས་བྱ་བ་ནི་ཆོས་ཐམས་ཅད་ལ་དུས་གསུམ་མཉམ་པ་ཉིད་དུ་འཇུག་པའོ། །ཞེས་དང་། འཇམ་དཔལ་སྟོང་པ་ཉིད་རྗེས་སུ་རྟོགས་པའི་ཕྱིར་ཏེ། སྟོང་པ་ཉིད་རྗེས་སུ་རྟོགས་པ་གང་ཡིན་པ་དེ་ནི་བྱང་ཆུབ་བོ། །ཞེས་དང་། ངེས་པའི་དོན་དང་དྲང་བའི་དོན་མཉམ་པ་ཉིད་ཀྱིས་དོན་མཉམ་པ་དེ་ནི་སྟོང་པ་ཉིད་དོ། །སྟོང་པ་ཉིད་དུ་དོན་མཉམ་པས་གང་ཟག་མཉམ་པ་ཉིད་མཉམ་མོ། །གང་ཟག་མཉམ་པ་ཉིད་ཀྱིས་ཆོས་མཉམ་པ་ཉིད་མཉམ་མོ། །ཆོས་མཉམ་པ་ཉིད་ཀྱིས་རྣམ་པར་གྲོལ་བ་མཉམ་པ་ཉིད་མཉམ་སྟེ་རྣམ་པར་གྲོལ་བ་མཉམ་པ་ཉིད་རྗེས་སུ་རྟོགས་པ་ནི་བྱང་ཆུབ་བོ། །འཇམ་དཔལ་གཟུགས་ལ་ཆགས་པས་ཆགས་པར་གྱུར་པ་རྣམས་ཀྱིས་མིག་ནི་ཆགས་པ་ཡིན་ནོ། །གཟུགས་དང་མིག་གི་རང་བཞིན་ཤེས་པ་ནི་ཆགས་པ་མེད་པ་ཡིན་ནོ། །ལྟ་བ་ལ་ཆགས་པས་ཆགས་པར་གྱུར་པ་རྣམས་ཀྱིས་རང་གི་ལུས་ནི་ཆགས་པ་ཡིན་ནོ། །ལྟ་བར་གྱུར་པ་ཐམས་ཅད་ཀྱི་རང་གི་ལུས་ཀྱི་རང་བཞིན་སྟོང་པ་ཉིད་དུ་ཤེས་པ་ནི་ཆགས་པ་མེད་པ་ཡིན་ནོ། །ཚུལ་བཞིན་མ་ཡིན་པ་ཡིད་ལ་བྱེད་པ་ལ་ཆགས་པས་ཆགས་པར་གྱུར་པ་རྣམས་ཀྱི་ཆོས་ཀྱི་སྣང་བ་ནི་ཆགས་པ་ཡིན་ནོ། །ཚུལ་བཞིན་ཡིད་ལ་བྱེད་པའི་ཆོས་ལ་སོ་སོར་རྟོག་ཅིང་ངོ་བོ་ཉིད་ཀྱིས་རང་བཞིན་སྟོང་པ་ཉིད་དུ་ཤེས་པ་ནི་ཆགས་པ་མེད་པ་ཡིན་ནོ། །ཐེ་ཚོམ་གྱི་དྲི་མ་ལ་ཆགས་པས་ཆགས་པར་གྱུར་པ་རྣམས་ཀྱི་ཐར་པ་ནི་ཆགས་པ་ཡིན་ནོ། །མོས་པ་དང་རྣམ་པར་གྲོལ་བ་ཡང་དག་པ་ཇི་ལྟ་བ་བཞིན་དུ་ཤེས་པ་ནི་ཆགས་པ་མེད་པ་ཡིན་ནོ། །ལེ་ལོའི་དྲི་མ་ལ་ཆགས་པས་ཆགས་པར་གྱུར་པ་རྣམས་ཀྱི་རྟོགས་པར་བྱ་བ་ལ་བརྩོན་འགྲུས་བརྟན་པ་ཉིད་ནི་ཆགས་པ་ཡིན་ནོ། །ཆོས་ཇི་ལྟ་བ་བཞིན་དུ་རྟོགས་པ་ནི་ཆགས་པ་མེད་པ་ཡིན་ནོ། །སྒྲིབ་པ་ལ་ཆགས་པས་ཆགས་པར་གྱུར་པ་རྣམས་ཀྱི་བྱང་ཆུབ་ཀྱི་ཡན་ལག་རྣམས་ནི་ཆགས་པ་ཡིན་ནོ། །སྒྲིབ་པ་མེད་པའི་རྣམ་པར་ཐར་པ་ཤེས་པ་ནི་ཆགས་པ་མེད་པ་ཡིན་ནོ། །ཞེས་སོགས་གསུངས་པ་ལྟར་རོ། །སུམ་གཉིས་ནི། དམིགས་པ་མེད་པའི་ཤེས་རབ་ཆེན་པོ་རང་གི་ཁྱད་པར་གྱི་ཆོས་བསྟན་པ་སྟེ། དེ་ཉིད་ལས། འཇམ་དཔལ་བྱང་ཆུབ་ནི་ཞི་བ་དང་ཉེ་བར་ཞི་བ་ཡིན་ཏེ། དེ་ལ་ཞི་བ་ནི་གང་། ཉེ་བར་ཞི་བ་ནི་གང་ཞེ་ན། ནང་ནི་ཞི་བ་ཡིན་ནོ། །ཕྱི་རོལ་ནི་ཉེ་བར་ཞི་བ་ཡིན་ནོ། །དེ་ཅིའི་ཕྱིར་ཞེ་ན། འཇམ་དཔལ་མིག་ནི་བདག་དང་བདག་གིས་སྟོང་སྟེ། དེའི་རང་བཞིན་དེ་ཡིན་པའི་ཕྱིར་དེ་ནི་ཞི་བ་ཞེས་བྱའོ། །དེས་མིག་སྟོང་པ་ཞེས་བྱ་བར་ཡོངས་སུ་ཤེས་ནས་གཟུགས་རྣམས་ལ་མི་རྒྱུག་སྟེ། དེའི་ཕྱིར་ཉེ་བར་ཞི་བ་ཞེས་བྱའོ། །ཞེས་སོགས་ནས། ལུས་ནི་བདག་དང་བདག་གིས་སྟོང་སྟེ། དེའི་རང་བཞིན་དེ་ཡིན་པའི་ཕྱིར་དེ་ནི་ཞི་བ་ཞེས་བྱའོ། །དེས་ལུས་སྟོང་པ་ཞེས་བྱ་བར་ཡོངས་སུ་ཤེས་ནས་རེག་བྱ་རྣམས་ལ་མི་རྒྱུག་སྟེ། དེའི་ཕྱིར་ཉེ་བར་ཞི་བ་ཞེས་བྱའོ། །འཇམ་དཔལ་ཡིད་ནི་བདག་དང་བདག་གིས་སྟོང་སྟེ། དེའི་རང་བཞིན་དེ་ཡིན་པའི་ཕྱིར་དེ་ནི་ཞི་བ་ཞེས་བྱའོ། །དེའི་ཡིད་སྟོང་པ་ཞེས་བྱ་བར་ཡོངས་སུ་ཤེས་ནས་ཆོས་རྣམས་ལ་མི་རྒྱུག་སྟེ། དེའི་ཕྱིར་ཉེ་བར་ཞི་བ་ཞེས་བྱའོ། །འཇམ་དཔལ་བྱང་ཆུབ་ནི་སེམས་ཀྱི་རང་བཞིན་འོད་གསལ་བ་ཉིད་ཀྱིས་རང་བཞིན་འོད་གསལ་བ་ཡིན་ཏེ་ཅིའི་ཕྱིར་འོད་གསལ་བ་ཞེས་བྱ་ཞེ་ན། རང་བཞིན་གང་ཡིན་པ་དེ་ནི་ཀུན་ནས་ཉོན་མོངས་པ་མེད་པ་ནམ་མཁའ་དང་མཉམ་པ། ནམ་མཁའི་རང་བཞིན་ཅན། ནམ་མཁར་ཡང་དག་པར་འདུ་བ། ནམ་མཁའ་ལྟ་བུ་སྟེ། རང་བཞིན་གྱིས་ཤིན་ཏུ་འོད་གསལ་བ་ཡིན་པའི་ཕྱིར་རོ། །ཞེས་དང་། འཇམ་དཔལ་སེམས་ནི་རང་བཞིན་གྱིས་འོད་གསལ་བའི་ཕྱིར་ཏེ། དེ་ནི་གློ་བུར་གྱི་ཉེ་བའི་ཉོན་མོངས་པ་ཐམས་ཅད་ཀྱིས་ཉེ་བར་ཉོན་མོངས་པར་ཟད་ཀྱི། རང་བཞིན་གྱིས་ཀུན་ནས་ཉོན་མོངས་པ་ཉིད་མ་ཡིན་ནོ། །རང་བཞིན་གྱིས་འོད་གསལ་བ་ཉིད་གང་ཡིན་པ་དེ་ནི་ཀུན་ནས་ཉོན་མོངས་པ་མེད་པ་ཉིད་ཡིན་ནོ། །ཀུན་ནས་ཉོན་མོངས་པ་མེད་པ་གང་ཡིན་པ་དེ་ལ་ནི་གཉེན་པོ་གང་གིས་ཉོན་མོངས་པ་སྤོང་བར་འབྱོར་བའི་གཉེན་པོ་མེད་དོ། །དེ་ཅིའི་ཕྱིར་ཞེ་ན། འཇམ་དཔལ་དེ་ནི་དག་པ་ཉིད་ཡིན་པས་དག་པ་ནི་དག་པར་མི་འགྱུར་བའི་ཕྱིར་ཏེ། དག་པ་གང་ཡིན་པ་དེ་ནི་སྐྱེ་བ་མེད་པའོ། །ཞེས་དང་། འཇམ་དཔལ་བྱང་ཆུབ་ནི་བླང་བ་མེད་པ་ཉིད་དང་། དོར་བ་མེད་པ་ཉིད་ཡིན་ཏེ། ཞེས་པ་ནས། བྱང་ཆུབ་ནི་མཚན་མ་མེད་པ་ཉིད་དང་། དམིགས་པ་མེད་པ་ཉིད་ཡིན་ཏེ། དེ་ལ་མཚན་མ་མེད་པ་ཉིད་ནི་གང་། དམིགས་པ་མེད་པ་ཉིད་ནི་གང་ཞེ་ན། འཇམ་དཔལ་མིག་གི་རྣམ་པར་ཤེས་པ་མི་དམིགས་པ་ནི་མཚན་མ་མེད་པ་ཉིད་ཡིན་ནོ། །གཟུགས་ཡང་དག་པར་རྗེས་སུ་མི་མཐོང་བ་ནི་དམིགས་པ་མེད་པ་ཉིད་ཡིན་ནོ། །ཞེས་པ་ནས་རྣ་བའི་རྣམ་ཤེས་སོགས་ལའང་དེ་ལྟར་སྦྱར་ཏེ། ཡིད་ཀྱི་རྣམ་པར་ཤེས་པ་མི་དམིགས་པ་ནི་མཚན་མ་མེད་པ་ཡིན་ནོ། །ཆོས་རྣམས་རྣམ་པར་ཤེས་པར་བྱར་མེད་པ་ནི་དམིགས་པ་མེད་པ་ཉིད་ཡིན་ནོ། །འཇམ་དཔལ་དེ་ནི་འཕགས་པ་རྣམས་ཀྱི་སྤྱོད་ཡུལ་ཡིན་ཏེ། འཇམ་དཔལ་གང་ཁམས་གསུམ་པའི་སྤྱོད་ཡུལ་མ་ཡིན་པ་དེ་ནི་འཕགས་པ་རྣམས་ཀྱི་སྤྱོད་ཡུལ་ཡིན་ནོ། །ཞེས་སོགས་གསུངས་པས་བསྟན་ཏོ། །བྱེད་པ་ནི། འཇམ་དཔལ་ཆོས་ཐམས་ཅད་ཀྱི་ངོ་བོ་ཉིད་གང་ཡིན་པ་དེ་ནི་ངོ་བོ་ཉིད་མེད་པ་སྟེ། ངོ་བོ་ཉིད་མེད་པ་གང་ཡིན་པ་དེ་ལ་ནི་གཉིས་སུ་མེད་པའི་ཕྱིར་རོ། །འཇམ་དཔལ་བྱང་ཆུབ་དེ་ནི་དབྱེར་མེད་པའི་གཞི་ཡིན་ཏེ། དེ་ལ་དབྱེར་མེད་པ་ནི་གང་། གཞི་ནི་གང་ཞེ་ན། མིང་མེད་པ་ནི་དབྱེར་མེད་པའོ། །དེ་བཞིན་ཉིད་ནི་གཞིའོ། །གནས་མེད་པ་ནི་དབྱེར་མེད་པའོ། །ཆོས་ཀྱི་དབྱིངས་ནི་གཞིའོ། །ཐ་དད་པ་མེད་པ་ནི་དབྱེར་མེད་པའོ། །ཡང་དག་པའི་མཐའ་ནི་གཞིའོ། །དམིགས་པ་མེད་པ་ནི་དབྱེར་མེད་པའོ། །གཡོ་བ་མེད་པ་ནི་གཞིའོ། །ཞེས་སོགས་ནས། འཇམ་དཔལ་ཡང་དག་པར་བྱང་ཆུབ་ཡོངས་སུ་ཚོལ་བ་ན་ཡང་ཆོས་ཐམས་ཅད་ཀྱིས་བརྗོད་པར་བྱ་བ་མ་ཡིན་ནོ། །དེ་ཅིའི་ཕྱིར་ཞེ་ན། འཇམ་དཔལ་ཡང་དག་པར་ནི་ཚིག་ནི་མ་སྐྱེས་པ་དང་། མ་འགགས་པ་ཡིན་པས་ཡོད་པ་མ་ཡིན་པའི་ཕྱིར་རོ། །འཇམ་དཔལ་བྱང་ཆུབ་ནི་གཟུང་བ་མེད་པ་ཉིད་དང་། གནས་མེད་པ་ཉིད་ཡིན་ཏེ། འཇམ་དཔལ་དེ་ལ་གཟུང་བ་མེད་པ་ནི་གང་། གནས་མེད་པ་ནི་གང་ཞེ་ན། འཇམ་དཔལ་མིག་ཡོངས་སུ་ཤེས་པ་ནི་གཟུང་བ་མེད་པ་ཉིད་ཡིན་ནོ། །གཟུགས་དམིགས་སུ་མེད་པ་ནི་གནས་མེད་པ་ཉིད་ཡིན་ནོ། །ཞེས་པ་ནས། ཡིད་ཡོངས་སུ་ཤེས་པ་ནི་གཟུང་བ་མེད་པ་ཉིད་ཡིན་ནོ། །ཆོས་དམིགས་སུ་མེད་པ་ནི་གནས་མེད་པ་ཉིད་ཡིན་ནོ། །དེ་བཞིན་གཤེགས་པས་ནི་དེ་ལྟར་གཟུང་བ་མེད་པ་ཉིད་དང་གནས་མེད་པ་ཉིད་དུ་བྱང་ཆུབ་མངོན་པར་རྫོགས་པར་སངས་རྒྱས་ཏེ། མངོན་པར་རྫོགས་པར་སངས་རྒྱས་ནས་ཀྱང་མིག་གཟུང་དུ་མེད་པ་དང་། གཟུགས་དམིགས་སུ་མེད་པའི་ཕྱིར། མིག་གི་རྣམ་པར་ཤེས་པ་ལ་མི་གནས་སོ། །རྣ་བ་གཟུང་དུ་མེད་པ་སོགས་ནས། ཡིད་གཟུང་དུ་མེད་པ་དང་། ཆོས་དམིགས་སུ་མེད་པའི་ཕྱིར་ཡིད་ཀྱི་རྣམ་པར་ཤེས་པ་ལ་མི་གནས་ཏེ། དེའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་རྣམ་པར་ཤེས་པ་ལ་མི་གནས་པ་དང་ལྡན་པ་ཞེས་བྱ་བའི་གྲངས་སུ་འགྲོའོ། །ཞེས་པ་ནས། འཇམ་དཔལ་དེ་ལ་སེམས་ཅན་མ་རིག་པས་ལྡོངས་བར་བྱས་པ། སྲེད་པས་དཀྲུགས་པར་གྱུར་པ་དག་ནི་ཕན་ཚུན་མངོན་པར་ཞེན་པར་གྱུར་ནས་ལེན་པར་བྱེད་ཀྱི་དེ་བཞིན་གཤེགས་པས་ནི་བདག་ཏུ་སྨྲ་བའི་ལེན་པ་རྩ་བ་ཡིན་པར་ཡོངས་སུ་ཤེས་ནས་བདག་རྣམ་པར་དག་པས་སེམས་ཅན་ཐམས་ཅད་རྣམ་པར་དག་པ་རྗེས་སུ་རྟོགས་པར་གྱུར་ཏེ། བདག་རྣམ་པར་དག་པ་གང་ཡིན་པ་དང་། སེམས་ཅན་ཐམས་ཅད་རྣམ་པར་དག་པ་གང་ཡིན་པ་དེ་ནི་གཉིས་སུ་མེད་དེ་གཉིས་སུ་དབྱེར་མེད་ལ། གཉིས་སུ་མེད་པའི་དོན་གང་ཡིན་པ་དེ་ནི་སྐྱེ་བ་མེད་པ་དང་འགག་པ་མེད་པ་ཡིན་ནོ། །འཇམ་དཔལ་སྐྱེ་བ་མེད་པ་དང་། འགག་པ་མེད་པ་ལ་ནི་སེམས་དང་ཡིད་དང་རྣམ་པར་ཤེས་པ་འཇུག་པར་མི་འགྱུར་ཏེ། འཇམ་དཔལ་གང་ལ་སེམས་དང་ཡིད་དང་རྣམ་པར་ཤེས་པ་མི་འཇུག་པ་དེ་ལ་ནི་ཡོངས་སུ་རྟོགས་པ་གང་གིས་ཚུལ་བཞིན་མ་ཡིན་པ་ཡིད་ལ་བྱེད་པར་འགྱུར་བའི་ཡོངས་སུ་རྟོག་པ་གང་ཡང་མེད་དོ། །ཚུལ་བཞིན་ཡིད་ལ་བྱེད་པ་ལ་རབ་ཏུ་བརྩོན་པ་དེ་ནི་མ་རིག་པ་ཀུན་ནས་སློང་བར་མི་བྱེད་དོ། །མ་རིག་པ་ཀུན་ནས་ལྡང་བ་མེད་པ་གང་ཡིན་པ་དེ་ནི་སྲིད་པའི་ཡན་ལག་བཅུ་གཉིས་པོ་དག་གི་ཀུན་ནས་སློང་བ་མེད་པ་ཡིན་ནོ། །སྲིད་པའི་ཡན་ལག་བཅུ་གཉིས་པོ་དག་གི་ཀུན་ནས་ལྡང་བ་མེད་པ་གང་ཡིན་པ་དེ་ནི་སྐྱེ་བ་མེད་པ་ཡིན་ནོ། །ཞེས་པ་ནས། དེའི་ཕྱིར་གང་གིས་རྟེན་ཅིང་འབྲེལ་བར་འབྱུང་བ་མཐོང་བ་དེས་ཆོས་མཐོང་ངོ་། །གང་གིས་ཆོས་མཐོང་བ་དེས་དེ་བཞིན་གཤེགས་པ་མཐོང་ངོ་ཞེས་གསུངས་ཏེ་ཇི་ལྟར་ཡོངས་སུ་ཚོལ་བ་ན་ཅི་ཡང་མི་མཐོང་བ་དེ་ལྟར་མཐོང་ངོ་། །འཇམ་དཔལ་དེ་ལ་ཅི་ཡང་ཞེས་བྱ་བ་གང་ཞེ་ན། འདི་ལྟ་སྟེ། སེམས་དང་དམིགས་པ་སྟེ། དེས་གང་གི་ཚེ་སེམས་དང་དམིགས་པ་ཡང་དག་པར་རྗེས་སུ་མི་མཐོང་བ་དེའི་ཚེ་ན་ཡང་དག་པར་མཐོང་བ་ཡིན་པས། དེ་བཞིན་གཤེགས་པས་ནི་ཆོས་དེ་དག་དེ་ལྟར་མཉམ་པ་ཉིད་ཀྱིས་མཉམ་པར་མངོན་པར་རྫོགས་པར་སངས་རྒྱས་སོ། །ཞེས་སོགས་ནས། དེའི་ཕྱིར་དེ་བཞིན་གཤེགས་པ་རྣམས་བྱུང་ཡང་རུང་། མ་བྱུང་ཡང་རུང་། ཆོས་ཉིད་དང་ཆོས་གནས་པ་ཉིད་དང་ཆོས་ཀྱི་དབྱིངས་འདི་ནི་གནས་པ་ཁོ་ན་ཞེས་བྱ་སྟེ། ཇི་ལྟར་ཆོས་ཀྱི་དབྱིངས་ལ་གནས་པ་དེ་བཞིན་དུ་ཤེས་པ་དེ་ཡང་འཇུག་པར་མི་བྱེད་ལྡོག་པར་མི་བྱེད་དོ། །ཇི་ལྟར་ཤེས་པ་དེ་འཇུག་པར་མི་བྱེད། ལྡོག་པར་མི་བྱེད་པ་དེ་ལྟ་བུའི་ཆོས་ཀྱི་ཚུལ་ལ་འཇུག་པས་ཟག་པ་སྐྱེད་པར་མི་བྱེད་འགག་པར་མི་བྱེད་དོ། །འཇམ་དཔལ་ཟག་པ་ཟད་པ་ཞེས་བྱ་བ་དེ་ནི་ཐ་སྙད་དང་སྒྲ་དང་ཡི་གེ་དང་བརྡར་གདགས་པ་ཡིན་ཏེ། འདི་ལ་ནི་སྐྱེ་བའམ་འགག་པར་འགྱུར་བའི་ཆོས་གང་ཡང་མེད་དོ། །ཞེས་བཀའ་སྩལ་བར་མཛད་དེ། དེ་ལྟ་བུའི་བྱེད་ལས་དང་ལྡན་པ་དེ་ནི་མི་དམིགས་པའི་ཤེས་རབ་ཡང་དག་པ་ཡིན་པས་བློ་དང་ལྡན་པ་དག་གིས་ཚུལ་བཞིན་དུ་ངེས་པར་བྱའོ། །འདི་དག་གི་དོན་འགྲེལ་བར་བྱས་ན་ཤིན་ཏུ་མང་བར་འགྱུར་བས་མ་སྤྲོས་ལ། འདིར་སྐྱེ་གནས་སུ་འཇུག་པའི་ཆོས་བཤད་པའི་སྐབས་སུ་གནད་ཆེ་བའི་ཕྱིར་དང་། འདི་དག་གི་དོན་གྱི་རང་བཞིན་རྟོགས་པར་དཀའ་ཞིང་དོན་བསྡུས་སུ། དོན་དམ་ངེས་པའི་ཐེག་མཆོག་ལས། །གསང་སྒོ་མཚོན་པའི་མདོ་རྒྱུད་དོན། །ཞེས་འབྱུང་བ་ལྟར། ངེས་དོན་གྱི་མདོ་སྡེ་ཟབ་མོའི་དགོངས་པ་ཕྱིན་ཅི་མ་ལོག་པར་ངེས་ན་ལུང་ཆེན་གསང་མཆོག་རྒྱལ་པོའི་ཇི་བཞིན་པའི་གནས་ལའང་གཞན་དྲིང་མི་འཇོག་པའི་ངེས་པ་རྙེད་པར་འགྱུར་བའི་ཕྱིར་བཀའ་ལུང་གི་ཚིག་དོན་སྙན་ཅིང་ཟབ་ལ་ཞལ་གསལ་བ་རྣམས་ཅུང་ཟད་དྲངས་པ་ཡིན་ནོ། །འོན་ཀྱང་དེ་བཞིན་གཤེགས་པ་རྟག་ཏུ་སྐྱེ་མེད་ཆོས། །ཆོས་རྣམས་ཀུན་ཀྱང་བདེ་བར་གཤེགས་དང་འདྲ། །བྱིས་པའི་བློ་ཅན་མཚན་མར་འཛིན་པ་རྣམས། །འཇིག་རྟེན་དག་ན་མེད་པའི་ཆོས་ལ་སྤྱོད། །དེ་བཞིན་གཤེགས་པ་ཟག་མེད་དགེ་བ་ཡི། །ཆོས་ཀྱི་གཟུགས་བརྙན་ཡིན་ཏེ་འདི་ལ་ནི། །དེ་བཞིན་ཉིད་མེད་དེ་བཞིན་གཤེགས་པའང་མེད། །འཇིག་རྟེན་ཀུན་ཏུ་གཟུགས་བརྙན་ཀུན་ཏུ་སྣང་། །ཞེས་གསུངས་ཏེ་གནས་འདི་དག་ཤིན་ཏུ་ཟབ་ཅིང་རྒྱ་ཆེ་བ་ཡིན་པས་རྒྱས་པར་མདོ་ཉིད་དང་མཁས་གྲུབ་གོང་མའི་ལེགས་བཤད་རྣམས་ལས་ཤེས་པར་བྱའོ། །གཉིས་པ་ལ་གཉིས་ཏེ། ཉེ་བར་བསྟན་པ། རླུང་བདུན་ཕྲག་སུམ་ཅུ་རྩ་བརྒྱད་ཀྱིས་སྨིན་ཅིང་སྐྱེ་བ་རྒྱས་པར་བཤད་པའོ། །དང་པོ་ནི། འཛིན་དང་འདྲེས་པའི། ཞེས་པ་ནས། ཐམས་ཅད་སྨིན་པར་འགྱུར། །ཞེས་པའི་བར་གྱིས་བསྟན་ཏེ། ཇི་སྐད་དུ། མདོ་ལས། གནས་གསུམ་མངོན་དུ་གྱུར་ན་མངལ་དུ་འཇུག་པར་འགྱུར་ཏེ། མ་ཉམས་༢བདེ་ཞིང་ཟླ་མཚན་དང་ལྡན་པ་དང་། ཕ་དང་༡མ་ཆགས་པར་གྱུར་ཅིང་ཕྲད་པ་དང་། དྲི་ཟ་ཡང་ཉེ་བར་གནས་པར་གྱུར་ནའོ། །ཞེས་གསུངས་པ་ལྟར། ཕ་མ་གཉིས་ཆགས་ཤིང་ཕྲད་པའི་ས་བོན་གྱིས་བར་མའི་སྲིད་པའི་རྣམ་ཤེས་འཛིན་པ་དང་། མངལ་དུ་ཟླ་མཚན་དང་ཁུ་བ་འདྲེས་པ་དེར་འདྲེན་པའི་ཚུལ་གྱིས། དྲི་ཟ་ཉེར་འཁོར་དེ་ན་གནས་པ་དེ་ཉིད་ཇི་ལྟར་འཛིན་པའི་ཚུལ་ཡང་། དེ་ལྟར་གནས་གསུམ་མཐུན་པས་བར་མ་དོའི་ཤེས་པ་མིའི་མངལ་དུ་སྐྱེ་བ་འཛིན་པར་བྱེད་པ་ཡིན་ཏེ། དེའང་མི་མཐུན་པར་གྱུར་པའི་སྐྱེ་གནས་ཀྱི་བར་ཆད་དང་། ས་བོན་གྱི་བར་ཆད་དང་། ལས་ཀྱི་བར་ཆད་རྣམས་ཀྱིས་ཉེས་པའི་བར་ཆད་གསུམ་པོ་དག་མེད་པར་བཤད་པ་ལྟར་གནས་གསུམ་མཐུན་པས་དེ་ལས་བཟློག་པ་བཞིན་གྱུར་ན་མའི་མངལ་དུ་སྐྱེ་བའི་སེམས་ཅན་ཐམས་ཅད་སྨིན་པའམ་སྐྱེ་བ་མཐར་ཕྱིན་པར་འགྱུར་བའོ། །དེ་ཡང་སའི་དངོས་གཞི་ལས། དེ་ལ་སྐྱེ་གནས་ཀྱི་ཉེས་པ་གང་ཞེ་ན། གལ་ཏེ་རླུང་གིས་མ་རུང་བར་བྱས་པའམ། མཁྲིས་པས་མ་རུང་པར་བྱས་པའམ། བད་ཀན་གྱིས་མ་རུང་བར་བྱས་པའམ། དཔུང་ནས་འདྲ་བའམ། དབུང་ཏིལ་འབྲུ་འདྲ་བའམ། ཁ་ཤིང་རྟ་འདྲ་བའམ། ཁ་དུང་འདྲ་བའམ། མཚན་མ་ཙམ་ཡོད་པའམ། ཡོ་བའམ། སྐྱོན་ཡོད་པའམ། སྐ་བ་ཡོད་པའམ། དེ་ལྟ་བུ་དང་མཐུན་པ་རྣམས་ནི་སྐྱེ་གནས་ཀྱི་ཉེས་པ་ཡིན་པར་རིག་པ་བྱའོ། །ཞེས་གསུངས་ཏེ། དེའང་གློ་བུར་གྱི་བར་ཆད་དང་། ལྷན་ཅིག་སྐྱེས་པའི་བར་ཆད་གཉིས་ཏེ། དང་པོ་ནི་འདུ་བ་རྣམ་བཞིའི་ནད་ཀྱིས་འཕྲལ་དུ་མ་རུང་པར་བྱས་པའོ། །གཉིས་པར་ཡང་དབྱིབས་གྱུར་པ་ནི། མངལ་གྱི་དབྱིབས་ནས་འདྲ་བ་དང་། ཏིལ་དང་ཤིང་རྟ་འདྲ་བ་དང་། དུང་འདྲ་བ་དང་། ཐང་པའམ་ཡོ་བའམ། འདི་ལ་ལ་ལར་ཡོབ་ཆེན་ལྟ་བུ་ཞེས་འབྱུང་། སྦྲ་ལྟ་བུ་འཁྱིལ་བ་དང་། གྲ་མ་ལྟ་བུས་གང་བ་དང་། ཕྱིར་ལུག་སྟེ་འབྱུང་གནས་ལྟ་བུ་དང་། རྔ་མོའི་ཁ་ལྟ་བུ་དང་དེ་དག་སྟེ། དེ་ལྟར་དབྱེ་བས་གྱུར་པས་ནི་སྐྱེ་གནས་ཀྱིས་ཁུ་ཆུ་གཞིབས་ནས་ཕྱིར་འཛག་པའམ་མི་འཇིབ་པའོ། །གལ་ཏེ་དབྱིབས་མ་གྱུར་ནའང་པགས་ཤུན་ལ་རྨའི་སྐྱོན་ཡོད་དེ། དེར་རྣག་དང་ཆུ་སེར་སོགས་དང་འདྲེས་ན་ཁུ་ཆུ་དེ་རུལ་བར་འགྱུར་ལ། སྐ་བ་ཡོད་ནའང་ཡང་ནས་ཡང་དུ་སྐལ་པར་འགྱུར་བས་ནལ་ནལ་པོར་མི་འཇུག་སྟེ། དེའི་ཕྱིར་དེར་ཁུ་ཆུ་དང་ཁྲག་ཟད་པར་འགྱུར་རོ། །ཞེས་སའི་རྣམ་བཤད་ལས་བསྟན་ཏོ། །ས་བོན་གྱི་བར་ཆད་ཡང་སྔ་མ་ལས། ས་བོན་གྱི་ཉེས་པ་གང་ཞེ་ན། གལ་ཏེ་ཕའི་ཁུ་བ་བྱུང་ལ་མའི་མ་བྱུང་བའམ། མའི་བྱུང་ལ་ཕའི་མ་བྱུང་བའམ། གཉི་གའི་མ་བྱུང་བའམ། མའི་རུལ་ཏམ། ཕའི་རུལ་ཏམ། གཉི་གའི་རུལ་ཏམ། དེ་ལྟ་བུ་དང་མཐུན་པ་རྣམས་ནི་ས་བོན་གྱི་ཉེས་པ་ཡིན་པར་རིག་པར་བྱའོ། །ཞེས་ཏེ། ས་བོན་ཨ་རུ་ར་ལྟ་བུར་སྐ་བ་དང་། སྔ་ཕྱིར་གྱུར་པ་ལ་སོགས་པའོ། །ལས་ཀྱི་བར་ཆད་ཡང་། དེ་ཉིད་ལས། ལས་ཀྱི་ཉེས་པ་གང་ཞེ་ན། གང་ཏེ་ཕའམ་མའམ། ཡང་ན་གཉི་གས་བུ་ཡོང་བར་འགྱུར་བའི་ལས་མ་བྱས་ཤིང་མ་བསགས་སམ། ཡང་ན་སེམས་ཅན་དེས་ཕ་མ་ཡོད་པར་འགྱུར་བའི་ལས་མ་བྱས་ཤིང་མ་བསགས་སམ། ཡང་ན་ཕ་མ་དེ་གཉིས་ཀྱིས་བུ་དེ་མ་ཡིན་པ་ཡོད་པར་འགྱུར་བའི་ལས་བྱས་ཤིང་བསགས་སམ། ཡང་ན་སེམས་ཅན་དེས་དེ་མ་ཡིན་པ་དབང་ཆེ་བར་གྲགས་པ་དང་། དབང་ཆེ་བར་གྲགས་པ་མ་ཡིན་པ་ཕ་མར་འགྱུར་བའི་ལས་བྱས་ཤིང་བསགས་པའམ། དེ་ལྟ་བུ་དང་མཐུན་པ་རྣམས་ནི་ལས་ཀྱི་ཉེས་པ་ཡིན་པར་རིག་པར་བྱ་སྟེ། ཉེས་པ་དེ་དག་ཀྱང་མེད་ལ། གནས་གསུམ་ཡང་མངོན་སུམ་དུ་གྱུར་ན་མངལ་དུ་འཇུག་པར་འགྱུར་རོ། །ཞེས་ཏེ། ཕ་མ་དང་བར་དོ་བསོད་ནམས་ཆེ་ཆུང་དུ་གྱུར་པ་དང་། བསོད་ནམས་མཉམ་ཡང་ཕན་ཚུན་ཕ་མ་དང་བུར་འགྱུར་བའི་ལས་མ་བསགས་པ་ལ་སོགས་པའོ། །གཉིས་པ་ནི། དེ་ཡང་འབྱུང་གནས། ཞེས་པ་ནས། ཟ་བར་འབྱུང་བ་ཡིན། །ཞེས་པའི་བར་གྱིས་བསྟན་ཏེ། དེ་ཡི་ཚུལ་ཡང་འབྱུང་བའི་ཕ་དང་གནས་ཀྱི་མ་གཉིས་གཅིག་ལ་གཅིག་འདོད་ཆགས་ཆེན་པོ་ལངས་ཏེ་ཞེན་པ་དྲག་པོ་འབྱུང་ནས་འཁྲིག་པ་སྤྱོད་པའི་དུས་ཀྱི་སྐབས་སུ་སྐད་ཅིག་ཐ་མར་ཕྱིར་འཛག་སྟེ་བར་དོའི་རྣམ་ཤེས་འཛིན་པའི་བཅུད་འབྱུང་ཞིང་འབབ་པར་འགྱུར་པས་ན་ཁུ་བ་སྐ་བ་འབྱུང་བའི་རྗེས་དེ་ནས་དེ་བཞིན་དུ་ཕ་མ་གཉིས་ཀ་ལས་རྩ་གནས་གང་གི་བཅུད་ས་བོན་དཀར་དམར་གྱི་ཐིགས་པའི་ཐིག་ལེ་རེ་རེ་དག་ནི་གདོན་མི་ཟ་བར་འབྱུང་ཞིང་འབབས་པར་འགྱུར་རོ། །དེ་ནས་ཐིག་ལེའི་ཐིགས་པ་དེ་དག་ཉིད་སྐྱེ་གནས་གང་དེར་འདྲེས་པར་གྱུར་ནས་དཔེར་ན་གང་འོ་མ་བསྐོལ་བའི་དྲོད་ཀྱི་གྲང་བའི་ཞམས་ལ་སྤྲིས་མ་སྟེང་དུ་འོང་བ་བཞིན་དུ་བདུན་ཕྲག་དང་པོ་ལ་རླུང་ཀུན་སྡུད་ཀྱིས་འདུ་བར་བྱེད་པ་ཡིན་པས་དཔེར་ན་ཞོ་རིམ་པར་འཆགས་པ་ལྟ་བུའོ། །དེ་ལྟར་ས་བོན་གྱི་ཤེས་པ་ལས་ཐམས་ཅད་དང་ལྡན་པ་ཡི་བར་མ་དེ་ནི་མངལ་དེར་འཇུག་པར་འགྱུར་བ་ནི་དུས་དེ་ཉིད་དུ་ཡིན་པས་དེ་ནས་བཟུང་ཉིང་མཚམས་སྦྱོར་བ་ཞེས་བྱ་སྟེ། བདུན་ཕྲག་དང་པོའི་མགོར་ཟིན་པ་ཡིན་ནོ། །དེ་ལ་གཏར་ཀ་གེགས་སེལ་གྱི་ཚུལ་དུ། འོ་ན་བར་མ་དོའི་ཤེས་པ་གང་ལ་དངོས་པོའི་ངོ་བོ་ཐོགས་པ་ཅན་དུ་མེད་པ་དེ་ཉིད་གདོས་པ་ཅན་གྱི་ས་བོན་གྱི་དངོས་པོས་ཅི་ཡི་ཕྱིར་འཛིན་པར་འགྱུར་ཏེ་མི་རིགས་སོ་ཞེས་དྲིས་ནས་རྩོད་པར་བྱེད་ན། དེ་ཡི་ལན་ཉིད་དཔེའི་སྒོ་ནས་གསལ་བར་བསྟན་པའི་ཕྱིར། དཔེར་ན་ནམ་མཁའ་ལ་འགྲོ་བའི་བྱ་ཡང་རང་གི་འདོད་པའི་དབང་གིས་བྱ་བཤོར་བར་བྱེད་པའི་བྱ་མཁན་གྱིས་ས་ཁུང་དུ་བྲུས་པའམ་བྲེས་ནས་བྱ་གཟུང་བའི་ཆེད་དུ་བཙུགས་པའི་སྙིས་འཛིན་པར་བྱེད་པ་ཇི་ལྟ་བ་བཞིན་དུ། གང་དངོས་པོ་མེད་པའི་ཤེས་པ་ཡང་རང་གི་ཆགས་པའི་དབང་གིས་ས་བོན་གདོས་པ་ཅན་གྱི་རྙིས་འཛིན་པ་ནི་དེ་ལྟར་འཐད་པའི་དོན་ཏོ། །དེའང་སྔ་མ་ལས། རྣམ་པར་ཤེས་པ་ས་བོན་ཐམས་ཅད་པ་དེ་ཡང་ཡོངས་སུ་མྱ་ངན་ལས་འདའ་བའི་ཆོས་ཅན་དག་གི་ས་བོན་ཡོངས་སུ་ཚང་བ་ཡིན་ནོ། །ཡོངས་སུ་མྱ་ངན་ལས་འདའ་བའི་ཆོས་ཅན་མ་ཡིན་པ་དག་གི་ནི་བྱང་ཆུབ་རྣམ་པ་གསུམ་གྱི་ས་བོན་མེད་པ་ཡིན་ནོ། །ཞེས་གསུངས་པ་ལྟ་བུའི་ཁྱད་པར་ཡོད་ཀྱང་། མདོར་ན་གང་ཡིན་ནའང་། དེ་ཉིད་ལས། ལུས་མངོན་པར་འགྲུབ་པ་གང་ཅི་ཡང་རུང་སྟེ་དེ་ཐམས་ཅད་ནི་ས་བོན་ཐམས་ཅད་དང་ལྡན་པ་ཡིན་པར་རིག་པར་བྱ་སྟེ། ཞེས་གསུངས་པ་ལྟར། མངལ་དེ་མི་འདྲུལ་བར་བརྟས་པར་བྱེད་པའི་སྙིང་པ་ོབར་མ་དོའི་ཤེས་པ་ས་བོན་ཐམས་ཅད་པ་ཡི་དབང་དེས་བྱས་པ་ཡིན་པས་ན་ཕ་མའི་ས་བོན་དེ་ཉིད་མི་འདྲུལ་ཞིང་སེམས་ཅན་གྱི་དངོས་པོར་སྨིན་ཏེ་ཇེ་ཆེ་ཇེ་བརྟན་དུ་བརྟས་པར་འགྱུར་བ་ཉིད་དཔེ་ཆུང་རང་གནས་ལས་བཤད་པ་བཞིན་ཡིན་པས་འབྱུང་བ་བཞིའི་ཁམས་ཡང་ཚང་སྟེེ་སྐྱེད་སྡུད་སྨིན་ཅིང་ཡན་ལག་རྣམ་པར་འབྱེད་པའོ། །དེར་ཡང་ས་བོན་དེ་དག་གི་མེར་མེར་པོ་དང་ནུར་ནུར་པོར་གནས་པའི་ཕྱོགས་ཀྱི་ངོ་བོ་གང་དུ་བར་མ་དོའི་ཤེས་པ་དེ་ཞུགས་པ་ཉིད་ནི་ས་བོན་གྱི་སྙིང་པོ་དང་ཤེས་པའི་རྟེན་ཡིན་པས་ལས་དང་མཐུན་པར་མིང་དང་གཟུགས་སུ་གནས་པའོ། །དེར་ཡང་མ་ཟད་སྔ་མ་ལས་མེར་མེར་པོའི་ཕྱོགས་གང་དུ་རྣམ་པར་ཤེས་པ་ཞུགས་པར་གྱུར་པ་དེ་ནི་དེའི་ཚེ་དེའི་སྙིང་གི་ཕྱོགས་ཡིན་ནོ། །ཞེས་འབྱུང་བར་ཡང་ཤེས་དགོས་སོ། །དེ་ཡང་ལས་ཀྱི་རླུང་སུམ་ཅུ་རྩ་བརྒྱད་ཞག་བདུན་ཕྲག་སུམ་ཅུ་རྩ་བརྒྱད་ལ་འབྱུང་བས་ལུས་རྫོགས་པར་འགྱུར་བ་ཡང་འདིར་འཁྲུགས་མར་བརྗོད་དེ། མའི་མངལ་དུ་གནས་མ་ཐག་པར་གྱུར་པ་དེའི་དུས་སུ་ཚོར་བ་བཏང་སྙོམས་དང་ལྡན་ཏེ་བདུན་ཕྲག་དང་པོའོ། །དེ་ཉིད་རྫོགས་པའི་མཚམས་དེ་ནས་རྒྱུ་དེས་བརྟེན་ནས་བདུན་ཕྲག་གཉིས་པ་ལ་ནི་ཚོར་བ་བདེ་སྡུག་གཉིས་སུ་ཡང་མྱོང་བར་འགྱུར་རོ། །དེ་ཡང་མངལ་དུ་གནས་པའི་སྐབས་ཀྱི་ཚོར་བ་བཏང་སྙོམས་དེ་ནི་ཀུན་གཞི་རྣམ་པར་ཤེས་པ་དང་མཚུངས་ལྡན་ཡིན་ལ། བདེ་བ་དང་སྡུག་བསྔལ་ནི་ཆེད་འགལ་རྐྱེན་མངོན་དུ་གྱུར་ན་འབྱུང་ལ། ཆེད་འགའ་མི་འབྱུང་བ་ཡིན་པར། སའི་དངོས་གཞི་ལས། མངལ་དུ་གནས་པ་ལ་ནི་རང་བཞིན་གྱིས་སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་ལ་གནས་པའི་རྣམ་པར་ཤེས་པ་སྐྱེ་བར་འགྱུར་ཏེ། དེའི་ཚོར་བ་དེ་ནི་རྣམ་པར་སྨིན་པས་བསྡུས་པ་ཡིན་ནོ། །དེ་ལས་གཞན་པའི་ཚོར་བ་ཐམས་ཅད་ནི་རྣམ་པར་སྨིན་པ་ལས་བྱུང་བའམ་ཡུལ་གྱི་རྐྱེན་ལས་གྱུར་པ་ཡིན་ནོ། །ཞེས་སོ། །བདུན་ཕྲག་བརྒྱད་པ་ལ། ལས་ཀྱི་རླུང་རྣམ་པར་འབྱེད་པ་ཞེས་བྱ་བས་ཉེར་སྤྱོད་ཀྱི་འདུ་མཆེད་འབྱུང་བའི་སྐྱེ་མཆེད་དྲུག་གི་དབང་པོའི་སྒོ་དང་བུ་ག་དགུ་དོད་པའི་གནས་སྐབས་དག་ཏུ་འགྱུར་བར་བྱེད་དོ། །ཞག་བདུན་ཕྲག་དང་པོ་གང་གི་དུས་ཀྱི་ཚེ་ན་ས་བོན་གྱི་དྭངས་མ་ཤིན་ཏུ་སླ་བ་དེ་ཉིད་ལས་ཀྱི་རླུང་ཀུན་ཏུ་སྡུད་པ་ཞེས་བྱ་བས་ཕོ་མོ་གར་འབྱུང་གི་མའི་རྩིབས་ལོགས་གཡས་ གཡོན་དུ ་བུས་ནས་ཤིན་ཏུ་བརྟས་པར་འགྱུར་ཏེ་ཅུང་ཟད་སྲ་བར་བྱེད་པ་ཡིན་ནོ། །དེ་ནས་བདུན་ཕྲག་གཉིས་པ་ལའང་། ལས་ཀྱི་རླུང་མཛོད་ཅེས་བྱ་བས་སྔ་མ་དེ་བཞིན་དུ་དེ་ལས་ཅུང་ཟད་སྲ་བར་གྱུར་ཀྱང་ཤར་མ་གྱུར་པས་འདྲིལ་བར་གནས་པའི་དུས་དེར་དབྱིབས་ཟླུམ་པོར་འདྲིལ་བར་བྱེད་པ་ཉིད་དེ། རླུང་མཛོད་ལྡན་ནམ་མཛོད་མར་ཡང་གསུངས་སོ། །དགའ་བོ་མངལ་འཇུག་གི་མདོ་ལས་རླུང་མཛོད་ཀ་འདི་ཉིད་གསུམ་པར་བཤད་པ་སོགས་ཅུང་ཟད་འདྲ་མིན་ཡོད་ཀྱང་འདིར་རབ་གཞུང་ཁོ་ན་ལྟར་རོ། །དེ་ནས་བདུན་ཕྲག་གསུམ་པ་ལ་ལས་ཀྱི་རླུང་བཀྲེས་པ་དང་སྐོམ་པར་འབྱེད་པའམ་རབ་ཏུ་འབྱེད་པ་ཞེས་བྱ་བས་མ་ཡིས་ཟོས་པའི་ཟས་ཀྱི་བཅུད་རྣམས་བུ་ཡིས་འདྲེན་པའི་སྒོ་ལྟེ་བ་ནས་ནུས་པ་འཇུག་སྟེ་བཅུད་འཛིན་པས་ལུས་དེ་ཉིད་བརྟས་པར་བྱེད་པའོ། །ཞག་བདུན་ཕྲག་བཞི་པ་ལ་ལས་ཀྱི་རླུང་ཡང་དག་པར་སྡུད་པ་ཞེས་བྱ་བས་ཡན་ལག་གི་རྩ་བ་ལྔ་པོ་གང་ཡིན་པ་གང་གིས་སྐྱེད་ན་ལུས་འདིའི་འབྱུང་བ་བཞི་དང་ནམ་མཁའི་ཁམས་ཀྱིས་གོ་འབྱེད་པས་བསྐྱེད་པ་ཉིད་དེ། རྐང་པའི་རྩ་གཉིས་དང་ལག་པའི་རྩ་གཉིས་དང་སྐེའི་རྩ་དང་ལྔའོ། །དེ་ལྟར་ཡང་གནས་གཅིག་ཏུ་གང་རྟེན་པའི་ས་བོན་གྱི་འབྱུང་བ་དཀར་དམར་གཉིས་པོ་ཉིད་ནི་རྣམ་ཤེས་ཀྱི་གནས་ཏེ། དེ་ཉིད་ཀྱི་རྟེན་དུ་ཤེས་པ་ཞུགས་པ་ནི་ཁོང་ན་གནས་པའི་རྒྱུའི་དོན་དང་། ཕྱིས་འབྲས་བུ་འབྱུང་བའི་དོན་གྱིས་སྙིང་པོ་ཉིད་དུ་གྱུར་པས་ལུས་ཅན་ནམ་སེམས་ཅན་དུ་སྣང་བའི་མིའི་ལུས་སེམས་སུ་སྨིན་པར་འགྱུར་བའོ། །དེ་བས་ན་མཐར་རྫོགས་པའམ་ཐ་མ་རང་ཉིད་སྨིན་པར་ནུས་པའི་ས་བོན་གཉིས་ལ་དབང་བྱེད་པའི་འབྱུང་བ་བཞི་དང་ལས་ཀྱི་རླུང་རྣམས་ནི་ས་བོན་དེ་ཉིད་ལ་བརྟེན་ནས་སྐྱེ་བ་ཡིན་ནོ། །དེའང་རྐྱེན་འབྱུང་བ་བཞིའི་ཁམས་བཞིས་ལས་ཀྱི་རླུང་གིས་རྒྱས་པར་བྱེད་པ་དང་ས་ཡིས་སྲ་བར་བྱེད་པ་དང་ཆུ་ཡིས་སྡུད་པར་བྱེད་པ་དང་མེ་ཡིས་སྨིན་པར་བྱེད་དེ་ལུས་འཛིན་པ་ཡིན་པས་ཁམས་དེ་དག་ཆ་མ་སྙོམས་ན་སྐྱོན་བཞི་ཡི་དབང་གིས་ལུས་མི་འགྲུབ་ལ། ཆ་སྙོམས་ན་ལུས་སུ་འགྲུབ་པར་བྱེད་པའོ། །དེ་ལྟར་འབྱུང་བ་ཆ་སྙོམས་པར་གྱུར་པ་ན་ལས་ཀྱི་རླུང་བདུན་ཕྲག་ལྔ་པ་ལ་འབྱུང་བ་ནི་རླུང་ཟས་ཞེས་བྱ་བ་ཡིན་པས་རླུང་དེ་ཡིས་སྔར་གྱི་ཡན་ལག་ལྔའི་འཕྲོ་མགོ་དང་དཔུང་པ་གཉིས་དང་བརླ་གཉིས་རྣམས་སྐྱེད་ཅིང་འབྱུང་བར་བྱེད་དོ། །ཞག་བདུན་ཕྲག་དྲུག་པ་ལ་ལས་ཀྱི་རླུང་འཁྱིལ་བྱེད་ཅེས་བྱ་བས་ཡན་ལག་ལྔ་པོ་རྣམས་རྫོགས་པར་རྣམ་པར་འབྱེད་དེ་སྐྱེད་པར་བྱེད་དོ། །དེ་ནས་བདུན་ཕྲག་བདུན་པ་ལ་རླུང་ཟློག་སྒྱུར་བྱེད་པ་ཞེས་བྱ་བས་སོར་མོ་དང་བཅས་པ་ཡོངས་སུ་རྫོགས་པར་འབྱིན་པར་བྱེད་པ་ཡིན་ནོ། །དེར་ཡང་མངལ་ན་གནས་པ་དེ་ཡིས་སྔོན་དེ་ལྟ་བུར་འགྱུར་བའི་ལས་དགེ་སྡིག་བྱས་པ་གང་གི་དབང་དང་། རྐྱེན་མ་ཡི་ཁ་ཟས་གཉིས་དང་སྤྱོད་ལམ་གྱི་དབང་གང་གིས་སེམས་ཅན་དེ་ཉིད་བྱད་བཞིན་ལེགས་ཉེས་དང་མདོག་ཀྱང་སྡུག་མི་སྡུག་ཏུ་འགྱུར་ཏེ། རང་གིས་སྔོན་ལས་ཀྱི་རྒྱུ་ནི་ཀུན་ལ་མཚུངས་ཤིང་། ད་ལྟར་གྱི་རྐྱེན་ནི། མ་བརྒྱུག་པ་དང་། འཕར་བ་དང་། མཆོངས་པ་ལ་སོགས་པའི་སྤྱོད་ལམ་དྲག་པོ་བྱེད་དེ་ཡ་ང་བ་མ་སྤངས་པ་དེས་ན་དེའི་ལུས་མི་སྡུག་པའམ་དབང་པོ་མ་ཚང་བར་འགྱུར་ལ་གཞན་སྤྱོད་ལམ་དལ་བ་སོགས་ཀྱིས་ལུས་ལེགས་པར་འགྱུར་རོ། །དེ་བཞིན་དུ་འཁྲིག་པའི་ཆོས་ཧ་ཅང་བསྟེན་དྲག་པས་རྔོ་ཅན་དུ་འགྱུར་བ་སོགས་སོ། །མས་ལན་ཚའི་རོ་ལྟ་བུའི་ཁ་ཟས་དང་། འགྱུར་བྱེད་དང་སྐོམ་ཕལ་ཆེར་བསྟེན་པས་དེའི་བ་སྤུ་དང་སྐྲ་ངན་པ་སོགས་སུ་འགྱུར་རོ། །ཡང་ཉི་མ་ལ་སོགས་པ་ཤིན་ཏུ་ཚ་བ་བསྟེན་པས་དེའི་མདོག་གནག་པ་དང་སྔོ་བསངས་སུ་འགྱུར་ལ། ཁྱིམ་གྱི་ནང་ན་ཧ་ཅང་གྲང་བ་ལ་འདུག་པ་དེས་ནི་དེའི་མདོག་དཀར་བར་འགྱུར་ཞིང་། ཁ་ཟས་ཧ་ཅང་ལྕི་བའམ་ཚ་བ་ཟོས་པ་དེས་ནི་མདོག་དམར་པོ་འགྱུར་བ་ལ་སོགས་པའོ། །གལ་ཏེ་གནས་པ་མོ་ཞིག་ཡིན་ན་ནི་མའི་བཞིན་ཕྱོགས་དང་མཐུན་པ་ལྟར་མདུན་ དུ་བལྟས་ཏེ་སྒལ་ཚིགས་ལ་རྒྱབ་བསྟན་ནས་གློ་གཡོན ་རོལ་གྱི་ཕྱོགས་ན་འདུག་གོ། །གལ་ཏེ་འབྱུང་བ་ཉིད་དུ་འགྱུར་བའི་ཁྱེའུ་ཞིག་ཡིན་ན་འདུག་ཕྱོགས་སྣྲེལ་ཞི་ཞེས་བྱ་བ་ཕན་ཚུན་བསྣོལ་མ་ལྟར་བྱས་ནས་མའི་ལྟོ་ལོགས་སུ་རྒྱབ་བསྟན་ལ་སྒལ་ཚིགས་ཕྱོགས་སུ་ཁ་བལྟས་ཏེ་གློ་གཡས་རོལ་གྱི་ཕྱོགས་ན་འདུག་སྟེ་ཕྱིའི་ཕོ་མོ་ཆགས་པ་སྤྱོད་པའི་ཚུལ་དུ་མཐུན་པའོ། །དེ་ཡང་མའི་མངལ་དུ་ཡུན་ཅི་ཙམ་གནས་ན་སྤྱིར་ཟླ་བ་བརྒྱད་ཀྱིས་རྫོགས་ཀྱང་ཤིན་ཏུ་ཡོངས་སུ་རྫོགས་པ་ལ་ནི་ཟླ་བ་དགུའམ་དགུ་ལས་འདས་པའི་བར་དུ་ཐོགས་ཏེ། བཅོམ་ལྡན་འདས་ཀྱིས་མངལ་དུ་འཇུག་པའི་མདོ་ལས་བཀའ་སྩལ་པ། དེ་ནི་ཟླ་བ་དགུའམ་དེ་ལས་འདས་ན་ཤིན་ཏུ་རྫོགས་པར་འགྱུར་རོ། །ཟླ་བ་བརྒྱད་ཀྱིས་ནི་རྫོགས་པ་ཡིན་མོད་ཀྱི་ཤིན་ཏུ་རྫོགས་པ་མ་ཡིན་ནོ། །ཟླ་བ་དྲུག་གམ་བདུན་གྱིས་རྫོགས་པར་མི་འགྱུར་ཏེ་ཡན་ལག་མ་ཚང་བར་ཡང་འགྱུར་རོ། །ཞེས་ཇི་སྐད་གསུངས་པ་ལྟ་བུ་སྟེ། དེར་ཡང་གནས་པའི་དུས་སམ་སྐབས་ནི་བརྒྱད་ཉིད་ཡོད་དེ། སའི་དངོས་གཞི་ལས། མངལ་ན་གནས་པ་དེ་ལ་ཡང་དུས་རྣམ་པ་བརྒྱད་ཡོད་དེ། དུས་རྣམ་པ་བརྒྱད་པོ་གང་ཞེ་ན། མེར་མེར་པོའི་དུས་དང་། ནུར་ནུར་པོའི་དུས་དང་། ལྟར་ལྟར་པོའི་དུས་དང་། མཁྲང་འགྱུར་གྱི་དུས་དང་། རྐང་ལག་འགྱུས་པའི་དུས་དང་། སྐྲ་དང་བ་སྤུ་དང་སེན་མོ་འབྱུང་བའི་དུས་དང་། དབང་པོ་དོད་པའི་དུས་དང་། མཚན་མ་དོད་པའི་དུས་སོ། །ཞེས་གསུངས་པ་ལྟར། བདུན་ཕྲག་དང་པོ་ལ་མེར་མེར་པོ་དང་། གཉིས་པ་ལ་ནུར་ནུར་པོ་དང་། གསུམ་པ་ལ་ལྟར་ལྟར་པོ་དང་། བདུན་ཕྲག་བཞི་པ་ལ་རླུང་རབ་ཏུ་འབྱེད་པས་མཁྲང་འགྱུར་ཏེ་མཆིག་གུ་ལྟ་བུའོ། །བདུན་ཕྲག་ལྔ་པ་ལ་ཡན་ལག་གི་རྩ་བ་ལྔར་འགྱུ་བའམ་འགྱུར་ཏེ་བཤད་པ་བཞིན་ནོ། །བདུན་ཕྲག་དྲུག་པ་དེ་ལ་ལྔ་པ་དེ་ཡི་ཕྱིར་རམ་རྗེས་ཀྱི་རླུང་གིས་ཡན་ལག་གི་འཕྲོ་རྣམས་ཕྱིར་རྫོགས་པར་སྐྱེད་དོ། །བདུན་ཕྲག་བདུན་པ་ལ་ཉིང་ལག་རྣམས་ཀྱང་རྫོགས་པར་འབྱུང་བ་དང་། དེ་རྣམས་གོང་དུ་བཤད་པ་ལྟར་རྫོགས་ནས། དེ་ནས་བདུན་ཕྲག་བརྒྱད་པ་ལ་མིག་སོགས་དབང་པོ་དང་ནི་ཕོ་མོ་གང་ཡིན་པའི་མཚན་མ་ལ་སོགས་པ་བུ་ག་དགུ་རྣམས་དོད་པའོ། །དེ་ལྟར་དུས་ཀྱི་རྣམ་པ་བརྒྱད་ཡོངས་སུ་རྫོགས་པར་གྱུར་པའི་དུས་དེ་ཉིད་ཀྱི་སྐབས་ན། བདུན་ཕྲག་དགུ་པ་ལ་སོགས་པ་ཡི་ལས་ཀྱི་རླུང་རྣམས་རིམ་པར་འབྱུང་བ་སྟེ། བདུན་ཕྲག་དགུ་པ་ལ་རླུང་སྲ་བར་བྱེད་པས་ལུས་བུས་ནས་རྐྱལ་པ་ལྟ་བུར་གྱུར་ཏེ་སྲ་བར་ཡང་བྱེད་དོ། །བདུན་ཕྲག་བཅུ་པ་ལ་ལས་ཀྱི་རླུང་རྡོ་རྗེ་ཞེས་བྱ་བས་བུ་ག་དགུ་སྦྱངས་ནས་ཁ་སྣ་ནས་ཁྲག་དང་ཆུ་སེར་ལ་སོགས་ཕྱུངས་ཏེ་སྔ་མ་ལས་དབང་པོ་རྣམས་དོད་པར་བྱེད་དོ། །བདུན་ཕྲག་བཅུ་གཅིག་པ་ལ་རླུང་ཡོན་པོ་སྒོ་ཞེས་བྱ་བའམ། སྨན་ཡོན་པོ་ཞེས་བྱ་བས་ནང་ཁྲོལ་རྣམས་སྐྱེད་དོ། །བདུན་ཕྲག་བཅུ་གཉིས་པ་ལ་ལས་ཀྱི་རླུང་ཞོ་ལ་འབྱུང་བའམ་སྤུ་རྒྱུས་པ་ཞེས་བྱ་བས་རུས་མགོ་སུམ་བརྒྱ་སྐྱེད་ཅིང་འབྱོར་བ་གང་གི་འདུ་བ་རྣམ་བཞིའི་ནད་རྣམས་ནི་སྐྱེད་པ་བྱེད་པའོ། །བདུན་ཕྲག་བཅུ་གསུམ་པ་ལ་འབྱུང་བའི་ཆར་གཏོགས་པའི་རླུང་བཀྲེས་སྐོམ་བྱེད་པ་ཞེས་བྱ་བ་འབྱུང་བས་རུས་པ་རྣམས་སྲ་ཞིང་ནད་སྐྱེད་པ་བཤད་པ་བཞིན་ནོ། །བདུན་ཕྲག་བཅུ་བཞི་པ་ལ་ལས་ཀྱི་རླུང་སྐུད་པའི་སྒོ་ཞེ་བྱ་བས་ལུས་ལ་ཆུ་རྒྱུས་གཡོགས་པར་བྱེད་དེ་སྤྱིལ་པོ་ལྟ་བུའོ། །བཅོ་ལྔ་པ་ལས་ཀྱི་རླུང་དམ་ཟིན་ནམ་པདྨ་ཞེས་བྱ་བས་རྩ་ཆེན་པོ་ཉི་ཤུ་ལས་རྩ་བྲན་རྣམས་རྒྱས་པར་བྱེད་དོ། །བཅུ་དྲུག་པ་ལ་ལས་ཀྱི་རླུང་བདུད་རྩི་ཞེས་བྱ་བས་སྙིང་དང་མིད་པའི་སྒོ་འབྱེད་པར་བྱེད་དོ། །བཅུ་བདུན་པ་ལ་རླུང་འབྲི་གཏིང་ཞེས་བྱ་བས་དབང་པོ་རྣམས་དྭངས་པར་བྱེད་དོ། །བཅོ་བརྒྱད་པ་ལ་ལུང་བརྟན་འགྱུར་ཞེས་བྱ་བས་སྔོན་གྱི་ལས་བཞིན་དུ་ལེགས་ཉེས་ཆེ་ཆུང་དུ་བྱེད་དེ་དབང་པོ་ནུས་མཐུ་དང་ལྡན་པར་བྱེད་དོ། །བཅུ་དགུ་པ་ལ་རླུང་ལས་བྱེད་ཅེས་བྱ་བས་སྲོག་དང་ཡིད་དང་ལུས་ཀྱི་དབང་པོ་གསུམ་རྫོགས་པར་བྱེད་དོ། །ཉི་ཤུ་པ་ལས་རླུང་ཤིན་ཏུ་སྲ་བའམ་སྲ་བྱེད་ཅེས་བྱ་བས་རུས་པ་རྣམས་བརྟན་པར་བྱེད་དོ། །ཉེར་གཅིག་པ་ལ་རླུང་ཡང་དག་པར་སྐྱེད་པས་ཤ་རྣམས་བསྐྱེད་དེ་དཔེར་ན་འཇིམ་པའི་སྐུའི་ཞལ་ཞལ་བཞིན་ནོ། །ཉེར་གཉིས་པ་ལ་ལུང་ཀུན་ཏུ་རྒྱལ་བ་ཞེས་བྱ་བས་ཁྲག་རྣམས་སྐྱེད་པར་བྱེད་དོ། །ཉེར་གསུམ་པ་ལ་རླུང་ཡོངས་དག་འཛིན་ཞེས་བྱ་བས་པགས་པ་གཡོགས་པར་བྱེད་དོ། །ཉེར་བཞི་པ་ལ་རླུང་སྤྲིན་འཛིན་ཞེས་བྱ་བས་པགས་པ་དེ་ཉིད་ཁ་དོག་དང་ལྡན་པར་བྱེད་དོ། །ཉེར་ལྔ་པ་ལ་རླུང་གྲོང་ཁྱེར་འཛིན་ཞེས་བྱ་བས་ཁྲག་རྣམས་དྭངས་པར་བྱེད་དོ། །ཉེར་དྲུག་པ་ལ་ལས་ཀྱི་རླུང་སྐྱེ་བ་མངོན་དུ་གྲུབ་པར་བྱེད་པ་ཞེས་བྱ་བས་བ་སྤུ་དང་ཆུ་རྒྱུས་དང་སེན་མོ་རྣམས་འབྲེལ་བར་བྱེད་དོ། །ཉེར་བདུན་པ་ལ་རླུང་ཕན་ཡོན་ཆེན་པོ་ཞེས་བྱ་བས་སྔོན་གྱི་ལས་ལྟར་བཞིན་ལེགས་ཉེས་དང་ལུས་བོང་ཆེ་ཆུང་དུ་བྱེད་དོ། །ཉེར་བརྒྱད་པ་ལ་རླུང་རྟོག་པ་ཞེས་བྱ་བས་ཕྱིན་ཅི་ལོག་གི་འདུ་ཤེས་བརྒྱད་བསྐྱེད་པར་བྱེད་དེ། དགའ་བོ་མངལ་དུ་འཇུག་པའི་མདོ་ལས། བརྒྱད་གང་ཞེ་ན། འདི་ལྟ་སྟེ། ཁྱིམ་གྱི་འདུ་ཤེས་དང་། བཞོན་པའི་འདུ་ཤེས་དང་། ཀུན་དགའ་ར་བའི་འདུ་ཤེས་དང་། ཁང་པ་བརྩེགས་པའི་འདུ་ཤེས་དང་། སྐྱེད་མོས་ཚལ་གྱི་འདུ་ཤེས་དང་། ཁྲི་ལ་འདུག་པའི་འདུ་ཤེས་དང་། ཆུ་བོའི་འདུ་ཤེས་དང་། རྫིང་གི་འདུ་ཤེས་ཏེ་ཡང་དག་པར་འདི་དག་ཡོང་པ་མ་ཡིན་ཡང་ཡང་དག་པ་མ་ཡིན་པའི་རྣམ་པར་རྟོག་པ་སྐྱེད་པར་བྱེད་དོ། །ཞེས་སོ། །ཉེར་དགུ་པ་ལ་རླུང་མེ་ཏོག་ཕྲེང་ཞེས་བྱ་བས་ལུས་ཀྱི་ཁ་དོག་སོ་སོར་བསྒྱུར་རོ། །སུམ་ཅུ་པ་ལ་རླུང་ལྕགས་སྒོ་ཞེས་བྱ་བའམ་ལྕགས་སྒྲོག་སྡུད་མས་སྤུ་དང་སེན་མོ་རྒྱས་པར་བྱེད་དོ། །སོ་གཅིག་པ་ནས་སོ་ལྔ་པའི་བར་བདུན་ཕྲག་ལྔ་ལ་ལས་ཀྱི་རླུང་ཡངས་པར་བྱེད་པ་ཞེས་བྱ་བའི་མིང་ཅན་གྱིས་མཚན་མ་རིལ་འཕེལ་ཞིང་རྒྱས་པར་བྱེད་དོ། །བདུན་ཕྲག་སོ་དྲུག་པ་ལ་ལས་ཀྱི་རླུང་གཡོ་བར་བྱེད་པ་ཞེས་བྱ་བས་ཕྱི་རོལ་དུ་འབྱུང་བའི་སེམས་སྐྱེད་དེ་གཡོ་འགུལ་ཅན་དུ་འགྱུར་བ་སྟེ། མས་ཀྱང་ཤས་ཆེར་མི་བཟོད་པ་འབྱུང་ངོ་། །བདུན་ཕྲག་སོ་བདུན་པ་ལ་རླུང་ལྡང་བའམ་དྭངས་པ་ཞེས་བྱ་བས་སྐྱེ་བའི་འདུ་ཤེས་ལྔ་བསྐྱེད་པས་ཕྱིར་འབྱུང་བ་ལ་དགའོ། །དེ་ནས་བདུན་ཕྲག་སུམ་ཅུ་བརྒྱད་པ་ལ་ལས་ཀྱི་རླུང་ཐོགས་པ་མེད་པ་ཞེས་བྱ་བས་རྟེན་འབྲེལ་བཅུ་གཉིས་ཀྱི་སྲིད་པ་ལས་མངལ་ནས་འབྱུང་བའི་ལུགས་སུ་སྐྱེ་བས་ལུས་དེ་ཉིད་ཇི་བཞིན་དུ་མགོ་མཇུག་བཟློག་སྟེ་མགོ་ཐུར་དུ་སྟོན་ཏེ་སྐྱེ་བར་བྱེད་དོ། །ཡང་ན་གོང་གི་བདུན་ཕྲག་བཅུ་གསུམ་པའི་རླུང་དེ་བདུན་ཕྲག་སོ་དྲུག་པ་ལ་མར་སྦྱར་ཏེ། སའི་དངོས་གཞིར་གསུངས་པ་ལྟར་དེར་སྐྱེ་བ་འབྱུང་བའི་ཆར་གཏོགས་པའི་རླུང་དག་འབྱུང་བས་དེས་དེ་ལ་གནོད་པ་སྐྱེད་དེ་གཡོ་འགུལ་ཅན་དུ་འགྱུར་བ་སྟོན་པའི་ལུགས་ཞིག་ཀྱང་འདུག་གོ། །དེ་ལྟར་རླུང་རྣམས་ཀྱི་རྒྱུད་དུ་མ་ཚང་བ་རྣམས་ནི་འགྲེལ་གྱིས་ཁ་བསྐང་བར་མཛད་པའོ། །འདི་ལ་ཆོས་རྗེ་དམ་པ་རིན་པོ་ཆེའི་ཕྱག་མཆན་ལས། སྔོན་ལ་བྲང་ཐད་དུ་འབྲུ་མནན་ཏེ། །དེ་ནས་རྟིང་ལ་འཁྲུགས་སྡེབ་བོ། །ཞེས་གསུངས་པས་འདིར་ཡང་འཁྲུགས་ཏེ་ཡོད་པ་རྣམས་ཅུང་ཟད་བསྡེབ་ན། བདུན་ཕྲག་དང་པོ་ལ་རླུང་ཀུན་ཏུ་སྡུད་པས་ས་བོན་གཉིས་གཅིག་ཏུ་འདུ་བར་བྱས་ཏེ་ཕོ་མོ་གར་འབྱུང་གི་མའི་རྩིབས་ལོགས་གཡས་ གཡོན་དུ ་བུས་ནས་ཤིན་ཏུ་ཞེས་དབྱེར་མེད་ལྟ་བུར་བརྟས་ཏེ་ཅུང་ཟད་སྲ་བར་བྱས་པས། དེ་ལ་སྤྲིས་མ་ལྟ་བུས་གཡོགས་ལ་ནང་སླན་ཏེ་འདུག་པ་ནི་མེར་མེར་པོའི་དུས་ཡིན་ཏེ་ཚོར་བ་བཏང་སྙོམས་དང་ལྡན་པའོ། །དེ་ནས་བདུན་ཕྲག་གཉིས་པ་ལ་མཛོད་ཅེས་བྱ་བའི་རླུང་གིས་དེ་ལས་ཀྱང་ཅུང་ཟད་སྲ་བར་བྱས་ཏེ་ཕྱི་ནང་མེད་པར་འདྲིལ་བར་གནས་ཤིང་དབྱིབས་ཟླུམ་པོར་བྱེད་དེ། ཕྱི་ནང་བཅས་པར་སྤྲིས་མ་ལྟ་བུར་གྱུར་ཏེ། ཞོ་ལྟ་བུར་འདུག་ལ་ཤར་མ་གྱུར་པ་ནི་ནུར་ནུར་པོའི་དུས་ཡིན་པས་དེར་ཚོར་བ་བདེ་སྡུག་གཉིས་ཀྱང་མྱོང་བ་ཡོད་དོ། །དེ་ནས་བདུན་ཕྲག་གསུམ་པ་ལ་རླུང་བཀྲེས་པ་དང་སྐོམ་པར་འབྱེད་པར་མ་རབ་ཏུ་འབྱེད་པས་མ་ཡིས་ཟོས་པའི་ཟས་ཀྱི་བཅུད་རྣམས་ལྟེ་བ་ནས་འཇུག་པས་ལུས་བརྟས་པར་བྱེད་དེ་ཤར་ནི་གྱུར་ལ་སླ་བ་ཡིན་པས་ལྟར་ལྟར་པོ་ཞེས་བྱའོ། །དེ་ནས་བདུན་ཕྲག་བཞི་པ་ལ་རླུང་ཡང་དག་པར་སྡུད་པས་ཡན་ལག་གི་རྩ་བ་ལྔ་པོ་འབྱུང་བའི་ཁམས་ཀྱིས་སྐྱེད་ཀྱང་འབུར་བའི་རྣམ་པར་མི་མངོན་པས་མཆིག་གུ་ལྟ་བུ་སྟེ་དེར་ནི་སྐ་བར་གྱུར་ཏེ་མནན་དུ་བཟོད་པས་ན་འཁྲང་འགྱུར་ཞེས་བྱའོ། །དེ་ནས་བདུན་ཕྲག་ལྔ་པ་ལ་ལས་ཀྱི་རླུང་ཟས་ཞེས་བྱ་བས་ཡན་ལག་ལྔའི་འཕྲོ་རྣམས་སྐྱེད་པས་དེ་ཉིད་ལས་ཤ་ལྷག་ལྟ་བུར་གྱུར་ཏེ་ཡན་ལག་དང་ཉིང་ལག་གི་མཚན་མ་འབྱུང་བ་ནི་རྐང་ལག་འགྱུས་པའི་དུས་ཡིན་ནོ། །དེ་ནས་བདུན་ཕྲག་དྲུག་པ་ལ་རླུང་འཁྱིལ་བྱེད་ཀྱིས་ཡན་ལག་ལྔ་པོ་རྫོགས་པར་འབྱེད་དེ་སྐྲ་དང་བ་སྤུ་དང་སེན་མོ་ཡང་འབྱུང་བ་ནི་དེ་ཉིད་ཀྱི་དུས་ཡིན་ནོ། །དེ་ནས་བདུན་ཕྲག་བདུན་པ་ལ་རླུང་ཟློག་སྒྱུར་བྱེད་པས་ཡན་ལག་དང་ཉིང་ལག་ཐམས་ཅད་ཡོངས་སུ་རྫོགས་པར་འབྱིན་ཅིང་མིག་ལ་སོགས་པའི་དབང་པོ་རྣམས་མངོན་པར་འགྲུབ་པ་ནི་དེའི་དུས་ཞེས་བྱའོ། །དེ་ནས་བདུན་ཕྲག་བརྒྱད་པ་ལ་ལས་ཀྱི་རླུང་རྣམ་པར་འབྱེད་པས་ཉེར་སྤྱོད་ཀྱི་འདུ་བྱེད་འབྱུང་བའི་སྒོ་དབང་པོ་རྣམས་དང་མཚན་མ་ལ་སོགས་པའི་གནས་ཀུན་གསལ་བར་གྱུར་ཏེ་བུ་ག་དགུ་རྣམས་དོད་པ་ནི་མཚན་དོད་པའི་དུས་ཞེས་བྱའོ། །དེ་ནས་བདུན་ཕྲག་དགུ་པ་མན་ཆད་གོང་དུ་འབྱུང་བ་བཞིན་ཏེ། བདུན་ཕྲག་སོ་བདུན་པའི་སྐབས་སུ་དགའ་བོ་ལ་མངལ་དུ་འཇུག་པ་བསྟན་པའི་མདོ་ལས། ཕྱིན་ཅི་ལོག་ཏུ་མ་གྱུར་པའི་འདུ་ཤེས་རྣམ་པ་ལྔ་འབྱུང་བར་འགྱུར་རོ། །ལྔ་གང་ཞེ་ན། མི་གཙང་བའི་འདུ་ཤེས་དང་། དྲི་མི་ཞིམ་པའི་འདུ་ཤེས་དང་། བཙོན་རའི་འདུ་ཤེས་དང་། མུན་ནག་གི་འདུ་ཤེས་དང་། ཡོངས་སུ་སྐྱོ་ནས་ཕྱིར་འབྱུང་བའི་འདུ་ཤེས་སྐྱེ་བ་གང་ཡིན་པ་སྟེ། མངལ་ན་གནས་པ་དེ་ཡོངས་སུ་སྐྱོ་བའི་བསམ་པ་དེ་ལྟ་བུ་དག་སྐྱེ་བར་འགྱུར་རོ། །ཞེས་པ་ལྟར་དང་མདོ་སྔ་མ་ལས་མི་གཙང་བ་དང་། དྲི་ང་བ་དང་། མུན་པ་ལ་མི་དགའ་བ་གསུམ་གསུངས་པ་ལ་སོགས་པའི་འདུ་ཤེས་སྐྱེད་དེ་ཕྱིར་འབྱུང་བར་མོས་སོ། །འདི་དག་སློབ་དཔོན་བདེ་བ་གསལ་མཛད་ཀྱིས་དཔེ་ཆུང་རང་གནས་དང་ཡང་བསྟུན་ནས་བྲིས་སོ། །དེར་ཡང་སའི་དངོས་གཞི་ལས། ལུས་དེ་ལ་ཡང་བྱིས་པ་རྣམས་ནི་བདག་གོ་སྙམ་པ་དང་། ངའི་འོ་སྙམ་པ་དང་། ངའོ་སྙམ་དུ་འཛིན་ཏོ། །འཕགས་པ་རྣམས་ནི་སྡུག་བསྔལ་ཉིད་དུ་འཛིན་ཏོ། །ཞེས་གསུངས་སོ། །དེ་ལྟར་དེ་ཡིས་རྫོགས་པའི་ཕྱིར་འདོད་པའི་ཁམས་ཀྱི་མི་ཁོ་ནའི་དབང་དུ་སེམས་ཅན་དེ་དག་མངལ་དེ་ན་གནས་པའི་ཡུན་རླུང་དང་ཞག་བདུན་ཕྲག་སུམ་ཅུ་རྩ་བརྒྱད་ཀྱིས་ནི་ལུས་དང་ཡན་ལག་ཐམས་ཅད་ཤིན་ཏུ་རྫོགས་པ་ཡིན་ཏེ། སྔ་མ་ལས་ཀྱང་། མངལ་ན་གནས་པ་དེ་ཡང་ཞག་བདུན་ཕྲག་སུམ་ཅུ་རྩ་བརྒྱད་ཀྱིས་མངལ་དུ་ཡན་ལག་དང་ཉིད་ལག་ཐམས་ཅད་དང་ལྡན་པར་འགྱུར་རོ། །དེ་ནས་ཞག་བཞི་ལོན་ན་བཙའ་བར་འགྱུར་ཏེ། ཞེས་གསུངས་པ་ལྟར་ཡིན་པས་ངེས་ནི་རྫོགས་པར་གྱུར་པ་ཡིན་ཏེ་ཕལ་ཆེ་བའི་དབང་ངོ་། །དེ་ལྟར་གང་སུ་ཞིག་མངལ་ན་གནས་པ་དེ་དག་གི་ལུས་ཀྱི་རྩ་བ་གཟུགས་དྲུག་དང་མགོ་དང་པགས་པ་བྲང་དང་ནང་གྲོལ་བཞི་ཡིས་ལུས་རྫོགས་པའམ་རྩ་ཕྲན་གྱི་ཡན་ལག་དྲུག་དང་གཡས་གཡོན་མདུན་རྒྱབ་ཀྱི་རྩ་ཆེན་བཞི་རྣམས་ཡོངས་སུ་རྫོགས་ནས་གདོན་མི་ཟ་བར་ཕྱིར་འབྱུང་ཞིང་སྐྱེ་བ་ཡིན་ནོ། །དེས་ན་ཟླ་བ་དགུ་དང་ངོ་བཅུ་སྟེ་ཟླ་བའི་ཚད་བརྩིས་པའོ། །དེ་སྐད་དུའང་སྔ་མ་ལས། དེ་ནས་ཤ་མས་གཡོགས་བཞིན་དུ་འབྱུང་བར་འགྱུར་ལ་འབྱུང་བ་ན་ཤ་མ་དེ་ཕྱིར་ནང་དུ་ལོག་སྟེ་ལྟོ་ན་གནས་སོ། །མངལ་གྱི་སྒོར་བྱུང་མ་ཐག་ཏུ་བཙས་པའི་དུས་ཞེས་བྱའོ། །དེ་བཙས་ནས་རིམ་གྱིས་སྐྱེ་བའི་ཆར་གཏོགས་པའི་རེག་པ་འདི་ལྟ་སྟེ། མིག་གི་འདུས་ཏེ་རེག་པ་ནས་ཡིད་ཀྱི་འདུས་ཏེ་རེག་པའི་བར་དུ་རེག་པར་འགྱུར་རོ། །ཞེས་པ་ནས། ཕ་མ་གཉིས་ཀྱིས་ཐོག་མ་ཁོ་ནར་ཁུ་བ་དང་ཁྲག་གིས་སྒྲུབ་པར་བྱེད་དོ། །དེ་ནས་བཙས་པར་རིག་ནས་གཞན་དག་ཀྱང་དེ་དང་མཐུན་པའི་ཟས་སྡུད་པར་བྱེད་གསོ་བར་བྱེད་སྐྱེད་པར་བྱེད་དོ། །དེ་ནས་དུས་མ་ཡིན་པར་འགྲོ་བ་དང་། ཡ་ང་བར་འགྲོ་ཞིང་རྒྱུ་བ་ལས་དེ་དང་དེར་ཀུན་ཏུ་སྲུང་བའི་བྱ་བ་བྱེད་དོ། །དེ་ནས་སྐྱེས་པའི་རྒྱུས་དབང་པོ་རྣམས་ཡོངས་སུ་སྨིན་ནས་སྨྲ་བའི་ཐ་སྙད་དག་སློབ་ཏུ་འཇུག་སྟེ། དེ་དག་གིས་ཀྱང་གཞན་དག་སློབ་ཏུ་འཇུག་གོ། །དེ་ལྟར་ན་སེམས་ཅན་འདི་དག་ནི་ཐོག་མ་མེད་པའི་དུས་ནས་བདེ་བ་དང་སྡུག་བསྔལ་བ་སོ་སོར་ཉམས་སུ་མྱོང་སྟེ། སངས་རྒྱས་རྣམས་ཀྱི་བྱང་ཆུབ་ལ་བརྟེན་ནས་གཞན་གྱི་སྒྲའི་རྒྱུ་ལས་བྱུང་བ་དང་། ནང་གི་ཚུལ་བཞིན་ཡིད་ལ་བྱེད་པས་ཟག་པ་ཟད་པ་ཐོབ་པར་མ་གྱུར་གྱི་བར་དུ་བདེ་བ་དང་སྡུག་བསྔལ་བ་ལས་འདའ་བར་མི་འགྱུར་རོ། །དེ་བས་ན་འདི་ལྟ་སྟེ། བདག་གི་ནི་གང་ན་ཡང་སུ་ཡང་ཅི་ཡང་མེད་དོ། །བདག་ཀྱང་གང་ན་ཡང་ཅི་ཡང་མ་ཡིན་ནོ། །ཞེས་བྱ་བའི་ཚིག་འདི་ནི་ཤིན་ཏུ་རྟོགས་པར་དཀའ་སྟེ་ནང་གི་དངོས་པོ་རྣམས་ཀྱི་འཆི་འཕོ་དང་སྐྱེ་བ་ནི་དེ་ལྟ་བུ་ཡིན་ནོ། །ཞེས་གསུངས་ཏེ་བྱམས་པའི་སེམས་སྒྲུབས་པ་དང་དོན་ཟབ་མོ་ལ་འཇུག་པའི་ཕྱིར་ཚད་མའི་ལུང་དུ་དྲངས་པ་ཡིན་ནོ། །དེ་ལྟར་འཇུག་པའི་ཆོས་བཞི་ཡང་ཡིད་ཀྱི་ལས་སོ། །ལྔ་པ་ལ་གཉིས་ཏེ། སྐྱེ་བ་བཅུ་དྲུག་སྤྱིར་བསྟན་ཏེ་ཀུན་ཀྱང་ཡིད་ཀྱི་ཆ་ལ་བསྡུ་བ། བྱེ་བྲག་ཏུ་ལས་ཀྱི་སྐྱེ་བ་ཡིད་ཀྱི་ལས་སུ་བསྟན་པའོ། །དང་པོ་ནི། ལྔ་བ་འབྱུང་བའི། ཞེས་པ་ནས། བདག་ཀུན་འདུས་པའོ། །ཞེས་པའི་བར་གྱིས་བསྟན་ཏེ། ལྔ་ཕྲག་གསུམ་གྱི་ཐ་མ་སྐྱེ་བ་སྤྱིར་བསྟན་པའི་ཕྱིར་འདི་སྐད་བཀའ་སྩལ་ཏེ། དེ་ལ་ལྔ་ཕྲག་གསུམ་པའི་ལྔ་པ་སྤྱིར་འབྱུང་བའམ་སྐྱེ་བར་བྱེད་པའི་ཆོས་ཀྱི་རྣམ་གྲངས་བསྟན་པ་ལ་བཞི་སྟེ་འཇུག་པའི་ཆོས་ཀྱི་རྗེས་སུ་བསྙད་པས་ཟབ་ཅིང་རྒྱ་ཆེ་ལ་གནད་གལ་པོ་ཆེའང་ཡིན་ནོ། །དེའང་རྒྱུད་རང་གཞུང་དུ་སྔར་བཤད་པའི་གང་ལས་ཀྱི་རྫུ་འཕྲུལ་ལས་སྐྱེ་བ་བཞི་དང་། རྣལ་འབྱོར་བསྒོམ་པའི་ཏིང་ངེ་འཛིན་ནམ་བསམ་གཏན་གྱི་ཆོ་འཕྲུལ་ལས་སྐྱེ་བ་བཞི་དང་། རྣམ་འཕྲུལ་ཅིར་ཡང་འབྱུང་བའི་གནས་ཐུགས་རྗེའི་རྫུ་འཕྲུལ་ལས་སྐྱེ་བ་བཞི་དང་། བཀོད་པ་སྣ་ཚོགས་སུ་སྟོན་པའི་ཆོས་ཉིད་ཀྱི་ཆོ་འཕྲུལ་ལས་སྐྱེ་བ་བཞི་སྟེ། གང་འདིར་དེ་དག་རེ་རེ་ལའང་བཞི་ཕྲག་རེར་དབྱེ་བས་སྐྱེ་བ་བཞི་ལ་རྣམ་གྲངས་ཀྱི་དབྱེ་བ་བཅུ་དྲུག་ཆོས་སུ་གྲགས་པ་དེ་ལ་ནི། གང་སྐྱེ་བ་དག་པ་དང་མ་དག་པ་རིལ་མ་ལུས་པ་ཀུན་འདུས་པར་གྱུར་པ་ཁོ་ནའོ། །དེའང་ལས་ཀྱིས་སྐྱེ་བ་ནི་ལྷ་མི་སྟོད་སྨད་གཉིས་ལ་སོགས་པའོ། །རྣལ་འབྱོར་བསྒོམ་པའི་ཏིང་ངེ་འཛིན་གྱི་སྟོབས་ཀྱིས་སྐྱེ་བ་ནི་བྱང་ཆུབ་སེམས་དཔའ་དང་ཉན་ཐོས་དང་རང་རྒྱལ་རྣམས་ཡིན་ནོ། །གང་དེ་དག་ཀྱང་འདིར་མངལ་གཅིག་པུའི་དབང་དུ་བསྟན་པར་ཟད་ཀྱི་ལྷ་མི་དང་ཉན་རང་བྱང་སེམས་དེ་དག་རེ་རེ་ལའང་སྐྱེ་བ་བཞི་ཆར་དུ་སྐྱེ་བའང་ཡོད་པས་བཅུ་དྲུག་ཏུ་འགྱུར་ཏེ་སྐྱེ་གནས་ཀྱི་སྐྱེ་བ་རིལ་དེར་འདུས་སོ། །འོ་ན་བྱང་ཆུབ་སེམས་དཔའ་དེ་འདུལ་བའི་དབང་གིས་ཇི་ལྟར་ཡང་རུང་ན། ལྷ་དང་མི་ལ་སྐྱེ་བ་བཞི་ཚང་དུ་བཏུབ་བམ་ཞེ་ན། དེ་ཡང་མི་ལ་བཙུན་མོ་ལྷ་མཚམས་མའི་བུ་སུམ་ཅུ་རྩ་གཉིས་དང་གནས་བརྟན་བྲག་དང་ཉེ་བའི་བྲག་ལྟ་བུ་སྒོ་ང་ལས་སྐྱེས་པ་དང་། སྣང་བ་མཐའ་ཡས་ཀྱི་ཞིང་ཁམས་སམ། བསྐལ་པ་དང་པོའི་མི་བརྫུས་ནས་སྐྱེ་བ་དང་། རྒྱལ་པོ་སྤྱི་བོ་སྐྱེས་དྲོད་གཤེར་ལས་སྐྱེ་བ་དང་། ཕལ་པ་མངལ་ནས་སྐྱེ་བའོ། །ལྷ་ལའང་བཞི་ཀ་ཚང་སྟེ། ལྷ་མོ་ཨ་འབྲ་སྐྱོང་ཤིང་གི་དྲོད་གཤེར་ལས་སྐྱེས་པ་དང་། ལྷ་ཚངས་པ་སྒོ་ང་ལས་སྐྱེས་པ་དང་། འདོད་པའི་ལྷ་དམན་རིགས་རྣམས་སའི་དངོས་གཞི་སོགས་ལས། པང་དང་ཕྲག་པ་ལས་སྐྱེ་བར་གསུངས་པ་ལྟར་མངལ་དང་བརྫུས་ནས་སྐྱེ་བ་ལྟ་བུའི་ཕྱིར་ཏེ། འོན་ཀྱང་ལྷའི་བུ་མོ་རྣམས་ལ་མངལ་གྱི་གནས་མེད་པ་སོགས་ཀྱིས་བརྫུས་སྐྱེས་སུ་ཡང་བསྡུས་ལ། གཞན་ཡང་དྲེགས་པའི་རབས་རྒྱུད་སོགས་དང་སྦྱར་རོ། །དེ་རྣམས་ནི་ཁྱད་པར་དུ་མངལ་དུ་འཇུག་པའི་རྗེས་སུ་བསྙད་པ་ཡིན་ནོ། །འོ་ན་ལས་དང་རྣལ་འབྱོར་གྱི་སྟོབས་ལས་སྐྱེ་བའི་སེམས་ཅན་དང་ཉན་རང་བྱང་སེམས་ཀྱི་སྐྱེ་བའི་གནས་ཀྱི་དབྱེ་བ་བཅུ་དྲུག་རྣམས་ཡིད་ཀྱི་ལས་སུ་རུང་ཡང་། ཐུགས་རྗེ་དང་ཆོས་ཉིད་ཀྱི་ཆོ་འཕྲུལ་ལས་སྐྱེ་བ་གཉིས་ཡིད་ཀྱི་ལས་སུ་ཇི་ལྟར་འདུ་ཞེ་ན། སྐྱེ་བ་བཞི་ཀ་ཡིད་ཀྱི་ཆ་ཡིན་ཏེ། ལས་ཀྱི་རྫུ་འཕྲུལ་ནི་ཡིད་ཤེས་རང་ཀ་མའི་ལས་ཡིན་ལ། བསམ་གཏན་གྱི་བཞི་ནི་ཡིད་ཀུན་གཞི་ལ་ཁ་བལྟས་པའི་ཤས་ཆེ་ཆུང་གིས་ལམ་པའི་ཏིང་ངེ་འཛིན་གྱི་ཆ་མཐོ་དམན་བཞི་ཡིན་པས་ཡིད་ཤེས་དག་པའི་ཆ་ཡིན་ཞིང་། ཐུགས་རྗེ་ནི་ཡིད་དང་ཀུན་གཞི་དབྱེར་མེད་དུ་རྟོགས་ཏེ་ཆོས་སྐུ་ལྷུན་གྲུབ་ཆེན་པོ་ལས་རང་རྩལ་མ་འགགས་པའི་ཐུགས་རྗེ་སྟོན་པས་ཡིད་རང་བྱུང་གི་ཡེ་ཤེས་ཀྱི་ཆོ་འཕྲུལ་ཡིན་ཏེ། ལམ་པའི་དུས་སུ་ཡིད་ཀྱི་ཤེས་པ་ཡུལ་དུ་སྣང་བའོ། །ཆོས་ཉིད་ནི་ཡིད་དང་དབྱེར་མེད་པའི་ཆོས་ཉིད་ཀྱི་ངོ་བོ་རང་སྣང་བའི་ཆོ་འཕྲུལ་ཡིན་པས་ཀུན་གྱི་ཡུལ་ཡང་ཆོས་ཉིད་རང་སྣང་དུ་འདུས་ཏེ། རིན་པོ་ཆེ་རྒྱན་ལས། ཐམས་ཅད་རང་སྣང་ཉིད་གནས་ལ། །སྒྲིབ་པ་མེད་ཀྱང་སྣང་རྐྱེན་བྲལ། །མི་ཤེས་བློ་ཡིས་ནན་བརྟགས་པས། །འཛིན་ལྔ་དངོས་པོར་འཐས་པ་ལས། །འདུ་བྱེད་རླུང་གིས་གཡོས་པས་ན། །སྣོད་བཅུད་སྡུག་བསྔལ་ངོ་བོར་སྨིན། །ཞེས་པ་ལྟར་རོ། །དེ་བས་ན་བཅུ་དྲུག་ཡིད་ཤེས་ཀྱི་ཆ་ལ་འདུས་སོ། །གཉིས་པ་ནི། འདི་དག་ལས་ཀྱིས། ཞེས་པ་ནས། མདོར་ཤེས་པར་བྱའོ། །ཞེས་པའི་བར་གྱིས་བསྟན་ཏེ། འོ་ན་དེ་ལྟར་ཡིན་ཀྱང་རང་བཞིན་དང་ཐུགས་རྗེ་ནི་ཡིད་ཀྱི་ལས་སུ་མི་འགྱུར་བས་དེ་ལ་དགོས་པ་མེད་དོ་ཞེ་ན། ལན་དུ། དེ་ལྟར་བཀོད་པ་འདི་དག་གི་དགོས་པས་དག་མ་དག་ཐམས་ཅད་ལས་ཀྱིས་དབང་ལས་སྐྱེ་བ་ཡིན་པར་ངོས་ཟིན་ཏེ་དཀར་ནག་གི་ཁྱད་པར་ལས་གྱུར་པའོ། །དེ་བས་ན་ཡིད་ཀྱིས་ལས་བཟང་ངན་ཐམས་ཅད་དང་འདུས་བྱས་དང་འདུས་མ་བྱས་ཀྱི་ཆོ་འཕྲུལ་དེ་དག་ཐམས་ཅད་སྐྱེད་པར་བྱེད་པ་ནི་སྐད་ཅིག་མའི་རྒྱུན་མ་ཆད་པར་ཡུལ་ལ་འཇུག་པས་ངང་རིང་ཞིང་མྱུར་ལ་མགྱོགས་པའི་ཡིད་ཀྱི་ལས་སུ་གྱུར་པ་ཡིན་ནོ་ཞེས་མུན་པའི་སྤྱོད་ཡུལ་ལ་གནས་པའི་རྒྱུའི་ཐེག་པ་མཚན་ཉིད་པ་ཡིས་མཐོང་བ་ཡིན་ཏེ། དེའང་རང་རྒྱུད་ཀྱི་མུན་པ་དང་ལྟོས་པའི་མུན་པ་གཉིས་སུ་འགྱུར་རོ། །དེ་བས་ན་འདིར་ནི། རྒྱན་སྟུག་པོ་བཀོད་པ་ལས། དེ་བས་ལས་ཀྱི་འབྲས་གྱུར་པ། །འདི་ནི་སྒྱུ་མའི་བུས་བྱས་བཞིན། །འདི་ན་ལས་མེད་འབྲས་བུ་མེད། །ལས་ཀྱིས་སྒྲུབ་པའང་ཡོད་པ་མིན། །ཞེས་དང་། དུར་ཁྲོད་ཁུ་བྱུག་རོལ་པ་ལས། བྱང་ཆུབ་སྤྱོད་པའི་གནས་འདི་ཡི། །ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །དེ་ཉིད་འཇིག་རྟེན་སྣ་ཚོགས་ཏེ། །ཕྱག་རྒྱའི་ཚོགས་ཆེན་དེ་ཉིད་དོ། །ཆོས་སྐུ་སྒྱུ་མས་དབང་བསྒྱུར་བས། །དེ་ལ་དངོས་པོ་ག་ལ་ཡོད། །ཅི་སྤྱོད་ཅི་བསྒོམས་ཅི་བསྒྲུབས་ཀྱང་། །བྱང་ཆུབ་ཉིད་དེ་ལྟུང་གནས་མེད། །དམྱལ་བའི་གནས་ཉིད་བླ་མེད་གནས། །སྡུག་བསྔལ་ཉིད་ཀྱང་བྱང་ཆུབ་ལ། །འཁོར་བ་ཉིད་ཀྱང་མྱ་ངན་འདས། །སྒྲིབ་པ་ཉིད་ནི་མངོན་སངས་རྒྱས། །ངེས་དོན་དེ་ལ་འདུས་པར་སྦྱོར། །ཞེས་དང་། ཀུན་ཏུ་བཟང་པོ་ཆེ་བ་རང་ལ་གནས་པའི་རྒྱུད་ལས། ཆུ་ཟླ་སྒྱུ་མ་སྨིག་རྒྱུ་བཞིན། །མེད་པ་ཟང་ཐལ་མ་ཡིན་ལ། །ཡོད་པ་ཡང་ནི་མ་ཡིན་ནོ། །ཡོད་མེད་གཉིས་ལས་འདས་པ་ཡིས། །རང་བཞིན་མེད་པ་ཡིད་ལ་དྲན། །ཤེས་རབ་ཆེན་པོའི་རྟོག་པས་བཏགས། །མཁའ་ལྟར་མཉམ་པ་ཉིད་གནས་ན། །ཤེས་རབ་ཆེན་པོས་ཁྱབ་པའི་རྟགས། །ཞེས་སོགས་གསུངས་པ་ལྟར་རོ། །འོ་ན་དོན་དེ་ལྟར་དུ་གནས་པ་ཡིན་ན་ཚུལ་འདི་དག་གང་ལ་དགོངས་ཏེ་གསུངས་ཞེ་ན། རང་གིས་མུན་པས་བསླད་པ་དང་རྩོལ་བའི་ལས་ཀྱིས་ཡུན་རིང་དུ་བསྒྱངས་པས་རྩ་བ་ཆེན་པོ་མ་མཐོང་སྟེ་ཆོས་ཉིད་ཀྱི་དོན་ལ་བསྒྲིབས་པར་གནས་པའི་རྒྱུའི་ཐེག་པ་པ་རྣམས་ཀྱི་ཡུལ་དང་དེ་འདྲ་བ་ལ་དགོངས་ཏེ་དེ་ལྟར་སྣང་བའི་མདོར་གསལ་བར་གསུངས་ཏེ་རྒྱས་བར་བཀའ་སྩལ་པར་མཛད་པའོ། །དེ་ལྟར་ལྔ་ཕྲག་ཐ་མའི་ཡན་ལག་ཉི་ཤུ་རྩ་དྲུག་ཀྱང་ཡིད་ཀྱི་ལས་སོ། །ལང་ཀའི་བདག་པོ་ཞེས་བོས་ནས། དེ་ལྟར་སྟོན་པ་གསང་བ་མཆོག་གི་བདག་པོས་བཀའ་སྩལ་པ་བཞིན་དུ་ལེགས་པར་བསྟན་པ་དེ་དག་ནི་ཡིད་ཀྱི་ཤེས་པ་སྣང་བའི་མདོར་ཡང་དག་པར་ཤེས་པར་བྱའོ། །ཞེས་དོན་གྱི་ངོ་བོ་བསྟན་པའོ། །བཞི་པ་འཇུག་པའི་མདོ་སྒོ་ལྔའི་རྣམ་པར་ཤེས་པ་བཤད་པ་ལ་གཉིས་ཏེ། ཉེ་བར་བསྟན་པ། རྒྱས་པར་བཤད་པའོ། །དང་པོ། ལང་ཀའི། ཞེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ། ལང་ཀའི་བདག་པོ། ཞེས་སྡུད་པ་པོ་ལ་བོས་ནས་གཞན་ཡང་མུན་པའི་དྲིས་ལན་མདོ་ཐ་མ་ཡུལ་ལ་འཇུག་པར་བྱེད་པའི་མདོ་སྒོ་ལྔའི་རྣམ་པར་ཤེས་པ་ཉེ་བར་བསྟན་པ་གང་ཇི་ལྟ་ཞེ་ན། འདི་ལྟ་སྟེ། ཞེས་བྱའོ། །གཉིས་པ་ལ་བདུན་ཏེ། སྒོ་ལྔའི་རྣམ་པར་ཤེས་པའི་གནས་བསྟན་པ། དེ་ཡི་དམིགས་པའི་ཡུལ་གྱི་ཁྱད་པར་བཤད་པ། དེ་དག་འཁོར་གང་དང་མཚུངས་པར་ལྡན་ཚུལ་བཤད་པ། དེ་རྣམས་ཀྱི་བྱེད་པའི་ལས་ཀྱི་ཁྱད་པར་བསྟན་པ། དེ་དག་ཚོར་བ་གང་དང་མཚུངས་པར་ལྡན་ཚུལ་བཤད་པ། དེ་ཡི་རང་གི་ངོ་བོའི་ཁྱད་པར་གྱི་ཆོས་བསྟན་པ། དེ་དག་ལྡོག་པའི་དུས་བསྟན་ཏེ་མཚན་ཉིད་ངོས་གཟུང་བའོ། །དང་པོ་ནི། དེ་འདོད་བྱེད་པ། ཞེས་པ་ནས། རྒྱུན་གཅིག་རྒྱུན་གཞན་བྱེད། །ཅེས་པའི་བར་གྱིས་བསྟན་ཏེ། དེ་ཡང་སྒོ་ལྔའི་ཤེས་པ་དེ་དག་འདོད་པའི་ཡུལ་ལ་འཇུག་པར་བྱེད་པས་ན་འཇུག་པའི་རྣམ་པར་ཤེས་པ་ཞེས་པའི་མིང་ཡང་འགྲུབ་ལ། དེ་ལའང་གནས་རྣམ་པ་གསུམ་སྟེ་གནས་གསུམ་པོ་གང་ཞེ་ན། གོ་འབྱེད་པའི་གནས་ཤེས་པ་སྔ་མ་སྔ་མ་འགགས་མ་ཐག་པ་གང་ཡིན་པ་དང་། རྒྱུན་གཅིག་པའམ་ལྷན་ཅིག་འབྱུང་བའི་གནས་དབང་པོ་ལྔ་ཡིན་ལ། བག་ཆགས་ཀྱི་གནས་སྒོ་ལྔས་ཡུལ་བཅད་དེ་ཡུལ་དང་ཤེས་པ་གཉིས་ཀ་འགགས་ནས་ཀུན་གཞི་ལ་བག་ཆགས་བསགས་པའི་རྒྱུ་བྱས་པས་སྔར་མེད་པ་ལས་ཡོད་པར་གྱུར་ཏེ་ཕྱིས་ཀྱི་རྒྱུན་གཞན་ཡང་སྐྱེད་པར་བྱེད་པ་ནི་ས་བོན་གྱི་གནས་ཞེས་བྱ་སྟེ། སའི་དངོས་གཞི་ལས། མིག་གི་རྣམ་པར་ཤེས་པ་གང་ཞེ་ན། གང་མིག་ལ་བརྟེན་ནས་གཟུགས་སོ་སོར་རིག་པའོ། །མིག་གི་རྣམ་པར་ཤེས་པའི་གནས་གང་ཞེ་ན། མིག་ནི་ལྷན་ཅིག་འབྱུང་བའི་གནས་སོ། །ཡིད་ནི་དེ་མ་ཐག་པའི་གནས་སོ། །ས་བོན་ཐམས་ཅད་པ་ལུས་ལེན་པར་བྱེད་པ་རྣམ་པར་སྨིན་པས་བསྡུས་པ་ཀུན་གཞི་རྣམ་པར་ཤེས་པ་ནི་ས་བོན་གྱི་གནས་སོ། །ཞེས་དང་། མིག་གང་ཞེ་ན། གང་འབྱུང་བ་ཆེན་པོ་བཞི་དག་རྒྱུར་བྱས་པ་མིག་གི་རྣམ་པར་ཤེས་པའི་རྟེན་པོ་གཟུགས་དྭང་བ་སྟེ། བསྟན་དུ་མེད་ལ་ཐོགས་པ་དང་བཅས་པའོ། །ཡིད་གང་ཞེ་ན། གང་མིག་གི་རྣམ་པར་ཤེས་པའི་སྔོན་རོལ་དུ་འདས་མ་ཐག་པའི་རྣམ་པར་ཤེས་པའོ། །ས་བོན་ཐམས་ཅད་པའི་རྣམ་པར་ཤེས་པ་གང་ཞེ་ན། སྔོན་གྱི་སྤྲོས་པ། དགའ་བ་རྒྱུར་གྱུར་པ་ལ་བརྟེན་ནས་ས་བོན་ཐམས་ཅད་པ་རྣམ་པར་སྨིན་པ་མངོན་པར་འགྲུབ་པ་གང་ཡིན་པའོ། །ཞེས་དང་། རྣ་བའི་རྣམ་པར་ཤེས་པ་གང་ཞེ་ན། གང་རྣ་བ་ལ་བརྟེན་ནས་སྒྲ་སོ་སོར་རྣམ་པར་རིག་པའོ། །ཞེས་སོགས་གཞན་རྣམས་སྔ་མ་ལྟར་འགྲེ་ལ། སྣའི་རྣམ་པར་ཤེས་པ་གང་ཞེ་ན། གང་སྣ་ལ་བརྟེན་ནས་དྲི་སོ་སོར་རྣམ་པར་རིག་པའོ། །ཞེས་སོགས་དང་། ལྕིའི་རྣམ་པར་ཤེས་པ་གང་ཞེ་ན། གང་ལྕེ་ལ་བརྟེན་ནས་རོ་སོ་སོར་རྣམ་པར་རིག་པའོ། །ཞེས་སོགས་དང་། ལུས་ཀྱི་རྣམ་པར་ཤེས་པ་གང་ཞེ་ན། གང་ལུས་ལ་བརྟེན་ནས་རེག་བྱ་སོ་སོར་རྣམ་པར་རིག་པའོ། །གནས་གང་ཞེ་ན། ལུས་ནི་ལྷན་ཅིག་འབྱུང་བའི་གནས་སོ། །ཡིད་ནི་དེ་མ་ཐག་པའི་གནས་སོ། །ས་བོན་ཐམས་ཅད་པ་ཀུན་གཞི་རྣམ་པར་ཤེས་པ་དེ་ཉིད་ནི་ས་བོན་གྱི་གནས་སོ། །ལུས་གང་ཞེ་ན། གང་འབྱུང་བ་ཆེན་པོ་བཞི་པོ་དག་རྒྱུར་བྱས་པ་ལུས་ཀྱི་རྣམ་པར་ཤེས་པའི་རྟེན་པོ་གཟུགས་དྭང་བ་སྟེ་བསྟན་དུ་མེད་ལ་ཐོགས་པ་དང་བཅས་པའོ། །ཡིད་དང་ས་བོན་གྱི་རྣམ་པར་དབྱེ་བ་ནི་སྔ་མ་བཞིན་ནོ། །ཞེས་དང་། གཏན་ལ་དབབ་པ་བསྡུ་བ་ལས། འདི་ལ་ཀུན་གཞི་རྣམ་པར་ཤེས་པ་ནི་རྣམ་པ་གཉིས་ཀྱིས་འཇུག་པའི་རྣམ་པར་ཤེས་པའི་རྐྱེན་གྱི་བྱ་བ་བྱེད་དེ་ས་བོན་གྱི་དངོས་པོ་དང་རྟེན་བྱེད་པས་སོ། །དེ་ལ་ས་བོན་གྱི་དངོས་པོ་ནི་འཇུག་པའི་རྣམ་པར་ཤེས་པ་དགེ་བ་དང་མི་དགེ་་བ་དང་ལུང་དུ་མ་བསྟན་པ་འབྱུང་བར་འགྱུར་བ་གང་ཅི་ཡང་རུང་སྟེ། དེ་དག་ཐམས་ཅད་ནི་ཀུན་གཞི་རྣམ་པར་ཤེས་པའི་ས་བོན་དང་ལྡན་པ་ཡིན་ནོ། །དེ་ལ་རྟེན་བྱེད་པ་ནི་ཀུན་གཞི་རྣམ་པར་ཤེས་པས་ཟིན་པའི་དབང་པོ་གཟུགས་ཅན་རྣམས་ལ་བརྟེན་ནས་རྣམ་པར་ཤེས་པའི་ཚོགས་ལྔ་པོ་དག་འབྱུང་བར་འགྱུར་གྱི་མ་ཟིན་པ་དག་ལས་ནི་མ་ཡིན་ནོ། །ཞེས་དང་། དེ་ལ་འཇུག་པའི་རྣམ་པར་ཤེས་པ་ནི་རྣམ་པ་གཉིས་ཀྱིས་ཀུན་གཞི་རྣམ་པར་ཤེས་པའི་རྐྱེན་གྱི་བྱ་བ་བྱེད་དེ། ཚེ་འདི་ལ་ས་བོན་ཡོངས་སུ་བརྟས་པར་བྱེད་པ་དང་། ཚེ་ཕྱི་མ་ལ་དེ་མངོན་པར་འགྲུབ་པའི་ས་བོན་ཡོངས་སུ་འཛིན་པར་བྱེད་པས་སོ། །དེ་ལ་ཚེ་འདི་ལ་ས་བོན་ཡོངས་སུ་བརྟས་པར་བྱེད་པ་ནི། ཇི་ལྟ་ཇི་ལྟར་ཀུན་གཞི་རྣམ་པར་ཤེས་པ་ལ་བརྟེན་པ་འཇུག་པའི་རྣམ་པར་ཤེས་པ་དགེ་བ་དང་། མི་དགེ་བ་དང་། ལུང་དུ་མ་བསྟན་པ་འབྱུང་བར་འགྱུར་པ་དེ་ལྟ་དེ་ལྟར་རང་གི་རྟེན་ལ་རྟེན་དེ་དང་ལྷན་ཅིག་སྐྱེ་བ་དང་འགགས་པས་བག་ཆགས་བསྒོ་བར་བྱེད་དོ། །རྒྱུ་དེ་དང་རྐྱེན་དེས་ན་འཇུག་པའི་རྣམ་པར་ཤེས་པ་རྣམས་ཀྱང་ཕྱིར་ཞིང་ཕྱིར་ཞིང་དགེ་བ་ལ་སོགས་པའི་དངོས་པོར་ཤིན་ཏུ་བརྟས་པ་དང་། ཤིན་ཏུ་སྦྱངས་པ་དང་། ཤིན་ཏུ་འོད་གསལ་བ་དག་ཏུ་འབྱུང་བར་འགྱུར་རོ། །དེའི་བག་ཆགས་ཀྱི་རིགས་གཞན་ནི་ཕྱི་མ་ལ་ཀུན་གཞི་རྣམ་པར་ཤེས་པ་དེ་དག་ཉིད་ཀྱི་རྣམ་པར་སྨིན་པ་ཡོངས་སུ་འཛིན་པའི་ཕྱིར་འཇུག་པར་འགྱུར་རོ། །ཞེས་སོ། །གཉིས་པ་ནི། སོ་སོའི་རིས་སུ་བཅད་དབང་བྱེད། །ཅེས་པས་བསྟན་ཏེ། སྒོ་ལྔའི་ཤེས་པས་དམིགས་པའི་ཡུལ་ནི། གཟུགས་ལ་སོགས་པ་སོ་སོའི་རིས་སུ་བཅད་དེ་ཐ་དད་དུ་གྱུར་པས་རང་ཡུལ་རང་རང་སོ་སོ་ལ་དབང་བྱེད་པ་ལས་གཞན་དུ་མ་ཡིན་ཏེ། རྒྱན་སྟུག་པོ་བཀོད་པ་ལས། རྣམ་ཤེས་ལྔ་ཡི་ཡུལ་རྣམས་ནི། །སེམས་ཅན་བཞིན་གནས་ལུས་ཅན་ལ། །ཀུན་གཞིར་གྲགས་པའི་ཆུ་ཀླུང་ལས། །རྦ་རླབས་བཞིན་དུ་རབ་ཏུ་འབྱུང་། །རྣམ་ཤེས་ཀུན་གཞི་མཚོར་གནས་པ། །བག་ཆགས་རྣམས་ཀྱིས་བརྙོགས་པའི་རྣམས། །ཡུལ་གྱི་རླུང་གིས་བསྐྱོད་པ་དག །རྣམ་པར་རྒྱུན་ཆད་མེད་པར་རྒྱུ། །ཞེས་དང་། སའི་དངོས་གཞི་ལས། མིག་གི་རྣམ་པར་ཤེས་པའི་དམིགས་པ་གང་ཞེ་ན། གཟུགས་གང་བསྟན་དུ་ཡོད་ཅིང་ཐོགས་པ་དང་བཅས་པའོ། །དེ་ཡང་རྣམ་པ་དུ་མ་ཡོད་དོ། །མདོར་ན་ཁ་དོག་དང་དབྱིབས་དང་རྣམ་པར་རིག་བྱེད་དོ། །ཞེས་དང་། ཡང་ཁ་དོག་གང་ཞེ་ན་གཟུགས་དང་འདྲ་བ་མིག་གི་རྣམ་པར་ཤེས་པའི་སྤྱོད་ཡུལ་དུ་གྱུར་པའོ། །དབྱིབས་གང་ཞེ་ན། གང་གཟུགས་རྒྱས་པར་རིང་པོ་ལ་སོགས་པར་ཡོངས་སུ་བཅད་པའི་རྣམ་པའོ། །ཞེས་དང་། རྣམ་པར་རིག་བྱེད་གང་ཞེ་ན། འདི་ལྟ་སྟེ། ལེན་པ་དང་། འཇོག་པ་དང་། བསྐུམ་པ་དང་། བརྐྱང་པ་དང་། འགྲེང་བ་དང་། འདུག་པ་དང་། ཉལ་བ་དང་། འགྲོ་བ་དང་། ལྡོག་པ་དང་། དེ་ལ་སོགས་པའོ། །ཞེས་སོགས་དང་། རྣ་བའི་རྣམ་པར་ཤེས་པའི་དམིགས་པ་གང་ཞེ་ན། སྒྲ་རྣམ་པ་དུ་མ་བསྟན་དུ་མེད་ལ་ཐོགས་པ་དང་བཅས་པ་དག་སྟེ། འདི་ལྟ་སྟེ་དུང་གི་སྒྲ་དང་། ཞེས་སོགས་དང་། སྣའི་རྣམ་པར་ཤེས་པའི་དམིགས་པ་གང་ཞེ་ན། དྲི་རྣམ་པ་དུ་མ་བསྟན་དུ་མེད་ལ་ཐོགས་པ་དང་བཅས་པ་དག་སྟེ། དྲི་ཞིམ་པའམ། ཞེས་སོགས་དང་། ལྕེའི་རྣམ་པར་ཤེས་པའི་དམིགས་པ་གང་ཞེ་ན་རོ་རྣམ་པ་དུ་མ་བསྟན་དུ་མེད་ལ་ཐོགས་པ་དང་བཅས་པ་དག་སྟེ། དེ་དག་ཀྱང་རོ་ཁ་བ་དང་། ཞེས་སོགས་དང་། ལུས་ཀྱི་རྣམ་ཤེས་ཀྱི་དམིགས་པ་གང་ཞེ་ན། རེག་བྱ་རྣམ་པ་དུ་མ་བསྟན་དུ་མེད་ལ་ཐོགས་པ་དང་བཅས་པ་དག་སྟེ། འདི་ལྟ་སྟེ། ས་དང་ཆུ་དང་། མེ་དང་རླུང་། ཡང་བ་ཉིད་དང་། ཞེས་སོགས་ནས། དེ་ཡང་རེག་ན་བདེ་བ་དང་། རེག་ན་སྡུག་བསྔལ་བ་དང་། བཏང་སྙོམས་ཀྱི་གནས་ཀྱི་རེག་པར་བལྟ་བར་བྱའོ། །ཞེས་སོ། །གསུམ་པ་ནི། དེ་ཉིད་ལྡན་པ་དེ་ཁོ་ན། །ཞེས་པས་བསྟན་ཏེ། སྒོ་ལྔ་དེ་ཉིད་ཀྱི་འཁོར་ནི་ཡིག་རྙིང་ཚད་མའི་ཕྱག་མཆན་ལས་བྱུང་བ་བཞིན་རྐྱེན་ལྟར་ཉེ་བར་གནས་པ་ཞེས་བྱ་སྟེ་བསམ་པ་སྔོན་དུ་མ་བཏང་བ་ན་ཐུན་མོང་དུ་མཚུངས་པར་ལྡན་པ་ལྔ་ཀུན་ཏུ་འགྲོ་བ་དེ་དག་ཁོ་ན་ལས་གཞན་མི་འབྱུང་ལ། ཡིད་ཀྱི་བསམ་པ་སྔོན་དུ་སོང་བའི་འཁོར་གྱི་དབང་དུ་ན་ཡུལ་ངེས་ལྔ་དང་རྟོག་དཔྱོད་རྣམས་ཀྱང་འབྱུང་སྟེ། སའི་དངོས་གཞི་ལས། གྲངས་གང་ཞེ་ན། དེ་དང་ལྷན་ཅིག་འབྱུང་ཞིང་མཚུངས་པར་ལྡན་པ་སེམས་ལས་བྱུང་བའི་ཆོས་རྣམས་ཏེ། འདི་ལྟ་སྟེ། ཡིད་ལ་བྱེད་པ་དང་། རེག་པ་དང་། ཚོར་བ་དང་། འདུ་ཤེས་དང་། སེམས་པའོ། །སེམས་ལས་བྱུང་བའི་ཆོས་གཞན་གང་དག་མིག་གི་རྣམ་པར་ཤེས་པ་དང་ལྷན་ཅིག་འབྱུང་ཞིང་མཚུངས་པར་ལྡན་པ་དེ་དག་ནི་དམིགས་པ་གཅིག་ལ་རྣམ་པ་དུ་མ་སྟེ། ལྷན་ཅིག་འབྱུང་བ་དག་ཀྱང་རེ་རེ་འབྱུང་ལ། ཐམས་ཅད་ཀྱང་རང་གི་ས་བོན་ལས་ངེས་པར་འབྱུང་བ་མཚུངས་པར་ལྡན་པ་དམིགས་པ་དང་བཅས་པ་རྣམ་པ་དང་བཅས་པ། གནས་དང་བཅས་པ་དག་གོ། །ཞེས་སོ། །འདིར་དམིགས་པ་གཅིག་ལ་རྣམ་པ་དུ་མ་ཞེས་པ་ནི་དམིགས་པའི་དངོས་པོ་གཅིག་ཡིན་ཀྱང་ཡུལ་གྱི་མཚན་ཉིད་ཐ་དད་པས་འཛིན་པའི་རྣམ་པ་ཐ་དད་པའི་ཕྱིར་རང་གི་རྣམ་པ་ཐ་དད་པ་ལ་བྱའོ། །དེས་ན་འདི་ལྟར་གསུངས་པ་ནི། ཡིད་ཀྱི་བསམ་པ་སྔོན་དུ་སོང་བའི་ས་མང་བཅུ་ལ་སོགས་པའི་དབང་དུ་སྟེ། རྣ་བ་ནས་ལུས་ཀྱི་རྣམ་ཤེས་ཀྱི་བར་དུ་ཡང་དེས་འགྲེའོ། །བཞི་པ་ནི། གང་གི་ངོ་བོར་བྱུང་ཙམ་ཉིད། །ཅེས་པས་བསྟན་ཏེ། ལས་ནི་རྒྱུ་མཐུན་པའི་བག་ཆགས་གང་གི་ངོ་བོར་བྱུང་བ་ཙམ་ཀུན་གཞི་ལ་གསོགས་ཏེ་ཁྱད་པར་གསལ་བར་མ་ཆོད་པས་རྟོག་མེད་ཉིད་ཡིན་པས་རྣམ་པར་སྨིན་པ་གསོགས་པར་མི་ནུས་ཏེ་མངོན་སུམ་ངེས་མེད་ཀྱི་ཤེས་པར་གྱུར་བའི་ཕྱིར་རོ། །དེས་ན་སྔ་མ་ལས། ལས་གང་ཞེ་ན། དེ་ནི་རྣམ་པ་དྲུག་ཏུ་བལྟ་བར་བྱ་སྟེ། ཐོག་མ་ཁོ་ནར་དེ་རང་གི་ཡུལ་ལ་དམིགས་པ་རྣམ་པར་རིག་པའི་ཡུལ་ལས་དང་། ཡང་རང་གི་མཚན་ཉིད་རྣམ་པར་རིག་པ་དང་། ཡང་ད་ལྟར་གྱི་དུས་རྣམ་པར་རིག་པ་དང་། ཡང་སྐད་ཅིག་གཅིག་རྣམ་པར་རིག་པ་དང་། ཡང་རྣམ་པ་གཉིས་ཀྱིས་ཡིད་ཀྱི་རྣམ་པར་ཤེས་པའི་རྗེས་སུ་འཇུག་པ་སྟེ། དགེ་བ་ཉོན་མོངས་པ་ཅན་གྱི་རྗེས་སུ་འཇུག་པ་དང་། ལས་ཀུན་ནས་སློང་བའི་རྗེས་སུ་འཇུག་པ་དང་། ཡང་སྡུག་པ་དང་མི་སྡུག་པའི་འབྲས་བུ་ཡོངས་སུ་རིག་པ་སྟེ་ལས་དྲུག་པའོ། །ཞེས་གསུངས་ཏེ། འདི་དག་ནི་ཡིད་ཀྱི་རྣམ་པར་ཤེས་པ་ལས་བྱེ་བྲག་ཏུ་བསྟན་པའི་ཕྱིར་ཏེ། དེ་ནི་རང་གི་ལུས་དང་། གཞན་གྱི་ཡུལ་དང་། རང་གི་མཚན་ཉིད་དང་སྤྱི་དང་འབྲེལ་བ་ཅན་གྱི་མཚན་ཉིད་ལ་སོགས་པ་དང་། དུས་གསུམ་དང་། རྒྱུན་ལ་ཡང་དམིགས་པས་ན་དེ་ལས་རྣམ་པར་དབྱེ་བའི་ཕྱིར་ཚིག་དང་པོ་བཞི་སྨོས་ལ། ཡིད་ཀྱི་རྣམ་པར་ཤེས་པ་ནི་རང་དབང་སོགས་ཀྱིས་དགེ་བ་ལ་སོགས་པ་དང་ལས་ཀུན་ནས་སློང་བ་དང་། སྡུག་པ་དང་མི་སྡུག་པའི་འབྲས་བུ་ཡོངས་སུ་འཛིན་པར་རིག་པ་ཡིན་ཀྱང་ལྔ་པོ་དག་ནི་རང་ལ་རྣམ་པར་རྟོག་པ་མེད་པའི་ཕྱིར་དེའི་རྗེས་སུ་འཇུག་པས་ཡིན་ཏེ་གཞན་གྱི་དབང་ཁོ་ནར་ཟད་དོ། །ཚུལ་དེས་ན་ཕྱི་མ་གཉིས་སྨོས་པ་ཡིན་ཏེ། དེ་ཉིད་ལས། འདི་ལྟར་མིག་ཀྱང་ཡོངས་སུ་མ་ཉམས་ལ་གཟུགས་ཀྱང་སྣང་བར་གྱུར་ཅིང་། དེ་དང་འབྱུང་བ་ཡིད་ལ་བྱེད་པ་ཡང་ཉེ་བར་གནས་པར་གྱུར་ན་དེའི་ཕྱིར་དེ་ལས་སྐྱེས་པའི་མིག་གི་རྣམ་པར་ཤེས་པ་འབྱུང་བར་འགྱུར་རོ། །མིག་གི་རྣམ་པར་ཤེས་པ་ཇི་ལྟ་བ་བཞིན་དུ། རྣ་བ་དང་། སྣ་དང་། ལྕེ་དང་། ལུས་ཀྱི་རྣམ་པར་ཤེས་པ་རྣམས་ལའང་དེ་བཞིན་དུ་བལྟ་བར་བྱའོ། །དེ་ལ་མིག་གི་རྣམ་པར་ཤེས་པ་བྱུང་བ་ན་ཉེ་བར་གནས་པ་ལས་བྱུང་བ་དང་། ཚོལ་བ་དང་། ངེས་པའི་སེམས་རྣམ་པ་གསུམ་རིམ་བཞིན་དུ་དམིགས་པར་འགྱུར་ཏེ། དེ་ལ་དང་པོ་ནི་མིག་གི་རྣམ་པར་ཤེས་པ་ཉིད་དོ། །གཉིས་པ་ནི་ཡིད་ཀྱི་རྣམ་པར་ཤེས་པའོ། །དེ་ལ་ངེས་པའི་སེམས་ཕན་ཆད་ནས་ཀུན་ནས་ཉོན་མོངས་པ་དང་། རྣམ་པར་བྱང་བར་འགྱུར་བར་བལྟའོ། །དེ་ནས་དེའི་རྒྱུ་མཐུན་པའི་མིག་གི་རྣམ་པར་ཤེས་པ་ཡང་དགེ་བ་དང་མི་དགེ་བར་འབྱུང་བར་འགྱུར་ཏེ་རང་གི་རྟོག་པའི་དབང་གིས་ནི་མ་ཡིན་ནོ། །ཇི་སྲིད་དུ་ཡིད་དེ་གཞན་ལ་རྣམ་པར་གཡེངས་པར་མ་གྱུར་པ་དེ་སྲིད་དུ་ཡིད་ཀྱི་རྣམ་པར་ཤེས་པ་དང་མིག་གི་རྣམ་པར་ཤེས་པ་གཉི་ག་དགེ་བའམ་ཉོན་མོངས་པ་ཅན་དུ་འགྱུར་རོ། །མིག་གི་རྣམ་པར་ཤེས་པ་བྱུང་བ་ན། ཇི་ལྟ་བ་བཞིན་དུ་ལུས་ཀྱི་རྣམ་པར་ཤེས་པའི་བར་དུ་ཡང་དེ་བཞིན་དུ་རིག་པར་བྱའོ། །ཞེས་སོ། །ལྔ་པ་ནི། གང་ཡང་མ་ཡིན་དེ་དབུ་མ། །ཞེས་པས་བསྟན་ཏེ། དེ་ལྟར་འཇུག་པའི་རྣམ་ཤེས་ལྔ་པོ་དེ་ཉིད་ཚོར་བ་བདེ་སྡུག་གང་དང་ཡང་ལྡན་པ་མ་ཡིན་པས་དེ་གཉིས་ཀྱི་ཕྱོགས་རིས་སུ་མ་ཆད་པའི་ཚོར་བ་དབུ་མའམ་བཏང་སྙོམས་དང་མཚུངས་པར་ལྡན་པ་ཡིན་ནོ། །གལ་ཏེ་གཞན་གྱི་དབང་དུ་གཟུང་ན་ནི། དེ་ཙམ་དུ་མ་ཟད་བདེ་བ་དང་སྡུག་བསྔལ་གཉིས་དང་དེ་གཉིས་གང་རུང་གིས་གཅིག་ཤོས་ཟིལ་གྱིས་གནན་པ་རྣམས་དང་ཡང་ལྡན་ཏེ། དེ་དག་ཀུན་གཞིའི་རྣམ་པར་ཤེས་པའི་ཁམས་ལ་རྟེན་ནས། འདི་ལྟར་ཚུལ་བཞིན་ནམ་ཚུལ་བཞིན་མ་ཡིན་པ་སེམས་པར་བྱེད་པ་དང་། རྗེས་སུ་རྟོགས་པར་བྱེད་པའམ། སེམས་མཉམ་པར་གཞག་པའམ། སེམས་མཉམ་པར་མ་བཞག་པ་གཅིག་གི་ལུས་ལ་ཚོར་བ་རྣམ་པ་དུ་མ་རྣམ་པ་མང་པོ་སྣ་ཚོགས་པ་འབྱུང་བའི་དབང་ཡིན་པའི་ཕྱིར། གཏན་ལ་དབབ་པ་བསྡུ་བ་ལས། ཀུན་གཞི་རྣམ་པར་ཤེས་པ་དེ་ཡང་རེས་འགའ་ནི་བདེ་བ་དང་། སྡུག་བསྔལ་བ་དང་། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་རྣམས་དང་འདྲེན་མར་འཇུག་སྟེ། འཇུག་པའི་རྣམ་པར་ཤེས་པ་ལ་བརྟེན་ནས། ཚོར་བ་གང་དག་ཡིན་པ་དེ་དག་དེ་ལ་བརྟེན་ནས་འབྱུང་བའི་ཕྱིར་རོ། །ཞེས་གསུངས་པ་ལ་སོགས་པ་ལྟར་ཏེ་ཞིབ་པར་རྟོགས་པར་བྱའོ། །དྲུག་པ་ནི། ཀུན་ཏུ་མི་འཆོས་རང་བཞིན་བླུན། །ཞེས་པས་བསྟན་ཏེ། རང་གི་ངོ་བོ་ནི་ཀུན་གཞི་ལྟར་ཡུལ་ཀུན་ལ་དམིགས་མི་ནུས་ཤིང་ཡིད་ཤེས་ལྟར་ཡུལ་གྱི་བྱེ་བྲག་ཐམས་ཅད་གཅོད་མི་ནུས་པས་དུས་ཀུན་ཏུ་དོན་གྱི་ཁྱད་པར་རྣམ་པར་འབྱེད་དེ་མི་འཆོས་པའམ་མི་ཆོད་པར་རང་ཡུལ་ཙམ་འཛིན་ཏེ་རང་བཞིན་བླུན་པས་རྟོག་མེད་ཀྱི་ཤེས་པ་ཉིད་དེ། ལང་ཀར་གཤེགས་པ་ལས། སེམས་ནི་གར་མཁན་བཞིན་དུ་གནས། །ཡིད་ནི་བཞད་གད་པ་འདྲ་སྟེ། །ལྔ་དང་བཅས་པའི་རྣམ་པར་ཤེས། །སྣང་བ་ཚོན་དང་འདྲ་བར་རྟོག །ཅེས་དང་། རྒྱན་སྟུག་པོ་བཀོད་པ་ལས། རྩྭ་དང་ཤིང་དང་གྱོ་མོ་དག །སྒྱུ་མའི་མཁན་པོས་རྒྱུར་བྱས་ཏེ། །སྔགས་ཀྱིས་ཅི་དང་ཅི་འདོད་པར། །གཟུགས་ཀྱི་དངོས་ནི་རབ་ཏུ་བྱེད། །གཟུགས་དང་སྣང་བ་ཡིད་བྱེད་དང་། །སྲེད་དང་མིག་རྣམས་རྒྱུར་བྱས་ཤིང་། །མིག་གི་རྣམ་ཤེས་སྒྱུ་མ་བཞིན། །སྨིག་རྒྱུ་བཞིན་དུ་དེ་གཡོའོ། །གང་གི་ཡུལ་དུའང་འོང་བ་མེད། །ཡུལ་གཞན་དག་ཏུའང་འགྲོ་བ་མིན། །འདི་ལྟའི་རྣམ་ཤེས་འབྱུང་བ་ལ། །ཡོད་དང་མེད་པར་བརྟགས་མི་བྱ། །ཞེས་སོ། །བདུན་པ་ནི། གསུམ་གསུམ་གཉིས་དང་། ཞེས་པ་ནས། ཡོངས་སུ་རྫོགས་པ་ཡིན། །ཞེས་པའི་བར་གྱིས་བསྟན་ཏེ། ལྡོག་པའི་དུས་ནི་དགུ་སྟེ། གཉིད་ལོག་པ་དང་། བརྒྱལ་བ་དང་། འབོགས་པའི་དུས་ཏེ་གསུམ་དང་། ལམ་དག་པའི་དུས་དང་། མཉམ་པར་བཞག་པའི་དུས་དང་། ངེས་པ་རྙེད་པའི་དུས་གསུམ་སྟེ། དེ་ལྟར་གསུམ་ཕྲག་གཉིས་དང་། རྐྱེན་འོན་ལོང་ལ་སོགས་པ་དབང་པོ་ཉམས་པ་དང་། ཡུལ་དང་མ་འཕྲད་པ་དང་། དབང་པོ་མ་ཚང་བ་གསུམ་སྟེ་དུས་དེ་དག་རྣམས་སུ་ལྡོག་པ་ཉིད་དོ། །མཐར་ཐུག་སངས་རྒྱས་ཀྱི་སར་ནི་འདི་ཉིད་བྱ་བ་གྲུབ་པའི་ཡེ་ཤེས་དང་ཡིད་ཀྱི་རྣམ་ཤེས་ནི་སོ་སོར་རྟོག་པའི་ཡེ་ཤེས་སུ་གནས་འགྱུར་བའོ། །དེ་ལྟར་སྒོ་ལྔའི་རྣམ་ཤེས་ལྔ་ནི་འདོད་པའི་ཡོན་ཏན་ལྔ་དང་མི་འབྲལ་བས་འདོད་ཁམས་དང་ཆ་མཐུན་པའི་ཕྱིར་ཁམས་གསུམ་རྒྱུད་ལ་ཚང་བའི་དབང་སྟེ། དེས་ན་འདིས་འདོད་ཁམས་ཡོངས་སུ་རྫོགས་པ་ཡིན་ཏེ། དེ་ནི་སྒོ་ལྔའི་དོན་མཐར་ཐུག་པའོ། །གསུམ་པ་ནི། ལང་ཀའི། ཞེས་པ་ནས། འགྲོལ་བར་ཤེས་པར་བྱའོ། །ཞེས་པའི་བར་གྱིས་བསྟན་ཏེ། ལང་ཀའི་བདག་པོ་ཞེས་བོས་ནས། རྒྱས་པར་བསྟན་པ་དེ་དག་ནི་མདོ་བཞི་ཡི་དོན་རྣམ་པར་འགྲེལ་བ་ཞེས་བྱ་སྟེ། ཚུལ་དེས་མདོ་བཞི་པོ་དེ་དག་རྩ་བ་ཆེན་པོ་ལ་ཡོངས་སུ་འགྲེལ་བར་བྱེད་དེ། དོན་ཡང་དག་པར་འགྲོལ་བར་ཤེས་པར་བྱ་སྟེ་མུན་པའི་ངོ་བོ་གསང་བའི་དབྱིངས་སུ་ཤེས་ནས་མ་འདྲེས་ཡོངས་རྫོགས་ལ་འཇུག་པར་བྱའོ། །དེ་བས་ན་ལང་ཀར་གཤེགས་པ་རིན་པོ་ཆེའི་མདོ་ལས། སེམས་ནི་གར་མཁན་བཞིན་དུ་གནས། །ཡིད་ནི་རམ་བུ་ཐོགས་པ་འདྲ། །རྣམ་ཤེས་ལྔ་ནི་གྲོགས་ལྟ་བུ། །རྣམ་རྟོག་གང་རྣམས་རབ་ཏུ་ལྟ། །ཞེས་དང་། རྒྱན་སྟུག་པོ་བཀོད་པ་ལས། ཡིད་དང་དབང་པོར་ལྡན་པ་ནི། །རྣམ་ཤེས་ལྔ་ཡི་རྒྱུ་ཡིན་ཏེ། །རྟག་ཏུ་ཡང་དག་ཡེ་ཤེས་ཀྱིས། །འཇུག་རྟེན་རྒྱུ་ལ་རྣམ་པར་ལྟ། །དེ་ལྟར་བྱེད་དང་བྱ་བ་མེད། །དེ་བཞིན་ཉིད་འདི་རྣམ་གཞན་མིན། །ཐམས་ཅད་ཆོས་ཀྱི་དེ་བཞིན་ཉིད། །ཕན་ཚུན་སྟོབས་ཀྱིས་འབྱུང་བ་སྟེ། །རྣལ་འབྱོར་ཅན་རྣམས་དེ་ལྟར་ལྟ། །དེ་བཞིན་ཉིད་དུ་གསལ་བར་མཐོང་། །ཞེས་གསུངས་པ་ལྟར་མདོ་སྔགས་ཀྱི་དགོངས་དོན་ཟབ་མོ་ལ་ངེས་པ་རྙེད་པར་བྱའོ། །གསུམ་པ་འབྱིན་པའི་རྩ་བ་གསུམ་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི། ལང་ཀའི། ཞེས་པ་ནས། ཐམས་ཅད་པའི་རྩ་བའོ། །ཞེས་པའི་བར་གྱིས་བསྟན་ཏེ། ཡན་ལག་གསུམ་པ་གང་སྙམ་པ་ལ། ལང་ཀའི་བདག་པོ་ཞེས་སྡུད་པ་པོ་ལ་བོས་ནས། དེ་ལ་རྩ་བ་གསུམ་གང་ཞེ་ན། འདི་ལྟ་སྟེ། སྣང་བ་དངོས་པོའི་རྩ་བ་ལུས་དང་། སྒྲ་གྲགས་བརྗོད་པའི་རྩ་བ་ངག་དང་། ཆོས་ཐམས་ཅད་པའི་རྩ་བ་སེམས་སམ་ཡིད་དེ་རྣམ་གྲངས་གསུམ་དུ་ཉེ་བར་བསྟན་པའོ། །གཉིས་པ་ནི། ལང་ཀའི། ཞེས་པ་ནས། ཅིར་ཡང་རིག་པ་ཉིད་དོ། །ཞེས་པའི་བར་གྱིས་བསྟན་ཏེ། ལང་ཀའི་བདག་པོ་ཞེས་བོས་ནས། དེ་ལ་དངོས་པོའི་རྩ་བ་ལུས་ནི། ངོ་བོ་ཆོས་ཉིད་ཀྱི་ངང་ལ་གང་ཅི་ཡང་གྲུབ་པ་མེད་པ་ལས། འཁྲུལ་པ་དང་ལམ་པའི་ངོ་ལ་བཟང་ངན་དང་ཆེ་ཆུང་སྣ་ཚོགས་པར་ཅིར་ཡང་སྣང་བས་ན་ལས་དང་ངོ་བོ་གཉིས་ཀྱིས་འཁོར་འདས་ཀྱི་སྣང་བ་གཉིས་སུ་ཤར་བའོ། །དེ་བཞིན་དུ་བརྗོད་པའི་རྩ་བ་ངག་ནི། སྒྲའི་གཞི་ངག་གི་ངོ་བོ་ཅི་ཡང་གྲུབ་པ་མེད་པའི་རང་བཞིན་མཉམ་པ་ལས། ཇི་ལྟར་ཡང་བརྗོད་པའི་སྒྲ་མི་མཐུན་པར་གྱུར་པས་ཅིར་ཡང་འགྱུར་ཞིང་འབྱུང་བ་སྟེ་སྣང་བ་གཉིས་སུ་གྲགས་པ་སྣ་ཚོགས་པའོ། །དེ་ལྟར་ཆོས་ཐམས་ཅད་པའི་རྩ་བའམ་རྒྱུར་གྱུར་པའི་སེམས་སམ་ཡིད་ནི། གཉུག་མ་ཇི་བཞིན་པའི་ངོ་བོ་གང་ཅི་ཡང་བསྟན་དུ་མེད་པ་ལས་ཅིར་ཡང་མ་འགག་པར་གསལ་ཏེ་ཐམས་ཅད་ཤེས་ཤིང་རིག་པ་ཉིད་དོ། །དེས་ན་དོན་གྱི་ངོ་བོ་ནི། ཡེ་ཤེས་རྫོགས་པ་ལས། རིག་པ་མཐའ་མེད་དཀྱིལ་འཁོར་ལ། །ལུས་ཀྱིས་བརྩལ་མེད་ཆོས་སྐུར་གསལ། །རང་སྣང་རིག་པའི་འོད་གསལ་ལ། །ངག་གིས་བརྩལ་མེད་རིག་པའི་གསུང་། །མི་འགྱུར་ཀུན་བཟང་ཡེ་ཤེས་ལ། །ཐུགས་ཀྱིས་བརྩལ་མེད་བསམ་དང་བྲལ། །སྣང་བ་གཟུགས་ཀྱི་རྣམ་པ་ཀུན། །མཉམ་ཉིད་ཆོས་ཀྱི་སྐུ་རུ་ཐིམ། །གྲགས་པ་སྒྲ་ཡི་རྣམ་པ་ཀུན། །མཚོན་པའི་རང་རྟགས་གསུང་དུ་ཐིམ། །ཤེས་རིག་མ་ལུས་ཇི་སྙེད་པ། །ཐུགས་ཀྱི་མཚོན་པའི་རང་རྟགས་ཏེ། །ཡེ་ཤེས་རིག་པའི་ཐུགས་སུ་ཐིམ། །རིག་པ་འགྱུར་མེད་རྡོ་རྗེ་ལྟར། །དབྱེར་མེད་ཡེ་ཤེས་བྱ་རྩོལ་བྲལ། །ཞེས་གསུངས་པ་ལྟར་ལ་བཟླ་བར་བྱ་ཞིང་། དེ་ཡང་རྒྱལ་བའི་གསུངས་པའི་ལུང་ཚད་མ་དང་། བླ་མ་མཁས་པའི་མན་ངག་ཚད་མ་དང་། རང་གིས་སྒོམས་པའི་ཉམས་མྱོང་ཚད་མ་གསུམ་གྱིས་ཡིད་ཆེས་ཏེ་རིན་པོ་ཆེ་གསེར་གླིང་གི་དགོངས་པ་ལ་བསླབ་པར་བྱ་སྟེ། ཡེ་ཤེས་གསང་བ་སྒྲོན་མ་རིན་པོ་ཆེ་མན་ངག་གི་རྒྱུད་ལས། ཡིན་པ་གསུམ་གྱིས་ཐག་བཅད་དེ། །སྐུ་གསུང་ཐུགས་ལ་ཡིད་ཆེས་སྐྱེ། །རིན་པོ་ཆེ་ཡི་གསེར་གླིང་དུ། །ཕྱིན་པས་ཐམས་ཅད་གསེར་དུ་སྣང་། །འཁོར་འདས་བཟང་ངན་མེད་པར་ཤེས། །ལྕེ་སྤྱང་ཨེ་ནའི་མིག་བཞིན་དུ། །གཉིས་སུ་མེད་བར་ཐག་ཆོད་དོ། །ཞེས་གསུངས་པ་སོགས་རྒྱས་པར་རྫོགས་པ་ཆེན་པོའི་རྒྱུད་དང་དགོངས་འགྲེལ་རྣམས་ལས་ཤེས་པར་བྱའོ། །གསུམ་པ་ནི། ལང་ཀའི། ཞེས་པ་ནས། འབྱིན་པའོ། །ཞེས་པའི་བར་གྱིས་བསྟན་ཏེ། ལང་ཀའི་བདག་པོ། ཞེས་བོས་ནས། ཇི་སྐད་བཤད་པ་གསུམ་པོ་དེ་དག་ནི་ཐམས་ཅད་ཀྱི་གཞིར་གྱུར་པས་རྩ་བ་ཞེས་བྱ་སྟེ། དེས་སྒོ་ནས་ཕྱི་ནང་ཐམས་ཅད་གསལ་བར་སྟོན་ཏེ་ངེས་པར་འབྱིན་པར་བྱེད་པའོ། །ཞེས་ངོ་བོ་བསྟན་པ་ནི་ངེས་ཚིག་ཏུ་ཡང་འགྱུར་རོ། །འོ་ན་ཡིད་ཀྱི་ཤེས་པ་ནི། ཡན་ལག་དྲུག་དང་། མདོ་བཞི་དང་། རྩ་བ་གསུམ་གྱི་སྐབས་ཀུན་ཏུ་བྱུང་བས་བལྡབས་པར་གྱུར་ཏེ་དེ་བས་མ་ངེས་སོ་ཞེ་ན། དེ་དག་ཀུན་ཀྱང་ཡིད་ཤེས་ཀྱི་རྩལ་ཀ་ཡིན་པས་འགལ་བ་མེད་དེ། ཡན་ལག་དྲུག་ནི་ཡིད་ཤེས་ཀྱི་མ་འགག་པའི་རྩལ་ཅིར་ཡང་སྣང་བའི་སྒོ་ཡིན་ལ། ཀུན་གཞི་ནི་ཡིད་ཤེས་ཀྱི་རང་བཞིན་དང་། ཉོན་ཡིད་ནི་ཡིད་ཤེས་ཀྱི་བདག་པོའི་རྐྱེན་ནམ་འཛིན་པའི་ཆ་ཡིན་ཞིང་། སྒོ་ལྔ་ནི་ཡིད་ཤེས་གསལ་བའི་ལམ་ལྟ་བུའོ། །རྩ་བ་གསུམ་ནི་ཡིད་ཤེས་ཀྱི་གཞི་ཡིན་ཏེ་དེ་བས་ན་མ་རྟོགས་པའི་དུས་སུ་དེ་ལྟར་སྣང་ཡང་། རྟོགས་ན་རང་སྣང་རིག་པའི་ཡེ་ཤེས་ཡིན་ཏེ། ཡེ་ཤེས་རྫོགས་པ་ལས། འཁོར་བའི་ཤེས་པ་གློ་བུར་བ། །རང་བཞིན་མ་ཡིན་རྐྱེན་གྱིས་སྣང་། །བརྗོད་པའི་བརྙན་མ་ཉིད་དང་མཚུངས། །རྣམ་པར་རྟོག་པའི་སེམས་ཉིད་ནི། །གང་ལྟར་བརྟགས་པ་གཞན་དུ་མཐོང་། །དུ་མ་རིམ་གྱི་རྟོག་པ་དག །སྒོ་རྣམས་ཀུན་ཏུ་རྒྱུ་བ་སྟེ། །མི་གཅིག་སྐར་ཁུང་དུ་མ་བཞིན། །དོན་གྱི་རྣམ་བྱང་དུ་མ་མིན། །ཞེས་དང་། སྣ་ཚོགས་འཁོར་བའི་རྟོག་པ་དང་། །རྫོགས་ཉིད་ཡེ་ཤེས་རང་བཞིན་གཅིག །རྫོགས་པའི་ཡེ་ཤེས་རྟོག་པ་ཉིད། །རྟོག་པ་གང་ཡིན་ཡེ་ཤེས་ཉིད། །ཐ་དད་ཡོད་པ་མ་ཡིན་ཏེ། །ཡེ་ཤེས་རྫོགས་པའི་རང་བཞིན་ནི། །ཀུན་སྤངས་ཀུན་གྱི་དངོས་གཞི་ཅན། །འཛིན་པ་དུ་མའི་རྟོག་པ་འདི། །བྱང་ཆུབ་སེམས་སུ་བརྗོད་པ་ཡིན། །ཞེས་དང་། རྩོལ་བའི་སེམས་བྲལ་མངོན་སངས་རྒྱས། །རྒྱུ་འབྲས་གཉིས་མེད་འགྱུར་པ་བྲལ། །རྣམ་བྱང་ཤེས་པ་རང་གནས་པ། །བྱེད་པ་ཉིད་ཀྱིས་མཐོང་བར་གྱིས། །ཤེས་པའི་རྣམ་གྲངས་གང་སྐྱེས་ཀྱང་། །རྣམ་བྱང་ཉིད་ལས་གཞན་མ་ཡིན། །བསམ་གྱིས་མི་ཁྱབ་དུས་ན་ཤེས། །ཞེས་གསུངས་པ་སོགས་ཤིན་ཏུ་མང་བས་ཟབ་གསང་སྙིང་པོའི་མན་ངག་གི་གནད་ལ་མཁས་པ་ནི་ཤིན་ཏུ་གཅེས་སོ། །གསུམ་པ་རྒྱུད་ལུང་མན་ངག་གི་དཔེས་མུན་པའི་ཐེ་ཚོམ་བསལ་བ་ལ་གཉིས་ཏེ། ཐེ་ཚོམ་དུ་རྟོག་ཚུལ་བསྟན་པ། དེའི་རྟོག་པའི་ཐེ་ཚོམ་བསལ་བའོ། །དང་པོ་ནི། ལང་ཀའི། ཞེས་པ་ནས། འདི་ལ་རྣམ་རྟོག་པ། །ཞེས་པའི་བར་གྱིས་བསྟན་ཏེ། ལང་ཀའི་བདག་པོ་ཞེས་སྡུད་པ་པོ་ལ་བོས་ནས། ལམ་གྱི་དུས་ན་བཤད་པའི་ཡན་ལག་དྲུག་དང་མདོ་བཞི་མཚན་མར་བསྟན་ཏེ་རྩ་བ་གསུམ་ངོས་གཟུང་བ་དེ་དག་ནི་དེ་ཁོ་ན་ཉིད་དུ་ལམ་དངོས་ཀྱི་ཡན་ལག་དང་མདོ་དང་རྩ་བ་གསུམ་དུ་བསྟན་པའི་ཕྱིར་བཀའ་སྩལ་པ། དེ་ལྟར་ལོག་པའི་ཤེས་པ་ཚོགས་དྲུག་དང་རྣམ་གྲངས་བཞི་དང་སྒོ་གསུམ་རྣམས་ལམ་གྱི་རྩ་བར་ཉེ་བར་སྟོན་པ་ནི་འདི་ལྟ་སྟེ། ཞེས་གླག་ཁྲ་མོ་གཟན་ལ་འཇུམས་པ་ལྟར་གཏར་ཀ་གེགས་སེལ་གྱི་ཚུལ་དུ། སྟོན་པ་རིགས་ཀྱི་བདག་པོ་ཆོས་ཀྱི་རྒྱལ་པོ་ཆེན་པོས་ཆོས་ཀྱི་དངོས་པོ་གང་གསུངས་ཏེ་བཀའ་སྩལ་པ་ཟབ་མོ་དག་ནི། ཐུགས་ཀྱི་དགོངས་པ་ལ་བཞག་པ་དང་ཞལ་དུ་ཕྱུང་སྟེ་གསུངས་པ་དང་། དེས་མ་གོ་བ་ལ་ཞུས་ལན་དུ་འཕྲོས་ཏེ་འདྲེན་མར་གསུངས་པ་གསུམ་སྟེ། དེ་དག་གང་ཡིན་ཞེ་ན། དང་པོ་ལ་དོན་དམ་པའམ་མན་ངག་ཅེས་བྱ་བ་དང་། གཉིས་པ་ལ་ལུང་ཞེས་བྱ་བ་དང་། གསུམ་པ་ལ་རྒྱུད་ཅེས་བྱ་བ་ཡིན་པར་བསྟན་པས་ན་གང་འདིར་དེ་ལྟར་ངོ་བོ་གསུམ་དུ་གྲགས་པ་ལ། གང་ཟག་གང་དག་གཞི་འདི་ལ་རྣམ་པར་རྟོག་སྟེ་ལྡེའུ་མིག་གསུམ་རྒྱུད་ལུང་མན་ངག་གསུམ་དང་མཐུན་པ་གང་དེ་ཇི་ག་ལྟར་ཡིན་སྙམ་ནས་ཐེ་ཚོམ་ཟོས་ནས་དོགས་པ་སྐྱེ་བ་ལ། ཞེས་པའི་དོན་ནོ། །གཉིས་པ་ལ་གཉིས་ཏེ། གནས་སྐབས་ཀྱིས་བརྟག་པ་བསྟན་ཏེ་ཆོས་མཐུན་ངོས་གཟུང་བ། མཚོན་ཚུལ་གྱིས་བརྟག་པ་བསྟན་ཏེ་མཚན་ཉིད་ངེས་པར་བྱ་བའོ། །དང་པོ་ནི། ཆོས་ཀྱི་རྒྱལ་པོའི། ཞེས་པ་ནས། རྒྱལ་པོའི་བཀའ་རྒྱུད་ཡིན། །ཞེས་པའི་བར་གྱིས་བསྟན་ཏེ། དེ་ལྟར་ཆོས་ཀྱི་རྒྱལ་པོ་སྟོན་པ་ཀུན་ཏུ་བཟང་པོའི་གསུང་ཚད་མ་གསང་སྔགས་ཟབ་མོའི་ངོ་བོ་གཅིག་ལ་ཡང་རྒྱུད་དང་ལུང་དང་དོན་དམ་མམ་མན་ངག་ཅེས་བྱ་བ་གསུམ་དུ་སྣང་བ་འདི་ཉིད་ཇི་ལྟ་བུ་ཡིན་སྙམ་དུ་རྣམ་པར་རྟོག་སྟེ་ཐེ་ཚོམ་ཟ་བ་དེ་གང་དག་རྣམས་སྟོན་པ་ཉིད་ཀྱིས་མཁྱེན་ཏེ་ཐེ་ཚོམ་སྐྱེས་པ་དེ་ཉིད་བསལ་བར་བྱ་བའི་ཕྱིར་ཆེད་དུ་དགོངས་ཏེ་ཐབས་གསུམ་ཉིད་རྣམ་པར་གསུངས་པ་གང་ཞེ་ན། འདི་དག་རང་རྒྱུད་མ་ཡིན་པར་གང་དེ་ཐུགས་ལ་མངའ་བའི་སྐབས་སུ་མན་ངག་དང་ཞལ་དུ་ཕྱུང་བའི་སྐབས་སུ་ལུང་དང་། དེའི་སྐབས་ལ་ཞུས་ལན་དུ་གཅིག་པས་དུ་མར་འཕྲོས་པ་ནི་རྒྱུད་དུ་བསྟན་པའོ། །དེ་དག་སོ་སོ་ནས་བསྟན་པའི་ཕྱིར། དེ་ཡང་སྟོན་པ་འཆད་པའི་སྐྱེས་བུའི་ཉིད་ཀྱི་ཐུགས་ཀྱི་དགོངས་པ་ལ་དོན་གྱི་མཆོག་གང་ཡིན་པ་མ་འདྲེས་ལ་ཡོངས་སུ་རྫོགས་པར་གནས་ཤིང་མངའ་བ་གང་། དངོས་སུ་བརྗོད་པ་དང་བྲལ་བས་ཞལ་དུ་མ་བྱུང་བ་དེ་ནི་དོན་དམ་པའི་མན་ངག་ཟབ་མོ་ཉིད་ཡིན་ལ། གལ་ཏེ་ཚུལ་གང་དེ་ཞལ་ནས་གསུང་པའི་བརྡ་ཚིག་གི་འགྱུར་བ་ཇི་ལྟར་ཡང་བརྗོད་པས་དོན་གྱི་དངོས་པོ་དེ་ཉིད་སྒྲོ་སྐུར་མེད་པར་ཡང་དག་པར་མཚོན་ན་ནི། སྟོན་པ་སྐྱེས་བུ་རྒྱལ་པོའི་བཀའ་ལུང་གི་ངོ་བོ་དགོངས་པ་ཇི་བཞིན་པ་ཉིད་གསུང་གིས་མཚོན་པ་ཆེན་པོ་ཡིན་ཞིང་། དོན་དེ་ཉིད་འཁོར་གྱིས་མ་གོ་བས་སྡུད་པ་པོས་ཞུས་པ་དང་། སྟོན་པས་ལན་བཀའ་སྩལ་པ་རྣམས་སྤེལ་མར་བྱུང་བས་ཕྲ་མེན་གྱི་ཚུལ་དུ་ཚིག་ཏུ་འཕེལ་ཞིང་དོན་རྒྱས་པར་སྟོན་པའི་ཐབས་སུ་གྱུར་ན་ནི། སྟོན་པ་སྐྱེས་བུ་རྒྱལ་པོའི་བཀའ་རྒྱུད་ཀྱི་ངོ་བོ་ཡིན་པས་ཚུལ་དེ་ཡིས་གསང་བའི་དོན་ལ་ངེས་པ་རྙེད་པ་སྟེ། རྫོགས་པ་ཆེན་པོ་འཁོར་བ་རྩད་གཅོད་ཀྱི་རྒྱུད་ལས། ཡེ་ནས་གནས་པའི་རང་བྱུང་དེ། །ལུང་ལྡན་རྐྱེན་གྱིས་རྟོགས་པའི་ཕྱིར། །རང་བྱུང་ཡེ་ཤེས་འཛོམ་པ་ནི། །མར་གྱི་ཡང་ཞུན་ལྟ་བུར་གསུངས། །ཞེས་དང་། ངེས་དོན་འདུས་པ་ལྟ་བའི་སྙིང་པོ་ལས། ཡང་དག་སངས་རྒྱས་རྣམས་གསུངས་པའི། །ངེས་པའི་ལུང་ལ་ཡིད་ཆེས་པས། །ཐེ་ཚོམ་སྒྲིབ་པ་དེ་ལ་མེད། །དེ་ཡང་ངེས་པའི་འབྲས་བུ་ཡིན། །ཞེས་སོགས་གསུངས་སོ། །དེ་བས་ན་ཡན་ལག་དྲུག་རྒྱུད་དང་མཐུན་པ་ཡིན་ཏེ། སྔར་བསྟན་པའི་ཡན་ལག་དྲུག་ལ་ཡང་ཡུལ་དྲུག་གི་ཆོས་རྩ་བ་དང་ཡན་ལག་ཏུ་བཅས་ཏེ་གཟུགས་བཅོ་ལྔ། ཚོར་བ་བཅོ་བརྒྱད། འདུ་ཤེས་གསུམ། འདུ་བྱེད་ལྔ་བཅུ་རྩ་གཅིག་ལ་སོགས་པའི་ཡན་ལག་སྣ་ཚོགས་སུ་འབྲེལ་བ་རྣམས་ཀྱི་རང་བཞིན་མ་རྟོགས་པས་འཁོར་བར་སྣང་ལ། དེའི་གཉེན་པོ་ལམ་གྱི་ཆོས་ནི། རྒྱུད་ཀྱི་ཕུན་སུམ་ཚོགས་པ་དྲུག་དང་། ཞུས་ལན་ཕྲ་མེན་དུ་འཕེལ་ཞིང་རྒྱས་པ་ཉིད་ཀྱིས་འཁོར་བའི་ཆོས་སུ་སྣང་བ་རྣམས་གཞི་ལམ་འབྲས་བུ་གསུམ་དུ་གཏན་ལ་འབེབས་པར་བྱེད་པའོ། །མདོ་བཞི་ལུང་དང་ཆོས་མཐུན་ཏེ། གཞིའི་མདོ་ཀུན་གཞི་བག་ཆགས་དང་བཅས་པ་ལས། དམིགས་པ་དང་སྣང་བ་དང་འཇུག་པ་རྣམས་རྩལ་དུ་སྣང་ལ། དེ་ཡང་དབྱིངས་དང་ཡེ་ཤེས་སུ་གཏན་ལ་ཕབས་ཏེ་ཀུན་གཞིའི་དོན་མཐོང་བའི་ཐབས་སུ་གྱུར་པས་ཡང་དག་པའི་ལུང་ཡིན་ནོ། །རྩ་བ་གསུམ་མན་ངག་དང་མཐུན་ཏེ། མ་རྟོགས་ན་འཁོར་བའི་ཆོས་སུ་སྣང་ལ། རྟོགས་ན་མྱ་ངན་ལས་འདས་པའི་ཆོས་སུ་སྣང་བའི་རང་རྩལ་ལུས་ངག་ཡིད་གསུམ་ཀྱང་ངོ་བོ་བྱང་ཆུབ་ཀྱི་སེམས་སུ་འདུས་པས་སོ། །ཡང་ན་འདི་ཉིད་རྩ་བ་གསུམ་གྱི་གེགས་བསལ་དུ་གསུངས་པ་ལྟར་ན། ལུས་སྣང་བ་རྒྱུད་དང་ཆོས་མཐུན། ངག་བརྗོད་པ་ལུང་དང་ཆོས་མཐུན། སེམས་ཅི་ཡང་མིན་པ་ལས་ཅིར་ཡང་འཆར་བ་མན་ངག་དང་ཆོས་མཐུན་པར་བརྩིས་ཏེ་བསྟན་པ་ཡིན་པས་གཞུང་དུ་ཀུན་གཞི་གཟུགས་མེད་ཁམས་དང་། ཉོན་ཡིད་གཟུགས་ཁམས་དང་། ཚོགས་དྲུག་འདོད་ཁམས་དང་ཆོས་མཐུན་སྦྱར་ཏེ་བསྟན་པ་བཞིན་ནོ། །གཉིས་པ་ནི། ཐབས་ཆེ་ཚེགས་ཆུང་། ཞེས་པ་ནས། གསང་བ་མཆོག་དེས་བཤད། །ཅེས་པའི་བར་གྱིས་བསྟན་ཏེ། ངོ་བོའི་རྗེས་སུ་མཚན་ཉིད་གསལ་བར་བསྟན་ཏེ་ངེས་ཚིག་བརྗོད་པ་ནི་གང་སྙམ་པ་ལ། མན་ངག་ཅེས་གསུངས་པ་ནི། སྐད་ཅིག་གིས་ཀྱང་འབྲས་བུ་ལ་སྦྱོར་བ་དང་། ཉོན་མོངས་པ་ལམ་དུ་ཤར་བ་དང་། བྱ་བརྩལ་གྱིས་མ་སྒྲུབས་པ་ཉིད་འབྲས་བུའི་སྟོངས་སུ་གྱུར་པས་བརྩལ་བ་མེད་པར་འགྲུབ་པའི་ཐབས་ཤིན་ཏུ་ཆེ་བ་དང་། འོག་མ་ལ་ལྟོས་ན་འབད་པའི་གྲོན་ཚེགས་ཆུང་བས་གྲུབ་ཐག་མཆོག་ཏུ་ཉེ་བ་དང་། རྟོགས་པ་དོན་གྱི་ངོ་བོ་བློས་དཔག་ཏུ་མེད་པས་རང་བྱུང་གི་ཡེ་ཤེས་དེ་ཁོ་ན་ཉིད་ཇི་བཞིན་པར་ངེས་པ་དང་། གྲངས་མེད་གསུམ་ལ་སོགས་པའི་འོག་མའི་བྱ་བརྩལ་ལས་འདས་པས་བྱ་བ་མེད་པའི་རྣལ་འབྱོར་ལ་རྩོལ་མཐའི་དཀའ་བ་མེད་པར་ཤིན་ཏུ་སླ་བ་དང་། དོན་གྱི་རང་བཞིན་མཆོག་ཏུ་ཟབ་པའི་ཕྱིར་ས་བཅུ་པ་མན་ཆད་ཀྱིས་ཀྱང་དཔག་པར་དཀའ་བའི་ཐུགས་ཀྱི་དགོངས་པར་གནས་པ་སྟེ། དེ་ལྟར་ཆོས་ལྔའི་སྒོ་ནས་མན་ངག་གི་དམ་པ་ཉིད་དུ་ངེས་པར་གྲུབ་པས་སྐལ་ལྡན་དབང་པོ་ཡང་རབ་ཀྱི་དོན་དུ་བསྟན་པའོ། །ལུང་ཞེས་གསུངས་པ་ནི་དེ་བཞིན་ཉིད་ཀྱི་དགོངས་པ་གསང་བ་མི་བསླུ་བས་ངེས་པ་དམ་པ་སྤྲོས་པ་དང་བྲལ་བའི་དེ་ཁོ་ན་ཉིད་རྒྱུ་རྐྱེན་གྱིས་མ་བསླད་པས་གསང་སྔགས་ཇི་བཞིན་པ་ཉིད་སྒྲོ་སྐུར་མེད་པར་ཐུགས་ལ་མངའ་བ་བཞིན་དུ་བཀའ་ཡི་ཚིག་གིས་བཅད་དེ་ཞལ་དུ་ཕྱུང་ནས་བཀའ་སྩལ་པ་ནི་ལུང་དམ་པར་ངེས་པས་སྐལ་ལྡན་དབང་པོ་རབ་ཀྱི་དོན་དུ་བསྟན་པའོ། །རྒྱུད་ཅེས་གསུངས་པ་ནི། རྒྱུད་འབྱུང་བའི་རྒྱུ། བཅས་གཞིའི་གླེང་གཞི་དང་རྐྱེན་གཏམ་རྒྱུད་བརྗོད་དེ་གླེང་བསླང་བ་དང་། རྒྱུད་དོན་ཟབ་མོ་ཉམས་སུ་བྱ་བའི་ལས་དང་རྒྱུད་ཀྱི་ཚིག་གིས་ཡན་ལག་ངེས་པ་དང་། སྦྱོར་བའི་རྟོག་པ་ཆེན་པོ་ཡན་ལག་དགོས་འབྲེལ་དང་བཅས་པའི་ཆོས་བཞིའི་སྒོ་ནས་རྒྱུད་དམ་པ་ཉིད་དུ་བཞག་པ་ཡིན་པས་དབང་པོའི་ཁྱད་པར་དང་མཐུན་པར་བསྟན་པའོ། །ཡང་། ཆོས་རྗེའི་ཕྱག་མཆན་ལྟར་ན། བཅས་གཞི་དང་གཏམ་རྒྱུད་གཉིས་འདྲ་ལ། དེ་ནས་རྒྱུ་རྐྱེན་དེ་གཉིས་ལས་རྒྱུད་ཀྱི་ཚིག་དོན་དངོས་སུ་བྱུང་བ་དང་། དེ་ནས་རྟོག་ཆེན་མཛད་དེ་གདམས་ཤིང་གཏད་པ་ཉིད་དང་། དེ་དག་གི་ཡན་ལག་དགོས་འབྲེལ་བསྟན་པ་དང་བཅས་ཏེ་ཆོས་ལྔ་ཡི་ཕྱིར་རྒྱུད་དུ་བཞག་གོ། །ཞེས་གསུངས་ཤིང་། ཡང་དབུས་པ་ཇོ་འབུམ་གྱི་ཕྱག་མཆན་ལས། དང་པོ་གཉིས་འདྲ་ལ། དེ་ནས་དེ་གཉིས་ལས་རྒྱུད་ཀྱི་ཚིག་དང་དོན་རྣམས་ཞུས་ལན་ལས་འཕྲོས་པས་རྟོག་པ་ཆེན་པོ་དང་། ཡན་ལག་དགོས་འབྲེལ་དང་བཅས་པ་བསྟན་ཏེ་གདམས་གཏད་ཤུགས་ལ་མཚོན་པ་ནི་རྒྱུད་ཡིན་ནོ། །ཞེས་གསུངས་སོ། །དེ་ལྟར་མཚན་ཉིད་སོ་སོར་གསལ་ཏེ་མཚོན་ཚུལ་གསུམ་དུ་སྣང་བ་ལ་ཡང་དོན་གྱི་ངོ་བོ་རྣམ་དབྱེ་མེད་པར་རང་རིག་པ་གཅིག་ཏུ་འདུས་པར་ཟད་པས་མ་འདྲེས་སོ་སོར་གསལ་ཡང་རང་བཞིན་དབྱེར་མེད་ཆེན་པོ་ཆོས་ཀྱི་དབྱིངས་སུ་ཚུལ་གཅིག་པའི་རང་སྣང་དེ་བཞིན་ཉིད་ལ་རོལ་པ་འགག་པ་མེད་པར་ཅིར་ཡང་འཆར་བས་ཤེས་རབ་ཀྱི་རྩལ་དང་མཐུན་པར་ལྟ་སྤྱོད་ཀྱི་འཕངས་མཐོ་དམན་དང་། གདུལ་བྱའི་ངོ་ལ་རྒྱུད་ལུང་མན་ངག་གི་བྱེ་བྲག་མ་འདྲེས་པར་རྣམ་པར་སྣང་བའི་མཚན་ཉིད་བསྟན་པ་དག་ཀྱང་། དོན་གྱི་ངོ་བོ་ངེས་པར་རང་རིག་ཆོས་ཀྱི་དབྱིངས་སུ་དང་གཅིག་པ་ཡིན་ཏེ། དེ་བས་ན་ཐ་དད་རྣམ་པ་སྣ་ཚོགས་ཀྱི་དབྱེ་བ་ཡོངས་ཀྱིས་མེད་པར་དབྱེར་མེད་ཐིག་ལེ་ཉག་གཅིག་ཏུ་ཡོངས་སུ་རྫོགས་ཤིང་འདུས་པ་ཡིན་པས་དེ་ལྟར་རྟོགས་ཚེ་གཅིག་ཤེས་ཀུན་གྲོལ་དུ་འགྱུར་བ་ཉིད་དེ། སྒྲོན་མ་བརྩེགས་པའི་རྒྱུད་ལས། ཆོས་གཅིག་བྱ་བའི་རང་བཞིན་ནི། །གཞི་ཡི་ཀློང་ནས་མཚོན་མེད་ཀྱང་། །རྩལ་ཟེར་ཤེས་རིག་གཅིག་ཅེས་བརྗོད། །རིན་ཆེན་གསལ་དྭངས་ངང་དངས་དེ། །ཡོད་པ་མ་ཡིན་དངོས་པོ་མེད། །མེད་པ་མ་ཡིན་གསལ་ཞིང་རིག །དངོས་མེད་ཡེ་ཤེས་ཟང་ཀ་མ། །མི་སྣང་གསལ་བའི་རང་བཞིན་ཅན། །དེ་ཀ་ཉིད་ལས་གྲོལ་ཞེས་བཤད། །དེས་ན་གཅིག་ཤེས་ཀུན་གྲོལ་ལོ། །ཞེས་སོ། །དེ་ལྟར་ཚད་མའི་ལུང་ལ་བརྟེན་ནས་ཡང་དག་པའི་དོན་མཆོག་རྙེད་པ་ནི་རྒྱལ་བའི་དགོངས་པ་ནོར་འཁྲུལ་དང་བྲལ་བ་ཡིན་ཏེ། དགོངས་པ་བཀའ་བགྲོས་ཡོན་ཏན་ཀུན་འབྱུང་གི་རྒྱུད་ལས། ངེས་པ་དོན་གྱི་རིག་པ་ནི། །རིགས་དང་བཤད་དང་འོས་པ་དང་། །འཐད་དང་མ་ནོར་དོན་དང་ལྡན། །ངེས་དོན་བཀའ་ནི་ཡིད་ཆེས་ཁུངས། །རིག་པ་ཉམས་མྱོང་གདེང་གིས་ཟིན། །ལུང་རིགས་གཉིས་འཇོམ་རྟོགས་པས་ཆོག །ཅེས་དང་། ངེས་དོན་འདུས་པ་ལྟ་བའི་སྙིང་པོ་ལས། ད་ཡང་འདུས་པའི་སྙིང་པོ་ཉོན། །ཡེ་ཤེས་ཡོད་ན་མ་རིག་མེད། །དེ་ཕྱིར་ལུང་ལྡན་ངེས་པའི་དོན། །བཀའ་རྒྱུད་ཆོས་འདི་སངས་རྒྱས་གསུངས། །མ་རིག་སེལ་བའི་སྒྲོན་མེ་ཡིན། །ཉི་ཟླས་དེ་ལ་འགྲན་མི་ནུས། །མ་རིག་མེད་ཕྱིར་སངས་རྒྱས་འགྲུབ། །ཡེ་ཤེས་ཤར་བས་ཐམས་ཅད་མཁྱེན། །ཞེས་སོགས་ཚད་མེད་དོ། །དེ་ཡང་རྒྱུད་ལུང་མན་ངག་གི་གོལ་སྒྲུབ་དང་འཁྲུལ་པ་བསལ་ཏེ་གནད་ཀྱི་ངོ་བོ་ངོས་བཟུང་ན། རིན་པོ་ཆེ་སྣང་གསལ་སྤུ་གྲིས་འཁྲུལ་སྣང་རྩད་ནས་གཅོད་པའི་རྒྱུད་ལས། རྒྱུད་ཀྱི་རང་བཞིན་བསྟན་པ་ནི། །སེམས་ཆོས་གཉིས་སུ་མེད་པར་འགྲེལ། །གཉིས་མེད་འགྲེལ་བར་མ་ཤེས་ན། །རྒྱུད་ཀྱི་སྒྲིབ་པ་ཡིན་པར་བཤད། །གཉིས་སུ་མེད་པར་འགྲེལ་བ་ལ། །གཉིས་མེད་འབྲེལ་བར་མ་རྟོགས་ཏེ། །སེམས་ཆོས་གཉིས་སུ་ལྟ་བ་ནི། །རྒྱུད་ཀྱི་གོལ་ས་ཡིན་པར་བཤད། །ཐ་དད་རྩེ་གཉིས་སྐྱེས་པ་ནི། །རྒྱུད་ཀྱི་འཁྲུལ་པ་ཡིན་པར་བཤད། །ལུང་གི་རང་བཞིན་ཡིན་པ་ནི། །གཏན་ལ་འབེབས་ཤིང་ངེས་པར་སྟོན། །གཏན་ལ་འབེབས་པར་མ་ཤེས་ན། །ལུང་གི་སྒྲིབ་པ་ཡིན་པར་བཤད། །གཏན་ལ་འབེབས་པའི་ལུང་དེ་ལ། །ཐོག་ཏུ་ཕེབས་པར་མ་རྟོགས་ཏེ། །ཐོག་ཏུ་མི་ཕེབས་ཟེར་བ་ནི། །ལུང་གི་གོལ་ས་ཡིན་པར་བཤད། །སྒྲ་ཚིག་རང་ཐད་ཁྱེར་ནས་ནི། །དོན་དང་མི་མཐུན་ཚིག་རྗེས་འབྲང་། །ལུང་གི་འཁྲུལ་པ་ཡིན་པར་བཤད། །མན་ངག་རང་བཞིན་བསྟན་པ་ནི། །གཉིས་སྣང་མེད་པར་ལ་ཟློས་ནས། །སྤྲོས་པ་མེད་པར་མ་ཤེས་ན། །མན་ངག་དག་གི་སྒྲིབ་པ་ཡིན། །སྒྲོ་སྐུར་བྲལ་བའི་མན་ངག་ལ། །སྤྲོས་པ་མེད་པར་མ་རྟོགས་ཏེ། །སྒྲོ་སྐུར་ཡོད་པར་འདོགས་པ་ནི། །མན་ངག་དག་གི་གོལ་སར་བཤད། །སྤྲོས་པའི་མཐའ་ལ་མངོན་ཞེན་ན། །མན་ངག་འཁྲུལ་པ་ཡིན་པར་བཤད། །དབྱེ་ན་དེ་ལྟར་ཡོད་མོད་ཀྱང་། །བསྡུ་ན་གསུམ་ལས་མེད་པར་བཤད། །ཅེས་སོགས་གསུངས་པ་ལྟར་རོ། །དེ་བས་ན་མན་ངག་གི་རྩ་བ་ལུང་ཆེན་གསང་མཆོག་རྒྱལ་པོའི་རྒྱུད་འདི་ནི་རྒྱུད་ལུང་མན་ངག་གསུམ་ཀ་ཡིན་པར་ཐེ་ཚོམ་མེད་དོ། །ཚུལ་དེ་སྐད་ཅེས་སྟོན་པ་ཀུན་ཏུ་བཟང་པོ་གསང་བ་མཆོག་གི་བདག་པོ་དེས་བཤད་དེ་བཀའ་སྩལ་པ་ཇི་ལྟ་བ་བཞིན་དུ་ངེས་པར་བསྟན་པ་ཡིན་ནོ། །དེ་ལྟར་རྒྱུད་ལུང་མན་ངག་གི་གེགས་བསལ་བ་འདི་ལ། ལྷ་རྗེ་སྒྲོ་ཕུག་པའི་ཞལ་ནས། ཡིད་ཀྱི་རྣམ་ཤེས་དེ་མུན་པའི་ཡན་ལག་དྲུག་གི་ཁོངས་སུ་ཡང་སོང་། མུན་མདོ་བཞིའི་ཁོངས་སུ་ཡང་སོང་ལ། མུན་རྩ་གསུམ་གྱི་ཁོངས་སུ་ཡང་སོང་བས་དེ་ལ་ཐེ་ཚོམ་ཟོས་པ་ལ། རྒྱལ་བའི་གསུང་གཅིག་ལ་རྒྱུད་དང་ལུང་དང་མན་ངག་གསུམ་དུ་བྱུང་བའི་དཔེ་དེས་གེགས་སེལ་ལོ། །ཞེས་གསུངས། འདི་ལ་ཀུན་མཁྱེན་དམ་པ་རིན་པོ་ཆེས། ཁོ་བོ་ནི་འདི་ལྟར་ཡང་གོ་སྟེ་ཡན་ལག་དྲུག་རྒྱུད་དང་ཆོས་མཐུན། མདོ་བཞི་ལུང་དང་ཆོས་མཐུན། རྩ་བ་གསུམ་མན་ངག་དང་མཐུན་པ་ལ་ཐེ་ཚོམ་ཟོས་པ་ལ། དཔེར་ན་རྒྱལ་བའི་གསུང་གཅིག་ལ་རྒྱུད་ལུང་མན་ངག་གསུམ་དུ་བྱུང་བ་ལྟར་ཡིན་ནོ། །ཞེས་པས་གེགས་བསལ་བར་གོ་བས་གེགས་སེལ་བར་བདེའོ། །ཞེས་གསུངས་ཏེ་གོང་དུ་རང་སྐབས་སུ་བསྟན་པ་བཞིན་ནོ། །ཡང་ས་གཅོད་ཚུལ་ལ་ལར། གོང་གི་མུན་པའི་ཡན་ལག་དྲུག་དང་མདོ་བཞི་དང་རྩ་བ་གསུམ་གྱི་དོན་ལ་བརྩད་པའི་སྐྱོན་སྤོང་གི་མགོ་བསྒྲེར་འདི་ཉིད་འཆད་པ་ཡང་ཡོད་དོ། །བཞི་པ་ཞབས་བསྡུ་བ་ནི། ལས་ཀྱིས་བསྒྱངས་པ། ཞེས་པ་ནས། ཤེས་པར་གྱིས། །ཞེས་པའི་བར་གྱིས་བསྟན་ཏེ། དེ་ལྟར་རང་རང་གི་ལས་ཀྱིས་བསྒྱངས་པའི་མཚན་ཉིད་པ་སོགས་གསང་སྔགས་མ་མཐོང་བའི་འགྲོ་བ་གང་དག་རྣམས་ལ་དགོངས་ཏེ་ཇི་སྐད་གསུངས་པ་ལྟར་གང་འདིར་མུན་པའི་མཚན་ཉིད་སྣང་བའི་སྤྱོད་ཡུལ་དང་མ་འདྲེས་པའི་ཕྱོགས་རྣམས་ཡང་དག་པར་བཤད་དེ་བཀའ་སྩལ་པ་ཉིད་ནི་སྔར་གོང་དུ་བཤད་པར་དམ་བཅས་ཏེ་གོ་ཆ་བགོས་པར་མཛད་པ་དེ་ཡི་དོན་བགྲོས་པ་ཡིན་པར་ཤེས་ཤིང་རྟོགས་པར་གྱིས་ཤིག །ཅེས་གསུངས་པར་མཛད་དོ། །ལེའུའི་མཚན་ནི། སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ཆོོས་ཐམས་ཅད་ཀྱི་མི་མཐུན་པ་སྐྱོན་གྱི་རྩ་བ་གང་གི་གསང་སྔགས་ལ་ལྟོས་ཏེ་མུན་པའི་སྤྱོད་ཡུལ་དུ་གྱུར་པའི་མཚན་ཉིད་རྣམས་གསལ་བར་བསྟན་པའི་ལེའུ་སྟེ་ལྔ་བཅུ་རྩ་ལྔ་པ་ཉིད་རྒྱས་པར་འགྲེལ་ཏེ་རྣམ་པར་བཤད་པའོ།། །།གསུམ་པ་དོན་ངེས་པའི་རྩ་བ་བཤད་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི། དེ་ནས། ཞེས་པ་ནས། ཡོངས་སུ་བགྲོ་བར་བྱའོ། །ཞེས་པའི་བར་གྱིས་བསྟན་ཏེ། དབུ་ཞབས་ན་ལེའུ་འདི་ཉིད་ཟབ་སྟེ་ངེས་དོན་ཁོ་ན་སྟོན་ནོ། །སྤྱིར་དྲང་ངེས་ཀྱི་རྣམ་བཞག་འདི་ལའང་། དབུ་མ་པ་སོགས་ཀྱིས་ཀུན་རྫོབ་སྟོན་པ་དྲང་དོན་དང་། དོན་དམ་སྟོན་པ་ངེས་དོན་དུ་འདོད་པས་དེ་ལྟར་ན་རང་རང་གི་བདེན་གཉིས་ཀྱི་འཇོག་ཚུལ་ལྟར་ལུང་ཡང་དེ་དང་མཐུན་པར་བཞེད་དོ། །གསང་སྔགས་འཛིན་པ་ཁ་ཅིག་གིས། རྒྱུའི་ཆོས་སྟོན་པ་དྲང་ལུང་། འབྲས་བུའི་ཆོས་སྟོན་པ་ངེས་ལུང་དུ་འདོད་དེ། དེ་ལྟར་ན་མཚན་ཉིད་ཀྱི་ཐེག་པ་དྲང་དོན། སྔགས་ཀྱི་ཐེག་པ་ངེས་དོན་ནོ། །ཡང་གསང་སྔགས་གསར་མའི་རྒྱུད་འགའ་ཞིག་ལྟར་ན། ཀུན་བརྟགས་བསྐྱེད་རིམ་གྱི་རྣལ་འབྱོར་སྟོན་པའམ། རྣམ་པར་རྟོག་པའི་ལམ་བསྐྱེད་རྫོགས་སོགས་རྒྱ་ཆེ་བར་སྟོན་པ་དྲང་ལུང་ཡོངས་གྲུབ་རྫོགས་རིམ་གྱི་རྣལ་འབྱོར་སྟོན་པའམ་རྣམ་པར་མི་རྟོག་པ་གཅིག་ཆར་དུ་སྒོམ་པའི་ཐབས་སྟོན་པ་ངེས་ལུང་དུ་འདོད་དེ། དེ་ལྟ་ན་ཐེག་པ་ཐམས་ཅད་ལའང་རང་རང་གི་ལུགས་ཀྱིས་རྒྱ་ཆེ་བ་དང་མི་རྟོག་པ་སྒོམ་ཚུལ་སོ་སོར་ཡོད་པས་ཐམས་ཅད་ལ་དྲང་ངེས་གཉིས་རེ་ཡོད་པར་འགྱུར་རོ། །དེས་ན་ལུང་ཆེན་པོ་འདིའི་དྲང་ངེས་འཇོག་ཚུལ་ནི། རྒྱུ་འབྲས་ཀྱི་རྣམ་གྲངས་སྟོན་པའི་ཐབས་ལ་བརྟེན་ནས་ཆོས་ཉིད་བརྒྱུད་ནས་སྟོན་པ་དྲང་དོན་དང་། རྒྱུད་འབྲས་ཀྱི་དབྱེ་བ་ལས་འདས་པའི་ཐབས་ལ་བརྟེན་ནས་ཆོས་ཉིད་ཅར་ཕོག་ཏུ་སྟོན་པ་ངེས་དོན་དུ་བཞེད་པ་ཉིད་དོ། །དེ་ལྟར་ན་ཨ་ནུ་མན་ཆད་དྲང་ལུང་དང་ཨ་ཏི་ངེས་ལུང་དུ་བཞེད་པ་ཡིན་ནོ། །དེར་མ་ཟད་ལེའུའི་གནས་འདི་ནི། ཀུན་བྱེད་རྒྱལ་པོ་ལས། ཀུན་བྱེད་ང་ཡི་རང་བཞིན་སྒྲོ་སྐུར་བྲལ། །ང་ཡི་རང་བཞིན་དེ་བཞིན་ཉིད་གཅིག་ལ། །སྐུ་གསུམ་སྟོན་པས་སོ་སོར་བསྟན་པ་ཡང་། །དེ་བཞིན་ཉིད་ལ་དྲང་བའི་ལུང་བསྟན་ཡིན། །ཞེས་གསུངས་པ་ལྟར། ངེས་པའི་དོན་མཆོག་མཐར་ཐུག་པའི་རྩ་བའང་ཡིན་ཏེ། བཤད་རྒྱུད་ངེས་དོན་མདོ་བཅུ་ལས། རིམ་པ་དགུ་ཡི་དོན་བདུན་ནི། །ཚིག་དང་ཡི་གེ་ཡོད་བསྟན་པས། །དྲང་བའི་ལུང་ཞེས་ང་ཡིས་བཤད། །ངེས་པའི་ལུང་གི་དོན་འདི་ནི། །བྱང་ཆུབ་སེམས་ཀྱི་ཆོས་ཉིད་ལ། །རྡོ་རྗེ་སེམས་དཔའ་ང་ཡིས་བཤད། །ཡང་དག་ངེས་པ་འདི་ཡིན་ཞེས། །ཚིག་དང་ཡི་གེས་མཚོན་དུ་མེད། །སྒྲ་དང་ཐ་སྙད་རིལ་ལས་འདས། །སྒྲོ་དང་སྐུར་པ་ཀུན་དང་བྲལ། །ཀུན་ལས་འདས་པའི་དོན་འདི་ལ། །འདི་ཡིན་མཚོན་དུ་མེད་པས་ན། །ངེས་པའི་ལུང་ཞེས་མིང་ཙམ་བཏགས། །ངེས་པར་གདམས་སུ་ཡོད་པ་མིན། །ཞེས་གསུངས་པ་སོགས་ཀྱིས་བསྟན་པ་ལྟར་རོ། །དེའང་མུན་པའི་རྗེས་སུ་གསང་སྔགས་ཀྱི་ཐབས་ངེས་པའི་རྩ་བ་སྣང་བའི་སྤྱོད་ཡུལ་དམ་པ་ཟླ་ཡིས་གསལ་བར་བསྟན་པའི་ཕྱིར། རྩ་བ་གསུམ་ལས་མཚོན་པ་དཔེའི་རྩ་བ་དང་། འཁོར་འདས་དབྱེར་མེད་ཀྱི་མུན་པ་བསྟན་པ་དེ་ནས་ཡང་ལང་ཀའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེས། སྟོན་པ་གསང་བ་པའི་བདག་པོ་ལ་བོས་ནས་ཡང་ཡོངས་སུ་དྲི་བ་མི་མཐུན་པ་ནི། སྣང་བ་དག་པའི་ངོ་བོ་འཁོར་འདས་དབྱེར་མེད་ཀྱི་རྩ་བ་ཆེན་པོའི་དོན་ཡང་དག་པར་དྲིས་པ། ཀྱེ་གསང་བ་པའི་བདག་པོ། གསང་ཆེན་སྔགས་ཀྱི་དོན་ངེས་པའི་རྩ་བ་གང་ལ་དབྱེར་མེད་བྱང་ཆུབ་ཀྱི་སེམས་གང་གི་དོན་མཆོག་བླ་ན་མེད་པ་དེ་ཉིད་སྣོད་དང་ལྡན་པའི་རིག་པ་གང་ལ་སྣང་བ་ལགས། ཡོངས་སུ་དག་པའི་སྤྱོད་ཡུལ་དེ་ཡང་བུདྡྷ་དང་རྣལ་འབྱོར་པ་གང་སུའི་ཡུལ་དུ་སྣང་བ་ལགས། དེ་སྐད་ཅེས་གསོལ་ཏེ་དྲིས་པ་ནི་ལེའུ་བཞི་བཅུ་དྲུག་པའི་རྩ་བ་ལས་འཕྲོས་པས་འདིར་རང་བཞིན་ལྟ་བའི་དེས་དོན་གྱི་གནད་དམ་པའོ། །དེའི་ལན་དུ། སྟོན་པ་གསང་བ་འདུས་པའི་མངའ་བདག་ཆེན་པོས་བཀའ་སྩལ་ཏེ་སྨྲས་པ། ལང་ཀའི་བདག་པོ། ཞེས་སྡུད་པ་པོ་ལ་བོས་ནས་གང་རྩ་བ་ཆེན་པོ་ཡོངས་སུ་དག་པའི་དྲི་བ་དེ་ནི་རང་དོན་དུའང་ལེགས་སོ། །གཞན་དོན་དུའང་ཤིན་ཏུ་རབ་ཏུ་ལེགས་སོ། །ཞེས་པའམ། སྡུད་པས་དྲི་བ་གཉིས་པ་ལ་ལེགས་པ་གཉིས་གནང་བས་བཀའ་སྩལ་པ་གང་ཞེ་ན། ལང་ཀའི་བདག་པོ། དེ་ཡི་དོན་ཡང་དག་པར་བསྟན་པ་དེ་ཡང་ལོ་རྒྱུས་སུ་བརྗོད་པ་འདི་ལྟར། སྟོན་པ་ཕུན་སུམ་ཚོགས་པ་རྒྱལ་བ་ཀུན་གྱི་སྤྱི་མེས་འཁོར་འདས་དབྱིངས་སུ་རང་གྲོལ་བར་བཅོམ་ཞིང་ཡོན་ཏན་མ་བརྩལ་ལྷུན་གྲུབ་ཏུ་རང་གསལ་བར་ལྡན་ཏེ་མཐའ་ཡིས་སྒྲིབ་པ་ཀུན་ལས་འདས་པའི་བདག་ཉིད་སངས་རྒྱས་ངོ་བོ་ཉིད་ཀྱི་སྐུ་ཆེན་པོ་རང་བཞིན་རྣམ་པར་དག་པ་སྟེ། ངེས་དོན་མདོ་བཅུ་ལས། སྟོན་པ་ཀུན་ཏུ་བཟང་པོ་ནི། །སངས་རྒྱས་ཀུན་གྱི་སྤྱི་མེས་པོ། །བླང་དོར་མེད་པའི་རང་བཞིན་གྱིས། །སྟོན་པ་ཀུན་ལས་ཁྱད་པར་འཕགས། །དེས་ན་མངོན་པར་ཆེ་བར་བཤད། །ཅེས་སོ། །གནས་ཕུན་སུམ་ཚོགས་པ། རང་བཞིན་གྱིས་བསལ་བ་མེད་པར་མཐར་འཛིན་ཡོངས་སུ་དག་པའི་གནས་མཆོག་དབྱིངས་མུ་མཐའ་བྲལ་བ་ཞེས་བྱ་བའི་ཞིང་ཁམས་ཏེ། སྔ་མ་ལས། ཡངས་པ་ཆོས་དབྱིངས་ཀུན་བཟང་གནས། །ཐམས་ཅད་འདུས་པའི་གནས་ཆེན་དེ། །མཐའ་དབུས་མེད་པའི་རང་བཞིན་གྱིས། །བཞུགས་གནས་ཀུན་ལས་ཁྱད་པར་འཕགས། །གནས་དེ་མངོན་པར་ཆེ་བར་བཤད། །ཅེས་གསུངས་པ་ལྟ་བུའི་གནས་ན། བཞུགས་བྱ་བཞུགས་བྱེད་གཉིས་སུ་མེད་པར་ཡེ་ནས་ངང་གིས་བཞུགས་ཐབས་གཅིག་དང་དུ་མར་བྲལ་བའི་ཚུལ་གྱིས་བཞུགས་པ་དེའི་ཚེ་དང་དེའི་སྐབས་ཀྱི་དུས་ཕུན་སུམ་ཚོགས་པ་སྟེ། དེ་ཉིད་ལས། དུས་ནི་དུས་གསུམ་ཁྱད་པར་གཅིག །དུས་ལ་སྐྱེ་འཇིག་མེད་པས་ན། །གཅིག་ཏུ་གསལ་བའི་རང་བཞིན་གྱིས། །སྔ་ཕྱི་ཀུན་ལས་ཁྱད་པར་འཕགས། །དུས་དེ་མངོན་པར་ཆེ་བར་བཤད། །ཅེས་པ་ལྟ་བུའི་བླ་ན་མེད་པའི་དུས་ན། འཁོར་ཕུན་སུམ་ཚོགས་པ་གང་ཡིན་པ་སྡུད་པ་པོ་ལ་སོགས་པ་དཔག་ཏུ་མེད་པའི་རྒྱལ་བ་རྒྱ་མཚོ་ཡེ་ཤེས་ཆོས་ཀྱི་སྐུ་ལ་སོགས་པའི་ཚོགས་མཐའ་དག་གསང་བའི་དབྱིངས་ཡེ་སངས་རྒྱས་པའི་ཆོས་ཀྱི་དགོངས་པ་ཀུན་ནས་ཡོངས་སུ་འདུས་པ་དག་ཏུ་བཞུགས་པ་སྟེ། སྔ་མ་ལས། སྡུད་པ་སེམས་དཔའ་ཆེན་པོ་ནི། །སངས་རྒྱས་སེམས་ཅན་འཁོར་རྣམས་ལ། །སྐྱེ་འཇིག་མེད་པས་ཁྱད་པར་འཁོར། །སྡུད་པ་ཀུན་ལས་ཁྱད་པར་འཕགས། །འཁོར་དེ་མངོན་པར་ཆེ་བར་བཤད། །ཅེས་སོ། །དེ་ལྟ་བུའི་འཁོར་ལ་གང་འཁྲུལ་སྣང་འཁྲུལ་འཛིན་ཀུན་དང་བྲལ་བའི་དེ་ཁོ་ན་ཉིད་སྣང་བ་ཡོངས་སུ་དག་པའི་མཉམ་པ་ཆེན་པོ་རིག་པ་ལ་ཇི་བཞིན་དུ་གསལ་བའི་འཁོར་འདས་དབྱེར་མེད་ཚོགས་བརྒྱད་ཡེ་ཤེས་ལྔར་སྣང་བ་རང་བཞིན་རྫོགས་པ་ཆེན་པོའི་བསྟན་པ་ཕུན་སུམ་ཚོགས་པ་སྟེ། སྔ་མ་ལས། བསྟན་པ་ལྟ་བ་རྫོགས་ཆེན་འདི། །ཆོས་ཉིད་ཀུན་གྱི་སྙིང་པོ་སྟེ། །ཐམས་ཅད་ཀུན་གྱི་རང་བཞིན་གྱིས། །ཐེག་པ་ཀུན་ལས་ཁྱད་པར་འཕགས། །དེས་ན་བསྟན་པ་མངོན་པར་ཆེ། །ཞེས་སོ། །དེ་ལྟ་བུའི་ཆོས་ཉིད་རང་སྣང་གི་ངོ་བོ་དེ་ཉིད་ཐེག་པ་གཞན་གྱིས་ཡུལ་མིན་ཏེ། རྒྱུད་ཡོངས་སུ་དག་པའི་རྒྱལ་བ་དང་། རྣལ་འབྱོར་གྱི་དབང་ཕྱུག་དམ་པ་རྣམས་ཀྱི་སྤྱོད་ཡུལ་དུ་གྱུར་པར་དགོངས་ཏེ་བསྟན་པ་ཀུན་གྱི་ཡང་སྙིང་དེ་ཁོ་ན་ཉིད་གསང་བ་ཇི་བཞིན་པའི་དོན་དུ་བཀའ་སྩལ་པར་མཛད་པས་འཁོར་གྱི་རིག་པ་ལ་རང་སྣང་བའི་དོན་མཆོག་བླ་ན་མེད་པ་དེ་ནི་ཐེག་མཆོག་འོད་གསལ་སྙིང་པོའི་ཐུན་མོང་མ་ཡིན་པའི་ཕུན་སུམ་ཚོགས་པ་ལྔ་ཡིས་མངོན་སུམ་པར་སངས་རྒྱས་པའི་ཆེ་བ་རྨད་དུ་བྱུང་བ་ཉིད་དེ། སྔ་མ་ལས། དེས་ན་ཕུན་སུམ་ཚོགས་པ་ལྔས། །མངོན་པར་སངས་རྒྱས་ཆེ་བར་བཤད། །ཅེས་སོ། །དེ་ལྟར་ཕུན་སུམ་ཚོགས་པ་ལྔའི་ངོ་བོ་ནི། སྒྲ་ཐལ་འགྱུར་ཆེན་པོ་གསང་བ་སྒྲའི་རྒྱུད་ལས། འཁོར་དང་འདས་པའི་ཐོག་མར་ནི། །རང་བྱུང་བྱས་པ་མེད་པ་ལས། །འབྱུང་བ་འདུས་པའི་ཕུང་པོར་ཤར། །ས་ཆུ་མེ་རླུང་རིན་ཆེན་བཞི། །དབུས་སུ་རླུང་སེམས་རྒྱུ་དང་རྐྱེན། །འདུས་ཤིང་བསྐྱེད་པའི་གཞལ་མེད་ཁང་། །རང་བྱུང་རིག་པ་བཅོས་པ་མེད། །འཁྲུལ་པ་ཡོངས་སུ་དག་པ་ལ། །བདེ་ཆེན་འདུས་པའི་ཐབས་ཀྱི་འཁོར། །སྐུ་དང་ཡེ་ཤེས་ཤེས་རབ་རླུང་། །མི་ཕྱེད་སྣ་ཚོགས་དམིགས་མེད་པས། །རྩ་རླུང་ཐབས་ཀྱི་བདེ་ཆེན་ཆོས། །སོ་སོའི་ཉམས་དང་མཐུན་པར་བཤད། །འདས་དང་མ་འོངས་ད་ལྟར་མེད། །མི་ཕྱེད་འབྱེད་པ་ཡོངས་སུ་མེད། །ཐམས་ཅད་རང་བྱུང་ཡེ་ཤེས་སོ། །ཞེས་ཐུན་མོང་མིན་པའི་གླེང་གཞིའི་སྐབས་སུ་གསུངས་ཤིང་། དེ་ནས་ཐུན་མོང་གི་གླེང་གཞི་རྒྱས་པར་བསྟན་པའི་མཇུག་ཏུ། མི་འབྱེད་རང་བཞིན་རྣམ་དག་པ། །ཐམས་ཅད་ངོ་བོ་དབྱེར་མེད་པར། །བརྗོད་ཅིང་སྒྲ་ཚིག་བདེ་རིག་སྟེ། །ཆོས་ཀྱི་སྐུ་ཡང་རྒྱུ་མེད་པ། །ལོངས་སྐུ་གདལ་བ་ཀུན་ཁྱབ་པར། །སྤྲུལ་སྐུ་སྤྲོས་གཞི་རྫོགས་པ་ལས། །དབྱེར་མི་ཕྱེད་པས་སྙོམས་ཞུགས་ཏེ། །རང་བཞིན་རྫོགས་པ་ཆེན་པོ་ཡི། །དཀྱིལ་འཁོར་གཅིག་ཏུ་ཐབས་གཅིག་འཁོད། །དེ་ལྟར་ངང་གཅིག་དབྱེར་མེད་དོ། །ཞེས་གསུངས་པ་ལྟར་རྟོགས་པ་མངོན་གྱུར་གྱི་ཕུན་སུམ་ཚོགས་པ་འབྲས་བུ་རྫོགས་པ་ཆེན་པོ་རང་བྱུང་རིག་པའི་དཀྱིལ་འཁོར་ཏེ། སེམས་ཕྱོགས་རྫོགས་པ་ཆེན་པོའི་མན་ངག་གི་སྐབས་དུ་མར། འབད་རྩོལ་མེད་པར་ལྷུན་གྲུབ་ཆེན་པོའི་དཀྱིལ་འཁོར། ལྷག་ལུས་མེད་པར་ཁམས་གསུམ་དོང་སྤྲུགས་ཀྱི་དཀྱིལ་འཁོར། ཕྱི་ནང་མེད་པར་ཡེ་ཤེས་རང་སྣང་གི་དཀྱིལ་འཁོར། སྤང་བླང་མེད་པར་རང་གྲོལ་ཆེན་པོའི་དཀྱིལ་འཁོར། གཙོ་འཁོར་མེད་པར་མཉམ་པ་ཉིད་ཀྱི་དཀྱིལ་འཁོར། མཐའ་དབུས་མེད་པ་གདལ་ཁྱབ་ཆེན་པོའི་དཀྱིལ་འཁོར། སྒྲིབ་གཡོགས་མེད་པ་ཡེ་ཤེས་ཟང་ཐལ་གྱི་དཀྱིལ་འཁོར་ཞེས་པ་ལ་སོགས་པ་ཇི་སྐད་གསུངས་པ་ལྟ་བུ་སྟེ། དེ་ལྟར་ཁྱབ་བདག་ངོ་བོ་ཉིད་སྐུའི་དཀྱིལ་འཁོར་དུ་ཐབས་གཅིག་པར་འཁོད་པའི་སྐབས་ཀྱི་དགོངས་པ་རང་སྣང་བའི་དོན་ཕུལ་དུ་བྱུང་བ་དེ་ཉིད་ཁོ་བོ་སྡུད་པ་པོ་ཕྱག་ན་རྡོ་རྗེ་གསང་བའི་མངའ་བདག་ཆེན་པོས་ཇི་ལྟ་བ་བཞིན་དུ་ནོར་བ་མེད་ཅིང་ཕྱིན་ཅི་མ་ལོག་པར་ལང་ཀ་ལ་སོགས་པ་ཁྱེད་རྣམས་ལ་ཡོངས་སུ་བགྲོ་བར་བྱའོ་ཞེས་གསུངས་ནས་བཤད་པར་ཞལ་གྱིས་བཞེས་པ་སྟེ། ཀུན་བྱེད་རྒྱལ་པོ་ལས། ནམ་མཁའ་ལྟ་བུའི་ཆོས་ཉིད་ལ། །ནམ་མཁའ་ལྟ་བུའི་དཔེ་ཡིས་མཚོན། །དམིགས་སུ་མེད་པའི་ཆོས་ཉིད་ལ། །དམིགས་སུ་མེད་པར་མཚོན་ཏེ་བསྟན། །ཚིག་ཏུ་བརྗོད་དུ་མེད་པ་ལ། །བརྗོད་དུ་མེད་པའི་ཚིག་བརྗོད་དེ། །དམིགས་མེད་དོན་གྱི་ངོ་བོར་བསྟན། །ཞེས་གསུངས་པ་ལྟ་བུའོ། །འོ་ན་འདིར་ངོ་བོ་ཉིད་སྐུ་ཁོ་ནའི་གླེང་གཞི་འོང་ཞིང་སྟོན་པ་དང་སྨོས་པ་ཅི་དགོས་གཞན་ཡང་ཡོད་དམ་ཞེ་ན། དེ་ཁོ་ན་ཉིད་སྣང་བ་དམ་པ་དག་པ་མཐར་ཕྱིན་པ་ནི་ངོ་བོ་ཉིད་ཆོས་ཀྱི་སྐུ་འཁོར་དང་བཅས་པ་ཁོ་ནའི་ཕྱིར་རོ། །དེས་ན་གནས་ལུགས་དོན་གྱི་རྫོགས་ཆེན་ནི་ངོ་བོ་ཉིད་སྐུའི་བསྟན་པ་སྟེ། མདོ་བཅུ་ལས། འདི་ཡི་དོན་གྱི་རང་བཞིན་ལས། །རྟོགས་ནས་བྱིན་རླབས་འབྱུང་བ་ནི། །རྫོགས་པ་ཆེན་པོའི་རང་བཞིན་ནི། །སངས་རྒྱས་རྫོགས་ལ་སེམས་ཅན་རྫོགས། །འཇིག་རྟེན་རྫོགས་ལ་འདས་པ་རྫོགས། །བདེ་དང་སྡུག་བསྔལ་གཉིས་མེད་རྫོགས། །ཐེག་པ་རྫོགས་ལ་ཆོས་ཉིད་རྫོགས། །ཡོད་པའི་མཐའ་རྫོགས་མེད་མཐའ་རྫོགས། །གཅིག་རྫོགས་ཀུན་རྫོགས་ཐམས་ཅད་རྫོགས། །ཡོངས་སུ་རྫོགས་པའི་མདོ་འདི་ནི། །དུས་གསུམ་སངས་རྒྱས་ཐམས་ཅད་ཀྱིས། །སྔར་གྲུབ་དགོངས་པ་འདི་ཡིས་གྲུབ། །ད་ལྟར་བཞུགས་པའི་རྣལ་འབྱོར་པ། །མི་ཡེངས་དགོངས་ལམ་འདི་ལ་གནས། །སླད་ནས་བྱོན་པའི་གདུང་འཚོབ་རྣམས། །དགོངས་པའི་ལུང་བསྟན་འདི་ཡིས་མཛད། །གང་སུ་འདི་ལ་གནས་པ་ཡི། །རྣལ་འབྱོར་དེ་ནི་ཆེན་པོ་ཡིན། །ཞེས་སོགས་གསུངས་པ་ལྟར་ཡིན་ཀྱང་། མཚོན་བྱེད་སྒྲ་རྒྱུད་ཀྱི་རྫོགས་པ་ཆེན་པོའི་ངོས་ནས་ཆོས་སྐུའི་བསྟན་པ་གསུངས་པའང་གནད་མཆོག་ཏུ་གསང་བ་ལ་བརྟེན་པའི་ངེས་པའི་གསང་སྒོ་རྨད་བྱུང་དམ་པ་ཡིན་ནོ། །དེ་ལྟ་བུ་ངོ་བོ་ཉིད་སྐུའི་གླེང་གཞི་འདི་ནི། རིན་པོ་ཆེ་རྒྱན་ལས་ཀྱང་། ངོ་བོ་ཉིད་སྐུས་ཆོས་སྐུ་ལ། །དུས་བཞི་མཉམ་པའི་དུས་ཉིད་ལ། །ཐ་དད་མི་གནས་པ་ཡི་གནས། །ཀུན་འདུས་རང་གྲོལ་བསྟན་པ་སྟེ། །མ་བསྒྲིབས་མཐོང་ཐོས་རང་ཤར་བའོ། །ཞེས་གསུངས་ཏེ། ཆོས་ལོངས་སྤྲུལ་གསུམ་གྱི་གླེང་གཞི་ནི་ཐེག་པ་སྤྱིའི་གཞུང་དང་མཐུན་ལ། གསང་བའི་གླེང་གཞི་ནི་གདུལ་བྱ་ཆགས་ཅན་དང་མཐུན་པར་དོན་ལ་དྲང་བ་ཡིན་པའི་ཕྱིར་མཐར་ཐུག་ཐུན་མོང་མིན་པ་ནི་ངོ་བོ་ཉིད་སྐུའི་གླེང་གཞི་འདི་ཉིད་ཁོ་ན་ཡིན་པས་ཐེག་པ་ཀུན་གྱི་གནས་དང་ཕུན་སུམ་ཚོགས་པ་ཀུན་གྱི་གཙོ་བོ་ཡིན་ཏེ། དེ་ཉིད་ལས། དང་པོ་གསུམ་ནི་སྤྱི་གཞུང་ལ། །གཅིག་ནི་གདུལ་བྱ་མཐུན་པར་དྲངས། །མཐར་ཐུག་ཐ་མ་ཐུན་མོང་མིན། །ཀུན་གྱི་གནས་ཡིན་ཀུན་གྱི་གཙོ། །ཀུན་གྲོལ་ཆེན་པོའི་རྒྱུད་ལས་གྲགས། །ཞེས་གསུངས་པ་ལྟར་ཏེ་རྒྱས་པར་རྫོགས་པ་ཆེན་པོའི་རྒྱུད་སྡེ་རྣམས་ལས་ཤེས་པར་བྱའོ། །གཉིས་པ་ལ་བཞི་སྟེ། དོན་ངེས་པའི་རྩ་བ་དངོས་བཤད་པ། དེ་ཉིད་རྟོགས་མ་རྟོགས་ཀྱི་ཁྱད་པར་བཤད་པ། མ་རྟོགས་པ་རྣམས་གཏན་ལ་ཕབས་ཏེ་རང་གཞུང་དུ་བསྟན་པ། དེ་ལྟར་སྟོན་པའི་བླ་མ་དམ་པ་ཇི་ལྟར་བཀུར་ཚུལ་བཤད་པའོ། །དང་པོ་ལ་གཉིས་ཏེ། གང་གིས་གསུངས་པའི་ཁུངས་བཤད་པ། ཇི་ལྟར་བསྟན་པའི་ངོ་བོ་བཤད་པའོ། །དང་པོ་ནི། ལང་ཀའི། ཞེས་པ་ནས། དགོངས་པ་བརྒྱུད་ནས་གསུངས། །ཞེས་པའི་བར་གྱིས་བསྟན་ཏེ། དེ་ཡང་དཔེར་ན་མེ་ལོང་གཡས་གཡོགས་པ་ཉིད་དལ་གྱིས་རིམ་པར་ཕྱི་བ་དང་། ཚ་མར་དང་ཉི་མ་ལ་གདུང་སྟེ་ཅིག་ཆར་ཕྱི་བ་གཉིས་དག་པའི་ཚེ་གསལ་བ་དང་གཟུགས་བརྙན་ངེས་པར་འཆར་བ་ལྟར་འདིར་མེ་ལོང་ཅིག་ཆར་དུ་ཕྱི་བའི་དཔེས་སེམས་ཀྱི་ཆོས་ཉིད་ཇི་བཞིན་པར་རྟོགས་པའི་སྐད་ཅིག་གིས་ཉོན་ཡིད་ནི་གཟུང་འཛིན་གྱི་རྟོག་པ་ཡིན་པས་གཞི་ནས་དག་སྟེ་ཚོགས་བརྒྱད་ཡེ་ཤེས་ལྔར་དག་པའི་ངོ་བོ་རྒྱས་པར་བཤད་པ་ཉིད་དེ། ལང་ཀའི་བདག་པོ་ཞེས་བོས་ནས་ཐོག་མར་ཅིག་ཆར་དུ་རྟོགས་པའི་ཐབས་ཀྱི་ཁུངས་ཉེ་བར་བསྟན་པ་ནི་འདི་ལྟ་སྟྭེ། དཔེར་ན་མུན་ཁུང་དུ་གསེར་སྟོར་བ་ཉིད་སྣང་གསལ་སྒྲོན་མས་རྐྱེན་ལས་རྙེད་པ་ན་བྱས་པ་མེད་པར་རང་སྣང་བ་ལྟར་དུ་འཁོར་བའི་སྲིད་པ་མ་རིག་པའི་མུན་པར་རང་རིག་བྱང་ཆུབ་སེམས་ཀྱི་གསེར་སྟོར་བ་ཉིད་རང་སྣང་ཞིང་རྙེད་པར་བྱེད་པའི་རྐྱེན་དུ་གྱུར་པ་སྒྲོན་མ་ལྟ་བུའི་རྒྱུད་ཆེན་པོ་རྒྱལ་བ་ཐམས་ཅད་ཀྱི་བརྗོད་བྱ་དང་རྗོད་བྱེད་ཀྱི་དགོངས་པ་མཐའ་དག་ཀུན་ནས་འདུས་པའི་རྩ་བ་རྫོགས་པའི་སངས་རྒྱས་མ་ལུས་པའི་དགོངས་པའི་ཞེ་ཕུགས་དམ་པར་གྱུར་བའི་འབྲས་བུར་ངེས་པ་འདི་ནི་སྔ་རབས་འདས་པའི་དུས་སུ་བྱོན་པའི་ཕྱོགས་བཅུ་དུས་བཞིའི་རྒྱལ་བ་རྫོགས་པའི་སངས་རྒྱས་ཀུན་གྱིས་ཀྱང་ཐུགས་ཀྱི་དགོངས་པ་ལ་བརྒྱུད་ནས་གསུངས་ཤིང་བཀའ་སྩལ་བར་མཛད་པའི་ཁུངས་དང་ལྡན་པའོ། །གཉིས་པ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི། ཆོས་ཀུན་རྩ་བ། ཞེས་པ་ནས། ནོན་པར་འདུས་པས་གསུངས། །ཞེས་པའི་བར་གྱིས་བསྟན་ཏེ། དེ་ཡང་ཇི་སྐད་དུ་ངེས་དོན་མདོ་བཅུ་ལས། ཨ་ནུ་ཡོ་གའི་ཨ་ཏི་ནི། །བྱང་ཆུབ་སེམས་ཀྱི་ཆོས་ཉིད་དེ། །རྒྱུ་རྐྱེན་བྲལ་བའི་རང་བཞིན་གྱིས། །གསང་བའི་ཡེ་ཤེས་རང་བྱུང་བའོ། །ཞེས་གསུངས་པའི་དོན་གྱི་སྙིང་པོ་དེ་ཉིད། ཨ་ཏི་ཡོ་གའི་ཨ་ནུ་ནི། །རང་བཞིན་མ་བཅོས་ཆོས་ཉིད་དེ། །སྒྲིབ་པ་མེད་པའི་རང་བཞིན་གྱིས། །དབྱིངས་དང་ཡེ་ཤེས་རང་བྱུང་བའོ། །ཞེས་གསུངས་པའི་ངོ་བོ་དང་གནད་མཐུན་པར། ཨ་ནུ་ཡོ་གའི་ལ་བཟླས་ནི། །འདུ་འབྲལ་མེད་པའི་ཆོས་ཉིད་དེ། །གཟུང་འཛིན་བྲལ་བའི་རང་བཞིན་གྱིས། །ཆོས་ཉིད་ཟབ་མོ་རང་བྱུང་བའོ། །ཞེས་གསུངས་པའི་ཆོས་ཉིད་དོན་གྱི་ལ་བཟླ་དེ་ཉིད། ཨ་ཏི་ཡོ་གའི་ལ་བཟླས་ནི། །བརྗོད་དུ་མེད་པའི་ཆོས་ཉིད་དེ། །སྒྲོ་སྐུར་བྲལ་བའི་རང་བཞིན་གྱིས། །བདེ་བ་ཆེན་པོར་རང་བྱུང་བའོ། །ཞེས་གསུངས་པ་ལྟར་ཕྱོགས་མེད་བདེ་བ་ཆེན་པོ་རང་རིག་རང་གྲོལ་གྱི་ངང་དུ་ལ་བཟླས་པའི་རང་བཞིན་རྫོགས་པ་ཆེན་པོ་མ་འདྲེས་མཐའ་བྲལ་ཡོངས་རྫོགས་དབྱེར་མེད་ཕྱོགས་བྲལ་གདལ་ཁྱབ་ཆེན་པོའི་དགོངས་དོན་ཟབ་མོ་ཇི་བཞིན་པར་སྟོན་ཏེ། འཁོར་བ་དང་མྱ་ངན་ལས་འདས་པས་བསྡུས་པའི་དངོས་པོ་གཉིས་ཀྱི་ཆོས་ཐམས་ཅད་ཀུན་གྱི་གཞི་དང་རྩ་བ་ནི་རང་གི་རིག་པ་བྱང་ཆུབ་ཀྱི་སེམས་སྤྲོས་པ་དང་བྲལ་བའི་རྣམ་ཤེས་དགུ་པ་འདི་ཉིད་ཁོ་ན་ལ་འདུས་ཤིང་རྫོགས་པ་ཡིན་པས་ཀུན་གཞི་བྱང་ཆུབ་སེམས་ཀྱི་རང་རྩལ་སེམས་ཉིད་ཚོགས་བརྒྱད་ཀྱི་དངོས་པོར་གྱུར་པ་རྣམས་སྐབས་ལྔའམ་བཅུར་གནས་གྱུར་ཏེ་ཡེ་ནས་ཡེ་ཤེས་ལྔར་གནས་པ་ཉིད་རིག་པ་ལ་ཤར་ཞིང་སྣང་བའི་བླ་དྭགས་སུ་གནས་གྱུར་ཞེས་བརྗོད་པ་སྟེ། རྟོགས་པ་དེ་ཉིད་ཀྱི་དོན་ལ་རང་གི་བློ་ཡིད་ཀྱི་བྱ་བསམ་དང་རྩོལ་བ་མེད་པར་ངེས་པར་བཞག་པས་མ་བཅོས་རང་གྲོལ་གྱི་ངང་ལ་རང་བབ་ཏུ་འདུག་ཅིང་གཡོ་བ་མེད་པར་གནས་ན། སེམས་ཉིད་ཡེ་ཤེས་ལྔར་གནས་གྱུར་པ་ཡང་དེ་ཉིད་ཡིན་པས་དེ་ཁོ་ན་ལས་གཞན་ན་མེད་དོ། །དེ་ལྟ་བུའི་ཡེ་ཤེས་ལྔ་ཡང་རིག་པ་གཅིག་དང་དུ་མ་བྲལ་བའི་ཆོས་ཉིད་བྱང་ཆུབ་ཀྱི་སེམས་རྟོགས་པ་དེ་ལ་མཚན་ཉིད་རྣམ་ལྔ་མ་འགགས་པར་གསལ་བའི་ཚུལ་གྱིས་ཡོངས་སུ་རྫོགས་པ་ཡིན་པས་ན་ཡེ་ཤེས་ལྔ་ཡང་ངོ་བོ་ཐ་དད་མེད་པར་རང་རིག་པ་རང་བྱུང་གི་ཡེ་ཤེས་གཅིག་པུ་ཉིད་དུ་འདུས་ཤིང་རིམ་པ་མིན་པར་ཅིག་ཆར་དུ་རྫོགས་པ་ཡིན་ཏེ། ཡེ་ཤེས་གསང་བ་ལས། མི་གནས་ཐུགས་ལ་ཕྱི་ནང་མེད། །སྟོང་པའི་ཡེ་ཤེས་དངོས་པོ་མེད། །མེ་ལོང་ལྟ་བུའི་ཡེ་ཤེས་ནི། །ཤེས་བྱ་ཀུན་ལ་མངོན་ཕྱོགས་མེད། །མཉམ་ཉིད་ཡེ་ཤེས་ཆེ་ཆུང་མེད། །སོ་སོར་རྟོག་པ་མ་འདྲེས་གསལ། །བྱ་བ་ནན་ཏན་ཐུགས་རྗེ་དངོས། །རང་བྱུང་ཡེ་ཤེས་ཉག་གཅིག་ལ། །ཡོན་ཏན་ཆ་རེས་དུ་མར་བགྲངས། །ཞེས་སོ། །དེས་ན་རང་རིག་པའི་སེམས་ཀྱི་ཆོས་ཉིད་མ་བཅོས་མ་བསླད་པའི་ཇི་བཞིན་པ་དེ་ཁོ་ན་བ་དེ་ཉིད་ཅིར་ཡང་མ་མཐོང་བའི་ཚུལ་གྱིས་ཡང་དག་པར་རྟོགས་ཤིང་རིག་པ་ན། དེ་ལྟར་རྟོགས་པའི་ཡོན་ཏན་གྱིས་སེམས་འཕྲལ་དུ་སངས་རྒྱས་མིན་པ་ལས་ཡིན་པར་བཟོས་མ་བསྒྱུར་བར་ཡེ་ནས་འཁྲུལ་པ་མེད་པར་སངས་རྒྱས་པའི་དོན་རྒྱུ་རྐྱེན་གྱིས་བསླད་པ་མེད་པར་མ་ནོར་མ་བཅོས་པར་མངོན་དུ་གྱུར་པ་ཡིན་པས་དེ་ལས་གཞན་དུ་བགྲོད་པ་མེད་པའི་ཕྱིར་སེམས་ཉིད་གདལ་བ་ཆེན་པོས་ཆོས་ཀུན་ལ་ཁྱབ་པས་ཀུན་ཏུ་བཟང་པོ་དབྱེ་བ་མེད་པའི་ས་མཆོག་དེ་ཉིད་ཆེད་དུ་མ་མནན་པར་ནོན་པ་ཡིན་ཏེ། སྔ་མ་ལས། རང་གསལ་ཉག་གཅིག་དྲི་མ་མེད། །རྩོལ་མེད་ནམ་མཁའ་བཞིན་དུ་གནས། །སངས་རྒྱས་སེམས་ཅན་ཀུན་ལ་ཁྱབ། །དེ་རྙེད་རྟོགས་པས་འབྲས་བུའི་ས། །ཞེས་དང་། བྱང་ཆུབ་སེམས་ཀྱི་རང་བཞིན་ལ། །དབྱིངས་དང་ཡེ་ཤེས་དབྱེར་མེད་པས། །ཀུན་བཟང་དབྱེ་བ་མེད་པའི་ས། །མ་སྦྱངས་སེམས་ཉིད་ས་དག་ལ། །ས་རྣམས་མ་ལུས་ཐམས་ཅད་འདུས། །ཞེས་དང་། ཀུན་བྱེད་རྒྱལ་པོའི་སྤྱིའི་བཤད་རྒྱུད་སྡེ་བཞིའི་ཡ་གྱལ་ནམ་མཁའ་དང་མཉམ་པ་ཡི་གེ་མེད་པའི་རྒྱུད་ལས། ཁྱབ་གདལ་དོན་འདི་སུས་རྟོགས་པ། །རྒྱལ་སྲས་བཞིན་དུ་དབུལ་བ་སངས། །འདུ་འབྲལ་གཉིས་མེད་ཀུན་ཏུ་བཟང་། །མཚན་མ་མ་སྤངས་རང་སར་གྲོལ། །འཁོར་བ་མ་བཀག་གནས་སུ་དག །འཁྲུལ་པ་མ་བསལ་རྩད་ནས་ཆོད། །དུག་ལྔ་མ་བསྒྱུར་ཆོས་ཉིད་ཀློང་། །རྩོལ་སྒྲུབ་མེད་པར་ཡེ་སངས་རྒྱས། །ཡིན་པའི་དོན་ལ་ཡིན་པར་ཤེས། །དཔེར་ན་གསེར་ལ་གསེར་མཐོང་བཞིན། །ཡིད་ཀྱི་རྣམ་རྟོག་ཟད་པའོ། །ནམ་མཁའ་ཆེན་པོའི་ཀློང་ཆེན་བཞིན། །ཁྱབ་གདལ་མི་འགྱུར་ཀུན་རྫོགས་གྲོལ། །ཉི་མ་སྤྲིན་མེད་སྙིང་པོ་བཞིན། །དུས་གསུམ་སྒྲིབ་མེད་དེ་བཞིན་ཉིད། །བརྒྱ་བྱིན་གཙུག་གི་ནོར་བུ་བཞིན། །འདོད་རྒུ་འབྱུང་ལ་འགྲན་ཟླ་མེད། །མ་གི་ཏ་ཡི་སྨན་བཞིན་དུ། །གང་ལ་རེག་པ་སྨན་དུ་འགྱུར། །ཞེས་སོགས་གསུངས་པ་ལྟར་རོ། །དེ་ལྟར་སེམས་ཉིད་མ་ནོར་བར་རྟོགས་པ་ལ་ཐམས་ཅད་རྫོགས་པར་རྒྱལ་བ་ཀུན་གྱི་དགོངས་པ་འདུས་པའི་སྟོན་པ་ཁྱབ་བདག་དམ་པས་བཀའ་སྩལ་བར་མཛད་དེ་ངེས་པར་གསུངས་པའོ། །ཞེས་གསང་བདག་ཆེན་པོས་ལོ་རྒྱུས་སུ་བརྗོད་པའོ། །གཉིས་པ་ལ་བདུན་ཏེ། ལྟ་བས་ཐག་བཅད་པར་གདམས་པ། རྟོགས་ནས་ཅི་ཡང་མི་འགེག་པ་སྤྱད་ཅིང་བློ་བཞག་ཐབས་བསྟན་པ། བཞག་པ་བཞིན་ཉམས་སུ་བླང་བས་ཀུན་གྱི་སྒོ་དང་མཐུན་པར་དམ་པའི་དགོངས་པ་མྱོང་བར་བསྟན་པ། དེ་ལྟར་དགོངས་པ་རྙེད་པས་ཕ་རོལ་ཕྱིན་པ་དྲུག་ཀྱང་རྫོགས་པར་བསྟན་པ། མ་བཅོས་མཉམ་པའི་ངང་ལས་ཉམས་པའི་སྐྱོན་བྱུང་ན་བཅོས་ཐབས་བཤད་པ། ཏིང་འཛིན་མ་ཡེངས་པའི་ངོ་བོ་ལ་རྣལ་འབྱོར་གསུམ་གྱི་དོན་ཀུན་རྫོགས་པར་བསྟན་པ། དོན་དེ་ཤེས་ཤིང་གོམས་པ་ཉིད་རྒྱལ་བའི་དགོངས་སྤྱོད་མཐར་ཐུག་ཏུ་ངེས་པར་གདམས་པའོ། །དང་པོ་ནི། གནས་སྐབས་དེ་ན། ཞེས་པ་ནས། གྲོས་ཀྱིས་ཆོད་པར་བྱ། །ཞེས་པའི་བར་གྱིས་བསྟན་ཏེ། རྟོགས་པའི་ཡོན་ཏན་དེ་ལྟ་བུ་དང་ལྡན་པས་ན་རྗེས་སུ་འཇུག་པ་པོ་རྣམས་ཀྱིས་དང་པོར་ལྟ་བས་ཐག་བཅད་པར་གཅེས་ཏེ། དེའི་ཚུལ་ནི་ཆོས་ཉིད་ཇི་བཞིན་པ་ཇི་ལྟ་བར་ཤེས་ཤིང་ཐག་ཆོད་པའི་གནས་སྐབས་ཀྱི་དུས་དེ་ཉིད་ན་ཡང་། དེ་ལྟ་བུའི་རང་རིག་པ་ལ་ཉན་རང་བྱང་སེམས་ལྟར་ཡོད་མེད་ཀྱི་མཐའི་ལྟ་བ་རྗེས་བཅད་པ་དང་། གསང་སྔགས་སྤྱིའི་དགོངས་པ་ལྟར་མཐར་ཐུག་གི་བསྒྲུབ་བྱ་ཟབ་མོ་གཏན་ལ་དབབ་པ་དང་། ཚོགས་བརྒྱད་སེམས་ཀྱི་རང་བཞིན་རྣལ་མའི་དབྱིངས་ཀྱི་ངོ་བོ་ཆོས་ཉིད་དེ་བཞིན་ཉིད་རང་བྱུང་བའི་གནས་ལུགས་ཇི་ལྟར་ཡིན་པ་དང་། སེམས་ཉིད་དེ་ལ་ཡང་སེམས་ཙམ་སྐད་ཅིག་མ་དེ་ཡི་རྒྱུན་ཡོད་མེད་ཐག་བཅད་དེ་མཚན་མའི་ཚོགས་བརྒྱད་དང་གསང་བའི་དབྱིངས་ཀྱི་རང་བཞིན་མ་འདྲེས་ཡོངས་རྫོགས་སུ་རྟོགས་པའི་ཡེ་ཤེས་དམ་པར་ངེས་པ་རྙེད་པར་བྱའོ། །དེ་ལའང་གལ་པོའམ་གཏར་ཀ་གེགས་སེལ་ལྟ་བུར། གལ་ཏེ་ལྟ་སྒོམ་གྱི་ངོ་བོ་སེམས་མ་བཅོས་པའི་དེ་བཞིན་ཉིད་ལ་སྐབས་གང་འདིར་ཚུལ་ཇི་ལྟར་ལྟ་བར་བྱ་ཞེ་ན། འདི་ལྟར་རྩད་བཅད་པར་བྱ་སྟེ། སེམས་ཀྱི་རང་བཞིན་ཆོས་ཉིད་ཇི་བཞིན་པ་དེ་ཉིད་འདི་ལྟར་ཡོང་དེ་མངོན་སུམ་དུ་སྣང་བ་ཞིག་ཡིན་ནམ། གལ་ཏེ་མེད་ཅིང་མི་སྣང་བ་ཞིག་ཏུ་གྱུར་ཏམ། འོན་ཏེ་རང་སྣང་བའི་སེམས་ཉིད་ཡེ་ནས་སངས་རྒྱས་པ་ཞིག་ཡིན་ནམ། ཡང་ན་སངས་རྒྱས་མིན་པར་སེམས་ཅན་འབའ་ཞིག་ཏུ་གྱུར་པ་ཞིག་ཡིན་ཞེས་སྤྲོས་པ་གཅོད་པ་དང་། དེ་བཞིན་དུ། སེམས་ཀྱི་དེ་ཁོ་ན་ཉིད་འདི་ལས་སངས་རྒྱས་ཆོས་ཀྱི་སྐུ་ཞེས་བྱ་བ་དེ་ཉིད་གཞན་ལོགས་ཞིག་ན་ཡོད་དམ། འོན་ཏེ་གཞན་ན་མེད་པར་འདི་ཉིད་ཁོ་ན་ཡིན་ནམ། ཞེས་ཚུལ་འདི་ལྟར་རྩད་བཅད་ལ། ལྟ་བ་ཇི་ལྟར་ཡིན་པ་དང་། སྒོམ་པས་དོན་ཇི་ལྟར་གྱུར་པའི་བློ་ཡི་ངེས་པ་གང་ལ་གཞག་པ་རྣམས། ཡིན་དོན་ལེགས་པར་རྟོགས་པ་དང་སྣང་སྤྱོད་ཡེ་ཤེས་སུ་ཤར་བའི་ཕྱིར་དང་པོར་ལྷག་མཐོང་གི་གྲོས་ཀྱིས་ཐག་ཆོད་པར་བྱ་བ་ཁོ་ན་གལ་ཆེ་སྟེ། ཀུན་འདུས་རིག་པ་ལས། ཀློང་ཡངས་ནམ་མཁའི་སྙིང་པོ་ལ། །སྤྲིན་མེད་ཉི་མ་འབུམ་གྱིས་བརྡལ། །ཅིང་སྣང་ཅི་ཡང་མ་ཡིན་པ། །མི་སྐྱེ་མི་འགག་ངོ་བོ་ལས། །ཇི་ལྟར་བལྟས་རྒུ་དེར་སྣང་བ། །ཐེག་མཆོག་སྤྱི་རྒྱ་རླབས་ཀྱིས་བཅད། །དེ་ཡང་ལྟ་བའི་ཁྱད་པར་གྱིས། །བདག་ཉིད་ཆེན་པོའི་རྣལ་འབྱོར་དང་། །ལྷུན་གྱིས་གྲུབ་དང་ཀློང་ཡངས་ཆུབ། །གསུམ་རྫོགས་རང་བྱུང་གདལ་བའོ། །ཞེས་དང་། ཀུན་བྱེད་རྒྱལ་པོ་ལས། ཀྱེ་སེམས་ཀྱི་རང་བཞིན་ལྷུན་གྱིས་གྲུབ་པའི་ཕྱིར། །གྲུབ་དང་མ་གྲུབ་གཉིས་སུ་ལུང་མི་སྟོན། །བདེ་དང་སྡུག་བསྔལ་གཉིས་སུ་རྟོག་མི་བྱེད། །འཁོར་དང་མྱ་ངན་འདས་པར་རེ་དོགས་བྲལ། །ལྷུན་གྲུབ་སེམས་ཀྱི་རང་བཞིན་ཅིར་སྣང་བས། །མ་བྱུང་སྟོང་པའི་དོན་དུ་སྨྲ་མི་བྱེད། །གཞི་རྩ་སྙིང་པོ་རྟོག་དཔྱོད་ལས་འདས་པས། །གྲུབ་ཅིང་བརྟན་པའི་ཕྱོགས་སུ་ཞེས་མི་བྱེད། །ཅེས་གསུངས་པ་ལྟར་ཇི་བཞིན་པའི་དོན་ཟབ་མོ་ལ་ངེས་པ་ལེགས་པར་རྙེད་པའི་ཆེད་དུ་བཤད་པ་འདི་དག་ལ་བརྟགས་པ་རྒྱས་པར་བྱ་སྟེ་ཞིབ་ཏུ་འཕྲུལ་གྱི་མེ་ལོང་གི་གདམས་པ་བཞིན་ནོ། །གཉིས་པ་ནི། འདི་ལྟར་ངེས་ནས། ཞེས་པ་ནས། དེ་ཉིད་ཡེ་སངས་རྒྱས། །ཞེས་པའི་བར་གྱིས་བསྟན་ཏེ། ལྟ་བས་འདི་ལྟར་ངེས་པ་རྙེད་དེ་གཏན་ལ་ཕེབས་ནས་སྒོམ་པས་དེ་ལྟར་གདེངས་དང་ལྡན་ཏེ་ཀླུང་དུ་གྱུར་ན་ཡང་གཞན་གྱི་དོན་དུ་འདུས་བྱས་ཀྱི་དགེ་རྩའམ་གློ་བུར་གྱི་ལས་ལམ་དཀར་པོའི་ཕྱོགས་རྣམས་མི་འགེག་པའམ་མི་སྤང་བར་ནུས་ཚད་ཐམས་ཅད་དེ་བཞིན་དུ་སྤྱད་པར་བྱ་སྟེ། དེ་ཉིད་སྤང་བྱ་མིན་པ་དང་། ཆོས་ཉིད་དེ་ལས་གཞན་པའང་མ་ཡིན་པའི་ཕྱིར་རོ། །དེས་ན་ངང་གི་རང་བཞིན་མ་རྟོགས་པར་ཞེན་རྩོལ་གྱིས་བྱས་ན་ཆུ་སས་རྙོགས་པ་དང་འདྲ་ཡང་ངང་ལས་མི་འདའ་བའི་རང་བཞིན་དུ་སྤྱད་ན་མ་འདྲེས་ཡོངས་རྫོགས་སུ་འགྱུར་བའོ། །དེ་ལྟར་རྟོགས་ཏེ་ཐག་ཆོད་པ་དེས་ན་ཆོས་ཀུན་གྱི་རང་བཞིན་ལ་སྤང་བླང་གང་ཡང་མེད་པ་དང་ཐམས་ཅད་དགོངས་པ་དེ་ཉིད་དུ་གསལ་བར་འདུས་པ་ཡིན་པས་བཀོལ་སྤང་གི་སྤྲོས་མཐའ་གང་ཅི་ཡང་མེད་པའོ། །དེ་ལྟར་རྟོགས་ནས་ཉམས་སུ་ཏིང་ངེ་འཛིན་གྱིས་བླངས་པའི་ཚེ་ཐོག་མར་བློ་བཞག་པའི་ཐབས་འཆད་དེ། སྙེགས་པའི་རྟོགས་པ་དེ་དང་དོན་གྱི་གཞི་ལ་མ་ནོར་བར་རྗེས་སུ་འཇོག་པ་དེ་ནི། ཆོས་ཉིད་མཉམ་པ་ཉིད་ཇི་བཞིན་པར་རྟོགས་པས་བློས་བསམ་བྱ་མེད་ཅིང་སྒོམ་པས་དམིགས་སུ་མེད་པའི་ངང་དེར་ཡིད་ལ་བྱ་བ་དང་གཏོང་འཛིན་མེད་དེ་འདུ་ཤེས་གང་དུའང་མ་ཞུགས་པར་གྱིན་འདའ་བར་བཞག་པ་ནི། བསམ་པ་གང་དུའང་མ་གཡོས་པས་བཞག་པའི་མིང་ཐོབ་པས་ཐབས་དམ་པ་ཉིད་དེ། ཀུན་བྱེད་ལས། ཇི་བཞིན་རྩོལ་བྲལ་བདེ་བ་ཆེན་པོ་ལ། །སྒོ་གསུམ་མི་རྩོལ་བཅོས་ཤིང་དམིགས་མི་བྱེད། །ཡིད་ལ་མི་བྱེད་མཚན་མའི་རྗེས་མི་འབྲངས། །རང་བྱུང་ཡེ་ཤེས་བདེ་བའི་དོན་ལ་བཞག །འདི་ནི་རང་བྱུང་འོད་གསལ་དགོངས་པ་སྟེ། །ཀུན་བྱེད་རྒྱལ་པོའི་དགོངས་པའི་ཕྲིན་ལས་སོ། །ཞེས་གསུངས་པ་ལྟར་རོ། །དེ་བས་ན། ཚེ་སྐབས་ཀྱི་དོན་ནི་དེ་ལྟ་བུར་རིག་པ་མི་གཡོ་བ་ཆེན་པོར་གནས་པ་ལ་ཐ་སྙད་ཅི་སྣང་ཇི་སྲིད་ཀྱི་ཆོས་སོ་ཅོག་མཐའ་དག་ཐམས་ཅད་མཚན་ཉིད་དང་བྲལ་བའི་ཆོས་ཀྱི་དབྱིངས་སུ་གསལ་བའི་ངང་སྤྲོས་པ་མེད་པ་དེར་དགོངས་པ་ལྷུན་གྱིས་གྲུབ་པར་གཅིག་ཏུ་གྲོལ་བས་རང་གི་ངོ་བོ་རྒྱུ་ལས་སྐྱེ་བ་དང་རྐྱེན་གྱིས་འགག་པ་མེད་པར་དེ་ཁོ་ན་ཉིད་དུ་ཡེ་ནས་སངས་རྒྱས་པ་ཡིན་ཏེ། སྔ་མ་ལས། ཇི་ལྟར་སྣང་གྲགས་ཆོས་རྣམས་ཐམས་ཅད་ལ། །སྙིང་པོ་རྟོགས་གོམས་དོན་ཉིད་གཅིག་ལས་མེད། །སྙིང་པོ་མངོན་དུ་ཕྱུང་ནས་གང་བསྟན་པ། །རང་བཞིན་སྐྱེ་བ་མེད་པའི་དོན་དུ་རྟོགས། །མ་ཡེངས་རེ་དོགས་ཆད་པའི་དགོངས་པ་ཡིན། །ཞེས་སོགས་གསུངས་སོ། །གསུམ་པ་ནི། དེ་ཉིད་མ་ཡེངས། ཞེས་པ་ནས། དམ་པའི་དགོངས་པ་མྱོང་། །ཞེས་པའི་བར་གྱིས་བསྟན་ཏེ། དེ་ལྟ་བུའི་དགོངས་པ་དམ་པ་དེ་ཉིད་ལ་འཛིན་པའི་རྣམ་པ་གང་ཡང་མེད་ཅིང་ཡེངས་བྱ་ཡེངས་བྱེད་དང་བྲལ་ཏེ་ཀུན་ཏུ་མ་ཡེངས་པར་གྱུར་པས་ན་གཞན་དུ་མ་བརྩལ་ན་ཡང་དོན་གྱི་ངོ་བོ་མཐའ་བྲལ་ཀུན་རྫོགས་སུ་གསལ་བ་ཙམ་ཉིད་བགྲོད་པའི་གནས་མཆོག་མཐར་ཐུག་པ་ཉིད་ལ་གནས་པ་ཡིན་པས་རྫོགས་པ་ཐམས་ཅད་ཀྱི་སྤྱིར་རམ་སྤྱི་བོར་ཆིབས་པའི་ས་མཆོག་དམ་པ་ཉིད་གསར་དུ་མནན་པ་མ་ཡིན་པར་ཡེ་ནས་ནོན་པ་ཉིད་མངོན་དུ་སྣང་བ་ཡིན་པས་ད་ལྟ་ཉིད་ནས་འབྲས་བུར་མངོན་བྱང་ཆུབ་པ་ཉིད་དེ། ཀློང་རབ་འབྱམས་ལས། ཀློང་ཡངས་འུབ་ཆུབ་གདལ་ཁྱབ་ས། །སྤྱིར་ཆིབས་ས་བཅུ་འདུས་པའི་ཀློང་། །གཅིག་ལས་བྱེ་བྲག་ཕྱེ་བའི་ཕྱིར། །ས་བཅུ་སྣང་བ་ཡོན་ཏན་ཡིན། །ཞེས་དང་། སྔ་མ་ལས། དགོས་ནི་ཁམས་གསུམ་སེམས་ཅན་ཐམས་ཅད་ཀུན། །རང་སེམས་དེ་བཞིན་ཉིད་དེ་མཐོང་གྱུར་ན། །སངས་རྒྱས་ཚིག་གི་ས་ལ་མི་གནས་ཏེ། ད་ལྟ་ཉིད་ནས་ཤིན་ཏུ་རྣལ་འབྱོར་ཐོབ། །ཅེས་སོ། །དེ་ལྟར་ཆོས་ཉིད་བྱང་ཆུབ་ཀྱི་སེམས་དེ་ཉིད་ཇི་བཞིན་དུ་རྟོགས་ནས་བློས་བསམ་དུ་མེད་པའི་བསམ་གཏན་ལ་ཡུན་རིང་དུ་གནས་པས་མཇུག་དྲག་དལ་གྱི་གོམས་པ་ཆུ་དང་མཚོ་གཏིང་གི་དཔེས་ཉམས་ཐ་མ་དང་ལྡན་ཞིང་། དྲོད་མཆོག་དམ་པ་ཐོག་ཏུ་ཕེབས་ཏེ་རྟོགས་པའི་ཉམས་སུ་སྒྲིབ་བྱེད་མ་དམིགས་པར་རང་གསལ་བར་འགྱུར་ལ། དེ་ལྟར་ན་ཡང་མི་མཐུན་པ་ནི། གསང་མཆོག་ཐེག་པ་ཆེན་པོ་ནི་ཆོས་ཀུན་གྱི་བདག་ཉིད་ཡིན་པས་འདི་ཉིད་ལ་བསླབ་པས་སྣང་སྟོང་དབྱེར་མེད་གསུམ་དང་ཏིང་འཛིན་རྣམ་པ་གསུམ་སོགས་ཐེག་པའི་སྒོ་རྣམས་དང་མི་འགལ་ཞིང་མཐུན་པར་བསྟན་པའི་ཕྱིར་རམ་ཆེད་དུ། དཀྱིལ་འཁོར་གསུམ་དབྱེར་མེད་པར་རྟོགས་པའི་ཕྱོགས་བྲལ་ལྷུན་གྲུབ་གསུམ་གྱི་རིག་པ་ལ་སྟོང་ཆེན་དེ་བཞིན་ཉིད་དང་ཀུན་ཏུ་སྣང་བ་དང་རྒྱུའི་ཏིང་ངེ་འཛིན་གསུམ་ཡང་རྫོགས་པར་ལྡན་ཏེ་ཡོངས་སུ་གྲོལ་བས། རང་བཞིན་སྟོང་པའམ་དེ་བཞིན་ཉིད་ཀྱིས་སྐྱེ་བོར་གོལ་བའི་སྒོ་དང་། སྣང་བ་དང་རྒྱུས་བྱང་སེམས་སུ་གོལ་བའི་སྒོ་དང་། དབྱེར་མེད་དང་སྙིང་རྗེས་ཉན་རང་དུ་གོལ་བའི་སྒོ་དང་། གསུམ་ཆར་ངང་ལ་རྫོགས་པས་སྔགས་ཕྱི་ནང་གི་རྟོགས་པ་ཕྱོགས་རིས་སུ་གོལ་བའི་སྒོ་རྣམས་བཀག་ནས་དགོངས་པ་ཡོངས་རྫོགས་ལྷུན་གྲུབ་ཆེན་པོར་གནས་པ་ཡིན་ཏེ། ཇི་བཞིན་པ་ཉིད་མ་བསླད་པར་གསལ་བ་ནི་རིལ་གྱི་འབྱུང་གནས་སུ་གྱུར་པའི་ཕྱིར་རོ། །དེ་ལྟ་བས་ན་དགོངས་པ་འདི་ལ་མཐའ་རྣམས་མ་བསལ་བྲལ་བས་གོལ་སྒྲིབ་ཏུ་ལྟུང་བའི་གནས་རྣམས་མ་སྤངས་ལ་མི་འབྱུང་བར་ཡང་དག་པར་ཤེས་པའི་ངོ་བོར་གྱུར་པའོ། །རྟོགས་པ་དེ་ཉིད་ལ་མཚན་མའི་ཉམས་དྲོད་བརྟག་ཏུ་མེད་ན་ཡང་། སྔ་མའི་དགོས་པ་དང་བསྟུན་ཏེ་ཉམས་དྲོད་དང་ཉམས་དྲོད་ཆེན་པོའི་དབྱེ་བས་ཕྱི་ནང་གསང་བའི་དྲོད་མཆོག་གཡོ་ཐོབ་བརྟན་པ་གསུམ་གྱིས་རྒྱལ་བ་རྣམ་འདྲེན་དམ་པའི་དགོངས་པ་ཇི་ལྟ་བ་བཞིན་དུ་ཉམས་སུ་མྱོང་ནས་རོ་བསྟར་བར་འགྱུར་རོ། །བཞི་པ་ནི། དེས་ན་ཏིང་འཛིན། ཞེས་པ་ནས། ཕྱིན་དྲུག་རང་བཞིན་རྫོགས། ཞེས་པའི་བར་གྱིས་བསྟན་ཏེ། དེ་ལྟར་ཇི་ལྟ་བ་ཉིད་ཀྱི་རོ་བསྟར་བའི་ཚུལ་དེས་ན་དགོངས་པའི་ཏིང་ངེ་འཛིན་རྣམ་པ་གསུམ་གྱི་ཉམས་དུས་གཅིག་ལ་རྙེད་པའི་ཕྱིར་ན་རྟོགས་པ་དེ་ཉིད་མཐར་ཕྱིན་པས་རྒྱལ་བའི་ཡོན་ཏན་འབྲས་བུ་སྐུ་གསུམ་དང་རྒྱུ་ཕ་རོལ་ཏུ་ཕྱིན་པ་དྲུག་པོ་རྣམས་ཀྱང་རང་བཞིན་གྱིས་ཡོངས་སུ་རྫོགས་པར་ཅི་སྟེ་བར་མི་ཆུད་དེ། དཔེར་ན་ཉི་མའི་ཆོས་ཉིད་གསལ་བ་དང་མཚུངས་པར་རང་བཞིན་གྱི་གཏན་ཚིགས་དང་། ཆོས་ཉིད་ཀྱི་རིགས་པས་ཤིན་ཏུ་གསལ་ལོ། །དེའི་ཚུལ་ནི། དགོངས་པ་དང་པོ་ནི་ཆོས་ཀྱི་སྐུའོ། །བར་མ་ནི་ལོངས་སྤྱོད་རྫོགས་པའོ། །ཐ་མ་ནི་སྤྲུལ་པའི་སྐུའོ། །དེ་ལྟ་བུ་ལ་ཟིན་ཆགས་མེད་པར་གདལ་བས་སྦྱིན་པའི་ཕར་ཕྱིན་དང་། དྲི་མ་གཉིས་དང་བྲལ་བའི་དོན་ལས་མི་འདའ་བས་ཚུལ་ཁྲིམས་དང་། མཉམ་པའི་དོན་ཆེན་པོ་གང་ལའང་ཉམ་མི་ང་ཞིང་མི་སྐྲག་པས་བཟོད་པ་དང་། ཅིར་ཡང་མི་གཡོ་བས་བསམ་གཏན་དང་། དུས་གསུམ་དུ་ཡེངས་བྲལ་མེད་པས་བརྩོན་འགྲུས་དང་། ཇི་བཞིན་པར་རིག་པ་རང་གསལ་བས་ཤེས་རབ་ཀྱི་ཕ་རོལ་དུ་ཕྱིན་པའོ། །ལྔ་པ་ནི། སེམས་ཉིད་མ་བཅོས། ཞེས་པ་ནས། རྣམས་ཀྱིས་ཡིན་པར་བསྔགས། །ཞེས་པའི་བར་གྱིས་བསྟན་ཏེ། སེམས་ཀྱི་ཆོས་ཉིད་རྟོག་པས་མ་བཅོས་པའི་རང་བཞིན་ནི། ངོས་གཟུང་མེད་པ་དང་། ཆོ་འཕྲུལ་འབྱུང་བ་དང་ཐོག་མ་དང་མཐའ་དབུས་བྲལ་བའི་ཆོས་གསུམ་གྱི་ནམ་མཁའི་དབྱིངས་དང་མཚུངས་པ་ཉིད་ནི་བྱས་པ་མེད་པར་རང་རིག་པ་ལྷུན་གྱིས་གྲུབ་པའི་ངང་སྟེ། དོན་དེ་ལ་དེ་ཉིད་དུའང་མ་བསམ་པ་ནི་ངང་གནས་སུ་བཞག་པ་ཉིད་དེ། ཀུན་བྱེད་ལས། ཀྱེ་སེམས་དཔའ་རྡོ་རྗེ་ཇི་བཞིན་ཉིད་སྒོམས་ཤིག །མ་བཅོས་ཇི་བཞིན་ཉིད་ལ་འཇུག་པ་ལ། ཚད་མ་མི་དགོས་གཉེན་པོས་བཅོས་མི་དགོས། །རྟོགས་པའི་དོན་ལ་མ་བཅོས་དེ་བཞིན་ཞོག །ཅེས་སོ། །འོན་ཀྱང་དེ་ལྟར་སྒོམ་པ་དེ་ཡི་ཚེ་ན་ཡང་དྲན་ཞིང་རྟོག་པའི་རྣམ་པ་ཕྲ་རགས་ཅི་ཞིག་བྱུང་སྟེ་འཕྲོ་བར་སྣང་ན་ཡང་། བློ་བཅོས་པའི་ཐབས་ནི། ཡེ་ཤེས་ཀྱི་རོལ་པར་ཤེས་ནས་དེ་བཞིན་ཉིད་ལས་མ་གཡོས་པའི་ངང་ལ་བསམ་པ་གང་དུའང་འབྱུང་འཇུག་མེད་པར་གདེང་དུ་ཆུད་པ་ཉིད་ཀྱིས་དྲན་རྟོག་ཐམས་ཅད་ལ་བཟླས་ཏེ་ལྟ་བས་ཐག་བཅད་པས་དྲན་རྟོག་གི་རྒྱུ་བ་གང་ཡང་མ་དམིགས་ཏེ་བློས་ཆེད་དུ་མ་གཏད་པར་རྟོགས་པའི་ཏིང་ངེ་འཛིན་གྱི་ངོ་བོར་ངང་གིས་གྲོལ་བས་རྒྱུ་རྐྱེན་ནམ་བྱེད་པ་པོས་མ་བཅོས་པར་རང་བཞིན་ཡོངས་ཀྱིས་འོད་གསལ་བ་ཉིད་དུ་མ་བཀག་ལ་མི་ལྡན་པར་ཡོངས་སུ་དག་པ་ནི། གསང་བ་སྔགས་ཀྱི་སྟོན་མཆོག་རྒྱལ་བའི་དགོངས་པ་ཀུན་ནས་འདུས་ཤིང་རྫོགས་པ་རྣམས་ཀྱིས་སེམས་ཉིད་དོན་གྱི་ངོ་བོ་མ་ནོར་བ་ཡིན་པར་ཆེད་དུ་བསྔགས་ཏེ་ཡོན་ཏན་ཐམས་ཅད་ཀྱི་འབྱུང་གནས་ཉིད་དུ་ངེས་པར་བསྟན་ནས་ཆེ་བ་བརྗོད་པའི་ཚུལ་གྱིས་བཀའ་སྩལ་པ་ཉིད་དེ། སྔ་མ་ལས། ཇི་བཞིན་མ་བཅོས་རྒྱལ་བའི་དགོངས་པ་ལ། །སེམས་དང་སེམས་ལས་བྱུང་བ་ཅི་སྐྱེས་ཀྱང་། །དེ་ཉིད་སྐྱེ་མེད་ཉིད་དུ་གནས་ཤེས་ན། །བྱ་རྩོལ་མཚོན་མའི་འདུ་ཤེས་ཀུན་དང་བྲལ། །ཀྱེ་སེམས་དཔའ་རྡོ་རྗེ་ཇི་བཞིན་ཉིད་སྒོམས་ཤིག །རྟོགས་པ་རང་སར་གྲོལ་བའི་ལྟ་བ་ལ། །མ་ཡེངས་རང་བཞིན་བཞག་པས་བྱ་བཙལ་མེད། །ཀུན་ཀྱང་རང་བྱུང་རང་སར་གྲོལ་བ་ཡིན། །ཞེས་དང་། རང་བྱུང་སྙིང་པོ་མཆོག་གི་དཀྱིལ་འཁོར་ལ། །སྒོ་གསུམ་ལྷུག་པས་ཇི་བཞིན་ངང་བཞག་ན། །ཀུན་བྱེད་ང་ཡི་དགོངས་པར་གནས་པ་ཡིན། །སྔ་རབས་འདས་པའི་ཀུན་བྱེད་རྒྱལ་པོས་ཀྱང་། །དགོངས་པ་རྣལ་དུ་བཞག་པས་དོན་རྫོགས་ལ། །མ་བྱོན་དུས་ཀྱི་ཀུན་བྱེད་རྒྱལ་པོས་ཀྱང་། །མ་བཅོས་རྣལ་དུ་བཞག་པས་དོན་རྫོགས་འགྱུར། །ད་ལྟར་བཞུགས་པའི་ཀུན་བྱེད་རྒྱལ་པོས་ཀྱང་། །དགོངས་པ་རྣལ་དུ་བཞག་སྟེ་གནས་པ་ཡིན། །ཞེས་དང་། ཀྱེ་སྟོན་པ་ཀུན་བྱེད་ང་ཡི་ཡེ་ཤེས་ཉིད། །བགྲང་དུ་མེད་ལ་བགྲང་ན་མཐའ་ལས་འདས། །ཆེ་བ་རེ་ལ་ཡེ་ཤེས་གྲངས་བསྟན་པས། །བརྗོད་པས་དེ་དག་མི་རྫོགས་ལུང་བསྟན་ཏོ། །ཀྱེ་ཀུན་བྱེད་རྒྱལ་པོ་ང་ཡི་ཡེ་ཤེས་ནི། །རྣམ་པར་མི་རྟོག་སྤྲོས་པ་ཀུན་དང་བྲལ། །རབ་ཞི་གདུལ་མེད་མཁའ་ལྟར་གནས་པ་སྟེ། །སྐྱེ་བ་མེད་པ་ཞེས་སུ་བསྟན་པ་ཡིན། །རང་བྱུང་ཡེ་ཤེས་གཅིག་ལས་མ་གཡོས་ཀྱང་། །རྣམ་པའི་ཁྱད་པར་མ་བཅོས་སོ་སོར་གསལ། །དེ་ལྟར་གང་གིས་རིག་ཅིང་རྟོགས་པ་ཉིད། །ཀུན་བྱེད་རྒྱལ་པོའི་སྲས་སུ་ལུང་བསྟན་ཏོ། །ཞེས་སོགས་གསུངས་པ་ལྟར་རོ། །དྲུག་པ་ནི། མ་ཡེངས་སྐྱེ་འགག །ཅེས་པ་ནས། དེ་ཡི་སྐབས་ན་རྫོགས། །ཞེས་པའི་བར་གྱིས་བསྟན་ཏེ། དེ་ཡང་རྟོགས་པའི་ངོ་བོ་བྱང་ཆུབ་སེམས་ཀྱི་ངང་ལས་གཞན་པའི་ཡུལ་དུ་གྱུར་པའི་ཆོས་གང་ཡང་མ་དམིགས་པས་ཕྱོགས་བྲལ་བ་བདེ་བ་ཆེན་པོའི་དོན་ལས་མ་ཡེངས་པར་དང་པོར་སྐྱེ་བ་དང་ཐ་མ་འགག་པ་མེད་པའི་ཆོས་ཉིད་རང་གསལ་བ་ནི་རང་བྱུང་རྫོགས་པའི་ཏིང་ངེ་འཛིན་ཀྱི་ངོ་བོ་ཡིན་ཏེ། རང་རིག་པ་མཉམ་པའི་ངང་ལས་མ་གཡོས་པས་སོ། །དེ་བས་ན། ཀློང་རབ་འབྱམས་ལས། དམིགས་པའི་མཐའ་ལས་འདས་པས་ན། །མི་གནས་ཆོས་སྐུའི་ངོ་བོ་ཉིད། །རྒྱུ་རྐྱེན་མེད་པར་རང་བྱུང་བས། །རང་བྱུང་ཡེ་ཤེས་ནམ་མཁའ་ཆེ། །ཐམས་ཅད་དེ་རུ་འདུས་པས་ན། །མ་འདྲེས་ཡོངས་རྫོགས་ཐེག་པའི་རྒྱན། །ཞེས་གསུངས་པ་ལྟར། རང་རིག་གདལ་ཁྱབ་ཆེན་པོ་རྟོགས་ནས་ངང་ལ་གནས་པའི་རང་བཞིན་ལ། མ་ཧཱ། ཨ་ནུ། ཨ་ཏི་གསུམ་མམ། བྱ་བ་དང་། བྱ་བ་བྱེད་པ་དང་། བྱ་བ་མེད་པའི་རྣལ་འབྱོར་གསུམ་གྱི་དོན་ཡང་དུས་གཅིག་ཏུ་དབྱེར་མེད་པར་དེ་ཡི་སྐབས་ན་རིག་པ་ལ་མ་འདྲེས་ཡོངས་སུ་རྫོགས་པ་ཡིན་ནོ། །བདུན་པ་ལ་ལྔ་སྟེ། མ་ནོར་བར་ཤེས་དགོས་པར་གདམས་པ། དེ་ལྟར་རྟོགས་པའི་ཡོན་ཏན་བསྟན་པ། ཡེངས་མེད་དུ་བསྒོམ་དགོས་པར་གདམས་པ། དེ་ལྟར་བསྒོམ་པའི་ཡོན་ཏན་བསྟན་པ། །ཚུལ་དེ་ཉིད་ཐུན་མོང་མ་ཡིན་པའི་དགོངས་སྤྱོད་དུ་བསྟན་པའོ། །དང་པོ་ནི། དེས་ན་ཀུན་གྱི། ཞེས་པ་ནས། སེམས་ཉིད་ཤེས་པར་བྱ། །ཞེས་པའི་བར་གྱིས་བསྟན་ཏེ། དགོངས་པ་མཆོག་གི་ཏིང་ངེ་འཛིན་གྱི་ཆེ་བའི་ཡོན་ཏན་ལ་སྙེགས་པ་དེས་ན་གཏན་ཚིགས་ལྟ་བུར་གྱུར་པ་ནི། བདེ་བར་གཤེགས་པ་ཀུན་གྱི་བཤེས་གཉེན་སྟོན་མཆོག་ཀུན་བཟང་རྡོ་རྗེ་སེམས་དཔའི་གསང་བའི་དབྱིངས་ཀྱི་དགོངས་པ་ཟབ་མོ་གསང་བདག་རྡོ་རྗེ་འཛིན་པ་ནས་རིག་འཛིན་དྲ་མ་ལ་བརྒྱུད་པའི་རྒྱུད་འདིའི་དོན་ཇི་བཞིན་དུ་རྟོགས་ནས་འབྲས་བུ་དམ་པའི་དོན་དུ་ངེས་པ་ནི་དཀྱིལ་འཁོར་རྣམ་གསུམ་དབྱེར་མེད་པའི་རང་རིག་ལྷུན་མཉམ་ཆེན་པོ་སེམས་ཉིད་བྱང་ཆུབ་ཀྱི་སེམས་སུ་ཡེ་སངས་རྒྱས་པ་ཉིད་དུ་ཡང་དག་པར་ཤེས་པར་བྱ་སྟེ། དེ་ལྟར་མཐར་ཐུག་དོན་གྱི་ངོ་བོ་ཇི་བཞིན་པར་ཤེས་ནས་བསྒོམ་པ་གཅེས་པར་བསྟན་པའོ། །གཉིས་པ་ནི། དེ་ཉིད་རྡོ་རྗེ། ཞེས་པ་ནས། བཤེས་གཉེན་ཡིན་པར་གྲགས། །ཞེས་པའི་བར་གྱིས་བསྟན་ཏེ། དེ་ཅིའི་ཕྱིར་ཞེ་ན། རྒྱུད་འདིའི་དོན་སྟོན་པ་དེ་ཉིད་རྒྱལ་མཆོག་རྡོ་རྗེ་སེམས་དཔའ་ཉིད་ཡིན་ཏེ། འདུལ་བའི་དབང་གིས་མཚན་སོ་སོར་གྲགས་པའང་ངོ་བོ་ལ་བྱེ་བྲག་མེད་པས་ན་དམ་པ་གང་ཞིག་གིས་རྒྱུད་ཀྱི་དགོངས་པ་ཇི་བཞིན་པ་རྡོ་རྗེ་ལྟ་བུའི་ཆོས་ལྔ་དང་ལྡན་པ་རང་བཞིན་འོད་གསལ་མཐའ་བྲལ་བྱང་ཆུབ་སེམས་ཀྱི་ཆོས་ཉིད་འདི་ཡི་བདེན་པ་མཐོང་ན་བཅོམ་ལྡན་འདས་དཔལ་རྡོ་རྗེ་སེམས་དཔའ་དེ་ཡི་ཞལ་ངེས་པར་མཐོང་བ་ཁོ་ན་ཡིན་ཏེ། ཡང་འབྱེད་འཕྲུལ་གྱི་ལྡེ་མིག་ལས། ཏིང་འཛིན་རབ་ལ་ལུང་བསྟན་པ། །གསེར་རི་གཡུ་ཡིས་བརྒྱན་པ་འདྲ། །ཡེ་ཤེས་གསལ་ལ་གདུགས་བརྡལ་འདྲ། །རྡོ་རྗེ་སེམས་དཔར་དེ་མ་ཐག །སངས་རྒྱས་ཀུན་གྱི་སྙིང་པོར་འགྱུར། །རྣལ་འབྱོར་དབང་ཕྱུག་ཆེན་པོ་ཡིན། །ཞེས་དང་། ནམ་མཁའ་ཆེ་རྒྱས་པའི་རྒྱུད་ལས། རྡོ་རྗེ་སེམས་དཔའ་ནམ་མཁའ་ཆེ། །ཀུན་བཟང་ཡངས་པ་ཆོས་ཀྱི་དབྱིངས། །རྣམ་དག་ལམ་ཆེན་ཀུན་སྒྲོལ་ཕྱིར། །མ་སྐྱེས་མ་འགགས་ཅིར་མི་དགོངས། །དེ་བཞིན་གཤེགས་པ་ཐམས་ཅད་ལ། །དམ་པ་འདི་ལས་གཞན་མི་མངའ། །འདས་དང་ད་ལྟར་བྱུང་བ་ཀུན། །འདི་ཉིད་བརྙེས་ནས་ལྷུན་གྱིས་གྲུབ། །ཅེས་སོ། །རྟོགས་པའི་ཡོན་ཏན་ཇི་ལྟ་བུ་སྙམ་པ་ལ། དེ་ལྟར་ངེས་པར་མཐོང་ནས་དོན་གྱི་གནད་ཟབ་མོ་ཁོང་དུ་ཆུད་པའི་དུས་དེ་ཉིད་ཕན་ཆད་འཁོར་བར་ལྟུང་བ་མེད་པ་དང་རྒྱལ་བ་དམ་པ་ཉིད་དང་སྤྱོད་ཡུལ་གཅིག་པ་ཡིན་པས་སངས་རྒྱས་ཉིད་དེ། དེས་ན་རྡོ་རྗེ་སེམས་དཔའ་རྒྱལ་བ་ཀུན་གྱི་སྟོན་པ་འགྲོ་བ་ཡོངས་ཀྱི་བཤེས་གཉེན་དམ་པ་དེ་ཉིད་ཡིན་པར་རྡོ་རྗེ་གསང་བའི་རྒྱུད་ལས་གྲགས་པ་ཡིན་ཏེ། ཀློང་ཆེན་རབ་འབྱམས་ལས། དོན་འདི་ཚིག་ཏུ་མ་ཁྱེར་བར། །གནད་ཀྱི་གདེང་དུ་ཆུད་པ་གང་། །དམན་པའི་ལུས་ལ་དམ་པའི་སེམས། །དུས་གསུམ་སངས་རྒྱས་སྲས་གཅིག་པོ། །འཇིག་རྟེན་དྲེགས་པས་བཅིངས་པ་ཡི། །ལྷ་སྲིན་སྡེ་བརྒྱད་ཐམས་ཅད་ཀྱང་། །ཇོ་བོའི་ཚུལ་དུ་ཁུར་བར་བྱེད། །སངས་རྒྱས་ཀུན་དང་དགོངས་པ་མཉམ། །ནམ་མཁའ་ཉིད་ལ་ནམ་མཁའ་སྤྱོད། །ཅེས་དང་། མདོ་བཅུ་ལས། ལུས་ནི་གང་ཟག་འཇིག་རྟེན་ཡང་། །སེམས་དགོངས་རྫོགས་ཆེན་སངས་རྒྱས་ཡིན། །འདི་ཡིས་སེམས་ཅན་དོན་བྱས་ཀྱང་། །དོན་ལ་ནོར་བ་ངེས་མི་འབྱུང་། །ཡིན་པ་དག་ལ་ནོར་བ་མེད། །ངེས་པ་དག་ལ་ཐེ་ཚོམ་མེད། །རྫོགས་པ་ཆེན་པོའི་ལུང་འདི་ལ། །ཡོད་མེད་ཚིག་དང་མ་ངེས་པའི། །དོན་ལ་འདའ་བ་མི་མངའ་བས། །བརྗོད་པའི་ཚིག་ལས་འདའ་མི་མངའ། །ཞེས་སོ། །གསུམ་པ་ནི། དེ་ལྟའི་དོན་མཐོང་། ཞེས་པ་ནས། ཡོངས་སུ་དག་ཅེས་བྱ། །ཞེས་པའི་བར་གྱིས་བསྟན་ཏེ། དེ་ལྟའི་རྣལ་མ་མ་བཅོས་པའི་དོན་མཐོང་ཞིང་རྟོགས་པའི་སྐྱེས་བུ་དམ་པ་བློ་ཡང་རབ་ཏུ་གྱུར་པ་གང་དང་གང་ཞིག་གིས། བྱ་བ་ཐམས་ཅད་བཏང་ནས་ཅི་ལའང་མི་ལྟ་བར་ཆོས་ཉིད་དེ་ཁོ་ན་ལ་ཞེན་ཏེ་བསྒོམ་པར་བྱའོ། །དེ་ལྟར་གོམས་པ་དེས་ཏིང་ངེ་འཛིན་ལས་སུ་རུང་བར་གྱུར་ན་བྱ་བ་ཐམས་ཅད་མ་བསྒྲུབ་པར་བྱས་ཟིན་ཏེ་མཐར་ཕྱིན་ཅིང་དོན་གཉིས་ལྷུན་གྱིས་གྲུབ་པའི་ངང་ལ་འབད་རྩོལ་མེད་པར་རང་སྣང་རིག་པའི་ངོ་བོ་དེར་ངེས་ཏེ་མི་འགྱུར་བར་གནས་ན་རྒྱུ་རྐྱེན་མེད་པས་རང་བྱུང་རང་གསལ་བས་ཡེ་ཤེས་ཆེན་པོ་ཉིད་བྱིང་རྨུགས་རྒོད་འཐོར་གྱི་སྐྱོན་རྣམས་ཡོངས་སུ་དག་ཅིང་མཐའ་ཐམས་ཅད་དང་བྲལ་བའི་ངོ་བོ་སྣང་བའམ་མངོན་དུ་གྱུར་པ་ཞེས་བྱ་བ་ཡིན་པར་བཀའ་ཟབ་མོ་དག་ལས་འབྱུང་བའོ། །དེ་ལ་བྱིང་བ་ནི་ཡེ་མི་གསལ་བ་དང་། རྨུགས་པ་ནི་རིག་པ་མ་སྟོར་ཡང་མི་གསལ་བ་དང་། རྒོད་པ་ནི་ཡེ་གཡོ་བ། འཐོར་བ་ནི་ཅུང་ཟད་གསལ་ཡང་འཐོར་ནས་བྱ་བས་ཁྲིད་པ་སྟེ། སྒོམ་པའི་ཀློང་ལས། བྱིང་བས་རིག་པ་གསལ་མ་ཐོན། །རྨུགས་པས་ཤེས་བྱའི་དོན་མ་གསལ། །ཤིན་ཏུ་བྱིང་ན་དྲན་པ་འགག །རབ་ཏུ་རྨུགས་ན་འདུ་ཤེས་སྤངས། །རྒོད་པ་རིག་པ་ཡུལ་ལ་འཕྲོ། །གཡེང་བ་བྱ་བའི་ལས་ཀྱིས་ཁྲིད། །རབ་ཏུ་རྒོད་ན་ཡིད་ལ་བྱེད། །ཤིན་ཏུ་གཡེངས་ན་མཚན་མར་སྨིན། །ཞེས་སོ། །བཞི་པ་ནི། དེས་ན་ཟིན་ཆགས། ཞེས་པ་ནས། མཐུན་པར་ས་རྣམས་ནོན། །ཞེས་པའི་བར་གྱིས་བསྟན་ཏེ། དེ་ལྟ་བུའི་སྤྱོད་ཡུལ་ལ་གདེང་དུ་ཆུད་ཅིང་གོམས་པའི་སྟོབས་དང་ལྡན་པ་དེས་ན་ཆོས་ཅན་གྱི་རྟོག་པ་དང་སྤྱོད་པ་ཟིན་ཆགས་ཅི་བྱས་ཅི་སྤྱད་དེ་ཐོགས་ཤིང་ཞེན་པ་དང་བདེ་བ་དང་སྡུག་བསྔལ་ཅི་ཞིག་ལྟར་བྱུང་ཡང་། དེ་ཉིད་མི་འགོག་པར་ཐབས་སྤྱོད་པ་མ་འགགས་པའི་བདེ་བ་དང་། དེ་ལ་ངོ་བོ་ཡེ་ནས་མ་དམིགས་པ་ཡིན་པའི་དོན་གསལ་བས་སྣང་བ་མ་འགགས་པ་བསོད་ནམས་ཀྱི་ཚོགས་དང་རང་བཞིན་མེད་པ་ཡེ་ཤེས་ཀྱི་ཚོགས་ཏེ་ཚོགས་གཉིས་ཆེད་དུ་བརྩལ་བས་མ་བསགས་ཀྱང་རང་བཞིན་ལྷུན་གྱིས་གྲུབ་པར་རྫོགས་པའི་ངོ་བོ་ཡིན་པར་དམ་བཅའ་བ་སྟེ་ཞེ་བས་འདོད་པར་བྱའོ། །དེ་ལྟར་བསྒོམ་པའི་ཡོན་ཏན་ཅི་ལྟ་བུ་ཞེ་ན། མོས་པ་ལས་བྱུང་བའི་མི་དམིགས་པ་དང་། ཤིན་ཏུ་མི་དམིགས་པ་དང་། རྗེས་སུ་མི་དམིགས་པའི་རིམ་པ་མཐར་ཕྱིན་ནས་ཅིར་ཡང་མི་རྟོག་པའི་ཏིང་ངེ་འཛིན་དམ་པ་ཇི་ལྟར་ཡང་མི་གཡོ་བར་གསལ་བ་ལ། དེ་ཁོ་ན་ཉིད་ཐོབ་པར་རྟོག་པའི་མཚན་མ་ཡང་རྣམ་པར་དག་ཅིང་ཡང་དག་པར་བྲལ་བའི་རིག་པ་ནི་ཤེས་རབ་ཀྱི་དབང་པོ་དང་ཡེ་ཤེས་ཀྱི་སྤྱན་གྱིས་རང་རིག་པའི་ཆོས་ཉིད་དེ་ཁོ་ན་ཉིད་རང་སྣང་རིག་པའི་མངོན་སུམ་དུ་གྱུར་པ་ཡིན་པས། དེ་ལྟ་བུ་ལ་ནི་དཔེར་ན་འབྲས་ལེགས་པས་ཕུབ་སོག་ཞོར་ལ་འབྱུང་བ་ལྟ་བུར་གནས་སྐབས་དང་མཐར་ཐུག་གི་ཆེ་བའི་ཡོན་ཏན་རྣམས་ཀྱང་དུས་ཀུན་ཏུ་རྒྱུན་མི་འཆད་པར་འབྱུང་བའོ། །དེའང་ཉོན་མོངས་པ་དང་ཤེས་བྱའི་སྒྲིབ་པར་བསྙད་པ་གཉིས་དང་མཚན་མའི་སྤྱོད་ཡུལ་ཐམས་ཅད་བྱང་ཞིག་དག་ནས་ཡང་དག་པའི་སྤྱོད་ཡུལ་ཚོགས་ཆེན་རྣམ་གཉིས་ཡོངས་སུ་རྫོགས་པས་ན། ཐོབ་བྱ་སྐུ་གསུམ་གྱི་འབྲས་བུའང་བཞིན་དང་མེ་ལོང་གི་ཚུལ་དུ་རང་སྣང་བའི་ཕྱིར་ཨ་ནུ་མན་ཆད་ཀྱི་ཐེག་པ་གང་གི་ཕྱོགས་ཀྱི་སྒོ་རྣམས་དང་མི་འགལ་ཞིང་མཐུན་པར། ཇི་སྐད་དུ། རྒྱུ་འབྲས་ཁྱད་པར་ལྷུན་གྱིས་རྫོགས། །ཞེས་པ་ལྟར་རིམ་གྱིས་མིན་པར་གཅིག་ཆར་གྱི་ཚུལ་དུ་འོག་མས་བགྲོད་པའི་ས་རྣམས་ཀྱང་ད་ལྟ་ཉིད་དུ་ནོན་པ་ཡིན་ཏེ། ཡེ་ཤེས་གསང་བ་ལས། རྒྱུད་དང་མདོ་སྡེ་བླ་མེད་ས། །ཀུན་ཏུ་འོད་དང་རྡོ་རྗེ་འཛིན། །མ་ཆགས་པདྨ་སྟུག་པོ་བཀོད། །ཚོགས་ཆེན་ཡི་གེ་འཁོར་ལོ་དང་། །ཀུན་ཏུ་དབྱེ་བ་མེད་པའི་ས། །ས་དྲུག་སེམས་ལ་བགྲངས་པ་ཡང་། །མ་བཅོས་རྫོགས་པ་ཆེན་པོའི་ས། །རྟོགས་པའི་ཡོན་ཏན་དྲུག་ཏུ་བསྟན། །མ་བཅོས་ས་ལ་སྦྱངས་པ་མེད། །འོད་གསལ་ལྷུན་རྫོགས་ཆེན་པོ་ལ། །ས་ཡི་རིམ་པ་གང་ཡང་མེད། །རང་བྱུང་རིག་པ་རྟོགས་གྱུར་ན། །ནོར་བུ་རིན་ཆེན་ལྷུན་གྲུབ་ལྟར། །ཐམས་ཅད་སེམས་ལས་བྱུང་བའི་ཕྱིར། །རང་སྣང་བྱང་ཆུབ་སེམས་ཀྱི་ས། །ཞེས་སོ། །ལྔ་པ་ནི། འདི་ནི་ཀུན་འདུས། ཞེས་པ་ནས། སྤྱོད་ཡུལ་མ་ཡིན་ནོ། །ཞེས་པའི་བར་གྱིས་བསྟན་ཏེ། དེ་ལྟར་སྐབས་འདིར་བསྟན་པའི་དོན་འདི་ནི་བདེ་བར་གཤེགས་པ་ཀུན་གྱི་དགོངས་པ་འདུས་པའི་བསྟན་པ་ཐམས་ཅད་ཀྱི་འབྱུང་གནས་རྒྱལ་བའི་དགོངས་པ་དང་མཛད་སྤྱོད་ཟབ་མོ་ཤིན་ཏུ་དཔག་པར་དཀའ་བ་ཉིད་མངོན་དུ་ཕྱུང་བ་ཡིན་པས། གང་དག་འོག་མ་ཀུན་གྱིས་མི་རྟོགས་པས། སྣོད་བཞི་དང་། ཕྱི་པ་སོགས་བློ་ཆུང་དམན་པ་རྣམས་ཀྱི་སྤྱོད་ཡུལ་དུ་གྱུར་པ་མ་ཡིན་ནོ། །དེ་སྐད་དུའང་ཀུན་བྱེད་ལས། དགོངས་པ་རྣལ་དུ་བཞག་པའི་དོན་འདི་ནི། །ཀུན་གྱིས་སྤྱོད་ཡུལ་མིན་པས་མི་ཤེས་ཤིང་། །མཉམ་པར་བཞག་པས་རྟོགས་པའི་ཡུལ་ལས་འདས། །ཀུན་བྱེད་རྒྱལ་པོ་དེ་ལ་གནས་པར་བྱེད། །ཅེས་སོ། །གཉིས་པ་ལ་གསུམ་སྟེ། སངས་རྒྱས་དང་སེམས་ཅན་གྱི་ཁྱད་པར་བཤད་པ། ཐེག་པས་བགྲོད་པའི་ས་གོང་འོག་གི་ཁྱད་པར་བསྟན་པ། སྟོང་པ་དང་མ་སྐྱེས་པའི་ཁྱད་པར་བཤད་པའོ། །དང་པོ་ནི། གང་གིས་གང་ལྟར། ཞེས་པ་ནས། མུན་པ་སངས་དཀའ་འོ། །ཞེས་པའི་བར་གྱིས་བསྟན་ཏེ། དེ་ལྟར་ཀུན་གྱི་སྤྱོད་ཡུལ་མིན་པ་ཅིའི་ཕྱིར་ཞེ་ན། སྐལ་པ་མཆོག་དང་ལྡན་པའི་དམ་པ་གང་གིས་ཚུལ་གང་ལྟར་ཐུན་མོང་མ་ཡིན་པ་དེ་ཡི་དོན་ཉིད་ཡང་དག་པར་མཐོང་ཞིང་ཕྱིན་ཅི་མ་ལོག་པར་ཆུད་པ་ལྟར་དུ་སེམས་ཅན་གང་དག་འཁྲུལ་བར་གནས་པའི་སྐྱེ་བོར་རང་རྒྱུད་པ་དང་རྒྱུའི་ཐེག་པའི་ས་ལ་གནས་པའི་སེམས་དཔའ་མན་ཆད་དམ་སྔགས་ཕྱི་པ་མན་ཆད་ཞེས་ཀྱང་གསུངས་ཏེ་ཐམས་ཅད་ཀུན་ལྟོས་པས་ནོར་བ་སྟེ། དེ་རྣམས་ཀྱིས་གསང་སྔགས་ཐེག་པ་མཆོག་གི་ངོ་བོ་ཇི་བཞིན་པ་ཉིད་མ་མཐོང་བར་མ་རིག་པའི་རྒྱུད་དམ་ཆ་ཅན་དུ་གྱུར་པས་ན་ཡེ་གདོད་མའམ་ཐོག་མ་མེད་པ་ནས་བག་ཆགས་བསགས་པས་ཞེན་པའི་མུན་པ་ལས་དང་ཉོན་མོངས་པའི་སྒྲིབ་པ་དག་ཤིན་ཏུ་འབྱོངས་པ་དང་སངས་པར་དཀའ་བའི་ཕྱིར། རྟོགས་པ་དང་མ་རྟོགས་པའི་དབང་གིས་སངས་རྒྱས་དང་སེམས་ཅན་དུ་འཇོག་པའི་ཁྱད་པར་ངེས་པར་གྲུབ་པའོ། །གཉིས་པ་ནི། ས་དང་ས་ཡི། ཞེས་པ་ནས། ལྷུན་གྱིས་གྲུབ་དེས་པའོ། །ཞེས་པའི་བར་གྱིས་བསྟན་ཏེ། བཀའ་རྒྱུད་རྣམས་ལས་བྱང་ཆུབ་སེམས་དཔའི་ས་དང་སངས་རྒྱས་ཀྱི་ས་ཡི་ཁྱད་པར་ལ་རྒྱུ་དང་འབྲས་བུའི་རིམ་པས་མཐོ་དམན་ཡོད་དོ་ཅེས་སུ་གསུངས་པ་ཡང་། ཇི་སྐད་དུ། ཀུན་བྱེད་ལས། ཐེག་པ་རེ་ལ་གནས་ས་རེ། །བྱང་ཆུབ་ལམ་གྱི་གཞི་རྟེན་བྱེད། །རྫོགས་ཆེན་བྱང་ཆུབ་སེམས་ས་ལ། །དུས་གསུམ་སངས་རྒྱས་ཐམས་ཅད་དང་། །སྐུ་གསུམ་སྟོན་པ་བཞུགས་པ་དང་། །ཁམས་གསུམ་སེམས་ཅན་མ་ལུས་དང་། །སྣང་སྲིད་སྣོད་བཅུད་གནས་པའི་ཕྱིར། །ས་ལ་སྦྱངས་ཤིང་བགྲོད་དུ་མེད། །ཅེས་དང་། ཡེ་ཤེས་གསང་བ་ལས། མ་བཅོས་རང་སྣང་བླ་མའི་ས། །སྦྱངས་པས་མ་ཡིན་ཡེ་ནས་གྲུབ། །རང་བྱུང་རྣམ་དག་ཀུན་བཟང་ས། །དབྱེར་མེད་ཆེ་མཆོག་ཆོས་ཀྱི་སྐུ། །ཞེས་གསུངས་པ་ལྟར། འདིར་རིག་མ་རིག་གཉིས་ཀ་དབྱེར་མེད་པའི་དོན་གྱི་སྙིང་པོ་མངོན་དུ་གྱུར་ཏེ། སྔགས་དང་འབྲས་བུས་མཐོང་བ་དང་། སྲིད་པ་དང་རྒྱུ་ཡིས་མ་མཐོང་བ་གཉིས་ཀ་དབྱེར་མེད་ཆེན་པོ་རང་རིག་པའི་ཆོས་ཉིད་དུ་གསལ་བའི་དུས་ན། གང་ཡང་མ་འདྲེས་ལ་ཡོངས་སུ་རྫོགས་པས་མཐའི་ཐ་སྙད་ཡང་མེད་པར་རྒྱལ་བ་དམ་པའི་དགོངས་པ་བླ་ན་མེད་པ་ཆོས་ཐམས་ཅད་ཀྱི་ངོ་བོ་ཉིད་ཡེ་ནས་ལྷུན་གྱིས་གྲུབ་པར་ངེས་པའི་གསང་བ་དམ་པ་ཡང་དག་པར་རྟོགས་པ་ཡིན་པས་སྐྱེད་དུ་བྱ་བ་དང་བྲལ་བའོ། །དེས་ན་ཀུན་བྱེད་ལས་ཀྱང་། སངས་རྒྱས་སེམས་ཅན་གཉིས་སུ་མ་མཐོང་སྟེ། །དེ་བཞིན་ཉིད་དུ་ཐམས་ཅད་གཅིག་པར་མཐོང་། །དེ་བཞིན་ཉིད་ལ་གཅིག་དང་དུ་མ་མེད། །མ་བྱུང་མ་སྐྱེས་པ་ཡི་སྙིང་པོ་ལ། །སྒྲོས་ཀྱིས་བཏགས་པའི་ཐ་སྙད་ག་ལ་ཡོད། །ཅེས་སོགས་ཤིན་ཏུ་མང་ངོ་། །གསུམ་པ་ནི། སྟོང་དང་རང་བཞིན། ཞེས་པ་ནས། ཡོངས་སུ་རྫོགས་པའི་ཚུལ། །ཞེས་པའི་བར་གྱིས་བསྟན་ཏེ། སྟོང་པ་དང་རང་བཞིན་མེད་པའི་ཁྱད་པར་ནི། སྟོང་པ་ནི། ཉན་ཐོས་གང་ཟག་གི་བདག་མེད་དང་། སེམས་ཙམ་པས་སེམས་འཁྲུལ་པ་གཟུང་འཛིན་གྱིས་སྟོང་པ་དང་། དབུ་མ་པས་རྟེན་འབྲེལ་གྱི་སྣང་བ་མ་གྲུབ་པས་སྟོང་པ་སོགས་ཕྱི་ནང་གཉིས་ཀ་མ་གྲུབ་པ་ཙམ་སྟེ། དོན་དམ་པར་སྟོང་པ་འབའ་ཞིག་གོ། །རང་བཞིན་མེད་པ་ནི། གསང་ཆེན་སྔགས་ཀྱི་མཐའ་གཉིས་ཀྱིས་སྟོང་པའི་སྣང་བ་ཉིད་ན་ངོ་བོ་མེད་དེ་བདེན་པ་གཉིས་དབྱེར་མེད་པས་འཕགས་པའོ། །མ་སྐྱེས་པ་དང་མི་གཡོ་བའི་ཁྱད་པར་ནི། མ་སྐྱེས་པ་ནི་ཆོས་རྣམས་རྒྱུ་རྐྱེན་དང་བྲལ་བས་ངོ་བོ་མེད་པ་སྟེ་རྒྱུའི་ཐེག་པའི་དོན་མཐར་ཐུག་པ་མི་རྟོག་པའི་ཡེ་ཤེས་ཀྱི་སྤྱོད་ཡུལ་དུ་བྱེད་པ་ཉིད་དེ་སྔགས་ཕྱི་པའང་ཕྱོགས་མཚུངས་སོ། །མི་གཡོ་བ་ནི་གསང་སྔགས་དེ་ཁོ་ན་ཉིད་ཀྱི་ཡེ་ཤེས་སྤྱོད་ཡུལ་དང་བྲལ་བ་ལ་འབྱུང་འཇུག་མེད་པའོ། །གཉིས་སུ་མེད་པ་དང་ལྷུན་གྱིས་གྲུབ་པའི་ཁྱད་པར་ཅི་ཞིག་གིས་འབྱེད་ན། གཉིས་སུ་མེད་པ་ནི་མི་བདེན་པ་རིས་སུ་མ་ཆད་ཅིང་སྤྱོད་ཡུལ་དང་གཉིས་ཐ་དད་མེད་དེ་རང་རིག་པ་ཙམ་མོ། །ལྷུན་གྱིས་གྲུབ་པ་ནི་རྒྱལ་བའི་སྐུ་དང་ཡེ་ཤེས་ཀྱི་ཡོན་ཏན་རྒྱུ་མེད་པར་འཆར་བས་འཕགས་ཏེ། རྒྱུ་འབྲས་དང་བསྐྱེད་རྫོགས་ལས་རྫོགས་ཆེན་ཆེ་བའི་ཁྱད་པར་དུ་ཡང་འགྱུར་བས་མ་ཧཱ་དང་ཨ་ནུས་གཉིས་མེད་དང་རྫོགས་པ་ཆེན་པོའི་མཐའ་བཞི་རང་གྲོལ་གི་ཤན་འབྱེད་དུའང་འགྱུར་རོ། །དེ་ནི་གཏར་ཀ་གེགས་སེལ་གྱི་ཚིག་ལྟ་བུའོ། །དེ་ལྟ་བུའི་ལྷུན་གྱིས་གྲུབ་པའི་དོན་ནི་ཡོད་མེད་དང་རྟག་ཆད་དང་བྱ་བརྩལ་ལ་སོགས་པ་མཐའ་གཉིས་པར་བསྙད་པ་རིལ་མ་སྤངས་བྲལ་བའི་ངོ་བོ་ལ་གང་ཡང་བཀོལ་བ་མེད་པར་ཀུན་ནས་ལྷུན་གྱིས་གྲུབ་པར་ཡེ་གསལ་དུ་གནས་པའོ། །དེ་ཅིའི་ཕྱིར་ཞེ་ན། ལོག་པ་དང་མ་ལོག་པའི་རྒྱུ་དང་འབྲས་བུ་ཉིད་ཀྱི་ཆོས་ཅིར་སྣང་ཅིར་སྲིད་ཐམས་ཅད་ཀུན་ཀྱང་གསང་བ་ཆེན་པོའི་མ་སྐྱེས་པའི་ཆོས་ཉིད་ཇི་བཞིན་པ་སྙིང་པོ་དེ་བཞིན་ཉིད་ཀྱི་ངོ་བོ་དང་དབྱེར་མེད་པར་ལྡན་པའི་རང་བཞིན་མ་ནོར་བའི་རྒྱན་དུ་རང་སྣང་བ་ཉིད་ཡེ་ནས་ཡིན་པའོ། །དེའི་ཚུལ་ནི། དེ་དག་ཀུན་ཀྱང་ཆོས་ཉིད་ཀྱི་ངང་ལ་སྤངས་ཡང་མ་སྤང་བཀག་ཀྱང་མ་བཀག་པར་ངོ་བོ་ཐ་དད་དུ་རྒྱ་ཆད་པའང་མེད་དེ་མ་འདྲེས་ལ་ཡོངས་སུ་རྫོགས་པའི་ཚུལ་དུ་རང་གྲོལ་བའི་ཕྱིར་ཏེ། ཀློང་རབ་འབྱམས་ལས། བྱ་བྲལ་ངང་དུ་ཀུན་རྫོགས་པས། །མ་འདྲེས་ཡོངས་སུ་རྫོགས་པའི་རྒྱན། །མ་སྤངས་རང་སར་གྲོལ་བའི་ཀློང་། །སངས་རྒྱས་སྐུ་དང་སེམས་ཅན་ལུས། །ཇི་ལྟར་སྣང་བ་དབྱིངས་ཀྱི་རྒྱན། །ཞེས་སོ། །གསུམ་པ་ལ་ལྔ་སྟེ། ཆོས་ཉིད་ཇི་བཞིན་པའི་ངོ་བོ་གཏན་ལ་དབབ་པ། ཕབས་པའི་དོན་ཉིད་རྫོགས་ཆེན་དུ་ལ་བཟླ་བ། དེ་ལྟར་རྟོགས་པའི་ཡོན་ཏན་བཤད་པ། དེ་ཉིད་ཀྱི་དོན་དེ་མ་བཅོས་པར་སྒོམ་ཚུལ། བསྒོམ་པའི་ཡོན་ཏན་ལྷུན་རྫོགས་སུ་བསྟན་པའོ། །དང་པོ་ལ་གསུམ་སྟེ། སྐྱོན་ཡོན་ཀུན་དེ་བཞིན་ཉིད་དུ་གཅིག་པར་དམ་བཅའ་བ། དེའི་གཏན་ཚིགས་དེ་བཞིན་ཉིད་ལས་གཞན་མེད་པར་བསྟན་པ། དེ་ལ་ཏིང་ངེ་འཛིན་གྱིས་ཀྱང་དམིགས་སུ་མེད་པར་བསྟན་པའོ། །དང་པོ་ནི། གོང་འོག་ལ་སོགས། ཞེས་པ་ནས། ཉིད་དུ་གཅིག་པར་ཟད། །ཅེས་པའི་བར་གྱིས་བསྟན་ཏེ། དེའི་དོན་ཇི་ལྟ་བུ་ཞེ་ན། ཉན་རང་ནས་གསང་སྔགས་མཆོག་གི་བར་གྱི་ཐེག་པ་གོང་འོག་གི་རིམ་པ་བསྟན་པའི་མཐོ་དམན་དང་། ལ་སོགས་པ་ཞེས་གཞན་བསྡུ་བའི་དོན་གྱིས་ལྟ་སྤྱོད་དང་གྲུབ་མཐའི་ཁྱད་པར་གྱིས་འོག་མའི་སྐྱོན་དང་གོང་མའི་ཡོན་ཏན་གྱི་རྣམ་པ་གཉིས་པོ་ཇི་ལྟར་སྣང་ཞིང་བསྟན་པ་དག་དང་། དེ་ལས་གཞན་ཡང་གོལ་སྒྲིབ་དང་དེ་དག་སེལ་བའི་གཉེན་པོ་དག་གི་དོན་གསང་སྔགས་ཀྱིས་ཇི་ལྟ་བར་མཐོང་ཞིང་ཤེས་པ་དང་། ཐེག་པ་འོག་མས་དེ་ལྟར་མ་མཐོང་ཞིང་མ་ཤེས་པའི་ཁྱད་པར་བསྟན་ཏེ། གང་མི་ཤེས་པའི་བྱིས་པ་དག་འབྲས་བུ་ལ་རེ་ཞིང་སེམས་ཀྱི་སྨོན་པས་འབད་བ་ཤ་ཐང་བར་བྱེད་པ་དང་། གང་ཤེས་པ་དག་གིས་ཀྱང་དམ་ཚིག་སེམས་དཔས་ཡེ་ཤེས་སེམས་དཔའ་ལ་བརྟེན་པ་དང་། དབྱེར་མེད་དུ་སྒྲུབ་པའི་ཐབས་ཀྱིས་ཀུན་ཏུ་རྩོལ་བར་གནས་པའི་རྐྱེན་ཙམ་གྱིས་སྒོ་ནས་ཐེག་པ་སོ་སོའི་ཆོས་རྒྱུ་ངེས་པ་དང་འབྲས་བུ་ངེས་པའི་ཚུལ་གྱིས་མ་འདྲེས་པར་སོ་སོར་གསལ་བར་ཡོད་དོ་ཞེས་སྨྲ་བ་ཡང་། འདིར་དེ་སྐད་ཟེར་བ་ངག་ཀྱང་རྟོག་གེའི་སྤྱོད་ཡུལ་དུ་སྣང་བ་ཁོ་ནར་ངེས་པས་རང་ངོ་ལ་བརྟགས་པ་ཙམ་སྟེ། ངོ་བོ་ཉིད་ཇི་ལྟ་བར་ཐག་ཆོད་ན་སྐྱོན་ཡོན་རྒྱུ་འབྲས་ཀྱི་ཆོས་དེ་དག་ཐམས་ཅད་ཏིལ་འབྲུ་དང་མར་གྱི་དཔེ་ལྟ་བུར་ལྷུན་གྱིས་གྲུབ་པའི་ཆོས་ཉིད་དེ་བཞིན་ཉིད་དུ་དབྱེར་མེད་པར་གཅིག་ཏུ་ངེས་པར་ཟད་དེ་གཉིས་སུ་སྣང་བ་ཡེ་ནས་མེད་དོ་ཞེས་དམ་བཅའ་འོ། །གཉིས་པ་ནི། དེ་ལ་ཡེ་ནས། ཞེས་པ་ནས། ཚོགས་རྫོགས་ཐབས་ཤེས་འབྲེལ། །ཞེས་པའི་བར་གྱིས་བསྟན་ཏེ། འོ་ན་ཅི་ཡང་མི་སྣང་བ་ཞིག་གམ་ཞེ་ན། ཡེ་ཤེས་གསང་བ་ལས། མི་འགྱུར་གདལ་ཁྱབ་ཕོ་བྲང་ན། །ཅིས་ཀྱང་མི་བསྐྱོད་སེམས་ཉིད་ཆེ། །འདུ་འབྲལ་གཉིས་མེད་རྡོ་རྗེ་ཉིད། །ཕྱི་ནང་མེད་པར་གསལ་ཁྱབ་ལ། །ཕྱི་ནང་གསང་བའི་སྒོ་ཕུགས་མེད། །ཡུལ་དང་དབང་པོ་གདོད་ནས་དག །མཚན་མ་འཇིལ་བའི་སྐུ་མེད་པས། །རྡོ་རྗེ་སེམས་དཔའ་མི་འགྱུར་ཆེ། །ཡེ་ཤེས་མཁའ་གསལ་ཀུན་ཏུ་བཟང་། །བསམ་མེད་མཁའ་གསལ་ཡེ་སངས་རྒྱས། །ཞེས་གསུངས་པ་བཞིན་དུ། དེ་ལ་ཞེས་སྙེགས་པས་གཞིར་བཞག་པ་ནི། ཐམས་ཅད་དེ་བཞིན་ཉིད་དུ་གཅིག་པའི་དོན་ཉིད་ལ་ལྟ་སྒོམ་སྤྱོད་པའི་རྣམ་གྲངས་སོགས་ཀྱིས་ཡེ་ནས་ཚོགས་ཤིང་འདུ་བ་དང་གྱེས་ཆོས་ཀྱི་འབྲལ་བ་མེད་པ་ཉིད་ཀྱི་རང་བཞིན་དུ་དུས་གསུམ་དུ་གནས་པ་ལས་མི་གཡོ་བས་ན་སེམས་ཅན་ནམ་འོག་མ་འཁྲུལ་པས་མི་མཉམ་པ་དང་སངས་རྒྱས་སམ་གོང་མ་མ་འཁྲུལ་པས་མཉམ་པའི་སྤྱོད་ཡུལ་དུ་བཞག་པའི་སོ་སོའི་ཡུལ་དང་ཤེས་པ་གང་ཅིར་སྣང་ཡང་རུང་སྟེ་ངོ་བོ་ལ་དབྱེར་མེད་པས་ཆོས་ཉིད་ཇི་བཞིན་པའི་དེ་བཞིན་ཉིད་འདི་ཉིད་མ་ཡིན་པ་གང་ཡང་མེད་པར་དེ་ཁོ་ན་ཉིད་དུ་ངེས་པའི་ཕྱིར་གཏན་ཚིགས་ཐུན་མོང་མིན་པར་ཆོས་ཉིད་ཀྱི་རིགས་པས་གྲུབ་པ་ཡིན་ཏེ། ཀུན་བྱེད་ལས། དེ་བཞིན་ཉིད་ལ་གང་ཞིག་སུ་གནས་པ། །དེ་ཡིས་མ་ནོར་མ་བཅོས་འགྲུབ་པར་འགྱུར། །དེ་ནི་མ་ནོར་བཞིན་ནི་མ་བཅོས་ཡིན། །ཉིད་ནི་མ་ནོར་ངོ་བོ་ཉིད་ལ་བྱ། །དེ་བཞིན་ཉིད་ལས་སངས་རྒྱས་ཆོས་མེད་དོ། །ཞེས་དང་། རང་བྱུང་ཡེ་ཤེས་གཅིག་གི་སྙིང་པོ་ལས། །སྣང་ཞིང་སྲིད་པའི་ཆོས་རྣམས་ཐམས་ཅད་ཀུན། །མི་སྣང་བ་ལ་མངོན་དུ་འབྱིན་ནུས་པས། །ཆོས་ཀྱི་སྙིང་པོ་ཡིན་པར་ཡིད་ཀྱང་ཆེས། །རང་བྱུང་ཡེ་ཤེས་གཅིག་གི་ངོ་བོ་དེ། །དོན་དམ་ཀུན་རྫོབ་བདེན་རྫུན་གཉིས་མེད་པར། །མ་ནོར་ངེས་པའི་བྱང་ཆུབ་སེམས་སྟོན་པས། །ཐེ་ཚོམ་སོམ་ཉི་མེད་པར་ཡིད་ཀྱང་ཆེས། །རང་བྱུང་ཡེ་ཤེས་གཅིག་གི་ངོ་བོ་དེ། །རྒྱུ་ལ་མི་བརྟེན་རྐྱེན་ལས་མི་སྒྲུབ་པས། །གཞན་ལ་རག་མ་ལས་པའི་རང་བཞིན་གྱིས། །རང་འབྱུང་ཡེ་ཤེས་ཡིན་པར་ཡིད་ཀྱང་ཆེས། །རང་བྱུང་ཡེ་ཤེས་གཅིག་གི་ངོ་བོ་དེ། །རྒྱུ་རྐྱེན་མེད་པར་ལྷུན་གྱིས་གྲུབ་པའི་ཕྱིར། །ཕྲིན་ལས་བཙལ་ཞིང་བྱ་བྱེད་བྱ་མི་དགོས། །མ་བཙལ་ལྷུན་གྱིས་གྲུབ་པར་ཡིད་ཀྱང་ཆེས། །རང་བྱུང་ཡེ་ཤེས་གཅིག་གི་ངོ་བོ་དེ། །རང་འབྱུང་ཡེ་ཤེས་ཡེ་ནས་མ་བསྒྲིབས་པས། །ཇི་ལྟར་སྣང་བའི་ཆོས་རྣམས་ཐམས་ཅད་གསལ། །ཆོས་རྣམས་ཐམས་ཅད་གཏན་ལ་འབེགས་པའི་ཕྱིར། །སྟོན་པའི་སྒྲོན་མ་ཡིན་པར་ཡིད་ཀྱང་ཆེས། །ཞེས་དང་། ཀློང་རབ་འབྱམས་ལས། དེ་བཞིན་ཉིད་ལས་མ་གཡོས་པར། །རོལ་པ་སྐྱེ་བ་ལྟར་སྣང་ཡང་། །འཕོ་འགྱུར་མེད་པས་སྐྱེ་མེད་དང་། །འཇིག་འདྲལ་མེད་པས་རྡོ་རྗེའི་ཀློང་། །ཅིས་ཀྱང་མི་ཤིགས་འདུ་འབྲལ་མེད། །དབྱིངས་ལ་འདུ་འབྲལ་མེད་པའི་ཕྱིར། །ཞེས་དང་། རྒྱུ་འབྲས་དབྱེར་མེད་ཐིག་ལེ་ཆེ། །རྩ་བ་མེད་པའི་བྱང་ཆུབ་སེམས། །ཐམས་ཅད་རང་སེམས་རིག་པའི་རྒྱན། །ཡང་དག་ལམ་གཅིག་བདེ་བའི་མཆོག །བདེ་ཆེན་ལམ་ལ་འཇུག་ལྡོག་མེད། །དབྱིངས་ལ་དབྱིངས་ཤར་རིག་པའི་སྟོབས། །མི་རྟོག་བསྒོམ་པ་བཟང་རྟོག་ཡིན། །རྣམ་པར་རྟོག་དང་ཁྱད་མེད་དེ། །གཉིས་ཀ་ཟང་ངན་མེད་པར་མཉམ། །དེ་ཡང་རིག་པ་རང་གི་སྟོབས། །ཞེས་དང་། སྒྲ་ཐལ་འགྱུར་ལས། འདིར་ནི་རང་ཡུལ་བསྟན་པ་ལས། །འཁོར་རྐྱེན་འཇུག་པ་མ་ཡིན་པར། །ཟང་མ་ཉིད་དང་ཐལ་བྱུང་དུ། །ཡུལ་དང་ཤེས་པའི་སྣང་ཆ་ལས། །ཐད་ཀ་སོ་སོའི་གཞི་ལ་གྲོལ། །འདོད་ཡོན་རྣམས་ནི་རང་རྫོགས་ཏེ། །སྣ་ཚོགས་འགྱུ་བ་སོ་སོའི་གནད། །གཅིག་ཤེས་པ་ཡིས་གྲོལ་བར་གནས། །དེས་ན་ཆོས་ཉིད་རྟོགས་པ་སྟེ། །ཆ་ཤས་ཉིད་དང་བྲལ་བའོ། །ཞེས་སོ། །དེ་ལྟར་ཇི་བཞིན་པ་དེ་ཡི་ངོ་བོ་ཉིད་རྟོགས་པའི་སྐབས་དེ་ཁོ་ནར་མཉམ་པའི་དབྱིངས་དེ་ལ་སྐུ་གསུམ་དང་ཚོགས་གཉིས་རྫོགས་ཏེ་ཐབས་དང་ཤེས་རབ་ཟུང་དུ་འབྲེལ་བ་ཉིད་དེ། ཡེ་ནས་དབྱེར་མེད་པ་དང་། རིལ་ཆོས་ཉིད་ཀྱི་རྒྱན་དུ་རྫོགས་པ་དང་། ཅིར་ཡང་མ་འགགས་པར་སྣང་བ་དང་མི་དམིགས་པ་ཉིད་དུ་གསལ་བ་ལ་སྤྱོད་ཡུལ་ཐམས་ཅད་དུ་མི་འགོག་པ་གཉིས་མེད་རང་གྲོལ་དུ་གྱུར་པའི་ཕྱིར་རོ། །གསུམ་པ་ནི། དེས་ན་དམ་པ། ཞེས་པ་ནས། དམིགས་པ་ཀུན་དང་བྲལ། །ཞེས་པའི་བར་གྱིས་བསྟན་ཏེ། དེ་ལྟར་བྱང་ཆུབ་ཀྱི་སེམས་ཆོས་ཉིད་དེ་བཞིན་ཉིད་ལ་ཡོན་ཏན་ཐམས་ཅད་རྫོགས་པ་དེས་ན། རྒྱལ་བ་དམ་པ་མང་པོ་འདུས་ནས་སྐུ་བཞིའམ་ལྔ་ཡིས་གདུལ་བྱ་ལ་བསྟན་པ་སོ་སོར་ཇི་ལྟར་མཚོན་ཏེ་བཀའ་སྩལ་པའི་དགོངས་པ་རྣམས་ནི་མཐར་ཐུག་དོན་དམ་གྱི་མཆོག་ཏུ་གྱུར་པ་བྱ་བ་དང་བྲལ་བར་རང་རིག་པ་ཡེ་ནས་མ་བཅོས་པར་སངས་རྒྱས་པའི་སེམས་ཀྱི་ཆོས་ཉིད་ཐམས་ཅད་ཀྱི་གཞིའི་ངོ་བོ་དེ་ལ་འདུས་ཤིང་དང་གཅིག་ཏུ་ཡོངས་སུ་རྫོགས་པ་ཡིན་ཏེ། ཇི་ལྟར་བསྟན་ཀྱང་དེ་ཉིད་ཀྱི་ཡོན་ཏན་གྱི་མཚན་གྱི་རྣམ་གྲངས་ཐ་དད་དུ་གྲགས་པར་གྱུར་པའི་ཕྱིིར་རོ། །དེ་ལྟར་བསྒོམ་པའི་ངོ་བོ་གང་ཞེ་ན། ཚིག་ཕྱེད་ནི་གཏན་ཚིགས་ལྟ་བུ་སྟེ། སེམས་ཀྱི་ངོ་བོ་རང་བཞིན་མེད་ཀྱང་མི་འགག་པས་ཡེ་ཤེས་ཆེན་པོ་སྤྱོད་ཡུལ་དང་བྲལ་བ་འཁོར་འདས་དབྱེར་མེད་ཀྱི་གནས་ལུགས་རྒྱུ་ཡིས་མ་བྱས་རྐྱེན་ལས་མ་བྱུང་བར་ཡུལ་མེད་རང་བྱུང་དུ་གྲོལ་བས་ཐིག་ལེ་ཉག་གཅིག་ཏུ་ཤར་བའི་ཕྱིར་ངང་ལས་མི་འདའ་ཞིང་རང་བཞིན་ལ་བརྗེད་པ་མེད་པས་ན་རྗེས་སུ་བསྒོམ་པའི་ཏིང་ངེ་འཛིན་ཞེས་ཨ་ནུ་མན་ཆད་ལྟ་བུའི་ཡུལ་བྱས་ཀྱི་བསམ་པས་དམིགས་པར་བྱ་བ་ཀུན་དང་བྲལ་ཏེ་འདུ་ཤེས་ཐམས་ཅད་ལས་གྲོལ་བར་རང་གསལ་བ་ལ་བློ་ཡི་ལྡང་ལྡོན་གྱི་མིང་ཡང་མེད་པ་ཁོ་ནའོ། །གཉིས་པ་ལ་གསུམ་སྟེ། ཐམས་ཅད་རྫོགས་ཆེན་དུ་ལ་བཟླ་བ། མཐའ་དབུས་ཅན་མཐའ་དབུས་མེད་པར་ལ་བཟླ་བ། སྟོང་པར་འདོད་པ་སྣང་སྟོང་གཉིས་སུ་མེད་པར་ལ་བཟླ་བའོ། །དང་པོ་ནི། འདི་ལྟར་ངེས་པའི། ཞེས་པ་ནས། ཆེན་པོར་ལ་བཟླས་པའོ། །ཞེས་པའི་བར་གྱིས་བསྟན་ཏེ། གསང་ཆེན་ཨ་ཏིའི་གཞུང་ཆེན་པོའི་དོན་ཕུལ་དུ་བྱུང་བ་ཉིད་འདི་ལྟར་བློ་གྲོས་ཟབ་ཅིང་རྒྱ་ཆེ་བས་ཡང་དག་པར་ངེས་པའི་སྐྱེས་བུ་མཆོག་གི་དགོངས་པ་རང་རིག་བྱང་ཆུབ་སེམས་ཀྱི་རང་བཞིན་རྩོལ་མེད་བདེ་བ་ཆེན་པོའི་ངང་དེ་ཉིད་རྟོགས་ཏེ་དེ་ལས་འདའ་བ་མེད་པ་ལ། ཡུལ་དུ་བྱས་ཏེ་ལམ་ལྔ་དང་ས་བཅུར་བགྲོད་པ་ལྟ་བུར་བགྲོད་པའི་གནས་ཀྱི་གྲུབ་པའི་འབྲས་བུ་གཞན་ན་མེད་པར་ངོ་བོ་ཉིད་དུ་གནས་པ་དང་། དེ་བཞིན་དུ་ལྟ་བས་ཤེས་པར་བྱ་བའི་ཡུལ་དངོས་པོ་གཟུགས་སྣང་ཏུ་གྱུར་བ་དང་དངོས་མེད་སྟོང་པར་ལྟ་བའང་མེད་པས་ཡུལ་ལོགས་ནས་མི་ཚོལ་བར་དངོས་པོ་དང་དངོས་པོ་མེད་པའི་ཆོས་ཀྱི་མཚན་མ་ཐམས་ཅད་ཀུན་ཆོས་ཉིད་སེམས་ཀྱི་དཀྱིལ་འཁོར་འོད་གསལ་བའི་རང་བཞིན་དུ་མཁྱེན་ཅིང་རྟོགས་པས་ན་སྐྱོན་དང་ཡོན་ཏན་གྱི་རིས་སུ་བསྙད་པ་གང་ཡང་ཐོག་མ་ཉིད་ནས་ཡོང་ཡེ་མེད་དེ་མ་དམིགས་པས་གདལ་ཁྱབ་བྱང་ཆུབ་སེམས་ཀྱི་དཀྱིལ་འཁོར་ཉིད་དུ་འུབ་ཆུབ་པ་ཡིན་ཏེ། ཀློང་རབ་འབྱམས་ལས། དཀྱིལ་འཁོར་དཀྱིལ་འཁོར་ཞེས་བྱ་བ། །ཐམས་ཅད་འདུས་ཤིང་རྫོགས་པས་ན། །བྱང་ཆུབ་སེམས་ཀྱི་དཀྱིལ་འཁོར་ཡིན། །ཕྱི་ནང་སྒོ་ཕུགས་བྲལ་བས་ན། །མཉམ་པ་ཉིད་ཀྱི་དཀྱིལ་འཁོར་ཡིན། །མཐའ་དབུས་གཉིས་སུ་མེད་པའི་ཕྱིར། །མུ་མཐའ་མེད་པའི་དཀྱིལ་འཁོར་ཡིན། །འཁོར་འདས་སྟེང་འོག་མེད་པའི་ཕྱིར། །མཐོ་དམན་མེད་པའི་དཀྱིལ་འཁོར་ཡིན། །སྒྲིབ་པ་གཉིས་དང་བྲལ་བའི་ཕྱིར། །མ་བཀོད་གསལ་བའི་དཀྱིལ་འཁོར་ཡིན། །རིག་པ་ཕྱི་ནང་མེད་པའི་ཕྱིར། །དབྱེར་མེད་ཟད་ཐལ་དཀྱིལ་འཁོར་ཡིན། དགག་སྒྲུབ་གཉིས་དང་བྲལ་བའི་ཕྱིར། །རྒྱ་ཆེན་སྣང་བའི་དཀྱིལ་འཁོར་ཡིན། །མ་སྤངས་རང་སར་གྲོལ་བས་ན། །རང་བཞིན་ལྷུན་གྲུབ་དཀྱིལ་འཁོར་མཆོག །ཅེས་དང་། གཅིག་ཏུ་འདུས་པས་མཐོ་དམན་མེད། །མཐོ་དམན་མེད་པས་ཡངས་དོག་མེད། །མཐའ་དབུས་བྲལ་བས་ཕྱི་ནང་མེད། །སྐྱེ་འགག་མེད་པས་དུས་གསུམ་མེད། །དུས་གསུམ་མེད་པས་སྐྱེ་ཤི་མེད། །འདུ་འབྲལ་མེད་པ་རྒྱལ་བའི་སྐུ། །དགོངས་པ་མཉམ་པ་ཉིད་དུ་གཅིག །རྒྱལ་བའི་དགོངས་སྤྱོད་བསམ་ཡས་ཀྱང་། །རང་བྱུང་ཡེ་ཤེས་གཅིག་གི་ཀློང་། །གཞན་དུ་གཡོས་པ་རྡུལ་ཙམ་མེད། །ཅེས་སོ། །དེ་བས་ན། ཐེག་རྩེ་གསང་བ་ཆེན་པོའི་དོན་འདིར་མདོ་སྔགས་ཀྱི་ལྟ་བ་དང་ཚོགས་གཉིས་ཀྱི་སྒོ་ཐམས་ཅད་སྟོང་ཉིད་དང་སྙིང་རྗེ་དབྱེར་མེད་པའི་ངང་ཀློང་དུ་རྫོགས་ཏེ་རྒྱུ་འབྲས་རིལ་ལྷུན་གྱིས་གྲུབ་པ་ཡིན་པས་རང་རིག་རང་གྲོལ་གྱི་གཞི་ལ་གཏན་ཚིགས་ཚད་མས་ཐ་དད་ཕྱོགས་འཛིན་གྱི་ཐེ་ཚོམ་ཟ་བའི་གེགས་ཐམས་ཅད་བསལ་ནས་ཆེད་བྱས་དང་རྩོལ་སྒྲུབ་ཀྱིས་ཡུལ་དུ་བྱེད་པའི་བློ་ཐག་ཀུན་བཅད་ཅིང་། ཐམས་ཅད་ཐེག་མཆོག་བླ་ན་མེད་པ་འོད་གསལ་རྫོགས་པ་ཆེན་པོར་མ་འདྲེས་ཡོངས་རྫོགས་ཀྱི་དགོངས་པར་ཤར་གྲོལ་དུས་མཉམ་དུ་གྱུར་པས་ཐེག་པའི་རྒྱལ་པོའི་དགོངས་སྤྱོད་མ་ཡིན་པ་མེད་པའི་དོན་ཉིད་གདེང་ཆེན་ཚད་དུ་འཁྱོལ་བར་ལ་བཟླས་པ་ཡིན་པའི་ཕྱིར་མཐར་ཐུག་གི་དགོངས་པའི་སྐྱེལ་སོ་ལ་ངེས་པ་རྙེད་པར་བྱའོ། །དེ་སྐད་དུའང་སྔ་མ་ལས། འཁོར་འདས་རིག་པ་ཆིག་ཆོད་ལ། །མཉམ་དང་མི་མཉམ་སེམས་ཀྱི་སྟོབས། །དབྱེ་བསལ་མེད་དོ་གཅིག་གི་ཀློང་། །གཉིས་མཐའི་གྲས་ཐག་བཅད་པའི་ཕྱིར། །མཚུངས་མེད་ཕྱོགས་མེད་གཏན་ཚིགས་ཀྱིས། །ཡུལ་སྣང་ཞེན་པ་ཀུན་བཀྲོལ་ནས། །ཕྱོགས་རིས་མེད་དོ་ཡེ་གདལ་ཆེ། །དེ་དོན་འགྱུར་མེད་གནད་ལ་ཕེབས། །ཕྱོགས་མེད་རིག་པ་ཁ་ཡན་གྱིས། །མཐར་འཛིན་སྤྲོས་པ་ཀུན་བཅད་ནས། །དགག་སྒྲུབ་མེད་པར་ཡེ་ནས་མཉམ། །ཡུལ་སེམས་རིས་སུ་མི་འབྱེད་པས། །ཡུལ་མེད་རིག་པ་རང་ཤར་གྱིས། །གཏན་ཚིགས་ཞེན་པའི་གཏིང་ཕྱུང་ནས། །རྒྱུ་འབྲས་མེད་དེ་ཆོས་ཉིད་ཆེ། །དེ་ལ་ཕྱོགས་སུ་རྩོལ་འདོད་པ། །དག་དང་མ་དག་གོལ་ས་སྟེ། །རིམ་པ་བརྒྱད་པོ་ལམ་གྱི་གནས། །ཡིད་ཆེས་རང་གཞན་གཉིས་ཀྱི་ལུང་། །ཐེ་ཚོམ་གོལ་ས་ཤུགས་ཀྱིས་ཆོད། །ཕྱི་ནང་མེད་པར་འོད་གསལ་བས། །མཐའ་ཡི་མུན་པ་ཀློང་དུ་དག །རྒྱུ་རྐྱེན་གཉེན་པོས་མི་གཡོ་བས། །འཇིག་འདྲལ་མེད་པ་ཆོས་ཀྱི་སྐུ། །མ་རིག་མེད་པ་ཡེ་ཤེས་ཀློང་། །ཐམས་ཅད་གྲོལ་བ་ནམ་མཁའི་ཀློང་། །ཞེས་དང་། སྣང་སྲིད་སྐྱེ་འགུལ་ཡོང་བ་དང་། །མི་སྲིད་མེད་པའི་ཆོས་རྣམས་ཀུན། །རང་བྱུང་ཡེ་ཤེས་ཀློང་དཀྱིལ་དུ། །མ་རྫོགས་པ་ནི་མེད་པའི་ཕྱིར། །རྫོགས་ཆེན་ལྷུན་གྲུབ་བླ་ན་མེད། །མཉམ་པ་ཉིད་དུ་ཐག་ཆོད་པས། །ཀུན་ཀྱང་རང་བྱུང་ཡེ་ཤེས་ཉིད། །དུས་ལ་སྔ་ཕྱི་མ་མཆིས་པས། །ཨ་ཏི་དུས་གསུམ་ཆིག་ཆོད་ལ། །ཨ་ནུ་མན་ཆད་འོག་མ་ཡི། །བསྐལ་པའི་གྲངས་དང་མི་ཚེའི་གྲངས། །བརྒྱུད་ནས་འབྲས་བུ་འདོད་པ་དེ། །མ་སྤངས་གཅིག་ཏུ་འདུས་པའི་ཕྱིར། །དུས་གསུམ་ཐ་དད་མེད་པ་རུ། །རང་བཞིན་གཅིག་པས་ཀློང་དུ་གྲོལ། །དེ་ཡི་ངང་ལ་རྒྱུན་ཆད་མེད། །རྒྱུན་ཆད་མེད་པའི་རང་བཞིན་ལ། །འཁོར་འདས་མཉམ་པ་རིས་མེད་ལས། །གཞན་དུ་ལྟ་བ་མེད་པའི་ཕྱིར། །ཡེ་སངས་རྒྱས་པའི་ཆོས་ཉིད་ཡིན། །དེ་ལ་རང་རང་ལོངས་སྤྱོད་པས། །ཕྱོགས་མེད་གཏེར་ཆེན་འབྲས་བུ་ཡིན། །ཞེས་སོགས་མང་ངོ་། །དེས་ན་རྫོགས་པ་ཆེན་པོའི་བྱང་ཆུབ་ཀྱི་སེམས་རང་བྱུང་རིག་པའི་ཡེ་ཤེས་ཇི་བཞིན་དུ་རྟོགས་པས་འོག་མའི་ཐེག་པའི་ལྟ་བ་ཀུན་ལས་འཕགས་ཚུལ་ཉུང་ངུར་བརྗོད་ན ། ཉན་ཐོས་ཀྱིས་གང་ཟག་གི་བདག་མེད་ཙམ་ལས་མ་རྟོགས་པར་ཆོས་བདག་གཟུང་འཛིན་ཕྲ་བ་དོན་དམ་དུ་འདོད་པ་ལ་ལྟོས་ན། རང་རྒྱལ་གྱིས་དེའི་སྟེང་དུ་ཆོས་ཀྱི་ཕྱོགས་གཅིག་གཟུང་བ་རང་བཞིན་མེད་པར་རྟོགས་པས་འཕགས་ལ། དེ་ལས་སེམས་ཙམ་པས་གཟུང་འཛིན་གཉིས་མེད་ཀྱི་ཤེས་པ་རང་རིག་རང་གསལ་དུ་རྟོགས་པས་འཕགས་ཤིང་། དེ་བས་དབུ་མ་པས་དོན་དམ་པར་རང་རིག་རང་གསལ་དུའང་མ་གྲུབ་སྟེ། ཆོས་ཉིད་སྤྲོས་བྲལ་ནམ་མཁའ་ལྟར་བདག་མེད་གཉིས་ཀ་རྟོགས་པས་འཕགས་ལ། །དེ་ལས་ཀྲི་ཡ་བས་དོན་དམ་རང་སེམས་དག་པ་མཐའ་བཞི་དང་བྲལ་བ། ཀུན་རྫོབ་དེ་རྟོགས་ཀྱི་ཡོན་ཏན་རིགས་གསུམ་གྱི་དཀྱིལ་འཁོར། དེ་གཉིས་ཀྱང་དབྱེར་མེད་དུ་རྟོགས་པས་འཕགས་པ་དང་། དེ་ལས་ཡོ་ག་པས་དོན་དམ་སེམས་ཉིད་རང་བཞིན་གྱིས་འོད་གསལ་བའམ། སྐྱེ་འགག་མེད་པའི་ཆོས་སྐུ་རྣམ་སྣང་ཀུན་ཏུ་ཞལ་དང་། ཀུན་རྫོབ་དེ་རྟོགས་ཀྱི་བྱིན་རླབས་ཐུན་མོང་གི་རིགས་ལྔའམ། རྡོ་རྗེ་དབྱིངས་ཀྱི་ལྷ་སོ་བདུན། དེ་གཉིས་ཀྱང་དབྱེར་མེད་དུ་རྟོགས་པས་འཕགས་ཤིང་། དེ་ལས་མ་ཧཱ་པས། དོན་དམ་རིག་པ་སྤྲོས་བྲལ་སྣང་བ་ངོ་བོ་ཉིད་རྒྱུར་ལྷུན་གྱིས་གྲུབ་པ། ཀུན་རྫོབ་རིག་པ་སྒྱུ་མ་རྣམ་དག་ཆེན་པོ། དེ་གཉིས་ཚིག་ལ་སྔ་ཕྱི་ཡོད་ཀྱང་དོན་ལ་དབྱེར་མེད་སྤྱོད་ཡུལ་དང་བྲལ་བར་རྟོགས་པས་འཕགས་ལ། དེ་ལས་ཨ་ནུ་པས་དབྱིངས་སྣང་བ་རྩལ་རྫོགས་ཀུན་ཏུ་བཟང་མོའི་མཁའ་ཀློང་། ཡེ་ཤེས་འགག་པ་མེད་པར་ཀུན་ཏུ་བཟང་པོའི་རོལ་པ། དེ་གཉིས་དབྱེར་མེད་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར། དེ་ཡང་སྤྱོད་ཡུལ་དང་བྲལ་བར་རྟོགས་པས་འཕགས་ཤིང་། ཨ་ནུས་དེ་ལྟར་རྟོགས་ཀྱང་རྒྱུ་འབྲས་སྒོ་ཕུགས་སུ་འབྱེད་པ་ལ། ཨ་ཏི་ཡོ་ག་པས། ཇི་སྐད་དུ། ཇི་བཞིན་མ་བསླད་བཙལ་དུ་མེད་པ་ལ། །སྒོ་ཕུགས་དཀྱིལ་འཁོར་བསྐྱེད་དང་མ་བྲལ་ནོར། །འཇུག་སྐྱེད་ཡེ་བྲལ་ངང་ཉིད་ཁྱོད་ཀྱིས་ཀྱང་། །ཕྱོགས་ཙམ་མ་ཤེས་རང་བྱུང་ང་ཉིད་འཕགས། །ཞེས་གསུངས་པ་ལྟར་ཆོས་ཐམས་ཅད་བྱང་ཆུབ་ཀྱི་སེམས་སྐྱེ་འགག་གཉིས་སུ་མེད་པའི་རང་བྱུང་གི་ཡེ་ཤེས་སྒྲ་ཇི་བཞིན་མ་ཡིན་པར་བློ་དང་དངོས་པོ་གཉིས་མེད་རང་གྲོལ་དུ་རྟོགས་པས་ཁྱད་པར་འཕགས་པ་ཡིན་ནོ། །དེ་བས་ན་འདིར་ཐེག་དགུ་རྫོགས་ཆེན་དུ་འདུས་ཤིང་ཀུན་ལས་འཕགས་པའི་ཚུལ་ནི། འཇམ་པའི་དབྱངས་དངོས་ཀུན་མཁྱེན་ཀཿཐོག་པ་ཆེན་པོས་འདྲ་མཐུན་ཁྱད་པར་ངང་པའི་རྒྱལ་པོ་ལས། སྣང་བ་འགོག་ཏུ་མེད་པ་ནི། །སེམས་ཅན་དང་ཡང་མཐུན་པ་སྟེ། །རང་རྒྱུད་དངོས་པོར་མི་འཛིན་པས། །འགྲོ་བ་དྲུག་ལས་ཁྱད་པར་འཕགས། །གང་ཟག་བདག་མེད་འདོད་པ་ནི། །ཉན་ཐོས་དང་ཡང་མཐུན་པ་སྟེ། །རྡུལ་ཕྲན་རྫས་སུ་མི་འཛིན་པས། །ཉན་ཐོས་ལས་ཀྱང་ཁྱད་པར་འཕགས། །རྒྱུ་རྐྱེན་དག་པར་འདོད་པ་ནི། །རང་སངས་རྒྱས་དང་མཐུན་པ་སྟེ། །རྟེན་འབྲེལ་མཚན་མར་མི་ལྟ་བས། །རང་རྒྱལ་ལས་ཀྱང་ཁྱད་པར་འཕགས། །སྣང་བ་སེམས་སུ་འདོད་པ་ནི། །སེམས་ཙམ་དང་ཡང་མཐུན་པ་སྟེ། །རིག་པ་རྫས་སུ་མི་སྒྲུབ་པས། །སེམས་ཙམ་ལས་ཀྱང་ཁྱད་པར་འཕགས། །དོན་དམ་སྤྲོས་བྲལ་འདོད་པ་ནི། །དབུ་མ་དང་ཡང་མཐུན་པ་སྟེ། །བདེན་པ་རིས་སུ་མི་འབྱེད་པས། །དབུ་མ་ལས་ཀྱང་ཁྱད་པར་འཕགས། །རང་བཞིན་དག་པར་འདོད་པ་ནི། །ཀྲྀ་ཡ་དང་ཡང་མཐུན་པ་སྟེ། །དག་བྱེད་དངོས་པོར་མི་འཛིན་པས། །ཀྲྀ་ཡ་ལས་ཀྱང་ཁྱད་པར་འཕགས། །ཡུལ་སེམས་ཟུང་འཇུག་འདོད་པས་ནི། །ཨུ་པ་ཡ་དང་མཐུན་པ་སྟེ། །ལྟ་སྤྱོད་གོང་འོག་མི་འབྱེད་པས། །ཨུ་པ་ལས་ཀྱང་ཁྱད་པར་འཕགས། །སྣང་སེམས་དབྱེར་མེད་འདོད་པས་ནི། །ཡོ་ག་དང་ཀྱང་མཐུན་པ་སྟེ། །བྱང་ཆུབ་ཆོ་འཕྲུལ་མི་འདོད་པས། །ཡོ་ག་ལས་ཀྱང་ཁྱད་པར་འཕགས། །བླང་དོར་མེད་པར་སྤྱོད་པས་ནི། །མ་ཧཱ་དང་ཡང་མཐུན་པ་སྟེ། །དེ་ཉིད་དངོས་པོར་མི་འཛིན་པས། །མ་ཧཱ་ལས་ཀྱང་ཁྱད་པར་འཕགས། །དབྱིངས་དང་ཡེ་ཤེས་འདོད་པས་ནི། །ཨ་ནུ་དང་ཡང་མཐུན་པ་སྟེ། །དེ་ཉིད་རྒྱུ་འབྲས་མི་ལྟ་བས། །ཨ་ནུ་ལས་ཀྱང་ཁྱད་པར་འཕགས། །ཤིན་ཏུ་རྣལ་འབྱོར་ལྟ་བ་ནི། །རང་བཞིན་སྐྱེ་བ་མེད་པ་ཡིན། །རོལ་པ་འགག་པ་མེད་པ་ཡིན། །མཚན་ཉིད་དབྱེ་བ་མེད་པ་ཡིན། །རིག་པ་རང་སར་གྲོལ་བ་ཡིན། །འཁྲུལ་ཆོས་རང་སར་ཞི་བ་ཡིན། །འབྲས་བུ་རང་སྣང་ལྷུན་གྲུབ་ཡིན། །ཞེས་གསུངས་པ་ལྟར་ཐེག་མཆོག་རྒྱལ་པོའི་དགོངས་དོན་བླ་ན་མེད་པ་ལ་ངེས་པ་རྙེད་པར་བྱ་བ་ཤིན་ཏུ་གཅེས་ཏེ། འདིར་གནད་ཙམ་བསྟན་པ་ཡིན་གྱི་རྒྱས་པར་སྤྲོས་ཀྱང་ཆོག་གོ། །གཉིས་པ་ལ་གཉིས་ཏེ། མཐའ་དབུས་མེད་པར་ཁུངས་ཀྱིས་བསྟན་པ། གཏན་ཚིགས་ཀྱིས་མཐའ་གུད་ན་མེད་པར་བསྟན་པའོ། །དང་པོ་ནི། དེས་ན་མཐའ་དབུས། ཞེས་པ་ནས། དོན་དུ་ཀུན་འདུས་གསུངས། །ཞེས་པའི་བར་གྱིས་བསྟན་ཏེ། དེ་བས་ན་རྒྱུ་འབྲས་ཀྱི་ཐེག་པ་ལས་ཆེ་བའི་ཁྱད་པར་ཡོད་པའི་ཕྱིར་ཏེ། འདི་ལྟར་གསང་སྔགས་བླ་ན་མེད་པའི་ལྟ་བ་གང་ཡང་སྤོང་ལེན་མེད་པའི་དོན་དེ་ལྟར་ཡིན་པ་དེས་ན། དབུ་མ་པ་སོགས་གང་སུ་ཞིག་གིས་དབྱེ་གཞི་ཟད་པའི་དབྱེར་མེད་ཆེན་པོ་ལ་མཐའ་དང་དབུས་སུ་འབྱེད་དེ་མཐའ་བསལ་ནས་དབུ་མར་མི་དམིགས་པའི་དོན་འདོད་པ་དང་། སེམས་ཙམ་སོགས་ཤེས་པ་རང་རིག་རང་གསལ་དང་། བདེན་གཉིས་དབྱེར་མེད་དུ་སྒྲུབས་ཏེ་ཤིན་ཏུ་བརྟག་དཀའ་བའི་ངོ་བོ་ཆ་ཕྲ་བ་ལ་བློ་གནས་པར་འདོད་པ་རྣམས་ཀྱང་ཀུན་བྲལ་ཉག་གཅིག་ཅི་ཡང་མ་ཡིན་པའི་དོན་ཆེན་པོ་མཐོང་བ་ལས་གོལ་བ་ཁོ་ནའོ། །འོན་ཀྱང་དེ་དག་ཐམས་ཅད་ཐེག་པ་ཆེན་པོའི་མདོ་མཐའ་དབུས་སུ་འཛིན་པ་མེད་པའི་མཉམ་པ་ཉིད་དབུ་མ་དང་དབྱེར་མེད་ཀྱི་ཐ་སྙད་ལས་ཀྱང་གྲོལ་བའི་ཀློང་ཆེན་པོ་ཉིད་དུ་ཀུན་རྣམ་དབྱེ་མེད་པ་གཅིག་ཏུ་འདུས་པ་ནི། དཔེར་ན་ཕུལ་ཁྱོར་བྲེ་ནང་དུ་ཤོང་བ་དང་མཚུངས་པ་ཉིད་དུ་ངེས་ཏེ། དེ་བས་ན་གསང་སྔགས་ཐེག་མཆོག་རྒྱལ་པོ་འོད་གསལ་སྙིང་པོའི་དགོངས་པ་ཉིད་འོག་མ་ཀུན་ལས་ཁྱད་པར་དུ་འཕགས་པའི་ཆེ་བ་རྨད་དུ་བྱུང་བ་རྣམས་ཡང་དག་པར་རིག་ཅིང་རྟོགས་པར་བྱ་བའི་དོན་གྱི་ཆེད་དུ་དགོངས་པ་ཀུན་འདུས་ཀྱི་རྒྱུད་མཆོག་ཆེན་པོ་འདི་ལྟ་བུ་ཉིད་བཀའ་སྩལ་བར་མཛད་དེ་གསུངས་པ་ཡིན་པར་ཤེས་པར་བྱའོ། །གཉིས་པ་ནི། རྒྱུར་འདོད་ལ་སོགས། ཞེས་པ་ནས། འདོད་ན་སྐྱོན་ཆེན་ཡིན། ཞེས་པའི་བར་གྱིས་བསྟན་ཏེ། སེམས་ཉིད་སངས་རྒྱས་ཀྱི་རྒྱུར་འདོོད་པ་རྒྱུའི་ཐེག་པ་རྣམས་དང་། ལ་སོགས་ཞེས་དངོས་པོ་གཞན་བསྡུ་བ་ནི་ཡོ་ག་ཕྱི་པ་དག་སྟེ་དེ་རྣམས་ཀྱིས་ཕྱི་ནང་སྣོད་བཅུད་ཀྱི་ཡུལ་དུ་སྣང་བའི་དངོས་པོ་དག་ལ་འཕགས་པ་ཉན་ཐོས་ཀྱིས་དངོས་པོ་རྣམས་བརྟགས་ན་བརྟགས་མི་བཟོད་དེ་མ་བརྟགས་ན་ཉམས་དགའ་བ་ཙམ་སྟེ་རང་བཞིན་ཆ་མེད་གཉིས་ལས་མ་འདས་པར་མཐོང་བ་དང་། སྔགས་ཕྱི་པས་ཀུན་རྫོབ་ཏུ་སྣང་བའི་མཚན་མ་རྣམས་ཀྱང་དག་པའི་ཆོས་ཉིད་དུ་ངེས་པས་མཚན་མ་མེད་པ་ཙམ་དང་དབྱེར་མེད་དུ་གནས་པས་རྟོགས་ན་ཡོན་ཏན་དང་བྱིན་རླབས་རིགས་གསུམ་དང་རིགས་ལྔའི་ལྷར་སྣང་བས་ན་སྤྱོད་པ་རྣམ་པར་དཀར་བ་དང་གཙང་སྦྲས་འགྲོ་བ་འདུལ་བའི་ཐབས་ལ་མོས་པས་གནས་པ་དང་། གང་དག་རྣམ་རིག་པ་དང་རྣལ་འབྱོར་སྤྱོད་པའི་དབུ་མ་པས་དངོས་པོ་ཕྱི་ནང་གི་ཆོས་རྣམས་ཀུན་གཞི་གཟུང་ཆ་དང་འཛིན་ཆ་འཁྲུལ་པར་སྣང་བ་རབ་རིབ་ཅན་གྱིས་རྫས་མཐོང་བ་ལྟར་གྱུར་པས་འཁྲུལ་པར་སྣང་བའི་སེམས་སུ་གཅིག་ཏུ་འདུས་པས་ཡུལ་ལོགས་ན་མེད་པར་འདོད་པ་དང་། དབུ་མ་ཆེན་པོས་ཀུན་རྫོབ་ཏུ་རྟེན་ཅིང་འབྲེལ་བར་འབྱུང་བ་སྒྱུ་མ་ཙམ་དང་། དོན་དམ་པར་མཐའ་གཉིས་སམ་བཞི་པོ་ཀུན་དང་བྲལ་བའི་ཆོས་ཉིད་མ་སྐྱེས་བའི་ངོ་བོར་ངང་གིས་གསལ་ལོ་ཞེས་སུ་འདོད་པའི་གཞུང་སོ་སོ་ལ་བརྟེན་ཏེ་འབད་པས་འབྲས་བུ་ཐོབ་པའི་ཕྱིར་རྒྱུ་འབྲས་སྔ་ཕྱི་ཡོད་པར་སྨྲ་ཞིང་གྲུབ་མཐའ་སོ་སོར་འཛིན་པ་རྣམས་ཀྱིས་མཚན་ཉིད་ཐེག་པས་སེམས་ཉིད་སངས་རྒྱས་ཀྱི་རྒྱུ་ཙམ་དུ་འདོད་པ་དང་། གསང་སྔགས་ཀྱིས་སེམས་ཆོ་འཕྲུལ་དང་བཅས་པ་འབྲས་བུར་འདོད་དེ་རང་རང་གི་ལུགས་སྲོལ་སྒྲུབ་པར་བྱེད་པ་ཡང་། ཀུན་ཟླུམ་ཐིག་ལེ་ཉག་གཅིག་གསང་སྔགས་མཉམ་པ་ཆེན་པོའི་ངོ་བོར་ལ་བཟླས་ཏེ་ཐག་བཅད་པའི་སྙིང་པོ་དོན་གྱི་གནས་ལུགས་ཇི་ལྟ་བ་བཞིན་དུ་རྟོགས་ཤིང་མཐོང་ན་དེ་དག་ཀུན་ཀྱང་སྤང་བྱ་མིན་པར་དབྱིངས་ལ་རྫོགས་པས་གསང་སྔགས་སུ་གཅིག་པ་ཉིད་ལས་གུད་ན་ཡོང་ཡེ་མེད་པ་ཉིད་དོ། །དེས་ན་ཀློང་ཆེན་རབ་འབྱམས་ལས། ཇི་བཞིན་པ་དང་དེ་ལས་གཞན། །མ་ནོར་བ་དང་འཁྲུལ་པ་དང་། །མ་བཅོས་པ་དང་བཅོས་པ་དང་། །གཞན་མ་ཡིན་དང་རང་ཡིན་དང་། །ཆོས་ཅན་དང་ནི་ཆོས་ཉིད་དང་། །དབྱིངས་དང་དངོས་པོ་ལ་སོགས་པ། །བཟང་ངན་བྱེ་བྲག་འབྱེད་པ་ནི། །འདི་ཀུན་རང་བཞིན་འཁྲུལ་པའི་བློ། །བྱང་ཆུབ་སེམས་ལ་དབྱེ་བ་མེད། །སྟོང་ཉིད་སྙིང་པོའི་ཀློང་ཆེན་འདི། །སྐད་ཅིག་རྟོགས་པ་ཙམ་གྱིས་ཀྱང་། །བྱང་ཆུབ་ཀློང་དུ་དེར་སོན་པས ། །མཚན་མའི་ཆོས་ལ་རག་མི་ལས། །སྟོང་པའི་ཆོས་ལ་བློ་མི་གནས། །ཅིར་ཡང་མེད་ལས་གར་ཡང་སྣང་། །མཐོང་བ་མེད་པར་ཀུན་ཏུ་གསལ། །བརྟགས་ན་མ་རྙེད་ཅིར་ཡང་འཆར། །དངོས་པོ་མེད་ལས་སྙིང་པོ་འབྱུང་། །རང་བཞིན་མེད་པར་ཀུན་ལ་ཁྱབ། །དངོས་གཞི་མེད་པར་ཐམས་ཅད་འབྱུང་། །བསྒྲུབ་ཏུ་མེད་པར་ཅིར་ཡང་འགྲུབ། །བཏང་བཞག་མེད་པར་རང་ལ་གནས། །འདོད་པ་མེད་པར་དོན་ཀུན་འགྲུབ། །འདོད་རྒུ་འབྱུང་བས་བཙལ་མི་དགོས། །ཡེ་ཤེས་ཉི་མ་རང་ལ་ཤར། །གསང་སྔགས་དོན་ཀུན་བསྐྱེད་པའི་གཞི། །གདུལ་བྱ་མ་ལུས་འདུལ་བའི་ཞིང་། །ཐམས་ཅད་བདག་ཉིད་བྱང་ཆུབ་ཀློང་། །མི་མཛད་མཛད་པ་མཐར་ཕྱིན་པས། །དུས་གསུམ་རྒྱལ་བ་མ་ལུས་ཀྱིས། །ཕྲིན་ལས་མཛད་པ་འདི་ཡིས་མཛད། །ཅེས་སོགས་གསུངས་སོ། །དེ་བས་ན་གསང་སྔགས་མཆོག་གི་དོན་ཟབ་མོ་དེ་དག་གིས་ཇི་བཞིན་པར་མ་མཐོང་ཡང་། གལ་ཏེ་ངོ་བོས་གསང་དོན་ལ་རྒྱ་ཆད་ནས་ལོགས་ཤིག་པར་གྱུར་ཏེ་གུད་ན་ཡོད་པར་འདོད་པའི་ཕྱོགས་འཛིན་ན་མཐའ་བྲལ་གསང་སྔགས་ཀྱི་ངེས་དོན་མཐོང་དུ་མི་སྟེར་བའི་སྐྱོན་ཆེན་པོ་བག་ཆགས་ངན་པས་ནད་ཀྱིས་ཟིན་པ་ཡིན་པའི་ཕྱིར་ཏེ། དཔེར་ན་མཛུབ་མོས་ཟླ་བ་མཚོན་པ་ན་མཛུབ་རྩེ་ལ་ཆགས་པས་ཟླ་བ་སྒྲིབ་པ་བཞིན་ནོ། །གསུམ་པ་ནི། དེས་ན་བསམ་གཏན། ཞེས་པ་ནས། སྣང་ལ་རང་བཞིན་མེད། །ཅེས་པའི་བར་གྱིས་བསྟན་ཏེ། དེ་ལྟར་གསང་སྔགས་ཀྱི་དོན་དུ་རིལ་འདུས་པ་དེས་ན་ཉན་ཐོས་ནས་སྔགས་ཕྱི་པའི་བར་གྱིས་ཐེག་པ་རྣམས་ཀྱི་ལྟ་བ་དང་བསམ་གཏན་ནམ་ཏིང་ངེ་འཛིན་རིམ་པ་སོ་སོ་བར་གྱུར་ཏེ་ཐེག་པ་ཆེན་པོའི་ཁྱད་པར་ལས་རང་རང་གི་ངོ་ལ་ཐ་དད་དུ་ཅིར་ཡང་སྣང་བ་ཀུན་ཀྱང་གསང་སྔགས་ཀྱི་དོན་ཆེན་པོ་ལ་ཤེད་མ་བྱེ་བས་བྱིས་པའི་སྤྱོད་ཡུལ་རང་གི་བློས་བརྟགས་པའི་ལྟ་བ་དང་ཏིང་ངེ་འཛིན་ལ་ཞེན་པ་དེ་ཡང་དཔེར་ན་བྱིས་པ་ཆུང་ངུས་ཁང་པ་བརྩེགས་པ་བྱས་པ་དང་མཉམ་དུ་འཇིག་པ་བཞིན་དུ་འཁྲུལ་པ་ཉིང་འཁྲུལ་ཉིད་སྣང་བ་ཡིན་པས་ལྟོས་པའི་འཁྲུལ་སྣང་ཁོ་ན་ཡིན་ནོ། །དེ་ཅིའི་ཕྱིར་ཞེ་ན། དམ་པ་གསང་སྔགས་ཐེག་པ་ཆེེན་པོ་ལ་གཉིས་ལས་སྔགས་ཕྱི་པ་ལྟ་འཕང་ཞན་པ་དག་དང་དམན་པ་གསང་སྔགས་ལ་ལྟོས་ནས་རྒྱུའི་ཐེག་པ་ཆེན་པོ་པ་དག་གིས། ལྟ་བས་ཀུན་རྫོབ་སྒྱུ་མ་ཙམ་དུ་ཡུལ་རང་རྒྱུད་དུ་ལྟ་བ་ནི་དཔེར་ན་སྒྱུ་མས་འཁྲུལ་ཤེས་འདྲེན་པའི་བྱ་བ་བྱེད་ཀྱང་དངོས་པོ་མེད་པ་ལྟ་བུ་དང་། ཏིང་ངེ་འཛིན་གྱི་རྣམ་པ་ལ་ཞེན་པ་ནི་སྨིག་རྒྱུའི་ཆུའི་ཚུལ་ལ་རི་དྭགས་སྐོམ་པས་བདས་ཀྱང་སྐོམ་པས་གདུང་བ་མི་འཇིལ་བ་བཞིན་དང་། དོན་དམ་པར་རང་བཞིན་སྐྱེ་འགག་མེད་པས་ནམ་མཁའ་བཞིན་དུ་འདོད་པའི་སྐབས་དེས་ནི་རྟོགས་པར་དཀའ་བའི་གསང་སྔགས་ཐེག་པ་ཆེན་པོ་ཇི་བཞིན་པའི་ཆོས་ཉིད་རྒྱལ་བའི་དགོངས་པ་ཀུན་ནས་འདུས་པའི་ངོ་བོ་ཆོས་ཀུན་རྫོགས་པའི་རང་བཞིན་བདེན་པ་རྣམ་གཉིས་དབྱེར་མེད་པའི་དོན་གྱི་ངང་ལ་གནས་པར་གྱུར་པ་ཉིད་མཐོང་བ་མེད་དེ་རང་གི་ལྟ་བས་སྒྲིབ་པས་སོ། །དེ་ཅིའི་ཕྱིར་ཞེ་ན། མདོ་སྡེའི་བྱང་ཆུབ་སེམས་དཔས་ནི། དོན་དམ་པར་མ་སྐྱེས་པ་ཟང་མ་ཅིར་ཡང་མི་སྣང་བའམ་སྣང་མ་མྱོང་བ་ཉིད་མཐའ་དང་བྲལ་བའི་ལྟ་བ་དམ་པ་སྐྱོན་མེད་པ་ཡིན་པར་ཞེ་བས་འདོད་དེ། དེ་ནི་གསང་སྔགས་དོན་གྱི་སྙིང་པོ་མ་མཐོང་བའི་འཁྲུལ་པ་ནོར་བའི་ཡུལ་ཡིན་པས་དེས་རྒྱུ་འབྲས་དབྱེར་མེད་པའི་དོན་མ་ནོར་བ་ཉིད་རྟོགས་སུ་བཏུབ་པ་མ་ཡིན་པའི་ཕྱིར་ཏེ་སྣང་སྟོང་དབྱེར་མེད་མཐའ་བྲལ་ཆེན་པོ་མ་རྟོགས་པར་སྟོང་པ་ལ་དམ་པར་འཛིན་པས་སོ། །འོ་ན་དབུ་མ་སྣང་མེད་པའི་ལུགས་སུ་དེ་ལྟར་ངེས་ཀྱང་། སྔགས་ཕྱི་པ་ནི་དེ་ལ་བསྐྲུན་དུ་མེད་དོ་སྙམ་ན། འདིར་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་ལ་ལྟོས་ན། སྔགས་ཕྱི་པ་གསུམ་གྱི་འདོད་པ་ཡང་། ལྟ་བའི་ཀློང་ལས། ཀུན་རྫོབ་སྣང་བ་ལྷ་ཚིགས་གསུམ། །རྗེ་དང་འབངས་འདྲ་དོན་དམ་པར། །དག་པའི་མཐའ་རུ་ལྟ་བ་དང་། །རིགས་བཞི་དཔོན་གཡོག་དོན་དམ་པར། །སྤྲོས་དང་བྲལ་བར་ལྟ་བ་དང་། །སྣང་བ་རིགས་ལྔ་གྲོགས་པོའི་ཚུལ། །དམ་པར་རྣམ་སྣང་ཆེན་པོར་ལྟ། །ཞེས་གསུངས་པ་ལྟར་མཐར་ཐུག་དབྱེར་མེད་དུ་འདོད་པ་ཙམ་ཡོད་ཀྱང་། བདེན་གཉིས་ཀྱི་ཁས་ལེན་ཅན་དུ་སོང་བས་ན། མཐའ་བྲལ་ཕྱོགས་རིས་སུ་གྱུར་པའི་དོན་དམ་དུ་བཞག་པ་དེ་ཉིད་ཀུན་རྫོོབ་ཀྱི་སྣང་བ་དང་བྲལ་བར་འགྱུར་པས། རིན་པོ་ཆེ་གཏེར་གཏད་པ་ལས། དག་བདེན་གཙང་སྦྲ་དགོས་པས་འཁྲུལ། །ཞེས་པ་དང་། སྔ་ཕྱི་གཉིས་སྐྱོན་རྗེས་སུ་གནོད། །ཅེས་པ་དང་། རྣམ་སྣང་ཆེན་པོ་ཕྱོགས་མེད་ན། །ཐ་དད་རིགས་ལྔ་ཕྱོགས་བཅས་ཅི། །རེས་འཇོག་བསམ་གཏན་གཅིག་སྒྲུབ་པ། །ཚ་གྲང་རེག་པ་གཅིག་བསྡུས་ནས། །གཅིག་སྒྲུབ་འདོད་པའི་བླུན་པོ་འདྲ། །ཞེས་གསུངས་པ་ལྟར་ངེས་པར་འགྱུར་ཏེ། ཞིབ་པར་འདི་ཉིད་དང་གཡུ་ཐང་སོགས་ལས་ཤེས་པར་བྱའོ། །དེས་ན་སྒྲ་ཐལ་འགྱུར་ཆེན་པོ་ལས། ལ་ལ་ཡུལ་ལ་བརྟེན་པ་ཡིས། །བདེན་དང་རྫུན་གྱི་ཁྱད་པར་འབྱུང་། །ལ་ལ་དམིགས་པ་མེད་པ་ལས། །གཟུ་བོ་ཙམ་གྱིས་ཤེས་པར་གཟུང་། །ལ་ལ་འཁོར་འདས་འདོད་པ་ཡང་། །བདེན་པ་གཉིས་ལས་སེམས་གཉིས་འཁྲུལ། །དེ་ལས་སྣང་རྐྱེན་ཉོན་མོངས་སོགས། །ཞེས་གསུངས་པ་ལྟ་བུའི་ཕྱིར་རོ། །དེ་བས་ན་དབུ་མ་སོགས་ཀྱི་ཀུན་རྫོབ་དང་དོན་དམ་དུ་བཞག་པའང་སྐབས་འདིས་དེ་དག་ཐམས་ཅད་སེམས་ཀྱི་ཆོས་ཉིད་སྣང་བ་མཐོང་བ་དང་སྟོང་པ་མ་མཐོང་བ་གཉིས་དབྱེར་མེད་སྤྱོད་ཡུལ་དང་བྲལ་བའི་སྣང་ལ་རང་བཞིན་མེད་པའི་ངང་དུ་འདུས་པ་ཡིན་པས་ཕྱོགས་རིས་སུ་གྱུར་པའི་ཁས་ལེན་གཞན་ལྟ་ཅི་དབྱེར་མེད་ཙམ་དུ་འདོད་པའང་རྣམ་པ་ཀུན་ཏུ་མེད་དོ། །གསུམ་པ་ནི། ཀུན་འདུས་གསང་བའི། ཞེས་པ་ནས། མི་བརྩལ་བཞག་པའོ། །ཞེས་པའི་བར་གྱིས་བསྟན་ཏེ། འོ་ན་ཐེག་པ་ཆེན་པོའི་གསང་སྔགས་ཀྱི་ལུགས་ཉིད་གང་ཞེ་ན། ཕྱོགས་བཅུ་དུས་བཞིའི་སངས་རྒྱས་མ་ལུས་པ་ཀུན་འདུས་ནས་བཀའ་སྩལ་བར་མཛད་པའི་དོན་གྱི་སྙིང་པོ་རྟོགས་པར་དཀའ་བ་གསང་སྔགས་ཐེག་པ་ཆེན་པོའི་ལྟ་བའི་དགོངས་པ་དང་སྤྱོད་པ་གཏིང་དཔག་དཀའ་བས་འོག་མའི་ཡུལ་དུ་མ་གྱུར་པའི་ཟབ་མོ་དམ་པ་མཆོག་ཏུ་འཕགས་པའི་དོན་ནི་ཡོད་མེད་སོགས་ཀྱི་མཐའ་དང་བྲལ་ཞིང་བདེན་པ་གཉིས་ཀྱི་ཐ་སྙད་ལས་འདས་པར་རྒྱུ་རྐྱེན་མེད་པས་རང་བྱུང་གི་ཆོས་ཉིད་ཡུལ་མེད་དུ་གསལ་བས་རང་རིག་པའི་ཡེ་ཤེས་ཆེན་པོ་མངོན་སུམ་དུ་མ་འདྲེས་ཡོངས་རྫོགས་སུ་སྣང་སྟེ་མཐའ་གྲོལ་གཅིག་རྫོགས་ཀྱི་ངང་དུ་གྲོལ་བའི་དུས་ན། ཆོས་ཐམས་ཅད་ལྷུན་མཉམ་རྫོགས་པ་ཆེན་པོའི་རང་རིག་པའི་ཡེ་ཤེས་སུ་ལྷག་མ་མེད་པར་གསལ་བས་ན་དེ་ལ་མིང་དུ་རང་བྱུང་གི་ཡེ་ཤེས་དེ་ཁོ་ན་ཉིད་དེ་ཡང་དག་པར་མཐོང་བ་ཡིན་ནོ། །ཞེས་བྱ་སྟེ། ཀུན་བྱེད་ལས། ཀྱེ་བྱ་མེད་ཡུལ་ནི་མི་གནས་ནམ་མཁའ་འདྲ། །མི་གནས་དམིགས་པའི་ཡུལ་མེད་མི་རྟོག་ཆོས་ཀྱི་ལམ། །བསྔོ་བའི་ཆ་ཤས་ཕྲ་མོའི་ཡུལ་ལ་བྱུང་བ་སྟེ། །རྟོག་སྒོམ་ཆོས་ཀྱི་སྐུ་ནི་ཁྱད་པར་དོན་མེད་པས། །རང་འབྱུང་ཡེ་ཤེས་ཀུན་ཏུ་མི་རྟོག་ཇི་བཞིན་གནས། །བྱ་བྲལ་ཡུལ་ལ་མི་གནས་གཉེན་པོས་བཅོས་སུ་མེད། །ཅེས་སོ། །དེ་ལྟ་བུའི་ཡེ་ཤེས་ཆེན་པོ་དེ་ལ་དབྱེ་ན་ཡང་དག་པའི་དུག་ལྔའི་ལམ་གྱི་བདུད་རྩི་ཆེན་པོ་ལྔ་ཡོད། དེ་ཉིད་ལས། རང་འབྱུང་ཡེ་ཤེས་རྣམ་པ་ལྔ་ལམ་ནི། །རང་འབྱུང་རྒྱུ་རྐྱེན་མེད་པར་བྱུང་བ་ཡིན། །ཡེ་ཤེས་འགག་པ་མེད་པར་གསལ་བ་ཡིན། །ལམ་ནི་རྒྱུ་རྐྱེན་མེད་པས་བགྲོད་མི་དགོས། །མི་བགྲོད་རང་འབྱུང་ལྔ་ལ་ལམ་ལྔར་བཤད། །འདོད་པ་ཆོས་རྣམས་བདག་ཏུ་འདོད་པ་ཡིན། །ཆགས་པ་བདག་ཏུ་འདོད་པ་དེ་ལ་ཆགས། །ཞེ་བ་སྐྱེ་བ་མེད་པའི་རང་བཞིན་ལ། །སྡང་བ་ཆོ་འཕྲུལ་སྣ་ཚོགས་དེ་ལ་སྡང་། །གཏི་མུག་མི་རྟོག་པ་ཡི་ཏིང་འཛིན་གྱིས། །ཆོས་ཉིད་མཉམ་པ་ཉིད་ལ་དབྱེ་བསལ་མེད། །ང་ནི་མ་ནོར་བ་ཡི་བྱང་ཆུབ་སེམས། །དེ་བཞིན་ཉིད་དུ་ཡེ་ནས་རྒྱལ་བར་བྱེད། །ཐམས་ཅད་དེ་བཞིན་ཉིད་དུ་གཅིག་པ་ལ། །ཡིན་མིན་སྒྲོ་སྐུར་འདེབས་ལ་ཕྲག་དོག་བྱེད། །བགྲོད་དུ་མེད་པའི་ལམ་ལྔ་བསྟན་པ་ཡིན། །ཞེས་སོ། །དེ་ལྟར་སྤྱི་དང་ཁྱད་པར་གྱི་ངེས་ཚིག་དེ་དང་ལྡན་པའི་རིག་པ་རང་བྱུང་གི་ཡེ་ཤེས་ནི་ཐེག་པ་གཞན་གྱི་ཡེ་ཤེས་ལས་མཆོག་ཏུ་འཕགས་པ་ཡིན་ཏེ། བང་མཛོད་འཕྲུལ་གྱི་ལྡེའུ་མིག་ལས། རང་བྱུང་རྒྱུ་རྐྱེན་མེད་པ་ཡིན། །ཡེ་ཤེས་སྒྲིབ་པ་མེད་པ་ཡིན། །རང་བྱུང་ཡེ་ཤེས་ཆེན་པོ་དེ། །རྒྱུ་རྐྱེན་གཞན་གྱིས་མ་བསྐྱེད་ཅིང་། །རྩོལ་སྒྲུབ་དག་ལས་མི་འབྱུང་བས། །རང་བྱུང་གཞན་ལ་རག་མ་ལས། །ཡུལ་ལས་བྱུང་བའི་ཡེ་ཤེས་དེ། །ཡུལ་ལས་བྱུང་བས་རང་བྱུང་མིན། །ཡུལ་ལ་འཕེལ་འགྲིབ་ཡོད་པའི་ཕྱིར། །ཡེ་ཤེས་དེ་ཡང་གསལ་འགྲིབ་བཅས། །ཞེས་སོ། །དེ་ལྟ་བུའི་རང་བྱུང་ཆེན་པོའི་ཡེ་ཤེས་དེ་ནི་མ་འདྲེས་ཡོངས་སུ་རྫོགས་པ་ཉིད་དེ། སྔ་མ་ལས། མཁའ་ལ་གཟུགས་སོགས་མ་འདྲེས་པ། །ཆུ་ནང་ཕྱོགས་སུ་ཡོངས་སུ་རྫོགས། །འབྱུང་བ་རྣམ་བཞི་མ་འདྲེས་པ། །ནམ་མཁའི་ངང་དུ་ཡོངས་སུ་རྫོགས། །སྣ་ཚོགས་སྣལ་མ་མ་འདྲེས་པ། །ཟ་འོག་སྣམ་བུར་ཡོངས་སུ་རྫོགས། །ཚོན་རྩི་སྣ་ལྔ་མ་འདྲེས་པར། །དཀྱིལ་འཁོར་ཆེན་པོར་ཡོངས་སུ་རྫོགས། །རིན་ཆེན་སྣ་ལྔ་མ་འདྲེས་པ། །མཆོག་རབ་རི་ལ་ཡོངས་སུ་རྫོགས། །ཆོས་ཅན་ཕྱོགས་ནས་མ་འདྲེས་པ། །ཆོས་ཉིད་ཕྱོགས་སུ་ཡོངས་སུ་རྫོགས། །བསམ་དབང་ཕྱོགས་ནས་མ་འདྲེས་པ། །དངོས་དབང་ཕྱོགས་སུ་ཡོངས་སུ་རྫོགས། །ཀུན་རྫོབ་ཕྱོགས་ནས་མ་འདྲེས་པ། །དོན་དམ་ཕྱོགས་སུ་ཡོངས་སུ་རྫོགས། །འཁྲུལ་རྟོག་ཕྱོགས་ནས་མ་འདྲེས་པ། །གཉིས་མེད་ཡེ་ཤེས་ཡོངས་སུ་རྫོགས། །བརྒྱད་ཀྱི་ལྟ་སྤྱོད་མ་འདྲེས་པ། །ཨ་ཏི་ཡོ་གར་ཡོངས་སུ་རྫོགས། །ཞེས་གསུངས་ཏེ་དཔེ་ཡི་མཚོན་པས་ཚིག་གི་ལྡེ་མིག་གིས་དོན་དམ་ངེས་པའི་གསང་སྒོ་ཕྱེ་བའོ། །དེ་ལྟ་བུའི་དོན་གྱི་ནོར་བུ་མཆོག་གི་ཡེ་ཤེས་རང་རིག་པའི་ངོ་བོ་ལྷག་མ་མེད་པར་ཕྱོགས་བྲལ་དུ་རྫོགས་པ་དེ་ཉིད་རྫོགས་པ་ཆེན་པོ་ཁོ་ན་མ་གཏོགས་ཐེག་པའི་འོག་མས་རྟོགས་པ་མེད་དེ། དང་པོ་ལྷ་མིའི་ཐེག་པས་མི་རྟོགས་པའི་ཚུལ་ནི། དེ་ཉིད་ལས། མུན་པའི་འཁོར་སྒོ་ཕྱེ་བ་ནི། །ཉོན་མོངས་དུག་གསུམ་སྒོ་ཡིས་བཅད། །ཉོན་མོངས་དུག་གསུམ་སྒོ་ཕྱེ་བས། །ཀུན་གཞི་སེམས་ཀྱི་ཁང་བུ་ན། །རང་ལ་ཡོད་པའི་རིན་པོ་ཆེ། །གཟུང་འཛིན་རྣམ་རྟོག་མཚན་མས་སྦས། །ནོར་བུ་རིན་ཆེན་དེ་རུ་སྟོར། །ཞེས་སོ། །དེ་བཞིན་དུ་མཚན་ཉིད་ཀྱི་ཐེག་པས་རྟོགས་པ་མེད་དེ། སྔ་མ་ལས། སྤྱོད་པའི་འདྲེན་སྒོ་ཕྱེ་བ་ནི། །མདོ་སྡེ་འདུལ་བ་མངོན་པ་གསུམ། །སྡེ་སྣོད་གསུམ་གྱི་སྒོ་ཡིས་བཅད། །སྡེ་སྣོད་གསུམ་གྱི་སྒོ་ཕྱེ་ནས། །ཆོས་སྤྱོད་དགེ་བའི་ལྡེ་མིག་གིས། །མཚན་ཉིད་ཐེག་པའི་སྒོ་ཕྱེ་སྟེ། །ལ་ལ་བདེན་བཞིའི་སྒོ་ནས་འཇུག །ལ་ལ་རྟེན་འབྲེལ་སྒོ་ནས་འཇུག །ལ་ལ་བདེན་གཉིས་སྒོར་ཞུགས་ནས། །ཀུན་གཞི་སེམས་ཀྱི་ཁང་བུ་ན། །ནོར་བུར་རིན་ཆེན་ཡོད་པ་དེ། །ཕྲ་རགས་ཤེས་པའི་སྒྲིབ་པས་བསྒྲིབས། །ནོར་བུ་རིན་ཆེན་དེ་རུ་སྟོར། །ཞེས་སོ། །དེར་མ་ཟད་སྔགས་ཕྱི་པ་གསུམ་གྱིས་ཀྱང་རྟོགས་པ་མེད་དེ། དང་པོ་བྱ་རྒྱུད་ཀྱིས་མི་རྟོགས་པའི་ཚུལ་ནི། སྔ་མ་ལས། ཐབས་ཀྱི་སྦྱོར་བའི་སྒོ་ཕྱེ་བས། །དག་པ་གསུམ་གྱི་སྒོར་ཞུགས་ཏེ། །ཀུན་གཞི་སེམས་ཀྱི་ཁང་བུ་ན། །ནོར་བུ་རིན་ཆེན་ཡོད་པ་དེ། །གཟུང་འཛིན་ཕྲ་མོའི་རྟོག་པས་བསྒྲིབས། །ནོར་བུ་རིན་ཆེན་དེ་རུ་སྟོར། །ཞེས་སོ། །གཉིས་པ་སྤྱོད་རྒྱུད་ཀྱིས་ཀྱང་མ་རྟོགས་ཏེ། དེ་ཉིད་ལས། ལྟ་སྤྱོད་གཉིས་ཀྱི་སྒོར་ཞུགས་ནས། ཀུན་གཞི་སེམས་ཀྱི་ཁང་བུ་ན། །ནོར་བུ་རིན་ཆེན་ཡོད་པ་དེ། །ཡེ་རྔམས་ཆོས་ཀྱི་སྒྲིབ་པས་བསྒྲིབས། །ནོར་བུ་རིན་ཆེན་དེ་རུ་སྟོར། །ཞེས་སོ། །གསུམ་པ་ཡོ་ག་པས་མ་རྟོགས་ཏེ། དེ་ཉིད་ལས། ཕྱག་རྒྱ་བཞི་ཡི་སྒོར་ཞུགས་ནས། །ཀུན་གཞི་སེམས་ཀྱི་ཁང་བུ་ན། །ནོར་བུ་རིན་ཆེན་ཡོད་པ་དེ། །བླང་དོར་གཉིས་ཀྱི་རྟོག་པས་བསྒྲིབས། །ནོར་བུ་རིན་ཆེན་དེ་རུ་སྟོར། །ཞེས་སོ། །དེར་མ་ཟད་མ་ཧཱ་ཡོ་གས་ཀྱང་ཡང་དག་པར་མ་རྟོགས་ཏེ། སྔ་མ་ལས། ཐབས་དང་ཤེས་རབ་སྒོ་ཕྱེ་ནས། །ཀུན་གཞི་སེམས་ཀྱི་ཁང་བུ་ན། །ནོར་བུ་རིན་ཆེན་ཡོད་པ་དེ། །རྩོལ་ཞིང་བསྒྲུབ་པའི་སྒྲིབ་པས་བསྒྲིབས། །ནོར་བུ་རིན་ཆེན་དེ་རུ་སྟོར། །ཞེས་སོ། །དེར་མ་ཟད་ཨ་ནུ་ཡོ་གས་ཀྱང་ཇི་བཞིན་པར་མ་རྟོགས་ཏེ། སྔ་མ་ལས། དབྱིངས་དང་ཡེ་ཤེས་སྒོར་ཞུགས་ནས། །ཀུན་གཞི་སེམས་ཀྱི་ཁང་བུ་ན། །ནོར་བུ་རིན་ཆེན་ཡོད་པ་དེ། །རྒྱུ་འབྲས་འདས་པའི་སྒྲིབ་པས་བསྒྲིབས། །ནོར་བུ་རིན་ཆེན་དེ་རུ་སྟོར། །ཞེས་སོ། །དེ་བས་ན་ཐེག་པ་བརྒྱད་ཀྱིས་མ་རྟོགས་ཏེ། །དེ་ཉིད་ལས། རིམ་པ་བརྒྱད་ཀྱི་ལྟ་བ་ཡིས། །རང་ལ་ཡོད་པའི་རིན་པོ་ཆེ། །རང་རང་ལྟ་སྤྱོད་རྩོལ་བས་བསྒྲིབས། །ནོར་བུ་རིན་ཆེན་མཐོང་བ་མེད། །ཞེས་སོ། །དེ་ལྟ་བུའི་རྟོགས་པར་དཀའ་བའི་གསང་བ་ཟབ་མོ་དབྱིངས་ཇི་བཞིན་པའི་ངོ་བོ་དེ་ཉིད་ཐེག་མཆོག་རྫོགས་པ་ཆེན་པོས་རང་རིག་རང་གྲོལ་དུ་རྟོགས་པ་ཡིན་ཏེ། སྔ་མ་ལས། ངེས་པའི་གསང་སྒོ་ཕྱེས་ནས་ནི། །གཉིས་མེད་ཡེ་ཤེས་སྒོར་ཞུགས་ཏེ། །རང་བྱུང་ཡེ་ཤེས་ཆེན་པོ་ཡིས། །མ་བཅོས་མཉམ་བཞག་མིག་གིས་བལྟས། །སྣང་མེད་སེམས་ཀྱི་དོན་མཐོང་བས། །མ་མཐོང་བ་ཡི་མཐོང་བའི་མིག །བརྒྱད་ཀྱིས་མ་མཐོང་རིན་པོ་ཆེ། །ཤིན་ཏུ་རྣལ་འབྱོར་མིག་གིས་མཐོང་། །མཐོང་ཡང་དེ་ལ་ངོས་བཟུང་མེད། །ཞེས་སོ། །དེ་ལྟར་རྟོགས་པ་ནི་ཐེག་མཆོག་རྒྱལ་པོའི་ལྟ་བ་ནོར་འཁྲུལ་དང་བྲལ་བ་ཉིད་དེ། དེ་ཉིད་ལས། རྫོགས་པ་ཆེན་པོའི་ལྟ་བ་ནི། །མ་འདྲེས་ཡོངས་སུ་རྫོགས་པ་ཡིན། །ཀུན་བྲལ་ཅི་མ་སྤངས་པ་ཡིན། །རྒྱ་ཆད་ཕྱོགས་ལྷུང་མེད་པ་ཡིན། །ཡིན་ཚུལ་ངེས་པ་མེད་པ་ལ། །སྣང་ཚུལ་ཅིར་ཡང་སྣང་བ་ཡིན། །རང་བཞིན་གཅིག་ཏུ་མ་ངེས་པས། །ལྟ་བ་ངོས་གཟུང་མེད་པ་ཡིན། །ཞེས་སོ། །དེ་ལྟ་བུའི་དོན་གྱི་གནས་ལུགས་མཐོང་བ་ནི་མཐའ་བྲལ་ཡོངས་རྫོགས་ཀྱི་ལྟ་བ་མཚན་ཉིད་པ་ཡིན་པས། ཡོད་པའི་མཐའ་དང་བྲལ་བས་དངོས་པོའི་ཕྱོགས་སུ་མ་ལྷུང་། མེད་པའི་མཐའ་དང་བྲལ་བས་སྟོང་པའི་ངོ་བོར་མི་འཛིན། གཉིས་ཀའི་མཐའ་དང་བྲལ་བས་རང་རྒྱུད་དུ་འཛིན་པ་གང་ཡང་མི་གནས། གཉིས་མེད་ཀྱི་མཐའ་དང་བྲལ་བས་ཕྱོགས་རིས་ཀྱིས་ངོས་གཟུང་ཕྲ་བའང་མེད་དོ། །དེ་བས་ན་སྟོང་པའི་མཐའ་དང་བྲལ་བས་ཡུལ་མེད་དུ་རང་གསལ་མི་སྟོང་པའི་མཐའ་དང་བྲལ་བས་བློ་དངོས་ཀྱི་ཆོས་ལས་འདས། གཉིས་ཀའི་མཐའ་དང་བྲལ་བས་གསལ་སྟོང་གང་དུ་ཡང་མི་རྟོག །གཉིས་མེད་ཡི་མཐའ་དང་བྲལ་བས་དགག་སྒྲུབ་གང་ཡང་མེད་དེ། མཐའ་དང་བྲལ་བས་དུ་མ་མ་གྲུབ། ཡོངས་སུ་རྫོགས་པས་གཅིག་ཏུ་མ་ངེས་ཏེ་བརྗོད་བྲལ་བློ་ལས་འདས་པ་ཉིད་དོ། །འོ་ན་རྫོགས་ཆེན་མ་ཡིན་ཏེ་མཐའ་སྤོང་བར་འདུག་གོ་ཞེ་ན། ཡོད་པ་རྫོགས་པས་བརྩལ་དུ་མེད། མེད་པར་རྫོགས་པས་སྤང་དུ་མེད། གཉིས་ཀ་རྫོགས་པས་རྒྱ་གར་ཡང་མ་ཆད། གཉིས་མེད་རྫོགས་པས་ཕྱོགས་གང་དུའང་མ་ལྷུང་བར་མངོན་སུམ་དུ་རྟོགས་པས་འཁོར་བའི་ལམ་རྒྱུད་བཅད་པ་ཡིན་ཏེ། སྒྲ་ཐལ་འགྱུར་ལས། འཁོར་བའི་ལམ་རྒྱུད་གཅད་འདོད་ན། །བྱ་བ་བྲལ་བར་རྫོགས་པས་རྫོགས། །མཐའ་དང་བྲལ་བས་དབུས་མི་གནས། །ཡོངས་སུ་རྫོགས་པས་དངོས་དང་བྲལ། །ལྷག་མ་མེད་པས་ཆ་ཤས་མིན། །གཅིག་ཏུ་མ་ཡིན་གཉིས་མཐའ་ཟད། །དུ་མར་མི་སྣང་གཅིག་ལས་འདས། །བརྗོད་དུ་མེད་པས་ཚིག་གི་གཞི། །དངོས་བྲལ་སྟོང་པ་སྙིང་པོའི་དོན། །ཕྱོགས་སུ་མ་ལྟུང་ལྟ་བའི་དོན། །འདི་ཤེས་འཁོར་བའི་ལམ་འགག་གོ། །ཞེས་དང་། མཐའ་གྲོལ་འགག་པ་མེད་པ་ལས། །ཡོངས་སུ་རྫོགས་པས་ཏིང་འཛིན་གནས། །ཆེན་པོ་ཡིན་པས་གོང་ན་མེད། །རང་བཞིན་གཡོས་པ་མེད་ཕྱིར་རོ། །ཞེས་སོ། །ཚུལ་འདི་ལྟ་བུའི་དོན་ལ་གཞན་དྲིང་མི་འཇོག་པའི་ངེས་པ་རྙེད་པའི་ཚེ་ན། ཡེ་ཤེས་རྫོགས་པ་ལས། མཐའ་དབུས་མེད་པའི་གཞལ་ཡས་ན། །རང་འབར་ཡེ་ཤེས་རྫོགས་སངས་རྒྱས། །རང་བྱུང་རིག་པ་འཁོར་མཐའ་མེད། །ལྷུན་གྲུབ་ཕོ་བྲང་ཆེན་པོར་ནི། །སྤྱན་དྲངས་མ་ཡིན་ཡེ་སངས་རྒྱས། །ཞེས་དང་། ཀུན་བཟང་འབར་བའི་ཡེ་ཤེས་ལ། །གཟུང་འཛིན་གཉེན་པོ་བརྟེན་མི་དགོས། །ཐོགས་མེད་རང་བྱུང་ཕྱོགས་དང་བྲལ། །བྱང་ཆུབ་རང་སེམས་ཁོ་ན་བས། །ལམ་གྱིས་མ་བཅོས་ཡེ་སངས་རྒྱས། །གང་སྣང་རིག་པ་ཅིར་རྟོག་ཀྱང་། །རང་རིག་བདེ་ཆེན་མངོན་སུམ་གསལ། །འདོད་པའི་སྐབས་བྲལ་གང་མཐོང་ཚོར། །རང་གཞག་ཡེ་ཤེས་རྫོགས་པ་མཐོང་། །ཞེས་གསུངས་པའི་དོན་ལ་ཡིད་ཆེས་ལྷག་པར་སྐྱེ་བར་འགྱུར་རོ། །དེ་བས་ན། སེམས་ཙམ་པས་མྱོང་བ་གཉིས་མེད་རང་གསལ་དང་ཨ་ནུ་མན་ཆད་ཀྱི་རང་རིག་པའི་ཡེ་ཤེས་ལས། རྫོགས་པ་ཆེན་པོའི་མ་འདྲེས་ཡོངས་རྫོགས་མཐའ་བྲལ་རང་གྲོལ་ཆེན་པོའི་རང་བྱུང་གི་ཡེ་ཤེས་ཕྱོགས་མེད་བདེ་བ་ཆེན་པོ་ཀུན་བྲལ་ཅི་མ་སྤང་བའི་རང་རིག་འོད་གསལ་སྙིང་པོ་ཉིད་ཁྱད་པར་དུ་འཕགས་པའི་ཆེ་བ་ཟབ་མོ་ལ་ངེས་པ་རྙེད་པའི་ཕྱིར་ཅུང་ཟད་བསྟན་པ་ཡིན་ནོ། །འོན་ཀྱང་དོན་གྱི་ངོ་བོ་རང་སྣང་གི་དེ་བཞིན་ཉིད་ལ་ལེགས་པར་བསམ་ན། སྙིང་པོ་དོན་གྱི་རྒྱུད་ལས། ལྟ་བ་རང་བྱུང་རྫོགས་པའི་ལུང་། །མ་ལུས་ཀུན་འདུས་རྣམ་པར་དག །ཐིག་ལེ་གཅིག་ཏུ་ཀུན་རྫོགས་པས། །རང་བྱུང་སྙིང་པོ་གཅིག་ལ་རོལ། །གསང་བའི་ཐིག་ལེ་ཀུན་གྱི་དབྱིངས། །མུ་མཐའ་མེད་པར་རང་བཞིན་གནས། །ཐམས་ཅད་གསང་བ་རང་བྱུང་སེམས། །རང་རིག་མ་རིག་རྣམ་པར་དག །རྟོག་འགྱུས་རིག་པའི་འདུ་ཤེས་སྤངས། །རིག་པ་ཏིང་འཛིན་གཏེར་གྱི་ལུང་། །རེ་དོགས་མེད་པའི་དབྱིངས་ལ་རོལ། །རང་རིག་ཡུལ་དབྱིངས་ལ་མི་གོས། །ཀུན་བཟང་སྟོང་ཉིད་མ་བཅོས་པས། །ཀུན་བཟང་ཐབས་ཀྱི་ཁྱད་པར་ཀུན། །མ་འདྲེས་གསལ་བར་རྫོགས་པའི་ཕྱིར། །མཁའ་ལ་གཟའ་སྐར་བཀྲམ་པ་འདྲ། །ཞེས་གསུངས་པ་ལྟར་ངེས་པས་མཆོག་ཏུ་རློམ་པའི་ཆོས་ནི་གང་ཡང་མེད་པར་ལ་བཟླའོ། །འོ་ན་ལྟ་བའི་དོན་དེ་ལྟར་ན་ཏིང་ངེ་འཛིན་ཇི་ལྟ་བུ་སྙམ་པ་ལ། དེ་ལྟར་བཤད་པའི་དགོངས་པ་དམ་པ་ཤེས་བརྗོད་ལས་འདས་པའི་དོན་ཉིད་ཇི་ལྟ་བར་རྟོགས་ཤིང་མཐོང་བའི་དུས་ཀྱི་ཚེ་ན། རྣམ་པར་རྟོག་པ་དང་གཟུང་འཛིན་གྱི་བག་ཆགས་མ་ལུས་པ་ཀུན་དུས་གཅིག་ཏུ་སངས་ཏེ་ཡེ་ཤེས་ཆེན་པོའི་ཀློང་དུ་རང་ཤར་བས་ན་དམིགས་པའི་མཐོང་ཡུལ་གཟུགས་སྒྲ་ལ་སོགས་པ་ཀུན་ལས་འདས་ནས་རང་གྲོལ་བར་གྱུར་པ་ཁོ་ན་སྟེ། དེའི་དོན་ལ་ཆེད་དུ་བྱ་བ་དང་ཕྱོགས་ཆར་གསལ་བ་ཅི་ཡང་མེད་པར་ངོ་བོ་གང་དུའང་སྣང་བ་མེད་དེ་བསམ་དཔྱོད་དང་དམིགས་པའི་སྒོ་ནས་འབྲས་བུའི་དོན་དུ་མི་བརྩལ་བར་གཡོ་བ་མེད་པར་གནས་པ་ཉིད་ནི། ཇི་བཞིན་པ་ཉིད་དུ་རྣལ་མར་ཕེབས་ཟིན་པས་ཐ་སྙད་དུ་མཉམ་པར་བཞག་པ་ཞེས་བྱ་བའོ། །དེ་སྐད་དུའང་། རྫོགས་པ་ཆེན་པོ་ཡེ་ཤེས་བདུན་འབྱུང་གི་རྒྱུད་ལས། དུས་གསུམ་རྒྱལ་བའི་སྙིང་པོ་ནི། །རིག་པའི་ཡེ་ཤེས་རང་གསལ་ཡིན། །ཟབ་མོ་གསང་བའི་ངེས་དོན་ལ། །ཕྱོགས་དང་ཕྱོགས་མིན་ཆོས་མི་གནས། །རིག་པ་རང་གསལ་ཡེ་ཤེས་ཉིད། །སྦྱང་བ་མ་ཡིན་གདོད་ནས་གྲུབ། །གཉེན་པོས་མ་བཙལ་དེ་བཞིན་ཉིད། །མ་བཅོས་མི་གནས་རང་བཞག་པས། །ཇི་བཞིན་རང་བྱུང་གནས་པས་གསལ། །སྣང་སྲིད་འཁོར་དང་འདས་པ་ཀུན། །རང་བྱུང་རིག་པར་རང་གསལ་བས། །སྒྲོ་དང་སྐུར་པའི་ཆོས་མི་གནས། །ཞེས་དང་། ས་ལེ་དམིགས་བྲལ་གཅིག་གི་ངང་། །མི་སྤྱད་མི་འཛིན་བསམ་དུ་མེད། །མཐའ་ཡི་འདུ་ཤེས་རྒྱུ་བ་མེད། །བསལ་པས་སྒྲིབ་པས་དོན་མི་ཤེས། །གང་དུའང་མི་བསམ་མི་སྤྱད་དེ། །རང་བཞིན་རིག་པ་ཉིད་ཀྱིས་གསལ། །ཉམས་མྱོང་བསམ་རྟོག་ཡུལ་ཞེས་བྲལ། །ཞེས་སོ། །བཞི་པ་ལ་གཉིས་ཏེ། གཉིས་མེད་རང་གསལ་དུ་བསྒོམ་དགོས་པར་བསྟན་པ། བློ་བཅོས་ནས་བསྒོམ་པའི་སྐྱོན་བཤད་པའོ། །དང་པོ་ནི། དམིགས་པའི་ཡུལ་མེད། ཅེས་པ་ནས། དེ་ཉིད་ཚོགས་གཉིས་རྫོགས། །ཞེས་པའི་བར་གྱིས་བསྟན་ཏེ། དེ་ལྟར་རྟོགས་ནས་ཡང་དག་པར་སྒོམ་པ་དེའི་དུས་ན་དམིགས་པར་བྱ་བའི་ཡུལ་མེད་པར་རིག་པ་ཇི་བཞིན་པ་ཉིད་དུ་རང་སྣང་བ་ལ་ཆོས་ཉིད་ཡུལ་དུ་བྱེད་པའི་ལམ་གྱི་རྣམ་པར་སྣང་བའི་ཏིང་ངེ་འཛིན་གྱི་རོ་ལ་ཞེན་ཅིང་ཆགས་པ་ཡོངས་སུ་སྤངས་པས་འཛིན་མེད་རང་གྲོལ་དུ་གནས་པར་བྱའོ། །དེ་ལ་བློ་བཅོས་པའི་ཐབས་གང་ཞེ་ན། དེ་ལྟར་དོན་སྒོམ་པའི་ཚེ་ཐམས་ཅད་གཉིས་མེད་མཉམ་གྲོལ་དུ་ཤེས་པས་རྣམ་རྟོག་ཅི་སྐྱེས་དང་གཟུགས་མཐོང་སྒྲ་ཐོས་ལ་སོགས་པའི་བྱུང་ཚོར་ཇི་ལྟར་བྱུང་ཡང་། དེ་ཉིད་ཀུན་མཉམ་བདེ་བ་ཆེན་པོའི་དོན་དུ་རྟོགས་པའི་ལམ་མཆོག་ཉིད་དུ་རང་གསལ་བའི་ངོ་བོར་གྱུར་པས་སྤོང་དུ་མེད་པར་མུ་མེད་མཐའ་དབུས་ལས་གྲོལ་བས་རང་བྱུང་མཉམ་པ་ཉིད་དུ་གདལ་བའི་ཆོས་ཉིད་ཀྱི་དབྱིངས་སུ་གསལ་བ་ལས། འགྲེ་ལྡོག་དང་སྤྱིའུ་ཚུགས་ལ་སོགས་པ་གང་ལྟར་འགྱུར་ཞིང་གང་ལྟར་སྣང་བར་གྱུར་ཀྱང་སྙིང་པོ་དོན་གྱི་དབྱིངས་དེ་ལས་གར་ཡང་མ་གཡོས་པར་འབྱུང་བ་ལ་འབྱུང་རྒྱུ་མེད་དེ་ཚོགས་དྲུག་རང་གྲོལ་གྱི་དེ་ཁོ་ན་ཉིད་ལས་འཕོ་འགྱུར་མེད་པའོ། །དེ་ལྟར་རྣམ་རྟོག་སྤོང་དུ་མེད་པ་དེ་ཡི་གཏན་ཚིགས་ནི། ཆོས་ཐམས་ཅད་སེམས་ཉིད་མ་བཅོས་པའི་དེ་བཞིན་ཉིད་ཀྱི་ཆོས་ཉིད་ཡིན་པས་རང་བཞིན་གྱི་གཏན་ཚིགས་ཀྱིས་མངོན་པར་གསལ་ཞིང་ཡང་དག་པར་གྲུབ་པའོ། །དེ་བས་ཆོས་ཉིད་བྱང་ཆུབ་ཀྱི་སེམས་མ་ནོར་བར་རྟོགས་པ་དེ་ཡི་དོན་ལ་རྒྱལ་བའི་དགོངས་པ་མ་ལུས་པ་ཀུན་འདུས་པ་ཉིད་ཡིན་ཀྱང་གཞུང་ཆེན་པོ་འདིའི་ལུགས་ཀྱིས་དེ་ལའང་རིག་པའི་ཡུལ་དུ་རྟོག་ཅིང་དཔྱོད་པར་མི་མཛད་པས་མཉམ་ཉིད་རྫོགས་པ་ཆེན་པོའི་དོན་དུ་ངེས་པའོ། །དེ་ཅིའི་ཕྱིར་ཞེ་ན། འཁོར་འདས་ཀྱི་ཆོས་ཇི་སྙེད་པ་ཐམས་ཅད་ཀུན་ཀྱང་རྒྱུ་རྐྱེན་མེད་པར་རང་བྱུང་བས་རང་རིག་པའི་ཡེ་ཤེས་ཆེན་པོའི་ངོ་བོར་རང་གསལ་བར་སྣང་བ་ལ། རྒྱུ་རྐྱེན་མེད་པར་ཤར་བའི་རང་སྣང་དེ་ཉིད་ཀྱང་ངོ་བོ་ཡེ་གདོད་མ་ནས་འདི་འདྲར་མི་ཟིན་པས་མ་བྱུང་མ་སྐྱེས་པའི་ཆོས་ཀྱི་དབྱིངས་ཏེ། དེས་ན་དབྱིངས་ཉིད་རིག་པའི་ཡེ་ཤེས་ལ་ཡེ་ཤེས་ཉིད་ཀྱང་དབྱིངས་ཡིན་པས་དབྱེར་མེད་པ་ལ་ཡུལ་མེད་པའི་ཕྱིར་རོ། །དེ་བས་ན་འཁྲུལ་ངོ་ལ་རྒྱུ་འབྲས་སུ་སྣང་ཡང་། དོན་གྱི་ངོ་བོ་ལ་ད་ལྟ་རྒྱུ་ལ་འབད་པ་དང་། དེའི་འབྲས་བུ་ཕྱིས་སུ་སྣང་བའི་འཕོ་འགྱུར་དུ་བཏགས་པ་ཡོང་ཡེ་མེད་པར་རང་བཞིན་འདུས་མ་བྱས་པ་ཉིད་དེ། དེ་ལྟར་དབྱེར་མེད་པའི་དོན་མཆོག་ཟབ་མོ་གང་གིས་ཡང་དག་པར་རིག་ཅིང་ངེས་པར་རྟོགས་པ་དེ་ཉིད་ཀྱིས་ནི་ཚོགས་གཉིས་མ་བསགས་པར་དུས་གཅིག་ཏུ་རྫོགས་ཤིང་འབྲས་བུ་རྣམ་གཉིས་ལྷུན་གྱིས་གྲུབ་པར་དངོས་སུ་གྱུར་པ་སྟེ། ཀློང་རབ་འབྱམས་རྒྱལ་པོ་ལས། བསོད་ནམས་ཡེ་ཤེས་བྱང་ཆུབ་སེམས་ལ་རྫོགས། །སྤྱད་པས་མི་འཛད་མ་བསགས་བྲི་བ་མེད། །ཀློང་ཡངས་ནམ་མཁའ་རྒྱ་མཚོ་ལྟ་བུ་ཡི། །ཚོགས་ཆེན་རྣམ་གཉིས་རང་རིག་ངང་ལ་རྫོགས། །ཞེས་སོ། །དེ་ལྟར་དོན་ངེས་པར་མཐོང་ནས་སྒོམ་པས་ཉམས་སུ་ལེན་པའི་ཚུལ་རྒྱུད་དང་མན་ངག་རྣམས་ལས་ཤིན་ཏུ་མང་པོར་གསུངས་ཀྱང་། གནད་ཀྱི་ཡང་སྙིང་ཙམ་ནི། ཀུན་བྱེད་རྒྱལ་པོའི་སྤྱིའི་བཤད་རྒྱུད་རྒྱ་མཚོ་དང་མཉམ་པ་རྙོག་པ་མེད་པ་ལས། དང་པོ་ཞི་གནས་དུས་སུ་ནི། །དྲན་པ་ཤེས་བཞིན་རྩི་ཡིས་བཟུང་། །དཔེར་ན་གླང་ཆེན་ལྕགས་ཀྱུ་བཞིན། །མ་ཡེངས་དྲན་པས་རང་སར་གྲོལ། །གཉིས་པ་མཉམ་བཞག་དུས་སུ་ནི། །ཤེས་བྱ་ཆོས་ཉིད་བུམ་པར་གཞུག །གསེར་བུམ་ཏིལ་གྱི་སྒྲོན་མ་བཞིན། །འགྱུར་མེད་རིག་པ་ནང་ན་གསལ། །གསུམ་པ་རྗེས་ཐོབ་དུས་སུ་ནི། །དབང་པོ་མི་དགག་རང་ཡན་བཞག །གསེར་གླིང་བརྡལ་བའི་ཀླུང་ཆེན་བཞིན། །གང་བལྟས་རྫོགས་པ་ཆེན་པོའི་ཀློང་། །ཐ་མ་ལྷག་མཐོང་དུས་སུ་ནི། །མཚན་མ་རང་གྲོལ་བློས་མ་རིག །དུག་སྦྲུལ་འབར་བའི་མདུད་པ་བཞིན། །རྩོལ་སྒྲུབ་མེད་པར་རང་སར་གྲོལ། །ཞེས་གསུངས་པ་ལྟར་ངེས་ནས་བརྩོན་པར་བྱའོ། །གཉིས་པ་ནི། དོན་ལ་མཉམ་བཞག །ཅེས་པ་ནས། དོན་དང་འཕྲད་མི་འགྱུར། །ཞེས་པའི་བར་གྱིས་བསྟན་ཏེ། འོ་ན་བྱུང་ཚོར་གང་ཡང་མི་བཅོས་སམ་ཞེ་ན། བློས་ཆོས་ཉིད་ཀྱི་དོན་ཕྱོགས་གཅིག་ཏུ་གྱུར་པ་ལ་དམིགས་ཏེ་མཉམ་པར་བཞག་ནས་བྱུང་ཚོར་གྱི་བློ་ཐམས་ཅད་གཉིས་ཅན་དུ་མཐོང་སྟེ་བཅོས་པར་བྱས་ནས་སྒོམ་པའི་སྐྱོན་ཉིད་ནི། ད་དུང་གཉིས་སུ་མཐོང་བ་དང་མ་བྲལ་བས་གསང་སྔགས་ཐེག་པ་ཆེན་པོ་འདིའི་གཞུང་གི་གསང་བ་གཉིས་མེད་མཉམ་ཉིད་རང་གྲོལ་དེ་དང་འགལ་ཞིང་། བསམ་རྟོག་གི་འཛིན་པ་དེའི་སྐྱོན་གྱིས་དོན་གྱི་ཆོས་ཉིད་དངོས་དང་འཕྲད་དེ་ཡང་དག་པར་རྟོགས་པར་ཡང་མི་འགྱུར་ཏེ། ཡེ་ཤེས་བདུན་འབྱུང་གི་རྒྱུད་ལས། རང་བཞག་རིག་པའི་རྒྱུད་ཚིག་གིས། །ཇི་བཞིན་མ་བཅོས་ངོ་བོ་ལ། །བརྗོད་བྲལ་རང་བཞག་དགོངས་པ་ཡིན། །རང་བྱུང་དབྱིངས་ལས་གསལ་བར་བྱེད། །མ་བཅོས་གསང་བའི་དགོངས་པ་ལ། །བཅོས་མའི་རྣལ་འབྱོར་ལོག་པའི་ལས། །མཚན་བྲལ་བཅོས་མེད་སྙིང་པོ་ལ། །འཛིན་པའི་རྣམ་རྟོག་ལོག་པའི་ལུང་། །གང་དག་རང་འདོད་ཕྱོགས་ཆ་ཡིས། །འཛིན་པ་སོ་སོར་མཐོང་བ་ཡིས། །ཕྱོགས་བྲལ་ཡེ་ཤེས་ཆེན་པོ་ལ། །བཙལ་ཞིང་སྤྱད་པས་དོན་མི་མཐོང་། །ཅིར་སྣང་གཅིག་གི་ངོ་བོ་ལ། །ཡེངས་པ་མེད་པས་ཀུན་ཏུ་གསལ། །ཉམས་མྱོང་བརྗོད་བྲལ་གསལ་འཛིན་མེད། །འདི་ལ་ཕྱོགས་རིས་གདོད་ནས་མེད། །ཅེས་དང་། རྒྱ་མཚོ་དང་མཉམ་པ་རྙོག་པ་མེད་པའི་རྒྱུད་ལས། རྫོགས་ཆེན་རིས་མེད་ཆོས་ཆེན་པོ། །ཐོད་རྒལ་བློ་ཡི་བདུད་རྩི་འདི། །སྐལ་མེད་རྨོངས་པའི་བདུད་དུ་འགྱུར། །དཔེར་ན་དུག་གི་རང་བཞིན་ལ། །རྨ་བྱ་དག་ལ་རྒྱན་གྱིས་མཛེས། །གཞན་རྣམས་ལ་ནི་དུག་གིས་འཇིག །ཐམས་ཅད་རྫོགས་པའི་བདེ་ཆེན་པོ། །སྐྱེ་འགག་མེད་པར་ལྷུན་གྱིས་གྲུབ། །ཁྱབ་གདལ་མ་བཅོས་ཡེ་སངས་རྒྱས། །སྤྲོས་བྲལ་གཉིས་མེད་ཁོ་ནའོ། །ཞེས་སོགས་མང་ངོ་། །ལྔ་པ་ལ་གཉིས་ཏེ། ཡོན་ཏན་ལྷུན་གྱིས་གྲུབ་ཚུལ་བཤད་པ། དྲོད་རྟགས་རྫོགས་ཤིང་ཐེ་ཚོམ་དང་བྲལ་བར་བསྟན་པའོ། །དང་པོ་ནི། དེ་ལ་ངེས་བློ། ཞེས་པ་ནས། རྒྱུ་འབྲས་ལྷུན་གྱིས་གྲུབ། །ཞེས་པའི་བར་གྱིས་བསྟན་ཏེ། འོ་ན་དོན་མ་ནོར་བ་དངོས་གང་ཡིན་ཞེ་ན། དེ་ལྟར་གཉིས་སུ་མེད་པའི་དོན་དེ་ལ་ཡང་དག་པར་ངེས་པའི་བློ་གྲོས་ཀྱིས་འཛིན་པ་མེད་པར་རིག་པ་རང་གསལ་དུ་རྟོགས་པ་ཉིད་གདེངས་དང་ལྡན་པར་གྱུར་པས་དེ་ཉིད་གདལ་ཁྱབ་ཆེན་པོའི་ངང་དུ་ཕྱོགས་རིས་མེད་པར་བཏང་ནས་དམིགས་བཅོས་ཀྱིས་རྩོལ་བ་གང་ཡང་མེད་པ་ནི། གཉིས་མེད་མཉམ་པ་ཉིད་ཀྱི་དོན་དེ་དང་མི་འགལ་བས་མི་མཐུན་པ་མེད་ཅིང་སེམས་ཀྱི་རང་བཞིན་ཡེ་ནས་དག་པ་དེ་ཉིད་མ་ནོར་བར་ངེས་པ་སྟེ། དེས་ན་རང་རིག་པའི་ཡེ་ཤེས་དེ་ཉིད་ཇི་ལྟ་བར་རྟོགས་ཏེ་རང་གསལ་དུ་གདལ་བའི་དུས་ན་དེ་ལ་གཉིས་པའི་ཆོས་གང་ཡང་མ་དམིགས་པས་ཡེ་ནས་གཉིས་སུ་མེད་པའི་རང་གྲོལ་ཆེན་པོ་ཡིན་ཏེ། སྙིང་པོ་བྱང་ཆུབ་དེ་ཉིད་ཆོས་ཀུན་གྱི་བཅུད་དུ་གྱུར་པས་རྒྱུ་ལམ་དང་འབྲས་བུ་སངས་རྒྱས་ཀྱི་ཆོས་ཐམས་ཅད་འདུས་ཤིང་གཉིས་སུ་མེད་པའི་ལྷུན་གྱིས་གྲུབ་པ་ཡིན་པའི་ཕྱིར། ཁམས་གསུམ་སྒྲོན་མ་རྐྱེན་དང་བྲལ། །མ་རིག་མུན་སེལ་བློས་མ་རེག །གཞན་ནས་བཙལ་བས་རྙེད་མི་འགྱུར། །ཐིག་ལེ་བརྡལ་བའི་རང་བྱུང་བདེ། །རིག་པ་རང་ཤར་བཅོས་སུ་མེད། །ལྷུན་གྲུབ་བཙལ་དུ་གདོད་ནས་མེད། །སྙིང་པོའི་སྙིང་པོ་གཉིས་མེད་མཆོག །ཡེ་ནས་ཐ་སྙད་ཀུན་དང་བྲལ། །ཇི་བཞིན་གསལ་ལ་རྟོག་མེད་དེ། །དོན་དམ་སྤྲོས་མེད་ཡང་དག་དབྱིངས། །བཙལ་དུ་མེད་པས་སྒོམ་ཚིག་འདས། །ཇི་བཞིན་ཀློང་དུ་གྱུར་པས་ན། །རྣམ་དག་དོན་ལ་མཁས་པ་ཡིན། །གདོད་ནས་མ་སྐྱེས་བརྡལ་བའི་ཀློང་། །དོན་དམ་རྟོགས་པས་ཆོས་ཀྱི་སྐུ། །ལོངས་སྤྱོད་བདེ་ཆེན་རྒྱལ་པོའི་སྐུ། །ཡེ་ཤེས་རོལ་པ་སྤྲུལ་པའི་སྐུ། །ཐུགས་རྗེ་བྱང་ཆུབ་སེམས་དཔའི་ལམ། །མ་གཡོས་རྟོག་མེད་ཆོས་ཀྱི་ལམ། །རང་བཞིན་གནས་པས་བདེ་བའི་ཀློང་། །ཁམས་གསུམ་གསལ་བྱེད་སྒྲོན་མའི་མཆོག །བདེ་ཆེན་རང་བྱུང་ཐུགས་རྗེར་གསལ། །རིན་ཆེན་སྒྲོན་མས་ཐུགས་རྗེ་རྫོགས། །ཞེས་ཀུན་བྱེད་རྒྱལ་པོའི་སྤྱིའི་བཤད་རྒྱུད་རིན་པོ་ཆེ་དང་མཉམ་པ་སྐྱེ་བ་མེད་པའི་རྒྱུད་ལས་གསུངས་སོ། །དེ་བས་ན་ཐེག་མཆོག་རྫོགས་པ་ཆེན་པོའི་དགོངས་པ་ཐུན་མོང་མ་ཡིན་པའི་རང་རིག་གཉིས་མེད་བདེ་བ་ཆེན་པོ་རྩོལ་མེད་བྱ་བ་དང་བྲལ་བའི་རང་བྱུང་གི་ཡེ་ཤེས་ཇི་ལྟ་བ་བཞིན་ངེས་པ་ཤིན་ཏུ་གཅེས་པས་འདིར་ཡང་ཅུང་ཟད་བརྗོད་ན། འཇིག་རྟེན་ཕལ་པ་དང་མུ་སྟེགས་རྟག་ལྟ་བ་དང་། ཉན་རང་དང་སེམས་ཙམ་པ་རྣམས་ཀྱིས་ཡོད་པར་འདོད་ལ། མུ་སྟེགས་ཆད་སྨྲ་སྡེ་གསུམ་གྱིས་མེད་པར་འདོད་ཅིང་། དབུ་མ་དང་སྔགས་ཕྱི་པ་གསུམ་གྱིས་གཉིས་ཀར་འདོད་ལ། གསང་སྔགས་ནང་པ་གཉིས་ཀྱིས་གཉིས་མེད་དུ་བཞེད་པ་ལས། འདིར་ཞེན་པ་དགྲོལ་ཕྱིར་བསྟན་པ་མ་གཏོགས་དོན་ལ་མཐའ་བཞི་མ་སྤངས་བྲལ་ཏེ་རང་སར་གྲོལ་བས་མཐའ་སྣང་ཆོས་ཉིད་དུ་རྫོགས་པའི་རང་རིག་བདེ་བ་ཆེན་པོ་ཡིན་པས་ཁྱད་པར་མཆོག་ཏུ་འཕགས་པའི་གནད་ཟིན་པར་བྱ་སྟེ། བཀྲ་ཤིས་རིག་པ་ཁུ་བྱུང་གི་རྒྱུད་ལས། ཡང་དག་དབྱིངས་ལ་མཉམ་སྦྱར་བས། །ཆོས་རྣམས་ངོ་བོ་ཉིད་ཀྱི་ཞིང་། །མི་སྐྱེ་མི་འགག་མི་དགོངས་ཕྱིར། །དེ་ལ་རྟག་ཆད་མཐར་མི་ཆགས། །ཡེ་ཤེས་རིག་པས་དོན་རིག་པས། །ཉམས་སུ་བླང་མེད་རང་རིག་ཉིད། །ཡེ་ཤེས་རང་རིག་འདི་འདྲ་ཞེས། །རྡོ་རྗེ་སེམས་དཔས་བསྟན་དུ་མེད། །ཀུན་རྫོབ་བརྗོད་ཡོད་མ་གཏོགས་པ། །ཡང་དག་བདེན་པ་ཉིད་དུ་ནི། །འཁོར་བ་མྱ་ངན་འདས་པའི་ཆོས། །རང་བཞིན་མེད་པས་ཡེ་ནས་ཞི། །གཅིག་ལས་དུ་མ་མེད་པར་གྱུར། །གཅིག་ལས་མཉམ་ཉིད་ཕྱོགས་བྲལ་བས། །དེ་དག་རང་བཞིན་མི་དམིགས་ཕྱིར། །ཐམས་ཅད་དེ་བཞིན་ཉིད་དུ་བཞག །རང་བྱུང་རང་ཞི་མཉམ་བཞག་པས། །མཚན་མའི་འགོག་པར་ལྟུང་མི་སྲིད། །དེ་ལྟར་དོན་ལ་རེག་གྱུར་ན། །ཅི་ལ་གནས་ཤིང་གང་ལ་ཆགས། །གང་ཞིག་འགོག་ཅིང་ཅི་ཞིག་བླང་། །མ་སྤངས་ལྷུན་གྲུབ་ཀུན་ཏུ་བཟང་། །སྐུ་གསུམ་ལྡན་པས་ཕོ་བྲང་མཆོག །ཅེས་དང་། ཀློང་རབ་འབྱམས་ལས། གསང་བའི་མདུད་འགྲོལ་འདི་ལྟ་སྟེ། །མཐའ་ལ་སྐྱོན་དུ་མི་ལྟ་བས། །འཆིང་དང་གྲོལ་བར་མི་བྱེད་དེ། །མཐའ་གཉིས་མ་སྤངས་རང་གྲོལ་བས། །གཉིས་མེད་ཙམ་དུ་མི་གནས་ཤིང་། །གཉིས་ཀ་ལྟར་ཡང་རང་ཤར་བས། །མཐའ་བཞི་རྒྱ་ཡན་ནམ་མཁའི་ཀློང་། །འཆིང་གྲོལ་གཉིས་མེད་རང་སར་བདེ། །ཞེས་དང་། སྒྲ་ཐལ་འགྱུར་ལས། རང་བཞིན་རྫོགས་པ་ཆེན་པོའི་མཐའ། །ཆོས་རྣམས་རང་སར་བཞག་པ་སྟེ། །སྣང་ཤེས་ཆོས་ཉིད་ཟུང་འཇུག་པས། །ཡེ་གྲོལ་ཅོག་བཞག་ཉིད་ལ་ཐུག །དགོངས་པ་བློ་ལས་འདས་པ་དང་། །མཚན་བཅས་རང་སར་དག་པ་དང་། །སྟོང་དང་དངོས་པོའི་མཐའ་གྲོལ་དང་། །འགྱུ་ཟད་རྟོག་པ་མེད་པ་དང་། །བློ་ཟད་ཡིད་ལས་འདས་པའོ། །ཞེས་སོགས་མང་ངོ་། །འདི་ལྟ་བུའི་རང་རིག་བདེ་བ་ཆེན་པོ་ཇི་བཞིན་པའི་དོན་འདི་ལ། །ཇི་ལྟར་བསྟན་ཀྱང་ངོ་བོ་འདྲ་བ་ལས་དམ་པ་རྣམས་ཀྱི་བཞེད་པའི་ཁྱད་པར་ཅུང་ཟད་བསྟན་ན། ཡང་སྤྲུལ་དགའ་རབ་རྡོ་རྗེས་རང་རིག་ལྷུན་གྲུབ་ཆེན་པོར་བཞེད། ཨོ་རྒྱན་མ་ཧཱ་རཱ་ཛ་དང་བི་མ་ལ་མི་ཏྲ་སོགས་ཀྱིིས་གཟའ་གཏད་དང་བྲལ་བར་བཞེད། དགེ་སློང་མ་ཀུན་དགའ་སོགས་ཀྱིས་རང་བྱུང་གི་ཡེ་ཤེས་སུ་བཞེད། སངས་རྒྱས་གསང་བ་སོགས་ཀྱིས་བྱ་བརྩལ་དང་བྲལ་བར་བཞེད། ཀུ་ཀུ་རཱ་ཛ་དང་ཤྲི་སིངྷ་སོགས་ཀྱིས་བདེ་བ་ཆེན་པོར་བཞེད། འཇམ་དཔལ་བཤེས་གཉེན་གྱིས་གཉིས་སུ་མེད་པར་བཞེད། སྲས་ཐུ་བོ་རཱ་ཛ་ཧསྟིས་ཐིག་ལེ་ཆེན་པོར་བཞེད། ལོ་ཙཱ་བ་ཆེན་པོ་བཻ་རོ་ཙ་ན་སོགས་ཀྱིས་བདག་ཉིད་ཆེན་པོར་བཞེད། ཡང་གསང་བདག་དགའ་རབ་དཔའ་བོས་སྤྱིར་གོང་མ་རྣམས་ཀྱང་གསལ་བར་སྟོན་མོད། ཁྱད་པར་དུའང་རྗེ་དེ་དང་། རྒྱལ་པོ་དྷ་ཧེ་ཏ་ལོ་དང་། གནུབས་སངས་རྒྱས་རིན་པོ་ཆེ་སོགས་ཀྱིས་མཐའ་རིལ་མ་སྤངས་བྲལ་བའི་རིང་ལུགས་ཆེན་པོ་ཇི་བཞིན་པ་ཉིད་དུ་བཞེད་དོ། །རྒྱས་པར་བསམ་གཏན་མིག་གི་སྒྲོན་མ་ལས་ཤེས་པ་བྱའོ། །དེ་བཞིན་དུ་བླ་མ་སྔ་མ་རྣམས་ཀྱིས་ཀ་དག་ཏུ་བཞེད་ཅིང་ལྷ་རྗེ་ཟུར་ཆུང་པས་ལྷུན་གྲུབ་ཏུ་བཞེད་པ་དང་། ཀུན་མཁྱེན་དམ་པ་རིན་པོ་ཆེས། མ་འདྲེས་ཡོངས་རྫོགས་ལྷུན་གྲུབ་ཆེན་པོར་བཞེད་དེ། དེའི་དོན་མ་འདྲེས་ལྷུན་གྲུབ་གསུམ་གྱི་དོན་དང་ཡོངས་རྫོགས་དབྱེར་མེད་མཉམ་གྲོལ་དུ་བཞེད་པ་ཡིན་ཏེ། ལྷུན་གྲུབ་གསུམ་ནི་རང་བཞིན་སྤྲོས་བྲལ་ལྷུན་གྲུབ། རྣམ་པ་སྒྱུ་མ་ལྷུན་གྲུབ། མཚན་ཉིད་རང་རིག་ལྷུན་གྲུབ་གསུམ་སྟེ། ཡེ་ཤེས་གསང་བ་ལས། སེམས་དཔའ་རྡོ་རྗེ་ད་ཉོན་ཅིག །ཡེ་ཤེས་གསང་བའི་རང་བཞིན་ནི། །སངས་རྒྱས་སེམས་ཅན་གཉིས་སུ་མེད། །ནམ་མཁའ་བཞིན་དུ་ཀུན་ལ་ཁྱབ། །མ་རིག་ཡེ་ཤེས་ཐ་དད་མེད། །མ་རྟོགས་རྟོགས་པ་ལམ་དུ་གཅིག །ཡེ་ཤེས་གསང་བའི་མཚན་ཉིད་ནི། །རང་རིག་འོད་གསལ་རྣམ་པར་དག །རྣམ་རྟོག་ཡེ་ཤེས་ཉིད་དུ་གནས། །གཞི་བཞག་རང་ལུགས་རིན་ཆེན་མཛོད། །རང་བྱུང་མ་བརྩལ་གདོད་ནས་གནས། །ཡེ་ཤེས་གསང་བའི་རྣམ་པ་ནི། །སྣ་ཚོགས་སྣང་ལ་ངོས་བཟུང་མེད། །མི་དམིགས་སྒྱུ་མ་ལྷུན་གྲུབ་ནི། །རྟག་པར་གསལ་ན་ལྟ་བ་ཡིན། །ཞེས་གསུངས་པ་དང་། ཡོངས་རྫོགས་དབྱེར་མེད་མཉམ་གྲོལ་ནི། རྡོ་རྗེ་སེམས་དཔའ་ནམ་མཁའ་ཆེ་ལས། གཅིག་སྟེ་རྣམ་པ་ཡོངས་ཀྱིས་མེད། །རྣལ་འབྱོར་ནམ་མཁའི་བྱ་ལམ་གནས། །མ་བྱུང་མ་སྐྱེས་སྙིང་པོ་ལ། །སྒྲོ་བཏགས་ཆོས་ཀུན་ག་ལ་ཡོད། །ཅེས་གསུངས་པ་ལྟར་ཏོ། །ཞིབ་པར་སེམས་ཕྱོགས་རྫོགས་པ་ཆེན་པོའི་དགོངས་པ་ལྟར་སྟོན་ཀྱང་མན་ངག་གི་གནད་ཐུན་མོང་མ་ཡིན་པར་འཆད་པས་དོན་དངོས་ནི་རིན་པོ་ཆེ་གཏེར་གཏད་པ་ཉིད་དང་གནད་མཐུན་པའོ། །རྒྱལ་བའི་དབང་པོ་ཀུན་མཁྱེན་ཀློང་ཆེན་རབ་འབྱམས་ཀྱིས་ནི། ཀ་དག་དང་ལྷུན་གྲུབ་དབྱེར་མེད་པའི་རང་རིག་ཐུགས་རྗེ་ཀུན་ཁྱབ་ཏུ་བཞེད་དེ། སྒྲ་ཐལ་འགྱུར་ལས། གཞན་ཡང་ཆོས་ཉིད་ངོ་བོ་ནི། །རང་བཞིན་ཉིད་ལས་ངོ་བོ་གྲུབ། །སྣང་ཚུལ་གཅིག་ཏུ་མ་ངེས་པས། །འཇུག་པའི་ལམ་ཡང་ཐ་དད་དོ། །ངོ་དང་ཤེས་དང་གྲོལ་མཐོང་གིས། །འཇུག་དང་མཐོང་དང་གོམས་པ་ལས། །ངོ་ཤེས་པ་ལས་རང་ངོ་སྟེ། །ཡིད་ཆེས་པ་ཡིས་ཐུག་སའོ། །ཐག་ཆོད་པས་ནི་གདེང་དུ་ཚུད། །དེ་ལྟར་གསུམ་གྱི་ངེས་པ་ལས། །ངོ་བོ་རྫོགས་པས་རྒྱུ་འགགས་སོ། །གཞན་ཡང་ཆོས་ཉིད་རང་བཞིན་བཤད། །འདི་འདྲ་གཅིག་ཏུ་མ་ངེས་པས། །གང་ལྟར་བཏགས་པ་དེ་ལྟར་སྣང་། །སྣ་ཚོགས་མིང་གི་གདགས་གཞི་ལས། །སྒྲ་ཚིག་དུ་མས་སྤྲོས་པར་སྣང་། །ངེས་མེད་མིང་གི་སྣ་ཚོགས་ལས། །དོན་ཡང་བཏགས་པ་ཙམ་གྱིས་སྟོང་། །སྟོང་ཉིད་གང་ཡང་མ་གྲུབ་པས། །རང་བཞིན་དག་པ་ལྟར་སྣང་ངོ་། །གཞན་ཡང་ཆོས་ཉིད་ཐུགས་རྗེ་བཤད། །གདུལ་བྱའི་ཡུལ་ནི་སྣ་ཚོགས་པས། །འདུལ་བྱེད་སྐུ་ཡང་དེ་བཞིན་ནོ། །རིགས་དང་དབང་པོའི་རྣམ་འཕྲུལ་ལས། །འཁོར་འདས་རྟོག་པ་ཐ་དད་དེ། །དེ་ཉིད་སོ་སོའི་ཡུལ་བཞག་ན། །མ་བཅོས་དོན་གྱི་དགོངས་པའོ། །ཞེས་གསུངས་པ་ལྟར། ངོ་བོ་དང་། རང་བཞིན་དང་། ཐུགས་རྗེ་གསུམ་གྱི་གནད་གསུམ་ལས། ངོ་བོའི་གནད་ནི་རང་ཐོག་ཏུ་ངོ་ཤེས། །ཡིན་ཐོག་ཏུ་ཐག་ཆོད། གྲོལ་ཐོག་ཏུ་གདེངས་བཅའ་བ་གསུམ་ལས། དང་པོ་ནི། རང་བཞིན་འོད་དུ་སྣང་ཡང་། ངོ་བོ་རིག་གདངས་གཅིག་ལས་མ་འདས་པས་ངང་གི་རིག་པ་སྟོང་གསལ་ཟང་ཀ་དེ་ཀ་དག་གི་རང་ངོ་ཡིན་པས་ཐག་བཅད་པ་ནི་མཐར་ཐུག་གི་གྲོལ་ས་ཅེར་མཐོང་དུ་ངོ་སྤྲད་པའོ། །གཉིས་པ་ནི། དེའི་ངང་དེར་བཏང་བཞག་མེད་པ་རང་བཞིན་གྱི་བསམ་གཏན་དུ་ཐག་རྦད་ཀྱིས་བཅད་ལ་མ་ཡེངས་ལ་མི་འཛིན་པས་བསྒོམ་པའོ། །གསུམ་པ་ནི། དེའི་ཚེ་བསྒོམ་བྱ་སྒོམ་བྱེད་ལས་འདས་པའི་རིག་པ་ཟང་ཐལ་དུ་ཤར་ཞིང་གྲོལ་བས་བཟང་ངན་གྱི་རྟོག་ཚོགས་མ་སྤངས་པར་རང་གྲོལ་བའི་གདེང་ལ་ཡིད་ཆེས་ཤིང་ལ་ཟློས་པར་བྱེད་པ་སྟེ། གནད་གལ་པོ་ཆེའི་ཆིངས་གཅིག་ཐལ་ལོ། །རང་བཞིན་གྱི་གནད་ལ། སྣ་ཚོགས་སུ་སྣང་ཡང་སྣང་ངོ་ལ་དོན་རང་གསལ་རྗེན་པའི་ཡེ་ཤེས་གཅིག་ཏུ་འུབས་ཆུབ་པར་བསྡུས་ཏེ་རང་གསལ་རང་བྱུང་གི་ཡེ་ཤེས་སུ་ལ་བཟླས་ནས་བསྒོམས་པས་དེའི་འཛིན་པ་ཡང་གྲོལ་ལས་གཞན་ཡང་མེད་པ་ནི་འོད་སྣང་ཆོས་ཉིད་དུ་གྲོལ་བའི་གདམས་པ་སྟེ། ཕར་ལ་བལྟས་པས་ཚུར་ལ་གསལ་བའི་རིག་པ་སྐད་ཅིག་རྗེན་པར་བུད་པའི་ངོ་བོ་སྤྲད་པ་སྟེ། སྣང་བ་ལ་བལྟས་ན་མཐའ་ཡས་ཀྱང་། རིག་པ་ལ་བལྟས་ན་གཅིག་ཀྱང་མེད་པར་ཟང་མར་རང་ཤར་བས། གྲོལ་ས་བར་གྱིས་བཏབ་པའི་མན་ངག་གནད་གལ་པོ་ཆེའི་ཆིངས་གཉིས་ཐལ་ལོ། །ཐུགས་རྗེའི་གནད་ནི། ཕྱིའི་གདུལ་ཡུལ་སྣ་ཚོགས་པའི་རྐྱེན་རེ་ལ་ནང་གི་གདུལ་བྱེད་དམ་འཆར་བའི་རིག་པ་དུ་མ་འཕྲོ་དུས་ཕྱིར་འཕྲོ་བའི་རྗེས་མི་བཅད། རང་ངོ་མི་བརྟག །ནང་དུ་མི་དགག་པར་གང་ཤར་དེ་ཀའི་ཐད་དེར་ཅོག་གིས་བཞག་ལ། བར་མེད་ཀྱི་ཤེས་པ་རྗེན་པར་ཟང་ངེ་ཐལ་ལེ་བ་དེ་ངོས་བཟུང་བས་གྲོལ་ས་ཅེར་མཐོང་དུ་ཟིན་ཏེ་ཤར་གྲོལ་རང་ཡལ་གྱི་རིག་པ་ཧར་སངས་བར་མེད་རྗེན་པར་ཟང་ཐལ་བ་དེ་ཀ་འདི་དང་བར་དོའི་ཤེས་པ་འཆར་བྱེད་མ་འགགས་པ་ལ་ངོས་བཟུང་བས། ཀ་དག་ཐུགས་རྗེའི་རིག་པ་ཟིན་ནས་གྲོལ་བ་སྟེ་གནད་གལ་པོ་ཆེའི་ཆིངས་གསུམ་ཐལ་ལོ། །འདི་གསུམ་ནི་གསང་བ་སྙིང་གི་བདུད་རྩི་ཡང་ཞུན་གྱི་ཐིགས་པ་རབ་ཏུ་གསང་བ་སྟེ། ཁ་འདུམས་ལ་ཆོད་ཆེ་བ། མདོ་འདུས་ལ་ཆིང་ཆེ་བ། གནད་ཟབ་ལ་གལ་ཆེ་བ། སྙིང་གི་བུ་མཆོག་དག་ལས་གཞན་ལ་གསང་བའི་རྒྱས་གདབ་པའི་མན་ངག་གོ། །ཞེས་གསུངས་ཏེ། དེས་ན་རྒྱལ་བ་ཀཿཐོག་པ་ཆེན་པོས་བཞེད་པ་འདི་ནི། སྣང་བ་སེམས་མཐར་སོང་བའི་སེམས་སྡེ་སྟེ། སེམས་ཕྱོགས་རྒྱ་མཚོའི་དགོངས་པའི་ཡང་བཅུད་དུ་གྱུར་པས་ཀུན་མཁྱེན་དྲི་མེད་འོད་ཟེར་དང་དགོངས་པའི་བབ་སོ་གཅིག་ཏུ་འགྱུར་བ་ཡིན་ནོ། །གཉིས་པ་ནི། དེ་ཡི་དུས་ན། ཞེས་པ་ནས། ཐེ་ཚོམ་འདིར་བཅད་པའོ། །ཞེས་པའི་བར་གྱིས་བསྟན་ཏེ། དེ་ལྟར་རིག་པ་གཉིས་མེད་དུ་གསལ་བ་དེ་ཡི་དུས་ཀྱི་སྐབས་ན་དོོན་དམ་མཉམ་ཉིད་ཆེན་པོ་དེ་ཉིད་ཀྱི་ཉམས་དང་དྲོད་ཀྱི་མཆོག་ཀྱང་སྐྱེད་དུ་བྱ་བ་མེད་པར་རྫོགས་པ་ཁོ་ན་ཡིན་ནོ། །དེ་ཅི་སྟེ་ཞེ་ན། སྤྲོས་པས་མཐར་བརྟགས་པའི་སྣང་བ་དང་མི་སྣང་བ་དང་རྟག་པ་དང་ཆད་པ་དང་ཡིན་པ་དང་མིན་པ་ལ་སོགས་པ་ཀུན་ཀ་ནས་དག་པར་རྟོགས་པའི་གདེངས་རྙེད་པས་ཤེས་རབ་ཟབ་མོས་དབྱེར་མེད་བྱ་བརྩལ་དང་བྲལ་བའི་ངོ་བོ་མངོན་དུ་བྱས་ནས་ཉམས་དྲོད་ཡང་དག་པར་ངེས་པས་དོན་གྱི་གནས་ལུགས་ཇི་བཞིན་པའི་གཏིང་ཕོལ་ཏེ་ཐག་ཆོད་པས་རྟོགས་པ་མཐར་ཕྱིན་པ་ནི་གཞུང་མི་མཐུན་པ་ཐ་དད་པའི་ཕྱོགས་ཀྱི་ངེས་པ་མ་རྙེད་པའི་ཐེ་ཚོམ་དང་ཞེན་པ་རྣམས་འདིར་ཡང་དག་པར་བཅད་དེ་ཟབ་དོན་གྱི་གདེངས་དང་ལྡན་པར་བྱས་ཏེ་ངེས་པའི་ཉམས་དྲོད་ཆེན་པོ་རྙེད་པར་གྱུར་པའོ། །དེ་སྐད་དུའང་སྙིང་པོ་དོན་གྱི་རྒྱུད་ལས། སུ་ཞིག་རིག་པ་འཕྲུལ་གྱི་ལྡེ་མིག་གིས། །རང་བྱུང་ཐབས་ཀྱི་དཀྱིལ་འཁོར་སྒོ་ཕྱེ་ནས། །མ་བཙལ་རང་བྱུང་ལྷུན་གྲུབ་བདེ་མཆོག་མཐོང་། །དུས་གསུམ་འདུ་འབྲལ་མེད་པ་རིག་པའི་གཏེར། །མ་བཅོས་ལྷུན་གྱིས་གྲུབ་པས་བཙལ་དུ་མེད། །དམིགས་པའི་འདུ་ཤེས་ཆད་པས་ཡེངས་སུ་མེད། །རང་བྱུང་གཅིག་ལ་རྣམ་པ་བགྲང་དུ་མེད། །གཉིས་མེད་ཐིག་ལེར་གནས་པས་བགྲོད་དུ་མེད། །འགྲོ་དོན་སེམས་སུ་གསལ་བས་བྱས་པ་ཟིན། །མ་ལུས་ལྷུན་གྱིས་རྫོགས་པས་འབྲས་མི་བསྒྲུབ། །མ་སྐྱེས་རྣམ་པར་དག་པའི་སྒྲིབ་མི་སྦྱང་། །མ་བྱས་རང་བཞིན་རྫོགས་པས་ཕྲིན་ལས་བྲལ། །འདི་ཉིད་རྟོགས་པས་ཀུན་འགྲུབ་ཀུན་རྫོགས་པས། །རྫོགས་ཆེན་ཐིག་ལེ་གཅིག་ཏུ་གནས་པར་བཤད། །ཅེས་དང་། ལྟ་བ་ཡེ་ཤེས་གཏིང་རྫོགས་ཀྱི་རྒྱུད་ལས། དེ་ཡང་འདུས་པའི་འཁོར་ཚོགས་ཡིད་ཀྱིས་ཉོན། །བླ་མ་མཁས་པས་མན་ངག་དོན་ཟབ་མོས། །ཀུན་གཞི་གཞི་ཆ་ཆོས་སྐུའི་ངོ་བོ་ཉིད། །བཅོས་སུ་མེད་ལ་རང་སེམས་ནམ་མཁའ་འདྲ། །སྒོ་ལྔ་ཡུལ་ཉིད་འཁྲུལ་ཕྱིར་འབྲེལ་བ་ཆོད། །ཡིད་ལ་ལྟ་བ་བརྟན་པས་ཉོན་མོངས་གྲོལ། །དེ་ཕྱིར་བཀའ་དོན་ཤིན་ཏུ་གཅེས་པར་གསུངས། །ཞེས་སོ། །བཞི་པ་ནི། དེ་ཉིད་དེ་ལ། ཞེས་པ་ནས། ནོར་བུར་བཞིན་དུ་བལྟ། །ཞེས་པའི་བར་གྱིས་བསྟན་ཏེ། དེ་ལྟར་བསྒོམ་པའི་ཡོན་ཏན་ནི་གང་སྙམ་པ་ལ། སྐྱེས་བུ་དམ་པ་གང་སུ་ཞིག་དེ་ཁོ་ན་ཉིད་དེ་ལ་ཞེན་གོམས་ངེས་པའི་སྟོབས་ཀྱིས་དོན་གྱི་རྟོགས་པ་ལ་བློ་གྲོས་བརྟན་པ་ཐོབ་ནས་ལས་སུ་རུང་ཞིང་ཆོས་གང་ཡང་ཚིག་དང་དོན་དུ་འབྲེལ་བར་ལྟ་བས་ཐག་ཆོད་དེ་རྟོགས་པ་གནད་དུ་ཆུད་ན། ས་ལྔ་པ་མན་ཆད་ལྟ་བུ་འགྲོ་བ་དམན་པའི་ལུས་ལ་དགོངས་པ་བདེ་བར་གཤེགས་པ་དམ་པའི་གོ་འཕང་དང་ལྡན་པ་ཅན་ནི་རྟོགས་པའི་དབང་ཕྱུག་ཆེན་པོ་རྒྱལ་བ་རྫོགས་སངས་རྒྱས་པ་ཉིད་ཡིན་པས་དེ་ལ་ལྷ་སྲིན་སྡེ་བརྒྱད་ཀྱིས་ཀྱང་སྒོ་གསུམ་གུས་པས་ཕྱག་འཚལ་ཞིང་མོས་པས་འདུད་པར་བྱེད་པ་ཉིད་དེ། ཀུན་བྱེད་ལས། བྱ་མེད་འདི་ལ་གང་གནས་པ། །ལུས་འདི་གང་ཟག་ལྷ་མི་ཡང་། །དགོངས་པ་ཆོས་ཉིད་སངས་རྒྱས་ཡིན། །འདི་ཡིས་སེམས་ཅན་དོན་བྱས་ན། །རྩོལ་སྒྲུབ་མི་བྱེད་བདེ་བར་འགྱུར། །ཞེས་དང་། ཡེ་ཤེས་གཏིང་རྫོགས་རྒྱལ་པོའི་རྒྱུད་ལས། བྱང་ཆུབ་སེམས་ལ་སྔ་ཕྱི་མེད་པའི་ཕྱིར། །འཇིག་རྟེན་མཐོ་དམན་གར་སྐྱེས་ལུས་ཉིད་ཀྱང་། །སྐྱེ་འགག་མེད་པའི་སེམས་ལ་སེམས་གནས་ན། །འདུ་འབྲལ་མེད་པའི་དགོངས་པ་ཉམས་མྱོང་རྟགས། །རྟགས་ཆེན་དེ་ལྡན་རྣལ་འབྱོར་རྣམས་ཀྱིས་ནི། །ཅི་སྤྱོད་ཐམས་ཅད་ཡེ་ཤེས་སངས་རྒྱས་ཐུགས། །མི་ཡི་ལུས་ལ་སྒྲིབ་གཡོགས་འདི་ཉིད་ལ། །ལྷ་མི་རྣམས་ཀྱིས་ཕྱག་འཚལ་མཆོད་པར་འགྱུར། །ཞེས་དང་། ཆོས་ཆེན་པོ་རྨད་དུ་བྱུང་བ་ལས། ལྟ་བ་རྨད་དུ་བྱུང་བའི་དོན། །རྡོ་རྗེ་སེམས་དཔའ་བདག་ཉིད་ཀྱིས། །སྔོན་ཆད་རྟོགས་པར་མ་གྱུར་པ། །ཐུགས་ཀྱི་སྒྲོན་མེས་དོན་བསྟན་པ། །གང་ལ་སངས་རྒྱས་གུས་མཛད་པ། །དོན་དེ་ལ་ཡང་ཕྱག་འཚལ་ལོ། །ཞེས་དང་། ཀུན་ཏུ་བཟང་པོ་ཀློང་དྲུག་པ་ལས། མ་བཙལ་བཞག་པའི་རིན་པོ་ཆེ། །ཀུན་གྱི་སྤྱོད་ཡུལ་མིན་པས་ན། །འདི་ཉིད་རྟོགས་པའི་རྣལ་འབྱོར་པ། །མི་ཡི་ནང་ན་རྒྱལ་བའི་སྐུ། །དབང་ཕྱུག་ཡིན་གྱིས་གུས་ཕྱག་འཚལ། །ཞེས་སོ། །འདི་ལྟ་བུའི་རྣལ་འབྱོར་མཆོག་མཐོང་ན་བདག་ཅག་གིས་ཀྱང་གཡོ་དང་སྒྱུ་མེད་པའི་བསམ་པས་འདོད་པའི་ཡོན་ཏན་གྱི་ཡོ་བྱད་ཆེན་པོ་ལྔས་མཆོད་པར་བྱས་ཤིང་རྒྱལ་སྲིད་ལ་སོགས་པའང་བསྟབས་ཏེ་གུས་པ་མཆོག་གིས་བཀུར་བ་ནི། དཔེར་ན་བརྒྱ་བྱིན་ལྷ་ཡི་དབང་པོ་དང་ཀླུའི་རྒྱལ་པོའི་སྤྱི་གཙུག་གི་ནོར་བུ་རིན་པོ་ཆེ་བཞིན་དུ་བལྟ་བར་བྱ་སྟེ། ཀུན་བྱེད་རྒྱལ་པོའི་སྤྱིའི་བཤད་རྒྱུད་ཉི་ཟླ་དང་མཉམ་པ་དྲི་མ་མེད་པ་ལས། སློབ་དཔོན་ཚད་མར་མ་གྱུར་སྤྲེའུ་འདྲའི་ལུང་། །བརྟེན་ནས་ལམ་ནོར་རྟོག་པས་ཟིན་ཏ་རེ། །དེ་བས་གསེར་ལ་ནག་ཚུར་བཏང་འདྲ་ཡི། །སློབ་དཔོན་རིན་ཆེན་ལྟ་བུ་མཁས་པ་དེ། །རིན་ཐང་དཔག་ཏུ་མེད་པའི་རིན་གྱིས་བསླུའོ། །ཞེས་སོགས་གསུངས་སོ། །གསུམ་པ་ནི། ཀུན་ནས་འདུས་པའི། ཞེས་པ་ནས། རང་རིག་ཁོ་ནར་ཟད། །ཅེས་པའི་བར་གྱིས་བསྟན་ཏེ། གདམས་ངག་གི་ནན་ཏན་གལ་ཆེ་བར་བསྟན་པའི་ཕྱིར། ཐེག་པ་ཀུན་གྱི་དོན་དང་རྒྱལ་བ་རྣམས་ཀྱི་དགོངས་པ་མ་ལུས་པ་ཀུན་གདོད་ནས་འདུས་པའི་དོན་མ་ནོར་བ་ནི། ལེའུ་གཉིས་པ་ལས། བློ་དང་ལྡན་པར་བྱའོ། །གྲོས་ཀྱིས་ཆོད་པར་བྱའོ། །ཐབས་ཀྱིས་ཟིན་པར་བྱའོ། །ཞེས་བཀའ་སྩལ་པའི་རྒྱལ་བའི་དགོངས་པ་བློ་དང་གྲོས་དང་ཐབས་ཀྱི་ཚིག་གསུམ་པོ་ཉིད་དེ། དེ་བས་ན་དེ་གསུམ་གྱི་དོན་ལ་ཐེ་ཚོམ་ཆོད་པས་ཡིད་ཆེས་པས་བྱས་ཏེ་ངེས་པར་རྟོགས་པས་བློ་ཡི་གདེང་དུ་ཆུད་པའི་ཚད་དང་ལྡན་པར་བྱ་སྟེ། དེ་ལྟར་ཚིག་གསུམ་གྱི་དོན་ལ་ངེས་པ་རྙེད་ནས་འབད་པས་གདེངས་དང་ལྡན་ཏེ་སྒོམ་པས་མངོན་དུ་གྱུར་པའི་ཚེ་ན། ངེས་པའི་དོན་ནི་གཞན་ཞིག་མེད་དེ་རང་གི་རིག་པ་ཡེ་ཤེས་ལྔ་ཆོས་ཉིད་བྱང་ཆུབ་ཀྱི་སེམས་སུ་རྫོགས་པའི་རང་སྣང་སེམས་ཀྱི་དེ་ཁོོ་ན་ཉིད་མ་བཅོས་པ་འབའ་ཞིག་ཁོ་ནར་ཟད་པས་དེ་ལ་ངེས་པར་གཟུང་བར་བྱ་སྟེ་དེ་ལས་ལྷག་པ་གང་ཡང་མེད་དོ། །དེས་ན་ཡེ་ཤེས་རྫོགས་པ་ལས། རང་སེམས་སྟོན་པར་མ་ཤེས་ན། །རང་བྱུང་མཐོང་བར་ཡོང་མི་འགྱུར། །དེས་ན་ཡེ་ཤེས་རྫོགས་པའི་དོན། །རང་རིག་བདེ་བས་ཤེས་པར་གྱིས། །རང་བྱུང་རྒྱལ་པོ་སྟོན་པའི་མཆོག །ཡེ་ཤེས་མ་འགགས་ཅིར་ཡང་གསལ། །རིག་པ་ཀློང་གི་འཁོར་དུ་རྫོགས། །རང་སེམས་བདེ་བར་ཀུན་རྫོགས་པས། བསྟན་པ་རྒྱ་མཚོ་རིག་པའི་ཀླུངས། །རྣམ་དག་རང་སེམས་སྐྱེ་མེད་པས། །འགྱུར་མེད་འཁོར་ལོ་རིག་པའི་གནས། །ཞེས་དང་། གསང་བདག་དགའ་རབ་དཔའ་བོས་འབྲས་བུའི་ཀློང་ལས། ཤིན་ཏུ་རྣལ་མའི་ཡེ་ཤེས་ལ། །སེལ་མེད་གནས་པའི་རང་བཞིན་ནི། །སྤྲོས་པ་ཀུན་བྲལ་དེ་མཁྱེན་པའི། །ཡེ་ཤེས་མཚན་ཉིད་རང་རིག་གསལ། །དེ་འོད་རྣམ་པ་ཅིར་ཡང་ཤར། །དབྱེར་མེད་ཀུན་བྲལ་ཅི་མ་སྤངས། །རང་བཞིན་ཅིས་ཀྱང་སྟོང་པས་ཡོད་པའི་མཐའ་ལས་འདས། །དེ་མཁྱེན་ཐམས་ཅད་རྫོགས་པས་མེད་པའི་མཐའ་ལས་འདས། །མཚན་ཉིད་ཐ་དད་བྲལ་བས་གཉིས་ཀྱི་མཐའ་ལས་འདས། །གཉིས་མེད་ངོས་བྲལ་རོལ་པས་དེར་འཛིན་ངང་ལས་འདས། །ཀུན་བྲལ་ཇི་མ་སྤངས་པས་ཀུན་མཁྱེན་སྟོང་ཉིད་རྫོགས། །ཡེ་ཤེས་ཡོད་མེད་མཐའ་ལས་འདས་པར་བཞུགས། །ཀུན་མཁྱེན་གསལ་བས་ཡེ་ཤེས་ལྷག་ཆད་མེད། །སྤྲོས་དང་བྲལ་བས་ཆོས་དབྱིངས་ལྷག་ཆད་མེད། །ངོ་བོས་མ་འདྲེས་བདེན་གཉིས་ལྷག་ཆད་མེད། །རང་བཞིན་དབྱེར་མེད་མཉམ་ཉིད་ལྷག་ཆད་མེད། །ཐམས་ཅད་ལྷུན་གྲུབ་རོལ་པ་ལྷག་ཆད་མེད། །རྒྱ་མ་ཆད་པས་ཀ་དག་ལྷག་ཆད་མེད། །དེ་ལྟར་མཁྱེན་ལ་ངོས་མེད་རོལ་པར་ཤར། །མ་བཅོས་ལྷུན་གནས་ཡེ་ཤེས་བདེ་ཆེན་ཡིན། །ལྷག་མ་མེད་པར་རྫོགས་པ་ཆེན་པོ་ཡིན། །ཞེས་སོ། །ཡང་ན་འདི་ཉིད་དོན་ངེས་པའི་རྩ་བ་ཁོ་ནས་ཞབས་སྡུད་མི་བྱེད་པར་བསྡུས་དོན་ལས་སྔར་ཡང་བསྟན་པ་ལྟར་ངེས་པའི་གསང་སྒོར་འཇུག་པའི་ཞབས་བསྡུ་བར་བྱས་ན། གསུམ་པ་མཇུག་བསྡུ་བ་ནི། ཀུན་ནས་སོགས་ཚིགས་བཅད་གཅིག་ཡོན་ཏན་དང་བཅས་པས་བསྟན་ཏེ། དེ་ལྟར་ཐེག་པ་རྣམས་དང་སངས་རྒྱས་ཐམས་ཅད་ཀྱི་དགོངས་པའི་གསང་མཛོད་ཀུན་ནས་འདུས་པ་ནི། ལེའུ་དྲུག་པ་ལས། རྒྱལ་བའི་དགོངས་པ་ཚིག་གསུམ་པོ། །འཕྲུལ་གྱི་བློ་དང་གྲོས་མཆོག་སྟེ། །ཡུན་གྱི་དོན་སྲིད་ཆེན་པོ་བས། །བློ་གྲོས་དམ་པའི་ཡུལ་དུ་སྣང་། །ཞེས་གསུངས་པ་ལྟར། རྒྱལ་བའི་དགོངས་པ་ཚིག་གསུམ་པོ་གདམས་ངག་གསུམ་ཚོ་ལྔ་རུ་བསྟན་པ་འདི་ནི་ཐེག་པ་ཀུན་གྱི་ཡང་བཅུད་ལྷ་གནས་སུ་གྲགས་པའི་བསྟན་པ་རིན་པོ་ཆེ་ཐམས་ཅད་ཀྱི་གསང་མཛོད་དུ་ངེས་པའི་དགོངས་པ་དམ་པ་ཡིན་པས་ཐེ་ཚོམ་དང་བྲལ་བར་ཡིད་ཆེས་ངེས་པར་རྙེད་ནས་མ་ནོར་བར་རྟོགས་པས་བློ་ཡི་གདེང་དུ་བྱའོ། །དེ་ལྟར་ཚིག་གསུམ་གྱི་དོན་ལ་ངེས་པ་རྙེད་དེ་འབད་ཅིང་སྒོམས་པས་དོན་གྱི་ངོ་བོ་མཐར་ཐུག་པ་མངོན་དུ་གྱུར་ན། ངེས་པའི་དོན་ནི་རང་གི་སེམས་ཀྱི་ཆོས་ཉིད་གསལ་སྟོང་གཉིས་སུ་མེད་ཅིང་བདེ་སྟོང་རྣམ་དབྱེར་མེད་པའི་དཀྱིལ་འཁོར་གསུམ་མ་འདྲེས་ཡོངས་རྫོགས་ཀྱི་ངོ་བོ་རང་རིག་ཕྱོགས་མེད་བདེ་བ་ཆེན་པོ་འོད་གསལ་ཐིག་ལེ་ཉག་ཅིག་ཁོ་ནར་ཟད་པ་ཡིན་པས་དེར་མཐར་ཕྱིན་པ་འབའ་ཞིག་ཏུ་འགྱུར་རོ། །དེས་ན་དཔལ་གསང་བའི་སྙིང་པོ་ལས། གཅིག་དང་དུ་མ་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །ཞེས་དང་། ཀུན་འདུས་ལས། ཐབས་ཆེ་གཏིང་ཟབ་ཤེས་རབ་ལམ། །སྤྲོས་བྲལ་མཚན་མའི་འཕྲང་ལས་འདས། །གཏོས་ཆེ་ཡངས་པས་ལམ་གཉིས་བྲལ། །དབུས་མཐའ་མི་དམིགས་མཉམ་པའི་ལམ། །གཅིག་ཏུ་མཉམ་པར་ཆུད་ནས་ནི། །ཡུལ་མེད་ཚོལ་བའི་སེམས་བྲལ་ཏེ། །བླང་དོར་གཉིས་ཀྱི་མཐའ་སྤངས་ནས། །གནས་པ་མེད་པའི་ཚུལ་གྱིས་གནས། །ཆོས་ཉིད་དབྱིངས་སུ་རོ་གཅིག་ཕྱིར། །ཤེས་དང་ཤེས་བྱ་གཉིས་མེད་དེ། །ཡེ་ནས་ཆོས་ཉིད་ཆོས་ཤེས་ན། །ཆོས་ཉིད་གཞན་ནས་བརྩལ་མི་དགོས། །ཞེས་དང་། ཡེ་ཤེས་གསང་བ་ལས། མ་འགགས་རང་རིག་རྒྱུ་མེད་གསལ། །རང་རྒྱུད་ཡེ་ཤེས་འགྱུར་མེད་སེམས། །འོད་གསལ་བསམ་གྱིས་མི་ཁྱབ་པ། །ཀུན་བཟང་རོལ་པ་མཐའ་དབུས་མེད། །མི་རྩོལ་མཐའ་བྲལ་དབུ་མའི་སེམས། །མཚོན་འདས་རང་རིག་ཞེན་རྟོག་མེད། །གཉིས་མེད་རང་རིག་ཡུལ་དང་བྲལ། །རང་རིག་ཡེ་ཤེས་ཐིག་ལེ་དྲུག །ལྟ་སྤྱོད་དགོངས་པའི་རང་བཞིན་ནོ། །ཞེས་སོགས་ཤིན་ཏུ་མང་ངོ་། །ཞེས་གསང་བ་ཀུན་གྱི་མཛོད་འཛིན་པའི་སྟོན་པ་གསང་བ་པའི་བདག་པོས་དེ་སྐད་ཅེས་སྨྲས་ཏེ་བཀའ་སྩལ་པས། འཁོར་ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་ཀྱིས་ཆོས་ཐམས་ཅད་ཀྱི་རྩ་བ་ཆེན་པོའི་དོན་གཏན་ལ་ངེས་པར་ཕེབས་ཏེ་རྟོགས་པའི་གདེངས་དང་ལྡན་པས་གྱུར་ཏོ། །དེ་བས་ན་ཀུན་གཟིགས་རོང་ཟོམ་པཎྜི་ཏས་ཐེག་པའི་བྱེ་བྲག་ཆེན་པོར། འདི་དག་ཙམ་གྱིས་ཐུན་མོང་ཁྱད་པར་ཤེས། །འདི་ལྟར་སྨྲས་ན་སྒྲོ་དང་སྐུར་བ་མེད། །འདི་ལྟར་ཤེས་ན་ཡིད་གཉིས་རྣམ་པར་བྲལ། །རང་གི་འདོད་པ་མ་ཡིན་གཟུ་བོའི་ཚིག །ཅེས་གསུངས་པ་ལྟར་ཚད་མའི་ལུང་གིས་བརྒྱན་ཏེ་ཅུང་ཟད་རྒྱས་པར་བཤད་པ་ཡིན་ན་ཡང་། བསྒོམ་ཐབས་སྒྲོན་མ་ལས། སྐྱེ་རྒུ་ཕལ་ཆེར་བློ་གྲོས་ཕྱོགས་ལྷུང་མཁྱེན་པའི་རྩལ་མ་རྫོགས་པས་མ་བཅོས་ལྷུན་རྫོགས་ཆོས། །མོས་འདུན་དད་མེད་པར་ཡང་མ་ཟད་ཕྲག་དོག་བསམ་པས་སྒྲོ་སྐུར་འདེབས་པར་བྱེད། །དེས་ན་འདི་ལྟར་སྙིང་རྗེས་བཀོད་ཀྱང་ཀུན་ལ་ཕན་ཞེས་ངེས་པར་ཡིད་བརྟན་མེད། །རང་དང་རིགས་མཐུན་འཇམ་དབྱངས་བུ་དང་ཕྱི་རབས་དྲྭ་མ་ཆེན་པོའི་དོན་དུ་དགོད ། །ཞེས་གསུངས་པ་དང་ཚུལ་ཙམ་མཐུན་པར་ཕྱོགས་ཞེན་ཅན་ལ་ཟབ་དོན་སྨྲ་བའི་དུས་མིན་པར་ཤིན་ཏུ་ངེས་པར་གྱུར་ཀྱང་། སློབ་དཔོན་དཔའ་བོས། ཡ་རབ་རྣམས་དང་འཕྲད་ན་སྐྱེས་ཀྱི་མཆོག །ཚོགས་ཀྱི་ནང་ནས་མཁས་པ་དགའ་བར་འགྱུར། །ཞེས་གསུངས་པ་ལྟར་སྐྱེས་བུ་དམ་པ་རྣམས་ལ་ལེགས་པར་བཤད་པའི་མཆོད་རྫས་སུ་ཕུལ་བ་ཡིན་ནོ། །ལེའུའི་མཚན་ནི། སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ཆོས་ཐམས་ཅད་ཀྱི་རྩ་བ་ཆེན་པོ་གང་བྱང་ཆུབ་ཀྱི་སེམས་སྣང་བ་རྣམ་པར་དག་པ་དེ་ཡི་དོན་རྟོགས་པའི་སྐལ་པ་མཆོག་གི་སྤྱོད་ཡུལ་དུ་གྱུར་པའི་གསང་ཆེན་ངེས་པའི་སྙིང་པོ་བསྟན་པའི་ལེའུ་སྟེ་ལྔ་བཅུ་རྩ་དྲུག་པ་ཉིད་གསལ་བར་བཤད་པའོ།། །།བམ་པོ་དགུ་པར་ཟུག་པ། གཉིས་པ་རང་བཞིན་མ་བཅོས་པར་བྱ་བ་ལ་གཉིས་ཏེ། །མདོར་བསྟན་པ། རྒྱས་པར་བཤད་པའོ། །དང་པོ་ནི། དེ་ནས། ཞེས་པ་ནས། སྤྱོད་པའི་རང་བཞིན་ནོ། །ཞེས་པའི་བར་གྱིས་བསྟན་ཏེ། ལེའུ་འདིས་ངེས་དོན་སྟོན་ནོ། །ལེའུ་བཞི་བཅུ་ཞེ་ལྔ་པའི་རྣམ་གྲངས་བཅུའི་དང་པོའི་རྗེས་སུ་གཉིས་པ་དེ་ཉིད་རྒྱས་པར་འགྲེལ་བའི་ཕྱིར། སྣང་བ་དག་པའི་སྤྱོད་ཡུལ་བསྟན་པའི་དེ་མ་ཐག་པ་དེ་ནས་ཡང་འཁོར་ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་བྱང་ཆུབ་སེམས་དཔའ་མ་འདྲེས་ཡོངས་རྫོགས་དབྱེར་མེད་དུ་རྟོགས་པས་འོག་མ་ལས་འཕགས་པའི་སེམས་དཔའ་ཆེན་པོ་རྣམས་ཀྱིས། སྟོན་པ་གསང་བ་པའི་བདག་པོ་ལ། ཡང་རང་བཞིན་མ་བཅོས་པའི་ཚུལ་གང་གི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། བྱུང་ཚུལ་བཅུ་གཉིས་པའི་སྐབས་འདིར་སྟོན་པ་ཉིད་ཀྱིས་ལེའུ་ཞེ་ལྔ་པ་ཆོས་ཀྱི་རྣམ་གྲངས་བཅུར་བཀོད་པ་ལས། དང་པོ་མཛོད་དུ་འཇུག་པ་སོང་ནས་གཉིས་པ་རང་བཞིན་མ་བཅོས་པར་བྱའོ། །ཞེས་གསུངས་པར་ཐོས་ན། ཐབས་དེ་ཉིད་ངོ་བོ་ཇི་ལྟར་ཡོངས་སུ་ཤེས་པར་བྱ་སྟེ། རང་བཞིན་ནི་གང་ཞིག་ཡིན། དེ་གང་ལྟར་ན་མ་བཅོས། མ་བཅོས་པ་དེ་གང་གི་རང་བཞིན་ལགས། ཞེས་དེ་སྐད་ཅེས་གསོལ་ཏེ། དྲིས་པའི་དོན་ནི་འདྲེན་པ་བཅུའི་ལྟ་བ་ཡིན་ལ། དེའང་དཔེ་ཡིས་འཆད་པ་ཤས་ཆེ་བས། དྲང་དོན་གྱི་དཔེ་ལ་བརྟེན་ནས་ངེས་དོན་དངོས་སྟོན་པའོ། །དེ་ལྟར་དྲིས་པ་དང་། སྟོན་པ་གསང་བ་པའི་བདག་པོས་སྨྲས་ཏེ་བཀའ་སྩལ་པ། ཀྱེ་དམན་པའི་གྲོགས་པོ་དག །ཅེས་བོས་ནས། དྲི་བ་གཅིག་ལ་གསུམ་དྲིས་པའི་ལན་དུ་གསུངས་པ། དེ་ཁོ་ན་ཉིད་ཀྱི་རང་བཞིན་སྙིང་པོའི་དོན་ནི། དངོས་པོ་ཐམས་ཅད་དང་བྲལ་ཏེ་ངང་ལས་མི་འདའ་བས་མི་འགྱུར་བའོ། །མ་བཅོས་པ་ནི་ཡེ་ནས་ཡིན་པའི་དོན་གཞི་ཇི་བཞིན་པའི་ངོ་བོ་རྣལ་མའོ། །མ་བཅོས་རྣལ་མ་འདི་དག་ནི། ཤེས་པར་བྱ་བའི་དེ་བཞིན་ཉིད་གསང་སྔགས་ཀྱི་རང་བཞིན་དང་། ཇི་ལྟར་རྟོགས་པའི་ཚུལ་གྱིས་དེ་ལ་ལྟ་བའི་རང་བཞིན་དང་། རྟོགས་པ་དེ་ལས་མི་འདའ་བའི་དམ་ཚིག་གི་རང་བཞིན་དང་། དེ་ལྟར་ངང་ལས་མི་ཉམས་པར་ལུས་ངག་ཡིད་ཀྱིས་བྱ་བ་བྱེད་པ་སྤྱོད་པའི་རང་བཞིན་ཏེ་རྣམ་པ་བཞིར་གསུངས་པས་གསུམ་པོ་གོ་རིམས་བཞིན་ནོ། །གཉིས་པ་ལ་བཞི་སྟེ། སྔགས་ཀྱི་རིམ་བཞིན་བཤད་པ། ལྟ་བའི་རང་བཞིན་བསྟན་པ། དམ་ཚིག་གི་རང་བཞིན་བཤད་པ། སྤྱོད་པའི་རང་བཞིན་བསྟན་པའོ། །དང་པོ་ལ་གསུམ་སྟེ། ཉེ་བར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི། གྲོགས་པོ་དག །ཅེས་པ་ནས་འདི་ལྟ་སྟེ། ཞེས་པའི་བར་གྱིས་བསྟན་ཏེ། དེ་ལ་ལན་ཐ་མ་བཞིའི་དང་པོ་བསྟན་པའི་ཕྱིར། གླེང་གཞི་གསུམ་ལས་བྱིན་བརླབས་བྱུང་ཁུངས་ཀྱི་གླེང་གཞིའི་དབང་དང་རང་བཞིན་མཉམ་པ་ཉིད་ལ་དགོངས་ཏེ་གྲོགས་པོ་དག་ཅེས་བོས་ནས། འདི་ལ་གསང་སྔགས་ཀྱི་རང་བཞིན་ཉེ་བར་སྟོན་པ་ནི། འདི་ལྟ་སྟེ། ཞེས་པའོ། །གཉིས་པ་ནི། ནམ་མཁའ་ལྟ་བུའི། ཞེས་པ་ནས། མ་བསླད་དེ་བཞིན་པའོ། །ཞེས་པའི་བར་གྱིས་བསྟན་ཏེ། གཞིའི་ཆོས་རང་བཞིན་ཆོས་ཉིད་དབྱིངས་ཀྱི་རྣལ་འབྱོར་ནི། དཔེར་ན་ནམ་མཁའ་ནི་ཕྱོགས་རིས་དང་མཐའ་དབུས་བྲལ་བས་རྟོག་མེད་ཡིན་པ་ལྟ་བུའི་ཚུལ་དུ་གསང་སྔགས་དེ་ཁོ་ན་ཉིད་ཀྱང་ཆེད་འཛིན་དང་བྲལ་བའི་ངོ་བོའི་རང་བཞིན་ཡིན་པས། ཡུལ་ལ་རྣམ་པར་རྟོག་པའི་མཚན་ཉིད་ཐམས་ཅད་དང་བྲལ་ཞིང་། གང་རང་བཞིན་དེ་ཉིད་དུ་ཡང་རྣམ་པར་མི་རྟོག་པར་ངོས་གཟུང་ལས་འདས་པའི་ཆོས་ཉིད་དོ། །དེ་བཞིན་དུ་དཔེར་ན་ས་གཞི་ནི་རྩི་བཅུད་ཐམས་ཅད་འཁྲུངས་པའི་འབྱུང་ཁུངས་ཡིན་པ་ལྟར། དབྱིངས་ཆེན་གཞི་ཡི་རང་བཞིན་ཡང་འཁོར་འདས་ལམ་གསུམ་གྱི་ཆོས་ཀུན་གྱི་བསྐྱེད་གཞིར་གྱུར་པས་རྒྱུ་དང་འབྲས་བུའི་ཆོས་ཐམས་ཅད་འབྱུང་བའི་གནས་ཀྱི་རང་བཞིན་དམ་པ་ཡིན་ནོ། །དེ་དང་མཚུངས་པར་དཔེར་ན་མེ་ཡི་རང་བཞིན་རྫས་ཀྱི་དངོས་པོ་ཐམས་ཅད་སྲེག་བྱེད་ཡིན་པ་ལྟ་བུ་རང་རིག་པའི་ཡེ་ཤེས་ཉིད་ཀྱང་། ཉོན་མོངས་དང་གཟུང་འཛིན་གང་ཡང་སྟོང་ཉིད་ཀྱི་ངང་དུ་སྲེག་པར་བྱེད་པ་ཡིན་པས། མཐའ་ཡི་དངོས་པོ་གཉིས་འཛིན་དང་བཅས་པ་ཐམས་ཅད་བསྲེག་སྟེ་མེད་པར་སྦྱོངས་པར་བྱེད་པའི་མཛད་པ་ཅན་དུ་ངེས་པའོ། །དེ་དང་འདྲ་བར་དཔེར་ན་རླུང་གི་རང་བཞིན་གྱིས་དྭངས་སྙིགས་ཐམས་ཅད་འབྱེད་པར་བྱེད་པ་ལྟ་བུ་ཆོས་ཉིད་རང་གྲོལ་གྱི་རིག་པ་ཡང་རྣམ་པར་རྟོག་པའི་མཚན་མ་ཀུན་མི་གནས་པར་བྱེད་པ་ཡིན་པས་གཡོ་རྡུལ་དང་མི་གཡོའི་རྡུལ་དུ་སྣང་བའི་སྒྲིབ་པ་དང་ཆོད་པའི་གཟུང་འཛིན་གྱི་རྟོག་པའི་རྡུལ་ཀུན་མི་གནས་པར་སེལ་ཏེ་བྲལ་བར་བྱེད་པའི་ཕྱིར་ཡེ་ཤེས་ཀྱི་རླུང་ཆེན་པོའི་རང་བཞིན་ཡིན་ནོ། །དེ་བཞིན་དུ་ཀླུང་རྣམས་ཐམས་ཅད་རྒྱ་མཚོར་རོ་གཅིག་པ་བཞིན་དུ་འབྱུང་བ་ཆུ་ཡི་རང་བཞིན་དང་བྱེད་ལས་འདྲ་བར་ཡེ་ཤེས་ཆེན་པོའི་ཆུ་དེ་ཁོ་ན་ཉིད་ཡིན་པས། ཐམས་ཅད་དབྱིངས་ལས་གཞན་མེད་པར་སྐྱེ་མེད་དེ་བཞིན་ཉིད་ཀྱི་ངང་དུ་སྡུད་དེ་མཉམ་པ་ཉིད་དུ་འདུས་པར་བྱེད་པ་ཡིན་ནོ། །འདི་ཡང་ཨ་ནུའི་ཨ་ཏིའི་རང་ལུགས་ལྟར་ན། སེམས་ཉིད་དོན་གྱི་སྟོན་པ་རྣལ་མ་དབྱིངས་ཀྱི་ངོ་བོ་ཉིད་འབྱུང་བ་ལྔའི་སྐུར་མངོན་དུ་ཕྱུང་བའི་བཀོད་པ་ཞི་བ་དང་ཁྲོ་བོའི་རྩལ་གྱིས། གྲུབ་མཐས་བློ་མ་བསྒྱུར་བའི་གདུལ་བྱ་འདོད་ལ་ཞེན་པ་དང་དྲག་པོ་གདུལ་བར་དཀའ་བ་ལ་འཁོར་ལོ་རྒྱུན་དང་། ཆོ་འཕྲུལ་མངོན་པར་ཕྱུང་བས་དོན་མཛད་ཚུལ་སྔར་བཤད་པ་ལྟར་དང་། བློ་བསྒྱུར་བ་དྲང་དོན་ལ་ཞུགས་པའི་ལས་སྒྲིབ་དག་པའི་གདུལ་བྱ་རིག་འཛིན་ཆེན་པོ་དང་ས་བཅུའི་བྱང་ཆུབ་སེམས་དཔའ་ལ་འབྱུང་ལྔ་ངོ་བོ་ཉིད་དུ་དག་པའི་སྐུས་བདག་རྐྱེན་ལས། ལོངས་སྤྱོད་རྫོགས་པ་ཡེ་ཤེས་སྒྱུ་མའི་སྐུར་ཤར་ནས་ཐེག་པ་མཆོག་གི་ཆོས་ལ་ལོངས་སྤྱོད་པར་བཞེད་པ་ཡིན་ནོ། །དེར་མ་ཟད་སྐྱེས་བུ་མཁྱེན་རྩལ་ཅན་ལ་གསང་སྔགས་མཚོན་པའི་སྒོར་མ་གྱུར་པ་མེད་པས་ཆོས་ཀྱི་སྒོར་གྱུར་པའི་གསང་མཛོད་དུའང་བཞེད་མོད་ཀྱི། འོད་གསལ་རྫོགས་པ་ཆེན་པོ་ལྟར་ན། ཀུན་བྱེད་ལས། ཀུན་བྱེད་རྒྱལ་པོ་ང་ཡིས་ནི། །ཀུན་རྒྱུ་བྱང་ཆུབ་སེམས་ལས་ནི། །སེམས་ཀྱི་ངོ་བོ་འབྱུང་ཆེན་ལྔ། །སྟོན་པ་བྱང་ཆུབ་སེམས་ལྔ་ཕྱུང་། །སྐུ་ནི་ལོངས་སྤྱོད་རྫོགས་པའི་སྐུ། །ཆོས་ནི་རང་གི་ངོ་བོས་འཆད། །སྟོན་ནི་རང་གི་རང་བཞིན་སྟོན། །སྟོན་པ་ལོངས་སྤྱོད་རྫོགས་སྐུ་དེ། །དགོངས་པ་ཉིད་ལ་ཉིད་མི་རྟོག །ཡུལ་ཆོས་གཞན་ལའང་རྟོག་མི་བྱེད། །བྱང་ཆུབ་སེམས་ཀྱི་སྟོན་པ་ལྔས། །ཀུན་ཀྱང་ཆོས་ཉིད་དེ་བཞིན་སྟོན། །ཞེས་དང་། བཤད་རྒྱུད་མདོ་བཅུ་ལས། ནམ་མཁའ་སྣང་བྱེད་ཁྱབ་པའི་དབྱིངས། །མ་བསྒྲིབས་པ་ཡི་བྱང་ཆུབ་སེམས། །སྒྲིབ་པ་མེད་པའི་ཁྱད་པར་གྱིས། །ཀུན་ལ་ཁྱབ་པའི་བདག་ཉིད་དོ། །ས་ནི་སྲ་བྱེད་རྡོ་རྗེ་དབྱིངས། །སྐྱེ་བ་མེད་པའི་བྱང་ཆུབ་སེམས། །འཇིག་པ་མེད་པའི་ཁྱད་པར་གྱིས། །འགྱུར་བ་མེད་པའི་ཆོས་ཉིད་དོ། །ཆུ་ནི་རིན་ཆེན་གཏེར་གྱི་དབྱིངས། །ཐམས་ཅད་སྣུམ་པའི་བྱང་ཆུབ་སེམས། །ཐམས་ཅད་སྡུད་པའི་ཁྱད་པར་གྱིས། །འབྱེད་པར་བྱེད་པའི་ཆོས་ཉིད་དོ། །མེ་ནི་རྣམ་དག་པདྨའི་དབྱིངས། །གཟུང་འཛིན་དག་པའི་བྱང་ཆུབ་སེམས། །རྣམ་པར་དག་པའི་རང་བཞིན་གྱིས། །སྐྱོན་དང་བྲལ་བའི་ཆོས་ཉིད་དོ། །རླུང་ནི་བརྩོན་འགྲུས་ཡངས་པའི་དབྱིངས། །ཐོགས་མ་མེད་པའི་བྱང་ཆུབ་སེམས། །ཡང་ཤིང་གཡོ་བའི་ཁྱད་པར་གྱིས། །འགག་པ་མེད་པའི་ཆོས་ཉིད་དོ། །ཞེས་གསུངས་ཏེ། བྱང་ཆུབ་སེམས་ཀྱི་ཆོས་ཉིད་སྔར་སངས་རྒྱས་པས། འབྱུང་གནས་ཀུན་ལས་ཁྱད་པར་དུ་འཕགས་པས་ཆོས་ཀྱི་དབྱིངས་སུ་སངས་རྒྱས་པའི་ཆེ་བ་ཕུལ་དུ་བྱུང་བ་ཉིད་དེ། ལོངས་སྤྱོད་རྫོགས་སྐུར་བཞག་པ་ནི། ངོ་བོ་དབྱེར་མེད་ཡིན་ཀྱང་མཚན་ཉིད་ཀྱི་ཚུལ་ནས་ཐེག་འོག་ལ་འདོད་པའི་ལོངས་སྐུ་རིགས་ལྔ་དང་འབྱུང་བ་ལྔ་ཚུལ་མཚུངས་ཤིང་དོན་གཅིག་པ་དང་། རང་སྣང་ཕྱོགས་མེད་དུ་ཤར་ནས་ལོངས་སྤྱོད་པའི་ཕྱིར་ཡིན་ལ། སྐལ་ལྡན་ཤིན་ཏུ་རྣལ་འབྱོར་ལ་རང་གི་ངོ་བོས་ཆོས་སྟོན་ཏེ་རང་བཞིན་གསལ་བར་བྱེད་པའོ། །དེས་ན་འདི་ནི་སྟོན་པ་དང་བསྟན་པ་ཐ་དད་མེད་པར་རྩོལ་བས་མ་བྱས་པར་ཡུལ་མེད་རང་བཞིན་ལྷུན་རྫོགས་ཆེན་པོར་བསྟན་པ་རང་གསལ་དུ་བཀྲམ་པའོ། །འོ་ན་འདི་ཉིད་དང་ཀུན་བྱེད་སོགས་ལས། ལོངས་སྐུའི་བསྟན་པ་ཀྲི་ཡོག་གསུམ་དུ་བཤད་དོ་སྙམ་ན། དེ་ནི་བརྒྱུད་ནས་སྟོན་པས་ཡེ་ཤེས་སྒྱུ་མའི་ལོངས་སྐུའི་མཚོན་བྱེད་སྒྲའི་བསྟན་པ་ཡིན་ལ། འདིར་ནི་མཚོན་བྱའི་ངོས་ནས་གནས་ལུགས་དོན་གྱི་རྫོགས་ཆེན་དང་། དེ་ལྟར་ཡིན་པ་ལ་ཡིན་པར་སྟོན་པ་རྗོད་བྱེད་སྒྲའི་རྫོགས་ཆེན་ནོ། །དེས་ན་རང་སྣང་ལོངས་སྤྱོད་རྫོགས་སྐུའི་རང་རིག་བདེ་བ་ཆེན་པོའི་བསྟན་པ་ཡིན་པས་ཁྱད་པར་ཤིན་ཏུ་ཆེ་སྟེ་ཚུལ་དེས་གཞན་ཡང་མཚོན་ནོ། །འདི་དག་གི་དོན་གྱི་གནས་མཐར་ཐུག་པ་ནི་ཡང་གསང་བ་སྙིང་ཏིག་གི་དགོངས་པ་ལྟར་ཐེག་མཆོག་རིན་པོ་ཆེའི་མཛོད་སོགས་ལས་ཤེས་པར་བྱའོ། །དེ་བཞིན་དུ་གཞན་ཡང་རང་དག་པའི་སྨན་གྱི་རང་བཞིན་དང་འདྲ་བ་ཡིན་པས་ན། རྒྱུན་དུ་འགྲོགས་པས་ཟུག་རྔུ་བསྐྱེད་པའི་འཁོར་བར་བརྟགས་པའི་ནད་ཀྱི་གཅོད་རྙིང་ཐོག་མ་མེད་པ་ནས་ཡོད་པ་ཐམས་ཅད་དུས་གཅིག་ལ་རྣམ་པར་འབྱིན་པར་བྱེད་དོ། །འདི་ལྟར་འཚོ་བའི་ཟས་སྐོམ་དང་འདྲ་བར་རང་བཞིན་བསྐྱེད་པའི་གནས་སུ་ནར་སོན་པར་བྱེད་པས། བརྟགས་པས་དག་པ་བསོད་སྙོམས་སོགས་མིན་པར་སུ་ཞིག་ཡང་དག་པའི་ཏིང་ངེ་འཛིན་དང་ལྡན་པས་འཚོ་བ་དག་པ་སངས་རྒྱས་དང་བྱང་ཆུབ་སེམས་དཔའ་རིག་འཛིན་ཀུན་གྱི་ཡིད་བཞིན་གྱིས་གསོས་དང་བཏུང་བར་གྱུར་པའོ། །རང་བཞིན་ནམ་ཆོས་ཉིད་རྟོགས་པའི་ཤེས་རབ་ནི། དཔེར་ན་རལ་གྲི་སོགས་གནོད་པའི་རང་བཞིན་གྱི་མཚོན་རྣོན་པོ་ལྟ་བུ་ཡིན་པས་སྡུག་བསྔལ་གྱིས་གདུང་བའི་འཁོར་བའི་རྒྱ་མཚོ་ཐར་དཀའ་བ་རྣམས་རྟོགས་མ་ཐག་ཏུ་རྩད་ནས་རྣམ་པར་གཅོད་པ་ཡིན་ན་གོམས་ན་ལྟ་ཅི་སྨོས་པའོ། །མཚན་ཉིད་མ་ནོར་བར་རྟོགས་པ་ནི། དཔེར་ན་ཉི་མ་ལྟ་བུའི་རང་བཞིན་ཡིན་པས་མ་རིག་པའི་མུན་ཁང་དང་སྣང་སྟོང་གི་མཐའ་གཉིས་དག་པའི་རང་སྣང་གི་ཆོས་ཉིད་སྟོན་ཏེ་རང་གསལ་བར་བྱེད་པ་ཉིད་དོ། །གོམས་པའི་ཏིང་ངེ་འཛིན་བརྟན་པ་ནི། དཔེར་ན་རི་རབ་ཆུས་མི་བསྒུལ་བ་ལྟ་བུའི་རང་བཞིན་དུ་གྱུར་པས། རྟོགས་པ་ངང་ལས་མི་འགྱུར་བ་ནི། འདོད་ཡོན་ལ་ཞེན་པའི་ལོག་པར་རྟོག་པ་དང་འཁོར་བའི་གཡང་ས་ཅིས་ཀྱང་མི་བསྐྱོད་ཅིང་གཡོ་བར་བྱ་བ་དང་གཡོ་བྱེད་མེད་པར་འཕེལ་འགྲིབ་དང་བྲལ་བའོ། །རྟོགས་པའི་ཡོན་ཏན་རྒྱ་མཚོ་ལས་རླབས་འབྱུང་བ་ལྟ་བུའི་རང་བཞིན་དུ་ངེས་པས། དགོངས་པ་མི་གཡོ་བ་སྐྱེ་བ་མེད་པའི་ངང་ལས་དུས་བཞིར་མ་བཙལ་བར་སྣང་བ་སྣ་ཚོགས་ཀྱི་ཐུགས་རྗེའི་ཆོས་རྣམས་བྱིན་རླབས་ཀྱི་ཆོ་འཕྲུལ་དུ་འབྱུང་བའོ། །དེ་བཞིན་དུ་གསང་དོན་རྟོགས་པས་སྐྱེ་བ་མེད་པའི་རོས་བྱུག་པས་དུག་ལྔའང་ཡེ་ཤེས་ལྔར་དག་པའི་རྩི་ཡི་རང་བཞིན་དུ་གྱུར་པས། དཔེར་ན་སྔགས་སམ་རྩི་སྦྱོར་གྱིས་དུག་ལ་སྨན་དུ་འགྱུར་བ་དང་གསེར་འགྱུར་གྱི་རྩི་བཞིན་དུ་གཟུང་འཛིན་གྱི་དྲི་མའི་དུག་ཉིད་མ་སྤངས་པར་མཉམ་པ་ཆེན་པོར་སངས་རྒྱས་པར་བྱེད་པ་ཡིན་ནོ། །དེ་ལྟར་རང་བཞིན་བཅུ་གཉིས་དང་། ལ་སོགས་པ་ཞེས་བསྡུ་བའི་དོན་གྱིས་རང་བཞིན་མཐའ་ཡས་པ་མཆོག་གང་ཇི་སྙེད་དང་ལྡན་ཏེ། རིལ་གསང་སྔགས་མཚོན་པའི་སྒོར་མ་གྱུར་པ་མེད་པའི་ཕྱིར་རོ། །དེས་ན་ཆོས་ཉིད་ངོ་བོ་ཉིད་ཀྱི་གསང་སྔགས་ནི། དཔེར་ན་ཡིད་བཞིན་གྱི་ནོར་བུ་རིན་པོ་ཆེ་ལྟར། རྣམ་པར་རྟོག་པ་ཐམས་ཅད་བྲལ་བཞིན་ཅིར་ཡང་མི་རྟོག་པའི་ངང་ལས་ཡོན་ཏན་ཇི་སྙེད་པ་ཐམས་ཅད་རང་འབྱུང་དུ་འཆར་བ་ཡང་། ལམ་པས་འཕྲལ་དུ་མེད་པ་ལས་བྱས་ཏེ་མ་བཅོས་ཤིང་སེལ་ཞུགས་པ་མེད་པས་མ་བསླད་པར་ཡེ་ནས་མ་བྱས་མ་བཅོས་པའི་ངོ་བོ་དེ་ཁོ་ན་ཉིད་ཇི་བཞིན་པ་གཉིས་སུ་མེད་པ་ལས་བྱིན་རླབས་རང་སྣང་བ་ཉིད་དུ་གྱུར་པའོ། །གསུམ་པ་ནི། གྲོགས་པོ་དག །ཅེས་པ་ནས། རྣམ་པར་བགྲོས་པའོ། །ཞེས་པའི་བར་གྱིས་བསྟན་ཏེ། གྲོགས་པོ་དག །ཅེས་བོས་ནས། བསྟན་པ་དེ་དག་ནི་གསང་སྔགས་ཀྱི་རང་བཞིན་དུ་ཤེས་པར་བྱའོ། །ཞེས་སྡུད་པ་པོ་ཕྱག་ན་རྡོ་རྗེས་རྒྱལ་བ་མང་པོ་ལས་ཐོས་པ་རྣམས་འདིར་བཀའ་སྩལ་ཏེ་རྣམ་པར་བགྲོས་པས་རང་བཞིན་དང་པོའི་ངོ་བོ་བསྟན་པའོ། །གཉིས་པ་ལ་གསུམ་སྟེ། ཉེ་བར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི། གྲོགས་པོ་དག །ཅེས་པ་ནས། འདི་ལྟ་སྟེ། །ཞེས་པའི་བར་གྱིས་བསྟན་ཏེ། གྲོགས་པོ་དག །དེ་ལ་སྐྱེས་བུ་དམ་པས་ལྟ་བའི་རང་བཞིན་ཁྱུང་ལྡིང་བ་ལྟ་བུ་ཉེ་བར་བསྟན་པ་གང་ཞེ་ན། འདི་ལྟ་སྟེ། གཉིས་པ་ལ་གཉིས་ཏེ། ཅི་ལ་ཡང་ནམ་མི་ང་བར་རྟོགས་པར་གདམས་པ། ལྟ་བའི་ཁྱད་པར་མ་འདྲེས་པར་བཤད་པའོ། །དང་པོ་ནི། ཕྱག་དཔེ་གཅིག་ན། ཆོས་ཉིད་ནམ་མཁའ་ལྟ་བུ་འདིར། །མ་ནོར། ཞེས་དང་། གཞན་ཀུན་ན། མ་ནོར་མི་འགྱུར། ཞེས་པ་ནས། ཅན་གྱིས་བལྟ་བར་བྱ། །ཞེས་པའི་བར་གྱིས་བསྟན་ཏེ། དེ་ཡང་ཆོས་ཉིད་ནམ་མཁའ་ལྟ་བུ་ལྟ་བ་མཐའ་དབུས་མེད་པར་སྟོན་པའི་སྐབས་འདིར། ཆོས་རྣམས་ཀྱི་ཆོས་ཉིད་དེ་ཁོ་ན་ཉིད་ཀྱི་དོན་མཆོག་མ་ནོར་ཞིང་མི་འགྱུར་བའི་དོན་དུ་བློ་ཡིས་ངེས་པར་ཐག་བཅད་དེ། དེ་ལྟར་ཐག་ཆོད་པའི་ཤེས་རབ་ཟིན་ཆགས་ཀྱི་རྟོག་པ་དང་བྲལ་བས་གང་ལའང་མ་ཆགས་ལ་ཡུལ་དུ་མི་རྟོག་པར་རང་རིག་པར་ལྷུན་གྱིས་གྲུབ་པའི་ངང་དུ་གྱུར་པས་གོལ་སྒྲིབ་ཏུ་ལྟུང་བའི་མཐའ་སྣང་གང་ལའང་ཉམ་མི་ང་བས་བསྙེངས་པ་ཐམས་ཅད་དང་བྲལ་བའི་ལྟ་བའོ། །དེའི་ཚུལ་ཇི་ལྟ་བུ་ཞེ་ན། དཔེར་ན་ནམ་མཁའི་རང་བཞིན་ལས། སྤྲིན་དང་ན་བུན་དང་ཁུག་རླངས་དང་ཟླ་བ་དང་ཉི་མ་དང་སྐར་ཚོགས་ལ་སོགས་པ་གང་དང་ཅི་ཞིག་སྣང་ཡང་ནམ་མཁའ་ཉིད་ཀྱི་རང་བཞིན་ལས་མ་གཡོས་པར་དེའི་ཀློང་དུ་གནས་ཤིང་སོ་སོར་གསལ་བའོ། །དཔེ་དེ་ལྟར་དུ་དོན་གྱི་རང་བཞིན་ཆོས་ཉིད་དེ་བཞིན་ཉིད་ཀྱི་ནམ་མཁའ་རྣམ་པར་དག་པའི་ངང་ལས་མཚན་མའི་རྣམ་པར་རྟོག་པའི་རྒྱུ་འགྲུལ་ཅི་ལྟར་བྱུང་ཡང་ཆོས་ཉིད་དོན་གྱི་ནམ་མཁའ་དག་པའི་རང་བཞིན་དུ་གནས་པས་མ་བཀག་ཀྱང་བྱུང་ཚོར་གྱི་རྒྱུ་བ་མེད་པར་ཆོས་ཉིད་རང་སྣང་གི་དགོངས་པ་ཡིན་པས་དོན་དེ་ཉིད་ཤེས་རབ་ཀྱིས་ལྟ་བ་རྟོགས་པ་དང་ཏིང་ངེ་འཛིན་དུ་ལྡན་པས་རྣལ་འབྱོར་ཅན་གྱིས་བལྟ་ཞིང་ཤེས་པར་བྱ་བའོ། །གཉིས་པ་ནི། ཇི་བཞིན་མ་བཅོས། ཞེས་པ་ནས། ཉིད་དུ་སྣང་བར་ཟད། །ཅེས་པའི་བར་གྱིས་བསྟན་ཏེ། འོ་ན་ཐེག་པ་སོ་སོའི་ལྟ་བའི་སྣང་ལུགས་ནི་གང་ཞེ་ན། ཆོས་ཉིད་ཇི་བཞིན་པའི་གསང་སྔགས་མ་བཅོས་ལྷུན་གྱིས་གྲུབ་པའི་ཆོས་དབྱིངས་དེ་བཞིན་ཉིད་ལ་དམིགས་པ་ཐ་དད་ཀྱིས་ལ་ལས་མཐོང་ཞིང་རྟོགས་པ་དང་། ལ་ལས་མ་མཐོང་ཞིང་མ་རྟོགས་པའི་ཤེས་རབ་ཀྱི་ཁྱད་པར་གྱིས་འཇིག་རྟེན་པ་དང་ཐེག་པ་དགུ་ཡི་ལྟ་བའི་ཁྱད་པར་སྐས་གདངས་ལྟ་བུར་སོ་སོར་ཐ་དད་དུ་འཕྲོས་པ་ཡིན་པར་བལྟ་ཞིང་ཤེས་པར་བྱའོ། །དེ་དག་རྟོགས་པའི་ཚུལ་ཇི་ལྟ་བུ་ཡིན་ཞེ་ན། བྱང་ཆུབ་སེམས་ཀྱི་དེ་ཁོ་ན་ཉིད་དེ་ནི་སོ་སོའི་སྐྱེ་བོ་བརྟགས་པའི་རྣམ་པར་རྟོག་པ་ཅན་ལ་སྒྲིབ་པའི་དབང་གིས་རྣམ་རྟོག་ཉིད་དུ་སྣང་བའོ། །མུ་སྟེགས་བྱེད་ལྟ་བ་ངན་པའི་ལོག་སྲེད་ལ་ཆགས་པ་ཅན་ལ་ལོག་པར་རྟོག་པའི་དབང་གིས་རྩ་བ་རྟག་ཆད་ཉིད་དུ་སྣང་ངོ་། །ཉན་ཐོས་དང་རང་རྒྱལ་ཕྱོགས་ཙམ་རྟོགས་པའི་འཛིན་པ་ཅན་ལ་ཐ་སྙད་ཐ་དད་ཀྱི་མཐོང་བ་རྡུལ་ཕྲ་རབ་འདུས་པ་དང་རྟེན་འབྲེལ་འཇུག་ལྡོག་གི་ཆོས་ཙམ་དང་འཛིན་ཤེས་སྐད་ཅིག་མའི་རྫས་སུ་སྣང་བའོ། །དོན་དམ་པའི་ཕྱོགས་ཙམ་ཤེས་ཤིང་རྟོགས་ཀྱང་ཡང་དག་ཉིད་མ་མཐོང་བའི་རྣམ་རིག་པ་དང་དབུ་མ་པ་བདེན་པ་རེས་མོས་པ་ཅན་དག་ལ་ཀུན་རྫོབ་ཏུ་རྨི་ལམ་ལྟ་བུ་དང་སྒྱུ་མར་མཐོང་ལ་དོན་དམ་པར་རང་རིག་རྒྱུན་དང་བཅས་པ་དང་མ་སྐྱེས་པའི་ཆོས་ཉིད་དུ་སྣང་བའོ། །གས ང་སྔགས་ཀྱི་དམ་པ་ཆེན་པོའི་ཤེས་པས་དོན་མ་ནོར་བ་དེ་ཉིད་རྟོགས་ཏེ་ངང་དེར་བློ་ངེས་པ་ལ་སྤྱོད་ཡུལ་ཐམས་ཅད་ཆོས་ཉིད་ཀྱི་ནམ་མཁར་མཐོང་སྟེ། དཔེར་ན་ནམ་མཁའ་དང་བའི་རང་བཞིན་ལྟ་བུར་ཆོས་ཐམས་ཅད་མཐའ་དང་བྲལ་བར་གནས་པའི་ཆོས་ཉིད་མཉམ་པའི་ནམ་མཁའ་ཆེན་པོར་རྟོགས་པའི་རིག་པ་རང་ཤར་བ་ལ་མཐོང་ཐོས་ཐམས་ཅད་ཀྱང་ནམ་མཁའ་ལྟ་བུའི་ཆོས་ཉིད་དུ་སྣང་བར་ཟད་དེ། དེ་ལྟ་བུའི་དབྱིངས་ཀྱི་ངང་དུ་གསལ་བ་ལས་མཚན་མ་འཁྲུལ་པར་སྣང་བའི་གཉིས་སུ་གྱུར་པ་མེད་པའོ། །གསུམ་པ་ནི། གྲོགས་པོ་དག །ཅེས་པ་ནས། ངེས་པར་བགྲོས་པའོ། །ཞེས་པའི་བར་གྱིས་བསྟན་ཏེ། གྲོགས་པོ་དག །དེ་དག་ནི་ལྟ་བའི་རང་བཞིན་གྱི་དོན་དེའི་ངོ་བོ་ཉིད་དུ་ཤེས་པར་བྱའོ། །ཞེས་ཐོས་པ་དམ་པ་ངེས་པར་བགྲོས་ཏེ་བསྟན་པའོ། །གསུམ་པ་ལ་གསུམ་སྟེ། ཉེ་བར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི། གྲོགས་པོ་དག །ཅེས་པ་ནས། འདི་ལྟ་སྟེ། ཞེས་པའི་བར་གྱིས་བསྟན་ཏེ། གྲོགས་པོ་དག །ཅེས་བོས་ནས། དེ་ལས་མི་འདའ་བའི་དམ་ཚིག་གི་རང་བཞིན་གང་ཞེ་ན། ཉེ་བར་བསྟན་པ་འདི་ལྟ་སྟེ། །གཉིས་པ་ལ་བདུན་ཏེ། བསྲུང་དུ་མེད་པ་ཅིག་ཆར་བའི་དམ་ཚིག་བསྟན་པ། དེ་ལྟར་བསྲུང་དུ་མེད་པའི་ཆེ་བ་བཤད་པ། རིས་སུ་སྲུང་བ་གོལ་བར་བསྟན་པ། བསྲུང་དུ་མེད་པའི་སྲུང་ཚུལ་བཤད་པ། བསྲུང་དུ་མེད་པ་ལ་བློ་དང་འཚམས་པར་གྲགས་ལུགས་བསྟན་པ། དམ་ཚིག་གི་ངེས་ཚིག་བཤད་པ། བསྲུང་དུ་མེད་པ་ལས་མ་གཡོས་པར་བསྲུང་བར་བསྟན་པའོ། །དང་པོ་ནི། ཆོས་ཉིད་ནམ་མཁའ། ཞེས་པ་ནས། ཚད་གཟུང་ག་ལ་ཡོད། །ཅེས་པའི་བར་གྱིས་བསྟན་ཏེ། སྐྱེས་མཆོག་ཅིག་ཆར་བའི་ལྟ་བའི་དམ་ཚིག་དམ་པ་ནི། ཡེ་ནས་མ་བརྟགས་མ་བསྙད་པའི་ངོ་བོ་ཆོས་ཉིད་ནམ་མཁའ་ལྟ་བུ་འདི་ཡི་ངང་འདིར་བསྲུང་བར་བྱ་བ་དང་ཆོས་ཐམས་ཅད་ཀུན་དབྱེར་མེད་ཆེན་པོར་ཡོངས་ཀྱིས་གཅིག་པར་གནས་པ་ལ་ནི་གཅིག་པུའི་དམ་ཚིག་ཅེས་ཀྱང་བྱ་སྟེ། གསང་བདག་དགའ་རབ་དཔའ་བོས་དམ་ཚིག་གི་ཀློང་ལས། འཁོར་འདས་བདག་གཞན་བཟང་ངན་དུ། །དབྱེར་མེད་གཅིག་པུའི་དམ་ཚིག་ཡིན། །ཞེས་གསུངས་པ་ལྟར་ཏེ། ཐིག་ལེ་ཉག་གཅིག་གི་ངང་ལས་འདའ་བ་མེད་པའོ། །དོན་ཕྱོགས་མེད་ཆེན་པོ་ལ་རིས་སུ་ཕྱེ་བའི་བསྲུང་བ་དང་མི་བསྲུང་བའི་བླང་དོར་གྱི་ཕྱོགས་དང་བྲལ་བ་ལ། འདི་སྲུང་འདི་མི་སྲུང་ཞེས་པའམ། རྩ་བ་དང་ཡན་ལག་གི་བསྲུང་བར་བྱ་བའི་ཚད་གཟུང་དུ་ག་ལ་ཡོད་དེ་མེད་པར་གཏད་འཛིན་ཀུན་དང་བྲལ་བ་ནི་ཕྱལ་བའི་དམ་ཚིག་ཆེན་པོ་ཞེས་ཀྱང་བྱ་སྟེ། དེ་ཉིད་ལས། ཡིན་མིན་ཡོད་མེད་བདེན་རྫུན་གྱི། །འཛིན་པ་བྲལ་བས་ཕྱལ་བ་ཡིན། །ཞེས་གསུངས་ཏེ། དེ་ལྟར་བསྲུང་དུ་མེད་པའི་ངང་དུ་འགགས་བསྡམ་པའོ། །གཉིས་པ་ནི། ནམ་མཁའ་ལྟ་བུའོ། །ཞེས་པ་ནས། ཐམས་ཅད་སྲུང་བ་ཡིན། །ཞེས་པའི་བར་གྱིས་བསྟན་ཏེ། ཆོས་ཉིད་ནམ་མཁའ་ལྟ་བུའི་ངང་དུ་རང་རིག་པ་ཤར་བས་ས་དགུ་པ་དང་བཅུ་པའི་རྣལ་འབྱོར་པ་བློ་ཤིན་ཏུ་ཆེ་ཞིང་ཡངས་པས་ཕྱོགས་རིས་མེད་པ་ལས་མི་འདའ་བར་ནམ་མཁའ་ལྟ་བུའི་དམ་ཚིག་ཅི་ལའང་འཛིན་རྟོག་དང་བླང་དོར་མེད་པར་བསྲུང་བར་བྱའོ། །དེ་ལྟར་གང་སུ་ཡང་རུང་བ་སྒོ་འདིར་བསྲུང་བའི་རྣམ་གྲངས་ཀྱི་མཚམས་དང་བྲལ་ཏེ་འདའ་ཉམས་ཀྱིས་དཀའ་ཐུབ་མེད་པར་རིག་པ་ཀློང་དུ་གྱུར་ན་ནི་ཐིག་ལེ་བདེ་བ་ཆེན་པོའི་ངང་ལ་ཕྱོགས་རིས་མེད་པས་ན་གང་དང་ཡང་མི་འགལ་བ་དེས་ནི་དམ་ཚིག་ཐམས་ཅད་མ་ཉམས་པར་སྲུང་བའང་ཡིན་པས་མེད་པའི་དམ་ཚིག་ཆེན་པོ་ཞེས་ཀྱང་བྱ་སྟེ། སྔ་མ་ལས། ཕྱོགས་དང་གྲངས་ཀྱི་བསྲུང་བྱ་དང་། །བྲལ་བས་མེད་པའི་དམ་ཚིག་ཡིན། །ཞེས་སོ། །གསུམ་པ་ནི། ཅི་ཕྱིར་ཐམས་ཅད། ཅེས་པ་ནས། གྱུར་པ་ག་ལ་ཡིན། །ཞེས་པའི་བར་གྱིས་བསྟན་ཏེ། གཏན་ཚིགས་ཅི་ཡི་ཕྱིར་ན་བསྲུང་མཚམས་མེད་པའི་དམ་ཚིག་ཅེས་བྱ་ཞེ་ན། འཁོར་བའམ་བསྲུང་བྱའམ་རྩ་བའི་དམ་ཚིག་ཐམས་ཅད་དང་མྱ་ངན་ལས་འདས་པའམ་སྲུང་བྱེད་དམ་ཡན་ལག་གི་དམ་ཚིག་ཐམས་ཅད་ཀུན་ཀྱང་ཆོས་ཉིད་མཉམ་པ་ཆེན་པོའི་དམ་ཚིག་མཆོག་ཏུ་ཡེ་ནས་བྱུང་ཐེབས་པ་ཉིད་ངེས་པར་ཡིན་པས་ན་ལྷུན་གྱིས་གྲུབ་པའི་དམ་ཚིག་ཞེས་ཀྱང་བྱ་སྟེ། སྔ་མ་ལས། ངང་གནས་ཉམས་པ་ལས་གྲོལ་བས། །བརྩལ་མེད་ལྷུན་རྫོགས་ཡེ་གྲུབ་པའོ། །ཞེས་གསུངས་པའི་ཕྱིར་ཏེ་རང་མཚན་རྟོགས་ན་ངེས་པར་བསྲུང་ཉམས་མེད་པའོ། །གལ་ཏེ་འགྱུར་བ་ཅན་གྱི་དོན་ནི། དེ་ལྟར་མ་རྟོགས་པར་རིས་སུ་ཕྱེ་ནས་བསྲུང་བྱའི་ཁྱད་པར་ཚད་དུ་འཛིན་ཞིང་ཚད་སོ་སོར་ཡོད་པར་བྱེད་པ་ཉིད་ནི་རང་བཞིན་མཉམ་པའི་དམ་པ་ཆེན་པོ་འདི་ལས་ཉམས་པ་ཡིན་པའི་ཕྱིར་ན་རྣལ་འབྱོར་པ་གང་སུ་ཡང་རུང་བའི་བློ་ལ་བསྲུང་བ་དང་མི་བསྲུང་བའི་རྣམ་པར་རྟོག་པ་དེ་དག་མེད་ཀྱང་བླ་ཞེས་མེད་པ་ཁོ་ན་མཆོག་ཡིན་ཏེ་རྟོག་པའི་ཚུལ་དེས་མི་སྟོངས་པས་སོ། །དེ་ཅིའི་ཕྱིར་ཞེ་ན། དེ་འདྲའི་ཕྱོགས་རིས་ཅན་གྱི་བསྲུང་བའི་མཚམས་རྩ་བ་དང་ཡན་ལག་ཏུ་ཕྱེ་ནས་ཚད་འཛིན་བྱེད་དེ་བསྲུང་བ་ནི་དོན་མ་མཐོང་བར་སྒྱུ་མས་བསླུ་བ་ལྟ་བུར་གསོག་གསོབ་ཡ་མ་བརླ་ཙམ་ཡིན་པས་ཐེག་པ་མཆོག་གི་དམ་ཚིག་དམ་པ་མིན་པའི་ཕྱིར་ཏེ། དེ་བས་ན་དམིགས་ལྟ་ཅན་དེ་ལ་དམ་ཚིག་བསྲུང་ཞེས་བྱ་བའི་མིང་དུ་སུ་ཞིག་ཟེར་ཞིང་སྨྲ་སྟེ་དོན་ལ་མཁས་པ་སུ་ཡང་མི་སྨྲའོ། །དེའི་ཕྱིར་ཐབས་ཆེན་པོ་འདིར་བསྲུང་མཚམས་དང་བྲལ་བའི་ཆོས་ཉིད་ཀྱི་ངང་ལ་བསྲུང་སྟེ་མ་ཉམས་པར་དང་དུ་བླང་བ་དང་མི་བསྲུང་བར་ཉམས་པས་དོར་བར་བྱེད་པའི་ཚིག་ཡང་མེད་པ་དེ་ནི་ཐེག་པ་མཆོག་གི་དམ་ཚིག་ཡིན་པས་ཆོས་ཉིད་མཉམ་པའི་ངང་དེ་ལ་བསྲུང་མི་བསྲུང་གི་མཐའ་ཡི་བླང་དོར་གང་ཡང་མེད་པས་ན་དེ་ལྟར་ཡོད་པའི་དཀའ་ཐུབ་ཀྱི་རྟོག་པ་ཅན་ནི་དམ་ཚིག་མཆོག་ལ་གནས་པར་གྱུར་པ་ག་ལ་ཡིན་ཏེ་མ་ཡིན་པར་ངེས་སོ། །བཞི་པ་ནི། བསྲུང་དང་མི་བསྲུང་། ཞེས་པ་ནས། མེད་པའི་ངང་དུ་བསྡམ། །ཞེས་པའི་བར་གྱིས་བསྟན་ཏེ། དེ་ལ་དམ་ཚིག་ཆེད་དུ་བྱེད་དེ་བསྲུང་བ་དང་ཆེད་དུ་བྱ་བ་མེད་པར་མི་བསྲུང་བའི་ཕྱོགས་ཆར་གྱུར་བའི་ཐེག་པ་མཐོ་དམན་གྱིས་ཆོས་རྣམས་གང་ཡང་འདིར་ནི་རང་བཞིན་ལ་ལྷུན་གྱིས་གྲུབ་པས་ཅི་ཡང་དང་དུ་བླངས་ཏེ་བསྲུང་དུ་མེད་པས་མཉམ་པའི་ངང་ལ་བྱ་བ་མེད་པར་དེ་བཞིན་ཉིད་ཀྱི་དོན་དུ་བློ་གཞག་པར་བྱ་སྟེ། ཐབས་ཇི་ལྟར་ཞེ་ན། ཆོས་ཉིད་མ་བཅོས་མ་བསླད་པས་དེ་བཞིན་ཉིད་ཀྱི་ངོ་བོ་སྤྲོས་པ་དང་བྲལ་བས་དོན་དམ་མཆོག་ལ་རིག་པའང་ཡེ་ཇི་བཞིན་པར་རང་སྣང་བ་ཡི་དུས་ན་བློ་ཅིར་ཡང་མ་སྐྱེས་ཏེ་མི་གཡོ་མི་འཛིན་པར་བཞག་པ་ནི་རྣལ་མ་ཉིད་ལ་བབ་པ་སྟེ། དེ་ཉིད་ཀྱི་ངང་དེ་བདག་ཉིད་ཀྱི་རིག་པ་ལ་ཡེངས་བརྗེད་ཀྱིས་བྲལ་བས་མེད་པར་དམ་བཅའ་བརྟན་པའི་ཐ་ཚིག་མཆོག་གིས་དོན་ལས་མི་འགྱུར་བར་འདི་བསྲུང་བ་དང་འདི་མི་བསྲུང་ཞེས་པའི་བསྲུང་མཚམས་ཀྱི་དབྱེ་བ་མེད་པའི་ངང་དུ་བསྡམ་ནས་གདེང་དང་སྲོག་ལས་མི་ཉམས་པར་བྱ་བ་སྟེ། དེ་ཉིད་ལས། བྱང་སེམས་ལྷུན་གནས་དམ་པའི་ངང་། །རྩོལ་བྲལ་གནས་ལ་ཉམས་པ་ཡི། །འཇིགས་དོགས་གདོད་ནས་མི་གནས་ཏེ། །ཀ་དག་ཡོན་ཏན་ལྷུན་གནས་གདེང་། །དེས་ན་བསྲུང་བྱ་ཕྱོགས་རིས་གྲངས། །རྣམ་པར་དབྱེ་བ་བཟང་ངན་དང་། །མཚམས་བཟུང་མི་གནས་བདེ་བ་ཆེ། །རྩོལ་བྲལ་ངེས་པའི་སྲོག་གིས་གནས། །ཞེས་གསུངས་པ་ལྟར་ལ་བཟླ་སྟེ་ལྟ་བའི་དམ་ཚིག་གིས་ཆིངས་ཀྱིས་བཅིངས་པར་བྱའོ། །ལྔ་པ་ནི། བསྲུང་མེད་ནམ་མཁའི། ཞེས་པ་ནས། ངོ་ལ་སོ་སོར་གྲགས། །ཞེས་པའི་བར་གྱིས་བསྟན་ཏེ། དེ་ལྟར་སྒོ་གསུམ་ཆེད་དུ་བསྡོམ་སྟེ་བསྲུང་བ་མེད་པར་ཆོས་ཉིད་ནམ་མཁའི་དགོངས་པར་གནས་པའི་དམ་ཚིག་ཆེན་པོ་འདི་ཡི་ཁྱད་པར་ལས་བློའི་རིམ་པ་བཞིན་དུ་གདུལ་བྱ་སོ་སོར་རང་རང་གི་འདུལ་བའི་ཚད་དུ་ཇི་ལྟར་གྲགས་པ་ལྟར་སྣང་བའི་རང་བཞིན་ལ་སྡོམ་པ་དང་དམ་ཚིག་རྒྱ་མཚོ་ལྟ་བུ་དང་ཉིས་བརྒྱ་ལྔ་བཅུའི་ཚུལ་ཁྲིམས་ལ་སོགས་པ་ངེས་ཚིག་སོ་སོར་གསལ་ཞིང་སྣང་བ་ནི་འདི་ལྟ་སྟེ། འཇིག་རྟེན་གྱི་སྐྱེ་བོ་ཕལ་པ་རྣམས་ལ་ཆད་མདོ་དང་མནའ་ཉིད་བཙན་པ་རུ་སྣང་ངོ་། །དོན་ལ་ཤེད་མ་བྱེ་བས་བྱིས་པ་ཉན་ཐོས་རྣམས་ལ་ཚུལ་ཁྲིམས་ཀྱི་བསླབ་པ་སྤོང་བའི་ཤེས་པ་ཞེས་སུ་གྲགས་ཤིང་སྣང་ངོ་། །དོན་ཕྱོགས་ལ་ཤེད་བྱེ་བས་ནར་སོན་པ་བྱང་ཆུབ་སེམས་དཔའ་ལ་སྡོམ་པ་ཞེས་བྱ་བར་གྲགས་སོ། །ཐེག་པ་ཆེན་པོའི་གསང་སྔགས་ཕྱི་པ་དང་བླ་མེད་ནང་པ་མཆོག་ལ་རྩ་བ་དང་ཡན་ལག་གི་དམ་ཚིག་ཉིད་དུ་ངེས་པར་སྣང་ཞིང་གྲགས་སོ། །དེ་ལྟ་བུའི་སྣང་ལུགས་དེ་དག་རྣམས་ནི། དམ་ཚིག་ཆེན་པོ་ནོར་བུ་རིན་པོ་ཆེ་ལྟར་དམ་པ་མང་པོའི་དངོས་གཞིར་གྱུར་པས་རང་བཞིན་གཅིག་གི་དོན་ལས་མ་གཡོས་པར་གནས་ཀྱང་སྐྱེ་བོ་ནས་ཨ་ནུའི་བར་གྱིས་གདུལ་བྱ་རྣམས་ཇི་ལྟར་འདུལ་བའི་སྣང་ངོ་དང་འཚམས་པར་རང་རང་ལ་སོ་སོར་སྣང་ཞིང་གྲགས་པར་གྱུར་པ་ཁོ་ན་ཡིན་ནོ། །དྲུག་པ་ནི། དེ་བཞིན་ཉིད་ལྡན། ཞེས་པ་ནས། འདས་ན་ཚིག་པར་འགྱུར། །ཞེས་པའི་བར་གྱིས་བསྟན་ཏེ། དེ་བས་ན་དེ་ཁོ་ན་ཉིད་ཆོས་ཉིད་དེ་བཞིན་ཉིད་ཀྱི་དོན་རྟོགས་པ་དང་ལྡན་ཅིང་གོམས་པ་ཅན་ནི་དམ་པར་ངེས་པ་སྟེ་དུས་བཞི་ཀུན་ཏུ་འདའ་བ་དང་ཉམས་པ་མེད་པར་རྣམ་རྟོག་ཀུན་སྲེག་པར་བྱེད་དོ། །གལ་ཏེ་ལྟ་བ་དང་བྲལ་ནས་དོན་དེ་ལས་འདས་པར་གྱུར་ན་རང་གི་རྒྱུད་ཚིག་སྟེ་འོག་ཏུ་ལྟུང་བར་འགྱུར་བས་དམ་ཚིག་ཆེན་པོ་ཞེས་པའི་ངེས་ཚིག་གིས་བསྟན་པ་ཡིན་ཏེ། རིན་པོ་ཆེ་རྒྱས་ལས། བྱང་ཆུབ་སེམས་ཉིད་དམ་པའི་དོན། །གནས་དང་མི་གནས་ཁྱད་པར་ལས། །རྣམ་པར་རྟོག་དང་རང་རྒྱུད་སྲེག །དམ་ཚིག་ཅེས་སུ་དཔའ་བོས་གསུངས། །ཞེས་སོ། །བདུན་པ་ནི། གཅིག་བསྲུང་བས་ན། ཞེས་པ་ནས། དོན་དུ་འགྱུར་བར་བྱ། །ཞེས་པའི་བར་གྱིས་བསྟན་ཏེ། ངེས་པར་ཆོས་ཉིད་དེ་བཞིན་ཉིད་ཀྱི་དོན་རྟོགས་ནས་རིས་མེད་མཉམ་པ་ཆེན་པོའི་དམ་ཚིག་གཅིག་བསྲུང་བས་དོན་ལས་འདའ་ཉམས་གང་ཡང་མེད་པས་ན་བསྲུང་མཚམས་ཅན་གྱི་དམ་ཚིག་སྡོམ་པ་ཐམས་ཅད་ལ་ཞིག་རལ་ལྟ་བུར་བྱུང་ཡང་ཀུན་ཀྱང་དོན་ལ་བསྲུངས་པར་འགྱུར་བས་སྐྱོན་དང་བྲལ་བའི་དམ་པའི་དམ་ཚིག་ཆེན་པོ་འདི་ནི། གོང་དུ་བཤད་པའི་སོ་སོར་སྐྱེ་བོ་ནས་ཨ་ནུ་མན་ཆད་ཐེག་པ་སོ་སོ་ཀུན་གྱིས་བསྲུང་མཚམས་རྣམས་དང་འགལ་བར་མི་བྱ་བ་ནི་འདིར་བྲེ་ཕུལ་གྱི་ཚུལ་གྱིས་ཚང་བ་དང་། རྒྱལ་པོ་དང་འབངས་ལྟ་བུའི་ཚུལ་གྱིས་ཐེག་པ་ཀུན་གྱི་བསྲུང་བ་རྣམས་དང་དུ་བླང་ཞིང་ངོ་བོས་དག་པར་གྱུར་པ་དེ། འོན་ཀྱང་དེ་དག་ཐམས་ཅད་དམ་པ་ཆེན་པོ་གང་གཅིག་གི་རང་བཞིན་གྱིས་རྒྱས་ཐེབས་པའི་དོན་གྱི་རང་བཞིན་རྟོགས་ནས་གདེང་དུ་ཆུད་དེ་དོན་ལས་འགྱུར་བ་མེད་པར་མི་ཉམས་པར་བྱ་བའི་དོན་ཏེ། འདི་ནི་སྡོམ་པ་གསུམ་ལྡན་གྱི་ལུང་དུའང་དྲང་ངོ་ཞེས་གསུངས་སོ། །གསུམ་པ་ནི། གྲོགས་པོ་དག །ཅེས་པ་ནས། དག་པར་བགྲོས་པའོ། །ཞེས་པའི་བར་གྱིས་བསྟན་ཏེ། གྲོགས་པོ་དག་དེ་དག་ནི་མི་འདའ་བའི་རང་བཞིན་དུ་ཤེས་པར་བྱའོ། །ཞེས་ཐོས་པ་དམ་པ་ཡོངས་སུ་དག་པར་བགྲོས་ཏེ་དམ་ཚིག་གི་ངོ་བོ་བསྟན་པའོ། །བཞི་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི། ཀྱེ་གྲོགས་པོ། ཞེས་པ་ནས། དམ་པའི་རིགས་ཞེས་བཤད། །ཅེས་པའི་བར་གྱིས་བསྟན་ཏེ། ཀྱེ་གྲོགས་པོ་དག །ཅེས་བོས་ནས་ལྟ་བ་དང་དམ་ཚིག་བསྟན་པ་དེ་ལྟར་འདིར་གསང་བ་མཆོག་གི་རང་དོན་གྱི་སྤྱོད་པའི་རང་བཞིན་ཉེ་བར་བསྟན་པ་གང་ཞེ་ན། འདི་ལྟ་སྟེ། ལས་དང་པོ་པའི་ས་ནས་ལུས་དང་ངག་དང་ཡིད་ཀྱི་སྒོ་གསུམ་གྱི་ལས་ཀྱི་མཐའ་གསུམ་ཉེས་པས་མ་གོས་པར་ཡོངས་སུ་དག་པའི་རང་བཞིན་དུ་རྫོགས་ཏེ་མཐར་ཕྱིན་པ་ན། དེ་ནི་ཐེག་པ་ཆེན་པོའི་སྤྱོད་པ་རྨད་དུ་བྱུང་བ་ཡིན་པའི་ཕྱིར། སྐྱེས་བུ་དམ་པ་ལམ་ལ་ཞུགས་པའི་སྤྱོད་པ་དམ་པ་ཡིན་པས་ན་རིགས་ངན་དུ་གྱུར་པ་དམན་པའི་སྤྱོད་པ་མིན་ཏེ། ཐེག་པ་ཆེན་པོའི་རྒྱུད་འཛིན་པ་ཞེས་བཀའ་ལས་གསུངས་པས་གསང་སྔགས་དམ་པའི་རིགས་ཅན་གྱི་སྤྱོད་པ་ཞེས་སུ་སྟོན་མཆོག་ཀུན་ཏུ་བཟང་པོས་བཤད་དེ་བཀའ་སྩལ་བ་ཡིན་ནོ། །གཉིས་པ་ལ་གསུམ་སྟེ། ལུས་ཀྱི་སྤྱོད་པ། ངག་གི་སྤྱོད་པ། སེམས་ཀྱི་སྤྱོད་པ་བཤད་པའོ། །དང་པོ་ལ་གཉིས་ཏེ། རྡོ་རྗེ་ལུས་ཀྱི་སྤྱོད་པ་སྤྱིར་བསྟན་པ། བྱེ་བྲག་ཏུ་བཤད་པའོ། །དང་པོ་ནི། རྡོ་རྗེ་ལུས་ཀྱི། ཞེས་པ་ནས། ཇི་ལྟར་བདེ་ལྡན་སྦྱར། །ཞེས་པའི་བར་གྱིས་བསྟན་ཏེ། སྒོ་གསུམ་གྱི་སྤྱོད་པ་སོ་སོ་ནས་བསྟན་པའི་ཕྱིར། ཁྱད་པར་དུ་ཡང་ས་ལྔ་པ་མན་ཆད་ཀྱི་ཡུལ་ཐེག་པ་ཆེན་པོའི་རྣལ་འབྱོར་པ་ཡང་དག་པའི་དོན་དང་མི་ཕྱེད་པས་གསང་སྔགས་རྡོ་རྗེ་ལྟ་བུའི་སྒོར་ཞུགས་པའི་དམ་པ་རྣམས་ཀྱི་ལུས་ཀྱི་སྤྱོད་པ་ནི་ཇི་ལྟར་སྤྱོད་ཞེ་ན། ཐར་པ་དེ་ཉིད་འདོད་གཟུགས་དང་གཟུགས་མེད་ལྟ་བུ་མིན་པས། ཚིག་ཕྱེད་ཕྱེད་ཀྱིས་དོན་དང་བྱ་བར་འགྱུར་ཏེ། ཡུལ་ལ་དམིགས་ནས་ཆེད་དུ་བྱེད་པ་དང་བྲལ་བས་རིལ་མཉམ་པའི་ངང་ལ་བདག་མཐོ་སར་ཕྱིན་པ་མེད་ལས་དོན་གྱི་ངོ་བོར་གྱུར་པའི་ཕྱིར་ལུས་ཀྱིས་ཚུལ་མི་འཆོས་པའམ་བཅོས་པར་མི་བྱ་བ་དང་། ཆོས་སོ་ཅོག་སེམས་ཀྱི་ཆོས་ཉིད་དུ་གཅིག་པས་བདག་ཀྱང་། ལུས་སེམས་དང་བྱ་བའི་ལས་དང་གྲོགས་རྣམས་གང་ཡང་གཉིས་གཉིས་ཐམས་ཅད་རྣམ་པར་སྤང་ནས་གཅིག་པུ་ཉིད་དུ་གྱུར་པས། དགོན་གནས་དབེན་པ་ཞིག་ཏུ་གཅིག་ཏུ་གནས་ཏེ་འདུག་པར་བྱ་བ་དང་། དེ་ནས་ཚིག་ཕྱེད་ཕྱེད་ཀྱིས་དོན་དང་བྱ་བར་མི་སྦྱོར་བར། ཚམ་ཚོམ་མེད་པར་གླང་པོ་ཆེན་པོའི་ལྟ་སྟངས་ལྟར་ཇི་བཞིན་པ་ལས་མ་བཅོས་པར་བག་ཚ་བ་མེད་དེ་ཟོན་བག་ཆེ་བ་དང་ལྡན་པར་བྱ་བ་དང་། དེ་བཞིན་དུ་ལུས་ཀྱི་སྤྱོད་པ་བཅོས་བསླད་མེད་པར་སེམས་རང་ལུགས་སུ་རྣལ་མས་གནས་ཏེ་འདུག་པར་བྱ་བ་དང་། གནས་གང་དུ་གནས་པ་དེར་ཡང་རྟོགས་པའི་ངང་ལ་དོན་དང་ལྡན་པར་རྟག་ཏུ་འདུག་སྟེ་དབེན་པ་ལ་མི་སྐྱོ་བར་བྱ་འཕུར་བ་བཞིན་མིན་པར་གནས་ཏེ་མ་ངེས་པའི་སྐྱོན་མེད་པར་བྱ་བ་དང་། འོ་ན་དེ་ལ་ཆགས་སམ་ཞེ་ན། དོན་ལ་གནས་པ་དང་ལྡན་པས་རྟག་པར་འདུག་པའི་དབེན་གནས་དེ་ཉིད་ལའང་མི་དམིགས་པར་ཤེས་ནས་ཡུལ་གྱི་ས་ལ་ལྷག་པར་ཆགས་ཞེན་མི་བྱ་བ་དང་། འགྲོ་ཉལ་འདུག་པ་དང་ལོངས་སྤྱོད་བྱེད་པའི་སྤྱོད་ལམ་རྣམ་བཞིར་ཇི་ལྟར་གང་དང་ལྡན་པར་གནས་པ་དེར་ཡང་ལུས་ལ་ཆེད་དུ་བཅོས་པ་མེད་པར་མ་བཅོས་རྣལ་མར་རང་ལུགས་སུ་གནས་པར་བྱ་བ་དང་། གོས་རྒྱན་གྱི་རྣམ་པ་གང་ཡང་ཚ་གྲང་གིས་གདུང་བས་ལུས་སེམས་མི་ཉེན་པར་བྱེད་པའི་ཕྱིར་གནོད་པ་སྐྱོབ་པ་དེ་དག་གི་རྐྱེན་ཙམ་ལས་གཞན་ལྷག་པར་བཟང་བ་དང་མཛེས་པའི་རྒྱན་གྱི་ཕྱིར་དུ་བཅོས་པར་མི་བྱ་བ་དང་། གནས་གང་དུ་ཡང་ལུས་སྤྱོད་ཇི་ལྟར་བདེ་བ་ལྟར་བག་ཡངས་དང་ལྡན་པར་ལུས་དང་འཚམས་པར་སྦྱར་ཏེ་དོན་དང་ལྡན་པར་བྱ་བའོ། །ལས་དང་པོ་པས་རང་དོན་དུ་སྤྱོད་པར་བྱ་བར་མ་ཟད་དེ་ཁོ་ན་ཉིད་ཀློང་དུ་གྱུར་ཀྱང་གཞན་གྱི་ཕྱིར་ལུས་སྤྱོད་དགུ་པོ་ལས་མི་འདའ་བར་བྱའོ། །གཉིས་པ་ལ་བཞི་སྟེ། བྱ་བྱེད་མི་བཅོས་པར་བསྟན་པ། ཁ་ཟས་མི་བཅོས་པར་བཤད་པ། མཚམས་བཅད་པའི་ཚུལ་བསྟན་པ། གནས་མི་བཅོས་པར་བཤད་པའོ། །དང་པོ་ནི། རྡོ་རྗེ་སྔགས་ཀྱི། ཞེས་པ་ནས། རྣལ་མས་གནས་པར་བྱ། །ཞེས་པའི་བར་གྱིས་བསྟན་ཏེ། དེ་བཞིན་དུ། རྡོ་རྗེ་ཐེག་པ་གསང་བ་སྔགས་ཀྱི་ལུས་ཀྱི་སྤྱོད་ཡུལ་ནི། སྤྱིར་བྱ་བ་མེད་པའི་རྣལ་འབྱོར་སྒོམ་ལམ་པ་དང་། ཁྱད་པར་དུ་ཡང་མཐར་ལམ་ཐ་མ་བདག་ཉིད་ཆེན་པོའི་རྣལ་འབྱོར་དང་། ལྷུན་གྱིས་གྲུབ་པའི་རྣལ་འབྱོར་དང་། ཀློང་ཡངས་ཆུབ་པའི་རྣལ་འབྱོར་ལ་གནས་པས་བྱ་བ་གང་གིས་ཀྱང་བསྟངས་སུ་མེད་པའི་ཕྱིར། མཆོད་རྟེན་མི་བརྩིག་པ་དང་། གླེགས་བམ་མི་ཀློག་པ་ལ་སོགས་པ་དགུ་པོ་མི་བྱའོ། །རྣམ་པ་གཞན་དུ་ན་ཡང་བློ་ཆེན་པོས་གནས་ལུགས་མ་བཅོས་པར་རང་གྲོལ་བྱ་བ་མེད་པའི་དོན་རྟོགས་ནས་མཉམ་པ་ཉིད་སྒོམ་པའི་རྣལ་འབྱོར་པ་ཀུན་གྱིས་ཀྱང་ཏིང་ངེ་འཛིན་ལ་གནས་པའི་དུས་སུ། མཆོད་རྟེན་བརྩིགས་པ་དག་གི་ལས་ཆེད་དུ་མི་བྱ་ལ་གླེགས་བམ་ཀླག་པའམ་གདོན་པར་ཡང་མི་བྱ་ཞིང་བྲིས་སྐུ་དང་དཀྱིལ་འཁོར་གྱི་བྱ་བ་སོགས་གཟུགས་བརྙན་བརྩམ་པའི་ལས་ཀྱི་བྱ་བ་མི་བྱ་བ་དང་། དེ་བཞིན་དུ་རྩོལ་བས་དོན་ལས་གཡེང་བར་འགྱུར་བས་ལག་གི་ཕྱག་རྒྱ་མི་བཅིང་ཞིང་ངག་གི་སྔགས་བཟླས་པ་བྱས་པས་ཏིང་འཛིན་དེ་ལ་སྒྲིབས་པར་འགྱུར་ལ། རྣལ་འབྱོར་པས་སུ་ལའང་ལུས་ཀྱི་ཕྱག་འཚལ་བར་མི་བྱ་སྟེ། སྒོམ་ཆེན་གྱི་ཕྱག་ལྕི་བས་སོ། །གལ་ཏེ་ཁ་ན་མ་ཐོ་བས་འཇིགས་ནའང་། ཕྱག་གི་གནས་གང་ཡིན་པའི་སྤྱི་བོར་ལྷའམ་བླ་མ་གནས་པར་བྱས་ལ་ཕྱག་འཚལ་བ་དང་། ནོར་རྫས་སྣ་ཚོགས་རྙེད་པ་དང་། མང་པོས་བཀུར་སྟི་བྱ་བའི་ཆེད་དུ་བལྟ་བ་མ་ཡིན་ཞིང་། འཇིག་རྟེན་གྱི་ཁེ་སྒྲུབ་ཕྱིར་ཡང་མ་ཡིན་ལ་གྲགས་པ་འདོད་པའི་ཕྱིར་ཡང་སྤྱད་པ་མིན་ཏེ་དེ་ལྟར་དགུའོ། །དེའི་དགོས་ཆེད་ནི། དེ་དག་ཅི་ཡི་ཕྱིར་ཞེ་ན། ལས་དང་པོ་པ་དང་མཚན་མ་རྟགས་ཀྱི་རྣལ་འབྱོར་པ་ཡང་ལུས་བརྟན་ན་སེམས་བརྟན་ལ་སེམས་བརྟན་ན་ཏིང་ངེ་འཛིན་སྟོབས་སུ་འགྱུར་བས་ན། གཡེང་བ་དྲུག་ལས་ཕྱི་རོལ་གྱི་གཡེང་བ་འབའ་ཞིག་ཡིན་པ་དང་། ཤིན་ཏུ་ཡང་བསམ་གཏན་གྱི་དགྲར་གྱུར་ཏེ། སྒོ་གསུམ་དོན་ལས་གཡེང་བར་འགྱུར་བ་ཡིན་པའི་ཕྱིར་གྱི་གཏན་ཚིགས་ངེས་ན་དོན་མཉམ་པའི་ངང་དུ་བློ་མི་ཕེབས་ཏེ་དེ་ལ་ཉེ་བ་མ་ཡིན་པར་དོན་ལས་རིང་བར་བྱེད་པས་ལུས་འདི་མ་བཅོས་རང་གནས་སུ་རྣལ་མས་གནས་པར་བྱའོ། །འདི་དག་ཀྱང་ལུས་སྤྱོད་དུ་འགྱུར་ཏེ་བསྡོམས་པའི་རྣམ་གྲངས་བཅོ་བརྒྱད་དོ། །གཉིས་པ་ནི། རྣལ་འབྱོར་ངེས་པའི། ཞེས་པ་ནས། ཡོངས་སུ་མ་དག་པའོ། །ཞེས་པའི་བར་གྱིས་བསྟན་ཏེ། ཐེག་པ་ཆེན་པོའི་རྣལ་འབྱོར་པ་གསང་སྔགས་སུ་རིགས་ངེས་ཤིང་རྟོགས་པའི་གདེངས་དང་ལྡན་ཏེ་བསྒོམ་པར་འདོད་པའི་བསམ་གཏན་པས་སྐུ་གསུང་ཐུགས་ཀྱི་རྡོ་རྗེ་སྒྲུབ་ཅིང་གསང་བ་སྔགས་ཀྱི་ཡོན་ཏན་འབྱུང་བའི་གནས་སུ་གྱུར་པའི་ཁ་ཟས་ཀྱི་སྤྱོད་པ་ཡང་ནི། ལུས་ཀྱི་གཟུངས་སམ་གཟུང་འཛིན་ཅིང་གསོ་བར་བྱེད་པའི་རྟེན་གྱི་ཆེད་ཙམ་དུ་བདག་རང་ལ་གང་ལྡན་ཏེ་སྔར་གྱི་བསོད་ནམས་དང་མཐུན་པར་ཡོ་བྱད་གང་ཡོད་དང་འབྱོར་བ་ཇི་ལྟར་ལྡན་པ་དེ་ལས་མ་གཏོགས་པར་ཞིམ་པ་ལ་སོགས་པའི་རོ་ལ་ཆགས་པས་ཟས་ཀྱི་དོན་གྱི་ཕྱིར་ཆེད་དུ་གཉེར་ནས་བསྒྲུབ་པར་མི་བྱ་བ་དང་། ལུས་ཀྱི་དྲོད་རྒྱས་ཏེ་མཚག་པར་རེ་བ་དང་ཉམས་བསྐྱེད་པའི་ཕྱིར་ཁ་ཟས་ཟ་ཞིང་བཙལ་བ་ག་ལ་ཡིན་ཏེ་མ་ཡིན་པར། བསམ་པ་མི་དམིགས་པའི་དོན་དང་མ་བྲལ་བས་ཁ་ཟས་ཆེད་དུ་མ་བཅོས་པར་གཡོ་སྒྱུ་སྤངས་པས་རྣལ་མ་རང་ཐད་ཙམ་དུ་ཇི་བཞིན་པར་བཟའི་ཞེས་བཟའ་བར་བྱ་ཡི། འཚོ་བའི་ཟས་ཀྱི་ཆེད་དུ་ཆགས་ཤིང་ཞེན་པས་གཡོས་ཀྱི་བྱེ་བྲག་སྣ་ཚོགས་ཀྱིས་བཅོས་ཤིང་བསྒྱུར་བར་མི་བྱ་བ་དང་། ཟས་ཀྱི་ནང་ནས་རོ་ཞིམ་པ་ལ་ཆགས་པ་དང་མི་ཞིམ་པ་ལ་མ་ཆགས་པས་སྤང་ལེན་མི་བྱ་བར་བླང་དོར་མེད་པར་བྱ་བ་དང་། གཞན་གྱིས་འཚོ་བ་སྦྱར་བ་ལྟ་བུར་རང་ལ་ཁ་ཟས་ཡོད་བཞིན་དུ་ལྷག་པར་ཆགས་པས་བླང་བར་བྱ་བ་མ་ཡིན་ཞིང་བསོད་སྙོམས་དང་སློང་མོས་འཚོ་བར་ཡོང་ཡེ་མི་བྱ་སྟེ། ཅི་ཡི་ཕྱིར་ན་གཏན་ཚིགས་ནི་བདག་གཞན་དང་གཉིས་ཀ་དང་ཆོས་ཀྱི་དོན་དུ་མི་འགྱུར་བའི་ཕྱིར་ཏེ་སློང་བ་ལ་མི་དགའ་བ་འོང་བས་གཡེང་བ་སྐྱེས་ན་བདག་གི་དོན་དུ་མི་འགྱུར་བ་དང་། རྐྱེན་དེས་ཕ་རོལ་པོ་ལ་ཆགས་སྡང་སྐྱེས་ན་ཁོའི་དོན་དུ་མི་འགྱུར་བས་ན་དོན་གཉིས་དང་བྲལ་བ་ནི། འཚོ་བ་ཡོངས་སུ་མ་དག་པ་ཞེས་བྱའོ། །དེ་ལྟར་བདུན་ཀྱང་རྩ་བའི་དབང་གིས་ལུས་སྤྱོད་དུ་འགྱུར་རོ། །གསུམ་པ་ནི། མཚམས་མེད་པ་ལས། ཞེས་པ་ནས། འདྲུལ་རྣམས་གཅད་པར་བྱ། ཞེས་པའི་བར་གྱིས་བསྟན་ཏེ། དེ་ཡང་། ཇི་སྐད་དུ་ཡེ་གདལ་བ་ལས་ཕྱི་ནང་བདག་གཞན་མེད། །ཅེས་གསུངས་པ་ལྟར། ཆོས་ཉིད་ལ་མཚམས་མེད་པའམ་ཡང་ན་སྔར་མཚམས་དང་མི་ལྡན་པ་ལས་ཕྱིས་དགོན་པར་ཉམས་པའམ་བསམ་དགྲ་རྣམས་གཅོད་ཅིང་ལམ་པས་འགྲུས་པར་འགྱུར་བའི་ཕྱིར་གྲོང་ཡུལ་ན་གནས་ཀྱང་རུང་སྟེ་མ་འདྲུལ་བར་མཚམས་གཅོད་པར་བྱེད་པ་འདི་ནི་རྣལ་འབྱོར་པ་ལྟ་སྒོམ་ཅན་གྱི་ལས་སུ་བྱ་བ་དམ་པ་ཡིན་ནོ། །དེས་ན་ཕྱིའི་རྟོག་རྒྱུན་བཅད་དེ་ཤེས་བྱ་དམ་པའི་ངོ་བོ་ནང་གི་སེམས་ཀྱི་ཆོས་ཉིད་ལ་སྒོམ་པའི་རྣལ་འབྱོར་གྱི་ཐབས་ལ་བརྟེན་ནས་ངེས་པའི་དོན་དུ་འཇུག་པ་ཡི་དུས་ཀྱི་ཚེ་ན་ཕྱི་རོལ་ཡུལ་དུ་གྱུར་པ་ཡི་འདུ་འཛི་དང་རྣམ་པར་གཡེང་བ་ཡིས། བསམ་གཏན་མཆོག་གི་ལམ་གྱི་བར་དུ་གཅོད་པ་བསལ་ཞིང་སྤང་བའི་དགོས་ཆེད་ཀྱི་ཕྱིར་དུ་ཕྱི་ཡི་གྲོང་ཡུལ་ལམ་འགྲོ་བ་གཞན་གྱི་གནས་དང་། ནང་གི་རང་གནས་ཀྱི་ས་མཚམས་སུ་གྱུར་པའི་བར་དུ་རང་ཉིད་ཕྱིར་འགྲོ་བ་དང་གཞན་རྣམས་ནང་དུ་འོང་བའི་རྒྱུ་འགྲུལ་རྣམས་གཅད་པར་བྱ་བའི་རྟགས་ཐོ་ཡང་བརྩིགས་པར་བྱའོ། །བཞི་པ་ནི། གང་ལ་གནས་གཞི། ཞེས་པ་ནས། མེད་པར་རང་བྱུང་བའོ། །ཞེས་པའི་བར་གྱིས་བསྟན་ཏེ། དེ་ལྟར་མཚམས་བཅད་པའི་གནས་དེར་ལུས་ཇི་ལྟར་སྤྱད་ཞེ་ན། གཅིག་ཆར་བའི་རྣལ་འབྱོར་མཆོག་སུ་ཞིག་བསྒོམ་པའི་ཚེ་བློ་ཆེ་བ་གང་གི་ཡུལ་ནི་ཐམས་ཅད་རང་རིག་པའི་ངོ་བོར་འོད་གསལ་བར་ཤར་བ་ལ་ལུས་སེམས་གནས་པར་བྱ་བའི་གཞི་རྟེན་མ་དམིགས་ཏེ་ངོ་བོ་མེད་པར་རྟོགས་པས་ལུས་གནས་ཀྱི་རང་བཞིན་མ་གྲུབ་པའི་ཕྱིར་གནས་དེ་ཡང་ཆེད་དུ་བདེར་ཞེས་བདེ་བར་བྱ་བ་དང་། ཆོས་ཉིད་ཀྱི་ངང་ལ་ལུས་བཅོས་པས་ཁ་ན་མེད་དེ། མཁན་པོ་གཉན་དཔལ་དབྱངས་ཀྱིས། ལུས་སེམས་མ་སྐྱེས་གཞི་མེད་པས། །མཁའ་ལྟར་བཅོས་པའི་ཁ་ན་མེད། །ཅེས་དང་། སྒྱུ་མ་བཞིན་དུ་ལུས་ཤེས་ན། །དྲང་འདུག་སྐྱིལ་ཀྲུང་འཆའ་བའང་མེད། །སྤྱོད་ལམ་གསུམ་གྱིས་གནས་པ་གང་། །ཆེད་དུ་བྱ་མེད་བྱེད་པའང་མེད། །ཅེས་སོ། །དེ་བས་ན་ལུས་སྐྱིལ་ཀྲུང་ལ་སོགས་པ་ཆོས་དྲུག་གིས་བཅོས་པར་མི་བྱའོ། །འོ་ན་དེ་དག་སྐྱོན་ནམ་ཞེ་ན། གང་ཞིག་ལུས་གནས་ལ་ཞེན་ཞིང་ཆགས་པས་གནས་སུ་ལུས་འཆོས་པའི་སྤྱོད་ལམ་ཆེད་དུ་སྤྱོད་པར་བྱེད་པ་དེས་ནི། ལུས་གནས་བཅོས་པས་ཡང་དག་པའི་དོན་ལ་བསླད་དེ་སེལ་ཞུགས་པ་ཡིན་ནོ། །དེ་བས་ན་ལོ་ཙཱ་བ་ཀ་བ་དཔལ་བརྩེགས་ཀྱིས་ལྟ་རིམ་སྣང་བ་བཅུ་བདུན་པ་ལས། ལུས་ངག་མ་སྐྱེས་གཞི་མེད་ཕྱིར། །སྐྱིལ་ཀྲུང་སྨྲ་བཅད་ཁ་ན་མེད། །དེ་བཞིན་སེམས་ཀྱང་དངོས་བྲལ་བས། །རྟོག་སྤངས་སྒོམ་པའི་ཁར་མི་འོང་། །དེ་ལྟར་རྟོགས་པའི་སྒོམ་པ་པོ། །ཡལ་བར་འདུག་པ་ནམ་ཡང་མེད། །ཅི་ཕྱིར་བདག་ཉིད་དེ་ཕྱིར་ཏེ། །རང་གི་དབྱིངས་ལས་གཡོས་པ་མེད། །ཅེས་གསུངས་པ་ལྟར། བློ་མཆོག་ཏུ་ཆེ་བའི་སྒོམ་པ་པོས་བསམ་གཏན་བྱེད་པའི་དུས་སུ་ལུས་སེམས་ཀྱི་དངོས་པོ་ཡེ་མ་དམིགས་པས་དབེན་པ་རང་གནས་ཡིན་པ་ལ་ལུས་སུ་མཐོང་ནས་ཆེད་དུ་བཅོས་པར་མི་བྱའོ། །འོན་ཀྱང་ལུས་སེམས་ཀྱི་རང་བཞིན་འོད་གསལ་བ་དེ་ལ་ལུས་སེམས་ཀྱི་དངོས་པོ་དེ་ལས་དབེན་པས་མ་བཅོས་མ་བསླད་པ་དེ་ཉིད་ཡེ་ནས་ཆོས་ཉིད་མཐའ་ཐམས་ཅད་ལས་རིང་བས་དབེན་པའི་གནས་མཆོག་དམ་པ་ཉིད་དེ་འདི་ནི་རྣལ་འབྱོར་ཆེན་པོ་མཆོག་གི་སྤྱོད་ཡུལ་ཁོ་ནའོ། །དེར་མ་ཟད་དོན་ཆེན་པོ་སྤྱོད་པ་བས་རི་ཕུག་དང་དགོན་པ་དག་མཁར་ལེན་གྱི་བྱ་བས་གཞལ་མེད་ཁང་དུ་བཅོས་པར་མི་བྱ་སྟེ། དེ་ཅིའི་ཕྱིར་ཞེ་ན། རི་ཕུག་ལ་སོགས་པའི་ངོ་བོ་དེ་ཉིད་སེམས་ཀྱི་རང་བཞིན་ཡེ་ཇི་བཞིན་པ་བློས་དཔག་ཏུ་མེད་པའི་གནས་ལུགས་མ་བཅོས་མ་བསླད་པས་ཆོས་ཉིད་ཟབ་མོ་བྱེད་པས་མ་བྱས་པའི་ངང་གི་ཐིག་ལེའི་ངོ་བོ་འདི་ནི་ཡེ་གདོད་མ་ནས་དུས་གསུམ་གྱི་རྒྱལ་བ་ཐམས་ཅད་ཀྱི་བཞུགས་གནས་རྨད་དུ་བྱུང་བའི་གཞལ་མེད་ཁང་ཆེན་པོར། ལམ་པའི་བློས་བྱེད་པ་མེད་པར་རང་བྱུང་བ་ཡིན་པའི་ཕྱིར། ཀུན་འདུས་ལས། བསམ་གཏན་ལུས་ནི་གཙོར་བྱེད་དང་། །གནས་བདེ་ལུས་ཀྱི་ཕྱག་རྒྱ་ཀུན། །མཚན་མར་མངོན་པར་ཞེན་ལས་བྱུང་། །མཚན་མེད་སེམས་ལ་བྱ་བརྩལ་མེད། །སྨིག་རྒྱུ་བཞིན་དུ་ལུས་རེད་ན། །གནས་དང་ཕྱག་རྒྱར་དམིགས་པ་མེད། །བྱེད་སྤྱོད་ཆེད་དུ་སྟེན་བྱེད་ཅིང་། །བྱ་མེད་བྱ་བའི་དམིགས་པའང་མེད། །དེ་ཉིད་མ་སྐྱེས་གཞི་མེད་པས། །གནས་དེར་ལུས་བཅོས་ཁ་ན་མེད། །ཞེན་པར་འཆོས་ལམ་སྤྱོད་བྱེད་པ། །དེ་ཉིད་གཟུང་འཛིན་རྣམ་རྟོག་སྟེ། །བསམ་གཏན་ལུས་དབེན་དབེན་མ་ཡིན། །མཁའ་ལ་སེམས་དབེན་དབེན་པའི་མཆོག །སེམས་ཉིད་དབེན་པའི་གནས་ཡིན་ཏེ། །འདི་ནི་རྣལ་འབྱོར་སྤྱོད་མཆོག་གནས། །བླ་གབ་རི་ཕུག་གཞལ་མེད་མིན། །སེམས་ཉིད་དཔག་ཡས་གཞལ་མེད་མཆོག །ཅེས་གསུངས་ཏེ་གང་ཞིག་རི་ཕུག་འཆོས་པ་ལ་ནི་དགོན་པར་ཞེན་པ་ཡོད་པས་དེ་དག་བསལ་བའི་ཆེད་དུའང་མི་འཆོས་པའོ། །འོ་ན་གཏན་ནས་དགོན་པ་དང་དུ་མི་བླང་ངམ་ཞེ་ན། དེ་ལྟར་ཐག་ཆོད་ནས་དགོན་པར་འབྱུང་བ་དང་། གནས་ཉམས་དགའ་བར་བྱ་བ་ནི་འཛིན་པ་མེད་པས་བྱ་བ་དང་གང་ཡང་སྤང་བྱ་མིན་པས་མི་འགལ་བར་ཐེ་ཚོམ་མེད་དོ། །དེ་དག་གི་རྣལ་འབྱོར་མཆོག་གི་ལུས་སྤྱོད་དེ་རྣམ་གྲངས་བསྡོམས་ནས་ཉི་ཤུ་རྩ་བརྒྱད་དུ་འགྱུར་རོ། །གཉིས་པ་ནི། རྡོ་རྗེ་ངག་གི། ཞེས་པ་ནས། ངག་གི་སྤྱོད་པར་བཤད། །ཅེས་པའི་བར་གྱིས་བསྟན་ཏེ། རྣལ་འབྱོར་ཆེན་པོའི་རྡོ་རྗེ་ངག་གི་སྤྱོད་ཡུལ་བསྟན་པ་ཡང་། བླ་མ་དང་གྲོགས་དམ་པ་དང་ཆོས་དང་མཐུན་པར་བྱ་བའི་དགོས་ཆེད་དུ་སྙན་པར་སྨྲ་བ་དང་། དེ་ལས་གཞན་དུ་ཁ་གསག་ལ་སོགས་པ་ཁ་གཏོགས་དང་ག་ཞའམ་ཀུ་རེ་དང་རྟ་གད་བྱ་བ་མིན་ལ་སྨྲ་ཞིང་བརྗོད་པ་ཐམས་ཅད་མི་འགྱུར་པར་ངེས་པར་བདེན་པ་ཉིད་དུ་སྨྲ་བ་དང་། སྨྲ་བའི་དོན་ཇི་ལྟ་བར་རྫུན་མེད་པར་དྲང་པོར་འགྱུར་བའི་གསོང་པོར་སྨྲ་ཞིང་ཚིག་དེ་ལས་ཕྱིས་མི་འགྱུར་བར་བྱ་བ་དང་། ངག་གིས་ཇི་ལྟར་བརྗོད་པ་དེ་བཞིན་དུ་དོན་ཀྱང་དེ་དང་མཐུན་པར་བྱ་བ་དང་། སྐབས་དང་དགོས་ཆེད་མེད་པར་ཐམས་ཅད་ཀུན་ཏུ་སྨྲ་བ་མ་ཡིན་པ་དང་། ངག་གིས་གང་བརྗོད་ཅིང་རྗོད་བྱེད་ཀྱི་ཚིག་དེ་བརྗོད་བྱའི་དོན་དང་འབྲེལ་བར་དོན་དང་ལྡན་པར་བྱ་བ་དང་། གཞན་གྱིས་དྲིས་པ་དང་ཁ་ཏ་ལྟ་བུ་སྐབས་དང་དགོས་ཆེད་ཡོད་པ་མ་གཏོགས་པར་དེ་ལྟར་མ་ཡིན་པ་ཀུན་ཏུ་ཅི་ཐོད་ཐོད་དུ་རྣམ་པར་འཆལ་བའི་གཏམ་མང་པོ་སྨྲ་བར་བྱ་བ་མིན་པ་དང་། སྨྲ་བརྗོད་ཀུན་ལ་དཔེས་མཚོན་ཏེ་དོན་གྱི་ཐོག་ཏུ་དབབ་ནས་གོ་ངེས་སུ་འཇལ་བར་བྱེད་པ་དང་། ཆོས་ཐམས་ཅད་ཚད་མས་གཞལ་ཏེ་དོན་སྒྲོ་སྐུར་མེད་པར་སྨྲས་པས་བདག་ཀྱང་ཚད་མར་སྨྲ་བའི་ཚིག་གི་རྗོད་པ་ཅན་དུ་བྱ་བ་དང་། སྤྱོད་པ་ཆེད་དུ་མ་བཅོས་པར་དོན་ལ་ངང་གིས་གནས་པའི་རྣལ་འབྱོར་པ་དམ་པ་ཡིས་རྡོ་རྗེ་ངག་གི་སྤྱོད་པ་དེ་ལྟར་ཡིན་པར་སྟོན་པ་མཆོག་གིས་བཤད་དེ་བཀའ་སྩལ་བ་ཡིན་པས་རྣལ་འབྱོར་མཆོག་གི་ངང་གི་སྤྱོད་པ་རྣམ་པ་བཅུའོ། །གསུམ་པ་ནི། རྡོ་རྗེ་ཡིད་ཀྱི། ཞེས་པ་ནས། ཉི་འོད་གསལ་འདོད་འདྲའོ། །ཞེས་པའི་བར་གྱིས་བསྟན་ཏེ། རྡོ་རྗེ་གསང་བའི་ཐེག་པ་ཆེན་པོའི་ཡིད་ཀྱི་སྤྱོད་ཡུལ་བསྟན་པ་ནི། བློ་ཆེད་དུ་མ་བཅོས་པ་དང་། དོན་གྱི་ངང་ལས་ཡུལ་ལ་མ་གཡོས་པ་དང་། དོན་ལའང་ཡིད་ཀྱིས་ཆེད་དུ་བསམ་པ་དང་བྲལ་བ་དང་། རྟོགས་པའི་དོན་ལས་མི་གཡེང་བ་དང་། མི་རྟོག་པའི་ཏིང་ངེ་འཛིན་མ་རྨུགས་པ་དང་། རྟོག་པའི་ཟུག་རྔུ་དང་བྲལ་ཏེ་དགོངས་པ་གསལ་ཞིང་གནས་པ་དང་། འདོད་པའི་ཡུལ་ལ་ཞེན་པ་མེད་པས་མ་ཆགས་པ་དང་། རྟོགས་པའི་ཏིང་ངེ་འཛིན་དང་སེམས་ཉིད་རང་ལ་སྒྲོ་སྐུར་གྱི་བསམ་པ་དང་བྲལ་བ་དང་། ཡོན་ཏན་ལ་བཟང་པོར་བལྟས་ནས་བླང་བ་མེད་ཅིང་སྐྱོན་ལ་ངན་པར་དམིགས་ཏེ་དོར་བ་མེད་པ་དང་། ཆགས་སྡང་གི་སེམས་ཀྱི་ཡིད་བྱེད་མེད་པ་དང་། ཉེས་པ་འཆབ་སེམས་མེད་པ་དང་། ཡོན་ཏན་གྱི་ཆེ་བས་སྤྱོམ་པ་མེད་པ་དང་། དེ་བཞིན་དུ་ནོར་རྫས་དང་རྙེད་འབྱོར་ལ་ཚོལ་ཞིང་ཆགས་པའི་སེམས་དང་ལྡན་པ་མིན་པ་དང་། རིག་པ་ཕྱོགས་རིས་དང་བྲལ་བར་རྟོགས་པ་དང་མུ་མཐའི་སྣང་བ་མེད་པར་བསམ་པ་ཡོངས་སུ་དག་པ་དང་། དོན་གཉིས་སྒྲུབ་པས་དམ་བཅའ་བའི་གོ་ཆ་བགོས་ནས་སྒོ་གསུམ་གྱི་གཞུང་ལམ་ཉིད་དྲང་པོར་སྲོང་བ་དང་། མ་དག་པའི་ལྟ་བའི་དུག་བདུད་རྩིར་འགྱུར་བས་ཏིང་ངེ་འཛིན་གྱི་སྨན་སྲེལ་ཞིང་ཡང་དག་པའི་ལྟ་བའི་གདེང་གིས་མཚོན་ཆ་ལྡན་པ་དང་། གཉིས་མེད་ཀྱི་ལྟ་བའི་ངང་ལས་མི་འགྱུར་བས་རྡོ་རྗེའི་རྫོང་ལ་འདྲིས་ཞེན་གྱི་གནས་པ་དང་། བྱང་ཆུབ་ཀྱི་སེམས་ཡིད་བཞིན་ནོར་བུ་འཆང་བར་བྱེད་པས་ཞི་ལྷག་གི་བློ་གྲོས་དང་ལྡན་པ་དང་། ལྟ་བ་དང་ཏིང་ངེ་འཛིན་གདེང་དུ་ཆུད་དེ་གང་དུ་ཡང་མི་འགྱུར་བས་རྐྱེན་གང་ཅིས་ཀྱང་མི་འགྱུར་བ་དང་། རང་རིག་མཉམ་པའི་དབྱིངས་འདིར་ཆོས་ཀུན་དབྱེར་མེད་པས་བདག་གཞན་ཐམས་ཅད་དང་ངང་གཅིག་པ་ཉིད་དུ་རྟོགས་པར་བྱ་བའི་ཕྱིར་དང་། གདུལ་བྱ་གང་གི་བློ་ལ་མངོན་པར་སྣང་ཞིང་གསལ་བའི་ཆེད་དམ། ཡང་ན་དབྱིངས་རྟོགས་པས་ལྟ་བ་བརྟན་པའི་ཕྱིར་སྤྱོད་པ་ཀུན་ནས་ཡོངས་སུ་ལེགས་པའམ་ཆེ་བའི་ཡོན་ཏན་རང་སྣང་བས་མཛེས་པ་དང་། དེ་ལྟར་མི་མཐུན་པ་མེད་པས་བདུད་རྩིའི་གནས་ཀྱི་བག་ཡོད་དང་ལྡན་པ་དང་། ཆོས་ཀྱི་དེ་ཉིད་རྟོགས་པའི་དབང་ལས་ཕྱིན་ཅི་ལོག་གི་སེམས་མེད་པས་ཁྲེལ་ཡོད་དང་མི་འབྲལ་བ་དང་། སེམས་ཉིད་དེ་ལ་ང་རྒྱལ་གྱིས་རློམ་པའམ་ང་བདག་ཏུ་འཛིན་པ་མེད་པས་སེམས་ཀུན་དང་མཐུན་པས་ཐམས་ཅད་ལ་ཡོངས་སུ་ལྡན་ཏེ་ཞི་བའི་སེམས་དང་ལྡན་པར་བྱ་བ་དང་། ཆོས་ཐམས་ཅད་རིལ་ཞི་བ་ཆེན་པོའི་ཆོས་ཉིད་དེ་ཡིན་པར་རྟོགས་པས་སེམས་མཆོག་ཏུ་ངེས་པར་བྱ་བའམ་དོན་དེ་གོ་བར་ངེས་པར་སྒྲོགས་པ་དང་། གང་འདིར་ཆོས་ཐམས་ཅད་སྟོང་པ་ཉིད་པས་བསམ་པ་ཅིར་ཡང་མི་རྟོག་པ་དང་། ཆོས་ཉིད་རྟོགས་པའི་དེ་ཁོ་ན་ཉིད་ཀྱི་ཞི་བ་དང་ལྡན་པས་སེམས་འཁྲུགས་པ་མེད་པ་དང་། བདག་ཉིད་ཀྱི་དབྱིངས་ལས་མ་གཏོགས་པར་གཞན་གང་ནས་ཀྱང་དངོས་གྲུབ་དང་ཡོན་ཏན་ཅི་ཡང་མི་འབྱུང་བས་སེམས་ཉིད་ལས་གཞན་དུ་དངོས་གྲུབ་དང་ཡོན་ཏན་ཚོལ་བའི་སེམས་པ་མེད་པ་དང་། ཟང་ཟིང་ལ་འདོད་ཅིང་ཆགས་པ་མེད་པས་ཚུལ་མི་འཆོས་ཏེ་བཅོས་མའི་ཚུལ་འཆོས་མི་བྱེད་པ་དང་། འདོད་ཡོན་གྱི་ཡུལ་ལ་སེམས་ཆགས་པས་གདུང་བ་མེད་པས་དེ་དང་ཕྲད་པར་འདོད་པའི་བསམ་པ་མེད་པ་དང་། སེམས་ཅི་ལའང་མ་ཆགས་པའི་དོན་གྱི་ཡེ་ཤེས་རང་འབྱུང་དུ་ཤར་བས་ཆོག་པར་འཛིན་པ་དང་ལྡན་པ་དང་། དངོས་པོ་གང་ཅི་ལའང་རང་རིག་པར་རྟོགས་པའི་ཕྱིར་མཚན་མར་རྟོག་ཅིང་རྣམ་པར་མི་འཛིན་པས་གཙང་སྨེ་མེད་ཅིང་དུས་གསུམ་ལ་སྔ་ཕྱིར་ལྟ་བའང་མེད་པས་དེ་བཞིན་ཉིད་ལ་དམ་པར་བལྟས་ནས་དང་དུ་ལེན་པའང་ཡོད་པ་མ་ཡིན་པར་བྱ་བ་སྟེ་དེ་ལྟར་སུམ་ཅུ་རྩ་བདུན་གྱིས་སེམས་ཀྱི་སྤྱོད་པ་ཡང་དག་པར་བསྟན་པའོ། །དེ་ལྟ་བས་ན་རང་རིག་པ་ཆོས་ཀྱི་སྐུ་སེམས་ཉིད་ནམ་མཁའི་རང་བཞིན་ཆོས་ཉིད་བདེ་བར་གཤེགས་པའི་སྙིང་པོ་དེ་ལ་འགྲོ་བ་རྣམས་ཀྱིས་གློ་བུར་དུ་བརྟགས་པའི་རྟོག་པ་སྤྲིན་ལྟ་བུ་རྣམས་ཀྱིས་གཏིབས་ཤིང་སྤུངས་པས་སྒྲིབ་ནས་སེམས་ཀྱི་རང་བཞིན་མ་རྟོགས་པ་དེ་ཉིད་ཡང་དག་པའི་ཤེས་རབ་ཀྱི་རླུང་གིས་ཆོས་ཉིད་ཀྱི་ངང་དུ་རང་དེངས་པར་བྱས་ནས་མ་གཏོར་བར་སྐྱེ་བོ་མ་གྲངས་པ་ག་ཞ་མཁན་གྱི་རྟ་གད་སྐྱེད་པ་དང་མཚུངས་པའི་འཇིག་རྟེན་གྱི་སྤྱོད་པ་བཞའ་ལེ་བ་དང་འདྲ་བ་ལྟ་བུ་ཡིས་སྒྲིབ་པ་བསལ་ཞིང་དག་པས་ཆོས་ཉིད་ཀྱི་དོན་གསལ་བར་འདོད་པ་ཉིད་ནི་ཚི་ཆད་པའི་ཕྱིར་དཔེ་ཇི་ལྟར་ན་ཆུས་གཤེར་བར་བྱས་པས་བྱིས་པ་དག་ཉི་མ་སྤྲིན་དང་ལྡན་པའི་གྲིབ་མ་ཡིས་ཤིན་ཏུ་སྒྲིབ་པར་གྱུར་ནས་གྲང་བས་སྦྲེབས་པ་ན་བྱིས་པའི་རང་བཞིན་ཅི་ཡང་མི་ཤེས་པས་སྤྲིན་ཆེན་འདུས་པའི་ཕུང་པོ་དེ་ལ་རང་གི་ཁ་ཡི་ཕུ་བཏབ་པའི་དབུགས་ཀྱིས་བུས་པར་བྱས་ནས་སྤྲིན་བསལ་ཏེ། ཉི་མའི་འོད་སྣང་གསལ་བར་འདོད་པ་དང་འདྲ་བར་འགྱུར་བ་ཁོ་ནའོ། །གསུམ་པ་ནི། གྲོགས་པོ་དག །ཅེས་པ་ནས། བགྲོས་པའོ། །ཞེས་པའི་བར་གྱིས་བསྟན་ཏེ། གྲོགས་པོ་དག །བཤད་པ་དེ་དག་ནི་དེ་ལྟར་སྒོ་གསུམ་གྱི་སྤྱོད་པའི་རང་བཞིན་དུ་ཤེས་པར་བྱའོ། །ཞེས་ཐོས་པ་དམ་པ་ཕྱིན་ཅི་མ་ལོག་པར་བགྲོས་ཏེ་སྤྱོད་པའི་ངོ་བོ་བསྟན་པའོ། །ལེའུའི་མཚན་ནི། སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། རང་བཞིན་མ་བཅོས་པའི་གསང་སྔགས་ཀྱི་ལྟ་བ་རྟོགས་པའི་རྣལ་འབྱོར་གྱི་རང་བཞིན་གྱི་རྣམ་གྲངས་བཞི་ངེས་པར་བསྟན་པའི་ལེའུ་ཞེས་བྱ་སྟེ། ལྔ་བཅུ་རྩ་བདུན་པ་ཉིད་རྣམ་པར་བཀྲོལ་ཏེ་བཤད་པའོ།། །།གསུམ་པ་ལྗོན་ཤིང་བསྐྱེད་པར་བྱ་བ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི། དེ་བས་ཡང་། ཞེས་པ་ནས། རྣམ་པར་བགྲོ་བར་བྱ། ཞེས་པའི་བར་གྱིས་བསྟན་ཏེ། ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །དེ་ནས་ཡང་འཁོར་ལང་ཀའི་བདག་པོ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་སྟོན་པ་གསང་བ་པའི་བདག་པོ་ལ་ཡོངས་སུ་དྲི་བ་དྲིས་པ། ཀྱེ་གསང་བ་པའི་བདག་པོ། ཉིད་ཀྱིས་ཞེ་ལྔ་པ་ཆོས་ཀྱི་རྣམ་གྲངས་བཅུར་བཀོད་པ་ལས། །གསུམ་པ། ལྗོན་ཤིང་བསྐྱེད་པར་བྱའོ། །ཞེས་དམ་བཅའ་བར་གསུངས་པ་དེ་ཉིད། རྟོགས་པ་དང་གོམས་པའི་ཐབས་གང་གིས་ཚུལ་ཇི་ལྟར་ཡོངས་སུ་ཤེས་པར་བགྱི། སྤྱོད་ཡུལ་གྱི་དངོས་པོ་དེ་གང་གི་ལྗོན་ཤིང་ལགས། ཞེས་དྲི་བ་གཉིས་ནི་ཤེས་པར་བྱ་བའི་ཐབས་དང་སྤྱོད་ཡུལ་གཉིས་ཏེ། དེ་ལྟར་དྲིས་པ་ལས། སྟོན་པ་གསང་བ་པའི་བདག་པོས་ལན་སྨྲས་ཏེ་བཀའ་སྩལ་པ། ཀྱེ་གྲོགས་པོ་དག །ཅེས་བོས་ནས། ཤིང་གི་ངོ་བོ་ནི་བྱང་ཆུབ་སེམས་ཀྱི་ལྗོན་ཤིང་ཞེས་བྱ་བ་སྟེ། རིམས་ཀྱིས་འཕེལ་བ་དང་འབྲས་བུ་ལྷུན་རྫོགས་སུ་རྒྱས་པར་འགྱུར་བས་སོ། །བསྐྱེད་པའི་དགོས་པ་ནི། གོང་ན་མེད་ཅིང་རྟོགས་པར་དཀའ་བས་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་གི་འབྲས་བུར་མཆོག་ཏུ་སྨིན་པར་འགྱུར་བས་གང་སངས་རྒྱས་དང་སེམས་ཅན་ཆོས་ཉིད་དང་ཆོས་ཅན་ལམ་པ་དང་འབྲས་བུ་མཐའ་དག་གི་ངོ་བོ་ཉིད་ཀྱི་སྲོག་འཛིན་པའི་གསོས་སུ་འགྱུར་ཏེ་སྐུ་གསུང་ཐུགས་ཡོན་ཏན་ཕྲིན་ལས་དང་རྣམ་རོལ་ཅིར་ཡང་འཆར་བའི་ཕྱིར་ཏེ། དེ་བས་ན་སྐལ་པ་མཆོག་ལྡན་རྣམས་ཀྱིས་དེ་ལྟ་བུའི་རྡོ་རྗེ་ལྟར་གྱུར་བའི་ལྗོན་ཤིང་དམ་པ་དེ་ཉིད་དོན་ལ་འཇུག་རིམ་བཅུ་ཚན་གྱི་སྒོ་ནས་བསྐྱེད་པར་བྱ་བ་ལ་བརྩོན་པར་བྱའོ། །གྲོགས་པོ་དག་དེའི་ཚུལ་ཉེ་བར་བསྟན་པ་འདི་ལྟ་སྟེ། རྫོགས་པར་བསྐྱེད་པའི་ངེས་ཚིག་གི་གོ་ནས་རིམ་པར་སྦྱོར་བའི་ཚུལ་བསྟན་ཏེ། ཆོས་ཉིད་དབྱིངས་ཀྱི་རང་བཞིན་ཆོས་རྣམས་ཀྱི་དེ་ཁོ་ན་ཉིད་འདུས་མ་བྱས་པའི་ངོ་བོ་རྡོ་རྗེ་ལྟ་བུའི་ཆོས་ལྔ་དང་ལྡན་པའི་སྙིང་པོའམ་བཅུད་དུ་གྱུར་པའི་རྩ་བ་ཆེན་པོ་དེ་ལ། གདོད་ནས་འཁོར་བའི་གཟུང་འཛིན་དང་ལམ་པས་རྩོལ་བའི་རྟོག་པ་གང་གི་ཟུག་རྔུ་དང་འཚེ་བ་ཕྲ་རགས་ཀུན་རྣམ་པར་བྱང་ཞིང་དག་པ་དེར་འཁོར་འདས་ཀྱི་ཆོས་མ་ལུས་པ་མཐའ་དག་ཡོངས་སུ་ཆུབ་སྟེ་ལྷུན་གྱིས་གྲུབ་པའི་ངོ་བོར་རྫོགས་པ་ལ་ནི་བྱང་ཆུབ་སེམས་ཀྱི་ལྗོན་ཤིང་ཞེས་བྱ་སྟེ་གསང་སྔགས་དམ་པ་འདི་ཉིད་དོ། །དེས་ན་རྒྱལ་བ་རྫོགས་པའི་སངས་རྒྱས་གང་གི་དགོངས་པ་མཐར་ཐུག་པ་དེ་ཉིད་ངེས་པར་བསྐྱེད་དེ་གསལ་བར་འགྲེལ་པས་དོན་རྟོགས་ཏེ་རྣམ་པར་རྟོག་པ་བསལ་བར་བྱེད་པའི་ཐབས་ཀྱི་སྒོ་ནས་དོན་ལ་རིམ་པར་སྦྱོར་བའི་སྐབས་སུ་རྣམ་གྲངས་བཅུ་ཚན་གྱིས་བཤད་པ་དེ་དག་རྣམས། དེ་ཇི་ལྟ་བར་མ་ནོད་པ་ཉིད་རིགས་ཅན་དམ་པ་ཁྱོད་རྣམས་ལ་རྣམ་པར་བགྲོ་སྟེ་ཡང་དག་པར་བཤད་པར་བྱ་ཡིས་གཞན་དུ་མ་ཡེངས་པར་རྣ་བ་ལྷོགས་ལ་ཉོན་ཅིག་པར་གདམས་པར་མཛད་པའོ། །འདིར་ལམ་རིམ་གྱིས་པ་ལ་དོན་ལ་རིམ་པར་འཇུག་ཚུལ་དུ་ངེས་ལ། ཅིག་ཆར་བའང་བགྲོད་པ་མྱུར་བས་རིམ་པ་མེད་པ་ལས་དོན་ལ་རྟོགས་རིམས་ཚང་ཞིང་རྫོགས་པར་མངོན་ནོ། །གཉིས་པ་ལ་བཞི་སྟེ། སེམས་ཉིད་དོན་ལ་སྦྱོར་བའི་སྐབས་བཅུ་བཤད་པ། དེ་དག་གི་སྐབས་སུ་འབྱུང་བའི་རིག་པ་བྱང་ཆུབ་ཀྱི་སེམས་བཅུ་བསྟན་པ། དེ་རྣམས་མཚོན་པར་བྱེད་པའི་དཔེ་བཅུ་བཤད་པ། དེ་གསུམ་སྦྱར་ཏེ་ཤིན་ཏུ་གསལ་བར་བསྟན་པའོ། །དང་པོ་ནི། དེ་ལ་དགོངས་འགྲེལ། ཞེས་པ་ནས། གང་དེ་ནུབ་པར་འགྱུར། །ཞེས་པའི་བར་གྱིས་བསྟན་ཏེ། དེ་ཞེས་གདམས་པ་ལ་སྙེགས་པས་མཚན་མ་མེད་པའི་དོན་ལ་འཇུག་པའི་ལམ་གྱི་གཞི་ལ་ལྗོན་ཤིང་བསྐྱེད་པའི་ཐབས་ཀྱིས་སྐབས་རྣམས་རྒྱུ་དང་འབྲས་བུའི་ཚུལ་དུ་འབྲེལ་བ་ཡིས། རྒྱལ་བའི་དགོངས་པ་ངེས་པར་འགྲེལ་པ་ལས་དོན་ལ་ཡང་དག་པར་སྦྱོར་བའི་སྐབས་ཆེན་པོ་ནི་རྣམ་གྲངས་བཅུ་སྟེ། ཚོགས་ཀྱི་ལམ་ས་དང་པོ་ལ་ཡུལ་ཆོས་ཉིད་རྟོགས་པར་འདོད་དེ་འདུན་པ་སྐྱེད་པའི་གནས་སྐབས་དང་། ས་གཉིས་པ་ལ་དེ་ལ་རྩོལ་བ་དྲག་པོས་སྦྱོར་བའི་གནས་སྐབས་དང་། སྦྱོར་བའི་ལམ་ས་གསུམ་པ་ལ་མཐའ་བཅུའི་བསླབ་པར་འཇུག་པའི་གནས་སྐབས་དང་། ས་བཞི་པ་ལ་འདུ་ཤེས་ཆོས་སུ་འགྱུར་བའི་གནས་སྐབས་དང་། ས་ལྔ་པ་ལ་དོན་ལ་སྦྱོར་ནས་སྦྱོང་ལེན་ལ་འཇུག་པའི་གནས་སྐབས་ཏེ་དེ་རྣམས་ཟག་བཅས་སོ། །མཐོང་བའི་ལམ་ས་དྲུག་པ་ལ་ཆོས་ཉིད་ཀྱི་རོ་ཚོར་བའི་གནས་སྐབས་དང་། སྒོམ་པའི་ལམ་ས་བདུན་པ་ལ་ཡུལ་ཆོས་ཉིད་རང་གི་མཚན་ཉིད་ལ་འཇུག་སྟེ་གོམས་པའི་གནས་སྐབས་དང་། མཐར་ལམ་ས་བརྒྱད་པ་ལ་དོན་དམ་རྣམ་པར་མི་རྟོག་པའི་རྟོག་ཆེན་ལ་ཕེབས་པའི་གནས་སྐབས་དང་། ས་དགུ་པ་ལ་དེ་ཁོ་ན་ཉིད་གདེང་དུ་གྱུར་པའི་གནས་སྐབས་དང་། ས་བཅུ་པ་ལ་མཐར་ཕྱིན་ཏེ་ལས་སུ་རུང་བའི་གནས་སྐབས་ཏེ་དེ་རྣམས་ནི་ཟག་མེད་དོ། །དེ་ལྟར་རིག་པ་སྐད་ཅིག་མའི་ངོ་བོའི་རྒྱུན་དང་བཅས་པའི་བྱང་ཆུབ་སེམས་ཀྱི་གནས་སྐབས་བཅུ་སྟེ། ཀུན་འདུས་ལས། དོན་གྱི་རྗེས་སུ་འཇུག་པ་ཡང་། །དོན་ནི་ཆོས་ཉིད་སྙིང་པོ་ལ། །རྗེས་སུ་འཇུག་པ་སེམས་ཡིན་ཏེ། །སེམས་ཉིད་ཆོས་ལ་སྦྱོར་བའི་སྐབས། །རྣམ་པ་བཅུ་ཞེས་འདྲེན་པས་བཤད། །བཅུ་གཉིས་གང་དང་གང་ཞེ་ན། །འདུན་པ་སྐྱེ་བའི་གནས་སྐབས་དང་། །རྩོལ་བ་སྦྱོར་བའི་གནས་སྐབས་དང་། །བསླབ་པ་ལ་འཇུག་གནས་སྐབས་དང་། །འདུ་ཤེས་འགྱུར་བའི་གནས་སྐབས་དང་། །སྦྱོར་ཆེན་ལ་འཇུག་གནས་སྐབས་དང་། །རོ་ཉིད་ཚོར་བའི་གནས་སྐབས་དང་། །ཡུལ་ལ་འཇུག་པའི་གནས་སྐབས་དང་། །རྟོག་ཆེན་ཉིད་ལ་ཕེབས་སྐབས་དང་། །དེ་ཉིད་གདེང་དུ་གྱུར་པའི་སྐབས། །ལས་སུ་རུང་བའི་སྐབས་དང་བཅུ། །ཞེས་སོ། །དེ་ལྟར་རྩ་བ་ལྗོན་ཤིང་གི་སྙིང་པོ་དེ་དག་གི་དོན་རྣམས་རྒྱུན་དུ་བསམ་ནས་འབད་པ་དང་བཅས་པའི་ཕྱིར། རྣལ་འབྱོར་མཆོག་གི་ཐེག་པ་ཆེན་པོའི་སྐབས་རྣམས་སུ་གནས་ཏེ་སེམས་དང་ཆོས་འཕྲད་པས་དོན་ལ་ཕེབས་པའི་རྣལ་འབྱོར་བཅུ་སྐབས་བཅུ་ཡིས་མཐར་ཕྱིན་པ་ཡང་གཞན་བཤད་པའི་རྣལ་འབྱོར་གྱི་རྩ་བ་རྣམ་པ་ལྔ་ཡི་ཁྱད་པར་ལས་སྣང་བར་གྱུར་པ་སྟེ། དེ་ཡང་རྣལ་འབྱོར་བཅུ་དང་། སྐབས་བཅུ་དང་། བྱང་ཆུབ་ཀྱི་སེམས་བཅུ་དང་། རྟགས་དང་དཔེ་བཅུ་དང་། ས་བཅུ་དང་། བསླབ་པའི་མཐའ་བཅུ་སྟེ་བཅུ་ཕྲག་ཚན་དྲུག་གིས། སྐར་ཕྲན་ནས་ཚེས་བཅུ་དྲུག་གི་བར་ལྟ་བུའི་རྒྱུན་གྱིས་ངེས་པར་ཟླ་བའི་དཀྱིལ་འཁོར་ཆ་གང་བར་སྣང་བ་ལྟར་ཡོངས་སུ་རྫོགས་ཤིང་མཐར་ཕྱིན་པའོ། །དེ་ལྟར་བསྟན་པ་བཞིན་དུ་གནས་སྐབས་ཀྱི་ཤེས་པར་བྱ་པའི་ཡུལ་ཐམས་ཅད་ཀུན་ལ་གྲངས་ཀྱི་རྣམ་པ་རྩ་བ་བཅུ་ཡི་བྱེ་བྲག་གི་ཁྱད་པར་གྱིས་གོང་འོག་གི་མཐོ་དམན་གྱི་རིམ་པ་སྐྱེ་བོ་པ་དང་པོ་སེམས་བསྐྱེད་པ་ཡན་ཆད་ནས་བཟུང་སྟེ་མཐར་འབྲས་བུ་ཡོངས་སུ་རྫོགས་པ་ཐོབ་པའི་བར་དུ་རིམ་པས་དོན་ལ་སྦྱོར་བའི་ཏིང་ངེ་འཛིན་གྱི་ངོ་བོ་འོག་ནས་གོང་དུ་འཕར་བས་སྔ་མ་སྔ་མ་རྒྱུ་དང་ཕྱི་མ་ཕྱི་མ་འབྲས་བུའི་ཚུལ་གྱིས་ཡེ་ཤེས་རེ་རེ་སྐྱེས་ཏེ་གང་སྒྲིབ་པ་བཅུ་པོ་དེ་དག་རེ་རེ་ནུབ་ཅིང་སྦྱོང་ནུས་པའི་རྩལ་དང་ལྡན་པར་འགྱུར་བའོ། །གཉིས་པ་ནི། གང་གིས་གང་མཐོང་ཞེས་པ་ནས། གནས་དང་རྫོགས་པའོ། །ཞེས་པའི་བར་གྱིས་བསྟན་ཏེ། རྟེན་གྱི་གང་ཟག་ས་དང་པོ་ཡན་ཆད་ནས་བཅུ་པའི་བར་ལ་འོག་མ་གང་གིས་གོང་མ་དག་གི་ཆོས་ཉིད་ཀྱི་དོན་གང་ལ་སེམས་ཉིད་རྗེས་སུ་འཇུག་པས་ཡང་དག་པར་རྟོགས་ཤིང་མཐོང་བའི་གནས་སྐབས་དེ་དག་རེ་རེའི་ཚེ་ལ་ཡང་རིམ་པར་རྟོགས་པའི་རིག་པ་བྱང་ཆུབ་ཀྱི་སེམས་རེ་འབྱུང་བས་དོན་གྱི་རྟོགས་པ་ཇེ་གསལ་དུ་གྱུར་པས་གནས་སྐབས་བཅུའི་སྒྲིབ་པ་དེ་ཉིད་བྱང་ཆུབ་སེམས་ཀྱི་ངང་གི་རྣམ་པ་དེར་ནུབ་སྟེ་ཡེ་ཤེས་བཅུ་འཆར་བ་ཡང་སྐབས་བཅུར་འདུས་ཏེ་སྐྱེ་བར་འགྱུར་བ་གང་ཞེ་ན། ལས་དང་པོ་པས་འཁོར་བའམ་མཐའ་གཉིས་ལས་འདས་པར་གསང་བའི་དོན་ལ་ཅུང་ཟད་གཡོ་བའི་བྱང་ཆུབ་ཀྱི་སེམས་དང་། དེ་ཉིད་སྟོབས་སུ་གྱུར་པས་འདས་པའམ་སྔགས་དོན་ལ་སྨོན་པ་བྱང་ཆུབ་ཀྱི་སེམས་དང་། དེ་ལས་འཕགས་ཏེ་འབྲས་བུའི་རྣམ་པ་ལ་ལན་རེ་ལྡང་བ་བྱང་ཆུབ་ཀྱི་སེམས་དང་། མཐའ་བཅུ་ལ་འབད་པས་གཉིས་མེད་ལ་སྦྱོར་བ་བྱང་ཆུབ་ཀྱི་སེམས་དང་། ཤེས་རབ་གསུམ་གྱི་སྒོ་ནས་དོན་ལ་གཉིས་མེད་དུ་འཇུག་པའི་བྱང་ཆུབ་ཀྱི་སེམས་དང་། ཆོས་ཉིད་རང་གི་མཚན་ཉིད་མངོན་སུམ་དུ་མཐོང་བས་རབ་ཏུ་དགའ་བ་བྱང་ཆུབ་ཀྱི་སེམས་དང་། དེ་ཉིད་སྒོམ་པས་དེ་ལས་མི་འགྱུར་བར་གནས་པའི་བྱང་ཆུབ་ཀྱི་སེམས་དང་། ཐམས་ཅད་རང་རིག་པའི་ཡེ་ཤེས་སུ་ཤར་བའི་མགོ་གཡོ་བ་བྱང་ཆུབ་ཀྱི་སེམས་དང་། དེའི་ངང་ལ་གནས་ཤིང་ཡོན་ཏན་ཐོབ་པ་བྱང་ཆུབ་ཀྱི་སེམས་དང་མཐར་ཐུག་ཏུ་རྫོགས་ཏེ་སྤྱི་བོར་ཆིབས་པའི་བྱང་ཆུབ་ཀྱི་སེམས་དང་རྣམ་གྲངས་བཅུ་སྟེ། སྔ་མ་ལས། དགུ་པོ་དེ་དག་རེ་རེ་ཡི། །སྐབས་སུ་སེམས་དང་ཆོས་ཕྲད་པས། །རིག་པ་བྱང་ཆུབ་སེམས་རེ་འབྱུང་། །བྱང་ཆུབ་སེམས་ནི་གང་ཞེ་ན། །འདི་ཡི་གྲངས་ཀྱང་རྣམ་པ་བཅུ། །གཡོ་བ་བྱང་ཆུབ་སེམས་ཉིད་དང་། །དེ་བཞིན་སྨོན་པ་བྱང་ཆུབ་སེམས། །ལྡང་བ་བྱང་ཆུབ་ཆེན་པོའི་སེམས། །དེ་བཞིན་སྦྱོར་བ་བྱང་ཆུབ་སེམས། །འཇུག་པའི་སེམས་དང་དགའ་བའི་སེམས། །མི་འགྱུར་བ་དང་རིག་པ་དང་། །གནས་པ་དང་ནི་རྫོགས་པའོ། །བྱང་ཆུབ་སེམས་ཞེས་གྲགས་པས་ན། །སེམས་བཅུ་དག་ཏུ་རྒྱས་པས་བཤད། །ཅེས་གསུངས་ཏེ། དེ་ལྟར་བྱང་ཆུབ་ཀྱི་སེམས་རྣམ་པ་བཅུའོ། །གསུམ་པ་ནི། གང་གི་གཟུགས་བརྙན། ཞེས་པ་ནས། བཅུ་དྲུག་ལྟ་བུར་སྣང་། །ཞེས་པའི་བར་གྱིས་བསྟན་ཏེ། གང་གི་རྟོགས་པ་དང་གོམས་པའི་ཁྱད་པར་ལྟར་བྱང་ཆུབ་སེམས་ཀྱི་གཟུགས་བརྙན་གང་ཡིན་པ་རིག་པ་ལ་སྣང་བ་ཡི་རྟགས་དང་། དངོས་པོ་མེད་པར་ངོ་བོ་རང་སྣང་དང་མཐུན་པར་སེམས་སྐྱེ་ལུགས་ཀྱི་མཚོན་པར་འགྱུར་པའི་དཔེ་གཉིས་ཐུན་མོང་གི་རྣམ་གྲངས་སུ་བསྟན་པ་ནི། དཔེར་ན་སྐར་མ་ཕྲ་མོ་ལྟ་བུ་དང་། ཐ་མལ་དུ་གྱུར་བའི་འབྲིང་པོ་ལྟ་བུ་དང་། ཆེན་པོ་ཡི་སྐར་མ་ཤར་བ་ལྟ་བུ་དང་། ཟླ་བ་ཚེས་གཅིག་པ་ལྟ་བུ་དང་། དེ་བཞིན་དུ་ཚེས་གཉིས་པ་ལྟ་བུ་དང་། གསུམ་པ་ལྟ་བུ་དང་། བཞི་པ་ལྟ་བུ་དང་། ཚེས་ལྔ་པ་ལྟ་བུ་དང་ནི། ཚེས་བརྒྱད་པ་ལྟ་བུ་དང་། ཚེས་བཅུ་དྲུག་པ་ཆ་ཤས་ཡོངས་སུ་གང་བ་ལྟ་བུར་སྣང་བ་སྟེ། དེ་ཉིད་ལས། བྱང་ཆུབ་སེམས་ཀྱི་རང་བཞིན་དེ། །སྐབས་བཅུ་དག་ཏུ་སྦྱོར་བ་ན། །གཟུགས་བརྙན་ཆོས་ཉིད་ངོ་ལ་སྣང་། །གཟུགས་བརྙན་རང་བཞིན་ཇི་ལྟར་སྣང་། །ཕྲ་མོ་ཙམ་གྱི་སྐར་མ་དང་། །དེ་བཞིན་སྐར་མ་ཐ་མལ་པ། །སྐར་མ་ཆེན་པོ་དག་དང་ནི། །ཟླ་བ་ཚེས་གཅིག་རྣམ་པ་དང་། །གཉིས་དང་གསུམ་དང་བཞི་དང་ལྔ། །བརྒྱད་དང་བཅུ་དྲུག་རྣམ་པ་ཡི། །གཟུགས་བརྙན་དག་ཏུ་སྣང་བ་སྟེ། །དངོས་པོར་སྣང་བ་ཅང་མ་ཡིན། །ཆུ་ཟླ་ལྟ་བུར་གཟུང་དུ་མེད། །སེམས་ཀྱི་གཟུགས་བརྙན་སྣང་བ་དང་། །ཆོས་ཉིད་གསལ་བའི་ཉི་མ་གཉིས། །ཡུལ་དང་དབང་པོའི་ཚུལ་ལྟ་བུར། །དབྱིངས་དང་ཡེ་ཤེས་རང་བཞིན་གསལ། །འདི་ནི་རྣལ་འབྱོར་སྦྱོར་བའི་ལམ། །བགྲོད་པར་བྱེད་པའི་ཐབས་ཆེན་ཡིན། །ཞེས་གསུངས་ཏེ། འདི་དག་ཆོས་ཉིད་ཀྱི་དོན་ལ་མི་སྦྱར་བར་རང་གི་སེམས་ཀྱི་སྐྱེ་ལུགས་ལ་སྦྱར་ཏེ་སེམས་འཕེལ་ཞིང་བོགས་སུ་དབྱུང་བའི་མཚོན་དཔེར་བྱས་ནས་ལམ་བཅུ་ཚན་གྱི་གོ་བསྐྱེད་པར་བྱའོ། །བཞི་པ་ལ་བཅུ་སྟེ། འདུན་པ་སྐྱེ་བའི་སྐབས་ཀྱི་སེམས་དཔེ་དང་བཅས་པ། རྩོལ་བར་སྦྱོར་བའི་སྐབས་ཀྱི་སེམས་དཔེ་དང་བཅས་པ། བསླབ་པར་འཇུག་པའི་སྐབས་ཀྱི་སེམས་དཔེ་དང་བཅས་པ། འདུ་ཤེས་འགྱུར་བའི་སྐབས་ཀྱི་སེམས་དཔེ་དང་བཅས་པ། སྦྱོར་ཆེན་འཇུག་པའི་སྐབས་ཀྱི་སེམས་དཔེ་དང་བཅས་པ། རོ་མྱོང་བ་ཡི་སྐབས་ཀྱི་སེམས་དཔེ་དང་བཅས་པ། ཡུལ་ལ་འཇུག་པའི་སྐབས་ཀྱི་སེམས་དཔེ་དང་བཅས་པ། རྟོག་ཆེན་དག་པའི་སྐབས་ཀྱི་སེམས་དཔེ་དང་བཅས་པ། གདེང་དུ་གྱུར་པའི་སྐབས་ཀྱི་སེམས་དཔེ་དང་བཅས་པ། ལས་སུ་རུང་བའི་སྐབས་ཀྱི་སེམས་དཔེ་དང་བཅས་པ་བཤད་པའོ། །དང་པོ་ནི། འདུན་པ་སྐྱེ་བའོ། །ཞེས་པ་ནས། སྐབས་མ་རབ་རིབ་སྣང་། །ཞེས་པའི་བར་གྱིས་བསྟན་ཏེ། གོང་དུ་རྣལ་འབྱོར་ཆེན་པོའི་སྐབས་བཅུ་ཡིས། ཞེས་གསུངས་པས་དོན་གྱིས་ཐུན་མོང་མ་ཡིན་པའི་ལམ་འབའ་ཞིག་ཏུ་འགྱུར་ཏེ། ས་དང་པོ་ཚོགས་ལམ་གྱི་ཐོག་མར་སྐྱེ་བོའི་ས་དང་རྒྱུའི་ས་གང་ནས་ཀྱང་གསང་སྔགས་མཆོག་འདིར་སེམས་སྐྱེས་ཀྱང་འདི་ཉིད་རྟེན་གཞི་ལས་དང་པོ་པར་འགྱུར་བས་ཐོག་མ་སྔོན་གྱི་དུས་ནས་རྒྱུ་མཚུངས་པ་ཡོད་པ་ཉིད་བླ་མ་ཉིད་བླ་མ་དམ་པ་ལས་རྒྱུད་ཆེན་པོ་ཐོས་པའི་རྐྱེན་གྱིས་བསླད་ནས་ཐུན་མོང་མ་ཡིན་པའི་སྒོ་འདིར་མོས་ཤིང་འབྲས་བུ་ལ་འདུན་པ་དང་པོ་སྐྱེ་བའི་གནས་སྐབས་དག་གི་ཚེ་དེ་ཁོ་ན་ལ་ས་གཉིས་གང་རུང་ནས་འཇིག་རྟེན་གྱི་ཆོས་འདི་རྫུན་པ་མི་བདེན་པ་ཡིན་ནོ་སྙམ་དུ་བདེན་པ་གཉིས་སྤྱིའི་ལམ་པོ་ཆེའི་མཚན་ཉིད་ཙམ་དུ་ཤེས་པས་དོན་ལ་གོ་བ་དངོས་མེད་ཀྱང་དུས་དུས་སུ་མོས་པ་སྐྱེས་ཏེ་སེམས་གཡོ་བ་བྱུང་བ་ནི་ས་གཉིས་ལ་མེད་པར་མུན་པའི་ཤེས་པ་ལས་འཕགས་པས་ལྷག་པའི་བྱང་ཆུབ་ཀྱི་སེམས་ཞེས་བྱ་བ་འབྱུང་སྟེ། དཔེར་ན་དབྱར་གྱི་ཆར་སྤྲིན་འཐིབས་པས་མུན་པའི་སྤྲིན་རུམ་ལྟ་བུ་ཡི་གསེབ་བམ་མཐོངས་ནས་ཟེར་འཕྲོ་བའི་སྐར་མ་ཕྲ་མོ་བྱུང་བ་དང་འདྲ་བར་སྣང་ཡང་ཡུན་ཐུང་སྟེ། དེ་མ་ཐག་ནུབ་པར་འགྱུར་བས་རབ་རིབ་ཙམ་དུ་སྣང་བ་ཉིད་དེ། བློ་མུན་པ་ལྟ་བུའི་གསེབ་ལས་བྱང་ཆུབ་ཀྱི་སེམས་རྒྱུ་རྐྱེན་གྱི་དབང་གིས་དེ་ཙམ་སྐྱེས་པ་ཡིན་པས་དུས་དེར་དེ་ལྟ་བུ་དངོས་སུ་ཡང་མཐོང་བར་འགྱུར་ཏེ། འོན་ཀྱང་སྣང་ངོ་སྙམ་ནས་བརྟགས་ན་མི་མངོན་པས་མེ་ཁྱེར་རྩ་བ་ནས་བལྟས་ན་ཡོད་ཀྱང་རྒྱང་ནས་བལྟས་ན་མེད་པ་དང་འདྲ་བར་སེམས་དེ་ཙམ་སྐྱེས་ཀྱང་མི་རྟག་སྟེ་གྲོགས་ངན་གྱི་སྟོབས་ཀྱིས་ཀྱང་མི་གསལ་བར་འགྱུར་ཏེ། གཉིས་པ་ནི། རྩོལ་བ་སྦྱོར་བའི། ཞེས་པ་ནས། རབ་རིབ་ལྟ་བུའོ། །ཞེས་པའི་བར་གྱིས་བསྟན་ཏེ། ས་གཉིས་པ་ཚོགས་ཀྱི་ལམ་ཕྱི་མར་དེ་ལྟར་འདུན་པ་གཡོ་བའི་རྒྱུ་ལ་བརྟེན་ནས་རྩོལ་བ་དང་བཅས་པས། བཙལ་ཞིང་ཡུལ་གསང་སྔགས་ལ་སྦྱོར་ཏེ་གྲུབ་པ་དང་རྟོགས་པར་འདོད་པའི་གནས་སྐབས་དག་ལ་གསང་སྔགས་འབྲས་བུའི་དོན་དེ་ཉིད་ལ་སློབ་ཅིང་རྟོགས་པར་སྨོན་པའི་ཁྱད་པར་གྱིས་ས་འོག་མ་འདུན་པ་པ་ལ་མེད་པས་ལྷག་པའི་བྱང་ཆུབ་ཀྱི་སེམས་འབྱུང་ཞིང་སྐྱེ་སྟེ། དེའི་ཚུལ་ནི་སྔ་མ་བས་ཅུང་ཟད་གསལ་ཡང་མི་བརྟན་ཞིང་བརྟགས་ཏུ་མི་བཟོད་པས་མུན་པ་ནས་ཤིན་ཏུ་མི་གསལ་བའི་སྐར་མ་ཕལ་པ་འབྲིང་པོ་དག་མཐོང་ཡང་གང་ལ་རབ་རིབ་ཅན་གྱི་སྤྲིན་གྱིས་བསྒྲིབས་པ་ལྟ་བུ་ཉིད་དུ་སྣང་བ་ཙམ་སྟེ། ད་དུང་གསང་སྔགས་དེ་ཁོ་ན་ཉིད་ལ་ཞུགས་པ་ནི་མ་ཡིན་ཏེ། དོན་ལ་སྨོན་པ་ཙམ་དུ་གྱུར་བའོ། །དེ་གཉིས་ནི་རྣལ་འབྱོར་དང་པོའི་ཁྱད་པར་རོ། །གསུམ་པ་ནི། བསླབ་པར་འཇུག་པའི། ཞེས་པ་ནས། ལྟ་བུར་བར་རིབ་སྣང་། །ཞེས་པའི་བར་གྱིས་བསྟན་ཏེ། ས་གསུམ་པ་སྦྱོར་ལམ་དང་པོར་དེ་ལྟར་རྩོལ་བ་དང་སྨོན་པའི་རྒྱུ་ལས་གསང་མཆོག་ཐེག་པ་ཆེན་པོ་ལ་ཞུགས་ནས་བསླབ་པའི་མཐའ་བཅུ་ལ་ཡང་དག་པར་འཇུག་ཅིང་སློབ་པའི་གནས་སྐབས་ཀྱི་ཚེ་དག་ལ། བླ་མའི་སྟོབས་དང་བསླབ་མཐའ་བཅུའི་མཐུ་ཡིས་འོག་མ་ལ་མེད་པས་ལྷག་པ་སྨོན་པ་ལས་གྱེན་དུ་འཕགས་ཏེ་བདེན་གཉིས་དབྱེར་མེད་ཀྱི་དོན་ལ་སྐབས་སུ་ལྡང་བ་བྱང་ཆུབ་ཀྱི་སེམས་འབྱུང་ཞིང་སྐྱེ་སྟེ། དེའི་ཚུལ་ནི་རྩ་བ་མ་རྟོགས་ཀྱང་འོད་སྣང་བས་དཔེ་ཇི་ལྟར་ན་མཚན་མོ་མེ་ཡི་འོད་ཟེར་ཆེན་པོ་ལྟར་རམ་སྐར་མ་ཆེན་པོའི་འོད་ལྟ་བུར་བརྟག་ཏུ་ཡོད་ཀྱང་རང་གི་མཚན་ཉིད་མི་གསལ་བས་རབ་རིབ་ལྟར་སྣང་བ་ཉིད་སྐྱེ་བར་འགྱུར་རོ། །བཞི་པ་ནི། འདུ་ཤེས་འགྱུར་བའི། ཞེས་པ་ནས། ཟླ་ཚེས་ལྟ་བུར་སྣང་། །ཞེས་པའི་བར་གྱིས་བསྟན་ཏེ། ས་བཞི་པ་སྦྱོར་ལམ་གཉིས་པར་དེ་ལྟར་བསླབ་པ་དང་ལྡང་བའི་རྒྱུ་ལ་བརྟེན་ནས་སྔར་གྱི་སྤྱོད་ཡུལ་ལས་འཕགས་ཏེ་གསང་སྔགས་ཡང་དག་པའི་དོན་དུ་འདུ་ཤེས་སྔ་བར་འགྱུར་བའི་གནས་སྐབས་དག་ལ་འབད་རྩོལ་གྱིས་ཡུལ་དུ་བྱེད་དེ་རྟོགས་པའི་རིག་པས་གསང་སྔགས་གཉིས་མེད་ཀྱི་དོན་ལ་སྦྱོར་ཞིང་གཏན་ལ་འབེབས་པ་འོག་མ་ལས་ལྷག་པའི་བྱང་ཆུབ་ཀྱི་སེམས་འབྱུང་ཞིང་སྐྱེ་སྟེ། དེའི་ཚུལ་ནི། དཔེ་ཇི་ལྟར་ན་མགལ་མེའི་འཁོར་ལོ་མྱུར་ལ་རྒྱུན་མི་འཆད་པ་ལྟ་བུ་དང་། ཅུང་ཟད་གསལ་ལ་སྐྱེད་དུ་བྱ་བར་ཡོད་པས་ཚེས་གཅིག་པའི་ཟླ་ཚེས་ལྟ་བུར་སྣང་ཞིང་མཐོང་བ་ནི་རྟགས་ཏེ་དེ་ཡང་མུན་ནང་ནས་སྣང་བ་ནི་སྐྱེ་ཚུལ་ལོ། །ལྔ་པ་ནི། སྦྱོར་ཆེན་འཇུག་པའི། ཞེས་པ་ནས། གཉིས་པ་ལྟ་བུར་སྣང་། །ཞེས་པའི་བར་གྱིས་བསྟན་ཏེ། ས་ལྔ་པ་སྦྱོར་ལམ་ཐ་མར། དྲོད་རྟགས་ཀྱི་རྣལ་འབྱོར་ཞེས་འདུ་ཤེས་འགྱུར་བ་དང་དོན་ལ་སྦྱོར་བའི་རྒྱུ་ལ་བརྟེན་ནས་གསང་སྔགས་མཉམ་པ་ཉིད་ཀྱི་དོན་མངོན་དུ་བྱེད་པ་ལ་སྦྱོར་བའི་ཤེས་རབ་སྦྱངས་ནས་ལྷག་པའི་སེམས་ཆེན་པོ་དེས་མཐོང་ལམ་ལ་འཇུག་པར་འགྱུར་བའི་གནས་སྐབས་ཀྱི་ཚེ་དག་ལ། གཉིས་སུ་མེད་པའི་དོན་ལ་རྣལ་འབྱོར་མངོན་སུམ་གྱིས་འཇུག་པར་བྱེད་པས་སྔར་གྱི་ལྟ་བ་ལས་ལྷག་པའི་བྱང་ཆུབ་ཀྱི་སེམས་སྐྱེ་ཞིང་འབྱུང་སྟེ། དེའི་ཚུལ་ནི། དཔེ་ཇི་ལྟར་ན་བཏེགས་པས་གསལ་ཡང་རླུང་གིས་གཡོ་བ་མུན་པར་བལྟམས་པའི་སྒྲོན་མེ་ལྟ་བུའམ། ཟླ་བ་ཚེས་གཉིས་པ་ལྟ་བུར་སྣང་བ་འབྱུང་བའོ། །རྟགས་དང་ཐུན་མོང་བ་དང་སྐབས་ཀྱི་སེམས་དེ་དག་གསལ་མི་གསལ་གྱི་ཁྱད་པར་ས་གོང་འོག་ལྟར་སེམས་ཀྱི་སྐྱེད་དུ་འཕར་བས་ཕྱེ་བ་དང་། འོག་མ་ལས་ལྷག་པའི་སེམས་སུ་གྱུར་པ་བཤད་པ་དང་འཆད་པ་རིལ་རྗེས་སུ་མཐུན་ནོ། །དེ་གསུམ་རྣལ་འབྱོར་གཉིས་པའི་ཁྱད་པར་རོ། །དྲུག་པ་ནི། རོ་མྱོང་བ་ཡིན། ཞེས་པ་ནས། ལྟ་བར་དེ་སྣང་ངོ་། །ཞེས་པའི་བར་གྱིས་བསྟན་ཏེ། ས་དྲུག་པ་མཐོང་བའི་ལམ་དུ། ཤེས་རབ་གསུམ་གྱིས་སྦྱོར་བ་དང་འཇུག་པའི་རྒྱུ་ལ་བརྟེན་ནས་གསང་སྔགས་ཇི་བཞིན་པ་སྐྱེ་བ་མེད་པའི་སེམས་ཀྱི་ཆོས་ཉིད་མ་ནོར་བའི་དོན་རྟོགས་ཏེ་རོ་མྱོང་ཞིང་བདེན་པ་མཐོང་བ་ཡི་གནས་སྐབས་དག་ཏུ་གྱུར་པ་ལ། སྔར་དེ་ལྟ་བུ་མེད་པས་འཁོར་བར་མི་ལྡོག་ཅིང་ཟག་མེད་ཀྱི་མཐོང་བ་མཐར་ཕྱིན་པར་མྱོང་ནས་ལོངས་སྐུ་མཐོང་བས་ཤིན་ཏུ་དགའ་བ་དང་ལྡན་པར་མཆོག་ཏུ་ལྷག་པའི་བྱང་ཆུབ་ཀྱི་སེམས་འབྱུང་སྟེ་སྐྱེ་ཞིང་རིག་པ་ལ་གསལ་བ་ནི་དཔེར་ན་བུམ་པའི་སྣོད་ཀྱི་སྒྲོན་མ་མི་གཡོ་བར་གསལ་བ་ལྟ་བུའམ། ཟླ་བ་ཚེས་གསུམ་པ་ལྟ་བུར་དོན་དེ་ཡང་སྣང་བའོ། །དེ་ཉིད་རྣལ་འབྱོར་གསུམ་པའི་ཁྱད་པར་དུ་གཟུང་ངོ་། །དེ་དག་ནི་ཤེས་པའི་མཚན་ཉིད་དུའང་འགྱུར་ཏེ། རྟོགས་པ་བཞི་ལ་སོགས་པའི་ཡན་ལག་གི་རྐྱེན་དང་ལྡན་པས་སོ། །བདུན་པ་ནི། ཡུལ་ལ་འཇུག་པའི། ཞེས་པ་ནས། ལྟ་བུའི་རང་བཞིན་སྣང་། །ཞེས་པའི་བར་གྱིས་བསྟན་ཏེ། ས་བདུན་པ་སྒོམ་པའི་ལམ་དུ། དེ་ལྟར་ཟག་མེད་རང་གི་མཚན་ཉིད་རྟོགས་ནས་ཡུལ་ཆོས་ཉིད་མཐོང་བའི་ཡེ་ཤེས་ལ་གོམས་ཏེ་ངེས་པར་འཇུག་པའི་གནས་སྐབས་དག་གི་ཚེ་ལ། ལྟ་བའི་གདེངས་དེ་དང་ལྡན་ཏེ་གཉིས་མེད་དེ་ཉིད་རང་རིག་པའི་མངོན་སུམ་དུ་སྒོམ་ནས་མཐོང་བའི་དོན་ལས་མི་གཡེངས་པས་ཚོར་བ་ལ་སོགས་པའི་དབང་དུ་མི་འགྱུར་བའི་མཆོག་ཏུ་ལྷག་པའི་བྱང་ཆུབ་ཀྱི་སེམས་འབྱུང་ཞིང་སྐྱེ་སྟེ། དེའི་དུས་ན་དྲོད་རྟགས་ཆེན་པོ་གཡོ་བའི་སྐབས་ཏེ། ས་དང་པོའི་ཐོབ་པ་དང་གཉིས་པ་དང་གསུམ་པ་བརྟན་པར་གྱུར་ལ་བཞི་པ་ནས་བདུན་པའི་བར་གྱིས་ཉེ་བ་ཡིན་པས་ཆོས་བཞིས་ལུང་ཆེན་གསང་མཆོག་རྒྱལ་པོའི་དགོངས་དོན་བླ་ན་མེད་པའི་རྟོགས་པ་དམ་པ་ཉིད་འབྱུང་མ་རག་པ་སྟེ། དེ་ནི་དཔེར་ན་ཟླ་བ་ཚེས་བཞི་པ་ལྟ་བུའི་རང་བཞིན་དུ་སྣང་བ་ཡིན་ནོ། །འདིར་བཤད་པའི་རང་རིག་མངོན་སུམ་ནི། གསང་བ་སྒྱུ་འཕྲུལ་གྱི་རིང་ལུགས་ལྟར། བཤད་རྒྱུད་རྒྱ་མཚོ་ལས། རང་བྱུང་རང་སྣང་ཆོས་འདི་དག །གཉིས་མེད་རང་རིག་མ་སྐྱེས་པ། །གསལ་བར་མངོན་སུམ་ཐེ་ཚོམ་མེད། །རྟོགས་པ་ཀུན་གྱི་མཆོག་ཏུ་བཤད། །ཅེས་དང་། མན་ངག་ལྟ་བའི་ཕྲེང་བ་ལས། ཆོས་ཐམས་ཅད་ཡེ་ནས་སངས་རྒྱས་པར་གནས་པ་དེ་ཡང་། ལུང་དང་མན་ངག་དང་འགལ་བ་ཡང་མ་ཡིན་ལ། ལུང་དང་མན་ངག་གི་ཚིག་ཙམ་ལ་བརྟེན་པའང་མ་ཡིན་པར་རང་གི་རིག་པས་བློའི་གཏིང་དུ་ཡིད་ཆེས་པས་མངོན་སུམ་དུ་རྟོགས་པའོ། །ཞེས་གསུངས་པ་ལྟར་དམིགས་པ་ཟུང་ནས། རྣམ་གྲངས་རྣམ་པར་ཕྱེ་ན། ཐུགས་ཐིག་ལས། དབང་པོ་དྲུག་གི་ཆར་སྣང་ཡང་། །སྤྱན་ལ་མཆོག་ཏུ་བརྗོད་པ་ནི། །ཤེས་རབ་ཡུལ་ལ་དབྱེར་མེད་པས། །མངོན་སུམ་རྟོགས་པ་རྟོགས་པའི་མཆོག །རང་རིག་ཡེ་ཤེས་ཚོགས་གཅིག་པུ། །ཞེས་དང་། ལམ་རིམ་ལས། ཤེས་དང་སྤྱོད་ཡུལ་གཉིས་མེད་པས། །ཐམས་ཅད་མ་ལུས་གཅིག་པའི་ངང་། །མ་འདྲེས་ཡོངས་རྫོགས་གསལ་སྟོང་གཟུགས། །ལྟ་དང་བལྟ་བར་བྱར་མེད་པར། །ཕྱོགས་བཅུའི་ཞིང་ཁམས་ཐམས་ཅད་མཐོང་། །གང་དུའང་མ་མཐོང་སྤྱན་གྱི་མཆོག །ཁྱབ་གསལ་རང་བཞིན་གོ་བའི་སྒྲ། །ཐོས་པ་མེད་པར་ཐོས་པའི་ཕུལ། །དྭང་བས་ཚིམ་བྱེད་ཆོས་ཀྱི་དྲི། །སྣོམ་བྱེད་མེད་པར་ཚོར་བའི་ཤངས། །དོན་བཅུད་ཉམས་སུ་མྱོང་བའི་རོ། །མྱོང་བའི་བྱ་བྱེད་མེད་ཉིད་མྱོང་། །ཡང་དག་དོན་ལ་རེག་པ་ཉིད། །རེག་པ་ཀུན་དངོས་རེག་དང་བྲལ། །ཆོས་ཁམས་སྣ་ཚོགས་ཀུན་མཁྱེན་པ། །རང་རིག་རྒྱལ་པོར་རང་སྣང་བའོ། །དེ་བས་བདག་འཛིན་རང་གསལ་བ། །བདག་བཅས་བདག་དང་བྲལ་བའི་ཡིད། །དོན་དང་སེམས་ཅན་རྟོག་མེད་གསལ། །རང་བྱུང་ཡེ་ཤེས་ཐམས་ཅད་མཁྱེན། །ཞེས་གསུངས་ཏེ། དམ་པ་སྔ་མ་རྣམས་ཀྱིས་ཤེས་རབ་ཀྱི་ཚོགས་དྲུག་གི་ངེས་གསང་དམ་པའམ། ཚོགས་བརྒྱད་ཀྱི་ལྟ་བར་བཞེད་པ་ལྟར་བྱས་ནས་སྐབས་དོན་ལ་སྦྱར་ན་གཞུང་གི་གསང་བ་དང་འབྱོར་པར་འགྱུར་གྱི། དེ་མན་ཆད་ལ་གྲགས་པའི་རང་རིག་མངོན་སུམ་དང་མི་འདྲ་བར་ཤེས་དགོས་སོ། །འོན་ཀྱང་གྲུབ་ཐོབ་ཆེན་པོ་ཀུ་ཀུ་རཱ་ཛས། ངེས་དོན་མདོ་ལས་རྒྱུན་གྲོལ་ཡེ་ཤེས་བསྔགས། །འཕགས་པ་རིགས་པ་ཅན་གྱིས་དངོས་ལྟ་སྨད། །ཅེས་སོགས་གསུངས་པ་ལྟར། ངེས་དོན་གྱི་མདོ་དང་རྒྱུད་དོན་ཟབ་མོ་ཇི་བཞིན་དུ་གཟིགས་པའི་འཕགས་བོད་ཀྱི་མཁས་གྲུབ་སྔ་མ་རྣམས་ཀྱིས་ཚད་མའི་གསུང་གི་གསང་བ་བཞེད་ཚུལ་ཅུང་ཟད་མི་འདྲ་བ་རྣམས་ཀྱང་དགོངས་གཞི་ཉིད་མ་ནོར་བའི་དོན་དུ་གནས་པ་ལ་གཟུ་བོས་བློས་ངེས་པ་རྙེད་ན་མཐར་ཐུག་གི་དོན་དུ་སོ་སོ་རང་རིག་པའི་ཡེ་ཤེས་ལ་དགོངས་གནད་གཅིག་ཏུ་འབབ་པར་འགྱུར་རོ། །བརྒྱད་པ་ནི། རྟོག་ཆེན་དག་གི། ཞེས་པ་ནས། ལྟ་བུའི་རང་བཞིན་སྣང་། །ཞེས་པའི་བར་གྱིས་བསྟན་ཏེ། ས་བརྒྱད་པ་མཐར་ལམ་དང་པོར། དེ་ལྟར་འཇུག་པ་དང་མི་འགྱུར་བའི་རྒྱུ་ལ་བརྟེན་ནས་སྒོམ་ལམ་མཐར་ཕྱིན་པས། ཆོས་ཐམས་ཅད་རང་རིག་ཡུལ་དང་བྲལ་བས་རང་བྱུང་གི་ཡེ་ཤེས་སུ་གསལ་བའི་རྟོག་པ་ཆེན་པོ་དག་གི་ཏིང་ངེ་འཛིན་ཤར་བའི་གནས་སྐབས་དེའི་ཚེ་དག་ལ། ཆོས་ཇི་བཞིན་པ་གཉིས་སུ་མེད་པར་རང་རིག་པའི་ཏིང་ངེ་འཛིན་རང་གསལ་བར་སྒོམས་ཏེ་ཏིང་ངེ་འཛིན་བྱེ་བ་བརྒྱ་ལ་འཇུག་ཅིང་སོ་སོར་ཆོས་ཉན་པ་དང་མངོན་ཤེས་དང་རྫུ་འཕྲུལ་རྫོགས་པར་ལྡན་པ་ཡུལ་མེད་པར་མཆོག་ཏུ་ལྷག་པའི་བདག་ཉིད་ཆེན་པོ་རང་བྱུང་གི་ཡེ་ཤེས་ཡིན་པར་ཝལ་གྱིས་གསལ་ཏེ་རིག་པའི་ཆོ་འཕྲུལ་དུ་སྣང་བའི་བྱང་ཆུབ་ཀྱི་སེམས་འབྱུང་ཞིང་སྐྱེ་སྟེ། ཐམས་ཅད་མཁྱེན་པའི་ཡེ་ཤེས་ཀྱི་མགོ་ཤར་བས་དེར་ནི་མཐར་ཕྱིན་པའི་རྟགས་ཆེན་དང་པོར་ཉེ་བར་བསྙེན་ཏེ་ཐོག་མར་དོན་ལ་རྣལ་དུ་ཕེབས་པའི་ཡེ་ཤེས་ཉིད་དང་ལྡན་པ་ནི་དཔེར་ན་ཟླ་བ་ཚེས་ལྔ་པ་ལྟ་བུའི་རང་བཞིན་དུ་སྣང་ཞིང་གསལ་བར་མཐོང་བ་ཡིན་ནོ། །དགུ་པ་ནི། གདེང་དུ་གྱུར་པའི། ཞེས་ནས། ཉིད་ན་གྲུབ་ཅེས་བྱ། །ཞེས་པའི་བར་གྱིས་བསྟན་ཏེ། ས་དགུ་པ་མཐར་ལམ་བར་པ་ལ་དེ་ལྟར་གོམས་པར་འབད་པས་རྟོག་ཆེན་རིག་པ་དག་པའི་རྒྱུ་ལ་བརྟེན་ནས་རྟོགས་པའི་ཏིང་ངེ་འཛིན་ཤིན་ཏུ་སྟོབས་དང་ལྡན་ཏེ་གདེང་ཅན་དུ་གྱུར་པའི་གནས་སྐབས་ཀྱི་ཚེ་དག་ལ། རང་རིག་པ་གཉིས་མེད་ཆེན་པོ་མཐའ་དག་བྲལ་བའི་དོན་ཉིད་དང་རྣམ་དབྱེར་མེད་པར་འབད་པ་མི་དགོས་ཏེ་ངང་གིས་མི་གཡོ་བར་གནས་པ་མཆོག་ཏུ་ལྷག་པའི་བྱང་ཆུབ་ཀྱི་སེམས་འབྱུང་བས་ཡོན་ཏན་དུ་མ་ལ་དབང་འབྱོར་བར་འགྱུར་ཏེ། དཔེར་ན་ཤིན་ཏུ་གསལ་ཞིང་བརྟན་པའི་སྒྲོན་མ་ཉི་མས་མུན་པ་གཞ་ིབྲལ་དུ་བྱས་ཏེ་ཕྱོགས་ཀུན་ཏུ་གསལ་བ་ལྟ་བུ་དང་། ཟླ་བ་ཚེས་བརྒྱད་པ་ལྟ་བུའི་རང་བཞིན་དུ་གསལ་ཞིང་སྣང་བར་འགྱུར་བའི་མཐོང་བ་དག་པ་འབྱུང་སྟེ། ཐམས་ཅད་མཁྱེན་པའི་རང་བྱུང་གི་ཡེ་ཤེས་ཕྱེད་མངོན་དུ་བྱས་པའི་དཔེ་ཡིན་ནི་ཞེས་གསུངས། དེའི་དུས་ན་སྟོན་པ་ཀུན་གྱི་བཤེས་གཉེན་གྱིས་ཕྱག་བརྐྱང་ནས་མངོན་སུམ་དུ་ལུང་སྟོན་པའི་མཐའི་དྲོད་རྟགས་རྣམས་ཡང་དག་པར་ཐོབ་པར་འགྱུར་ཏེ། དེ་ལྟར་ཐོག་པ་ཉིད་ན་ཡེ་ཤེས་ལྔ་ཉིད་སྐུར་སྨིན་ནས་ཆོས་ཉིད་མི་རྟོག་པའི་ངོ་བོར་ངེས་པར་གྲུབ་པ་ཡིན་ནོ་ཞེས་བྱའོ། །སྤྱིར་ས་བདུན་པ་རྣལ་འབྱོར་བཞི་པའི་ཁྱད་པར་དང་། བརྒྱད་པ་དགུ་པ་བཅུ་པ་རྣམས་རྣལ་འབྱོར་ལྔ་པའི་ཁྱད་པར་ཡིན་ཡང་། འགྲེལ་ཆེན་ལས། བདུན་པ་བརྒྱད་པ་དགུ་པ་རྣམས་རྣལ་འབྱོར་བཞི་པའི་ཁྱད་པར་དུ་གསུངས་པ་ལྟ་བུར་བཞུགས་པ་ནི། ལུང་སྟོན་པའི་རྟགས་ཀྱི་ངེས་ཚིག་དང་བསྟན་པར་མངོན་པས་ཐ་སྙད་དེ་ལྟར་བསྟན་ཀྱང་སྒོམ་ལམ་པ་དང་མཐར་ལམ་པ་ལུང་སྟོན་ཚུལ་གྱི་ཁྱད་པར་དབྱེ་ན་ས་བདུན་པ་ལུང་ཆེན་ཐོབ་པ་དང་། བརྒྱད་པ་ནས་རྩལ་ཆེན་རྫོགས་པའི་ཁྱད་པར་དུ་འགྱུར་བར་འགྲེལ་པའི་བབ་ཀྱིས་དངོས་དོན་དུ་གསལ་ལོ་སྙམ་མོ། །བཅུ་པ་ནི། ལས་སུ་རུང་བའི། ཞེས་པ་ནས། ངེས་པས་གྲུབ་ཆེན་ཡིན། །ཞེས་པའི་བར་གྱིས་བསྟན་ཏེ། ས་བཅུ་པ་མཐར་ལམ་ཐ་མལ་དེ་ལྟར་གདེང་དུ་གྱུར་ཏེ་ངང་གིས་མི་གཡོ་བར་གནས་པའི་རྒྱུ་ལས་བསྒོམ་མི་དགོས་པར་ཏིང་ངེ་འཛིན་ལས་སུ་རུང་སྟེ་གཉིས་མེད་ཙམ་མ་ཡིན་པར་ལྷུན་གྱིས་གྲུབ་པར་གཉིས་མེད་ཀྱི་ཐ་སྙད་ལས་གྲོལ་བར་རང་གསལ་བའི་གནས་སྐབས་དག་ཏུ་མཐར་ཕྱིན་པའི་ཚེ་ལ་དབྱིངས་དང་ཡེ་ཤེས་ཀྱང་ཚིག་གི་ཐ་སྙད་ཙམ་དུ་ཆུད་དེ་ཏིང་ངེ་འཛིན་དང་རིག་པ་ཡེ་ཤེས་ཀྱི་རྩལ་མ་འདྲེས་ལ་ཡོངས་སུ་རྫོགས་པར་རྟོགས་པས་དེ་ལས་སྐྱེད་དུ་བྱ་བ་མེད་པར་རྫོགས་པ་མཆོག་ཏུ་ལྷག་པའི་བྱང་ཆུབ་ཀྱི་སེམས་དམ་པ་མཐར་ཐུག་པ་འབྱུང་ཞིང་སྐྱེ་བ་སྟེ། དཔེར་ན་གཉེན་པོ་མེད་པའི་སྒྲོན་མ་མེ་ཆེན་པོ་རླུང་གིས་མ་བསྐྱོད་པའམ་དུས་མཐའི་མེས་ཐམས་ཅད་སྲེགས་ཏེ་མེར་སྣང་བ་དང་། ཚེས་བཅུ་དྲུག་ཆ་ལ་རྫོགས་པའི་ཟླ་བ་ཉ་གང་བ་ལྟ་བུར་དེ་བས་སྐྱེད་དུ་བྱར་མེད་པའི་སྣང་ཞིང་གསལ་བར་མཐོང་བར་འགྱུར་རོ། །དེའི་དུས་ན་དྲོད་རྟགས་ཆེན་པོ་བདུད་དང་མི་མཐུན་པའི་ཕྱོགས་ཀྱིས་མི་འཕྲོགས་པར་ཡེ་ཤེས་མི་འགྱུར་ཏེ་བརྟན་པར་ངེས་པས་མཐར་ཕྱིན་པའི་འབྲས་བུ་གྲུབ་པ་ཆེན་པོ་ཡིན་པས་ལམ་ཡོངས་སུ་རྫོགས་པ་ཞེས་བྱའོ། །གསུམ་པ་ནི། སེམས་ཉིད་ཡེ་ནས། ཞེས་པ་ནས། བགྲོས་པའོ། །ཞེས་པའི་བར་གྱིས་བསྟན་ཏེ། འོ་ན་གསང་སྔགས་ཐམས་ཅད་མཉམ་པ་ཉིད་ལ་སེམས་བཅུ་དཔེ་བཅུ་སྐབས་བཅུས་ཅི་ཞིག་བྱ་སྟེ་འོག་མ་དང་མི་འདྲ་འམ་ཞེ་ན། དེ་ལྟར་མིན་པར་འགྲོ་བའི་སེམས་ཉིད་ཡེ་ནས་སངས་རྒྱས་ཏེ་ཆོས་ཀྱི་སྐུའི་ངོ་བོ་ཡིན་ཡང་། དེ་ཉིད་ལ་རང་གི་ངོ་བོ་མ་རིག་པའི་རྟོག་པ་དང་བརྟགས་པས་བསྒྲིབས་པས་ལྗོན་ཤིང་དེ་རུ་མ་ཤེས་ཏེ་དོན་མ་མཐོང་བ་ཉིད་རྟོགས་པའི་ཐབས་དམ་པ་རིམ་པར་འཇུག་པའི་ཚུལ་གྱིས་རང་རིག་བྱང་ཆུབ་སེམས་ཀྱི་སྐབས་བཅུ་ཡི་སྒོ་ནས་ལྗོན་ཤིང་མཆོག་ཉིད་བསྐྱེད་དེ་གོང་དུ་འཕེལ་བ་ལས། དེ་ལྟར་རྫོགས་ཤིང་མཐར་ཕྱིན་པས་བླ་ན་མེད་པའི་འབྲས་བུར་སྨིན་ཏེ་ལྷུན་གྱིས་གྲུབ་པ་ཡིན་པས། དམན་པའི་ལུས་ཅན་ཁྱེད་ཅག་གིས་ཀྱང་། རྒྱལ་བའི་དགོངས་པ་བྱང་ཆུབ་སེམས་ཀྱི་ལྗོན་ཤིང་དེ་ཉིད་དུས་ཐམས་ཅད་དུ་སྒོམས་པར་གྱིས་ཤིག་པའོ། །དེ་བས་རྟོགས་པའི་ཡེ་ཤེས་ཉིད་འབབ་ཆུ་ལྟར་བར་མ་ཆད་པར་འཕེལ་བས་མཐར་ཕྱིན་པ་ཡིན་པའི་ཕྱིར། རྒྱུ་མཚན་དེས་ན་སྲིན་པོ་བློ་གྲོས་ཐབས་ལྡན་ལ་སོགས་པའི་གྲོགས་པོ་དམ་པ་དག །ཅེས་བོས་ནས། ལྗོན་ཤིང་གི་མཚན་ཉིད་འཆད་པ་ནི། བདེ་བར་གཤེགས་པ་རྫོགས་པའི་སངས་རྒྱས་དམ་པ་རྣམས་ཀྱི་བྱང་ཆུབ་སེམས་ཀྱི་ཤིང་བུ་ནི་དུས་གསུམ་ཀུན་ཏུ་ཡོན་ཏན་གྱི་རྒྱུན་དང་བཅས་ཏེ་དུས་བཞིའི་ཕྱོགས་རིས་ཀྱི་ཆར་མ་ཆད་པར་སྣང་བ་སྟེ། དེ་ལྟར་སྣང་བ་ཡང་སྐད་ཅིག་མའི་རྒྱུན་ལས་གྲོལ་ཏེ་ངོ་བོ་ངོས་གཟུང་མེད་པར་དམིགས་པའི་ཡུལ་ལས་འདས་པ་ནི་འཁྲུལ་སྣང་གཞི་དང་བཅས་པའི་འཇུག་པ་ཆད་དེ་དོན་མཆོག་ཏུ་གྱུར་པ་དམ་པ་ཡིན་ནོ། །དེ་ཡི་ཚིག་གི་ལྷག་མ་ནི། གལ་ཏེ་དེ་ལྟར་སྣང་བ་ལ་ངོ་བོ་སྐད་ཅིག་མའི་རྒྱུན་ལས་གྲོལ་ཀྱང་སྐབས་བཅུས་སྐད་ཅིག་མའི་རྒྱུན་ཆད་ན་མུ་སྟེགས་ཆད་པའི་ཕྱོགས་སུ་ལྟུང་བར་འགྱུར་བས་དམ་པ་མིན་པར་བསྟན་པའོ། །དེ་ལྟ་བུར་བྱང་ཆུབ་སེམས་ཀྱི་ངོ་བོའི་དོན་ལ་ལམ་པས་སྐད་ཅིག་མའི་རྒྱུན་དུ་འབད་དེ་གོམས་པ་ཉིད་ཀྱིས་ནི་གོང་ནས་གོང་དུ་བོགས་དང་ལྡན་པར་གྱུར་ཏེ་ངེས་པར་འབྲས་བུ་མཆོག་ཏུ་སྨིན་པ་ཡང་གང་བྱང་ཆུབ་སྙིང་པོ་ཉིད་དུ་ལམ་རྣལ་འབྱོར་ལྔ་དང་ས་བཅུས་རིམ་པར་སྨིན་པའི་ཡོན་ཏན་རྒྱ་མཚོའི་དཔག་བསམ་གྱི་ལྗོན་པ་ཉིད་ནི་སྐྱེད་ཤིང་དེ་ཡི་ངོ་བོ་སྟེ་བྱང་ཆུབ་དམ་པ་བླ་ན་མེད་པར་གྱུར་བའི་བྱང་ཆུབ་སེམས་ཀྱི་ལྗོན་པའི་ཤིང་བུ་མཆོག་ཏུ་རྒྱས་པས་འབྲས་བུ་དམ་པ་ཡང་དག་པར་རྫོགས་པའི་སངས་རྒྱས་ཉིད་དུ་སྨིན་ངེས་པར་གྱུར་པའོ། །ཇི་ལྟར་བགྲོས་པའི་ཁུངས་དང་འབྲེལ་བར་གྲོགས་པོ་དག་བཤད་པ་དེ་དག་ནི། ལྗོན་ཤིང་དམ་པ་ཇི་ལྟར་བསྐྱེད་པའི་ཚུལ་གྱིས་རྒྱལ་བའི་དགོངས་པ་མ་ནོར་བ་ཉིད་ངེེས་པར་བགྲོས་ཏེ་བསྟན་པའོ། །ལེའུའི་མཚན་ནི། སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། དེ་ཁོ་ན་ཉིད་གསང་བ་དམ་པ་བྱང་ཆུབ་སེམས་ཀྱི་ལྗོན་ཤིང་བསྐྱེད་པའི་ལེའུ་སྟེ་ལྔ་བཅུ་རྩ་བརྒྱད་པ་ཉིད་རྣམ་པར་འགྲེལ་ཏེ་བཤད་པའོ།། །།བཞི་པ་དམ་པར་འཇུག་པར་བྱ་བ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི། དེ་ནས་ཡང་། ཞེས་པ་ནས། ལམ་དམ་པ་ལ་བྱའོ། །ཞེས་པའི་བར་གྱིས་བསྟན་ཏེ། ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །ལྗོན་ཤིང་བསྐྱེད་པ་བསྟན་མ་ཐག་པ་དེ་ནས་ཡང་ལང་ཀའི་བདག་པོ་ལ་སོགས་པ་འཁོར་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས། ལེའུ་ཞེ་ལྔ་པའི་རྣམ་གྲངས་བཅུའི་བཞི་པའི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། ཉིད་ཀྱིས་དམ་པ་རྣམས་ཀྱི་རྗེས་སུ་འཇུག་པར་བྱའོ། །ཞེས་དམ་བཅའ་བར་དགོངས་པ་དེ་ལ། དམ་པ་རྣམས་ཀྱི་རྗེས་སུ་ཇི་ལྟར་འཇུག་པར་བགྱི། དེ་ཉིད་ཚུལ་ཇི་ལྟར་ཡོངས་སུ་ཤེས་པར་བགྱི། ཞེས་དེ་སྐད་ཅེས་འཇུག་པའི་ཐབས་དང་ཤེས་པར་བྱ་བའི་ཐབས་གཉིས་ཡོངས་སུ་དྲིས་པ་ལས། འཆད་པའི་སྐྱེས་བུ་གསང་བ་པའི་བདག་པོས་ལན་སྨྲས་ཏེ་གསུངས་པ། ཀྱེ་གྲོགས་པོ་དག །དྲིས་པ་དེ་ནི་འདི་ལྟར། རྒྱལ་བ་རྫོགས་པའི་སངས་རྒྱས་དམ་པ་རྣམས་ཀྱི་རྗེས་སམ་ཤུལ་ནི། གང་ངེས་པར་སྔར་སངས་རྒྱས་པར་གཤེགས་པའི་ལམ་དམ་པ་གསང་སྔགས་ཐེག་པ་ཆེན་པོའི་སྙིང་པོ་ཆོས་ཀྱི་དབྱིངས་ཡང་དག་པར་རྟོགས་པ་ལ་བྱའོ། །གཉིས་པ་ལ་གཉིས་ཏེ། ལོག་པར་ལྟ་བ་ལམ་དུ་གཞུག་ལུགས་ལྡེམ་དགོངས་ཀྱིས་བསྟན་པ། ངེས་པའི་ལམ་དུ་འཇུག་ལུགས་མ་འདྲེས་ཡོངས་རྫོགས་སེམས་ཀྱི་གསང་ལམ་དུ་བསྟན་པའོ། །དང་པོ་ལ་བཞི་སྟེ། ལྡེམ་དགོངས་ཀྱིས་བསྟན་པ་དངོས་བཤད་པ། དེ་ལ་ཐེ་ཚོམ་ཟ་བ་དྲིས་ཚུལ་བསྟན་པ། ལན་དུ་དྲང་དོན་གྱིས་ཁྲིད་པའི་ཐབས་ཚུལ་གསུངས་པ། ཆོས་ཉིད་དུ་ཤེས་ན་ལོག་པ་ཉིད་ངེས་པའི་ལམ་དུ་བསྟན་པའོ། །དང་པོ་ནི། གྲོགས་པོ་དག །ཅེས་པ་ནས། དམ་པར་གསུངས་པ་ལས། ཞེས་པའི་བར་གྱིས་བསྟན་ཏེ། གྲོགས་པོ་དག །ཅེས་བོས་ནས། ལམ་དམ་པ་གང་ཞེ་ན། དེ་ལྟར་དེ་ཉིད་བསྟན་པ་ནི། སྐྱེས་བུ་ཉིད་ཀྱིས་བྱུང་ཁུངས་ཀྱི་སྐབས་སུ་ཕྱག་ན་རྡོ་རྗེ་ཁོ་བོས་བྱིན་རླབས་འབྱུང་བའི་བསྟན་པ་རིན་པོ་ཆེའི་གསང་བ་ཟབ་མོ་མཐོང་ཞིག་ཐོས་པའི་སྐབས་གཅིག་གི་ཚེ་ན། སྟོན་པ་བཤེས་གཉེན་དམ་པ་སྐུ་ལྔ་རྣམས་ཀྱིས་ངེས་པར་གསུངས་པ་གང་ཉིད་གསན་པའི་ལོ་རྒྱུས་འདིར་བཀའ་སྩལ་པ་ནི། རང་རྒྱུད་པ་ནི་འཁོར་བ་ཡིན་ཀྱང་རང་བཞིན་ནི་ཆོས་ཀྱི་སྐུ་ཡིན་པས། འདིར་དབྱེར་མེད་ཀྱི་བྱ་བའི་རྣལ་འབྱོར་གཞིའི་དོན་འཁོར་འདས་གཉིས་མེད་གསང་སྔགས་ངོ་བོ་ཉིད་ཀྱི་སྐུ་གཉེན་པོ་མེད་པར་རང་བཞིན་མ་བཅོས་པས་ཐམས་ཅད་ཀྱི་གཞིར་གྱུར་པ་ནི། རིལ་དེ་ཉིད་ཀྱི་ཕྱིར་དང་མི་མཐུན་པ་མེད་པའི་ཕྱིར། ལོག་པའི་རྣམ་པར་རྟོག་པ་ཐམས་ཅད་མ་སྤངས་པར་རྫོགས་པ་དང་ལྡན་ཏེ། དེའི་ཚུལ་ནི། ལྟ་བ་ངན་པ་རྟག་པ་ཉིད་དང་། ཆད་པ་ཉིད་དེ། དེ་གཉིས་ནི་ལྡེམ་དགོངས་ཀྱི་དབང་དུ། རང་བཞིན་མི་འགྱུར་བ་དང་དངོས་པོ་མེད་པ་ལ་དགོངས་པ་དང་། དངོས་པོར་སྐྱེ་ཞིང་འགག་པ་དང་། ཡུལ་ལ་དམིགས་པ་ཉིད་དེ། དེ་གཉིས་ནི། སྐྱེ་བ་མེད་པའི་ཆོ་འཕྲུལ་དང་། རང་སྣང་མི་འགག་པ་ལ་དགོངས་པ་དང་། ཉོན་མོངས་པ་ལྔ་སྟེ། སྲེད་པས་ཀུན་ལ་ཞེན་པའི་འདོད་ཆགས་པ་ཉིད་དང་། མནར་སེམས་པས་ཞེ་སྡང་བ་ཉིད་དང་། ཀུན་ནས་རྨོངས་པས་གཏི་མུག་པ་ཉིད་དང་། སེམས་གྱོང་ཞིང་ཁེངས་པས་ང་རྒྱལ་བ་ཉིད་དང་། གཞན་གྱི་ཡོན་ཏན་སེམས་ཀྱི་ཕྲག་ཏུ་མི་ཤོང་བས་ཕྲག་དོག་པ་ཉིད་དེ། དབྱིངས་དང་ཡེ་ཤེས་དབྱེར་མེད་པར་ཆགས་པ་དང་། རྟོག་པའི་ཆོ་འཕྲུལ་ལ་སྡང་བ་དང་། ཆོས་ཉིད་ཀྱི་ངང་ལ་འབྱེད་པ་མེད་པ་དང་། མཉམ་ཉིད་ཀྱི་ལྟ་བ་གཤོངས་སུ་མི་འབབ་པ་དང་། མཐར་འཛིན་གྱིས་སྒྲོ་སྐུར་ལ་ཕྲག་དོག་བྱེད་པ་དང་ལྔ་ལ་དགོངས་པ་དང་། འདོད་པ་ལྔ་ནི་ཆོས་ཉིད་དབྱིངས་ཀྱི་རྒྱན་སེམས་ཉིད་ལ་ཚང་བར་དགོངས་པ་དང་། མི་དགེ་བ་བཅུ་སྟེ། ལུས་ཀྱི་སྡིག་པ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་གསུམ་ཉིད། དངོས་འཛིན་འཇིག་པ་དང་། སངས་རྒྱས་ཀྱི་ཡེ་ཤེས་རང་སྟོབས་ཀྱིས་ལེན་པ་དང་། ཆོས་དབྱིངས་ལ་རིག་པ་ཆགས་པས་འཁོར་བ་ལས་ལོག་པ་རྣམས་ལ་དགོངས་པ་དང་། ངག་གི་སྡིག་པ། ངོ་བོ་དང་རྣམ་པའི་རྫུན་སྨྲ་བ་དང་། ཕྲ་མ་བྱེད་པ་དང་། ངག་རྩུབ་མོ་དང་། ཚིག་འཁྱལ་པ་སྨྲ་བ་དང་བཞི་ཉིད། ཕྱོགས་རིས་མི་བདེན་པ་དང་། འཁོར་འདས་འབྱེད་པ་དང་། ལོག་ལྟ་ཚར་གཅོད་པ་དང་། རང་བཞིན་མ་ངེས་པ་རྣམས་ལ་དགོངས་པ་དང་། ཡིད་ཀྱི་སྡིག་པ། བརྣབ་སེམས་དང་། གནོད་སེམས་དང་། ལོག་པར་ལྟ་བ་ཉིད་དེ། འབྲས་བུ་ལ་འདུན་པ་དང་། ལོག་ལྟ་ཉིད་འཇོམས་པ་དང་། འཁོར་བ་ལས་ལོག་པའི་ཡང་དག་པའི་དོན་ལ་ལྟ་བ་གསུམ་ལ་དགོངས་པ་ཉིད་དོ། །མཚམས་མེད་པ་ལྔ་ཉིད། ཕ་མ་དང་དགྲ་བཅོམ་གསོད་པ། བདེར་གཤེགས་ཀྱི་སྐུ་ལ་ངན་སེམས་ཀྱིས་ཁྲག་འབྱིན་པ། དགེ་འདུན་འཁོར་ལོའམ་མཐུན་པའི་དབྱེན་བྱེད་པ་སྟེ། ཡེ་ཤེས་ལྔ་ལ་དགོངས་པ་དང་། དེ་དང་ཉེ་བ་ལྔ་སྟེ། ཕྱག་མཆན་ལས། སློབ་དཔོན་དང་བྱང་ཆུབ་སེམས་དཔའ་གསོད་པ། གཙུག་ལག་ཁང་གི་དཀོར་འཇོམས་པའམ་དགེ་འདུན་འདུ་བའི་སྒོ་ཕྲོག་པ། དགེ་འདུན་སུན་འབྱིན་པ། མཆོད་རྟེན་བཤིག་པ་རྣམས་དམ་ཚིག་ཏིང་འཛིན་སོགས་ལ་དགོངས་པ་དང་། ཡང་ན་མ་ཡང་ཡིན་ལ་དགྲ་བཅོམ་མ་ཡིན་པ་འདོད་ལོག་གིས་སུན་ཕྱུང་བ། ཕྱིར་མི་ལྡོག་པའི་བྱང་སེམས་ངེས་གནས་གསོད་པ། འཕགས་པ་སློབ་པ་གསོད་པ་སྟེ་གཞན་གཉིས་འདྲའོ། །ཕྱི་ནང་གི་ལྕི་བ་བཞི་ལ། ཉམས་པའི་ལྕི་བ་བཞི་ནི། སྐྱེ་བོ་ལ་མི་ཆོས་ཀྱི་མནའ་ལྕི། ཉན་ཐོས་ལ་འདུལ་ཁྲིམས་ལྕི། བྱང་སེམས་ལ་སྡོམ་པ་ལྕི། སྔགས་པ་ལ་དམ་ཚིག་ལྕི་བའོ། །ལོག་པའི་ལྕི་བ་བཞི་ནི། མཁས་པའི་གོང་ལྕི། སྒོམ་ཆེན་གྱི་ཕྱག་ལྕི། སྒྲུབ་པ་པོའི་ཟས་ལྕི། སྔགས་པའི་ནོར་ལྕི་བའོ། །སྨད་པའི་ལྕི་བ་བཞི་ནི། གཏི་མུག་གི་དབང་གིས་འཕགས་པའི་སྐུ་ལ་སྨད་པ་ལྕི། ཕྱོགས་རིས་ཀྱི་དབང་གིས་དམ་པའི་ཆོས་ལ་བླང་དོར་བྱས་པ་ལྕི། ང་རྒྱལ་གྱི་དབང་གིས་བདེན་པའི་ཚིག་ལ་སྨད་པ་ལྕི། ཕྲག་དོག་གི་དབང་གིས་གྲོགས་ཀྱི་ཡོན་ཏན་ལ་སྨད་པ་ལྕིའོ། །སྐུར་བའི་ལྕི་བ་བཞི་ནི། མཉམ་ཉིད་ཆོས་ལ་ཁྱད་འདོན་ལྕི། །རང་བཞིན་ངན་ལ་གལ་འཛུག་ལྕི། །མི་དགེ་བཅུ་ལ་ལོག་ལྟ་ལྕི། །མཚམས་མེད་ལྔ་ལ་ཁྲག་འབྱིན་ལྕི། །ཞེས་གསུངས་ཏེ། ལྟ་སྒོམ་སྤྱོད་འབྲས་བཞིའི་རང་བཞིན་རྟོགས་ན་སྤངས་དང་རྟོགས་པའི་ཡོ ན་ཏན་གྱི་ལྕི་བ་ལ་དགོངས་པའམ། གསང་བདག་དགའ་རབ་དཔའ་བོས་སྤྱོད་པའི་ཀློང་ལས། གལ་ཏེ་མཐུན་པས་བཀྲིར་བཏུབ་ལ། །ཤན་པ་སྨད་འཚོང་མཚམས་མེད་པ། །རང་བཞིན་བཅས་པའི་མ་ཐོ་ཀུན། །དེ་ཡིས་དེ་དྲང་དོན་ལ་སྦྱར། །ངེས་པར་དགོངས་ལ་སྒྲིབ་མི་གནས། །ཞེས་པ་ལྟར་རང་གི་རྟོགས་པ་མཐར་ཕྱིན་ནས། མཐུན་པས་འདྲེན་པའི་ཐབས་མཁས་ལ་དགོངས་པ་དང་། ལོག་པའི་སྤྱོད་པ་བརྒྱད་དེ་ཕྱིའི་ལོག་པ་བཞི་ནི། དཀར་པོའི་ཕྱོགས་སྨོད་པ། ནག་པོའི་ཕྱོགས་བསྟོད་པ། དད་པ་ཅན་གྱི་ཚོགས་བཅག་པ། དགེ་བ་ཅན་གྱི་ཐུགས་དཀྲུག་པ་རྣམས་དང་། ནང་གི་ལོག་པ་བཞི་ནི། སློབ་དཔོན་སྨད་པ། བྱང་སེམས་སྤངས་བ། མཆེད་ལ་གདུང་སེམས་བསྐྱུངས་པ། དཀྱིལ་འཁོར་གཉན་པོ་འདྲལ་བ་རྣམས་ཏེ། ལྟ་བ། སྒོམ་པ། སྔགས། སྤྱོད་པ། ཕྲིན་ལས། ཆོས། མཆོད་རྫས། དམ་རྫས་རྣམས་མ་མཐུན་པའི་ཕྱོགས་ལས་ལོག་པ་ལ་དགོངས་པ་དང་། སྔར་བཤད་པ་ལྟར་སྨེ་ཤ་ཅན་ཤ་ལྔ་དང་། བཤང་བ་དང་། གཅི་བ་དང་། ཁྲག་དང་། ཁུ་བ་ལ་སོགས་པ་བདུད་རྩི་ལྔ་དག །ཤུགས་ལ་བློ་དམན་པ་ལ་སྨེ་བ་དང་། ལམ་མ་རྟོགས་པ་ལ་བསྟིང་བ་ཡང་སྦྱར་ཏེ། དེ་ལྟ་བུ་རྟོག་དཔྱོད་ངན་པ་མང་པོ་ལ་ངེས་པར་སྤྱོད་པ་ནི་འདིར་སྐྱེས་བུ་དམ་པ་རྣམས་ཀྱི་ཐར་པའི་ལམ་གྱི་དམ་པ་མཆོག་ཏུ་བསྟན་པ་ཉིད་མཉམ་པ་ཉིད་ལ་དགོངས་པ་དང་། འདི་དག་ལ་དགའ་བའི་འདུ་ཤེས་མཐུན་པ་རྣམས་དེའི་སྒོ་ནས་འདྲེན་ཞིང་དོན་ལ་གཞུག་པའི་ཕྱིར་དང་། ལམ་གཞན་དུ་ཞེན་པ་དགག་པའི་ཕྱིར། རང་དོན་དང་གཞན་དོན་གྱི་སྤྱོད་པ་རྣ་ཕྲུག་བྲག་རྩེད་ཀྱི་འགྲོས་སུ་དགོངས་པས་བཀའ་སྩལ་པ་ཡིན་པར་ཤེས་པར་བྱའོ། །ཞེས་སྟོན་པ་གསང་བ་མཆོག་གི་བདག་པོས་ངེས་པ་དམ་པར་རིགས་ཀྱི་བདག་པོ་ཕྱག་ན་རྡོ་རྗེ་ཉིད་ལ་གསུངས་པ་ལས། གཉིས་པ་ནི། ཁོ་བོས་དེ་ལ། ཞེས་པ་ནས། ཞུ་བ་འདུན་པ་ལས། ཞེས་པའི་བར་གྱིས་བསྟན་ཏེ། གསང་འཛིན་ཕྱག་ན་རྡོ་རྗེ་ཁོ་བོས་དེ་ཡི་ཚེ་སྟོན་པ་ཆེན་པོ་ལ་ཞུས་པའི་ཚིག་ཉེ་བར་བཤད་པ་ནི། རྟོགས་པའི་ཕྱོགས་ནས་སྟོན་པ་ལ་ཡོན་ཏན་མངའ་བར་ངམ་པ་དང་། གཞིའི་རྣམ་འབྱོར་ལ་ངམ་པ་དང་། ལམ་ལོག་པར་སྨྲ་བས་དོན་ལ་འདྲེན་པ་ལ་ངམ་པ་དང་། ཐབས་གང་ཡང་མ་སྤངས་པ་ལ་ངམ་པ་ཡིན་ན་ཡང་། མ་སྨིན་པའི་འཁོར་གྱི་བསམ་པ་དང་བསྟུན་ནས། སྟོན་པས་ལམ་ལོག་པ་རྣམས་ལམ་མ་ནོར་བ་ཡང་དག་ཏུ་གསུངས་པ་ལ་ངམ་ནས་འདི་སྐད་དུ། ཨེ་མའོ། །ཞེས་ངོ་མཚར་བ་སྐྱེས་པས། དོན་རྨད་དུ་བྱུང་བའི་ཡོན་ཏན་གྱི་མངའ་བདག་ཆོས་ཀྱི་རྗེ་བཙན་ཚོགས་གཉིས་རྫོགས་པའི་བདག་པོ་རྒྱལ་བ་སངས་རྒྱས་བཅོམ་ལྡན་འདས་ཆོས་སྟོན་པའི་སྨྲ་བ་དམ་པ་སྐུ་ལྔའམ་དུས་གསུམ་དུ་གཤེགས་པ་རྣམས་ཀྱི་དགོངས་པ་རྣམ་དག་ཡང་དག་པས་བརྗོད་པ་ཚད་མའི་གསུང་གི་བསྟན་པ་དག་ནི་ལམ་འབྲས་རྣམ་པར་དཀར་བ་ཡིན་པ་ལས། འདི་ལྟར་མི་དགེ་བ་བཅུ་ལ་སོགས་པ་ཕྱིན་ཅི་ལོག་གི་ཆོས་ཀུན་མ་ནོར་བའི་ལམ་དུ་བཀའ་སྩལ་བར་འབྱུང་བ་འདི་ཅི་ལྟ་བུ་ལགས། ཞེས་དེ་སྐད་ཞུ་བ་འདུན་པའི་ཚུལ་གྱིས་ཞུས་པ་ལས། གསུམ་པ་ལ་གསུམ་སྟེ། དྲང་དོན་དུ་བསྟན་པ་དངོས་བཤད་པ། ཐབས་དེ་ལྟར་བསྟན་པའི་དགོས་ཆེད་བཤད་པ། ཚུལ་དེའི་མཚོན་ཚུལ་མཐུན་དཔེས་བསྟན་པའོ། །དང་པོ་ནི། བཤེས་གཉེན་དམ་པས། ཞེས་པ་ནས། ཐབས་སུ་བསྟན་པ་ཡིན། །ཞེས་པའི་བར་གྱིས་བསྟན་ཏེ། སྟོན་པ་གསང་བ་མཆོག་གི་མངའ་བདག་ཆེན་པོ་བཤེས་གཉེན་དམ་པས་ལན་དུ་བཀའ་སྩལ་པ་ནི། འདི་ལྟར་བསྟན་པ་གང་དེ་ཉིད། གདུལ་བྱ་ཕྱིན་ཅི་ལོག་གི་ལས་ལ་ཞེན་ཅིང་ཆགས་པ་རྣམས་ཀྱང་། སྟོན་པ་དམ་པ་ཐེག་ཆེན་གསང་བ་རྒྱལ་པོའི་ཐེག་པ་བྱེ་བྲག་མང་ལ་ཡངས་པས་ཐབས་མཆོག་དཔག་གིས་མི་ལང་བའི་སྤྲིན་ཕུང་ཐམས་ཅད་མཁྱེན་པ་ཐབས་ཀྱི་མངའ་བདག་ལགས་པས་དེ་ཉིད་མིན་པར་གཞན་གྱིས་མི་འདྲོངས་པས་ན་དེ་ལྟར་བསྟན་ཅིང་ཁྲིད་ནས་མཐར་གསང་སྔགས་ངེས་པའི་དོན་གྱི་སྒོ་འདི་ལ་གཟུད་ཅིང་འཇུག་པའི་དགོས་ཆེད་ཀྱི་ཕྱིར་དུ། ལོག་པར་ལྟ་བ་ཅན་དག་ཁྲིད་པའི་ཐབས་སུ་དོན་གཉིས་མེད་ལ་དགོངས་ཏེ་ལྡེམ་དགོངས་སྒྲ་ཇི་བཞིན་མ་ཡིན་པས་ཕྱིན་ཅི་ལོག་རྣམས་ཡང་དག་པའི་ལམ་དུ་བསྟན་ཅིང་གསུངས་པ་ཡིན་ནོ། །གཉིས་པ་ནི། ལོག་ཞེན་དག་ལ། ཞེས་པ་ནས། བསྟན་བྲིད་ཐབས་སུ་གསུངས། །ཞེས་པའི་བར་གྱིས་བསྟན་ཏེ། འོ་ན་དེ་དག་ལའང་དང་པོ་ནས་ཟབ་མོ་བསྟན་ན་ཅི་མ་རུང་སྟེ་རྣལ་མ་མི་སྟོན་པ་དེ་ཅིའི་ཕྱིར་ཞེ་ན། ལོག་པའི་སྤྱོད་པ་ལ་ཞེན་ཅིང་ཆགས་པ་དག་ལ་ཐོག་མ་ནས་ངེས་དོན་ཟབ་མོ་སྒྲ་ཇི་བཞིན་དུ་བསྟན་ཡང། བློ་དང་མི་འཚམས་པས་འཇུག་པར་མི་འགྱུར་ཞིང་། དེར་མ་ཟད་སླར་ཡང་མི་མོས་པས་དེ་ཉིད་འགེགས་ཏེ་སྤོང་བར་འགྱུར་ཞིང་དེའི་སྐྱོན་གྱིས་ངན་སོང་དུ་ལྟུང་བའི་རིགས་རྣམས་ཀུན་ཀྱང་ཐེག་པ་ཆེན་པོའི་སྒོ་འདིས་ཆུད་མ་ཟོས་པར་ལོག་སྤྱོད་དེ་ལྟ་བུ་དང་མཐུན་པའི་ཐབས་ལ་མཁས་པ་ཉིད་ཀྱིས་གདུལ་བྱ་དེ་ཉིད་དྲངས་ནས་དོན་ལ་ཁྲིད་ན་གཟོད་རིམས་ཀྱིས་གསང་སྔགས་རྣལ་མའི་དེ་ཉིད་ལ་ཐེ་ཚོམ་མེད་པར་ངེས་པས་ཡིད་ཆེས་འབྱུང་བར་འགྱུར་ཏེ། དཔེར་ན་ཤེད་མ་བྱེ་བའི་བྱིས་པ་མེའི་ནང་དུ་འཇུག་པ་ཐབས་ཀྱིས་དྲང་བའི་དཔེ་བཞིན་ནོ། །དེའི་ཕྱིར་དོན་ཆེན་པོ་ལ་དགོངས་ཏེ་ཐབས་སྣ་ཚོགས་པར་རང་དང་མཐུན་པས་བཙུད་ནས་དེ་ཉིད་ལ་མི་གནས་པར་བྱེད་པ་ནི་བསླུ་བའི་ཐབས་ཏེ། རེ་ཞིག་པར་བསྟན་པ་དེ་ཉིད་ཀྱིས་མཐར་ངེས་པའི་དོན་ལ་གཟུད་པའི་ཕྱིར་དུ་གདུལ་བྱ་ལོག་པའི་ལྟ་བ་སོ་སོ་ལ་ཞེན་པས་འདོད་ཅིང་མོས་པ་དང་མཐུན་པར་ཐབས་ཀྱི་འཇུག་སྒོ་སྣ་ཚོགས་པ་རྣམས་ཀྱིས་རང་རང་གི་ལོག་པའི་ལྟ་སྤྱོད་རྣམས་དང་སྒོ་བསྟུན་པས་མཐུན་འཇུག་གི་ཚུལ་དུ་ཆ་འདྲ་བའི་སྤྱོད་ཡུལ་ཅན་དུ་སྦྱར་ནས་བསྟན་པས་གདུལ་བྱ་བྲིད་དེ་མཐར་གསང་སྔགས་དམ་པ་ལ་གཞུག་པའི་ཐབས་སུ་གསུངས་ཏེ་བཀའ་སྩལ་བར་མཛད་པའོ། །གསུམ་པ་ནི། དཔེར་ན་ལོག་སྤྱོད། ཅེས་པ་ནས། རྒལ་བའི་གྲུ་བཞིན་འདོར། །ཞེས་པའི་བར་གྱིས་བསྟན་ཏེ། དེའི་མཚོན་དཔེ་བརྡལ་ཤེད་མ་བྱེ་བ་དང་དོན་ལ་ཤེད་མ་བྱེ་བ་གཉིས་ཀ་སྦྱར་ཏེ། དཔེར་ན་ལོག་པར་སྤྱོད་པའི་བྱིས་པ་རྣམས། རང་གི་དངོས་ཀྱི་ཕ་མས་འཇིགས་པས་བསྡིགས་པ་དང་དགའ་བས་བྲིད་པར་བྱེད་པའི་ཐབས་ཀྱིས་ནི། རུང་བ་དང་མི་རུང་བའི་བྱ་བའི་ལས་ལ་གཟུང་དེ་ལུས་ངག་གི་བྱ་བརྩལ་བཟང་པོ་ཆེད་དུ་འཛིན་པར་གཞུག་པ་ལྟར། སྟོན་པ་རྣམ་འདྲེན་དམ་པས་ཉེས་པ་ལས་བཟློག་སྟེ་བཀྲི་དྲང་གི་ཐབས་ལ་བརྟེན་ནས་ཐུགས་བརྩེ་ཆེན་དམ་པས་གསང་བའི་དོན་ལ་རིམ་པར་འདྲེན་པར་མཛད་པའོ། །འོ་ན་ཐབས་དེ་ཉིད་ལ་ཆགས་པས་ཉེས་པས་གོས་པར་མི་འགྱུར་རམ་ཞེ་ན། དེ་ཡང་དཔེ་ཇི་ལྟར་ན་གང་ཟག་ལ་ལ་ཞིག་ཆུ་བོ་ཆེན་པོའི་ཕ་མཐར་འགྲོ་བར་འདོད་པ་ན། ཆུའི་ཀླུང་དེར་གྲུ་བོ་དག་ལ་བརྟེན་ནས་བརྒལ་ཏེ་འགྲོ་ཡང་ཕ་རོལ་གྱི་མཐར་སོན་པ་ན་གྲུ་བོ་འབོར་བར་བྱེད་པ་བཞིན་དུ་གདུལ་བྱ་འདུལ་བའི་ཐབས་སམ་ཐེག་པའི་བྱེ་བྲག་གི་རིམ་པ་རྣམས་དང་། འདིར་ལོག་པའི་སྤྱོད་པ་ལམ་དུ་བཀའ་སྩལ་པ་ལྟ་བུ་དེ་དག་ལ་བརྟེན་པས་དོན་རྣལ་མ་ལ་དྲང་བའི་ཐབས་ཆེན་པོ་ཡིན་ཡང་ཐམས་ཅད་དུ་ལྡན་པ་མ་ཡིན་ཏེ་གསང་སྔགས་ཟབ་མོའི་དོན་གྱི་ངེས་པ་ཡང་དག་པར་རྙེད་མ་ཐག་ཏུ་ཆུ་བོ་རྒལ་བའི་གྲུ་བཞིན་དུ་དོན་དེ་དང་ཐབས་དེ་ཉིད་ལ་ཞེན་པ་དང་རྩོལ་བའང་མཐར་འདོར་བ་ཉིད་དེ། རང་གི་ངོ་བོ་འདོར་བ་དང་། ཞེན་པ་འདོར་བ་གཉིས་ལས་འདིར་ལྟ་སྤྱོད་ངན་པ་རང་གི་ངོ་བོ་ཡང་འདོར་བའི་དཔེ་དང་སྦྱར་རོ། །བཞི་པ་ནི། དེས་ན་དེ་བཞིན། ཞེས་པ་ནས། མི་གསུང་བར་བཞུགས་སོ། །ཞེས་པའི་བར་གྱིས་བསྟན་ཏེ། གསང་སྔགས་ཀྱི་ལམ་མ་ཡིན་པ་མེད་པའི་ཕྱིར་ཞེན་པ་དང་ངོ་བོ་གཉིས་ལ་མི་གནས་པའི་ཚུལ་དེས་ན་གསང་བ་མཆོག་གི་ཆོས་ཀྱི་དབྱིངས་གཉིས་སུ་མེད་པའི་དེ་བཞིན་ཉིད་མ་ནོར་བར་ཤེས་ནས་དོན་གོ་ན། ལྟ་བ་ངན་པ་ཐམས་ཅད་དང་སྤྱོད་པ་ངན་པ་ཐམས་ཅད་གང་ཡང་རུང་སྟེ་རིལ་དང་རིག་པའི་ངོ་བོར་རྟོགས་ཏེ་དམ་པའི་ལམ་དུ་མཐོང་བས་མ་སྤངས་པར་སྤྱོད་པ་ཉིད་ཀྱིས་མཐར་ཕྱིན་པར་ངེས་པས་ན་ལམ་གཞན་ན་མེད་ཅིང་འབྲས་བུ་ལོགས་སུ་མི་ཚོལ་བའི་ཕྱིར་ལོག་པའི་ལྟ་སྤྱོད་ཀྱང་སྤངས་མི་དགོས་པར་གྲོལ་བས་ལམ་ཐམས་ཅད་ཀྱི་ནང་ན་ཉེ་ལམ་དམ་པ་རྨད་དུ་བྱུང་བ་ཡིན་ནོ། །ཚུལ་དེས་ན་སྐྱེ་བ་མེད་པའི་དེ་བཞིན་ཉིད་ཤེས་ན་དམ་པའི་ལམ་དུ་མ་གྱུར་པ་གང་ཡང་མེད་པར་བསྟན་པའོ། །འོ་ན་སྤྱོད་ངན་དེ་ལྟར་གཟུགས་བརྙན་ཙམ་ཡིན་ན་ཡང་། ལྟ་ངན་དེ་ཉིད་ཇི་ལྟར་ཡོད་ཅེ་ན། ཆོས་ཉིད་ཀྱི་དོན་མངོན་དུ་གྱུར་ཙ་ན་ལྟ་ངན་གྱི་གཞི་ཡང་རང་རིག་པའི་ཆོས་ཉིད་དུ་དག་པ་ཡིན་པས་ཆེད་དུ་སྤངས་པ་མ་ཡིན་པར་རང་གྲོལ་བ་ཁོ་ན་ཡིན་ནོ། །དེ་སྐད་ཅེས་སྟོན་པ་མཆོག་གིས་གསུངས་ཤིང་བཀའ་སྩལ་ནས་དེའི་ཚེ་ཕྲིན་ལས་གྲུབ་པས་ཅང་མི་གསུང་བར་བཞུགས་སོ། །གཉིས་པ་ལ་གཉིས་ཏེ། ལམ་ཤེས་པའི་དགོས་པ་བསྟན་པ། ལམ་རང་གི་ངོ་བོ་བཤད་པའོ། །དང་པོ་ནི། ཀྱེ་གྲོགས་པོ། །ཞེས་པ་ནས། ལམ་འདི་ཤེས་པར་བྱ། །ཞེས་པའི་བར་གྱིས་བསྟན་ཏེ། དེ་ལྟར་ཞུས་པའི་ཡོན་ཏན་གང་སྙམ་པ་ལ། འཆད་པའི་སྐྱེས་བུ་གསང་བདག་ཆེན་པོས། ཀྱེ་གྲོགས་པོ་དག །ཅེས་བོས་ནས་ཡོན་ཏན་གསུངས་པ་ནི། སྔར་བཤད་པའི་ཚུལ་དེ་བས་ན། རྒྱལ་བ་དམ་པ་རྣམས་ཀྱི་གཤེགས་ཤུལ་གྱིས་རྗེས་ལྟར་ཐེག་པ་ཆེན་པོའི་ཉེ་ལམ་དམ་པ་མཆོག་གི་སྒོ་འདིར་སྤྱད་ཅིང་ཞུགས་ཏེ་རང་གི་གཞུང་ལས་མ་ཉམས་ན་དུས་སྔ་མ་ཐམས་ཅད་ནས་ཕྱི་མ་ཐམས་ཅད་དང་ད་ལྟར་གྱི་རྣམ་པ་ཐམས་ཅད་ཀྱི་བྱེ་བྲག་གི་ལྟ་བའི་དོན་དང་སྤྱོད་པའི་ཁྱད་པར་ཇི་སྙེད་པ་ཐམས་ཅད་དུ་རང་སྣང་གི་རིག་པ་དེ་ཉིད་གསང་སྔགས་ཀྱི་ངོ་བོར་ཤེས་ཤིང་རྟོགས་པ་དང་། སེམས་ཀྱི་དཀྱིལ་འཁོར་དུ་གསལ་བ་དང་། རང་གི་མཚན་ཉིད་སོ་སོའི་བྱེ་བྲག་མ་འདྲེས་པར་ཕྱེད་པ་དང་། སྤྱིའི་མཚན་ཉིད་དེ་ཉིད་ཀྱི་ངོ་བོར་དབྱེར་མེད་པར་ཡོངས་སུ་རྫོགས་པ་རྟོགས་པར་འགྱུར་ཏེ། ཚིག་ལྷག་མ་ནི་དེ་ལྟ་བུའི་གདམས་པར་འབྱུང་བའོ། །དེས་ན་ཆོས་ཉིད་མཉམ་པ་ཉིད་མ་རྟོགས་པ་ལས་འཁོར་བ་ཉིད་ལས་ཉོན་གྱི་རྒྱུ་འབྲས་ཅན་དུ་སྣང་བའང་། སྐྱེ་བ་མེད་པའི་ཆོས་ཉིད་དུ་ཡོངས་སུ་ཤེས་པར་འདོད་པས་ཀྱང་ལམ་འདི་ཉིད་ཤེས་པར་བྱའོ། །མྱ་ངན་ལས་འདས་པ་སངས་རྒྱས་ཀྱི་མཚན་ཉིད་ལམ་དང་འབྲས་བུའི་རང་བཞིན་མཉམ་པ་ཉིད་དུ་ཡོངས་སུ་ཤེས་པར་འདོད་པས་ཀྱང་ལམ་འདི་ཉིད་ཤིས་ཤིང་རྟོགས་པར་བྱའོ། །དེ་བས་ཆོས་ཉིད་ཀྱི་ངོ་བོ་འཁོར་འདས་རིས་མེད་ཡིན་ཏེ་དེའི་ཕྱིར་མཉམ་ཉིད་རྟོགས་པས་འཁོར་འདས་ཤེས་པའོ། །གཞན་ཡང་སྔར་ལེའུ་བཅུ་དྲུག་པར་བཤད་པའི། རང་བཞིན་བསམ་གཏན་ལས་ཐུགས་རྗེ་བཞི་ལ་ཡན་ལག་བཅུ་དྲུག་སྟེ་ཆོ་འཕྲུལ་ཆེན་པོ་ཉི་ཤུ་ཐོབ་པར་འདོད་པས་ཀྱང་ལམ་དམ་པ་འདི་ཉིད་ཡོངས་སུ་ཤེས་པར་བྱའོ། །དེ་བཞིན་དུ་མཐར་ལམ་པས་གོལ་སྒྲིབ་ཆེད་དུ་བྱས་པའི་བཟང་རྟོག་སྔར་བཤད་པ་ལྟ་བུའི་རྟོག་པའི་རི་བོ་བརྒྱད་ཅུ་རྩ་གཅིག་མི་དམིགས་མཉམ་པའི་ངང་དུ་གཞིལ་བར་འདོད་པས་ཀྱང་ལམ་དམ་པ་འདི་ཡོངས་སུ་ཤེས་པར་བྱ་སྟེ། ཀུན་འདུས་ལས། དངོས་གཞིའི་རྟོག་པ་དགུ་དང་། མཚན་མའི་རྟོག་པ་དགུ་དང་། རྟགས་ཀྱི་རྟོག་པ་དགུ་དང་། རྐྱེན་གྱི་རྟོག་པ་དགུ་དང་། ལས་ཀྱི་རྟོག་པ་དགུ་དང་། སྦྱོད་པའི་རྟོག་པ་དགུ་དང་། བསྐྱེད་པའི་རྟོག་པ་དགུ་དང་། ཞེན་པའི་རྟོག་པ་དགུ་དང་། མངོན་པར་རྟོག་པ་དགུའོ། །ཞེས་གསུངས་པས་དགྲོལ་བར་བྱའོ། །ཟག་པ་དང་བཅས་པའི་ལམ་པས་ལྟུང་བའི་སྒོ་དགུ་ཆད་པར་འདོད་པས་ཀྱང་ལམ་དམ་པ་འདི་ཉིད་ཡོངས་སུ་ཤེས་པར་བྱའོ། །དེའང་སྔ་མ་ལས། བདུད་ཆེན་པོའི་རིས་སུ་ལྟུང་བའི་སྒོ་དང་། མུ་སྟེགས་ཀྱི་ཁམས་སུ་ལྟུང་བའི་སྒོ་དང་། སྲིན་པོའི་ཁམས་སུ་ལྟུང་བའི་སྒོ་དང་། གནོད་སྦྱིན་གྱི་རིས་སུ་ལྟུང་བའི་སྒོ་དང་། རུ་ཏྲ་ཆེན་པོར་ལྟུང་བའི་སྒོ་དང་། བགེགས་ཆེན་པོར་ལྟུང་བའི་སྒོ་དང་། ལྷ་ཆེན་པོའི་རིས་སུ་ལྷུང་བའི་སྒོ་དང་། ཤོ་གམ་གཅན་ཆེན་གྱི་རིས་སུ་ལྟུང་བའི་སྒོ་དང་། དམྱལ་བ་ཆེན་པོར་ལྟུང་བའི་སྒོའོ། །ཞེས་གསུངས་ཏེ། སོ་སོའི་མཚན་ཉིད་བསྟན་ན། བདུད་དུ་ལྟུང་བའི་སྒོ་ནི། ངེས་དོན་འདུས་པ་ལས། གཞན་གྱི་བསམ་སྦྱོར་བཟང་པོ་ལ། །བར་ཆད་བྱེད་པ་བདུད་ཡིན་ཏེ། །གཞན་གྱི་རྫས་ལ་སེར་སྣ་བྱེད། །མ་རྟོགས་བདུད་ཀྱི་སྒོར་ལྟུང་འཁྱམས། །ཞེས་སོ། །མུ་སྟེགས་སུ་ལྟུང་བ་ནི། དེ་ཉིད་ལས། མ་རྟོགས་ང་དང་བདག་འཛིན་པས། །གསང་སྔགས་ལྟ་སྤྱོད་ལོག་པའི་ཕྱིར། །བརྩེ་མེད་སྡིག་པ་ཀུན་སྤྱད་པས། །མུ་སྟེགས་སྒྲོ་སྐུར་རྟག་ཏུ་འཁྱམས། །ཞེས་སོ། །སྲིན་པོར་ལྟུང་བ་ནི། མཉམ་ཉིད་ཆོས་སྐུ་མ་རྟོགས་པར། །རང་རྒྱུད་ཆགས་སྡང་ཕོ་ཚོད་སྤྱོད། །སྙིང་རྗེ་མེད་པར་གསོད་ལ་དགའ། །སྲིན་པོའི་སྒོར་ལྟུང་དམྱལ་བར་སྐྱེ། །ཞེས་སོ། །གནོད་སྦྱིན་དུ་ལྟུང་བ་ནི། མ་རྟོགས་མཐུ་ཆེ་ཚད་མེད་ཀྱང་། །ང་རྒྱལ་དྲེགས་པའི་ཉོན་མོངས་ཅན། །འཇིག་རྟེན་འདི་རུ་བཙན་ཕྱུག་ཀྱང་། །གནོད་སྦྱིན་སྒོར་ལྟུང་རྟག་ཏུ་འཁྱམས། །ཞེས་སོ། །རུ་ཏྲར་ལྟུང་བ་ནི། ཇི་བཞིན་མ་ནོར་མ་རྟོགས་པར། །ལོག་རྟོག་སྤྱོད་ཅིང་སྣ་ཚོགས་སྤྱོད། །རང་གིས་མི་ཤེས་གཞན་འགྲོལ་བ། །རུ་ཏྲའི་སྒོར་ལྟུང་དམྱལ་བར་སྐྱེ། །ཞེས་སོ། །བགེགས་སུ་ལྟུང་པ་ནི། མ་རྟོགས་ཕྲིན་ལས་ཅི་མཁས་ཀྱང་། །ཚིག་ལ་དངོས་པོར་འཛིན་པ་ཡིན། །རང་རྒྱུད་དམ་རྫས་མངོན་ཞེས་པས། །བགེགས་དང་བྱ་རོག་སྒོར་ལྟུང་འཁོར། །ཞེས་སོ། །འདིའི་རྐང་པ་དང་པོར་དཔེ་ལ་ལར། མ་རྟོགས་ཕྲ་མེན་ཅི་མཁས་ཀྱང་། །ཞེས་འབྱུང་། ལྷ་ཆེན་པོར་ལྟུང་བ་ནི། ཐབས་ལམ་དབང་ལ་ཁུངས་ཕྱུང་སྟེ། །འདོད་ཆགས་རང་དགར་རྟག་སྤྱོད་པ། །ལྟ་བས་མ་ཟིན་བདེ་ལ་ཞེན། །ལྷ་ཆེན་འདོད་ཆགས་མངལ་སྒོར་ལྟུང་། །ཞེས་སོ། །ཤོ་གམ་ཅན་དུ་ལྟུང་བ་ནི། རང་དབང་ཏིང་འཛིན་མ་ཐོབ་པར། །སྡིག་པས་འཁོར་དང་རིས་སུ་བཅད། །བདག་ཉིད་ཆེ་འདོད་འཁོར་སྡུད་པ། །ཤོ་གམ་གཅན་ཆེན་གནས་སུ་ལྟུང་། །ཞེས་སོ། །ངན་སོང་དུ་ལྟུང་བའི་སྒོ་ནི། སྔ་མ་ལས། རང་སེམས་ཆོས་སྐུར་མ་རྟོགས་པར། །མདོ་རྒྱུད་མང་པོ་ཤེས་བཤད་ཀྱང་། །བདག་བསྟོད་གཞན་ལ་སྨོད་པའི་ཕྱིར། །ངན་སོང་གསུམ་གྱི་སྒོར་ལྟུང་འཁོར། །ཞེས་སོ། །དེ་ལ་སོགས་པ་སྔར་ཡང་བཤད་པ་གཞན་འདི་དག་བསྡུ་བའི་དོན་གྱིས་རྔམ་ཉི་ཤུ་དང་། ཆེ་བ་ཉི་ཤུ་དང་། བརྗིད་ཉི་ཤུ་ལ་སོགས་པ་རྩ་བའི་རྒྱུད་ལས་སྨོས་པ་དང་། རྒྱུའི་རྣལ་འབྱོར་དང་། རྐྱེན་གྱི་རྣལ་འབྱོར་དང་། འབྲས་བུའི་རྣལ་འབྱོར་ཏེ། འཁོར་འདས་ལམ་གསུམ་གྱིས་བསྡུས་པ་མཐའ་ཡས་པའི་ཆོས་ཇི་སྙེད་པ་ཐམས་ཅད་ནས་ཐམས་ཅད་དུ་ཡོངས་སུ་རྫོགས་པ་ཀུན་ཤེས་ཤིང་རྟོགས་པར་འདོད་པ་རྣམས་གང་དང་གང་དག་གིས་ཀྱང་གསང་སྔགས་གསང་བ་དམ་པའི་ལམ་ཆེན་པོ་འདི་ཉིད་ཡང་དག་པར་ཤེས་པར་བྱ་སྟེ། ཀུན་འདུས་ཀྱི་ལེའུ་དང་པོ་ལས། དེ་ལྟར་ཆོས་ཀྱིས་ཚུལ་ཤིན་ཏུ་མང་པོ་རྒྱས་པར་བཀའ་སྩལ་ཏེ་མཇུག་ཏུ། འདུས་པ་ཆེན་པོའི་ཚོགས་དེ་བས་ན། སངས་རྒྱས་ཀྱི་ཆོས་དེ་རྣམས་ལ་སྤྱོད་པར་འདོད་པས། ལམ་འདི་ལ་བསླབ་པར་བྱའོ། །ཤེས་པར་བྱའོ། །གོམས་པར་བྱའོ། །ཀློང་དུ་གྱུར་བར་གྱིས་ཤིག །ཅེས་གདམས་པར་མཛད་དོ། །གཉིས་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པ་ནི། སེམས་ཉིད་དམ་པའོ། །ཞེས་པ་ནས། ལོག་མེད་དམ་པའི་ལམ། །ཞེས་པའི་བར་གྱིས་བསྟན་ཏེ། ཡང་དག་པར་ཤེས་ན་དགོས་པ་དེ་ལྟ་བུ་དང་ལྡན་པའི་ལམ་གྱི་ངོ་བོ་ནི་སེམས་ཀྱི་དཀྱིལ་འཁོར་དང་རང་བཞིན་གྱིས་འོད་གསལ་བ་དབྱེར་མེད་མཉམ་པ་ཆེན་པོར་རྟོགས་པ་དེ་ཉིད་རྒྱལ་བ་རྣམས་ཀྱི་གཤེགས་ཤུལ་ཡིན་པས་རྣལ་འབྱོར་པའི་ཡང་འཇུག་ངོགས་དམ་པ་རྣལ་མ་མ་ནོར་བའི་ལམ་མཆོག་རྨད་དུ་བྱུང་བ་ཉིད་དེ་དཔེར་ན་ཁྱུང་ཆེན་ནམ་མཁའ་ལ་ལྡིང་ཡང་བྱ་ལམ་གྱི་རྗེས་མེད་པ་བཞིན་དུ། དེ་ལྟ་བུའི་རྟོགས་པའི་གདེངས་དང་ལྡན་པ་ཅན་ལ་ཅིས་ཀྱང་མི་གོས་པས་ཟོན་ཆགས་ཀྱིས་ཉམ་ང་བ་དང་ལོག་པར་ལྟུང་བའི་བག་ཚ་བ་མེད་པར་ནོར་བ་མི་འབྱུང་བ་ནི་དམ་པའི་ལམ་མཆོག་ཏུ་གྱུར་བར་ངེས་པ་ཡིན་ནོ། །མཆན་ལས། འདི་གཉིས་སེམས་ཉམས་ཀྱང་ཡིན་ནོ། །ཞེས་འབྱུང་མོད། རང་མཚན་རྟོགས་ནས་དོན་ལ་འདའ་ཉམས་མེད་པའི་གདེངས་དང་ལྡན་པ་ལ་དགོངས་ཀྱི། ངོ་བོ་མ་རྟོགས་པར་ཏིང་ངེ་འཛིན་བརྟན་པ་དང་། སྤྱི་མཚན་ཙམ་གྱིས་གོ་མྱོང་ལ་གནས་པས་ནི་མི་བསྟོངས་ཏེ། དམ་ཚིག་གི་ཀློང་ལས། དམ་ལ་མི་གནས་སྔགས་པ་དེ། །ན་རག་རྡོ་རྗེའི་གཏན་གཞི་སྟེ། །རྟོགས་པ་སྤྱི་ཡིས་དེ་མི་སྐྱོབས། །སེམས་འཛིན་གནས་པས་ཆུ་ལོན་མིན། །ཞེས་གསུངས་སོ། །གཉིས་པ་ལ་དྲུག་སྟེ། ལམ་མཆོག་ཤེས་པར་བྱ་བའི་ཕྱིར་ཚིག་གིས་མཚོན་དགོས་པར་བསྟན་པ། ལམ་གྱི་གོལ་ས་ཉེས་དམིགས་དང་བཅས་པ་བཤད་པ། དོན་ལམ་གྱི་ངོ་བོ་དངོས་བསྟན་པ། དེ་ལྟར་མཐོང་གོམས་ཀྱི་དྲོད་རྟགས་བཤད་པ། ལམ་པ་དེ་ཉིད་ཐེག་པ་གཞན་གྱི་ལམ་ཞུགས་ལས་དཔག་པར་བསྟན་པ། དོན་ལམ་གྱི་རྣལ་འབྱོར་པ་ལ་ཡོན་ཏན་ཐམས་ཅད་རྫོགས་པར་བཤད་པའོ། །དང་པོ་ནི། འདི་ལྟར་ངེས་པའི། ཞེས་པ་ནས། ཉེ་ལམ་གཏེར་བཙལ་བ། །ཞེས་པའི་བར་གྱིས་བསྟན་ཏེ། འདི་ལྟར་ཐེག་པ་ཆེན་པོ་བླང་དོར་མེད་པར་གསང་དོན་ངེས་པའི་ལམ་མཆོག་དམ་པ་འདི་ཡང་སྐལ་བ་དང་ལྡན་པའི་ལམ་པ་བློ་རབ་འབྲིང་ཐ་མ་ཀུན་གྱིས་རིམ་གྱིས་ཤེས་ཤིང་རྟོགས་པར་བྱ་བའི་ཕྱིར་རམ་ཆེད་དུ་བརྗོད་འབྱུང་ཚིག་གི་ལམ་གྱིས་ཆེད་དུ་གཉེར་ནས་ཡི་གེས་དོན་མཚོན་ཏེ་བསྟན་དགོས་པའོ། །ཚིག་ལྷག་མ་ནི། འོན་ཏེ་དེ་ལྟར་བསྟན་ཀྱང་དོན་གྱི་ངོ་བོ་བརྗོད་དུ་མེད་ཅིང་ཚིག་གི་ཡུལ་དང་བྲལ་བ་ཉིད་བརྗོད་ཚིག་གིས་མི་ཕེབས་ཏེ་སྨྲར་མེད་པས། ལམ་དམ་པ་དེ་ཡི་རང་བཞིན་དེ་ལྟ་བུ་མ་ནོར་བའི་མཚན་ཉིད་ཅན་དུ་ངེས་པ་ཡིན་ན་ལམ་པས་འཕྲལ་དུ་བྱས་ཏེ་རང་བཞིན་མ་བཅོས་ཤིང་བསམ་པ་ལས་འབྱུང་བ་མ་ཡིན་པས་ཆོས་ཉིད་དེ་བཞིན་ཉིད་དམ་པའོ། །འོན་ཀྱང་ཚིག་ཏུ་བརྗོད་པས་ལམ་མཚོན་པའི་ཚུལ་ནི། ཆོས་ཀྱི་དབྱིངས་མཉམ་པའི་དོན་དེ་ལ་མིང་མེད་ཅིང་བརྗོད་དུ་མེད་པས་མ་བཅོས་པའི་ངང་ལས། གདུལ་བྱ་ལ་མིང་དུ་བཏགས་ཏེ་རྣམ་གྲངས་ཐ་སྙད་དུ་བསྙད་པའི་རྒྱུས་ཕྱིན་ཅི་མ་ལོག་པར་མཐོང་ཞིང་རྟོགས་པ་དང་། དེ་ལྟར་མ་མཐོང་ཞིང་མ་རྟོགས་པས་ཐེག་པ་སྣ་ཚོགས་ཐ་དད་དུ་གྱུར་པའོ། །དེ་ཡི་རྒྱུ་ལས་སོ་སོའི་ངོ་ལ་བརྗོད་པ་ཐ་དད་པའི་གཞིར་གྱུར་ཏེ་རང་རང་གིས་ལྟ་བའི་གཞུང་སྒྲུབ་ཅིང་རྩོད་པས་སྨྲ་བརྗོད་འཕེལ་ཞིང་རྒྱས་པར་འགྱུར་རོ། །ཚིག་ལམ་བསྟན་པ་དེའི་དགོས་པ་ནི། ཚིག་ཏུ་སྨྲ་ཞིང་བརྗོད་པས་དོན་གྱི་ངོ་བོ་དེ་ཁོ་ན་ཉིད་མཐོང་ཞིང་རྟོགས་པར་བྱའི་ཞེས་བྱ་བའི་ཕྱིར་དུ། ཚིག་གི་ལམ་གྱིས་མཚོན་ཐབས་ནི་རྣམ་གྲངས་ཀྱི་བྱེ་བྲག་སྣ་ཚོགས་པ་མང་པོར་བསྡེབས་པ་ལས་ཚིག་གི་ལམ་གྱི་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་ལ་སོགས་པ་མི་མཐུན་པ་དཔག་ཏུ་མེད་ཅིང་བསམ་ཡས་པར་འགྱུར་བ་ཡིན་ནོ། །དེ་བས་ན་ཚིག་གི་སྤྲོས་པ་དེ་དག་ལས་ཤེས་བྱའི་དོན་མ་ནོར་བ་དམ་པ་ལྐོག་ཏུ་གྱུར་པའི་མཚན་ཉིད་མཚོན་པས་རྗེས་བརྗོད་དེ་རིགས་པས་དཔྱད་པར་བྱ་བའི་ཐབས་མཆོག་ཏུ་གྱུར་པ་ནི། གདུལ་བྱའི་བློ་དང་བསྟུན་ཏེ་དྲང་བའི་ཐབས་སུ་བཀའ་སྩལ་པ་ཙམ་མིན་པར། རྒྱལ་བ་རྫོགས་པའི་སངས་རྒྱས་དམ་པ་གང་གི་ཐུགས་ཀྱི་དགོངས་པ་ལས་བྱུང་ནས་ཡང་དག་པའི་བཀའི་ཚིག་ཏུ་བྱུང་བའི་ངེས་པའི་ལུང་སྣང་གསལ་འོད་ལྡན་ལྟ་བུའི་སྒྲོན་མས་ཡོན་ཏན་ལྷུན་གྱིས་གྲུབ་པར་རང་ལ་གནས་པའི་དོན་གྱི་ཉེ་ལམ་འཛམ་བུའི་ཆུ་བོའི་གསེར་གྱི་གཏེར་དང་འདྲ་བ་བཙལ་ཏེ་རྟོགས་པར་བྱ་བ་ཡང་བརྗོད་པ་ཚིག་ལམ་དམ་པ་ལ་བརྟེན་ནས་མཚོན་པར་ཟད་དོ། །གཉིས་པ་ནི། ཉེ་ལམ་བྱང་ཆུབ། ཅེས་པ་ནས། ནས་ནི་གྲིབ་ཚོལ་འདྲ། །ཞེས་པའི་བར་གྱིས་བསྟན་ཏེ། དེ་ཡང་ཇི་ལྟར་རྒྱུད་དགྲོལ་བའི་བསླབ་པ་ལ་གནས་པས་དམིགས་མེད་བསམ་ལས་འདས་པར་ཐག་ཆོད་ནས་ཉེ་ལམ་བྱང་ཆུབ་དམ་པ་མཆོག་ཉིད་རྙེད་པ་ན་ནི། དེའི་ངང་ལ་གནས་ཏེ་སྒོམ་དགོས་པས། དེ་ལྟར་སྒོམ་པའི་དུས་སུ་དེའི་རིག་པ་དེ་དག་དྲན་པ་གང་དང་སྒོ་དྲུག་གི་མཚན་མའི་བྱུང་ཚོར་གྱི་རྗེས་སུ་དེ་ལྟར་འབྲངས་ན། བྱུང་ཚོར་གྱི་དབང་གིས་གཡེངས་པར་གྱུར་པ་མར་མེ་རླུང་གིས་བསྐྱོད་པ་ལྟ་བུའི་སྐྱོན་དུ་སོང་བས་འཇིག་རྟེན་པར་ལྟུང་སྟེ་རྟེན་འབྲེལ་བཅུ་གཉིས་ཀྱིས་འཁོར་བའི་འཁོར་ལོར་འཁོར་བར་འགྱུར་ཏེ་འདི་ལ་སྐྱེ་བོ་རང་ཀ་མ་དང་སྒོམ་པའི་ཤེས་པ་གཉིས་སུ་སྦྱར་རོ། །གང་མཚན་མའི་བྱུང་ཚོར་དང་རྟོག་པ་གཡོ་བའི་རྒྱུ་བ་ལ་སྐྱོན་དུ་བལྟས་ནས་དབང་པོའི་སྒོ་སྡོམས་པས་གང་བཀག་ནས་སྒོམ་པ་ནི། འཛིན་ཆགས་ཀྱི་དབང་གིས་འགོག་པར་གྱུར་པ་ཁྱིམ་བདག་འཇུར་བུ་ཅན་ལྟ་བུའི་སྐྱོན་དུ་སོང་བས་རྒྱུན་གྱི་འགོག་པ་ཉིད་དུ་ལྟུང་བར་འགྱུར་ཏེ། འདི་ལའང་ཉན་ཐོས་འགོག་པ་དང་སྒོམ་པའི་ཤེས་པ་གོལ་བ་གཉིས་སུ་སྦྱར་རོ། །གང་དྲན་པ་དང་བྱུང་ཚོར་ཡང་མེད་ལ་དོན་རྟོགས་པའི་ཤེད་ཀྱང་མ་བྱེ་བར་གང་དུའང་མི་རྒྱུ་བར་འཐོམ་ཞིང་བླུན་པོ་པ་ཡི་སྒོམ་པ་ནི། བྱིང་རྨུགས་ཀྱི་དབང་གིས་འཐིབས་པར་གྱུར་པ་འབེན་ཐིམ་པའི་མདའ་ལྟ་བུའི་སྐྱོན་དུ་སོང་བས་མ་རིག་རྨོངས་པའི་མུར་འཛིན་གྱིས་ནོན་པས་མུན་པའི་ལམ་གྱི་ཁྲོད་དུ་ལྟུང་བར་འགྱུར་ཏེ། འདི་ལའང་འདུ་ཤེས་མེད་པའམ་བྱོལ་སོང་དང་སྒོམ་པའི་ཤེས་པ་གཉིས་སུ་སྦྱར་རོ། །གང་ཟག་གི་བདག་གམ་སེམས་སྣང་བ་འདི་ཉིད་དོ་ཞེས་བདག་གིས་ངོ་བོ་གཅིག་ཏུ་གང་ལ་ངེས་པར་བཟུང་ནས་སྒོམ་པ་ནི་ཐེར་ཟུག་གི་དབང་གིས་འཐས་པར་གྱུར་པ་སྐྱེས་བུ་བྱ་རོག་གི་ཁུ་འཕྲིག་ཅན་གྱིས་མཐའ་ལ་རྟོག་པ་ལྟ་བུའི་སྐྱོན་དུ་སོང་བས་རྟག་པའི་མཚན་མ་ལ་རྟོག་པའི་རི་བོ་ཉིད་དུ་ལྟུང་བ་ཡིན་ཏེ། འདི་ལའང་མུ་སྟེགས་རྟག་ལྟ་བ་དང་སྒོམ་པའི་ཤེས་པ་གཉིས་སུ་སྦྱར་རོ། །ཚེའམ་རྒྱུ་འབྲས་སམ་དོན་ལ་དུས་སྔ་ཕྱི་གང་ཡང་མེད་ཅེས་མུ་མཐའ་བཅད་དེ་ད་ལྟ་འབའ་ཞིག་མ་ཁེགས་པར་ཡོད་པ་ཙམ་དུ་མཐོང་ནས་སྒོམ་ན་ནི། ཕྱལ་བའི་དབང་གིས་མེད་པར་གྱུར་པ་ཁྱི་འགྲོན་ཕྱོགས་གཉིས་པ་ལྟ་བུའི་སྐྱོན་དུ་སོང་བས། དེ་ལྟར་མེད་པ་ཆད་པའི་མུ་ཅན་དུ་ལྟུང་བ་ཡིན་ཏེ། འདི་ལའང་མུ་སྟེགས་ཆད་ལྟ་བ་དང་སྒོམ་པའི་ཤེས་པ་གོལ་བ་གཉིས་སུ་སྦྱར་རོ། །དེ་བས་ན་མ་བཅོས་པའི་ཆོས་ཉིད་ཇི་བཞིན་པའི་དོན་གྱི་ལམ་ཉིད་རིག་པ་ལ་སྐད་ཅིག་ཡུད་ཙམ་ཞིག་གསལ་ནས་སླར་དེ་ཉིད་འགག་སྟེ་བློ་ཡི་རྟོག་པ་ཅིར་ཡང་གཡོས་པས་རྣམ་རྟོག་གི་རྗེས་སུ་འབྲངས་ནས་སྐྱེ་འགག་འབྱུང་བ་དེ་ལ་སླར་ཡང་སྔ་མའི་རྗེས་སུ་དྲན་པར་བྱས་པས་དེ་ལས་སྔར་ལྟར་བསྒོམ་བྱ་གང་དེ་ཡུན་དུ་གསལ་བར་འབྱུང་བས་གང་རྟོགས་པ་ཇེ་བས་ཇེ་འཕེལ་དུ་བྱུང་ནས་སེམས་ལས་བོགས་སུ་གྱུར་བ་ན་ཡང་། ས་བཅུ་དང་རྣལ་འབྱོར་བཅུ་ལ་སོགས་པ་རིམ་གྱིས་པ་ཇི་ལྟར་འཇུག་པའི་རྣམ་གྲངས་ཀྱི་ལམ་དེ་ཉིད་འཕེལ་ཞིང་གོང་ནས་གོང་དུ་འགྲོ་བར་ནི་འགྱུར་གྱི། གང་གཅིག་ཆར་དུ་འཇུག་པའི་དམ་པའི་ལམ་མཆོག་ཉིད་དུ་གདེངས་རྙེད་དེ་ཀློང་དུ་ཕེབས་པ་ནི་མ་ཡིན་ཏེ་དྲན་པར་བྱེད་པ་ཉིད་ཀྱིས་བསྒྲིབས་པའོ། །དེས་མི་མཐོང་བ་ཉེ་བར་མཚོན་པ་ནི། དཔེར་ན་འགྲོ་བ་གང་བརྡ་ལ་ཤེད་མ་བྱེ་བའི་བྱིས་པ་དག་གིས་གྲིབ་མ་ལ་འབྲོས་ཏེ་སྤངས་ནས་གྲིབ་མ་མེད་པའི་ལུས་གཟུགས་རྣམ་པར་དག་པ་ཚོལ་བ་ཡང་། གྲིབ་མ་རང་རྒྱུ་གང་ལས་བྱུང་བ་མ་ཤེས་པ་དེ་ཉིད་ཀྱིས་གྲིབ་མ་མེད་པའི་ལུས་གཟུགས་བཙལ་ཡང་སླར་གྲིབ་མ་འཕེལ་ཞིང་དེ་མེད་པའི་ལུས་དང་གཟུགས་དག་པ་ནི་མི་རྙེད་པ་དང་མཚུངས་པར་རང་གི་སྒོ་གསུམ་གྱིས་བསྡུས་པའི་ཆོས་ཀུན་སེམས་ཀྱི་དེ་ཁོ་ན་ཉིད་ཡེ་ནས་རང་རིག་པའི་དེ་བཞིན་ཉིད་དམ་པའི་ལམ་མཆོག་མ་ནོར་བ་ཡིན་བཞིན་དུ་གང་དེ་ཉིད་མི་ཤེས་པར་རྒྱུ་འབྲས་དང་བཅས་པའི་ལམ་འདིར་སྡུག་བསྔལ་སྣ་ཚོགས་ཀྱིས་རྩོལ་བ་མང་པོའི་གདུང་བས་ཆོས་ཉིད་ཀྱི་དོན་ལ་བྱ་བའི་རྣལ་འབྱོར་པ་ལྟར་ཤ་ཐང་བར་ནི་འབད་དེ་ལམ་གཞན་དུ་ཚོལ་བ་ནི་བདག་ཉིད་ཆེན་པོ་མཐོང་དུ་མི་སྟེར་བས་དོན་མེད་པའི་བདུད་ཀྱི་ལས་འབད་པ་དོན་མེད་པ་ཁོ་ན་ཡིན་ནོ། །དེས་ན་ཆོས་ཉིད་རང་གི་ངོ་བོ་ཐ་སྙད་དང་བྲལ་བའི་དོན་དེ་ལ་ལམ་གཞན་དུ་ཚོལ་བའི་གཞུང་མི་མཐུན་པ་རྣམས་ཀྱིས་ཚིག་ཏུ་གང་བརྗོད་དེ་བདེན་རྫུན་ལ་རྩོད་པར་བྱེད་པ་ནི་དཔེར་ན་ནམ་མཁའ་དག་ལ་བགོ་བཤའ་བྱས་ཏེ་ཡོད་མེད་དུ་རྩོད་པར་བྱེད་པ་དང་འདྲ་ཞིང་མཚུངས་སོ། །དེའི་ཕྱིར་གཞན་ཡང་དཔེར་ན་ཚིག་ཏུ་སྨན་དང་དཔྱད་བཟང་པོ་བཀླག་སྟེ་བཤད་ཀྱང་སྨན་མ་བཏང་ན་ནད་པའི་ཚོགས་ལ་ཕན་པ་མེད་པས་མི་སྨན་ནོ། །དཔེ་དེ་ལྟར་དོན་གྱི་ངོ་བོ་རང་རིག་པ་དེ་ཁོ་ན་ཉིད་ལ་དེ་བཞིན་ཉིད་ལྟར་གནད་དུ་ཆུད་དེ་རྟོགས་པ་མངོན་དུ་མ་གྱུར་ན། ཚིག་ལམ་ཙམ་གྱི་ཐབས་ཇི་སྙེད་པ་མང་པོ་དེ་དག་བརྗོད་ཀྱང་དོན་གྱི་ཡིན་ལུགས་ཆོས་ཉིད་དེ་མཐོང་བར་འགྱུར་བ་མ་ཡིན་ནོ། །འོན་ཀྱང་དོན་རྟོགས་པ་ལ་གལ་ཆེ་བར་བསྐུལ་བ་ལས་ཇི་ལྟ་བ་བཞིན་སྟོན་པའི་ཚིག་བཀག་པ་ནི་མ་ཡིན་ནོ། །དེ་བས་ན་ལམ་གཞན་དུ་ཚོལ་བའང་དོན་མེད་པའི་ཕྱིར་གང་འདིར་རྣལ་འབྱོར་ཆེན་པོའི་གསང་བའི་ལུང་གི་དོན་ལམ་གྱི་སྒོར་ཞུགས་ནས་འཁོར་བའི་ལམ་གང་ཡིན་པ་སྤངས་ཏེ་མྱ་ངན་ལས་འདས་པའི་ལམ་མཆོག་གང་ཞིག་གཞན་ནས་ཚོལ་བ་ནི། དཔེར་ན་གཟུགས་སྤངས་ནས་ནི་གྲིབ་མ་ཚོལ་བ་དང་འདྲ་སྟེ་གཞན་གང་ལས་མི་རྙེད་པར་ངེས་སོ། །དེ་བས་ན་བྱང་ཆུབ་ཀྱི་སེམས་སྒོམ་པ་ལས། འཁོར་བའི་ལམ་གསུམ་སྤོངས་ཤིང་མྱ་ངན་འདས་ལམ་སྒོམ་བྱེད་པ་ཡང་བདུད་ཉིད་དོ། །དེ་ཉིད་རང་བཞིན་མ་ཞི་རང་བཞིན་རྩལ་སྤངས་གར་མི་གནས། །འཕགས་པ་ཀུན་གྱི་ཡུལ་དང་གནས་ཀྱང་འདས་སོགས་ལམ་འདི་གཞན་ན་མེད། །ལྡང་དང་མི་ལྡང་ཆེད་དུ་མི་སྤོང་སེམས་རྟེན་མི་འཆའ་མངོན་དུ་མིན། །འཇམ་དཔལ་མ་ཡིན་རྡུལ་ཙམ་གཡོ་བ་དེ་ཉིད་དེ་ཡིན་དེར་མི་གནས། །བསྒོམ་པའི་ས་མི་རྙེད་ཕྱིར་སྒོམས་པས་རྙེད་པར་མི་འགྱུར་ཏེ། །སེམས་ཀྱི་སྤྱོད་ཡུལ་ཤེས་པ་དེ་དག་ཆོས་རྣམས་ཀྱི་ནི་ཆོས་ཉིད་ཡིན། །རྣམ་བྲལ་གང་ལའང་མཆོག་དང་ཐ་མ་མེད་པར་ལམ་མཆོག་འདི་བསྒོམ་མོ། །ཞེས་གསུངས་སོ། །གསུམ་པ་ལ་བཞི་སྟེ། སེམས་ཉིད་གཉིས་མེད་དམ་པའི་ལམ་དུ་བསྟན་པ། སེམས་ཀྱི་དཀྱིིལ་འཁོར་རང་བཞིན་གྱིས་འོད་གསལ་བར་བཤད་པ། སེམས་ལ་དྲན་རྟོག་ཤར་ཡང་རང་བྱུང་རང་ཞིར་བསྟན་པ། ལམ་དེའི་ཡོན་ཏན་སངས་རྒྱས་འབྱུང་བའི་ངོ་བོར་བསྟན་པའོ། །དང་པོ་ནི། སེམས་ཉིད་དམ་པའི། ཞེས་པ་ནས། དེ་ལས་གཞན་མི་དམིགས། །ཞེས་པའི་བར་གྱིས་བསྟན་ཏེ། འོ་ན་གང་ནས་བཙལ་བར་བྱ་ཞེ་ན། གནས་ལུགས་ཇི་བཞིན་པ་ཆོས་སོ་ཅོག་གི་རྩ་བ་སེམས་ཉིད་རང་རིག་པ་ཆེན་པོ་ནི་ཐར་པ་དམ་པའི་ལམ་མཆོག་མ་ནོར་བ་ཉིད་ཡིན་པས་འཁོར་བའི་རྩ་བ་མ་རིག་པ་དང་རིག་པ་ཡེ་ཤེས་ཆེན་པོ་གཉིས་གསེར་དང་གཡའི་ཚུལ་ཙམ་ལས་ངོ་བོ་ཐ་དད་མིན་པར་དབྱེར་མེད་དུ་གནས་པའི་དོན་ལ་འཁོར་བ་དང་སངས་རྒྱས་ཀྱི་རིས་སུ་མི་འཛིན་ཏེ་བླང་དོར་མེད་པར་གཉིས་སུ་མི་རྟོག་པ་ཡི་ལམ་ཆེན་པོ་བགྲོད་དུ་མེད་པ་འདིར་རང་བཞིན་གཅིག་པ་ཡིན་པས་གཞན་དུ་མི་ཚོལ་ཏེ། ཀུན་འདུས་ལས། ལམ་ཉིད་ཇི་ལྟར་ཡིན་ཞེ་ན། །མ་རིག་ཡེ་ཤེས་ཐ་དད་མིན། །མ་རྟོགས་རྟོགས་པ་ལམ་དུ་གཅིག །སེམས་འདི་སྣ་ཚོགས་པར་སྣང་བས། །སྣ་ཚོགས་སེམས་སུ་གཅིག་པ་ཡིན། །ཞེས་སོ། །དེ་ཅིའི་ཕྱིར་ཏེ། འོ་ན་སྟོང་པ་ཕྱོགས་གཅིག་པ་ཞིག་གོ་ཞེ་ན། སེམས་རང་རིག་པ་དེ་ཉིད་འཁོར་འདས་སུ་འགྲོ་བའི་མཐོ་དམན་གྱི་ལམ་ཇི་སྙེད་པ་སྣ་ཚོགས་པར་སྣང་བས་རྟོགས་པ་དང་མ་རྟོགས་པའི་དབང་གིས་སྣ་ཚོགས་ཅིར་ཡང་འཆར་བ་ཉིད་སེམས་ཀྱི་ཆོས་ཉིད་མཉམ་པ་ཉིད་ཀྱི་ལམ་འདིར་དབྱེར་མེད་དུ་གཅིག་པ་ཡིན་པས་འཁོར་བའི་ལམ་མ་སྤངས་ལ་འདས་པ་བཙལ་དུ་མེད་པར་ཆོས་ཉིད་རང་རིག་རང་གྲོལ་དུ་རྟོགས་པ་དེ་ཉིད་མ་ནོར་བའི་ལམ་ཡིན་ནོ། །དེ་ཉིད་ཉེ་བར་མཚོན་ཚུལ། དཔེར་ན་གསེར་གྱི་རྒྱུ་གཅིག་ལས་སྐུ་དང་ཆོལ་ཟངས་ལ་སོགས་པ་དབྱིབས་དང་གཟུགས་ནི་ཐ་དད་པར་བྱས་ཏེ་སོ་སོར་སྣང་བས་སྣང་ཚུལ་དེ་དག་ལ་མིང་ཡང་དེ་དང་དེར་ཐ་དད་རེ་རེར་གྲགས་མོད། གང་ལྟར་གྲགས་ཀྱང་དོན་གསེར་གྱི་ངོ་བོར་གཅིག་པ་ལས་འགྱུར་བ་མེད་དོ། །དཔེ་དེ་ལྟར་ཆོས་ཐམས་ཅད་སེམས་ཉིད་བྱང་ཆུབ་ཀྱི་སེམས་སུ་རང་བཞིན་གཅིག་ཅིང་ངོ་བོ་རྣམ་ལས་དག་པ་ལ། འཇིག་རྟེན་པ་དང་འདས་པའི་ཐེག་པ་གོང་འོག་གིས་དོན་དེ་མཐོང་ཞིང་རྟོགས་པ་དང་མ་མཐོང་ཞིང་མ་རྟོགས་པའི་ཁྱད་པར་གྱིས་དོན་ཕྱོགས་མེད་ལ་ཇི་ལྟར་བལྟས་པ་ལྟར་སེམས་ཉིད་གང་ལྟར་བལྟས་རྒུ་དེ་ལྟར་སྣང་སྟེ། སྣ་ཚོགས་སུ་གསལ་ཞིང་སྣང་བ་ཡིན་ཡང་ངོ་བོ་སེམས་ཉིད་དེ་ཁོ་ན་ཉིད་མ་གཏོགས་དེ་ལས་གཞན་དུ་གྱུར་པ་ནི་གང་ཡང་མི་དམིགས་པས་སེམས་ཉིད་དུ་མ་འདུས་པའི་ཆོས་མེད་དོ། །གཉིས་པ་ནི། སྒྲོན་མ་འབར་བའི། ཞེས་པ་ནས། རང་བཞིན་ཡོང་གིས་གསལ། །ཞེས་པའི་བར་གྱིས་བསྟན་ཏེ། འོ་ན་སེམས་ཀྱི་རང་བཞིན་ཇི་ལྟ་བུ་ཞེ་ན། དཔེར་ན་སྣང་བྱེད་གསལ་བའི་སྒྲོན་མ་འོད་འབར་བ་དང་ལྡན་པའི་རིན་ཆེན་དམ་པ་ནི། ཇི་ལྟར་འདམ་གྱི་ངན་ཁུང་དུ་སྦས་པར་གྱུར་ན་ཡང་དེ་ཡི་རང་བཞིན་རང་གསལ་དུ་སྣང་བ་ཡིན་པས་འོད་ནི་ནམ་མཁའ་ལ་གསལ་བར་འགྱུར་རོ། །དཔེ་དེ་བཞིན་དུ་རིག་པ་བྱང་ཆུབ་ཀྱི་སེམས་ཉིད་ཡེ་ནས་རང་བཞིན་གྱིས་འོད་གསལ་བའི་རིན་ཆེན་མཆོག་གི་སྒྲོན་མ་དེ་ཉིད་ལུས་ངག་ཡིད་ཀྱི་བག་ཆགས་ངན་པའི་འདམ་དུ་བྱིང་སྟེ་བསྒྲིབས་པར་གྱུར་ན་ཡང་རང་རིག་པ་ཡེ་ཤེས་ཆེན་པོ་ལས་ཉམས་པ་མེད་དེ། ཇི་ལྟར་རྒྱུ་རྐྱེན་བྲལ་བར་རང་བྱུང་ཞིང་སྤྲོས་པ་མ་སྤངས་རང་སར་ཞི་སྟེ་རིལ་རིག་པ་ཉིད་དུ་ཤར་ཞིང་དེ་ཉིད་སྣ་ཚོགས་པར་མ་འགགས་ཏེ་རང་སྣང་བར་ནུས་པ་ཡིན་པས་ན་བློས་ཆེད་དུ་མ་བཅོས་པར་སེམས་ཀྱི་རང་བཞིན་ཡེ་ནས་འབྱེད་པ་མེད་པར་ཡོང་གིས་འོད་གསལ་བ་ནི་སུས་ཀྱང་མ་བྱས་པར་བྱུང་བའོ། །གསུམ་པ་ནི། སེམས་འདི་ནམ་མཁའ། ཞེས་པ་ནས། མ་ཡེངས་ཁོ་ནར་ཟད། །ཅེས་པའི་བར་གྱིས་བསྟན་ཏེ། དེ་ལྟ་བུའི་བྱང་ཆུབ་ཀྱི་སེམས་འདི་ནི་ནམ་མཁའ་ཇི་ལྟ་བུའི་རང་བཞིན་ཅན་ཏེ། ཇི་ལྟར་ན་ཀུན་ལ་ཁྱབ་པ་ངོ་བོ་སྟོང་པ་མཚན་ཉིད་གསལ་བ་ཆོས་ཇི་སྙེད་པ་སྣ་ཚོགས་ཆོ་འཕྲུལ་དུ་འབྱུང་བའི་གཞིར་གྱུར་པའི་ཕྱིར་རོ། །དེ་ལྟ་བུའི་བྱང་ཆུབ་ཀྱི་སེམས་དེ་བསྒོམ་པའི་དུས་སུ་སེམས་ཀྱི་བྱུང་ཚོར་དང་རྣམ་རྟོག་གི་རྒྱུ་འགྲུལ་གཡོ་ཞིང་སྐྱེ་བ་དང་སྔ་མ་འགག་པ་དང་གཉིས་ཆ་འགོག་པ་ཐམས་ཅད་ཀུན་ཀྱང་བྱང་ཆུབ་སེམས་ཀྱི་ངང་ལས་རང་བཞིན་གྱིས་འབྱུང་ཞིང་རང་སྣང་བ་དེཉིད་དུ་ངེས་པས་ཟིན་ཆགས་མེད་པའི་ཕྱིར་ངང་གིས་ཞི་བར་འགྱུར་རོ། །མདོར་ན་སེམས་ཉིད་རང་རིག་པ་ནི་ཇི་ལྟར་བརྟགས་ཤིང་བསམ་པ་ལྟར་དེ་ཁོ་ན་བཞིན་དུ་སྣང་བར་འགྱུར་བས་ཆོས་གང་ཅིར་ཡང་སྣང་དུ་བཏུབ་པའི་ཕྱིར་ཆོས་ཐམས་ཅད་ཀྱི་ངོ་བོར་བྱུང་བས་རང་རིག་པ་དངོས་གཞི་ཐམས་ཅད་པར་རང་སྣང་བ་ཉིད་དོ། །དེ་བས་ན་བློ་ཆེ་བས་སེམས་ཉིད་རྟོགས་ནས་ཡེ་མ་བཅོས་མ་བསླད་པའི་ངང་ལ་ཅིར་སྣང་ཅི་སྲིད་ཀྱང་དེ་ཉིད་ལས་གཡོ་བ་མེད་པའི་དབྱིངས་ཉིད་ལས་དྲན་པ་དང་རྣམ་རྟོག་སྣ་ཚོགས་ཀྱི་རྒྱུ་བ་ཇི་ལྟར་འབྱུང་བ་ཡང་མཚན་མར་མི་འཆར་བས་སྐྱོན་དུ་བྱ་བ་མེད་པར་ངང་སྐྱོང་ཞིང་གནས་ཏེ། ཅི་སྟེ་ན་དེ་རྣམས་སེམས་ཀྱི་ཆོ་འཕྲུལ་ཡིན་པས་རྟོག་རྒྱུན་ཅིར་ཡང་མི་འགག་པར་སྐྱེས་ཀྱང་ཆེད་དུ་མི་འགོག་པར་དེ་དག་སྐྱེས་པ་གང་ལའང་ཉམ་ང་བ་དང་བག་ཚ་བ་མེད་དེ། རིལ་དེ་ཁོ་ན་ཉིད་དུ་ཐག་ཆོད་པའི་ཕྱིར་རོ། །དེ་ལྟར་ཆོས་ཉིད་མ་བཅོས་པས་ཡེ་ཇི་བཞིན་པ་ལ་རང་རིག་པ་ཇི་བཞིན་པ་ཉིད་དུ་རང་སྣང་བས་ཡུལ་ལ་མི་དཔྱོད་ཡུལ་ཕས་མི་སྣང་སྟེ་ཆོས་ཉིད་དངོས་ནམ་མཁའ་ལྟ་བུ་ཉིད་དུ་རིག་པ་དངོས་ནམ་མཁའི་རང་བཞིན་ལྟར་རང་ཤར་བ་ལ་བློ་རང་གསལ་དུ་བཞག་ཅིང་དོན་ལས་མ་ཡེངས་ཏེ་མི་འཛིན་པ་ལ་བྲལ་བ་མེད་པ་ཙམ་ཉིད་ལ་བློ་བཞག་སྟེ་སྒོམ་པ་ཞེས་པའི་མིང་བཏགས་པ་ཁོ་ནར་ཟད་དོ། །བཞི་པ་ནི། དེ་ནི་ཚེགས་མེད། ཅེས་པ་ནས། འབྱུང་བའི་ངོ་བོ་ཡིན། །ཞེས་པའི་བར་གྱིས་བསྟན་ཏེ། དེ་ལྟ་བུར་གཅིག་ཆར་དུ་རྟོགས་པའི་ངང་ལ་མ་བཅོས་པར་བཞག་སྟེ་སྒོམ་པ་མ་ནོར་བ་ལ་གནས་པ་ནི་འབད་པའི་གྲོན་ཚེགས་ཀྱི་དཀའ་བ་བྱར་མེད་པར་དེ་ཉིད་དུ་ས་ནོན་པས་དོན་ཆེན་པོ་རྨད་དུ་བྱུང་བའི་ཆེ་བ་དང་ལྡན་པ་གྲུབ་པ་ཡིན་པས་རིམ་པར་མ་བགྲོད་པར་འབྲས་བུར་རང་སྣང་བ་དེ་ཉིད་ནི་དུས་གསུམ་དུ་གཤེགས་པའི་རྒྱལ་བ་ཐམས་ཅད་ཀྱི་རྣམ་གྲོལ་སངས་རྒྱས་འབྱུང་བའི་གནས་ཀྱི་ངོ་བོ་མ་ནོར་བ་རྒྱུ་ཡང་ཡིན་ལ་ལམ་ཆེན་པོ་ཉིད་དུའང་བསྟན་པ་ཡིན་ནོ། །བཞི་པ་ནི། དེ་ཡི་དོན་ལ། ཞེས་པ་ནས། ཉིད་པས་དམ་པ་ཡིན། །ཞེས་པའི་བར་གྱིས་བསྟན་ཏེ། །དེ་ལྟར་ཆོས་ཉིད་མཉམ་པ་ཉིད་རྟོགས་པ་དེ་ཡི་དོན་ལ་ཡུན་ཇི་སྙེད་པར་རིང་དུ་གནས་པས། ཇི་ལྟ་བ་ཉིད་མཐོང་ཞིང་རྟོགས་པ་དེ་ཉིད་ཀྱི་ཏིང་ངེ་འཛིན་དེར་གོམས་པར་བྱེད་པའི་ཚེ་ན། ཡང་དག་པའི་ལམ་རྙེད་དེ་དོན་ལམ་མ་ནོར་བ་ཉིད་མཐོང་ཞིང་རྟོགས་ནས་གོམས་པར་བྱས་པས་ཉམས་དྲོད་ཀྱི་རྟགས་ནི། དྲོད་ཆུང་ངུ་ནི་ས་བཞི་པར་ཡང་འབྱུང་ལ། དྲོད་ཆེན་པོ་རྣམས་སྐབས་བརྒྱད་པས་གཡོས་ནས་དགུ་པ་དང་བཅུ་པར་འབྱུང་བའང་ཐོབ་པ་དང་བརྟན་པའི་ཚུལ་ནི། རྒྱུ་ཆོས་ཉིད་ཀྱི་དོན་ལ་བློ་རེག་པའི་ཤུགས་ཀྱིས་ངེས་པར་འབྱུང་བ་ཡང་དང་པོ་ཁོ་ནར་དོན་མ་རྟོགས་པའི་འགྲོ་བ་གང་སེམས་ཉིད་ཀྱི་དོན་ངོས་ཟིན་པ་མ་ཡིན་པ་རྣམས་ལ་སྙིང་རྗེ་ཆེན་པོས་ངེས་པར་ཟིན་པའི་སེམས་འབྱུང་བ་ཉིད་པས་ཀུན་རྫོབ་ཀྱི་བྱང་ཆུབ་ཀྱི་སེམས་དམ་པ་འབྱུང་བར་འགྱུར་བ་དང་། དངོས་པོ་དང་མཚན་མར་རྟོག་པའི་ཆོས་རྣམས་ལ་ཡིད་མི་ཆེས་ཤིང་སྒྱུ་མ་ལྟ་བུར་མི་བདེན་པར་ངེས་པའི་ཤེས་རབ་ཀྱི་བློ་གྲོས་འབྱུང་ཞིང་སྐྱེ་བ་ཡིན་པ། ཆོས་ཐམས་ཅད་ཀུན་འདི་ལྟར་ཡེ་ནས་དེ་ཁོ་ན་ཉིད་ཡིན་པ་ལ་འགྲོ་བ་རྣམས་ཀྱིས་མ་རྟོགས་ནས་འཁྲུལ་པས་དེ་ལྟར་མི་ཤེས་ཏེ་ས་མཆོག་གཉིས་མེད་ཆེན་པོར་མ་མཐོང་བ་དེ་ངོ་མཚར་ཆེའོ་སྙམ་པ་དང་། ཇི་བཞིན་པའི་དོན་བརྟག་པར་དཀའ་བ་དེ་ཉིད་ལམ་པས་མ་འཁྲུལ་བར་ཡང་དག་པར་མཐོང་བ་དེ་ཡང་ངོ་མཚར་ཆེ་བ་འདི་ལྟ་བུ་ཞིག་སྙམས་ནས་ཡ་མཚན་པའི་འདུ་ཤེས་སྐྱེས་ཏེ། ཨེ་མའོ་ཇི་ག་སྙམ་དུ་འབྱུང་བ་དང་། དེ་ལྟར་དེ་ཁོ་ན་ཉིད་ཀྱི་དོན་མ་མཐོང་བའི་འགྲོ་བ་གང་སུ་དག་རྣམས་རྩོལ་སྒྲུབ་སྣ་ཚོགས་ཀྱིས་ཤ་ཐང་བར་འབད་དེ་དཀའ་བའི་ཚེགས་ཆེན་པོའི་ཐབས་ཀྱིས། བྱང་ཆུབ་དམ་པའི་ལམ་གཞན་ནས་ཚོལ་མི་དགོས་པ་ལ་རྩོལ་བས་གཞན་ནས་ཚོལ་བ་དེ་ཉིད་ལམ་ཐག་རེ་རིང་ངོ་སྙམ་པ་དང་། དེ་ལྟ་བུ་ལ་འབད་ཀྱང་བརྒྱུད་པའི་རྒྱུ་ཙམ་དུ་འགྱུར་བས། དེ་ཡི་དོན་གནས་སྐབས་ཀྱི་འབྲས་བུ་མཐོ་རིས་ཙམ་འགྲུབ་ཅིང་འབྱུང་བ་དེ་ཡོད་མོད་ཀྱང་། ཡང་དག་པའི་ལམ་ཆེན་པོ་དེ་ཡི་དོན་འདི་དངོས་སུ་རྙེད་ཅིང་རྟོགས་པར་ནི་ཡོང་ཡེ་འབྱུང་བར་མི་འགྱུར་རོ་སྙམ་པ་དང་། བདེ་བར་གཤེགས་པ་རྒྱལ་བ་རྫོགས་པའི་སངས་རྒྱས་དམ་པ་རྣམས་ཀྱི་ལམ་མ་ནོར་བ་རྣལ་མ་ཉིད་རྙེད་ཅིང་ཐོབ་པའི་རྣལ་འབྱོར་པ་ནི། བདེར་གཤེགས་དམ་པ་ཉིད་དང་མཉམ་པ་ཡིན་པས་ལམ་དམ་པ་ལ་གནས་པ་ཡིན་པར་ངེས་པའོ། །དེ་དག་ནི་དོན་མཐོང་བའི་དྲོད་ཀྱི་ཕྱིར་ལྔ་པ་དང་དྲུག་པར་ཟག་མེད་སྐྱེ་བ་ལ་སྦྱོར་བ་དང་དངོས་སུ་སྐྱེ་བའི་རིགས་སོ། །ལྔ་པ་ནི། དེ་ནི་རྟེན་བརྙན། ཞེས་པ་ནས། དེ་འདྲ་དེ་མི་མཚུངས། །ཞེས་པའི་བར་གྱིས་བསྟན་ཏེ། ལམ་དེའི་ཡོན་ཏན་ཡང་། དེ་ལྟ་བུའི་རྟོགས་པའི་དྲོད་ཆེན་པོ་དང་ལྡན་པའི་རྣལ་འབྱོར་མཆོག་དེ་ནི། རྟེན་དུ་གྱུར་པའི་སྐུའི་གཟུགས་བརྙན་དང་དྲོད་དེ་བྲལ་བ་རྣམས་ཡོན་ཏན་གྱི་ཁྱད་པར་འདྲ་ཞིང་མཚུངས་པ་མ་ཡིན་པའོ། །དེ་བས་ན་གཞི་ལ་དབྱེར་མེད་ཡིན་ཀྱང་རྟེན་གྱི་ཁྱད་པར་ལས་བསོད་ནམས་ཀྱི་ཡུལ་ཡིན་ཀྱང་ཡེ་ཤེས་ཀྱི་ཡུལ་མ་ཡིན་པ་དང་། བརྒྱུད་པའི་རྒྱུ་ཡིན་ཀྱང་། དངོས་ཀྱི་རྒྱུ་མ་ཡིན་པ་དང་། རིག་པའི་ངོ་བོ་ཡིན་ཀྱང་རྟོགས་པས་མ་ཁྱབ་པས། མི་མཚུངས་པའི་གཏན་ཚིགས་བཀོད་པ་སྟེ། ཉན་ཐོས་ཟག་མེད་ཞི་བའི་ལུས་ཅན་དང་རང་རྒྱལ་རྟེན་འབྲེལ་མཐར་འགོག་གི་ཆོས་ཉིད་མཐོང་བ་གཉིས་ཀྱིས་ཀྱང་བསྒྲུན་དུ་མེད་པས་མཚུངས་པ་མིན་ཏེ། ལང་ཀར་གཤེགས་པ་ལས། ཇི་ལྟར་ཤིང་དག་རྒྱ་མཚོ་ལ། །རླབས་རྣམས་ཀྱིས་ནི་རྣམ་པར་གཡེངས། །དེ་བཞིན་ཉན་ཐོས་རྨོངས་པ་ཡང་། །མཚན་ཉིད་རྣམས་ཀྱིས་རབ་ཏུ་གཡེངས། །ཀུན་ནས་ལྡང་དང་བྲལ་མོད་ཀྱི། །ཉོན་མོངས་བག་ཆགས་རྣམས་དང་འབྲེལ། །ཏིང་འཛིན་མྱོས་པས་རབ་མྱོས་ཏེ། །ཟག་པ་མེད་པའི་དབྱིངས་ན་འཁོད། །མཐའ་མར་ཕྱིན་པ་དེ་ལ་མེད། །ཕྱིར་ཡང་དེ་ལས་མི་ལྡོག་སྟེ། །ཏིང་ངེ་འཛིན་གྱི་ལུས་ཐོབ་ནས། །བསྐལ་པའི་བར་དུ་དེ་མི་སང་། །ཇི་ལྟར་སྐྱེས་བུ་ར་རོ་བ། །ཆང་དང་བྲལ་ནས་སངས་འགྱུར་བཞིན། །དེ་ན་དེ་དག་ང་ཡི་ཡང་། །ཆོས་ཀྱི་སྐུ་ནི་ཐོབ་པར་འགྱུར། །ཞེས་དང་། འབྲས་བུའི་ཀློང་ནས། རྐྱེན་རྟོགས་གཟུང་ཡུལ་མ་གྲུབ་པར། །འཛིན་པས་ཤེས་འདོད་དེ་ཇི་བཞིན། །ཞེས་གསུངས་པ་ལྟ་བུའི་ཕྱིར་དང་། །རྒྱུའི་བྱང་ཆུབ་སེམས་དཔའ་སློབ་པའི་ས་བཅུ་ལ་གནས་པ་དག་དང་ཡང་རྣལ་མ་རྟོགས་པ་དེ་ཉིད་མི་མཚུངས་ཏེ། སྔགས་ཀྱི་མཉམ་པ་ཉིད་མ་མཐོང་བ་དང་། ལམ་རིང་བ་དང་། བདེན་པ་རིས་མོས་པ་དང་། གཞན་དོན་ལ་ངར་འཛིན་ཡོད་པའི་ཕྱིར་དང་། ཐེག་པ་ཆེན་པོའི་རྣལ་འབྱོར་གསང་སྔགས་ཕྱི་པའི་རིག་འཛིན་བྱང་ཆུབ་སེམས་དཔའ་དོན་ལ་རྟོག་ཅིང་དཔྱོད་པའི་མཐའ་ཅན་ནམ། ཀུན་མཁྱེན་དམ་པ་རིན་པོ་ཆེས། རྣལ་འབྱོར་ཡོ་ག་དང་། སེམས་དཔའ་ཨུ་པ་དང་། རྟོག་མཐའ་ཀྲི་ཡར་གསུངས་པས། དེ་དག་དང་། གང་ལུས་ཀྱི་ཆ་བྱད་དང་ཤེས་བྱ་ཙམ་མཚུངས་ཡང་རྟོགས་པ་དང་ཏིང་ངེ་འཛིན་དེ་འདྲ་བ་མིན་པས་ཡོན་ཏན་དེ་དང་མི་མཚུངས་པ་ཉིད་དེ་སྔགས་ཕྱི་པ་འདི་དག་གསང་སྔགས་ཡིན་ཀྱང་ནང་པ་བླ་མེད་ལ་མི་སླེབ་པའི་ཕྱིར་ཏེ། ཆེད་འཛིན་དང་བཅས་པ་དང་། རང་སྣང་མཉམ་པ་ཉིད་མ་མཐོང་བས་སོ། །འོ་ན་དེ་དག་ཅིའི་ཕྱིར་ཞེ་ན། ཡེ་ཤེས་ལྔ་དང་ལྡན་པའི་ཕྱིར་དང་། ཐེག་པ་ཆེན་པོའི་དྲོད་རྟགས་མཆོག་དང་ལྡན་པའི་ཕྱིར་དང་། བདེན་པ་རེས་མོས་པ་མེད་པའི་ཕྱིར་དང་། ཐེག་ཆེན་གསང་བའི་དོན་ཉིད་ལའང་འཛིན་རྟོག་དམིགས་པ་དང་བྲལ་བའི་ཕྱིར་རོ། །དྲུག་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི། དེས་ན་རྣམ་དག །ཅེས་པ་ནས། ཐམས་ཅད་གྲུབ་པ་ཡིན། །ཞེས་པའི་བར་གྱིས་བསྟན་ཏེ། དེས་ན་ཡོན་ཏན་གྱི་ངོ་བོ་དེ་ལྟ་བུའི་ཚུལ་གྱིས་ཐེག་པ་མཆོག་གི་རྣམ་པར་དག་པའི་ལམ་ཆེན་པོའི་ངོ་བོ་ནི། དཔེར་ན་ལུས་ཀྱི་གསང་མིག་གིས་གཟུགས་མཐོང་གི་དེ་ལས་གཞན་གྱིས་མིན་པ་ལྟར་འདིར་རང་རིག་པ་བྱང་ཆུབ་སེམས་ཀྱི་གསང་བ་རྟོགས་པར་དཀའ་བ་འདི་ཉིད་རྟོགས་པ་ཁོ་ནས་སངས་རྒྱས་པ་ཡིན་གྱི། གཞན་གང་གིས་ཀྱང་མ་ཡིན་པའི་ཕྱིར་གྱི་གཏན་ཚིགས་དེ་བས་ན་རྒྱལ་བ་རྫོགས་པའི་སངས་རྒྱས་ཀྱི་དགོངས་པ་ཀུན་ནས་འདུས་པ་ཡི་རྩ་བ་གསང་མཆོག་སྔགས་ཀྱི་རང་བཞིན་སེམས་ཉིད་ཇི་ལྟར་ཡིན་པའི་ལམ་འདི་ཤེས་ཤིང་རྟོགས་པར་བྱས་པས་འབྲས་བུ་རང་གསལ་ལྷུན་གྲུབ་ཏུ་འབྱུང་བ་ལ་དགོངས་པ་ཡིན་གྱི། འདི་ལས་གཞན་དུ་འབད་པས་བཙལ་བར་བྱ་བའི་རྒྱུ་མེད་ལ་བཙལ་ཡང་མི་དགོས་པ་ཉིད་དེ། སེམས་ཉིད་དེ་ཁོ་ན་ཉིད་ཀྱི་ལམ་དག་པ་འདི་ཉིད་མ་ནོར་བར་མཐོང་ཞིང་རྟོགས་པ་དེ་ཉིད་ཀྱིས་གཞན་དུ་དཀའ་བས་བཙལ་བའི་ཚེགས་ཆེན་པོས་རྩོལ་བ་གང་ཡང་མེད་པར་མཆོག་དང་ཐུན་མོང་གི་དངོས་གྲུབ་ཐམས་ཅད་དང་ཇི་ལྟ་དང་ཇི་སྙེད་མཁྱེན་པའི་ཡེ་ཤེས་ཐམས་ཅད་ངང་གིས་གྲུབ་ཟིན་ཏེ་ལམ་དང་འབྲས་བུའི་ཡོན་ཏན་མ་ལུས་པ་ཀུན་མཐར་ཕྱིན་པར་གྱུར་པ་ཡིན་པས་དབྱེར་མེད་མཉམ་པ་ཆེན་པོའི་རྟོགས་པ་ཡོངས་སུ་རྫོགས་པའོ། །གཉིས་པ་ལ་བཅུ་སྟེ། གནས་རྫོགས་པ། གཞལ་ཡས་རྫོགས་པ། ཚོགས་རྫོགས་པ། ཡོ་བྱད་རྫོགས་པ། སྒོམ་ལམ་རྫོགས་པ། དམ་ཚིག་རྫོགས་པ། མཉམ་པ་ཉིད་རྫོགས་པ། བརྟུལ་ཞུགས་རྫོགས་པ། དངོས་གྲུབ་རྫོགས་པ། མཐོང་ལམ་རྫོགས་པར་བཤད་པའོ། །དང་པོ་ནི། སེམས་ཀྱི་གསང་བ། ཞེས་པ་ནས། ཀུན་ནས་འདུས་པས་གསུངས། །ཞེས་པའི་བར་གྱིས་བསྟན་ཏེ། དེ་བས་ན་རྟོགས་པར་དཀའ་བའི་སེམས་ཀྱི་གསང་བ་རང་བཞིན་གྱིས་འོད་གསལ་བའི་དོན་མཆོག་གང་ཡིན་པ་དེ་ཉིད་སྐྱེས་བུ་སུ་ཡིས་ཡང་དག་པར་རྟོགས་པའི་ངང་ལ་གནས་ཏེ་བློ་ལ་འཆང་བ་དེ་ནི་གཉིས་སུ་མེད་པའི་བདེན་པ་སྒྲོ་སྐུར་དང་བྲལ་བས་དོན་དམ་པའི་ལྟ་བ་མཆོག་ཉིད་མངོན་དུ་བྱས་པ་སྟེ། དེ་ཉིད་མཐའ་ཐམས་ཅད་ལས་རིང་དུ་གྱུར་པའི་ཕྱིར་དགོན་པ་ཆེན་པོའི་གནས་མཆོག་དམ་པ་ཉིད་དུ་གྱུར་པར་རྒྱལ་བ་རྣམས་ཀྱི་དགོངས་པ་ཀུན་ནས་འདུས་པའི་སྟོན་པས་ཀྱང་རིག་པ་འཛིན་པའི་འཁོར་ལ་བཀའ་སྩལ་ཏེ་གསུངས་པར་མཛད་དོ། །གཉིས་པ་ནི། དེ་ཉིད་དཔག་མེད། ཅེས་པ་ནས། ནང་དུ་གྱུར་པ་ཡིན། །ཞེས་པའི་བར་གྱིས་བསྟན་ཏེ། དེས་ན་གཉིས་བྲལ་གྱི་ལྟ་བ་ཐམས་ཅད་ཀྱི་དངོས་གཞིར་གྱུར་པས་བྱ་བརྩལ་མེད་ལ་གནས་ཚུལ་གྱི་ཆ་ནས་འཁོར་འདས་ལམ་གསུམ་གྱི་གནས་སུ་གྱུར་པའི་བྱང་ཆུབ་ཀྱི་སེམས་དེ་ཉིད་བློ་ཡིས་དཔག་ཏུ་མེད་ཅིང་རྟོགས་པར་དཀའ་བ་ཡིན་པས། དེ་ལྟར་མ་ནོར་བར་མཐོང་བ་དེ་བཞིན་གཤེགས་པ་རྣམས་ཀྱི་ཡང་བཞུགས་པའི་གཞལ་ཡས་དམ་པ་མཆོག་ཁྱད་པར་ཅན་ཡོན་ཏན་ཅིར་ཡང་འཆར་བས་རྨད་དུ་བྱུང་བའི་རིན་ཆེན་མཆོག་གི་ཡིད་བཞིན་གྱི་ཁང་པ་ཡིན་པས། དེའི་ངོ་བོ་འཕྲལ་དུ་བྱེད་པ་པོའམ་རྒྱུ་རྐྱེན་གྱིས་མ་བྱས་ཤིང་མ་སྒྲུབས་པར་ཡེ་ནས་རང་བྱུང་བའི་ཡེ་ཤེས་ཉིད་ལ་སྤྱོད་ཡུལ་མ་དམིགས་པས་ཕྱི་དང་ནང་མེད་དེ་ཡེ་ཤེས་ཀྱིས་མ་ཁྱབ་པ་མེད་པས་ཀུན་ཏུ་ཡང་ནང་དུ་གྱུར་པ་ཡིན་ནོ། །དེ་བས་ན་གནས་གཞན་དུ་བཙལ་མི་དགོས་སོ། །གསུམ་པ་ནི། གང་འདིར་གང་འདུས། ཞེས་པ་ནས། རྒྱལ་བ་དགྱེས་པའི་མཆོག །ཅེས་པའི་བར་གྱིས་བསྟན་ཏེ། རྣལ་འབྱོར་པ་གང་ཐེག་པ་ཆེན་པོར་ངེས་པའི་སྒོ་འདིར་རྫས་དང་ཡོ་བྱད་ལྡན་པའི་ལྷ་མི་མང་པོ་གང་འདུས་པ་ནི་མཆོག་ཏུ་ངེས་པའི་ཚོགས་ཆེན་པོ་མ་ཡིན་ཏེ། རང་གི་རིག་པའི་ཆོས་ཉིད་དེ་ཁོ་ན་ཉིད་ལ་ཆོས་ཐམས་ཅད་དང་འདོད་པའི་ཡོན་ཏན་ལྔ་ཡང་མ་བཙལ་ལྷུན་གྱིས་རྫོགས་པའི་ངང་དུ་རྟོགས་པ་དེ་ཉིད་ཚོགས་ཆེན་ཡོངས་སུ་འདུས་པའི་མཆོག་ཉིད་ཡིན་པས། འཁོར་འདས་ལམ་གསུམ་གྱི་ཆོས་སོ་ཅོག་ཀུན་རང་རིག་པར་འོང་བསྡུས་མེད་པར་མ་འདྲེས་ཡོངས་རྫོགས་ཆེན་པོར་རྟོགས་པས་ཐ་སྙད་གཉིས་པ་རིལ་འབྱུང་འཇུག་དང་བྲལ་བ་མེད་པར་དེ་ཁོ་ན་ཉིད་ཕྱི་མོའི་མཆོད་པར་གནས་སུ་སྟོབས་པ་ཉིད་དོ། །དེ་ལྟ་བུ་ནི་དཔག་ཏུ་མེད་པའི་རྒྱལ་བ་ཐམས་ཅད་མཉེས་ཤིང་དགྱེས་པའི་དབྱེར་མེད་རྣམ་དག་གི་མཆོད་པ་མཆོག་དམ་པ་ཡིན་ནོ། །བཞི་པ་ནི། གང་འདིར་འདོད་སྤྱོད། ཅེས་པ་ནས། ཀུན་གྱི་རྩ་བ་ཡིན། །ཞེས་པའི་བར་གྱིས་བསྟན་ཏེ། ལམ་ཆེན་པོའི་སྐབས་གང་འདིར་གཟུགས་སྒྲ་དྲི་རོ་རེག་བྱ་ལ་སོགས་པ་འདོད་པའི་ཡོན་ཏན་ལྔར་ལོངས་སྤྱོད་པ་ནི་ཡོ་བྱད་ཆེན་པོ་མིན་ཏེ། ཀུན་རྫོབ་ཀྱི་འབྱོར་པ་ཡིན་པས་སོ། །དེ་བས་ན་སེམས་ཀྱི་དེ་ཁོ་ན་ཉིད་མཉམ་པ་ཆེན་པོ་མ་ནོར་བར་རྟོགས་ནས་གཉིས་མེད་དུ་འབྱོར་བ་ནི་ཡང་དག་དོན་གྱི་ཡོ་བྱད་ཆེན་པོ་མཆོག་ཏུ་གྱུར་པ་སྟེ། དེ་ཅིའི་ཕྱིར་ཞེན། དེ་ནི་རིལ་གྱི་རྒྱུ་ཆེན་པོའི་ཕྱིར་ཏེ། དམན་པ་དག་ལ་མེད་པས་ལྷག་པའི་ཡོ་བྱད་དམ་པ་ཅིར་ཡང་འཆར་ཞིང་དགའ་བ་སྐྱེད་པ་འདི་ཉིད་ཤེས་ན། བྱང་ཆུབ་ཀྱི་སེམས་འབྲས་བུའི་ཆོས་ཀྱི་ཡོ་བྱད་ཀུན་གྱི་རྩ་བ་འཁོར་འདས་ཀྱི་ཡོན་ཏན་ཐམས་ཅད་འབྱུང་བའི་གཞི་ཆེན་པོ་ཡིན་ནོ། །ལྔ་པ་ནི། སྒོམ་པར་བྱེད་པ། ཞེས་པ་ནས། དམ་པ་འདི་ཉིད་དོ། །ཞེས་པའི་བར་གྱིས་བསྟན་ཏེ། ཆོས་ཉིད་ཇི་བཞིན་པའི་རྗེས་སུ་བློ་འབྲངས་ནས་ཆེད་དུ་སྒོམ་སྟེ་མངོན་དུ་ཅི་འགྱུར་བར་བྱེད་པ་ནི་ཡང་དག་པའི་བསྒོམ་པ་མིན་པར་འདིར་ཆོས་ཉིད་བྱ་བ་བསམ་བྱ་བློའི་ཡུལ་སྣང་དང་ཡུལ་ཅན་ཤེས་པ་དབྱེར་མེད་པར་རྟོགས་པ་ལ་ཆོས་ཉིད་དུའང་འདུ་ཤེས་ཀྱིས་དམིགས་སུ་མེད་པ་ནི་སྒོམ་པའི་མཆོག་སྟེ། དེ་ནི་དུས་གསུམ་གྱི་བདེ་བར་གཤེགས་པ་དམ་པ་རྣམས་ཀྱི་གཤེགས་ཤུལ་རྟོགས་པར་དཀའ་བའི་གསང་ལམ་མ་ནོར་བ་ཡིན་པས་དེ་ལྟར་རྟོགས་ན་འདི་ལྟར་སྒོམ་ཤེས་ན་བསྒོམ་པའི་ལམ་ཇི་སྙེད་པ་རྣམས་ཀྱི་ཕུལ་དམ་པ་རིམ་པར་བགྲོད་པ་ལས་འདས་ཏེ་དམིགས་རྩོལ་གྱིས་གཡོ་བ་དང་བྲལ་བའི་ངང་ལས་ལོགས་སུ་མེད་པ་འདི་ཉིད་དོན་གྱི་དགོངས་པ་འཁྲུལ་པ་དང་བྲལ་བ་ཉིད་དོ། །དྲུག་པ་ནི། བསྲུང་ཞེས་སྲུང་བར། ཞེས་པ་ནས། གསང་བ་དམ་པའོ། །ཞེས་པའི་བར་གྱིས་བསྟན་ཏེ། འདིར་བསྲུང་མཚམས་མེད་པར་རྟོགས་པ་ལ་རྩ་བ་དང་ཡན་ལག་གི་དམ་ཚིག་བསྲུང་ངོ་ཞེས་ཆེད་དུ་སྲུང་བར་བྱ་བ་ཅི་ཡང་མི་དམིགས་པའི་དོན་ལ་ཉམས་པའང་མེད་དེ་སྟོང་ཉིད་ཆེན་པོ་མཐའ་གཉིས་མ་གྲུབ་པའི་ངང་ལ་བསྲུང་རྒྱུ་མེད་ཅིང་ཡོན་ཏན་ཅིར་ཡང་འབྱུང་བའི་ཟབ་དོན་རེག་པར་དཀའ་བས་གསང་བ་དམ་པ་ནི། ལམ་མ་ནོར་བ་སྟེ་འདི་ལྟར་སེམས་ཀྱི་ཆོས་ཉིད་རྩོལ་བྲལ་རིག་པའི་དམ་ཚིག་གོ། །དེའི་དོན་ལ་སོ་སོར་རྟོག་པའི་ཤེས་རབ་ཀྱིས་དབུས་མཐར་ཕྱེ་ནས་བརྟགས་པས་མཐའ་དབུས་དང་ཕྱོགས་རིས་ཀྱི་ཐ་སྙད་བསྲེགས་ནས་མཉམ་པའི་དམ་ཚིག་གི་དོན་མ་ནོར་བ་ཤེས་ཤིང་རྟོགས་ན་དམ་ཚིག་ཇི་སྙེད་པ་ཀུན་སྲུངས་པའི་གསང་བ་དམ་པ་ཁོ་ནའོ། །བདུན་པ་ནི། ཚིག་ལམ་མཉམ་བརྗོད། ཅེས་པ་ནས། ཀུན་ནས་འདུས་དང་མཉམ། །ཞེས་པའི་བར་གྱིས་བསྟན་ཏེ། དོན་ཆེན་པོ་རྟོགས་པའི་གདེངས་མེད་ན། ཚིག་གི་ལམ་དུ་མཉམ་པ་ཉིད་ཡིན་ནོ་ཞེས་བརྗོད་དེ་སྨྲས་ཀྱང་། དེ་ལ་མཉམ་པའི་དོན་གང་ཡང་མི་དམིགས་པས་མཉམ་དོན་མེད་དོ། །དེ་ཅིའི་ཕྱིར་ཞེ་ན། གསང་སྔགས་གསང་བ་དམ་པའི་ངོ་བོ་འདིར་ཐམས་ཅད་མ་འདྲེས་ཡོངས་རྫོགས་སུ་གཅིག་པ་ལ། དེ་ལས་གཞན་དུ་མཉམ་པའི་དོན་ཞེས་བརྗོད་དེ་མཆོག་ཏུ་ལྷག་པ་ཞིག་བཟང་པོར་བལྟ་རྒྱུ་ག་ལ་ཡོད་དེ་མེད་པས་ན། འདི་ལྟར་རྟོགས་ན་རིལ་རྒྱལ་བའི་ཐུགས་དང་མཉམ་པར་སངས་རྒྱས་ཀྱི་དགོངས་པ་ཀུན་ནས་འདུས་པའི་ཞེ་ཕུགས་འདིའི་དོན་ཉིད་དང་མཉམ་པ་ཡིན་པ་ལ་བླང་དོར་མ་དམིགས་པའི་ཕྱིར་རོ། །བརྒྱད་པ་ནི། གང་གཞན་བརྟུལ་ཞུགས། ཞེས་པ་ནས། མཆོག་ཏུ་ཀུན་འདུས་གསུངས། །ཞེས་པའི་བར་གྱིས་བསྟན་ཏེ། ལུང་ཆེན་གསང་བའི་རྣལ་འབྱོར་ཆེན་པོ་བླ་ན་མེད་པ་མཆོག་གི་སྐབས་འདིར། གང་ཐེག་པ་གཞན་དག་གི་བརྟུལ་ཞུགས་སྨེ་ཤ་ལ་སོགས་པ་སྤྱོད་པ་ནི་འདིའི་སྤྱོད་པ་ཆེན་པོ་དམ་པ་ཉིད་མིན་ནོ། །དེས་ན་འདི་ཉིད་ཀྱི་སྤྱོད་པ་ནི། ཆོས་ཉིད་ཇི་བཞིན་པ་དེ་ལ་དེར་རྟོགས་པའི་རིག་པ་གཉིས་མེད་དུ་གཞོལ་ཏེ་དབྱིངས་རིག་དབྱེར་མེད་ཀྱི་ངང་ལ་གནས་པས་ཆོས་ཉིད་ལ་སེམས་ཉིད་རོལ་པའི་སྤྱོད་པ་ནི་འཁོར་འདས་ཀྱི་ཆོས་སོ་ཅོག་ཐམས་ཅད་ཆོས་ཉིད་དེའི་ངང་འདིར་བཅོམ་པས་བརྟུལ་ཞིང་སྤྱོད་པ་ཕྱོགས་མེད་ཀྱི་དོན་འདིར་བཅུགས་ཏེ་ཞུགས་པས་བླང་དོར་གཉིས་སུ་མེད་པར་མ་བརྩལ་དོན་ཀུན་གྲུབ་པར་བྱས་པ་ལ་སྤྱོད་པ་མི་འགོག་སྤྱད་པ་མེད་པ་ཉིད་ནི་བརྟུལ་ཞུགས་བླ་ན་མེད་ཅིང་མཆོག་ཏུ་གྱུར་བ་ཡིན་པར་བདེ་བར་གཤེགས་པ་ཀུན་ནས་འདུས་པ་རྣམས་ཀྱིས་ཀྱང་གསུངས་ཏེ་བཀའ་སྩལ་པའོ། །དགུ་པ་ནི། ལམ་འདི་དངོས་ཉིད། ཅེས་པ་ནས། དམ་པ་ཀུན་འདུས་གསུངས། །ཞེས་པའི་བར་གྱིས་བསྟན་ཏེ། ཤིན་ཏུ་རྣལ་འབྱོར་གྱི་ལམ་མཆོག་འདི་ཡི་སྐབས་འདིར་དངོས་གྲུབ་ཀྱི་དམ་པ་དེ་ཁོ་ན་ཉིད་ཀུན་གཞི་བྱང་ཆུབ་སེམས་ཀྱི་ངེས་གསང་བརྗོད་པ་དང་བྲལ་བ་ཉིད་ཡིན་པའི་ཕྱིར་གཞན་ནས་མི་གཉེར་ཏེ། འབྲས་བུའི་སྙིང་པོར་ཡེ་ནས་གྲུབ་ཟིན་དུ་གནས་པ་ལ་བྱ་བ་བྱས་ཟིན་པས་ད་གཟོད་ལྷ་ལ་རེ་རྩོལ་གྱིས་གསོལ་བ་གདབ་ཅིང་དངོས་གྲུབ་གཞན་ནས་ཐོབ་པར་བྱ་བ་མེད་དོ། །དེ་ལྟ་བུ་ལ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དངོས་གྲུབ་རྒྱུན་མི་འཆད་ཅིང་བར་ཆད་མེད་པ་ཞེས་བྱ་བར་དགོངས་པ་དམ་པ་ཀུན་ནས་འདུས་པའི་རྒྱལ་བ་རྣམས་ཀྱིས་གསུངས་ཏེ་བཀའ་སྩལ་པའོ། །བཅུ་པ་ནི། དེ་ལྟར་སེམས་ཀྱི། ཞེས་པ་ནས། སྣང་བ་ལམ་མཐོང་ཡིན། །ཞེས་པའི་བར་གྱིས་བསྟན་ཏེ། དེ་ལྟར་བཤད་པ་བཞིན་སེམས་ཀྱི་དེ་བཞིན་ཉིད་གསང་སྔགས་ཀྱི་དོན་ཇི་ལྟ་བར་མཐོང་ཞིང་རྟོགས་ན་སྔོན་ཆད་མ་མཐོང་བའི་ཆོས་ཉིད་དོན་གྱི་ལམ་ཆེན་པོ་ཡང་དག་པར་མཐོང་ཞིང་རྟོགས་པ་ཡིན་པས་དེ་ལ་ནི་དངོས་པོའི་ངོ་བོ་འདི་འདྲར་མཐོང་ཞིང་ཤེས་པར་བྱ་བ་ཅི་ཡང་མེད་པ་ཉིད་དེ། དེ་ཉིད་ལམ་པ་གང་སུ་ཞིག་གི་རིག་པ་ལ་གསལ་བར་སྣང་སྟེ་མངོན་སུམ་དུ་ཤར་བ་ནི་ལམ་མཆོག་བདེ་བ་ཆེན་པོ་མཐོང་བ་ཡིན་ཏེ། དབུགས་ཆེན་འབྱིན་པའི་རྣལ་འབྱོར་པ་ཐོག་མཐར་ལས་ཀྱང་ཐ་མ་ཆེན་པོ་པ་མཐོང་ལམ་ཡོངས་སུ་རྫོགས་པ་ཉིད་དེ། ཀུན་འདུས་ལས། དེ་ལྟ་བུ་ཡི་དོན་མཐོང་ན། །མཚན་མར་མཐོང་བ་ཅི་ཡང་མེད། །སྒྱུ་མ་ཙམ་དུ་ཚུལ་ཤེས་ན། །ནམ་མཁའ་མཉམ་པའི་དོན་སྣང་འགྱུར། །ཁ་ཅིག་དག་ནི་དེ་དོན་ལ། །མཐོང་བ་ཅི་ཡང་མེད་གྱུར་ན། །སྣང་བ་ཞེས་ནི་ཅི་ཕྱིར་གདགས། །མེད་པའི་དོན་དང་འགལ་འགྱུར་ཞེས། །ཐེ་ཚོམ་ཟ་འགྱུར་དེ་དག་ལ། །མཐོང་བ་མེད་པའི་དོན་དེ་ཉིད། །ཡིད་ཀྱི་ངོ་ལ་སྣང་འགྱུར་ན། །སྣང་ཞེས་དེ་ཕྱིར་བརྗོད་པར་བྱ། །ཞེས་གསུངས་པ་སོགས་འདི་དག་ཐམས་ཅད་གསལ་བར་བསྟན་ནོ། །གསུམ་པ་ནི། གྲོགས་པོ་དག །ཅེས་པ་ནས། བགྲོས་པའོ། །ཞེས་པའི་བར་གྱིས་བསྟན་ཏེ། །གྲོགས་པོ་དག་ཇི་ལྟར་བཤད་པ་དེ་དག་ནི། དེ་བཞིན་གཤེགས་པ་དམ་པ་རྣམས་ཀྱི་རྗེས་སུ་འཇུག་པའི་ལམ་དམ་པ་རང་གི་ངོ་བོ་ཞེས་བྱ་བ། འོག་མིན་ཆེན་པོར་འདི་སྐད་དུ་ཐོས་པའི་དགོངས་པ་ཡོངས་སུ་བགྲོས་པ་ཡིན་པར་ཤེས་པར་བྱའོ། །ཞེས་གསང་བདག་ཆེན་པོས་དམ་པའི་རིགས་ཅན་ལ་བཀའ་སྩལ་ཏོ། །ལེའུའི་མཚན་ནི། སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། སྐལ་བ་དང་ལྡན་པའི་རྣལ་འབྱོར་པ་རྣམས་རྒྱལ་བའི་ཤུལ་ལམ་གྱི་རྗེས་སུ་འཇུག་པའི་ལྟ་བ་དང་ཏིང་ངེ་འཛིན་མཆོག་གི་དོན་གྱི་ཁྱད་པར་བསྟན་པའི་ལེའུ་སྟེ། ལྔ་བཅུ་རྩ་དགུ་པ་ཉིད་གསལ་བར་བཤད་པའོ།། །།ལྔ་པ་སྒྲོན་མ་སྲེལ་བར་བྱ་བ་ལ་དོན་གསུམ་སྟེ། སྤྱིར་བསྟན་པ། བྱེ་བྲག་ཏུ་བཤད་པ། ཞབས་བསྡུ་བའོ། །དང་པོ་ནི། དེ་ནས་ཡང་། ཞེས་པ་ནས། མི་ཤེས་པའི་གཞི་མེད་དོ། །ཞེས་པའི་བར་གྱིས་བསྟན་ཏེ། ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །རྗེས་འཇུག་བཀའ་སྩལ་མ་ཐག་པ་དེ་ནས་ཡང་འཁོར་ལང་ཀའི་མངའ་བདག་ལ་སོགས་པ། གྲོགས་ཀྱི་སེམས་དཔའ་དམ་པ་རྣམས་ཀྱིས་སྟོན་པ་གསང་བ་པའི་བདག་པོ་ལ་ཡོངས་སུ་དྲི་བ་དྲིས་པ། ཀྱེ་གསང་བ་པའི་བདག་པོ། ཉིད་ཀྱིས་ལེའུ་ཞེ་ལྔ་པ་འདིར་ཆོས་ཀྱི་རྣམ་གྲངས་བཅུ་བཀོད་པ་ལས་ལྔ་པ་རིན་པོ་ཆེ་འབར་བའི་སྒྲོན་མ་བསྲེལ་བར་བྱའོ། །ཞེས་དམ་བཅའ་བར་དགོངས་པ་དེ་ཉིད་ཇི་ལྟར་ཡོངས་སུ་ཤེས་པར་བགྱི། ཞེས་དེ་སྐད་ཅེས་དྲི་བ་ཡོངས་སུ་དྲིས་པ་ལས། སྟོན་མཆོག་འཆད་པའི་སྐྱེས་བུ་གསང་བ་པའི་བདག་པོས་ལན་སྨྲས་ཏེ་གསུངས་པ། ཀྱེ་གྲོགས་པོ་དག །ཅེས་བོས་ནས། རིན་པོ་ཆེ་འབར་བ་ནི་འོད་ཀྱི་འབྱུང་གནས་ལགས་ཏེ། འོད་དེ་ཉིད་འཐོར་རླུང་གི་ཚོགས་ཀྱིས་ཀྱང་མི་སོད་པས། དེའི་བྱེད་ལས་ནི་མུན་པ་སེལ་བར་བྱེད་པ་ཁོ་ན་ཡིན་པས་དེའི་ཕྱིར་ངེས་པའི་ཚིག་གིས་མཚོན་ཏེ་སྒྲོན་མ་ཞེས་བྱ་བར་གྲུབ་པའོ། །དེས་ན་དཔེ་དེ་ལྟར་དོན་ཀྱང་རྗེས་སུ་སྦྱར་ཏེ་དཔེ་དོན་མཚུངས་པའི་ངོ་བོར་བལྟའོ། །དེ་ལྟར་ངེས་ཚིག་དང་ལྡན་པ་དེའི་རང་གི་ངོ་བོ་བསྟན་པ་ཇི་ལྟ་བུ་ཞེ་ན། དེ་ནི་འདི་ལྟར་མ་རིག་པའམ་མི་ཤེས་པའི་རྨོངས་པ་སེལ་བའི་རང་རིག་པའི་ཤེས་རབ་ཆེན་པོ་ཡེ་ཤེས་རང་གསལ་བ་ཉིད་ཡིན་ཏེ། དེ་ཉེ་བར་མཚོན་པ་ནི་དཔེར་ན་ཉི་མའི་སྙིང་པོའམ་རིན་པོ་ཆེའི་སྒྲོན་མ་འོད་འབར་བ་ལ་མུན་པའི་གཞི་ངང་གིས་མེད་པ་བཞིན་དུ་གང་ཡང་དག་པའི་ཤེས་རབ་ཆེན་པོ་རིག་པ་གསལ་བའི་རང་བཞིན་དེ་ལ་ཡང་མི་ཤེས་པའི་མ་རིག་པ་ནི་གཞི་ཡང་མེད་པས་འཁྲུལ་པ་མིང་མེད་ཆེན་པོར་བསྟན་པ་ཡིན་ཏེ། གསང་བདག་དགའ་རབ་དཔའ་བོས་དབང་གི་ཀློང་ལས། དེ་ཉིད་དེ་ཡི་རང་བཞིན་ཏེ། །དེ་རིག་དེ་སྣང་དེ་ཁོ་ན། །ཉི་མའམ་རིན་ཆེན་འབར་བ་བཞིན། །འོད་དང་ངོ་བོ་དེ་ཉིད་ལས། །ཡུལ་དང་གཞན་གྱིས་བྱས་པ་མིན། །ཞེས་གསུངས་པ་ལྟར་རང་གསལ་རྣམ་དག་ཆེན་པོ་ཡིན་ཡང་གསལ་རྐྱང་རང་རྒྱུད་པ་མིན་པར་རིས་མེད་ལྷུན་རྫོགས་ཆེན་པོ་ཉིད་དོ། །དེ་ལྟར་གསལ་བར་སྟོན་པ་ནི་ངེས་པ་དོན་གྱི་ལུང་ཆེན་མཐར་ཐུག་པ་ཡིན་ནོ། །གཉིས་པ་ལ་གཉིས་ཏེ། མདོར་བསྟན་པ། རྒྱས་པ་བཤད་པའོ། །དང་པོ་ནི། དེ་ཡང་འདི་ལྟར། ཞེས་པ་ནས། ཉིད་ཀྱི་ཤེས་པའོ། །ཞེས་པའི་བར་གྱིས་བསྟན་ཏེ། དེ་བས་ན་ཡང་དག་པའི་ཤེས་རབ་མེད་པ་ལས་ལྟ་བ་ཐ་དད་དུ་བྱུང་བར་བསྟན་པའི་ཕྱིར། དེ་ཡང་འདི་ལྟར་སྤྲུལ་པའི་སྐུ་མཆོག་སྒྲོན་མ་དམ་པ་ཐུབ་པའི་དབང་པོ་མྱ་ངན་ལས་འདས་ནས་ཡང་དག་པའི་ཤེས་རབ་གསལ་བ་ཆེན་པོ་དེ་ཉིད་མ་གོ་བའི་དབང་གིས་རང་རིག་པའི་ཉི་མ་ནུབ་པར་གྱུར་པའི་དུས་སུ་སྣང་བ་ན། ཆོས་རྣམས་ཀུན་གྱི་དེ་བཞིན་ཉིད་གསང་བའི་དབྱིངས་གཅིག་གི་ངོ་བོར་དབྱེར་མེད་པའི་དེ་ཁོ་ན་ཉིད་ཀྱི་ངང་ལ་མཉམ་པར་གནས་ཀྱང་། ཆོས་ཉིད་དེ་རིག་པ་དང་མ་རིག་པའི་ཁྱད་པར་གྱིས་ལྟ་བའི་མཐོ་དམན་དང་བཟང་ངན་མི་འདྲ་བའི་རྣམ་པར་གྱུར་ཏེ་ཐ་དད་དུ་འབྱུང་ཞིང་སྣང་བར་གྱུར་པའི་ཚུལ་ཉེ་བར་བསྟན་པ་ནི་འདི་ལྟ་སྟེ། མུན་པའི་ས་པ་སོ་སོའི་སྐྱེ་བོའི་ཤེས་པ་དང་། ཡ་མཚན་ཅན་མུ་སྟེགས་བྱེད་ཀྱི་ཤེས་པ་དང་། བྱིས་པ་ཉན་རང་རྣམས་ཀྱི་ཤེས་པ་དང་། ཕྱོགས་སུ་རིག་པ་སེམས་ཙམ་པའི་ཤེས་པ་དང་། མཐའ་དབུས་འབྱེད་པ་དབུ་མ་པའི་ཤེས་པ་དང་། ངེས་པ་དམ་པ་གསང་སྔགས་ཉིད་ཀྱི་ཤེས་པའོ། །གཉིས་པ་ལ་དྲུག་སྟེ། མུན་པའི་ཤེས་པ་བསྟན་པ། ལོག་སྲེད་ཅན་གྱི་ཤེས་པ་བཤད་པ། བྱིས་པའི་ཤེས་པ་བསྟན་པ། ཕྱོགས་སུ་རིག་པའི་ཤེས་པ་བཤད་པ། མཐའ་དབུས་འབྱེད་པའི་ཤེས་པ་བསྟན་པ། དམ་པ་ཆེན་པོའི་ཤེས་པ་བཤད་པའོ། །དང་པོ་ནི། ཀྱེ་གྲོགས་པོ། ཞེས་པ་ནས། ལོག་པར་ཤེས་པའོ། །ཞེས་པའི་བར་གྱིས་བསྟན་ཏེ། དེ་དག་སོ་སོ་ནས་བསྟན་པའི་ཕྱིར། ཀྱེ་གྲོགས་པོ་དག །ཅེས་བོས་ནས། དང་པོ་གང་མུན་པའི་ཤེས་པ་ཉེ་བར་སྟོན་པ་ནི། གང་གཉིས་སུ་མེད་པའི་དེ་ཁོ་ན་ཉིད་འདི་ལ་བརྟགས་ཞེན་གྱིས་བདག་གཞན་དུ་བཟུང་བ་ལས་གཟུང་འཛིན་གྱི་རྣམ་པར་ཕྱིན་ཅི་ལོག་པར་མཐོང་བ་སྐྱེ་བོ་པ་རྣམས་ཀྱི་ཤེས་པའོ། །གཉིས་པ་ནི། ལོག་སྲེད། ཅེས་པ་ནས། གཉིས་སུ་འདོད་པའོ། །ཞེས་པའི་བར་གྱིས་བསྟན་ཏེ། གང་ལོག་པར་ལྟ་བ་ལ་ཆགས་སྲེད་ཅན་རྣམས་ཀྱི་ཤེས་པ་ནི། ལྟ་གཞུང་མི་མཐུན་པ་སུམ་བརྒྱ་དྲུག་ཅུ་ལ་སོགས་པ་ཐ་དད་དུ་སྨྲ་ཞིང་། རྩ་བ་རྟག་པ་དང་ཆད་པ་གཉིས་སུ་འདོད་པ་མུ་སྟེགས་བྱེད་ཀྱི་ཤེས་པའོ། །གསུམ་པ་ནི། བྱིས་པ། ཞེས་པ་ནས། ཆུང་བས་དེ་ལས་མིན། །ཞེས་པའི་བར་གྱིས་བསྟན་ཏེ། གང་བྱིས་པ་རྣམས་ཀྱི་ལྟ་བ་ནི་ཉེ་བར་བསྟན་པ་འདི་ལྟ་སྟེ། མུ་སྟེགས་ཀྱི་ཆོས་རྣམས་སམ་སྣང་བ་རགས་པ་གང་ཡིན་པ་དང་གང་ཟག་གི་བདག་མེད་པར་སྨྲ་ཞིང་ཕྱི་གཟུང་བའི་ཡུལ་ཐམས་ཅད་རྡུལ་ཕྲ་རབ་ཀྱི་ཆོས་ཙམ་དང་ནང་འཛིན་པའི་ཤེས་པ་སྐད་ཅིག་ཙམ་རྫས་སུ་ཡོད་པར་འདོད་པའོ། །དེ་ཡི་ཚུལ་རྒྱས་པར་བསྙད་པ་ཡང་འདི་ལྟར། དང་པོ་གཟུགས་ཀྱི་མཐའ་རྡུལ་ཕྲ་རབ་དང་། རྡུལ་ཕྲན་དང་། ལྕགས་རྡུལ་ལ་སོགས་པར་བརྩིས་ནས་དཔག་ཚད་ཀྱི་བར་དང་། དེ་ལས་སའི་དཀྱིལ་འཁོར་ཆེན་པོ་ལ་སོགས་པར་སྣང་བ་ཡང་རྡུལ་གྱི་ངོ་བོར་འདོད་པ་དང་། དུས་ཀྱི་ཚད་ཀྱང་དུས་ཀྱི་མཐའ་སྐད་ཅིག་མ་དང་། དེ་ཉིད་བརྒྱ་དང་ཉི་ཤུ་ལ་དེ་ཡི་སྐད་ཅིག་ལ་སོགས་པ་ནས་ཡར་བརྩིས་པས་ཉིན་ཞག་དང་ཟླ་བ་དང་ལོ་དང་བསྐལ་པ་ཆེན་པོའི་ཡུན་དུ་བརྩིས་པ་དང་། མིང་གི་མཐའ་ཡི་གེ་སིལ་བུ་ནས་མིང་ཚིག་ལ་སོགས་པ་ཐ་སྙད་སྣ་ཚོགས་པར་གྱུར་ཏེ་སྐར་མ་དང་ཉི་ཟླ་དང་རི་བོ་མཆོག་རབ་ནས་འཁོར་ཡུག་གི་བར་དང་འགྲོ་བ་ལུས་ཅན་རྣམས་ཀྱི་ལུས་བོང་ཆེ་ཆུང་དང་ཁྲུ་ལ་སོགས་ནས་དཔག་ཚད་སོགས་ཀྱི་བར་དུ་ཚད་སྣ་ཚོགས་པར་བརྩི་བ་དང་། སེམས་ཅན་དེ་དག་གི་སེམས་སམ་ཤེས་པ་སྐྱེ་བ་སྐད་ཅིག་མའི་ཡུན་དང་། གྲངས་དང་། ཚེ་ཚད་ལ་སོགས་པ་དང་ལོངས་སྤྱོད་ཆེ་ཆུང་གི་ཚུལ་སོགས་སོ་སོའི་ཚད་ཀྱི་རྣམ་པར་བཞག་པ་དང་། འགྲོ་བའི་སྣང་ཚུལ་དང་སྣོད་ཀྱི་དུས་བཞི་གནས་པ་དང་། འཇིག་པ་དང་། ནུབ་སྟེ་སྟོངས་པ་དང་། ཆགས་པ་ལ་སོགས་པའི་མཚན་ཉིད་ལས་ཐ་དད་ཀྱི་བྱེ་བྲག་གི་རྣམ་གྲངས་སྣ་ཚོགས་སུ་ཕྱེ་བས་ཐམས་ཅད་དུ་ཡང་མི་རྟག་པ་ལ་སོགས་པར་ཡང་མཐོང་སྟེ། རྡུལ་དང་སྐད་ཅིག་མར་བཤིགས་ནས་དོན་དམ་དུ་རགས་པར་གྲུབ་པ་མེད་པར་སྨྲ་ཞིང་ཤེས་ཡུལ་སྐད་ཅིག་མ་དང་། རྡུལ་ཙམ་ཡོད་དོ་ཅེས་སུ་འདོད་པ་སྟེ། རང་ཉིད་མྱ་ངན་ལས་འདས་པ་ལ་མོས་པ་དང་ཤེས་རབ་ཆུང་བས་འཁོར་བ་ལས་ངེས་པར་འབྱུང་བའི་འཇུག་ཐབས་དེ་ཙམ་ལས་མ་གཏོགས་པར་ལྷག་པའི་ལྟ་བ་ཡོད་པ་མིན་ནོ། །བཞི་པ་ནི། གང་འདིར་རྣལ་འབྱོར། ཞེས་པ་ནས། ཆོས་སྐུ་རྟག་པར་འདོད། །ཅེས་པའི་བར་གྱིས་བསྟན་ཏེ། སྐབས་གང་འདིར་རྣམ་པར་རིག་པ་དང་རྣལ་འབྱོར་སྤྱོད་པའི་ཀུན་རྫོབ་པ་དོན་གྱི་ཕྱོགས་ཙམ་ཤེས་ཤིང་རིག་པ་དག་གི་སྤྱིའི་གཞུང་ནི། ཡུལ་དུ་སྣང་བ་འདི་ཀུན་ཕྱི་དོན་དུ་གྲུབ་པ་མེད་པར་གང་སེམས་ཀྱི་བར་ཆགས་ལས་འདི་ལྟར་སྣང་བ་ཁོ་ན་ཡིན་པས་སེམས་སུ་ངེས་པར་གཟུང་བའི་བྱ་སྟེ། ཕྱི་རོལ་ཡུལ་གྱི་དངོས་པོ་ལོགས་སུ་མ་གྲུབ་པས་གཟུང་འཛིན་རང་རྒྱུད་པ་མེད་དེ། དཔེར་ན་མིག་ཤེས་རབ་རིབ་དང་ཚ་བའི་རིམས་ཀྱིས་བསྐྱོད་པ་ལྟར་ཀུན་གཞི་རྣམ་པར་ཤེས་པ་འཁྲུལ་པ་ཉིད་གཟུང་ཆ་དང་འཛིན་ཆའི་ཡུལ་སེམས་གཉིས་ཀྱི་རྣམ་པ་ཉིད་དུ་སྣང་བ་ཡིན་པས་ཤེས་པའི་ངོ་བོར་འདོད་དེ། དཀར་དམར་གྱི་རྣམ་པ་རྣམས་ཤེས་པའི་ཆོས་སུ་བདེན་པར་སྨྲ་བ་རྣམ་བདེན་པའམ་རྣམ་བཅས་པའི་གཞུང་ངོ་། །དེ་ལྟ་བུའི་སེམས་དེ་ཉིད་གཉིས་མེད་ཀྱི་རང་རིག་ཤེལ་དག་པ་ལྟ་བུར་སུས་ཀྱང་མ་བཅོས་མ་བྱས་པར་དོན་དམ་པར་དེ་བཞིན་ཉིད་དུ་ཡོད་པར་འདོད་པས། དཀར་དམར་གྱི་རྣམ་པ་འདི་དག་ཤེས་པའི་ཆོས་སུ་ཡང་མི་བདེན། ཕྱི་རོལ་གྱི་དོན་དུའང་མི་བདེན་པར་རྫུན་པ་དངོས་མེད་ཀྱི་སྣང་བར་སྨྲ་བ་རྣམ་རྫུན་པའམ་རྣམ་མེད་པའི་གཞུང་སྟེ། འདི་ཡིས་གཞན་དབང་གི་ཤེས་པ་སྐད་ཅིག་མ་དོན་དམ་དུ་འདོད་པས། རྣམ་རིག་ཙམ་ཞིག་རྟག་ཏུ་རྣམ་པར་སྣང་སྟེ་ཆོས་ཀྱི་སྐུ་ཡང་རྒྱུན་གྱི་རྟག་པར་འདོད་པ་ཡིན་ནོ། །ལྔ་པ་ལ་གསུམ་སྟེ། གཞུང་ཕྱི་མོའི་དབུ་མ། རྣལ་འབྱོར་སྤྱོད་པའི་དབུ་མ། མདོ་སྡེ་སྤྱོད་པའི་དབུ་མའོ། །དང་པོ་ནི། ངེས་པར་འབྱེད་པའི། ཞེས་པ་ནས། དབྱེ་བ་མེད་པའོ། །ཞེས་པའི་བར་གྱིས་བསྟན་ཏེ། མཐའ་དབུས་ངེས་པར་འབྱེད་དེ་མཐའ་གཉིས་ལས་ངེས་པར་འབྱུང་བར་བྱེད་པའི་རྣལ་འབྱོར་པ་གཞུང་ཕྱི་མོའི་དབུ་མ་རབ་ཏུ་མི་གནས་པ་ལ་ལ་དག་གི་འདོད་པ་ནི། དངོས་པོ་ཡུལ་སེམས་ཀྱི་སྣང་བ་འདི་དག་སོ་སོ་ཡི་རྣམ་པ་གང་དང་གང་དག་ཏུ་སྣང་ཡང་རྟེན་ཅིང་འབྲེལ་བར་འབྱུང་བ་སྒྱུ་མའི་མཚན་ཉིད་ཙམ་དང་ཤིང་རྟ་བཞིན་དུ་རྒྱུ་རྐྱེན་འདུས་བདོ་བ་ཙམ་ཞིག་སྣང་བས་ཀུན་རྫོབ་ཏུ་མཐུན་པར་སྣང་བའི་བྱ་བ་དང་དོན་བྱེད་ནུས་པ་ཡིན་ནོ། །དེ་ལའང་ཡང་དག་པའི་ཀུན་རྫོབ་དང་ལོག་པའི་ཀུན་རྫོབ་ཀྱི་མཚན་ཉིད་དང་ངེས་ཚིག་ཇི་ལྟར་འཇིག་རྟེན་ན་གྲགས་པ་ལྟར་བར་ཆ་དབྱེ་བས་ཐ་སྙད་དུའང་རང་གི་མཚན་ཉིད་དུ་གྲུབ་པར་མི་བཞེད་དེ། དེས་ན་ཡུལ་དུ་གསལ་བར་འདོད་པའི་མདོ་སྡེ་སྤྱོད་པ་དང་། སེམས་སུ་གསལ་བར་འདོད་པའི་རྣལ་འབྱོར་སྤྱོད་པའི་ཀུན་རྫོབ་གང་ན་གང་དུ་འདོད་པའང་བློ་གཉིས་སྣང་གི་སྤྱོད་ཡུལ་ཙམ་སྟེ་ངེས་པར་དོན་དམ་དུ་ཀུན་རྫོབ་སྒྱུ་མ་ཉིད་ཀྱང་མེད་དེ་མ་སྐྱེས་པའི་ཆོས་ཉིད་དུ་གཅིག་པས་བདེན་པ་གཉིས་སུ་དབྱེ་བ་མེད་པར་སྤྲོས་བྲལ་མཉམ་ཉིད་ཆེན་པོ་བློའི་སྤྱོད་ཡུལ་ལས་འདས་པའོ། །ཞེས་བཞེད་དེ། དེའང་སྤྲོས་པ་དང་སྤྲོས་མེད་ཀྱི་དབྱེ་བ་དང་། མཚན་ཉིད་དང་ངེས་ཚིག་གི་རྣམ་པར་བསྙད་ནས་ཆོས་ཉིད་རྟོགས་པར་བྱེད་པའོ། །གཉིས་པ་ནི། ལ་ལ་དེ་ལྟར། ཞེས་པ་ནས། ཉིད་དུ་མེད་པའོ། །ཞེས་པའི་བར་གྱིས་བསྟན་ཏེ། ལ་ལ་རྣལ་འབྱོར་སྤྱོད་པའི་དབུ་མ་པ་དག་གི་ལུགས་ཀྱིས་དོན་དམ་མཐར་ཐུག་ཏུ་དེ་ལྟར་མ་སྐྱེས་པ་དེ་ཁོ་ནར་ངེས་ཀྱང་། ཀུན་རྫོབ་ཏུ་སེམས་སྣང་བ་ཡིན་ཏེ། སེམས་འཁྲུལ་པ་སྒྱུ་མ་ལྟ་བུའི་རང་བཞིན་དུ་སྣང་བ་དེ་ལས་མ་གཏོགས་པར་ཡུལ་སྒྱུ་མ་དེ་ཉིད་ལོགས་ཤིག་ན་ཡོད་ཅིང་འོང་བ་མིན་པས་རྣམ་རིག་པའི་དོན་དམ་དང་མཐུན་པའོ། །དོན་དམ་པར་ནི། སེམས་སྐད་ཅིག་མའི་སྣང་བ་དེ་ཉིད་ཀྱང་རྡོ་རྗེ་གཟེགས་མ་ལ་སོགས་པའི་གཏན་ཚིགས་ཀྱིས་གཞལ་བ་དེས་ནི་སེམས་ཙམ་གྱི་དངོས་པོར་ཡང་གྲུབ་པ་མེད་པའི་ཕྱིར་ན། དམ་པ་ཉིད་དུ་ངོ་བོ་སྟོང་པ་ཉིད་ཡིན་པས་དངོས་པོའི་རང་བཞིན་ཅིར་ཡང་གྲུབ་པ་མེད་པར་འདོད་པའོ། །གསུམ་པ་ནི། ལ་ལ་གང་མ། ཞེས་པ་ནས། པ་ལྟར་ཡོད་མ་ཡིན། །ཞེས་པའི་བར་གྱིས་བསྟན་ཏེ། ལ་ལ་མདོ་སྡེ་སྤྱོད་པའི་དབུ་མ་པ་དག་གིས་དངོས་པོ་ཀུན་རྫོབ་སྒྱུ་མ་ཙམ་ཞིག་སྣང་བ་ནི། གང་མ་ཟིན་པ་ཡིན་པའི་ཕྱིར་སེམས་ཀྱི་གཟུང་ཆ་སྣང་བ་མ་ཡིན་ཏེ། སེམས་འཁྲུལ་པ་དེ་ཉིད་ཡུལ་དུ་སྣང་བར་ནི་གང་ན་རུང་སྟེ་མི་རུང་ངོ་། །དེ་བས་ན་ཀུན་རྫོབ་ཏུ་རྡུལ་ཕྲ་རབ་ཀྱི་ས་པ་དེ་ནི་ཕྱི་རོལ་གྱི་དོན་དུ་ཡོད་པ་ཡིན་པས་འདི་ལས་བརྩམས་ཏེ་ཡུལ་གྱི་རྣམ་པ་ཀུན་སྣ་ཚོགས་སུ་བཀྲ་བར་ཉན་ཐོས་དང་དགྲ་བཅོམ་པ་ཀྱང་མཁྱེན་པ་ཉིད་པས་དེ་ལྟར་སྣང་བ་ཡིན་ཀྱང་། དོན་དམ་པར་ནི། ཀུན་རྫོབ་ཀྱི་རྡུལ་ཕྲ་རབ་ཀྱི་རྣམ་པ་ཉིད་ཀྱང་ཕྱོགས་ཆས་རྣམ་པར་དབྱེ་བས་མ་གྲུབ་པས་ན་ཀུན་རྫོབ་སླུ་བ་དང་འདྲིད་པ་ཅན་གྱི་ཆོས་ལྟར་དུ་ཡོད་པ་མ་ཡིན་པས་གཉིས་སུ་མེད་པར་འདོད་དེ་སྟོང་པ་ཉིད་དོ། །དེ་བས་ན་བློ་གྲོས་མི་ཟད་པས་བསྟན་པའི་མདོ་ལས། བློ་གྲོས་ཆེན་པོ་རྡུལ་ཕྲ་རབ་ཀྱིས་གཞིག་ན་བ་ལང་གི་རྭ་ལ་དངོས་པོར་མི་འདུག་གོ། །ཞེས་པའི་དོན་ཏོ། །དྲུག་པ་ལ་གཉིས་ཏེ། སྤྱིར་བསྟན་པ། བྱེ་བྲག་ཏུ་བཤད་པའོ། །དང་པོ་ནི། དམ་པ་ཉིད་ཀྱི། ཞེས་པ་ནས། མི་རྟོག་ཚིག་མི་བརྗོད། །ཅེས་པའི་བར་གྱིས་བསྟན་ཏེ། གསང་སྔགས་དམ་པ་བླ་ན་མེད་པ་ཉིད་ཀྱི་ལྟ་བ་དམ་པ་མཆོག་ཏུ་གྱུར་པ་གང་གི་བཞེད་པ་ནི། ཆོས་སོ་ཅོག་ཡེ་ཇི་བཞིན་པའི་ཆོས་ཉིད་དུ་ཡེ་གདོད་མ་ནས་སངས་རྒྱས་པ་ཡིན་པ་ལ་གདགས་བརྗོད་ཐམས་ཅད་དང་བྲལ་ཞིང་དེ་ཉིད་ཀྱང་མངོན་དུ་བྱ་ཞིང་དོན་དུ་གཉེར་བ་དང་བྲལ་བའོ། །འོ་ན་ཚིག་ཏུ་བཏགས་པ་ལ་དགོས་པ་མེད་དོ་བར་དོགས་པ་ལ། དེ་ལྟ་བུའི་དོན་རྟོགས་པ་མིན་པར་གདེངས་མ་ཆུད་པ་དག་གི་གཉིས་སུ་འཛིན་ལྟ་བ་ངན་པ་ཟློག་ནས་དོན་མ་ནོར་བ་ལ་གཟུད་པའི་ཕྱིར་དུ་ཡེ་ནས་གཉིས་སུ་མེད་པར་སངས་རྒྱས་པ་ཡིན་ནོ། །ཞེས་དེ་སྐད་ཅེས་བརྗོད་པ་ཡང་ཐ་སྙད་ཙམ་དུ་བཏགས་ཏེ་བརྗོད་པར་ཟད་ཀྱི། དོན་གྱི་ངོ་བོ་ཉིད་ལ་ཡེ་གདོད་ནས་བཀོད་པ་ཚིག་གི་ལམ་གྱི་ཐ་སྙད་ཡོད་མེད་གཉིས་ཀྱི་བརྗོད་པ་དང་བྲལ་བའི་ཐིག་ལེ་ཆེན་པོ་ཆོས་ཀྱི་སྐུར་གསལ་བ་ལ། བདེན་པ་གཉིས་སུ་ཡོད་ཅེས་སྒྲོ་འདོགས་པ་དང་མེད་ཅེས་སྐུར་པ་གདབ་པའི་ཚིག་གི་ཐ་སྙད་དོན་ལ་མི་གདགས་ཏེ་ཚིག་བརྗོད་ཀྱིས་བཙལ་བའི་འོས་མིན་པས་གཏན་ཚིགས་ཀྱིས་གཙེ་བས་དོན་གྱི་བཞག་ས་ཚོལ་བའི་ཚིག་རྣམས་ཀྱིས་བདེན་པ་གཉིས་ཀྱི་བརྗོད་པའི་ཐ་སྙད་སོ་སོའི་ཚིག་ལམ་ལས་འདས་ཏེ་གདགས་པ་དང་བྲལ་བའོ། །དེ་ལྟ་བུ་ལ་ནི་བདེན་པ་གཉིས་ཡོད་དོ། །ཞེས་པ་དང་། མེད་དོ་ཞེས་པའི་ཐ་སྙད་གདགས་སུ་མེད་དེ་བརྗོད་པས་མི་ཕེབས་པས་གདགས་པ་ལས་གྲོལ་བ་ཁོ་ནའོ། །དེ་བས་ན་མཉམ་པ་ཆེན་པོ་ལ་བདེན་པ་གཉིས་སུ་རྩོད་པ་ནི་དོན་མི་མཐོང་བའི་ནད་ཡིན་པའི་ཕྱིར་རོ། །དེའང་དཔེར་ན་ནམ་མཁའ་འདི་ནི་ཡོད་པའམ་མེད་པ་ཉིད་དོ་ཅེས་བླུན་པོ་མི་མཁས་པ་རྣམས་ནི་ཕྱོགས་སུ་བཟུང་ནས་རྩོད་པར་འགྱུར་གྱི། ནམ་མཁའི་མཚན་ཉིད་ལ་མཁས་པ་རྣམས་ནི་དེ་ལྟར་མིན་པས་རྩོད་པ་དང་བྲལ་ཏེ། གང་དེ་ལྟར་རྩོད་པ་ལ་ཇི་ག་སྙམ་ནས་ངོ་མཚར་ཆེར་སྐྱེ་བར་བྱེད་དེ་མཐུན་པའི་དཔེ་ལས་དོན་གྱི་དཔེར་བླངས་པའོ། །དཔེ་དེ་བཞིན་དུ། ཆོས་ཉིད་དེ་བཞིན་ཉིད་འདི་མཐའ་ཡོད་པ་དང་མེད་པ་ཉིད་ཅེས་བདེན་པ་རིས་སུ་ཕྱེ་ནས་གསང་སྔགས་པ་ཤེད་མ་བྱེ་བའི་བྱིས་པ་ཉན་རང་དབུ་སེམས་རྣམས་ནི་རྩོད་པར་འགྱུར་རོ། །ཐེག་པ་ཆེན་པོ་གསང་སྔགས་ཀྱི་དོན་རྟོགས་པའི་སྐྱེས་བུ་གང་དག་ཡེ་གཉིས་སུ་མེད་པའི་ངང་ལ་དེ་ཉིད་དུའང་མི་རྟོག་པ་ནི་དེ་ལྟར་མིན་ཏེ་རྩོད་པའི་ཐ་སྙད་དང་བྲལ་བའོ། །དེ་བས་ན་དེ་བཞིན་ཉིད་ལ་མཐར་བཟུང་ནས་རྩོད་པ་ནི་ཤེས་རབ་འཆལ་བར་ངེས་པ་ཁོ་ནར་ཟད་དོ། །དེ་ཅིའི་ཕྱིར་ཞེ་ན། འདི་ལྟར་འཁྲུལ་པའི་ངོ་ལ་སྣང་བའི་སྣོད་བཅུད་ལ་སོགས་པའི་ཆོས་ཐམས་ཅད་ཀུན་ཡེ་ནས་གཉིས་སུ་མེད་པའམ་ལྷུན་གྱིས་གྲུབ་པའི་ངང་གིས་སངས་རྒྱས་པ་ཡིན་པའི་དོན་གྱིས་ཡོད་མེད་རྟག་ཆད་སྣང་སྟོང་ལས་གྲོལ་བའི་ཆོས་སྐུ་ཆེན་པོ་ཉིད་དུ་གནས་པ་ལ། བྱིས་པས་འཕྲུལ་དུ་བརྩལ་ཏེ་སྔར་དངོས་པོ་ལ་སངས་རྒྱས་པའི་དོན་མཆོག་དམ་པ་མིན་པ་ཞིག་ལས་ཡིན་པར་སྒྲུབས་པས་སངས་རྒྱས་པར་གྱུར་པ་མ་ཡིན་པའི་ཕྱིར་ཏེ། ཆོས་རྣམས་ཀྱི་མཉམ་པ་ཉིད་ནི་ངོ་བོ་ཉིད་ཀྱིས་རྟོགས་རུང་མ་རྟོགས་རུང་ཡེ་ནས་དེ་བཞིན་ཉིད་ཆེན་པོ་ལས། འཕྲལ་དུ་རྨོངས་པ་དག་གིས་ཡེ་ནས་སངས་རྒྱས་པ་ཡིན་ཞེས་བྱ་བ་དང་མིན་ཞེས་བརྗོད་པས་ཅི་ཞིག་བྱར་ཡོད་དེ་མེད་དོ། །དེས་ན་དེ་སྐད་སྨྲ་བ་ཉིད་ལ་ད་དུང་ཡུལ་དུ་བྱེད་པའི་སྒྲིབ་པ་ཡོད་པས་དོན་ཡང་དག་པར་མ་མཐོང་བའོ། །དཔེར་ན་ནམ་མཁའ་ཡེ་ནས་སྟོང་པའི་དག་པ་ཆེན་པོ་ལ་ནམ་མཁའ་འདི་ནི་མེད་དོ་ཞེས་ནམ་མཁའི་དོན་མི་ཤེས་པའི་བླུན་པོ་གང་ཞིག་དངོས་པོ་མེད་པར་ཡིད་ལ་རྟོག་པར་བྱེད་དོ། །ནམ་མཁའ་གང་གི་མཚན་ཉིད་ཤེས་པ་དག་ནི་མེད་དོ་བར་བསམ་པར་ཡང་མི་འཛིན་ཚིག་ཏུའང་མི་བརྗོད་དེ་བསམ་པ་ཅིར་ཡང་མི་སྐྱེའོ། །དེ་ལྟར་དོན་མ་མཐོང་བས་ཆོས་ཉིད་ཡང་དག་པར་མི་ཤེས་པའི་མུན་སྤྲུལ་རྣམས་གང་དག་གིས་ནི་དེ་ཁོ་ན་ཉིད་ནི་མཐའ་དང་བྲལ་བའོ་ཞེས་ཞེ་བས་འཛིན་ཞིང་རྟོགས་པར་བྱེད་དེ་ཚིག་ཏུའང་བརྗོད་པར་བྱེད་དོ། །གང་ཆོས་ཉིད་ཇི་ལྟ་བའི་དོན་མཐོང་ཞིང་ཤེས་པའི་མི་ཆེན་པོ་རྣམས་ནི་ཡེ་ནས་མཐའ་དང་བྲལ་བ་ཉིད་དུའང་ཡོང་ཡེ་མི་རྟོག་པར་ཡིད་ལ་མི་བྱེད་རྗེས་སུ་མི་འབྲང་ཞིང་མཐའ་དང་བྲལ་བ་མིན་པར་ཡང་ཀུན་ནས་མི་རྟོག་ཞེ་བས་མི་འཛིན་རྗེས་སུའང་མི་འབྲང་སྟེ། དེ་བས་ན་ཡོད་མེད་དང་ཡིན་མིན་ལ་སོགས་པའི་ཚིག་ཏུའང་མི་བརྗོད་པ་ནི་དོན་ལ་རྣལ་དུ་ཕེབས་པའི་མི་རྟོག་པ་ཉིད་དོ། །དེ་ལྟ་བུའི་གདེང་མ་ཆུད་པའི་མུན་སྤྲུལ་པ་དག་རང་གི་ཞེན་ཕྱོགས་ཀྱི་བསམ་ངན་གྱི་དབང་གིས་བཙལ་དུ་མེད་ཅིང་ཡུལ་དང་བྲལ་བ་ནི་རྒྱལ་བའི་སྤྱོད་ཡུལ་ཡིན་གྱི། གང་ཟག་གི་སྤྱོད་ཡུལ་མ་ཡིན་ནོ་ཞེས་སྨྲ་བ་དག་ནི་ཐེག་པ་ཆེན་པོར་གཅིག་ཆར་དུ་འཇུག་པ་ཁས་འཆེས་ནས་ཐེག་པ་ཆུང་ངུའི་ལྟ་བ་ལ་གནས་པ་སྟེ། རྒྱལ་པོ་དམངས་སུ་འབབ་པ་ལྟ་བུའོ། །ཞེས་གནུབས་ཆེན་མཁྱེན་བརྩེའི་གཏེར་མཛོད་ཀྱིས་གདམས་པར་མཛད་དོ། །གཉིས་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི། དེ་ཡང་འདི་ལྟར། ཞེས་པ་ནས། དགོས་ཆེད་རེ་རེར་འབྱུང་། །ཞེས་པའི་བར་གྱིས་བསྟན་ཏེ། ཡང་དག་པའི་ཤེས་རབ་ཆེན་པོ་དེ་ལ་ཡང་ཚུལ་འདི་ལྟར་སོ་སོར་རྟོག་པའི་བློ་གྲོས་ཀྱིས་རྣམ་པར་འབྱེད་དེ། ཤེས་རབ་སྐྱེད་པའི་རྒྱུ་དང་། དེའི་བྱེད་ལས་དང་། རྣམ་གྲངས་དང་། མཚན་ཉིད་དང་། ངེས་པ་ཡི་ཚིག་དང་། ངོ་བོ་དང་། འབྲས་བུ་དང་། དགོས་ཆེད་དེ། དེ་ལྟར་རེ་རེར་བྱས་པས་རྣམ་གྲངས་རྣམ་པ་བརྒྱད་དུ་འབྱུང་བའོ། །གཉིས་པ་ལ་བརྒྱད་དེ། ཤེས་རབ་མཆོག་གི་རྒྱུ་བསྟན་པ། དེའི་བྱེད་ལས་བཤད་པ། ཤེས་རབ་དམ་པའི་རྣམ་གྲངས་བསྟན་པ། དེའི་མཚན་ཉིད་བཤད་པ། ཤེས་རབ་ཟབ་མོའི་ངེས་ཚིག་བསྟན་པ། ཤེས་རབ་གསལ་བའི་ངོ་བོ་བཤད་པ། ཤེས་རབ་ངེས་པའི་འབྲས་བུ་བསྟན་པ། ཤེས་རབ་མཆོག་གི་དགོས་ཆེད་བཤད་པའོ། །དང་པོ་ནི། འདི་ལྟར་འདིར་ནི། ཞེས་པ་ནས། འདི་དག་ཉིད་ཀྱི་རྒྱུ། །ཞེས་པའི་བར་གྱིས་བསྟན་ཏེ། འདི་ལྟར་རྣམ་གྲངས་དང་པོ་འདིར་གསང་སྔགས་ཀྱི་ཤེས་རབ་འདི་ཉིད་ནི་རྟོགས་པར་བྱེད་པ་གང་གི་རྒྱུ་ལས་ཇི་ལྟར་བྱུང་བ་ཡིན་ཞེ་ན། རང་བྱུང་གི་ཡེ་ཤེས་ཀྱི་ངོ་བོ་ཇི་ལྟར་ཡིན་པ་དེ་ཉིད་ཐོས་བསམ་ཡང་དག་པ་ལ་བརྟེན་ནས་རྩིང་ཞིབ་ཀྱི་ཚུལ་དུ་རྟོག་ཅིང་དཔྱོད་པ་དང་བཅས་པའི་སོ་སོར་རྟོག་པའི་ཤེས་རབ་དང་ལྡན་པས་རྣལ་འབྱོར་པ་ལྟ་བས་མ་འདྲེས་ཡོངས་རྫོགས་སུ་གཞལ་ཏེ་དོན་ལ་འཇུག་པ་གང་དག་རིག་པའི་ཤེས་རབ་ཆེན་པོ་གང་ལ་གཡོ་ཐོབ་བརྟན་ཅིང་མཐར་ཕྱིན་པའི་ཚུལ་གྱིས་བོགས་སུ་སྐྱེ་ཞིང་འོག་ནས་གོང་དུ་མཆེད་པར་འགྱུར་པ་ཡིན་པའི་ཕྱིར་ཇི་ལྟ་ཇི་སྙེད་ཀྱི་གནས་ལ་རྟོག་ཅིང་དཔྱོད་པས་སོ་སོར་རྟོག་པའི་ཤེས་རབ་གཉིས་པོ་དེ་ནི་མི་དམིགས་པའི་ཤེས་རབ་དང་སོ་སོར་རྟོག་པའི་ཤེས་རབ་ཆེན་པོ་འདི་དག་ཉིད་ཀྱི་རྒྱུ་མ་ནོར་བ་སྐྱེད་པར་བྱེད་པའི་ཐབས་དམ་པ་ཡིན་ནོ། །གཉིས་པ་ནི། གང་ལས་གང་མིན། ཞེས་པ་ནས། དོན་འདོད་འབྲེལ་བའོ། །ཞེས་པའི་བར་གྱིས་བསྟན་ཏེ། ཡང་དག་པའི་ཤེས་རབ་ཆེན་པོ་གང་དེའི་བྱེད་ལས་ནི། གང་གཉིས་མེད་ཀྱི་ངོ་བོ་མིན་པར་བརྟགས་པས་ཐ་དད་དུ་གྱུར་པའི་ཆོས་ཇི་སྙེད་པ་མང་པོའི་མཐོ་དམན་གྱི་ཁྱད་པར་དང་རྣམ་པའི་བྱེ་བྲག་མ་འདྲེས་པ་ལ་ཐ་དད་པར་ཡང་ངེས་པར་འབྱེད་ཅིང་། སོ་སོར་རྟོག་པའི་ཤེས་རབ་ཀྱིས་དེ་དག་ལ་ཤེས་པ་འཇུག་པ་དང་། དེ་དག་གི་འབྲེལ་བ་བསྒྲུབ་པ་དང་། དེ་དག་ལ་ཡང་དག་པའི་ལུང་དང་མན་ངག་ཚད་མའི་སྦྱོར་བ་ཚང་བར་དགོད་ཅིང་། གཏན་ཚིགས་རྒྱས་པ་འབའ་ཞིག་གིས་སྦྱོར་བ་བྱེད་པ་དང་། ཆོས་མཐུན་པའི་དཔེ་ཡིས་སྦྱོར་བ་དང་། མི་མཐུན་པ་ཉིད་ཅན་གྱིས་སྦྱོར་བ་འགོད་པ་དང་བཅས་ཏེ་ཆོས་རྟགས་ཀྱི་དོན་དང་མི་འགལ་བའི་སྦྱོར་བ་དང་ལྡན་པས། ཆོས་ཉིད་ཡོངས་སུ་རྫོགས་པའི་ངོ་བོ་ཡང་དག་པའི་དོན་དེ་ཉིད་མི་དམིགས་པའི་ཤེས་རབ་ཀྱིས་ངོས་འཛིན་ཞིང་ཕྱིན་ཅི་མ་ལོག་པར་གཏན་ལ་ཕབས་ནས་མ་ནོར་བའི་དོན་དུ་མཐར་ཕྱིན་པར་བྱེད་པས་གསང་སྔགས་གཉིས་མེད་ཀྱི་ངོ་བོ་དངོས་མངོན་དུ་འབྱིན་ཅིང་དོན་གྱི་གནས་ལུགས་རིག་པའི་མངོན་སུམ་དུ་གསལ་བར་འདོད་པ་དག་གིས་དེ་ལྟར་བརྩོན་ཏེ་དོན་གྱི་ལམ་ལ་གནས་པར་བྱས་པས་རྟོགས་པར་དཀའ་བའི་ཤེས་རབ་དང་དོན་ཇི་བཞིན་པའི་ངོ་བོ་དབྱེར་མེད་དུ་འབྲེལ་བའི་ཉག་གཅིག་ཐིག་ལེའི་ཀློང་དུ་གྲོལ་བར་བྱེད་པའོ། །འདི་ནི་གོལ་སྒྲིབ་ཤན་འབྱེད་ཀྱི་གནད་ཕྱེད་དེ་གསང་བའི་དོན་ལ་འཇུག་པའང་ཡིན་ནོ། །གསུམ་པ་ནི། རྣམ་གྲངས་རྣམ་གཉིས། ཞེས་པ་ནས། ངེས་པར་འབྱེད་པ་ཡིན། །ཞེས་པའི་བར་གྱིས་བསྟན་ཏེ། ཡང་དག་པའི་ཤེས་རབ་དེའི་རྣམ་གྲངས་ནི། སོ་སོར་རྟོག་པའི་ཤེས་རབ་དང་། མི་དམིགས་པའི་ཤེས་རབ་རྣམ་པ་གཉིས་ཏེ། གཏན་ལ་དབབ་ཅིང་རྟོགས་པར་བྱ་བའི་ཡུལ་དོན་གྱི་ངོ་བོ་མ་འདྲེས་པ་དང་ཡོངས་སུ་རྫོགས་པ་བཞིན་དུ་ཕྱེ་ནས་བསྟན་པ་ཡིན་ནོ། །དེས་ན་ཤེས་བྱའི་ཡུལ་ཀུན་ལ་མཚན་ཉིད་མ་འདྲེས་པར་ངེས་པར་འབྱེད་ཅིང་ཡོངས་སུ་རྫོགས་པའི་ཆོས་ཉིད་དུ་རྟོགས་ནས་ཐོས་བསམ་སྒོམ་པའི་ཤེས་རབ་གསུམ་ཉིད་ལྡན་པས་དོན་མངོན་དུ་བྱེད་པ་ཡིན་ཏེ། ཆོས་ཇི་ལྟ་བ་དང་ཇི་སྙེད་པ་ཀུན་རང་གསལ་ལྷུན་རྫོགས་སུ་བསྟན་པའོ། །བཞི་པ་ནི། དེ་ཉིད་མ་འདྲེས། ཞེས་པ་ནས། དེ་ལྟར་ཇི་བཞིན་བྱེད། །ཅེས་པའི་བར་གྱིས་བསྟན་ཏེ། ཤེས་རབ་དམ་པ་དེ་ཉིད་ཀྱི་མཚན་ཉིད་ནི། སོ་སོར་རྟོག་པས་མ་འདྲེས་པ་དང་། མི་དམིགས་པས་ཡོངས་སུ་རྫོགས་པར་ཤེས་པ་ཡིན་ལ། མི་དམིགས་པ་དེ་ཡང་ཆོས་རྣམས་ཐམས་ཅད་ཀུན་ངོ་བོ་མ་གྲུབ་པས་དངོས་པོ་མེད་པར་རྟོགས་ཤིང་དངོས་མེད་དེ་ཉིད་དུའང་མི་རྟོག་པར་མི་དམིགས་པའི་ངང་གཅིག་ཏུ་ཡོངས་སུ་རྫོགས་པའོ། །སོ་སོར་རྟོག་པ་དེ་ཡང་། སོ་སོར་སྣང་བའི་ཆོས་བརྟགས་པ་ཐ་དད་པ་དང་། འཁྲུལ་པ་ལ་ངོ་བོ་དང་བཏགས་པ་ཐ་དད་པའི་ཆོས་བསམ་གྱིས་མི་ཁྱབ་ཅིང་མཐའ་ཡས་པའི་བྱེ་བྲག་ཇི་སྙེད་པ་ཀུན་དེ་དག་ཇི་ལྟ་བར་མ་འདྲེས་པར་གསལ་ཞིང་རིག་པར་བྱེད་པའོ། །མདོར་ན་དེ་ལྟར་གསལ་ལ་མ་འདྲེས་པ་དང་དེ་ཉིད་ཇི་བཞིན་པའི་ངོ་བོར་མི་དམིགས་པར་གསལ་ལ་ཡོངས་སུ་རྫོགས་པར་མངོན་དུ་བྱེད་པའི་མཚན་ཉིད་དང་ལྡན་པའོ། །ལྔ་པ་ནི། གང་འདིར་ཕྱིན་ཅི། ཞེས་པ་ནས། ཆུབ་པ་ཕུལ་ཉིད་དོ། །ཞེས་པའི་བར་གྱིས་བསྟན་ཏེ། འོ་ན་ཅིའི་ཕྱིར་ཤེས་རབ་ཅེས་བྱ་ཞེ་ན། གང་འདིར་གསང་སྔགས་དེ་ཁོ་ན་ཉིད་ཀྱི་དོན་ཕྱིན་ཅི་མ་ལོག་པ་ཉིད་མ་ནོར་བར་ཁོང་དུ་ཆུད་པའི་ཕྱིར་ཏེ། ཤེས་བྱའི་དོན་མཆོག་དམ་པ་ཡོངས་སུ་ཆུབ་ཅིང་ཤེས་པས་ཤེས་བྱེད་རྣམས་ཀྱི་དམ་པ་མཆོག་གམ་ཕུལ་དུ་གྱུར་པས་ན་ཤེས་རབ་ཅེས་བརྗོད་པ་ཉིད་དོ། །དྲུག་པ་ནི། ཀུན་ནས་མ་རྨོངས། ཞེས་པ་ནས། གང་མ་རིག་པ་གཅོད། །ཅེས་པའི་བར་གྱིས་བསྟན་ཏེ། ཤེས་རབ་ཆེན་པོའི་ངོ་བོ་ཉིད་ནི། ཆོས་ཐམས་ཅད་ཀྱི་མཚན་ཉིད་ལ་ཀུན་ནས་མ་རྨོངས་པར་ཐམས་ཅད་རང་གསལ་སྒྲིབ་མེད་དུ་གཟིགས་ཏེ། ཤེས་བྱ་གང་ལ་ཡང་མཁྱེན་ཆ་མ་འགགས་པར་ཐོགས་པ་མེད་པར་ཀུན་ཤེས་པ་ལ་འཇུག་པར་བྱེད་ཅིང་། གང་སྔར་གསང་དོན་ཟབ་མོ་མི་ཤེས་པ་རྣམས་ཤེས་པར་བྱེད་དེ་མ་རིག་པ་དང་ཐེ་ཚོམ་གྱི་དྲི་མ་གཅོད་ཅིང་ཡིད་ཆེས་པའི་གདེངས་དང་ལྡན་པར་བྱེད་པ་ཉིད་ཡིན་ནོ། །བདུན་པ་ནི། སྐྱེ་མཆེད་ཀུན་ཏུ། ཞེས་པ་ནས། ཡེ་ཤེས་ཚད་མེད་པའོ། །ཞེས་པའི་བར་གྱིས་བསྟན་ཏེ། ཡང་དག་པའི་ཤེས་རབ་ཆེན་པོའི་འབྲས་བུ་ནི། ཤེས་རབ་གསལ་བ་དེ་ཉིད་ཡང་དག་པའི་རྟོག་དཔྱོད་ཀྱིས་སྐྱེ་ཞིང་མཆེད་དེ་ཀུན་ཏུ་འཕེལ་ཞིང་རྒྱས་པར་གྱུར་པ་ཉིད་ཀྱི་སྒོ་ནས། གསང་སྔགས་མཆོག་གི་དོན་གང་ལ་རྟོགས་པའི་རིག་པའམ་ཡེ་ཤེས་གོང་འཕེལ་དུ་མཆེད་པ་གང་གི་བསླབ་པའི་མཐའ་ཀུན་ལ་མཁས་པར་ཆུབ་པའི་ཤེས་རབ་ཀྱིས། ཆོས་ཉིད་སེལ་མེད་པའི་དོན་གྱི་ཀླུང་དུ་གཉིས་སུ་མེད་པར་ཞུགས་པར་གྱུར་པས་འབྲས་བུ་ཐམས་ཅད་མཁྱེན་པ་དང་། མི་དམིགས་པའི་ཡེ་ཤེས་མ་འདྲེས་ཡོངས་རྫོགས་སུ་ཐོབ་པར་འགྱུར་བའི། འདུ་ཤེས་ཀློང་དུ་ཆུད་པས་གསང་སྔགས་བླ་ན་མེད་པའི་དོན་མཆོག་གང་ལ་མཁས་ཤིང་གདེང་དུ་གྱུར་པའི་ཡེ་ཤེས་ཚད་མེད་དུ་རྒྱས་ཏེ་མུ་མཐའ་མེད་པར་འཕེལ་བར་གྱུར་པའོ། །བརྒྱད་པ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི། གང་ལ་ལོག་པ། ཞེས་པ་ནས། དེ་ལ་བལྟ་བར་བྱ། །ཞེས་པའི་བར་གྱིས་བསྟན་ཏེ། ཤེས་རབ་དེ་ཉིད་དམ་པ་གང་ལ་བསྟན་པའི་དགོས་ཆེད་ནི། ལམ་པ་དང་འགྲོ་བ་སུ་ཞིག་ལོག་པར་ལྟ་བ་ལ་གནས་ཏེ་མ་རྟོགས་པ་དེ་ཉིད་རྣམ་པར་དག་སྟེ། ཐེག་པ་ཆེན་པོའི་དོན་བླ་ན་མེད་པ་དེ་ཉིད་གདེང་དུ་ཆུད་དེ་ཕུལ་དུ་ཕྱིན་པར་བྱ་བའི་ཕྱིར་དུ། མ་རིག་པའི་ལིང་ཏོག་བསལ་བར་བྱེད་པས་དམིགས་བུ་ཡང་དག་པའི་ཤེས་རབ་མཆོག་ཏུ་གསལ་བའི་སྒྲོན་མ་ཡིས་ཆོས་ཉིད་ཇི་བཞིན་པ་གསང་སྔགས་ཀྱི་དེ་ཁོ་ན་ཉིད་དེ་ལ་མ་ནོར་བར་བལྟ་བར་བྱ་བའོ། །གཉིས་པ་ལ་གཉིས་ཏེ། གཞན་སེལ་བའི་དགོས་པ་བསྟན་པ། དོན་དུ་གཉེར་བའི་དགོས་པ་བཤད་པའོ། །དང་པོ་ནི། སྒྲོན་མའི་སྣང་བ། ཞེས་པ་ནས། གྲོང་ཁྱེར་ཆེན་པོར་འགྲོ། །ཞེས་པའི་བར་གྱིས་བསྟན་ཏེ། འོ་ན་དེ་མེད་ན་སྐྱོན་ཅི་ཡོད་ཅེ་ན། ཡང་དག་པའི་ཤེས་རབ་ཀྱི་སྒྲོན་མའི་སྣང་བ་མི་ཤེས་པར་རྨོངས་པ་མི་ཤེས་པས་མདོངས་པར་གྱུར་པ་རྣམས་ནི་ཤེས་ཤིང་མཐོང་བར་བྱ་བ་ཐུན་མོང་དང་ཐུན་མོང་མ་ཡིན་པ་ཀུན་ལ་ཡང་རང་གི་མ་རིག་པའི་མུན་པས་བསྒྲིབས་ཏེ་ཡང་དག་པའི་དོན་མཐོང་དུ་མི་སྟེར་བས་དུས་ནམ་དུ་གྱུར་ཀྱང་གསང་སྔགས་ཀྱི་ཟབ་དོན་སྣང་ཞིང་གོ་བར་མི་འགྱུར་ཏེ། མདོངས་པའམ་ལོང་བའི་གྲོང་ཁྱེར་ཆེན་པོར་ལྟུང་སྟེ་ཁམས་གསུམ་དུ་འགྲོ་བའི་ཕྱིར་ཡང་དེ་ལ་དགོངས་ཏེ་བསྟན་པར་མཛད་པའོ། །གཉིས་པ་ནི། སྒྲོན་མ་འབར་བ། ཞེས་པ་ནས། དམིགས་བུས་མཐོང་བར་འགྱུར། །ཞེས་པའི་བར་གྱིས་བསྟན་ཏེ། ཤེས་རབ་ཆེན་པོ་ཡོད་པའི་ཡོན་ཏན་ནི། དེ་བས་ན་ཤེས་རབ་མཆོག་གི་སྒྲོན་མ་འོད་འབར་བ་གང་ཉིད་ལེགས་པར་སྲེལ་ཏེ་མཁྱེན་རབ་དམ་པ་དང་ལྡན་པ་ནི། ཤེས་ཤིང་མཐོང་བར་བྱ་བའི་ཆོས་ཀུན་ལ་མ་རིག་པའི་མུན་པ་དག་ཅིང་སངས་ནས་བློ་གྲོས་མཆོག་ཏུ་གསལ་བའི་སྒོ་ནས་ཆོས་ཉིད་ཇི་བཞིན་པ་རྒྱལ་བའི་དགོངས་པ་མ་ནོར་མ་བཅོས་པའི་དེ་བཞིན་ཉིད་ཀྱི་དོན་མཐར་ཐུག་པ་ཡང་སྒྲོན་མའི་དམིགས་བུས་ངེས་པར་ཁྲིད་ནས་ཡང་དག་པར་མཐོང་ཞིང་རྟོགས་པར་འགྱུར་བའི་ཕྱིར་དགོས་ཆེད་དེ་ལྟ་བུ་ལ་དགོངས་ཏེ་བསྟན་པ་ཡིན་ནོ། །གསུམ་པ་ཞབས་བསྡུ་བ་ནི། དེ་ལྟར་དམ་པའི། ཞེས་པ་ནས། ཤེས་པར་བྱའོ། །ཞེས་པའི་བར་གྱིས་བསྟན་ཏེ། བླ་ན་མེད་པའི་ཤེས་རབ་ཀྱི་ཚུལ་ནི་ཇི་སྐད་བསྟན་པ་དེ་ལྟར་དུ་ངེས་པ་ཡིན་པས་ལང་ཀ་ལ་སོགས་པ་དམ་པའི་གྲོགས་པོ་ཁྱེད་རྣམས་ཀྱིས་ཀྱང་ཡང་དག་པའི་ཤེས་རབ་ནོར་བུ་རིན་ཆེན་མཆོག་གི་སྒྲོན་མ་རབ་ཏུ་འབར་བའི་མེ་འོད་གསལ་བ་དེ་ཉིད་སེམས་ཀྱི་མུན་པར་སྣང་བྱེད་ཀྱི་དམིགས་བུར་མ་སྲེལ་བར་རྨོངས་པས་ནོན་པར་གྱུར་ན། དོན་ཇི་བཞིན་པའི་དེ་ཁོ་ན་ཉིད་ཀྱི་གནས་ལུགས་རང་སྣང་རིག་པའི་གསེར་བཟང་པོ་རྨད་དུ་བྱུང་བ་དེ་ཉིད་མ་ནོར་བར་མཐོང་ཞིང་རྟོགས་པར་ག་ལ་རིགས་ཏེ་རིགས་པ་མ་ཡིན་པས་དེ་ལ་ཆེད་དུ་གྱིས་ཤིག་པར་གདམས་པ་སྟེ་ཐག་ལྟ་བས་བཅད་པར་འགྱུར་རོ། །གྲོགས་པོ་དག །བཤད་པ་དེ་དག་ནི། སྒྲོན་མ་དམ་པ་སྲེལ་བར་བྱའོ་ཞེས་སྔར་དམ་བཅས་པ་དེ་ཡི་དགོངས་པ་དམ་པའི་ངོ་བོ་ཉིད་ཡང་དག་པར་ནོར་བ་མེད་པར་ལེགས་པར་བགྲོས་ཏེ་བསྟན་པ་ཡིན་པར་ཤེས་པར་བྱའོ། །ལེའུའི་མཚན་ནི། སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། རྣལ་འབྱོར་མཆོག་གི་སྣང་བྱེད་མིག་གི་སྒྲོན་མས་ཤེས་རབ་ཀྱི་སྤྱན་དང་ལྡན་པར་བྱ་བའི་ཚུལ་བསྟན་པའི་ལེའུ་སྟེ་དྲུག་ཅུ་ཐམ་པ་ཉིད་ལེགས་པར་བཤད་དེ་འགྲེལ་པའོ། །དྲུག་པ་ཁྱད་པར་དུ་བླ་མར་འགྲོ་བ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི། དེ་ནས་ཡང་། ཞེས་པ་ནས། མཐོ་དམན་རིམ་པར་ཟད། །ཅེས་པའི་བར་གྱིས་བསྟན་ཏེ། ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །སྒྲོན་མ་བསྟན་མ་ཐག་པ་དེ་ནས་ཡང་འཁོར་ལང་ཀའི་མངའ་བདག་ལ་སོགས་པ་དམན་པ་དམ་པའི་སེམས་དཔའ་ཆེན་པོ་རྣམས་ཀྱིས་དགོས་པའི་དོན་གྱི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། ཉིད་ཀྱིས་ལེའུ་ཞེ་ལྔ་པར། ཁྱད་པར་དུ་བླ་མར་འགྲོ་བར་བྱའོ། །ཞེས་དམ་བཅའ་བར་དགོངས་པ་དེ་ཉིད་ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་གསོལ་ཏེ་ཆོས་ཀྱི་རྣམ་གྲངས་དྲུག་པ་དྲིས་པ་ལས། འཆད་པའི་སྐྱེས་བུ་གསང་བ་པའི་བདག་པོས་ལན་སྨྲས་ཏེ་བཀའ་སྩལ་པ། ཀྱེ་གྲོགས་པོ་དག་ཁྱད་པར་དུ་འགྲོ་བར་བྱ་བ་ཞུ་བར་དེ་ནི་རང་གི་དོན་དུ་ལེགས་སོ། །གཞན་དོན་དུའང་ཤིན་ཏུ་རབ་ཏུ་ལེགས་སོ། །དེ་བས་ལན་དངོས་གང་ཞེ་ན། ས་ཡི་ཁྱད་པར་འོག་ནས་གོང་དུ་བགྲོད་པར་བྱ་བ་དེ་ནི་འདི་ལྟར། དཔེར་ན་ས་གཞི་ཆེན་པོ་ལ་བརྟེན་ནས་ལོ་ཏོག་སྣང་བ་བཞིན། སྔ་མ་ལ་བརྟེན་ནས་ཕྱི་མར་སྨིན་པར་བྱེད་པའི་ཕྱིར་སའི་མིང་འཐོབ་སྟེ། དེ་ཡང་སྟོན་པ་ས་མཁན་དམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་རྣལ་འབྱོར་པ་ལམ་པ་རྣམས་ཀྱི་ས་ཡི་ཁྱད་པ་ཡོངས་སུ་སྣང་ཞིང་གསལ་བར་བྱེད་པ་ཞེས་བྱ་བའི་མཚོན་པ་ཐབས་ཀྱི་སྒྲོན་མ་ལེགས་པར་བཀོད་དེ་སྒྲོ་སྐུར་མེད་པར་རིམ་པར་ཉེ་བར་བསྟན་པ་ནི་གང་ཞེ་ན། འདི་ལྟ་སྟེ། གོང་མའི་ས་དང་འོག་མའི་ས་ཡི་ཁྱད་པར་མཐོ་དམན་ཉིད་དུ་འབྱུང་བའི་རྒྱུ་ནི། སའི་གྲངས་དང་ལྟ་སྤྱོད་ཀྱི་ཁྱད་པར་ཀུན་ཐེག་པ་ཆེན་པོ་བླ་ན་མེད་པ་གང་འདིར་ཡོངས་ཀྱིས་ཆོས་ཉིད་དུ་གཅིག་ཅིང་དོན་ལ་དབྱེར་མེད་ཡིན་པ་ལ། ཐེག་པ་ཆེན་པོའི་དོན་གྱི་ཤེས་བྱ་ཉིད་གཏན་ལ་འབེབས་པའི་ཤེས་རབ་ཀྱིས་སྒྲོ་འདོགས་གཅོད་པར་བྱེད་པའི་ཚེ་ཇི་ལྟར་རྟོགས་པའི་ཚུལ་གྱི་བློ་རྩལ་ཆེ་ཆུང་གི་ཁྱད་པར་གྱིས་རང་གི་རིག་པ་ཉིད་རྟོགས་པའི་ཤེས་རབ་ཆེ་ཆུང་དང་མཐུན་པར་མཐོ་དམན་གྱི་རིམ་པར་སྣང་བར་ཟད་ཀྱི་དེ་ལས་གཞན་པ་མེད་པའོ། །གཉིས་པ་ལ་གཉིས་ཏེ། སའི་ཁྱད་པར་འབྱུང་བ་སྤྱིར་བསྟན་པ། ཇི་ལྟར་འབྱུང་བའི་བྱེ་བྲག་སོ་སོར་བཤད་པའོ། །དང་པོ་ལ་བཞི་སྟེ། རྒྱལ་པོའི་དཀོར་མཛོད་ཀྱི་དཔེས་ཁྱད་པར་ཡོད་པར་བསྟན་པ། སྐས་ཀྱི་གདང་བུའི་དཔེས་ཁྱད་པར་ཡོད་པར་བསྟན་པ། ཁང་པ་སྒོ་མངས་ཀྱི་དཔེས་ཁྱད་པར་ཡོད་པར་བསྟན་པ། རི་དང་མིའི་དཔེས་ཁྱད་པར་ཡོད་པར་བསྟན་པའོ། །དང་པོ་ནི། དཔེར་ན་རྒྱལ་པོའི། ཞེས་པ་ནས། འཇུག་སྒོ་ཀུན་ནས་སྤྱོད། །ཅེས་པའི་བར་གྱིས་བསྟན་ཏེ། དེ་ཡང་སའི་ཁྱད་པར་ཉེ་བར་མཚོན་པ་ནི། དཔེར་ན་རྒྱལ་པོ་ཆེན་པོའི་དཀོར་མཛོད་ཀྱི་ནང་ནས་ནོར་ཆེ་ཆུང་ཇི་ཙམ་ཞིག་དབང་བ་ཐབས་ཀྱིས་བླངས་ནས་སྤྱོད་པར་འདོད་པ་གང་སུ་ཡང་རུང་བ་དག་ནི། མི་རིགས་བཞི་ལས་མངའ་འོག་ཏུ་གྱུར་པ་དག་ནི། རྒྱལ་པོའི་ཆོས་ཀྱིས་ནོར་སྲུན་པ་སོགས་དཀའ་བ་ཐུབ་པ་དང་མི་ཐུབ་པའི་དབང་ལས་གོ་ཆོད་པ་དང་མི་ཆོད་པ་ཡི་འབངས་རིགས་རང་རེ་ཕྱི་འཁོར་དང་ནང་འཁོར་མཐོ་དམན་གྱི་ཁྱད་པར་ལྟར་གྱིས་དཀོར་ནོར་ལ་སྤྱོད་པ་དང་སྒོ་སོ་སོར་འཇུག་པའི་སྐལ་བ་དང་བྱ་བྱེད་ཀྱི་ལས་དང་ཐབས་ཀྱི་རིམ་པ་ལས་དབང་ཆེ་ཆུང་དང་ངོ་མཐོ་དམན་གྱི་ཁྱད་པར་དང་མཐུན་པར་རང་རང་གི་རྩལ་གྱིས་རིན་པོ་ཆེ་དང་ཡིག་ཚང་གང་ཞིག་ལེན་པ་ན་ཡང་། གང་ལས་བླང་བར་བྱ་བའི་ཡུལ་རྒྱལ་པོ་གཅིག་གི་ནོར་ལ་སྤྱོད་པ་ལས་མེད་ན་ཡང་། གསེར་དངུལ་དང་གཡུ་ལ་སོགས་པའི་རིན་ཆེན་སྣ་འགའི་རྣམ་གྲངས་ཐོབ་པའི་ཁྱད་པར་ལས་ཐབས་ཆེ་ཆུང་གང་གིས་ཐོབ་པའི་རྟགས་དེ་དག་དང་མཐུན་པར་རང་སྐལ་གང་ལ་དབང་བ་ལྟར་ཐབས་ཆེན་སྒོ་རྒུ་སོ་སོར་ཡིག་ཚང་སྒོ་རྒུའི་རིམ་པ་ལྟར་སྤྱོད་པ་ཉིད་དོ། །འདིར་རྒུ་ཞེས་པ་ཡོད་དོ་ཅོག་ལྟ་བུའི་དོན་ཏེ། གྲངས་ངེས་མེད་པར་དོན་ཡང་ཐེག་པ་མཐའ་ཡས་པ་དང་སྦྱར། ཞེས་མཆན་རྙིང་ལས་འབྱུང་ངོ་། །དེ་ནི་རིམས་ཀྱིས་པའི་དཔེ་ཡིན་ནོ། །གཅིག་ཆར་བའི་དཔེ་ནི། གལ་ཏེ་རྒྱལ་པོ་ཆེན་པོར་གྱུར་པ་ཞིག་ན་དེ་ནི་ནོར་ཐམས་ཅད་ཀུན་ལ་རང་དབང་དུ་མངའ་བསྒྱུར་བྱེད་པའི་བདག་པོ་ཉིད་དུ་འགྱུར་བ་ཡིན་ནོ། །དཔེ་དེ་བཞིན་དུ། མཚན་ཉིད་གང་དུའང་མི་ཟིན་པས་མི་གནས་པའི་གསང་བ་ཆོས་ཉིད་མ་བཅོས་པའི་དེ་བཞིན་ཉིད་ནི་ཐེག་པ་ཆེན་པོ་སྟེ། ཤེས་བྱ་ཐམས་ཅད་དེ་ཡི་ངང་ལས་གཞན་དུ་མེད་པ་ལ། གང་འདི་ལ་རང་རང་གི་རིག་པའི་ཤེས་རབ་ཀྱིས་ཇི་ལྟར་རྟོགས་པའི་བློ་རྩལ་གྱི་ནུས་པ་ཆེ་ཆུང་གི་ཁྱད་པར་གྱིས་རིམས་ཀྱིས་པ་ལ་སོ་སོའི་ལྟ་སྤྱོད་དང་ཏིང་ངེ་འཛིན་གྱི་འཇུག་སྒོ་མི་མཐུན་པར་སྣ་ཚོགས་སུ་སྣང་ལ། གཅིག་ཆར་བས་ནི་དེ་ཀུན་ལ་རིམ་པ་ནས་འཇུག་མི་དགོས་པར་རྟོགས་པ་རྫོགས་པ་འགྱུར་བའི་ཕྱིར་ཁྱད་པར་སོ་སོར་སྤྱོད་པ་ནི་དེ་ལྟར་ངེས་པ་ཡིན་ནོ། །གཉིས་པ་ནི། དེ་ཡི་དེ་ཉིད། ཅེས་པ་ནས། དེ་ལྟར་སྣང་བ་ཡིན། །ཞེས་པའི་བར་གྱིས་བསྟན་ཏེ། དེ་བས་ན་རྟོགས་པར་བྱ་བའི་དོན་དེ་ཡི་ངོ་བོ་ནི་རང་རིག་པ་དེ་བཞིན་ཉིད་ཆོས་ཉིད་དབྱིངས་ཀྱི་རང་བཞིན་དེ་ཁོ་ན་ཉིད་ཀྱི་ངང་གཅིག་ཏུ་དབྱེར་མེད་མཉམ་པ་ཆེན་པོར་གནས་པ་ལ། དེ་ཉིད་རྟོགས་པའི་ཚུལ་གྱིས་ལྟ་བའི་རྩལ་འཕང་མཐོ་དམན་གྱི་ཁྱད་པར་གྱིས། ཐེག་པའི་རིམ་པ་དང་ས་ཡི་གོ་འཕང་ཀྱང་མཐོ་དམན་གྱི་ཁྱད་པར་ཅན་དུ་གྱུར་ཏེ། རྒྱུ་རིམ་གྱིས་རྩོལ་བ་དང་འབྲས་བུ་ཅིག་ཆར་བ་གཉིས་སུ་སྣང་ལ། དེར་ཡང་རིམ་པར་བགྲོད་པའི་སྐབས་ཉིད་དུ་དཔེར་ན་སྐས་ཀྱི་གདང་བུ་བཞིན་དུ་ཡན་ལག་གི་རིམ་པ་ཡང་འགྱུར་དབང་མ་ངེས་པ་ནས་རྫོགས་པ་སྤྱིར་ཆིབས་ཀྱི་བར་དུ་མཐོ་དམན་གྱི་ཁྱད་པར་དེ་ལྟར་དུ་སྣང་བ་ཡིན་པས་སོ་སོར་འབྱུང་ཞིང་བསྟན་པའོ། །གསུམ་པ་ནི། གང་འདིར་ཐམས་ཅད། ཅེས་པ་ནས། ཐ་དད་ཡོངས་ཀྱིས་མེད། །ཅེས་པའི་བར་གྱིས་བསྟན་ཏེ། གང་གཞི་མཉམ་པ་ཉིད་ཀྱི་ཆོས་ཉིད་འདིར་ཐམས་ཅད་ཀུན་གནས་ལུགས་ཇི་ལྟ་བའི་ངང་དུ་གཅིག་པ་ལ་ཐ་དད་ཀྱི་སྤྲོས་པ་མེད་ན་ཡང་། གནས་ལུགས་དེ་ཉིད་མཐོང་བ་དང་རྟོགས་པའི་ཁྱད་པར་མི་མཐུན་པ་དེ་ཡི་དབང་གིས་སོ་སོར་གྱུར་པ་ནི་དཔེར་ན་ཕྱོོགས་ཀུན་ནས་འབྱུང་ཞིང་མང་པོ་གནས་པའི་ཁང་པ་ཆེན་པོ་སྒོ་མངས་ཀྱི་དཔེ་བཞིན་དུ་ས་ཡི་རིམ་པ་དང་རྣམ་པར་ཐར་པའི་ཐེག་པ་རྣམ་གྲངས་སོ་སོའི་སྒོ་མང་པོ་བློ་རིམ་དང་མཐུན་པར་གཞིའི་ཆོས་ཉིད་ཀུན་གཞི་བྱང་ཆུབ་ཀྱི་སེམས་གཅིག་གི་ངང་ལ་མི་མཐུན་པ་སྣ་ཚོགས་པ་དེ་ལྟར་མཐོང་སྟངས་ཐ་དད་པར་སྣང་བ་ནི་རིམས་ཀྱིས་པའི་སྣང་ཚུལ་ལོ། །འོན་ཏེ་ན་གྲུབ་པའི་མཐའ་ཡང་ཐ་དད་པར་འགྱུར་རོ་བར་དོགས་པ་ལ། ཐེག་པ་ཆེན་པོ་གསང་སྔགས་གཅིག་ཆར་བས་ནི་ཚེ་འདིར་ས་དང་རྣམ་པར་ཐར་པའི་སྒོ་གང་དག་ཇི་སྙེད་པ་ལ་རྒྱུ་མཚན་ཉིད་ནས་རིམ་པར་འཇུག་པ་ལ་སོགས་པས་མ་སྦྱངས་མ་བཙལ་ཀྱང་། ཐེག་པ་ཆེན་པོ་གསང་ཆེན་ངེས་པའི་སྙིང་པོ་ནི་ཀུན་གྱི་དོན་གྱི་ཡང་གཞིར་གྱུར་པས་རྩ་བ་ཆེན་པོ་འདིར་བཅད་དེ་མ་འདྲེས་ཡོངས་རྫོགས་སུ་རྟོགས་པར་གྱུར་ན་གཞན་ཀུན་ཀྱང་རྟོགས་པ་ཡིན་པས་གསར་དུ་རྟོགས་པར་བྱ་མི་དགོས་ལ། དེས་ན་ཀུན་གྱི་གྲུབ་པའི་མཐའ་ཡང་འདིར་གཅིག་སྟེ་ཐེག་པ་ཐ་དད་ཀྱི་རིམ་པ་སྣ་ཚོགས་སུ་གྲུབ་པ་ནི་གནས་ལུགས་ལ་ཡོངས་ཀྱིས་མེད་པས་གྲུབ་པའི་མཐའ་ཆེན་པོ་འདིར་ངང་གིས་དབྱེར་མེད་ཅིང་གཅིག་པ་ཁོ་ནའོ། །བཞི་པ་ནི། དེ་ནི་རི་དང་། ཞེས་པ་ནས། དེ་ལྟར་ཡོད་པ་ཡིན། །ཞེས་པའི་བར་གྱིས་བསྟན་ཏེ། དེར་ཡང་མ་ཟད་ཁྱད་པར་དེ་ནི་དཔེར་ན་རི་ཕལ་པའི་རྩེ་ནས་མཐོང་བ་མི་གསལ་བ་དང་། ལྷུན་པོ་མཆོག་རབ་ཀྱི་རྩེ་ནས་གླིང་རྣམས་ཐམས་ཅད་གསལ་བར་མཐོང་བ་ལྟ་བུ་དང་། ཚོང་དཔོན་ལྟ་བུ་ཀུན་ཏུ་རྒྱུ་བའི་མིས་ཡུལ་ཇི་སྙེད་པ་བགྲོད་པས་ཐོས་པ་ཆེ་བ་དང་། གཞོན་ནུ་ན་ཚོད་དར་ལ་བབ་པ་རང་རྩར་གནས་པར་དེ་ལྟ་བུའི་ཐོས་པ་མེད་པའི་ཁྱད་པར་ཡོང་བ་ལྟར་དུ། རྒྱུ་འབྲས་ཀྱི་ཐེག་པ་གཞན་གྱིས་ས་དང་རྣམ་ཐར་གྱི་ཁྱད་པར་མཐོང་ཐོས་སྟོན་པ་དང་། ཐེག་མཆོག་འདིའི་ས་དང་རྣམ་པར་ཐར་པའི་གནས་ཀྱི་ཁྱད་པར་ནི། རིག་པ་དང་མ་རིག་པའི་དོན་གྱིས་ཇི་ལྟ་བར་མཐོང་བ་དང་། མཚོན་པའི་ཚིག་ཐོས་པ་ཆེ་བ་དང་། དེ་ལྟར་སྟོན་པའི་ཁྱད་པར་དང་སའི་རིམ་པ་དང་ཁྱད་པར་ཡང་མཐོ་དམན་ཡོད་པ་ཡིན་པས་རིམ་པར་བསྟན་པ་ཡིན་ནོ། །གཉིས་པ་ལ་གཉིས་ཏེ། སའི་ཁྱད་པར་ཤེས་པར་གདམས་པ། ཁྱད་པར་ཅན་གྱི་སའི་རིམ་པ་དངོས་བཤད་པའོ། །དང་པོ་ནི། དེས་ན་ཆོས་རྣམས། ཞེས་པ་ནས། བདེར་རྙེད་གྲུབ་པའོ། །ཞེས་པའི་བར་གྱིས་བསྟན་ཏེ། ས་ལ་ཁྱད་པར་ཡོད་པའི་ཚུལ་དེས་ན་ཆོས་རྣམས་ཐམས་ཅད་ཀུན་གྱི་གནས་ཤིང་རྟེན་པའི་ས་ཆེན་པོ་ཉིད་ནི་གསང་སྔགས་ཐེག་པ་ཆེན་པོའི་དོན་བླ་ན་མེད་པ་བྱང་ཆུབ་ཀྱི་སེམས་མཉམ་པ་ཉིད་འདི་ཁོ་ན་ཡིན་པས། མཐུན་པ་དཔེ་ཡིས་མཚོན་བྱེད་ནམ་མཁའ་ལྟ་བུ་དཔེས་ཉེ་བར་མཚོན་ཏེ། རང་རིག་པའི་སེམས་ཉིད་ཀུན་གཞི་ཀུན་གྱི་ས་ཆེན་པོ་འདི་ཉིད་ཡང་དག་པར་ཤེས་ཤིང་རྟོགས་པར་བྱའོ། །འདི་ཤེས་པའི་ཡོན་ཏན་གང་ཞེ་ན། འདི་ལྟར་བྱང་ཆུབ་སེམས་ཀྱི་མཚན་ཉིད་རྒྱུད་འདིར་བསྟན་པ་ལྟ་བུར་གང་ཤེས་པའི་རྣལ་འབྱོར་དམ་པ་སུ་ཡིན་ཀྱང་ལམ་ཁྱད་པར་ཅན་གྱི་ཐབས་ལ་མཁས་པ་ཡི་གང་ཟག་སྟེ། དེས་ཡང་དག་པའི་ལམ་མུན་པའི་ཁམས་སུ་སྟོར་རླག་ཏུ་གྱུར་པ་ཉིད་སླར་ལམ་བཙལ་བ་ན་ལམ་མཆོག་མ་ནོར་བར་རྙེད་པ་ཡིན་པས་གཞན་དུ་བཙལ་བས་མི་རྙེད་པའི་ཕྱིར་ཉེ་ལམ་དམ་པ་བདེར་ཞེས་བདེ་བར་རྙེད་དེ་སེམས་ཀྱི་ཆོས་ཉིད་རྟོགས་ནས་ངེས་པར་གྲུབ་ཅིང་ཐོབ་པའོ། །གཉིས་པ་ལ་གཉིས་ཏེ། རིམས་ཀྱིས་པའི་ས་བཤད་པ། གཅིག་ཆར་བའི་ས་བཤད་པའོ། །དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི། གང་རྙེད་དེར་རྙེད། ཅེས་པ་ནས། བཅུ་ཕྲག་གཅིག་གིས་རྫོགས། །ཞེས་པའི་བར་གྱིས་བསྟན་ཏེ། རྣལ་འབྱོར་པ་གང་སུ་ཞིག་གིས་ཉེ་ལམ་མཆོག་ཉིད་རྙེད་པ་ཡང་སེམས་ཀྱི་ཆོས་ཉིད་ཀྱི་དོན་དེར་རྙེད་ཅིང་མཐོང་བ་ནི་དོན་ཆེན་པོ་དེར་གནས་ཏེ་འདུག་པའི་ཕྱིར་ན་སྐྱེས་བུ་དམ་པ་རྣལ་འབྱོར་མཆོག་གི་དོན་ལ་སྤྱོད་པའི་ས་པ་ཡིན་ཏེ། དེ་ལའང་སྤྱིར་རིམས་ཀྱིས་པ་དང་གཅིག་ཆར་བ་གཉིས་ལས་ཅིག་ཆར་བ་ལ་ས་ཡི་རིམ་པ་ཀུན་རང་རིག་པའི་ཡེ་ཤེས་ཆེན་པོ་གཅིག་ཏུ་ཡོངས་སུ་རྫོགས་ཤིང་དེ་ལ་འདུས་པ་ཡིན་ཀྱང་། རིམས་ཀྱིས་པའི་དབང་དུ་རྣམ་པའི་ཁྱད་པར་གྱི་གཞི་སྟོན་པ་ནི་རང་བྱུང་གི་རིག་པ་རྟོགས་པའི་ཤེས་རབ་མཆོག་གམ་རབ་ཏུ་གྱུར་པ་དང་འབྲིང་པོ་དང་ཐ་མའི་རིམ་པ་ཡོད་པའི་ཕྱིར། ཆོས་ཉིད་བྱང་ཆུབ་ཀྱི་སེམས་སུ་གཅིག་ཀྱང་། རབ་ལ་ལམ་ལྔ་ལ་རྣལ་འབྱོར་ལྔར་སྣང་། འབྲིང་ལ་སའི་ཁྱད་པར་ལྟར་རྣལ་འབྱོར་བཅུར་སྣང་། ཐ་མ་ལ་རྣལ་འབྱོར་སུམ་ཅུ་སོ་བཞིའམ་བཞི་བཅུར་དབྱེ་བ་འབྱུང་བའོ། །དེ་ཡང་རིམ་པར་འཇུག་པ་གང་དག་གི་དོན་གྱི་ཆེད་དུ་དང་པོ་ལྔ་གཞན་ན་གསལ་བས་འདིར་དང་པོ་ལྔའི་གཞི་ལ་བརྟེན་ནས་ཕྱི་མ་གཉིས་ཀྱི་ངོ་བོ་རྒྱས་པར་བགྲང་སྟེ་བསྟན་པར་བྱའོ་ཞེས་དམ་བཅའ་བར་མཛད་དོ། །དེ་ལྟར་དམ་བཅས་ནས་ངེས་ཚིག་གི་ཚུལ་གྱིས་བསྟན་པ་འདི་དག་ལ་གནས་པ་དང་འདི་དག་གིས་འཛིན་པ་དང་འདི་དག་གི་དོན་ལ་སྤྱོད་པའི་ཕྱིར་ས་གཞི་དང་འདྲ་བས་ན་ས་ཞེས་བྱ་སྟེ་རྣམ་གྲངས་བསྟན་པ་ནི་བཅུ་ཕྲག་གཅིག་གིས་ཡོངས་སུ་རྫོགས་ཏེ་མཐར་ཐུག་པར་འགྱུར་རོ། །དེ་ལ་འདིར་ཐུན་མོང་བྱང་ཆུབ་སེམས་དཔའི་ས་བཅུ་དང་། ཁྱད་པར་གསང་སྔགས་ནང་པའི་ས་བཅུ་ལས། འདིར་ཁྱད་པར་དུ་འཕགས་པའི་ས་བཅུ་བསྙད་དེ། ཐུན་མོང་མ་ཡིན་པ་ལུང་ཆེན་གསང་སྔགས་མཆོག་གི་ལམ་ཤ་སྟག་ཏུ་འགྱུར་ཏེ། ཐུན་མོང་གི་རིམ་པར་བརྒྱུད་པའང་འགོག་པ་མ་ཡིན་ནོ། །འདིར་གཞུང་བཙན་པར་བྱ་བའི་ཆེད་དུ་གསང་སྔགས་རྗེས་སུ་རྣལ་འབྱོར་གྱི་ལམ་ཉིད་དུ་འཇལ་བར་སྦྱར་ཏེ་མཚན་བཅས་མཚན་མེད་གཉིས་ཀ་ལ་ལན་གཉིས་བཤད་དོ། །གཉིས་པ་ལ་བཅུ་སྟེ། ས་བཅུ་ལམ་ལྔར་སྡུད་པ་ནི་ཚོགས་ལམ་ས་གཉིས་ཀྱི་བདག་ཉིད་དུ་བཤད་པ། སྦྱོར་ལམ་ས་གསུམ་གྱི་བདག་ཉིད་དུ་བཤད་པ། མཐོང་ལམ་ས་གཅིག་གི་བདག་ཉིད་དུ་བཤད་པ། སྒོམ་ལམ་ས་གཅིག་གི་བདག་ཉིད་དུ་བཤད་པ། མཐར་ལམ་ས་གསུམ་གྱི་བདག་ཉིད་དུ་བཤད་པའོ། །དང་པོ་ལ་གཉིས་ཏེ། འགྱུར་དབང་མ་ངེས་པའི་ས་བསྟན་པ། བརྟེན་པ་གཞིའི་ས་བཤད་པའོ། །དང་པོ་ནི། འགྱུར་དབང་མ་ངེས། ཞེས་པ་ནས། སྤྱོད་པའི་ས་ཞེས་བྱ། །ཞེས་པའི་བར་གྱིས་བསྟན་ཏེ། གསང་སྔགས་ངེས་དོན་ལ་འཇུག་པའི་རྒྱུ་སྟེ། རྒྱུ་རྐྱེན་རྣམས་ཀྱིས་ཉན་རང་བྱང་སེམས་ཐུན་མོང་གི་ས་དང་སོ་སོ་སྐྱེ་བོ་པ་གང་ཡང་རུང་བ་ལས་ཐེག་པ་ཆེན་པོ་གསང་བ་དམ་པ་ལ་བློ་འགྱུར་ཡང་། ད་དུང་ཐེག་པ་ཆེན་པོ་ལ་ཇི་ལྟ་བ་བཞིན་སྤྱོད་པའི་གདེངས་མེད་པས་རྐྱེན་དབང་ལ་རག་ལས་ཤིང་རིགས་མ་ངེས་པ་ལ་གནས་ཏེ་རྟེན་པའང་ས་ཞེས་བྱ་བར་དེས་གོང་དུ་སྐྱེས་པས་མིང་འགྲུབ་སྟེ་འཆད་པའང་རྗེས་སུ་མཐུན་པའོ། །གཞི་འདི་ལ་ཉེ་རིང་དང་མཐོ་དམན་གྱི་བྱེ་བྲག་གིས་རྣལ་འབྱོར་ལྔ་སྟེ། ཐོག་མར་བློ་གྱེན་དུ་འགྱུར་པའི་རྒྱུས་གསང་སྔགས་ཀྱི་དོན་བློ་ལ་མ་ཤར་ཡང་། ལྷ་བསྒོམ་པ་དང་བསམ་དཔྱོད་རྣམས་གསང་བ་དམ་པའི་ཚུལ་དུ་བསྒྱུར་ནས་སྤྱོད་པ་ལ་དགའ་བས་བཅོས་མ་ཙམ་གྱི་རྣལ་འབྱོར་དོན་གསལ་བ་མེད་པ་དང་། སྒོ་གསུམ་གྱི་སྤྱོད་པ་གསང་བའི་ཚུལ་དེར་འཇུག་པ་དང་གཞན་འདྲེན་མར་སྤྱོད་ཅིང་བསྒོམ་པའང་རྟོག་པ་དང་འདྲེན་མར་རྒྱུ་བས་ཕྲ་མེན་སྤྱོད་པའི་རྣལ་འབྱོར་དུ་བ་ལྟ་བུ་དང་། གསང་སྔགས་ལ་མོས་པས་དེའི་ཚུལ་རྟགས་དང་ལྷའི་ཆ་ལུགས་འཛིན་པའི་རྣལ་འབྱོར་སྨིག་རྒྱུ་ལྟ་བུ་དང་དེ་བས་ཀྱང་ཁྱད་པར་དུ་གསང་བའི་ལྷ་དང་སྔགས་དོན་ལ་ཤིན་ཏུ་མོས་པའི་བསམ་པ་ལ་སྤྱོད་པར་སྒོམ་པའི་རྣལ་འབྱོར་སྤྲིན་ཕུང་ལྟ་བུ་དང་། གསང་སྔགས་ལ་སོམ་ཉི་དང་ཐེ་ཚོམ་གྱི་དྲི་མ་དང་བྲལ་བས་ལེགས་པར་འདུན་པར་བྱེད་ཅིང་ལྷ་བསྒོམ་པའི་རྣལ་འབྱོར་མར་མེ་ལྟ་བུ་དང་ལྔའོ། །དེ་རྣམས་ལ་ཏིང་ངེ་འཛིན་ཡང་དག་པ་མེད་ཀྱང་སྐབས་ཀྱི་བསམ་པ་དང་ལྷ་སྒོམ་པ་ལ་གནས་པའང་བྱ་བས་ཡིད་ལ་བྱེད་པའི་ཏིང་ངེ་འཛིན་ཡོད་པས་རྣལ་འབྱོར་གྱི་མིང་ཡང་ངེས་པར་འགྲུབ་བོ། །དེ་དག་ལ་ནི་གསང་སྔགས་ལ་འཇུག་པའང་ཡོད་ཅིང་། ཞུགས་ནས་སླར་ལྡོག་པ་དང་། དེས་དབང་ལས་ངན་འགྲོར་ལྟུང་བ་དང་བཅས་པ་ཡིས་ཐེག་པའི་གནས་ཀུན་ཏུ་འཁོར་ཞིང་འཁྱམ་སྟེ་རིགས་མ་ངེས་པ་ཡིན་པས་ལས་དང་པོ་པར་གྱུར་པའི་ས་འདིའི་མིང་གི་ངེས་ཚིག་ཀྱང་འགྲུབ་པའོ། །འདིར་རྣལ་འབྱོར་ལྔ་དང་བཅུ་ལས། དེ་དག་གི་དོན་ལ་སྒོམ་མོ་སྙམ་དུ་འདུན་པ་སེམས་པའི་རྣལ་འབྱོར་ཉིད་བཤད་པའི་སྐབས་དེ་ས་འདི་ལ་བརྟེན་པའི་ཕྱིར་ས་པ་དེ་ལ་རྣལ་འབྱོར་དྲུག་གོ། །དེ་བས་ན་དེ་དག་ལ་རྟེན་ནས་གནས་ཤིང་མོས་པ་སྤྱོད་པའི་ས་ཞེས་བྱ་བ་གྲངས་དང་པོ་ཡིན་ནོ། །འདི་ལའང་མཚན་བཅས་ལྷ་བསྒོམ་པ་དང་། མཚན་མེད་ཆོས་ཉིད་བསྒོམ་པ་གཉིས་ལས། དང་པོ་ཡི་གེའི་རྗེས་སུ་འཇུག་པ་ལྷ་བསྒོམ་པའི་དབང་དུ། ཀུན་འདུས་ལས། དེས་ན་ཏིང་འཛིན་ཁྱད་པར་ཡང་། །དབྱིངས་ཉིད་གཅིག་ལ་སྒོམ་མོད་ཀྱི། །རྣལ་འབྱོར་རྩལ་གྱིས་ཁྱད་པར་གྱིས། །བསམ་པའི་ཡུལ་ནི་སྣ་ཚོགས་ཏེ། །དང་པོའི་ས་ལ་གནས་པ་ཡི། །བརྩམ་པ་ལས་ཀྱི་རྣལ་འབྱོར་པ། །འདུན་པ་སེམས་ཀྱི་རྣལ་འབྱོར་ལས། །སོགས་པའི་རྣལ་འབྱོར་རྣམ་དྲུག་པོ། །ཤེས་རབ་རྩལ་གྱི་འཕང་དམས་པས། །ཏིང་འཛིན་རྩལ་ཡང་ཆུང་བ་སྟེ། །དོན་ལ་མཐོང་བར་མི་འགྱུར་ཏེ། །རང་གི་མོས་པའི་ལྷ་བསྒོམ་ན། །ལྷ་ཡི་ས་བོན་གང་ཡིན་པ། །ཁ་དོག་ཚོན་གྱིས་ཕྱེ་ནས་ནི། །སྣ་ཡི་དབུགས་ལ་རྒྱུ་བྱས་ཏེ། །དབུགས་ཀྱི་ཡུལ་དུ་གྱུར་ཚད་དུ། །ཟུང་སྒྲིལ་ཕར་འཕྲོ་གསལ་བ་ལས། །འཕྲོ་འདུའི་གནས་སུ་བསྐྱེད་པར་བྱ། །རང་གི་ཆག་ཚད་དང་སྦྱར་བའི། །སྐུ་ཡི་ཁྱོན་ཡང་དེ་ཙམ་མོ། །ཞེས་གསུངས་ཏེ། ལུང་འདིའི་མདོར་བསྟན་ཐུན་མོང་ཡིན་ཀྱང་། རྒྱས་བཤད་ནས་ལྷ་དང་སྦྱར་བར་གསལ་བས། །དེ་ལྟར་ན་འདི་ལ་རྣལ་འབྱོར་དྲུག་སྟེ། འདུན་པ་སེམས་པའི་རྣལ་འབྱོར་ནི། ཉམས་གཡོ་བ་མི་བརྟན་པ་ལྷ་ཁ་དོག་ཙམ་ལས་དབྱིབས་མི་གསལ་བར་ཡིད་ལ་བྱེད་པ་ཙམ་མོ། །བཅོས་མའི་རྣལ་འབྱོར་ནི། ཉམས་གཡོ་བ་བརྟན་པ་ལྷ་རབ་རིབ་ཙམ་ལ་སེམས་བཅོས་པའོ། །ཕྲ་མེན་སྤྱོད་པའི་རྣལ་འབྱོར་ནི། ཉམས་ཐོབ་པ་ལྷ་རེས་གསལ་རེས་མི་གསལ་བར་འདྲེས་མའོ། །ཚུལ་རྟགས་འཛིན་པའི་རྣལ་འབྱོར་ནི། ཉམས་གོམས་པ་ལྷ་རྒྱན་ཆས་མི་གསལ་ཏེ་ལྷའི་ཚུལ་འཛིན་པའོ། །མོས་པའི་རྣལ་འབྱོར་ནི་ཉམས་བརྟན་པ་ལྷ་རྒྱན་ཆས་བག་རེ་གསལ་བ་ལ་མོས་པའོ། །ལེགས་པར་འདུན་པའི་རྣལ་འབྱོར་ནི། ཉམས་མཐར་ཕྱིན་ཏེ་ཏིང་ངེ་འཛིན་ལ་སྐྱོན་མེད་པའོ། །རྣལ་འབྱོར་དེ་ཚོའི་ཉམས་ནི་བྱ་བ་བྱེད་པའི་ཏིང་ངེ་འཛིན་ལ་སྦྱོར། འཕྲོ་འདུ་ནི་དབུགས་ཀྱི་བསྙེགས་ཚད་དུ་བྱེད། ཁྱོན་ནི་ཁྲུ་བཞི་སྟེ་རང་གི་ལུས་པོ་ཙམ་དུ་སྒོམ། གྲངས་ནི་ལྷ་གཅིག །རྣམ་པའི་ཁྱད་པར་ནི་རྟོག་པའི་ལྷའོ། །གཉིས་པ་མཚན་མེད་ཆོས་ཉིད་བསྒོམ་པའི་དབང་དུ། ས་དང་པོ་འདུན་པ་སྐྱེ་བའི་སྐབས། གཡོ་བ་བྱང་ཆུབ་ཀྱི་སེམས་དཔེ་སྐར་མ་རབ་རིབ་ལྟ་བུ་སྟེ། སྒོམ་ཐབས་སྒྲོན་མ་ལས། དང་པོ་མིང་ཙམ་འཛིན་ལྟ་བྱ་བྱེད་སྒོམ། །རྣམ་པར་དཀར་བའི་སྤྱོད་པའོ། །ཞེས་གསུངས་ཏེ། ལྟ་བ་ནི་གསང་བ་མཆོག་གི་དེ་ཁོ་ན་ཉིད་ཀྱི་མིང་ཙམ་དུ་འཛིན་པ་དང་། སྒོམ་པ་ནི་བྱ་བ་བྱེད་པའི་ཏིང་ངེ་འཛིན་དང་། སྤྱོད་པ་ནི་བསོད་ནམས་ཀྱི་དཔུང་གིས་རྣམ་པར་དཀར་བའི་སྤྱོད་པའོ། །ཉམས་དང་རྣལ་འབྱོར་ཕྲ་མོ་ཀུན་མཚན་བཅས་ཀྱི་སྐབས་དང་ཐུན་མོང་ཡིན་ཀྱང་འདིར་མཚན་མེད་ཀྱི་རྣལ་འབྱོར་དྲུག་ལས། འདུན་པ་སེམས་པའི་རྣལ་འབྱོར་ནི། ཆོས་ཉིད་ཀྱི་མིང་ཙམ་ལ་མོས་ཤིང་འདུན་པའོ། །བཅོས་མའི་རྣལ་འབྱོར་ནི། ཆོས་ཉིད་མིང་ཙམ་ལ་བཅོས་པའོ། །ཕྲ་མེན་སྤྱོད་པ་ནི་མིང་ཙམ་གྱི་ཆོས་ཉིད་དེ་རང་གསལ་མི་གསལ་འདྲེས་མའོ། །ཚུལ་རྟགས་འཛིན་པའི་རྣལ་འབྱོར་ནི། ཆོས་ཉིད་མི་རྟོག་པའི་མིང་ཙམ་གྱི་ཚུལ་འཛིན་པའོ། །མོས་པའི་རྣལ་འབྱོར་ནི། དེ་ཉིད་ལ་དད་ཅིང་མོས་པའོ། །ལེགས་པར་འདུན་པའི་རྣལ་འབྱོར་ནི། ཆོས་ཉིད་མི་རྟོག་པའི་སྤྱིའི་རྣམ་པ་ཙམ་ལ་གནས་པ་ལ་སྐྱོན་མེད་པའོ། །ཚུལ་དེས་གཞན་ཡང་མཚོན་ནོ། །ཐུན་མོང་དུ་ནི་ཕལ་པའི་སེམས་བརྒྱད་ལས་རྣལ་འབྱོར་ལྔས་རིམ་པར་སྐྱེ་ཞིང་ཐོག་མར་འདུན་པ་སེམས་པའི་རྣལ་འབྱོར་དང་དྲུག་སྟེ། དེ་ཉིད་ལས། དེ་ལ་རྣལ་འབྱོར་ཕྲ་མོ་བཞི་བཅུ་སྟེ། །དང་པོ་ལ་དྲུག་འདུན་པ་སེམས་པ་ཉིད། །བསྙུང་བར་གནས་པའི་སེམས་དང་ས་བོན་ལྟར། །བཅོས་མའི་སྙིང་རྗེའི་གནས་གཏོང་སྡོང་ལྟ་བུ། །ཕྲ་མེན་དགེ་སྦྱོང་ལ་གཏོང་ལོ་མ་ལྟར། །ཚུལ་འཛིན་ལྷུག་པར་གཏོང་སེམས་མེ་ཏོག་ལྟར། །མོས་པ་ཁྲིམས་སྲུང་སེམས་བསྐྱེད་གསོས་སུ་འགྱུར། །དགེ་བར་འདུན་པ་ལྷ་མཆོད་འཇིག་རྟེན་ལམ། །ཞེས་གསུངས་ཏེ། དེའང་ས་དང་པོ་ལ་རྣལ་འབྱོར་དྲུག་པས་ལྷ་དང་མི་རྟོག་པ་བསྒོམ་པ་ལ་འདུན་པ་ཙམ་དུ་སེམས་པའི་རྣལ་འབྱོར་ཉིད་བསྙུང་བར་གནས་པའི་སེམས་ཏེ་བརྒྱད་ཀྱི་དང་པོ་ས་བོན་ལྟ་བུ་དང་། དེ་ནས་ཕ་མ་དང་ཉེ་དུ་ལྟ་བུ་ལ་སྦྱིན་པ་བྱེད་དེ་མྱུ་གུ་ལྟ་བུ་དང་། ལྟ་སྤྱོད་སྔགས་ཀྱི་ཚུལ་དུ་བཅོས་མའི་རྣལ་འབྱོར་ཉིད་སྙིང་རྗེའི་སྦྱིན་གནས་ལ་གཏོང་བ་སྡོང་པོ་ལྟ་བུ་དང་། སྔགས་དང་ཚུལ་གཞན་ཕྲ་མེན་དུ་སྤྱོད་པའི་རྣལ་འབྱོར་ཉིད་བྲམ་ཟེ་དང་དགེ་སྦྱོང་དག་ལ་གཏོང་བ་ལོ་མ་ལྟ་བུ་དང་། འདི་ལ་མོས་པས་དེའི་ཚུལ་རྟགས་འཛིན་པའི་རྣལ་འབྱོར་ཉིད་བླ་མ་དང་རོལ་མོ་མཁན་ལ་ལྷུག་པར་གཏོང་བ་མེ་ཏོག་ལྟ་བུ་དང་། དེ་ནས་གང་འདོད་པ་ལ་གཏོང་བས་འབྲས་བུ་ལྟ་བུ་དང་དྲུག་གི་སྦྱིན་པའི་བསླབ་པ་དང་ལྷ་དང་མི་རྟོག་པ་སྒོམ་པ་ལ་མོས་པའི་རྣལ་འབྱོར་ཉིད་སྦྱིན་པས་རྒྱུ་བྱས་ནས་ཚུལ་ཁྲིམས་སྲུང་བ་ལ་མོས་པས་སེམས་བསྐྱེད་དེ་སྲུང་བ་གསོས་སུ་འགྱུར་བ་ལྟ་བུ་དང་། ཐེ་ཚོམ་མེད་པར་དགེ་བར་ལེགས་པར་འདུན་པའི་རྣལ་འབྱོར་ཉིད་དེ་བས་ཀྱང་ལྷ་ལ་མཆོད་པ་ཕུལ་བ་ཤེས་སྟོབས་ཅན་དུ་འགྱུར་སྙམ་ནས་ཚངས་པ་ལ་སོགས་པ་མཆོད་པ་སྟེ། དེ་དག་ནི་འཇིག་རྟེན་ཕལ་པའི་སེམས་སམ་ལམ་བརྒྱད་ཅེས་ཀྱང་བྱའོ། །གཉིས་པ་ནི། རྟེན་པ་གཞི་ཡི། ཞེས་པ་ནས། སྤྱོད་པའི་ས་ཞེས་བྱ། །ཞེས་པའི་བར་གྱིས་བསྟན་ཏེ། དེ་ལྟར་འདུན་པའི་སྟོབས་དང་སྒོ་གསུམ་གྱི་རྩོལ་བའི་ལས་ལ་རྟེན་པ་ཡི་སྒོ་ནས་གོང་མ་རྣམས་ཀྱི་ཡོན་ཏན་འབྱུང་བའི་གཞི་ཡི་ངོ་བོར་གྱུར་པའི་ཕྱིར་ས་ཞེས་བྱའོ། །གཞི་འདི་ལ་ཡང་རྣལ་འབྱོར་གསུམ་དུ་འགྱུར་ཏེ། གཞིའི་དང་པོའི་ལས་ཅན་གསང་སྔགས་ལ་སྔར་ལྟ་བུ་གདེང་ཅན་དུ་མ་སྤྱད་པ་ལས་ཐོག་མར་གསང་བ་མཆོག་གི་དོན་སྤྱིའི་མཚན་ཉིད་ཤེས་ནས་རང་གི་མཚན་ཉིད་ཀྱི་མགོ་གོ་བ་ལ་དཔྱོད་པའི་རྣལ་འབྱོར་དང་། གསང་སྔགས་ཀྱི་སྒོ་དང་པོར་བསླབ་པའི་མཐའ་དམ་པ་བཅུ་ལ་སྦྱོར་ཏེ་སྤྱོད་པས་སློབ་ཅིང་ལྷའི་སྐུ་དང་མི་རྟོག་པའི་ཡིད་ལ་དམིགས་པར་བྱེད་དེ་སྦྱོང་བའི་རྣལ་འབྱོར་དང་། ཐེག་པ་ཆེན་པོའི་བསླབ་པ་བཅུ་ལས་མི་འགྱུར་བར་བྱ་བའི་བསམ་པ་ངེས་པའི་རྣལ་འབྱོར་ཏེ། སྤྱིའི་བདེན་པ་གཉིས་ལ་རང་གི་མཚན་ཉིད་དུ་གོ་བའི་བསམ་པས་མཐོ་དམན་གྱིས་བྱེ་བྲག་གསུམ་མོ། །ཚུལ་དེ་དག་གི་སློབ་པ་ཡང་བསམ་དཔྱོད་དག་པས་སྤྱོད་པ་དང་། མ་དག་པས་སྤྱོད་པ་གཉིས་ཀ་ཡོད་པས་དགེ་སྡིག་གིས་ཕྱོགས་དཀར་བ་དང་གནག་པ་གང་འདྲེན་མར་སྤྱོད་པའོ། །འདི་དག་ཀྱང་ཚོགས་ལམ་པའི་ཕྱིར་དང་པོར་རྣམ་པར་དཀར་བའི་སྤྱོད་པ་ལ་གནས་པ་ཞེས་བྱའོ། །འདི་དག་ནི་རྒྱལ་བའི་བཀའ་ལུང་དང་བླ་མའི་བཀའ་ལ་རག་ལས་ཏེ་སྡོད་ཅིང་དེ་དག་གི་གནང་བ་ཐོབ་ནས་ས་གོང་མ་གོང་མར་རིགས་ཕྱེ་ནས་ངེས་པར་འགྱུར་ཞིང་སྒོ་གསུམ་གྱི་རྩོལ་བས་བསླབ་པ་ལ་མི་གཡེལ་བའི་ལས་ཅན་གྱི་རྣལ་འབྱོར་ཏེ་དེ་ལྟར་ན་ས་པ་དེ་ལ་རྣལ་འབྱོར་བཞི་སྟེ་འདུན་པའི་རྣལ་འབྱོར་ཉིད་ཀྱི་བྱེ་བྲག་གཉིས་པ་ལ་གནས་ཤིང་མོས་པས་སྤྱོད་པའི་ས་ཞེས་བྱའོ། །འདི་དག་ནི་གསང་བ་ལ་སློབ་ཀྱང་རིགས་ངེས་པར་མ་གྱུར་ཏེ་དེ་ནི་རྩོལ་བས་སྦྱོར་བའི་སྐབས་སུ་གྱུར་པས་གསང་བ་ལ་འབད་པའོ། །འདི་ལའང་མཚན་བཅས་མཚན་མེད་གཉིས་ལས། དང་པོ་ནི་ཀུན་འདུས་ལས། གཉིས་པའི་ས་ལ་གནས་པ་ཡི། །བཀའ་སྡོད་ལས་ཀྱི་རྣལ་འབྱོར་ལས། །སོགས་པའི་རྣལ་འབྱོར་རྣམ་བཞི་པོ། །ཏིང་འཛིན་རྩལ་གྱི་ཁྱད་པར་ནི། །ས་བོན་རང་བཞིན་ཡི་གེ་ལས། །འོད་ཟེར་འབར་བར་བཅས་པ་དེ། །དྲི་འབྱུང་ཡུལ་ནི་ཚུན་ཆད་དུ། །འཕྲོ་འདུ་གསལ་བར་བསྐྱེད་པ་ལས། །རང་གི་ཆག་ཚད་གཉིས་བསྒྱུར་བའི། །སྐུ་ཡི་ཁྱོན་ཡང་དེ་ཙམ་མོ། །ཞེས་གསུངས་ཏེ། བཀའ་སྡོད་ལས་ཀྱི་རྣལ་འབྱོར་ནི། ཉམས་ཐོབ་པ་དྲོད་རྟགས་དང་རྟོག་པའི་ལྷ་དེ་ལྷག་མཐོང་གི་དོན་ལ་སྦྱོར་བ་བྱེད་དེ། སྟོན་པ་དང་བླ་མའི་བཀའ་ལ་སྡོད་པའོ། །ལས་དང་པོའི་རྣལ་འབྱོར་ནི། ཉམས་གོམས་པ་ཐོག་མར་བསླབ་པའི་ལས་ལ་མགོ་འཛུག་པའོ། །བསླབ་པ་སྦྱོང་བའམ་སྦྱོར་བའི་རྣལ་འབྱོར་ནི་ཉམས་བརྟན་པ་བསླབ་པའི་མཐའ་བཅུ་ལ་མི་ལྕོག་པ་མེད་པར་འདྲིས་གོམས་སུ་བྱེད་པའོ། །ངེས་པའི་རྣལ་འབྱོར་ནི། ཉམས་མཐར་ཕྱིན་པ་ཡེངས་ཐུབ་ལ་སེམས་བརྟན་ཞིང་མི་བསླུ་བའོ། །ཉམས་དེ་ཚོ་རིན་ཆེན་མྱུ་གུའི་ཏིང་ངེ་འཛིན་ལ་སྦྱར་ཏེ་འཕྲོ་འདུ་ནི་སྣ་ཡིས་དྲི་ཚོར་ཚད་དུའོ། །ཁྱོད་ནི་ཁྲུ་བརྒྱད་དེ་ལུས་གཉིས་འགྱུར་རོ། །གྲངས་ནི་ཡབ་ཡུམ་གཉིས་ཡན་ལག་གི་ལྷ་དང་བཅས་པའོ། །རྣམ་པ་ནི་མཚན་མའི་ལྷའོ། །གཉིས་པ་མཚན་མེད་ཀྱི་དབང་དུ། ས་གཉིས་པ་རྩ་བར་སྦྱོར་བའི་སྐབས་སྨོན་པ་བྱང་ཆུབ་ཀྱི་སེམས་དཔེ་སྐར་མ་ཕལ་པ་ལྟ་བུ་སྟེ། སྒོམ་ཐབས་སྒྲོན་མ་ལས། གཉིས་པ་ནི། ཡིད་ལ་བྱེད་ལྟ་དུག་འཇོམས་སྨན་ཏིང་འཛིན། །ཕྲ་མེན་སྤྱོད་པའོ། །ཞེས་གསུངས་ཏེ། ཆོས་ཉིད་ཡིད་ལ་བྱེད་པའི་ལྟ་བ་དང་ལས་ཀྱི་བག་ཆགས་ཀྱི་དུག་ཐོག་མར་འཇོགས་པའི་སྨན་གྱི་ཏིང་ངེ་འཛིན་དང་། དག་མ་དག་ཕྲ་མེན་དུ་སྤྱོད་པའོ། །དཀའ་འགྲེལ་ལས། འདི་ལ་རིན་ཆེན་མྱུ་གུའི་ཏིང་ངེ་འཛིན་གསུངས་ཏེ་གསང་སྔགས་ཀྱི་བསླབ་པ་མཆོག་གི་གཞིར་གྱུར་པའི་དབང་སྟེ་དོན་དུ་འདྲའོ། །འདིའི་རྣལ་འབྱོར་ཕྲ་མོ་ནི། དེ་ཉིད་ལས། སེམས་བརྒྱད་ལ་བརྟེན་སྟོང་སེམས་གཞི་ལ་བཞི། །བདེ་གཤེགས་བླ་མའི་བཀའ་སྡོད་ལས་ལ་བརྟེན། །དང་པོའི་ལས་ཅན་སྟོང་པར་བདག་དག་བསྒོམ། །བསླབ་པ་སྦྱོང་བར་བྱེད་པས་བྱས་པར་སྤྱོད། །ངེས་པར་རྒྱུ་མེད་འབྲས་བུ་གྲུབ་པར་ལྟ། །ཞེས་གསུངས་ཏེ། སེམས་བརྒྱད་ལ་བརྟེན་ནས་སྟོང་པ་ཉིད་ཀྱི་སེམས་སྐྱེ་བའི་གཞི་ལ་རྣལ་འབྱོར་བཞི་སྟེ་བདེ་གཤེགས་དང་བླ་མའི་བཀའ་ལ་སྡོད་ཅིང་སྒོ་གསུམ་གྱི་བྱ་བའི་ལས་ལ་བརྟེན་པའི་རྣལ་འབྱོར་དང་། ཐོག་མར་སྔགས་ལ་སྤྱོད་པས་དང་པོའི་ལས་ཅན་གྱི་རྣལ་འབྱོར་སྟོང་པ་ཉིད་དུ་བདག་དག་པར་བསྒོམ་པ་དང་། སྔགས་ཀྱི་བསླབ་པའི་མཐའ་བཅུ་ལ་སྦྱོར་བར་བྱེད་དེ་དོན་ཡིད་ལ་བྱས་ཏེ་སྤྱོད་པའི་རྣལ་འབྱོར་དང་། བསླབ་པའི་མཐའ་དེ་ལས་མི་འགྱུར་བའི་བསམ་པས་ངེས་པའི་རྣལ་འབྱོར་གྱིས་སྟོང་པའི་རྒྱུའམ་རྒྱུ་མེད་པ་ལས་འབྲས་བུ་གྲུབ་པར་ལྟ་བའོ། །ལམ་གཉིས་པ་ལ་གསུམ་སྟེ། གལ་ཆེན་སྦྱོང་བའི་ས་བཤད་པ། བསླབ་པ་རྒྱུན་གྱི་ས་བཤད་པ། བསོད་ནམས་གཏེར་གྱི་ས་བསྟན་པའོ། །དང་པོ་ནི། གལ་ཆེན་སྦྱོང་བའི། ཞེས་པ་ནས། སྟོབས་ཆེན་འགྱེད་པའོ། །ཞེས་པའི་བར་གྱིས་བསྟན་ཏེ། ཤིན་ཏུ་བརྩོན་འགྲུས་དང་ལྡན་པས། གསང་སྔགས་ཀྱི་དོན་ལ་མཆོག་ཏུ་ཆེད་ཆེ་བའམ་གལ་ཆེན་པོར་བྱས་ཏེ་སྒོ་གསུམ་གྱི་རྩོལ་བས་བག་ཆགས་ཆེད་དུ་སྦྱོང་ཞིང་སྦྱོར་བར་བྱེད་པའི་ས་འདི་ལ་གསང་སྔགས་དང་གསང་བ་མ་ཡིན་པ་རྣམས་ཀྱི་རིགས་ཆེན་པོ་ལུང་དང་མོས་པའི་ཉམས་ཀྱིས་འབྱེད་པའི་རྣལ་འབྱོར་ཉིད་དེ། འདི་ནས་སླར་ལྡོག་པ་གྱེན་དུ་འབྱུང་བའི་གནས་ཕྱེད་པ་ཡིན་པའི་ཕྱིར་རྣལ་འབྱོར་གྱི་མིང་འགྲུབ་སྟེ། རྣལ་འབྱོར་དེ་ཉིད་རྟེན་ཏེ་དོན་ལ་གནས་ཤིང་སྤྱོད་པའི་ས་ཡིན་ཏེ། ས་འདིར་ཡང་ཡ་ང་བ་སྡིག་པའི་ལས་ཀྱི་བག་ཆགས་དང་ཡ་མི་ངའི་དགེ་བའི་ལས་ཀྱི་བག་ཆགས་རྣམས་འཕྲོ་འདུ་གཅིག་པའི་ཏིང་ངེ་འཛིན་དང་བདེན་པ་གཉིས་ཀྱི་རྟོགས་པ་བརྟན་པས་ཀུན་ནས་གཅོད་ཅིང་སྦྱོང་བ་དང་ཡང་དག་པའི་དོན་ལ་སྦྱོར་བའི་ཚུལ་ཉིད་ཀྱིས་འདིར་བརྩོན་འགྲུས་ཀྱིས་དགེ་བའི་ལས་དབང་དུ་འབྱོངས་ན་མི་འགྱུར་བས་ལས་སྟོབས་ལེགས་པ་དང་། ལེ་ལོའི་དབང་གིས་མ་འབྱོངས་ན་འགྱུར་བས་ལས་སྟོབས་ཉེས་པ་གཉིས་ཀྱི་སྟོབས་ཆེན་པོ་འགྱེད་དེ་བརྩོན་འགྲུས་དང་ཤེས་རབ་ཀྱི་བྱེད་པ་འབྱུང་བའོ། །དེས་ན་བརྩོན་འགྲུས་གལ་ཆེ་སྟེ་སོ་མཚམས་ཀྱི་མཁར་དང་འདྲའོ། །ཚུལ་དེ་ལྟ་བུའི་སྒོ་ནས་བསླབ་པ་ལ་འཇུག་པའི་སྐབས་སོ། །འདི་ལའང་མཚན་བཅས་མཚན་མེད་གཉིས་ལས། དང་པོ་ནི། ཀུན་འདུས་ལས། གསུམ་པའི་ས་ལ་གནས་པ་ཡི། །ཞེས་སོགས་བཞི་པ་དང་ཐུན་མོང་དུ་གསུངས་པས་རྣལ་འབྱོར་གཅིག་སྟེ། རིགས་ཆེན་འབྱེད་པའི་རྣལ་འབྱོར་ཞེས་བྱ་བ་འཁོར་འདས་ཀྱི་རིགས་འབྱེད་པའོ། །ཉམས་དེ་ཉིད་དུག་འཇོམས་སྨན་གྱི་ཏིང་ངེ་འཛིན་ལ་གནས་པ་དང་སྦྱར་ཏེ། འཕྲོ་འདུ་ནི་རྣ་བས་ཐོས་ཚད་དུའོ། །ཁྱོན་ནི་ཁྲུ་བཅུ་དྲུག་ཙམ་སྟེ་ལུས་བཞི་འགྱུར་རོ། །གྲངས་ནི་རིགས་གཅིག་འཁོར་དང་བཅས་པ་ཙམ་མོ། །རྣམ་པ་ནི་ལྷ་ཆུ་ཟླ་ལྟ་བུའོ། །གཉིས་པ་མཚན་མེད་ཀྱི་དབང་དུ། ས་གསུམ་པ་བསླབ་པ་ལ་འཇུག་པའི་སྐབས་ལྡང་བ་བྱང་ཆུབ་ཀྱི་སེམས་དཔེ་སྐར་མ་ཆེན་པོ་ལྟ་བུ་སྟེ། སྒོམ་ཐབས་སྒྲོན་མ་ལས། གསུམ་པའི་ལྟ་སྒོམ་སྤྱོད། །དེ་ཁོ་ན་ཉིད་མཐོང་མ་རག་པ་དང་། རིན་ཆེན་མྱུ་གུ་བརྩོན་འགྲུས་སྤྱོད་པའོ། །ཞེས་གསུངས་ཏེ། དེ་ཁོ་ན་ཉིད་མཐོང་མ་རག་པའི་ལྟ་བ་དང་། གསང་བ་དམ་པའི་རིགས་ཀྱི་གཞི་རིན་ཆེན་མྱུ་གུའི་ཏིང་ངེ་འཛིན་དང་། ལེགས་ཉེས་སྟོབས་འགྱེད་པའི་བརྩོན་འགྲུས་ཀྱི་སྤྱོད་པའོ། །དཀའ་འགྲེལ་དང་མཆན་གཞན་ལས། ཉོན་སྒྲིབ་རགས་པའི་དུག་འཇོམས་པས་སྨན་གྱི་ཏིང་ངེ་འཛིན་ཏེ་དོན་འདྲ་ཡང་འཆད་ཚུལ་གཉིས་ཀར་མཁས་པས་ལམ་གནད་ལ་གོ་སྐྱེད་ཆེའོ། །དེས་ན་སྔ་མ་ལས། གལ་ཆེན་རིགས་ཆེན་འབྱེད་དེ་ལོག་ལྟ་སེལ། །ཉོན་མོངས་རགས་པ་འཇོམས་པས་རིགས་ཆེན་འབྱེད། །ཞེས་གསུངས་ཏེ། རིགས་ཆེན་འབྱེད་པའི་རྣལ་འབྱོར་གྱིས་གོང་གི་ལོག་ལྟ་དེ་དག་སེལ་ཞིང་ཉོན་མོངས་པའི་སྒྲིབ་པ་རགས་པ་འཇོམས་པས་རིགས་ཆེན་པོ་འབྱེད་དེ་གྱེན་དུ་འབྱུང་བའི་གནས་སོ། །གཉིས་པ་ནི། བསླབ་པ་རྒྱུན་གྱི། ཞེས་པ་ནས། སྤྱོད་པའི་ས་ཞེས་བྱ། །ཞེས་པའི་བར་གྱིས་བསྟན་ཏེ། དེ་ལྟར་རིགས་ཕྱེ་ནས་ཐེག་པ་ཆེན་པོར་ངེས་པའི་རིགས་བསྟན་པའི་ཕྱིར། འདིར་གཟོད་ཅིག་ཐེག་པ་ཆེན་པོའི་གསང་བ་མཆོག་གི་བསླབ་པའི་མཐའ་བཅུ་ལ་གནས་པ་ཉིད་རྒྱུན་གྱི་བར་ཆད་པ་མེད་པར་སློབ་པར་བྱེད་པའི་ས་འདི་ལ་ཡང་རྣལ་འབྱོར་དྲུག་སྟེ། དེ་ཡང་རྟོགས་པའི་དྲོད་རྟགས་དང་བསྒོམ་པའི་དྲོད་རྟགས་ཆེ་ཆུང་ལས། འདིར་རྟོགས་པ་དང་ལྷ་བསྒོམ་པའི་དྲོད་རྟགས་ཆུང་ངུ་སྟེ། སྔ་མ་དག་ལ་ལྷ་བསྒོམ་པ་དང་རྩོལ་བ་ཡོད་ཀྱང་རིགས་མ་ངེས་པས་གསང་སྔགས་རང་གི་ངོ་བོ་གཉིས་སུ་མེད་པའི་དོན་གཏན་ནས་མ་སྐྱེས་པ་དེ་ཉིད། འདིར་བསླབ་པའི་མཐའ་བཅུ་ལ་སྦྱངས་པས་རྟོགས་པའི་དྲོད་མགོ་གཡོ་བ་ལ་གནས་པ་དང་། དྲོད་དེ་ཐོབ་ནས་མགོ་ལྡང་བ་དང་། དེ་ཡང་མི་འགྱུར་བར་བརྟན་པའི་དྲོད་དང་གསུམ་འབྱུང་ངོ་། །དེ་དག་ཤིང་ལ་མེའི་དྲོད་ལྟར་ཐུན་མོང་གི་དྲོ་བ་ལྟ་བུའོ། །དེ་བཞིན་དུ་རྟགས་ཆེན་པོ་གཏོས་ཆེན་གྱི་འཇིག་རྟེན་རང་བཞིན་མེད་ཅིང་མི་འཇིགས་པའི་མཚན་མ་དག་མགོ་གཡོ་བ་དང་། དེ་ཐོབ་པ་ཉིད་དང་། དེ་ནས་བརྟན་ཞིང་མི་གཡོ་བ་ཡི་རྣལ་འབྱོར་དང་གསུམ་སྟེ། དེ་ལྟར་རྣལ་འབྱོར་རྣམ་པ་དྲུག་པོ་དེ་དག་རྣམས་ཀྱི་བསླབ་པ་གང་ཞེ་ན། རྒྱུད་ཐོས་པས་དགྲོལ་བར་བསླབ་པ་ལ་སོགས་པ་འཆད་པར་འགྱུར་བའི་བསླབ་པའི་མཐའ་ཆེན་པོ་བཅུ་དག་ཟག་པ་དང་བཅས་པས་མཐར་ཕྱིན་པར་བྱེད་ཅིང་གནས་པའོ། །དེ་ལས་རིག་པ་སྐྱེ་བའི་ཚུལ་ནི། དེ་ལྟར་བསླབ་པས་དྲོད་རྟགས་སྐྱེས་ནས་རྟོགས་པའི་ཡེ་ཤེས་འཕེལ་བ་ནི། དཔེ་ཇི་ལྟར་ན་ཟླ་བ་ཡར་གྱི་ངོ་ལ་ཚེས་གཅིག་ནས་ཉ་ཡི་བར་དུ་གསལ་བར་འཕེལ་ཏེ་འགྲོ་བ་བཞིན་ས་བཅུ་ཡིས་སྒྲུབས་པས་བསླབ་པའི་ཡེ་ཤེས་སྐྱེད་དུ་གསལ་ཞིང་འཕེལ་བར་འགྱུར་ཏེ་ཡེ་ཤེས་གཅིག་ཏུ་མི་སྡོད་པས་ཐུན་མོང་གི་རྩེ་མོ་ལྟ་བུའོ། །ཚིག་ལྷག་མ་ནི། དེ་ནས་གསང་སྔགས་བདེན་པ་གཉིས་མཉམ་པ་ཆེན་པོའི་དོན་ལ་བཟོད་པ་ཐོབ་ནས་མི་སྐྲག་ཅིང་སྔངས་པ་དང་བྲལ་བའི་རྟོགས་པ་འབྱུང་བས་དེ་ལ་ངོ་མཚར་ཆེ་བའམ་ཡ་མཚན་སྐྱེ་བ་ཉིད་དེ། ཇི་སྐད་དུ། ས་ཐོབ་འཇིགས་པ་ལྔ་དང་བྲལ། །བཟོད་ཐོབ་ངན་སོང་ཡོང་མི་ལྟུང་། །ཞེས་གསུངས་པ་ལྟར་ངན་འགྲོའི་འཇིགས་པ་དང་བྲལ་བའོ། །དེས་ན་ཆོས་མཉམ་པའི་ཡུལ་ལ་སོ་སོར་རྟོག་ཅིང་དཔྱོད་པའི་སེམས་ཀྱི་ཤེས་རབ་ཀྱིས་དོན་ཇི་ལྟ་བ་ཉིད་ལ་འཇུག་པར་འགྱུར་བའི་ཚུལ་གྱིས་ཞུགས་ནས་རྟོགས་པར་བྱེད་པའི་སེམས་དཔའ་དེས་ཆོས་མཉམ་པ་ལ་དཔྱོད་པའི་ཤེས་རབ་ཀྱིས་ངན་འགྲོར་འགྲོ་བའི་ཡ་ང་བའི་གནས་ཀྱི་རྒྱུད་སྦྱངས་ནས་སླར་ངན་སོང་དུ་མི་ལྡོག་སྟེ། དེ་ནི་དགོན་པར་དབེན་པའི་གནས་སུ་འཇུག་ཅིང་ཡེ་ཤེས་ཚོལ་བར་བྱེད་དེ་ཐུན་མོང་གི་འཇིག་རྟེན་པའི་ཆོས་ཀྱི་མཆོག་ལ་ཞུགས་པ་ལྟ་བུའོ། །དེའི་ཚེ་བསམ་པའི་བར་ཆད་ཀྱི་སེམས་གཡེང་འཁྲུག་དང་འདུ་བྱེད་ལ་སོགས་པ་དག་ཀྱང་དེ་ལ་འབྱུང་སྟེ། བདུད་ས་ལྟ་བུ་ཉེ་དུ་ལ་འཛིན་པ། ཆུ་ལྟ་བུ་གྲགས་སྙན་འདོད་པ། མེ་ལྟ་བུ་འདོད་སྲེད་སྐྱེ་བ། རླུང་ལྟ་བུ་ཁེ་གྲགས་གཉེར་བ། མུན་པ་ལྟ་བུ་བླ་མ་ངན་པས་དབང་ལས་མི་ཤེས་པ་སོགས་དང་། གཞན་ཡང་དཀར་པོའི་ཕྱོགས་ཀྱི་བདུད་ཀྱི་སྤྱོད་ཡུལ་བཅོ་བརྒྱད་རྣམས་འབྱུང་ངོ་། །དེ་ལྟར་དྲུག་ཀྱང་བསྡུ་ན་གསུམ་སྟེ། གསང་སྔགས་མཚོན་པའི་སྒོ་ལུང་གི་གནས་ཟབ་མོ་ལ་བརྟེན་ཅིང་གཉིས་མེད་ཀྱི་དོན་ལ་བཟོད་པ་ཐོབ་ཀྱང་ད་དུང་དྲོད་གཡོ་བ་ཙམ་ལས་མ་ཐོབ་པར་སྒོམ་པའི་རྣལ་འབྱོར་དང་། དེ་ལ་གོམས་ནས་སྤྱོད་ལམ་བཞིར་བསླབ་པ འི་མཐའ་བཅུ་དང་མི་འབྲལ་བར་གནས་པས་སྤྱོད་པ་རྒྱུན་གྱི་རྣལ་འབྱོར་གཉིས་མེད་ཀྱི་རྟོགས་པ་གཡོས་པའི་ཡེ་ཤེས་འཕེལ་བར་བྱེད་པ་དང་། དེ་ལ་རྒྱུན་དུ་གནས་པས་རྟོགས་པའི་མཚན་མ་ལ་བརྟེན་ནས་དྲོད་དང་རྟགས་ཀྱི་རྣལ་འབྱོར་དང་གསུམ་ལྡན་ཏེ། འདི་ལ་གཡོ་ཐོབ་ཀྱི་ཆ་ཕྱེ་བས་རྣལ་འབྱོར་དྲུག་གོ། །དེ་དག་ཀྱང་དེ་ལ་གནས་ཤིང་སྤྱོད་པའི་ཕྱིར་ས་ཞེས་བྱ་སྟེ་འདུ་ཤེས་འགྱུར་བའི་སྐབས་སོ། །འདི་ལའང་མཚན་བཅས་དང་མཚན་མེད་གཉིས་ལས། དང་པོ་ནི། ཀུན་འདུས་ལས། རྣལ་འབྱོར་ལུང་གི་བཀའ་སྒོ་ལས། །སོགས་པའི་རྣལ་འབྱོར་རྣམ་གསུམ་པོ། །དམིགས་པའི་ཏིང་འཛིན་འདི་ལྟར་འདོད། །ལྷ་ཡི་ས་བོན་གང་ཡིན་པ། །རང་བཞིན་ཡི་གེར་བསྒྱུར་བྱས་ཏེ། །འོད་ཟེར་འབར་དང་བཅས་པ་ཡིས། །ཐོས་པའི་ཡུལ་ནི་ཚུན་ཆད་དུ། །འཕྲོ་འདུ་གསལ་བར་བྱས་པ་ལས། །རང་གི་ཆག་ཚད་བཞི་བསྒྱུར་ཙམ། །སྐུ་ཡི་ཁྱོན་ཡང་དེ་ཙམ་མོ། །ཞེས་གསུངས་ཏེ། གསང་སྒོ་ལུང་གི་རྣལ་འབྱོར་ནི། ཉམས་ཐོབ་པ་ཤིན་ཏུ་གསལ་བརྟན་དུ་འདོད་ཅིང་ལུང་ཟབ་མོ་ལ་བརྟེན་ནས་བསྒོམ་པའོ། །སྤྱོད་པ་རྒྱུན་གྱི་རྣལ་འབྱོར་ནི། ཉམས་གོམས་པ་སྤྱོད་ལམ་བཞིར་ཟག་བཅས་ཀྱི་བསླབ་པ་ལ་མངོན་དུ་སྤྱོད་པའོ། །མཚན་མ་རྟགས་ཀྱི་རྣལ་འབྱོར་ནི། ཉམས་བརྟན་པ་ཏིང་ངེ་འཛིན་ལ་རྒྱུན་དུ་གནས་པས་རྟགས་དང་མཚན་མ་འབྱུང་བའོ། །དེ་ལ་དྲོད་གཡོ་ཐོབ་བརྟན་པ་གསུམ། རྟགས་གཡོ་ཐོབ་བརྟན་པ་གསུམ་སྟེ་དྲུག་ཏུ་ཕྱེ་ན་རྣལ་འབྱོར་བཞི་བཅུར་འགྱུར་རོ། །ཉམས་དེ་ཚོ་ནི་རྩེ་གཅིག་འཕྲོ་བའི་ཏིང་ངེ་འཛིན་ལ་སྦྱར་ཏེ། འཕྲོ་འདུ་ནི་མིག་གིས་གཟུགས་མཐོང་ཚད་དུའོ། །ཁྱོན་ནི་ཁྲུ་སུམ་ཅུ་སོ་གཉིས་ཙམ་སྟེ་ལུས་བརྒྱད་འགྱུར་རོ། །གྲངས་ནི་རིགས་གསུམ་འཁོར་དང་བཅས་པ་ཙམ་མོ། །རྣམ་པ་ནི་གཟུང་འཛིན་དང་བྲལ་བའི་ལྷའོ། །གཉིས་པ་མཚན་མེད་ཀྱི་དབང་དུ་ས་བཞི་པ་འདུ་ཤེས་བསྒྱུར་བའི་སྐབས། སྦྱོར་བ་བྱང་ཆུབ་ཀྱི་སེམས་དཔེ་ཟླ་བ་ཚེས་གཅིག་པ་ལྟ་བུ་སྟེ། སྒོམ་ཐབས་སྒྲོན་མ་ལས། བསླབ་པ་གཅིག་ལྟ་ཚོགས་ཆེན་རྫོགས་པ་དང་། །རྩེ་གཅིག་པ་ཡི་སྤྱོད་པ་བཞི་པ་ཡིན། །ཞེས་གསུངས་ཏེ། གསང་སྔགས་ཀྱི་བསླབ་པའི་དོན་ལ་གཅིག་ཏུ་ལྟ་བ་དང་། ཟག་པ་དང་བཅས་པའི་ཚོགས་ཆེན་རྫོགས་པའི་ཏིང་ངེ་འཛིན་སྒོམ་པ་དང་བྱ་བ་རྩེ་གཅིག་པའི་སྤྱོད་པ་ལ་སློབ་པའོ། །དཀའ་འགྲེལ་ལས། རྩེ་གཅིག་འཕྲོ་བའི་ཏིང་ངེ་འཛིན་དུ་གསུངས་པ་ནི། དམིགས་པ་རྩེ་གཅིག་གི་ངང་ནས་འཕྲོ་འདུ་ནུས་པ་དང་པོར་ཐོབ་པ་སྟེ་དོན་གཅིག་གོ། །འདིའི་རྣལ་འབྱོར་ཕྲ་མོ་ནི། དེ་ཉིད་ལས། སྦྱོར་གནས་བསླབ་རྒྱུན་ལ་གསུམ་གསང་སྒོ་ལུང་། །དྲོད་ལ་བསླབ་པས་རྩེ་མོར་འཕེལ་བ་དང་། །ཆོས་ཉིད་དོན་ལ་མི་སྐྲག་བཟོད་པ་ཐོབ། །སྤྱོད་པ་རྒྱུན་གྱིས་གོང་ནས་གོང་དུ་འཕེལ། །མཚན་མ་རྟགས་ལ་སེམས་ཀྱི་དྲོད་རྟགས་ཏེ། །གཡོ་ཐོབ་བརྟན་པའི་དྲོད་གསུམ་རྟགས་ལ་གསུམ། །གཞི་པོ་གསུམ་དང་དོན་དགུར་གནས་པ་ཡིན། །ཞེས་གསུངས་ཏེ། སྦྱོར་ལམ་ལ་གནས་པའི་བསླབ་པ་རྒྱུན་གྱི་ས་ལ་རྣལ་འབྱོར་གསུམ་སྟེ། གསང་སྒོ་ལུང་གི་རྣལ་འབྱོར་ལུང་ཟབ་མོ་ལ་བརྟེན་ཅིང་སྒོམས་པས་དྲོད་གཡོ་བ་ཙམ་ཐོབ་ནས་བསླབ་པའི་མཐའ་བཅུ་ལ་མི་འབྲལ་བར་བསླབས་པས་རྟོགས་པའི་ཡེ་ཤེས་རྩེ་མོར་འཕེལ་བ་དང་། ཆོས་ཉིད་མཉམ་པ་ཆེན་པོ་གསང་སྔགས་ཀྱི་དོན་ལ་མི་སྐྲག་ཅིང་བཟོད་པ་ཐོབ་པས་ངོ་མཚར་སྐྱེ་བའོ། །སྤྱོད་པ་རྒྱུན་གྱི་རྣལ་འབྱོར་གྱིས་བསླབ་པ་བཅུ་ལ་དུས་རྒྱུན་དུ་གནས་པས་ཡེ་ཤེས་གོང་ནས་གོང་དུ་འཕེལ་བ་དང་། མཚན་མ་རྟགས་ཀྱི་རྣལ་འབྱོར་སེམས་ཉིད་རྟོགས་པ་དང་གོམས་པའི་དྲོད་རྟགས་བྱུང་བ་སྟེ། དེ་ལ་དབྱེ་ན་དྲོད་ལ་གཡོ་བའི་རྣལ་འབྱོར། ཐོབ་པའི་རྣལ་འབྱོར། བརྟན་པའི་རྣལ་འབྱོར་གསུམ། རྟགས་ལའང་དེ་ལྟར་གསུམ་སྟེ་རྣལ་འབྱོར་དྲུག་དང་། གཞི་པོ་གསུམ་སྟེ་དོན་ལ་དགུའོ། །གསུམ་པ་ནི། བསོད་ནམས་གཏེར་གྱི། ཞེས་པ་ནས། མཐའ་བཅུ་སྤྱིར་ཆིབ་པའོ། །ཞེས་པའི་བར་གྱིས་བསྟན་ཏེ། དེ་ལྟར་བསླབ་པའི་ཡེ་ཤེས་འཕེལ་བའི་བསོད་ནམས་སྐད་ཅིག་མ་ལ་བརྟེན་ནས་ཟད་པ་མེད་པར་རཏྣའི་གཏེར་གྱི་ཡོན་ཏན་ལྟར་དུ་འབྱུང་བ་དང་ལྡན་པའི་ཕྱིར་ས་ཡི་མིང་ཡང་འགྲུབ་བོ། །དེ་ལྟ་བུའི་ས་འདི་ལ་ཡང་གོང་དུ་བསླབ་པའི་མཐའ་བཅུ་དང་མ་བྲལ་བར་གནས་ཏེ་སྤྱོད་པ་རྒྱུན་གྱི་རྣལ་འབྱོར་ཉིད་ཀྱི་དོན་དང་མ་བྲལ་བར་མཐར་ཕྱིན་པ་དེ་ཡིས་བསམ་པའི་མོས་པ་དང་ཏིང་ངེ་འཛིན་གྱིས་གཟུང་འཛིན་རགས་པའི་མི་ཤེས་པའི་དྲི་མ་དག་ཅིང་མཉམ་པའི་དོན་ལ་བློ་འདུན་པའི་སྒོ་ནས་བདེ་བ་ཆ ེན་པོ་ནམ་མཁའི་ངོགས་བཞིན་མཐོང་ལ་མ་རག་པར་གནས་པ་ནི་བར་ཆད་མེད་པའི་ལམ་སྟེ། བསླབ་པ་ལ་རྒྱུན་དུ་གནས་ནས་ཤིན་ཏུ་གསལ་བརྟན་དུ་གྱུར་པས་འཕགས་པའི་ས་དང་པོ་ཤེས་རབ་མཆོག་གི་རྩལ་ཅན་མཐོང་བའི་ལམ་དུ་འགྲོ་བའི་བློ་དང་ལྡན་པ་ཡིས་དྲུག་པའི་སྟེགས་ལྟ་བུའི་བསྟི་གནས་ཀྱི་ས་ཡིན་ཏེ། འདིར་མི་སྡོད་པའི་ཕྱིར་རོ། །དེར་ནི་རྟོགས་པར་བྱེད་པའི་ཟག་པ་དང་བཅས་པའི་བསླབ་པའི་མཐའ་བཅུ་ཉིད་མཐར་སྐྱེད་དུ་བྱ་བ་མེད་པར་སྤྱིར་ཆིབ་ཅིང་ཁོང་དུ་ཆུད་པར་གྱུར་པའོ། །དེ་ནི་སྤྱོད་ཆེན་ལ་འཇུག་པའི་སྐབས་ཀྱི་ས་སྟེ། དེ་ཡན་ཆད་དུ་འཁོར་བར་མི་ལྡོག་པ་མ་ཐོབ་པས་ལྡོག་པའང་ཡོད་དོ། །ས་དེ་གསུམ་རྣལ་འབྱོར་གཅིག་གི་ཁྱད་པར་ཏེ། ལྡོག་བཅས་ཀྱི་སའོ། །འདི་ལའང་མཚན་བཅས་དང་མཚན་མེད་གཉིས་ལས། དང་པོ་ནི། ཀུན་འདུས་ལས། དེ་བཞིན་རྣལ་འབྱོར་རིམ་པ་བཞིན། །ལྷ་ཡི་ཁྱད་པར་གང་ཡིན་པ། །ཡི་གེའི་རིམ་པ་བཞིན་བྱས་ནས། །འཕྲོ་འདུའི་ཚད་ཀྱང་དེ་བཞིན་ཏེ། །རིམ་པ་བཞིན་དུ་སྦྱར་ནས་ཀྱང་། །འཕྲོ་འདུ་གསལ་བར་གྱུར་པ་དང་། །སེམས་ཀྱིས་ལྕོགས་ཚད་ཚུན་ཆད་དུ། །སྐུ་ཡི་ཁྱོན་གྱི་ཁྱད་པར་ཡང་། །ཆོས་ཀྱི་དབྱིངས་ཀྱི་མཐའ་ཀླས་པར། །སྐུ་ཡི་ཁྱོན་གྱིས་གང་བར་བསྒོམ། །ཞེས་ས་ལྔ་པ་ནས་བཅུ་པའི་བར་ཐུན་མོང་དུ་གསུངས་པས། ས་འདིར་རྣལ་འབྱོར་གཅིག་སྟེ། སྤྱོད་པ་རྒྱུན་གྱི་རྣལ་འབྱོར་ཞེས་བྱ་བ་ས་ལྔ་པའི་སྤྱོད་པ་རྒྱུན་ལ་སྟོན་ནས་འདི་ཉིད་ཀྱི་བར་ཆད་མེད་པའི་བསླབ་པ་མངོན་དུ་སྤྱོད་དེ་དེ་ལ་རྒྱུན་དུ་གནས་པའོ། །རྣལ་འབྱོར་འདིར་ནི་ཚོགས་རྟེན་རྫོགས་པའི་ཏིང་ངེ་འཛིན་ལ་གནས་པ་སྟེ། འཕྲོ་འདུ་ནི་གླིང་གཅིག་ཚུན་ཆད་དུའོ། །ཁྱོན་ནི་ཁྲུ་དྲུག་ཅུ་རྩ་བཞི་ཙམ་སྟེ་ལུས་བཅུ་དྲུག་འགྱུར་རོ། །གྲངས་ནི་རིགས་ལྔ་གཙོ་འཁོར་དུ་བཅས་པའོ། །རྣམ་པ་ཆོས་ཉིད་མཉམ་པ་ཉིད་ཀྱི་ལྷའོ། །གཉིས་པ་མཚན་མེད་ཀྱི་དབང་དུ། ས་ལྔ་པ་སྦྱང་ཆེན་ལ་འཇུག་པའི་སྐབས་དང་། འཇུག་པ་བྱང་ཆུབ་ཀྱི་སེམས་དཔེ་ཟླ་བ་ཚེས་གཉིས་པ་ལྟ་བུ་སྟེ། སྒོམ་ཐབས་སྒྲོན་མ་ལས། བར་ཆད་མེད་ལྟ་རྩེ་གཅིག་འཕྲོ་བ་དང་། །བཏང་སྙོམས་རྒྱུན་གྱི་སྤྱོད་པ་ལྔ་པའོ། །ཞེས་གསུངས་ཏེ། བར་ཆད་མེད་པར་ཟག་མེད་དུ་སྦྱོར་བའི་ལྟ་བ་དང་། རྩེ་གཅིག་ལས་མི་འགྱུར་བར་འཕྲོ་བའི་ཏིང་ངེ་འཛིན་སྒོམ་པ་དང་། ཟག་བཅས་ཀྱི་བསླབ་པ་མཐར་ཆིབ་ཅིང་དེ་དང་མི་འབྲལ་བར་བཏང་སྙོམ་རྒྱུན་གྱི་སྤྱོད་པ་ལ་སློབ་པའོ། །དཀའ་འགྲེལ་དང་མཆན་གཞན་ལས། ཚོགས་ཆེན་རྫོགས་པའི་ཏིང་ངེ་འཛིན་དུ་གསུངས་པ་ནི། བསླབ་པ་སྤྱིར་ཆིབ་པས་ཏེ་དོན་འདྲ་ཡང་ཟུར་གཉིས་ཀ་ལྟར་ཤེས་པས་ལམ་གནད་ལ་མཁས་པར་འགྱུར་པའོ། །དེས་ན་སྔ་མ་ལས། བསོད་ནམས་གཏེར་ལ་སྤྱོད་པ་རྒྱུན་ཉིད་དེ། །འཇིག་རྟེན་ཆོས་མཆོག་བསླབ་པ་མཐར་ཕྱིན་ཡིན། །ཞེས་གསུངས་ཏེ། གོང་གི་བསླབ་པ་བཅུའི་སྤྱོད་པ་དང་མ་བྲལ་བའི་རྒྱུན་གྱི་རྣལ་འབྱོར་ཉིད་དེ་གཟུང་འཛིན་གྱི་དྲི་མ་རགས་པ་དག་པས་ཐུན་མོང་གི་འཇིག་རྟེན་ཆོས་མཆོག་ལྟ་བུ་སྟེ་ཟག་བཅས་ཀྱི་བསླབ་པ་བཅུ་སྐྱེད་དུ་བྱར་མེད་པར་མཐར་ཕྱིན་པ་ཡིན་ནོ། །གསུམ་པ་མཐོང་ལམ་ས་གཅིག་གི་བདག་ཉིད་ས་དྲུག་པ་རྟེན་པས་ཁྱད་པར་དུ་འགྲོ་བའི་ས་བཤད་པ་ནི། རྟེན་པས་ཁྱད་པར། ཞེས་པ་ནས། དམ་པར་འབྱིན་པའོ། །ཞེས་པའི་བར་གྱིས་བསྟན་ཏེ། འདིར་གོང་དུ་བསླབ་པའི་མཐའ་བཅུ་རྩེར་ཆིབ་པས་ཆོས་ཉིད་ཟབ་མོ་གསང་སྔགས་ཀྱི་དོན་སྒོམས་ཏེ་ནམ་མཁའི་ངོས་བཞིན་རྟོགས་པས་མཐོང་ལམ་སྟེ། རྟོགས་པའི་དོན་འདི་ལ་རྟེན་ནས་མཐར་ཐུག་གི་བར་དུ་རྟོགས་པ་ཇེ་གསལ་དུ་གྱུར་པས་འདི་ཉིད་ཀྱི་རྒྱུད་མཐུན་པའི་ཁྱད་པར་སྐྱེད་དུ་འགྲོ་བ་ཡིན་པའི་ཕྱིར་མིང་གི་ངེས་ཚིག་ཀྱང་འགྲུབ་བོ། །ས་འདི་ལ་ཡང་རྣལ་འབྱོར་གྱི་བྱེ་བྲག་གིས་བདུན་ཏེ། དང་པོ་ཇི་ལྟ་བའི་བདེན་པ་མཐོང་བས་འཁོར་བའི་དུཿཁ་དང་ཟག་བཅས་ཀྱི་ལམ་དུ་རྩོལ་བ་ལས་ཐོག་མར་དབུགས་ཆེན་པོ་འབྱིན་ཏེ་ངལ་སོས་པ་ཐོབ་པའི་རྣལ་འབྱོར་ཉིད་དེ། ཐུན་མོང་བྱང་ཆུབ་སེམས་དཔའི་ས་དང་པོ་པ་ལྟ་བུའོ། །འོན་ཀྱང་ལྟ་བ་མཉམ་པ་ནི་མ་ཡིན་ནོ། །དེར་མ་ཟད་དེ་བཞིན་གཤེགས་པའི་མཚན་ཐོས་པ་དང་། ཞལ་མཐོང་བ་དང་། སེམས་བསྐྱེད་པ་དང་། ལམ་སྦྱང་བ་རྣམས་ཀྱི་དབུགས་འབྱིན་པའང་འདིར་ཐོབ་བོ། །ཐེག་པ་ཆེན་པོ་གསང་བའི་དོན་གདེང་དུ་གྱུར་པས་དེའི་རྒྱུད་དུ་འབྱུང་ཞིང་འཇུག་པ་མི་གཏོང་བའི་ཕྱིར་རིགས་ཆེན་འཛིན་པའི་རྣལ་འབྱོར་དང་། བླང་དོར་དང་བཟང་ངན་མི་འབྱེད་པའི་ལྟ་བའི་སྟོབས་ཀྱིས་ཡོན་ཏན་མ་འདྲེས་ཡོངས་རྫོགས་སུ་གསལ་བར་གྱུར་པས་མཉམ་རྫོགས་ཆེ་བའམ་ཆེན་པོའི་རྣལ་འབྱོར་དང་། སྤྱོད་ལམ་ཅི་སྤྱད་པ་ཐམས་ཅད་གསང་བ་ཇི་བཞིན་པ་ཉིད་དུ་གདེང་ཅན་དུ་ངེས་པར་སྤྱོད་པའི་རྣལ་འབྱོར་དང་། ཤེས་རབ་ཀྱི་གདེང་གི་རྩལ་ཆེན་པོར་སྦྱོང་བས་ལྷུན་གྲུབ་ཀྱི་དོན་ལ་སྦྱོར་བའི་རྣལ་འབྱོར་དང་། རིག་པ་ཉིད་ཆོས་ཉིད་ཇི་བཞིན་པའི་ཡུལ་དང་དབྱེར་མེད་པར་ཞུགས་པས་སྒོམ་ལམ་ལ་འཇུག་པར་བྱེད་པའི་རྣལ་འབྱོར་དང་། ཐམས་ཅད་ཡེ་ཤེས་ཆེན་པོ་ཡུལ་དང་བྲལ་བར་རྟོགས་པས་སྒོམ་ལམ་ཐོབ་ལ་མ་རག་པར་ཆོས་ཉིད་རིག་པ་ལ་སྦྱོར་བའི་རྣལ་འབྱོར་ཏེ། དེ་དག་ཀྱང་ཐུན་མོང་གི་ས་དང་པོ་རབ་ཏུ་དགའ་བ་ནས་བདུན་པ་རིང་དུ་སོང་བའི་བར་ལྟ་བུ་སྟེ། སྤྱིར་མཐོང་སྒོམ་གྱི་ལམ་གཉིས་ཀ་ཚང་ཡང་འདིར་མཐོང་ལམ་འབའ་ཞིག་གི་ཁྱད་པར་དུ་རིགས་ཏེ་ས་བདུན་པོ་དེ་ཉིད་འདིར་རྫོགས་པར་གྱུར་པས་སྐྱེད་དུ་འགྲོ་བའོ། །སྟེ་ཞེས་ཚིག་ལྷག་མ་ནི་སློབ་མའི་ཚུལ་འབྱུང་བའོ། །དེ་བས་ན་མི་ལྡོག་པར་བསླབ་པར་བྱ་བའི་ཟག་པ་མེད་པའི་རྒྱུ་བཅུ་དང་འབྲས་བུའི་མཐའ་བཅུ་ལ་ལོབས་པར་གྱུར་པ་ཉིད་ས་ལྔ་པར་གོམས་པར་བྱེད་པའི་ཚུལ་དུ་འདིར་སྦྱོར་བར་བྱེད་པས་དབུགས་ཆེན་པོ་འབྱིན་པའི་ཚེ་ངལ་བསོ་བ་ལ་གནས་པ་ལས་ཆོས་སོ་ཅོག་ཐམས་ཅད་ཀྱི་རང་གི་མཚན་ཉིད་མ་འདྲེས་ལ་ཡོངས་སུ་རྫོགས་པར་ཇི་ལྟ་བ་བཞིན་མཐོང་ཞིང་རྟོགས་པའོ། །དེས་ན་འཁོར་བར་རམ་མཚན་མར་མི་ལྡོག་པ་ཡང་དག་པ་ཐོབ་པ་ལ་ད་བསླབ་པ་བཅུ་ཀ་སྔ་མ་ལྟར་གོམས་པར་བྱར་མེད་དེ། ཟག་བཅས་ཀྱི་སྐབས་ལྟར་སློབ་མི་དགོས་པས་འདིའི་སྐབས་སུ་མ་བརྗོད་པའོ། །དེ་ཡང་སྤྱིར་ལམ་གྱི་སྒྲིབ་པ་དག་ཅིང་ཡེ་ཤེས་འཆར་ཚུལ་གྱི་སའི་རིམ་པ་སྨོས་པ་འདི་དག་རྣམས་ཀྱང་མི་དམིགས་པའི་དོན་མཐར་ཐུག་པ་སྙིང་པོ་བྱང་ཆུབ་ལ་སྦྱོར་བའི་གཞི་ཡི་དམིགས་གཅིག་པ་ཡིན་ཀྱང་མི་མཐུན་པ་ནི་ས་འོག་མ་སོ་སོ་རང་རང་གི་སྤྱོད་ཡུལ་དུ་གོང་མ་གོང་མར་གྱུར་ཏེ་ཐུན་མོང་མ་ཡིན་པའི་གནས་སུ་གྱུར་པ་འོག་མས་གོང་མའི་དོན་མ་མཐོང་བས་སྒྲིབ་པ་སྟེ་རྟེན་པ་དང་སྐྱེད་བྱེད་ཀྱི་སྐབས་ལ་ས་ཞེས་འདོགས་ཏེ་རྩི་བར་བྱེད་ཅིང་འོག་མ་རང་གི་ཞེན་པ་སྤངས་ནས་གོང་མའི་དོན་མཐོང་བའི་ཡེ་ཤེས་རེ་རེ་འཆར་ཏེ་བོགས་སུ་འབྱུང་བས་ན་སའི་རིམ་པ་བཀོད་པའོ། །ཚུལ་དེས་ནས་རྣམས་ཐམས་ཅད་སྙིང་པོ་བྱང་ཆུབ་ཀྱི་བསླབ་པའི་མཐའ་རུ་དོན་གཅིག་ལས་མེད་པ་ལ། ས་དྲུག་པར་འཁོར་བར་མི་ལྡོག་པ་དང་། ས་བརྒྱད་པས་མཚན་མར་མི་ལྡོག་པ་དང་། ལ་སོགས་པ་ཞེས་གཞན་བསྡུ་བའི་དོན་གྱིས་རྫོགས་པ་སྤྱིར་ཆིབས་ཀྱི་ས་ཆེན་པོའི་བར་རྣམས་སུ་རང་རིག་པ་ལ་མཉམ་པར་བཞག་པའི་ཏིང་ངེ་འཛིན་ས་ལྔ་པ་ནས་རིམ་པ་དྲུག་པོར་བྱིང་རྒོད་ལ་སོགས་པ་ལས་རིང་དུ་གྱུར་པའི་ས་གང་དེར་གོང་མའི་བདེན་པ་མཐོང་བའི་བོགས་རེ་རེ་འབྱུང་བ་ལ་སྐབས་དེའི་སྒྲིབ་པ་རེ་འཇོམས་པའི་ནུས་པའི་རྩལ་རེ་འབྱུང་བ་དང་བཅས་པའི་ཡེ་ཤེས་རེ་རེ་འཆར་བ་སྟེ། དེ་ཡང་གྲངས་ཀྱི་ཐ་མ་རང་བྱུང་གི་ཡེ་ཤེས་ཆེན་པོ་ཤར་ནས་སྐྱེད་དུ་བྱ་བ་མེད་པ་ཉིད་ཀྱིས་རྫོགས་པར་གྱུར་པའོ། །དེ་དག་གི་སྐབས་སུ་ཡང་མཐར་ཕྱིན་པ་ས་བཅུ་པ་ཆོས་ཀྱི་སྤྲིན་ནམ་རྫོགས་པ་སྤྱིར་ཆིབས་དང་། དགུ་པ་ལེགས་པའི་བློ་གྲོས་སམ་གདལ་བ་ཆོས་ཉིད་ཀྱི་ས་ཐོབ་པ་དང་བདུན་པ་ལུང་ཆེན་ཐོབ་པ་སྒོམ་ལམ་པ་དང་། བརྒྱད་པ་མཚན་མར་མི་ལྡོག་པའམ་གནས་པ་མི་འགྱུར་བའི་ས་མཐར་ལམ་པ་དང་། དྲུག་པ་མཐོང་ལམ་མི་ལྡོག་པ་རྣམས་ལ་རིམ་པ་བཞིན་དུ་ལུང་བསྟན་པ་འབྱུང་བ་ཡང་། དྲུག་པའམ་བརྒྱད་པ་ལ་རྨི་ལམ་དུ་ལུང་བསྟན་པ་འབྱུང་བ་དང་ནི། བདུན་པའམ་དགུ་པ་ལ་དེ་ལས་གསལ་བར་སྒྲ་སྙན་པ་བར་སྣང་དང་གཞལ་ཡས་ལ་སོགས་པ་ལས་བྱུང་ནས་ལུང་སྟོན་པ་དང་། མཐར་ལམ་བཅུ་པ་ལ་རྒྱལ་བའི་སྐུ་མངོན་སུམ་དུ་བྱུང་ནས་ངེས་པར་ཤིན་ཏུ་གསལ་བར་ལུང་སྟོན་པ་རྣམས་འབྱུང་ངོ་། །དེ་ལྟར་ཅི་རིགས་པར་ཡང་འདིར་རྨི་ལམ་ན་ལུང་སྟོན་པ་འབྱུང་བའི་ཚུལ་གྱིས་རྨི་ལྟས་ཀྱི་མཚན་མ་བརྒྱད་ཀྱང་རྣལ་འབྱོར་གྱི་སྐབས་སྐབས་སུ་འབྱུང་བས། སྒྲ་བརྙན་དང་མངོན་སུམ་གྱི་ཡང་སྤྲུལ་པ་དང་ལོངས་སྤྱོད་རྫོགས་པ་སོ་སོར་སྣང་བས་སོ་སོ་ལ་ལུང་བསྟན་པ་སྦྱར་ཏེ་འཆད་པར་ཡང་འགྱུར་རོ། །དེ་ལྟར་འཚམས་པར་ལུང་སྟོན་པའི་ཚུལ་ཡང་། རྣལ་འབྱོར་དེ་དག་རྡོ་རྗེ་ཐེག་པའི་ལམ་གྱི་རིག་འཛིན་དུ་ལུང་སྟོན་པ་དང་། རྡོ་རྗེ་འཆང་ཆེན་པོ་ཉིད་གྲུབ་པའི་འབྲས་བུར་ལུང་སྟོན་པ་སྟེ། དེ་ཡང་མིང་གི་ལུང་གསང་བའི་མཚན་རྡོ་རྗེ་རྣལ་འབྱོར་པ་ཆེ་གེ་མོ་ཞེས་བྱར་བོས་ནས་དེ་ཉིད་དང་མཐུན་པར་རིག་པ་འཛིན་པའི་ས་གནས་ཀྱི་ཁམས་ཇི་སྙེད་པ་དང་། སངས་རྒྱས་ཀྱི་ཞིང་ཁམས་ཀུན་ཏུ་བསྒྲགས་ཏེ་གྲགས་པར་བྱས་ནས་འབྲས་བུའི་རྣལ་འབྱོར་དམ་པར་མངོན་དུ་འབྱིན་པར་བྱེད་པའོ། །ས་འདི་དང་ལུང་ཆེན་ཐོབ་པའི་རྣལ་འབྱོར་གྱི་རྩ་བ་གཉིས་ལས་ཡན་ལག་མཚན་ཉིད་ཀྱི་ས་བཅུར་འགྱུར་པའོ། །སྐབས་བཅུ་ལས་རོ་ཉིད་ཚོར་བའི་སྐབས་སོ། །འདི་ལའང་མཚན་བཅས་དང་མཚན་མེད་གཉིས་ལས། དང་པོ་ནི། ལྷའི་མཚན་ཉིད་མཉམ་པ་ཉིད་དུ་གསལ་བའི་རྣལ་འབྱོར་གྱི་རིམ་པ་བདུན་ཏེ། དབུགས་ཆེན་འབྱིན་པའི་རྣལ་འབྱོར་ནི། ཉམས་གཡོ་བ་ཟག་བཅས་ཀྱི་རྩོལ་བས་དུབ་པ་ལ་ཟག་མེད་དུ་སློབ་པས་དབུགས་འབྱིན་པའོ། །རིགས་ཆེན་འཛིན་པའི་རྣལ་འབྱོར་ནི་ཉམས་ཐོབ་པ་ཏིང་ངེ་འཛིན་ལ་གྲིམས་ཕྱུང་བས་མཐོང་བའི་དོན་ལས་མི་འགྱུར་བའོ། །མཉམ་རྫོགས་ཆེན་པོའི་རྣལ་འབྱོར་ནི། ཉམས་གོམས་པ་མཉམ་པ་ཉིད་ཀྱི་ལྷའི་ཏིང་ངེ་འཛིན་ཚད་དུ་ཕྱིན་པའོ། །ངེས་པར་འབྱིན་པའི་རྣལ་འབྱོར་ནི། ཉམས་བརྟན་པ་མཐོང་བའི་དོན་གདེང་དུ་བྱས་པའོ། །རྩལ་ཆེན་སྦྱོང་བའི་རྣལ་འབྱོར་ནི། ཉམས་མཐར་ཕྱིན་པའི་ཐོབ་པ་ཤིན་ཏུ་གདེང་དུ་བྱས་ཏེ་ཏིང་ངེ་འཛིན་བརྒྱ་སྟོང་ལ་རྩལ་སྦྱོང་བའོ། །ཡུལ་ལ་འཇུག་པའི་རྣལ་འབྱོར་ནི། ཉམས་མཐར་ཕྱིན་པའི་གོམས་པ་མཐོང་བ་ལ་རྩལ་འབྱོངས་པས་སྒོམ་ལམ་ལ་འཇུག་པའོ། །རིག་པར་སྦྱོང་བའི་རྣལ་འབྱོར་ནི། ཉམས་མཐར་ཕྱིན་པའི་བརྟན་པ་སྒོམ་ལམ་ལ་སྦྱོར་ངེས་པར་བདེན་པའོ། །དེ་ཚོའི་ཉམས་ནི་མངོན་པར་རྟོགས་པའི་ཏིང་ངེ་འཛིན་ལ་སྦྱར་ཏེ། འཕྲོ་འདུ་ནི་གླིང་བཞི་རི་རབ་དང་བཅས་པ་ཚུན་ཆད་དུའོ། །ཁྱོན་ནི་ཁྲུ་བརྒྱ་ཉི་ཤུ་རྩ་བརྒྱད་དམ་ཡང་ན་གླིང་གཅིག་ཁེངས་པ་ཙམ་མོ། །གྲངས་ཀྱང་གླིང་གཅིག་ལྷས་ཁེངས་པའོ། །རྣམ་པ་ནི་རང་གི་མཚན་ཉིད་གསལ་བའི་ལྷའོ། །གཉིས་པ་མཚན་མེད་ཀྱི་དབང་དུ། ས་དྲུག་པ་རོ་མྱོང་བའི་སྐབས། དགའ་བ་བྱང་ཆུབ་ཀྱི་སེམས། དཔེ་ཟླ་བ་ཚེས་གསུམ་པ་ལྟ་བུ་སྟེ། སྒོམ་ཐབས་སྒྲོན་མ་ལས། མངོན་རྟོགས་པ་ཡི་ལྟ་བ་ཏིང་ངེ་འཛིན། །ཤེས་རབ་མཐུན་པའི་སྤྱོད་པ་དྲུག་པ་ཡིན། །ཞེས་གསུངས་ཏེ། དབྱིངས་དང་ཡེ་ཤེས་དབྱེར་མེད་ཀྱི་དོན་མངོན་སུམ་དུ་རྟོགས་པའི་ལྟ་བ་དང་། དེའི་ངང་ལ་གནས་པའི་ཏིང་ངེ་འཛིན་སྒོམ་ལ་ཤེས་རབ་ཆེན་པོའི་བདེན་པ་མཐོང་བ་དང་མཐུན་པའི་མི་དམིགས་པའི་སྤྱོད་པ་ལ་སློབ་པའོ། །འདིའི་རྣལ་འབྱོར་ཕྲ་མོ་ནི། དེ་ཉིད་ལས། དྲུག་པ་ལ་བདུན་དབུགས་ཆེན་འབྱིན་པ་ནི། །བདག་གཉིས་མེད་རྟོགས་མཐོང་ལམ་ས་རབ་དགའོ། །རིགས་ཆེན་འཛིན་པས་གཉིས་པ་དྲི་མ་བྲལ། །མཉམ་རྫོགས་བདེན་པ་གཉིས་མཉམ་གསུམ་པ་བྱེད། །ངེས་སྤྱོད་ཐུགས་ཆུད་དོན་མཛད་བཞི་པ་འཕྲོ། །རྩལ་སྦྱོང་དབྱེར་མེད་སྦྱོང་བས་ས་ལྔ་པ། །རིག་པས་ཆོས་ཉིད་ཡུལ་ལ་འཇུག་པས་དྲུག །རིག་པར་སྦྱོར་བས་ཉོན་མོངས་དག་པས་བདུན། །ཞེས་གསུངས་ཏེ། འཁོར་བའི་དུཿཁ་ལས་ངལ་སོས་པས་དབུགས་ཆེན་འབྱིན་པའི་རྣལ་འབྱོར་ནི། བདག་གཉིས་མེད་པའི་དོན་ཇི་ལྟ་བ་བཞིན་རྟོགས་པས་ཐུན་མོང་བྱང་ཆུབ་སེམས་དཔའི་མཐོང་ལམ་རབ་དགའ་ལྟ་བུ་སྟེ་ལྟ་བ་མཉམ་པའང་མ་ཡིན་ནོ། །གསང་སྔགས་ཀྱི་རིགས་ཆེན་འཛིན་པའི་རྣལ་འབྱོར་ས་གཉིས་པ་དྲི་མ་མེད་པ་ལྟ་བུ། མཉམ་རྫོགས་ཆེན་པོའི་རྣལ་འབྱོར་བདེན་པ་གཉིས་མཉམ་ཉིད་དུ་རྫོགས་པར་རྟོགས་པས་ས་གསུམ་པ་འོད་བྱེད་པ་ལྟ་བུ། ངེས་པར་སྤྱོད་པའི་རྣལ་འབྱོར་གསང་བ་ཇི་བཞིན་པ་ཉིད་ཐུགས་སུ་ཆུད་ནས་དོན་མཛད་པས་ས་བཞི་པ་འོད་འཕྲོ་ལྟ་བུ། རྩལ་ཆེན་སྦྱོང་བའི་རྣལ་འབྱོར་ཤེས་རབ་ཀྱི་རྩལ་ཆེན་པོས་དབྱེར་མེད་ཀྱི་དོན་སྦྱོང་བས་ས་ལྔ་པ་སྦྱང་དཀའ་བ་ལྟ་བུ། རིག་པས་ཆོས་ཉིད་ཇི་བཞིན་པའི་ཡུལ་ལ་འཇུག་པའི་རྣལ་འབྱོར་ས་དྲུག་པ་མངོན་དུ་གྱུར་པ་ལྟ་བུ། ཡེ་ཤེས་ཆེན་པོ་ཡུལ་མེད་དུ་རྟོགས་པས་སྒོམ་ལམ་གྱི་རིག་པར་སྦྱོར་བའི་རྣལ་འབྱོར་ཉོན་མོངས་པའི་སྒྲིབ་པ་དག་པས་ས་བདུན་པ་རིང་དུ་སོང་བ་ལྟ་བུ་སྟེ། འདིར་མཐོང་ལམ་གྱི་ཁྱད་པར་དུ་གྱུར་པར་རིག་པར་བྱའོ། །བཞི་པ་སྒོམ་ལམ་ས་གཅིག་གི་བདག་ཉིད་བདུན་པ་དམིགས་པས་འབྲས་བུ་སྐྱེ་བའི་ས་བཤད་པ་ནི། དམིགས་པས་འབྲས་བུ། ཞེས་པ་ནས། ཏིང་འཛིན་སྦྱོར་བའོ། །ཞེས་པའི་བར་གྱིས་བསྟན་ཏེ། ལུང་ཆེན་ཐོབ་པའི་རྣལ་འབྱོར་སྒོམ་ལམ་དངོས་གང་སྙམ་པ་ལ། དེ་ལྟར་གསང་སྔགས་མཐོང་བའི་དོན་ལ་འཇུག་ཅིང་དམིགས་ཏེ་གོམ་པས་མཐར་ལམ་གྱི་འབྲས་བུ་སྐྱེ་བ་ནི་སྐབས་བཅུ་ལས་ཡུལ་ལ་འཇུག་པའི་སྐབས་ཏེ། བསྒོམ་པའི་དྲོད་རྟགས་ད་དུང་མ་ཐོབ་སྟེ་དེ་ལ་ཉེ་བའོ། །དེ་ལྟ་བུ་རྟེན་སྐྱེད་ཀྱི་གནས་སུ་གྱུར་པའི་ས་འདི་ལ་ཡང་དབྱེ་ན་གསུམ་སྟེ། ཕྱག་རྒྱ་ཆེན་པོའི་རིགས་འཛིན་གྲུབ་པའི་རྣལ་འབྱོར་སྒོམ་ལམ་ཐོབ་པ་ཀྲི་ཡ་དང་། དེ་ལ་གོམས་ཤིང་ཉམས་པ་མེད་པར་རྣལ་འབྱོར་ཆེའམ་ཆེན་པོ་ཨུ་པ་ཡ་དང་། མཚན་མ་ལས་ངེས་པར་འབྱུང་སྟེ་མཐར་ལམ་ལ་སྦྱོར་བའི་རྣལ་འབྱོར་ཡོ་ག་དང་གསུམ་སྟེ་བྱང་ཆུབ་སེམས་དཔའི་ས་བརྒྱད་པ་ནས་བཅུ་པའི་བར་དང་ཡང་སྦྱར་རོ། །དེ་ཡང་འདིར་ཆོས་ཉིད་ཇི་བཞིན་པར་རིག་པ་རྣལ་དུ་འབྱོར་བ་དང་། དེ་པས་ཀྱང་སྐྱེད་དུ་གྱུར་པས་ལྟོས་ནས་ཆེན་པོར་འདོགས་པ་དང་མཚན་མ་གཉིས་ལས་ཀྱང་ངེས་པར་འབྱུང་བའི་ཕྱིར་ཏེ། འདི་དག་ཐུན་མོང་གི་རྣལ་འབྱོར་སྒོ་སོ་སོའི་ཀྲི་ཡོག་མ་ཡིན་ཏེ། རྒྱུད་གཅིག་གི་ལམ་དབང་དུ་བཞག་པའི་ཕྱིར་ཏེ་དག་པའི་ས་གསུམ་ཡང་དེ་ལྟར་ངེས་སོ། །རྒྱལ་བ་རིགས་ལྔ་ལ་སོགས་པའི་དབང་བསྐུར་ཞིང་ཐུགས་ཀྱི་བྱིན་རླབས་ལས་རྒྱལ་བའི་སྲས་ཀྱི་རྒྱུད་དུ་སྐྱེས་པས་སེམས་དཔའ་བཅུ་དྲུག་ལྟ་བུར་འབྱུང་ཞིང་། ལྷའི་ཆ་ལུགས་འཛིན་པས་རྒྱལ་བའི་སྲས་པོ་སེམས་དཔའ་བཅུ་དྲུག་གི་སྤྲུལ་པའི་རྒྱལ་ཚབ་བྱེད་པས་གདུང་འཚོབ་པ་རྟོགས་པ་དང་གོམས་པས་ཁྱད་པར་གྱིས་ཤེས་རབ་དང་ཏིང་ངེ་འཛིན་གྱི་རྩལ་འཕང་ཀུན་རྫོགས་ཤིང་ཆུབ་པར་བྱེད་དེ། ཡང་དག་པར་རྫོགས་ཏེ་མཐར་ཕྱིན་པའི་ས་གང་ལ་ངེས་པའི་ཏིང་ངེ་འཛིན་རྣལ་འབྱོར་དུ་སྒོམས་པས་སྦྱོར་བར་བྱེད་ཅིང་རིགས་རྒྱུད་འཛིན་པ་རྡོ་རྗེ་འཛིན་མཆོག་དམ་པ་དང་། རྒྱལ་བ་མང་པོ་མཐོང་བས་སྟུག་པོ་བཀོད་པའོ། །ཐུན་མོང་མ་ཡིན་པར་འདི་ཉིད་ཀྱི་རྟོགས་པ་ཁོ་ནའི་དབང་དུ་ན་གསང་སྔགས་གཉིས་སུ་མེད་པར་མཐོང་ནས་སྒོམ་ལམ་དེ་ལ་ཤིན་ཏུ་མི་གཡོ་བའི་རྣལ་འབྱོར་གྲུབ་པ་དང་། དེ་ལ་གནས་པ་རྣལ་འབྱོར་མཆོག་ཏུ་ཆེ་བའི་མི་གཡོ་བ་ཐོབ་པ་དང་། དེ་ཉིད་བརྟན་པས་ངེས་པར་འབྱུང་སྟེ་མཐར་ཕྱིན་པའི་ལམ་ཐོབ་ལམ་རག་པ་ནི། རྒྱལ་བའི་ཐུགས་ལས་སྐྱེས་པའི་རྒྱལ་སྲས་སུ་དབང་བསྐུར་བྱིན་གྱིས་བརླབས་པ་ལས་འབྱུང་ཞིང་གདུང་འཚོབ་པས་ཁྱད་པར་རྩལ་འཕང་གི་གོམས་པ་མཐར་ཕྱིན་ཏེ་བསླབ་པ་རྫོགས་པའི་དོན་གང་ལ་ཏིང་ངེ་འཛིན་མཆོག་གི་རྣལ་འབྱོར་དུ་གནས་པའོ། །འདི་ལའང་མཚན་བཅས་དང་མཚན་མེད་གཉིས་ལས། དང་པོ་ལའང་རྣལ་འབྱོར་གསུམ་སྟེ། གྲུབ་པའི་རྣལ་འབྱོར་ནི་ཉམས་ཐོབ་མ་ཐག་པ་ཕྱག་རྒྱ་ཆེན་པོའི་རིག་འཛིན་གྲུབ་པའོ། །རྣལ་འབྱོར་ཆེན་པོ་ནི། ཉམས་བརྟན་པ་དེའི་ངང་ལ་གནས་པའོ། །ངེས་པར་འབྱུང་བའི་རྣལ་འབྱོར་ནི། ཉམས་མཐར་ཕྱིན་པ་མཐར་ལམ་ལ་སྦྱོར་ངེས་པའོ། །ཉམས་དེ་ཚོ་ནི་མི་ཟད་མཛོད་ཀྱི་ཏིང་ངེ་འཛིན་ལ་སྦྱོར་ཏེ། འཕྲོ་འདུ་ནི་སྟོང་གསུམ་ཚུན་ཆད་དུའོ། །ཁྱོན་ནི་ཁྲུ་ཉིས་བརྒྱ་ལྔ་བཅུ་ང་དྲུག་གམ་ཡང་ན་སྟོང་གསུམ་ལྷས་ཁེངས་པའོ། །གྲངས་ཀྱང་སྟོངས་གསུམ་ལྷས་གང་བའོ། །རྣམ་པ་ནི་ཆོས་ཉིད་ཟག་མེད་ཀྱི་ལྷའོ། །གཉིས་པ་མཚན་མེད་ཀྱི་དབང་དུ། ས་བདུན་པ་ཡུལ་ལ་འཇུག་པའི་སྐབས། མི་འགྱུར་བ་བྱང་ཆུབ་ཀྱི་སེམས། དཔེ་ཟླ་བ་ཚེས་བཞི་པ་ལྟ་བུ་སྟེ། སྒོམ་ཐབས་སྒྲོན་མ་ལས། བདུན་པ་མི་གཡོ་བ་ཡི་ལྟ་བ་དང་། །མི་ཟད་མཛོད་ཀྱི་ཏིང་འཛིན་མི་གཡོ་སྤྱོད། །ཅེས་གསུངས་ཏེ། ཆོས་ཉིད་མི་གཡོ་བའི་དོན་རྟོགས་པའི་ལྟ་བ་དང་། དམིགས་མེད་ཀྱི་དོན་སྒོམ་པའི་མི་ཟད་མཛོད་ཀྱི་ཏིང་ངེ་འཛིན་དང་། ནང་དུ་ཡང་དག་འཇོག་ལས་མི་གཡོ་བར་སྤྱོད་པ་རྣམས་སོ། །འདིའི་རྣལ་འབྱོར་ཕྲ་མོ་ནི། དེ་ཉིད་ལས། བདུན་པ་ལ་གསུམ་གྲུབ་པའི་རྣལ་འབྱོར་ནི། །མཚན་མ་ལས་གྲོལ་མི་གཡོར་གནས་པས་བརྒྱད། །ལེགས་པ་ཆེར་ལྡན་རྣལ་འབྱོར་ཆེན་པོ་དགུ། །ངེས་འབྱུང་གཞིར་གནས་ཆོས་ཀྱི་སྤྲིན་ཆེན་ཏེ། །དམ་ཚིག་ཡེ་ཤེས་འབྱེད་པས་ཕྱི་རྒྱུད་གསུམ། །ཞེས་གསུངས་ཏེ། ཆོས་ཉིད་རིག་པ་ལ་གྲུབ་པའི་དོན་རྣལ་མ་ལ་འབྱོར་བ་ནི། མཚན་མ་ལས་གྲོལ་ཏེ་ཅིས་ཀྱང་མི་གཡོ་བར་གནས་པས་ས་བརྒྱད་པ་མི་གཡོ་བའོ། །དེ་བས་ཀྱང་སྐྱེད་དུ་གྱུར་ཏེ་ལེགས་པ་ཆེར་ལྡན་པའི་རྣལ་འབྱོར་ཆེན་པོ་ནི་ས་དགུ་པ་ལེགས་པའི་བློ་གྲོས་སོ། །ངེས་པར་འབྱུང་བའི་རྣལ་འབྱོར་ནི། དེ་ཉིད་ཆོས་ཀྱི་གཞིར་གནས་པས་ས་བཅུ་པ་ཆོས་ཀྱི་སྤྲིན་ཆེན་ཉིད་དེ། རིམ་པ་བཞིན་དམ་ཚིག་པ་དང་ཡེ་ཤེས་པ་འབྱེད་ཅིང་འཕྲོ་འདུ་བྱེད་པས་ཕྱི་རྒྱུད་ཀྲི་ཡ་ཨུ་པ་ཡོ་ག་གསུམ་མོ། །ལམ་ལྔ་པ་ལ་གསུམ་སྟེ། གནས་པ་མི་འགྱུར་བའི་ས་བཤད་པ། གདལ་བ་ཆོས་ཉིད་ཀྱི་ས་བསྟན་པ། རྫོགས་པ་སྤྱིར་ཆིབས་ཀྱི་ས་བཤད་པའོ། །དང་པོ་ནི། གནས་པ་མི་འགྱུར། ཞེས་པ་ནས། གནས་ན་ལོངས་སྤྱོད་པའོ། །ཞེས་པའི་བར་གྱིས་བསྟན་ཏེ། གཉིས་སུ་མེད་པའི་དོན་ལ་རིག་པ་རྣལ་དུ་གནས་པ་ཉིད་ལས་མི་འགྱུར་བའི་ངང་དུ་ཕེབས་པས་སྐབས་བཅུ་ལས་ཀྱང་རྟོག་ཆེན་ལ་ཕེབས་པའི་སྐབས་ཉིད་དུ་གསུངས་ཏེ། ཏིང་ངེ་འཛིན་མཐར་ཕྱིན་པ་ལ་སྐྱོན་དབང་དུ་འགྱུར་བ་མེད་པས་རྟགས་ཆེན་པོ་དང་ལྡན་པའི་ས་འདི་ལ་ཡང་རྣལ་འབྱོར་གསུམ་སྟེ། ཐམས་ཅད་ཀྱང་རང་རིག་པའི་ཆོ་འཕྲུལ་སྣང་བར་རྟོགས་པས་དབང་བསྒྱུར་ཐབས་ཀྱི་ཏིང་ངེ་འཛིན་དང་ལྡན་པ་སྟེ། སྦྱོར་སྒྲོལ་ལ་སོགས་པ་བླང་དོར་མེད་པའི་སྤྱོད་པ་རྨད་དུ་བྱུང་བར་སྤྱོད་ཅིང་དམ་རྫས་སོགས་ལ་ཉམ་ང་མེད་པར་རོལ་པའི་རྣལ་འབྱོར་དང། འདོད་ཡོན་ལྔ་ལ་སོགས་པ་ཅི་སྤྱད་ཡང་ཚོགས་གཉིས་སུ་འགྱུར་བར་ཤེས་པས་ཚོགས་ཆེན་འདུས་པའི་རྣལ་འབྱོར་དང་། འདི་ནས་ལུང་ཆེན་པོའི་ཚོགས་སྒྲུབ་པས་དེ་གྲུབ་ནས་ཚོམ་བུ་དང་བཅས་པ་རིག་འཛིན་གྱི་སར་གཤེགས་པར་ཡང་གསུངས་སོ། །མཉམ་པ་ཆེན་པོའི་ལྟ་སྤྱོད་ཟུང་དུ་འབྲེལ་བས་རིག་པའི་རྩལ་ཆེན་པོ་དང་ལྡན་པས་ཆོ་འཕྲུལ་བཞི་འཐོབ་ཅིང་འཆད་པའི་སྐྱེས་བུར་ནུས་པས་ཡོན་ཏན་རྫོགས་པའི་རྣལ་འབྱོར་དང་གསུམ་དུ་རྫོགས་པར་ཤེས་པར་བྱ་སྟེ། དེ་དག་ནི་ཆ་ལུགས་ལྷའི་སྐུ་ཕྱག་རྒྱ་ཆེན་པོ་ཉིད་དུ་གསལ་བས་སྒྱུ་མ་ལྟ་བུའི་སྐུ་ཅན་ཕྱག་རྒྱ་ཆེན་པོའི་རིག་འཛིན་ལ་གནས་པ་ཡིན་ནོ། །དེ་ནི་དཔེར་ན་འཁོར་ལོས་སྒྱུར་བའི་རྒྱལ་པོ་ཆེན་པོ་གང་གི་མཚན་དཔེ་དང་ལོངས་སྤྱོད་མཐོང་བ་དང་འདྲ་སྟེ་བདག་ཉིད་ཆེན་པོ་རྒྱལ་བ་རྡོ་རྗེ་འཆང་ཆེན་པོའི་ཞལ་མཐོང་བས་དགོངས་པ་ལྷུན་གྱིས་གྲུབ་པའི་ངང་ནས་དབང་ཕྱུག་ཆེན་པོའི་གནས་ཀྱི་འོག་མིན་ཆེན་པོའི་འཁོར་དུ་འདུས་ནས་སེམས་དཔའ་བཅུ་དྲུག་གི་མཚན་དཔེ་ཐུན་མོང་མ་ཡིན་པ་དང་ལྡན་ཏེ་འབྲས་བུའི་གཞིའི་ས་མཆོག་རྫོགས་པའི་འཁོར་སྨིན་པ་ཞིང་ཁམས་དག་པའི་གནས་ན་ཐམས་ཅད་ལ་མ་ཆགས་པར་ལོངས་སྤྱོད་པས་པདྨ་སྤྱན་གྱི་ས་ནོན་ཏེ་དགོངས་པ་བརྡའི་ཆོས་བསྟན་པ་ལ་སྤྱོད་པའོ། །འདི་ལའང་མཚན་བཅས་དང་མཚན་མེད་གཉིས་ལས། དང་པོ་ལའང་རྣལ་འབྱོར་གསུམ་སྟེ། རྨད་བྱུང་རོལ་པའི་རྣལ་འབྱོར་ནི། ཉམས་ཐོབ་པ་སྤྱོད་པ་བླང་དོར་མེད་པར་ཞུགས་ནས་སློབ་པའོ། །ཚོགས་ཆེན་འདུས་པའི་རྣལ་འབྱོར་ནི། ཉམས་གོམས་པ་བླང་དོར་མེད་པ་ལ་སློབ་པའི་ཚོགས་བསྒྲུབ་པའོ། །རྩལ་ཆེན་རྫོགས་པའི་རྣལ་འབྱོར་ནི། ཉམས་མཐར་ཕྱིན་པ་ཚོགས་གྲུབ་ནས་རིག་འཛིན་གྱི་རྩལ་རྫོགས་པའོ། །ཉམས་འདི་དག་ནི་འབྱུང་ཆེན་སྤྲུལ་པའི་ཏིང་ངེ་འཛིན་དང་། དབང་བསྒྱུར་ཐབས་ཀྱི་ཏིང་ངེ་འཛིན་ལ་སྦྱོར་ཏེ། འཕྲོ་འདུ་ནི་རྣམ་རྟོག་གི་སེམས་ཀྱིས་ཁྱབ་ཚད་དུའོ། །ཁྱོན་ཀྱང་སེམས་ཀྱིས་ཁྱབ་ཚད་དོ། །གྲངས་ཀྱང་སེམས་ཀྱིས་ཁྱབ་ཚད་དོ། །རྣམ་པ་ནི་ལྷུན་གྲུབ་ཀྱི་ལྷ་ཐོབ་པའོ། །གཉིས་པ་མཚན་མེད་ཀྱི་དབང་དུ་ས་བརྒྱད་པ་རྟོག་ཆེན་ལ་ཕེབས་པའི་སྐབས། རིག་པ་བྱང་ཆུབ་ཀྱི་སེམས་དཔེ་ཟླ་བ་ཆས་ལྔ་པ་ལྟ་བུ་སྟེ། སྒོམ་ཐབས་སྒྲོན་མ་ལས། བརྒྱད་པ་ཡེ་ཤེས་རིག་པའི་ལྟ་བ་དང་། འབྱུང་ཆེན་སྤྲུལ་པའི་ཏིང་འཛིན་རྟུལ་ཞུགས་སྤྱོད། །ཅེས་གསུངས་ཏེ། གཉིས་མེད་ཀྱི་ཡེ་ཤེས་ལ་རིག་པ་རྣལ་དུ་ཕེབས་པའི་ལྟ་བ་དང་། འབྱུང་བ་ཆེན་པོ་ལྔ་ལ་གཞལ་ཡས་དང་ལྷར་སྤྲུལ་པའི་ཏིང་ངེ་འཛིན་དང་། སྤང་བླང་མེད་པ་བརྟུལ་ཞུགས་ཀྱི་སྤྱོད་པ་ལ་གནས་པའོ། །རྩ་བའི་རྒྱུད་ལས་ཏིང་ངེ་འཛིན་བཅུ་གཉིས་གསུངས་པས་འདིར་ཡང་དབང་བསྒྱུར་ཐབས་ཀྱི་ཏིང་ངེ་འཛིན་སྦྱར་རོ། །འདིའི་རྣལ་འབྱོར་ཕྲ་མོ་ནི། དེ་ཉིད་ལས། བརྒྱད་པ་ལ་གསུམ་རྨད་བྱུང་རོལ་པ་ནི། །རྣལ་འབྱོར་ཆེན་པོ་བསྐྱེད་པའི་སྐྱེད་པའོ། །ཚོགས་ཆེན་འདུན་པས་བསྐྱེད་པའི་རྫོགས་པར་རྫོགས། །རྩལ་ཆེན་རྫོགས་པ་བསྐྱེད་པའི་རྫོགས་པ་ཆེ། །ཞེས་གསུངས་ཏེ། བླང་དོར་མེད་པར་རྨད་བྱུང་རོལ་པར་སྤྱོད་པའི་རྣལ་འབྱོར་ནི། རྣལ་འབྱོར་ཆེན་པོ་བསྐྱེད་པའི་སྐྱེད་པའི་རིམ་པའོ། །ཅི་སྤྱད་ཚོགས་ཆེན་གཉིས་སུ་ཤེས་ཏེ་འདུན་པའི་རྣལ་འབྱོར་ནི་བསྐྱེད་པའི་རྫོགས་པར་རྫོགས་པ་ཡིན་ལ། ལྟ་སྤྱོད་འབྲེལ་བའི་རིག་པའི་རྩལ་ཆེན་རྫོགས་པའི་རྣལ་འབྱོར་ནི། བསྐྱེད་པའི་རྫོགས་པ་ཆེན་པོ་སྟེ་ཕྱག་རྒྱའི་རིག་འཛིན་ཆེན་པོའོ། །གཉིས་པ་ནི། གདལ་བ་ཆོས་ཉིད། ཅེས་པ་ནས། སྒྱུ་མ་ཡིན་སྤྱོད་པའོ། །ཞེས་པའི་བར་གྱིས་བསྟན་ཏེ། དབྱིངས་དང་ཡེ་ཤེས་གཉིས་སུ་མེད་པའི་ཆོས་ཉིད་མཉམ་པ་ཉིད་དུ་ལྷུན་གྱིས་གྲུབ་པས་ཐམས་ཅད་རིག་པའི་རྩལ་དུ་སྣང་བར་རྟོགས་པ་ཉིད་གདེང་དུ་གྱུར་པས་རིག་པ་ཕྱི་ནང་གི་ཆོས་ཀུན་ལ་གདལ་བར་ཁྱབ་སྟེ་མུ་མེད་པ་ཉིད་དུ་བསྣུམས་པའི་ཆོས་ཉིད་དག་པར་གསལ་བས་གདེང་དུ་གྱུར་པའི་སྐབས་སུའང་གསུངས་ཏེ། བསྒོམ་པའི་མཐའི་རྟགས་ཆེན་པོ་འདིར་ཐོབ་པའི་ས་མཆོག་འདི་ལ་ཡང་རྣལ་འབྱོར་གསུམ་སྟེ། སྣང་བ་ཀུན་ཏུ་བཟང་མོའི་རོལ་པར་རྟོགས་ཏེ་དབྱིངས་སུ་སྤྱོད་པ་ལ་འདོད་ཡོན་ལྔ་ཆོས་ཉིད་ཀྱི་རྒྱན་དུ་རྫོགས་པར་ཤེས་པས་ལོངས་སྤྱོད་རྫོགས་པ་ཉིད་ཀྱི་རྣལ་འབྱོར་དམ་པ་དང་། སྟོང་པ་ཉིད་དང་སྙིང་རྗེ་རོ་མཉམ་པས་ཉོན་མོངས་དང་སྡུག་བསྔལ་ལ་སོགས་པ་ཆོས་ཐམས་ཅད་བདེ་བ་ཆེའམ་ཆེན་པོ་བྱང་ཆུབ་ཀྱི་སེམས་རང་བྱུང་གི་ཡེ་ཤེས་ཀུན་ཏུ་བཟང་པོར་རྟོགས་པའི་རྣལ་འབྱོར་དང་། དབྱིངས་དང་ཡེ་ཤེས་གཉིས་སུ་མེད་པར་ངང་ཆེན་པོའི་ཐིག་ལེར་ཡོངས་སུ་རྫོགས་པར་རྟོགས་པའི་རྣལ་འབྱོར་དང་གསུམ་ཉིད་དུ་ནི་སྣང་བ་ལ་ཡང་། ཆོས་ཀྱི་དབྱིངས་ཀྱི་ཡུལ་ལ་སྦྱོར་བ་དང་། སྙིང་རྗེ་འབྱུང་བས་དོན་མི་འགོག་པ་དང་། སྙིང་རྗེ་ཆེ་དང་ཆོས་ཉིད་ཐ་མི་དད་པའི་ཕྱིར་རིག་པའི་ཡེ་ཤེས་དེ་ཉིད་དང་སྦྱར་བ་སྟེ་ཤེས་བྱ་རིལ་དེ་ལྟར་ཤེས་པར་བྱས་པས་དབྱིངས་དང་ཡེ་ཤེས་གཉིས་མེད་ཀྱི་ངང་དུ་འབྲས་བུ་ཐམས་ཅད་རྫོགས་ཏེ་མཐར་ཕྱིན་པའོ། །འདི་དག་ཀྱང་ལྷུན་གྱིས་གྲུབ་པའི་རིག་འཛིན་ཆེན་པོ་སྟེ། སྤྱོད་ཡུལ་ཡེ་ཤེས་འགག་མེད་སྒྱུ་མ་ལྟ་བུའི་སྐུར་ཡེ་ནས་རང་གསལ་བའང་དེ་ལྟར་རྣམ་པར་དག་པའི་སྒྱུ་མ་ལྟ་བུར་ཤར་བ་ཡིན་ཏེ་རིག་པས་གཉིས་སུ་མེད་པར་གསལ་བའི་ངང་ལ་གཞན་དོན་སྤྱོད་པའི་མཛད་པ་ཡང་སྣང་བར་འགྱུར་བས་ཡི་གེ་འཁོར་ལོ་ཚོགས་ཆེན་གྱི་སའོ། །འདི་ལའང་མཚན་བཅས་དང་མཚན་མེད་གཉིས་ལས། དང་པོ་ལའང་རྣལ་འབྱོར་གསུམ་སྟེ། རོལ་པ་རྒྱན་གྱི་རྣལ་འབྱོར་ནི། ཉམས་ཐོབ་པ་འདོད་ཡོན་ལྔ་མ་སྤང་པར་ཆོས་ཉིད་ཀྱི་རྒྱན་དུ་ལོངས་སྤྱོད་པའོ། །བདེ་བ་ཆེན་པོའི་རྣལ་འབྱོར་ནི། ཉམས་གོམས་པ། ཉོན་མོངས་པ་དང་སྡུག་བསྔལ་བདེ་ཆེན་དུ་གསལ་བའོ། །ཐིག་ལེ་རྫོགས་པའི་རྣལ་འབྱོར་ནི། ཉམས་བརྟན་པ་ཆོས་ཐམས་ཅད་ཡེ་ཤེས་ཀྱི་ཐིག་ལེར་མཇལ་བའོ། །ཉམས་དེ་ཚོ་ནི་རྣམ་དག་དབྱིངས་ཀྱི་ཏིང་ངེ་འཛིན་ལ་སྦྱོར་ཏེ། འཕྲོ་འདུ་དང་ཁྱོན་དང་གྲངས་གསུམ་ཆར་ནམ་མཁས་ཁྱབ་ཚད་དོ། །རྣམ་པ་ནི་ལྷུན་གྲུབ་ཀྱི་ལྷ་ཤིན་ཏུ་ཐོབ་པའོ། །གཉིས་པ་མཚན་མེད་ཀྱི་དབང་དུ། ས་དགུ་པ་གདེང་དུ་གྱུར་བའི་སྐབས། གནས་པ་བྱང་ཆུབ་ཀྱི་སེམས་དཔེ་ཟླ་བ་ཚེས་བརྒྱད་པ་ལྟ་བུ་སྟེ། སྒོམ་ཐབས་སྒྲོན་མ་ལས། དགུ་པ་གཉིས་མེད་དབྱིངས་ཀྱི་ལྟ་བ་དང་། །རྣམ་དག་དབྱིངས་ཀྱི་ཏིང་འཛིན་དབང་བསྒྱུར་ཐབས། །ཞེས་གསུངས་ཏེ། དབྱིངས་དང་ཡེ་ཤེས་གཉིས་མེད་ཆོས་དབྱིངས་བརྡལ་བ་ཆེན་པོའི་ལྟ་བ་དང་། རྟོག་པ་རྣམས་ལྷའི་དཀྱིལ་འཁོར་དུ་རྣམ་པར་དག་སྟེ་རང་བཞིན་མེད་པ་དབྱིངས་ཀྱི་ཏིང་ངེ་འཛིན་སྒོམ་པ་དང་། འདོད་ཡོན་ལ་དབང་བསྒྱུར་བའི་ཐབས་ཀྱི་སྤྱོད་པ་དང་ལྡན་པའོ། །འདིའི་རྣལ་འབྱོར་ཕྲ་མོ་ནི། དེ་ཉིད་ལས། དགུ་པ་ལ་གསུམ་རོལ་པ་རྒྱན་དེ་ཡི། །རྫོགས་པའི་བསྐྱེད་པ་རྩོལ་བཅས་རྣལ་འབྱོར་ཡིན། །བདེ་བ་ཆེན་པོ་རྫོགས་པའི་རྫོགས་པ་དངོས། །ཐིག་ལེར་རྫོགས་པ་རྫོགས་པའི་ངང་གནས་པའོ། །ཞེས་གསུངས་ཏེ། འདོད་ཡོན་ལྔ་ཆོས་ཉིད་ཀྱི་རྒྱན་དུ་སྤྱོད་པས་རོལ་པ་རྒྱན་གྱི་རྣལ་འབྱོར་དེ་ནི་རྫོགས་པའི་བསྐྱེད་པ་སྟེ་རྩོལ་བ་དང་བཅས་པའི་རྣལ་འབྱོར་ཡིན་ལ། ཉོན་མོངས་དང་སྡུག་བསྔལ་བདེ་ཆེན་དུ་གསལ་བས་བདེ་བ་ཆེན་པོའི་རྣལ་འབྱོར་ནི་རྫོགས་པའི་རྫོགས་པ་དངོས་ཡིན་ཅིང་། དེ་ཉིད་བརྟན་པས་ཡེ་ཤེས་ཀྱི་ཐིག་ལེར་རྫོགས་པའི་རྣལ་འབྱོར་ནི་རྫོགས་པ་དངོས་ཡིན་ཅིང་། དེ་ཉིད་བརྟན་པས་ཡེ་ཤེས་ཀྱི་ཐིག་ལེར་རྫོགས་པའི་རྣལ་འབྱོར་ནི་རྫོགས་པ་ཆེན་པོའི་ངང་ལ་གནས་པའོ། །འདི་དག་ཕྱག་རྒྱ་ཆེན་པོའི་རིག་འཛིན་དུ་གསུངས་པའང་བཞུགས་མོད་ཀྱི། ཞིབ་པར་དབྱེ་ན། དང་པོ་ཕྱག་རྒྱའི་རིག་འཛིན་མཐར་ཐུག་པ། གཉིས་པ་དེས་ལྷུན་གྲུབ་རིག་འཛིན་ལ་སྦྱོར་བའི་སྐབས། གསུམ་པ་ལྷུན་གྲུབ་དངོས་ཐོབ་པར་བྱས་ན་གཞུང་གི་གསུང་སྒྲོས་དང་ཤིན་ཏུ་མཐུན་ནོ། །གསུམ་པ་ནི། རྫོགས་པ་སྤྱིར་ཆིབས། ཞེས་པ་ནས། རང་བྱུང་གདལ་བའོ། །ཞེས་པའི་བར་གྱིས་བསྟན་ཏེ། སའི་རིམ་པ་ཀུན་ལྷུན་གྱིས་རྫོགས་པ་ཉིད་ཀྱི་སྤྱིར་ཞེས་སྤྱི་བོར་ཕྱིན་ཏེ་ཡོངས་སུ་ཆིབས་པའི་ས་མཆོག་དམ་པ་འདི་ནི་རྣལ་འབྱོར་བཅུ་ཡི་གྲངས་ཀྱི་ཐ་མ་མཐར་ཐུག་ཅིང་སངས་རྒྱས་ཀྱི་ས་ལ་འཇུག་པའི་གྲལ་གྱི་དང་པོ་འདིར་ལས་སུ་རུང་སྟེ་སྐྱེད་དུ་བྱ་བ་གཏན་མེད་པར་མཐར་ཕྱིན་པར་རྫོགས་པ་ཡིན་པས། ལས་སུ་རུང་བའི་སྐབས་སུའང་གསུངས་ཏེ། དེས་ན་མཐའི་རྟགས་རྨད་དུ་བྱུང་བ་རིལ་མ་ལུས་ལ་ཀུན་མི་འགྱུར་བར་བརྟན་པ་ཉིད་ཀྱི་ས་མཆོག་གང་ཞིག་གྲལ་གྱི་ཡང་ཐོག་འདིར་ས་རྣམས་མཐར་ཕྱིན་པའི་རྩེ་མོའི་ཏོག་ཆེན་པོ་ཡིན་ཏེ། འདིའི་ངོ་བོ་ནི་ཐམས་ཅད་ཀྱང་རང་བྱུང་གི་ཡེ་ཤེས་ཆེན་པོ་རང་སྣང་བའི་ཀློང་ཡངས་པ་འབའ་ཞིག་ལ་གང་ཡང་མ་ཆུད་པ་མེད་པས་ནམ་མཁའི་དབྱིངས་ལྟ་བུའི་སྙིང་པོར་གྱུར་པའི་འབྲས་བུའི་བཅུད་ཆེན་པོ་ལ་ཀུན་ཡོངས་སུ་རྫོགས་པར་གསལ་བ་ནི། དཔེར་ན་སྤྲིན་མེད་པའི་ནམ་མཁའ་ལ་ཉི་མ་འབུམ་དུས་གཅིག་ཏུ་ཤར་བ་ལྟར་གྱིས་ཡེ་ཤེས་སྒྲིབ་མེད་དུ་གསལ་བའི་ངོ་བོར་ཡོངས་སུ་རྫོགས་པར་གདལ་བ་དེ་ནི་ཅི་སྣང་ཇི་སྲིད་གང་དུའང་མི་འགོག་ལ་རྣམ་པ་གང་ཅིར་ཡང་གྲུབ་པ་མ་ཡིན་པ་སྟེ་རང་བཞིན་གང་དུའང་མི་སྐྱེ་བས་མཐའི་སྣང་བ་མི་འབྱུང་ཞིང་གང་ལྟར་སྣང་བའང་མི་འགག་པས་ཐ་སྙད་དུ་མཐའ་རིལ་ལས་གྲོལ་བའི་ངོ་བོ་ཉིད་དུ་རྫོགས་པ་ལས་དང་རྣམ་པར་ཐར་པའི་སྒོ་ཐ་དད་པར་ཇི་ལྟར་བལྟས་རྒུ་དེ་ལྟར་བསམ་པ་དེར་རང་སྣང་བ་ཉིད་ཀྱང་འདིར་ཆུབ་པས་གདལ་ཁྱབ་ཆེན་པོས་སྤྱི་རྒྱ་རླབས་ཀྱིས་བཅད་པ་ཁོ་ནའོ། །དེ་ལྟ་བུའི་རྫོགས་པ་ཆེན་པོ་དེ་ལ་ཡང་ལྟ་བ་དམ་པའི་ཁྱད་པར་གྱིས་དབྱེ་ན་རྣལ་འབྱོར་གསུམ་སྟེ། དབྱིངས་དང་ཡེ་ཤེས་ཀྱང་ཐ་སྙད་ཙམ་དུ་རྟོགས་ཏེ། ཆོས་ཐམས་ཅད་རིལ་བདག་ཉིད་ཆེན་པོ་རིག་པ་རང་བྱུང་གི་ཡེ་ཤེས་གཉིས་མེད་ཆེན་པོའི་རྣལ་འབྱོར་ཡུལ་མེད་རང་གསལ་གྱི་ངང་གཅིག་ཏུ་རྟོགས་པ་དང་། དེ་ཉིད་ལའང་རྒྱུ་འབྲས་རིལ་མ་བརྩལ་ལྷུན་གྱིས་གྲུབ་པར་དགོངས་པས་མ་འདྲེས་ཡོངས་རྫོགས་ཆེན་པོའི་རྣལ་འབྱོར་དང་། དེ་ཉིད་ཀྱི་ཐ་སྙད་ལའང་མི་གནས་ཏེ་གང་ཡང་མ་སྤངས་བཀོལ་བ་མེད་པས་ཆོས་ཉིད་ཀྱི་ཀློང་ཡངས་པར་ཆུབ་སྟེ་མ་འདྲེས་མཐའ་བྲལ་ཡོངས་རྫོགས་དབྱེར་མེད་དུ་གསལ་པའི་དཀྱིལ་འཁོར་དུ་དགོངས་པའི་རྣལ་འབྱོར་ཏེ། དེ་ལྟར་གསུམ་པོ་དེ་དག་རིལ་ལྷུན་གྱིས་རྫོགས་པས་གསུམ་གྱི་ཐ་སྙད་ཀྱང་མེད་པར་རང་བྱུང་གི་ཡེ་ཤེས་ཀྱི་ཉི་མ་འཆར་ནུབ་མེད་པར་གདལ་ཁྱབ་ཏུ་གྱུར་པ་ནི་འབྲས་བུ་ཆེན་པོ་མཐར་ཐུག་པ་ཉིད་དུ་ཕྱིན་པའོ། །འདི་ཉིད་ལྷུན་གྱིས་གྲུབ་པའི་རིག་འཛིན་ཆེན་པོ་རྒྱུད་དག་པའི་སངས་རྒྱས་སོ། །འདི་ལའང་མཚན་བཅས་ལྷ་སྒོམ་པ་དང་མཚན་མེད་ཆོས་ཉིད་སྒོམ་པ་གཉིས་ལས། དང་པོ་ལའང་། རྣལ་འབྱོར་གསུམ་སྟེ། བདག་ཉིད་ཆེན་པོའི་རྣལ་འབྱོར་ནི། ཉམས་ཐོབ་པ་ལྷ་དང་ཆོས་ཐམས་ཅད་རང་རིག་ཏུ་གསལ་བའོ། །ལྷུན་གྱིས་གྲུབ་པའི་རྣལ་འབྱོར་ནི། ཉམས་བརྟན་པ་རྒྱུ་འབྲས་ཐམས་ཅད་གཉིས་མེད་ཀྱི་ངང་དུ་ལྷུན་གྱིས་གྲུབ་པའོ། །ཀློང་ཡངས་ཆུབ་པའི་རྣལ་འབྱོར་ནི་ཉམས་མཐར་ཕྱིན་པ་རྩོལ་བ་མེད་པར་གསལ་བ་ལ་མི་མཐུན་པའི་སེམས་མེད་པའོ། །ཉམས་དེ་ཚོ་ནི་ཐམས་ཅད་རྫོགས་པའི་ཏིང་ངེ་འཛིན་དང་། སྣང་གསལ་ཡེ་འཕྱོའི་ཏིང་ངེ་འཛིན་ལ་སྦྱར་ཏེ། འཕྲོ་འདུ་དང་ཁྱོན་དང་གྲངས་གསུམ་གཅིག་ཆར་ཆོས་ཀྱི་དབྱིངས་ཀྱིས་ཁྱབ་ཚད་དོ། །རྣམ་པ་ནི་ལྷུན་གྲུབ་ཀྱི་ལྷ་བརྟན་ཞིང་མཐར་ཕྱིན་པའོ། །གཉིས་པ་མཚན་མེད་ཀྱི་དབང་དུ། ས་བཅུ་པ་ལས་སུ་རུང་བའི་སྐབས། རྫོགས་པ་བྱང་ཆུབ་ཀྱི་སེམས། དཔེ་ཟླ་བ་ཚེས་བཅུ་དྲུག་པ་ལྟ་བུ་སྟེ། སྒོམ་ཐབས་སྒྲོན་མ་ལས། ཐ་མ་གཟའ་གཏད་མེད་པའི་ལྟ་བ་དང་། །སྣང་གསལ་ཡེ་འཕྱོའི་ཏིང་འཛིན་ལྷུན་གྲུབ་སྤྱོད། །ཅེས་གསུངས་ཏེ། རང་བྱུང་ཡེ་ཤེས་འབའ་ཞིག་ལས་སེལ་མེད་པས་གཟའ་གཏད་མེད་པའི་ལྟ་བ་དང་། ཐམས་ཅད་མཁྱེན་པས་སྣང་གསལ་ཡེ་འཕྱོའི་ཏིང་ངེ་འཛིན་དང་བྱ་བརྩལ་མེད་པར་ལྷུན་གྱིས་གྲུབ་པའི་སྤྱོད་པ་དང་ལྡན་པའོ། །འདིར་ཐམས་ཅད་རྫོགས་པའི་ཏིང་ངེ་འཛིན་ཡང་སྦྱར་རོ། །འདིའི་རྣལ་འབྱོར་ཕྲ་མོ་ནི། དེ་ཉིད་ལས། ཐ་མ་ལ་གསུམ་བདག་ཉིད་ཆེན་པོ་ནི། །རྣལ་འབྱོར་ཆེན་པོ་རྫོགས་པར་ལ་བཟླ་སྟེ། །ལྷུན་གྱིས་གྲུབ་པ་རྗེས་སུ་འབྱོར་བ་ཉིད། །ཀློང་ཡངས་ཆུབ་པ་དེ་ཡིས་གཤིས་མཐོང་བས། །དེ་ལས་སེམས་བསྐྱེད་དོན་ལ་རེག་འདོད་ཡིན། །ཞེས་གསུངས་ཏེ། ཐམས་ཅད་རང་བྱུང་གི་ཡེ་ཤེས་སུ་རྟོགས་པས་བདག་ཉིད་ཆེན་པོའི་རྣལ་འབྱོར་ནི། རྣལ་འབྱོར་ཆེན་པོ་རྫོགས་ཆེན་དུ་ལ་བཟླ་བ་དང་། དེ་ལ་ཐམས་ཅད་མ་བརྩལ་བར་རྫོགས་པས་ལྷུན་གྱིས་གྲུབ་པའི་རྣལ་འབྱོར་ནི་རྗེས་སུ་རྣལ་འབྱོར་ཉིད་དེར་ལ་བཟླ་བ་དང་། ཐ་སྙད་ལ་མི་གནས་ཏེ་ཀློང་ཡངས་ཆུབ་པའི་རྣལ་འབྱོར་དེ་ཡིས་གཤིས་མཐོང་བས་ལྷུན་གྲུབ་རིག་འཛི ན་རང་རྒྱུད་དག་པ འི་སངས་རྒྱས་སོ། །དེ་ལྟར་སེམས་བཅུ་བསྐྱེད་དེ་རྣལ་འབྱོར་གྱི་རིམ་པ་རྫོགས་པ་ལས་མཐར་ཐུག་གི་དོན་ལ་རེག་པར་འདོད་པ་ནི་རྗེས་སུ་རྣལ་འབྱོར་གྱི་གཞུང་གི་གསང་བ་ཡང་དག་པ་ཉིད་ཡིན་ནོ། །དེ་བས་ན་མཐར་ལམ་གསུམ་པོ་འདིའི། དང་པོ་གཉིས་མེད་རིག་པའི་དོན་ལ་འབྱོར་ངེས་པས་ཆོས་སྐུའི་སས་བསྡུས་ལ། གཉིས་པ་ཡེ་ཤེས་ཀྱི་སྐུ་ཐོབ་པར་ངེས་པས་ལོངས་སྐུའི་སས་བསྡུས་ཤིང་། གསུམ་པ་ལ་དོན་གཉིས་ཀྱི་མཛད་པ་རྫོགས་ངེས་པས་སྤྲུལ་སྐུའི་སས་བསྡུས་པར་ཡང་གསུངས་ཏེ་དེ་ལྟར་སྐུ་གསུམ་དབྱེར་མེད་ཀྱི་ཆོས་སྐུ་ཆེན་པོ་ནི་ངོ་བོ་ཉིད་སྐུའི་འཁོར་དུ་གྱུར་པས་སྐད་ཅིག་ལ་སྙིང་པོ་བྱང་ཆུབ་ཏུ་སངས་རྒྱས་པ་ཉིད་དེ། རིན་པོ་ཆེ་རྒྱན་ལས། དུས་ལ་ཐོག་མེད་མཐར་མི་ནུས། །གནས་ལུགས་སྐབས་བཞིན་འདིར་ཤེས་བྱ། །རྒྱུད་དག་དུས་ཀྱི་དང་པོ་ནི། །རང་རང་གྲོལ་ཚེ་སྐབས་ལས་སྦྱར། །ཞེས་གསུངས་པ་སོགས་རྒྱུད་དང་མན་ངག་དག་ལས་རྒྱ་ཆེར་འབྱུང་ངོ་། །མདོར་ན་ཐུན་མོང་མ་ཡིན་པའི་ལམ་འདི་དག་གང་ཟག་རྒྱུད་གཅིག་གི་དབང་དུ་ཐེག་པ་རིལ་རྫོགས་པ་ཆེན་པོར་འདུས་ཤིང་འབྲས་བུ་དེར་གཅིག་པ་ནི་ཆུ་བོ་བརྒལ་བའི་ཐབས་མི་མཐུན་ཡང་བརྒྱུད་ནས་མཐར་འདིར་སོན་པས་ན་གཅིག་པ་དང་འདྲ་བའི་སྤྱིར་བཀོད་དོ། །སྤྱི་ཉིད་གསང་སྔགས་ནང་པ་མན་ཆད་ཀྱིས་ཡང་དག་པར་རྫོགས་པའི་སངས་རྒྱས་ཀྱི་ས་རྫོགས་པ་སྤྱིར་ཆིབས་ཀྱི་ས་ཆེན་པོ་མཐོང་བ་ལ་ཕྱིན་ནས་ཐུག་པ་མེད་པར་བགྲོད་པ་ནི་མ་ཡིན་ནོ། །དེ་ཅིའི་ཕྱིར་ཞེ་ན། མདོ་སྡེ་ཀུན་ཏུ་འོད་དང་ཀྲི་ཡ་རྡོ་རྗེ་འཛིན་པའི་སངས་རྒྱས་ཀྱི་ས་ཡན་ཆད་རྫོགས་པ་ཆེན་པོ་ཉིད་ཀྱི་བསྟི་གནས་ཀྱི་ཕྱིར། ནམ་གནས་འདིར་སངས་རྒྱས་པ་ན་འདིར་རྫོགས་པ་ཆེན་པོ་ཐོབ་ཅེས་བྱའོ། །རང་རེའི་སྒོས་མཐར་ཐུག་ཏུ་བསྟན་པ་ནི་རྒྱུད་སོ་སོའི་མོས་དབང་དུ་བསྟན་པའོ། །གསུམ་པ་ནི། འདི་དག་རྣལ་འབྱོར། ཞེས་པ་ནས། ས་འདིར་སྦྱར་བར་བྱའོ། །ཞེས་པའི་བར་གྱིས་བསྟན་ཏེ། འདིར་སའི་རིམ་པ་ཐུན་མོང་མ་ཡིན་པར་སྨོས་པ་འདི་དག་རྣམས་ནི། གསང་སྔགས་ཀྱི་དོན་ལ་རྣལ་འབྱོར་དུ་བྱེད་པ་རྣམས་ཀྱི་རིམ་པར་སྤྱོད་པའི་ས་ཡི་རིམ་པ་ཡིན་ཏེ། སའི་རིམ་པ་ལ་ཁྱད་པར་ཡོད་པར་སྣང་ནས་རིམས་ཀྱིས་འཇུག་པར་མོས་པ་གང་ལ་དེ་དང་མཐུན་པར་སའི་ཁྱད་པར་མཐོ་དམན་དུ་སྣང་སྟེ་རིམས་ཀྱིས་གསང་སྔགས་ལ་འཇུག་པའོ། །གང་སའི་རིམ་པ་ཁྱེད་པར་ཅན་དུ་མཐོང་བ་མེད་པར་གཅིག་ཆར་དུ་འཇུག་པར་མོས་པ་རྣམས་ལ་དེ་ལྟར་ས་མཐོ་དམན་གྱི་ཁྱད་པར་མེད་པར་རྫོགས་པ་སྤྱིར་ཆིབས་ཀྱིས་ཉིད་དུ་སྣང་བའོ། །དེས་ན་ཤེས་རབ་ཀྱི་རྩལ་འཕང་མཐོ་བ་རྣམས་ཀྱིས་ས་མཆོག་ལ་གཅིག་ཆར་བགྲོད་པར་བྱའོ། །འོན་ཀྱང་སྟེས་དབང་མ་ཡིན་ཏེ། སྔར་སྦྱངས་པས་འདི་ལ་ས་གཞན་མ་བགྲོད་པར་སའི་ཏོག་ཆེན་པོ་ཉིད་ལ་འཇུག་པ་མི་འགལ་བ་དང་། སེམས་ཉིད་ཡིན་བཞིན་ནོར་བུ་རིན་པོ་ཆེ་གང་ལྟར་བསླབ་པ་ལྟར་འགྱུར་དུ་བཏུབ་པ་གཉིས་ཀའི་ཕྱིར་རོ། །སྐལ་པ་དང་ཤེས་རབ་ཀྱི་རྩལ་འཕང་ཞན་ཏེ་སའི་རིམ་པར་མཐོ་དམན་དུ་འཇུག་པའི་རྣལ་འབྱོར་པས་མཐོ་དམན་གྱི་རིམ་པའི་གོ་འཕང་ལྟར་འགྱུར་དབང་མ་ངེས་པའི་ས་ནས་ཡར་སྐས་ཀྱི་གདངས་བུ་ལྟར་བགྲོད་པར་བྱའོ། །འོ་ན་གསང་སྔགས་ཀྱི་དབང་པོ་ཐ་ཤལ་རིམ་འཇུག་ནི་མདོ་སྡེ་བས་ཀྱང་ལམ་རིམ་སྟེ་ཕྱིན་པའི་དུས་མེད་པར་འགྱུར་རོ་ཞེ་ན། འདིར་ཏིང་ངེ་འཛིན་དང་པོར་དམིགས་པ་བརྟན་པས་གཞན་རྣམས་ལ་རྩོལ་བའི་ཡུན་མེད་པར་འགྲོ་ཞིང་ཐབས་ཁྱད་པར་ཅན་གྱིས་སྐད་ཅིག་ཙམ་དུ་གནས་པའི་རིམ་པ་ལ་སར་བསྙད་ཀྱི། བསྐལ་པའི་གྲངས་དང་ཡུན་དུ་ཐོགས་པ་མེད་པས་དེ་ཉིད་ལ་སྦྱོར་བའི་ཕྱིར་རིང་བ་མིན་པ་དང་། རྒྱུ་ཡིས་བསྐལ་པར་སྤྱད་ཀྱང་ཐབས་འདི་དག་དང་འཕྲད་ནས་འདི་བཞིན་དུ་གྲུབ་པས་གཟོད་འཚང་རྒྱ་བའི་ཕྱིར་ཐེ་ཚོམ་མེད་དོ། །ཐུན་མོང་དུ་བསྙད་ན་དབུགས་ཆེན་འབྱིན་པའི་རྣལ་འབྱོར་རྟེན་པས་ཁྱད་པར་དུ་འགྲོ་བ་མན་ཆོད་འཇིག་རྟེན་པ་དང་རྒྱུའི་ཐེག་པའི་སར་འགྱུར་བས་དེ་ནས་གཟོད་གསང་སྔགས་ཀྱི་དམིགས་པས་འབྲས་བུ་སྐྱེ་བའི་ས་ལ་འཇུག་གོ་ཞེས་གཞན་པ་དག་འདོད་དོ། །ཁོ་བོ་ནི་འདིར་བཤད་པའི་ཡིད་ལ་བྱེད་པའི་ཏིང་ངེ་འཛིན་ལ་སོགས་པ་དང་། དབང་གི་ཚུལ་དང་། འཆད་པའི་ལྷའི་ཏིང་ངེ་འཛིན་གྱིས་གསང་སྔགས་ཀྱིས་འབའ་ཞིག་ལ་ཐེ་ཚོམ་མེད་པའི་ཕྱིར་འདིར་ཐུན་མོང་མ་ཡིན་པར་བསྙད་པ་ལ་འགལ་བ་མེད་དོ། །ཞེས་གནུབས་ཆེན་མཁྱེན་པའི་གཏེར་མཛོད་བསྟན་འགྲོའི་དཔལ་མགོན་མཆོག་གིས་གསུངས་སོ། །སྐབས་གང་འདིར་སྡུད་པས་དྲིས་ཏེ་དྲི་བར་བྱ་བའི་མཆོག་སའི་ཁྱད་པར་རྣམས་ལན་དུ་གསལ་བར་བཤད་པས་ཐུན་མོང་མིན་པའི་སའི་དོན་ལ་སྣང་བ་ཐོབ་པ་ཉིད། དྲི་བའི་མཆོག་དྲི་བའི་དམ་པར་གྱུར་པ་ལང་ཀའི་མངའ་བདག་སྲིན་པོ་མགྲིན་བཅུ་ཞེས་སྡུད་པ་པོ་ལ་དོན་གྱིས་བོས་ནས། ལུང་གི་རྒྱུད་ཆེན་པོ་གང་འདིར་རྣལ་འབྱོར་གྱི་རིམ་པ་ཆེ་ཆུང་ཀུན་སྦྱོར་ཏེ་རྫོགས་པར་བསྟན་པ་ཡང་། གསང་སྔགས་ཀྱི་དོན་མཐར་ཐུག་ངེས་པའི་ས་མཆོག་ཆེན་པོ་བཅུ་ནི། ས་ཀུན་གྱི་ཡང་རྩ་བའི་གཞིར་གྱུར་པའོ། །དེས་ན་འདིར་བསྟན་པའི་སའི་རིམ་པ་འདི་ནི་ཁྱད་པར་གྱི་ལམ་དུ་འཐད་དེ། གང་དེ་དག་གི་རྩ་བ་ཆེན་པོ་དོན་མ་ནོར་བར་ངེས་པའི་ས་བཅུ་འདི་ཉིད་ཀྱི་ཡན་ལག་གི་རིམ་པའི་དབྱེ་བ་ལས། རྣལ་འབྱོར་ཕྲ་མོ་བཅུ་ཚན་གཉིས་ཏེ་ཉི་ཤུ་དང་བདུན་ཕྲག་གཉིས་ལ་བཅུ་བཞི་སྟེ་རྣལ་འབྱོར་སུམ་ཅུ་རྩ་བཞིར་ཕྱེ་བས་ཀུན་འདུས་ཤིང་རྫོགས་པ་ཉིད་དེ། ས་བཞི་པའི་རྣལ་འབྱོར་ཕྲ་མོ་དྲུག་ནི་མཚན་མ་རྟགས་ཀྱི་རྣལ་འབྱོར་ལ་འདུས་པས་ལོགས་སུ་མ་བགྲང་བའོ། །དེ་ལྟ་བུའི་ས་བཅུ་པོར་ས་གཞན་གྱི་རྩ་བ་དང་ཡན་ལག་ཏུ་ཕྱེ་བ་ཀུན་འདུས་པ་ནི་གང་ཞེ་ན། མདོ་སྡེ་བྱང་ཆུབ་སེམས་དཔའི་ས་བཅུ་དང་། གསང་སྔགས་ཀྱི་ཁྱད་པར་འཕགས་པའི་ས་བཅུ་སྟེ་བཅུ་ཕྲག་གཉིས་དང་། ཉན་ཐོས་ཀྱི་ས་བདུན་དང་། རང་སངས་རྒྱས་ཀྱི་ས་གཉིས་ལ་སོགས་པ་རིལ་རྫོགས་པའོ། །དེ་ཅིའི་ཕྱིར་ཞེ་ན། དེ་དག་ཀྱང་གསང་སྔགས་ཀྱི་སར་བརྒྱུད་ནས་ནོན་པར་བྱེད་པའི་རྒྱུར་གྱུར་པ་དང་། དེ་དག་གི་མཐར་གཏུགས་པའི་འབྲས་བུ་ཆེན་པོ་འདི་ཡིན་པའི་ཕྱིར་དང་། བྲེ་ཕུལ་གྱིས་ཚུལ་གྱིས་བསྟན་པའོ། །དེས་ན་གསང་སྔགས་ལུང་གི་ས་བཅུ་ནི་ས་ཡི་ཡོན་ཏན་གྱི་ཁྱད་པར་ལས་མཆོག་ཏུ་ཆེ་བ་སྟེ། ས་རིལ་གྱི་རྩ་བ་ཡིན་པས་རྒྱུ་འབྲས་ཀྱི་ཐེག་པའི་ས་རྒྱ་ཆེ་བ་དང་གྲངས་མང་ཡང་གཞན་ལ་འཇུག་ཅིང་བགྲོད་པར་མི་བྱ་སྟེ། གསང་སྔགས་ངེས་དོན་གྱི་རྣལ་འབྱོར་རྫོགས་པའི་ས་མཆོག་འདི་ལ་སྐལ་བས་ཕྱེ་ནས་སྒོ་འདིར་ཚུལ་གཉིས་ཀྱིས་སྦྱར་བར་བྱ་ཞིང་འཇུག་པར་གྱིས་ཤིག་པའོ། །གཉིས་པ་ནི། ས་དང་ས་ཡི། ཞེས་པ་ནས་སྐད་ཅིག་ཙམ་བགྲོད་པའོ། །ཞེས་པའི་བར་གྱིས་བསྟན་ཏེ། བྱང་ཆུབ་སེམས་དཔའ་དང་རིག་འཛིན་རྣམས་ཀྱི་ས་དང་། སངས་རྒྱས་རྣམས་ཀྱིའང་ས་ཡི་འབྱུང་གནས་ཀྱི་གཞིར་གྱུར་པ། ཀུན་གཞི་བྱང་ཆུབ་ཀྱི་སེམས་བདེ་བ་ཆེན་པོ་གང་དེ་ཐམས་ཅད་ཀུན་གྱི་གནས་མཆོག་ས་ཆེན་པོ་དེ་ཉིད་ཡིན་ཏེ། གང་སུ་ཞིག་གིས་ཀུན་གཞི་བྱང་ཆུབ་ཀྱི་སེམས་ཀྱི་ས་ཆེན་པོ་འདི་ཉིད་ནོན་ཏེ་དོན་མངོན་དུ་གྱུར་ན་གཞན་རྣམས་བགྲོད་ཅིང་སྦྱངས་མི་དགོས་པའི་ཕྱིར་ས་རྣམས་ཀུན་རིག་པའི་སྐད་ཅིག་ཙམ་གྱིས་བགྲོད་ཅིང་ཡང་དག་པར་ནོན་པའོ། །དེས་ན་གཅིག་ཆར་འཇུག་པའི་དོན་ནི་མཆོག་གི་མཆོག་ཏུ་གྱུར་པའོ། །གསུམ་པ་ནི། གྲོགས་པོ་དག །ཅེས་པ་ནས། ཤེས་པར་བྱའོ། །ཞེས་པའི་བར་གྱིས་བསྟན་ཏེ། གྲོགས་པོ་དག །དེ་དག་ནི་ཁྱད་པར་བླ་མར་འགྲོ་བར་བྱའོ། །ཞེས་དམ་བཅའ་བར་མཛད་པའི་སའི་རིམ་པ་འོག་ནས་གོང་དུ་འཕར་བའི་ཚུལ་དང་གཅིག་ཆར་དུ་བགྲོད་པའི་ཚུལ་གྱིས་དགོངས་པ་དམ་པ་ཡོངས་སུ་བགྲོས་ཏེ་བསྟན་པ་ཡིན་པར་ཤེས་པར་བྱའོ། །ལེའུའི་མཚན་ནི། སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ཏིང་ངེ་འཛིན་གྱི་རྣལ་འབྱོར་བཅུ་ཡིས་སའི་རིམ་པ་གསལ་བར་བྱེད་པས་སྒྲོན་མ་དམ་པ་ཉིད་བསྟན་པའི་ལེའུ་སྟེ་དྲུག་ཅུ་རྩ་གཅིག་པ་ཉིད་རྣམ་པར་བཤད་པའོ།། །།བདུན་པ་ཡུལ་ལ་འཇུག་པར་བྱ་བ་ལ་གསུམ་སྟེ། སྤྱིར་བསྟན་པ། བྱེ་བྲག་ཏུ་བཤད་པ། ཞབས་བསྡུ་བའོ། །དང་པོ་ལ་གཉིས་ཏེ། མདོར་བསྟན་པ། རྒྱས་པར་བཤད་པའོ། །དང་པོ་ནི། དེ་ནས་ཡང་། ཞེས་པ་ནས། དེ་སྐད་ཅེས་སྨྲས་པས། ཞེས་པའི་བར་གྱིས་བསྟན་ཏེ། ལེའུ་འདིས་དྲང་དོན་དང་ངེས་དོན་གཉིས་ཀ་སྟོན་ནོ། །སའི་སྒྲོན་མ་བསྟན་མ་ཐག་པ་དེ་ནས་ཡང་ལང་ཀའི་བདག་པོ་ལ་སོགས་པ་འཁོར་དམན་པ་དམ་པ་རྣམས་ཀྱིས། སྟོན་པ་གསང་བ་པའི་བདག་པོ་ལ་དྲིས་པ། ཀྱེ་གསང་བ་པའི་བདག་པོ། ཉིད་ཀྱིས་ལེའུ་ཞེ་ལྔ་པར་ཆོས་ཀྱི་རྣམ་གྲངས་བཅུ་བཀོད་པ་ལས། བདུན་པ། ཡུལ་ལ་འཇུག་པར་བྱའོ། །ཞེས་དམ་བཅའ་བར་དགོངས་པ་དེ་ཉིད། ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་ཡོངས་སུ་དྲིས་པ་ལས། གསང་བ་པའི་བདག་པོས་ལན་སྨྲས་ཏེ་བཀའ་སྩལ་པ། ཀྱེ་གྲོགས་པོ་དག །ཅེས་སྐྱེས་བུས་བོས་ནས། ཡུལ་གྱི་ངོ་བོ་བསྟན་པ་ཤེས་པར་བྱ་བ་ནི་འདི་ལྟར་གང་སུ་ཞིག་གི་སངས་རྒྱས་ཀྱི་ཞིང་ཡོངས་སུ་སྤྱོད་པར་འདོད་པ་རྣམས་ཀྱིས། གང་དུ་ཏིང་ངེ་འཛིན་དང་ཡེ་ཤེས་ཀྱི་དགོངས་པའི་ཡུལ་ཆོས་ཉིད་ཇི་བཞིན་པ་དེ་ཁོ་ན་ཉིད་དང་། གང་ལ་གཉིས་སུ་མེད་པའི་ཐུགས་རྗེ་ཆེན་པོ་འབྱུང་བའི་ཡུལ་མཐའ་ཡས་ཤིང་བསམ་གྱིས་མི་ཁྱབ་པའི་འགྲོ་བ་འཁོར་བ་ན་གནས་པ་རྣམས་ཀྱི་དོན་དང་གཉིས་ལ་དགོངས་སྤྱོད་ཀྱིས་འཇུག་པར་བྱའོ། །ཚུལ་དེ་ནི། དཔེར་ན་བཙོ་བླག་མཁན་དག་གིས་རས་སྦྱངས་པ་གང་དུ་ཚོན་གྱི་བྱ་བ་ཇེན་པ་ལྟར་དུ། གང་འདིར་ལས་ཀྱི་དང་པོ་པའི་རྣལ་འབྱོར་པས། གང་དེར་དོན་དམ་པ་དང་ཀུན་རྫོབ་ཀྱི་བྱང་ཆུབ་ཀྱི་སེམས་རྣམ་པ་གཉིས་ཀྱི་རྒྱུས་བདག་གཞན་གྱི་སྒྲིབ་པ་སྦྱང་བ་ལ་རབ་ཏུ་བརྩོན་པ་ཤིན་ཏུ་གཅེས་ཤིང་གལ་ཆེ་བ་ཉིད་དོ། །དེ་སྐད་ཅེས་སྨྲས་ཏེ་བཀའ་སྩལ་པས། གཉིས་པ་ནི། བྱང་ཆུབ་སེམས་དཔའ། ཞེས་པ་ནས། ཞུགས་པ་ཉིད་དུ་རིག་པར་བྱའོ། །ཞེས་པའི་བར་གྱིས་བསྟན་ཏེ། དེ་ལ་སྡུད་པ་པོ་བྱང་ཆུབ་སེམས་དཔའ་སེམས་དཔའ་ཆེན་པོ་ལང་ཀའི་བདག་པོ་དེས་འདི་སྐད་ཅེས་གསོལ་ཏེ་སྨྲས་སོ། །གསང་བ་པའི་བདག་པོ་ཞེས་སྟོན་པ་ལ་བོས་ནས། གང་སྔར་གྱི་དུས་ཐམས་ཅད་ནས་ཕྱིས་ཀྱི་དུས་ཐམས་ཅད་ཀུན་ཏུ། འཁོར་བ་ཉིད་ཡེ་ནས་སངས་རྒྱས་པ་ཡིན་པས་འཕྲལ་དུ་མ་གྲུབ་པ་ཉིད་གྲུབ་པར་བྱར་མེད་པར་བཀའ་སྩལ་པ་དེ་ལྟར་ངེས་ན། ད་གདོད་སངས་རྒྱས་པར་བྱར་མེད་ཕན་ཆད། དགོངས་པ་དམ་པའི་ཡུལ་དེ་ཁོ་ན་ཉིད་ལ་བློས་སྦྱོར་བའི་སྒོམ་པ་དང་སྙིང་རྗེའི་ཡུལ་དུ་བྱས་ཏེ་དོན་བྱ་རྒྱུ་ཉིད་དུ་གྱུར་པ་གང་ཡང་མ་དམིགས་པས་མེད་པ་ཉིད་དུ་ངེས་ལགས་ན། འདིར་སྙིང་རྗེའི་ཡུལ་དུ་དགོངས་ཏེ་དོན་བྱ་བའི་གནས་སུ་གྱུར་པ་གང་ལགས། དེ་ལས་ཀྱང་ཁྱད་པར་དུ་འགྲོ་བ་གང་སུ་ཞིག་སྙིང་རྗེའི་ཡུལ་དུ་གྱུར་པ་ལགས། དེ་སྐད་ཅེས་སྨྲས་ཏེ་དྲིས་པ་དང་། འཆད་པའི་སྐྱེས་བུ་གསང་བ་པའི་བདག་པོས་ལན་སྨྲས་ཏེ་བཀའ་སྩལ་པ། ཀྱེ་ལང་ཀའི་བདག་པོ། ཞེས་བོས་ནས། ཆོས་རྣམས་ཀྱི་རང་བཞིན་དེ་ཉིད་སྔར་བཤད་པ་དེ་ལྟར་ཀུན་ཀྱང་ཡེ་ནས་སངས་རྒྱས་པའི་རང་བཞིན་ཡིན་ཕན་ཆད་དེ་ཁོ་ན་ཉིད་དུ་ངེས་པས། དོན་དམ་པར་སྙིང་རྗེའི་ཡུལ་ཐུགས་རྗེས་བཟུང་བར་བྱ་བའི་འགྲོ་བ་དང་དགོངས་པའི་ཡུལ་སྒོམ་པར་བྱ་བའི་ངོ་བོ་ཉིད་གང་ཡང་མེད་ཅིང་མ་དམིགས་ན་ཡང་། གང་གིས་དགོངས་སྤྱོད་ཀྱི་དངོས་པོ་ཇི་ལྟར་བྱས་ན་ཡང་དེ་ཉིད་ཆོས་ཉིད་མཉམ་པ་ཆེ ན་པོའི་དོན་གྱི་དེ་ཁོ་ན་ཉིད་ལས་མི་འདའ་བར་གཞན་དུ་མ་གྱུར་བའི་ཚུལ་གྱིས་དགོངས་སྤྱོད་གང་ཡང་ཐེག་པའི་སྒོ་གང་དང་ཡང་འགལ་བ་མིན་ཞིང་འགྲོ་བའི་བསམ་པ་ཀུན་དང་འགལ་བར་མི་བྱ་བ་གཉིས་སུ་བཀའ་སྩལ་པའོ། །དེ་ཅིའི་ཕྱིར་ཞེ་ན། འགྲོ་བ་སེམས་ཅན་རྣམས་སམ་གདུལ་བྱ་གང་དག་གི་དོན་ཉིད་བྱེད་པ་ནི་ཐུགས་ཀྱི་དམ་ཚིག་ཆེན་པོ་ཡིན་ལ། ཡེ་ནས་སངས་རྒྱས་པ་ཡིན་པས་དོན་བྱར་མེད་དེ་སེམས་ཅན་རིལ་ལམ་ཡང་དག་པར་སྦྱང་བས་བྱ་བྱེད་དང་བྲལ་བར་སངས་རྒྱས་ཐོབ་ཟིན་པར་རྟོགས་པ་ནི་སྙིང་རྗེ་ཆེན་པོ་ཡིན་ནོ། །གཏན་ཚིགས་དེ་གཉིས་ཀྱི་ཕྱིར་དང་། དོན་དམ་པའི་བྱང་ཆུབ་ཀྱི་སེམས་རང་གི་སེམས་ཉིད་དུ་ངེས་པས་དགོངས་པ་དམ་པ་ལ་འཕྲལ་དུ་འཇུག་མི་དགོས་པར་ཤེས་པ་ནི། དགོངས་པ་དམ་པའི་ཡུལ་ཡང་དག་པ་ཉིད་རྣལ་དུ་ཕེབས་པ་ཡིན་པས་ཆོས་ཉིད་དེ་ཁོ་ན་ཉིད་ལ་ཞུགས་ཟིན་པ་ཉིད་དུ་རིག་ཅིང་ཤེས་པར་བྱའོ། །ཞེས་གདམས་པའི་ཕྱིར་རོ། །གཉིས་པ་ལ་གཉིས་ཏེ། དགོངས་པའི་ཡུལ་ལ་འཇུག་པ་བསྟན་པ། སྙིང་རྗེའི་ཡུལ་ལ་འཇུག་པ་བཤད་པའོ། །དང་པོ་ལ་ལྔ་སྟེ། དགོངས་པ་གསང་བའི་ཕྱིར་གསང་བའི་ཡུལ་དང་ལྷན་ཅིག་མི་གནས་པ། བྱ་བ་མེད་པས་གཞན་དོན་བྱ་བ། ཉམས་པའི་ཡོ་བྱད་མི་སྤྱད་པ། སྤྱད་པར་གྱུར་ན་དེའི་ཉེས་པ། ཐེག་པའི་སྒོ་གང་དང་ཡང་མི་འགལ་བར་དགེ་བའི་དཔུང་བསྐྱེད་པའོ། །དང་པོ་ནི། ལང་ཀའི་བདག་པོ། ཞེས་པ་ནས། ཅི་ལའང་མི་བརྣལ་ལོ། །ཞེས་པའི་བར་གྱིས་བསྟན་ཏེ། ལང་ཀའི་བདག་པོ་ཞེས་བོས་ནས། དེ་ཉིད་ཤེས་པར་བྱ་བའི་ཐབས་དང་། དགོས་པ་ཉེ་བར་སྟོན་པ་ནི་འདི་ལྟ་སྟེ། ཆོས་ཉིད་ཇི་བཞིན་པའི་དགོངས་པ་དམ་པར་གང་སུ་ཞིག་འཇུག་ཏུ་མེད་པར་ཤེས་ཏེ་ཞུགས་ཟིན་པ་གང་གི་ཤེས་རབ་ཐུན་མོང་གི་ཟབ་མོ་ཤིན་ཏུ་ཟབ་པ་བས་ཀྱང་ཆེས་ཁྱད་པར་དུ་བློ་གྲོས་ཟབ་པ་དེ་ཉིད་ཀྱི་དགོངས་པས་སེམས་ཀྱི་དེ་ཁོ་ན་ཉིད་ཇི་ལྟ་བའི་མཚན་ཉིད་གཏིང་ནས་རྟོགས་པར་བྱ་ཞིང་ངེས་པར་ཐག་བཅད་དེ། གསང་བའི་རྟོགས་པ་འཕེལ་བ་དང་། དམ་ཚིག་མི་ཉམས་པ་དང་། གདུལ་བྱ་ཆུད་མི་ཟ་བའི་ཕྱིར་དང་། གསང་སྔགས་མི་བསྟན་པའི་ཡུལ་བཞི་ནི། སོ་སོའི་སྐྱེ་བོ་དང་། མུ་སྟེགས་པ་དང་། ཐེག་པ་ཆུང་ངུ་བ་དང་། ཐེག་པ་ཆེན་པོ་ལ་གསར་དུ་ཞུགས་པ་རྣམས་སམ། མུ་སྟེགས་པ། ཐེག་འོག་པ་ཆེ་ཆུང་། གསང་སྔགས་ལ་གསར་དུ་ཞུགས་པ་བཞིར་ཡང་གསུངས་ཏེ་སྐྱེ་བོ་དེ་རྣམས་དང་ལྷན་ཅིག་ཅི་ལའང་མི་བསྡད་ཅིང་ཉལ་ཏེ་མི་གཟིམས་པས་མི་བརྣལ་ལོ། །ཞེས་བཀའ་སྩལ་ཏེ། ཀུན་འདུས་ལས། བསྟན་པའི་གནས་མིན་སྣོད་ངན་དང་། །རྣམ་པ་བཞིས་བསྡུས་བྱེ་བྲག་རྣམས། །མ་འོངས་རྣལ་འབྱོར་བཅུད་ཅན་གྱིས། །ཤེས་ནས་སྤང་བར་བྱ་ཕྱིར་བཤད། །ཅེས་སོགས་དང་། ཟབ་མོར་འཇུག་པའི་སྔོན་ལོགས་ནས། །སེམས་ཉིད་གཏིང་ནས་ཚར་གཅད་ཕྱིར། །ཐེག་པ་དམན་པའི་སྐྱེ་བོ་དང་། །ལྷན་ཅིག་ཅི་ལའང་མི་བརྣལ་ལོ། །ཞེས་སོ། །དེས་ན་འདི་ཉིད་ལྟར་ན་གསང་ཡུལ་བཞི་དང་ཉན་ཐོས་ཀྱི་ནང་དུ་མི་གནས་པ་དང་སྦྱར་ཡང་རུང་བར་མངོན་ནོ། །གཉིས་པ་ནི། དེ་ཡང་ཡོངས་སུ། ཞེས་པ་ནས། གང་འདིར་ཕན་པར་བྱ། །ཞེས་པའི་བར་གྱིས་བསྟན་ཏེ། དེ་བས་ན་དེ་ཅིའི་ཕྱིར་ཞེ་ན། དེ་དག་གང་ཡང་ཆོས་ཉིད་མཉམ་པ་ཆེན་པོ་ལྷུན་གྱིས་གྲུབ་པའི་ངང་ལ་ཡོངས་སུ་རྫོགས་པ་ཉིད་ཀྱི་ཕྱིར་གང་ཡང་རིས་མེད་པར་ལྷན་མི་གཅིག་པའི་བྱ་བས་སོ་སོར་འདུག་ཏུ་མེད་ཅིང་། སངས་རྒྱས་ལྟ་བུའི་ཕྲིན་ལས་ཀྱིས་དགོངས་པའི་ཡུལ་ལ་འཇུག་པ་དང་ཐུགས་རྗེའི་ཡུལ་ལ་འཇུག་པ་རང་བཞིན་ཡིན་པས་མཚན་མའི་ཡུལ་ལ་རྩོལ་བས་ཆེད་དུ་བྱ་བ་མེད་པར་གྱུར་ན་ཡང་། རྣལ་འབྱོར་པ་བློ་ཆེ་བ་དེ་ཡི་ཐུགས་ཀྱི་རང་བཞིན་ཉི་མ་ལྟར་དུ་ཀུན་ལ་སྙོམས་ཤིང་ཕན་པར་བྱེད་པས་གཞན་གྱི་དོན་མཛད་པ་ཡིན་པས་ཡུལ་བཞི་པོ་དག་གི་རང་བཞིན་ལྟ་སྤྱོད་ཀྱི་ནུས་པ་ཆུང་བ་གང་ཡིན་པ་འདིར་ཡང་ཐེག་ཆེན་གསང་བ་མཆོག་གི་ལྟ་སྤྱོད་ཟབ་མོ་དྲང་ཐད་དུ་བསྟན་ན་ཇི་བཞིན་དུ་མི་གོ་ཞིང་སྐུར་པས་ལྟུང་བའི་ཕྱིར་ལྷན་མི་གཅིག་པར་བྱས་ཏེ་ཕྱིའི་སྤྱོད་པ་འཚམས་པས་ཐམས་ཅད་ལ་ཕན་པར་དོན་བྱ་བའོ། །གསུམ་པ་ནི། གང་གི་དོན་དང་། ཞེས་པ་ནས། དམ་པ་ཉིད་ལས་མིན། །ཞེས་པའི་བར་གྱིས་བསྟན་ཏེ། རྣལ་འབྱོར་པ་གང་སུ་ཞིག་གི་གསང་སྔགས་ཟབ་མོའི་གཞུང་དོན་དང་འགལ་བར་གྱུར་ཅིང་དམ་ཚིག་ཉམས་པ་དེ་ལས་བྱུང་བར་གྱུར་པའི་ནོར་རྫས་ལ་སོགས་པའི་ཡོ་བྱད་དག་དཔེར་ན་རུས་སྦལ་རང་གི་མགོ་ལ་མི་ཕྱིན་བརྒྱ་ལ་འོངས་ན་འཆི་ལྟས་ཡིན་པས་མྱུར་དུ་འདོར་བ་བཞིན་ནམ། རུ་སྦལ་གྱི་མགོ་ལ་ཡོད་པའི་ནོར་བུ་རིན་པོ་ཆེ་ནི་ཉེན་ཅན་དང་འབྲེལ་བར་མི་བྱ་བ་ཡིན་པ་ལྟར་དུ་དམ་ཉམས་ཀྱི་རྫས་ནི་ཉེས་པ་ཆེན་པོ་དང་འབྲེལ་བས་རྒྱ་མཚོས་བར་བཅད་པ་ལྟར་རྩལ་སྐྱེད་ནས་མུ་མཐའ་མེད་པར་བཤུག་སྟེ་སྤང་བར་བྱ་བའོ། །དེའི་དགོས་པ་ཅི་ཡི་ཕྱིར་ན་དུས་ཀུན་ཏུ་རྣལ་འབྱོར་མཆོག་དམ་པ་གཞུང་མ་ཉམས་པས་རྣལ་འབྱོར་དམ་ཚིག་དང་ལྡན་པ་ཉིད་དང་ནང་འགྲུལ་ཏེ་བཤེས་པར་བྱ་བ་ལས་མ་རྟོགས་པ་དང་དམ་ཉམས་པ་རྣམས་དང་བཤེས་པར་བྱ་བ་མིན་པས་སྤང་སྟེ་ཁ་ཙམ་ཡང་མི་གཏམ་པར་བྱེད་དོ། །ཀུན་འདུས་ལས། དེ་ལས་གྱུར་པའི་ཡོ་བྱད་དག །རུས་སྦལ་མགོ་ལ་འོངས་པ་དང་། །ཤིན་ཏུ་འཁྲུགས་པའི་སེམས་ཆེན་གྱིས། །རྒྱ་མཚོས་བཤུགས་ཏེ་སྤང་བར་བྱ། །ཞེས་སོ། །བཞི་པ་ལ་གཉིས་ཏེ། ཉེས་པ་དངོས་བཤད་པ། ཉེས་པ་དེ་འབྱུང་མི་འབྱུང་གི་ཁྱད་པར་རྟོགས་པར་གདམས་པའོ། །དང་པོ་ནི། གལ་ཏེ་གང་གི། ཞེས་པ་ནས། མི་མཐུན་ཉེན་ཆེན་འབྱུང་། །ཞེས་པའི་བར་གྱིས་བསྟན་ཏེ། བརྒྱ་ལ་གལ་ཏེ་གང་ཟག་འགའ་ཞིག་གི་དོན་མ་རྟོགས་པའི་དབང་གིས་ངོ་བསྲབ་ཅིང་འདོད་པའི་རྐྱེན་དབང་དུ་གྱུར་ནས་ཉམས་པ་དང་འགྲུལ་ན་གསང་སྔགས་ཐེག་པ་ཆེན་པོའི་གཞུང་གི་དམ་པའི་དོན་དང་འགལ་བར་འགྱུར་ཏེ། ཉམས་པ་དེ་དང་འགྲུལ་བས་བསམ་པ་དང་མི་མཐུན་པའི་ཉམས་པའི་བཀའ་ཆད་ཀྱི་ཉེན་ཆེན་པོ་འབྱུང་བའི་སྐྱོན་དུ་འགྱུར་རོ། །གཉིས་པ་ནི། གལ་ཏེ་དེ་ལས། ཞེས་པ་ནས། མ་ཟིན་འབན་ཐག་ཆད། །ཅེས་པའི་བར་གྱིས་བསྟན་ཏེ། གལ་ཏེ་གང་ཟག་ཉམས་པ་དང་བཤེས་པའི་རྣལ་འབྱོར་དེ་ལ་བཀའི་ཆད་པ་དེ་ཉིད་བྱུང་ན་དེ་ལ་སྐྱབས་སུ་གྱུར་པའི་མགོན་བཙུན་ནི་ཆོས་ཉིད་བྱང་ཆུབ་སེམས་ཀྱི་ལྟ་བ་རྟོགས་ནས་དེ་ཡི་ངང་ལ་གནས་པའི་མི་དམིགས་པའི་ཤེས་རབ་དེ་ལས་གཞན་གང་གིས་ཀྱང་སྐྱོབ་པར་ནུས་པ་མེད་དོ། །དེ་བས་ན་ཆོས་ཉིད་བྱང་ཆུབ་སེམས་ཀྱི་ལྟ་བ་དེ་ཡི་དོན་གང་གིས་མ་ཟིན་ན་གཉིས་ཀ་ཉམས་པས་འགོས་ཏེ་དགེ་བ་ཅི་སྤྱད་ཀྱང་འབན་ཐག་ཆད་དེ་རྡོ་རྗེ་དམྱལ་བ་ཆེན་པོར་འགྱུར་རོ། །དེས་ན་ཀུན་འདུས་ལས། གལ་ཏེ་གང་ཟག་དབང་གིས་ན། །ཉམས་པའི་ཆད་པ་བྱུང་བ་ན། །མགོན་ཚུན་ཆོས་ཉིད་ཆུ་ཕབ་ནས། །སྐོང་ཟློག་ཆོ་ག་རྒྱ་ཆེར་བྱ། །ཞེས་སོ། །འོ་ན་གཞན་གྱིས་ཉམས་པ་མ་ཉམས་པ་ལ་འགོས་བཏུབ་བམ་ཞེ་ན། འདི་ཉིད་ཀྱི་གཞུང་གི་དམ་ཚིག་གི་སྐབས་ལས། དཔེར་ན་རྟེའུ་རིད་རྔོ་ཅན་གྱིས་ཡུ་མ་ཁྱུ་ཕུང་བ་དང་། འོ་མ་རུལ་བ་ཐིགས་པ་གཅིག་མ་རུལ་པའི་ནང་དུ་བླུགས་ན་ཀུན་རུལ་པ་བཞིན་ཏེ། དེ་ཉིད་ཀྱི་དམ་ཚིག་གསང་བ་མཆོག་གི་ལེའུ་ལས། དེ་ལྟ་མོད་ཀྱི་འདི་ཀུན་རྣམས། །རྨི་ལམ་དུ་ཡང་མཐོང་མི་བྱ། །ཅིའི་ཕྱིར་འོ་མ་ཉུང་ངུ་ཞིག །རུལ་བས་འོ་མ་ཀུན་རུལ་བཞིན། །རྣལ་འབྱོར་ཉམས་གྱུར་གཅིག་གིས་ནི། །རྣལ་འབྱོར་ཅན་ཀུན་མ་རུང་འགྱུར། །འཁོར་བའི་གཡུལ་རྒྱལ་བྱེད་པ་ཡི། །ལོག་པའི་རྣལ་འབྱོར་ཐམས་ཅད་ཀུན། །དོན་ལ་མཁས་པའི་རྣལ་འབྱོར་པས། །ཐམས་ཅད་བསྒྲིམས་ཏེ་སྤང་བར་བྱ། །གལ་ཏེ་མ་སྤངས་ལོག་སྤྱོད་ན། །འཁོར་བའི་གཡུལ་ནི་རྒྱལ་འགྱུར་ཏེ། །བདེན་པའི་བྱིན་རླབས་མཐུ་ཆུང་འགྱུར། །ཞེས་སོགས་གསུངས་སོ། །དེ་བས་ན་ཉམས་པ་དང་འདྲིས་པ་ཉིད་ཀྱིས་ཀྱང་རྒྱལ་བའི་བཀའ་བཅག་པའི་ལས་བྱས་པའི་ཕྱིར་རོ། །ལྔ་པ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི། གང་གི་དོན་དུ། ཞེས་པ་ནས། གྱིས་ནི་དགའ་ནས་བྱ། །ཞེས་པའི་བར་གྱིས་བསྟན་ཏེ། འོ་ན་ཉམས་པའི་དོན་གཏན་འདིར་དགག་གམ་ཞེ་ན། རྣལ་འབྱོར་པ་གང་གི་དགེ་བའི་རྩ་བ་སྣ་ཚོགས་ཉམས་པ་ལ་སོགས་པ་བདག་དང་གཞན་གྱི་དོན་དུ་གང་འགྱུར་བའི་སྤྱོད་པར་ངེས་ན་དགེ་བ་དཀར་ཕྱོགས་ཕྲ་མོའི་ཕྲ་མོའམ་ཆུང་ངུའི་ཆུང་ངུར་གྱུར་པའི་ཕྲ་བ་ཡན་ཆད་ནས། ཆེན་པོའི་ཆེན་པོ་མན་ཆད་རིལ་ཐམས་ཅད་ནས་ཐམས་ཅད་དུ་ཇི་ལྟ་བར་མོས་པ་རྣམས་དོན་ཆུད་མི་གསན་པར་ནན་ཏན་གྱིས་ནི་འབད་དེ་སྙིང་རྗེ་ཆེན་པོ་དང་ལྡན་པར་དགའ་བ་དང་ལྡན་ནས་བཏང་སྙོམས་སྤངས་པས་སྒྲུབས་པར་བྱའོ། །གཉིས་པ་ལ་བཅུ་གསུམ་སྟེ། ཐེག་པ་འོག་མ་པ་སྙིང་རྗེའི་ཡུལ་དུ་དམིགས་ཏེ་འདེགས་པ། ཆུ་གཏོར་རྒྱ་ཆེན་པོ་གཏང་བ། སློབ་མ་གྲྭ་གཟུགས་པ། ཀློག་འདོན་བྱ་བ། ཆོས་ཀྱི་སྦྱིན་པ་བཏང་བ། བསྒོམ་ཆེན་འདེགས་པ། ཆོས་འཁོར་བྱ་བ། ལམ་སྲང་བཅོས་པ། ཚྭ་ཚྭ་གདབ་པ། བཤགས་པ་བྱ་བ། སྦྱིན་བསྲེག་བྱ་བ། དཀྱིལ་འཁོར་བྲི་བ། དགེ་བ་སྣ་ཚོགས་བྱ་བའོ། །དང་པོ་ནི། སློངས་མོ་པ་དང་། ཞེས་པ་ནས། ཁུད་པའི་ཞིང་དུ་བྱ། །ཞེས་པའི་བར་གྱིས་བསྟན་ཏེ། ཐེག་པ་ཆེན་པོ་གསང་སྔགས་ཀྱི་རྣལ་འབྱོར་པས། སློངས་མོ་བྱས་ཏེ་འཚོ་བའི་ཉན་ཐོས་པ་དང་། དེའི་རིགས་སུ་གཏོགས་པའི་སློང་བ་ལ་དགའ་བས་རང་རྒྱལ་ཡང་བསྡུས་ཤིང་། མདོ་སྡེའི་བྱང་སེམས་སློང་མོ་ལ་བརྟེན་པའི་བསོད་སྙོམས་ཀྱིས་འཚོ་བའི་ཆོས་ལ་ཚེ་གཅིག་ཏུ་སྤྱོད་པ་རྣམས། རང་རིག་གི་སྡེ་དང་ཚན་པ་དང་གྲྭར་བྱས་པའམ། ཡང་ན་ཉན་ཐོས་ཀྱི་སྡེ་དང་རང་རྒྱལ་གྱི་ཚན་དང་བྱང་སེམས་རྣམས་གྲྭར་བྱས་ཏེ། མཆོད་གནས་སུ་མི་བཀུར་བར་ལྷག་པར་ཡང་སྙིང་རྗེ་སྒོ་ཁུད་པའི་ཞིང་དུ་དགོངས་ཏེ་ཡུལ་དུ་བྱ་སྟེ། འཇིག་རྟེན་པ་བསོད་ནམས་ཆེ་ཆུང་གིས་སློང་བའི་ས་པ་དག་ཀྱང་དེ་བཞིན་དུ་བལྟའོ། །གཉིས་པ་ནི། སྨན་དང་འབྲུ་དང་། ཞེས་པ་ནས། ཆགས་མེད་སྦྱིན་པར་བྱ། །ཞེས་པའི་བར་གྱིས་བསྟན་ཏེ། སྨན་རྣམ་པ་ལྔ་ལ་སོགས་པ་དང་། འབྲུ་ལྔ་ལ་སོགས་པ་དང་། རྩི་ཏོག་ལྔ་ལ་སོགས་པ་རྣམས་དང་། སྙིང་པོ་ལྔ་ལ་སོགས་པ་བཅུད་ཀྱི་རིགས་དང་། རིན་པོ་ཆེ་ལྔ་ལ་སོགས་པའི་མཆོག་ཏུ་གྱུར་པ་དག །ཞིབ་ཏུ་བཏགས་སམ། ཕྱེ་མར་བྱས་ཏེ་བསྲེས་ནས་ཀྱང་། ཆུ་ཆེན་པོའི་ཀླུང་ངམ་སྣོད་ཀྱི་ཆུ་གང་དག་གམ་མཚོ་ཆེན་པོ་ལ་སོགས་པ་ཉིད་དུ་བླུགས་ཤིང་དོར་ཏེ། འཕགས་པ་དང་འགྲོ་བ་རྣམས་ལ་ཚུལ་བཞིན་དུ་བྱིན་གྱིས་བརླབས་ལ་ཆགས་པ་མེད་པར་མི་དམིགས་པས་ཟིན་པས་དབུལ་ཞིང་སྦྱིན་པར་བྱ་བའོ། །ཡང་ན་ལྔ་པོ་དག་གི་ཡུལ་དེ་རྣམས་བསམ་པས་དེ་ལྟར་གཟུང་ལ་སྦྱིན་པའི་དངོས་པོ་འདི་རྣམས་གཏང་བར་བཤད་དེ་ཆུའི་སྒྲས་མི་བཤད་པར་འགྲེལ་པ་ལུང་བསྟན་ལས་འབྱུང་བར་ཡང་གསུངས་སོ། །གསུམ་པ་ནི། གང་གི་རྟེན་དུ། ཞེས་པ་ནས། འཁོར་ལོའི་མཆོད་སྦྱིན་བྱ། །ཞེས་པའི་བར་གྱིས་བསྟན་ཏེ། ཐེག་པ་ཆེན་པོ་བས་དགེ་བའི་གནས་གང་གི་མཆོད་པའི་རྟེན་དུ་དམ་བཅས་ཤིང་ཁས་བླངས་ཏེ། ཉེ་རིང་མེད་པའི་ནད་པ་གསོ་བ་དང་གང་ཆོས་ལ་སློབ་སྦྱང་བྱེད་པའི་བྲི་ཀློག་གི་གྲྭ་གཟུག་པ་དང་། ཆོས་སྤྱོད་ཀྱི་གྲྭ་བྱ་བ་དང་། སྒོམ་པའི་གྲྭ་བཙུགས་ཏེ་བསྟི་གནས་མཆོག་ཏུ་བྱ་ཞིང་བཀུར་སྟི་ཆེན་པོ་བྱེད་པ་དང་། དུས་དུས་སུ་ཆོས་ཀྱི་འཁོར་ལོའི་གྲྭ་གཟུག་པ་དང་། ཚོགས་ཀྱི་མཆོད་པ་རྒྱ་ཆེན་པོ་དང་། འཕགས་པ་མཆོད་པར་བྱ་བ་དང་འགྲོ་བ་སེམས་ཅན་རྣམས་ལ་སྦྱིན་པ་རྒྱ་ཆེན་པོ་བཏང་བ་དང་ལྔ་བྱ་བའོ། །བཞི་པ་ནི། གང་ལ་དམ་པའི། ཞེས་པ་ནས། ཡངས་པའི་ལས་རྣམས་བྱ། །ཞེས་པའི་བར་གྱིས་བསྟན་ཏེ། གསུང་སྒྲ་རྒྱ་མཚོ་སྒྲོགས་པ་གང་སུ་ཞིག་ལ་རྒྱལ་བ་རྣམ་འདྲེན་དམ་པའི་ལུང་གི་བརྒྱུད་པ་བྱུང་ཞིང་ཐོབ་པ་ཡོད་པ་དེས་གསུང་གི་མཆོད་རྟེན་གླེགས་བམ་ཟབ་མོ་ཕྱི་ནང་ཀུན་བསྡུས་ནས་དེ་དག་ལ་བསྟེན་ཏེ། གཞན་ལ་བརྗོད་ཅིང་བཤད་པ་དང་བསྙེན་བཀུར་དང་བསྟི་གནས་སུ་བྱ་ཞིང་མཆོད་རྫས་སྣ་ཚོགས་ཀྱིས་མཆོད་པ་དང་། དེ་དག་གི་ཚིག་དོན་ལ་མཉམ་བསམ་སྒོམ་པ་བྱ་བ་དང་། ཀློག་འདོན་བྱེད་པ་དང་། གཞན་ལ་ཟབ་དོན་སྟོན་པ་སོགས་རྒྱ་ཆེར་ཡངས་པའི་དགེ་བའི་ལས་རྣམ་པར་དཀར་བ་རྣམས་ལ་འབད་པར་བྱ་སྟེ། ཀུན་འདུས་ལས། གསུང་སྒྲ་རྒྱ་མཚོ་སྒྲོགས་པ་ཡི། །གླེགས་བམ་ཟབ་མོ་ཀུན་བསྟེན་ཏེ། བརྗོད་དང་བསྙེན་བཀུར་བསྟི་གནས་ཀྱིས། །རྒྱ་ཆེ་ཡངས་པའི་ལས་རྣམས་བྱ། །ཞེས་སོ། །ལྔ་པ་ནི། གང་གི་དམ་པ། ཞེས་པ་ནས། ཡེ་ཤེས་ཚད་མེད་འགྱུར། །ཞེས་པའི་བར་གྱིས་བསྟན་ཏེ། འོ་ན་དེ་ལ་ཡོན་ཏན་ཅི་ཡོད་ཅེ་ན། དེ་ལྟར་གླེགས་བམ་ལ་བརྟེན་ནས་གང་དེའི་ཤེས་རབ་མཆོག་གི་རྒྱུད་དམ་པ་གོང་ནས་གོང་དུ་འཕེལ་ཞིང་གསལ་བར་འགྱུར་བ་སྟེ། ཚོགས་མཆོག་ཡེ་ཤེས་ཀྱི་རྒྱུའོ། །དེས་ན་གསང་རྒྱུད་འདི་ལྟར་ངེས་ཏེ་སྤྱོད་པ་མི་འགྱུར་བའི་རྣལ་འབྱོར་པ་དམ་པ་དག་གིས་ཆོས་ཀྱི་གཏམ་སྨྲ་བའམ། གླེགས་བམ་སྣ་ཚོགས་ལེགས་པར་སྦྱིན་ནམ། འདུས་ཤེས་བསྒྱུར་བའི་སློབ་དཔོན་གཞན་ལ་བསྟེན་ནམ། རྒྱུ་ཡི་ཆོས་ཀྱི་རིམ་པར་དྲངས་ནས་ཁྲིད་པར་བྱས་ན། དེ་ལྟ་བུའི་རྣལ་འབྱོར་པ་དེ་ཡི་ཡང་དག་པའི་ཡེ་ཤེས་ཉིད་ཚད་མེད་པར་གསལ་ཞིང་མངོན་དུ་འགྱུར་བ་ཡིན་ཏེ། སྔ་མ་ལས། ཡེ་ཤེས་ཚོགས་རྣམས་རྫོགས་བྱའི་ཕྱིར། །ཤེས་རབ་ཚོགས་ཀྱི་སྦྱིན་མཆོག་དག །བསྟན་ཏམ་གླེགས་བམ་ལ་སོགས་པའི། །བློ་མཆོག་ལྡན་པ་རྣམས་ལ་སྦྱིན། །ཞེས་སོ། །དྲུག་པ་ནི། གོམས་དང་གོམས་པར། ཞེས་པ་ནས། ཡུལ་གྱི་རྩལ་རྣམས་སྦྱངས། །ཞེས་པའི་བར་གྱིས་བསྟན་ཏེ། ཏིང་ངེ་འཛིན་སྔར་གོམས་ཟིན་པ་དང་ཕྱིས་སུ་གོམས་ཤིང་འདྲིས་པར་བྱེད་པ་ཡིས་སྒོ་ནས་ཀུན་གཞི་ལ་ཡོད་པའི་སྒྲིབ་པའི་ཕུང་པོ་གང་དེ་རྣམས་སྦྱངས་ཤིང་དག་པར་བྱ་བའི་དགོས་ཆེད་ཀྱི་ཕྱིར་དུ་བསམ་བསྒོམ་བྱེད་པའི་ཡུལ་ཏིང་ངེ་འཛིན་གྱི་སྒོ་བྱེ་བ་མང་པོ་ལ་འཇུག་ཅིང་བློ་མཆོག་དང་ལྡན་པས་དེ་ལྟར་མ་འདྲེས་ཡོངས་རྫོགས་ཉིད་དུ་ཏིང་ངེ་འཛིན་གྱི་ཡུལ་སྣ་ཚོགས་ཀྱི་དོན་ལ་ཡང་ནས་ཡང་དུ་རྩལ་རྣམས་སྦྱངས་ཏེ་གྲུབ་པར་གྱུར་པ་དེ་ལྟར་ཀུན་ཏུ་གོམས་པར་བྱེད་དེ་སྒོམ་ཆེན་གཞན་ཡང་འདེགས་པར་བྱ་སྟེ། སྔ་མ་ལས། བསྒོམ་དང་གོམས་པར་བྱ་བ་ཡིས། །ཀུན་གཞི་དག་པར་བྱ་བའི་ཕྱིར། །ཏིང་འཛིན་བྱེ་བ་མང་པོ་ལ། །བློ་མཆོག་ཡིད་ཀྱི་རྩལ་དེ་སྦྱང་། །ཞེས་སོ། །བདུན་པ་ནི། དམ་པའི་འཁོར་ལོ། ཞེས་པ་ནས། ལྷག་པའི་ཤེས་རབ་བལྟ། །ཞེས་པའི་བར་གྱིས་བསྟན་ཏེ། གསང་སྔགས་རྒྱུད་ཀྱི་དམ་པ་ལ་སོགས་པའི་ཆོས་ཀྱི་འཁོར་ལོ་ཆེན་པོ་རབ་ཏུ་བསྐོར་བའི་ཡོན་བདག་བྱས་ཏེ། བདག་གཞན་གྱི་ཤེས་རྒྱུད་སྦྱང་བ་དང་ལྷག་མཐོང་ཟབ་མོའི་ཡེ་ཤེས་སྐྱེད་དེ་གཞི་དོན་རྟོགས་པའི་ཤེས་རབ་མཆོག་ཏུ་གསང་བ་ལ་ཡང་དག་པར་བལྟ་བར་བྱའོ། །བརྒྱད་པ་ནི། ཤོ་གམས་སྲང་དང་། ཞེས་པ་ནས། འཁོར་ལོ་རྒྱུན་མི་གཅད། །ཅེས་པའི་བར་གྱིས་བསྟན་ཏེ། ཤོ་གམས་གཅན་ཆེན་གྱི་འཕྲང་དང་ལམ་སྲང་ངན་པ་དང་། ཤོ་གམས་ཀྱི་ལམ་དུ་འཚེ་བས་མི་བདེ་བའི་གནོད་པ་དེ་ཀུན་བསལ་ཏེ་ཚད་མེད་པའི་སྙིང་རྗེའི་འཁོར་ལོ་ཆེན་པོ་བསྐོར་ཏེ་སྤྱོད་པ་རྒྱུན་དུ་བྱ་བ་དང་། རྫས་དང་ལུས་དང་སྐྱབས་དང་ཆོས་ཀྱི་སྦྱིན་པའི་འཁོར་ལོ་བཞི་སྟེ། དེ་ལ་དང་པོའང་བུ་དང་བུ་མོ་དང་ཡུལ་དང་རྒྱལ་སྲིད་མན་ཆད་དོ། །གཉིས་པ་ཤ་དང་ཁྲག་དང་མགོ་དང་རྐང་ལག་གོ། །གསུམ་པ་གནོད་པའི་རྒྱུད་ལས་སྐྱོབ་པ་དང་། སྲོག་གི་བར་ཆད་ལས་སྐྱོབ་པ་དང་། འཁོར་བའི་གཡང་ས་ལས་སྐྱོབ་པའོ། །བཞི་པ་ཆོས་བསྟན་པ་དང་གླེགས་བམ་དང་མཁན་པོར་ལུང་བསྟན་པ་སྟེ། དེ་དག་རྒྱུན་མི་གཅད་པའོ། །དགུ་པ་ནི། ཆུའམ་སའམ། ཞེས་པ་ནས། ལས་ཆེན་འཁོར་ལོར་བྱ། །ཞེས་པའི་བར་གྱིས་བསྟན་ཏེ། ཆུའམ་སའམ་ནམ་མཁའམ། མེའམ་དེ་བཞིན་དུ་རླུང་སྟེ་འབྱུང་བ་ལྔ་པོ་རྣམས་ལ་སྐུ་གདུང་དང་མཆོད་རྟེན་གྱི་སཙྪ་མང་པོ་བཏབ་སྟེ་སྤེལ་བ་ལ་ཡུན་རིང་པོར་མཆོད་པ་འབུལ་བ་དང་། རིང་བསྲེལ་དང་ལྡན་པའི་སྐུ་མང་པོ་རྣམས་བྱས་ཤིང་བཏབས་ན་ལུས་ངག་གིས་བརྩམ་པའི་ཐུན་མོང་གི་དགེ་བའི་ལས་ཆེན་པོ་ཡིན་པས་དེ་ལྟར་རྒྱུན་གྱི་འཁོར་ལོར་བྱ་ཞིང་དེ་དག་ལ་ཡེ་ཤེས་པ་སྤྱན་དྲངས་ཏེ་བསྟིམ་ཞིང་མཆོད་པ་དང་བསྟོད་པ་སོགས་པར་མི་བཅད་པར་བྱའོ། །བཅུ་པ་ནི། མཚམས་མེད་བཟློག་པར། ཞེས་པ་ནས། ལུས་ཀྱིས་མཆོད་སེམས་བཤགས། །ཞེས་པའི་བར་གྱིས་བསྟན་ཏེ། མཚམས་མེད་པ་ལྔའི་སྡིག་པའི་ལས་ཀྱིས་རྣམ་པར་སྨིན་པས་མི་གོས་པར་ཟློག་པར་བྱེད་པ་ཡི་ཐབས་སུ་རང་གི་ལུས་ངག་དང་སེམས་རྒྱུད་ལ་ཞེན་འཛིན་རྡུལ་དུ་རླགས་པར་བྱ་ཞིང་། འདི་ཉིད་བརྩོན་འགྲུས་ཀྱི་དོན་ཡང་ཡིན་ཏེ། དེ་བས་རྒྱལ་བ་སྲས་དང་བཅས་པའི་འཕགས་པའི་སྤྲིན་ཚོགས་མང་པོ་ཕོ་བྲང་དུ་ཡིད་ཀྱིས་སྤྱན་དྲངས་ལ། བདག་གི་ལུས་ཀྱང་རྡུལ་སྙེད་དུ་སྤྲུལ་ཏེ། དེ་དག་རེ་རེའི་སྤྱན་སྔར་གུས་པ་ཆེན་པོའི་ཚུལ་གྱིས་འདུག་པས་ལུས་ངག་དང་བ་དང་བཅས་ཏེ་དངོས་སམ་ཡིད་ཀྱིས་མཆོད་པ་ཕུལ་ལ། ལས་ངན་པ་ཡང་བ་སྤྱོད་པ་ལ་འགྱོད་པ་དྲག་པོ་དང་བཅས་པའི་སེམས་ཀྱིས་ཡང་ཡང་བཤགས་པར་བྱའོ། །ཡན་ལག་བདུན་པ་བྱ་བར་ལུང་བསྟན་གྱིས་བཤད་དོ། །ཞེས་ཀྱང་འབྱུང་ངོ་། །བཅུ་གཅིག་པ་ནི། རྒྱལ་མཉེས་ལས་ཀྱི། ཞེས་པ་ནས། མཚམས་མེད་བཟློག་པ་ཡིན། །ཞེས་པའི་བར་གྱིས་བསྟན་ཏེ། རྒྱལ་བ་ཀུན་མཉེས་ཤིང་དགྱེས་པ་བསྐྱེད་པའི་ཕྲིན་ལས་རྣམ་པ་བཞིའི་སྒོ་ནས་ཐབས་ཁྱད་པ་ཅན་གྱི་བུད་ཤིང་བསྲེགས་པའི་སྦྱིན་སྲེག་བྱས་པ་ན། ཞི་བས་ཉོན་སྒྲིབ་སྦྱང་ཞིང་རྒྱས་པས་ཤེས་སྒྲིབ་སྦྱང་ལ། དབང་གིས་ལྟ་སྒྲིབ་སྦྱང་སྟེ། དྲག་པོས་ལས་སྒྲིབ་སྦྱང་བ་ཡིན་པས། གསང་བ་སྔགས་ཀྱི་ཐབས་ཆེན་པོ་མཆོག་གིས་འབྲས་བུ་ལ་སྦྱོར་བའི་སྤྱིའི་ལམ་ཆེན་པོ་ཉིད་ལས། དད་པ་རླབས་པོ་ཆེའི་མེ་དང་། འགྱོད་པ་དྲག་པོའི་མེ་དང་། ཏིང་ངེ་འཛིན་གྱི་མེ་དང་། ཤེས་རབ་ཀྱི་མེ་སྟེ་རྣམ་པ་བཞི་དང་ལྡན་པས་མེ་ཡི་ལས་མཆོག་ཞི་རྒྱས་དབང་དྲག་གམ་ཀུན་འདུས་ལྷུན་གྱིས་གྲུབ་པར་བྱ་བ་དེས་ནི་མཚམས་མེད་པ་ལྔའི་དབང་དུ་མི་འགྱུར་བར་བཟློག་པར་བྱེད་པ་ཡང་ཡིན་ནོ། །བཅུ་གཉིས་པ་ནི། སྙིང་རྗེ་འབྱུང་བའི། ཞེས་པ་ནས། གོམས་ལྟར་ནན་ཏན་བྱ། །ཞེས་པའི་བར་གྱིས་བསྟན་ཏེ། ཐུགས་རྗེ་ཆེན་པོའམ་སྙིང་རྗེ་འབྱུང་བའི་གཞིར་གྱུར་པས་གསང་སྔགས་ཕྱི་ནང་གི་དཀྱིལ་འཁོར་ཆེན་པོ་དེ་དག་རྣམས་རྒྱུད་གང་དང་གང་ལས་འབྱུང་བ་ལྟར་རང་གང་ལ་གོམས་པ་ཡོད་པ་ལྟར་བཞེངས་སུ་གསོལ་ཏེ་འབད་རྩོལ་གྱིས་མཆོད་པ་ནན་ཏན་དུ་བྱ་བ་སྟེ། ཀུན་འདུས་ལས་ནི། ཐུགས་རྗེ་འབྱུང་བའི་འཁོར་ལོ་དག །གང་ལྟར་གོམས་ལྟར་འབད་རྩོལ་བྱ། །བསྟན་པ་སྐྱོང་བའི་ཚོགས་རྣམས་ལ། །སྦྱིན་མཆོད་སྤེལ་བའི་ལས་རྣམས་བྱ། །ཞེས་གསུངས་པ་སོགས་འདི་དག་གསལ་བར་བསྟན་ནོ། །བཅུ་གསུམ་པ་ནི། དེ་ལ་སོགས་པའི། ཞེས་པ་ནས། ཚོགས་ཀྱི་དཔུང་ཆེན་བསྐྱེད། །ཅེས་པའི་བར་གྱིས་བསྟན་ཏེ། མདོར་ན་དེ་ལྟར་དགེ་བའི་ལས་རྣམ་གྲངས་སོ་སོར་བཤད་ན་བཅུ་བདུན་དུ་འགྱུར་བ་ལ་སོགས་པ་གཏོར་མ་ཆ་གསུམ་དང་ཐ་ན་ཁམ་གཅིག་ཙམ་སྦྱིན་པ་ཡན་ཆད་ཀྱི་དགེ་བའི་རྩ་བ་སྣ་ཚོགས་པ་དག །སྔ་མ་ལས། བདག་དང་གཞན་དང་གཉི་ག་དང་། །ཆོས་ཀྱི་དོན་དུ་མི་འགྱུར་བའི། །སྐྱོན་བཞི་པོ་དག་སྤངས་ནས་ནི། །དེ་ལས་བཟློག་པའི་ཚུལ་ལྡན་པས། །རྣལ་འབྱོར་སྙིང་དང་མིག་ལྟ་བུར། །གདུང་བའི་འདུ་ཤེས་ཉེར་བཞག་སྟེ། །ཅི་བཞིན་འདོད་པ་ཉེ་བར་སྦྱར། །ཞེས་སོགས་གསུངས་པ་ལྟར། བདག་དང་གཞན་དང་གཉིས་ཀ་དང་ཆོས་ཀྱི་དོན་དུ་མི་འགྱུར་བ་དང་བཞི་པོ་ཀུན་སྤངས་ཤིང་བསལ་ཏེ་ནན་ཏན་དང་ལྡན་པས་བསོད་ནམས་རྒྱ་མཚོ་ལྟ་བུའི་དགེ་བའི་ཚོགས་ཀྱིས་དཔུང་ཆེན་པོ་བསྐྱེད་པར་བྱ་བ་ཉིད་དོ། །གསུམ་པ་ནི། འདི་ལྟར་ལས་ཀྱི། ཞེས་པ་ནས། སྟངས་ཆེན་ཀུན་བསྡོངས་ཏེ། །ཞེས་པའི་བར་གྱིས་བསྟན་ཏེ། དེ་དག་གི་དགོས་པ་ཅི་ཞིག་སྙམ་པ་ལ། འདི་ལྟར་གཞུང་འདིར་བཤད་པ་བཞིན་དུ་དགེ་བའི་ལས་ཀྱི་སྟངས་མ་བསོད་ནམས་ཀྱི་ཚོགས་རྒྱ་ཆེན་པོ་ལ་སོགས་པ་གསོགས་པའང་དགོས་པ་གཞན་ཞིག་གི་ཆེད་དུ་སྤྱོད་པ་མ་ཡིན་ཏེ། ཚེ་འདི་དང་ཁེ་གྲགས་ལྟ་བུའི་དབང་དུ་མ་སོང་བར་བསམ་གཏན་ལ་སེམས་མཉམ་པ་རྩེ་གཅིག་ཏུ་གནས་ཤིང་བློ་མི་དམིགས་པའི་དོན་དང་ལྡན་པའི་བསམ་པས་ཡུལ་གཉིས་སུ་མེད་པར་ཡིད་ལ་བྱ་བའི་རྣལ་འབྱོར་པ་ཡིད་གཉིས་མེད་པ་རྣམས་ཀྱིས་བསྒྲུབ་པའི་སྔོན་དུ་བྱ་བའི་ལས་དང་བསམ་པ་ལ་མི་གནོད་པ་ཙམ་དུ་བྱ་བའང་རང་གི་ཤེས་པའི་རྒྱུད་སྦྱོང་བ་དང་། བདག་གཞན་གྱི་དོན་དང་ལྡན་པར་བྱ་བའི་ཕྱིར་སྤྱོད་པ་ཡིན་པས་ཡོན་ཏན་འཆར་བར་ངེས་པ་དང་། བརྒྱ་ལ་གལ་ཏེ་སྒོ་གསུམ་གྱི་ནུས་པ་ཆུང་ཞིང་ཤེས་རབ་ཀྱི་རྩལ་ཞན་པས་དེ་དག་མ་ལུས་པ་རྣམས་མི་དམིགས་པ་དང་ལྡན་པར་མ་གྲུབ་ན་ཡང་སྔར་དང་ཚེ་རབས་ཀྱི་དགེ་བ་ཅི་སྤྱད་ཅིང་བསགས་པའི་སྟངས་ཆེན་ཡོད་དོ་ཅོག་ཀུན་བསྡོངས་ཤིང་བསྡོམས་ཏེ་དོན་བགྲང་ཞིང་བསྔོ་བ་སོགས་ལ་འབད་དོ། །གཉིས་པ་ནི། གང་འདིར་བསགས་པའི། ཞེས་པ་ནས། ཆེན་པོ་དེ་ཉིད་དོ། །ཞེས་པའི་བར་གྱིས་བསྟན་ཏེ། དེ་ལྟར་གང་གི་སྐབས་འདིར་ཡང་འགྲོ་བ་སེམས་ཅན་ཐམས་ཅད་སྙིང་རྗེའི་ཡུལ་དུ་གཟུང་སྟེ། ཚེ་རབས་ཀྱི་དགེ་སྡིག་ཅི་སྤྱད་པ་དང་ཚེ་འདིར་ཡང་སྔར་ཇི་ལྟར་བསགས་པའི་དོན་རྣམས་བགྲངས་ཤིང་བསྡོམས་ལ། དགེ་བ་ནི་མཚམས་མེད་ཟློག་པར་བྱེད་པའི་སྐབས་སུ་བཤད་པ་ལྟ་བུར་བསམ་ལ་བྱང་ཆུབ་ཆེན་པོར་བསྔོའོ། །སྡིག་པ་རྣམས་ནི་ལུས་ངག་ཡིད་ཀྱིས་གདུང་བའི་ཤུགས་ཆེན་པོ་ཕྱུང་ཞིང་མཆི་མ་བླགས་ཏེ་འགྱོད་སེམས་ཀྱིས་རྩལ་དྲག་པོས་བཤགས་པར་བྱའོ། །དེ་ལྟར་སྒོ་གསུམ་རྩལ་སྤྲུགས་ཀྱིས་ཤུགས་བྱུང་ནས་ཉི་མ་རེ་རེ་བཞིན་བྱས་ན་སྒྲིབ་པ་དག་ནས་དངོས་གྲུབ་འབྱུང་བ་ནི། དཔེར་ན་ཉི་མ་ཤར་བའི་གཟུགས་བརྙན་ཆུ་ཀླུང་དྭངས་པར་གསལ་བའམ། དེའི་ནང་དུ་ཟླ་བའི་གཟུགས་བརྙན་སྣང་ལ་རང་བཞིན་མེད་པར་འཆར་བ་ལྟར་དུ་ཡེ་ཤེས་རང་གསལ་གྱི་དངོས་གྲུབ་རང་བཞིན་ཤུགས་ཀྱིས་རང་དབང་མེད་པར་འབྱུང་བ་ཡིན་པས་དེ་ལྟར་ལེགས་པའི་ལས་ལམ་ལ་འབད་པར་བྱེད་པ་ཤིན་ཏུ་གཅེས་སོ། །གཏན་ཚིགས་དེ་ཡི་ཕྱིར་ན་དགེ་བ་ཆུང་ངུ་ཕྲ་མོ་ཡན་ཆད་ཀྱང་རང་གཞན་གྱི་རྒྱུད་ལ་བྱང་ཆུབ་དམ་པ་རྫོགས་སངས་རྒྱས་ཀྱི་འབྲས་བུ་འགྲུབ་པའི་དོན་དུ་འགྱུར་བའི་གཞིར་ངེས་པར་དཔྱོད་དེ་ལེགས་པར་བརྩོན་པར་བྱ་བའོ། །འདིར་ཀུན་འདུས་ལས་ནི། ཁམས་གསུམ་སྙིང་རྗེའི་གནས་རྣམས་ལ། །ཡོ་བྱད་སྦྱིན་ཚོགས་ཆེན་པོ་ལས། །འདོད་པའི་བསམ་པ་རངས་བྱས་ན། །མགུ་བས་སྐོངས་པའི་སྟོངས་སུ་འགྱུར། །ཞེས་སོགས་སྐོང་བའི་ཐབས་ཀྱི་སྟོངས་ཡང་རྒྱ་ཆེར་འབྱུང་ངོ་། །འོ་ན་གཅིག་ཆར་འཇུག་པའི་བློ་མཆོག་གིས་ཀྱང་ཐམས་ཅད་དུ་དེ་ལྟར་སྤྱད་ཅིང་དེ་ལ་རག་ལས་སམ་ཞེ་ན། ཐེག་ཆེན་གསང་བ་མཆོག་གི་སྒོ་གང་འདིར་ཤེས་པས་ཟིན་པ་དང་མ་ཟིན་པའི་དངོས་པོ་བརྟན་པ་སྣོད་དང་གཡོ་བ་བཅུད་ཐམས་ཅད་རིལ་དང་། ལ་སོགས་པ་ཞེས་བསྡུ་བའི་དོན་གྱིས་མྱ་ངན་ལས་འདས་པའི་ཆོས་རྣམས་དང་བཅས་པ་མ་ལུས་པ་ཀུན་ཆོས་དབྱིངས་དེ་བཞིན་ཉིད་དུ་གཉིས་སུ་མེད་པར་རྟོགས་པའི་ཡེ་ཤེས་ཆེན་པོ་ལ་འཁོར་བ་སངས་རྒྱས་ཀྱི་སར་བཀོད་ཟིན་པས་དོན་བྱར་མེད་པའི་དོན་ལ་དེ་ཉིད་དུའང་འཛིན་པ་མེད་པར་བློ་བཞག་སྟེ་སྒོམ་ན་སྙིང་རྗེ་ཆེན་པོ་བླ་ན་མེད་པས་འགྲོ་དོན་མ་བྱས་རྫོགས་པའི་ཕྱིར་ཡུལ་གཉིས་ཀ་ལ་ཞུགས་ཟིན་པས་གཉིས་སུ་མེད་པའི་དེ་ཁོ་ན་ཉིད་ཡིན་ཏེ། དེ་བས་ན་སྐྱེས་བུ་མཆོག་གི་ལས་ལ་སྤང་བླང་མེད་དོ། །གསུམ་པ་ནི། ལང་ཀའི་བདག་པོ། ཞེས་པ་ནས། རྙེད་པར་གྱུར་ཏོ། །ཞེས་པའི་བར་གྱིས་བསྟན་ཏེ། འཆད་པའི་སྐྱེས་བུ་ཆེན་པོས། ལང་ཀའི་བདག་པོ་ཞེས་བོས་ནས། བཤད་པ་དེ་ལྟར་ན་དགོངས་པ་དང་དོན་བྱ་བའི་ཡུལ་གང་གཞན་ན་མེད་པའི་དོན་དེའི་ཚུལ་གྱིས་ནི་སྤྱོད་ཡུལ་གྱི་དངོས་པོ་གང་ཡང་སྣང་ལ་འཛིན་པ་མེད་པས་བདག་ལས་གཞན་དུ་སྣང་སྟེ་ཡུལ་དང་ཡུལ་ཅན་གྱི་དངོས་པོར་འཇུག་པ་མེད་པར་རྟོགས་པའི་ལུང་ཆེན་པོ་ཐ་དད་དུ་འཇུག་ཏུ་མེད་པའི་ངོ་བོ་ཉིད་ལས་མི་གཡོ་བར་དེ་ལྟར་གང་གིས་ཡང་དག་པར་ཤེས་ཏེ་འཇུག་པ་ཉིད་ནི། ཆོས་ཉིད་དང་སྙིང་རྗེ་ཆེན་པོའི་ཡུལ་ལ་འཇུག་པ་རྣམས་ཀྱི་ནང་ནས་མཆོག་དམ་པ་ཕུལ་དུ་བྱུང་བ་སྟེ། དགོངས་སྤྱོད་གཉིས་ཀ་ལྷུན་གྱིས་གྲུབ་པས་རྩོལ་མེད་བདེ་བ་ཆེན་པོ་ཁོ་ནའོ། །དེ་སྐད་ཅེས་བཀའ་སྩལ་ཏེ་ཚིག་སྨྲས་པས་འཁོར་ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་རྣམས་ཀྱིས་གང་གི་རྒྱུན་དུ་ཡུལ་ལ་འཇུག་པའི་དོན་དེའི་ཐེ་ཚོམ་ཆོད་དེ་ངེས་པ་དམ་པ་རྙེད་པར་གྱུར་ཏོ།། །།ལེའུའི་མཚན་ནི། སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། ལམ་གྱི་སྔོན་དུ་འགྲོ་བའི་དགོངས་པ་དང་སྙིང་རྗེའི་ཡུལ་དམ་པ་ལ་འཇུག་པ་བསྟན་པའི་ལེའུ་ཞེས་བྱ་སྟེ་དྲུག་ཅུ་རྩ་གཉིས་པ་ཉིད་ལེགས་པར་འགྲེལ་པའོ།། །།བརྒྱད་པ་མེ་ལོང་བརྟག་པར་བྱ་བ་ལ་གསུམ་སྟེ། མདོར་བསྟན་པ། རྒྱས་པར་བཤད་པ། ཞབས་བསྡུ་བའོ། །དང་པོ་ནི། དེ་ནས་ཡང་། ཞེས་པ་ནས། སྣང་དུ་བཏུབ་པའི་དཔེ། །ཞེས་པའི་བར་གྱིས་བསྟན་ཏེ། །ལེའུ་འདིས་ངེས་དོན་སྟོན་ཏེ་དོན་དང་ཡི་གེའི་རྣལ་འབྱོར་གཉི་གའི་ལྟ་བ་གཅིག་ཡིན། དེའང་ཡི་གེའི་རྣལ་འབྱོར་གྱི་ཤས་ཆེའོ། །ཡུལ་ལ་འཇུག་པ་བཤད་མ་ཐག་པ་དེ་ནས་ཡང་འཁོར་ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་དེ་དག་གིས། སྟོན་པ་གསང་བ་པའི་བདག་པོ་ལ། ལེའུ་ཞེ་ལྔ་པར་ཆོས་ཀྱི་རྣམ་གྲངས་བཅུར་བཀོད་པའི་བརྒྱད་པ་གསང་སྔགས་ཀྱི་གཞི་བཅུ་དཔེས་མཚོན་པའི་དོན་རྣམས་ཀྱི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ། ཉིད་ཀྱིས་སྔར་གོང་དུ་མེ་ལོང་བརྟག་པར་བྱའོ། །ཞེས་དམ་བཅའ་བར་དགོངས་པ་དེ་ཉིད་ཇི་ལྟར་ཡོངས་སུ་བརྟག་པར་བགྱི། དེ་སྐད་ཅེས་དྲིས་པ་ལས། སྟོན་པ་གསང་བ་པའི་བདག་པོས་ལན་སྨྲས་ཏེ་བཀའ་སྩལ་པ། ཀྱེ་གྲོགས་པོ་དག །ཅེས་འཁོར་ལ་བོས་ནས་དོན་གྱི་དངོས་པོ་གང་ཡང་རུང་བ་ལ་དེ་དང་མཐུན་པར་གང་གིས་ཉེ་བར་མཚོན་པས། བཅུ་ཀ་དེ་ཁོ་ན་ཉིད་དུ་ཤེས་པར་འགྱུར་བའི་མཚོན་པ་དཔེའི་མེ་ལོང་ནི་དོན་དང་བཅས་ཏེ་རྣམ་གྲངས་བཅུ་ཕྲག་གཉིས་ཀྱིས་འདི་ལྟར་བསྟན་ཏེ་གང་ཞེ་ན། དོན་བཅུ་ནི། སྒྲུབ་པ་སྣང་བ་དང་། གསང་སྔགས་ཀྱི་མིང་བརྟགས་པ་དང་། སྐུ་ཕྱག་རྒྱ་འབྱུང་བ་དང་། སྤྱོད་པ་མི་ཆགས་པ་དང་། བཟླས་བརྗོད་ནུས་པ་འབྱུང་བ་དང་། ལྟ་བ་སྣང་བ་མེད་པ་དང་། ཏིང་ངེ་འཛིན་དག་པ་དང་། གཞན་ཡང་ཁང་གནས་དང་། ཆོ་འཕྲུལ་སྣ་ཚོགས་འབྱུང་བ་དང་། དངོས་གྲུབ་དོན་དང་མཐུན་པ་རྣམ་པ་བཅུའོ། །དཔེ་བཅུ་ནི། སྒྱུ་མ་ལྟ་བུ་དང་། སྨིག་རྒྱུ་དང་། ཆུ་ཟླ་དང་། རྨི་ལམ་དང་། སྒྲ་བརྙན་དང་། མིག་ཡོར་དང་། མགལ་མེའམ་ཆུ་བུར་དང་། དྲི་ཟའི་གྲོང་ཁྱེར་དང་། སྤྲུལ་པ་དང་། གཟུགས་བརྙན་ལྟ་བུར་མཚོན་པས་མེ་ལོང་བཅུ་སྟེ། བཤད་པའི་དོན་རྣམས་དང་མཐུན་པའི་དཔེའི་དམིགས་བཅུ་ཡིས་དཔེ་རིས་དོན་དེ་རིམ་པར་མཚོན་ནས་རྣམ་པར་གཞག་པ་ཉིད་དེ། ཀུན་འདུས་ལས། ཟབ་མོར་སྤྱོད་པ་ལ་མོས་པས། །གང་ཞིག་དོན་ལ་འདྲིས་པ་ཡི། །གསང་སྔགས་སྤྱོད་པའི་རང་བཞིན་ནི། །མཐུན་པའི་དམིགས་བཅུ་དཔེར་བཞག་སྟེ། །རྣལ་འབྱོར་ཅན་གྱིས་ཤེས་པར་བྱ། །སྒྱུ་མ་སྨིག་རྒྱུ་རྨི་ལམ་དང་། །གཟུགས་བརྙན་དྲི་ཟའི་གྲོང་ཁྱེར་དང་། བྲག་ཆ་ཆུ་ཟླ་མིག་ཡོར་དང་། །ཆུ་བུར་འཁྲུལ་དང་མགལ་མེར་སྣང་། །སྒྲུབ་དང་གསང་སྔགས་སྤྱོད་པ་དང་། །གྲུབ་པ་དང་ནི་གནས་དག་དང་། །བཟླས་པའི་སྒྲ་དང་ཕྱག་རྒྱར་རྟོག །ཏིང་འཛིན་ལྟ་བ་ཆོ་འཕྲུལ་བརྟག །ཅེས་གསུངས་ཏེ་དཔེ་རྣམས་དེ་ལྟར་ཡང་ཤེས་པས་དོན་ལ་ངེས་པ་ལྷག་པར་འདྲེན་པས་དྲང་ངོ་། །དེའང་བྱང་ཆུབ་སེམས་ཀྱི་ངོ་བོ་ཉིད་མཚན་ཉིད་ཐམས་ཅད་དང་བྲལ་བས་དངོས་པོ་མེད་ཀྱང་མི་མཐུན་པ་གསང་སྔགས་ཀྱི་དངོས་པོ་བཅུར་སྣང་བས་ན་དངོས་མེད་ཀྱི་ངོ་བོས་དངོས་པོར་སྣང་དུ་བཏུབ་པའི་ཚུལ་མཚོན་པ་དཔེ་ཡིས་སྟོན་པའོ། །གཉིས་པ་ལ་གཉིས་ཏེ། དཔེ་དོན་སྦྱར་ཏེ་སོ་སོར་བསྟན་པ། དཔེས་མཚོན་པའི་དོན་གྱི་མཇུག་བསྡུ་བའོ། །དང་པོ་ལ་བཅུ་སྟེ། གསང་སྔགས་ཀྱི་སྒྲུབ་པ་སྒྱུ་མ་ལྟ་བུར་སྣང་བར་བསྟན་པ། མིང་སྨིག་རྒྱུ་ལྟ་བུར་བཏགས་པར་བཤད་པ། ཕྱག་རྒྱ་ཆུ་ཟླ་ལྟ་བུར་འབྱུང་བར་བསྟན་པ། སྤྱོད་པ་རྨི་ལམ་ལྟ་བུར་མ་ཆགས་པར་བཤད་པ། བཟླས་པ་སྒྲ་བརྙན་ལྟ་བུར་འབྱུང་ཞིང་གྲུབ་པར་བསྟན་པ། ལྟ་བ་མིག་ཡོར་ལྟ་བུར་སྣང་ཡང་མེད་པར་བཤད་པ། ཏིང་ངེ་འཛིན་ཆུའི་ཆུ་ལྦུར་ལྟ་བུར་དག་པར་བསྟན་པ། གནས་དྲི་ཟའི་གྲོང་ཁྱེར་ལྟ་བུར་ངེས་པ་མེད་པར་བཤད་པ། ཆོ་འཕྲུལ་སྤྲུལ་པ་ལྟ་བུར་ཅིར་ཡང་འབྱུང་བར་བསྟན་པ། དངོས་གྲུབ་གཟུགས་བརྙན་ལྟ་བུར་སྐབས་དང་མཐུན་པར་བཤད་པའོ། །དང་པོ་ནི། ཇི་ལྟར་སྒྱུ་མའི། ཞེས་པ་ནས། སྣང་འབྱུང་བར་རང་བཞིན་མེད། །ཅེས་པའི་བར་གྱིས་བསྟན་ཏེ། དེ་དག་སོ་སོ་ནས་བསྟན་པ་ནི། དཔེ་ཇི་ལྟར་ན་རྒྱུ་རྐྱེན་ལས་སྣང་བའི་སྒྱུ་མའི་རང་བཞིན་ཡང་ནི། སྐྱེས་བུ་སྒྱུ་མ་མཁན་གང་གི་ལག་པས་རྩོལ་བ་བྱེད་པའི་ཐབས་དང་། རྡེའུ་ཤིང་སོགས་ཀྱི་སྨན་དང་ཤེའུ་རེའུ་ཨྀ་ན་ཡ་ཨ་མོ་ཀ་ཨ་འགུས་ས་འགུས་སོགས་ཀྱི་སྔགས་དང་རྫས་ཀྱི་སྦྱོར་བ་འཛོམ་པ་ལས་འགྲོ་བ་བཟང་མོ་ལ་སོགས་པར་སྣང་བས་ལྟད་མོ་བའི་མིག་གི་དབང་པོ་དང་ཡིད་འཕྲོག་ཅིང་དགའ་བར་བྱེད་པའི་དངོས་པོ་གང་ཅིར་སྣང་ཡང། རྒྱུ་རྐྱེན་ལས་སྣང་བའི་སྒྱུ་མའི་དངོས་པོ་དེ་དག་ལའང་འགྲོ་འོང་གི་ངོ་བོའི་དངོས་པོ་མེད་པ་ལྟར་དུ། དཔེས་མཚོན་པའི་དོན་ནི། འདི་ལྟར་ཚུལ་དེ་བཞིན་དུ་གསང་སྔགས་མཆོག་གི་སྒྲུབ་པའི་རང་བཞིན་ཡང་། ངོ་བོ་ཅི་ཡང་མེད་པའི་རྒྱུ་ཡི་དང་ལས་དངོས་གྲུབ་འབྱུང་བའི་ཚུལ་ཡིག་འབྲུ་དང་ཆོ་ག་དང་རྫས་ཀྱི་སྦྱོར་བ་ལས་སུ་རུང་བ་ལས་སྔགས་ཀྱི་དངོས་གྲུབ་སྣ་ཚོགས་འདུ་བ་སྟེ་ཇི་ལྟར་སྣང་ཞིང་འབྱུང་ན་ཡང་དེའི་ངོ་བོ་འདི་འདྲར་གྲུབ་པའི་རང་བཞིན་བསྟན་དུ་མེད་དོ། །དེ་ལྟར་ཡང་ཀུན་འདུས་ལས། ཇི་ལྟར་སྒྱུ་མའི་མཚན་ཉིད་ནི། །སྐྱེས་བུ་དག་གི་རྩོལ་བ་དང་། །སྨན་དང་སྔགས་ཀྱི་སྦྱོར་བ་ལས། །དབང་པོ་ཡིད་འཕྲོག་ཅིར་སྣང་ཡང་། །དེ་ལ་འགྲོ་འོང་ག་ལ་ཡོད། །དེ་ལྟར་སྒྲུབ་པའི་མཚན་ཉིད་ཀྱང་། །ཡིག་འབྲུ་རྫས་ཀྱི་སྦྱོར་བ་ལས། །གྲུབ་པར་སྣང་ཡང་རང་བཞིན་མེད། །ཅེས་སོ། །གཉིས་པ་ནི། གང་འདིར་སྨིག་རྒྱུའི། ཞེས་པ་ནས། སྟོང་པས་དེ་མི་དམིགས། །ཞེས་པའི་བར་གྱིས་བསྟན་ཏེ། དཔེར་ན་གང་འདིར་སྨིག་རྒྱུའི་རང་བཞིན་ནི། དཔྱིད་དྲོད་གཡོ་བའི་དུས་ནས་ཚ་སྒོ་ཅན་དུ་ཉི་མ་ཕྱེད་ལ་ཉེ་བར་རླུང་གཞོལ་ཕྱོགས་སུ་བབ་པའི་ཚེ་ལྟ་བ་པོ་རྒྱང་ན་གནས་པའི་རྐྱེན་དང་བཞི་ལྡན་པས་ཆུར་སྣང་སྟེ། ནམ་ཟླ་དུས་བཞིའི་འཇིག་ཆགས་བཞི་ལས་དགུན་གྱི་གྲང་རེག་འཇིག་ཅིང་དྲོད་འབྱུང་བ་གཡོ་བའི་དཔྱིད་ཟླ་ཐ་ཆུང་གི་དུས་དག་ལ་བབ་ནས་དྲོད་དང་ཉི་མ་འཛོམ་པ་སོགས་ཀྱིས་རྐྱེན་དེ་དག་ལྡན་པ་དེ་ཡི་རང་བཞིན་ལས་སྨིག་རྒྱུ་བ་ན་བྱིས་པ་སྐོམ་གྱིས་གདུང་བའི་ཆུར་བཟུང་སྟེ་སྐོམ་སེལ་བའི་འདུ་ཤེས་ཀྱིས་ཆུ་ཡི་འདུ་ཤེས་སྐྱེད་ཅིང་བསམ་པ་ཉེར་ཞེས་ཉེ་བར་བཞག་ནས་བདག་ཀྱང་དེ་ལ་ཆུ་མེད་པས་ངོམས་ཤིང་སིམ་པའམ་ཚིམ་པའི་རྒྱུ་དེར་ག་ལ་འགྱུར་ཏེ་མི་འགྱུར་རོ། །དཔེ་དེ་བཞིན་དུ་གསང་སྔགས་ཐེག་པ་ཆེན་པོ་དེ་ཡི་མིང་གི་ངོ་བོའི་ཁྱད་པར་ཡང་ཆོས་ཀུན་མཚན་ཉིད་གདོད་མ་ནས་རྣམ་པ་ཀུན་ལྡན་གྱི་རང་བཞིན་སྟོང་པ་ཆེན་པོ་མི་དམིགས་པའི་ངང་ལ་ཐ་སྙད་མཚོན་པས་མཚན་མའི་མིང་དུ་བཏགས་པ་ཡིན་ཀྱང་མིང་སྣ་ཚོགས་པ་དེ་ཉིད་སྟོང་པ་ཉིད་པས་དེ་ཡི་རང་བཞིན་མི་དམིགས་ཏེ་ངོ་བོ་འདི་འདྲར་མེད་པ་སྟེ། སྔ་མ་ལས། ཇི་ལྟར་སྨིག་རྒྱུའི་མཚན་ཉིད་ནི། །ཞིང་པའི་དུས་ཀྱི་ཟླ་བ་ལ། །དྲོད་དང་ཉི་མའི་སྦྱོར་བ་ལས། །བྱིས་པ་གདུངས་པའི་རང་བཞིན་གྱིས། །ཆུ་ཡི་འདུ་ཤེས་ཅི་བསྐྱེད་ཅིང་། །ཚིམ་པའི་རྒྱུར་ནི་ག་ལ་འགྱུར། །གསང་སྔགས་མིང་གི་ཁྱད་པར་ཡང་། །རང་བཞིན་མི་དམིགས་སྟོང་པ་ལས། །མཚན་མའི་ཐ་སྙད་མིང་དུ་བཏགས། །དེ་ཉིད་སྟོང་པས་མིང་མི་དམིགས། །ཞེས་སོ། །གསུམ་པ་ནི། གང་འདིར་ཆུ་ཡི། ཞེས་པ་ནས། དངོས་མེད་འཛིན་རྟོག་བྲལ། །ཞེས་པའི་བར་གྱིས་བསྟན་ཏེ། དཔེར་ན་སྐབས་གང་འདི་ཆུ་ཡི་ཟླ་བ་ནི་སྤྲིན་ལ་སོགས་པའི་སྒྲིབ་པ་མེད་པར་དྭངས་པའི་ནམ་མཁའ་ལ་ཟླ་བའི་དཀྱིལ་འཁོར་ཤར་བ་ན། དེའི་གཟུགས་བརྙན་རྙོག་པ་དྭངས་པའི་ཆུ་ཡི་ནང་དུ་གསལ་བར་སྣང་ཡང་དེ་ལ་ཟླ་བར་བརྟགས་པའི་དངོས་པོའི་ངོ་བོ་གང་ཅིར་ཡང་གྲུབ་པ་མེད་དོ། །དཔེ་དེ་བཞིན་དུ་དོན་གྱི་རང་བཞིན་གསང་སྔགས་ཀྱི་ལྷའི་སྐུ་དང་ཕྱག་རྒྱ་གང་ཡང་ཆེད་དུ་བཀོད་པ་མེད་པར་ལྷར་སྣང་དེ་ཉིད་ཆོས་ཉིད་རིག་པའི་ནམ་མཁའ་ལས་སྣང་སྲིད་གང་སྣང་ཐམས་ཅད་སྐུ་དང་ཞིང་གི་ཕྱག་རྒྱ་སྣ་ཚོགས་སུ་གསལ་བར་གདལ་བ་ཉིད་དུ་ཕྱག་རྒྱ་ཆེན་པོའི་རིག་འཛིན་གང་གི་རིག་པའི་ངོ་འདིར་རང་སྣང་བ་དེ་ཉིད་དེ་ལྟར་གསལ་ཡང་དག་པ་ལྷར་སྣང་དེ་ཡི་ངོ་བོ་ཉིད་ཡེ་གདོད་ནས་དངོས་པོའི་རང་བཞིན་དུ་གྲུབ་པ་མེད་པས་ཡོད་མེད་དུ་འཛིན་ཅིང་རྟོག་པའི་མཐའ་དང་བྲལ་བ་ཉིད་དེ། དེ་ཉིད་ལས། ཇི་ལྟར་ཆུ་ཡི་ཟླ་བ་ནི། སྒྲིབ་མེད་མཁའ་ལས་ཟླ་ཤར་བ། །གཟུགས་བརྙན་དྭངས་པའི་ཆུ་ནང་སྣང་། །སྣང་ཡང་གཟུང་བའི་རྟོག་པ་མེད། །དེ་བཞིན་གཟུགས་སྣང་ཕྱག་རྒྱ་ཡང་། །སེམས་ཀྱི་མཁའ་ལས་སྐུར་གསལ་བ། །ཕྱག་རྒྱའི་རིག་འཛིན་ངོ་ལ་སྣང་། །དེ་ལྟར་སྣང་ཡང་འཛིན་རྟོག་བྲལ། །ཞེས་སོ། །བཞི་པ་ནི། ཇི་ལྟར་རྨི་ལམ། ཞེས་པ་ནས། དམིགས་པ་ཀུན་དང་བྲལ། །ཞེས་པའི་བར་གྱིས་བསྟན་ཏེ། དཔེ་ཇི་ལྟར་ན་རྨི་ལམ་དག་གི་རང་བཞིན་ནི། སྐྱེས་བུ་གང་ཞིག་གཉིད་ཀྱིས་ནོན་པ་དེའི་རྨི་ལམ་ན། སྐད་ཅིག་ཐང་ཅིག་ཡུད་ཙམ་དང་ལོ་དང་ཟླ་བ་ལ་སོགས་པ་ཡུན་རིང་ཐུང་ཇི་སྙེད་པའི་བར་བར་དུ་བདེ་སྡུག་གི་རྣམ་པ་སྣ་ཚོགས་ཇི་སྙེད་ཅིག་མྱོང་བར་སྣང་ན་ཡང་གཉིད་དེ་ཉིད་སངས་པའི་དུས་ན་དེ་གཉིས་ཀ་ཅི་ཡང་མི་དམིགས་པ་ལྟར་དུ། དོན་གསང་སྔགས་ཀྱི་སྤྱོད་པ་ཡང་སྟོང་པ་ཉིད་ཆེན་པོ་ཅི་ཡང་མེད་པ་ཡི་ངང་ལ། སྤྱོད་པའི་ཁྱད་པར་ལེགས་ཉེས་ཇི་ལྟར་སྤྱད་ཀྱང་། སྤྱོད་བཞིན་པ་ལ་ཡང་མ་ཆགས་པའི་ཤེས་རབ་ཇི་བཞིན་པའི་ངང་ལས་མ་གཡོས་ཤིང་ཞེན་པ་དག་པས་མ་རིག་པའི་གཉིད་སད་པ་དག་གིས་བརྟགས་ན་སྤྱོད་པའི་ངོ་བོ་ཉིད་ལ་དམིགས་པ་ཀུན་དང་བྲལ་བ་ཉིད་དེ། སྔ་མ་ལས། དཔེར་ན་རྨི་ལམ་རང་བཞིན་ནི། །སྐྱེས་བུ་གཉིད་ཀྱི་དབང་གྱུར་ན། །ཐང་ཅིག་སྐད་ཅིག་ཡུད་ཙམ་དང་། །ལོ་ལ་སོགས་པ་དེ་བཞིན་དུ། །བདེ་དང་སྡུག་བསྔལ་དེ་བཞིན་མྱོང་། །སངས་ནས་ཅི་ཡང་མི་དམིགས་ལྟར། །དེ་བཞིན་སྔགས་ཀྱི་སྤྱོད་པ་དག །སྟོང་པ་ཉིད་ཀྱི་རང་བཞིན་ལ། །སྤྱོད་པའི་རྣམ་པ་ཅིར་སྣང་ཡང་། །བརྟགས་ན་དམིགས་པ་ཀུན་དང་བྲལ། །ཞེས་སོ། །ལྔ་པ་ནི། སྒྲ་བརྙན་འབྱུང་བའི། ཞེས་པ་ནས། བཏགས་ཆགས་བལྟས་པར་སྣང་། །ཞེས་པའི་བར་གྱིས་བསྟན་ཏེ། དཔེར་ན་བྲག་ཆའམ་སྒྲ་བརྙན་འབྱུང་བའི་རང་བཞིན་ནི། བྲག་གང་གི་གནས་ཀྱི་ངོས་ལ་མིའི་སྒྲས་རྐྱེན་དང་འཕྲད་པས་ཇི་སྐད་སྨྲས་པ་དེ་ཁོ་ན་བཞིན་གྲགས་ཏེ་དེ་ལྟར་སྒྲ་བརྙན་འབྱུང་བ་ཡིན་ཡང་། དེ་ཉིད་ཀྱི་ངོ་བོ་ཅི་ཡང་མེད་པ་ལས་འབྱུང་པ་ཡིན་པས་རང་བཞིན་དམིགས་པ་མེད་པ་ལྟར། བྲག་གི་ངོས་དང་མིའི་སྒྲ་ལྟ་བུའི་གསང་སྔགས་གསང་བའི་བྱིན་རླབས་ཀྱི་རྣམ་པར་འཕྲུལ་པ་དག་གདུལ་བྱ་གང་གི་དངོས་གྲུབ་ཀྱི་ཆེད་དུ་གསང་སྔགས་ཀྱི་བཟླས་བརྗོད་ཀྱི་སྒྲ་རྣམས་ཀྱིས་ལེགས་པར་བསྒྲུབ་ན་རང་བཞིན་མེད་པའི་དབྱིངས་ལ་བཟླས་པའི་སྒྲའི་ཚིག་གི་ནུས་པ་མཐུ་ཅན་དུ་འབྱུང་བ་ཉིད་ཀྱང་སྒྲ་བརྙན་གྲགས་པ་ལྟ་བུའི་སྒོ་གསུམ་གྱི་ཆོས་ཉིད་ཅི་ཡང་མེད་ཅིང་མཐའ་སྣང་གང་ཡང་མ་ཡིན་པའི་ངང་ལས་བཟླས་པའི་སྒྲའི་ནུས་པའི་བྱིན་རླབས་ཅི་ཡང་འབྱུང་ཞིང་སྣང་སྟེ། དེ་ཉིད་ཅི་ཡང་མེད་འབྱུང་ལྟ་བུའི་གཞིའི་གནས་ལུགས་མཚན་ཉིད་མེད་པའི་རྒྱུ་ལས་ཇི་ལྟར་བསམས་ཤིང་བཏགས་པ་ལྟར་ཆགས་ཏེ་གང་དུ་བལྟས་པར་དེ་ལྟར་སྒྲ་སྣ་ཚོགས་སུ་སྣང་ཡང་ངོ་བོ་ཉིད་དུ་བསྟན་དུ་མེད་པ་ཉིད་དེ། དེ་ཉིད་ལས། བྲག་ཆ་གྲགས་པའི་མཚན་མ་ནི། །དཔེར་ན་ངོས་ལ་སྒྲས་རྐྱེན་པས། །ཅི་བཞིན་སྒྲ་ལྟར་བྲག་ཆ་འབྱུང་། །བྱུང་ཡང་སྒྲར་ཐོས་དམིགས་པ་མེད། །དེ་བཞིན་སྔགས་ཚིག་བཟླས་པའི་སྒྲ། །དཔེར་ན་མེད་ལས་ཡོད་བརྟགས་པའི། །མཚན་མ་ལ་བརྟེན་སྟོང་པའི་སྒྲ། །བརྗོད་པ་ཙམ་དུ་བསྟན་པར་ཟད། །ཅེས་སོ། །དྲུག་པ་ནི། གང་འདིར་མིག་ཡོར། ཞེས་པ་ནས། དེ་དག་གང་ཡང་མེད། །ཅེས་པའི་བར་གྱིས་བསྟན་ཏེ། དཔེར་ན་གང་འདིར་མིག་ཡོར་གྱི་རང་བཞིན་ནི་གསུམ་སྟེ། མིག་ནད་ཅན་དང་རབ་རིབ་ཀྱིས་ཁྱེར་བ་སོགས་ལ་དུང་གི་སེར་སྣང་སོགས་མེད་པའི་རྫས་སུ་སྣང་བ་འབྱུང་སྟེ། འཁྲུལ་རྒྱུ་ཡུལ་ལ་ཡོད་པ་དང་། དབང་པོ་ལ་ཡོད་པ་དང་། ཕྱི་རོལ་གྱི་རྟེན་ལ་ཡོད་པ་དང་། ནང་ན་ཡོད་པའི་རྒྱུ་བཞིས་མཐོང་སྟེ་འཁྲུལ་པའི་ངོ་ལ་སྣང་བར་གྱུར་པའི་ངོ་བོ་ཙམ་དུ་ཟད་དེ། དེ་ཉིད་ཇི་ལྟར་སྣང་བ་ན་ཡང་དབང་པོ་མངོན་སུམ་ཡི་ཚད་མ་མ་ཡིན་པས་མི་ཡོར་ལ་ངོ་བོ་གང་ཡང་མེད་པའོ། །དེ་བཞིན་དུ་གསང་སྔགས་ཀྱི་ལྟ་བ་ཡང་ངན་རྟོག་གི་མཐའ་རྣམས་ཀྱི་སྤྲོས་པ་ལྟ་ཅི་སྨོས་ཀྱི། བཟང་རྟོག་གི་ཡུལ་དབྱིངས་དང་ཡེ་ཤེས་ལ་སོགས་པའི་ཐ་སྙད་ཀྱི་སྤྲོས་པ་ཙམ་ཡང་བྲལ་བ་ཡི། རང་བཞིན་སྟོང་པ་ཉིད་ཀྱི་ངང་ལས་ཆོས་སོ་ཅོག་ཇི་ལྟར་བལྟས་པ་ལྟར་ཆོ་འཕྲུལ་གྱི་རྣམ་པ་མཚན་ཉིད་ཅིར་ཡང་མ་ངེས་པར་སྣ་ཚོགས་སུ་སྣང་བ་ཡང་རང་རིག་པའི་ཆོ་འཕྲུལ་ཉིད་དུ་རོལ་པ་ཅིར་ཡང་སྣང་བ་ཙམ་དུ་ངེས་པར་ཟད་པས་སྣང་བ་དེ་དག་གང་ལ་ཡང་ངོ་བོ་མེད་པར་མཚན་ཉིད་བརྗོད་པ་ལས་འདས་པ་ཉིད་དེ། སྔ་མ་ལས། འཁྲུལ་པ་སྣང་བའི་རང་བཞིན་ནི། །སྤྲོས་བྲལ་དངོས་པོ་སྟོང་པ་ལས། །སྲོག་དང་ཤེད་ཅན་བྱེད་པ་པོ། །སེམས་ཅན་པ་ལ་སོགས་པར་སྣང་། །མིག་ནད་ངོ་ལ་རྫས་ལྟར་སྣང་། །འཁྲུལ་པ་ཁོ་ན་སྣང་བར་ཟད། །དེ་བཞིན་སྔགས་ཀྱི་ལྟ་བ་ཡང་། །ཆོ་འཕྲུལ་མང་པོ་ཅིར་འཕྲུལ་པ། །སྣང་བ་མེད་པའི་རང་བཞིན་ལ། །འཁྲུལ་པ་སྣ་ཚོགས་སྣང་བར་ཟད། །རྣལ་འབྱོར་ཅན་གྱིས་དེ་ལྟར་བལྟ། །ཞེས་སོ། །བདུན་པ་ནི། ཆུ་དང་ནམ་མཁའ། ཞེས་པ་ནས། ཉིད་དུ་ངེས་པའོ། །ཞེས་པའི་བར་གྱིས་བསྟན་ཏེ། ཏིང་ངེ་འཛིན་གྱི་དཔེ་དོན་ལའང་གསུམ་སྟེ། དཔེར་ན་ཆུ་དྭངས་པ་དང་ནམ་མཁའ་དྭངས་པ་ལས་ཆུ་ལྦུར་དང་སྤྲིན་ཚོགས་མང་པོ་ཐ་དད་པར་འབྱུང་བ་ཡང་ཆུ་དང་ནམ་མཁའ་ཉིད་ལས་རང་བྱུང་ཞིང་སླར་ཡང་དེ་ཉིད་དུ་རང་སར་ཞིའི་ཞེས་ཞི་བའི་རང་བཞིན་ཡིན་པས་ཆུ་ཉིད་དང་ནམ་མཁའ་ཉིད་མ་དམིགས་པ་བཞིན་དུ་རྣམ་པར་དག་པ་ཡིན་ནོ། །དཔེ་དེ་ལྟར་གསང་སྔགས་ཐེག་པ་ཆེན་པོ་སྣང་བ་མཚན་མ་དང་བཅས་པའི་ཏིང་ངེ་འཛིན་དང་། མི་སྣང་བ་མཚན་མ་མེད་པའི་ཏིང་ངེ་འཛིན་སོགས་ཏིང་ངེ་འཛིན་གྱི་སྒོ་འབུམ་ཕྲག་ཇི་སྙེད་པ་ཡི་མཚན་མ་ཐམས་ཅད་དང་མཚན་མ་མེད་པ་ཐམས་ཅད་ཀུན་རང་རིག་པ་བྱང་ཆུབ་ཀྱི་སེམས་དེ་ཉིད་ཡིན་པས་རིག་པའི་དཀྱིལ་འཁོར་འོད་གསལ་བ་དེ་ཁོ་ན་ཉིད་ལས་རང་བྱུང་ཞིང་ཤར་ནས་དེ་ཉིད་ཀྱི་ངང་དུ་རང་སར་ཞི་སྟེ་དབྱེར་མེད་པ་ཡིན་པས་མདོ་སེམས་ཀྱི་ཆོས་ཉིད་ཇི་བཞིན་པ་ཉིད་རྣམ་པར་དག་པ་ཉིད་དུ་ངེས་པ་ཁོ་ནའོ། །དེ་སྐད་དུའང་དེ་ཉིད་ལས། ཇི་ལྟར་ཆར་གྱི་རྒྱུན་བཞིན་དུ། །ཆུ་ལས་ཆུ་ལྦུར་རྣམ་པར་འབྱུང་། །དེ་ཡང་གཅིག་གི་རྣམ་པ་ལས། །མང་པོའི་རྣམ་གྲངས་དུ་མ་འབྱུང་། །སྡུད་ཅིང་ཕྱིར་ཡང་དུམ་བུར་འཆད། །དེ་བཞིན་རྣལ་འབྱོར་སྒྲུབ་པ་ཡི། །ཏིང་འཛིན་རྣམ་པ་མང་པོར་འདོད། །ཅེས་སོ། །བརྒྱད་པ་ནི། དྲི་ཟའི་གནས་ལ། ཞེས་པ་ནས། དེ་ལྟར་གནས་མ་ཡིན། །ཞེས་པའི་བར་གྱིས་བསྟན་ཏེ། དཔེར་ན་དྲི་ཟའི་གྲོང་ཁྱེར་གྱི་གནས་ལ་ངེས་པ་མེད་པ་ཡིན་པས་ཁྱད་པར་གསུམ་སྟེ། དྲི་ཟ་དེ་ཡི་གཟུགས་ནི་ནམ་མཁའི་གནས་ཀྱི་གར་བྱུང་བར་གྲོང་ཁྱེར་དེ་ཡང་དེ་ཁོ་ན་བཞིན་དུ་འབྱུང་ལ། དེ་ལྟར་བྱུང་བ་ཉིད་ན་ཡང་དེར་མ་ངེས་པ་ཡིན་པས་དེ་ཁོ་ནར་མི་རྟག་པས་བརྟན་པ་མེད་པ་ལྟར། གསང་སྔགས་ཀྱི་གཞལ་ཡས་ཁང་ནི་ཆོས་ཉིད་ཇི་བཞིན་པ་ཡི་དེ་ཁོ་ན་ཉིད་ཇི་ལྟ་བ་དེ་བཞིན་ཉིད་དུ་བློ་གནས་པས་རང་རིག་པ་ནམ་མཁའི་ངང་ལ་གནས་པ་དང་ལྡན་བཞིན་དུ་ལྷའི་སྐུ་ཕྱག་རྒྱར་སྒོམ་སྟེ་གར་གནས་ཏེ་གསལ་བར་འབྱུང་བ་དེར་རང་སྣང་དེ་ཉིད་གཞལ་མེད་ཁང་ཆེན་པོར་རིག་པའི་བྱིན་རླབས་ལས་ཤར་བར་སྣང་སྟེ། གནས་སུ་འབྱུང་བའི་སྣང་བ་དེ་ལྟར་ཐེར་ཟུག་པའི་གནས་རྟག་པ་ཅན་མ་ཡིན་པར་སེམས་ཀྱི་དེ་ཁོ་ན་ཉིད་རང་སྣང་བ་ཉིད་དེ། སྔ་མ་ལས། དྲི་ཟ་གནས་པའི་རང་བཞིན་ནི། །མཁའ་འམ་སྟོང་པའི་ངོས་དག་ལ། །དྲི་ཟའི་གཟུགས་ནི་གར་བྱུང་ཡང་། །གྲོང་ཁྱེར་དེ་ཡང་དེ་ནས་འབྱུང་། །བྱུང་ནས་དེ་ཡང་མི་རྟག་ལྟར། །གསང་སྔགས་གྲུབ་པའི་གནས་དག་ཀྱང་། །ཆོས་སམ་ཡིད་ཀྱི་མཁའ་ངོས་ལ། །རྣལ་འབྱོར་གསང་བདག་གར་བསྐྱེད་པར། །དེ་ཉིད་གནས་པའི་གཞལ་ཡས་ཁང་། །བྱུང་ཡང་དེ་ལ་གནས་མི་འགྱུར། །ཞེས་སོ། །དགུ་པ་ནི། ཇི་ལྟར་སྤྲུལ་པའི། ཞེས་པ་ནས། ཟད་མེད་འཕེལ་བ་མེད། །ཅེས་པའི་བར་གྱིས་བསྟན་ཏེ། དཔེ་ཇི་ལྟར་ན་མགལ་མེའི་སྤྲུལ་པའི་རང་བཞིན་ནི་གསུམ་སྟེ། དངོས་པོ་མེད་བཞིན་དུ་འཁོར་ལོ་ལ་སོགས་པ་སྣ་ཚོགས་སུ་འབྱུང་སྟེ་མགལ་མེ་གཅིག་གི་རྣམ་པ་ལས་ཀྱང་དབྱིབས་སོ་སོར་དུ་མར་མང་པོ་འབྱུང་བས། གང་དག་མེ་ཉིད་བསྐོར་ཏེ་བསྒྱུར་ན་མགལ་མེའི་འཁོར་ལོའི་རྒྱུན་དང་ཐོག་རིས་ལ་སོགས་པ་ལྟར་སྣང་བས། སྣང་བའི་འབྱུང་རྒྱུན་བར་ཆད་པ་མ་ཡིན་ནོ། །དེ་བཞིན་དུ་དོན་སྔགས་ཀྱི་ཆོ་འཕྲུལ་ཡང་མི་མཉམ་པ་འཁོར་བའམ་སེམས་ཅན་དང་། མཉམ་པའི་མྱ་ངན་ལས་འདས་པའམ་སངས་རྒྱས་གཉིས་ཀྱི་རང་བཞིན་ཆོས་ཉིད་གཉིས་སུ་མེད་པས་བླང་དོར་མེད་པའི་ངོ་བོ་ལས། འདུལ་བྱ་དག་གི་བསམ་པ་ཇི་ལྟ་བ་དེ་ལྟར་ཆོ་འཕྲུལ་བལྟས་རྒུ་སྣ་ཚོགས་པ་དེ་ཉིད་འབྱུང་ཞིང་སྣང་བ་ཡང་། གང་འདིར་དོན་མཛད་པའི་བཀོད་པ་མང་པོའི་སྣང་འབྱུང་སྟོན་པ་རྒྱུན་གྱི་བར་མི་ཆད་པར་ཤར་ཀྱང་མ་འགགས་པར་སྣ་ཚོགས་སུ་འབྱུང་བ་དེ་ལ་བྲི་ཞིང་འགྲིབ་པས་ཟད་པ་མེད་ཅིང་འོང་བསྡུས་ཀྱིས་དངོས་པོར་འཕེལ་བ་གང་ཡང་མེད་པ་ཉིད་དེ། སྔ་མ་ལས། ཇི་ལྟར་མགལ་མེའི་རང་བཞིན་ནི། །གང་དག་ལག་ན་འགལ་མེ་ཐོགས། །བསྐོར་ན་འཁོར་ལོའི་རྒྱུན་ལྟར་སྣང་། །དེ་ལ་འཁོར་ལོའི་རང་བཞིན་མེད། །དེ་བཞིན་སྔགས་ཀྱི་ཆོ་འཕྲུལ་ཡང་། །མི་མཉམ་མཉམ་པའི་རང་བཞིན་ལས། །ཇི་ལྟར་དམིགས་པའི་དོན་འབྱུང་སྟེ། །ཆོ་འཕུལ་སྣ་ཚོགས་རྒྱུན་མི་འཆད། །ཅེས་སོ། །བཅུ་པ་ནི། གང་འདིར་གཟུགས་བརྙན། ཞེས་པ་ནས། ཉིད་དོ་དེ་ཁོ་ནའོ། །ཞེས་པའི་བར་གྱིས་བསྟན་ཏེ། དཔེར་ན་གང་འདིར་བཞིན་གྱི་གཟུགས་བརྙན་གང་སྣང་བ་ནི་གསུམ་སྟེ། བྱད་བཞིན་གྱི་གདོང་པ་དངོས་དང་བཞིན་སྣང་འབྱུང་བའི་གཞི་མེ་ལོང་གཡའ་མེད་པར་དྭངས་པ་གཉིས་འཛོམ་ནས་སྣང་བ་ཡོད་པ་གསུམ་དང་ལྡན་པ་ལ་བརྟེན་ནས་འཇོག་པ་པོའི་བྱད་བཞིན་དེ་ཉིད་ཇི་ལྟ་བ་བཞིན་དུ་གཟུགས་བརྙན་གྱི་སྣང་བ་འབྱུང་ངོ་། །དེ་ལྟར་འབྱུང་ཡང་གཟུགས་བརྙན་དེ་ཉིད་དང་མེ་ལོང་དེ་གཉིས་དུས་དེར་ཐ་མི་དད་པ་ཡིན་པ་བཞིན་དུ། དོན་གསང་སྔགས་ཀྱི་དངོས་གྲུབ་ཀྱང་། གང་འདིར་སྤྱིར་རྒྱུ་དང་འབྲས་བུ་གཉིས་སོ་སོ་ཐ་དད་པར་མ་མཐོང་བས་ཐེག་པ་ཆེན་པོའི་དོན་གྱི་ངོ་བོ་མཐོང་ན། དངོས་གྲུབ་ཀྱི་གཞིའམ་རྒྱུ་སེམས་ཀྱི་ཆོས་ཉིད་དེ་འབྲས་བུ་དངོས་གྲུབ་ཆེན་པོ་ཡང་ཡིན་ཏེ། དེ་ཉིད་འབྱུང་བའི་རྒྱུ་ཡང་ཡིན་པས་དོན་ལ་རྒྱུ་འབྲས་དབྱེར་མེད་པའི་ཕྱིར་ཏེ། དེ་བས་ན་ཆོས་ཉིད་དེ་ལ་སེམས་དང་དངོས་གྲུབ་ལ་རྒྱུ་འབྲས་སོ་སོ་དེ་གཉིས་མེད་དེ་སེམས་ཀྱི་དེ་བཞིན་ཉིད་དོ། །དེས་ན་དེ་ཁོ་ན་དངོས་གྲུབ་ཆེན་པོ་མཐར་ཐུག་པའོ། །དེ་ལྟར་ཡང་སྔ་མ་ལས། གཟུགས་བརྙན་སྣང་བའི་མཚན་ཉིད་ནི། །དཔེར་ན་གདོང་དང་མེ་ལོང་ལ། །བརྟེན་ནས་བཞིན་གྱི་གཟུགས་འབྱུང་ཡང་། །རེང་པར་གྱུར་པ་ག་ལ་ཡོད། །དེ་བཞིན་སྔགས་ཀྱི་དངོས་གྲུབ་ཀྱང་། །སྒྲུབ་དང་ཏིང་འཛིན་ཡོ་བྱད་ལས། །བརྟེན་ནས་དངོས་གྲུབ་ཚུལ་འབྱུང་ཡང་། །གསོལ་ཐོབ་དམིགས་པ་ག་ལ་ཡོད། །ཅེས་སོ། །འདི་དག་ཀྱང་མཚན་མའི་རྣལ་འབྱོར་བཅུས་ཤེས་པར་བྱ་བའི་མཆོག་སྟེ་ཐག་གཅད་པའི་དོན་ཏོ། །གཉིས་པ་ལ་བཅུ་སྟེ། དེ་ཁོ་ན་ཉིད་གཅིག་པར་བསྟན་པ། དེ་བློ་དམན་པའི་ཡུལ་མ་ཡིན་པར་བསྟན་པ། བློ་དམན་པས་མི་རྟོགས་པའི་དཔེ་དོན་བཤད་པ། བློ་དམན་པ་ལ་གཅིག་ཆར་མི་རྟོགས་པས་རིམ་གྱིས་བསྟན་པ། བསམ་དུ་མེད་པའི་དོན་བློ་དམན་ལ་མི་བསྟན་པར་གདམས་པ། དོན་དེ་མཚོན་ཅིང་བརྗོད་དུ་མེད་པར་བསྟན་པ། རྟོགས་ན་མཐའ་དབུས་མེད་པར་བཤད་པ། དོན་ལ་བླང་དོར་མེད་པར་བསྟན་པ། མ་རྟོགས་པའི་གོལ་ས་བཤད་པ། རྟོགས་མ་རྟོགས་ཀྱི་ཁྱད་པར་བསྟན་པའོ། །དང་པོ་ནི། དེས་ན་ཇི་སྙེད། ཅེས་པ་ནས། བ་ལ་འབྱུང་སྣང་མེད། །ཅེས་པའི་བར་གྱིས་བསྟན་ཏེ། གཏན་ཚིགས་ཀྱིས་ཡིད་ཆེས་པར་བྱ་བ་ནི། བཤད་པའི་ཚུལ་དེས་ན་ཇི་སྙེད་དུ་བརྗོད་ཅིང་བསྟན་པ་ཡི་མཚན་མར་སྣང་བའི་ཆོས་སོ་ཅོག་ཐམས་ཅད་མཚན་མ་མེད་པ་ཇི་བཞིན་པའི་དེ་ཁོ་ན་ཉིད་དུ་དབྱེར་མེད་པར་གཅིག་པའི་ཕྱིར་ཏེ་དེ་བས་ན་སྒྲུབ་ཐབས་གང་ཇི་ལྟར་ཡང་སྣང་བ་དེ་ལྟར་བསྒྲུབ་པ་ལས་དངོས་གྲུབ་ཅིར་སྣང་དང་རྟགས་རྣམས་ཇི་ལྟར་བྱུང་ན་ཡང་ཆོས་ཉིད་མཉམ་པ་ཆེན་པོ་མི་གཡོ་བ་ཡི་ངང་ལས་འབྱུང་སྣང་མེད་པས་བྱང་ཆུབ་ཀྱི་སེམས་ལས་འགྲོ་འོང་མེད་པའོ། །དེ་བས་དཔེ་བཅུས་དོན་མཐོང་ཚུལ་གྱི་ངོ་བོ་དེ་བཞིན་ཉིད་དུ་གཅིག་པར་བསྟན་ཏེ། དེ་ཉིད་ལས། དེ་ཕྱིར་མཚན་མའི་ཆོས་ཐམས་ཅད། །མཚན་མེད་ངང་དུ་གཅིག་པས་ན། །རྟོག་པའི་བག་ཆགས་ཅི་བྱུང་ཡང་། །ཆོས་ཀུན་དབྱིངས་སུ་གཅིག་པའི་ཕྱིར། །རྟོག་འཇུག་སྤྲོས་པའི་མཚན་མ་ཀུན། །མ་བྱུང་མ་སྐྱེས་དབྱིངས་ཉིད་ལས། །གཡོས་པ་མེད་ཅིང་ཆོ་འཕྲུལ་འབྱུང་། །ཡོན་ཏན་སྣ་ཚོགས་ཆེར་འབྱུང་བའི། །གཏེར་གྱི་དབྱིག་འདི་གང་མཐོང་བ། །སངས་རྒྱས་ཀུན་གྱི་ཡོན་ཏན་ཡང་། །སྐད་ཅིག་གཅིག་ལ་དེ་ལ་འདུས། །དེ་བས་ཡིད་བཞིན་རིན་ཆེན་འདི། །ལྡོག་པ་མེད་པས་དང་དུ་བླང་། །ཞེས་སོ། །གཉིས་པ་ནི། ཟབ་མོ་གསང་བ། ཞེས་པ་ནས། རྟོགས་པར་མི་འགྱུར་རོ། །ཞེས་པའི་བར་གྱིས་བསྟན་ཏེ། གསང་སྔགས་ཀྱི་དགོངས་དོན་ཟབ་མོ་ཟབ་པའི་ཡང་སྙིང་གསང་བ་དམ་པ་འདི་ནི། ནམ་མཁའ་ལ་མུ་མཐའ་བརྟགས་ཀྱང་རྟོག་པས་མི་རྙེད་པ་དང་འདྲར་ཞེས་འདྲ་བར་གསང་སྔགས་མུ་མཐའ་བྲལ་བའི་ངེས་དོན་གཏིང་དཔག་དཀའ་ཞིང་ཇི་བཞིན་དུ་མཐོང་བ་དཀོན་པ་ལ། རྣལ་འབྱོར་ཆེན་པོ་ཤེས་རབ་ཀྱི་སྤྱན་ནམ་ལྟ་བ་དང་མི་ལྡན་པ་གང་གིས་ཐ་སྙད་ཀྱི་མིང་མང་པོ་བཏགས་ནས་གསང་བའི་གྲུབ་མཐའ་ལ་རྟོག་པ་ནི། བརྟགས་སུ་མེད་པ་ལ་བརྟགས་པ་ཡིན་པས་ཡང་དག་པར་རྟོགས་པར་མི་འགྱུར་ཏེ་རྟོག་པ་ཉིད་ཀྱིས་མི་རྙེད་པའི་ཕྱིར་རོ། །དེས་ན་སྔ་མ་ལས། མི་དམིགས་སྤྲོས་བྲལ་བྱང་ཆུབ་སེམས། །ཟབ་མོར་སྣང་བའི་ངེས་དོན་འདི། །མཁའ་ལ་མདུད་འདྲར་གཏིང་དཔག་དཀའ། །རྣལ་འབྱོར་དམིགས་ལྡན་བློ་ཆུང་ཞིང་། །གང་ཞིག་རྩལ་ཞན་དེ་རྟོག་པ། །གཡོག་མོའི་ཚུལ་དུ་བདག་བརྟགས་པ། །བརྟགས་ཀྱང་རྟོགས་པར་མི་འགྱུར་རོ། །ཞེས་སོ། །གསུམ་པ་ནི། དཔེར་ན་ཉི་མའི། ཞེས་པ་ནས། བྱིས་པ་ག་ཆད་བརྒྱལ། །ཞེས་པའི་བར་གྱིས་བསྟན་ཏེ། དེ་ལྟ་བུའི་དོན་དེ་བརྟགས་པའི་ཚུལ་འདིས་མི་རྟོགས་པར་འཆད་དེ། ཇི་བཞིན་དུ་རྟོགས་པར་དཀའ་བའི་ཚུལ་མཚོན་པ། དཔེར་ན་ཉི་མའི་སྙིང་པོ་ལ་མིག་གི་དབང་པོས་གཏད་ནས་རབ་ཏུ་བརྟགས་ན། འོད་ཀྱི་སྙིང་པོ་དེ་ཡང་གང་སུ་ཞིག་གིས་ངེས་པར་མི་རྟོགས་ཀྱི། ཉི་མ་འོད་འབར་བའི་ཟེར་ཕོག་པའི་ཟིལ་གྱིས་མིག་རྗིར་རམ་རྫིལ་བར་བྱས་ནས་མི་མཐོང་བར་འགྱུར་རོ། །དཔེ་དེ་བཞིན་དུ་གསང་བའི་དོན་ལ་ཤེད་མ་བྱེ་བའི་བྱིས་པ་བློ་རྩལ་ཞན་པས་རྨོངས་པ་དག་གིས། གསང་སྔགས་སྙིང་པོའི་དོན་ལ་བློས་ཅིར་བརྟགས་ཏེ་ཇི་ལྟ་བར་དཔྱད་ཀྱང་རྟོག་པ་དེས་གསང་བའི་སྙིང་པོ་གཉིས་སུ་མེད་པའི་སྔགས་ཀྱི་དོན་རྟོགས་པར་མི་འགྱུར་བར་ཡང་དག་པར་མི་མཐོང་གི། སླར་བཙལ་བ་པོ་བློ་ངན་པའམ་ཞན་པའི་བྱིས་པ་དེ་ཉིད་ཚི་ཆད་ཅིང་དོན་ལ་མདོངས་ཏེ་ག་ཆད་དུ་བརྒྱལ་བར་འགྱུར་བའི་ཕྱིར་དེ་ཉིད་ལས། དཔེར་ན་ཉི་མའི་སྙིང་པོ་ལ། མིག་གི་དབང་པོས་རབ་བརྟགས་ན། །དེ་བརྟགས་དོན་དེ་མི་རྟོགས་ཀྱི། །འོད་ཀྱི་ཟེར་གྱིས་མིག་རྫིར་འགྱུར། །དེ་འདྲར་བྱིས་པའི་རང་བཞིན་གྱིས། །ཟབ་མོའི་དོན་ལ་ཅིར་བརྟགས་ཀྱང་། །ཡང་དག་དོན་དེ་མི་མཐོང་གི། །བློ་ཞན་བྱིས་པ་ག་ཆད་བརྒྱལ། །ཞེས་སོ། །བཞི་པ་ནི། དེས་ན་གསང་བ། ཞེས་པ་ནས། ཅན་ལ་ཕྱོགས་ཙམ་མོ། །ཞེས་པའི་བར་གྱིས་བསྟན་ཏེ། དེས་ན་གསང་སྔགས་གསང་བ་དམ་པ་འདི་ནི། རྟོགས་པར་དཀའ་བའི་ཚུལ་གྱིས་དཔེས་མཚོན་པར་ཡང་དཀའ་བས་ཤེས་པར་མི་ནུས་ཏེ་ཡུལ་ལས་འདས་པའོ། །ཀྱང་ནི་མི་མཐུན་པ་སྟེ་འོན་ཀྱང་། བློ་ལྡན་ལ་བརྒྱུད་ནས་མཚོན་པའི་ཚུལ་གྱིས་གང་གསང་སྔགས་གཉིས་སུ་མེད་པའི་དོན་ལ་རྨོངས་པའི་མདོངས་པ་དག་ལ་དོན་གྱི་ངོ་བོ་ཕྱོགས་ཙམ་མཚོན་ནས་ཤེས་པར་བྱ་བའི་དགོས་ཆེད་ཀྱི་ཕྱིར་དུ་ཐེག་འོག་པའམ་ལྷའི་རྣལ་འབྱོར་སོགས་དང་ལྡན་པའི་སྐལ་བ་ཅན་ལ་ཏིང་ངེ་འཛིན་དོན་དང་འབྲེལ་བའམ། སྐུ་ཕྱག་རྒྱ་ལ་སོགས་པས་དོན་ལ་སྦྱོར་ཚུལ་ཕྱོགས་མཚོན་དུ་བསྟན་པ་ཙམ་མོ། །དེ་སྐད་དུའང་སྔ་མ་ལས། སྟོང་པར་སྦས་པའི་དོན་འདི་ལ། །དཔེས་མཚོན་ཚིག་གི་ལྡེ་མིག་གིས། །མཉམ་ཉིད་རིག་པའི་སྒོ་དབྱེ་བྱས། །སྦས་པའི་དོན་འབྱིན་གསལ་བྱེད་པ། །སཱ་ལུ་ཕུབ་ཁྲོད་སྣང་མེ་བཞིན། །བསལ་བཏེག་སྣང་རྙེད་ས་ལེར་འདུག །ཅེས་སོ། །ལྔ་པ་ནི། བསམ་དུ་མེད་པའི། ཞེས་པ་ནས། རྣམས་ལ་ངས་མ་བསྟན། །ཞེས་པའི་བར་གྱིས་བསྟན་ཏེ། སྤྱོད་ཡུལ་ཀ་ནས་དག་པས་བསམ་དུ་མེད་པའི་ཆོས་ཉིད་འདི་ལ་ཡེ་ནས་ཡིད་ལ་བྱ་བསམ་དང་བྲལ་ཏེ་རྟོག་དཔྱོད་ཀྱིས་ཡུལ་དུ་མེད་པས་དེ་ལྟར་ངེས་པའི་ལམ་པས་ཀྱང་དེ་ཉིད་དུའང་འདུ་ཤེས་མ་ཞུགས་པར་དེ་བཞིན་དུ་གཞག་པར་བྱས་ན་རྣལ་དུ་ཕེབས་པའོ། །དེ་ལྟར་ཕེབས་པའི་ངང་ལ་མི་རྟོག་པར་གཞག་པས་ཅི་ལྟར་སྤྱད་ཀྱང་འཆིང་བ་མེད་པའི་དོན་གྱི་ཆོས་ཉིད་ཟབ་མོ་འདི་ནི་ཤིན་ཏུ་རྟོགས་པར་དཀའ་བས་གསང་དོན་ལ་ཤེད་མ་བྱེ་བའི་བྱིས་པ་བློ་ཆུང་རྣམས་ལ་སྟོན་པ་ངས་མ་བསྟན་ཞིང་བཀའ་སྩལ་བར་མ་མཛད་དོ་ཞེས་པའི་དོན་ཏེ། དེ་ཉིད་ལས། བརྟག་ཏུ་མེད་པའི་ཆོས་རྣམས་ནི། །རྟོག་པ་ཅན་གྱིས་མི་རྟོགས་ཏེ། །གང་ཞིག་དེ་དོན་མི་རྟོག་ཕྱིར། །གཡང་སར་ལྟུང་བ་ཅི་ཆ་ཡོད། །གདོད་ནས་མ་ཐོས་ཤིན་ཏུ་དགེ། །བསམ་དང་བྲལ་བས་དེ་བཞིན་གཞག །མི་བརྟགས་བཞག་པའི་ཆོས་འདི་གང་། །བྱིས་པ་རྣམས་ལ་ངས་མ་བསྟན། །བསྟན་ཀྱང་གོ་བར་མི་འགྱུར་སྟེ། །བསྟན་དུ་མེད་ཅིང་གོ་བར་དཀའ། །ཞེས་སོ། །དྲུག་པ་ནི། བརྗོད་པས་མཚོན་པ། ཞེས་པ་ནས། ཆོས་ལ་ཚིག་ལམ་མེད། །ཅེས་པའི་བར་གྱིས་བསྟན། གསང་བའི་དབྱིངས་ཇི་བཞིན་པ་ནི་ཚིག་ཏུ་བརྗོད་པས་དོན་ལ་མི་ཕེབས་པའི་ཕྱིར་ཚིག་གི་མཚོན་པ་ལས་འདས་ཏེ་བརྗོད་པ་དང་བྲལ་བ་ཡིན་པ་ལ་བཟླས་པའི་སྒྲ་དང་སྒྲུབ་པར་གྱིས་ཤིག་ཅེས་པ་ལ་སོགས་པ་ངོ་བོ་ངེས་པར་བརྗོད་པས་འདི་ཞེས་བསྟན་དུ་ག་ལ་ཡོད་དེ་མེད་པའི་ཕྱིར་རོ། །དེས་ནས་དེ་ཁོ་ན་ཉིད་བརྗོད་པ་དང་བྲལ་བའི་ཕྱིར་ཕྱོགས་གཅིག་ཏུ་གྲུབ་པ་མེད་པས་ངོ་བོ་ངེས་པར་མི་ཟིན་པའི་ཆོས་ཉིད་དེ་དེ་ལ་འདི་ཞེས་བསྟན་པའི་དམིགས་པ་དག་གིས་མི་རྙེད་དེ་མཐའ་གང་དུའང་མི་དམིགས་པའི་ཆོས་ཉིད་ཀྱི་དབྱིངས་ལ་བརྗོད་པའི་ཚིག་ལམ་མེད་པར་ཐ་སྙད་ཐམས་ཅད་ལས་འདས་པ་ནི་ལྟ་བའི་མཆོག་དམ་པ་ཡིན་ཏེ། སྔ་མ་ལས། ཚིག་གིས་བརྗོད་པ་ཀུན་དང་བྲལ། །འདི་ཞེས་བསྟན་དུ་ག་ལ་ཡོད། །མེད་པས་བསྟན་པའི་དམིགས་མི་ཕྱེད། །མི་དམིགས་ཆོས་ལ་བློ་སྦྱངས་ཤིང་། །ཡིད་ཀྱི་མེ་ལོང་གསལ་བྱས་ནས། །ནམ་མཁའ་དག་ལ་རབ་བརྟགས་ན། །སྣང་བ་མེད་པའི་རང་བཞིན་ནི། །ནམ་མཁའ་ལྟ་བུར་དེ་ཉིད་འགྱུར། །ཞེས་སོ། །བདུན་པ་ནི། ཆོས་ཀུན་ནམ་མཁའ། ཞེས་པ་ནས། མཐའ་དབུས་མུ་དང་བྲལ། ཞེས་པའི་བར་གྱིས་བསྟན་ཏེ། ཆོས་སོ་ཅོག་ཀུན་གྱི་དེ་ཁོ་ན་ཉིད་ནི་གསལ་ལ་མི་གཡོ་བ་ནམ་མཁའ་ལྟ་བུ་དང་འདྲ་བ་སྟེ། དེས་ན་ཆོས་ཉིད་ཀྱི་ནམ་མཁའ་ལ་ཡང་མཚན་ཉིད་འདི་ཡིན་ནོ། །ཞེས་གཟུང་དུ་མེད་དེ། དེ་ཉིད་ལས། ཆོས་ཉིད་ནམ་མཁའ་ལྟ་བུ་སྟེ། །ནམ་མཁའ་ལ་ཡང་མཚན་ཉིད་བྲལ། །ཞེས་སོ། །དེ་བས་ན་ནམ་མཁའ་ལ་དབུས་མཐའ་མི་དམིགས་པ་བཞིན་དུ་ཆོས་ཀུན་ཀྱང་མཐའ་དབུས་ཀྱི་མུ་དང་བྲལ་བའི་རིག་པ་ཅིར་ཡང་མ་གཡོས་པ་ནི་ཏིང་ངེ་འཛིན་དམ་པའི་ཕྱིར་རོ། །བརྒྱད་པ་ནི། ནམ་མཁའ་གང་མིང་། ཞེས་པ་ནས། གཉིས་མེད་འགལ་མི་འགྱུར། །ཞེས་པའི་བར་གྱིས་བསྟན་ཏེ། དཔེར་ན་ནམ་མཁའ་ལ་གང་ཟག་གང་ཞིག་མིང་གི་སྒོ་ནས་ཡོད་མེད་དུ་བརྗོད་པར་བྱེད་པ་ན་ཡང་། བརྗོད་པ་དེ་ཉིད་ཚིག་གི་དངོས་པོ་ཡིན་ཏེ། དེས་ན་ནམ་མཁའ་དེ་ཡི་ཐ་སྙད་ཡོད་མེད་ལ་སོགས་པར་མིང་གིས་བརྗོད་ཀྱང་ནམ་མཁའ་ཉིད་མིང་ལས་མི་སྐྱེ་བས་དེ་ལ་སྐྱེ་འགག་གི་དངོས་པོ་ཡོད་པར་མི་འགྱུར་རོ། །དེ་བཞིན་དུ་ཆོས་ཉིད་མི་རྟོག་པ་ཆེན་པོ་འདི་ལ་ཡང་རྣམ་པར་མི་རྟོག་པའོ་ཞེས་གང་དག་དོན་མི་རྟོགས་པར་སྨྲ་ཞིང་བརྗོད་དེ་ཞེ་བས་འདོད་པ་ནི། འདོད་པ་དང་བརྗོད་པ་དེ་ཉིད་རྣམ་རྟོག་ཁོ་ན་སྟེ་ཆོས་ཉིད་མི་རྟོག་པ་ལ་རེག་པ་མེད་དོ། །འོ་ན་རྣམ་པར་རྟོག་པ་སྤང་བ་ཞིག་གམ་ཞེ་ན། གསང་བའི་དབྱིངས་མཉམ་པ་ཉིད་ལ་རྣམ་པར་རྟོག་པ་དང་རྣམ་པར་མི་རྟོག་པ་གང་ཅི་ཞིག་བརྗོད་པར་བྱས་ཀྱང་དེ་ཉིད་ཡིན་པས་ངོ་བོ་ལ་གཉིས་སུ་མེད་པས་འགལ་བར་ཡང་མི་འགྱུར་ཏེ། ཅིར་ཡང་བཏགས་པ་ལྟར་ཆགས་པའི་ཕྱིར་ཏེ། དེ་བས་ན་དེ་བཞིན་ཉིད་དེ་ནི་རྒྱལ་བ་ཐམས་ཅད་ཀྱི་བཞུགས་གནས་ཆེན་པོའི་ཕྱིར། སྔ་མ་ལས། ནམ་མཁའ་གང་མིང་རྗོད་བྱེད་པ། །བརྗོད་པ་དེ་ཉིད་དངོས་པོ་སྟེ། །དངོས་པོ་དེ་ཡི་མིང་བརྗོད་ཀྱང་། །ནམ་མཁའ་དེ་ལ་འགག་མི་འགྱུར། །དེ་བཞིན་མི་རྟོག་བརྗོད་བྱེད་པ། །བརྗོད་པ་དེ་ཉིད་རྣམ་རྟོག་སྟེ། །རྣམ་རྟོག་དེ་ཡི་མིང་བརྗོད་ཀྱང་། །མི་རྟོག་དེ་ལ་འགག་མི་འགྱུར། །དེ་འདྲར་སེམས་ཀྱང་དེ་ལྟར་ལྟ། །སེམས་ཉིད་གཞན་དུ་མ་གྲུབ་སྟེ། །དེ་བཞིན་ཆོས་ཀྱང་གྲུབ་མ་ཡིན། །སེམས་དང་ཆོས་ཉིད་གཉིས་མེད་དེ། །སེམས་ཉིད་གང་ཡིན་ཆོས་ཉིད་དེ། །ཆོས་ཉིད་ཀྱང་ནི་དེ་བཞིན་ནོ། །ཆོས་སེམས་གཉིས་མེད་ལྡན་གྱུར་པ། །བླ་མེད་བྱང་ཆུབ་ཆེན་པོར་བཤད། །ཅེས་སོ། །དགུ་པ་ནི། གང་འདིར་གཉིས་སུ། ཞེས་པ་ནས། དབུས་མཐར་འབྱེད་ལས་བྱུང་། །ཞེས་པའི་བར་གྱིས་བསྟན་ཏེ། ཐིག་ལེ་ཆེན་པོ་ཆོས་ཀྱི་སྐུའི་བདག་ཉིད་ལ་སྐབས་གང་འདིར་ཆོ་འཕྲུལ་ཐ་དད་གཞི་དང་སྣང་བ་གཉིས་སུ་འདོད་པ་ལ་སོགས་པ་དང་། དབུས་དང་མཐའ་འབྱེད་དེ་ཆོས་ཉིད་ཀྱི་མུ་ཚོལ་བ་ཐམས་ཅད་ནི་ནོར་བ་དང་གོལ་སར་འཕྱན་པའོ། །དེ་ཅིའི་ཕྱིར་ཞེ་ན། མཉམ་པ་ཉིད་ལ་དེ་ཉིད་དུའང་བརྗོད་ཅིང་མངོན་དུ་བྱ་བ་དང་བྲལ་བ་ལས་མི་མཉམ་པ་ལ་ལྟོས་ནས་མཉམ་པ་ཉིད་ཅེས་བྱ་བ་དེ་ཉིད་དུ་བཏགས་པའི་ཐ་སྙད་ཀྱི་སྣང་བ་ཉིད་ཀྱང་མཉམ་མི་མཉམ་གཉིས་དང་དབུས་མཐར་འབྱེད་པ་ལས་གྱུར་ཏེ་ལྟོས་པའི་དབང་ལས་བྱུང་བ་སྟེ་སྐྱོན་ཡིན་ནོ། །དེ་བས་ན་ཆོ་འཕྲུལ་གྱི་མཚན་ཉིད་དང་མཐའ་དབུས་ཅི་སྣང་ཡང་། ཡེ་ཐ་སྙད་དང་བྲལ་བ་ལ་དེ་ཉིད་དུ་འདོད་ཅིང་མངོན་དུ་བྱེད་པའང་མེད་པའོ། །བཅུ་པ་ནི། ཀྱེ་མ་འདི་གཅིག ཅེས་པ་ནས། ངེས་པ་འདི་ལྟར་ཞོག །ཅེས་པའི་བར་གྱིས་བསྟན་ཏེ། །ཀྱེ་མའོ་ཞེས་ངོ་མཚར་བའི་ཚིག་གིས་བོས་ནས་འདིར་གསུངས་པ་ལྟར་མཉམ་པའི་རང་བཞིན་འདི་ཉིད་གཅིག་ཏུ་ངེས་པས་ཆོས་ཀྱི་སྤུན་གྱི་ངེས་ཚིག་ཀྱང་འགྲུབ་སྟེ་དངོས་གྲུབ་དང་བསྒྲུབ་པར་བྱ་བ་ཐམས་ཅད་ཇི་སྙེད་པའང་དོན་དེ་ཁོ་ན་ཉིད་གཅིག་པུ་དེ་ལས་མེད་བཞིན་དུ་རྒྱུ་འབྲས་དང་མཐའ་གཉིས་ལ་སོགས་པར་སྣང་བ་འདི་ཀུན་གཉིས་སུ་འབྱེད་ཕན་ཆད་ཐམས་ཅད་རིལ་རྣམ་པར་རྟོག་པ་ཆེན་པོ་ཡིན་ནོ། །དེ་བས་ན་དོན་བཅུ་དང་དཔེ་བཅུ་རིལ་ཀུན་གྱིས་ཀྱང་ངེས་པར་བརྗོད་པའི་དོན་གྱི་སྙིང་པོ་དམ་པ་འདི་ལྟར་ཡིད་ལ་ཞོག་ལ་ལེགས་པར་ཟུངས་ཤིག་པའོ། །གསུམ་པ་ནི། གྲོགས་པོ་དག །ཅེས་པ་ནས། གྱུར་ཏོ། །ཞེས་པའི་བར་གྱིས་བསྟན་ཏེ། གྲོགས་པོ་དག །ཅེས་བོས་ནས། དེ་དག་ནི་དཔེ་ཡི་མེ་ལོང་ལ་བརྟག་ནས་དོན་བཙལ་བར་བྱའོ། །ཞེས་པའི་དགོངས་པ་མ་ནོར་བའི་ངོ་བོ་དམ་པ་ངེས་པར་བགྲོས་པ་ཡིན་པར་ཤེས་པར་བྱའོ། །དེ་སྐད་ཅེས་སྨྲས་ཏེ་བཀའ་སྩལ་པས། འཁོར་ལང་ཀའི་བདག་པོ་ལ་སོགས་པ་དམན་པའི་ལུས་ཀྱི་སེམས་དཔའ་ཆེན་པོ་རྣམས་ཀྱིས་ཀྱང་དེའི་ཐེ་ཚོམ་ཆོད་དེ་དོན་ཡང་དག་པར་ངེས་པ་དེ་ཁོ་ན་ཉིད་གཅིག་ཏུ་གདེངས་རྙེད་དེ་ཆོས་ཉིད་ཀྱི་ངང་དུ་ངེས་པར་མཉམ་པར་འཇོག་པར་གྱུར་ཏོ།། །།ལེའུའི་མཚན་ནི། སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས། དཔེ་ལ་བརྟེན་ནས་དོན་ཉེ་བར་མཚོན་པ་ཞེས་བྱ་བའི་ལེའུ་སྟེ་དྲུག་ཅུ་རྩ་གསུམ་པ་ཉིད་རྣམ་པར་བཤད་པའོ།། །།