དཔལ་རྡོ་རྗེ་ནག་པོ་ཆེན་པོ་ཁྲོས་པའི་མགོན་པོ་གསང་བ་དངོས་གྲུབ་འབྱུང་བའི་རྣམ་བཤད་རྡོ་རྗེའི་སྙིང་པོ།

དཔལ་རྡོ་རྗེ་ནག་པོ་ཆེན་པོ་ཁྲོས་པའི་མགོན་པོ་གསང་བ་དངོས་གྲུབ་འབྱུང་བའི་རྣམ་བཤད་རྡོ་རྗེའི་སྙིང་པོ་ཞེས་བྱ་བ་བཞུགས་སོ། །རྗེ་བཙུན་བླ་མ་མཉེས་པ་ཉིན་མོ་བཞིན། །མི་ཤེས་གཉིད་སངས་ཤེས་བྱར་བློ་རྒྱས་པའི། །ཐབས་ཀྱི་དམ་པར་དབང་གྱུར་དེས་མདོ་རྒྱུད། །ཀུན་ཏུ་གསུངས་ཕྱིར་རྩེ་གཅིག་དེ་ལ་སྐྱབས། །བདུད་དང་བདུད་ཀྱི་ཕྱོགས་ཀྱི་ཕྱོགས་རྣམས་གཡུལ་ངོར་བསད་པའི་དྲག་ཤུལ་ཆེན་པོས་འཇིགས་ནས་གང་གི་དྲུང་། །སྲིད་གསུམ་སྲིད་པའི་བདག་པོ་རྣམས་ཀྱི་མགོ་བོས་རབ་བཏུད་ཅི་གསུངས་ཐོད་དུ་བཅིངས་གུས་པ། །རྒྱལ་བའི་རྒྱལ་ཐབས་མ་ལུས་སྐྱོང་མཁན་རྣམ་པའི་རོལ་མོ་སྐུ་གསུང་ཐུགས་དང་བདེ་ཆེན་གྱི། །དཀྱིལ་འཁོར་དཀྱིལ་ན་འཇིགས་བྱེད་གཏུམ་པའི་གར་མཛད་དེ་ཡིས་བདག་ལ་རྟག་ཏུ་བདེ་ལེགས་མཛོད། །དྲག་སྔགས་དམོད་པའི་མཚོན་ཆ་རྣོན་པོའི་སྡེ། །ལེགས་བཤད་གླང་ཆེན་སྨྱོན་པའི་སྣས་བསྐོར་ཚེ། །སྡིག་པ་སྤྱོད་པ་རྣམས་ལ་རྒྱུད་ཆད་པ། །འབྱུང་སྙམ་དགའ་རབ་དབང་ཕྱུག་བཞིན་རས་ཟུམ། །གཞན་པ་ལྔ་བརྒྱ་མཐའ་མའི་ཚ་གདུང་ཁྲོད། །ཐར་པར་བགྲོད་པའི་ལུས་རྣམས་དགུན་དུས་ཀྱི། །ཁ་བའི་རེག་བྱས་བསྐུས་པ་ཡང་དང་ཡང་། །པད་དཀར་ཙན་དན་ནགས་ཚལ་གནས་རིང་མོད། །འདིར་གང་བཤད་པར་བྱ་ན་དཔལ་རྡོ་རྗེ་ནག་པོ་ཆེན་པོ་ཁྲོས་པའི་མགོན་པོ་གསང་བ་དངོས་གྲུབ་འབྱུང་བ་ཞེས་བྱ་བའི་རྒྱུད་ཀྱི་རྒྱལ་པོ་དེའོ། །ཚུལ་ཇི་ལྟ་བུས་བཤད་ན། གླེང་བསླང་གླེང་གཞི་བསྟན་པ། རྒྱུད་ཀྱི་གཞུང་རྒྱས་པ་ངེས་པར་བསྟན་པ། ལེའུ་མཐའ་མ་གསང་བ་བསྡུ་བའི་ཚུལ་གསུམ་གྱིས་སོ། །དང་པོ་ནི་དེ་ནས་བཅོམ་ལྡན་ཀུན་མཁྱེན་པའི། །ཡེ་ཤེས་མངོན་པར་མཁྱེན་པ་ཡིས། །བདུད་ཀྱི་དཀྱིལ་འཁོར་འཇོམས་བྱེད་པ། །བཀའ་ཡི་འཁོར་ལོ་བཤད་པར་བྱ། །ཞེས་དགོས་པ་དང་ཉིད་དགོས་གཟིགས་ནས་བཅོམ་ལྡན་འདས་ཤཱཀྱ་སེང་གེས་དཔལ་འབྲས་སྤུངས་རྒྱལ་བའི་མཆོད་རྟེན་ཆེན་པོར་བདེ་མཆོག་གི་རྒྱུད་གཞན་ཐམས་ཅད་བཤད་པའི་མཇུག་ཐོགས་སུ་འདིའི་གླེང་བསླང་བར་མཛད་ལ། དེ་ཡང་བདེ་མཆོག་ཆེན་པོ་ལས་བསྡུས་པར་ཡང་བླ་མ་རྣམས། དེའི་སྡོམ་པ་རྒྱ་མཚོའི་མཇུག་ཏུ། དཔལ་ལྡན་ཁྲག་འཐུང་ནག་པོ་ཆེ། །བྱ་རོག་མིང་ཅན་ཚོགས་ཀྱི་བདག །འཁོར་ནི་ནག་པོ་སྟོང་དང་བཅས། །མ་མོ་ནག་མོ་འབུམ་གྱིས་བསྐོར། །དེ་ཡི་གསང་བ་སྔགས་ཀྱི་གནད། །རྡོ་རྗེ་འཆང་གིས་བཀའ་སྩལ་ཏོ། །ཞེས་སོགས་ཀྱིས་ཤིན་ཏུ་རྒྱས་པར་བཤད་ཡོད་ཅེས་གསུངས་ལ། དེ་རིགས་པ་ཉིད་དེ། ཐུགས་རྗེ་འབྱུང་བར། བདེ་མཆོག་རྒྱ་མཚོར་བཤད་པ་བཞིན། །མིང་དང་ལེའུ་བརྗོད་བྱ་དོན། །ཕྱི་ནང་གོ་རིམ་གཞུང་གི་ཚད། །དེ་ཡི་དབྱེ་བ་རྒྱས་ཞེས་བསྟན། །ཞེས་པས་སོ། །དེ་བཞིན་བདེ་མཆོག་གི་རྩ་བའི་རྒྱུད་ཉུང་ངུའི་ལེའུ་ཉེར་བདུན་བརྒྱད་གཉིས་སུ། རིགས་གཅིག་ལ་ནི་ཀུན་སྤྱོད་པ། །རྣལ་འབྱོར་སྤྱོད་པ་རབ་ཏུ་མཆོད། །ཅེས་ནས། འདོད་པའི་དོན་ཀུན་སྒྲུབ་བྱེད་པ། །བདུད་ཀུན་རབ་ཏུ་ཞི་བར་བྱེད། །ཅེས་པའི་བར་གྱིས་གསུངས་པ་དེ་འདིས་བཤད་པས་འདི་དེའི་བཤད་པའི་རྒྱུད་དུ་བགྲངས་པ་ཡིན་ནོ། །དཔལ་ནི་གཉིས་སུ་མེད་པ་ཡིན་ལ། གང་གཉིས་སུ་མེད་ན། རྡོ་རྗེ་ནི་དམིགས་པ་དང་བཅས་པའི་ཤེས་རབ་དང་། ནག་པོ་ནི་འགྱུར་བ་མེད་པས་སྙིང་རྗེའོ། །ཆེན་པོ་ནི་དེ་དག་གཉིས་སུ་མེད་པ་ཉིད་དང་པོའི་མགོན་པོ། ཁྲོས་པ་ནི་མ་རིག་པའི་བསླད་པ་ཅན་ལ་སྙིང་རྗེས་སོ། །མགོན་པོ་ནི་ལམ་དུས་ཀྱི་སྟེ། དེས་དྲི་མ་ཟློག་པར་བྱེད་པའི་ཕྱིར་རོ། །གསང་བ་དངོས་གྲུབ་འབྱུང་བ་ནི་ཕྱག་རྒྱ་ཆེན་པོ་མཆོག་གི་དངོས་གྲུབ་ཅེས་གྲགས་པ་སྟེ། མིང་འདིས་བརྗོད་བྱ་དོན་གྱི་རྒྱུད་གཞི་ལམ་འབྲས་བུ་གསུམ་དུ་ཕྱེ་སྟེ་བསྟན་ནོ། །དེ་བརྗོད་པར་བྱེད་པའང་དེ་ཉིད་ལས་གཞན་མ་ཡིན་ཏེ། བརྗོད་བྱ་བརྗོད་བྱེད་རོ་མཉམ་པའི་ཕྱིར་རོ། །འདིའི་དགོས་པ་ནི། ཡེ་ཤེས་མངོན་པར་མཁྱེན་པ་ཡིས། །ཞེས་པས་བཤད་དེ། སྐུ་གསུང་ཐུགས་རྡོ་རྗེའི་སྙིང་པོ་ཡེ་ཤེས་ཀྱི་དངོས་གྲུབ་སྒྲུབ་པའི་ཐབས་ཤེས་པའོ། །ཉིང་དགོས་ནི། བདུད་ཀྱི་དཀྱིལ་འཁོར་འཇོམས་བྱེད་པ། །ཞེས་པས་ཏེ། དེ་ཤེས་པས་བདུད་ལས་རབ་ཏུ་རྒྱལ་བའི་སངས་རྒྱས་སུ་འགྱུར་བ་ཡིན་ནོ། །འབྲེལ་བ་ནི་ཞར་གྱིས་འཐོན་ལ། བཀའ་ཡི་འཁོར་ལོ་ནི། སངས་རྒྱས་ཀྱི་བཀའ་འདི་རྒྱུད་དང་འཚམ་པར་གོ་བ་ལ་བྱེད་དེ། ཆོས་ཀྱི་འཁོར་ལོའི་སྒྲ་བཤད་བཞིན་ནོ། །ཡང་དེ་ནས་ཞེས་པའི་སྐད་དོད། ཨ་ཐ་ཨེ་ཝཾ་དུ་བསྒྱུར་ནས་བཤད་པས། དེ་གཉིས་མེད་པ་མ་ཡིན་པ་དང་། རྒྱུད་ཐམས་ཅད་ཀྱི་ཐོག་མར་ཚིག་དེ་གཉིས་རང་ངེས་པར་སྨྲ་དགོས་པ་མ་ཡིན་པའང་དོན་ལ་སྟོན་པའི་ཕྱིར་དུའོ། །གླེང་གཞི་ནི། དེ་བཞིན་གཤེགས་པ་ཐམས་ཅད་ཀྱིས་ཐོགས་པ་མེད་ཅིང་གདོན་མི་ཟ་བ་བདེ་བ་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ནས་ཞེས་ནས། ཀླ་ཀློའི་སྐད་ཀྱིས་སྦས་པ་སྟེ། །ཞེས་པའི་བར་གྱིས་རྒྱུའི་རྒྱུད་དམ་གཞི། དེ་ནས་རྐང་པ་ལྔས་དབང་། དེ་ནས་དྲུག་གིས་ལམ་གྱི་ཆིངས། དེ་ནས་བཅུ་དགུས་བསྐྱེད་རིམ། དེ་ནས་བརྒྱད་ཀྱིས་གསང་དབང་གི་ལམ། དེ་ནས་བཞིས་དབང་གསུམ་པའི་ལམ། དེ་ནས་བཅུ་གཉིས་ཀྱིས་དབང་བཞི་པའི་ལམ། དེ་ནས་གསུམ་གྱིས་དམ་ཚིག དེ་ནས་བཞིས་བརྗོད་བྱེད་ཀྱི་རྒྱུད་ཀྱི་གནས་པ། དེ་ནས་ལེའུ་དང་པོ་རྫོགས་པའི་བར་གྱིས་སྤྱོད་པ་མདོར་བསྟན་པ་ཡིན་ནོ། །འདི་ནི་རྫོགས་པའི་སངས་རྒྱས་ཆོས་བཤད་པར་བཞེད་པ་ཙམ་སྟེ་ཚིག་ཏུ་མ་ཐོན་པས། རྩ་བའི་རྒྱུད་རྒྱས་པ་སངས་རྒྱས་རྣམས་ཀྱི་ཐུགས་དང་མཉམ་པ་དེ་འཆད་པའི་གླེང་གཞིར་སོང་ངོ་། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་ཐམས་ཅད་ཀྱིས་བཅོམ་ལྡན་འདས་རྡོ་རྗེ་འཛིན་པའི་གསུང་རྨི་ལམ་ལྟ་བུ་ཉེ་བར་གསན་ཏེ་གསུང་རྡོ་རྗེའི་ཚིག་འདི་གསུངས་སོ། །རྡོ་རྗེ་འཛིན་པ་གང་ཞིག་གི །ནས། གསང་བ་ཆེན་པོའི་རིགས་དག་པའི། །འདོད་ཆགས་རྡོ་རྗེའི་སྐུར་ལྡན་པ། །ཞེས་པའི་བར་གྱིས་རྒྱུའི་སྟོན་པ་ལོངས་སྐུས། རྩ་བའི་རྒྱུད་འབྲིང་པོ་འོག་མིན་དུ་རྒྱུན་མི་འཆད་པར་བསྐོར་བ་སངས་རྒྱས་རྣམས་ཀྱི་དབྱངས་དང་མཉམ་པ་དེ་བཤད་པའི་གླེང་གཞི། ལྷོ་ཕྱོགས་བྱ་རྐང་རི་དང་ནི། །ནས། ཐུབ་པའི་རྒྱལ་པོ་དེ་བཞིན་གཤེགས། །ཞེས་པའི་བར་གྱིས་འབྲས་དུས་ཀྱི་ཧེ་རུ་ཀ་སྤྲུལ་པའི་སྐུར་བཞེངས་ནས་རྒྱུད་ཉུང་ངུ་ལེའུས་བཅིངས་པ་ཤླཽ་ཀ་བགྲང་བར་ནུས་པ་རྣམས་འཆད་པ་སྐུའི་གླེང་གཞི་སྟེ། འདི་ནི་གླེགས་བམ་ལ་འགོད་པར་ཡང་ནུས་པ་ཡིན་ནོ། །དེ་ལ་ཡང་རྒྱས་བསྡུས་དུ་མ་ནི་གདུལ་བྱའི་བསམ་པས་ཡིན་ལ། ཤིན་ཏུ་ཉུང་བའི་བཀའ་དག་ནི་བདག་ཅག་ལྔ་བརྒྱ་མཐའ་མ་པ་རྣམས་ལ་དགོངས་ནས་སོ། །མཐའ་མ་འདི་ལ་གནས་ཕུན་སུམ་ཚོགས་པ་ནི་དཔལ་འབྲས་སྤུངས་རྒྱལ་བའི་མཆོད་རྟེན་དཔལ་ལྡན་རྒྱུ་སྐར་གྱི་དཀྱིལ་འཁོར་ཆེན་པོའི་དབུས་ཀྱི་སེང་གེའི་ཁྲི་སྟེ། ལྷོ་ཕྱོགས་བྱ་རྐང་རི་དང་ནི། །དཔལ་གྱི་རི་ལ་མདུན་ཕྱོགས་པ། །ཤྲཱི་དྷཱ་ནྱ་ཀ་ཊ་ཀ །པདྨ་གེ་སར་རྒྱས་པའི་དབུས། །ཆོས་ཀྱི་འབྱུང་གནས་བསྟན་པར་གནས། །དཔལ་ལྡན་དགའ་བའི་ཁང་པ་བརྩེགས། །གསང་བ་སྔགས་ཀྱི་རྒྱ་མཚོ་ཡི། །མ་ལུས་རྒྱལ་བ་བགྲོད་པའི་ཡུལ། །གསང་བ་ཆོས་ཀྱི་དབྱིངས་ཆེན་པོ། །དཔལ་ལྡན་རྒྱུ་སྐར་དཀྱིལ་འཁོར་དུ། །ཞེས་དང་། དེ་དབུས་སེང་གེའི་ཁྲིར་བཞུགས་པ། །ཞེས་སོ། འཁོར་ནི། ཀླ་ཀློའི་ཡུལ་གྱི་མི་རྣམས་དང་། །དཔའ་བོ་རྣལ་འབྱོར་དབང་ཕྱུག་ཚོགས། །ལྷ་དང་ལྷ་མིན་དྲི་ཟར་བཅས། །གསང་ཆེན་ཡོངས་སུ་རྫོགས་པ་ཡི། །རང་བྱུང་ཡེ་ཤེས་ཕོ་བྲང་དུ། །ཚངས་དབང་ཁྱབ་འཇུག་དབང་ཕྱུག་དག །དཀྱིལ་འཁོར་སྒོ་བཞིར་བཅུག་ནས་ཀྱང་། །སྐྱེ་བོ་ཆགས་ཅན་རབ་འདུལ་ཕྱིར། །མཆོག་ཏུ་གྱུར་པའི་སྙིང་པོ་གསུངས། །ཕྱོགས་བཅུར་གནས་པའི་སངས་རྒྱས་དང་། །བྱང་ཆུབ་སེམས་དཔའི་ཚོགས་རྣམས་དང་། །དཔའ་བོ་རྣལ་འབྱོར་དབང་ཕྱུག་ཚོགས། །གངྒཱའི་ཀླུང་གི་བྱེ་སྙེད་ཀྱི། །ཁྲག་ཁྲིག་རི་རབ་རྡུལ་མཉམ་དང་། །ཞེས་པ་འདིས་ཀླ་ཀློ་ཡུལ་གྱི་མི་ནི་ཤམྦྷ་ལ་ཡི་རྒྱལ་པོ་འཁོར་བཅས་སོ། །སྟོན་པ་ནི། ཐུབ་པའི་རྒྱལ་པོ་དེ་བཞིན་གཤེགས། །རྡོ་རྗེ་འཛིན་པ་ཆེན་པོ་ལ། །ཞེས་གསུངས་པ་ཤཱཀྱ་སེང་གེ་ཉིད་དཔལ་མགོན་པོ་ཐམས་ཅད་འདུས་པའི་དཀྱིལ་འཁོར་དུ་བཞེངས་ནས་འདི་བཤད་པ་སྟེ། གཞན་དུ། གསང་ཆེན་ཡོངས་སུ་རྫོགས་པ་ཡི། །རང་བྱུང་ཡེ་ཤེས་ཕོ་བྲང་དུ། །ཞེས་གསུངས་པ་འབྲེལ་མེད་པར་འགྱུར་བའི་སྐྱོན་མཆིའོ། །ཞུ་བ་དང་སྡུད་པ་པོ། རྡོ་རྗེ་སྙིང་པོ་སེམས་དཔའ་ཆེ། །བླ་གོས་ཕྲག་པ་གཅིག་གཟར་ཏེ། །པུས་མོའི་ལྷ་ང་ས་ལ་བཙུགས། །ཐལ་མོ་སྦྱར་ཏེ་འདི་དོན་ཞུས། །ཞེས་སོགས་ཀྱིས་སོ། །ཆོས་ནི། དེ་ནས་བཅོམ་ལྡན་འདས་རྡོ་རྗེ་འཛིན་པས་བཀའ་སྩལ་པ། བླ་མེད་སངས་རྒྱས་བསྟན་པ་ལ། །དགའ་ཞིང་མགུ་ལ་རབ་དད་པའི། །སེམས་དཔའ་ཆེན་པོ་གསང་བའི་དོན། །རབ་ཏུ་ཞུས་པ་ལེགས་སོ་ལེགས། །ཤིན་ཏུ་རྨད་དུ་བྱུང་བ་ཡི། །གདུལ་དཀའ་མ་ལུས་འདུལ་དོན་དུ། །བྱང་ཆུབ་སེམས་ཀྱི་ཡེ་ཤེས་མཛོད། །ཁྱོད་ལ་ཡང་དག་བསྟན་པར་བྱ། །ཞེས་ནས་རྒྱུད་རྫོགས་པའི་བར་རོ། །དུས་ནི་བཅོམ་ལྡན་འདས་དགུང་ལོ་བདུན་ཅུ་རྩ་དགུ་པ་ནག་པའི་ཉ་ལའོ།། །། གཉིས་པ་རྒྱུད་ཀྱི་གཞུང་རྒྱས་པ་ངེས་པར་བསྟན་པ་ལ། འཁྲུགས་བསྡེབས་ནས་རྒྱུད་ཀྱི་མངོན་རྟོགས་བསླང་བ་དང་། ལེའུས་བཅད་པའི་གནད་ཀྱིས་རྒྱུད་ཆ་ཤས་སུ་གསིལ་བ་རྣམ་གྲངས་སུ་བསྟན་པའོ། །དང་པོ་ལ། ཇི་ལྟར་ཞུས་པ། དེ་ལ་ལན་རིམ་པར་བཏབ་པ་གཉིས། དང་པོ་ནི། གསང་ཆེན་ཁྱད་པར་འཕགས་པ་ཡི། །ལྷུན་གྱིས་གྲུབ་པའི་ཕྱག་རྒྱ་ཆེ། །ཞེས་པས་དང་པོའི་མགོན་པོ་དྲིས་པ། མི་འགྱུར་རྡོ་རྗེ་ཐེག་པའི་ལམ། །ཞེས་པས་ལམ་དུས་ཀྱི་མགོན་པོ་དྲིས་པ། རྒྱུ་བསྟན་པ། དེ་ཉིད་ཅེས་པས་འབྲས་བུའི་དུས་ཀྱི་མགོན་པོ་དྲི་བ་གསུམ་སྟེ། མཚན་དང་གླེང་གཞིའི་འབྲེལ་གྱིས་བསྟན་པ་ཡིན་ནོ། །ལམ་དུས་ལས་འཕྲོས་ནས། དུས་དང་གནས་དང་གང་ཟག་སྟེ། །སྤྱོད་ཡུལ་བསྟན་པའི་ཁྱད་པར་ནི། །ཞེས་པས་དྲི་བ་བཞི་སྟེ། དུས་ནམ། གནས་གང་། གང་ཟག་ཅི་ལྟ་བུ། རྣལ་འབྱོར་གྱི་སྤྱོད་ཡུལ། དེ་ལས་འཕྲོས་ནས། སྒྲུབ་དང་བསྒྲུབ་པ་འཕྲིན་ལས་ཚོགས། །ཐབས་དང་སྟོབས་དང་འཇུག་པ་སྟེ། །མངོན་བྱེད། ཅེས་པ་དྲིས་པས་བདུན་ནོ། །གཉིས་པ་དེ་ལ་ལན་རིམ་པར་བཏབ་པ་ལ། གཞི་དུས་ཀྱི་ལན་ལམ། འབྲས་དུས་ཀྱི་ལན་བསྟན་པའོ། །དང་པོ་ནི། དེ་ལ་དངོས་གྲུབ་ཐམས་ཅད་ཀྱི། །གྲུབ་པ་རབ་ཏུ་སྟེར་བྱེད་པ། །རྒྱལ་བ་ཀུན་གྱི་སྙིང་པོ་སྟེ། །སྙིང་པོའི་སྒྲ་ནི་བསྟན་པ་ཐམས་ཅད་ཀྱི་གཅེས་ཤོས་ལ་བཞག་པ་དང་། དྲི་མ་དགུའི་སྦུབས་སུ་གནས་པ་ལ་བཞག་པ་གཉིས་ལས། འདིར་ཕྱི་མའོ། །དེའི་ངོ་བོ་ནི། ཡ་ཀི་ཡེ་ཤེས་ཀྱི་མགོན་པོ་ནས་མ་ཀི་ཐེའུ་རང་རྐང་གཅིག་པའི་བར་ཐ་དད་མེད་པས་རྒྱུད་གཅིག་སྟེ། ཆོས་ཀྱི་དབྱིངས་ལ་དབྱེར་མེད་ཕྱིར། །རིགས་ནི་ཐ་དད་རུང་མ་ཡིན། །ཞེས་རྒྱན་ལས་གསུངས་པའི་ཕྱིར་རོ། །རྒྱུད་གཅིག་ཏུ་བཞག་པའི་གནས་སྐབས་དེར་ཡང་དངོས་པོར་གཟུང་རྒྱུ་ཞིག་ཏུ་མ་གྲུབ་པས་རང་བཞིན་མེད་པ་ཞེས་བྱ། དེ་ཀ་རང་བཞིན་རྣམ་དག་གི་དོན་དུ་བླ་མ་བཞེད་ལ། བཞེད་པ་ལྟར་རྒྱལ་བ་རྣམས་ཀྱིས་འདིའི་དཔེར་ནམ་མཁའ་གཟུང་སྟེ། ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ནི་མཚན་ཉིད་མེད། །ཁམས་གསུམ་པོ་ནི་མ་ལུས་པ། །འགྲོ་ཀུན་སྒྱུ་མ་ལྟ་བུ་ཡིན། །ལག་པ་ལ་སོགས་པས་མྱུལ་བའི་ཚེ་རེག་བྱ་མེད་པ་ཙམ་ཞིག་ལ་འཇིག་རྟེན་ནམ་མཁའ་ཞེས་ཟེར་ལ། རྒྱུ་དེས་གཞན་གྱི་གོ་མི་དགག་པས་གཞན་མི་སྒྲིབ་པ་སྟེ། ཆོས་མངོན་པར། དེ་ལ་ནམ་མཁའ་མི་སྒྲིབ་པའོ། །ཞེས་གསུངས་སོ། །གང་དངོས་པོ་ཞིག་ཏུ་གྲུབ་ན་དེས་དེར་གཞན་འཇུག་པའི་གོ་བགགས་ཏེ་ཕ་བོང་ལྟ་བུའོ། །དེའི་ཕྱིར་རང་བཞིན་མེད་པས་རང་བཞིན་ཅན་ལྟར་སྣང་བ་འདི་ཐམས་ཅད་རྐྱེན་གྱི་ངོར་རུང་བ་མེ་ལོང་དྭངས་པ་ལ་གཟུགས་བརྙན་བཞིན་ནོ། །དེ་ལྟར་ཤར་བ་དེ་ལས་གཞན་དུ་མེད་ཀྱང་སྣང་ཙམ་ཞིག་ལོགས་སུ་གྲུབ་པ་འདྲ་བས་སྒྱུ་མ་ལྟ་བུ་སྟེ། བརྟན་པ་དང་ནི་གཡོ་བ་ཡི། །འགྲོ་བ་དམིགས་སུ་མེད་པ་སྟེ། །མཐོང་བ་དང་ནི་ཐོས་པ་སོགས། །ཐམས་ཅད་སྒྱུ་མ་ལྟ་བུར་འཆར། །ཞེས་སོ། །དེའི་ཕྱིར་ཕུང་པོ་ཁམས་དང་སྐྱེ་མཆེད་དང་། །འབྱུང་བ་བཞི་ལ་སོགས་པ་རྣམས། །ཐམས་ཅད་གདོད་ནས་དག་པ་ཡིས། །ཡེ་ཤེས་ཆེན་པོའི་བྱིན་རླབས་ཀྱིས། །དངོས་པོ་དུ་མ་གསལ་བར་སྣང་། །ཡེ་ཤེས་མེད་པར་སྐྱེ་མི་འགྱུར། །སངས་རྒྱས་ཡེ་ཤེས་ཀྱིས་རབ་བསྐུལ། ནམ་མཁའི་དཔེས་མཚོན་པའི་གཞི་དེ་ཡང་སངས་རྒྱས་ཀྱི་གཟིགས་པ་ལ་བྱ་ཡི། བདག་ཅག་གིས་མཐོང་བ་ནི་བཅོས་མ་སྟེ། དཔེར་ན་སྐྱེས་བུ་ལྷ་སྦྱིན་ཨོ་ཚོམ་མེར་འདུག་བཞིན་པ་ལ་དགྲ་གཉེན་མཆོད་སྦྱིན་གྱིས་ཐ་དད་པར་མཐོང་བ་ལྟ་བུའོ། །དེ་ལྟ་བ་པོའི་སྐྱོན་ཡིན་གྱི། ལྟ་གཞིའི་དེའི་མ་ཡིན་པ་བཞིན། གཞི་འཁྲུལ་མེད་ལ་འཁྲུལ་པའི་ལྷད་གློ་བུར་དུ་ཞུགས་པ་ཤེས་པར་བྱའོ། །ལྷད་དེས་རྐྱེན་བྱས་པས་སྲིད་པ་ཇི་སྲིད་དམན་མཆོག་གི་སྣང་བ་འཇུག་ལ། ལྷད་དེ་འཇུག་པ་མེད་པར་གྱུར་ན་སྣང་བ་ཐམས་ཅད་དག་སྟེ་འཚང་རྒྱ་བ་ཡིན་ནོ། །དེའི་ཕྱིར། ཇི་སྲིད་འཁོར་བའི་གནས་སུ་ནི། །ཀུན་མཁྱེན་བདེ་གཤེགས་བཞུགས་གྱུར་པ། །མྱ་ངན་འདའ་བར་མི་མཛད་ཅིང་། །དེ་སྲིད་མཚུངས་མེད་སེམས་ཅན་དོན། །རྒྱུན་མི་འཆད་པར་འགྲོ་བ་ཀུན། །སྲིད་པའི་ཞགས་པས་འཇིགས་མེད་པར། །བྱམས་པའི་ཐུགས་ཀྱི་བརྩོན་འགྲུས་ཀྱིས། །རྟག་ཏུ་སེམས་ཅན་དོན་མཛད་རྣམས། །ནམ་མཁའི་ཁམས་ཀྱི་མཐར་ཐུག་པར། །སྨོན་ལམ་རྣམ་པར་སྦྱོང་བྱེད་ཅིང་། །སྙིང་རྗེས་དོན་བརྩོན་སེམས་ཀྱིས་ནི། །དཔའ་བོས་སྲིད་པ་སྦྱོང་བར་མཛད། །སྣ་ཚོགས་གཟུགས་ཅན་ནོར་བུ་བཞིན། །དེ་བས་གཞི་དུས་ཀྱི་སྙིང་རྗེས་གཞན་གྱི་གོ་འབྱེད་པ་བཞིན། ལམ་དུས་སུ་སེམས་ཅན་སྡུད་པར་བྱེད་ལ། འབྲས་དུས་སུ་སེམས་ཅན་ཐམས་ཅད་ཀྱི་དོན་འཆར་བས། སྙིང་རྗེའི་སྟེང་དུ་གཞི་ལམ་འབྲས་བུ་ཐམས་ཅད་ལྷུན་གྱིས་གྲུབ་བོ། །དེ་བཞིན་གཞི་དུས་སུ་རྐྱེན་མ་ཞུགས་པ་རང་བཞིན་གྱིས་དག ལམ་དུས་སུ་འཁོར་བ་སྦྱོང་ལ། འབྲས་དུས་སུ་དག་པ་གཉིས་ལྡན་ཏེ། བློ་ཟད་ཆོས་ཟད་དུ་འགྱུར་བས། སྟོང་པའི་སྟེང་དུ་གཞི་ལམ་འབྲས་བུ་ལྷུན་གྱིས་གྲུབ་བོ། །དེའི་ཕྱིར། གསང་བ་ལས་ཀྱི་རིམ་པ་ཉིད། །ཅེས་བསྟན་ནོ། །གཞི་ལ་རྐྱེན་ཞུགས་པའི་དབང་དུ་བྱས་ནས། དུས་གསུམ་སངས་རྒྱས་ཐམས་ཅད་ཀྱི། །བསྟན་པ་བསྲུང་ཞིང་བཀའ་ལ་མཉན། །དམ་ཚིག་འཛིན་པའི་ཞིང་སྐྱོང་ལ། །མགོན་པོ་ས་བཅུའི་དབང་ཕྱུག་གཙོ། །དཔལ་ལྡན་ཞིང་སྐྱོང་ཐམས་ཅད་ལས། །མཆོག་ཏུ་གྱུར་པའི་ལས་སྒྲུབ་པ། །དཔལ་ལྡན་ནག་པོ་ཆེན་པོ་ནི། །འདུས་པ་འདིས་ནི་ལྷ་མིན་གྱི། །གཡུལ་ལས་རྒྱལ་བར་བྱེད་པ་ཡིན། །ཞེས་དང་། འོག་ཏུ། དཔལ་ལྡན་ལྷ་མོ་ཆེན་མོ་དང་། །ནག་མོ་རེ་མ་ཏིར་གྱུར་པ། །ལྕམ་དྲལ་གྱུར་པས་བསྟན་པ་བསྲུང་། །ཞེས་ཐུགས་དཀྱིལ་བ་ཐམས་ཅད་ཡུམ་ཅན་དུ་བཤད་པ་དང་། ཞིང་སྐྱོང་བ། ཉི་ཤུ་རྩ་བཞིའི་གཙོ་བོ་སྟེ། གཞན་དུ་ས་གསུམ་དབང་བྱེད་པའོ། །ཞེས་དུར་ཁྲོད་ཀྱི་ཞིང་སྐྱོང་བརྒྱད། འདི་ལ་དངོས་ཟིན་ཕོ་གཙོ་བོར་གྱུར་པ་འདྲ་ཞིག་བསྟན་ཡང་། རིགས་ཐམས་ཅད་པའི་དཀྱིལ་འཁོར་ལ་མོ་གཙོ་དགོས་ལ། ལེའུ་བཅུ་གཅིག་པར། དེ་ནས་དཀྱིལ་འཁོར་ཆེན་པོ་ཡི། །དུར་ཁྲོད་གནས་པའི་ཞིང་སྐྱོང་དང་། །ཉི་ཤུ་རྩ་བཞིའི་ཞིང་སྐྱོང་བཅས། །དེ་དག་རིམ་པ་བཤད་པར་བྱ། །རྡོ་རྗེ་རིགས་ཀྱི་ཕོ་ཉ་མོ། །དྲུག་ཅུ་རྩ་བཞིའི་འཕྲིན་ལས་དང་། །འདི་ཉིད་གསང་བའི་མགོན་པོ་ཡི། །ཐབས་མཆོག་འདི་ནི་ཀུན་ཏུ་སྦས། །ཞེས་བཤད་པས་སོ། །ལྷ་སྲིན་སྡེ་བརྒྱད་མ་ལུས་པ། །མཆོད་འོས་གཙོ་བོར་གྱུར་པ་ཡིན། །ཞེས་སྐུ་དཀྱིལ་གྱི་ལྷ་བཤད་ནས། སྐུ་དང་གསུང་དང་ཐུགས་གསང་བ། །སྒོ་གསུམ་སྦྲག་དང་། དེ་ཡང་ལྷའི་དག་པའི་དབང་དུ་མཛད་ནས། ཕྱི་ནང་དེ་ཉིད་ཁོ་ནའི་དོན། །ཡོན་ཏན་འཕྲིན་ལས་དབང་ཕྱུག་ཏུ། །དམ་ཚིག་མགོན་པོ་ཞེས་གསུངས་སོ། །དེའི་དོན། དེ་ཁོ་ན་ཉིད་དུ་ཆོས་ཉིད་ཀུན་འགྲོ་ཡིན་པས་ཆོས་ཅན་དུ་མར་གྲུབ་ལ། དེས་ཆོས་ཆོས་ཉིད་མི་ཕྱེད་པ་དང་། གསང་བར་རིགས་གཅིག་རིགས་བརྒྱ་ནས་གྲངས་མེད་པའི་བར་དུ་འཆར་བས། རིགས་དང་རིགས་ཅན་མི་ཕྱེད་པ་དང་། ཡ་གི་དཔལ་ཡེ་ཤེས་ཀྱི་མགོན་པོ་ནས་མ་གི་ཐེའུ་རང་གི་བར་ཐམས་ཅད་ནང་རྩའི་རྟེན་འབྱུང་སྟེ། རྩ་ཁམས་མ་དག་པར་དེ་དག་ཀྱང་བགེགས་དང་ལོག་འདྲེན་ལ་སོགས་པ་བར་དུ་གཅོད་བྱེད་ཀྱི་བདུད། རང་གི་རྩ་དག་པ་ན་དེ་དག་ཆོས་སྐྱོང་དུ་ཞལ་བསྒྱུར། རྩ་ཐམས་ཅད་དབུ་མར་ཐིམ་ན་རང་རྒྱུད་དུ་དྭངས་ཏེ་འཚང་རྒྱ་བས། རྗེ་བཙུན་གྱིས། ནང་རྩ་གཟུགས་རྟེན་འབྲེལ་ཤེས་པའི་ཕྱིར། །ཕྱི་འཁྲུལ་སྣང་གི་གདོན་ལ་ང་མི་འཇིགས། ཞེས་དང་། དགྱེས་རྡོར་ལས། ཇི་ལྟར་ཕྱི་རོལ་དེ་བཞིན་ནང་། །ཇི་ལྟར་ནང་བཞིན་ཕྱི་དེ་བཞིན། །ཞེས་སོ། །འདི་ཀའི་ལེའུ་བཞི་པར། དཀྱིལ་འཁོར་ལྷ་འདི་ལུས་ཉིད་ཡིན། །གཞན་དུ་ལྷ་དང་དཀྱིལ་འཁོར་ནི། །བཙལ་ཡང་རྙེད་པར་མི་འགྱུར་ཞེས། །འདྲེན་པ་དཔའ་བོས་རྟག་ཏུ་གསུངས། །ཞེས་བཤད་དོ། །གཞན་ཡང་སམ་པུ་ཊར། ཧེ་རུ་ཀ་ལ་སོགས་པའི་ལྷ། །རྩ་གཟུགས་མཛེས་པར་ཡང་དག་བྱུང་། །ཞེས་བཤད་པ་དང་། བརྟག་གཉིས་ལས། ང་ལས་འཇིག་རྟེན་ཐམས་ཅད་བྱུང་། །ང་ལས་གནས་གསུམ་པོ་ཡང་བྱུང་། །དང་། འཇིག་རྟེན་འཇིག་རྟེན་འདས་པ་ང་། །དང་། བདེ་མཆོག་ཉུང་ངུ་ལས། ཡུལ་ཕྱོགས་གང་ན་གནས་གྱུར་པའི། །རིགས་ངན་ཀླ་ཀློ་ཡིན་ན་ཡང་། །ཡུལ་དེ་ཡོངས་སུ་བཏགས་པ་སྟེ། །སེམས་ཅན་ཡོངས་སུ་གཟུང་བའི་རྒྱུར། །དེ་རུ་ང་ནི་རྟག་ཏུ་གནས། །ཞེས་འབྱུང་བས་ཐམས་ཅད་ཧེ་རུ་ཀའི་རོལ་མོ། དེའི་ཕྱིར། གང་དུ་བདེ་ཆེན་ཞེས་བྱ་གཅིག་པུ་ཉིད། །གཅིག་པུའི་ཉམས་ཀྱིས་དུ་མའི་གར་མཛད་དོ། །ཞེས་ཀུན་སྤྱོད་ལས་བཤད་དོ། །འདི་ལྟ་བུའི་གནད་གོ་ནས་ལྷའི་རྣལ་འབྱོར་བསྒོམས་ན་དེས་ཐ་མལ་གྱི་སྣང་བ་ཟློག་པར་ནུས་ལ། དེར་ལྷའི་སྣང་བ་བསྒོམ་རྒྱུ་ཞིག་སྟོན་དགོས་པ་ཡང་། དང་པོ་ནས་མཚན་མ་མེད་པ་ལ་འཇོག་མི་ནུས་པས། སྤྲོས་པ་ལ་འཁྲིད་ནས་སྤྲོས་མེད་ལ་འཇུག་པར་བྱ་བའོ། །དེ་ལྟར་ཡང་བརྟག་གཉིས་ལས། སྤྲོས་པ་རྨི་ལམ་ལྟར་བྱས་ན། །སྤྲོས་པ་ཉིད་ཀྱང་སྤྲོས་མེད་བྱེད། །ཅེས་གསུངས་པས་སོ། །གཞན་ཕྱི་རོལ་དུ་ལྷ་དང་འདྲེ་ཞིག་གཟུང་། དེ་གསོལ་བ་དང་བརྡུང་བར་ཞེན་པ་དག་ནི་རྡོ་རྗེ་ཐེག་པར་མི་འགྱུར་ཏེ། གང་ཟག་དེས་སེམས་ཙམ་གྱི་ལྟ་བ་ཡང་མ་སྙེགས་པས་སོ། །དེ་ཅིའི་ཕྱིར་ཞེ་ན། མདོ་སྡེ་རྒྱན་དུ་དེའི་གྲུབ་མཐར། སེམས་ལས་གཞན་མེད་པར་ནི་བློས་རིག་ནས། །ཞེས་འབྱུང་བས་སོ། །དབུ་མ་པར་འགྱུར་བ་ལ་དེར། དེ་ནས་སེམས་ཀྱང་མེད་པ་ཉིད་དུ་རྟོགས། །ཞེས་འབྱུང་ཞིང་། འདིར་ཕྱི་ནང་སྦྱར་བ་ཡང་ཐམས་ཅད་མཉམ་པ་ཉིད་དུ་སྟོན་པ་སྟེ། ཕྱི་ནང་གསང་བ་དེ་ཁོ་ནའི་སྤྲོས་པ་ཉེ་བར་ཞི་ན་ཞི་བའི་དབྱིངས་དེ་ལ་མཉམ་པ་ཉིད་ཅེས་བྱ་ཡི། སྤྲོས་པ་ཟིང་ངེར་བཞུགས་པའི་མཉམ་ཉིད་ནི་མིང་ཙམ་མོ། །རང་བཞིན་མེད་པ་ཐམས་ཅད་པར་འཆར་བ་ཙམ་ཕྱག་རྒྱས་མཚོན་ནུས་པས་ཕྱག་མཚན་དེ་དག་ཀྱང་ཐུགས་སུ་བཞག་གོ །དེ་ལྟར་ཐུགས་ཕྱག་རྒྱ་ཆེན་པོ་བཤད་ནས་ལེའུ་བཞི་པར། སྐུ་གསུང་ཐུགས་ཀྱི་གསང་བ་ལས། །དྲག་པོ་ཀུན་གྱི་སྲོག་གྱུར་པ། །ཡོན་ཏན་འཕྲིན་ལས་དབང་ཕྱུག་གི །ཕྱི་ནང་གསང་བའི་བདག་པོ་ཡིན། །འདི་ཡང་སྔར་གསུང་རྡོ་རྗེ་ཚིག་ཏུ་འཐོན་པའི་གླེང་གཞིར། རྡོ་རྗེ་འཛིན་པ་གང་ཞིག་གི །སྒྱུ་མ་བྲག་ཅའི་གཟུགས་བརྙན་ལྟར། །ཡིད་འོང་དབེན་པའི་གནས་དག་ཏུ། །དངོས་གྲུབ་ཐམས་ཅད་བསྡུས་པ་བསྒྲུབ། །ཅེས་སྒྲ་བརྙན་ལྟ་བུར་སྔགས་བཟླ་བ་དེ་འཆད་པར་བཞེད་པ་ཡིན་ལ། བླ་མ་རྣམས་འདིར་སྲོག་བཞིའི་ཐ་སྙད་མཛད་དེ། དེ་བཞིན་འདིར། །གཅིག་ལས་དུ་མའི་ངོ་བོ་ཅན། །འཇིག་རྟེན་པ་དང་ཡེ་ཤེས་ཆེ། །མི་འགྱུར་བ་དང་དགུག་པ་དང་། །ལས་རྣམས་བྱེད་པའི་གྲོགས་གྱུར་པའོ། །གསང་སྔགས་འཁོར་ལོ་འདི་དག་ནི། བྱེ་བྲག་རྣལ་འབྱོར་པས་བཤད་བྱ། །ཞེས་དང་སྲོག་གམ་མི་འགྱུར་བའི་སྲོག འཁྲུལ་སྲོག་གམ་གནས་པའི་སྲོག གདགས་སྲོག་གམ་མིང་སྲོག འདི་དགུག་སྲོག འདྲེན་སྲོག་གམ་སྲོག་སྔགས། འདི་ལས་བྱེད་ཀྱི་སྲོག དང་པོ་ནི་ཆོས་ཐམས་ཅད་ལ་སྙིང་པོར་བཞུགས་པས། ཧཱུྃ་ལ་བྱེད། དེ་ཀ་སྐུ་གསུང་ཐུགས་ཡོན་ཏན་འཕྲིན་ལས་ཏེ་ཡེ་ཤེས་ལྔ་ལྡན་དུ་བཤད་པས་སྟོང་ཆེན་ཡི་གེ་ལྔར་འགྱུར་བ་ལ། རྡོ་རྗེ་བཞི་ལ་གནས་པའི་ཆ། །གཏེར་གྱི་བུམ་པ་ཁ་ཁྱེར་ལྡན། །དུས་ཀྱི་རྒྱལ་པོ་འོད་གསལ་བ། །ཆུ་འཛིན་ཕྱོགས་ཙམ་ཕྱེད་ལྡན་གཉིས། །སྒྲ་དང་སྒྲ་ཡིས་ཁྱབ་པ་སྟེ། །དུ་མ་མ་ཡིན་གནས་པའི་ཡུལ། །ཞེས་དགོངས་པའི་སྐད་ཀྱིས་གསུངས་སོ། །སྟོང་ཆེན་ཡི་གེ་ལྔ་ནི་དབྱངས་ཐམས་ཅད་ལ་ཁྱབ་པ་ཡིན་ལ། དེ་ལས་ཐིག་ལེ་སྟོང་པ་ཡི་གེ་དྲུག་ཏུ་འགྱུར་བ་གསལ་བྱེད་ཐམས་ཅད་པ་སྟེ། དབྱངས་དང་གསལ་བྱེད་ཀྱིས་མ་བསྡུས་པའི་ཡི་གེ་ནི་མ་མཆིས་སོ། །འདིས་ཡི་གེ་ཧཱུྃ་དང་སྲོག་ཐུགས་མི་འགྱུར་བ་གཅིག་ཡིན་པས་ཐམས་ཅད་ཀྱི་ས་བོན་དུ་འདི་བཞེད་དོ། །སྤྱིའི་མི་འགྱུར་བའི་སྲོག་ཨེ་ལ་བཞག་པ་སྟོང་པ་ཉེད་ཨེར་འཆད་པའི་དགོངས་པས་ཡིན་ལ། དེ་ཡང་རྣམ་འགྱུར་གཙོ་བོར་སོང་བས་འཁྲུལ་སྲོག་ཏུ་གཟུང་ངོ་། །དེར་རྣམ་པར་མ་གྱུར་པའི་ཨ་ལྟ་བུ་ནི་ངག་ཐམས་ཅད་ཀྱི་རྩ་བ་ཡིན་ལ། དེ་དང་འདིར་ཧཱུྃ་རྒྱལ་བ་རྣམས་ཀྱི་ཐུགས་ལ་གནས་པའི་གསང་སྔགས་ངོ་མ་ཡིན་པར་ཁྱད་པར་མེད། དེ་གསུང་རྡོ་རྗེའི་ས་བོན་དུ་བཞག་པའི་ཚེ་རིང་པོར་སྣང་བ་ཙམ། དེ་བཞིན་ཡི་གེ་ཨོཾ་སྐུའི་ས་བོན་དུ་བྱས་པ་ཡང་ཤེས་པར་བྱ་དགོས། དེ་བས་ན་དྲི་མེད་འོད་ལ་སོགས་པར། སྐུ་གསུངས་ཐུགས་ཀྱི་སྙིང་པོ་འདི་དག་ལས། ཨ་ཨུ་མ་གསུམ་ལས་ཨོཾ་སྒྲུབ་པ་དང་། ཨ་ཨཿརྣམ་བཅད་གསུམ་ལས་ཨཱཿདང་། ཧ་ཨུ་མཱ་གསུམ་ལས་ཧཱུྃ་བསྒྲུབ་པར་མཛད་པའང་སྐུ་གསུང་ཐུགས་གཅིག་པ་མཚོན་པའི་ཕྱིར་རོ། །གཞན་མི་འགྱུར་བའི་སྲོག་ཏྲི་ལ་བྱེད་པ་ནི་དྲེགས་པ་ཁོ་ནའི་དབང་དུ་བྱས་སོ། །གདགས་པའི་སྲོག་ནི་མིང་ངམ་མིང་གི་ཐོག་མ་སྟེ། ཨཱི་ཤྭ་ར་ལྟ་བུའི། ཨ་བསྡུས་པ་དང་། བདུད་ལ་དུ། གཤིན་རྗེ་ལ་ཡ། གཟའ་ལ་ར། ཀླུ་ལ་ཕུཿ བཙན་ལ་ཙ། གནོད་སྦྱིན་ལ་ཀྵ། རྒྱལ་པོ་ལ་རཱ། མ་མོ་ཐམས་ཅད་ལ་མའམ་བྷྱོ། ཕོ་བརྒྱུད་ཐམས་ཅད་ལ་ཡ་བཤད་པ་ལྟ་བུ། འདྲེན་སྲོག་ནི་རང་རང་གི་སྙིང་པོ་སྟེ། དེ་ལྟར་ལྷ་ལས་ཀྱི་འགྱུར་ན་དེའི་སྔགས་ཀྱང་འགྱུར་བས་མཐའ་གཅིག་ཏུ་མི་གཟུང་སྟེ་སྐབས་ཐོབ་ཀྱིས་ཤེས་པར་བྱའོ། །དེ་ཡང་། སྙིང་པོ། ཡང་སྙིང་། འཕྲིན་ལས་ཀྱི་སྔགས་གསུམ་དུ་ཕྱེ། དེ་ཐམས་ཅད་ཀྱང་ཁྲག་མཚོ་ཁོལ་མའི་རྒྱུད་དུ། སྙིང་དབུས་སྲོག་གནས་མི་ཤིགས་པ། །རྩེ་མོར་གྱུར་པ་ཀུན་བསྐྱེད་གཞི། །མཚན་ནས་བརྗོད་པ་ཐུན་མོང་བ། །དེ་ནི་བདེ་བ་མིང་ཙམ་ཡིན། །གསང་བ་ཐུན་མོང་མ་ཡིན་པ། །མྱུར་དུ་བསྐུལ་བ་ལས་བྱེད་འགྱུར། །ཡང་སྙིང་གསང་ཆེན་རང་དབང་མེད། །ལེན་ཞིང་འཛིན་པས་དོན་གྲུབ་པའོ། །འཕྲིན་ལས་སྐུལ་བྱེད་དྲག་སྔགས་ནི། །བརྗོད་པས་ཐོག་དང་གླང་ཆེན་བཞིན། །གང་གཏང་རྒྱུག་ཅིང་འཇོམས་པར་བྱེད། །ཅེས་སོ། །གཞན་འདིར། རྩ་བའི་སྔགས་ནི་སྲོག་ཡིན་ཏེ། །གསུང་གི་དངོས་གྲུབ་སྙིང་པོ་ཡིན། །ཉེ་བའི་སྙིང་པོ་ཐུགས་བསྐུལ་བའོ། །ཡེ་ཤེས་ས་བོན་མི་ཤིགས་པ། །དྭངས་མའི་གནས་པར་དེ་བཤད་དོ། །ཞེས་སོ། །ལར་ཡ་གི་རྒྱལ་བ་རིགས་ལྔ་ནས་མ་གི་དམྱལ་བའི་བར་གྱི་སྲོག་གཟུགས་ཐམས་ཅད་རྩ་གཟུགས་དབྱིབས་ཀྱི་ཡི་གེར་སྣང་ཞིང་དེར་རླུང་རྒྱུ་བའི་གདངས་ལས་དེ་དང་དེའི་ཡི་གེ་དངོས་གྲུབ་པའོ། །དེའི་ཕྱིར་རྩ་གཟུགས་དེ་དག་ཏུ་རླུང་གིས་ཐིག་ལེ་འཁྲིད་པ་ན་སོ་སོའི་གནས་སྦྱོང་འཆར་ལ། རྩ་གཟུགས་དེ་དག་འཁྲུལ་འཁོར་དང་དམིགས་པ་རླུང་གནད་ཀྱིས་བཤིག་ན་དེ་ལས་གྲོལ་ནས་ཕྱིན་ཆད་དེའི་སྣང་བ་མི་འཆར་བ་ཡིན་ནོ། །དེའི་ཕྱིར། དྭངས་སྙིགས་ལས་ཀྱི་རྒྱུ་འབྲས་ཀྱིས། །གནས་པ་ཁྱད་པར་རྟེན་འབྲེལ་ཏེ། །འཁྲུལ་དང་འཁྲུལ་པ་མ་ཡིན་པས། །ཁམས་གསུམ་ཀུན་ལ་དབང་བྱེད་པས། །འཇིག་རྟེན་ལས་དང་ཡེ་ཤེས་ཀྱི། །མགོན་པོའི་ཁྱད་པར་མངོན་དུ་འབྱུང་། །ཞེས་གསུངས་ལ། ལས་ཀྱི་རྣམ་སྨིན་རགས་པས་འཁྲུལ་པ་ཤས་ཆེ། དེས་འཇིག་རྟེན་པ། རྣམ་སྨིན་གྱི་གཟུགས་ཕྲ་བས་ཡེ་ཤེས་པ་སྟེ། སོ་སོ་སྐྱེ་བོ་དང་མ་རིག་བག་ཆགས་ཀྱི་ས་པའི་ཁྱད་ལྟ་བུ། དོན་རགས་པ་ཉིད་སྦྱངས་པས་ཕྲ་བར་འགྱུར་ཞིང་། ཕྲ་བ་དག་ན་སངས་རྒྱས་ཀྱི་སྐུ་གསུམ་དུ་གནས་འགྱུར་བས་སོ། །གདགས་པ་ཐ་སྙད་ཁྱབ་པ་པོ། །ཐུན་མོང་བར་ནི་བསྟན་པ་ཡིན། །གདགས་པའི་སྲོག་རྩ་གཟུགས་བོད་ལ་བོད་དང་རྒྱ་ལ་རྒྱའི་ཡི་གེའི་གཟུགས་སུ་ཡོད་པས་སྐད་རིགས་བཞི་ཡོད་པ་ནས་སྐད་བསམ་གྱིས་མི་ཁྱབ་པའི་བར་ཏེ། གྲི་གུག་བརྩེགས་པར། སྔགས་ནི་རྩ་བའི་སྲོག་ནང་གནས། །ཨཱ་ལི་ཀཱ་ལི་ཁོང་ནས་འབྱུང་། །འཇུག་འབྱིན་རྒྱན་གྲོགས་རྐྱེན་གྱིས་བསྒྱུར། །མིང་དང་ཚིག་དང་ཡི་གེའི་ཚོགས། །རབ་ཏུ་བྱེད་པ་དུ་མར་འགྱུར། །ཞེས་པས་སོ། །དེའི་ཕྱིར། འདི་དག་ལས་དང་སྐྱེ་བོ་ལས། །སྒྲིབ་པ་ཐུན་མོང་ལྷ་ཡི་ཆ། །དངོས་དང་བརྒྱུད་པས་ལུང་བསྟན་པས། །སྲོག་དང་སྲོག་མ་ཡིན་པ་སྟེ། །ཞེས་པ་འབྱུང་བའི་དབྱེ་བ་ཕན་ཚུན་དགྲ་གཤེད་གྲོགས་བཏང་སྙོམས་པར་འགྱུར་བ་བཞིན། སྔགས་དེ་དག་ཀྱང་དགྲ་གྲོགས་བཏང་སྙོམས་པར་གནས་པ་བཤད་ལ། རྒྱུ་དང་རྐྱེན་དང་བསྐུལ་བ་ཡིས། །གསང་སྔགས་བཟླས་པ་མངོན་པར་ཕྱེ། །ཞེས་པ། གླེགས་བམ་དུ་བཀོད་པ་ཙམ་མ་ཡིན་པ། རྒྱུ་དང་རྐྱེན་གྱི་ངོར། དགྲ་དང་སྤྲད་པ། གྲོགས་དང་བསྡེབ་པ། ཡི་གེ་བསྣན་པ། དུག་དབྱུང་བ། དཀྲུག་པ། འཕྲུལ་དུ་བསྐོར་བ་རྣམས་ཤེས་དགོས་པས། ཁྲག་འཚོ་ཁོལ་མར། དེ་ཡི་གསང་སྔགས་བསྟན་པ་ཡང་། །གཏོར་དང་གྲིལ་དང་དཀྲུག་པའི་ཚུལ། །བྱིན་ཆེ་ཚན་སྐྱེད་མི་བཟློག་ཕྱིར། །སྤྱི་དང་བྱེ་བྲག་བཟླས་པ་བྱ། །ཞེས་བཤད་པ་དང་། ཐུགས་རྗེ་འབྱུང་བར། རང་གི་རྒྱུད་རྩུབ་ཁྲོ་བ་ན། །ཡེ་ཤེས་བསྙེན་པས་སྟོད་ལ་མནན། །འཁོར་དང་ནོར་ལ་འཁྲེན་པ་ན། །འཕྲེང་བའི་སྔགས་ཀྱིས་མགོ་ཐོག་བགྲང་། །ནོར་དང་བསོད་ནམས་ཆུང་བ་ན། །གསང་བའི་སྔགས་ལ་ཐུན་བཞིར་རྦད། །ལྷ་བཞིའི་འབྱིན་འཇུག་མ་ཤེས་ན། །ནག་པོ་གནད་ནས་འཁྲུལ་མི་འགྱུར། །ཞེས་སོགས་རྒྱུད་རྣམས་ལས་དུ་མས་གསུངས་སོ། །བཞི་སྙིང་སྦས་པའི་རྒྱུད་དུ། འཇུག་པ་རང་རང་སྐབས་ཀྱི་འབོད། །འབྱིན་པ་འཐེམས་ཀྱིས་བསྐོར་ལ་དབྱུང་། །ཞེས་དང་། རང་གནས་དང་ནི་བསྐོར་བ་དང་། །མི་བསྐོར་བ་དང་མཐར་ཟད་དང་། ཚེག་དྲག་བར་དུ་དགྲ་མིང་འཇུག །ཅེས་ཚེ་ཟད་ལས་ཟད་དུ་སྡེབས་པ་ཡང་བཤད་དོ། །བསྐུལ་བ་ནི་རྣམ་པ་བཞིས་ཏེ། བརྗོད་པ་དང་། དམིགས་པ་དང་། བརྡར་གྱུར་པ་དང་། འགོག་པ་རྡོ་རྗེའི་བཟླས་པ་བཞིའི་རིམ་པས་སོ། །དེ་བས་ན་སྔགས་ལ་གཞུང་ཇི་ལྟ་བ་དང་། བླ་མའི་མན་ངག་གི་དབྱེ་བ་གཉིས་ལས། ཐམས་ཅད་དུ་ཕྱི་མ་གཙོ་བ་ཡིན་ནོ། །དེ་ལྟར་གསུང་ཕྱག་རྒྱ་ཆེན་པོར་བཤད་ནས། ལེའུ་བཅུ་དྲུག་པར། དཔལ་ལྡན་ནག་པོ་ཆེན་པོ་ཡི། །བཀའ་ཡི་ཚོགས་ཀྱི་འཁོར་གྱུར་པ། །འདི་ནི་ཀུན་ཏུ་ཤེས་པར་བྱ། །ལས་ཀྱི་མགོན་པོ་རྣམས་དང་ནི། །ལྷ་མོ་ཆེན་མོ་འཁོར་དང་བཅས། །ལྷ་སྲིན་སྡེ་བརྒྱད་མ་ལུས་པ། །ཕོ་ཉ་མངག་གཞུག་ལས་བྱེད་པ། །གཞན་ཡང་ཕྱོགས་སྐྱོང་བཅུ་དང་ནི། །ཀླུ་ཆེན་བརྒྱད་དང་ལྷ་ཆེན་བརྒྱད། །གཟའ་ཆེན་བརྒྱད་དང་རྒྱལ་ཆེན་བཞི། །རྒྱུ་སྐར་ཉི་ཤུ་རྩ་བརྒྱད་དང་། །གནོད་སྦྱིན་བརྒྱད་དང་འཕྲོག་མ་བུ། །ཤ་ཟ་དང་ནི་མ་མོ་དང་། །འཇིག་རྟེན་པ་དང་དམ་ཚིག་གནས། །ཞིང་སྐྱོང་མ་ལུས་འཁོར་དང་བཅས། །འདི་དག་ལས་ཀུན་བྱེད་པ་ཡི། །འཇིག་རྟེན་སྐྱོང་བ་བཞི་བཅས་པ། །གྲུབ་པ་རབ་ཏུ་རྩོལ་བར་མཛད། །ལྷ་དང་ལྷ་མིན་མིའམ་ཅི། །ལྟོ་འཕྱེ་གྲུལ་བུམ་སྲུལ་པོ་དང་། །ལུས་སྲུལ་གྲིབ་གནོན་སྐྱེ་མཆེད་སོགས། །ནམ་མཁའ་ལྡིང་དང་ཤ་ཟ་དང་། །འབྱུང་པོ་མ་ལུས་འདུས་པ་ཀུན། །ཞེས་པའི་ལྷ་མོ་ཆེན་མོ་འཁོར་དང་བཅས་པ་ཡན་གྱིས་ཐུགས། འཇིག་རྟེན་པ་དང་དམ་ཚིག་གནས། །ཞེས་སོགས་ཀྱི་རྐང་པ་དང་པོ་གཉིས་ཀྱིས་དུར་ཁྲོད་བརྒྱད་དང་ཉེར་བཞིའི་ཞིང་སྐྱོང་མ། རྐང་པ་ཕྱི་མ་གཉིས་ཀྱིས་སྒོ་མ་བཞི། ལྷག་མས་སྐུ་དཀྱིལ་བ་བཤད་ལ། དེ་ཡང་ཆབས་གཅིག་ཏུ་བཤད་པས་དཀྱིལ་འཁོར་གཅིག་ཡིན་པ་ཤེས་པར་བྱའོ། །སངས་རྒྱས་ལ་མཐོང་བ་པོ་གསུམ་གྱི་དབྱེ་བས་སྐུ་གསུང་དུ་འགྱུར་བ་བཞིན། །དཔལ་ནག་པོ་ཆེན་པོ་ཡང་ཡིན་ལ། ཆོས་སྐུ་ནི་སངས་རྒྱས་ནང་ཕན་ཚུན། ལོངས་སྤྱོད་རྫོགས་པའི་སྐུ་ནི་བྱང་ཆུབ་སེམས་དཔའ་ས་ཆེན་པོ་ལ་བཞུགས་པ་བདག་གི་ངོར། སྤྲུལ་པའི་སྐུ་ནི། མཆོག་དང་སྐྱེ་བ་སྤྲུལ་པའི་སྐུའི་དབང་དུ་བྱས་པ་གཉིས་ཏེ། དང་པོ། སྤུ་གྲི་ཀླད་གཟེར་ནག་པོ་དངོས་གྲུབ་འབྱུང་བའི་བཀའ་བརྒྱུད་དུ། དང་པོ་སངས་རྒྱས་ཀྱི་བསྟན་པ་གང་གི་བསྲུངས་ན། བདུད་ཀྱི་རྒྱལ་པོ་དགའ་རབ་དབང་ཕྱུག་གིས་སངས་རྒྱས་ཀྱི་བསྟན་པ་རིན་པོ་ཆེ་ནི་བསྣུབས། ལོག་འདྲེན་གྱི་སྤྱོད་པ་དར་དུ་བཅུག་ནས་ཡོད་པ་ལ། འགྲོ་བ་རིགས་དྲུག་མུན་པའི་ནང་ན་གནས་པ་ལས་བྱང་ཆུབ་ཀྱི་མྱུ་གུ་སྐྱེ་མི་སྲིད་པས། བཅོམ་ལྡན་འདས་ཀྱིས་དྲེགས་པ་ཅན་རྣམས་ཐུལ་བར་མ་གྱུར་ནས། དཔལ་ཆེན་པོ་རྡོ་རྗེ་སྲིན་པོར་སྐུ་སྤྲུལ་ཏེ། ནམ་མཁའ་འབྲུག་གིས་བཀང་། བར་སྣང་གློག་གིས་བཀང་། ས་གཞི་མེ་དཔུང་དང་ཁྲོ་ཆུང་གི་སེར་བས་བཀང་ནས་གདུག་པ་ཅན་ཐམས་ཅད་ནི་བརྒྱལ་ཞིང་མྱོས་པར་གྱུར་ནས། དཔའ་བོ་ཆེན་པོ་དབུགས་ཕྱུང་བའི་ཏིང་ངེ་འཛིན་ལ་སྙོམས་པར་བཞུགས་སོ། །དེ་ནས་དྲེགས་པ་ཅན་རྣམས་བརྒྱལ་སངས་པ་ལས་དྲེགས་པའི་གཙོ་བོ་དེ་རྣམས་ན་རེ། བཅོམ་ལྡན་འདས་ཀྱིས་བཀའ་སྩོལ་ཅིག ཇི་ལྟར་གསུངས་པའི་བཀའ་བཞིན་བྱེད་དོ་ཟེར་ཞེས་ནས་བྱང་ཆུབ་ཀྱི་སེམས་ལ་བཀོད་དོ། །བར་དུ་དཔའ་བོ་ཆེན་པོ་བསྟན་པ་ལ་དགོངས་པའི་ཏིང་ངེ་འཛིན་ལ་སྙོམས་པར་བཞུགས་པས། དེའི་ངང་ནས་ཆུའི་ཆུ་བུར་གྱི་ཚུལ་དུ་གྱུར་ཏེ་ལེགས་ལྡན་ཆེན་པོའི་སྐུར་གྱུར་ནས་ཞེས་ཕྱག་བཞི་པ་བཤད་ལ། མཐའ་མར་དཔའ་བོ་ཆེན་པོའི་ཐུགས་ཀྱི་དཀྱིལ་ནས་དྲག་པོ་ཚ་རབ་རྔམ་པའི་འོད་ནག་པོ་གཅིག་འཐོན་པར་གྱུར་ཏོ། །འོད་ཟེར་དེས་འཇིག་རྟེན་གྱི་ཁམས་ལན་གསུམ་དུ་དཀྲུགས་ཏེ། སླར་དཔའ་བོ་ཆེན་པོའི་ཐུགས་ཁར་ཐིམ་མོ། །ཐིམ་པ་དང་ཞལ་ལྡེག་པའི་ངང་ནས་ཧཱུྃ་ཧཱུྃཕཊ྄་ཕཊ྄་ཅེས་རྔམ་པར་བསྒྲགས་པས། ཐུགས་ཀ་ནས་མིའི་ལུས་ལ་བྱ་རོག་གི་གདོང་པ་ཅན། ཕྱག་གཡས་ན་གྲི་གུག་འཕྱར་བ།  གཡོན་ན་ཐོད་ཁྲག་ཞལ་དུ ་བརྔུབ་པ། སྐུ་ལ་གདུག་པའི་འོད་ཟེར་རབ་ཏུ་འཕྲོ་བ། རྐང་པ་ས་ལ་བརྡབས་པས་ཐམས་ཅད་རྡུལ་དུ་རློག་པ། སྐད་ཅིག་གིས་སྟོང་གསུམ་རླག་པར་མཛད་པ། ལོག་འདྲེན་ཅན་རྣམས་བརྒྱལ་ཞིང་ཁྲག་ཏུ་སྐྱུག་པ། དྲག་པོ་བཙན་དུག་སྲོག་གི་སྤུ་གྲི། དམ་ཉམས་ཀྱི་སྲོག་གཅོད། བཀའ་ཡིས་བསྟན་སྲུངས། ཡེ་ཤེས་ཀྱི་སྤྱན་ཅན། ནག་པོ་ཆེན་པོའི་སྙིང་ཏིག་འདི་འཐོན་པར་གྱུར་ཏོ། །འཐོན་པ་དང་འཇིག་རྟེན་གྱི་ཁམས་འགུལ་འགུལ་ཤིག་ཤིག་གྱུར་ཏེ། ཞེས་པས་ལས་མགོན་བཤད་དོ། །གཞན་ཡང་སྟོན་པ་ཉིད་དེར་སྤྲུལ་ཏེ་མགོན་པོ་ཐམས་ཅད་ཀྱི་རྩ་བའི་རྒྱུད་དངོས་གྲུབ་འབྱུང་བ་གསུངས་པས་ཀྱང་ཤེས་སོ། །གཉིས་པ་ནི། ཐུགས་རྗེ་འབྱུང་བ་རྩ་བའི་རྒྱུད་ལས། སྔོན་འདས་པའི་དུས་ན་བསྐལ་པ་དྲག་པོ་རྣམ་པར་འཁྲུག་པ་ཞེས་བྱ་བ་ལ། སངས་རྒྱས་ཞི་བའི་འོད་ཏོག་གི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་ནས། དེའི་བསྟན་པ་ལ་གཞན་འཕྲུལ་དབང་བྱེད་ཀྱི་གནས་སུ་བདུད་ཀྱི་རྒྱལ་པོ་དགའ་རབ་དབང་ཕྱུག་གིས་བདུད་ཀྱི་སྤྲུལ་པ་དབང་ཕྱུག་ཆེན་པོ་མ་ཧཱ་དེ་ཝ་དང་། ལྷ་མོ་ཨུ་མ་དེ་ཝཱི་གཉིས་སྤྲུལ་ནས། དེ་གཉིས་ཀྱིས་ཀྱང་འཇིགས་བྱེད་དང་དུས་མཚན་གཉིས་སྤྲུལ་ནས། དེ་དག་གིས་འཇིག་རྟེན་གྱིས་ཁམས་ཀྱི་སེམས་ཅན་རྣམས་ལ་གསོད་པའི་ལས་ཀྱིས་ཟད་ཅིང་བརླག་པར་བྱས་ནས། སྟོངས་པ་ལ་ཐུག་པའི་ཚེ། སངས་རྒྱས་ཞི་བའི་འོད་ཀྱིས་བདུད་བཞི་པོ་དེ་དག་བཏུལ་ཡང་མ་ཐུལ་བས། དཔལ་བདེ་བ་ཆེན་པོས་བདུད་འདུལ་བའི་ཆོ་འཕྲུལ་གྱིས་ལྷ་མོ་ཨུ་མ་ལ་དགྱེས་པའི་གད་རྒྱངས་བཅུ་གཉིས་ཀྱིས་སྦྱོར་བ་བྱས་པ་ལས། དེ་དག་ལ་བུ་རྡོ་རྗེ་སྲིན་པོ་རབ་ཏུ་འཇིགས་པ་དག་སྐྱེས་པར་གྱུར་ཏོ། །དེའི་ཚེ་འཇིག་རྟེན་གྱི་ཁམས་ཐམས་ཅད་གཡོ་བའི་འཕྲུལ་འཁོར་འགུལ་ཞིང་ལྡེག་པར་གྱུར་པ་ལས། བདུད་དགའ་རབ་དབང་ཕྱུག་ཡིད་འཁྲུགས་པར་གྱུར་ནས། འཇིག་རྟེན་གྱི་ཁམས་ཐམས་ཅད་གཡོ་བའི་འཕྲུལ་འཁོར་ལ་ཞུགས་ནས། ལྷ་མ་ཡིན་གྱི་དམག་བསྡུས་ནས་ཐོག ནམ་མཁའ་ལ་མེ་དང་འབྲུག་དང་། དྲག་པོའི་ཆོ་འཕྲུལ་ཆེན་པོ་བཅུ་དྲུག་གིས་སྲིད་པ་གསུམ་འགུལ་འགུལ་ཤིག་ཤིག་བྱེད་པ་ལས། དེའི་ཚེ་རྡོ་རྗེ་སྲིན་པོ་རབ་ཏུ་ཁྲོས་པ་ལས། བདུད་ཀྱི་ཞལ་བཞི་ནས་དྲག་པོའི་སྐུ་བྱུང་བས། དེ་འདུལ་བ་ལ་གསང་བའི་ལྷ་མོ་བཞི་སྤྲུལ། ཁོའི་མིག་ལ་དུག་བཞི་ཡོད་པ་ལས། དེ་འདུལ་བ་ལ་འཕྲིན་ལས་ཀྱི་ཕྱག་བཞི་སྤྲུལ་ཞིང་དུག་ཞི་བའི་རྒྱལ་པོ་བཞི་སྤྲུལ། སྐྱེ་མཆེད་དྲུག་ལས་མཁའ་འགྲོ་མ་དྲུག རྣམ་པར་ཤེས་པའི་ཚོགས་བརྒྱད་ལས་བཀའ་སྡོད་ཀྱི་མགོན་པོ་བརྒྱད། རིགས་པའི་ཡན་ལག་བཅུ་ལས་ཕྱོགས་སྐྱོང་བཅུ། དབང་གི་བཞིན་འཛུམ་བཅུ་དྲུག་ལས་མགོ་བརྙན་བཅུ་དྲུག སྐུའི་བཀོད་པ་བཅོ་བརྒྱད་ལས་གིང་ཆེན་བཅོ་བརྒྱད། ཁྲོས་པའི་ང་རོ་ཉི་ཤུ་རྩ་གཅིག་ལས་ཕོ་བདུད་ཉི་ཤུ་རྩ་གཅིག ཆགས་པའི་གར་ཉི་ཤུ་རྩ་བརྒྱད་ལས་དབང་ཕྱུག་མ་ཉི་ཤུ་རྩ་བརྒྱད། སྤྱན་གྱི་འགྱུར་བཟློག་སུམ་ཅུ་ལས་དྲེགས་པ་སུམ་ཅུ་དང་། འཕྲིན་ལས་ཀྱི་འོད་ཕུང་བདུན་ཅུ་ལས་དཔལ་མགོན་བདུན་ཅུ། ཞལ་གྱི་མདངས་བྱད་བརྒྱ་ལས་རོ་ལངས་བརྒྱ། སྤྱན་གྱི་འགྱུར་ལྡོག་སྟོང་ལས་ནག་པོ་སྟོང་། ཞབས་ཀྱི་སྟངས་སྟབས་ཁྲི་ལས་གནོད་སྦྱིན་ཁྲི། དབང་གི་གར་སྤྱོད་འབུམ་ལས་མ་མོ་འབུམ། བ་སྤུའི་འོད་ཟེར་བྱེ་བ་ལས་ཤ་ཟ་བྱེ་བ་སྤྲུལ་ནས། དྲག་པོ་འཇིགས་བྱེད་དང་དུས་མཚན་དམར་མོའི་ལུས་ལ་དབང་བྱས་ནས་སྟན་དུ་བཏིང་། ལྷ་ཆེན་ཡབ་ཡུམ་འཁོར་དུ་བཀོད། འཁོར་ཚོགས་གཞན་ཐམས་ཅད་དབང་དུ་བསྡུས་ནས་བདུད་ཀྱི་དམག་ཚོགས་ཐམས་ཅད་བརླག་པར་བྱས་སོ། །དེས་ན་ཡབ་ནི་ཁྲག་འཐུང་ཆེན་པོ་ཧེ་རུ་ཀ་ཡིན་ལ། མ་ནི་ཨུ་མ་དེ་ཝཱི་ཞེས་བྱ་བ་དེ་ཡིན་ཏེ། དེ་དག་གཉིས་ལས་རྡོ་རྗེ་སྲིན་པོ་སྐྱེས་སོ། །དེ་ནས་རྡོ་རྗེ་སྲིན་པོ་དེས་བདུད་ཐམས་ཅད་དབང་དུ་བསྡུས་ཏེ་ཉིད་ཀྱི་སྐུ་ལས་སྤྲུལ་པ་ཐམས་ཅད་རང་ལ་རང་ཐིམ་པར་གྱུར་ཏོ། །དེ་ཉིད་ཀྱང་དཔལ་ཧེ་རུ་ཀའི་ཞལ་ལ་ཐིམ་པར་གྱུར་ཏོ། །ཞེས་གསུངས་པའི་གསང་བའི་ལྷ་མོ་བཞི་ནི་རེ་མ་ཏི་བཞི་དུག་ཞི་བའི་རྒྱལ་པོ་བཞི་སྟེ་སྲས་མཆོག་བཞི། ཧཱུྃ་མཛད། མྱུར་མཛད། གདོང་བཞི། ལས་མགོན། ཕྱི་མ་ལས་ལས་མགོན་ཆེན་པོ་གསུམ། བཀའ་སྡོད་བརྒྱད་ནི་མགོན་པོ་བཀའ་བརྒྱད་དུ་བཤད་དོ། །ཡང་དེར། དང་པོ་སྔོན་བྱུང་འདས་པའི་དུས་ཀྱི་ཚེ། །བསྐལ་པ་བཟང་རྒྱན་ཞེས་ནི་བྱ་བ་ལ། །སངས་རྒྱས་ཞི་བ་འོད་ཅེས་འཇིག་རྟེན་བྱུང་། །དེ་ལ་འཁོར་ནི་བྱེ་བ་དུང་འཕྱུར་འབུམ། །དགེ་སློང་དགེ་བསྙེན་ཚངས་སྤྱོད་གཙང་། །སྦྱངས་པ་བཅུ་གཉིས་སྤྱོད་པ་ལས། །བྱང་ཕྱོགས་ཨོ་ཊའི་ཡུལ་དུ་སོང་། །སངས་རྒྱས་འཁོར་དང་བཅས་པ་རྣམས། །སྡིག་སྤྱོད་རྒྱལ་པོ་དགའ་བའི་དཔལ། །ཁམས་གསུམ་ལྷ་ཡི་བདག་པོ་དེས། །འོག་གི་རྒྱ་མཚོ་དུག་རིའི་ཁ། །དུག་གསུམ་འབར་བའི་ཁང་པར་བཅུག །བདུད་རྒྱལ་དགའ་རབ་དབང་ཕྱུག་དང་། །བཙུན་མོ་པདྨའི་འཕྲེང་བ་ཅན། །རང་གི་ལྷ་རུ་སྨོན་པ་ལས། །སངས་རྒྱས་རྫུ་འཕྲུལ་མཁའ་ལ་གཤེགས། །དེ་ཚེ་འཁོར་གྱིས་སྨོན་ལམ་བཏབ། །བདག་ཅག་དགེ་སློང་ཕོ་མོ་རྣམས། །ཚངས་སྤྱོད་བསོད་ནམས་སྔགས་མཐུ་ཡིས། །སྐྱེ་བ་འདི་ནས་གཉིས་པ་ན། །སྲིད་པ་གསུམ་ལ་དབང་ཆེ་བ། །གནོད་སྦྱིན་གདུག་པ་སྲིན་པོའི་རིགས། །ཤ་ཟ་ཁྲག་འཐུང་སྲོག་གི་བདག །ལས་ཀྱི་གཤིན་རྗེར་སྨོན་ལམ་གདབ། །སྨོན་ལམ་བདེན་པའི་བྱིན་རླབས་ཀྱིས། །རི་རབ་རི་ཡི་རྩེ་མོ་རུ། །ལྷ་ཆེན་དབང་ཕྱུག་ཆེན་པོ་དང་། །བཙུན་མོ་ཨུ་མ་དེ་ཝཱི་ལ། །བུ་ནི་བརྒྱད་སྐྱེས་ལྷ་ཆེན་བརྒྱད། །དེ་ཡི་ཆུང་ཤོས་མགོན་པོ་སྟེ། །སྲིན་པོ་ནག་པོ་སྟོབས་པོ་ཆེ། །ཤ་དང་ཁྲག་ལ་རབ་དགའ་བ། །སྲིད་པ་གསུམ་ལ་དབང་ཆེ་བ། །འཇིག་རྟེན་གསུམ་པོ་ཟ་བྱེད་ཅིང་། །ཁམས་གསུམ་པོ་ནི་བརླག་པར་བྱས། །རྒྱལ་ཆེན་བཞི་པོ་བསྒྲལ་བྱས་ནས། །གསང་བའི་ཡུམ་བཞི་ཉིད་ལ་སྦྱོར། །དེ་ལ་གསང་བའི་བུ་བཞི་སྐྱེས། །སྲིན་པོའི་གཟུགས་ལ་བྱ་རོག་གདོང་། །གསུས་ཁྱིམ་ཆེ་ལ་ཤ་ཁྲག་དགའ། །མིག་རྩ་དམར་ལ་མཆེ་བ་རིང་། །དྲག་པོའི་གཟུགས་ཅན་བཞི་རུ་བྱུང་། །སྟེང་ཕྱོགས་ཚངས་པའི་འཇིག་རྟེན་ནས། །ལྷ་མོ་བརྒྱད་པོ་དབང་དུ་བསྡུས། །འདོད་ཁམས་ལྷ་རིགས་གནས་དྲུག་ནས། །མཁའ་འགྲོ་དྲུག་པོ་དབང་དུ་བསྡུས། །རི་རབ་རི་ཡི་ཁོང་སེང་ནས། །ལྷ་སྲིན་སྡེ་བརྒྱད་དབང་དུ་བསྡུས། །རྣམ་པར་རྒྱལ་བའི་ཁང་བཟང་ནས། །ཕྱོགས་སྐྱོང་བཅུ་པོ་དབང་དུ་བསྡུས། །ཞེས་དང་། དེ་ནས་སྲིན་པོ་ནག་པོ་དེས། །སྔོན་གྱི་སྨོན་ལམ་དམོད་བོར་བས། །ལས་ཀྱི་སྐྱེ་དྲན་དུག་རིའི་ཁར། །རྒྱལ་པོ་འཁོར་བཅས་སྟོང་གི་ནི། །མཁལ་མ་སྙིང་དང་ནང་རོལ་དང་། །ལུས་ཕྱེད་དག་ནི་བཅད་ཅིང་ཟོས། །སྲིན་པོ་ལངྐཱ་སྤུ་གྲིའི་ཡུལ། །སྲིན་གྱི་གྲོང་ཁྱེར་བདུན་འབུམ་བརླག །གཡས་པ་གཅོད་བྱེད་གྲི་གུག་གིས། །སྲིན་པོའི་མགོ་བཅད་དོན་སྙིང་གཏུབས། །ལངྐཱ་སྤུ་གྲིའི་སྙིང་ཁྲག་འཐུངས། །ལྷ་མིན་བུ་མོ་གློག་མ་སྤྲིན། །བསད་ནས་མགོ་བཅད་འཕྲེང་བ་བྱས། །ཞེས་པའི་སྐྱེ་བརྒྱུད་འདི་ནི་ལས་ཀྱི་མགོན་པོའི་ཡིན་ལ། འདིར་བྱ་རོག་གདོང་བཞི་ནི། བཞི་སྙིང་སྦས་པ་སྲོག་གཟེར་ནག་པོར་བཤད་པའི། སྲོག་བདག་གཤིན་རྗེ་བདུད་པོ། གནོད་སྦྱིན་བྱར་གདོང་བཞིའོ། །གཞན་དུ་བདུད་མོ་བྱར་གདོང་ཡང་བཤད་དོ། །དཔལ་ཡེ་ཤེས་ཀྱི་མགོན་པོ་ཉིད་ལ་འཇིག་རྟེན་དང་མཐུན་པའི་སྐྱེ་བརྒྱུད། ནམ་མཁའ་དང་མཉམ་པའི་རྒྱུད་ཀྱི་རྒྱལ་པོ་དགོས་འདོད་འབྱུང་བ་ལས། ཕ་ནི་དགའ་རབ་དབང་ཕྱུག་ཡིན། །མ་ནི་དུར་ཁྲོད་པེ་ཏཱ་ལི། །བུ་ནི་ནག་པོ་ཆེན་པོ་སྟེ། །ཕས་བྱིན་གཡས་ན་གྲི་གུག་སྟེ། །མས་བྱིན་གཡོན་ན་ཐོད་ཁྲག་འཛིན། །གཞན་ཡང་འཁོར་གྱིས་བྱིན་པ་ནི། །རལ་གྲི་དང་ནི་ཁ་ཊྶཱཾ་འཛིན། །མར་མེ་མཛད་ལ་སེམས་བསྐྱེད་ནས། །དེ་བཞིན་གཤེགས་པར་ལུང་བསྟན་པ། །མི་བརྗིད་འཇིག་རྟེན་ཁམས་གསུམ་ནི། །སངས་རྒྱས་ཤཱཀྱ་ཐུབ་པ་འབྱུང་། །དེ་ཡི་བསྟན་པ་ཁྱོད་ཀྱིས་བསྲུངས། །མུ་སྟེགས་གནོད་པ་ཁྱོད་ཀྱིས་ཐུལ། །ཞེས་པས་བསྐལ་པ་བཟང་པོའི་སངས་རྒྱས་ཀྱི་བསྟན་སྲུང་མཛད་པའི་རྒྱུ་མཚན་དང་བཅས་ཏེ་བཤད་དོ། །བསྐལ་བ་བཟང་པོ་ཡང་། ཡར་གྱི་ཡ་ཐོག་རིང་མོ། བར་གྱི་ཁུག་པ་བཅོ་བརྒྱད། མར་གྱི་མ་ཐོག་རིང་མོ་ཞེས་པ་འདི་ཙམ་ཉན་ཐོས་དང་ལུང་ཆ་མཐུན་ཕལ་ལ་གྲགས། དྲི་མེད་འོད་དུ། རྣམ་པར་གཟིགས་ལ་སོགས་པའང་བསྐལ་པ་བཟང་པོའི་སངས་རྒྱས་སུ་བཤད་པ་བཞིན་སོ་ཐར་མདོའི་འགྲེལ་པ་མང་པོར་བཤད་དོ། །ཞིང་ཁམས་འདི་ཁ་ཡང་། བསྐལ་བཟང་གི་མདོར། སངས་རྒྱས་འཁོར་བ་འཇིག་ནས་བགྲངས་པའི་བཅུ་དང་བཞི་བཅུ་པ་ལ་སོགས་པར་ཞིང་ཁམས་རྒྱལ་བའི་སྨོན་ལམ་གྱིས་འགྱུར་ནས་ཆེས་ཕུན་སུམ་ཚོགས་པར་བཤད་པས་ན། ཇི་སྐད་བཤད་ཀྱང་མི་འགལ་བའི་གནད་ཅིག་མ་རིག་ན་རྒྱལ་བའི་བཀའ་ནང་ཕན་ཚུན་མི་མཐུན་པར་འགྱུར་རོ། །དེ་ལྟ་བུའི་ལས་ཀྱི་མགོན་པོ་དེ་ཡང་། ཐུགས་རྗེ་འབྱུང་བའི་རྒྱུད་དུ། ཁྱོད་ནི་དང་པོ་དུས་ཀྱི་སྔོན་རོལ་ཚེ། །བྲམ་ཟེའི་བུ་ནི་བླ་མར་སྐྱེས་པའི་ཚེ། །གནོད་སྦྱིན་འབྲོག་གནས་བཟང་པོ་ལ། །གདུག་པའི་སེམས་ཀྱིས་ནོར་བུ་བརྐུས། །འགྱོད་པའི་སེམས་ཀྱིས་སླར་གཏད་པ། །མི་འདོད་ཚུར་ལ་སྦྱིན་པར་གཏང་། །མངོན་སུམ་སངས་རྒྱས་ལ་དད་དེ། །འབྲས་བུ་མི་བསླུ་སྔོན་ཡང་བསྐལ་པ་བརྒྱར། །རེ་རེ་ལ་ཡང་བསོད་ནམས་བསགས་ལས་སྐྱེས། །རྣམ་གཟིགས་མར་མེ་རིན་ཆེན་གཙུག །བྱང་ཆུབ་མཆོག་ཏུ་སེམས་བསྐྱེད་བས། །བྲམ་ཟེའི་སྔགས་འགྲུབ་འདི་ཉིད་དུ། །ལས་ཀྱི་མགོན་པོའི་ལུས་བླངས་ནས། །དུས་གསུམ་སངས་རྒྱས་ཐམས་ཅད་ཀྱི། །བསྟན་པ་གཙུག་ལག་བསྲུངས་ནས་ཀྱང་། །ནུབ་ཕྱོགས་ཐལ་བ་ཅན་ཞེས་པའི། །རྣམ་པར་དག་པའི་འཇིག་རྟེན་དེར། །ཁྱོད་ནི་ཐལ་བའི་དབང་པོ་མཆོག །བདེ་བར་གཤེགས་པར་སངས་རྒྱས་ནས། །ལུས་ཅན་ཁྱོད་ཀྱིས་བསད་པ་རྣམས། །ཞིང་དེར་ཐམས་ཅད་སངས་རྒྱས་འགྱུར། །ཞེས་འབྱུང་བ་དང་། ཁ་ཏནྟྲའི་རྒྱུད་ལས། རྒྱལ་པོ་ཆེན་པོ་རྣམ་ཐོས་སྲས་ཉིད་ལས་མ་ཧཱ་ཀཱ་ལ་བྱ་རོག་གི་རྡོ་རྗེ་ཅན་དུ་སྤྲུལ་ནས་ཀྱང་བཤད་དེ། དོན་ལ་འདུལ་བྱེད་ཀྱི་ངོར་དེ་དང་དེར་སོང་བས་གཅིག་དུ་མར་སོང་བ་ཞེས་བྱའོ། །གྲི་གུག་བརྩེགས་པར། ཡེ་ཤེས་མགོན་པོ་ས་བཅུ་ཡི། །དབང་ཕྱུག །ཅེས་དང་། ལས་མགོན་དུར་ཁྲོད་བདག་པོ་ནི། །འཇིག་རྟེན་གནས་པ་ས་དྲུག་པ། །ཞེས་བཤད་དོ། །དེ་བས་ན། སྐྱེ་བརྒྱུད་བཤད་པར་ཡང་། ཆོས་སྐྱོང་ཐམས་ཅད་མགོན་པོ་ཕྱག་བཞི་པ་ཉིད་ཀྱི་སྤྲུལ་པར་བསྟན་ནོ། །དཔལ་ཡེ་ཤེས་ཀྱི་མགོན་པོ་ཉིད་ཀྱང་དོན་གསང་བ་སྔགས་ཀྱི་ངོ་བོ། །བརྡ་ཐབས་སུ་དེར་སྣང་བ་ཙམ་སྟེ། །ཐུགས་རྗེ་འབྱུང་བ་རྩ་བའི་རྒྱུད་དུ། །ཞལ་གཅིག་ཆོས་སྐུ་མི་འགྱུར་དག །ཕྱག་བཞི་འཕྲིན་ལས་བཞི་མཛད་པ། །བདུད་བཞི་འདུལ་མཛད་གྲི་གུག་དང་། །ལྷ་མིན་གཡུལ་ཟློག་རལ་གྲི་གཡས། །ཁམས་གསུམ་དབང་སྡུད་ཐོད་ཁྲག་དང་། །བགེགས་ཆེན་འདུལ་བྱེད་ཁ་ཊྶཱཾ་གཡོན། །ཐབས་དང་ཤེས་རབ་ལས་བྱུང་བའི། །ཁྲོས་པའི་ཞབས་བརྡབས་ས་གཞི་གཡོ། །འཇིགས་པའི་གད་མོས་རི་རབ་བསྒྱེལ། །དམ་ཚིག་ཉམས་པའི་སྙིང་ཁྲག་འཐུང་། །ཞེས་དང་། ནམ་མཁའ་མཉམ་པ་དགོས་འདོད་འབྱུང་བའི་རྒྱུད་དུ། གྲི་གུག་ཉོན་མོངས་གཅོད་པར་བྱེད། །ཐོད་པ་སྟོང་ཉིད་དོན་དམ་པ། །ཤེས་རབ་རལ་གྲིས་མཚོན་པ་སྟེ། །ཁ་ཊྶཱཾ་སྐུ་གསུམ་ངོ་བོ་གཅིག །ཁྱེད་ཀྱིས་དེ་ལྟར་བསྟན་པ་སྟེ། །སྤྱན་གསུམ་དུས་གསུམ་མཁྱེན་པ་ལས། །སྙིང་རྗེ་ཆེ་བས་སྤྱན་རྩ་དམར། །གདུག་པ་འདུལ་ཕྱིར་ཁྲོ་བོས་ཏེ། །ཕྱག་བཞི་འཕྲིན་ལས་བཞི་ལ་སོགས། །མུ་སྟེགས་འདུལ་ཕྱིར་ཧ་ཧ་བརྗོད། །འདུ་བྱེད་ལྔ་བཅུ་རྩ་གཅིག་པོ། །འཇོམས་ཕྱིར་ཐོད་རློན་འཕྲེང་བ་ཅན། །དབུལ་བ་སེལ་ཕྱིར་སྒེག་པ་སྟེ། །ཡེ་ཤེས་ལྔ་པོ་ཐོད་སྐམ་མཚོན། །སྟག་ལྤགས་མནབས་པས་དཔའ་བོ་སྟེ། །མཆེ་བཞི་སྐྱེ་གནས་འཇོམས་པ་པོ། །དྲི་མས་མ་གོས་ཆུ་སྐྱེས་གདན། །རྟག་ཆད་སྤངས་པ་དྲེགས་པའི་གདན། །བདུད་དང་མུ་སྟེགས་ལ་སོགས་པ། །ཐམས་ཅད་འཇོམས་ཕྱིར་མེ་དཔུང་ངོ་། །ཞེས་བཤད། ཡུམ་ཆེན་གསུམ་ནི། དག་པའི་ཆོས་ཀྱི་སྤྲུལ་པ་ནི། །ཕག་མོའི་གཟུགས་སུ་བསྟན་པ་ཡིན། །ཞེས་ཀུན་སྤྱོད་ལས་བཤད་པ་ལྟར་དུ། འཁྱུད་བྱེད་བདེ་བ་ཆེན་པོ་ནི་དཔལ་ནག་པོ་ཆེན་པོ་ཡིན་པས། གྲི་གུག་བརྩེགས་པར། འགྲོ་དོན་སྙིང་རྗེས་བྱེད་པ་ན། །སྒྲོལ་བྱེད་ནག་པོ་ཆེན་པོར་བཤད། །ཅེས་འབྱུང་བས་སོ། །དེ་ལ་འཁྱུད་པས་སྟོང་ཉིད་ཡུམ་དུ་གྲུབ་ལ། དེ་ཡང་རྣམ་པར་ཐར་པའི་སྒོ་གསུམ་གྱི་དབྱེ་བས་དབྱིངས་ཡུམ་སྦྱོར་ཡུམ་སྒྲོལ་ཡུམ་གསུམ་བཤད། རིགས་བཞིའི་དབྱེ་བས་རེ་མ་ཏི་བཞི་སྟེ། གསང་བའི་ཡུམ་ཆེན་མ་བདུན་ཞེས་བྱའོ། །ཧཱུྃ་མཛད་ནག་པོ་ཆེན་པོ་ནི་སངས་རྒྱས་རྣམས་ཀྱི་ཐུགས་རྡོ་རྗེས་སྤྲུལ་པས་ལག་ན་རྡོ་རྗེ། མྱུར་མཛད་ནག་པོ་ཕྱག་དྲུག་པ་ནི་གསུང་རྡོ་རྗེ་འཇིག་རྟེན་དབང་ཕྱུག གདོང་བཞི་པ་ནི་སྐུ་རྡོ་རྗེ་འཇམ་དཔལ་ཏེ། ཕྱི་མ་དངོས་གྲུབ་འབྱུང་བར་སྔགས་ཙམ་ལས་ལྷ་སྦས་ཏེ་མ་བཤད་པས་གསང་བའི་མགོན་པོ་ཞེས་བྱའོ། །དེ་དག་རིགས་གསུམ་གྱི་ཁྲོ་བོའོ། །མངོན་འབྱུང་གི་རྒྱུད་ལས་སྦས་པ་དེ་ཕྱུང་ནས། ཕྱག་བཞི་པ་བདུད་འཇོམས་པ་དང་། ཧཱུྃ་མཛད་དགྲ་འདུལ་བ་དང་། ཕྱག་དྲུག་པ་བགེགས་འདུལ་བ་དང་། ཞལ་བཞི་པ་བསྟན་པ་སྐྱོང་བར་བསྔགས་སོ། །དཔལ་ལས་ཀྱི་མགོན་པོའི་སྐུ་གསུང་ཐུགས་ལས་གདོང་ཅན་གསུམ་སྟེ། དོན་འཇིག་རྟེན་ལས་ལས་གྲུབ་པའི་ཚེ་བདག་སྲོག་བདག་འཆི་བདག་གོ །ཧཱུྃ་མཛད་ནག་པོ་ཆེན་པོ་དགྱེས་པའི་རྡོ་རྗེའི་ཐུགས་ཀ་ནས་སྤྲོས་པར་རྡོ་རྗེ་གུར་གྱི་རྒྱུད་ནས་བཤད་པས་གུར་མགོན་ཞེས་གྲགས་ལ། དེ་ཉིད་ཀྱིས་ཡང་རྣམ་འཕྲུལ་གྱི་གཎྜྻཱི་འཛིན་པ་འདི་སྤྲུལ་པར་དེ་ཁའི་རྒྱུད་ལས་བཤད། ལེགས་ལྡན་ལྗང་སྔོན་ཞལ་གསུམ་ཕྱག་དྲུག་པ་ཉིད་འཕྲིན་ལས་མཛད་པའི་ཚེ། ཡོན་ཏན་མགོན་པོ་འདིར་བཞེངས་པར་ཡང་དེ་ཁའི་རྒྱུད་ལས་བཤད་པ་སོགས། དོན་གཅིག་ལ་རྣམ་འཕྲུལ་གྱིས་གཉིས་འདིར་འགོད་པ་ཡང་ལག་ན་རྡོ་རྗེ་དང་རྡོ་རྗེ་རྣམ་པར་འཇོམས་པ་འདུག་ས་གཅིག་ཏུ་གྲལ་ལ་བསྒྲིགས་པ་ལྟ་བུའོ། །དེ་བས་དངོས་གྲུབ་འབྱུང་བར་དངོས་སུ་དཀྱིལ་འཁོར་ལ་མགོན་པོ་འདི་གསུམ་འགོད་པ་སྦས་ཀྱང་། ལེའུ་བཅུ་བཞི་པར། དཀྱིལ་འཁོར་བའི་མགོན་པོ་དང་། ཡུམ་དང་བཅས་པའི་གསང་སྔགས་དང་འཕྲིན་ལས་ཀྱི་ལེའུ་ཞེས་གསུངས་ཤིང་དེར་འདི་དག་གི་སྔགས་བསྟན་པས་ཤེས་པར་བྱ་དགོས་པ་དང་། ལེའུ་བཅུ་བདུན་པར་ཤར་དུ་སྐུ་ཡི་མགོན་པོ་དང་། ལྷོར་ཡོན་ཏན་མགོན་པོ་དང་། ནུབ་ཏུ་གསུང་གི་མགོན་པོ་དང་། བྱང་དུ་ལས་ཀྱི་མགོན་པོ་སྟེ། ཐམས་ཅད་ཞལ་གཅིག་ཕྱག་གཉིས་པ། གྲི་གུག་ཐོད་པ་བསྣམས་པའོ། །སོ་སོའི་ གཡོན་དུ ་ཡུམ་རེ་རེ། །གཏུམ་པ་མ་དང་དྲག་མོ་དང་། །ཟློག་བྱེད་མ་དང་དཔའ་མོ་སྟེ། །ཞལ་གཅིག་ཕྱག་གཉིས་རྒྱན་དང་བཅས། །དེ་ཡི་ཕྱི་ཡི་གྲུ་ཆད་ལ། །བེང་འཛིན་པ་དང་ཁ་ཊྶཱཾ་ག །གཎྜྻཱི་འཛིན་དང་རྒྱལ་མཚན་འཛིན། །སོ་སོ་ཡུམ་དང་བཅས་པ་སྟེ། །དེ་ཡི་ཕྱི་ཡི་སྒོ་དང་གྲྭར། །ལྷ་མོ་བརྒྱད་པོ་གར་གྱིས་རོལ། །ཐམས་ཅད་ཞལ་གཅིག་ཕྱག་གཉིས་མ། །གར་སྟབས་ལྡན་པར་བཞུགས་པའོ། །ཞེས་གསུངས་ལ། འཁོར་ཚོགས་འདི་ཐམས་ཅད་ཀྱི་མི་གསལ་བ་བཤད་པའི་རྒྱུད་ཀྱིས་ཁ་བསྐང་དགོས་པས། ཁྲག་མཚོ་ཁོལ་མར། ཡེ་ཤེས་ཀྱི་མགོན་པོ་ནི་གནམ་ལྕགས་འབར་བའི་རི་མཱ་ལ་ཡའི་རྩེ་མོའི་གཞལ་ཡས་ཁང་ན་གནས་སོ། །གསོད་བྱེད་སྐུའི་མགོན་པོ་བསིལ་བའི་ཚལ་ན་གནས་པའོ། །རྔམ་བྱེད་གསུང་གི་མགོན་པོ་གྱད་ཀྱི་ཡུལ་ན་གནས་པའོ། །སྒྲོལ་བྱེད་ཐུགས་ཀྱི་མགོན་པོ་ཨུ་རྒྱན་ན་གནས་པའོ། །མིའུ་ཐུང་ཁྲོས་པ་སྲིན་པོའི་གླིང་སྟེ། དེའི་འཁོར་ལས་ཀྱི་གཤན་དམར་ནི་ཀརྞ་པའི་ཡུལ་གྱི་རླུང་སྤུ་གྲི་ཅན་གྱི་གནས་སུའོ། །ཕྱག་དྲུག་པ་དཔལ་གྱི་རིའི་འགྲམ་ནའོ། །གྲི་གུག་བརྩེགས་པ་ནི་ཧ་རི་ཀེ་ལར་རོ། །ཆུ་སྲིན་ལ་ཞོན་པའི་མགོན་པོ་དཔལ་སྐྱོང་དྲག་པོ་ནི་རྡོ་རྗེ་གདན་གྱི་བཀའ་བསྲུང་ངོ་། །གདོང་བཞི་པའི་མགོན་པོ་ནི་སིངྒཱ་ལ་ན་གནས་སོ། །བེང་འཛིན་པ་ནི་གདོང་དམར་གྱི་བྲག་ལ་བརྟེན་པའོ། །བེང་འཛིན་པ་བར་པ་ནི་རྒྱ་ནག་རི་བོ་རྩེ་ལྔ་ལའོ། །ཞེས་སོ། །འདིར་བཤད་པའི་དཔལ་ཡེ་ཤེས་མགོན་པོ་ནི་ལེགས་ལྡན། གསོད་བྱེད་སོགས་གསུམ་བྱར་གདོང་། མིའུ་ཐུང་ཁྲོས་པ་མ་ནིང་། མགོན་པོ་བེང་གདོང་དམར་གྱི་བྲག་སྟེ་སྐྱི་ཤོད་ཀྱི་མགོན་པོ་གདོང་ངོ་། །འདི་བྲག་ལྷ་མགོན་པོ་ཡང་བཏགས། སྤྱིར་གདོང་དམར་ཞེས་པ་རྒྱ་ནག་ལའང་བཞག་ཀྱང་འདིར་བོད་དོ། །དཔལ་སྐྱོང་དྲག་པོ་ནག་པོ་ཆེན་པོ་འབར་བ་སྟེ་རྡོ་རྗེ་གདན་གྱི་ལྷོའི་སྒོ་སྐྱོང་དུ་བཤད་པས་སོ། །བེང་འཛིན་བར་པ་ནི་ཨ་གྷོ་རའོ། །སྟག་ཞོན་ནི་དེར་མ་ཧཱ་ཀཱ་ལ་སྟག་ལ་གནས་པ་དང་། ཞེས་གསུངས་ལ། གནས་ས་དེའི་གཞུང་དུ་ལྕང་ལོ་ཅན་དང་གྱད་ཡུལ་ནའོ། །ཏྲག་ཤད་ནི་རྡོ་རྗེ་བསེ་གདོང་སྟེ་རྒྱ་ནག་གེའུ་ཏེ་ཤན་གནས་ལ། གཞན་དུ་སངས་རྒྱས་ཀྱི་བསྟན་པ་གང་དུ་གནས་པ་དེར་རོ། །དེ་ཉིད་དུ། ཆོས་སྐྱོང་ཆེན་པོ་དེ་དག་ནི་བསྟན་པ་འཛིན་པའི་སྒྲུབ་པ་པོ་གང་དུ་གནས་པར་འདུ་ཞིང་ལས་ཐམས་ཅད་གྲུབ་པར་བྱེད་དོ། །ཞེས་བཤད་པས། ཆོས་སྐྱོང་དུ་མ་བསྟེན་ན་ཁུ་བཟློག་འབྱུང་སྙམ་པའི་ལོག་རྟོག་ཀྱང་ཞར་ལ་བཀག་གོ །རེ་མ་ཏི་བཞི་ལ་འདིར་འཕྲོག་མ་ལ་སོགས་པའི་མཚན་བསྟན་པ་བཞིན་མེ་ཁ་ལ་ཞེས་བྱ་བའི་གཟུངས་སྔགས་ལས་ཀྱང་བཤད་པ་ནི་མཐུན་ལ། དེ་བྱ་བའི་རྒྱུད་ཀྱི་ལྔས་རྩེན་གྱི་རིགས་སུ་གསུངས་ལ། འདིར་རྡོ་རྗེ་རིགས་ཀྱི་ཡུམ་དུ་བཤད་པ་ནི་གདུལ་བྱའི་སྐལ་བས་སོ་ཞེས་མང་དུ་སྨྲས་སོ། །ཞིང་སྐྱོང་ལ། ཀུན་ཏུ་གཏུམ་པའི་ཤུགས་འཆང་བ། །ཡུལ་དང་ཡུལ་དུ་རོལ་བྱེད་པས། །ཤིང་རྣམས་ལ་ནི་གནས་ནས་ཀྱང་། །དཀྱིལ་འཁོར་ཞིང་རྣམས་སྐྱོང་བར་བྱེད། །དུར་ཁྲོད་གནས་ཀྱིས་ཡོངས་སུ་བསྐོར། །མ་མོ་གནས་སོགས་ཁྱབ་པར་བྱེད། །ཀླུ་ཡིས་མཚོན་པའི་ཞིང་སྐྱོང་ལ། །མེ་ཡིས་ཕྱེ་བས་ཡོངས་སུ་བསྐོར། །སྒོར་ནི་མིག་གིས་ཁྱབ་པར་འགྱུར། །ཞེས་པ། རྡོ་རྗེ་ཕོ་ཉ་མོ་བརྒྱད་ལ། དུར་ཁྲོད་ཀྱི་མ་མོ་བཞི་བཞིས་བསྐོར་བས་བཞི་བཅུ་ཕྱོགས་མཚམས་བརྒྱད་ལ་མེས་ཕྱེ་བས་ཉེར་བཞིའི་ཡུལ་གྱི་ཞིང་སྐྱོང་མ་རྣམས་ལ་ཕོ་ཉ་དྲུག་ཅུ་རྩ་བཞི་སྟེ། དུས་ཀྱི་འཁོར་ལོའི་རྣལ་འབྱོར་མ་དྲུག་ཅུ་རྩ་བཞི་ཕན་གནོད་ཀྱི་ལས་བྱེད་པ་གསུངས་པ་དག་གོ །དེ་དག་གི་གཙོ་མོ་ཡབ་ཡུམ་དཀྱིལ་འཁོར་ཐམས་ཅད་ཀྱི་དུར་ཁྲོད་དུ་འབྱུང་བའི་ཞིང་སྐྱོང་ཡིན་པ་དང་། འཁྱུད་བྱེད་སོ་གཉིས། སྒོར་མིག་ཅེས་པ་ལྕམ་དྲལ་གྱི་ཞིང་སྐྱོང་བཞིའོ། །སྡེ་བརྒྱད་ལ། ལྷ་ཆེན་པོ་ལྷའི་མགོན་པོའམ་མ་མོའི་སྡེ་དཔོན་ཏེ། དུར་ཁྲོད་ཀྱི་མ་མོ་ཐམས་ཅད་ཀྱིས་མཆོད་པའི་ཡུལ་ཡིན་པས་དང་ཁམས་གསུམ་གྱི་བདག་པོ་ཡིན་པའི་ཕྱིར་རོ། །དེ་བས་ན་འདི་ལ་ཕྱིའི་སྡེ་བརྒྱད་འཁོར་དུ་འགྱུར་རོ། །དཔལ་བདུད་ཀྱི་མགོན་པོ་ནི་འཇིག་རྟེན་པའི་སྐྱེ་བརྒྱུད་དང་བསྟུན་ན་བདུད་རྒྱལ་ནག་པོ་བཀྲག་མེད་ཅེས་བྱ་བ་བདུད་ཡུལ་ཁ་རག་མགོ་དགུའི་གླིང་ན་གནས་པ་སྟེ། དོན་ཤ་ཟ་སེང་གདོང་། འདི་ཡང་ཐུབ་དཀའ་ཞེས་བོད་ཡུལ་གྱི་ཞིང་སྐྱོང་ཆེན་པོ་དེ་ཀ་ཡིན་ལ། བདུད་ཡུལ་ཁ་རག་ཅེས་པའང་བོད་བདུད་ཀྱི་གཟུང་བ་དེའི་དུས་ཀྱི་རྒྱལ་ཁམས་ཀྱི་མིང་དེ་ལྟར་གྲགས་པའོ། །འོན་ཀྱང་སྒོ་སྐྱོང་མ་དག་དང་འདི་ལྟ་བུ་ལ་སོགས་པ་བྱ་བའི་དབྱེ་བས་གཉིས་གཉིས་འདིར་དཀྱིལ་འཁོར་དུ་བཞུགས་སོ། །འདི་ལ་སྲིད་པ་གསུམ་སྒྲོལ་བའི་ལས་བྱེད་པས་བདུད། དེའི་ཕྱིར་ལས་བྱེད་ཀྱི་སྡེ་བརྒྱད་ཐམས་ཅད་འཁོར་རོ། །གཤིན་རྗེ་ནི་ཕྱོགས་སྐྱོང་དང་དོན་གཅིག འོན་ཀྱང་འཆི་མེད་མཛོད་ལ་སོགས་བར་ཆོས་ཀྱི་རྒྱལ་པོ་བདུན་བཤད། གཞན་གཤིན་རྗེའི་སྡེ་དཔོན་བརྒྱད། གཤིན་རྗེ་ཕོ་ཉ་མོ་སོགས་མ་མོ་བརྒྱད་འཁོར་དང་བཅས་པ། གཤིན་བུའི་རྗེ་ཡིན་པས་གཤིན་རྗེའོ། །དེ་ནི་སྔགས་ཀྱི་བདག་པོར་བཤད་པས་སྔགས་ཀྱི་སྡེ་བརྒྱད་ཐམས་ཅད་འཁོར་རོ། །གཟའ་ནི་ནང་དུ་མུན་ཅན། ཕྱིའི་སྒྲ་གཅན་ལྷ་མ་ཡིན་གྱི་སྡེ་དཔོན་ཀྱང་ཡིན་ལ། ཆོས་མངོན་པའི་གཞུང་ལས། དེ་དག་གི་གཙོ་བོ་མཆོག་རབ་ནི་ཐག་བཟང་རིས་ལ་བཤད་ཀྱང་། འཆི་བདག་བདུད་པོ་དངོས་སུ་རྒྱུ་བ་རཱ་ཧུ་ལ། འདིས་ཀི་ཀཾ་དུ་བཞག་པ་དང་། ཞིབ་མོར་བརྟགས་ན་འཆར་ཀ་ནག་པོ་ཡང་འདི་ཀའོ་ཞེས་བླ་མ་གསུང་ངོ་། །འཇིག་རྟེན་ཁམས་ན་དྲག་ཤུལ་ཆེ་ལ། དེ་ཉིད་འཇམ་དཔལ་གཤིན་རྗེ་གཤེད་པོས་འཁོར་ལོ་འཕངས་པས་ལུས་དུམ་བུ་བརྒྱད་དུ་སོང་བ་ལྷ་ཆེན་གཟའ་བརྒྱད། དོན་དེ་ཀ་བསྡོངས་ཟླས་ཕྱེ་བའོ། །ཕྱི་རོལ་གྱི་རེས་གཟའ་དག་ཀྱང་དོན་དེ་དག་རྣམ་པ་སོ་སོ། གཟའ་དགུར་བྱེད་པའི་མཇུག་རིས་ཀྱང་འདིས་མཇུག་མར་བསྡུ་ལ། ཤིན་ཏུ་མྱུར་པར་ལས་བྱེད་པས་མྱུར་མགྱོགས་ཀྱི་སྡེ་བརྒྱད་དོ། །ཀླུ་བདུད་ནག་པོ་མགོ་དགུ་པ་ཞེས་མགོན་པོའི་ལུང་མང་པོར་བཤད་པ་ནི། གདུག་པ་ཅན་ཀླུའི་ནང་ན་དེ་ལས་མཐུ་རྩལ་ཆེ་བ་མེད་པས་ཀླུའི་བདུད་དམ། ཀླུའི་སྲིན་པོ་ཡིན་པས་ནཱ་ག་རཱཀྵ་ཞེས་བཤད་དེ། གཏད་ཁྲམ་རུས་སྦལ་ནག་པོའམ། གཤིན་རྗེ་འཁོར་ལོ་ནག་པོར་བཤད་པ་དང་། ཡི་དམ་ལྟར་བསྙེན་པའི་ཚུལ་མང་པོར་གསང་སྔགས་རྙིང་མ་ལས་བྱུང་ཞིང་། འདིའི་ཀླུ་བརྒྱད་ཀྱི་སྲོག་བདག་ལྷ་འདྲེ་བརྒྱད་དང་བཅུ་དྲུག་ལ་སོགས་པ་རྣམ་འགྱུར་དུ་བྱེད་པས་རྣམ་འགྱུར་དེ་སྦས་པའི་ཕྱིར་སྦས་པའི་ལྷ་མ་སྲིན་སྡེ་བརྒྱད་འཁོར་རོ། བེག་རྩེ་ནི་བཙན་གྱི་སྡེ་དཔོན། བཙན་ཞེས་པའང་གསུང་རབ་ཆེན་པོ་དག་ཏུ་ཤ་ཟའི་སྒྲས་བསྙད་པ་ཀྱང་ངོ་། །དེ་དག་ཀྱང་ནང་གི་ལྷ་མ་སྲིན་སྡེ་བརྒྱད་དེ། ཤ་ཟར་མཚན་མོ་རྒྱུ་བ་ཐམས་ཅད་འདུས་པའི་ཕྱིར་རོ། །གནོད་སྦྱིན་ནག་པོ་ཁྲག་རལ་ཅན་ཞེས་གསུངས་ཤིང་། སྐབས་འགར་གནོད་སྦྱིན་བྱར་གདོང་དུ་ཡང་བཤད་པ་ནི་ཞང་འོན། ཕྱིས་རིག་འཛིན་རྣམས་ཀྱིས་བན་ཆེན་རྡོ་རྗེ་བདུད་འདུལ་དུ་མཚན་བཏགས། གསང་བའི་བདག་པོའི་སྲས་ཏེ་གནོད་སྦྱིན་བརྒྱད་ནི། གསང་བའི་སྡེ་བརྒྱད་དེ། དྲེགས་པ་ཐམས་ཅད་ཀྱང་གནོད་སྦྱིན་དུ་བསྡུས་དུས་ཀྱི་སྡེ་དཔོན་ཡིན་པས་སོ། །རྒྱལ་པོ་པེ་ཧཱ་ར་ནི་གིང་ཆེན་པོ་དཔལ་ལྡན་བླ་མ་དམ་པ་བསོད་ནམས་རྒྱལ་མཚན་གྱིས་གུར་གྱི་མགོན་པོ་དང་རྒྱུད་གཅིག་ཏུ་གསུངས་པ་ཞེས་གྲགས་པ། འདིའི་འཁོར་པུ་ཏྲ་བྷ་དྲ་སྲིང་མོ། གནོད་སྦྱིན་ཡབ་ཡུམ་རྣམས་ས་ལུགས་པའི་གུར་ཀྱི་འཁོར་དུ་བྱུང་བ་དེ་ཀ་ཡིན་ཞིང་། རུ་འདྲེན་སྡེ་བཞིའང་དེ་ཀའོ། །དེ་བས་བཏགས་ཆགས་ཀྱི་ལྷ་མ་སྲིན་སྡེ་བརྒྱད་ཅེས། མཁའ་ལ་རྒྱུ་བའི་ཚོགས་ཐམས་ཅད་དོ། །འདིར་སྡེ་བརྒྱད་བསྡུ་བའི་མཚན་ཉིད་སྲིད་པའི་གཏེར་ཁྱིམ་སོགས་དང་མཐུན་ལ། མཚན་གཞི་ནི་མ་ངེས་ཏེ། ཕྱག་ན་རྡོ་རྗེ་སངས་རྒྱས་དང་། བྱང་ཆུབ་སེམས་དཔའ་ཆེན་པོ་གང་དུའང་འདྲེན་པ་བཞིན་ནོ། །ཕྱོགས་བཅུ་སྐྱོང་བ་ནི་ངེས་པར་སླ་ལ། རྒྱལ་པོ་ཆེན་པོ་བཞི་བདུད་དགའ་རབ་དབང་ཕྱུག་གི་བློན་པོ་བཞི་ཡོད་པའི་གཤེད་ཆེན་པོར་རྒྱལ་བས་བསྐོས་པའོ། །དེའི་ཕྱིར་ཐུགས་རྗེ་འབྱུང་བར། རྒྱལ་ཆེན་བཞི་བསད་ཅེས་པ་སྔ་མ་བདུད་ཀྱི་བློན་པོ་བཞི་པོ་དེ་ཡིན་པས་ཤན་ཕྱེད་པར་བྱའོ། །དེ་བས་ན་དཀྱིལ་འཁོར་ཆེན་པོ་འདིར་དཔལ་གྱི་མགོན་པོ་ལྕམ་དྲལ་ནས་སྲིད་པ་ཕོ་རྒྱུད་མོ་རྒྱུད་ཅི་ཡང་མ་འཚོགས་པ་མེད་དོ། །འདི་ལ་བོས་ན་མི་ཁོམ་པའི་མགྲོན་མེད་དེ། འདིར་ནི་སྣང་སྲིད་ཐམས་ཅད་དཀྱིལ་འཁོར་ཆེན་པོར་བསྒྱུར་བས་སོ། །དེ་ལྟ་བུའི་ཐུགས་དཀྱིལ་དུ་ལྷ་དགོད་ཁྱེར། ཐུགས་རྗེ་འབྱུང་བར་ཡང་། ཡི་གེ་ཧཱུྃ་ལས་བྱུང་བ་སྟེ། །ཉི་མ་ཟླ་བའི་གདན་སྟེང་དུ། །ས་བཅུའི་མགོན་པོ་ཡེ་ཤེས་པ། །བརྐྱང་བསྐུམ་ཚུལ་དུ་བཞུགས་པར་བསྒོམ། །འཇིག་རྟེན་ལས་སྤྲུལ་ཡུམ་ཆེན་གསུམ། །དཀར་དམར་ནག་པོ་ཁྲོས་པའི་སྐུ། །འཇིགས་པའི་མཚོན་ཆ་སྣ་ཚོགས་བཟུང་། །ཡི་གེ་ཀྵཾ་ལས་བསྐྱེད་པར་བྱ། །ཐུགས་ཀྱི་སྲས་མཆོག་ཆེན་པོ་བཞི། །སྤྲུལ་པའི་མགོ་བརྙན་བྱར་གདོང་བཞི། །ཧཱུྃ་ལས་སྐྱེས་པའི་ནག་པོ་ཆེ། །ནས། །རིགས་བཞི་འཁོར་དང་བཅས་པར་བསྒོམ། །སྐྱེ་མཆེད་སྤྲུལ་པའི་མཁའ་འགྲོ་དྲུག །ཡེ་ཤེས་ལས་དབང་དབང་མོ་ཆེ། །འབྱུང་བ་དྲུག་ལས་བྱུང་བ་ཡི། །དང་། ལས་ཀྱི་བཀའ་སྡོད་ཡབ་ཡུམ་བརྒྱད། །དྷ་དང་དྷེ་ལས་བྱུང་བའི་སྐུ། །འཇིགས་པའི་ཞལ་བགྲད་མཆེ་བ་གཙིགས། །ལག་ན་བེང་མདུང་གློ་སྙིང་ཟ། །དར་ནག་འཇོལ་བེར་ལུས་ལ་གྱོན། །སྤྲུལ་པ་མགོ་བརྙན་སྤྱི་བོར་བརྩིགས། །མི་མགོའི་འཕྲེང་བ་ལུས་ལ་འཆང་། །བདུད་འདུལ་མི་རོའི་སྟེང་ན་བཞུགས། །ལྷ་མོ་མགྱོགས་མ་མགོ་བརྙན་ཅན། །གྲི་གུག་ཐོད་པ་ལག་ན་ཐོགས། །མི་ལྤགས་གཡང་གཞིའི་སྟོད་གཡོགས་ཅན། །སྐུ་མདོག་ནག་མོ་མུན་པའི་གཟུགས། །ཕྱོགས་དང་མཚམས་ན་གནས་པར་བསྒོམ། །ཞེས་བཤད་པས། འདིར་ལྷ་གྲངས་ཇི་ལྟར་བཤད་པ་དེར་གཏན་ལ་ཕབ་ལ་ཁ་དོག་ཕྱག་མཚན་གྱི་ཁྱད་པར་ཅུང་ཟད་སྣང་ངོ་། །དེ་ལྟ་བུར། གྲི་གུག་བརྩེགས་པའི་རྒྱུད་དུ་ཡང་། །ཁྱད་པར་ལྷ་མོ་ལྕམ་མོ་ནི། །བོང་བུ་གྭ་དམར་ཆིབས་པ་སྟེ། །ལས་བྱེད་སྲིན་མོའི་ཚོགས་བཅས་པའོ། །མིང་པོ་མགོན་པོ་ནག་པོ་ནི། །ཕྱག་བཞི་པ་དང་ཕྱག་གཉིས་པ། །ནག་པོ་དུ་མའི་གཙོ་བོར་གྱུར། །གཏུམ་བྱེད་ནག་མོ་མ་མོར་བཅས། །ཕྱོགས་མཚམས་གནས་པའི་ལྷ་མོ་དང་། །འཇིགས་བྱེད་དྲག་མོ་རྔམ་དང་རྒོད། །ལས་མཁན་ཁྭ་ཏའི་གདོང་ཅན་དང་། །ཕོ་ཉའི་མགོན་པོ་ཤ་ཟ་བརྒྱད། །སོ་སོའི་སྡེ་དཔུང་བཅས་པ་ནི། །འདི་དག་གིས་ནི་སྔོན་དུས་སུ། །དེ་བཞིན་གཤེགས་པ་དུ་མ་མཆོད། །ད་ལྟ་ཕྱོགས་བཅུའི་ཞིང་ཁམས་སྐྱོང་། །ཐུབ་པ་ཆེན་པོ་འདི་ཡི་ནི། །བསྟན་པ་སྲུང་བར་བྱེད་པ་ཡིན། །མ་འོངས་པ་ནའང་དེ་བཞིན་འགྱུར། །ཞེས་སོ། །འདིར་བྱ་རོག་གདོང་སྡེ་བརྒྱད་མགོན་པོའི་སྔོན་དུ་བཤད་པ་ནི། ལས་གྲུབ་ཀྱི་དཀྱིལ་འཁོར་ལ་དེ་གཙོ་བོར་བསྟན་པ་ཡིན་ནོ། །དེ་ཕྱིར་ཕྱག་གཉིས་པ་གཙོ་བོར་གྱུར་པ་དེའོ། །དེ་ལྟ་བུའི་ཡེ་ཤེས་ཀྱི་མགོན་པོ་ལ། བྱ་རོག་མིང་ཅན་ཞེས་པའི་རྒྱུ་མཚན་ཡང་། བདུད་དཔུང་ཐམས་ཅད་འཇོམས་བྱེད་པའི། །མགོན་པོ་བྱ་རོག་ཅན་ཞེས་པ། །སྔོན་ཚེ་ལྷ་མིན་འདུལ་བའི་ཚེ། །བྱ་རོག་དག་ཏུ་སྤྲུལ་ནས་ནི། །དེ་ཡི་ཡང་སྤྲུལ་དུ་མ་ཡིས། །འོད་ཟེར་ནག་པོ་སྐར་མདའ་སྟོང་། །དེ་ཡིས་བདུད་ཚོགས་ཕམ་པ་བྱས། །སྲིན་པོའི་ཚོགས་ནི་འདུལ་བའི་ཚེ། །བྱ་རོག་ཆེན་པོས་གཤོག་པ་བརྡབས། །དེ་ཚེ་རྒྱ་མཚོ་འཁྲུགས་པ་དང་། །མེ་དཔུང་ཁ་ནས་སྤྲོས་པ་ཡིས། །ཐམས་ཅད་བསྲེགས་ཤིང་རྡུལ་དུ་བརླགས། །གཤིན་རྗེའི་ཡུལ་དུ་བྱ་རོག་ཆེས། །ཏོག་ཏོག་རྔམ་པའི་སྒྲ་བསྒྲགས་པས། །བེ་ཏ་ས་སྟ་བཏུལ་བར་གྱུར། །མ་མོ་རྣམས་ནི་དབང་དུ་བྱས། །བདུད་ཀྱི་དཔུང་རྣམས་ཀ་ནི་ཀར། །གཡོས་ཚེ་སུམ་ཅུ་རྩ་གསུམ་ནས། །བྱ་རོག་ཆེན་པོ་ཁྲོས་པ་ཡིས། །ལྷ་དམག་དུང་ཕྱུར་ཕྲག་བརྒྱ་རྣམས། །གཤོག་པའི་སྟེང་དུ་བཏེག་ནས་ནི། །འོངས་ཏེ་བདུད་ཚོགས་ཕམ་པར་བྱས། །དུས་གསུམ་མ་ལུས་ཐམས་ཅད་དུ། །ཀུན་ཁྱབ་གློག་གི་འོད་ལྟར་འཁྱུག །ཐམས་ཅད་མཐོང་བ་རྡོ་རྗེ་ཡིས། །མངོན་ཤེས་མངའ་བར་འགྱུར་བའི་གནད། །རྡོ་རྗེ་བྱ་རོག་ཅན་དུ་གྲགས། །སྒྲུབ་པ་པོ་རྣམས་སྐྱོང་བའི་ཚེ། །བྱ་རོག་ཆེན་པོས་སྲུང་བར་བྱེད། །ཉེ་བའི་ཡུལ་ནི་ཉི་ཤུ་བཞི། །ཁྱབ་མཛད་ཞིང་སྐྱོང་ཆེན་པོ་སྟེ། །ལྗོན་པའི་ཤིང་ལ་བརྟེན་ཏེ་གནས། །དེ་ཕྱིར་ཞིང་སྐྱོང་ཆེན་པོར་གྲགས། །ཐབས་དང་ཤེས་རབ་ཤེས་པར་ལྡན། །རྡོ་རྗེའི་སྤྱན་གྱིས་གཟིགས་མཛད་ཅིང་། །གནམ་ལྕགས་འབར་བ་རྡོ་རྗེའི་མཆུས། །ཁྲོ་ཞལ་ཅན་དང་ཕྱག་ཞབས་ལ། །བྱ་སྡེར་སེན་མོ་རྣོན་པོ་ཅན། །ལས་ཀྱི་མགོན་པོར་རབ་ཏུ་གྲགས། །ཀཾ་ཀ་བྱ་ཁྱུང་ཁྭ་ཏ་འགྱེད། །ཡེ་ཤེས་སེམས་དཔས་མ་ཐུལ་བ། །མ་རུངས་གདུལ་དཀའ་དེས་འདུལ་བས། །བྱ་རོག་གདོང་ཅན་དྲག་པོ་ཆེ། །ཞེས་རྒྱུ་མཚན་བདུན་གྱིས་གསུངས་སོ། །ལས་ཀྱི་མགོན་པོ་རྡོ་རྗེའི་གཤོག་པ་ཅན་དང་ཞིང་སྐྱོང་རྣམས་སྤྲུལ་པར་ཡང་འདིས་བསྟན་ནོ། །དེ་བས་ན་འདིའི་སྲོག་གི་སྙིང་པོར། ཀཱ་ཝུ་ཝ་ཝ་པ་ཤཱ་ཡ་ཞེས་པ་ཉིད་རྒྱུད་ཀྱི་དགོངས་པ་ཡིན་གྱི། ཀཱ་ཝུ་ཝ་ཝ་པུ་ཥ་ཡ་ཞེས་འདོན་པ་ནི་མཁས་འདོད་ཅན་དག་གི་བཅོས་མའོ། །སྔ་མ་བྱ་རོག་མིང་ཅན། ཕྱི་མ་བྱ་རོག་སྐུ་ཅན་ཞེས་བསྒྱུར་བས་ཁྱད་པར་མེད་དོ་ཞེས་སྨྲ་བའི་འགལ་སྤོང་ཡང་རྒྱུ་མཚན་འདིས་མི་འཐད་དོ། །དེ་བས་གཤིས་གང་དུ་ཡང་མ་གྲུབ། གདངས་ལྷའི་རོལ་མོར་གནས་པའི་གནད་ཤེས་ན་སྐུ་ཕྱག་རྒྱ་ཆེན་པོར་འགྱུར་བས། བརྟག་གཉིས་ལས། སྒོམ་པ་པོ་མེད་སྒོམ་པ་མེད། །ལྷ་མེད་སྔགས་ཀྱང་ཡོད་མ་ཡིན། །སྤྲོས་པ་མེད་པའི་རང་བཞིན་ལ། །ལྷ་དང་སྔགས་ནི་ཡང་དག་གནས། །ཞེས་གསུངས་སོ། །དེ་ཕྱིར་ཕྱག་རྒྱ་ཆེན་པོ་གསུམ་པོའི་ལན་ནི་རྫོགས་རིམ་མཚན་ཉིད་གསུམ་ལྡན་དུ་སྟོན་པ་སྟེ། རྣམ་པར་མི་རྟོག་པས་ཟབ་པ། རྣམ་པ་ཐམས་ཅད་པས་གསལ་བའམ་རྒྱ་ཆེ་བ། ལྷན་ཅིག་སྐྱེས་པས་ཟུང་འཇུག་སྟེ། གཅིག་དང་དུ་མ་རོ་མཉམ་པའོ། །འདིར་རྫོགས་རིམ་དང་པོར་སྟོན་པའང་། འཆད་འགྱུར་ཐམས་ཅད་ལྟ་བའི་རྩིས་ཟིན་ན་ཐར་པའི་ཐབས་སུ་འགྱུར་གྱི། མ་ཟིན་ན་འཁོར་བ་ཁོ་ནའི་རྒྱུ་ཉིད་རེད་པ། དེའི་ཕྱིར་སློབ་དཔོན་ཆེན་པོ་པདྨའི་གཞུང་ལས་ཀྱང་། ལྟ་བ་གྱབས་ཀྱི་ལྷ་ཞེས་རྣམ་པ་ཀུན་ཏུ་གཅེས་པར་གཟུང་ལ། ཇོ་བོ་རྗེས་ཀྱང་། སངས་རྒྱས་པ་ཡི་སྔགས་རྒྱུད་དང་། །མུ་སྟེགས་པ་ཡི་སྔགས་རྒྱུད་ལ། །སྟོང་པ་ཉིད་ལ་ཁྱད་པར་ཡོད། །ཅེས་གསུངས་ཤིང་། དེ་བཞིན་འདི་ཁའི་གླེང་གཞིར། ཤེས་རབ་སྙིང་རྗེ་ཟུང་འཇུག་པའི། །ཏིང་འཛིན་གང་དུ་སྒོམ་བྱེད་པ། །བླ་མེད་དཀོན་མཆོག་གསུམ་པ་སྟེ། །རྒོལ་བ་ངན་པ་བཟློག་པར་མཛད། །ཐུབ་པ་མཆོག་གི་བསྟན་པ་ལ། །འཛིན་དང་སྐྱོང་དང་བསྲུང་བ་གསུམ། །ལྔ་བརྒྱ་དུས་ཀྱི་སྙིགས་མ་ལ། །བདག་ཏུ་འཛིན་པ་སྤོང་བར་མཛད། །སྐུ་གསུམ་ཡེ་ཤེས་ལྔ་ལྡན་པར། །ཡེ་ཤེས་གཅིག་པུ་བསྒྲུབ་པར་བྱ། །ཞེས་གསུངས་པས་སོ། །དེ་བས་ན་འདིར་ལྷའི་དག་པ་ཡང་། དམ་ཚིག་གསང་བ་འབྱུང་བ་ལས། །རྒྱལ་བ་རིན་ཆེན་འབར་བའི་གཙོ། །ཕྱོགས་དུས་མེད་པར་རང་བྱུང་བ། །དམ་ཚིག་གསང་བ་འབྱུང་བ་ནི། །མཆོག་ཏུ་མི་འགྱུར་བའི་བདེ་ཆེན། རྒྱལ་བ་རིན་ཆེན་འབར་བའི་གཙོ་ནི་དེ་ལས་ཡིད་བཞིན་གྱི་ནོར་བུའམ་དཔག་བསམ་གྱི་ཤིང་རྣམ་པར་རྟོག་པའམ་འབད་རྩོལ་མེད་པར་འདོད་དགུ་སྟེར་བ་ལྟ་བུར། ཕྱོགས་དུས་མེད་པར་རང་བྱུང་བའི་ལྷའི་རོལ་པ་སྤྲོས་པ་དང་བྲལ་བ་ལས་སྣང་བ་དེ། ཆོས་འབྱུང་ཕོ་བྲང་དཀྱིལ་འཁོར་དུ། །ཆོས་ཐམས་ཅད་ཀྱི་འབྱུང་གནས་སོ། །དེ་ཉིད་དཀྱིལ་འཁོར་ཏེ། སྙིང་པོ་ལེན་པས་སོ། །རིགས་ཀྱི་ཡོན་ཏན་ལྡན་པར་ཡང་། ལེན་བྱའི་སྙིང་པོ་དེ་ཡང་། རིགས་ལྔ་དྲུག་པ་རྡོ་རྗེ་འཆང་དང་མི་ཕྱེད་པའོ། །གང་དེ་དག་དང་མི་ཕྱེད་ན། འཇིག་རྟེན་དང་འཇིག་རྟེན་ལས་འདས་པའི་ཚོགས་འདི་པའོ། །ཇི་ལྟར་མི་ཕྱེད་པ་ནི། འདུས་པར། མདོར་ན་ཕུང་པོ་ལྔ་རྣམས་ནི། །སངས་རྒྱས་ལྔ་རུ་རབ་ཏུ་གྲགས། །ཞེས་སོགས་ཀྱིས་གསུངས་པ་ལྟར་རོ། །དེའི་ཕྱིར་གཞི་ལམ་འབྲས་བུ་གསུམ་རོ་མཉམ་པས། ནམ་མཁའ་རྒྱ་མཚོ་འབྲས་ལྡན་པ། །ཕུན་སུམ་ཚོགས་པ་ལྷུན་གྱིས་གྲུབ། །ཅེས་བཤད་དོ། །གཞལ་ཡས་ཁང་གི་དག་པ་ནི། །མི་ཕྱེད་ལྷན་ཅིག་སྐྱེས་པའི་རྒྱལ། །ཕོ་བྲང་གསང་བའི་གཞལ་ཡས་ཁང་། །མི་ཕྱེད་པ་ནི་གཉིས་སུ་མེད་པ་གང་གཉིས་སུ་མེད་ན་རྟེན་གཞལ་ཡས་ཁང་དང་། བརྟེན་པ་ལྷ་གཉིས་སུ་མེད་པ་ཞེས་བྱའོ། །དེ་བས་གཞལ་ཡས་ཁང་གིས་རྣམ་བྱང་གི་ཆོས་ཐམས་ཅད་བསྟན་ལ། ལྷག་པར་དཔལ་བདེ་མཆོག་བླ་མ་ལས་དེ་ཀ་རིགས་ལྔར་བཤད་པས་སོ།། །། གཉིས་པ་ལམ་དུས་ཀྱི་ལན་ལ་སྤྱིར་བཏབ་པ་དང་། བྱེ་བྲག་ཕྱེ་སྟེ་བཏབ་པ་གཉིས་ལས། དང་པོ་ནི། དེ་ནས་གསང་བ་བཤད་བྱ་བ། །དེ་ཉིད་བླ་མེད་སྒྲུབ་པ་པོ། །བླ་ན་མེད་པ་ནི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་རང་བཞིན་རྡོ་རྗེ་ཐེག་པའོ། །བསྒྲུབ་བྱ་དེར། འབྲས་བུ་ལམ་དུ་བྱེད་པས་སྦྱོར་བ་སྟེ། སངས་རྒྱས་བསྟན་པ་སྲུང་བྱེད་པ། །སྙིང་པོ་འབྲས་བུ་ལམ་བྱེད་པ། །ཞེས་སོ། །སུ་ཞིག་དེར་སྦྱོར་ན། འཁོར་བའི་རྒྱ་མཚོར་ལྟུང་བ་ཡི། །སེམས་ཅན་སྡུག་བསྔལ་གཟིགས་ནས་ནི། །ཞེས་པ་དག་གོ །ཚུལ་ཇི་ལྟ་བུས་སྦྱོར་ན། སོ་སོའི་མོས་པ་ལ་བཀྲི་བའི་སྒོ་ནས་ཏེ། ཇི་ལྟ་ཇི་ལྟར་གྲོལ་གྱུར་པ། །དེ་ལྟ་དེ་ཡིས་གྲོལ་བར་མཛད། །དེའི་ཕྱིར་གདུལ་བྱ་དང་པོར་ཁྲིད་པའི་སྒོ་ནི་རབ་ཏུ་མང་བས་རིམ་པ་གཅིག་གིས་གཞལ་བར་མི་ནུས། དེས་ཐེག་པ་སྣ་ཚོགས་ཏེ། མི་དང་། ལྷ་དང་། ཚངས་པ་དང་། ཉན་ཐོས་དང་། རང་རྒྱལ་དང་། ཕ་རོལ་ཏུ་ཕྱིན་པ་དང་། རྡོ་རྗེ་ཐེག་པའོ། །སྒོ་སྣ་ཚོགས་པ་ནས་ཞུགས་ཀྱང་ཐར་པའམ་དེ་ཁོ་ན་ཉིད་དུ་བགྲོད་ཀ་མའི་ལམ་ནི་གཅིག་སྟེ། དེ་ཁོ་ན་ཉིད་གཅིག་ཡིན། དེ་མཐོང་བའི་ཡེ་ཤེས་ཀྱང་གཅིག་པུར་ཟད་པས་སོ། །དེའི་ཕྱིར། ཐེག་པ་སྣ་ཚོགས་ཐབས་ཚུལ་གྱིས། །འགྲོ་བའི་དོན་ལ་རྟོགས་པ་པོ། །ཞེས་དེར། ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གིས་འབྲས་བུར་གནས། །ཞེས་མཚན་ཡང་དག་པར་བརྗོད་པར་གསུངས་སོ། །བགྲོད་པའི་ལམ་གཅིག་པུ་ཀ་རྣལ་མའི་ལམ། གང་ལ་བཅོས་བསླད་མ་བྱས་ན་དེས་རང་བཞིན་ཤེས་པར་ནུས་པ། དཔེར་ན་ཆུ་རྙོག་མ་ཅན་མ་བསྒུལ་བར་བཞག་ན་རང་དྭངས་པ་བཞིན་ནོ། །དེའི་ཕྱིར་བླ་མ་རྣམས་མ་བཅོས་སོ་མར་གཞོག་ཤེས་ན། མ་ཡེངས་པ་དང་དེས་རྣལ་མའི་ལམ་དུ་ཞུགས་པ་ཞེས་གསུངས་ནས། དེ་སློབ་མས་ཅི་ཤེས་མཛད། དེ་ཤེས་ན་སྤང་བྱ་སྤང་དུ་མེད་པ་དང་གཉེན་པོ་བསྟེན་དུ་མེད་དེ་སྲིད་ཞི་ངང་གིས་མཉམ་ཉིད་དུ་ཤེས། དེ་ལ་རང་བཞིན་ཡོངས་ཤེས་ཀྱི་ཐ་སྙད་མཛད། དེ་འཚང་རྒྱ་བའི་ཐབས་ངོ་མར་སོང་ནས། བཀའ་བརྒྱུད་འདིའི་རིང་ལུགས་ཕྱག་རྒྱ་ཆེན་པོའི་དངོས་གྲུབ་བརྙེས་པ་བྱེ་བ་ཁྲག་ཁྲིག་ཞིག་བྱུང་བ་ནི་མངོན་སུམ་པའོ། །གཞན་གཞོག་ཁྱེར་དེ་ལ་འཁུ་བ་ནི་ཡུལ་སྣང་དགྲར་གཟུང་དེ་བཤིག་པར་འདོད། ལུང་རིགས་ཀྱི་བསམ་གཞིགས་མང་པོ་མཛད་པས་མཐར་འོ་བརྒྱལ། མིག་འབྲས་གཏིང་དུ་ལྷུང་། སྔོ་ལྷང་ངེ་བ། སེམས་ཅན་དམྱལ་བ་བཞིན་དུ་དྲན་པ་ཤིན་ཏུ་གསལ་ནས། ཚེ་གཞུག་སྡུག་དོགས་སྲིད་པའི་སྲད་བུ་སྐྱེད་གང་ཐུབ་བྱེད་པ་ཁོ་ནར་མཐོང་ངོ་།། །། གཉིས་པ་ལ་དུས་ཀྱི་དྲིས་ལན། གང་ཟག་གི གནས་ཀྱི་སྤྱོད་ཡུལ་བསྟན་པའི་ཁྱད་པར་གྱིས་ལན་བཞི། དང་པོ་ནི། དུས་ནི་བསྐལ་པ་བཟང་པོ་ཡི། །རྫོགས་ལྡན་མཐའ་མར་གྱུར་པ་ཡི། །དཔག་མེད་དུས་ལས་འདས་ན་ནི། །གསུམ་ལྡན་དང་ནི་གཉིས་ལྡན་ནས། །རྩོད་པའི་དུས་ཀྱི་རིམ་པ་ལ། །བཅོམ་ལྡན་ཚེ་ལོ་བརྒྱ་པའི་དུས། །དེ་ཡི་བསྟན་པའི་སྙིགས་མ་ཡི། །ལྔ་བརྒྱ་པ་ཡི་དུས་ཀྱི་མཐར། །ཤིན་ཏུ་གདུག་ཅིང་རྩུབ་པ་ཡི། །མི་བསྲུན་པ་ཡི་དུས་ཀྱི་ཚེ། །དེ་ཚེ་མགོན་པོའི་བསྟན་པ་འབྱུང་། །དེ་ཡང་། ལས་ཀྱི་ས་པའི་བསྐལ་པར་གྱུར་པ་དང་། ཁྱད་པར་སྙིགས་མ་ལས་ཆེས་སྙིགས་མ་ལྔ་བརྒྱ་མཐའ་མ་ལ་ཉེ་བ་ད་ལྟའི་དུས་ལ་འདི་དག ཉོན་མོངས་པ་རགས་པས་དེ་སྤངས་ནས་སེམས་རྩེ་གཅིག་པ་ལ་འཇོག་མི་ནུས་པ་དང་། སེར་སྣ་དང་གཡོ་སྒྱུའི་དབང་དུ་སོང་བའི་ཕྱིར་ཕ་རོལ་ཏུ་ཕྱིན་པའི་སྤྱོད་པ་དང་དུ་ལེན་དཀའ་བ་དང་། རྒྱུད་སྡེ་ཕྱི་མ་དག་བཞིན་དུ། བྱ་བ་དང་རྣལ་འབྱོར་རྒྱ་ཆེན་པོ་སྙུགས་ཀྱིས་མི་ཁྱོངས་པ་དག་ལ། གཏི་མུག་དང་། འདོད་ཆགས་དང་། ཞེ་སྡང་ངམ། ཉོན་མོངས་པ་ཐམས་ཅད་སྤང་མི་དགོས། དེ་ཁོ་ནའི་སྒོར་ཞུགས་ནས་ཚེ་གཅིག་ལ་འཚང་རྒྱ་བའི་རྡོ་རྗེ་སེམས་དཔའི་གསེབ་ལམ་བླ་ན་མེད་པའི་རྒྱུད་གསལ་བར་བསྟན་ལ། དེ་ཡང་བསྟན་པ་འཛིན་སྐྱོང་བསྲུང་བ་གསུམ་ལས། ཕྱི་མ་གཙོ་བོར་གྱུར་པ་ནི་འདིར་མགོན་པོའི་བསྟན་པའོ། །དེ་སྤྱོད་པའི་དུས་ནི་ད་ལྟའི་དུས་མན་ཆད་དེ། མ་རུངས་པ་མང་པོས་བསྟན་པ་ཉམས་སྨད་གང་ཐུབ་བྱེད་པ་ནི་མིག་ལམ་ན་མངོན་སུམ་པ། དེ་དག་ལ་སྙིང་རྗེས་བསད་ན་ཁོང་ཚོའི་དོན་ཆེན་པོར་འགྱུར་རོ། །ཞེས་དགོངས་སོ། །གཉིས་པ་གང་ཟག་གི་ལན་ནི། གང་ཟག་ལ་ཡང་གཉིས་སུ་བཤད། །བསྒྲལ་བར་བྱ་བའི་གང་ཟག་དང་། །སྒྲོལ་བར་བྱེད་པའི་སྒྲུབ་པོ་སྟེ། །ཞེས་པའི་དང་པོ། དཀོན་མཆོག་གསུམ་པོ་སྨོད་པ་དང་། །བླ་མ་ལ་སྡང་བདག་ལ་སྨོད། །དེ་དག་སོགས་ལ་བྱ་བར་བཤད། །སོགས་སྒྲས། སེམས་ཅན་སྤྱི་ལ་འཚེ་བ་དང་། །སྡིག་པའི་ལས་ལ་རྔམས་པ་དང་། །ངན་སོང་གསུམ་ལ་གཞོལ་བ་དང་། །བདུད་ཀྱི་ཕྱོགས་སུ་ལྷུང་བ་དང་། །མུ་སྟེགས་བྱེད་ལ་སོགས་པ་ལྟར་གྲུབ་མཐའ་ངན་པས་ལམ་གོལ་བར་ལྷུང་བ་ལྟ་བུ་རྣམས། དེ་ཡང་། དང་པོར་སྡིག་པ་ལ་དགའ་ཡང་། ཕྱིས་དད་པས་བསྟན་པ་ལ་བྱ་བ་ཆེར་ནུས་པ་རྒྱལ་པོ་མྱ་ངན་མེད་ལྟ་བུ་འབྱུང་སྲིད་པས་དུས་འཁོར་ནས། མངོན་སྤྱོད་ལ་སོགས་པ་མངོན་ཤེས་ཐོབ་པས་བྱ་བར་གསུངས་ལ། གཞན་དུ་དང་པོ་རིམས་ལ་སོགས་དུང་བའམ་ལྟས་ངན་པ་དང་ཆོ་འཕྲུལ་དབབ་པ་ལ་སོགས་བྲེད་བསྡིགས་བྱ། དེས་འཆུན་ནས་འདུན་ན་སླར་གསོ་ཞིང་གལ་ཏེ་མི་འདུད་པར་ད་དུང་བྱ་བ་ངན་པ་དེ་དང་དུ་ལེན་པར་སྤྲོ་ན་དེ་དད་པས་འཕོངས་པ་མངོན་སུམ་པ་ཡིན་པས་ཕྱིས་བསད་པའི་ལས་བྱ་བར་གསུངས་སོ། །སྒྲུབ་པ་པོ་ནི་རྣམ་པ་གསུམ། །ཧེ་རུ་ཀ་དཔལ་རྣལ་འབྱོར་མ། །དག་ཅིང་སྦྱངས་ཏེ་ཏིང་འཛིན་གསལ། །རིམ་པ་གོ་འཕང་ཐོབ་པ་སྟེ། །ཞེས་རབ་ལྟ་བ་རྟོགས་པ་སྟེ། དེ་ལ་དྲེགས་པ་རྣམས་ཡིད་བཞིན་གྱི་ནོར་བུ་ལྟར་བཀུར་ཞིང་མཆོད་པའོ། །འབྲིང་ཏིང་ངེ་འཛིན་གྱིས་འཆུན་པ་སྟེ། དེ་ལ་ཇོ་བོ་ལྟར་དུ་བཀུར་ཞིང་བཀའ་ཉན་པས་སོ། །མཐའ་མ་རྩལ་གསུམ་བསྙེན་པས་འཆུན་པ་སྟེ། དེས་ཅི་བསྒོ་བའི་ལས་བྱེད་ཅིང་ཕྲིག་མི་ནུས་པས་སོ། །རྩལ་གསུམ་ནི། ལུས་ལྷ། ངག་བཟླས་བརྗོད། སེམས་དམིགས་པ་ལ་རྩེ་གཅིག་པ་སྟེ། དེ་དག་ནི་བཙན་པོའི་མཁར་དུ་མི་ཤིགས་པའི་སྐུ་བསྐྱེད་དེ། གནམ་ལྕགས་ཀྱི་འཁོར་ལོ་བསྐོར་བ་ཞེས་བྱའོ། །ཐུན་མོང་སྤྱི་དང་བྱེ་བྲག་ཏུ། །དམ་ཚིག་གནས་པའི་རྡོ་རྗེ་འཛིན། །ཞེས་པ་ནི། དེ་ལ་དམ་ཚིག་ལ་གནས་པ་ནི་ཐམས་ཅད་དུ་གཙོ་བ་སྟེ། ལེགས་ཉེས་ཀྱི་སྟངས་གཅོད་པ་ལ་དམ་ཅན་འདི་རྣམས་འཁྲུངས་པས་ཉམས་ན་ལྷ་བདུད་དུ་འབབ་ལ། མ་ཉམས་པར་གཙང་ན་ཅི་བསྒོ་བ་ཐམས་ཅད་བསྙེན་བསྒྲུབ་མ་བྱས་ཀྱང་ངང་གིས་བྱེད་པས་སོ།། །། གསུམ་པ་གནས་ཀྱི་ལན་ནི། གནས་ཀྱི་ཁྱད་པར་འབྱུང་བ་ཡང་། །བསྙེན་པའི་དུས་དང་སྒྲུབ་པ་དང་། །ལས་ལ་སྦྱར་བའི་དུས་ཤེས་པས། །ཡིད་འོང་དབེན་དང་དུར་ཁྲོད་སོགས། །བསམ་གཏན་འཕེལ་དང་ཁྱད་པར་རོ། །ཞེས་བཤད་པ་ནི། བསྙེན་པ་ནི་ཡིད་འོང་བཀྲ་ཤིས་པའམ་བྲག་རི་ནག་པོ་ཁ་ལྷོར་བལྟ་བའི་ཕུག་དབེན་པར། སྒྲུབ་པ་བརྒྱད་སོགས་དུར་ཁྲོད་ལ་སོགས་པ་བདེ་མཆོག་དང་མཐུན་ལ། འཕྲིན་ལས་སྣ་ཚོགས་ནི། སོ་སོའི་བསྔགས་པ་དེར་བསྒྲུབ་དགོས། གཞན་དུ་མི་འགྲུབ་པས། སློབ་དཔོན་པདྨས། སྡེ་གནས་སྦྱིན་སྲེག་བྱས་མལ་དུ། །སེར་བ་བསྒྲུབས་ན་མི་ཐོན་ཞུད། །དབང་བསྐུར་ཚེ་བསྒྲུབ་བྱས་མལ་དུ། །ཐུན་ཕྲན་བསྒྲུབས་ན་མི་ཐོན་ཞུད། །མཆོད་རྟེན་ཚྭ་ཚྭ་བཤིག་པ་དང་། །སྟོང་ཉིད་གསུང་བཀླག་མལ་ཉིད་དུ། །ལྟས་ངན་བསྒྲུབ་ན་མི་ཐོན་ཞུད། །ཕུང་ཤུལ་བསད་བཅད་གཡུལ་བཀྱེའི་སར། །མངོན་ཤེས་བསྒྲུབས་ན་མི་ཐོན་ཞུད། །དུག་སྦྲུལ་ས་རལ་ཤག་འཕུང་ཤུལ། །ནོར་བསྒྲུབ་བྱས་ན་མི་ཐོན་ཞུད། །ཅེས་བཤད་པ་ལྟ་བུས་སོ།། །། བཞི་པ་རྣལ་འབྱོར་གྱི་སྤྱོད་ཡུལ་ལ་བདུན་ལས། དང་པོ་སྒྲུབ་པའི་ལན་ནི། ཡུལ་དང་དབང་པོའི་སྤྱོད་ཡུལ་དུ། །མཐོང་བ་དང་ནི་ཐོས་པ་དང་། །རེག་པ་དང་ནི་དྲན་པ་ཡི། །དཀྱིལ་འཁོར་པ་ཡི་སྣང་བ་དང་། །མ་ལུས་དངོས་པོར་གང་ཤར་བ། །བདེ་བ་ཅན་དུ་ཤེས་པར་བྱ། །སྣང་ཚད་སྐུ་ཕྱག་རྒྱ་ཆེན་པོ། གྲགས་ཚད་གསུང་ཕྱག་རྒྱ་ཆེན་པོ། དྲན་ཚད་ཐུགས་ཕྱག་རྒྱ་ཆེན་པོའི་ཁྱེར་སོ་དང་ལྡན་པས་བསྙེན་པ་བྱ་བར་བསྟན་ལ། གང་བསྙེན་ན། བསྟན་པ་ཀུན་ལས་བཏུས་པ་ཡིས། །བྱང་ཆུབ་སེམས་དཔའི་ལམ་ལས་ཀྱང་། །གསང་བ་འབྲས་བུ་ལམ་བྱེད་པ། །རྡོ་རྗེ་ཐེག་པ་འདི་ཉིད་དེ། །ཞེས་པས་འདིར་བསྟན་པ་ནི། རྩ་བའི་རྒྱུད་ཆེན་པོ། ངེས་པར་བརྗོད་པ་འབུམ་ཕྲག་སོ་དྲུག་པ་ལས་བསྡུས་པ་འདིའོ། །དེ་ཡང་། བྱང་ཆུབ་སེམས་དཔའ་བྱང་ཆུབ་ཏུ་ཆས་པའི་ལམ། རིང་བ་དང་ཉེ་བ་གཉིས་ཡོད་པའི་ཕྱི་མ་རྡོ་རྗེའི་གསེབ་ལམ་དེ་ནས་སོ། །བསྟན་པ་འཛིན་སྐྱོང་བསྲུང་བ་གསུམ། །འདི་ནི་ཁྱད་པར་བསྲུང་བ་ཡིན། །བསྟན་པ་ནི་རྒྱལ་བ་རྣམས་ཀྱི་ཆོས་ལུང་དང་རྟོགས་པའོ། །འཛིན་པ་ནི་ཀློག་པ་ཐོས་བསམ་དང་། སྤོང་བ་བསམ་གཏན་ནོ། །དེས་ཇི་ལྟར་འཛིན་པའི་ཚུལ་ནི། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། ཞེས་པའི་ཚུལ་གྱིས་སོ། །སྐྱོང་བ་ནི། བསོད་ནམས་ཀྱི་གཞིས་དགེ་འདུན་བསྡུ་བ་དང་། ཆོས་འཁོར་འཛུགས་པ་དང་། འཆད་པ་དང་། རྩོམ་པ་དང་། བསམ་གཏན་གྱི་བདེ་བ་ལ་རེག་པར་བྱེད་འཇུག་པ་དང་། ཤེས་རབ་ཀྱིས་སྦྱངས་ནས་གོང་ནས་གོང་དུ་སྤེལ་བ་དག་གོ །བསྲུང་བ་ནི། ལོ་ཏོག་སེར་བ་ལས་སྐྱོབ་པ་ལྟ་བུ་རིགས་པས་རྩོད་པ་དང་། ཕས་ཀྱི་རྒོལ་བ་ངན་པ་ཆོས་བཞིན་དུ་ཚར་བཅད་པ་མཐུ་དག་གོ །དེ་ལས་འདི་ཕྱི་མའི་དབང་དུ་མཛད་དོ། །དེ་ཡང་། བསྒྲུབ་པ་བསྙེན་པའི་ཏིང་ངེ་འཛིན་དང་། ཉེ་བར་བསྙེན་པའི་ཏིང་ངེ་འཛིན་དང་། བསྙེན་པ་དང་། ཉེ་བསྙེན་ནམ་ཉེར་བསྒྲུབ་གཉིས་དང་པོ་ནི། ལུས་ཀྱི་ལྷ། ངག་གི་མཚང་ཚིག་སྔགས། ཡིད་ཆོས་ཉིད་ཀྱི་རྩལ་ཏིང་ངེ་འཛིན་གྱི་འཕྲོ་འདུ་དང་སེམས་ཅི་བྱེད་གཞན་དོན་དུ་བསམས་པས་རང་རྒྱུད་བྱིན་གྱིས་རློབས་ནས། དམ་ཅན་ཕོ་རྒྱུད་མོ་རྒྱུད་ཐམས་ཅད་པདྨའི་མཚོ་ལ་ངང་པ་ལྟ་བུར་འདུ་ཞིང་དེས་དངོས་གྲུབ་ཅི་འདོད་པ་འགྲུབ་པས་བསྙེན་པ་སྟེ། དཔལ་ལྡན་ཁྲག་འཐུང་ཡེ་ཤེས་ཆེ། །རྣམ་དག་དམ་ཚིག་ཀུན་གྲུབ་ལ། །བདེ་བའི་བསོད་ནམས་རྒྱུན་གནས་པས། །རྣལ་འབྱོར་སྟོབས་ནི་རྒྱས་པར་བྱེད། །ཅེས་པས་སོ། །འདི་ལ། བསྙེན་པའི་དུས་སུ་རང་ལྷ་ཡི། །ཧེ་རུ་ཀར་ནི་གནས་པ་ཡིས། །མདུན་དུ་བཀའ་སྡོད་དམ་ཚིག་གི །མགོན་པོ་ཕྱག་བཞི་བསྒོམ་པར་བྱ། །དེ་ལ་ཆོ་གའི་ཆིངས། ལྷག་པའི་ལྷར་སྦྱར་བ་དང་། བགེགས་ལ་གཏོར་མ་སྦྱིན་ཏེ་བསྐྲད་པ་དང་། མདུན་སྐྱེད་བསྐྱེད་པ། བྱིན་གྱིས་རླབས་པ་སྤྱན་འདྲེན་པ། མཆོད་པ། དམ་ཚིག་ཡེ་ཤེས་བསྲེ་བ། དབང་བསྐུར་བ། རྒྱས་བཏབ་པ། ཕྱག་བཙལ་བ། མཆོད་པ་བྱིན་གྱིས་བརླབ་པ། མཆོད་པ་བཞི་འབུལ་བ། གཏོར་མ་བཏང་བ། བསྟོད་པ། བཟླས་པ། སླར་མཆོད་བསྟོད་བྱ་བ། བསྡུ་བ། བསྔོ་བ་དང་། བཀྲ་ཤིས་སོ། །ཆིངས་དང་པོ་ནི་གོང་ནོན་པའི་ཕྱིར་ཏེ། ཡེ་ཤེས་ཀྱི་མགོན་པོ་དཔལ་དྲེགས་པ་ལྟ་བུར་སྒྲུབ་པའི་སྐབས་ཡིན་པས། ཡི་དམ་འཁོར་ལོ་སྡོམ་པ་ལྟ་བུའི་བསྙེན་པ་ལེགས་པར་འཐེམས་པས་འདི་ལ་འཇུག་གོ །གཉིས་པ་བགེགས་དང་ལོག་པར་འདྲེན་པས་རྣལ་འབྱོར་གྱི་ནུས་པ་འཇོམས་པ་བཟློག་པའི་ཕྱིར་ཡིན་ལ། མདུན་སྐྱེད་བསྐྱེད་པ་ནས་བསྲེ་བའི་བར། འདིར་རང་བཞིན་གནས་པའི་ཧཱུྃ་ལས་བསྐྱེད་དོ། །དེ་ནས་དཔལ་ལྡན་བདུད་འཇོམས་པའི། །སྒྲུབ་པ་ཡང་དག་རབ་ཏུ་བཤད། །ཅེས་སོགས་ཀྱིས་རྒྱས་པར་བཤད་པའི་སྙིང་པོ། སྟོན་པ་གནས་པ་རང་བཞིན་ལས། །ཕྱིར་ཆད་དུ་སྟོན་པ་བཀའ་སྡོད་ལྟར་སྒྲུབ་པ་ལ། གནས་པའི་སྲོག་ལས་རང་བཞིན་དུ་བསྐྱེད་པ་ཞེས་བྱའོ། །འཁོར་ལོ་དགུག་བྱ་གཉིས་མེད་བསྟིམ། རང་རྒྱུད་ལྟར་གནས་པའི་མགོན་པོ་སངས་རྒྱས་ཀྱི་ཞིང་སྐྱོང་བ་རྣམས་སྤྱན་དྲངས་གཉིས་མེད་དུ་བསྲེ་བའི་བར་བསྟན་ལ། དབང་བསྐུར་རྒྱས་བཏབ་པ་ནི། གོང་དུ། སྒྲུབ་པའི་དུས་སུ་མགོན་པོ་ཡི། །རྒྱས་འདེབས་སྤྱི་བོར་ཧེ་རུ་ཀ །དེ་ཉིད་ཅེས་པས་བསྟན་ཏེ། དཔལ་མགོན་པོ་ལ་ཧེ་རུ་ཀ་རིགས་བདག་དང་། གཞན་རྣམས་ལ་དེ་ཉིད་ཅེས་པ་མགོན་པོ་ཉིད་དེ། བདེ་མཆོག་ཉུང་ངུར། འདི་རིགས་གཅིག་པའི་དཀྱིལ་འཁོར་དུ་གསུངས་ཤིང་། རྡོ་རྗེ་འཕྲེང་བར་ལྷ་རིགས་མ་ངེས་པ་དག་ལ་རྡོ་རྗེ་སེམས་དཔའམ་མི་བསྐྱོད་པས་རྒྱས་འདེབས་པར་བཤད་པའང་དེ་ཐམས་ཅད་ཀྱི་བདག་པོར་དགོངས་པས་སོ། །མཆོད་པ་ནི། དམ་ཚིག་ལྡན་པའི་སྔགས་པ་ཡིས། །སྒྲུབ་པའི་རྫས་རྣམས་ཁྱད་པར་ལས། །འབྲུ་ནག་གཏོར་མ་རབ་ཏུ་ཤེས། །ཞེས་སྡོམ་འབྱུང་དུ། ཆང་དང་གཏོར་མ་མེད་པར་ནི། །ལས་རྣམས་ཐམས་ཅད་འགྲུབ་མི་འགྱུར། །ཞེས་པས་གཏོར་མ་གཙོ་བོ་དང་། ཁྱད་པར་ལས། ཞེས་པས་ཞི་རྒྱས་དབང་དྲག་གིས་དབྱེ་བ་ཕྱི་ནང་གསང་བ་དེ་ཁོ་ན་ཉིད་དུ་བཞག་པའོ། །ཤ་ཆེན་གྱིས་ནི་བརྒྱན་པ་ཡི། །ཚོགས་རྫས་མཆོད་པ་གུས་པས་འབུལ། །སྨད་ལས་ཏེ་དེ་སྐབས་སྐབས་སུ་བྱ་བ་དང་། སྟོད་ལས་རྒྱུན་དུ་བྱ་བར་གསུངས་པས། རྒྱུན་དང་གནས་སྐབས་ལས། བསྒྲུབ་དང་བསྒྲུབ་པས་མངོན་དུ་འགྱུར། །ཞེས་སོ། །ཟློས་དུས་ཀྱི་ཏིང་ངེ་འཛིན་ཀྱང་འདི་ཉིད་དུ། རང་ཉིད་ཧེ་རུ་ཀར་གསལ་བ། །རི་རབ་སྟེང་དུ་ཡུམ་བཅས་བསམ། །དེ་མདུན་ནག་པོ་ཆེན་པོ་ཉིད། །གསལ་བ་བསྐྱེད་ཚུལ་དབྱེ་བ་ཡིས། །རྒྱན་དང་ཆ་ལུགས་རྫོགས་པ་ནི། །མངོན་གྱུར་ལྟ་བུར་བལྟ་བར་བྱ། །བདག་དང་མདུན་གྱི་མགོན་པོ་ཡི། །ཐུགས་ཀའི་ཏིང་འཛིན་རང་སྔགས་ལས། །དེ་ལས་སྤྲོ་བསྡུའི་ཏིང་འཛིན་བསམ། །ཞེས་པ་སྔར་མདོར་བསྟན་དུ། འོད་འཕྲོས་འཁོར་བའི་བཟླས་པ་ནི། །ཁྱད་པར་དུ་ནི་སྒྲ་དང་བཅས། །ཤིན་ཏུ་དཔའ་བར་བཟླ་བར་བྱ། །ཞེས་པའི་དོན་འདིའི་རྣམ་གྲངས་སུ། གྲི་གུག་བརྩེགས་པར། ཟླ་ཉིའི་དབུས་ཀྱི་ས་བོན་ལ། །སྟིམ་བྱ་འོད་ཟེར་སྤྲོས་ནས་ཀྱང་། །ཁྱོགས་ལྟར་འཕྲེང་བ་ལྡིང་གྱུར་པ། །དེ་ཉིད་རྣམ་པར་གསལ་བ་ལས། །ནུས་པ་གཟི་བྱིན་མྱུར་བསྐྱེད་པ། །ཞེས་དང་། དེར་སྲོག་གཅོད་སྤང་བ་ཞི་བ་སྟེ། སོགས་མ་བྱིན་ལེན། མི་ཚངས་སྤྱོད། རྫུན་སྨྲ་ལས་ལོགས་པ་རྒྱས་པ། དབང་དྲག་པོ་དང་། སྐུ་གསུང་ཐུགས་ཀྱི་བསྙེན་པས་ནི། །རྩ་བའི་ཉོན་མོངས་རང་དག་འགྱུར། །གསལ་བ་གསུམ་དང་ལྡན་པ་ཡི། །སྤང་བྱ་དུ་མའི་གཉེན་པོར་ཆེ། །བསོད་ནམས་ཚོགས་ནི་བསགས་པ་ཡིས། །ཁ་ན་མ་ཐོའི་དྲི་མ་འདག །ཡེ་ཤེས་ཚོགས་ཀྱིས་རང་བཞིན་གྱིས། །ཁ་ན་མ་ཐོའི་གཉེན་པོར་འགྲོ། །ཞེས་དམིགས་པའི་ཁྱད་པར་བཤད་དོ། །གཞན་ཡང་། ཁ་དོག་སྣ་ཚོགས་འབར་བའི་འོད། །ཡེ་ཤེས་མེ་ལྕེའི་སྙིང་པོ་ནི། །འོད་གསལ་མཁའ་དབྱིངས་མི་འགྱུར་བ། །ངག་བརྗོད་པ་ཡི་བཟླས་པ་ཡང་། །དཔལ་འཛིན་བྱིན་རླབས་དུས་སུ་བྱ། །ཞེས་མྱུར་བའི་གནད་གསུངས་སོ། །ཁྱད་པར་རྟགས་ནི་གསལ་བར་འབྱུང་། །ཉེ་བའི་མཚན་མ་ངེས་མཐོང་ནས། །དངོས་གྲུབ་བླང་ཞིང་གཏོར་མ་འབུལ། །སྦྱིན་སྲེག་ལས་ཀྱིས་མྱུར་དུ་འགྲུབ། །གསང་སྔགས་འབུམ་ཕྲག་བཅུ་ཡིས་ནི། །འབྲས་བུ་ཡིད་ལ་འདོད་པ་འགྲུབ། །ཁ་སྐོང་མེ་ཡིས་མཆོད་པ་བྱ། །ཞེས་ལེའུ་བཅུ་དགུ་པར་བཤད། དེ་ཡང་གྲངས་རྟགས་དུས་གསུམ་དུ་བཞག་སྟེ། དེ་ཡང་རབ་འབྲིང་མཐའ་མ་ཡིས། །བྱེ་བྲག་རྟག་ཏུ་འཆར་བར་འགྱུར། །གྲངས་ནི་བདུན་འབུམ་དག་དང་ནི། །ཁྲི་ཕྲག་དགུ་དང་ཁྲི་ཕྲག་བདུན། །སྟོང་ཕྲག་བདུན་གྱིས་ཉེ་བར་འགྱུར། །ཐབས་དང་ཤེས་རབ་བཅས་པ་ཡི། །སྔགས་ཀྱི་སྟོང་ཕྲག་བཅུ་དག་གིས། །མངོན་སུམ་གསལ་བའི་ངེས་པ་འཆར། །དུས་ནི་ཟླ་དྲུག་ཞག་བདུན་བར། །རྣལ་འབྱོར་སྨྲ་བ་བཅད་དེ་བཟླ། །མི་ཚིག་བར་མ་ཆོད་པ་ཡིས། །གསང་སྔགས་འཕྲིན་ལས་ངེས་པར་འགྲུབ། །ཐུན་མཚམས་མཆོད་དང་གཏོར་མ་དང་། །བསྟོད་བཅོལ་ཞེས་གསུངས་སོ། །འདིར་འཕྲེང་བ་བསྙེན་དུས། རུ་རཀྵ། དུང་ཆེན། གཞན་ཤེལ་གྱིས་ཞི་བ་འགྲུབ་སོགས་ཀྱིས་སོ། །རྒྱུ་གྲངས་བྱིན་བརླབ་གྲི་གུག་བརྩེགས་པར། ཤེས་པས་ལྷ་ཡི་ཏིང་འཛིན་གྱིས། །འཕྲེང་བ་གང་ནས་རྙེད་པ་ལ། །ཁྲུས་བྱས་དྲིས་བྱུག་རང་ལག་སྟེང་། །མི་དམིགས་ངང་ལས་རང་བཞིན་གྱིས། །བྱིན་རླབས་སྤྲོ་བསྡུ་མཆོད་པ་བྱ། །གསང་སྔགས་བརྗོད་ལ་བཅད་པར་བྱ། །འདིར་རང་བཞིན་ཞེས་པ་དམ་པ་རིགས་བརྒྱ། སྔགས་བརྗོད་རྒྱུ་དབྱངས་གསལ་ལོ། །འདིར་མགོན་པོ་ཕྱི་རོལ་ཏུ་བལྟ་བ་མ་བཟློག་པར་བསྙེན་པས་ཕྱི་སྒྲུབ། ཉེ་བར་བསྙེན་པ་ནི། ཉེ་བར་བསྙེན་པའི་དུས་སུ་ནི། །བདག་ཉིད་ཧེ་རུ་ཀ་ལས་ནི། །ཧཱུྃ་བྱུང་མདུན་དུ་སྤྲོས་པ་ལས། །བསྐྱེད་ཅིང་མཐར་ནི་ཉེ་བར་བསྡུ། །བཅུ་དགུ་པར། གཏོར་མ་ཆེན་པོ་དང་བཅས་པས། །ལན་བདུན་ཉེ་བར་བསྙེན་པས་འགྲུབ། །མགོན་པོ་འཁོར་བཅས་བསྐྱེད་པའི་རྒྱུ་དུས་ཀྱི་ཧཱུྃ་བདག་ཉིད་ཀྱི་ཐུགས་ཀ་ནས་སྤྲོས་ལ་དེས་སྤྲུལ་པའི་དཀྱིལ་འཁོར་བལྟ་བའམ། མཐར་ནི་ཉེ་བར་བསྡུ་ཞེས་པས་ཞལ་མྱུར་དུ་ལྟ་བའི་མན་ངག དེའི་དབང་དུ་མཛད་ནས་གྲི་གུག་བརྩེགས་པར། ཆུ་སྐྱེས་དབུས་སུ་རྡོ་རྗེ་ནི། །ས་བོན་འོད་འཕྲོས་མི་བཟད་པ། །ཉི་ཟླ་དྲག་པོ་སྙིང་པོ་ལས། །རོལ་མཚོའི་ཕྱོགས་གྱུར་གནས་པ་ཡི། །པདྨ་ཕྱོགས་བཅས་འཕྲེང་བའོ། །གེ་སར་འདབ་ཀླུ་གནས་གྱུར་ཏེ། །སྲོག་ཉིད་ཡེ་ཤེས་བདག་ཉིད་ཅན། །སྙིང་པོ་རྒྱུན་དུ་བསྐུལ་བའོ། །ཉེ་བའི་ཉོན་མོངས་དག་པའི་ཚུལ། །ལྷག་མར་གྱུར་པའི་ཉེས་པ་སྡོམ། །ལྷ་ནི་མེ་དང་ཕྱོགས་དག་གི །དཀྱིལ་འཁོར་རང་བཞིན་གྱུར་པ་ཡི། །ལྷ་མོ་ཉེར་བཞིར་བདེ་བར་རོལ། །སྤྱོད་དང་གྲོལ་བའི་ངོ་བོར་མཐོང་། །འདི་ལ་གསང་རྟེན་ལུས་ལ་བཅའ་བ་ཞེས་ཀྱང་གསུངས་སོ། །སྔ་མས་ཕན་འདོགས་བྱར་སོང་བས་སམ་ཉེ་བའི་ཉོན་མོངས་པ་འཇོམས་པའི་གཉེན་པོ་ཡིན་པས་ཉེ་བསྙེན་ནོ། །ལྷ་རང་སེམས་ཀྱི་སྤྲུལ་པར་བསྒོམ་པས་སམ། ལུས་ཀྱི་ནང་དུ་འགོངས་པས་ཕྱིར་མ་ཆད་པའི་ཕྱིར་ནང་བསྒྲུབ་བོ།། །། གཉིས་པ་སྒྲུབ་པ་ཆེན་པོའི་ལན་ནི། བསྒྲུབ་པ་ཆེན་པོ་བླ་ན་མེད། །ཡེ་ཤེས་མགོན་པོ་ཆེན་པོ་ནི། །ཁྭ་གདོང་ལ་སོགས་ལྷ་མོ་བརྒྱད། །དམ་པ་བཞིན་དུ་ཡོངས་སུ་བསྐོར། །དཀྱིལ་འཁོར་ཕོ་བྲང་དབུས་སུ་ཡང་། །དུར་ཁྲོད་དུ་ནི་མགོན་པོ་རོལ། །འཇིག་རྟེན་གསུམ་ན་རྙེད་དཀའ་བའི། །དམ་ཚིག་སྤྱོད་པའི་རང་བཞིན་ནི། །རྟག་ཏུ་རང་སྔགས་སྦས་པ་སྟེ། །རབ་ཏུ་འབད་དེ་གསང་བར་བྱ། །ཞེས་མདོར་བསྟན། དཀྱིལ་འཁོར་ཆེན་པོ་སྟོན་པའི་ལས་རིམ་དང་འབྲེལ་བའི་གཞུང་ཚིག་གིས་ཐམས་ཅད་རྒྱས་པར་བཤད་དོ། །འདི་ལ་སྔོན་འགྲོ་དང་དངོས་གཞི་རྣམ་པ་གཉིས། སྔོན་འགྲོ་ལ། ས་ཆོག་སྟ་གོན་གཉིས། དང་པོ་ལ། ས་བརྟག་བསླང་སྦྱང་ཞིང་གཟུང་བ་བཞི། སྔ་མ་ལ་ས་བརྟག་པ་དང་ལྟོ་འཕྱེ་བརྟགས་ཏེ་བརྐོ་བ་གཉིས། བར་པ་ལ་སློབ་མས་གསོལ་བ་བཏབ་པ། བགེགས་སྡིག་པ་མི་ཤེས་པར་སྦྱང་བ། བསྙེན་པ་བྱ་བ། མཚན་མ་ཐོབ་ནས་དཀྱིལ་འཁོར་གྱི་ཕྱོགས་སུ་བསྙེན་པ་དང་འདྲ་བར་བདག་མདུན་བསྐྱེད་མཆོད། མི་སྣང་བ་ལ་བསླང་བ། མཐའ་མ་ལ། བགེགས་སྦྱང་སྲི་མནན་པ་སྦྱང་བ་རྣམས། བཞི་པ་ལ། དཀྱིལ་འཁོར་ཡོད་སའི་དབུས་སུ་བདག་བསྐྱེད། གསོལ་བཏབ། ཁྲོ་བོ་བསྐྱེད་པ། བཀའ་བསྒོ། སྟངས་སྟབས། སློབ་མ་བསྲུང་བ། ས་དེ་ལ་མཆོད་པ། ལེའུ་བཅུ་བདུན་པར། དེ་ནས་གཞན་ཡང་བཤད་བྱ་བ། །དཔལ་ལྡན་ནག་པོ་ཆེན་པོ་ཡི། །ཐར་པའི་གྲོང་ཁྱེར་ཉམས་དགའ་བ། །ནས། རྒྱུད་ཤེས་ཡང་དག་བླ་མ་ལ། །སྣོད་ལྡན་དག་པའི་སློབ་མ་ཡིས། །གསོལ་བ་ལན་གསུམ་གདབ་བྱ་བ། །ནས། ལན་གསུམ་བརྗོད་ནས་གནང་བྱ་བའི། །ཞེས་པའི་བར་དང་། དང་པོར་བསྙེན་པ་བརྩམ་པར་བྱ། །མཚན་མ་ཉེ་བའི་ཚུལ་ཤེས་ནས། །དེ་ནས་སྔོན་འགྲོ་བརྩམ་པར་བྱ། །འཕྲིན་ལས་མཆོད་པ་གཏོར་མ་ཡིས། །ཡེ་ཤེས་ལྷ་རྣམས་མཆོད་པ་དང་། །ལུས་དང་ངག་དང་ཡིད་ཀྱི་ནི། །སྡིག་པ་འབྲལ་ཞིང་བགེགས་དབྱུང་བའི། །སྔགས་དང་བཅས་པའི་ཡུངས་ཀར་གྱིས། །མེ་སྦར་བསྲེག་དང་བྲབ་པར་བྱ། །བགེགས་ལ་བཀའ་བསྒོ་གཏོར་མ་བྱིན། །སློབ་མ་ཀུན་ལ་བསྲུང་བྱས་ནས། །དེ་རྗེས་ས་ཕྱོགས་གཙང་མ་ལ། །ས་བརྟག་པ་དང་སྦྱང་བ་དང་། །ས་བསླངས་ནས་ནི་བཀའ་ཐོབ་པས། །བརྐོ་ཞིང་རོ་ལྔ་བསལ་བར་བྱ། །དེ་ནས་བསྲུང་བའི་འཁོར་ལོ་ཡི། །བཀའ་ཡི་འཁོར་ལོ་རྣམ་པར་བསྒོམ། །དང་། དེ་ལས་བརྗོད་པ་ཙམ་གྱིས་ནི། །ཕུར་བུས་གདབ་དང་བརྡུང་བར་བྱ། །རྡོ་རྗེ་མགོན་པོ་ཆེན་པོ་ཡི། །ཏིང་ངེ་འཛིན་དུ་གནས་པ་ལ། གསོལ་བ་བཏབ་པས་གནང་བ་བྱིན། །དེས་རྗེས་ཐལ་སྦྱར་གསོལ་བ་ནི། །སོགས་དང་། བགེགས་ལ་བཀའ་བསྒོ་གཏོར་མ་བྱིན། །དང་། དེ་ནས་བསྲུང་ཞིང་བཅག་པར་བྱ། །རྡོ་རྗེ་འཛིན་པ་བཞེངས་ནས་ནི། །རྡོ་རྗེ་གོམས་པའི་གར་སྟབས་ཀྱིས། །ཧཱུྃ་ཧཱུྃ་དྲག་པོའི་སྒྲ་བརྗོད་པས། །ཕྱོགས་ཀུན་བཅིངས་པ་བྱས་ནས་ནི། །དང་། སློབ་མ་ཀུན་ལ་བསྲུང་བྱས་ནས། །དང་། ཁྱད་པར་བདུད་རྩི་འཁྱིལ་པས་བསྲུང་། །ཞེས་པའི་དངོས་ཤུགས་ཀྱིས་བཤད་དོ། །སྟ་གོན་ལ། ས་ལྷ་བུམ་པ་སློབ་མ་ལྷག་གནས་བཞི། །དེ་ནས་ལྷག་པར་གནས་པ་བརྩམ། །ས་འཛིན་ལྷ་མོ་ཉིད་མཆོད་པས། །བཀའ་བྱིན་ནས་ནི་ཐིམ་པར་བལྟ། །དང་། དཀྱིལ་འཁོར་དྲི་ཡི་ཐིག་ལེ་ལ། །མེ་ཏོག་ཆལ་དགྲམ་ལྷ་རྣམས་ནི། །བསྐྱེད་ཅིང་མཆོད་ལ་གཉིས་མེད་བཏེག །ཅེས་དང་། བུམ་པ་བཀྲ་ཤིས་ཡན་ལག་ལྡན། །མ་ཉམས་མཚན་ཉིད་ལྡན་པ་དགུ། །ཁ་ཚར་མ་ཉམས་རས་ཟུང་དཀྲི། །སྙིང་པོ་སྨན་དང་འབྲུ་ལྔ་པ། །སྤོས་དང་རིན་ཆེན་དག་གིས་དགང་། །རྒྱུན་འབབ་ཆུ་ཡིས་གང་བ་དང་། །འབྲས་ལྡན་ཤིང་གིས་ཁ་བརྒྱན་པའོ། །དེ་ནས་སེམས་བསྐྱེད་སྡོམ་གནས་པས། །དམ་ཚིག་གསང་བ་སྦྱིན་པར་བྱ། །དང་། སོ་ཤིང་དོར་ནས་ལྟས་བརྟག་པ། །བསྲུང་སྐུད་ཀུ་ཤ་སྦྱིན་པར་བྱ། །རྣམས་ཀྱིས་སོ། །བསྒྲུབ་པ་ཆེན་པོའི་དངོས་གཞི་ལ། །ཐིག་བྱིན་རླབས་གདབ་པ། ཚོན་བྱིན་རླབས་བྲི་བ། སྤྱན་གཟིགས་དགྲམ་པ། རྟེན་འཛུགས་པ། དཀྱིལ་འཁོར་བསྒྲུབ་པ། བདག་འཇུག་པ། གཞན་ལ་དབང་བསྐུར་བ། དཀྱིལ་འཁོར་དེ་ཉིད་དུ་དངོས་གྲུབ་དང་འཕྲིན་ལས་སྣ་ཚོགས་བསྒྲུབ་པའོ། །དེ་དག་ཀྱང་རིམ་པ་བཞིན། ཁྱད་པར་ལྷ་ལ་གསོལ་བཏབ་ནས། །རྡུལ་ཚོན་དཀྱིལ་འཁོར་ཐིག་གདབ་བྱ། །དང་པོར་ཡེ་ཤེས་ཐིག་གདབ་ཅིང་། །དེ་ནས་དམ་ཚིག་ངེས་པར་གདབ། །གོ་རིམ་མ་ནོར་ངེས་པའི་ཚུལ། །སྲད་བུ་ཤེས་རབ་ཅན་གྱིས་གདབ། །ཚོན་ནི་བྱིན་གྱིས་བརླབས་ནས་ཀྱང་། །པྲ་བརྟག་རྡུལ་ཚོན་རིམ་པས་འགྱེད། །ཇི་ལྟར་བྲིས་པའི་དཀྱིལ་འཁོར་ནི། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་པ་ཡི། །ཕོ་བྲང་ལེ་ཚེ་དགུ་ཟླུམ་སྐོར། །དབུས་མ་ཨེ་དབྱིབས་དྲག་པོ་ཉིད། །པདྨ་འདབ་བརྒྱད་ཕྱི་རོལ་ནི། །ལྷ་ཁྱམས་བཅས་པའི་དཀྱིལ་འཁོར་མཆོག །ཅེས་གསུངས་ལ། ནང་དྲག་པོ་ཨེར་བཤད་པའི་རིགས་པས། ཕྱི་མ་ཟླ་གམ་གསུམ་ལྡན་པ། བལྟ་ཚུལ་ལ་ཟླ་གམ་དྲུག་ལྡན་ཀྱང་འཐོན་པས་ཕྱི་ཟླུམ་པོ་ཞི་བ། དེའི་ཕྱི་གྲུ་བཞི་རྒྱས་པར་བཤད་པ་ནི། ཞེ་སྡང་རིགས་པ་གྲགས་ཀྱིས་མཛད་པའི་ལས་གསང་གི་བཀའ་འགྲེལ་ལས། དབུས་ཀྱི་ཕོ་བྲང་ཨེ་ཡི་དཀྱིལ། །རལ་གྲིའི་རྩིག་པས་དྲག་པོ་འདུལ། །ཟླ་གམ་དྲུག་ལྡན་དམར་པོ་དབང་། །ཆོས་སྐུ་སྤྲོས་མེད་མུ་ཁྱུད་ཟླུམ། །གྲི་གུག་དག་གི་རྩིག་པ་ཡིན། །མི་འཇིགས་བཞི་རྒྱས་གྲུ་ཚད་བཞི། །བར་གྱི་ཁྱམས་དང་སྒོ་བཞིར་ལྡན། །སྐུ་གསུམ་ལྡན་ཕྱིར་ཐོད་བརྩིགས་གསུམ། །ཞེས་འབྱུང་བ་དང་། སློབ་དཔོན་རཏྣ་ཨཱ་ཀ་ར་གུཔྟའི་དཀྱིལ་འཁོར་གྱི་ཆོ་ག་རིན་ཆེན་འཕྲེང་བར་ཇི་སྐད་བཤད་པ་བཞིན་དེའི་རྗེས་སུ་འབྲངས་ལ། དེར། སྐུ་གསུང་ཐུགས་ཀྱི་དཀྱིལ་འཁོར་གསུམ། །གྲུ་བཞི་པར་ནི་མཉམ་པ་ལ། །ཕོ་བྲང་ནང་མ་དུར་ཁྲོད་ཀྱི། །གཞལ་ཡས་ཐོད་པའི་རྩིག་པར་ལྡན། །མུ་ཁྱུད་རིམ་པ་གཉིས་ཀྱིས་བསྐོར། །ཕྱི་མ་ཕོ་བྲང་ལེ་ཚེ་བརྒྱད། །དེ་ཡི་ནང་གི་ཨེ་དབྱིབས་ན། །ཟླ་གམ་གསུམ་ལྡན་དབུས་སུ་ནི། །མུ་ཁྱུད་རིམ་པ་བསྐོར་བ་ལ། །པདྨ་འདབ་བརྒྱད་ལྟེ་བར་བཅས། །ཞེས་འབྱུང་ལ། འདིར་གཏི་མུག་འདོད་ཆགས་ཞེ་སྡང་རྣམ་པར་དག་པའི་བརྡར་ཀླད་ཁྲག་ཞག་གི་རྒྱ་མཚོ་བཤད་ཅིང་། ཕོ་བྲང་ནི། གུར་ཆེན་པོའི་ནང་དུ་ཆུང་ངུ་ཕུབ་པ་ལྟ་བུར་སྐུ་དཀྱིལ་གྱི་ནང་དུ་གསུང་དཀྱིལ་ཆུག་པའི་རིམ་པས་ཤེས་པར་བྱ་སྟེ། འདིར་ནི་སྲིན་པོའི་རྒྱལ་ཁབ་དཔེར་མཚོན་ཏེ་བཤད་པའི་ཕྱིར་རོ། །ལྷག་མ། རིན་ཆེན་འདོད་སྣམ་བསྐོར་བ་དང་། །དྲྭ་ཕྱེད་བ་ཀུ་ལཱི་ཡི་འཕྲེང་། །ཡ་སྟེང་ཁ་བད་མཛེས་པར་བརྒྱན། །ཆོས་འཁོར་རི་དྭགས་གདུགས་དང་བཅས། །ཐོད་སྐམ་པདྨའི་ཕྲེང་བར་ལྡན། །དུར་ཁྲོད་བརྒྱད་ཀྱིས་ཡོངས་སུ་བསྐོར། །རྡོ་རྗེ་མེ་འོད་འབར་བ་འཁྲིགས། །ལས་དཀྱིལ་ནི། ཡང་ན་ལེ་ཚེ་དགུ་ལྡན་པའི། །པད་འདབ་བརྒྱད་ཀྱི་ཕྱི་རོལ་ཏུ། །མུ་ཁྱུད་འཁོར་ལོ་རིམ་གསུམ་དུ། །ཨེ་དབྱིབས་ཞིང་སྐྱོང་རིམ་པས་དགོད། །ལྷ་དང་ས་བོན་ཕྱག་མཚན་ནི། །སྐུ་གསུང་ཐུགས་ཀྱི་ཕྱག་རྒྱས་མཚན། །ཞེས་སོ། །དགྲམ་པ་ནི། ཉེ་བར་བརྒྱན་ཅིང་ཡོངས་སུ་བསྐོར། །དང་། རྟེན་འཛུགས་པ། ལྷ་དང་ས་བོན་ཕྱག་མཚན་ནི། །སྐུ་གསུང་ཐུགས་ཀྱི་ཕྱག་རྒྱས་མཚན། །དང་། དཀྱིལ་འཁོར་བསྒྲུབ་པ། གསང་སྔགས་ཉེ་བར་བསྔགས་པས་གནས། །བསྟེན་ཅིང་མཆོད་ལ་གསོལ་བ་གདབ། །བསྒྲུབ་ཚུལ་རྒྱས་པ། བདག་མདུན་བུམ་པ་བསྒྲུབ་པ་གསུམ། །དང་པོ། ཚོགས་གཉིས་ལ་གནས་པ། འབྱུང་བ་རིམ་བརྩེགས། གུར་ཁྲོ་བཅུའི་བསྲུང་འཁོར། དེ་ལ་མཆོད་བསྟོད་བཟླས་པ། གཞལ་ཡས་ཁང་། རྒྱུ་དུས་ཀྱི་མགོན་པོ། མངལ་འབྱིན་གྱིས་འཁོར་བསྐྱེད་པ། གླུས་བསྐུལ་བ། འབྲས་དུས་ཀྱི་ལྷར་བཞེངས་པ། བྱིན་བརླབས། ཡེ་ཤེས་དགུག་པ། མཆོད་པ། གཞུག་པ། དབང་། རྒྱས་བཏབ་པ། ཕྱག་མཆོད་བདུད་རྩི་མྱང་དང་བསྟོད་པ། འཛབ་དང་ཏིང་ངེ་འཛིན་ཉེར་བསྡུ་རྣམས་སོ། །དེ་ཡང་ལེའུ་ལྔ་པར། འགྲོ་བ་ཀུན་ལ་རབ་བལྟས་ནས། །སོགས་ནས། དེ་ཉིད་ཧཱུྃ་དང་བཅས་པ་ཡང་། །ནཱ་ད་ཙམ་དུ་གནས་པ་ལས། །ནམ་མཁའ་ལྟ་བུའི་ངང་ལས་ནི། །ཚངས་པའི་གནས་བཞིས་ཁྱབ་པར་བྱ། །ཞེས་སོགས་ཀྱིས་དང་། དེ་ལས་ས་བོན་འདི་དག་ནི། །ལྟེ་བ་གེ་སར་བཅས་དབུས་སུ། །ཞེས་པའི་བར་དང་། ཧ་ལས་སྣ་ཚོགས་རྡོ་རྗེ་ནི། །ནས། འདི་དག་བསྲུང་བའི་ཁྱད་པར་རོ། །ཞེས་པའི་བར་དང་། བྷྲཱུྃ་ལས་བྱུང་བའི་འཁོར་ལོ་ནི། །ནས། བཀུག་ནས་གཉིས་མེད་བཞུགས་པར་བསམ། །ཁྲོ་བོ་དེ་དག་རེ་རེ་ཞིང་། །བརྟན་པར་བྱ་ཕྱིར་གསང་སྔགས་བརྗོད། །དང་། ཨོཾ་དཀར་འཁོར་ལོ་དང་བཅས་པ། །ནས། རྡོ་རྗེ་དང་ནི་ནོར་བུ་ཡི། །འོད་ཟེར་འཁྲུག་པའི་རྣམ་པར་རོ། །སྐུ་དཀྱིལ་ལ་རྡོ་རྗེ་རིན་པོ་ཆེ་དང་། གསུང་ནོར་བུའི་འོད་ཟེར་ཅན་ཏེ། རྩིག་པའི་རྒྱུ་བཤད་པའོ། །ཕོ་བྲང་ནང་མ་ཟླུམ་པོ་ལ། །ནས། དྲག་པོའི་གནས་སུ་བསམ་པར་བྱ། །ཞེས་པའི་བར་དང་། དབུས་མའི་ནང་དུ་བཾ་ལས་ནི། །ནས། དེ་ལྟར་ཡབ་ཡུམ་རྫོགས་བསྐྱེད་ནས། །ཞེས་པའི་བར་དང་། མཁའ་གསང་བྱིན་གྱིས་བརླབས་བྱས་ནས། །ནས། དཀྱིལ་འཁོར་ལྷ་རྣམས་རྫོགས་པ་དག །ཅེས་པའི་བར་གྱིས་དང་། དེ་ནས་གཙོ་བོ་ཡབ་ཡུམ་དག །སྙོམས་པར་ཞུགས་པས་འོད་དུ་ཞུ། །ནས། ཨ་ཨི་ཞེས་པའི་བར་དང་། དེ་ལྟར་བསྐུལ་བར་གྱུར་པ་ལས། །ནས། བདུད་འདུལ་ཆེན་པོ་བརྒྱད་ཀྱི་བར། །དང་། སྐུ་གསུང་ཐུགས་ཀྱི་རྒྱས་གདབ་ཅིང་། །དང་། སྤྲོ་བ་དང་ནི་བསྡུ་བ་དང་། །དེ་ཉིད་བརྟན་དང་མཉེས་པར་བྱ། །ཡེ་ཤེས་གཞུག་དང་དབང་བསྐུར་དང་། །བྱིན་གྱིས་བརླབ་དང་འདི་རྒྱས་བཏབ། །མཆོད་པ་དང་། བདུད་རྩི་མྱང་དང་བསྟོད་ཅིང་བསྐུལ། །སྔགས་ཀྱི་རྟེན་བྱེད་བཟླས་པ་བྱ། །ཏིང་འཛིན་དོན་བསམ་ཉེ་བར་བསྡུ། །ཞེས་པ་རྣམས་ཀྱིས་སོ། །འདིར་བསྒྲུབ་པ་ཆེན་པོ་དང་འབྲེལ་བའི་བསྙེན་པ་སྟེ། རང་རིག་དམིགས་མེད་གཅིག་པུ་སྒྱུ་མ་ཙམ་དུ་ཁྱེར་བས་ཕྱི་ནང་གི་འཛིན་པ་མེད་པས་གསང་སྒྲུབ། དེའི་ཕྱིར་བསྐྱེད་རིམ་རང་རྐྱང་གི་དབང་དུ་བྱས་པ་ལ་བསྙེན་པ་བྱ་བའི་སྒོ་གསུམ་ཡོད་པས་མདོར་བསྟན་དུ། གསང་བ་ཞིང་སྐྱོང་རྒྱལ་པོ་ཆེ། །ཆོ་ག་གསུམ་གྱིས་བསྒྲུབ་པའི་ཚུལ། །ཞེས་གསུངས་ཤིང་། དེ་ཁའི་སྔོན་དུ། གསང་སྔགས་ཕྱོགས་བཅས་པ། །དེ་ཉིད་སེམས་དཔའ་སུམ་བརྩེགས་བསམ། །ཞེས་པའི་རྐང་པ་ཕྱི་མ་ཕྱི་མའི་བཟླ་དུས་ཀྱི་ཏིང་ངེ་འཛིན་ཡིན་ལ། གསང་སྔགས་ཕྱོགས་ཞེས་པ་བཟླས་ཚུལ་དམ་ཚིག་བཟླས་པ་སོགས་བཅུར་བཤད་པའི་དབང་དུ་བྱས་སོ། །བསྐྱེད་རྫོགས་ཟུང་འབྲེལ་དུ་བསྙེན་པའི་དབང་དུ་བྱས་ནས་དེའི་མཐར། འཇིག་རྟེན་འཇིག་རྟེན་འདས་པའི་བདག །ཐམས་ཅད་བདེ་ཆེན་གནས་པ་ལ། །དུས་གསུམ་འཁོར་ལོ་གསུམ་དུ་གནས། །བརཏལ་ཞུགས་འཛིན་པས་ཐོབ་པར་འགྱུར། །ཞེས་མདོར་བསྟན། དེ་ཡང་། གྲུབ་པའི་སློབ་དཔོན་ཆེན་པོ་ཙ་མི་སངས་རྒྱས་གྲགས་པས་སྦྱོར་བའི་འཕྲེང་བ་ཞེས་པས་གསལ་བར་བསྟན་པ། ཉོན་མོངས་པའི་བདུད་འཇོམས་པ་ལས་རླུང་འགོག་པའི་སྦྱོར་བ། ཕུང་པོའི་བདུད་འཇོམས་པ་འཛག་པ་བཅིང་བའི་སྦྱོར་བ། འཆི་བདག་གི་བདུད་གཞོམ་པ་བཅུད་ཀྱིས་ལེན་གྱི་སྦྱོར་བ། ལྷའི་བུའི་བདུད་གཞོམ་པ་སྒྱུ་འཕྲུལ་གྱི་སྦྱོར་བ། བདུད་བཞི་ཅིག་ཅར་དུ་གཞོམ་པ་བཙན་ཐབས་ཀྱི་སྦྱོར་བ་དང་ལྔའི་དང་པོ། དབྱུག་གུ་དག་པའི་ཕོ་ཉ་དང་། །ཆུ་ཚོད་ཀྱི་ནི་མི་མོ་དང་། །འཕོ་བ་གནོད་སྦྱིན་བརྒྱ་ཕྲག་གཉིས། །ཐུན་ནི་ཕོ་ཉ་བརྒྱད་དག་གོ །དུས་སྦྱོར་བཅུ་གཉིས་གནས་པའི་ཡུལ། །ཉི་ཤུ་རྩ་བཞི་དེ་ཡི་ཕྱེད། །རྩ་རླུང་ཡི་གེ་ཁམས་ལ་རྒྱུ། །འཆིང་གྲོལ་ཚར་བཅད་རྗེས་འཛིན་པའོ། །ཞེས་བཤད་པས། ལས་རླུང་འགོག་པ་ཚར་བཅད་དང་། །དབུ་མར་འཇུག་པ་རྗེས་འཛིན་ནོ། །སྦྱོར་བ་གཉིས་པ་ནི། ཁྱད་པར་ཡེ་ཤེས་བླ་མེད་པ། །དམ་ཚིག་མགོན་པོ་སྒྲུབ་པ་ཡི། །དམ་ཚིག་འདི་ནི་རྨད་པོ་ཆེ། །བདེ་བར་གཤེགས་པའི་ལམ་སྤྱོད་མཛད། །འདིས་ཐིག་ལེ་ཐུར་དུ་འཕོ་བ་དགག་པ་བུམ་པ་ཅན་བསྟན་ཏེ། བརྟག་གཉིས་སུའང་། དཔལ་ལྡན་དེ་བཞིན་ཉིད་གཤེགས་ཤིང་། །ཞེས་པས་ཡས་འོངས་ལ་འཆད། དེ་དགག་པ་བུམ་པ་ཅན་འཆིངས་པས་ཡིན་པའི་ཕྱིར་རོ། །བྱང་ཆུབ་སེམས་ཀྱི་ཟླ་བ་འདི། །ཡར་ངོ་མར་ངོར་རབ་ཏུ་གནས། །ཡར་ངོ་ཡིས་ནི་བསྐྱེད་བྱེད་ལ། །མར་ངོ་ལ་ནི་གྲིབ་པར་བྱེད། །ཡར་ངོ་ཡི་ནི་བཅོ་ལྔ་ལ། །བྱང་ཆུབ་སེམས་ཀྱི་མཁའ་འགྲོ་ཡང་། །བདེ་བ་ཆེན་པོར་འདུ་བར་མཛད། །འདི་ནི་ངེས་པའི་དོན་དུ་གསུངས། །ཞེས་པ་ཐིག་ལེ་གོ་བཟློག་ཏུ་གནོན་པ་སྲོག་ཐུར་བསྲེ་བའི་སྒོ་ནས་བསྒྲུབ་པར་བསྟན་ནོ། །སྦྱོར་བ་གསུམ་པ། གསང་བ་སྔགས་ཀྱི་འཁོར་ལོ་ལས། །ལྷ་ཡི་འཁོར་ལོ་རྒྱ་མཚོ་ནི། །ལན་ཚྭ་ཆུ་རྒྱུན་འབབ་པའི་ངང་། །ཞེས་པ་རྒས་པ་གཞོམ་པ་རླུང་ཟས་སུ་ཟ་བ། གངས་ཀྱི་ཐིགས་པ་བདུད་རྩིའི་ཆུ། །མེ་ཏོག་མདངས་གསལ་སྙིང་པོ་ཡི། །གེ་སར་ཟེའུ་འབྲུ་ལྡན་པ་ལ། །འདབ་རྒྱས་ཡེ་ཤེས་ཉི་ཤར་བས། །རང་གྲོལ་མདངས་འབར་རབ་ཏུ་རྒྱས། །ཞེས་པས་འཆི་བ་སྐྱེངས་སུ་གཞུག་པ་བདུད་རྩི་སྐོམ་དུ་བཏུང་བ་བཤད་དོ། །སྦྱོར་བ་བཞི་པ། རྡོ་རྗེ་རལ་གྲི་རིན་ཆེན་དང་། །འཁོར་ལོ་འབར་བའི་རྩིབས་དག་ལས། །ཞེས་པ་སྟོང་པ་ཉིད་རྣམ་པ་ཀུན་ལྡན་གྱི་ལྷའི་གཟུགས་གོམས་པར་བྱ་བ་བསྟན་ལ། འཁོར་བའི་རྒྱུན་ལས་འོད་ཟེར་འཕྲོ། །ཞེས་པས་མངོན་ཤེས་སོགས་མངོན་པར་འདོད་པ་བསྒྲུབ་པ་བསྟན་ནོ། །སྦྱོར་བ་ལྔ་པ། སྟེང་འོག་དག་ལས་རིམ་པ་ནི། །འཁྲུག་ཅིང་གཅོད་པའི་གྲི་གུག་གིས། །ལས་དང་འཕྲིན་ལས་རང་བྱུང་དུ། །བྱེད་ཅིང་སྤྲུལ་པའི་ལས་འགྲུབ་པ། །ཕྱི་ནང་གསང་བ་རིམ་བཞིན་དུ། །དབབ་དང་སྔགས་དང་བཟློག་པ་སྟེ། །རྩ་བ་ཡན་ལག་ལས་བཞིར་འགྱུར། །དང་པོ་ཐུན་མོང་དགུ་པ་སྟེ། །གཉིས་པ་བྱེ་བྲག་ཕྱེད་པ་དང་། །བསྐྱེད་པ་ཡེ་ཤེས་མི་བཟློག་པ། །ཀླུངས་སུ་ཚུད་པ་ཕྱག་རྒྱ་ཆེ། །སྙིང་པོ་གཅིག་ལ་དུས་གསུམ་དུ། །འགྱུར་མེད་དེ་ཉིད་དབྱེ་བ་ཉིད། །ཞེས་པས་ཕྱག་རྒྱའི་རྣལ་འབྱོར་བཤད་དོ། །དེ་ཡང་། དེ་ཁོ་ན་ཉིད་ཀྱི་སྒྲུབ་པ་སྟེ་དེ་ཕྱིར་སྒྲུབ་པ་བཞི་ལྡན་དུ་སོང་ངོ་། །མདུན་བསྐྱེད་ནི། དཀྱིལ་འཁོར་རྟེན་རྫས་ཐམས་ཅད་ལ་ཚིག་འདོན་པ་གཅིག་གིས། དམ་ཚིག་པ་བསྐྱེད། ཡེ་ཤེས་སེམས་དཔའ་གསུམ་བསྲེ། དབང་བསྐུར་བཟླས་པའི་བར་བསྙེན་པ་བཞིན་དུ་བྱ་བ་ནི། དེ་ནས་ལྡང་བར་གྱུར་པ་ན། །གཉིས་པ་ལྷ་རྣམས་ཐམས་ཅད་ཀུན། །སྐད་ཅིག་གཅིག་གིས་རྫོགས་བྱས་ཏེ། །དེ་ཡི་ངང་ལ་ཏིང་འཛིན་ནི། །གསང་བ་རྫོགས་པར་བྱ་བའོ། །ཞེས་པས་བསྟན་ལ། བུམ་བསྐྱེད་ནི་སྟ་གོན་བཞིན་དུ་བྱའོ། །རང་ཉིད་དམ་ཚིག་གསོ་བའི་ཕྱིར་ཡང་བདག་འཇུག་ལེན་ལ། གཞན་ལ་དབང་བསྐུར་ན་ངེས་པར་བླང་སྟེ། །སམྦུ་ཊར། སློབ་དཔོན་སྨིན་པའི་ལས་ཀྱིས་ནི། །སློབ་མ་ཡོངས་སུ་སྨིན་པར་བྱ། །ཞེས་སོ། །བསྐུར་བའི་དབང་ལ། སྔོན་འགྲོ་འཇུག་པ། དངོས་གཞི་དབང་བསྐུར། རྗེས་ཡོན་འབུལ་གསུམ། དང་པོ། འཇུག་པ་ལ་ཕྱི་རོལ། ནང་གསང་བའི་འཇུག་པ་གསུམ་གྱི་དང་པོ། ཁྲུས་དང་། མཎྜྻལ། གསོལ་བཏབ། སྡོམ་པ། མིག་དར་བཅིང་བ། སྟོད་གཡོགས་སྨད་གཡོགས་བསྐོན་པ། གཙུག་ཏོར་བཅིང་བ། མེ་ཏོག་འཕྲེང་བ་འཛིན་དུ་འཇུག་པ། དྲི་བ། ལན། རྣལ་འབྱོར་དུ་སེམས་བསྐྱེད་པའོ། །དེ་ཡང་། སློབ་མ་ཁྲུས་བྱས་རྒྱན་གདགས་ཏེ། །མཎྜྻལ་མེ་ཏོག་ཁྲུས་བྱ་ཞིང་། །རས་ཀྱི་མིག་ནི་བཀབ་ནས་སུ། །ཞེས་པས་དང་། ནང་འཇུག ཡོལ་བའི་ནང་དུ་ཁྲིད་པ། བསྐོར་བ། ཕྱག་བྱ་བ་སྟེ། མཚན་མ་མཐོང་བས་ལེགས་པར་དྲངས། །སྒོ་བཞི་ནས་ནི་ནང་འཇུག་ཅིང་། །ཞེས་པས་སོ། །གསང་འཇུག དམ་བཞག་བཞི། གསོལ་བཏབ། བྱིན་དབབ། མ་ཕེབས་ན་སྤོགས་ཆོག ཕེབས་ན་གཤེགས་གསོལ། ཁ་དོག་དྲི་བ། ལས་སོ་སོ་གྲུབ་པར་གོ་བར་བྱ་བ་དྲིས་སློབ་མ་བསངས། འཛབ། སྔར་བཟུང་བའི་མེ་ཏོག་བྱིན་གྱིས་བརླབས་ཏེ་དོར་བ། རིགས་འདིའོ་ཞེས་བརྡ་སྤྲད་པ། དེས་མེ་ཏོག་སློབ་མའི་མགོར་བཅིང་བ། མིག་དར་དགྲོལ་བ། དཀྱིལ་འཁོར་བརྟེན་པ་རྟེན་དང་བཅས་པ་བསྡུ་བ་ནི། སྐུ་གསུང་ཐུགས་ཀྱི་བྱིན་དབབ་པ། གུ་གུལ་བདུག་ཅིང་ཏིང་འཛིན་གྱིས། །ནག་པོ་ཆེན་པོའི་ལྷ་ཚོགས་ཀྱང་། །ངེས་པར་སྤྱན་དྲངས་བསྟིམ་པར་བྱ། །དེ་ལ་ངེས་པར་རྟགས་རྣམས་འབྱུང་། །ཡང་ན་སོ་སོའི་མགོན་པོར་བསྐྱེད། །ཡེ་ཤེས་སེམས་དཔའ་བྱིན་གྱིས་བརླབ། །བླ་མ་དཀྱིལ་འཁོར་གཙོར་བྱས་ལ། །འོད་འཕྲོས་རང་བྱིན་བརླབས་པར་འགྱུར། །མཐོང་བ་དྲི་དང་བདུད་རྩི་གཏོར། །གདོང་གཡོགས་བཀྲོལ་ཞིང་ལྷ་ངོ་བསྟན། །དང་། སྔར། དང་པོར་མེ་ཏོག་གཏོར་བར་བྱ། །དམ་ལ་བཞག་པ་བཞི་འདིའི་སྔོན་དུ་འགྲོ་བར་རྒྱུད་སྡེ་ཕལ་མོ་ཆེའི་ཕྱག་སྲོལ་ལ་ཡོད་ཅིང་རྒྱ་གཞུང་དུ་གསུངས་སོ། །ད་ནི་འདིར་ཅུང་ཟད་དཔྱད་ན། སྐྱབས་སུ་འགྲོ་བ་དང་བྱང་ཆུབ་ཀྱི་སེམས་རྣམ་པ་གཉིས་བསྐྱེད་པ་ནི་ཐུན་མོང་བའི་དབང་དུ་བྱས་པ་ཡིན་ལ། རྣམ་རྟོག་ཡེ་ཤེས་ལྔར་གྱུར་པས། །རྟག་ཏུ་བརྟེན་ཅིང་སྤྱད་པར་བྱ། །རྣམ་པར་རྟོག་པ་ལས་མི་མཐུན་ཕྱོགས་ལྟུང་བ་འབྱུང་བ་དང་། དེ་རང་བཞིན་ཡོངས་སུ་ཤེས་ན་བདེ་བ་ཆེན་པོ་ཡིན་པའི་ཕྱིར། རྣམ་རྟོག་བག་ཆགས་ཀྱིས་བཅིངས་པ། །རྟོག་པ་དག་པའི་ཐབས་མཆོག་ལྡན། །རྣམ་རྟོག་རང་བཞིན་ཡོངས་ཤེས་ནི། །དེ་ཉིད་ཐོབ་ཏུ་མེད་པ་སྟེ། །བདེ་བ་ཆེན་པོ་ཡང་དག་འབྱུང་། །ཞེས་སོ། །དེ་ཁ་ཡེ་ཤེས་ལྔའི་མདངས་སུ་ཤར་བས་རིགས་ལྔ། དེའི་དབང་གིས་འཕྲིན་ལས་ཐམས་ཅད་བྱ་བ་རྣལ་འབྱོར་པ་དེའི་བརཏལ་ཞུགས་ཡིན་པས། ཚིག་ཉུང་ཀྱང་དོན་རིགས་ལྔའི་དམ་ཚིག་དྲང་ངེས་ཀྱི་རྣམ་པ་ཐམས་ཅད་འཐོན་པ་ཡིན་ནོ། །ཡང་དག་བླ་མ་མཉེས་པར་བྱ། །འདིར་ནི་བྱང་ཆུབ་སེམས་ཀྱིས་སུ། །བསྙེན་པ་ཉེ་བར་བསྙེན་པ་དང་། །སྒྲུབ་པ་བསྒྲུབ་པ་ཆེན་པོ་ཡི། །ཁྱད་པར་རིམ་པ་རྟགས་དང་དུས། །ལས་ལ་སྦྱར་བ་ཤེས་པར་བྱ། །བླ་མ་མཉེས་པ་དངོས་གྲུབ་ཀྱི་གཞིའི་གནད། ལྟ་བ་ཕྱག་ཆེན་ལས་མ་གཡོས་པ་འཁོར་བ་གཅོད་པའི་གྱབས་ཀྱི་གནད། སྒོམ་པ་སྒོ་གསུམ་སྐུ་གསུམ་དུ་ཁྱེར་བ་རྩལ་སྦྱོང་གི་གནད། སྤྱོད་པ་ཅི་བྱེད་ཐབས་ཀྱིས་ཟིན་པས་བསྒྲལ་བྱ་དབྱིངས་སུ་འདྲེན་པ་གདུག་པ་འདུལ་བ་ལ་མཁས་པའི་གནད་བཞི་མ་སྟེ། འདིར་ཁྱད་པར་གྱི་དམ་ཚིག་ཏུ་བཞག་གོ །རྣལ་འབྱོར་དུ་སེམས་བསྐྱེད་པ་ནི། རྡོ་རྗེ་ཐེག་པར། སེམས་རྣམ་པ་གཉིས་ནི། ཀུན་རྫོབ་ཀུན་ད་ལྟ་བུ་དང་། །དོན་དམ་བདེ་བའི་གཟུགས་ཅན་ནོ། །ཞེས་པས། དེ་གཉིས་ལ་སློབ་ཚུལ་རྒྱུད་སྡེ་ཕྱི་མར། དང་པོ་ཟླ་བའི་དཀྱིལ་འཁོར་གྱིས་མཚོན་པ་དང་། གཉིས་པ་རྡོ་རྗེ་རྩེ་ལྔ་པས་སོ། །ནང་མར་དང་པོ་ནི་ཞུ་བ། གཉིས་པ་ནི་བདེ་བ། དེའི་ཕྱིར་ཞུ་བདེ་ལྷན་སྐྱེས་རྣལ་འབྱོར་དུ་འགྱུར་རོ། །དེ་ཙམ་འཇུག་པའི་དུས་སུ་བསྐྱེད་པས་བསྐྱེད་རིམ་ཙམ་གྱི་མཐར་ཡང་ཕྱག་རྒྱའི་རྣལ་འབྱོར་ལ་སློབ་ཏུ་རུང་བའི་གནད་ཤེས་པར་འགྱུར་རོ། །འདིར་དབབ་རྒྱུའི་ལྷ་ནི་དཔལ་རྡོ་རྗེ་ནག་པོ་ཆེན་པོ་ཉིད་དམ་ལས་ཀྱི་མགོན་པོ་ལ་སོགས་པ་ལས་གང་འདོད་པ་དབབ་པར་བྱའོ། །དངོས་གཞི་དབང་བསྐུར་ལ་བུམ་གསང་ཤེས་རབ་ཚིག་དབང་། རྡོ་རྗེ་སློབ་དཔོན་བདག་པོའི་དབང་ལྔའོ། །དེ་ཡང་གླེང་བསླང་དུ། འཁོར་བའི་སྡུག་བསྔལ་འཇོམ་པ་པོ། །ཞེས་པས། ལུས་ངག་ཡིད་ཡེ་ཤེས་ཀྱི་དྲི་མ་བཞི་འཁྲུད་པས་དབང་བཞིར་སོང་ལ། གང་ལ་དེ་བཞིའི་མ་རིག་པ་འགགས་པའི་ཡེ་ཤེས་སུ་གྲུབ་པ་ཉིད། རྡོ་རྗེ་སེམས་དཔའ་མཉམ་གྱུར་པའི། །ཞེས་པའི་ཚིག་གིས་བསྟན་ཏེ། དེ་ནི། རྡོ་རྗེ་སློབ་དཔོན་བདག་ཉིད་ཆེར། །དེར་འོས་ཏེ་ཐམས་ཅད་དུ་མ་རིག་པ་ལས་ལོག་པའི་ཕྱིར་སངས་རྒྱས་བཞིན་ནོ། །ཅིའི་ཕྱིར་རྡོ་རྗེ་སློབ་དཔོན་དུ་འོས་པ་ཞེ་ན། དངོས་གྲུབ་ཐམས་ཅད་སྟེར་བྱེད་པ། །ཞེས་པས། གཞན་དབང་བཞིས་ཁྲིད་པའི་སློབ་དཔོན་དུའོ། །འདིས་སེམས་འགྲེལ་གྱི་དགོངས་པ་བཞིན་བུམ་པའི་དབང་ལ་སློབ་དཔོན་དུ་གསུངས་པ་དྲང་དོན། དབང་བཞི་པའི་མཐར་དེ་སྟེར་བ་ངེས་པའི་དོན་དུ་བཤད་ལ། ཐམས་ཅད་དུ་སྤྲོས་པ་དང་བཅས་པ་དགོས་སམ་སྙམ་ན་མ་ཡིན་ཏེ། དཔོན་སློབ་ཀྱི་རྟེན་འབྲེལ་འགྲིག་ན་ཚིག་གཅིག་ལ་མ་བལྟོས་པར་ཡང་པྲ་བ་དང་མེ་ཤེལ་ཉི་འོད་གསུམ་འཛོམ་པའི་མེ་ལྟ་བུར་དབང་བཞི་མོད་ལ་འཐོབ་པའང་། འཕྲལ་དུ་ཡང་དག་ཡིད་ཆེས་བྱེད། །ཅེས་གསུངས་ལ། དེ་བས་ལམ་རྒྱུད་ལ་བརྟེན་པར་བྱ་བ་ཡང་། འདིར། བསམ་པ་གང་དང་གང་དག་གིས། །མི་རྣམས་སེམས་དང་མཐུན་པར་འཇུག །དེ་དང་དེ་ཡི་གཟུགས་སྤྲུལ་ཏེ། །སྣ་ཚོགས་གཡོགས་ཏེ་བདེ་བར་བཞུགས། །ཞེས་པས་འདྲེར་འཛིན་གྱི་རྟོག་པས་འདྲེ། ལྷར་འཛིན་གྱི་རྟོག་པས་ལྷར་འགྲོ་བར་བཤད་དེ། རྗེ་བཙུན་ལ། རྣམ་རྟོག་དགྲ་རུ་མ་ལངས་ན། །ང་བྲག་སྲིན་དགྲ་རུ་ཅི་ལ་སྡང་། །ཞེས་པ་བཞིན་དེ་བས་འདིར་ལྷག་པའི་ལྷར་བལྟ་བའི་དབང་དུ་བྱས་ནས། དཀྱིལ་འཁོར་དུ་འཇུག་པ་ནས་བརྩམས་ཏེ་བུམ་དབང་། དེའི་ལམ་ལ་བསླབས། དེ་ནས་གསང་དབང་དང་། དེའི་ལམ། དེ་ནས་གསུམ་པ་བསྐུར། དེའི་ལམ། དེ་ནས་བཞི་པ་བསྐོར། དེའི་ལམ། དེའི་མཐར་རྡོ་རྗེ་སློབ་དཔོན་དུ་སྐོར་བའམ། སྟན་ཐོག་གཅིག་ཏུ་བསྐུར་ཏེ་དེ་ཀས་གྲོལ་བར་བྱེད་ནུས་པས་སམ། མ་ནུས་ན་དེ་སྨིན་བྱེད་དུ་བཞག་ནས། ཕྱིས་དེ་ལ་གྲོལ་བྱེད་སྟོན་པ། དེ་ནས་དབང་པོའི་བྱེ་བྲག་གིས། །ངེས་པར་རིམ་པར་དབང་བསྐུར་བ། །འདི་ལྟ་བུས་ནི་དཔལ་རྒྱལ་བའི་དབང་པོས། དབང་བསྐུར། རྒྱུད་བཤད། མན་ངག་སྦྱིན་པའི་སྒྲོས་གསུམ་ལ་བསྟན་བཤད་བསྡུ་བའི་ཚུལ་གསུམ་དུ་བཤད་པས་དབང་བསྐུར་ཉིད་འཚང་རྒྱ་བར་བྱེད་པའི་གསེབ་ལམ་དངོས་དང་། རྡོ་རྗེ་ཐེག་པར་གྲོལ་ལམ་རིམ་པ་གཉིས་སོགས་བཤད་པ་ཡང་དབང་བསྐུར་ཉིད་དུ་ཤེས་ན་རྡོ་རྗེ་ཐེག་པའི་གསང་རིག་པ་ཡིན་ནོ། །ཞེས་དཔྱད་དོ། །དེ་ལྟ་བུའི་བུམ་པའི་དབང་དེ་ལ། གསོལ་བ་བཏབ་པ། བགེགས་སྦྱང་བ། རིགས་ལྔའི་དབང་། རྗེས་གནང་འདོགས་དང་བཅས་པའི་ཕྱིར་མི་ལྡོག་པའི་དབང་། འདོགས་ནི། སྐུ་གསུང་ཐུགས་ཡོན་ཏན་འཕྲིན་ལས། ལྷ་ཚོགས་རྣམས་ཀྱི་སྐུ་གསུང་ཐུགས་ཀྱི་རྗེས་གནང་དྲུག་གོ །དེ་དག་ཀྱང་། བསྟན་པ་འཛིན་ཞིང་བསྟན་པ་སྐྱོང་། །བསྟན་པ་སྲུང་བར་བྱེད་པ་ཡིས། །སངས་རྒྱས་བསྟན་པ་འཕེལ་མཛད་པ། །སྐུ་ཡི་མགོན་པོ་སོགས་བཅས་ཀྱིས། །བླ་མེད་དངོས་གྲུབ་སྦྱིན་པའི་ཕྱིར། །ཡང་དག་ཡེ་ཤེས་དབང་བསྐུར་རོ། །ཞེས་པས་རིགས་དྲུག་གི་དབང་ངོ་ཏི་དང་། །སྐུ་གསུང་ཐུགས་དང་ཡོན་ཏན་དང་། །འཕྲིན་ལས་ལྷ་ཡི་ཁྱད་པར་རོ། །ཞེས་པས་འདོགས་དྲུག་མདོར་བསྟན། མེ་ལོང་ཡེ་ཤེས་བདག་ཉིད་ཅན། །ནས། མཉམ་ཉིད་སོ་སོར་རྟོག་པ་དང་། །བྱ་བ་ནན་ཏན་ཆོས་ཀྱི་དབྱིངས། །ཡེ་ཤེས་ལྔ་ཡི་རིགས་ཀྱི་གཙོ། །ངེས་པར་དབང་བསྐུར་བསྟན་པར་བྱ། །འཕྲིན་ལས་བཞི་ཡི་དབང་ཡང་བསྐུར། །ལྷ་མོ་བརྒྱད་ཀྱི་ལས་རྣམས་སྒྲུབ། །ཞེས་པས་རིགས་ལྔ་དེའི་མཐའི་རྗེས་གནང་རྒྱས་པར་བཤད། བུམ་པ་སྤྱི་བོར་སྦྱིན་པ་དང་། །ཞེས་པས། ཕྱིར་མི་ལྡོག་པའི་ངོ་ཏི་དང་། །དེ་རྗེས་བ་ལིང་གཏད་པ་ཡིས། །ནུས་པ་ཐོགས་མེད་སྦྱིན་པ་ཡིན། །སྐུ་གསུང་ཐུགས་ཀྱི་གསང་བ་མཆོག །ལྷ་དང་སྔགས་ཀྱི་ཟབ་པའི་ཆོས། །ཏིང་འཛིན་ཆེན་པོའི་ཕྱག་རྒྱ་ཆེ། །འདོགས་རྒྱས་པར་བཤད་དོ། །དཀྱིལ་འཁོར་གྱི་ལྷའི་དབང་བསྐུར་བ་རྙིང་མའི་རྒྱས་འགེབས་སོ་སྙམ་པའང་དེང་ཕྱིན་དོར་ཞིག གསང་དབང་། མཎྜྻལ། གསོལ་བ་བཏབ་པ། མིག་དར། ཕྱག་རྒྱ་འབུལ་བ། མཁའ་གསང་བྱིན་གྱིས་བརླབས་ཏེ་སྦྱོར་བ་མཛད་པ། ཐིག་ལེ་ཕྱུང་དེས་གནས་བཞིར་ཐིག་ལེ་ཁར་སྦྱིན་ལ་མིག་དར་བཀྲོལ། དབང་དོན་བཤད་པ། ཐོད་པའི་བདུད་རྩི་བླུག་པ་ཡི། །ཐོད་པ་ནི། རྡོ་རྗེ་སློབ་དཔོན་གྱི་མགོ་བོའི། །བདུད་རྩི་ནི། དེར་གནས་པའི་བྱང་སེམས་སྦྱོར་བས་ཕབ་པ། དེ་བླུགས་པ་ནི་སློབ་མའི་ཁར་རོ། །དབང་གསུམ་པ་ནི། མཎྜྻལ། གསོལ་བཏབ་མིག་དར། ཕྱག་རྒྱ་གཏད་པ། ལྷ་བསྐྱེད། མཁའ་གསང་བྱིན་བརླབ། སྦྱོར་བ་བྱེད་དུ་བཅུག་ནས། མིག་དར་དཀྲོལ་བ། དེ་ཡང་། གསང་བ་བདེ་ཆེན་ཡེ་ཤེས་ཉིད། །ཅེས་པས་ཞུ་བདེ་དབང་གསུམ་པར་བྱས་ལ། བཞི་པ། མཎྜྻལ། གསོལ་བ་བཏབ་པ། དབང་དོན་བཤད་པ་སྟེ། རང་བྱུང་དྲི་མེད་དབང་བསྐུར་བའོ། །དེ་ཡང་ཞུ་བདེའི་ལྷན་སྐྱེས་འགྱུར་མེད་དུ་དག་ན་དེ་ཁ་དབང་བཞི་པ་ཡིན་ལ། དེ་ཡང་གསུམ་པར་ལྷན་སྐྱེས་བརྟན་ནུས་ན། དེར་སོ་སོ་རང་རིག་ངེས་པར་འོང་ལ། དེས་དངོས་གྲུབ་མཆོག་གི་རྒྱུད་རྙེད་པས་བདེ་མཆོག་ཏུ། ཡིད་ནི་ནང་དུ་ཆུད་པ་ཡིས། །འདོད་པའི་དངོས་གྲུབ་བསྒྲུབ་པར་བྱ། །ཞེས་འབྱུང་བས་སོ། །རྡོ་རྗེ་སློབ་དཔོན་གྱི་དབང་ལ། མཎྜྻལ། གསོལ་བཏབ། སློབ་དཔོན། པོ་ཏི་ལུང་སྦྱིན། བརཏལ་ཞུགས་གཉིས་སོ། །དེ་ཡང་། འདི་ཉིད་དངོས་གྲུབ་ཀུན་གྱི་གཏེར། །ཟབ་ཅིང་རྒྱ་ཆེ་དངོས་གྲུབ་པ། །སྐལ་བ་ཅན་ལ་སྦྱིན་པར་འོས། །ཞེས་པས་བསྟན་ནོ། །དེ་ཉིད་དུ། དངོས་གྲུབ་བསྒྲུབ་པའི་རྫས་བཀོད། ཐུན་མོང་གི་བསྒྲུབ་པ་བརྒྱད་བསྒྲུབ་པ་དང་འཕྲིན་ལས་གང་ཡང་རུང་བས་ཚར་བཅད་པའམ་ཕན་བཏགས་པ་བསྒྲུབ་པར་བྱ་སྟེ་ཟླ་བ་དང་ལོ་ལ་སོགས་པའི་བར་དུ་རྒྱུན་མི་འཆད་པས་སོ། །ཡང་འདིར་བསྒྲུབ་པ་ཆེན་པོར་འགྱུར་བ་ནི་ཚོགས་ཀྱི་དཀྱིལ་འཁོར་དུ་བྱ་བ་སྟེ། རྒྱལ་པོ་ཛས་ཇི་ལྟར་བསྒྲུབས་པའི་ཚུལ་བཞིན་གྱིས་ཐ་མལ་གྱི་སྣང་ཞེན་སྦྱངས། དག་པའི་སྣང་བ་བསྒྲུབས་ཏེ། སྦྲུལ་ལྤགས་པ་བརྗེ་བ་བཞིན་དུ་ཡེ་ཤེས་ཀྱི་སྐུས་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་རྒྱུ་བར་བྱའོ། །དེ་དག་ཀྱང་ལེའུ་ལྔ་པར། ཆགས་པ་མེད་པས་ཀུན་ཏུ་སྤྱད། །འདི་དེའི་རང་བཞིན་རྣལ་འབྱོར་པ། །ཞེས་འཕྲིན་ལས་སྒྲུབ་པ་སོགས་དང་། རིགས་མ་རྣམས་ལ་རོལ་བྱེད་ནའང་། །དེ་ཉིད་ཤེས་པ་བཅིང་མེད་དེ། །རྣམ་པར་རོལ་བའི་ཚུལ་མཆོག་གོ །ཞེས་གསུངས་པས་སོ།། །། གསུམ་པ་འཕྲིན་ལས་ཀྱི་ལན་ནི། འཕྲིན་ལས་ཁྱད་པར་གང་ཡིན་པ། །ལས་ལ་སྦྱོར་བ་རིམ་ཤེས་བྱ། །རེངས་པར་བྱེད་དང་སྐྲོད་པ་དང་། །རྨུགས་པར་བྱེད་དང་བརྒྱབ་ཏུ་འཇུག །ཐམས་ཅད་རྨོངས་དང་ལྐུགས་པར་བྱེད། །དུག་གིས་འཛིན་དང་འོན་ལོངས་དང་། །རང་ཤ་རང་གི་ཟ་བྱེད་ཅིང་། །གཤིས་ངན་དུག་དང་ཁྲག་ཏུ་སྐྱུག །འདི་དག་དུས་མིན་འཆི་བྱེད་པ། །ལས་ཀྱི་ཁྱད་པར་ཡོངས་སུ་བསྟན། །ཞེས་པའི་རྐང་པ་དང་པོ་གཉིས་ཀྱིས་ལས་སྤྱིར་བསྟན་ལ། ལྷག་མས་མངོན་སྤྱོད་མདོར་བསྟན་ནོ། །འཕྲིན་ལས་ལ་རྣམ་པར་དབྱེ་ན། ཞི་དྲག་གཉིས། ཞི་བ་ལ་ཞི་རྒྱས་གཉིས། དྲག་པོ་ལ་དབང་དགུག་མངོན་སྤྱོད་གསུམ། དང་པོ་གཉིས་གཅིག་ཏུ་བསྡུས་ན་ལས་བཞི། ཐུགས་རྗེ་འབྱུང་བར། དེ་ནས་ལས་ཆེན་དཔག་མེད་ཀྱང་། །བསྡུས་པ་ཞི་རྒྱས་དབང་དྲག་དང་། །ལྷ་དང་སྔགས་དང་དམིགས་པའི་གནད། །དེ་ཡི་གོ་རིམ་བཞི་བཞིར་འགྱུར། །ཞེས་སོ། ཕྱི་མ་ལ། བསད་པ་དང་། བསྐྲད་པ་དང་། དབྱེ་བ་དང་། ལུས་ངག་ཡིད་རེངས་པར་བྱེད་པས་གསུམ་དང་། སྲིད་སྐམ་པ་དང་། གསོ་བ་དང་། སྦྱིན་སྲེག་གི་ལས་རྣམས་ཨ་བྷ་ཡཱ་ཀ་རས་མཛད་པའི་མན་ངག་གི་ཡི་གེར་བྱུང་། དེའི་བསད་པ་ལ། བཞི་སྙིང་སྦས་པ་སྲོག་གཟེར་ནག་པོའི་རྒྱུད་དུ། སྤུ་གྲིས་བསད་དང་ཐུན་གྱིས་བསད། །སྙིང་གཟེར་དང་ནི་རེག་གཅོད་དང་། །ལྟོ་དཀྲུགས་དང་ནི་སྲོག་ཏིག་དང་། །འབྱུང་དཀྲུགས་དང་ནི་སྲོག་གཟེར་གྱིས། །བཞི་སྙིང་བསད་པ་རྣམ་པ་བརྒྱད། །ལྷ་དང་སྔགས་དང་དམ་རྫས་དང་། །དུག་དང་ཐུན་དང་འཁོར་ལོ་དང་། །གཏོར་མ་སྦྱིན་སྲེག་བཞི་བཞི་ཡི། །སྙིང་པོ་གཅིག་ཏུ་དྲིལ་ལ་བསད། །ཅེས་གསུངས་ལ། དེའི་བཞི་སྙིང་གིས་བསད་པ་བརྒྱད། དེ་ཉིད་དུ། གཏོར་མས་བསད་དང་སྦྱིན་སྲེག་དང་། །ཟོར་གྱིས་བསད་དང་མདོས་ཀྱིས་བསད། །མནན་པས་བསད་དང་ལྟས་ངན་དང་། །བཟློག་པས་བསད་དང་ཐུན་གྱིས་བསད། །ནག་པོ་གཏོར་མས་བསད་པ་ནི། །ནག་པོ་རྣམས་ཀྱི་ཤ་ཁྲག་ལ། །གཏོར་ཆེན་གཅིག་ལ་གཏོར་ཆུང་སྟོང་། །འབྲུ་སྣ་སྨན་དང་སྙིང་སྣ་སྟོང་། །ནག་པོའི་ཉི་མ་བདུད་འཆར་ལ། །བཞི་སྙིང་བཟླས་ཤིང་ཁྲག་ཐུན་གཏོར། །གཏོར་མ་རེ་ལ་དགྲ་གཟུགས་རེ། །སྔགས་རིང་དྲག་པོའི་དབལ་གྱིས་འབུལ། །དགྲ་བོ་གནས་པའི་ཕྱོགས་སུ་བསྐྱལ། །དེས་ནི་ལན་གསུམ་ཐལ་ནས་འཆི། །དུག་གི་ཚེར་མ་སྤུན་དགུ་ལ། །དྲག་པོའི་ཧོམ་ནག་ཟུར་སུམ་བྱ། །སྔགས་བྱང་ལིངྒ་རྩ་བརྒྱད་བྲི། །དུག་ཁྲག་སྙིང་འབྲུ་ནག་པོ་དགུ །བཞི་སྙིང་བཞི་སྟོང་བཟླས་པ་ཡི། །ཟླ་བ་མཐའ་མ་སྟོང་བཞི་ལ། །སྲེག་པ་ཉི་ཤུ་རྩ་བདུན་སྲེག །བུ་ག་དགུ་ནས་ཁྲག་གཟགས་ནས། །དགྲ་དེ་མ་ལུས་དུས་མིན་འཆི། །ཕུང་ས་ནག་པོ་སྤུན་དགུ་ལ། །ཟོར་གྱི་ཀོང་བུ་ཟུར་གསུམ་བརྒྱད། །ནག་པོའི་ཁྲག་བཀང་དུག་ནག་དང་། །འགོང་རྫས་ཡུངས་ནག་མཚེ་ནག་རྩང་། །དུག་མདའ་ནག་པོ་སྤུན་དགུ་ལ། །ཐན་སྒྲོ་སྐྱོན་རྡོ་དུག་ཁྲག་བྱུགས། །བཞི་སྙིང་སྟོང་བཟླས་དགྲ་ཡུལ་འཕང་། །དེས་ནི་དགྲ་རྣམས་ཁ་ཕུང་འཆི། །འབྲུ་སྣ་ནག་པོ་སྤུན་དགུ་ལ། །མི་ནག་དར་མདུང་ཐོགས་པ་བརྒྱ། །གནོད་སྦྱིན་ཐོགས་སེར་འཕེན་པ་བརྒྱ། །མ་མོ་ནད་རྐྱལ་ཐོགས་པ་བརྒྱ། །ཅེ་སྦྱང་འུར་པ་རྒྱུག་པ་བརྒྱ། །རྒྱང་བུ་མདའ་འཕང་རུ་དར་དང་། །ནམ་མཁའ་ཤིང་བྲིས་གདུང་བརྒྱ་དང་། །ཤ་ཁྲག་གཏོར་བཅས་བཞི་སྙིང་ནི། །བཞི་སྟོང་བཞི་བརྒྱས་རྦད་ལ་བཏང་། །དགྲ་རྣམས་དུས་གཅིག་བརླག་པར་འགྱུར། །གཏོར་ཆེན། ཧོཾ། ཟོར། ཟོར་མདོས་རྣམས་བཤད་ལ། ལྷག་མ་རྡིབ་གྲིར་གསོད་པ་དང་། དངངས་ཏེ་གསོད་པ་དང་། ལྷ་དང་དྲལ་ཏེ་གསོད་པ་དང་། སྦོས་གྲིར་གསོད་པའི་ཚུལ་རྣམས་གསུངས་སོ། །སྲོག་གཟེར་ནག་པོས་གསོད་པ་ནི་ཐོད་ནག་ཏུ་གྲགས་པ་སྟེ། ཙ་མིའི་ལས་སྦྱོར་ཆེན་པོ་གཙོ་བོ་དེས་དྲུག་མར་གྲགས་པ་ཁ་སྐོངས་སོ། །གཞན་ཡང་ཆར་དབབ་པ་དང་། སྤྲིན་དབྲལ་བ་དང་། ཐོག་དང་སེར་བ་དབབ་པ་དང་། རང་ཕྱོགས་སུ་ནི་བཟློག་ཅིང་བསྲུང་། །བྱད་ཁ་བཟློག་དང་ཁ་འཆིང་དང་། །ནུས་པ་གཞོམ་དང་ཆོ་འཕྲུལ་དང་། །ཕྲན་ཚེགས་ལས་ཀྱིས་བསད་པའོ། །དེ་དག་རྣལ་འབྱོར་པ་རབ་ཀྱི་དབང་དུ་མཛད་ནས་བསམ་གཏན་གྱིས་འགྲུབ་པ་ཞེས་གསུངས་ཏེ་རྫས་སྔགས་ཀྱི་བྱ་བ་ལ་མི་ལྟོས་པའོ། །འབྲིང་གི་དབང་དུ་མཛད་ནས་སྔགས་ཀྱིས་འགྲུབ་པ་ཞེས་གསུངས་ཏེ། བསྙེན་སྒྲུབ་མཐར་ཕྱིན་ནས་ལས་སྦྱོར་བྱ་བར་བཤད་པས་སོ། །མཐའ་མ་ལྷའི་སྟོབས་དང་རྫས་ཀྱིས་ཏེ། ལྷའི་སྟོབས་ནི། ཐུགས་རྗེ་འབྱུང་བར། གཙོ་བོ་ཡེ་ཤེས་མགོན་པོ་ལ། །མ་མོ་མཁའ་འགྲོས་བསྐོར་བ་ནི། །སྤྱི་བསྙེན་ཡིད་བཞིན་ནོར་བུ་ཡིན། །ལས་མགོན་ནག་པོ་མཆེད་བཞི་ལ། །གིང་ཆེན་ལྷ་མོས་བསྐོར་བ་ནི། །སྙིང་ཏིག་ནག་པོའི་སྲོག་བསྒྲུབ་ཡིན། །དཔེར་ན་མྱུར་མཛད་ལ་དབང་ཕྱུག་ཛི་ན་མི་ཏྲ་ལ་སོགས་པ་གིང་གིས་བསྐོར་བ། གདོང་བཞི་པ་ལ་སྲིང་མོ་ལྷ་མོ་བཞིས་བསྐོར་བ། ཧཱུྃ་མཛད་ལ་ལྷ་དང་གཤིན་རྗེ་དང་བདུད་དང་གནོད་སྦྱིན་བརྒྱད་དམ་ལས་ཀྱི་མགོན་པོ་གདོང་ཅན་བཞིས་བསྐོར་བ་བཤད་པའོ། །བཀའ་སྡོད་ནག་པོ་མཆེད་བརྒྱད་ལ། །ཕོ་བརྒྱུད་དྲེགས་པས་བསྐོར་བ་ནི། །ལྟོ་དཀྲུགས་གསང་བའི་མན་ངག་ཡིན། །མགོན་པོ་སྟག་ཞོན་ལ་སོགས་པའི་སྒེར་སྒྲུབ། རོ་ལངས་དམར་མོ་སྤུན་བདུན་ལ། ཤ་ཟ་བྱེ་བས་བསྐོར་བ་ནི། །སྙིང་གཟེར་ནག་པོའི་སྒྲུབ་པ་ཡིན། །འདིར་རོ་ལངས་དམར་མོ་ནི་ལས་ཀྱི་ཙཎྜྻི་ཀ །དེའི་མཆེད་མཁའ་འགྲོ་དྲུག །གསང་བའི་ཡུམ་ཆེན་མ་བདུན་ལ། །དབང་ཕྱུག་མ་མོས་བསྐོར་བ་ནི། །ཙིཏྟ་གསང་ཐུན་དྲག་སྔགས་ཡིན། །དབྱིངས་ཡུམ། སྦྱོར་ཡུམ། སྒྲོལ་ཡུམ། རེ་མ་ཏི་བཞི་རྣམས་གཙོ་བོ་ཉིད་དང་སྦྱོར་བའི་ཕྱིར་མ་བདུན་ནོ། །ལས་ཀྱི་གཤན་པ་མཆེད་བཞི་ལ། །ནག་པོ་སྟོང་གིས་བསྐོར་བ་ནི། །གཤེད་པོ་ལྟོ་དཀྲུགས་དྲག་སྔགས་ཡིན། །གཟའ་ཀླུ་བཙན་གིང་། བདུད་མགོན་ནག་པོ་སྤུན་གསུམ་ལ། །མུན་པའི་བདུད་མོས་བསྐོར་བ་ནི། །ལྕམ་དྲལ་སྲོག་ཏིག་དྲག་སྔགས་ཡིན། །བདུད་མགོན་ནི་ཤ་ཟ་སེང་གདོང་ཡིན། སྤུན་གསུམ་ནི་ལྒ་ལོས། དུག་གསུམ་མགོན་པོ་སྤུན་གསུམ་གྱི་བཙན་དུ་བཤད་པ་སྟེ། ཞེ་སྡང་གི་མགོན་པོ་སེང་གདོང་། གཏི་མུག་གི་མགོན་པོ་ལྕགས་མགོ་ནག་པོའམ་འཇིགས་བྱེད་དུས་མཚན་ནག་པོ། ད་ལྟ་ཞིང་སྐྱོང་གི་འཁོར་དུ་རྫུ་བའི་བམ་རོ་འདི་ཀ་ཡིན། འདི་ལ་ལེགས་ལྡན་གྱི་རྒྱུད་དུ་ཡང་ལེགས་ལྡན་ཉིད་ཁྲོས་པར་བཤད་ཡོད་དོ། །འདོད་ཆགས་ཀྱི་མགོན་པོ་ལས་གཤིན། རོ་ལངས་དྲག་པོ་སྨྱོན་པ་ལ། །མཁའ་འགྲོ་དྲུག་གིས་བསྐོར་བ་ནི། །སྤུ་གྲི་རེག་གཅོད་དྲག་སྔགས་ཡིན། །འདི་མུ་སྟེགས་གུ་ལང་ཡིན། དེ་ཀ་ལ་ལྷ་ཆེན་པོ་ཤྲཱི་རལ་པ་ཅན། དབང་ཕྱུག་ཁྲག་རལ་ཅན་ལ་སོགས་པར་གྲགས། སྒོ་མཚམས་ཀྱི་མཁའ་འགྲོ་བརྒྱད་ཀྱི་ལས། ལྷ་མོ་བྱ་རྒོད་མགོ་ཅན་མས་རེངས་པའི་ལས་བྱེད་དོ། །སོགས་དང་། ཞིང་སྐྱོང་རྣམས་ཀྱིས། དེ་དག་གྲུབ་པའི་རྣལ་འབྱོར་མ། །དངོས་གྲུབ་སྩོལ་བར་ཐེ་ཚོམ་མེད། །སོགས་དང་། རྒྱལ་པོ་བཞི་ལ། ཕྱོགས་བཞི་ཡོངས་སུ་སྐྱོང་བ་ཡི། །ནས། སངས་རྒྱས་བསྟན་པ་སྲུང་བྱེད་པ། །འདི་ཉིད་གྲུབ་པ་སྟེར་བྱེད་པའོ། །ཞེས་པའི་བར་དང་། འདི་ཉིད་དུ། རྣམ་སྲས་ཀྱིས་རྒྱས་པའི་ལས་གྲུབ་པ་མང་དུ་བཤད་པ། གྲི་གུག་བརྩེགས་པར། གང་པོ་མཛེས་མའི་སྒྲུབ་པ་བཤད་པ་ནི་གནོད་སྦྱིན་མིང་སྲིང་ཡིན་ལ། སྲིང་མོ་ལ་རྫོང་གི་ལྷ་མོ་ཞེས་བྱ་བའི་རྒྱུད་དུ་མར་བསྔགས་ཏེ། དེ་ཡང་སྔགས་སྟོབས་ཀྱིས་བཀུག་ནས། དེས་མཁའ་སྤྱོད་དུ་འཁྱེར་བར་བཤད་པ་ལྟ་བུ་སོགས་རེ་རེས་ཀྱང་ལས་ཐམས་ཅད་ནུས་ཀྱང་གཙོ་བོར་དེ་དང་དེ་ལ་བསྔགས་སོ། །རེ་མ་ཏེ་བཞི་གཞན་དུ་བཤད་པའི་སྒོ་མ་བཞི་ཡང་ཡིན་ཏེ། ཤར་གྱི་ལྷ་མོ་འཕྲོག་བྱེད་མས་འགུགས་པའི་ལས་བྱེད་དོ། །ལྷོའི་ལྷ་མོ་གླང་སྣ་མས་འཆིང་བའི་ལས་བྱེད་དོ། །ནུབ་ཀྱི་ལྷ་མོ་རལ་པ་ཅན་གྱིས་སྡོམ་པའི་ལས་བྱེད་དོ། །བྱང་གི་ལྷ་མོ་སའི་གཙུག་གིས་མྱོས་ཤིང་དབང་དུ་བྱེད་དོ། །ཞེས་པས་སོ། །གཞན་གསུང་དཀྱིལ་གྱི་སྒོ་བ་ལ་སོགས་པའི་ལྷའི་སྟོབས་ནི་ཁྲག་མཚོ་ཁོལ་མ་སོགས་ལས་བཤད་དོ། །དོན་དུ་ལྷ་གཅིག་ཉིད་ཁ་དོག་ཕྱག་མཚན་ལ་སོགས་པའི་དབྱེ་བས་ལས་སོ་སོར་བསྔགས། དཔལ་ཡེ་ཤེས་ཀྱི་མགོན་པོ། རྟག་པའི་རྡོ་རྗེས་དུས་མ་ཡིན་པའི་འཆི་བ་དང་། ནད་གདོན་འཇོམས་པས་ཞི་བ་དང་ཚེ་སྒྲུབ། མགོན་པོ་འཇམ་པའི་རྡོ་རྗེས་ཤེས་རབ་དང་རྒྱས་པ། ཆགས་པའི་རྡོ་རྗེས་དབང་བསྡུད་དང་དགུག་པ། ཞེ་སྡང་རྡོ་རྗེས་མངོན་སྤྱོད། འཕྲིན་ལས་ཐམས་ཅད་པའི་རྡོ་རྗེས་ལས་ཐམས་ཅད་པར་རོ། །དེ་ནས་སྦྱིན་སྲེག་གིས་བསྒྲུབ་པའི་དབང་དུ་མཛད་ནས། དཀྱིལ་འཁོར་བའི་ལྷའི་འཕྲིན་ལས་ཀྱི་རྣལ་འབྱོར་དང་ལྡན་པས་ཞི་བའི་ལས་བསྒྲུབ་པ་ལ་ནི་བིལ་བ་ལ་སོགས་པའི་སྦྱིན་སྲེག་བརྒྱ་རྩ་བརྒྱད་དུ་བྱའོ། །འབྲས་ལྡན་གྱི་ཤིང་གང་ལས་རྒྱས་པའི་ལས་བསྒྲུབ་ན་སྟོང་ཕྲག་གིས་བྱའོ། །ཁ་དི་རའི་ཤིང་དང་དམར་བའི་ཤིང་གིས་ནི་དབང་བསྒྲུབ་ན་ཁྲི་ཕྲག་གི་བྱའོ། །ཤིན་ཏུ་རྩུབ་པའི་ཚེར་མ་དང་ལྡན་པའི་ཤིང་དག་གིས་ནི་མངོན་སྤྱོད་ལ་འབུམ་ཕྲག་གིས་བྱ་བར་ཤེས་སོ། །ཞེས་སོགས་ལས་སོ་སོ་ལ། ཁྱད་པར་གྲི་གུག་བརྩེགས་པར། སྦྱིན་སྲེག་མེ་ལྷ་མཆོད་པ་དང་། ཐབ་ཁུང་སྲེག་རྫས་ཡམ་ཤིང་དང་། །འདུག་ཕྱོགས་གོས་དང་ཕྱག་རྒྱ་བསམ། །སྔགས་དང་སྤེལ་ཚིག་འཕྲིན་ལས་བཅོལ། །གཏོར་མ་མཆོད་པ་གོ་རིམ་བཞིན། །ཀུན་ལ་སྦྱར་བ་ཤེས་པར་བྱ། །ཞེས་དང་། དྲག་པོ་ལ། ལས་གསང་བར། ལིངྒ་མང་ན་གནད་མི་ཕེབས། །སྲེག་རྫས་མང་ན་ལས་ཀྱང་འགྱངས། །སྔགས་མང་རང་ལ་བཟློག་དེའི་ཕྱིར། །ཞེས་གསུངས་པ་དང་། རྫས་ཀྱིས་འགྲུབ་པ་ནི་བསྐྲད་པ་ལ་ཤིང་གི་ལོ་མ་རླུང་དམར་བྱུང་བའི་ཚེ་ས་ལ་མ་ལྷུང་བ་བླངས་ཏེ་གཟུགས་བརྙན་བྲིས་ནས་ཡུལ་གཞན་གྱི་ཧོར་པ་ལ་བཏགས་ཏེ་བཏང་བར་བྱའོ། །སོགས་ཀྱིས་དང་འཕྲུལ་འཁོར་གྱིས་འགྲུབ་ལ། །མར་ངོ་ཡི་ནི་ཚེས་བརྒྱད་དམ། །གཟའ་སྐར་ཤིན་ཏུ་དྲག་པོ་ལ། །དེ་ནས་འཁོར་ལོ་བྲི་བར་བྱ། །སོགས་ཀྱིས་སོ། །འཁོར་ལོ་ཡང་། ཞི་རྒྱས་ལ་ཡིག་མགོ་ཕྱི་དང་། དྲག་པོ་ལ་ནང་། དེས་ན་དབང་ཡང་དྲག་པོའི་དབྱེ་བར་དགོངས་ནས་གནོད་སྦྱིན་འཁོར་ལོ་ལྟ་བུ་ལ་དབུ་རུག་མ་མཛད། །མོ་འོག་ཕོ་སྟེང་དུ་རྣམ་པ་ཐམས་ཅད་དུ་བཤད་དོ། །རབ་གནས་ནི། འཁོར་ལོ་དགུག་བྱ་གཉིས་མེད་བསྟིམ། །སོགས་ཀྱིས། རྟེན་དང་བླ་རྡོའི་འཁོར་ལོ་ཐམས་ཅད་སྲོག་གི་རང་བཞིན་ཡིན་པས་ཆགས་པའི་རྟེན་ནམ་འདུ་བའི་རྐྱེན་དུ་དམིགས། བསད་པའི་འཁོར་ལོ་ནི་མཚོན་ཆའི་དབལ་དུ་ནག་པོ་དགྲ་བགེགས་ཀྱི་སྲོག་ལ་འདེབས་ཀྱིན་འཁོར་བ། མནན་པའི་འཁོར་ལོ་བསྒྲུབ་བྱ་ལིངྒར་བསྟིམ། དེའི་ལུས་ངག་ཡིད་གསུམ་རི་རབ་སོགས་ཀྱིས་མནན་པའོ། །དབྱེ་བ་ནི་ཕན་ཚུན་དུ་དབྱེ་བྱ་དེའི་བར་དུ་རླུང་ལྷ་ཡབ་ཡུམ་སྲས་འགོང་པོ་ལ་སོགས་པ་མི་མཐུན་པ་ཐམས་ཅད་ཀྱིས་དབྱེ་བ། བསྐྲད་པ་རླུང་གི་དཀྱིལ་འཁོར་གྱི་ཁར་བསྒྲུབ་བྱ་རྔ་མོང་ལ་བསྐྱོན་ཏེ་རྒྱ་མཚོའི་མཐར་བསྐྱལ་བ་སོགས་སུ་དམིགས་པས་ལྷག་མ་རིགས་འགྲེའོ། །ཕོ་འཁོར་གཡས་མོ་འཁོར་ གཡོན། །འགའ་ཞིག་ལས། སྔགས་ཕོ་ལ་མགོ་ཕྱི། མོ་ལ་ཡིག་མགོ་ནང་དུ ་བསྟན་པར་ཡང་བཤད་དོ། །འདིར་སྔགས་ཀྱིས་འགྲུབ་པ་ནི། ལས་སོ་སོའི་སྔགས་ཤེས་དགོས་ཏེ། དེ་ཡང་། ཞི་བ་ལ་མཱ་ར་ཡ། བསད་པ་ཤཱནྟིཾ་དུག་ཏུ་འགྱུར་བ་ལྟ་བུས་སོ། །ཏིང་ངེ་འཛིན་གྱིས་བསྒྲུབ་པ་ཡང་། སྤུ་གྲི་ཀླད་གཟེར་ནག་པོར། རང་གི་ཐུགས་ཀའི་ཧཱུྃ་ལ་སྔགས་ཀྱི་བསྐོར་བར་བསམས་ལ། ཞི་བ་ལ་ཡི་གེ་ཁ་དོག་དཀར་པོ། རང་གི་ཞལ་ནས་མགོན་པོའི་ཞལ་དུ་ཞུགས་པར་བསམ། མགོན་པོའི་ཐུགས་ཀ་ནས་བརྒྱུད་པ་ལ་ཞི་བའི་ལས་བཅོལ་བ་ལ་མགོན་པོ་མི་བསྙེལ་བ་དང་། བར་དུ་གདོན་གང་ཞི་བར་བྱེད་པའི་ཞི་བ་དང་། རང་གི་ཐུགས་ཀ་ནས་བརྒྱུད་པ་དེ་རང་གི་ཉོན་མོངས་པ་ལ་སོགས་པ་ཞི་བར་བསམ་མོ། །རྒྱས་པའི་སྐབས་སུ་ཡི་གེ་སེར་པོ་ལ་འཁོར་ལུགས་གོང་བཞིན་དུ་གསུངས་པ་ལས། མགོན་པོའི་ཐུགས་ཀ་ནས་འཁོར་དུས་སུ་རང་གིས་རྒྱས་པའི་ལས་བཅོལ་བ་ལ་མི་བསྙེལ་བ་དང་། རང་གི་ཐུགས་ཀ་ནས་འཁོར་བའི་དུས་སུ་ཚེ་དང་དཔལ་ལ་སོགས་པ་རྒྱས་པར་བསམ། དབང་གི་དུས་སུ་ཁ་དོག་དམར་པོ་མགོན་པོའི་ཞལ་ནས་རང་གི་ཞལ་དུ་ཞུགས་པར་བསམ། མགོན་པོའི་ཐུགས་ཀ་ནས་འཁོར་དུས་དབང་གི་ལས་བཅོལ་བས་མི་བསྙེལ་བར་བསམ། བར་དུ་འཁོར་དུས་གང་དབང་དུ་བྱ་བ་རྒྱལ་པོ་ལ་སོགས་པ་དབང་དུ་གྱུར་པ་བསམ། རང་གི་ཐུགས་ཀ་ནས་རྒྱུ་དུས་སུ་གང་དབང་དུ་བྱེད་པ་དེ་དབང་དུ་གྱུར་པར་བསམ། མངོན་སྤྱོད་ཀྱི་དུས་སུ་ཡི་གེ་ཁ་དོག་ནག་པོ་ལ་འཁོར་ལུགས་དང་པོ་དང་འདྲ། མགོན་པོའི་ཐུགས་ཀ་ནས་འཁོར་དུས་སུ་མངོན་སྤྱོད་ཀྱི་ལས་བཅོལ་བས་མི་བསྙེལ་བར་བསམ། བར་དུ་འཁོར་བའི་ཚེ་དགྲ་བགེགས་ལ་སོགས་པ་རྣམས་བསད་ཅིང་གཏུབ་པར་བསམ། རང་གི་ཐུགས་ཀ་ནས་འཁོར་བའི་དུས་སུ་རང་གི་བར་ཆད་ཞི་བར་བསམ་ཞེས་དང་། ལས་ཐམས་ཅད་པ་ལ་ནམ་མཁའ་དང་མཉམ་པའི་རྒྱུད་དུ། སྙིང་གར་པད་ཉིའི་སྟེང་དུ་ཧཱུྃ། །ནག་པོ་དེ་ལ་རྩ་སྔགས་ཀྱིས། །བསྐོར་བར་བསམས་ཏེ་བཟླ་དུས་སུ། །སྔགས་འཕྲེང་འཁོར་བར་བསམ་ཞིང་བཟླ། །འོད་ཟེར་ལྔ་འཕྲོས་ལས་བཞི་འགྲུབ། །ཁྱད་པར་དུ་ཡང་གདུག་པ་རྣམས། །ཚར་བཅད་དབང་དུ་བསྡུས་པར་བསམ། །ཞེས་སོ། །གཞན་ཡང་ཁམ་ཟས་གོས། འདུག་སྟངས་དུས། གཟའ་སྐར། ཕྱག་རྒྱ་མ་ལ་སོགས་པའི་སྟོབས་ཀྱིས་བསྒྲུབ་པ་སོ་སོར་ཤེས་པར་བྱ་སྟེ། གྲི་གུག་བརྩེགས་པར། བསྙེན་པ་ཚེས་གསུམ་བརྒྱད་དང་ནི། །བཅུ་བཞི་ཉེར་གཉིས་བརྒྱད་ལ་སོགས། །ལས་སྦྱོར་དྲང་སྲོང་དབང་བྱེད་དང་། །མགོན་པོ་རྒྱུ་དུས་འཕྲིན་ལས་ནི། །སྒྲ་གཅན་གྱིས་ནི་ལས་བྱེད་པ། །དེ་དུས་སྦྱོར་བ་བྱེད་པར་བརྟག །ཉིན་ཞག་ཆ་ལས་རབ་དབྱེ་བས། གནས་སྐབས་རྟགས་དང་སྦྱར་བར་བྱ། །སོགས་ཀྱིས་སོ། །ཕྱག་བཞི་འཕྲིན་ལས་བཞི་ཡིན་པས་དེའི་ཕྱག་མཚན་བཞི་ལས་དེ་དག་ཇི་ལྟར་བསྒྲུབ་པ་ནི། གྲི་གུག་བརྩེགས་པར། རོ་ལངས་ཀྱི་ནི་ལྕེ་ལྟ་བུར། །གཤིན་རྗེའི་ལྕེ་འདྲའི་གྲི་གུག་གི །རལ་གྲིའི་དངོས་གྲུབ་ཕྱག་མཚན་ཉིད། །སྟོབས་ཆེན་དཔའ་བོའི་ཟིལ་གནོན་ཆེ། །ཐམས་ཅད་ཟིལ་གནོན་བཟློག་པའོ། །ཁ་ཊྶཱཾ་ག་ལས་སྐུ་གསུམ་སྟེར། །ཡེ་ཤེས་ཐུགས་རྗེ་ཞི་བ་ཉིད། །ཡང་ན་རྩེ་གསུམ་འཇིགས་བྱེད་པ། །གདུག་པ་ཅན་རྣམས་ཚར་གཅོད་བྱེད། །ཡེ་ཤེས་བདུད་རྩིའི་རྒྱུན་ཕབ་ནས། །འཚེ་བ་འབྱུང་བ་ཀུན་ལས་བསྲུངས། །ཐོད་པའི་སྣོད་ནི་བཟང་པོ་རུ། །བདུད་རྩིའི་རྫས་བསྒྲུབ་དངོས་གྲུབ་བླང་། །ཁ་སྦྱར་ཏིང་འཛིན་སྤྲོ་བསྡུ་ཡིས། །རིལ་བུ་སྦྱར་བས་མཆོག་ཏུ་སྟེར། །རཱ་ས་ཡ་ན་བཅུད་ཀྱིས་ལེན། །འཆི་མེད་གྲུབ་པའི་རྡོ་རྗེ་འཐོབ། །ཅེས་པས་གྲི་གུག་དང་རལ་གྲི་ལས་མཐུན་པར་བཤད་ལ། གོང་དུ། རྣལ་འབྱོར་པ་ལ་གྲུབ་སྟེར་བའི། །ལས་ཀྱི་སྣ་ཚོགས་པ་ཞེས་པ་བེ་ཏའི་འབྲས་བུ་ལ་སྦྱར་བ་ཡིན་ནོ། །དེ་བས་ན་གྲི་གུག་དང་བེ་ཏ་མཐའ་གཅིག་ཏུ་ངེས་པ་མེད་པར་བླ་མ་རྣམས་གསུང་ངོ་།། །། བཞི་པ་ཐབས་ལས་ཀྱི་ལམ་རིམ་པའི་དྲིས་ལན་ནི། ཐབས་ནི་ལས་ཀྱི་རིམ་པ་སྟེ། །རྟེན་གྱི་གང་ཟག་འགའ་ཞིག་གིས། །དང་པོར་བླ་མ་མཉེས་པར་བྱ། །གཉིས་པར་དབང་བཞི་ཐོབ་པ་དང་། །གསུམ་པར་བྱིན་གྱིས་བརླབས་ནས་ནི། །བཀའ་བསྒོ་རྗེས་གནང་ཚུལ་བཞིན་དུ། །མ་ནོར་འཇུག་པའི་ལམ་རིམ་ཤེས། །བླ་མ་མཉེས་པ་དང་། དབང་བཞི་ཐོབ་པ་དང་། རྡོ་རྗེ་སློབ་དཔོན་དུ་བྱིན་གྱིས་བརླབས་པས། བཀའ་བསྒོ་ཞེས། རྒྱལ་བས་བསྟན་པ་བསྲུང་བར་རོ། །རྗེས་སུ་གནང་བ་ནི་གསང་སྔགས་ཀྱི་ལས་རིམ་མོ། །དེ་ཡང་། །མངོན་སྤྱོད་མཐུའི་དབང་དུ་བྱས་པ་སྟེ། བསྲུང་བཟློག་བསད་གསུམ། སྲེག་འཕང་མནན་གསུམ་སྟེ་ལས་དྲུག་ཏུ་བསྡུ་ལ། བསྲུང་བ་ནི་དམག་གོ་བགོ་བ་ལྟ་བུ། བཟློག་པ་དམག་བཤམ་པ་ལྟ་བུ། བསད་པ་གཡུལ་ངོ་སྤྲད་པ་ལྟ་བུ། སྲེག་འཕང་མནན་པ་མཚོན་ཆ་སྣ་ཚོགས་ཀྱིས་ཕ་རོལ་འཇོམས་པ་ལྟ་བུའོ། །འདི་དག་བུམ་དབང་དང་འབྲེལ་བ་ཙམ་གྱི་ལས་ཡིན་པ་ལ། དབང་བཞི་དང་རྡོ་རྗེ་སློབ་དཔོན་གྱི་དབང་ཐོབ་པ་ཅིའི་ཕྱིར་བཤད་སྙམ་ན་བསྒྲལ་འདྲེན་ནུས་པའི་དབང་དུ་བྱས་པ་སྟེ། འབད་པས་སྙིང་རྗེ་བསྐྱེད་པ་ཉིད། །བསད་པར་བྱ་བ་བརྗོད་པ་ཉིད། །སྙིང་རྗེ་མེད་ན་མི་འགྲུབ་པས། །དེ་ཕྱིར་སྙིང་རྗེ་བསྐྱེད་པར་བྱ། །ཞེས་པས་སོ། །དེ་ལ་ཡང་བསྙེན་སྒྲུབ་ལས་སྦྱོར་གསུམ། བར་པ་འབོད་རྦད། ཕྱི་མ་ལ་བསད་པ། དེ་ཡང་ལས་གསང་བར། དང་པོ་འབོད་ལ་ཞག་བདུན་བྱ། །དུས་ནི་བཅུ་གཅིག་དག་ལ་ཤིས། །རྟགས་ནི་རྣམ་པ་གསུམ་ཡིན་ཏེ། །རབ་ནི་དངོས་སུ་འོང་བ་ཡིན། །འབྲིང་ནི་སྒྲ་རུ་སྟོན་པ་ཡིན། །མཐའ་མ་རྨི་ལམ་དག་ཏུ་འོང་། །དེ་ནས་རྦད་པ་ཞག་བདུན་བྱ། །དུས་ནི་ཉི་ཤུ་གཉིས་ལ་ཤིས། །རྟགས་ནི་རབ་འབྲིང་གསུམ་དུ་འོང་། །མོན་དང་ཨཱ་ཙ་ར་ནག་པོ། །རྒོད་ཅིང་ཅི་བྱ་ཟེར་འོང་རབ། །ལྕགས་སྤྱང་ཁང་ཕྱིར་བསྐོར་བྱས་འབྲིང་། །བྱ་ནག་མོན་པས་འཁོར་ཞིང་ལྡིང་། །མཐའ་མའི་རྟགས་སུ་ཤེས་པར་བྱ། །དེ་ནས་བསད་པ་ཞག་བདུན་བྱ། །དུས་ནི་ཉི་ཤུ་བཞི་ལ་ཤིས། །རྟགས་ནི་རྣམ་པ་གསུམ་དུ་འདོད། །ཤིང་གཅོད་རོ་གཅོད་ཤ་བསྐོས་རབ། །ཞུབ་ཅན་དམག་སྣ་འདྲེན་པ་དང་། །ཁྱི་ནག་དྲུང་འོང་འབྲིང་གི་རྟགས། །ལིངས་དང་ཁྱི་ར་བྱེད་པ་ནི། །མཐའ་མའི་རྟགས་སུ་ཤེས་པར་བྱ། །རྟགས་འོག་ཏུ་རྒྱས་པར་བཤད་དེ་རྒྱས་པ་ཐུགས་རྗེ་འབྱུང་བར། དེ་ཡི་ལས་མཐའ་ཡང་དག་བཤད། །བརྒྱད་ཚན་བརྒྱད་ཀྱི་གོ་རིམ་ལས། །གནད་འཆིང་གེགས་དང་བླ་རྡོ་ནི། །གསང་བའི་ལས་ཆེན་ཉིད་དུ་གསུངས། །མཆོད་དང་ལས་ཚོགས་ཆ་ལག་ནི། །ནང་གི་ལས་ཚོགས་ཡིན་པར་བཤད། །མཐའ་གནད་བརྒྱད་ཅེས་ཕྱི་ཡི་ལས། །ཞེས་པའི་ཕྱིའི་བརྒྱད་ནི། ལྷའི། གསང་བའི། སྔགས་ཀྱི། བསྲུང་བཟློག་གི རྫས་ཀྱི། རྟགས་ཀྱི། མཚང་ཚིག་བསྐུལ་བའི། དམ་ཚིག་བསྲུང་བའི་གནད་བརྒྱད་ལ་མཐའ་གནད་བརྒྱད་ཅེས་གསུངས་སོ། །དང་པོ་ནི། སྤྱིར་ཡེ་ཤེས་པའི་རྩལ་གསུམ་གྱི་བསྙེན་པ་རྫོགས་པར་བྱས་ལ། སྒོས་སུ་ལས་གང་བྱེད་ཀྱང་སྒྲུབ་པའི་སྔོན་དུ་བསྙེན་པ་ཁ་གསོ། ཕོ་བསྒྲུབ་ན་མོ་ནི་འཁོར་དང་ལས་བྱེད་ལྟ་བུར་དམིགས། སྔགས་ནི་ཕོའི་ཤམ་བུར་མོ། མོ་བསྒྲུབ་ན་མོ་ནི་ཡུམ་མམ་འཁོར་གྱི་ཚུལ་དུའམ་ཆུང་མའམ་སྲིང་མོ་ཚུལ་དུ་བསྙེན་ན་སྙིང་ཉེ། ཕོ་རྗེ་བོ་ལྟ་བུ་ལ་མོ་བྲན་གྱི་ཚུལ་དུ་བསྟེན་ན་ལས་མྱུར། ཐུགས་རྗེ་འབྱུང་བར། ཕོ་ནི་ནག་པོ་བདུད་ཀྱི་རིགས། །དྲག་ཅིང་མྱུར་ལ་རྩུབ་པར་འགྱུར། །མོ་ནི་དཀར་མོ་ལྷ་ཡི་རིགས། །འཇམ་ཞིང་རྣོ་ལ་འགྱང་བར་འགྱུར། །ཕོ་བསྒྲུབས་མོ་རྟགས་འབྱུང་བ་ན། །དེ་ཡི་དགྲ་རྣམས་ཕུང་བར་འགྱུར། །མོ་བསྒྲུབས་ཕོ་རྟགས་བྱུང་བ་ན། །དེས་ཀྱང་དགྲ་རྣམས་ཕུང་བར་འགྱུར། །ཞེས་སོ། །ཞེས་སྤྱིར་ཕོ་མོ་རྟེན་ལ་གནས་པ་ཕྱི་ནང་གསང་བའི་རྟེན་བླ་རྡོ་སྲོག་འཁོར་ལུས་ལ་བསྲེལ་བའོ། །ཡེ་ཤེས་ཀྱི་ལྷ་འགྲུབ་དཀའ་བས་འཇིག་རྟེན་ལས་བྱེད་ཤམ་བུར་གདགས་སོ། །བསྙེན་དུས་གང་བསྒྲུབ་ཀྱང་གཏོར་མ་དང་། སྙིང་སྣ། ཁྲག བདུད་རྩི་རྣམས་ཀྱིས་མཆོད་ཅིང་། དུང་བ་བསྐྱེད། བསྙེན་པའི་སྔགས་ཆུ་བོའི་གཞུང་བཞིན་བཟླ་ཞིང་། ཟོ་དལ་བར་བྱ། བསྙེན་པ་ལ་དྲགས་ན་རྦད་བསད་ཀྱིས་དུས་དུབ་ནས་སུན་འགྲོ་བ་ཡིན་ལ། འདི་དུས་དམིགས་པ་འདི། བདག་གཉེན་པོ་དང་ལས་བྱེད་བདག་མདུན། ཐུགས་ཀའི་སྔགས་ཀྱི་འོད་ཟེར་ཕར་འཕྲོ་ཚུར་འཕྲོ། ལྷག་པར་དྲེགས་པའི་མཐུ་སྟོབས་ཐམས་ཅད་དམ་ཅན་དེ་ལ་བསྟིམ་གཟི་བརྗིད་དང་ལྡན་པར་བསམ། ཡང་ཡང་མཆོད་ཅིང་བསྟོད་དབང་དུ་བསྡུ་བའི་ཕྱག་རྒྱ་ཡང་བསྟེན། མཐའ་ཚིག་བརྗོད་པས་ཤིན་ཏུ་འདྲིས་པར་བྱ་བ་སྟེ། དཔེར་ན་མི་གཅིག་ལ་གྲོགས་པོ་འཚོལ་བར་འདོད་ན་དང་པོར་འདྲིས་བཙལ། འདྲིས་ནས་བཟའ་བཏུང་ནོར་སྦྱིན། དེ་ནས་མནའ་ཐོ་སྦྲེལ་བ་འདྲ་བ་ཡིན་ནོ། །དེ་ལྟ་བུའི་བསྙེན་པས་རང་རྒྱུད་པ་ལ་གནས་ན་མི་ཡོང་བའི་དབང་མེད་དེ། སྔོན་རྒྱལ་བའི་སྤྱན་སྔར་ཁས་བླངས་པ་ཡིན་པས་བཀའ་ལས་འདའ་མི་སྲིད་པའོ། །རྦད་པ་མི་དེ་ལ་གླ་བྱིན་ནས་ལས་ཀྱིས་ཟེར་བ་ལྟ་བུ། བསད་པ་ནི་མི་དེས་དེ་ལ་ཉན་ནས་ལས་ལ་ཞུགས་པ་ལྟ་བུའོ། དེ་ཡང་རྦད་དུས་མཐུན་པའི་དམ་རྫས་སྦྱིན་ལས་བཅོལ་བས་རང་རྒྱུད་པར་འདུག་པའི་དབང་མེད་དོ། །རྦད་པའི་སྔགས་ནི་སྲོག་འཕེན་པར་བྱེད་པའི་ཕྱིར། སྔོན་གྱི་མཐའ་ཚིག་དྲན་ནས་ལས་བྱེད་དོ། །གསང་སྔགས་ནི་མཚོན་ངར་མ་དང་འདྲ་སྟེ་དམིགས་བྱའི་ལུས་སྲོག་འབྲལ་བར་བྱེད་པའོ། །དེ་ཡང་འབོད་པའི་དུས་སུ་སྔགས་དང་ཏིང་ངེ་འཛིན་གྱིས་ཚུར་འགུགས། རྦད་པའི་དུས་སུ་ཕར་བསྐུལ་ཏེ་དགྲའི་བླ་དགུག་པའི་ཕྱིར་རྦད།། །། གཉིས་པ་གསང་བའི་གནད་ནི། མཐུ་གཏད་ཀྱི་ལས་གང་བྱེད་ནའང་། རྟེན་གྱི་ལས་ཁྱིམ། གནད་ཀྱི་སྲོག་ཁྱིམ། བཏགས་ཆགས་ཀྱི་རྫས་ཁྱིམ། རྟོགས་པའི་རྟ་ཁྱིམ། སྲིད་པའི་གཏེར་ཁྱིམ། རྫུ་འཕྲུལ་གྱི་སྦྲ་ཁྱིམ་རྣམས་ཀྱི་དོན་གོ་ཞིང་ཤེས་དགོས། དེ་དག་ཏུ་སྡེ་བརྒྱད་ཀྱི་གནས་ལུགས། སྲོག་ལས། སྡེ་བརྒྱད་དུ། དབྱེ་བའི་རྒྱུ་མཚན་སྒྲུབ་པའི་ཐབས་རྣམས་སྟོན་པ་ཡིན་ནོ། །གཞན་ཡང་ལས་བྱེད་མཁན་དེ་གསངས་ནས་གཞན་ལ་ཁ་འཆོལ་བ་སྟེ། དཔེར་ན་གཟའ་ལ་ཆོས་སྐྱོང་སྙིང་ཏིག་ཡིན་ན་དེ་གསངས་ནས་ཀུན་ཏུ་གིང་ཆོས་སྐྱོང་གི་གཙོ་བོ་ཡིན་ཟེར་བ་ལྟ་བུའོ། །ཡང་བསྟེན་གྱི་མེད་རྒྱུ་བར་ཡང་གསང་ངོ་། །དེ་ལྟར་མ་བྱས་ན་གཞན་གྱིས་རྩད་བཅད་ནས་ཞུ་འགྲས་འདུས་བཟློག་སླ་བ་ཡིན། གཞན་ཡང་གསང་སྔགས་གསངས་བས་གྲུབ། མ་གསངས་ན་འཆལ་ཏེ་ཆོས་སྐྱོང་ནུས་པ་ཆུང་འཕྲིན་ལས་བཅོལ་ཀྱང་ཞུམ་ནས་ལས་འགྱང་བ་ཡིན་ནོ།། །། གསུམ་པ་སྔགས་ཀྱི་གནད་ནི། བསྙེན་སྔགས་ལ། རྦད་དང་ཐུན་དང་ཡཱ་གསུམ་སྤང་། །དུང་དུང་བྲེང་བྲེང་ཛཿཛཿགཞུག བསྒྲུབ་དུས་སྭཱ་ཧཱ། བཟློག ཧཱུྃ་ཧཱུྃ་སྤངས་ཏེ། བྷྱོ་བྷྱོ། ཐུན་ཐུན། ཡ་ཡཱ་གདགས་ལས་སྦྱོར། །ནྲི་ཛཿ མཱ་ར་ཡ། སྲོག་ལ་ཧུར་ཐུཾ་གདགས་པ་ལྟ་བུ། བཟླ་ལུགས། བསྙེན་དུས་ཆུ་བོའི་རྒྱུན་འབབ་ལྟ་བུ། སྒྲུབ་པ་དྲག་ལ་མི་བསྲུན་པར་རི་གཟར་གྱི་རྦབ་ལྟར་བཟླ། ལས་སྦྱོར་ནི་ཅེ་སྤྱང་ཤ་ལ་རོལ་པ་ལྟར་བཟླ་སྟེ་རྔམས་ལ་སྙིང་རྗེ་མེད་པའོ། །འབོད་པ་སྤང་ལ་མེ་མཆེད་པ་ལྟར་བགྲང་། །རྦད་པ་མགར་གྱི་ཚ་ཚ་འཕྲོ་བ་ལྟར་བགྲང་། བསད་པ་དུག་གི་ཆར་འབབ་པ་ལྟར་བགྲང་། །མནན་པ་དུག་ལོ་འཁྱིལ་བ་ལྟར་བགྲང་། །ཟོར་སྔགས་རལ་གྲི་སོ་འདེབས་པ་ལྟར་བགྲང་། །སྦྱིན་སྲེག་ཧོཾ་སྤོར་བ་ལྟར་བགྲང་བར་བཤད་དོ། །དྲེགས་པ་ཕོ་མོ་ཐམས་ཅད་ཀྱི་ཐུགས་ཀ་ནས་མི་འགྱུར་བའི་སྲོག་ལ། སྔགས་ཕོ་བརྒྱུད་ལ་གཡས། མོ་བརྒྱུད་ལ་ གཡོན་དུ ་འཁོར་ཏེ་གནས་པ་བཞིན་བསམ། བཟློག་དུས་འོད་ཟེར་ཚ་ཞིང་རྩུབ་པས་སྲོག་གནད་ནས་བསྐུལ་བར་བསམ། བཞི་པ་བསྲུང་བཟློག་གི་གནད་ནི། བསྲུང་བའི་འཁོར་ལོ་ཐམས་ཅད་སྔགས་མགོ་ཕྱི། བསྲུང་བྱ་དབུས། བཟློག་པའི་འཁོར་ལོ་ཐམས་ཅད་སྔགས་མགོ་ནང་། བསྲུངས་བཟློག་སྦྲགས་མ་ལ་སྤེལ་མར་དྲག་སྔགས་ཀྱི་གཞུང་མང་པོར་བཤད་དོ། །སྔགས་པ་ནང་རྒྱས་བྱུང་ན་རང་དང་འཁོར་མ་ཀུན་ལ་གདགས། ཁོའི་བསྲུངས་མ་ལ་གསེར་སྐྱེམས་གཏང་། བདེན་པ་བདར། ཤགས་གདབ་དཔང་གཟུགས། ཁོའི་ལིངྒ་ལ་ཐུན་དང་ཕུར་པ་གདབ། སྲོད་ལ་ཁོའི་བསྲུངས་མ་བཟློག་པའི་ལས་བྱས། ནམ་ཕྱེད་ལ་བླ་སྲོག་དགུག་ཅིང་བསད་པའི་ལས་བྱ། ཐོ་རངས་ཟོར་དྲག་པོ་འཕང་ངོ་། །ལྔ་པ་རྫས་ཀྱི་གནད་ནི་བཞི་སྟེ། འབོད་རྫས། མཆོད་རྫས། བསྐང་རྫས། རྟེན་རྫས་ཏེ། དེ་དག་ཚོགས་ན་དམ་ཅན་རང་བཞིན་དུ་འདུ་ཞིང་ལས་ཅི་བསྒོ་བ་བྱེད་དོ། །གཞན་ཡང་ལས་དང་མཐུན་པའི་རྫས། ཟོར། སྲེག་རྫས། མནན་རྫས་ཚང་བར་དགོས་སོ། །དེ་ལ་དང་པོ་སྙན་པ་དབྱངས་དང་རོལ་མོ་སྣོམ་པ་གསུར་ཆེན་སོགས་དྲི། སྤྱན་གཟིགས་རྐུན་ཆེན་ལག་པ་ལ་དར་སྣ་བཏགས་པ་དེ། མདའ་ལ་བརྒྱན་པའི་གཡབ་དར། ཁྲག་མཚོ་ཁོལ་མར། བྷཾ་པཾ་སཾ་བཾ་གྷཾ། མི་རྒོད་གཏུམ་པོ་ཙྭཽ་ར་པའི། །ལག་གཡས་དཀྱིལ་དུ་འཁོར་ལོ་ནི། །རྩིབས་ལྔའི་ཡིག་འབྲུ་ཁ་དོག་ལྔ། །སོར་མོ་ལ་ནི་མཚན་སྔགས་དགོད། །མགུལ་པར་སྤེལ་ཚིག་དབང་སྡུད་བྲི། །གྲིར་ཤིའི་ལག་སོར་དར་སྣ་ལྔ། །འབྲུ་སྣའི་ཚོམ་བུ་དགོད་དང་དྲིལ། །ཞེས། འདི་སྤྱིར་དབང་དུ་སྡུད། ཁྱད་པར་འབོད་པའི་རྫས་གཙོ་བོར་བླ་མའི་མན་ངག་ལས་ཤེས་སོ། །དམ་ཚིག་གཙང་མར། གདུང་བའི་ཤུགས་རྣམས། གཉིས་པ་སྤྱན་གཟིགས་སྟེང་དུ་གདུགས་བླ་བྲེ་སོགས་ཡོལ་བ་ལྡ་ལྡི་མདའ་དར་འཕན་ལྷ་ལྷུབ། ཕྱེ་ཕུར། དགྲ་ཆ། དཀོར་ཆ། རྒྱན་ཆ་དང་། ལས་དང་མཐུན་པའི་མཆོད་པ། དེའི་གཙོ་བོ་སྨན་རཀ་གཏོར་མའོ། །གསུམ་པ་ཕྱི་ལྟར་བསྐང་བ་མདོས། ནང་ལྟར་བསྐང་བ་གཏོར་མ་ཡས་ཐགས་དེར་དར་འབྲུ་སྣ་རིན་པོ་ཆེ་སྙིང་སྣ་ཚོགས་པས་བརྒྱན་པ། མདོས་ཆོག་ཏུ་གསང་བ་མདོས་ཞེས་འབྱུང་བའི་གསང་བ་ནི་སྔགས་ཀྱི་དམ་རྫས་ཡིན་པ་ལ་དགོངས་སོ། །གསང་བ་ཆོས་དང་རྗེས་སུ་མཐུན་པར་ཆོས་བསྒྲུབ་པ་དང་། ཚོགས། འདི་ལ་དང་པོར་མཆོད། བར་དུ་བཤགས་ཤིང་སྐོང་། མཐའ་མར་གདབ་པ་བཤད་པའི་མཐའ་མ། །མ་ཉམས་གྲིར་ཤིའི་བམ་བླངས་ལ། །མ་ཏྲཾ་རུ་དྲ་བསྟིམ་ནས་ནི། །སོགས་བམ་གྱི་བསྐང་བ་བཤད་པ་འདིར་བསྡུས་པའི་དབང་དུ་བྱས་པའོ། །རྟེན་རྫས་བླ་རྡོ་ཡིན་པས་འོག་ཏུ་འཆད་དོ། །འཇུག་པ་རྟགས་ཀྱི་གནད་ནི། དམ་ཅན་གྲུབ་པའི་རྟགས་མ་བྱུང་བར་ལས་ལ་བརྫངས་ཀྱང་མངགས་པའི་གནས་སུ་མི་འགྲོ། འགྲུབ་པ་ཡང་རྟགས་ཀྱིས་གསལ་ལ། དེ་ཡང་དམ་ཅན་གང་བསྒྲུབས་ཀྱང་སྔོན་ལ་བགབ་འདྲེའི་རྟགས། དཔེ་དཀར་དང་གཟའ་ལྟ་བུ་ལ་ཐེའུ་རང་། ཚོགས་བདག་ལ་སེང་གདོང་ལྟ་བུ། མོ་བརྒྱུད་ལ་ཏེ་ཕུར་མའི་ཆོ་འཕྲུལ་འོང་བས། དེ་རྣམས་བྱུང་བ་བར་ཆད་ཡིན། དེ་ནས་འཁོར་གྱི་འདྲེ་སྲིན་རྣམས་ཀྱི་ཆོ་འཕྲུལ་འོང་བས་ཡིད་བརྟན་མི་རུང་། རྗེ་དཔོན་ཉིད་ཀྱི་རྟགས་བྱུང་ན་ཡིན། དེ་ཡང་ཕོ་བསྒྲུབ་ན་རྨི་ལམ་དུ་སྐད་རིགས་མི་གཅིག་པ། མཛའ་བོ་བརྟེན་པ་དང་། ཐོ་བཅད་པ་དང་། ཡུལ་གྱི་མི་ཆེན་དང་། བློན་པོ་ཞང་བློན་དང་། བོན་པོ་མི་རེང་མང་པོ། ཞུབ་ཅན། ཕ་ཁུ། གཙོ་བོ་སྟག་ཤར། བྲོ་པ། བརྩད་པོ། བཙུན་པ། བྱིས་པ། མོན་རྒྱ། རྟ་པ། སྟག་སེང་། མི་ནག གྲིབ་སོ། མུན་པ། མེ་འབར། ཆུ་བྲུབ་པའོ། །མངོན་སུམ་དུ་ཡང་འོང་། ཤུག་པ། འཚེར་བ། བརྡ། འབོད་པ། ཁང་པ་འཚེག་པ། སྒོ་ཁྲོག་པ། མེ་སྟག་འཕྲོ་བ། རྡོ་འཕེན་པ་སོགས་སོ། །མོ་བརྒྱུད་ལ་བརྩད་པོ་བྱེ་མོ་མ་སྲིང་ཆུང་མ་མཛའ་མོ། བུད་མེད་གཡུ་ཞུ་ཅན། ཅོད་ཐོད་ཅན། སྨ་ར་ཅན། གཅུགས་པ། བུ་མོ་ཤོན་བྱེད་པ། རྒྱ་མོ། བལ་མོ། མོན། འབྲི་རྒོད། གཡག་རྒོད། བྱ་མང་པོ། མོ་རིགས་མང་པོ། དགོ་བ། གཉན། ཕྱག་བྱེད་པ་སོགས་བཀུར་སྟི། རྦད་རྟགས་དམག་ལ་ཆས་པ། མཁར་བརྩིག་པ། གོ་གྱོན་པ། མདའ་གསིར་བ། མཚོན་བརྡར་བ། འཆིངས་བྱེད་པ། དམག་འདྲེན་པ། བྲག་གཤོག་པ། ཤིང་གཅོད་པ། རྩྭ་འབྲེག་པ། མེ་སྤོར་བ། ཆུ་བྲུབ་པ། རླུང་ཆེན་གཡོ་བ། ཁྲོམ་ཆེན་སྡུད་པ། མི་མང་པོས་བདག་ལ་དགའ་སྟོན་བྱེད་པ། དེ་ལྟར་བྱུང་ན་ལས་ལ་ཚུད་པ་ཡིན་ནོ། །བསད་རྟགས། དགྲ་ཕོ་མོ་དངོས་བསད་པ་དང་། ར་ལུག་སོགས་སྲོག་ཆགས་བསད་པ། རྩི་ཤིང་གཅོད་པ། རི་དྭགས་རྒྱ་ལ་འཐུམས་པ། འདབ་ཆགས་རྙི་ལ་ཟིན་པ། ཁྲོམ་ཤ་འགྱེད་པ། ཁྲག་བསྐྱིལ་བ། པགས་པ་བཏིང་བ། མགོ་བྲེགས་པ། གློ་སྙིང་ཟ་བ། དམག་ཚོགས་ཡུལ་མཁར་བསྒྱེལ་བ། གོ་ཅན་འཁྲུག་པ། མཚོན་རྣོན་པོ་བསྲེལ་བ། མི་མང་པོ་གཡུལ་སྤྲོད་པའི་བཤམ་རྭ། རི་སྙིལ། སེམས་ཅན་མང་པོ་ཤི་བ། ཆུ་ཆེན་པོས་ཡུལ་གྲོང་བཤིག་པ། བདག་གིས་དུང་ཕུ་བ། རྔ་བརྡུང་བ། དར་འཕྱར། གསོ་བཏབ་པ། བྲུབ་ཁུང་ནང་དུ་རྐང་རྗེས་བྱུང་བ། ཤི་དྲི་མནམ་པ། སེམས་ཅན་བརྡུང་བ། དེ་དག་ཀྱང་ལན་རེ་ལན་གཉིས་ཀྱིས་མི་ཆོག་ཤིན་ཏུ་བསྟན་པ་དགོས་སོ། །རང་འགྲོ་སྙིང་འདོད་པ། སྙིང་མི་དགའ། སྒྲུབ་ཁང་ལ་ཡིད་མི་ཆགས་པ། སེམས་སྤུར་བ། འཇིགས་ཤིང་སྐྱི་གཡའ་བ། བག་གྲང་བ། རྨི་ལམ་དུ་བུད་མེད་རྫུད་པ། སྤྲང་ལོང་། བུད་མེད་ཆགས་པ་དགུག་པ་བྱུང་ན་དམ་སྲིའི་རྟགས། དགོངས་པ་བསྐྱེད། སེམས་དགུག ཕྱག་རྒྱ་གསལ་བཏབ། དམ་སྲི་མནན། ཛ་བརྡུངས་བྱ། བཟླས་བརྗོད་སྒྲིམ། ཁྲོ་ཞིང་ཚིག ལྷ་འདྲེ་ནང་འཁྲུག བདག་ལ་གནོད་ན་དམ་ཅན་འཁྲུགས་པས་བསྐང་བཤགས་བྱ། ཚོགས་གཏོར་བཟང་དུ་བཏང་ངོ་། །གཉིད་རྨུགས་མྱོས་པ། བྱེད་སྙིང་མི་འདོད་པ། ཁམས་མི་བདེ་བ། སྲུངས་མ་ཡེལ་ལེ་བྱས་མི་འཁོར་ན་ཉམས་གྲིབ་ཁོན་གྲིབ་མི་གཙང་པ་ཕོག་པ་ཡིན་པས་ཁྲུས་བཤགས་བསྡམ་གྲིབ་སེལ་གང་ཐུབ་བྱའོ། །རེས་ཉེ་རེས་རིང་། རེས་བཟང་རེས་ངན་ན་ཡིད་གཉིས་སོམ་ཉི། སྙོམས་སེམས་ལེ་ལོ་གཉིད་རྨུགས་ཀྱི་སྐྱོན་ཡིན་པས་ཐེ་ཚོམ་བཅད། ཡིད་ཆེས་དམ་ཅན་ལ་གདུང་བ་སྐྱེད། དགྲ་བོ་ལ་གནག་པ་མ་ཡེངས། བརྩོན་པས་དམ་ཅན་ལ་འབོད་པ་བྱའོ། །དྲེགས་པ་གང་བསྒྲུབས་ཀྱང་ལྟས་བཟང་བ་ལ་དགའ་བ་མི་སྐྱེ། ངན་པ་ལ་སྡུག་སྣང་མི་བྱ། འཇིགས་པ་ལ་ཡ་ང་སྤངས་ཏེ་དོགས་པ་མེད་པར་བརྩོན་པར་བྱའོ།། །། བདུན་པ་མཚང་ཚིག་བསྐུལ་བའི་གནད་ནི། བསྙེན་པ་མ་འཐེམས་བར་དུ་ལས་ལ་མི་བསྐུལ། བསྙེན་རྟགས་རྫོགས་ནས་སྒྲུབ་པ་ལ་བླ་རྡོ་བསྲེལ། མཆོད་གཏོར་བཟང་དུ་བྱ། དུས་བཞིར་བསྐུལ། ཐུན་བཅའ། ལིངྒ་བྲུབ་ཁུང་དུ་བཅུག ལྷ་དབྱེ་བླ་འཁྱམས་པའི་དུས་སུ་རྣམ་ཤེས་དགུག་ལ་བསྟིམ། བསྐུལ་བ་ལ་བྱུང་ཁུངས་སྐྱེ་བརྒྱུད་ནས་བསྐུལ་བ། མཚང་ཚིག་གནད་ནས་བསྐུལ་བ། ཆེ་བརྗོད་བསྟོད་པས་བསྐུལ་བ། ཕྱག་རྒྱ་གསལ་འདེབས་ཀྱིས་བསྐུལ་བ། མཐའ་ཚིག་གདུང་ཤུགས་ཀྱིས་བསྐུལ་བའོ། །བསྙེན་སྒྲུབ་མ་འཐེམས་བར་བསྐུལ་ཡང་ལས་མི་བྱེད། འཐེམས་ནས་དུས་རྒྱུན་དུ་བསྐུལ། རང་ལ་དགྲ་མེད་ན་བསྟན་པའི་སྤྱི་དགྲ་ལ་བསྐུལ། མ་བསྐུལ་ན་རང་ལ་འཚེ་ཞིང་འཁོར་ལ་གཟན། བསྟན་པ་ལ་གནོད་ངེས་པའི་རིམ་གྲོ་བ་མི་བྱ། བྱས་ན་རང་དམ་ཚིག་ཉམས་པར་འགྱུར་རོ།། །། བརྒྱད་པ་དམ་ཚིག་བསྲུང་བའི་གནད་ནི། སྤྱིར་སྔགས་ནས་བཤད་པའི་རྩ་ལྟུང་གིས་མ་ཕོག་པ། བྱེ་བྲག་རྩ་བ་གསུམ་ཡན་ལག་ལྔ། རྩ་བ་གསུམ་ནི་བསྐྱེད་རིམ་བསྒོམ་པ། བཟླས་བརྗོད་བྱེད་པ། ཏིང་ངེ་འཛིན་ལ་མཉམ་པར་འཇོག་པའོ། །ཡན་ལག་ལྔ་ནི། སྐུའི་ཡན་ལག་ཏུ་བྲིས་སྐུ་སོགས་སྐུ་བརྙན་བསྲེལ་བ། གསུང་གླེགས་བམ། །ཐུགས་ཕྱག་མཚན། ཡོན་ཏན་ཚོགས་གཏོར་སོགས་རྒྱུན་ལོ་ཟླ། འཕྲིན་ལས་སྡེ་བརྒྱད་རང་རང་གི་གཞུང་ནས་བཤད་པ་ལྟར་བསྟེན་ནོ། །གཞན་མི་འགྲུབ་པའི་ལས་མི་འཆོལ། འགྲུབ་པ་རྣམས་ཕྱི་བཤོལ་དུ་མི་བཞག དཔེར་ན་འབོད་རྟགས་བརྟན་པོ་བྱུང་ནས་རྦད་མ་ཤེས་པ་དང་བླ་ཁུགས་རྟགས་བརྟན་པོ་བྱུང་ནས་བསད་པ་མ་སྦྱར་བ་ལྟ་བུ་དམ་ཅན་སྐྱེངས་པའི་རྒྱུར་བཤད་དོ། །གང་བསྒྲུབ་པའི་ལྷ་འདྲེ་དེ་དངོས་སུ་བྱུང་ན། གཉེན་པོ་ལྷ་བསྒོམ། གཉིས་མེད་དུ་བསྲེ། དེ་ལ་འཇིགས་པ་སྐྱེ། ཡི་ཆད་ན་རང་ཕུང་། གདུང་བ་མེད་ན་གོང་གཡེལ། ཞེ་སྡང་མེད་ན་སྒྲོལ་མི་ནུས། ཏིང་ངེ་འཛིན་མི་གསལ་ན་བཀའ་མི་ཉན། བསྟེན་ཐབས་ནོར་ན་འཁོར་ལ་གཟན། ལྟ་བ་མེད་ན་དབང་དུ་མི་འདུ། ཐེ་ཚོམ་སྐྱེས་ཤིང་འདུན་པ་མེད་ན་ལས་མི་འགྲུབ། སྐྱོན་དེ་རྣམས་སྤངས་ཏེ་ལས་རབ་འབྱམས་བསྒྲུབ་པའོ། །ཉེ་ཡང་ལས་བྱེད་དུ་མ་འདོད་ན། གནད་ལ་དབབ་ཅིང་ཨར་ལ་གཏད། དེ་ཡང་སྲོག་གི་སྙིང་པོ་མས་ཟློག བསྐུལ་ཡང་མས་ཟློག དེས་མ་གྲུབ་ན་སྲིད་པ་དཀྲུག སྲོག་སྙིང་དཀྲུག རང་ཡི་དམ་མམ་གོང་གནོན་གྱི་ལྷར་བསྐྱེད། དམ་བདར། གནད་གཟིར། ཞེ་སྡང་དྲག་པོ་བསྐྱེད། དེ་ལྟར་བྱས་ཀྱང་མ་གྲུབ་ན་ལན་གསུམ་སྤོགས། དེས་ཀྱང་མ་གྲུབ་ན་དམ་ཅན་ཤི་ས་བསྟན། དེ་ལ་སྤྱིར། དམ་ཅན་དེའི་ཙཀྐ་ལི་དང་། དམ་རྫས་བྲུབ་ཁུང་དུ་བཅེར་ལ་ཐུན་གྱིས་བྲབ། ཕུར་པས་གཟིར། དེའི་དུས་སུ་སྣང་སྲིད་ཐམས་ཅད་བདག་གི་ཞབས་འོག་ཏུ་གནས་པར་བསམ། བྱེ་བྲག་དམ་ཅན་དེ་ཞབས་ཀྱིས་མནན། སྙིང་ཁྲག་ཞལ་དུ་བརྔུབས། ཉ་བྱེ་ཚན་ལ་བོར་བ་ལྟར་མིག་སྲིག་སྲིག འདར་ཧེད་ཧེད། ལས་ཅི་བྱ་ཟེར་བར་བསམ། སྔགས་མས་བཟློག་དྲག་ཏུ་བཟླའོ། །བྲུབ་ཁུང་དུ་ཡང་ཞིང་ལྤགས་རེ་གཡབ་བརྡབ། ཚིལ་ཆེན་གྱི་དུད་པ་བཏང་། ལ་གཡོགས་བདར། དེའི་ཚུལ་ཡང་། ལུས་གཅེར་བུ་བྱས། ཏིལ་མར་བྱུགས། སོལ་བས་གདོང་ནག་པོར་བཏང་། ཞིང་ལྤགས་གྱོན། སྐྲ་འབལ། བ་སྤུ་སློང་། མཆི་མ་འབྱིན། བྲང་བརྡུང་། ངུ་ཞིང་ཆོ་ངེ་བརྡབ། ཐལ་མོ་ལན་བདུན་བརྡབ། བསྐོར་བ་ཕྱིར་ལོག་ལན་བདུན་བྱ། ངག་ཏུ་སངས་རྒྱས་ཀྱི་བཀའ་རྫུན་ནོ། །ཕུག་པ་ཞྭ་ལྟར་གྱོན། ལུས་སྲོག་འབེན་དུ་བཙུགས། ཤ་ཁྲག་གཟན་དུ་བོར་ནས་བསྒྲུབ་པ་བྱས་པས། རྣལ་འབྱོར་ང་གཙང་ཤས་ཉ་བཞིན་མྱུལ། དམ་ཉམས་དགྲ་བོ་གངས་ཁོངས་ཀྱི་སེང་ལྟར་རྒྱུག འཇིག་རྟེན་འདི་ན་བདག་ལ་མགོན་མེད་དམ། ཁྱེད་ཀྱི་ཐུགས་རྗེས་བདག་ལ་མི་དགོངས། སྡང་བའི་དགྲ་ལ་རྟགས་མ་བྱུང་། བསྟན་པའི་རུ་ཏྲ་ལ་ཚེ་སྲོག་མེད་དམ། སྔོན་གྱི་མཐའ་ཚིག་འགལ་བར་མི་འགྱུར་རམ། ཞེས་བརྗོད་ཅིང་སྲིད་པ་དཀྲུག དེ་ལྟར་ཞག་གཅིག་ཏུ་ཞེ་སྡང་མ་ཡོལ་བ་བྱ། དེ་ནུབ་གཏོར་མ་ཡང་མི་བཏང་བར་ཉལ་བསྡད། དེ་ནས་ནངས་བར་ཙཀ་ལི་ཐུན་རྫས་མེ་ལོང་དུ་འཆར་དུ་གཞུག བདུད་རྩིའི་ཁྲུས་བྱས་སོ་སོའི་སར་བཀོད། བཤགས་པ་བྱས་ལ་ཞག་གསུམ་ལས་སྦྱོར་བྱའོ། །འདི་ནི་དགྲ་ལ་ལྕགས་ཀྱི་སྲོག་རྩ་ཡོད་ཀྱང་འཆིའོ། །ཤི་ས་བསྟན་ཅིང་སྲིད་པ་དཀྲུག་པའི་ལས་འདི་ནི་ཅི་རུང་རུང་ལ་མི་བྱའོ། །དེ་ཡང་ཐུགས་རྗེ་འབྱུང་བར། དབང་བསྐུར་བསྙེན་པ་ཕྱི་ཡིན་ལ། །སྒྲུབ་པ་ལས་ཚོགས་ནང་གི་ཡིན། །ལས་སྦྱོར་དྲག་པོ་གསང་བ་ཡིན། །སྤོགས་དང་གནད་འབེབས་མཐར་ཐུག་ཡིན་ནོ། །ཞེས་སོ། །གཉིས་པ་ནང་གི་ལ། མཆོད་བརྒྱད། ལས་ཚོགས་བརྒྱད། ཆ་ལག་བརྒྱད་དེ་གསུམ། དང་པོ་ལ། རྦད་བསད་ཀྱི་དུས་གསེར་སྐྱེམས་གཏོང་བ། གཟུ་དཔང་འཛུགས་པ། འདི་ལྷ་འདྲེ་ཐམས་ཅད་རང་གི་རོགས་སུ་སྦྲན་པས་ཁོ་ལ་སྟོངས་གྲོགས་བྱེད་མཁན་ཉུང་ཞིང་རང་ལ་དམག་ཚན་ཆེ་ལ། འཇིག་རྟེན་ན་དམག་གྲོགས་སྡུད་པ་ལྟ་བུའོ། །འདི་འདྲ་བའི་དམག་གཡབ་པ་ཞེས་བྱའོ། །བྲུབ་ཁུང་སོགས་བསྐྱེད་པ། བདེན་བདར་བྱས། དགུག་བཅིང་བསྐུལ་བ། སྡིག་བསྒོ་སྟེ་ལྷ་དང་དབྱེ་བ། བསད་པ། བརྡུང་བ། བཏབ་པ་དང་བརྒྱད་དོ། །རྣམ་ཤེས་ལིངྒའི་རྟེན་མེད་པར་མི་ཁུགས་ཤིང་། ལིངྒ་དགྲའི་བླ་རྡོ་ཡིན་པས་སྤྱིར་བཏང་། འདི་ལ་དགྲ་གཟུགས། དེ་ཡང་རྗུད་པ། རིད་པ། རོའི་གཟུགས་འདྲ་བ། ཡན་ལག་ལྕགས་སྒྲོག་གིས་བསྡམས་པ། ཞགས་པས་མགྲིན་པ་བཅིངས་པ། མིག་ཤི་མིག་ཏུ་ལྟ་བ། དེའི་སྙིང་གར་ཛཿ ཁ་སྤྲོད་ཀྱི་བར་དུ་དགྲ་ལ་ནྲི། བགེགས་ལ་ཏྲི། དེ་ལ་མིང་རུས་བླ་གདགས་ཀྱིས་བསྐོར། དེ་ཡང་ཕོ་ཡིན་ན་ཡིག་མགོ་ཕྱིར་བསྟན། མོ་ཡིན་ན་ནང་དུ་བསྟན། ནང་དུ་དཔྲལ་བར་རུས་ལ་ཆེ་གེ་མོ་མཱ་ར་ཡ་ཛཿཛཿ སྐེད་པ་ལ་མིང་ལ་མཱ་ར་ཡ་ཛཿཛཿ མགོ་ལ་ནན། མདོམས་སུ་ཚ། བརླ་གཉིས་ལ་བླ་གདགས། ཡན་ལག་བཞི་ལ་ཛཿ གཞོགས་གཉིས་ལ་རྦད། དེ་ཡང་ཕོ་གཤེད་མོ་ལ་རྦད་པ་ཞེས་བྱ་སྟེ་དགྲ་མོ་ཡིན་ན་ཡི་གེ་དེ་རྣམས་ཕོ་གྲིར་ཤི་བའི་ཁྲག་གིས་བྲི། དགྲ་ཕོ་ཡིན་ན་མོ་གཤེད་ཕོ་ལ་རྦད་པ་ཞེས་བྱ་སྟེ་མོ་གྲིར་ཤི་བའི་ཁྲག་གིས་བྲི། སྲོག་གཤེད་སྲོག་ལ་དབབ་པ་ཞེས་པས་བླ་ཚེ་གང་ཡིན་པ་དེའི་སྙིང་ཁྲག་གིས་ལིངྒ་དམར་པོར་བྱུག རང་གཤེད་རང་ལ་དབབ་པ་ཞེས་དེ་ཀའི་ཟག་རྫས་དུག་གང་འཛོམ་དེས་ལིངྒ་ལ་བྱུག བསད་པའི་ཏིང་ངེ་འཛིན་ཏེ་ཕུར་པ་གཟིར་བསྲུང་བ། བྱིན་རླབས་ཀྱི་ཁ་སྦྱར་དབྱེ་བ། བདུད་བཞི་གཤེད་དུ་བསླང་བ། ཏིང་ངེ་འཛིན་གྱིས་ཁ་སྦྱར་དབྱེ་བ། ཚེ་ལུང་ལྔ་ལ། གནམ་གྱི་འཇུ་ཐག་བཅད་པ་ཞེས་བྱ་སྟེ་ཡེ་ཤེས་ཀྱི་ལྷ་ལ་སོགས་པའི་བྱིན་རླབས་ཀྱིས་སྐྱོབས་པ་དང་འབྲེལ་བས་སོ། །ཁྲུས་ལུང་རྣམ་ཤེས་འོག་མིན་དུ་བསྒྲལ་བ། འདི་ལས་ཀྱི་རྣམ་སྨིན་དང་འགྲེལ་བས་སའི་རྟེན་ཕུར་འབྱིན་པ་ཞེས་བྱའོ། །དེ་གཉིས་ཀྱིས་བསྒྲུབ་བྱ་རང་དབང་དུ་གནས་པའི་སྐབས་མེད་པས་འཆི་བར་འགྱུར་རོ། །བླ་འགུགས་དུས་སམ་རྦད་དུས། ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་ཕྱག་རྒྱ། བདག་ལྷར་གསལ་བའི་ཐུགས་ཀ་དང་ལྕགས་ཀྱུའི་རྒྱའི་རྩེར་ཛཿ དེའི་འོད་ཟེར་ལྕགས་ཀྱུ་ལྟ་བུ་དགུག་བྱ་གནས་པའི་ཕྱོགས་སུ་སོང་། དེའི་སྲོག་ནྲི་རུ་གནས་པ་དེ་ལ་བཏབ་ནས་འཐེན་པས་དམར་ནར་གྱིས་བྱུང་། བྲུབ་ཁུང་གི་རྟེན་དང་གཉིས་སུ་མེད་པར་བསྟིམ། དེ་ནས་ཕོ་ཉའི་རྩལ་གྱིས་དགུག་སྟེ། ཡེ་ཤེས་ཀྱི་ལྷ། འཇིག་རྟེན་པ་ཀུན་ལ་གསེར་སྐྱེམས་བཤོས་བུ་རཀྟས་མཆོད། །གསུར་ཆེན་གྱི་དུད་པ་བཏང་། །དྲེགས་པ་སྤྱི་བསྐུལ་བ་དང་། ཕོ་ཉ་གང་ཡིན་པ་དེ་སྒོས་སུ་བསྐུལ་ལོ། །དེ་ཡང་། རང་གི་ཐུགས་ཀ་ནས་འོད་འཕྲོས། ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་འཛིན་པའི་ལྷ་མོ་བཞི་ལ་འཕོག དེ་རྣམས་ཀྱིས་རང་འདྲ་ནམ་མཁའ་གང་བའི་སྤྲུལ་པ་སྤྲོས། གཞན་ཡང་ཁྲོ་བོ་ཁྲོ་མོ་དཔག་ཏུ་མེད་པ་དང་དམ་ཅན་རྒྱ་མཚོ་ལྷ་སྲིན་དྲེགས་པ་ཕྱག་མཚན་སྣ་ཚོགས་ཐོགས་པ་དགྲ་གནས་པའི་ཕྱོགས་སུ་དམག་དཔུང་བཞིན་དུ་འཆས་ནས། ཡཾ་ལས་ལས་ཀྱི་རླུང་དམར་གྱིས་གཡོས་པས་རྒྱབ་ནས་དེད། གནམ་ལྕགས་འཁོར་ལོའི་ཁར་བསྒྲུབ་བྱ་བཞག ལྕགས་ཀྱུ་མ་རྣམས་ཀྱིས་ལྕགས་ཀྱུས་སྙིང་ཕུག ཞགས་པས་སྐེ་བཅིངས། ལྕགས་སྒྲོག་གིས་ལུས་བསྡམས། དྲིལ་བུས་རྒྱབ་ནས་འདེབས། མཚོན་ཆ་སྣ་ཚོགས་ཀྱི་ཆར་འབེབས། འཇིགས་པའི་མུན་ནག་གིས་མདུན་བདར། གཤེད་མས་བཙོན་ཁྲིད་དེ་འོང་བ་བཞིན་ནམ། བྱིའུ་ཁྲས་དེད་པ་ལྟར་བདས་ནས་བྲུབ་ཁུང་དེར་བཅུག་ནས་དམིགས་རྟེན་ལིངྒ་ལ་བསྟིམ་པར་བསམ་མོ། །བྱེ་བྲག་གང་བསྐུལ་བའི་སྲུངས་མས་དེ་བཞིན་ནོ། །ལྷ་དང་དབྱེ་བ་ལ། རང་གི་ལྷ་དང་དབྱེས་འཇུག་པ། ཆེ་གེ་མོ་འདིས་སངས་རྒྱས་ཀྱི་བསྟན་པ་བཤིག་གོ །དཀོན་མཆོག་གི་དབུ་འཕངས་སྨད་དོ། །ཐུགས་དམ་ལ་གནས་པའི་བསམ་གཏན་དཀྲུགས་སོ། །སྔགས་འཆང་བདག་ལ་བསྡོས་སོ། །སྲུངས་མ་ཁྱེད་ལ་བརྙས་སོ། །མཐུ་བུ་ལོན་བཞིན་དུ་འདེད་དོ། །ཞེས་པ་ལྟ་བུ། ཁོ་རང་གི་ལྷ་དང་དབྱེས་འཇུག་པ། བླ་གླུད་གཏོར་མ་སྦྱིན་པ་གཞུང་བཞིན་ནོ། །ཟ་ལམ་བསྟན་པ་ནངས་ནུབ་ཚོགས་དང་གཏོར་མ་འབུལ་དུས་མཆོད་རྫས་དེ་ལ་དགྲ་བོ་བཀུག་སྟེ་བསྟིམ། དེའི་ཤ་ཁྲག་རུས་ནང་ཁྲོལ་དུ་དམིགས་ཏེ་འབུལ་ལོ། །ཡང་ན་མིའི་རྩིབ་མ་ལ་མིང་རུས་བྲིས་པའམ་ལིངྒ་དེ་དགྲ་བོར་བསམས་ལ་བསྟབས་སོ། །དགྲའི་སྒོ་རྩར་ཕོ་བྲང་གདབ་པ་ནི། ཐོད་ངན་དུ་འཇིག་རྟེན་གྱི་ལྷ་འདྲེའི་མིང་དང་རུས་ཤེས་ཚད་བྲིས་ལ་གཞུགས། ཐུན་སྣ་དུག་སྣ་ཁྲག་སྣ་བླུགས་སྟེ་དེའི་སྒོའམ་ཁང་པའི་རྨང་དུ་སྦས་ན་ལྷ་འདྲེ་ཐམས་ཅད་དེར་འཚོག་ཅིང་འདུའོ། །དགྲ་ཟུན་འཐབ་ཏུ་འཇུག་པ་ནི། ལས་སྔགས་དང་དམིགས་བྱའི་མིང་རུས་སྦྲེལ་ཏེ། དེས་ལས་མི་བྱེད་པའི་དབང་མེད་པ། དཔེར་ན་རྦད་པའི་སྔགས་ཀྱིས། ཆེ་གེ་མོའི་ཙིཏྟ་ལ་ཡཱ་ཞེས་པ་ལྟ་བུ། དམག་ཟས་དུས་སུ་བྱིན་པ་ནི། ལས་དྲག་པོ་བྱས་པ་གྲུབ་པའི་དུས་སུ་རང་གཞུང་དང་མཐུན་པའི་གཏང་རག་གཏང་། ལིངྒ་ཡོད་པ་ཀུན་ཀྱང་གཏོར་མ་དང་སྦྲགས་ཏེ་དབུལ་ལོ། །གསེར་སྐྱེམས་དང་ལིང་རོ་ལྷ་འདྲེ་སྤྱི་ལ་གཏོང་། དེ་ཡང་མྱུར་བར་བཏང་། ཕྱིས་ན་བཀའ་ཆད་འོང་ཉེན་ཆེའོ། །དུས་རྒྱུན་དུ་མཆོད་པ་ལ་བརྩོན་པ་ནི་དམ་ཅན་ཉེ་བའི་ཐབས་སོ། །གཉིས་པ་ལས་བརྒྱད་ནི། ཐུགས་རྗེ་འབྱུང་བར། སྲོག་དང་ཆོ་འཕྲུལ་སེར་བ་དང་། །ཐོག་དང་གཏད་ཆེན་སེལ་ནག་དང་། །ནང་རྒྱས་བཟློག་དང་བསྲུང་བ་སྟེ། །ཞེས་དང་། ཆ་ལག་བརྒྱད་ནི་བཟློག་པ། ངག་མནན། ངག་དགྲོལ། བཅིང་བ། བསྐྲད་པ། དབྱེ་བ། མནན་པ། སྲིའུ་གསོ་བའོ། །གསང་བ་ལ། གེགས་སེལ། ཆིངས། གནད། བླ་རྡོའི་བརྒྱད་ཚན་བཞིའི་དང་པོ། སྲོག་ལ་བྱེད་ན་སྲུངས་མ་སྐྱེངས་དྲེད་འབྱམས་གསུམ་དུ་མ་སོང་བའི་གནད་ཤེས་པ། སྐྱེངས་པ་ནི་ལས་བྱས་དུས་གཏང་རག་མ་བཏང་བར་དེ་ཀར་བཞག་ན་འབྱུང་བ། དྲེད་པ་ནི་ཡང་ཡང་མཆོད་ནས་རྦད་མ་ཤེས་ན་འབྱུང་། འཇིག་རྟེན་ན་མིང་རུས་གཅིག་པ་མང་པོ་ཡོད་པས། དེས་ནོར་ཞིང་འབྱམས་པ་སྲིད་པས། གསལ་ཤིང་འཛུགས་པའི་གནད་ཤེས་པར་བྱ་སྟེ། ཤིང་གདུག་པ་ཅན་ཅིག་ལ་ཁྲམ་བཏབ། ཁྲམ་བར་དུ་དགྲ་བོའི་མིང་རུས་དང་། ཕ་ཚན་དང་། ཕ་དང་མ། བླ་གདགས། ཡུལ་དང་ཞིང་ལ་སོགས་པ་བྲི། སྒྲུབ་ཁང་གི་རྩར་འཕྱར་རོ། །ས་ལ་ གཡོན་དང་གཡས་སུ་བསྐོར་ཞིང་བྲབས་པས་མྱུར་དུ ་འགྲུབ་བོ། །ཁུངས་བཞིན་དུ་བསད་པའི་ལས་ལ་མ་སྦྱར་ནའང་འབྱམས་ཏེ་དོན་མི་འགྲུབ། རྦད་རྟགས་རྫོགས་ནས་བསད་པ་ལ་མ་སྦྱར་ན་ཡང་དོན་མི་འགྲུབ་བོ། །སེར་བ་བྱེད་ན་བོ་ཟགས་ཞུང་གསུམ་དུ་མ་སོང་བའི་གནད། གཏད་བྱེད་ན་ལོག་རྡུགས་འབྱམས་གསུམ་དུ་མ་སོང་བའི་གནད། ཐོག་བྱེད་ན་ཞུད་ལོག་འབྱམས་གསུམ་དུ་མ་སོང་བའི་གནད། ལྟས་ངན་བྱེད་ན་ལོག་རྡུགས་འབྱམས་གསུམ་དུ་མ་སོང་བའི་གནད། སེལ་བྱེད་ན་ལོ་ནོར་ཟླ་ནོར་དུས་ནོར་དུ་མ་སོང་བའི་གནད། སེང་གེ་ཁ་འཐབ་བྱེད་ན་འཁོར་ལོ་ཚུར་འཁོར། ལྷ་སྲིན་ཚུར་ལོག ལྟས་ངན་ཚུར་ལོག་གསུམ་དུ་མ་སོང་བ་བྱེད་པའི་གནད། འཁོར་ལོ་བསྐོར་ན་ཐལ་རྡུགས་འབྱམས་གསུམ་དུ་མ་སོང་བའི་གནད་དོ། །ཆིངས་བརྒྱད་ནི། སྲོག་ལ་བསྡོ་ན་བསད། ཡུལ་ཁམས་དགྲར་ལངས་ན་སེར་བ། ཕུང་དུ་འཇུག་ན་ཀླུ་ལ་གཏད། སྒོས་དང་འགྲས་ན་གནམ་ལྕགས་དབབ། འགྲན་འཚོལ་ན་ཁང་བཤིག་དུང་རྨད་དཀྲུག་པ་སེལ་ནང་རྒྱས་བྱུང་ན་སེང་གེ་ཁ་འཐབ་བྱ། རྦོད་གཏོང་བྱུང་ན་བཟློག་ཅིང་ནུས་པ་བཤིག རང་གི་ཕྱོགས་བསྲུང་བ་རྣམས་སོ། །གནད་ནི། སྲོག་ལ་གཏོང་ན་བསྲུང་བཟློག་གིས་མི་ཐུབ་པའི་གནད། སེར་བ་བྱེད་ན་མུ་ཁྲིད་དུ་འོང་བའི་གནད། གཏད་རང་ལ་མི་བཟློག་པ་གཞན་ལ་ཐེབས་པའི་གནད། ཐོག་དམིགས་བྱའི་ཁང་སྟེང་དུ་འབབ་པའི་གནད། ལྟས་ངན་རང་ལ་མི་བབས་པའི་གནད། སེལ་དུར་ཁང་ཞིང་གསུམ་དཀྲུག་པའི་གནད། ཁ་འཐབ་བྱེད་ན་ཁོ་རང་གི་སྲུང་མ་གནད་དུ་དབབ་པའི་གནད། འཁོར་ལོ་བསྐོར་ན་དྲག་སྔགས་སྡེབ་པའི་གནད་བརྒྱད་དོ། །བླ་རྡོ་བརྒྱད་ནི། རྟེན་བཅས་དཀྱིལ་འཁོར་བཞེང་པ་དང་། །རྟེན་བཙུག་རྟེན་བསྐྱེད་དེ་ཉིད་བསྙེན། །ཞེས་དང་། རྟ་ནག་ལུག་ནག་གཡག་རོག་ཁྱིའི། །མགུལ་དུ་སྙིང་པོ་བྲིས་པ་གདགས། །དེ་ཡི་ངོ་བོ་ལེགས་ཕུལ་ལ། །ཕྱི་ཡི་རྟེན་དུ་བྱ་བར་བཤད། །ཅེས་པ་ལ། རྟེན་དུ་འཛུགས་པ་དང་འབུལ་བའི་ཚུལ་གཉིས་སོ། །དེས་མཚོན་ཏེ་དྲེགས་པ་རང་དགའ་བའི་སྲོག་ཆགས་དེ་དང་དེའི་རྟེན་དུ་ཤེས་པར་བྱའོ། །སྣ་ཚོགས་འབྲུ་ནག་དབལ་བྱས་པའི། །གཏོར་མ་མི་ཤས་བརྒྱན་པ་འདི། །ཕོ་བྲང་རྟེན་དང་བརྟེན་པར་བཅས། །ནང་གི་རྟེན་དུ་སློབ་པའོ། །སྤྱིར་གཏོར་མའི་ངོ་བོ་ཐབས་ཤེས་དབྱེར་མེད། དབྱེ་བ། རྟེན་གཏོར། གཏའ་གཏོར་མཆོད་གཏོར། གཏོར་ཆེན། ཟོར་དུ་འཕང་པའི། རྒྱུན་གྱི་གཏོར་མ། བསྐང་བའི་གཏོར་མ་བརྒྱད། དང་པོ་ནི། དཀྱིལ་འཁོར་ཆེན་པོ་ལ་དགོད་པ་ལྷར་བསྒོམ་རྒྱུ། གཉིས་པ་ནི་དུས་རྒྱུན་དུ་འཛུགས་པ། དེ་ལའང་རྟེན་དང་མཆོད་པའི་དབྱེ་བ་གཉིས། གསུམ་པ་ལས་མ་འགྲུབ་པར་མི་འབུལ་བར་བྱིན་གྱིས་བརླབས་ཏེ་ནམ་འགྲུབ་པ་དང་འབུལ་རྒྱུ། བཞི་པ་ལས་ཀྱིས་ཕྱེ་བ་བཞི་མཆོད་གཏོར་བྱིན་བརླབས་ཀྱང་། བྱ་རོག་གདོང་གི་རྒྱུད་དུ། ཨོཾ་ཨཱཿཧཱུྃ། སྦྱངས་དང་སྤེལ་དང་བདུད་རྩིར་བསྒྱུར། །ཞེས་སོ། །གཏོར་ཆེན་ནི་གཏོར་མས་བསད་པ་དེའོ། །ཟོར་དུ་འཕང་བ་ནི་ཟོར་རྫས་སུ་བྱིན་གྱིས་བརླབ་པའོ། །མཐའ་མ་གཉིས་ངེས་སླ། དེ་ལ་གཅིག་ལ་ཡང་ཤེས་པ་བཞི། རྟེན་དུས་ཁང་པ། བསྒྲུབ་དུས་ལྷར། མཆོད་དུས་ཁམ་ཟས། འཕང་དུས་ཟོར་དུ་བྱས་ཀྱང་རུང་ངོ་། །མདོས་ཀྱང་ནང་གི་རྟེན་ནོ། །ནམ་མཁའ་མཉམ་པའི་རྒྱུད་དུ། ནང་གི་རྟེན་ནི་བྱ་རོག་གི རྒྱལ་མཚན་ལ་ནི་དར་ནག་བརྒྱན། །འདབ་གཤོགས་ལ་ནི་སྔགས་ཀྱང་བྲི། །ཁར་ནི་ཆེ་གེ་བྲིས་པ་གཞུག །དེ་ནི་སྒྲུབ་ཁང་སྟེང་དུ་འཛུགས། །ཞེས་པས་སྲོག་ཆགས་དངོས་ཀྱི་གཡང་གཞིའི་རྒྱལ་མཚན། ནང་རྟེན་དུ་འདི་ཤུགས་ཀྱིས་བསྟན་ནོ། །དེ་ནས་ནུབ་ཕྱོགས་དག་ནས་ནི། །མི་ནག་གསུམ་གྱིས་ཁུར་བའི་རྡོ། །ནག་པོ་དག་ལ་འདི་སྐད་བརྗོད། །ནས། འདི་ནི་རང་བཞིན་རྟེན་རྫས་ཡིན་གྱི་བར་དང་། ནག་པོའི་རས་སམ་དར་ལ་ཡང་། །ཏིང་འཛིན་སྔགས་དང་བཅས་པ་ཡི། །ནག་པོ་ཞལ་གཅིག་ཕྱག་བཞི་པ། །བྲིས་པ་ཉིན་གཅིག་གིས་རྫོགས་ནས། །བར་ཆད་མེད་པ་ལུས་ལ་འཆང་། །གསང་རྟེན་ལུས་ལ་འཆང་བའོ། །འདིས་སྲོག་གི་འཁོར་ལོ་ལུས་ལ་འཆང་བ་བསྟན། ནམ་མཁའ་མཉམ་པར། གསང་བའི་རྟེན་ནི་ཀ་པཱ་ལ། །མཚན་དང་ལྡན་པར་གྲི་རྒོད་སྙིང་། །དར་ནག་གིས་གཏུམ་ཕོ་བྲང་དབུས། །ཞེས་བཤད་པས། དཀྱིལ་འཁོར་དུ་དགོད་པ་དང་། བྱ་རོག་གཡང་གཞིས་བརྒྱན་པ་ཡི། །ནས། ཐུགས་ཀྱི་རྟེན་དུ་གཟུང་བར་གྱིས་སྐུ། །སྔགས་བྲི་བ། ཕྱག་མཚན་བཅད་བ་སྐུ་གསུང་ཐུགས་རྟེན་དུ་རིམ་པ་བཞིན་བཤད་པ་དང་། སྐྱེས་པ་གྲིར་ཤིའི་ཐོད་འཕྲེང་ནི། །ཡོན་ཏན་ལྡན་ཕྱིར་རྟག་ཏུ་སྦ། །མི་བཟད་མཚོན་ལས་བྱས་པ་ཡི། །རྡོ་རྗེ་གྲི་གུག་ཧཱུྃ་བྲིས་པ། །འཕྲིན་ལས་བྱེད་པའི་ཁྱད་པར་རོ། །འཕྲེང་བ་ཕྱག་མཚན་ཡོན་ཏན་ནམ་འཕྲིན་ལས་ཀྱི་རྟེན། ཁྱད་པར་ཡེ་ཤེས་བླ་མེད་པ། །དམ་ཚིག་མགོན་པོ་བསྒྲུབ་པ་ཡི། །དམ་ཚིག་འདི་ནི་རྨད་པོ་ཆེ། །བདེ་བར་གཤེགས་པའི་ལམ་སྦྱོང་མཛད། །འདིས་དེ་ཁོ་ན་ཉིད་ཀྱི་རྟེན་བསྟན་ཏེ། དེ་ཡང་དགྲ་བོའི་གཤེད་དུ་མངགས་པའི་ཚེ་དྲག་པོའི་མཐུ། སངས་རྒྱས་ཀྱི་བསྟན་པ་བསྲུང་བའི་ཚེ་ཞི་བ་དམ་པའི་ཆོས། དུག་གསུམ་གྱི་སྨན་པ་མཛད་པའི་ཚེ་དག་པ་གསུམ་གྱི་བསྐྱེད་པ། དམ་པ་ཆོས་ཀྱི་སྲོག་ཤིང་འཛིན་པའི་ཚེ་གསང་བ་སྔགས་ཀྱི་གནད། ཡེ་ཤེས་ཀྱི་མགོན་པོར་བསྙེན་པའི་ཚེ་སྟོང་ཉིད་སྙིང་རྗེ་གཅིག་པའི་ཟུང་འཇུག་གོ །དམ་ཚིག་མགོན་པོར་བསྙེན་པའི་ཚེ། ཐིག་ལེའི་རྣལ་འབྱོར་ཏེ། དཀྱིལ་འཁོར་ལྷ་ནི་ལུས་ཉིད་ཡིན། །ཞེས་སོགས་ཀྱིས་སོ། །ལྔ་པ་སྟོབས་ཀྱི་དྲི་ལན་ནི། སྟོབས་ནི་ཆོས་རྣམས་ཐམས་ཅད་ལ། །སྒྱུ་མ་ལྟ་བུར་ཤེས་པ་དང་། །ཡང་དག་བདེན་པའི་སྟོབས་ཀྱིས་ནི། །རང་བཞིན་མེད་པར་རྟོགས་པ་འབྱུང་། །ཞེས་བསྒྲུབས་པའི་མཐུའོ། །དྲུག་པ་འཇུག་པའི་ལན་ནི། འཇུག་པ་ཐུན་མོང་མ་ཡིན་པ། །བྱམས་དང་སྙིང་རྗེ་བྱང་ཆུབ་སེམས། །ཚད་མེད་བཞི་དང་ལྡན་པ་ཡིས། །འགྲོ་བའི་དོན་ལ་སེམས་པ་པོ། །ཞེས་པས་སྤྱིར་བྱམས་པ་རྩ་བ། སྙིང་རྗེ་སྡོང་པོ། བྱང་ཆུབ་ཀྱི་སེམས་པདྨའི་སྙིང་པོ་དང་ཆོས་མཚུངས་པས་སྔ་མ་གཉིས་རྒྱུར་བྱས་པའི་བྱང་ཆུབ་སེམས་ལ་གནས་པས་ཇི་སྐད་བཤད་པ་ཐམས་ཅད་བྱའོ། །ཁྱད་པར་ཞི་བ་ལ་བཏང་སྙོམས་པའི་སེམས། རྒྱས་པ་ལ་དགའ་བ། དབང་དགུག་ལ་བྱམས་པ། དྲག་པོ་བསྒྲལ་བ་སྙིང་རྗེ། དེ་ཡང་རྒྱུ་དུས་ཀྱི་ཀུན་སློང་སྙིང་རྗེ། དེ་དུས་ཀྱི་ཀུན་སློང་ཞེ་སྡང་ཞེས་གོང་མ་རྣམས་གསུང་ངོ་། །བདུན་པ་མངོན་དུ་བྱེད་པའི་དྲིས་ལན་ནི། མངོན་དུ་བྱེད་པ་ཉེར་སྒྲུབ་སྟེ། །ནས། གཙོ་བོ་དང་ནི་འཁོར་རྣམས་ཀྱིས། །གང་འགྲུབ་རབ་འབྲིང་མཐའ་མ་རུ། །རྟགས་ཀྱིས་དབྱེ་བ་བསྟན་པ་ཡིན། །ཞེས་པ་རྟགས་ཤེས་ནས་ལས་རིམ་པར་སྒྲུབ་པ་ཡིན་ནོ། །འདིར་རྟགས་ནི་བསྙེན་དུས། སྔར་བཤད་པ་ནི་སྒྲུབ་པ་དང་ལས་སྦྱོར་གྱི་སྐབས་སོ།། །། གསུམ་པ་འབྲས་བུའི་དྲིས་ལན་ནི། རྒྱུ་ནི་ཐོག་མ་མེད་པ་ཡི། །རྟེན་ཅིང་འབྲེལ་པར་འབྱུང་བ་སྟེ། །མངོན་སུམ་དུ་ནི་འབྱུང་བ་ལ། །གང་གིས་དགག་པར་མི་ནུས་པ། །དེ་ལས་འབྲས་བུ་ཕུན་སུམ་ཚོགས། །སྙིང་པོ་སྨིན་པ་བཞིན་དུ་འབྱུང་། །ཇི་ལྟར་རྒྱུ་ཚོགས་གཉིས་རྫོགས་པ་ལས་འབྲས་བུ་སྐུ་གཉིས་གྲུབ་པ་ནི་རྟེན་ཅིང་འབྲེལ་པར་འབྱུང་བའོ། །ཇི་ལྟར་འཁོར་བ་ཟད་པ་ལས་ཐར་པ་འགྲུབ་པ་ཡང་ཆུ་ཤིང་གི་ནུས་པ་ཟད་ཁར་འབྲས་བུ་ཆགས་ལ་འབྲས་བུ་སྨིན་པ་ན་དེ་རྩ་བ་ནས་བསྐམས་པ་ལྟ་བུའོ། །སྙིང་པོའི་འབྲས་བུ་དེ། གང་དུ་ཐོགས་མེད་རྡོ་རྗེ་ཡིས། །སྙིང་པོ་ཟག་པ་མེད་པའི་དོན། །ཡང་དག་ཡེ་ཤེས་སྣང་བའོ། །བླ་མའི་དྲིན་ལས་ཐོབ་པར་འགྱུར། །འདིས་མཐར་ཐུག་ཡེ་ཤེས་གཅིག་ཀ་ཡིན་ལ། གདུལ་བྱ་སོ་སོ་ལ་ནི་དེ་ཀ་སྐུ་སོ་སོར་འགྱུར་ཏེ། ཤེལ་དྭངས་པོ་དར་གང་གི་ཁར་བྱུང་བའི་མདོག་ཏུ་འགྲོ་བ་བཞིན་ནོ། །དེ་ལྟར་འཁྲུགས་པ་སྡེབས་ནས་མངོན་པར་རྟོགས་པ་བསླང་བའི་ཚུལ་དེ་ཙམ་སྟེ། རྒྱས་པར་ཡི་གེ་མང་པས་འཇིགས་ཏེ་གཞན་གླེགས་བམ་བཀླགས་པ་ཉིད་ཀྱིས་གོ་བར་ཡང་ནུས་སོ་བསམ་མོ། །གཉིས་པ་ལེའུས་བཅད་པའི་གནད་ཀྱིས་ཆ་ཤས་སུ་གསིལ་བ་རྣམ་གྲངས་སུ་བསྟན་པ་ནི། རྒྱུད་འདི་ལ་ལེའུ་ཉི་ཤུ་རྩ་ལྔ་བྱུང་བའི་གཉིས་པ་ནས་ཉེར་བཞིའི་བར་གྱིས་དངོས་སུ་བསྟན་པ་དོན་སོ་སོ་བར་བཤད་པ། རྒྱུད་འདི་ཡང་གྱི་ལྗང་དབུ་དཀར་གྱི་འགྱུར་རྒྱས་ཏེ། དེར་ཆོས་ཀྱི་གྲགས་པ་དང་ནག་པོ་སྤྱོད་པ་ལུང་བསྟན་པ་ཡོད་པ་དང་། ཁེ་གད་འགྱུར་དུ་མི་སྣང་ལ། ཁེ་གད་འགྱུར་དང་། དེ་གཉིས་ཀར་དཔེ་ལ་སྐྱོན་ཞུགས་པས་སྔགས་བཏུ་ཅུང་ཟད་མ་དག་ཅེས་བུ་སྟོན་གསུང་བ་མེད་པར་མཐོང་ལ། དེ་ཙམ་གྱིས་རྒྱུད་དེ་ལ་ལོག་པར་རྟོག་མི་འོས་ཏེ། ཁེ་གད་འགྱུར་ལ་གདོད་ཀྱིས་ཞུས་ཆེན་མཛད་པས་ཤིན་ཏུ་དག་པར་ཡང་སྣང་བའི་ཕྱིར་རོ། །དེ་ལྟ་བུ་མགོན་པོའི་རྩ་བའི་རྒྱུད་དུ་བཤད་དེ། དཔལ་ལྒ་ལོའི་སློབ་རྒྱུད་རྣམས་ཡོངས་གྲགས་ཀྱི་རྒྱུད་ཉི་ཤུ་རྩ་བཞིར་འཆད་པ་སོགས་མགོན་པོ་སྣ་ཚོགས་པའི་རྒྱུད་ཐམས་ཅད་འདིའི་བཤད་པའི་རྒྱུད་དུ་བཞག་ནུས་པའི་ཕྱིར་དང་། དཔལ་མགོན་པོ་ལ་སོགས་པའི་དྲེགས་པའི་རྒྱུད་མང་པོ་བློས་མ་འཆེལ་བ་ནི་མི་རིགས་ཏེ། རྒྱུད་སྡེའི་དབྱེ་བ་ན་འཇིག་རྟེན་པའི་ཚུལ་གཟུང་བའི་རྒྱུད་བསམ་གྱིས་མི་ཁྱབ་པ་བཤད་པའི་ཕྱིར་རོ། །སུས་བཤད་ཀྱང་ཐམས་ཅད་སངས་རྒྱས་ཀྱི་ལུང་དུ་འགྲུབ་སྟེ་དེའི་མཐུ་ལས་འོངས་པའི་ཕྱིར་རོ། །གསུམ་པ་ལེའུ་མཐའ་མས་གསང་བ་བསྡུ་བའི་ཚུལ་བཤད་པ་ནི། དེ་ནས་གཞན་ཡང་བཤད་བྱ་བ། །གསང་བ་མངོན་པར་འབྱུང་བའི་གནས། །དྲང་སྲོང་ཐུབ་པ་ཡང་དག་བསྟན། །ངེས་པར་གསང་བ་འཛིན་གྱུར་པ། །གསང་བ་ཡོན་ཏན་འབྱུང་བའི་གཏེར། །ཡེ་ཤེས་མགོན་པོ་ཆེན་པོ་དང་། །ལས་ཀྱི་མགོན་པོ་དུ་མར་བཅས། །དཔལ་ལྡན་ལྷ་མོ་ནག་མོ་ནི། །འཁོར་བཅས་དཀྱིལ་འཁོར་བསྟན་པ་སྟེ། །དཀྱིལ་འཁོར་གྱི་དོན་བསྡུ། གདུག་པ་རྣམས་ནི་གཟུང་བའི་ཕྱིར། །ནས། རྫོགས་པའི་བར་གྱིས་ཆོ་ག་རྣམས་ཀྱི་དོན་བསྡུ། སྐལ་ལྡན་ལམ་འདི་འཛིན་པ་གང་། །ང་ཡིས་ལུང་བསྟན་གྱུར་པ་ཡིན། །རྒྱུད་ཀྱི་གསང་བ་འདི་འཛིན་པ་དག་རྒྱལ་བས་རྡོ་རྗེ་འཛིན་པའི་ནང་ན། སྐལ་བ་བཟང་པོའོ་ཞེས་ལུང་བསྟན་ནོ་ཞེས། རིག་པ་འཛིན་པ་པདྨ་དཀར་པོ་རྗེ་བཙུན་བླ་མ་དང་ཆོས་སྐྱོང་ཉིད་ཀྱིས་གསང་བ་འཆད་པར་བསྐོས་པ་ན། དཔལ་འབྲུག་པའི་ལེགས་པར་བཤད་པའི་གསང་མི་གཏོལ་བའི་མཐུ་མེད་ནས་རྡོ་རྗེ་སྙིང་པོ་ཞེས་བྱ་བ་འདི། ཕྱོགས་རེའི་མིག་སྐྱོན་གྱིས་ལོག་པར་རྟོག་པ་དག་ལ་སྙིང་རྗེའི་བློ་ཁོ་ནས་ལུང་གཙོ་བོར་བཏོན་ཏེ་ཕོ་བྲང་ཡང་རྩེའི་སའི་ཆར་སྦྱར་བ་ཡིན་ནོ། །ལེགས་བཤད་ཉིན་འདིས་ཀུན་ཤེས་མིག་བྱེ་ཚེ། །ཕྱོགས་ལྷུང་འུག་པའི་ཚོགས་ལོང་ཡིབ་གྱུར་པ། །ཐུབ་བསྟན་འདབ་རྒྱས་ཤེས་ཏེ་ཀེ་ས་རའི། །གད་མོ་ཆེན་མོས་འདེབས་པ་ཀུན་ཏུ་ཁྱབ།། །།མངྒལཾ།། །།