ཀླུ་སྒྲུབ་བདེ་སྨོན་གྱི་འཆད་འགྲེལ་ཟིན་བྱང་བཞུགས།

གང་གི་ཐུགས་བསྐྱེད་སྨོན་ལམ་སྟོབས་ཤུགས་ཀྱིས། །ཡོངས་བཟུང་དག་པའི་ཞིང་མཆོག་བདེ་ལྡན་མགོན། །རྒྱལ་བའི་དབང་པོ་བདེ་གཤེགས་སྣང་མཐའ་ཡས། །རྒྱལ་སྲས་སེམས་དཔའི་ཚོགས་ལ་གུས་པས་འདུད། །འདྲེན་མཆོག་རྒྱལ་བ་ཁྱེད་ཀྱི་སྨོན་ལམ་དང༌། །བརྩེ་ཆེན་ཐུགས་རྗེ་དཔག་མེད་ནུས་པའི་མཐུས། །བདག་སོགས་ཕ་མ་འབྲེལ་ཐོགས་ཡིད་ཅན་ཀུན། །རྣམ་དག་བདེ་ཆེན་ཞིང་དེར་དྲང་དུ་གསོལ། །དེ་ཡང་བདེ་སྐྱིད་དང་ཡོན་ཏན་དཔག་ཏུ་མེད་པ་སྣོད་བཅུད་རྣམ་པར་དག་པ་ནུབ་ཕྱོགས་བདེ་བ་ཅན་གྱི་ཞིང་གི་གཙོ་བོ་རྒྱལ་བ་འོད་དཔག་ཏུ་མེད་པ་དང༌། ཞིང་གི་བཀོད་པ་དང་ཡོན་ཏན་སོགས་ཀྱི་རྣམ་པ་ཡིད་ལ་བྱས་ཏེ། མདོ་སྡེ་རིན་པོ་ཆེ་ལས་ཇི་སྐད་བསྟན་པའི་དོན་ཚིགས་བཅད་དུ་བསྡེབས་པ་བསླུ་མེད་བདེན་ཚིག་གྲུབ་པའི་འཕགས་པ་མཆོག་གི་གསུང་ཁྱད་པར་དུ་གྱུར་བའི་སྨོན་ལམ་འདི་ཉིད་ལ་ཉིན་མཚན་དུས་དྲུག་ཏུ་ནན་ཏན་བྱས་ཏེ། རྣམ་དག་བདེ་ཆེན་ཞིང་ལ་འདུན་པ་རྩེ་གཅིག་ཏུ་གཏད་པར་བྱས་ན། སྲིད་པ་འདི་ནས་འཕོ་བའི་ཚེ་དག་པའི་ཞིང་ཁམས་དེར་སངས་རྒྱས་སྣང་བ་མཐའ་ཡས་ཀྱི་ཞབས་དྲུང་དུ་ངེས་པར་སྐྱེ་བ་ནི། རྫོགས་པའི་སངས་རྒྱས་འོད་དཔག་ཏུ་མེད་པ་དེ་ཡི་སྔོན་གྱི་སྨོན་ལམ་ཆེན་པོའི་མཐུས་བསླུ་བ་མེད་པ་དེས་ན། དེར་སྐྱེ་བའི་རྒྱུ་བཞི་སྒྲུབ་པ་དང༌། སྨོན་ལམ་འདེབས་པར་བྱས་པས་ནི། རང་རེ་རྣམས་ཀྱིས་མི་ལུས་རིན་པོ་ཆེ་ཐོབ་པའི་དོན་གྱི་སྙིང་པོ་ལོན་པ་ཡིན་པས་ན། དེ་ལྟ་བུའི་ཆེད་དུ་སྨོན་ལམ་འདིའི་ཚིག་དོན་གོ་སླ་བའི་ཕྱིར་ཚིག་འགྲེལ་ཉུང་ཙམ་ཞུ་བ་ལགས་པས་ལེགས་པར་གསན་འཚལ།

༈ བཅོམ་ལྡན་འདས་མགོན་པོ་འོད་དཔག་ཏུ་མེད་པ་ལ་ཕྱག་འཚལ་ལོ། །འདི་ནས་ནུབ་ཀྱི་ཕྱོགས་རོལ་སྟེང་གི་ཆ། །སངས་རྒྱས་ཞིང་ཁམས་རྣམ་དག་བདེ་བ་ཅན། །སྨོན་ལམ་ཕུན་ཚོགས་ཡོངས་གྲུབ་རྒྱལ་བའི་མཆོག །སྲས་བཅས་བསམ་མི་ཁྱབ་ལ་ཕྱག་འཚལ་ལོ། །འཇིག་རྟེན་གྱི་ཁམས་མི་མཇེད་ཀྱི་ཞིང་ཁམས་འདི་ནས་ནུབ་ཀྱི་ཕྱོགས་རོལ་གྱི་སྟེང་གི་ཆ་སངས་རྒྱས་ཀྱི་ཞིང་ཁམས་སྣོད་དང་བཅུད་ཀྱི་ཚུལ་རྟེན་དང་བརྟེན་པའི་ཆོས་ཐམས་ཅད་རྣམ་པར་དག་པ་དང༌། དགའ་བདེ་ཡོན་ཏན་ཕུན་སུམ་ཚོགས་པ་ཅན་གྱི་ཞིང་། སྔོན་བཅོམ་ལྡན་འདས་འཇིག་རྟེན་དབང་ཕྱུག་རྒྱལ་པོའི་མདུན་དུ་བསྐལ་པ་ཆེན་པོ་དུ་མར་དགེ་སློང་ཆོས་ཀྱི་འབྱུང་གནས་ཀྱིས་སྨོན་ལམ་རྒྱ་མཚོ་ལྟ་བུའི་ཞིང་ཡོངས་སུ་བཟུང་བ་སྟེ། དེ་ཡང་སངས་རྒྱས་འཇིག་རྟེན་དབང་ཕྱུག་རྒྱལ་པོ་གང་ཡིན་པ་དེ་ཉིད་ཀྱིས་ལོ་བྱེ་བ་ཐམ་པར་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་སངས་རྒྱས་ཀྱི་ཞིང་གི་ཡོན་ཏན་གྱི་རྒྱན་བཀོད་པ་ཕུན་སུམ་ཚོགས་པ་ཐམས་ཅད་། རྣམ་པ་དང་བཅས། ཡུལ་ཕྱོགས་དང་བཅས། གཞི་ཅི་ལས་གྱུར་པ་དང་བཅས་པ། ཐམས་ཅད་ཡང་དག་པར་གསུངས་པ་ལ། དེ་དག་ཐམས་ཅད་ཀྱི་ཡོན་ཏན་ཡོངས་སུ་རྫོགས་པ་དེ་ཡང་དགེ་སློང་ཆོས་ཀྱི་འབྱུང་གནས་དེ་ཉིད་ཀྱིས་བསྐལ་པ་ལྔའི་བར་དུ་སངས་རྒྱས་ཀྱི་ཞིང་གི་ཡོན་ཏན་ཕུན་སུམ་ཚོགས་པ་ཐམས་ཅད་ཡོངས་སུ་བཟུང་སྟེ། དེ་ལྟ་བུའི་སྨོན་ལམ་བཏབ་པས་རྨད་དུ་བྱུང་བའི་ཚོགས་གཉིས་དང༌། སྙིང་སྟོབས་དང༌། བརྩོན་འགྲུས་དང༌། གཟུངས་དང་ཏིང་ངེ་འཛིན་གྱི་སྟོབས་ཀྱིས་སྨོན་ལམ་ཕུན་སུམ་ཚོགས་པའི་འབྲས་བུ་ཡོངས་སུ་གྲུབ་པར་གྱུར། དེ་ལྟ་བུའི་རྒྱལ་བའི་ཞིང་མཆོག་དེ་ན་མཁྱེན་བརྩེ་ནུས་གསུམ་གྱི་ཡོན་ཏན་ཡོངས་སུ་རྫོགས་ཤིང༌། སྐུ་དང་ཡེ་ཤེས་ཕྲིན་ལས་ཀྱི་རྣམ་རོལ་བསམ་གྱིས་མི་ཁྱབ་པའི་རྒྱལ་བ་སྐུ་ཚེ་དཔག་ཏུ་མེད་པ་འོད་མཚན་སྟོང་དུ་འབར་བ་སྣང་བ་མཐའ་ཡས་དང༌། རྒྱལ་བའི་འཁོར་ཚོགས་ས་ལ་གནས་པའི་བྱང་ཆུབ་སེམས་དཔའ་དང་། སྲིད་པའི་འཆིང་བ་ལས་གྲོལ་བའི་ཉན་ཐོས་ཆེན་པོ་སོགས་བསམ་གྱིས་མི་ཁྱབ་པ་བཞུགས་པ་དེ་དག་ཐམས་ཅད་ལ་ཕྱག་འཚལ་ལོ། །རིན་ཆེན་ས་གཞི་མཉམ་ཡངས་མཐའ་བྲལ་བ། །རྒྱ་མཚོ་རི་ཀླུང་གླིང་གཞན་ཐ་དད་མེད། །གསལ་ཞིང་འོད་འབར་བདེ་ཞིང་ཉམས་དགའ་བ། །རྣམ་དག་རྒྱལ་བའི་ཞིང་དེར་སྐྱེ་བར་ཤོག །དེ་ལྟར་འཇིག་རྟེན་དབང་ཕྱུག་རྒྱལ་པོའི་དྲུང་དུ་དགེ་སློང་ཆོས་ཀྱི་འབྱུང་གནས་ཀྱིས་ཞིང་གི་བཀོད་པ་སྨོན་ལམ་གྱི་སྟོབས་ཀྱིས་ཡོངས་སུ་གྲུབ་པར་གྱུར་པས། བདེ་བ་ཅན་གྱི་ཞིང་ཁམས་དེ་ཡི་ས་གཞི་ཐམས་ཅད་ནི་རིན་པོ་ཆེ་སྣ་ཚོགས་ལས་གྲུབ་པ། དེ་ཡང་ཁོད་སྙོམས་པ་ཡངས་ཤིང་མཐའི་རྒྱ་ཁྱོན་འདི་ཙམ་ཞིག་ཚད་དཔག་ཏུ་མེད་པ་མཐའ་དང་བྲལ་བ་དེ། རྒྱ་མཚོ་དང༌ རི་ནག་པོ་ལ་སོགས་པ་དང༌། གླིང་སོ་སོར་བཅད་པ་ལ་སོགས་དེ་འདྲའི་མི་མཉམ་པ་ཐ་དད་ཀྱི་རྣམ་པ་གང་ཡང་མེད་པ། གསལ་ཞིང་འོད་ཟེར་འབར་བ་དང་། བདེ་ཞིང་ཉམས་དགའ་བ་དེ་ལྟ་བུའི་རྣམ་པར་དག་པ་རྒྱལ་བའི་ཞིང་དེར་བདག་སོགས་ཀྱི་ཕ་མ་འབྲེལ་ཐོགས་དང་བཅས་པའི་གཙོས་སེམས་ཅན་ཐམས་ཅད་སངས་རྒྱས་ཀྱི་སྨོན་ལམ་གྱིས་ཡོངས་སུ་བཟུང་བ་བཞིན་དུ་སྐྱེ་བར་ཤོག་ཅིག རིན་ཆེན་སྣ་ཚོགས་ལས་གྲུབ་ལྗོན་པའི་ཤིང་། །སྤོས་ཆུ་ཀླུང་འབེབས་རིན་ཆེན་པདྨོ་གང་། །དྲི་ཞིམ་ངད་ལྡན་མེ་ཏོག་འབྲས་བུས་བརྒྱན། །དཔལ་གྱི་ཞིང་རབ་དེ་རུ་སྐྱེ་བར་ཤོག །སངས་རྒྱས་ཀྱི་དྲུང་དུ་དགེ་སློང་ཆོས་ཀྱི་འབྱུང་གནས་ཀྱིས་ཞིང་ཡོངས་སུ་བཟུང་ཞིང་སྨོན་ལམ་བཏབ་པ་ལྟར། རིན་ཆེན་སྣ་ཚོགས་ལས་གྲུབ་པ་ཞེས་པས་རིན་པོ་ཆེ་གསེར་དང་དངུལ་ལ་སོགས་པ་སྣ་ཚོགས་ལས་གྲུབ་པ། རྩ་བ་གསེར། ཡལ་ག་དང་ལོ་མ་དངུལ་དང་བཻཌཱུརྱ་ལ་སོགས་དང༌། ཡང་ན་རྩ་བ་ཡང་རིན་པོ་ཆེ་སྣ་བདུན། ཡལ་ག་དང་ལོ་མ་ཡང་རིན་པོ་ཆེ་སྣ་བདུན་ལས་མེ་ཏོག་འབྲས་བུའི་བར་དུ་རིན་པོ་ཆེ་སྣ་བདུན་ལས་གྲུབ་པ་ལ་སོགས་དེ་ལྟ་བུའི་ཤིང་ལྗོན་པས་ཞིང་ཁམས་དེ་བརྒྱན་ཞིང༌། སྤོས་ཀྱི་ཆུའི་ཀླུང་དྲི་བཟང་པོའི་བསུང་ངད་ལྡན་ཞིང་ཤིན་ཏུ་དལ་གྱིས་འབབས་པ་ལ་རིན་པོ་ཆེ་སྣ་ཚོགས་ཀྱི་པདྨོས་གང་ཞིང༌། དྲི་ཞིམ་པའི་ངད་དང་ལྡན་པ་དེ་ལྟ་བུའི་མེ་ཏོག་གང་ཡིན་པ་དེ་དག་ཐམས་ཅད་ཀུན་ལ་ཡང་། རོ་བདའ་ཞིང་མངར་བ་ལ་སོགས་པའི་འབྲས་བུ་རིགས་ཕུན་སུམ་ཚོགས་པས་བརྒྱན་པར་གྱུར་པ། དེ་ལྟ་བུ་དཔལ་དང་ཡོན་ཏན་གྱིས་བརྒྱན་པའི་ཞིང་རབ་བམ་མཆོག་ཏུ་གྱུར་པ་དེ་རུ་བདག་སོགས་སེམས་ཅན་ཐམས་ཅད་སྐྱེ་བར་ཤོག་ཅིག སྤྲུལ་བའི་བྱ་ཚོགས་སྙན་པའི་ཆོས་སྒྲ་སྒྲོག །བདེ་རླུང་གཡོ་བའི་མེ་ཏོག་ཆར་ཆེན་འབེབས། །བཀོད་ལེགས་མཉམ་ཞིང་རབ་བཀྲ་ཡིད་འོང་ལྡན། །ཕུན་ཚོགས་འབྱོར་ལྡན་ཞིང་དེར་སྐྱེ་བར་ཤོག །བདེ་བ་ཅན་དེ་ན་ཐ་མལ་གྱི་སེམས་ཅན་དུད་འགྲོ་ལ་སོགས་པ་མིང་དང་སྒྲ་ཙམ་ཡང་མི་གྲགས་ཤིང༌། བྱང་ཆུབ་སེམས་དཔའ་མཆོག་གིས་རྣམ་པར་སྤྲུལ་པའི་མཛེས་ཤིང་ཡིད་དུ་འོང་བའི་བྱ་ཡི་ཚོགས་རྣམས་ཀྱིས། བྱང་ཆུབ་སེམས་དཔའ་རྣམས་ཀྱི་སྤྱོད་པའི་རྣམ་པ་དང༌། ཟབ་པ་དང༌། རྒྱ་ཆེ་བའི་སྙན་པ་དམ་པའི་ཆོས་ཀྱི་སྒྲ་སྒྲོག་ཅིང༌། དུས་དང་དུས་སུ་ལུས་ལ་ཟག་མེད་ཀྱི་བདེ་བ་སོགས་སྐྱེད་པའི་རླུང་གཡོ་བས་རེག་བྱས་རེག་ཅིང་། མེ་ཏོག་གི་ཆར་ཡང་དུས་དུས་སུ་འབེབས། གཞི་ཁོད་སྙོམས་པ་ལ་མི་འགྲེང་བ་བདུན་ཙམ་གྱི་མེ་ཏོག་གཅལ་དུ་བཀྲམ་པས་བཀོད་ལེགས་ཤིང༌། རབ་ཏུ་མཉམ་ཞིང་ཁ་དོག་རབ་ཏུ་བཀྲ་བ་ཡིད་དུ་འོང་བ་དང་ལྡན་པ། དེ་ལྟ་བུ་ཕུན་སུམ་ཚོགས་པའི་འབྱོར་བ་དང་ལྡན་པའི་ཞིང་མཆོག་དེར་བདག་སོགས་སེམས་ཅན་ཐམས་ཅད་སྐྱེ་བར་ཤོག་ཅིག་ཅེས་བསྔོ་ཞིང་སྨོན་ལམ་གདབ། ཤིང་དང་ཆུ་ཀླུང་པདྨོ་ཐམས་ཅད་ལས། །ཡིད་འོང་གཟུགས་སྒྲ་དྲི་རོ་རེག་བྱ་ཆོས། །དགའ་བདེ་སྤེལ་བའི་འདོད་ཡོན་མཆོད་སྤྲིན་འབྱུང་། །འདོད་དགུ་ལྷུན་གྲུབ་ཞིང་དེར་སྐྱེ་བར་ཤོག །དེ་ལྟར་རིན་པོ་ཆེ་སྣ་གཅིག་དང་གཉིས་དང་སྣ་བདུན་ལ་སོགས་པ་དུ་མས་གྲུབ་པའི་ཤིང་དང་། གཞན་ཡང་བདེ་བའི་རེག་བྱ་སྦྱིན་པའི་ཀླུང་དང་། དྭངས་བསིལ་ཡན་ལག་བརྒྱད་དང་ལྡན་པའི་ ཆུ་དང་། ཁ་དོག་སྣ་ཚོགས་ཀྱི་དྲིའི་ངད་བཟང ་པོ་ཕུན་སུམ་ཚོགས་པ་དང་ལྡན་པའི་པདྨོ་སྟེ། དེ་ཐམས་ཅད་ཡིད་དུ་འོང་བའི་གཟུགས་དང་སྒྲ་དང་དྲི་དང་རོ་དང་རེག་བྱའི་ཆོས་གང་ཅི་འདོད་དུ་འབྱུང་བའི་དགའ་བདེའི་ཡོན་ཏན་སྤེལ་བར་བྱེད་ཀྱང༌། འདོད་ཡོན་གྱི་མཆོད་སྤྲིན་དུ་མ་འབྱུང་བའི་འདོད་དགུའི་དངོས་པོ་ཐམས་ཅད་འབད་པ་མེད་པར་ལྷུན་གྱིས་གྲུབ་པའི་ཞིང་མཆོག་དམ་པ་དེར་བདག་སོགས་འགྲོ་བ་སེམས་ཅན་ཐམས་ཅད་སྐྱེ་བར་ཤོག་ཅིག ཐམས་ཅད་ལས་ཀྱང་སྣ་ཚོགས་འོད་རབ་འཕྲོ། །དེ་ལས་མཚན་དཔེས་རབ་བརྒྱན་རྒྱལ་བའི་སྐུ། །མཁའ་དབྱིངས་གང་འཁྲིགས་ཟབ་ཡངས་ཆོས་སྟོན་པ། །ཆོས་དབྱིངས་རྣམ་དག་ཞིང་དེར་སྐྱེ་བར་ཤོག །གནས་དང་ཡོ་བྱད་ཤིང་ལ་སོགས་པ་ནས་ཕྱི་ནང་གི་དངོས་པོ་ཐམས་ཅད་ལས་ཀྱང་སྣ་ཚོགས་པའི་འོད་ཟེར་རབ་ཏུ་འཕྲོ་ཞིང༌། དེ་ལྟ་བུའི་འོད་ཀྱིས་གང་ཞིང་འཁྲིགས་པ་དེར། ཕྱག་དང་ཞབས་ལ་འཁོར་ལོ་རྩིབས་སྟོང་གི་རི་མོ་བཀྲ་བ་སོགས་མཚན་བཟང་པོ་སུམ་ཅུ་རྩ་གཉིས་དང༌། དཔེ་བྱད་བཟང་པོ་བཅུ་ཕྲག་བརྒྱད་ཀྱིས་རབ་ཏུ་བརྒྱན་པའི་རྒྱལ་བ་འོད་དཔག་ཏུ་མེད་པའམ་ཚེ་དཔག་ཏུ་མེད་པ་གང་གི་སྐུ། མཁའ་དབྱིངས་ཡོངས་སུ་གང་བའི་འོད་དང་འོད་ཟེར་གྱི་སྣང་བ་ཀུན་ནས་འཁྲིགས་ཤིང་། ཟབ་པ་དང་ཡངས་པ་སྟེ་རྒྱ་ཆེ་བའི་ཆོས་ཀུན་ནས་སྟོན་པའི་ཆོས་དབྱིངས་རྣམ་པར་དག་པའི་ཞིང་མཆོག་དེར། སྐྱེ་སྲིད་གཞན་གྱིས་བར་མ་ཆོད་པར་བདག་སོགས་སེམས་ཅན་ཐམས་ཅད་སྐྱེ་བར་ཤོག་ཅིག ངན་སོང་ལྷ་མིའི་མི་ཁོམ་མིང་ཡང་མེད། །བུད་མེད་མེད་ཅིང་མངལ་ནས་སྐྱེ་བ་མེད། །ཉོན་མོངས་ནད་དང་སྡུག་བསྔལ་ཅུང་ཟད་མེད། །ཉེས་སྐྱོན་ཀུན་བྲལ་ཞིང་དེར་སྐྱེ་བར་ཤོག །དེ་ལྟ་བུའི་བདེ་བ་ཅན་གྱི་ཞིང་དེ་ན་དམྱལ་བ་ལ་སོགས་པ་ངན་སོང་གསུམ་དང་། གཞན་ཡང་མཐོ་རིས་ལྷ་མི་ལ་སོགས་པ་དང༌། མི་ཁོམ་པའི་གནས་བརྒྱད་སོགས་ཀྱི་མིང་ཙམ་ཡང་མེད་ཅིང་མི་གྲགས་ལ། གནས་དེ་ན་ལུས་རྟེན་དམན་པ་བུད་མེད་མེད་ཅིང་། རྫོགས་པའི་སངས་རྒྱས་ཀྱི་སྨོན་ལམ་དང་ཡེ་ཤེས་ཀྱིས་གྲུབ་པའི་ཞིང་དེ་ན། བརྫུས་ཏེ་སྐྱེ་བ་འབའ་ཞིག་མ་གཏོགས་པ། སྐྱེ་བ་ཐམས་ཅད་ཀྱི་ནང་ན་ཐ་ཆད་པ་སྒོ་ང་ལས་སྐྱེས་པ་ལྟ་བུ་དང༌མངལ་ནས་སྐྱེས་པ་སོགས་ཀྱང་མེད་པ། དེ་ལྟ་བུའི་བདེ་བ་ཅན་གྱི་ཞིང་དེ་ནི་ཉེས་སྐྱོན་གྱི་རང་བཞིན་ཅན་གྱི་ཉོན་མོངས་པ་དང༌། ནད་དང་སྡུག་བསྔལ་གང་ཅུང་ཟད་ཀྱང་མེད་པས་ན། ཉེས་སྐྱོན་ཀུན་བྲལ་གྱི་ཞིང་དེར་སྐྱེ་བ་འདིའི་ཕ་མའི་ཐོག་དྲངས་བདག་སོགས་འགྲོ་བ་སེམས་ཅན་ཐམས་ཅད་སྐྱེ་བར་ཤོག་ཅིག ལྷ་མིའི་མིང་ཙམ་ལུས་འབྱོར་ཐ་དད་མེད། །ཐམས་ཅད་གཅིག་པར་གསེར་མདོག་མཚན་དཔེས་བརྒྱན། །མངོན་ཤེས་ལྔ་དང་སྤྱན་ལྔ་ཆགས་པ་མེད། །ཡོན་ཏན་ཀུན་རྫོགས་ཞིང་དེར་སྐྱེ་བར་ཤོག །དེ་ལྟ་བུའི་བདེ་བ་ཅན་གྱི་ཞིང་དེ་ནི་སྔོན་སངས་རྒྱས་ཀྱི་སྨོན་ལམ་གྱིས་ཡོངས་སུ་བཟུང་བ་བཞིན་དུ། ལྷ་དང་མི་ཡི་མིང་ཙམ་དང་ལུས་དང་འབྱོར་བ་ལ་སོགས་པ་ཐ་དད་པ་དེ་ལྟ་བུའི་རྣམ་པ་ཅན་གང་ཡང་མེད་པར། ཐམས་ཅད་ཀུན་ཀྱང་རྣམ་པ་གཅིག་པ་ལྟ་བུར་གསེར་བཙོ་མའི་མདོག་མཚན་དང་དཔེ་བྱད་ཀྱིས་རབ་ཏུ་བརྒྱན་པའི་བདག་ཉིད་ཅན་ཡིན་ལ། བདེ་བ་ཅན་གྱི་ཞིང་དེར་བཞུགས་པའི་བྱང་ཆུབ་སེམས་དཔའི་དགེ་སློང་དང་དགེ་འདུན་གྱི་ཚོགས་ཐམས་ཅད་ཀུན་ཀྱང་། གཞན་སེམས་ཤེས་པའི་མངོན་ཤེས་ལ་སོགས་པ་མངོན་ཤེས་ལྔ་དང༌། ཤའི་སྤྱན་དང་ལྷ་ཡི་སྤྱན་ལ་སོགས་སྤྱན་ལྔས་འཇིག་རྟེན་གྱི་ཁམས་གྲངས་མེད་པ་གཟིགས་པས་ཆགས་ཐོགས་མེད་པ་ཡོན་ཏན་གྱི་ཚོགས་ཀུན་རྫོགས་པར་འགྱུར་བའི་ཞིང་མཆོག་དེ་རུ་སྐྱེ་བར་ཤོག་ཅིག གནས་དང་རྫས་དང་ལུས་ལ་བདག་འཛིན་བྲལ། །ཡིད་ལ་དྲན་པའི་གང་དགོས་འདོད་དགུ་འབྱུང་། །ཀུན་ཀྱང་ཐེག་མཆོག་ཟབ་མོའི་ཆོས་ལ་སྤྱོད། །ཐེག་ཆེན་ཡོངས་རྫོགས་ཞིང་དེར་སྐྱེ་བར་ཤོག །བདེ་བ་ཅན་གྱི་ཞིང་དེ་ནི་སངས་རྒྱས་ཀྱི་སྨོན་ལམ་གྱིས་ཡོངས་སུ་བཟུང་བ་བཞིན་དུ། ཇི་ལྟར་གནས་ཐ་དད་པ་དང་། རྫས་སོ་སོ་བདག་གི་བའི་འདུ་ཤེས་དང༌། ལུས་ལ་བདག་འཛིན་དང་བྲལ་ཞིང་། ཡིད་ལ་གང་དང་གང་དྲན་པའི་ལེགས་དགུའི་དངོས་པོ་ཐམས་ཅད་བསམ་པ་ཙམ་གྱིས་གང་དགོས་པ་ཐམས་ཅད་ཇི་ལྟར་འདོད་པ་བཞིན་ཀུན་ཏུ་འབྱུང་བར་འགྱུར་ཞིང༌། ཀུན་ཀྱང་ཐེག་པ་ཆེན་པོ་མཆོག་གི་ཟབ་མོའི་ཆོས་ལ་སྤྱོད་པས། ཐེག་པ་ཆེན་པོའི་ལམ་དང་འབྲས་བུའི་ཡོན་ཏན་མཐའ་དག་ཡོངས་སུ་རྫོགས་པའི་ཞིང་ཁམས་མཆོག་དེར་བདག་སོགས་སེམས་ཅན་ཐམས་ཅད་སྐྱེ་བར་ཤོག་ཅིག རྫུ་འཕྲུལ་སྟོབས་ཀྱིས་མཐའ་ཡས་ཞིང་རྣམས་བགྲོད། །མཆོད་སྤྲིན་རྒྱ་མཚོ་ལག་པའི་མཐིལ་ནས་འབྱུང་། །རྒྱལ་བ་ཀུན་མཆོད་འགྲོ་ཀུན་སྨིན་གྲོལ་མཛད། །སྤྲུལ་སྐུའི་ཞིང་མཆོག་དེ་རུ་སྐྱེ་བར་ཤོག །རྫུ་འཕྲུལ་གྱི་སྟོབས་ཀྱིས་སྔ་དྲོའི་དུས་ལ་སོགས་པར་མཐའ་ཡས་པའི་ཞིང་ཁམས་རྣམས་ལ་ཐོགས་པ་མེད་པར་བགྲོད་ནས། དེར་བཞུགས་པའི་འགྲོ་བའི་མགོན་པོ་རྒྱལ་བ་རྫོགས་པའི་སངས་རྒྱས་སྲས་དང་བཅས་པ་ཀུན་ལ། རང་གི་ལག་པའི་མཐིལ་ནས་བྱུང་བའི་མཆོད་པའི་དངོས་པོ་བཀྲ་ཤིས་པའི་རྫས་བརྒྱད་དང༌། རྒྱལ་སྲིད་རིན་པོ་ཆེ་སྣ་བདུན་དང༌། གདུགས་དང༌། རྒྱལ་མཚན་དང༌། བ་དན་དང་། རྔ་ཡབ་ནོར་བུའི་ཡུ་བ་ཅན་དང༌། ན་བཟའ་རྒྱན་ཕྲེང་དང༌། གཞལ་མེད་ཁང་དང་། རོལ་མོའི་བྱེ་བྲག་སྣ་ཚོགས་དང་། བཀྲ་ཤིས་པའི་རྟགས་བརྒྱད་སོགས་མཆོད་པའི་སྤྲིན་རྒྱ་མཚོ་ལྟ་བུ་དཔག་ཏུ་མེད་པས། ཞིང་ཁམས་དེ་དག་ན་བཞུགས་པའི་རྒྱལ་བ་ཀུན་ལ་མཆོད་ཅིང་། འགྲོ་བ་ཀུན་ཀྱང་རྒྱུད་སྨིན་པ་དང༌གྲོལ་བར་མཛད་དེ། སླར་ཡང་བདེ་བ་ཅན་གྱི་ཞིང་དེར་ཕྱི་དྲོ་ཁར་བདེ་བླག་ཏུ་སླེབ་པར་མཛད་པ། དེ་ལྟ་བུའི་སྤྲུལ་སྐུའི་ཞིང་མཆོག་དེ་རུ་བདག་སོགས་འགྲོ་བ་སེམས་ཅན་ཐམས་ཅད་སྐྱེ་བར་ཤོག་ཅིག རིན་ཆེན་པདྨོ་རྣམ་པར་སྣང་ཞེས་བྱ། །བྱང་ཆུབ་ཤིང་མཆོག་སྟོང་དང་དྲུག་བརྒྱ་བ། །མེ་ཏོག་འབྲས་བུ་རྒྱན་ཕྲེང་དུ་མས་བརྒྱན། །དེ་མཐོང་ཡོན་ཏན་སྣ་ཚོགས་ཐོབ་པར་ཤོག །བདེ་བ་ཅན་གྱི་ཞིང་དེ་ན་རྒྱལ་བའི་དབང་པོ་མགོན་པོ་ཚེ་དཔག་ཏུ་མེད་པའམ་མགོན་པོ་འོད་དཔག་ཏུ་མེད་པ་གང་ཉིད་ཀྱི་སྐུའི་རྒྱབ་ཕྱོགས་བརྟེན་སའི་བྱང་ཆུབ་ཀྱི་ཤིང་རིན་པོ་ཆེ་པདྨོ་རྣམ་པར་སྣང་བྱེད་ཅེས་བྱ་བ། དཔག་ཚད་སྟོང་དང་དྲུག་བརྒྱའི་འཕང་དུ་བསླེབས་པ། མེ་ཏོག་དང་འབྲས་བུ་དང་། དྲ་བ་དང༌དྲ་བ་ཕྱེད་པ་སོགས་རིན་པོ་ཆེའི་རྒྱན་ཕྲེང་དུ་མས་བརྒྱན་པའི་བྱང་ཆུབ་ཀྱི་ཤིང་སྟེ། གང་གིས་མཐོང་ན་དེའི་རྒྱུད་ལ་ཡོན་ཏན་སྣ་ཚོགས་ཐོབ་པར་སངས་རྒྱས་ཀྱི་སྨོན་ལམ་གྱིས་ཡོངས་སུ་བཟུང་བ་བཞིན། བྱང་ཆུབ་ཀྱི་ཤིང་དེ་མཐོང་བ་ཙམ་གྱིས་གཟུངས་དང་ཏིང་ངེ་འཛིན་སོགས་ཀྱི་ཡོན་ཏན་སྣ་ཚོགས་ཐོབ་པར་ཤོག་ཅིག རིན་ཆེན་ས་གཞི་མེ་ཏོག་དུ་མས་བརྒྱན། །དེ་དབུས་པདྨ་གེ་སར་སྡོང་པོའི་ཚོགས། །དག་གསལ་བཟང་ཞིང་བཀྲ་བའི་འོད་ཟེར་ཅན། །པདྨོའི་གདན་མཆོག་དེ་འདྲ་མཐོང་བར་ཤོག ། དེ་ལྟ་བུའི་བྱང་ཆུབ་ཀྱི་ཤིང་པདྨོ་རྣམ་པར་སྣང་བྱེད་དེ་ཉིད་ཀྱི་དྲུང་དུ་རིན་པོ་ཆེའི་ས་གཞི་ལ་ལྷའི་མེ་ཏོག་མནྡ་ར་དང༌། པདྨ་དཀར་པོ་དང༌། ཨུཏྤལ་སོགས་དུ་མས་བརྒྱན་ཞིང༌། དེའི་དབུས་སུ་པདྨ་འདབ་མ་སྟོང་དང་གེ་སར་དང་སྡོང་པོའི་ཚོགས་དང་ལྡན་པ་དག་ཀྱང་། གསལ་ལ་ཤིན་ཏུ་ཁ་དོག་བཟང་ཞིང་དྲི་མ་མེད་པ་རྣམ་པར་བཀྲ་བའི་འོད་ཟེར་ཅན་རྒྱལ་བ་མགོན་པོ་འོད་དཔག་ཏུ་མེད་པ་ཉིད་བཞུགས་པའི་པདྨའི་གདན་མཆོག་དེ་འདྲ་བ། བདག་སོགས་སེམས་ཅན་ཐམས་ཅད་ཀྱིས་མངོན་སུམ་དུ་མཐོང་བར་ཤོག དེ་སྟེང་རྒྱལ་བ་མགོན་པོ་འོད་དཔག་མེད། །གཡས་ན་བྱང་ཆུབ་སེམས་དཔའ་སྤྱན་རས་གཟིགས། །གཡོན་ན་བྱང་ཆུབ་སེམས་དཔའ་མཐུ་ཆེན་ཐོབ། །གྲངས་མེད་སེམས་དཔས་བསྐོར་བ་མཐོང་པར་ཤོག །དེ་ལྟ་བུའི་བྱང་ཆུབ་ཀྱི་ཤིང་པདྨོ་རྣམ་པར་སྣང་བྱེད་དེ་ཉིད་ཀྱི་དྲུང་དུ། དག་ཅིང་དྲི་མ་མེད་པའི་པདྨོའི་གདན་རྣམ་པར་བཀྲ་བ་བཀོད་པའི་གདན་ཕུན་སུམ་ཚོགས་པ་དེ་ཡི་སྟེང་དུ། རྒྱལ་བ་མགོན་པོ་འོད་དཔག་མེད་པ་སྐུ་ལུས་པདྨ་རཱ་གའི་ལྷུན་པོ་ལ་ཉིན་བྱེད་འབུམ་གྱིས་འཁྱུད་པ་ལྟ་བུ་ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། ཕྱག་གཉིས་མཉམ་བཞག་མཛད་པས་འཆི་མེད་ཡེ་ཤེས་ཀྱི་བདུད་རྩིས་བཀང་བའི་ལྷུང་བཟེད་བསྣམས་པ། སྐུ་ལ་ཆོས་གོས་རྣམ་པ་གསུམ་གསོལ་བ། འོད་དང་གཟི་བརྗིད་རབ་ཏུ་འབར་བ་མཚན་བཟང་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུས་རྣམ་པར་སྤྲས་པ་ལྷམ་མེ་ལྷང་ངེ་ལྷན་ནེར་བཞུགས་པ། དེ་ཡི་སྐུའི་གཡས་ཕྱོགས་ན་བྱང་ཆུབ་སེམས་དཔའ་འཕགས་མཆོག་སྤྱན་རས་གཟིགས་དབང་ཕྱུག་སྐུ་མདོག་དཀར་པོ་ཕྱག་ན་པདྨ་བསྣམས་པ་དང༌། སྐུའི་གཡོན་ཕྱོགས་ན་བྱང་ཆུབ་སེམས་དཔའ་རྒྱལ་སྲས་མཐུ་ཆེན་ཐོབ་དཔལ་གསང་བའི་བདག་པོ་ཉིད་སྐུ་མདོག་སྔོན་པོ་ཕྱག་ན་རྡོ་རྗེས་མཚན་པའི་པདྨ་བསྣམས་པ། དེ་ལྟ་བུའི་རྒྱལ་བ་མགོན་པོ་འོད་དཔག་ཏུ་མེད་པ་དང་ཐུགས་སྲས་བྱང་ཆུབ་སེམས་དཔའ་མཆོག་གཉིས་ཏེ་གཙོ་བོ་གསུམ་པོ་ལ། གྲངས་མེད་བྱང་ཆུབ་སེམས་དཔའི་དགེ་སློང་གི་དགེ་འདུན་གྱིས་ཡོངས་སུ་བསྐོར་བ། ཞལ་མཐོང་བ་དང༌གསུང་ཐོས་པ་ཙམ་གྱིས་ཟག་མེད་ཡེ་ཤེས་ཀྱི་སྣང་བ་བསྐྱེད་པ་དེ་ལྟ་བུའི་རྒྱལ་བ་སྲས་དང་བཅས་པ་ཉིད། ཕ་མ་འབྲེལ་ཐོགས་རྣམས་ཀྱི་གཙོར་བྱས་པའི་སེམས་ཅན་ཐམས་ཅད་ཀྱི་མངོན་སུམ་དུ་མཐོང་བར་ཤོག་ཅིག འོད་ནི་དཔག་མེད་གཟི་བརྗིད་དཔག་མེད་དང་། །སྐུ་ཚེ་དཔག་མེད་དགེ་འདུན་དཔག་མེད་དང་། །བྱང་ཆུབ་སེམས་དཔས་བསྐོར་ཅིང་མཛེས་གྱུར་པ། །རྒྱལ་མཆོག་དེ་འདྲའི་དྲུང་དེར་སྐྱེ་བར་ཤོག །རྒྱལ་བ་ཚེ་དཔག་ཏུ་མེད་པ་དེ་ནི་སྔོན་གྱི་ཚོགས་གཉིས་རྒྱ་མཚོ་ལྟ་བུ་དང་ཐུགས་བསྐྱེད་དང་སྨོན་ལམ་རྨད་དུ་བྱུང་བའི་སྟོབས་ཀྱིས། འོད་དང་འོད་ཟེར་གྱི་མཐའ་འདི་ཙམ་ཞེས་དཔག་པར་དཀའ་བས་དཔག་ཏུ་མེད་པ་དང་ནི། དེ་བཞིན་དུ་གཟི་བརྗིད་དཔག་ཏུ་མེད་པ་དང༌། སྐུ་ཚེའི་ཚད་འདི་ཙམ་ཞེས་གྲངས་ཀྱིས་དཔག་ཏུ་མེད་པ་དང༌། དེའི་འཁོར་རྒྱལ་སྲས་བྱང་ཆུབ་སེམས་དཔའི་དགེ་འདུན་དང་ཉན་ཐོས་འཁོར་འདུས་པ་དང་པོ་ལ་སོགས་པ་དེ་དག་གི་ཚད་ཀྱང་དཔག་ཏུ་མེད་པ་ཡིན་པའི་ཚུལ་མདོ་ལས་གསུངས་པ་ལྟར། བྱང་ཆུབ་སེམས་དཔའི་དགེ་སློང་གི་དགེ་འདུན་གྱིས་བསྐོར་ཅིང་ཀུན་ནས་གཙོ་བོ་ལ་འཁོར་གྱིས་ཡོངས་སུ་བསྐོར་བ་དེ་ལྟ་བུའི་ཡེ་ཤེས་ཡོན་ཏན་མཚན་དང་དཔེ་བྱད་སོགས་ཀྱིས་མཛེས་པར་གྱུར་པའི་རྒྱལ་མཆོག་དེ་འདྲའི་དྲུང་དེར། རང་གཞན་སེམས་ཅན་ཐམས་ཅད་སྲིད་པ་གཞན་གྱིས་བར་མ་ཆོད་པར་སྐྱེ་བར་ཤོག་ཅིག ཞིང་དེར་པདྨོའི་མཆོག་ལས་སྐྱེས་ནས་ཀྱང་། །ལྷ་ཡི་མིག་དང་ལྷ་ཡི་རྣ་བ་དང་། །སྔོན་གནས་དྲན་དང་བློ་གྲོས་མཁས་མཆོག་དང་། །རྫུ་འཕྲུལ་མཆོག་གི་སྟོབས་ཀྱང་མཐོང་བར་ཤོག ། ཞིང་དེར་ཡང་མངལ་སྐྱེས་ལ་སོགས་པ་མེད་པ། པདྨོ་དཔག་ཚད་བརྒྱ་སྟོང་དུ་མ་ཁེབས་པ་ལྷའི་ཁང་བཟང་བཀོད་ལེགས་ཕུན་སུམ་ཚོགས་པ་དང་ལྡན་པ། དེ་ལྟ་བུའི་པདྨོའི་མཆོག་ལས་བརྫུས་ཏེ་སྐྱེས་ནས་དེ་མ་ཐག་སངས་རྒྱས་ཀྱི་ཞལ་མཐོང་ཞིང༌། ལྷའི་མིག་དང་ལྷ་ཡི་རྣ་བའི་མངོན་ཤེས་དང༌། སྔོན་གནས་དྲན་པ་དང་། གཞན་ཡང་ཆོས་རྣམས་ཀྱི་དོན་ཡོངས་སུ་འབྱེད་པའི་བློ་གྲོས་དང༌། དེ་ཁོ་ན་ཉིད་ཀྱི་དོན་སོགས་ལ་མཁས་པ་མཆོག་དང་ནི་རྫུ་འཕྲུལ་མཆོག་གི་སྟོབས་ཀྱང་ཡོངས་སུ་རྫོགས་པ་འཐོབ་པར་ཤོག་ཅིག བདག་གིས་མགོན་མཛད་རྒྱལ་བ་འཇིག་རྟེན་མགོན། །རྫོགས་པའི་སངས་རྒྱས་མཆོག་དེ་མཐོང་ནས་ཀྱང་། །གུས་དང་བཅས་པའི་ཟབ་ཡངས་ཆོས་ཐོབ་ནས། །སྐད་ཅིག་དེ་ལ་ས་བཅུ་ཡོངས་རྫོགས་ཤོག །དེ་ལྟར་ཞིང་མཆོག་དེར་སྐྱེས་ནས་བདག་གིས། མཐའ་ཡས་པའི་སེམས་ཅན་ཐམས་ཅད་ཀྱི་མགོན་དང་སྐྱབས་མཛད་པའི་རྒྱལ་བ་འཇིག་རྟེན་གྱི་མགོན་པོ་རྫོགས་པའི་སངས་རྒྱས་མཆོག་ཚེ་དཔག་ཏུ་མེད་པ་དེ་ཞལ་མངོན་སུམ་དུ་མཐོང་ནས། གུས་པ་དང་བཅས་པའི་སྒོ་ནས་རྒྱལ་བའི་གསུང་གི་སྣང་བ་དམ་པའི་ཆོས་ཟབ་པ་དང་ཡངས་བའམ་རྒྱ་ཆེ་བའི་ཐེག་པ་མཆོག་གི་ཆོས་ཐོབ་ནས། སྐད་ཅིག་དེ་ཉིད་ལ་ས་རབ་ཏུ་དགའ་བ་ལ་སོགས་པ་ནས་བཅུ་པ་ཆོས་ཀྱི་སྤྲིན་གྱི་བར་ས་བཅུ་ཡོངས་སུ་རྫོགས་པ་ཐོབ་པར་ཤོག་ཅིག བདེ་གཤེགས་འོད་དཔག་མེད་ཀྱིས་ལུང་བསྟན་ནས། །སངས་རྒྱས་བྱེ་བ་མང་ལ་མཆོད་པར་བགྱི། །རྫུ་འཕྲུལ་སྟོབས་ཀྱིས་ཞིང་མང་སོང་ནས་ནི། །རྒྱལ་བ་ཀུན་མཆོད་འགྲོ་ཀུན་སྨིན་གྲོལ་ཤོག །བདེ་བ་ཅན་གྱི་ཞིང་དེར་རྒྱལ་བ་མགོན་པོ་འོད་དཔག་ཏུ་མེད་པ་ཉིད་ཀྱིས་ལུང་བསྟན་པའི་སྒོ་ནས། ཕྱོགས་བཅུའི་སངས་རྒྱས་བྱེ་བ་གྲངས་མེད་པ་མང་རབ་ལ། བདག་གིས་བྱང་སེམས་བདག་ཉིད་ཆེན་པོ་ཀུན་ཏུ་བཟང་པོའི་མཆོད་པའི་རྣམ་པར་འཕྲུལ་བ་ལྟ་བུའི་མཆོད་པར་བགྱི་བའི་ཆེད་དུ། རྫུ་འཕྲུལ་གྱི་སྟོབས་ཀྱིས་མཐའ་ཡས་པའི་ཞིང་མང་པོར་སོང་ནས་ནི། དེ་དང་དེར་བཞུགས་པའི་རྒྱལ་བ་ལ་ཀུན་ནས་མཆོད་ཅིང༌། དེ་ན་གནས་པའི་འགྲོ་བ་སེམས་ཅན་ཀུན་སྨིན་ཅིང་གྲོལ་བའི་ཚུལ་ལ་འགོད་ནུས་པར་ཤོག་ཅིག སྣོད་ཀྱི་འཇིག་རྟེན་བདེ་སྐྱིད་བསམ་མི་ཁྱབ། །བཅུད་ཀྱི་སེམས་ཅན་བདེ་ཚོགས་བསམ་མི་ཁྱབ། །རྒྱལ་བ་སྲས་བཅས་བདེ་སྤྲུལ་བསམ་མི་ཁྱབ། །ཞིང་མཆོག་བསམ་མི་ཁྱབ་དེར་སྐྱེ་བར་ཤོག །རྒྱལ་བའི་དབང་པོ་འོད་དཔག་ཏུ་མེད་པ་ཉིད་སྔོན་འཇིག་རྟེན་དབང་ཕྱུག་རྒྱལ་པོའི་མདུན་དུ་དགེ་སློང་ཆོས་ཀྱི་འབྱུང་གནས་ཞེས་པར་གྱུར་ནས། རྣམ་པར་དག་པའི་སྨོན་ལམ་ཚད་མེད་པས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་དུ་མའི་ཡོན་ཏན་གྱི་བཀོད་པ་བསྡུས་ཏེ། བདེ་བ་ཅན་གྱི་ཞིང་ཡོངས་སུ་བཟུང་བ་བཞིན་དུ། སྣོད་ཀྱི་འཇིག་རྟེན་གྱི་ཡོན་ཏན་ལ་བརྟེན་པའི་བདེ་སྐྱིད་ཀྱང་བསྐལ་བ་བྱེ་བར་བརྗོད་ཀྱང་ཟད་དུ་མེད་པ་བསམ་གྱི་མི་ཁྱབ་པ་དང་། བཅུད་ཀྱི་སེམས་ཅན་རྣམས་ཀྱི་བདེ་ཚོགས་ཀྱི་དངོས་པོ་ཡང་བསམ་གྱིས་མི་ཁྱབ་པ་དང༌། རྒྱལ་བ་སྲས་དང་བཅས་པ་རྣམས་ཀྱི་ཡེ་ཤེས་དང་། ཐུགས་རྗེའི་སྟོབས་ལས་བྱུང་བའི་དགའ་བདེ་དང་། ཏིང་ངེ་འཛིན་གྱི་ཆོ་འཕྲུལ་གྱིས་སྤྲུལ་བ་ཡང་བསམ་གྱིས་མི་ཁྱབ་པ་དང༌། དེ་ལྟ་བུའི་ཞིང་གི་མཆོག་བསམ་གྱིས་མི་ཁྱབ་པ་ལོངས་སྤྱོད་དང་བདེ་བའི་ཡོན་ཏན་ཚད་མེད་པའི་ཡེ་ཤེས་ལ་མངའ་དབང་འབྱོར་བའི་སངས་རྒྱས་ཀྱིས་ཀྱང་བསྐལ་བ་མང་པོར་བརྗོད་ཀྱང་ཡོངས་སུ་ཟད་པར་མི་འགྱུར་བའི་ཞིང་མཆོག་ཡོན་ཏན་བསམ་གྱི་མི་ཁྱབ་པ་དེར། བདག་སོགས་འགྲོ་བ་སེམས་ཅན་ཐམས་ཅད་སྐྱེ་བར་ཤོག་ཅིག འཆི་བའི་ཚེ་ན་རྒྱལ་བ་འོད་དཔག་མེད། །འཁོར་དང་བཅས་པ་མཐོང་ནས་རབ་དགའ་བའི། །ཏིང་འཛིན་མི་བརྗེད་དྲན་པས་འཆི་འཕོས་ནས། །བདེ་བ་ཅན་དུ་བརྫུས་ཏེ་སྐྱེ་བར་ཤོག །དེ་ཡང་གོང་དུ་བཤད་པ་ལྟར་སྔོན་སངས་རྒྱས་ཀྱི་སྨོན་ལམ་གྱིས་ཡོངས་སུ་བཟུང་བ་འོད་དཔག་མེད་ཀྱི་ཞིང་བཀོད་འཕགས་པ་དཀོན་མཆོག་བརྩེགས་པའི་ལེའུ་ལྔ་པ་དེ་ཉིད་ལས་འདི་ལྟར་གསུངས་ཏེ། སེམས་ཅན་གང་དག་ཁ་ཅིག་ནི་དེ་བཞིན་གཤེགས་པ་དེ་རྣམ་པས་ཡང་དང་ཡང་དུ་ཡིད་ལ་བྱེད་པ་དང༌། དགེ་བའི་རྩ་བ་མང་པོ་དཔག་ཏུ་མེད་པ་བསྐྱེད་པ་དང༌། བྱང་ཆུབ་ཏུ་སེམས་ཡོངས་སུ་བསྔོས་ཏེ། འཇིག་རྟེན་གྱི་ཁམས་དེར་སྐྱེ་བར་སྨོན་ལམ་འདེབས་པ་དེ་དག་འཆི་བའི་དུས་ཉེ་བར་གནས་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་དེ། དགེ་སློང་བརྒྱ་ཕྲག་གི་ཚོགས་དུ་མས་ཡོངས་སུ་བསྐོར་ཞིང་མདུན་གྱིས་བལྟས་ནས་བཞུགས་པར་འགྱུར་ཏེ། དེ་དག་གིས་བཅོམ་ལྡན་འདས་འོད་དཔག་མེད་དེ་མཐོང་ནས་རབ་ཏུ་དྭངས་པའི་སེམས་ཀྱིས་ཤི་འཕོས་ཏེ། འཇིག་རྟེན་གྱི་ཁམས་བདེ་བ་ཅན་དེ་ཉིད་དུ་སྐྱེ་བར་འགྱུར་རོ། །ཞེས་གསུངས་པ་བཞིན་དུ་བདེ་བ་ཅན་གྱི་ཞིང་དེར་སྐྱེ་བའི་རྒྱུ་རྣམ་པ་ཡིད་ལ་ཡང་ནས་ཡང་དུ་བྱེད་པ་ལ་སོགས་པའི་ཚུལ་ལ་བརྩོན་པར་བྱས་ན། སང་འཆི་བའི་ཚེ་ན་ནི་རྒྱལ་བ་འོད་དཔག་མེད་པ་འཁོར་དང་བཅས་པ་བདག་གིས་མངོན་སུམ་དུ་མཐོང་ནས་རབ་ཏུ་དགའ་ཞིང་དད་པའི་སྣང་བ་ཆེན་པོ་དང་། ཏིང་ངེ་འཛིན་གྱི་སྒོ་དུ་མ་ཡང་ཐོབ་ནས་མི་བརྗེད་པའི་གཟུངས་དང་ལྡན་པས། དྲན་པ་དང་ཤེས་བཞིན་དང་ལྡན་བཞིན་དུ་འཆི་འཕོས་ནས་བདེ་བ་ཅན་དུ་བརྫུས་ཏེ་སྐྱེ་བར་འགྱུར་བ་ཡིན་པས། དེ་ལྟར་མཁའ་ཁྱབ་ཀྱི་འགྲོ་བ་ཐམས་ཅད་བདེ་བ་ཅན་གྱི་ཞིང་དེར་སྐྱེ་བར་ཤོག་ཅིག་ཅེས་བསྔོ་ཞིང་སྨོན་ལམ་ཡང་གདབ་པར་བྱའོ། །བདེ་ཆེན་དཔའ་བོ་དཔའ་མོའི་ཚོགས་རྣམས་ཀྱིས། །གདུགས་དང་རྒྱལ་མཚན་བ་དན་རོལ་མོའི་སྒྲ། །སྣ་ཚོགས་མཆོད་པའི་སྤྲིན་གྱིས་རབ་བསུས་ནས། །མཁའ་ལ་སྤྱོད་པའི་ཞིང་དེར་ཁྲིད་པར་ཤོག དེ་ལྟར་འཆི་ཁར་མགོན་པོ་འོད་དཔག་མེད་མངོན་སུམ་མཐོང་ནས་བདེ་བ་ཆེན་པོའི་ཞིང་དེར། དཔའ་བོ་དང༌དཔའ་མོའི་ཚོགས་རྣམས་ཀྱིས་ལྷ་རྫས་ལས་གྲུབ་པའི་གདུགས་དང༌། རྒྱལ་མཚན་དང༌། ཁ་དོག་སྣ་ཚོགས་ཀྱི་བ་དན་དང༌། སྙན་ཞིང་ཀུན་ནས་འཇེབས་པའི་རོལ་མོའི་ཚོགས་པི་ཝཾ་གླིང་བུ་དང་སིལ་སྙན་ལ་སོགས་པ་སྒྲ་དབྱངས་སྣ་ཚོགས་པའི་མཆོད་པའི་སྤྲིན་གྱིས། ནམ་མཁའ་ལ་ཁ་དོག་སྣ་ཚོགས་པའི་འཇའ་ཚོན་གྱི་ལམ་ལ་རབ་ཏུ་བསུས་ནས། མཁའ་ལ་སྤྱོད་པའི་ཞིང་མཆོག་བདེ་བ་ཅན་དེར་དཔའ་བོ་དང་མཁའ་འགྲོས་ཡོངས་སུ་ཁྲིད་པར་ཤོག་ཅིག དགེ་སློང་རྒྱལ་སྲས་ཆོས་ཀྱི་འབྱུང་གནས་ཞེས། །དྲན་དང་བློ་གྲོས་རྟོགས་པ་དང་ལྡན་པ། །ཤེས་རབ་བརྩོན་འགྲུས་རྒྱ་ཆེར་རབ་དགའ་བ། །དེ་ཡི་སྨོན་ལམ་ཇི་བཞིན་བདག་གྱུར་ཅིག །སྔར་གྲངས་མེད་བསམ་གྱིས་མི་ཁྱབ་པའི་བསྐལ་པའི་གོང་རོལ་དུ། དེ་བཞིན་གཤེགས་པ་འཇིག་རྟེན་དབང་ཕྱུག་རྒྱལ་པོའི་དྲུང་དུ་སངས་རྒྱས་བྱེ་བ་ཁྲག་ཁྲིག་བརྒྱད་ཅུ་རྩ་གཅིག་གི་ཡོན་ཏན་གྱི་ཞིང་གི་བཀོད་པ་ཡོངས་སུ་བཟུང་སྟེ། སྨོན་ལམ་ཆེན་པོ་བཏབ་ཅིང་ཡོངས་སུ་གྲུབ་པའི་དགེ་སློང་རྒྱལ་སྲས་ཆོས་ཀྱི་འབྱུང་གནས་ཞེས། དྲན་པ་དང་བློ་གྲོས་རྟོགས་པ་མཆོག་དང་ལྡན་པ། ཤེས་རབ་དང་བརྩོན་འགྲུས་རྒྱ་ཆེ་ཞིང༌། གཅིག་ཏུ་སེམས་ཅན་གྱི་དོན་ཁོ་ན་ལ་རབ་ཏུ་དགའ་བ་གང་ཡིན་པ་དེ་ཡིས་སྨོན་ལམ་ཇི་ལྟར་བཏབ་པ་བཞིན་དུ་བདག་གི་སྨོན་ལམ་ཀྱང་དེ་བཞིན་དུ་འགྲུབ་པར་གྱུར་ཅིག དཀོན་མཆོག་གསུམ་གྱི་བདེན་པ་ཆེན་པོ་དང་། །ཆོས་དབྱིངས་རང་བཞིན་རྣམ་དག་བྱིན་རླབས་དང་། །ཆོས་ཅན་རྒྱུ་འབྲས་བསླུ་མེད་ནུས་མཐུ་དང་། །ལྷག་བསམ་བྱང་སེམས་སྨོན་ལམ་རྣམ་དག་དང་། །དགེ་བ་བསགས་དང་བསག་འགྱུར་ཀུན་གྱི་མཐུས། །སྨོན་ལམ་འདི་བཏབ་ངེས་པར་འགྲུབ་གྱུར་ཅིག །སྔོན་མགོན་པོ་འོད་དཔག་མེད་པ་སློབ་པ་ལམ་གྱི་གནས་སྐབས་ན་དགེ་སློང་རྒྱལ་སྲས་ཆོས་ཀྱི་འབྱུང་གནས་ཀྱི་སྐྱེ་བ་ཡོངས་སུ་བཟུང་སྟེ། ཞིང་བཟུང་བ་སོགས་ཀྱི་སྨོན་ལམ་ཇི་ལྟར་བཏབ་པ་བཞིན། བདག་གིས་ཀྱང་དེ་བཞིན་དུ་བཏབ་པའི་སྨོན་ལམ་དེ་དག་ཀྱང་ཡོངས་སུ་འགྲུབ་པར་དཀོན་མཆོག་རིན་པོ་ཆེ་རྣམ་པ་གསུམ་གྱི་བདེན་པ་ཆེན་པོ་དང་། ཆོས་ཀྱི་དབྱིངས་རང་བཞིན་གྱི་རྣམ་པར་དག་ཅིང་གང་ཅིར་ཡང་མ་གྲུབ་ཀྱང༌། གང་ཅིར་ཡང་འཆར་དུ་རུང་བའི་བྱིན་རླབས་དང་། ཆོས་ཅན་རྒྱུ་འབྲས་ཀྱི་ཚུལ་བསླུ་བ་མེད་པའི་ནུས་མཐུ་དང༌། རང་ཉིད་ཀྱི་ལྷག་བསམ་རྣམ་པར་དག་པ་དང༌། བྱང་ཆུབ་མཆོག་ཏུ་སེམས་བསྐྱེད་པ་དང༌། སྨོན་ལམ་རྣམ་པར་དག་པ་གང་བཏབ་པ་དེ་ལྟ་བུའི་སྟོབས་དང་། དགེ་བ་སྔར་ཇི་སྙེད་བསགས་པ་དང༌། མ་འོངས་པ་ན་དགེ་བ་གང་ཞིག་གསག་པར་འགྱུར་བ་ལྟ་བུའི་དུས་གསུམ་དུ་བྱས་ཤིང་བསགས་པའི་དགེ་རྩ་ཐམས་ཅད་ཀྱི་མཐུས། བདག་གི་ད་ལྟ་ཞིང་ཡོངས་སུ་བཟུང་བ་ལ་སོགས་པའི་སྨོན་ལམ་གང་ཇི་སྙེད་བཏབ་པ་འདི་དག་ཐམས་ཅད་ཀུན་ཀྱང་། སེམས་ཅན་ཐམས་ཅད་ཀྱི་དོན་དུ་ངེས་པར་འགྲུབ་པར་གྱུར་ཅིག་ཅེས་སྙིང་ཐག་པ་ནས་སྨོན་ལམ་བྱའོ། །གསོལ་བ་འདེབས་སོ་རྒྱལ་བ་འོད་དཔག་མེད། །ཐུགས་རྗེས་ཟུངས་ཤིག་རྗེ་བཙུན་སྤྱན་རས་གཟིགས། །བྱིན་གྱིས་རློབས་ཤིག་རྒྱལ་སྲས་མཐུ་ཆེན་ཐོབ། །ལམ་སྣ་དྲོངས་ཤིག་གྲངས་མེད་སེམས་དཔའི་ཚོགས། །ཡེ་ཤེས་འོད་ཀྱིས་ཞིང་དེར་དྲང་དུ་གསོལ། །ཐུགས་རྗེའི་འོད་ཀྱིས་ཞིང་དེར་དྲང་དུ་གསོལ། །ཕྲིན་ལས་འོད་ཀྱི་ཞིང་དེར་དྲང་དུ་གསོལ། །སྨོན་ལམ་འོད་ཀྱིས་ཞིང་དེར་དྲང་དུ་གསོལ། །ད་ནི་དེ་ལྟ་བུའི་རྒྱལ་བ་མགོན་པོ་འོད་དཔག་མེད་པ་དང་། སྲས་ཀྱི་ཐུ་བོ་རྒྱལ་སྲས་འཕགས་མཆོག་མིག་མི་འཛུམ་པ་དང༌། གསང་བདག་མཐུ་ཆེན་ཐོབ་སྟེ། དེ་ལྟ་བུའི་རྣམ་པ་གསུམ་པོའི་ཐུགས་རྒྱུད་བསྐུལ་བ་ལ། སྒོ་གསུམ་ཆིག་སྒྲིལ་བྱས་ཏེ་དད་མོས་གདུང་ཤུགས་དྲག་པོས་སྙིང་ཐག་པ་ནས་གུས་པ་ཆེན་པོས། གསོལ་བ་འདེབས་སོ་རྒྱལ་བ་འོད་དཔག་ཏུ་མེད་པ་དང༌། ཐུགས་རྗེས་གཟིགས་ཤིག་དམིགས་མེད་བརྩེ་བ་ཆེན་པོའི་མངའ་བདག་རྗེ་བཙུན་སྤྱན་རས་གཟིགས་དབང་ཕྱུག་དང༌། བྱིན་གྱིས་རློབས་ཤིག་ཕྲིན་ལས་ནུས་པའི་མངའ་བདག་རྒྱལ་སྲས་མཐུ་ཆེན་ཐོབ་ཅེས་གདུང་བའི་ཤུགས་ཀྱིས་བོས་ནས། ཚད་མེད་པའི་ཐུགས་རྗེ་དང༌། བྱིན་རླབས་དང་ཕྲིན་ལས་དང་ནུས་མཐུ་དང༌། སྨོན་ལམ་རྒྱ་མཚོ་ལྟ་བུའི་བདག་ཉིད་ཅན་གྱི་ཞིང་གི་གཙོ་བོ་རྣམ་པ་གསུམ་གྱི་ཡེ་ཤེས་ཀྱི་འོད་སྣང་གིས་སྒྲིབ་གཉིས་ཀྱི་དྲི་མ་སེལ་ཞིང་ཟག་མེད་དགའ་བདེའི་སྣང་བ་སྟེར་བས་བདག་སོགས་སེམས་ཅན་ཐམས་ཅད་ཞིང་མཆོག་བདེ་བ་ཅན་དེར་དྲང་དུ་གསོལ། ཐུགས་རྗེའི་འོད་ཀྱིས་བདག་སོགས་སེམས་ཅན་ཐམས་ཅད་བདེ་བ་ཅན་དེར་དྲང་དུ་གསོལ། ཕྲིན་ལས་འོད་ཀྱིས་བདག་སོགས་སེམས་ཅན་ཐམས་ཅད་བདེ་བ་ཅན་གྱི་ཞིང་དེར་དྲང་དུ་གསོལ། སྨོན་ལམ་འོད་ཀྱིས་ཞིང་དེར་བདག་སོགས་སེམས་ཅན་ཐམས་ཅད་དྲང་དུ་གསོལ། བདེ་ཆེན་ཞིང་གྲགས་རྒྱལ་བའི་དཀྱིལ་འཁོར་དུ། །བཅོམ་ལྡན་མགོན་པོ་སྣང་བ་མཐའ་ཡས་དང་། །བློ་གྲོས་སྙིང་པོ་ཡབ་སྲས་ཞབས་དྲུང་དུ། །བདག་སོགས་འཆི་འཕོས་དེ་རུ་སྐྱེ་བར་ཤོག །ནུབ་ཕྱོགས་བདེ་ཆེན་དག་པའི་ཞིང་མཆོག་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ཡོངས་སུ་གྲགས་པའི་རྒྱལ་བའི་ཞིང་ཁམས་སུ། བཅོམ་ལྡན་འདས་མགོན་པོ་འོད་དང་སྐུ་ཚེ་དཔག་ཏུ་མེད་པ་སྣང་བ་མཐའ་ཡས་དང༌། བྱང་སེམས་བློ་གྲོས་སྙིང་པོ་ཡབ་སྲས་ཀྱི་ཞབས་དྲུང་དུ། བདག་སོགས་ཚེ་འཕོས་པའི་དེ་མ་ཐག་ཏུ་སྐྱེ་བ་གཞན་གྱི་བར་མ་ཆོད་པར་དེ་རུ་སྐྱེ་བར་ཤོག་ཅིག སངས་རྒྱས་ཀྱི་ཞིང་གཞན་ལས་ཁྱད་པར་དུ་འཕགས་པའི་བདེ་བ་ཅན་གྱི་ཞིང་དེར་སྔོན་སངས་རྒྱས་ཀྱི་ཞིང་ཡོངས་སུ་བཟུང་བའི་སྨོན་ལམ་གྱི་སྟོབས་ཀྱིས། བདག་ཅག་སོ་སྐྱེ་རྣམས་ཀྱང་བདེ་བ་ཅན་གྱི་ཞིང་དུ་སྐྱེ་བའི་རྒྱུ་བཞི་བསྒྲུབ་ན་ཐེ་ཚོམ་མེད་པར་ཞིང་ཁམས་དེ་རུ་སྐྱེ་བར་འགྱུར་ངེས་པ་ཡིན་ཏེ། དེའི་རྒྱུ་མཚན་འོད་དཔག་མེད་ཀྱི་ཞིང་གི་བཀོད་པའི་མདོ་ལས། མི་ཕམ་པ་བྱང་ཆུབ་སེམས་དཔའ་ཡོངས་སུ་གྲུབ་པ་བྱེ་བ་ཕྲག་ཁྲིག་ཕྲག་བདུན་ཅུ་རྩ་གཉིས་སངས་རྒྱས་ཀྱི་ཞིང་འདི་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཏེ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་ལ་དགེ་བའི་རྩ་བ་བསྐྱེད་པས། ཕྱིར་མི་ལྡོག་པར་ཡོངས་སུ་འགྲུབ་ན་དགེ་བའི་རྩ་བ་དེ་བས་ཆེ་བ་རྣམས་ལྟ་སྨོས་ཀྱང་ཅི་དགོས། ཞེས་གསུངས་པ་ལྟ་བུའི་སངས་རྒྱས་ཀྱི་སྨོན་ལམ་གྱིས་ཡོངས་སུ་བཟུང་བས་ན། མི་མཇེད་ཀྱི་ཞིང་འདི་ནས་ཀྱང་བྱེ་བ་ཁྲག་ཁྲིག་བདུན་ཅུ་རྩ་གཉིས་ཀྱི་གྲངས་ཀྱི་འགྲོ་བ་རྣམས་ནུབ་ཕྱོགས་བདེ་བ་ཅན་གྱི་ཞིང་དེར་སངས་རྒྱས་ཀྱི་སྨོན་ལམ་གྱིས་ཡོངས་སུ་བཟུང་བས་སྐྱེ་བར་འགྱུར་བ་ཡིན་པ་དེའི་ཕྱིར། བདག་ཅག་གིས་ཀྱང་བདེ་བ་ཅན་དུ་སྐྱེ་བའི་རྒྱུ་བཞི་སྒྲུབ་པ་དང་ནི། སྨོན་ལམ་འདེབས་པར་བྱེད་པ་དང༌། དེ་ལ་ཡིད་ཆེས་པར་བྱས་ཏེ། རྩེ་གཅིག་ཏུ་མོས་པར་བྱའོ། །དེར་ཡང་ཏིང་འཛིན་དགོངས་པ་མཐར་ཕྱིན་ནས། །ཆོས་སྐུ་མངོན་གྱུར་གཞན་སྣང་གདུལ་བྱ་ཡི། །བློ་དངོས་བཞིན་དུ་དགོངས་པ་བསྐང་བ་དང་། །དཔག་མེད་མཛད་པས་འགྲོ་བ་ཀུན་གྲོལ་ཤོག །བདག་སོགས་དེ་ལྟ་བུའི་ཡོན་ཏན་ཚད་མེད་པ་བདེ་བ་ཅན་གྱི་ཞིང་དུ་སྐྱེས་ཏེ། ཞིང་ཁམས་དེར་སྐྱེས་མ་ཐག་ཏུ་ཡང་རྩེ་གཅིག་པའི་ཏིང་ངེ་འཛིན་དང་། རྣམ་པར་དག་པའི་ཤེས་རབ་དང༌། མི་བརྗེད་པའི་གཟུངས་ལ་སོགས་པ་ས་ལམ་གྱི་ཡོན་ཏན་ཐམས་ཅད་ཡོངས་སུ་རྫོགས་ཏེ། མཐར་ཐུག་དེ་ཁོ་ན་ཉིད་དགོངས་པ་ཇི་ལྟ་བ་བཞིན་མཐར་ཕྱིན་ནས། ཆོས་ཐམས་ཅད་ཆོས་ཉིད་སྐྱེ་བ་མེད་པའི་ཀློང་དུ་དག་པ་གཉིས་ལྡན་གྱི་ཆོས་སྐུའི་དགོངས་པ་མངོན་དུ་གྱུར་ནས། དེ་ལས་གཞན་སྣང་གཟུགས་སྐུའི་བཀོད་པ་གདུལ་བྱའི་འགྲོ་བ་རྣམས་ལ་རང་རང་གི་བློ་མོས་ཏེ་བསམ་བློ་དང་མོས་པ་ལ་ཇི་ལྟར་འཚམས་པ་བཞིན་དུ། རྒྱལ་བའི་མཛད་པ་རྒྱ་མཚོ་ལྟ་བུ་ཡོངས་སུ་བསྒྲུབས་ཏེ། རྒྱལ་བ་མགོན་པོ་འོད་དཔག་མེད་པ་ལ་སོགས་པ་སྲས་དང་བཅས་པའི་རྒྱལ་བའི་དགོངས་པ་ཡོངས་སུ་བསྐོང་བ་དང༌། དཔག་ཏུ་མེད་པའི་མཛད་པ་དང་ཕྲིན་ལས་ཀྱི་སྟོབས་ཀྱིས་འགྲོ་བ་སེམས་ཅན་ཀུན་ཡོངས་སུ་གྲོལ་བར་ཤོག་ཅིག རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །པདྨོ་དམ་པ་ཤིན་ཏུ་མཛེས་ལས་སྐྱེས། །སྣང་བ་མཐའ་ཡས་རྒྱལ་བའི་མངོན་སུམ་དུ། །ལུང་བསྟན་པ་ཡང་བདག་གིས་དེར་ཐོབ་ཤོག །དེར་ཡང་བདག་གིས་ལུང་བསྟན་རབ་ཐོབ་ནས། །སྤྲུལ་བ་མང་པོ་བྱེ་བ་ཕྲག་བརྒྱ་ཡིས། །བློ་ཡི་སྟོབས་ཀྱིས་ཕྱོགས་བཅུ་རྣམས་སུ་ཡང་། །སེམས་ཅན་རྣམས་ལ་ཕན་པ་མང་བགྱིད་ཤོག །རྒྱལ་བའི་དཀྱིལ་འཁོར་ཞེས་བྱ་བ་ནི་གཙོ་བོ་རྒྱལ་བ་མགོན་པོ་འོད་དཔག་ཏུ་མེད་པ་ལ་འཁོར་བྱང་ཆུབ་སེམས་དཔའི་དགེ་སློང་གི་དགེ་འདུན་གྲངས་མེད་པས་ཡོངས་སུ་བསྐོར་བའི་རྒྱལ་བའི་དཀྱིལ་འཁོར་བཟང་ཞིང་ཉམས་དགའ་བ་དག་པའི་ཞིང་ཁམས་དེར། ཕ་མ་དང་བཟང་ངན་ལས་ཀྱིས་འབྲེལ་བ་ཐོགས་པའི་གཙོས་སེམས་ཅན་ཐམས་ཅད་རྣམ་པར་དག་ཅིང་མཛེས་ལ་ཡངས་ཤིང་རྒྱ་ཆེ་བའི་པདྨོ་དམ་པ་ལས་བརྫུས་ཏེ་ལེགས་པར་འཁྲུངས་ནས། རྒྱལ་བ་མགོན་པོ་འོད་དཔག་ཏུ་མེད་པ་སྣང་བ་མཐའ་ཡས་ཀྱིས་བྱང་ཆུབ་ཏུ་ལུང་བསྟན་པ། རིགས་ཀྱི་བུ་ཁྱོད་གནས་འདི་ཞེས་བྱ་བ་དང་བསྐལ་པ་འདི་ལ་དེ་བཞིན་གཤེགས་པ་མིང་འདི་ཞེས་བྱ་བ་དང༌། ཡབ་དང་ཡུམ་རིགས་དང་རུས་འཁོར་འདུས་པ་ལ་སོགས་པ་འདི་དང་འདི་ལྟ་བུར་འགྱུར་རོ་ཞེས་རྫོགས་པའི་སངས་རྒྱས་ཀྱིས། རང་ཉིད་མངོན་པར་བྱང་ཆུབ་སྟེ། སངས་རྒྱས་པའི་དུས་དང་གནས་ལ་སོགས་པ་ལུང་བསྟན་པ་རབ་ཏུ་ཐོབ་ནས་ཇི་སྲིད་གནས་ཀྱི་བར། གང་ལ་གང་འདུལ་གྱི་སྤྲུལ་པའི་རོལ་པ་མང་པོ་བྱེ་བ་ཕྲག་བརྒྱ་སྟོང་དཔག་ཏུ་མེད་པ་ཡོངས་བཀོད་དེ། ཆགས་ཐོགས་མེད་པའི་ཡེ་ཤེས་དང༌། སྙིང་རྗེ་ཆེན་པོའི་བློ་ཡི་སྟོབས་ཀྱིས། ཕྱོགས་བཅུའི་འཇིག་རྟེན་ཞིང་ཁམས་རབ་འབྱམས་རྣམས་སུ་གནས་པའི་འགྲོ་བ་སེམས་ཅན་རྣམས་ལ། གནས་སྐབས་སུ་ཕན་པ་དང་མངོན་མཐོའི་དཔལ་དང་། མཐར་ཐུག་བདེ་བ་ངེས་ལེགས་བྱང་ཆུབ་མཆོག་ལ་འགོད་པའི་མཛད་པ་དང་ཕྲིན་ལས་བསམ་གྱིས་མི་ཁྱབ་པར་བྱེད་པར་ཤོག་ཅིག སེམས་ཅན་ཐམས་ཅད་བདེ་དང་ལྡན་གྱུར་ཅིག །ངན་འགྲོ་ཐམས་ཅད་རྟག་ཏུ་སྟོངས་བར་ཤོག ། བྱང་ཆུབ་སེམས་དཔའ་གང་དག་སར་བཞུགས་པ། །དེ་དག་ཀུན་གྱི་སྨོན་ལམ་འགྲུབ་པར་ཤོག །དེ་ལྟར་བདག་ཅག་གིས་ཞིང་ཡོངས་སུ་བཟུང་བར་སྨོན་ལམ་བཏབ་པ་དེ་ལྟ་བུའི་དགེ་བའི་རྩ་བ་འདི་ཉིད་ཀྱིས་ནི། མཐའ་ཡས་པའི་སེམས་ཅན་ཐམས་ཅད་གནས་སྐབས་མངོན་མཐོ་ལྷ་མིའི་བདེ་བ་དང༌། མཐར་ཐུག་རྣམ་གྲོལ་བྱང་ཆུབ་གསུམ་གྱི་ཟག་པ་མེད་པ་གཏན་གྱི་བདེ་བ་དང་ལྡན་པར་གྱུར་ཅིག དམྱལ་བ་ལ་སོགས་པའི་ངན་འགྲོའི་གནས་ཐམས་ཅད་མིང་ཙམ་མེད་པར་རྟག་ཏུ་སྟོངས་ནས། བྱང་ཆུབ་སེམས་དཔའ་གང་དག་ས་དང་པོ་ལ་སོགས་པ་ལ་བཞུགས་པའི་རྒྱལ་སྲས་བྱང་ཆུབ་སེམས་དཔའ་ཕྱོགས་བཅུའི་འཇིག་རྟེན་གྱི་ཁམས་གང་ན་ཇི་སྙེད་བཞུགས་པ་དེ་དག་ཀུན་གྱིས་གཞན་སེམས་ཅན་རྣམས་ཀྱི་དོན་དུ་སྨོན་ལམ་གང་བཏབ་པ་དེ་དག་ཐམས་ཅད་ཀུན་ཀྱང་གེགས་མེད་པར་མྱུར་དུ་འགྲུབ་པར་ཤོག་ཅིག སངས་རྒྱས་སྐུ་གསུམ་བརྙེས་པའི་བྱིན་རླབས་དང་། །ཆོས་ཉིད་མི་འགྱུར་བདེན་པའི་བྱིན་རླབས་དང་། །དགེ་འདུན་མི་ཕྱེད་འདུན་པའི་བྱིན་རླབས་ཀྱིས། །ཇི་ལྟར་བསྔོ་བ་སྨོན་ལམ་འགྲུབ་པར་ཤོག །རྫོགས་པའི་སངས་རྒྱས་ནི་ཆོས་ཀྱི་སྐུ་དང༌། ལོངས་སྤྱོད་རྫོགས་པའི་སྐུ་དང༌། སྤྲུལ་པའི་སྐུ་དང༌། དེ་ཡང་རང་དོན་མཐར་ཕྱིན་པའི་ཆོས་སྐུ་དང༌། གཞན་དོན་མཐར་ཕྱིན་པའི་གཟུགས་སྐུ་རྣམ་གཉིས་ཏེ། དེ་ལྟ་བུའི་རྒྱལ་བ་སྐུ་གསུམ་གྱི་ཡོན་ཏན་རྒྱ་མཚོ་ལྟ་བུ་ཡོངས་སུ་བརྙེས་པའི་བྱིན་རླབས་དང༌། དབྱིངས་གདོད་ནས་སྐྱེ་བ་མེད་པ་ཆོས་ཉིད་འགྱུར་བ་མེད་པའི་བདེན་པའི་བྱིན་རླབས་དང༌། དགེ་འདུན་མི་ཕྱེད་འདུན་པ་སྟེ། རྒྱལ་སྲས་འཕགས་པ་ས་ཆེན་པོ་ལ་གནས་པའི་དགེ་འདུན་རྣམས་ཀྱི་ཐུགས་རྒྱུད་ན་བཞུགས་པའི་རྟོགས་པའི་ཡོན་ཏན་དེ་ནི། ལྷ་དང་བཅས་པའི་འཇིག་རྟེན་གྱིས་ཀྱང་དེ་ལས་ཐ་དད་དུ་འབྱེད་མི་ནུས་པའི་བྱིན་རླབས་ཏེ། དེ་ལྟ་བུའི་དཀོན་མཆོག་རིན་པོ་ཆེ་རྣམ་པ་གསུམ་གྱི་བྱིན་རླབས་དང་ནུས་པའི་སྟོབས་ཀྱིས། བདག་གིས་བླ་མེད་བྱང་ཆུབ་མཆོག་གི་རྒྱུར་ཡོངས་སུ་བསྔོས་ཤིང་སེམས་ཅན་ཐམས་ཅད་ཞིང་མཆོག་བདེ་བ་ཅན་དུ་སྐྱེས་ནས་རྫོགས་སྨིན་སྦྱངས་གསུམ་མཐར་ཕྱིན་པའི་སངས་རྒྱས་ཀྱི་གོ་འཕང་ཐོབ་པའི་ཆེད་དུ་སྨོན་ལམ་ཇི་ལྟར་བཏབ་པ་ཐམས་ཅད་ཡོངས་སུ་འགྲུབ་པར་གྱུར་ཅིག ཀུན་གཟིགས་མཁན་ཆེན་བླ་མས་རྒྱལ་བ་ཕུག་ཁང་དགོན་གྱི་ཞིང་སྦྱངས་ལ་ཉེར་མཁོའི་ཆེད་དུ་ལྗགས་ཁྲིད་གནང་བ་ཕྱིས་སུ་གསུང་ཟིན་དུ་ཕབ་པ་ལགས།

༈ འོད་མཚན་སྟོང་འབར་རྒྱལ་བའི་བྱིན་རླབས་ཀྱིས། །བདག་སོགས་ལྟོས་བཅས་འབྲེལ་ཐོགས་ཡིད་ཅན་ཀུན། །ཚེ་འདིའི་སྣང་བ་ནུབ་པའི་དུས་བྱུང་ཚེ། །བདེ་ཅན་དག་པའི་ཞིང་དེར་སྐྱེ་བར་ཤོག །ཅེས་པའང་རྒན་བུ་དགེ་ལེགས་ཆོས་འཕེལ་ནས་སྨོན་པ་དགེའོ།། །།