༈ ཤེར་ཕྱིན་སྐོར་དྲི་བ་བཅུ་གསུམ་བཀོད་པ།
༈ དྲི་བ། ༡༽ གཞི་ཤེས་ཡིན་ན་ཉི་ཚེ་བའི་མཁྱེན་པ་ཡིན་པས་ཁྱབ་པ་ཡོད་མེད།
༼༡ དྲིས་ལན། སྤྱིར་གཞན་གཞུང་འགར་གཞི་ཤེས་ཡིན་ན་ཉི་ཚེ་བའི་མཁྱེན་པ་ཡིན་པ་ལྟ་བུར་གསུངས་ཡོད་མོད། རང་ལུགས་ལ་གཞི་བདག་མེད་དུ་རྟོགས་པ་ཙམ་དེ་ཉི་ཚེ་བའི་མཁྱེན་པ་ཡིན་ཡང༌། གཞི་བདག་མེད་དུ་རྟོགས་པ་ཐབས་ཤེས་ཁྱད་པར་ཅན་གྱི་མངོན་རྟོགས་དེ་ནི་ཉི་ཚེ་བ་མ་ཡིན་པས། གཞི་ཤེས་ཡིན་ན་ཉི་ཚེ་བའི་མཁྱེན་པ་ཡིན་པས་མ་ཁྱབ་སྙམ།
༈ དྲི་བ། ༢༽ ཤེར་ཕྱིན་འགྲེལ་བ་པུཎྜ་རི་ཀའི་དོ་ཤལ་མི་ཕམ་གསུང་ཡིན་ནམ་མིན།
༼༢ དྲིས་ལན། ང་རང་གིས་ཚོད་འཇོག་བྱས་ནས་ཡིན་མིན་ཞུ་མི་ཤེས་ཀྱང༌། ད་ལྟ་འགྲེལ་བ་རང་གི་མཛད་ བྱང་ན་འཁོད་ཡོད་པ་ལྟར། འཇམ་མགོན་མི་ཕམ་རིན་པོ 
་ཆེའི་ཕྱག་མཆན་ལྟར་རྩེ་མོའི་མངོན་རྟོགས་སོགས་ཀྱི་སྐོར་ཅི་རིགས་ཀཿཐོག་སི་ཏུས་ཕྱག་བྲིས་གནང་བ་དང༌། གཞན་ཞེ་ཆེན་རྒྱལ་ཚབ་རིན་པོ་ཆེས་ཕྱག་བྲིས་གནང་བར་གསུངས་ཡོད་པ་ལྟར་ཡིན་ཏེ། ཁོང་རྣམས་ནི་ཚད་མའི་སྐྱེས་བུ་ཆེན་པོ་ཡིན་པས་དེ་ཉིད་དུ་གང་གསུངས་ལྟར་རྣམ་པར་འཇོག་དགོས་པ་ཞིག་རེད་སྙམ།
༈ དྲི་བ། ༣༽ ས་དང་པོའི་རྗེས་ཐོབ་ཀྱི་ཡེ་ཤེས་མཐོང་ལམ་ཡིན་མིན་གང་ཡིན།
༼༣ དྲིས་ལན། ས་དང་པོའི་རྗེས་ཐོབ་ཀྱི་ཡེ་ཤེས་རྟེན་འབྲེལ་ལུགས་འབྱུང་ལྡོག་ཏུ་བསྒོམ་པར་བཤད་པ་སོགས་མཐོང་ལམ་ཡིན་ཏེ། མངོན་རྟོགས་རྒྱན་ལས། དེ་ནས་སེང་གེ་རྣམ་བསྒྱིངས་པའི། །ཏིང་ངེ་འཛིན་ལ་སྙོམས་ཞུགས་ནས། །རྟེན་ཅིང་འབྲེལ་འབྱུང་ལུགས་མཐུན་དང༌། །ལུགས་མི་མཐུན་ལ་རྟོག་པར་བྱེད། །ཅེས་གསུངས་པ་ལྟར། མཐོང་སྤང་གི་བག་ཚ་བ་མེད་པར་འཇུག་ནུས་པའི་ཕྱིར་ན་མཐོང་ལམ་ཨེ་ཡིན་སྙམ།
༈ དྲི་བ། ༤༽ ཤེར་ཕྱིན་བཀའ་བབས་དྲུག་པོ་བརྒྱུད་ཚུལ་ཇི་ལྟར་ཡིན།
༼༤ དྲིས་ལན། ཤེར་ཕྱིན་བཀའ་བབས་དྲུག་ནི། བདེ་བའི་འབྱུང་གནས་དགའ་ལྡན་ལྷའི་ཡུལ་ནས་བརྒྱུད་པ་དང༌། ལོངས་སྤྱོད་ཀྱི་འབྱུང་གནས་འོག་ཀླུ་ཡུལ་ནས་བརྒྱུད་པ་དང༌། བྱིན་རླབས་ཀྱི་འབྱུང་གནས་ནུབ་ཕྱོགས་ཨོ་རྒྱན་མཁའ་འགྲོའི་གླིང་ནས་བརྒྱུད་པ་དང༌། རིག་པའི་འབྱུང་གནས་རྒྱ་གར་ཤར་ཕྱོགས་བྷཾ་ག་ལ་ནས་བརྒྱུད་པ་དང༌། ཡོན་ཏན་གྱི་འབྱུང་གནས་ལྷོ་ཕྱོགས་བྷེ་ཏ་ལ་ནས་བརྒྱུད་པ་དང༌། ངོ་མཚར་གྱི་འབྱུང་གནས་ལྷོ་བྷི་ཤོ་ཀོ་ཏ་ཙནྚ་ཡི་གླིང་ནས་བརྒྱུད་པའོ། །དེ་ལྟ་བུའི་བཀའ་བབས་དྲུག་པོའི་བརྒྱུད་ཚུལ་རེ་རེ་ནས་ད་ལྟ་བགྲང་དུ་ཡོད་མེད་སོགས་གསལ་བོར་ཞུ་མི་ཤེས་ལགས།
༈ དྲི་བ། ༥༽ ལམ་ཤེས་དེ་མངོན་སུམ་དང་རྗེས་དཔག་གཉིས་ཀ་གཞག་རྒྱུ་ཡོད་དམ་མེད། འཕགས་རྒྱུད་ཀྱི་གཞན་སེམས་ཤེས་པའི་མངོན་ཤེས་དེ་ལམ་ཤེས་ཡིན་དང་མིན།
༼༥ དྲིས་ལན། ལམ་ཤེས་ཡིན་ན་མངོན་སུམ་གྱི་ཏིང་ངེ་འཛིན་ཡིན་པས་ཁྱབ་ལ། དབྱེ་ན། མཉམ་བཞག་རྡོ་རྗེ་ལྟ་བུའི་ཏིང་ངེ་འཛིན་དང༌། རྗེས་ཐོབ་སྒྱུ་མ་ལྟ་བུའི་ཏིང་ངེ་འཛིན་ཡོད། སྔགས་ཀྱི་ཆོས་སྐད་རྣམས་སུ་རྗེས་ཐོབ་རྒྱ་ཡན་དང༌། མདོ་ལམ་དུ་འཇིག་རྟེན་པའི་ཕར་ཕྱིན་སོགས་ནི་ལམ་ཤེས་མ་ཡིན་སྙམ། འཕགས་རྒྱུད་ཀྱི་གཞན་སེམས་ཤེས་པའི་མངོན་ཤེས་དེ་ལམ་ཤེས་ཡིན་དང་མིན་ཟེར་ན། དེ་ནི་ཁས་བླང་ཕྱོགས་གཅིག་པ་མ་ཡིན་ཏེ། ལམ་ཤེས་ཡིན་པ་དང་མ་ཡིན་པ་གཉིས་ཡོད་ཆོག་སྙམ། དཔེར་ན། འཕགས་པའི་རྒྱུད་དང་སོ་སྐྱེས་ཀྱི་རྒྱུད་མཁྱེན་པ་བཞིན་ནོ། །
༈ དྲི་བ། ༦༽ ཤེས་རྣམ་དང་དོན་རྣམ་གཉིས་ཀྱི་ཁྱད་པར་ཇི་ལྟར་ཡིན།
༼༦ དྲིས་ལན། དེ་ལ་ཤེས་རྣམ་ཚད་མེད་བཞི་སྒོམ་པ་ལྟ་བུ་དང༌། དོན་རྣམ་བདག་མེད་གཉིས་སྒོམ་པ་ལྟ་བུ་ལ་འཇོག སྤྱིར་བོད་སྤྲུལ་རིན་པོ་ཆེ་དང་གཞུང་མང་རབས་ཀྱི་དགོངས་པ་ནི། སྦས་དོན་མངོན་རྟོགས་ཀྱི་སྐབས་རྒྱལ་ཚབ་བྱམས་པས་ཤེས་རྣམ་བསྒོམ་པར་གསུངས་ལ། དངོས་བསྟན་སྟོང་ཉིད་ཀྱི་རིམ་པར་ཀླུ་སྒྲུབ་ཀྱིས་དོན་རྣམ་བསྒོམ་པའི་རྣམ་གཞག་བསྟན་ཞེས་གསུངས་སྙམ།
༈ དྲི་བ། ༧༽ མངོན་རྟོགས་རྒྱན་གྱི་སེམས་བསྐྱེད་བསྟན་པ་དེ། སེམས་བསྐྱེད་སྤྱིའི་མཚན་ཉིད་དུ་འཇོག་ཐུབ་བམ། ཐུབ་ན་དེས་དོན་དམ་སེམས་བསྐྱེད་ལ་ཁྱབ་ཚུལ་ཇི་ལྟར་ཡིན།
༼༧ དྲིས་ལན། འདི་དོན་ལ་མཁས་པ་རྣམས་ཀྱི་བཞེད་ཚུལ་འདྲ་མིན་ཡོད་ཀྱང༌། འདིར་སེམས་བསྐྱེད་སྤྱིའི་མཚན་ཉིད་ལ་འཇོག་དགོས་སྙམ། མཚན་ཉིད་དེ་བཞག་མ་ཐག་མཚན་ཉིད་དེ་དང་ལྡན་པའི་མཚན་གཞི། དེ་ཡང་ས་གསེར་ཟླ་བ་མེ། །སོགས་ནས་སངས་རྒྱས་ཀྱི་སའི་བར་གྱི་སེམས་བསྐྱེད་ཀྱི་རྣམ་དབྱེ་མཛད་པའི་ཕྱིར་རོ། །དེས་ན་དོན་དམ་སེམས་བསྐྱེད་ལ་ཁྱབ་ཚུལ་ནི། འདིར་དོན་དམ་དང་ཀུན་རྫོབ་ཀྱི་སེམས་བསྐྱེད་གང་གི་སྐབས་ཡིན་ཡང༌། སེམས་བསྐྱེད་པ་ནི་གཞན་དོན་ཕྱིར། །ཞེས་གསུངས་ལ། སངས་རྒྱས་ཀྱི་སར་དམིགས་མཚན་ཅན་གྱི་སྙིང་རྗེ་ཞིག་མེད་ཀྱང་དམིགས་པ་མེད་པའི་སྙིང་རྗེ་ཆེན་པོ་ནི་འཇོག་དགོས་པས་ན་ཆེད་དུ་བྱ་བ་གཞན་དོན་ལ་འདྲ། ཡང་དག་རྫོགས་པའི་བྱང་ཆུབ་འདོད། །ཅེས་པའི་ཟུར་ཕྱི་མ་བྱང་ཆུབ་དེ་ལ་ཆོས་ཅན་དང་ཆོས་ཉིད་ཀྱི་ཆ་གཉིས་ཡོད་པས། ཆོས་ཉིད་ཀྱི་ཆ་ལ་དམིགས་པའི་སྟོང་དང་སྙིང་རྗེའི་བདག་ཉིད་ཅན་གང་ཡིན་པ་དེ་དོན་དམ་སེམས་བསྐྱེད་ཡིན་པར་གསུངས་པ་ལྟར་རོ། །
༈ དྲི་བ། ༨༽ ཐོགས་མེད་དང་དབྱིག་གཉེན་གྱི་རྒྱན་འགྲེལ་དེ་རྒྱ་འགྲེལ་ཉེར་གཅིག་གི་ཁོངས་སུ་མི་བརྩི་བའི་རྒྱུ་མཚན་གང༌།
༼༨ དྲིས་ལན། དེ་ནི་བོད་དུ་འགྱུར་ཡོད་ཅིང་ད་ལྟ་མཇལ་དུ་ཡོད་པ་རྒྱ་འགྲེལ་ཉེར་གཅིག་ཅེས་གྲངས་བཟུང་བ་ཡིན་སྙམ། སྤྱིར་དབྱིག་གཉེན་གྱི་རྒྱན་འགྲེལ་དེ་འགྱུར་ཡོད་ཅེས་མཁས་པ་འགས་གསུངས་ཀྱང་། ཡོངས་གྲགས་སུ་ཐོགས་མེད་ཀྱིས་སེམས་ཙམ་དུ་བཀྲལ་བའི་རྒྱན་འགྲེལ་དེ་དང་། དབྱིག་གཉེན་འགྲེལ་བ་གཉིས་མ་འགྱུར་བས་གྲངས་ངེས་བཟུང་བ་འདྲ།
༈ དྲི་བ། ༩༽ རང་ལུགས་སངས་རྒྱས་ཀྱི་ས་ལ་ཀུན་རྫོབ་སེམས་བསྐྱེད་ཡོད་དམ་མེད།
༼༩ དྲིས་ལན། སྤྱིར་རགས་པ་བརྡ་ལས་བྱུང་བའི་སེམས་བསྐྱེད་ཆོ་གས་བླངས་པ་དང༌། རང་ཉིད་བྱང་ཆུབ་ཀྱི་ལམ་ལ་སྨོན་པ་ལྟ་བུ་དེ་སངས་རྒྱས་ཀྱི་སར་མེད་མོད། གོང་བཤད་ལྟར་བདེན་པ་གཉིས་ཀའི་སེམས་བསྐྱེད་གང་ཡིན་ཀྱང་ཆེད་དུ་བྱ་བ་གཞན་དོན་ཡིན་པ་ལ་འདྲ། དམིགས་ཡུལ་རྫོགས་བྱང་དེ་ལ་ཆོས་ཅན་དང་ཆོས་ཉིད་ཀྱི་ཆ་གཉིས་ཡོད་པའི་ཚུལ་སོགས་བྱས་ན། རང་བྱང་ཆུབ་ཀྱི་སར་སྨོན་པ་ལྟ་བུ་མེད་ཀྱང་གཞན་སེམས་ཅན་ཀུན་བྱང་ཆུབ་ཀྱི་སར་འགོད་པའི་སྙིང་རྗེ་ཆེན་པོ་ཐུགས་རྒྱུད་ལ་མངའ་བའི་ཚུལ་སོགས་ཞིབ་མོའི་བློས་རྣམ་པར་ཕྱེ་ན་སངས་རྒྱས་ཀྱི་སར་ཀུན་རྫོབ་སེམས་བསྐྱེད་ཡོད་ཅེས་སྨྲས་ཀྱང་འགལ་བ་མེད་སྙམ།
༈ དྲི་བ། ༡༠༽ ལམ་ཤེས་ཀྱི་སྐབས་སུ་ཐེག་གསུམ་གྱི་རྟོགས་པ་ཤེས་པར་བྱ་བ་དང༌། བསྐྱེད་པར་བྱ་བ་དང༌། ཤེས་མཐོང་གི་འདའ་ཚུལ་ཇི་ལྟར་ཡིན།
༼༡༠ དྲིས་ལན། ལམ་ཤེས་ཀྱི་སྐབས་ཐེག་གསུམ་གྱི་རྟོགས་པ་ཤེས་པར་བྱ་བ་ཡིན་པའི་ཚུལ། མཚན་ཉིད་དེ་ཡི་སྦྱོར་བ་དང་ཞེས་སོགས་ཀྱི་སྐབས་ལམ་གསུམ་གྱི་མཚན་ཉིད་ཀྱང་ཇི་ལྟ་བ་དབྱེ་ཞིང་གཏན་ལ་ཕབ་པ་བྱང་སེམས་ཚོགས་སྦྱོར་ནས་ཡོད་པ་དང༌། བསྐྱེད་པར་བྱ་བ་ཡང་ཡིན་ཏེ། དཔེར་ན། སྦྱོར་ལམ་དུ། དམིགས་པ་དང་ནི་རྣམ་པ་དང༌། །རྒྱུ་ནི་ཡོངས་སུ་འཛིན་པ་ཡིས། །སོགས་ཀྱི་དམིགས་རྣམ་རྒྱུ་གསུམ་འཇོག་སྐབས། ཉན་ཐོས་ཀྱི་རྟོགས་རིགས་ནི་མཐོང་ལམ་བསྐྱེད་པའི་རྒྱུར་གྱུར་པ་ཐེག་ཆེན་གྱི་སྦྱོར་ལམ་དེ་ཡིན་པས་ན་ཞེས་རྣམ་གཞག་མཛད་པ་དང༌། དེས་བསྐྱེད་པའི་འབྲས་བུ་ཡང་ཐེག་གསུམ་རྟོགས་རིགས་འདུས་པའི་བདག་ཉིད་ཅན་གྱི་མཐོང་ལམ་དེ་སྐྱེད་བྱེད་ཐེག་ཆེན་སྦྱོར་ལམ་གྱི་ཁྱད་ཆོས་ལ་འཇོག་གོ། ཤེས་མཐོང་གི་འདའ་ཚུལ་ནི། གོང་དུ་ཐེག་གསུམ་གྱི་རྟོགས་པ་དེ་ཤེས་པར་ཡང་བྱས། བསྐྱེད་པར་ཡང་བྱས་ནས། མཐར་ཤེས་མཐོང་གི་ཉན་རང་གི་ལམ་དེ་འདའ་བྱ་ཡིན་པ་ལས་ཇི་ལྟ་བ་བཞིན་ཉམས་སུ་བླངས་ཤིང་གོམས་པར་བྱ་བ་མ་ཡིན་ནོ། །ཅིའི་ཕྱིར་ན་ཐེག་པ་ཆེན་པོ་གཞན་དོན་འབའ་ཞིག་ལ་བརྩོན་པའི་བདག་ཉིད་ཅན་ཡིན་པའི་ཕྱིར་སྙམ།
༈ དྲི་བ། ༡༡༽ ཤེར་ཕྱིན་གྱི་མཚན་ཉིད་སྤྲོས་བྲལ་མངོན་སུམ་རྟོགས་པའི་མཁྱེན་པ་བཞག་ན། རང་བཞིན་ཤེར་ཕྱིན་དེ་ཤེར་ཕྱིན་མཚན་ཉིད་པ་ཡིན་དང་མིན།
༼༡༡ དྲིས་ལན། སྤྱིར་རང་ལུགས་ལ་ཤེར་ཕྱིན་གྱི་མཚན་ཉིད། གནས་ལུགས་རང་བཞིན་མེད་རྟོགས་ཀྱི་མཁྱེན་པ་ཞེས་འཇོག་པ་ལས། སྤྲོས་བྲལ་མངོན་སུམ་རྟོགས་པའི་མཁྱེན་པ་ཞེས་བཞག་ཡོད་མེད་མི་ཤེས་ཀྱང༌། སྐབས་འདིར་རྒྱལ་ཚབ་མ་ཕམ་པས། སྦས་དོན་མངོན་རྟོགས་ཀྱི་རིམ་པ་གཏན་ལ་དབབ་ནས་གསུངས་ལ། ཕྱོགས་གླང་གིས། ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །བསྒྲུབ་བྱའི་དོན་དེ་དང་ལྡན་པས། །གཞུང་ལམ་གཉིས་ལ་དེ་སྒྲས་བཏགས། །ཞེས་དབྱེ་གཞི་སྦས་དོན་ཡུལ་ཅན་མངོན་རྟོགས་ཀྱི་རིམ་པ་དེ་བྱས་ནས་དབྱེ་ངོ་ལམ་དང་འབྲས་བུའི་ཤེར་ཕྱིན་དང༌། སྟོན་པར་བྱེད་པའི་གཞུང་རྣམས་བཞག་པར་མཛད་དོ། །གཞི་ཤེར་ཕྱིན་ནི། སྐབས་འདིར་རྟོགས་བྱ་ཡིན་ཏེ། གང་ཚེ་ཆོས་དཀར་ཐམས་ཅད་ཀྱི། །རང་བཞིན་ཤེས་རབ་ཕ་རོལ་ཕྱིན། །ཞེས་དང༌། སློབ་དཔོན་ཆོས་བཤེས་ཀྱི་འགྲེལ་བར་རྒྱས་པར་གསུངས་ལ། སྤྱིར་ཤེས་པ་ཐམས་ཅད་ཀྱི་རབ་ཏུ་འགྱུར་འགྲོ་བའི་རྒྱུ་མཚན་ནི་རང་བཞིན་ཤེར་ཕྱིན་ནམ་གཞི་ཤེར་ཕྱིན་ཤེས་པ་ལས་བཞག་པར་གསུངས། ཡུལ་གྱི་སྐབས་མགོན་པོ་ཀླུ་སྒྲུབ་ཀྱིས། གཞི་དབུ་མ་དེ་དབུ་མ་མཚན་ཉིད་པའི་རྣམ་གཞག་མཛད་ཀྱང༌། སྐབས་འདིར་གོང་བཤད་ལྟར་རྒྱལ་ཚབ་བྱམས་པས། ཡུལ་ཅན་མངོན་རྟོགས་ཀྱི་རིམ་པ་དབྱེ་གཞི་བྱས་ནས་གཏན་ལ་ཕབ་པའི་སྐབས་སུ། གཞི་ཤེར་ཕྱིན་ལ་མཚན་ཉིད་ཀྱིས་ཁྱབ་མ་ཁྱབ་དཔྱད་པ་བྱེད་མི་དགོས་སྙམ།
༈ དྲི་བ། ༡༢༽ རྣམ་རྫོགས་སྦྱོར་བའི་སྐབས་རྣམ་པ་བརྒྱ་དང་དོན་གསུམ་པོ་བསྡུས་ནས་སྒོམ་ཚུལ་ཇི་ལྟར་ཡིན།
༼༡༢ དྲིས་ལན། མཉམ་བཞག་གི་ངོ་ཁ་ལ་རྣམ་པ་བརྒྱ་དོན་གསུམ་པོ་སྐྱེ་མེད་གཅིག་གི་ངང་དུ་བསྡུས་ཏེ་སྒོམ་ཚུལ་ལ་དྲི་བ་ཨེ་ཡིན་སྙམ། དེ་ཡིན་ན་དཔལ་དགེ་རིན་པོ་ཆེའི་སྒོམ་རིམ་ན། དེ་ཡང་འཕགས་པའི་མཉམ་བཞག་སྤྲོས་པ་ཐམས་ཅད་ཉེ་བར་ཞི་བ་ཡིན་པས་རྣམ་པ་ཐ་དད་དུ་སྒོམ་པ་མེད་ཀྱང་། སྟོང་པ་ཕྱོགས་གཅིག་པ་མིན་པར་སྣང་སྟོང་ཟུང་འཇུག་གི་དོན་ཅན་ཡིན་པས་རྣམ་པ་གཏན་མེད་པ་ཡང་མ་ཡིན་ཏེ། དཔེར་ན་མཐོང་ལམ་རྩེ་མོའི་སྐབས་སུ། སྦྱིན་པ་ལ་སོགས་རེ་རེར་ནི། །ཞེས་སོགས་གསུངས་པ་ལྟར་རོ། །མདོར་ན་སྦྱིན་པ་ལ་སོགས་པ་སུམ་ཅུ་རྩ་དྲུག་དེ་མཐོང་ལམ་རྣམ་པར་མི་རྟོག་པའི་ཡེ་ཤེས་གཅིག་གི་ངོ་བོར་སྤྲོས་པ་མཐའ་དག་ཉེ་བར་ཞི་བའི་ཚུལ་དུ་རྫོགས་ཚུལ་གསུངས་པ་ལྟར་ཡིན་སྙམ། དེ་ལས་གཞན་འཕགས་པའི་མཉམ་བཞག་གི་ངོ་བོ་འདི་ལྟར་ཡིན་ཞེས་སྟོན་མི་ནུས་པས་སོ། །
༈ དྲི་བ། ༡༣༽ ཀུན་མཁྱེན་གྱིས་སྦྱོར་ལམ་མཉམ་བཞག་ངོ་བོ་རྟོག་མེད་བཞེད་ན་དེ་ཆོས་ཉིད་ལ་མངོན་སུམ་ཡིན་དང་མིན།
༼༡༣ དྲིས་ལན། དེ་ཡང་སྦྱོར་ལམ་གྱི་ལུས་རྟེན་དེ་འགྲོ་བ་ལྔ་དང་སེམས་རྟེན་དེ་བསམ་གཏན་ས་དྲུག་གིས་བསྡུས་ཞེས་གསུངས། ཀུན་མཁྱེན་བླ་མས། སྦྱོར་ལམ་ཆ་བཞི་སྒོམ་དུས་ཀྱི་ཡེ་ཤེས་ཀྱི་ངོ་བོ་མཉམ་བཞག་གི་ཆ་ནི་རྣམ་པར་མི་རྟོག་པའི་ཡེ་ཤེས་ཡིན་ལ། དེ་ལས་ལངས་པའི་རྗེས་ཐོབ་ནི་རྟོག་རྟོག་མེད་ཅི་རིགས་ཡོད་ཅེས་གསུངས་པ་དེས་ན། བདེན་བཞིའི་ཆོས་ཉིད་མངོན་སུམ་དུ་རྟོགས་པའི་བདག་ཉིད་ཅན་མ་ཡིན་པའི་ཕྱིར་ན་འཇིག་རྟེན་པའི་སྒོམ་བྱུང་ཡིན་ནོ། །དེ་ལྟར་ན་ཡང་རྣམ་པར་མི་རྟོག་པ་ཡིན་ཏེ་ཞི་གནས་རྩེ་གཅིག་པ་འགྲུབ་ཅིང་བདེན་བཞི་ལ་དམིགས་པའི་ཚུལ་ཅན་ཡིན་པའི་ཕྱིར་རོ། །སྦྱོར་ལམ་མཉམ་བཞག་གི་ངོ་བོ་དེ་བསམ་གཏན་ས་དྲུག་གང་རུང་གིས་བསྡུས་པའི་ངོ་བོ་ཅན་ཡིན་ལ། བསམ་གཏན་ས་དྲུག་ནི་འཇིག་རྟེན་པའི་སྒོམ་བྱུང་མཉམ་བཞག་གི་ས་བ་ཞིག་ཡིན་ནོ། །འདིར་རྣམ་པར་མི་རྟོག་པའི་ཡེ་ཤེས་གསུངས་པ་ནི། སྤྱིར་བསམ་གཏན་ས་དྲུག་དེ་མཉམ་བཞག་གི་ས་པ་རྣམ་པར་རྟོག་པའི་འདུ་བྱེད་ཀྱི་སྤྲོས་པ་དང་བྲལ་བ་དང༌། བདེན་བཞི་ལ་དམིགས་པས་ན་ཡེ་ཤེས་ཞེས་བཞག་པའི་ཚུལ་ཅན་ཞིག་ཨེ་ཡིན་སྙམ།