རིག་པ་འཛིན་པ་ཚེ་དབང་ནོར་བུ་རང་ཉིད་ཀྱི་སྤྱད་རབས་ལས་བྱུང་བ་ལུ་མ་ནས་སྙིམ་པའི་ཆུ་ལྟར་ས་བོན་ཙམ་ཞིག་སྨོས་པ།

རིག་པ་འཛིན་པ་ཚེ་དབང་ནོར་བུ་རང་ཉིད་ཀྱི་སྤྱད་རབས་ལས་བྱུང་བ་ལུ་མ་ནས་སྙིམ་པའི་ཆུ་ལྟར་ས་བོན་ཙམ་ཞིག་སྨོས་པ་འདིར་བཞུགས་སོ། །

༈ ཨོཾ་སྭ་སྟི། བདེན་པར་གསུང་དེས་འཁོར་བ་སྡུག་བསྔལ་ཞིང་། །འདུས་བྱས་མི་རྟག་ཤེས་ནས་ངེས་འབྱུང་གི །ཐར་ལ་གཞོལ་བར་གདམས་བཞིན་མངོན་སུམ་པས། །རང་གིས་དགེར་སྤྱད་ཅུང་ཟད་ཡང་སྨྲ་བ། །དེ་ཡང་གནམ་བྱུང་གི་ལོ་གཞུག་ནས་བརྩམས་སྔ་འགྱུར་གྱི་རིང་ལུགས་བསླད་མེད་པ། དེ་བཞིན་གཤེགས་པ་ནས་ད་ལྟ་ལ་ཐུག་གི་བར་གཏེར་དང་དག་སྣང་ཞལ་གཟིགས་ལྟ་བུའི་འཕྲོ་འཐུད་པ་མ་ཡིན་པ་ཞལ་ནས་ཞལ། སྙན་ནས་སྙན། ཐུགས་ནས་ཐུགས་སུ་བརྒྱུད་པ་ཏནྟྲ་སྡེ་བཅོ་བརྒྱད་ཀྱི་སྙིང་པོ་ཕྱི་མའི་རྒྱུད་སྒྱུ་འཕྲུལ་གསང་བ་སྙིང་པོ་ཡི་དབང་ལུང་མན་ངག་དང་བཅས་པ་སྔ་འགྱུར་གྱི་རིགས་སྔགས་འཆང་བ་སྦས་པའི་ཚུལ་ཅན་ལས་ལེགས་པར་ཐོས་པར་བྱས་ཤིང་། དེ་བཞིན་སེམས་དཔའ་ཆེན་པོ་རཏྣའི་མཚན་ཅན་ལ་དཀར་པོའི་ལོ་འཆར་བ་ནས་བརྩམས་ཀརྨ་སྙིང་ཐིག་གི་དབང་ཁྲིད་ཀྱི་རྒྱུན་གྱིས་མཚོན་སྔ་འགྱུར་གྱི་རྒྱུན་དཀོན་པ་མང་ཞིག་དང་བསྐྱར་ཏེ་ཡང་ཞུས་ཤིང་རྙིང་མ་རྒྱུད་འབུམ་གྱི་བཀླགས་ལུང་ཡང་ཚུགས་སྐབས་ཉིད་དུ་འཕགས་ཡུལ་གྱི་མུ་ཁུན་ཀྴེ་ཊ་ཞེས་བོད་ཡུལ་གྱི་གློ་བོར་འབོད་པའི་ལྗོངས་ཀྱི་བདག་མོ་ཡང་ཡུལ་ཕྱོགས་དེར་ངེད་ཡོང་དགོས་ཚུལ་དོ་གལ་ཆེན་པོས་བྱོན་པའི་ནན་མ་ཐེག་པར་སྣྲོན་ཟླ་བ་ལ་མངའ་རིས་གུང་ཐང་ནས་ཐོན་ཏེ་ཆུ་སྟོད་ཟླ་བའི་ཚེས་གསུམ་ལ་གློ་བོའི་ཡུལ་མི་སེར་སྐྱེ་ཐམས་ཅད་ཀྱིས་རང་རང་འཁོས་སུ་དཔག་པའི་རོལ་མོའི་གླུ་གཞས་སོགས་ཚད་མེད་པའི་མདུན་བསུས་ཏེ་སྨོན་ཐང་ཁབ་ཏུ་འབྱོར། རིང་པོར་མ་ཐོགས་པར་རང་རང་གི་འདོད་མཐུན་ཚེ་དབང་གིས་སྣ་དྲངས་ཏེ་ཆོས་བཀའ་ཇི་སྙེད་དང་ཕྱོགས་དེར་འཁོད་པའི་སྐྱེ་བོ་མཐའ་དག་པར་དབུ་མ་ལུགས་ཀྱི་སྒོ་ནས་སེམས་བསྐྱེད་ཐུགས་རྗེ་ཆེན་པོའི་བསྒོམ་ཁྲིད་སོགས་ཆོས་བཀའ་ཇི་སྙེད་དང་། ཁྲོམ་མང་ཉུང་སྣ་ཚོགས་ལ་ཕལ་ཆེར་ལྔ་བརྒྱར་ལོང་པ་ལ་བླ་མའི་སྒྲུབ་ཐབས་དང་འབྲེལ་བའི་ཆོས་ཁྲིད་སྨར་བ་བཤད་ཅིང་། དེ་ཡི་ནང་ནས་ཉུང་འཐུས་ཁ་ཤས་པར་རྫོགས་པ་ཆེན་པོ་ཀློང་གསལ་མཁའ་འགྲོ་སྙིང་ཐིག་གི་ཟབ་ཁྲིད་བཤད། རྗེ་རཏྣའི་མཚན་ཅན་ལ་རྒྱུད་འབུམ་གྱི་ལུང་གུང་ཐང་དུ་མ་རྫོགས་པའི་ལྷག་མ་འདིར་ཡང་ཞུས་ཤིང་། བླ་མ་ཡང་མཉེས་པ་གསུམ་གྱིས་མཉེས་པར་བྱས་ཏེ་རང་གནས་སུ་ཕེབས་པའི་སྐྱེལ་མ་བཅས་བཏང་། ངེད་གློ་བོ་སྨད་རྡོ་དང་ཆུ་ལ་མེ་འབར་བའི་གནས་སུ་བསྒྲོད་པར་བརྩམས་ནས་དགོན་པ་སྒང་དུ་སླེབས་སྐབས་དམ་ཅན་རྡོར་ལེགས་དང་གཉན་ཆེན་གེ་འཛོ་དག་ཡོང་ནས་བོད་ཀྱི་སོ་ཁ་བསྲུང་ཚུལ་དང་། འདི་ལོ་མཐའ་དམག་གི་དོགས་མེད་ཀྱང་ནང་དུ་ལྷ་ངན་འདྲེ་བརྫུ་ཡོང་འདྲ་ཞེས་སོགས་མོལ།

དེ་ནས་གློ་བོའི་གནས་ཆེན་གྱི་མཐིལ་དངོས་ཛ་ལཱགྣ་ཛྭ་ལར་ཚེས་དགུ་ལ་འབྱོར་ཞིང་བཅུ་ནས་བརྩམས། དེར་སྡོད་རིང་སྒོ་གསུམ་ལེ་ལོ་ཅུང་ཟད་ཀྱང་མ་སོང་བར་དཀྱིལ་འཁོར་གསུམ་དུ་ཅི་ནུས་སུ་མཉམ་པར་བཞག་ཅིང་ཚོགས་གཏོར་འབུམ་ཕྲག་དུ་མ་ངེད་རང་དངོས་དང་གྲྭ་ཚོགས་རྣམས་ནས་ཀྱང་བསགས་ཤིང་། དཔའ་བོ་དང་མཁའ་འགྲོ་རྣམས་དགྱེས་པ་མཉམ་བྱས། དེ་སྐབས་མཁའ་འགྲོ་མ་ཡི་འདུ་བ་ཉམས་སུ་མཐོང་བ་སོགས་ཡ་མཚན་པའི་ལྟས་ཁྲའུ་ཁྲའུ་བྱུང་། རང་དང་ལས་སྨོན་འབྲེལ་བའི་སྐྱེས་བུ་དམ་པ་འགའ་ཞིག་གི་འཕྲལ་གྱི་འགལ་རྐྱེན་ཁ་ཤས་ཞི་ནུས་པའི་ལྟས་ཀྱང་མཐོང་། འདིར་སླེབས་མཚམས་ཚེས་གྲངས་མ་ངེས་པ་ཞིག་ཏུ་དུས་ཟིང་འབྱུང་ངོ་ཞེས་པའི་སྒྲ་གསལ་པོ་རྣ་བར་བྱུང་བ་ཅི་ཡིན་སྙམ་པ་ལས་ཧ་ཅང་ཅེར་ཅེར་པོ་མ་བྱུང་། དེ་ནས་ཕྱི་རོལ་པ་རྣམས་ཀྱིས་ཁྱབ་འཇུག་གི་གནས་སུ་འདོད་པའི་ཀག་པ་ཎེ་ཀོ་ནེར་ཡང་གཏོར་ཆེན་ཞིག་གཏོང་བར་ཕྱིན། དེ་ནས་དགོན་པ་སྒང་དུ་ཞག་ཤས་ངལ་གསོས་ཤིང་དགོན་དེའི་བདག་པོ་བླ་མས་ཀྱང་དགོན་གཞིས་དེ་བདག་ལ་རྩིས་སུ་ཕུལ་བཞིན་རྟེན་འབྲེལ་ལ་དམིགས་བདག་གིར་ཁས་བླངས།

སྔར་ཐུན་མོང་ལྕགས་ཁྱི་ལོར་དཔལ་ཆེན་པོ་གནུབས་ནམ་མཁའི་སྙིང་པོ་ཡིས་རྡོ་རྗེ་ཐེག་རྒྱུད་ཐམས་ཅད་ཀྱི་བདག་པོར་བདག་ལ་དབང་བསྐུར་མཛད་པའི་སྣང་བ་བྱུང་བའི་མལ་ཐད་དེར་མཐིང་གི་ཧཱུྃ་ཡིག་ཞིག་ཀྱང་བྲིར་བཅུག སྔར་མ་ཕྱིན་སྟབས་རྒྱ་གད་ཀྱི་གྲོང་བགྲོད། དེའི་གཞི་བདག་བཙན་དེས་ཀྱང་དགའ་ནས་ཡུལ་ཆོས་དང་མཐུན་པར་རོལ་མོ་དང་གར་རྩེད་པའི་ཉམས་སྣང་བྱུང་། དགེ་གླིང་དང་བདུད་ལྕགས་ཀྱི་ཐོར་ཅོག་ཅན་གྱི་གནས་ག་མིའི་རྫོང་དུ་ཡང་ཞག་ཤས་བསྡད། དེ་ནས་གུ་རུའི་གནས་ཆེན་དགེ་དཀར་དུ་ཕྱིན། དེའི་གནས་བདག་སྲིད་པའི་མ་མོ་བདུན་དང་ཕུག་བདག་ཆེན་མོའི་དགུའི་ནང་ཚན་རྡོ་རྗེ་ལེགས་ལྡན་མས་དགའ་བའི་ཉམས་འགྱུར་ཅི་ཡང་བསྟན་ཅིང་། མངོན་སུམ་དུ་མི་ལ་རློམ་ནས་དམ་ཚིག་གི་མནའ་ཆུ་ལེན་པ་ཡང་བྱུང་། ཚོགས་གཏོར་གྱི་བྱ་བ་ཅི་ནུས་བགྱིས་ཤིང་འདུས་པའི་སྐྱེ་བོ་རྣམས་ལ་ཆོས་འབྲེལ་གྱི་རེ་བ་ཡང་བསྐང་།

དེ་ནས་སླར་ཡང་སྨོན་ཐང་དུ་འབྱོར། སྔར་བཀའ་ཆོས་ཞུ་བ་རྣམས་དང་། དེའི་ཁར་དོལ་པོ་ནས་སྔགས་འཆང་རྡོ་རྗེ་འཛིན་པ་ཆེན་པོའི་ཞབས། ཛུམ་ལེ་ར་ཛའི་བཀའི་བློན་པོ་སོགས་དོན་གཉེར་ཅན་ཁ་ཤས་ལ་ཉི་མ་ཁ་ཡར་གྱི་བར་སྙིང་ཐིག་གི་དབང་ཚང་བར་བྱས། དོལ་པོ་རྡོ་རྗེ་འཛིན་ཆེན་པོ་ལ་ཕུར་པར་ཇོ་མོ་ལུགས་ཀྱི་ནང་ཚན་ཉང་ལུགས་ཀྱི་དབང་རྡུལ་ཚོན་ལ་བརྟེན་པ་ཚར་གཉིས་དང་། རས་བྲིས་སྟེང་ནས་ཚར་གསུམ་སྟེ་ཁྱོན་ལྔ་ཞུས། སྔོན་ནས་ད་ལྟ་ཁོང་ལ་ཐུག་གི་བར་ཕུར་པའི་བསྙེན་ཆེན་གསུམ་ལྡབ་བར་མ་ཆད་བྱུང་འདུག་པར་བྱིན་བརླབས་ནན་ལྟར་དུ་བཟང་ཞིང་ཁོང་ནས་ཀྱང་ཕྱིན་ཆད་སྐུ་ཚེའི་རིང་ཕུར་བཟླས་ནད་སོགས་མ་གཅོགས་པ་མ་བྱུང་ཕྱིན་ཉིན་རེར་ཉི་ཁྲི་རེ་ཆག་མེད་དུ་ཞལ་བཞེས་མཛད་སོང་ལ། དོན་དུ་སྦས་ཚུལ་གྱི་གྲུབ་བརྙེས་ཞིག་ཏུ་གོ །

ག་མི་ནས་བརྩམས་དམག་གི་དཔུང་ཆེན་པོ་གཡོ་བའི་ལྟས་གསལ་པོ་བྱུང་བཞིན། བོད་ཁམས་སྡུག་ལ་གཏོད་པའི་གོད་ཆགས་སྣ་འདྲེན་མངའ་རིས་གུང་ནས་གྲོ་ཤོད་དུ་དམག་བསྐུལ་བའི་དུས་སུ་འདུག དེ་སྐབས་རྨི་ལམ་དུ་འཕྲལ་མར་ཕྱོགས་གཞན་དུ་མ་བསྐྱོད་ན་མི་ཁ་དང་གླེང་གཞི་ཆེ་བ་ཞིག་ཡོངས་ཞེས་བྱུང་། དེ་ནས་མི་རིང་བར་བོད་ཀྱི་སྲིད་སྐྱོང་ཆེན་པོ་ཝང་ནས་ཁྲི་སྐོར་ཡོ་ཡི་ཡོངས་ཀྱི་དམག་མངའ་རིར་བཅུག་ཅིང་། གཡུལ་སྤྲོད་དུ་ཆ་བ་ན་མི་བདག་གུང་ཚད་རིམ་ནད་ཀྱིས་ཉེན་སྟེ། ངེད་ལ་ཡང་ཅི་ལྟར་འགྱུར་བརྟག་ཞུ་དངུལ་བྲེ་ཆེན་གཅིག་དང་བཅས་བྱུང་བར། ཚེ་ཚད་དངོས་མ་ཡིན་ཀྱང་ཚེ་འཕྲང་ནི་ཤིན་ཏུ་དམ། ཡི་གེ་འདི་འབྱོར་བསྟུན་སྐུ་རིམ་འགྲུབ་ན་གྲོལ་བར་སྲིད་ཀྱང་ཕལ་ཆེར་ཐལ་བར་དོག་ཞེས་ཕོ་ཉ་བ་ལ་གསང་པོར་སྨྲས་བཞིན། རྒྱལ་ཟླ་བའི་ཚེས་བཅུ་ལ་དུས་ཀྱི་ཆོས་ཉིད་དུ་གྱུར་འདུག་ཅིང་། འཁོར་རྣམས་གཡུལ་དཔུང་སླེབ་འཕྲལ་ཕྱེ་མ་ལེབ་རླུང་གིས་བརྡས་པ་ལྟར་འཐབ་འཁྲུག་ཡེ་མེད་པར་སོ་སོར་གྱེས་ཤིང་། ངེད་ལ་ཡང་སྐྱབས་ཞུ་བདུན་ཅུ་སྐོར་བྱུང་ཞིང་། རང་གི་ལུས་ལོངས་སྤྱོད་དཔོན་པོའི་དགོངས་པ་ཚོམས་འཁྲུངས་ལ་མ་ལྟོས་པར་རང་ལ་སྐྱབས་ཞུ་ཙམ་མ་ཡིན་པར་གུང་གཡོག་ཚང་མར་མི་འཇིགས་པ་སྐྱབས་ཀྱི་སྦྱིན་པ་ཡང་དག་པར་འདུན་སྟེ་ཐབས་དུ་མའི་སྒོ་ནས་ཞུ་ངོ་ནན་དུ་བགྱིས་པས་ཐོག་མ་བརྒྱ་དང་དགུ་བཅུའི་སྲོག་སྐྱོན་ཡོང་རྩིས། མཐར་ཉིས་བརྒྱ་སྐོར་སྲོག་ལ་ཉེས་སྐྱོན་མེད་པར་འགྲུབ་ཅིང་། དེ་བཞིན་གུང་གི་མཐུ་མཁན་རིམ་གྲོ་བ་སོགས་དགོན་པ་མང་ཞིག་ལ་བཀའ་སྐྱོན་དབྱིངས་ཆེ་ཙམ་འདུག་རུང་། དེ་རྣམས་ལ་ཡང་ཞུ་ངོའི་ཁོང་ནས་སྲོག་སྐྱོན་རྒྱང་འབུད་འཐོར་གོད་མེད་པར་འཇམ་ཆགས་སུ་སྡོད་ཆོག་པ་བྱུང་སོང་། རང་གི་གཏན་པ་མེད་པར་མི་འཇིགས་སྦྱིན་པ་དགེ་བ་རྫོགས་བྱང་དུ་བསྔོ་བ་ལས། སྙིགས་དུས་ཀྱི་སྐྱེ་བོ་དེ་རྣམས་ནས་རེ་ཟུང་ནི་སྲིད་མཐའ་མ་དགག་གཞན་ནི་དྲིན་དུ་བཟོ་བ་ཡང་ཅུང་ཟད་ཙམ་ཡང་མི་བྱེད་དོ། །དེར་ཡང་མ་ཟད་བོད་ཀྱི་བསྟན་པའི་མངའ་བདག་དགོན་སྡེ་ཆེ་ཁ་རྣམས་ནས་ངེད་རྣམས་གུང་གཡོག་ལ་ཕན་འདོགས་ཅུང་ཟད་ཀྱང་མ་ནུས་ཤིང་། ཁོ་བྱ་བྲལ་བ་ཞིག་གི་ཕན་འདོགས་བྱས་སོ་ཞེས་པའི་གཏམ་འདི་རྣ་བར་མི་སྙན་ཅིང་སྙིང་ལ་ཟུག་རྔུ་བསྐྱེད་པའི་ཚེར་མའོ་སེམས་ནས་དེ་ལ་བྱིངས་མི་སྙན་པའི་ཚིག་སྒྲུབ་བྱེད་པའི་རམ་འདེགས་བྱེད་པ་ཡང་ཆེས་མང་མོད། གང་ལྟར་རང་ཉིད་ལ་འཕགས་པ་སྤྱན་རས་གཟིགས་དབང་ཕྱུག་དགྱེས་པའི་མཚན་མ་ཅུང་ཟད་བྱུང་བས་དེས་དབུགས་དབྱུང་ཐོབ།

དེ་ལྟར་བགྱིད་འོས་འགས་ཟླ་བ་ཁ་ཤས་འགོར་ནས་རབ་མྱོས་ལྕགས་རྟ་ལོ་སྦོ་ཟླ་བའི་ཚེས་གཅིག་ལ་གློ་བོ་ནས་ཐོན་ཏེ་གྲོད་ཤོད་ཀྱི་རྒྱལ་པོ་གྲོ་མཆོག་པའི་མདུན་དུ་སླེབ་པ་ན། རྒྱ་ནག་དང་བོད་ཀྱི་ལྷ་འདྲེ་རྣམས་ཤྭོ་རྡེལ་བཀྲམ་སྟེ་རྒྱལ་ཕམ་རྩོད་པ་དག་ཀྱང་མཐོང་། དེ་སྐབས་རིམ་གྲོ་ལ་འབད་ན་བོད་སྤྱིར་ཅུང་ཟད་བདེ་བའི་གོ་སྐབས་རྙེད་པར་སྣང་ཡང་། སྤྱི་མཐུན་གྱི་ལས་ཀྱིས་མ་གྲུབ་པས་ས་སྦྲུལ་གྱི་སྟོན་མགོ་ཙམ་ནས་མིའི་བདག་པོ་ཡང་ཐུགས་འགྱུར་བའི་རྣམ་པས་ལེགས་པར་གསོལ་བ་ལ་མི་དགྱེས་པའི་རྣམ་པ་རེ་འདུག་པས་སྤྱིར་སྙན་དུ་གསོལ་དཀའ་ཡང་འདི་སྐབས་ཆ་ཤས་ཞུས་ཀྱང་། སྐུ་རིམ་གྱི་རྩོལ་བ་ཡེ་ནས་མཛད་མ་སོང་། དེ་ནས་ཚེས་བདུན་ལ་སྤྲ་དུན་དུ་འབྱོར། ཞི་བའི་སྦྱིན་བསྲེག་ཁ་ཡར་དང་། ཚེས་བཅུ་སོགས་དུས་ཆེན་ལ་གཏོར་མ་བཏང་། ལྷག་ཏུ་ཚེས་བཅོ་བརྒྱད་ཀྱི་ཉིན་བྱང་ཕྱོགས་ཀྱི་དེའུ་དེའི་རྩེར་ཕྱིན་གཏོར་མ་བཏང་བ་ལ་ཆེ་བཙན་པ་རོལ་སྐྱ་བདུན་རལ་པ་བསྭེ་ཡན་གྱི་གསེབ་ནས་མེ་ལྕེ་ལྗིབ་ལྗིབ་འཕྲོ་བཞིན་མངོན་སུམ་དུ་བྱུང་ནས་གཏོར་མ་ལེན་པའི་ཉམས་བྱུང་། དེར་འདུས་པ་ཐམས་ཅད་ཀྱིས་མཐུན་སྣང་དུ་རླུང་ཤིན་ཏུ་དྲག་པ་དང་རྔམ་ཞུད་ཚད་མེད་པ་བྱུང་ཟེར། དེ་ནི་དགའ་བ་དང་འཚུབ་པ་ཟུང་དུ་འབྲེལ་བ་སྟེ་ངེད་ལ་དགའ་ཞིང་གཞན་ལ་འཚུབ་པའི་མཚན་མའོ། །དེ་སྐབས་རྒྱལ་ཁྲིམས་ཀྱི་ཆད་པས་མི་ཉི་ཤུ་ཙམ་བསད་པ་ཡིན་འདུག་ཀྱང་མང་ཞིག་ནི་གདུག་འདྲེར་སྐྱེས་པའི་མཚན་མར་མཐོང་།

འདི་ལོ་ངེད་རང་བལ་ཡུལ་དུ་རང་བྱུང་མཆོད་རྟེན་ལ་མཆོད་འབུལ་ཞིབ་མོ་ཞིག་བགྱིད་འདོད་ཡིན་ཡང་དུས་ཟིང་དེས་བཤོལ་དགོས་བྱུང་ཞིང་། གུང་གཡོག་གི་སྲོག་སྐྱོབ་ལ་ཞུ་ནན་ཆེས་པས་དགོངས་པ་ཅུང་ཟད་མ་དགྱེས་པ་སེལ་བྱེད་དུ་ཡར་འབྲོག་ཆུ་ཚན་དུ་མཇལ་རྩིས་བྱས་ནས་དཔལ་མོ་ཆོས་སྡིངས་སུ་འབྱོར་སྐབས་སྦྱིན་བདག་གིས་ནན་གྱིས་བཤོལ་བཏབ་ནས་ཞག་མ་ཉུང་ཙམ་འགོར་བ་རྟེན་འབྲེལ་ཤིན་ཏུ་གནོད་པ་བྱུང་། དེ་སྐབས་མགོན་པོ་གཡུ་ཐོག་པའི་ཡུམ་ཤེས་རབ་དཔལ་འཕྲེང་དང་མཇལ་ནས་དབང་བཞི་བསྐུར་ཞིང་འཕྲལ་གྱི་ལུང་བསྟན་ཁ་ཡར་གནང་བ་ཡང་ཇི་བཞིན་པར་འགྲུབ། ལ་སྟོད་ལྷོར་ཕྱིན་སྔ་སོར་ས་སྦྲུལ་ནས་བརྩམས་པའི་ཀུན་རིག་གི་གཟུངས་སྔགས་དུང་ཕྱུར་གཉིས་གྲུབ་དགེ་བ་རྫོགས་བྱང་དུ་བསྔོས་ཤིང་། གཤིན་རྗེ་གཤེད་དམར་གྱི་སྙིང་པོ་འབྲུ་བཅུ་བཞི་པ་དུང་ཕྱུར་དང་། སྒྲོལ་མའི་བསྟོད་པ་འབུམ་ཕྲག་ལྔ་འཕྲལ་དུ་བསྒྲུབ། གྲོམ་པ་རྒྱང་། བོ་དོང་ཨེ། ཁྲོ་ཕུ་རྣམས་སུ་མཆོད་འབུལ་་སྨོན་ལམ་དང་བཅས་ཤིང་། སྲད་རིན་ཆེན་རྩེར་སྲིད་སྐྱོང་ཆེན་པོའི་དྲུང་དུ་ཚེས་བཅུ་ལ་འབྱོར། དེ་འཕྲལ་ངོས་མཇལ་ཐོག་བཀུར་བཟོས་སྔར་དང་ཆ་འདྲ་བ་ཐུགས་གཤིས་འགྱུར་བའི་རྣམ་པ་ཆེ་ཞིང་སྔར་ལྟར་གྱི་དབང་ཆོས་གསན་བཞེད་ཀྱི་སྤྲོས་པ་སྤངས་འདུག བླ་མཆོད་གཙོ་བོ་ཤེལ་སྟོད་པ་ཡང་དེར་བཞུགས་ཤིང་དེ་སྐབས་ཁྲུང་བཞེས་ནི་ཉིན་མཚན་མི་ཤེས་པ་ལྟར་སྣང་། རང་གི་གསལ་སྣང་ལ་ནི་རྒྱལ་སྲིད་ཡུན་རིང་དུ་མི་གནས་པའི་འཆར་སྒོ་བཅས་ཉེ་བར་འཁོད་པ་རྣམས་ལ་ཡང་གསལ་པོར་སྨྲས། དེ་སྐབས་རྒྱ་ཐག་ཤེར་སྤུན་ཁྲིམས་རར་ཆུད་དེ་སྲོག་སྐྱོབ་བྱས་ཀྱང་ཕྱིས་དྲིན་ལན་ལོག་གཞལ་སྔོན་དེ་བཞིན་གཤེགས་པས་ལྷས་བྱིན་ལ་ཕན་འདོགས་པ་ལྟ་བུ་འདིའོ། །ཡང་སྐྱོག་པོའི་བློ་ཅན་་འགས་ཕོ་ལྷར་སྐུ་རིམ་སྲི་གནོན་གྱི་རིགས་ངེད་ནས་བྱས་ན་ལེགས་ཚུལ་སྲིད་སྐྱོང་ལ་ཞུས་ནས་ངེད་ལ་བཀའ་ཕེབས་བྱུང་ཡང་། དེར་བརྟེན་མ་འོངས་གླེང་གཞི་ཆེན་པོ་འབྱུང་བར་ཤེས་ནས་རང་ཐག་ཆོད་པའི་སྒོ་ནས་ལས་བཞིའི་སྦྱིན་བསྲེག་བྱེད་པར་ཞུས།

དེ་ནས་བཀྲ་ཤིས་ལྷུན་པོར་ཕྱིན་རང་རེའི་ཞྭ་དམར་སྤྲུལ་པའི་སྐུ་མཆེད་དུ་གྱུར་པའི་རྨོངས་ཞེན་གྱིས་རང་ལ་ཅི་ཡོད་ཀྱི་འབུལ་སྤང་བསྐྱེད། ཚུར་ལ་ཡང་གདབ་ལན་ཆེས་བཟང་བ་བྱུང་། དེ་ནས་ཕོ་ལྷ་དང་གནས་གསར། རྩེ་ཆེན་རྣམས་བརྒྱུད་ར་ལུང་དུ་ཟླ་བ་གཅིག་ཉེ་ཙམ་སྡོད། ཡར་འབྲོག་ཏུ་ཕྱིན་ཡོམ་པོ་དོར་གུ་རུའི་ཕྱག་རྗེས་མཇལ། རྗེ་དཔའ་བོ་རིན་པོ་ཆེ་ཡང་ངོས་དང་འཕྲལ་དུ་འཕྲད་པར་ཕེབས་བཞིན་མུ་ཏིག་སྤ་མ་གོང་དུ་མཇལ། དེ་སྐབས་ཀླུ་སོགས་བོད་ཀྱི་ལྷ་འདྲེ་རྣམས་འཁྲུག་པའི་ཆོ་འཕྲུལ་ཤིན་ཏུ་ཆེ་ཞིང་འཚུབ་པར་བྱུང་། མཚུར་ཕུ་ནས་དྲུང་པ་ཡང་གཅེན་གྱི་སྤྱོད་པ་མ་བཟོད་པས་ཁོ་རང་རྒྱང་འབུད་དང་དབང་རིས་བདག་ཐོབ་གང་ཡོད་ཤེལ་སྟོད་པ་ལ་སྦྱར་རྒྱུའི་གཏམ་སྦིར་གྱིས་འཇིགས་ཤིང་སྐྲག་སྟེ་ངོ་ཆེན་ཞུ་དགོས་ཚུལ་གྱི་གནས་འདིར་བྱུང་བཞིན་ཞུ་དོན་ལེགས་པར་གཉལ་སྨད་དགེ་རིར་སླེབས་སྐབས་འགྲུབ་སོང་བ། དེ་སྐབས་ནི་དགའ་ཚོར་ཚད་མེད་བྱེད་ཀྱི་འདུག་ཁོ་བོ་ཡང་གཏིང་དུ་ཆོས་པའི་ཡང་མཐའ་བྱེད་སྙམ་པ་ཞིག་མི་བདོག ལྷོ་བྲག་གི་གནས་མཐའ་དག་མཇལ་བའི་ཆེད་དུ་ཕྱིན་ཡང་། དེར་སོང་ན་མི་ལེགས་ཚུལ་གྱི་ལུང་བསྟན་བྱུང་བས་དོག་པ་སྐྱེས་རྣ་བོ་ཅོག་ནས་ཚུར་ལོག གནས་དེར་སྔར་རང་ཉིད་ཆུང་ངུ་བྱིས་པའི་སྐབས་དང་ཆ་མཐུན་པའི་སྔོན་གནས་རྗེས་སུ་དྲན་པ་སོགས་གསལ་སྣང་མང་ཞིང་ཏིང་ངེ་འཛིན་ལ་ཡང་བོགས་ཅུང་ཟད་ཐོན། དེ་ནས་གཉལ་སྨད་དུ་འགྲོ་བར་འདོད་པའི་བགྲོད་ལམ་ལོ་རོ་བརྒྱུད།

སྔ་སོར་ཀུན་གཟིགས་སི་ཏུའི་ཞབས་སོགས་དམ་པ་རྣམས་ལ་ཐུགས་དམ་བརྟག་དཔྱད་ཞིབ་མོར་ཞུས་བཞིན་སྤྲུལ་པའི་སྐུར་སྙམ་པ་དེ་ཡང་ལྷ་བབས་ཀྱི་དུས་བཟང་པོ་ལ་རང་དང་ལྷན་ཅིག་ཏུ་རྗེས་སུ་དཀྲིས་རྒྱུར་བྱས། གཉལ་སྨད་དགེ་རིར་ཕྱིན་སྔ་ཕྱིར་གཏོར་ཚོགས་དང་། གཞོན་ནུའི་སྟོན་མོ་སོགས་རྟེན་འབྲེལ་ལ་ཕན་པ་རྣམས་བགྱིས། དེར་མཆོད་རྟེན་མཁའ་འགྲོ་མ་མང་པོའི་བཞེངས་པར་གྲགས་ཤིང་། དེ་ལ་ནམ་མཁའ་སྙིང་པོས་ཕྱག་མཛད་པའི་ཕྱག་རྗེས་གསལ་བར་བཞུགས་པའི་མཆོད་རྟེན་དེ་ནི་དུས་འཁོར་ཡེ་ཤེས་ལེའུ་ནས་བཤད་པའི་མཆོད་རྟེན་བཟོ་དབྱིངས་ཆ་ཚད་འཁྲུལ་མེད་དུ་སྣང་བས་ཤིན་ཏུ་ངོ་མཚར་སྐྱེས། འདི་སྐོར་དྲེའུ་ལྷས་སྤྲུལ་པའི་སྐུ་རིན་པོ་ཆེར་ཤངས་ཆོས་ཀྱི་བདེ་མཆོག་ལྷ་ལྔའི་དབང་རས་བྲིས་སྟེང་ནས་སྨིན་པ་དང་། ཆོས་དྲུག་ཕྱག་ཆེན་སོགས་ཁྲིད་ཆེན་ལྔ་ཚང་བར་བཤད། ཐུགས་མཁྱེན་རབ་ཆེ་ཞིང་སྣང་བ་གཤིམ་པ་བྱུང་། དེ་སྐབས་ལྟས་འཚུབ་ཆེ་བར་བསྟུད་མར་བྱུང་བཞིན་། སྨིན་དྲུག་ཟླ་བའི་ཚེས་ཕུག་ལུགས་བཅུ་གཉིས་ཆད་ཅིང་རང་ལུགས་ཀྱི་བཅུ་གཉིས་མ་ཆད་པའི་ཉི་མ་རྩེ་ཤར་སྐབས་ལྷ་ལྡན་དུ་མིའི་བདག་པོ་རྒྱ་ནག་ཏཱ་ཞིང་དག་གིས་གཡོ་ཐབས་ཀྱིས་བཀྲོངས་ཤིང་། ཉི་མ་དེ་ཀར་སྲིད་སྐྱོང་རང་གི་གཡོག་རིས་དྲག་པ་འདྲས་དཔུང་གི་སྦྱོར་བས་ཏཱ་ཞིང་གཉིས་ཀྱིས་མཚོན་རྒྱ་མི་སུམ་བརྒྱ་ལྷག་ཙམ་ཞིག་ལྔ་པའི་ལམ་དུ་བཀོད་ནས་ཁོ་པ་རྣམས་ཀྱང་ཅི་བདེར་གྱེས་འདུག ཚེས་བཅུ་དྲུག་ལ་དགའ་པཎ་གྱིས་བོད་གངས་ཅན་ལ་དབང་བསྒྱུར་བའི་གཏམ་དང་བཅས་དམག་གི་བསྐུལ་བརྡའི་ཐམ་ཀ་སྔར་ནག་པོ་དེ་དང་། མི་རིང་བར་གངས་ཅན་རྗེ་བོའི་ཁྲི་ལ་འཁོད་པ་ཡིན་ཞེས་ཐམ་ཀ་ཁ་དོག་དམར་པོར་བྱས་ཏེ་བྱུང་། དེ་འཕྲལ་རང་ཉིད་ཀྱང་ལྷ་ལྡན་འགྲོ་བར་སྙམ་ཡང་ཆོས་ལྟར་བཅོས་པའི་བྲེལ་བ་མང་པོས་གཡེངས་ནས་འགོར། དེ་སྐབས་ཤེད་ཁྱབ་འཇུག་ཆེན་པོ་ནམ་མཁའི་ཁ་དོག་ལྟ་བུ་གཟི་བརྗིད་ཕུན་སུམ་ཚོགས་པ་ཞིག་རྨི་ལམ་དུ་མཐོང་། འདི་ནི་འཇིག་རྟེན་གྱི་ལྷ་མཐུ་བོ་ཆེ་ཡིན་པས་ཐུན་མོང་གི་དངོས་གྲུབ་ཁ་ཅིག་ཞུའོ་སྙམ་པ་བྱུང་། ལར་དེ་སྐབས་མི་རྣམས་ཀྱི་བརྗོད་གླེང་སྣ་ཚོགས་པས་ཉེ་བར་འཁོད་པ་རྣམས་དོགས་པ་ཆུ་ལྟར་དུ་འཁོལ་ཡང་རང་ཉིད་ནི་འདི་ཕྱི་བར་དོ་ཀུན་རྣམ་རྟོག་གི་རི་མོ་ཙམ་ལས་གཞན་མེད་པར་ཆོས་ཉིད་ཀྱི་གཤིས་ལ་ངེས་ཤེས་ལྷག་པར་སྐྱེས་པས་ལེགས་ཉེས་གང་བྱུང་ཡང་ཆོག་སྙམ་པ་ལས་ཁུ་ཁྲིག་ཁྲིག་སྙེམ་གང་ཡང་མ་བྱུང་། ཚེས་གསུམ་གྱི་སྐབས་དྲག་ཤུལ་ཅན་ཞིག་རེ་ཞིག་གནོད་སྦྱིན་དུ་སྐྱེས་སམ་སྙམ་པ་བྱུང་། ངེད་ལ་གཞུང་ས་ནས་བཀའ་རྒྱ་ཞིག་རྩིས་དཔོན་ཕུན་ཚོགས་ཀྱིས་ཁོ་བོ་ཆེད་མངགས་སྐྱེལ་བཏང་བ་གཞུང་རང་གི་ངན་པ་དགུ་འཛོམ་དུ་འདོད་པའི་ཉི་མ་དེ་ལ་འབྱོར། དེ་ཉིན་ཕོ་ཉ་བ་འཕྲད་པ་དང་ཡི་གེ་ལེན་པ་གཉིས་ཀ་མ་ཐུབ། དེའི་སང་ཉིན་ཡི་གེ་ཁྱེར་ནས་རྔམ་ཟིལ་བསྐྱེད་ཀྱང་། ངེད་ཀྱི་ཆུ་འབབ་ཙམ་ལས་སྒེར་དུ་བཀུར་བཟོས་བསྟབ་མ་འདོད། ལྟ་སྟངས་ཀྱིས་གཟིར་བས་ནི་མཐར་གདོང་རོ་མདོག་ཏུ་སོང་། ཚེས་དགུ་ལ་ལྷ་ལྡན་དུ་འགྲོ་བའི་ལམ་དུ་ཞུགས། དལ་འགྲོས་ཀྱི་གསེར་ཁུ་ཆབ་ཚན་དུ་ཡང་བཅག་མལ་ཞིག་བྱས། དེ་ནས་ཡོངས་བ་ཤམ་པོའི་ལ་རྩེར་འབྲོག་པ་བཟུང་གཡག་ལ་གདུགས་དང་རྒྱལ་མཚན་ཆེས་ཆེ་བ་འཛུགས་ཏེ་ཡོངས་བ་ཁ་ཡར་དང་འཕྲད་པ་ནི་ཤམ་པོ་དགའ་ཞིང་ངེད་རང་ལ་ལེགས་པའི་ལྟས་སུ་གོ །

ཚེས་བཅུ་བཞིར་ཡར་སྟོད་ཀརྨ་ལྷ་ཁང་དུ་སྡོད་པའི་ནུབ་མོར་འཇམ་དཔལ་གཞོན་ནུར་གྱུར་པ་ཡི་བརྡའ་ཐབས་ཀྱི་སྒོ་ནས་འཇིགས་པ་ལས་རྣམ་པར་གྲོལ་བ་ཡི་དབུགས་དབྱུང་། ཚེས་བཅོ་ལྔར་ཁྲ་འབྲུག་ཏུ་འབྱོར། སྦྱིན་བདག་ཆེན་པོར་སྙིང་བརྩེ་བས་ཅི་ལྟར་འབྱོར་བའི་ཡོ་བྱད་ཀྱི་སྣང་གསལ་གཙོ་བོར་གྱུར་པའི་མཆོད་པ་དང་། སྙན་དར་ཡང་ཕུལ་ཞིང་སྨོན་ལམ་ཡང་དག་པས་རྒྱས་བཏབ། ཞོར་དུ་བྱ་ས་དང་ཀ་ཆུ་ལྷ་ཁང་མཇལ། བསམ་ཡས་སུ་འབྱོར་སྐབས་འཇའ་དཀར་པོ་ཞིག་དབུ་རྩེའི་ཐད་དུ་ཀ་བ་ལྟར་འགྲེང་བ་དང་། དཀོར་བདག་ཆོས་སྐྱོང་ཆེན་པོ་དེས་ཀྱང་སྔར་ལས་དགའ་བ་དང་གུས་པའི་རྣམ་འགྱུར་བསྟན། དུར་ཁྲོད་མ་མོའི་རིགས་ཡིན་པ་ཉ་བཤན་གྱི་བུ་མོ་ཞིག་ཀྱང་འཕྲད། བཅག་མལ་བྱས་ཏེ་དབུ་རྩེ་དང་རྟ་མགྲིན་གླིང་མཆོད་རྟེན་དཀར་པོ་རྣམས་ལ་མཆོད་འབུལ་སྨོན་ལམ་ཁྲ་འབྲུག་གི་དཔེ་འདྲེ་བྱས། བྱང་ཆུབ་ཆེན་པོའི་ཞལ་རས་ལན་མང་དུ་མཇལ་ཡང་འདི་རེས་ནི་མཚན་དཔེ་རྫོགས་པའི་མཐར་ཐུག་པ་ཞིག་ཏུ་མཐོང་བས་ཡིད་འཕྲོག་པ་བྱུང་། རྒོད་དཀར་ལ་ལ་ཡང་སེར་བུ་དང་བྲལ་ཞིང་ཉི་མ་མཆོག་ཏུ་དྭངས་བ་སོགས་ཡུལ་བདག་དེ་དགའ་བའི་རྣམ་འགྱུར་གྱིས་ཆེས་བདེ། ཚལ་གུང་ཐང་དུ་བཅག་མལ་ཞིག་བྱས་ནས་ཉི་ཤུ་གཉིས་ལ་ལྷ་ལྡན་དུ་འབྱོར། ཉི་ཤུ་གསུམ་ལ་པཎྜི་ཏར་མཇལ་ཁ་ཞིག་དགོས་ཚུལ་སྨྲས་ཀྱང་བཀའ་འདྲི་མང་ཙམ་བྱེད་རྒྱུ་ཡོད་པས་དེ་མ་གྲུབ་པར་མི་ཡོང་ཚུལ་བྱུང་བ། དེ་འཕྲལ་རྩེ་ལ་ཞུ་མཁན་བཏང་བས་རྟེན་འབྲེལ་གྱི་ནུས་པས་སང་ཡོང་ངོ་གསུངས་ལྟར་གྲུ་འཛིན་གྱི་ཕོ་བྲང་ཆེན་པོར་ཕྱིན། ཀུན་གྱི་ལྐོག་གྱུར་ཤིབ་བུར་གཞུངས་ཀྱི་དགོངས་འཁྲེལ་གྱི་གནས་སོ་ཞེས་སྨོས་པར་བྱེད་ཀྱང་དེར་འདུས་པའི་དབུས་གཙང་གི་དྲུང་འཁོར་ཆེ་ཕྲས་མཚོན་བརྒྱ་ཕྲག་དུ་མས་གུས་པའི་ཞེ་ས་བཏབ་ནས་མགོ་བོས་འདུད་པར་བྱས་ཤིང་། སྔར་དང་མི་འདྲ་བའི་གུས་ཚུལ་སྟོན། ཡུན་ཅུང་ཟད་ལོན་པ་ན་གསེར་གདུང་གི་སྟེང་བ་གམ་སྲིད་ཞི་ཕུན་ཚོགས་སུ་གོང་ཞབས་མཇལ་བའི་ཕྱག་རྟེན་དུ་གན་དར། སུ་ཝརྞ་སྲང་གང་། རྡོ་བཅུད་སྲང་བཅོ་ལྔའི་གྲངས་ལྡན་བཅས་མགྲོན་གཉེར་ཉི་རྒྱལ་བ་བརྒྱུད་ཕུལ་ཞིང་ཕྱག་བྱེད་པའི་སྐབས་སུ་སྐུ་ལུས་དྲང་པོར་བསྲང་ཞིང་ཏིང་ངེ་འཛིན་གསལ་ཞིང་མཇལ་རྟེན་གྱི་དར་བདག་གི་ལག་ནས་འཛུམ་བཞིན་པས་ཕྱག་ཏུ་བཞེས་ཤིང་། གཡས་གྲལ་གདན་ཁ་གང་མ་ཞིག་འདུག་པ་ལ་མགྲོན་གཉེར་དུ་མས་ནན་ཏུར་གྱིས་བཀུར་ཡང་བབས་ཐོབ་མེད་ཚུལ་གྱིས་ས་རྗེན་ལ་སྡོད། ཐོན་གདོང་སླར་ཡང་ཕྱག་དང་བཅས་ཏེ་གནས་ཚུལ་ཁ་ཤས་གསོལ་བས་འཚམས་འདྲི་དང་ལན་ཡིད་ལ་བབ་པས་བྱབ། བཞུགས་གྲལ་དེར་པཎྜི་ཏ་ཡང་སྲིད་སྐྱོང་སྔ་མ་རྣམས་དང་ཁྲི་མཚུངས་པར་གཡོན་ངོས་སུ་བཞུགས་འཇུག་པ་ལ་ཡང་དར་གཅིག་བསྟབ་པར་མགོ་བོས་དུད་ཙམ་བྱས་སོང་། ཁོ་རང་ལ་སྒེར་མཇལ་ཞུས་པར་མི་ཡོང་ཞེས་རྩེགས་རྩེགས་པོ་བྱས་པ་དེ་ཡང་ལྷུས་མ་ཐིང་བའི་རྣམ་པ་བྱུང་། ངེད་རང་ནི་འདི་སྐབས་ཀུན་ཏུ་སྣང་བ་མེ་ལོང་གི་གཟུགས་བརྙན་ལྟ་བུར་ཡུལ་དང་ཡུལ་ཅན་མི་ཕྱེད་པ་ཆོས་ཐམས་ཅད་ཀྱི་གཏིང་ལ་སླེབ་པ་འདྲ་ཞིག་བྱུང་། དེ་ཡང་རྟོགས་པའི་ངོ་བོ་ལ་ཉམས་ཀྱིས་རྒྱན་བཏགས་པར་སྣང་། ཅི་ཕྱིར་ངོ་བོ་འགྱུར་བ་མེད་ཀྱང་གསལ་སྣང་ལ་འཕེལ་འགྲིབ་དུ་ཆ་བས་སོ།

དེ་ནས་འགྲོ་བའི་མགོན་འབྲུག་པ་མཆོག་ཀྱང་ངེད་ལ་གཞུང་ནས་དབྱིངས་ཚོམ་ཡོང་བའི་སྒྲ་སྦིར་ཆེ་གཤིས་དེ་ཐག་མ་ཆོད་པར་བརྩེ་བའི་ཐུགས་ཀྱིས་ཕྱོགས་ཕེབས་བཤོལ་ཏེ། ལྷ་ལྡན་གཡུ་ཐོག་ཁང་གསར་དུ་བཞུགས་འདུག་པ་མཇལ་བར་ཕྱིན་ཤིན་ཏུ་དགྱེས་པར་མཛད། དཔལ་ལྡན་དཔའ་བོ་མཆོག་ཡང་དེ་དང་སྒོ་མཐུན་ལྷ་སར་བཞུགས་པ་དང་ཡང་ཡང་མཇལ། དེའི་ཕྱི་ཉིན་མཁན་རིན་པོ་ཆེ་དྷི་ར་དྷ་ར་ཤོད་ནས་བཀྲས་རབ་པ་བཅས་རྒྱུ་མཚན་མང་ཉུང་ཙམ་ལབ་པ་ལ་ལན་གང་ཡིན་པ་རྣལ་མ་བཏབ། སླར་ཡང་ཚེས་བརྒྱད་སྐབས་རང་གི་གནས་ཚུལ་དང་། བསྟན་པ་ཅི་ལས་འཕྲོས་པའི་གསོལ་འོས་ཇི་སྙེད་ཞིག་ཡི་གེའི་ལམ་དུ་བཀོད་དེ་གཞུང་སར་ཕུལ། ཚེས་བཅུ་ལ་སླར་ཡང་སྤྱིར་གྲུབ་མཐའ་ལ་བསྙད་ཅིང་བྱེ་བྲག་བཀའ་འདྲི་ཤིན་ཏུ་ལྕི་བ་བརྒྱད་ཕེབས་པར་དེ་ལ་བག་ཚ་བ་ཅུང་ཟད་ཀྱང་མ་མཆིས་པར་འཇིགས་པ་མེད་པའི་སྤོབས་པས་རྩ་ཐོ་ཡི་གེ་དང་ངག་ནས་རྒྱ་ཆེར་སྤེལ་ཏེ་སྙན་དུ་བཏབ། ཚུལ་དེས་བོད་སྔགས་རྙིང་པའི་ལྟ་གྲུབ་འཛིན་པ་རྣམས་དང་བཀའ་བརྒྱུད་སྤྱི་ལ་ཕན་ཐོགས་མ་ཆུང་ཙམ་བྱུང་སོང་ཡང་འདྲིས་ཆེ་བ་རེ་ཟུང་ལས་གཞན་ཀུན་གྱིས་ཤེས་པར་དཀའ། བཀའ་འདྲི་དེ་ལྟར་ཕེབས་པའི་རྐྱེན་ནི་ངེད་ལ་འཕྲིན་ལས་ཐན་ཐུན་བྱུང་བར་སེར་འབྲས་ཀྱི་ཀུན་སློང་ཅན་ཁ་ཅིག་མ་དགེས་པའི་ཞོར་དང་། གཙོ་བོར་མཚུར་ཕུ་སྒར་འོག་ཕྱོགས་གཏོགས་རྣམས་ཀྱིས་ནན་གྱིས་དཀྲུག་པའི་རྒྱུ་ལས་སོ། །ཚེས་ཉི་ཤུ་སྐོར་ལ་རྒྱ་ཡི་ཟི་ལིང་ཨན་བན་དེ་འབྱོར་ནས། ཚེས་ཉེར་ལྔ་ལ་ཝང་གི་ཕྱག་གཡོག་རྒྱ་དཔུང་འཇོམས་པར་བྱེད་པ་སྔར་འཐོབ་བ་རྣམས་པཎྜི་ཏ་རང་ཉིད་སྲིད་སྐྱོང་ཡིན་རྒྱུའི་རྩིས་ཀྱིས་འཛིན་སྦྱངས་བྱས་པ་ཉི་ཤུ་ལྷག་ཙམ་ཞིག་སྲོག་བཀུམ་པ་ལ་ཡང་སྙིང་ཐག་པ་ནས་བསྔོ་སྨོན་བཟང་པོ་བྱས། ཁ་ཅིག་ངན་འགྲོ་ཆེན་པོའི་འཇིགས་ལས་སྐྱོབ་ནུས་པར་ཡང་སེམས། ཚེས་ཉེར་དྲུག་ཉིན་ཆེན་པོ་ཁ་ཅིག་གི་རྒྱུད་མི་མ་ཡིན་གྱིས་བསྐུལ་ཏེ་མཐའ་དམག་བཟློག་པའི་བྱ་བ་སོགས་སླད་ནས་མི་བརྩམས་པའི་དག་པ་དགོས་ཞེས་གསུང་བྱུང་བ།དེས་བདག་ལ་རུང་ན་རྐང་བརྐྱངས་ལ་དེ་བས་ཀྱང་རུང་སྙམ་སྟེ་རེ་ཞིག་དེ་ལྟར་ཁས་བླངས། བོད་སྤྱིའི་རྟེན་འབྲེལ་ལ་ནི་ཤིན་ཏུ་གནོད་ཚབ་ཆེ་བར་རྟོགས། གོང་ཞབས་ཀྱི་ཡོངས་འཛིན་ནུ་མོད་ཧུའང་ནས་རང་ཅག་ཁམས་སོག་ཡུལ་མཐུན་ཞིང་ངེད་གུ་རུ་པདྨ་ལ་སྙིང་ནས་མོས་མཁན་ཡིན། ཁྱེད་རང་བྱ་བྲལ་གྱི་སྤྱོད་པ་སྔར་མུས་ལྟར་ཅི་བདེར་སྐྱོངས་ཤིག་སོགས་མཛེས་ཚིག་ཇི་སྙེད་ཞིག་བརྒྱུད་དེ་འཕྲོས་སུ་བྱུང་། དེ་དང་གོང་ཞབས་ནས་ཀྱང་ལྷ་ལྡན་དུ་ཡུན་རིང་སྡོད་ན་མི་དགེས་ཚུལ་བཀའ་བསྟུད་མར་ཕེབས་གཤིས་དགོངས་སྦྱར་གྱིས་སྐྱེས་བདག་ལོ་ཆོ་འཕྲུལ་ཟླ་བའི་ཚེས་གཅིག་ལ་ལྷ་ལྡན་ནས་ཐོན་ཏེ་ཁྱུང་རྫོང་བྲག་གི་རི་ཁྲོད་དུ་འབྱོར། ལྷ་སར་དྲུང་འཁོར་མང་ཞིག་དབང་ཆོས་ཀྱི་འཕྲོ་ལུས་པས་ཡིད་ཅུང་ཟད་འཕྲེང་བ་བྱུང་།

གཉལ་ནས་བརྩམས་གནས་འདིར་སླེབ་ཀྱི་བར་ཆོས་ཐམས་ཅད་སྒྱུ་མ་ལྟ་བུར་ཞེན་འཁྲིས་ཀྱི་ཡུལ་དུ་མ་གྱུར་ཞིང་། དོན་དམ་གྱི་གཤིས་སྟོང་པ་ཉིད་སྙིང་རྗེ་དང་ཟུང་དུ་འབྲེལ་བ་བྱུང་ཚོར་གྱི་རྟོག་པ་ཀུན་སྦྲུལ་མདུད་ལྟར་རང་སར་གྲོལ་བ་བདེ་བའི་གོ་སྐབས་རྙེད་པ་བྱུང་། དེ་ནས་སྟོད་ལུང་དུ་གཞན་ཕྱོགས་མི་སྲུན་པ་མང་ཞིག་གི་དཔའ་བཀོང་བའི་སླད་དུ་གཞུང་ནས་ཀྱང་བཀུར་ཟོས་ཆེན་པོས་བྱབ་པའི་འུ་ལག་བཅས་དལ་འགྲོས་ཀྱི་ཚེས་དགུ་ལ་སྐྱེར་སྒང་དུ་འབྱོར། ཚེས་བཅུ་ལ་སྤྱོད་འཆང་བའི་སྲོལ་ལྟར་འཁོར་ལོ་བདེ་མཆོག་གི་ཚོགས་ཀྱི་འཁོར་ལོ་རྒྱས་པ་ཞིག་བཏང་། འགྲོ་བའི་མགོན་པོ་འབྲུག་པས་ཀྱང་སྒྲོལ་མའི་སྐུ་དང་། གསེར་ཞོ་སོ་བདུན་གྱིས་མཚོན་དངོས་པོ་ཕོན་ཆེ་ཞིང་རྣམ་པར་དག་པ་དང་ལྷན་ཅིག་ཡུན་འཚོ་བསྩལ་བ་དང་། ཡུལ་མདོ་ཁམས་ནས་ཞྭ་དམར་མཆོག་གི་སྤྲུལ་པའི་སྐུ་རིན་པོ་ཆེ་དང་། ཀུན་གཟིགས་སི་ཏུ་རིན་པོ་ཆེ་ནས་ཀྱང་བརྩེ་བའི་ཐུགས་ཀྱིས་མ་སྐྱུད་པའི་ཆབ་ཤོག་ཡུན་འཚོའི་རྟེན་བཅས་ཆེད་མངགས་ཀྱི་བྱ་མ་རྟ་ཡི་གདོང་དུ་དེར་འབྱོར་བ་རྟེན་འབྲེལ་ལེགས་པའི་མཚན་མར་གོ །

ཚེས་བཅུ་གཅིག་ལ་ཡོང་བའི་ལམ་བར་དུ་རྟ་བསུ་དང་། ཐབ་བསུ། སེར་འཕྲེང་སོགས་བསུ་བའི་བཀོད་པ་བཟང་པོ་དང་བཅས་མཚུར་ཕུར་ཕྱིན། དེ་སྐབས་རླུང་འཚུབ་ཤིན་ཏུ་ཆེ། དེ་ཡང་གྱེས་པ་དང་འཚུབ་པའི་མཚན་མ་ཅན་ནོ། །ཐོག་མར་རྒྱལ་བའི་དབང་པོ་དཔལ་ཀརྨ་པ་ཆེན་པོ་ཞལ་རས་ལྷ་ཁང་དུ་མཇལ་བར་ཕྱག་བྱས། མཚུར་ཕུ་དྲུང་པ་ཡང་སྒོ་འགག་བར་བསུ་བ་ལ་བྱུང་། རྒྱལ་བའི་དབང་པོ་ནི་སྐུ་ཡི་བཞུགས་ཚུགས། གསུང་གི་བརྗོད་པ། ཐུགས་ཀྱི་འཆར་སྒོ་རྣམས་སྔར་དང་མི་འདྲ་བ་བབ་ཆགས་པས་ཡིད་མགུ་བ་ཐོབ། དེ་ནས་མི་རིང་བར་སྦྱོར་བ་ཡན་ལག་དྲུག་གི་ཁྲིད་དང་། གཞན་ཁྲིད་བཀའ་ཁ་ཤས་ཀྱང་དཔའ་བོ་རིན་པོ་ཆེ་དང་ལྷན་དུ་ཕུལ། མདོ་ལུགས་ཀྱི་ཁྲིད་རིམ་ཐམས་ཅད་ཀྱི་རྒྱལ་པོ་ཇོ་བོ་རྗེའི་ཐུགས་ཀྱི་ཉིང་ཁུ་བྱང་ཆུབ་ལམ་གྱི་རིམ་པའི་འཕྲོ་ཡང་གོང་གི་ཡབ་སྲས་དང་དཀར་ལྕོག་སྤྲུལ་པའི་སྐུ་ལྷན་དུ་ཕུལ། སྦོ་ཟླའི་ཚེས་བཅོ་ལྔ་བྱང་བདག་སོགས་ཀྱི་རྒྱལ་བ་སྐུ་བལྟམ་པའི་དུས་སུ་འདོད་པ་དེར་ལྷ་ཆེན་འཛམ་གླིང་རྒྱན་གྱི་དྲུང་དུ་གོང་གི་ཡབ་སྲས་གསུམ་དང་རྒྱལ་ཚབ་བཅས་ལ་སེམས་ཙམ་དང་དབུ་མ་ལུགས་ཀྱི་སེམས་བསྐྱེད་ཀྱི་ཆོ་ག་ཡང་དག་པ་གཞུང་ཚིག་གང་ཡིན་ལྷག་ཆད་ཀྱི་སྐྱོན་སྤངས་ཏེ་ཕུལ། དེ་ལྟ་ན་ཡང་བདག་ནི་མ་མཁས་མི་བསྡམས་ཉོན་མོངས་པའི་ཚང་ཚིང་དྲག་ཏུ་འཁྲུག་པ་ཞིག་གི་དེ་ལྟར་སྐབས་སུ་མི་ཆེ་བའི་ངེས་པ་གཏིང་ནས་རྙེད་ཀྱང་། སློབ་དཔོན་ལ་ཚིག་གི་རྒྱུན་ཐོབ་པ་ཙམ་ཁོ་ནས་ཡུར་བ་མ་ཆད་པའི་ ཆུ་ལྟར་བསྟན་རྒྱུན་ལ་ཆེ་ཐང་དུ་དགོངས་ཏེ་བཞེས་པར་མཛད་པ་ནི་སློབ་མ་བཟང ་པོའི་མཚན་ཉིད་དུ་གྱུར་ཀྱང་རང་ཉིད་བྱང་ཆུབ་སེམས་དཔའི་མཚན་ཉིད་མི་ལྡན་བཞིན་སློབ་དཔོན་གྱི་ཁུར་བཟུང་བ་ལ་ཉེས་ལྟུང་ཅི་ཙམ་མཆིས་པ་ཀུན་དཔང་གྱུར་རྒྱལ་བ་སྲས་བཅས་དང་དཀར་ཕྱོགས་སྐྱོང་བའི་ལྷ་རྣམས་ཀྱི་སྤྱན་སྔར་སྙིང་ཐག་པ་ནས་མཐོལ་ཞིང་བཤགས་དགོས་པར་སྣང་ངོ་། །སྤྱིར་ནི་དེར་ཟླ་བ་ཁ་ཤས་སྡོང་རིང་ཐུན་བར་དུ་ཆོས་ཀྱི་བྱ་བ་ཅུང་ཟད་ཙམ་ལས་ཕལ་ཆེ་བ་ཞིག་འཇིག་རྟེན་དགྲ་འདུལ་གཉེན་སྐྱོང་ལྟར་སྣང་བས་དུས་འདའ་བའི་རང་བཞིན་དུ་གྱུར་ཅིང་། ལྷ་སར་ཡང་རྒྱ་ཡི་ཙོང་དུ་ཨམ་པན་ཕྱི་མ་རྣམས་རིམ་པས་འབྱོར་རང་ལུགས་ཀྱི་སྦོ་ཟླ་ཕུག་པའི་བཤོལ་སྔ་འདོན་གྱི་ལོ་གསར་སྐབས་པཎྜི་ཏ་སྲིད་སྐྱོང་གི་ཁྲི་ལས་ཕབས་ཏེ་བཀའ་བློན་གྱི་གྲལ་དུ་འཁོད་ཅིང་། ཟླ་བ་དེའི་ཚེས་བཅུ་གཅིག་ལ་དགའ་ལྡན་ཁང་གསར་ནས་རྡོ་རིང་དུ་སྤོ་བ་དང་། ཟླ་བ་དེའི་རྗེས་མའི་ཚེས་གཅིག་ལ་ཧོར་ཟླ་བཅུ་པའི་ཚེས་བཅོ་ལྔ་ནས་གནང་བའི་ཐམ་དམར་དེ་གོང་ཞབས་སུ་བཞེས་ནས་ཕྱིན་ཆད་སྔར་སྤྱི་འགྲེའི་ཁ་དོག་ཏུ་བསྒྱུར་བ་སོགས་ཡ་ཆ་བ་བྱུང་། རང་ལ་དད་པ་ཅན་གྱིས་ཕུལ་བའི་དངོས་པོ་ཆུད་མི་ཟ་ཆེད་དུ་སྟོད་ཧོར་གྱི་ཟབ་གོས་གསེར་མ་ལ་མུ་ཏིག་གི་དྲ་བས་བསྒྲེལ་ཞིང་གཡུ་དམར་གྱིས་ཕྲ་བཏབ་པ་གསེར་སྟོང་གི་རིན་ཐང་ཅན་ཞིག་གཞུང་དེབ་དུ་སྦྱར་རྒྱུ་ཁྲི་ལྕམ་བདེ་ལྡན་སྒྲོལ་མ་ལ་དོ་དམ་བཅོལ་ནས་བསམ་ཡས་བྱང་ཆུབ་ཆེན་པོའི་དབུ་སྟེང་དུ་རྩ་བའི་བླ་མའི་དུས་ཆེན་གནམ་སྟོང་ལ་ཕུལ།

ཡང་དེ་སྐབས་རྙིང་མ་ཡི་རྡོར་སྨིན་བྱང་ཆུབ་གླིང་པ་སོགས་རྙིང་དགོན་ཆེ་ཁ་ཡི་ཕྱག་མགྲོན་སོགས་དྲག་རིམ་བཀུག་ནས་རྒྱུ་མཚན་འདྲི་བའི་ཕྲེང་བ་རྒྱ་ཆེར་སྤེལ་བའི་སྐབས་ཉིད། ལྷ་སའི་ཆེ་ཁག་རྣམས་ཀྱང་གཅིག་འོག་ཏུ་གཅིག་མི་འདུ་ཞིང་རེ་འཁོང་ཆེན་པོ་དང་བཅས་མཚོན་རྩེའི་རྐྱལ་པ་བཞིན་ནང་མི་གཤིམ་པ་སོགས་དུས་སྙིགས་མའི་རང་མཚང་ནི་གསལ་པོར་ངོམ་བཞིན་པས་ཡིད་སྐྱོ་བ་ཇེ་ཆེར་འཕེལ་བའི་རང་གཟུགས་ཉིད་དུ་གྱུར། ནག་ཟླའི་ཚེས་ཉི་ཤུ་ལ་རང་བྱུང་ཞབས་ཀྱིས་བྱིན་གྱིས་བརླབས་པའི་སྣང་བ་དང་བཅས་ཆོས་ཁམས་ལ་ངེས་ཤེས་ཁྱད་པར་ཅན་ཞིག་སྐྱེས། འདི་སྐབས་སྔ་ཕྱིར་མངའ་རིས་ནས་རྒྱལ་མོ་སྤུན་དང་། མངའ་རིར་རྗེ་འབྲུག་པའི་ཞལ་སྐྱིན་ཚུལ་དུ་འབྱོན་མཁན་གྱི་བླ་མ་ལོ་རི་བ། ལྷོ་བྲག་དྷི་ཚ་སྤྲུལ་སྐུ། ན་ལེནྡྲ་བཅོ་བརྒྱད་སྤྲུལ་པའི་སྐུ་རྣམས་བཀའ་ཆོས་ཀྱི་ཆེད་དུ་བྱོན་པར་སོ་སོའི་འདོད་ལྟར་ཅི་ནུས་ཀྱི་ཆོས་བཀའ་བཤད། གོང་ཞབས་ནས་དྭངས་བར་མཛད་པ་ཡི་རིམ་གྲོ་བ་ཆེན་པོའི་ལམ་ནས་བརྟག་པ་བགྱིད་དགོས་ཕེབས་པ་ཡང་། འབྱུང་འགྱུར་གནས་ཅུང་ཟད་གོ་ཡང་བརྡའ་དོན་འཕྲོད་རུང་ཙམ་ཞིག་ལས་ཕུལ་མ་སྤོབས། འོན་ཀྱང་དེ་ལ་དགྱེས་པས་དངུལ་གྱི་མཎྜལ་ཆུང་ངུ་ཞིག་དང་། གསེར་དངུལ་གྱི་ཕུར་མ་མཚོན་བྱེད་བཅས་སྐྱེས་སུ་ཕེབས། ནག་ཟླའི་ཚེས་བཅུ་བཞིའི་ནུབ་ལྷ་ཆེན་པོ་མ་ཧེས་ཤྭ་ར་འཕགས་ཡུལ་གྱི་སྒྲུབ་ཐབས་དང་མཐུན་པར་དྷ་རུ་དཀར་དམར་གྱི་མེ་ཏོག་ཤིན་ཏུ་མཛེས་པའི་རྒྱན་ཅན་ཞིག་ཀྱང་རྨི་ལམ་དུ་མཐོང་། འཇིག་རྟེན་གྱི་ལྷ་ཆེན་པོ་རྣམས་ཀྱིས་ཁོ་བོ་ལ་ཡང་ཡང་གཟིགས་པར་སེམས། ལར་ནི་རང་ཉིད་གཞོན་ནུའི་སྐབས་སུ་རྨི་ལམ་དགེ་བ་དང་མཐོང་སྣང་སྣ་ཚོགས་པར་རྩིས་སུ་བཟུང་ཡང་། དུས་ཕྱིས་དེ་ལ་ཅེར་ཅེར་པོ་མེད་ནས་ལོ་ཤིན་ཏུ་མང་ཞིང་། མཐའ་དག་ཡི་གེར་འབྲིར་ཡང་ག་ལ་ལོངས། གཞན་མཁའ་འགྲོ་རྣམས་ཀྱིས་ཀྱང་ཅུང་ཟད་བཀག་པས་སོ། །

དེ་ཡང་ལྷ་ལ་དགའ་བ་དང་འདྲེ་ལ་མི་དགའ་བ་མེད་ཞེས་རྟོགས་ལྡན་རྣམས་ཀྱིས་ཟེར་མོད། མཉམ་བཞག་དབྱིངས་སུ་ལ་བཟླ་བའི་སྐབས་དེ་ལྟ་ཡིན་མོད་ཀྱང་ཀུན་རྫོབ་ཀྱི་བདེན་པའི་མཐུས་ལྷ་མཐོང་བ་རྣམས་བག་བྲོ་ཞིང་ཉམས་དགའ་བ་དང་། བགེགས་མཐོང་ན་དེ་ལས་བཟློག་ཅིང་བར་མ་བཏང་སྙོམས་ཀྱི་ཚུལ་དུ་འཆར་བ་ད་ལྟའི་ཕུང་ཁམས་འདི་མི་འགྱུར་བདེ་བའི་དབྱིངས་སུ་དག་པ་ཡེ་ཤེས་ཀྱི་སྐུར་མ་སྨིན་བར་དེ་ལྟར་ཡོད་པར་གོ་ལ། འོན་ཀྱང་དགའ་སྡུག་བདེ་མི་བདེ་ལ་བཟང་ངན་གྱི་ཁྱད་འཛིན་ཅེར་ཅེར་པོ་མེད་ཆོས་ཉིད་གཉུག་མའི་དབྱིངས་སུ་ཁད་དེར་སྙོམ་པ་རྣལ་འབྱོར་ཐོབ་པ་ཁས་འཆེ་བ་རྣམས་ཀྱི་རྒྱུད་ལ་ངེས་པར་སྐྱེ་བའི་ཁྱད་ཆོས་སུ་བྱ་དགོས་སོ། །

སྤྱིར་བཏང་ཙམ་དུ་ཀུན་ལ་ཕན་གནོད་ཀྱི་ལྷ་འདྲེ་གང་མཐོང་ཡང་དགེ་དང་མི་དགེ་བའི་མཚན་མ་ཡིད་བདེ་དང་མི་བདེ་བའི་ཁྱད་པར་གྱིས་བརྟག་གོ་ཞེས་གྲགས་པ་ཡང་མཐུན་པའོ། །དུས་དེ་སྐབས་རྒྱང་ཤེར་བས་བློ་གྲོས་ཀྱི་ལང་ཚོ་ཕྱུང་ནས་ཀོང་པོ་ནས་ཕྱག་གར་ཡང་བསོ། རྣམ་གླིང་ནས་སྤྲུལ་བརྫུ་ཚུར་བཀུག བྱ་ཀོ་བའི་ལྷ་བུ་སྐུ་སྐྱེད་རྩེ་དྲུང་དུ་བཅུག དེའི་གཡོག་ཏུ་བྱ་རིས་པ་སོགས་དམ་ཉམས་ཁ་ཤས་དཀྲིས། མི་འོས་པའི་བྱ་བ་ལྷུ་རུ་བླངས་ནས་སྔོན་གྱི་གླེང་གཞི་རྩ་སློང་གི་བློ་འདོད་ཆེས་ཆེ་བ་ཡི་ཕུ་དཀྲུག་མདའ་དཀྲུག་བྱེད་ཀྱི་འདུག་པར་བློས་མ་བཟོད་པར་རྩེ་ཤོད་ཀྱི་མདུན་ན་འདོན་གལ་ཆེ་རིགས་ཐམས་ཅད་ལ་རྒྱུ་མཚན་ཞིབ་མོ་དངོས་པོའི་འབུལ་མནོན་རང་གི་རྔོ་གང་ཐོགས་བཅས་ལྷ་སར་བང་མི་ཡང་ཡང་གཟེར་གཏབ། ཞྭ་དམར་མཆོག་གི་ཕྱག་མཛོད་མགོན་པོ་ཡང་ལྷ་སར་ཡུན་རིང་པོའི་བར་དོན་དེ་སྐོར་གྱི་ཉན་ནོན་ཉེར་ལེན་བགྱིད་པར་བཞུགས་ཤིང་ཕྱག་ཏུ་དངོས་པོ་ཡང་སྲབ་པས་དཀའ་ཙམ་བྱུང་ཚོད་དང་། དཔའ་བོ་རིན་པོ་ཆེ་ཡང་དོན་འདི་སྐོར་ལ་ཐུགས་ངལ་ཆེ་ཡང་རེ་ཞིག་རང་ཕྱོགས་ལ་འཕོ་འགྱུར་གླིང་ལོག་མི་འབྱུང་བའི་རྐང་ཚུགས་སོང་རུང་རྒྱབ་སྐྱོར་སྐུའི་རིམ་གྲོ་ལ་འབད་དགོས་ནི་གལ་ཆེར་སྣང་།

དེ་ཡང་ཞྭ་དམར་མཆོག་གི་སྤྲུལ་པའི་སྐུ་རེ་ཞིག་བོད་དུ་གདན་ཆགས་ན་གླེང་གཞི་ཡང་རང་སར་གྲོལ་ཞིང་། ལུག་ལོ་ཤར་ཙམ་སྡེ་དགེ་ལྟ་བུའི་ཁམས་སུ་སྤྱན་འདྲེན་གྱི་དགོངས་ཞུ་གོང་ཞབས་ལ་བགྱིད་ན་ལྷིང་ཆགས་ཤིང་ལུགས་ལེགས་པ་ལྟ་བུར་སྣང་ཡང་། སྔ་སོར་མེ་སྟག་ལོར་ལྷ་ལྡན་བསམ་འགྲུབ་ཕོ་བྲང་དུ་སྡོད་སྐབས་ཉི་མ་ཤར་ཕྱོགས་ཀྱི་སྐུ་དོན་ནི་འགྲུབ་ཞེས་ལུས་མེད་ཀྱི་སྒྲ་གསལ་པོར་ཐོས་པ་དེ་སྐབས་དོན་ཅི་བཞིན་རྔོ་མ་ཐོགས་ཀྱང་ཡབ་སྲས་ལྷན་རྒྱས་མདོ་ཁམས་སུ་ཕེབས་རྒྱུའི་རྟེན་འབྲེལ་དུ་གོ །མཚུར་ལུགས་ཀྱི་ས་ག་དང་གཞུང་ལུགས་ཀྱི་ནག་པའི་ཚེས་ཉི་ཤུ་ལྔ་ལ་རྒྱལ་བའི་དབང་པོ་དཔལ་ཀརྨ་པ་ཆེན་པོ་ཡང་ལྷ་ལྡན་དུ་གངས་ཅན་རྒྱལ་པོར་མཇལ་ཕྱག་ཞུ་བའི་ལམ་ཞུགས་གནང་བའི་སྐབས་ཀརྨ་པའི་སྐྱེ་འཕྲེང་ཞྭ་ནག་ཅོད་པཎ་བཅིང་བའི་སྐྱེས་བུ་ནི་བཅུ་གཅིག་གམ། བཅུ་གསུམ་ལྷག་མི་འབྱོན་པའི་ངེས་པ་ལུང་གིས་གྲུབ་བཞིན་ཀརྨ་པ་ད་ལྟའི་སྐུ་ཐོག་འདིར་ཞྭ་དམར་བ་དང་བླ་སློབ་ཀྱི་རྟེན་འབྲེལ་མ་འཆུག་པ་གནང་ཕྱིན་སླད་མར་ཞྭ་དམར་ཅོད་པཎ་འཛིན་པ་དང་། ཀརྨ་པ་གཉིས་སུ་མེད་པའི་སྒོ་ནས་གདུལ་བྱའི་དོན་མཛད་པ་ལས་ད་ཕྱིན་ཀརྨ་པའི་སྤྲུལ་སྐུར་སྒྲོ་བཏགས་ནས་ནག་པོའི་ཅོད་པཎ་བཅིངས་ན་མི་ལེགས་པར་ཀརྨ་པ་ཆེན་པོ་བཅུ་གསུམ་པ་རང་ཉིད་ཀྱི་ཐུགས་ཀྱི་དགོངས་བཞིན་དེ་དོན་ཕྱག་གི་ཨ་ཀྵ་ར་ལ་དྲི་བཟང་གི་ཕྱག་མཐིལ་གྱི་རྗེས་དང་བཀའ་རྟགས་ཕྱག་རྒྱས་སྤྲས་པ་དཔལ་ལྡན་དཔའ་བོ་རིན་པོ་ཆེ་དང་། ཞྭ་དམར་ནག་གི་མཛོད་པ། ངེད་བཅས་འདུས་པར་གནང་སོང་ཞིང་བདག་ནི་འདི་སྐབས་མཆིས་པའི་བྲོ་འཚལ་བས་ཕེབས་བསྐྱལ་རྒྱང་རིང་དུ་མ་ཐུབ་པར་གནམ་སྒོའི་མཚམས་སུ་ཕྱག་གསུམ་ཕྲག་དག་བཙལ་ནས་ཕྱག་དབང་ཞུས། སྐུ་ཞབས་འདི་ནུབ་སྣ་དཀར་བཞུགས་རྩིས་སུ་ཕེབས།

ཚེས་ཉེར་དྲུག་གཟའ་སྐར་འགྲུབ་སྦྱོར་བཟང་པོ་ལ་སྐྱེར་སྒང་འབུམ་པའི་རྫ་ཏོག་དེ་མཁས་པ་ཆོས་མཛད་ཀྱི་ཟླ་བ་ཕྱེད་གཉིས་བར་དུ་བཅོས་ནས་གྲུབ་པའི་རྩིས་སུ་བྱས་ཡང་ཡིད་ཚིམ་པ་ཞིག་ནི་མ་བྱུང་། འོན་ཀྱང་དེར་འབད་ཀྱི་དགེ་བ་རྫོགས་བྱང་དུ་བསྔོས། མཚུར་ཕུ་ནས་རང་ཉིད་འཕྲལ་དུ་ཐོན་རྩིས་ཡིན་ཡང་ལྷ་ལྡན་དུ་རྣམ་གླིང་བ་དང་། གར་ཤེ་སོགས་ནས་བྱེད་རྒྱུ་མང་བར་བསྐྱར་ནན་གྱི་རྩེ་ཤོད་དུ་ཞུ་ཡིག་རེ་འབུལ་བར་བརྫངས་བར་དགྱེས་པའི་ངང་ཚུལ་དང་བཅས་རང་གི་བཞེད་ལྟར་གནང་རྒྱུའི་རྩིས་སུ་བྱུང་། དཔལ་ཀརྨ་པ་ཆེན་པོ་ཡང་ལྷ་སར་ཟླ་གཅིག་ལྷག་ཙམ་གདན་ཆགས་པར་མཆོག་དམན་མཐའ་དག་ནས་གུས་ཞབས་ཆེ་ཞིང་གཞུང་ལུགས་ས་གའི་ཉེར་བཞི་ལ་གོང་ཞབས་དང་མཇལ་འཕྲད་སྐབས་ལྡང་བ་མཐོང་བཞེས་བཟོས་སྒོ་སོགས་གང་ཅི་འདི་རེས་རིངས་སྔར་ལས་ལེགས་ཆ་ཆེ་བ་ཡང་རྟེན་འབྲེལ་གྱི་མཐུ་ལས་བྱུང་འདུག་ཅིང་། གཞུང་ལུགས་ཀྱི་སྣྲོན་ཟླའི་ཚེས་ལྔ་ལ་མཚུར་དུ་བདེ་བར་ཕེབས་པར་ཕེབས་བསུར་མཐིལ་དུ་ཕྱིན་ལུས་ཀྱི་མལ་ལྔ་ས་ལ་ཕབ་པའི་ཕྱག་སྔོན་དུ་འགྲོ་བས་ཕྱག་དབང་ཞུས། རྗེ་འབྲི་གུང་ཡབ་སྲས་ནས་ཀྱང་ལྷ་ལྡན་དང་འདི་རུ་ཡང་ཕོ་ཉ་སྔ་ཕྱིར་གནང་ཞིང་སྔར་ནས་དག་པའི་སྣང་བ་རྒྱས་བཞིན་གོང་འཕེལ་དུ་གྱུར། དེ་ལྟར་མཚུར་དུ་འདི་རེས་ཞག་ཁ་ཡར་ལས་མི་སྡོད་པའི་རྩིས་སུ་བྱས་ཀྱང་ཟླ་ངོ་དྲུག་དང་ཧྲིལ་པོ་ལྔ་ཡི་རིང་འགོར་ཞིང་ཕྱི་ནས་དགྲ་ཟླ་ནང་ནས་འཐབ་འཁྲུག་བར་ནས་ཟེར་གསོག་ཆེ་བར་མ་ཟད་ཡབ་སྲས་ཀྱི་གྲྭ་རུས་ནས་ཀྱང་གཟིགས་ཕྱོགས་དང་བརྗོད་པ་སྣ་ཚོགས་པས་ཚེར་མའི་དོང་དང་ཤིག་ནད་ཀྱི་བྲོ་ཚལ་བ་ལྟར་སྒོ་གསུམ་ངལ་དུབ་ཆེ་ཆེ་འདྲ་བ་བྱུང་ཡང་ཕལ་ཆེར་ཕྱག་རྒྱ་ཆེན་པོའི་དབྱིངས་སུ་ལ་བཟླ་བའི་ཁུལ་ཙམ་བྱས་ཤིང་། ཞྭ་དམར་སྤྲུལ་པའི་སྐུ་འདི་ཉིད་ཁྲིར་འཁོད་པ་དང་ལྷན་དུ་རང་གི་ལས་ཁུར་དེས་ཟིན་པ་ཡིས། སླད་ནས་འདི་སྐོར་ལ་འཇུག་མི་དགོས་པའི་ཞུ་བཀྲོལ་ཡང་དག་གྲུབ་ཟིན་པ་ཡིན་ཡང་འདི་ལོ་ཤིན་ཏུ་ཉེན་ཅིང་འགྱུར་བ་ཆེ་བའི་སྐབས་སུ་གྱུར་པ་ཡི་སླར་ཡང་ཡབ་སྲས་རྣམས་ལ་སྨན་པའི་བྱ་བ་སྒོ་དུ་མ་ནས་རྒྱ་མ་ཆུང་ཙམ་གྲུབ་སྟེ་དོན་འདི་ཀུན་སྔོན་གྱི་སྨོན་ལམ་གྱི་འཕེན་པས་རང་གི་ལས་ཀྱི་རྒྱུ་བར་སྙིང་ནས་ངེས་ཤེས་ཀྱི་སྟེགས་བུར་ཡིད་ཀྱི་ཁྱེའུ་ངལ་གསོས་ཐོབ།

སྐབས་འདིར་མཐའ་དང་བོད་ཡུལ་གྱི་ལྷ་འདྲེ་མཐུ་བོ་ཆེ་རྣམས་ཆེས་འཁྲུག་པའི་ལྟས་དང་། ཆོ་འཕྲུལ་ཐུན་མོང་དང་ཐུན་མོང་མ་ཡིན་པ་དུ་མ་བར་མི་ཆད་དུ་འབྱུང་བའི་སྐབས་སུ་ཡིན། མཚུར་སྒར་ཆེན་ཡར་ཕེབས་པའི་རྗེས་སུ་ཡང་འགོང་པོ་ཉི་ཚེ་བ་ཁ་ཤས་འབྲང་བའི་ལྟས་བྱུང་བས་རྫོང་ན་ལེགས་ཚུལ་སྨྲས་པར་ཆ་གསུམ་ལན་ཁ་ཤས་དང་ཚེས་བརྒྱད་ལ་ལྷ་བསངས་རྒྱས་པ་ཞིག་ཀྱང་བཏང་སོང་། འདི་སྐབས་ཞྭ་དམར་མཆོག་དང་། སི་ཏུ་རིན་པོ་ཆེའི་སྐུ་ཞབས་སུ་བང་མི་རྫོང་རྒྱུའི་ཞུ་ཡིག་རྣམས་བྲིས་ཤིང་ལྷག་ཏུ་སི་ཏུ་རིན་པོ་ཆེའི་ཞལ་སྔར་བཀའ་རྒྱུད་གསེར་འཕྲེང་དང་། སྒྲ་རིག་ཙནྡྲ་པའི་འགྲེལ་པ། སྔགས་རྒྱུད་ཁ་ཡར་ལ་འགྱུར་ཞུས་སོགས་སྔར་ན་གསོལ་བ་བཏབ་བཞིན། འདི་རེས་ཡང་ནན་བསྐྱེད་ཀྱིས་བསྐུལ་མ་དང་། ཡབ་སྲས་རྣམས་ཞབས་པད་བརྟན་ཅིང་ངེས་དོན་སྙིང་པོའི་བསྟན་པ་དར་རྒྱས་ཡུན་རིང་དུ་གནས་པའི་སྨོན་ལམ་ལ་སྙིང་ཐག་པ་ནས་རྟག་ཏུ་འདེབས་བཞིན་པའོ། །

འདིར་སྨྲས་པ། དུས་ཀྱི་ཆུ་གཏེར་རླབས་འཕྲེང་ཆེས་འཁྲུག་ཅིང་། །འཇིགས་རུང་འཇིགས་པས་ཕྱོགས་ཀུན་ཡོངས་བསླད་ཀྱང་། །པད་འབྱུང་ཐུགས་རྗེའི་སྣང་བས་ཕྱོགས་རྙེད་ཅིང་། །བསོད་ནམས་གྲུ་ཆེན་བློ་གྲོས་གཟེར་གྱིས་བསྡམ། །སྨོན་ལམ་རླུང་གིས་འདེད་པའི་བ་དན་གཡོས། །སྐྱེས་མཆོག་སྐྱེས་དགུ་རྣམ་པ་མང་པོ་དག །ངལ་འཇིགས་ལས་འདས་དགའ་བདེའི་གླིང་བཟང་པོར། །དབུགས་དབྱུང་གྲུ་ཆེན་གྲུབ་པའི་ངང་ཚུལ་ཡིན། །ཞེས་སོ། །འདི་སྐབས་ཀྱི་སྤྱད་རབས་ཞིབ་མོར་བགྱིས་ན་ཆེས་མང་ཡང་འདིར་ཕྱོགས་མཚོན་ཙམ་སྟེ་ཞིབ་པར་སླར་བརྗོད་པར་འདོད་དོ། །སརྦ་མངྒ་ལཾ། །