སྨིན་བྱེད་དོན་གསལ་སྒྲོན་མེ་ཞེས་བྱ་བ། སྤྲོས་བཅས་བུམ་པའི་དབང་།
༄༅༔ སྨིན་བྱེད་དོན་གསལ་སྒྲོན་མེ་ཞེས་བྱ་བ་སྤྲོས་བཅས་བུམ་པའི་དབང་བཞུགས་པ་ལགས་སོ༔
༄༅༔ བྱི།ཉཐཱདམྱ།༔ རིགས་ལྔ་བདེ་བར་གཤེགས་ལ་ཕྱག་འཚལ་ལོ༔ བདག་འདྲ་པདྨ་འབྱུང་གནས་ཀྱིས༔ སྙིང་ཐིག་གསང་བ་བླ་མེད་ཀྱི༔ ཉམས་ལེན་སློབ་བུ་སྨིན་བྱའི་ཕྱིར༔ དབང་གི་ཆོ་གའི་རིམ་པ་བཤད༔ ཀློང་གསལ་ཉི་མའི་རྒྱུད་དག་ལས༔ སྤྲོས་བཅས་བུམ་པ་ཕྱི་ཡི་དབང༔ སྤྲོས་མེད་ནང་གི་གསང་དབང་དང༔ ཤིན་ཏུ་སྤྲོས་མེད་ཤེས་རབ་ཡེ་ཤེས་དབང༔ ཡོངས་སུ་སྤྲོས་མེད་ཚིག་དབང་རིན་པོ་ཆེ༔ སྣོད་ལྡན་བུ་ལ་བསྐུར་ཕྱིར་རིམ་པར་བསྟན༔ ཤེས་རབ་བློ་ལྡན་སྙིང་རྗེ་ཅན་དང་འཕྲད་པར་ཤོག༔ རྒྱ་རྒྱ་རྒྱ༔
ཀཐཀྲཨཱྃ༔ དེ་ཡང་སྤྲོས་བཅས་བུམ་པ་ཕྱིའི་དབང་བསྐུར་བ་འདི་ལ༔ སྔོན་འགྲོ༔ དངོས་གཞི༔ རྗེས་ཀྱི་བྱ་བ་དང་གསུམ་ལས༔ དང་པོ་སྔོན་འགྲོ་ལ་བཅུ་གཅིག་སྟེ༔ བླ་མའི་མཚན་ཉིད་བརྟགས་པ་དང་(༥༢)གཅིག༔ སློབ་མའི་མཚན་ཉིད་བརྟགས་པ་དང་གཉིས༔ གསོལ་བ་གདབ་པ་དང་གསུམ༔ བསྙེན་པ་བྱ་བ་དང་བཞི༔ སའི་ཆོ་ག་དང་ལྔ༔ སྟ་གོན་གྱི་ཆོ་ག་དང་དྲུག༔ ཐིག་གི་ཆོ་ག་དང་བདུན༔ ཚོན་གྱི་ཆོ་ག་དང་བརྒྱད༔ དཀྱིལ་འཁོར་སྒྲུབ་པའི་ཆོ་ག་དང་དགུ༔ དེ་ལ་མཆོད་པའི་ཆོ་ག་དང་བཅུ༔ སློབ་བུ་དལ་དུ་འཇུག་པའི་ཆོ་ག་དང་བཅུ་གཅིག་གོ༔ དངོས་གཞི་ལ་ཡང་བཅུ་སྟེ༔ རིགས་ལྔའི་དབང་ལྔ༔ ཀུན་ཏུ་བཟང་པོའི་དབང་དང་དྲུག༔ ཕྱག་རྒྱའི་དབང་དང་བདུན༔ བརྡའི་དབང་དང་བརྒྱད༔ དོན་གྱི་དབང་དང་དགུ༔ དམ་ཚིག་གི་དབང་དང་བཅུའོ༔ རྗེས་ལ་ཡང་གསུམ་སྟེ༔ ཡོན་འབུལ་བ་དང༔ བཀའ་བཞིན་བསྒྲུབ་པ་དང༔ སྐྱོན་ཡོན་བྱུང་ཚུལ་དང་གསུམ་མོ༔ རྒྱ་རྒྱ་རྒྱ༔
དེ་ནས་དབང་བསྐུར་བ་ལ་བླ་མ་མཚན་ཉིད་དང་ལྡན་པ་གཅིག་དགོས་ཏེ༔ ཀློང་གསལ་ལས༔ མཚན་ཉིད་མི་ལྡན་བླ་མས་ནི༔ དབང་བསྐུར་བྱས་ན་གཉིས་ཀ་ཕུང༔ ཞེས་པ་དང༔ རིག་པ་རང་ཤར་ལས༔ མི་ཤེས་ང་རྒྱལ་ཆེན་པོ་དང༔ བླུན་རྨོངས་ཚིག་ཕྱིར་འབྲང་བ་དང༔ གསང་སྔགས་དོན་ལ་མི་དགོངས་དང༔ གཞན་གྱི་ཞེ་གཅོད་ཁེངས་ཚིག་ལྡན༔ ལོག་པའི་ལམ་དུ་ཞུགས་པ་དང༔ དབང་གི་ད་ལ་ཞལ་མ་མཐོང༔ དམ་ཚིག་འཆལ་བར་གྱུར་པ་དང༔ དྲིས་པ་དག་ལ་ལན་མི་ཐེབས༔ ཐོས་ཆུང་ང་རྒྱལ་ཆེ་བ་དང༔ སློབ་དཔོན་མ་བརྟགས་སློབ་མའི་བདུད༔ གསང་སྔགས་སྟོན་པའི་སློབ་དཔོན་མིན༔ རྫོགས་ཆེན་ཨ་ཏི་སྟོན་མི་ནུས༔ དེ་དང་འགྲོགས་པར་མི་བྱའོ༔ ཞེས་པས་གདམས་པ་སྣ་རེ་ཙམ་ལ་མཆོག་འཛིན་ཆེ་བ་དང༔ ཡོན་ཏན་མེད་པའི་བླ་མ་བསྟེན་པར་མི་བྱའོ༔ བསྟེན་ན་གཉིས་ཀ་ངན་སོང་དུ་འཁྲིད་པས་སྤང་བར་བྱའོ༔ དབང་བསྐུར་བ་དང་བསྟེན་པ་ལ་བླ་མ་མཚན་ཉིད་དང་ལྡན་པ་བསྟེན་དགོས་ཏེ༔ ཀློང་གསལ་ལས༔ མཚན་ཉིད་ལྡན་པའི་བླ་མས་ནི༔ དབང་བསྐུར་བས་ནི་སྡུག་བསྔལ་གྲོལ༔ ཅེས་པ་དང༔ ཐལ་འགྱུར་ལས༔ མཚན་ཉིད་རྫོགས་པའི་བླ་མ་ནི༔ ཡོན་ཏན་ཀུན་གྱི་འབྱུང་ཁུངས་ཡིན༔ རྫོགས་པའི་བྱང་ཆུབ་གཞི་འཛིན་པ༔ རྩ་བ་ཡན་ལག་བླ་མ་གཉིས༔ སོ་སོའི་མཚན་ཉིད་ཚང་བ་དང༔ ཞེས་པས་སྤྱིར་ཐེག་པ་ཆེན་པོའི་ཚིག་དོན་ལ་མཁས་པ༔ ཕྱི་ནང་གསང་བའི་ལག་(༥༣)ལེན་ལ་མཁས་པ༔ བསྐྱེད་རྫོགས་བཟླས་གསུམ་ལ་རྟགས་ཐོན་པ༔ ལྟ་སྒོམ་སྤྱོད་གསུམ་ལ་དྲོད་ཐོན་པ༔ དབང་འཛིན་གྱི་ཞེན་པ་ཆུང་ཞིང་དབེན་པར་བཞུགས་པ༔ རང་ཉམས་སུ་ལེན་པ་ལ་བརྩོན་ཞིང་གཞན་ཡང་ཉམས་སུ་ལེན་པ་ལ་འཇུག་པ༔ ཉམས་རྟོགས་དང་ལྡན་པའི་བླ་མ་དེ་བསྟེན་པར་བྱའོ༔ བླ་མས་སློབ་མའི་མཚན་ཉིད་བརྟག་པར་བྱ་སྟེ༔ ཀློང་གསལ་ལས༔ སྣོད་དང་མི་ལྡན་སློབ་མ་ནི༔ ཤེས་ཆུང་ཁ་གསག་གདོང་ལྟས་ཆེ༔ ཁ་མཁས་ལག་དམ་གཡོ་སྒྱུ་ཆེ༔ བླ་མའི་གསུང་གཅོག་དྲིན་ལ་རྩོད༔ ཡོན་ཏན་མི་མཐོང་སྐྱོན་ལ་རྟོག༔ རིགས་རྒྱུད་ངང་རྒྱུད་ངན་པ་དང༔ བཀའ་དྲིན་ཁྱད་གསོད་རང་གིས་རང་ལ་བསྟོད༔ སྡོམ་དང་དམ་ཚིག་ཉམས་ལེན་འཆལ༔ སློབ་མ་མ་བརྟགས་སློབ་དཔོན་དགྲ༔ ཉམས་སུ་མི་ལེན་གང་ཟག་ལ༔ རྫོགས་པ་ཆེན་པོའི་དབང་དང་ནི༔ དོན་དང་གདམས་པ་བསྟན་མི་བྱ༔ ཞེས་པས༔ དེ་ལྟ་བུ་ལ་ནི༔ དབང་དང་གདམས་པ་མི་སྦྱིན་ནོ༔ སློབ་མ་མཚན་ཉིད་དང་ལྡན་པ་ནི༔ རིག་པ་རང་ཤར་ལས༔ དད་པའི་སྟོབས་དང་བརྩོན་འགྲུས་ཆེ༔ ཤེས་རབ་ཆེ་ཞིང་འཛིན་ཆགས་མེད༔ ཕུ་དུད་ཆེ་ཞིང་གསང་སྔགས་སྤྱོད༔ རྟོག་མེད་སེམས་ལ་གཡེང་བ་མེད༔ དམ་ཚིག་ལྡན་ཞིང་སྒྲུབ་ལ་བརྩོན༔ ཞེས་པས༔ དེ་ལྟ་བུའི་སློབ་མ་དུ་ཡོད་ལ༔ ཕྱི་དབང་བསྐུར་བར་བྱ་སྟེ༔ དེ་ཡང་ཐལ་འགྱུར་ལས༔ དབང་ནི་རྣམ་པ་བཞི་ཡིས་ཀྱང༔ སྐལ་བར་ལྡན་པ་སྨིན་པར་བྱ༔ ཞེས་སོ༔ དེ་ནས་བླ་མ་མཚན་ཉིད་དང་ལྡན་པས༔ དབང་སྐུར་བར་བྱེད་པའོ༔
གསུམ་པ་གསོལ་བ་གདབ་པ་ནི༔ མཚན་ཉིད་དང་ལྡན་པའི་བླ་མ་དེ་ལ༔ ལོ་གསུམ་མམ༔ གཉིས་སམ༔ གཅིག་ནས་དབང་བསྐུར་བར་ཞུ་ཞེས་པའི་ཞུ་བ་བྱས་ཏེ་ཚོགས་འཁོར་དང་གསེར་གྱི་མཎྜལ་ཕུལ་ལ་ཞུ་བ་བྱའོ༔ དེ་ནས་བླ་མས་ཀྱང་ཞལ་གྱིས་བཞེས་ནས་རང་གི་བྱ་བ་རྣམས་རྫོགས་པར་བྱའོ༔ དེ་ནས་དུས་ལ་བབ་པའི་དུས་སུ༔ སློབ་མ་ཚོགས་ཏེ་བླ་མའི་དྲུང་དུ་འོང་ལ་བླ་མས་སློབ་མ་རྣམས་ལ༔ དྲང་དོན་གྱིས་དད་པ་བསྐྱེད་དེ་སྐྱབས་སུ་འགྲོ་བ་ནས་ཅི་རིགས་སུ་ཆོས་མ་ཐོབ་པ་རྣམས་ལ་བསླབ་བྱའི་སྡོམ་པ་འབོག་གོ༔ ཐལ་འགྱུར་ལས༔ (༥༤)དེ་ནས་དབང་བསྐུར་ཆོ་ག་ཡང༔ ཉན་ཐོས་ཐེག་པ་ནས་བརྩམས་ཏེ༔ ཞེས་པ་དང༔ ཀློང་གསལ་ལས༔ སྐྱབས་འགྲོ་ཐུན་མོང་ནས་བརྩམས་ཏེ༔ དབང་བཞི་རྫོགས་པར་བསྐུར་བར་བྱ༔ ཞེས་སོ༔ དེ་ནས་དགའ་སྟོན་བྱ་བ་ནི༔ དཔོན་སློབ་རྣམས་ཚོགས་ཀྱི་འཁོར་ལོ་བཤམས་ལ༔ སློབ་མ་རྣམས་ཀྱིས་མེ་ཏོག་དོར་ལ༔ ཕྱག་གསུམ་བཙལ་ཏེ༔ ཀྱེ་ཀུན་བཟང་རྡོ་རྗེ་འཛིན་པ་ཆེ༔ ཡེ་ཤེས་ལྔ་ནི་འཐོབ་བྱའི་ཕྱིར༔ རིགས་ལྔའི་དབང་ཆོག་བཤད་དུ་གསོལ༔ ཅེས་ལན་གསུམ་ཞུའོ༔ དེ་ནས་བླ་མས་སློབ་མ་ལ༔ རིགས་ཀྱི་བུ་མཆོག་ཁྱེད་རྣམས་ཀྱིས༔ བླ་མ་ཡི་དམ་མཁའ་འགྲོ་དང༔ ཆོས་སྐྱོང་དང་ནི་རྡོ་རྗེ་སྤུན༔ ཚོགས་མཆོད་ཡོན་གྱིས་མཉེས་ནུས་སམ༔ ཞེས་བྱའོ༔ དེ་ནས་སློབ་མས་ལན་དུ༔ ཀྱེ་ཇི་ལྟར་ཐུགས་ཀྱིས་དགོངས་མཛད་པ༔ བདག་གིས་མ་ལུས་བསྒྲུབས་ལགས་པས༔ དཔའ་བོས་བདག་ལ་གནང་དུ་གསོལ༔ ཅེས་ཞུའོ༔ དེ་ནས་ཚོགས་ཀྱི་འཁོར་ལོ་དང་མཆོད་པ་བྱས་ལ༔ གླུ་གར་ལ་སོགས་པ་ཅི་དགར་བྱའོ༔ དེས་སྔོན་དུ་བར་ཆད་ཐམས་ཅད་སེལ་ཞིང་ཡོན་ཏན་དཔག་ཏུ་མེད་དེ༔ ཀློང་གསལ་ལས༔ དགའ་སྟོན་བར་ཆད་སེལ་བ་དང༔ ཡོན་ཏན་དངོས་གྲུབ་འགྲུབ་པར་འགྱུར༔ ཞེས་གསུངས་སོ༔ ཐལ་འགྱུར་ལས༔ འཁོར་དང་ལོངས་སྤྱོད་རྣམས་ཀྱིས་བསྟེན༔ ལུས་ངག་སྤྱོད་པས་མཉེས་པ་ཡིས༔ བླ་མ་སངས་རྒྱས་མཉམ་སྦྱོར་བསྟེན༔ བསྟེན་པ་དེ་ལ་ཡོན་ཏན་ནི༔ དཔག་བསམ་ཤིང་དང་ཡིད་བཞིན་ནོར༔ འདོད་འཇོའི་བ་དང་འདྲ་བ་ཡི༔ ཡོན་ཏན་དཔག་ཏུ་མེད་པ་ཐོབ༔ ཅེས་སོ༔ དེ་ལྟར་དགའ་སྟོན་བྱའོ༔
དགའ་སྟོན་མེད་པའི་སྐྱོན་ནི༔ ཀློང་གསལ་ལས༔ དགའ་སྟོན་ཚོགས་འཁོར་མེད་པ་ན༔ བར་ཆད་རྐྱེན་ནི་སྣ་ཚོགས་འབྱུང༔ དབང་གི་རྒྱལ་ས་ཞིག་པ་དང༔ དངོས་སྒྲུབ་མི་ཐོབ་ཡི་དྭགས་སྐྱེ༔ ཞེས་སོ༔ དེ་ནས་སློབ་མ་རྣམས་སྡིག་པ་སྦྱོང་དུ་གཞུག་པ་ནི༔ ཀློང་གསལ་ལས༔ རྒྱུད་ཀྱི་སྡིག་པ་སྦྱོང་བའི་ཕྱིར༔ སྔོན་འགྲོ་ཡིག་བརྒྱའི་བཟླས་བརྗོད་བྱ༔ ཞེས་པས་ཡི་གེ་བརྒྱ་པའི་བཟླས་བསྒོམ་ཕོག་ལ༔ ཞག་འགར་སྡིག་སྒྲིབ་སྦྱང་དུ་(༥༥)གཞུག་གོ༔ སྲུང་བའི་འཁོར་ལོ་བསྒོམ་པ་ནི༔ ཀློང་གསལ་ལས༔ བར་ཆད་མི་ཞུགས་བསྲུང་བྱའི་ཕྱིར༔ ཧཱུྃ་གི་སྦྱོར་བས་སྲུང་མཚམས་བྱ༔ ཞེས་པས༔ དེ་ནས་སློབ་མ་རྣམས་ལ་སྙིང་ཁར་ཧཱུྃ་ལས་འོད་འཕྲོས་པས༔ ལུས་ཐམས་ཅད་རྡོ་རྗེའི་རང་བཞིན་གྱི་ཞུ་ལུབ་ཏུ་གྱུར་པར་བསམ༔ སློབ་མ་རྣམས་ལའང་སྒོམ་དུ་གཞུག་གོ༔ དེ་ནས་སློབ་མ་ཐམས་ཅད་ཀྱིས་ཧཱུྃ་གི་སྒྲ་དི་རི་རི་བཟླས་ཤིང་སྟེང་འོག་ཕྱོགས་མཚམས་ཐམས་ཅད་རྡོ་རྗེའི་རྭ་བར་གྱུར་པར་བསམ་ལ༔ བསྲུང་བ་བྱའོ༔ མ་བྱས་ནའང་དེ་ཉིད་ལས༔ དེ་ལྟར་སྲུང་བ་མ་བྱས་ན༔ བདུད་དང་བར་ཆད་རྐྱེན་དབང་འགྱུར༔ དངོས་གྲུབ་བྱིན་རླབས་ཕྲོག་ཅིང་ཡལ༔ ཞེས་སོ༔ དེ་ནས་ཀློང་གསལ་ལས༔ དམ་ཚིག་ཁས་ལེན་བྱུང་ན་སྦྱིན༔ ཞེས་པས༔ ཀྱེ་མ་རིགས་ཀྱི་བུ་ཁྱོད་ཀྱིས༔ དམ་ཚིག་རྒྱུད་ལ་གནས་འདོད་ན༔ ཐབས་ཤེས་གཉིས་ཀྱི་དམ་ཚིག་ཏུ༔ མཚན་མ་ལ་ནི་མི་འགོམ་དང༔ རྡོ་རྗེ་སློབ་དཔོན་མལ་ཆ་དང༔ རྡོ་རྗེ་སྤུན་ལ་རྩོད་མི་བྱ༔ དེ་ལྟར་བསྲུང་བར་ནུས་གྱུར་ཏམ༔ ཞེས་བརྗོད་དེ་ནས་སློབ་བུ་ཡིས༔ ཀྱེ་སངས་རྒྱས་ཐམས་ཅད་འདུས་པ་ཡི༔ རྡོ་རྗེ་འཛིན་པའི་བཀའ་བཞིན་དུ༔ བདག་ཅག་རྣམས་ཀྱིས་སྲུང་བར་བྱེད༔ ཅེས་བྱའོ༔ དེ་ལྟར་མ་བྱས་ན༔ ཡང་དེ་ཉིད་ལས༔ དམ་ཚིག་དེ་རྣམས་མ་བསྲུངས་ན༔ དབང་གི་ཡོན་ཏན་མི་འབྱུང་ཞིང༔ ཉམས་པས་དམྱལ་བ་ཉིད་དུ་ལྟུང༔ ཞེས་སོ༔ དེ་ནི་གསོལ་བ་གདབ་པའི་ཆོ་གའོ༔ དེ་ནས་བསྙེན་པ་བྱ་བ་ནི༔ མངོན་རྟོགས་བཞིན་ཤེས་པར་བྱའོ༔ དེ་ནས་སའི་ཆོ་ག་ཡང་གཞན་དང་མཐུན་པས་འདིར་མ་བྲིས་སོ༔ དེ་ནས་དཀྱིལ་འཁོར་སྟེགས་བུ་ཚད་དང་ལྡན་པ་སྐྱོན་ཡོན་གྱི་བྱེ་བྲག་རྣམས་གཞན་དང་མཐུན་པས་ཐུན་མོང་ཡིན་ནོ༔ དེ་ཡང་སྟེགས་བུའི་རྒྱུའམ་ཚད་ནི་ཀློང་གསལ་ལས༔ བཀྲ་ཤིས་རྫས་དང་ས་བཟང་ལ༔ རཏྣ་ས་བཟང་ལེགས་པར་བརྩིགས༔ རབ་ནི་ཇི་ལྟར་གྲུབ་པ་ལ༔ ཐ་མ་མདའ་གང་འདོམ་གང་ཚད༔ ཅེས་སོ༔ སྟེགས་བུ་དེ་ལ་བའི་རྣམ་ལྔ་དང་བདུད་རྩི་ལྔ་དང་དྲི་བཟང་པོས་བྱུགས་ལ༔ དེའི་སྟེང་དུ་རིགས་ལྔའི་ལྷ་ཚོགས་བསྐྱེད་རིམ་མངོན་(༥༦)རྟོགས་ལྟར་བསྐྱེད་ལ༔ མཆོད་བསྟོད་བྱ༔
གསོལ་བ་གདབ་པ་ནི༔ ཀུན་ཏུ་བཟང་པོ་སངས་རྒྱས་རིགས་ལྔའི་གཙོ༔ སློབ་བུ་རྣམས་ལ་ཕན་གདགས་ཕྱིར༔ དེང་འདིར་བདག་གིས་དཀྱིལ་འཁོར་བྲི༔ བྱིན་གྱིས་བརླབ་པར་མཛད་དུ་གསོལ༔ ཅེས་བརྗོད༔ གཏོར་མ་ཕུལ་ལ་བསྔོ་བ་བྱ༔ དེ་ཡང་ལུང་ལས༔ གསོལ་བ་བཏབ་པས་བྱིན་རླབས་འབྱུང༔ ལྷ་བསྐྱེད་བསྟོད་དང་མཆོད་པ་ཡིས༔ བྱིན་གྱིས་བརླབས་པ་ཉིད་དུ་འགྱུར༔ ཞེས་པ་དང༔ མ་བྱས་པའི་སྐྱོན་ནི༔ དེ་ལྟར་བྱས་པར་མ་གྱུར་ན༔ དཀྱིལ་འཁོར་བྱིན་ཉིད་ཕེབས་མི་འགྱུར༔ ཞེས་སོ༔ དེ་ནས་སྟ་གོན་གྱི་ཆོ་ག་ནི༔ ཀློང་གསལ་ལས༔ རྡོ་རྗེ་སློབ་དཔོན་བྱ་བའི་ལས༔ བུམ་པ་ལྷ་དང་སྦྱིན་སྲེག་དང༔ སློབ་མ་སྟ་གོན་ཉེ་བར་བྱ༔ ཞེས་པས༔ དེ་ལ་དང་པོ་བུམ་པ་སྟ་གོན་བྱ་བ་ནི༔ རབ་རཏྣའི་བུམ་པ་ལ་བྱ༔ མེད་ན་རྫ་བུམ་ལ་བྱ༔ དེ་ཡང་བུམ་པ་ལྔ་རིགས་ལྔ་ཡབ་ཡུམ་གྱི་སྐུ་མདོག་ལྟར་མདོག་བསྒྱུར༔ ལས་བུམ་དཀར་པོ་བྱ༔ དག་པར་བཀྲུས་ལ་སྤོས་ཀྱིས་བདུག༔ ནང་དུ་རཏྣ་ལྔ་བདུད་རྩི་ལྔ༔ འབྲུ་ལྔ༔ སྨན་ལྔ༔ དྲི་ལྔ་ལ་སོགས་པ་བླུགས་ལ་བུམ་པའི་སུམ་གཉིས་ཆུ་གཙང་དང་བཅས་པས་དགང་ངོ་༔ དཔག་བསམ་གྱི་ཤིང་གིས་ཁ་བརྒྱན་ནོ༔ གོས་རས་ཀྱིས་མགུལ་པ་བཅིངས༔ ཡི་དམ་ཡབ་ཡུམ་གྱི་ཕྱག་མཚན་བུམ་པའི་ཕྱི་ལ་བྲི༔ བུམ་པ་བཅུའམ་ཡང་ན་དྲུག་ལ་བྱའོ༔ གཟུངས་ཐག་རྡོ་རྗེ་དང་བཅས་པ་མེ་ཏོག་ཚོམ་བུ་ཀུ་ཤའི་སྟེང་དུ་སྟེགས་མཐོ་བ་ལ་བཞག༔ བཀོད་པའི་རྒྱན་དང་ལྡན་པར་བྱས་ལ་བཞག་གོ༔ དེ་ནས་བུམ་པ་དེ་རྣམས་སྭ་བྷཱ་ཝས་བསངས་ལ༔ བྷྲཱུྃ་ལས་རཏྣའི་གཞལ་ཡས་ཁང་གི་ནང་དུ་བཾ་ལས་པདྨ་འདབ་མ་བརྒྱད་པའི་སྟེང་དུ༔ གཙོ་འཁོར་གྱི་ས་བོན་འོད་དུ་ཞུ་བ་ལས་གཙོ་བོ་ཡབ་ཡུམ་གསལ་བར་བསྐྱེད༔ དེ་དག་གི་ཐུགས་ཀའི་ས་བོན་ལས་འོད་འཕྲོས་པས་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས་ནས་རྒྱལ་བ་ཐམས་ཅད་ལ་མཆོད༔ རང་འདྲ་བའི་ཡེ་ཤེས་པ་སྤྱན་དྲངས་ལ་ཡི་གེ་བཞིས་བསྟིམ༔ ཡི་གེ་གསུམ་གྱིས་སྐུ་གསུང་ཐུགས་བྱིན་གྱིས་བརླབས༔ གོ་བཀོན༔ དབང་(༥༧)བསྐུར༔ མཆོད་པ་དང་བསྟོད་པ་ཅི་རིགས་སུ་བྱའོ༔ དེ་ནས་གཟུངས་ཐག་ལ་བཟུང་ནས་བཟླས་པ་བྱ༔ བཟླས་པའི་འོད་ཟེར་གཟུངས་ཐག་ལ་བརྟེན་ནས་སོང་བས་ལྷའི་ཐུགས་ཀར་ཕོག༔ གཙོ་འཁོར་རྣམས་བདུད་རྩིར་མེར་གྱིས་སོང་བར་བསམ་ལ་བཟླས་པ་ཅི་འགྲུབ་ཅིག་བྱའོ༔ བུམ་པ་ཐམས་ཅད་ལ་གཙོ་འཁོར་གྱི་རང་རང་གི་བཟླས་པ་དང་དམིགས་པ་འགྲེའོ༔ དེ་ནས་ལྷ་སྟ་གོན་དུ་བྱ་བ་ནི་མཎྜལ་གྱི་སྟེང་དུ་དྲིའི་ཐིག་ལེ་ལྷའི་གྲངས་དང་མཉམ་པ་བྱས་ལ་དེའི་སྟེང་དུ་ལྷའི་ས་བོན་རེ་རེ་བཀོད་ཅིང་མེ་ཏོག་གི་ཚོམ་བུ་བཀོད་ལ༔ དེ་ལ་དམ་ཚིག་སེམས་དཔའ་བསྐྱེད༔ ཡེ་ཤེས་སེམས་དཔའ་སྤྱན་དྲངས་ལ་གཞུག༔ མཆོད་པ་དང་བསྟོད་པ་ཅི་རིགས་སུ་བྱས་ལ་གསོལ་བ་གདབ་པ་ནི་ཐལ་མོ་སྦྱར་ལ༔ ཧོ་དགོངས་སུ་གསོལ་ལོ༔ རྒྱལ་བ་རིགས་ལྔ་ཡབ་ཡུམ་འཁོར་དང་བཅས༔ སེམས་དཔའ་སེམས་མ་མ་ལུས་བདག་ལ་དགོངས༔ རྒྱལ་བ་སྲས་བཅས་ཐམས་ཅད་མཆོད་པ་དང༔ སློབ་བུ་ཁྱེད་ཀྱི་རྗེས་སུ་འཇུག་པའི་ཕྱིར༔ བདག་མིང་འདི་ཞེས་བགྱི་བས་ཀྱང༔ ནང་པར་རྒྱལ་བའི་དཀྱིལ་འཁོར་བྲི་བར་བྱ༔ ཁྱེད་ཀྱི་ཐུགས་རྗེ་ཆེན་པོས་བརྩེར་དགོངས་ལ༔ གནས་འདིར་བྱིན་གྱིས་བརླབ་པར་མཛད་དུ་གསོལ༔ ཞེས་གསོལ་བ་གདབ་བོ༔ དེ་ནས་དཔོན་སློབ་རྣམས་ཀྱིས༔ བར་ཆད་ཞི་བ་དང་སྡིག་སྒྲིབ་སྦྱོང་བའི་དོན་དུ༔ སྦྱིན་སྲེག་བྱ་སྟེ་མཎྜལ་དཀར་པོའི་སྟེང་དུ་ཞི་བའི་ཤིང་ཟླུམ་པོར་བརྩིགས་ལ༔ མེ་སྦར་དེའི་ནང་དུ་མེ་ལྷ་དམ་ཚིག་པ་བསྐྱེད༔ ཡེ་ཤེས་པ་བསྟིམ༔ མཆོད་བསྟོད་བྱ༔ མེ་ལྷའི་སྔགས་ལ་ཆེ་གེའི་སྡིག་པ་དང་བག་ཆགས་ཐམས་ཅད་ཞི་བ་ཤཱནྟིཾ་ཀུ་རུ་ཡེ་སྭཱ་ཧཱ༔ ཞེས་མར་གྱི་དགང་བླུགས་དང༔ སྲེག་རྫས་རྣམས་མེ་ལྷའི་ཞལ་དུ་ལན་བདུན་འབུལ་ལོ༔ དེ་ནས་སྐད་ཅིག་གིས་མེ་ལྷའི་ཐུགས་ཀར་དཀྱིལ་འཁོར་གྱི་ལྷ་ཚོགས་བསྐྱེད་ལ་མཆོད་བསྟོད་ཅི་རིགས་པ་བྱ་སྟེ༔ གཙོ་བོ་ཡབ་ཡུམ་གྱིས་སྔགས་ལ་ཁ་བསྒྱུར་བཏགས་ལ་ཞལ་དུ་བདུད་རྩི་སིང་སིང་གསོལ་བར་བསམ་ཞིང་ཅི་འགྲུབ་འབུལ་ལོ༔ མཇུག་མི་དམིགས་པས་རྒྱས་གདབ་བསྔོ་བ་བྱའོ༔ རྩ་དེ་ནས་སློབ་མ་སྟ་གོན་བྱ་བ་ནི༔ (༥༨)བླ་མ་ཁྲི་ལ་བཞུགས་ཏེ༔ སློབ་མ་རྣམས་ཀྱིས་ཕྱག་བཙལ་ནས༔ ཀྱེ་མ་དུས་གསུམ་རྒྱལ་བ་ཀུན་ཏུ་བཟང༔ རིགས་ལྔའི་སངས་རྒྱས་དགོངས་སུ་གསོལ༔ བདག་རྣམས་ཁྱེད་ཀྱི་རྗེས་སུ་འཇུག༔ དཀོན་མཆོག་གསུམ་ལ་སྐྱབས་འགྲོ་དང༔ སོ་ཐར་བྱང་སེམས་དམ་ཚིག་རྣམས༔ ཐར་པའི་གྲོང་དུ་འཇུག་པའི་ཕྱིར༔ མགོན་པོས་བདག་ལ་གནང་དུ་གསོལ༔ ཅེས་མེ་ཏོག་དོར༔ དེ་ནས་སློབ་དཔོན་གྱིས༔ ཀྱེ་མ་སྣོད་དང་ལྡན་པའི་བུ༔ གསང་སྔགས་ཆོ་ག་ཁྱེད་ལ་བསྟན༔ འདས་དང་མ་བྱོན་ད་ལྟར་གྱི༔ སངས་རྒྱས་མ་ལུས་ཐམས་ཅད་ཀྱང༔ གསང་སྔགས་ཆོ་ག་འདི་མཁྱེན་པས༔ ཀུན་ཀྱང་སངས་རྒྱས་ཐོབ་པ་ཡིན༔ ཀུན་བཟང་རྒྱལ་བ་རིགས་ལྔ་ཡིས༔ བདུད་ཀྱི་དཔུང་ཡང་འདི་ཡིས་བཅོམ༔ དེ་ལྟར་ཁྱོད་ཀྱིས་འཐོབ་བྱའི་ཕྱིར༔ འདི་ཡི་རྗེས་སུ་ཀུན་ཞུགས་མཛོད༔ ཅེས་གནང་བ་སྦྱིན་ནོ༔ དེ་ནས་བླ་མ་དང་སློབ་བུ་རྣམས་ཀྱིས་མདུན་གྱི་ནམ་མཁའ་ལ་རིགས་ལྔའི་སངས་རྒྱས་དང༔ བྱང་ཆུབ་སེམས་དཔའ་བླ་མ་ཡི་དམ་མཁའ་འགྲོ་དང་བཅས་པ་སྐད་ཅིག་གིས་སྤྱན་དྲངས་ལ༔ བདུན་རྣམ་དག་གིས་ཚོགས་བསག་གོ༔ དེ་སྔར་མ་ཐོབ་པ་རྣམས་ཀྱིས༔ སྐྱབས་སུ་འགྲོ་བ་ནས་བརྩམས་ཏེ༔ སོ་སོར་ཐར་པ་དང་བྱང་ཆུབ་སེམས་དཔའི་བསླབ་པ༔ དམ་ཚིག་གི་སྡོམ་པ་མན་ཆད་རྒྱས་པར་བླང་ངོ་༔ རེ་ཞིག་བསྡུས་པ་ཚིགས་བཅད་ཙམ་དུ་ལེན་ན༔ བླ་མའི་མདུན་དུ་ཙོག་པུར་འདུག་སྟེ༔ མདུན་གྱི་ནམ་མཁའ་ལ་སངས་རྒྱས་དང་བྷོ་དྷི་སཏྭ་དང༔ བླ་མ་དང༔ ཡི་དམ་མཁའ་འགྲོ་རྣམས་གུས་པའི་ཡིད་ཀྱིས་སྤྱན་དྲངས་ལ༔ ལུས་ལོངས་སྤྱོད་མཆོད་པ་གཞི་རྫོགས་སུ་ཕུལ་ལ༔ ཕྱག་འཚལ༔ མེ་ཏོག་གཏོར༔ ཐལ་མོ་སྦྱར་ལ༔ ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་དང༔ བླ་མ་ཡི་དམ་མཁའ་འགྲོ་བདག་ལ་དགོངས༔ རྐང་གཉིས་གཙོ་བོ་སངས་རྒྱས་ཐམས་ཅད་དང༔ ཞི་བ་ཆགས་བྲལ་དམ་པའི་ཆོས་རྣམས་དང༔ ཚོགས་མཆོག་འཕགས་པའི་དགེ་འདུན་ཐམས་ཅད་ལ༔ བདག་ནི་གུས་པས་སྐྱབས་སུ་ཉེ་བར་མཆི༔ ཞེས་ལན་གསུམ་བྱ༔ དེ་ནས་ཡང༔ ཀུན་(༥༩)བཟང་རིགས་ལྔའི་ལྷ་ཚོགས་ལ༔ འདི་བཟུང་བླ་མེད་བྱང་ཆུབ་བར༔ གུས་པ་ཡི་ནི་སྐྱབས་སུ་མཆི༔ ཞེས་ལན་གསུམ་བྱའོ༔ དེ་ནས་ཡང༔ དཔའ་བོ་དཔའ་མོ་ཆོས་སྐྱོང་བཅས༔ བྱང་ཆུབ་སེམས་དཔའ་སློབ་དཔོན་ལ༔ བདག་ནི་གུས་པས་སྐྱབས་སུ་མཆི༔ ཞེས་ལན་གསུམ་བྱའོ༔ དེ་ནས་སོ་སོར་ཐར་པ་བླང་བ་ནི༔ ཡང་མདུན་དུ་འདུག་ལ༔ བླ་མ་ཀུན་བཟང་སྤྱན་སྔ་རུ༔ ལུས་ངག་ཡིད་ཀྱིས་གཞན་རྣམས་ལ༔ གནོད་པ་ལས་ལྡོག་དགེ་བ་བསྒྲུབ༔ དགེ་ཚུལ་དགེ་སློང་བྱང་ཆུབ་སེམས༔ སོ་སོར་ཐར་པའི་སྡོམ་པ་རྣམས༔ བདག་ནི་རྒྱུན་དུ་གནས་ཤིང་སྲུང༔ ཞེས་ལན་གསུམ་བྱའོ༔ དེ་ནས་སྨོན་པ་སེམས་བསྐྱེད་བླངས་ཏེ༔ ཧོ༔ བླ་མ་ཀུན་བཟང་དགོངས་སུ་གསོལ༔ འདི་བཟུང་བྱང་ཆུབ་མ་ཐོབ་བར༔ འགྲོ་དྲུག་སེམས་ཅན་ཐམས་ཅད་ལ༔ མ་དང་བུ་ཡི་འདུ་ཤེས་ཀྱིས༔ མ་བསྒྲལ་བ་རྣམས་བསྒྲལ་བ་དང༔ མ་གྲོལ་དགྲོལ་དང་དབུགས་དབྱུང་ཕྱིར༔ སྨོན་པའི་བྱང་ཆུབ་སེམས་བསྐྱེད་དོ༔ ཞེས་ལན་གསུམ་བྱའོ༔ དེ་ནས་འཇུག་པ་བླང་བ་ནི༔ སྔོན་གྱི་རྒྱལ་བ་ཐམས་ཅད་ཀྱང༔ སྡོམ་པ་ལ་ནི་གནས་པ་ལྟར༔ འདི་བཟུང་འཁོར་བ་མ་སྟོང་བར༔ བླ་མེད་འཇུག་པའི་བྱང་ཆུབ་སེམས༔ བདག་ཅག་རྣམས་ཀྱིས་བསྐྱེད་པར་བགྱི༔ ཕར་ཕྱིན་དྲུག་ལ་སློབ་ཅིང་བསྒྲུབ༔ བརྩོན་འགྲུས་དག་གིས་ཐམས་ཅད་བསྒྲལ༔ ཀུན་དོན་ཚུལ་ཁྲིམས་གསུམ་ཡང་བཟུང༔ བདག་གིས་སེམས་བསྐྱེད་སྡོམ་བཟུང་ནས༔ མ་གྲོལ་སྒྲོལ་དང་མ་བསྒྲལ་བསྒྲལ༔ དབུགས་དབྱུང་མྱ་ངན་འདས་ལ་དགོད༔ ཅེས་ལན་གསུམ་བྱའོ༔ དེ་ནས་སྡོམ་པ་བཟུང་བ་ནི༔ དཀོན་མཆོག་གསུམ་བཟུང་མི་གཏོང་ངོ་༔ རྡོ་རྗེ་རིགས་ཀྱི་དམ་ཚིག་ཏུ༔ རྡོ་རྗེ་དྲིལ་བུའི་ཕྱག་རྒྱ་དང༔ བྱང་ཆུབ་སེམས་ནི་སྤང་མི་བྱ༔ རྡོ་རྗེ་རིགས་ཀྱི་དམ་ཚིག་ཡིན༔ རིན་ཆེན་རིགས་ཀྱི་དམ་ཚིག་ཏུ༔ སྦྱིན་པ་དུས་རྣམས་རྟག་ཏུ་གཏོང༔ རིན་ཆེན་རིགས་ཀྱི་སྡོམ་པ་ཡིན༔ པདྨ་རིགས་ཀྱི་དམ་ཚིག་ཏུ༔ ཐེག་པ་གསུམ་དང་ཆོས་རྣམས་བཤད༔ པདྨ་རིགས་ཀྱི་སྡོམ་པ་ཡིན༔ ལས་ཀྱི་རིགས་ཀྱི་དམ་ཚིག་ཏུ༔ འགྲོ་བའི་དོན་ལ་བརྩོན་པར་བྱ༔ ལས་ཀྱི་རིགས་ཀྱི་སྡོམ་(༦༠)པ་ཡིན༔ ཞེས་སོ༔ དེ་ནས་དམ་ཚིག་སྦྱིན་ཏེ༔ ཡར་མཆོད་གུས་ཤིང་མར་ལ་བརྩེ༔ རྩ་བ་ཡན་ལག་དམ་ཚིག་བསྲུང༔ རྩ་བ་བཞི་ལས་འདའ་མི་བྱ༔ ཞེས་བཤད་དོ༔ རྩ་བའི་ཉེས་པ་བཤད་ལ་བསྲུང་དུ་གཞུག་གོ༔ དེ་ནས་སློབ་མ་ལྷར་བསྐྱེད་ལ༔ ཡི་གེ་གསུམ་བཟླས་ཤིང༔ སློབ་མའི་གནས་གསུམ་དུ་དྲིའི་ཐིག་ལེ་བྱའོ༔ ཡེ་ཤེས་སེམས་དཔའ་དགུག་གཞུག་བྱ༔ དབང་བསྐུར༔ མཆོད་པ་དང༔ གཏོར་མ་དབུལ༔ བདུད་རྩི་ལྕེའི་སྟེང་དུ་བཞག་གོ༔
དེ་ནས་དངོས་གྲུབ་ཀྱི་ལྟས་བརྟག་པའི་ཕྱིར༔ མེ་ཏོག་གི་ཚོམ་བུ་ལྔ་བཀོད་ལ༔ ཤིང་ལྕུག་མ་མཐོ་གང་བ་སྦོམ་ཕྲ་མདའ་ཙམ་ལ་སྙུག་གུ་ཁར་གཞོག་ལ༔ རྩེ་མོ་ལ་མེ་ཏོག་གི་ཕྲེང་བ་བཅིང༔ སངས་རྒྱས་དང་བྱང་ཆུབ་སེམས་དཔའ་དཔའ་བོ་དང་མཁའ་འགྲོ་སྲུང་མ་ཐམས་ཅད་ཀྱིས་བདག་ལ་དངོས་གྲུབ་ཀྱི་ལྟས་བསྟན་དུ་གསོལ་ལོ༔ ཞེས་སོས་བཟུང་ལ་མིག་བཙུམས་ཏེ་མཎྜལ་སྟེང་དུ་བསྐྱུར༔ ཕྱོགས་བཞི་དབུས་དང་ལྔར་བྱུང་ན་རིགས་དེའི་དངོས་གྲུབ་ཐོབ༔ མཚམས་བཞིར་དེའི་དངོས་གྲུབ་ཕྲན་ཚེགས་ཐོབ༔ སྟེང་དུ་བྱུང་ན་མཆོག་གི་དངོས་གྲུབ་ཐོབ༔ དེ་རྩ་བ་རང་ལ་བསྟན་འདུག་ན་སྐལ་བ་ཞན་པས་བལྡབས་ལ་བསྐྱུར༔
དེ་ནས་ཆོས་བཤད་པ་ནི༔ ཀྱེ་མ་རིགས་ཀྱི་བུ་རྣམས་གསོན་ཅིག༔ འདི་ལྟ་བུའི་དཀྱིལ་འཁོར་དུ་ཞུགས་པའི་རིགས་ཀྱི་བུ་ནི༔ ཨུ་དུམ་ཝཱ་རའི་མེ་ཏོག་དང་འདྲ་བས་ཤིན་ཏུ་འབྱུང་བར་དཀའོ༔ དེ་བས་ཀྱང་གསང་སྔགས་ཀྱི་སྒོར་འཇུག་པ་ནི་ཤིན་ཏུ་དཀོན་ཏེ༔ འདི་ལྟ་བུ་ལ་ཞུགས་ནས་བསྐལ་པ་དཔག་ཏུ་མེད་པའི་སྡིག་སྒྲིབ་ཐམས་ཅད་དཀྱིལ་འཁོར་འདི་མཐོང་བ་ཙམ་གྱིས་བྱང་ཞིང་དག་པར་འགྱུར་ན་སྔགས་འདི་ལ་སྤྱོད་ཅིང་ཚུལ་ལ་གནས་ནས་བཟླས་པ་བྱས་ན་མྱུར་དུ་བླ་ན་མེད་པའི་གོ་འཕང་ཐོབ་པ་ལ་ཚེགས་མེད་པར་འགྱུར་རོ༔ ཞེས་སྤྲོ་བ་བསྐྱེད་པའི་ཆོས་ཅི་རིགས་སུ་བཤད་དོ༔ དེ་ནས་སྲུང་སྐུད་སྣ་ལྔ་དྲིལ་ལ་རྩ་སྔགས་བཟླས་ཏེ་མདུད་པ་ལྔ་བྱས་ཏེ༔ གྲུ་མོ་གཡོན་པ་ལ་བཅིང་ངོ་༔ དེ་ནས་ཀུ་ཤ་ལ་ཡི་གེ་གསུམ་གྱིས་བྱིན་གྱིས་བརླབས་ལ༔ སྔས་དང་གདན་དུ་བཏིང་སྟེ༔ ཁ་ཤར་དུ་གཏད་སེང་གེའི་ཉལ་སྟབས་བྱས་ཏེ་ཉལ་ལོ༔ བླ་མ་དང་རིགས་(༦༡)ལྔའི་ལྷ་ཚོགས་ཀྱིས་དགེ་བ་དང་མི་དགེ་བའི་རྨི་ལམ་བསྟན་དུ་གསོལ༔ ཅེས་གསོལ་བ་བཏབ་ལ་ཉལ་ལོ༔ ཚོགས་དང་གཏོར་མ་ཡང་བཏང་ངོ་༔ ནང་པར་རྡོ་རྗེ་སློབ་དཔོན་ལ་རྨི་ལམ་བཟླས་ཏེ༔ ངན་པ་བྱུང་བ་རྣམས་ལ་ཚོགས་གཏོར་གྱིས་བཟློག་པར་བྱའོ༔ སློབ་མ་སྟ་གོན་དུ་བྱ་བའོ༔
དེ་ནས་ཐིག་གི་ཆོ་ག་ནི༔ ཐལ་འགྱུར་ལས༔ སྟ་གོན་ཐིག་དང་ཚོན་དགྱེ་བ༔ ཞེས་པ་དང༔ ཀློང་གསལ་ལས༔ ཐིག་སྐུད་ཡེ་ཤེས་ལྔ་སྒྲིལ་བས༔ དཀྱིལ་འཁོར་སྟེང་གི་ནམ་མཁའ་ལ༔ ཚངས་ཐིག་ཆ་ཆེན་དག་ཀྱང་གདབ༔ སྐད་ཅིག་དཀྱིལ་འཁོར་ལྷ་ཚོགས་བསྐྱེད༔ མཆོད་པ་དང་ནི་བསྟོད་པ་བྱ༔ དེ་ནས་དཀྱིལ་འཁོར་ཐིག་གདབ་པ༔ དཀྱིལ་འཁོར་སྤྱི་དང་མཐུན་པར་གདབ༔ དཀྱིལ་འཁོར་བཀོད་པ་ཤེས་པར་གྱིས༔ ཞེས་པས་ཐིག་སྐུད་ཁ་དོག་ལྔ་སྒྲིལ་ལ༔ སྦོམ་ཕྲ་རིང་ཐུང་གཞན་དང་མཐུན་པའོ༔ ཐིག་སྐུད་རིགས་ལྔ་ཡུམ་ལྔར་བསྐྱེད་ལ༔ ཡིད་ཀྱིས་ཡེ་ཤེས་གཞུག་མཆོད་བསྟོད་བྱས་ལ༔ སློབ་དཔོན་ཁ་ཤར་དུ་བལྟས་སློབ་མ་ཁ་ནུབ་ཏུ་བལྟས་ཐིག་སྐུད་བཟུང་ལ༔ དཀྱིལ་འཁོར་སྟེང་གི་ནམ་མཁའ་ལ༔ ཡེ་ཤེས་ཀྱི་ཚངས་ཐིག་བཞིའམ་བཅུ་དྲུག་གདབ་ཅིང་གསོལ་བ་གདབ་པ་ནི༔ ཨེ་མ་རིགས་ལྔའི་སངས་རྒྱས་གཙོ༔ འགྲོ་དོན་དུ་ནི་འདི་ལགས་པས༔ ཀུན་ཏུ་བཟང་པོས་ཐིག་གདབ་མཛོད༔ རྩ་སྔགས་ལན་གསུམ་བརྗོད༔ དེའི་སྒྲས་བསྐུལ་ནས་རིགས་ལྔའི་དཀྱིལ་འཁོར་ལྷ་དང་བཅས་པ་སྐད་ཅིག་གིས་བསྐྱེད་དོ༔ དེ་ནས་ལྷ་ཚོགས་དེ་རྣམས་ལས་འོད་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་བླ་མ་ཡི་དམ་མཁའ་འགྲོ་ཆོས་སྐྱོང་དང་བཅས་པ་བྱོན་ཏེ༔ དཀྱིལ་འཁོར་སྟེང་གི་ནམ་མཁའ་ལ་བཞུགས་པར་བསམ་དེ་ལ་མཆོད་པ་དང་བསྟོད་པ་བྱས་ལ༔ མི་གཤེགས་པར་བཞུགས་སུ་གསོལ་ལོ༔ ཐིག་གདབ་པ་དངོས་ནི་ཆ་ཆེན་ས་དཀར་དང་དྲི་བཟང་པོའི་ཆུས་སྦངས་ལ་གདབ༔ མན་ངག་ཐིགས་དམར་གྱི་ཁུ་བས་སྦངས་ཏེ་གདབ༔ དེ་ཡང་གདབ་པ་སྤྱི་དང་མཐུན་པ་ལ༔ ཁྱད་པར་དུ་འདི་ཉིད་ཀྱི་དཀྱིལ་འཁོར་འོག་ནས་འབྱུང་བ་ལྟར་བལྟས་ལ་ཤེས་རབ་ཀྱིས་དཔྱད་པར་བྱའོ༔ ཐིག་སྐུད་ཀྱི་བསྐོར་ལུགས་སྐྱོན་ཡོན་གཞན་(༦༢)དང་མཐུན་པ་ཡིན་ནོ༔ ཐིག་གི་ཆོ་གའོ༔ དེ་ནས་ཚོན་གྱི་ཆོ་ག་ནི༔ ཚོན་རྩི་སྣ་ལྔ་བསགས་ཏེ༔ རབ་རཏྣ་ལྔ༔ འབྲིང་དུར་ཁྲོད་ཀྱི་ས་རྡོ་ལྔ༔ ཐ་མ་ཁ་དོག་ཚང་བའོ༔ དེ་དག་སྣོད་སོ་སོར་བླུགས་ལ༔ རིགས་ལྔའི་ས་བོན་སོ་སོར་བྲིས་ཏེ་དེ་ལ་དམ་ཚིག་སེམས་དཔའ་བསྐྱེད༔ ཡེ་ཤེས་སེམས་དཔའ་བསྟིམ་ཡིད་ཀྱིས་མཆོད་བསྟོད་ཙམ་བྱ༔ དེ་ནས་རྡོ་རྗེ་སློབ་དཔོན་གྱིས་ཤར་ནས་ཚོན་རྩི་ཐོགས་ཏེ༔ སངས་རྒྱས་རིགས་ལྔ་ཡེ་ཤེས་གཙོ༔ ཀུན་གྱི་དོན་རིག་བྱ་བའི་ཕྱིར༔ ཡེ་ཤེས་ལྔ་ཡི་ཚོན་དགྱེའོ༔ ཞེས་རེ་ཁཱ་གཅིག་དྲངས༔ དེ་ཡང་སྦོམ་ཕྲ་ཞིང་གི་ཚད་ནི་ཀློང་གསལ་ལས༔ ཚོན་རེ་སྒོ་ཡི་ཉི་ཤུ་ཆ༔ དཔངས་ནི་མདའ་ཙམ་བྲི་བར་བྱ༔ ཞེས་སོ༔ སྐྱོན་ཡོན་ནི༔ ཡང་དེ་ཉིད་ལས༔ ཚོན་རྩ་ཕྲ་ལ་ཀྱོག་པ་དང༔ སྦོམ་ཕྲ་མི་སྙོམས་དངོས་གྲུབ་མེད༔ སྦོམ་ན་ནད་མང་ཕྲ་ན་ནོར་མི་འབྱུང༔ ཆད་ན་གཉིས་ཀ་འཆི་བ་ཡིན༔ ཞེས་སོ༔ དེ་ནས་སློབ་མས་བྲི་བར་བྱ་སྟེ༔ དབུས་མཐིང་ཁར་བྱ༔ པདྨ་འདབ་བཞི་ཕྱོགས་དང་མཐུན༔ ཞེས་སོ༔ མཚམས་བཞི་མཛེས་ཚོན་དུ་བྲི༔ དེའི་ཕྱི་མ་མཐིང་ཀ་དཀར་པོ་དམར་པོ་གསུམ་གྱི་མུ་ཁྱུད་བསྐོར༔ སྒོ་བཞི་ཕྱོགས་དང་མཐུན་པར་བྱ༔ འདིར་དུར་ཁྲོད་འདོད་པ་གཞན་དང་མཐུན་པར་བྲི༔ ས་ཚོན་ལྷག་མ་ལ་ཡེ་ཤེས་པ་གཤེགས་ལ་བསྡུའོ༔ དེ་ནི་ཚོན་གྱི་ཆོ་གའོ༔
དེ་ནས་དཀྱིལ་འཁོར་བསྒྲུབ་པ་ནི༔ ལས་ཀྱི་སློབ་དཔོན་གྱིས་བྲི་ཚར་བ་དང༔ རྡོ་རྗེ་སློབ་དཔོན་གྱིས་གཟིགས་ཏེ་སྤོས་ཐོགས༔ དྲིལ་བུ་དཀྲོལ་ཞིང་ཡི་གེ་བརྒྱ་པ་བཟླས་སོ༔ སྐོར་བ་བསྐོར་ཞིང་ལྷག་ཆད་རྣམས་གསོ་འབྱིད་བྱའོ༔ དེ་ནས་མེ་ཏོག་ཐོགས་ལ་རྟེན་འབྲེལ་སྙིང་པོ་བཟླས་ཤིང་རབ་གནས་བྱའོ༔ བཀྲ་ཤིས་ཀྱི་ཚིགས་སུ་བཅད་པ་བརྗོད་དོ༔ གོང་གི་ནམ་མཁའི་ལྷ་རྣམས་སྐད་ཅིག་གིས་དཀྱིལ་འཁོར་ལ་བསྟིམས་ལ༔ མཆོད་པ་ལྔ་འབུལ་ལོ༔ དེ་ནས་དཀྱིལ་འཁོར་གྱི་རྒྱན་དགོད་པ་ནི༔ རྡོ་རའི་ཕྱི་ལོགས་སུ་མེ་རི༔ ཡེ་ཤེས་སྒོ་མ་བཞིའི་ཕུར་པ་སྒོའི་ཐད་དུ་གཟུགས་སོ༔ ཡུམ་བཞིའི་ཕུར་པ་བཞི་མཚམས་བཞིར་གཟུགས་སོ༔ དེ་ལ་ཡེ་ཤེས་ལྔའི་དྲུ་གུས་དྲུ་བ་རིས་སུ་སྦྲེལ༔ དར་སྣ་ལྔ་ལ་སོགས་པས་ལེགས་(༦༣)པར་བརྒྱན༔ ཡོལ་བ་ལ་སོགས་པ་བཀོད་པའི་བྱེ་བྲག་ལེགས་པར་བྱ༔ རྡོ་རྗེ་སློབ་དཔོན་གྱི་གཡས་ཕྱོགས་སུ་སྐུ་གསུང་ཐུགས་ཀྱི་རྟེན་དགྲམ༔ གཏོར་མ་ཆ་བཅུ་༼བཞིའམ་ཡང་ན་ཅི་འགྲུབ་ཏུ་༽བཤམས༔ ཕྱི་རོལ་གྱི་གཏོར་མ་ལ་སོགས་གང་དགོས་དཀར་རྒྱན་དམར་རྒྱན་ལ་སོགས་པས་བརྒྱན་པ་བཤམ༔ མདོར་ན་རྡོ་རྗེ་སློབ་དཔོན་གྱི་གཡས་ནས་དཀྱིལ་འཁོར་གྱི་མཚན་ན་མར་བཤམ༔ མཆོད་པའི་མཎྜལ་དང༔ བླ་མའི་མཎྜལ་རྣམས་དལ་གྱི་མདུན་ན་མར་བཤམ༔ མཆོད་པ་རྣམ་ལྔ་དང༔ བདུད་རྩི་ལྔ་ལ་སོགས་པའི་མཆོད་པ་ཐམས་ཅད་བླ་མའི་གཡོན་ན་མར་མགོ་བཙུགས་ལ་བཤམ༔ གོང་དེར་བླ་མའི་ཁྲི་བཀོད་པ་དང་ལྡན་པར་བཤམ་མོ༔ ཚོགས་ཀྱི་ཡོ་བྱད་ཀྱང་ཅི་ཆེར་བཤམས་ལ་བཞག་གོ༔ དེ་ནས་སྟ་གོན་གྱི་བུམ་པ་དེ་རྣམས་དལ་གྱི་སྟེང་དུ་སོ་སོའི་གནས་སུ་ཁྲིའུའམ་མཉྫིའི་སྟེང་དུ་བཞུགས་སོ༔ ལས་ཀྱི་བུམ་པ་ཤར་སྒོའི་ཕྱིར་གཞུག་གོ༔
དེ་ལྟར་དཀྱིལ་འཁོར་སྒྲུབ་པ་དངོས་ནི༔ བདག་ཉིད་དཔལ་ཀུན་ཏུ་བཟང་པོར་སྐད་ཅིག་དྲན་རྫོགས་སུ་བསྐྱེད་དོ༔ དེའི་(༦༤)ཐུགས་ཀ་ནས་འོད་འཕྲོས་པས་བསྐྱེད་པ་ལ་སོགས་མངོན་རྟོགས་ལྟར་བྱའོ༔
དེ་ནས་མཆོད་པ་བྱ་བ་ནི༔ རྡོ་རྗེ་དང་དྲིལ་བུ་བཟུང་ནས༔ མཆོད་བསྟོད་གཞན་དང་མཐུན་པར་བྱའོ༔ དེ་ནས་དལ་བསྒྲུབས་པ་དང་མཆོད་པ་ཚར་ནས་བདག་རྡོ་རྗེ་སློབ་དཔོན་ཉིད་དཀྱིལ་འཁོར་གྱི་སྒོ་བཞི་ལ་བཞུགས་ནས་སྒོ་བ་བཞི་ལ་གསོལ་བ་བཏབ་ནས༔ ནང་དུ་ཕྱིན་ཏེ་ཡབ་ཡུམ་ཐམས་ཅད་ལ་དབང་ཞུས་པས༔ ༼སྐབས་འདིར་བདག་གི་ཆོ་ག་རྒྱས་པར་བྱས་ལ༔༽ དབང་བསྐུར་ནས་ཁྱོད་ཀྱིས་རིགས་ཀྱི་བུ་རྣམས་ལ་དབང་བསྐུར་བར་བྱའོ༔ ཞེས་གནང་བ་སྦྱིན་ནས་དངོས་གྲུབ་ཐོབ་པར་བསམ༔ དེ་ནས་སློབ་མ་དལ་དུ་འཇུག་པ་ནི༔ ལས་ཀྱི་སློབ་དཔོན་གྱིས་ལས་བུམ་ཁྱེར་ལ་ཕྱིར་ཕྱིན་ཏེ༔ སློབ་མ་རྣམས་ལ་ཁྲུས་བྱས་ཏེ་མིག་དར་དམར་པོ་སྭ་བྷཱ་ཝས་བསངས་ལ༔ སློབ་མའི་མིག་ལ་དཀྲིས་ཏེ༔ ཐམས་ཅད་ལག་པ་སྦྲེལ་ནས་ལས་ཀྱི་སློབ་དཔོན་གྱི་ལག་ཏུ་རྡོ་རྗེ་བཟུང་སྟེ༔ དེ་ལ་སློབ་མས་བཟུང་ལ༔ ཚོགས་ཁང་ལ་སྐོར་བ་ལན་གསུམ་བྱས་ལ་ཕྱི་སྒོ་བཅད་པའི་དྲུང་ནས་གསོལ་བ་གདབ་པ་ནི༔ ཀྱེ་ཁྲོ་བོ་མི་བཟད་(༦༤)འཇིགས་པའི་སྐུ༔ མཚོན་ཆ་སྣ་ཚོགས་ཕྱག་ན་བསྣམས༔ བདག་ཅག་འཁོར་བ་ལས་བསྒྲལ་ཕྱིར༔ ཁྱེད་ཀྱིས་གནང་སྟེ་བཏང་དུ་གསོལ༔ ཞེས་ལན་གསུམ་དུ་གསོལ་བ་གདབ་བོ༔ ནང་ནས་ཁྱེད་སུ་ཡིན་ཅི་བྱེད་ཅེས་བྱ༔ ཡང་ཕྱི་ནས་ལན་ཞུ་བ་ནི༔ བདག་ནི་སྐལ་ལྡན་རིགས་ཀྱི་བུ་ཡིན༔ དཔལ་རིགས་ཀྱི་བདག་པོ་ལ་དབང་ཞུ་ཞེས་བྱའོ༔ དེ་ནས་དཀྱིལ་འཁོར་ཡོལ་བས་བསྒྲིབས་ལ༔ སློབ་བུ་རྣམས་ལ་ཆགས་པའི་འབྱུང་པོ་རྣམས་ལ་གཏོར་མ་བྱིན་ལ་སོང་ཞིག་ཅེས་པའི་བཀའ་བསྒོའོ༔ རྡོ་རྗེ་སློབ་དཔོན་གྱི་ཆ་ལུགས་དུར་ཁྲོད་ཀྱི་ཆས་བརྒྱད༔ རུས་པའི་རྒྱན་དྲུག་ལ་སོགས་པས་བརྒྱན་ལ་ཁྲོ་བོའི་ང་རྒྱལ་གྱིས་སྔགས་བཟླས་ཐུན་བཟུང་སྟེ༔ སྒོ་ཕྱེ་ལ་སློབ་བུ་ནང་དུ་ཡོང་བའི་དུས་སུ་དྲག་སྔགས་དང་ཐུན་བརྡེག༔ རོལ་མོའི་སྒྲ་ཐམས་ཅད་དུས་གཅིག་ལ་དཀྲོལ་ལོ༔ ཧཱུྃ་དང་ཕཊ་ལ་སོགས་པའི་སྒྲ་འབྱིན༔ གུ་གུལ་གྱི་དུད་པས་བདུག༔ སྒོ་སྲུང་རྣམས་ཀྱིས་ཁྲོ་བོའི་སྟངས་སྟབས་བྱ༔ ཕྱག་མཚན་གྱིས་བསྡིག་གོ༔ དེ་ནས་སློབ་བུ་ནང་དུ་རྫོགས་པ་དང་སྒོ་བཅད་ལ་སློབ་བུ་རྣམས་གྲལ་ལ་བཞག་རྡོ་རྗེ་སེམས་དཔའ་བསྒོམ་དུ་བཅུག་ལ་ཡི་གེ་བརྒྱ་པ་བགྲངས༔ བླ་མས་རྡོ་རྗེ་མེ་རི་ལ་སོགས་པས་མཚམས་བཅད་སྲིད་པའི་རླུང་གིས་ཀྱང་མི་ཐར་བར་བསམ་མོ༔ དེ་ནས་སློབ་བུ་རྣམས་ཀྱིས་བླ་མ་ཡི་དམ་ལ་མཎྜལ་དབུལ༔ དེ་ནས་ཡོལ་བའི་ནང་གི་སྒོ་བ་ལ་གསོལ་བ་གདབ་པ་ནི་མེ་ཏོག་བཟུང་ལ༔ ཀྱཻ་རིགས་ལྔའི་བདེ་བར་གཤེགས་པ་དང༔ བླ་མ་ཡི་དམ་མཁའ་འགྲོ་དགོངས༔ སྒོ་བ་ཆེན་པོ་ཁྱེད་རྣམས་ཀྱིས༔ སྒོ་ཕྱེ་ཐར་པའི་གྲོང་བསྟན་ཚལ༔ ཞེས་གསོལ་བ་གདབ༔ སྒོ་བ་བཞིས་སྒོ་ཕྱེ་ནས་དཀྱིལ་འཁོར་གྱི་ལྷ་ཐམས་ཅད་ཀྱིས་སྤྱན་གྱིས་གཟིགས་པར་བསམས་ལ༔ ཕྱག་འཚལ་མེ་ཏོག་དོར་དེ་ནས་ཡོལ་བ་བཀྲོལ་ལོ༔
དེ་ནས་ནང་གི་གཙོ་བོ་ལ་གསོལ་བ་གདབ་པ་ནི༔ ཀྱཻ་བླ་མ་རྡོ་རྗེ་འཛིན་པ་དང༔ དཀྱིལ་འཁོར་ལྷ་ཚོགས་སྤངས་ནས་ནི༔ སྐྱོབ་པ་གཞན་ན་མི་མངའ་པས༔ ཁྱེད་ཀྱི་ཐུགས་རྗེས་བདག་ལ་སྩོལ༔ ཅེས་ལན་གསུམ་བརྗོད་པས་མེ་ཏོག་དོར༔ དེ་ནས་བླ་མས་འདི་སྐད་བྱ༔ ཀྱེ་མ་ཁྱེད་ནི་སྣོད་མཆོག་དམ་པ་སྟེ༔ (༦༥)ཁྱེད་འདོད་པ་ནི་བདག་གིས་སྦྱིན༔ ཞེས་བརྗོད་དོ༔ དེ་ནས་སློབ་མས༔ བདག་ནི་འབྲས་བུ་གསང་སྔགས་ཀྱི༔ དངོས་གྲུབ་བདུད་རྩིའི་ཆུ་རྒྱུན་གྱིས༔ སྨིན་ཅིང་གྲོལ་བར་འདོད་པས་ན༔ ཐུགས་རྗེས་བདག་ལ་གནང་བར་མཛོད༔ ཅེས་ཞུ་བ་ལན་གསུམ་བྱའོ༔ དེ་ནས་བླ་མས༔ ཨེ་མ་ཨེ་མ་རིགས་ཀྱི་བུ༔ ཁྱོད་ནི་ལས་སད་འཁྲུལ་པ་ཞིག༔ རིགས་ཀྱི་བུ་མཆོག་ཁྱོད་ཡིན་པས༔ ངས་ཁྱོད་ཀུན་བཟང་རིགས་ལྔ་ཡི༔ དལ་དུ་འཇུག་ཅིང་ཡེ་ཤེས་དབབ༔ དངོས་གྲུབ་ཐམས་ཅད་ཁྱོད་ཀྱིས་ཐོབ༔ དངོས་གྲུབ་དཀྱིལ་འཁོར་འདི་དག་ནི༔ མ་མཐོང་བ་ལ་སྨྲས་པ་ན༔ དམ་ཚིག་ཉམས་ཏེ་དམྱལ་བར་ལྟུང༔ རིགས་ལྔ་ཡེ་ཤེས་རྣམ་པ་ལྔ༔ ཁྱོད་ཀྱི་ཐུགས་ལ་ཞུགས་པ་སྟེ༔ འདི་སྨྲས་ཡེ་ཤེས་ལྷ་དང་དབྲལ༔ ཞེས་སོ༔ དེ་ནས་བདུད་རྩི་ལྕེ་ལ་བཞག་ལ༔ འདི་ནི་ཁྱོད་ཀྱི་དམ་ཚིག་ཆུ༔ དམ་ཚིག་ཉམས་ན་སྲེག་པར་བྱེད༔ བསྲུངས་ན་དངོས་གྲུབ་ཐམས་ཅད་ཐོབ༔ དམ་ཚིག་བདུད་རྩིའི་ཆུ་འདི་འཐུང༔ ཨོཾ་ཨ་མྲ྇་ཏ་དམ་ལས་མ་འདའ་སྭཱ་ཧཱ༔ འོ་ཁྱོད་ཀྱི་(༦༥)སྟོན་པ་རིགས་ལྔའི་སངས་རྒྱས་ང་ཡིན་པས་ངས་བཀའ་བསྒོ་བ་ལས་མ་འདའ་ཞིག༔ འདས་ན་རྡོ་རྗེའི་དམྱལ་བར་སྐྱེས་ནས་ཐོན་པའི་དུས་མེད་དོ༔ ཞེས་དམ་ཚིག་བསྒྲག་པར་བྱའོ༔ དེ་ནས་ཡེ་ཤེས་དབབ་པ་ནི་སློབ་བུ་གྲལ་ལ་བཞག་ལ་རྣམ་སྣང་གི་ཆོས་བདུན་དང་ལྡན་པར་བྱས་ལ༔ སློབ་བུའི་སྙིང་གི་ནང་དུ་གཡུང་དྲུང་འཁྱིལ་པ་དམར་པོ་གཅིག་བསྒོམ༔ དེའི་ནང་དུ་ཟླ་བའི་སྟེང་དུ་ཡཾ་གཅིག་བསྒོམ༔ གཡུང་དྲུང་གི་ཡན་ལག་བཞི་ལ་ཧ་རི་ནི་ས་བཞི་བསམ༔ ཡཾ་དེ་ལས་རླུང་གིས་བསྐྱེད་པས་གཡུང་དྲུང་འཁྱིལ་པ་སྙིང་དང་བཅས་པ་གཡོན་དུ་འཁོར་བར་བསམ་ཞིང་མ་ཡེངས་བར་བྱའོ༔ འདི་དུས་སུ་བྱི་ལའི་བྲུན༔ རཀྟ༔ ཤ་ཆེན༔ གུ་གུལ་ནག་པོ༔ ཀླད་ཆེན༔ བདུད་རྩི་ལྔ༔ རའི་རྐང་ལག་བཞིའི་ཉྭ་ཤ༔ རང་རང་གི་སྐྲ༔ དེ་རྣམས་སྦྱར་ལ་སོལ་མེ་ལ་བསྲེག་ཅིང་མཆོད་གཡོག་པ་རྣམས་ཀྱིས་རོལ་མོ་ཐམས་ཅད་དཀྲོལ་ཞིང་རྩ་སྔགས་དྲག་པོ་བཟླས་པས་ཐུགས་ཀའི་ས་བོན་ལས་འོད་འཕྲོས་པས་རིགས་ལྔའི་སངས་རྒྱས་དང་བྱང་ཆུབ་སེམས་དཔའ་དཔའ་བོ་(༦༦)དང་མཁའ་འགྲོ་ཐམས་ཅད་མཁའ་སྤྱོད་ནས་ཐིབ་ཐིབ་བྱོན་ནས་སློབ་བུའི་སྙིང་ནང་དུ་སིབ་སིབ་བྱོན་ནས་འཁྲབ་ཅིང་གར་བྱེད་པར་བསམ་མོ༔
ཡེ་ཤེས་ཕེབས་པའི་རྟགས་ནི་ལུས་ལ་ཕེབས་ན་ལྷ་འདི་ཡིན་སྔགས་འདི་ཡིན༔ ཞེས་ལུས་འཕར་བ་དང༔ འཁྲབ་པ་དང༔ འདར་བ་དང༔ བ་སྤུ་ཟིང་བ་ཡོད་དོ༔ ངག་ལ་ཕེབས་ནི་ངག་སྨྲ་བ་དང༔ ངུ་བ་དང༔ གླུ་ལེན་པ་དང༔ སཾ་སྐྲ྇་ཏའི་སྐད་སྨྲ་བ་ལ་སོགས་པ་ཡོད་དོ༔ སེམས་ལ་ཕེབས་ན་སེམས་གསལ་བ༔ བདེ་བ༔ མི་རྟོག་པ་སྐྱེའོ༔ མ་ཕེབས་ན་སྤོགས་པར་བྱའོ༔ ཡེ་ཤེས་དབབ་པའོ༔ དེ་ནས་ཡེ་ཤེས་ཕེབས་པ་དང་སློབ་བུ་རྣམས་དཀྱིལ་འཁོར་གྱི་ཤར་སྒོར་ཁྲིད་དེ་ཕྱག་འཚལ་ལ༔ ཀྱེ་ཤར་སྒོ་སྲུང་བའི་སྒོ་མ་ལྕགས་ཀྱུ་མ༔ ཤར་གྱི་སྒོ་ནི་ཕྱེ་ལ་ནི༔ བདག་ཅག་ཡི་དམ་ལྷ་དང་སྤྲོད༔ ཅེས་ཞུ༔ ཞགས་པ་ལྕགས་སྒྲོག་དྲིལ་བུ་མ་རྣམས་གོང་གི་འགྲེའོ༔ དེ་ནས་མེ་ཏོག་ཐོགས་ལ༔ ཀྱེ་བདེ་གཤེགས་རིགས་ལྔའི་ཕོ་བྲང་དུ༔ འབྲེལ་བའི་མེ་ཏོག་འདི་དོར་བས༔ འབྲེལ་པ་གང་ཡོད་ལྷ་དང་བདག་འཕྲད་ཤོག༔ པུཥྤ་སི་ཏི་སྟོན༔ ཅེས་དོར་ལ༔ མེ་ཏོག་ཕོག་པའི་ལྷ་དང་སྔགས་ངོ་སྤྲད་དོ༔ ལྷ་འདི་ཡིན༔ སྔགས་འདི་ཡིན༔ ཞེས་སོ༔ དེ་ནས་མིག་དབྱེ་བ་ནི༔ སྟོན་པ་རིགས་ལྔའི་སངས་རྒྱས་ཀྱིས༔ ཁྱོད་ཀྱི་མ་རིག་འཁོར་བའི་མིག༔ ཡེ་ཤེས་སྤྱན་དུ་དབྱེ་བར་བྱ༔ དེ་བཞིན་ཁྱེད་ཀྱིས་འགྲོ་བ་རྣམས༔ ཡེ་ཤེས་སྤྱན་དུ་དབྱེ་བར་ཤོག༔ ཨོཾ་ཙཀྵུ་སྭཱ་ཧཱ༔ ཞེས་མིག་དར་བཀྲོལ་ལོ༔ དེ་ནས་བླ་མས༔ ཀྱེ་མ་རིགས་ཀྱི་བུ་རྣམས་ཀུན༔ ཁྱེད་རྣམས་སྡིག་པ་ཀུན་ལས་གྲོལ༔ དཀྱིལ་འཁོར་ཆེན་པོ་འདི་ལ་ལྟོས༔ ལུས་ངག་ཡིད་ཀྱིས་དད་པ་བསྐྱེད༔ སྔགས་དང་ཕྱག་རྒྱས་བྱིན་གྱིས་རློབས༔ དངོས་གྲུབ་ཐམས་ཅད་ཁྱེད་ཀྱིས་ཐོབ༔ དམ་ཚིག་སྔགས་ལ་བརྩོན་པར་གྱིས༔ ཞེས་བརྗོད་དོ༔ དེ་ནས་དཀྱིལ་འཁོར་དང་ལྷའི་རྣམ་དག་བཤད་པ་གཞན་དུ་ཤེས་པར་བྱའོ༔ དེ་ཡན་ཆད་སྔོན་འགྲོ་རྣམ་པ་བཅུ་གཅིག་གོ༔
དེ་ནས་དབང་བསྐུར་བ་དངོས་ལ༔ ཀློང་གསལ་ལས༔ (༦༧)མཎྜལ་ཡོན་དབུལ་གསོལ་བ་གདབ༔ མེ་ཏོག་གང་ལ་ཕོག་པ་ཡི༔ རིགས་སྦྱོར་རིག་པའི་དབང་ལྔ་བསྐུར༔ ཞེས་པས༔ ལས་ཀྱི་སློབ་དཔོན་གྱིས༔ ཀྱེ་དབང་ཞུ་བ་ཐམས་ཅད་ཀྱིས་བླ་མ་ལ་ཡོན་ཕུལ་ཞེས་བརྗོད་དོ༔ དེ་ནས་བླ་མ་ལ་མཎྜལ་དང་དབང་ཡོན་དབུལ་ལོ༔
དེ་ནས་གསོལ་བ་གདབ་པ་ནི༔ ཀུན་བཟང་ཡབ་ཡུམ་ཡེ་ཤེས་དབང༔ བདག་ཅག་རྣམས་ལ་བསྟན་དུ་གསོལ༔ ཞེས་ཕྱག་དང་མཆོད་པ་ལྔ་འབུལ་ལོ༔ དེ་ནས་སློབ་མ་དཀྱིལ་འཁོར་གྱི་ཤར་སྒོར་སེང་གེའི་ཁྲི་བརྩིགས་པའམ༔ བྲིས་པའམ༔ སྒོམ་པ་ལ་བཞུགས་ལ༔ མེ་ཏོག་༼དོར་བའི་དུས་ཀྱི་༽གང་ལ་ཕོག་པའི་ལྷ་བསྒོམ་དུ་བཅུག་ལ༔ མེ་ཏོག་༼ཅོད་པན་དེ་༽དེ་མགོའམ་དཔུང་པ་གཡོན་དུ་བཏགས་ལ༔ མེ་ཏོག་གང་ལ་ཕོག་པ་འདི༔ སྔོན་གྱི་ཁྱོད་ཀྱི་ཡི་དམ་ལྷ༔ རྟག་ཏུ་བསྒོམས་ལ་བསྒྲུབ་པར་གྱིས༔ ཨ་བཛྲ་པུཥྤ་སི་ཏི་སྟྭཾ༔ འོ་ཁྱེད་ཀྱི་ཡི་དམ་ལྷ་འདི་ཡིན་པས་དུས་རྒྱུན་དུ་བསྒོམས་ལ་སྙིང་པོ་འདི་༼ལྷའི་བསྐྱེད་རྫོགས་དང་བཟླས་པའི་ལུང་འབོག་དམིགས་པ་འདི་རིགས་དང་བསྟུན་ལ་ཐམས་ཅད་ལ་འགྲེས་སོ་བགྲང༔ རྫོགས་པའི་རིམ་པ་འདི་ལྟར་རྒྱས་ཐོབ་ལ་སྒོམས་ཤིག༔ ཞལ་གཅིག་ཕྱག་གཉིས་རཏྣའི་གདན་ལ་བཞུགས་པའི་ལྷ༔༽ དེས་དངོས་གྲུབ་དང་འབྲས་བུ་འདི་ཐོབ་པོ་ཞེས་ལྷ་རིགས་༼ལྔའི་༽དང་བསྟུན་ལ་བཤད་དོ༔ དེས་དབང་ལ་སྔ་བ་ལྷ་དང་འབྲེལ་བའི་དབང་ངོ་༔ རྒྱ་རྒྱ་རྒྱ༔
དེ་ནས་རིགས་ལྔའི་དབང་བསྐུར་བ་ནི༔ ཀློང་གསལ་ལས༔ སྐུ་གསུང་ཐུགས་དང་ཡོན་ཏན་དང༔ ཕྲིན་ལས་དག་གི་དབང་བསྐུར་བྱ༔ ཞེས་པས༔ དང་པོ་སྐུའི་དབང་ནི༔ སློབ་མ་རྡོ་རྗེ་སེམས་དཔའ་དཀར་པོ་ཞལ་གཅིག་ཕྱག་གཉིས་པ་རཏྣས་བརྒྱན་པ་གཡས་རྡོ་རྗེ་གཡོན་དེས་ཡུ་བ་བྱས་པའི་དྲིལ་བུ་འཛིན་པ་༼དཔོན་སློབ་གཉིས་ཀས་༽བསྒོམས་པའི་སྤྱི་བོར་ཟླ་བའི་སྟེང་དུ་ཨོཾ་དཀར་པོ་གཅིག་བསྒོམ༔ བདག་དང་བླ་མའི་ཐུགས་ཀ་ནས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དཔའ་བོ་མཁའ་འགྲོ་ཐམས་ཅད་རྡོ་རྗེ་སེམས་དཔའི་རང་བཞིན་དུ་བྱོན་ནས་བཀྲ་ཤིས་བརྗོད་ཅིང་དབང་བསྐུར་བས་དྲི་མ་ཐམས་ཅད་དག་༼པར་སློབ་མས་བསྒོམས་༽ནས་བླ་མ་རྡོ་རྗེ་སེམས་དཔའ་དབྱེར་མེད་(༦༨)དུ་སློབ་བུའི་སྤྱི་གཙུག་ཏུ་བཞུགས་པར་བསམ་མོ༔ དབྱངས་དང་བཅས་པས༔ ཧཱུྃ་གཟུགས་ཀྱི་ཕུང་པོ་རྣམ་དག་པའི༔ ཉོན་མོངས་ཞེ་སྡང་སྦྱོང་བྱེད་ཅིང༔ མེ་ལོང་ལྟ་བུའི་ཡེ་ཤེས་༼བླ་མའི་མེ་ལོང་ལྟ་བུའི་ཡེ་ཤེས་སློབ་མའི་རྒྱུད་ལ་ཕོག་པར་བསམ་མོ་༽ཀྱི༔ དཔལ་ལྡན་སྐུ་ཡི་དབང་བསྐུར་རོ༔ བཛྲ་ཨ་བྷི་ཥིཉྩ་ཧཱུྃ༔ ཞེས་ཁྲུས་བྱེད་དུ་བཅུག་ལ༔ འོ་རིགས་ཀྱི་བུ་ཁྱོད་ལ་ཆུ་འདི་གཏད་ཅིང་བཀྲུས་པ་ཙམ་གྱིས་ལུས་ཀྱི་སྒྲིབ་པ་ཐམས་ཅད་བྱང་ནས་འདིར་སངས་རྒྱས་ཐམས་ཅད་ཀྱི་སྐུའི་དབང་ཐོབ་པ་ཡིན་ནོ༔ ཁྱོད་ཀྱི་གཟུགས་ཀྱི་ཕུང་པོ་འདི་རྡོ་རྗེ་སེམས་དཔའ་ཉིད་དུ་སངས་རྒྱས་ནས་ཆུའི་ཁམས་མཱ་མ་ཀཱིའི་རང་བཞིན་དུ་དག་སྟེ༔ ཞེ་སྡང་མེ་ལོང་ལྟ་བུའི་ཡེ་ཤེས་སུ་གྲོལ་ནས་སངས་རྒྱས་རྡོ་རྗེ་རིགས་སྐུ་འགྱུར་བ་མེད་པ་ཐོབ་སྟེ༔ འགྲོ་བ་ཐམས་ཅད་ཀྱི་དོན་བྱེད་པར་འགྱུར་རོ་ཞེས་བྱའོ༔
དེ་ནས་གསུང་གི་དབང་བསྐུར་བ་ནི༔ སློབ་མ་སྣང་བ་མཐའ་ཡས་དམར་པོ་ཕྱག་ན་པདྨ་བསྣམས་པ་ལ་སོགས་གོང་དང་འདྲ་བ་ལས༔ ཧཱུྃ་འདུ་ཤེས་ཕུང་པོ་རྣམ་དག་པའི༔ ཉོན་མོངས་འདོད་ཆགས་སྦྱོང་བྱེད་ཅིང༔ སོ་སོར་རྟོགས་པའི་ཡེ་ཤེས་ཀྱི༔ དཔལ་ལྡན་གསུང་གི་དབང་བསྐུར་རོ༔ པདྨ་ཨ་བྷི་ཥིཉྩ་ཧྲཱི༔ ཞེས་རྡོ་རྗེ་ལག་ཏུ་གཏད་ལ༔ འོ་རིགས་ཀྱི་བུ་ཁྱོད་ཀྱི་ལག་ཏུ་རྡོ་རྗེ་འདི་གཏད་པ་ཙམ་གྱིས༔ འདིར་ངག་གི་སྒྲིབ་པ་དག་ནས་སངས་རྒྱས་ཐམས་ཅད་ཀྱི་གསུང་གི་དབང་ཐོབ་པ་ཡིན་ནོ༔ འདུ་ཤེས་ཀྱི་ཕུང་པོ་སྣང་བ་མཐའ་ཡས་ཉིད་དུ་སངས་རྒྱས་ཏེ་མེ་ཁམས་ཀྱང་གོས་དཀར་མོ་ཉིད་དུ་དག་ནས་འདོད་ཆགས་སོ་སོར་རྟོགས་པའི་ཡེ་ཤེས་ཉིད་དུ་གྲོལ༔ སངས་རྒྱས་པདྨ་རིགས་ཀྱི་གསུང་འགག་པ་མེད་པའི་ཆོས་ཀྱི་སྒྲ་དབྱངས་ཐོབ་ནས་འགྲོ་བའི་དོན་བྱེད་པར་འགྱུར་རོ༔ ཞེས་བྱའོ༔
དེ་ནས་ཐུགས་ཀྱི་དབང་བསྐུར་བ་ནི་སློབ་མ་རྣམ་སྣང་མཐིང་ཁ་ཕྱག་ན་ཙཀྲ་འཛིན་པ་གོང་དུ་འདྲ་བ་ལས༔ ཧཱུྃ་རྣམ་ཤེས་ཕུང་པོ་གནས་དག་པའི༔ ཉོན་མོངས་གཏི་མུག་རྣམས་སྦྱོང་ཞིང༔ ཆོས་ཀྱི་དབྱིངས་ཀྱི་ཡེ་ཤེས་ཀྱི༔ དཔལ་ལྡན་ཐུགས་ཀྱི་དབང་བསྐུར་རོ༔ བུདྡྷ་ཨ་བྷི་ཥིཉྩ་ཨཱཾ༔ མེ་ཏོག་གང་ལ་ཕོག་པ་ལ་གྲས་པའི་མིང་བཏགས་ཏེ༔ འོ་(༦༩)རིགས་ཀྱི་བུ་ཁྱོད་ལ་མིང་ཆེ་གེ་ཞེས་བཏགས་པ་ཙམ་གྱིས་འདིར་ཡིད་ཀྱི་སྒྲིབ་པ་དག་ནས་སངས་རྒྱས་ཐམས་ཅད་ཀྱི་ཐུགས་ཀྱི་དབང་ཐོབ་པ་ཡིན་ནོ༔ རྣམ་པར་ཤེས་པ་ཡང་རྣམ་པར་སྣང་མཛད་དུ་སངས་རྒྱས་ཏེ་ནམ་མཁའི་ཁམས་ཀྱང་ཆོས་ཀྱི་དབྱིངས་ཀྱི་དབང་ཕྱུག་མར་དག་ནས་གཏི་མུག་ཆོས་ཀྱི་དབྱིངས་ཀྱི་ཡེ་ཤེས་སུ་གྲོལ་ཏེ༔ སངས་རྒྱས་དེ་བཞིན་གཤེགས་པའི་ཐུགས་འཁྲུལ་པ་མེད་པ་ཆོས་ཀྱི་སྐུ་ཐོབ་ནས་འགྲོ་བའི་དོན་བྱེད་པར་འགྱུར་རོ༔ ཞེས་བྱའོ༔
དེ་ནས་ཡོན་ཏན་གྱི་དབང་བསྐུར་བ་ནི༔ སློབ་མ་རིན་ཆེན་འབྱུང་ལྡན་ཡབ་ཡུམ་སེར་པོ་ཕྱག་གཡས་ན་རིན་པོ་ཆེ་བསྣམས་པ་གོང་དང་འདྲ༔ ཧཱུྃ་ཚོར་བའི་ཕུང་པོ་རྣམ་དག་པའི༔ ཉོན་མོངས་ང་རྒྱལ་སྦྱོང་བྱེད་ཅིང༔ མཉམ་པ་ཉིད་ཀྱི་ཡེ་ཤེས་ཀྱི༔ དཔལ་ལྡན་ཡོན་ཏན་དབང་བསྐུར་རོ༔ རཏྣ་ཨ་བྷི་ཥིཉྩ་ཏྲཱྃ༔ ཞེས་དབུ་རྒྱན་བསྐོན་ལ༔ འོ་རིགས་ཀྱི་བུ་ཁྱོད་ལ་དབུ་རྒྱན་འདི་བསྐོན་པ་ཙམ་གྱིས༔ འདིར་ལུས་ངག་ཡིད་གསུམ་གྱི་སྒྲིབ་པ་ཐམས་ཅད་དག་ནས་སངས་རྒྱས་ཐམས་ཅད་ཀྱི་ཡོན་ཏན་གྱི་དབང་ཐོབ་པ་ཡིན་ནོ༔ ཚོར་བའི་ཕུང་པོ་རིན་ཆེན་འབྱུང་ལྡན་དུ་སངས་རྒྱས་ཏེ་སའི་ཁམས་ཀྱང་སངས་རྒྱས་སྤྱན་དུ་དག་ནས་ང་རྒྱལ་མཉམ་པ་ཉིད་ཀྱི་ཡེ་ཤེས་སུ་གྲོལ་ཏེ་སངས་རྒྱས་རིན་ཆེན་རིགས་ཀྱི་ཡོན་ཏན་ཐམས་ཅད་ཐོབ་ནས༔ འགྲོ་བའི་དོན་བྱེད་པར་འགྱུར་རོ་ཞེས་བྱའོ༔
དེ་ནས་ཕྲིན་ལས་ཀྱི་དབང་བསྐུར་བ་ནི༔ སློབ་མ་དོན་ཡོད་གྲུབ་པ་ཕྱག་གཡས་ན་རལ་གྲི་བསྣམས་པ་གོང་དང་འདྲའོ༔ ཧཱུྃ་འདུ་བྱེད་ཕུང་པོ་རྣམ་དག་པའི༔ ཉོན་མོངས་ཕྲག་དོག་སྦྱོང་བྱེད་ཅིང༔ བྱ་བ་གྲུབ་པའི་ཡེ་ཤེས་ཀྱིས༔ དཔལ་ལྡན་ཕྲིན་ལས་དབང་བསྐུར་རོ༔ ཀརྨ་ཨ་བྷི་ཥིཉྩ་ཨཱཿཞེས་རལ་གྲིའམ༔ དྲིལ་བུ་གཏད་ལ༔ འོ་རིགས་ཀྱི་བུ་ཁྱོད་ལ་དྲིལ་བུ་འདི་གཏད་པ་ཙམ་གྱིས་སྒྲིབ་པ་མ་ལུས་པ་ཐམས་ཅད་དག་ནས་སངས་རྒྱས་ཐམས་ཅད་ཀྱི་ཕྲིན་ལས་ཀྱི་དབང་ཐོབ་པ་ཡིན་ནོ༔ འདུ་བྱེད་ཕུང་པོ་ཡང་དོན་ཡོད་གྲུབ་པར་སངས་རྒྱས་ཏེ༔ རླུང་གི་ཁམས་ཀྱང་དམ་ཚིག་སྒྲོལ་མར་དག་ནས་ཕྲག་དོག་བྱ་བ་གྲུབ་པའི་ཡེ་ཤེས་སུ་གྲོལ་ཏེ་སངས་(༧༠)རྒྱས་དོན་ཡོད་གྲུབ་པའི་ཕྲིན་ལས་ཐོགས་པ་མེད་པར་གྲུབ་ནས་འགྲོ་བའི་དོན་བྱེད་པར་འགྱུར་རོ༔ ཞེས་བྱའོ༔ དེ་ནི་རིགས་ཀྱི་བདག་པོའི་དབང་ངོ་༔
དེ་ནས་ཀུན་ཏུ་བཟང་པོའི་དབང་བསྐུར་ཏེ༔ སློབ་མ་ཀུན་ཏུ་བཟང་པོ་རྡོ་རྗེ་དང་དྲིལ་བུ་འཛིན་པར་བསྒོམས་ཏེ༔ བླ་མའི་རྟོགས་པ་སློབ་མའི་རྒྱུད་ལ་འཕོས་པར་བསྒོམ་ནས༔ ལག་ཏུ་རྡོ་རྗེ་དྲིལ་བུ་གཏད་ལ༔ ཨ་ཨཱཿཧཱུྃ༔ ཐབས་དང་ཤེས་རབ་དབྱེར་མེད་ཅིང༔ སྣང་སྟོང་དབྱེར་མེད་འདི་བཟུང་ལ༔ སྟོང་ཉིད་སྙིང་རྗེའི་སྙིང་པོ་ཡི༔ ཀུན་བཟང་རྡོ་རྗེ་འཛིན་ཁྱོད་ཀྱིས༔ འགྲོ་ཀུན་རྗེས་སུ་གཟུང་བར་བགྱི༔ འོ་རིགས་ཀྱི་བུ་ཁྱོད་ལ་རྡོ་རྗེ་དང་དྲིལ་བུ་གཏད་པ་ཙམ་གྱིས་ཐམས་ཅད་མཁྱེན་པའི་ས་བོན་ཐེབས་ནས་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་རང་བཞིན་ཀུན་ཏུ་བཟང་པོ་རིག་པའི་རྩལ་དབང་ཐོབ་པ་ཡིན་ནོ༔ རང་གི་སེམས་སྐྱེ་བ་མེད་པ་ཆོས་ཀྱི་སྐུར་སངས་རྒྱས་ཏེ༔ འདི་ལྟར་སྣང་བ་ཐམས་ཅད་མ་སྤངས་གནས་སུ་དག་ནས་སྐུ་གསུམ་འདུ་འབྲལ་མེད་པས་འགྲོ་བའི་དོན་དཔག་ཏུ་མེད་པ་འགྲུབ་པར་འགྱུར་རོ༔ ཞེས་བྱའོ༔
དེ་ནས་དབང་བསྐུར་བ་ཕྱག་རྒྱའི་དབང་ནི༔ བུམ་པ་བཅུའི་བདུད་རྩི་གཙོ་བོའི་བུམ་པར་བསྡུས་ཀྱང་རུང༔ རེ་རེ་ནས་བསྐུར་ཀྱང་རུང་སྟེ༔ ལྷ་ཐམས་ཅད་བདུད་རྩིར་ཞུ་སྟེ་བུམ་པ་ཁེངས་པར་བསམས་ལ༔ སློབ་བུའི་སྤྱི་བོར་བཞག་སྟེ༔ བུམ་པའི་བདུད་རྩི་སློབ་བུའི་སྤྱི་བོ་ནས་མར་བབས་པས་ལུས་བདུད་རྩིས་གང་ལུས་འདི་རྒྱལ་བ་རིགས་རྣམ་པ་ལྔའི་ངོ་བོ༔ ནང་གི་ཁམས་དང་སྐྱེ་མཆེད་ཐམས་ཅད་ལྷ་དང་ལྷ་མོར་གྱུར་པར་དཔོན་སློབ་གཉིས་ཀས་བསྒོམས་ལ༔ ཡང་འོད་ཟེར་ཕྱིར་འཕྲོས་པས་ཕྱི་སྣོད་ཀྱི་འཇིག་རྟེན་ཐམས་ཅད་ལྷའི་གཞལ་ཡས་ཁང༔ ནང་བཅུད་ཀྱི་སེམས་ཅན་ཐམས་ཅད་ལྷ་དང་ལྷ་མོར་བསྒོམས་ལ༔ ཧཱུྃ་རྡོ་རྗེ་སེམས་དཔའ་བཅོམ་ལྡན་འདས༔ མཱ་མ་ཀཱི་ཡི་ཕྱག་རྒྱ་བུམ་པ་སྟེ༔ གཉིས་མེད་བྱང་ཆུབ་སེམས་ཀྱི་ཆུས༔ རིགས་ཀྱི་བུ་ལ་དབང་བསྐུར་རོ༔ སྣང་བ་མཐའ་ཡས་བཅོམ་ལྡན་འདས༔ གོས་དཀར་མོ་ཡི་ཕྱག་རྒྱ་བུམ་པ་སྟེ༔ གཉིས་མེད་བྱང་ཆུབ་སེམས་ཀྱི་ཆུས༔ རིགས་ཀྱི་བུ་ལ་དབང་བསྐུར་རོ༔ སྣང་བ་མཐའ་ཡས་བཅོམ་ལྡན་འདས༔ གོས་དཀར་མོ་ཡི་ཕྱག་རྒྱ་བུམ་པ་སྟེ༔ གཉིས་མེད་བྱང་ཆུབ་སེམས་ཀྱི་ཆུས༔ རིགས་ཀྱི་བུ་ལ་དབང་བསྐུར་རོ༔ རྣམ་པར་སྣང་(༧༡)མཛད་བཅོམ་ལྡན་འདས༔ ཀུན་ཏུ་བཟང་མོའི་ཕྱག་རྒྱ་བུམ་པ་སྟེ༔ གཉིས་མེད་བྱང་ཆུབ་སེམས་ཀྱི་ཆུས༔ རིགས་ཀྱི་བུ་ལ་དབང་བསྐུར་རོ༔ རིན་ཆེན་འབྱུང་ལྡན་བཅོམ་ལྡན་འདས༔ སངས་རྒྱས་སྤྱན་མའི་ཕྱག་རྒྱ་བུམ་པ་སྟེ༔ གཉིས་མེད་བྱང་ཆུབ་སེམས་ཀྱི་ཆུས༔ རིགས་ཀྱི་བུ་ལ་དབང་བསྐུར་རོ༔ དོན་ཡོད་གྲུབ་པ་བཅོམ་ལྡན་འདས༔ དམ་ཚིག་སྒྲོལ་མའི་ཕྱག་རྒྱ་བུམ་པ་སྟེ༔ གཉིས་མེད་བྱང་ཆུབ་སེམས་ཀྱི་ཆུས༔ རིགས་ཀྱི་བུ་ལ་དབང་བསྐུར་རོ༔ ཨ་ཨཱཿཧཱུྃ་གུ་རུ་ཌཱཀྐི་ནི་སིདྡྷི་ཧཱུྃ༔ ཨ་ཧཱུྃ་ཏྲཱྃ་ཧྲཱིཿཨཱཿཧ་རི་ནི་ས་ཨ་བྷི་ཥིཉྩ་བྷྲཱྃཿསི་ཏི་ཕ་ལ་ཧཱུྃ་ཨཱཿའོ་རིགས་ཀྱི་བུ་ཁྱོད་ལ་དབང་ཐམས་ཅད་བརྟན་པར་བྱེད་པ་བུམ་པའི་དབང་བསྐུར་བ་ཙམ་གྱིས་སྣོད་བཅུད་ལྷ་དང་གཞལ་ཡས་ཁང་གི་རང་བཞིན༔ ཕུང་པོ་ཁམས་དང་སྐྱེ་མཆེད་ཐམས་ཅད་ལྷ་དང་ལྷ་མོར་གྱུར་པ་ཡིན་པས༔ ཕྱི་ནང་ཐམས་ཅད་ལ་བརྙས་པ་བྱས་ན་ལྟུང་བར་འགྱུར་བས་དག་སྣང་དང་མོས་པ་གྱིས་ལ་མཆོད་པ་དང་བསྟོད་པ་ལ་དགའ་བར་གྱིས་ལ་ངོ་ཤེས་པར་གྱིས་ཤིག༔ ཅེས་བརྗོད་ལ་བུམ་ཆུ་ཁོང་དུ་བཏང༔ ཟག་མེད་ཀྱི་ཡེ་ཤེས་སྐྱེས་པར་བསམ༔ ལྷག་མས་ཁྲུས་བྱའོ༔
དེ་ནས་བརྡའི་དབང་བསྐུར་བ་ནི༔ རིགས་ལྔའི་སྐུ་བསྟན་ལ༔ འོ་རིགས་ཀྱི་བུ་ཁྱོད་ལ་རིགས་ལྔའི་སྐུ་འདི་བསྟན་པ་ཙམ་གྱིས་ཡེ་ཤེས་ལྔའི་ངོ་བོར་སངས་རྒྱས་པ་ཡིན་གྱིས༔ དེ་ཡང་བཅོམ་ལྡན་འདས་རྡོ་རྗེ་སེམས་དཔའ་སྐུ་མདོག་དཀར་པོར་བྱུང་བ་འདི་ཡང༔ སངས་རྒྱས་ཐམས་ཅད་ཀྱི་སྐུའི་དགོངས་པ་འདུས་ཤིང་ཉོན་མོངས་པ་ཞེ་སྡང་མི་མངའ་ཞིང་མེ་ལོང་ལྟ་བུའི་ཡེ་ཤེས་འོད་དཀར་པོར་ཡོད་པའི་བརྡ་ཡིན་ནོ༔ སྣང་བ་མཐའ་ཡས་སྐུ་མདོག་དམར་པོར་བྱུང་བ་འདི་ཡང༔ སངས་རྒྱས་ཐམས་ཅད་ཀྱི་གསུང་གི་དགོངས་པ་འདུས་ཤིང་ཉོན་མོངས་པ་འདོད་ཆགས་མི་མངའ་ཞིང་སོ་སོར་རྟོགས་པའི་ཡེ་ཤེས་འོད་དམར་པོར་ཡོད་པའི་བརྡ་ཡིན་ནོ༔ རྣམ་པར་སྣང་མཛད་སྐུ་མདོག་མཐིང་ཁར་ཡོད་པ་འདི་ཡང་སངས་རྒྱས་ཐམས་ཅད་ཀྱི་ཐུགས་ཀྱི་དགོངས་པ་འདུས་ཤིང༔ ཉོན་མོངས་པ་གཏི་མུག་མི་མངའ་ཞིང༔ ཆོས་དབྱིངས་ཡེ་ཤེས་འོད་མཐིང་ཁར་ཡོད་པའི་བརྡ་ཡིན་ནོ༔ རིན་ཆེན་འབྱུང་(༧༢)ལྡན་སྐུ་མདོག་སེར་པོར་ཡོད་པ་འདི་ཡང༔ སངས་རྒྱས་ཐམས་ཅད་ཀྱི་ཡོན་ཏན་ཀྱི་དགོངས་པ་འདུས་ཤིང༔ ཉོན་མོངས་པ་ང་རྒྱལ་མི་མངའ་ཞིང་མཉམ་ཉིད་ཡེ་ཤེས་འོད་སེར་པོར་ཡོད་པའི་བརྡ་ཡིན་ནོ༔ དོན་ཡོད་གྲུབ་པ་སྐུ་མདོག་ལྗང་གུར་འདུག་པ་འདི་ཡང༔ སངས་རྒྱས་ཐམས་ཅད་ཀྱི་ཕྲིན་ལས་ཀྱི་དགོངས་པ་འདུས་ཤིང༔ ཉོན་མོངས་པ་ཕྲག་དོག་མི་མངའ་ཞིང༔ བྱ་བ་གྲུབ་པའི་ཡེ་ཤེས་འོད་ལྗང་གུར་ཡོད་པའི་བརྡའོ༔ དེ་ཡང་སོ་སོའི་ཡོན་ཏན་དང་བཅས་པ་འདི་ཡང་འཁོར་བ་ཐམས་ཅད་ཟིལ་གྱིས་གནོན་ཅིང་སྐྱོན་གྱིས་མ་གོས་པའི་བརྡ་ཡིན་ནོ༔ ཞབས་ཐམས་ཅད་སེམས་དཔའི་སྐྱིལ་མོ་ཀྲུང་དུ་བཞུགས་པ་ནི༔ བདུད་ཀྱི་དམག་ཐམས་ཅད་ཀྱིས་མི་གཡོ་ཞིང་ཡང་དག་པར་རྫོགས་པར་སངས་རྒྱས་པའི་བརྡ་ཡིན་ནོ༔ རཏྣའི་རྒྱན་ཐམས་ཅད་ཀྱིས་བརྒྱན་པ་ནི་དགོས་འདོད་ཐམས་ཅད་རང་ལས་འབྱུང་ཞིང་སྐུ་གསུམ་འདུ་འབྲལ་མེད་པའི་བརྡའོ༔ སྤྱན་ཐུར་དུ་གཟིགས་ཤིང་ཞལ་འཛུམ་པ་དང་ལྡན་པ་ནི་འགྲོ་བ་ཐམས་ཅད་ལ་བུ་བཞིན་དུ་བརྩེ་ཞིང་སྡུག་བསྔལ་གྱི་རྒྱ་མཚོ་ཆེན་པོ་ལས་སྒྲོལ་བའི་བརྡ་ཡིན་ནོ༔ དེ་ཡང་རྡོ་རྗེ་སེམས་དཔའི་ཕྱག་ཆ་རྡོ་རྗེ་དང་དེས་ཡུ་བ་བྱས་པའི་དྲིལ་བུ་འཛིན་པ་དེ་ཡང་གསལ་སྟོང་གཉིས་སུ་མེད་པའི་བརྡ་ཡིན་ནོ༔ སྣང་བ་མཐའ་ཡས་ཀྱི་ཕྱག་ཆ་པདྨས་ཡུ་བ་བྱས་པའི་རྡོ་རྗེ་དང་དྲིལ་བུ་འཛིན་པ་དེ་ཡང་བདེ་སྟོང་གཉིས་སུ་མེད་པའི་བརྡའ་ཡིན་ནོ༔ རྣམ་པར་སྣང་མཛད་ཀྱི་ཕྱག་ཆ་འཁོར་ལོས་ཡུ་བ་བྱས་པའི་རྡོ་རྗེ་དང་དྲིལ་བུ་འཛིན་པ་འདི་ཡང་རིག་སྟོང་གཉིས་སུ་མེད་པའི་བརྡ་ཡིན་ནོ༔ རིན་ཆེན་འབྱུང་ལྡན་གྱི་ཕྱག་ཆ་རཏྣས་ཡུ་བ་བྱས་པའི་རྡོ་རྗེ་དང་དྲིལ་བུ་འཛིན་པ་འདི་ཡང་ཤར་སྟོང་གཉིས་སུ་མེད་པའི་བརྡ་ཡིན་ནོ༔ དོན་ཡོད་གྲུབ་པའི་ཕྱག་ཆ་རལ་གྲིས་ཡུ་བ་བྱས་པའི་རྡོ་རྗེ་དང་དྲིལ་བུ་འཛིན་པ་འདི་ཡང་སྣང་སྟོང་གཉིས་སུ་མེད་པའི་བརྡ་ཡིན་ནོ༔ རིགས་ལྔ་ཡབ་ཡུམ་རེ་རེར་སྣང་བ་འདི་ཡང་ཐབས་དང་ཤེས་རབ་ཟུང་དུ་འཇུག་པའི་བརྡ་ཡིན་ནོ༔ ཞེས་པའམ༔ ཡང་ན་རིགས་ལྔ་སྤྱི་རྣམ་པ་ཆ་ལུགས་གོང་ལྟར་འདུག་པ་ལྟར་སྤྲོས་པ་ཡང་བཤད་དོ༔
དེ་ནས་དོན་གྱི་དབང་བསྐུར་བ་ནི༔ ཀློང་གསལ་ལས༔ དེ་ལྟར་(༧༣)བརྡ་ཡིས་ངོ་སྤྲད་ཡང༔ ལོགས་ན་ཡོད་པ་མ་ཡིན་ཏེ༔ རང་གི་ལུས་སེམས་འདི་ལ་ཚང༔ ཞེས་པས༔ འདས་མ་འོངས་ད་ལྟར་གསུམ་གྱི་སངས་རྒྱས་ཐམས་ཅད་ཀྱང་རྒྱལ་བ་རིགས་རྣམ་པ་ལྔ་ལ་མ་འདུས་པ་མེད་དེ༔ མཐོ་བ་སྲིད་པའི་རྩེ་མོ་མན་ཆད་ནས་དམའ་བ་ན་རག་དམྱལ་བ་ཡན་ཆོད་དུ་འཁོར་འདས་ཐམས་ཅད་རིགས་ལྔ་ལས་མ་གྱེས་ཤིང་མ་འདུས་པ་མེད་དེ་རྒྱལ་བ་རིགས་ལྔ་ཡབ་ཡུམ་ཡེ་ཤེས་རྣམ་པ་ལྔ་ཡང་ལོགས་ན་ཡོད་པ་མ་ཡིན་ཏེ༔ རང་གི་ལུས་སེམས་འདི་ལ་ཚང་སྟེ༔ ལུས་འབྱུང་བ་ལྔ་ལས་གྲུབ་པ་འདི་རིགས་ལྔ་ཡབ་ཡུམ་ལྔ་དངོས་ཡིན་ཏེ་ཆུ་ལས་ཁྲག་བྱུང་བས་མཱ་མ་ཀཱི་ཡིན༔ ས་ལས་ཤ་བྱུང་བས་སངས་རྒྱས་སྤྱན་ཡིན༔ མེ་ལས་དྲོད་བྱུང་བས་གོས་དཀར་མོ་ཡིན༔ རླུང་ལས་དབུགས་བྱུང་བས་དམ་ཚིག་སྒྲོལ་མ༔ ནམ་མཁའ་ལས་སེམས་བྱུང་བས་དེ་ཀུན་ཏུ་བཟང་མོ་ཆོས་ཀྱི་སྐུ་ཡིན་ནོ༔ དེ་ནས་ལུས་གྲུབ་པ་འདི་ལས་ཕུང་པོ་ལྔ་བྱུང་སྟེ༔ གཟུགས་ཀྱི་ཕུང་པོ་རྡོ་རྗེ་སེམས་དཔའ་ཡིན༔ ཞེ་སྡང་གསལ་ལ་རང་བཞིན་མེད་པ་མེ་ལོང་ཡེ་ཤེས་ཡིན་ཏེ་ལོགས་ན་མེད་དོ༔ འདུ་ཤེས་ཀྱི་ཕུང་པོ་སྣང་བ་མཐའ་ཡས་ཡིན་ཏེ༔ འདོད་ཆགས་བདེ་ལ་སྟོང་པ༔ སོ་སོར་རྟོགས་པའི་ཡེ་ཤེས་ཡིན༔ རྣམ་པར་ཤེས་པའི་ཕུང་པོ་རྣམ་པར་སྣང་མཛད་ཡིན༔ གཏི་མུག་མི་རྟོག་དྲི་མེད་ཆོས་ཀྱི་དབྱིངས་ཀྱི་ཡེ་ཤེས་ཡིན་ནོ༔ ཚོར་བའི་ཕུང་པོ་རིན་ཆེན་འབྱུང་ལྡན་ཡིན༔ ང་རྒྱལ་སྣང་ལ་སྟོང་པ་མཉམ་པ་ཉིད་ཀྱི་ཡེ་ཤེས་ཡིན༔ འདུ་བྱེད་ཀྱི་ཕུང་པོ་དོན་ཡོད་གྲུབ་པ་ཡིན༔ ཕྲག་དོག་རིག་སྟོང་བྱ་བ་གྲུབ་པའི་ཡེ་ཤེས་ཡིན་ཏེ༔ རང་གི་ལུས་སེམས་འདི་ལས་ལོགས་ན་མེད་པས་བདག་གིས་ཁྱེད་རྣམས་ལ་ཡེ་གདོད་མ་ནས་ཡོད་པ་དེ་ངོ་སྤྲད་པ་ཡིན་པས་རིགས་ལྔའི་སངས་རྒྱས་དང༔ ཡེ་ཤེས་ལྔ་དང༔ སྐུ་གསུམ་དང༔ སྐུ་ལྔ་ལ་སོགས་པ་ཐམས་ཅད་ཕྱིར་མ་ཚོལ་ཅིག༔ ཅེས་དོན་ངོ་སྤྲད་དོ༔
དེ་ནས་དམ་ཚིག་གི་དབང་ནི༔ ལྕེ་ལ་བདུད་རྩི་བཞག༔ སྤྱི་བོར་རྡོ་རྗེ་བཞག་སྟེ༔ ཀྱེ་རིགས་ཀྱི་བུ་དག་ཉོན་ཅིག༔ ཐུན་མོང་སྐྱབས་འགྲོ་ནས་བརྩམས་པའི༔ སོ་ཐར་བྱང་སེམས་བསླབ་བྱ་དང༔ (༧༤)རིག་འཛིན་སྔགས་ཀྱི་དམ་ཚིག་ཀུན༔ བྱང་ཆུབ་མ་ཐོབ་བར་དུ་ནི༔ སྲོག་གི་ཕྱིར་ཡང་མ་བཏང་ཞིག༔ དམ་ཚིག་ཉམས་ན་བསྐལ་པ་རུ༔ ངན་སོང་གསུམ་ལས་ཐར་མི་སྲིད༔ དེ་ཕྱིར་སྲུངས་ཤིག་རིགས་ཀྱི་བུ༔ འོ་ཁྱེད་ཀྱིས་གསང་སྔགས་ཀྱི་དབང་ཐོབ་པ་ཡིན་པས་དད་པ་བྱ་ཞིང་དམ་ཚིག་བསྲུང་དགོས་སོ༔ དམ་ཚིག་ས་མ་ཡ་འབུམ་སྡེ་བཤད་ཀྱང༔ ཀློང་གསལ་ལས༔ དམ་ཚིག་ཤིན་ཏུ་མང་བཤད་ཀྱང༔ མདོར་བསྡུས་སྐུ་གསུང་ཐུགས་ཉིད་བསྲུང༔ ཞེས་པས༔ སྐུ་གསུང་ཐུགས་ཀྱི་དམ་ཚིག་ལ་མ་འདུས་པ་མེད་དེ་སྐུའི་དམ་ཚིག་ཏུ༔ རྡོ་རྗེ་སློབ་དཔོན་དང༔ སངས་རྒྱས་བྱང་ཆུབ་སེམས་དཔའ༔ ཡི་དམ་མཁའ་འགྲོ༔ མཆེད་ལྕམ༔ སྤུན་དང༔ སེམས་ཅན་ཐམས་ཅད་དང་འབྱུང་བ་ལྔ་ལ་སོགས་པ་རང་གི་ལུས་ལ་སོགས་པ་ལ༔ མ་གུས་པ་དང་འཐབ་པ་དང་རྩོད་པ་དང༔ བརྡེག་བཙོག་དང༔ བརྐུ་འཕྲོག་དང༔ ངན་སྨྲས་དང༔ དག་སྣང་ལོག་པ་དང༔ མི་དགེ་བ་སྡིག་པར་འགྱུར་བ་ཐམས་ཅད་མི་བྱ་བར་དམ་ཚིག་བསྲུང་ངོ་༔ ཕྱི་སྣོད་ནང་བཅུད་རང་ལུས་ཐམས་ཅད་ཡི་དམ་ལྷར་མ་གྱུར་པ་མེད་པས་ན༔ དམ་ཚིག་མི་བསྲུང་བ་ཐབས་མེད་དོ༔ སྐུའི་རིགས་སུ་གྱུར་པ་ཐམས་ཅད་ལ༔ ཕྱག་དང་མཆོད་པ་བསྟོད་པ་གུས་པའི་སྒོ་ནས་དག་སྣང་ཕྱོགས་མེད་དུ་བྱའོ༔ གསུང་གི་དམ་ཚིག་ཏུ་རྡོ་རྗེ་སློབ་དཔོན་གྱིས་ཅི་གསུངས་པ་ལས་མི་འདའ༔ སངས་རྒྱས་ནས་གང་ཟག་ཕལ་པའི་གསུང་རབ་ཡན་ཆད་ལ་བརྙས་པ་མི་བྱ༔ དག་སྣང་མོས་གུས་བྱའོ༔ འབྱུང་བ་དང་འགྲོ་བའི་སྐད་དུ་གྱུར་པ་ཐམས་ཅད་ལ་ཞེ་སྡང་དང་ཁོང་ཁྲོ་མི་བྱ༔ ཐམས་ཅད་སངས་རྒྱས་ཀྱི་གསུང་དུ་མོས་པ་བྱའོ༔ ཐུགས་ཀྱི་དམ་ཚིག་ཏུ་མི་དགེ་བའི་རྟོག་པ་སྐད་ཅིག་མ་ཡན་ཆད་ཀྱང་སྤངས་ལ་དགེ་བ་བྱང་ཆུབ་ཀྱི་སེམས་དུས་རྒྱུན་ཆད་མེད་པར་བསྒོམ༔ འགྲོ་བ་ཐམས་ཅད་ལ་ཅི་ཕན་འབའ་ཞིག་ཏུ་བྱའོ༔ ཡང་སྐུའི་དམ་ཚིག་ཏུ་ཡི་དམ་བསྐྱེད་རིམ་རྒྱུན་ཆད་མེད་པར་བསྒོམས༔ གསུང་གི་དམ་ཚིག་ཏུ་སྔགས་ཀྱི་བཟླས་བརྗོད་དང་མ་བྲལ་བར་བྱའོ༔ ཐུགས་ཀྱི་དམ་ཚིག་ཏུ་སེམས་རྫོགས་པའི་རིམ་པ་དང་མ་བྲལ་བར་བྱའོ༔
དེ་ལྟར་དམ་ཚིག་བསྲུང་བའི་ཡོན་ཏན་(༧༥)ནི་གནས་སྐབས་དང་མཐར་ཐུག་གཉིས་སུ་འབྱུང་སྟེ༔ སྐུའི་དམ་ཚིག་བསྲུང་བས་གནས་སྐབས་སུ་ལུས་ལ་ན་ཚ་ལ་སོགས་པ་འབྱུང་བའི་ནད་ཐམས་ཅད་མི་འབྱུང༔ ལུས་ཀྱིས་སེམས་ཅན་ལ་ཕན་ཐོགས༔ ལུས་དེ་མཐོང་བ་དང༔ ཐོས་པ་དང༔ རེག་པ་དང༔ དྲི་མའམ་རྫི་ཕྱོགས་ཀྱིས་སེམས་ཅན་ཐམས་ཅད་ཀྱང་བདེ་སྐྱིད་འབྱུང་མཐོ་རིས་སུ་སྐྱེ༔ ལུས་དེ་མཛེས་ཤིང་ཡིད་དུ་འོང་བ་ཀུན་གྱིས་བཀུར་བར་འོང་ངོ་༔ མཐར་ཐུག་ཏུ་ལུས་ལ་རྡོ་རྗེ་སེམས་དཔའི་རྟེན་འབྱོན་པ་དང༔ དེ་བཞུགས་པའི་ས་ལ་ཡང་བྱིན་རླབས་འབྱུང་བ་དང༔ ཚེ་འཕོས་ནས་སེམས་ཅན་རེ་རེའི་མདུན་དུ་སྤྲུལ་པ་འགྱེད་ནུས༔ སྤྲུལ་པ་དེ་དག་ཐམས་ཅད་སངས་རྒྱས་ཀྱི་མཚན་བཟང་པོ་སུམ་ཅུ་རྩ་གཉིས་དཔེ་བྱད་བཟང་པོ་བརྒྱད་ཅུ་འོད་འདོམ་གང་བ་ལ་སོགས་པ་སངས་རྒྱས་ཀྱི་སྐུའི་ཡོན་ཏན་རྫོགས་ནས་སེམས་ཅན་གྱི་དོན་དཔག་ཏུ་མེད་པ་འབྱུང་ཞིང་སངས་རྒྱས་པར་འགྱུར་རོ༔ དམ་ཚིག་མ་ཐུབ་ན་གནས་སྐབས་སུ་ནད་མང་ཚེ་ཐུང་བཞིན་མི་སྡུག་ཐམས་ཅད་དགྲར་ལྡང༔ འགྲོ་བ་གང་གིས་མཐོང་བ་དང༔ ཐོས་པ་དང༔ རེག་པ་ཐམས་ཅད་ངན་སོང་དུ་སྐྱེ༔ མཐར་ཐུག་ན་རག་དམྱལ་བར་ལྷུང་ནས་ངན་སོང་གི་སྡུག་བསྔལ་ཐམས་ཅད་ལུས་ཀྱིས་མྱོང་ཞིང་ཐོན་པའི་དུས་མེད་དོ༔ གསུང་གི་དམ་ཚིག་བསྲུང་ན༔ གནས་སྐབས་སུ་ངག་སྙན༔ ཐམས་ཅད་ཀྱིས་བདེན་པར་བརྩི༔ ལྷ་འདྲེ་མི་གསུམ་བཀའ་ཉན༔ སྙན་ངག་དང་བསྟན་བཅོས་ལ་སོགས་པ་བརྩམ་ནུས༔ རྒྱུད་དང་མན་ངག་ཐམས་ཅད་ཤེས༔ ཆོས་ཐམས་ཅད་རང་རྡོལ་དུ་འབྱུང༔ གསུང་དེ་འགྲོ་བ་གང་གིས་ཐོས་པ་ཐམས་ཅད་ནད་དང་གདོན་ཐམས་ཅད་ཞི༔ ཚེ་དང་བསོད་ནམས་ཐམས་ཅད་འཕེལ༔ ཐམས་ཅད་མཐོ་རིས་སུ་སྐྱེ༔ གང་ལ་གསུང་གི་བྱིན་རླབས་ བྱས་པ་ཐམས་ཅད་བསམ་པ་འགྲུབ༔ གང 
་ལ་ཆོས་བཤད་པ་ཐམས་ཅད་སྐྱེ་བ་གཅིག་ལ་གྲོལ་ལོ༔ མཐར་ཐུག་གསུང་གི་སྤྲུལ་པ་འགྲོ་བ་རེ་རེའི་མདུན་དུ་འགྱེད་ནུས༔ དེས་གང་ལ་གང་འདུལ་དུ་ཆོས་གསུང་ནུས༔ ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གསུང་ནུས་པར་འགྱུར་རོ༔ གསུང་གི་དམ་(༧༦)ཚིག་ཉམས་ན་གནས་སྐབས་སུ་ལྕེ་འབབ༔ མི་ཁ་ལྡང༔ ཁ་ཡོགས་དང་ཁ་མཆུ་མང༔ ཐམས་ཅད་ཀྱིས་བདེན་པར་མི་བརྩི༔ ཉན་མཁན་མི་ཡོང༔ གཏམ་གྱི་ཉེས་པས་རང་གཞན་ཐམས་ཅད་ལ་གནོད༔ དེའི་གཏམ་སུས་ཐོས་པ་ཐམས་ཅད་བཀྲ་མི་ཤིས་ངན་སོང་དུ་སྐྱེའོ༔ མཐར་ཐུག་དེའི་ལྕེ་ལ་རྨོ་དོར་ལྔ་བརྒྱ་བཙུགས༔ ངན་སོང་གསུམ་གྱི་སྡུག་བསྔལ་ཐམས་ཅད་མྱོང་བར་འགྱུར་རོ༔ ཐོན་པའི་དུས་མི་འབྱུང་ངོ་༔ ཐུགས་ཀྱི་དམ་ཚིག་བསྲུང་ན་གནས་སྐབས་སུ་ཏིང་ངེ་འཛིན་བཟང་པོ་སྐྱེ༔ བསམ་པའི་དོན་ཐམས་ཅད་འགྲུབ༔ དགེ་བའི་བསམ་པ་ཐམས་ཅད་སྐྱེ་ཞིང་མི་དགེ་བའི་བསམ་པ་གཏན་ནས་མི་སྐྱེའོ༔ དེས་བཞུགས་པའི་གནས་དེར་སུ་བསྡད་ཀྱང་བསམ་གཏན་སྐྱེ༔ ཡུལ་ཕྱོགས་དེའི་སེམས་ཅན་ཐམས་ཅད་བདེ་བ་ཅན་དུ་སྐྱེའོ༔ ཐུགས་ཀྱིས་གང་དགོངས་པ་ཐམས་ཅད་ལ་བཀྲ་ཤིས་དང་བདེ་ལེགས་ཐམས་ཅད་འབྱུང༔ དེས་གང་ལ་ཐུགས་གཏད་པའི་སེམས་ཅན་ཐམས་ཅད་ཀྱི་ནད་ཐམས་ཅད་ཞི་བར་ནུས་སོ༔ དེ་དང་ཐུགས་འདྲེས་པ་ཐམས་ཅད་ཚེ་གཅིག་ལུས་གཅིག་ལ་སངས་རྒྱས་སོ༔ མཐར་ཐུག་ཐུགས་ཀྱི་སྤྲུལ་པ་འགྲོ་བ་རེ་རེའི་མདུན་དུ་འགྱེད་ནུས་སོ༔ ཐུགས་ཀྱི་དམ་ཚིག་ཉམས་ན༔ གནས་སྐབས་སུ་ཡིད་ཀྱི་སྒྲིབ་པ་ཐམས་ཅད་སོགས༔ མི་དགེ་བའི་བསམ་པ་འབའ་ཞིག་ཏུ་སྐྱེའོ༔ དེས་གང་ལ་བསམ་པ་གཏད་པ་ཐམས་ཅད་བཀྲ་མི་ཤིས་ནད་གདོན་མང༔ དུས་རྒྱུན་དུ་སེམས་མི་བདེ༔ སྙིང་རླུང་དང་སྨྱོ་འབོག་ཡོང༔ ཏིང་ངེ་འཛིན་མི་སྐྱེ༔ དེ་དང་འབྲེལ་བ་ཐམས་ཅད་ངན་སོང་དུ་ལྟུང༔ མཐར་ཐུག་དེའི་ཡིད་ཀྱིས་ངན་སོང་གི་སྡུག་བསྔལ་མྱོང་ཞིང་ཐོན་པའི་དུས་མ་མཆིས་སོ༔ དེ་ལ་སོགས་པའི་སྐྱོན་ཡོན་ཐམས་ཅད་སྤྲོས་ཏེ་བཤད་པར་བྱའོ༔ དེ་ནས་གཞི་མ་སྨིན་པ་སྨིན་པར་བྱེད་པ་ལ་དབང་བསྐུར་དགོས༔ དབང་བརྟེན་པར་བྱེད་པ་ལ་དམ་ཚིག་བསྲུང་དགོས་པས་སྤྱིར་གསང་སྔགས་ནས་བཤད་པའི་དམ་ཚིག་ཐམས་ཅད་བསྲུང༔ ཁྱད་པར་སྐུ་གསུང་ཐུགས་ཀྱི་དམ་ཚིག་མི་བསྲུང་ཁ་ཐབས་མེད་དེ༔ ཐལ་འགྱུར་ལས༔ དབང་(༧༧)བརྟན་པ་ཡི་དམ་ཚིག་བཤད༔ དབྱེ་ན་བརྗོད་ཀྱིས་མི་ལང་ཡང༔ མདོར་བསྡུས་སྐུ་དང་གསུང་དང་ཐུགས༔ རྣལ་འབྱོར་ལུས་ངག་ཡིད་ལ་སྦྱར༔ དམིགས་པ་བླ་མ་རྡོ་རྗེ་མཆེད༔ སྲུང་བ་ཡུལ་གྱི་རྣམ་པ་དབྱེ༔ སྡོམ་པ་འདུས་དང་དབང་དུ་འདུས༔ རྟོག་པ་བཞི་གནས་བཟུང་བའོ༔ ཞེས་པ་དང༔ རིན་ཆེན་སྤུངས་པའི་རྒྱུད་ལས༔ དེ་ཉིད་བརྟན་པའི་ཡན་ལག་ཏུ༔ དམ་ཚིག་རྣམ་གསུམ་བསྲུང་བར་བྱ༔ འདི་དག་སྔོན་དུ་སོང་ནས་ནི༔ ཐེག་མཆོག་རྒྱལ་བའི་ནང་དུ་འཇུག༔ ཅེས་སོ༔ དེས་དམ་ཚིག་གི་དབང་བསྟན་ནོ༔
ད་ནི་རྗེས་ལ་རྣམ་པ་གསུམ་ལས༔ དང་པོ་ཡོན་དབུལ་བ་དང༔ དགའ་སྟོན་བྱ་བ་ནི༔ རིག་པ་རང་ཤར་གྱི་རྒྱུད་ལས༔ དེ་ལྟར་མན་ངག་སློབ་དཔོན་ལ༔ རང་ལུས་དང་ནི་ཏིང་འཛིན་རྫས༔ ཤིན་ཏུ་དཀོན་པ་དག་གིས་བརྟེན༔ ཞེས་པ་དང༔ རིན་ཆེན་གསེར་ནི་རང་ལུས་ཙམ༔ བླ་མ་ལ་ཡང་ཡོན་དུ་དབུལ༔ ཞེས་པ་དང༔ མན་ངག་ལུང་གི་སློབ་དཔོན་ལ༔ ཁུ་བོ་ཕ་དང་མ་དང་མིག༔ བུ་དང་ཆུང་མ་ནོར་གྱི་མཆོག༔ སྒོ་གསུམ་ཟོལ་ཟོག་མེད་པ་ཡིས༔ རབ་ཏུ་གཅེས་དང་ཡིད་འཐད་དབུལ༔ ཞེས་སོ༔ དགའ་སྟོན་བྱ་བར་གསུངས་པ་ཡང༔ ཀློང་གསལ་ལས༔ དབང་བསྐུར་ཐོག་མ་ཐ་མ་རུ༔ དགའ་སྟོན་མ་བྱས་དངོས་གྲུབ་མེད༔ ཅེས་པ་དང༔ སྟོན་མོ་མེད་ན་དོན་མི་འགྲུབ༔ དགའ་སྟོན་ཆེན་པོ་མཆོད་པ་ཡིས༔ བླ་མ་དང་ནི་དེ་ཡི་འཁོར༔ དེ་བཞིན་རང་གི་རྡོ་རྗེ་སྤུན༔ གཅིག་དང་གཉིས་དང་གསུམ་དག་དང༔ བརྒྱ་སྟོང་གྲངས་མེད་དག་ལ་ནི༔ ཚོགས་ཀྱིས་དགའ་བ་སུས་བྱས་པ༔ སྟོན་མོ་ཡོན་དང་བཅས་པ་ཡིས༔ རྣལ་འབྱོར་པ་རྣམས་མགུ་བྱས་ན༔ ལེགས་པ་ཐམས་ཅད་འགྲུབ་པ་དང༔ ཉེས་པ་ཀུན་ལས་གྲོལ་བར་འགྱུར༔ ཞེས་སོ༔ དེ་ནས་བླ་མ་དང་མཆེད་གྲོགས་ཐམས་ཅད་ཡོན་དང་ཚོགས་མཆོད་ཐམས་ཅད་ཀྱིས་མཉེས་པར་བྱས་ནས་མཆོག་དང་ཐུན་མོང་ཐམས་ཅད་ཀྱི་དངོས་གྲུབ་ཐོབ་བོ༔ ཚེ་གཅིག་གིས་སངས་རྒྱས་ཏེ་འགྲོ་བའི་དོན་དཔག་ཏུ་མེད་པ་འཐོབ་པར་འགྱུར་རོ༔ ཡོན་དང་དགའ་སྟོན་མ་བྱས་ན་སྐྱོན་ནི༔ ཀློང་གསལ་ལས༔ བླ་མ་ཡི་དམ་མཁའ་འགྲོ་དང༔ (༧༨)ཆོས་སྐྱོང་རྡོ་རྗེ་སྤུན་ལ་སོགས༔ ཚོགས་མཆོད་ཡོན་གྱིས་མ་མཉེས་ན༔ ནད་མང་ཚེ་ཐུང་བར་ཆད་འབྱུང༔ ཐུན་མོང་དངོས་གྲུབ་མེད་པ་དང༔ མཆོག་ལས་རིང་དུ་སོང་བ་དང༔ ཚེ་འཕོས་ཡི་དྭགས་སྐྱེ་བ་བརྒྱུད༔ ཅེས་སོ༔ དེ་ནས་བླ་མ་ལ་དབང་ཡོན་གྲུབ་ཚད་དབུལ༔ ཡི་དམ་ཌཱཀྐི་ཆོས་སྐྱོང་རྡོ་རྗེ་སྤུན་ཐམས་ཅད་ལ་ཚོགས་འཁོར་དང་མཆོད་པས་མཉེས་པར་བྱའོ༔ ཡོན་དབུལ་ལོ༔
དེ་ནས་བཀའ་བཞིན་བསྒྲུབ་པ་ནི༔ ཀློང་གསལ་ལས༔ བླ་མ་དང་ནི་དབང་ཆོག་གི༔ གསུང་དང་གཞུང་ལས་འགལ་བ་ན༔ ན་རཀ་སྡུག་བསྔལ་མྱོང་བར་འགྱུར༔ ཞེས་སོ༔ རྡོ་རྗེ་སློབ་དཔོན་སངས་རྒྱས་ཀུན་ཏུ་བཟང་པོ་དངོས་ཡིན་པས༔ དེའི་གསུང་ལས་འགལ་བ་དང༔ མི་ཉན་པ་དང་བརྙས་པར་མི་བྱའོ༔ ཅི་གསུང་གི་བཀའ་ཚུལ་བཞིན་དུ་བསྒྲུབ་བོ༔ དབང་ཆོག་ནས་བྱུང་བའི་དགག་བྱ་དང་བསྲུང་བྱ་ཐམས་ཅད་ལས་མི་འགལ་བར་བསྒྲུབ་བོ༔ དེ་ལྟར་བསྒྲུབ་པའི་ཡོན་ཏན་ནི༔ ཀློང་གསལ་ལས༔ བཀའ་དང་མ་འགལ་ཡོན་ཏན་ནི༔ ཆོས་སྐུ་ཀུན་ཏུ་བཟང་པོ་འགྲུབ༔ འཕྲིན་ལས་བཞི་ལ་ཐོགས་པ་མེད༔ ཅེས་སོ༔ བཀའ་བཞིན་བསྒྲུབ་པའོ༔ རྒྱ་རྒྱ་རྒྱ༔
ད་དབང་མ་ཐོབ་པའི་སྐྱོན་དང༔ ཐོབ་པའི་ཡོན་ཏན་ནི༔ སྙིང་གི་མེ་ལོང་གི་རྒྱུད་ལས༔ གསང་སྔགས་དབང་ལ་མ་བརྟེན་འགྲུབ་པར་ག་ལ་འགྱུར༔ དཔེར་ན་མཉེན་པ་ལག་སྐྱ་མེད་པ་བཞིན༔ ཕ་རོལ་སྒྲོལ་བར་ག་ལ་ནུས༔ དབང་རྣམས་རབ་ཏུ་ཐོབ་བྱས་ན༔ གསང་སྔགས་ཐམས་ཅད་མ་སྒྲུབ་འགྲུབ༔ ཅེས་པ་དང༔ ཀློང་གསལ་ལས༔ དཔེར་ན་ཞིང་ས་གཤིན་པོ་ཡོད་གྱུར་ཀྱང༔ སོ་ནམ་རིམ་པར་མ་བྱས་ན༔ འབྲས་བུ་སྨིན་པར་མི་འགྱུར་ལྟར༔ སེམས་ལ་ཆོས་ཉིད་གནས་གྱུར་ཀྱང༔ དབང་གིས་སྨིན་པར་མ་བྱས་ན༔ རྣལ་འབྱོར་དངོས་གྲུབ་ག་ལ་ཐོབ༔ ཅེས་སོ༔ ཡང་དེ་ཉིད་ལས༔ དབང་ཐོབ་རིགས་ཀྱི་བུ་དེ་ཉིད༔ ཚེ་འདིར་བསམ་ཀུན་འགྲུབ་པ་དང༔ ཕྱི་མ་མངོན་པར་རྫོགས་སངས་རྒྱས༔ ཞེས་པ་དང༔ དབང་མེད་འཁོར་བའི་མཐའ་སྙོགས་ཏེ༔ འདི་ཕྱིར་བདེ་བ་ཐོབ་པ་མེད༔ ཅེས་སོ༔ དེས་དབང་ཐོབ་མ་ཐོབ་ཀྱི་སྐྱོན་ཡོན་བསྟན་པའོ༔ དེ་ལྟར་བླ་(༧༩)མ་མཚན་ཉིད་དང་ལྡན་པས་དབང་བསྐུར་བས་སྐལ་བ་དང་ལྡན་པའི་སློབ་བུ་ལ༔ སངས་རྒྱས་ཀྱི་འབྲས་བུ་ཐོགས་པ་མེད་པར་འབྱུང་ངོ་༔ དཔེར་ན་ཞིང་ས་གཤིན་པོ་ལ་ས་བོན་བཏབ་ནས་སོ་ནམ་ལེགས་པོར་བྱས་ན་འབྲས་བུ་སྨིན་པ་དང་འདྲ་བར་རང་རྒྱུད་རྣམ་པར་དག་པ་ལ་དབང་བསྐུར་ནས་དམ་ཚིག་མ་ཉམས་པར་བརྟེན་པས་སེམས་ཆོས་ཉིད་དུ་འབྲས་བུ་སྨིན་པའོ༔ དཔེར་ན་འབྲས་ནས་ལ་སོགས་པ་སྨིན་པ་དེ་བཞག་པས་ཆོག་པ་མ་ཡིན་ཏེ༔ རྩས་མ་རྔས་འབྲས་བུ་བསྡུས་ནས་རྔོ་བཏག་ལ་སོགས་པ་བྱས་ནས་བཟའ་རུ་རུང་བ་དང་འདྲ་བར་སེམས་ཀྱི་འབྲས་བུ་སྨིན་པ་དེ་ཡང་གྲོལ་བར་བྱེད་པ་ལ༔ བླ་མའི་གདམས་པ་ཕྱིན་ཅི་མ་ལོག་པ་བརྟེན་དགོས་སོ༔ འོ་ན་སྨིན་པ་གྲོལ་ཅི་དགོས་ཞེ་ན༔ འབྲས་བུ་སྨིན་པ་དེ་མ་བརྔས་པར་བཞག་ན་དོན་ནས་བྱེད་མི་ནུས་པ་བཞིན་དུ་དབང་བསྐུར་རྒྱུད་ཡོངས་སུ་སྨིན་ཡང༔ བླ་མའི་གདམས་ངག་གིས་གྲོལ་བར་མ་བྱས་ན་དོན་མེད་དོ༔ དཔེར་ན་དབང་བསྐུར་བས་རྒྱུད་སྨིན་པ་ནི༔ གསེར་དངུལ་བཏུལ་ཏེ་ལྗོང་བར་སོང་བ་དེ་ལ༔ ལྷ་སྐུ་དང་ཡི་གེ་ལ་སོགས་པ་ཅི་བྱས་ཀྱང་ཉན་ལ༔ མ་བཏུལ་བ་ལ་ཅི་ཡང་མི་བཏུབ་པ་དང་འདྲ་བར་སེམས་འདི་ཡང་བག་ཆགས་དང་སྡིག་སྒྲིབ་ཐམས་ཅད་དབང་གིས་དག་པར་བྱས་ནས་རྒྱུད་དག་ཅིང་སྨིན་ནས་མཆོག་དང་ཐུན་མོང་གི་དངོས་གྲུབ་ཐམས་ཅད་འབྱུང༔ སྡིག་སྒྲིབ་མ་དག་ཅིང་རྒྱུད་མ་སྨིན་ན་ངན་སོང་དུ་འགྲོ་བའོ༔ དེས་རྟེན་ཁྱད་པར་ཅན་དུ་བསྒྲུབ་པར་བྱ་བའི་ཕྱིར་དབང་གྲོགས་དམ་ཚིག་དང་བཅས་པ་བསྟན་པའོ༔ རིག་པ་རང་གྲོལ་གྱི་རྒྱུད་ལས༔ དབང་བསྐུར་དཀྱིལ་འཁོར་རྫོགས་ནས་ནི༔ གདམས་ངག་རྒྱས་པར་གདབ་པར་བྱ༔ ཞེས་པས་གདམས་ངག་ལོགས་སུ་ཤེས་སོ༔ གཏེར་མ་འདི་ལ་དབང་བསྐུར་བའི་ལུང་མེད་ཅེས་མ་འོངས་པའི་དུས་ན་བླུན་པོ་འགའ་ཞིག་སྨྲ་བས༔ བརྒྱུད་པ་ལྔའམ་དྲུག་གང་རུང་གཅིག་དང་མི་ལྡན་ན་དབང་བསྐུར་དུ་མི་བཏུབ་སྟེ༔ གང་ཟག་སྙན་ཁུང་གི་བརྒྱུད་པ༔ རྒྱལ་བ་དགོངས་པའི་བརྒྱུད་པ༔ རིག་འཛིན་བརྡའི་བརྒྱུད་པ༔ ཐུགས་རྗེ་བྱིན་རླབས་ཀྱི་བརྒྱུད་པ༔ མཁའ་འགྲོ་གཏད་རྒྱའི་བརྒྱུད་པ༔ སྨོན་ལམ་དབང་བསྐུར་གྱི་བརྒྱུད་པ་དང་དྲུག་གམ༔ (༨༠)ལྔ་ལས་གཏེར་མ་འདི་ལ་བརྒྱུད་པ་དྲུག་ཀ་ཚང་སྟེ༔ གཏེར་ལུང་ཆེན་མོ་ལས༔ སྤྲུལ་སྐུས་ཆོས་རྣམས་གསུངས་པ་ཡང༔ སྒྲ་ཚིག་དོན་ལས་ལོགས་ན་མེད༔ གཏེར་ཡིག་སྤྲུལ་པའི་སྐུ་ཡིན་ཕྱིར༔ དེ་ཡི་བརྗོད་ཚིག་སྒྲ་ཡང་ཡིན༔ དེ་ཉིད་གོ་བ་དོན་ཡིན་ནོ༔ ཞེས་པས༔ སྤྲུལ་སྐུས་གསུངས་པའི་སྙན་བརྒྱུད་ཀྱང༔ བླ་མ་དེས་གསུང་དེས་ཉན༔ ཉན་པ་དེས་གོ༔ གོ་བ་དེས་ཉམས་སུ་ལེན་པ་ལས་མེད་གཏེར་མ་ལ་ཡང༔ གཏེར་དཔེ་བླ་མ༔ དེའི་ནང་ན་བཞུགས་པ་དེ་གསུང༔ དེ་བལྟས་པས་གོ༔ གོ་བ་དེ་ཉམས་སུ་བླངས་པས་བླ་མ་སངས་རྒྱས་དང་རང་སེམས་དབྱེར་མེད་དུ་གྱུར་ཙ་ན་སྙན་བརྒྱུད་དམ་པའོ༔ ཅི་ནས་ཀྱང་སེམས་ཅན་སྐྲོག་པ་ལྟར་བླ་མ་ཡིན་ཟེར་བ་གཅིག་གིས་ཀུས་གདབ་མི་དགོས༔ དེ་མིན་ཡང་གཏེར་ལུང་ལས༔ ཆོས་སྐུ་ཀུན་ཏུ་བཟང་པོ་ལ༔ བླ་མ་བྱ་བ་ཡོད་མིན་ཏེ༔ དབང་བསྐུར་ཆོས་བཤད་བྱེད་མཁན་མེད༔ རང་སེམས་ཆོས་སྐུར་ཤེས་ཙ་ན༔ དུས་གསུམ་རྒྱལ་བའི་དབང་ལུང་ཐོབ༔ བརྒྱུད་པར་འཛིན་པ་རྟོག་པ་ཡིན༔ ཞེས་སོ༔ རྒྱལ་བ་དགོངས་པའི་བརྒྱུད་པ་ཡང་འདི་ལ་ཚང་སྟེ་རྒྱལ་བ་རིགས་ལྔས་རིམ་པ་བཞིན་དུ་སྣོད་ལྡན་ལ་དགོངས་པ་ཙམ་གྱིས་རིག་པའི་རྩལ་དབང་ཐོབ༔ བདག་འདྲ་པདྨས་ཀྱང་མ་འོངས་པ་ལ་དགོངས་ནས་ཟབ་གཏེར་དབང་བཀའ་དང་བཅས་པ་སྦས་ནས་དེ་སུས་ཐོན་པ་ལ་རྒྱལ་བ་དགོངས་པའི་དབང་བཀའ་ཡོད་པའོ༔ རྒྱལ་བའི་གཏེར་ལུང་ལས༔ རྒྱལ་བ་དགོངས་པ་གཉིས་ཀྱི་ཚུལ༔ དགོངས་པ་བསམ་པ་དབང་གི་མཆོག༔ ཅེས་སོ༔ རིག་འཛིན་བརྡའི་བརྒྱུད་པ་ཡང་ཚང་སྟེ༔ ཀུན་ཏུ་བཟང་པོ་ནས་རིགས་ལྔའི་སངས་རྒྱས་གཅིག་ནས་གཉིས་སུ་བརྒྱུད་པ་ཐམས་ཅད་དུ༔ ཕྱག་རྒྱའི་བརྡ་བསྟན་པ་ཙམ་གྱིས་དབང་དང་དངོས་གྲུབ་ཐོབ༔ བདག་འདྲ་པདྨ་ངས་ཀྱང་མ་འོངས་པའི་སྣོད་ལྡན་ལ་དབང་བསྐུར་བ་འདི་བཞིན་གྱིས་ཞེས་པའི་གཏེར་དཔེ་བཞག་པས་སློབ་བུས་དེ་ལྟར་དུ་བསྐུར་བས་བྱིན་རླབས་དང་དངོས་གྲུབ་ཐོབ་སྟེ་དབང་བཀའ་ཡོད་པ་ཡིན་ནོ༔ རིག་པ་བདུན་པའི་རྒྱུད་ལས༔ བརྡ་དང་བརྡ་མཚོན་གོ་བ་ནི༔ དབང་གི་ནང་ནས་དབང་བཀའོ༔ ཞེས་སོ༔ ཐུགས་རྗེ་བྱིན་རླབས་ཀྱི་བརྒྱུད་པ་ཡང་(༨༡)ཚང་སྟེ༔ ཀུན་ཏུ་བཟང་པོ་ནས་རིམ་པ་བཞིན་དུ་བྱིན་གྱིས་བརླབས་པ་ཙམ་གྱིས་རིག་པ་ལ་དབང་ཐོབ་སྟེ་བདག་འདྲ་པདྨས་ཀྱང་མ་འོངས་དོན་དུ་ཟབ་པའི་གཏེར་དུ་སྦས་པས་དེ་སུས་ཐོན་པ་ལ་བྱིན་རླབས་ཞུགས་ཏེ༔ རིག་པའི་རྩལ་དབང་ཐོབ་ནས་སློབ་མས་ཀྱང་བསྐུར་ནུས་པས་ན་བྱིན་རླབས་ཀྱི་བརྒྱུད་པའོ༔ གཏེར་ལུང་ལས༔ གང་གི་བྱིན་རླབས་ཞུགས་པ་དེ༔ དབང་གི་དམ་པ་མཆོག་ཏུ་དབང༔ ཞེས་སོ༔ མཁའ་འགྲོ་གཏད་རྒྱའི་བརྒྱུད་པ་ཡང་ཚང་སྟེ་ཀུན་ཏུ་བཟང་པོ་ནས་རིམ་པ་བཞིན་དུ་སྣོད་ལྡན་དང་མ་འཕྲད་ཀྱི་བར་དུ་རྒྱས་བཏབ་ནས་ཌཱཀྐི་མ་ལ་གཏེར་གཏད་དེ་སྣོད་མིན་ལ་བསྲུང་ལ་སྣོད་ལྡན་ལ་གཏོད་ཅེས་པས་དེས་རྒྱལ་བའི་བཀའ་བཞིན་དུ་གཏད་པས་དབང་ཐོབ་ནས་ཡང་དག་པར་སངས་རྒྱས་པ་བཞིན་དུ་བདག་འདྲ་པདྨས་ཀྱང་མ་འོངས་དོན་དུ་གཏེར་དུ་སྦས་ནས་མཁའ་འགྲོ་མ་དང་འཇིག་རྟེན་གྱི་ལྷ་འདྲེ་ལ་གཏད་ནས་སྣོད་ལྡན་འདི་ལ་གཏེར་འདི་གཏོད༔ སྣོད་མིན་ལེན་ན་དབང་པོ་སྣུབས༔ ཞེས་གཏད་པས་གཏེར་སྲུང་རྣམས་ཀྱིས་ཀྱང་སྣོད་དང་ལྡན་པ་ལ་གཏད་པས་དབང་གི་ལུང་ཐོབ་པ་ཡིན་ཏེ་གཏེར་ལུང་གཏད་རྒྱ་ལས༔ གཏད་རྒྱ་གང་ལ་གཏད་པ་ནི༔ སངས་རྒྱས་ཀུན་གྱི་དབང་འཛིན་པ༔ ཞེས་སོ༔ སྨོན་ལམ་དབང་བསྐུར་གྱི་བརྒྱུད་པ་ཡང་འདི་ལ་ཚང་སྟེ་ཆོས་ཐམས་ཅད་སྨོན་ལམ་གྱི་མཐའ་བསྒྱུར་བས་སྨོན་ལམ་ནི་སངས་རྒྱས་ཀྱི་བདེན་པའི་བཀའ་ཡིན་ཏེ༔ བཀའ་ནི་མི་བསླུ་དབང་གི་མཆོག༔ ཅེས་པས༔ བདག་འདྲ་པདྨས་ཀྱང་གཏེར་དུ་གཏམས་ཚད་ལ༔ མ་འོངས་ལས་ཅན་ཅིག་དང་འཕྲད་པར་ཤོག༔ ཅེས་སྨོན་ལམ་བཏབ་པས་དེའི་མཐུས་ལས་ཅན་རེ་དང་འཕྲད་པར་ངེས་པ་ཡིན་ཏེ་སྐལ་མེད་ཀྱི་ལག་ཏུ་མི་འབྱུང་ངེས་སོ༔ དབང་ཐམས་ཅད་ཀྱི་དམ་པ་སྨོན་ལམ་ཡིན་ཏེ་དེས་ན་སྨོན་ལམ་དབང་གིས་བཀའ་མ་ཆད་པ་འདི་ཉིད་དོ༔ གཏེར་ལུང་ལས༔ སྨོན་ལམ་དབང་ནི་དབང་བསྐུར་མཆོག༔ ཅེས་སོ༔ བརྒྱུད་པ་མེད་ཅིང་དབང་བཀའ་མེད་ཟེར་བའི་ཐེ་ཚོམ་བསལ་ལོ༔ མཁའ་འགྲོ་སྙིང་ཐིག་གི་ཕྱི་དབང་སློབ་བུ་ཐུན་མོང་དུ་སྨིན་པར་བྱེད་པ་དོན་གསལ་སྒྲོན་མེ་ཞེས་བྱ་བ་ཀློང་གསལ་ནས་བཏུས་པ་རྫོགས་སོ༔ ས་མ་ཡ༔ རྒྱ་རྒྱ་རྒྱ༔ ལས་ཅན་ཅིག་དང་འཕྲད་(༨༢)པར་ཤོག༔ ལྡང་ལྷས་བཀའ་འདི་སྲུང་ལ་བྱ་ར་གྱིས༔ སྣོད་དང་ལྡན་པ་དེ་ལ་གཏོད་ཅིག་ས་མ་ཡཱ༔ ཁ་ཐམ༔ ཐ།ཐསིུསུམཱིཝྱིཐུཀ༔ དགེའོ༔