ཟབ་ཆོས་མཁའ་འགྲོ་ཡང་ཏིག་གི་པུསྟ་ཀ་པར་དུ་བསྒྲུབས་ཚུལ་དཀར་ཆག་ཉུང་ངུ་ཨུཏྤ་ལའི་ཕྲེང་བ་ཞེས་བྱ་བ།

༄༅། །ཟབ་ཆོས་མཁའ་འགྲོ་ཡང་ཏིག་གི་པུསྟ་ཀ་པར་དུ་བསྒྲུབས་ཚུལ་དཀར་ཆག་ཉུང་ངུ་ཨུཏྤ་ལའི་ཕྲེང་བ་ཞེས་བྱ་བ་བཞུགས།

༄༅། །ༀ་སྭསྟི་སིདྡྷཾ། བགྲང་ཡས་སྲས་བཅས་རྒྱལ་ཀུན་མཁྱེན་ནུས་བརྩེ། །གསང་གསུམ་ཡོན་ཏན་ཕུང་པོ་ཅིག་ཅར་དུ། །མཚོ་དབུས་པད་སྦུབས་སྙིང་པོར་སྨིན་པའི་དཔྱིད། །མཚོ་སྐྱེས་རྡོ་རྗེ་འགྲོ་བའི་བླ་མར་འདུད། །རྒྱལ་སྲས་བྱེ་བས་བསྡུ་བར་མ་ནུས་པའི། །སངས་རྒྱས་གཉིས་པའི་གསང་ཆེན་བཀའི་བསྡུ་མཛད། །མཁའ་སྤྱོད་བདེ་ཆེན་ཌཱཀྐི་ཡོངས་ཀྱི་གཙོ། །མ་གཅིག་ཡེ་ཤེས་མཚོ་རྒྱལ་དེར་ཕྱག་འཚལ། །གཞུང་ལུགས་འབུམ་ཕྲག་ཡངས་པའི་ནམ་མཁའ་ལ། །ཐོགས་མེད་སྤྱོད་པའི་བློ་གྲོས་འོད་སྟོང་ཅན། །སྙིང་ཏིག་བསྟན་པའི་པད་ཚལ་བཞད་པའི་གཉེན། །ཀུན་མཁྱེན་དྲི་མེད་འོད་ཟེར་བསམ་གྱིན་གུས། །གང་གི་མཁྱེན་དཔྱོད་ཡངས་པའི་གྲུ་གཟིངས་ཀྱིས། །རྒྱལ་བའི་ཆོས་ཚུལ་རྒྱ་མཚོ་བརྒལ་བ་ལས། །ཉེ་བར་ཐོབ་པའི་ཡང་ཏིག་ཡིད་བཞིན་ནོར། །ཟབ་ཆོས་རིན་ཆེན་འདི་མཚུངས་གཞན་ཡོད་མིན། །དེ་ཕྱིར་ཆོས་ཀྱི་དེད་དཔོན་ཀློང་ཆེན་པས། །ལེགས་བཤད་བྱི་དོར་གྱིས་གཙང་པུསྟ་ཀར། །ཆོས་ཚན་བཞུགས་གྲངས་དཀར་ཆག་ཨུཏྤལ་ཕྲེང་། །དཔྱོད་ལྡན་མགྲིན་པའི་རྒྱན་དུ་འདི་ན་སྤེལ། །ཅེས་མཆོད་པར་བརྗོད་པ་ཅུང་ཟད་ཀྱིས་མདུན་བསུས་ནས། འདིར་རྒྱལ་བ་གཉིས་པ་ཨོ་རྒྱན་དུས་གསུམ་མཁྱེན་པའི་ཐུགས་བཅུད་ཟབ་ཆོས་མཁའ་འགྲོ་སྙིང་ཏིག་ལས་འཇམ་མགོན་ཀློང་ཆེན་པས་ཟབ་མོའི་གནད་རྣམས་ལེགས་པར་བཀྲལ་བའི་དགོངས་གཏེར་བསྟན་བཅོས་མཁའ་འགྲོ་ཡང་ཏིག་ཏུ་གྲགས་པའི་ཟབ་ཆོས་ཀྱི་པུསྟཀཿའདི་ཉིད་པར་དུ་བསྒྲུབས་པའི་ཚུལ་ལས་བརྩམ་སྟེ་ལོ་རྒྱུས་གླེང་བ་ཅུང་ཟད་གཅིག་བརྗོད་ན།

འདི་ལ་གསུམ་ཏེ་གང་ལས་བྱུང་བའི་ལོ་རྒྱུས། པར་དུ་བསྒྲུབས་པའི་ཚུལ། ཆོས་ཚན་བཞུགས་བྱང་ཡོངས་བསྔོ་དང་བཅས་པ་ལས། དང་པོ་ནི། རྒྱལ་བ་ཀུན་གྱི་འཕྲིན་ལས་པ་ཨོ་རྒྱན་དུས་གསུམ་མཁྱེན་པ་དེ་ཉིད་ཀྱིས་འཛམ་བུའི་གླིང་ཀུན་ཏུ་བསྟན་འགྲོའི་ཕན་བདེ་སྤེལ་བའི་འཕྲིན་ལས་ནི་མཐའ་ཡས་ལ། ཁྱད་པར་དུ་གངས་ཅན་བོད་ཀྱི་ཡུལ་འདིར་ལྷ་འདྲེ་གདུག་པ་ཅན་ཐམས་ཅད་དམ་ལ་བཏགས་ཤིང་བསམ་ཡས་ལ་སོགས་པའི་གཙུག་ལག་ཁང་མང་པོར་རབ་ཏུ་གནས་པར་མཛད་པ་དང་། མདོ་སྔགས་ཀྱི་ཆོས་མང་པོ་བསྒྱུར་ནས་རྒྱལ་བའི་བསྟན་པ་རིན་པོ་ཆེ་ཉི་མ་ཤར་བ་ལྟར་མཛད་པས། བོད་ཡུལ་འདིར་རྒྱལ་བའི་ཕྲིན་ལས་འདྲེན་པའི་ཤིང་རྟ་གཅིག་པུ་པ་སྟེ་ལྗོངས་འདིར་ཐུབ་བསྟན་ཐོག་མར་སྣང་བར་གྱུར་པ་ནི་སློབ་དཔོན་རིན་པོ་ཆེ་འདི་ཁོ་ནའི་བཀའ་དྲིན་ལས་གཞན་དུ་མ་དམིགས་སོ། །གཞན་ཡང་བོད་ཡུལ་མཐའ་དབུས་མེད་པར་ས་གཞི་རྟ་མིག་གང་ཡན་ཆད་ཞབས་ཀྱིས་བཅགས་ཤིང་བཀྲ་ཤིས་པར་མཛད། རི་བྲག་མང་པོ་སྒྲུབ་པའི་གནས་སུ་བྱིན་གྱིས་བརླབས་ནས་ཟབ་མོའི་གཏེར་ཁ་བསམ་གྱིས་མི་ཁྱབ་པ་སྦ་བར་མཛད་དེ། དེ་ལྟ་བུའི་ཨོ་རྒྱན་དུས་གསུམ་མཁྱེན་པ་དེ་ཉིད་གཞུ་སྟོད་གཏེར་སྒྲོམ་བྲག་ན་བཞུགས་པའི་དུས་སུ་མཁའ་འགྲོ་སྙིང་ཏིག་གི་ཆོས་སྐོར་རྣམས་བཀའ་རྒྱ་བཀྲོལ་ནས་ཡེ་ཤེས་མཚོ་རྒྱལ་དང་མཁའ་འགྲོ་མ་འབུམ་ཕྲག་གཅིག་ལ་དབང་བསྐུར་ནས་རྒྱ་ཆེན་སྤེལ་བའི་ཚེ། རྒྱལ་པོ་ཁྲི་སྲོང་ལྡེའུ་བཙན་གྱིས་མཆིམས་ཕུར་སྤྱན་དྲངས་ནས་ཚོགས་འཁོར་བརྒྱ་རྩ་མཛད་པའི་དུས་སུ་རྒྱལ་པོའི་སྲས་མོ་ལྷ་ལྕམ་པདྨ་གསལ་གྲོངས་པས། མོའི་རོ་ལ་སློབ་དཔོན་གྱིས་རྣམ་ཤེས་བཀུགས་པས་སྨྲ་ཞིང་འགྲོ་ནུས་པར་བྱུང་བའི་ཚེ་དབང་བསྐུར་ཞིང་གདམས་པའི་བེ་བུམ་སྤྱི་བོར་བཞག་ནས་བཀའ་གཏད་མཛད་ཅིང་མོ་རང་གི་ཆོས་སྐལ་དུ་དྭགས་པོའི་དང་ལུང་ཁྲ་མོ་བྲག་ལ་གཏེར་དུ་སྦས་སོ། །

དེ་ནས་ལྔ་བཅུ་ཁ་རལ་གྱི་དུས་སུ་སྦ་སྒང་པ་སྤྲུལ་སྐུ་རིན་ཆེན་ཚུལ་ཁྲིམས་རྡོ་རྗེ་ཞེས་པར་སྐུ་འཁྲུངས་ཤིང་། ཁྲ་མོ་བྲག་ནས་མཁའ་འགྲོ་སྙིང་ཏིག་གི་ཆོས་སྐོར་རྣམས་སྤྱན་དྲངས་ཀྱང་། གཏེར་སྟོན་ཉིད་རྟེན་འབྲེལ་གཞན་དབང་དུ་གྱུར་པས་སྐུ་གཤེགས། སྐུ་འཕོས་མ་ཐག་གི་སྐྱེ་བ་ནི་ཀུན་མཁྱེན་ཆེན་པོ་འདི་ཡིན་ཏེ། དེ་ཡང་གཡོ་རུ་གྲྭ་ཡི་ཕུར་རྒྱལ་བ་མཆོག་དབྱངས་ཀྱི་གདུང་རབས་ཉེར་ལྔ་པར་སྐུ་འཁྲུངས། ནམ་གྲུ་རེ་མ་ཏི་ལུས་དང་གྲིབ་མ་བཞིན་དུ་འགྲོག་ཅིང་བསྲུང་བ་ཀུན་གྱིས་མཐོང་། ལོ་ལྔ་ནས་འབྲི་ཀློག་པར་མཁྱེན། བཅུ་གསུམ་པ་ལ་རབ་ཏུ་བྱུང་བའི་མཚན་ཚུལ་ཁྲིམས་བློ་གྲོས་སུ་འབོད། ཤེས་བྱ་རིག་པའི་གནས་བཟོ་གསོ། སྒྲ་ཚད། སྙན་ངག །མངོན་བརྗོད། སྡེབས་སྦྱོར། སྐར་རྩིས་སོགས་མི་མཁྱེན་པ་མེད་ཅིང་། ཁྱད་པར་དུ་དབུ་མ། ཕར་ཕྱིན། འདུལ་མངོན་ཐམས་ཅད་མཁས་པར་མཁྱེན། གཞན་ཡང་གསང་འདུས། བདེ་མཆོག །ལམ་འབྲས། སྦྱོར་དྲུག །ཞི་བྱེད་གཅོད་ཡུལ་རྫོགས་ཆེན་སེམས་ཕྱོགས་སོགས་གསན་ཅིང་། མདོར་ན་མདོ་རྒྱུད་ལུང་རིགས་མན་ངག་རྒྱ་མཚོའི་ཕ་རོལ་དུ་གཤེགས་པའི་མཁས་པ་ཆེན་པོར་གྱུར། ཁྱད་པར་དུ་བླ་མ་ཀུ་མ་རཱ་ཛ་ལ་རྫོགས་པ་ཆེན་པོ་གསང་བ་སྙིང་ཏིག་གི་ཆོས་སྐོར་མ་ལུས་པ་གསན་པས་བླ་མས་ཀྱང་ཆོས་ཀྱི་བདག་པོར་ལུང་བསྟན་ཅིང་མངའ་གསོལ་ནས་བསྟན་པ་གཏད། གཞན་ཡང་ཡི་དམ་གྱི་ལྷ་དུ་མའི་ཞལ་གཟིགས་ཤིང་། ཁྱད་པར་དུ་དབྱངས་ཅན་མས་ཕྱག་མཐིལ་དུ་པ་ཞག་ནས་གླིང་བཞི་རི་རབ་དང་བཅས་པ་ཞག་བདུན་དུ་གཟིགས། རྗེ་བཙུན་སྒྲོལ་མས་རིན་པོ་ཆེའི་པྲོག་ཞུ་དབུ་ལ་བཅིངས་ནས་བྱིན་གྱིས་བརླབས་པའི་གནང་བ་བྱིན། མགོན་པོ་བྱམས་པས་སྐྱེ་བ་གཉིས་ནས་རྒྱལ་བ་རི་རབ་མར་མེའི་རྒྱལ་མཚན་དུ་སངས་རྒྱས་པར་འགྱུར་བའི་ལུང་བསྟན་གནང་། མཁའ་འགྲོ་མ་རྣམས་དང་ཆོས་ཀྱི་བགྲོ་བ་མི་དང་མི་ལབ་པ་ལྟར་མཛད་ཅིང་། སྔགས་བདག་གཟའ་དང་དམ་ཅན་རྣམས་མི་དང་མི་འགྲོགས་པ་བཞིན་དུ་བྲན་དང་གཡོག་ཏུ་འཁོལ་བ་སོགས་མངའ་ལ། གཞན་ཡང་མདོ་སྔགས་རིག་ལམ་དང་བཅས་པའི་བསྟན་བཅོས་མང་པོ་དང་། ཁྱད་པར་དུ་རྫོགས་པ་ཆེན་པོའི་ལམ་སྲོལ་ཇི་ལྟ་བ་བཞིན་སྟོན་པའི་བསྟན་བཅོས་མང་དུ་མཛད། ས་སྐྱ་པ་བླ་མ་དམ་པ་དང་གསང་ཕུ་བ་གྲགས་བཟང་སོགས་མཁས་པ་མང་པོས་དངོས་དང་ཕྲིན་ཡིག་གི་ལམ་ནས་རྫོགས་པ་ཆེན་པོའི་ལྟ་གྲུབ་ལ་དྲི་བ་བྱུང་བ་རྣམས་ལ་ཐེ་ཚོམ་སེལ་བའི་ལན་དགྱེས་པར་ཕུལ། མཁས་པར་རློམས་པའི་རྒོལ་ངན་གཉིས་འཐུང་གི་ཀླད་པ་ལུང་རིགས་གནམ་ལྕགས་སྡེར་མོས་འགེམས་པར་མ་བཟོད་ནས་ཀུན་གྱིས་ཞབས་ལ་བཏུད་ཅིང་། དུས་དེ་ཙ་ན་ལུང་རིགས་སྨྲ་བའི་ཁྱུ་མཆོག་ཏུ་གྱུར་ཏེ་སུས་ཀྱང་འགྲན་དུ་མ་བཟོད་པས། དོན་དང་མཐུན་པའི་མཚན་ཀུན་མཁྱེན་བསམ་ཡས་པ་ངག་གི་དབང་པོ་ལུང་མང་པར་གྲགས་སོ། །

དེ་ལྟ་བུའི་རྣམ་པར་ཐར་པ་བསམ་བརྗོད་ཀྱི་ཡུལ་ལས་འདས་པའི་ཀུན་མཁྱེན་ཆེན་པོ་དེ་ཉིད་མཆིམས་ཕུར་གསང་བ་སྙིང་ཏིག་གི་ཁྲིད་འཆད་པའི་སྐབས་སུ་མཁའ་འགྲོ་མ་རྣམས་དང་བཀའ་སྲུང་རྣམས་ཀྱིས་ཡང་ཡང་བསྐུལ་བས། མཁའ་འགྲོ་སྙིང་ཏིག་གི་ཆོས་བཀའ་འབྱེད་པར་མཛད་པས། དེའི་ཚེ་མཁའ་འགྲོའི་འདུ་བ་མང་པོ་དང་། བྱིན་རླབས་ཀྱི་རང་སྒྲ་དང་། ནམ་མཁའ་འཇས་ཁེངས་པ་དང་། རྣལ་འབྱོར་པ་ཕོ་མོ་རྣམས་ལ་བདེ་གསལ་མི་རྟོག་པའི་ཉམས་དང་འོད་གསལ་གྱི་ངང་ལ་ཉིན་མཚན་འཁོར་ཡུག་ཏུ་འབྱམས་པ་ཟླ་བ་གཅིག་གི་བར་དུ་བྱུང་ཞིང་། ཁྱད་པར་དུ་ཨོ་རྒྱན་ཆེན་པོའི་ཞལ་ཡང་ཡང་གཟིགས་ཤིང་བྱིན་གྱིས་བརླབས་པ་དང་། ཡེ་ཤེས་ཀྱི་མཁའ་འགྲོས་སྙིང་ཏིག་གི་ཟབ་གནད་རྣམས་མངོན་སུམ་དུ་བཀའ་བཀྲོལ་ནས་གནང་སྟེ། གཅིག་པུར་བསྒོམ་ན་འོད་ལུས་འགྲུབ་ཀྱང་། གཞན་ལ་ཕན་ཕྱིར་འགྲོ་དོན་ལ་བརྩོན་དགོས་པར་རྗེས་སུ་བསྐུལ་བའི་ཚུལ་དང་བཅས་གནང་ཞིང་། དེ་ནས་གངས་རི་ཐོད་དཀར་དུ་མཁའ་འགྲོ་ཡང་ཏིག་གི་ཆོས་བཀའ་རྣམས་ཡི་གེ་བཀོད་པའི་དུས་སུའང་བྱིན་རླབས་ཀྱི་མཚན་མ་རྒྱུན་མི་ཆད་པ་སྔ་མ་ལྟར་བྱུང་ཞིང་། དེ་ལྟ་བུའི་མཁའ་འགྲོ་ཡང་ཏིག་ཡིད་བཞིན་ནོར་བུའི་ཆོས་སྡེ་འདི་སྙིང་ཏིག་གི་ཟབ་གནད་རྣམས་ཡེ་ཤེས་ཀྱི་མཁའ་འགྲོའི་མངོན་སུམ་དུ་བཀྲལ་བའི་དགོངས་གཏེར་ཟབ་མོ་གཞན་གྱི་སྤྱོད་ཡུལ་དུ་མ་གྱུར་པའི་ཟབ་ཁྱད་དུ་མས་ཁྱད་པར་དུ་འཕགས་ཚུལ་གྱི་སྔགས་བརྗོད་རྒྱ་ཆེར་མཛད་པའི་ཆོས་ཚུལ་འདི་ཉིད་དེང་སང་གི་བར་དུ་ཉམས་པ་མེད་པར་རྒྱ་ཆེར་འཕེལ་ཞིང་ཆོས་བརྒྱུད་འཛིན་པའང་མང་དུ་བྱོན་པར་སྣང་ཞིང་། ཁྱད་པར་དུ་ཕྱོགས་འདིར་དར་བའི་བདག་རྐྱེན་གྱི་གྲུབ་པའི་དབང་ཕྱུག་རྫོགས་ཆེན་པ་ཆེན་པོའི་བཀའ་དྲིན་ཏེ། གྲུབ་དབང་རིན་པོ་ཆེ་ཉིད་ལ་མཁའ་འགྲོ་སྙིང་ཏིག་ཡང་ཡིག་དང་བཅས་པའི་བཀའ་བབས་ཤིང་ཆོས་ཀྱི་བདག་པོར་གྱུར་ཏེ། གྲུབ་དབང་རིན་པོ་ཆེ་ཉིད་ཀྱིས་ཆོས་འདི་ལ་བརྟེན་ནས་འོད་གསལ་སྣང་བཞིའི་རྟོགས་པ་མཐར་ཕྱིན་ནས་གྲུབ་པའི་ས་ལ་གཤེགས་ཤིང་རྗེས་འཇུག་སློབ་ཚོགས་རྣམས་ཀྱང་ཆོས་འདིའི་སྒོ་ནས་སྨིན་གྲོལ་ལ་བཀོད་ཅིང་དར་རྒྱས་སུ་མཛད་པ་ཡིན་ལ། དེ་ནས་གདན་རབས་རིམ་བྱོན་ཞལ་སློབ་ཆོས་བརྒྱུད་དང་བཅས་པ་རྣམས་ཀྱིས་ཀྱང་མཁའ་འགྲོ་སྙིང་ཏིག་གི་ཁྲིད་དང་ཀུན་མཁྱེན་ཆེན་པོའི་གསུང་རབ་ལ་འཆད་ཉན་རྩལ་དུ་འདོན་ཞིང་ཐོས་བསམ་བསྒོམ་སྒྲུབ་ཀྱི་སྒོ་ནས་བསྟན་པ་ལ་བྱ་བ་རྒྱ་ཆེར་མཛད་པ་ཤ་སྟག་བྱོན་པ་འདི་ཡིན་ནོ། །

གཉིས་པ་ཇི་ལྟར་པར་དུ་བསྒྲུབས་པའི་ཚུལ་ནི། སྤྱིར་རྒྱལ་བསྟན་རིན་པོ་ཆེའི་བསྟན་པའི་རྩ་ལག་ནི་ས་ཆེན་ཆོས་བཞིན་དུ་སྐྱོང་བའི་རྒྱལ་པོ་ཆེན་པོ་རྣམས་ཡིན་ལ། ཁྱད་པར་བོད་ཆེན་པོའི་ལྗོངས་འདིར་ལས་ཤུགས་བཙན་པོའི་སྟོབས་ཀྱི་དཔུང་པས་སའི་དཀྱིལ་འཁོར་མཐའ་དག་རང་གིས་མཛད་ཅིང་། རིས་སུ་མ་ཆད་པའི་རྒྱལ་བསྟན་རིན་པོ་ཆེ་སྲི་ཞུས་མཆོད་པ་དང་། ཆོས་དང་མཐུན་པའི་མཛད་པས་ཡངས་པའི་མངའ་རིས་བྱམས་བརྩེས་སྐྱོངས་ཤིང་། བསྟན་པའི་བཙས་སུ་གཙུག་ལག་ཁང་དུ་མ་དང་རྟེན་གསུམ་སྤྱི་དང་བྱེ་བྲག་ཆོས་སྦྱིན་པར་གྱི་རྒྱུན་བསམ་གྱིས་མི་ཁྱབ་པ་འཛད་པ་མེད་པར་སྤེལ་བས། སྔོན་གྱི་ཆོས་རྒྱལ་མེས་དཔོན་རྣམས་ཀྱི་མཛད་པའང་ཕྲ་མོར་བྱེད་པའི་ཆོས་ཀྱི་རྒྱལ་པོ་རིམ་པར་བྱོན་པའི་རྒྱལ་ཁབ་ཆེན་པོ་འདི་ཉིད་དུ། སྟོབས་ཀྱི་འཁོར་ལོས་སྒྱུར་བ་མི་དབང་ཡུམ་སྲས་ཀྱིས་སྔོན་གྱི་གདུང་རབས་གོང་མ་རྣམས་ལ་ཅོ་འདྲི་བར་ནུས་པའི་ཆོས་སྦྱིན་རྒྱ་ཆེར་སྤེལ་ཞིང་། ཁྱད་པར་དུ་ས་སྐྱོང་མ་ཡུམ་ཆེན་མོ་ཚེ་དབང་ལྷ་མོ་ཉིད་ཀྱིས་ཐུགས་ཀྱི་ལྷག་བསམ་སྟོན་ཟླ་ལྟར་དཀར་བས་བསྟན་འགྲོའི་ཕན་བདེ་སྤེལ་བ་དང་། ཆབ་སྲིད་མངའ་ཐང་རྒྱས་ཤིང་། སྐུ་ཚེ་གདུང་རྒྱུད་བཅས་གོང་འཕེལ་འབྱུང་བའི་ཆེད་དང་། ཁྱད་པར་དུ་ཆོས་ཚུལ་འདི་ཉིད་མི་ནུབ་ཅིང་གསང་ཆེན་སྙིང་པོའི་བསྟན་པའི་བཙས་སུ་དགོངས་ནས་པར་དུ་བཀོད་པར་གནང་སྟེ། དེ་ཡང་འཆད་ཉན་སྒོམ་གསུམ་གང་ལའང་ཡི་གེ་ལ་མི་བརྟེན་པའི་ཐབས་མེད་ཅིང་། དེ་ཉིད་ཀྱང་དག་མ་དག་ལ་ཤིན་ཏུ་ལྟོས་དགོས་པར་མཁྱེན་དཔྱོད་རྣམ་པར་ཡངས་པས་ལེགས་པར་གཟིགས་ནས་ཆོས་སྦྱིན་རླབས་པོ་ཆེའི་རྒྱུན་སྤེལ་བའི་ཚེ་ཁོ་བོ་ལ་ཞུས་དག་བྱེད་དགོས་ཚུལ་གྱི་བཀའ་སྩལ་གཙུག་གི་ཅོད་པན་དུ་གུས་པས་མཆོད་ནས་ཡི་གེ་ཕྱི་མོ་དག་པ་འགའ་ཞིག་སྒོ་བསྟུན་ནས་དག་པར་ བྱས་པ་ལས། སླར་ཡང་སྡེབས་ནོར་བཅོས་བསླད་ལྟ་བུའི་རིགས་རྣམས་རང་བློས་གང ་དཔོག་དཔྱད་པས་དག་པར་བགྱིས་ཤིང་། བརྡ་རྙིང་རེ་ཟུང་སྣང་བ་དང་སྔགས་རྣམས་ལེགས་སྦྱར་ཁོ་ནར་མ་ངེས་པས་འགའ་ཞིག་བརྡ་སྤྲོད་པའི་ལུགས་དང་བསྟུན་པར་དཀའ་བར་སྣང་ཡང་ལེགས་སྦྱར་དང་མཐུན་པ་རྣམས་ལེགས་སྦྱར་དང་བསྟུན་ཞིང་མི་མཐུན་པ་རྣམས་ཡིག་རྙིང་སོར་བཞག་ལས་འོལ་ཚོད་མ་སྤོབས་པས་དཔྱད་འོས་མ་མཆིས་ཤིང་། གཞན་བབ་བཅོལ་མེད་པར་དཔྱད་གཞིར་འོས་པ་རྣམས་བཏང་སྙོམས་སུ་མ་སོང་བར་ཡང་ཡང་ཞུས་དག་གྲུབ་པ་ཡིན་ལ། དེའི་ཚེ་སྔོན་གྱི་ཆོས་རྒྱལ་ཆེན་པོའི་ཆོས་སྦྱིན་གྱི་ལུགས་སྲོལ་ཉམས་པ་མེད་པའི་རྒྱུན་བཞིན་གྱི་བྲིས་བརྐོས་སོ་སོའི་ཡོན་སྦྱོར་ཕུན་སུམ་ཚོགས་པ་དང་བཅས། རབ་བྱུང་བཅུ་བཞི་པའི་ཐོག་མར་སླེབ་པའི་མེ་མོ་ཡོས་ཀྱི་ལོ་མཛེས་སྡུག་དབྱར་གྱི་དཔལ་མོས་རྣམ་བཀྲ་མེ་ཏོག་སྣ་ཚོགས་ཀྱི་རྒྱན་ཕྲེང་དང་ལོ་འདབ་སར་པའི་གོས་བཟང་གིས་ཀླུབས་པའི་ཕུན་ཚོགས་ལང་ཚོའི་མཛེས་པ་ངོམ་པའི་དུས་ཚེས་དགེ་བ་ནས་དབུ་བརྩམས་ཏེ། རྣམ་བྱུང་ཞེས་པ་ས་ཕོ་འབྲུག་གི་ལོའི་སྟོན་གསུམ་དུས་ཀྱི་རྒྱལ་མོས་འབྲས་བུ་དང་ལོ་ཏོག་དུ་མ་བཅུད་དུ་སྨིན་པའི་ཁུར་གྱིས་ལྕི་བའི་འདོད་དགུའི་འབྱོར་པ་ངོམ་པའི་དུས་བཟང་པོར་ལེགས་པར་གྲུབ་པ་ཡིན་ནོ། །

གསུམ་པ་ཆོས་ཚན་བཞུགས་གྲངས་སྨོས་ཤིང་དགེ་བ་བྱང་ཆུབ་ཏུ་བསྔོ་བ་ལ། ཀ་པ་ལ་ཐེམ་བྱང་རིན་ཆེན་ལྗོན་ཤིང་། ཁ་པ་ལ་གཏེར་འབྱུང་རིན་པོ་ཆེའི་ལོ་རྒྱུས། ག་པ་ལ་རིན་པོ་ཆེ་དབང་གི་ཕྲེང་བ། ང་པ་ལ་བདག་འཇུག་པདྨ་ཀློང་ཡངས། ཅ་པ་ལ་ཚོགས་མཆོད་རྒྱ་མཚོའི་སྤྲིན། ཆ་པ་ལ་ཕྱག་འཚལ་དྲི་མེད་ཟླ་རྒྱས། ཇ་པ་ལ་གསོལ་འདེབས་བདུད་རྩིའི་ཆུ་རྒྱུན། ཉ་པ་ལ་ཁྲིད་ཡིག་ནོར་བུ་ལུགས། ཏ་པ་ལ་ཁྲིད་ཡིག་ཉི་ཟླ་གཟའ་སྐར། ཐ་པ་ལ་ཟབ་མོ་རབ་འབྱེད། ད་པ་ལ་ཁྲིད་ཡིག་རིན་པོ་ཆེ་གསེར་གྱི་ཕྲེང་བ། ན་པ་ལ་ནམ་མཁའ་རབ་འབྱམས། པ་པ་ལ་ནམ་མཁའ་ཀློང་ཡངས། ཕ་པ་ལ་ནམ་མཁའ་དྲི་མེད། བ་པ་ལ་མན་ངག་རིན་པོ་ཆེ་གསེར་གྱི་སྒྲོམ་བུ། མ་པ་ལ་ཚིག་དོན་རིན་པོ་ཆེའི་བང་མཛོད། ཙ་པ་ལ་ཟབ་དོན་རྒྱ་མཚོའི་སྤྲིན་དང་དེའི་ས་བཅད་བསྡུས་དོན། ཚ་པ་ལ་གསང་སྤྱོད་རྡོ་རྗེའི་ལམ་བསྟན། ཛ་པ་ལ་ངེས་དོན་སྙིང་པོ། ཝ་པ་ལ་བྱིན་རླབས་ཐུགས་སྒྲུབ། ཞ་པ་ལ་རིག་འཛིན་མཆོག་སྒྲུབ། ཟ་པ་ལ་མཁའ་འགྲོ་བདེ་ཆེན་རྒྱ་མཚོ། འ་པ་ལ་རླུང་སྦྱོར་ཡེ་ཤེས་དྲ་བ། ཡ་པ་ལ་ཟབ་ལམ་བདེ་ཆེན་རྒྱ་མཚོ། ར་པ་ལ་འོད་གསལ་འཁོར་ལོ། ལ་པ་ལ་གཞི་སྣང་ངོ་སྤྲོད། ཤ་པ་ལ་འོད་གསལ་སྦུབ་འཇུག །ས་པ་ལ་སྒྲོལ་མ་བཞི་སྐོར། ཧ་པ་ལ་འཁྲུལ་སྣང་གཞི་གྲོལ། ཨ་པ་ལ་རྨི་ལམ་སྦུབ་འཇུག །ཀི་པ་ལ་དབྱིངས་སྣང་ངོ་སྤྲོད། ཁི་པ་ལ་ཟབ་དོན་གནད་ཀྱི་ལྡེ་མིག །གི་པ་ལ་འོད་གསལ་པྲ་ཁྲིད། ངི་པ་ལ་གསང་ལམ་རིན་པོ་ཆེའི་ངོ་སྤྲོད། ཅི་པ་ལ་ཟབ་དོན་སྙིང་པོ། ཆི་པ་ལ་ཀུན་འདུས་རིན་པོ་ཆེའི་ངོ་སྤྲོད། ཇི་པ་ལ་བར་དོ་སྦུབས་འཇུག །ཉི་པ་ལ་བར་དོ་གནད་ཀྱི་སྒྲོན་མེ། ཏི་པ་ལ་གནད་གསུམ་སྒྲོན་མེ། ཐི་པ་ལ་མཐོང་སྣང་རིན་པོ་ཆེ་འོད་ཀྱི་དྲ་བ། དི་པ་ལ་ཞལ་ཆེམ་དྲི་མ་མེད་པའི་འོད། ནི་པ་ལ་ཞལ་ཆེམ་མཐར་ཐུག་གཅིག་མ་དང་གནད་ཀྱི་མེ་ལོང་། པི་པ་ལ་བདེ་གཤེགས་རིགས་ལྔའི་སྒྲུབ་ཐབས་པདྨ་སྟོང་ལྡན། །ཕི་པ་ལ་རིགས་ལྔའི་བཅུད་ལེན་བདུད་རྩི་ཐིགས་པ། བི་པ་ལ་བདུད་རྩི་སྤྲིན་ཕུང་། མི་པ་ལ་འཆི་བ་བརྟག་བསླུའི་མན་ངག་ཉི་ཟླ་གཟའ་བྲལ། ཙི་པ་ལ་བཏགས་གྲོལ་རྒྱུད་ཀྱི་མན་ངག་རིན་ཆེན་སྙིང་པོ། ཚི་པ་ལ་སྲེག་སྦྱོར་འོད་ཀྱི་སྙེ་མ། ཛི་པ་ལ་གཞན་ཕན་འོད་ཀྱི་འཁོར་ལོ། ཝི་པ་ལ་ཕྱག་རྒྱ་བཞི་མཆོད་འོད་ཀྱི་འཁོར་ལོའི་གནད་ཡིག །ཞི་པ་ལ་མཆོད་རྟེན་རབ་གནས་རིན་ཆེན་དྲ་བ། ཟི་པ་ལ་རབ་ཏུ་གནས་པའི་ཆོ་ག་ཡེ་ཤེས་དྲི་མེད། འི་པ་ལ་མཐོང་སྣང་རིན་ཆེན་གསེར་གྱི་དྲ་བ། ཡི་པ་ལ་རྡོ་རྗེ་གཡུ་སྒྲོན་མའི་སྒྲུབ་ཐབས་ཟླ་བ་འདོད་འཇོ། རི་པ་ལ་གཟའ་བདུད་གསང་སྒྲུབ། ལི་པ་ལ་གནོད་སྦྱིན་དམར་ནག་གི་སྒྲུབ་པ་མེ་རླུང་འཁྱིལ་པ། ཤི་པ་ལ་ཤན་པ་སྲོག་སྒྲུབ་ནག་མོའི་གསང་སྒྲུབ། སི་པ་ལ་ཐེམ་བྱང་དཔག་བསམ་ལྗོན་ཤིང་སྟེ། དེ་ལྟར་གཞུང་གི་ཁ་བྱང་ལ་ཇི་ལྟར་བཞུགས་པའི་ཆོས་ཚན་མ་ཚང་བ་མེད་པ་པར་དུ་བཞུགས་པ་ཡིན་ལ། དགེ་བ་རྫོགས་བྱང་དུ་བསྔོ་བ་ཡང་། དེ་ལྟའི་ལེགས་བྱས་རླབས་ཆེན་སྤྱོད་པའི་དགེ། །རྨོངས་དང་ཐ་བའི་སེམས་ཀྱིས་མ་བཀག་པར། །རྒྱལ་སྲས་ཐུ་བོ་ཀུན་ཏུ་བཟང་པོ་ཡི། །ཡོངས་བསྔོ་ཇི་བཞིན་བྱང་ཆེན་མཆོག་རྒྱུར་བསྔོ། །ཞེས་སོ། །

སླར་ཡང་སྨྲས་པ། མགོན་ཁྱོད་རང་སྣང་ལོངས་སྐུའི་ཞིང་ཉུལ་ཡང་། །ཐ་མལ་སྣང་ངོར་མཐའ་ཡས་ཆོས་ཀུན་གྱི། །ཤེས་བྱ་ཀུན་གཟིགས་འཇམ་དབྱངས་པཎྜི་ཏ། །ཀུན་མཁྱེན་ཆེ་དེ་སླར་ཡང་སྙིང་ནས་དྲན། །གང་བློ་རྣམ་དཔྱོད་ཡངས་པའི་གྲྭ་གཅིག་ན། །མཐའ་ཡས་ཤེས་བྱའི་གཞུང་ལུགས་སྲིད་དོ་འཚལ། །དོག་པ་མེད་པར་ཆུད་པའི་མཁྱེན་རབ་མཐའ། །ཀུན་གསལ་ཡངས་པའི་ཕ་མཐས་ག་ལ་འཆིང་། །ལོངས་སྤྱོད་འཁོར་ལོའི་ཆུ་སྐྱེས་འདབ་སྟོང་ལ། །དགའ་བས་རྗེས་ཆགས་ཚངས་པའི་བུ་མོ་དེ། །རྣམ་པར་རྩེན་པས་མཐའ་ཡས་ཆོས་སོ་ཅོག །ལེགས་བཤད་གླུ་རུ་ལེན་ལ་རིངས་པ་བཞིན། །དེ་ཕྱིར་མོས་པའི་ཡོལ་གོ་དང་འཚམས་པའི། །ཆོས་ཚུལ་ཅི་འདོད་འཇོ་ལས་སྐལ་བཟང་འགྲོའི། །ལེགས་སྤྱད་རིན་ཆེན་གྱིས་ཐོབ་རྙེད་དཀའི་ནོར། །ལག་རྩེར་སོན་འདིའང་མགོན་ཁྱོད་ཁོ་ནའི་དྲིན། །དེ་ལྟའི་ཆོས་ཚུལ་འཆི་མེད་རྟག་པའི་དབྱངས། །སྲིད་མཐའི་བར་དུ་ནུབ་མེད་གླུར་འཇོ་ཕྱིར། །ཡི་གེའི་སྒྱུ་འཕྲུལ་འགོག་མེད་ཟླ་གཟུགས་སྟོང་། །ཅིག་ཆར་འཆར་བའི་ཆོས་སྦྱིན་པར་གྱི་རྫིང་། །ཚུལ་འདི་བོད་ཆེན་ནོར་འཛིན་མཛེས་པའི་རྒྱན། །བྱམས་ལྡན་ལྷ་སྲས་ལྕམ་དྲལ་རྒྱལ་ཡུམ་བཅས། །འགྲོ་འདིའི་ལེགས་བྱས་དཔུང་པས་ཚོགས་གཉིས་མཚོ། །བསྲུབས་ལས་བསོད་ནམས་མགྲོན་དུ་སྐྱེས་པ་བཞིན། །ཁྱད་པར་དད་པའི་ལང་ཚོ་གཏོང་ཕོད་ཀྱི། །རྒྱན་ཕྲེང་གིས་མཛེས་ས་སྐྱོང་ཆེན་མོ་ཡིས། །སྙིང་པོའི་བསྟན་ལ་རི་མོར་བགྱི་བའི་སླད། །ཆོས་སྦྱིན་སྐལ་ལྡན་ཤིང་རྟའི་མཆེད་པོར་བསྐྲུན། །གངྒཱའི་བྱེ་སྙེད་གསེར་གྱིས་ཡོངས་བསྐངས་ནས། །སྦྱིན་པ་བས་ཀྱང་ཚིགས་བཅད་གཅིག་བརྗོད་པའི། །ཕན་འདོགས་ལྷག་ཅེས་གསུངས་ན་འཛད་མེད་ཀྱི། །ཆོས་སྦྱིན་འདི་ལྟའི་བསོད་ནམས་གཞལ་དུ་ཅི། །འདིས་མཚོན་བསྐལ་མང་ལེགས་སྤྱོད་འཛམ་བུའི་འབྲས། །དམིགས་པའི་དུག་བྲལ་བྱང་ཆེན་ཆུ་གཏེར་དུ། །ལྷུང་བྱས་སྐུ་གསུམ་གྲུབ་པའི་ཀཱཉྩ་ནའི། །དོན་གཉིས་ཕུན་ཚོགས་འབྱོར་པས་ཕྱུག་པར་ཤོག །སྙིགས་མའི་བརླང་སྤྱོད་རྩུབ་མོས་བོས་པའི་མགྲོན། །དུས་མིན་འཚོ་བྲལ་སྐལ་ངན་འཐིབ་བུའི་སྨག །དཀོན་མཆོག་ཐུགས་རྗེའི་ཉི་གཞོན་གྱིས་གཞིལ་ནས། །ཕན་བདེའི་ལེགས་ལམ་སྣང་བས་རྟག་བསྲུང་ཤོག །ལྷ་མིའི་དབང་ཕྱུག་ཡུམ་སྲས་སྐུའི་འཚོ་གཞེས། །གཞོམ་གཞིག་དང་བྲལ་མངའ་ཐང་གདུང་རྒྱུད་འཕེལ། །ཆབ་འབངས་བྱམས་པའི་སྤྱན་རས་ཀྱིས་འཚོ་ཞིང་། །ལུས་ཅན་བདེ་སྐྱིད་དཔལ་གྱིས་འབྱོར་པར་ཤོག །རྒྱལ་བསྟན་དྲི་མེད་འོད་དཀར་སྲིད་པའི་བླར། །ནུབ་མེད་འཆར་བའི་དགེ་ལེགས་ཟིལ་མངར་གྱིས། །འཁོར་བའི་ཉེས་སྤྱོད་ཚ་གདུང་ཡོངས་བཅིལ་ཞིང་། །དེ་འཛིན་ཚོགས་ཀྱང་བསྐལ་བརྒྱར་འཚོ་གཞེས་ཤོག །མདོར་ན་གནས་སྐབས་མཐར་ཐུག་བཞེད་དགུ་ཀུན། །བསམ་བཞིན་འགྲུབ་པ་བསླུ་མེད་མཆོག་གསུམ་གྱིས། །བྱིན་རླབས་བདུད་རྩིའི་ཆབ་ཀྱིས་བྲན་པ་ཡིས། །འདོད་དོན་འདབ་བརྒྱ་བཞད་པའི་བཀྲ་ཤིས་སྩོལ། །

ཅེས་དཀར་ཆག་ཉུང་ངུ་འདི་ནི་མིའི་དབང་པོ་ཡུམ་སྲས་ཀྱིས་ཆོས་ཚུལ་འདི་ཉིད་པར་དུ་བཞེངས་པའི་ཚེ་ས་སྐྱོང་མ་ཡུམ་ཆེན་མོ་ཉིད་ཀྱི་བཀས་བསྐུལ་བ་གུས་པས་གཙུག་ཏུ་མཆོད་ནས་གུས་ཞབས་རྨོངས་རྟུལ་དཱ་རི་ཏྲ་པ་ངག་དབང་བློ་གྲོས་ཀྱིས་ལྷུན་གྲུབ་སྟེང་གི་རྒྱལ་ཁབ་ཆེན་པོ་ནས་སྤེལ་བ་བི་ཛ་ཡནྟུ།། །།