ལེའུ་དང་པོའི་རྣམ་པར་བཤད་པ།

༄༅། །དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་འགྲེལ་པ་ཕྱོགས་བཅུའི་མུན་པ་ཐམས་ཅད་རྣམ་པར་སེལ་བ་ཞེས་བྱ་བ་བཞུགས་སོ། །

༄༅། །དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་རྒྱལ་པོ་སྒྱུ་འཕྲུལ་དྲྭ་བའི་རྣམ་བཤད་ཉི་ཟླའི་སྤྲིན་གྱི་སྣང་བ་ཆེན་པོས་ཕྱོགས་བཅུའི་མུན་པ་ཐམས་ཅད་ངེས་པར་སེལ་བ་ཞེས་བྱ་བ། ཕྱོགས་བཅུའི་དུས་བཞིའི་བདེ་བར་གཤེགས་པ་སྲས་དང་བཅས་པ་མ་ལུས་མི་ལུས་ལུས་པ་མེད་པ་ཐམས་ཅད་ལ་ཕྱག་འཚལ་ལོ། །གང་གི་རང་བཞིན་གཉིས་སུ་མེད་གང་ཆོས་སྐུའི་ངོ་བོར་རྣམ་སངས་རྒྱས། །དབྱིངས་དང་ཡེ་ཤེས་གཉིས་སུ་མེད་གང་གདོད་མའི་མགོན་པོ་ཡོན་ཏན་རྫོགས། །སྲིད་དང་ཞི་བ་གཉིས་སུ་མེད་གང་བསམ་གྱིས་མི་ཁྱབ་འདུས་མ་བྱས། །ཆོས་དང་ཆོས་ཉིད་གཉིས་སུ་མེད་གང་(༢)ཀུན་བཟང་བཙུན་མོར་བཅས་ཀུན་རྒྱལ། །བདེ་གཤེགས་སྣང་བ་ཤིན་ཏུ་ཚད་མེད་འོད་གསལ་སྟུག་པོ་བཀོད་པའི་ཞིང་། །ཡེ་ཤེས་རྣམ་ལྔའི་རང་བཞིན་ལས་གྲུབ་རྒྱ་དང་བྲལ་བའི་གཞལ་ཡས་ཁང་། །རིགས་ལྔའི་རང་བཞིན་རྒྱ་མཚོའི་སྤྲིན་འཕྲོ་དུས་རྣམས་ཀུན་ཏུ་ལོངས་སྤྱོད་རྫོགས། །ཞི་དང་ཁྲོ་ཚུལ་དཔག་མེད་ཚུལ་འཆང་ལྷུན་གྱིས་གྲུབ་པའི་ཚོགས་ལ་འདུད། །རྒྱལ་བའི་ཐུགས་རྗེ་ཤིན་ཏུ་རྨད་བྱུང་རྫོགས་སངས་རྒྱས་ཀྱི་གསུང་གསོལ་ཞིང་། །སྣ་ཚོགས་སྤྲུལ་པས་འགྲོ་བའི་དོན་མཛད་རིགས་དང་དཀྱིལ་འཁོར་ཀུན་གྱི་གཙོ། །གསང་བའི་སྙིང་པོ་མཆོག་གི་མཛོད་བརྙེས་ཀུན་གྱི་སྔོན་རོལ་རྫོགས་སངས་རྒྱས། །རྡོ་རྗེ་སེམས་དཔའ་གསང་བའི་བདག་ལ་འདུ་འབྲལ་མེད་པས་ཕྱག་འཚལ་ལོ། །གདུལ་བྱའི་གློ་བུར་ཉོན་མོངས་བསལ་ཕྱིར་སྟོན་པས་ཆོས་ཀྱི་ཆར་ཕབ་སྟེ། །དབང་པོའི་རིམ་པས་རིམ་དང་རིམ་མིན་ཚེ་གང་གྲོལ་བའི་རང་བཞིན་ལས། །གསང་བའི་སྙིང་པོ་མཆོག་གི་ལམ་ནི་ཀུན་གྱི་རྩེ་མོ་ལོངས་སྤྱོད་རྫོགས་སྐུའི་བསྟན་པ་ཆེ། །གྲངས་མེད་རྒྱལ་བ་སྔ་ཕྱིའི་གཤེགས་ཤུལ་ཤིང་རྟ་ཆེན་པོའི་སྲོལ་འབྱེད་ཉིད། །སྐྱེ་རྒུའི་དཔལ་ལས་མི་ཡུལ་སྣང་བ་གངས་ཀྱི་རི་བོ་འདིར་འོངས་ཏེ། །སྔོན་གྱི་ལོ་པཎ་དམ་པ་རྣམས་ཀྱིས་ལེགས་བསྒྱུར་གཏན་པ་ཕབ་པའི་དོན། །མཁས་པ་དུ་མས་རྣམ་བཤད་མཛད་ཅིང་མི་ནུབ་རྒྱལ་མཚན་ལེགས་གཟུངས་པ། །བསྟན་པའི་སྲོག་ཤིང་རྒྱ་ཆེར་གྱུར་ལ་ལྷག་པར་དད་བརྒྱའི་འདབ་སྟོང་གཡོ། །ཟབ་ཅིང་རྒྱ་ཆེའི་རྒྱུད་དོན་ཉི་མ་བདག་བློའི་སྤྱོད་ཡུལ་མ་གྱུར་ནའང་། །དམ་པའི་ལེགས་བཤད་མིག་ཐུར་དབྱེ་བས་ཚིག་དོན་རྣམ་བཀྲའི་གཟུགས་སྣང་བ། །ཇི་སྙེད་ཇི་བཞིན་དེ་ཉིད་དོན་མཐོང་ལུང་རིག་མན་ངག་ལ་བརྟེན་ནས། །སྐལ་བཟང་སློབ་མས་བསྐུལ་བའི་དོན་དུ་ངེས་དོན་སྙིང་པོ་འདིར་གསལ་བྱ། །

དེ་ལ་འདིར་ཡང་དག་པར་རྫོགས་པའི་སངས་རྒྱས་དཔལ་ཀུན་ཏུ་བཟང་པོ་ཐབས་མཁས་ལ་ཐུགས་རྗེ་ཆེ་བའི་(༣)མངའ་བདག་དེས། ཆོས་ཀྱི་དབྱིངས་ཀྱི་ཕོ་བྲང་ཆེན་པོ་ནས་མ་གཡོས་བཞིན་དུ། རང་བཞིན་ཐུགས་རྗེའི་བྱིན་གྱིས་རླབས་ལས་རང་སྣང་བ། སྐུ་གསུང་ཐུགས་ལྷུན་སྟུག་པོ་བཀོད་པའི་རྒྱན་ཉིད་དུ་རིགས་ལྔའི་སངས་རྒྱས་ཀྱི་རྣམ་པར་བཞེངས་ཏེ། ཕྱོགས་བཅུ་དུས་བཞིའི་སངས་རྒྱས་ཐམས་ཅད་ཀྱི་ཐུགས་རྡོ་རྗེ་གཉིས་སུ་མེད་པའི་རང་བཞིན་གྱི་དཀྱིལ་འཁོར་ཉིད་ལས་མི་གཞན་པའི་མངའ་ཐང་ཆེན་པོས་དབང་བསྒྱུར་བས། རྡོ་རྗེ་སེམས་དཔའ་ལ་སོགས་པ་འབྲས་བུའི་སེམས་དཔའ་རྣམས་ལ། ཟབ་ཅིང་རྒྱ་ཆེ་བའི་ཆོས་ཕུན་ཚོགས་པ་གསང་སྔགས་རྡོ་རྗེའི་ཐེག་པ་གསུངས་ཏེ། སྣང་བ་གསུམ་གྱིས་གདུལ་བར་བྱ་བའི་འགྲོ་བའི་ཁམས་རང་བཞིན་གྱིས་གྲོལ་བར་མཛད་པ་ལས། གསང་སྔགས་ནང་པ་བསྐྱེད་པ་མཧཱ་ཡོ་ག །ལུང་ཨ་ནི་ཡོ་ག །རྫོགས་པ་ཆེན་པོ་ཨ་ཏི་ཡོ་ག་རྣམས་ཕྱི་ནང་གསང་བ་གསུམ་དུ་སྣང་བའི། གསང་བ་ལ་ཡང་བསྐྱེད་རྫོགས་གཉིས་སུ་མེད་པ་སེམས་དང་ཡེ་ཤེས་སུ་རང་སྣང་བའི་དཀྱིལ་འཁོར་བསྟན་པ་དང་། བསྐྱེད་པ་དང་རྫོགས་པ་ལ་མི་ལྟོས་པར་སེམས་ཉིད་ཡེ་ནས་སངས་རྒྱས་པའི་རང་བཞིན་དུ་བསྟན་པ་དང་། ཡེ་ཤེས་རང་སྣང་བའི་ངོ་བོར་སངས་རྒྱས་པའི་རང་བཞིན་དུ་བསྟན་པ་གསུམ་ལས། འདིར་བསྐྱེད་རྫོགས་གཉིས་སུ་མེད་པ་སེམས་དང་ཡེ་ཤེས་སུ་རང་སྣང་བའི་དཀྱིལ་འཁོར་སྒྱུ་འཕྲུལ་དྲྭ་བ་མངོན་པར་བྱང་ཆུབ་པ་ཉིད་སྟོན་པར་བྱེད་དོ། །

འདི་ལ་ཡང་སྡེ་བཞི་སྟེ། འཁོར་འདས་ཀྱི་ཆོས་ཐམས་ཅད་རང་སྣང་དབྱེར་མེད་དུ་སྟོན་པ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་དང་། ལས་ཚོགས་རྒྱས་པར་སྟོན་པ་རྣམ་པར་སྣང་མཛད་སྒྱུ་འཕྲུལ་དྲྭ་བ་དང་། རོལ་པ་མངོན་དུ་སྟོན་པ་ལྷ་མོ་སྒྱུ་འཕྲུལ་དྲྭ་བ་དང་། ཐེག་པ་ཀུན་ལ་ཁྱབ་པར་སྟོན་པ་འཇམ་དཔལ་སྒྱུ་འཕྲུལ་དྲྭ་བའོ། །རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལ་ཡང་བརྒྱད་དེ། སེམས་དང་ཡེ་ཤེས་རང་སྣང་བར་སྟོན་པ་དཔལ་གསང་བའི་སྙིང་པོ་དང་། འཕྲིན་ལས་རྫོགས་པར་སྟོན་པ་བཞི་བཅུ་པ་དང་། དཀྱིལ་འཁོར་རྫོགས་པར་སྟོན་པ་བརྒྱད་པ་དང་། དབང་བསྐུར་བ་གསལ་བར་སྟོན་པ་བླ་མ་དང་། དམ་ཚིག་མཆོག་ཏུ་སྟོན་པ་ལེ་ལག་དང་། ཡོན་ཏན་རྒྱས་པར་སྟོན་པ་བརྒྱད་ཅུ་པ་དང་། ལྷའི་སྐུ་མདོག་དང་ཕྱག་མཚན་གསལ་བོར་སྟོན་པ་རྡོ་རྗེ་མེ་ལོང་དང་། བསྐྱེད་རིམ་གསལ་བོར་སྟོན་པ་རྒྱ་མཚོ་དང་། ཐབས་ལམ་གསལ་བར་སྟོན་པ་ཐལ་བ་དང་སྡེ་ བརྒྱད་དོ། །

དེ་ལ་འདིར་ཐེག་པ་ཐམས་ཅད་ཀྱི་ཡང་རྩེ། ལུང་ཐམས་ཅད་ཀྱི་འབྱུང་ཁུངས། དུས་གསུམ ་སངས་རྒྱས་ཐམས་ཅད་ཀྱི་ཐེག་པའི་ཉེ་(༤)ལམ་ཆེན་པོ། གསང་བ་བས་ཀྱང་ཆེས་ཤིན་ཏུ་གསང་བ་དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་རྒྱལ་པོ་ཆེན་པོ་འཆད་པ་ལ་གསུམ་སྟེ། བརྗོད་བྱ་རྟོགས་པའི་ཡན་ལག་ཏུ་མཚན་གྱི་དོན་བཤད་པ། བརྗོད་བྱ་ཉིད་གསལ་བར་སྟོན་པ་རྒྱུད་ཀྱི་དོན་དངོས་བཤད་པ། ཡོངས་སུ་རྫོགས་པ་མཇུག་གི་དོན་བཤད་པའོ། །དང་པོ་ལའང་གཉིས་ཏེ། མཚན་དོན་དངོས་དང་། ཕྱག་གིས་མཆོད་པར་བརྗོད་པའོ། །དང་པོ་ལ་བཞི་སྟེ། དགོས་པའི་དོན། བསྡུས་པའི་དོན། ཚིག་གི་དོན། ཕྱིན་ཅི་ལོག་གི་ཀླན་ཀ་སྤང་བའོ། །

དང་པོ་ལ་གསུམ་ལས། མིང་ལ་བརྟེན་ནས་དོན་གོ་བ་ནི་བུམ་པ་ཞེས་པའི་མིང་ལས་ལྟོ་ལྡིར་ཞབས་ཞུམ་ཆུ་སྐྱོར་བའི་དངོས་པོ་གོ་བར་བྱེད་པ་ལྟར། མཚན་འདི་ཉིད་ལས་ཆོས་ཐམས་ཅད་ཡེ་ནས་སངས་རྒྱས་པའི་དཀྱིལ་འཁོར་གཅིག་ཏུ་བསྟན་པས། དབང་པོ་ཤིན་ཏུ་རྣོན་པོས་དེ་ཙམ་གྱིས་རྟོགས་པའི་དགོས་པ་ཡོད་དོ། །དོན་ལ་བརྟེན་ནས་མིང་གོ་བ་ནི་ལྟོ་ལྡིར་ཉིད་བུམ་པར་གོ་བ་ལྟར། ཡེ་ནས་དཀྱིལ་འཁོར་དུ་སངས་རྒྱས་པའི་དོན་ཉིད་མཚན་དེར་གོ་བས་དབང་པོ་འབྲིང་པོས་ཆོས་ཐམས་ཅད་མིང་ཙམ་མིང་ཡང་བཏགས་པ་ཙམ་དུ་ཕྱི་ནས་གོ་བའི་དགོས་པ་ཡོད་དོ། །མིང་དོན་གྱིས་འབྲེལ་བ་ཤེས་པ་ནི་བུམ་པ་དང་ལྟོ་ལྡིར་ཐ་དད་མེད་པ་ལྟར། མཚན་དང་དོན་གཉིས་སུ་མེད་པར་ཤེས་པས། དབང་པོ་རྟུལ་པོའང་རིང་ཞིག་ན་ཚིག་དོན་དབྱེར་མེད་པའི་རང་བཞིན་ཁོང་དུ་ཆུད་པའི་དགོས་པ་ཡོད་དོ། །གཞན་ཡང་མིང་ལས་དོན་གོ་བས་གླེགས་བམ་བཙལ་སླ་བ་སྨན་གྱི་ཁ་བྱང་ལྟ་བུ་དང་། ཕྱོགས་གར་གཏོགས་ངོ་ཤེས་པས་དམག་མིའི་མདའ་བྱང་ལྟ་བུར་ཆོས་ཐམས་ཅད་ཡེ་ནས་སངས་རྒྱས་པའི་བདག་ཉིད་དུ་ཤེས་པའི་དགོས་པ་ཡོད་དོ། །

བསྡུས་དོན་ནི་ཆོས་ཐམས་ཅད་ཡེ་ནས་རྒྱལ་བའི་དཀྱིལ་འཁོར་དུ་བྱང་ཆུབ་པའི་རང་བཞིན་དུ་བསྟན་པའོ། །ཚིག་གི་དོན་ནི་ཡུལ་དུམ་བུ་གསུམ་ལས་དབུས་གཙང་ནི་བོ༵ད་ཆེན་པོ་སྟེ་དེའི་སྐད༵་རིགས་གང་བཟང་བཟང་དུ་བསྒྱུར་རོ། །དེ་ཡང་ཆོས་ཀུན་ཡེ་ནས་སངས་རྒྱས་པ་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་འཁོར་འདས་ཐམས་ཅད་དབྱེར་མེད་དུ་ཁྱབ་པར་རྟོགས་པ་ནི་རྒྱལ་བའི་དགོངས་པ་སྟེ། དེ་ཉིད་ཤིན་ཏུ་རྟོགས་པར་དཀའ་བས་གས༵ང་བའི༵་དོན་ནོ། །གང་ལ་གསང་ན་སྣོད་དུ་མ་གྱུར་པ་སྟེ་སྒོ་གསུམ་གྱི་སྒྲིབ་པ་ཅན་ལའོ། །གསང་ལུགས་ནི་གབ་སྦས་གཉིས་ཏེ། དེའང་སྐུ་གསུམ་རང་ལ་ཡོད་ཀྱང་གློ་བུར་གྱི་སྒྲིབ་པས་བསྒྲིབས་ནས་མ་མཐོང་བ་ནི་གབ་པ་སྟེ། བརྟག་གཉིས་ལས། (༥)སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །ཞེས་དང་། རྒྱུད་བླ་མ་ལས། ཇི་ལྟར་མི་དབུལ་ཁྱིམ་ནང་ས་འོག་ན། །མི་ཟད་པ་ཡི་གཏེར་ནི་ཡོད་གྱུར་ལ། །མི་དེས་དེ་མ་ཤེས་ཤིང་གཏེར་དེས་ཀྱང་། །དེ་ལ་ང་འདིར་ཡོད་ཅེས་མི་སྨྲ་ལྟར། །དེ་བཞིན་ཡིད་ཀྱི་ནང་ཆུད་རིན་ཆེན་གཏེར། །དྲི་མེད་བསལ་དང་བཞག་མེད་ཆོས་ཉིད་ཀྱང་། །མ་རྟོགས་པས་ན་དབུལ་བའི་སྡུག་བསྔལ་ནི། །རྣམ་མང་ཀུན་ཏུ་སྐྱེ་རྒུ་འདིས་མྱོང་ངོ་། །ཞེས་པ་ལྟར་རོ། །དེ་ཉིད་ཀྱིས་མཚོན་ནས་ལྟ་དགོངས་ཟབ་མོ་རྣམས་རང་སྟོབས་ཀྱིས་མ་ཤེས་ཤིང་གཞན་གྱིས་སྟོན་པ་མེད་པས་སམ་བསྟན་ཡང་མ་རྟོགས་པས་གབ་པ་སྟེ། དམུས་ལོང་ལ་གཟུགས་ཀྱི་སྣང་བ་གབ་པ་བཞིན་ནོ། །སྦས་པའི་གསང་བ་ནི་ལྟ་སྒོམ་སྤྱོད་པ་ཐུན་མོང་མ་ཡིན་པ་རྣམས་ཏེ། མ་སྦས་ན་གསང་སྒོ་འཆོལ་བ་དང་སྒྲོ་སྐུར་གྱི་གནས་སུ་འགྱུར་བའི་ཕྱིར་རོ། །དེ་སྐད་དུའང་དམ་ཚིག་གསལ་བཀྲ་ལས། གསང་སྔགས་སྐྱོན་ཡོད་མ་ཡིན་ཏེ། །སེམས་ཅན་དོན་ཕྱིར་རབ་ཏུ་གསང་། །གསང་ཐུབ་དངོས་གྲུབ་མི་ཡལ་བས། །གསང་ཕྱིར་བརྡ་དག་སྣ་ཚོགས་གསུངས། །ཞེས་སོ། །གསང་བའི་རྣམ་གྲངས་དུ་མ་སོ་སོའི་ལུང་དང་སྦྱར་ཏེ་འཆད་ནའང་། འདིར་འདུས་པས་ཡི་གེ་མང་བར་ཟད་དོ། །དེའང་བསྡུ་ན། སྐུ་དང་། གསུང་དང་། ཐུགས་ཀྱི་གསང་བ་བསམ་གྱིས་མི་ཁྱབ་པ་གསུམ་མོ། །སྙིང༵་པོ༵་ནི་ཆོས་ཐམས་ཅད་ཀྱི་རང་བཞིན་མཐར་ཐུག་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ཡེ་ནས་སངས་རྒྱས་པའི་དོན་གྱི་གནས་ལུགས་རྫོགས་པ་ཆེན་པོ་དང་དེའི་རྗོད་བྱེད་ཟབ་ཅིང་རྒྱ་ཆེ་བ་རྣམས་སོ། །དེ༵་ཁོ༵་ན༵་ཉིད༵་ནི་སྐུ་གསུམ་འདུ་འབྲལ་མེད་པའི་རང་བཞིན་དེ་ཉིད་ཀུན་ཁྱབ་བསླུ་བ་མེད་པའི་ཆོས་ཏེ་འཕོ་འགྱུར་མེད་པའོ། །ངེས༵་པ༵་ནི་སངས་རྒྱས་ལ་ཡོད་ཀྱང་སེམས་ཅན་ལ་མེད་པའི་དྲང་དོན་ལྟར་གསུངས་པ་ནི་མ་ཡིན་གྱི། ཏིལ་ལ་མར་ལྟར་ཡེ་ནས་ཐམས་ཅད་ལ་གནས་པའི་དོན་ཏོ། །གཞན་ཡང་ཐམས་ཅད་ཡེ་ནས་སངས་རྒྱས་པའི་དཀྱིལ་འཁོར་ནི་གཞི་གསང་བའི་སྙིང་པོའོ། །དེ་ཉིད་བསྐྱེད་རྫོགས་གཉིས་སུ་མེད་པས་ཉམས་སུ་ལེན་པ་ནི་ལམ་དེ་ཁོ་ན་ཉིད་དོ། །དེའི་མཐར་ཐུག་སྐུ་གསུམ་ལྷུན་གྱིས་གྲུབ་པ་ནི་འབྲས་བུ་གཞི་ཐོག་ཏུ་ངེས་པའོ༵། །མདོར་ན་སྣང་བ་དང་སྟོང་པ་བསྐྱེད་པ་དང་རྫོགས་པ་འཁོར་བ་དང་མྱ་ངན་ལས་འདས་པ་གཉིས་སུ་མེད་པའི་རང་བཞིན་དུ་ཡེ་ནས་སངས་རྒྱས་པའི་ངོ་བོ་ཉིད་སྟོན་པའི་མཚན་ཡིན་ནོ། །ཕྱིན་ཅི་ལོག་གི་ཀླན་ཀ་སྤང་བ་ནི། མ་རིག་པའི་མཚོ་སྔོན་(༦)པོ་ཕྱིན་ཅི་ལོག་གི་ལྦུ་བ་འཁྲིགས་ཤིང་ལོག་པར་ལྟ་བ་དང་ཕྲག་དོག་གི་རྦ་རླབས་དྲག་ཏུ་གཡོ་བ་དག་ན་རེ། ཁྱེད་ཀྱི་རྒྱུད་འདིའི་ཀླད་དུ་རྒྱ་གར་སྐད་མ་སྨྲོས་པས་ཡང་དག་པ་མ་ཡིན་ནོ་ཞེས་ཟེར་རོ། །

དེའི་ལན་དུ་ཁ་ཅིག་ནི་བོད་སྐད་དུའི་སྒྲས་རྒྱ་གར་གྱི་སྐད་ཤུགས་ལ་བསྟན་ཏེ། རྒྱ་གར་སྐད་དུ། གུ་ཧྱ་གརྦྷ་ཏ་ཏྭ་བི་ནིཥྩ་ཡ། ཞེས་པ་ཡོད་དེ་མ་སྨྲོས་པ་ནི་ཟློས་པ་སྤང་བའི་ཕྱིར་ཡིན་ཞེས་པ་དང་། ཁ་ཅིག་ནི་རྒྱ་གར་གྱི་གླེགས་བམ་ལའང་མེད་པ་དང་། འོད་དཔག་མེད་ཞིང་གི་ཡོན་ཏན་བཀོད་པ་ལ་སོགས་པ་མདོ་སྡེ་དུ་མ་དང་། བདེ་མཆོག་རྩ་རྒྱུད་ལ་སོགས་པ་རྒྱུད་སྡེ་དུ་མ་ནའང་མ་སྨྲོས་པས་དེ་དག་ཡང་དག་པ་མ་ཡིན་པར་འགྱུར་ཞེས་རིགས་པ་འཕེན་ནོ། །དེ་ལྟར་ཡང་ཡིན་མོད། འོན་ཀྱང་འདི་ཡིན་ཏེ། རྒྱ་སྐད་དང་ཕྱག་གི་ངེས་བཟུང་ནི་རལ་པ་ཅན་མན་ཆད་དུ་བྱས་ཏེ་ཡན་ཆད་ལ་ཅི་རིགས་སུ་ཡོད་ཅིང་། འདི་ཡང་བསམ་ཡས་རྒྱལ་པོའི་དུས་སུ་བསྒྱུར་བས་རྒྱ་སྐད་མ་སྨོས་ཏེ། མིང་གཅིག་ལན་དུ་མར་ཟློས་པའང་དོན་ཆུང་བར་དགོངས་ནས་མ་བསྟན་པ་ཡིན་ནོ། །གཉིས་པ་ཕྱག་འཚལ་བ་ནི། བདུད་བཞི་དང་སྒྲིབ་པ་གཉིས་བག་ཆགས་དང་བཅས་པ་བཅོ༵མ་པ་ནི་སྤངས་པ་ཕུན་སུམ་ཚོགས་པའོ། །བདུད་བཞི་ནི། ཚེ་ལ་བར་དུ་གཅོད་པ་འཆི་བདག་གི་བདུད་དང་། ཏིང་ངེ་འཛིན་ལ་བར་དུ་གཅོད་པ་ལྷའི་བུའི་བདུད་དང་། ལྷག་མེད་ལ་བར་དུ་གཅོད་པ་ཕུང་པོའི་བདུད་དང་། ཐར་པ་ལ་བར་དུ་གཅོད་པ་ཉོན་མོངས་པའི་བདུད་དོ། །འདི་དག་ཡེ་ནས་མི་མངའ་བས་བཅོམ་ཞེས་བཏགས་སོ། །སྒྲིབ་པ་གཉིས་ནི་ཉོན་མོངས་པ་དང་ཤེས་བྱའི་སྒྲིབ་པ་སྟེ། དུག་ལྔ་རང་མཚན་པའི་རྟོག་པ་དང་། དེ་ཉིད་དག་བྱེད་གཉེན་པོ་ལ་ཞེན་པའི་བློ་ཡིན་ཏེ། དབུས་མཐའ་ལས། སེར་སྣ་ལ་སོགས་རྣམ་རྟོག་གང་། །དེ་ནི་ཉོན་མོངས་སྒྲིབ་པར་བརྗོད། །འཁོར་གསུམ་རྣམ་པར་རྟོག་པ་གང་། །དེ་ནི་ཤེས་བྱའི་སྒྲིབ་པར་བརྗོད། །ཅེས་སོ། །སྐུ་དང་ཡེ་ཤེས་འདུ་འབྲལ་མེད་པའི་དོན་དང་ལྡན༵་པ་ནི་རྟོགས་པ་ཕུན་སུམ་ཚོགས་པ་སྟེ། སམྦྷུ་ཊི་ལས། དབང་ཕྱུག་དང་ནི་གཟུགས་བཟང་དང་། །དཔལ་དང་གྲགས་དང་ཡེ་ཤེས་དང་། །བརྩོན་འགྲུས་ཕུན་སུམ་ཚོགས་པ་སྟེ། །དྲུག་པོ་རྣམས་ལ་ལྡན་ཞེས་བྱ། །ཞེས་པ་ལྟར་རོ། །དབང་ཕྱུག་ནི་ཆོས་སྐུ་ངོ་བོ་ཉིད་ཀྱི་དག་པ་སྟེ་ཆོས་ཀྱི་དབྱིངས་སོ། །གཟུགས་བཟང་ནི་ལོངས་སྤྱོད་རྫོགས་པའི་སྐུ་སྟེ་མེ་ལོང་ལྟ་བུའོ། །དཔལ་ནི་མངོན་པར་བྱང་ཆུབ་པའི་སྐུ་སྟེ་མཉམ་པ་ཉིད་དོ། །གྲགས་དང་ཡེ་ཤེས་ནི་སྤྲུལ་པའི་སྐུ་སྟེ་ཇི་ལྟ་བ་དང་ཇི་སྙེད་པ་མཁྱེན་(༧)པས་དོན་མཛད་པས་སོ་སོར་རྟོག་པའོ། །བརྩོན་འགྲུས་ནི་མི་འགྱུར་རྡོ་རྗེའི་སྐུ་ཉིད་དབྱིངས་ལས་མ་གཡོས་པར་འཕྲིན་ལས་ཚད་མེད་པ་སྣང་བས་བྱ་བ་གྲུབ་པའོ། །ཕུན་སུམ་ཚོགས་པ་ནི་དབང་ཕྱུག་ལ་སོགས་པ་ལྔ་ཀའི་མཐར་སྦྱར་ཏེ་འཕགས་པ་སློབ་པ་རྣམས་ཀྱི་ཡེ་ཤེས་ལས་ཁྱད་པར་འཕགས་པ་བསྟན་ཏོ། །

ཁ་ཅིག་ནི་བཅོམ་པའི་དོན་ཉིད་ལྡན་པས་བཅོམ་ལྡན་ཞེས་པའང་བཞེད་དོ། །འད༵ས་ནི་འཁོར་འདས་བླང་དོར་ཡོད་མེད་སྤྲོས་པའི་མཚན་མ་ཐམས་ཅད་ལས་འདས་པ་སྟེ། ཕལ་པོ་ཆེ་ལས། སྲིད་དང་ཞི་ལས་རྣམ་གྲོལ་ཞིང་། །ཡོན་ཏན་རྒྱ་མཚོ་གཉིས་སུ་མེད། །སྤྲོས་པ་ཀུན་ལས་རབ་འདས་པའི། །བཅོམ་ལྡན་འདས་ནི་མཁའ་རབ་ཞི། །ཞེས་སོ། །དཔ༵ལ་ནི་ཆོས་སྐུའི་དབྱིངས་ལས་མི་གཡོ་བ་རང་དང་། གཟུགས་སྐུ་དེ་ཉིད་ཀྱི་ངང་ལས་ལྷུན་གྲུབ་ཏུ་འཆར་བ་གཞན་གྱི་དཔལ་ཏེ། གླང་པོ་ཆེ་རབ་འབོག་གི་རྒྱུད་ལས། ཆོས་ཀྱི་སྐུ་ལས་མ་གཡོས་བཞིན། །གཟུགས་ཀྱི་སྐུ་ལྔ་ལྷུན་གྱིས་གྲུབ། །དེ་ལས་དོན་གཉིས་ཡོངས་རྫོགས་ཕྱིར། །དཔལ་ནི་ལྷུན་རྫོགས་གཅིག་ཏུ་རོལ། །ཞེས་སོ། །

དེ་ལྟ་བུ་རང་བཞིན་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ལྷུན་སྟུག་པོ་བཀོད་པའི་ཞིང་ན་འཕོ་འགྱུར་མེད་པས་དུས་ཀུན༵་ཏུ་བཞུགས་ཤིང་རང་སྣང་བའི་ལོངས་སྤྱོད་ཆེན་པོ་རྫོགས་པས་བཟ༵ང་པོ་སྟེ། ཡེ་ཤེས་གསང་བ་ལས། རང་བཞིན་མི་གཡོ་ལྷུན་རྫོགས་ཤིང་། །སྤྱོད་ཡུལ་ཀུན་ཏུ་བཟང་པོ་སྟེ། །ཞེས་སོ། །དབྱེ་ན་ལྔ་ལས། ཀུན་གྱི་སྔོན་རོལ་ཏུ་མངོན་པར་བྱང་ཆུབ་པ་གདོད་མའི་སྟོན་པ་ཀུན་ཏུ་བཟང་པོ་སྟེ། རྨད་བྱུང་རྒྱལ་པོའི་རྒྱུད་ལས། ཐོག་མ་ཀུན་གྱི་སྔོན་རོལ་ཏུ། །རང་སྣང་གཞི་ལ་མཐར་ཕྱིན་ཏེ། །སྔར་སང༵ས་སྔ་ནས་རྒྱས༵་པའི་ཕྱིར། །ཐོག་མའི་ཀུན་ཏུ་བཟང་པོ་ནི། །འཁོར་འདས་ཀུན་གྱི་སྟོན་པར་ཤར། །ཞེས་སོ། །དེའང་ཆོས་ཉིད་སྟོང་པའམ་རང་བཞིན་གྱི་སེམས་ཉིད་ལ་ཟེར་བ་མ་ཡིན་གྱི། སངས་རྒྱས་ཐམས་ཅད་ལ་ཡང་ཐར་པའི་ལམ་སྟོན་པས་གདོད་མའི་མགོན་པོ་ཞེས་བྱ་བ་ཡིན་ཏེ། ཀུན་བྱེད་ལས་ཀྱང་། རྒྱལ་བ་ཀུན་ལས་ང་སྔའི་ཕྱིར། །སྐུ་གསུམ་སྟོན་པའི་ཕ་མར་ཤར། །ཅེས་པ་དང་། སྟོན་པའི་སྟོན་པ་ཀུན་བྱེད་རྒྱལ་པོ་ངས། །ང་ལས་བྱུང་བའི་སྟོན་པ་སྐུ་གསུམ་ལ། །ཞེས་སོ། །སྟོན་པ་འདི་ཡོད་པས་འཁོར་འདས་གདོད་མར་གྲོལ་བའི་ལམ་སྟོན་པ་བྱུང་སྟེ། དུས་གསུམ་གྱི་རྒྱལ་བ་བྱུང་བ་ཡིན་ནོ། །དེ་ལྟ་མ་ཡིན་ན་འཇིག་རྟེན་དུ་སངས་རྒྱས་འབྱུང་བའང་མི་རིགས་ཏེ། ཐམས་ཅད་སེམས་ཅན་དུ་མཉམ་པ་ལ་གཅིག་གིས་གཅིག་ལ་ལམ་སྟོན་པ་མི་ཤེས་པ་ཉིད་དང་། (༨)ལ་ལ་སངས་རྒྱས་ཤིང་ལ་ལ་འཁོར་བ་མི་རིགས་སོ། །ཐུན་མོང་པའི་ཐེག་པ་ལས་ཐོག་མཐའ་མེད་པར་བཤད་པ་ནི་དུས་དང་ཆོས་ཉིད་ལ་དགོངས་སོ། །ཁྱད་པར་དབུ་མ་ནས། འཁོར་འདས་རང་བཞིན་མ་གྲུབ་པས་དེ་ལ་ཐོག་མཐའ་མེད་དེ་དེ་ནམ་མཁའ་བཞིན་ཞེས་འབྱུང་ངོ་། །ཡང་སངས་རྒྱས་དང་སེམས་ཅན་སོ་སོར་དང་པོ་ནས་བྱུང་ན་འཁོར་འདས་གཞི་ཐ་དད་པས་ཐུགས་རྗེའི་འབྲེལ་པ་མི་འཇུག་པར་འགྱུར་རོ། །དེས་ན་ལུགས་འདི་ནི་གསང་སྔགས་བླ་ན་མེད་པའི་རྒྱུད་སྡེ་གོང་མར་ཤིན་ཏུ་གསལ་བར་གསུངས་ཤིང་། སློབ་དཔོན་ཆེན་པོ་པདྨ་དང་། བི་མ་ལས་ལེགས་པར་གཏན་ལ་ཕབ་པ་ཡིན་ཏེ། འདིར་ཡང་དེ་ལ་ཕྱག་བྱེད་དོ། །ཆོས་ཐམས་ཅད་ཀྱི་གནས་ལུགས་དེ་བཞིན་ཉིད་ནི་རང་བཞིན་ཀུན་ཏུ་བཟང་པོའོ། །སེམས་ཉིད་འོད་གསལ་བའི་ངོ་བོ་སྐུ་གསུམ་འདུ་འབྲལ་མེད་པའི་རང་བཞིན་ད་ལྟ་ཉིད་ནས་རང་ཆས་སུ་ལྷུན་གྱིས་གྲུབ་པས་ཡེ་ནས་སངས་རྒྱས་པ་ནི་གཞིའི་ཀུན་ཏུ་བཟང་པོའོ། །ལམ་གོམས་པས་ཐབས་ཤེས་གཉིས་མེད་ཀྱི་རྟོགས་པ་ཤར་བ་ནི་ལམ་ཀུན་ཏུ་བཟང་པོའོ། །ལམ་མཐར་ཕྱིན་ནས་གཞི་ཐོག་ཏུ་ཕྱིན་ཏེ་སྐུ་ལྔ་ཡེ་ཤེས་ལྔ་ལྷུན་གྱིས་གྲུབ་པ་ནི་འབྲས་བུའི་ཀུན་ཏུ་བཟང་པོའོ། །འདི་དག་གི་ལུང་ནི་ཡི་གེ་མང་བས་མི་སྤྲོའོ། །ཡུལ་དེ་ཉིད་ལ༵་འགྱུར་མཛད་པ་པོ་སྒོ་གསུམ་དང་བས་ཕྱག༵་འཚ༵ལ་ལོ༵། །ཞེས་སོ། །

ཁ་ཅིག་སྡུད་པ་པོའི་ཕྱག་ཏུ་འདོད་པ་ནི་མ་ཡིན་ཏེ་རྒྱ་གར་གྱི་གླེགས་བམ་ལ་མེད་པའི་ཕྱིར་རོ། །འགྲེལ་ཆུང་གི་དེ་ཉིད་དེའི་མཆོད་བརྗོད་ཡིན་གྱི་ཕྱག་གི་འགྲེལ་པ་ནི་མ་ཡིན་ནོ། །དེ་ཡང་འདི་སྐད་འབྱུང་སྟེ། མཉམ་ཉིད་དབྱིངས་སུ་བདུད་བཞི་ངང་གིས་བཅོམ། །ཕྱག་རྒྱ་རང་བཞིན་ཚོགས་གཉིས་རྫོགས་པར་ལྡན། །ཡོད་མེད་མཐའ་འདས་བདག་གཞན་ཡོངས་ཀྱི་དཔལ། །ཐམས་ཅད་རང་བཞིན་རྟོགས་དང་ཐུགས་རྗེ་བཟང་། །ཀུན་བཟང་ལྷ་ཡི་ལྷ་ཁྱོད་དབྱེར་མེད་ལ། །རྟོགས་དང་གྲུབ་པས་རབ་ཏུ་ཕྱག་འཚལ་ལོ། །ཞེས་སོ། །

དོན་གཉིས་པ་བརྗོད་བྱ་ཉིད་གསལ་བར་སྟོན་པ་རྒྱུད་ཀྱི་དོན་དངོས་ལ་གསུམ་སྟེ། གཞི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ཐུགས་རྗེའི་ངང་ལས་འཆར་ཚུལ་བསྟན་པ། དེ་ལས་ཞི་ཁྲོ་གཉིས་ཀྱི་དཀྱིལ་འཁོར་ཇི་ལྟར་འཕྲོས་ཚུལ་བསྟན་པ། རྒྱུད་དམ་པར་གདམས་ནས་རྗེས་འཇུག་ལ་གཏད་ཚུལ་བསྟན་པའོ། །དང་པོ་ལ་གསུམ་སྟེ། ཆོས་སྐུ་སྟོན་པ་ཉིད་དབྱིངས་ལས་མ་གཡོས་པར་ལྷུན་སྟུག་པོ་བཀོད་པའི་ཞིང་དུ་རྡོ་རྗེ་དབྱིངས་ཀྱི་དཀྱིལ་འཁོར་རང་སྣང་བར་ཇི་ལྟར་བཀོད་པའི་(༩)ཚུལ། སྟོན་པ་ཉིད་རིགས་ལྔར་བཞེངས་པའི་ཐུགས་རང་བྱུང་གི་ཡེ་ཤེས་གཉིས་སུ་མེད་པས་ཆོས་ཐམས་ཅད་ཡེ་ནས་སངས་རྒྱས་པར་ཆེད་དུ་བརྗོད་ཅིང་ཐུགས་རྗེ་གཡོ་བའི་ཚུལ་བསྟན་པ། ཐུགས་རྗེའི་རང་བཞིན་ཆོས་ཉིད་ལས་མ་གཡོས་བཞིན་དུ་རྣམ་པས་འཇིག་རྟེན་སྒྲོན་མ་བཀོད་དེ་ཆོས་ཐམས་ཅད་གཏན་ལ་དབབ་པའི་ཚུལ་ལོ། །

དང་པོ་ལའང་ཕུན་སུམ་ཚོགས་པའི་གླེང་གཞི་མདོར་བསྟན། དེ་ཡི་རང་བཞིན་རྒྱས་པར་བཤད། ཡེ་ཤེས་ཀྱི་རང་སྣང་བཀོད་པར་དོན་བསྡུ་བ་གསུམ་ལས། དང་པོ་ལ་གཉིས་ཏེ། ངོ་བོ་བཤད་པ་དང་། ལོག་རྟོག་དགག་པའོ། །

དང་པོ་ལ་གསུམ་ལས། ཕྱི་རྒྱུད་འབྱུང་བ་གླེང་གཞིའི་ཚུལ་དུ་བཤད་པ་ནི། ཨེ་ཝཾ་མཱ་ཡཱ་ཞེས་པས་སྒྲས་གོ་བར་བྱ་སྟེ། ཨེ་ཝཾ་ནི་དབྱིངས་ཀྱི་ཡི་གེ་སྟེ་དེ་ལས་ཡི་གེ་ཀུན་འབྱུང་བའི་ཕྱིར་འོག་ནས་འབྱུང་བའི་ཚུལ་འདི་སྐད་ཅེས་སྣང་བར་བྱེད་དོ། །མཱ་ཡཱའི་སྒྲ་ལས། རང་བཞིན། སྒྱུ་མ། བདག །འབྱུང་བ་ལ་སོགས་ཡོད་ཀྱང་འདིར་འབྱུང་བ་གཟུང་སྟེ་བཤད་པའི་དུས་ཞེས་སྣང་བ་ཡིན་ནོ། །དེ་ལ་འདི༵་སྐད༵་འོག་གི་རྒྱུད་རྒྱས་པ་རྣམས་ཏེ་ཆོས་ཕུན་སུམ་ཚོགས་པའོ། །བཤ༵ད་ཅེས་པས་སྡུད་པ་པོ་ཉིད་སྟོན་པ་ཕུན་སུམ་ཚོགས་པ་ཉིད་དུ་ཁས་བླང་པའོ། །བཤད་པའི༵་ཤུགས་ལ་ཉན་པ་པོའི་འཁོར་ཕུན་སུམ་ཚོགས་པ་བསྟན་ཏེ། དེའང་བདག་གིས་ཐོས་པ་མི་སྨོས་པ་ནི་དེའི་ཚེ་བདག་གཞན་གཉིས་སུ་ཕྱེ་བ་མེད་པ་ཡིན་ལ། ཐོས་པ་ནི་སྟོན་པ་དང་འཁོར་ཐ་དད་དུ་སྟོན་པ་ལས། འདིར་བསྡུ་བ་བྱེད་པ་ན་སྟོན་པ་ཉིད་གསང་བདག་ཏུ་སྣང་བས་སྔར་འོག་མིན་དུ་ངས་བསྟན་པ་ཉིད་དེང་ཡང་འདིར་བཤད་པར་བྱ་ཞེས་པའི་དོན་ཏེ། ཐུན་མོང་པའི་སྡུད་པ་པོ་གནས་བརྟན་འོད་སྲུང་ལ་སོགས་པ་ལས་ཁྱད་པར་དུ་འཕགས་པ་བསྟན་པའོ། །དེའང་སྡུད་པ་པོ་ཉིད་སྟོན་པ་ཡིན་པར་གཉིས་མེད་རྣམ་རྒྱལ་ལས་ཕྱག་ན་རྡོ་རྗེ་ནི་དེ་བཞིན་གཤེགས་པ་ཀུན་ཏུ་བཟང་པོ་ཡིན་ལ། རྡོ་རྗེ་འཆང་ཆེན་པོའང་དེ་ཉིད་ལས་གཞན་མ་ཡིན་པར་རིག་པར་བྱ་སྟེ། གཞན་དུ་ན་ཐེག་པ་བསམ་གྱིས་མི་ཁྱབ་པ་རྣམས་དུས་སྐད་ཅིག་གཅིག་ལ་ཁོང་དུ་ཆུད་པར་བྱས་ཏེ་སུས་སྨྲ་བར་ནུས། ཞེས་པ་དང་། གསང་བ་གྲུབ་པ་ལས། རྒྱུད་འཆད་པ་དེ་ཐུགས་རྡོ་རྗེ། །འཆད་པ་པོ་དེ་སྡུད་པའང་དེ། །ཞེས་པ་དང་། དཔལ་ཀྱེ་རྡོ་རྗེ་ལས་ཀྱང་། འཆད་པ་པོ་ང་ཆོས་ཀྱང་ང་། །རང་གི་ཚོགས་ལྡན་ཉན་པ་ང་། །ཞེས་སོ། །དུས༵་ན༵་ཞེས་པ་ནི་དུས་བཞི་མཉམ་པ་ཉིད་ཀྱི་ཡེ་ཤེས་འཁོར་བ་དང་མྱ་ངན་ལས་འདས་པ་གཉིས་སུ་མེད་པའི་རང་(༡༠)བཞིན་ཏེ་དུས་ཕུན་སུམ་ཚོགས་པ་སྨོས་པའོ། །དེ་ལྟར་སྟོན་པ་དང་ཆོས་དང་འཁོར་རྣམས་སྣང་བ་དེའི་ཚེ་གནས་ཀྱང་ཡོད་ངེས་པས་འོག་མིན་ཉིད་ཤུགས་ལ་བསྟན་པའོ། །

འོ་ན་དུས་གཅིག་ན་ཞེས་གཞན་ལས་འབྱུང་བ་ལྟར་མི་སྟོན་པ་ཅི་ཡིན་ཞེ་ན། ལོངས་སྤྱོད་རྫོགས་པའི་སྐུའི་ཞིང་ན་རྟག་པ་རྒྱུན་གྱི་འཁོར་མོར་ཆོས་གསུངས་པ་ཡིན་གྱི། དུས་གཅིག་ན་ཐོས་ཞེས་པའི་ངེས་གཟུང་ལས་འདས་པ་ཡིན་ནོ། །ཐུན་མོང་བ་ནི་འབྱུང་བ་དཀོན་ཕྱིར་ཞེས་པ་ལྟར་སྤྲུལ་སྐུའི་ཆོས་དུས་རེ་འགའ་གསུངས་པ་ལས་ཁྱད་པར་འཕགས་པའོ། །

གཉིས་པ་ནང་ལྟར་བཀོད་པ་བྱང་ཆུབ་སེམས་སུ་བཤད་པ་ནི། གནས་ཡུམ་གྱི་གསང་བ་དང་འཁོར་ལོ་བཞིའི་རྩ་རྣམས་སོ། །སྟོན་པ་ཡབ་ཡུམ་ནི་དྭངས་མ་དཀར་དམར་དང་ཡེ་ཤེས་ཀྱི་རླུང་ངོ་། །འཁོར་དགའ་བ་བཅུ་དྲུག་གི་ཉམས་དང་བཅས་པའོ། །དུས་གཙུག་ཏོར་འཁོར་ལོས་སྒྱུར་བ་བསམ་གྱིས་མི་ཁྱབ་པའི་དུས་སོ། །དེ་སྐད་དུའང་ཐལ་བ་ལས། འདི་ཞེས་ཉེ་བར་མཚོན་པ་ནི། །ཨེ་སོགས་རྣམ་བཞིའི་དབྱིབས་ཅན་གནས། །སྐད་ཅེས་གསལ་བྱེད་ལས་མིང་ཅན། །ཐིག་ལེ་ཝཾ་དབྱིབས་ཅན་སྟོན་པའོ། །མ་ད་མ་ནུ་སྡོམ་བྱེད་ཡིད། །ལས་ཅན་རྣམ་ཤེས་དེ་དག་ལས། །གསལ་བར་གོ་བས་བཤད་པར་འདོད། །པ་སྒྲ་དོན་དམ་ངེས་པའི་རྒྱུད། །ཡཱ་ན་ཐེག་མཆོག་འདི་ཡིན་ནོ། །དུས་ནི་བསམ་གྱིས་མི་ཁྱབ་དུས། །ནཱ་མ་ཞེས་མིང་དེ་བྱའོ། །ཞེས་སོ། །ཨེ་སོགས་ནི་ཡུམ་གྱི་མཁའི་གཟུགས་ཏེ་ལས་བཞིའི་གནས་དང་འཁོར་ལོ་བཞིའོ། །སྐད་ཅེས་པ་ནི་སྐད་ཅིག་མ་སྟེ་དགའ་བ་ཆེན་པོའི་ཚེ་གསལ་བྱེད་མིང་ཅན་ཐབས་ཏེ། ཐིག་ལེ་དཀར་པོ་ཝཾ་གི་གཟུགས་ཅན་ནོར་བུའི་རྩེར་འཐོན་པས་ཡུམ་ལ་བདེ་བ་སྟེར་ཞིང་། ཡུམ་གྱི་དམར་པོས་ཡབ་ལ་བདེ་བ་སྦྱིན་པའོ། །མ་ད་མ་ནུ་སྡོམ་བྱེད་ཀྱིས་སྟེང་འོག་གི་རླུང་འཆིང་ཞིང་གྱེན་དུ་འཁོར་ལོ་བཞིའི་ནང་འགེངས་པས་ཡེ་ཤེས་བརྟན་པར་བྱེད་པའོ། །ལས་ཅན་ནི་སྐལ་ལྡན་ལ། པ་སྒྲ་དོན་དམ་སྟེ་བདེ་སྟོང་གཉིས་མེད་ཀྱི་ཡེ་ཤེས་ཡཱ་ན་སྟེ་ཐེག་མཆོག་འདི་ཉིད་བསམ་གྱིས་མི་ཁྱབ་ཀྱི་དུས་སུ་མཐོང་བས་ནཱ་མ་སྟེ་ཡེ་ཤེས་ཆེན་པོའི་ཕུན་སུམ་ཚོགས་པ་ཉིད་དུ་བསྟན་པ་ཡིན་ནོ། །

 གསུམ་པ་གསང་བ་འོད་གསལ་ལྟར་བཤད་པ་ནི། གནས་སྙིང་རིན་པོ་ཆེ་ཟུར་བརྒྱད ་པའི་དབུས་ན་སྲོག་གི་རྩ་མཐིང་ཁ། དེ་ལས་སྦྲའི་ཆོན་ཐག་ལྟར་གྱེས་པའི་ཤར་ན་ཆུའི་རྩ་དཀར་པོ། ལྷོ་ན་སའི་རྩ་སེར་པོ། ནུབ་ན་མེའི་རྩ་དམར་པོ། བྱང་ན་རླུང་གི་རྩ་ལྗང་གུ་རྣམས་ཀྱི་ནང་ན་ཀུན་རྫོབ་ཀྱི་ཐིག་ལེ་ཡུངས་འབྲུ་ཙམ་རེ་གནས་སོ། །དེ་ན་སྟོན་པ་ནི་རང་བྱུང་(༡༡)གི་ཡེ་ཤེས་ལྔ་སོ་སོར་མ་འདྲེས་པའི་ཁ་དོག་ལ། ཡེ་ཤེས་ལྔའི་ཐུགས་ཀྱི་རང་རྩལ་ཉོན་མོངས་པ་ལྔར་སྣང་བ་སྟེ། ངོ་བོ་སྟོང་། རང་བཞིན་གསལ། ཐུགས་རྗེའི་མདངས་འགག་པ་མེད་པར་བཞུགས་སོ། །འཁོར་ནི་རྩ་དང་ཐིག་ལེ་དེ་དག་ལས་ལུས་ཀྱི་སྟེང་འོག་ཀུན་ཏུ་ཁྱབ་པ་རྩ་རྣམས་སོ། །དེའང་འོད་ལྔའི་དབུས་ན་རིགས་ཀྱི་སྐུ་དང་ཡེ་ཤེས་སུ་རང་གསལ་བའོ། །དུས་ནི་གནས་སྐབས་ལུས་དང་དབང་པོའི་རྟེན་འབྲེལ་ཚང་བ་དང་། རང་བཞིན་དུས་གསུམ་འཕོ་འགྱུར་མེད་པས་དུས་བཞི་མཉམ་པ་ཉིད་ཀྱི་དུས་སོ། །ཆོས་ནི་སྟོང་གསལ་སྤྲོས་པ་དང་བྲལ་བའི་ཡེ་ཤེས་ཏེ། སྟེང་སྒོ་ཡེ་ཤེས་ཆེན་པོའི་རླུང་ཟིན་ཅིང་། ལས་རླུང་ཀུན་ཏུ་གཡོ་བྱེད་ཐམས་ཅད་འགགས་པ་ན་རང་སྣང་ཞིང་། འཆི་ཁའི་ཚེ་རྣམ་ཤེས་རླུང་ཞོན་གྱི་དགོངས་པ་ཤར་བས་མངོན་དུ་བྱེད་དོ། །དེའི་ཚེ་འོག་མིན་རྡོ་རྗེ་དབྱིངས་ཀྱི་དཀྱིལ་འཁོར་སྙིང་ག་ནས་གནས་བཏེག་སྟེ། རང་སྣང་བ་ལས་འོག་མིན་དུ་རང་ངོ་ཤེས་པས་གྲོལ་བ་ཡིན་ནོ། །དེ་སྐད་དུ་རྒྱ་མཚོ་ལས། དྷརྨཱ་ཙཀྲ་ཆོས་ཀྱི་གནས། །འོད་བཞི་ཨེ་སོགས་དབྱིབས་སུ་གནས། །མི་ཤིགས་ཐིག་ལེ་ཝཾ་དབྱིབས་ཅན། །རང་ལ་བདེ་བ་གསལ་བྱེད་བདག །མ་ནུ་ཡིད་སོགས་རྣམ་ཤེས་བཞི། །ཡེ་ཤེས་མྱོང་བས་བསྡུས་བཤད་པའོ། །ཡེ་ཤེས་ནམ་མཁའི་གཟུགས་སུ་སྐྱེས། །པ་ར་མཱརྠ་དོན་ཟབ་མོ། །བདེ་བའི་དུས་ཉིད་མཐའ་བྲལ་ཕྱིར། །དུས་གསུམ་ཀུན་གྱི་ངོ་བོར་གནས། །ཞེས་སོ། །དྷརྨཱ་ཙཀྲ་ནི་ཆོས་ཀྱི་འཁོར་ལོ་སྟེ་སྙིང་ག་ན་འོད་བཞིའི་དབྱིབས་ནི་མཐིང་ཁ་ཁྱབ་པ་ཆེན་པོ་འཆར་གཞི་ཡིན་པས་གཟུགས་སུ་མ་ཆད་ལ། དཀར་པོ་ཟླ་གམ། སེར་པོ་གྲུ་བཞི། དམར་པོ་ཟླུམ་པོ། ལྗང་གུ་གྲུ་གསུམ་པའོ། །དེ་དག་གི་རྟེན་ཐིག་ལེ་ནི་ཝཾ་སྟེ་ཟླུམ་པོར་གནས་སོ། །ཡིད་ལ་སོགས་པ་བཞི་ནི་དབུས་སུ་ཀུན་གཞི། ཤར་དུ་ཀུན་གཞིའི་རྣམ་ཤེས། ལྷོར་ཡིད་ཀྱི་རྣམ་ཤེས། ནུབ་ཏུ་ཉོན་མོངས་པ་ཅན་གྱི་ཡིད། བྱང་དུ་མིག་རྣ་བ་སྣ་ལྕེ་ལུས་ཀྱི་རྣམ་པར་ཤེས་པ་འཆར་བའི་གཞི་བྱེད་དོ། །ཀུན་གཞི་ལུང་མ་བསྟན་རྟེན་ཡིན་ལ། དེ་ལ་བརྟེན་པའི་ཤེས་པ་སྡེ་ཚན་བཞིའོ། །དེ་དག་གི་ངོ་བོ་ད་ལྟ་ཉིད་ནས་གནས་ཀྱི་རིམ་པ་ལྟར་ཡེ་ཤེས་ལྔར་གནས་སོ། །དེ་ཉིད་ངོ་ཤེས་པས་ཉོན་མོངས་པ་མ་སྤངས་གནས་སུ་དག་སྟེ་ཡེ་ཤེས་ལྔའི་རྩལ་རྫོགས་པས་རྒྱལ་བའི་ཐུགས་ཞེས་བྱའོ། །ཡེ་ཤེས་ཀྱི་ངོ་བོ་ནམ་མཁའི་རང་བཞིན། དོན་གཉིས་སུ་མེད་པ། རང་བཞིན་འཕོ་འགྱུར་མེད་པ་ཡིན་ནོ། །གླེང་གཞི་འདི་ཉིད་ཤིན་ཏུ་གཅེས་པ་ཡིན་ཏེ། དུས་(༡༢)ཐམས་ཅད་དུ་སྐུ་གསུམ་ཡེ་ནས་སངས་རྒྱས་པའི་སྣང་ལུགས་དང་གནས་ལུགས་ཤེས་དགོས་པའི་ཕྱིར་རོ། །དེའང་ཐུན་མོང་གི་རྒྱུད་དུ་སྦྱང་གཞི་མ་དག་པ་སྦྱངས་པས་དག་པའི་ཡེ་ཤེས་འདོད་ཀྱང་། གསང་བ་སྒྱུ་འཕྲུལ་ནི་ཐམས་ཅད་དག་པའི་རང་བཞིན་གཅིག་ཏུ་གནས་པར་འདོད་དོ། །དེའང་སེམས་ཅན་ལ་སྣང་ཚད་སེམས་ཀྱི་སྣང་བ་རྨི་ལམ་ལྟར་ཡིན་ལ། སངས་རྒྱས་ལ་སྣང་བ་ཡེ་ཤེས་ཀྱི་རོལ་པ་སྟེ་འོག་མིན་ཉིད་དུ་སྣང་ངོ་། །དེའང་སེམས་ཅན་གྱི་རང་སྣང་བ་ཉིད་ཀྱི་ངོ་བོ་གཟུང་འཛིན་དུ་ཞེན་པས་མ་དག་པ་ལྟར་སྣང་ཡང་མ་དག་པ་རང་མཚན་པ་མེད་དེ། དུང་སེར་པོར་སྣང་བ་བཞིན་ནོ། །དེ་བས་ན་དུང་གི་སེར་པོ་རྟོག་པ་ལ་མིག་གི་བད་ཀན་རྟོག་པ་ལྟར་གཉིས་འཛིན་གཉིས་མེད་ཀྱི་ཡེ་ཤེས་དཀྱིལ་འཁོར་གསུམ་དུ་ཤེས་པར་བྱེད་དོ། །དེས་ན་མ་དག་པ་ལྟར་སྣང་ཡང་མ་དག་པ་ཉིད་མ་ཡིན་ཏེ་དག་པ་ཉིད་ཡིན་ནོ། །དག་པ་ལ་གཟུང་འཛིན་སྐྱེས་པས་མ་དག་པར་ཤར་བ་ཞེས་བྱའོ། །ངོ་བོ་ཡེ་ཤེས་གཅིག་ལ་སངས་རྒྱས་ཀྱིས་དག་པར་མཐོང་། ལམ་པས་འདྲེས་མར་མཐོང་། སེམས་ཅན་གྱིས་མ་དག་པར་མཐོང་བ་ནི་ཆུ་གཅིག་ལ་འགྲོ་དྲུག་སོ་སོས་བདུད་རྩི་དང་། བཏུང་དུ་རུང་བ་ཙམ་དང་། རྣག་ཁྲག་ལ་སོགས་པར་མཐོང་བ་དང་། དག་པའི་ཞིང་ན་གནས་པས་བདུད་རྩི་ཆེན་པོ་དང་ཆོས་ཀྱི་རང་བཞིན་དུ་སྣང་ངོ་། །ཆོས་ལ་དབང་ཐོབ་པའི་རིག་འཛིན་རྣམས་ལ་ཆུ་དེ་ཉིད་མཱ་མ་ཀཱིར་སྣང་སྟེ་བརླན་པའི་བྱ་བ་ཡང་བྱེད་ལ་རོལ་པའི་བདེ་བ་ཡང་མྱོང་ཞིང་། ཏིང་ངེ་འཛིན་ཀྱང་འཕྲུལ་ཏོ། །བག་ལ་ཉལ་ཤིན་ཏུ་ཟད་པ་ལ་ནི་སྤྲོས་པ་ཐམས་ཅད་དང་བྲལ་བའི་ངང་དུ་རོ་གཅིག་པར་སྣང་བ་དང་མི་སྣང་བའི་སྤྲོས་པ་ཉེ་བར་ཞི་བ་བཞིན་ནོ། །དཔེར་ན་ཞིང་འདི་ཉིད་ཀྱང་དག་པ་དང་མ་དག་པ་སོ་སོར་མཐོང་བ་ན་དག་མ་དག་རང་གི་བློ་ལ་སྣང་བ་ལས་ཕྱི་རོལ་ན་མ་དག་རང་མཚན་དུ་མེད་པར་བཤད་དེ། ཇི་སྐད་དུ་དྲི་མ་མེད་པར་གྲགས་པའི་མདོ་ལས། བཙུན་པ་ཤཱ་རིའི་བུས་སྨྲས་པ། བདག་གིས་ས་ཆེན་པོ་འདི་མཐོ་དམན་དང་གཡང་ས་དང་ལྗན་ལྗིན་གྱིས་གང་བར་མཐོང་ངོ་ཞེས་ཟེར་རོ། །སངས་རྒྱས་མྱ་ངན་མེད་པའི་ཞིང་ནས་འོངས་པའི་ཚངས་པ་རལ་པ་ཅན་གྱིས་སྨྲས་པ། བདག་གིས་ནི་བཅོམ་ལྡན་འདས་ཤཱཀྱ་ཐུབ་པའི་ཞིང་འདི་ཉིད་གཞན་འཕྲུལ་དབང་བྱེད་ཀྱི་ལྷའི་གནས་ཀྱི་བཀོད་པ་ཕུན་སུམ་ཚོགས་པ་བཞིན་དུ་ཡོངས་སུ་དག་པར་མཐོང་ངོ་ཞེས་ཟེར་རོ། །དེ་ནས་བཅོམ་ལྡན་འདས་ཀྱིས་འཁོར་གྱི་དཀྱིལ་འཁོར་རྣམས་ལ་སངས་རྒྱས་ཀྱི་ཞིང་འདིའི་རང་བཞིན་བསྟན་པར་(༡༣)མཛད་པས། ཐམས་ཅད་ཀྱིས་ཤར་ཕྱོགས་ཀྱི་སངས་རྒྱས་རིན་པོ་ཆེ་རྒྱན་བཀོད་པའི་ཞིང་ཁམས་བཞིན་ཡོངས་སུ་དག་པར་མཐོང་བར་གྱུར་པ་དེའི་ཚེ། བཅོམ་ལྡན་འདས་ཀྱིས་བཀའ་སྩལ་པ། ངའི་སངས་རྒྱས་ཀྱི་ཞིང་འདི་ནི་རྟག་ཏུ་འདི་འདྲ་སྟེ། ཁྱེད་རྣམས་ཀྱིས་མི་མཐོང་ངོ་། །ཞེས་གསུངས་སོ། །དེ་བས་ན་དག་མ་དག་ནི་སྣང་བས་ཕྱེ་བ་ཉིད་དུ་ཤེས་པར་བྱའོ། །

འོ་ན་སངས་རྒྱས་ལ་མ་དག་པ་མི་སྣང་ན། མདོ་ལས། ངས་སངས་རྒྱས་ཀྱི་སྤྱན་སྒྲིབ་པ་མེད་པས་ཡོངས་སུ་གཟིགས་པ་ན། འཇིག་རྟེན་གྱི་ཁམས་དག་པ་དང་མ་དག་པ་དང་། སེམས་ཅན་དབང་པོ་མཆོག་དང་མཆོག་མ་ཡིན་པ་དག་ཀྱང་ཡང་དག་པ་ཇི་ལྟ་བ་བཞིན་དུ་མཁྱེན་ཏོ། །ཞེས་པ་དང་འགལ་ཞེ་ན། འདི་ལྟར་གཉིད་དུ་མ་སོང་བ་དང་སོང་བ་ཁ་ཅིག་རིན་པོ་ཆེའི་ཁང་བུ་ན་གནས་པ་ལས། རྨི་ལམ་དུ་དག་པ་དང་མ་དག་པ་རང་རང་གི་སྣང་བས་ཕྱེ་བ་སོ་སོར་སྣང་དུས། མ་སོང་པ་དེས་དེ་དག་གི་མདུན་དུ་སྤྲུལ་བ་བཀྱེ་ནས། ཀྱེ་འདི་ལྟར་ཆོས་ཐམས་ཅད་ནི་ངོ་བོ་ཉིད་མེད་པ་དང་། མི་རྟག་པ་དང་། སྒྱུ་མ་ལྟ་བུ་དང་། རང་བཞིན་གྱིས་དག་པའོ། །ཞེས་པ་དང་། ཁྱེད་ནི་མ་རིག་པའི་གཉིད་ཀྱི་སྣང་བ་སྟེ་དོན་ལ་ནི་མེད་དོ་ཞེས་བརྗོད་ནས། རིམ་གྱིས་གཉིད་སད་པའི་ཐབས་ལ་སྦྱོར་བ་ལྟར་སངས་རྒྱས་ཀྱིས་མཁྱེན་གྱི། རང་སྣང་དུ་མིན་ཏེ་དེ་དག་རིན་པོ་ཆེའི་ཁང་བུ་ན་གནས་པ་བཞིན་ནོ། །

གཉིས་པ་ཚུལ་གཞན་གྱི་ལོག་རྟོག་དགག་པ་ནི། བློ་གྲོས་ཀྱི་མིག་ཕྱིན་ཅི་ལོག་གི་ལིང་ཐོག་གིས་ཁེབས་ཏེ་ཟབ་མོའི་དེ་ཁོ་ན་ཉིད་སྣང་བའི་སྐལ་བ་མེད་པ་དག་ན་རེ། ཁྱེད་ཀྱི་གཞུང་འདིར་འདི་སྐད་བདག་གིས་ཐོས་པའི་དུས་གཅིག་ན་ཞེས་མ་སྨོས་པས་གླེང་གཞི་ལོག་པའི་སྐྱོན་ཡོད་ཅེས་ཟེར་རོ། །ལན་ལ་གཉིས་ལས། ཚུལ་མཚུངས་པའི་རིག་པས་གདབ་པ་ནི། དེ་ལྟར་ན་བདེ་མཆོག་རྩ་རྒྱུད་ལས། དེ་ནས་གསང་བ་བཤད་པར་བྱ། །ཞེས་པ་དང་། མཚན་བརྗོད་ལས། དེ་ནས་དཔལ་ལྡན་རྡོ་རྗེ་འཆང་། །ཞེས་པ་འདི་ཡང་གླེང་གཞི་ལོག་པས་བཀའ་ཡང་དག་པ་མ་ཡིན་པར་ཐལ་ལོ། །གཉིས་པ་ཐུན་མོང་མ་ཡིན་པའི་ལན་དངོས་ནི་འདི་ལྟར་སྤྲུལ་སྐུ་རེས་འགའ་བས་གསུངས་པའི་བཀའ་དང་། ཐུན་མོང་གི་རྒྱུད་རྣམས་སུ་འདི་སྐད་བདག་གིས་ཐོས་ཞེས་འབྱུང་སྟེ། སྟོན་པ་དང་སྡུད་པ་པོ་ཐ་དད་པ་དང་། ཆོས་ཀྱང་ཐེག་པ་སྣ་ཚོགས་པས་རེས་འགའ་བར་བསྟན་པ་དང་། དུས་ཀྱང་རེས་འགའ་བར་བསྟན་པ་ཡིན་ཡང་། འདིར་ཐུན་མོང་མ་ཡིན་པ་ལོངས་སྤྱོད་རྫོགས་པ་སྐུའི་བསྟན་པའི་སྐབས་སུ། སྟོན་པ་(༡༤)ཐུན་མོང་མ་ཡིན་པ་དཔལ་ཀུན་ཏུ་བཟང་པོ་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་པོ་ཆོས་ཐམས་ཅད་ཀྱི་རང་བཞིན་གདོད་མ་ཉིད་དུ་མངོན་པར་སངས་རྒྱས་པ་ཉིད་སྟོན་པར་འདོད་ཀྱི། གང་ཟག་གི་རྒྱུད་གཅིག་ལམ་སྦྱངས་ཏེ་མངོན་པར་སངས་རྒྱས་པའི་སྟོན་པ་ལྟར་མ་ཡིན་ནོ། །གནས་ཐུན་མོང་མ་ཡིན་པ་ནི་འོག་མིན་ཆོས་ཀྱི་དབྱིངས་སྙིང་པོ་བྱང་ཆུབ་ཀྱི་དཀྱིལ་འཁོར་རང་སྣང་བ་ཕྱོགས་བཅུའི་རྒྱུད་དུ་མ་གཏོགས་པས་རྒྱ་དང་ཚད་དུ་མ་ཆད་པ། སངས་རྒྱས་ཉིད་ལས་གཞན་གྱི་སྤྱོད་ཡུལ་མ་ཡིན་པས་རིས་སུ་ཆད་པའི་གནས་མ་ཡིན་ནོ། །འཁོར་ཐུན་མོང་མ་ཡིན་པ་ནི་ཡེ་ཤེས་ཆེན་པོ་རང་སྣང་བའི་རྣམ་པར་འཕྲུལ་པ་སྟོན་པ་ཉིད་ལས་གཞན་མ་ཡིན་པས་རྒྱུད་ཐ་དད་པའི་འཁོར་གཞན་དག་འདུས་པ་མ་ཡིན་ནོ། །དུས་ཐུན་མོང་མ་ཡིན་པ་དུས་བཞི་མཉམ་པ་ཉིད་འཕོ་འགྱུར་མེད་པའི་ངང་ན་སྐུ་གསུང་ཐུགས་ལྷུན་སྟུག་པོ་བཀོད་པའི་རྒྱན་ཉིད་དུ་བཞུགས་ཀྱི། འདས་མ་འོངས་ད་ལྟར་རམ་སྐད་ཅིག་ཐང་ཅིག་ཡུད་ཙམ་ལོ་ཟླ་ལ་སོགས་པ་མ་ཡིན་ནོ། །རྒྱུད་ཀྱི་གཞུང་ཕུན་སུམ་ཚོགས་པ་འཁོར་འདས་ཐམས་ཅད་ཡེ་ནས་མངོན་པར་བྱང་ཆུབ་པའི་ངོ་བོར་ལྷུན་གྱིས་གྲུབ་པར་སྟོན་གྱི། རྒྱུ་འབྲས་བཟང་ངན་བླང་དོར་ལ་སོགས་པ་སྣ་ཚོགས་སུ་འབྱེད་པའི་རང་བཞིན་སྟོན་པ་ནི་མ་ཡིན་ནོ། །དེ་བས་ན་ཐུན་མོང་གི་ཐེག་པའི་ཕྱོགས་ལས་དཔགས་ཏེ་ཐུན་མོང་མ་ཡིན་པའི་ཐེག་པ་ལ་ཕྱིན་ཅི་ལོག་གི་སྐྱོན་བརྗོད་པར་བྱ་བ་མ་ཡིན་ཏེ། འདི་ལྟར་རྣམ་པར་གཞག་པ་ཐ་དད་པའི་ཕྱིར་རོ། །དེ་སྐད་དུ་མངོན་རྟོགས་རྒྱན་གྱི་འགྲེལ་པ་ལས་ཀྱང་། འདི་ནི་རྣམ་པར་གཞག་པ་གཞན་ཁོ་ན་ཡིན་པས། ཐེག་པ་གཞན་གྱི་ལུགས་ལ་བརྟེན་ནས་ནམ་དུ་ཡང་སུན་འབྱིན་པར་བརྗོད་པར་མི་བྱའོ། །ཞེས་གསུངས་པ་དང་མཐུན་ནོ། །འདི་ལྟར་ཆོས་ཡང་དག་པ་ཡིན་པ་དང་མ་ཡིན་པ་ཇི་ལྟ་བ་བཞིན་ཁོང་དུ་ཆུད་པ་ལ་ནི་ཐམས་ཅད་མཁྱེན་པའི་གཟིགས་པ་སྒྲིབ་པ་མེད་པ་དང་། འཕགས་པ་ཆེན་པོ་རྣམས་དང་། རིག་པའི་གནས་མཐའ་དག་ཁོང་དུ་ཆུད་པ་ཉིད་དགོས་ན། ཁྱོད་ནི་བ་ལང་རྫིའི་ཤེས་པ་ལྟར་འདུ་ཤེས་ཅུང་ཟད་མཐོང་བས་ནམ་མཁའ་ལྟ་བུའི་ཆོས་ཀྱི་རྣམ་གྲངས་ལ་ཡིན་མ་ཡིན་གྱི་རྣམ་པར་གཞག་པ་མི་རིགས་སོ། །སངས་རྒྱས་ཀྱི་ཆོས་ནི་བསམ་གྱིས་མི་ཁྱབ་སྟེ། འབྱམས་ཀླས་པས་ཚུ་རོལ་མཐོང་བའི་སྤྱོད་ཡུལ་ལས་འདས་སོ། །རེ་ཞིག་བདུད་ཀྱི་བསྟན་པ་ལའང་བསྟན་པར་རིགས་ཏེ། ཟ་མ་ཏོག་བཀོད་(༡༥)པར་བདུད་སྡིག་ཅན་རིན་པོ་ཆེའི་ཁྲི་ལ་འདུག་པས་ཆོས་བསྟན་པ་དེ་ཉིད་སངས་རྒྱས་ཀྱི་མདོ་སྡེར་བཞག་པ་བཞིན་ནོ། །དེ་ལྟ་བུའི་གསང་བ་ཆེན་པོ་ལ་སྐུར་པ་འདེབས་པ་ནི་རྣམ་པར་སྨིན་པ་ཚད་མེད་དེ། མདོ་ལས། ཆོས་ཀྱིས་ཕོངས་པར་གྱུར་པའི་ལས་བསགས་པ་དེའི་རྣམ་པར་སྨིན་པ་ནི་ཚད་མེད་བསམ་གྱིས་མི་ཁྱབ་སྟེ། མནར་མེད་པའི་སེམས་ཅན་དམྱལ་བ་ཆེན་པོར་སྐྱེས་ནས། དེར་ཡང་མེས་སྡུད་པའི་བསྐལ་པ་བྱུང་བ་དེའི་ཚེ་འཇིག་རྟེན་གྱི་ཁམས་གཞན་གྱི་དམྱལ་བ་ཆེན་པོ་དག་ཏུ་འདོང་ཞིང་དེར་ཡང་ཞེས་སོགས་ཕྱོགས་བཅུ་གངྒཱའི་ཀླུང་གི་བསྐལ་པའི་བར་དུ་གསུངས་ཤིང་། རྒྱུད་བླ་མ་ལས། གང་ཞིག་ཡང་ཡང་སྡིག་གྲོགས་བསྟེན་པས་སངས་རྒྱས་ངན་སེམས་ལྡན་གྱུར་དང་། །ཕ་མ་དགྲ་བཅོམ་གསོད་པར་བྱ་བ་མིན་བྱེད་མཆོག་ཚོགས་འབྱེད་པའི་མི། །དེ་ཡང་ཆོས་ཉིད་ངེས་པར་བསམས་ན་མྱུར་དུ་དེ་ལས་ཐར་འགྱུར་གྱི། །གང་ཞིག་ཡིད་ནི་ཆོས་ལ་སྡང་བ་དེ་ལ་ཐར་པ་ག་ལ་ཡོད། །ཅེས་སོ། །མདོར་ན་རང་གི་ཆོས་ལ་ཡིད་ཆེས་པར་གཟུང་གིས། གཞན་གྱི་ཆོས་ལ་སྐུར་པ་ནམ་ཡང་གདབ་པར་མི་བྱའོ། །

གཉིས་པ་གླེང་གཞི་རྒྱས་པར་བཤད་པ་ལ་གཉིས་ཏེ། སྟོན་པའི་ངོ་བོ་ལོངས་སྤྱོད་རྫོགས་པའི་རང་བཞིན་མདོར་བསྟན་པ་དང་། ལོངས་སྤྱོད་རྫོགས་པའི་དབྱེ་བ་རྒྱས་པར་བཤད་པའོ། །

དང་པོ་ནི། ཆོས་སྐུ་སྤྲོས་པའི་མཐའ་དག་བྲལ་བ་ནམ་མཁའ་ལྟ་བུའི་དེ༵་བཞི༵ན་ཉིད་ལ་མངའ་བརྙེས་པ་དེའི་ཚེ་སྐུ་གཞན་བཞི་ཡང་རྟག་ཏུ་ལྷུན་གྱིས་གྲུབ་ཅིང་ནམ་མཁའི་རང་བཞིན་ཆོས་སྐུའི་རྗེས་སུ་བྱེད་པ་མཐུན་པས་གཤེ༵གས་པ༵་ཞེས་བྱ་སྟེ། དཀོན་མཆོག་བརྩེགས་པའི་གསང་བ་བསམ་གྱིས་མི་ཁྱབ་པའི་མདོ་ལས། ནམ་མཁས་ཇི་སྙེད་ཁྱབ་གྱུར་པ། །སྐུ་ཡིས་ཀྱང་ནི་དེ་སྙེད་ཁྱབ། །སྐུ་ཡིས་ཇི་སྙེད་ཁྱབ་གྱུར་པ། །འོད་ཀྱིས་ཀྱང་ནི་དེ་སྙེད་ཁྱབ། །འོད་ཀྱིས་ཇི་སྙེད་ཁྱབ་གྱུར་པ། །གསུང་གིས་ཀྱང་ནི་དེ་སྙེད་ཁྱབ། །གསུང་གིས་ཇི་སྙེད་ཁྱབ་གྱུར་པ། །ཐུགས་ཀྱིས་ཀྱང་ནི་དེ་སྙེད་ཁྱབ། །ཅེས་པ་ལྟར་རོ། །གཞན་ཡང་སྔོན་གྱི་རྒྱལ་བའི་རྗེས་སུ་གཤེགས་པ་དང་། འདོད་ཡོན་གྱི་སྣང་བ་ཇི་ལྟར་སྣང་བ་དེ་བཞིན་ཐབས་ཀྱིས་སྤྱད་པས་གཤེགས་པ་དང་། སྐྱེ་བ་བཞིའི་སེམས་ཅན་གྱི་བསམ་པ་དང་མཐུན་པར་མངལ་ནས་སྐྱེ་བ་དེ་བཞིན་དུ་གཤེགས་པ་ལ་སོགས་པ་བཤད་དེ། སྤྲུལ་པའི་སྐུ་ལམ་རིམ་བགྲོད་རྣམས་དང་བསྟུན་པར་ཟད་ཀྱི། འདིར་མ་འབྲེལ་ལོ། །སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ཡོན་ཏན་ཐམས་ཅད་མ་ལུས་པ་ཐམས་ཅད་ཡ༵ང་དག༵་པ༵ར་རྫོག༵ས་པ༵འི་བདག་ཉིད་ནི། མ་རིག་པའི་གཉིད་ལས་སང༵ས་ཤིང་བྱ་བ་ཐམས་ཅད་ལ་བློ་གྲོས་ཕུན་སུམ་ཚོགས་(༡༦)པ་རྒྱ༵ས་པའི་སྟོན་པ་སྟེ། སྐྱབས་འགྲོ་བདུན་ཅུ་པ་ལས། མ་རིག་གཉིད་ལས་སངས་ཕྱིར་དང་། །ཤེས་བྱ་ལ་ཡང་བློ་རྒྱས་ཕྱིར། །སངས་རྒྱས་པདྨའི་འདབ་ལྟར་རྒྱས། །ཞེས་པ་དང་། ལེ་ལག་ལས། མ་རིག་པ་ཉིད་ཡེ་ཤེས་གསལ། །ཉོན་མོངས་བྱང་ཆུབ་སྡུག་བསྔལ་མཆོག །ཅེས་པ་ལྟར་རོ། །དེ་ལྟ་བུའི་རང་བཞིན་བདུད་བཞི་ཡེ་ནས་བཅོ༵མ་ཞིང་ཆེ་བའི་ཡོན་ཏན་དྲུག་དང་ལྡ༵ན་ལ་མི་གནས་པའི་མྱ་ངན་ལས་འད༵ས་པའོ། །བདུད་བཞི་བཅོམ་ལུགས་ནི་ཉོན་མོངས་པ་ལྔའི་རང་བཞིན་ཡེ་ནས་ཡེ་ཤེས་ལྔར་གྲུབ་པས་བླང་དོར་མེད་པའི་ཕྱིར་ཉོན་མོངས་པའི་བདུད་བཅོམ། ཉོན་མོངས་པ་མེད་པས་དེས་འཁོར་བར་མི་སྐྱེ་ཞིང་མ་སྐྱེས་པ་ལ་འཆི་བ་མེད་པས་འཆི་བདག་གི་བདུད་བཅོམ། འཆི་བ་མེད་ན་ཕུང་པོ་ཉིང་མཚམས་མི་སྦྱོར་བས་ཕུང་པོའི་བདུད་བཅོམ། དེ་ལ་བར་ཆད་ཀྱི་ཆོས་ཀྱིས་མི་ཚུགས་པས་ལྷའི་བུའི་བདུད་བཅོམ་པའོ། །མི་གནས་པའི་མྱ་ངན་ལས་འདས་པ་ནི་སྲིད་ཞི་གཉིས་ཀྱི་མཐའ་ལ་མི་གནས་པས་འགྲོ་བའི་དོན་ལྷུན་གྱིས་གྲུབ་པ་རང་བྱུང་བ་ཀུན་ཏུ་བཟང་པོའི་གོ་འཕང་ངོ་། །འདས་ཀྱི་སྒྲ་བོད་ཀྱིས་སྦྱར་ཏེ་རྒྱ་སྐད་ལ་མེད་པ་ནི་མི་འཐད་དེ། བྷ་གའི་སྒྲ་བསྒྲུབས་པས་འཁོར་འདས་གཉིས་སུ་འགྱུར་ཞིང་། དེའི་མཐའ་ལ་མི་གནས་པ་བསྟན་ཏོ། །གནས་དང་འཁོར་ལ་སོགས་པ་གཞན་ལ་མི་ལྟོས་པར་ཡེ་ཤེས་ཀྱི་རང་སྣང་ཉིད་དུ་ཏིང་ངེ་འཛིན་གྱི་སྒྱུ་མའི་རོལ་པར་ལྷུན་གྱིས་གྲུབ་པས་ལོ༵ངས་སྤྱོད༵་ཆེ༵ན་པོ༵་ཞེས་བྱའོ། །སྤྲུལ་པའི་སྐུ་ལ་སོགས་པའི་ཕུན་སུམ་ཚོགས་པ་རྣམས་གཞན་དང་ཐུན་མོང་དུ་གྱུར་པས་ལོངས་སྤྱོད་ཆེན་པོ་མ་ཡིན་པ་ལས་ཁྱད་པར་དུ་བྱས་སོ། །རང་སྣང་ལོངས་སྤྱོད་རྫོགས་པ་སྐུའི་སངས་རྒྱས་ཀྱི་དགོངས་པ་དེ་ཉིད་ཀུན་ལ་ཁྱབ་ཅིང་ཀུན་གྱི་རང་བཞིན་དང་ཐ་མི་དད་པར་བསྟན་པ་ནི། ཤར་ཕྱོགས་མངོན་པར་དགའ་བ་ལ་སོགས་པ་ཕྱོག༵ས་བཅུ༵་དང་འདས་མ་འོངས་ད་ལྟར་མ་ངེས་པའི་དུས་ཏེ་དུས༵་བཞིའི༵་དབྱིངས་ན་བཞུགས་པའི་མི་འཁྲུགས་པ་དང་། མར་མེ་མཛད་ལ་སོགས་པའི་དེ༵་བཞིན༵་གཤེག༵ས་པ༵་ཐམ༵ས་ཅ༵ད་ཀྱི༵་སྐུ༵་རྡོ༵་རྗེ༵་དང༵་གསུ༵ང་རྡོ་རྗེ་དང༵་ཐུ༵གས་རྡོ༵་རྗེའི་བད༵ག་ཉིད༵་ཆེན་པོ་ཆོས་སྐུ་ཕུན་ཚོགས་པ་མ༵་ལུ༵ས་པ་ཐམས་ཅད་ལོངས་སྐུ་ཕུན་སུམ་ཚོགས་པ་མི༵་ལུ༵ས་པ་ཐམས་ཅད་སྤྲུལ་སྐུ་ཕུན་སུམ་ཚོགས་པ་ལུ༵ས་པ༵་མེད༵་པ༵་ཐམ༵ས་ཅ༵ད་དང༵་དགོངས་པ་ཐ་དད་མེད་ཅིང་སོ༵་སོ༵་མ༵་ཡིན་ཏེ། ངོ་བོ་ལ་ཐ༵་མི་དད༵་ཅིང་ཆོས་ཉིད་ལ་དབྱེ༵ར་མེད༵་པའི་ར༵ང་བཞི༵ན་ཏེ༵་ཡེ་ནས་ལྷུན་གྱིས་གྲུབ་ཅིང་འདུ་འབྲལ་མེད་པའི་ཕྱིར་རོ། །གཞུང་འདི་ལ་ཁ་ཅིག་གིས་ཆོས་ཉིད་ཀུན་ལ་ཁྱབ་པར་འཆད་(༡༧)ཅིང་། འཁོར་འདས་གཉིས་ལ་སྦྱར་ཏེ་སོ་སོར་འབྱེད་པ་ནི་སྐབས་དང་འབྲེལ་བར་མ་མཐོང་ངོ་། །འདིར་ལྟ་བ་ངན་པའི་རི་བོ་ལྷུན་སྟུག་པ་ཕྱིན་ཅི་ལོག་གི་ནགས་ཐིབས་པོ་ཆེས་བསྐོར་བ་དག་ན་རེ། དུས་བཞིར་བཤད་པས་གཞན་ཐམས་ཅད་དུ་དུས་གསུམ་ལས་མ་གསུངས་པས་དུས་ལོག་པ་ཡིན་ཟེར་རོ། །དེ་ལྟ་ན་སྡེ་སྣོད་འགའ་ཞིག་ཏུ་རྫོགས་ལྡན་སུམ་ལྡན་གཉིས་ལྡན་རྩོད་ལྡན་གྱི་དུས་བཞིར་གསུངས་པ་དང་། མཛོད་ལས། ཆགས་གནས་འཇིག་སྟོངས་བཞིར་གསུངས་པ་དང་། དཀོན་ཅོག་བརྩེགས་པར་འདས་པ་དང་མ་འོངས་པ་དང་ད་ལྟར་བྱུང་བ་དང་བསམ་གྱིས་མི་ཁྱབ་པའི་དུས་བཞིར་གསུངས་པ་དག་ཀྱང་ལོག་པར་གོལ་ལ། འདོད་ན་ཆོས་དེ་དག་ཀྱང་ལོག་པར་འགྱུར་རོ། །དེ་ལ་མ་ངེས་པའི་དུས་ནི་ཁ་ཅིག་གིས་སེམས་ཅན་གྱི་ཁམས་ཆོས་ཐོས་ཤིང་ཉམས་སུ་བླངས་ན་སངས་རྒྱས་སུ་འགྱུར་ལ། མ་བླངས་ན་འཁོར་བར་གནས་པ་ལ་འདོད་དོ། །མ་འོངས་པའི་དུས་སུ་འདུའོ། །ཆོས་བསྟན་པས་ཐར་པར་འགྱུར་ན་སངས་རྒྱས་ཀྱི་ཐུགས་རྗེ་སྐད་ཅིག་ཀྱང་མི་བསྙེལ་བས་ཇི་ལྟ་བུས་འདུལ་བའི་གཟུགས་ཀྱིས་སྟོན་པར་ངེས་ཏེ། ལས་བརྒྱ་པ་ལས། རྒྱ་མཚོ་ཆུ་སྲིན་གནས་ཀྱི་རླབས། །དུས་ལས་ཡོལ་བར་འགྱུར་སྲིད་ཀྱང་། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་མི་མངའ། །ཞེས་སོ། །དེའང་སངས་རྒྱས་ཀྱིས་མི་འདུལ་བའི་སེམས་ཅན་ནི་འགའ་ཡང་མེད་དེ། ཡུམ་བར་མ་ལས། རབ་འབྱོར་སེམས་ཅན་གྱི་ཁམས་ན་དེ་བཞིན་གཤེགས་པས་འདུལ་བར་མི་འགྱུར་བའི་སེམས་ཅན་དེ་ནི་འགའ་ཡང་མེད་དེ། ཞེས་སོ། །འོ་ན་མ་སྐྱེས་དགྲའི་འགྱོད་པ་སེལ་བ་ལ་འཇམ་དཔལ་བསྔགས་པ་དང་། རྒྱལ་པོ་ཟས་གཙང་འདུལ་བ་ན་འཆར་ཀ་བཏང་བ་ལ་སོགས་པ་ཉན་རང་དང་བྱང་ཆུབ་སེམས་དཔས་འདུལ་གྱི། དེ་བཞིན་གཤེགས་པས་མི་འདུལ་བར་གསུངས་སོ་ཞེ་ན། མ་ཡིན་ཏེ། དེ་དག་ཉིད་དེ་བཞིན་གཤེགས་པའི་ཐུགས་རྗེས་བསྐུལ་ནས་དོན་མཛད་པས་ལ་ལ་ནི་དངོས་སུ། ལ་ལ་ནི་བརྒྱུད་ནས། ལ་ལ་ནི་སྣ་ཚོགས་སུ་འཕྲུལ་པས་དོན་མཛད་དེ། ས་ཐོབ་པའི་རྒྱལ་སྲས་རྣམས་ལ་བདེ་བར་གཤེགས་པས་འོད་ཟེར་ཆེན་པོའི་དབང་བསྐུར་བ་ལ་སོགས་པས་དོན་མཛད་ན་གཞན་ལ་ལྟ་ཅི་སྨོས་སོ། །ཇི་སྐད་དུ་སྙིང་རྗེ་པདྨ་དཀར་པོ་ལས། ཤཱ་རིའི་བུ། འདི་ལ་སོ་སོའི་སྐྱེ་བོ་དང་། ཉན་ཐོས་དང་། རང་སངས་རྒྱས་དང་། དབང་ཐོབ་པའི་བྱང་ཆུབ་སེམས་དཔའ་རྣམས་ཀྱིས་གང་ཅུང་ཟད་གདུལ་བ་དང་ལེགས་པར་སྨྲ་བ་དང་སེམས་པ་དེ་ཡང་དེ་བཞིན་གཤེགས་(༡༨)པའི་བྱིན་གྱིས་རླབས་ཏེ་ཐུགས་རྗེའི་དབང་ངོ་། །ཞེས་འབྱུང་ངོ་། །ཡང་ཁ་ཅིག་གིས་འཇིག་ཆགས་སྟོངས་གནས་བཞི་ལ་དུས་བཞིར་འདོད་པ་ནི་རིགས་པར་མ་མཐོང་སྟེ། འོག་མིན་གྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་དུས་ཆད་པ་མེད་པའི་རང་བཞིན་མ་འདུས་པ་དང་། སྐྱེ་གནས་འཇིག་པའི་ཆོས་ལས་སྐྱེ་འཇིག་མེད་པའི་དུས་ལ་མ་ཁྱབ་པའི་ཕྱིར་རོ། །འདིར་རང་གི་ལུགས་ནི་འདས་མ་འོངས་ད་ལྟར་གསུམ་ནི་འདུས་བྱས་ཀྱི་དུས་ཏེ་ཀུན་རྫོབ་པའོ། །ཆོས་ཉིད་འགྱུར་བ་མེད་པ་ནི་མ་ངེས་པ་སྟེ། བསམ་གྱིས་མི་ཁྱབ་པ་དོན་དམ་པའི་དུས་སོ། །དེ་ལ་དབྱེ་ན་གསུམ་ལས། གཞི་མ་ངེས་པའི་དུས་ནི་སེམས་ཉིད་གདོད་མ་ནས་དག་པ་དང་ཆོས་ཐམས་ཅད་ཀྱི་ཆོས་ཉིད་དེ་བཞིན་ཉིད་དེ། དཀོན་ཅོག་བརྩེགས་པ་ལས། འོད་སྲུངས་སེམས་དང་ཆོས་ཀྱི་དེ་བཞིན་ཉིད་ནི་གང་ནས་ཀྱང་མ་འོངས་གང་དུ་ཡང་མ་སོང་གར་ཡང་མི་གནས་པས་ན་མ་ངེས་པ་སྟེ་བསམ་གྱིས་མི་ཁྱབ་པའི་དུས་སོ། །ཞེས་སོ། །ལམ་མ་ངེས་པའི་དུས་ནི་དུས་གསུམ་གྱིས་བསྡུས་པའི་ཆོས་ཐམས་ཅད་སྐྱེ་བ་མེད་པར་རྟོགས་པ་རྣལ་འབྱོར་པ་མཉམ་པར་བཞག་དུས་ཀྱི་བློ་དམ་པ་སྟེ། མཚན་བརྗོད་ལས། དུས་གསུམ་དུས་མེད་རྟོགས་པ་པོ། །ཞེས་པས་སོ། །འབྲས་བུ་མ་ངེས་པའི་དུས་ནི་ལྷུན་སྟུག་པོ་བཀོད་པའི་ཞིང་ན་འཕོ་འགྱུར་མེད་པས་རྟག་པ་རྒྱུན་གྱི་འཁོར་ལོར་བཞུགས་པ་སྟེ། རྣམ་སྣང་མངོན་བྱང་ལས། ཡེ་ཤེས་ཀྱི་སྣང་བ་ཆེན་པོ་རང་གསལ་བས་མི་གཡོ་བའི་དུས་ཏེ། ཞེས་སོ། །དེ་བས་ན་ཆོས་ཐམས་ཅད་དུས་བཞིའི་ངོ་བོར་འདུས་པ་ཡིན་ནོ། །

གཉིས་པ་ལོངས་སྤྱོད་རྫོགས་པའི་དབྱེ་བ་རྒྱས་པར་བཤད་པ་ལ་གསུམ་སྟེ། གནས། སྟོན་པ། འཁོར་ཕུན་སུམ་ཚོགས་པ་རྒྱས་པར་བཤད་པའོ། །དང་པོ་ལ་གཉིས་ཏེ། སྤྱི་དོན་དང་། གཞུང་དོན་ནོ། །དང་པོ་ལ་བཞི་སྟེ། སྒྲ་དོན། མཚན་ཉིད། དབྱེ་བ། རྩོད་པ་སྤང་པའོ། །

དང་པོ་ནི། ཨ་ཀ་ནིཥྛའི་སྒྲ་ལས་དམན་པར་མ་གྱུར་པའམ་འོག་མ་ཡིན་པ་སྟེ་གོང་མར་གྱུར་པའི་དོན་ཏོ། །

གཉིས་པ་ནི། གནས་སུ་གྱུར་པ་གང་ཞིག་དེའི་གོང་ན་ཆེས་འཕགས་པའི་གནས་གཞན་མེད་པ་སྟེ་འོག་མིན་ཙམ་གྱི་མཚན་ཉིད་དོ། །ཆོས་སྐུའི་འོག་མིན་གྱི་མཚན་ཉིད་ནི་མཐར་ཐུག་གི་བགྲོད་བྱའི་གནས་ཡིན་པ་གང་ཞིག་གཟུགས་སྐུ་གཉིས་ཀྱི་འཆར་གཞིའི་རྟེན་བྱེད་པ། ལོངས་སྐུའི་ནི་ངེས་པ་ལྔ་ལྡན་སྣང་བའི་གནས་སུ་གྱུར་པ་གང་ཞིག་སྤྲུལ་སྐུའི་འཆར་གཞིའི་རྟེན་བྱེད་པ། སྤྲུལ་སྐུའི་ནི་གཙང་མའི་གནས་རིགས་ལྔའི་གོང་མར་གྱུར་པ་གང་ཞིག་འཇིག་རྟེན་དུ་སྣང་བའི་གནས་ཐམས་ཅད་(༡༩)ཀྱི་མཆོག་ཡིན་པའོ། །དེ་ཡང་འཇིག་རྟེན་གྱི་ཁམས་དང་། ཞིང་ཁམས་ཀྱི་ཁྱད་ནི། སྤྲུལ་སྐུས་འདུལ་བའི་ཞིང་དང་། ལོངས་སྐུ་དང་། ཆོས་སྐུའི་ཞིང་གི་ཁྱད་ཡོད་དོ། །

གསུམ་པ་དབྱེ་བ་ལ་གསུམ་སྟེ། ཆོས་སྐུ། ལོངས་སྐུ། སྤྲུལ་སྐུའི་འོག་མིན་ནོ། །

དང་པོ་ནི། མཐའ་དབུས་ཕྱོགས་ཆ་གང་དུའང་གཞག་ཏུ་མེད་ཅིང་སྤྲོས་པ་ཐམས་ཅད་དང་བྲལ་བའི་ངོ་བོ་སངས་རྒྱས་ཀྱི་མཐར་ཐུག་གི་བགྲོད་བྱ་དམ་པ་སྟེ། ཡང་དག་དོན་གྱི་འོག་མིན་ཞེས་བྱའོ། །དེ་སྐད་དུའང་ཀུན་བྱེད་ལས། སྟོན་པ་ཆོས་སྐུའི་གནས་ནི་འདི་ལྟ་སྟེ། །འོག་མིན་ཆོས་ཀྱི་དབྱིངས་ཀྱི་ཕོ་བྲང་སྟེ། །ཡང་དག་དོན་གྱི་འོག་མིན་དེ་རུ་བཤད། །ཅེས་སོ། །

ལོངས་སྐུའི་འོག་མིན་ནི་ཆོས་སྐུའི་དབྱིངས་ལས་ཡེ་ཤེས་ཆེན་པོའི་སྣང་བར་རང་བྱུང་བ་འོད་ཀྱི་གཞལ་ཡས་ཁང་དང་གཙོ་འཁོར་དུ་སྣང་བ། ཡེ་ཤེས་ལྔའི་རིགས་སུ་ལྷུན་གྱིས་གྲུབ་ཅིང་དུས་ཐམས་ཅད་དུ་འཕོ་འགྱུར་མེད་པ་སྟེ། སྒྱུ་འཕྲུལ་རྡོ་རྗེ་ལས། གཙང་མའི་རིགས་དག་སྤངས་པ་ཡིས། །འོག་མིན་ཆེན་པོའི་གནས་མཆོག་ན། །རིགས་བདག་ཕྱག་རྒྱ་ལྷུན་གྲུབ་སྐུ། །གཅིག་དང་དུ་མ་རྣམ་སྤངས་པ། །སངས་རྒྱས་ཀུན་གྱི་སྤྱི་གཟུགས་ཏེ། །གདོད་ནས་ཐེག་ཆེན་མཛོད་ཉིད་ཕྱིར། །སྒྲིབ་པ་མཐའ་སྤངས་གདུལ་བྱ་ལ། །སྐད་ཅིག་གཅིག་གིས་སྣང་བར་མཛད། །ཅེས་སོ། །དེའང་གཙང་མའི་གནས་སྤངས་ཞེས་པ་ནི་དེ་ལས་འདས་པ་སྟེ། འཇིག་རྟེན་གྱི་སྣང་བ་ལས་འཕགས་པ་ཡིན་གྱི་དེའི་ཡ་རོལ་ན་ཡོད་པའི་ངེས་པ་མེད་དེ། སངས་རྒྱས་གང་ན་བཞུགས་པའི་རང་སྣང་ཡིན་པའི་ཕྱིར་རོ། །དེའང་བཟང་པོ་སྤྱོད་པ་ལས། རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །ཞེས་པས། རྡུལ་ཕྲ་རབ་ཀྱི་ནང་ནའང་མི་བཞུགས་ཞེས་མི་བསམ་ཞིང་། དེ་ནའང་ལྷུན་སྟུག་པོ་བཀོད་པའི་ཞིང་སྣང་བར་མ་འགགས་སོ། །དེས་ན་གནས་ཀྱི་ཕྱོགས་བློས་ཕྱོགས་ཆར་ཆད་པ་ཞིག་ཏུ་བཙལ་མི་དགོས་ཏེ། ཆོས་ཀྱི་དབྱིངས་རྣམ་པར་དག་པའི་དབང་ལས། ཡོན་ཏན་གྱི་ཁྱད་པར་གང་དུ་སྣང་བ་དེ་ཉིད་རྒྱལ་བའི་དཀྱིལ་འཁོར་དུ་ཤེས་པར་བྱའོ། །དེ་ལྟ་བུའི་གནས་དེ་ཉིད་འོག་མིན་ཆེན་པོ་ཞེས་བྱ་སྟེ། སངས་རྒྱས་ཉིད་ཀྱི་རོལ་པ་ལས་གཞན་གྱི་ལོངས་སྤྱོད་མ་ཡིན་པའི་ཕྱིར་རོ། །དེ་ན་རྣམ་པར་སྣང་མཛད་དེ་བཞིན་གཤེགས་པའི་རིགས། མི་བསྐྱོད་པ་རྡོ་རྗེའི་རིགས། རིན་ཆེན་འབྱུང་ལྡན་རིན་པོའི་ཆེའི་རིགས། འོད་དཔག་མེད་པདྨའི་རིགས། དོན་ཡོད་གྲུབ་པ་ལས་ཀྱི་རིགས་ཏེ། སོ་སོའི་དཀྱིལ་འཁོར་ཚོམ་བུ་ནམ་མཁའི་(༢༠)དབྱིངས་ཀྱི་མཐའ་ཀླས་པར་རང་སྣང་བ་ལྷུན་གྱིས་གྲུབ་པའོ། །དེ་ལྟར་སྣང་བའི་སྐུ་དང་ཡེ་ཤེས་ཀྱི་སྣང་བ་དེ་ཡང་གཅིག་ཏུ་མ་གྲུབ་སྟེ་སྣ་ཚོགས་སུ་སྣང་ཞིང་། དུ་མར་མ་གྲུབ་སྟེ། ལོངས་སྐུ་དེ་ཉིད་གཅིག་གི་རང་སྣང་ཡིན་པའི་ཕྱིར་རོ། །དེ་ལྟ་བུའི་ཞིང་དང་སྐུ་དང་ཡེ་ཤེས་སུ་སྣང་བ་ནི་སངས་རྒྱས་ཐམས་ཅད་ཀྱི་རང་སྣང་ལོངས་སྤྱོད་རྫོགས་པའི་སྐུའི་སྤྱི་གཟུགས་ཏེ་ཐམས་ཅད་ཀྱི་སྤྱོད་ཡུལ་མ་ཡིན་ལ། སངས་རྒྱས་ལོངས་སྐུ་རྣམས་སྤྱི་མཐུན་པའི་སྣང་བའོ། །དེ་ན་སྣང་བའི་གཙོ་འཁོར་དེ་དག་ཐེག་པ་ཆེན་པོའི་ཆོས་ཐུན་མོང་མ་ཡིན་པའི་མཛོད་ཡིན་ཏེ། སངས་རྒྱས་ལོངས་སྤྱོད་རྫོགས་པའི་སྐུའི་ངང་ཡིན་པའི་ཕྱིར་རོ། །དེ་ལྟར་སྣང་བ་དེ་ཡང་སྒྲིབ་པ་མཐའ་དག་སྤངས་པའི་ཚེ། སྐད་ཅིག་དེ་ཉིད་ཆོས་སྐུ་དང་སྔ་ཕྱི་མི་ཕྱེད་པར་སྣང་བ་ཡིན་ནོ། །གདུལ་བྱ་ལ་སྣང་ཞེས་པས་ས་ཐོབ་པའི་སྤྱོད་ཡུལ་མ་ཡིན་ཏེ། སྒྲིབ་པ་མཐའ་དག་སྤངས་ཞེས་པ་དེ་མ་ཚང་བའི་ཕྱིར་རོ། །གནས་དེའི་ཡོན་ཏན་སྣང་ཚུལ་ནི། སྒྱུ་འཕྲུལ་རྒྱ་མཚོ་ལས། འཇིག་རྟེན་གནས་ཀྱི་འོག་མིན་ལས། །ཉིས་འགྱུར་དུ་ནི་དཔགས་པ་ཡི། །ངོ་བོ་མཐའ་གསུམ་ལས་འདས་པ། །ཡོན་ཏན་ལྔ་ཡི་བདག་ཉིད་དེ། །མ་སྤངས་རྒྱན་རྫོགས་གཞལ་ཡས་ཁང་། །གྲུ་བཞི་སྤྱི་བོ་འཁྱིལ་པར་གནས། །ཞེས་པས་ལོངས་སྐུའི་རང་སྣང་དག་པའི་ཞིང་ཁམས་ཡིན་པས་ན་གཙང་མའི་འོག་མིན་དང་། སར་གནས་ཀྱི་སྣང་བ་རང་བཞིན་སྤྲུལ་སྐུའི་འོག་མིན་གཉིས་ལས་སྣང་བ་དེ་ཉིད་འཕགས་སོ། །

དེ་ལྟ་བུའི་ཞིང་གི་ངོ་བོ་ཡོད་མེད་རྟག་ཆད་སྤྲོས་པའི་མཐའ་གསུམ་ལས་འདས་ཤིང་། སྐུ་གསུང་ཐུགས་ཡོན་ཏན་འཕྲིན་ལས་མི་ཟད་པ་རྒྱན་གྱི་འཁོར་ལོའི་ཡོན་ཏན་ལྔའི་རང་བཞིན་ཅན། སྣང་བའི་རྒྱན་ཕུལ་ཏུ་ཕྱིན་པས་སྤྲས་པའི་གཞལ་མེད་ཁང་ནམ་མཁའི་དབྱིངས་ཀུན་ཏུ་ཁྱབ་པར་སྣང་བའོ། །དེ་ཡང་གང་དུ་དབྱིངས་དང་ཡེ་ཤེས་གཉིས་སུ་མེད་པར་འདྲེས་པའི་གནས་དེ་ཉིད་དུ་སངས་རྒྱས་ལོངས་སྐུའི་སྣང་བ་དེ་ཉིད་འཆར་བ་ཡིན་ཏེ། ཆོས་དབྱིངས་བསྟོད་པ་ལས་ཀྱང་། དབང་ཕྱུག་ཆེན་པོའི་གནས་མཆོག་དང་། །འོག་མིན་དེ་ཉིད་རྣམ་མཛེས་པ། །ཤེས་པ་གསུམ་པ་གཅིག་ཉིད་དུ། །འདྲེས་པར་གྱུར་ལ་བདག་སྨྲའོ། །ཞེས་སོ། །དབང་ཕྱུག་ཆེན་པོ་ནི་ལོངས་སྐུ་ཉིད་དེ། ཆོས་ཐམས་ཅད་ཀྱི་འབྱོར་པ་དམ་པ་ལ་དབང་བསྒྱུར་བའི་ཕྱིར་རོ། །དེ་ལྟ་བུ་ཉིད་སངས་རྒྱས་ཐམས་ཅད་ཀྱི་ལོངས་སྤྱོད་རྫོགས་པ་སྐུ་སྤྱིའི་སྣང་བ་ཡིན་པས། སྣང་བ་མི་འདྲ་བ་ཐ་དད་དུ་བཞག་པ་མེད་ཀྱང་། རྒྱལ་བ་སོ་སོས་བྱང་ཆུབ་བརྙེས་པའི་ལོངས་སྐུའི་ཆ་ནས་(༢༡)ལོངས་སྐུའི་ཞིང་སོ་སོར་ཕྱེ་བ་ཙམ་དུ་ཟད་དེ། ཐེག་བསྡུས་ལས། བདག་ཏུ་འཛིན་པ་མེད་པའི་ཕྱིར། །གནས་ལ་ཐ་དད་ཡོད་མ་ཡིན། །སྔོན་གྱི་རྗེས་སུ་འབྲངས་པས་ན། །དེ་ལ་གདགས་པ་ཐ་དད་འབྱེད། །ཅེས་སོ། །དེ་ལྟར་རང་སྣང་ལོངས་སྐུའི་ཞིང་དུ་སངས་མ་རྒྱས་ན་འཇིག་རྟེན་དུ་སྒྲོན་མ་བཀོད་པ་ནས་འགྲོ་བའི་དོན་མཛད་མི་ནུས་ཏེ། རྒྱན་སྟུག་པོ་བཀོད་པའི་མདོ་ལས། ཡང་དག་སངས་རྒྱས་འོག་མིན་དུ། །སངས་རྒྱས་མ་གྱུར་འདོད་ཁམས་སུ། །སངས་རྒྱས་མཛད་པ་མི་མཛད་དོ། །ཞེས་སོ། །དེ་ཉིད་ཀྱི་ཕྱིར་རྒྱལ་བ་ཁམས་གསུམ་ལས་འདས་པས་གནས་ཀྱང་དེའི་སྒྲས་བརྗོད་དེ། དེ་ཉིད་ལས། གཟུགས་མེད་འདོད་དང་གཟུགས་རྣམས་དང་། །འདུ་ཤེས་མེད་པ་དེ་བཞིན་ཏེ། །གནས་ལས་འདས་སོ་སངས་རྒྱས་དབང་། །བཞུགས་སོ་སྟུག་པོའི་དཀྱིལ་འཁོར་ན། །ཞེས་སོ། །གནས་དེར་རང་སྣང་དག་པའི་དཀྱིལ་འཁོར་ལ། རང་བཞིན་རྫོགས་པ་ཆེན་པོ་ཨ་ཏི་ཡོ་གའི་ཆོས་ཕུན་སུམ་ཚོགས་པ་རང་བཞིན་བྱིན་གྱིས་བརླབས་ཀྱི་ཐུགས་ཀྱིས་སེམས་དཔའ་ལ་སྟོན་པ་ཀུན་ཏུ་བཟང་པོ་ཉིད་ལོངས་སྐུར་སྣང་བས་གསུངས་ཏེ། འདི་ཉིད་ལས། དེ་བཞིན་གཤེགས་པ་ཉིད་ལ་ཉིད་ཆེད་དུ་གླེང་ངོ་། །ཞེས་པ་དང་། གཞན་ལས་ཀྱང་ཚུལ་དེ་དང་མཐུན་པར་གསུངས་སོ། །

གསུམ་པ་སྤྲུལ་སྐུའི་འོག་མིན་ལ་གཉིས་ཏེ། གདུལ་བྱ་ས་ལ་གནས་པའི་དོན་དུ་རང་བཞིན་སྤྲུལ་སྐུའི་ཞིང་དང་། འདྲེས་མའི་དོན་དུ་གཙང་མ་རིས་ཀྱི་འོག་མིན་བསྟན་པའོ། །

དང་པོ་ནི། དབུས་ན་འོག་མིན་ཁང་བུ་བརྩེགས་པའམ་སྟུག་པོ་བཀོད་པ། ཤར་ན་མངོན་པར་དགའ་བ། ལྷོ་ན་རིན་པོ་ཆེས་བརྒྱན་པ། ནུབ་ན་བདེ་བ་ཅན། བྱང་ན་ལས་རབ་གྲུབ་པའི་ཞིང་ལྔར་འཁོར་ས་བཅུའི་སེམས་དཔའ་ལ། སྟོན་པ་རིགས་ལྔས་ཆོས་ཐེག་པ་ཆེན་པོ་ཐུན་མོང་དང་ཐུན་མོང་མ་ཡིན་པའི་རྣམ་གྲངས་ཞལ་དང་ལྗགས་ལས་འོད་ཟེར་འཕྲོས་པའི་རྩེ་ལས་རང་སྣང་ཞིང་། མེ་ལོང་ལྟ་བུའི་སྣང་བས་སྒྲིབ་པ་སྦྱང་བར་འདོད་དེ། འདི་ཉིད་ལས། འོག་མིན་བླ་མེད་གནས་མཆོག་ཏུ། །སྐུ་ནི་རྣམ་པར་སྣང་མཛད་ཚུལ། །བྱང་ཆུབ་སེམས་དཔའི་འཁོར་རྣམས་ལ། །དེ་བཞིན་གསུང་མཆོག་མི་སྨྲ་སྟེ། །སྐུ་ཡིས་ཆོས་རྣམས་མཇལ་བར་སྟོན། །མེ་ལོང་བསྟན་པའི་ཚུལ་བཞིན་དུ། །དངོས་ཀྱི་མདོག་ངན་ཐམས་ཅད་སེལ། །འཁོར་གྱིས་དེ་བཞིན་སྐུ་བལྟས་ན། །བྱང་ཆུབ་སྒྲིབ་པ་གཏིང་དཔག་མེད། །མེ་ལོང་བཞིན་དུ་སྐུ་ལ་སྣང་། །དེ་ནས་ས་བཅུ་རིམ་གྱིས་འབྱོང་། །བླ་མེད་བྱང་ཆུབ་ཡང་དག་འཐོབ། །ཅེས་སོ། །(༢༢)དུས་ནི་མི་ཟད་པ་རྒྱན་གྱི་འཁོར་ལོ་སྟེ་རྟག་པར་རོ། །ཁྱད་པར་དུ་ཞི་བ་དང་ཁྲོ་བོའི་དཀྱིལ་འཁོར་རིགས་ལྔ་མངོན་པར་སྣང་བས་རྣལ་འབྱོར་དང་རྣལ་འབྱོར་ཆེན་པོའི་ཐེག་པ་གསུངས་སོ། །ཞིང་དེ་ཡང་འཇིག་རྟེན་ལས་འཕགས་པས་སྟེང་ཞེས་བརྗོད་དེ། ཀུན་བྱེད་ལས། སྟོན་པ་ལོངས་སྤྱོད་རྫོགས་སྐུའི་གནས་བསྟན་པ། །འཇིག་རྟེན་མཚན་མ་ཀུན་གྱི་སྟེང་གྱུར་པ། །གནས་ཀྱི་འོག་མིན་ཁང་བུ་བརྩེགས་པ་ཡི། །གཞལ་ཡས་ཁང་སྟེ་གནས་ཀྱི་འོག་མིན་བཤད། །ཅེས་སོ། །འཁོར་ཡང་སེམས་དཔར་བཤད་དེ། དེ་ཉིད་ལས། སྟོན་པ་ལོངས་སྤྱོད་རྫོགས་སྐུའི་འཁོར་བསྟན་པ། །མོས་སྤྱོད་བཞི་ཡི་ས་ལས་འདས་པ་ཡིས། །དང་པོ་རབ་ཏུ་དགའ་བའི་ས་མནན་ནས། །ས་བཅུ་ཆོས་ཀྱི་སྤྲིན་གྱི་ས་པ་རྣམས། །དེ་ནི་ལོངས་སྤྱོད་རྫོགས་སྐུའི་འཁོར་དུ་བསྟན། །ཞེས་སོ། །ཆོས་ཀྱང་སྐུ་དང་ཡེ་ཤེས་ཀྱི་དགོངས་པ་སྟོན་ཏེ། དེ་ཉིད་ལས། ཡེ་ཤེས་ལོངས་སྤྱོད་འོག་མིན་བཞུགས་པ་ཡི། །ས་བཅུ་པ་ཡི་བྱང་ཆུབ་སེམས་དཔའ་ལ། །བྱང་ཆུབ་སེམས་དེ་སྐུ་དང་ཡེ་ཤེས་བཤད། །ཅེས་སོ། །ཇི་ལྟར་བཤད་ན་དེ་ལས། ལོངས་སྤྱོད་རྫོགས་སྐུ་རང་གི་ངོ་བོས་སྟོན། །ཞེས་སོ། །

གཉིས་པ་འདྲེས་མའི་ཚུལ་དུ་གཙང་མ་རིས་ཀྱི་འོག་མིན་བསྟན་པ་ནི། མི་མཇེད་ལ་སོགས་པ་འགྲོ་དྲུག་སེམས་ཅན་གྱི་སྣང་བ་དང་མཐུན་པའི་གནས་ཀྱི་མཆོག་རང་རང་གི་འཇིག་རྟེན་དེའི་གཟུགས་ཀྱི་ཁམས་བསམ་གཏན་བཞི་པའི་གནས་གཙང་མ་རིས་ཀྱི་ལྷ་ལྔའི་གནས་ཀྱི་འོག་མིན་རགས་པའི་དངོས་པོ་མ་ཡིན་པ། དྭངས་མ་འོད་ཀྱི་རང་བཞིན་ལས་གྲུབ་པའི་གནས་གཞལ་ཡས་ཁང་ལ་སོགས་པ་བཀོད་པའི་བྱེ་བྲག་སྣ་ཚོགས་པས་བརྒྱན་པ་དེར། འཇིག་རྟེན་དུ་སངས་རྒྱས་འབྱུང་བའི་ཚེ་སྤྲུལ་པའི་དང་པོ་ལོངས་སྐུ་དང་ཆོས་མཐུན་པ་མཚན་དཔེས་བརྒྱན་པའི་སངས་རྒྱས་སུ་བསྟན་ནས་ལྷ་དང་གྲུབ་པ་དང་རིག་སྔགས་འཆང་གི་དབང་པོ་ཚད་མེད་པ་ལ། བྱ་བ་དང་སྤྱོད་པ་དང་། རྣལ་འབྱོར་གྱི་རྒྱུད་ལ་སོགས་པ་དང་། ཕ་རོལ་ཏུ་ཕྱིན་པ་ལ་སོགས་པའི་ཐེག་པ་དུ་མས་འདུལ་བར་ཀུན་ཏུ་སྟོན་ཏོ། །དེ་སྐད་དུའང་ལེགས་པར་གྲུབ་པའི་རྒྱུད་ལས། གཙང་མའི་འོག་མིན་རྣམ་མཛེས་པར། །གྲུབ་པ་དབང་པོ་ལ་སོགས་ལ། །རིག་སྔགས་གཟུངས་སྔགས་རྣལ་འབྱོར་དང་། །རྒྱུ་ཆོས་དུ་མས་ཚིམ་པར་མཛད། །ཅེས་སོ། །གཞན་ཡང་སློབ་དཔོན་སངས་རྒྱས་གསང་བས་མཛད་པའི་སྤྱན་འགྲེལ་ལས། དོན་གྱི་འོག་མིན་ཆོས་ཀྱི་དབྱིངས་ཏེ། སངས་རྒྱས་ཐམས་ཅད་ཀྱི་བཞུགས་གནས་ཡིན་ཞིང་དེའི་གོང་ན་གཞན་མེད་པའི་(༢༣)ཕྱིར་རོ། །རྟགས་ཀྱི་འོག་མིན་དབྱིངས་དང་ཡེ་ཤེས་དབྱེར་མེད་ཀྱི་རྟགས་གཞལ་ཡས་ཁང་གི་དབྱིབས་དང་ཁ་དོག་ཏུ་སྣང་བ་སྟེ། ལོངས་སྤྱོད་རྫོགས་པ་སྐུའི་བཞུགས་གནས་ཡིན་ཞིང་ཆོས་ཀྱི་དབྱིངས་མཚོན་བྱེད་ཀྱི་རྟགས་དེའི་གོང་ན་གཞན་མེད་པའི་ཕྱིར་རོ། །རིག་པའི་འོག་མིན་དངོས་པོའི་གནས་ལུགས་ཇི་ལྟ་བ་བཞིན་རྟོགས་པའི་རིག་པའི་ཡེ་ཤེས་ཏེ། དག་པ་གཉིས་ལྡན་གྱི་ཆོས་སྐུའི་བཞུགས་གནས་ཡིན་ཞིང་དེའི་གོང་ན་རིག་པ་གཞན་མེད་པའི་ཕྱིར་རོ། །གསང་བའི་འོག་མིན་ཡུམ་གྱི་མཁའ་སྟེ་གསང་བ་སྐུའི་བཞུགས་གནས་ཡིན་ཞིང་། ལམ་གནས་དང་ཡོན་ཏན་གོང་ན་གཞན་མེད་པའི་ཕྱིར་རོ། །རྟོག་པའི་འོག་མིན་ལས་དང་པོ་པས་འོག་མིན་གྱི་གཞལ་ཡས་ཁང་བསྒོམ་པ་སྟེ། ལྷག་པ་ཏིང་ངེ་འཛིན་གྱི་དཀྱིལ་འཁོར་གྱི་བཞུགས་གནས་ཡིན་ཞིང་། དོན་སྤྱི་འཛིན་བྱེད་ཀྱི་རྟོག་པ་དེའི་གོང་ན་གཞན་མེད་པའི་ཕྱིར་རོ། །འཇིག་རྟེན་གནས་ཀྱི་འོག་མིན་གཙང་མ་རིས་ཀྱི་ལྷ་ལྔའི་ཡ་ཏ་སྟེ། འཕགས་པ་རྣམས་ཀྱི་བཞུགས་གནས་ཡིན་ཞིང་གཟུགས་ཁམས་ཀྱི་གནས་དེའི་གོང་ན་གཞན་མེད་པའི་ཕྱིར་རོ། །ཞེས་པའི་དོན་དྲུག་བྱུང་ཡང་སྔ་མའི་ཁོངས་སུ་འདུ་སྟེ། དོན་དང་རིག་པའི་འོག་མིན་ཆོས་སྐུར་འདུ་ཞིང་། རྟགས་ཀྱི་ལོངས་སྐུ། གཞན་གསུམ་སྤྲུལ་སྐུར་འདུ་སྟེ། གནས་ཀྱི་འོག་མིན་དངོས་ཡིན་ལ། གསང་བ་དང་རྟོག་པའི་འོག་མིན་སྤྲུལ་སྐུའི་ལམ་ཉམས་སུ་ལེན་པས་དེའི་ཁོངས་སུ་འདུས་སོ། །

བཞི་པ་རྩོད་པ་སྤང་པ་ནི། སྒྱུ་འཕྲུལ་གསུངས་པའི་གནས་རང་སྣང་ལོངས་སྐུའི་ཞིང་དུ་གདུལ་བྱ་རང་རྒྱུད་པ་མེད་ན་ཆོས་བསྟན་པའི་དགོས་པ་མེད་ཅིང་དོན་རྟགས་ཀྱི་དཀྱིལ་འཁོར་ཡང་གདུལ་བྱ་ལ་བསྟན་གྱི། རང་གི་ཐུགས་ཀྱི་སྤྲུལ་པ་ལ་བསྟན་མི་དགོས་ཏེ། སྤྲུལ་པ་ལ་རྟོག་པ་མེད་པའི་ཕྱིར་རོ། །དེས་ན་རང་རྒྱུད་པའི་འཁོར་དང་སྤྲུལ་པ་གཉིས་ཀའོ་ཞེས་ཟེར་རོ། །དེ་ནི་ཁྱེད་ཀྱིས་དགོངས་པ་མ་ལོན་པར་སྣང་སྟེ། སྤྲུལ་པའི་གདུལ་བྱ་ཡོད་པས་ཆོས་བསྟན་པའི་དགོས་པ་ཡོད་དེ། ཕྱི་རབས་ལ་གསང་བདག་གིས་འཆད་པའི་དགོས་པ་ཡོད་པའི་ཕྱིར་དང་། དོན་རྟགས་ནི་ཆེད་དུ་གདུལ་བྱ་ལ་བསྟན་པ་མ་ཡིན་གྱི། རང་སྣང་ལ་ལོངས་སྤྱོད་རྫོགས་པའི་ཡོན་ཏན་ལྷུན་རྫོགས་སུ་ཤར་བ་སྟེ། མེ་ལོང་གི་ངོས་ལ་གཟུགས་བརྙན་སྣང་བ་བཞིན་ནོ། །སྤྲུལ་པ་ལ་རྟོག་པ་མེད་ཀྱང་ཡེ་ཤེས་ཡོད་པས་དེ་ཉིད་ཀྱིས་ཆོས་ཉན་ཅིང་འཛིན་པར་བྱེད་དོ། །གལ་ཏེ་སྤྲུལ་པ་ལ་རིག་པའི་ཡེ་ཤེས་མེད་ན་ཤཱཀྱ་ཐུབ་པ་དང་གསང་བདག་ལ་སོགས་པ་ལ་ཇི་ལྟ་བ་དང་ཇི་སྙེད་པ་མཁྱེན་པའི་ཡེ་ཤེས་མི་མངའ་བར་ཐལ་བའི་སྐྱོན་ཡོད་དོ། །ལུང་གིས་ཀྱང་གནོད་དེ། དེ་བཞིན་ཐུགས་ཀྱི་ཁྱད་པར་ལས། །རང་སྣང་རྒྱལ་བའི་སེམས་སོགས་དང་། །ཞེས་པ་དང་། དེ་བཞིན་གཤེགས་པ་ཉིད་ལ་ཉིད་ཆེད་དུ་གླེང་ངོ་། །ཞེས་པ་དང་། དེ་བཞིན་ཉིད་ཀྱི་དབྱིངས་ཉིད་དབང་སྒྱུར་ཡེ་ཤེས་དཀྱིལ་འཁོར་ཐུགས་རྗེའི་ངང་། །རང་སྣང་བ་ཉིད་ཏིང་འཛིན་གཟུགས་བརྙན་སྒྱུ་མ་རྣམ་དག་གསལ་བ་ནི། །ཞེས་པ་ལ་སོགས་པས་གནོད་དོ། །ཁ་ཅིག་འདི་ནས་གསུངས་པའི་སེམས་དཔའ་རྣམས་ས་བཅུའི་སེམས་དཔར་འདོད་པ་ནི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ལ་བློ་ཁ་མ་ཕྱོགས་པ་སྟེ། གཙོ་འཁོར་དུ་སྣང་ཡང་ངོ་བོ་བཟང་ངན་མེད་པ་རྩིག་ངོས་གཅིག་གི་རི་མོའི་རྣམ་པའམ། གསེར་གྱི་གར་བུ་གཅིག་ལས་ལྷ་གཙོ་འཁོར་དུ་བཀོད་པ་བཞིན་དུ་ཡེ་ཤེས་ཀྱི་རོལ་པ་གཅིག་གི་ངང་དུ་བཤད་དོ། །ཁ་ཅིག་སྨོན་ལམ་གྱིས་གྲུབ་པའི་གདན་ཁྲི་ལ་ཆོས་ཉན་པའི་གདུལ་བྱ་རང་རྒྱུད་པར་འདོད་པ་ནི་མཚར་ཏེ། རང་སྣང་བའི་ཡེ་ཤེས་ཀྱི་རྟགས་སུ་ཤར་བའི་དེ་ཉིད་མ་གོ་བར་ཟད་དོ། །མདོར་ན་རང་སྣང་ལོངས་སྐུའི་ཞིང་ན་གདུལ་བྱ་རང་རྒྱུད་པ་འདོད་པའི་ཕྱོགས་བསྒྲུབ་པའི་རྩོད་པ་ནི། སྤྲེའུའི་ཟློས་གར་ཉིད་དེ་བཞད་གད་ཀྱི་གནས་སོ། །མདོར་ན་སངས་རྒྱས་ཀྱི་སྐུ་གསུམ་དང་རྣམ་པར་འཕྲུལ་པ་དང་ཞིང་ཁམས་ཀྱང་བསམ་གྱིས་མི་ཁྱབ་ཅིང་ཚད་མེད་དེ། སྡོང་པོ་བཀོད་པའི་མདོ་ལས། སྤུ་ཡི་རྩེ་མོ་གཅིག་ལ་ཡང་། །ཞིང་རྣམས་བྱེ་བ་བསམ་མི་ཁྱབ། །སྣ་ཚོགས་དབྱིབས་ཀྱང་ཐ་དད་དེ། །དེ་དག་འདྲེས་པར་གྱུར་པ་མེད། །ཅེས་གསུངས་པས། ནམ་མཁས་གང་དུ་ཁྱབ་པར་ཆོས་སྐུ་དང་ལོངས་སྐུས་ཁྱབ་ཅིང་། སེམས་ཅན་གྱི་གང་ཁྱབ་པར་སྤྲུལ་པའི་སྐུ་དང་འཕྲིན་ལས་ཀྱིས་ཁྱབ་པས་བདེ་བར་གཤེགས་པའི་ཞིང་ཁམས་ལ་ཕྱོགས་དང་རིས་སུ་ཆད་པ་མེད་དེ། ཞིང་འདི་ཉིད་ཀྱི་ཁོང་ནའང་གཞན་དག་བསམ་གྱིས་མི་ཁྱབ་པ་བརྗོད་ཀྱིས་མི་ལང་བ་ཡོད་པར་རྟོགས་པར་བྱ་ཞིང་། མ་དག་པར་སྣང་བ་ཡང་རང་གི་སྣང་བ་ཙམ་ལས་དག་པའི་ཞིང་དུ་བལྟ་བར་བྱ་སྟེ། ཉི་ཟླའི་སྣང་བ་མ་དག་པ་མ་ཡིན་མོད་ཀྱི། དམུས་ལོང་རྣམས་ཀྱིས་མི་མཐོང་བ་བཞིན་དུ་ཤེས་པར་བྱའོ། །རྣམ་པར་གཞག་པ་འདི་ནི་ཤིན་ཏུ་དཀའ་བའི་གནས་ཏེ་གསལ་བར་བསྟན་པ་ཡིན་ནོ། །

གཉིས་པ་གཞུང་གི་དོན་ལ་གསུམ་སྟེ། ལོངས་སྤྱོད་རྫོགས་པ་སྐུའི་ཞིང་ཁམས། གཞལ་ཡས་ཁང་། བཀོད་པ་ཕུན་སུམ་ཚོགས་པའོ། །

དང་པོ་ནི། ལྷུན་སྟུག་པོ་བཀོད་པའི་ཞིང་སྣང་བ་ཐམས་ཅད་ཀྱི་མཆོག་དེའི་གོང་ན་གཞན་མེད་པས་འོག༵་མི༵ན་ལོངས་སྐུའི་སངས་རྒྱས་ཀྱི༵་བཞུགས་གན༵ས་སྟེང་དང་འོག་ལ་སོགས་(༢༥)པའི་ཕྱོགས་བཅུ་མ་ཡིན་པས་མཐའ༵་དང༵་དབུ༵ས་ཞེ༵ས་རིས་སུ་བཞག་ཏུ་མེད༵་པ༵་ནམ་མཁའ་ལྟར་བསམ་གྱིས་མི་ཁྱབ་ཅིང་རང་སྣང་བའི་ཚད་མེད་པ་ན༵་འོག་གཞི༵་ཡང་རྒྱ་ཁྱོན་གྱི་ཚད༵་དམིགས་སུ་མེ༵ད་པ༵་མཐིང་ཁ་དང་དཀར་པོ་དང་སེར་པོ་དང་དམར་པོ་དང་ལྗང་གུའི༵་རང་བཞིན། མེ་ལོང་ལྟ་བུ་ལ་སོགས་པ་ཡེ༵་ཤེས༵་ཀྱི༵་རྩལ་མ་འགགས་པས་ཉོན་མོངས་པ་ལྔ་གཅོད་པའི་རྟགས་སུ་འོད་ལྔའི་འཁོར་ལོ༵་རྩིབས་བཞི་ལྟེ་བ་དང་བཅས་པར་མ་འདྲེས་པར་རང་གས༵ལ་བའི་སྟེང་ལ༵འོ། །

གཉིས་པ་ནི། སྟོན་པ་ཉིད་ཀྱི་རང་སྣང་བའི་ཡེ༵་ཤེས༵་ལྔའི་གདངས་ལས་གྲུབ་པའི་ཕྱིར། འདོད་རྒུ་ལྷུན་གྱིས་གྲུབ་པས་རིན༵་པོ་ཆེ་འོད་དང་གཟི་བརྗིད་མཐའ་ཡས་པ་ཉི་མའི་དཀྱིལ་འཁོར་ལྟར་འབ༵ར་བ༵འི་ངོ་བོ་ཡོན་ཏན་དང་རྒྱ་ཁྱོན་ལ་སོགས་པ་བློས་དཔག་པར་མི་ནུས་པས་གཞ༵ལ་ཡ༵ས་ཁང༵་ཆེན་པོ། སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་བསམ་གྱིས་མི་ཁྱབ་པ་མངའ་བས་ཁང་པ་དེའི་རྒྱ༵་ཆེ་ཆུང་གི་ཚད་ཕྱོག༵ས་བཅུར༵་མཐར་ཐུག་པར་གྱུར་པ་མེད་པས་ཡོ༵ངས་སུ༵་མ༵་ཆ༵ད་པ༵་སྟེ་ནམ་མཁའ་དང་མཉམ་པའོ། །སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་ཟད་པར་དང་ཟིལ་གནོན་ལ་སོགས་པའི་ཡོ༵ན་ཏན༵་དཔ༵ག་ཏུ་མེ༵ད་པ༵ར་ཡོངས་སུ་རྒྱས༵་པ༵འི་ཕྱིར༵་དབྱིབས་གྲུ༵་བཞི༵ར་གྱུ༵ར་པ༵འོ། །

ཆོས་མ་འདྲེས་པ་བཅོ་བརྒྱད་ནི། སྐུ་གསུང་ཐུགས་ལ་འཁྲུལ་པ་དང་། ཅ་ཅོ་དང་། དྲན་པ་ཉམས་པ་དང་། ཐུགས་མཉམ་པར་མ་བཞག་པ་དང་། ཐ་དད་པའི་འདུ་ཤེས་དང་། སོ་སོར་མ་བརྟགས་པའི་བཏང་སྙོམས་མི་མངའ་བ་དྲུག་དང་། འདུན་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་ལས་ཉམས་པ་མི་མངའ་བ་དྲུག་དང་། སྐུ་དང་། གསུང་དང་། ཐུགས་ཀྱི་ཕྲིན་ལས་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་གསུམ་དང་། འདས་པ་དང་། མ་འོངས་པ་དང་། ད་ལྟར་བྱུང་བ་ལ་མ་ཆགས་མ་ཐོགས་པའི་ཡེ་ཤེས་ཀྱི་གཟིགས་པ་ལ་འཇུག་པ་ གསུམ་སྟེ་བཅོ་བརྒྱད ་ནི། མདོ་སྡེ་རྒྱན་ལས། སྤྱོད་པ་དང་ནི་རྟོགས་པ་དང་། །ཡེ་ཤེས་དང་ནི་འཕྲིན་ལས་ཀྱི། །ཉན་ཐོས་རང་སངས་རྒྱས་ཀུན་གྱི། །བླ་མ་ཁྱོད་ལ་ཕྱག་འཚལ་ལོ། །ཞེས་པ་ལྟར་རོ། །

ཟད་པར་བཅུ་ནི། ཟད་པར་ས་དང་། ཆུ་དང་། མེ་དང་། རླུང་དང་། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ནམ་མཁའ་དང་། རྣམ་པར་ཤེས་པ་སྟེ་ནང་གི་ཁམས་དང་སྐྱེ་མཆེད་ལ་རང་དབང་ཐོབ་པས་ནུས་པ་མཐར་ཕྱིན་ཏེ་ཆུ་ལ་མི་ནུབ་པ་ལ་སོགས་པའི་ཡོན་ཏན་བཅུའོ། །

ཟིལ་གནོན་བརྒྱད་ནི། ནང་(༢༦)གཟུགས་སུ་འདུ་ཤེས་པས་ཕྱི་རོལ་སེམས་ཅན་དང་། སེམས་ཅན་མ་ཡིན་པའི་གཟུགས་ཐམས་ཅད་ཟིལ་གྱིས་གནོན་པ་གཉིས་དང་། ནང་གཟུགས་མེད་པར་འདུ་ཤེས་པས་ཕྱི་རོལ་སེམས་ཅན་དང་། སེམས་ཅན་མ་ཡིན་པའི་གཟུགས་ཟིལ་གྱིས་གནོན་པ་གཉིས་དང་། ནང་སྡུག་པར་མོས་པས་ཕྱི་རོལ་གྱི་ཁ་དོག་སྔོན་པོ་དང་། སེར་པོ་དང་། དམར་པོ་དང་། དཀར་པོ་ཐམས་ཅད་ཟིལ་གྱིས་གནོན་པའི་འོད་ཟེར་འགྱེད་པ་སྟེ་ བརྒྱད་དོ། །ནང་གཟུགས་དང་། གཟུགས་མེད་པ་དང་། སྡུག་པར་མོས་པ་གསུམ ་ནི་རྣམ་པར་ཐར་པའི་སྒོ་སྟོང་པ་ཉིད་ལ་སོགས་པ་གསུམ་མོ། །མེ་ལོང་ལྟ་བུ་ལ་སོགས་པ་མཐར་ཐུག་པ་བཞི་ནི་སངས་རྒྱས་ཁོ་ནའི་ཆོས་ཡིན་ལ་གཞན་ལ་མེད་པས་ལྷག༵་པའི༵་ཡེ༵་ཤེས༵་ཏེ་དེ་བཞི་མཚོན་པའི་བརྡར་ཕྱོགས་བཞི་ན་ཤེལ་དང་གསེར་དང་པདྨ་རཱ་ག་དང་མར་གད་ལས་གྲུབ་པའི་རིན༵་པོ༵་ཆེའི༵་གློ་འབུར༵་གྱི༵ས་ཕྱོགས་བཞིར་མཛེ༵ས་པ༵འོ། །དེ་ལ་མེ་ལོང་ལྟ་བུའི་ཡེ་ཤེས་ནི་གཡོ་བྱེད་གཟུང་འཛིན་གྱི་མཚན་མ་ཞི་ཞིང་ཡེ་ཤེས་གཞན་གསུམ་གྱི་འཆར་གཞི་བྱེད་དེ། དེ་ཉིད་ལས། མེ་ལོང་ཡེ་ཤེས་མི་གཡོ་སྟེ། །ཡེ་ཤེས་གསུམ་ནི་དེ་ལ་བརྟེན། །མཉམ་པ་ཉིད་དང་སོ་སོར་རྟོག །བྱ་བ་གྲུབ་པ་ཁོ་ནའོ། །ཞེས་སོ། །མཉམ་པ་ཉིད་ནི་འཁོར་འདས་ཀྱི་མཐའ་ལ་མི་གནས་པ་སྟེ། དེ་ལས། མི་གནས་ཞུ་བར་ཞུགས་པ་ནི། །མཉམ་ཉིད་ཡེ་ཤེས་ཆེན་པོར་འདོད། །ཅེས་སོ། །སོ་སོར་རྟོག་པ་ནི་ཤེས་བྱ་ཐམས་ཅད་མ་འདྲེས་པར་མཁྱེན་པ་སྟེ། དེ་ལས། སོ་སོར་རྟོག་པའི་ཡེ་ཤེས་ནི། །ཤེས་བྱ་ཀུན་ལ་རྟག་མི་ཐོགས། །ཏིང་ངེ་འཛིན་དང་གཟུངས་རྣམས་ཀྱི། །གཏེར་དང་འདྲ་བ་ཁོ་ན་ཡིན། །ཞེས་སོ། །བྱ་བ་གྲུབ་པའི་ཡེ་ཤེས་ནི་གདུལ་བྱའི་སྐལ་བ་ཇི་ལྟ་བ་བཞིན་འཕྲིན་ལས་འཇུག་པ་སྟེ། དེ་ལས། བྱ་བ་གྲུབ་པའི་ཡེ་ཤེས་ནི། །ཁམས་རྣམས་ཀུན་ཏུ་སྣ་ཚོགས་ཤིང་། །དཔག་མེད་བསམ་ཡས་སྤྲུལ་པ་ཡིས། །སེམས་ཅན་ཀུན་དོན་བསྒྲུབ་པའོ། །ཞེས་སོ། །དེ་ལྟ་བུའི་ཡེ་ཤེས་རྣམས་ཀྱང་ངོ་བོ་གཅིག་པའི་བརྡར་དཀྱིལ་འཁོར་དུ་བསྟན་ལ། རྩ་བའི་ཡེ་ཤེས་ལྔ་ལས་གྱེས་པའི་ཡེ་ཤེས་ལྔ་ལྔ་མཚོན་པའི་ཕྱིར་ཕྱོགས་བཞིའི་གློ་འབུར་གྱི་སྒྲས་ཡེ་ཤེས་ལྔའི་རང་བཞིན་གྱི་རྩིག་པ་ལྔ་ཡང་ནང་ནས་རིམ་པ་བཞིན་དུ་མཐིང་ཁ་དང་། ལྗང་གུ་དང་། དམར་པོ་དང་། སེར་པོ་དང་། དཀར་པོ་རྣམས་སྦྲགས་མར་བསྟན་པ་ཡིན་ནོ། །གཞལ་མེད་ཁང་དེའི་རྩེ༵་མོ༵་སྟེ་བུམ་པ་ཟླུམ་པོ་ནི་ཆོས་ཀྱི་དབྱིངས་ཀྱི་ཡེ་ཤེས་མཚོན་པ་སྟེ། སྔར་སྨོས་པ་བཞིན་ཕྱོག༵ས་བཅུ༵་དུས༵་བཞིའི༵་སངས༵་རྒྱས༵་(༢༧)ཐམས་ཅད་ཀྱི༵་སྐུ་གསུང་ཐུགས་ཡོན་ཏན་འཕྲིན་ལས་རྡོ་རྗེའི་དཀྱི༵ལ་འཁོ༵ར་མ༵་ལུས༵་པ༵་ཐམ༵ས་ཅ༵ད་དང་རང་བཞིན་སོ༵་སོ༵་མ་ཡི༵ན་ཞིང་ངོ༵་བོ༵་ཉིད༵་གཅི༵ག་པའི༵་ཡེ༵་ཤེས༵་ཆེན་པོ་དུས་བཞིར་ཀུན༵་ཏུ༵་འཁྱི༵ལ་པའི༵་བརྡའོ། །གཞལ་ཡས་ཁང་དེ་ཡང་གཅིག་མ་ཡིན་གྱི་ཚད་མེད་པར་བསྟན་པ་ནི། ཡེ་ཤེས་རེ་རེའང་ལྔ་ལྔ་སྟེ་ཉི་ཤུ་རྩ་ལྔ་ནས་དེ་ཡང་ལྔ་ཚན་དུ་ཕྱེ་བས་ཡེ༵་ཤེས༵་བས༵མ་གྱི༵ས་མི༵་ཁྱ༵བ་པ་མངའ་བ༵འི་བརྡར། གཞལ་ཡས་ཁང་གི་མདོག་ཀྱང་ཡེ༵་ཤེས༵་རི༵ན་པོ༵་ཆེ༵འི་དབྱིབ༵ས་དང༵་ཁ༵་དོ༵ག་དང་མཐུན་པར་རྩ་བའི་གཞལ་ཡས་ཁང་ནས་ཕྱོགས་བཞི་དབུས་དང་ལྔའི་གཞལ་ཡས་ཁང་གྲངས་མེད་པ་ཐམས་ཅད་ཀྱི་ཁ་དོག་སོ་སོར་གསལ་ཞིང་། དེ་དག་གི་དབྱིབས་ཀྱང་དབུས་གྲུ་བཞི། ཤར་ཟླ་གམ་ལ་སོགས་པ་དང་ཁ་དོག་ཀྱང་དཀར་སེར་ལ༵་སོ༵གས་པ༵་རྣམ༵་པ༵་ཐ༵་དད༵་པ༵འི་བྱེ༵་བྲ༵ག་ཚད་མེད་པ་དང༵་། བཀོད་པ་བསམ་གྱིས་མི་ཁྱབ་པའི་ཁྱ༵ད་པ༵ར་དུ༵་གྱུར༵་པ༵། ཉན་རང་དང་བྱང་ཆུབ་སེམས་དཔའི་སྣང་བའི་ཡོན་ཏན་ལས་ཁྱད་པར་དུ་འཕ༵གས་པ༵། ཞིང་དང་གཞལ་ཡས་ཁང་པའི་དབྱིབས་དང་ཁ་དོག་ལ་སོགས་པའི་ཚད༵་དཔ༵ག་ཏུ༵་མེ༵ད་པ༵འོ། །

གསུམ་པ་བཀོད་པ་ཕུན་སུམ་ཚོགས་པ་ལ་གཉིས་ཏེ། རྒྱན་དང་། ཁྲིའི་བཀོད་པ་ཕུན་སུམ་ཚོགས་པའོ། །

དང་པོ་ནི། ངོ་བོ་ཡེ༵་ཤེས༵་ལས་གྲུབ་པ་རྣམ་པ་རི༵ན་པོ༵་ཆེ༵་སྣ༵་ཚོ༵གས་ཀྱི༵་གཟུགས་དང་ཁ་དོག་ཏུ་སྣང་བའི་རང་བཞིན་རྩིག་པ་ལྔའི་སྟེང་ན་ཕ་གུ་དང་། དེའི་སྟེང་ན་མདའ་ཡབ་ཕྱིར་འཕྱར་བའི་ཁ་བད་ཀྱི་གདུང་སྣ་ལས་རིན་པོ་ཆེའི་དྲྭ་བའི་འཕྲེང༵་བ༵་དང༵་དེའི་བར་བར་ན་ཉི་ཟླའི་ཚར་དང་། དར་གྱི་ལྡ་ལྡི་དང་། རྔ་ཡབ་ནོར་བུའི་ཡུ་བ་ཅན་ལ་སོགས་པའི་ཆུན༵་འཕྱང༵་དང༵་། རྩེ་མོ་རིན་པོ་ཆེའི་དྲྭ་མིག་གསེང་མའི་ཤ༵ར་བུའི༵་རྒྱན༵་གྱི་པུ་ཤུས་མཛེས་པ་དང༵་། མི་བསྒྲིབ་པར་གསལ་བའི་རྒྱན་ཅན་རབ་ཏུ་འཚེར་ཞིང་ཡིད་དུ་འོང་བ་སྟེ། ཕ་གུ་ནི་ཡེ་ཤེས་འགྱུར་བ་མེད་པའི་བརྡའོ། །དྲྭ་ཕྱེད་ནི་སྐུ་གསུམ་འདུ་འབྲལ་མེད་པས་འགྲོ་བའི་དོན་འབྱུང་བའི་བརྡའོ། །མདའ་ཡབ་ནི་ཐུགས་རྗེའི་འགྲོ་བ་སྐྱོབ་པའི་བརྡའོ། །པུ་ཤུ་ནི་ཀུན་གྱི་བླ་མར་གྱུར་པས་མཚུངས་པ་མེད་པའི་བརྡའོ། །གཞན་ཡང་འདོད་ཡོན་གྱི་སྣམ་བུའི་སྟེང་ན་གཞལ་ཡས་ཁང་གི་ཕྱོགས་བཅུ་ཀུན་ཏུ་ཁྱབ་པར་འདོད་ཡོན་གྱི་ལྷ་མོ་ལྔ་ལྔའི་སྤྲིན་འཕྲོ་བས་ནང་གི་ལྷ་རྣམས་ལ་མཆོད་པ་ནི་ཡིད་དུ་འོང་བའི་གཟུ༵གས་སྣ༵་ཚོ༵གས་དང༵་། སྒྲ༵་སྣ༵་ཚོ༵གས་དང༵་། དྲི༵་སྣ༵་ཚོ༵གས་དང༵་། རོ༵་སྣ༵་ཚོ༵གས་དང༵་། རེག༵་བྱ༵་སྣ་ཚོ༵གས་ཀྱི༵ས་ཕྱོག༵ས་བཅུར༵་སྤྲིན་ཕུང་འཁྲིག༵ས་པ༵ར་ར༵ང་བཞིན་ལྷུན་གྱིས་གྲུབ་པར་བྱུང༵་བ༵་ནི་འདོད་ཡོན་ཐམས་ཅད་རོལ་པའི་རྒྱན་དུ་ཤར་བའི་བརྡའོ། །(༢༨)ཁ་ཅིག་ཡིད་དུ་འོང་མི་འོང་བར་མར་སྦྱོར་བ་ནི་མི་འཐད་དེ། སྐབས་འདིར་སངས་རྒྱས་ཀྱི་རང་སྣང་ལ་མ་དག་པ་མི་མངའ་བའི་ཕྱིར་རོ། །གཞལ་ཡས་ཁང་པ་དང་ཕྱི་ནང་གི་རྒྱན་ཐམས་ཅད་རགས་པར་མ་གྲུབ་ཅིང་དྭངས་པས་གཅིག་གིས་གཅིག་མི༵་བསྒྲི༵བས་པར༵་ཕྱི་ནང་ཟང་ཐལ་བར་གས༵ལ་བ༵འི་རྒྱན༵་ཅན་བཀོད་པ་མཛེས་ཤིང་བྱེ་བྲག་བས༵མ་གྱིས༵་མི༵་ཁྱབ༵་པ༵ས་ལྷབ་ལྷུབ་ཏུ་ཀླུབ༵ས་ཤིང་བརྒྱན་པ༵་ནི་སེམས་ཀྱི་རང་བཞིན་ཡེ་ནས་འོད་གསལ་ཞིང་ཡོན་ཏན་ཚད་མེད་པར་མཚོན་པའོ། །དངོས་པོ་དང་མཚན་མར་འཛིན་པའི་སྒྲིབ་པ་ལས་རྣམ༵་པ༵ར་ཐར༵་པ༵་བཞི༵འི་སྒོ༵་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། མངོན་པར་འདུས་མ་བྱས་པ་བཞི་ན༵ས་ཀུན་ཏུ་བཟང་པོ་ལྷུན་གྱིས་གྲུབ་པའི་གཞལ་ཡས་ཁང་དེར་འཇུ༵ག༵་པ་མཚོན་པ༵འི་ཕྱིར་ཕྱོགས་བཞི་ན་སྒོ་གསུམ་གསུམ་གྱིས་བརྒྱན་པའི་སྒོ༵་ཁྱུད༵་ཅ༵ན་ནོ། །ཆོས་ཐམས་ཅད་ཡེ་ནས་ངོ་བོ་ཉིད་མེད་པ་ནི་སྟོང་པ་ཉིད་དོ། །སྣང་དུས་ཉིད་ནས་རང་བཞིན་མེད་པ་ནི་མཚན་མ་མེད་པའོ། །དགག་བསྒྲུབ་བླང་དོར་མེད་པ་ནི་སྨོན་པ་མེད་པའོ། །དེ་དག་གི་རང་བཞིན་རྟོགས་ནས་སེམས་ཉིད་བྱ་རྩོལ་མེད་པ་ནི་མངོན་པར་འདུས་མ་བྱས་པའོ། །འདུས་མ་བྱས་པ་ལ་དབྱེ་ན་གཉིས་ཏེ། ཡེ་ནས་འོད་གསལ་བ་དང་། དེའི་ངང་ནས་རང་བཞིན་ཤུགས་ཀྱིས་ཚད་མེད་པ་བཞི་ལྷུན་གྱིས་གྲུབ་པའོ། །དང་པོ་ནི། སེམས་ཉིད་གདོད་ནས་དག་ཅིང་འོད་གསལ་བ་སྟེ། བརྒྱད་སྟོང་པ་ལས། སེམས་ལ་སེམས་མ་མཆིས་ཏེ། སེམས་ཀྱི་རང་བཞིན་འོད་གསལ་བའོ། །ཞེས་པ་དང་། ཤིང་སྒྲོལ་རྒྱུའི་ཚལ་དུ་མཉམ་པར་བཞག་པའི་ཚེ་དེ་བཞིན་གཤེགས་པས། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་བདག་གིས་རྙེད། །སུ་ལ་བསྟན་ཡང་གོ་བར་མི་འགྱུར་བས། །མི་སྨྲ་གཅིག་པུར་ནགས་ཀྱི་ནང་དུ་གནས། །ཞེས་པ་དང་། མངོན་རྟོགས་རྒྱན་ལས། འདི་ལ་བསལ་བྱ་ཅི་ཡང་མེད། །གཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཞེས་པ་ལྟར་རོ། །

གཉིས་པ་ནི། སེམས་ཅན་བདེ་བ་དང་མི་ལྡན་པ་རྣམས་བདེ་བ་དང་ཕྲད་པར་འདོད་པའི་བྱམས་པ། སྡུག་བསྔལ་གྱིས་ཉམ་ཐག་པ་རྣམས་དེ་དང་བྲལ་བར་འདོད་པའི་སྙིང་རྗེ། བདེ་བ་དང་ལྡན་པ་རྣམས་དེ་དང་མི་འབྲལ་བར་འདོད་པའི་དགའ་བ། ཆགས་སྡང་ཅན་རྣམས་ཉེ་རིང་ཆགས་སྡང་ཐམས་ཅད་དང་བྲལ་ནས་སེམས་སྙོམས་པ་ལ་གནས་པར་འདོད་པའི་བཏང་སྙོམས་ཏེ། དམིགས་པ་དང་(༢༩)མཚན་མ་མེད་པའི་ཐུགས་རྗེའི་ངང་ཉིད་ནས་བྱུང་བས་ཚད་མེད་པ་བཞི་ནི། མདོ་སྡེ་རྒྱན་ལས། སེམས་ཅན་རྣམས་ལ་བརྩེ་བ་ཅན། །ཕྲད་དང་བྲལ་བའི་དགོངས་པ་ཅན། །མི་འབྲལ་བ་ཡི་དགོངས་པ་ཅན། །ཕན་བདེ་དགོངས་ཁྱོད་ལ་ཕྱག་འཚལ། །ཞེས་པ་ལྟར་རོ། །དེའང་ཚད་མེད་བཞིའི་བརྡར་སྒོ་བཞི་དང་། རྣམ་ཐར་གསུམ་གྱིས་བརྡར་སྒོ་ཁྱུད་རེ་རེ་ཞིང་སྒོ་གསུམ་བསྒྲིགས་རེ་རེས་བརྒྱན་པར་བཤད་དོ། །ནང་གཟུགས་ཀྱི་སྣང་བ་མ་འགགས་པས་ཕྱི་རོལ་གྱི་གཟུགས་སྣང་སྟོང་སྒྱུ་མར་བལྟ་བས་སྣང་བའི་བདེན་ཞེན་ལོག་པ་གཟུགས་ཅན་གཟུགས་ལ་བལྟ་བའི་རྣམ་ཐར་ནང་གཟུགས་སུ་མི་དམིགས་པས་ཕྱི་རོལ་གཟུགས་ལ་བལྟ་བས་ཕྱི་ནང་གི་བདེན་ཞེན་ལས་ཐར་པ་གཟུགས་ཅན་མ་ཡིན་པ་གཟུགས་ལ་བལྟ་བའི་རྣམ་ཐར། ཐམས་ཅད་སྟོང་པ་ཉིད་དུ་རོ་གཅིག་པར་བལྟ་བས་འཛིན་པ་ཀུན་ལས་ཐར་པ་སྡུག་པའི་རྣམ་ཐར། སེམས་ཉིད་ནམ་མཁའ་ལྟ་བུའི་དོན་མཐོང་བས་ནམ་མཁའ་མཐའ་ཡས་སྐྱེ་མཆེད་ཀྱི་རྣམ་ཐར། ཐམས་ཅད་སེམས་དང་ཡེ་ཤེས་ཀྱི་རོལ་པར་རྟོགས་པས་རྣམ་ཤེས་མཐའ་ཡས་སྐྱེ་མཆེད་ཀྱི་རྣམ་ཐར། གང་དུའང་གཟུང་འཛིན་མེད་པས་ཅི་ཡང་མེད་པའི་སྐྱེ་མཆེད་ཀྱི་རྣམ་ཐར། སྤྲོས་པ་དང་མཚན་མའི་སྤྱོད་ཡུལ་ཐམས་ཅད་ཞི་བས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་རྣམ་ཐར། འཁོར་འདས་ལ་སོགས་པའི་ཆོས་ཐམས་ཅད་ལ་དམིགས་ཞེན་འཛིན་པ་གཏན་དུ་མི་མངའ་བས་འགོག་པའི་རྣམ་པར་ཐར་པ་སྟེ། དེ་ལྟར་རྣམ༵་པ༵ར་ཐར༵་པ༵་བརྒྱད༵་ཀྱི༵་ཡོན་ཏན་རྫོགས་པའི་བརྡར་སྒོ་བཞིའི་ཕྱི་འགྲམ་གཉིས་ན་ཀ་བ་གཉིས་གཉིས་ཏེ་བཞིས་བཏེག་པའི་སྒོ་སྟེང་ན་རྡོ་རྗེའི་གདུང་བཞིའི་སྟེང་རྟ༵་བབ༵ས་བང་རིམ་བཞི་ཉིད་སྣམ་ཕྲན་བརྒྱད་དང༵་ལྡན༵་པ༵་ལ། རིན་པོ་ཆེའི་གདུགས་ཀྱི་རྩ་བར་ཆོས་ཀྱི་འཁོར་ལོ་རི་དྭགས་གཉིས་ཀྱིས་བསྐྱོད་པས་འཁོར་བ་དང་། འཕན་དང་། རྒྱལ་མཚན་དང་། ལྷའི་གོས་དང་། དར་གྱི་ལྡ་ལྡི་དང་། ཁ་ཁྱེར་བཞི་བཞི་ལ་བ་དན་ཉི་ཤུ་རྩ་བཞི་རྩ་བཞི་གསེར་གྱི་དྲིལ་བུ་གཡེར་ཁའི་ཕྲེང་བ་འཁྲོལ་བ་ལས་སྒྲ་འབྱུང་བ་ལ་སོགས་པས་བརྒྱན་ཅིང་། གཞན་ཡང་རྒྱ་མཚོ་ལས། ཞབས་དང་མ་ཆགས་ཟ་ར་ཚགས། །སྣ་འཕྱང་ཆུ་འཕྱང་འཕྲེང་བ་དང་། །སྣ་ཚོགས་ཁྱུང་མགོ་རིམ་པར་འཁྲིགས། །ཞེས་སོ། །ཏྭ་ར་ཎའི་སྒྲ་ལས། བར་སྣང་གི་རྒྱལ་མཚན་དང་། སྒོ་སྐྱབས་དང་། རྟ་བབས་ཞོན་གྱི་སྟེགས་དང་། ཐེམ་སྐས་ལ་འཇུག་པས། འདིར་གཙོ་བོར་བར་སྣང་གི་རྒྱན་གྱི་རྟ་བབས་བང་རིམ་བཞི་སྣམ་ཕྲན་བཞི་སྟེ་བརྒྱད་ལ་འདོད་(༣༠)དོ། །ཁ་ཅིག་ཐེག་པ་འོག་མ་བརྒྱད་ཨ་ཏིར་འཇུག་པའི་བརྡར་འདོད་པ་དང་། ཁ་ཅིག་རྣམ་པར་ཐར་པ་བརྒྱད་བསྒོམས་པས་འཇུག་པར་བཞེད་པ་ནི་མ་ཡིན་ཏེ། སྐབས་འདིར་སངས་རྒྱས་ཀྱི་སའི་ཡོན་ཏན་ཁོ་ན་ལ་སྦྱོར་དགོས་པའི་ཕྱིར་རོ། །ཆོས་སྐུ་སྤྲོས་པ་དང་བྲལ་བའི་ཡེ་ཤེས་ལ་ཕྱི༵་ནང༵་མེ༵ད་ཅིང་སངས་རྒྱས་ཀྱི་སའི་ཡོན་ཏན་ཐམས་ཅད་དེར་མ་ཚུད་པ་མེད་པ༵ས་ཀུན༵་ཏུ༵་ཡ༵ང་ནང༵་དུ༵་གྱུར༵་པ་མཚོན་པའི་ཕྱིར། གཞལ་ཡས་ཁང་དེ་ཡང་ཡེ་ཤེས་ཀྱི་འོད་ལྔ་རབ་ཏུ་དྭངས་པའི་རང་བཞིན་དེ་བཞིན་གཤེགས་པ་ཉིད་ཀྱི་ཐུགས་རྗེའི་ངང་ལས་སྣང་བས་ཕྱི་ཞིང་ཁམས་སུ་སྣང་བ་དང་ནང་གཙོ་འཁོར་དུ་སྣང་བ་ཐམས་ཅད་ཀྱང་ཉིད་ཀྱི་རང་བཞིན་ལས་གཞན་པའི་ཆོས་ཐ་དད་དུ་གྲུབ་པ་མེད་པར་ངོ་བོའི་གནས་ལུགས་ལ་དུས་དང་རྣམ་པ་ཀུན་ཏུ་ཡང་ཆོས་སྐུ་ཀུན་ཏུ་བཟང་པོའི་ངང་ལས་མ་གཡོས་པར་འདུས་པས་ནང་སྤྲོས་པ་དང་བྲལ་བ་ཉིད་དུ་ཡེ་ནས་གྱུར་པ་ན༵་ཞེས་སོ། །

གཉིས་པ་ཁྲིའི་བཀོད་པ་ཕུན་སུམ་ཚོགས་པ་ནི། ཐེག་པ་འོག་མས་ཉམ་མི་ང་ཞིང་། མི༵་འཇི༵གས་པ༵་བཞི་མཚོན་པའི་ཕྱིར་དབུས་སུ་སེང༵་གེ༵་རིན་པོ་ཆེའི༵་ཁྲི༵་དང༵་ལྡན་པའོ། །ང་སངས་རྒྱས་ཞེས་ཞལ་གྱིས་བཞེས་པ་རྟོགས་པ་དམ་འཆའ་བ། སྒྲིབ་པ་མཐའ་དག་སྤངས་ཞེས་སྤང་བ་དམ་འཆའ་བ། དུག་གསུམ་རང་གས་ཐར་པ་ལ་བར་དུ་གཅོད་ཅེས་གེགས་དམ་འཆའ་བ། ལམ་ཟབ་མོ་བསྒོམས་པས་འཁོར་བ་ལས་ངེས་པར་འབྱུང་ཞེས་ལམ་དམ་འཆའ་བ་ལ། དོན་ལ་གནས་པའི་རྒོལ་བ་མེད་པས་མི་འཇིགས་པ་བཞི་སྟེ། མདོ་སྡེ་རྒྱན་ལས། རང་གཞན་དོན་དུ་ཡེ་ཤེས་དང་། །སྤངས་དང་ངེས་འབྱུང་གེགས་བྱེད་རྣམས། །སྟོན་མཛད་མུ་སྟེགས་གཞན་དག་གིས། །མི་རྫི་ཁྱོད་ལ་ཕྱག་འཚལ་ལོ། །ཞེས་པ་ལྟར་རོ། །ཐེག་པ་འོག་མར་མི་ཆུད་པའི་དོན་འདིར་ཤོང་ཞིང་ཐེག་ལ་སྟོབ༵ས་ཀྱི་རྣམ་པ་བཅུ་མངའ་བའི་བརྡར་ཤར་དུ་གླང༵་པོ༵་ཆེ༵འི་ཁྲི༵་དང༵་ལྡན་པའོ། །སྤྱོད་ཡུལ་གྱི་གནས་དང་གནས་མ་ཡིན་པ་དང་། འགྲོ་བའི་ལས་ཀྱི་རྣམ་པར་སྨིན་པ་དང་། བསམ་གཏན་དང་ཏིང་ངེ་འཛིན་དང་རྣམ་པར་གྲོལ་བ་དང་། གདུལ་བྱའི་མོས་པ་སྣ་ཚོགས་དང་། ཁམས་སྣ་ཚོགས་དང་། དབང་པོ་མཆོག་དང་མཆོག་མ་ཡིན་པ་དང་། འགྲོ་བ་རྒྱུད་ལྔ་དང་ཐར་པ་གསུམ་དུ་འགྲོ་བའི་ལམ་དང་། རང་གཞན་གྱི་སྐྱེ་བ་སྔོན་གྱི་གནས་རྗེས་སུ་དྲན་པ་དང་། སེམས་ཅན་གྱི་འཆི་འཕོ་སྐྱེ་བ་དང་། ཟག་པ་ཟད་པ་མཁྱེན་པ་བཅུ་ལ་སྒྲིབ་བྱེད་དམ་རང་རང་གི་མི་མཐུན་ཕྱོགས་བཅུ་འཇོམས་པས་སྟོབས་བཅུ་སྟེ། དེ་ཉིད་ལས། ཐབས་དང་སྐྱབས་དང་དག་པ་དང་། །ཐེག་ཆེན་ངེས་པར་འབྱུང་བ་ལ། །སེམས་ཅན་རྣམས་ནི་རབ་བསླུ་བའི། །བདུད་འཇོམས་(༣༡)ཁྱོད་ལ་ཕྱག་འཚལ་ལོ། །ཞེས་པ་ལྟར་རོ། །གདུལ་བྱ་ཐམས་ཅད་མྱུར་དུ་གྲོལ་བར་བྱེད་ཅིང་རྫུ༵་འཕྲུ༵ལ༵་གྱི་རྐང་པ་བཞི་ལ་མངའ་བརྙེས་པའི་བརྡར་ལྷོར་ཅང་ཤེས་པ་རྟའི༵་ཁྲི༵་དང༵་ལྡན་པའོ། །

རྐང་པ་བཞི་ནི། འདུན་པ་དང་། བརྩོན་འགྲུས་དང་། སེམས་པ་དང་། དཔྱོད་པ་སྟེ་འགྲོ་བའི་ཡིད་དང་མཐུན་པར་སྤྲུལ་པ་བཀྱེ་ནས་དོན་མཛད་པ་ནི། འགྲེལ་ཆུང་ལས། འདུན་དང་བརྩོན་འགྲུས་སེམས་དང་ནི། །དཔྱོད་པའི་ཏིང་འཛིན་སྤོང་པ་ཡིན། །འདུ་བྱེད་རྣམས་ནི་རྐང་པ་བཞིས། །ཞེས་སོ། །སྣང་བ་ཐམས་ཅད་དབ༵ང་དུ་བྱེད་ཅིང་དབང་བཅུ་མངའ་བའི་བརྡར་ནུབ་ཏུ་རྨ༵་བྱ༵་རིན་པོ་ཆེའི༵་ཁྲི༵་དང༵་ལྡན་པའོ། །

དབང་བཅུ་ནི། འཆི་བ་མེད་པའི་ཚེ་དང་། འགྲོ་བའི་སེམས་ཤེས་པ་སེམས་དང་། ནམ་མཁའ་མཛོད་ལ་མངའ་བརྙེས་པས་ཡོ་བྱད་དང་། གཞན་གྱི་ལས་དམན་པ་བཟང་པོར་བསྒྱུར་བས་ལས་དང་། ཇི་ལྟར་འདུལ་བ་དེར་སྤྲུལ་པ་ལྷུན་གྲུབ་ཏུ་འབྱུང་བས་སྐྱེ་བ་དང་། སྔོན་དང་ཕྱི་མའི་བསྐལ་པ་རྒྱ་མཚོར་དགོངས་པ་བཞིན་འགྲུབ་པས་སྨོན་ལམ་དང་། གདུལ་བྱའི་མོས་པ་བཞིན་དོན་མཛད་པས་མོས་པ་དང་། བཞེད་ན་འཇིག་རྟེན་གྱི་ཁམས་ཐམས་ཅད་ཡུངས་འབྲུ་གཅིག་ཏུ་བཅུག་སྟེ་འཇིག་རྟེན་ཆུང་བའམ་ཡུངས་འབྲུ་ཆེ་བར་མི་མངོན་པ་ལ་སོགས་པ་སྟོན་པས་རྫུ་འཕྲུལ་དང་། མེ་ལོང་ལྟ་བུ་ལ་སོགས་པའི་ཡེ་ཤེས་ཆེན་པོ་ལྔ་ལ་མངའ་བརྙེས་པས། དོན་མཛད་པའི་ཕྱིར་ཡེ་ཤེས་དང་། ཇི་ལྟ་བ་དང་ཇི་སྙེད་པ་མ་ལུས་པ་མངོན་སུམ་དུ་མཁྱེན་པས་ཆོས་ལ་དབང་བ་སྟེ། དེ་ཉིད་ལས། ཡོ་བྱད་སྐྱེ་བ་ཚེ་ལ་དབང་། །ཡེ་ཤེས་ཆོས་དང་སེམས་དང་ལས། །རྫུ་འཕྲུལ་སྨོན་ལམ་ཆོས་རྣམས་ཀྱིས། །ཁམས་གསུམ་ཀུན་གྱི་དབང་ཕྱུག་རྒྱལ། །ཞེས་སོ། །འཕྲིན་ལས་སྣ་ཚོགས་ཀྱིས་འགྲོ་བ་འདུལ་ཞིང་ཐོ༵གས་པ༵་མེ༵ད་པ༵འི་ཡེ་ཤེས་གསུམ་དང་སོ་སོ་ཡང་དག་རིག་པ་བཞིས་དོན་མཛད་པའི་བརྡར་བྱང་དུ་ན༵མ་མཁ༵འ་ལྡི༵ང་སྟེ་ཤང་ཤང་གི༵་ཁྲི༵་དང༵་ལྡན་པའོ། །

ཐོགས་པ་མེད་པའི་ཡེ་ཤེས་གསུམ་ནི། འདས་པའི། མ་འོངས་པའི། ད་ལྟར་བྱུང་བའི་དུས་ལ་མ་ཆགས་མ་ཐོགས་པའི་ཡེ་ཤེས་ཀྱི་གཟིགས་པ་འཇུག༵་པ་གསུམ་མོ། །

རིག་པ་བཞི་ནི། ཆོས་ཐམས་ཅད་ཀྱི་ངོ་བོ་རྒྱུ་དང་འབྲས་བུ་མཐའ་དག་མཁྱེན་པས་ཆོས་དང་། དེའི་དོན་བརྗོད་ཚུལ་དུ་མས་སྟོན་པས་ཚིག་དང་། ལྷ་ལ་སོགས་པ་སེམས་ཅན་གྱི་སྐད་མཁྱེན་པ་སྟོན་པས་སྐད་དང་། ཆོས་འཆད་པ་ན་འཁོར་ལ་མི་འཇིགས་པས་སྤོབས་པ་སོ་སོ་ཡང་དག་རིག་པ་བཞི་སྟེ། མདོ་སྡེ་རྒྱན་ལས། རྟེན་དང་བརྟེན་པ་བཤད་བྱ་དང་། །གསུང་དང་མཁྱེན་པ་འཆད་བྱེད་ལ། །བློ་གྲོས་རྟག་ཐོགས་མི་(༣༢)མངའ་བའི། །ལེགས་སྟོན་ཁྱོད་ལ་ཕྱག་འཚལ་ལོ། །ཞེས་པ་ལྟར་རོ། །གཞན་ཡང་གདན་དེ་དག་གི་ངེས་པ་འགའ་ཞིག་རིན་པོ་ཆེ་དབང་གི་རྒྱུད་ལས་བྱུང་བ། སྐུ་ནི་མི་འཇིགས་བདུད་བཞི་རབ་ཏུ་འཇོམས། །དེ་གྲུབ་རྟགས་སུ་སེང་གེའི་ཁྲི་ལ་བཞུགས། །ཐུགས་ནི་སྟོབས་བཅུ་མི་དགེ་བཅུ་རྣམས་འདུལ། །དེ་གྲུབ་རྟགས་སུ་གླང་ཆེན་ཁྲི་ལ་བཞུགས། །ཡོན་ཏན་རྫུ་འཕྲུལ་རྐང་བཞིས་ཆགས་མེད་བགྲོད། །དེ་གྲུབ་རྟགས་སུ་རྟ་མཆོག་ཁྲི་ལ་བཞུགས། །གསུང་ནི་དབང་བཅུ་མཐར་ཕྱིན་རྒྱལ་བའི་ཚུལ། །དེ་གྲུབ་རྟགས་སུ་རྨ་བྱའི་ཁྲི་ལ་བཞུགས། །ལས་ནི་ཕྲིན་ལས་རྣམ་བཞིས་སྐྱེ་བཞི་སྒྲོལ། །དེ་གྲུབ་རྟགས་སུ་མཁའ་ལྡིང་ཁྲི་ལ་བཞུགས། །ཞེས་སོ། །སེམས་ཉིད་དང་ཆོས་སྐུ་ཡེ་ནས་རང༵་བཞི༵ན་གྱིས༵་འོ༵ད་གས༵ལ་ཞིང་ཐབས་དང་ཤེས་རབ་གཉིས་མེད་པའི༵་བརྡར་ཉི༵་ཟླའི༵་དཀྱི༵ལ་འཁོ༵ར་དང༵་། ཉེས་པའི་སྐྱོན་ཐམས་ཅད་ཀྱིས་གོ༵ས་པ༵་མེ༵ད་པ༵འི་བརྡར་སྣ་ཚོགས་པ༵དྨ༵་སྟེ། དེ་དག་གི་རྒྱུ་འདོད་རྒུ་འབྱུང་བའི་རི༵ན་པོ༵་ཆེ༵་ལས་གྲུབ་པའི༵་གད༵ན་ལ༵་བཞུགས་པའོ། །དེ་ཡང་ཁྲི་ལྔའི་སྟེང་ན་པདྨ་དང་ཉི་ཟླས་སྤྲས་པ་ནི་གཙོ་བོ་རྣམས་ཀྱི་གདན་ཡིན་ལ། འཁོར་ལ་ནི་སོ་སོའི་གནས་སུ་པདྨ་དང་ཉི་ཟླའི་གདན་རེ་རེའོ། །

གཉིས་པ་སྟོན་པ་ཕུན་སུམ་ཚོགས་པ་རྒྱས་པར་བཤད་པ་ལ་གཉིས་ཏེ། སྤྱི་དོན་དང་། གཞུང་དོན་ནོ། །དང་པོ་ལ་གསུམ་སྟེ། རིགས་ཀྱི་དབྱེ་བ། གང་གི་རིགས་ཡིན་ངོས་བཟུང་བ། གཞན་གྱི་ལོག་རྟོག་དགག་པའོ། །

དང་པོ་ནི། སྤྱིར་དེ་བཞིན་ཉིད་དུ་མངོན་པར་བྱང་ཆུབ་པ་འབྲས་བུའི་སྐབས་སུ་དབྱེ་ན་རིགས་ལྔ་སྟེ། དེ་བཞིན་གཤེགས་པའི་རིགས། རྡོ་རྗེའི། རིན་པོ་ཆེའི། པདྨའི། ལས་ཀྱི་རིགས་ལྔའོ། །དེ་དག་ཀྱང་རེ་རེ་ཞིང་སྐུ་དང་། གསུང་དང་། ཐུགས་དང་། ཡོན་ཏན་དང་། འཕྲིན་ལས་ཀྱི་རིགས་ལྔ་ལྔ་སྟེ་ཉི་ཤུ་རྩ་ལྔའོ། །དེ་བཞིན་དུ་རིགས་ལྔ་སྐུ་གསུང་ཐུགས་སུ་དབྱེ་བས་རིགས་བརྒྱ་དང་སྟོང་དང་། བྱེ་བ་དང་། གྲངས་མེད་པའི་བར་དུ་འགྱུར་ཏེ། དབང་གི་རྒྱུད་ལས། རིགས་ནི་རྣམ་ལྔ་རབ་དབྱེ་བས། །བརྒྱ་སྟོང་བྱེ་བ་གྲངས་མེད་དེ། །ནམ་མཁའ་བཞིན་དུ་བསམ་ཡས་སོ། །ཞེས་སོ། །དེ་ལྟར་རིགས་སོ་སོར་དབྱེ་བ་ན། དཀྱིལ་འཁོར་དེའི་གཙོ་བོ་ནི་རིགས་དེ་ཉིད་ཀྱིས་བསྡུས་པའི་ཐུགས་ཀྱི་རིགས་ཏེ་རྡོ་རྗེ་རྩེ་མོ་ལས། རིགས་ཀྱི་དཀྱིལ་འཁོར་རྣམས་ལ་ནི། །རིགས་བདག་ཐུགས་ཏེ་རིགས་ཀྱི་གཙོ། །ཞེས་སོ། །ཡང་དེ་བཞིན་གཤེགས་པའི་རིགས་ཀྱི་ཐུགས་རྣམ་པར་སྣང་མཛད་མཐིང་ག །སྐུ་རྡོ་རྗེ་སེམས་དཔའ་དཀར་པོ། །གསུང་སྣང་བ་མཐའ་ཡས་དམར་པོ། ཡོན་ཏན་རིན་ཅེན་འབྱུང་ལྡན་སེར་པོ། འཕྲིན་ལས་དོན་ཡོད་(༣༣)གྲུབ་པ་ལྗང་གུའོ། །རྡོ་རྗེའི་རིགས་ལ་ཐུགས་མི་བསྐྱོད་པ་མཐིང་ག །སྐུ་རྣམ་པར་སྣང་མཛད་དཀར་པོ། གཞན་རྣམས་སོ་སོའི་མདོག་གོ། །པདྨའི་རིགས་ལ་གསུང་གི་ཐུགས་སྣང་མཐའ་མཐིང་ག །གསུང་གི་སྐུ་རྣམ་པར་སྣང་མཛད་དཀར་པོ། གསུང་གི་གསུང་མི་བསྐྱོད་པ་དམར་པོ། གསུང་གི་ཡོན་ཏན་དང་འཕྲིན་ལས་སེར་ལྗང་ངོ་། །རིན་པོ་ཆེའི་རིགས་ལ། རིན་པོ་ཆེའི་ཐུགས་རིན་འབྱུང་མཐིང་ག །ཡོན་ཏན་མི་བསྐྱོད་པ་སེར་པོ། གཞན་གསུམ་སོ་སོའི་མདོག་གོ། །ལས་ཀྱི་རིགས་ལ་ལས་ཀྱི་ཐུགས་དོན་གྲུབ་མཐིང་ག །འཕྲིན་ལས་མི་བསྐྱོད་པ་ལྗང་གུ། གཞན་ནི་སོ་སོའི་མདོག་གོ། །དབྱེ་བ་འདི་ནི་ཐུན་མོང་མ་ཡིན་པའི་རྒྱུད་ཀྱི་དགོངས་པའོ། །དེའི་ཚེ་ཐུགས་ཀྱི་རིགས་ཀྱི་ཡེ་ཤེས་ཀྱང་མེ་ལོང་ལྟ་བུ་གཙོ་ལ་གཞན་བཞི་བཞིས་མཚོན་པ་སྟེ། དེ་བཞིན་གཤེགས་པའི་སྐབས་སུ་ཐུགས་རྣམ་སྣང་མེ་ལོང་ཡེ་ཤེས། ཐུགས་ཀྱི་སྐུ་མི་བསྐྱོད་པ་ཆོས་དབྱིངས་ཡེ་ཤེས། ཡོན་ཏན་རིན་འབྱུང་མཉམ་ཉིད། གསུང་སྣང་མཐའ་ཀུན་རྟོག །འཕྲིན་ལས་དོན་ཡོད་བྱ་གྲུབ། རྡོ་རྗེའི་རིགས་ལ་ཐུགས་མི་བསྐྱོད་པ་མེ་ལོང་ཡེ་ཤེས། སྐུ་རྣམ་སྣང་ཆོས་དབྱིངས་ཡེ་ཤེས། ཞེས་པའི་ཚུལ་གྱིས་གསུངས་སོ། །རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །ཞེས་པ་ལ་སོགས་པ་དང་། སེམས་ཅན་རྣམས་ནི་སངས་རྒྱས་ཉིད། །ཅེས་པ་དང་། འགྲོ་བའི་རྟོག་ཚོགས་བྱང་ཆུབ་སེམས། །ཞེས་པ་ལ་སོགས་པས་མ་དག་པ་འཁོར་བའི་གནས་སྐབས་ན་ཡང་ཡེ་ཤེས་ལྔའི་རང་བཞིན་དུ་ཡེ་ནས་སངས་རྒྱས་པར་འདོད་དེ། རེ་ཞིག་ཟབ་མོའི་མདོ་སྡེ་སྡོང་པོ་བཀོད་པ་ལས་ཀྱང་། གང་ཞིག་བདག་དང་སངས་རྒྱས་རྣམས། །རང་བཞིན་མཉམ་པར་རབ་གནས་ཤིང་། །མི་གནས་ལེན་པ་མེད་པ་དེ། །དེ་དག་བདེ་བར་གཤེགས་པར་འགྱུར། །གཟུགས་དང་ཚོར་བ་འདུ་ཤེས་དང་། །རྣམ་པར་ཤེས་དང་སེམས་པ་དག །གྲངས་མེད་དེ་བཞིན་གཤེགས་པ་རྣམས། །དེ་དག་ཐུབ་པ་ཆེན་པོར་འགྱུར། །ཞེས་པ་དང་། དྲི་མ་མེད་པའི་མདོ་ལས་ཀྱང་། འཇིག་ཚོགས་ལ་ལྟ་བ་ནི་དེ་བཞིན་གཤེགས་པའི་གདུང་ངོ་། །ཞེས་པ་དང་། སྐམ་ས་ལས་པདྨ་མི་སྐྱེའི། འདམ་ལས་སྐྱེ་བ་དང་འདྲ་བར། འདུས་མ་བྱས་མངོན་དུ་བྱས་པ་རྣམས་ལས་བླ་ན་མེད་པའི་བྱང་ཆུབ་ཀྱི་སེམས་མི་སྐྱེའི། འཇིག་ཚོགས་ལ་ལྟ་བ་རི་བོ་ལྟ་བུ་བསྐྱེད་ན་བླ་ན་མེད་པའི་བྱང་ཆུབ་ཀྱི་སེམས་སྐྱེ་བར་འགྱུར་བས། དེ་བས་ན་ཉོན་མོངས་པ་ནི་དེ་བཞིན་གཤེགས་པའི་གདུང་ངོ་། །ཞེས་གསུངས་ལ། ཐབས་ཀྱི་ཞགས་པའི་(༣༤)བསྲུང་བ་མེད་པའི་དམ་ཚིག་གི་སྐབས་ལས་ཀྱང་། འདི་ལྟར་གཏི་མུག་ནི་རྣམ་པར་མི་རྟོག་པའི་ཁོངས་སུ་འདུས་པས་སྤང་བླང་མེད་པའི་མཚན་ཉིད་ནི་སྐུ་དེ་བཞིན་གཤེགས་པའི་རིགས་སོ། །ཞེ་སྡང་ནི་ཆོས་ཀྱི་དབྱིངས་ལས་མ་གཡོས་བཞིན་དུ་གདུག་པ་འདུལ་བའི་མཚན་ཉིད་རྡོ་རྗེའི་རིགས་སོ། །ང་རྒྱལ་ནི་ཆོས་མཉམ་པ་ཉིད་ལ་སྲན་ཚུགས་པའི་མཚན་ཉིད་རིན་པོ་ཆེའི་རིགས་སོ། །འདོད་ཆགས་ནི་ཆོས་ཐམས་ཅད་ལ་མངའ་བརྙེས་པའི་མཚན་ཉིད་པདྨའི་རིགས་སོ། །ཕྲག་དོག་ནི་ཆོས་མཉམ་པར་མ་རྟོགས་པ་རྣམས་ལ་ལས་དགེ་སྡིག་ཡོད་ཕྱིར་འགྲོ་བའི་དོན་བྱེད་པའི་མཚན་ཉིད་ལས་ཀྱི་རིགས་སོ། །ཞེས་པ་དང་། གསང་བ་འདུས་པ་ལས་ཀྱང་། གཟུགས་ཀྱི་གཏི་མུག་ཉིད་བསྟན་པ། །བླུན་པས་བཅིངས་པའི་ངོ་བོའོ། །ཚོར་བ་འདོད་པས་མྱོས་བསྟན་པ། །ང་རྒྱལ་གྱི་ནི་ངོ་བོའོ། །འདུ་ཤེས་འདོད་ཆགས་བདག་ཉིད་ནི། །དངོས་པོ་ལ་ནི་ཆགས་པའི་མཚན། །འདུ་བྱེད་རྟག་ཏུ་ཕྲག་དོག་སྟེ། །རྩེ་གཅིག་བདག་ཉིད་བསྟོད་པའོ། །རྣམ་ཤེས་ཞེ་སྡང་ཞེས་བསྟན་ཏེ། །རྒྱུ་དང་འབྲས་བུར་རབ་ཏུ་གྲགས། །འདི་དག་བདེ་གཤེགས་ལྔ་ཡི་རིགས། །ཞེས་པ་དང་། རིན་ཅེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་སེམས་ཅན་མེད། །ཅེས་པ་ལ་སོགས་པ་གསུངས་སོ། །འོ་ན་འགྲོ་བའི་ཁམས་རྣམས་མ་དག་པ་སྣ་ཚོགས་སུ་སྣང་བ་ཇི་ལྟར་ཡིན་ཞེ་ན། ཡེ་ནས་དག་ཅིང་དྲི་མ་མེད་ཀྱང་། གློ་བུར་ཀུན་ཏུ་བཏགས་པའི་རྟོག་པའི་སྦགས་པས་ལས་དང་བདེ་སྡུག་སྣ་ཚོགས་སུ་ཀུན་གཞི་ལ་ནུས་པ་སྣ་ཚོགས་བཞག་པ་ལས་བྱུང་བའོ། །དེ་ཡང་ཀུན་གཞི་ནི། ཐམས་ཅད་པ་སྟེ་ཀུན་གྱི་རྟེན་ཡིན་པར། ལང་ཀར་གཤེགས་པ་ལས། ཀུན་གཞི་ཀུན་གྱི་རྟེན་ཡིན་ཏེ། །སྲིད་པ་དང་ནི་དེ་བཞིན་དུ། །རྣམ་པར་བྱང་བའི་གཞི་མའང་ཡིན། །ཞེས་སོ། །དེ་ཡང་མ་དག་པ་འཁོར་བར་སྣང་དུས་དེའི་རྟེན་བྱེད་ཅིང་དབྱེར་མེད་པ་བཞིན་ཡོད་ཀྱང་། དག་པའི་ཆོས་ཀྱི་དེ་ཉིད་ཆོས་ཀྱི་དབྱིངས་ཀྱི་ཡེ་ཤེས་བྱ་བར་མིང་གྱུར་པའོ། །དེ་ཉིད་ལ་ནི་ཡེ་ཤེས་ཀུན་བརྟེན་ཏོ། །འཁོར་བའི་ཀུན་གཞི་ལ་ནི་ཀུན་གཞིའི་རྣམ་པར་ཤེས་པ་དང་། ཉོན་ཡིད་དང་། ཡིད་ཤེས་དང་། སྒོ་ལྔའི་རྣམ་ཤེས་བརྟེན་ཏོ། །འདི་དག་མདོ་རྒྱུད་ལ་ལར་སྦྱངས་ཤིང་གནས་གྱུར་པས་ཡེ་ཤེས་ལྔར་དག་པར་འདོད་དོ། །ཀུན་གཞི་ཆོས་དབྱིངས་ཡེ་ཤེས་སུ་གནས་གྱུར། དེ་བཞིན་དུ་ཀུན་གཞིའི་རྣམ་ཤེས་མེ་ལོང་ཡེ་ཤེས། ཉོན་ཡིད་སོ་སོར་རྟོག་པ། ཡིད་ཤེས་མཉམ་པ་ཉིད། སྒོ་ལྔའི་རྣམ་ཤེས་བྱ་བ་གྲུབ་པའི་ཡེ་ཤེས་སུ་(༣༥)གནས་གྱུར་པའོ། །དེ་བཞིན་དུ་གཟུགས་རྣམ་སྣང་། ཚོར་བ་རིན་འབྱུང་། འདུ་ཤེས་སྣང་མཐའ། འདུ་བྱེད་དོན་གྲུབ། རྣམ་པར་ཤེས་པའི་ཕུང་པོ་མི་བསྐྱོད་པར་གནས་གྱུར་ཅིང་། ས་སངས་རྒྱས་སྤྱན། ཆུ་མཱ་མ་ཀཱི། མེ་གོས་དཀར་མོ། རླུང་དམ་ཚིག་སྒྲོལ་མ། ནམ་མཁའ་དབྱིངས་ཀྱི་དབང་ཕྱུག་མར་གནས་གྱུར་ལ། དབང་པོ་དང་ཡུལ་རྣམས་ནི་སེམས་དཔའ་དང་སེམས་མའི་ངོ་བོར་གནས་གྱུར་ཅིང་སྒོ་གསུམ་འཛིན་པ་དང་བཅས་པ་སྒོ་བར་གནས་གྱུར་པར་གྲགས་ཀྱང་། གཞུང་འདིར་ནི། སྣམ་བུ་ཚོས་ཀྱིས་བསྒྱུར་བ་ལྟ་བུའི་སྦྱང་གཞི་སྦྱོང་བྱེད་གནས་གྱུར་པ་ལྟ་བུ་མི་འདོད་དེ། སྤང་བླང་དང་སྦྱོང་བསྒྱུར་ལས་འདས་པའི་ཕྱིར་རོ། །དེ་བས་ན་ཡེ་ནས་ཡེ་ཤེས་སུ་ཡིན་པ་ལ་ཡིན་པར་ཤེས་པས་འཁོར་བའི་ཀུན་རྟོག་ཡེ་ཤེས་སུ་གྲོལ་བ་ཆབ་རོམ་ཆུར་ཞུ་བའི་ཚུལ་གྱིས། འཁོར་བ་ཉིད་མྱང་འདས་སུ་གྲོལ་བར་འདོད་དོ། །དེའང་ད་ལྟ་ཀུན་ཏུ་བཏགས་པའི་དྲི་མས་སེལ་དུ་གྱུར་པས་དག་ཀྱང་མ་དག་པ་ལྟར་སྣང་བ་ཉིད་གནད་ཟབ་མོ་ལ་གོམས་པས་ཀུན་རྟོག་ཕུང་པོ་དང་བཅས་པ་ཡེ་ཤེས་སུ་གྱུར་ནས། དྲི་མ་སྤངས་ནས་དབྱིངས་སུ་དག་པ་ནི་དཔེར་ན། གསེར་དང་འདྲེས་པའི་དངུལ་ཆུའི་གོང་བུ་རེ་ཞིག་མར་གསར་རམ་དངུལ་ཆུའི་རྣམ་པར་སྣང་གི་གསེར་དུ་མི་སྣང་ཡང་མེ་དང་ཕྲད་པའི་རྐྱེན་གྱིས་གསེར་དུ་སྣང་ཞིང་། དངུལ་ཆུའི་རྣམ་པའི་མར་གསར་གྱི་ཁ་དོག་ཉིད་རང་ཡལ་དུ་སོང་བ་བཞིན་ནོ། །དེ་བས་ན་མེ་ལ་ཆེར་བསྲེགས་པ་ན་འཛམ་བུ་ཆུ་བོའི་གསེར་ལྟར་སྣང་ངོ་། །དེ་བཞིན་དུ་ལམ་ཟབ་མོ་གོམས་པས་ཉོན་མོངས་པ་ལས་གྲོལ་བའི་འཕགས་པ་རིག་འཛིན་གྱི་གནས་སྐབས་དང་། ལྷུན་གྱིས་གྲུབ་པའི་རིག་འཛིན་སངས་རྒྱས་ཀྱི་སར་ཤེས་པར་བྱའོ། །

གཉིས་པ་གང་གི་རིགས་ཡིན་ངོས་གཟུང་བ་ནི། སྐབས་འདིའི་དཀྱིལ་འཁོར་ནི་རྡོ་རྗེའི་རིགས་སུ་བྱས་ནས། གཙོ་བོ་མི་བསྐྱོད་པར་སྔ་རབས་པ་དག་གིས་བཤད་ཀྱང་། དེ་ནི་མ་ཡིན་ཏེ། དབུས་སུ་རིགས་ཀྱི་བདག་པོ་མཚོན་བྱེད་ཀྱི་གདན་འཁོར་ལོ་དང་སེང་གེ་བྱུང་བའི་ཕྱིར་དང་། ཡུམ་ཀྱང་ནམ་མཁའ་དབྱིངས་ཀྱི་དབང་ཕྱུག་མ་བྱུང་བའི་ཕྱིར་དང་། ཞི་བའི་མདངས་ལས་འཕྲོས་པའི་ཁྲོ་བོའི་སྐབས་སུ་ཡང་གཙོ་བོ་བུདྡྷ་ཧེ་རུ་ཀ་བྱུང་བའི་ཕྱིར་དང་། དཀྱིལ་འཁོར་འདི་ཡང་ཡེ་ཤེས་རང་སྣང་བ་གཞི་ལ་གཙོ་འཁོར་མ་འཁྲུགས་པར་འཆད་ཅིང་སྣང་བའི་སྐབས་ཡིན་པའི་ཕྱིར་དང་། སློབ་དཔོན་ཆེན་པོ་པདྨས་འདིའི་སྒྲུབ་ཐབས་དང་དབང་བསྐུར་བའི་ཆོ་ག་ལས་ཀྱང་། ཧཱུྃ་མེ་ལོང་ཡེ་ཤེས་རྣམ་དག་ཅིང་། །རྣམ་པར་སྣང་མཛད་བཅོམ་ལྡན་འདས། །དབྱིངས་ཀྱི་དབང་ཕྱུག་ཕྱག་རྒྱ་ཡིས། །རིགས་ཀྱི་བུ་ལ་དབང་བསྐུར་རོ། །(༣༦)ཞེས་པའི་ཡི་གེས་ཀྱང་གནོད་ལ། ཐུན་མོང་མ་ཡིན་པའི་རྒྱུད་ཀྱི་སྡེ་ཚན་གཅིག་པ་འཇམ་དཔལ་སྒྱུ་འཕྲུལ་དྲྭ་བའི་འགྲེལ་པ་པདྨ་དཀར་པོ་ལས་ཀྱང་། མེ་ལོང་ལྟ་བུའི་ཡེ་ཤེས་ཀྱི་བདག་ཉིད་རྣམ་པར་སྣང་མཛད་མཐིང་ག་དང་། ཆོས་ཀྱི་དབྱིངས་ཀྱི་ཡེ་ཤེས་ཀྱི་བདག་ཉིད་མི་བསྐྱོད་པ་དཀར་པོར་གསུངས་པ་དང་འགལ་ལོ། །འོ་ན་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞེས་བཤད་པས་མི་བསྐྱོད་པར་འཐད་དོ། །ཞེ་ན། མ་ཡིན་ཏེ། ལྷ་མོ་སྒྱུ་འཕྲུལ་དྲྭ་བ་ཞེས་བཤད་པས་གཙོ་བོ་ལྷ་མོར་ཐལ་བ་ལ་སོགས་པའི་སྐྱོན་སྤོང་བར་མི་ནུས་སོ། །དེས་ན་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ནི་རིགས་ཐམས་ཅད་ཀྱི་སྤྱིའི་སྒྲར་བཤད་ཀྱི། མི་བསྐྱོད་པ་ཁོ་ནར་འཆད་པ་མ་ཡིན་ཏེ། རྣལ་འབྱོར་གྱི་རྒྱུད་ལས། རྡོ་རྗེ་སེམས་དཔའ་རིགས་རྣམས་ཀུན་གྱི་བདག །རིགས་དང་དཀྱིལ་འཁོར་ཀུན་གྱི་བདག་པོ་ཤོག །ཅེས་པས་དཀྱིལ་འཁོར་གྱི་གཙོ་བོ་གང་ཡིན་རྡོ་རྗེ་སེམས་དཔར་བཏགས་པའི་ཚུལ་དང་གཅིག་གོ། །སྤར་ཁབ་དང་། གཞི་བསྟོད་ལ་སོགས་པ་ནི་བོད་མ་ཡིན་པས་ཡིད་བརྟན་མི་རུང་ངོ་། །རྔམ་གློག་ལས། དབུས་སུ་རྣམ་པར་སྣང་མཛད་གཙོ། །ཞེས་པའང་མ་མཐོང་བར་ཟད་དོ། །དེ་བས་ན་འདིར་དེ་བཞིན་གཤེགས་པའི་ཐུགས་ཀྱི་ཐུགས་ཀྱི་རིགས་ཀྱི་དཀྱིལ་འཁོར་ཡིན་པས་གཙོ་བོ་ནི་རྣམ་པར་སྣང་མཛད་ཐུགས་ཀྱི་ལྷ་ཡིན་ལ། མི་བསྐྱོད་པ་སྐུ་རྡོ་རྗེའི་བདག་ཉིད་དོ། །

གསུམ་པ་གཞན་གྱི་ལོག་རྟོག་དགག་པ་ནི། འོ་ན་རྒྱུད་གཞན་ལས། གཟུགས་ནི་རྣམ་པར་སྣང་མཛད་ཉིད། །ཚོར་བ་རིན་ཆེན་འབྱུང་ལྡན་ལ། །འདུ་ཤེས་སྣང་བ་མཐའ་ཡས་ཏེ། །འདུ་བྱེད་དོན་ཡོད་གྲུབ་པ་ཉིད། །རྣམ་པར་ཤེས་པ་མི་བསྐྱོད་པ། །ཞེས་པ་དང་འགལ་ཞིང་། སྐུ་མདོག་ཀྱང་མཐིང་གར་བཤད་པས་འགལ་ལོ་ཞེ་ན། ལན་བརྗོད་པ། ཀྱེ་བཞིན་བཟང་ད་དུང་ཐུན་མོང་དང་ཐུན་མོང་མ་ཡིན་པའི་རྒྱུད་སྡེ་གོང་འོག་ལ་བློ་ཁ་མ་ཕྱོགས་པས་རེ་བདེན། དེ་ལྟ་ནའང་ཁྱེད་ཅག་རྣམ་པར་ཤེས་པའི་རྒྱལ་པོ་དང་ཞེས་པ་དང་། མཐིང་ག་དང་ཞེས་པའི་སྒྲ་ཙམ་ལ་འཁྲུལ་པར་ཟད་དེ། འདིར་ནི་འོག་མིན་རྡོ་རྗེའི་དབྱིངས་དང་། སྙིང་ག་ན་འོད་གསལ་གྱི་དམ་པ་རིགས་བརྒྱ་འོད་ལྔའི་ཀློང་ན་དེ་ཉིད་དང་ཐ་དད་མེད་པར་ཡོད་པའི་རང་ལུགས་འཇུག་པ་སྟེ། སྙིང་གི་དགོངས་པའི་རྒྱུད་ལས། རྣམ་པར་སྣང་མཛད་མཐིང་ག་ཕྱག་ན་འཁོར་ལོ་བསྣམས་པ་ཡུམ་ནམ་མཁའ་དབྱིངས་ཕྱུག་མ་དང་ཞལ་སྦྱར་ནས་སངས་རྒྱས་ཀྱི་སྐུ་དྲུག་ཕྲག་གཅིག་ཏུ་ཤར་རོ། །ཞེས་སོ། །རྣམ་པར་ཤེས་པའི་རྒྱལ་པོ་ཞེས་པ་དང་། མཐིང་གར་གསུངས་པ་ནི་དེ་བཞིན་གཤེགས་པའི་(༣༧)ཐུགས་ཀྱི་ཐུགས་ཀྱི་རིགས་ཡིན་པའི་ཕྱིར་རོ། །གཞན་ལས་རྣམ་སྣང་གཟུགས་ཏེ་སྐུའི་རིགས་དང་མི་བསྐྱོད་པ་ཐུགས་སུ་བཤད་པ་ནི་ཐུན་མོང་བའི་རྒྱུད་ཀྱི་དགོངས་པ་སྟེ། རིགས་ལྔ་སྤྱི་ཙམ་དང་སྐུའི་སྐུའི་དཀྱིལ་འཁོར་ལ་སོགས་པ་རྩ་བའི་དཀྱིལ་འཁོར་ལས་གཞན་དུ་འཕྲོས་པའི་དབང་དུ་བྱས་པའོ། །གཞན་ཡང་ནམ་མཁའ་དབྱིངས་ཀྱི་དབང་ཕྱུག་མ་ནི་སེམས་ཉིད་རང་བཞིན་གྱིས་དག་པས་གོ་འབྱེད་པ་ཡིན་ལ། རྣམ་པར་ཤེས་པ་ནི་སྣ་ཚོགས་སུ་གསལ་ཞིང་འཆར་བས་རྣམ་པར་སྣང་མཛད་དེ་མེ་ལོང་གི་གཟུགས་བརྙན་འཛིན་པ་ལྟ་བུ་ཡེ་ཤེས་སོ། །སངས་རྒྱས་སྤྱན་ནི་མི་གཡོ་ཞིང་རྟོག་པ་མེད་པས་གཏི་མུག་དང་ཆོས་མཐུན་པའི་ཕྱིར་ཆོས་ཀྱི་དབྱིངས་ཀྱི་སྤྱོད་ཡུལ་སའི་ཁམས་ཀྱི་སྲ་བའི་ཆ། གཟུགས་ཀྱི་ཕུང་པོས་བསྡུས་པ་ནི་གཞན་དུ་མི་འཕོ་བས་མི་བསྐྱོད་པ་ཞེས་བཤད་དོ། །ཚུལ་འདི་ནི་རྒྱུད་སྡེ་གོང་མའི་རྣམ་བཤད་དེ་གཞན་ལས་ཁྱད་པར་དུ་འཕགས་པའོ། །དེ་བས་ན་གཙོ་བོ་རྣམ་པར་སྣང་མཛད་ལ་རིགས་ཀྱི་འཁོར་ཚོམ་བུ་རྣམས་ཀྱིས་བསྐོར་བའི་དཀྱིལ་འཁོར་དུ་ཤེས་པར་བྱའོ། །དེ་ལ་ཀུན་གྱི་ཐུགས་རྗེས་མངའ་བདག་སྟོན་པ་ཀུན་ཏུ་བཟང་པོ་ཡབ་ཡུམ་དཀྱིལ་འཁོར་འདིའི་ཕྱོགས་གང་ན་ཡོད་པ་ཡིན་ཞེ་ན། ཁ་ཅིག་ན་རེ་ཁྱམས་ན་བྱིན་གྱིས་རློབ་པའི་ཚུལ་དུ་བཞུགས་ཟེར་རོ། །དེ་ནི་མ་ཡིན་ཏེ་འཁོར་དུ་ཐལ་བ་དང་། གཙོ་བོ་མཐར་གནས་པ་ཐུན་མོང་དང་ཐུན་མོང་མ་ཡིན་པའི་དཀྱིལ་འཁོར་གང་ལས་ཀྱང་མི་འབྱུང་བའི་ཕྱིར་ན་རིགས་པ་མ་ཡིན་ནོ། །དེ་བས་ན་འདི་ལྟར་ཡིན་ཏེ། ཆོས་སྐུའི་གནས་སྐབས་ན་རང་བྱུང་གི་ཡེ་ཤེས་ཆེན་པོ་ཉིད་དམིགས་བསམ་སྤྲོས་པའི་ཡུལ་ལས་འདས་པར་བཞུགས་པས་ཀུན་ཏུ་བཟང་པོ་ཡབ་ཡུམ་ཞེས་བྱའོ། །དེ་སྐད་དུ་དཔལ་སངས་རྒྱས་མཉམ་སྦྱོར་ལས། སེམས་དཔའ་སངས་རྒྱས་ཀུན་གྱི་དངོས། །རྡོ་རྗེ་སེམས་དཔའ་བདེ་བའི་མཆོག །གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཞེས་པ་དང་། སློབ་དཔོན་ཆེན་པོ་བི་མ་ལའི་རིན་པོ་ཆེའི་སྒྲོན་མ་ལས། མི་གནས་ཆོས་དབྱིངས་དཀྱིལ་འཁོར་ན། ཀུན་བཟང་ཡབ་ཡུམ་ཞེས་བྱའོ། །དེ་ལས་ལོངས་སྐུར་བཞེངས་པ་ན། །རིགས་ལྔའི་སངས་རྒྱས་ཡིན་པར་གྲགས། །སྤྲུལ་པའི་འགྲོ་དོན་སྤྱོད་པ་ན། །རྡོ་རྗེ་སེམས་དཔའ་རྡོ་རྗེ་འཛིན། །གྲངས་མེད་དཔག་གིས་མི་ལང་ངོ་། །ཞེས་གསུངས་པ་ལྟར་ལོངས་སྤྱོད་རྫོགས་པའི་དཀྱིལ་འཁོར་དུ་རང་སྣང་བའི་ཚེ་རིགས་ལྔའི་གཙོ་བོ་ཉིད་རྣམ་སྣང་སྟེ་ཀུན་བཟང་ཡབ་ཡུམ་མོ། །དམིགས་པ་ལ་དགའ་བས་བསྒོམ་པའི་ཚེ་དེའི་ཐུགས་(༣༨)ཀར་བསྒོམ་པའི་རིམ་པ་ཡང་གསུངས་སོ། །དེ་ཡང་མཉམ་སྦྱོར་ལས། དེ་ནས་འགྲོ་བ་འདུལ་ཐབས་ཀྱིས། །དེ་ཉིད་རིགས་རྣམས་ལྔར་སྣང་ཡང་། །ཡང་དག་གྲུབ་པ་གཅིག་པུ་ཉིད། །ཇི་ལྟར་འདོད་པ་བཞིན་དུ་སྦྱར། །ཞེས་སོ། །དེ་ལས་སྤྲུལ་པའི་འགྲོ་བ་འདུལ་བ་ན་ཕྱག་ན་རྡོ་རྗེ་དང་། འཇམ་དཔལ་དང་། སྤྱན་རས་གཟིགས་ལ་སོགས་པ་དང་། ཐུབ་པ་དྲུག་གི་རོལ་པ་དཔག་ཏུ་མེད་པ་སྣང་ངོ་། །ཁྱམས་སུ་དགོད་པར་གསུངས་པའི་བྱེད་པ་དང་། བྱ་བ་གཉིས་ནི་གདངས་ཐམས་ཅད་འཆར་བའི་གཞིའི་ཀུན་བཟང་ཡབ་ཡུམ་ཞེས་བྱ་སྟེ། བར་དོ་ལ་སོགས་པར་ཐོག་མར་ཆོས་དབྱིངས་རྣམ་དག་གི་གདངས་སྣང་སྟོང་གཉིས་ཀྱི་རྣམ་པ་དེ་གཉིས་སུ་སྣང་བ་ལས། རིམ་གྱིས་ཞི་ཁྲོའི་ལྷ་སོ་སོའི་ཚོམ་བུ་འཆར་བའི་གཞིར་གྱུར་པ་སྟེ། ཁྱམས་སུ་གསུངས་པའི་དོན་ནི་གཙོ་བོ་ཐུགས་ཀ་སྟེ། རྒྱབ་མདུན་ནི་ཞལ་སྦྱར་ནས་བཞུགས་ཚུལ་གྱི་ངོ་བོ་བསྟན་པའོ། །དེ་བས་ན་གཞིའི་གཙོ་བོ་ནི་དབུས་ཀྱི་གཙོ་བོ་ཉིད་ཡིན་ལ། གདངས་ཀྱི་ཡབ་ཡུམ་གཉིས་ནི་དེའི་ཐུགས་ཀ་ན་གནས་པ་སྟེ་སྣང་སྟོང་གཉིས་སུ་མེད་པའི་ཡེ་ཤེས་ཡིན་ནོ། །

ཚུལ་འདི་ནི་ཐུན་མོང་མ་ཡིན་པའི་རྒྱུད་དང་། བླ་མའི་མན་ངག་དང་། སྒྲུབ་ཐབས་ཀྱི་ཡི་གེ་ཆེན་པོ་རྣམས་ལས་བྱུང་བ་ཡིན་ནོ། །ད་ལྟ་གནས་ཀྱང་ཞུ་བ་སྙིང་ག་ཡིན་ཏེ། ཉི་ཟླ་ཁ་སྦྱོར་གྱི་རྒྱུད་ལས། ཙིཏྟ་རིན་ཅེན་གཞལ་ཡས་ན། །ཞི་བའི་དཀྱིལ་འཁོར་བཞི་བཅུ་གཉིས། །སྐུ་ནི་སྣང་ལ་རང་བཞིན་མེད། །ཆ་ཕྲ་འོད་གསལ་སྙིང་ཁར་བཞུགས། །ཞེས་སོ། །ཁྲོ་བོ་ལྔ་བཅུ་རྩ་བརྒྱད་ནི་སྤྱི་བོ་ན་ཡོད་དེ། དེ་ལས། གདངས་ཀྱི་ཁྲག་འཐུང་ལྔ་བཅུ་བརྒྱད། །དུང་ཁང་བྷནྡྷའི་གཞལ་ཡས་ན། །ཞེས་སོ། །ཚུལ་འདི་ནི་སློབ་དཔོན་གྱི་བདེ་གཤེགས་འདུས་པའི་བསྐྱེད་རྫོགས་འབྲིང་པོའི་ལས་བྱང་ལས། ཞི་བ་ལྷུན་གྱིས་གྲུབ་པའི་དཀྱིལ་འཁོར་ན། །ཞེས་པ་དང་། བྷནྡྷ་སྨུག་ནག་འབར་བའི་ཁང་བཟང་དུ། །མཐུ་ཆེན་བདུད་ཀྱི་རྒྱལ་པོས་སྒོ་བཅད་བརྩིགས། །རྔམས་པའི་ཁྲོ་བོ་རྣམས་ཀྱི་གཟེར་གྱིས་བཏབ། །དྲེགས་པ་ལྷ་ཆེན་བརྒྱད་ཀྱི་ཀ་གདུང་བཅས། །གདུག་པའི་ཀླུ་ཆེན་བརྒྱད་ཀྱིས་རབ་ཏུ་གཏམས། །གཟའ་ཆེན་ཁ་བད་རྒྱུ་སྐར་མིག་ཚགས་བྱས། །ཞེས་སོ། །བྷནྡྷ་ནི་མགོ་སྟེ་སྐྲ་སྨུག་ནག་ཅན་ནོ། །གཞན་ནི་མཚོག་གསང་གཉིས་དང་ལྟག་གསང་གཉིས་ཀྱི་སྡུད་སྒོ་དང་རྩའི་གནས་སོ། །སྤྱིའི་དོན་བཤད་ཟིན་ཏོ། །

༈ གཉིས་པ་གཞུང་གི་དོན་ལ་གཉིས་ཏེ། གཙོ་བོའི་བཞུགས་ཚུལ་དང་ཕྱག་མཚན་ཐུན་མོང་དུ་བསྟན་པ་དང་། ཡབ་ཡུམ་སོ་སོར་བཤད་པའོ། །

དང་པོ་ནི་སངས་རྒྱས་ཀྱི་རང་བཞིན་འགྲོ་བ་ཐམས་ཅད་ལ་(༣༩)དུས་རྟག་ཏུ་གཟིགས་ཤིང་རྒྱབ་ཀྱིས་མི་ཕྱོགས་པའི་མཚོན་བྱེད་དུ་དྭངས་ཤིང་འོད་ཀྱི་རང་བཞིན་ཕྱི་ནང་གསལ་བའི་སྐུ༵་དེ་ཡང་རགས་པར་མ་གྲུབ་ཅིང་ཐུགས་རྗེ་ཆེན་པོའི་རང་བཞིན་གྱི་ཕྱོགས་མཚམས་སྟེང་འོག་གང་ནས་བལྟས་ཀྱང་ཞལ་བསྟན་པར་སྣང་གི་འདི་ནི་མདུན༵་དང༵་འདི་ནི་རྒྱབ༵་ཏུ་སྣང་ངོ་ཞེས་འགྲོ་བ་ཕལ་པ་ལ་མཐོང་བ་ལྟར་མེ༵ད་པ༵་ཚོམ་བུའི་འཁོར་ཐམས་ཅད་ལ་མདུན་གྱིས་གཟིགས་པས་ཕྱོགས་ཐམ༵ས་ཅ༵ད་དུ༵་ཞལ༵་གྱི་དཀྱིལ་འཁོར་ཐལ༵་ལེ༵་བ༵ར་གས༵ལ་ཞིང༵་། སྐུ་ལ་སྐྱེས་བུ་ཆེན་པོའི་མཚ༵ན་བཟང་པོ་སུམ་ཅུ་རྩ་གཉིས་དང་། དཔེ༵་བྱད༵་བཟང་པོ་བརྒྱད་ཅུས་ཡེ་ཤེས་དང༵་ཡོན་ཏན་ཕུན་སུམ་ཚོགས་པ་མངའ་བའི་མཚོན་བྱེད་དུ་ལྡན༵་པ༵འོ། །

མཚན་དཔེ་ལ་གཉིས་ཏེ། ཐུན་མོང་མ་ཡིན་པ་དང་། ཐུན་མོང་བའོ། །དང་པོ་ལའང་གཉིས་ལས། མཚན་སུམ་ཅུ་རྩ་གཉིས་ནི་ཡེ་ཤེས་བཅུ་དྲུག་གི་རྩལ་སེམས་དཔའ་བཅུ་དྲུག་དང་། དེའི་ཡུལ་ཆོས་དབྱིངས་བཅུ་དྲུག་གི་རྩལ་སེམས་མ་བཅུ་དྲུག་སྟེ་སུམ་ཅུ་རྩ་གཉིས་སོ། །དཔེ་བྱད་བརྒྱད་ཅུ་ནི་སེམས་དཔའ་བཅུ་དྲུག་པོ་རེ་རེ་ལའང་ཡེ་ཤེས་ལྔའི་རྟགས་རིགས་ལྔ་ལྔས་དབུ་རྒྱན་གྱི་རིགས་ལྔ་བརྒྱད་ཅུའོ། །ཡུམ་བཅུ་དྲུག་ལ་དབུ་རྒྱན་མེད་དེ། ཆོས་དབྱིངས་མཚོན་པའི་ཕྱིར་རོ། །དེ་དག་མཚན་དཔེར་འཇོག་པ་ནི། འཁོར་ཕུན་སུམ་ཚོགས་པས་གཙོ་བོའི་རང་བཞིན་ཡང་བཀོད་པ་མཛེས་ཤིང་ཕུན་སུམ་ཚོགས་པ་སྟེ། མེ་ཏོག་གི་ཟེའུ་འབྲུ་དང་འདབ་མས་མེ་ཏོག་གི་བཀོད་པ་མཛེས་པར་བྱེད་པ་ལྟ་བུའོ། །

གཉིས་པ་ཐུན་མོང་གི་མཚན་དཔེ་ལ་གཉིས་ལས། མཚན་སུམ་ཅུ་རྩ་གཉིས་ནི། མངོན་རྟོགས་རྒྱན་ལས། ཕྱག་ཞབས་འཁོར་ལོས་མཚན་དང་རུས་སྦལ་ཞབས། །ཕྱག་དང་ཞབས་སོར་དྲྭ་བས་འབྲེལ་བ་དང་། །ཕྱག་དང་ཞབས་བཅས་འཇམ་ཞིང་གཞོན་ཤ་ཆགས། །འདི་ཡི་སྐུ་ནི་བདུན་དག་མཐོ་བ་དང་། །སོར་མོ་རིང་དང་རྟིང་ཡངས་སྐུ་ཆེ་དྲང་། །ཞབས་འབུར་མི་མངོན་སྤུ་ནི་གྱེན་དུ་ཕྱོགས། །བྱིན་པ་ཨེ་ན་ཡ་འདྲ་ཕྱག་རིང་མཛེས། །འདོམས་ཀྱི་སྦ་བ་སྦུབས་སུ་ནུབ་པའི་མཆོག །པགས་པ་གསེར་མདོག་པགས་པ་སྲབ་པ་དང་། །སྤུ་ནི་རེ་རེ་ནས་གཡས་ལེགས་འཁྲུངས་དང་། །ཞལ་མཛོད་སྤུས་བརྒྱན་རོ་སྟོད་སེང་གེ་འདྲ། །འདི་ཡི་དཔུང་བའི་མགོ་ཟླུམ་ཐལ་གོང་རྒྱས། །འདི་ལ་རོ་མི་ཞིམ་པའང་རོ་མཆོག་སྣང་། །སྐུ་ནི་ནྱ་གྲོ་ཏ་ལྟར་ཆུ་ཞེང་གབ། །གཙུག་ཏོར་དབུར་ལྡན་ལྗགས་རིང་མཛེས་པ་དང་། །ཚངས་དབྱངས་འགྲམ་པ་སེང་གེ་འདྲ་དང་ཚེམས། །ཤིན་ཏུ་དཀར་དང་ཚད་མཉམ་ཐགས་བཟང་དང་། །གྲངས་ནི་བཞི་བཅུ་ཐམ་པ་ཚང་བ་(༤༠)དང་། །སྤྱན་ནི་མཐོན་མཐིང་སྤྱན་རྫི་བ་མཆོག་གི། །འདྲ་བ་འདི་དག་སུམ་ཅུ་རྩ་གཉིས་མཚན། །ཞེས་སོ། །

དཔེ་བྱད་བརྒྱད་ཅུ་ནི། དེ་ཉིད་ལས། ཐུབ་པའི་སེན་མོ་ཟངས་མདོག་དང་། །མདོག་སྣུམ་མཐོ་དང་སོར་མོ་རྣམས། །ཟླུམ་རྒྱས་བྱིན་གྱིས་ཕྲ་བ་དང་། །རྩ་མི་མངོན་དང་མདུད་པ་མེད། །ལོང་བུ་མི་མངོན་ཞབས་མཉམ་དང་། །སེང་གེ་གླང་ཆེན་བྱ་དང་ནི། །ཁྱུ་མཆོག་སྟབས་གཤེགས་གཡས་ཕྱོགས་དང་། །མཛེས་གཤེགས་དྲང་དང་འཁྲིལ་བག་ཆགས། །བྱི་དོར་བྱས་འདྲ་རིམ་པར་འཚམ། །གཙང་དང་འཇམ་དང་དག་པའི་སྐུ། །མཚན་ནི་ཡོངས་སུ་རྫོགས་པ་དང་། །སྐུ་ཡི་ཁོ་ལག་ཡངས་ཤིང་བཟང་། །གོམ་སྙོམས་པ་དང་སྤྱན་གཉིས་ནི། །དག་དང་གཞོན་ཤ་ཅན་ཉིད་དང་། །སྐུ་ཞུམ་མེད་དང་རྒྱས་པ་དང་། །ཤིན་ཏུ་གྲིམས་པའི་སྐུ་ཉིད་དང་། །ཡན་ལག་ཤིན་ཏུ་རྣམ་འབྱེས་དང་། །གཟིགས་པ་སྒྲིབ་མེད་དག་པ་དང་། །སྐུ་ཟླུམ་སྐབས་ཕྱེད་མ་རྙོངས་དང་། །ཕྱང་ངེ་བ་དང་ལྟེ་བ་ནི། །ཟབ་དང་གཡས་ཕྱོགས་འཁྱིལ་པ་དང་། །ཀུན་ནས་བལྟ་ན་སྡུག་པ་དང་། །ཀུན་སྤྱོད་གཙང་དང་སྐུ་ལ་ནི། །སྨེ་བ་ནག་བག་མེད་པ་དང་། །ཕྱག་ནི་ཤིང་བལ་ལྟར་འཇམ་དང་། །ཕྱག་རིས་མདངས་ཡོད་ཟབས་རིང་དང་། །ཞལ་ནི་ཧ་ཅིང་མི་རིང་དང་། །མཆུ་ནི་བིམ་པ་ལྟར་དམར་དང་། །ལྗགས་མཉེན་པ་དང་སྲབ་པ་དང་། །དམར་དང་འབྲུག་གི་སྒྲ་ཉིད་དང་། །གསུང་མཉེན་འཇམ་དང་མཆེ་བ་ཟླུམ། །རྣོ་དང་དཀར་དང་མཉམ་པ་དང་། །བྱིན་གྱིས་ཕྲ་དང་ཤངས་མཐོ་དང་། །མཆོག་ཏུ་དག་པ་དག་དང་ནི། །སྤྱན་ཡངས་པ་དང་རྫི་མ་སྟུག །པདྨའི་འདབ་མ་འདྲ་བ་དང་། །སྨིན་མཚམས་རིང་དང་འཇམ་པ་དང་། །སྣུམ་དང་སྤུ་ནི་མཉམ་པ་དང་། །ཕྱག་རིང་རྒྱས་དང་སྙན་མཉམ་དང་། །ཉམས་པ་རྣམ་པར་སྤངས་པ་དང་། །དཔྲལ་བ་ལེགས་པར་འབྱེས་པ་དང་། །དབྱེས་ཆེ་བ་དང་དབུ་རྒྱས་དང་། །དབུ་སྐྲ་བུང་བ་ལྟར་གནག་དང་། །སྟུག་དང་འཇམ་དང་མ་འཛིངས་དང་། །མི་གཤོར་དྲི་ཞིམ་སྐྱེས་བུ་ཡི། །ཡིད་ནི་འཕྲོག་པར་བྱེད་པ་དང་། །དཔལ་གྱི་བེའུ་དང་བཀྲ་ཤིས་ནི། །གཡུང་དྲུང་འཁྱིལ་པས་བརྒྱན་པ་སྟེ། །སངས་རྒྱས་དཔེ་བྱད་བཟང་པོར་བཞེད། །ཅེས་སོ། །དཔལ་གྱི་བེའུ་མན་ཆད་གཅིག་ཡིན་ཅིང་གཞན་ནི་སོ་སོའོ། །ཆོས་ཀྱི་དབྱིངས་དང་། ནམ་མཁའི་ཁམས་དང་། གདུལ་བྱའི་འཇིག་རྟེན་བས༵མ་གྱི༵ས་མི༵་ཁྱབ༵་པ༵་ཐམ༵ས་ཅ༵ད་དུ༵་ལྷུན་གྱིས་གྲུབ་པའི་སྐུ༵་གསུ༵ང་ཐུ༵གས་མི་ཟད་པ་རྒྱན་གྱི་འཁོར་ལོ་སྣ༵་ཚོ༵གས་པ༵ར་ཀུན༵་ཏུ༵་སྣ༵ང་བ༵འོ། །ཇི་ལྟར་སྣང་ན་ཆོས་ཀྱི་དབྱིངས་སྤྲོས་པ་དང་བྲལ་བའི་ཞིང་ཁམས་སུ་སྐུ་མི་ཟད་པ་རྒྱན་གྱི་འཁོར་ལོ་ཆོས་སྐུ་ཀུན་བཟང་ཡབ་ཡུམ་སྤྲོས་པ་ལས་འདས་པ། (༤༡)གསུང་མི་ཟད་པ་བརྗོད་དུ་མེད་པ་དང་མཉན་དུ་མེད་པ་དང་ངོ་བོ་ཉིད་མེད་པ་དང་། ཐུགས་མི་ཟད་པ་གཏན་དུ་སྤྲོས་པ་ཐམས་ཅད་ཞི་ཞིང་རྒྱ་ཆད་ཕྱོགས་ལྷུང་མེད་པའོ། །ནམ་མཁའི་ཁམས་ཀྱི་མཐའ་ཀླས་པ་རང་སྣང་ལྷུན་སྟུག་པོ་བཀོད་པའི་ཞིང་དུ་ནི། སྐུ་མི་ཟད་པ་ལོངས་སྤྱོད་རྫོགས་པའི་མཚན་དང་དཔེ་བྱད་ཀྱིས་བརྒྱན་པ་ནམ་མཁའ་དང་མཉམ་པ། གསུང་མི་ཟད་པ་ཞལ་གྱི་དཀྱིལ་འཁོར་ལས་འོད་འཕྲོས་པས་བརྗོད་བྱའི་དོན་ཁོང་དུ་ཆུད་པ། ཐུགས་མི་ཟད་པ་ཡེ་ཤེས་ལྔའི་མཚན་ཉིད་དུ་བཞུགས་པའོ། །ཕྱོགས་བཅུའི་འཇིག་རྟེན་འགྲོ་བ་དྲུག་གི་འདུལ་ཞིང་ནམ་མཁའི་མཐའ་དང་མཉམ་པ་རྣམས་སུ་ནི། སྐུ་མི་ཟད་པ་གང་ལ་གང་གིས་འདུལ་བ་སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་དང་། སོ་སོ་སྐྱེ་བོ་དང་། རྒས་པ་དང་། ན་བ་དང་། འཆི་བ་དང་། ལྷ་དང་། ཀླུ་དང་། དུད་འགྲོ་ལ་སོགས་པ་རིགས་མཐུན་པ་དང་མི་མཐུན་པ་དང་། པདྨ་དང་། དཔག་བསམ་གྱི་ཤིང་དང་། གྲུ་གཟིངས་དང་། གྲོང་དང་། སྐྱེད་མོས་ཚལ་ལ་སོགས་པ་སེམས་ཅན་ལ་ཕན་པ་འབྱུང་བ་དེ་དང་དེའི་གཟུགས་ཚད་མེད་པ་དང་། གསུང་མི་ཟད་པ་འགྲོ་བ་སོ་སོའི་སྐད་དང་། པདྨོ་དང་དཔག་བསམ་གྱི་ཤིང་ལ་སོགས་པ་ལས་སྒྲ་བྱུང་བས་ཆོས་ཀྱི་གསུང་སྣ་ཚོགས་པར་སྒྲོགས་པ་ལ་སོགས་པ་དང་། ཐུགས་མི་ཟད་པ་ཇི་ལྟ་བ་དང་ཇི་སྙེད་པ་མཁྱེན་པས་འགྲོ་བའི་དོན་མཛད་པར་སྣང་ངོ་། །དེའང་སངས་རྒྱས་རྣམས་ཀྱི་རྣམ་པར་འཕྲུལ་པ་བསམ་གྱིས་མི་ཁྱབ་པས་དོན་མཛད་པ་ཡིན་པས་འདི་དང་འདིའོ་ཞེས་བློས་བསམ་པར་ནུས་པ་མ་ཡིན་ནོ། །འོ་ན་ཆོས་སྐུ་དང་ལོངས་སྐུའི་གསུང་མི་བརྗོད་པ་ལ་གསུང་དུ་ཅི་གདགས་ཤེ་ན། སྒྲ་དང་ཚིག་ཏུ་བརྗོད་པའི་མཐར་ཡང་བརྗོད་མེད་གོ་བར་བྱ་བ་ལས་མེད་ལ་དེ་ཉིད་ཀྱིས་དངོས་སུ་བརྗོད་མེད་གོ་བར་མཛད་པ་དང་། ཚིག་ཐམས་ཅད་ཡི་གེར་འདུས་ལ་དེ་ཉིད་ཨ་སྐྱེ་བ་མེད་པར་འདུས་པས་གསུང་གི་སྙིང་པོ་ཨའི་དོན་སྟོན་པ་ཉིད་གསུང་མཆོག་ཆེན་པོ་སྟེ། མདོ་ལས། རྒྱལ་བའི་སྲས་པོས་ཅང་མི་གསུང་། །མ་གསུངས་པ་ཉིད་རྒྱ་ཆེར་གསུངས། །ཞེས་པ་ལྟ་བུའོ། །གདུལ་བྱ་ལ་སྣང་བའི་སྤྲུལ་སྐུ་ཐུབ་པས་ཡན་ལག་དྲུག་ཅུའི་དབྱངས་ཀྱིས་གསུངས་པ་ལྟ་བུ་ཡང་གདུལ་བྱའི་སྣང་བ་དང་སངས་རྒྱས་ཀྱི་ཐུགས་རྗེ་འཛོམ་པ་ལས་གསུང་དུ་སྣང་ཡང་སྒྲ་བརྙན་ལྟར་དོན་ལ་གསུངས་པ་མེད་དེ། རྒྱུད་བླ་མ་ལས། ཇི་ལྟར་སྒྲ་བརྙན་གྱིས་ནི་སྒྲ། །གཞན་གྱི་རྣམ་རིག་ལས་བྱུང་བ། །རྣམ་རྟོག་མེད་ཅིང་བཟོ་མེད་པ། །དེ་ལྟར་དེ་བཞིན་གཤེགས་པའི་གསུང་། །གཞན་གྱི་རྣམ་རིག་ལས་བྱུང་བ། །(༤༢)ཕྱི་དང་ནང་ནའང་གནས་མ་ཡིན། །ཞེས་པ་དང་། དཀོན་མཆོག་བརྩེགས་པ་ལས། དེ་བཞིན་གཤེགས་པ་སྐུ་བལྟམས་ནས་གང་གི་མཚན་མོ་ལ་མྱ་ངན་ལས་འདས་པ་དེ་སྲིད་དུ་ཚིག་དང་ཡི་གེར་སྣང་བས་ཆོས་ཚིག་འབྲུ་གཅིག་ཀྱང་མ་གསུངས་ཏེ་གདུལ་བྱའི་སྣང་བས་གོ་བར་ཟད་དོ། །ཞེས་སོ། །འདི་ཁ་ཅིག་གིས་སྤྲུལ་སྐུ་ཁོ་ན་ལ་སྦྱར་བ་མི་འཐད་དེ་བསམ་གྱིས་མི་ཁྱབ་པ་ཐམས་ཅད་དུ་སྐུ་གསུང་ཐུགས་སྣང་བར་བཤད་པ་ཉིད་དང་འགལ་ལོ། །སྤྲུལ་སྐུའི་སྒྲས་སྐབས་འདིར་ཐུབ་པ་དྲུག་ཀྱང་ཟིན་པས་ཐུབ་དྲུག་གི་གླེང་གཞི་ཞར་ལ་སྨོས་པ་ཡིན་ནོ། །བསྟན་པ་གཅིག་ལ་སྟོན་པ་གཉིས་མི་འཐད་ཅེས་པ་ནི་སྐབས་སུ་མ་བབས་པའི་རྒོལ་བ་སྟེ། འདིར་ལོངས་སྐུ་གཞི་དང་ཐུབ་དྲུག་འཁོར་དུ་བསྟན་པས་སྟོན་པ་གཉིས་མེད་དོ། །

ཐ༵བས་སྙིང་རྗེ་ཆེན་པོ་དང༵་ཤེས༵་རབ༵་སྟོང་པ་ཉིད་ཀྱི༵་ཡེ་ཤེས་མངའ་བའི་བརྡར་ཞབ༵ས་གཉི༵ས་ཏེ་ཟུང་དུ་འབྲེལ་བས་སྲིད་ཞིའི་མཐའ་ལ་མི་གནས་པའི་བརྡར་མཉམ༵་པའི༵་རང་བཞིན་ཉོན་མོངས་པ་མཐའ་དག་བརྟུལ༵་ཅིང་ཡེ་ཤེས་ཆེན་པོའི་ངོ་བོར་བཞུག༵ས་པ་ཉིད་ཀྱི༵་བརྡར་རྡོ་རྗེའི་སྐྱིལ༵་མོ༵་ཀྲུང༵་དུ༵་བཞུག༵ས་པ༵འོ། །འདིར་ཁ་ཅིག་ཡུམ་དངོས་སུ་མ་བཤད་པར་འདོད་པ་ནི་མི་འཐད་དེ། བཙུན་མོ་དམ་པ་སྣང་བའི་དབྱིངས་ཡིན་པའི་ཕྱིར་རོ། །ཡེ༵་ཤེས༵་ལྔ་དབྱིངས་རྣམ་པར་དག་པའི་ཡེ་ཤེས་དང་དྲུག༵་གི༵་མཚོན་བྱེད་དུ་ཕྱག༵་དྲུག་གོ། །སྐུ་གསུང་ཐུགས་ཡོན་ཏན་འཕྲིན་ལས་གཉིས་སུ་མེད་པའི་ཡེ༵་ཤེས༵་ལས་དགོས་འདོད་སྣ་ཚོགས་འབྱུང་བས་རི༵ན་པོ༵་ཆེའི༵་རང་བཞིན་དུ་མཚོན་པའི་ཕྱིར་རྡོ་རྗེ་ལ་སོགས་པའི་ཕྱག༵་རྒྱ༵་དྲུག་ལས་འོད་ཟེར་མུ་མེད་པ་འབ༵ར་བ༵་ཅན༵་ནི་སེར་སྣ་དང་། འཆལ་པའི་ཚུལ་ཁྲིམས་དང་། ཁོང་ཁྲོ་དང་། ལེ་ལོ་དང་། རྣམ་པར་གཡེང་བ་དང་། ཤེས་རབ་འཆལ་པ་དྲུག་འཇོམ་པའི་བརྡའོ། །ཁ་ཅིག་ནི་གཙོ་བོ་ལ་ཕྱག་དྲུག །གཞན་རྣམས་ལ་ཕྱག་གཉིས་པར་འདོད་པ་ནི་མ་ཡིན་ཏེ། ཐུན་མོང་དུ་གསུངས་པའི་ཕྱིར་རོ། །དེའང་རྡོ་རྗེ་རིན་པོ་ཆེ་འཁོར་ལོ་པདྨ་རྒྱ་གྲམ་དྲིལ་བུ་སྟེ། རིགས་སོ་སོའི་རྩ་ཕྱག་གཉིས་ཀྱི་གཡས་ཐམས་ཅད་རང་རང་གི་ཕྱག་མཚན། གཡོན་ཐམས་ཅད་དྲིལ་བུ་སྟེ། ཐུགས་ཀར་བསྣོལ་ནས་འཛིན་པ་གཞན་རྣམས་སོ་སོར་བརྐྱངས་པའོ། །སངས་རྒྱས་གསང་བ་ནི་ཕྱག་དྲུག་ན་རིན་པོ་ཆེ་འབར་བ་ཟུར་བརྒྱད་པ་དྲུག་བསྣམས་པར་བཞེད་དོ། །སྐུ༵་གསུང༵་ཐུག༵ས་མི་ཟད་པ་རྒྱན་གྱི་འཁོར་ལོ་བསམ༵་གྱིས༵་མི༵་ཁྱབ༵་པ༵་མངའ་བའི༵་མཚོན་བྱེད་དུ་དབུ༵་གསུ༵མ་དང༵་ལྡན༵་པ༵་ནི་གཙོ་བོའི་རྩ་ཞལ་མཐིང་ག་གཡས་དཀར་གཡོན་དམར། མི་བསྐྱོད་པའི་རྩ་ཞལ་དཀར་པོ་(༤༣)གཡས་མཐིང་གཡོན་དམར། རིན་འབྱུང་གི་རྩ་ཞལ་སེར་པོ་གཡས་དཀར་གཡོན་དམར། འོད་དཔག་མེད་ཀྱི་རྩ་ཞལ་དམར་པོ་གཡས་དཀར་གཡོན་མཐིང་། དོན་གྲུབ་ཀྱི་རྩ་ཞལ་ལྗང་གུ་གཡས་དཀར་གཡོན་དམར་རོ། །

གཉིས་པ་ཡབ་ཡུམ་སོ་སོར་བཤད་པ་ལ་གཉིས་ཏེ། སྤྱིའི་དོན་དང་། གཞུང་གི་དོན་ནོ། །དང་པོ་ལ་གཉིས་ཏེ། ཐམས་ཅད་ཡེ་ནས་ལྷའི་དཀྱིལ་འཁོར་དུ་བསྟན་པ་དང་། རིགས་དབྱེ་བའོ། །

དང་པོ་ནི་རྣམ་པར་སྣང་མཛད་ལ་སོགས་རིགས་ལྔའི་མཚན་ནས་མི་བརྗོད་པར། རྣམ་པར་ཤེས་པའི་རྒྱལ་པོ་དང་ཞེས་པ་ལ་སོགས་པ་ཕུང་པོ་ལྔའི་མཚན་ནས་བརྗོད་པ་ཅི་ཡིན་ཞེས་སྔ་རབས་པ་དག་ཟེར་ཏེ། འདི་ཡང་མ་ཕྱེད་པར་སྣང་ངོ་། །ཕུང་པོ་ལྔ་ལ་སོགས་པ་རྟོག་པའི་མིང་གིས་ལྷ་ལ་བརྗོད་པ་མེད་དེ། རྣམ་པར་ཤེས་པའི་རྒྱལ་པོ་དང་ཞེས་ལྡན་ཆོས་ཕུང་པོ་ལྔ་ལས་འཕགས་པ་ཉིད་བསྟན་པ་ཡིན་ཏེ། མྱ་ངན་ལས་འདས་པ་ཆེན་པོ་ཞེས་བརྗོད་པ་བཞིན་ནོ། །མྱ་ངན་གྱི་མིང་གིས་སངས་རྒྱས་ལ་བརྗོད་པ་མ་ཡིན་གྱི་འཕགས་ཆོས་ངོས་གཟུང་བའི་ཕྱིར་དང་། བརྟག་གཉིས་ལས། འདོད་ཆགས་ཆེན་པོ་རྗེས་ཆགས་པ། །ཞེས་པའང་བདེ་སྟོང་གཉིས་མེད་ཀྱི་ཡེ་ཤེས་ལ་བརྗོད་ཅིང་། གསང་བ་འདུས་པར་ཡང་། ཞེ་སྡང་རྡོ་རྗེ་ཞེས་པ་ལ་སོགས་པས་མེ་ལོང་ཡེ་ཤེས་ལ་སོགས་པ་དངོས་སུ་བསྟན་པ་བཞིན་ནོ། །དེས་ན་རྒྱལ་པོའི་སྒྲ་ནི་ཆེན་པོ་སྟེ་རྣམ་པར་སྣང་མཛད་ལ་སོགས་པ་ཡིན་ཞིང་། འཁོར་གྱི་སྐབས་སུའང་བྱང་ཆུབ་ཆེན་པོ་རྡོ་རྗེ་ཐོས་པ་ལ་སོགས་པ་གསུངས་པ་ལའང་ཤེས་པར་བྱའོ། །གལ་ཏེ་རྟོག་པའི་སྒྲས་བརྗོད་ན་རྣམ་པར་ཤེས་པ་དང་ཞེས་བརྗོད་པ་རིགས་ཀྱི་རྒྱལ་པོ་ཞེས་མི་རིགས་སོ། །ཁྱད་པར་འཕགས་ཆོས་སུ་བརྗོད་པ་ནི་འཁོར་བའི་གནས་སྐབས་ན་རྣམ་པར་ཤེས་པ་དེ་བཞིན་གཤེགས་པ་དེ་དག་གི་གདུང་ངམ་རིགས་སུ་གནས་པས་བརྗོད་པའོ། །དེ་ཡང་རང་བཞིན་གྱིས་དག་པའི་སངས་རྒྱས་ཉིད་ཡིན་ཀྱང་མ་དག་པའི་ཚེ་འགྲོ་བའི་ཕུང་པོ་ལྔ་རྣམ་སྨིན་ལས་གྲུབ་པ་ལྟར་སྣང་ངོ་། །དེ་ལས་ཅུང་ཟད་དག་པ་ན་དབང་ཐོབ་པ་རྣམས་ཀྱི་སྨོན་ལམ་ལས་གྲུབ་པའི་ལུས་ལ་སོགས་པར་སྣང་ངོ་། །ཤིན་ཏུ་དག་པའི་ཚེ་རྒྱལ་བའི་སྐུ་དང་ཡེ་ཤེས་སུ་སྣང་ངོ་། །དཔེར་ན་ཆུ་གཅིག་ལའང་དམྱལ་བ་པས་མེ་དང་། ཡི་དྭགས་ཀྱིས་རྣག་ཁྲག་དང་། མིས་དག་ཅིང་འདོད་ཡོན་དུ་བྱེད་པ་དང་། དུད་འགྲོས་བཏུང་བ་དང་། ལྷས་བདུད་རྩི་དང་། ཞིང་དག་པའི་འགྲོ་བས་བདུད་རྩིའི་ཆུ་ཀླུང་དང་། གྲུབ་པས་མཱ་མ་ཀཱི་ལ་སོགས་པར་སྣང་བ་ཉིད་དོ། །ཡང་ན་དངུལ་ཆུའི་ཁམས་བཞིན་དུའང་སྣང་(༤༤)བར་སྔར་བརྗོད་ཟིན་ཏོ། །དེའང་མ་དག་པའི་སྐབས་ན་ཕུང་པོ་ལྔ་དང་ཁམས་བཅོ་བརྒྱད་དང་། སྐྱེ་མཆེད་བཅུ་གཉིས་ལ་སོགས་པར་སྣང་བ་ཉིད། དག་པའི་ཚེ་ན་རིགས་ལྔའི་སྐུ་དང་། འཁོར་གྱི་སེམས་དཔའ་སེམས་མ་ལ་སོགས་པའི་དཀྱིལ་འཁོར་དུ་སྣང་བའོ། །དཔེར་ན་མིག་ལ་བད་ཀན་གྱི་སྐྱོན་ཆགས་པའི་ཚེ་དུང་སེར་པོར་སྣང་བ་ཉིད་དག་པའི་ཚེ་དཀར་པོར་སྣང་བ་བཞིན་ནོ། །བད་ཀན་གྱི་ཚེ་ནའང་གཟུགས་བརྙན་དུང་གི་རྣམ་པ་མི་འདོར་བ་བཞིན་དུ་མ་དག་པའི་ཚེའང་སངས་རྒྱས་ཀྱི་ཆོས་མཐུན་བརྩིར་ཡོད་དོ། །སེར་པོར་སྣང་ཡང་དོན་ལ་དཀར་པོ་ཡིན་པ་བཞིན་དུ་ཕྱི་ནང་གི་སྣང་བ་རྟོག་ཚོགས་དང་བཅས་པ་ཀུན་མ་དག་པར་སྣང་ཡང་དོན་ལ་དག་པ་སངས་རྒྱས་ཀྱི་ཞིང་དང་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ཉིད་ཡིན་ནོ། །

གཉིས་པ་སོ་སོར་དབྱེ་བ་ལ་ལྔ་ལས། དང་པོ་རྣམ་པར་ཤེས་པའི་ཕུང་པོ་ལ་དབྱེ་ན་བརྒྱད་དེ། ཀུན་གཞིའི་རྣམ་པར་ཤེས་པ་མེ་ལོང་དག་པའི་ངོས་ལྟ་བུ་ཤེས་པ་ཡུལ་ལ་མ་འཕྲོས་ལ་འཆར་གཞི་བྱེད་པ་དང་། ཡིད་ཀྱི་རྣམ་ཤེས་དོན་སྤྱིའི་ཡུལ་དང་རྗེས་ཀྱི་བློས་ཡུལ་ལ་སྤྱོད་པ་དང་། ཉོན་མོངས་པ་ཅན་གྱི་ཡིད་དགག་སྒྲུབ་ཏུ་བྱེད་པའི་ཤེས་པ་ལས་གསོག་པར་བྱེད་པ་དང་། སྒོ་ལྔའི་རྣམ་ཤེས་གཟུགས་མཐོང་བ་ལ་སོགས་པ་རྟོག་མེད་ལྔའོ། །དེའང་མཐོང་ཐོས་རེག་ཚོར་གྱི་ཆ་ནི་རྟོག་མེད་ཡིན་ལ། དེ་ལ་སོ་སོར་ཤེས་པ་ནི་ཡིད་ལ། དེ་ལ་དགག་སྒྲུབ་བྱེད་པ་ནི་ཉོན་ཡིད་དོ། །སྒོ་ལྔ་དང་ཡིད་ཤེས་ཙམ་གྱིས་ནི་ལས་མི་གསོག་ལ། ཉོན་ཡིད་ཀྱིས་ཀུན་གཞིའི་སྟེང་དུ་ལས་གསོག་པའོ། །ཀུན་གཞི་ནི་དེ་ཐམས་ཅད་པའི་རྟེན་ཡིན་ཏེ་རྟོག་མེད་ལུང་མ་བསྟན་ནོ། །དཔེར་ན་གང་དུའང་རྟོག་དཔྱོད་མེད་ཅིང་གསལ་དྭངས་མེད་པའི་ཤེས་པ་རང་སོའི་གནས་སྐབས་ལྟ་བུའོ། །དེས་མཚོན་པ་ཐམས་ཅད་དོ། །ཀུན་གཞིའི་རྣམ་ཤེས་ནི་ཤེས་པ་གསལ་དྭངས་ཡུལ་ལ་མ་འཕྲོས་པའི་གནས་སྐབས་སོ། །སྒོ་ལྔ་ནི་ཡུལ་དེ་གསལ་བར་སྣང་བའོ། །ཡིད་ནི་འདྲེར་རུང་འཛིན་པ་ཙམ་མོ། །ཉོན་ཡིད་ནི་དགག་སྒྲུབ་ཏུ་སྐྱེས་པའོ། །འདིར་ནི་ཀུན་གཞིའི་རྣམ་ཤེས་མེ་ལོང་ལྟ་བུ་འཕགས་ཆོས་སུ་གཟུང་ངོ་། །ཚོར་བ་ལ་གསུམ་སྟེ། ཡུལ་ཡིད་དུ་འོང་བ་ལ་བདེ་བ། མི་འོང་བ་ལ་སྡུག་བསྔལ། བར་མ་ལ་བཏང་སྙོམས་སུ་སྐྱེའོ། །འདུ་ཤེས་ལ་གསུམ་སྟེ། ཡུལ་ལ་འཇུག་པ་རྒྱ་ཆེ་བ། ཆུང་བ། བར་མའོ། །འདུ་བྱེད་ལ་སེམས་བྱུང་ལྔ་བཅུ་རྩ་གཅིག་སྟེ། ལྡན་པའི་འདུ་བྱེད། རེག་པ། ཡིད་ལ་བྱེད་པ། ཚོར་བ། འདུ་ཤེས། སེམས་པ་སྟེ་ཀུན་ཏུ་འགྲོ་བ་ལྔ་དང་། མོས་པ། འདུན་པ། (༤༥)དྲན་པ། ཏིང་ངེ་འཛིན། ཤེས་རབ་སྟེ་ཡུལ་སོ་སོར་ངེས་པ་ལྔ་དང་། དད་པ། ངོ་ཚ་བ། ཁྲེལ་ཡོད་པ། བག་ཡོད་པ། བཏང་སྙོམས། མི་འཚེ་བ། བརྩོན་འགྲུས་དང་། ཤིན་ཏུ་སྦྱངས་པ། འདོད་ཆགས་མེད་པ། ཞེ་སྡང་མེད་པ། གཏི་མུག་མེད་པའི་དགེ་བའི་རྩ་བ་སྟེ་བཅུ་གཅིག་དགེ་བ་དང་། འདོད་ཆགས། ཁོང་ཁྲོ། ང་རྒྱལ། མ་རིག་པ། འཇིག་ཚོགས་ལ་བལྟ་བ། ཐེ་ཚོམ་སྟེ་དྲུག་རྩ་བའི་ཉོན་མོངས་པ་དང་། ཕྲག་དོག །སེར་སྣ། གཡོ་སྒྱུ། རྒྱགས་པ། རྨུགས་པ། རྒོད་པ། མ་དད་པ། ལེ་ལོ། གཡེང་བ། བག་མེད་པ། བརྗེད་ངས་པ། ཤེས་བཞིན་མ་ཡིན་པ། འཚེ་བ། ངོ་ཚ་མེད་པ། ཁྲེལ་མེད་པ། ཁྲོ་བ། ཁོན་འཛིན། འཆབ་པ། འཚིག་པ་སྟེ་ཉི་ཤུ་ཉེ་བའི་ཉོན་མོངས་པ་དང་། འགྱོད་པ། གཉིད། རྟོག་པ། དཔྱོད་པ་སྟེ་བཞི་ནི་གཞན་དུ་འགྱུར་བའོ། །དེ་རྣམས་ཀྱི་ནང་ནས་ཚོར་བ་དང་འདུ་ཤེས་ལས་གཞན་པའི་བཞི་བཅུ་རྩ་དགུ་དང་། མིང་དང་མཚན་མ་ལ་སོགས་པ་མི་ལྡན་པའི་འདུ་བྱེད་འཁོར་འདས་བསྐྱེད་པའི་བྱ་བ་བྱེད་པ་ཐམས་ཅད་ནི། བྱ་བ་གྲུབ་པའི་ཡེ་ཤེས་ཀྱི་ངོ་བོ་དོན་ཡོད་གྲུབ་པའི་ཁྱད་པར་འཕགས་ཆོས་སུ་ངོས་གཟུང་ངོ་། །གཟུགས་ཀྱི་ཕུང་པོ་ལ་དབྱེ་ན་བཅོ་ལྔ་སྟེ། ས། ཆུ། མེ། རླུང་སྟེ་རྒྱུའི་གཟུགས་འབྱུང་བ་བཞི་དང་། གཟུགས། སྒྲ། དྲི། རོ། རེག་བྱ་སྟེ་ཡུལ་ལྔ་དང་། མིག །རྣ་བ། སྣ། ལྕེ། ལུས་ཀྱི་དབང་པོ་སྟེ་དབང་པོ་ལྔ་དང་། རྣམ་པར་རིག་བྱེད་མ་ཡིན་པའི་གཟུགས་ཏེ་བཅོ་ལྔ་ལས། རིག་བྱེད་མ་ཡིན་པ་ནི་ཆོས་ཀྱི་དབྱིངས་ཀྱི་ཡེ་ཤེས་མི་བསྐྱོད་པ་དང་གཞན་བཅུ་བཞི་སངས་རྒྱས་སྤྱན་སོགས་ཀྱིས་བསྡུས་པའི་ཁྱད་པར་འཕགས་ཆོས་སུ་ངོས་གཟུང་ངོ་། །

གཉིས་པ་གཞུང་གི་དོན་ལ་གཉིས་ཏེ། དབྱིངས་ངོ་བོ་ཉིད་ཀྱི་གཙོ་བོ་དང་། རང་བཞིན་ཐ་མི་དད་པའི་འཁོར་རོ། །དང་པོ་ནི། བཅོམ༵་ལྡན༵་འདས༵་དེ༵་བཞིན༵་གཤེགས༵་པ༵་རྣམ༵་པར༵་ཤེས༵་པའི༵་རྒྱལ༵་པོ༵་རྣམ་པར་སྣང་མཛད་དང༵་། དེ༵་བཞིན༵་གཤེགས༵་པ༵་གཟུགས༵་ཀྱི༵་རྒྱལ༵་པོ༵་མི་བསྐྱོད་པ་དང༵་། དེ༵་བཞིན༵་གཤེགས༵་པ༵་ཚོར༵་བའི༵་རྒྱལ༵་པོ༵་རིན་ཅེན་འབྱུང་ལྡན་དང༵་། དེ༵་བཞིན༵་གཤེགས༵་པ༵་འདུ༵་ཤེས༵་ཀྱི༵་རྒྱལ༵་པོ༵་སྣང་བ་མཐའ་ཡས་ད༵ང་། དེ༵་བཞིན༵་གཤེགས༵་པ༵་འདུ༵་བྱེད༵་ཀྱི༵་རྒྱལ༵་པོ༵་དོན་ཡོད་གྲུབ་པ་དང༵་ལྔའོ། །རིགས་ལྔ་པོ་དེ༵་དག༵་ཀུན༵་ཀྱང༵་སྐུ་མདོག་ནི་རིམ་པ་བཞིན། མེ་ལོང་ལྟ་བུའི་ཡེ་ཤེས་འགྱུར་བ་མེད་པས་རྣམ་པར་སྣང་མཛད་མཐིང༵་ག༵་དང༵་། ཆོས་ཀྱི་དབྱིངས་ཀྱི་ཡེ་ཤེས་དྲི་མ་ཐམས་ཅད་དང་བྲལ་བས་མི་བསྐྱོད་པ་དཀར༵་པོ༵་དང༵་། མཉམ་པ་ཉིད་ཀྱི་ཡེ་ཤེས་ཆེ་བའི་ཡོན་ཏན་དུ་མ་དང་ལྡན་པས་རིན་ཅེན་འབྱུང་ལྡན་སེར༵་པོ༵་དང༵་། སོ་སོར་རྟོག་པའི་ཡེ་ཤེས་འགྲོ་(༤༦)བའི་དོན་ལ་རྗེས་སུ་ཆགས་པས་འོད་དཔག་མེད་ལེ༵་བརྒན༵་ཏེ་དམར་པོ་དང༵་། བྱ་བ་གྲུབ་པའི་ཡེ་ཤེས་ཀྱིས་སེམས་ཅན་གྱི་དོན་སྣ་ཚོགས་སུ་མཛད་པས་དོན་ཡོད་གྲུབ་པ་ལྗང༵་གུའི༵་མདོག༵་ཏུ༵་གསལ་ཞིང་འཚེར༵་བ༵་ནི་རིགས་ལྔ་གའི་རང་བཞིན་དྭངས་ལ་བཀྲག་དང་གཟི་བརྗིད་ཆེ་བའོ། །དེ་དག་གི་ཡུམ་ནི་ལོངས་སྤྱོད་པར་བྱ་བའི་གཞི་དང་གཙོ་བོའི་ཡུམ་དུ་གྱུར་པ་དང་ཡོན་ཏན་གྱིས་ཆོ་རིགས་བཙུན་པས་བཙུ༵ན་མོ༵་གཞན་ལས་ཁྱད་པར་དུ་འཕགས་པས་དམ༵་པའོ༵། །དབྱིངས་ནམ་མཁའི་རང་བཞིན་ནི་ཆོས་ཉིད་ཡངས་ཤིང་ཡོན་ཏན་གྱི་གོ་འབྱེད་པ་ལ་མི་བསྒྲིབས་པས་གསལ་བར་བྱེད་པའི་ཕྱིར་སྣང༵་བའི༵་ངོ་བོ་ནམ་མཁའ་དབྱིང༵ས་ཀྱི་དབང་ཕྱུག་མ༵་དང༵་། ས་ནི་བརྟན་ཞིང་རྟེན་དུ་གྱུར་པ་བཞིན་དུ་ངོ་བོ་མི་འགྱུར་ཞིང་ཡོན་ཏན་གྱི་རྟེན་བྱེད་པས་སྲ༵་བའི༵་དབྱིང༵ས་ཏེ་སངས་རྒྱས་སྤྱན་དང༵་། ཆུ་ནི་གཤེར་ལ་སྐྱེ་བོའི་གསོས་སུ་གྱུར་པ་ལྟར་འགྲོ་བའི་རྒྱུད་བརླན་པར་བྱེད་པས་མཉེན༵་པ༵འི་དབྱི༵ངས་ཏེ་མཱ་མ་ཀཱི་དང༵་། མེ་ནི་བསྲེག་ཅིང་སྣང་བ་ལྟར་ཉོན་མོངས་པ་བསྲེག་ཅིང་ཤེས་བྱ་ཐམས་ཅད་གསལ་བར་བྱེད་པས་དྲོ༵་བའི༵་དབྱི༵ངས་ཏེ་གོས་དཀར་མོ་དང༵་། རླུང་ནི་བསྐྱོད་པ་དང་འདེགས་པའི་བྱ་བ་བྱེད་པ་ལྟར་འགྲོ་བའི་དོན་ལ་ཐོགས་པ་མེད་ཀྱང་ཉེ་བར་འཚོ་བའི་གཞིར་གྱུར་པས་བསྐྱོད༵་པ༵འི་དབྱི༵ངས་ཏེ་དམ་ཚིག་སྒྲོལ་མ་དང༵་། དེ་དག་ལ༵་སོག༵ས་པ༵་རིགས་ཀྱི་བཙུ༵ན་མོ༵འི་ཚོ༵གས་མ་ལུས་མི་ལུས་ལུས་པ་མེད་པ་ཐམས་ཅད་དང༵་། ཐབས་དང་ཤེས་རབ་གཉི༵ས་སུ༵་མེད་པར༵་མཉམ་པར་སྦྱོར་བས་བཞུགས་སོ། །

དེ་དག་གི་རང་བཞིན་ནམ་བཞུགས་པའི་ཚུལ་ལམ་གྲངས་སམ་རྣམ་གྲངས་བསྟན་པ་ནི། སྣང་སྲིད་ཐམས་ཅད་ལ་ཡེ་ནས་འདུ་འབྲལ་མེད་པར་ཁྱབ་ཅིང་། ཁྱད་པར་དུ་ལོངས་སྐུའི་སྣང་བས་ཡུལ་ཆོས༵་ཀྱི༵་དབྱི༵ངས་ནམ་མཁའི་མཐའ་ཀླས་པ་ཀུན་ཏུ་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་སྣང་བ་ཆེན་པོས་ཀུན༵་ཏུ༵་མཐའ༵་ཡས༵་པར༵་ཁྱབ༵་པ༵་ནི༵། འདི༵་ལྟ༵་སྟེ༵་དཔེར༵་ན༵་ཏིལ༵་གྱི༵་གང༵་བུ༵་ཁ་ཕྱེ་བ་བཞིན༵་དུ༵་གོ་མཚམས་མེད་པར་སྐུ་དང་ཡེ་ཤེས་ཀྱི་དཀྱིལ་འཁོར་གྱིས་གང༵་ནས༵་ཐམས་ཅད་ཀུན་ཏུ་ཁྱབ༵་པར༵་བཞུ༵གས་སོ། །སྤྱིར་སྣང་སྲིད་ཐམས་ཅད་ལ་ཡེ་ནས་ཁྱབ་ཀྱང་འདིར་བདེ་གཤེགས་ཀྱི་སྣང་བ་ལ་སྦྱར་རོ། །ཚུལ་འདི་ནི་བར་གྱི་གསལ་བྱེད་དེ་གོང་གི་རིགས་ལྔ་ཡབ་ཡུམ་དང་། འོག་གི་སེམས་དཔའ་སེམས་མ་ལ་སོགས་པའི་དཀྱིལ་འཁོར་ཐམས་ཅད་ལ་ཤེས་པར་བྱའོ། །དཀྲུགས་ཏེ་མི་བཤད་དོ། །ཅིའི་ཕྱིར་ཞེ་ན་ལས་དང་པོ་པས་རྟོགས་པར་དཀའ་ཞིང་ཕུལ་ཆུང་བའི་ཕྱིར་རོ། །

གསུམ་པ་འཁོར་ཕུན་སུམ་ཚོགས་པ་རྒྱས་པར་བཤད་པ་ལ་གཉིས་ལས། (༤༧)རང་བཞིན་གྱི་འཁོར་ནི་གོང་དུ་བསྟན་ཟིན་ཅིང་། ཐུགས་རྗེའི་འཁོར་ལ་གསུམ་སྟེ། ནང་གི་སེམས་དཔའ་ཡབ་ཡུམ། ཕྱིའི་སེམས་དཔའ་ཡམ་ཡུམ། སྒོ་བ་ཡབ་ཡུམ་མོ། །

དང་པོ་ལའང་གཉིས་ལས་ཡབ་བཞི་ནི། གཙོ་བོ་རིགས་ལྔའི་རང་བཞིན་བཤད་པ་དེ༵་ན༵ས་སེམས་དཔའི་འཁོར་བཤད་པར་བཤད་སྟེ། དེ་ཡང་སྟོན་པ་ཉིད་བྱང་ཆུབ་ཆེན་པོ་ཡིན་པ་བཞིན་དུ་རང་སྣང་བའི་ཐུགས་རྗེའི་ངང་ལས་ཤར་བའི་འཁོར་རྣམས་ཀྱང་སྒྲིབ་པ་མཐའ་དག་བྱང༵་ཞིང་ཡོན་ཏན་མ་ལུས་པ་ཐུགས་སུ་ཆུབ༵་པས་སངས་རྒྱས་ཉིད་ཡིན་པའི་ཕྱིར་ཆེ༵ན་པོ༵་སར་གནས་ཀྱི་སེམས་དཔའ་ལས་འཕགས་སོ། །དེ་ཡང་རྣམ་པར་ཤེས་པའི་སེམས་དཔའ་བཞི་ལ། རྡོ༵་རྗེ༵་ནི་དབྱིངས་དང་ཡེ་ཤེས་སྣང་བ་དང་སྟོང་པ་གཉིས་སུ་མེད་ཅིང་འཇིག་འབྲལ་མེད་པ་སྟེ། རྡོ་རྗེ་རྩེ་མོ་ལས། སྲ་ཞིང་སྙིང་པོ་ཁང་སྟོང་མེད། །གཅད་དང་གཞིག་པར་བྱ་བ་མེད། །བསྲེག་པར་བྱར་མེད་འཇིག་མེད་པས། །སྟོང་ཉིད་རྡོ་རྗེར་བརྗོད་པར་བྱ། །ཞེས་པ་དང་། སྒྲིབ་པ་ཐམས་ཅད་འཇོམས་ཤིང་སྒྲིབ་པས་ཚུར་མི་གནོད་པ་ཡིན་ཏེ། རྒྱས་པ་ལས། རྡོ་རྗེའི་རང་བཞིན་སྒྲིབ་པ་ཀུན། །འཇོམས་ཤིང་ཅིས་ཀྱང་མི་ཚུགས་ལ། །རང་བྱུང་ཡེ་ཤེས་ལྷ་ཡི་ལྷ། །ཐམས་ཅད་ཀུན་ལ་འབིགས་པར་བྱེད། །ཅེས་སོ། །མིག་གི་རྣམ་ཤེས་ཀྱིས་གཟུགས་མཐོང་བ་ལས་ཁྱད་པར་དུ་འཕགས་པ་སངས་རྒྱས་ཀྱི་སྤྱན་གྱིས་ཡུལ་ལྔ་ག་ལ་འཇུག་ཅིང་ཆོས་ཉིད་རོ་གཅིག་ཏུ་གཟིགས་པའི་ཆ་ནས་མཐོང༵་བ༵་སྟེ་སའི་སྙིང་པོ་དང༵་། རྣ་བའི་རྣམ་ཤེས་ཀྱིས་སྒྲ་ཐོས་པ་ལས་འཕགས་པས་སངས་རྒྱས་ཀྱི་སྙན་གྱིས་ཡུལ་ལྔ་ག་ལ་འཇུག་ཅིང་དེ་བཞིན་ཉིད་དུ་རོ་གཅིག་པར་གསན་པའི་ཆ་ནས་བྱང༵་ཆུབ༵་ཆེ༵ན་པོ༵་རྡོ༵་རྗེ༵་ཐོ༵ས་པ༵་སྟེ་ཕྱག་ན་རྡོ་རྗེ་དང༵་། སྣའི་རྣམ་ཤེས་ཀྱིས་དྲི་ཚོར་བ་ལས་འཕགས་པ་སངས་རྒྱས་ཀྱི་ཤངས་ཀྱིས་ཡུལ་ལྔ་ག་ལ་འཇུག་ཅིང་སྐྱེ་བ་མེད་པར་རོ་གཅིག་ཏུ་ཚོར་བ་བྱང༵་ཆུབ༵་ཆེ༵ན་པོ༵་རྡོ༵་རྗེ༵་བསྣམ༵ས་པ༵་སྟེ་ནམ་མཁའི་སྙིང་པོ་དང༵་། ལྕེའི་རྣམ་ཤེས་ཀྱིས་རོ་མྱོང་བ་ཙམ་ལས་འཕགས་པ་སངས་རྒྱས་ཀྱི་ལྗགས་ཀྱིས་ཡུལ་ལྔ་ག་ལ་འཇུག་ཅིང་གཉིས་སུ་མེད་པར་རོ་གཅིག་ཏུ་མྱོང་བ་བྱང༵་ཆུབ༵་ཆེ༵ན་པོ༵་རྡོ༵་རྗེ༵་མྱོང༵་བ༵་སྟེ་སྤྱན་རས་གཟིགས་དང༵་། དེ་དག་གི་ཡུམ་བཞི་ཡང་རིམ་པ་བཞིན་དུ་བཙུ༵ན་མོ༵་མཐོ༵ང་བ༵ར་བྱ༵་བ༵་ཡེ་ཤེས་ཀྱི་སྣང་བའི་ཡུལ་གཟུགས་ཏེ་སྒེག་མོ་དང༵་། དེ་བཞིན་དུ་མཉན༵་པ༵ར་བྱ༵་བ༵་ཕྲེང་མ་དང༵་། མན༵མ་པ༵ར་བྱ༵་བ༵་ནི་གླུ་དབྱངས་མ་དང༵་། མྱོང༵་བ༵ར་བྱ༵་བ༵་ནི་རོལ་པའི་དགའ་བ་སྟེ་གར་མ་དང༵་བཞིའོ། །དེ་ལྟར་ཅུང་ཟད་བསྣོལ་ཡང་མིང་ཙམ་སྟེ་དོན་ལ་ནང་གི་སྒེག་མོ་བཞིར་འདོད་པས་མི་འགལ་ལོ། །ཇི་ལྟ་བའི་སྒྲར་བརྗོད་ན་མཉན་པར་བྱ་བ་(༤༨)སྒྲ་སྟེ་གླུ་མ། མནམ་པར་བྱ་བ་དྲི་སྟེ་བདུག་སྤོས་མར་འབྱུང་ངོ་། །དབང་པོའི་སེམས་དཔའ་བཞི་ལ་མཐོང༵་བྱེད༵་ནི་མིག་གི་དབང་པོ་ཟར་མའི་མེ་ཏོག་ལྟ་བུ་ལས་ཁྱད་པར་དུ་འཕགས་པ་རྡོ་རྗེའི་སྤྱན་སྒྲིབ་པ་མེད་པས་ཡུལ་ལྔ་འཛིན་པའི་རྟེན་བྱེད་པ་སྟེ་བྱམས་པ་དང༵་། ཐོས༵་བྱེད༵་ནི་རྣ་བའི་དབང་པོ་གྲོ་ག་གཅུས་པ་ལྟ་བུ་ལས་འཕགས་པ་སྙན་གྱི་དབང་པོ་ཉམས་པ་མེད་པས་ཡུལ་ལྔ་གསལ་བའི་རྟེན་བྱེད་པ་སྟེ་སྒྲིབ་པ་རྣམ་སེལ་དང༵་། སྣོམ༵་བྱེད༵་ནི་སྣའི་དབང་པོ་ཟངས་ཀྱི་མོ་ཁབ་གཤིབས་པ་ལྟ་བུ་ལས་འཕགས་པ་ཤངས་ཀྱི་དབང་པོས་ཡུལ་ལྔ་ལ་འཇུག་པའི་རྟེན་བྱེད་པ་སྟེ་ཀུན་ཏུ་བཟང་པོ་དང༵་། མྱོང༵་བྱེད༵་ནི་ལྕེའི་དབང་པོ་ཟླ་བ་ཕྱེད་པ་ལྟ་བུ་ལས་འཕགས་པ་གསུང་རོ་བྲོ་བའི་མཆོག་མཁྱེན་པས་ཡུལ་ལྔ་ལ་འཇུག་པའི་རྟེན་བྱེད་པ་སྟེ་འཇམ་དཔལ་དང༵་དེ་དག་གི་ཡུམ་རྣམས་ཀྱང་རིམ་པ་བཞིན། བཙུན༵་མོ༵་འད༵ས་པ༵་ནི་སྔར་གྲགས་པའི་ཆོས་ཞིག་ནས་མེད་པ་ལས་ཁྱད་པར་དུ་འཕགས་པ་སྔ་མའི་ཆོས་ཇི་བཞིན་པ་མངོན་སུམ་དུ་གསལ་བའི་རང་བཞིན་འདས་པའི་དུས་ལ་མ་ཆགས་མ་ཐོགས་པའི་ཡེ་ཤེས་གཟིགས་པ་འཇུག་པའི་མཚོན་བྱེད་དུ་བདུག་སྤོས་མར་སྣང་བ་དང༵་། ད་ལྟར་ནི་དབང་པོའི་མངོན་སུམ་ལ་སྣང་བ་ཙམ་ལས་འཕགས་པ་ཆོས་ཐམས་ཅད་བསྐལ་དོན་མེད་པར་ད༵་ལྟར༵་གྱི་དུས་ལ་མ་ཆགས་མ་ཐོགས་པའི་ཡེ་ཤེས་གཟིགས་པ་འཇུག་པའི་མཚོན་བྱེད་དུ་མེ་ཏོག་མར་སྣང་བ་དང༵་། མ༵་བྱུང༵་བ༵་ནི་མ་འོངས་པའི་ཡུལ་ལ་མངོན་དུ་མ་གྱུར་པ་ལས་ཁྱད་པར་དུ་འཕགས་པ་མ་འོངས་པའི་ཆོས་རྣམས་ཀྱང་སྐྱུ་རུ་ར་ཕྱག་མཐིལ་དུ་བཞག་པ་བཞིན་དུ་ད་ལྟར་གཟིགས་པས་མ་འོངས་པའི་དུས་ལ་མ་ཆགས་མ་ཐོགས་པའི་ཡེ་ཤེས་གཟིགས་པ་འཇུག་པའི་མཚོན་བྱེད་དུ་སྣང་གསལ་མར་སྣང་བ་དང༵་། འབྱུ༵ང་བར༵་མ༵་ངེས༵་པའི༵་ཚོ༵གས་དུས་བཞི་མཉམ་པ་ཉིད་ཀྱི་ཡེ་ཤེས་ཏེ་རང་བྱུང་གི་སྣང་བ་ཇི་བཞིན་པའི་ངང་ནས་འཕོ་འགྱུར་མེད་པའི་ཆོས་ཉིད་ལ་བཞུགས་པའི་མཚོན་བྱེད་དུ་དྲི་ཆབ་མར་སྣང་བ་དང༵་བཞིའོ། །དེའང་འདས་མ་འོངས་ད་ལྟར་མཁྱེན་ཚུལ་ནི་མེ་ལོང་གི་ངོས་ལ་པྲ་ཕབ་པའི་སྔ་རྟགས་ཕྱི་རྟགས་ད་ལྟར་བ་དང་བཅས་པ་འཆར་བ་བཞིན་དུ་ས་ལེ་མཁྱེན་པའོ། །དེ་སྐད་དུ་ཕལ་པོ་ཆེ་ལས། འདས་དང་མ་འོངས་ད་ལྟར་བྱུང་། །ཇི་སྙེད་ཇི་བཞིན་མངོན་དུ་གྱུར། །ཅེས་པ་ལྟར་རོ། །སྒོ་བ་ཡབ་ཡུམ་ལ་གཉིས་ལས། ཡབ་ནི་གསང་བ་འདུས་པའི་རྒྱུད་ཕྱི་མ་ལས། མི་འཇིག་རྣམ་པར་མི་ཤེས་པ། །བརྗོད་མེད་རྣམ་པར་མི་རྟོག་པ། །སངས་རྒྱས་བྱང་ཆུབ་ཡེ་ཤེས་འདི། །ཤེས་ན་བདེ་བ་ཐོབ་པར་འགྱུར། །ཞེས་པའི་ཚུལ་དང་མཐུན་པར་བཤད་(༤༩)དེ། འཇོ༵མ་པ༵་ནི་ཐབས་དང་ཆེ༵ན་པོ༵་ནི་ཤེས་རབ་སྟེ། དེ་གཉིས་ཀྱི་རྣམ་པར་འཕྲུལ་པ་ཆེན་པོས་བདུད་དང་གཤིན་རྗེ་ལ་སོགས་པ་གདུག་པ་ཅན་རྣམས་འདུལ་བར་བྱེད་པས་རྡོ༵་རྗེ༵འོ། །དེ་ཡང་གསུམ་ལས་ལུས་ཀྱི་ཆའི་རེ༵ག་པའི༵་ཚོར་བ་བསྐྱེད་པ་ལ། རེ༵ག་བྱེ༵ད་ལུས། རེ༵ག་བྱ༵་ཡུལ། དེ་གཉིས་ཕྲད་པ་ལས་རེ༵ག་བྱ་ཤེ༵ས་པ་ལུས་ཀྱི་རྣམ་ཤེས་ཏེ་ཐ་མལ་པ་ལས་ཁྱད་པར་དུ་འཕགས་པ་སངས་རྒྱས་ཀྱི་སྐུས་རེག་བྱའི་ཁམས་ཡུལ་ལྔ་ལ་འཇུག་པའི་ཕྱིར་བདུད་རྩི་འཁྱིལ་པ་ད༵ང་། རྟ་མཆོག་དང་། སྟོབས་པོ་ཆེ་དང་། གཤིན་རྗེ་གཤེད་དོ། །ངག་གི་ཆའི་རེག་པ་ཉིད་སྒྲར་བསྒྱུར་ཏེ་གཞུང་དུ་ལུས་ཀྱི་གཞི་དང་པོར་དངོས་སུ་བསྟན་པས་ངག་ཡིད་གཉིས་ཤུགས་ལ་བསྟན་ཏོ། །དེ་ཡང་སྒྲའི་ཤེས་པ་སྐྱེ་བ་ལ། རྗོད་བྱེད་སྒྲ། བརྗོད་བྱ་ཡུལ། དེ་གཉིས་བརྗོད་པའི་རྐྱེན་ཚོགས་པ་ལས་སྒྲའི་ཤེས་པ་སྙན་མི་སྙན་བར་མ་གསུམ་འབྱུང་བ་ལས་ཁྱད་པར་འཕགས་པ་སངས་རྒྱས་ཀྱི་གསུངས་དབྱངས་སྒྲིབ་པ་ཐམས་ཅད་དང་བྲལ་བ་ཡུལ་ལྔ་ལ་འཇུག་པའི་མཚོན་བྱེད་དུ་བདུད་རྩི་འཁྱིལ་པ་ལ་སོགས་པ་ཁྲོ་བོ་བཞིར་སྣང་ངོ་། །ཡིད་ཀྱི་ཚེ་ཆོས་སུ་བསྒྱུར་ཏེ། ཡིད་ཀྱི་ཡུལ་ཆོས་ཀྱི་སྐྱེ་མཆེད་སྐྱེ་བ་ལ། རིག་བྱེད་ཡིད། རིག་བྱ་དོན་སྤྱིའི་རྣམ་པ་སྣ་ཚོགས་པ་ཡུལ། དེ་གཉིས་ཕྲད་པ་ལས་བདེ་སྡུག་དགག་སྒྲུབ་ལ་སོགས་པའི་ཤེས་པ་སྐྱེ་བ་ལས་ཁྱད་པར་འཕགས་པ་སངས་རྒྱས་ཀྱི་ཡེ་ཤེས་སྒྲིབ་པ་མེད་པ་དོན་སྤྱིའི་འཛིན་པ་ལ་མི་ལྟོས་པར་མངོན་སུམ་དུ་གྱུར་ཅིང་ཆགས་སྡང་ཐམས་ཅད་དང་བྲལ་བའི་མཚོན་བྱེད་དུ་ཁྲོ་བོ་བཞི་སྒོ་བར་ཡེ་ཤེས་ཀྱི་རྩལ་ལས་རང་སྣང་བ་དེ་ཡང་སྐྱེ་འཇིག་མེད་པ་དང་། བརྗོད་དུ་མེད་པ་དང་། རིག་བྱེད་མེད་པ་དང་། རྣམ་པ་མེད་པར་རྟོགས་པའི་ཡེ་ཤེས་བཞིའོ། །དེ་དག་གི་ཡུམ་བཞི་ནི་རིམ་པ་བཞིན་ངོ་བོ་གཟུགས་ལ་སོགས་པའི་ཆོས་ཐམས་ཅད་རྟག༵་པ༵ར་མ༵་ཡི༵ན་པ༵་སྟེ་མེད་བཞིན་དུ་སྣང་བ་གཟུགས་བརྙན་དང་འདྲ་བར་མཚོན་ཞིང་རྣམ་པ་བྱམས་པ་ཆེན་པོ་དང་སྦྱིན་པས་སེམས་ཅན་རྣམས་སྡུད་པའི་མཚོན་བྱེད་དུ་ལྕགས་ཀྱུ་མའོ། །སྒྲ་ལ་སོགས་པའི་ཆོས་ཐམས་ཅད་ཆ༵ད་པ༵ར་མ༵་ཡི༵ན་པ༵་སྟེ་ངོ་བོ་རང་རང་གི་སྣང་བ་མ་དོར་བ་སྨིག་རྒྱུ་དང་། འདྲ་བར་མཚོན་ཞིང་རྣམ་པ་སྙིང་རྗེ་ཆེན་པོ་དང་སྙན་པར་སྨྲ་བས་སེམས་ཅན་རྣམས་སྡུད་པའི་ཕྱིར་ཞགས་པ་མར་སྣང་བའོ། །ཡིད་ཀྱི་ཆོས་རྣམས་ལ་དགག་སྒྲུབ་ཀྱིས་བདག་ཏུ༵་བཟུང་དུ་མེད་དེ་ངོ་བོ་བད༵ག་ཏུ་གྲུབ་པ་མ༵་ཡི༵ན་པ༵་རྨི་ལམ་དང་འདྲ་ཞིང་རྣམ་པ་དགའ་བ་ཆེན་པོ་དང་དོན་མཐུན་པས་སེམས་ཅན་རྣམས་དབང་དུ་བྱེད་པའི་བརྡར་ལྕགས་སྒྲོག་མའོ། །སྣང་སྲིད་འཁོར་འདས་ཐམས་(༥༠)ཅད་ཀྱི་ངོ་བོ་དངོས་པོ་དང་མཚ༵ན་མ༵ར་གྲུབ་པ་མ༵་ཡི༵ན་ཏེ་གདོད་མ་ནས་རང་བཞིན་མེད་པ་སྤྲུལ་པ་དང་འདྲ་ཞིང་རྣམ་པ་དོན་སྤྱོད་པ་དང་བཏང་སྙོམས་ཆེན་པོས་སེམས་ཅན་རྣམས་ཞི་བ་ལ་འགོད་པའི་མཚོན་བྱེད་དུ་དྲིལ་བུ་མར་སྣང་བ༵འོ། །དེ་ཡང་སངས་རྒྱས་ཀྱི་ས་ན་དབང་ཤེས་ལྔ་པོ་རེ་རེས་ཀྱང་ཡུལ་ལྔ་ལ་འཇུག་པར། མདོ་སྡེ་རྒྱན་ལས། དབང་པོ་ལྔ་རྣམས་གཞན་གྱུར་ན། །དོན་ཀུན་འཇུག་དང་ཐམས་ཅད་ཀྱི། །ཡོན་ཏན་བརྒྱ་ཕྲག་བཅུ་གཉིས་འབྱུང་། །ཞེས་པ་དང་། མིག་གི་དབང་པོ་ལ་ཐོག་མར་ཕྱོགས་བཞི་སྟེང་འོག་གཉིས་ཏེ་དྲུག་ཏུ་ཕྱེ་ལ། དྲུག་པོ་རེ་རེ་ལ་གདོད་ཕྱོགས་བཅུར་ཕྱེ་བའི་མིག་གི་དབང་པོས་ཤར་ཕྱོགས་ཀྱི་ཤར་གྱི་གཟུགས་མཐོང་བ་བཞག་ལ། སྒྲ་ཐོས། དྲི་ཚོར། རོ་མྱང་། རེག་བྱ་རེག་པ་བཞི། ཕྱོགས་ལྷག་མ་དགུ་ལ་བཞི་བཞི་སྟེ་བཞི་བཅུ། དེ་བཞིན་དུ་ཕྱོགས་ལྷག་མ་ལྔ་ལའང་བཅུ་བཅུར་ཕྱེ་ལ་བཞི་བཅུ་བཞི་བཅུ་སྟེ། དེ་ལྟར་ན་བཞི་བཅུ་ཚན་པ་དྲུག་ལ་ཉིས་བརྒྱ་བཞི་བཅུ་སྟེ། རྣ་བ་དང་། སྣ་དང་། ལྕེ་དང་། ལུས་རྣམས་ལའང་རང་རང་གི་ཡོན་ཏན་བོར་ལ་དེ་བཞིན་དུ་བརྩིས་པས་བརྒྱ་ཕྲག་བཅུ་གཉིས་ཏེ། འདི་དག་ནི་སངས་རྒྱས་ཀྱི་སའི་ཡོན་ཏན་ཁྱད་པར་ཅན་ནོ། །དེ་ལྟར་རྩ་བའི་དཀྱིལ་འཁོར་གྱི་ཡབ་དང་ཡུམ་དང་སེམས་དཔའ་དང་སེམས་མ་དང་སྒོ་བ་ཡབ་ཡུམ་ལ༵་སོ༵གས་པ༵་དབུས་སུ་སྣང་བ་ཇི་ལྟ་བ་བཞིན་དུ། ཕྱོགས་བཞིར་རིགས་བཞིའི་དཀྱིལ་འཁོར་རང་རང་གི་ཚོམ་བུའི་འཁོར་འབུམ་ཕྲག་དུ་མས་བསྐོར་བ། ལྷའི་བཀོད་ཚུལ་གྱི་མང་ཉུང་དང་རྣམ་པ་རྩ་བའི་དཀྱིལ་འཁོར་དེ༵་ལྟ༵་བུ༵འི་ཚོ༵གས་ནམ་མཁའི་དབྱིངས་ཀུན་ཁྱབ་པར་བརྗོ༵ད་ཀྱི༵ས་མི༵་ལ༵ང་བར་སྣང་བ༵་རྣམས་དང༵་རང་བཞིན་གཉི༵ས་སུ༵་མེ༵ད་པ༵ར་བཞུག༵ས་ཏེ་རང་སྣང་ཡེ་ཤེས་ཀྱི་རོལ་པ་གཅིག་གིས་ངང་ལས་ཤར་བའི་གནད་ཀྱིས་སོ༵། །

གསུམ་པ་ཡེ་ཤེས་ཀྱི་རང་སྣང་བཀོད་པས་དོན་བསྡུ་བ་ལ་གཉིས་ཏེ། གང་ལས་བཀོད་པའི་ངོ་བོ། ཚུལ་ཇི་ལྟར་བཀོད་པའི་ཚུལ་ལོ། །

དང་པོ་ནི། གླེང་གཞི་རྒྱས་པར་བསྟན་པ་དེ༵་ན༵ས་དེ༵་བཞི༵ན་གཤེ༵གས་པ༵་ཡབ་རྣམས་ཡུམ་བཙུན༵་མོ༵འི་ཚོ༵གས་དང༵་རང་བཞིན་གཉིས་སུ༵་མེ༵ད་པ༵འི་ངོ་བོ་གཞན་གྱི་སྤྱོད་ཡུལ་དུ་མ་གྱུར་པས་གས༵ང་བ༵འི་དཀྱི༵ལ་འཁོ༵ར་རང་སྣང་བ་དེ༵་ད༵ག་ཉིད༵་ཀྱི༵་གས༵ང་བ༵་ཆེན་པོ་འདི༵་ཉིད༵། སྐུ༵་རྡོ་རྗེ་དང༵་གསུ༵ང་རྡོ་རྗེ་དང༵་ཐུག༵ས་རྡོ་རྗེ་དང༵་ཡོན༵་ཏན༵་རྡོ་རྗེ་དང་འཕྲིན༵་ལས༵་རྡོ༵་རྗེ༵་ལས༵་རིགས་ལྔའི་དཀྱིལ་འཁོར་རང་སྣང་བའི་དོན་སྟོན་པའི་རྡོ་རྗེ་གསང་བའི་ཚིག་འདི་དག་དགོངས་པ་རང་ཤར་དུ་མ་བརྗོད་པའི་ཚུལ་གྱིས་ཕྱུང༵་ངོ༵་། །

གཉིས་པ་ཇི་ལྟར་བྱུང་ཞིང་རང་སྣང་དུ་བཀོད་པ་ལ་གསུམ་སྟེ། རང་སྣང་གི་དཀྱིལ་འཁོར་དེ་ཉིད་གང་གི་ངང་ལས་བཀོད་པ། (༥༡)ཚུལ་ཇི་ལྟར་སྣང་བ། དེ་ཉིད་གང་གི་བཞུགས་གནས་ཡིན་པར་ངོས་བཟུང་བའོ། །

དང་པོ་ནི། ཨེ༵་ཆོས་སྐུའི་ངང་ལས་ཨེ༵་མ༵་ལོངས་སྐུའི་སྣང་བ་ཨེ༵་མ༵་ཧོ༵ཿསྣ་ཚོགས་སུ་རང་སྣང་བ་ངོ་མཚར་སྟོན་པའོ། །ཆོས་སྐུ་དེ༵་བཞི༵ན་ཉིད༵་ཀྱི༵་དབྱིང༵ས་ཉིད༵་ཀྱི་ངོ་བོ་ལ་དབ༵ང་བསྒྱུར་བ༵་ལ་ལོངས་སྐུ་ཡེ༵་ཤེ༵ས་ལྔའི་དཀྱི༵ལ་འཁོ༵ར་ལྷུན་གྱིས་གྲུབ་པ་ནི་སྟོན་པ་ཉིད་ཀྱི་བསམ་གྱིས་མི་ཁྱབ་པའི་ཐུག༵ས་རྗེའི༵་ངང༵་ལས་བྱུང་བའོ། །

གཉིས་པ་ནི། དེ་ལྟ་བུའི་ཞིང་ཁམས་ལྷུན་སྟུག་པོ་བཀོད་པ་དེ་བཞིན་གཤེགས་པ་ཉིད་ལ་ར༵ང་སྣང༵་བ༵་ཉིད༵་དེ་སངས་རྒྱས་ཀྱི་ཏིང༵་ངེ་འཛིན༵་རྣམ་པར་དག་པའི་གཟུ༵གས་བརྙ༵ན་ཡེ་ཤེས་ཀྱི༵་སྒྱུ་མ༵་རང་བཞིན་གྱིས་རྣམ༵་པར་དག༵་པའི་ངོ་བོར་གས༵ལ་ཅིང་སྣང་བ༵་ནི༵་ཞེས་སོ། །

གསུམ་པ་ནི། སངས་རྒྱས་ཀྱི་སྐུ༵་དང་གསུ༵ང་དང་ཐུག༵ས་དང་ཡོན༵་ཏན༵་དང་འཕྲིན༵་ལས༵་རྣམས་ཉེས་པའི་སྐྱོན་ཅུང་ཟད་ཙམ་གྱིའང་སེ༵ལ་མེད༵་པའི༵་བདག་ཉིད། ཡོན༵་ཏན༵་ཕུན་སུམ་ཚོགས་པ་ཡི༵ད་བཞི༵ན་རི༵ན་པོ༵་ཆེ༵་བསམ་གྱིས་མི་ཁྱབ་པའི་མངའ་ཐང་ཆེན་པོ་མི༵་ཟ༵ད་པ༵ར་ལྡ༵ན་པ་ཡེ་ཤེས་རྒྱན༵་གྱི༵་འཁོ༵ར་ལོ༵་མངའ་བའི་རང་བཞིན་རྡོ༵་རྗེ༵་མཆོག༵་གི༵་ངོ་བོ་འདུ་འབྲལ་མེད་པ་དང་ལོངས་སྤྱོད་རྫོགས་པའི་སྐུའི་གན༵ས་ཉིད༵་དོ༵། །ཞེས༵་སྐུ་གསུང་ཐུགས་ཀྱི་རྡོ༵་རྗེ༵་གསུ༵ང་བ༵འི་ཚི༵ག་རྒྱུད་ཀྱི་རང་བཞིན་དུ༵འོ༵། །འདི་ལ་ཁ་ཅིག་སྡུད་པ་པོའི་རྣམ་པར་སྦྱོར་བ་ནི་མི་འཐད་དེ་རྡོ་རྗེ་གསང་བའི་སྙིང་པོའི་རྒྱུད་ཡིན་པའི་ཕྱིར་རོ། །སྐབས་འདིར་བླ་མ་རོང་པ། དེ་བཞིན་ཉིད་ཀྱི་དཀྱིལ་འཁོར། དབྱིངས་ཀྱི་དཀྱིལ་འཁོར། དབང་བསྒྱུར་ཐབས་ཀྱི་དཀྱིལ་འཁོར། ཡེ་ཤེས་ཀྱི་དཀྱིལ་འཁོར། ཐུགས་རྗེའི་དཀྱིལ་འཁོར། རང་སྣང་བའི་དཀྱིལ་འཁོར། ཉིད་ཀྱི་དཀྱིལ་འཁོར། ཏིང་ངེ་འཛིན་གྱི་དཀྱིལ་འཁོར། གཟུགས་བརྙན་གྱི་དཀྱིལ་འཁོར། སྒྱུ་མའི་དཀྱིལ་འཁོར། རྣམ་པར་དག་པའི་དཀྱིལ་འཁོར། གསལ་བའི་དཀྱིལ་འཁོར་དུ་བཞེད་དོ། །དེ་ཡང་རྡོ་རྗེའི་ཚིག་ཡིན་པས་གང་དུའང་སྦྱར་དུ་རུང་མོད་ཀྱི། འོན་ཀྱང་སྐབས་འདི་ཏིང་ངེ་འཛིན་གསུམ་དང་། གཟུགས་བརྙན་གྱི་དཀྱིལ་འཁོར་ལ་སོགས་པ་ལམ་གྱི་དཀྱིལ་འཁོར་སྟོན་པའི་སྐབས་མ་ཡིན་ཞིང་། སངས་རྒྱས་ཀྱི་རང་སྣང་ལྷུན་གྱིས་གྲུབ་པའི་དཀྱིལ་འཁོར་སྟོན་པའི་སྐབས་ཡིན་པའི་ཕྱིར་མ་འབྲེལ་ལོ། །ཁ་ཅིག་གླེང་གཞི་བསྡུས་པར་འདོད་པ་དེ་དག་གིས་ཀྱང་གཞུང་གི་ཕྱོགས་ཙམ་ཡང་མ་མཐོང་བ་ཉིད་དོ། །

གླེང་གཞི་སྟོན་པའི་བཀར་བསྡུ་བ་ནི། ཁ་ཅིག་ན་རེ་གླེང་གཞི་ནི་སྡུད་པ་པོའི་ཚིག་ཡིན་པས་གླེང་སློང་བ་མན་ཆད་བཀའ་ཡིན་ནོ་ཞེས་པའང་མི་འཐད་དེ། སྡུད་པ་པོ་ཉིད་སྟོན་པ་དང་ཐ་དད་མེད་པས་ཀྱང་དེའི་གསུང་བཀའ་ཡིན་ལ། ངན་སོང་སྦྱོང་བར་དཀྱིལ་འཁོར་ཕལ་ཆེར་(༥༢)གསང་བདག་གིས་གསུངས་པའང་རྒྱུད་དུ་བཤད་པ་དང་། གཞན་ཡང་སྙིང་རྗེ་པདྨ་དཀར་པོའི་མདོ་ལས་ཀྱང་། ང་འདས་པའི་ཚེ་དགེ་སློང་རྣམས་བཀའ་བསྡུ་བར་བྱེད་པ་ན། ཐོག་མར་འདི་སྐད་བདག་གིས་ཐོས་པ་དུས་གཅིག་ན་ཞེས་པས་གླེང་སློང་ཞིག །ཅེས་གསུངས་པས་འདིར་ཡང་ཆོས་མཐུན་ནོ། །དེ་ལྟར་ཕུན་སུམ་ཚོགས་པའི་ཚུལ་བརྗོད་པ་དེ་དག་གིས་གས༵ང་བ༵འི་སྙིང༵་པོ༵་དེ༵་ཁོ༵་ན༵་ཉི༵ད་ངེ༵ས་པ༵འི་ལེའུ་ཉི་ཤུ་རྩ་གཉིས་ཡོད་པ་ལ༵ས། རྒྱུད་འབྱུང་བའི་ལོ་རྒྱུས་དང་ངེས་པ་སྦྱིན་པ་དང་གཞིར་གྱུར་པའི་ཕྱིར་གླེ༵ང་གཞི༵འི་དོན་ཡིན་ལ། ལེ༵འུ༵་ནི་པ་རི་ཙྪེ་ཏའི་སྒྲ་ལས་ཡོངས་སུ་བཅད་པའམ་དུམ་པར་བྱས་པ་ལ་འཇུག་པས་ཏེ་འདིར་ཡང་དེ་ཡིན་ལ། ད༵ང་པོ༵འི་ནི་ལེའུ་རྣམས་ཀྱི་ཐོག་མ་སྨོས་པའི་སྒྲ་དེ་གྲལ་གྱི་འགོ་ན་གནས་པ་བཞིན་ནོ། །དེའང་བམ་པོ་ནི་ཁ་མར་བལྟ་ལ། ལེའུ་རྣམས་ནི་ཁ་ཡར་བལྟ་བ་ཡིན་པས་ན་སོ་སོའི་ལེའུ་རེ་རྫོགས་པར་བསྟན་པའི་མཐའ་ཚིག་གོ།། །།