ལེའུ་གསུམ་པའི་རྣམ་པར་བཤད་པ།
༈ དོན་གསུམ་པ་ཐུགས་རྗེའི་རང་བཞིན་ཆོས་ཉིད་ལས་མ་གཡོས་བཞིན་འཇིག་རྟེན་དུ་སྒྲོན་མ་བཀོད་པས་ཆོས་ཐམས་ཅད་གཏན་ལ་ཕབ་པའི་ཚུལ་ལ་གཉིས་ཏེ། སྤྱི་དོན་དང་། གཞུང་གི་དོན་ནོ། །དང་པོ་ལ་གཉིས་ཏེ། ཐེག་པ་ཐུན་མོང་བ་དང་། ཐུན་མོང་མ་ཡིན་པའི་ལུགས་སོ། །དང་པོ་ལ་གསུམ་སྟེ། མཆོག་གི་སྤྲུལ་པའི་སྐུ་གཅིག་གི་དབང་དུ་བྱས་ཏེ་དང་པོ་བྱང་ཆུབ་མཆོག་ཏུ་སེམས་ཇི་ལྟར་བསྐྱེད་པའི་ཚུལ། བར་དུ་གྲངས་མེད་གསུམ་དུ་ཚོགས་ཇི་ལྟར་བསགས་པའི་ཚུལ། ཐ་མར་མཛད་པ་བཅུ་གཉིས་ཀྱི་ཚུལ་གྱིས་འཚང་ཇི་ལྟར་རྒྱ་བའི་ཚུལ་ལོ། །
དང་པོ་ནི། བསྐལ་པ་གྲངས་མེད་པའི་སྔོན་རོལ་ཏུ་སངས་རྒྱས་ཤཱཀྱ་ཐུབ་པ་ཆེན་པོ་འཇིག་རྟེན་དུ་བྱོན་པའི་ཚེ། སངས་རྒྱས་ཤཱཀྱ་ཐུབ་པ་འདི་ཉིད་རྫ་མཁན་གྱི་ཁྱེའུ་སྣང་བྱེད་ཅེས་བྱ་བར་གྱུར་པས། གདུགས་གཅིག །མཆིལ་ལྷམ་ཟུང་གཅིག །མགྲོན་བུ་ལྔ་བརྒྱ་མེ་ཏོག་གི་ཚུལ་དུ་ཕུལ་ཏེ་སེམས་བསྐྱེད་པ། བདེ་གཤེགས་ཁྱོད་ཀྱི་སྐུ་ནི་ཅི་འདྲ་དང་། །འཁོར་དང་སྐུ་ཚེའི་ཚད་དང་ཞིང་ཁམས་དང་། །ཁྱེད་ཀྱི་མཚན་མཆོག་བཟང་པོ་ཅི་འདྲ་བ། །དེ་(༦༠)འདྲར་བདག་ཀྱང་དེ་བཞིན་འགྲུབ་པར་ཤོག །ཅེས་པ་དང་། དེ་བཞིན་དུ་སངས་རྒྱས་དཀོན་ཅོག་ཡན་ལག་འཇིག་རྟེན་དུ་བྱོན་པ་དེའི་ཚེ། ཚོང་དཔོན་ཤེས་རབ་བཟང་པོ་ཞེས་བྱ་བར་གྱུར་ནས་སེམས་བསྐྱེད་པ་དང་། སངས་རྒྱས་འོད་མཛེས་འཇིག་རྟེན་དུ་བྱོན་པའི་ཚེ། རྒྱལ་པོ་དགེ་བར་གྱུར་ནས་སེམས་བསྐྱེད་དོ། །
གཉིས་པ་ནི། དེ་ནས་གྲངས་མེད་དང་པོ་ལ་སངས་རྒྱས་ཡུལ་འཁོར་སྐྱོང་ལ་སོགས་པ་ལྔ་ཁྲི་ལྔ་སྟོང་གི་བདག་རྐྱེན་ལས་ཚོགས་གཉིས་གོམས་པ་ཕུལ་དུ་ཕྱིན་ནས་ཚོགས་ལམ་དང་སྦྱོར་བའི་ལམ་མངོན་དུ་མཛད་དེ། ལུང་གཞི་ལས། གྲངས་མེད་དང་པོར་གྱུར་པའི་ཚེ། །འདྲེན་པ་ཡུལ་འཁོར་སྐྱོང་ནས་ནི། །དབང་པོ་རྒྱལ་མཚན་ཐུབ་པའི་བར། །ལྔ་ཁྲི་ལྔ་སྟོང་ཚང་བ་ཡི། །སངས་རྒྱས་རྣམས་ནི་ངས་མཆོད་དེ། །དེ་ཚེ་ང་ལ་སྐྱོ་སེམས་མེད། །ཅེས་སོ། །
གཉིས་པ་ལ་སངས་རྒྱས་ལེགས་མཛད་ལ་སོགས་པ་དྲུག་ཁྲི་དྲུག་སྟོང་མཆོད་དེ་ས་དང་པོ་ནས་བདུན་པའི་བར་དུ་རྫོགས་པར་མཛད་པ་ནི། ཡང་དེ་ཉིད་ལས། སངས་རྒྱས་ལེགས་མཛད་ནས་བཟུང་སྟེ། །འདྲེན་པ་རྣམ་པར་གཟིགས་ཀྱི་བར། །དྲུག་ཁྲི་དྲུག་སྟོང་ཚང་བ་ཡི། །སངས་རྒྱས་རྣམས་ནི་ངས་མཆོད་དེ། །དེ་ཚེ་ང་ལ་སྐྱོ་སེམས་མེད། །ཅེས་སོ། །
གསུམ་པ་ལ་སངས་རྒྱས་མར་མེ་མཛད་ནས་འོད་སྲུངས་ཀྱི་བར་བདུན་ཁྲི་བདུན་སྟོང་ལས། དགེ་བའི་རྩ་བ་བསྐྲུན་ཅིང་དག་པ་ས་གསུམ་མངོན་དུ་མཛད་པར། དེ་ཉིད་ལས། སངས་རྒྱས་མར་མེ་མཛད་ནས་ནི། །རྒྱལ་བ་འོད་སྲུངས་བར་དག་ཏུ། །བདུན་ཁྲི་བདུན་སྟོང་ཚང་བ་ཡི། །སངས་རྒྱས་རྣམས་ནི་ངས་མཆོད་དེ། །དེ་ཚེ་ང་ལ་སྐྱོ་སེམས་མེད། །ཅེས་སོ། །དེ་དག་ཏུ་བསླབ་པ་གསུམ་གྱི་དབང་དུ་མཛད་དེ་ཕ་རོལ་ཏུ་ཕྱིན་པ་དྲུག་ཚོགས་གཉིས་ཀྱིས་རྫོགས་པར་མཛད་དེ། མདོ་སྡེ་རྒྱན་ལས། བསླབ་གསུམ་དབང་དུ་མཛད་ནས་ནི། །རྒྱལ་བས་ཕ་རོལ་ཕྱིན་པ་དྲུག །ཡང་དག་བཤད་དོ་དང་པོ་གསུམ། །ཐ་མ་གཉིས་ནི་རེ་རེའོ། །གཅིག་ནི་གསུམ་ཆར་ལ་ཡང་གཏོགས། །ཞེས་པས། སྦྱིན་པ། ཚུལ་ཁྲིམས། བཟོད་པ་གསུམ་ནི་ལྷག་པ་ཚུལ་ཁྲིམས་ཀྱི་བསླབ་པའི་རྒྱུ་དང་ངོ་བོ་ཡན་ལག་གསུམ་དུ་འདུས་སོ། །བསམ་གཏན་ནི་སེམས། ཤེས་རབ་ནི་ལྷག་པ་ཤེས་རབ་ཀྱི་བསླབ་པ་ཡིན་ལ། བརྩོན་འགྲུས་ནི་གསུམ་གའི་གྲོགས་སུ་ལྡན་ནོ། །དེའང་སྦྱིན་པ་ནས་བསམ་གཏན་གྱི་བར་ལྔ་ནི་ཐབས་དང་། ཤེས་རབ་ནི་གཉིས་སུ་མེད་པའི་ཤེས་རབ་ཡེ་ཤེས་ཀྱི་ཚོགས་དམ་པའོ། །དེ་གཉིས་ཀྱིས་ཉོན་མོངས་པ་དང་ཤེས་བྱའི་སྒྲིབ་པ་གཉིས་སྦྱོང་བར་བྱེད་དོ། །
དོན་གསུམ་པ་ནི་ཉན་ཐོས་པས་(༦༡)སོ་སོ་སྐྱེ་བོ་འཆིང་བ་མཐའ་དག་གིས་བཅིངས་པ། སྲིད་པ་ཐ་མ་པ། དབང་པོ་རྣོན་པོ་ཁ་ཅིག་འཚང་རྒྱ་བར་འདོད་དེ། འཕགས་པ་གནས་བརྟན་པའི་གཞུང་ལས། འཕགས་པ་མིན་ཡང་ཕ་མ་དང་། །ནད་པ་དང་ནི་ཆོས་སྨྲ་དང་། །སྐྱེ་མཐའི་བྱང་ཆུབ་སེམས་དཔའ་ལ། །ཡོན་ནི་གཞལ་དུ་མེད་པར་གསུངས། །ཞེས་འདོན་ལ། ཐེག་པ་ཆེན་པོ་རྒྱུ་ལམ་དུ་བྱེད་པས་གཙང་མའི་འོག་མིན་ནམ་དབང་ཕྱུག་ཆེན་པོའི་གནས་སུ་ཐོག་མར་སངས་རྒྱས་ནས། གདོད་འཛམ་བུའི་གླིང་དུ་སངས་རྒྱས་པར་བསྟན་ཏེ། ཆོས་དང་ལོངས་སྤྱོད་མངོན་པར་སངས་རྒྱས་པའི་མདོ་ལས། རིན་ཆེན་སྣ་ཚོགས་མཛེས་པ་ཡི། །འོག་མིན་གནས་མཆོག་ཉམས་དགའ་བ། །གཙང་མའི་གནས་ཀྱི་སྟེང་བཞུགས་ཏེ། །ཡང་དག་སངས་རྒྱས་དེར་སངས་རྒྱས། །སྤྲུལ་པ་པོ་གཅིག་འདིར་འཚང་རྒྱ། །ཞེས་སོ། །ཚུལ་ཇི་ལྟར་སྟོན་པ་ནི། འཕགས་པ་ཀླུ་སྒྲུབ་ཀྱི་ཞལ་ནས། སྙིང་རྗེའི་དབང་དུ་གྱུར་པ་རྣམས། །གཤེགས་དང་བལྟམས་དང་རོལ་པ་དང་། །ཁབ་ནས་འབྱུང་དང་དཀའ་བ་སྤྱོད། །བྱང་ཆུབ་ཆེ་དང་བདུད་སྡེ་འཇོམས། །ཆོས་ཀྱི་འཁོར་ལོ་བསྐོར་བ་དང་། །དེ་བཞིན་དུ་ནི་མྱ་ངན་ལས། །འདས་པ་སྟོན་པར་མཛད་པ་ཡིན། །ཞེས་པས། འདིར་མཛད་པ་བཅུ་གཉིས་ལས། དང་པོ་ལྔ་དང་ཕྱི་མ་ནི་འཇིག་རྟེན་པའི་སྣང་བ་དང་མཐུན་པར་སྟོན་པས་འཇིག་རྟེན་པའི་མཛད་པ་ཞེས་བཏགས་ཤིང་། གཞན་དྲུག་འཇིག་རྟེན་ལས་འདས་པའི་མཛད་པར་བཤད་ཀྱང་། དོན་ལ་ཐམས་ཅད་འཇིག་རྟེན་ལས་འདས་པའི་མཛད་པ་ཁོ་ནར་སྣང་བས་འདིར་དེ་བརྗོད་དོ། །
དེ་ཡང་དང་པོ་དགའ་ལྡན་ནས་འཕོ་བའི་མཛད་པ་ནི། དེ་ལྟར་གྲངས་མེད་གསུམ་རྫོགས་པའི་མཐར་དགའ་ལྡན་གྱི་གནས་སུ་ལྷའི་བུ་དམ་པ་ཏོག་དཀར་པོར་སྐྱེ་བ་བཟུང་བ་ན། ལྷའི་རོལ་མོའི་སྒྲ་ལས། བསོད་ནམས་བརྒྱ་ཡིས་ཚོགས་མང་དྲན་སྟོབས་ལྡན། །བློ་གྲོས་མཐའ་ཡས་ཤེས་རབ་འོད་མཛད་པ། །མཚུངས་མེད་སྟོབས་མངའ་སྒྱུ་རྩལ་རྒྱ་ཆེ་བ། །མར་མེ་མཛད་ཀྱིས་ལུང་བསྟན་དགོངས་པར་མཛོད། །ཅེས་པས་བསྐུལ་བ་ན། དེའི་ཚེ་ཆོས་ཀྱི་མཐོ་བའི་ཁང་བཟང་དུ་སེང་གེའི་ཁྲི་ལ་འདུག་སྟེ། ལྷའི་བུ་སྐལ་བ་མཚུངས་པ་རྣམས་ལ་བོས་ཏེ། གྲོགས་པོ་དག་ད་སྟེ་ལོ་བཅུ་གཉིས་ན་ཁོ་བོ་འཛམ་བུའི་གླིང་དུ་འགྲོ་བས། ཁྱེད་ཅག་སྤྲོ་བ་དེ་དག་འཛམ་བུའི་གླིང་དུ་སྐྱེ་བ་ལོང་ལ་རིག་བྱེད་ཀློགས་ཤིག །ཅེས་བསྒོ་བ་ན། ལྷའི་བུ་ཁ་ཅིག་ན་རེ། དེ་ནི་མི་བཟང་སྟེ་ད་ལྟ་འཛམ་བུའི་གླིང་ནི་མུ་སྟེགས་ཀྱི་སྟོན་པ་དྲུག་གིས་དཀྲུགས་པས་བྱོན་ཡང་དོན་དུ་མི་འགྱུར་བ་དང་། དགའ་ལྡན་(༦༢)གྱི་གནས་ཀྱང་མི་མཛེས་པར་འགྱུར་བའི་ཕྱིར་ཟེར་རོ། །དེའི་ཚེ་བྱང་ཆུབ་སེམས་དཔས་སྨྲས་པ། རོལ་མོ་རྣམས་དཀྲོལ་ཅིག་ཅེས་བརྗོད་དེ། བྱང་ཆུབ་སེམས་དཔས་དུང་བུས་པ་ལྷག་པར་སྒྲ་ཆེ་བས་ཟིལ་གྱིས་གནོན་པ་ལྟར་གྱུར་པའི་དཔེས་མུ་སྟེགས་པ་རྣམས་འདུལ་བར་གསུངས་ཏེ། ཉིད་ཀྱི་རྒྱལ་ཚབ་ཏུ་ བྱམས་པ་བསྐོས་ཏེ་གཟིགས་པ་ལྔ་ལ་གཟིགས་ནས་གཤེགས་པར་བཞེད་དོ། །ལྔ་ནི་གླིང ་ལ་གཟིགས་པ་འཛམ་བུའི་གླིང་ལས་ཀྱི་ས་པའོ། །དུས་ལ་གཟིགས་པ་ཚེ་ལོ་བརྒྱ་པ་སྟེ་ཡན་ཆད་དུ་སྐྱོ་བ་ཤས་ཆུང་བས་ཆོས་བསྟན་ཡང་མི་རྟོགས་ཤིང་། མན་ཆད་དུ་ལོག་པར་ལྟ་བ་ཤས་ཆེ་བས་བསྟན་ཀྱང་དོན་དུ་མི་འགྱུར་པའོ། །རིགས་ལ་གཟིགས་པ་སྐྱེ་བོ་རྣམས་རིགས་གང་ལ་མཆོག་ཏུ་འཛིན་པ་རྒྱལ་པོ་དང་བྲམ་ཟེ་གཉིས་ལས། དེའི་ཚེ་རྒྱལ་རིགས་ལ་མཆོག་ཏུ་བྱེད་པས་བུ་རམ་ཤིང་པའི་རིགས་སོ། །ཡབ་ལ་གཟིགས་པ་རྒྱལ་པོ་ཟས་གཙང་མ་དང་། ཡུམ་ལ་གཟིགས་པ་སྒྱུ་མ་ལྷ་མཛེས་ཏེ་བསྐལ་པ་བཟང་པོའི་སངས་རྒྱས་ཐམས་ཅད་ཀྱི་ཡབ་དང་ཡུམ་དུ་གྱུར་པ་དེ་གཉིས་གྲོང་ཁྱེར་སེར་སྐྱའི་གཞིར་སྐྱེ་བ་བཟུང་བ་གཟིགས་ནས། འཆི་འཕོ་རྣམ་པར་སྦྱང་བ་ཞེས་བྱ་བའི་ཆོས་སྣང་བའི་སྒོ་བརྒྱ་རྩ་བརྒྱད་པ་བསྟན་པར་མཛད་དེ། དེ་ལ་དད་པ་ནི་ཆོས་སྣང་བའི་སྒོ་སྟེ་སེམས་རྙོག་པ་ཅན་དྭངས་པར་འགྱུར་བའོ། །ཞེས་པ་ལ་སོགས་པ་གསུངས་པ་ན། ལྷའི་བུ་ཁ་ཅིག་ནི་བྱང་ཆུབ་ཏུ་སེམས་སྐྱེས་སོ། །ཁ་ཅིག་གིས་མི་སྐྱེ་བའི་ཆོས་ལ་བཟོད་པ་ཐོབ་བོ། །ལ་ལས་ནི་ཆོས་ཀྱི་མིག་དྲི་མ་དང་བྲལ་བ་རྙེད་དེ། དེའི་ཚེ་མེ་ཏོག་གི་ཆར་པུས་མོ་ནུབ་ཙམ་དུ་བབས་ཏེ། བྱང་ཆུབ་སེམས་དཔས་སྨྲས་པ། གང་གི་ཚེ་ན་དགའ་ལྡན་གནས་མཆོག་ནས། །འདྲེན་པ་སེང་གེའི་སྐྱེས་བུ་འཆི་འཕོ་ཚེ། །ལྷ་རྣམས་དག་ལ་ཚིག་ཏུ་སྨྲ་བ་ནི། །བག་མེད་མཐའ་དག་རྣམ་པར་སྤོང་ཞེས་སྨྲ། །ལྷ་ཡི་དགའ་བ་རྣམ་མང་ཇི་སྙེད་པ། །ཡིད་ཀྱིས་བསམས་པ་ལས་བྱུང་དཔལ་ལྡན་ཀུན། །ཐམས་ཅད་ལས་དགེའི་རྒྱུ་ལས་འབྱུང་བ་སྟེ། །དེ་ནི་དགེ་བའི་ལས་ཀྱི་འབྲས་བུ་ཡིན། །དེ་ལྟ་བས་ན་བྱས་པ་གཟོ་བར་གྱིས། །སྔོན་གྱི་དགེ་བ་འདི་ནི་ཟད་འགྱུར་ཏེ། །གང་དུ་མི་དགེའི་སྡུག་བསྔལ་མྱོང་གྱུར་ནས། །ངན་སོང་དག་ཏུ་ལྟུང་བར་འགྱུར་ཏ་རེ། །ཞེས་བརྗོད་དོ། །
ལྷུམས་སུ་ཞུགས་པ་ནི་འདི་ཆད་སྙམ་གྲོགས་པོ་དག་ཆ་ལུགས་ཇི་ལྟ་བུས་འཛམ་བུའི་གླིང་དུ་འགྲོ་བར་བྱ། ཞེས་གསུངས་པ་ན། ཁ་ཅིག་ནི་ཚངས་པ་དང་བརྒྱ་བྱིན་ལ་སོགས་པས་འགྲོ་བར་རིགས་ཟེར་རོ། །དེར་ལྷའི་བུ་གཟི་བརྗིད་དམ་པ་ན་རེ། དེ་ནི་མི་བཟང་སྟེ་ཕྱོགས་ཆར་ལྷུང་བའི་ཕྱིར་རོ། །བྲམ་ཟེའི་རིག་བྱེད་ལས། གླང་ཆེན་(༦༣)དམ་པ་ལུས་ཆེན་མཆོག་གྱུར་པ། །མཆེ་བ་དྲུག་ལྡན་གསེར་གྱི་དྲྭ་བས་གཡོགས། །མགོ་བོ་རབ་ཏུ་དམར་ཞིང་ཤིན་ཏུ་མཛེས། །འགྲམ་བཟང་ཟག་ཅིང་གཟུགས་བཟང་ལྡན་པའོ། །ཞེས་པར་སྤྲུལ་ནས་འགྲོ་བར་རིགས་སོ། །ཞེས་པ་དང་བསྟུན་ནས་དཔྱིད་ཟླ་ཐ་ཆུང་སྐར་མ་ས་གས་ཉ་བའི་བཅོ་ལྔ་ལ། ཡུམ་གསོ་སྦྱོང་ལ་གནས་པའི་གློ་གཡས་པ་ནས་ལྷུམས་སུ་ཞུགས་པ་ཡུམ་གྱི་རྨི་ལམ་དུ་བྱུང་ནས་ཡབ་ལ་སྨྲས་པ། གླང་པོ་ཁ་བ་དངུལ་མདོག་མཆེ་བ་དྲུག །རྐང་ལག་རབ་མཛེས་མགོ་བོ་དམར་སྡུག་ཅིང་། །འགྲོས་བཟང་ལུས་རྫོགས་རྡོ་རྗེ་བཞིན་བརྟན་པ། །གླང་པོའི་མཆོག་ཅིག་ཁོང་དུ་སོང་སྙམ་བྱེད། །ཅེས་བརྗོད་དོ། །དེར་ཡང་ལྷུམས་གཞལ་ཡས་ཁང་དུ་སྤྲུལ་ཏེ་འགྲོ་བ་མཐའ་ཡས་པའི་དོན་མཛད་དོ། །
སྐུ་བལྟམས་པའི་མཛད་པ་ནི། དེ་ནས་ཟླ་བ་བཅུ་ན་ལུམ་པའི་ཚལ་དུ་ཡུམ་གྱི་རྩིབ་ལོགས་གཡས་ནས་རང་བྱོན་པ་ལ། ལྷ་དང་ཀླུའི་རྒྱལ་པོ་རྣམས་ཀྱིས་ཁྲུས་གསོལ་ཞིང་། ཚངས་པ་དང་བརྒྱ་བྱིན་གྱིས་དར་དཀར་གྱི་ལྕིབ་མོས་ལེན་པར་བརྩམས་པ་ལས། ཁྱེད་ལྷ་རྣམས་གཙང་སྦྲ་ཆེ་བས་ཕྱིར་དེངས་ཤིག་ཅེས་གསུངས་ཏེ་ལེན་པ་མེད་པར་རང་བྱོན་ཏེ་ཕྱོགས་བཞིར་གོམ་པ་བདུན་བདུན་དོར་ཏེ། ང་ནི་འཇིག་རྟེན་འདི་ན་མཆོག་ཡིན་ནོ། །ཞེས་པ་ལ་སོགས་པ་བརྗོད་པ་ན། ལྷས་བསྟོད་པ། གང་ཚེ་རྐང་གཉིས་གཙོ་བོ་ཁྱེད་བལྟམས་ཚེ། །ས་ཆེན་འདི་ལ་གོམ་པ་བདུན་བཞུད་དེ། །ང་ནི་འཇིག་རྟེན་འདི་ན་མཆོག་ཅེས་གསུངས། །དེ་ཚེ་མཁས་པ་ཁྱོད་ལ་ཕྱག་འཚལ་ལོ། །ཞེས་སོ། །དེའི་ཚེ་ནགས་ཚལ་དུ་མེ་ཏོག་ཁ་འབུས་པ་དང་། འཇིག་རྟེན་ཐམས་ཅད་སྣང་བ་ཆེན་པོས་ཁྱབ་པ་དང་། ཀུན་དགའ་བོ་ལ་སོགས་པ་ཤཱཀྱ་གཞོན་ནུ་ལྔ་བརྒྱ་ཡང་བཙས། རྔོག་ལྡན་ལ་སོགས་པ་རྟེའུ་ལྔ་བརྒྱ་ཡང་བཙས། ཁམས་ཀྱི་རྒྱལ་ཕྲན་བཞི་ལ་ཡང་བུ་བཞི་བཙས་ཏེ། མ་ག་དྷཱར་རྒྱལ་པོ་པདྨ་ཆེན་པོའི་བུ་གཟུགས་ཅན་སྙིང་པོ། ཀོ་ས་ལར་རྒྱལ་པོ་ཨ་ནནྡ་ཚངས་བྱིན་གྱི་བུ་གསལ་རྒྱལ། གྲོང་ཁྱེར་རྡོ་འཇོག་ཏུ་རྒྱལ་པོ་མུ་ཁྱུད་མཐའ་ཡས་ཀྱི་བུ་རབ་སྣང་། བད་ས་ལར་རྒྱལ་པོ་དམག་བརྒྱ་པའི་བུ་ཤར་པའོ། །དེ་ནས་བྲམ་ཟེ་ལ་མཚན་བསྟན་པས། རབ་ཏུ་མ་བྱུང་ན་འཁོར་ལོས་སྒྱུར་བའི་རྒྱལ་པོ་དང་། བྱུང་ན་སངས་རྒྱས་སུ་འགྱུར་བར་ལུང་བསྟན་ཏོ། །དེའི་ཚེ་རྒྱལ་བུ་དོན་ཐམས་ཅད་གྲུབ་པ་ཞེས་མཚན་གསོལ་ཞིང་། ཤཱཀྱ་གཞོན་ནུ་རྣམས་ཐུབ་པ་ལྟར་སྣང་བས་ཤཱཀྱ་ཐུབ་པ་ཞེས་ཀྱང་བཏགས་སོ། །དེའི་ཚེ་རི་རབ་ཀྱི་ངོས་ལ་དྲང་སྲོང་མདོག་ནག་གམ་ཉོན་མོངས་མེད་ཅེས་བྱ་བ་ཞིག་གནས་པས། (༦༤)དེས་ལྟས་ཁྱད་པར་ཅན་རྣམས་མཐོང་ནས་མངོན་ཤེས་ཀྱིས་བལྟས་པ་ལས། རྒྱལ་བུ་དོན་ཐམས་ཅད་གྲུབ་པའི་ལྟས་སུ་ཤེས་ནས། ཕོ་བྲང་དུ་རྫུ་འཕྲུལ་གྱིས་འོང་སྟེ་མཚན་བལྟས་པ་ལས། རྒྱལ་པོས་དྲིས་པ་ན། དྲང་སྲོང་གིས་སྨྲས་པ། སྔར་མཚན་མཁན་གཞན་ལ་བསྟན་ནམ། རྒྱལ་པོས་སྨྲས་པ། བསྟན་ཏེ་འཁོར་ལོས་སྒྱུར་བའི་རྒྱལ་པོར་ལུང་བསྟན་ཏོ། །དྲང་སྲོང་གིས་སྨྲས་པ། ས་བདག་རྟོག་པ་པོ་རྣམས་བློ་འཁྲུལ་ཏེ། །རྩོད་པའི་དུས་སུ་འཁོར་ལོས་སྒྱུར་མི་འབྱུང་། །ཉེས་ལས་རྣམ་པར་རྒྱལ་བའི་མཆོག་འདི་ནི། །འགྲོ་བའི་དོན་དུ་རང་བྱུང་སངས་རྒྱས་འགྱུར། །ཞེས་སོ། །དེ་ལྟར་བལྟམས་ནས་ཞག་བདུན་ན་ཡུམ་འདས་ཏེ་སྐྱེ་རྒུའི་བདག་མོ་ལ་སོགས་པ་མ་མ་སུམ་ཅུ་རྩ་གཉིས་ཀྱིས་ཆེར་བསྐྱེད་དེ། མཚོ་ཆེན་པོ་ལ་གནས་པའི་པདྨ་ལྟར་གྱུར་ཏོ། །
བཟོའི་གནས་ལ་མཁས་པ་ནི། དེ་ནས་ཡིག་དཔོན་ཀུན་གྱི་བཤེས་གཉེན་དང་། སྲིན་བུ་གོ་ཆ་ལ་སོགས་པའི་དྲུང་དུ་ཕྱིན་ཏེ་ཡི་གེ་དང་། འཕོང་དང་སྒྱུ་རྩལ་ལ་མཐར་ཕྱིན་ཏོ། །དེའི་ཚེ་ཤཱཀྱ་གཞོན་ནུ་རྣམས་སྟོབས་འགྲན་པ་ལས། ལྷས་བྱིན་གྱིས་གླང་པོ་ཆེ་ཐལ་མོས་བསྣུན་ནས་བསད་པའི་རོ་གཅུང་དགའ་བོས་གྲོང་ཁྱེར་གྱི་ཕྱིར་བོར་བའི་མཇུག་མ་ནས་བྱང་ཆུབ་སེམས་དཔའི་ཞབས་མཐེའུ་ཆུང་གིས་བླངས་ཏེ་གྲོང་ཁྱེར་གྱི་ར་བ་བདུན་དང་འོབས་བདུན་དང་ཤིང་ཏ་ལའི་ཕྲེང་བ་བདུན་ལ་སོགས་པའི་ཕྱི་རོལ་ཏུ་དོར་བའི་གཤོངས་ལ་གླང་པོ་ཆེའི་གཤོངས་ཞེས་གྲགས་སོ། །དེའི་ཚེ་ལྷ་རྣམས་ཀྱིས་བསྟོད་པ། གླང་པོའི་དབང་པོ་རྡོ་བ་བཞིན་བཞུད་པ། །ཞབས་ཀྱི་མཐེ་བོས་གླང་པོའི་དབང་པོ་བླངས། །ར་བ་བདུན་དང་འོབས་བདུན་ཡང་འདས་ཏེ། །གྲོང་ཁྱེར་འདི་ཡི་ཕྱི་རོལ་རྒྱང་རིང་འཕངས། །མཁྱེན་པ་མཆོག་མངའ་འདི་ནི་གདོན་མི་ཟ། །ང་རྒྱལ་སྟོབས་ཀྱི་ཐོབ་པའི་ལུས་ཅན་རྣམས། །འཁོར་བའི་གྲོང་ལས་ཕྱི་རོལ་རྒྱང་རིང་དུ། །ཤེས་རབ་སྟོབས་ཀྱིས་འདིས་ནི་འཕེན་པར་འགྱུར། །ཞེས་སོ། །དེ་བཞིན་རྩལ་འགྲན་པ་ལས་ཀྱང་ལྕགས་ཀྱི་སླ་ང་བདུན། ཤིང་ལྗོན་པའི་ཕྲེང་བ་བདུན། ལྕགས་ཀྱི་ཕ་གུ་བདུན་ལས། ལྷས་བྱིན་གྱིས་གཅིག །གཅུང་དགའ་བོས་གཉིས། བྱང་ཆུབ་སེམས་དཔས་ཐམས་ཅད་ཕིགས་ཏེ་མདའི་ཤུལ་ལས་ཆུ་ཡན་ལག་བརྒྱད་ལྡན་སྐྱེས་པ་ལ་མདའ་ཆུ་ཁྲོན་པ་སྐྱེས་ཞེས་གྲགས་སོ། །
དེ་ནས་བཙུན་མོའི་འཁོར་གྱིས་རོལ་པ་ནི། ཤཱཀྱའི་བུ་མོ་ས་འཚོ་མ་འཁོར་ཉི་ཁྲི། རི་དྭགས་སྐྱེས་འཁོར་ཉི་ཁྲི། གྲགས་འཛིན་མ་འཁོར་ཉི་ཁྲི་སྟེ། བཙུན་མོ་དྲུག་ཁྲི་ཁབ་ཏུ་བཞེས་ནས་ཕོ་བྲང་དུ་གནས་པའི་ཚེ་ལྷའི་སིལ་སྙན་གྱི་སྒྲ་ལས་ཚིགས་སུ་བཅད་པ། སྡུག་བསྔལ་གྱིས་གང་སེམས་ཅན་མཐོང་ནས་ནི། །འགྲོ་བའི་མགོན་དང་སྐྱབས་དང་(༦༥)གནས་གྱུར་པ། །ཕན་བྱེད་མཆོག་དང་དཔུང་གཉེན་གྱུར་ཅིག་ཅེས། །ཁྱོད་ཀྱིས་སྔོན་གྱི་སྨོན་ལམ་དེ་སྐད་བཏབ། །དགེ་བ་དང་པོ་སྔོན་གྱི་སྤྱོད་པ་དང་། །འགྲོ་ཕན་ཞེས་བྱའི་སྨོན་ལམ་དྲན་བྱས་ནས། །གྲོང་ཁྱེར་དམ་པ་འདི་ནས་མྱུར་དུ་ཕྱུང་། །ཞེས་སོ། །
མངོན་པར་བྱུང་བ་ནི་གྲོང་ཁྱེར་གྱི་ཕྱོགས་བཞིར་བྱོན་ཏེ་སྐྱེ་བ་དང་། རྒ་བ་དང་། ན་བ་དང་། འཆི་བའི་སྡུག་བསྔལ་ལ་གཟིགས་ཤིང་། ཐར་པའི་ཡོན་ཏན་ལ་དགོངས་ཏེ་རབ་ཏུ་འབྱུང་བར་བཞེད་པ་ལས། ཕོ་བྲང་གི་སྒོ་བཞི་དམག་གིས་བསྲུངས་ནས། ཕྱིར་གཤེགས་སུ་མི་སྟེར་བ་ལས། རྔོག་ལྡན་ལ་ཆིབས་ཏེ་རྒྱལ་པོ་བཞིས་རྟ་རྨིག་ནས་བཏེགས་ནས་མཆོད་རྟེན་རྣམ་དག་གི་དྲུང་དུ་གཤེགས་ཏེ་ཉིད་ཀྱི་དབུ་སྐྲ་ཉིད་ཀྱིས་བཞར་ནས་རབ་ཏུ་བྱུང་ངོ་། །དེ་ནས་རྒྱལ་པོའི་ཁབ་ཏུ་རངས་བྱེད་ཀྱི་བུ་ལྷག་སྤྱོད་ཀྱི་དྲུང་དུ་ཅི་ཡང་མེད་པ་དང་། ཡངས་པ་ཅན་དུ་སྒྱུ་རྩལ་ཤེས་ཀྱི་བུ་རིང་འཕུར་གྱི་དྲུང་དུ་སྲིད་རྩེ་མན་ཆད་ཀྱི་ཏིང་ངེ་འཛིན་མངོན་དུ་མཛད་པའི་ཚུལ་བསྟན་ཏོ། །
དཀའ་བ་སྤྱད་པ་ནི་དེ་ནས་ཆུ་ཀླུང་ནཻ་རཉྫཱ་ནའི་འགྲམ་དུ་བྱོན་ཏེ་ལོ་དྲུག་ཏུ་དཀའ་བ་སྤྱད་དེ། དེ་ཡང་ལོ་དང་པོ་གཉིས་ལ་འབྲས་ཉག་མ་རེ། བར་པ་གཉིས་ལ་ཏིལ་ཉག་མ་རེ། ཐ་མ་གཉིས་ལ་ཆུ་ཐིགས་པ་རེ་གསོལ་ལོ། །དེའི་ཚེ་ལྷས་བསྐུལ་བ། མི་ཡི་དབང་པོ་ཤཱཀྱའི་སྲས་པོ་འདི། །བརྣག་པ་མ་རྫོགས་དོན་ཡང་མ་མཛད་ཅིང་། །འཇིག་རྟེན་གསུམ་པོ་སྡུག་བསྔལ་མགོན་མེད་པར། །མཛད་ནས་མགོན་འདི་འདྲོངས་པར་མི་འགྱུར་གྲང་། །ཞེས་བརྗོད་པ་ན། དེ་ལས་བཞེངས་ཏེ་རྡོ་རྗེ་ལྟ་བུའི་ཏིང་ངེ་འཛིན་གྱི་གནས་ཚོལ་དུ་གཤེགས་པའི་ལམ་དུ། ཚོང་དཔོན་གྱི་བུ་མོ་ལེགས་སྐྱེས་མས་བ་མེན་ལྔ་བརྒྱ་ལས་བཞོས་པའི་འོ་མ་རིམ་གྱིས་བརྒྱད་ལ་བླུད་པ་བསྐོལ་བ་དྲངས་པས་སྐུ་མདོག་གསེར་གྱི་མདངས་སུ་གྱུར་ཅིང་བསྔོ་བ་མཛད་པ། བསོད་པ་ཕུལ་བའི་བསོད་ནམས་ཅི་མཆིས་པ། །གྲགས་དང་ལྡན་པའི་དོན་ཀུན་འགྲུབ་འགྱུར་བར། །མི་ཡི་དབང་པོ་བློ་མཆོག་ལྡན་པ་དེའི། །དོན་རྣམས་ཐམས་ཅད་དེ་རིང་འགྲུབ་གྱུར་ཅིག །ཅེས་སོ། །
དེ་ནས་བྱང་ཆུབ་སྙིང་པོར་གཤེགས་པ་ནི། ལམ་དུ་རྩྭ་འཚོང་བཀྲ་ཤིས་ལྡན་གྱིས་རྩྭ་རྨ་བྱའི་མགྲིན་པ་ལྟ་བུ་ཕུལ་བ་བཞེས་ཏེ་བྱོན་པ་ལས། བྱང་ཆུབ་སྙིང་པོ་བརྒྱན་པའི་ལྷ་རྣམས་ཀྱིས་རྡོ་རྗེའི་གདན་དང་བྱང་ཆུབ་ཀྱི་ཤིང་དག་ཚད་མེད་པར་བརྒྱན་པ་ག་ལ་བ་དེར་གཤེགས་ནས་རྩྭའི་སྟན་ལ་བཞུགས་ཏེ་དམ་བཅའ་བ་བརྟན་པོ་མཛད་པ། སྟན་འདིར་བདག་གི་ལུས་འདི་སྐམས་ཀྱང་རུང་། །པགས་པ་རུས་པའི་ཚོགས་རྣམས་ཞིག་ཀྱང་རུང་། །བསྐལ་མང་རྙེད་དཀའ་བྱང་ཆུབ་མ་ཐོབ་པར། །སྟན་འདི་ལས་ནི་ལུས་བསྐྱོད་མི་བྱའོ། །ཞེས་སོ། །(༦༦)
དེ་ནས་བདུད་ཀྱི་སྡེ་བཅོམ་པ་ནི། མཛོད་སྤུ་ནས་བདུད་ཀྱི་སྡེ་རབ་ཏུ་འཇོམས་པ་ཞེས་བྱ་བའི་འོད་ཟེར་བཀྱེ་བས། བདུད་ཀྱི་གནས་ཐམས་ཅད་དཔའ་བཀོང་བར་བྱས་ནས། བདུད་ཀྱི་རྒྱལ་པོའི་རྨི་ལམ་དུ་བཀྲ་ཤིས་ཀྱི་བུམ་པ་ལྷུང་བ་དང་། རྒྱལ་མཚན་ཆག་པ་ལ་སོགས་པ་བརྒྱ་རྩ་བརྒྱད་རྨིས་ཏེ་བལྟས་པས། བྱང་ཆུབ་སེམས་དཔའ་འཚང་རྒྱ་བར་ཤེས་ཏེ་རྡོ་རྗེའི་གདན་དུ་འོངས་ཏེ་སྨྲས་པ། ཁྱོད་འཚང་རྒྱ་བའི་དུས་ལ་མ་བབས་ཞེས་སྨྲས་སོ། །དེར་བྱང་ཆུབ་སེམས་དཔས་སྨྲས་པ། ངས་བསྐལ་པ་གྲངས་མེད་པར་ཚོགས་གཉིས་རྫོགས་པས་འཚང་རྒྱ་བའི་དུས་ལ་བབས་ཏེ་ཁྱོད་མཆོད་སྦྱིན་གཅིག་ཙམ་བྱས་པས་ཀྱང་བདུད་ཀྱི་རྒྱལ་པོར་གྱུར་པ་ལ་ལྟོས་ཞེས་བརྗོད་པས། བདུད་ཀྱིས་སྨྲས་པ། ངས་ནི་འདི་ན་མཆོད་སྦྱིན་གཏན་པ་མེད། །བྱས་པ་ལ་ནི་ཁྱོད་ཉིད་དཔང་ཡིན་ཏེ། །ཁྱོད་ལ་འདི་ན་དཔང་འགའ་ཡོད་མིན་པས། །སྨྲས་ཀྱང་དཔང་མེད་དེ་ནི་ཡེ་ཕམ་ཡིན། །ཞེས་སོ། །སེམས་དཔས་སྨྲས་པ། ས་འདི་འགྲོ་བ་ཀུན་གྱི་རྟེན་ཡིན་ཏེ། །རྒྱུ་དང་མི་རྒྱུ་ཉེ་རིང་མེད་པས་ན། །ས་འདི་དེ་རིང་བདག་གི་དཔང་མཛོད་ཅིག །ཅེས་གསུངས་མ་ཐག་ཏུ་སའི་ལྷ་མོས་རིགས་ཀྱི་བུ་འདིས་ཚོགས་དུ་མ་ཞིག་རྫོགས་པའི་ཕྱིར་རིགས་ཏེ། ངས་སའི་དཀྱིལ་འཁོར་རྡུལ་ཕྲ་བ་སྙེད་དུ་བགྲང་བར་ནུས་ཀྱི། འདིས་མགོ་དང་ཡན་ལག་སེམས་ཅན་ལ་བྱིན་པའི་གྲངས་ནི་བགྲང་བར་མི་ནུས་སོ། །ཞེས་བརྗོད་པས། བདུད་སྐྱེངས་ཏེ་རང་གི་གནས་སུ་ལོག་ནས་དམག་བྱེ་བ་དུང་ཕྱུར་དྲངས་ཏེ་བྱང་ཆུབ་སེམས་དཔའ་ལ་མཚོན་ཆའི་ཆར་ཆེན་པོ་དབབ་པར་བྱས་སོ། །དེ་སྐད་དུ་མངོན་པར་འབྱུང་བ་ལས། མགོ་གཅིག་པ་དང་མགོ་གཉིས་མགོ་གསུམ་དང་། །མགོ་སྟོང་ལྡན་པའི་བར་དུ་རབ་ཏུ་མང་། །ཞེས་སོ། །དེའི་ཚེ་བྱམས་པའི་ཏིང་ངེ་འཛིན་ལ་མཉམ་པར་བཞག་པས་མཚོན་ཆའི་ཚོགས་རྣམས་མེ་ཏོག་གི་ཆར་དང་། མི་སྙན་པའི་སྒྲ་རྣམས་གླུ་དབྱངས་སྙན་པར་གྱུར་ནས། ལྷས་སྨྲས་པ། བྱམས་པའི་སྟོབས་ཀྱིས་བདུད་ཀྱི་སྒྱུ་བཏུལ་ཏེ། །མཚོན་ཆ་འཕངས་པ་མེ་ཏོག་ཉིད་དུ་གྱུར། །ཅེས་པ་དང་། ཤཱཀྱའི་རྒྱལ་པོས་རྟེན་ཅིང་འབྲེལ་འབྱུང་ཆོས། །རང་གི་ངོ་བོ་མེད་པར་མཐོང་ནས་ནི། །ནམ་མཁའ་ལྟ་བུའི་སེམས་དང་རབ་ལྡན་པས། །གཡོན་ཅན་དཔུང་བཅས་ཚོགས་ཀྱིས་བརྫི་བ་མེད། །ཅེས་སོ། །གཞན་ཡང་བདུད་ཀྱི་བུ་མོ་རྣམས་ཀྱིས་བསླུ་བར་བྱས་ཀྱང་སླར་རྒན་མོ་ཉིད་དུ་གྱུར་ནས་བྱང་ཆུབ་སེམས་དཔའ་ལ་བཟོད་པར་གསོལ་ལོ། །
བྱང་ཆུབ་པ་ནི། དེ་ནས་རྡོ་རྗེ་ལྟ་བུའི་ཏིང་ངེ་འཛིན་ལ་མཉམ་པར་བཞག་པས་ཐོ་རངས་རྔ་བརྡུང་དུ་ཉེ་བ་ན་ཟད་པ་ཤེས་པ་དང་མི་སྐྱེ་བ་ཤེས་པའི་ཏིང་ངེ་འཛིན་མངོན་དུ་མཛད་དེ་སངས་རྒྱས་བྱང་ཆུབ་རིག་པ་གསུམ་(༦༧)བརྙེས་པའི་ཚེ། ལྷས་བསྟོད་པ། སྐྱེས་བུ་སེང་གེ་དེ་ཡིས་བདུད་བཏུལ་ཏེ། །སྟོན་པའི་བསམ་གཏན་མངོན་དུ་མཛད་ནས་ནི། །སྟོབས་བཅུ་རིག་པ་གསུམ་པོ་བརྙེས་གྱུར་ཚེ། །ཕྱོགས་བཅུའི་ཞིང་རྣམས་ཐམས་ཅད་གཡོས་པར་གྱུར། །ཅེས་སོ། །དེ་ནས་ཞག་བདུན་ཕྲག་བདུན་ཆོས་མི་གསུང་བར་བཞུགས་པ་ལས། བདུན་ཕྲག་དང་པོ་ལ་སྐྱིལ་ཀྲུང་མ་བཤིག་པར་བཞུགས། གཉིས་པ་ལ་འཛམ་གླིང་ཉེ་བར་བཅགས། གསུམ་པ་ལ་སྟོང་གསུམ་རིང་དུ་བཅགས། བཞི་པ་ལ་སྤྱན་མི་འཛུམ་པར་ཤིང་དེ་ཉིད་ལ་གཟིགས། ལྔ་པ་ལ་ཀླུའི་རྒྱལ་པོ་བཏང་བཟུང་གི་གནས་སུ་གཤེགས། དྲུག་པ་ལ་ཀུན་ཏུ་རྒྱུ་བཏུལ། བདུན་པ་ལ་ཤིང་སྒྲོལ་རྒྱུའི་ཚལ་དུ་ཚོང་པ་ག་གོན་དང་བཟང་སྐྱོང་གིས་སྦྲང་རྩི་ཕུལ་བའི་ཚེ་རྒྱལ་པོ་བཞིས་ལྷུང་བཟེད་ཕུལ་བ་བཞེས་པར་གསོལ་ཏེ། ཚོང་པ་དག་ནི་དོན་གཉེར་བ། །རྙེད་པ་ཆེན་པོ་རྙེད་གྱུར་ཅིག །ཅེས་པ་ལ་སོགས་པ་ཤིས་པ་བརྗོད་ནས། ཆོས་མི་གསུང་བར་བཞུགས་ཏེ། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་ཁོ་བོས་རྙེད། །སུ་ལ་བསྟན་ཀྱང་གོ་བར་མི་འགྱུར་བས། །མི་སྨྲ་གཅིག་པུར་ནགས་སུ་གནས་པར་བྱ། །ཞེས་པ་ན།
ཆོས་ཀྱི་འཁོར་ལོ་བསྐོར་བ་ནི་ཚངས་པ་འོངས་ནས་ཞུས་པ། ཡེ་ཤེས་ཆེན་པོ་མཆོག་གི་དཀྱིལ་འཁོར་བསྒྲུབས་ནས་ནི། །ཕྱོགས་བཅུ་དག་ཏུ་འོད་ཟེར་རྣམ་པར་འགྱེད་མཛད་དེ། །ཡེ་ཤེས་ཟེར་གྱིས་བློ་ཡི་པདྨོ་ཁ་འབྱེད་པ། །སྨྲ་བའི་ཉི་མ་ཅི་སླད་དེ་རིང་བཏང་སྙོམས་བཞུགས། །དམ་པ་ཆོས་ཀྱི་རྔ་བོ་ཆེ་ནི་བརྡུང་དུ་གསོལ། །དམ་པའི་ཆོས་ཀྱི་དུང་ནི་མྱུར་དུ་འབུད་དུ་གསོལ། །དམ་པ་ཆོས་ཀྱི་སྡོང་པོ་སྒྲེང་བར་མཛད་དུ་གསོལ། །དམ་པ་ཆོས་ཀྱི་མར་མེ་སྦར་བར་མཛད་དུ་གསོལ། །ཞེས་ཞུས་པས་ཅང་མི་གསུང་བ་དང་། ཡང་བརྒྱ་བྱིན་སྦྲན་ཏེ་དྲུང་དུ་འོངས་ནས་ཚངས་པས་གསེར་གྱི་འཁོར་ལོ་རྩིབས་སྟོང་དང་ལྡན་པ་ཕུལ་ཏེ་ཞུས་པ། གཡུལ་ལས་རྣམ་པར་རྒྱལ་བ་བཞེངས་སུ་གསོལ། །འཇིག་རྟེན་མུན་པར་ཤེས་རབ་འོད་དབྱུང་གསོལ། །ཀུན་ནས་འཚམ་པར་གྱུར་པ་མཆིས་ལགས་ཀྱི། །ཐུབ་པ་ཁྱོད་ཀྱིས་ཆོས་ནི་བསྟན་དུ་གསོལ། །ཞེས་པ་དང་། བརྒྱ་བྱིན་གྱིས་རིན་པོ་ཆེ་ཕུལ་ནས་ཞུས་པ། ཟླ་བ་ཉ་བ་གཟའ་ལས་ཐར་པ་ལྟར། །ཐུབ་པ་ཁྱོད་ཀྱི་ཐུགས་ནི་རྣམ་པར་གྲོལ། །གཡུལ་ལས་རྣམ་པར་རྒྱལ་བ་བཞེངས་སུ་གསོལ། །འཇིག་རྟེན་མུན་པར་ཤེས་རབ་འོད་དབྱུང་གསོལ། །ཞེས་ཞུས་པའི་ཚེ། བཀའ་སྩལ་པ། ཚངས་པ་ང་ཡི་ཐ་བ་ཀུན། །བཅོམ་ནས་ཚེགས་ཆེན་གྱིས་རྟོགས་པའི། །ཆོས་འདི་སྲིད་པའི་འདོད་ཆགས་ཀྱིས། །དཀྲིས་པས་(༦༨)བདེ་བླག་རྟོགས་མ་ཡིན། །ཞེས་སོ། །ཡང་ཞུས་པ། མ་ག་དྷཱ་ཡི་ཡུལ་འདིར་སྔོན་ཆད་ཆོས། །མ་དག་དྲི་མ་རྗེས་སུ་འབྲེལ་བ་བྱུང་། །བདུད་རྩིའི་སྒོ་མོ་དབྱེ་བར་མཛོད་ཅིག་ཆོས། །རྡུལ་བྲལ་དྲི་མ་མེད་པར་བཤད་དུ་གསོལ། །ཞུས་པ་དང་། བཀའ་སྩལ་པ། ཚངས་པ་མ་ག་དྷཱ་ཡི་སེམས་ཅན་གང་། །རྣ་བར་ལྡན་ཞིང་དད་དང་ལྡན་གྱུར་པ། །མི་འཚེ་འདུ་ཤེས་རྟག་ཏུ་ཆོས་ཉན་པ། །དེ་དག་ལ་ནི་བདུད་རྩིའི་སྒོ་དབྱེའོ། །ཞེས་གནང་བས། སྐད་ཅིག་དེ་ལ་འོག་མིན་གྱི་བར་དུ་དེ་བཞིན་གཤེགས་པས་ཆོས་ཀྱི་འཁོར་ལོ་བསྐོར་བར་གནང་ངོ་ཞེས་ཐོས་ནས་ལྷགས་སོ། །ལྷ་སྲིད་མཆོག་གིས་ཆོས་ཀྱི་འཁོར་ལོ་གང་དུ་བསྐོར་ཞུས་པས། ཝཱ་ར་ཎ་སཱིར་རོ། །དེར་ནི་ང་ཡིས་མཆོད་སྦྱིན་སྟོང་ཕྲག་ཁྲག་ཁྲིག་དྲུག་ཅུ་མཆོད། །ཝཱ་ར་ཎ་སཱི་དམ་པ་དེ་ནི་སྔོན་གྱི་དྲང་སྲོང་རྣམས་ཀྱི་གནས། །དེ་ཕྱིར་དྲང་སྲོང་ཞེས་བྱའི་གནས་མཆོག་དེར་ནི་འཁོར་ལོ་དམ་པ་བསྐོར། །ཞེས་བཀའ་སྩལ་ནས་གཤེགས་པ་ལས། ས་ཕྱོགས་དེར་ནི་རིན་པོ་ཆེའི་ཁྲི་སྟོང་བྱུང་སྟེ། གསུམ་ལ་བསྐོར་བ་མཛད་ནས་བཞི་པའི་སྟེང་དུ་བཞུགས་ཏེ། ལྔ་སྡེ་བཟང་པོ་ལྷ་བརྒྱད་ཁྲི་དང་བཅས་པ་ལ་བདེན་པ་བཞིའི་ཆོས་ཀྱི་འཁོར་ལོ་བསྐོར་བས་བདེན་པ་མངོན་པར་རྟོགས་ཤིང་ལྔ་སྡེ་བཟང་པོས་དགྲ་བཅོམ་པའི་འབྲས་བུ་ཐོབ་བོ། །དེ་ནས་བྱ་རྒོད་ཕུང་པོ་ལ་མཚན་ཉིད་མེད་པའི་འཁོར་ལོ་བྱང་ཆུབ་སེམས་དཔའ་དང་ཉན་ཐོས་ཆེན་པོ་ལ་སོགས་པ་ལ་བསྐོར་རོ། །དེ་ནས་ལྷ་དང་ཀླུའི་གནས་ལ་སོགས་པར་ཐ་མ་དོན་དམ་རྣམ་པར་ངེས་པའི་འཁོར་ལོ་བསྐོར་རོ། །དེ་ཡང་བཀའ་དང་པོ་ནི་ལས་དང་པོ་པ་ལམ་ལ་འཇུག་པའི་རིམ་པ་ཤེས་པ་དང་བསྟུན་ནས་གཙོ་བོར་སྤང་གཉེན་གྱི་སྒོ་ནས་འཁོར་བ་ལས་ངེས་པར་འབྱིན་པའོ། །བར་བ་ནི་འཁོར་བ་སྤོང་བྱེད་ཀྱི་གཉེན་པོར་ལམ་ལ་སོགས་པའི་ཆོས་ལ་ཞེན་པ་བཀག་པའི་ཕྱིར་ཡིན་ནོ། །མཐའ་མ་ནི་ཤེས་བྱའི་གཤིས་ལ་ཇི་ལྟར་གནས་པ་དེ་ཉིད་དྲང་པོར་བརྗོད་པའོ། །ཡང་སྡེ་སྣོད་གསུམ་དང་། བསླབ་པ་གསུམ་དང་། ཐེག་པ་ཆེ་ཆུང་གི་སྒོ་ནས་ཀྱང་གསུངས་པའོ། །
ཐ་མའི་མཛད་པ་ནི། དེ་ལྟར་དགུང་ལོ་བརྒྱད་ཅུའམ་བརྒྱད་ཅུ་རྩ་གཉིས་ན་གྲོང་ཁྱེར་རྩྭ་ཅན་ཤིང་སཱ་ལ་ཟུང་གི་དྲུང་དུ་མྱ་ངན་ལས་འདའ་བར་བཞེད། དེའང་བརྒྱད་ཅུ་ཡིན་པར་བྱེ་བྲག་ཏུ་བཤད་པའི་མཛོད་ཆེན་མོ་ལས། ཆོས་འཁོར་གནས་དང་ཡངས་པ་ཅན། །ས་དཀར་ཅན་དང་ལྷ་ཡི་གནས། །འབྲོག་གནས་མཆོད་རྟེན་རི་དང་ནི། །འོད་མའི་ཚལ་དང་དགྲར་བཅས་དང་། །བྱིས་པ་གསོད་དང་ཀཽ་ཤམ་བྷི། །སེར་སྐྱ་ཡི་ནི་གྲོང་ཁྱེར་ཏེ། །འདི་རྣམས་སུ་ནི་ཐུབ་པ་ཡིས། །སྐྱེས་མཆོག་(༦༩)ལོ་རེ་ལོ་རེ་བཞུགས། །འབར་བའི་ཕུག་གི་གནས་སུ་གཉིས། །སྨན་གྱི་ནགས་སུ་ལོ་གསུམ་དང་། །རྒྱལ་པོའི་ཁབ་ཀྱི་གྲོང་དུ་ལྔ། །དཀའ་བ་སྤྱད་པ་ལོ་དྲུག་དང་། །མཉན་དུ་ཡོད་པར་ཉི་ཤུ་བཞི། །ཉི་ཤུ་རྩ་དགུ་ཁབ་གནས་ཏེ། །དེ་ལྟར་རྒྱལ་བ་བརྒྱད་ཅུ་ལ། །སྐྱེས་མཆོག་དམ་པ་མྱ་ངན་འདས། །ཐམས་ཅད་མཁྱེན་པས་བཞུགས་པ་ཡི། །བསོད་ནམས་གནས་ནི་དེ་དག་ལ། །རྟག་ཏུ་ལུས་དང་ངག་དང་ཡིད། །གུས་པས་བཏུད་དེ་ཕྱག་འཚལ་ལོ། །ཞེས་སོ། །དེ་ཡང་གདུལ་བྱ་རྟག་པར་འཛིན་པ་ཤས་ཆེ་བ་རྣམས་གདུལ་བའི་ཕྱིར་ནམ་གྱི་ཆ་སྨད་ཟླ་བ་རི་ལ་ནུབ་པའི་ཚེ་དགོངས་པ་ཡོངས་སུ་མྱ་ངན་ལས་འདས་ཏེ། པུར་བཞུ་ནས་སྐུ་གདུང་ཆ་བརྒྱད་དུ་བགོས་ཤིང་ཚེམས་མཆེ་བ་བཞི་སོ་སོའི་དབང་པོས་གདན་དྲངས་པར་བཤད་དེ། འདུལ་བ་ལུང་དུ་གསུངས་པ། སྤྱན་ལྡན་སྐུ་གདུང་བྲེ་བོ་བརྒྱད་དག་ལས། །བདུན་ནི་འཛམ་བུའི་གླིང་པས་མཆོད་པར་ཐོབ། །སྐྱེས་མཆོག་དེ་ཡི་བྲེ་པོ་གང་ཞིག་ནི། །གྲོང་ཁྱེར་སྒྲ་སྒྲོགས་ཀླུ་ཡི་རྒྱལ་པོས་མཆོད། །སྐྱེས་མཆོག་དེ་ཡི་མཆེ་བ་བཞི་དག་ལས། །གཅིག་ནི་རྩ་གསུམ་ལྷ་ཡུལ་འཇིག་རྟེན་མཆོད། །གཉིས་པ་ཚིག་འཛིན་ཡིད་འོང་གྲོང་ཁྱེར་ན། །གསུམ་པ་ཀ་ལིང་རྒྱལ་པོའི་ཡུལ་ན་སྟེ། །སྐྱེས་མཆོག་དེ་ཡི་མཆེ་བ་བཞི་པ་ནི། །གྲོང་ཁྱེར་སྒྲ་སྒྲོགས་ཀླུ་ཡི་རྒྱལ་པོས་མཆོད། །མྱ་ངན་མེད་རྒྱལ་སྐྱ་ནར་བུ་གནས་པ། །མཆོད་རྟེན་བདུན་པོ་རྒྱ་ཆེར་སྤེལ་བྱས་ཏེ། །དེ་ཡི་མཐུ་ཡིས་དབྱིག་འཛིན་འདིར་ཡང་ནི། །སྨོན་ལམ་དངོས་པོ་མངོན་པར་བརྒྱན་གྱུར་ཏེ། །དེ་ལྟར་སྤྱན་ལྡན་སྐུ་གདུང་དེ་ལ་ནི། །ལྷ་དང་ཀླུ་དང་མི་ཡི་དབང་པོ་དང་། །མི་དང་ཀླུ་དང་གནོད་སྦྱིན་བདག་པོ་ཡིས། །རབ་ཏུ་བཀུར་ནས་བཀུར་སྟི་མཆོད་པ་བྱས། །ཞེས་སོ། །
གཉིས་པ་ཐུན་མོང་མ་ཡིན་པའི་དབང་དུ་བྱས་ན། སྟོན་པ་ཀུན་ཏུ་བཟང་པོ་ཉིད་ཆོས་སྐུ་ལས་མ་གཡོས་པར་ལོངས་སྤྱོད་རྫོགས་པའི་སྐུར་བཞེངས་པའི་ཐུགས་རྗེའི་ངང་ལས་ཕྱོགས་བཅུའི་འཇིག་རྟེན་དུ་སྤྲུལ་པ་བསམ་གྱིས་མི་ཁྱབ་པ་སྣང་ཞིང་འགྲོ་བ་དྲུག་གམ་རྒྱུད་ལྔ་འདུལ་ལ། ཁྱད་པར་མི་མཇེད་ཀྱི་འཇིག་རྟེན་དུ་སངས་རྒྱས་སྟོང་ལ་སོགས་པ་གདུལ་བྱའི་སྣང་བ་གང་གིས་འདུལ་བ་དེའི་སྐུར་སྣང་བ་ཡིན་ཏེ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། ཀུན་བཟང་ལོངས་སྤྱོད་རྫོགས་པ་ལས། །འདུལ་བའི་སྤྲུལ་པ་གྲངས་མེད་ཅིང་། །ཁྱད་པར་མི་མཇེད་འཇིག་རྟེན་དུ། །སྟོང་རྩ་གཉིས་ཀྱི་སྐུར་སྣང་ངོ་། །ཞེས་སོ། །གཉིས་པོ་ནི་འཇམ་དཔལ་དང་། ཕྱག་ན་རྡོ་རྗེའོ། །དེ་དང་རྗེས་སུ་མཐུན་པར་ཆོས་སྐུའི་ངང་ལས་རང་ཤར་དུ་བྱུང་བ་ཉིད། རྒྱུད་བླ་མར་ཡང་། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་(༧༠)རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནས་འཕོ་བ་དང་། །ལྷུམས་སུ་འཇུག་དང་བལྟམས་པ་དང་། །བཟོ་ཡི་གནས་ལ་མཁས་པ་དང་། །བཙུན་མོའི་འཁོར་དགྱེས་རོལ་པ་དང་། །ངེས་འབྱུང་དཀའ་བ་སྤྱད་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་སྡེ་འཇོམས་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང་། །མྱ་ངན་འདས་པར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་དང་། ཕལ་པོ་ཆེ་ལས། ཇི་ལྟར་ཟླ་བ་ཤར་གྱུར་པ། །ཚད་མེད་པ་ཡི་གཟུགས་བརྙན་རྣམས། །ཆུ་ཡི་སྣོད་དུ་སྣང་གྱུར་ཀྱང་། །ཟླ་བ་གཉིས་སུ་གྱུར་པ་མེད། །དེ་བཞིན་ཆགས་མེད་མཁྱེན་ལྡན་རྣམས། །ཆགས་མེད་རྣམ་པར་འཚང་རྒྱ་བ། །ཞིང་རྣམས་ཀུན་ན་རབ་ཏུ་སྣང་། །སངས་རྒྱས་ལ་ནི་གཉིས་སྣང་མེད། །འདི་ལ་གཅིག་ཀྱང་ཡོད་མ་ཡིན། །སྐུ་ནི་གཉིས་སམ་གསུམ་དུ་མེད། །ཇི་ལྟར་སེམས་ཅན་བསམ་པ་བཞིན། །ཚད་མེད་པར་ནི་རབ་ཏུ་སྣང་། །སྐུ་ནི་འདས་པ་མ་ཡིན་ཏེ། །མ་འོངས་པ་ཡང་སྐུ་མ་ཡིན། །སྐྱེས་དང་བྱང་ཆུབ་མྱ་ངན་འདས། །སྐད་ཅིག་གིས་ནི་རབ་ཏུ་སྣང་། །ཇི་ལྟར་སྒྱུ་མར་གྱུར་པའི་གཟུགས། །སྐྱེས་པ་མ་ཡིན་འོངས་པ་མིན། །དེ་ལྟར་དེ་བཞིན་གཤེགས་པའི་སྐུ། །སྐྱེ་བ་མེད་ལས་ཤིན་ཏུ་བསྟན། །ཅེས་པ་དང་། འཕགས་པ་དེ་བཞིན་གཤེགས་པའི་ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པའི་མདོ་ལས། བཀའ་སྩལ་པ། འཇམ་དཔལ་འདི་ལྟ་སྟེ་དཔེར་ན་ཟླ་བ་ཡར་གྱི་ངོའི་དཀྱིལ་འཁོར་ནམ་ཕྱེད་ཀྱི་དུས་ན་འཛམ་བུའི་གླིང་གི་སེམས་ཅན་ཐམས་ཅད་ཀྱི་སོ་སོའི་མདུན་ན་ཟླ་བའི་དཀྱིལ་འཁོར་འདུག་པར་ཤེས་ཀྱང་། ཟླ་བའི་དཀྱིལ་འཁོར་ནི་སེམས་ཅན་དེ་དག་གིས་བདག་ཅིའི་ཕྱིར་ཟླ་བའི་དཀྱིལ་འཁོར་དུ་ཤེས་པར་འགྱུར་བར་བདག་གིས་སེམས་ཅན་དེ་དག་གི་མདུན་ན་འདུག་པར་བྱའོ་སྙམ་དུ་མི་རྟོག་རྣམ་པར་མི་རྟོག་མོད་ཀྱིས། འོན་ཀྱང་འཇམ་དཔལ། ཟླ་བའི་དཀྱིལ་འཁོར་ནི་མ་འདྲེས་པའི་ཆོས་དང་ལྡན་པས། ལྷུན་གྱིས་གྲུབ་ཅིང་རྣམ་པར་མི་རྟོག་པ་དེ་ལྟ་བུའི་བྱ་བ་འདི་འབྱུང་ངོ་། །འཇམ་དཔལ། དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་། འཁོར་དཔག་ཏུ་མེད་བསམ་གྱིས་མི་ཁྱབ་མཚུངས་པ་མེད་གཞལ་དུ་མེད་བརྗོད་པའི་སྒྲས་བརྗོད་དུ་མེད་པའི་དབུས་ན། དེ་ཐམས་ཅད་དེ་བཞིན་གཤེགས་པ་བཞུགས་པར་མཐོང་མོད་ཀྱི། འཇམ་དཔལ། དེ་བཞིན་གཤེགས་པ་ནི་སེམས་ཅན་དེ་དག་(༧༡)གིས་དེ་བཞིན་གཤེགས་པ་མདུན་ན་བཞུགས་པར་ཤེས་པར་འགྱུར་བར་ང་སེམས་ཅན་དེ་དག་གི་མདུན་ན་འདུག་པར་བྱའོ་སྙམ་དུ་མི་རྟོག་རྣམ་པར་མི་རྟོག་སྟེ། འོན་ཀྱང་སེམས་ཅན་རྣམས་ཀྱིས་མཐོང་བ་དེ་བཞིན་དུ། དེ་བཞིན་གཤེགས་པ་མདུན་ན་བཞུགས་སོ། །འཇམ་དཔལ། དེ་བཞིན་གཤེགས་པའི་སྐུ་གསེར་གྱི་ཁ་དོག་ཏུ་མཐོང་བས་གདུལ་བར་བྱ་བ་ཡིན་ན། དེ་བཞིན་གཤེགས་པའི་སྐུ་ཡང་གསེར་གྱི་ཁ་དོག་ཏུ་སྣང་ངོ་། །དེ་བཞིན་དུ་བཻ་ཌཱུཪྱ་དང་། ཨན་དྷ་རྙིལ་དང་། སྤུག་དང་། མུ་ཏིག་དམར་པོའི་ཁ་དོག་གིས་འདུལ་བར་བྱ་བ་ཡིན་ན། དེ་དག་གི་ཁ་དོག་ཏུ་བཞུགས་སོ། །དེ་བཞིན་དུ་འཇིག་རྟེན་སྐྱོང་བ་དང་། བརྒྱ་བྱིན་དང་། ཚངས་པ་དང་། དབང་ཕྱུག་དང་། ལྷ་མ་ཡིན་དང་། མི་དང་། དུད་འགྲོ་དང་། དམྱལ་བ་དང་། གཤིན་རྗེའི་འཇིག་རྟེན་པས་གདུལ་བར་བྱ་བ་ཡིན་ན་དེ་དག་གི་གཟུགས་སུ་བཞུགས་ནས་ཆོས་སྟོན་ཏོ། །ཞེས་སོ། །དེ་དག་གིས་སྤྱིའི་དོན་བཤད་ཟིན་ཏོ། །
གཉིས་པ་གཞུང་གི་དོན་ལ་གསུམ་སྟེ། དོན་གྱི་འབྲེལ་དགོད་པ། ཚིག་གི་དོན་བཤད་པ། སྐབས་ཀྱི་དོན་བསྡུ་བའོ། །
དང་པོ་ནི་གླེང་བསླང་བའི་ཚུལ་བཤད་པ་དེ༵་ན༵ས་རང་སྣང་བཀོད་པའི་དེ༵་བཞི༵ན་གཤེ༵གས་པ༵་ཐམ༵ས་ཅ༵ད་ལ༵ས་རང་བྱུང་གི་ཐུགས་རྗེ་ཆེན་པོའི་བྱི༵ན་གྱིས༵་རླབས་ལས་རང་ཤར་བ་ཞེ༵ས་བྱ༵་བའི༵་རྣམ་པར་འཕྲུལ་པ་སངས་རྒྱས་ཀྱི་ཡེ་ཤེས་ཉིད་ཡིན་པས། རིག༵་པའི༵་སྐྱེས༵་བུ༵་ལས་དང་ཉོན་མོངས་པ་ཐམས་ཅད་བཅོམ་པས་ཐུ༵བ་པ༵་འཇིག་རྟེན་དྲུག་གི་འགྲོ་བ་དྲུག་སོ་སོར་འདུལ་བས་ཤཱཀྱ་ཐུབ་པ་ལ་སོགས་པ་དྲུག༵་ནི་རང་སྣང་བཀོད་པའི་དེ༵་བཞི༵ན་གཤེ༵གས་པ༵འི་སྐུ༵་ད༵ང་ག༵སུང་དང༵་ཐུག༵ས་རྡོ༵་རྗེ༵་ལ༵ས་འཐོ༵ན་ཏོ༵། །
གཉིས་པ་ལ་གསུམ་སྟེ། འདུལ་བ་བཞིས་རྣམ་པར་འཕྲུལ་པའི་ཚུལ་སྤྱིར་བསྟན་པ། འདུལ་ཡུལ་འགྲོ་བ་དང་ཆོས་ཀྱི་རང་བཞིན་བྱེ་བྲག་ཏུ་བཤད་པ། འཁོར་འདས་སེམས་དང་ཡེ་ཤེས་ཀྱི་རང་སྣང་དུ་དོན་བསྡུ་བའོ། །དང་པོ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །
དང་པོ་ནི། དེ་ལྟར་ཐུབ་པ་དྲུག་འཐོ༵ན་ནས༵་ཀྱང༵་འགྲོ་བའི་ལས༵་སོ་སོར་བསགས་ཚུལ་གྱི་དབ༵ང་གི༵ས་འཇིག་རྟེན་གྱི་ཁམས་ཀྱང་ཐ་དད་དུ་སྣང་སྟེ། དེའང་བསྡུ་ན་མགོ་འཕྲེད་ལ་བསྟན་ནས་འགྲོ་བ་སྣྲེལ༵་གཞི༵་ད༵ང་གྱེན་དང་ཐུར་ལ་བསྟན་ནས་འགྲོ་བ་ཡས༵་མ༵ན་གྱི༵་འཇི༵ག་རྟེན༵་ཟླུ༵མ་པོ་དང་གྲུ་བཞི་དང་ཟླ་གམ་དང་གྲུ་གསུམ་གཞི་ཕྱལ་པ་དང་སྟེང་གཡོགས་མེད་པ་སྟེ་སྣོད་ཀྱི་བྱེ་བྲག་རྣམ་པ་མི་འདྲ་བ་དྲུག༵་གི༵་རང་བཞིན་གྱིས་ཕྱོག༵ས་བཅུ༵་ཀུན་ཏུ་ཁྱབ་ཅིང་དེ་དག་གི་རྣམ་གྲངས་དང་དབྱེ་བའི་ཚད་ནི་མཐའ༵་ཡས༵་ཤིང་བདེ་སྡུག་དང་ལོངས་སྤྱོད་ལ་སོགས་པའི་རྣམ་པ་མུ༵་མེ༵ད་པས་ཁྱབ་པའི༵་སྟོང༵་གསུ༵མ་གྱི༵་སྟོང༵་ཆེན་པོ༵འི་འཇིག་རྟེན་གྱི་(༧༢)ཁམས་རེ༵་རེ༵ར་རང་རང་གི་འདུལ་བྱེད་ཐུབ༵་པ༵་ཆེ༵ན་པོ༵་བཅོ༵མ་ལྡ༵ན་འད༵ས་རེ༵་རེ༵ས་འདུལ༵་བ༵་རྣམ༵་པ༵་བཞི་བཞི༵ས་འགྲོ༵་བ༵་ལྔ༵འི་དོ༵ན་མཛ༵ད་དེ༵། དེ་ཡང་བསོད་ནམས་ཀྱིས་འདུལ་བ་དང་། དོན་ཐམས་ཅད་མངོན་སུམ་དུ་གྱུར་པས་འདུལ་བ་དང་། རྫུ་འཕྲུལ་ཆེན་པོས་འདུལ་བ་དང་། རིགས་པས་འདུལ་བའོ། །དེ་ཡང་ཕལ་པོ་ཆེ་ལས། ལས་ཀྱི་བྱེ་བྲག་བསམ་མི་ཁྱབ། །དམྱལ་བའི་འཇིག་རྟེན་ཐུར་འཕྱང་ཞིང་། །གཤིན་རྗེའི་འཇིག་རྟེན་སྣྲེལ་གཞི་སྟེ། །བྱོལ་སོང་ལྷ་མི་གྱེན་དུ་འགྲོ། །ཞེས་སོ། །དེའང་དུད་འགྲོ་རྣམས་ཀྱང་སྣྲེལ་གཞི་ཉིད་དུ་གཏོགས་པ་སྙམ་མོ། །དེ་ལྟར་སྟོང་གསུམ་གཅིག་གི་འཇིག་རྟེན་ལའང་སྣྲེལ་གཞི་དང་ཡས་མན་གསུམ་དུ་སྦྱར་བ་ཉིད་དེ་རིགས་ལྔས་བསྡུས་པའི་སྣོད་བཅུད་ནི་སྤྲུལ་པ་སྐུའི་འདུལ་ཞིང་ངོ་། །འདིར་ཁ་ཅིག་སྣྲེལ་གཞི་ཕྱོགས་བཞི་དང་ཡས་མན་སྟེང་འོག་སྟེ་འཇིག་རྟེན་དྲུག་ཏུ་འདོད་པ་དེ་དག་གིས་ནི་གཞུང་གི་དོན་ཕྱོགས་ཙམ་ཡང་མ་མཐོང་ངོ་། །
གཉིས་པ་ལ་བཞི་སྟེ། སྐུ་བསོད་ནམས་ཆེན་པོས་མཛད་པ་ཕུན་སུམ་ཚོགས་པས་འདུལ་བ། ཐུགས་མངོན་ཤེས་ཆེན་པོས་མངོན་སུམ་པས་འདུལ་བ། བསམ་གྱིས་མི་ཁྱབ་པ་རྫུ་འཕྲུལ་ཆེན་པོས་འདུལ་བ། གསུང་ཐེག་པ་ལྔར་སྟོན་པ་རིག་པས་འདུལ་བའོ། །
དང་པོ་ནི་སྐུ་བལྟམ༵ས་པ༵་དང༵་། ཁྱིམ་སྤངས་ཏེ་ར༵བ་ཏུ༵་བྱུང༵་བ༵་དང༵་། ནཻ་རནྫཱ་ནའི་འགྲམ་ལ་སོགས་པར་དཀ༵འ་ཐུབ༵་མཛ༵ད་པ༵་ད༵ང་། རྡོ་རྗེ་གདན་ལ་སང༵ས་རྒྱས༵་པ༵་དང༵་། བདུད༵་ཀྱི་སྡེ་བཏུ༵ལ་བ༵་ད༵ང་། ཝཱ་ར་ཎཱ་སཱིར་ཆོ༵ས་ཀྱི༵་འཁོ༵ར་ལོ༵་བསྐོ༵ར་བ༵་དང༵་། གཉན་ཡོད་དུ་ཆོ༵་འཕྲུ༵ལ་ཆེ༵ན་པོ༵་བསྟན༵་པ༵་དང༵་། གྲོང་ཁྱེར་རྩྭ་མཆོག་ཏུ་མྱ༵་ང༵ན་ལ༵ས་འད༵ས་པ༵། དེ་ལྟར་ཡོངས་སུ་བསྟན་པ་བརྒྱད་དང་ལ༵་སོ༵གས་པའི་ཁོངས་ནས་དགའ་ལྡན་ནས་འཕོ་བ་དང་། བཟོའི་གནས་ལ་མཁས་པ་དང་། བཙུན་མོའི་འཁོར་གྱིས་རོལ་པ་དང་། བྱང་ཆུབ་སྙིང་པོར་གཤེགས་པ་དང་། རྒྱལ་པོའི་ཁབ་ཏུ་གླང་ཆེན་སྨྱོན་པ་བཏུལ་བ་དང་། དགའ་ལྡན་དུ་ཡུམ་ལ་ཆོས་གསུངས་པ་དང་། འབྲོག་གནས་སུ་གནོད་སྦྱིན་ཆེན་པོ་བཏུལ་བ་ལ་སོགས་པ་རྣམས་ཏེ། སྐུའི་རྣམ་པར་འཕྲུལ་པ་ཆེན་པོས་འགྲོ་བ་ཚད་མེད་པ་སྨིན་པ༵ར་མཛད་པའི་ཆོ་འཕྲུལ་ཆེན་པོ་སྟོན༵་པ༵འི་ཐུབ༵་པ༵ས་བསམ་གྱིས་མི་ཁྱབ་པའི་འགྲོ་བ་འདུལ་བའོ། །ཁ་ཅིག་ནི་མཛད་པ་བཅུ་གཉིས་སུ་འདོད་པ་ནི་དེར་མ་ངེས་ཏེ། ཆོ་འཕྲུལ་བསྟན་པ་གསུངས་པའི་ཕྱིར་རོ། །དེའི་ཞར་ལ་གཞན་རྣམས་འཕངས་ཤིང་། སོགས་པའི་ཁོངས་ནས་བསྡུས་པའི་མཛད་པ་བཅུ་གཉིས་མཚོན་པ་སྟེ་མདོར་ན་སྐུའི་ཆོ་འཕྲུལ་ཆེན་པོས་འགྲོ་བ་འདུལ་བ་ཐམས་ཅད་འདིར་བསྡུའོ། །
གཉིས་པ་ནི། འདས་པ་ལ་སོགས་པའི་དུས༵་བཞི༵་ཀུན༵་ཏུ༵་མཁྱེ༵ན་པས་ཤེས་བྱ་ཐམས་(༧༣)ཅད་མངོན་སུམ་དུ་གཟིགས་པ༵་ནི་སྔོན་གྱི་གནས་ཤེས་པའི་མངོན་པར་ཤེས་པ་སྟེ་ཚེ་རབས་དུ་མ་རྗེས་སུ་དྲན་པ་ལ་དབང་བསྒྱུར་བས་འགྲོ་བ་འདུལ་བའོ། །དུས་བཞི་མཁྱེན་ལུགས་ནི་པྲ་ཕབ་པའི་རྣམ་པ་མེ་ལོང་དུ་ཤར་བ་ལྟར་མཁྱེན་ཏོ། །གཞན་ཡང་འགྲོ་བ་རིགས་ལྔའམ་དྲུག་ལ་སོགས་པའི་གདུལ་བྱ་མ་ལུས་པ་ཐམ༵ས་ཅ༵ད་ཀྱི༵་རང་རང་གི་སེམ༵ས་ཀྱི༵་ཉོན་མོངས་པ་དང་རྣམ་པར་རྟོག་པ་ཐམས་ཅད་ཀྱི་རང་བཞིན་དང་སངས་རྒྱས་ཀྱི་མཁྱེན་པའི་ཡེ་ཤེས་ཀྱི་དགོངས་རྒྱུད༵་གཉིས་དུས་དང་གནས་སྐབས་ཀུ༵ན་ཏུ༵་ཐ་མི་དད་པར་མཁྱེ༵ན་པའི་གནད་ཀྱིས་ཕ་རོལ་གྱི་སེམས་ཤེས་པའི་མངོན་ཤེས་མངའ་བ༵་དང༵་། ཡེ་ཤེས་གཟིགས་པ་སྒྲིབ་པ་མེད་པའི་རྫུ༵་འཕྲུ༵ལ་གྱི༵་སྤྱན༵་གྱིས༵་དག་པའི་ཞིང་དང་མ་དག་པའི་འཇིག་རྟེན་གྱི་འགྲོ་བ་འཆི་འཕོ་བ་དང་སྐྱེ་བ་དང་རྣམ་པར་འཕྲུལ་པ་ལ་སོགས་པ་ཐ༵མས་ཅ༵ད་ཀུན༵་ཏུ༵་གཟི༵གས་པ༵་ནི་མངོན་པར་འདུ་བྱེད་པ་ལས་བྱུང་བ་ལྷའི་མིག་གི་མངོན་པར་ཤེས་པས་འདུལ་བའོ། །རྫུ༵་འཕྲུ༵ལ་གྱི༵་སྙན༵་གྱི༵ས་འཇིག་རྟེན་གྱི་ཁམས་ཐ༵མས་ཅ༵ད་ཀྱི་སྒྲ་སྐད་ཆེ་ཆུང་ཐམས་ཅད་ཀུན༵་ཏུ༵་གས༵ན་པ༵་ནི་ལྷའི་རྣ་བའི་མངོན་པར་ཤེས་པ་སྟེ་དེས་སེམས་ཅན་རྣམས་འདུལ་བའོ། །སེམས་ཅན་གང་ལ་གང་འདུལ་སྟོན་པའི་རྫུ༵་འཕྲུ༵ལ་གྱི༵་ཚོ༵གས་ཀྱི༵ས་འགྲོ་བའི་མོས་པ་དང་མཐུན་པར་ཀུན༵་ཏུ༵་དོ༵ན་སྤྱོད༵་པ༵་ནི་རྫུ་འཕྲུལ་གྱི་མངོན་པར་ཤེས་པས་འདུལ་བའོ། །སྒྲིབ་གཉིས་བག་ཆགས་དང་བཅས་པ་མ་ལུས་པ་དབྱིངས་སུ་དག་པའི་ཡེ་ཤེས་ཟ༵ག་པ༵་མེ༵ད་པ༵ས་མཐར་ཕྱིན་ཀུན༵་ཏུ༵་བཟ༵ང་པོ༵འི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་སྤྱོད༵་པ༵་ཡོངས་སུ་རྫོ༵གས་པའི༵་རང་བཞིན་ཟག་པ་ཟད་པའི་མངོ༵ན་པ༵ར་ཤེ༵ས་པ༵ས་འདུལ་བ་སྟེ། དེ་ལྟར་ན་དྲུག་པོ་དེ་ཤེས་བྱ་ཐམས་ཅད་མངོན་སུམ་དུ་དབང་སྒྱུར་བས་མངོན་པར་ཤེས་པ་ཆེན་པོ་དྲུག༵་སྟེ་ཐུགས་ཀྱིས་འདུལ་བའོ། །
གསུམ་པ་ནི། གདུལ་བྱ་མཐའ་ཡས་པ་ཀུན༵་ཏུ༵་དེའི་སྣང་བ་དང་མཐུན་པའི་སྐུ༵་ཚངས་པ་དང་བརྒྱ་བྱིན་དང་འཁོར་ལོས་སྒྱུར་བ་ལ་སོགས་པ་བས༵མ་གྱི༵ས་མི༵་ཁྱབ༵་པ༵་སྟོན་པ་ད༵ང་། འགྲོ་བའི་རྒྱུད་ཚད་མེད་པ་ཀུན༵་ཏུ༵་དེ་དག་གི་མོས་པ་དང་མཐུན་པར་འཇུག་པའི་ཐུག༵ས་ཇི་ལྟ་བ་དང་ཇི་སྙེད་པ་མཁྱེན་ནས་དོན་མཛད་ཚུལ་བས༵མ་གྱི༵ས་མི༵་ཁྱ༵བ་པ༵་ད༵ང་། གདུལ་བྱའི་ཁམས་དང་མོས་པ་མི་འདྲ་བའི་སྤྱོད་ཡུལ་ཀུན༵་ཏུ༵་སྐུ་དང་སྐུའི་ཆ་ལུགས་དང་ཞལ༵་གྱི་དཀྱིལ་འཁོར་མི་འདྲ་བ་ཞི་བ་དང་ཁྲོ་བོ་ལ་སོགས་པ་ཐ་དད་པ་དུ་མར་སྣང་ཞིང་སྐད་ཅིག་སྐད་ཅིག་ལ་རང་རང་གི་སྣང་བ་དང་མཐུན་པར་ཞལ་བསམ༵་གྱིས༵་མི༵་ཁྱབ༵་པ༵་བསྟན་ནས་བདག་ཁོ་ན་ལ་ཐུགས་བརྩེ་བའི་ཕྱིར་བདག་གི་མདུན་ན་བཞུགས་སོ་སྙམ་པ་སྟེ། ཡུམ་ཆེན་མོ་ལས། འཛམ་བུའི་གླིང་གི་སེམས་ཅན་དེ་དག་ནི་བདག་ཅག་ཁོ་ནའི་མདུན་ན་བཞུགས་ནས་ཐུགས་བརྩེ་བའི་ཕྱིར་ཆོས་སྟོན་ཏོ་སྙམ་མོ། །ཞེས་པས། ལུས་འཕགས་གླིང་དང་། བ་ལང་སྤྱོད་ནས་འོག་མིན་གྱི་བར་དུ་གསུངས་པ་དང་། སངས་རྒྱས་མཉམ་སྦྱོར་ལས། རེས་འགའ་ཞི་ལ་རེས་འགའ་དྲག །རེས་འགའ་གདོན་ཆེན་བགེགས་(༧༤)མཛད་དེ། །དེ་ལ་སོགས་པ་མཐའ་ཡས་མཆོག །རི་དང་སྐྱེ་བོ་ཐམས་ཅད་དོ། །ཞེས་པ་དང་། དཔུང་པ་བཟང་པོའི་རྒྱུད་ལས། གང་གི་རང་བཞིན་ཆགས་སྡང་རྣམ་བྲལ་ཡང་། །ཆགས་པ་ཅན་ལ་ཆགས་བཅས་ལྟར་སྟོན་ཅིང་། །གདུག་པ་འདུལ་ཕྱིར་ཁྲོ་ལ་ཁྲོར་སྟོན་པ། །ཐབས་ཀྱི་རྣམ་འདྲེན་དེ་ལ་ཕྱག་འཚལ་ལོ། །ཞེས་པ་ལྟར་རོ། །དེ་བཞིན་དུ་སྐུ་གཅིག་ལའང་ཞལ་བསམ་གྱིས་མི་ཁྱབ་པ་སྟོན་པ་རྣམས་སོ། །འགྲོ་བའི་སྐལ་བ་ཇི་ལྟར་ཡོད་པ་ཀུན༵་ཏུ༵་སེམས་ཅན་སོ་སོའི་སྐད་དང་མཐུན་པར་ཆོས་ཀྱི་གསུ༵ང་བས༵མ་གྱིས༵་མི༵་ཁྱབ༵་པ༵་སྒྲོག་པར་སྣང་བ་ད༵ང་ལྡ༵ན་པ༵་ནི་ནམ་མཁའི་མཐའ་ཀླས་པར་རྣམ་པར་འཕྲུལ་པ་བས༵མ་གྱི༵ས་མི༵་ཁྱབ༵་པ༵་སྣ་ཚོགས་སུ་འཕྲོ་བས་གྲང༵ས་མེ༵ད་པ༵་དག་གིས། ཕྱོག༵ས་བཅུ༵ར་གང་ལ་གང་འདུལ་དུ་སྣང༵་བ༵ར་གྱུར༵་ཏོ༵། །
བཞི་པ་གསུང་རིག་པས་འདུལ་བ་ལ་གཉིས་ཏེ། སྤྱིའི་དོན་དང་། གཞུང་གི་དོན་ནོ། །དང་པོ་ལ་གཉིས་ཏེ། སྒྲ་དོན་དང་དབྱེ་བའོ། །
དང་པོ་ནི། ཡཱ་ནའི་སྒྲ་ལས་ཐེག་པ་སྟེ་གང་ལ་བརྟེན་ནས་བགྲོད་པས་འདོད་པར་ཕྱིན་ཅིང་སྐྱེལ་བ་ཞེས་ཏེ། སྡུད་པ་ལས། ཐེག་པ་འདི་ནི་མཁའ་འདྲ་གཞལ་མེད་ཁང་ཆེན་ཏེ། །དགའ་སྐྱིད་བདེ་བ་མངོན་པར་ཐོབ་བྱེད་ཐེག་པའི་མཆོག །དེ་གང་ཞོན་ནས་སེམས་ཅན་ཐམས་ཅད་མྱ་ངན་འདའ། །ཞེས་སོ། །
གཉིས་པ་ལ་གཉིས་ཏེ། སྤྱིར་དབྱེ་བ་དང་། བྱེ་བྲག་ཏུ་དབྱེ་བའོ། །
དང་པོ་ནི། སྤྱིར་སེམས་ཅན་གྱི་རྒྱུད་ཀྱི་ཉོན་མོངས་པ་འདུལ་བའི་ཕྱིར་སངས་རྒྱས་ཀྱི་ཐུགས་རྗེས་གང་ལ་གང་འདུལ་དུ་བསྟན་པས་ཐེག་པའི་རྣམ་གྲངས་ཀྱང་འདི་ཉིད་ཁོ་ནར་ངེས་སོ་ཞེས་ཆད་པ་མེད་དེ། ལང་ཀར་གཤེགས་པ་ལས། སེམས་ཅན་རྣམས་ནི་ཡོངས་དྲང་ཕྱིར། །ཐེག་པ་མཐའ་དག་ངས་བཤད་དེ། །འདི་ཞེས་དམིགས་སུ་ཡོད་མ་ཡིན། །ཞེས་སོ། །དེའང་རེ་ཞིག་བསྡུ་ན་འབྲས་བུ་ལ་དགོངས་ཏེ་གཅིག་ཏུ་གསུངས་པ་ནི། དམ་པའི་ཆོས་པདྨ་དཀར་པོ་ལས། ཐེག་པ་གཅིག་སྟེ་གཉིས་སུ་ཡོད་མ་ཡིན། །ཞེས་པ་དང་། ཀུན་བྱེད་ལས། ཡོད་ནི་གཅིག་ལས་མེད་པ་ལ། །ཞེས་སོ། །ཡང་རྒྱུ་དང་འབྲས་བུ་ལ་དགོངས་ནས་གཉིས་དང་། ཆེན་པོ་དང་ཆུང་ངུ་ལ་དགོངས་ནས་གཉིས་སུ་གསུངས་ཏེ། དཔལ་འབྱུང་བཞི་ཟད་པའི་རྒྱུད་ལས། རྒྱུ་ཆོས་རྣམས་དང་འབྲས་བུའི་ཕྱིར། །ཐེག་པ་དེ་ཡང་རྣམ་པ་གཉིས། །ཞེས་པ་དང་། ཡེ་སྒྲོན་ལས། ཆེ་ཆུང་རིམ་པའི་བློ་ཡོད་ཕྱིར། །ཐེག་པའི་གྲངས་ཀྱང་དེ་བཞིན་ཏེ། །བསྡུ་ན་ཆེ་ཆུང་རྣམ་གཉིས་སོ། །ཞེས་སོ། །ཡང་ཆེ་འབྲིང་གི་དབྱེ་བས་ཉན་རང་ཐེག་པ་ཆེན་པོ་སྟེ་གསུམ་དུ་ཡང་གསུངས་ཏེ། མདོ་སྡེ་རྒྱན་ལས། སྦྱོར་བ་དང་ནི་ཚོགས་དག་དང་། །བསམ་པ་དང་ནི་བཤད་ཉིད་དང་། །སྒྲུབ་པའི་རབ་ཏུ་དབྱེ་བ་ཡིས། །ཐེག་པ་རྣམ་པ་(༧༥)གསུམ་དུ་འདོད། །ཅེས་པ་དང་། གསང་བ་ཐིག་ལེ་ནོར་བུའི་རྒྱུད་ལས། ཕྱི་ནང་གི་རིམ་པས་ཀྱང་གསུམ་དུ་བཤད་དེ། ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ཀྱང་རབ་ཏུ་གཟུང་། །ཞེས་སོ། །ཡང་རྒྱུའི་ཐེག་པ་གསུམ་འབྲས་བུ་དང་བཞིར་ཡང་བཤད་དེ། འཇམ་དཔལ་སྒྱུ་འཕྲུལ་དྲྭ་བ་ལས། ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་པ་དང་། བམ་བརྒྱད་ལས། བསམ་གྱིས་མི་ཁྱབ་བསྟན་པ་འདི། །བརྒྱད་ཁྲི་བཞི་སྟོང་རྣམ་གྲངས་ཀྱང་། །ཐེག་པའི་སྒོ་ནི་གསུམ་དུ་གསུངས། །གསང་ཉིད་ཐེག་པར་བསྡུས་དང་བཞི། །ཞེས་སོ། །ཡང་རྣམ་གྲངས་བསྡུ་བས་ལྔར་ཡང་བཤད་དེ། འདི་ཉིད་ལས། ཐེག་པ་བཞི་ཡི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་པ་དང་། ལང་ཀར་གཤེགས་པ་ལས། ལྷ་ཡི་ཐེག་དང་ཚངས་པའི་ཐེག །དེ་བཞིན་དུ་ནི་ཉན་ཐོས་དང་། །དེ་བཞིན་གཤེགས་དང་རང་རྒྱལ་གྱིས། །ཐེག་པ་ཐ་དད་པ་བཤད་དོ། །ཞེས་སོ། །ཡང་རྒྱུ་འབྲས་ཀྱི་གོང་འོག་དབྱེ་བས་དྲུག་ཏུ་ཡང་བཤད་དེ། ཀུན་བྱེད་ལས། ངེས་པ་ཐོབ་པའི་ཐེག་པ་དྲུག །ཅེས་སོ། །ཡང་བདུན་དུ་ཡང་བཤད་དེ། དཀྱིལ་འཁོར་བསྡུ་བ་ལས། ལྷ་དང་མི་དང་ཉན་ཐོས་དང་། །རང་སངས་རྒྱས་དང་བྱང་ཆུབ་སེམས། །གསང་བ་ཕྱི་དང་ནང་གཉིས་ཏེ། །དེ་ལྟར་ཐེག་པ་བདུན་དུ་བཤད། །ཅེས་སོ། །བརྒྱད་དུ་ཡང་བཤད་དེ། ནམ་མཁའ་ཆེ་ལས། དེ་ལྟར་ཐེག་བརྒྱད་ལས་འདས་པའི། །ཞེས་སོ། །དགུར་ཡང་བཤད་དེ། ཀུན་བྱེད་ལས། བྱུང་ནི་ཐེག་པ་དགུ་རུ་བྱུང་། །ཞེས་སོ། །ཡང་སོར་བཞག་ལྷ་མིའི་ཐེག་པ་གཉིས། ཕྱི་རོལ་པའི་སྡེ་ལྔ། ནང་པའི་རིམ་པ་དགུ། འོད་གསལ་རྡོ་རྗེ་སྙིང་པོའི་ཐེག་པ་དང་བཅུ་དྲུག་ཏུ་ཡང་བཤད་དེ། སྙིང་པོ་ཉི་མ་རབ་ཏུ་སྣང་བྱེད་ཀྱི་རྒྱུད་ལས། ཐེག་པའི་དང་པོ་བཅུ་དྲུག་མགོན། །ཞེས་སོ། །ཡང་བསམ་གྱིས་མི་ཁྱབ་པར་ཡང་བཤད་དེ། ལང་ཀར་གཤེགས་པ་ལས། ཇི་སྲིད་སེམས་ནི་འཇུག་པའི་བར། །ཐེག་པའི་མཐའ་ལ་ཐུག་པ་མེད། །ཅེས་སོ། །ཡང་གནས་ལུགས་ལ་ཐེག་པ་ཞེས་བཏགས་པ་ཙམ་ལས་གྲུབ་པ་མེད་དེ། དེ་ཉིད་ལས། སེམས་ནི་ནམ་ཞིག་གྱུར་པ་ན། །ཐེག་པ་མེད་ཅིང་འགྲོ་བའང་མེད། །ཅེས་སོ། །མདོར་ན་ཐམས་ཅད་བློའི་རིམ་པ་ལ་སྣང་བ་ཙམ་ལས། བློ་ངོ་བོ་ཉིད་ཀྱིས་དག་པའི་རྣལ་འབྱོར་པ་རྣམས་ལ་ནི། ཐེག་པ་ཞེས་པའང་གཞི་ནས་མེད་པས། ནམ་མཁའ་བཞིན་དུ་ཤེས་པར་བྱའོ། །
གཉིས་པ་བྱེ་བྲག་ཏུ་དབྱེ་བ་ལ་ལྔ་སྟེ། ལྷ་མིའི་ཐེག་པ། ཉན་ཐོས། རང་སངས་རྒྱས། བྱང་ཆུབ་སེམས་དཔའ། གསང་སྔགས་ཀྱི་ཐེག་པའོ། །དང་པོ་ལ་གཉིས་ཏེ། ངེས་ཚིག་དང་། དབྱེ་བའོ། །
དང་པོ་ནི། (༧༦)མ་ནུ་ཤ་ཡཱ་ན་ཞེས་པའི་སྒྲ་ལས་མིའི་ཐེག་པ་དང་། དྷེ་བ་ཡཱ་ན་ལས་ལྷའི་ཐེག་པའོ། །
དབྱེ་བ་ལ་གཉིས་ལས། མིའི་ཐེག་པ་ནི་མི་དགེ་བ་བཅུ་སྤངས་ཏེ་དགེ་བ་བཅུ་སྤྱད་པས་མཐོ་རིས་ཀྱི་མིར་སྐྱེའོ། །དེ་ལ་དགེ་བ་བཅུ་ནི་མི་དགེ་བཅུ་སྤངས་པའི་དགེ་བའི་ཆ་ནས་བཏགས་སོ། །དེ་ཡང་སྲོག་གཅོད། མ་བྱིན་ལེན། འདོད་ལོག་གསུམ་ནི་ལུས་དང་། རྫུན། ཕྲ་མ། ངག་འཁྱལ། ཚིག་རྩུབ་བཞི་ནི་ངག་དང་། བརྣབ་སེམས། གནོད་སེམས། ལོག་ལྟ་གསུམ་ནི་ཡིད་ཀྱི་མི་དགེ་བ་སྟེ་དེ་དག་སྤང་བའོ། །ལྷའི་ཐེག་པ་ནི་དགེ་བ་བཅུ་ཉིད་ཆེར་གོམས་པས་འདོད་ལྷ་རིགས་དྲུག་དང་། བསམ་གཏན་བཞི་ལས་གཟུགས་ཁམས་གནས་རིས་བཅུ་བདུན་དང་། གཟུགས་མེད་བཞིས་གཟུགས་མེད་སྐྱེ་མཆེད་མུ་བཞིར་སྐྱེ་བ་སྟེ། ལེ་ལག་ལས། དགེ་བཅུ་སྤྱོད་ཅིང་མི་དགེ་སྤོང་བྱེད་པ། །འདོད་པའི་ལྷ་དང་མི་རུ་སྐྱེ་བའི་རྒྱུ། །ཚད་མེད་བཞི་སྤྱོད་མི་གཡོ་སྒོམ་བྱེད་པ། །ཚངས་གནས་ལ་སོགས་སྐྱེ་བའི་རྒྱུ་ཡིན་ནོ། །ཞེས་སོ། །དེའང་གཞི་དགེ་སྡིག་བླང་དོར་ཤེས་པ་ལ་འཇུག་ཅིང་བསམ་གཏན་གཟུགས་མེད་ཀྱི་རང་བཞིན་ཤེས་པ། ལམ་དགེ་བ་བཅུ་ལ་སྤྱོད་པ། འབྲས་བུ་སོ་སོའི་གནས་སུ་སྐྱེས་པའོ། །
གཉིས་པ་ཉན་ཐོས་ཀྱི་ཐེག་པ་ལ་ཡང་གཉིས་ལས། ངེས་ཚིག་ནི་ཤྲ་བ་ཀའི་སྒྲ་ལས་ཐོས་སྒྲོགས་ཞེས་པས་སྟོན་པ་ལ་ཆོས་ཉན་པ་གཞན་ལ་བརྗོད་པར་མཚོན་པའོ། །དབྱེ་བ་ལ་གསུམ་ལས། གཞི་ཕུང་པོ་དང་གཞན་ལ་གང་ཟག་གི་བདག་དང་ང་ཡིར་འཛིན་པ་མེད་པ་དང་། དངོས་པོ་གཟུང་བ་རགས་པ་ཀུན་རྫོབ་དང་། རྡུལ་ཕྲན་ཆ་མེད་དོན་དམ་དང་། སེམས་ཀྱི་རྒྱུན་ཀུན་རྫོབ་དང་། སྐད་ཅིག་དོན་དམ་པའི་བདེན་པར་གཏན་ལ་ཕབ་ནས་བསླབ་པ་གསུམ་ལ་གནས་པའོ། །ལམ་ནི་ཚོགས་ལམ་ཆུང་ངུ་འབྲིང་ཆེན་པོར་དྲན་པ་ཉེར་བཞག་བཞི། ཡང་དག་སྤོང་བ་བཞི། རྫུ་འཕྲུལ་གྱི་རྐང་པ་བཞི་སྒོམ་ཞིང་། སྦྱོར་ལམ་དྲོད་དང་རྩེ་མོ་གཉིས་སུ། དད་པ། བརྩོན་འགྲུས། དྲན་པ། ཏིང་ངེ་འཛིན། ཤེས་རབ་ཀྱི་དབང་པོ་ལྔ་དང་། བཟོད་པ་ཆོས་མཆོག་གཉིས་སུ་དད་པ་ལ་སོགས་པའི་སྟོབས་ལྔ་སྒོམ་ཞིང་། མཐོང་ལམ་དུ་དྲན་པ་དང་། ཆོས་རབ་ཏུ་རྣམ་པར་འབྱེད་པ་དང་། བརྩོན་འགྲུས་དང་། དགའ་བ་དང་། སྦྱོངས་པ་དང་། ཏིང་ངེ་འཛིན་དང་། བཏང་སྙོམས་ཡང་དག་བྱང་ཆུབ་ཀྱི་ཡན་ལག་བསྒོམ་པའོ། །དེ་ནས་སྒོམ་ལམ་དུ་ཡང་དག་པའི་ལྟ་བ། རྟོག་པ། ངག །ལས་ཀྱི་མཐའ། འཚོ་བ། རྩོལ་བ། དྲན་པ། ཏིང་ངེ་འཛིན་ཡང་དག་པའི་འཕགས་པའི་ལམ་ཡན་ལག་བརྒྱད་བསྒོམ་པའོ། །འབྲས་བུ་ནི་ལྷག་བཅས་ལྷག་མེད་ཐོབ་ནས་ཞི་བའི་དབྱིངས་སུ་གནས་པའོ། །དེ་ཡང་གཙོ་བོར་བདེན་པ་བཞི་ལ་བླང་དོར་དུ་བྱེད་(༧༧)པས། མཐོང་ལམ་སྐད་ཅིག་བཅུ་དྲུག་ལ་སོགས་པ་ས་གོང་མ་ཐོབ་ཅིང་རྒྱུན་ཞུགས་ཕྱིར་འོང་ཕྱིར་མི་འོང་དགྲ་བཅོམ་གྱི་འབྲས་བུ་མངོན་དུ་བྱེད་པ་སྟེ། ལེ་ལག་ལས། བདེན་བཞིའི་དོན་རྟོགས་རབ་ཏུ་སྤོང་བ་ཡི། །ཡེ་ཤེས་བཅུ་དྲུག་ཆ་སྦྱངས་རབ་ཞི་བའི། །རྒྱུན་ཞུགས་ལ་སོགས་རིམ་པས་སྦྱངས་ནས་ནི། །ཉོན་མོངས་དགྲ་རྣམས་ཞི་བའི་ས་རུ་འགྲོ། །ཞེས་སོ། །
གསུམ་པ་རང་སངས་རྒྱས་ཀྱི་ཐེག་པ་ལ་ཡང་གཉིས་ལས། ངེས་ཚིག་ནི་པྲ་ཏྱ་ཀ་བུདྡྷ་ཞེས་པ་སྟེ། པྲ་ཏྱ་ཀ་སོ་སོ་རང་རང་བུདྡྷ་སངས་རྒྱས་ཏེ་སྲིད་པ་ཐ་མའི་ཚེ་སློབ་དཔོན་གྱིས་གདམས་ངག་སྟོན་པ་ལ་མི་ལྟོས་པར་ལམ་གྱི་རྟོགས་པ་རང་བྱུང་དུ་རྒྱུད་ལ་སྐྱེས་ནས་བྱང་ཆུབ་མངོན་དུ་བྱེད་པའོ། །དེའང་ཚོགས་ན་སྤྱོད་པ་ཆེ་བ། ཆུང་བ། བསེ་རུ་ལྟར་གཅིག་པུར་གནས་པ་གསུམ་ཡོད་པའོ། །དེའི་ཐེག་པ་ལ་དབྱེ་ན་གསུམ་ལས། གཞི་ཕྱི་དང་ནང་གི་ཆོས་རྣམས་རྟེན་འབྲེལ་ལུགས་སུ་འཇུག་པས་འཁོར་བ་དང་། ལུགས་ལས་ལྡོག་པས་མྱ་ངན་ལས་འདས་པ་ཐོབ་པར་ཤེས་ནས་གང་ཟག་གི་བདག་དང་། ཕྱི་གཟུང་བ་རང་བཞིན་མེད་པར་རྟོགས་པ་སྟེ། མངོན་རྟོགས་རྒྱན་ལས། གཟུང་དོན་རྟོག་པ་སྤང་ཕྱིར་དང་། །འཛིན་པ་མི་སྤོང་ཕྱིར་དང་ནི། །རྟེན་གྱི་བསེ་རུ་ལྟ་བུའི་ལམ། །ཡང་དག་བསྡུས་པས་ཤེས་པར་བྱ། །ཞེས་སོ། །ལམ་ནི་བྱང་ཆུབ་ཀྱི་ཆོས་སུམ་ཅུ་རྩ་བདུན་ཉན་ཐོས་ལྟར་བསྒོམ་པའི་སྟེང་དུ་རྟེན་འབྲེལ་བསྒོམས་པས་ཁྱད་པར་དུ་འཕགས་སོ། །འབྲས་བུ་ནི་ནམ་ཞིག་བྱང་ཆུབ་ཐོབ་ནས་སེམས་ཅན་ལ་སྒྲས་ཆོས་མི་སྟོན་ཞིང་བརྡས་བསྟན་པས་གོ་བར་བྱེད་ཅིང་མྱ་ངན་ལས་འདའ་བ་སྟེ། ལེ་ལག་ལས། ཕྱི་ནང་རྟེན་འབྲེལ་མིག་ཡོར་ཚུལ་ཤེས་ཤིང་། །དངོས་པོ་གཟུགས་ལ་ཐོགས་མེད་རབ་ཏུ་འཇུག །དགེ་བཤེས་མི་སློབ་རང་གི་རིག་པས་རྟོགས། །བྱང་ཆུབ་སར་འགྲོ་ཡིད་བཞིན་བདེ་བའི་མཆོག །ཅེས་སོ། །དེའི་དགྲ་བཅོམ་གྱི་ས་ལ་འབྲས་བུ་ཡིད་བཞིན་བདེ་བ་མཆོག་གི་ས་ཞེས་བྱའོ། །
བཞི་པ་བྱང་ཆུབ་སེམས་དཔའི་ཐེག་པ་ལའང་གཉིས་ལས། ངེས་ཚིག་ནི་བོ་དྷི་སཏྭ་ཞེས་པའི་སྒྲས་བྱང་ཆུབ་སེམས་དཔའ་སྟེ། སངས་རྒྱས་འདོད་པ་ལ་རྟེན་དམན་པ་ཟིལ་གྱིས་གནོན་ཞིང་སྙིང་སྟོབས་ཆེན་པོས་འགྲོ་བ་སྒྲོལ་བའི་གོ་ཆ་བགོས་པ་སྟེ། སྡུད་པ་ལས། བློ་ཆེ་བ་དང་གཏོང་བ་ཆེ་དང་སེམས་པ་ཆེ། །གོ་ཆ་ཆེན་པོ་བགོས་ཤིང་བདུད་ཀྱི་སྒྱུ་འདུལ་བ། །རྒྱུ་དེ་ཡིས་ནི་བྱང་ཆུབ་སེམས་དཔའ་ཞེས་བརྗོད་དོ། །ཞེས་སོ། །དབྱེ་ན་གསུམ་ལས། གཞི་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རང་བཞིན་མེད་པ་གཟུགས་བརྙན་དང་འདྲ་བར་རྟོགས་ཤིང་། (༧༨)གང་ཟག་གི་བདག་དང་། ཕྱི་གཟུང་བ་དང་། ནང་འཛིན་པའི་སེམས་ཏེ་ཆོས་ཀྱི་བདག་གིས་སྟོང་བས་བདག་གཉིས་ཀྱིས་སྟོང་པའི་ཚུལ་ཁོང་དུ་ཆུད་ནས། སྨོན་པ་དང་འཇུག་པའི་ངོ་བོ་བྱང་ཆུབ་ཀྱི་སེམས་གཉིས་སྐྱེད་པར་བྱེད་པའོ། །ལམ་ནི་ཆོས་སུམ་ཅུ་རྩ་བདུན་དང་སྤྱོད་པ་ཕ་རོལ་ཏུ་ཕྱིན་པ་དྲུག་གམ་བཅུ་ལ་སློབ་ཅིང་ས་བཅུ་སྦྱོང་བའོ། །བཅུ་ནི་ཕ་རོལ་ཏུ་ཕྱིན་པ་དྲུག་གི་སྟེང་དུ་ཐབས། སྟོབས། སྨོན་ལམ། ཡེ་ཤེས་ཀྱི་ཕ་རོལ་ཏུ་ཕྱིན་པ་སྟེ་ཤེས་རབ་ཀྱི་ཕ་རོལ་ཏུ་ཕྱིན་པའི་ནང་དུ་འདུའོ། །འབྲས་བུ་རྣམ་པ་ཐམས་ཅད་མཁྱེན་པའི་སངས་རྒྱས་བཅུ་གཅིག་ཀུན་ཏུ་འོད་ཀྱི་ས་ལ་བཞུགས་ནས་དོན་གཉིས་ལྷུན་གྱིས་གྲུབ་པ་སྟེ། ལེ་ལག་ལས། བདག་མེད་གཉིས་རྟོགས་ཕ་རོལ་ཕྱིན་རྫོགས་པའི། །ས་བཅུ་རིམ་གྱིས་བགྲོད་པའི་རྣལ་འབྱོར་པ། །སངས་རྒྱས་སར་འགྲོ་གོ་འཕང་ཐོབ་པའི་ལམ། །བདེན་པ་གཉིས་ཀྱིས་རབ་ཏུ་ཐོབ་པར་འགྱུར། །ཞེས་སོ། །དེ་ལ་བདེན་པ་གཉིས་ནི། དོན་དམ་པ་དང་། ཀུན་རྫོབ་ཀྱི་བདེན་པའོ། །ཀུན་རྫོབ་ཀྱི་བདེན་པ་ནི་སྣང་སྲིད་འཁོར་འདས་ཀྱི་ཆོས་སྣ་ཚོགས་སུ་སྣང་བ་ཡིན་ལ། དོན་དམ་པའི་བདེན་པ་ནི་སེམས་ཉིད་དང་ཆོས་ཉིད་སྤྲོས་པ་ཐམས་ཅད་ཉེ་བར་ཞི་ཞིང་བློས་བསམ་པའི་ཡུལ་ལས་འདས་པ་སྟེ། སྤྱོད་འཇུག་ལས། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་སོ། །དེའང་དབུ་མ་རང་རྒྱུད་པ་ནི་ཆོས་ཐམས་ཅད་ཀུན་རྫོབ་ཏུ་སྣང་ལ། དེ་ཡང་བརྟགས་ན་དོན་དམ་པར་རང་བཞིན་མེད་པར་འདོད་དེ། དབུ་མ་བདེན་གཉིས་ལས། ཀུན་རྫོབ་འདི་ལྟར་སྣང་བ་འདི། །རིག་པས་བརྟགས་ན་འགའ་མི་རྙེད། །མ་རྙེད་པ་ནི་དོན་དམ་སྟེ། །ཡེ་ནས་གནས་པའི་ཆོས་ཉིད་དོ། །ཞེས་སོ། །དབུ་མ་ཐལ་འགྱུར་བ་ནི་དཔྱད་རུང་མ་དཔྱད་རུང་དུས་གཏན་དུ་ཆོས་ཐམས་ཅད་སྤྲོས་པ་ཉེ་བར་ཞི་བ་ཁས་ལེན་ཐམས་ཅད་དང་བྲལ་བར་འདོད་དེ། འཇུག་པ་ལས། ཇི་ལྟར་ཁྱོད་ཀྱིས་གཞན་དབང་དངོས་འདོད་ལྟར། །ཀུན་རྫོབ་ཀྱང་ནི་བདག་གིས་ཁས་མ་བླངས། །ཞེས་པ་དང་། རྩ་བ་ཤེས་རབ་ལས། སྤྲོས་པ་རྣམས་ཀྱིས་མ་སྤྲོས་པ། །དེ་ནི་དེ་ཡི་མཚན་ཉིད་དོ། །ཞེས་པ་དང་། གང་གིས་རྟེན་ཅིང་འབྲེལ་བར་འབྱུང་། །འགག་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞི་བསྟན་པ། །རྫོགས་པའི་སངས་རྒྱས་སྨྲ་རྣམས་ཀྱི། །དམ་པ་དེ་ལ་ཕྱག་འཚལ་ལོ། །ཞེས་སོ། །ཀུན་རྫོབ་ལ་དབྱེ་ན་སྣང་ལ་དོན་བྱེད་མི་ནུས་པ་ཆུ་ཟླ་ལྟ་བུ་ལོག་པའི་ཀུན་རྫོབ་དང་སྣང་ལ་དོན་བྱེད་ནུས་པ་ཡང་དག་ཀུན་རྫོབ་ནམ་མཁའི་ཟླ་བ་ལྟ་བུ་སྟེ། བདེན་གཉིས་ལས། (༧༩)སྣང་དུ་འདྲ་ཡང་དོན་བྱེད་དག །ནུས་པའི་ཕྱིར་དང་མི་ནུས་ཕྱིར། །ཡང་དག་ཡང་དག་མ་ཡིན་པའི། །ཀུན་རྫོབ་ཀྱི་ནི་དབྱེ་བའང་བྱས། །ཞེས་སོ། །དཔྱད་ན་ཡང་དག་དང་ལོག་པ་གཉིས་ཀ་ཡང་སྣང་བར་མཉམ་ཞིང་། གཞིགས་ན་དོན་ལ་མ་གྲུབ་པས་མཉམ་པའི་ཕྱིར་འཁོར་འདས་སྣང་སྲིད་ཐམས་ཅད་ད་ལྟ་ཉིད་ནས་རྣམ་དབྱེ་མེད་པར་མཉམ་པ་ཉིད་དུ་གནས་སོ། །དོན་དམ་བློ་ལས་འདས་པས་ངོ་བོ་ལ་དབྱེ་བ་མེད་ཀྱང་བློས་ཅུང་ཟད་དབྱེ་ན། ཆོས་རྣམས་རང་གི་ངོ་བོ་ཉིད་ཀྱིས་སྟོང་པ་དེ་ནི་གཤིས་ཀྱི་དོན་དམ་ཡིན་ཏེ། མདོ་ལས། རབ་འབྱོར་འདི་ལྟ་སྟེ་དཔེར་ན་ནམ་མཁའི་ཁམས་ལ་འགའ་ཞིག་གིས་བསྔགས་པ་བརྗོད་ཅིང་། འགའ་ཞིག་གིས་བསྔགས་པ་མ་ཡིན་པ་བརྗོད་ན་གང་བའམ་བྲི་བ་མེད་དོ། །དེ་བཞིན་དུ་དེ་བཞིན་གཤེགས་པ་རྣམས་ཀྱིས་ཆོས་རྣམས་ཀྱི་ངོ་བོ་ཉིད་དོན་དམ་པ་གཅིག་པུ་ཞི་བའི་རང་བཞིན་བརྗོད་ཅིང་། གཞན་མུ་སྟེགས་བྱེད་ཀུན་ཏུ་རྒྱུ་རྣམས་ཀྱིས་རྟག་པ་ཐེར་ཟུག་པའི་ཆོས་སུ་བསྟན་ཡང་། ཡང་དག་པའི་དེ་བཞིན་ཉིད་ལ་གཉིས་སུ་གྱུར་པ་མེད་དོ། །ཞེས་སོ། །རྣལ་འབྱོར་པས་དོན་དེ་ཉིད་བསྒོམས་པས་སྤྲོས་པ་དང་བྲལ་བའི་བློ་སྐྱེས་པ་ནི་རྣམ་གྲངས་པའི་དོན་དམ་ཞེས་བྱ་སྟེ། བདེན་གཉིས་ལས། སྐྱེ་ལ་སོགས་པ་བཀག་པ་ཡང་། །ཡང་དག་པ་དང་མཐུན་ཉིད་བཞེད། །སྐྱེ་མེད་སྤྲོས་ཀུན་ཞི་བ་ལ། །དོན་དམ་པ་ཡི་བརྡའ་མཛད་དོ། །ཞེས་སོ། །འདི་ཉིད་བློའི་ཡུལ་ཡིན་པས་ཀུན་རྫོབ་བདེན་པ་མཚན་ཉིད་པ། དོན་དམ་བདེན་པ་བཏགས་པ་བར་བཤད་དོ། །
ལྔ་པ་གསང་སྔགས་ཀྱི་ཐེག་པ་ལ་གཉིས་ཏེ། ཕྱི་པ་དང་། ནང་པའོ། །ཕྱི་པ་ལ་གསུམ་ལས། བྱ་བའི་རྒྱུད་ལ་གཉིས་ལས། ངེས་ཚིག་ནི་ཀྲཱི་ཡ་སྟེ་ཁྲུས་དང་གཙང་སྦྲ་གཙོ་བོར་སྟོན་པས་བྱ་བའི་རྒྱུད་ཅེས་སོ། །དབྱེ་ན་གསུམ་ལས། གཞི་ཆོས་རྣམས་ངོ་བོ་ཉིད་མེད་པར་རྟོགས་ནས་ལྷ་ཡེ་ཤེས་སེམས་དཔའ་རྒྱལ་པོ་ལྟ་བུར་ལྟ་བ་ལས་དངོས་གྲུབ་འདོད་པའི་གཞི་བྱེད་དོ། །ལམ་ནི་ལྷ་བསྐྱེད་ནས་མཆོད་པ་འབུལ་བའི་དེ་ཁོ་ན་ཉིད་ལ་སོགས་པས་དཀའ་སྤྱད་གཙང་སྦྲའི་རང་བཞིན་ལ་བརྟེན་ནོ། །འབྲས་བུ་ནི་མི་ཚེ་བཅུ་དྲུག་ན་སངས་རྒྱས་ཀྱི་བྱང་ཆུབ་ཐོབ་པར་འདོད་དེ། ཀུན་བྱེད་ལས། ཀྲཱི་ཡས་བདག་དང་ལྷ་གཉིས་རྗེ་ཁོལ་ཚུལ། །མི་ཚེ་བཅུ་དྲུག་འབད་པས་གྲོལ་བར་འདོད། །ཅེས་སོ། །སྤྱོད་པའི་རྒྱུད་ལའང་གཉིས་ལས། ངེས་ཚིག་ཨུ་པ་ཡ་སྟེ་སྤྱོད་པ་ཀྲཱི་ཡ་དང་མཐུན་ཞིང་སྒོམ་པ་ཡོ་ག་དང་མཐུན་པས་གཉིས་བཅས་ཀྱི་ཐེག་པ་ཞེས་བྱའོ། །དབྱེ་ན་གསུམ་ལས་གཞི་ངོ་བོ་ཉིད་མེད་པའི་ཤེས་རབ་དང་བདག་དང་ལྷ་གཉིས་དམ་ཚིག་པ་དང་ཡེ་ཤེས་པའི་ཚུལ་དུ་མཉམ་པོར་འདོད་པའི་(༨༠)ཐབས་ལས་དངོས་གྲུབ་འདོད་པ་རྟོགས་པའོ། །ལམ་ནི་དེ་ལྟར་བསྒོམ་ཞིང་ཀྲཱི་ཡ་ལྟར་གཙང་སྦྲ་སྤྱོད་པས་མི་ཚེ་བདུན་ན་གྲོལ་བར་འདོད་པ་ནི་འབྲས་བུ་སྟེ། སྔ་མ་ལས། ཨུ་པས་བདག་དང་ལྷ་གཉིས་མཉམ་པོར་མཐོང་། །གྲོགས་པོའི་ཚུལ་གྱིས་དངོས་གྲུབ་སྟེར་རེ་བ། །མི་ཚེ་བདུན་ན་གྲོལ་བའི་འབྲས་བུ་འདོད། །ཅེས་སོ། །རྣལ་འབྱོར་གྱི་རྒྱུད་ལའང་གཉིས་ལས། ངེས་ཚིག་ནི་ཡོ་ག་སྟེ། སེམས་ཀྱི་སྒོམ་པ་གཙོ་ལ་ལྟ་སྤྱོད་གཉིས་གྲོགས་སུ་འདོད་པའོ། །དབྱེ་ན་གསུམ་ལས། གཞི་ནི་ངོ་བོ་ཉིད་མེད་པའི་ཤེས་རབ་དང་། བདག་ལྷར་གསལ་བ་ལ་ཡེ་ཤེས་པ་ཆུ་ལ་ཆུ་བཞག་པ་ལྟར་གནས་པས་གཞི་བྱེད་པའོ། །ལམ་ནི་དེ་ལྟར་བསྒོམ་ཞིང་གཙང་སྦྲ་ཀུན་ཏུ་སྤྱོད་པ་གྲོགས་སུ་ལྡན་པས། འབྲས་བུ་མི་ཚེ་གསུམ་ན་སྟུག་པོ་བཀོད་པའི་སར་གྲོལ་བར་འདོད་དེ། སྔ་མ་ལས། ཡོ་ག་སྟུག་པོ་བཀོད་འདོད་པ། །མི་ཚེ་གསུམ་ན་གྲོལ་བར་འདོད། །ཅེས་སོ། །
གསང་སྔགས་ནང་པ་ལ་ཡང་གསུམ་ལས། རྣལ་འབྱོར་ཕའི་རྒྱུད་ལའང་གཉིས་ལས། ངེས་ཚིག་ནི་མཧཱ་ཡོ་གའི་སྒྲ་ལས་ཐབས་ཤེས་ཀྱི་རྣལ་འབྱོར་བསྐྱེད་པ་དང་རླུང་གཙོ་བས་གྲོལ་བར་འདོད་དོ། །དབྱེ་ན་གསུམ་ལས། གཞི་ཡེ་ནས་དག་པས་ལྷའི་དཀྱིལ་འཁོར་དང་རླུང་གི་བྱེད་པ་ལ་སོགས་པའོ། །ལམ་ནི་དེ་དག་བསྒོམ་པའོ། །འབྲས་བུ་ནི་ཚེ་འདི་ཉིད་དུ་གྲོལ་བར་འདོད་པ་སྟེ། ཡེ་ཤེས་རོལ་པ་ལས། བསྐྱེད་དང་རྫོགས་པའི་རིམ་པ་ལས། །ཡེ་ཤེས་རླུང་གི་ལས་བྱེད་ཅིང་། །ནམ་མཁའི་འཇོ་བ་རབ་རྫོགས་པས། །ཚེ་གཅིག་གིས་ནི་རབ་གྲོལ་ལོ། །ཞེས་སོ། །ཤེས་རབ་མའི་རྒྱུད་ལའང་གཉིས་ལས། ངེས་ཚིག་ནི་ཨ་ནུ་ཡོ་ག་སྟེ་ཤེས་རབ་རྫོགས་པའི་རིམ་པ་དབྱིངས་དང་ཡེ་ཤེས་གཉིས་མེད་དུ་འདོད་པའོ། །དབྱེ་ན་གསུམ་ལས། གཞི་ཡེ་ནས་དག་པ་ལྷའི་རང་བཞིན་དབྱིངས་དང་ཡེ་ཤེས་གཉིས་སུ་མེད་པའོ། །ལམ་དེ་ཉིད་བསྒོམ་པའོ། །འབྲས་བུ་ཚེ་འདིར་བདེ་བ་ཆེན་པོའི་སྐུ་མངོན་དུ་བྱེད་པ་སྟེ། ཐིག་ལེ་མཆོག་གི་རྒྱུད་ལས། འོད་གསལ་བ་ཡི་སེམས་ཉིད་ནི། །དབྱིངས་དང་ཡེ་ཤེས་གཉིས་མེད་པར། །བདེ་བ་ཆེ་དེ་སུ་སྒོམ་པ། །འབྲས་བུ་ཚེ་འདིར་རྫོགས་སངས་རྒྱས། །ཞེས་སོ། །གཉིས་སུ་མེད་པའི་རྒྱུད་ལའང་གཉིས་ལས། ངེས་ཚིག་ནི་ཨ་ཏིའི་སྒྲ་ལས་སྐྱེ་བ་མེད་པའི་ངོ་བོ་ཉིད་དམ་ཀུན་གྱི་སྙིང་པོ་ལ་འཇུག་པས་ཆོས་ཐམས་ཅད་ཡེ་ནས་སངས་རྒྱས་པའི་དོན་ཏོ། །དབྱེ་ན་གསུམ་ལས། གཞི་སྣང་སྲིད་འཁོར་འདས་ཀྱི་ཆོས་སོ་ཅོག་ཡེ་ནས་སངས་རྒྱས་པའི་རང་བཞིན་ནོ། །ལམ་བསྐྱེད་རྫོགས་གཉིས་སུ་མེད་པ་བླང་དོར་རེ་དོགས་ལས་འདས་པར་བྱེད་པའོ། །འབྲས་བུ་ལྷུན་རྫོགས་ཀུན་ཏུ་བཟང་པོའི་ས་ལ་ད་ལྟ་(༨༡)ཉིད་ནས་གནས་པ་མཐར་ཕྱིན་པར་བྱེད་པ་སྟེ་ཐེག་པ་འདིར་ཐམས་ཅད་རྫོགས་པ་ཉིད། ལེ་ལག་ལས། མཉམ་ཉིད་དོན་རྟོགས་རང་རིག་རྒྱལ་པོ་དང་། །བླ་མེད་དོན་རྟོགས་ཐབས་ཆེན་འདི་དག་ཏུ། །རྒྱ་མཚོ་ཆེན་པོར་ཆུ་ཀླུང་ཀུན་འབབ་ལྟར། །རྣམ་ཐར་ཐེག་པ་བསམ་ཡས་མ་ལུས་འདུས། །ཞེས་སོ། །དེ་དག་གིས་སྤྱིའི་དོན་བཤད་ཟིན་ཏོ། །
༈ གཉིས་པ་གཞུང་གི་དོན་ལ་གསུམ་སྟེ། ཐེག་པའི་དབྱེ་བ། གང་གི་གཉེན་པོར་གསུངས་ཚུལ། དེ་དག་གི་དོན་བཤད་པའོ། །
དང་པོ་ནི། སྤྲུལ་པ་སྐུའི་གསུང་རབ་ཕུན་སུམ་ཚོགས་པ་ཐ༵མས་ཅ༵ད་ཀྱ༵ང་ཐེག་པ་ལྔར་བསྟན་པ་འདི༵་ལྟ༵་སྟེ༵། སེམས་ཅན་རྣམས་འདུ༵ལ་བའི༵་དབ༵ང་གི༵ས་བསམ་གཏན་བཞི་དང་གཟུགས་མེད་པ་བཞི་དང་། དགེ་བ་བཅུ་བསྟན་པ་གཟུགས་མེད་དང་གཟུགས་དང་འདོད་པའི་ཁམས་ཀྱི་ལྷའི༵་ཐེག་པ་དང༵་དགེ་བ་བཅུ་ཉིད་མིའི༵་ཐེག༵་པ༵་དང༵་། བདེན་པ་བཞིའི་རང་བཞིན་སྤོང་ལེན་དུ་བྱེད་པའི་དམིགས་ཡུལ་ཆོས་དང་ཆོས་སུམ་ཅུ་རྩ་བདུན་བསྒོམས་པས་དགྲ་བཅོམ་མངོན་དུ་བྱེད་པ་ཉན༵་ཐོས༵་ཀྱི༵་ཐེག༵་པ༵་དང༵་། རྟེན་འབྲེལ་དང་ལམ་ལྔ་བསྒོམས་པས་ཡིད་བཞིན་བདེ་བ་མཆོག་གི་སར་བགྲོད་པ་རང༵་ས༵ངས་རྒྱས༵་ཀྱི༵་ཐེག༵་པ༵་དང༵་། བདག་མེད་གཉིས་དང་ཕ་རོལ་ཏུ་ཕྱིན་པ་བཅུས་སངས་རྒྱས་མངོན་སུམ་དུ་བྱེད་པ་བྱང༵་ཆུབ༵་སེ༵མས་དཔའི༵་ཐེག༵་པ༵་དང༵་། ཆོས་ཐམས་ཅད་དཀྱིལ་འཁོར་གསུམ་དུ་ཤེས་ཤིང་ལམ་ཟབ་མོ་བསྒོམས་པས་ཚེ་འདིར་གྲོལ་བ་གས༵ང་སྔག༵ས་བླ༵་ན༵་མེ༵ད་པ༵འི་ཐེ༵ག་པ༵ས་ཞེས་སོ། །གཉིས་པ་ནི། འགྲོ་བའི་རྒྱུད་ཀྱི་མ༵་རི༵ག་པ༵འི་རྣ༵མ་པ༵ར་རྟོག༵་པ༵ས་བསྐྱེ༵ད་པའི༵་ཉོན༵་མོ༵ངས་པ༵་འདོད་ཆགས་ཞེ་སྡང་གཏི་མུག་ཆ་མཉམ་པ་ཉི་ཁྲི་ཆིག་སྟོང་སྟེ་ཉོན་མོངས་པ་སྟོ༵ང་ཕྲག༵་བརྒྱད༵་ཅུ༵་རྩ༵་བཞི༵འི་གཉེན༵་པོ༵ར། འདུལ་བ་མདོ་སྡེ་མངོན་པ་སྡེ་སྣོད་གསུམ་ཆ་མཉམ་པ་སྔགས་ཀྱི་སྡེ་སྣོད་ཉི་ཁྲི་ཆིག་སྟོང་ཆིག་སྟོང་སྟེ་ཆོ༵ས་ཀྱི་སྒོ་མོ་སྟོང༵་ཕྲག༵་བརྒྱ༵ད་ཅུ༵་རྩ༵་བཞི༵་རང་བྱུང་གི་ཡེ་ཤེས་ལས་འཕྲོས་པའི་སྟོན་པ་རྣམས་ཀྱིས་གདུལ་བྱའི་སྣང་བ་དང་མཐུན་པར་སྔར་ཡང་གསུ༵ངས་སོ༵། །ད་ལྟར་ཡང་ཕྱོགས་བཅུ་མཐའ་ཡས་མུ་མེད་པའི་འཇིག་རྟེན་ན་གསུང་ངོ་། །མ་འོངས་པ་ནའང་གསུང༵་བ༵ར་འགྱུ༵ར་རོ༵། །
གསུམ་པ་ནི། ཆོས་ཀྱི་རྣམ་གྲངས་ཐེག་པ་ལྔར་གསུངས་པ་དེ༵་ད༵ག་ཐ༵མས་ཅ༵ད་ཀྱ༵ང་། ཕྱི་གཟུང་བ་རགས་པར་འདོད་པ་ཐ་མལ་པའི་བློ་ལས་ཁྱད་པར་དུ་འཕགས་པས་རྡུལ་ཕྲན་ཆ་མེད་དོན་དམ་པའི་བདེན་པར་ཤེས་པ་གཟུ༵ང་བ༵་བདག་མེད་པ་དང༵་ནང་གི་སེམས་ཀྱང་སྐད་ཅིག་མ་སྟེ། དེ་ཡང་བདག་མེད་པར་ཤེས་པས་ཕུང་པོ་ལ་བདག་ཏུ་འཛི༵ན་པ༵འི་གཉེན་པོ་བྱེད་པ་ཉན་ཐོས་ཀྱི་ཐེག་པ་དང་། ཕྱི༵་སྣང་བའི་ཡུལ་རྡུལ་ཕྲན་ཆ་མེད་དུའང་དོན་དམ་པར་མ་གྲུབ་ཅིང་ཀུན་རྫོབ་ཏུ་རྫིང་བུར་ཤར་(༨༢)བའི་གཟུགས་བརྙན་དང་འདྲ་བར་རྟོགས་པས་ཕྱིའི་རྟེན་ཅིང་འབྲེལ་བར་འབྱུང་བ་རྫུན་པར་ཤེས་ཤིང་། མ་རིག་པ་ཡོད་ན་འདུ་བྱེད་ནས་རྒ་ཤིའི་བར་དུ་འབྱུང་ཞིང་། མ་རིག་པ་ལོག་ན་རྒ་ཤིའི་བར་དུ་འཁོར་བའི་འཁོར་ལོ་ལྡོག་པར་ཤེས་ནས། གང་ཟག་གི་བདག་དང་། ཕྱི་སྣང་བ་ཆོས་ཀྱི་བདག་བྱེད་པོ་མེད་པར་རྟོགས་པ་ནི་ན༵ང་གི༵་རྟེན༵་ཅི༵ང་འབྲེལ༵་བ༵ར་འབྱུ༵ང་བ༵་བསྒོམས་པས་ཆོས་ཀྱི་ཕྱེད་ཕྱི་ཡུལ་ལ་བདག་ཏུ་འཛི༵ན་པའི་གཉེན་པོ་བྱེད་པ་རང་སངས་རྒྱས་ཀྱི་ཐེག་པ་དང་། དེ་ལྟར་བདག་མེད་ཕྱེད་དང་གཉིས་ཀྱི་སྟེང་དུ་སྒོམ་བྱེད་གཉེན་པོའི་བློ་ནང་ཆོས་ཀྱི་བདག་ཏུ་འཛི༵ན་པ༵་སེམས་འཁྲུ༵ལ་པ་ཡུལ་དུ་བྱེད་པ༵་ལ༵ས། བྱང་ཆུབ་སེམས་དཔས་དེ་ཡང་མ་གྲུབ་པར་རྟོགས་པའི་ཆ་ནས་ཁྱད་པར་དུ་འཕགས་པར་འདོད་པ་བདག་མེད་གཉིས་མངོན་སུམ་དུ་བྱེད་པ་བྱང་ཆུབ་སེམས་དཔའི་ཐེག་པ་དང་། རྒྱུ་ལ༵ས་དཀར་ནག་དང༵་ལ༵ས་ཀྱི༵་འབྲ༵ས་བུ༵་སོ་སོར་སྨིན་པ་ཆུད༵་མི༵་ཟ༵་བ༵ར་སྟོན་པ་ལྷ་དང༵་མིའི་ཐེག་པ་སྟེ། ལས་བརྒྱ་པ་ལས། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ནས་ལུས་ཅན་རྣམས་ལ་ནི། །འབྲས་བུ་ཉིད་དུ་སྨིན་པར་འགྱུར། །ཞེས་པ་ལྟར་རོ། །དེ་ནི་ཕྱི་རོལ་པ་ལས་འབྲས་མེད་པར་འདོད་པ་ལས་ཁྱད་པར་དུ་འཕགས་སོ། །དེའང་མི་དང་ལྷའི་ཐེག་པ་ལ་བརྟེན་ནས་ཐར་པ་བསྒྲུབ་དགོས་པར། རིན་ཅེན་འཕྲེང་བ་ལས། མི་ཡི་ཆོས་ལུགས་ལེགས་སྤྱད་ན། །ལྷ་ཡུལ་བགྲོད་པ་ཐག་མི་རིང་། །ལྷ་ཡི་ཆོས་ལུགས་ལེགས་སྤྱད་ན། །རིམ་གྱིས་ཐར་པ་གམ་ན་འདུག །ཅེས་པ་དང་། འཇིག་རྟེན་པ་ཡི་ཡང་དག་ལྟ། །ཆེན་པོ་སུ་ལ་ཡོད་གྱུར་ན། །དེ་ནི་ཚེ་རབས་སྟོང་དུ་ཡང་། །ངན་འགྲོར་འགྲོ་བར་མི་འགྱུར་རོ། །ཞེས་པ་ལྟར་རོ། །དངོས་པོ་དང་མཚན་མར་འཛིན་པའི་ལ༵ས་ད༵ང་ལ༵ས་ཀྱི༵་འབྲ༵ས་བུ༵ས་ལུས་ལ་མི༵་གོ༵ས། ང༵ག་ལ༵་གོ༵ས་པ༵ར་མི༵་འགྱུ༵ར། སེམས་ལ་གོ༵ས་སུ༵་མེ༵ད་པ༵་སྒོ་གསུམ་ཡེ་ནས་དཀྱིལ་འཁོར་གསུམ་དུ་ཤེས་པས་ཐ་མལ་གྱི་སྣང་བ་མེད་དེ། གནས་ལུགས་སྟོང༵ས་པ༵འི་མཐ༵ར་ཐུ༵ག་པ་རྟོགས་པ་ནི་བླ་ན་མེད་པ་གསང་སྔགས་ཀྱི་ཐེག་པ་མཆོག་གོ༵། །
གཉིས་པ་གདུལ་ཡུལ་འགྲོ་བ་དང་ཆོས་ཀྱི་རང་བཞིན་བྱེ་བྲག་ཏུ་བཤད་པ་ལ་གཉིས་ཏེ། འཁོར་བའི་རང་བཞིན་ཆོས་ཉིད་དུ་བསྟན་པ་དང་། ཆོས་ཀྱི་རང་བཞིན་བརྗོད་དུ་མེད་པར་བསྟན་པའོ། །དང་པོ་ལ་དྲུག་སྟེ། དོན་གྱི་འབྲེལ་དགོད་པ། མ་རིག་པས་འཁོར་བར་སྣང་ཚུལ། སྣང་དུས་ཉིད་ནས་རང་བཞིན་ཆོས་ཉིད་དུ་བསྟན་པ། འཁྲུལ་སྣང་སེམས་ཀྱི་ཆོ་འཕྲུལ་དུ་བསྟན་པ། འཁྲུལ་རྟོག་གཞི་མེད་རྩ་བ་དང་བྲལ་བ། རྣམ་རྟོག་ཡེ་ཤེས་ཀྱི་རོལ་པར་བསྟན་པའོ། །
དང་པོ་ནི། འདུལ་བ་བཞིའི་ཆོ་འཕྲུལ་(༨༣)དུ་བསྟན་པ་དེ༵་ན༵ས་རང་སྣང་གི་དེ༵་བཞི༵ན་གཤེ༵གས་པ༵་ཐམ༵ས་ཅ༵ད་ཀྱི༵ས་ཆེ༵ད་དུ༵་བརྗོ༵ད་པ༵་འདི༵་བརྗོ༵ད་དོ༵། །གཉིས་པ་ནི་ཕྱི་ནང་གི་ཆོས་མ་དག་པ་སྣོད་བཅུད་ཀྱི་རྣམ་པར་སྣང་བ་ཇི༵་སྙེད༵་པས་བསྡུས་པའི་འཇིག༵་རྟེན༵་འཁྲུ༵ལ་པ༵འི་ཆོ༵ས་འདི་ཐམས་ཅད་རྨི་ལམ་དང་འདྲ་སྟེ། གནས་ལུགས་ཡེ་ནས་སངས་རྒྱས་པའི་ངོ་བོར་མ༵་རིག༵་པས་གཉིད་འཐིབས་པོ་ཆེས་ནོན་དེ། གཉིས་སུ་རྟོག༵་པ༵འི་གཟུང༵་འཛི༵ན་གྱིས༵་རྐྱེན་བྱས་པས། ཕྱི༵་རོལ་དཀར་དམར་སྣ་ཚོགས་ཀྱི་ཡུལ་དང་ན༵ང་འགྲོ་བའི་རྣམ་པ་ཚད་མེད་པ་སྣང་སྟེ། འཁྲུལ་པའི་རྒྱུ་ལས་འཁྲུལ་སྣང་གི་འབྲས་བུ་ཤིང་རྟའི་འཕང་ལོ་ལྟར་བྱུང་བའི་རྟེ༵་འབྲེ༵ལ་ཕྱི་ནང་གཉི༵ས་སུ༵་སེམས་ཅན་འཁོ༵ར་ཏེ། ཡུལ་དང་སྣང་བ་མི༵་མཐུ༵ན་པའི་བྱེ་བྲག་བདེ༵་བ་དང་སྡུ༵ག་བསྔལ་སྣ་ཚོགས་མྱོང༵་ཞིང་གཏན་ཏུ་འཁོར་བའི་གྲོང་ཁྱེར་གཅིག་ནས་གཅིག་ཏུ་བརྒྱུད་ཅིང་སྣ༵ང་བ༵ར་འགྱུ༵ར་རོ། །
གསུམ་པ་ནི། དེ་ལྟར་སྣང་ཡང་འཁོར་བའི་ར༵ང་བཞི༵ན་ཡེ་ནས་གྲོལ་བའི་ཆོས་ཉིད༵་མཉམ་རྫོགས་ཆེན་པོ་ལ༵ས་ཉམ༵ས་པ༵་མེ༵ད་དེ། རང་བཞིན་སྟོང་པ་ཉིད་ཡིན་པའི་ཕྱིར་རོ། །དེ་སྐད་དུ་ཡང་ཏིང་འཛིན་རྒྱལ་པོ་ལས། རྒྱལ་བའི་སྲས་པོ་དངོས་པོ་རྣམ་པར་འཇིག །སྲིད་པ་ཐམས་ཅད་ཡོང་ཡེ་སྟོང་པ་སྟེ། །ཉི་ཚེའི་སྟོང་པ་མུ་སྟེགས་ཅན་རྣམས་དང་། །མཁས་པ་བྱིས་པ་དག་དང་རྩོད་མི་བྱེད། །ཅེས་སོ། །དེའང་འཁོར་བར་སྣང་དུས་ཉིད་ནས་དོན་ལ་མ་གྲུབ་པས་ཡང༵་ད༵ག་པའི་གནས་ལུགས་ཡིན་ལ། ཀུན་རྫོབ་སྒྱུ༵་མ༵འི་ཚུལ༵་ཙམ་དུ་གཉི༵ས་སུ༵་སྣང་བ་ཉིད་དཔྱད་ན་རྨི་ལམ་གྱི་སྣང་བ་དང་རྨི་བ་པོ་རང་གི་སེམས་གཉིས་ཐ་དད་དུ་མ་གྲུབ་པ་བཞིན་དུ། འཁོར་མཁན་བད༵ག་ད༵ང་འཁོར་འདས་བད༵ག་གི༵ར་གཟུང་བའི་ཡུལ་གཞ༵ན་མེ༵ད་དེ༵། སེམས་ཉིད་དེ་ལྟར་སྣང་བའི་ཕྱིར་རོ། །དེ་སྐད་དུའང་ལང་ཀར་གཤེགས་པ་ལས། དོན་ཡོད་མ་ཡིན་སེམས་ཉིད་ནི། །ཕྱི་རོལ་དོན་མཐོང་ལོག་པ་ཡིན། །བག་ཆགས་ཀྱིས་ནི་དཀྲུགས་པའི་སེམས། །དོན་དུ་སྣང་བ་རབ་ཏུ་འབྱུང་། །ཞེས་སོ། །དེས་ན་འཁོར་བ་སྣང་དུས་རྣམ༵་པར་དག༵་ཅིང་རང་སྣང་དབྱི༵ངས་སུ་རྣམ་པར་དག་པའི་ཆོས་ཉི༵ད་དུ་ཡེ་ནས་ཚུ༵ལ་གཅི༵ག་པས་ཆོས་སྐུ་ལྷུན་རྫོགས་ཀྱི་དགོངས་པ་འཁོར་འདས་ཐམས་ཅད་ལ་ཡེ་ཁྱབ་ཆེན་པོར་ཕྱམ་གཅིག་གོ༵། །དེ་སྐད་དུའང་རྩ་བ་ཤེས་རབ་ལས། འཁོར་བ་དང་ནི་མྱ་ངན་འདས། །ཁྱད་པར་ཅུང་ཟད་ཡོད་མ་ཡིན། །འདི་གཉིས་ཀྱི་ནི་ཁྱད་པར་དག །ཤིན་ཏུ་ཕྲ་བའང་ཡོད་མ་ཡིན། །ཞེས་པ་དང་། མངོན་རྟོགས་རྒྱན་ལས། སྲིད་དང་ཞི་བ་མཉམ་ཉིད་ངང་། །ཞེས་སོ། །
བཞི་པ་ནི། བད༵ག་ད༵ང་བད༵ག་གི༵ར་འཛིན་པས་རང་དང་གཞ༵ན་ཐ་དད་པ་རྣམ༵ས་སུ་བློས་གཟུང་བ་ནི༵་རང་གི་ལོ༵ག་པར༵་རྟོག་པ་ཙམ༵་ཉིད༵་ལས༵་དོན་ལ་གྲུབ་པ་མེད་དེ། ལོག་པར་རྟོག་པ་དེ་ཉིད་བཙལ་ན་ཕྲ༵་ཞི༵ང་ཕྲ་(༨༤)བའི་ཆོས་སུའང་མེད་པས། དེ་ལས་ཐ་དད་པའི་ཆོས་ཉིད་ཟ༵བ་པ༵འ༵ང་ལོགས་སུ་ཡོ༵ད་པ་མ༵་ཡི༵ན་ཏེ། ལོག་རྟོག་ཉིད་ཆོས་ཉིད་དུ་གནས་པའི་ཕྱིར་རོ། །དེ་སྐད་དུའང་སློབ་དཔོན་པདྨའི་སངས་རྒྱས་མཉམ་སྦྱོར་ལས། རྟོག་པ་ཆོས་ཉིད་ཡིན་ཤེས་ན། །ཆོས་དབྱིངས་གཞན་ནས་བསྒོམ་རྒྱུ་མེད། །ཅེས་པ་དང་། བསྐྱེད་རྫོགས་ལས་ཀྱང་། རྣམ་པར་རྟོག་པ་བགེགས་ཉིད་དེ། །བགེགས་ནི་རང་གི་སེམས་ལས་བྱུང་། །ཡེ་ནས་སེམས་ཉིད་དག་ཤེས་ན། །བགེགས་ཞེས་བྱ་བ་གཞན་ན་མེད། །ཅེས་པ་དང་མཐུན་ནོ། །དེའང་འཁོར་བའི་གཟུང་འཛིན་དུ་སྣང་བ་འདི་དག་ཡུལ་ལོག་རྟོག་གི་སྣང་བ་རྨི་ལམ་ལྟ་བུ་ཉིད༵་ལ༵་ཡུལ་ཅན་རང་གི་ལོག་རྟོག་ཉིད༵་སྤྱོད༵་དེ༵་འཁྲུལ་པར་སྣང་ཡང་། དོན་ལ་སེམས་ཉིད་དེ་བཞིན་ཉིད་གནས་ལུགས་ལས་གཞ༵ན་དུ༵་གཡོ༵་བ༵་ཅི༵་ཡ༵ང་མེ༵ད་དེ། འབྱུང་བཞིའི་འཕོ་འགྱུར་ནམ་མཁའི་ངང་ལས་མ་གཡོས་པའམ་དགག་སྒྲུབ་ཀྱི་རྣམ་རྟོག་སེམས་ཉིད་ཀྱི་ངང་ལས་མ་གཡོས་པ་བཞིན་ནོ། །དེ་སྐད་དུ་ཡང་ཀུན་བྱེད་ལས། ཇི་ལྟར་སྣང་བ་དེ་བཞིན་ཉིད་དུ་གཅིག །འདི་ལ་སུ་ཡང་འཆོས་པར་མ་བྱེད་ཅིག །མ་བཅོས་མཉམ་པའི་རྒྱལ་པོ་དེ་ལས་ནི། །མི་རྟོག་ཆོས་སྐུའི་དགོངས་པ་ལྷུན་གྱིས་གྲུབ། །ཅེས་སོ། །
ལྔ་པ་ནི། དེ་ལྟར་གཟུང་འཛིན་འཁྲུལ་པར་སྣང་བའི་ལོ༵ག་རྟོག༵་གི་རྒྱུ༵་དང་དེས་བསྐྱེད་པའི་འབྲ༵ས་བུ་སྐད་ཅིག་སྔ་ཕྱི་རིམ་ཅན་དུ་འབྲེལ་བར་སྣང་བའི་རྒྱུན༵་ཉིད༵་ཀྱང༵་བརྟགས་ན་མེད་དེ། རིག་པའི་ངོ་བོ་ལ་གཞི༵་དང་རྩ༵་བ་མེ༵ད་པའི་ཆོས་དབྱི༵ངས་གདོད་ནས་དག་པའི་གནས་ལུགས་སུ་གནས་ཤིང་། སྣ་ཚོགས་སུ་འཆར་དུས་ཉིད་ནའང་རྒྱུན་དུ་མེད་དེ་སྐ༵ད་ཅི༵ག་མ༵་སིལ་བུའི་རང་བཞིན་ནོ། །དེའང་འདས་པའི་སྐད་ཅིག་མ་འགགས། མ་འོངས་པ་མ་རྙེད། ད་ལྟའི་སྐད་ཅིག་མ་ཡང་བརྟགས་ན་ཕྱི་ནང་བར་གསུམ་ན་མེད་པས་སྐད་ཅིག་མ་ཙམ་དུ་ཡང་མེད་པའི་ཕྱིར་རིག་པ་ཡེ་ནས་རྣ༵མ་པ༵ར་ད༵ག་པ༵འི་ཆོས་དབྱི༵ངས་ནམ་མཁའ་ལྟ་བུའི་ངོ་བོ་ཉིད༵་དུ་གནས་པའི་ཚུལ༵་ཏེ། དཀོན་མཆོག་བརྩེགས་པ་ལས། འོད་སྲུངས་སེམས་དེ་ནི་ཀུན་ཏུ་བཙལ་ན་ནང་ན་ཡང་ཡང་དག་པར་རྗེས་སུ་མི་མཐོང་། ཕྱི་རོལ་ན་ཡང་ཡང་དག་པར་རྗེས་སུ་མི་མཐོང་། དེ་གཉིས་ཀའི་བར་ན་ཡང་ཡང་དག་པར་རྗེས་སུ་མི་མཐོང་སྟེ་ནམ་མཁའ་ལྟ་བུའོ། །ཞེས་སོ། །
དྲུག་པ་ནི། སྣང་སེམས་ཐམས་ཅད་ཀྱི་ངོ་བོ་ཡེ་ནས་སངས་རྒྱས་པའི་ཡུལ་གདོད་ནས་དག་པའི་ཆོས་ཉི༵ད་ལ༵་ཡུལ་ཅན་བློའི་རོལ་པ་སྣ་ཚོགས་སུ་འཆར་ཞིང་དབང༵་བསྒྱུར༵་བ་ཐམས་ཅད་རང་སྣང་བའི་ཡེ་ཤེས་ཉི༵ད་ཡེ་ཤེས་ཉི༵ད་ལ་སྤྱོད༵་པའི་ཕྱིར༵་ན། བད༵ག་ད༵ང་གཞ༵ན་དུ༵་འཛིན་པར་བྱེད་པ་དང་དགག་སྒྲུབ་དུག་ལྔར་ཤར་བའི་རྟོག༵་པའི༵་རྒྱུན༵་ཐམས་ཅད་ཡེ་ཤེས་(༨༥)ཀྱི་རོལ་པ་ཡིན་པས་ཡེ་ནས་རྣ༵མ་པར་ད༵ག་པ་བླ༵་ན་མེ༵ད་པའི་ཐེ༵ག་པའི༵་མཆོ༵ག་ཡིན་ཏེ། ཀུན་བྱེད་ལས། འདོད་ཆགས་ཞེ་སྡང་གཏི་མུག་ཀྱང་། །བྱང་ཆུབ་ཆེན་པོའི་ལམ་ལས་བྱུང་། །ཀུན་སྤྱོད་ཡོན་ཏན་རྣམ་ལྔ་ཡང་། །ཆོས་ཉིད་དབྱིངས་ཀྱི་རྒྱན་ཞེས་གསུངས། །ཞེས་པ་དང་། མ་བསམས་མ་སྦྱོང་ཆོས་བཞིན་དུ་། །རྣམ་རྟོག་ཉིད་ལས་ཡེ་ཤེས་སྐྱེ། །ཞེས་པ་དང་། ཇི་ལྟར་དྲན་རིག་རྟོག་པ་ཐམས་ཅད་ཀུན། །མ་བཅོས་ཀུན་བྱེད་ཉིད་ཀྱི་དོན་དུ་རིག །ཅེས་སོ། །
གཉིས་པ་ཆོས་ཀྱི་རང་བཞིན་བརྗོད་དུ་མེད་པར་བསྟན་པ་ལ་དྲུག་སྟེ། ཐེག་པ་བཞིས་ངེས་པར་འབྱུང་བའི་འབྲས་བུ་བླ་ན་མེད་པའི་ཐེག་པར་བསྟན་པ། ཆོས་ཐམས་ཅད་རང་བཞིན་མེད་པའི་ཆོ་འཕྲུལ་དུ་བསྟན་པ། སྟོན་པ་དང་བསྟན་པ་འཕོ་འགྱུར་མེད་ཀྱང་གདུལ་བྱའི་དོན་དུ་གང་ལ་གང་འདུལ་དུ་བསྟན་པ། རང་བཞིན་གསང་བའི་སྙིང་པོ་ཐེག་པ་ཀུན་གྱི་འཕྲོ་གཞིར་བསྟན་པ། དེ་ཉིད་མདོ་རྒྱུད་ཀུན་གྱི་སྤྱི་འགྲེལ་དུ་བསྟན་པ། དེ་ཐམས་ཅད་མིང་ཚིག་བཏགས་པ་ཙམ་ལས་གནས་ལུགས་གང་དུ་ཡང་མ་གྲུབ་པར་བསྟན་པའོ། །
དང་པོ་ནི། སྔར་བསྟན་པའི་ཐེ༵ག་པ༵་བཞི༵་ཡི༵ས་རང་རང་གི་མི་མཐུན་ཕྱོགས་འཁོར་བའི་སྡུག་བསྔལ་དང་ཐེག་པ་དམན་པ་ལ་སོགས་པ་ལས་ངེས་པར་འབྱུ༷ང་བར་བྱེད་ལ། དེ་དག་གིས་ངེས་པར་འབྱུང་བའི་མཐར་བླ་ན་མེད་པའི་ཐེ༵ག་པ༵་རང་བཞིན་རྫོགས་པ་ཆེན་པོ་དང་འཕྲད་དེ་བླང་དོར་རྩོལ་སྒྲུབ་ལས་འདས་པའི་ཆོས་ཉིད་རྟོགས་པའི་རང་བཞིན་གཅི༵ག་གི༵་འབྲ༵ས་བུ༵་སངས་རྒྱས་ཀྱི་སར༵་གན༵ས་པར་བྱེད་དེ། ཀུན་བྱེད་ལས། སྟོན་པའི་ཐེག་པ་རང་བཞིན་དགུ་པོ་ཡང་། །རང་བཞིན་རྫོགས་པ་ཆེན་པོར་བགྲོད་པའི་ལམ། །བླང་དོར་མེད་པའི་ཆོས་ཉིད་འདི་རྟོགས་ནས། །ཇི་བཞིན་པ་ལ་རང་བཞིན་ལྷུན་གྱིས་གྲུབ། །འགྲོ་དང་འོང་མེད་ཀུན་ཏུ་ཁྱབ་པར་བརྡལ། །ཞེས་སོ། །
གཉིས་པ་ནི། གནས་ལུགས་ཀྱི་དོན་ཡ༵ང་དག༵་པར་རྟོག༵ས་པའི་རྣལ་འབྱོར་པས༵་སྣང་སྲིད་འཁོར་འདས་ཀྱི་ཆོས་རྣམས་ལ་རིག་པས་ར༵བ་ཏུ་བརྟག༵ས་ན༵་གནས་ལུགས་རང༵་བཞི༵ན་མེ༵ད་པའི་ངང་ལ༵ས་སྣང་ལུགས་རྐྱེན་གྱི་འཆར་ཚུལ་ཅི༵ར་ཡ༵ང་གྲུབ༵་པ་ནི་ནམ་མཁའི་ཆོ་འཕྲུལ་དང་སྒྱུ་མ་དང་གཟུགས་བརྙན་ལ་སོགས་པའི་དཔེས་ཤེས་པར་བྱ་སྟེ། ཏིང་ངེ་འཛིན་རྒྱལ་པོ་ལས། ཇི་ལྟར་བར་སྣང་ཅུང་ཟད་སྤྲིན་མེད་ལས། །སྐད་ཅིག་ཏུ་ནི་སྤྲིན་གྱི་འཁོར་ལོ་དག །བྱུང་ནས་ཞིག་སྟེ་སྤྲིན་གྱི་འཁོར་ལོ་མེད། །ཐོག་མ་གང་ལས་བྱུང་བ་བལྟ་བར་གྱིས། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཇི་ལྟར་སྐྱེ་བོ་མང་པོའི་དབུས་དག་ན། །སྒྱུ་མ་བྱེད་པ་དག་གིས་གཟུགས་སྤྲུལ་ཏེ། །རྟ་དང་གླང་པོ་ཤིང་རྟ་སྣ་ཚོགས་(༨༦)བྱས། །དེ་ལ་མི་བདེན་སྣང་བ་གང་ཡང་མེད། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཇི་ལྟར་ནམ་མཁའ་དྭངས་ལ་ཟླ་ཤར་བ། །དེ་ཡི་གཟུགས་བརྙན་དྭངས་པའི་མཚོར་སྣང་ཡང་། །ཆུ་ཟླ་སྟོང་པ་གསོགས་ཏེ་སྙིང་པོ་མེད། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཇི་ལྟར་སོས་ཀའི་ཉི་མ་ཕྱེད་དུས་ན། །སྐྱེས་བུ་སྐོམ་པས་གདུངས་ཤིང་འགྲོ་བ་དག །སྨིག་རྒྱུ་འགྱུ་བ་ཆུ་ཡི་ཕུང་པོར་སྣང་། །དེ་ལ་བརྟགས་ན་ཆུ་ནི་གང་ཡང་མེད། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་པ་དང་། ལྗོན་པས་ཞུས་པའི་མདོ་ལས། ཇི་ལྟར་མེ་ལོང་ངོས་དག་ལ། །བཞིན་གྱི་དཀྱིལ་འཁོར་སྣང་བ་ལྟར། །དེ་ལྟར་རང་བཞིན་མ་གྲུབ་པ། །ཆོས་རྣམས་ལྗོན་པས་ཤེས་པར་གྱིས། །ཞེས་པ་ལྟར་ཆོས་ཐམས་ཅད་རང་བཞིན་མེད་བཞིན་དུ་སྣང་ལ་སྣང་དུས་ཉིད་ནས་ངོ་བོ་གང་དུའང་མ་གྲུབ་པའི་ཆོ་འཕྲུལ་དུ་ཤེས་པར་བྱའོ། །
གསུམ་པ་ནི། དོན་གཉིས་ལྷུན་གྱིས་གྲུབ་པའི་ས༵ངས་རྒྱ༵ས་མཐར་ཐུག་གི་བགྲོད་བྱར་གྱུར་པ་ཀུན་ཏུ་བཟང་པོ་ལྟ་བུ་ནི་དུས་ཐམས་ཅད་དུ་སྐུ་གསུམ་འདུ་འབྲལ་མེད་པར་བཞུགས་པས་མྱ༵་ང༵ན་ལས་ཡོ༵ངས་སུ་མི༵་འད༵འ་བ་ཡིན་ཞིང་། དེའི་བསྟན་པ་ཕུན་སུམ་ཚོགས་པའི་ཆོ༵ས་ཐམས་ཅད་ཀྱང༵་ནུབ༵་པ༵ར་མི༵་འགྱུ༵ར་ཏེ༵། དུས་གསུམ་འཕོ་འགྱུར་མེད་པའི་རང་བཞིན་དུ་གནས་པའི་ཕྱིར་རོ། །དེ་སྐད་དུའང་གསེར་འོད་དམ་པ་ལས། སངས་རྒྱས་མྱ་ངན་ཡོངས་མི་འདའ། །ཆོས་ཀྱང་ནུབ་པར་མི་འགྱུར་ཏེ། །ཞེས་སོ། །སངས་རྒྱས་སྐུ་གསུམ་གྱི་རང་བཞིན་རྟག་པ་སྟེ་རྒྱུན་དུ་གནས་པ་ནི། སྐུ་གསུམ་བསྟན་པའི་མདོ་ལས། ཆོས་ཀྱི་སྐུ་ནི་ངོ་བོ་ཉིད་ཀྱི་རྟག་པའོ། །ལོངས་སྤྱོད་རྫོགས་པའི་སྐུ་ནི་རྒྱུན་གྱི་རྟག་པའོ། །སྤྲུལ་པའི་སྐུ་ནི་རྒྱུན་མི་འཆད་པའི་རྟག་པའོ། །ཞེས་པ་དང་། རྒྱུད་བླ་མ་ལས། ཆོས་ཀྱི་དབང་ཕྱུག་འཆི་བའི་བདུད་བཅོམ་དང་། །ངོ་བོ་མེད་ཕྱིར་འཇིག་རྟེན་མགོན་པོ་རྟག །ཅེས་པ་དང་། དབུ་མ་འཇུག་པ་ལས། ཞི་སྐུ་དཔག་བསམ་ཤིང་ལྟར་གསལ་གྱུར་ཅིང་། །ཡིད་བཞིན་ནོར་བུ་ཇི་བཞིན་རྣམ་མི་རྟོག །འགྲོ་གྲོལ་བར་དུ་འཇིག་རྟེན་འབྱོར་སླད་རྟག །ཅེས་སོ། །
དེའང་ཆོས་སྐུ་དང་ལོངས་སྐུ་ནི་གཞུང་ཕལ་པ་ལས་རྟག་པར་འདོད་ཅིང་། སྤྲུལ་པའི་སྐུ་ནི་འདི་ལས་ཆུ་ཟླ་ལྟར་འགྲོ་བ་ལ་སྣང་གིས་རང་མཚན་དུ་གདུལ་བྱའི་ངོར་མ་གྲུབ་པས་རྟག་མི་རྟག་ལས་འདས་པའི་ཆོས་ཉིད་ཁོ་ན་ལ་རྟག་པ་ཞེས་འདོད་དོ། །དེ་ལྟར་སྐུ་གསུམ་འདུ་འབྲལ་མེད་པས་ངོ་བོ་འཕོ་འགྱུར་མེད་ན་ཡང་། དེའི་ངང་ལས་ལྷུན་གྱིས་གྲུབ་པའི་སྤྲུལ་པ་མཛད་པ་བཅུ་གཉིས་ལྟ་བུར་འཕྲོས་ཏེ་གནས་ལུགས་མ༵་རི༵ག་པའི་སེམས་ཅན་རྣམས་སྨི༵ན་ཅིང་གྲོལ་(༨༧)བར་མཛ༵ད་པས་གདུ༵ལ་བའི་ཕྱིར༵་སོ་སོའི་སྣང་བ་དང་མཐུན་པའི་སྤྲུལ་པའི་སྐུ་རང་བྱུང་དུ་བྱུང༵་ནས༵་དོན་མཛད་པའི་མཐར་མྱ༵་ང༵ན་ལས་འད༵འ་བ༵ར་སྟོན༵་ཏེ། རྒྱུད་བླ་མ་ལས། གདུལ་བྱའི་ཁམས་དང་གདུལ་བའི་ཐབས་དང་ནི། །གདུལ་བྱའི་ཁམས་ཀྱི་འདུལ་བའི་བྱ་བ་དང་། །དེ་ཡི་ཡུལ་དང་དུས་སུ་གཤེགས་པ་ལ། །ཁྱབ་བདག་རྟག་ཏུ་ལྷུན་གྱིས་གྲུབ་པར་འཇུག །ཅེས་པ་དང་། གསེར་འོད་དམ་པ་ལས། སངས་རྒྱས་བཅོམ་ལྡན་བསམ་མི་ཁྱབ། །དེ་བཞིན་གཤེགས་པ་རྟག་པའི་སྐུ། །སེམས་ཅན་རྣམས་ལ་ཕན་པའི་ཕྱིར། །བཀོད་པ་རྣམ་པ་སྣ་ཚོགས་སྟོན། །ཞེས་པ་ལྟར་རོ། །
བཞི་པ་ནི། ལྷག་པ་ཚུལ་ཁྲིམས་ཀྱི་བསླབ་པ་གཙོ་བོར་སྟོན་པ་འདུ༵ལ་བ༵་སྟེ། མདོ་སྡེ་རྒྱན་ལས། ལྟུང་དང་འབྱུང་དང་ལྡང་བ་དང་། །ངེས་པར་འབྱུང་དང་གང་ཟག་དང་། །བཅས་པ་དང་ནི་རབ་དབྱེ་དང་། །རྣམ་པར་ངེས་ཕྱིར་འདུལ་བ་ཉིད། །ཅེས་སོ། །ལྷག་པ་སེམས་ཀྱི་བསླབ་པ་གཙོ་བོར་སྟོན་པ་མདོ༵་སྡེ༵་སྟེ། དེ་ཉིད་ལས། གནས་རྣམས་དང་ནི་མཚན་ཉིད་དང་། །ཆོས་དོན་སྨོས་ཕྱིར་མདོ་སྡེ་ཉིད། །ཅེས་སོ། །ལྷག་པ་ཤེས་རབ་ཀྱི་བསླབ་པ་གཙོ་བོར་སྟོན་པ་ཆོས༵་མངོ༵ན་པའི་སྡེ་སྣོད་དེ། དེ་ཉིད་ལས། མངོན་དུའི་ཕྱིར་དང་ཡང་ཡང་དང་། །ཟིལ་གནོན་རྟོགས་ཕྱིར་མངོན་པའི་ཆོས། །ཞེས་སོ། །ཁྲུས་དང་གཙང་སྦྲ་ལ་སོགས་ལུས་ངག་གི་དམ༵་ཚི༵ག་གཙོ་བོར་སྟོན་པ་ཀྲཱ྇་ཡ་དང་། སྤྱོད་པ་བྱ་བ་དང་ལྟ་བ་རྣལ་འབྱོར་ལྟར་བྱེད་པས་སངས་རྒྱས་སྒྲུ༵བ་པ་ཨུ་པ་དང༵་། ལུས་ངག་གི་སྤྱོད་པ་གྲོགས་ཙམ་ལས་སེམས་ཀྱི་སྒོམ་པ་གཙོ་བོར་སྟོན་པས་མཆོག་གྲུབ༵་པ༵་ཡོ་ག་དང༵་། ཐབས་བསྐྱེད་པའི་རིམ་པ་གཙོ་བོར་སྟོན་པ་སྐུའི༵་རྒྱུད་གཤིན་རྗེ་དགྲ་ནག་ལ་སོགས་པ་དང༵་། ཤེས་རབ་རྫོགས་པའི་རིམ་པ་གཙོ་བོ་སྟོན་པ་གསུ༵ང་གི་རྒྱུད་རྟ་མཆོག་རོལ་པ་ལ་སོགས་པ་ད༵ང་། རང་བཞིན་གཉིས་སུ་མེད་པར་སྟོན་པ་ཐུ༵གས་ཀྱི༵་རྒྱུ༵ད་གསང་བ་འདུས་པ་དང་དཔལ་ཡང་དག་ལ་སོགས་པ་སྟེ། ཕྱོག༵ས་བཅུའི༵་སངས་རྒྱས་ཀྱི་ཞིང་ཁམས་ཚད་མེད་པ་རྣམ༵ས་སུ༵་དམ་པའི་ཆོས་ར༵བ་ཏུ་གྲག༵ས་པ༵་ཐམས་ཅད་གས༵ང་བ༵འི་སྙིང༵་པོ༵་གནས་ལུགས་རྫོགས་པ་ཆེན་པོའི་རང་བཞིན་ལ༵ས་འཕྲོས༵་ཏེ༵། གྲུབ་པའི་མཐའ་དང་སྙིང་པོའི་དོན་ཐམས་ཅད་ཀྱི་མཐར་ཐུག་པ་རྫོགས་པ་ཆེན་པོར་འདུས་པའི་ཕྱིར་རོ། །དེ་སྐད་དུ་ཡང་ཀུན་བྱེད་ལས། སྤྱི་འདུས་སྒོས་འདུས་ཐམས་ཅད་འདུས། །རང་བཞིན་རྫོགས་པ་ཆེན་པོར་འདུས། །འདི་ཉིད་ཀུན་གྱི་སྙིང་པོ་སྟེ། །འདི་རུ་མ་འདུས་གང་ཡང་མེད། །ཅེས་སོ། །
ལྔ་པ་ནི། ཆོས་ཐམས་ཅད་ཀྱི་གནས་ལུགས་རང༵་བཞི༵ན་ག༵སང་བ༵འི་སྙིང༵་པོ༵་འདི༵་ཉིད༵་སྡེ༵་སྣོད༵་གསུམ་པོ་ཀུན༵་དང༵་རྒྱུད༵་སྡེ་དྲུག་པོ་ཀུན༵་གྱི༵་འཕྲོ་(༨༨)གཞིར་གྱུར་པས་འབྱུ༵ང་གན༵ས་ཀྱང་ཡིན་ལ། དོན་གྱི་སྙིང་པོ་འདུས་པས་གཏན༵་ལ༵་ངེ༵ས་པ༵ར་འབེ༵བས་པའི་གཞི་དང་དབབ་བྱའི་ཡུལ་དུ་གནས་ཤིང་། འདི་ཉིད་དེ་ཐམས་ཅད་ཀྱི་གཏན་ལ་འབེབས་བྱེད་ཀྱང་ཡིན་ཏེ། ཀུན་བྱེད་ལས། སྡེ་སྣོད་ཀུན་དང་རྒྱུད་ཀུན་གྱི། །རང་བཞིན་སྙིང་པོ་འདིར་འདུས་ཤིང་། །མདོ་རྒྱུད་ཀུན་གྱི་སྤྱི་འགྲེལ་ཡིན། །ཞེས་སོ། །
དྲུག་པ་དེ་ལྟར་ཐེག་པ་ལྔས་གཏན་ལ་འབེབས་བྱེད་དུ་བསྟན་པ་དང་། དབབ་བྱའི་ཡུལ་སྣང་སྲིད་འཁོར་འདས་ཀྱིས་བསྡུས་པའི་ཆོ༵ས་རྣ༵མས་ཐམས་ཅད་དོན་ལ་གྲུབ་པ་མེད་པས་མི༵ང་དུ༵་བཏ༵གས་པ༵་ཙ༵མ་སྟེ། མདོ་ལས། རབ་འབྱོར་ཆོས་ཐམས་ཅད་ནི་བརྡ་ཙམ་བཏགས་པ་ཙམ་སྟེ་ངོ་བོ་ཉིད་ཀྱིས་ཡོངས་སུ་གྲུབ་པ་མེད་དོ། །ཞེས་སོ། །སུས་བཏགས་ན་ལྷ་མིའི་སྟོན༵་པ༵་སངས་རྒྱས་ཀྱིས་སྣང་ཙམ་མ་འགགས་པ་ཀུན་རྫོབ་ཀྱི་བདེན་པ༵འི་དོ༵ན་དང༵་རེ་ཞིག་མཐུ༵ན་པའི་ཕྱོག༵ས་སུ༵་མཛད་དེ། འཁོར་བ་དང་མྱ་ངན་ལས་འདས་པ་ཕུང་པོ་དང་ཁམས་དང་སྐྱེ་མཆེད་ཅེས་པ་ལ་སོགས་པའི་མི༵ང་ད༵ང་ཚི༵ག་ཏུ༵་བཏ༵གས་ན༵ས་བསྟ༵ན་ཏོ། །དགོས་པ་ནི་དོན་གྱི་གནས་ལུགས་བློས་རྟོགས་པར་བྱ་བའི་ཕྱིར་རོ། །དེ་ལྟར་མིང་ཚིག་ཏུ་བཏགས་ནས་སྟོན༵་པའི་དུས་ཉིད་ན་མི༵ང་ཚི༵ག་ལ༵་དངོ༵ས་པོ༵་མེ༵ད་དེ། ནམ་མཁའ་ཞེས་བརྗོད་དུས་ན་མིང་ཚིག་དེ་ཉིད་ནམ་མཁའི་ཁམས་ལ་ནི་གྲུབ་པ་མེད་ཅིང་། ལུས་དང་སེམས་ལ་ནམ་མཁའི་མིང་ཚིག་ཀྱང་མེད་དེ། གང་ནས་ཀྱང་ནམ་མཁའི་མིང་ཚིག་མི་རྙེད་པས་དངོས་པོ་དང་ངོས་གཟུང་མེད་དེ། དེ་ཉིད་ནམ་མཁའི་དོན་དང་དབྱེར་མེད་པས་ཆོས་ཐམས་ཅད་བློས་མིང་ཚིག་ཏུ་བཏགས་ཀྱང་མིང་དོན་གང་དུའང་གྲུབ་པ་མེད་པའི་རང་བཞིན་དུ་ཤེས་པར་བྱ་སྟེ། ཏིང་འཛིན་རྒྱལ་པོ་ལས། ཇི་ལྟར་ལ་ལ་ཞིག་ལ་བུ་བཙས་ནས། །དེ་ཡི་མིང་ནི་ཐ་དད་དེར་བཏགས་ཀྱང་། །ནང་དང་ཕྱི་རོལ་ཀུན་ཏུ་བཙལ་ན་མེད། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་པ་ལྟར་རོ། །དེ་ལྟར་ཆོས་ཐམས་ཅད་བརྗོད་དུ་མེད་པའོ་ཞེ༵ས་ཆེད་དུ་བརྗོ༵ད་དོ༵། །
གསུམ་པ་འཁོར་འདས་སེམས་དང་ཡེ་ཤེས་ཀྱི་རང་སྣང་དུ་དོན་བསྡུ་བ་ལ་གཉིས་ཏེ། རང་སྣང་དུ་སྟོན་པའི་རྒྱུ་བརྗོད་པ་དང་། ཇི་ལྟར་བསྟན་པ་དངོས་སོ། །
དང་པོ་ནི། ཆོས་ཐམས་ཅད་ཀྱི་རང་བཞིན་བརྗོད་པ། དེ༵་ན༵ས་དེ༵་བཞི༵ན་གཤེ༵གས་པ༵འི་དཀྱི༵ལ་འཁོ༵ར་ཐབས་དང་ཤེས་རབ་གཉི༵ས་སུ༵་མེ༵ད་པ༵་དེ༵་ཉིད༵་ཀྱི༵་གས༵ང་བ༵་སེམས་དང་ཡེ་ཤེས་རང་སྣང་བར་སྟོན་པ་འདི༵་ཉིད༵་སྐུ༵་ད༵ང་གསུ༵ང་ད༵ང་ཐུག༵ས་ད༵ང་ཡོ༵ན་ཏན༵་ད༵ང་འཕྲི༵ན་ལ༵ས་རྡོ༵་རྗེ༵་ལ༵ས་འདི་སྐད་ཅེས་ཕྱུ༵ང་ངོ༵་། །
གཉིས་པ་ལ་གཉིས་ཏེ། སེམས་ཅན་གྱི་འཁྲུལ་སྣང་སེམས་ཀྱི་རང་སྣང་དུ་བསྟན་པ་དང་། སངས་རྒྱས་ཀྱི་ཞིང་(༨༩)སྣང་ཡེ་ཤེས་ཀྱི་རང་སྣང་དུ་བསྟན་པའོ། །
དང་པོ་ནི། ཐམས་ཅད་རང་སྣང་ཡིན་པས་ངོ་མཚར་བར་བསྟན་པའི་ཕྱིར་ཨ༵་ཧོ༵་ཞེས་སོ། །ཉེ་བར་ལེན་པའི་ཕུང་པོ་ལྔ་དང་དེས་རྒྱུ་བྱས་ཏེ་འཁོར་བའི་གནས་སྐབས་ན་འཁྲུལ་སྣང་སྣ་ཚོགས་སྲིད༵་པ་ཁམས་གསུམ་གྱི་རྩ༵་བར་གྱུར་པ༵འི་ཉེས༵་དམི༵གས་ཐམས་ཅད་ནི་ང་དང་བད༵ག་ཏུ༵་རྟོག༵ས་པ་ལ༵ས་འཕྲོ༵ས་ཏེ། འཁོར་བར་འཁྲུལ་དུས་ན་ལྷ་ལ་སོགས་པའི་འགྲོ་བ་རྒྱུད༵་དྲུག༵་སོ་སོའི་སྣང་བ་ལ་སྐྱེ༵་བ་དང་། སྲོག་གི་དབང་པོ་འག༵གས་པས་འཆི་བ་དང་། རང་རང་གི་ལུས༵་སྣ་ཚོགས་དང༵་བདུད་རྩི་དང་བུ་རམ་ཤིང་ལ་སོགས་པའི་ལོ༵ངས་སྤྱོད༵་སྣ་ཚོགས་ད༵ང་ལྷའི་གན༵ས་ལ་སོགས་པ་སོ་སོའི་ཡུལ་དུ་སྣང་བ་སྣ་ཚོགས་པ་དང༵་། འཆི་འཕོ་ལྟུང་བ་ལ་སོགས་པ་སྡུག༵་བསྔ༵ལ་གྱི་འཁྲུ༵ལ་འཁོ༵ར་དང་། ལ༵་སོ༵གས་པའི་ཁོངས་ནས་བདེ་བ་དང་བར་མའི་སྣང་བ་དཀར་དམར་སྣ་ཚོགས་སུ་སྣང་བ༵་འདི་ཐམས་ཅད་འགྲོ་བ་དེ་དག་གི་མ་རིག་པས་བསྐྱེད་པའི་ལོ༵ག་རྟོག༵་བག་ཆགས་འཁྲུལ་པའི་སེམས་ཀྱི་རང་སྣང་རྨི་ལམ་ལྟ་བུ་ཉིད༵་ལ༵ས་ཕྱི་རོལ་དོན་གཞ༵ན་ཐ་དད་དུ༵་གྲུབ་པ་ཅི༵་ཡ༵ང་མེ༵ད་དོ། །དེ་སྐད་དུ་ཡང་དྲན་པ་ཉེར་གཞག་ལས། སྣ་ཚོགས་ལས་དང་ལོངས་སྤྱོད་དང་། །བདེ་སྡུག་ཉིད་དུ་སྣང་བ་ནི། །སེམས་ཀྱིས་སྤྲུལ་ཅིང་སེམས་ཀྱིས་བྱས། །སེམས་ལས་གཞན་དུ་ཅུང་ཟད་མེད། །དཔེར་ན་རྨི་ལམ་ཇི་བཞིན་ནོ། །ཞེས་པ་ལྟར་རོ། །
གཉིས་པ་ནི། ཆོས་ཐམས་ཅད་རྣམ་པ་ཀུན་གྱི་མཆོག་དང་ལྡན་པའི་སྟོང༵་པ༵་ཉིད༵་འཁོར་འདས་ཡེ་ནས་སངས་རྒྱས་པའི་རང་བཞིན་གང་ཟག་དང་ཆོས་ཀྱི་བད༵ག་མེ༵ད་ཡེ༵་ནས་མཁྱེ༵ན་པ་སོ་སོ་ར༵ང་གི་རི༵ག་པ་ལ་མངའ་བརྙེས་པའི་ཐུག༵ས་རང་བྱུང་གི་ཡེ་ཤེས་ཏེ། དེ་ལ་སྣང་བའི་ཆོས་རྣམས་ལ་ཕྱི་གཟུང་བའི་ཡུལ་གཞན་དུ་དམི༵གས་པར་བྱ༵་བ་དང་། ནང་འཛིན་པའི་སེམས་བདག་ཏུ་དམི༵གས་པར་བྱེད༵་པ་གཉིས་སུ་མེ༵ད་པ༵ར་ཡེ་ཤེས་ཀྱི་དྲན༵་པས་དབ༵ང་སྒྱུ༵ར་བར་བྱེད་དོ། །དེ་ལྟར་དབང་སྒྱུར་བའི་ཆོས་གཞན་ལས་འཕགས་པས་ངོ༵་མཚ༵ར་ཞིང་རྨད་དུ་བྱུང་བའི་སྐུ༵་གསུམ་དང་ཡེ་ཤེས་ཆེན་པོའི་གསུ༵ང་ཐེག་པར་སྣང་བ་དང་ཐུགས་མཁྱེན་པ་གཉིས་དང་། ཡོ༵ན་ཏན༵་ཚད་མེད་པ་དང་འཕྲིན་ལས་ལྷུན་གྱིས་གྲུབ་པ་དང་ཞི༵ང་ཁ༵མས་བསམ་གྱིས་མི་ཁྱབ་པ་ལ་སོགས་པ་ཡང་། སངས་རྒྱས་ཉིད་ཀྱི་ཡེ་ཤེས་ཀྱི་རང་སྣང་ལ༵ས་ཕྱོགས་གཞ༵ན་ན༵་རང་མཚན་དུ་གྲུབ་པ་མེ༵ད་དེ༵། ཡེ་ཤེས་དེ༵་ཉིད༵་སྐུ་དང་ཞིང་ཁམས་དང་འཕྲིན་ལས་ལ་སོགས་པར་སྣང་བ་བསམ་གྱིས་མི་ཁྱབ་པ་དེ༵་ལྟར༵་སྣང་བ་ཡི༵ན་ཏེ། རྨད་བྱུང་རྒྱལ་པོ་ལས། སངས་རྒྱས་སྐུ་དང་ཡེ་ཤེས་ཞིང་ཁམས་དང་། །ཡེ་ཤེས་ཡོན་ཏན་འཕྲིན་ལས་ཇི་སྙེད་པ། །ཡེ་ཤེས་དེ་ཉིད་དེ་(༩༠)ལྟར་སྣང་བ་ཡིན། །གཞན་ནས་མ་ཡིན་དེ་ལྟར་ལྷུན་གྱིས་གྲུབ། །ཅེས་སོ། །དེ་ལྟར་ཐམས་ཅད་རང་སྣང་ཆེན་པོར་བཀོད་པ་ལས་གཞན་མ་ཡིན་ནོ་ཞེ༵ས་རང་བཞིན་རྡོ༵་རྗེ༵་གསང༵་བའི༵་རྒྱུད་ཀྱི་ཚི༵ག་ཏུ༵འོ༵། །
གསུམ་པ་སྐབས་ཀྱི་དོན་བསྡུ་བ་ནི་ཞེས༵་བརྗོད༵་པས༵། དེ་ལྟར་ཐུགས་རྗེ་ཆེན་པོ་ལས་འཕྲོས་པའི་ཐུ༵བ་པ༵་དྲུག༵་གི༵་སྤྲུལ༵་པ༵་གྲང༵ས་མེ༵ད་པ༵་སྣང་བས་ཐེག་པ་དུ་མར་བསྟན་པ་དང༵་། རང་སྣང་བཀོད་པའི་དེ༵་བཞིན༵་གཤེ༵གས་པ༵་ཐམ༵ས་ཅ༵ད་ཀྱི༵ས་གསུ༵ངས་པ༵་ཡ༵ང་། རང་བཞིན་བརྗོད་དུ་མེད་ཀྱང་སེམས་དང་ཡེ་ཤེས་ཀྱི་སྣང་བར་བསྟན་པ་དེ༵་དག༵་ཏུ༵་འདུ༵ས་པ༵ར་གཙོ་བོ་གདོད་མའི་དེ༵་བཞི༵ན་གཤེ༵གས་པ༵་ཉིད༵་ཀྱིས༵་མཁྱེན༵་ཏོ༵། །རང་བཞིན་གས༵ང་བ༵འི་སྙིང༵་པོ༵་བརྗོད་དུ་མེད་པའི་དོན་དེ༵་ཁོ༵་ན༵་ཉིད༵་ངེ༵ས་པ༵་ལ༵ས། འཁོར་འདས་ཀྱི་ཆོ༵ས་ཐམ༵ས་ཅ༵ད་སྣང་ལ་རང་བཞིན་མེད་པའི་ངོ་བོ་གདོད་མ་ཉིད་ནས་དག་པའི་ཆོས་ཉིད་དུ་གཏན༵་ལ༵་ཕ༵བ་པ༵འི་ལེ༵འུ༵་སྟེ༵་གསུ༵མ་པའི་རྣམ་པར་བཤད་པ༵འོ༵།། །།