གསུམ་པ། རྒྱུད་དོན་ངོས་བཟུང་བ།
གསུམ་པ་རྒྱུད་དོན་ངོས་བཟུང་བ་ནི། འཕགས་པ་རྟོགས་པའི་རྒྱལ་པོ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ལས་གསང་བའི་སྙིང་པོ་དེ་ཁོ་ན་ཉིད་ངེས་པའི་ལེའུ་ཞེས་བྱ་བ་ཡིན་ཏེ། འདི་ལ་གསུངས་པ་པོའི་ཆེ་བ། དེས་གསུངས་པ་རྒྱུད་ཀྱི་ཆེ་བ། ཆེ་བ་དེ་དང་ལྡན་པའི་རྒྱུད་ཉིད་བསྟན་ཞིང་བཤད་པའི་ཚུལ་གསུམ་ལས། དང་པོ་ནི། ཐུན་མོང་དུ་གྲགས་པའི་སྟོན་པ་ལྟར། གང་ཟག་གཅིག་གིས་སེམས་བསྐྱེད་ནས། ལམ་བསྒྲུབས་ཏེ། ཞིང་ཁམས་འདི་ཞེས་ཕྱོགས་སུ་ཆད་པའི་གནས་གཅིག་ན་གནས་པའི་སྟོན་པ་མ་ཡིན་གྱི། ཐོག་མ་མེད་པའི་དུས་སུ་གཞི་ཐོག་ནས་མངོན་པར་བྱང་ཆུབ་ཅིང་། འཁོར་འདས་ཐམས་ཅད་ཀྱི་སྤྱི་དཔལ་གདོད་མའི་མགོན་པོ། ཡོན་ཏན་ལྷུན་གྱིས་གྲུབ་པའི་འབྱོར་པ་ཆེན་པོས་ཆོས་ཀྱི་སྐུའི་ཞིང་ན། དུས་བཞི་མཉམ་པ་ཉིད་ཀྱི་ཡེ་ཤེས་འཕོ་འགྱུར་མེད་པར་བཞུགས་པས་རྒྱ་ཆད་ཕྱོགས་ལྷུང་མེད་པ་ནི་མངའ་དབང་རྫོགས་པའི་སྟོན་པ་ཀུན་ཏུ་བཟང་པོ་སྟེ། རྒྱ་མཚོ་ལས། གདོད་ནས་མངོན་པར་བྱང་ཆུབ་པ། །མངའ་དབང་རྫོགས་པའི་སྟོན་པ་ནི། །ཀུན་ལས་ཁྱད་པར་འཕགས་པའི་ཕྱིར། །རྟག་ཏུ་ཆོས་སྐུའི་ཞིང་ན་བཞུགས། །ཞེས་སོ། །དེའི་ངང་ལས་མ་གཡོས་བཞིན་དུ་རང་སྣང་ལྷུན་སྟུག་པོ་བཀོད་པའི་ཞིང་ན། རྒྱལ་ཚབ་ཀྱི་སྟོན་པ་རིགས་ལྔ་གངས་ཅན་མཚོ་སོ་སོའི་དཀྱིལ་འཁོར། ཡེ་ཤེས་རིན་པོ་ཆེའི་ངོ་བོ་ལས་གྲུབ་པ། རྩེ་མོ་ཕྱོགས་ཀུན་ཏུ་འཁྱིལ་ཞིང་། རྒྱ་ཕྱོགས་བཅུར་མ་ཆད་པ། ནམ་མཁའི་དབྱིངས་ཀྱི་མཐའ་ཀླས་པ་ཐམས་ཅད་དུ་ཁྱབ་པ་ནི་ལོངས་སྐུ་རང་གི་ངོ་བོའི་སྣང་ཚུལ་ཏེ། ལེའུ་དང་པོར། དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ལོངས་སྤྱོད་ཆེན་པོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི། སྐུ་དང་གསུང་དང་ཐུགས་རྡོ་རྗེའི་བདག་ཉིད་མ་ལུས་མི་ལུས་ལུས་པ་མེད་པ་ཐམས་ཅད་དང་། སོ་སོ་མ་ཡིན་ཐ་མི་དད་པའི་རང་བཞིན། འོག་མིན་གྱི་གནས་མཐའ་དང་དབུས་མེད་པ་ན། གཞི་ཚད་མེད་པའི་ཡེ་ཤེས་ཀྱི་འཁོར་ལོ་གསལ་བ་ལ། ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་། ཞེས་པ་ལ་(༥༢)སོགས་པ་དང་། དགུ་པ་ལས། ཞིང་ཁམས་བསམ་ཡས་རྣམ་དག་དང་། །རྒྱ་དང་བྲལ་བའི་གཞལ་ཡས་ཁང་། །འཁོར་ལོའི་རྒྱན་དང་རོལ་མོའི་ཚོགས། །དཀྱིལ་འཁོར་བསམ་ཡས་མ་ལུས་ཀུན། །མཐོང་ནས་ཉེ་བར་མཉེས་པ་དང་། །རྒྱ་ཆེན་གསུང་ལས་དོན་འབྱུང་བའང་། །མཐུན་པའི་ཡེ་ཤེས་རང་སྣང་བའོ། །ཞེས་པ་དང་། ཀུན་གསལ་ལས། ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པ། །རིགས་ལྔ་བདེ་བར་གཤེགས་ལ་ཕྱག་འཚལ་ལོ། །ཞེས་སོ། །དེའི་ངང་ལས་མ་གཡོས་བཞིན་དུ། སྐུ་གསུང་ཐུགས་རྡོ་རྗེའི་རང་བཞིན་ལས། གདུལ་བྱའི་གནས་རིགས་གསུམ་དུ་རིག་པ་ཁྱད་པར་ཅན་གྱི་སྟོན་པ་རིགས་གསུམ་མགོན་པོ་རང་བྱོན་པ་ནི་ཐུགས་རྗེ་ལྷུན་གྱིས་གྲུབ་པའི་རང་བཞིན་ཏེ། ཡེ་ཤེས་གསང་བ་ལས། སྐུ་དང་གསུང་དང་ཐུགས་དག་ལས། །ཐོག་མ་མཐའ་མ་དབུས་མེད་པའི། །སེམས་དཔའ་གཟུགས་མཛེས་པདྨ་དང་། །རྡོ་རྗེ་འཛིན་རྒྱལ་ཡེ་ཤེས་ཆེ། །ཞེས་གསུངས་སོ། །དེ་དག་ལས་འདིར་ཐུགས་ཀྱི་སེམས་དཔའ་གསང་བའི་བདག་པོ་སྟེ། མཉམ་སྦྱོར་ལས། སེམས་དཔའ་སངས་རྒྱས་ཀུན་གྱི་དངོས། །རྡོ་རྗེ་སེམས་དཔའ་སེམས་དཔའ་ཆེ། །ཞེས་པ་དང་། ངན་སོང་སྦྱོང་རྒྱུད་ལས། སངས་རྒྱས་ཀུན་བས་སྔར་སངས་རྒྱས། །མི་ཤེས་དྲི་མ་ཀུན་བཅོམ་པ། །རྡོ་རྗེ་རྡོ་རྗེ་རྡོ་རྗེ་འཛིན། །རྡོ་རྗེའི་སྐུ་སྟེ་སྐུ་ཆེ་བ། །ཕྱག་ན་རྡོ་རྗེར་ཕྱག་འཚལ་བསྟོད། །ཅེས་པ་དང་། གཞན་ཡང་། ཐོག་མཐའ་མེད་པའི་སེམས་དཔའ་ནི། །རྡོ་རྗེ་རྒྱལ་པོ་དགའ་ཆེན་པོ། །ཞེས་པ་ལ་སོགས་གསུངས་ཏེ། ཀུན་ཏུ་བཟང་པོ་དེ་ཉིད་དེ་ལྟར་སྣང་བའི་ཕྱིར། ཐོག་མཐའ་མེད་པའི་སྔོན་རོལ་ཏུ་སངས་རྒྱས་པས་སྟོན་པ་གཞན་ལས་ཆེས་ཁྱད་པར་དུ་འཕགས་པའོ། །
གཉིས་པ་དེས་གསུང་བ་རྒྱུད་ཀྱི་ཆེ་བ་ལ་གཉིས་ལས། སྤྱིར་ཐེག་པ་ཆེན་པོ་གསང་སྔགས་རྡོ་རྗེའི་ཐེག་པ་ཀུན་ལས་མཆོག་ཏུ་འཕགས་ཏེ། ཚུལ་གསུམ་པའི་སྒྲོན་མ་ལས། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་ཕྱིར་དང་། །དབང་པོ་རྣོན་པོའི་དབང་བྱས་ནས། །སྔགས་ཀྱི་ཐེག་པ་ཁྱད་པར་འཕགས། །ཞེས་པས། ཐབས་འཕགས་པ་བཞིན་དུ་ཐབས་དེས་ཆེ་བའི་ཤེས་རབ་ཀྱང་འཕགས་པ་དང་། དུས་མྱུར་བས་བྱང་ཆུབ་འགྲུབ་པ་དང་། བླང་དོར་མི་དགོས་པས་ལམ་བདེ་བ་དང་། ཡེ་ནས་དག་པས་འབད་རྩོལ་ཆུང་བ་དང་། གཅིག་ཏུ་འཆད་པས་(༥༣)འཇུག་པ་བདེ་བ་ལ་སོགས་པ་དུ་མས་འཕགས་ཤིང་ཆེ་བའོ། །ཁྱད་པར་དུ་འདི་ཉིད་གསང་སྔགས་རྒྱུད་ལུང་ཀུན་གྱི་འཕྲོ་གཞི་ཡིན་པས་ཀྱང་གཞན་ལས་ཁྱད་པར་འཕགས་ཏེ། ལེའུ་གསུམ་པར། འདུལ་བ་མདོ་སྡེ་ཆོས་མངོན་དང་། །དམ་ཚིག་བསྒྲུབ་དང་གྲུབ་པ་དང་། །སྐུ་དང་གསུང་དང་ཐུགས་ཀྱི་རྒྱུད། །ཕྱོགས་བཅུ་རྣམས་སུ་རབ་གྲགས་པ། །གསང་བའི་སྙིང་པོ་ལས་འཕྲོས་ཏེ། །ཞེས་སོ། །ལམ་ཀུན་གྱི་འབྲས་བུ་ཡིན་པས་ཀྱང་འཕགས་ཏེ། བཅུ་གསུམ་པར། བསྐལ་པ་ཞིང་གི་རྡུལ་སྙེད་དུ། །ཤིན་ཏུ་སྦྱང་ལ་རབ་གནས་ཤིང་། །དཀྱིལ་འཁོར་མ་ལུས་བསྙེན་པ་ཡི། །འབྲས་བུ་གསང་སྔགས་འདི་ཡིན་ཏེ། །ཞེས་སོ། །འདི་ཉིད་ངེས་དོན་ཀུན་གྱི་སྙིང་པོ་ཡིན་ཞིང་། ཚེ་གཅིག་གིས་གྲོལ་བས་ཀྱང་ཁྱད་པར་དུ་འཕགས་ཏེ། དེ་ཉིད་ལས། འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །རྒྱལ་བའི་དཀྱིལ་འཁོར་མ་ལུས་ལ། །འདི་ལས་གསང་བའི་ངེས་དོན་མེད། །ཅེས་གསུངས་སོ། །
གསུམ་པ་ཆེ་བ་དེ་དང་ལྡན་པའི་རྒྱུད་ཇི་ལྟར་བཤད་ཅིང་ཉན་པའི་ཚུལ་ལ་གསུམ་སྟེ། འཆད་པ་པོ་སློབ་དཔོན་གྱི་མཚན་ཉིད། ཉན་པ་པོ་སློབ་མའི་མཚན་ཉིད། དེ་གཉིས་ཀྱིས་གཏན་ལ་དབབ་བྱ་རྒྱུད་ཀྱི་དོན་དངོས་བསྟན་པའོ། །དང་པོ་ལ་གསུམ་སྟེ། མཚན་ཉིད། ཆེ་བ། ཇི་ལྟར་གདམས་པའི་ཚུལ་ལོ། །
དང་པོ་ནི། བཀོད་པ་ཆེན་པོ་ཡིད་བཞིན་མཆོག་གི་རྒྱུད་ལས། མཁས་ཤིང་བྱ་བ་བྲལ་བ་དང་། །ཆོས་ཉིད་དོན་ལ་ཚད་ཕེབས་དང་། །འདོད་པའི་དོན་ལ་རྨོངས་པ་མེད། །གསང་སྔགས་བླ་མའི་མཚན་ཉིད་དོ། །ཞེས་སོ། །དམ་ཚིག་ལ་གནས་ཤིང་། ཕྱི་ནང་གི་སྒྲུབ་པ་ཐམས་ཅད་ལ་མཁས་པ། སློབ་མའི་ཤེས་རྒྱུད་བྱིན་གྱིས་རློབ་ཅིང་གྲོལ་བར་ནུས་པ། བསྐྱེད་རྫོགས་ཀྱི་དོན་ལ་དྲོད་རྟགས་ཐོན་ཅིང་། འཇིག་རྟེན་གྱི་བྱ་བ་དང་བྲལ་བ་ཞིག་གི་མཚན་ཉིད་ཚང་བའོ། །འདི་ལྟར་ཐུན་མོང་གི་ཐེག་པ་ལས་ཀྱང་། བཤེས་གཉེན་ཞི་བ་དུལ་བ་ཉེར་ཞི་བ། །ཡོན་ཏན་བརྩོན་བྱས་ལྷག་པར་ལུང་གིས་ཕྱུག །དེ་ཉིད་རབ་ཏུ་རྟོགས་ལ་སྨྲ་མཁས་ལྡན། །བརྩེ་བའི་བདག་ཉིད་སྐྱོ་ངལ་སྤངས་ལ་བསྟེན། །ཅེས་སོ། །ཞར་ལ་མཚན་ཉིད་དང་མི་ལྡན་པ་ཡང་། ཡོན་ཏན་དེ་དག་དང་མི་ལྡན་ཞིང་། ཁྱད་པར་དེ་ཉིད་ལས། མཚན་ཉིད་མི་ལྡན་སློབ་དཔོན་ནི། །ཤེས་ཆུང་ང་རྒྱལ་ཆེ་བ་དང་། །དམ་ཚིག་སྡོམ་པ་རབ་འཆལ་ཞིང་། །སྔགས་ཀྱི་ལྟ་སྤྱོད་ཉམས་པ་དང་། །སྙིང་རྗེ་མི་ལྡན་རྙེད་པ་འཚོལ། །ཞེས་སོ། །
གཉིས་པ་མཚན་ཉིད་དང་ལྡན་པའི་བླ་མ་དེའི་ཆེ་བ་ནི། ཀུན་ཏུ་བཟང་པོ་(༥༤)དངོས་ཡིན་པར་ལེའུ་ཐ་མ་ལས། དེ་བཞིན་གཤེགས་པ་ཐམས་ཅད་ཀྱི། །ཕྱག་རྒྱ་གསང་ཆེན་སྙིང་པོ་འདི། །རྟོགས་ནས་སྨྲ་བ་གང་བྱེད་པ། །དེ་ཉིད་ང་ཡིན་དབང་ཡང་རྫོགས། །ཞེས་སོ། །
གསུམ་པ་ཇི་ལྟར་གདམས་ཚུལ་ནི། ལེའུ་བཅུ་གསུམ་པ་ལས། སྣོད་ལྡན་ངང་ཚུལ་བཟང་ལ་བརྟན། །ལུས་དང་ལོངས་སྤྱོད་གཏོང་ལ་སྦྱིན། །གཞན་དུ་ནམ་ཡང་སྦྱིན་མི་བྱ། །རྨོངས་དང་འཕྱར་ལ་གལ་ཏེ་སྦྱིན། །དུས་མིན་པར་ནི་སྲོག་ཟད་ནས། །བསྲེག་དང་སྦྲེབས་ལ་ཡུན་རིང་གནས། །ཞེས་པ་དང་། རྒྱན་སྟུག་པོ་བཀོད་པ་ལས། རྒྱ་ཆེན་ཆོས་ཀྱི་སྣོད་གྱུར་པ། །དམན་པའི་ཆོས་ལ་སྦྱར་མི་བྱ། །དམན་ལའང་མཆོག་གི་ཆོས་མི་བཤད། །ཅེས་པས་སྣོད་བརྟགས་ལ་བཤད་པར་བྱའོ། །ཅིའི་ཕྱིར་ན་རང་གཞན་ལ་ཉེས་པ་ཆེན་པོ་བསྐྱེད་པའི་ཕྱིར་དང་། རྨད་བྱུང་རྒྱལ་པོ་ལས། སློབ་མ་མ་བརྟགས་སློབ་དཔོན་དགྲ། །འདི་ཕྱིར་གནོད་ཅིང་ཡུན་རིང་འཚེ། །ཞེས་པའི་ཕྱིར་རོ། །
གཉིས་པ་ལ་གསུམ་སྟེ། མཚན་ཉིད། ཆེ་བ། ཇི་ལྟར་ཉན་པའི་ཚུལ་ལོ། །
དང་པོ་ནི། སྤྱིར་དད་པ་དང་དམ་ཚིག་ལྡན་པ། གཏོང་ཕོད་དང་སྲི་ཞུ་ཆེ་བ། ཆོས་དང་བླ་མ་ལ་གུས་པ། གསང་ཐུབ་ཅིང་སྒྲུབ་པ་ལ་བརྩོན་པ་སྟེ། སྔ་མ་ལས། གསང་སྔགས་སློབ་མའི་མཚན་ཉིད་ནི། བླ་མ་ལ་གུས་སྲི་ཞུར་ལྡན། །དད་དང་ངོ་ཚ་ཁྲེལ་ཡོད་ཆེ། །གསང་ཐུབ་བསྒྲུབ་ལ་བརྩོན་པའོ། །ཞེས་པའོ། །ཁྱད་པར་དུ་སྔར་ཐོས་བསམ་ལ་སྦྱངས་པའི་ཤེས་རབ་ཡོད་ཅིང་ཆོས་འདིའི་སྣོད་དུ་གྱུར་པ་སྟེ། འདི་ཉིད་ལས། ཐོས་བསམ་སྒོམ་ལ་རབ་སྦྱངས་པའི། །ཤེས་རབ་མཆོག་ལྡན་རྣམས་ཀྱིས་ཟུངས། །སྣོད་ལྡན་ངང་ཚུལ་བཟང་ལ་བརྟན། །ལུས་དང་ལོངས་སྤྱོད་གཏོང་ལ་སྦྱིན། །ཅེས་སོ། འདི་དང་མཐུན་པར་ཐེག་པ་ཐུན་མོང་གི་གཞུང་ལས་ཀྱང་། བླ་མ་ལ་གུས་ཚུལ་ཁྲིམས་ཡོངས་དག་དང་། །བསམ་གཏན་དང་ནི་འདོན་ལ་རྟག་བརྩོན་དང་། །གྲིམ་ཞིང་དུལ་ལ་བཟོད་དང་ལྡན་པ་སྟེ། །སྡོམ་བརྩོན་གནས་པའི་ཆོས་ལྡན་ལགས་པར་གསུངས། །ཞེས་སོ། །ཞར་ལ་དེ་ལས་བཟློག་པ་ནི། སྣོད་མ་ཡིན་ལ་ཁྱད་པར་དུ་སྡོམ་པ་དང་དམ་ཚིག་འཆལ་ཞིང་། ཆོས་དང་བླ་མ་ལ་མི་གུས་པ། གྲོགས་དང་མཆེད་ལྕམ་ལ་སྨོད་པ་སྟེ། ཡང་དག་པའི་ལམ་ལ་རྨོངས་ཤིང་། སྒོ་གསུམ་ཁྲེལ་བག་མེད་པ། རྣམ་གཡེང་དང་མི་དགེ་བ་ལ་འཕྱར་བ་ནི་སྤང་བྱ་སྟེ། འདི་ཉིད་ལས། རྨོངས་དང་འཕྱར་ལ་གལ་ཏེ་བྱིན། །དུས་མིན་པར་ནི་སྲོག་ཟད་ནས། །བསྲེག་དང་སྦྲེབས་ལ་ཡུན་རིང་གནས། །(༥༥)ཞེས་སོ། །
གཉིས་པ་སྣོད་ལྡན་གྱི་ཆེ་བ་ནི། འདི་ཉིད་ལས། གང་ཞིག་འདི་ལ་མོས་གྱུར་པ། །སངས་རྒྱས་དཀྱིལ་འཁོར་ཐམས་ཅད་ཀྱི། །ཕྱོགས་དུས་ཀུན་ནས་ཐམས་ཅད་དུ། །དཀྱིལ་འཁོར་མ་ལུས་བསྙེན་པ་ཡིས། །ཉེ་བའི་སྲས་སུ་དགོངས་པར་འགྱུར། །ཞེས་པ་དང་། རྒྱལ་བའི་རིགས་མཆོག་འཛིན་པ་དེ། །འཇིག་རྟེན་གཙོ་དང་འཁོར་གྱིས་བཀུར། །དམ་པ་མཆོག་དང་དམ་པ་ཡིས། །སྲས་དང་སྤུན་དགོངས་བྱིན་གྱིས་རློབས། །བདེ་གཤེགས་ཉིད་ཀྱི་ཡུལ་ལ་ཞུགས། །འཇིགས་མེད་ཀུན་ཏུ་བཟང་པོར་སྦྱོར། །ཞེས་པ་དང་། དེ་ནི་ངེས་པར་ལུང་བསྟན་ཏེ། །སྲས་ནི་ཐུགས་ལས་སྐྱེས་པ་ཡིན། །ས་རབ་རིག་འཛིན་ས་ལ་གནས། །ཞེས་སོ། །
གསུམ་པ་ནི། སྣོད་ཀྱི་སྐྱོན་གསུམ། དྲི་མ་དྲུག་དང་བྲལ་བས་ལེགས་པར་ཉན་པ་སྟེ། སྐྱོན་གསུམ་ནི། ཚིག་དོན་ཅུང་ཟད་མི་གཉེར་བ་ཁ་སྦུབས་ལྟ་བུ་དང་། ཅུང་ཟད་ཟིན་ནའང་མི་བརྟན་པར་ཞབས་རྡོལ་བ་ལྟ་བུ་དང་། ཟིན་ཡང་ཉོན་མོངས་པའི་གཉེན་པོར་མི་འགྲོ་བར་གྲོགས་སུ་འགྱུར་བ་དུག་ཅན་ལྟ་བུ་གསུམ་དང་བྲལ་བས་ཉན་པ་སྟེ། ཡུམ་བར་མ་ལས། ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་། ངས་བཤད་དོ། །ཞེས་པ་ལྟ་བུའོ། །ལེགས་པར་ནི་དུག་ཅན་དང་། རབ་ཏུ་ཉོན་ནི་ཁ་སྦུབས་དང་། ཡིད་ལ་ཟུངས་ཤིག་ནི་ཞབས་རྡོལ་ལ་གདམས་པའོ། །དྲི་མ་དྲུག་ནི། རྣམ་བཤད་རིག་པ་ལས། ང་རྒྱལ་དང་ནི་མ་དད་དང་། །དོན་དུ་གཉེར་བ་མེད་ཉིད་དང་། །ཕྱི་རོལ་རྣམ་གཡེང་ནང་དུ་སྡུད། །སྐྱོ་བས་ཉན་པ་དྲི་མ་ཡིན། །ཞེས་པ་སྟེ། སློབ་དཔོན་དང་གྲོགས་ལས་ང་ལྷག་སྙམ་པའི་ང་རྒྱལ་དང་། སློབ་དཔོན་དང་ཆོས་དང་མཆེད་གྲོགས་རྣམས་ལ་མ་དད་པ་དང་། ཆོས་ལ་འདོད་འདུན་དང་དོན་གཉེར་མེད་པ་དང་། དབང་པོ་ཡུལ་གྱི་ཕྱིར་འབྲང་ཞིང་རྩེ་གཅིག་ཏུ་མི་འཇོག་པ་དང་། སེམས་བྱིང་རྨུགས་ཀྱིས་ནང་དུ་སྡུད་པ་དང་། འཆད་ཉན་གྱི་ཚེ་འདིས་ཅི་བྱེད་སྙམ་དུ་བདུད་ཀྱིས་བཅོས་པའི་སྐྱོ་བས་ཉན་པ་རྣམས་ནི། ཚེ་འདིར་ཡང་ཚིག་དོན་ཕུན་སུམ་ཚོགས་པའི་རང་བཞིན་བསམ་གཏན་དང་། ཤེས་རབ་དང་། རྣམ་པར་གྲོལ་བའི་ཆོས་ལ་བར་དུ་གཅོད་ཅིང་། ཕྱི་མར་ཡང་ཆོས་དང་མི་འཕྲད་པའི་ཉེས་པས་འཁོར་བ་མཐའ་མེད་དུ་འཁྱམས་པར་འགྱུར་བས་རབ་ཏུ་གུས་པས་སྤྱོད་ལམ་བསྡམ་ཞིང་ལེགས་པའི་ཚུལ་གྱིས་སོ། །གཉིས་ཀ་ལ་ཐུན་མོང་དུ་འདོམས་པའི་ཚུལ་ནི། ཆོས་སྤྱོད་ཐམས་ཅད་ཀྱི་མན་ངག་མངོན་པར་རྟོགས་པའི་རྒྱུད་ལས། དང་པོ་བྱང་ཆུབ་སེམས་བསྐྱེད་དོ། །རང་ཉིད་སྒྲོལ་མར་བསྒོམས་བྱས་ནས། །རྣ་བ་གཡས་པར་པདྨ་བསམ། །སློབ་དཔོན་འཇམ་དཔལ་བསྒོམས་(༥༦)བྱས་ནས། །བླ་མའི་ཞལ་གྱི་འོད་ཟེར་དག །པདྨར་ངེས་པར་ཐིམ་པར་བྱ། །འགྲོ་རྣམས་ལྷ་མོར་བསྒོམས་བྱས་ནས། །ཐོན་ཁར་མི་རྟོག་སྟོང་པ་ཉིད། །སྐད་ཅིག་གཉིས་ཙམ་བསྒོམ་པར་བྱ། །ཞེས་པས། སློབ་དཔོན་འཇམ་དཔལ་དུ་གསལ་བའི་ཞལ་ནས་ཆོས་ཀྱི་གསུང་འོད་ཟེར་དུ་ཐོན་པས། རང་ཉིད་དེའི་ཡུམ་སྒྲོལ་མར་གྱུར་པའི་རྣ་བ་གཡས་པར་ཐིམ་པས་ཚིག་དོན་གྱིས་ལུས་གང་དྲི་མ་དག་པར་བསམ་ཞིང་། ཆོས་ཐོན་དུས་ཆོས་ཐུན་འགོ་ཞབས་འགྱུར་བས་ཀྱང་མི་རྟག་པ་མཚོན་ཞིང་། དེའི་རང་བཞིན་སྟོང་པར་བསམ་པའི་ངང་ནས་བསྔོ་བ་བྱ་ཞིང་སྒྱུ་མ་ལྟ་བུས་ཐུན་མཚམས་འདའ་བར་བྱའོ། །དེའང་འཆད་པ་པོས་ཆོས་བསྟན་པ་ནི་སྦྱིན་པ། ཉོན་མོངས་པ་མེད་པས་ཚུལ་ཁྲིམས། ཆོས་བསྟན་པ་ལ་སྐྱོ་ངལ་དང་གནོད་འཚེ་བཟོད་པས་བཟོད་པ། སྤྲོ་བས་བརྩོན་འགྲུས། ཆོས་འཆད་པ་ལས་གཞན་དུ་མ་ཡེངས་པས་བསམ་གཏན། ཚིག་དོན་འབྱེད་པས་ཤེས་རབ་སྟེ་ཕ་རོལ་ཏུ་ཕྱིན་པ་དྲུག་རྫོགས་ཤིང་། ཉན་པ་པོས་ཀྱང་ཆོས་འཆད་པའི་སྟན་དང་མཆོད་པ་ཆུ་དང་མེ་ཏོག་ལ་སོགས་པ་འབུལ་བས་སྦྱིན་པ། ལུས་ངག་ཡིད་གསུམ་གྱི་མ་དག་པ་རྐང་པ་བརྐྱང་པ་ལ་སོགས་པ་སྟེ། སྤྱོད་འཇུག་ལས། སྐྱིལ་ཀྲུང་འདུག་དང་རྒྱབ་མི་བསྟན། །གདུགས་དང་མཁར་བ་མཚོན་ཐོགས་དང་། །མགོ་བོ་དཀྲིས་པ་དག་ལ་མིན། །ཞེས་པ་ལ་སོགས་པ་ནས། སྒྲ་ཆེ་ཆུང་མི་བྱ་བའི་བར་ནི་ལུས་བསྡམ་པ་དང་། ཅ་ཅོ་དང་ཤུབ་བུ་ཟློས་རེས་བྱེད་པ་ལ་སོགས་མི་བྱ་བ་ནི་ངག་གི་ཉེས་པ་དང་། སེམས་ཀྱི་ཉོན་མོངས་པ་དང་། མ་དད་པ་ལ་སོགས་བསྡམ་པ་ནི་ཚུལ་ཁྲིམས་སོ། །ཆོས་གྲལ་དུ་ལྷགས་པའི་འབུ་སྦྲང་ལ་སོགས་པ་ལ་མི་འཚེ་ཞིང་ཤིག་ལ་སོགས་པའི་གནོད་པ་ཆེ་ཆུང་བཟོད་པ་དང་། ཆོས་སྟོན་པ་ལ་གསོལ་བ་འདེབས་ཤིང་ཉན་པར་བརྩོན་པ་ནི་བརྩོན་འགྲུས་དང་། སེམས་མ་ཡེངས་པར་ཉན་ཞིང་ཐོས་པ་འཛིན་པ་ནི་བསམ་གཏན་དང་། རང་གིས་རྟོགས་པའི་དོན་ལ་དཔྱོད་པ་དང་ཐེ་ཚོམ་གྱི་གཞིར་གྱུར་ན་བླ་མ་ལ་དྲི་ཞིང་རྩོད་པས་རྣམ་པར་གཏན་ལ་དབབ་པ་ནི་ཤེས་རབ་སྟེ། དེ་ཉིད་ལས། མེ་ཏོག་སྟན་སོགས་རབ་འབུལ་ཞིང་། །ས་ཕྱོགས་སྤྱོད་ལམ་བསྡམ་པ་དང་། །སྲོག་ཆགས་རྣམས་ལ་འཚེ་མི་བྱེད། །བླ་མ་ལ་ནི་གསོལ་བ་འདེབས། །མ་ཡེངས་བླ་མའི་གདམས་ངག་འཛིན། །དོགས་སེལ་ཕྱིར་ན་སྐྱོན་ཚིག་འདྲི། །སྒྲོལ་མ་ཡན་ལག་དྲུག་དང་ལྡན། །ཞེས་སོ། །ཡང་ན་སྣང་བ་ཐམས་ཅད་འོག་མིན་གྱི་ཞིང་ཁམས། ཆོས་སྒར་དེ་ཉིད་དཀྱིལ་འཁོར་གྱི་བཀོད་པ། (༥༧)བླ་མ་ཉིད་གཙོ་བོ་རིགས་ལྔ་ལུས་གཅིག་ལ་ཞལ་ཕྱོགས་བཞི་གང་དུ་བལྟས་ཀྱང་དེར་ལྟ་བས་ཐེག་པ་ཆེན་པོའི་སྒྲ་སྒྲོགས་པའི་གསུང་གི་འོད་ཟེར། འཁོར་རྣམས་ཞི་ཁྲོ་གང་མོས་ཀྱི་ཚོམ་བུར་གསལ་བའི་རྣ་བར་བཞུགས་པས་རྟོགས་པ་བསྐྱེད་ཅིང་། གསུང་ཡི་གེའི་སྤྲིན་ལས་ཕྱོགས་བཅུའི་འཇིག་རྟེན་ཐམས་ཅད་དུ་ཆོས་ཀྱི་གསུང་དབྱངས་རྒྱ་མཚོས་སེམས་ཅད་ཐམས་ཅད་ཀྱི་མུན་པ་བསལ་ཞིང་དོན་བྱས་པར་བསམ་མོ། །ཐོན་ཀར་སྣང་སྲིད་ལྷ་དང་གཞལ་ཡས་ཁང་གི་རང་བཞིན་དུ་གསལ་བཏབ་ལ། བདེན་པ་དབྱེར་མེད་པའི་ངང་ལས་བསྔོ་བ་བྱས་ལ་ལངས་ཏེ་སྒྱུ་མའི་ངང་ནས་ཐུན་མཚམས་ཀྱི་བྱ་བ་རྣམས་བྱའོ། །འདི་དག་ནི་གནད་དམ་པའོ། །
གསུམ་པ་དེ་གཉིས་ཀྱིས་གཏན་ལ་དབབ་བྱ་རྒྱུད་ཀྱི་དོན་དངོས་གཏན་ལ་དབབ་པ་ལ་གཉིས་ཏེ། རྒྱུད་གསུམ་སྤྱིའི་རྣམ་པར་བཞག་པ་དང་། གསང་ཆེན་དོན་གྱི་རིམ་པ་བྱེ་བྲག་ཏུ་བཤད་པའོ། །དང་པོ་ལ་གསུམ་སྟེ། མཚན་ཉིད། དབྱེ་བ། ལྡང་ཚད་དོ། །
དང་པོ་ནི། དེ་བཞིན་གཤེགས་པ་དངོས་སམ་དངོས་ཀྱི་བདག་རྐྱེན་ལས་བཀའ་བྱིན་གྱིས་བརླབས་པ་གང་ཞིག །འབྲས་བུ་རྡོ་རྗེའི་ཐེག་པ་ཡིན་ཏེ། རྡོ་རྗེ་ལས། གསུངས་སོ་བསྟན་ནོ་བྱིན་གྱིས་བརླབས། །རབ་འབྱམས་ཐེག་པའི་སྙིང་པོ་མཆོག །རང་བཞིན་རབ་ཏུ་འབྲེལ་བའི་ཕྱིར། །རྒྱུད་ཅེས་ངེས་པར་བཞག་པ་ཡིན། །ཞེས་སོ། །དེའང་གཞི་ལམ་འབྲས་བུ་གསུམ་ཀ་ཡེ་ནས་སངས་རྒྱས་ཀྱིས་བྱིན་གྱིས་བརླབས་པ་དང་། དེའི་རང་བཞིན་གསུངས་པའི་མཚན་ཉིད་འདིར་འདུས་པ་ཁོ་ནའོ། །
གཉིས་པ་ལ་གསུམ་སྟེ། རྩ་བའི་རྒྱུད། ཕྱི་མའི་རྒྱུད། ཕྱི་མ་ཕྱི་མའི་རྒྱུད་དོ། །
དང་པོ་ནི། གཞུང་གཞན་ལ་མ་བརྟེན་པར་གཞན་བསྐྱེད་པར་ནུས་པ་རྩ་བའི་རྒྱུད། དེའི་དོན་རྒྱས་པར་སྟོན་པ་གཉིས་པའོ། །མ་ཚང་བ་ཁ་སྐོང་བ་གསུམ་པའོ། །ཡང་རྩ་བ། བཤད་རྒྱུད། རྒྱུད་ཕྱི་མ་གསུམ་དུའང་བསྟན་ཏེ། དང་པོ་ནི་སྔར་བཞིན་ནོ། །
གཉིས་པ་ནི་རྒྱུད་རང་གིས་རྒྱུད་གཞན་གྱི་དོན་འགྲེལ་བར་བྱེད་པ་བཤད་པ་དང་། དེ་གཉིས་ནས་མི་གསལ་བ་གསལ་བར་སྟོན་པ་མ་ཚང་བ་ཁ་སྐོང་བས་རྒྱུད་ཕྱི་མ་ཞེས་བཞེད་དེ། སྔ་མ་དང་དོན་གཅིག་གོ། །དེ་ལྟར་གསུམ་ལས། འདི་ནི་སྒྱུ་འཕྲུལ་རྩ་བའི་རྒྱུད་ཆེན་པོ་སྟེ། འདི་ལ་ཁ་ཅིག་གིས། ཞི་བའི་བསྟོད་པ་ཡན་ཆད་རྩ་བའི་རྒྱུད། མན་ཆད་ལ་ཕྱི་མའི་རྒྱུད་ཟེར་བ་ནི་རིགས་པར་མ་མཐོང་སྟེ། ཐམས་ཅད་རྩ་བའི་རྒྱུད་ཡིན་པར་བསྟན་པ་དང་། རྒྱུད་ལས་ཀྱང་དེ་ལྟར་མ་ཕྱེས་པ་དང་། ཞི་ཁྲོ་གཉིས་སུ་བྱུང་བ་ནི་རྒྱུད་གཞན་(༥༨)ཐམས་ཅད་ཀྱི་རྩ་བར་བསྟན་པ་ཡིན་གྱི། ཁྲོ་བོའི་དཀྱིལ་འཁོར་ཞི་བའི་གཡོན་དུ་བསྟན་པའི་རྣམ་དབྱེ་དེ་ནི་ཤིན་ཏུ་འགལ་བར་མཐོང་ངོ་། །
གསུམ་པ་ལྡང་ཚད་ནི། རྒྱུད་དེ་ཉིད་བྱ་བ་གཞན་གྱི་འཕྲོ་གཞིར་འགྱུར་ཞིང་། གཞན་ལ་དེའི་ཆོ་ག་མི་ལྟོས་ན་རྒྱུད་ཆེན་པོ་ཞེས་བྱ་སྟེ། རྩ་བའི་རྒྱུད་འདི་བཞིན་ནོ། །གཞན་ལས་འཕྲོས་ཤིང་གཞན་དུ་ལྟོས་ན་ཡན་ལག་གི་རྒྱུད་དམ་བཀོལ་བ་དུམ་བུའི་རྒྱུད་ཅེས་བྱ་སྟེ། རྒྱུད་ཆུང་ངུའོ། །དཔེར་ན་རྩེ་མོ་རིགས་བསྡུས་བཞིན་ནོ། །རྒྱུད་སོ་སོའི་ལྡང་ཚད་ནི། རང་གི་ལམ་ཐབས་མཆོག་ལ་བརྟེན་ནས་ཉོན་མོངས་པ་རང་སར་དག་ཅིང་། དངོས་གྲུབ་གཉིས་སྒྲུབ་པའི་རང་བཞིན་འབྲེལ་ཆགས་པ་ནི་རྒྱུད་དུ་བཀོད་པ་ཙམ་སོ་སོའི་ཚད་དོ། །གཞི་ལམ་འབྲས་བུ་གསུམ་ཀྱང་རང་རང་གི་ངོ་བོ་ཟམ་མ་ཆད་ཅིང་། ཐབས་མཆོག་གི་གཞི་དང་། ལམ་དང་། འབྲས་བུར་གནས་པས་རྒྱུད་ཅེས་རྣམ་པར་བཞག་གོ། །འདི་དག་ལ་ཡི་གེ་མི་འདྲ་བ་ཤིན་ཏུ་མང་བས་འདིར་མ་བྲིས་སོ། །
གཉིས་པ་གསང་ཆེན་དོན་གྱི་རིམ་པ་བྱེ་བྲག་ཏུ་བཤད་པ་ལ་གསུམ་སྟེ། གཞི་དང་ལམ་དང་། འབྲས་བུའི་རྣམ་པར་བཞག་པའོ། །དེ་སྐད་དུའང་རྡོ་རྗེ་ལས། གཞི་དང་། ལམ་དང་ངོ་བོ་ཡིས། །ངེས་པ་རྣམ་པ་གསུམ་དུ་གསུངས། །ཞེས་སོ། །དང་པོ་ལ་གཉིས་ཏེ། གནས་ལུགས་དོན་གྱི་གཞི་དང་། རྟོགས་པ་ལམ་གྱི་གཞིའོ། །དང་པོ་ལ་གསུམ་སྟེ། གཞིའི་གནས་ལུགས། སྣང་ཚུལ། དབྱེ་བའོ། །
དང་པོ་ནི། ཡེ་ནས་འོད་གསལ་བའི་སེམས་ཉིད་ཀྱི་རང་བཞིན་དཀྱིལ་འཁོར་གསུམ་དུ་སངས་རྒྱས་ཤིང་དངོས་པོ་དང་མཚན་མ་གང་ཡང་མ་གྲུབ་པ་སྟེ། འདི་ཉིད་ལས། རྩ་བ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །ཞེས་པ་དང་། གཞི་རྩ་མེད་པའི་སེམས་ཉིད་ནི། །ཕོ་མོ་མ་ཡིན་མ་ནིང་མིན། །མཚན་མེད་མ་ཡིན་རིགས་བརྒྱུད་མིན། །ཁ་དོག་མ་ཡིན་དབྱིབས་མ་ཡིན། །གནས་སུ་མ་ཡིན་གང་ཡང་མིན། །དེ་བཞིན་ཉིད་དབྱིངས་ཡེ་ཤེས་ཏེ། །ཞེས་པ་དང་། ཡང་། ཕྱོགས་བཅུ་དུས་བཞི་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་ཚོལ་ཅིག །ཅེས་གསུངས་པས། འདིའི་དོན་ངེས་པར་བྱ་བ་ལ་དཔེ་དོན་རྟགས་གསུམ་ལས། སེམས་ཉིད་རང་བཞིན་གྱིས་དག་པའི་དཔེ་སྟོན་ཀའི་ནམ་མཁའ་སྤྲིན་ཐམས་ཅད་དང་བྲལ་བ་ལྟ་བུ་སྟེ་དངོས་པོ་དང་མཚན་མ་མེད་པའོ། །དོན་ནི་སེམས་ཉིད་གང་དུའང་མ་གྲུབ་ཅིང་སྨྲ་བསམ་བརྗོད་པ་ཐམས་ཅད་ལས་འདས་པ་རང་བྱུང་གི་ཡེ་ཤེས་སོ། །(༥༩)རྟགས་ནི་དྲན་རིག་སྣ་ཚོགས་སུ་གསལ་བ་འདི་ཉིད་ཡིན་ཏེ། གཞི་རྩ་དང་ངོས་བཟུང་མེད་པ། ཁ་དོག་དང་དབྱིབས་མཚན་མེད་ལ་སྣང་བ་འདིས་མཚོན་པའོ། །དེ་སྐད་དུའང་ཀུན་བྱེད་ལས། ང་ཡི་རང་བཞིན་ཤེས་འདོད་ན། །དཔེ་ནི་ནམ་མཁའ་ལྟ་བུར་ལྟོས། །དོན་ནི་ཀུན་ཏུ་སྐྱེ་བ་མེད། །རྟགས་ནི་རིག་པ་བྱང་ཆུབ་སེམས། །ཞེས་སོ། །དེའང་མེད་པ་ཕྱང་ཆད་དུ་མ་སོང་བས་གསལ་ལ་ངོས་བཟུང་མེད་པ་རྒྱ་མཚོ་རྙོགས་དྭངས་པའི་གཏིང་ལྟ་བུ། ཡོད་པ་མཐའ་གཅིག་ཏུ་མ་གྲུབ་པས་དཔེ་སྟོན་ཀའི་ནམ་མཁའ་ལྟ་བུ། ཡོན་ཏན་ལྷུན་གྱིས་གྲུབ་པས་ཡིད་བཞིན་གྱི་ནོར་བུ་ལྟ་བུ་སྟེ། རྒྱ་མཚོ་ལས། ནམ་མཁའ་རྒྱ་མཚོ་རིན་ཆེན་སོགས། །ཉེ་བའི་དཔེ་ཡིས་མཚོན་པའོ། །ཞེས་སོ། །དེའང་ངོ་བོ་གང་དུའང་མ་གྲུབ་པས་ཀ་དག་ཅེས་བྱ་ལ། ཡོན་ཏན་ཡེ་ནས་རྫོགས་པས་ལྷུན་གྲུབ་ཅེས་བྱ་སྟེ། ངོ་བོ་གཅིག་ལ་རང་བཞིན་གཉིས་སུ་མེད་པ་ཆུ་དང་ཆུ་ཟླའི་ཚུལ་ཏེ། རྒྱས་པ་ལས། ཐམས་ཅད་དག་ཅེས་བྱ་བ་ཡང་། །དངོས་པོ་བསལ་དག་མ་ཡིན་ཏེ། །སྣང་སྤྱོད་ཉིད་ན་རྣམ་པར་དག །རང་རིག་ཡེ་ཤེས་གཟུགས་སུ་སྐྱེས། །སྐུ་དང་ཡེ་ཤེས་བསམ་མི་ཁྱབ། །ཅེས་སོ། །དབྱེ་ན། ཀ་དག་དང་ལྷུན་གྲུབ་གཉིས་པོ་ལ། དབྱིངས། ཡེ་ཤེས། གཉིས་སུ་མེད་པ་གསུམ་གསུམ་དུ་འདོད་དེ། སྔ་མ་ལས། དབྱིངས་དང་ཡེ་ཤེས་གཉིས་སུ་མེད། །ལྷུན་གྱིས་གྲུབ་དང་རྣམ་དག་པའོ། །ཞེས་སོ། །དེ་ལ་དབྱིངས་ཀ་དག་ནི་སེམས་ཉིད་ཡེ་ནས་དག་པའོ། །ཡེ་ཤེས་ཀ་དག་ནི་རིག་པ་སྐྱེས་སམ་གནས་དུས་ཉིད་ནས་ངོ་བོ་མེད་པའོ། །གཉིས་མེད་ཀ་དག་ནི་གང་སྣང་བ་ཉིད་ལས་ཐ་དད་པའི་ཆོས་ཉིད་མ་གྲུབ་པའོ། །དེ་བཞིན་དུ། དབྱིངས་ལྷུན་གྲུབ་ནི་ཡེ་ནས་འོད་གསལ་བའི་སེམས་ཉིད་སུས་ཀྱང་མ་བྱས་པར་གདོད་མ་ནས་དུས་གསུམ་འཕོ་འགྱུར་མེད་པར་ཡོད་པ་སྟེ། ལེ་ལག་ལས། འདས་དང་ད་ལྟར་བྱུང་བ་དང་། །འབྱུང་བར་མ་ངེས་དུས་འདི་དག །སྔ་ཕྱི་མེད་པར་མཉམ་ཡིན་ཏེ། །ཞེས་སོ། །ཡེ་ཤེས་ལྷུན་གྲུབ་ནི་དཀྱིལ་འཁོར་གསུམ་དང་ཅིར་སྣང་ཐམས་ཅད་ཡེ་ཤེས་ཀྱི་རོལ་པར་ཤར་བ་ཉིད། སུས་ཀྱང་མ་བྱས་པར་ཡེ་ཤེས་ཉིད་རང་སྣང་བར་འདོད་དེ། རྡོ་རྗེ་ལས། ཆོས་ཀུན་ཡེ་ནས་དག་པ་ཡི། །ཡེ་ཤེས་ཉིད་ལ་ཉིད་སྣང་བ། །སུས་ཀྱང་མ་བྱས་རང་བྱུང་བར། །ཡེ་ཉིད་ནས་ནི་ལྷུན་གྲུབ་པའོ། །ཞེས་སོ། །གཉིས་མེད་ལྷུན་གྲུབ་ནི་དེ་ལྟར་ཡེ་ཤེས་སུ་སྣང་བ་ཡང་རྟག་པ་བདེན་པའི་རང་བཞིན་མ་ཡིན་ཏེ། ཆུ་ཟླའམ་གཟུགས་བརྙན་ལྟར་སྣང་ལ་ངོ་བོས་སྟོང་པར་འདོད་པ་ནི། རྒྱས་པ་ལས། འདི་ལྟར་ཐམས་ཅད་གཟུགས་བརྙན་ཏེ། །(༦༠)བྱ་བྱེད་སྣང་ཞིང་དངོས་པོ་མེད། །ཆུ་ཟླའི་ཚུལ་དུ་ཐམས་ཅད་གནས། །ཐམས་ཅད་སྣང་ལ་རང་བཞིན་མེད། །ཅེས་སོ། །
གཉིས་པ་སྣང་ཚུལ་ནི། གཞི་དེ་ལྟ་བུ་ལས་མ་རིག་པ་བདག་ཏུ་འཛིན་བྱེད་ཀྱི་བློ་རྟོག་པ་ལངས་པས་འགྲོ་བ་སོ་སོར་སྣང་བ་རྨི་ལམ་ལྟ་བུ་སྟེ། འདི་ལས། ཨེ་མ་ཧོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །ཅེས་སོ། །དེ་ལྟར་སྣང་དུས་འདི་ཉིད་ན་ངོས་བཟུང་མེད་དེ། ལས་རིམ་ལས། འཁོར་བ་གཟུགས་བརྙན་འདྲ་བ་ཡིས། །རང་བཞིན་ཡེ་ནས་མྱ་ངན་འདས། །ཞེས་སོ། །དེའང་སེམས་ཅན་གྱི་དུས་ན། སེམས་ཀྱི་སྣང་བ་ཡུལ་དང་རྣམ་པ་སྣ་ཚོགས་སྣང་བ་དུང་ལ་སེར་པོར་འཛིན་པ་ལྟ་བུ་ཉིད། འཁྲུལ་པ་དག་ཚེ་སངས་རྒྱས་ལ་ཡེ་ཤེས་ཀྱི་སྣང་བ་སྐུ་དང་ཞིང་ཁམས་སུ་སྣང་བ་ཡང་། སྔར་གྱི་གཞི་ཕུང་པོ་ཁམས་དང་སྐྱེ་མཆེད་དག་པ་ལས་གྱུར་པ་སྟེ། དུང་སེར་པོ་ཉིད་བད་ཀན་དག་པས་དཀར་པོར་སྣང་བ་བཞིན་ནོ། །
གསུམ་པ་དབྱེ་བ་ལ་གསུམ་སྟེ། དོན་དམ་པ། ཀུན་རྫོབ། དབྱེར་མེད་པའོ། །དེ་སྐད་དུ་ལམ་རིམ་ལས། དེ་ཡང་རྣམ་གསུམ་ཚུལ་དུ་བཞག །ཅེས་སོ། །
དང་པོ་ནི། ཆོས་ཐམས་ཅད་ཀྱི་རང་བཞིན་སྤྲོས་པའི་མཐའ་དང་བྲལ་བ་སྟེ། རྒྱས་པ་ལས། ཆོས་རྣམས་མ་ལུས་ཐམས་ཅད་ཀུན། །དེ་བཞིན་ཉིད་དང་སྟོང་པའི་མཐའ། །ཡང་དག་ཉིད་དང་ཆོས་ཀྱི་དབྱིངས། །མཚན་ཉིད་མེད་ཅིང་དམིགས་སུ་མེད། །ཅེས་སོ། །དེའང་ཆོས་ཐམས་ཅད་རིག་པས་གཞིག་ཅིང་བརྟགས་ན་གང་གི་ངོ་བོར་མ་གྲུབ་ཅིང་། སྣང་དུས་ཉིད་ནས་སྐྱེ་འགགས་གནས་གསུམ་དང་བྲལ་བར་གནས་ཏེ། འདི་ཉིད་ལས། ཨེ་མ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཅེས་པའི་འདོན་པ་བསྒྱུར་ཏེ། འགགས་པ་དང་། གནས་པ་དང་། དམིགས་པ་དང་། འགྲོ་འོང་མེད་པའི་བར་དུ་གསུངས་ཤིང་། རིགས་པས་ཀྱང་གྲུབ་སྟེ། སྣང་སྲིད་འཁོར་འདས་ཀྱིས་བསྡུས་པའི་ཆོས་འདི་དག་ཆོས་ཅན། རང་བཞིན་བདེན་པར་གྲུབ་པ་ཅུང་ཟད་ཀྱང་མེད་དེ། བདེན་པའི་གཅིག་དང་དུ་མ་དང་བྲལ་བའི་ཕྱིར། ཅེས་གཅིག་དུ་བྲལ་གྱི་གཏན་ཚིགས་ལ་སོགས་པས་ཀྱང་ཤེས་སོ། །མདོར་ན་ཇི་ལྟར་སྣང་བ་དེའི་རང་བཞིན་གདོད་མ་ནས་ངོ་བོ་མེད་པ་ནི་དོན་དམ་པའི་གནས་ལུགས་སོ། །
གཉིས་པ་ཀུན་རྫོབ་ལ་གསུམ་སྟེ། ངོ་བོ། དབྱེ་བ། རང་བཞིན་ནོ། །དང་པོ་ནི། སྣང་སྲིད་འཁོར་འདས་ཀྱི་ཆོས་མ་འགགས་སྣ་ཚོགས་སུ་གསལ་བ་འདི་ཡིན་ནོ། །དབྱེ་ན་གཉིས་ཏེ། ཡང་དག་ཀུན་རྫོབ་དང་། ལོག་(༦༡)པའི་ཀུན་རྫོབ་བོ། །
དང་པོ་ནི། འཁྲུལ་པ་དག་པའི་ཚེ་ཐམས་ཅད་དཀྱིལ་འཁོར་གྱི་རོལ་པར་སྣང་བ་ཡིན་ཏེ། འདི་ཉིད་ལས། ཡེ་ཤེས་ཉིད་ལ་ཡེ་ཤེས་རོལ། །ཡེ་ཤེས་རོལ་པ་ཉིད་ཀྱང་གསོག །ཅེས་པ་དང་། ལམ་རིམ་ལས། ཡང་དག་ཉིད་དུ་གྲགས་སོ་ཅོག །གཉིས་སྣང་ཉིད་ནས་གང་ཡིན་པ། །སེམས་ཉིད་ཡེ་ཤེས་སྒྱུ་མར་ཤར། །སྣང་བ་ངོ་བོ་ངེས་མེད་ཅིང་། །ཇི་ལྟར་བལྟས་པའི་སྣང་བ་དང་། །རང་བཞིན་ཐེར་ཟུག་རྟག་ཆད་བྲལ། །ཅེས་སོ། །
གཉིས་པ་ནི། འཁོར་བའི་འཁྲུལ་སྣང་ཇི་སྙེད་པ་ཐམས་ཅད་དེ། དེ་ཉིད་ལས། དེ་ལ་ལོག་རྟོག་སྒྱུ་མ་ནི། །ཆོས་དང་བདག་དང་དངོས་པོ་རྣམས། །ངོ་བོ་ཡོད་སོགས་རྟོག་པ་ལས། །རྟོགས་པ་སྒྱུ་མའི་ཀློང་གྱུར་པས། །སྐྱེས་ཀྱང་མི་བདེན་བསླུ་བ་གྲུབ། །ཅེས་སོ། །
གསུམ་པ་རང་བཞིན་ལ་གཉིས་ཏེ། ཡེ་ཤེས་སྒྱུ་མའི་རང་བཞིན་དང་། ལོག་རྟོག་སྒྱུ་མའི་རང་བཞིན་ནོ། །
དང་པོ་ནི། འོག་མིན་གྱི་ཞིང་ཁམས་ན་ལོངས་སྐུའི་སྣང་བ་དང་། དེ་ལས་འཕྲོས་པའི་སྤྲུལ་པ་སྟེ། འཇའ་ཚོན་ནམ་ཆུ་ཟླ་ལྟར་སྣང་ལ་རང་བཞིན་མེད་པ་དུས་ཐམས་ཅད་པའི་ངོ་བོར་གནས་ཤིང་། རྒྱུ་རྐྱེན་རང་རྒྱུད་པས་མ་བསྐྱེད་པར་འདོད་དེ། གཞི་ནས་དེ་ལྟར་གནས་པ་གསལ་བའི་ཕྱིར་རོ། །
གཉིས་པ་ནི། འགྲོ་བའི་སེམས་སྣང་རྨི་ལམ་ལྟ་བུ་སྟེ། དེའང་སེམས་ཀྱི་བག་ཆགས་ལས་ཕྱི་རོལ་དོན་གཞན་གྱིས་བསྐྱེད་པའི་རྒྱུ་འབྲས་སུ་མི་འདོད་དེ། རང་གི་རྣམ་རྟོག་ལས་ཀྱིས་སྤྲུལ། །ཅེས་སོ། །འདི་ནམ་བཟློག་ན། ལང་ཀར་གཤེགས་པ་ལས། སྲིད་གསུམ་འདི་ནི་རྨི་ལམ་དང་། །སྨིག་སྒྱུ་ཆུ་ཡི་ཕུང་པོ་བཞིན། །ནོར་བར་མཐོང་ནས་ཕྱིར་བཟློག་གོ། །ཞེས་སོ། །གསུམ་པ་དབྱེར་མེད་པ་ནི། ལོག་རྟོག་སྒྱུ་མ་དང་། ཡང་དག་སྒྱུ་མ་གཉིས་ཀའི་ཚེའང་། རང་གི་སྣང་བ་དེ་དང་དེའི་རང་བཞིན་སྟོང་པ་ལ་ཆུ་དང་ཟླ་གཟུགས་ལྟར་དབྱེར་མེད་པ་ཡིན་ཏེ། འདི་ཉིད་ལས། ཡང་དག་སྒྱུ་མའི་ཚུལ་གཉིས་སུ། །བདག་དང་བདག་གི་གཞན་མེད་དེ། །རྣམ་དག་དབྱིངས་ཉིད་ཚུལ་གཅིག་གོ། །ཞེས་སོ། །དེའང་སྒྱུ་མ་འདི་གཉིས་གཅིག་གམ་ཐ་དད། གཅིག་ན་དག་མ་དག་སོ་སོར་བཞག་ཏུ་མེད་པ་དང་། ཕན་ཚུན་འཆོལ་བར་སྣང་བར་འགྱུར་ཞིང་། མི་གཅིག་ན་སེམས་ཉིད་གཅིག་གི་རང་བཞིན་མ་ཡིན་པར་འགྱུར་རོ་ཞེ་ན། ལན་ལ་གཉིས་ལས། ཚུལ་མཚུངས་པ་ནི། རྨི་ལམ་གྱི་འཁྲུལ་སྣང་དང་། ཉིན་སྣང་གི་མ་འཁྲུལ་པ་འདི་གཉིས་ཐ་སྙད་དུ་གཅིག་གམ་ཐ་དད། གཅིག་ན་ཉིན་མཚན་གྱི་སྣང་བ་ཐ་དད་དུ་སོ་སོར་བཞག་ཏུ་མེད་པ་དང་། ཉིན་སྣང་བཞིན་དུ་རྨི་ལམ་ཡང་མ་འཁྲུལ་པ་དང་། རྨི་ལམ་བཞིན་དུ་ཉིན་སྣང་ཡང་(༦༢)འཁྲུལ་པར་འགྱུར་བས་ཕན་ཚུན་འཆོལ་བའི་སྐྱོན་ཡོད་ཅིང་། ཐ་དད་ནའང་སེམས་གཅིག་ལ་སྣང་བའི་རང་བཞིན་མ་ཡིན་པར་འགྱུར་རོ་ཞེ་ན་ལན་ཅི་ཡོད། དེ་སེམས་སུ་ངོ་བོ་གཅིག་ལ་དུས་ཀྱི་ཐ་དད་ཞེ་ན། མཚུངས་ཏེ། རིག་པར་ངོ་བོ་གཅིག་ཀྱང་རྐྱེན་འཁྲུལ་མ་འཁྲུལ་གྱི་གནས་སྐབས་སོ་སོར་སྣང་ཞེས་བྱའོ། །
གཉིས་པ་ལན་དངོས་ནི། དུང་སེར་པོར་འཛིན་དུས་ནས་དཀར་པོར་གནས་པ་དེའི་ཕྱིར། སེར་པོར་མ་གྲུབ་པས་དཀར་པོ་དང་གཅིག་ཐ་དད་དུ་མ་གྲུབ་པ་ལྟར། འཁྲུལ་པར་སྣང་དུས་ཉིད་ནས་མ་འཁྲུལ་པའི་རང་བཞིན་ཡེ་ནས་དག་པར་གནས་པས། ངོ་བོ་གཅིག་པ་དང་ཐ་དད་པ་གང་དུའང་བཞག་ཏུ་མེད་དོ། །དེ་བཞིན་དུ་ཐོ་ཡོར་ལ་མིར་འཁྲུལ་དུས་ཉིད་ནས་ཐོར་གནས་པས། ཐོ་ཡོར་དང་མི་ལ་ངོ་བོ་གཅིག་པ་དང་ཐ་དད་དུ་བཞག་ཏུ་མེད་པ་བཞིན་ནོ། །ཚུལ་འདི་ལྟར་འཁོར་བ་ཉིད་མྱ་ངན་ལས་འདས་པར་འཁྲུལ་པ་གཞི་དང་རྩ་བ་མེད་ཅིང་། དོན་ལ་མི་གནས་པར་བསྟན་པ་སྟེ། འདི་ལས། ངོ་མཚར་སྐུ་གསུམ་ཡོན་ཏན་ཞིང་ཁམས་ཡང་། །གཞན་ན་མེད་དེ་དེ་ཉིད་དེ་ལྟར་ཡིན། །ཞེས་པ་དང་། ལོག་རྟོག་རྒྱུ་འབྲས་རྒྱུན་ཉིད་ཀྱང་། །གཞི་རྩ་མེད་དབྱིངས་སྐད་ཅིག་མ། །རྣམ་པར་དག་པའི་དབྱིངས་ཉིད་ཚུལ། །ཞེས་པ་དང་། རྡོ་རྗེ་ཕུང་པོའི་ཡན་ལག་ནི། རྫོགས་པའི་སངས་རྒྱས་ལྔ་རུ་གྲགས། །ས་ཆུ་སྤྱན་དང་མཱ་མ་ཀཱི། །མེ་རླུང་གོས་དཀར་སྒྲོལ་མ་སྟེ། །ནམ་མཁའི་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་སངས་རྒྱས་ཞིང་། །ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་སོ། །དེའང་དུང་དཀར་པོར་སྣང་བ་འདི་བར་སྐབས་སུ་སེར་པོར་སྣང་བ་ལྟར་འཁྲུལ་པར་སྣང་ཡང་། གཟུང་འཛིན་དག་པ་ན་འཁྲུལ་སྣང་འདི་ཉིད་ཡེ་ཤེས་སུ་དག་སྟེ། དུང་སེར་སྣང་དཀར་པོར་དག་པ་བཞིན་སངས་རྒྱས་སོ། །འདི་ལ་གནས་གྱུར་ཞེས་བཏགས་ཀྱང་གནས་གྱུར་མ་ཡིན་ཏེ་སྣང་བ་དེ་ལྟར་གནས་པའོ། །དུང་སེར་པོ་ཉིད་དཀར་པོར་གནས་གྱུར་པ་མེད་དེ། དང་པོ་ནས་དཀར་པོར་གནས་པ་བཞིན་དུ། འཁྲུལ་སྣང་རྟོག་ཚོགས་དང་བཅས་པ་འདི་ཉིད་དང་པོ་ནས་སངས་རྒྱས་པས། དེ་ལས་ལོགས་ཤིག་ཏུ་གནས་སྤོས་པ་བཞིན་གནས་གྱུར་མི་འཐད་ཅིང་འདིའི་དགོངས་པ་མ་ཡིན་ནོ། །དེ་ལ་རྒྱུ་ཡི་ཐེག་པས་ཀུན་རྫོབ་འདུས་བྱས་མི་རྟག་ཅིང་བསླུ་བར་འདོད་དེ། དེ་ལྟར་ན་ལོངས་སྐུའང་བསླུ་བར་ཐལ་ཏེ། གཟུགས་སྐུ་གཉིས་ཀུན་རྫོབ་པས་བསྡུས་པའི་ཕྱིར་དང་། མི་རྟག་པར་ཐལ་བ་ལས། འགྲོ་གྲོལ་བར་དུ་འཇིག་རྟེན་འབྱོར་(༦༣)སླད་རྟག །ཅེས་ཁོ་རང་གི་གྲུབ་མཐའ་ནང་འགལ་བ་ཡིན་ནོ། །འདིར་ནི་ལོག་རྟོག་སྒྱུ་མའི་ཀུན་རྫོབ་མ་རིག་པས་བསྐྱེད་པའི་རྒྱུ་འབྲས་ཡིན་པས་མི་རྟག་པ་དང་བསླུ་བར་འདོད་ལ། ཡང་དག་སྒྱུ་མ་ནི་དང་པོ་ཉིད་ནས་དེ་ལྟར་གཞི་ལ་ལྷུན་གྱིས་གྲུབ་པ་ལམ་གྱིས་ཕྱིན་ཅི་ལོག་དག་པ་ན་སྔར་ཐོག་ཏུ་ཕེབས་པས་དུས་གསུམ་འཕོ་འགྱུར་མེད་དེ། རྒྱུ་རྐྱེན་གྱིས་གསར་དུ་འདུས་མ་བྱས་ཤིང་ལྷུན་གྱིས་གྲུབ་པའི་ཕྱིར་རོ། །ཚུལ་འདི་རྣམས་བྱམས་པས་ཀྱང་བཤད་དེ། འདུས་མ་བྱས་ཤིང་ལྷུན་གྱིས་གྲུབ། །གཞན་གྱི་རྐྱེན་གྱིས་རྟོགས་མིན་དང་། །མཁྱེན་དང་བརྩེ་དང་ནུས་པར་ལྡན། །དོན་གཉིས་ལྡན་པའི་སངས་རྒྱས་ཉིད། །ཅེས་སོ། །དེས་ན་འདིར་ཆོས་ཐམས་ཅད་བདེན་པ་དབྱེར་མེད་དུ་ཡེ་ནས་སངས་རྒྱས་པའི་དོན་ནི་གནས་ལུགས་དོན་གྱི་གཞིའོ། །
གཉིས་པ་རྟོགས་པ་ལམ་གྱི་གཞི་ལ་གསུམ་སྟེ། གནས་ལུགས། སྣང་ལུགས། དབྱེ་བའོ། །
དང་པོ་ནི། གནས་ལུགས་ཀྱི་གཞི་དེ་ཉིད་བློས་ཕྱིན་ཅི་མ་ལོག་པར་རྟོགས་པ་སྟེ། རྡོ་རྗེ་ལས། རང་བཞིན་གནས་པའི་གཞི་དེ་ནི། །རྟོགས་པ་རྣལ་འབྱོར་ལམ་གྱི་གཞི། །ཞེས་སོ། །དེའང་མ་རྟོགས་ན་གཞི་དེས་ཀུན་ལ་ཁྱབ་ཀྱང་གཤིས་སུ་གནས་པ་ཙམ་ལས་དོན་བྱེད་མི་ནུས་ཏེ་ཐ་མལ་པའི་སེམས་ཅན་ལ་གནས་པ་བཞིན་ནོ། །དེ་ཉིད་རྟོགས་པ་ལས་ལམ་བསྒོམ་པའི་གཞི་བྱེད་པས་དོན་འགྲུབ་པ་རྣལ་འབྱོར་པའི་ལམ་གྱི་གཞི་ཞེས་བྱའོ། །
གཉིས་པ་ནི། དེ་ཉིད་རྟོགས་པའི་རྣལ་འབྱོར་པ་ནི་དངོས་པོ་མཚན་མར་འཛིན་པ་ཤས་ཆུང་བས་ཐར་པ་ལ་ཉེ་བ་དང་། ཐ་མལ་གྱི་སྣང་བ་མ་དག་པ་དངོས་སུ་མ་ལོག་ཀྱང་སེམས་ཅན་གཞན་ལས་ཁྱད་པར་དུ་འཕགས་ཏེ། དཔེར་ན་རྨི་ལམ་དུ་དགྲ་དང་གཡང་ས་ལ་སོགས་པ་འཇིགས་པ་ཤར་དུས། རྨི་ལམ་དུ་ཤེས་པ་དང་། མ་ཤེས་པ་གཉིས་ཀ་ལ་སྣང་བ་དེ་མ་ལོག་པར་མཚུངས་ཀྱང་། སྡུག་བསྔལ་ལ་ཁྱད་ཡོད་དེ། རྨི་ལམ་དུ་མ་ཤེས་ན་དེའི་བར་ཉིན་དུས་དང་ཁྱད་མེད་པ་ཙམ་མྱོང་དགོས་ལ། དེ་ཉིད་རྨི་ལམ་ཡིན་པར་ཤེས་པ་རྣམས་ལ་སྣང་བ་དེ་དངོས་སུ་མ་ལོག་ཀྱང་སྡུག་བསྔལ་རང་མཚན་པ་མེད་པ་བཞིན་དུ། ཕྱི་ནང་གི་འཁྲུལ་སྣང་རང་མཚན་དུ་ཞེན་པའི་འགྲོ་བ་རྣམས་ལ་གནས་སྐབས་སུ་བདེ་སྡུག་རང་མཚན་པ་ཡོད་ཅིང་། ཡུན་རིང་པོར་འཁོར་བར་འཁྱམས་པའི་ཉེས་པ་ཡོད་ལ། རྣལ་འབྱོར་པ་ཆོས་ཐམས་ཅད་ཀྱི་གཞིའམ་གཤིས་བདེན་པ་དབྱེར་མེད་དུ་རྟོགས་ན་(༦༤)རྣམ་རྟོག་དང་མཚན་འཛིན་ཤས་ཆུང་བས། གནས་སྐབས་སུ་བདེ་སྡུག་ལ་སྤང་བླང་དང་ཞེན་འཛིན་རང་མཚན་པ་མེད་ཅིང་། མྱུར་དུ་འཁོར་བ་མྱང་འདས་སུ་གྲོལ་བར་ངེས་པ་བདེན་མེད་སྒྱུ་མར་སྣང་བ་ཞེས་བྱའོ། །འདིའི་སྣང་བ་དང་སེམས་སྒྱུ་མར་གཉིས་པོ་གང་གི་ནང་དུ་འདུ་ན། འཁྲུལ་སྣང་དང་ཞེན་རྟོག་གི་ཆ་རྣམས་ནི་ལོག་རྟོག་སྒྱུ་མ་ཉིད་དུ་འདུས། སོ་སོ་རང་གི་རིག་པའི་ལྟ་བ་དང་། ཏིང་ངེ་འཛིན་དང་། ཡེ་ཤེས་རྣམས་ནི་ཡང་དག་སྒྱུ་མར་འདུ་སྟེ། ཕྱིན་ཅི་ལོག་གི་བློ་ལས་འདས་པའི་རིག་པ་ཡིན་པའི་ཕྱིར་རོ། །བླ་མ་རོང་པའི་བཞེད་ཀྱིས། གནས་སྐབས་ཕྱིན་ཅི་ལོག་གི་སྒྱུ་མ་སྣང་ཡང་ངེས་པར་མི་གོལ་མི་སྲིད་པས་ཡང་དག་སྒྱུ་མའི་ས་ལ་གཏོགས་པར་བསྡུ་སྟེ། ལྕགས་ཀྱུས་ཟིན་པའི་ཉ་ཆུ་ནང་ན་གནས་ཀྱང་སྐམ་སར་གཏོགས་པ་བཞིན་ནོ་ཞེས་གསུང་ངོ་། །
གསུམ་པ་ལ་གསུམ་སྟེ། མཉམ་པ་ཉིད་བཞི། དག་པ་གསུམ། རྟོགས་པ་བཞིའི་གཏན་ཚིགས་ཀྱིས་གནས་ལུགས་ཀྱི་གཞི་རྟོགས་པ་ལམ་གྱི་གཞིར་བསྒྲུབ་པའོ། །
དང་པོ་ནི། མཉམ་གཉིས་ལྷག་པའི་མཉམ་གཉིས་ཀྱིས། །ཞེས་པས། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཆོས་ཅན། ཡེ་ནས་དག་མཉམ་རྫོགས་པ་ཆེན་པོར་གནས་པ་ཡིན་ཏེ། གདོད་མ་ནས་མཉམ་པ་ཉིད་བཞིའི་རང་བཞིན་དུ་གནས་པའི་ཕྱིར་རོ། །དེ་ལ་ཐུན་མོང་གི་མཉམ་པ་གཉིས་དང་། ལྷག་པའི་མཉམ་པ་གཉིས་སོ། །
དང་པོ་ཐེག་པ་ཐུན་མོང་གི་འདོད་པའི་བདེན་པ་གཉིས་ཀྱིས་གཞལ་བས་ཀྱང་མཉམ་སྟེ། སྣང་ཙམ་ཉིད་ནས་རང་བཞིན་མ་གྲུབ་པའི་ཕྱིར། སྒྱུ་མ་ལྟ་བུར་ཆོས་ཐམས་ཅད་མཉམ་སྟེ། རྣམ་བཀོད་ལས། ཐུན་མོང་རྒྱུ་ཡི་ཀུན་རྫོབ་ཏུ། །རྐྱེན་བཞི་འདུས་ཙམ་སྒྱུ་མ་ཙམ། །ཞེས་སོ། །དོན་དམ་པར་གང་དུའང་མ་གྲུབ་པའི་ཕྱིར་ཆོས་ཐམས་ཅད་མཉམ་སྟེ། དེ་ཉིད་ལས། ཀུན་བརྟགས་སྤྲོས་པ་བཅས་པའི་ཕྱིར། །རྣམ་གྲངས་དོན་དམ་ཞེས་ཀྱང་བྱ། །དེ་ལ་རྒྱུ་རྐྱེན་ཆ་དབྱེ་བས། །འདུས་སྣང་དངོས་པོ་མ་སྐྱེས་ལ། །དོན་དམ་མཉམ་པར་འདོད་པ་སྟེ། །རྟེན་ཅིང་འབྲེལ་བས་སྒྲུབ་པའི་མཐའོ། །ཞེས་སོ། །
གཉིས་པ་ཐུན་མོང་མ་ཡིན་པའི་ཐེག་པ་ལ་གྲགས་པའི་བདེན་པ་གཉིས་ཀྱིས་གཞལ་ནའང་ཆོས་ཐམས་ཅད་མཉམ་ཉིད་དུ་གནས་པ་ལས། དང་པོ་ཀུན་རྫོབ་སྒྱུ་མར་མཉམ་པ་ནི། ཕྱི་ནང་གི་ཆོས་ཐམས་ཅད་ཆོས་ཅན། བཟང་ངན་བླང་དོར་གྲུབ་པ་མེད་དེ། སྣང་བ་སྒྱུ་མར་དག་ཅིང་དེའི་རང་བཞིན་བདེན་མེད་ལས་འདུས་པའི་ཕྱིར་རོ། །དེ་ཉིད་ལས། ཀུན་རྫོབ་སྒྱུ་མར་སྣང་བ་ནི། །སྒྱུ་མའི་ཚུལ་དུ་ཐམས་ཅད་སྣང་། །འདི་དག་ཐམས་ཅད་གཟུགས་བརྙན་ཏེ། ཐམས་ཅད་(༦༥)སྣང་ལ་རང་བཞིན་མེད། །ཅེས་སོ། །དོན་དམ་སྐྱེ་འགགས་མེད་པའི་ཕྱིར། མཉམ་པ་ཉིད་དུ་གནས་ཏེ། དེ་ཉིད་ལས། དོན་དམ་སྐྱེ་འགགས་མེད་པ་སྟེ། །ཆོས་རྣམས་མ་ལུས་ཐམས་ཅད་ཀུན། །དེ་བཞིན་ཉིད་དང་སྟོང་པའི་མཐའ། །ཡང་དག་ཉིད་དང་ཆོས་ཀྱི་དབྱིངས། །ཞེས་སོ། །དེའང་ཐེག་པ་འོག་མ་ལྟར་ཀུན་རྫོབ་སྐྱེ་འགགས་བྱེད་ལ་དོན་དམ་མི་བྱེད་པ་ལྟར་མ་ཡིན་ཏེ། གནས་ལུགས་ལ་ཀུན་རྫོབ་ཀྱང་སྣང་དུས་ཉིད་ནས་དོན་དམ་དང་དབྱེར་མེད་པས། སྐྱེ་འགགས་མི་བྱེད་པར་འདོད་དེ། རྣམ་བཀོད་ལས། དོན་དམ་ཀུན་རྫོབ་དབྱེར་མེད་ནི། །ཆོས་རྣམས་མ་ལུས་ཐམས་ཅད་ཀུན། །གཞི་རྩ་མེད་ལས་ཐམས་ཅད་བྱུང་། །མེད་དང་ཡོད་པ་གཉིས་ཀ་མིན། །དོན་དམ་ཀུན་རྫོབ་དབྱེར་མེད་དེ། །འདུས་མ་བྱས་ཉིད་འདུས་བྱས་སྣང་། །དངོས་མེད་དེ་ཉིད་སྣ་ཚོགས་པའི། །དེ་ཉིད་སྒྱུ་མ་མིག་ཡོར་ཚུལ། །ཞེས་པ་དང་། འདི་ཉིད་ལས། འདུས་མ་བྱས་ཉིད་འདུས་བྱས་རྡོ་རྗེ་དཀྱིལ་འཁོར་འབྱིན་པའི་དམ། །ཞེས་པ་དང་། བདེན་པ་གཉིས་ཀར་དབྱེར་མེད་པས། །འཕྲུལ་དགའི་ཚུལ་ཏེ་ཐ་དད་མིན། །ཞེས་སོ། །ལོག་རྟོག་སྒྱུ་མའང་རྨི་ལམ་བཞིན་དུ་སྐྱེ་འགག་ཏུ་སྣང་ཡང་སྐྱེ་འགག་ཏུ་དོན་ལ་མ་གྲུབ་པས་ཀུན་རྫོབ་སྐྱེ་འགག་གྲུབ་པར་མི་འགྱུར་ཞིང་། ཡང་དག་སྒྱུ་མ་དུས་གསུམ་འཕོ་འགྱུར་མེད་པས་སྐྱེ་འགགས་མི་བྱེད་པ་ཁོ་ནར་འདོད་དོ། །ཚུལ་འདི་ཉིད་སློབ་དཔོན་ཟླ་བ་གྲགས་པས་ཀྱང་བཤད་དེ། བདེན་པ་གཉིས་ཆར་དུའང་རང་བཞིན་ཡོད་མིན་པས། །འདི་དག་རྟག་པ་མ་ཡིན་ཆད་མ་ཡིན། །ཞེས་པ་དང་། ཀླུ་སྒྲུབ་ཀྱིས། གང་གིས་རྟེན་ཅིང་འབྲེལ་བར་འབྱུང་། །འགགས་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །ཞེས་པ་ལ་སོགས་པ་གསུངས་པ་ཡིན་ནོ། །
གཉིས་པ་ནི། སྣོད་བཅུད་རྒྱུད་རྣམས་དག་རྟོགས་ཤིང་། །ཞེས་པས། ཆོས་ཐམས་ཅད་ཆོས་ཅན། ཡེ་ནས་མཉམ་རྫོགས་གཅིག་ཏུ་གནས་པ་ཡིན་ཏེ། དག་པ་གསུམ་དུ་གནས་པའི་ཕྱིར་རོ། །དེ་ལ་སྣོད་ཡུམ་ལྔར་དག །བཅུད་ཀྱི་ཕུང་པོ་ལྔ་ཡབ་ལྔར་དག །རྒྱུད་ཀྱི་རྟོག་ཚོགས་བརྒྱད་བྱང་ཆུབ་སེམས་དཔར་དག་པའོ། །འདི་དག་གི་རང་བཞིན་སྔར་བསྟན་ཟིན་མོད་ཀྱི་འོན་ཀྱང་ཅུང་མི་འདྲ་བས་ལུང་གཞན་དང་མཚུངས་པར་བཤད་ན། རྣམ་བཀོད་ལས། རྒྱུ་ཡི་མཚན་ཉིད་དག་པ་ནི། །ཕྱི་རོལ་ཆེན་པོ་ལྔ་རྣམས་ཏེ། །སེམས་ཉིད་གཟུང་འཛིན་གཉིས་སྣང་བ། །གཟུང་བའི་ཡུལ་ཉིད་འབྱུང་བ་ཆེ། །རྒྱུ་ཉིད་རང་གི་སེམས་ཡིན་པས། །འབྱུང་བ་ཆེན་པོ་རྒྱུད་ལས་དག །ཡུམ་གྱི་རང་བཞིན་ཉིད་དུ་གནས། །ཞེས་པ་(༦༦)དང་། ཟླ་བ་རུས་པ་རྡོ་རྗེ། ཤ་རིན་པོ་ཆེ། དྲི་ཆེན་དེ་བཞིན་གཤེགས་པ། དྲི་ཆུ་ལས། ཉི་མ་ཁྲག་པདྨའི་རིགས་ཏེ་ཡབ་ལྔར་དག་པ་དེ་ཉིད་ལས། འབྲས་བུ་ཡོངས་སུ་དག་པ་ན། །སེམས་ཅན་ཀུན་གྱི་རུས་པ་དེ། །རྡོ་རྗེ་བྱང་ཆུབ་སེམས་ཡིན་ནོ། །ཤ་ནི་པདྨའི་རཀྟ་ཡིན། །དྲི་ཆེན་དྲི་ཆུ་གུར་གུམ་ཆུ། །སོ་སོའི་ལུས་ལ་གནས་པ་དག །དོན་དམ་དམིགས་མེད་དག་པ་ཡིས། །ཕྱི་ནང་ཆོས་རྣམས་ཐམས་ཅད་ཀྱང་། །རང་གི་ངོ་བོར་མ་ཡིན་ཏེ། །སྐྱེ་འགགས་མེད་པར་ཡེ་ནས་དག །ཅེས་པ་དང་། རྟོག་ཚོགས་རྒྱུད་ནི་སེམས་དཔའ་ཆེ། །ཞེས་སོ། །
གསུམ་པ་རྟོགས་པ་བཞིའི་གཏན་ཚིགས་ནི། རྟོགས་པ་བཞིས་བསྡུས་པའི་ཆོས་ཐམས་ཅད་ཆོས་ཅན། རྣལ་འབྱོར་པས་དག་མཉམ་རྫོགས་པ་ཆེན་པོར་དབང་འབྱོར་པ་ཡིན་ཏེ། དེ་དག་གི་རང་བཞིན་རྟོགས་པ་བཞིར་བློས་ངེས་པའི་ཕྱིར་རོ། །དེའང་འདི་ཉིད་ལས། རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་བརླབས་དང་མངོན་སུམ་པར། །རབ་ཏུ་རྟོགས་པ་རྣམ་བཞི་ཡིས། །ཐམས་ཅད་མངོན་རྫོགས་རྒྱལ་པོ་ཆེ། །ཞེས་སོ། །ཆོས་ཐམས་ཅད་བདེན་པ་དབྱེར་མེད་དུ་ཡེ་ནས་དག་པར་རྒྱུ་གཅིག་པ་དང་། སྐུ་གསུང་ཐུགས་ཀྱི་ཡི་གེའི་སྤྲིན་དུ་ཡེ་ནས་གནས་ཤིང་མ་སྐྱེས་པར་གཅིག་པ་དང་། དེ་དག་ཀྱང་སྐུ་དང་ཡེ་ཤེས་ཀྱི་རང་བཞིན་དུ་ཡེ་ནས་སངས་རྒྱས་པས་བྱིན་གྱིས་བརླབས་ཤིང་། བླ་མས་ཀྱང་དབང་ལ་སོགས་པས་ལམ་དུ་བྱིན་གྱིས་བརླབས་པ་དང་། དེ་དག་ཀྱང་ཇི་ལྟར་གནས་པ་བཞིན་བསྟན་པའི་གནས་ལུགས་རང་གི་ཡིད་ཆེས་པར་མངོན་སུམ་དུ་རྟོགས་པ་བཞིའི་ངོ་བོར་ཁོང་དུ་ཆུད་པ་ནི། གཤིས་ཀྱི་གཞི་ལམ་གྱི་གཞིར་འགྲུབ་པར་བྱེད་པའི་གཏན་ཚིགས་སོ། །དེ་ལྟར་ཆོས་ཐམས་ཅད་སྣང་སྟོང་གཉིས་སུ་མེད་པས་འཁོར་འདས་དབྱེར་མེད་ཀྱི་ལྟ་བ་རྟོགས་པས། རྟག་ཆད་ཀྱི་མཐའ་ལས་གྲོལ་བ་དང་། ཚོགས་གཉིས་མྱུར་དུ་རྫོགས་པ་དང་། ལམ་ལ་གོལ་ས་མེད་པ་དང་། ཐར་པ་བྱང་ཆུབ་ཏུ་ངེས་པ་དང་། ངན་འགྲོར་མི་ལྟུང་ཞིང་བཟང་འགྲོར་བརྒྱུད་པ་དང་། ལས་ཀྱི་ཉེས་པས་མི་གོས་པ་དང་། ཐེག་པ་དམན་པ་ལས་གྲོལ་བ་དང་། དངོས་པོ་དང་མཚན་མར་མི་འཛིན་པ་དང་། དོན་གཉིས་ལྷུན་གྱིས་གྲུབ་པ་ལ་སོགས་པའི་ཡོན་ཏན་ཚད་མེད་དེ། ལམ་རིམ་ལས། གང་ཞིག་འདི་འདྲར་མཐོང་རྟོགས་པ། །དངོས་གྲུབ་མཆོག་གི་སྙིང་པོ་སྟེ། །ཆུ་སྲིན་ཕྱག་རྒྱ་ཇི་བཞིན་དུ། །དང་པོ་དོན་རྟོགས་མཐར་མི་གཏོང་། །རྒྱ་མཚོ་དྭངས་པའི་གཟུགས་བརྙན་ལྟར། །སྒྲ་རྟེན་ཡིད་ལ་བྱེད་མིན་པར། །རང་རིག་མངོན་སུམ་དམིགས་བྲལ་བ། །རང་(༦༧)གསལ་གསུམ་བྲལ་མི་འགུལ་བས། །ངེས་པར་གདིང་དུ་གང་བྱས་པ། །ཐོས་བསམ་བརྟན་པའི་ལྟ་མཐར་ཕྱིན། །དེ་ལས་མཚན་མ་འབྱུང་བ་ནི། །སྟོབས་ཀྱི་རྟོགས་པའི་རླུང་ལྡན་ལ། །འཕོ་འགྱུར་མཐོང་ལ་འཇིགས་མེད་ཅིང་། །འཁྲུལ་པའི་ཁམས་ལ་སྐྱོ་བ་མེད། །གྲུབ་པའི་གནས་ལ་མི་སྨོན་ཏོ། །ཞེས་སོ། །འཕོ་འགྱུར་ནི་འཆི་བ་སྟེ་ཉམ་མི་ངའོ། །དེ་དག་གིས་གཞི་བསྟན་ཟིན་ཏོ། །
གཉིས་པ་ལམ་ལ་གཉིས་ཏེ། གང་གིས་སྒོམ་པ་གང་ཟག་གི་མཚན་ཉིད་དང་། གང་བསྒོམ་པ་ལམ་དངོས་ཀྱི་རིམ་པའོ། །
དང་པོ་ནི། ལམ་རིམ་ལས། དེ་ཡང་རང་བཞིན་སྦྱངས་པ་ཡིས། །སྣོད་དུ་གྱུར་པ་ཉེ་རིང་ཕྱིར། །རིམ་དང་ཅིག་ཆར་བཞི་ཆ་ཡིས། །ཕྱེ་བས་རྣལ་འབྱོར་ཆེན་པོར་འཇུག །ཅེས་པས། རང་བཞིན་གྱི་སྣོད་དང་། སྦྱངས་པའི་སྣོད་དོ། །
དང་པོ་ནི། གཞི་ཡེ་ནས་དབང་པོ་རྣོན་པོར་གྱུར་པ་སྟེ། ཀུན་བྱེད་ལས། ལྷ་མི་སེམས་ཅན་དབང་པོ་མི་མཐུན་ཏེ། །ལ་ལ་ཡེ་ནས་དབང་པོ་ཆིག་ཆོད་ཡོད། །ལ་ལ་དབང་པོ་སྦྱངས་པའི་བློ་ཅན་ཡོད། །ཅེས་པ་དང་། མཉམ་སྦྱོར་ལས། ངོ་བོ་ཉིད་དང་མཐུ་དག་དང་། །རང་བཞིན་གྱིས་ནི་དེ་གྲུབ་བོ། །ཞེས་པ་དང་། དགོངས་འདུས་ལས། རྡོ་རྗེ་སེམས་དཔའི་ཞིང་ཁམས་ན་འཁོད་པའི་སེམས་ཅན་དེ་དག་ནི། སེམས་ཅན་གྱི་རང་བཞིན་སྣ་ཚོགས་པའི་ཕྱིར། བློ་ཤིན་ཏུ་ཟབ་པ་དང་། མི་ཟབ་པ་དང་། ཡངས་པ་དང་། དོག་པ་དང་། བརྟན་པ་དང་། འགྱུར་བ་དང་། རྣོན་པོ་དང་། རྟུལ་བ་དང་། མྱུར་བ་དང་། བུལ་བ་དང་། ཆེ་བ་དང་། ཆུང་བ་ཤ་སྟག་གིས་གང་བས་གསང་སྔགས་ཀྱི་ངོ་བོ་ཉིད་ཀྱི་གཏམ། རིམ་གྱིས་པ་དང་། ཅིག་ཆར་དུ་ཐོས་ན་དེ་ལ་མི་སྐྲག་མི་དངངས་ཤིང་། དགའ་བ་དང་། མགུ་བ་དང་། རངས་པར་གྱུར་པའི་ཕྱིར་སྣ་ཚོགས་སུ་སྣང་ངོ་། །ཞེས་པ་དང་། ཐབས་ཞགས་ལས། སེམས་ཅན་དེ་དག་ལས་རང་བཞིན་གྱི་དབང་པོ་རྣོན་པོ་ནི། མི་གཡོ་བའི་ཏིང་ངེ་འཛིན་སྐྱེ་བར་འགྱུར་རོ། །ཞེས་པ་དང་། ཐུན་མོང་གི་མདོ་སྡེ་དགོངས་པ་ངེས་པར་འགྲེལ་པ་ལས་ཀྱང་། ཁ་ཅིག་ནི་རང་བཞིན་གྱིས་དབང་པོ་རྣོ་བ་ཡིན་ལ། ཁ་ཅིག་ནི་རྟུལ་པོར་གནས་ཏེ། ཞེས་པ་དང་། མཛོད་ལས་ཀྱང་། ཁ་ཅིག་དང་པོ་ནས་དེའི་རིགས། །ཁ་ཅིག་སྦྱངས་པ་ལས་གྱུར་ཏོ། །ཞེས་པ་ལ་སོགས་པ་བྱུང་བས། གཞི་ནས་དབང་པོ་ལ་རྣོ་རྟུལ་ཡོད་ཅིང་། སྦྱངས་པས་ཀྱང་རྟུལ་པོ་རྣོན་པོར་གྲོལ་བར་བཤད་དོ། །འདི་ཉིད་ཀྱི་རྣོན་པོ་མཧཱར་འཇུག་ཚུལ་གཉིས་ལས། ཅིག་ཆར་བ་ནི། སྔ་མ་དང་ཡང་སྔ་ལ་སོགས་པར་ཐེག་པ་གང་ལའང་མ་སྦྱངས་ཤིང་། (༦༨)འདིར་ཡང་ཐེག་པ་གང་དུའང་མ་སྦྱངས་པར་མཧཱ་དང་ཨ་ཏིར་འཇུག་པའོ། །རིམ་གྱིས་པ་ནི། སྔར་གང་དུའང་མ་ཞུགས་མ་སྦྱངས་ཀྱང་། འདི་ལ་མཧཱ་མན་ཆད་གང་རུང་ལ་རིམ་པར་གསུམ་མམ་གཅིག་ཏུ་ཞུགས་པའི་རྗེས་ལ་ཨ་ཏིར་འཇུག་པའོ། །དེ་ལྟར་ཐེག་པ་ལ་ཞུགས་མ་ཞུགས་ཀྱིས་རིམ་གྱིས་པ་དང་། ཅིག་ཆར་བ་ཞེས་བྱ་སྟེ། དེ་གཉིས་ཡེ་ནས་ལྷུན་གྱིས་གྲུབ་པའི་སྣང་བ་སྐུ། གྲགས་པ་གསུང་། དྲན་རིག་ཐུགས་ཀྱི་དཀྱིལ་འཁོར་གྱི་དོན་ཁོང་དུ་ཆུད་ཅིང་གྲུབ་པས། དབང་པོ་རྣོན་པོ་ལྟ་བ་ཡངས་པ་དེ་ཉིད་མྱུར་དུ་གྲོལ་ཏེ། ལམ་རིམ་ལས། ལ་ལ་དབང་པོ་རྣོ་བ་དག །ཐེག་པ་ཆེན་པོར་གཉིས་འཇུག་སྟེ། །མ་སྦྱངས་གྲུབ་པ་གསུམ་ཕྱིར་གྱིས། །མཐོ་བརྟན་མྱུར་རྣོ་རྒྱ་ཆེ་ཡངས། །ཟབ་ཡངས་རྒྱུ་ཡི་གང་ཟག་དེ། །ཉིད་དང་རྐྱེན་དང་དེ་རིམ་པས། །ཕྱེ་བས་རྒྱུ་འབྲས་ཆེན་པོ་རྣམས། །མ་ངེས་འཇུག་དང་འདི་ཉིད་དུའོ། །ཞེས་སོ། །འདིར་རང་དང་གཞན་གྱི་གྲུབ་པའི་མཐའ་ལ་རབ་ཏུ་རྨོངས་ཤིང་། ཐེག་པ་ཆེན་པོའི་ཕྱོགས་ལ་བློ་ཁ་མ་ཕྱོགས་ཏེ། ཕྲག་དོག་གི་མུན་པ་མི་བཟད་པ་དང་། ཀུན་ནས་དཀྲིས་པའི་ཁྲོ་གཉེར་རྒྱུན་རིང་བས་རང་གི་དགེ་ཚོགས་མ་རུང་པར་བྱེད་པའི་བློ་ངན་དག་ན་རེ། གཞི་ནས་དབང་པོ་ལ་རྣོ་རྟུལ་མི་རིགས་ཏེ། ཐམས་ཅད་རྟུལ་པོ་ཤ་སྟག་ཡིན་པས་སྦྱངས་ན་དེར་འགྱུར་གྱི། ཁྱེད་ཀྱིས་དེ་སྐད་བརྗོད་པ་ནི་ཕྱིན་ཅི་ལོག་ཅེས་ཟེར་རོ། །དེ་ལྟར་ན་སྦྱངས་ཀྱང་རྟུལ་པོ་ཉིད་དུ་གྲུབ་པ་དེ། རྣོན་པོར་འགྱུར་མི་རིགས་ཏེ། སོལ་བའི་དངོས་པོ་ཇི་ཙམ་སྦྱངས་ཀྱང་གསེར་དུ་མི་འགྱུར་བ་བཞིན། ཞེས་པ་འདི་ལ་ལན་ཅི་ཡོད། ལུང་གིས་ཀྱང་གནོད་དེ། ཕལ་པོ་ཆེ་ལས། ཞིང་རྣམས་ཀུན་ཀྱང་སྣ་ཚོགས་ཏེ། །ལ་ལ་རིན་ཆེན་རྣམ་པར་བཀྲ། །ཁ་ཅིག་ཉོན་མོངས་ཀུན་གྱི་གནས། །སེམས་ཅན་ཀུན་ཀྱང་ཐ་དད་དེ། །ཁ་ཅིག་སེམས་དགེ་རབ་དྭངས་ཤིང་། །དབང་པོ་མཆོག་དང་རབ་ལྡན་ཏེ། །ལ་ལ་མི་ཤེས་ཀུན་ནས་རྨོངས། །གཞི་ནི་རང་བཞིན་ཐ་དད་ཅིང་། །རིག་པ་བྱེ་བྲག་སོ་སོར་སྣང་། །དེ་བཞིན་མདོག་དབྱིབས་བདེ་སྡུག་དང་། །རང་བཞིན་རྒྱ་མཚོའི་ཚད་དང་ལྡན། །ཅེས་པ་དང་ཡང་འགལ་བ་ཡིན་ནོ། །གཉིས་པ་སྦྱངས་བའི་སྣོད་ནི། ཚེ་རབས་ནས་ཐེག་པ་སྣ་ཚོགས་ལ་སྦྱངས་པའོ། །དེ་ལའང་གཉིས་ལས། སྦྱངས་པའི་རིམ་གྱིས་པ་ནི། སྔ་མ་དང་ཡང་སྔ་ལ་ཐེག་པ་མཐའ་དག་ལ་སྦྱངས་ཤིང་། འདིར་ཡང་ཀུན་ལ་རིམ་པར་ཞུགས་ཤིང་སྦྱངས་པའི་མཐར་ཨ་ཏིར་འཇུག་པ་སྟེ། སྔ་མ་ལས། དེ་ཕྱིར་མ་ངེས་རིགས་མཚོན་ནས། །མུན་པའི་ཤེས་པ་(༦༩)དེ་དག་ཉིད། །རང་བཞིན་རྒྱུ་ཡི་སྙུང་བར་གནས། །ཕལ་པའི་སེམས་བརྒྱད་མཐར་གནས་ཚེ། །ལམ་སྟེགས་སྔོན་དུ་རྫོགས་པར་སྤྱོད། །ཅེས་སོ། །སྦྱངས་པའི་ཅིག་ཆར་བ་ནི། སྔ་མ་ཡང་སྔར་ཀུན་ལ་སྦྱངས་པ་ཞིག་འདིར་གང་ལའང་མ་ཞུགས་མ་སྦྱངས་པར་ཨ་ཏི་ཉིད་ལ་འཇུག་པའོ། །སྔ་མ་ལས། ཁ་ཅིག་དུས་མཐའ་ཅིག་ཆར་བ། །བསྐལ་པ་རྡུལ་སྙེད་སྔོན་སྦྱངས་པས། །ཐུན་མོང་དེ་ཉིད་སྦྱངས་པའི་མཐར། །རིམ་གྱིས་སྦྱངས་ལ་ཅིག་ཆར་བགྲོད། །ཅེས་སོ། །འདི་ལ་གླན་རྡོ་རྗེ་འོད་ནི། སྔོན་སྦྱངས་འདིའི་ཚེ་སྟོད་ཐེག་པ་ཆུང་ངུ་དང་། ཐེག་པ་ཆེན་པོ་ཕ་རོལ་ཏུ་ཕྱིན་པ་ལ་སྦྱངས་ནས། སྔགས་ཕྱི་པ་བོར་ཏེ་འཇུག་པར་བཞེད་དོ། །དེ་ལྟར་ན་ཅིག་ཆར་བ་ཡང་དག་ཏུ་མི་འགྱུར་རོ། །ཞར་ལམ་དུ་ཞུགས་ཟིན་གྱི་དབང་དུ་བྱས་ནས་ཅིག་ཆར་བ་ནི་དུས་མྱུར་བར་འབྲས་བུ་ཐོབ་པ་དང་། ལམ་སྔ་མ་ཁ་ཅིག་བཞག་ནས་ཕྱི་མ་བསྒོམ་པའང་ཡོད་ལ། རིམ་གྱིས་པ་ནི་རིམ་པ་ཇི་སྐད་བཤད་པ་བཞིན་ནོ། །དེ་དག་ཀྱང་འཇུག་ཚུལ་གྱིས་གཉིས་སུ་བཤད་དེ། ཆགས་པ་ཅན་དང་། ཆགས་པ་བྲལ་བའོ། །
གཉིས་པ་གང་བསྒོམ་པ་ལམ་དངོས་ཀྱི་རིམ་པ་ལ་གཉིས་ཏེ། ཐུན་མོང་དང་། ཐུན་མོང་མ་ཡིན་པའི་ལམ་མོ། །
དང་པོ་ནི། མ་ངེས་པའི་རིགས་ཅན་འགའ་ཞིག་འོག་མའི་ལམ་སྟེགས་སྔོན་ལ་མ་བསྟན་ན་མི་འཇུག་པ་ཡོད་སྲིད་པས། དེ་གཞུག་པའི་དོན་དུ་ཐུན་མོང་གི་ལམ་རེ་ཞིག་བསྟན་ཏེ། འདི་ཉིད་ལས། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་པ་དང། ཐེག་པ་བཞི་ཡི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་སོ། །
གཉིས་པ་ལ་གཉིས་ཏེ། ལམ་དུ་འཇུག་པའི་ཚུལ་སེམས་བསྐྱེད་པ་དང་། ལམ་དངོས་ཀྱི་རིམ་པའོ། །
དང་པོ་ཐུན་མོང་གི་ཐེག་པ་ལས་སྨོན་འཇུག་གཉིས་བཤད་པ་ལྟར། འདིར་ཡང་ལམ་ལ་འཇུག་པ་རྒྱུའི་སེམས་བསྐྱེད་དང་། ཞུགས་ནས་སྤྱོད་པ་འབྲས་བུའི་སེམས་བསྐྱེད་གཉིས་སུ་བཤད་དེ། སྤྱན་འགྲེལ་ལས། རང་བཞིན་མངོན་བྱེད་རྣལ་འབྱོར་པ། །ངོ་བོ་རྐྱེན་གྱི་རྣམ་པར་དབྱེ། །རིགས་དང་རིགས་སུ་ངེས་པ་ཡིས། །དང་པོ་རྣམ་པ་གཉིས་གྱུར་པ། །ཞེས་པས། དང་པོ་ནི། བླ་མས་དཀྱིལ་འཁོར་དུ་འཇུག་པའི་སྔོན་འགྲོར་ཐེག་པ་ཐུན་མོང་གི་སྨོན་འཇུག་གཉིས་བསྐྱེད་ནས། དབང་བསྐུར་བས་ཐུན་མོང་མ་ཡིན་པའི་སེམས་བསྐྱེད་དེ་ལམ་དང་པོར་ཚུད་པ་ཡིན་ནོ། །
གཉིས་པ་ནི། ལམ་སོ་སོའི་ཐབས་དང་། ཤེས་རབ་ཁྱད་པར་ཅན་གྱི་སེམས་ཐམས་ཅད་ཡིན་ཏེ། སྔ་མ་ལས། ལམ་གྱི་ངོ་བོ་སེམས་(༧༠)བསྐྱེད་པ། །རང་རང་ཐབས་དང་ཤེས་རབ་མཆོག །ཅེས་སོ། །
གཉིས་པ་ལ་གཉིས་ཏེ། ལམ་གཉིས་ཀྱི་རིམ་པ་སྤྱིར་བསྟན་པ་དང་། ལམ་སོ་སོའི་རང་བཞིན་བྱེ་བྲག་ཏུ་བཤད་པའོ། །དང་པོ་ལ་གཉིས། གྲོལ་ལམ་དང་། ཐབས་ལམ་མོ། །དང་པོ་ནི། གང་ཟག་ལས་དང་པོ་པའམ་ཆགས་བྲལ་རྣམས་འཇུག་པའི་ལམ་སྟེ། ལྷ་དང་། མི་རྟོག་པ་བསྒོམ་པ་གཉིས་སོ། །
དང་པོ་ནི། གཞི་བདེན་པ་དབྱེར་མེད་རྟོགས་ནས། སྔོན་འགྲོ། དངོས་གཞི། རྗེས་གསུམ་ཚང་བས་བསྙེན་སྒྲུབ་བཞིའི་ལྷ་བསྒོམ་པའོ། །དེའང་རིམ་གྱིས་དང་སྐད་ཅིག་བསྒོམ་པའི་གང་ཟག་གཉིས་སོ། །
གཉིས་པ་མི་རྟོག་པའང་། ལུས་ཆོས་བདུན་ལྡན་པས་ཆོས་ཐམས་ཅད་ཡུལ་སེམས་གཉིས་སུ་མེད་པ་ནམ་མཁའ་ལྟ་བུའི་ངང་དུ་འཇོག་པ་སྟེ། འདི་ལའང་རང་གསལ་གཉིས་མེད་དུ་སྐད་ཅིག་གིས་འཇོག་པ་དང་། རིམ་གྱིས་བསྒོམས་པས་འཇོག་པ་སྟེ། ཅིག་ཆར་བ་དང་རིམ་གྱིས་པ་གཉིས་ཡོད་དོ། །དེ་སྐད་དུའང་ལམ་རིམ་ལས། བསམ་བྱ་བསམ་པར་མི་བྱ་སྟེ། མི་བསམ་པ་ཡང་མི་བསམ་མོ། །གང་ལ་རྣམ་པར་མི་བསམ་པ། །དེ་ནི་རང་རིག་མཉམ་ཉིད་དོ། །ཞེས་པ་དང་། བླ་མ་ལས། རིམ་པར་དེ་ཉིད་གསལ་འགྱུར་འབྲེལ། །སྐབས་ཀྱི་རྫོགས་པ་ཆེན་པོར་བརྗོད། །ཅེས་སོ། །
གཉིས་པ་ཐབས་ལམ་ལ། རླུང་དང་། ཐིག་ལེ་གཉིས་ལས། སོ་སོར་སྦྱོང་བ་ནི། དང་པོ་རླུང་ལ་བརྟེན་ནས་ཐིག་ལེ་རྣལ་འབྱོར་དུ་བྱེད་པ་སྟེ། རྩ་ཡུང་བ་དང་འདྲ་བར་ཐིག་ལེ་ཆུ་དང་འདྲ་བ་རླུང་སྐྱེས་བུས་རྩོལ་བས་དྲངས་ཏེ། ལུས་ཀྱི་འཁོར་ལོ་བཞི་དང་། དེའི་འདབ་མས་གཞི་དང་འདྲ་བ་ཐམས་ཅད་དུ་ཁྱབ་པར་བཀྲམ་པ་ལས། གནས་སྐབས་དང་། མཐར་ཐུག་གི་དོན་གཉིས་འགྲུབ་པའོ། །འདི་ལ་གཅིག་ཏུ་བསྒོམ་པ་ནི། བརྟན་པ་ཐོབ་ནས་བསྲེས་ཏེ་བསྒོམ་པའོ། །དེ་འང་དང་པོ་དབང་རྣམས་རྫོགས་པར་མནོས་ལ། སྟེང་སྒོའི་འཁོར་ལོ་དྲུག་དང་། སྲོག་ཤིང་གསུམ་དང་། རྩ་རླུང་བསྒོམ་པ་དང་། འོག་སྒོའི་བསྙེན་སྒྲུབ་བཞི་བསྒོམ་པ་ལས། ཡེ་ཤེས་ནམ་མཁའི་གཟུགས་ཅན་གསལ་ལ་མི་རྟོག་པ་དང་། ཉི་ཟླའི་གཟུགས་ཅན་བདེ་སྟོང་ངོ་བོ་སྟོང་པ་དང་། མཆོག་དགའི་གཟུགས་ཅན་དབྱེར་མེད་ལྷུན་རྫོགས་ཆེན་པོ་གསུམ་རིམ་པས་ཐོབ་པ་ནི་རིམ་གྱིས་པ་ཡིན་ལ། རང་བཞིན་ལྷན་ཅིག་སྐྱེས་པའི་ཡེ་ཤེས་དུས་གཅིག་ཏུ་སྐྱེས་པ་ནི་ཅིག་ཆར་བ་ཞེས་བྱའོ། །དེའང་ཕྱི་གཟུགས་བརྙན་གྱི་དཀྱིལ་འཁོར་དུ་དབང་མནོས། སྙིགས་མའི་རླུང་དང་། ཕྲ་བའི་རླུང་དང་། ཡེ་ཤེས་ཀྱི་རླུང་དང་། འཁོར་ལོ་བཞིའི་གནས་ལུགས་དང་། དེ་དག་སོ་སོའི་རྩ་དང་ཐིག་ལེ་(༧༡)འོད་ལ་སོགས་པ་བསྒོམ་དུ་གཞུག །དེ་བརྟན་པ་དང་། ཤེས་རབ་ཡེ་ཤེས་ཀྱི་དབང་བསྐུར། ཐིག་ལེ་དབབ་པ་དང་། རྡོ་རྗེའི་བུམ་པར་བཟུང་བའི་ཐབས་ཀྱིས་འགྲོ་འོང་ལ་མཁས་པར་བྱ་སྟེ། ས་བཅུ་ལམ་ལྔ་ཕ་རོལ་ཏུ་ཕྱིན་པ་བཅུ། དགའ་བ་བཅུ་དྲུག་གི་ཡེ་ཤེས་སུ་ངོ་སྤྲད་དེ། ཡུམ་ཟླ་བ་ཅན་དང་རོལ་པ་ལས་ཤར་བའི་ཡེ་ཤེས་ནི་དོན་དམ་པའི་བདེན་པ་སྟེ། ཤེས་རབ་ཡེ་ཤེས་ཀྱི་དབང་ངོ་། །དེ་ནས་སྟེང་སྒོ་བསྒོམ་དུ་བཅུག་པའི་རྗེས་ལ། འོག་སྒོའི་ཐིག་ལེ་བཟློག་པ་ལ་སོགས་པའི་གདམས་ངག་བརྗོད་ནས། ཡུམ་ཉི་མ་ཅན་དང་རོལ་པ་ལས་ཤར་བའི་ཡེ་ཤེས་ནི་བདེ་བ་ཆེན་པོའི་དབང་སྟེ། བདེན་པ་དབྱེར་མེད་ཀྱི་ཡེ་ཤེས་ཤར་བའོ། །དེ་ཉིད་ཉམས་སུ་བླངས་པས་རྡོ་རྗེ་འཆང་གི་ས་བགྲོད་དེ། ཟླ་གསང་ལས། འདོད་ཆགས་མེད་ལ་བྱང་ཆུབ་མེད། །སྡིག་པའི་ནང་ནས་ཆགས་བྲལ་ཏེ། །ཞེས་པ་དང་། རྒྱ་མཚོ་ལས། བྱེ་བྲག་རླུང་ལས་གྱུར་པ་ཡིས། །ཡེ་ཤེས་འབྱུང་བའི་སྟེང་འོག་སྒོ། །དགུག་དང་བཀུག་པའི་ཐབས་ཉིད་དེ། །འཁོར་ལོ་གསུམ་གྱི་སྲོག་ཤིང་གསུམ། །མེ་རླུང་འགྲོ་བ་ནམ་མཁའི་བ། །བཞོ་བས་སྟེང་དུ་རྣམ་པར་གྲགས། །བཀུག་པ་གསུམ་གྱིས་སེམས་ལྔའི་རིམ། །སྐྱེས་པས་བཅུ་དྲུག་ས་ཐོབ་པའི། །རང་བཞིན་ལྷན་ཅིག་སྐྱེས་པའི་ཕྱིར། །འཆིང་བ་ཉིད་ཀྱིས་ཐར་བའི་ལམ། །ཞེས་སོ། །སེམས་ལྔ་ནི་ཡུམ་དང་སྦྱར་བ་ལས། བྱང་ཆུབ་ཀྱི་སེམས་གནས་ནས་གཡོ་བ་དང་། གནས་སུ་བབས་པས་ལྡང་བ་དང་། རྡོ་རྗེར་བཟུང་བས་གནས་པ་དང་། གྱེན་དུ་དྲངས་པས་འཇུག་པ་དང་། ལུས་ལ་ཁྲེམ་པས་དོན་དམ་པ་བྱང་ཆུབ་ཀྱི་སེམས་དང་ལྔའོ། །དེ་དག་གིས་ནི་ཐབས་ལ་བརྟེན་ནས་མྱུར་དུ་གྲོལ་བའི་དགོས་པ་ཡོད་དོ། །
གཉིས་པ་ལམ་སོ་སོའི་རང་བཞིན་བྱེ་བྲག་ཏུ་བཤད་པ་ལ་གཉིས་ཏེ། བསྐྱེད་རྫོགས་ཅིག་ཆར་དུ་བསྒོམ་པ་དང་། རིམ་གྱིས་བསྒོམ་པའོ། །
དང་པོ་ནི། སེམས་བསྐྱེད་པ་དང་། ཏིང་ངེ་འཛིན་གསུམ་བསྒོམ་པ་སྔོན་དུ་འགྲོ་བས། ཞི་ཁྲོ་གང་རུང་གི་དཀྱིལ་འཁོར་རྒྱས་བསྡུས་ཅི་རིགས་སུ་བསྒོམ་ནས་གྲོལ་ལམ་ལྟར་དེའི་ངང་ལ་སེམས་སྤྲོ་བསྡུ་མེད་པར་འཇོག་པར་རང་བྱུང་གི་རྫོགས་རིམ། རིམ་གྱིས་བསྡུས་ནས་མི་དམིགས་པར་བསྒོམ་པ་དེ་ཁོ་ན་ཉིད་ཀྱི་རྫོགས་རིམ་མམ། ཐབས་ལམ་གཉིས་གང་རུང་བསྒོམ་པ་སྙིང་པོའི་རྫོགས་རིམ་བསྒོམ་སྟེ། མཐར་སྒྱུ་མ་ལྟ་བུའི་ཚུལ་གྱིས་བསྔོ་བ་བྱེད་པ་ནི་གདན་ཐོག་གཅིག་ཏུ་རྫོགས་པར་བྱེད་པས། སངས་རྒྱས་ཀྱི་ཆོས་ཐམས་ཅད་ཅིག་ཆར་ཉིད་དུ་བསྒོམ་པ་སྟེ། ཞི་བ་རིན་པོ་ཆེའི་དྲྭ་བ་དང་། ཁྲོ་བོ་དམ་པ་རྒྱན་གྱི་སྒྲུབ་ཐབས་ལྟར་ཤེས་པར་བྱའོ། །
གཉིས་པ་ལ་གཉིས་(༧༢)ཏེ། ལམ་གྱི་གོ་དོན་མདོར་བསྟན་པ་དང་། དེའི་རང་བཞིན་རྒྱས་པར་བཤད་པའོ། །
དང་པོ་ནི། གང་ཟག་རྩོལ་བ་དང་སྦྱངས་པ་རབ་ཏུ་གྱུར་པ་ཞིག །བསྐྱེད་རྫོགས་ཚར་གཅིག་གིས་རྡོ་རྗེ་འཆང་གི་གོ་འཕང་བགྲོད་པའི་དབང་དུ་བྱས་ན། བསྒོམ་ལམ་བཞི་བར་ཆད་མེད་ལམ་དང་ལྔར་རིག་འཛིན་གྱི་ས་བགྲོད་དེ་ཚེ་འདིར་མཆོག་གི་ས་ཐོབ་པའོ། །བསྒོམ་ལམ་བཞི་ནི། དེ་བཞིན་ཉིད། ཀུན་ཏུ་སྣང་། རྒྱུ་ཡི་གེའི་སྤྲིན། ཡེ་ཤེས་དྲྭ་བའི་ཏིང་ངེ་འཛིན་ནོ། །བར་ཆད་མེད་པའི་ཏིང་ངེ་འཛིན་ནི་ཚོགས་བསྒྲུབ་པའོ། །དེ་དག་སོ་སོའི་དགོས་པའང་། སྟོང་པ་ཆེན་པོ་དེ་བཞིན་ཉིད་ཀྱི་ཏིང་ངེ་འཛིན་གྱིས། དང་པོ་ལྟ་བས་ཐག་བཅད་པས་བསྐྱེད་རྫོགས་རང་རྒྱུད་དུ་མི་ཞེན་པའི་དགོས་པ་ཡོད་ཅིང་། སངས་རྒྱས་པའི་ཚེ་ཆོས་སྐུའི་ངང་ལས་གཟུགས་སྐུ་འཆར་བའི་གཞི་གྱུར་པས་དེའི་རྟེན་འབྲེལ་མངོན་དུ་བྱེད་པ་དང་། ལམ་ཡེ་ཤེས་ཀྱི་ཚོགས་རྫོགས་པའི་དགོས་པ་ཡོད་དོ། །ཀུན་སྣང་སྙིང་རྗེ་ཆེན་པོའི་རང་བཞིན་སྒྱུ་མ་དང་མིག་ཡོར་ལྟ་བུའི་ཏིང་ངེ་འཛིན་གྱིས། སྟོང་པའི་མཐར་ཞེན་པ་ལས་གྲོལ་ཞིང་ཐབས་སྙིང་རྗེ་ཆེན་པོའི་བསྒོམ་པ་ལམ་དུ་བྱེད་པས། བསོད་ནམས་ཀྱི་ཚོགས་རྫོགས་པ་དང་། སངས་རྒྱས་པའི་ཚེ་འོག་མིན་གྱི་ཞིང་ཁམས་རྒྱ་དང་བྲལ་བའི་རང་བཞིན་མངོན་དུ་བྱེད་པའི་དགོས་པ་ཡོད་དོ། །རྒྱུའི་ཏིང་ངེ་འཛིན་ཡི་གེའི་སྤྲིན་ལས། ཕྱག་རྒྱ་གཅིག་པའི་བར་བསྒོམ་པས་ཐབས་དང་ཤེས་རབ་ཟུང་དུ་འབྲེལ་ཞིང་། རྟག་ཆད་ཞེན་པའི་མཐའ་ལས་འདས་པས་ལམ་རང་གི་ངོ་བོ་གཉིས་སུ་མེད་པ་དང་། སངས་རྒྱས་པའི་ཚེ་འོག་མིན་གྱི་དཀྱིལ་འཁོར་ལོངས་སྐུ་རང་གི་ངོ་བོ་ལས་མཆེད་པ་ཡོངས་སུ་རྫོགས་པའི་རང་བཞིན་གཙོ་བོ་ལྷུན་གྱིས་གྲུབ་པ་རྟེན་འབྲེལ་མངོན་དུ་བྱེད་པའི་དགོས་པ་ཡོད་དོ། །ཡེ་ཤེས་དྲྭ་བའི་ཏིང་ངེ་འཛིན་གྱིས། དཀྱིལ་འཁོར་གྱི་རྒྱན་དང་བཀོད་པ་དང་། འོད་ཟེར་དང་འཕྲོ་འདུ་དང་། འཁོར་གྱི་རོལ་པ་དཔག་ཏུ་མེད་པ་རྫོགས་ལ། ཕྱག་རྒྱ་སྤྲོས་པའི་ཏིང་ངེ་འཛིན་གྱིས་འོག་མིན་གྱི་ལོངས་སྤྱོད་ཆེན་པོ་སྤྲུལ་པའི་སྐུ་འཕྲོ་གཞི་རྫོགས་པ་དང་། ལམ་ཡེ་ཤེས་དང་སྟོང་པ་ཆེན་པོའི་ཚོགས་གཉིས་ལྷུན་གྱིས་རྫོགས་པའི་དགོས་པ་དམ་པ་འགྲུབ་བོ། །བར་ཆད་མེད་པའི་ཚོགས་བསྒྲུབས་པས། བསྐྱེད་རྫོགས་ཀྱི་ནུས་པ་འབྱིན་ཞིང་རིག་འཛིན་གྱི་ས་བསྒྲུབ་པ་ལ་དངོས་སུ་བར་ཆད་མེད་པར་སྦྱོར་བའི་དགོས་པ་ཡོད་དོ། །དེ་དག་རིམ་གྱིས་བསྒོམ་པའི་ཚེ་ལམ་གྱི་རྫོགས་ཚུལ་ཡང་། དེ་བཞིན་ཉིད་ནི་ཚོགས་ལམ་ཆུང་ངུ་། ཀུན་ཏུ་སྣང་ཚོགས་ལམ་འབྲིང་། རྒྱུའི་ཕྱག་རྒྱ་གཅིག་སྤྲོས་ཚོགས་ལམ་ཆེན་པོ། ཡེ་ཤེས་དྲྭ་བའི་ཕྱག་རྒྱ་རྣམ་སྤྲོས་སྦྱོར་ལམ་དྲོད་དང་། (༧༣)རྩེ་མོ། བར་ཆད་མེད་པ་བཟོད་པ་དང་། ཆོས་མཆོག་ཆེན་པོ་མཐར་ཐུག་པའི་ཡེ་ཤེས་རྫོགས་སོ། །འདི་དག་ལམ་ཟག་པ་དང་བཅས་པ་སྟེ་འཇིག་རྟེན་པའི་ལམ་ཡིན་པའི་ཕྱིར་རོ། །དེའང་དེ་དག་བསྒོམ་པའི་ཚེ་ས་དེ་དག་གི་རྟགས་རྫོགས་ནས་ལམ་གོང་མར་འཇུག་གི། མ་རྫོགས་ཀྱི་བར་དུ་རང་བཞིན་གྱིས་དེ་ལ་ངེས་པར་སློབ་པའོ། །ཇི་ལྟར་ཞེ་ན་ཚོགས་ལམ་རྫོགས་པའི་རྟགས། སངས་རྒྱས་མཆོག་གི་སྤྲུལ་སྐུ་མཐོང་བ་དང་། གཟུངས་ཐོབ་པ་དང་། རྫུ་འཕྲུལ་ཅུང་ཟད་འགྲུབ་པ་ན་སྦྱོར་ལམ་ལ་འཇུག་གོ། །དེའང་ལུས་ཤིག་སྲོ་མེད་པ་དང་། སྲིན་བུ་མེད་པ་ལ་སོགས་པ་ཐོབ་ནས། གོང་མ་ལ་གོང་མ་འཇུག་པ་སྟེ། རྒྱས་པར་ཕ་རོལ་ཏུ་ཕྱིན་པའི་ཐེག་པ་ལས་འབྱུང་བ་བཞིན་ནོ། །དེའང་བར་ཆད་མེད་པའི་སྐབས་སུ་རྣམ་སྨིན་རིག་འཛིན་ཐོབ་པའོ། །རྟེན་དེ་ལ་ཚེ་དབང་མ་ཐོབ་པར་ཤི་ན། ལུས་རྒྱ་དང་བྲལ་མ་ཐག་སེམས་ལྷའི་སྐུ་ཕྱག་རྒྱ་ཆེན་པོའི་རིག་འཛིན་ལ་སྦྱར་ནས་ལྷུན་གྲུབ་ཐོབ་སྟེ། ཚེ་དབང་བོར་ནས་ཤི་བའོ། །རྒྱུ་མཚན་ལུས་དོར་བས་ཚེ་དབང་མ་ཐོབ་པའོ། །མ་ཤི་ན་ཆོས་མཆོག་ཆེན་པོའི་ཡེ་ཤེས་མཐར་ཐུག་ལས་མཐོང་ལམ་དངོས་སུ་སྐྱེ་བས། སྐྱེ་ཤི་མེད་པ་རྡོ་རྗེའི་སྐུར་གྱུར་པའི་ཕྱིར་ཚེ་ལ་དབང་བའི་རིག་འཛིན་ཞེས་བྱའོ། །དེ་ནས་མཐོང་ཟིན་གོམས་པར་བྱེད་པའི་ལམ་ས་བཅུ་ནི་ཕྱག་རྒྱ་ཆེན་པོའི་རིག་འཛིན་ཏེ། ཆོས་ཉིད་ཟག་པ་མེད་པའི་དོན་གོམས་ཤིང་། ས་གོང་མའི་ཡོན་ཏན་རྫོགས་པར་གོང་ནས་གོང་དུ་འགྱུར་པའི་ཕྱིར་རོ། །དེ་ནས་ལྷུན་གྱིས་གྲུབ་པའི་རིག་འཛིན་སངས་རྒྱས་ཀྱི་ས་ལ་སྦྱོར་བ་ཡིན་ནོ། །འདི་དག་ལ་ཉ་ཚལ་པ་ལ་སོགས་པ་ཁ་ཅིག་ན་རེ། རྣམ་སྨིན་ལམ་གྱི་རྟེན་ལ་ཚེ་དབང་མི་འབྱུང་། ཕྱག་རྒྱ་ཆེན་པོ་ས་གཉིས་པ་ནས་ བརྒྱད་པའི་བར་དང་། ལྷུན་གྲུབ་དག་པ་ས་གསུམ 
་ཚེ་དབང་ས་དང་པོ་དང་མཉམ་ཞེས་འདོད་པའང་། སྒྱུ་འཕྲུལ་སྤྱིའི་དགོངས་པ་མ་ལོན་ཞིང་། ས་ལམ་གྱི་དོན་རྣམས་ལེགས་པར་ཁོང་དུ་མ་ཆུད་པར་ངེས་སོ། །དེའང་རྣམ་སྨིན་གྱི་རྟེན་ལ་ཚེ་དབང་ཐོབ་མི་ཐོབ་གཉིས་ཡོད་དེ། བར་དུ་ཆད་ན་ཕྱག་རྒྱ་ལ་སྦྱོར། མ་ཆད་ན། ཚེ་དབང་ལ་སྦྱོར་ཏེ་དེའང་བཟོད་པའི་སྐབས་ཡིན་གྱི། ཆོས་མཆོག་གི་རྟེན་ལ་མཐོང་ལམ་དངོས་སུ་ཐོབ་པས་ཚེ་དབང་ལ་སྦྱོར་ཏེ། ཐུན་མོང་གི་ཐེག་པས་ཀྱང་། དེ་ནི་ཆོས་མཆོག་དང་ས་གཅིག །ཅེས་པས་འགྲུབ་བོ། །ཚེ་དབང་ས་དང་པོ་ཡིན་པ་འཐད་ཀྱི། ས་དང་པོ་ཁོ་ནར་འཇོག་ན་མི་འཐད་དེ། སངས་རྒྱས་ཀྱི་ས་དེ་ཉིད་མཐར་ཐུག་གི་ཚེ་དབང་ཡིན་ཏེ། དབང་བཅུའི་དོན་ལ་དབང་ཐོབ་པའི་ཕྱིར་རོ། །ཕྱག་རྒྱ་ཡང་འཕགས་པའི་བདེན་མཐོང་ས་དང་(༧༤)པོའི་སྐད་ཅིག་ནས་བཅུ་པའི་བར་ཡིན་ཏེ། འཕགས་པའི་ཡེ་ཤེས་དེ་ཉིད་ལ་མདོ་རྒྱུད་ཐམས་ཅད་ནས་ཕྱག་རྒྱ་ཆེན་པོའི་དངོས་གྲུབ་ཏུ་གསུངས་པའི་ཕྱིར་རོ། །ས་གཉིས་པ་ནས་བརྒྱད་པ་ལ་ཐུག་གི་བར་འཇོག་པ་དེ་ཁོ་ནར་ཡང་མི་འཐད་དོ། །ལྷུན་གྲུབ་ནི་སངས་རྒྱས་ཀྱི་ས་ལ་འདོད་དེ། འདི་ལས། དེ་ཚེ་བཅུ་དྲུག་ཚུན་ཆད་ཀྱིས། །སྐུ་ལྔ་ལྷུན་གྱིས་རྫོགས་པ་ནི། །ཞེས་པས། མཐར་ཕྱིན་པའི་ལམ་དུ་གསུངས་པའི་ཕྱིར་རོ། །དག་ས་གསུམ་ལྷུན་གྲུབ་མཐར་ཐུག་མ་ཡིན་ཏེ། གཞན་དོན་བྱེད་པ་ལ་ཏིང་ངེ་འཛིན་གྱི་རྩོལ་བ་ཡོད་པའི་ཕྱིར་དང་། རང་དོན་དུ་སངས་རྒྱས་ཐོབ་བྱར་ཡོད་པས་རང་དོན་མཐར་ཐུག་ལྷུན་གྱིས་མ་གྲུབ་པའི་ཕྱིར་དང་། ས་དེ་པའི་སེམས་དཔའ་དོན་མི་བྱེད་པས་གཞན་དོན་མཐའ་དག་ལྷུན་གྱིས་མ་གྲུབ་པའི་ཕྱིར་དང་། སྤང་རྟོགས་ཀྱི་ཡོན་ཏན་མཐའ་དག་ལྷུན་གྱིས་མ་གྲུབ་པའི་ཕྱིར་རོ། །དེ་ནི་རིག་འཛིན་གོང་མ་གོང་མ་ལ་འོག་མའི་ཡོན་ཏན་རྫོགས་པའི་ཆ་ནས་དེར་འཇོག་ལ། སངས་རྒྱས་ཀྱི་ས་ན་མཐར་ཐུག་གི་རིག་འཛིན་ཐམས་ཅད་རྫོགས་ཏེ། དོར་བ་མེད་པ་སྟོང་པ་ཉིད་ལ་མངའ་བརྙེས་པའི་ཕྱིར་རོ། །འདི་དག་རྒྱས་པར་འོག་ཏུ་འཆད་དོ། །
གཉིས་པ་དེའི་རང་བཞིན་རྒྱས་པར་བཤད་པ་ལ་ལྔ་སྟེ། དེ་བཞིན་ཉིད། ཡེ་ཤེས་སྒྱུ་མ། ཕྱག་རྒྱ་གཅིག་པ། ཕྱག་རྒྱ་སྤྲོས་བཅས། བར་ཆད་མེད་པའོ། །
དང་པོ་ལ་བཞི་ལས། ལྟ་བ་ནི། ཆོས་ཐམས་ཅད་གདོད་མ་ནས་དག་ཅིང་བདེན་པ་དབྱེར་མེད་སེམས་ཉིད་ཀྱི་དོན་ཏེ། རྣམ་བཀོད་ལས། ནམ་མཁའི་ངོས་བཟུང་མེད་པ་ལྟར། །སྣང་སྲིད་ཐམས་ཅད་དེ་དང་འདྲ། །ཆོས་རྣམས་ཐམས་ཅད་སེམས་ཡིན་ཏེ། །སེམས་ནི་ནམ་མཁའི་རང་བཞིན་ནོ། །ཞེས་སོ། །སྒོམ་པ་ནི། སེམས་བསྐྱེད་པའི་རྗེས་ལ་ཆོས་ཉིད་གྲུབ་བསལ་མེད་པའི་ངང་ལ་འཇོག་པ་སྟེ། ལས་རིམ་ལས། རྟོག་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཉིད་རང་གསལ་མི་གཡོ་བ། །ཞི་གནས་ལྷག་མཐོང་ཟུང་དུ་འབྲེལ། །
ཞེས་སོ། །སྤྱོད་པ་ནི། རང་དོན་དུ་མི་དམིགས་པ་གསུམ་གྱི་ངང་ལས་སྒྱུ་མའི་ཚུལ་གྱིས་སྤྱད་ཅིང་། གཞན་དོན་དུ། ལས་བཞི། སྒྲུབ་པ་གསུམ། དབང་ལྔ་ལ་སོགས་མོས་སློབ་ཀྱི་སྤྱོད་པ་སྟེ། རིམ་པ་བཞིན་དེ་ཉིད་ལས། སྤྱོད་དགུ་དོར་བའི་གཅིག་ཆ་ཡང་། མི་དམིགས་མཐུན་པར་སྤྱོད་ཅེས་བྱ། །ཞེས་པ་དང་། ཤེས་འཇུག་ཀུན་དང་གཞན་དོན་དུ། །ལས་བཞི་སྤྱོད་ཅིང་བསྒྲུབ་དབང་ཆེ། །སྤྲོས་པའི་འཁོར་ལོ་མངོན་བསྒོམ་ཞིང་། །ལམ་ཀུན་སྐད་ཅིག་ཆས་བསྒོམས་ནས། །ནུས་པ་འབྱིན་ལྡན་རྫོགས་པར་བྱེད། །ཅེས་སོ། །འབྲས་(༧༥)བུ་ནི། དངོས་སུ་དོན་དམ་རྟོགས་པ་དང་། །བརྒྱུད་ནས་ཆོས་སྐུ་ཐོབ་པ་སྟེ། །ཡང་དེ་ཉིད་ལས། སྣང་སྟོང་གཉིས་མེད་རྣལ་འབྱོར་མཐའ། །མངོན་བྱས་ལྷག་པའི་ཆོས་སྐུར་སྦྱོར། །ཅེས་སོ། །ལམ་འདི་ཀུན་གྱི་སྔོན་དུ་འགྲོ་ཞིང་ཟིན་དགོས་ཏེ་འདི་མེད་ན་མི་འགྲུབ་པ་ཡང་། གལ་ཏེ་བསམ་གཏན་འདི་མེད་ན། །རྒྱ་མཚོའི་འཇིངས་ཀྱི་ཕ་བོང་བཞིན། །བསྐལ་པར་ལམ་ལ་བརྩོན་བྱས་ཀྱང་། །དོན་གྱི་སྙིང་པོ་སྐམ་པ་ཡིན། །ཞེས་སོ། །
གཉིས་པ་ཡེ་ཤེས་སྒྱུ་མ་ལའང་བཞི་ལས། ལྟ་བ་ནི། ཆོས་ཐམས་ཅད་བདེན་པ་དབྱེར་མེད་སྒྱུ་མའི་ངང་དུ་གསལ་བ་སྟེ། འདི་ཉིད་ལས། སྐད་ཅིག་མ་སྐྱེས་མ་འགགས་པས། །གཟུང་འཛིན་བྲལ་བའི་རིག་པ་ཉིད། །ཡེ་ཤེས་སྒྱུ་མར་མི་གཡོ་གསལ། །ཆུ་དང་ཟླ་བ་ཇི་བཞིན་དུ། །མཚུངས་པར་གསལ་བའི་ངོ་བོར་བརྗོད། །ཅེས་སོ། །སྒོམ་པ་ལ། སྔོན་འགྲོ་ཚད་མེད་པ་བཞི་དང་སྙིང་རྗེ་ཆེན་པོས་བརླན་པར་བྱ་སྟེ། སྔོན་དུ་སྟོང་གོམས་རྣལ་འབྱོར་པ། །ཁམས་
གསུམ་ཐུགས་རྗེས་བཟུང་བའི་ཕྱིར། །ཡན་ལག་བརྒྱད ་པ་སྔོན་བཞིན་བྱ། །ཞེས་སོ། །དེའང་སྟོང་པ་ཉིད་ཀྱི་བསམ་གཏན་བཞི་དང་། དེའི་ངང་ལས་སྙིང་རྗེ་ཆེན་པོའི་ཚད་མེད་བཞི་སྟེ་ཡན་ལག་བརྒྱད་དོ། །དངོས་གཞི་ནི་དེའི་རྗེས་ལ་ཆོས་ཐམས་ཅད་མེད་བཞིན་དུ་སྣང་བ་སྒྱུ་མའི་དཔེ་བརྒྱད་ཀྱི་ངང་ལ། ཕྱམ་མེ། ཝལ་ལེ། རང་གསལ་མི་རྟོག་པར་བཞག་པ་ནི་ཆོས་ཐམས་ཅད་དང་དེ་ཉིད་གང་དུའང་འཛིན་པ་མེད་པ་ནམ་མཁའ་ལྟ་བུའི་ཆོས་ཉིད་ཀྱི་ངང་ལ་ལྷན་ནེར་བཞག་སྟེ། དེ་བས་གཉིས་གོམས་རྒྱུ་གོམས་པས། །དྲན་ལས་སྤྱི་བླུག་ཡེ་ཤེས་གསལ། །མངོན་དུ་བཏང་བཞག་གང་ཡང་མེད། །ནམ་མཁར་ནམ་མཁའ་ཇི་བཞིན་ནོ། །ཞེས་སོ། །དེ་ནི་ཡུལ་ནམ་མཁའ་དང་བློ་ནམ་མཁའ་བཞིན་དུ་རྟོག་མེད་བསམ་བརྗོད་ལས་འདས་པར་འཇོག་པའོ། །སྤྱོད་པ་ནི། ཆགས་སྡང་དུག་ལྔ་སྒྱུ་མ་ལྟར་རང་བཞིན་མེད་པར་སྤྱད་དེ། རྣམ་རྟོག་མཚན་མ་ཅི་སྐྱེས་ཀྱང་། །ཡེ་ཤེས་སྒྱུ་མར་རང་སྣང་ཕྱིར། །ཆགས་སྡང་རེ་དོགས་མེད་པར་སྤྱད། །ཅེས་སོ། །འབྲས་བུ་ནི། དངོས་སུ་ཀུན་རྫོབ་ཀྱི་བདེན་པ་རྟོགས་པ་དང་། བརྒྱུད་ནས་ལོངས་སྐུ་ཐོབ་སྟེ། ལམ་འདིར་ཆ་རྐྱེན་རྫོགས་གྲུབ་པ། །མཚན་དང་དཔེ་བྱད་ཀུན་དང་ལྡན། །དབང་ཕྱུག་ཆེན་པོའི་གནས་ཉིད་དུ། །མངོན་དུ་འབྱུང་བར་ཐེ་ཚོམ་མེད། །ཅེས་སོ། །
གསུམ་པ་ཕྱག་རྒྱ་གཅིག་པ་ལ་བཞི་ལས། ལྟ་བ་ནི། བདེན་པ་དབྱེར་མེད་ལྷ་ཡི་རང་བཞིན་དུ་ཡེ་ནས་དག་པ་ཤེས་པ་སྟེ། ཐམས་ཅད་ལྷུན་རྫོགས་ལྷ་ཡི་སྐུ། །ཕྱག་རྒྱ་ཆེན་པོར་ཡེ་ནས་གནས། །ཞེས་སོ། །སྒོམ་པ་ན། (༧༦)ཏིང་ངེ་འཛིན་སྔ་མ་རྣམས་སྔོན་དུ་སོང་ནས། དབྱིངས་ཀྱི་རྒྱུ་ཡི་གེའི་སྤྲིན་ལས། ཡེ་ཤེས་ཀྱི་རྒྱུ་དཀྱིལ་འཁོར་དུ་ལྷ་ཕྲ་རགས་གང་མོས་རིམ་གྱིས་སམ། ཅིག་ཆར་དུ་གསལ་བར་བསྒོམ་སྟེ་རིམ་པ་ལྟར། ཨ། རབ་ཏུ་བརྟན་གྱུར་ཨ་དཀར་ལས། །ཤིན་ཏུ་ཕྲ་བའི་ཨ་རྣམས་སྤྲོ། །ཞེས་པ་དང་། ཕྱི་མ་ཚངས་པ་སྲིན་པོའི་ཚུལ། །རྫོགས་པར་བྱ་བ་ཟུང་དུ་འགྱུར། །ཞེས་སོ། །དེའང་ཞི་ཁྲོ་གཉིས་ལས། རིམ་གྱིས་པ་དང་། ཅིག་ཆར་བ་གཉིས་ལས། རིམ་གྱིས་པ་ལའང་། ཕྲ་བ་ནི། རྣམ་སྣང་རྩ་བའི་སྟོན་པ་འདྲ་བ་ཞལ་གཅིག་ཕྱག་གཉིས་པར་ཧཱུྃ་ལས་བསྒོམ་པ་སྟེ། དེ་དཀྱིལ་ཡི་གེ་ཧཱུྃ་གནས་པའི། །མཐིང་ཀ་འཚེར་ལ་རབ་གསལ་བའི། །འོད་ཟེར་འཕྲོ་བ་རྣམ་པར་བསྒོམ། །ཞེས་སོ། །རགས་པ་ནི། ཞལ་གསུམ་ཕྱག་དྲུག་ཡན་ལག་གི་ལྷ་དང་བཅས་པ་བསྒོམ་སྟེ། ལམ་རིམ་ལས། དེ་བཞིན་གཉིས་མེད་གསལ་གྱུར་ནས། །སྐུ་གཅིག་རྡོ་རྗེ་དྲིལ་འབར་བསྒོམ། །དེ་བཞིན་ཉིད་དུ་གྱུར་པ་དང་། །དབུ་གསུམ་ཕྱག་དྲུག་ཉིད་དུ་བསྒོམ། །ཞེས་སོ། །ཅིག་ཆར་དུ་བསྒོམ་པ་ནི། སྐད་ཅིག་གིས་ཆུ་ལས་ཉ་ལྡང་གི་ཚུལ་དུ་བསྒོམས་ཏེ། དེ་ལས། ཡང་ན་ཕྱག་རྒྱ་ཆེན་པོ་སྟེ། །ཆུ་ལས་ཉ་ལྡང་ཇི་བཞིན་དུ། །བདག་ཉིད་ཕྱག་རྒྱ་ཆེན་པོ་སྟེ། །ཞལ་གསུམ་ཕྱག་དྲུག་རྟག་ཏུ་བསྒོམ། །ཞེས་པ་དང་། ཉི་ཟླ་གཟའ་སྐར་དུས་གཅིག་ཏུ། །ཆུ་དཀྱིལ་དྭངས་པར་གསལ་བ་ལྟར། །སྐད་ཅིག་སྐུར་གསལ་འོད་དུ་འབར། །སྙིང་པོ་བརྗོད་པས་འཁོར་ལོ་གསལ། །ཅེས་སོ། །ཁྲོ་བོའི་ལྷ་བསྒོམ་པ་ལའང་རིམ་དང་ཅིག་ཆར་ཏེ། རཀྴའི་ཆ་ལུགས་འཛིན་པ་ཡང་། །རིམ་དང་ཅིག་ཆར་སྔོན་བཞིན་ཏེ། །ཞེས་སོ། །རིམ་ལའང་ཕྲ་བ་ཡེ་ཤེས་སེམས་དཔའ་བུདྡྷ་ཧེ་རུ་ཀ་ཞལ་གཅིག་ཕྱག་གཉིས་པ་སྟེ། ཕྲ་བའི་གཞལ་ཡས་གདན་དང་ལྡན། །གནས་གཅིག་ཡེ་ཤེས་སེམས་དཔའ་བསྒོམ། །ཞེས་སོ། །རགས་པ་ལའང་སྔར་བཞིན་ནོ། །ཅིག་ཆར་བ་ཡང་འདྲའོ། །སྤྱོད་པ་ནི། དུས་ཐམས་ཅད་དུ་ལྟ་བའི་ངང་ལས་སྤྱོད་པ་སྟེ། འདིའི་ཚེ་ས་གཞི་ཀུན་ལྡན་མོད། །གསུང་གི་གཞི་ལ་ལྷུར་བྱ་ཞིང་། །ཕྱག་རྒྱ་ཆེན་པོའི་རྣལ་འབྱོར་དུ། །སྤྱོད་ཡུལ་ཐམས་ཅད་སྤྱད་པར་བྱ། །ཞེས་སོ། །འབྲས་བུ་ནི། དངོས་སུ་བདེན་པ་དབྱེར་མེད་རྟོགས་པ་དང་། བརྒྱུད་ནས་ཡི་གེ་འཁོར་ལོ་ཚོགས་ཆེན་གྱི་ས་ཐོབ་པ་སྟེ། ལམ་རིམ་ལས། རྣལ་འབྱོར་ལས་སུ་རུང་རྣམས་ཀྱིས། །ཕྱག་རྒྱ་ཆེན་པོ་རྫོགས་འགྱུར་ཞིང་། །གསང་བའི་ཡིད་གཉིས་མེད་པ་ན། །དཀྱིལ་འཁོར་ཆེན་པོ་(༧༧)འབར་བར་གྱུར། །ཅེས་སོ། །
བཞི་པ་ཕྱག་རྒྱ་སྤྲོས་བཅས་ལ་བཞི་ལས། ལྟ་བ་ནི། ཐམས་ཅད་དཀྱིལ་འཁོར་དུ་སངས་རྒྱས་པ་སྟེ། རྡོ་རྗེ་ཕུང་པོའི་ཡན་ལག་ནི། །ཞེས་པ་ལ་སོགས་པའོ། །སྒོམ་པ་ལའང་། ལམ་སྔ་མ་རྣམས་སྔོན་དུ་སོང་ནས། རིམ་མམ་ཅིག་ཆར་གྱིས་ཕུང་པོ་ལ་སོགས་པ་ལྷ་ཡི་དཀྱིལ་འཁོར་དུ་བསྒོམ་པ་སྟེ། སྔ་མ་ལས། ཕུང་སོགས་དཀྱིལ་འཁོར་ལྷར་སྣང་བ། །རྒྱ་མཚོའི་གཟུགས་བརྙན་ཇི་བཞིན་དུ། །ཀུན་དངོས་རང་རིག་ལྷར་གསལ་བ། །གཅིག་དང་དུ་མ་ཡོངས་ཀྱིས་མེད། །གསལ་ཆ་ཡུལ་མེད་མི་གཡོ་བ། །རྣལ་འབྱོར་ངོ་བོར་རྒྱལ་བས་གསུངས། །ཞེས་སོ། །དེ་ལ་དབྱེ་ན་ཞི་ཁྲོ་གཉིས་ལས། རེ་རེ་ལའང་། དཀྱིལ་འཁོར་སྤྲོས་བཅས། ཚོམ་བུ། རྣམ་གྲངས། ཞལ་ཕྱག་སྟེ་བཞི་བཞིའོ། །དང་པོ་ཞི་བའི་དཀྱིལ་འཁོར་སྤྲོས་བཅས་ལ་ གསུམ་སྟེ། བསྡུས་པ། འབྲིང་། རྒྱས་པའོ། །དང་པོ་ལྷ་གྲངས་བཅོ་བརྒྱད ་དེ། གཙོ་བོ་རིགས་ལྔ་དང་ཀུན་ཏུ་བཟང་པོ་གང་གིས་བྱེད་སོ་སོའི་རིགས་དང་མཐུན་པས་མ་ངེས་ཏེ། ཡབ་ཡུམ་གཉིས་ལ་རིགས་ཆུང་བརྒྱད་ཀྱིས་བསྐོར་བས་བཅུ། སྒོ་བ་ཡབ་ཡུམ་བརྒྱད་དེ་བཅོ་བརྒྱད་དོ། །དཀྱིལ་འཁོར་འབྲིང་པོ་ལ། རྡོ་རྗེ་དབྱིངས་ཀྱི་ལྷ་ཚོགས་བཞི་བཅུ་ཞེ་གཉིས་སོ། །རྒྱས་པ་ལ་བརྒྱད་ཅུ་རྩ་གཉིས་ཏེ། དབུས་ན་རིགས་ལྔ་ལ་རང་རང་གི་རིགས་ཆུང་གིས་བསྐོར་བས་ལྔ་བཅུ་ཐམ་པ། ཁྲོ་བོ་དང་ཁྲོ་མོ་ཉི་ཤུ་སྟེ་བདུན་ཅུ། ཐུབ་པ་དྲུག །སྒོ་མ་བཞི་སྟེ་བརྒྱད་ཅུ། ཀུན་བཟང་ཡབ་ཡུམ་གཉིས་དང་རྩ་གཉིས་སོ། །ལམ་རིམ་ལས། དང་པོ་བཅོ་བརྒྱད་བཞི་བཅུ་གཉིས། །རྒྱས་པའི་དཀྱིལ་འཁོར་རིམ་བཞིན་སློབ། །ཅེས་སོ། །ཚོམ་བུ་སྤྲོས་པ་ལའང་ གསུམ་ལས། དང་པོ་ཚོམ་བུ་གཅིག་པ་ལ་ལྷ་གྲངས་བཅོ་བརྒྱད ་དེ། གཙོ་བོ་རྣམ་སྣང་ལ། རྡོ་རྗེ་སེམས་དཔའ། རིན་ཆེན་རྡོ་རྗེ། ཆོས་རྡོ་རྗེ། ལས་རྡོ་རྗེ་བཞིའི་ཡུམ། བརྟན་མ་རྡོ་རྗེ། འབར་མ་རྡོ་རྗེ། སྡུད་མ་རྡོ་རྗེ། བསྐྱོད་མ་རྡོ་རྗེ་སྟེ་ཡབ་ཡུམ་བཅུ་དང་། ཕྱོགས་ཀྱི་ཁྲོ་བོ་ཡབ་ཡུམ་བརྒྱད་དེ། དེ་ལས། གཉིས་པོ་བདག་ཅག་ཡབ་ཡུམ་གཉིས། །གནས་སུ་དཀྱིལ་འཁོར་བསམ་བྱ་སྟེ། །གདན་ལྡན་དབུས་ན་བདག་པོ་གནས། །དེ་ལ་སེམས་དཔའ་ཁྲོ་བོས་བསྐོར། །ཞེས་སོ། །ཚོམ་བུ་འབྲིང་པོ་ལ་ལྷ་གྲངས་བཞི་བཅུ་རྩ་དྲུག་སྟེ། སྐུའི་ལྷ་མི་བསྐྱོད་པ་ཡབ་ཡུམ་ལ། རྡོ་རྗེ་སེམས་དཔའ། རྡོ་རྗེ་རྒྱལ་པོ། རྡོ་རྗེ་ཆགས་པ། རྡོ་རྗེ་ལེགས་པ་བཞིའི་ཡུམ། རྡོ་རྗེ་སྒེག་མོ། རྡོ་རྗེ་བདུག་པ། རྡོ་རྗེ་ལྕགས་ཀྱུ། རྡོ་རྗེ་སྒྲོལ་མ་སྟེ་ཡབ་ཡུམ་བཅུ། གསུང་གི་ལྷ་སྣང་བ་མཐའ་ཡས་ལ། རྡོ་རྗེ་ཆོས། (༧༨)རྣོན་པོ། འཁོར་ལོ། རྡོ་རྗེ་སྨྲ་བ་བཞིའི་ཡུམ། གླུ་མ། མར་མེ། ལྕགས་སྒྲོག །གསལ་བཀྲ་མ་སྟེ་བཅུ། གོང་གི་ཐུགས་ཀྱི་ལྷ་རྣམ་སྣང་ཡབ་ཡུམ་གྱི་རིགས་བཅུ་སྟེ། སྐུ་གསུང་ཐུགས་ཀྱི་ལྷ་སུམ་ཅུ། ཕྱོགས་དང་མཚམས་ཀྱི་ཁྲོ་བོ་ཡབ་ཡུམ་བཅུ་དྲུག་བསྣན་པས་བཞི་བཅུ་རྩ་དྲུག་སྟེ། བརྟན་ནས་མདུན་རྒྱབ་སྐུ་གསུང་ཐུགས། །འཁོར་ལོ་རྫོགས་པས་འབྲུ་ གསུམ་གདབ། །ཅེས་སོ། །དེའང་ཕྱོགས་བཞིའི་སྒོ་བ་ཡབ་ཡུམ་བརྒྱད ། མཚམས་བཞིའི་ཁྲོ་བོ་ཡབ་ཡུམ་བརྒྱད་དེ་བཅུ་དྲུག་གོ། །ཚོམ་བུ་རྒྱས་པ་ལ་ལྷ་གྲངས་བདུན་ཅུ་སྟེ། སྐུ་གསུང་ཐུགས་ཀྱི་སུམ་ཅུ། ཡོན་ཏན་གྱི་ལྷ་རིན་ཆེན་འབྱུང་ལྡན་ལ། རྡོ་རྗེ་རིན་ཆེན། རྡོ་རྗེ་གཟི་བརྗིད། རྡོ་རྗེ་རྒྱལ་མཚན། རྡོ་རྗེ་བཞད་པ་བཞིའི་ཡུམ། ཕྲེང་མ། མེ་ཏོག་མ། ཞགས་པ་མ། བདེ་བ་མ་སྟེ་བཅུ། ཕྲིན་ལས་ཀྱི་ལྷ་དོན་གྲུབ་ལ། རྡོ་རྗེ་ལས། བསྲུང་བ། གནོད་སྦྱིན། རྡོ་རྗེ་ཁུ་ཚུར་བཞིའི་ཡུམ། གར་མ། དྲི་ཆབ། དྲིལ་བུ། རྡོ་རྗེ་སེམས་མ་སྟེ་བཅུ་བསྡོམས་པས་ལྔ་བཅུ། ཕྱོགས་བཅུའི་ཁྲོ་བོ་བཅུ། ཁྲོ་མོ་བཅུ་སྟེ་བདུན་ཅུ་ནི་ལམ་རིམ་ལས། བརྟན་ནས་གཡས་དང་གཡོན་ཉིད་དུ། །ཡོན་ཏན་ཕྲིན་ལས་དཀྱིལ་འཁོར་བཞག །རྣལ་འབྱོར་དབང་དང་ཚོམ་བུ་ལྔ། །ཤིན་ཏུ་འདྲིས་ནས་དུས་ཚོགས་སྦྱར། །ཅེས་སོ། །བསྒོམ་ཚུལ་ནི། རིགས་བསྡུས་པའི་ཚེ་རིགས་དང་པོའི་དཀྱིལ་འཁོར་དབུས་སུ་གསལ་བའོ། །དེ་བརྟན་ནས་འབྲིང་པོའི་ཚེ་མདུན་དང་རྒྱབ་ཏུ་སྐུ་དང་གསུང་གི་དཀྱིལ་འཁོར་བསྒོམ་པའོ། །དེ་བརྟན་ནས་རྒྱས་པ་ལ་གཡས་སུ་ཡོན་ཏན་དང་། གཡོན་དུ་ཕྲིན་ལས་ཀྱི་དཀྱིལ་འཁོར་གྱི་ཚོམ་བུ་བསྒོམ་པའོ། །དཀྱིལ་འཁོར་དང་ཚོམ་བུའི་ཁྱད་པར་ནི། ཁ་ཅིག་ཕོ་བྲང་གཙོ་བོའི་ཆ་ནས་ཚོམ་བུ། རྣམ་གྲངས་བྱུང་རྫོགས་ཀྱི་ཆ་ནས་དཀྱིལ་འཁོར། ཡང་ན་མི་རེས་ལྷ་རེ་བསྒོམ་པ་ཚོམ་བུ། ལྷ་དུ་མ་མི་གཅིག་གིས་བསྒོམ་པ་དཀྱིལ་འཁོར་ཟེར་ཏེ་ཧ་ཅང་མ་འབྲེལ་ལོ། །འདིར་བསྒོམ་པའི་ཚེ་སྒོ་རྟ་བབས་ལ་སོགས་པ་གཞལ་ཡས་ཁང་བསྒོམ་པའི་ཆ་ནས་དཀྱིལ་འཁོར། དེ་མི་བསྒོམ་པར་ལྷ་རྣམས་གྲངས་ཚང་དུ་བསྒོམ་པས་ཚོམ་བུའོ། །རྣམ་གྲངས་སྤྲོས་བཅས་ནི། དང་པོ་རིགས་གསུམ་ལ་སློབ། དེ་གོམས་ནས་རིགས་ལྔ་ལ་སློབ། དེ་གོམས་ནས་བཞི་བཅུ་རྩ་གཉིས་ལ་སློབ། དེ་ལ་གོམས་ནས་སངས་རྒྱས་སྟོང་གི་དཀྱིལ་འཁོར་ལ་བསླབ་སྟེ། རྩ་བ་རྣམ་སྣང་ཡབ་ཡུམ་ལ། ཡབ་ལ་རིགས་ལྔ། སེམས་དཔའ་བརྒྱད་། ཐུབ་པ་དྲུག །སྒོ་བ་བཞི་སྟེ་ཉི་ཤུ་རྩ་ གསུམ། ཡུམ་ལ་ཡུམ་ལྔ། སེམས་མ་(༧༩)བརྒྱད ། སྒོ་མ་བཞི་སྟེ་བཅུ་བདུན་བསྒོམ་པ་ནི་ཐབས་ཀྱི་ལྷ་བཞི་བཅུ་ཞེས་བྱའོ། །དེ་དག་གི་ཐུགས་ཀར་རང་དང་འདྲ་བའི་ཡེ་ཤེས་སེམས་དཔའ་ཚོན་གང་བ་རེ་བསྒོམ་པ་ནི་ཤེས་རབ་ཀྱི་ལྷ་བཞི་བཅུ་ཞེས་བྱའོ། །དེ་ཡང་གཙོ་བོ་ནི་ཡབ་ཡུམ་དངོས་ཡིན་པས་ཐ་དད་དུ་བསྒོམ་མི་དགོས། གལ་ཏེ་བསྒོམ་ན་བཞི་བཅུ་རྩ་གཉིས་སུ་འགྱུར་བའི་སྐྱོན་ཡོད་དོ། །རགས་པ་དང་ཕྲ་བའི་ཆ་ནས་ཐབས་དང་ཤེས་རབ་ཏུ་བཏགས་པ་སྟེ། རྒྱས་པ་ལས། ཆེན་པོ་རགས་པ་ཐབས་སུ་རྟོགས། །མཚན་ཉིད་འཛིན་པ་ཤེས་རབ་བོ། །ཞེས་སོ། །ཐབས་ཀྱི་ལྷ་རེ་རེ་ལ་སྐུ་གསུང་ཐུགས་ཀྱི་ལྷ་གསུམ་གསུམ་བསྒོམ་པས་མི་ཟད་པ་རྒྱན་གྱི་འཁོར་ལོའི་ལྷ་བརྒྱ་ཉི་ཤུ། གོང་གི་ཐབས་དང་ཤེས་རབ་ཀྱི་ལྷ་བརྒྱད་ཅུ་སྟེ་ཉིས་བརྒྱ་ལ། རང་རང་གི་རིགས་ཀྱི་གཙོ་བྱས་པའི་དབུ་རྒྱན་གྱི་ལྷ་ལྔ་རེ་སྟེ། ཡེ་ཤེས་ཀྱི་དཀྱིལ་འཁོར་སྟོང་ངོ་། །དེའང་ཐབས་ཀྱི་ལྷ་ལ་དབུ་རྒྱན་བགྲངས་ཤིང་ཤེས་རབ་ལྷ་ལ་མི་བགྲང་བས། ཐབས་ཀྱི་ལྷ་བཞི་བཅུ། སྐུ་གསུང་ཐུགས་ཀྱི་ལྷ་གསུམ་གསུམ། དེ་རེ་རེ་ལ་དབུ་རྒྱན་ལྔ་ལྔ། དེའི་སྟེང་དུ་ཤེས་རབ་ཀྱི་ལྷ་བཞི་བཅུ་བསྣན་པས་སྟོང་དུ་འགྱུར་ཏེ། འདི་ཉིད་ལས། ཡན་ལག་བཞི་བཅུ་རྩ་གཉིས་ལྡན། །དེ་ཉིད་ཡན་ལག་སྤྲོས་བདག་སྟེ། །བཞི་བཅུ་རྩ་གཉིས་གསུམ་འཕྲོར་འགྱུར། །ཞེས་པ་དང་། སྔ་མ་ལས། སྟངས་དཔྱལ་གཉིས་ཀྱི་ཕྱག་རྒྱ་དང་། །སངས་རྒྱས་སྟོང་གི་དཀྱིལ་འཁོར་ཡང་། །རི་རབ་ཏིལ་འབྲུའི་ཚུལ་བཞིན་དུ། །དཔེ་བྱད་མཚན་གྱིས་སྤྲས་པ་འོ། །ཞེས་སོ། །ཉི་ཁྲི་ཆིག་སྟོང་ལ་བསླབ་པ་ནི། རིགས་ལྔ། རྒྱལ་མཆོག་ཀུན་ཏུ་བཟང་པོ་ཡབ་ཡུམ་དང་བཅས་པ་ལ་སྟོང་ཕྲག་དྲུག །སེམས་དཔའ་ཡབ་ཡུམ་ཆ་བརྒྱད་དང་། སྒོ་བ་ཡབ་ཡུམ་ཆ་བཞི་སྟེ། ཆ་བཅུ་གཉིས་ལ་སྟོང་ཕྲག་བཅུ་གཉིས། ཐུབ་པ་དྲུག་ལ་ཡུམ་མེད་པས་སྟོང་ཕྲག་གསུམ་སྟེ། དེ་ལྟར་ཡང་ཉི་ཁྲི་ཆིག་སྟོང་ངོ་། །ཉི་ཁྲི་བཞི་སྟོང་དུ་འདོད་པ་ནི་ཡུམ་ཡོད་པར་རློམ་པ་ཡིན་ནོ། །དེ་སྐད་དུ་ཡང་སྔ་མ་ལས། དེ་ལྟར་ལྡན་པའི་གཙོ་མཆོག་གིས། །རྒྱལ་བ་རྒྱལ་མཆོག་དེ་བཞིན་ཏེ། །བཅུ་གཉིས་དྲུག་གི་འོད་འཕྲོ་འབར། །ཞེས་དང་། ལས་རིམ་ལས། དེ་ལྟར་གཙོ་མཆོག་ལྡན་བྱ་སྟེ། །བྱ་བྱེད་རིགས་ལྔ་སྟོང་བསྒོམ་བྱ། །བཅུ་གཉིས་དྲུག་གི་འོད་འཕྲོ་བར། །ཉི་ཁྲི་ཆིག་སྟོང་དུས་གཅིག་གསལ། །ཅེས་སོ། །དེ་ལ་བརྟན་པ་དང་བསམ་ཡས་ལྷུན་གྱིས་གྲུབ་པའི་ཏིང་ངེ་འཛིན་ལ་སློབ་སྟེ། སྣང་སྲིད་ཐམས་ཅད་ལྷ་ཡི་དཀྱིལ་འཁོར་དུ་གསལ་བར་བསྒོམ་མོ། །ཞལ་ཕྱག་(༨༠)སྤྲོས་བཅས་ནི། དང་པོ་ཞལ་གཅིག་ཕྱག་གཉིས་པ་ལ་བསླབ་བོ། །དེ་ནས་ཚོམ་བུའི་ལྷ་ཐམས་ཅད་ཞལ་གསུམ་ཕྱག་དྲུག་པར་སློབ་སྟེ། དེ་ཉིད་ལས། གཞི་གཅིག་ཞལ་གསུམ་ཕྱག་དྲུག་པ། །བརྟན་ནས་གསུམ་ཀྱང་དེ་བཞིན་ཏེ། །ལྔ་ལའང་རྗེས་སུ་མཐུན་བསྒོམ་ནས། །སྤྲོས་པའི་ཞལ་ཕྱག་རྒྱས་གསལ་ལོ། །ཞེས་སོ། །
གཉིས་པ་ཁྲོ་བོའི་ཕྱག་རྒྱ་སྤྲོས་པ་ལའང་བཞི་སྟེ། དཀྱིལ་འཁོར། ཚོམ་བུ། ཞལ་ཕྱག །རྣམ་གྲངས་སོ། །
དང་པོ་ལ་དཀྱིལ་འཁོར་བསྡུས་འབྲིང་རྒྱས་ གསུམ་ལས། བསྡུས་པ་ལ་ཁྲག་འཐུང་ལྔ་བཅུ་རྩ་བརྒྱད ་དོ། །འབྲིང་པོ་ལ་དེའི་སྟེང་དུ་ཁྲོ་བོ་བཅུ་བསྣན་པས་དྲུག་ཅུ་རྩ་བརྒྱད་དོ། །རྒྱས་པ་ལ་བརྒྱ་རྩ་བརྒྱད་དེ། དབུས་སུ་བུདྡྷ་ཧེ་རུ་ཀ་ཡབ་ཡུམ་ལ། བཛྲ། རཏྣ། པདྨ། ཀརྨ་བཞིའི་ཡུམ། བཛྲ། རཏྣ། པདྨ། ཀརྨ་ཀྲོ་དྷཱི་ཤྭ་རཱི་མ་བཞི་སྟེ་བཅུ། ཤར་དུ་བཛྲ་ཧེ་རུ་ཀ་ཡབ་ཡུམ་གྱི་འཁོར། མི་ཏྲི། ཀ་རུ། ལོ་ཀ །བིང་དུ་གརྦ་ཧེ་རུ་ཀ་བཞིའི་ཡུམ། མི་ཏྲི་ཀྲོ་དྷཱི་ཤྭ་རཱི་མ་ལ་སོགས་པ་བཞི་སྟེ་བཅུ། ལྷོར་རཏྣ་ཧེ་རུ་ཀ་ཡབ་ཡུམ་ལ་འཁོར། ཡཀྴ། རཀྴ། བྷི་ཤ །ས་ནུ་ཧེ་རུ་ཀ་བཞིའི་ཡུམ། ཡཀྴ་ཀྲོ་དྷཱི་ཤྭ་རཱི་མ་ལ་སོགས་བཞི་སྟེ་བཅུ། ནུབ་ཏུ་པདྨ་ཧེ་རུ་ཀ་ཡབ་ཡུམ་ལ་འཁོར། ཏེ་ཤ །ཀེ་ཤ །པེ་ཤ །བི་ཤ་ཧེ་རུ་ཀ་བཞིའི་ཡུམ། ཏེ་ཤ་ཀྲོ་དྷཱི་ཤྭ་རཱི་མ་ལ་སོགས་པ་བཞི་སྟེ་བཅུ། བྱང་དུ་ཀརྨ་ཧེ་རུ་ཀ་ཡབ་ཡུམ་ལ་འཁོར། ཏྲག་ཤ །ཧྲི་ཤ །ཀེ་ཤ །བག་ཤ་ཧེ་རུ་ཀ་བཞིའི་ཡུམ་ཏྲག་ཤ་ཀྲོ་དྡྷཱི་ཤྭ་རཱི་མ་ལ་སོགས་པ་བཞི་སྟེ་བཅུ་རྣམས་བསྡོམས་པས་ལྔ་བཅུ། གནས་ཡུལ་སྒོ་མ་ཉི་ཤུ། དབང་མོ་ཉི་ཤུ་རྩ་བརྒྱད། ཁྲོ་བོ་བཅུ་སྟེ། དེ་ཉིད་ལས། དང་པོ་ལྔ་བཅུ་བརྒྱད་གོམས་ནས། །དྲུག་ཅུ་རྩ་བརྒྱད་དེ་བཞིན་ཏེ། །ཡབ་ཡུམ་མཐར་ཕྱིན་འཁོར་ལོའི་ཆས། །ལྔ་བཅུ་ཚོམ་བུ་གནས་ཡུལ་དང་། །སྒོ་སླས་ཧཱུྃ་ཆེན་བརྒྱད་རྩ་ བརྒྱད། །ཅེས་སོ། །
ཚོམ་བུ་ལའང་བསྡུས་འབྲིང་རྒྱས་གསུམ ་ལས། བསྡུས་པ་ཚོམ་བུ་གཅིག་པ་ལ་ལྷ་གྲངས་བདུན་ཅུ་རྩ་བརྒྱད་དེ། བུདྡྷ་ཧེ་རུ་ཀ་ལ་རིགས་བཞིའི་ཧེ་རུ་ཀ་ཡབ་ཡུམ་གྱིས་བསྐོར་བས་བཅུ། གནས་ཡུལ་སྒོ་མ་ཉི་ཤུ། དབང་མོ་ཉེར་བརྒྱད། ཁྲོ་བོ་ཡབ་ཡུམ་ཉི་ཤུའོ། །འབྲིང་པོ་ལ་དགུ་བཅུ་རྩ་བརྒྱད་དེ། སྐུའི་རིགས་ལྔ་ཡབ་ཡུམ་བཅུ། གསུང་གི་པདྨ་ཧེ་རུ་ཀ་རིགས་ལྔ་ཡབ་ཡུམ་བཅུ། ཐུགས་ཀྱི་བཅུ་སྟེ་སུམ་ཅུ། གནས་ཡུལ་སྒོ་མ་ཉི་ཤུ། དབང་མོ་ཉེར་བརྒྱད། ཁྲོ་བོ་ཡབ་ཡུམ་ཉི་ཤུའོ། །རྒྱས་པ་ལ་བརྒྱ་དང་བཅོ་བརྒྱད་དེ། དེའི་སྟེང་དུ་རིན་པོ་ཆེ་རིགས་ཀྱི་ཧེ་རུ་ཀ་(༨༡)ཡབ་ཡུམ་བཅུ། ལས་ཀྱི་རིགས་ཀྱི་བཅུའོ། །དེ་སྐད་དུ། ལམ་རིམ་ལས། དབུས་ཀྱི་ཧེ་རུ་བཞི་པོ་ལ། །སྐུ་གསུང་ཁྲག་འཐུང་མདུན་རྒྱབ་གསལ། །དེ་བརྟན་འཁོར་དང་བཅས་པ་བསྒོམ། །སྐུ་གསུང་ཐུགས་ལ་བརྟན་བྱས་ནས། །གཡས་གཡོན་ཡོན་ཏན་ལས་ཁྲོ་བོ། །ཡབ་ཡུམ་གསལ་ནས་འཁོར་ལོའི་ལྷ། །རྫོགས་པར་བསྒོམ་པ་རིམ་བཞིན་དུ། །གོང་ནས་གོང་དུ་གྱེན་དུ་འབར། །ཞེས་པའི་ཚུལ་གྱིས་སྔ་མ་སྔ་མ་བརྟན་ནས་ཕྱི་མ་ཕྱི་མ་བསྒོམ་པའོ། །
ཞལ་ཕྱག་སྤྲོས་བཅས་ནི་སྔར་བཞིན་ནོ། །རྣམ་གྲངས་སྤྲོས་བཅས་ནི། དང་པོ་ཁྲོ་བོ་རིགས་ལྔ་ལ་བསླབ། དེ་ནས་བརྒྱ་རྩ་བརྒྱད་ལ་བསླབ། དེ་ལ་བརྟན་ནས་བུདྡྷ་ཧེ་རུ་ཀ་ཡབ་ཡུམ་ལ། ཡན་ལག་གི་ལྷ་ཐབས་ཀྱི་ཧེ་རུ་ཀ་ལྔ་བཅུ་རྩ་བརྒྱད། དེ་ལ་དབུ་རྒྱན་ལྔ་ལྔ་བྱས་པས། ཡན་ལག་གི་ལྷ་ཉིས་བརྒྱ་དང་དགུ་བཅུ་ལ་བསླབ་པ་སྟེ། དེ་ཉིད་ལས། ཡན་ལག་བཀོད་པ་ལྔ་བཅུ་བརྒྱད། །ཆ་ལྔའི་གྲངས་ནི་ཉིས་བརྒྱ་དང་། །དགུ་བཅུ་ལྷ་རྣམས་ཡང་དག་ལྡན། །ཅེས་སོ། །དེ་ལས་ཀྱང་སྤྲོས་ན། རྩ་བ་ཧེ་རུ་ཀ་ཡབ་ཡུམ་ལ། ཡན་ལག་གི་ལྷ་ལྔ་བཅུ་རྩ་བརྒྱད་བསྒོམ་སྟེ། ཐབས་ཀྱི་ལྷ་ལྔ་བཅུ་རྩ་བརྒྱད། དེ་དག་གི་སྙིང་གར་ཤེས་རབ་ཀྱི་ལྷ་ལྔ་བཅུ་རྩ་ བརྒྱད། ཤེས་རབ་ཀྱི་ལྷ་ཕར་བཞག་པའི་ཐབས་ཀྱི་ལྷ་ལ་སྐུ་གསུང་ཐུགས་ཀྱི་ལྷ་གསུམ ་གསུམ་བསྒོམས་པས་བརྒྱ་བདུན་ཅུ་རྩ་བཞི། དེ་ལ་དབུ་རྒྱན་རིགས་ལྔ་ལྔ་བསྒོམས་པས་སྐུ་གསུང་ཐུགས་ཀྱི་ལྷའི་དབུ་རྒྱན་བརྒྱ་བདུན་ཅུ་ཚན་པ་ གསུམ་དང་། ཐབས་ཀྱི་ལྔ་བཅུ་རྩ་བརྒྱད ་ལ་ཉིས་བརྒྱ་དགུ་བཅུ་སྟེ། དབུ་རྒྱན་གྱི་ལྷ་ཉིས་སྟོང་དགུ་བཅུའོ། །དེ་ཐམས་ཅད་བསྡོམས་པས་སུམ་སྟོང་ཆིག་བརྒྱ་དང་དགུ་བཅུ་ཡོད་དོ། །སྤྱོད་པ་ནི། སྤྱོད་ལམ་རྣམ་བཞི་ཉིན་མཚན་དུ་བསྐྱེད་རྫོགས་ལྷའི་ངང་ལས་མ་ཉམས་པར་སྤྱད་དེ། ལམ་རིམ་ལས། སྤྱོད་ཡུལ་མཐོང་ཐོས་ཐམས་ཅད་ཀུན། །འགྲོ་དང་འདུག་དང་ཉལ་བ་ན། །དཀྱིལ་འཁོར་གཉིས་ཀྱི་རྣལ་འབྱོར་ལས། །མ་ཉམས་དེ་ཡི་དབྱིངས་ན་གནས། །ཞེས་སོ། །འབྲས་བུ་ནི། དངོས་སུ་བར་ཆད་མེད་པ་ལ་སྦྱོར་ལ། བརྒྱུད་ནས་ཡི་གེ་འཁོར་ལོའི་ས་ཐོབ་པ་དེ་ཉིད་ལས། སྤྲོས་པའི་རྣལ་འབྱོར་རྒྱུན་ཆགས་པ། །བསོད་ནམས་ཡེ་ཤེས་ལོངས་སྤྱོད་ཀྱིས། །མུན་སྣང་དུག་འགྱུར་ཚུལ་བཞིན་དུ། །ཡི་གེ་འཁོར་ལོའི་ཚོགས་མཆོག་བརྙེས། །ཞེས་སོ། །
ལྔ་པ་བར་ཆད་མེད་པའི་ལམ་ཚོགས་བསྒྲུབ་པ་ལའང་བཞི་ལས། དང་པོ་ལྟ་བ་ནི། ཆོས་ཐམས་ཅད་གདོད་མ་ནས་སངས་རྒྱས་ཤིང་། ཐབས་དང་ཤེས་རབ་ཀྱི་རང་བཞིན་གཉིས་སུ་མེད་པར་རྟོགས་པ་སྟེ། (༨༢)རྒྱུ་གཅིག་པ་དང་ཡིག་འབྲུའི་ཚུལ་ལ་སོགས་པའོ། །སྒོམ་པ་ལ། སྔོན་འགྲོ་ཐུན་མོང་བ་སྔར་དང་འདྲ་ལ། ཁྱད་པར་དུ་གནས་ཡིད་དུ་འོང་ཞིང་གནམ་འཁོར་ལོ་རྩིབས་བརྒྱད་དང་། ས་པདྨ་འདབ་བརྒྱད། བར་སྣང་འོ་མའི་ཆུ་ལྟར་དྭངས་པ་ལ་སོགས་པ་སྟེ། སྔ་མ་ལས། སྡེ་དཔུང་ཆེན་པོས་མི་ཚུགས་ཤིང་། །ས་དང་བར་སྣང་ཤིས་པ་དང་། །ལོ་རྒྱུས་རྣམ་གཉིས་ལྡན་པ་ཡི། །ཡིད་འོང་ས་བཙལ་རྒྱས་པར་བྱ། །རྙེད་ནས་ཚོམ་བུའི་གྲངས་བཞིན་དུ། །ཆེ་ཆུང་རྐྱེན་དང་འཚམས་པར་བྱ། །འཁོར་ཁང་ཕྱི་དང་ནང་ལྡན་པའི། །ཞེས་སོ། །དེ་ཡང་ཕྱི་མར་ཡོ་བྱད་ཅི་རིགས་པ་འཇོག་ཅིང་སྐྱེ་བོར་གསང་ཐུབ་པ་དང་། ནང་མར་སྒྲུབ་པ་པོ་ཡབ་ཡུམ་དངོས་གྲུབ་བརྙེས་པའི་དགོས་པ་ཡོད་དོ། །དེ་ལྟ་བུའི་ཁང་པར་སྒྲུབ་པའི་རྫས་དང་། ཟས་དང་། ཡོ་བྱད་དང་། སྨན་ལ་སོགས་པ་ཚོགས་པར་བྱ་སྟེ། དེ་ལས། གོས་རྒྱན་བཟའ་བཏུང་བཟང་བ་དང་། །སྒྲུབ་པའི་ཡོ་བྱད་ལྔ་རྣམས་དང་། །དཀྱིལ་འཁོར་ཡོ་བྱད་མཆོད་པའི་རྫས། །དངོས་གྲུབ་རྟེན་དང་བར་ཆད་ཟློག །ཡོ་བྱད་དག་པ་བསྡུ་བྱ་སྟེ། །ཞེས་སོ། །དུས་ཀྱང་གཟའ་ཚེས་བཟང་པོ་སྟེ། རྒྱས་པ་ལས། ཚེས་གྲངས་ཡར་གྱི་བརྒྱད་ལ་བརྩམ། །ཤིན་ཏུ་སྐར་མ་རྒྱལ་རྣམས་ལ། །བྱང་ཆུབ་སྤྱོད་པ་ཆེར་སྤྱོད་པའི། །གསང་མཆོག་དངོས་གྲུབ་མྱུར་བ་ཡི། །གཟའ་སྐར་ཤིས་པའང་འཇུག་པར་བྱ། །ཞེས་སོ། །དེའང་དེ་ལྟ་བུའི་ལམ་གོམས་པའི་རྣལ་འབྱོར་ཟུང་གཅིག་གམ། གསུམ་མམ། ལྔ་ཚོགས་ན་བཟང་སྟེ། དེ་དག་གིས་བསྒྲུབ་པར་སྟོན་པ་སྟེ། རྡོ་རྗེ་སློབ་དཔོན་ནི། ལམ་རིམ་ལས། སྟོན་པ་མཛོད་ལྡན་ཆུ་བོ་རྫོགས། །གཉེར་ལྡན་རྒྱུད་དང་ལས་ལ་མཁས། །མན་ངག་དྲོད་ཚད་བརྒྱད་འཆང་བ། །ཞེས་སོ། །འཁོར་ནི། དེ་ལས། སྟོན་པ་མཆོད་བརྩོན་རྟོགས་པ་གསལ། །དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་བཞིན་ཡོ་བྱད་ལྡན། །འགྲུབ་འགྱུར་མི་ལྡན་དོན་མེད་བརླག །ཅེས་སོ། །དེའང་རྣལ་འབྱོར་པ་དུ་མ་ཚོགས་ན། སྟོན་པ་རྡོ་རྗེ་སློབ་དཔོན་ཆེ་ཤོས་ཡིན་ལ་གཞན་རྣམས་འཁོར་རོ། །ཟུང་གཅིག་ལ་ཡབ་སྟོན་པ། ཡུམ་འཁོར་ཡིན་ནོ། །བསྒོམ་པའི་ཐབས་ནི། བསྙེན་སྒྲུབ་བཞི་སྟེ། ལམ་དང་། སྒྲུབ་པ་དང་། སྦྱོར་བ་དང་། ཉེ་བའི་བསྙེན་སྒྲུབ་བཞིའོ། །དང་པོ་ལམ་གྱི་བསྙེན་སྒྲུབ་བཞི་ལ། ལྟ་བ་སྟོང་པ་ཆེན་པོའི་རྣལ་འབྱོར་དང་། སྙིང་རྗེ་ཆེན་པོ་བསྒོམ་པ་ནི་བསྙེན་པའོ། །ཕྱག་རྒྱ་གཅིག་པ་དང་། སྤྲོས་པ་བསྒོམ་པ་ཉེ་བའི་བསྙེན་པའོ། །བར་ཆད་མེད་པར་ཚོགས་བསྒྲུབ་པ་ནི་སྒྲུབ་པའོ། །མཐར་(༨༣)ལམ་ཐོབ་ཏུ་ཉེ་བ་ནི་སྒྲུབ་པ་ཆེན་པོའོ། །དེ་ཉིད་ལས། བྱང་ཆུབ་སེམས་རྟོགས་འགྲུབ་པ་ནི། །བསྙེན་པའི་དམ་པ་ཡིན་པའི་ཕྱིར། །སེམས་ཆོས་སྙིང་རྗེ་ཡན་ཆད་དོ། །ཕྱག་རྒྱ་གསལ་བ་ཉེ་བསྙེན་པ། །དེ་ཕྱིར་གཅིག་དང་སྤྲོས་པའོ། །བསྒྲུབ་པ་ཉིད་ནི་བར་ཆད་མེད། །དུས་ཀྱི་ཚོགས་མཐས་སྒྲུབ་ཆེན་ལེན། །ཞེས་སོ། །
གཉིས་པ་སྒྲུབ་པའི་བསྙེན་སྒྲུབ་བཞི་ནི། སྒྲུབ་པའི་ཤོམས་འབྲེལ་ཀ་དང་བཅས་པ་བསྙེན་པ། ཟླ་བ་གཅིག་སྒྲུབ་པའི་དབང་དུ་བྱས་ན་ཟླ་ཕྱེད་ཉེ་བའི་བསྙེན་པ། བཅོ་ལྔ་མན་ཆད་ཀྱི་ཞག་བཅུ་བཞི་སྒྲུབ་པ། ནུབ་ཐ་མ་དངོས་གྲུབ་ལེན་ཁ་མ་ནི་སྒྲུབ་པ་ཆེན་པོའོ། །ཡང་དེ་ལ་ཟླ་ཞག་ཕྱེད་ཉེར་བསྙེན། །ལྷ་གསལ་འཕྲོ་འདུ་སྣོད་དུ་རུང་། །བཅོ་ལྔ་མར་ཕྱེད་སྒྲུབ་པ་སྟེ། །འཕྲོ་འདུ་བསྣོལ་མས་བསྒྲུབ་པར་བྱ། །ཞེས་སོ། །
གསུམ་པ་སྦྱོར་བའི་བསྙེན་སྒྲུབ་བཞི་ནི། ཡུམ་མཚན་ལྡན་བཙལ་ནས་ཆས་སུ་ཞུགས་པ་བསྙེན་པ། འདོད་པའི་བདེ་བ་རྒྱས་པར་བྱེད་པ་ཉེ་བའི་བསྙེན་པ། ཕྱག་རྒྱ་བཞིའི་རོལ་པ་སྒྲུབ་པ། བྱང་ཆུབ་ཀྱི་སེམས་མཁར་ཕབ་སྟེ་སེམས་ལྔ་རིམ་པར་སྐྱེ་བ་སྒྲུབ་པ་ཆེན་པོའོ། །
བཞི་པ་ཉེ་བའི་བསྙེན་སྒྲུབ་བཞི་ནི། སེམས་ཉིད་རང་ལ་ཡོད་པས་བསྙེན་པ། གཞན་ནས་མི་ཚོལ་བས་ཉེ་བའི་བསྙེན་པ། སྙིང་པོ་རྙེད་པས་སྒྲུབ་པ། རང་གསལ་གོམས་པས་སྒྲུབ་པ་ཆེན་པོའོ། །དེ་དག་ནི་ཞི་བ་དང་། ཁྲོ་བོའི་དཀྱིལ་འཁོར་གང་སྒྲུབ་ཀྱང་ཤེས་པར་བྱའོ། །སྤྱོད་པ་ནི། སྒྲུབ་པའི་གྲོགས་སུ་གང་འགྱུར་བ་སྤྱོད་ཅིང་གཙོ་བོར་ཨ་ལི་ཀ་ལིའི་འབྱོར་པ་ལ་སྤྱོད་པ་སྟེ། དེ་ཉིད་ལས། སྤྱོད་ལམ་ཡོ་བྱད་ལྔ་སྤྱོད་ཅིང་། །གཙོ་བོར་དགོས་པ་གང་ཡིན་པ། །ཞེས་སོ། །འབྲས་བུ་ནི། དངོས་སུ་མཐོང་ལམ་ལ་སྦྱོར་ལ། བརྒྱུད་ནས་ཡི་གེ་འཁོར་ལོའི་ས་ཐོབ་པའོ། །དེ་དག་གིས་ལམ་བསྒྲུབ་པ་རྒྱ་ཆེར་བཤད་ཟིན་ཏོ། །
གསུམ་པ་འབྲས་བུའི་རྣམ་པར་བཞག་པ་ལ་གཉིས་ཏེ། གནས་སྐབས་ཀྱི་འབྲས་བུ་དང་། མཐར་ཐུག་གི་འབྲས་བུའོ། །དང་པོ་ལ་གསུམ་སྟེ། རྣམ་སྨིན། ཚེ་དབང་། ཕྱག་རྒྱ་ཆེན་པོའི་རིག་འཛིན་ནོ། །
དང་པོ་ནི། རྣལ་འབྱོར་པས་ལམ་དུ་བསྐྱེད་རྫོགས་བསྒྲུབ་པས་ལུས་ཐ་མལ་དུ་ཡོད་ལ། སེམས་ལྷའི་སྐུར་སྨིན་པ་སྟེ། རྒྱས་པ་ལས། རྒྱ་མིག་རྒྱ་ས་ཇི་ལྟ་བར། །ཕྱག་རྒྱ་ཐོབ་ལ་མ་རེག་པའི། །གཟུགས་རྫོགས་སྟོབས་ཆེན་དེ་ཁོ་ན། །ཞེས་སོ། །དེའང་ཆོས་མཆོག་མ་ཐོབ་པར་ཤི་ན་བར་དོར་ཕྱག་རྒྱ་ལ་སྦྱང་ནས་རིམ་གྱིས་འཚང་རྒྱ་སྟེ། ལམ་རིམ་ལས། གཅིག་དང་དུ་(༨༤)མའི་རྣལ་འབྱོར་པ། །བརྟན་བྱ་ཉིད་པའམ་དེ་ཐོབ་ནས། །ཟླ་དྲུག་བཅུ་དྲུག་བསྙེན་བསྒྲུབ་ཚེ། །རྡོ་རྗེའི་ལུས་སུ་མ་གྱུར་པར། །སྟོབས་ཆུང་རྐྱེན་དམན་ཞན་པའི་ཕྱིར། །རྣམ་རྟོག་འབྱུང་བའི་ལྷག་ལུས་བཞག །རྡོ་རྗེ་འཆང་སར་རིག་པས་འགྲོ། །ཞེས་སོ། །ཆོས་མཆོག་ཐོབ་ནས་ཚེ་དབང་ལ་དངོས་སུ་སྦྱོར་ཏེ། དེ་ལས། རྐྱེན་གྱིས་བར་མ་ཆད་པ་ན། །དེ་ཡང་རྡོ་རྗེའི་ལུས་སུ་སྦྱོར། །ཞེས་སོ། །
གཉིས་པ་ཚེ་དབང་རིག་འཛིན་ནི། ལམ་སྔ་མ་མཐར་ཕྱིན་པས་ལུས་དེ་ཉིད་རྡོ་རྗེའི་སྐུ་གྲུབ་ནས་སྐྱེ་འཆི་མེད་ཅིང་། སེམས་འཕགས་པའི་ཡེ་ཤེས་དང་པོ་ཐོབ་པ་སྟེ། ལམ་རིམ་ལས། དོན་མཐོང་འཇུག་པ་མཐར་ཕྱིན་པའི། །ཚོགས་སྤྱོད་བསྒྲུབ་པའི་དངོས་གྲུབ་ཀྱིས། །ལུས་ཁམས་སྐྱེ་གནས་ཟག་པ་ཟད། །རྡོ་རྗེ་ལུས་གྱུར་ཚེ་ཡི་རིགས། །མཐོང་བའི་ཆོས་ལ་མྱ་ངན་འདས། །ལུས་མ་བོར་བ་རྒྱལ་བའི་ས། །འཇིགས་པ་ཀུན་བྲལ་ཆོ་འཕྲུལ་རྫོགས། །ཞེས་སོ། །རྣམ་པ་ནི་སྔོན་ལྷ་མི་གང་ཡིན་དེར་སྣང་སྟེ། མི་དང་ལྷ་དང་ཚངས་པ་ཡི། །སྐྱེ་བ་རྣམ་དག་འཛིན་མོད་ཀྱང་། །ཁྱད་པར་ས་ལ་གནས་གྱུར་ཡིན། །ཞེས་སོ། །
གསུམ་པ་ཕྱག་རྒྱའི་རིག་འཛིན་ནི། སེམས་མཚན་མ་མེད་པར་ཕྱག་རྒྱ་ཆེན་པོའི་རིག་པ་འཛིན་པ་སྟེ། ས་དང་པོ་སྐད་ཅིག་གཉིས་པ་ནས། བཅུ་པའི་བར་ཏེ་བསྒོམ་ལམ་ཟག་མེད་ལ་གནས་ཤིང་། ལུས་དཀྱིལ་འཁོར་གྱི་གཙོ་བོ་ཞི་ཁྲོ་ལོངས་སྤྱོད་རྫོགས་པའི་སྐུ་རིགས་ལྔའི་ཆ་ལུགས་སུ་སྣང་བྱེད་ཆུའི་ཟླ་བ་ལྟ་བུར་གནས་ཏེ་རིམ་པ་ལྟར། མཉམ་པ་ཉིད་ལས་མི་གཡོ་ཞིང་། །ཟག་པ་མེད་པ་བསྒོམ་པའི་ལམ། །ཞེས་པ་དང་། རང་སེམས་ཕྱག་རྒྱ་ཆེན་པོ་སྟེ། །བསྒོམ་པས་གང་ཡིན་མངོན་གྱུར་སྐུ། །ཐུན་མོང་མཆོག་གི་མཚན་དཔེར་ལྡན། །ལོངས་སྤྱོད་གཉིས་པ་ཕྱག་རྒྱའི་རིགས། །རྡོ་རྗེ་འཁོར་ལོ་རིན་ཆེན་དང་། །པདྨ་རལ་གྲིའི་རིག་འཛིན་འགྱུར། །ཞེས་སོ། །དེའང་གང་བསྒོམ་པའི་རིགས་སུ་སྣང་བ་དང་། ཐུན་མོང་གི་མཚན་དཔེ་དང་། མཆོག་གི་མཚན་དཔེ་འཁོར་གྱི་རྣམ་པས་བསྐོར་བར་སྣང་བ་དང་། ལོངས་སྐུ་ལ་གཉིས་ལས་ལམ་སྣང་གི་ལོངས་སྐུ་ཐོབ་པས་ཕྱག་རྒྱ་ཆེན་པོའི་རིགས་ཡིན་ནོ། །
གཉིས་པ་མཐར་ཐུག་གི་འབྲས་བུ་ནི། སློབ་པའི་ལམ་མཐར་ཕྱིན་ནས་མི་སློབ་པའི་ལམ་ལ་གནས་པའི་ཕྱིར་མཐར་ལམ་མངོན་དུ་མཛད་ཅིང་། ཆོས་སྐུའི་ཤེས་རབ་སྤྲོས་པའི་མཐའ་དང་བྲལ་བ་གནས་ལུགས་དོན་གྱི་ཡེ་ཤེས་དང་། ལོངས་སྐུའི་ཤེས་རབ་དུག་ལྔ་ཡེ་ཤེས་སུ་ཤར་བ་རང་བྱུང་གི་ཡེ་ཤེས་དང་། སྤྲུལ་སྐུའི་ཤེས་རབ་ཇི་སྙེད་ཇི་ལྟ་མཁྱེན་ནས་ཕྲིན་ལས་ལྷུན་གྲུབ་ཀྱི་ཡེ་(༨༥)ཤེས་གསུམ་ལ་མངའ་བརྙེས་ཤིང་། ཆོས་ཐམས་ཅད་ལ་མངའ་དབང་རྫོགས་པར་ལྷུན་གྱིས་གྲུབ་པ་སྟེ། དེ་ཉིད་ལས། སྔ་མའི་རིགས་ལས་མཐུ་རྫོགས་པས། །བཤད་པ་བཞིན་དུ་དྲི་མ་སྦྱངས། །སངས་རྒྱས་ས་ཡི་ཤེས་རབ་གསུམ། །ལྷུན་གྱིས་གྲུབ་པའི་རིགས་སུ་འབྱུང་། །ཞེས་སོ། །
འདི་ལ་ངོ་བོ་མདོར་བསྟན་པ་དང་། རང་བཞིན་རྒྱས་པར་བཤད་པ་གཉིས་ལས། དང་པོ་ནི། སངས་རྒྱས་པ་དེའི་ཚེ། སྐུ་ལྔ། གསུང་ལྔ། ཐུགས་ལྔ། ཡོན་ཏན་ལྔ། ཕྲིན་ལས་ལྔ་སྟེ་ཉི་ཤུ་རྩ་ལྔར་གནས་པ་ལས། སྐུ་ལྔ་ནི། སྤངས་རྟོགས་ཀྱི་ཡོན་ཏན་མཐར་ཕྱིན་པའི་ཆ་ནས་མངོན་པར་བྱང་ཆུབ་ཀྱི་སྐུ་དང་། དུས་གསུམ་འཕོ་འགྱུར་དང་འཇིག་འབྲལ་མེད་ཅིང་རྟག་པས་མི་འགྱུར་རྡོ་རྗེའི་སྐུ་དང་། དབྱིངས་དང་ཡེ་ཤེས་གཉིས་སུ་མེད་པ་སྤྲོས་པ་མཐའ་དག་ཞི་བས་ཆོས་ཀྱི་སྐུ་དང་། ལྷུན་སྟུག་པོ་བཀོད་པར་རང་སྣང་དཀྱིལ་འཁོར་དུ་རྫོགས་པས་ལོངས་སྤྱོད་རྫོགས་པའི་སྐུ་དང་། གདུལ་བྱ་གང་འདུལ་དུ་སྣང་བས་སྤྲུལ་པའི་སྐུ་སྟེ། དེ་ཚེ་སྐུ་ལྔ་ཀུན་ཀྱང་རྫོགས། །ཞེས་སོ། །གསུང་ལྔ་ནི། སྐུ་དེ་དག་གི་གསུང་སྟེ་མངོན་བྱང་གི་གསུང་རང་བྱུང་གི་ཡེ་ཤེས་ངོ་བོ་ཉིད་དུ་གསལ་བ། རྡོ་རྗེའི་གསུང་གྲགས་སྟོང་དབྱེར་མེད་འདུས་མ་བྱས་པ། ཆོས་སྐུའི་གསུང་སྐྱེ་མེད་སྨྲ་བསམ་བརྗོད་ལས་འདས་པ། ལོངས་སྐུའི་གསུང་དྭངས་གསལ་བརྡ་ཙམ་ཚིག་ལས་འདས་པ། སྤྲུལ་སྐུའི་གསུང་འགྲོ་བ་སོ་སོའི་སྐད་དུ་སྣང་བ་དེའང་ཚངས་པའི་དབྱངས་ལ་སོགས་པའི་ཡན་ལག་དྲུག་ཅུ་ལྟ་བུ་སྟེ། སྔ་མ་ལས། གསུང་ལྔ་རང་བྱུང་ཡེ་ནས་སྣང་། །ཞེས་སོ། །ཐུགས་ལྔ་ནི། ཀུན་ལ་དབྱེར་མེད་དུ་ཁྱབ་པའི་ཡེ་ཤེས་ལྔ་སྟེ། དེ་ལས། ཐུགས་ནི་རང་བྱུང་ཡེ་ཤེས་ལྔ། །ཞེས་སོ། །ཡོན་ཏན་ལྔ་ནི། རང་སྣང་ལོངས་སྐུའི་སྣང་བ་ཆེན་པོ་སྟེ། དེའང་རང་རིག་པ་བྱང་ཆུབ་ཀྱི་སེམས་ཉིད་ཞིང་ཁམས་དང་། གཞལ་ཡས་ཁང་དང་། འོད་ཟེར་དང་། གདན་ཁྲི་དང་། དཀྱིལ་འཁོར་གྱི་རྒྱན་ཕུན་སུམ་ཚོགས་པར་སྣང་བ་སྟེ། དེ་ལས། ལྷུན་རྫོགས་རིག་པ་རང་སྣང་བ། །ཞིང་དང་གཞལ་ཡས་གདན་ཁྲི་རྒྱན། །འོད་ཟེར་དུ་མ་སྣང་བ་སྟེ། །ཞེས་སོ། །ཕྲིན་ལས་ལྔ་ནི། མཛད་པ་སྟེ། གདུལ་བྱའི་ཉོན་མོངས་པ་དང་གནོད་འཚེ་ལ་སོགས་པ་སེལ་བས་ཞི་བ་དང་། བསོད་ནམས་དང་ཚེ་ལ་སོགས་པ་འཕེལ་བར་མཛད་པས་རྒྱས་པ་དང་། བསྡུ་བ་བཞིས་འཁོར་དུ་སྡུད་པས་དབང་དང་། བདུད་དང་གཤིན་རྗེ་ལ་སོགས་པ་ཚར་བཅད་པས་རྗེས་སུ་འཛིན་པ་དྲག་པོ་དང་། གདུལ་བྱ་དང་འཚམས་པར་གང་ལ་གང་འདུལ་གྱི་མཛད་པ་ལ་རྩོལ་བ་མེད་པར་དེ་དང་དེར་འབྱུང་བས་ལྷུན་གྱིས་གྲུབ་པའི་ཕྲིན་ལས་(༨༦)ཏེ། དེ་ཉིད་ལས། གདུལ་བྱའི་བྱ་བ་ཐ་དད་པས། །ཞི་དབང་དྲག་རྒྱས་ལྷུན་གྱིས་གྲུབ། །གང་ལ་འཚམས་པར་འདུལ་མཛད་དེ། །ཞེས་སོ། །
གཉིས་པ་རང་བཞིན་རྒྱས་པར་བཤད་པ་ལ་གསུམ་སྟེ། རྟེན་སྐུ། བརྟེན་པ་ཡེ་ཤེས། མཛད་པ་ཕྲིན་ལས་ཀྱི་རང་བཞིན་རྒྱས་པར་བཤད་པའོ། །
དང་པོ་ལ་གསུམ་ལས། ཆོས་ཀྱི་སྐུ་ནི་དབྱིངས་དང་ཡེ་ཤེས་རོ་གཅིག་ཏུ་གྱུར་པའི་གནས་སྐབས་ན། སེམས་ཉིད་སྤྲོས་པ་དང་བྲལ་བའི་ངང་དུ། སེམས་སེམས་བྱུང་གི་འཇུག་པ་མཐའ་དག་ཞི་བས་གང་དུའང་འཛིན་པ་མེད་པའི་ཡེ་ཤེས་ཤིན་ཏུ་ཕྲ་བའི་རང་བཞིན། གནམ་གང་གི་ཟླ་བ་དབྱིངས་སུ་ནུབ་པ་ལྟར། ཡོད་པ་མ་ཡིན་ཏེ། རགས་པའི་རྣམ་པ་དང་འདིའོ་ཞེས་སངས་རྒྱས་ཀྱིས་ཀྱང་མི་གཟིགས་པ་དང་། མེད་པ་མ་ཡིན་ཏེ། ཕྲ་བའི་ཡེ་ཤེས་འཆར་གཞིར་གནས་པ་དང་། གཉིས་དང་གཉིས་ཀ་མ་ཡིན་པའི་མཐའ་ཐམས་ཅད་ལས་འདས་པའི་ཚུལ། འདི་ཉིད་ལས། གཅིག་དང་དུ་མ་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །ཞེས་སོ། །ལོངས་སྤྱོད་རྫོགས་པའི་སྐུ་ནི། དེའི་ངང་ལས་མ་གཡོས་བཞིན་དུ། རང་སྣང་ལྷུན་སྟུག་པོ་བཀོད་པའི་ཞིང་ཁམས། ཡེ་ཤེས་རིན་པོ་ཆེའི་ངོ་བོ་ལས་ལྷུན་གྱིས་གྲུབ་པ། འོག་གཞི་ཞི་བ་དང་། སྟེང་གཞི་ཁྲོ་བོའི་དཀྱིལ་འཁོར་མཁའ་དབྱིངས་ཀྱི་མཐའ་དབུས་ཁྱབ་པར་སྐུ་དང་ཡེ་ཤེས་སུ་འཇའ་ཚོན་ལྟར་སྣང་བ་སྟེ། འདི་ཉིད་ལས། ཞིང་ཁམས་བསམ་ཡས་རྣམ་དག་དང་། །རྒྱ་དང་བྲལ་བའི་གཞལ་ཡས་ཁང་། །འཁོར་ལོ་རྒྱན་དང་རོལ་མོའི་ཚོགས། །དཀྱིལ་འཁོར་མ་ལུས་བསམ་ཡས་ཀུན། །མཐོང་ནས་ཉེ་བར་མཉེས་པ་དང་། །རྒྱ་ཆེན་གསུང་ལས་དོན་འབྱུང་བའང་། །མཐུན་པའི་ཡེ་ཤེས་རང་སྣང་བའོ། །ཞེས་པ་དང་། རྒྱ་མཚོ་ལས། རང་སྣང་རྒྱལ་བ་སེམས་སོགས་དང་། །དང་པོའི་སངས་རྒྱས་ས་རྒྱལ་བ། །སེམས་དཔའ་ཆེ་དང་འཇོམས་པ་ཆེ། །ཞེས་སོ། །ཞིང་འདིར་སྟོན་པས་གསང་བདག་ལ་བརྗོད་པ་མེད་བཞིན་དུ་རང་བྱུང་གི་དབྱིངས་སུ་སྣང་བས་སྒྱུ་འཕྲུལ་གསུངས་ཏེ། དེ་ཉིད་ལས། འཁོར་ལོ་འབར་བའི་སྟེང་དབུས་སུ། །བདག་པོ་ཀུན་བཟང་འཁོར་ལོ་བསྐོར། །སྐྱེས་བུ་བཀའ་སྡོད་མདུན་ན་གནས། །བརྗོད་པ་མེད་པར་གོ་བར་མཛོད། །ཅེས་སོ། །སྤྲུལ་སྐུ་ནི། དེ་ཉིད་ཀྱི་སྣང་ཆ་ལས་རང་བཞིན་སྤྲུལ་པ་དང་། འགྲོ་བ་འདུལ་བའི་སྤྲུལ་པའི་སྐུར་རང་སྣང་བས་དོན་མཛད་དེ། དེའང་ས་བཅུའི་སེམས་དཔའ་ལ་ལོངས་སྐུར་(༨༧)སྣང་བས། མེ་ལོང་དུ་བཞིན་གྱི་དྲི་མ་སྣང་བ་ལྟར་ལོངས་སྐུའི་ངོས་ལ་བལྟས་པས། ས་བཅུའི་སེམས་དཔའ་སོ་སོའི་སྒྲིབ་པ་མཐོང་ནས་སྦྱོང་ཞིང་འོད་ཟེར་འགྱེད་པ་ཡིན་ཏེ། འདི་ཉིད་ལས། འོག་མིན་བླ་མེད་གནས་མཆོག་ཏུ། །སྐུ་ནི་རྣམ་པར་སྣང་མཛད་ཚུལ། །བྱང་ཆུབ་སེམས་དཔའི་ཚོགས་རྣམས་ལ། །དེ་བཞིན་གསང་མཆོག་མི་སྨྲ་སྟེ། །སྐུ་ཡིས་ཆོས་རྣམས་མཇལ་བར་སྟོན། །མེ་ལོང་བལྟས་པའི་ཚུལ་བཞིན་དུ། །དངོས་ཀྱི་མདོག་ངན་ཐམས་ཅད་སེལ། །འཁོར་གྱིས་དེ་བཞིན་སྐུ་བལྟས་ན། །བྱང་ཆུབ་སྒྲིབ་པ་གཏིང་དཔག་མེད། །མེ་ལོང་བཞིན་དུ་སྐུ་ལ་སྣང་། །དེ་ནས་ས་བཅུ་རིམ་གྱིས་སྦྱང་། །བླ་མེད་བྱང་ཆུབ་ཡང་དག་འཐོབ། །ཅེས་སོ། །འགྲོ་བ་འདུལ་བའི་སྤྲུལ་པའི་སྐུ་ནི། གདུལ་བྱ་སོ་སོའི་མོས་པ་དང་གནས་རིས་དང་མཐུན་པ་དེ་ཁོ་ན་འདྲ་བ་ཡང་། སྤྲུལ་པ་བྱེ་བ་བསམ་མི་ཁྱབ། །ཅེས་སོ། །བསྡུ་ན་འགྲོ་བ་རིགས་དྲུག་སྣང་བས། དེ་དག་གི་འདུལ་བྱེད་ཐུབ་པ་དྲུག་སྣང་བ་སྟེ། འདི་ལས་ཐུགས་རྗེ་ཆེན་པོས་བྱིན་གྱིས་བརླབས་ཞེས་བྱ་བའི་རིག་པའི་སྐྱེས་བུ་ཐུབ་པ་དྲུག །ཅེས་སོ། །
གཉིས་པ་བརྟེན་པ་ཡེ་ཤེས་ལ་གསུམ་ལས། ཆོས་སྐུའི་ཡེ་ཤེས་ཟབ་ཅིང་སྤྲོས་པ་དང་བྲལ་བ་སྟེ། རྡོ་རྗེ་ལས། ཆོས་སྐུའི་ཡེ་ཤེས་བསམ་འདས་བརྗོད་མེད་ངང་། །ཞེས་སོ། །ལོངས་སྐུའི་ཡེ་ཤེས་ལ་ལྔ་སྟེ། སྟོང་ཉིད་བསམ་ངོ་ལས་འདས་པ་ཇི་ལྟ་བའི་གནས་ལུགས་ཀྱི་ངང་ལ་བཞུགས་པ་ཆོས་ཀྱི་དབྱིངས་ཀྱི་ཡེ་ཤེས། རང་གསལ་འགགས་པ་མེད་པ་མེ་ལོང་ལྟ་བུའི་ཡེ་ཤེས། ཆོས་ཐམས་ཅད་ལྷུན་མཉམ་རྫོགས་པ་ཆེན་པོའི་ངང་ལས་མི་གཡོ་བ་མཉམ་པ་ཉིད་ཀྱི་ཡེ་ཤེས། ཆོས་ཅན་ཇི་སྙེད་པ་མངོན་དུ་གྱུར་པ་སོ་སོར་རྟོགས་པའི་ཡེ་ཤེས། གདུལ་བྱའི་དོན་གཉིས་འབད་མེད་དུ་རྫོགས་པ་བྱ་བ་གྲུབ་པའི་ཡེ་ཤེས་ཏེ། རྒྱུད་བླ་མ་ལས། ཡེ་ཤེས་ཆེན་པོ་ལྔ་རྣམས་ཀྱང་། །ལྷུན་མཉམ་ངང་ལས་མི་གཡོ་ཞིང་། །ཞེས་སོ། །སྤྲུལ་སྐུའི་ཡེ་ཤེས་ནི་གཉིས་ཏེ། ཤེས་བྱའི་གནས་ལུགས་སྐྱེ་འགགས་མེད་པར་མཁྱེན་པ་ཇི་ལྟ་བ་ཆོས་ཉིད་གཟིགས་པའི་ཡེ་ཤེས་དང་། ཆོས་ཅན་མ་འདྲེས་པར་ཇི་ལྟར་ཡིན་པ་བཞིན་གཟིགས་པ་ཇི་སྙེད་པ་མཁྱེན་པའི་ཡེ་ཤེས་ཏེ། དེ་ཉིད་ལས། སྤྲུལ་སྐུ་ཇི་བཞིན་ཇི་སྙེད་གཟིགས། །ཞེས་སོ། །
གསུམ་པ་མཛད་པ་ཕྲིན་ལས་ནི། གདུལ་ཡུལ་སེམས་དཔའ་དང་། ཉན་རང་དང་། སོ་སོའི་སྐྱེ་བོ་རྣམས་ནི་ནམ་མཁའི་མཐའ་དང་མཉམ་པའི་འཇིག་རྟེན་དྲུག་གི་ཕྱོགས་བཅུ་ཐམས་ཅད་དུ། ལོངས་སྐུའི་ངང་ལས་སྤྲུལ་སྐུར་སྣང་བས་(༨༨)འདུལ་བ་བཞིའི་ཚུལ་གྱིས་དོན་མཛད་དེ། སྐུ་བསོད་ནམས་ཆེན་པོས་འདུལ་བ་སར་གནས་ལ་ལོངས་སྐུ་དང་། དེ་ལས་གཞན་པ་རྣམས་ལ་སྤྲུལ་པའི་སྐུ་མཛད་པ་བཅུ་གཉིས་ལ་སོགས་པའི་རོལ་པས་གདུལ་བ་དང་། ཐུགས་མངོན་པར་ཤེས་པ་ཆེན་པོས་འདུལ་བ་དོན་ཐམས་ཅད་མངོན་སུམ་དུ་གྱུར་པས་འདུལ་བ་དང་། བསམ་གྱིས་མི་ཁྱབ་པས་འདུལ་བ་རྫུ་འཕྲུལ་ལ་སོགས་པའི་ཆོ་འཕྲུལ་བསམ་གྱིས་མི་ཁྱབ་པས་གདུལ་བ་དང་། གསུང་རིག་པས་འདུལ་བ་ཐེག་པ་ལྔ་ཡི་ཆོས་ཀྱི་རྣམ་གྲངས་སྟོང་ཕྲག་བརྒྱད་ཅུ་རྩ་བཞིས་གདུལ་བས་དོན་མཛད་དོ། །དེའང་དུས་ཇི་ཙམ་ཞིག་ཏུ་མཛད་ན། ནམ་མཁའི་མཐའ་ཀླས་པའི་སེམས་ཅན་རྣམས་མ་གྲོལ་གྱི་བར་ལ་མཛད་པ་སྟེ། འདི་ལས། ཐུགས་རྗེ་ཆེན་པོས་འབྲེལ་བས་ན། །འགྲོ་དྲུག་དུས་གནས་མ་ལུས་སྣང་། །ཞེས་པ་དང་། མངོན་རྟོགས་རྒྱན་ལས་ཀྱང་། གང་གིས་སྲིད་པ་ཇི་སྲིད་བར། །འགྲོ་ལ་ཕན་པ་སྣ་ཚོགས་དག །མཉམ་དུ་མཛད་པའི་སྐུ་འདི་ནི། །ཐུབ་པའི་སྤྲུལ་སྐུ་རྒྱུན་མི་འཆད། །དེ་བཞིན་འཁོར་བ་ཇི་སྲིད་འདིར། །ལས་ནི་རྒྱུན་མི་འཆད་པར་འདོད། །ཅེས་པ་སྟེ། རྟག་པ་རྒྱུན་གྱི་འཁོར་ནམ་མཁའི་དབྱིངས་དང་མཉམ་པའི་འགྲོ་བ་ལ། གནས་སྐབས་སུ་འཁོར་བའི་སྡུག་བསྔལ་ལས་སྐྱོབ་ཅིང་བདེ་བ་ལ་འགོད་ལ། མཐར་ཐུག་བླ་ན་མེད་པའི་བྱང་ཆུབ་ལ་འགོད་པའི་ཕྲིན་ལས་ཆེན་པོ་རང་བཞིན་ལྷུན་གྱིས་གྲུབ་པར་མཛད་དོ། །དེ་དག་གིས་ནི་མཐར་ཕྱིན་པ་འབྲས་བུའི་དོན་ཏེ་སྤྱིའི་དོན་རྣམས་ལེགས་པར་གཏན་ལ་ཕབ་ཟིན་ཏོ། །
དོན་གཉིས་པ་གཞུང་གི་དོན་རྒྱ་ཆེར་བཤད་པ་ལ་གསུམ་སྟེ། བརྗོད་བྱ་རྟོགས་པའི་ཡན་ལག་ཏུ་མཚན་གྱི་དོན་བཤད་པ། བརྗོད་བྱ་ཉིད་གསལ་བར་སྟོན་པ་གཞུང་གི་དོན་དངོས་བཤད་པ། ཡོངས་སུ་རྫོགས་པ་མཇུག་གི་དོན་བཤད་པའོ། །ཞེས་པ་ལ་སོགས་པས་རྡོ་རྗེའི་གནས་རྣམས་གསལ་བར་བཤད་ཅིང་། དེ་དག་གི་སྐབས་སུ། དོན་གྱི་འབྲེལ་འགོད་པ་སྦལ་པའི་འཕར་སྟངས་ལྟ་བུ། ཚིག་གི་དོན་བཤད་པ་རུ་སྦལ་གྱི་འགྲོས་ལྟ་བུ། ངག་དོན་གྱི་སྐབས་བསྡུ་བ་གླང་པོ་ཆེའི་འགྱིང་ལྟ་བུ་དང་གསུམ་གསུམ་གྱིས་བཤད་ཅིང་། ཚིག་འབྲུ་གསལ་ཞིང་ཁོང་ལྷོད་ལ་དལ་ཆགས་པ། དཔེ་དང་དོན་གཉིས་འབྲེལ་ལ་ཆུན་ཆེ་བ་སྟེ། ཡེ་ཤེས་དྲུག་ལྡན་གྱི་ཚུལ་དུ་བཤད་པ་ནི་གདམས་ངག་དམ་པའོ། །
ཆོས་ཚུལ་འདི་ནི་ཤིན་ཏུ་རྒྱ་ཆེན་ནམ་མཁའི་རང་བཞིན་འབྱམས་ཀླས་ཤིང་། །དཔག་མེད་བསམ་ཡས་ལྷུན་གྱིས་གྲུབ་ལ་ལེགས་བཤད་ཡིད་བཞིན་(༨༩)སྤྲིན་ཚོགས་ཅན། །དོན་ཟབ་འབྲུག་སྒྲ་ཕྱོགས་ཀྱི་མཐར་ཁྱབ་ཕན་དང་བདེ་བའི་ཆར་མངའ་བ། །རྡུལ་བྲལ་དྲི་མེད་རིམ་རྒྱས་བཤད་དེས་འགྲོ་ཀུན་བྱང་ཆུབ་མཆོག་ཐོབ་ཤོག །བདག་བློའི་ཡིད་མཁར་རྣམ་དཔྱོད་རྟ་བདུན་ལེགས་བཤད་འོད་སྟོང་དྲྭ་བ་ཅན། །ཚིག་དོན་རྣམ་བཀྲའི་པད་ཚལ་ཁ་འབྱེད་བློ་གསལ་རྐང་དྲུག་ཉེར་འཚོའི་གནས། །ཇི་སྙེད་ཇི་བཞིན་དོན་རྣམས་གསལ་བས་ཐར་པའི་ལམ་བཟང་སྣང་བྱེད་ཅིང་། །ལོག་བློའི་མ་རིག་ཀུནྡ་ཟུམ་པས་ཡེ་ཤེས་སེམས་དཔའི་གཞིར་གྱུར་ཏོ། །ཆ་ཤས་གང་བའི་བློ་གྲོས་ནི། །སྟོན་ཟླའི་རྒྱུ་སྐར་ཕྲེང་བ་ཅན། །གཞུང་ལུགས་ཀུ་མུ་ཏ་ཁ་འབྱེད་པ། །རིང་ན་གསལ་བས་རྣམ་པར་གྲགས། །གཏོང་ལ་དགའ་བ་དེ་དག་དགེ་བའི་མཚོ། །ནམ་ཡང་སྦྱིན་པའི་ཆུ་རྒྱུན་མི་ཟད་ལྟར། །ཡོན་ཏན་རང་བཞིན་ཅན་རྣམས་ཡིད་བཞིན་སྤྲིན། །རང་གཞན་དོན་གཉིས་འབྱོར་བའི་ཚོགས་མང་བ། །གང་འདིར་བདག་བློའི་ཡིད་ཀྱི་པད་མཚོ་ལས། །བློ་གྲོས་ངུར་པ་ཤིན་ཏུ་སྙན་འདུ་བས། །རྒྱུད་དོན་རྣམ་བཤད་ཟབ་མོའི་དར་དིར་སྒྲ། །བློ་གསལ་འདབ་གཤོག་ཚོགས་ལ་ལེགས་པར་བསྒྲགས། །དགེ་བ་དེ་ཡིས་མ་ལུས་འགྲོ་ཀུན་དོན་གཉིས་འབྱོར་བའི་སྙིང་པོ་ཅན། །རྒྱལ་བའི་གོ་འཕང་ཤིན་ཏུ་མཐའ་ཡས་ཡོན་ཏན་ཀུན་རྫོགས་ཐོབ་པར་ཤོག །ལེགས་བཤད་མཆོག་འདི་མཁའ་དང་ཆུ་མཚོ་ཡིད་བཞིན་དཔག་བསམ་དབང་པོ་ལྟར། །རྒྱ་ཆེ་རྒྱུན་རིང་གཞན་དོན་ཕུན་ཚོགས་ཡིད་ལ་བསམ་པ་འགྲུབ་པར་ཤོག །གསང་བའི་སྙིང་པོ་དེ་ཁོ་ན་ཉིད་ངེས་པའི་སྤྱི་དོན་ཡིད་ཀྱི་མུན་སེལ་ཞེས་བྱ་བ། ཡུལ་བྱང་ཕྱོགས་ཀྱི་རྒྱུད་གངས་རིའི་རྒྱུད་ཀྱི་ར་བར་བྱུང་བའི་རྣལ་འབྱོར་པ་རྡོ་རྗེ་གཟི་བརྗིད་ཀྱིས། སྐལ་བཟང་གི་སློབ་མ་བློ་གྲོས་བཟང་པོ་དང་། དགེ་བའི་འབྱུང་གནས་ལ་སོགས་པས་བསྐུལ་བའི་ངོར། སྔོན་གྱི་ཆོས་རྒྱལ་དམ་པས་བརྟེན་པའི་རི་ལྷུན་མཐོ་ཞིང་ཡིད་དུ་འོང་བ། སྨན་དང་མེ་ཏོག་གི་འབྱུང་གནས། གངས་རི་ཐོད་དཀར་གྱི་མགུལ། རྒྱ་ཤུག་གི་ནགས་འདབས་ཡིད་དུ་འོང་བ་སྙེ་ཕུ་ཤུག་གསེབ་ཙནྡན་གྱི་ནགས་ཁྲོད་ཆེན་པོར་ལེགས་པར་སྦྱར་བ་རྫོགས་སོ།། །།
དགེའོ།། །།