གདམས་ངག་མཛོད་པོད་བདུན་པ།
དཔལ་འཁོར་ལོ་བདེ་མཆོག་དྭགས་པོ་སྙན་བརྒྱུད་ལུགས་ཀྱི་སྒྲུབ་ཐབས་བདེ་ཆེན་དྲྭ་བ།
དཔལ་འཁོར་ལོ་བདེ་མཆོག་དྭགས་པོ་སྙན་བརྒྱུད་ལུགས་ཀྱི་སྒྲུབ་ཐབས་བདེ་ཆེན་དྲྭ་བ་བཞུགས་སོ།། །།
ན་མོ་གུ་རུ་ཤྲཱི་ཙཀྲ་སམྦ་ར་ཡ། མཆོག་ཏུ་མི་འགྱུར་བདེ་བ་ཆེན་པོ་དང༌། །རྣམ་ཀུན་མཆོག་ལྡན་སྟོང་ཉིད་དྲ་བ་རུ། །འཁོར་འདས་ཆོས་ཀུན་སྡོམ་པར་མཛད་དེ་དང༌། །དབྱེར་མེད་ཁྱབ་བདག་བླ་མར་གུས་བཏུད་ནས། །སྙན་བརྒྱུད་ཡིད་བཞིན་ནོར་བུའི་སྒྲུབ་ཐབས་བཀོད། །དེའང་འདི་ཉིད་ཀྱི་རྩ་བའི་གཞུང་དོན་སྙན་བརྒྱུད་ཀྱི་ཉམས་ལེན་ཆེད་དུ་བྱེད་སྐབས་མ་གཏོགས་དབང་བསྐུར་སྒྲུབ་མཆོད་དཀྱུས་འགྲེ་ཙམ་ལ་ཕྱག་ལེན་ཐེབས་དཀའ་བས་མདོར་བསྡུ་ན། དུར་ཁྲོད་སོགས་རྒྱུད་དང་མཐུན་ཅིང་དབེན་པའི་གནས་སུ་སྒྲུབ་པ་པོ་དབང་ཐོབ་ཅིང་དམ་ཚིག་མ་ཉམས་པས་ཡར་མར་གྱི་ཚེས་བཅུ་ལ་དབུ་བཟུང་སྟེ། རྟེན་དང་མཆོད་པ་བདུད་རྩི་ཌཱ་མ་རུ་དྲིལ་བུ་སོགས་སྒྲུབ་ཐབས་ལ་ཉེ་བར་མཁོ་བ་རྣམས་ཚོགས་པར་བྱས་ཏེ། ཉམས་ལེན་དངོས་ལ་གསུམ། སྔོན་འགྲོ། དངོས་གཞི། རྗེས་ཀྱི་རིམ་པའོ། །སྔོན་འགྲོ་ལ་བདུན་གྱི། དང་པོ་དག་པ་གསུམ་ལས་ལུས་དག་པ་ནི། ཨོཾ་ཧྲཱིཿཧ་ཧ་ཧུཾ་ཧཱུྃ་ཕཊ། རང་ཉིད་སྐད་ཅིག་གིས་དཔལ་འཁོར་ལོ་བདེ་མཆོག་སྔོན་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པ་ཡུམ་རྡོ་རྗེ་ཕག་མོ་དམར་མོ་གྲི་གུག་དང་ཐོད་པ་འཛིན་པ་དང་མཉམ་པར་སྦྱོར་བའི་སྐུར་གྱུར། ངག་དག་པ་ནི། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ
ཀ་ཁ་ག་གྷ་ང༌། ཙ་ཚ་ཛ་ཛྙ་ཉ༌། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ ཡིད་དག་པ་ནི། ཤྲཱི་ཧེ་རུ་ཀ་ཨ་ཧཾ། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་སྤྲོས་དང་བྲལ་བ་སྟེ། །ཀ་ནི་གང་དུའང་མི་གནས་པ། །ཨ་ཧཾ་བདེ་བ་ཆེན་པོའོ། །གཉིས་པ་རྡོར་དྲིལ་བྱིན་རླབས་ནི། རྡོ་རྗེ་ཐབས་བདེ་བ་ཆེན་པོ་དང་དྲིལ་བུ་སྟོང་ཉིད་རྟོགས་པའི་ཤེས་རབ་ཆོས་ཀྱི་སྒྲ་སྒྲོགས་པ་དོན་དམ་པའི་བྱང་ཆུབ་སེམས་ཀྱི་རང་བཞིན་ནོ། །ཨོཾ་མ་ཧཱ་བཛྲ་ཧཱུྃ། ཞེས་རྡོ་རྗེ་ཐུགས་ཀར་གསོར། ཨོཾ་བཛྲ་གྷཎྜེ་ཨཿ ཞེས་དྲིལ་བུ་དཀྲོལ་ཞིང་དཀུར་བརྟེན། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་ཐུགས་ཀར་བསྣོལ་ཏེ་བཟུང༌། གསུམ་པ་བདུད་རྩི་བྱིན་རླབས་ནི། ཨོཾ་ཁཎྜ་རོ་ཧེ་ནཱི་ཧཱུྃ་ཧཱུྃ་ཕཊ། ཅེས་པས་བསང༌། ཨོཾ་སྭ་བྷཱ་ཝ་སོགས་ཀྱིས་སྦྱང༌། སྟོང་པ་ཉིད་དུ་གྱུར། སྟོང་པའི་ངང་ལས་ཡྃ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན་ལྗང་གུ་ཆང་བཟུང་ལ་ཡྃ་དང་མཆོག་མ་གཉིས་ལ་གཡོ་བའི་བ་དན་གྱིས་མཚན་པ། དེའི་སྟེང་དུ་རྃ་ལས་མེའི་དཀྱིལ་འཁོར་གྲུ་གསུམ་དམར་པོ་འབར་བ་རྃ་གྱིས་
མཚན་པ། དེའི་སྟེང་དུ་ཀྃ་གསུམ་ལས་ཐོད་པ་བུམ་རིལ་གྱི་སྒྱེད་པོ་ལྟག་པ་ནང་དུ་བསྟན་པ་གསུམ་གྱི་སྟེང་དུ། ཡི་གེ་ཨ་ཡོངས་སུ་གྱུར་པ་ལས། ཀ་པཱ་ལ་ཕྱི་དཀར་ལ་ནང་དམར་བ་དུམ་བུ་གཅིག་པ། དཔྲལ་བ་རང་ལ་བསྟན་པ། རྒྱ་ཁྱོན་ཆོས་ཀྱི་དབྱིངས་དང་མཉམ་པ། །དེའི་དབུས་སུ་བཾ་ལས་དྲི་ཆུ་ལ་མཱུ། ཤར་དུ་ལཱྃ་ལས་དྲི་ཆེན་ལ་བི། ལྷོར་མཱྂ་ལས་རཀྟ་ལ་ར། ནུབ་ཏུ་པཱྃ་ལས་བྱང་སེམས་དཀར་པོ་ལ་ཤཱུ། བྱང་དུ་ཏཱྃ་ལས་ཀླད་པ་ལ་མཱ། སླར་ཡང་དབུས་སུ་ཧཱུྃ་ལས་མིའི་ཤ་ལ་ན། ཤར་ལྷོར་ཨོཾ་ལས་བ་ལང་གི་ཤ་ལ་གོ །ལྷོ་ནུབ་ཏུ་ཨྃ་ལས་ཁྱིའི་ཤ་ལ་ཀུ། ནུབ་བྱང་དུ་ཛྲཱི་ལས་གླང་པོ་ཆེའི་ཤ་ལ་ད། བྱང་ཤར་དུ་ཁྃ་ལས་རྟའི་ཤ་ལ་ཧ་རྣམས་ཀྱིས་མཚན་པ། རང་གི་ཐུགས་ཀ་ནས་རླུང་ཧཱུྃ་གི་དབྱིབས་ཅན་འཕྲོས། རླུང་གི་དཀྱིལ་འཁོར་ལ་ཕོག །བ་དན་བསྐྱོད། མེ་སྦར། ཐོད་པ་དྲོས། རྫས་རྣམས་ཁོལ། ཉེས་པའི་སྐྱོན་རྣམས་ལྦུ་བའི་རྣམ་པར་ཕྱིར་ལུད། དེའི་སྟེང་དུ་ཨོཾ་ཨཱཿཧཱུྃ་གསུམ་ལས་འོད་ཟེར་འཕྲོས་པས། དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་བཀུག་སྟེ་དམ་ཚིག་གི་བདུད་རྩི་དང་གཉིས་སུ་མེད་པའི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། ལན་གསུམ། བཞི་པ་མཆོད་རྫས་རྣམས་བྱིན་བརླབ་པ་ནི། སྔར་ལྟར་བསང་སྦྱང༌། སྟོང་པ་ཉིད་དུ་གྱུར། སྟོང་པའི་ངང་ལས་ཨ་ལས་ཐོད་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཧཱུྃ་ཡིག་གི་ཚོགས་དཔག་ཏུ་མེད་པ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་རྡོ་རྗེའི་མཆོད་ཡོན། ཞབས་བསིལ། མེ་ཏོག །བདུག་སྤོས། སྣང་གསལ། དྲི་ཆབ། ཞལ་ཟས། རོལ་མོ་ལ་སོགས་པའི་མཆོད་པའི་དངོས་པོ་དྭངས་ཤིང་ཐོགས་པ་མེད་པ་བསམ་གྱིས་མི་ཁྱབ་པར་གྱུར།
ཨོཾ་བཛྲ་ཨཱརྒྷཾ་ཨཱཿཧཱུྃ་སྭཱ་ཧཱ། དེ་བཞིན་ཏུ་སྦྱར་ཏེ། པཱ་དྱཾ། པཥྤེ། དྷཱུ་པེ། ཨཱ་ལོ་ཀེ །གནྡྷེ། ནཻ་བི་དྱཻ། ཤབྡའི་བར་འགྲེས། ལྔ་པ་སྔོན་གཏོར་བྱིན་རླབས་ནི། གོང་གི་བདུད་རྩི་བྱིན་རླབས་ལྟར་བྱས་ཏེ། འབར་བའི་ཕྱག་རྒྱ་དཔྲལ་བར་བསྐོར་ཞིང༌། ཕཻཾ་ཕཻཾ་ཕཻཾ། ཨོཾ་བཛྲ་ཨཱ་རལླི་ཧོཿ ཛཿཧཱུྃ་བྃ་ཧོཿ བཛྲ་ཌཱ་ཀི་ནཱི་ས་མ་ཡ་སྟྭཾ་དྲྀ་ཤྱ་ཧོཿ ལན་གསུམ་གྱིས་གཏོར་མགྲོན་སྤྱན་དྲངས་ལ། ཨོཾ་བཛྲ་ཨཱརྒྷཾ་པྲ་ཏཱིཙྪ་ཧཱུྃ་སྭཱ་ཧཱ། ནས། ཤབྡའི་བར་གྱིས་མཆོད་ནས་ཐལ་མོ་ཁ་ཕྱེ་བ་གཏོར་འབུལ་གྱི་ཕྱག་རྒྱ་དང་བཅས་ཏེ། ཨོཾ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ། རཀྵཱ་ས། བྷཱུ་ཏ། པྲེ་ཏ། པི་ཤཱ་ཙཱ། ཨུ་ནྨཱུད། ཨ་པ་སྨ་ར་ཌཱ་ཀ་ཌཱ་ཀི་ནྱ་དཱ་ཡ་ཨི་མཾ་བ་ལིཾ་གྲིཧྞཾ་ཏུ། ས་མ་ཡ་རཀྵནྟུ་མ་མ་སརྦ་སིདྡྷིམྨེ་པྲ་ཡཙྪནྟུ། ཡ་ཐེ་བྃ། ཡ་ཐཻཥྚཾ། བྷུཉྫ་ཐ། པཱི་པ་ཐ། ཛི་གྷྲ་ཐ། མཱ་ཏིཀྲ་མ་ཐ། མ་མ་སརྦ་ཀཱརྟ་ཡ་སཏྶུ་ཁཾ་བི་ཤུརྡྷ་ཡ་ས་ཧཱ་ཡེ་ཀཾ་བྷ་ཝནྟུ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ལན་གསུམ་གྱིས་ཕུལ་ཏེ། ཞིང་སྐྱོང་ཆེན་པོ་བརྒྱད་རྣམས་དང༌། །མཁའ་འགྲོ་སུམ་ཅུ་རྩ་གཉིས་པོ། །མ་ལུས་འཁོར་བཅས་འདིར་བྱོན་ཅིག །མཆོད་སྦྱིན་གཏོར་མ་འདི་བཞེས་ལ། །སོགས་ནས། ཀུན་འགྲུབ་མཛོད། །ཅེས་པའི་བར་དང༌། གང་དག་ནག་པོའི་ཕྱོགས་གྱུར་པའི། །གསང་སྔགས་ཟབ་མོའི་ཆོ་ག་ལ། །ཉན་དང་བལྟ་བར་མི་དབང་བ། །དེ་དག་ཐམས་ཅད་གཞན་དུ་དེངས། །གལ་ཏེ་བཀའ་ལས་འདས་གྱུར་ན། །རྡོ་རྗེ་ཁ་ཊྭཱཾ་མཚོན་འབར་བས། །མགོ་བོ་ཚལ་པ་བརྒྱར་འགས་ཤིང༌། །བགེགས་རྣམས་བརླག་འགྱུར་གདོན་མི་ཟ། །ཨོཾ་སུམ་བྷ་ནི་སོགས་ལན་གསུམ། ཨོཾ་བཛྲ་རཀྵ་རཀྵ་ཧཱུྃ། ཞེས་སྲུང་འཁོར་བསྒོམ། བདུན་པ་སྐྱབས་སུ་འགྲོ་ཞིང་སེམས་བསྐྱེད་པ་ནི། བདག་གཞན་མ་གྱུར་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་བླ་མ་ལ་སྐྱབས་སུ་མཆིའོ། །སངས་རྒྱས་ལ༴ ཆོས་ལ༴ དགེ་འདུན་ལ༴
དཔལ་འཁོར་ལོ་སྡོམ་པའི་དཀྱིལ་འཁོར་གྱི་ལྷ་ཚོགས་འཁོར་དང་བཅས་པ་རྣམས་ལ་སྐྱབས་སུ་མཆིའོ། །ལན་གྲངས་ཅི་ནུས་བརྗོད། སེམས་ཅན་ཐམས་ཅད་ཀྱི་དོན་ཏུ་དཔལ་འཁོར་ལོ་སྡོམ་པའི་གོ་འཕང་མྱུར་དུ་ཐོབ་པར་བྱ། དེའི་ཆེད་དུ་རྡོ་རྗེའི་རྣལ་འབྱོར་ཟབ་མོ་ཉམས་སུ་བླང་བར་བགྱིའོ། །ལན་གསུམ་བརྗོད་དོ། །གཉིས་པ་དངོས་གཞི་ལ་བདུན་ལས། དང་པོ་ཕྱི་སྒྲུབ་བླ་མའི་རྣལ་འབྱོར་ནི། རང་གི་སྤྱི་བོར་པྃ་ལས་པདྨ་རྃ་ལས་ཉི་མའི་དཀྱིལ་འཁོར་གྱི་སྟེང་དུ་བླ་མ་རྡོ་རྗེ་སེམས་དཔའ་བདེ་ཆེན་འཁོར་ལོ་སྐུ་མདོག་གངས་རིའི་ཕུང་པོ་ལ་ཉི་མ་ཤར་བ་ལྟ་བུ་ཞལ་གཅིག་ཕྱག་གཉིས་པ། སྤྱན་གསུམ་རབ་ཏུ་དམར་ཞིང་གཡོ་བ། མཆེ་བ་བཞི་གཙིགས་པ། ཕྱག་གཉིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། ཡུམ་རྡོ་རྗེ་སྙེམས་མ་སྐུ་མདོག་དཀར་མོ་གྲི་གུག་དང་ཐོད་ཁྲག་འཛིན་པས་ཡབ་ལ་འཁྱུད་པ། ཞབས་གཡས་བརྐྱངས་གཡོན་བསྐུམས་པའི་གར་གྱིས་བཞེངས་པ། རལ་པའི་ཐོར་ཅོག་དང་རུས་པའི་རྒྱན་དྲུག །རིན་པོ་ཆེ་སྣ་ཚོགས་ཀྱི་ཕྲེང་བ་དང༌། རྡོ་རྗེ་ཕྲེང་བ་དང་མེ་ཏོག་གི་ཕྲེང་བ་དུ་མས་བརྒྱན་པ། འོད་དང་འོད་ཟེར་གྱི་ཕུང་པོ་གར་དགུའི་ཉམས་དང་ལྡན་ཅིང་དམ་ཚིག་ཡེ་ཤེས་གཉིས་སུ་མེད་པ། དེའི་འཁོར་ལོ་ལྔ་ལ་པདྨ་དང་ཉི་མའི་གདན་གྱི་སྟེང་དུ་སྤྱི་བོར་དེ་བཞིན་གཤེགས་པ་རྡོ་རྗེ་སེམས་དཔའ་ཡབ་ཡུམ་སྐུ་མདོག་དཀར་པོ། མགྲིན་པར་གར་གྱི་དབང་ཕྱུག་ཡབ་ཡུམ་དམར་པོ། སྙིང་གར་ཧེ་རུ་ཀ་ཡབ་ཡུམ་སྔོན་པོ། ལྟེ་བར་རྡོ་རྗེ་ཉི་མ་ཡབ་ཡུམ་སེར་པོ། གསང་གནས་སུ་རྡོ་རྗེ་རྒྱལ་པོ་ཡབ་ཡུམ་ལྗང་གུ་སྟེ་ཡབ་ཡུམ་ཐམས་ཅད་ཀྱང་རྒྱན་དང་ཆ་ལུགས་གཙོ་བོ་ལྟ་བུར་མཚན་དང་དཔེ་བྱད་ཡོངས་སུ་རྫོགས་པའི་སྐུར་གྱུར། དེའི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་གར་སོ་སོའི་མདོག་གི་པདྨའི་སྟེང་ན་ཉི་མའི་དཀྱིལ་འཁོར། དེ་དག་གི་སྟེང་དུ་ཧཱུྃ་སོ་སོའི་མདོག་ཅན་
གྱི་མཐའ་མར་སྔགས་ཀྱི་ཕྲེང་བས་བསྐོར་བར་གྱུར། ཨོཾ་བཛྲ་ཨཱརྒྷཾ་པྲ་ཏཱིཙྪ་སྭཱ་ཧཱ། སོགས་ཀྱིས་མཆོད་ནས་གསོལ་བ་གདབ་པ་ནི། བཅོམ་ལྡན་འདས་རྡོ་རྗེ་སེམས་དཔའ་ཡབ་ཡུམ་གྱིས་བདག་དང་མཐའ་ཡས་པའི་སེམས་ཅན་ཐམས་ཅད་ཀྱི་སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ། ཅེས་པས་ལན་གསུམ་དུ་གསོལ་བ་བཏབ་པས། ལྷ་ཚོགས་རྣམས་ཀྱི་སྐུ་གསུང་ཐུགས་ལས་ཡེ་ཤེས་ཀྱི་བདུད་རྩི་དཀར་དམར་སྔོན་པོ་དཔག་ཏུ་མེད་པ་ན་ར་ར་ཚངས་བུག་ཏུ་བབ། ལུས་ཕྱི་ནང་ཐམས་ཅད་ཁྱབ། ཕྱི་ལུས་ཀྱི་སྡིག་སྒྲིབ་ནང་སེམས་ཀྱི་སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་རྐང་མཐིལ་སོར་མོ་རྒྱུད་དུ་ནག་ནུར་གྱིས་དོན་པས། ལུས་ཐམས་ཅད་ཤེལ་གོང་དག་པ་ལྟར་གྱུར། ཨོཾ་བཛྲ་ཧེ་རུ་ཀ་ས་མ་ཡ་སོགས་ཧེ་རུ་ཀའི་ཡིག་བརྒྱ་ཅི་ནུས་བཟླས་པའི་མཐར། རྡོར་སེམས་རིགས་བསྡུས་ཡབ་ཡུམ་ཐམས་ཅད་ཀྱི་སྦྱོར་མཚམས་ནས་བྱང་སེམས་བདུད་རྩི་དཀར་དམར་ན་ར་ར་བབས། སྤྱི་བོ་ཚངས་པའི་བུ་ག་ནས་ལུས་གནས་རྩའི་ཕོ་བྲང་ཐམས་ཅད་ཁྱབ་ཅིང་བ་སྤུའི་བུ་གར་ངང་ལྷུག་ལྷུག་པར་གྱུར། རང་ཉིད་རྡོ་རྗེ་སེམས་དཔའ་རིགས་བསྡུས་ཀྱི་རང་བཞིན་བདེ་སྟོང་བསམ་གྱིས་མི་ཁྱབ་པའི་ཡེ་ཤེས་དང་ལྡན་པར་གྱུར། མགོན་པོ་བདག་ནི་མི་ཤེས་སོགས་ནས། བྱང 
་ཞིང་དག་པར་མཛད་དུ་གསོལ། ཨོཾ་ཨཱཿཧཱུྃ། རྡོར་སེམས་ཡབ་ཡུམ་འོད་དུ་ཞུ་ནས་རང་ལ་ཐིམ། རང་ཉིད་བདེ་མཆོག་ལྷན་ཅིག་སྐྱེས་པ་ཡབ་ཡུམ་གྱི་སྐུར་གསལ་བའི་ཐུགས་ཀའི་ས་བོན་གྱི་འོད་ཀྱི་སྣང་བས་མདུན་གྱི་ནམ་མཁར་གཞལ་ཡས་ཁང་གི་ནང་དུ་དཔལ་འཁོར་ལོ་སྡོམ་པའི་དཀྱིལ་འཁོར་གྱི་ལྷ་ཚོགས་བདེ་བ་ཆེན་པོའི་རང་བཞིན་ཅན། གཙོ་བོའི་མདུན་གྱི་ནམ་མཁར་སེང་ཁྲི་པདྨ་ཉི་མའི་གདན་ལ་རྩ་བའི་བླ་མ་རྡོ་རྗེ་འཆང་གི་རྣམ་པ་ཅན་ལ་བརྒྱུད་པའི་བླ་མའི་ཚོགས་ཀྱིས་བསྐོར་ནས་བཞུགས་པར་གྱུར། ཡེ་ཤེས་སེམས་དཔའི་འཁོར་ལོ་སྤྱན་དྲངས། བཛྲ་ས་མཱ་ཛཿ ཛཿཧཱུྃ་བྃ་ཧོཿ སངས་རྒྱས་ཐམས་ཅད་འདུས་པའི་སྐུ་སོགས་དང༌། དང་པོར་མེ་ཏོག་ཕོག་པའི་ལྷ། །དཀྱིལ་འཁོར་ལྷ་ཚོགས་
རྣམས་ལ་འདུད། །ཅེས་ཕྱག་བྱ། ལྷ་མིའི་ལོངས་སྤྱོད་ཕུན་ཚོགས་ཐམས་ཅད་དང༌། །ཀུན་ཏུ་བཟང་པོའི་མཆོད་སྤྲིན་ཆེན་པོ་དང༌། །གསང་དང་རབ་གསང་གསང་ཆེན་ཐམས་ཅད་ཀྱི། །མཆོད་པའི་སྤྲིན་ཆེན་རྒྱ་མཚོ་དག་གིས་མཆོད། །ཨོཾ་སརྦ་ཏ་ཐཱ་ག་ཏ་གུ་རུ་དེ་བ་ཌཱ་ཀི་ནཱི་ཛཱ་ལ་སམྦ་ར་མཎྜལ་སརྦ་ཝཱི་ར་ཡོ་གི་ནཱི་བཛྲ་ཨཱརྒྷཾ་པྲ་ཏཱིཙྪ་ཧཱུྃ་སྭཱ་ཧཱ། དེ་བཞིན་པཱ་དྱཾ་སོགས་ནས་ཤབྡའི་བར་གྱིས་ཕྱི་མཆོད་འབུལ། ཨོཾ་ཨཱཿབཛྲ་ཝི་ཎི་ཧཱུྃ་ཧཱུྃ་ཕཊ། སོགས་རིག་མ་བཅུ་དྲུག་དང༌། པཉྩ་ཨ་མྲྀ་ཏས་ནང་མཆོད། མ་ཏཾ་གི་སྦྱར་བས་གསང་མཆོད་འབུལ། སྤྲོ་ན་རྐང་བརྒྱད་དང་བསྡུ་ན། སྒྲིབ་གསུམ་དྲི་མེད་གསང་གསུམ་ཡོན་ཏན་ལྡན། །སྲིད་ཞིའི་འདྲེན་པ་རིགས་བདག་བླ་མའི་སྐུ། །འཁོར་ལོ་བདེ་མཆོག་དཀྱིལ་འཁོར་ལྷ་ཚོགས་ལ། །རབ་ཏུ་གུས་པའི་ཡིད་ཀྱིས་བསྟོད་པར་བགྱི། ཡན་ལག་ལྷག་མ་རྣམས་དང་དམ་ཚིག་སྡོམ་པ་བཟུང་བ་ནི། །དཀོན་མཆོག་གསུམ་ལ་བདག་སྐྱབས་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རངས། །ཆོས་ཀྱི་འཁོར་ལོ་བསྐོར་དུ་གསོལ། །མྱ་ངན་མི་འདའ་གསོལ་བ་འདེབས། །རྣལ་འབྱོར་ལམ་ལ་གནས་བགྱིད་ཅིང༌། །དམ་ཚིག་ཐམས་ཅད་སྐྱོང་བ་དང༌། །སེམས་ཅན་ཐམས་ཅད་སྡུག་བསྔལ་ལས། །གྲོལ་བ་བདག་གིས་བསྒྲུབ་པར་བགྱིད། །བསྟན་སོགས་དགེ་བ་འདི་དག་གི༌།རྣམ་པའི་མཆོག་རྣམས་ཀུན་ལྡན་པའི། །སངས་རྒྱས་ཉིད་དུ་བདག་གྱུར་ནས། །འགྲོ་བ་ཡོངས་སུ་སྒྲོལ་བྱེད་ཤོག །ལན་གསུམ། མཎྜལ་རྒྱས་བསྡུས་གང་འགྲུབ་འབུལ། གསོལ་བ་འདེབས་པ་ནི། ན་མོ་གུ་རུ་བཛྲ་ཌཱ་ཀི་ནཱི་ཡེ། རྡོ་རྗེ་འཆང་ཆེན་དབང་ཕྱུག་ཏཻ་ལོ་པ། །ནཱ་རོ་པཎ་ཆེན་མར་པ་ལོ་ཙཱའི་ཞབས། །བཞད་པ་རྡོ་རྗེ་དྭགས་པོ་ལྷ་རྗེའི་སྐུར། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །དུས་གསུམ་མཁྱེན་པ་འགྲོ་མགོན་རས་ཆེན་རྗེ། །སྤོམ་བྲག་ཆེན་པོ་གྲུབ་ཆེན་ཀརྨ་པ། །ཨོ་རྒྱན་པ་དང་རང་བྱུང་རྡོ་རྗེའི་ཞབས། །གསོལ་བ༴ རྒྱལ་བ་གཡུང་སྟོན་
འཛམ་གླིང་ཆོས་ཀྱི་གྲགས། །མཁའ་སྤྱོད་དབང་པོ་དེ་བཞིན་གཤེགས་པའི་ཞབས། །བློ་གྲོས་རིན་ཆེན་ཆོས་དཔལ་ཡེ་ཤེས་ལ། །གསོལ་བ༴ བསོད་ནམས་དབང་ཕྱུག་བློ་གྲོས་གྲགས་པ་དང༌། །བློ་གྲོས་རྒྱ་མཚོ་དོན་གྲུབ་བཀྲ་ཤིས་དང༌། །ལེགས་བཤད་སྒྲ་དབྱངས་བློ་གྲོས་རྣམ་རྒྱལ་རྗེ། །གསོལ་བ༴ སངས་རྒྱས་རིན་ཆེན་ཀུན་དགའ་རྣམ་རྒྱལ་དཔལ། །ཀརྨ་བསྟན་སྐྱོང་བསོད་ནམས་འགྱུར་མེད་རྗེ། །དཀོན་མཆོག་བསྟན་འཛིན་བསྟན་པ་རྣམ་རྒྱལ་ཞབས། །གསོལ་བ༴ གསུང་རབ་རྒྱ་མཚོ་ཆོས་ཀྱི་འབྱུང་གནས་དཔལ། །དགེ་ལེགས་རབ་རྒྱས་འགྱུར་མེད་བསྟན་འཕེལ་དང༌། །དགེ་ལེགས་ཉི་མ་ཡོན་ཏན་རྒྱ་མཚོའི་ཞབས། །རྩ་བའི་བླ་མ་རྣམས་ལ༴ །གསོལ་བ༴ །རྒྱུད་སྡེའི་མཐར་ཐུག་འཁོར་ལོ་བདེ་བའི་མཆོག །སངས་རྒྱས་ཀུན་ཡུམ་རྡོ་རྗེ་རྣལ་འབྱོར་མ། །དུས་གསུམ་རྒྱལ་བའི་བསྟན་སྲུང་ཕྱག་བཞི་པ། །ཕྲིན་ལས་མངའ་བདག་དཔལ་ལྡན་ལྷ་མོའི་ཚོགས། །གསོལ་བ༴ །སྒྱུ་ལུས་སྤྲུལ་སྐུར་རྟོགས་པར་བྱིན་གྱིས་རློབས། །སྲོག་རྩོལ་ལོངས་སྐུར་རྟོགས་པར་བྱིན་གྱིས་རློབས། །རྨི་ལམ་ཆོས་སྐུར་རྟོགས་པར་བྱིན་གྱིས་རློབས། །འོད་གསལ་ངོ་བོ་ཉིད་སྐུར་བྱིན་གྱིས་རློབས། །དབང་བླང་བའི་དོན་ཏུ། བདེ་ཆེན་དཔལ་གྱི་མགོན་པོ་ཡིས། །སངས་རྒྱས་སྐྱོབ་པ་ཇི་ལྟ་བ། །དག་པ་དེ་ཉིད་སྟོན་མཛད་པ། །དེ་རིང་བདག་ལ་མགོན་དགྱེས་མཛོད། །ཅེས་གསོལ་བ་བཏབ་པས་བླ་མ་བརྒྱུད་པ་རྣམས་ཀྱི་སྐུ་གསུང་ཐུགས་ལས་བྱིན་རླབས་ཀྱི་ཆུ་རྒྱུན་དཀར་དམར་སྔོན་པོ་དང༌། བདེ་མཆོག་ཡབ་ཡུམ་གྱི་སྦྱོར་མཚམས་ནས་བྱང་སེམས་དཀར་དམར་གྱི་རྒྱུན་དང་ན་ར་ར་བབས་ཏེ་སྤྱི་བོ་ཚངས་པའི་བུ་ག་ནས་ཞུགས། ལུས་སེམས་ཀྱི་ཉེས་ལྟུང་དྲི་མ་ཐམས་ཅད་དག་ནས་རང་ཉིད་འཁོར་ལོ་སྡོམ་པའི་སྐུར་གྱུར། རྩ་འཁོར་ལོ་བཞིར་བྱང་སེམས་ཀྱིས་ཁྱབ་པས་བདེ་སྟོང་གི་ཡེ་ཤེས་སྐྱེས། གནས་བཞིར་ཁྱབ་པས་དབང་བཞི་ཐོབ། སྒོ་
གསུམ་ཐ་དད་དུ་འཛིན་པའི་སྒྲིབ་པ་དག །འབྲས་བུ་སྐུ་བཞི་འགྲུབ་པའི་ས་བོན་བཞག །འོད་དུ་ཞུ་ནས་ཡི་དམ་ལ་ཐིམ། ཡི་དམ་ལྷ་ཚོགས་འོད་དུ་ཞུ་ནས་རང་ལ་ཐིམ་པར་གྱུར་པར་བསམ་ལ་མཉམ་པར་བཞག །སྙན་བརྒྱུད་ཉམས་སུ་ལེན་སྐབས་མཚན་བཅས་ཀྱི་རྫོགས་རིམ་བསྒོམས་ནས་ནང་སྒྲུབ་ལ་མཚམས་སྦྱར་བ་ཡིན་ཀྱང་སྐབས་འདིར་འདིར་ཙམ་གྱིས་འཐུས་སོ། །གཉིས་པ་ནང་སྒྲུབ་ཡི་དམ་གྱི་དཀྱིལ་འཁོར་བསྒོམ་པ་ལ། ཐོག་མར་འབྱུང་རིམ་དང་སྲུང་འཁོར་ནི། ཨོཾ་ཀཱ་ཡ་ཝཱ་ཀ་ཙིཏྟ་ཨཱཏྨ་ཀོ྅ཧཾ། སྣོད་བཅུད་ཐམས་ཅད་སྟོང་པར་གྱུར། སྟོང་པའི་ངང་ལས་ཐིག་ལེ་སྔོན་པོ། དེ་ཡོངས་སུ་གྱུར་པ་ལས་རྡོ་རྗེ་སྔོན་པོ་རྩེ་ལྔ་བ་ཧཱུྃ་གིས་མཚན་པ། དེ་ཡོངས་སུ་གྱུར་པ་ལས་ཆོས་འབྱུང་སྔོན་པོ་གྲུ་གསུམ་པ། དེའི་ནང་དུ་ཡྃ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན། ཆང་བཟུང་ལ་ཡྃ་དང་མཆོག་མ་གཉིས་ལ་གཡོ་བའི་བ་དན་གྱིས་མཚན་པ་དུ་བའི་ཕྲེང་བས་བསྐོར་བ། །དེའི་སྟེང་དུ་རྃ་ལས་མེའི་དཀྱིལ་འཁོར་དམར་པོ་རྃ་གྱིས་མཚན་པ་འབར་བའི་ཕྲེང་བས་བསྐོར་བ། དེའི་སྟེང་དུ་བྃ་ལས་ཆུའི་དཀྱིལ་འཁོར་ཟླུམ་པོ་དཀར་པོ་བྃ་གྱིས་མཚན་པ་འོད་ཀྱི་ཕྲེང་བས་བསྐོར་བ། དེའི་སྟེང་དུ་ལྃ་ལས་སའི་དཀྱིལ་འཁོར་གྲུ་བཞི་སེར་པོ་ལྃ་གྱིས་མཚན་པ་འོད་ཟེར་གྱི་ཕྲེང་བས་བསྐོར་བ། དེའི་སྟེང་དུ་སུྃ་ལས་རིའི་རྒྱལ་པོ་རི་རབ་གྲུ་བཞི་པ། ཤར་ཤེལ་ལས་གྲུབ་པའི་དཀར་བ། བྱང་ཨིནྡྲ་ནཱི་ལས་གྲུབ་པའི་ལྗང་བ། ནུབ་པདྨ་རཱ་ག་ལས་གྲུབ་པའི་དམར་བ། ལྷོ་བཻ་ཌཱུརྻ་ལས་གྲུབ་པའི་སྔོ་བ། དེའི་དབུས་སུ་པྃ་ལས་སྣ་ཚོགས་པདྨ་འདབ་མ་མཐའ་ཡས་པའི་ལྟེ་བར་ཧཱུྃ་ལས་སྣ་ཚོགས་རྡོ་རྗེ་རྩེ་མོ་བཅུ་གཉིས་པ། ཤར་གྱི་རྭ་དཀར་བ། བྱང་གི་རྭ་ལྗང་བ། ནུབ་ཀྱི་རྭ་དམར་བ། ལྷོའི་རྭ་སེར་བ། ལྟེ་བ་མཐིང་ག་ཡངས་ཤིང་རྒྱ་ཆེ་བ། དེའི་དབུས་སུ་ཧཱུྃ་གིས་མཚན་པ། དེ་ལས་བྷྲཱུྃ་སེར་པོ་ལས་གསེར་གྱི་འཁོར་ལོ་རྩིབས་བྱེ་བ་ཕྲག་དུ་མ་དང་ལྡན་པ་ཡངས་ཤིང་རྒྱ་ཆེ་བ་གུར་ཕུབ་
པ་ལྟ་བུ། ཧཱུྃ་དེ་ལས་ཧཱུྃ་ཡིག་སྔོ་ལྗང་དམར་སེར་དཀར་བ་དཔག་ཏུ་མེད་པ་འཕྲོས་པ་ལས་དེ་རྣམས་ཀྱི་གུར་ཁང་ཁ་དོག་སྣ་ལྔ་པ། ཧཱུྃ་དེ་ལས་ཏྲཱྃ་སེར་པོ་དཔག་ཏུ་མེད་པ་འཕྲོས་པ་ལས་རིན་པོ་ཆེའི་གུར་ཁང་སེར་པོ། དེ་ལས་བྃ་དམར་པོ་དཔག་ཏུ་མེད་པ་འཕྲོས་པ་ལས་པདྨའི་གུར་ཁང་དམར་པོ། དེ་ལས་ཁྃ་ལྗང་གུ་དཔག་ཏུ་མེད་པ་འཕྲོས་པ་ལས་རལ་གྲིའི་གུར་ཁང་ལྗང་གུ། དེ་ལས་བྷྲཱུྃ་དཀར་པོ་དཔག་ཏུ་མེད་པ་འཕྲོས་པ་ལས་འཁོར་ལོའི་གུར་ཁང་དཀར་པོ། དེ་ལས་ཁྃ་སྔོན་པོ་དཔག་ཏུ་མེད་པ་འཕྲོས་པ་ལས་དགྲ་སྟའི་གུར་ཁང་སེར་པོ། དེ་ལས་ཧཱུྃ་སྣ་ཚོགས་དཔག་ཏུ་མེད་པ་འཕྲོས་པ་ལས་མདའི་གུར་ཁང་ཁ་དོག་སྣ་ཚོགས་པ། དེ་ཐམས་ཅད་ཀྱང་གུར་བླ་རེ་ར་བ་དྲྭ་བ་ས་གཞི་དང་བཅས་པ། དེའི་ཕྱིར་རྡོ་རྗེའི་རྭ་གུར། དེའི་ཕྱིར་ཐོད་པ་བུམ་རིལ་གྱི་གུར་ཁང༌། དེའི་ཕྱིར་མེ་རི་ཁ་དོག་སྣ་ཚོགས་པའི་གུར་ཁང༌། དེའི་ཕྱིར་མེ་རི་དམར་ནག་གི་གུར་ཁང་གཡོན་སྐོར་དུ་འཁྱིལ་ཞིང་འཚུབས་པ། དེ་རྣམས་ཀྱི་བར་བར་དུ་ཧཱུྃ་ལས་ཧེ་རུ་ཀ་ཞལ་གཅིག་ཕྱག་གཉིས་པ་དང་ཞལ་གསུམ་ཕྱག་དྲུག་པ་མཚོན་ཆ་སྣ་ཚོགས་པ་འཛིན་པའི་གུར་ཁང་སྟེ། དེ་རྣམས་ཀྱང་དོན་དམ་སྟོང་པ་ཉིད་ཀྱི་རང་བཞིན་ཅན་ནོ། །རྟེན་དཀྱིལ་འཁོར་བསྒོམ་པ་ནི། སྲུང་འཁོར་གྱི་ནང་དུ་ཧཱུྃ་བརྒྱད་ལས་དུར་ཁྲོད་ཆེན་པོ་བརྒྱད། དེའི་ནང་དུ་སྣ་ཚོགས་པདྨ་མཐའ་ཡས་པའི་དབུས་སུ་སྣ་ཚོགས་རྡོ་རྗེའི་ལྟེ་བར་བྷྲཱུྃ་དཀར་པོ་ལས། རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གྲུ་བཞི་སྒོ་བཞི་པ། ནང་ནས་རིམ་པ་བཞིན་དུ་སྔོ་ལྗང་དམར་སེར་དཀར་བའི་རྩིག་པ་རིམ་པ་ལྔ་དང་ལྡན་པ། དེའི་སྟེང་དུ་རིན་པོ་ཆེའི་ཕ་གུ་སེར་པོས་བསྐོར་བ། དེའི་སྟེང་དུ་གསེར་གདུང་ལས་རིན་པོ་ཆེའི་དྲྭ་བ་དང་དྲྭ་ཕྱེད་འཆང་བ། དེའི་སྟེང་གི་ཕྱི་རོལ་དུ་ཤར་བུ་དང་མདའ་ཡབ་ཀྱིས་བསྐོར་བ། རྩིག་པའི་ཕྱི་རོལ་གྱི་རྩ་བར་འདོད་ཡོན་གྱི་སྣམ་བུ་དམར་པོ་ལ་གནས་
པའི་མཆོད་པའི་ལྷ་མོ་བཅུ་དྲུག་གིས་མཆོད་རྫས་དུ་མ་ཐོགས་ནས་བསྐོར་བ། ནང་ཀ་བ་བརྒྱད་ཀྱི་སྟེང་རྡོ་རྗེ་གདུང་བཞིས་བཏེག་པ། དབུས་ཕྱུར་བུར་གྱུར་པའི་རྩེ་མོར་རྡོ་རྗེ་སྔོན་པོ་རྩེ་ལྔ་པ་ཕྱེད་པའི་རིན་པོ་ཆེའི་ཏོག་གིས་མཚན་པ། སྒོ་བཞི་གློ་འབུར་གྱི་ཚུལ་དུ་ཡོད་པ་ལ་ཀ་བ་བཞིས་བཞིས་བཏེག་པའི་རྟ་བབས་བང་རིམ་བརྒྱད་དང་ལྡན་པའི་རྩེ་མོར་ཆོས་ཀྱི་འཁོར་ལོ་རི་དྭགས་གདུགས་ཏོག་དང་བཅས་པ། གཞལ་ཡས་ཁང་གི་ནང་དུ་བྱང་ཆུབ་སེམས་ཀྱི་རྒྱ་མཚོ་དཀར་ལ་དམར་བའི་མདངས་ཆགས་པས་ནང་ཐམས་ཅད་ཁེབས་པ། །དེའི་དབུས་སུ་སྣ་ཚོགས་པདྨ་འདབ་མ་མཐའ་ཡས་པའི་འདབ་མ་རྣམས་རྩིག་པ་ལ་ཐུག་པ། །འདབ་ཕྲན་རྣམས་ལ་རིན་པོ་ཆེའི་དྲྭ་བ་དང་དྲྭ་ཕྱེད་སྦྲེལ་མར་ཡོད་པ། དེའི་དབུས་སུ་སྣ་ཚོགས་པདྨ་འདབ་མ་བརྒྱད་པ་ཤར་སྔོ། བྱང་ལྗང༌། ནུབ་དམར། ལྷོ་སེར། མཚམས་བཞིའི་པད་འདབ་སྔོན་པོ་ཅན་གྱི་མཐར་གྲི་གུག་གི་ར་བས་བསྐོར་བ། །དེའི་ལྟེ་བར་པདྨ་ཉི་ཟླའི་དཀྱིལ་འཁོར་གྱི་དབུས་སུ་འཇིགས་བྱེད་དང་དུས་མཚན་བཅས་པའོ། །བརྟེན་པ་ལྷ་བསྐྱེད་པ་ནི། དེའི་སྟེང་དུ་གཡོན་སྐོར་གྱིས། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ དེ་ཞུ་བ་ལས་བྱུང་བའི་ཟླ་བ་མེ་ལོང་ལྟ་བུའི་ཡེ་ཤེས། དེའི་སྟེང་དུ་གཡས་སྐོར་དུ། ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ དེ་ཞུ་བ་ལས་བྱུང་བའི་ཉི་མ་མཉམ་པ་ཉིད་ཀྱི་ཡེ་ཤེས། དེ་གཉིས་ཀྱི་དབུས་སུ་རང་རིག་ཧཱུྃ་དང་བྃ་སོ་སོར་རྟོག་པའི་ཡེ་ཤེས། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས་ཚུར་འདུས་ཏེ། ཉི་ཟླ་ས་བོན་གསུམ་རོ་གཅིག་ཏུ་འདྲེས་པ་བྱ་བ་གྲུབ་པའི་ཡེ་ཤེས། དེ་ཡོངས་སུ་གྱུར་པ་ལས་རྡོ་རྗེ་སྔོན་པོ་རྩེ་ལྔ་པ་ལྟེ་བར་ཧཱུྃ་ཡིག་སྔོན་པོས་མཚན་པ་དང༌། མདུན་དུ་གྲི་གུག་དམར་པོ་སོ་ཡུའི་མཚམས་སུ་བྃ་དམར་པོས་མཚན་
པ་ཆོས་ཀྱི་དབྱིངས་ཀྱི་ཡེ་ཤེས། དེའི་ཕྱི་རོལ་གྱི་ཕྱོགས་བཞིའི་པད་འདབ་ཀྱི་སྟེང་དུ་ཉི་མའི་དཀྱིལ་འཁོར་རེ་རེའི་དབུས་སུ་འཇིགས་བྱེད་དང་དུས་མཚན་མ་རེ་རེའི་སྟེང་དུ་ཡབ་ཀྱི་ས་བོན་ཧཱུྃ་ཡིག་ལས་ཧེ་རུ་ཀ་རིགས་བཞིའི་ས་བོན་འཕྲོས་པ་ནི། ཤར་དུ་ཨོཾ། བྱང་དུ་ཨཱ། །ནུབ་ཏུ་ཧྲཱིཿ ལྷོར་ཏྲཱྃ། ཡུམ་གྱི་ས་བོན་བཾ་ཡིག་ལས་ཡུམ་བཞིའི་ས་བོན་སྤྲོས་པ་ནི། ཤར་དུ་མཱྃ། བྱང་དུ་ཏྲཱྃ། ནུབ་ཏུ་པཱྃ། ལྷོར་ལཱྃ། ས་བོན་དེ་བརྒྱད་ཡོངས་སུ་གྱུར་པ་ལས་ཤར་དུ་འཁོར་ལོ་དཀར་པོ་ཨོཾ་གྱིས་མཚན་པ། །བྱང་དུ་སྣ་ཚོགས་རྡོ་རྗེ་ལྗང་གུ་ཨཱཿཡིས་མཚན་པ། ནུབ་ཏུ་པདྨ་དམར་པོ་ཧྲཱིཿཡིས་མཚན་པ། ལྷོར་རིན་པོ་ཆེ་སེར་པོ་ཏྲཱྃ་གྱིས་མཚན་པ། དེ་བཞིའི་མདུན་དུ་ཤར་དུ་གྲི་གུག་སྔོན་པོ། བྱང་དུ་གྲི་གུག་ལྗང་གུ། ནུབ་ཏུ་གྲི་གུག་དམར་པོ། ལྷོར་གྲི་གུག་སེར་པོ། སོ་ཡུའི་མཚམས་སུ་མཱྃ་ལཱྃ་པཱྃ་ཏཱྃ་བཞིས་མཚན་པ། དབུས་ཀྱི་རྡོ་རྗེ་ཧཱུྃ་དང་བཅས་པ་ཡོངས་སུ་གྱུར་པ་ལས། བདག་ཉིད་བཅོམ་ལྡན་འདས་འཁོར་ལོ་བདེ་མཆོག་སྐུ་མདོག་སྔོན་པོ་ཡིད་བཞིན་གྱི་ནོར་བུ་རིན་པོ་ཆེ་བཻ་ཌཱུརྻ་མཐིང་ག་བཟང་པོ་ཡོངས་སུ་དང་བའི་མདོག་ལྟ་བུ་ཞལ་བཞི་པ། ཕྱག་བཅུ་གཉིས་པ། རྩ་ཞལ་མཐིང་ནག །གཡོན་ཞལ་ལྗང་བ། རྒྱབ་ཞལ་དམར་བ། གཡས་ཞལ་སེར་བ། ཞལ་རེ་རེ་ལ་སྤྱན་གསུམ་གསུམ་དང་ལྡན་པ། མཆེ་བ་བཞི་བཞི་ཅུང་ཟད་གཙིགས་པ། ཕྱག་གཡས་ཀྱི་དང་པོ་ན་གསེར་གྱི་རྡོ་རྗེ་རྩེ་དགུ་པ། གཡོན་གྱི་དང་པོ་ན་དངུལ་དཀར་གྱི་དྲིལ་བུ་ཐུགས་ཀར་བསྣོལ་ཐབས་སུ་འཛིན་པས་ཡུམ་ལ་འཁྱུད་པ། གཡས་དང་གཡོན་གྱི་གཉིས་པ་ན་གླང་པོ་ཆེ་དཀར་པོའི་པགས་པ་ཁྲག་འཛག་པ་བརྒྱངས་ཏེ་བསྣམས་པ། གཡས་ཀྱི་གསུམ་པ་ན་ཌཱ་མ་རུ། བཞི་པ་ན་གྲི་གུག །ལྔ་པ་ན་དགྲ་སྟྭ། དྲུག་པ་ན་མདུང་རྩེ་གསུམ་འཛིན་པ། གཡོན་གྱི་གསུམ་པ་ན་ཁ་ཊྭཱཾ་ག །བཞི་པ་ན་ཐོད་ཁྲག །ལྔ་པ་ན་ཞགས་པ།
དྲུག་པ་ན་ཚངས་པའི་མགོ་བོ་གདོང་བཞི་པ་འཛིན་པ། ཞབས་གཡས་བརྐྱངས་པས་དུས་མཚན་མ་དམར་མོའི་སྙིང་ག་ནས་མནན་པ། གཡོན་ཅུང་ཟད་བསྐུམས་པས་འཇིགས་བྱེད་ནག་པོའི་མགོ་བོ་ནས་མནན་པ། བྲམ་ཟེ་མོའི་ཚངས་སྐུད་ཀྱིས་རལ་པའི་ཐོར་ཅོག་བང་རིམ་གསུམ་དུ་བཅིངས་པའི་མགོ་ལ་སྣ་ཚོགས་རྡོ་རྗེས་མཚན་པ། བང་རིམ་བར་མ་ལ་ཚེས་གསུམ་གྱི་ཟླ་བ་དང་ཡིད་བཞིན་གྱི་ནོར་བུ་རིན་པོ་ཆེས་མཚན་པ། དབུ་རྒྱན་མི་བསྐྱོད་པ། ཐོར་ཅོག་གི་རྩེ་མོར་རུས་པའི་འཁོར་ལོ་རྩིབས་བརྒྱད་པའི་ལྟེ་བར་རུས་པའི་རྡོ་རྗེ་རྩེ་ལྔ་པའི་ཏོག་གིས་མཚན་པ་རྡོ་རྗེ་སེམས་དཔའི་ཡན་ལག །རྣ་རྒྱན་རིན་ཆེན་འབྱུང་ལྡན། མགུལ་རྒྱན་འོད་དཔག་མེད། དཔུང་རྒྱན་ཕྱག་གདུབ་ཞབས་གདུབ་རྣམས་རྣམ་པར་སྣང་མཛད། རྐེད་རྒྱན་དོན་ཡོད་གྲུབ་པ། ཐལ་བ་ཧེ་རུ་ཀའི་ཡན་ལག་སྟེ་ཕྱག་རྒྱ་དྲུག་གིས་བརྒྱན་པ། ཐོད་པ་སྐམ་པོ་ལྔས་དབུར་བརྒྱན་ཅིང༌། རློན་པ་ལྔ་བཅུའི་དོ་ཤལ་བྱས་པ། སྟག་གི་པགས་པའི་ཤམ་ཐབས་གྲོལ་བ། སྒེག་པ་དཔའ་བ་མི་སྡུག་པ་དང༌། དགོད་པ་དྲག་ཤུལ་འཇིགས་སུ་རུང༌། སྙིང་རྗེ་རྔམས་ཞིང་ཞི་བ་སྟེ། གར་གྱི་ཉམས་དགུ་དང་ལྡན་པ། མདུན་གྱི་གྲི་གུག་བྃ་ཡིག་དང་བཅས་པ་ཡོངས་སུ་གྱུར་པ་ལས། ཡབ་ཀྱི་པང་དུ་བཅོམ་ལྡན་འདས་མ་རྗེ་བཙུན་རྡོ་རྗེ་རྣལ་འབྱོར་མ་གསང་བ་ལྷན་ཅིག་སྐྱེས་མ། སྐུ་མདོག་པདྨ་རཱ་ག་ལྟར་དམར་བ། ཞལ་གཅིག་ཕྱག་གཉིས་སྤྱན་གསུམ་མཆེ་བ་བཞི་རབ་ཏུ་གཙིགས་པ། ཕྱག་གཡས་པས་རྡོ་རྗེས་མཚན་པའི་གྲི་གུག་ནམ་མཁའ་ལ་ཕྱར་བ། གཡོན་པས་ཐོད་པ་ཁྲག་གིས་གང་བ་བསྣམས་ནས་ཡབ་ཀྱི་མགུལ་ནས་འཁྱུད་པ། ཞབས་གཡོན་ཡབ་ཀྱི་གཡས་དང་མཉམ་དུ་བརྐྱངས་པས་དུས་མཚན་མ་དམར་མོའི་སྙིང་གར་མནན་པ། གཡས་ཡབ་ཀྱི་བརླ་ལ་འཁྲིལ་ཞིང་འཁྱུད་པ། དབུ་སྐྲ་སིལ་མ་སྐུ་རྒྱབ་ཏུ་གྲོལ་བ། ཐལ་བ་སྤངས་པའི་ཕྱག་
རྒྱ་ལྔས་བརྒྱན་པ། ཐོད་པ་སྐམ་པོ་ལྔས་དབུར་བརྒྱན་ཅིང་རློན་པ་ལྔ་བཅུའི་དོ་ཤལ་བྱས་པ། བདེ་བ་ཆེན་པོའི་ཡེ་ཤེས་ཀྱི་བདག་ཉིད་དོ། །ཕྱོགས་བཞིའི་ཕྱག་མཚན་ས་བོན་དང་བཅས་པ་ཡོངས་སུ་གྱུར་པ་ལས། ཤར་དུ་བུདྡྷ་ཧེ་རུ་ཀ་སྐུ་མདོག་དཀར་པོ་ཡུམ་མཁའ་འགྲོ་མ་སྔོན་མོ་དང་གཉིས་སུ་མེད་པར་སྦྱོར་བ། བྱང་དུ་ཀརྨ་ཧེ་རུ་ཀ་སྐུ་མདོག་ལྗང་གུ་ཡུམ་ལཱ་མ་ལྗང་གུ་དང་གཉིས་སུ་མེད་པར་སྦྱོར་བ། ནུབ་ཏུ་པདྨ་ཧེ་རུ་ཀ་སྐུ་མདོག་དམར་པོ་ཡུམ་ཁཎྜ་རོ་ཧི་མ་དམར་མོ་དང་གཉིས་སུ་མེད་པར་སྦྱོར་བ། ལྷོར་རཏྣ་ཧེ་རུ་ཀ་སྐུ་མདོག་སེར་པོ་ཡུམ་གཟུགས་ཅན་མ་སེར་མོ་དང་གཉིས་སུ་མེད་པར་སྦྱོར་བ། ཡབ་བཞི་གའང་ཞལ་བཞི་ཕྱག་བཅུ་གཉིས་པ། རྩ་ཞལ་སྐུ་མདོག་དང་མཚུངས་པ། ལྗང་གུའི་གཡོན་ཞལ་སྔོ་བ། དམར་པོའི་རྒྱབ་ཞལ་སྔོ་བ། སེར་པོའི་གཡས་ཞལ་སྔོ་བ། དཀར་པོའི་ཕྱག་གཡས་དང་པོས་འཁོར་ལོ། །ལྗང་གུས་སྣ་ཚོགས་རྡོ་རྗེ། དམར་པོས་པདྨ། སེར་པོས་རིན་པོ་ཆེ་རྣམས་བསྣམས་པ་དང༌། གཡོན་དང་པོས་དངུལ་གྱི་དྲིལ་བུ་ཐུགས་ཀར་བསྣོལ་སྟབས་སུ་ཡུམ་ལ་འཁྱུད་པ། ཞལ་ཕྱག་ལྷག་མ་དང་ཕྱག་མཚན་རྒྱན་དང་ཆ་བྱད་ཐམས་ཅད་གཙོ་བོ་ཇི་ལྟ་བ། ཡུམ་བཞི་གའང་ཞལ་གཅིག་ཕྱག་བཞི་སྤྱན་གསུམ་མཆེ་བ་བཞི་གཙིགས་པ། ཕྱག་གཡས་ཀྱི་དང་པོ་ན་ཌཱ་མ་རུ། འོག་མ་ན་གྲི་གུག །གཡོན་གྱི་དང་པོ་ན་ཁ་ཊྭཱཾ་ག །འོག་མ་ན་ཐོད་ཁྲག་འཛིན་པས་ཡབ་རྣམས་ཀྱི་མགུལ་ནས་འཁྱུད་པ། ཞབས་གཡོན་ཡབ་ཀྱི་གཡས་དང་མཉམ་དུ་བརྐྱངས་པས་དུས་མཚན་མ་དམར་མོའི་སྙིང་གར་མནན་པ་སོགས་རྒྱན་ཆ་ལུགས་ཐམས་ཅད་གཙོ་མོ་དང་མཚུངས་པའོ། །མཚམས་ཀྱི་པད་འདབ་བཞིར། བྷྲཱུྃ་སེར་པོ་བཞི་ལས། རིན་པོ་ཆེ་གསེར་གྱི་བུམ་པ་བཞི་ལས་ཤར་ལྷོའི་བུམ་པ་ག་བུར་གྱིས་གང་བ། ལྷོ་ནུབ་ཀྱི་བུམ་པ་སིཧླས་གང་བ། ནུབ་བྱང་གི་བུམ་པ་གླ་རྩིས་གང་བ། བྱང་ཤར་གྱི་བུམ་པ་བཞི་མཉམ་གྱིས་གང་བ། དེ་རྣམས་ཀྱི་
ཁར་ཨ་ལས་ཡེ་ཤེས་ཀྱི་ཀ་པཱ་ལ་དཔྲལ་བ་དབུས་སུ་བསྟན་པ་ཟག་པ་མེད་པའི་བདུད་རྩིས་གང་བ་རེ་རེ་གནས་པའོ། །དེ་ནས་ཕུང་ཁམས་དང་སྐྱེ་མཆེད་བྱིན་གྱིས་བརླབ་པ་ནི། གཙོ་བོ་བཅོམ་ལྡན་འདས་ཡབ་ཀྱི་སྤྱི་བོར་ཨོཾ་ལས་གཟུགས་ཀྱི་ཕུང་པོ་རྣམ་པར་སྣང་མཛད་དཀར་པོ་འཁོར་ལོ་དང་དྲིལ་བུ་འཛིན་པ། ལྟེ་བར་ཏྲཱྃ་ལས་ཚོར་བའི་ཕུང་པོ་རྡོ་རྗེ་ཉི་མ་སེར་པོ་རིན་པོ་ཆེ་དང་དྲིལ་བུ་འཛིན་པ། མགྲིན་པར་ཧྲཱིཿལས་འདུ་ཤེས་ཀྱི་ཕུང་པོ་པདྨ་གར་དབང་དམར་པོ་པདྨ་དང་དྲིལ་བུ་འཛིན་པ། རྐང་བོལ་དུ་ཧོཿལས་འདུ་བྱེད་ཀྱི་ཕུང་པོ་རྡོ་རྗེ་རྒྱལ་པོ་ལྗང་གུ་སྣ་ཚོགས་རྡོ་རྗེ་དང་དྲིལ་བུ་འཛིན་པ། སྙིང་གར་ཧཱུྃ་ལས་རྣམ་པར་ཤེས་པའི་ཕུང་པོ་རྡོ་རྗེ་སེམས་དཔའ་སྔོན་པོ་རྡོ་རྗེ་དང་དྲིལ་བུ་འཛིན་པ། དཔྲལ་བར་ཧཱུྃ་ལས་དེ་བཞིན་གཤེགས་པ་ཐམས་ཅད་ཀྱི་བདག་ཉིད་ཧེ་རུ་ཀ་མཐིང་ག་རྡོ་རྗེ་དང་དྲིལ་བུ་འཛིན་པ། མིག་ཏུ་བྷྲཱུྃ་ལས་གཏི་མུག་རྡོ་རྗེ་དཀར་པོ་འཁོར་ལོ་དང་དྲིལ་བུ་འཛིན་པ། རྣ་བར་ཧཱུྃ་ལས་ཞེ་སྡང་རྡོ་རྗེ་མཐིང་ག་རྡོ་རྗེ་དང་དྲིལ་བུ་འཛིན་པ། སྣ་ལ་ཏྲཱྃ་ལས་སེར་སྣ་རྡོ་རྗེ་སེར་པོ་རིན་པོ་ཆེ་དང་དྲིལ་བུ་འཛིན་པ། ལྕེ་ལ་ཨཱཿལས་འདོད་ཆགས་རྡོ་རྗེ་དམར་པོ་པདྨ་དང་དྲིལ་བུ་འཛིན་པ། རྡོ་རྗེ་ནོར་བུའི་རྩེར་ཁྃ་ལས་ཕྲག་དོག་རྡོ་རྗེ་ལྗང་གུ་སྣ་ཚོགས་རྡོ་རྗེ་དང་དྲིལ་བུ་འཛིན་པ། སྙིང་གར་ཧཱུྃ་ལས་དབང་ཕྱུག་རྡོ་རྗེ་ནག་པོ་རྡོ་རྗེ་དང་དྲིལ་བུ་འཛིན་པ། ལྟེ་བར་ལཱྃ་ལས་སའི་ཁམས་ལྟུང་བྱེད་མ་སེར་མོ་ཕྱག་གཡས་གཉིས་ཀྱིས་ཅང་ཏེའུ་དང་གྲི་གུག་འཛིན་པ། སྙིང་གར་མཱྃ་ལས་ཆུའི་ཁམས་གསོད་བྱེད་མ་སྔོན་མོ་གཡས་གཉིས་རྡོ་རྗེ་དང་གྲི་གུག་འཛིན་པ། མགྲིན་པར་པྃ་ལས་མེའི་ཁམས་འགུགས་བྱེད་མ་དམར་མོ་གཡས་གཉིས་པདྨ་དང་གྲི་གུག་འཛིན་པ། སྤྱི་བོར་ཏཱྃ་ལས་རླུང་གི་ཁམས་གར་གྱི་དབང་ཕྱུག་མ་ལྗང་མོ་གཡས་གཉིས་སྣ་ཚོགས་རྡོ་རྗེ་དང་གྲི་གུག་འཛིན་པ། དེ་བཞི་གའི་གཡོན་གཉིས་ཁ་ཊྭཱཾ་དང་ཐོད་ཁྲག་བསྣམས་པ། གསང་བར་ཁྃ་ལས་ནམ་མཁའི་ཁམས་པདྨ་དྲྭ་བ་ཅན་དམར་མོ་གྲི་གུག་
དང་དྲིལ་བུ་འཛིན་པ། སྤྱི་གཙུག་ཏུ་ཧོཿལས་ཡེ་ཤེས་ཀྱི་ཁམས་རྡོ་རྗེ་སྙེམས་མ་སྔོན་མོ་རྡོ་རྗེ་དང་དྲིལ་བུ་འཛིན་པའོ། །གསུམ་པ་གསང་སྒྲུབ་ལུས་དཀྱིལ་བསྒོམ་པ་ནི། གཙོ་བོ་བཅོམ་ལྡན་འདས་ཡབ་ཀྱི་ཐུགས་ཀར་སྣ་ཚོགས་པདྨ་འདབ་མ་ཤར་སྔོ། བྱང་ལྗང༌། ནུབ་དམར། ལྷོ་སེར། མཚམས་བཞིར་སྔོ་བའི་མཐར་གྲི་གུག་གི་ར་བ་དང༌། དེའི་ཕྱིར་ཐུགས་ཀྱི་འཁོར་ལོར་འཁོར་ལོ་སྔོན་པོ་རྩིབས་བརྒྱད་པའི་མཐར་རྡོ་རྗེ་སྔོན་པོ་རྩེ་ལྔ་པའི་ར་བ་དང༌། དེའི་ཕྱིར་གསུང་གི་འཁོར་ལོར་འཁོར་ལོ་དམར་པོ་རྩིབས་བརྒྱད་པའི་མཐར་པདྨ་དམར་པོ་འདབ་མ་བརྒྱད་པའི་ར་བ་དང༌། དེའི་ཕྱིར་སྐུའི་འཁོར་ལོར་འཁོར་ལོ་དཀར་པོ་རྩིབས་བརྒྱད་པའི་མཐར་འཁོར་ལོ་དཀར་པོའི་ར་བ་དང༌། དེའི་ཕྱིར་དམ་ཚིག་གི་འཁོར་ལོར་སྣ་ཚོགས་པདྨ་འདབ་མ་བརྒྱད་པའི་མཐར་སྣ་ཚོགས་རྡོ་རྗེའི་ར་བ་རྣམས་ཀྱིས་ཡོངས་སུ་བསྐོར་བ། དབུས་ཀྱི་པདྨའི་ལྟེ་བར་པདྨ་ཉི་ཟླའི་དཀྱིལ་འཁོར་གྱི་དབུས་སུ་འཇིགས་བྱེད་དང་དུས་མཚན་གྱི་སྟེང་དུ་ཧཱུྃ་སྔོན་པོ་དང་བྃ་དམར་པོ། དེ་ཡོངས་སུ་གྱུར་པ་ལས་རྡོ་རྗེ་སྔོན་པོ་རྩེ་ལྔ་པ་ལྟེ་བར་ཧཱུྃ་ཡིག་སྔོན་པོས་མཚན་པ་དང༌། གྲི་གུག་དམར་པོ་སོ་ཡུའི་མཚམས་སུ་བྃ་ཡིག་དམར་པོས་མཚན་པ། དེ་ཡོངས་སུ་གྱུར་པ་ལས་བཅོམ་ལྡན་འདས་འཁོར་ལོ་བདེ་མཆོག་སྐུ་མདོག་སྔོན་པོ་ཡིད་བཞིན་གྱི་ནོར་བུ་རིན་པོ་ཆེ་བཻ་ཌཱུརྻ་མཐོན་ཁ་བཟང་པོ་ཡོངས་སུ་དྭངས་པའི་མདོག་ལྟ་བུ་ཞལ་བཞི་ཕྱག་བཅུ་གཉིས་པ་ཡབ་ཡུམ་གཉིས་ཀ་སྐུ་མདོག་ཞལ་ཕྱག་རྒྱན་ཆ་ལུགས་ཐམས་ཅད་ཕྱིའི་ཧེ་རུ་ཀ་ལྟ་བུར་གྱུར། ཕྱོགས་བཞིའི་པད་འདབ་ཀྱི་སྟེང་དུ་ཉི་མའི་དཀྱིལ་འཁོར་དང་རོའི་གདན་གྱི་སྟེང་དུ་ཡུམ་གྱི་ཐུགས་ཀ་ནས་སྙིང་པོའི་རྣལ་འབྱོར་མ་བཞིའི་ས་བོན་སྤྲོས་པ་ནི། ཤར་ནས་གཡོན་སྐོར་དུ་མཱྃ་ལཱྃ་པཱྃ་ཏཱྃ་བཞི་ཡོངས་སུ་གྱུར་པ་ལས་ཤར་དུ་མཁའ་འགྲོ་མ་སྔོན་མོ། ཞེས་སམ་སྤྲོ་ན་ཕྱག་བཅུ་གཉིས་པ་མན་གོང་ལྟར་བརྗོད། བྱང་དུ་ལཱ་མ་ལྗང་གུ། ནུབ་ཏུ་ཁཎྜ་རོ་ཧཱི་མ་དམར་མོ། །ལྷོར་གཟུགས་ཅན་མ་སེར་མོ། །བཞི་གའང་ཞལ་གཅིག་ཕྱག་
བཞི་སྤྱན་གསུམ་མཆེ་བ་བཞི་གཙིགས་པ། ཕྱག་གཡས་ཀྱི་དང་པོ་ན་ཌཱ་མ་རུ། འོག་མ་ན་གྲི་གུག །གཡོན་གྱི་དང་པོ་ན་ཁ་ཊྭཱཾ་ག །འོག་མ་ན་ཐོད་ཁྲག་འཛིན་པ། ཞབས་གཡས་བརྐྱང༌། གཡོན་ཅུང་ཟད་བསྐུམས་པས་རོའི་གདན་ལ་བཞུགས་པ། དབུ་སྐྲ་སིལ་མ་སྐུ་རྒྱབ་ཏུ་གྲོལ་བ། ཐོད་པ་སྐམ་པོ་ལྔས་དབུ་ལ་བརྒྱན་པ། རློན་པ་ལྔ་བཅུ་རྩ་གཅིག་གིས་དོ་ཤལ་བྱས་པ། མཚམས་བཞིར་བྷྲཱུྃ་ལས་གསེར་གྱི་བུམ་པ་བཞི་ལས་ཤར་ལྷོའི་བུམ་པ་ག་བུར་གྱིས་གང་བ། ལྷོ་ནུབ་ཀྱི་བུམ་པ་སིཧླས་གང་བ། ནུབ་བྱང་གི་བུམ་པ་གླ་རྩིས་གང་བ། བྱང་ཤར་གྱི་བུམ་པ་བཞི་མཉམ་གྱིས་གང་བ། དེ་རྣམས་ཀྱི་ཁར་ཐོད་པ་བདུད་རྩིས་གང་བ་དཔྲལ་བ་དབུས་སུ་བསྟན་པ་རེ་རེ་སྟེ་བདེ་བ་ཆེན་པོའི་འཁོར་ལོའོ། །གཙོ་བོ་ཧེ་རུ་ཀའི་སྤྱི་བོ་ལ་སོགས་པའི་གནས་རྣམས་དང་ཐུགས་ཀར་ཐུགས་གསུང་སྐུའི་འཁོར་ལོ་རྩིབས་བརྒྱད་པ་རེ་རེ་གནས་པའི་རྩིབས་ཀྱི་སྟེང་དུ་ཐུགས་ཀའི་ཧཱུྃ་ལས་སྤྲོས་པའི་པཱུ་ཛ་ཨོ་ཨ། གོ་ར་དེ་⁽1763⁾ཐུགས་མ་ཀ་ཨོ་ཏྲ་ཀོ །ཀ་ལ་ཀ་ཧི་⁽1763⁾གསུང། པྲེ་གྲྀ་སཽ་སུ། ན་སི་མ་ཀུ་⁽1763⁾སྐུ། དེ་རྣམས་ཡོངས་སུ་གྱུར་པ་ལས་ཐུགས་ཀའི་ཐུགས་ཀྱི་འཁོར་ལོའི་ཤར་རྩིབས་དང་དཀྱིལ་འཁོར་གྱི་གཙོ་བོ་ཕྱིའི་ཧེ་རུ་ཀའི་སྤྱི་བོ་པཱུ་ལླི་ར་མ་ལ་ཡར་དཔའ་བོ་ཐོད་པའི་དུམ་བུ་དང་དཔའ་མོ་རབ་གཏུམ་མ། བྱང་གི་རྩིབས་དང་སྤྱི་གཙུག་ཛཱ་ལནྡྷ་རར་དཔའ་བོ་ཀེང་རུས་ཆེན་པོ་དང་དཔའ་མོ་གཏུམ་མིག་མ། ནུབ་རྩིབས་དང་རྣ་བ་གཡས་པ་ཨོ་ཌི་ཡཱ་ནར་དཔའ་བོ་ཀཾ་ཀ་ལ་དང་དཔའ་མོ་འོད་ལྡན་མ། ལྷོ་རྩིབས་དང་ལྟག་པ་ཨ་བུ་ཏར་དཔའ་བོ་མཆེ་བ་རྣམ་གཙིགས་དང་དཔའ་མོ་སྣ་ཆེན་མ། ཤར་ལྷོའི་རྩིབས་དང་རྣ་བ་གཡོན་པ་གོ་དཱ་ཝ་རར་དཔའ་བོ་ལྷ་དགྲ་དང་དཔའ་མོ་བློ་གྲོས་མ། ལྷོ་ནུབ་དང་སྨིན་དབུས་ར་མེ་ཤ་རར་དཔའ་བོ་སྣང་བ་དཔག་མེད་དང་དཔའ་མོ་མིའུ་ཐུང་མ། ནུབ་བྱང་དང་མིག་གཉིས་དེ་ཝཱི་ཀོ་ཏྲར་དཔའ་བོ་རྡོ་རྗེའི་འོད་དང་དཔའ་མོ་ལཾ་ཀའི་དབང་ཕྱུག་མ། བྱང་ཤར་དང་
ཕྲག་པ་གཉིས་མལ་ཝར་དཔའ་བོ་རྡོ་རྗེའི་སྐུ་དང་དཔའ་མོ་ཤིང་གྲིབ་མ་སྟེ་གནས་དང་ཉེ་བའི་གནས་ཀྱི་ལྷ་ཐམས་ཅད་སྐུ་མདོག་སྔོན་པོ་མཁའ་ལ་སྤྱོད་པ། དེའི་ཕྱིའི་གསུང་གི་འཁོར་ལོའི་ཤར་རྩིབས་དང་མཆན་ཁུང་གཉིས་ཀ་མ་རཱུ་པར་དཔའ་བོ་མྱུ་གུ་ཅན་དང་དཔའ་མོ་ས་སྲུང་མ། བྱང་རྩིབས་དང་ནུ་མ་གཉིས་ཨོ་ཏྲར་དཔའ་བོ་རྡོ་རྗེ་རལ་པ་ཅན་དང་དཔའ་མོ་འཇིགས་བྱེད་ཆེན་མོ། །ནུབ་རྩིབས་དང་ལྟེ་བ་ཏྲི་ཤ་ཀུ་ནེར་དཔའ་བོ་རབ་དཔའ་དང་དཔའ་མོ་རླུང་གི་ཤུགས་ཅན་མ། ལྷོའི་རྩིབས་དང་སྣ་རྩེ་ཀོ་ས་ལར་དཔའ་བོ་རྡོ་རྗེ་ཧཱུྃ་མཛད་དང་དཔའ་མོ་ཆང་འཐུང་མ། མེ་མཚམས་དང་ཁ་ཀ་ལིང་ཀར་དཔའ་བོ་རབ་ཏུ་བཟང་པོ་དང་དཔའ་མོ་སྔོ་བསངས་ལྷ་མོ། །བདེན་བྲལ་དང་མགྲིན་པ་ལམྦ་ཀར་དཔའ་བོ་རྡོ་རྗེ་བཟང་པོ་དང་དཔའ་མོ་རབ་ཏུ་བཟང་མོ། རླུང་དང་སྙིང་ག་ཀཉྩི་ཀར་དཔའ་མོ་འཇིགས་བྱེད་ཆེན་པོ་དང་དཔའ་མོ་རྟ་རྣམ། དབང་ལྡན་དང་འདོམས་སུ་ཧི་མ་ལ་ཡར་དཔའ་བོ་མིག་མི་བཟང་དང་དཔའ་མོ་བྱག་དོང་མ་སྟེ་ཞིང་དང་ཉེ་བའི་ཞིང་གི་ལྷ་ཐམས་ཅད་སྐུ་མདོག་དམར་པོ་ས་སྟེང་ལ་སྤྱོད་པ། དེའི་ཕྱིར་སྐུའི་འཁོར་ལོའི་ཤར་རྩིབས་དང་མཚན་མ་པྲེ་ཏ་པུ་རིར་དཔའ་བོ་སྟོབས་པོ་ཆེ་དང་དཔའ་མོ་འཁོར་ལོའི་ཤུགས་ཅན་མ། བྱང་རྩིབས་དང་བཤང་ལམ་གྲྀ་ཧ་དེ་ཝར་དཔའ་བོ་རིན་ཆེན་རྡོ་རྗེ་དང་དཔའ་མོ་དུམ་སྐྱེས་མ། ནུབ་རྩིབས་དང་བརླ་གཉིས་སཽ་རཱཥྚར་དཔའ་བོ་རྟ་མགྲིན་དང་དཔའ་མོ་ཆད་འཚོང་མ། ལྷོ་རྩིབས་དང་བྱིན་པ་གཉིས་སུ་ཝརྞ་དྭཱི་པར་དཔའ་བོ་ནམ་མཁའི་སྙིང་པོ་དང་དཔའ་མོ་འཁོར་ལོའི་གོ་ཆ་མ། མེ་དང་སོར་མོ་བཅུ་དྲུག་ན་ག་རར་དཔའ་བོ་ཧེ་རུ་ཀ་དང་དཔའ་མོ་རབ་ཏུ་གཏུམ་མོ། །བདེན་བྲལ་དང་པོ་ལ་གོང་གཉིས་སིནྡྷུ་རར་དཔའ་བོ་པདྨ་གར་གྱི་དབང་ཕྱུག་དང་དཔའ་མོ་སྟོབས་ཆེན་མ། རླུང་དང་མཐེ་བོང་བཞི་མ་རུར་དཔའ་བོ་རྣམ་པར་སྣང་མཛད་དང་དཔའ་མོ་འཁོར་ལོས་སྒྱུར་མ། དབང་ལྡན་དང་པུས་མོ་གཉིས་ཀུ་ལུ་ཏར་དཔའ་བོ་རྡོ་རྗེ་སེམས་དཔའ་དང་དཔའ་མོ་བརྩོན་འགྲུས་ཆེན་མོ་སྟེ་
འདུ་བ་དང་ཉེ་བའི་འདུ་བ་དང་དུར་ཁྲོད་དང་ཉེ་བའི་དུར་ཁྲོད་ཀྱི་ལྷ་ཐམས་ཅད་སྐུ་མདོག་དཀར་པོ་སྟེ་ས་འོག་ལ་སྤྱོད་པ། དེ་ལྟར་འཁོར་ལོ་གསུམ་གྱི་དཔའ་བོ་ཉེར་བཞི་ལས་ཐུགས་འཁོར་བ་རྣམས་སྔོན་པོ་ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ། གསུང་འཁོར་བ་རྣམས་དམར་པོ་ཕྱག་དང་པོ་གཉིས་ཀྱིས་པདྨ་དང་དྲིལ་བུ། སྐུ་འཁོར་བ་རྣམས་དཀར་པོ་ཕྱག་དང་པོ་གཉིས་ཀྱིས་འཁོར་ལོ་དང་དྲིལ་བུ་རྣམས་ཐུགས་ཀར་བསྣོལ་སྟབས་སུ་བསྣམས་པས་ཡུམ་ཉེར་བཞིར་སོ་སོར་འཁྱུད་པ། ཐམས་ཅད་ཀྱང་གཡས་ཀྱི་འོག་མ་ན་ཌཱ་མ་རུ། གཡོན་གྱི་འོག་མ་ན་ཁ་ཊྭཱཾ་ག །ཞབས་གཡས་བརྐྱང༌། གཡོན་ཅུང་ཟད་བསྐུམས་པས་རོའི་གདན་ལ་བཞུགས་པ། རལ་པའི་ཐོར་ཅོག་གྱེན་དུ་བཅིངས་པ་ཕྱག་རྒྱ་དྲུག་གིས་བརྒྱན་པ། ཐོད་པ་སྐམ་པོ་ལྔས་དབུ་ལ་བརྒྱན་པ། སྟག་གི་པགས་པའི་ཤམ་ཐབས་གྲོལ་བ། སྒེག་པ་དང་དཔའ་བ་དང་མི་སྡུག་པ། །དགོད་པ་དང་དྲག་ཤུལ་དང་འཇིགས་སུ་རུང་བ། སྙིང་རྗེ་དང་རྔམས་པ་དང་ཞི་བ་སྟེ་གར་གྱི་ཉམས་དགུ་དང་ལྡན་པའོ། །དཔའ་མོ་ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་མཆེ་བ་བཞི་གཙིགས་པ། ཕྱག་གཡས་གྲི་གུག་ནམ་མཁར་འཕྱར་བ། གཡོན་པས་ཐོད་པ་ཁྲག་གིས་བཀང་བ་བསྣམས་ནས་རང་རང་གི་ཡབ་ལ་འཁྱུད་པ། ཞབས་གཡོན་ཡབ་ཀྱི་གཡས་དང་མཉམ་དུ་བརྐྱངས་པས་རོའི་སྙིང་གར་མནན་པ། གཡས་ཀྱི་བརླ་ཡབ་ཀྱི་བརླ་གཡོན་པར་འཁྲིལ་ཅིང་བཞུགས་པ། དབུ་སྐྲ་སིལ་མ་སྐུ་རྒྱབ་ཏུ་གྲོལ་བ། ཐོད་པ་སྐམ་པོ་ལྔས་དབུ་ལ་བརྒྱན་པ། རློན་པ་ལྔ་བཅུའི་དོ་ཤལ་བྱས་པ། ཐུགས་ཀའི་འཁོར་ལོ་ཕྱིའི་ཕྱོགས་མཚམས་བརྒྱད་དང་གཙོ་བོའི་དབང་པོའི་སྒོ་བརྒྱད་དུ་ཧཱུྃ་བརྒྱད་སྤྲོས་པ་ཡོངས་སུ་གྱུར་པ་ལས། ཤར་ཕྱོགས་དང་ཁ་མདུང་གིས་འབིགས་པའི་དུར་ཁྲོད་དུ་ཁྭ་གདོང་མ་སྔོན་མོ། །བྱང་དུ་སྣ་ཚོགས་པའི་རོའི་དུར་ཁྲོད་དུ་འུག་གདོང་མ་ལྗང་གུ། ནུབ་དང་མཚན་མ་
རྣག་གི་དྲིའི་དུར་ཁྲོད་དུ་ཁྱི་གདོང་མ་དམར་མོ། ལྷོ་དང་གཤང་ལམ་རུལ་པའི་དུར་ཁྲོད་དུ་ཕག་གདོང་མ་སེར་མོ། །མེ་དང་རྣ་བ་གཡས་བྱིས་པ་ཤི་བའི་དུར་ཁྲོད་དུ་གཤིན་རྗེ་བརྟན་མ་གཡས་སྔོ་གཡོན་སེར་བ། བདེན་བྲལ་དང་རྣ་བ་གཡོན་སྦྲུལ་གྱིས་བཟུང་བའི་དུར་ཁྲོད་དུ་གཤིན་རྗེ་ཕོ་ཉ་མོ་གཡས་སེར་གཡོན་དམར་བ། རླུང་དང་མིག་གཡས་དྲག་པོའི་གཡུལ་གྱི་དུར་ཁྲོད་དུ་གཤིན་རྗེ་མཆེ་བ་མ་གཡས་དམར་གཡོན་ལྗང་བ། དབང་ལྡན་དང་མིག་གཡོན་ལྷག་མ་ཅན་གྱི་དུར་ཁྲོད་དུ་གཤིན་རྗེ་འཇོམས་མ་གཡས་ལྗང་གཡོན་དམར་བ། ཐམས་ཅད་ཀྱང་ཞལ་གཅིག་ཕྱག་བཞི་སྤྱན་གསུམ་མཆེ་བ་བཞི་གཙིགས་པ། ཕྱག་གཡས་ཀྱི་དང་པོ་ན་ཌཱ་མ་རུ། འོག་མ་ན་གྲི་གུག །གཡོན་གྱི་དང་པོ་ན་ཁ་ཊྭཱྃ་ག །འོག་མ་ན་ཐོད་ཁྲག་འཛིན་པ། ཞབས་གཡས་བརྐྱང༌། གཡོན་ཅུང་ཟད་བསྐུམས་པས་རོའི་གདན་ལ་བཞུགས་པ། ཐོད་པ་སྐམ་པོ་ལྔའི་དབུ་རྒྱན་དང༌། རློན་པ་ལྔ་བཅུའི་དོ་ཤལ་བྱས་པའོ། །བཞི་པ་ཕུང་ཁམས་སྐྱེ་མཆེད་བྱིན་རླབས་ནི། ཕྱི་ནང་གི་ཧེ་རུ་ཀ་དྲུག་དང༌། ནང་གི་དཔའ་བོ་ཉེར་བཞི་པོ་ཐམས་ཅད་ཀྱི་སྙིང་གར་རྡོ་རྗེ་སེམས་དཔའི་ངོ་བོ་ཨོཾ་ཧཿདཀར་པོ། མགོ་བོར་རྣམ་པར་སྣང་མཛད་ཀྱི་རང་བཞིན་ན་མ་ཧི་སེར་པོ། སྤྱི་གཙུག་ཏུ་པདྨ་གར་དབང་གི་ངོ་བོ་སྭཱ་ཧཱ་ཧུ་དམར་པོ། ཕྲག་པ་གཉིས་སུ་མི་བསྐྱོད་པའི་ངོ་བོ་བཽ་ཥ་ཏ་ཧེ་ནག་པོ། མིག་གཉིས་སུ་རྡོ་རྗེ་ཉི་མའི་ངོ་བོ་ཧཱུྃ་ཧོཿདམར་སེར། ཡན་ལག་ཐམས་ཅད་ལ་རྟ་མཆོག་རྒྱལ་པོའི་ངོ་བོ་ཕཊ་ཧཾ་ལྗང་གུ་སྟེ་གོ་ཆའི་དཔའ་བོ་དྲུག །ཕྱི་ནང་གི་ཡུམ་བཅུ། ནང་གི་དཔའ་མོ་ཉེར་བཞི། སྒོ་མཚམས་མ་བརྒྱད་བཅས་ཀྱི་ལྟེ་བར་རྡོ་རྗེ་ཕག་མོའི་ངོ་བོ་ཨོཾ་བྃ་དམར་མོ། །སྙིང་གར་གཤིན་རྗེ་མའི་ངོ་བོ་ཧྃ་ཡྃ་སྔོན་མོ། །ཁ་ལ་རྨོངས་བྱེད་མའི་ངོ་བོ་ཧྲཱི་མོཾ་དཀར་མོ། །མགོ་བོར་སྐྱོད་བྱེད་མའི་ངོ་བོ་ཧྲེཾ་ཧྲཱིཾ་སེར་མོ། །སྤྱི་གཙུག་ཏུ་སྐྲག་བྱེད་མའི་ངོ་བོ་ཧུྃ་ཧཱུྃ་ལྗང་གུ། སྨིན་མཚམས་སུ་གཏུམ་མོའི་
ངོ་བོ་ཕཊ་ཕཊ་དུད་ཀ་སྟེ་གོ་ཆའི་དཔའ་མོ་དྲུག །ཕྱི་ནང་གི་ལྷ་ཐམས་ཅད་ཀྱི་སྤྱི་བོར་ཟླ་བའི་སྟེང་དུ་ཨོཾ་ལས་སྐུ་རྡོ་རྗེ་དཀར་པོ་འཁོར་ལོ་དང་དྲིལ་བུ་འཛིན་པ། མགྲིན་པར་པདྨའི་སྟེང་དུ་ཨཱཿལས་གསུང་རྡོ་རྗེ་དམར་པོ་པདྨ་དང་དྲིལ་བུ་འཛིན་པ། སྙིང་གར་ཉི་མའི་སྟེང་དུ་ཧཱུྃ་ལས་ཐུགས་རྡོ་རྗེ་སྔོན་པོ་རྡོ་རྗེ་དང་དྲིལ་བུ་འཛིན་པ། སྤྱི་གཙུག་ཏུ་ཉི་མའི་སྟེང་དུ་ཧོཿལས་ཡེ་ཤེས་རྡོ་རྗེ་མཐིང་ག་རྡོ་རྗེ་དང་དྲིལ་བུ་འཛིན་པའོ། །ལྔ་པ་བདེ་ཆེན་འཁོར་ལོ་བསྒྲུབ་ཅིང་ཡེ་ཤེས་པ་གཞུག་པ་ནི། ཡབ་ཀྱི་གསང་བ་ཧཱུྃ་ལས་རྡོ་རྗེ་རྩེ་ལྔ་པ་བུ་ག་ཧཱུྃ་སྔོན་པོས་བཀག་པ། ཡུམ་གྱི་མཁའ་ཨཱཿལས་པདྨ་དམར་པོ་འདབ་མ་བརྒྱད་པ་ཟེའུ་འབྲུ་ཨཱཿདམར་པོས་བཀག་པ། ཡབ་ཡུམ་སྙོམས་པར་ཞུགས་པའི་བདེ་བ་ཆེན་པོ་དགའ་བའི་སྒྲ། ཧ་ཧ་སི་སི་ཀུན་དུ་རུ། ཞེས་པའི་སྒྲས་སྐུ་གསུང་ཐུགས་ཡེ་ཤེས་རྡོ་རྗེའི་ལྷ་ཚོགས་རྣམས་ཀྱི་ཐུགས་རྒྱུད་བསྐུལ། སྐུ་གསུང་ཐུགས་ཡེ་ཤེས་རྡོ་རྗེའི་ལྷ་ཚོགས་རྣམས་ལས་འོད་ཟེར་འཕྲོས། རྟེན་གཞལ་ཡས་ཁང་བརྟེན་པ་ལྷ་དང་བཅས་པ་བཀུག །ཡབ་ཀྱི་ཞལ་དུ་ཞུགས། སྐུའི་དབྱིབས་བརྒྱུད། ཡུམ་གྱི་མཁར་བབས། ལྷ་དང་གཞལ་ཡས་ཁང་དུ་གྱུར་ཅིང་ཕྱིར་འཕྲོས། རྟེན་གཞལ་ཡས་ཁང་བརྟེན་པ་ལྷ་དང་བཅས་པ་སྔར་ལྟར་གསལ་བར་གྱུར། རྡོ་རྗེ་བཞིའི་ལྷ་ཚོགས་ལས་འོད་ཟེར་འཕྲོས་པས། འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས་བཅོམ་ལྡན་འདས་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་སྟེང་གི་ཆ་ལ་རྩ་བརྒྱུད་བླ་མ་དང་བཅས་པ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་དཔག་ཏུ་མེད་པས་བསྐོར་བ་མདུན་གྱི་ནམ་མཁར་སྤྱན་དྲངས། ཨོཾ་བཛྲ་ས་མཱ་ཛཿཕེཾ་ཕེཾ་ཕེཾ། ན་མཿསརྦ་ཏ་ཐཱ་ག་ཏ་ཤྲཱི་ཙཀྲ་སམྦར་སརྦ་བཱིར་ཡོ་གི་ནཱི་ཡེ། ཨོཾ་བཛྲ་ཨཱརྒྷཾ་པྲ་ཏཱིཙྪ་སྭཱ་ཧཱ། ནས་ཤབྡའི་བར་གྱིས་མཆོད། ཛཿཧཱུྃ་བྃ་ཧོཿ དམ་ཚིག་པ་དང་གཉིས་སུ་མེད་པར་གྱུར། དྲུག་པ་དབང་བསྐུར་རྒྱས་གདབ་ནི། སླར་ཡང་རྡོ་རྗེ་བཞིའི་ལྷ་ལས་འོད་ཟེར་འཕྲོས་པས་དབང་
གི་ལྷ་རྒྱལ་བ་རིགས་ལྔ་འཁོར་དང་བཅས་པ་སྤྱན་དྲངས། ཨོཾ་བཛྲ་ས་མཱ་ཛཿ ཨོཾ་པཉྩ་ཀུ་ལ་ས་པ་རི་ཝཱ་ར། ཨོཾ་བཛྲ་ཨཱརྒྷཾ་པྲ་ཏཱིཙྪ་སྭཱ་ཧཱ། ཞེས་པ་ནས། ཨོཾ་བཛྲ་ཤབྡ་པྲ་ཏཱིཙྪ་སྭཱ་ཧཱ། དེ་བཞིན་གཤེགས་པ་ཐམས་ཅད་ཀྱིས་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས་རིགས་ལྔའི་སངས་རྒྱས་འཁོར་དང་བཅས་པས་བུམ་པའི་བདུད་རྩིས་དབང་བསྐུར་བར་གྱུར། ཇི་ལྟར་བལྟམས་པ་ཙམ་གྱིས་སོགས་ནས་ཤྲཱི་ཡེ་ཧཱུྃ། ཞེས་གསུངས་ཤིང་དབང་བསྐུར། སྐུ་གང༌། དྲི་མ་དག །ཆུའི་ལྷག་མ་ཡར་ལུད་པ་ལས་ཕྱི་ནང་གི་གཙོ་བོ་དང་ཕྱི་ནང་གི་མཁའ་འགྲོ་མ་གཉིས་དང་ཐུགས་འཁོར་གྱི་ལྷ་ཚོགས་རྣམས་ལ་མི་བསྐྱོད་པ་དང༌། ཕྱི་ནང་གི་གཙོ་བོའི་ཡུམ་དང་བུདྡྷ་ཧེ་རུ་ཀ་དང་སྐུ་འཁོར་གྱི་ལྷ་རྣམས་ལ་རྣམ་པར་སྣང་མཛད་དང༌། ཀརྨ་ཧེ་རུ་ཀ་དང་ཕྱི་ནང་གི་ལཱ་མ་གཉིས་དང་སྒོ་མཚམས་མ་བརྒྱད་ལ་དོན་ཡོད་གྲུབ་པ་དང༌། པདྨ་ཧེ་རུ་ཀ་དང་ཕྱི་ནང་གི་ཁཎྜ་རོ་ཧི་དང་གསུང་འཁོར་གྱི་ལྷ་རྣམས་ལ་འོད་དཔག་མེད་དང༌། རཏྣ་ཧེ་རུ་ཀ་དང་ཕྱི་ནང་གི་གཟུགས་ཅན་མ་རྣམས་ལ་རིན་ཆེན་འབྱུང་ལྡན་རྣམས་ཀྱིས་དབུར་བརྒྱན་པར་གྱུར། བདུན་པ་བཟླས་པ་བྱ་བ་ནི། ལྷ་ཐམས་ཅད་ཀྱི་ཐུགས་ཀའི་ཐུགས་རྡོ་རྗེའི་ཐུགས་ཀར་པདྨ་དང་ཉི་མའི་དབུས་སུ་ཡབ་ཀྱི་ཐུགས་ཀར་ཧཱུྃ་ཡིག་སྔོན་པོ། ཡུམ་གྱི་ཐུགས་ཀར་བྃ་ཡིག་དམར་པོ། གཙོ་བོ་ཡབ་ཡུམ་ལ་སྙིང་པོ་ཉེ་སྙིང་རྩ་སྔགས་ཀྱིས་བསྐོར་བ་དང༌། འཁོར་རྣམས་ཀྱི་ཐུགས་ཀར་རང་གི་ས་བོན་གྱི་མཐར་རང་རང་གི་སྙིང་པོས་བསྐོར་བ་ལས་འོད་ཟེར་འཕྲོ་འདུས་དོན་གཉིས་མཛད་པར་གྱུར། ཅེས་བསམས་ལ། ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧུཾ་ཧཱུྃ་ཕཊ། ཌཱ་ཀི་ནཱི་ཛཱ་ལ་སམྦ་རཾ་སྭཱ་ཧཱ། སྙིང་པོའོ། །ཨོཾ་ཧྲཱིཿཧ་ཧ་ཧུྃ་ཧཱུྃ་ཕཊ། ཉེ་སྙིང་ངོ༌། །ཨོཾ་ན་མོ་བྷ་ག་ཝ་ཏེ་ཝཱི་རེ་ཤཱ་ཡ། མ་ཧཱ་ཀ་ཝཱགྣི་སཾ་ནི་ཤཱ་ཡ། ཛཱ་ཊ་མ་ཀུ་ཊོཏྐ་ཊཱ་ཡ། དཾ་ཥྚྭཱ་ཀ་ར་ལོ་གྲ་བྷི་ཥ་ཎ་མུ་ཁཱ་ཡ། ས་ཧ་སྲ་བྷུ་ཛ་བྷཱ་སུ་རཱ་ཡ། པར་ཤུ་པཱ་ཤོདྱཱ་ཏ་ཤཱུ་ལ་ཁ་ཊྭཱཾ་ག་དྷཱ་རི་ཎེ།
བྱཱ་གྷྲཱ་ཛི་ནཱཾ་ཝ་ར་དྷ་རཱ་ཡ། མ་ཧཱ་དྷཱུ་མྲཱནྡྷཱ་ཀཱ་ར་ཝ་པུ་ཥཱ་ཡ། ཀ་ར་ཀ་ར། ཀུ་རུ་ཀུ་རུ། བནྡྷ་བནྡྷ། ཏྲཱ་ས་ཡ་ཏྲཱ་ས་ཡ། ཀྵོ་བྷ་ཡ་ཀྵོ་བྷ་ཡ། ཧྲཽཾ་ཧྲཽཾ། ཧྲཿཧྲཿ ཕེཾ་ཕེཾ། ཕཊ་ཕཊ། ད་ཧ་ད་ཧ། པ་ཙ་པ་ཙ། །བྷཀྵ་བྷཀྵ། བ་ས་རུ་དྷི་རཱནྟྲ་མཱ་ལཱ་བ་ལཾ་བི་ནེ། གྲྀཧྞ་གྲྀཧྞ། སཔྟ་པཱ་ཏཱ་ལ་ག་ཏ་བྷུ་ཛཾ་ག་པར་པ་ཾབཱ། ཏ་རྫ་ཡ་ཏ་རྫ་ཡ། ཨཱ་ཀཌྜྷྱ་ཨཱ་ཀཌྜྷྱ། ཧྲིཾ་ཧྲིཾ། ཛྙཽཾ་ཛྙཽཾ། ཀྵྨྃ་ཀྵྨྃ། ཧཱྃ་ཧཱྃ། ཧཱིཾ་ཧཱིཾ། ཧཱུྃ་ཧཱུྃ། ཀི་ལི་ཀི་ལི། སི་ལི་སི་ལི། ཧི་ལི་ཧི་ལི། དྷི་ལི་དྷི་ལི། ཧཱུྃ་ཧཱུྃ་ཕཊ། རྩ་སྔགས་སོ། །ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞ་ནཱི་ཡེ་ཧུཾ་ཧཱུྃ་ཕཊ་སྭཱ་ཧཱ། ཡུམ་གྱི་སྙིང་པོའོ། །ཨོཾ་བཛྲ་བཻ་རོ་ཙ་ནཱི་ཡེ་ཧུཾ་ཧཱུྃ་ཕཊ། ཡུམ་གྱི་ཉེ་སྙིང་ངོ༌། །ཨོཾ་ཤྲཱི་བུདྡྷ་ཧེ་ཧེ་རུ་རུ་ཀཾ་ཧུཾ་ཧཱུྃ་ཕཊ། ཌཱ་ཀི་ནཱི་ཛཱ་ལ་སམྦ་རཾ་སྭཱ་ཧཱ། ཨོཾ་ཤྲཱི་ཀརྨ་ཧེ་ཧེ༴ ཌཱ་ཀི༴ ཨོཾ་ཤྲཱི་པདྨ་ཧེ་ཧེ༴ ཨོཾ་ཤྲཱི་རཏྣ་ཧེ་ཧེ༴ ཧེ་རུ་ཀ་བཞིའོ། །ཨོཾ་ཌཱ་ཀི་ནཱི་ཡེ་ཧུཾ་ཧཱུྃ་ཕཊ། ཨོཾ་ལཱ་མེ་ཧུཾ་ཧཱུྃ་ཕཊ། ཨོཾ་ཁཎྜ་རོ་ཧི་ཧུཾ་ཧཱུྃ་ཕཊ། ཨོཾ་རཱུ་པི་ཎཱི་ཧུཾ་ཧཱུྃ་ཕཊ། སྙིང་པོའི་རྣལ་འབྱོར་མ་བཞིའོ། །ཨོཾ་ཁཎྜ་ཀ་པཱ་ལཱི་ནི་ཧུཾ་ཧཱུྃ་ཕཊ། ཨོཾ་པྲ་ཙཎྜ་ཧུཾ་ཧཱུྃ་ཕཊ། ཨོཾ་མ་ཧཱ་ཀཾ་ཀ་ལ་ཧུཾ་ཧཱུྃ་ཕཊ། ཨོཾ་ཙཎྜ་ཨཱཀྵི་ཡཻ་ཧུཾ་ཧཱུྃ་ཕཊ། ཨོཾ་ཀཾ་ཀ་ལ་ཧུཾ་ཧཱུྃ་ཕཊ། ཨོཾ་པྲ་བྷཱ་ཝ་ཏཱི་ཡཻ་ཧུཾ་ཧཱུྃ་ཕཊ། ཨོཾ་བི་ཀཊ་དཾཥྚཱ་ཎཱི་ཧུཾ་ཧཱུྃ་ཕཊ། ཨོཾ་མ་ཧཱ་ནཱ་སཱི་ཧུཾ་ཧཱུྃ་ཕཊ། ཨོཾ་སུ་ར་བཻ་རི་ཎི་ཧུཾ་ཧཱུྃ་ཕཊ། ཨོཾ་བི་ར་མ་ཏཱི་ཡཻ་ཧུཾ་ཧཱུྃ་ཕཊ། ཨོཾ་ཨ་མི་ཏ་བྷཱ་ཧུཾ་ཧཱུྃ་ཕཊ། ཨོཾ་ཁརྦ་རཱི་ཡཻ་ཧུཾ་ཧཱུྃ་ཕཊ། ཨོཾ་བཛྲ་པྲ་བྷཱ་ཝ་ཧུཾ་ཧཱུྃ་ཕཊ། ཨོཾ་ལཾ་ཀེ་ཤྭ་རི་ཡཻ་ཧུཾ་ཧཱུྃ་ཕཊ། ཨོཾ་བཛྲ་དེ་ཧ་ཧུཾ་ཧཱུྃ་ཕཊ། ཨོཾ་དྲུ་མཙྪ་ཡ་ཧུཾ་ཧཱུྃ་ཕཊ། ཐུགས་འཁོར་རོ། །ཨོཾ་ཨཾ་ཀུ་རི་ཀ་ཧུཾ་ཧཱུྃ་ཕཊ། ཨོཾ་ཨཻ་ར་ཝ་ཏཱི་ཡཻ་ཧུཾ་ཧཱུྃ་ཕཊ། ཨོཾ་བཛྲ་ཛཱ་ཊི་ལ་ཧུཾ་ཧཱུྃ་ཕཊ། ཨོཾ་མ་ཧཱ་བྷཻ་ར་བཱི་ཡཻ་ཧུཾ་ཧཱུྃ་ཕཊ། ཨོཾ་མ་ཧཱ་བཱི་ར་ཡ་ཧུཾ་ཧཱུྃ་ཕཊ། ཨོཾ་བཱ་ཡུ་བེ་གེ་ཧུཾ་ཧཱུྃ་ཕཊ། ཨོཾ་བཛྲ་ཧཱུྃ་ཀ་ར་ཧུཾ་ཧཱུྃ་ཕཊ། ཨོཾ་སུ་ར་བྷཀྵ་ཡཻ་ཧུཾ་ཧཱུྃ་ཕཊ། ཨོཾ་སུ་བྷ་དྲ་ཧུཾ་ཧཱུྃ་ཕཊ། ཨོཾ་ཤྱཱ་མ་དེ་ཝཱི་ཡཻ་ཧུཾ་ཧཱུྃ་ཕཊ། ཨོཾ་བཛྲ་བྷ་དྲ་ཧུཾ་ཧཱུྃ་ཕཊ། ཨོཾ་སུ་བྷ་དྲེ་ཧུཾ་ཧཱུྃ་ཕཊ། ཨོཾ་
མ་ཧཱ་བྷཻ་ར་བ་ཧུྃ་ཧཱུྃ་ཕཊ། ཨོཾ་ཧ་ཡ་ཀརྞེ་ཧུཾ་ཧཱུྃ་ཕཊ། ཨོཾ་བི་རཱུ་པ་ཨཱཀྵི་ཧུཾ་ཧཱུྃ་ཕཊ། ཨོཾ་ཁ་ག་ཨ་ན་ནེ་ཧུཾ་ཧཱུྃ་ཕཊ། གསུང་འཁོར་རོ། །ཨོཾ་མ་ཧཱ་བ་ལ་ཧུཾ་ཧཱུྃ་ཕཊ། ཨོཾ་ཙཀྲ་བེ་གེ་ཧུཾ་ཧཱུྃ་ཕཊ། ཨོཾ་རཏྣ་བཛྲ་ཧུཾ་ཧཱུྃ་ཕཊ། ཨོཾ་ཁཎྜ་རོ་ཧེ་ཧུཾ་ཧཱུྃ་ཕཊ། ཨོཾ་ཧ་ཡ་གྲཱི་ཝ་ཧུཾ་ཧཱུྃ་ཕཊ། ཨོཾ་ཤཽཎྜི་ནཱི་ཡཻ་ཧུཾ་ཧཱུྃ་ཕཊ། ཨོཾ་ཨཱ་ཀ་ཤ་གརྦྷ་ཧུཾ་ཧཱུྃ་ཕཊ། ཨོཾ་ཙཀྲ་ཝརྨི་ཎཱི་ཡཻ་ཧུཾ་ཧཱུྃ་ཕཊ། ཨོཾ་ཧེ་རུ་ཀ་ཧུཾ་ཧཱུྃ་ཕཊ། ཨོཾ་སུ་བཱི་རེ་ཧུཾ་ཧཱུྃ་ཕཊ། ཨོཾ་པདྨ་ན་རྟེ་ཤྭ་ར་ཧུཾ་ཧཱུྃ་ཕཊ། ཨོཾ་མ་ཧཱ་བ་ལེ་ཧུཾ་ཧཱུྃ་ཕཊ། ཨོཾ་བཛྲ་བཻ་རོ་ཙ་ན་ཧུཾ་ཧཱུྃ་ཕཊ། ཨོཾ་ཙཀྲ་ཝརྟི་ནཱི་ཡཻ་ཧུཾ་ཧཱུྃ་ཕཊ། ཨོཾ་བཛྲ་ས་ཏྭ་ཧུཾ་ཧཱུྃ་ཕཊ། ཨོཾ་མ་ཧཱ་བཱིརྻཻ་ཧུཾ་ཧཱུྃ་ཕཊ། སྐུ་འཁོར་རོ། །ཨོཾ་ཀཱ་ཀ་སྱཻ་ཧུཾ་ཧཱུྃ་ཕཊ། ཨོཾ་ཨཱུ་ལཱུ་ཀ་སྱཻ་ཧུཾ་ཧཱུྃ་ཕཊ། ཨོཾ་ཤྲཱན་ཀ་སྱཻ་ཧུཾ་ཧཱུྃ་ཕཊ། ཨོཾ་སཱུ་ཀ་རཱ་སྱཻ་ཧུཾ་ཧཱུྃ་ཕཊ། ཨོཾ་ཡ་མ་དཱ་དྷཱི་ཡཻ་ཧུཾ་ཧཱུྃ་ཕཊ། ཨོཾ་ཡ་མ་དཱུ་ཏི་ཡཻ་ཧུཾ་ཧཱུྃ་ཕཊ། ཨོཾ་ཡ་མ་དཾཥྚཱི་ཎཱི་ཡཻ་ཧུཾ་ཧཱུྃ་ཕཊ། ཨོཾ་ཡ་མ་མ་ཐཱ་ནཱ་ཡཻ་ཧུཾ་ཧཱུྃ་ཕཊ། དམ་ཚིག་གི་དཀྱིལ་འཁོར་ཏེ་སྒོ་མཚམས་མ་བརྒྱད་དོ། །གཙོ་བོ་ཡབ་ཡུམ་སྔགས་ནི་ནུས་དང་འཁོར་རྣམས་ལ་དེའི་བཅུ་ཆ་ལ་སོགས་ཅི་ནུས་བཟླའོ། །ཆེད་དུ་བསྙེན་སྐབས་ཏིང་ངེ་འཛིན་གྱི་རྣམ་གྲངས་དང་བཟླས་པའི་གྲངས་སོགས་སྙན་བརྒྱུད་ཟིན་པོད་ལྟར་བྱ་དགོས་སོ། །གསུམ་པ་རྗེས་ཀྱི་བྱ་བ་ལ་བདུན། བཟླས་པ་གྲུབ་པའི་མཐར་དང་པོ་མཆོད་པ་ནི། རྒྱས་པར་དཀྱིལ་ཆོག་ནས་བྱུང་བའི་མཆོད་བསྟོད་རྣམས་བྱ་དགོས་ཀྱང་སྤྲོས་པས་མི་ལྕོགས་ན། རང་གི་ཐུགས་ཀ་ནས་སྤྲོས་པའི་ལྷ་མོའི་ཚོགས་ཀྱིས་བདག་ལ་མཆོད་ཅིང་བསྟོད་པར་བསམས་ལ། ཨོཾ་སརྦ་ཏ་ཐཱ་ག་ཏ་ཤྲཱི་ཙཀྲ་སམྦ་ར་སརྦ་བི་ར་ཡོ་གི་ནཱི་བཛྲ་ཨཱརྒྷཾ་པྲ་ཏཱིཙྪ་སྭཱ་ཧཱ། ཞེས་པ་ནས་མཚན་སྔགས་དང་བཅས་པས། ཤབྡའི་བར་གྱིས་མཆོད། ཨོཾ་བཛྲ་རཱུ་པ་ཨཱཿཧཱུྃ། དེ་བཞིན་དུ་རཱུ་པའི་གནས་སུ། ཤབྡ།གནྡྷ།ེ ར་ས། སྤརྴེ་རྣམས་བཅུག །ཨོཾ་བཛྲ་ཝི་ཎི་ཨཱཿཧཱུྃ། དེ་བཞིན་དུ་ཝི་ཎིའི་ཚབ་ཏུ། ཝཾ་སེ། མུ་རཉྫེ། ཧ་སྱེ། ལཱ་ལྱེ། གཱིརྟི། ནཱིརྟི། པུཥྤེ། དྷཱུ་པེ། དཱི་པེ། གནྡྷེ། རཱུ་པ། ར་ས། སྤརྴེ། དྷརྨ།
དྷཱ་ཏུ། ཞེས་རེ་རེ་བཞིན་བཅུག་པས་རིག་མ་བཅུ་དྲུག་གིས་མཆོད། བྱིན་གྱིས་བརླབ་པའི་ནང་མཆོད་འཐོར་ཏེ། རྒྱས་པར་མདུན་བསྐྱེད་ལྟར་དང༌། བསྡུ་ན། རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་ཞལ་དུ་ཨོཾ་ཨཱཿཧཱུྃ། ཨོཾ་སརྦ་ཏ་ཐཱ་ག་ཏ་ཤྲཱི་ཙཀྲ་སམྦ་ར་སརྦ་བཱི་ར་ཡོ་གི་ནཱི་ས་པ་རི་ཝཱ་ར་ཨོཾ་ཨཱཿཧཱུྃ། བཛྲ་དྷརྨ་པཱ་ལ་བྷ་མི་པ་ཏི་ས་པ་རི་བཱ་ར་ཨོཾ་ཨཱཿཧཱུྃ། ཞེས་པས་མཆོད། གཉིས་པ་བསྟོད་པ་ནི། རྐང་པ་བརྒྱད་པ་སོགས་སམ་རྒྱ་གཞུང་གང་འགྲུབ་དང་བསྡུ་ན། ཆོས་དབྱིངས་རྣམ་དག་དབྱིངས་ལས་མ་གཡོས་ཀྱང༌། །ཐབས་ཀྱིས་ཁྲོ་བོའི་སྐུར་སྟོན་གདུག་པ་འདུལ། །ཆེ་བའི་ཆེ་མཆོག་ལྷ་ཡི་ལྷར་གྱུར་པ། །ཀུན་བཟང་ཧེ་རུ་ཀ་ལ་ཕྱག་འཚལ་ལོ། །ཕྱག་བྱར་འོས་པ་ཐམས་ཅད་ལ། །སོགས་ཀྱིས་བསྟོད། གསུམ་པ་ནོངས་བཤགས་ནི། མ་འབྱོར་པ་དང་སོགས་ཧེ་རུ་ཀའི་ཡིག་བརྒྱ་ལན་གསུམ་བརྗོད། བཞི་པ་དཀྱིལ་འཁོར་བསྡུ་བ་ནི། རང་གི་ཐུགས་ཀའི་འོད་ཀྱིས་ཕོག་པས་སྣོད་བཅུད་ཐམས་ཅད་འོད་དུ་ཞུ་ནས་གཞལ་ཡས་ཁང་ལ་ཐིམ། དེ་འཁོར་རྣམས་ལ་ཐིམ། དེ་གཙོ་བོ་ཡབ་ཡུམ་ལ་ཐིམ། ཡུམ་ཡབ་ལ་ཐིམ། དེ་ཡེ་ཤེས་སེམས་དཔའ་ལ་ཐིམ། དེ་ཐུགས་ཀའི་ཧཱུྃ་ལ་ཐིམ། དེའི་ཞབས་ཀྱུ་ཧ་ལ་ཐིམ། ཧ་མགོ་བོ་ལ་ཐིམ། མགོ་བོ་ཟླ་ཚེས་ལ་ཐིམ། ཟླ་ཚེས་ཐིག་ལེ་ལ་ཐིམ། ཐིག་ལེ་ནཱ་ད་ལ་ཐིམ། དེ་ཤིན་ཏུ་ཕྲ་བར་གྱུར་ནས་མི་དམིགས་པར་གྱུར། ཅེས་མོས་ལ་ཅི་གནས་སུ་མཉམ་པར་བཞག །ལྔ་པ་ཐུན་མཚམས་ཀྱི་ལྷར་ལྡང་བ་ནི། སླར་རང་ཉིད་བཅོམ་ལྡན་འདས་འཁོར་ལོ་བདེ་མཆོག་ལྷན་ཅིག་སྐྱེས་པའི་སྐུར་གྱུར། ཨོཾ་ཧྲཱིཿཧ་ཧ་ཧུཾ་ཧཱུྃ་ཕཊ། ཨོཾ་ཨཱཿཧཱུྃ། ཞེས་བརྗོད་ལ་གོ་ཆ་དང་གནས་གསུམ་བསྲུང་བའི་མོས་པ་བྱ། དྲུག་པ་བསྔོ་སྨོན་ནི། སྐྱེ་ཞིང་སྐྱེ་བར་རིགས་མཆོག་ཏུ། །སྐྱེ་ཞིང་ཁེངས་མེད་དམ་ཚིག་ལྡན། །འཁོར་ལོ་སྡོམ་པ་སྟོན་པ་དང༌། །བརྩེ་ལྡན་བླ་མར་གུས་གྱུར་ཅིག །སྐྱེ་ཞིང་སྐྱེ་བར་གྱུར་པ་ན། །ལག་པ་རྡོ་རྗེ་དྲིལ་བུ་འཁྲོལ། །ཟབ་མོའི་ཆོས་ནི་སྟོན་པ་དང༌། །བཙུན་མོའི་ཤུ་ཀྲ་ལེན་འགྱུར་ཤོག །ཀུན་ཏུ་སངས་རྒྱས་ཐམས་
ཅད་ཀྱི། །རྡོ་རྗེ་འཆང་ཆེན་གོ་འཕང་ལྡན། །དགེ་བ་འདི་ཡིས་ཐོབ་འགྱུར་ཞིང༌། །འགྲོ་བ་ལྔས་ཀྱང་ཐོབ་པར་ཤོག །བྱང་ཆུབ་རྡོ་རྗེས་བསྔགས་པ་ཡི། །རྫོགས་པའི་བྱང་ཆུབ་ཕྱིར་སྤྱོད་དང༌། །རྫོགས་སངས་རྒྱས་ཀྱི་སྤྱོད་པ་གང༌། །བདག་ཀྱང་དེ་ཉིད་སྤྱོད་པར་ཤོག །བདུན་པ་ཤིས་བརྗོད་ནི། བྱིན་རླབས་ཅན་གྱི་ཚིགས་བཅད་ཅི་རིགས་པར་བརྗོད། ཐུན་མཚམས་ཀྱི་རྣལ་འབྱོར་བླ་མེད་སྤྱི་དང་ཁྱད་པར་འདི་ཉིད་ཀྱི་རྒྱུད་དང་མན་ངག་ལས་གསུངས་པ་རྣམས་ཅི་ནུས་སུ་ཉམས་སུ་བླང་བར་བྱའོ། །ཚེ་གཅིག་མཆོག་ལ་རབ་སྦྱོར་ལྷ་མཆོག་དང༌། །གསང་སྔགས་ཟབ་མོ་རྒྱུད་ནས་བསྔགས་པ་ཡི། །རྣལ་འབྱོར་ཟབ་མོ་མཐའ་རུ་ཕྱིན་ནས་ཀྱང༌། །བདེ་བ་མཆོག་དང་ལྷན་ཅིག་གར་བྱེད་ཤོག །ཅེས་སྙན་བརྒྱུད་འབྲིང་པོ་དྭགས་པོ་ལུགས་ཡིན་ཀྱང་བཀའ་བབས་གྲུབ་ཆེན་རྨ་སེ་བློ་གྲོས་རིན་ཆེན་ལ་རྒྱུ་དང་མན་ངག་རྒྱས་པར་བཀའ་བབས་པའི་འཁོར་ལོ་ལྔ་རྣམས་ཀྱི་རྩ་བ་དང་གསལ་བྱེད་ཡིག་ཆ་ཕྱག་ལེན་གྱི་རྒྱུན་བཅས་གཅིག་ཏུ་བསྡེབས་ཏེ་བཀའ་བརྒྱུད་རིན་པོ་ཆེའི་རྗེས་ཞུགས་ཀརྨ་ངག་དབང་ཡོན་ཏན་རྒྱ་མཚོ་ཕྲིན་ལས་ཀུན་ཁྱབ་དཔལ་བཟང་པོས་རང་ལོ་གྱ་བདུན་བར་ཤྲཱི་དེ་བཱི་ཀོཊི་ཙཱ་འདྲ་རིན་ཆེན་བྲག་གི་སྒྲུབ་གནས་སུ་བསྡེབས་པའི་ཡི་གེ་པ་ནི་ཉེ་བར་གནས་པ་བློ་གསལ་གསང་སྔགས་བསྟན་འཛིན་ནས་བགྱིས་པ་དགེ་ལེགས་འཕེལ།། །།