གསེར་སྐྱེམས།

གསེར་སྐྱེམས་བཞུགས་སོ། །

ཧཱུྃ། །ང་ནི་དཔལ་ལྡན་རྡོ་རྗེ་འཆང་། ཧཱུྃ། །ང་ནི་དཔལ་ལྡན་ཧེ་རུ་ཀ །ཧཱུྃ། །ང་ནི་སངས་རྒྱས་ཀུན་གྱི་དངོས། ཧཱུྃ། །ང་ནི་རྡོ་རྗེ་གཞོན་ནུ་ཆེ། ཧཱུྃ། །ང་ནི་ཁམས་གསུམ་དབང་ཕྱུག་བདག །སྐྱེད་དང་སྡུད་པའི་བྱེད་པོ་ཡིན། །སྲིད་ཞི་ཀུན་གྱི་གཙོ་བོའོ། །རྒྱལ་བ་ཡབ་ཡུམ་དཀྱིལ་འཁོར་ལྷ། །བྱང་ཆུབ་སེམས་དཔའ་ལྷ་མོར་བཅས། །ཡེ་ཤེས་ཁྲོ་བོ་ཁྲོ་མོ་རྣམས། །འདིར་བྱོན་མཆོད་སྤྲིན་རྒྱ་མཚོ་བཞེས། །མཆོག་དང་ཐུན་མོངས་དངོས་གྲུབ་སྩོལ། །སྐུ་བཞིའི་བདག་ཉིད་སངས་རྒྱས་དང་། །རིག་འཛིན་སྤྲུལ་པའི་ཚོགས་རྣམས་དང་། །རྩ་བརྒྱུད་བླ་མ་ཐམས་ཅད་ཀྱང་། །འདིར་བྱོན། །མཆོག་དང་། །ཡི་དམ་དཀྱིལ་འཁོར་ལྷ་ཚོགས་དང་། །ཐེག་གསུམ་འཕགས་ཚོགས་མ་ལུས་དང་། །བཀའ་སྡོད་ཆོས་སྐྱོང་སྲུང་མ་ཀུན། །འདིར་བྱོན། མཆོག་དང་། ཧཱུྃ། བཀའ་སྲུང་དམ་ཅན་རྒྱ་མཚོ་དང་། །ལས་བྱེད་མ་མོ་མཁའ་འགྲོ་དང་། །སྣང་སྲིད་ལྷ་སྲིན་སྡེ་བརྒྱད་རྣམས། །ང་ཡི་བཀའ་ལས་མ་འདའ་ཞིག །ཧཱུྃ། དུས་གསུམ་བདེ་གཤེགས་བཀའ་ཉན་གཙོ། །དཔལ་གྱི་མགོན་པོ་མཐུ་རྩལ་ཅན། །ལེགས་ལྡན་ནག་པོ་ཆེན་པོའི་ཚོགས། །ལྷ་ཆེན་དཔལ་འབར་ཕྲིན་ལས་མགོན། །ཧྲ་ཀྴད་ལྕམ་དྲལ་འཁོར་དང་བཅས། །ཤྭ་ན་བདག་ཉིད་ས་བདག་མ། །དཀར་མོ་ཉི་ཟླ་ལྕམ་དྲལ་སོགས། །འཁོར་ཚོགས་བསམ་མི་

ཁྱབ་བཅས་ལ། །གསེར་སྐྱེམས་བདུད་རྩི་འདི་འབུལ་ལོ། །བར་ཆད་སོལ་ལ་འདོད་དོན་སྒྲུབས། ཧཱུྃ། ཕྱོགས་སྐྱོང་བཅུ་དང་རྒྱལ་ཆེན་བཞི། །ལྷ་ཆེན་བརྒྱད་དང་ཀླུ་ཆེན་བརྒྱད། །འཇིགས་བྱེད་དགུ་དང་གཟའ་ཆེན་དགུ། །རྒྱུ་སྐར་ཉེར་བརྒྱད་འཁོར་དང་བཅས། །མིང་པོ་གསུམ་དང་སྲིང་མོ་བཞི། །མ་བདུན་དབང་ཕྱུག་ཉི་ཤུ་བརྒྱད། །ཞིང་དུ་སྤྱོད་པའི་མཁའ་འགྲོ་མ། །བཞི་བཅུ་རྩ་བརྒྱད་ལ་སོགས་པ། །ཞིང་སྐྱོང་བཞི་བཅུ་ཞེ་བརྒྱད་དང་། །ཕྱོགས་བཞི་སོ་སོར་གནས་པ་ཡི། །ཐུབ་པ་འབྱུང་པོ་ཉེར་བརྒྱད་དང་། །དམག་དཔོན་གནོད་སྦྱིན་ཉི་ཤུ་བརྒྱད། །སྟོབས་ཆེན་སུམ་ཅུ་རྩ་གཉིས་དང་། །གྲོང་ཁྱེར་སྐྱོང་བ་བཅུ་དྲུག་དང་། །ལྗོངས་ཆེན་སྐྱོང་བ་ལྔ་བརྒྱ་སོགས། །ལངྐ་ལ་སོགས་སྲིན་པོའི་ཚོགས། །ཕོ་ཉ་སུམ་བརྒྱ་དྲུག་ཅུ་དང་། །གྲུབ་པ་དྲང་སྲོང་འཕྲོག་མ་དང་། །ཉི་ཁྱིམ་ཆ་ཡི་ལྷ་རྣམས་དང་། །སྦྱོར་བ་ཉེར་བདུན་བྱེད་པ་བཅུ། །གཤིན་རྗེའི་རྒྱལ་པོ་འཁོར་བཅས་དང་། །གཞན་ཡང་བརྟན་མ་བཅུ་གཉིས་དང་། །སྐྱེས་བུ་གིང་ཆེན་བཅོ་བརྒྱད་དང་། །དགེ་བསྙེན་མཐུ་ཆེན་ཉི་ཤུ་གཅིག །རྗེ་ཡི་མགུར་ལྷ་སུམ་ཅུ་སོགས། །བོད་ཡུལ་གནས་པའི་སྡེ་བརྒྱད་ཀུན། །རང་རང་བུད་མེད་གཡོག་དང་འཁོར། །མཛའ་བཤེས་གཉེན་འདུན་གྲོགས་བཅས་ལ། །

གསེར་སྐྱེམས་བདུད་རྩི་འདི་འབུལ་ལོ། །ཁྱད་པར་བཀའ་ཡི་ཆོས་སྐྱོང་བ། །སྨན་བཙུན་ནགས་སྨན་རྒྱལ་མོ་དང་། །ནང་འཁོར་སྨན་མོ་འབུམ་སྡེ་དང་། །ཆེ་བཙན་དམག་དཔོན་འཁོར་དང་བཅས། །ཡུལ་འདིའི་ལྷ་ཀླུ་གཞི་བདག་ནི། །རྣམ་པ་སྣ་ཚོགས་དཔག་ཡས་ལ། །གསེར་སྐྱེམས་བདུད་རྩི་འདི་འབུལ་ལོ། །གཞན་ཡང་ལྷ་དང་གནོད་སྦྱིན་དང་། །གཤིན་རྗེ་དྲི་ཟ་གྲུལ་བུམ་དང་། །ལྟོ་འཕྱེ་མཁའ་ལྡིང་མིའམ་ཅི། །ཀླུ་དང་ས་བདག་གཉེན་གྱི་སྡེ། །རྒྱལ་པོ་བཙན་དང་མ་མོ་བདུད། །གཟའ་དང་ཐེ་རང་འགོད་པོ་རྨུ། །རི་ དང་ནགས་ཚལ་ཤིང་གི་ལྷ། །དུར་ཁྲོད་ལམ་སྲོང་བཞི་མདོ་དང ་། །ཁྱིམ་དང་མཚན་གཅིག་གནས་ལ་སོགས། །མདོར་ན་འཇིག་རྟེན་དྲེགས་པ་ཅན། །སྲིད་གསུམ་གནས་པ་མ་ལུས་ཀུན། །གསེར་སྐྱེམས་བདུད་རྩི་འདི་འབུལ་ལོ། །འཇིག་རྟེན་འཇིག་རྟེན་འདས་པ་ཡི། །མཐུ་ལྡན་དམ་པ་ཁྱེད་ཀུན་གྱིས། །སངས་རྒྱས་བསྟན་པ་བསྲུང་བ་དང་། །བསྟན་འཛིན་དགེ་འདུན་འཕེལ་བ་དང་། །རྒྱལ་ཁམས་སེམས་ཅན་བདེ་བ་དང་། །གནོད་བྱེད་གདུག་པ་ཚར་ཆོད་ཅིག །ཧཱུྃ། ཁྱད་པར་ངེས་དོན་བསྟན་པ་གསལ་མཛད་པ། །ཆོས་ཀྱི་རྒྱལ་པོ་དཔལ་ལྡན་ཇོ་ནང་པའི། །བསྟན་པ་ཡུལ་རྣམས་ཀུན་ཏུ་དར་བ་དང་། །སྲིད་མཐར་མི་ནུབ་རྒྱལ་མཚན་བསྒྲེང་བ་དང་། །

བར་ཆད་མི་མཐུན་ཕྱོགས་ཀུན་ཞི་བ་དང་། །རྣལ་འབྱོར་བདག་ཅག་གསང་སྔགས་ཟབ་མོ་ཡི། །ཕྲིན་ལས་བསྒྲུབ་པའི་དམ་ཚིག་གྲོགས་མཛོད་ཅིག །ཅི་བསམ་ཡིད་བཞིན་འགྲུབ་པར་མཛད་དུ་གསོལ། འདི་རྒྱས་པ་ཡིན། བསྡུས་པ་ཕྱོགས་སྐྱོང་བཅུ་དང་སོགས་ཤློ་ཀ་བདུན་པོ་ཙམ་གྱིས་ཀྱང་ཆོག་གོ། །མངྒ་ལཾ།། །།