བཀའ་བརྒྱད་བདེ་གཤེགས་འདུས་པའི་སྒྲུབ་ཆེན་གྱི་སྟོང་ཐུན་གདོང་ལྔའི་གད་མོ།
བཀའ་བརྒྱད་བདེ་གཤེགས་འདུས་པའི་སྒྲུབ་ཆེན་གྱི་སྟོང་ཐུན་གདོང་ལྔའི་གད་མོ་ཞེས་བྱ་བ་བཞུགས་སོ། །
ཤེས་རབ་སྙིང་རྗེའི་བདག་ཉིད་ཅན། །སྒྱུ་མ་ལྟ་བུའི་ཆོས་རྣམས་ལ། །ཆགས་ཐོགས་མེད་པ་ནམ་མཁའི་སྐུ། །བླ་མ་དཀྱིལ་འཁོར་འཁོར་ལོར་འདུད། །དེ་ལ་ཐོག་མར་མ་ཏྲཾ་བསྒྲལ་ཆོག་གི་གོང་དུ་རྡོ་རྗེ་སློབ་དཔོན་ནམ་རྒྱལ་ཐེང་ཀྱི་གཙོ་བོས་འདི་ལྟར་བརྡ་སྤྲད་པར་བྱའོ། །ཀྱེ་རྡོ་རྗེའི་འདུས་པ་རྒྱ་མཚོ་ཚོམ་བུ་ཚོགས་སུ་བསྒྲུབ་པའི་གསང་བའི་འདུ་བ་ལ་མངོན་ཏུ་ཕྱོགས་པ་གང་ཞིག་ཟུང་འཇུག་ལྷའི་ཕྱག་རྒྱས་ཕྱི་ནང་གསང་བའི་མཚན་འཛིན་རྩད་གཅོད་པ་ལ་ཐོག་མར་མ་ཏྲཾ་འདུལ་ཆོག་གི་སྐབས་སུ་བབ་པ་སྟེ། དེ་ཡང་མ་ཏྲཾ་ཞེས་བྱ་བ་དོན་ཏུ་ཡིད་ལྷན་སྐྱེས་དང་ཀུན་བརྟགས་ཀྱི་མ་རིག་པའི་རྩལ་ལས་ཆོས་གཉིས་འཛིན་ཏུ་ཤར་བ་རྣམས་ཏེ། ལུས་སྣང་བའི་སྲིད་པ། ངག་ཕྱེད་སྣང་གི་སྲིད་པ། ཡིད་མི་
སྣང་བའི་སྲིད་པས་བསྡུས་པའི་ཆོས་སོ་ཅོག་ལ་གཟུང་བྱར་འཁྲུལ་པ་ཆོས་ཀྱི་བདག་འཛིན་མ་ཏྲཾ་ཀ་རུ་དྲ་སེམས་ཅན་གྱི་ལུས་ལ་གནས། སྨིག་རྒྱུའི་ཕྲེང་བ་ལྟར་རྟེན་འབྲེལ་དུ་འཚོགས་པའི་རྣམ་པར་ཤེས་པ་ཚོགས་བརྒྱད་ལ་ང་དང་བདག་ཏུ་ལྟ་བ་གང་ཟག་གི་བདག་འཛིན་ཁ་ཏྲྃ་ཀ་རུ་དྲ་སེམས་ཅན་གྱི་སེམས་ལ་གནས། ཡོད་པ་སྐུར་འདེབས་དང་མེད་པ་སྒྲོ་འདོགས་ཀྱི་མཐར་ལྷུང་བས་ལས་དང་ལས་ཀྱི་འབྲས་བུ་མཐའ་དག་ཡོངས་སུ་ཆད་ཅིང་མེད་པར་སྨྲ་བ་མི་བདེན་འཁྲུལ་པའི་བདག་འཛིན་ཨ་ཀར་ཤ་རུ་དྲ་སེམས་ཅན་གྱི་ངག་ལ་གནས་པ་སྟེ། མཐར་ལྟ་དང་འཇིགས་ཚོགས་ལ་མངོན་པར་ཞེན་པས་སྐྱེ་འཆིའི་བདེ་སྡུག་སྤེལ་མར་འབྱུང་བའི་མ་རིག་འཁྲུལ་སྣང་གི་
དུར་ཁྲོད་དང་། སྐྱེ་འཇུག་གི་ཕྲེང་བ་བར་མ་ཆད་པའི་ཕྱི་མའི་ལས་ཀྱི་གཟུགས་སྒྲུབ་པ་ཡིད་དང་རྣམ་ཤེས་ཀྱི་རྒྱ་མཚོ་ཀུན་འབྱུང་སེམས་ཀྱི་དུར་ཁྲོད་ལ་བདག་ཏུ་བཟུང་བའི་དྲེགས་པ་ཅན་དེ་དག །དབྱིངས་དང་ཡེ་ཤེས་གཉིས་སུ་མེད་པ་རྟོགས་པ་ལྷའི་དུར་ཁྲོད་ཆོས་ཀྱི་དབྱིངས་ཐམས་ཅད་འདུས་པ་ཆེན་པོའི་ཀློང་དུ་ལྟ་བ་གྱད་དུ་གྱུར་པས་བསྒྲལ་ཞིང་། རྩ་རླུང་ཐིག་ལེའི་རང་བཞིན་ཕྱི་རོལ་དུ་ཤར་བ་གདོད་ནས་གྲུབ་པའི་སྒྲུབ་པ་གནས་ཀྱི་དུར་ཁྲོད་ཆེན་པོར་བྱིན་གྱིས་བརླབས་པ་ལ། གསང་སྔགས་ཐབས་ཀྱི་ཆེ་བ་ཡིན་པས་བརྡ་དང་ཐབས་ཀྱིས་བཏུལ་བའི་ཚུལ་ཡང་། སྔོན་བྱུང་བ་འདས་པའི་དུས་ན། བསྐལ་པ་གདུལ་དཀའ་རབ་ཏུ་དགའ་བ་ལ་འཇིག་རྟེན་གྱི་ཁམས་སྦྱངས་དཀའ་བཞེས་བྱ་བར་དེ་བཞིན་གཤེགས་པ་འཇིག་རྟེན་གྱི་སྒྲོན་མེར་གྱུར་པས་མཐའ་དྲུག་གི་ཚུལ་གྱིས་ཆོས་སྟོན་པ་ལ། ལོག་པར་རྟོག་པའི་སེམས་ཅན་ཞིག་གིས་གབ་པའི་གསང་བ་སྒྲ་ཇི་བཞིན་དུ་སྤྱད་པའི་ལས་ཀྱི་ངན་སོང་གི་སྡུག་བསྔལ་སྣ་ཚོགས་པ་མྱོང་བའི་མཐར་རྒྱུ་མཐུན་གྱི་འབྲས་བུས་འཇིག་རྟེན་བདག་པོ་དབང་ཕྱུག་ཡབ་ཡུམ་གྱི་བུ་མ་ཏྲཾ་རུ་དྲ་ཞེས་བྱ་བ་ཤིན་ཏུ་འཇིགས་ལ་གཏུམ་ཞིང་མ་རུངས་པ་ཞིག་ཏུ་སྐྱེས་ནས་འབྲས་བུ་ཆེ་བའི་གནས་རིས་ཀྱི་ལྷ་མན་ཆད་དབང་དུ་བསྡུས་ནས་ཁམས་གསུམ་མཐའ་དག་ངན་འགྲོའི་ལས་ཀྱི་ལམ་མི་བཟད་པ་ལ་གཞོལ་བ་དེའི་ཚེ། རྒྱལ་བ་མ་ལུས་ཤིང་
ལུས་པ་མེད་པའི་རྡོ་རྗེ་གསུམ་གྱི་གསང་བ་གཅིག་ཏུ་བསྡུས་པ་དཔལ་ཆེན་པོ་ཧེ་རུ་ཀ་ཉིད་འབར་བ་ཆེན་པོའི་གཟུགས་ཀྱི་སྐུར་བཞེངས་ནས་རྡོ་རྗེ་ཁྲོ་བོའི་སྤྲིན་དང་བཅས་པས། དུར་ཁྲོད་ཀྱི་བདག་པོ་མ་ཏྲཾ་རུ་དྲ་བསྒྲལ་ཞིང་གནས་སྤར་ཏེ་ཆོས་སྐྱོང་བའི་སྲུང་མ་མ་ཧཱ་ཀཱ་ལར་དབང་བསྐུར། མ་འོངས་ཐལ་བས་ཁེབས་པའི་ཞིང་དུ་བཅོམ་ལྡན་འདས་ཐལ་བའི་དབང་པོར་འཚང་རྒྱ་བར་ལུང་བསྟན། ཆུང་མ་ཀྲོ་དྷཱི་ཤྭ་རི་མ་ལ་མ་ཆགས་ཐབས་ཀྱིས་རོལ་པ་མཛད་དེ་སྲས་མཆོག་བཛྲ་ཧེ་རུ་ཀར་སྤྲུལ། སླས་ཀྱི་འཁོར་བདུད་ཀྱི་བུ་མོ་མྱོས་བྱེད་མ་ལ་སོགས་པ་བརྒྱད་ལས་གཽ་རཱི་མ་བརྒྱད། ནང་གི་སྒོ་སྲུང་སེང་མོ་ལ་སོགས་པ་བརྒྱད་ལས་སི༚་ཧ་མ་བརྒྱད། ཕྱིའི་སྒོ་སྲུང་བཞི་ལས། རྟ་གདོང་སྒོ་མ་བཞིར་སྤྲུལ། འཁོར་གྱི་ཡི་དྭགས་ཆེན་པོ་འདུག་པ་ཅན་རྣམས་དབང་དུ་བསྡུས་ཤིང་བྲན་ཏུ་བྱས། རུ་དྲའི་ཕུང་པོ་ཛམ་བུའི་གླིང་དུ་བོང་བ་ལས་ཡུལ་ཆེན་པོ་བརྒྱད་དང་དུར་ཁྲོད་ཆེན་པོ་བརྒྱད། དེ་དག་རྣམས་སུ་རང་བྱུང་གི་མ་མོ་མཆོད་རྟེན་ཞིང་སྐྱོང་ཀླུ་དང་སྤྲིན་ལ་སོགས་པས་བརྒྱན་ཅིང་སྐལ་ལྡན་རྣམས་ཉམས་རྟོགས་སྤོང་། སྐལ་མེད་རྣམས་ཚར་གཅོད་པའི་གནས་སུ་བྱིན་གྱིས་རླབས་པ་དེ་དག་སྔོན་བྱུང་སྟོན་པའི་རྣམ་ཐར། རྗེས་འཇུག་གདུལ་བྱའི་ཉམས་ལེན་ཡིན་པས་བསྒྲལ་ཆོག་ལ་འཇུག་པ་འདི་ཡང་དོན་དང་ལྡན་པ་སྟེ། དཔལ་ཆེན་པོའི་རྣམ་ཐར་གྱི་རྗེས་སུ་འཇུག་པར་འགྱུར་
བ་དང་། མ་ཏྲ་བསྒྲལ་བའི་ཁོག་པ་གཞལ་ཡས་ཁང་དུ་བྱིན་གྱིས་བརླབས་པའི་ནང་དུ་བསྒྲུབ་ན་བཀྲ་ཤིས་པ་དང་། སྲིད་པ་གསུམ་གྱི་བགེགས་ཀྱི་རྒྱལ་པོ་བསྒྲལ་བས་བགེགས་གཞན་གྱིས་བར་ཆད་མི་ནུས་ཤིང་དངོས་གྲུབ་རྣམ་གཉིས་མྱུར་དུ་ཐོབ་པའི་དགོས་པ་ཡོད་ལ། དེ་ཡང་དབང་པོ་རབ་ཀྱིས་ཆོས་ཐམས་ཅད་བྱང་ཆུབ་ཀྱི་སེམས་ལས་གུད་ན་མེད་ཅིང་སེམས་ཉིད་བདག་མེད་ཕྱོགས་བྲལ་རང་བྱུང་གི་ཡེ་ཤེས་ཡུལ་སེམས་གཉིས་མེད་སྐྱེ་འགག་ལས་འདས་པར་རྟོགས་པས། གཉིས་སྣང་ལ་དགག་སྒྲུབ་བླང་དོར་མེད་པར་རང་ཤར་རང་གྲོལ་ཆོས་ཉིད་ཀྱི་རོལ་པ་འབའ་ཞིག་ཏུ་མཐོང་བའམ། དབང་པོ་འབྲིང་གིས་སྣང་སྲིད་ལྷ་དང་ལྷ་མོར་རིག་པ། ཐ་མས་ཀྱང་དམ་རྫས་ཆེན་པོ་ལྔ་ཡི་རང་བཞིན་ཏུ་ཤེས་པ་ནི་དོན་ཆོས་ཉིད་ཀྱིས་འདུལ་བ་ཞེས་བྱ་བ་འཁྲུལ་པའི་རྩད་ཆོད་པས་བར་ཆོད་ཀྱི་ཁུངས་བརྟོལ་བ་སྟེ། རྩ་རྒྱུད་ལས། མཐོང་དང་རིག་དང་ཤེས་དང་སྤྱད༔ འདི་ལས་འདའ་བར་མ་གྱུར་ན༔ ལོག་པར་ལྟ་བ་འདུལ་ནུས་ཤིང་༔ སངས་རྒྱས་རྣམས་དང་ང་ཉིད་འགྲུབ༔ ཅེས་གསུངས་ཤིང་། དེ་ལྟ་བུའི་དོན་མཚོན་པའི་ཕྱིར་རྟགས་ཆོགས་འདུལ་བ་ལའང་། རྒྱུད་ལས། ཤིན་ཏུ་ཁྲོ་ཞིང་གཏུམ་བ་ལ༔ ཞི་བས་ཕན་པར་མི་འགྱུར་ཏེ༔ ཤེས་རབ་ཐབས་ཀྱི་ངོ་བོ་ལས༔ ཁྲོ་བོ་དེ་བཞིན་གཤེགས་སྤྲུལ་མཛད༔ ཁྲོ་བོའི་
ཆུལ་འཆང་ཁྲོས་པས་ཀྱང་༔ འཇིག་རྟེན་གསུམ་རྣམས་བསྲེག་བྱེད་ན༔ སངས་རྒྱས་ཐམས་ཅད་ཁྲོས་པ་ཡིས༔ ཁམས་གསུམ་མ་ལུས་སྨོས་ཅི་དགོས༔ ཞེས་གསུངས་པ་ལྟར་རྣལ་འབྱོར་པ་རྣམས་དཔལ་ཁྲག་འཐུང་རོལ་པའི་ལྷ་སྐུ་ཕྱག་རྒྱའི་གསལ་སྣང་དང་ང་རྒྱལ་རབ་ཏུ་འབར་བས་མ་ཏྲཾ་བཀུག་ཅིང་བསྒྲལ་ཏེ་ཁོག་པ་གཞལ་ཡས་ཁང་དུ་བྱིན་གྱིས་རླབས་པའི་ནང་དུ་འཇུག་པ་སོགས་གཞུང་ལས་འབྱུང་བའི་ཚིག་གི་བསྒོམ་དོན་གསལ་འདེབས་བཞིན་པས་ཆོ་གའི་བྱ་བ་ལ་འཇུག་པར་ཞུ།། ༈ །།སྒྲུབ་པ་པོ་རྣམས་གནས་སུ་འགྲོད་པའི་སྐབས། ད་ལམ། ཐེག་པ་ཀུན་གྱི་ཡང་རྩེ། མདོ་རྒྱུད་ཐམས་ཅད་ཀྱི་ཉིང་ཁུ། བཀའ་བརྒྱད་བདེ་གཤེགས་འདུས་པའི་ཚོམ་བུ་ཚོགས་སྒྲུབ་ཆེན་མོ་གནང་བ་ལ། མཛད་པ་ཆོ་འཕྲུལ་ལྷའི་ལུང་ལས། ལྷ་ཞེས་བྱ་བ་བྱང་ཆུབ་སེམས། །དེ་ནི་རྒྱུད་དུ་རབ་ཏུ་བརྗོད། །ཐ་སྙད་ཙམ་དུ་ཕྱེ་བ་ན། །གཞི་ལམ་འབྲས་བུ་གསུམ་དུ་བརྗོད། །ཅེས་སྦྱང་གཞི་འགྲོ་བ་ཐམས་ཅད་རང་བཞིན་གྱིས་ལྷའི་དཀྱིལ་འཁོར་བྱང་ཆུབ་སེམས་ཀྱི་བདག་ཉིད་དུ་གནས་ཀྱང་། སྦྱང་བྱ་གཉིས་འཛིན་ཆགས་སྡང་གི་རྣམ་པས་བྲལ་བྱའི་ཚུལ་དུ་བསྒྲིབས་པ་ཉིད། སྦྱོང་བྱེད་ཞི་ཁྲོ་དཀྱིལ་འཁོར་འཁོར་ལོའི་རྣམ་པ་ལམ་དུ་བྱས་པས། སྦྱང་འབྲས་གདོད་ནས་བཞུགས་པའི་ཟུང་འཇུག་གི་ཕྱག་རྒྱ་མངོན་ཏུ་བྱེད་པའི་
ཐབས་ཁྱད་པར་ཅན་དང་དགོས་པ་རྗེས་སུ་འབྲེལ་བས་ཕུན་སུམ་ཚོགས་པ་ལྔས་བསྒྲུབ་པའི་གཞི་བཟུང་བ་ལ། ས་བརྟགས་བསླང་སྦྱོང་ཞིང་ཕྱི་ནང་གསང་བའི་མཚམས་གཅོད། དཀྱིལ་འཁོར་བྲི་ཞིང་རྒྱན་འགོད་པ་སོགས་སྔོན་ཏུ་སོང་ནས་སྒྲུབ་པ་པོ་རྣམས་གནས་སུ་འགོད་པའི་སྐབས་སུ་བབས་པ་སྟེ། དེ་ཡང་གནས་ཕུན་སུམ་ཚོགས་པ་གྲུབ་པའི་དཔའ་བོ་རྣམས་ཀྱིས་དཔལ་ཧེ་རུ་ཀའི་གནས་སུ་བྱིན་གྱིས་རླབས། གཙུག་ལག་གི་གཞུང་ལས་བཤད་པའི་སའི་དཔལ་ཁ་དང་ལས་བཞི་སྒྲུབ་པའི་མཐུན་རྐྱེན་འཛོམས་པས་བཀྲ་ཤིས་དག་པའི་གནས། ལྷུན་གྲུབ་ཡིད་འོང་གི་གནས། འཕྲལ་རྐྱེན་སྒྲུབ་པའི་གནས་རྣམས་ཀྱི་མཚན་ཉིད་ཀུན་ལྡན་ཏེ་ཕྱིའི་གནས་དང་། ཕྱི་ནང་སྣོད་བཅུད་རང་ལུས་དང་བཅས་པ་གདོད་ནས་གདན་གསུམ་ཚང་བའི་ལྷའི་འཁོར་ལོར་རྣམ་པར་དག་པ་ཡིན་པ་ལ་ཡིན་པར་ཤེས་པ་ནང་གི་གནས་དང་། འཁོར་འདས་ཀྱི་ཆོས་ཐམས་ཅད་ཆོས་ཉིད་དེ་ཁོ་ན་ཉིད་དུ་ལྷུན་གྱིས་གྲུབ་པས་གང་ན་གནས་ཀྱང་ཆོས་ཀྱི་དབྱིངས་འགྱུར་བ་མེད་པའི་ཀློང་དུ་གནས་པར་རྟོགས་པ་གསང་བའི་གནས་ཀྱི་མཚན་ཉིད་མཐའ་དག་ཚང་། སྟོན་པ་ཕུན་སུམ་ཚོགས་པ་རྡོ་རྗེ་སློབ་དཔོན་ལྟ་བ་གཉིས་སུ་མེད་པའི་གདེང་དང་ལྡན། སྒོམ་པ་བསྐྱེད་རྫོགས་ལས་སུ་རུང་། སྤྱོད་པས་མ་ཡ་འབུམ་སྡེ་རྣམ་པར་དག །དབང་དང་མན་ངག་གི་བཀའ་བབ། ཐེག་པ་རིམ་དགུའི་དོན་ཐུགས་སུ་ཆུད།
ངང་རྒྱུད་རིང་ཞིང་ཕན་སེམས་ཆེ་བ། ཚོགས་ཀྱི་དཀྱིལ་འཁོར་ཆེན་པོའི་མགོན་དང་དཔུང་གཉེན་ཏུ་གྱུར་པ་དོན་སླད་མཚན་ནས་སྨོས་པ། རྡོ་རྗེ་སློབ་དཔོན་ཆེན་པོ་མཚན་འདི་ཞེས་བྱ་བ་དང་། འཁོར་ཕུན་སུམ་ཚོགས་པ་བདེ་ཆེན་རྒྱུད་ལ་སྐྱེད་པའི་འཁོར་གཟུངས་མ་ལུས་ངག་ཡིད་གསུམ་གྱི་མཚན་ཉིད་དང་ལྡན་པ། རིགས་ལྔའི་དངོས་གྲུབ་སྒྲུབ་པའི་འཁོར་རྡོ་རྗེ་རིན་ཆེན་པདྨ་ལས་ཀྱི་རིགས་ཀྱི་གཙོ་བོ་བཞི་ཡུམ་དང་བཅས་པ། དོན་གཉིས་ཕྲིན་ལས་སྒྲུབ་པའི་འཁོར་རྒྱལ་ཐེབ་ཀྱི་སྟོན་པ་བཞི། བར་ཆད་དགྲ་བགེགས་སྒྲོལ་བའི་འཁོར་རྡོ་རྗེ་སྤྱན་པ་དང་། རྡོ་རྗེ་མཚམས་པ་གིང་དང་བཅས་པ། མཆོད་པའི་ཞལ་ཟས་སྦྱོར་བའི་འཁོར་རྡོ་རྗེ་དྲོད་འཛིན་བྱན་ཕོ་མོ་དང་བཅས་པ། དད་འདུས་ཐུགས་རྗེས་བཟུང་བའི་འཁོར་མཆེད་དང་ལྕམ་དྲལ། ཕྱི་ནང་བརྡ་སྦྱོར་བྱེད་པའི་འཁོར་རྡུལ་ཕྱག་སྐྱེས་བུ་སྟེ། ཐམས་ཅད་ཀྱང་བསགས་པ་སྔོན་ཏུ་སོང་བའི་སྐལ་པ་ཅན། ང་རྒྱལ་དང་ཕྲག་དོག་ཆུང་བ། དད་པ་དང་བརྩོན་འགྲུས་ཆེ་བ། ལྷག་པར་རྒྱལ་ཐེབ་རྣམས་ཀྱང་དབང་དང་དམ་ཚིག་ལྡན་ཞིང་ཐོས་བསམ་གྱིས་རྒྱུད་དག །དེ་ཁོ་ན་ཉིད་ལ་བློ་སྦྱངས་པ་ཤ་སྟག་ལགས་པ་དང་། དུས་ཕུན་སུམ་ཚོགས་པ། ཐོག་མཐར་དབྱེར་མེད་དུས་བཞི་མཉམ་པ་ཆེན་པོའི་ངང་ལས་གདུལ་བྱའི་སྣང་ངོར། བདག་ཅག་གི་སྟོན་པ་མཉམ་མེད་དོན་ཐམས་ཅད་གྲུབ་
པ་ལུ་བི་ནི་ཡི་སྐྱེད་ཚལ་དུ་སྐུ་བལྟམས་པ་དང་། རྡོ་རྗེ་གདན་དུ་མངོན་པར་སངས་རྒྱས་པ་དང་། རྩ་མཆོག་དྲུང་དུ་དགོངས་པ་མྱ་ངན་ལས་འདས་པ་སྟེ་དུས་ཆེན་སུམ་མཛོམས་ས་ག་ཟླ་བའི་དམར་ཕྱོགས་ཚེས་བཅུའི་གཟའ་སྐར་ཡོ་བྱད་དགེ་ཞིང་ཤིས་པ། ཡོ་བྱད་ཕུན་སུམ་ཚོགས་པ་འཚོ་བ་ཟས། ནད་ཟློག་སྨན། དགྲ་ཟློག་མཚོན་སོགས་ཕྱི་ཡི་ཡོ་བྱད། རྟེན་རྫས་སྒྲུབ་རྫས། རྒྱན་རྫས། མཆོད་རྫས། དབང་གི་རྫས་ཏེ་ནང་གི་ཡོ་བྱད། ཏ་ན་གྷ་ན། ཤེས་རབ་སྙིང་རྗེ་སྟེ་གསང་བའི་ཡོ་བྱད་དུ་བཤད་པ་སྤྱི་དང་ཁྱད་པར་ཕོ་བྲང་ཁང་ཁྱིམ་དགུའི་རྟེན་ཐུན་མོང་མ་ཡིན་པ། བུམ་པ་མར་མེ་ཐོད་པ་དང་། །ཕྱག་རྒྱ་ཕུར་བུ་ཙིཏྟ་དང་། །མཆོད་གཏོར་ལིངྒ་ཉའུ་དག །སྒྲུབ་རྫས་རྟེན་གྱི་མཐར་ཐུག་ཡིན། །ཞེས་ཕྲིན་ལས་ཀྱི་ལུང་ལས་གསུངས་པ། །ཆེ་མཆོག་གི་བུམ་གཅིག །ཡང་དག་གི་མེ་གཅིག་ལ་སོགས་པ་རྟེན་སྒྲུབ་མཆོད་པའི་རྫས་གཙང་ལ་མ་ཚང་བ་མེད་པར་འདུ་བྱས། དཀྱིལ་འཁོར་གྱི་རི་མོ་བཀྲ་ཡ་ལེ། སྣང་གསལ་མར་མེ་འོད་ལྷག་གེ། བདུག་སྤོས་ཀྱི་དྲི་ངད་ཐུ་ལེ། རྡོ་རྗེ་མཆེད་ལྕམ་སྤྲོ་དགའ་དང་བྱིན་རླབས་ཐིབས་སེ་འདུ་བའི་སྐབས་འདིར། སྟོན་པ་རྡོ་རྗེ་སློབ་དཔོན་ཉིད་བསྐྱེད་རྫོགས་ཀྱི་དགོངས་པ་མཛད་ཅིང་ཟབ་མོའི་དོན་སྟོན་ཏེ་རྣལ་འབྱོར་ཡོངས་ཀྱི་མགོན་ཏུ་འདུས་པ་རྒྱ་མཚོའི་དབུས་སུ་རྡོ་རྗེའི་ཁྲི་ཆེན་པོ་ལ་བཞུགས་པར་གསོལ། རིགས་བཞིའི་བསྐྱེད་རྫོགས་དང་ཛ་བ་བསྙེན་བགྲང་བའི་
རྒྱལ་ཚབ་ཆེན་པོ་བཞི་ཕྱོགས་བཞི། ཡབ་ཀྱི་དགོངས་པ་དང་བསྟུན་ཞིང་སྦྱོར་བའི་སྒྱུ་རྩལ་ཤེས་པའི་གཟུངས་མ་ཀུན་ཏུ་བཟང་མོ་རྣམས་ཡབ་ཀྱི་གཡོན་ཟུར། ཆོས་འཆད་པ་རྡོ་རྗེ་རྒྱལ་ཐེབ། དངོས་གྲུབ་ཀྱི་རྫས་སྟེར་བའི་རིན་ཆེན་རྒྱལ་ཐེབ། དབང་བསྐུར་བའི་བྱ་བ་བྱེད་པ་དབང་གི་རྒྱལ་ཐེབ། ཕྲིན་ལས་ཀྱི་གཞུང་བསྲང་བ་ལས་ཀྱི་རྒྱལ་ཐེབ་རྣམས་ཀྱང་ཕྱོགས་བཞི། ཕྱི་ནང་བར་ཆད་སྲུང་བའི་བརྟུལ་ཞུགས་ཅན་རྡོ་རྗེ་མཚམས་པ་ནུབ་བྱང་། སྒྲོལ་བའི་ལས་དང་བརྡ་ལ་མཁས་པ་རྡོ་རྗེའི་ཀིང་ཀར་རྣམས་ལྷོ་ནུབ། གཡོ་སྒྱུ་མེད་པར་མི་མ་ཡིན་མཐོང་ཞིང་ཉུ་ལེའི་བར་ཆད་ཟློག་ནུས་པའི་མིག་རྣོན་རྡོ་རྗེ་སྤྱན་པ་དང་། དུས་སྦྱོར་དབྱུ་གུ་སོགས་ལ་མཁས་ཤིང་ཕྲིན་ལས་ཀྱི་སྐབས་ཕྱེད་པ་རྡོ་རྗེ་དྲོད་འཛིན་པ་གཉིས་བྱང་ཤར། པག་ལྡན་གཙང་སྦྲ་ཆེ་ཞིང་རྣམ་སྨིན་ལ་འཛེམ་པའི་རྡོ་རྗེ་བྱན་པོ་བྱན་མོ་དང་། ང་རྒྱལ་མེད་ཅིང་བཀའ་བཞིན་སྲི་ཞུ་ལ་བརྩོན་པའི་རྡོ་རྗེ་རྡུལ་ཕྱག་པ་རྣམས་ཤར་ལྷོ། མཆེད་ལྕམ་རིན་པོ་ཆེ་ལྟ་བུའི་གང་ཟག་རྣམས་གྲལ་གྱི་བར་དུ་བཞུགས་ཏེ། ཐམས་ཅད་ཀྱང་། ཆོས་སྤྱོད་ལ་བརྩོན་འགྲུས་ཆུང་བ་ལུས་ཀྱི་སྐྱོན་དང་། སྨྲ་བ་མང་ཞིང་བཟླས་པ་ལ་མི་བརྩོན་པ་ངག་གི་སྐྱོན་དང་། ཞེ་སྡང་ཆེ་ཞིང་བྱམས་པ་ཆུང་བ་ཡིད་ཀྱི་སྐྱོན་དང་། བརྗེད་ངས་ཆེ་ཞིང་བག་ཟོན་ཆུང་བ་དམ་ཚིག་གི་སྐྱོན་དང་། ཆང་ལ་དགའ་ཞིང་གཉིད་ཆེ་
བ་ཏིང་ངེ་འཛིན་གྱི་སྐྱོན་དང་། གཡེང་བ་ལ་དགའ་ཞིང་བསྒོམ་སྒྲུབ་ལ་སྐྱོབ་དད་པའི་སྐྱོན་ཏེ་སྐྱོན་དྲུག་པོ་རྣམ་པ་ཐམས་ཅད་དུ་སྤང་ཞིང་། རྟོགས་པ་ཆེ་བས་ཆོས་ཉིད་དང་མི་ཕྱེད་པ། དད་གུས་ཆེ་བས་བླ་མ་དང་མི་ཕྱེད་པ། དམ་ཚིག་ཆེ་བས་ཡི་དམ་དང་མི་ཕྱེད་པ། བརྩེ་གདུང་ཆེ་བས་མཆེད་ལྕམ་དང་མི་ཕྱེད་པ། བརྟུལ་ཞུགས་ཆེ་བས་དམ་རྫས་དང་མི་ཕྱེད་པ། སྦྱོར་སྒྲོལ་ལ་བརྩོན་པས་གཟུངས་མ་དང་མི་ཕྱེད་པ། སྙིང་རྗེ་ཆེ་བས་སེམས་ཅན་དང་མི་ཕྱེད་པ། ཏིང་ངེ་འཛིན་གསལ་བས་དངོས་གྲུབ་དང་མི་ཕྱེད་པ། སྐྱོན་དང་བྲལ་བས་འབྲས་བུ་སངས་རྒྱས་དང་མི་ཕྱེད་པ་སྟེ་ཡོན་ཏན་དགུ་པོ་ལ་རྣམ་པ་ཀུན་ཏུ་བརྩོན་ཞིང་གཞན་ཡང་། རྩ་རྒྱུད་ལས། སྙིགས་མའི་དུས་ཀྱི་སྟོན་པ་དང་༔ ད་ལྟ་སངས་རྒྱས་འདི་དག་ལ༔ ཐ་དད་དུ་ནི་ཅུང་མིན་བརྟག༔ རྡོ་རྗེ་གསང་བའི་གྲོགས་དག་ཀྱང་༔ དེ་དང་རྗེས་སུ་མཐུན་པར་བལྟ༔ སྒོ་གསུམ་གུས་པས་བརྩོན་བྱ་ཞིང་༔ དམ་པའི་ཚིག་ལས་འདའ་མི་བྱ༔ ཞེས་གསུངས་པའི་དོན་ལ་བསླབ་པ་སོགས་གང་བསྒོ་བའི་ལས་རྣམས་བདེ་བླག་ཏུ་བསྒྲུབ་པར་བགྱིའོ་སྙམ་པའི་ཐུགས་འདུན་དང་ལྡན་པའི་འདིའི་རྗེས་ཟློས་གནང་བར་ཞུ།། ༈ །།དཔལ་གྱི་རྟགས་གདབ་པའི་སྐབས་སུ། འདིར་འདུས་པའི་སྒྲུབ་པ་པོ་རྣམས་དོན་གྱི་དག་པ་སྦྱར་བས་ལྷ་དང་གཉིས་སུ་མེད་པར་རྟོགས་པ་དང་། རྟགས་ཀྱི་ཕྱག་རྒྱ་བཅིངས་པས་མཁའ་འགྲོ་དམ་ཅན་ཕོ་
མོ་རྣམས་ཀྱིས་སྒྲུབ་པ་པོར་ཤེས་པ་དང་། བར་ཆད་བདུད་ཀྱིས་མི་ཚུགས་ཤིང་ཐབས་ཀྱི་ཐེག་པའི་རིགས་སུ་ངེས་པའི་འབྲས་བུ་མྱུར་དུ་འགྲུབ་པ་སོགས་དགོས་པ་དུ་མ་དང་ལྡན་པའི་ཧེ་རུ་ཀ་རོལ་པ་ཆེན་པོའི་ཆས་སུ་འཇུག་པའི་སྐབས་སུ་བབ་པ་སྟེ། ཆེ་མཆོག་འདུས་པ་རྩ་བའི་རྒྱུད་ལས། མ་འོངས་དུས་ན་སྐྱེས་བུ་དག༔ དུས་གསུམ་སངས་རྒྱས་ཀུན་ངོ་བོ༔ སྐུ་གསུམ་ཕྲིན་ལས་ཆེ་བའི་མཆོག༔ ཀུན་ཏུ་བཟང་པོ་ཀུན་གྱི་བདག༔ ཧེ་རུ་ཀ་ཡི་ཚུལ་འཆང་བ༔ བརྟུལ་ཞུགས་བཟང་པོ་དེ་ལ་ནི༔ མ་རིག་ལོག་པར་ལྟ་བའི་ཚོགས༔ བདུད་བཞིའི་ཕྱོགས་སུ་གཏོགས་རྣམས་ཀྱིས༔ འཚེ་ཞིང་བར་དུ་གཅོད་པའམ༔ གདུག་ཅིང་འདའ་བར་ནུས་མ་ཡིན༔ ཞེས་གསུངས། དེ་ཡང་རྟགས་ཕྱག་རྒྱའི་དབང་དུ་བྱས་ན། སྔོན་དཔལ་ཆེན་པོས་ཡི་དྭགས་ཀྱི་གཙོ་བོ་དུར་ཁྲོད་བདག་པོ་བཏུལ་ཞིང་དེའི་ཆས་རྣམས་དཔའ་བའི་རྟགས་སུ་བཞེས་པ་ལ་བྱུང་བ། རུ་དྲ་སྡེ་གསུམ་བསྒྲལ་བ་ཐོད་པ་ཚར་གསུམ་གྱི་ཕྲེང་བ། རུ་དྲའི་ཆུང་མ་མ་ཆགས་ཐབས་ཀྱི་རོལ་པས་དབང་དུ་བསྡུས་པ་རཀྟའི་ཐིག་ལེ། ཚངས་པ་ཆེན་པོ་བསྒྲལ་བ་ཞིང་ཆེན་གྱི་གཡང་གཞི། བརྒྱ་བྱིན་དང་དེའི་ཞོན་པ་གླང་པོ་ཆེ་བཏུལ་བ་གླང་ཆེན་གྱི་ཀོ་རློན། གཟའ་ཆེན་ཉི་མའི་བུ་མོ་སྟག་གདོང་སྤྱན་གཅིག་མ་བཏུལ་བ་སྟག་གི་
ཤམ་ཐབས། ཀླུ་རྒྱལ་གདུག་པ་ཅན་བཏུལ་བ་སྦྲུལ་ནག་གི་ཆུན་པོ། སྲིན་མོ་ཉེར་བཞི་ལ་སོགས་པ་བཏུལ་བ་ཐལ་ཆེན་གྱི་ཚོམ་བུ། དབང་མོ་ཉེར་བརྒྱད་དབང་དུ་བསྡུས་པས་ཞག་གི་ཟོ་རིས་ལ་སོགས་པ་བྱུང་བ་ཡིན་ཞིང་། བརྡའི་དག་སྦྱོར་གྱི་དོན་ནི། ཡེ་ཤེས་ལྔ་པོ་དོན་དམ་སྤྲོས་བྲལ་གྱི་དབྱིངས་སུ་གཅིག་པས། ཐོད་སྐམ་ལྔའི་དབུ་རྒྱན་རྒྱུ་མའི་ཁོང་སེང་གིས་སྦྲེལ་བ། ཐུགས་རྗེ་ཅི་ཡང་འགྱུར་བ་བཞི་ཡིས་འགྲོ་དོན་མཛད་པའི་གླང་ཀོ། ཕྱིན་ཅི་ལོག་བཞི་དང་བྲལ་བའི་སྦྲུལ་ཆུན། ཕྲིན་ལས་རྣམ་པ་བཞི་དང་ཚད་མེད་བཞི་ལྷུན་ལ་རྫོགས་པའི་གཡང་གཞི། ཁམས་གསུམ་རྟོག་པ་འཇོམས་པའི་སྟག་ཤམ། མ་རིག་རྣམ་རྟོག་གི་བུད་ཤིང་ཡེ་ཤེས་ཆེན་པོའི་དབྱིངས་སུ་སྦྱངས་པའི་མེ་དཔུང་། དུག་ལྔ་དབང་དུ་སྡུད་པ་ཁྲག་ཆེན་གྱི་ཐིག་ལེ། རྒྱུ་དྲུག་འཁོར་བའི་བཅུད་ཚོགས་གཉིས་ཀྱི་གསོས་སུ་བླང་བ་ཞག་ཆེན་གྱི་སོར་རིས། སྐྱེ་ཤི་རྩད་ནས་གཅོད་པ་ཐལ་ཆེན་གྱི་ཚོམ་བུ། དུག་གསུམ་སྐུ་གསུམ་དུ་རྫོགས་པ་ཐོད་ཕྲེང་ཚར་གསུམ། སྟོང་པ་ཉིད་ལ་བདུད་བཞིས་སྐྱེད་དུ་མེད་པའི་རྡོ་རྗེའི་གོ་ཁྲབ་བཅས་དཔལ་གྱི་ཆས་བཅུ་སྟེ། རང་རང་གི་རིགས་དང་མཐུན་པར་དཔལ་ཆེན་སྒྲུབ་སྡེ་བརྒྱད་དམ། སྐབས་སུ་གང་ཡིན་པའི་དཀྱིལ་འཁོར་འཁོར་ལོའི་གསལ་སྣང་དང་སྙེམས་པས་དཔལ་གྱི་ཆས་རྣམས་མངའ་གསོལ་དུ་བཞེས་ཤིང་
དོན་གྱི་དག་དྲན་དང་ལྡན་པར། དུག་ལྔ་རྩད་ནས་གཅོད། སྟོབས་བཅུ་དང་མི་འཇིགས་པ་ལྡན། མ་མོ་མཁའ་འགྲོ་ཐམས་ཅད་ལ་དབང་བསྒྱུར། གདུག་པ་ཅན་ཟིལ་གྱིས་མནན། ཡི་གེ་འཁོར་ལོ་ཚོགས་ཆེན་གྱིས་ལ་མངའ་མཛད་པ་ཞི་ཁྲོ་འདུས་པའི་ལྷའི་ཚོམ་བུའི་དགོངས་པ་ལས་གཡེལ་བ་མེད་པའི་ངང་འདིའི་རྗེས་ཟློས་གནང་བ་ཞུ།། ༈ །།དམ་ཚིག་གི་སྟོང་ཐུན་དང་འབྲེལ་བར་ལོ་རྒྱུས་ཅུང་ཟད་བཤད་པ་ནི། དེ་ཡང་བདག་ཅག་གི་སྟོན་པ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་དེ་ཉིད་ཀྱིས་སེམས་ཅན་གྱི་དབང་པོ་དང་འཚམས་པར་ཆོས་ཀྱི་འཁོར་ལོ་བསམ་གྱིས་མི་ཁྱབ་པ་བསྐོར་བ་ཐམས་ཅད་ཀྱང་རྒྱུ་དང་འབྲས་བུའི་ཐེག་པ་གཉིས་སུ་འདུས་ཏེ། ཀུན་བྱེད་ལས། །ཐེག་པ་རྣམ་པ་གཉིས་ཡིན་ཏེ། །མཚན་ཉིད་རྒྱུ་ཡི་ཐེག་པ་དང་། །འབྲས་བུ་རྡོ་རྗེའི་ཐེག་པའོ། །ཞེས་གསུངས་ཤིང་། རྒྱུ་མཚན་ཉིད་ཀྱི་ཐེག་པ་ལས་ཀྱང་ཁྱད་པར་དུ་མས་འཕགས་པ་འབྲས་བུ་གསང་སྔགས་རྡོ་རྗེའི་ཐེག་པ་ལའང་རྒྱུད་སྡེ་བཞི་དང་སྒོ་དྲུག་ལ་སོགས་པའི་དབྱེ་བ་ཡོད་པ་ལས་བླ་མེད་ཀྱི་རྒྱུད་རྣམས་ནི་ཚེ་གཅིག་ལ་ཕྱག་རྒྱ་ཆེན་པོའི་གོ་འཕང་སྟེར་བར་ནུས་པས་ཆེས་འཕགས་པ་སྟེ། དེ་ལའང་ཆེ་བ་རྣམ་པ་དྲུག་དང་ལྡན་པ། གསང་སྔགས་རྙིང་མའི་ཕྱོགས་འདིར་བསྐྱེད་རྫོགས་རྫོགས་པ་ཆེན་པོའི་བསྟན་བྱ་གཙོ་བོར་འཆད་པའི་
དབང་གིས་མ་ཧཱ། ཨ་ནུ། ཨ་ཏི་ཡོ་ག་གསུམ་དུ་དབྱེ་ཞིང་། རྒྱུད་ལུང་མན་ངག་གསུམ་ཀའང་སྦྱང་གཞི་སྔོན་ཏུ་འགྲོ་བའི་དབང་གི་ཡོ་ག་སྐོར་གསུམ་གྱི་རྩ་བ་བསྐྱེད་པ་མ་ཧཱ་ཡོ་གའི་སྐོར་རྣམས་རྒྱ་བོད་ཀྱི་མཁས་གྲུབ་རྣམས་ཀྱིས་བཤད་སྒྲུབ་སྒོ་ནས་མངོན་གྱུར་དུ་གཏན་ལ་ཕབ་ཅིང་། དེ་ལའང་རྒྱུད་སྡེ་དང་སྒྲུབ་སྡེ་གཉིས་ལས། འདིར་སྒྲུབ་སྡེ་བཀའ་བརྒྱད་བརྒྱུད་པ་དྲུག་ལྡན་གྱི་ལོ་རྒྱུས་ཅུང་ཟད་སྨོས་པ་སྐབས་སུ་བབ་པ་སྟེ། ཐོག་མའི་མགོན་པོ་བཅོམ་ལྡན་འདས་དཔལ་ཀུན་ཏུ་བཟང་པོ་དཀྱིལ་འཁོར་ཐམས་ཅད་ཀྱི་ཁྱབ་བདག་ངོ་བོ་རང་བཞིན་ཐུགས་རྗེར་བཅས་ཏེ་གཞི་ལ་མངོན་བྱང་ཆུབ་ནས་སྐུ་དང་ཞིང་ཁམས་རྒྱ་མཚོ་ལོངས་སྤྱོད་རྫོགས་པའི་བཀོད་པས་དག་པ་དང་། ཐུབ་པ་དྲུག་ལ་སོགས་པས་མ་དག་པའི་འགྲོ་བ་རབ་འབྱམས་རྒྱ་མཚོ་འདུལ་ཞིང་། ཉིད་ལས་མི་གཞན་པའི་འཁོར་གྱི་དཀྱིལ་འཁོར་གང་ལ་གང་འདུལ་དུ་སྣང་བ་རྣམས་དང་ཐབས་ཅིག །ངེས་དོན་རྡོ་རྗེ་ཐེག་པའི་བསྟན་པ་སྤྱི་དང་། བྱེ་བྲག་བདེ་གཤེགས་འདུས་པ་ཆེན་པོའི་སྤྱི་རྒྱུད་ལྔ་དང་སྒོས་རྒྱུད་བཅུ་ཡན་ལག་གི་རྒྱུད་ལ་ཡང་། འཇམ་དཔལ་ལེའུ་ཁྲི་དྲུག་སྟོང་པ། ཟླ་གསང་ནག་པོ་ལེའུ་འབུམ་པ་སོགས་འཇམ་དཔལ་སྐུ་རྒྱུད། རྟ་མཆོག་རོལ་པ། རྡོགས་མ་ལེབ་རྒན་སོགས་པདྨ་གསུང་རྒྱུད། གལ་པོ་ཆེ་ཆུང་སངས་རྒྱས་མཉམ་སྦྱོར་སོགས་
ཡང་དག་ཐུགས་རྒྱུད། བདུད་རྩི་བམ་བརྒྱད། བདུད་རྩི་འཁོར་ལོ་སོགས་བདུད་རྩི་ཡོན་ཏན་གྱི་རྒྱུད། རིགས་མཆོག་འབུམ་སྡེ། རྡོ་རྗེ་རྩེ་མོ་སོགས་ཕུར་པ་ཕྲིན་ལས་ཀྱི་རྒྱུད། སྲིད་པའི་བེམ་ཆེན། སྐུ་རྒྱུད་འབུམ་ཏིག་སོགས་རྦོད་གཏོང་མ་མོའི་རྒྱུད། དྲེགས་པ་འདུས་པ། སྲོག་ཐིག་ནག་པོ་སོགས་འཇིག་རྟེན་མཆོད་བསྟོད་ཀྱི་རྒྱུད། ཤེལ་ཕྲེང་དཀར་པོ། ཙིཏྟ་དམར་འབྱིན་སོགས་དམོད་པ་དྲག་སྔགས་ཀྱི་རྒྱུད་བསམ་གྱིས་མི་ཁྱབ་པ་རྒྱལ་བ་དགོངས་པས་བརྒྱུད་དེ་གསུངས་པ་རྣམས། མི་མངོན་རིག་པ་འཛིན་པའི་གནས་སུ་རྒྱལ་བ་ཀུན་གྱི་ཐུགས་ཀྱི་ཡེ་ཤེས་ལས་བྱུང་བའི་རིག་འཛིན་རྡོ་རྗེ་ཆོས་ཀྱི་སྐུའི་རྣམ་འགྱུར། གསུང་གི་བརྡ། ཐུགས་ཀྱི་དགོངས་དོན་མ་ལུས་པ་རྒྱུད་ཀྱི་རང་བཞིན་ཏུ་གཏན་ལ་ཕབ་སྟེ་ངག་ཏུ་བསྡུས། སླར་ཡང་འོག་མིན། དགའ་ལྡན། རི་རབ་ཀྱི་རྩེ་མོ་སྟེ་ལྷ་གནས་གསུམ་དུ་གྲགས་པའི་གནས་སུ་ཡི་གེར་བཀོད་ཅིང་དགོངས་འགྲེལ་ལུང་གི་ཆོས་ལྔ་བཅས་རིག་འཛིན་བརྡ་ཡིས་བརྒྱུད་དེ་སྟོན་ནས་མཁའ་འགྲོ་གཙོ་མོ་གསང་བ་ཡེ་ཤེས་ལས་ཀྱི་དབང་མོ་ཆེ་ལ་གཏད་རྒྱ་དང་བཅས་ཏེ་གཉེར་དུ་གདམས་པ་ན། དེས་ཀྱང་སྤྱི་བྱེ་བྲག་གི་རྒྱུད་རྣམས་སོ་སོར་ཕྱེས་ནས་རིན་པོ་ཆེའི་སྒྲོམ་བུར་བཅུག་སྟེ་དུར་ཁྲོད་བསིལ་བའི་ཚལ་གྱི་མཆོད་རྟེན་བདེ་བྱེད་བརྩེགས་པར་གཏེར་དུ་སྦས་པ། གསང་བའི་བདག་པོ་
ཀུཉྫ་རའི་ཐུགས་ཀྱི་ཡེ་ཤེས་དགུའི་རང་གཟུགས་དུར་ཁྲོད་ཆེན་པོ་བརྒྱད་ན་བཞུགས་པའི་སློབ་དཔོན་རྣམ་པ་དགུ་ཡིས་དགུང་བདུན་ཏུ་ཚོགས་ཀྱི་འཁོར་ལོ་བཅས་དགོངས་པ་མཛད་ནས་རྒྱ་བཀྲོལ་ཏེ་བཀའ་བརྒྱད་བྱེ་བྲག་གི་སྒྲོམ་བུ་བརྒྱད། འཇམ་དཔལ་བཤེས་གཉེན་སོགས་གྲུབ་བརྙེས་རིག་འཛིན་ཆེན་པོ་བརྒྱད་ལ་བབ། སྤྱི་རྒྱུད་ཀྱི་སྒྲོམ་རིན་ཆེན་སྣ་བརྒྱད་ལས་བྱས་པ་སྐབས་དེར་རྒྱ་མ་ཁྲོལ་བ་ཕྱིས་ཀུན་འདུས་རིག་འཛིན་ཆེན་པོ་པདྨ་ཐོད་ཕྲེང་རྩལ་གྱིས་སྤྱན་དྲངས། ཐམས་ཅད་ཀྱང་མཆོག་ཐུན་མོང་གི་གྲུབ་པ་བརྙེས་པའི་ཚུལ་བསྟན། དེ་ནས་སློབ་དཔོན་ཆེན་པོ་ཉིད་བོད་དུ་ཕེབ་ནས་གདུལ་བྱ་དུས་ལ་བབ་པའི་ཚེ། ཆོས་རྒྱལ་ཁྲི་སྲོང་ལྡེའུ་བཙན་གྱིས་ཞུས་ངོར། བསམ་ཡས་མཆིམས་ཕུ་བྲག་དམར་གྱི་ཀེའུ་ཚང་དུ་གནུབས་ཆེན་སངས་རྒྱས་ཡེ་ཤེས་སོགས་ལས་ཅན་སྙིང་གི་བུ་དགུ་ལ་སྒྲུབ་པ་བཀའ་བརྒྱད་ཀྱི་དཀྱིལ་འཁོར་ཆེན་པོ་ཞལ་ཕྱེས་ནས་དབང་བསྐུར་བའི་དུས་སུ་སོ་སོའི་མེ་ཏོག་ཇི་ལྟར་ཕོག་པའི་དཀྱིལ་འཁོར་གྱི་ཞལ་མཐོང་ཞིང་ཐུན་མོང་གི་སྤྲུལ་བསྒྱུར་དང་། སྐུ་ཚེ་དེ་ཉིད་ཀྱིས་རིགས་ཀྱི་བདག་པོའི་ཐུགས་ཀར་འོད་དུ་ཐིམ། གཞན་ཡང་རྗེ་འབངས་ཉི་ཤུ་རྩ་གཅིག ། ཡེར་བའི་གྲུབ་ཐོབ་བརྒྱ་རྩ། ཤེལ་བྲག་གི་སྔགས་པ ་སུམ་ཅུ། ཡང་རྫོང་རྟོགས་ལྡན་ང་ལྔ་སོགས་གང་ཟག་སྙན་ཁུང་བརྒྱུད་པས་མཆོག་ཐུན་དངོས་གྲུབ་བརྙེས་པ་བསམ་གྱིས་མི་ཁྱབ་
བྱོན་ཞིང་། བདེ་གཤེགས་འདུས་པའི་བཀའ་བརྒྱུད་མཁས་པ་མི་བཞིས་གཉག་ལོ་ཡེ་ཤེས་གཞོན་ནུ་ལ་གནང་ནས་རིམ་པར་བརྒྱུད་དེ་གྲུབ་ཐོབ་དངོས་གྲུབ་ཞབས་ལས་མངའ་བདག་ཉང་ཆེན་པོས་གསན་པས་བཀའ་གཏེར་ཆུ་བོ་གཅིག་འདྲེས་སུ་གྱུར་པ་དང་། གཏེར་ཆོས་སྨོན་ལམ་གྱི་བརྒྱུད་པ་ལའང་རྗེ་འབངས་སོ་སོའི་དབང་སྐལ་དུ་བསྩལ་བ་མི་འདྲ་བ་དུ་མ་མཆིས་པའི་ནང་ནས་ཡོངས་སུ་གྲགས་པའི་ཐུགས་གཏེར་ལྔ་ནི། སྙིང་དང་འདྲ་བ་བདེ་གཤེགས་འདུས་པ། སྙིང་ཁྲག་དང་འདྲ་བ་གསང་བ་ཡོངས་རྫོགས། དྭངས་མ་དང་འདྲ་བ་རང་བྱུང་རང་ཤར། སྲོག་དང་འདྲ་བ་ཐུགས་ཀྱི་མེ་ལོང་། ལུས་དང་འདྲ་བ་ཡང་གསང་དྲེགས་འདུལ་རྣམས་ཉང་གུར་རྒོད་ལྡེམས་ཏེ་མཆོག་གི་སྤྲུལ་སྐུ་གསུམ་དང་། པད་གླིང་། བསམ་གཏན་བདེ་ཆེན་གླིང་པ་རྣམས་ཀྱིས་སྤྱན་དྲངས། གཞན་ཡང་བཀའ་འདུས་ཆོས་ཀྱི་རྒྱ་མཚོ་ཨོ་རྒྱན་གླིང་པས་སྤྱན་དྲངས་ཤིང་སླར་ཡང་ཉིས་གཏེར་དུ་སྦས་པ་སོགས་ཐམས་ཅད་ལས་ཁྱད་པར་དུ་འཕགས་པ། ཆོས་རྒྱལ་ཚངས་པ་ལྷའི་མེ་ཏོག་གི་དབང་སྐལ་བདེ་གཤེགས་འདུས་པའི་སྐོར་རྣམས་ལོ་ཆེན་བཻ་རོ་དང་། ལྡན་མ་རྩེ་མང་གི་ཕྱག་བྲིས་རྒྱལ་པོའི་བླ་དཔེ་རྣམས་བླ་བྲག་མགྲིན་བཟང་ལ་གཏེར་དུ་སྦས་པ། མཁའ་འགྲོ་རྣམས་ཀྱིས་གཏེར་གནས་སྤོས་ཏེ་མཁོ་མཐིང་རྣམ་སྣང་གི་སྐུ་རྒྱབ་ཏུ་བཞུགས་པའི་
ཁ་བྱང་བསམ་ཡས་འཁོར་ས་བར་མ་ནས་གྲུབ་ཐོབ་དངོས་གྲུབ་ཀྱིས་བཏོན་ཏེ། མངའ་བདག་སྐྱེ་བ་བཅོ་ལྔ་བཞེས་པའི་མཐར་སྲིད་པ་ཐ་མའི་བྱང་སེམས་ཟབ་གཏེར་འཛིན་པ་ཀུན་གྱི་མངའ་བདག་ཉང་རལ་ཉི་མ་འོད་ཟེར་གྱིས་སྤྱན་དྲངས་ནས་བཀའ་བབ་ཀྱི་བུ་ལྔ་སོགས་ལས་རིམ་པར་གྲུབ་བརྙེས་ཀྱི་བརྒྱུད་པ་མི་འདྲ་བ་དུ་མ་གྱེས་པ་ལས། ཁྱད་པར་དུ་གྱུར་པ་སྲས་ཆུང་འགྲོ་བའི་མགོན་པོ་སོགས་མངའ་བདག་གདུང་རབས་བརྒྱུད་པ་བདུན་གྱི་མཐར། མངའ་བདག་ཀུན་དགའ་འོད་ཟེར་གྱི་སློབ་མ། རི་བྲག་ལ་ཟང་ཐལ་དུ་འཕུར་བ་སོགས་གྲུབ་པ་བརྙེས་པའི་རྟགས་མཚན་ཐུན་མོང་དུ་སྟོན་ནུས་པ་རྗེའུ་རིགས་ནམ་མཁའི་རྣལ་འབྱོར་གྱི་ཐུགས་སྲས། ཆོས་རྒྱལ་ཆེན་པོའི་ཡོན་ཏན་གྱི་སྤྲུལ་པ་མངའ་རིས་པ་ཆེན་པདྨ་དབང་རྒྱལ་རྡོ་རྗེས་བཀའ་བརྒྱད་བཀའ་གཏེར་གྱི་དབང་ལུང་ལན་གྲངས་ཉེར་ལྔ་གསན་པ་སོགས་རྒྱུད་ལུང་མན་ངག་གི་བཀའ་ཐམས་ཅད་བབས་ཤིང་། བརྒྱུད་པ་འགའ་ཞིག་གི་མཐར་ཨོ་རྒྱན་གཏེར་བདག་གླིང་པ་མངའ་བདག་ཉང་ཆེན་པོའི་ཡེ་ཤེས་སྐུས་རྗེས་སུ་བཟུང་ཞིང་གནང་བ་བསྩལ་བ་ལྟར་ལག་ལེན་འཇུག་པ་བདེ་བར་མཛད་པའི་རྗེས་འབྲང་རིམ་པར་བརྒྱུད་དེ་བདག་ཅག་གི་བླ་མ་དམ་པའི་བར་དུ་བྱོན་པ། སྟེང་ན་རིག་འཛིན་བརྒྱུད་པའི་གྲལ་མ་ཞིག །ས་ལ་དཀྱིལ་འཁོར་བསྒྲུབ་པའི་བཀྲག་མ་ཡལ། །བར་དུ་སྨན་རག་བདུད་རྩིའི་མཆོག་
མ་སྐམ། དམ་ཉམས་དང་འདྲེས་ཁྱེར་གྱི་ལྷད་མ་ཞུགས་པའི་སྙན་བརྒྱུད་ཚད་མ་བཞི་ལྡན་གྱི་སྒོ་ནས་སྒྲུབ་པ་ཆེན་པོའི་རིམ་པ་ཉམས་སུ་ལེན་པ་ལ། འཇུག་པའི་མཐའ་བཅུས་གསང་སྔགས་ཀྱི་ཆོས་ལ་ཞུགས་དགོས་ཏེ། སྒོ་དབང་གིས་ཕྱེ། སྲོག་དམ་ཚིག་གིས་བཟུང་། ཐག་ལྟ་བས་བཅད། ལ་སྤྱོད་པས་དོར། ཉམས་ཏིང་ངེ་འཛིན་གྱིས་བླངས། དོན་མན་ངག་ཟབ་མོས་སྒྲུབ། རྒྱུད་ཐོས་པས་དགྲོལ། སྒོ་ཐེག་པ་ཀུན་ལ་བསྡུ། ཤེས་བྱ་ཕྱོགས་མེད་ལ་བསླབ། དགོས་དོན་དུ་མ་རོ་གཅིག་ཏུ་བསྡུ་བ་ལགས། དེ་ལས་ཀྱང་ཐོག་མཐའ་བར་གསུམ་དུ་དམ་ཚིག་ལ་བརྟེན་ནས་རྡོ་རྗེ་ཐེག་པའི་ལམ་བགྲོད་དགོས་ཏེ། ཨ་ཏི་བཀོད་པའི་རྒྱུད་ལས། སྔ་རབས་འདས་པའི་སངས་རྒྱས་ཀྱང་། །དམ་ཚིག་འདི་ལ་བརྟེན་ཏེ་བྱུང་། །ད་ལྟར་བཞུགས་པའི་སངས་རྒྱས་ཀྱང་། །དམ་ཚིག་འདི་ལ་རབ་ཏུ་གནས། །སླད་ཀྱིས་འབྱོན་པའི་སངས་རྒྱས་ཀྱང་། །དམ་ཚིག་འདི་ལ་རབ་ཏུ་བསྒྲུབ། །ཅེས་གསུངས་པ་ལྟར་དམ་ཚིག་ནི་སངས་རྒྱས་ཐམས་ཅད་ཀྱི་གཤེགས་ཤུལ་ཡིན་པས་གཅེས་སྤྲས་སུ་བཟུང་འཚལ། དེ་ཡང་དམ་ཚིག་གི་ལྷ་ནི་དཔལ་རྡོ་རྗེ་སེམས་དཔའ་ཡིན་ཏེ། མཉམ་སྦྱོར་ལས། སེམས་ཅན་ཀུན་གྱི་སེམས་གང་ཞིག །རྡོ་རྗེ་ཞེས་ནི་རབ་ཏུ་བརྗོད། །རྡོ་རྗེ་སྟོང་པ་ཉིད་དུ་གནས། །སེམས་དཔའ་ཡེ་ཤེས་ཆེན་པོ་སྟེ། །ཞེས་
གཞི་རྡོ་རྗེ་སེམས་དཔའི་དམ་ཚིག་མི་ཕྱེད་པ་དེ་ཉིད། ལམ་དུས་སུ་མ་ཉམས་པར་སྟོན་པར་བྱེད་པ་དང་། ཉམས་ན་བཤགས་པའི་ཡུལ་དུ་གྲུབ་ལ། འབྲས་བུའང་དེའི་གོ་འཕང་གྲུབ་པའོ། །དམ་ཚིག་གི་བདག་པོ་ནི་དཔལ་ཧེ་རུ་ཀ་སྟེ་དམ་ལས་མི་འདའ་བ་རྣམས་ལ་དབང་བསྐུར་བྱིན་གྱིས་བརླབས། ཡིད་ལ་འདོད་པ་ཐམས་ཅད་བསྩལ། དམ་ལས་འདས་ན་སྙིང་དབུས་སུ་རྡོ་རྗེ་གནོད་སྦྱིན་རབ་ཏུ་ཁྲོས་པས་མི་བཟད་པའི་སྡུག་བསྔལ་བསྐྱེད་པར་མཛད། དམ་ཚིག་གི་སྲུང་མ་ཕྲ་མེན་བཅུ་དྲུག །སྤྱན་པ་དབང་ཕྱུག་ཉེར་བརྒྱད་རྣམས་ཀྱིས་ཀྱང་ལེགས་ཉེས་ཀྱི་སྟང་འཛིན་ཅིང་དགེ་སྡིག་གི་ལ་ཤན་འབྱེད་པ་ཡིན་པས་མངོན་ལྐོག་དང་ལེ་ལོ་མེད་པར། དྲན་པ་དང་ཤེས་བཞིན་པའི་བག་ཡོད་པར་བསྲུང་དགོས་ཤིང་། གང་བསྲུང་པར་བྱ་བ་ནི་ས་མ་ཡ་འབུམ་སྡེ་གསུངས་པའང་ཐུན་མོང་སྤྱིའི་དམ་ཚིག་ཉེར་བརྒྱད། སྒྲུབ་པ་ཁྱད་པར་གྱི་དམ་ཚིག་ཉི་ཤུ་རྩ་གཉིས་རྣམས་སུ་འདུས་ཏེ། དེ་ཡང་རྩ་བསྐུའི་དམ་ཚིག་ཏུ། ཤེས་རབ་རྒྱུད། དམ་ཚིག་དབང་། མན་ངག་ལུང་། ཉམས་ཆག་སྐོང་བའི་སློབ་དཔོན་ཏེ་རྡོ་རྗེ་སློབ་དཔོན་རྣམ་པ་བཞི་པོ་ཁོང་པའི་སྙིང་ལྟར་བཙའ། རང་བཞིན་གཅིག་པའི་མཆེད། དམ་མ་འདྲེས་པ་རིང་བའི་མཆེད། ལྟ་སྤྱོད་མཐུན་པ་ཉེ་བའི་མཆེད། དམ་ཚིག་འདྲེས་པ་སྲོག་གི་མཆེད་བཅས་རྡོ་རྗེ་མཆེད་བཞི་པོ་ལུས་དང་མིག་ལྟར་བལྟ། ཀུ་རེ་ཀྱལ་ཀའི་ཕྱིར་ཡང་ངན་སེམས་འཕྱ་སེམས་མི་
བསྐྱེད། རྩ་བ་གསུང་གི་དམ་ཚིག་ཏུ། རྒྱུ་མ་ནོར་བ་རྩ་བ། སྐྱེད་པ་རྐྱེན། སྟོབས་པ་མཆོད་པ། བཟླས་པ་ཛབྲ། བསྐུལ་བ་ཕྲིན་ལས་ཀྱི་སྔགས་ཏེ་སྙིང་པོ་རྣམ་པ་ལྔ་དང་། དོན་གསལ་བ་ཆོས་ཀྱི་རྒྱ། རྟགས་ཉེ་བར་སྒྲུབ་པ་ལྷའི་རྒྱ། མཚོན་པ་བསྒྱུར་བ་གར་སྟབས་ཀྱི་རྒྱ་སྟེ་ཕྱག་རྒྱ་རྣམ་པ་གསུམ་ལ་རབ་རྒྱུན་ཆགས། འབྲིང་དུས་དྲུག །ཐ་མས་ཀྱང་ཉ་སྟོང་བརྒྱད་གསུམ་ལ་མ་ཆགས་པར་ཉམས་སུ་ལེན། རྩ་བ་ཐུགས་ཀྱི་དམ་ཚིག་ཏུ། སྦྱོར་སྒྲོལ། ལྷ་སྔགས། གྲུབ་རྟགས། སྒྲུབ་ཐབས་ཏེ་སྤྱི་གསང་བཞི། སྒྲུབ་པ་བྱེད་པའི་གནས་དང་། དུས་དང་། གྲོགས་དང་། སྒྲུབ་རྫས་ཏེ་བར་གསང་བཞི། ལྟ་བ་ཟབ་མོ་གསང་བར་འོས་པ། སྤྱོད་པ་ཟབ་མོ་གསང་བར་གཉེར་གཏད་པ་སྟེ་བསྒོ་གྱུར་གཉིས་བཅས་གསང་བཅུ་སེང་གེའི་ལྕེ་ཡོད་ཀྱང་མི་བསྒྲག་པར་ལུས་ཀྱི་སྤྱོད་པའང་སྦས་ལ་བྱེད། ཡན་ལག་གི་དམ་ཚིག་ཉེར་ལྔ་ནི། སྦྱོར་སྒྲོལ་མ་བྱིན་ལེན་དང་རྫུན་ཚིག་རླང་སྨྲ་བ་སྤྱད་བྱའི་དམ་ཚིག་ལྔ། འདོད་ཆགས་ཞེ་སྡང་གཏི་མུག་ང་རྒྱལ་ཕྲག་དོག་སྟེ་མི་སྤང་བའི་དམ་ཚིག་ལྔ། དྲི་ཆེན་དྲི་ཆུ་བྱང་སེམས་རཀྟ་ཀླད་པ་སྟེ་དང་དུ་བླང་བའི་དམ་ཚིག་ལྔ། ཕུང་པོ་འབྱུང་བ་དབང་པོ་རྣམ་ཤེས་སོགས་ཤེས་པར་བྱ་བའི་དམ་ཚིག་ལྔ། གཟུགས་དང་ཚོར་བ་འདུ་ཤེས་འདུ་བྱེད་རྣམ་ཤེས་རྣམས་རིགས་ལྔར་ཤེས་པ་བསྒྲུབ་བྱའི་དམ་ཚིག་ལྔ་བཅས་ལྔ་ཚན་ལྔ་པོ་
ལེ་ལོ་སྙོམས་ལས་ཆང་དང་གཉིད་སོགས་བག་མེད་ཀྱི་དབང་དུ་ཡལ་བར་མི་དོར་བར་བསྲུང་བས་ཐུན་མོང་གི་དམ་ཚིག་རྣམ་པར་དག་ཅིང་། རྡོ་རྗེ་སློབ་དཔོན་གྱི་སྐུ་ལ་མི་སྨད། དུས་རྟག་ཏུ་བླ་མ་སྤྱི་བོར་བསྒོམ། མཆེད་ལྕམ་ནང་མི་འཐབ། སློབ་དཔོན་དང་མཆེད་ལྕམ་གྱི་གཟུངས་མ་མི་སྤྱད། གཞན་གྱི་དཀྱིལ་འཁོར་མི་བཤིག །གཞན་གྱི་མཚམས་མི་དབྲལ། བཟླས་བརྗོད་པར་མི་བཅད། སློབ་དཔོན་གྱི་གདན་མི་འགོམ། ཏིང་འཛིན་བྱིངས་རྨུགས་སུ་མི་བཏང་། རང་རྒྱུད་ཉོན་མོངས་པས་མི་བཀྲུག །དབང་རྟགས་རྒྱ་ལས་མི་འདའ། ཐོད་པ་མཚན་ངན་མི་བཅངས། མི་རོ་གོད་ཉམས་མི་ལེན། གཞན་གྱི་ཡོན་ཏན་མི་སྨད། མཆོད་རྫས་ལ་བསྔོས་པའི་ནོར་མི་སྤྱད། མི་དང་ཁ་འཕྲོ་མི་བསྲེ། ཐབས་ཤེས་ཡ་མི་འབྲལ། གསང་སྔགས་བློ་ཆུང་ལ་མི་བསྟན། མཚན་ངན་ལ་གཟུངས་མ་མི་བྱ། དད་པ་ཅན་གྱི་ཚོགས་མི་བཅག །ཡུག་ས་མོ་ཕྱག་རྒྱར་མི་བསྟེན་པ་སྟེ། དེ་དག་ལྡེམ་རྐྱང་མེད་པར་ལྷ་ཆོས། མི་ཆོས་བཀའ་ཆོས་གསུམ་གྱི་སྒོ་ནས་བསྲུངས་པས་ཁྱད་པར་གྱི་དམ་ཚིག་རྣམ་པར་དག །བསྲུང་བྱ་སྲུང་བྱེད་སྲུང་པའི་ཐབས་ཏེ་འཁོར་གསུམ་བྱང་ཆུབ་ཀྱི་སེམས་ཐིག་ལེ་ཉག་གཅིག་ལས་གུད་ན་མེད་པས་བསྲུང་མཚམས་བྲལ་བའི་ཡེ་བསྲུངས་ཆེན་པོར་རྟོགས་ན་ལྟ་བའི་དམ་ཚིག་ཐུགས་རྗེའི་དཔྱངས་ཐག་དང་ལྡན་པས་དམ་ཚིག་ཉམས་
སུ་ཡང་མེད་ཅིང་། ཉམས་པའང་མྱུར་དུ་འཆོས་པར་འགྱུར་ཏེ། བང་མཛོད་འཕྲུལ་སྡེ་ལས། སྤྱིར་ནི་གསང་སྔགས་དམ་ཚིག་ནི། །བསྲུང་ན་བསམ་གྱིས་མི་ཁྱབ་སྟེ། །ས་མ་ཡ་ནི་འབུམ་སྡེ་ཡོད། །ཇི་བཞིན་པ་ཡི་ཆོས་ཉིད་ལ། །མ་བཅོས་པ་ཡི་བློ་བཞག་ན། །གཉིས་སུ་མེད་པའི་ཡེ་ཤེས་ཏེ། །མཉམ་ཉིད་གཡོ་བ་མེད་པ་ནི། །དམ་ཚིག་ཐམས་ཅད་བསྲུང་བ་ཡིན། །ཉམས་པའི་ཆད་པ་བྱུང་བ་ལས། །མགོན་སྐྱབས་དེ་ལས་ཆེ་བ་མེད། །ཅེས་གསུངས། ལྟ་བ་མཐར་ཕྱིན་པ་མ་རྟོགས་པའི་གང་ཟག་མོས་སློབ་པས་དམ་ཚིག་ཉམས་ན་མེ་དང་འདྲ་སྟེ་རང་རྒྱུད་བསྲེག །སོ་མཚམས་ཀྱི་མཁར་དང་འདྲ་སྟེ་རང་གཞན་ཕུང་། དུག་དང་འདྲ་སྟེ་ཐར་པའི་སྲོག་གཅོད། སྙིང་ཕྱུང་ན་སྨན་ཅི་ཙམ་བཏང་ཡང་བདེ་བར་མི་འགྱུར་བ་བཞིན་ཏུ་སྒོམ་སྒྲུབ་ལ་སོགས་པ་ཅི་བྱས་ཀྱང་དམ་ཚིག་ཉམས་ན་འབྲས་བུ་མི་འབྱུང་བར་ལྷ་རྣམས་ཀྱང་རང་གཤེད་དུ་བབ་ནས་ཚེ་འདིར་མི་རུངས་པ་དུ་མ་འབྱུང་ཞིང་ཕྱི་མ་དམྱལ་ཁམས་བཅོ་བརྒྱད་ཐམས་ཅད་ཀྱིས་ཀྱང་སྡུག་བསྔལ་དོ་ཟླ་མེད་པའི་རྡོ་རྗེའི་དམྱལ་བ་ཆེན་པོར་སྐྱེས་ནས་སངས་རྒྱས་ཀུན་གྱིས་ཕྲིན་ལས་མཛད་ཀྱང་ཐར་པའི་དུས་མེད་པར་འགྱུར་ལ། ཉམས་པའི་རྒྱུ་ཡང་སློབ་དཔོན་གསང་ཞིང་རང་ཆེ་འཕྱིན་པ། ལུང་མ་མནོས་པ་སློབ་དཔོན་གྱིས་བཟུང་བ། ཁ་སྤྱོད་དང་ལྟ་སྤྱོད་མི་མཐུན་པ། གསང་བ་
སྨྲ་ཞིང་གསང་བའི་དམ་ཚིག་ཆེད་ཆེར་མི་འཛིན་པ། རྒྱལ་བློན་གྱི་བྱ་བ་སོགས་མི་ཆོས་ལ་གཙོ་བོར་འཛིན་པ། ང་རྒྱལ་རང་མཐོང་ཆང་དད་ཆེ་བ། ཆོས་ལ་ཕྱོགས་རིས་ཆེ་ཞིང་གཤེ་སྐུར་མང་བ། བདག་བསྟོད་གཞན་སྨོད་ཀྱི་ཟུར་ཟ་བྱེད་པ། གཙང་རྨེ་དང་རྟོག་པ་ཤས་ཆེ་བས་དམ་བཅའ་འདོར་ཞིང་གཉེན་པོ་མེད་པ། སྡིག་པའི་གྲོགས་པོ་དང་འགྲོགས་པ། ཐོས་པ་ཆུང་ཞིང་བླ་མ་མཁས་པ་དང་བྲལ་བ། སྤྱོད་པ་ཐོད་རྒལ་དུ་བྱེད་ཅིང་གཅིག་པུར་མི་ཚུགས་པ་སོགས་ལ་དམ་ཚིག་ཉམས་པའི་སྔ་རྟགས་དང་བཅས་ཏེ་རྒྱལ་བའི་བཀའ་ཆད་དུ་མ་འབྱུང་བར་གསུངས་པས། སྲོག་དང་མིག་འབྲས་ལྟར་བཙའ་བས་དམ་ཚིག་མི་ཉམས་པར་བསྲུང་ཞིང་། ཉམས་ཆགས་བྱུང་བ་དག་ཀྱང་རབ་ཀྱིས་ལྟ་བ་སྐྱེ་མེད་ངང་དུ་ལ་བཟླ། འབྲིང་གིས་སྲོག་ལན་གསུམ་བཏང་བ་སོགས་ཐབས་ལ་མཁས་པས་བཤགས། ཐ་མས་ཀྱང་གནང་འགྱོད་དྲག་པོའི་སྒོ་ནས་སྟོབས་བཞི་ཚང་བའི་བཤགས་པས་བཤགས་ཤིང་ཕྱིན་ཆད་སྡོམ་ཏེ་ལེགས་པར་བསྲུང་བའི་ཕན་ཡོན་ཀྱང་། ཡིད་བཞིན་གྱི་ནོར་བུ་དང་འདྲ་བར་དགོས་འདོད་ཐམས་ཅད་འབྱུང་། ས་གཞི་དང་འདྲ་བར་ཡོན་ཏན་ཐམས་ཅད་སྐྱེད། ནམ་མཁའ་དང་འདྲ་བར་ཐམས་ཅད་ཀྱི་གོ་འབྱེད། ཚེ་འདིར་ཡང་མ་ཉམས་པའི་སྔ་རྟགས་ལེགས་པའི་ཡོན་ཏན་དུ་མ་འབྱུང་ཞིང་། རིང་པོར་མི་ཐོགས་པ་དུས་གསུམ་གྱི་སངས་རྒྱས་ཐམས་
ཅད་ཀྱི་ཐུགས་རྗེའི་རང་གཟུགས་དཔལ་ཧེ་རུ་ཀའི་གོ་འཕང་མངོན་ཏུ་བྱེད་པར་འགྱུར་ཏེ། བཀོད་པ་ཆེན་པོའི་རྒྱུད་ལས། རྣལ་འབྱོར་དམ་ཚིག་ལྡན་པ་ཡིས། །དངོས་གྲུབ་ཡ་མཚན་ཆེན་པོ་འགྲུབ། །ཕྲིན་ལས་བཞི་པོ་ཐོགས་མེད་ཅིང་། །རྟོགས་པ་མཆོག་ནི་གོང་དུ་འཕེལ། །ཞེས་དང་། དམ་ཚིག་མཆོག་གི་རྒྱུད་ལས། །འདི་ལས་འགལ་བར་མ་བྱས་ན། །རྡོ་རྗེ་འཛིན་པ་རྫོགས་སངས་རྒྱས། །ཚེ་འདི་ཉིད་ལ་ཐོབ་པར་ངེས། །ཞེས་གསུངས། འཇམ་དཔལ་གྲགས་པས། ཞིང་གཞན་སྐལ་མང་སྡོམ་ལ་གནས་པ་བས། །སྐད་ཅིག་འདིར་གནས་འབྲས་བུ་རྫོགས་པར་བྱེད། །ཅེས་ཀྱང་གསུངས་པས་བག་ཡོད་དུས་ཐུང་ངུ་རེ་བསྟེན་ཡང་དོན་ཆེན་པོར་འགྱུར་ཞིང་། དེ་དག་ཀྱང་མདོར་བསྡུ་ན། སེམས་ལ་དགེ་བ་ཆ་དང་བཅས་པ་སྒྲུབ་ཅིང་། མི་དགེ་བ་ཆ་དང་བཅས་པ་སྡོམ་ནས་གཡོ་སྒྱུའི་སྐྱོན་མེད་པ་ལ་འདུས་ཏེ། རྡོ་རྗེ་སྙིང་པོ་སྲ་བ་འབྱུང་གནས་ཀྱི་རྒྱུད་ལས། །དམ་ཚིག་སྡོམ་པ་རྣམ་བཤད་པ། །ཀུན་ཀྱང་རང་གི་སེམས་ལས་སོ། །དེ་ཡི་འཕེན་པ་བླ་མས་ཤེས། །དེ་ཕྱིར་སེམས་ལ་འདྲིས་པའི་མིས། །སངས་རྒྱས་ཞིང་ཁམས་མཐོང་བ་དང་། །སྐུ་གསུམ་ཚད་དུ་འབྱོངས་པ་དང་། །སངས་རྒྱས་ཡོན་ཏན་མངོན་པར་འགྲུབ། །བླ་མ་རྟག་ཏུ་བསྟེན་པའི་མིས། །མཁའ་འགྲོའི་གཟུགས་
རྣམས་མཐོང་ག་དང་། །དེ་ཡི་བྱིན་རླབས་འཇུག་པ་དང་། །དུས་གསུམ་ལུང་ཡང་སྟོན་པ་དང་། །སྐྱེ་ཤི་གཉིས་ལ་དབང་ཐོབ་འགྱུར། །གྲོགས་ལ་བརྩེ་གདུང་ལྡན་པའི་མིས། །འགྲོ་བ་ཐམས་ཅད་འདུལ་བ་དང་། །ཀུན་གྱིས་སྙན་པར་གྲགས་པ་དང་། །གཟུགས་ཅན་ཀུན་ཀྱང་བྱམས་པ་དང་། །མཁའ་འགྲོ་མ་རྣམས་འདུ་བ་དང་། །མ་བསྒྲུབ་དངོས་གྲུབ་འབྱུང་བ་དང་། །ངག་ལ་ནུས་པ་འབར་བ་དང་། །དེ་བཞིན་མཆོག་དང་ཐུན་མོང་གིས། །དངོས་གྲུབ་ཐམས་ཅད་འགྲུབ་པར་འགྱུར། །རྟག་ཏུ་དགོན་པར་གནས་པའི་མིས། །རླུང་སེམས་ཚད་རྣམས་ཟིན་པ་དང་། །སྣང་བ་གྲོགས་སུ་འཆར་བ་དང་། །རང་གི་སེམས་ལ་དབང་ཐོབ་འགྱུར། །བླ་མ་བསྙེན་བཀུར་བྱས་པའི་མིས། །ལོངས་སྤྱོད་མཆོག་དང་ལྡན་པ་དང་། །འཁོར་འདབ་རྒྱས་ཤིང་བསོད་ནམས་ལྡན། །འགྲོ་བ་ཡོངས་ལས་རྒྱལ་བར་འགྱུར། །རྟག་ཏུ་དབང་རྫོགས་བྱས་པའི་མིས། །འགྲོ་བའི་གཙོ་བོར་འགྱུར་བ་དང་། །ཀུན་གྱི་མཐོང་ན་དགའ་བ་དང་། །ཡེ་ཤེས་མངོན་སུམ་འབྱོངས་པ་དང་། །སངས་རྒྱས་རྣམས་ཀྱིས་བྱིན་རློབས་འགྱུར། །རྟག་ཏུ་གཏོར་མའི་ལས་བྱེད་པ། །བསོད་ནམས་ཚོགས་རྣམས་རྫོགས་པ་དང་། །བར་ཆད་མེད་ཅིང་ལས་རྣམས་འགྲུབ། །འདོད་པ་ཕུན་སུམ་ཚོགས་པ་དང་། །མཁའ་འགྲོ་བྲན་བཞིན་འཁོལ་བར་འགྱུར། །ཞེས་
གསུངས་པས་རྡོ་རྗེའི་མཆེད་ལྕམ་རྣམས་བག་ཡོད་དྲན་ཤེས་ལྡན་པས་རྟག་ཏུ་དམ་ཚིག་སྡོམ་པ་ལ་ནན་ཏན་ཏུ་གཟུང་བར་མཛོད་ཅིག། ༈ །།བཟླས་དམིགས་སྐབས་སུ་འདི་ལྟར་བཤད་པར་བྱའོ། །ད་ལམ། མཆེད་ལྕམ་རྣམས་བསྙེན་པ་མི་བཅད་པར་ཤུབ་བུར་བཟླ་བཞིན་ཏུ་བསྒོམ་དོན་གསལ་འདེབས་ཅུང་ཟད་ཞུ་བ་ལ་གསན་འཚལ། དེ་ཡང་རྒྱུད་ལས། བཀའ་ཡི་གསང་རྒྱུད་ཐམས་ཅད་རྣམས། །བསྡུས་པས་སྒྲུབ་པ་བརྒྱད་དུ་འདུས། །ཞེས་གསུངས་པ་ལྟར་རྙིང་ལུགས་ཀྱི་ཐེག་པ་རིམ་དགུ། གསར་མའི་ལུགས་ཀྱི་གསང་སྔགས་རྒྱུད་སྡེ་བཞིའི་ལྷ་ཐམས་ཅད་སྒྲུབ་པ་བཀའ་བརྒྱད་ལ་མ་འདུས་པ་ནི་གང་ཡང་མེད་པས་རིགས་འདུས་ཀྱི་དཀྱིལ་འཁོར་འདི་ལྟ་བུ་བསྒྲུབ་ཏུ་ཡོད་པ་བསྐལ་པ་རེ་བཟང་སྙམ་དུ་བསམ་སྟེ། བླ་མ་ལ་མོས་གུས། ཡི་དམ་ལ་དད་སྤྲོ། མཆེད་ལྕམ་ལ་གདུང་ཤུགས། ལེ་ལོ་སྤང་བའི་བརྩོན་འགྲུས་བརྟན་པོའི་སྒོ་ནས། ཕྱི་མ་ཧཱ་ཡོ་ག་ལྟར་ཐབས་ཀྱི་རྒྱུད་ཀྱི་བརྗོད་བྱ་ཐམས་ཅད་རྡུལ་ཚོན་དང་རས་བྲིས་ཀྱི་དཀྱིལ་འཁོར་སྟེང་དུ་གཏན་ལ་ཕབ་སྟེ་བསྒྲུབ་པ་དང་། ནང་ཨ་ནུ་ཡོ་ག་ལྟར་ཤེས་རབ་རྒྱུད་ཀྱི་བརྗོད་བྱ་ཐམས་ཅད་ཕུང་ཁམས་སྐྱེ་མཆེད་རྩ་རླུང་ཐིག་ལེའི་དཀྱིལ་འཁོར་དུ་གཏན་ལ་ཕབ་སྟེ་བསྒྲུབ་པ་དང་། གསང་བ་ཨ་ཏི་ཡོ་ག་ལྟར་བསྐྱེད་རྫོགས་གསུམ་གྱི་རིམ་པ་རྣམས་ཀྱང་གཉིས་མེད་ཟུང་འཇུག་ཏུ་གཏན་ལ་ཕབ་ཅིང་དེ་གསུམ་པོ་རེ་རེར་
ཡང་ཐག་བཅད་པ། །ལ་དོར་བ། ས་བཟུང་བ་སྟེ་བསྐྱེད་རྫོགས་ཀྱི་གུང་ཤིང་དགུ་ལ་བརྟེན་ནས་ཉམས་སུ་ལེན་ཚུལ་རྒྱ་ཆེར་གསུངས་པ་ལས། ད་ལམ། ཕྱིའི་དཀྱིལ་འཁོར་ལ་གཙོ་ཆེར་བརྟེན་ཏེ་སྒྲུབ་པ་ཆེན་པོའི་རིམ་པ་ཉམས་སུ་ལེན་པའི་སྐབས་འདིར། ཞི་བར་བསྙེན་ཅིང་ཁྲོ་བོར་བསྒྲུབ་པ་ལ། བསྐྱེད་རྫོགས་ཆེན་མོའི་ལུགས་ཀྱི་དཀྱིལ་འཁོར་གྱི་འཁོར་ལོ་བདུན་བརྒྱ་ཉེར་ལྔ་མ་འདྲེས་ཡོངས་སུ་རྫོགས་པ་རྣམ་པ་གསལ་བ། ང་རྒྱལ་བརྟན་པ། རྣམ་དག་དྲན་པའི་སྒོ་ནས་ཡུལ་གསུམ་རབ་ཏུ་གསལ་ནས་ལྷ་གྱད་དུ་གྱུར་པ་སྐུའི་སྒྲུབ་ལུགས། ལུས་ཀྱིས་ཕྲེང་བ། ངག་གིས་སྙིང་པོ། ཡིད་ཀྱིས་ལྷ་སྔགས་ཏིང་འཛིན་ཏེ་བཟླ་ཚུལ་གསུམ་གྱི་སྒོ་ནས་སྔགས་དང་། སྔགས་ཀྱི་གཞི། གཟུགས་དང་གཟུངས་ཀྱི་སྒོ། རིག་པ་དང་རིག་སྔགས་ཀྱི་སྒྲ་དང་དོན་ཤེས་པས་འཕྲོ་འདུའི་ཕྲེང་བ་བཅས་བཟླས་པ་ལ་བརྩོན་པ་གསུང་གི་སྒྲུབ་ལུགས། རྡོ་རྗེ་དབྱིངས་ཀྱི་དགོངས་པ་ལྷུན་རྫོགས་ཐིག་ལེ་ཉག་གཅིག །སྐུ་འཇམ་དཔལ་འཆི་མེད་ཀྱི་དགོངས་པ་འཁོར་ལོ་རྣམ་བཞི། གསུང་པདྨ་རྣམ་དག་གི་དགོངས་པ་རྟ་སྐད་ཐང་གསུམ། ཐུགས་ཡང་དག་དོན་གྱི་དགོངས་པ་རུ་ལུ་འབྲུ་བརྒྱད། ཡོན་ཏན་ཆེ་མཆོག་ཧེ་རུ་ཀའི་དགོངས་པ་བདུད་རྩི་རྣམ་བཞི། ཕྲིན་ལས་རྡོ་རྗེ་གཞོན་ནུའི་དགོངས་པ་ཕུར་བུ་ཐལ་འབྱིན། རྦོད་གཏོང་མ་མོ་ཀུན་ཁྱབ་ཀྱི་དགོངས་པ་རྩ་རླུང་ཐིག་ལེ། རིག་འཛིན་
བླ་མ་བྱིན་རླབས་ཀྱི་དགོངས་པ་ཐུགས་གསལ་རྣམ་དག །མཆོད་བསྟོད་དྲེགས་པ་ཀུན་འདུལ་གྱི་དགོངས་པ་བསྒྲུབ་ལུགས་དོན་བཞི། དྲག་སྔགས་དུག་ལྔ་རང་བསད་ཀྱི་དགོངས་པ་གནད་ཀྱི་མན་ངག་བཞི་ཡི་དོན་རྟོགས་པ་ནི་ཐུགས་ཀྱི་སྒྲུབ་ལུགས་ཏེ་ཤེས་པར་བྱ་བ་སྤྱིའི་རྣམ་བཞག་ཅུང་ཟད་སྙན་ཏུ་གསོལ་ནས། སྐབས་འདིར་མི་ཤེས་སུ་མི་རུང་བ་ནི། གཤིན་རྗེ་གཤེད་ཀྱི་རྒྱུད་ལས། ཏིང་འཛིན་བསམ་གཏན་དག་དང་མི་ལྡན་ན། །གསང་སྔགས་བཟླས་ཀྱང་འགྲུབ་པར་མི་འགྱུར་ཏེ། །གསོ་དཔྱད་བཀླག་པས་ནད་ལ་མི་ཕན་ལྟར། །དེ་བས་ཏིང་འཛིན་བསམ་གཏན་འབད་པར་གཅེས། །ཞེས་དང་། ཨོ་རྒྱན་རིན་པོ་ཆེས། གཞན་ཏུ་ཡེངས་པར་གྱུར་ན་ནི། །བསྐལ་པར་བཟླས་ཀྱང་འབྲས་མི་འབྱིན། །ཞེས་གསུངས་པ་ལྟར་ཆོ་གའི་གྱེར་དབྱངས། རྔ་བརྡུང་རོལ་མོ། ཛཔྲ་བསྙེན་བཟླས་བརྗོད་སོགས་སྒྲོས་པ་ཇི་ཙམ་བྱས་ཀྱང་རིམ་གཉིས་ཀྱི་ཏིང་ངེ་འཛིན་དང་མ་ལྡན་ན། འབྲས་བུ་འབྱིན་པར་མི་འགྱུར་བས། རྣལ་འབྱོར་རབ་རྣམས། སེམས་སངས་རྒྱས་སུ་ཤར་བས་ས་ལམ་ལ་བགྲོད་དུ་མེད་པར་ཤེས། སྣོད་བཅུད་དཀྱིལ་འཁོར་དུ་ཤར་བས་འབྲས་བུ་རང་བྱུང་ལྷུན་རྫོགས་སུ་ཤེས། སྡུག་བསྔལ་བདེ་ཆེན་ཏུ་ཤར་བས་སྣང་བ་སྣ་ཚོགས་ཆོག་ཉིད་དུ་ཁྱེར་ཤེས། ཉོན་མོངས་ཡེ་ཤེས་སུ་ཤར་བས་སྤང་བླངས་དགག་བསྒྲུབ་རང་སར་གྲོལ་
བའི་གནད་ཤེས། རྣམ་རྟོག་ཆོས་ཉིད་དུ་ཤར་བས་ཆོས་སྐུ་རང་ལ་ལེ་ནས་གནས་པའི་དོན་ཤེས་པ་སྟེ་ཤར་བ་རྣམ་པ་ལྔ་དང་ལྡན་པ། རྣལ་འབྱོར་འབྲིང་རྣམས། སྟོང་གསུམ་ལྷའི་གཞལ་ཡས་སུ་གསལ་བས་དཀྱིལ་འཁོར་ལ་ཆེ་ཆུང་ཡང་དོགས་མེད། ཕུང་ཁམས་ལྷ་རུ་གསལ་བས་བར་ཆད་གདོན་བགེགས་ཀྱི་ཡུལ་དང་བྲལ། སྣོད་ཀྱི་འཇིག་རྟེན་གཏོར་སྣོད་དུ་གསལ་བས་གཏོར་མཆོད་ལ་བཟང་ངན་གྱི་མཚན་འཛིན་མེད། སྣང་སྲིད་ཐམས་ཅད་རྫས་སུ་གསལ་བས་སྲུང་མ་དམ་ཅན་མི་དགྱེས་པའམ་མི་སྐོངས་པའི་སྐྱོན་ཟད། གནས་ལུགས་སྟོང་པ་ཉིད་དུ་གསལ་བས་སངས་རྒྱས་ཀྱི་ཆོས་མ་ལུས་པ་རང་སེམས་ལ་རྫོགས་པ་སྟེ་གསལ་བ་རྣམས་་ལ་ལྔ་དང་ལྡན་པ་ཞིག་ངེས་པར་དགོས་ལ། བསྐྱེད་རིམ་རྟག་བརྟན་ཐེར་ཟུག་ཏུ་བཟུང་བས་ལྷ་འགྲུབ་པའི་དུས་མེད། ཕྲིན་ལས་གྱེར་ལ་སྒོམ་མེད་དུ་བཟུང་བས་གསང་སྔགས་དམ་མེད་ལྟོ་ཕྱིར་བོན་གྱེར་དུ་སོང་། སྔགས་དང་སྙིང་པོ་རང་རྒྱུད་པར་བཟུང་བས་བྱིན་རླབས་དང་ནུས་པའི་རྒྱུ་མེད། རྫས་དང་གཏོར་ཆུང་བཤོས་བུར་བཟུང་ཞིང་ཟ་འདོད་དང་བརྣབ་སེམས་ཀྱི་འབྲས་བུས་སྐོར་དང་རྣམ་སྨིན་གྱི་འདམ་དུ་ཆུད། འབྲས་བུ་འཇིག་རྟེན་རྟག་ཆད་དུ་བཟུང་བས་རུ་དྲའི་གོལ་སར་ལྟུང་བ་སྟེ་སྔགས་པ་ཐ་མ་བཟུང་བ་ལྔས་མ་བཅིངས་པ་ཞིག་ཅི་ནས་གལ་ཆེ། མདོར་ན། གསང་སྔགས་བླ་མེད་ལ་ཞུགས་པའི་རྣལ་འབྱོར་པ་ནི། ལྟ་བའི་གདེངས་ཀྱིས་འཁོར་
འདས་རང་སེམས་སུ་ཐག་ཆོད་པ། སྒོམ་པའི་ཉམས་ཀྱིས་སྣང་སྲིད་དག་པ་རབ་འབྱམས་སུ་ཤར་བ། སྤྱོད་པ་བརྟུལ་ཞུགས་ཀྱི་རྩལ་གྱིས་གང་བྱུང་ལམ་དུ་ལོངས་པ་ཞིག་དགོས་ཤིང་། དེ་ཡང་བསྐྱེད་རྫོགས་གང་གི་སྐབས་སུའང་བློས་བཅོས་ནས་བསྒོམ་པ་ནི་དཔེ། གདོད་ནས་རང་བཞིན་གྱིས་གྲུབ་པ་ནི་དོན་ཏེ་སེམས་ཉིད་འགག་མེད་ཀྱི་འཆར་སྒོ་ཐམས་ཅད་བསྐྱེད་རིམ། ངོ་བོ་སྟོང་ཉིད་དུ་ཁྲིག་གེར་གནས་པ་རྫོགས་རིམ། དེ་གཉིས་གསར་དུ་བསྲེ་མ་དགོས་པ། གདོད་ནས་ཙནྡན་དང་དྲི། ཉི་མ་དང་འོད་ཟེར་གྱི་ཚུལ་དུ་འབྲལ་མེད་ཟུང་འཇུག་ཏུ་གནས་པས། ངོ་བོ་གསལ་སྟོང་གཉིས་སུ་མེད་པའི་དོན། རང་བཞིན་ཕུང་ཁམས་སྐྱེ་མཆེད་དུ་ཤར་བ་གདོད་ནས་ལྷའི་འཁོར་ལོར་དག་པ་ནི་བརྡ། དེ་ཉིད་མངོན་ཏུ་གྱུར་པའི་ཕྱིར་ལྷ་སྔགས་ཡེ་ཤེས་ཀྱི་རྣམ་པ་ལམ་དུ་བྱེད་པ་ནི་རྟགས་ཏེ། སྣང་སྲིད་གཞིར་བཞེངས་རང་བྱུང་གི་དཀྱིལ་འཁོར་ཞེས་ཡོ་ག་གསུམ་གྱི་རིམ་གཉིས་ཐམས་ཅད་དེའི་ཁོངས་སུ་མ་འདུས་པ་ཅི་ཡང་མེད་པས་བསྐྱེད་རྫོགས་ཀྱི་གནད་དེ་ལྟར་ངེས་པ་དང་། རྒྱུད་ལས། དོན་གྲུབ་དངོས་གྲུབ་ཐོབ་པ་ནི། །སྔགས་ཀྱི་བཟླས་པས་འགྲུབ་པ་ཡིན། ཞེས་གསུངས་པས་གཙོ་ཆེར་སྔགས་བཟླ་བ་ལའང་། བུམ་དབང་དང་མཐུན་པར་ཕྱི་རྩོལ་བཅས་ཚིག་འབྲུའི་སྔགས། གསང་དབང་དང་མཐུན་པར་ནང་ལྷུན་གྲུབ་རང་བྱུང་
གི་སྔགས། ཤེར་དབང་དང་མཐུན་པར་གསང་བ་སྐྱེ་མེད་རྡོ་རྗེའི་སྔགས། དབང་བཞི་པ་དང་མཐུན་པ་དེ་ཁོ་ན་ཉིད་སྤྲོས་བྲལ་བརྗོད་མེད་ཀྱི་སྔགས་རྣམས་དབང་པོ་དང་མཐུན་པར་ཉམས་སུ་ལེན་པར་གསུངས་ཤིང་། རྩོལ་བཅས་ཀྱི་སྔགས་ལའང་སྤྲོ་བསྡུས་བཟླས་པ། རྡོ་རྗེའི་བཟླས་པ། འགོག་བཟླས་སོགས་ཡོད་དེ། ཇི་སྐད་དུ། ཏིང་འཛིན་མེ་དང་འདྲ་བ་ལ། །བཟླས་བརྗོད་རླུང་དང་འདྲ་བས་བསྐུལ། །ཅེས་ཏིང་ངེ་འཛིན་གསལ་ཞིང་བརྟན་པ་ནི་བུན་ཤིང་དང་མེའི་ས་བོན་རྒྱུ་རྐྱེན་འཛོམ་པ་ལ། གསང་སྔགས་སྐྱོན་དང་བྲལ་བའི་བཟླས་བརྗོད་བྱེད་པ་ནི་རླུང་གི་དཔེར་མཛད་པས་མེ་དང་བུད་ཤིང་འཛོམས་པ་རླུང་གིས་བསྐུལ་ན་ལྷག་པར་འབར་བ་བཞིན་ཏིང་འཛིན་དང་སྔགས་བཟླས་འཛོམས་པས་བསྒྲུབ་བྱའི་འབྲས་བུ་ཤིན་ཏུ་མྱུར་བའི་ཐབས་ཀྱི་མཆོག་ཡིན་ཞིང་། དེ་ཡང་ངག་བཟླས་སྐབས་རིན་ཆེན་ཕྲེང་བ་ལས། བཟླས་པ་བྱེད་ཚེ་ལོང་གཏམ་ཀྱལ་ཁ་དང་༔ ཁྲོ་དང་འཐབ་དང་ཤགས་དང་འཇུག་འཛིན་དང་༔ ཞུམ་དང་ལྷག་པའི་ང་རྒྱལ་རྣམ་པར་སྤངས༔ སྨྲ་དང་རྣམ་རྟོག་སྤྲོས་པ་རྣམ་པར་བཅད༔ ལྷ་དང་སྔགས་ལས་གཞན་ལ་མི་བསམ་མོ༔ ཞེས་པ་ལྟར་བཟླས་པའི་ཕན་ཡོན་ཀྱང་དེ་ཉིད་ལས། ལན་གཅིག་ཙམ་ཡང་སྔགས་བརྗོད་ན། །འདས་དང་འབྱུང་དང་འབྱུང་གང་ཡིན། །གང་གིས་ལྕེ་ལ་སྨྲ་འགྱུར་བ། །དེ་དག་བདེན་པ་ཐོབ་པར་
འགྱུར། །ཞེས་སྔགས་ཀྱི་བདེན་པ་འགྲུབ་པས་བསྟན་སྲུང་མཐུ། ཚེ་མཐུད་བུ། ཟང་ཟིང་ནོར། མཆོག་གི་དངོས་གྲུབ་ཕུན་སུམ་ཚོགས་པ་འགྲུབ་པར་གསུངས་ལ། བསྐྱེད་རྫོགས་ཀྱི་རྣལ་འབྱོར་ལ་བརྩོན་པས་དགྲ་གསུམ་སོང་། བདུད་བཞི་ཆོམ། འགྲོ་དྲུག་གི་གཡང་ས་ཆོད། མི་སློབ་པའི་ཟུང་འཇུག་སྐུ་བཞི་ཡེ་ཤེས་ལྔ་མངོན་ཏུ་འགྱུར་བས་དད་བརྩོན་དྲག་པོས་གཞན་ཏུ་མ་ཡེངས་པར། སྣང་བ་ལྷ། ལྷ་རང་སེམས། སེམས་སྟོང་ཉིད། གྲགས་སྟོང་སྔགས་ཀྱི་རོལ་བར་ཤེས་པའི་ངང་གཞུང་ནས་འབྱུང་བའི་བསྙེན་སྒྲུབ་བཞིའི་དམིགས་པའི་འཕྲོ་འདུ་ལ་རྩེ་གཅིག་ཉམས་སུ་ལེན་པར་ཞུ།། ༈ །།སྒྲུབ་པ་གྲོལ་སྐབས་ཕན་ཡོན་དང་འབྲེལ་བའི་མར་མེ་སྨོན་ལམ་གྱི་སྟོང་ཐུན་ནི། །དེ་ལྟར་ཕུན་སུམ་ཚོགས་པ་ལྔ་ཡིས་གཞི་བཟུང་། བསྐྱེད་རྫོགས་ཡན་ལག་བཞི་ཡིས་གཞུང་བསྲངས། ལག་ལེན་རྩིས་འགོ་ཚང་བས་ཁྲིག་ལ་ཕབ་ནས། བཀའ་བརྒྱད་བདེ་གཤེགས་འདུས་པའི་ཚོམ་བུ་ཚོགས་སྒྲུབ་ཆེན་མོ་དང་རྗེས་སུ་འབྲེལ་བའི་བདུད་རྩི་སྨན་གྱི་སྒྲུབ་པ་བཅས་སྔོན་འགྲོ་དངོས་གཞི་རྗེས་ཚང་བར་ཆད་མེད་པར་མཐའ་རྒྱས་སུ་གྲུབ་པ་སྟེ། དེ་ཡང་སྤྱིར་ཨོ་རྒྱན་སངས་རྒྱས་གཉིས་པའི་བསྟན་སྙིང་གཏེར་གྱི་ཆོས་ལ་དད་པ་ཐམས་ཅད། གུ་རུ་ཉིད་བོད་དུ་ཕེབས་པའི་སྐབས་སུ་ཞལ་གྱི་དཀྱིལ་འཁོར་མཐོང་བའི་
སྐལ་པ་དང་ལྡན་པར་གསུངས་ཏེ། ཡེ་ཤེས་མཚོ་རྒྱལ་གྱི་ཞལ་ནས། མ་འོངས་པདྨའི་ཆོས་ལ་མོས་པ་ཀུན། །དེང་སང་གུ་རུའི་ཞལ་མཐོང་སྨོན་ལམ་བཏབ། །ཐམས་ཅད་ལས་ཅན་ཡིན་པས་དགའ་བ་བསྒོམ། །ཁོ་མོའི་ཚིག་འདི་རིན་ཆེན་གསེར་ལས་དཀོན། །ཞེས་གསུངས་པ་དང་། གཞུང་ཚད་ལྡན་ནས་གསུངས་པ་ཚུལ་བཞིན་ཉམས་སུ་ལེན་པ་རྣམས་གུ་རུ་ཉིད་ཀྱི་བྱིན་རླབས་ཀྱི་རོལ་རྩལ་ཡིན་པར་ཡང་གསུངས་ཏེ། དགོངས་འདུས་ལུང་བསྟན་བཀའ་རྒྱ་མ་ལས། མདོར་ན་ཨོ་རྒྱན་ངས་བསྟན་ཆོས་རྣམས་ལ༔ གཞུང་བཞིན་སུ་དང་སུ་ཡིས་སྤྱོད་པ་ཀུན༔ ཐམས་ཅད་ང་ཡི་སྤྲུལ་པ་ཡིན་པར་ངེས༔ མ་འོངས་ཀུན་གྱིས་ཡིད་གཉིས་ཐེ་ཚོམ་སྤངས༔ གུས་པས་བཀུར་བསྟི་ཕུ་དུད་འབྲེལ་པ་ཞོག༔ ཅེས་གསུངས། ཁྱད་པར་སྒྲུབ་པ་བཀའ་བརྒྱད་ལ་འབྲེལ་པ་བཞག་པའི་ཕན་ཡོན་ཀྱང་། དཔལ་ཀུན་ཏུ་བཟང་པོས། བསྐལ་པར་བསགས་པའི་སྡིག་སྒྲིབ་བྱང་། །ཕྱི་ནང་རྐྱེན་ངན་བར་ཆད་སེལ། །ཕྱི་མ་ཐར་པ་བྱང་ཆུབ་ཐོབ། །ཅེས་དང་། ཨོ་རྒྱན་རིན་པོ་ཆེའི་ཞལ་ནས། གསང་སྔགས་དོན་གྱི་སྙིང་པོ་འདི་ཁོ་ན། །སྒྲུབ་ཆེན་འདི་ཡི་མིང་ཙམ་སུ་གང་འཛིན། །ཨོ་རྒྱན་ང་དང་སྙིང་ཁྲག་གཅིག་ཏུ་འདྲེས། །ཅེས་དང་། །པདྨ་ང་ཡི་སྲོག་གི་དྭངས་མ་སྟེ། །དུས་གསུམ་རྒྱལ་བའི་སྲོག་སྙིང་འདི་ཁོ་ན། །དུས་གསུམ་རྒྱལ་བ་སྤྱི་
སྒྲུབ་འདི་ཀ་ཟབ། །འདི་འཆང་ཨོ་རྒྱན་ང་དང་འབྲལ་བ་མེད། །རིག་འཛིན་བརྒྱད་འདུས་དམ་ཅན་བྲན་ཏུ་ཁོལ། །ཡང་ཟབ་སྙིང་པོ་མར་གྱི་སྙིང་ཁུ་ཕང་། །དུས་གསུམ་བདེ་གཤེགས་རྒྱལ་བ་མ་ལུས་པ། །ཐམས་ཅད་ཐམས་ཅད་མ་ལུས་འདིས་འགྲུབ་སྟེ། །དེ་ཕྱིར་དུས་གསུམ་རྒྱལ་བ་སྤྱི་བསྒྲུབ་ཡིན། །ཚིག་ཚོགས་མང་བས་མི་ཟབ་དོན་ལ་འདི། །ཨོ་རྒྱན་ང་ཡི་ཐུགས་བཅུད་མིན་རེ་ཀན། །ཞེས་དང་། མཁའ་འགྲོ་ཡེ་ཤེས་མཚོ་རྒྱལ་གྱི་ཞལ་ནས། བདེ་གཤེགས་སྒྲུབ་པ་བཀའ་བརྒྱད་ཀྱི་ཆོས་སྐོར་རྣམས་ནི། གཞན་ལས་ཁྱད་དུ་འཕགས་པའོ། །དེ་ཅིའི་ཕྱིར་ཞེ་ན། སློབ་དཔོན་ཆེན་པོ་པདྨའི་ཐུགས་དམ་གྱི་ལྷ་རྩོད་མེད་དུ་གྲགས་པ་ཡིན་ཞིང་། མ་འོངས་པ་ན་ཡང་རྗེས་འཇུག་ཐམས་ཅད་འདི་ལ་གྲུབ་པ་ཐོབ་པ་མང་བར་གསུངས་སོ། །དེས་ན་ཐེ་ཚོམ་དང་ཡིད་གཉིས་མ་བྱེད་པར་སྒྲུབ་ཅིག །ཤོད་ཅིག །སྟོན་ཅིག །སྒོམས་ཤིག །ཅེས་གསུངས་པ་མ་ཟད་གླེགས་བམ་ཙམ་དད་པའི་རྟེན་དུ་བཟུང་ཡང་། གསང་བའི་རྒྱུད་ཆེན་སྒྲུབ་ཡིག་གང་སུ་འཛིན། །དེ་ཕྱོགས་དམ་ཅན་བདེ་གཤེགས་ཀུན་འདུས་ཏེ། །ཤ་རུལ་དག་ལ་སྦྲང་མ་ཇི་བཞིན་ནོ། །ཞེས་གསུངས་ལ། ཡང་དག །གཤིན་རྗེ། རྟ་མགྲིན། ཕུར་པ། ཕྱག་རྡོར། རིག་འཛིན་བླ་མ་སོགས་རེ་རེ་ལའང་མཚན་ཙམ་
འཛིན་པ་དང་། སྒྲུབ་པའི་ཕན་ཡོན་རྒྱ་ཆེར་གསུངས་པ་ཐམས་ཅད་ཀྱང་དཀྱིལ་འཁོར་འདི་ལ་འདུས་ཤིང་། དེ་ལྟ་བུའི་སྒྲུབ་པ་རྣལ་འབྱོར་རང་རང་གིས་ལོ་གསུམ་མཚམས་དམ་དུ་བཅད་པ་ལས་ཀྱང་ཚོམ་བུ་ཚོགས་སྒྲུབ་ཞག་བདུན་ཕན་ཡོན་ཆེ་སྟེ། རྒྱུད་ཆེན་གསང་བ་འདུས་པ་ལས། །དད་བརྩོན་དྲག་པོས་བསྒྲུབ་གྱུར་ན། །མཚམས་མེད་ལྔ་པོ་སྤྱོད་པས་ཀྱང་། །དངོས་གྲུབ་ཐོབ་པ་གསང་སྔགས་ཁྱད། །དམ་ལྡན་རྣམས་ལ་སྨོས་ཅི་དགོས། །ཞེས་གསུངས། འདི་ལྟ་བུའི་ཕན་ཡོན་འབྱུང་བ་མི་བདེན་སོགས་བསམ་པ་མི་རུངས་ཏེ། འདི་ཕྱོགས་ཐེ་ཚོམ་ཟ་བའི་མི་གང་སུ། །ཚེ་འདིར་ཡིད་དུ་མི་འོངས་ཀུན་འདུས་ནས། །མནར་མེད་རྡོ་རྗེའི་དམྱལ་སྟེང་དེར་འགྲོ་བས། །ཀུན་གྱིས་ཐུན་མོང་མ་ཡིན་གསང་དམ་སྲུང་། །ཞེས་ཀྱང་གདམས་པར་མཛད་ཅིང་། མདོར་ན། བདེ་གཤེགས་འདུས་པའི་དྲག་སྔགས་འདི། །གསང་སྔགས་ཀུན་གྱི་བཅུད་ཡིན་པས། །ནུས་པ་ཡོན་ཏན་བརྗོད་མི་ལངས། །ལས་མཐའ་བརྒྱ་དང་རྩ་བརྒྱད་འགྲུབ། །ཐུན་མོངས་དངོས་གྲུབ་བརྒྱད་ཀྱང་ཐོབ། །མཆོག་གི་དངོས་གྲུབ་མྱུར་དུ་འགྲུབ། །ཅེས་གསུངས་པ་དང་། བདུད་རྩི་སྨན་སྒྲུབ་ཀྱི་ཕན་ཡོན་ཡང་། གནས་སྐབས་སུ་སྦྱངས་རྟོགས་སྦར་གསུམ་གྱིས་བྱིན་གྱིས་བརླབས་པའི་རྫས་ཀྱི་བདུད་རྩིས་རང་ལུས་ལ་གནས་པའི་བདུད་རྩི་ལྔ་དྭངས་མར་འགྱུར་བའི་
གྲོགས་བྱེད་ཅིང་། ཤ་ལྔས་དུག་ལྔ་སེལ། བདུད་རྩི་ལྔས་ཡེ་ཤེས་ལྔ་མངོན་ཏུ་བྱེད། དེའི་མཐུ་ལས་ལམ་ལྔའི་རྟོགས་པ་རྒྱུད་ལ་སྐྱེས་ཏེ་ཚེ་དང་ཏིང་འཛིན་ལྷག་མེད་ཐར་པ་ལ་བར་དུ་གཅོད་པའི་བདུད་བཞི་འཇོམས་པར་འགྱུར་ཏེ། བམ་བརྒྱད་ལས། བདུད་རྩིའི་ཆོས་ཀྱི་དོན་འདི་ནི་དཔེར་ན་མེ་དང་འདྲ་སྟེ། ཆུང་སྟེ་རྡུལ་ཙམ་ནས། ཆེ་སྟེ་སྲིད་པའི་རི་བོ་ཡང་བསྲེག་གོ། །དེ་བཞིན་ཏུ་ཆོས་བདུད་རྩི་ཆེན་པོ་འདིས་ཀྱང་སེམས་ཅན་གྱིས་ཉོན་མོངས་པ་རྟོག་པ་ཕྲ་མོ་དང་། དུག་ལྔའི་རྡུལ་དཔྱིས་ཕྱུངས་ཏེ་རིགས་ལྔ་ཡེ་ཤེས་ལྔར་འཚང་རྒྱ་བར་བྱེད་དོ། །ཞེས་གསུངས་ཤིང་ཐབས་དང་ལྡན་པའི་ཆོ་གས་བཅུད་ལེན་ཏུ་བསྟེན་ན་མཐར་ཐུག་ཕུང་པོ་ལྔ་སངས་རྒྱས་ལྔར་སྦྱོང་ཞིང་དབང་བཞིའི་རྟོགས་པ་ཉམས་སུ་མྱོང་། གྲུབ་མཐའ་བཞི་ལམ་དུ་སློང་། སྐུ་བཞིའི་གོ་འཕང་མངོན་ཏུ་འགྱུར་བ་སོགས་ཕན་ཡོན་མཐའ་ཀླས་གསུངས་ཏེ། ཁྲག་འཐུང་འདུས་པ་རྩ་བའི་རྒྱུད་ལས། སྐད་ཅིག་ཐུག་འཕྲད་བསྟེན་པ་ཡིས༔ ཚེ་རིང་ནད་མེད་བདེ་བ་དང་༔ ལང་ཚོ་ཁ་དོག་སྟོབས་དང་གཟི༔ འཕེལ་ཞིང་དབང་པོ་རིག་པ་གསལ༔ མཁའ་ལ་འགྲོ་ཞིང་ཕ་རོལ་གྱི༔ ནུས་སྟོབས་གནོད་པས་མི་ཚུགས་ཤིང་༔ ཀུན་གྱིས་བཀུར་བསྟིའི་འོས་སུ་མཐོང་། ཁམས་ཀྱི་ཟས་དང་མ་འདྲེས་ཤིང་༔ གོས་མེད་མཁའ་ལ་གཅེར་བུར་
སྤྱོད༔ སྔོན་གྱི་རྒྱལ་བ་ཆེ་རྣམས་ཀྱི༔ རིག་པ་འཛིན་པའི་གྲལ་ཐོབ་འགྱུར༔ དེ་ཉིད་མ་རེག་བར་དུ་ཡང་༔ ནད་དང་མུ་གེས་མི་ཚུགས་ཤིང་༔ བར་གྱི་བསྐལ་པ་འཇིགས་ལས་ཐར༔ གཞན་ལ་ཕན་པ་བསྒྲུབ་ལ་སོགས༔ ཡོན་ཏན་ཆེན་པོ་དཔག་མེད་ཐོབ༔ ཅེས་སོགས་ལུང་ཆེན་པོ་མཐའ་ཡས་པ་ལས་རྒྱ་ཆེར་འབྱུང་བའི་དོན་བསྡུས། ཨོ་རྒྱན་རིན་པོ་ཆེའི་ཞལ་ནས། བདེ་གཤེགས་མ་ལུས་མཆོད་པའི་རྫས། །བླ་མ་ཡི་དམ་སྡུད་པའི་རྩི། །མཁའ་འགྲོ་ཀུན་གྱི་སྙིང་ཁྲག་ཡིན། །ཟོས་པས་ཡོན་ཏན་བརྗོད་མི་ལངས། །སངས་རྒྱས་སྐུ་ལྔའི་ཡོན་ཏན་འཐོབ། །ཕྱི་ལྟར་ལུས་ཀྱི་ནད་གདོན་འཇོམས། །ནང་དུ་ཉོན་མོངས་དུག་ལྔ་འདག །དམ་ཚིག་ཉམས་ཆག་ཐམས་ཅད་བསྐང་། །གསང་བ་རང་བྱུང་ཡེ་ཤེས་རྟོགས། །ཉན་ཐོས་རང་སངས་རྒྱས་རྣམས་ཀྱིས། །ཟོས་ན་ས་བཅུ་ཐོབ་ནས་ཀྱང་། །ཐེག་ཆེན་བྱང་སེམས་ཆེན་པོར་འགྱུར། །བླ་མ་མཆོད་ན་བྱིན་རླབས་འཇུག །ཡི་དམ་མཆོག་ན་དངོས་གྲུབ་སྟེར། །བདེ་གཤེགས་མཆོད་ན་ཐུགས་རྗེ་འབྱུང་། །མཁའ་འགྲོ་མཆོད་པས་ལུང་ཡང་སྟོན། །རྣལ་འབྱོར་པའམ་སུས་ཟོས་ཀྱང་། །ཕྱི་ཡི་ནད་གདོན་སྡིག་སྒྲིབ་བྱང་། །ནང་གི་བསྐྱེད་རིམ་ཏིང་འཛིན་གསལ། །གསང་བ་རང་རིག་ཆོས་སྐུར་རྟོགས། །ཉན་
ཐོས་རང་སངས་རྒྱས་རྣམས་ཀྱིས། །ཉམས་དང་ལྷག་ཆད་མ་ལུས་སྐོང་། །འཆང་བས་དུག་མིན་འཆི་བ་བཟློག །གདུག་པའི་དུག་ཀྱང་འཇིལ་བར་ནུས། །བྱུག་པས་ནད་གདོན་མ་ལུས་སེལ། །བསྲེག་ན་ནད་གདོན་ཐམས་ཅད་སྐྲོད། །འདི་ཉིད་བསྒྲུབ་པའི་གནས་དེ་ཡང་། །དུར་ཁྲོད་བསིལ་བའི་ཚལ་དང་མཚུངས། །དཔའ་བོ་མཁའ་འགྲོ་ཐམས་ཅད་འདུ། །ས་ཕྱོགས་བྱིན་དང་ལྡན་པར་འགྱུར། །ཆར་ཆུ་འབེབས་ཤིང་ལོ་ཕྱུགས་ལེགས། །གང་བསྒྲུབས་པ་ཡི་གནས་དེ་རུ། །སུ་བསྡད་མི་རྣམས་ཏིང་འཛིན་འཆར། །ནམ་ཞིག་ཚེ་ཡི་དུས་བྱས་ནས། །ཕོ་མོ་བཟང་ངན་མེད་པ་རུ། །རིག་པ་འཛིན་པའི་ས་ལ་གནས། །དེ་ཕྱིར་མཆོག་གི་དམ་རྫས་སོ། །ཞེས་གསུངས་ཤིང་། །གཞན་ཡང་བམ་བརྒྱད་ལས། །འཇམ་དཔལ་བསྐལ་བ་སྟོང་གི་བར་དུ་སེམས་ཅན་གྱི་དོན་བྱས་པ་བས་བདུད་རྩི་ཆེན་པོ་འདིས་ལན་གཅིག་སེམས་ཅན་གྱི་དོན་བྱས་པ་བསོད་ནམས་ཆེ་སྟེ། སེམས་ཅན་ཐམས་ཅད་དམྱལ་ཁམས་བཅོ་བརྒྱད་ཀྱི་ནང་ནས་ཐར་པའི་ལམ་དུ་འདྲེན་པ་ཡིན་ནོ། །ཞེས་གསུངས་པས། བདུད་རྩི་འདི་ཉིད་རིན་པོ་ཆེའི་ག་འུར་བཅུ་གནས་རྟག་ཏུ་བཅང་བ་དང་། རབ་ཐུན་བཞིའི་ཐོག་མཐའ། འབྲིང་ཉིན་རེ་ལན་རེ། ཐ་མས་ཟླ་བ་རེ་ལ་རེ་རེ། ཡང་ཐས་ཀྱང་དཔྱིད་ཟླ་འབྲིང་པོའི་ཚེས་
གཅིག་གམ་བཅོ་ལྔར་ལན་རེ་མ་ཆགས་པར་བསྟེན་ཏེ་དམིགས་པའི་ཆོ་གའང་། སྒྱུ་འཕྲུལ་ལས། རྡོ་རྗེ་ལྕེ་ཡི་དམ་ཚིག་ནི། །རྡོ་རྗེ་ཅན་གྱི་ཧཱུྃ་བསྒོམ་སྟེ། །མཐེབ་སྲིན་ཐབས་ཤེས་ཕྱག་རྒྱ་ཡིས། །མྱ་ངན་རྡོ་རྗེའི་ཐུགས་ཐོབ་འགྱུར། །ཞེས་གསུངས་པ་བཞིན་ནོ། །ཕན་ཡོན་དེ་ལྡན་གྱི་བསྒྲུབ་པ་ལེགས་པར་གྲུབ་པ་ལ་དགའ་སྤྲོ་དད་མོས་ཡིད་ཆེས་དང་ལྡན་པས་སླད་ནས་ཀྱང་རྡོ་རྗེ་རྒྱལ་པོ་དང་རྒྱལ་ཐེབ། གཟུངས་མ་མཆེད་ལྕམ་དཀྱིལ་འཁོར་གཅིག་ཏུ་འཚོགས་ཤིང་མར་མེ་གཅིག་ལ་བལྟས་པ་ཐམས་ཅད་གཅིག་གིས་གཅིག་ལ་ཁོང་ཁྲོ་ང་རྒྱལ་སྒྲོ་བཀུར་སོགས་ཀྱིས་དམ་ཚིག་ལ་སེལ་སླད་མི་གཞུག་པར་ལྷ་དང་དཀྱིལ་འཁོར་གྱི་ཚུལ་དུ་བལྟ་དགོས་པ་དང་། འདི་ནས་བྱང་ཆུབ་མ་ཐོབ་བར་དུ་དམ་ཚིག་རྡོ་རྗེའི་ལུ་གུ་རྒྱུད་གཅིག་ཏུ་སྦྲེལ་བས་རྣམ་ཀུན་འབྲལ་བ་མེད་པར་སྲོག་གིས་བསྡུས་པའི་ལྷའི་ཚོམ་བུར་འཁོད་ཅིང་། ཚོམ་བུ་ཚོགས་སྒྲུབ་ཀྱི་དགེ་བའི་ལས་ཆེན་པོ་བསགས་པའང་དོན་ཡོད་པར་བགྱི་བའི་སླད་དུ་མར་མེ་སྨོན་ལམ་གདབ་པའི་སྐབས་སུ་བབ་པ་སྟེ། དེ་ཡང་། རྫོང་འཕྲང་ལས། སངས་རྒྱས་ཀུན་གཞི་སྤྲོས་པ་མེད་པའི་དབྱིངས། །ཐིག་ལེ་ཆེན་པོ་མ་བཅོས་ལྷུན་གྲུབ་དང་། །སྐྱེ་འགག་མེད་པ་བྱང་ཆུབ་སེམས་ཀྱི་དོན། །ཡེ་ཤེས་མར་མེ་སྟོང་རྩར་ཤར་བའོ། །ཞེས་གསུངས་པ་ལྟར་བྱང་ཆུབ་ཀྱི་སེམས་དངོས་པོའི་གཟུགས་
དང་བྲལ་བ། ཁྱད་ཆོས་དྲུག་ལྡན་ཡེ་ཤེས་ཀྱི་འོད་ཕུང་དུ་འབར་ཞིང་གཞོན་ནུ་བུམ་པ་སྐུའི་ཚུལ་དུ་བཞུགས་པ་ནི་མཚོན་བྱ་དོན་གྱི་མར་མེ། གཞི་ལས་གཞི་སྣང་དུ་གཡོས་ཏེ། ལྷུན་གྲུབ་རང་སྣང་གི་སྒོ་ནས་ཤར་ལུགས་ཆེན་པོ་བརྒྱད་ཀྱིས་འཁོར་འདས་ཀྱི་སྣང་བ་སྣ་ཚོགས་སུ་སྣང་བ་མཚོན་པ་བརྡ་ཡི་མར་མེ། རྒྱུ་སྐུ་དང་ཡེ་ཤེས། རྐྱེན་འོད་དང་ཁ་དོག །བྱེད་ལས་སྒྲོན་མ་བཞིར་སྨིན་ཏེ་འཁོར་ལོ་བཞིའི་དབུས་སུ་སྙིང་པོའི་འོད་གསལ་ཐིག་ལེ་ཆེན་པོ་དང་སྤྱི་བོ་ནས་རྟོག་པ་མེད་པའི་སྐུ་འཆར་བ་ནི་མཚོན་བྱེད་རྟགས་ཀྱི་མར་མེ་སྟེ། དེ་དག་རྟེན་ཅིང་འབྲེལ་འབྱུང་གི་དབང་ལས་སྣང་གསལ་མར་མེ་འདི་ཡིས་མཚོན་བྱེད་དུ་བྱས། ཆོས་དབྱིངས་མེ་ལོང་མཉམ་ཉིད་སོར་རྟོགས་བྱ་གྲུབ་སྟོང་ཉིད་འདའ་ཀ་དབྱིངས་སྒྲོལ་ཀློང་གྱུར་ཏེ་ཡེ་ཤེས་ཆེན་པོ་རྣམ་པ་དགུ་ཡི་སྣང་བས་ཉོན་མོངས་པ་དགུ་ཡི་མུན་ཁང་བཅོམ། རྒྱུ་དྲུག་འཁོར་བའི་སྒོ་རྩད་ནས་བཅད། རྡོ་རྗེ་ཁྲོ་རྒྱལ་རྣམས་ཀྱི་ཞལ་མཐོང་། རང་བྱུང་སྣང་བ་བཞི་ཡིས་ཤུལ་མཚོན། རིག་སྟོང་ཁྱབ་བདལ་ཆེན་པོས་རྒྱབ་སྐྱོར། རང་གྲོལ་སྤྱོད་པ་ཅོག་བཞག་གིས་མཐའ་བརྟེན་ཏེ་བགྲོད་པར་བྱ་བའི་ལམ་ལྔ་དང་ས་བཅུ་བགྲོད་དུ་མེད་པའི་ཚུལ་གྱིས་དྭངས་སྲོག་ཐིག་ལེ་ཆེན་པོར་སྲིད་པ་གསུམ་པོ་ཡོངས་སུ་དག་པ་འོད་ཟེར་འཁྲུལ་བཞད་ཀྱི་ཀློང་དམ་པར་བགྲོད་ནས། ཆོས་ཐམས་ཅད་བྱ་རྩོལ་གཉིས་ཀྱི་ཀློང་
དུ་གདོད་ནས་སྐྱེ་འགག་འཕོ་འགྱུར་བྲལ་བ་གཞི་རྫོགས་ལྷུན་གྲུབ་ཆེན་པོར་གདེང་ཆེན་ཐོབ། དབུགས་ཆེན་ཕྱིན། རྩལ་ཆེན་རྫོགས་པའི་ཐུགས་འདུན་རྩེ་གཅིག་པ་མཛད་ནས་སྨོན་ལམ་གྱི་རྗེས་ཟློས་གནང་བ་ཞུ། །རིག་པ་འཛིན་པའི་ཡེ་ཤེས་སྐུ། །ཚེ་འདི་ཉིད་ལ་སྟེར་བྱེད་པ། །བླ་མེད་ཐེག་པ་ཀུན་གྱི་བཅུད། །སྒྲུབ་པ་བཀའ་བརྒྱད་འདི་རྨད་བྱུང་། །སྤྲོས་བཅས་སྒྲུབ་པའི་བུམ་བཟང་ནི། །སྟོང་ཐུན་རིན་ཆེན་ཕྲས་མཛེས་པས། །གྲུབ་གཉིས་འདོད་པ་ཀུན་འཇོབ། །མཁས་དང་གྲུབ་པའི་ཕྱག་ཆ་ཡིན། །དེ་བྱུང་དགེ་བས་དཔལ་ཆེན་པོའི། །གོ་འཕང་དཀའ་བ་མེད་ཐོབ་སྟེ། །ལུས་ཅན་ཀུན་ལ་དངོས་གྲུབ་གཉིས། །འཛད་མེད་སྦྱིན་པའི་བྱེད་པོར་ཤོག། །།ཅེས་སྟོང་ཐུན་ཚན་པ་དྲུག་པོ་འདིའང་དཔལ་སྤུངས་སྒྲུབ་ཁང་དུ་བཀའ་བརྒྱད་སྒྲུབ་ཆེན་སྨན་སྒྲུབ་འབྲེལ་མ་འཛུག་པའི་སྐབས་སུ་ཉེར་མཁོར་གྱུར་ཏེ་བླུན་རྨོངས་ཡོན་ཏན་རྒྱ་མཚོས་རི་ཁྲོད་ཀུན་བདེ་གླིང་དུ་བྲིས་པའི་ཡི་གེ་སྤེལ་བ་པོ་ནི་རང་སློབ་ལྔ་རིག་སྨ་བ་ཀརྨ་འགྱུར་མེད་དོ།། །།དགེ་ལེགས་འཕེལ།། །།