ལེགས་སྤྱད་བྱང་ཆུབ་ཀྱི་རྒྱ་མཚོར་སྤེལ་བའི་ཚིག་གི་ཕྲེང་བཟླ་འོད་བདུད་རྩིའི་ཆར་པ།
ལེགས་སྤྱད་བྱང་ཆུབ་ཀྱི་རྒྱ་མཚོར་སྤེལ་བའི་ཚིག་གི་ཕྲེང་བཟླ་འོད་བདུད་རྩིའི་ཆར་པ་ཞེས་བྱ་བ་བཞུགས་སོ།། །།
མཆོག་གསུམ་ཀུན་འདུས་བླ་མ་ཚེ་དཔག་མེད། །མདུན་མཁར་བསྔོ་བའི་དབང་པོ་མངོན་སུམ་བཞུགས། ས་གཞི་སྤོས༴ །རི་རབ༴ །སངས་རྒྱས༴ །འགྲོ་ཀུན༴ །སྐུ་གསུམ་ཡོངས་རྫོགས༴ །ཕྱི་ནང་༴ །བདག་ལུས༴ །བླ་མེད༴།ཕྱག་འཚལ་བ༴ །རབ་འབྱམས་རྒྱལ་བ་སྲས་བཅས་བརྩེར་དགོངས་ནས། །དགེ་འདི་འཁོར་གསུམ་ཡོངས་དག་བསྔོ་བར་གསོལ། །ཇི་ལྟར་འཇམ་པའི་དབྱངས་སོགས་དཔའ་རྣམས་ཀྱིས། །བསྔོས་བཞིན་རྒྱལ་བ་རྣམས་ཀྱིས་ཆེར་བསྔགས་པའི། །བསྔོ་བའི་མཆོག་ངེས་ཡོངས་སུ་བསྔོ་བར་བགྱི། །སྲས་བཅས་རྒྱལ་བས་ཚོགས་གཉིས་ཅི་བསགས་པ། །དེ་དག་ཀུན་ལ་རྗེས་སུ་ཡི་རང་ངོ་། །འདིས་མཚོན་དུས་གསུམ་དགེ་རྩ་
གཅིག་བསྡོམས་ཏེ། །སྣང་མཐའ་སྤྱན་རས་གཟིགས་སོགས་ཕྱོགས་དུས་ཀྱི། །བཅོམ་ལྡན་སློབ་མར་བཅས་ལ་འབུལ་བགྱི་ན། །ཀུན་བཟང་མཆོད་སྤྲིན་ལྟ་བུར་འབྱུང་གྱུར་ཅིག །དེ་མཐུས་སངས་རྒྱས་བསྟན་པ་རིན་པོ་ཆེ། །དར་ཞིང་རྒྱས་ལ་ནུབ་མེད་ཡུན་རིང་གནས། །དེར་འཛིན་སྐྱེས་ཆེན་རྣམས་ཀྱི་སྐུ་ཚེ་དང་། །མཛད་ཕྲིན་དཔལ་འབྱོར་ཡར་ངོའི་ཟླ་ལྟར་རྒྱས། །དེ་ལྟའི་དགེ་རྩ་མཁའ་ཁྱབ་འགྲོ་ལ་སྦྱིན། །ཀུན་ཀྱང་བདེ་བ་དང་ལྡན་སྡུག་བསྔལ་བྲལ། །མྱུར་དུ་རྣམ་མཁྱེན་སངས་རྒྱས་ཐོབ་ཕྱིར་བསྔོ། །བདག་དང་བདག་ཉིད་མཐོང་ཐོས་དྲན་རེག་གིས། །དུས་གསུམ་བསགས་པའི་སྡིག་སྒྲིབ་ཉེས་ལྟུང་དང་། །ནད་གདོན་བར་གཅོད་མི་མཐུན་
ཕྱོགས་ཀུན་ཞི། །ཚེ་བསོད་དཔལ་འབྱོར་སྟོབས་དང་སྙན་གྲགས་རྒྱས། །སྙིང་རྗེ་བྱང་སེམས་ཚད་མེད་རྒྱུད་ལ་སྐྱེ། །དད་དང་གཏོང་བ་ལ་སོགས་འཕགས་ནོར་ཕྱུག །མཁོ་བ་སྦྱིན་སོགས་བསྡུད་ངོས་བཞི་ཡིས་འབྱོར། །ཕ་རོལ་ཕྱིན་པ་དྲུག་དང་བཅུ་ལ་སྤྱོད། །ཐོས་བསམ་སྒོམ་ལྡན་བསླབ་གསུམ་རྒྱན་གྱིས་མཛེས། །བྱང་ཆུབ་ཕྱོགས་ཀྱི་ཆོས་ཀུན་རྒྱུད་ལ་རྫོགས། །འོད་གསལ་ཕྱག་རྒྱ་ཆེན་པོ་མངོན་གྱུར་ཏེ། །ཚེ་གཅིག་རྡོ་རྗེ་འཆང་དངོས་འགྲུབ་ཕྱིར་བསྔོ། །འཕོས་ཚེ་གནད་གཅོད་མི་འབྱུང་ལུས་སེམས་བདེ། །འཁྲུལ་སྣང་རང་ངོ་ཤེས་ནས་རང་སར་གྲོལ། །བླ་མ་སྣང་མཐའ་ཡས་པས་མདུན་བསུས་ཏེ། །བདེ་བ་ཅན་ཏུ་པདྨོར་བརྫུས་ཏེ་སྐྱེས། །སངས་རྒྱས་ཞལ་མཇལ་ལུང་བསྟན་རབ་ཐོབ་ནས། །ས་བཅུ་བགྲོད་ཅིང་སྤྲུལ་པས་འགྲོ་བ་འདྲེན། །རྒྱལ་བའི་སྐུ་གསུང་ཐུགས་དང་མཉམ་ཕྱིར་བསྔོ། །བསོད་ནམས་འདི་ཡིས༴ །ཐོབ་ནས༴ སྐྱེ་རྒ་ན༴ སྲིད་པའི༴ །སྐྱབས་ཀྱི་གནས་ཀུན་ཚེ་དཔག་མེད་ལ་ཐིམ། །དེ་ཉིད་རང་ཐིམ་ཡེ་ཤེས་ཡོན་ཏན་འཕེལ། སངས་རྒྱས་སྐུ༴ །ཆོས་ཉིད༴ །དགེ་འདུན༴ ཇི་བཏབ་བསྔོ་བ༴ །དེ་བཞིན་གཤེགས་པ་བསྔོ་བ་སྨོན་ལམ་ཀུན། །ཡོངས་སུ་འགྲུབ་པའི་རྒྱལ་འོད་ལ་ཕྱག་འཚལ་ལོ། །ཏདྱ་ཐཱ། ཨོཾ་དྷ་རེ་དྷ་རེ་བནྡྷ་རེ་སྭཱ་ཧཱ། ཅེས་ཆགས་མེད་རིན་པོ་ཆེས་མཛད་པའི་བསྔོ་བ་རྒྱས་པའི་དོན་མ་འཛོལ་བས། །རྒྱུན་ཏུ་ཉམས་ལེན་བདེ་ཕྱིར་ཉུང་ངུའི་ཚིགས་བཅད་དུ་བསྡེབ་པ་པོ་ནི་ཡོན་
ཏན་རྒྱ་མཚོ་སྟེ། །གཤིན་བསྔོ་སྐབས་འོད་དཔག་མེད་དང་། །གསོན་བསྔོལ་ཚེ་དཔག་མེད་དུ་བསྒྱུར་བར་བྱའོ། །འགྲོ་བ་མང་པོ་ལ་ཕན་པར་གྱུར་ཅིག །མངྒ་ལཾ། ༈ །ངེས་པར་ལེགས་པའི་ལམ་ཚང་ལ་མ་ནོར་བ་སྟོན་ཅིང་། ལོག་པའི་ལམ་མཐའ་དག་ལས་ཟློག་པར་མཛད་པ་ཨོ་རྒྱན་གྱི་སློབ་དཔོན་པདྨ་སཾ་བྷ་བའི་ཞལ་སྐྱིན། །ཐམས་ཅད་མཁྱེན་པ་ཏཱའི་སི་ཏུ་མཚན་ཡོངས་སུ་གྲགས་པ་པདྨ་དབང་ཆེན་གྱི་ཞབས་ལ་སྙིང་ཐག་པ་ནས་སྐྱབས་སུ་མཆི་ཞིང་། །འདི་ཕྱི་བར་དོ་གསུམ་དུ་ཅི་མཛད་ཁྱེད་ཤེས་ཀྱི་བློ་གཏད་ལིངས་བསྐྱུར་བགྱིན་བདག་སོགས་ནམ་མཁའི་མཐའ་དང་མཉམ་པའི་སེམས་ཅན་མ་རིག་པས་མིག་ལྡོང་ཞིང་། ཆོས་དང་མི་མཐུན་པའི་བྱ་བ་ལ་བརྟེན་ཏེ་ངན་སོང་གི་གཡང་སར་ལྷུང་བ་རྣམས་ལ་ཐུགས་རྗེས་བྱིན་གྱིས་རླབས་སྟེ་གཟིགས་ཤིང་དགོངས་སུ་གསོལ། །བདག་དུས་འདི་ནས་བཟུང་སྟེ་ཨོ་རྒྱན་གྱི་སློབ་དཔོན་པདྨཱ་ཀ་རའི་གོང་འཕང་མངོན་ཏུ་མ་གྱུར་གྱི་བར་དུ་དམ་པའི་ཆོས་དང་མི་མཐུན་པའི་བསམ་སྦྱོར་ཕྱིན་ཅི་ལོག་ཐ་ན་རྨི་ལམ་དུའང་མི་འབྱུང་བར་ཤོག་ཅིག །སངས་རྒྱས་ཀྱི་བསྟན་པ་རིན་པོ་ཆེ་སྤྱི་དང་། ཁྱད་པར་ངེས་དོན་སྙིང་པོ་ཕྱག་རྫོགས་ཟུང་འཇུག་གྲུབ་ཐོབ་ཆུ་བོ་བརྒྱུད་པའི་གསང་ལམ་ཀརྨ་ཀཾ་ཚང་དྭགས་རྙིང་ཟུང་དུ་འབྲེལ་བའི་བསྟན་པ་ལ་རང་དོན་ཏུ་ཐོས་བསམ་སྒོམ་གསུམ་མཐར་ཕྱིན། །གཞན་དོན་ཏུ་འཆད་རྩོད་རྩོམས་གསུམ་སོགས་སྐྱེས་བུ་དམ་པའི་བྱ་བས་བསྟན་པའི་
སྒྲོན་མེ་གཞན་དྲིང་མི་འཇོག་པར་ཡུན་རིང་དུ་བྱེད་པར་ཤོག་ཅིག། མཁྱེན་བརྩེ་ནུས་གསུམ་ཡང་མཐར་ཕྱིན་པར་གྱུར་ཅིག །གལ་ཏེ་བསྟན་པའི་བྱ་བ་མི་འགྲུབ་པར་གྱུར་ན་ཡང་རང་རྒྱུད་དགེ་ཞིང་ཉོན་མོངས་པས་མི་དཀྲུག་པར་ཆོས་དང་མཐུན་པའི་འཚོ་བས་འཚོ་སྟེ་ཁ་རོག་པར་འདུག་པར་གྱུར་ཅིག །དམ་པའི་ཆོས་ལ་དབང་ཟ་བ་དང་། །དམ་པའི་ཆོས་སྤོང་བ་དང་། སྙིང་པོའི་ཆོས་བསྣུབ་པའི་རྐྱེན་ཏུ་འགྱུར་བ་སོགས་དཀོན་མཆོག་ལ་བསྟན་པའི་སྡིག་པ་སྤུ་ཙམ་ཡང་བསགས་པར་མ་གྱུར་ཅིག །ཁྱད་པར་ངེས་དོན་སྙིང་པོའི་བསྟན་པ་ལ་རྨ་འབྱིན་པའི་བསམ་སྦྱོར་སྐད་ཅིག་མ་ཙམ་ཞིག་བྱུང་བར་གྱུར་ན་དེ་མ་ཐག་ཏུ་བདག་གི་ཚེ་དང་བསོད་ནམས་ཐམས་ཅད་ཟད་པར་གྱུར་ཅིག །ནམ་མཁའི་མཐའ་ཀླས་པའི་འགྲོ་བ་རྣམས་ཀྱི་ལུས་དང་ངག་དང་ཡིད་ཀྱི་སྒོ་བླ་མ་ལ་སྨོད་པ་དང་། ཆོས་སྤངས་པ། ཆོས་ལ་དབང་ཟབ་སོགས་རྣམ་སྨིན་མི་ཟད་པར་མྱོང་བར་འགྱུར་བའི་ལས་བསགས་པ་དང་། བསགས་པར་འགྱུར་བ་དང་། བསགས་བཞིན་པ་ཐམས་ཅད་བདག་གི་ལས་ལ་གཅིག་ཏུ་བསྡུས་ནས་སེམས་བསྐྱེད་པ་འདི་དང་། དགེ་བའི་བསམ་པ་འདི་ལ་བརྟེན་ནས་ཐམས་ཅད་བྱང་ཞིང་དག་སྟེ་སྡུག་བསྔལ་གྱི་འབྲས་བུ་འགའ་ཡང་མི་མྱོང་བར་ཕྱིན་ཆད་བག་དང་ལྡན་པས་སྒོ་གསུམ་བསྡམ་པར་གྱུར་ཅིག །ཁྱད་པར་དུ་མངོན་ཤེས་ཤར་བར་བརྫུ་བ་དང་། །ཞལ་གཟིགས་དང་ལུང་བསྟན་པར་བརྫུབ། །བླ་
མ་གོང་མའི་བཀའ་དཀྲུགས་སྟེ་ཨོ་རྒྱན་སངས་རྒྱས་གཉིས་པའི་ངེས་དོན་གྱི་བསྟན་པ་ལ་སེལ་བཞག །སེམས་ཅན་གཡོ་སྒྱུས་བསླུ། །གཏེར་སྟོན་ཏུ་ཁས་འཆེ་བ་སོགས་མིན་པ་ལ་ཡིན་པར་བརྫུ་བའི་སྤྱོད་ངན་སྐྱེ་བ་འདི་ནས་ཚེ་རབས་ཐམས་ཅད་དུ་དངོས་སུ་བགྱིད་པ་ལྟ་ཅི་སྨོས། །སེམས་ལའང་མི་དྲན་པར་གྱུར་ཅིག །གལ་ཏེ་ཕྱིན་ཅི་ལོག་གི་སྤྱོད་པ་བརྩམས་པར་གྱུར་ན་དེ་མ་ཐག་ཏུ་གཅིག་ཤུལ་ཚོགས་བདག་མ་ནིང་ནག་པོ། །དཔལ་ལྡན་སྔགས་ཀྱི་སྲུང་མ། །ཁྱབ་འཇུག་དུག་གི་སྤུ་གྲི། སྐྱེས་མཆོག་བཛྲ་སཱདྷུ་རྩལ་སོགས་བརྒྱུད་པ་དྲུག་ལྡན་གྱི་གཉེར་ཁ་སྐྱོང་བའི་སྙིང་ཏིག་གཉན་པོའི་རྒྱུད་སྲུང་རྣམས་ཀྱིས་བདག་གི་མགོ་ཨརྫ་ཀ་ཡི་དོགས་པ་བཞིན་ཏུ་ཁོས་ལ་སྙིང་ཁྲག་དྲོན་མོ་ཇམས་ཟས་སུ་བཞེས། །རྣམ་ཤེས་ཀུན་བཟང་པདྨ་འབྱུང་གནས་ཀྱི་ཐུགས་ཀློང་དུ་སྦར་བར་གྱུར་ཅིག །དེ་ལྟ་མ་ཡིན་པ་ཆོས་བཞིན་ཏུ་བྱེད་ཅིང་དྭགས་རྙིང་ཟུང་འཇུག་གི་བསྟན་དང་བླ་མ་སྙིང་ལ་འཆང་། །དམ་ཆོས་གཡོ་སྒྱུ་མེད་པར་སྒྲུབ། །ཆོས་བརྒྱད་ཀྱི་རྟོག་ངན་ཚར་བཅད་པ་ལ་ཚེ་བསོད་དཔལ་འབྱོར་ཡེ་ཤེས་ཡོན་ཏན་སོགས་ཆོས་དང་མཐུན་པའི་དངོས་གྲུབ་མཆོག་ཐུན་མོང་འབད་མེད་ལྷུན་གྲུབ་ཏུ་འབྱུང་བར་གྱུར་ཅིག །བྱང་ཆུབ་ཀྱི་སྙིང་པོ་ལ་འདུག་གི་བར་དུ་བདུད་དང་བདུད་ཀྱི་རིས་ཀྱི་ལྷ་གཞན་དག་དང་། །ཁྱད་པར་སྙིགས་མའི་དུས་ཀྱི་རྒྱལ་བསེན་ཀླུ་གདོན་རྣམས་ཀྱིས་བརྫི་བར་མི་ནུས་ཤིང་
བར་དུ་གཅོད་པས་མི་ཚུགས་པར་གྱུར་ཅིག །རང་དོན་ཡིད་བྱེད་དང་། ཐ་མལ་གྱི་སྣང་ཞེན་སེམས་ལ་འགྱུ་བར་མ་གྱུར་ཅིག །དགེ་བའི་རྩ་བ་འདིའི་མཐུས་རྡོ་རྗེ་འཆང་ཆེན་པོ་ཏཱའི་སི་ཏུ་པདྨ་དབང་ཆེན་དང་། །དཔལ་ཀརྨ་པ་ཆེན་པོ་ཐེག་པ་མཆོག་གི་རྡོ་རྗེ་དང་། །དཔལ་ལྡན་དཔའ་བོ་པདྨ་བསྟན་འཛིན། །མཁས་གྲུབ་ཀྱི་དབང་ཕྱུག་ཀརྨ་ཐེག་མཆོག་བསྟན་འཕེལ། །འགྱུར་མེད་མཐུ་སྟོབས་རྣམས་རྒྱལ་གཙོར་གྱུར་པའི་བཀའ་དྲིན་ཅན་གྱི་དཔལ་ལྡན་བླ་མ་དམ་པ་རྣམས་ཀྱི་དགོངས་པ་ལུས་རྟེན་འདི་ཉིད་ཀྱིས་བསྐང་བར་ནུས་པར་གྱུར་ཅིག །མ་རིགས་པའི་དབང་གིས་དེ་དག་ཅུང་ཟད་ཙམ་ཡང་མི་མཉེས་པར་འགྱུར་བའི་ལས་གང་དང་ཅི་བསགས་པ་ད་ཐམས་ཅད་འཕྲལ་དུ་འབྱང་བར་གྱུར་ཅིག །སླན་ཆད་མཉེས་པ་ཁོ་ན་སྒྲུབ་པ་ལས་མི་མཉེས་པའི་བྱ་བ་རྨི་ལམ་དུའང་མི་འབྱུང་བར་ཤོག་ཅིག །རྗེ་བཙུན་དམ་པ་དེ་དག་གི་སྤངས་རྟོགས་ཡོན་ཏན་ཇི་མཆིས་པ་ཐམས་ཅད་རྒྱུད་ལ་འཕོས་ནས་མྱུར་བ་ཉིད་དུ་འབྲེལ་ཐོག་གི་འགྲོ་བ་རྣམས་དང་ཆབ་ཅིག་བར་ཀུན་བཟང་རྡོ་རྗེ་འཆང་པདྨ་འབྱུང་གནས་ཉིན་བྱེད་དབང་པོའི་དཔལ་གྱི་ཐུགས་ཀློང་དང་དབྱེར་མེད་པར་འོད་གོང་ཁྱབ་བརྡལ་ལྷུན་གྲུབ་ཏུ་འཚང་རྒྱ་བར་གྱུར་ཅིག །དཀོན་མཆོག་གསུམ་གྱི་བདེན་པའི་བྱིན་གྱི་རླབས་ཀྱིས་དེ་དེ་བཞིན་ཏུ་འགྲུབ་པར་གྱུར་ཅིག །ཅེས་པའི་སྨོན་ལམ་འདི་སྙིང་ནས་འདེབས་པ་པོ་ནི་བཙུན་པ་ཡོན་ཏན་རྒྱ་མཚོ་སྟེ། །
འདི་དུས་རྒྱུན་བདེ་བས་ནུས་པ་ཡོད་ན་རྒྱལ་བ་སྲས་དང་བཅས་པ་རྣམས་དང་། ཁྱད་པར་རྒྱལ་བ་ཀརྨ་པ་ཡབ་སྲས་ཀྱི་དགོངས་པ་ཚེགས་ཆུང་ངུས་བསྐང་བར་བྱས་པ་ཡིན་ནོ། །འདིས་ཀྱང་སྙིགས་དུས་ཀྱི་འགྲོ་བ་མང་པོ་ཕྱིན་ཅིང་ལོག་གི་ལམ་ལས་སྡོག་ནུས་པར་གྱུར་ཅིག །ཀརྨ་པ་མཁྱེན་ནོ། རང་ལོ་ཉེར་བདུན་པ་ལའོ། ༅ །ཨོཾ་སྭ་སྟི་སིདྡྷི་རསྟུ། །ཚེ་འོད་དཔག་མེད་མགོན་པོ་སྤྱན་རས་གཟིགས། །རྒྱལ་ཀུན་སྤྱི་གཟུགས་བདེ་འབྱུང་ཡབ་ཡུམ་སོགས། །རྩ་གསུམ་སྲུང་མར་བཅས་ཡ་སྐྱབས་སུ་མཆི། །ཇི་ལྟར་སྨོན་པའི་འབྲས་བུ་འགྲུབ་པར་མཛོད། ༡ རིགས་ཀུན་ཁྱབ་བདག་མགོན་པོ་འོད་མི་འགྱུར། །ཐེག་དགུ་ཡོངས་ཀྱི་རྒྱས་གདབ་དཀྱིལ་འཁོར་པའི། །རྣམ་པར་ཤར་བ་དགོངས་པ་འདུས་པའི་ལྷར། །གུས་པས་ཕྱག་འཚལ་རྟག་ཏུ་ཐུགས་རྗེས་ཟུངས། ༢ སྙིགས་ལྔའི་མུན་པར་ཆུད་ལ་ཐུགས་རྗེའི་ཉི། །རྒྱལ་བ་ཟླ་བ་ཀུན་ལས་འཕགས་སོ་ཞེས། །བདེན་ཚིག་བསླུ་བ་མེད་པ་རྡོ་རྗེའི་བཀའ། །དུས་ལ་བབ་བོ་ཡེ་ཤེས་སྤྱན་གྱིས་གཟིགས། ༣ དཀྱིལ་འཁོར་ཀུན་གྱི་བྱེད་པོ་བླ་མ་སྟེ། །བླ་མ་ཀུན་གྱི་མཆོག་རབ་མཐར་ཐུག་པ། །པདྨ་བཛྲའི་དཀྱིལ་འཁོར་ཚོམ་བུ་དགུ། །བརྒྱུད་པར་བཅས་པའི་སྐུ་བརྙན་བཞེངས་པ་དང་། ༤ ཆོས་ཕུང་བརྒྱད་ཁྲི་བཞི་སྟོང་བྲིས་པ་དང་། །བསོད་ནམས་མཉམ་ཞིང་འབྲུ་རེར་ཌཱ་ཀི་མ། །འབུམ་ཕྲག་འདུ་བར་བསྔགས་པའི་གསེར་
ཆོས་འདི། །དད་གུས་ཆེན་པོས་བཞེངས་པའི་དགེ་བ་དང་། ༥ བདག་གཞན་འགྲོ་བ་ཀུན་གྱིས་དུས་གསུམ་དུ། །རྣམ་པར་དཀར་བའི་ལེགས་བྱས་ཇི་བསགས་པ། །ཐམས་ཅད་གཅང་གྱུར་བྱང་ཆུབ་སྙིང་པོ་རུ། །འཁོར་གསུམ་མི་དམིགས་ཤེས་རབ་སྟོབས་ཀྱིས་བསྔོ། ༦ ཀུན་ཏུ་བཟང་དང་འཇམ་དཔལ་དཔའ་བོ་སོགས། །སྲས་བཅས་རྒྱལ་བས་དམིགས་པ་མེད་པ་ཡི། །བསྔོ་བ་མཆོག་གིས་ཇི་ལྟར་བསྔོས་པ་ལྟར། །བདག་ཀྱང་དེ་དང་མཚུངས་པར་བསྔོ་བར་བགྱི། ༧ བསོད་ནམས་མཐུ་ཡིས་དེང་ནས་བྱང་ཆུབ་བར། །བསམ་བཞིན་སྲིད་པར་འཇུག་པ་མ་གཏོགས་པ། །ལས་ཀྱི་དབང་གིས་ཁམས་གསུམ་རིགས་དྲུག་ཏུ། །མི་འཁྱམས་ལས་རླུང་དབུ་མར་དག་པར་ཤོག༨འགྲོ་ཕན་སྐྱེ་སྲིད་གང་དང་ཅི་སྣང་ཡང་། །རིགས་བདག་མཚོ་སྐྱེས་རྡོ་རྗེ་ཡབ་ཡུམ་དང་། །སྐད་ཅིག་རྨི་ལམ་དུ་ཡང་མི་འབྲལ་ཞིང་། །གདམས་པའི་བདུད་རྩི་ངོམ་མེད་འཐུང་བར་ཤོག༩བདེ་བ་ཆེན་པོ་པད་འབྱུང་ཡབ་ཡུམ་གྱིས། །དབང་བསྐུར་བྱིན་བརླབས་གསང་བའི་མཛོད་གཏད་ནས། །དཀའ་བ་མེད་པར་ཚེ་ལུས་གཅིག་ཁོ་ནར། །རིག་འཛིན་རྣམ་བཞིའི་གོང་འཕང་འགྲུབ་པར་ཤོག ༡༠ རྣམ་སྨིན་ཕུང་ཁམས་འཇའ་ལུས་རྡོ་རྗེར་དག །འཕོ་བཙས་ངག་རླུང་གཞོམ་མེད་རང་སྒྲར་སྨིན། །དྲན་རིག་ཀ་དག་ཁྱབ་བདག་ཆེན་པོར་གྲོལ། །པདྨའི་གསང་བ་གསུམ་
དང་མཉམ་གྱུར་ཤོག༡༡འདུལ་བ་བཞི་ཡིས་དངོས་དང་བརྒྱུད་པ་ནས། །གང་གི་ཕྲིན་ལས་ནམ་མཁའི་མཐར་སྤེལ་ཏེ། །ཚར་གཅོད་རྗེས་བཟུང་བླ་མེད་བརྟུལ་ཞུགས་ཀྱིས། །ཐུགས་དགོངས་བདག་ཉིད་ཁོ་ནས་སྐོང་བྱེད་ཤོག ༡༢ མཁའ་ཁྱབ་ཡིད་ཅན་སྤྱི་དང་ཁྱད་པར་དུ། །བདག་ལ་དུས་གསུམ་བཟའ་ངན་པར་མ་ཡི། །འབྲེལ་བ་ཐོགས་ཚད་པདྨ་བཛྲ་ཡི། །གོ་འཕང་གདོན་མི་ཟ་བར་ཐོབ་གྱུར་ཅིག ༡༣ ཐོག་མེད་ནས་བསགས་སྒྲིབ་གཉིས་བག་ཆགས་དང་། །ཁྱད་པར་སྡོམ་པ་གསུམ་དང་འགལ་བ་སོགས། །བཅས་དང་རང་བཞིན་ཁ་ན་མ༴་ཐོ་བ། །ཐར་པའི་གེགས་རྣམས་དུས་འདིར་བྱང་གྱུར་ཅིག ༡༤ ནད་གདོན་བགེགས་རིགས་བྱད་ཟོར་གཏད་ཁྲོམ་དང་། །རྨིས་ལྟས་མཚན་ངན་ལོ་ཟླ་ཞག་ཀེག་སོགས། །སྔོན་ལས་འཕྲལ་རྐྱེན་གཟུགས་ཅན་གཟུགས་མེད་ཀྱི། །ཉེར་འཚེ་མ་ལུས་རྩད་ནས་ཞི་གྱུར་ཅིག ༡༥ གསོན་གཤིན་དགེ་འདུན་དཀོར་ལ་སྤྱོད་པ་དང་། །སློབ་དཔོན་ས་བཟུང་ཆོས་ལ་དབང་ཟོས་སོགས། །དཀོན་མཆོག་ལ་བསྟན་སྡིག་པ་ཅི་བསགས་པ། །ཐམས་ཅད་སྐད་ཅིག་ཡུད་ལ་དག་པར་ཤོག ༡༦ དུག་ལྔ་ཆོས་བརྒྱད་ལ་སོགས་ཐར་པ་དང་། །ཚེ་ཡི་གེགས་གྱུར་ནང་མུག་འཁྲུགས་རྩོད་སོགས། །སྙིགས་མའི་རྒུད་པ་ཀུན་ཞི་འཇིག་རྟེན་ཀུན། །སྡེ་བཞིའི་རྫོགས་ལྡན་གསར་པས་ཚིམས་བྱེད་ཤོག ༡༧ ཚེ་
བསོད་དཔལ་འབྱོར་མངའ་ཐང་སྙན་གྲགས་དང་། །ཆོས་བཞིན་སྤྱོད་དང་བྱང་ཆུབ་མཆོག་གི་སེམས། །ཉམས་རྟོགས་ཡོན་ཏན་ཡར་ངོའི་ཟླ་བ་དང་། །དབྱར་གྱི་ཆུ་གཏེར་བཞིན་ཏུ་རྒྱས་གྱུར་ཅིག༡༨ཁྱད་པར་ཐུབ་བསྟན་མདོ་སྔགས་ཚུལ་སྤྱི་དང་། །སྒྲུབ་བརྒྱུད་སྙིང་པོ་འོད་གསལ་རྡོ་རྗེ་ཐེག །མཁའ་ལྟར་ཁྱབ་ཅིང་ནམ་མཁའ་ཇི་སྲིད་གནས། །ཆོས་ཀྱིས་ཕོངས་པ་མིང་ཡང་མི་གྲགས་ཤོག ༡༩ །བསྟན་འཛིན་སྐྱེས་བུ་ཐམས་ཅད་ཐུགས་མཐུན་ཞིང་། །སྐུ་ཚེ་རྡོ་རྗེ་ལྟར་བསྟན་མཛད་ཕྲིན་རྒྱས། །ཆོས་འཁོར་ཀུན་དང་ཟབ་གསང་རྫོགས་པ་ཆེའི། །བསྟན་པའི་ཉི་མ་ཕྱོགས་བརྒྱར་སྣང་བྱེད་ཤོག ༢༠ །སྐྱེ་བར་ཚུལ་གནས་ཐོས་བསམ་སྒོམ་ལ་ཞུགས། །ཕར་ཕྱིན་དྲུག་རྫོགས་སྡོམ་གསུམ་རྣམ་པར་དག །ཐེག་ཆེན་གསང་སྔགས་བཅུད་དང་རྟག་འཕྲད་ནས། །ས་བཅུ་ལམ་ལྔ་མཐའ་རུ་ཕྱིན་པར་ཤོག༢༡ལོག་པའི་ལམ་དང་མི་དགེའི་བཤེས་གཉེན་དང་། །མི་འཕྲད་བརྒྱུད་ལྡན་བླ་མས་རྗེས་བཟུང་སྟེ། །སྔགས་ཀྱི་ལྟ་སྤྱོད་ཟབ་མོ་སྒྲ་ཇི་བཞིན། །སྤྱོད་ནུས་རྡོ་རྗེ་སེམས་དཔའི་གནས་ཐོབ་ཤོག༢༢བླ་མའི་ཐུགས་དགོངས་རྫོགས་ཤིང་ཐུགས་ཡིད་འདྲེས། །ཕ་མའི་དྲིན་ལན་འཁོར་ཞིང་ཐར་ལམ་སྦོར། །དོན་གཉིས་ལྷུན་གྲུབ་ཆོས་ཀྱི་རྒྱལ་པོའི་སྐུ། །བདག་གཞན་འགྲོ་བ་ཀུན་གྱི་བརྙེས་པར་ཤོག༢༣ཁྱད་པར་བདག་དང་
བདག་གི་ཚེ་འདི་ལ། །མཐོང་ཐོས་དྲན་རེག་འབྲེལ་བ་ཐོབ་ཀུན་དང་། །ཁྱད་པར་འཕགས་པའི་རྟེན་མཆོག་འདི་དག་ལ། །འབྲེལ་བ་ཅུང་ཟད་ཐོགས་པ་ཐམས་ཅད་ཀུན། ༢༤ ཚེ་འདིར་འགལ་རྐྱེན་ཀུན་ཞི་མཐུན་རྐྱེན་འགྲུབ། །ཐར་པའི་ལམ་ལ་དད་དམ་ཤུགས་ཀྱིས་འཇུག །རང་གཞན་འབྲེལ་བར་བཅས་ཀུན་དགེ་ལ་སྦྱོར། །གཤིས་ངན་འཆི་རྐྱེན་གཏན་ནས་མི་འབྱུང་ཤོག ༢༥ །ཚེ་འདིས་སྣང་བ་ནུབ་ཚེ་གནད་གཅོད་ཀྱི། །ཟུག་རྔུ་མི་འབྱུང་རྩ་གསུམ་དཀྱིལ་འཁོར་ལྷས། །མངོན་སུམ་བསུས་ཏེ་བདེ་ཆེན་ཞིང་ཁམས་སུ། །བརྫུས་སྐྱེས་འོད་དཔག་མེད་པའི་ཞལ་མཐོང་ཤོག༢༦མདོར་ན་རྒྱལ་དབང་པདྨ་སཾ་བྷ་བའི། །གསང་བ་གསུམ་དང་དབྱེར་མེད་གཅིག་གྱུར་ནས། །ཕྱོགས་བཅུ་དུས་གསུམ་རྒྱལ་བ་སྲས་བཅས་ཀྱི། །རྣམ་ཐར་བདག་ཉིད་ཁོ་ནས་ངེས་འགྲུབ་ཤོག༢༧རྟེན་མཆོག་འདི་ཡང་བྱམས་པའི་ཟླ་བ་ནི། །འཛམ་བུ་གླིང་གི་དཔལ་དུ་སྣང་དེ་སྲིད། །བསྟན་པའི་བཙས་དང་འགྲོ་བའི་བསོད་ནམས་ཀྱི། །ཞིང་དུ་ཉམས་པ་མེད་པར་བཞུགས་གྱུར་ཅིག༢༨དེ་མཐུས་བླ་མ་དགོངས་པ་འདུས་པ་ཡི། །བསྐྱེད་རྫོག་ནོར་བུའི་བང་མཛོད་ཁ་བྱེ་བས། །འབྱོར་ལྡན་རིག་པ་འཛིན་པའི་མྱུ་ཚོགས་ཀྱིས། །དོན་གཉིས་འཁོར་ལོ་མཁའ་ཁྱབ་སྒྱུར་བྱེད་ཤོག༢༩སངས་རྒྱས་སྐུ་གསུམ་བརྙེས་པའི་བྱིན་རླབས་དང་། །ཆོས་ཉིད་མི་
འགྱུར་བདེན་པའི་བྱིན་རླབས་དང་། །དགེ་འདུན་མི་ཕྱེད་འདུས་པའི་བྱིན་རླབས་ཀྱི། །ཇི་ལྟར་བསྔོ་བ་སྨོན་ལམ་འགྲུབ་པར་ཤོག༣༠ཅེས་དགོངས་འདུས་སྐུ་རྟེན་ཞལ་ཐང་གྲྭ་ཚང་༡༡གསུང་རྟེན་གསེར་ཆོས་པུསྟ་ཀ་བཅུ་གསུམ་བཅས་བཞེངས་གྲུབ་པའི་སྐབས། པདྨའི་རྒྱལ་ཚབ་ཏཱའི་སི་ཏུ་པདྨ་དབང་ཆེན་གྱི་བཀའ་འབབས། པདྨ་གར་གྱི་དབང་ཕྱུག་རྩལ་གྱིས་དཔལ་སྤུངས་རི་ཁྲོད་ཀུན་བཟང་བདེ་ཆེན་འོད་གསལ་གླིང་དུ་བྲིས་པ་ཡ་ཐཱ་སིདྡྷིྷ་བནྟུ། དགེ་ལེགས་འཕེལ། ༈བསྐལ་བཟང་སྒྲོན་མེ་སྟོང་ཕྲག་ལས། །ཐུགས་བསྐྱེད་པད་དཀར་ལྟར་འཕགས་པ། །འགྲོ་མགོན་ཤཱཀྱའི་རྒྱལ་པོ་ཡི། །བསྟན་པ་ཡུན་རིང་འབར་གྱུར་ཅིག །ཐེག་གསུམ་མཐར་ཐུག་སེང་གེའི་སྒྲ། །ངེས་དོན་འཁོར་ལོ་ཐ་མ་ཡི། །སྡེ་སྣོད་དགོངས་འབྲེལ་བཅས་པ་ཀུན། །ཡུན་རིང་བསྟན་པ་འབར་གྱུར་ཅིག །ས་བཅུའི་དབང་ཕྱུག་མ་ཕམས་པ། །ཤིང་རྟ་ཆེན་པོ་ཐོགས་མེད་མཆེད། །བརྩོད་དུས་ཀུན་མཁྱེན་ཞི་བའི་ཞབས། །དགོངས་དོན་ཚུལ་བཞིན་བཀྲལ་བ་ཡི། །བཀའ་སྲོལ་གངས་རིའི་ལྗོངས་འདི་ན། །གཟུ་བཙན་འཇིག་རྟེན་མིག་གཅིག་གི། །བཀའ་དྲིན་ཆེན་པོས་སྣང་བྱས་པའི། །བསྟན་པ་ཡུན་རིང་འབར་གྱུར་ཅིག །རིགས་ལྡན་ཆེན་པོ་ཀུན་སྤངས་པ། །རྒྱལ་བ་ཡེ་ཤེས་བྱང་ཆུབ་སེམས། །ཡོན་ཏན་རྒྱ་མཚོ་ཆོས་ཀྱི་མཛོད། །ཁྱད་པར་རྒྱལ་བས་ལུང་བསྟན་པ། །ཀུན་མཁྱེན་ཆེན་པོ་བདེ་བར་གཤེགས། །ཡོངས་རྫོགས་བསྟན་པ་
རྒྱ་མཚོའི་བདག །ངེས་དོན་དབུ་མའི་ཤིང་རྟ་ཆེ། །ཆོས་ཀྱི་རྒྱལ་པོ་ཇོ་ནང་པའི། །བརྒྱུད་འཛིན་མཁས་ཤིང་གྲུབ་པའི་ཚོགས། །གྲངས་ མེད་སྤྱི་དང་ཁྱད་པར་དུ། །གསང་བདག་སྒྲོལ་བའི་མགོན་པོ་ཡི། །བསྟན་པ 
་ཡུན་རིང་འབར་གྱུར་ཅིག །ངེས་དོན་ཕྱིར་མི་ལྡོག་པའི་གཏམ། །འོད་གསལ་བདེ་གཤེགས་སྙིང་པོའི་ཚུལ། །ལེགས་པར་རྣམ་པར་ཕྱེ་བ་ཡི། །བསྟན་པ་ཡུན་རིང་འབར་གྱུར་ཅིག །འཕོ་བའི་འཇིགས་འཇོམས་རྒྱུད་ཀྱི་རྒྱལ། །ཕྱི་ནང་གཞན་དང་དེ་བཞིན་ཉིད། །ཟུང་འཇུག་རྣལ་འབྱོར་ཡན་ལག་དྲུག །ཡུན་རིང་བསྟན་པ་འབར་གྱུར་ཅིག །ཤཱཀྱ་སེང་གེའི་བསྟན་པ་ལ། །མདོ་དོན་གཞན་སྟོང་དབུ་མ་དང་། །སྔགས་དོན་རྡོ་རྗེའི་རྣལ་འབྱོར་ལས། །མཐར་ཐུག་ཆོས་ཚུལ་གཞན་མེད་པས། །ཡིད་ཆེས་བསྐལ་པ་བཟང་ལྡན་ཏེ། །རྟོགས་ནས་གཞན་ལ་སྟོན་ནུས་པའི། །དམ་པའི་སྐྱེས་བུས་ས་སྟེང་ཁྱབ། །བསྟན་པ་ཡུན་རིང་འབར་གྱུར་ཅིག །ཅེས་པའང་འཇོ་ནང་ཆོས་ཀྱི་རྒྱལ་པོ་ཡབ་སྲས་ལ་མི་ཕྱེད་པའི་འདུན་པ་ཅན། ཀུན་མཁྱེན་ཏཱའི་སི་ཏུའི་བཀའ་འབངས་ཐ་ཤལ་པ་ཀརྨ་ངག་དབང་ཡོན་ཏན་རྒྱ་མཚོས་དཔལ་ཛཾ་ཐང་གི་ཆོས་སྡེར་རྟེན་འབྲེལ་ཆེད་དུ་བྲིས་པ་དགེ་ལེགས་འཕེལ། ༈བདག་གཞན་དུས་གསུམ་བསགས་དང་ཡོད་པ་ཡི། །རྣམ་དཀར་དགེ་བའི་དཔལ་ཀུན་གཅིག་བསྡོམས་
ཏེ། །ཚེ་འོད་མཐའ་ཡས་རྣམ་རོལ་པ་ཆེན་མཆོག །ཤམྦྷ་ལ་ཡི་མི་འཇིགས་སེང་གེའི་ཁྲིར། །རིགས་ལྡན་དྲག་པོ་འཁོར་ལོའི་སྐུར་བཞེངས་ཚེ། །འཁོར་གྱི་འདུས་པ་དང་པོ་སྐྱེ་ཕྱིར་བསྔོ་། །དེར་ཡང་ཟབ་དོན་ཕྱི་ནང་གཞན་གསུམ་གྱི། །ཚེས་ཀྱི་བདུད་རྩིས་སྨིན་ཅིང་གྲོལ་གྱུར་ཅིག །ཅེས་པའང་སྒ་ཟེལ་དཀར་བླ་མ་ཞིག་གི་ངོར་ཡོན་ཏན་རྒྱ་མཚོས་ཇོ་བོ་སྒྱོགས་ཆེན་གདོང་རའི་མདུན་ནས་སྤེལ་བ་དགེ། ༄༅ །རྟག་བརྟན་ཡོངས་སུ་གྲུབ་པ་ཡི། །སྙིང་པོ་ཏིལ་ལ་མར་བཞིན་ཏུ། །ཡོངས་ཁྱབ་སེང་གེའི་སྒྲ་བསྒྲགས་པ། །བདེན་པ་དེ་ཡིས་བདེ་ལེགས་ཤོག ༡ འགྱུར་བ་མེད་པ་དམ་པའི་རྒྱུད། །ཟབ་ཅིང་ཕྲ་ལ་གཏིང་དཔག་དཀའ། །ཡེ་ཤེས་རྒྱ་མཚོའི་འབྱུང་གནས་དེར། །ཡིད་ཆེས་བདེན་པས་དགེ་གྱུར་ཅིག ༢ །ཀུན་རྫོབས་ཆོས་གཞན་བྲལ་བས་སྟོང་། །དོན་དམ་རང་ངོར་སྟོང་མིན་པ། །ཆ་མེད་ཀུན་འགྲོ་སྲོག་ཆེན་པོ། །བདེན་པས་ཕྱོགས་རྣམས་བདེ་མཛད་ཤོག ༣ །མ་བྱས་གཤིས་ཀྱི་དགེ་བ་སྟེ། །སྐྱེ་བ་
མེད་པས་འགག་པ་མེད། །ཀུན་ཏུ་བདུད་རྩིའི་བདག ་ཉིད་བདེན། །བདེན་པས་སྲོག་ནི་བརྟན་གྱུར་ཅིག ༤ །སངས་རྒྱས་རིན་ཆེན་ཟ་མ་ཏོག །རྒྱལ་བ་སེང་གེའི་ཁྲིར་བཞུགས་པ། །རྡོ་རྗེ་སེམས་དཔའ་དང་པོའི་བདག །ཆོས་དབྱིངས་བདེན་པས་མི་བསླུ་ཤོག ༥ །སེམས་ཀྱི་རྣམ་དཔྱད་ཤིན་ཏུ་སྤངས། །བལྟ་བར་མི་བཟོད་ནམ་མཁའི་ལུས། །རྣལ་འབྱོར་ཡེ་ཤེས་ཡུལ་དུ་སྣང་། །
ཟབ་མོའི་དོན་ཕྱིར་བདེ་ལེགས་སྩོལ། ༦ །ཆུ་ཤིང་ལྟ་བུའི་སྟོང་ལས་འདས། །རྒྱུན་མི་ཆད་པའི་བདེ་བ་ཅན། །འཕོ་འཛག་ཀུན་བྲལ་ཡེ་ཤེས་སྐུ། །ས་གསུམ་དགེ་ལེགས་མཛད་གྱུར་ཅིག ༧ །ཐོག་མཐའ་མི་དམིགས་དམ་པའི་བདག །འཁོར་ཚེ་སྒྲིབ་པ་ཀུན་སྤངས་པ། །རྡོ་རྗེའི་རང་བཞིན་སེམས་ཅན་ཀུན། །སྲུང་མཛད་དེ་ཡིས་རྟག་སྲུང་མཛོད། ༨ །གཏེར་དང་འབྲས་བུའི་ཤིང་བཞིན་ཏུ། འཇིག་རྟེན་ཕན་མཛད་རིགས་གཉིས་པོ། །ཤེས་བྱ་བླ་ན་མེད་བདེན་པས། །བདག་སོགས་འགྲོ་ཀུན་བདེ་གྱུར་ཅིག ༩ །ཡེ་ཤེས་ཉིན་མོར་བྱེད་པའི་སྐུ། །པདྨ་འདབ་མ་རྒྱས་པའི་སྤྱན། །རྒྱུད་གསུམ་ཡོངས་དག་མ་ནིང་གི། །གོང་འཕང་རྡོ་རྗེའི་སྐུ་བརྙེས་ཤོག ༡༠ །ཤིས་པ་བརྗོད་པའི་ཚིག་ཕྲེང་སེང་གེའི་སྒྲ་ཞེས་བྱ་བ་ཀརྨ་ངག་དབང་ཡོན་ཏན་རྒྱ་མཚོས་སྤེལ་བ་དགེ་ལེགས་འཕེལ། །མངྒ་ལཾ། ཤུབྷཾ། །