རྒྱ་གར་འཕགས་པའི་ཡུལ་དུ་ཇི་ལྟར་བྱུང་བའི་ཚུལ།

༈ དེ་ལྟར་འཛམ་བུའི་གླིང་འདིར་བསྟན་པ་དམ་པའི་ཆོས་ཀྱི་འབྱུང་ཚུལ་ལ་གཉིས་ལས། དང་པོ་རྒྱ་གར་འཕགས་པའི་ཡུལ་དུ་ཇི་ལྟར་བྱུང་བའི་ཚུལ་ནི། དེ་ཡང་སྤྱིར་བསྐལ་བ་ལ། སྒྲོན་བསྐལ་དང་མུན་བསྐལ་གཉིས་ལས། སངས་རྒྱས་འབྱུང་བ་ལ་སྒྲོན་བསྐལ་དང་། མི་འབྱུང་བ་ལ་མུན་བསྐལ་ཞེས་བྱ་སྟེ། སྒྲོན་བསྐལ་བསྐལ་བ་བཟང་པོ་ལ་སངས་རྒྱས་སྟོང་ངམ་སྟོང་རྩ་ལྔ། དེ་ནས་མུན་བསྐལ་བསྐལ་ཆེན་དྲུག་ཅུ། དེ་ནས་སྒྲོན་བསྐལ་སྙན་པ་ཆེན་པོ་ལ་སངས་རྒྱས་ཁྲི། དེ་ནས་མུན་བསྐལ་ཁྲི་འདས་པ་དང་། བསྐལ་པ་སྐར་མ་ལྟ་བུ་ཞེས་བྱ་བའི་སྒྲོན་བསྐལ་ལ་སངས་རྒྱས་ཁྲི། དེ་ནས་མུན་བསྐལ་སུམ་བརྒྱ། དེ་ནས་སྒྲོན་བསྐལ་ཡོན་ཏན་བཀོད་པ་ལ་སངས་རྒྱས་བརྒྱད་ཁྲི་བཞི་སྟོང་འབྱུང་བར་བསྐལ་བཟང་ནས་བཤད། བསྐལ་པ་བཟང་པོ་འདི་ལ་སྙིང་རྗེ་པདྨ་དཀར་པོ་ནས་སངས་རྒྱས་སྟོང་དང་རྩ་ལྔའམ་དྲུགགསང་བ་བསམ་གྱིས་མི་ཁྱབ་པའི་མདོ་སོགས་ནས་སངས་རྒྱས་སྟོང་འབྱོན་པར་བཤད། བསྐལ་བཟང་སངས་རྒྱས་སྟོང་རྩ་གཉིས་ཞེས་པ། དཀོན་བརྩེགས་ལས་བསྐལ་པ་མཛེས་པར་སྣང་བར་འཇིག་རྟེན་གྱི་ཁམས་རྣམ་པར་རྒྱན་ཞེས་བྱ་བར། བླ་ན་མེད་པ་ལྷ་དང་མིའི་སྟོན་པ་སངས་རྒྱས་བཅོམ་ལྡན་འདས་ཡོན་ཏན་མཐའ་ཡས་རིན་ཆེན་སྣ་ཚོགས་བཀོད་པའི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་བའི་དུས། འཁོར་ལོ་སྒྱུར་བའི་རྒྱལ་པོ་ཡུལ་འཁོར་སྲུང་ཞེས་བྱ་བ་རིན་ཆེན་སྣ་བདུན་དང་ལྡན་པ་གླིང་བཞི་ལ་དབང་བ། སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། དགེ་བའི་རྩ་བ་བསྐྱེད་པ་བསོད་ནམས་དང་གཟི་བརྗིད་དང་ལྡན་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཞིག་བྱུང་། དེ་ལ་བཙུན་མོའི་འཁོར་བདུན་འབུམ་ཡོད་དེ། ཐམས་ཅད་ཀྱང་མཚན་དང་ལྡན་པའི་ན་ཆུང་བུད་མེད་རིན་པོ་ཆེའི་ལོངས་སྤྱོད་དང་ལྡན་པ་ཤ་སྟག་གོ། ཐམས་ཅད་ཀྱང་བླ་ན་མེད་པའི་བྱང་ཆུབ་ཏུ་ཞུགས་པར་གྱུར་པ་དག་གོ། དེ་ལ་བུ་སྟོང་དུ། སྐྱེས་བུ་ཆེན་པོའི་མཚན་ཉི་ཤུ་རྩ་བརྒྱད་ཀྱིས་བརྒྱན་པ། ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་པ་ཤ་སྟག་གོ། བཙུན་མོའི་ནང་ནས་མ་སྨད་ཅེས་བྱ་བ་དང་། དཔེ་མེད་མ་ཞེས་བྱ་བ་དེ་གཉིས་རྫིང་དགའ་བ་ཞེས་བྱ་བར་ཁྲུས་བྱས་ཏེ་སྤོས་ཆུས་གོས་བརླན་པས་སེང་གེའི་ཁྲི་པདྨའི་འབྱུང་གནས་བཟང་པོ་ལ་འདུག་གོ། དེ་གཉིས་དེར་འདུག་པའི་པང་ན་རྒྱལ་པོ་གཞོན་ནུ་གཟུགས་བཟང་བ་མཛེས་པ་ལྟ་ན་སྡུག་པ་ཁ་དོག་བཟང་པོ་རྒྱས་པ་མཆོག་དང་ལྡན་པ་གཉིས་སྐྱིལ་མོ་ཀྲུང་བཅས་པར་རྫུས་ཏེ་བྱུང་ངོ་། །དེ་ནས་སྐད་ཅིག་དེ་ཉིད་ལ་སྟེང་གི་བར་སྣང་ལས་ལྷ་རྣམས་ཀྱིས། ཀྱེ་མ་ཁྱེའུ་འདི་ནི་ཆོས་ཀྱི་སེམས་དཔའ་འོ། །ཀྱེ་མ་ཁྱེའུ་འདི་ནི་ཆོས་ཀྱི་བློ་གྲོས་སོ། །ཞེས་པའི་སྒྲ་བྱུང་བས་མ་སྨད་པའི་པང་ལ་ཆོས་སེམས་དང་། དཔེ་མེད་པའི་པང་ལ་ཆོས་ཀྱི་བློ་གྲོས་སུ་བཏགས་སོ། །ཞེས་སོགས་ནས། བཅོམ་ལྡན་འདས་༼མར་མེ་༽མཛད་དེ་དེའི་ཚེ་དེའི་དུས་ན་འཁོར་ལོ་སྒྱུར་བའི་རྒྱལ་པོ་ཡུལ་འཁོར་སྲུང་ཞེས་བྱ་བར་གྱུར་ཏོ། །དེའི་བུ་སྟོང་ཡོད་པ་དེ་དག་ནི་བསྐལ་པ་བཟང་པོའི་བྱང་ཆུབ་སེམས་དཔའ་ཤ་སྟག་སྟེ། དེ་བཞིན་གཤེགས་པ་འཁོར་བ་འཇིག་ནས་བཟུང་སྟེ། དེ་བཞིན་གཤེགས་པ་མོས་པ་ཞེས་བྱ་བའི་བར་དེའི་ཚེ་དེའི་དུས་ན་རྒྱལ་པོ་གཞོན་ནུར་གྱུར་ཏོ། །ཞེས་གསུངས་པ་ལྟར། རྒྱལ་པོ་ཡུལ་འཁོར་སྲུང་གིས་རིན་པོ་ཆེ་སྣ་བདུན་གྱི་བུམ་པར་གཞོན་ནུ་དེ་རྣམས་ཀྱི་མིང་བྲིས་ནས་བཅུགཞག་བདུན་དུ་མཆོད་པ་བྱས་པས་ཐོག་མར་གཞོན་ནུ་རྣམ་པར་དག་པའི་བློ་གྲོས་ཀྱི་མིང་བྱུང་སྟེ་དེ་ནི་དེ་བཞིན་གཤེགས་པ་འཁོར་བ་འཇིག་གོ།  དེའི་འོག་ཏུ ་རྒྱལ་བུ་རྣམ་པར་རྒྱལ་བའི་སྡེ་བྱུང་སྟེ་དེ་ནི་གསེར་ཐུབ་བོ། ། དེའི་འོག་ཏུ ་གཞོན་ནུ་དབང་པོ་ཞི་བ་ཞེས་བྱ་བ་བྱུང་སྟེ། དེ་ནི་འོད་སྲུང་ངོ་། ། དེའི་འོག་ཏུ ་གཞོན་ནུ་དོན་གྲུབ་ཀྱི་མིང་བྱུང་སྟེ། དེ་ནི་ཤཱཀྱ་ཐུབ་པའོ། ། དེའི་འོག་ཏུ ་གཞོན་ནུ་སྐ་རགས་ཅན་ཞེས་བྱ་བའི་མིང་བྱུང་སྟེ། དེ་ནི་བྱམས་པའོ། །མཐར་གཞོན་ནུ་བློ་གྲོས་མཐའ་ཡས་ཞེས་བྱ་བའི་མིང་བྱུང་སྟེ། དེ་ནི་དེ་བཞིན་གཤེགས་པ་མོས་པའོ། །ཆོས་ཀྱི་སེམས་དཔའ་ནི་སངས་རྒྱས་སྟོང་གི་ཆོས་ཉན་པ་དང་། མོས་པ་དང་། རྟོགས་པར་བྱ་བའི་ཕྱིར་བཀའི་བསྡུ་བ་མཛད་པའི་གསང་བདག་ལག་ན་རྡོ་རྗེ་དང་། ཆོས་ཀྱི་བློ་གྲོས་ནི་སངས་རྒྱས་དེ་རྣམས་༼ལ༽ཆོས་འཁོར་བསྐོར་བར་བསྐུལ་ཞིང་གསོལ་བ་འདེབས་པར་བཤད་དོ། །འདི་དང་བསྐལ་བཟང་གི་མདོ་མཐུན་པར་སྟོང་དང་རྩ་གཉིས་སུ་བཤད། ཡང་འཕགས་པ་ལི་ཙ་བཱི་དྲི་མ་མེད་པར་བསྟན་པ་ལས། ལྷའི་དབང་པོ་སྔོན་བྱུང་བ་འདས་པའི་དུས་ན་བསྐལ་པ་གྲངས་མེད་པའི་ཡང་ཆེས་གྲངས་མེད་བསམ་གྱིས་མི་ཁྱབ་པར་གྱུར་པ་དེའི་ཚེ་དེའི་དུས་ན། བསྐལ་པ་རྣམ་པར་སྦྱོང་བ་ལ་འཇིག་རྟེན་གྱི་ཁམས་ཆེར་བཀོད་པར། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སྨན་གྱི་རྒྱལ་པོ་ཞེས་བྱ་བ་འཇིག་རྟེན་དུ་བྱུང་སྟེ། ལྷའི་དབང་པོ། དེའི་ཚེ་དེའི་དུས་ན་འཁོར་ལོ་བསྒྱུར་བའི་རྒྱལ་པོ་རིན་ཆེན་གདུགས་ཞེས་བྱ་བ་གླིང་བཞི་ལ་དབང་བ་རིན་པོ་ཆེ་སྣ་བདུན་དང་ལྡན་པ་ཞིག་བྱུང་སྟེ། དེ་ལ་བུ་དཔའ་བ་བརྟུལ་ཕོད་པ་ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ་སྟོང་དུ་ཚང་བ་ཡོད་དེ། རྒྱལ་པོ་རིན་ཆེན་གདུགས་དེས་བཅོམ་ལྡན་འདས་དེ་བཞིན་གཤེགས་པ་སྨན་གྱི་རྒྱལ་པོ་འཁོར་དང་བཅས་པ་ལ་བར་གྱི་བསྐལ་པ་ལྔའི་བར་དུ་དགེ་བའི་ཡོ་བྱད་ཐམས་ཅད་ཀྱིས་རི་མོར་བྱས་སོ། །ཞེས་དང་། ངས་དེ་བཞིན་གཤེགས་པ་ལ་མཆོད་པ་བྱས་ཀྱི། ད་ཁྱོད་ཀྱིས་ཀྱང་དེ་བཞིན་གཤེགས་པ་ལ་མཆོད་པར་གྱིས་ཤིགདེ་ནས་རྒྱལ་བུ་གཞོན་ནུ་དེ་དག་གིས་ཕ་རྒྱལ་པོ་རིན་ཆེན་གདུགས་ལ་ལེགས་སོ་ཞེས་སྨྲས་ནས། དེ་:གཉན་༼མཉན༽ཏེ་དེ་དང་ལྷན་ཅིག་ཚོགས་ནས་དེ་བཞིན་གཤེགས་པ་སྨན་གྱི་རྒྱལ་པོ་ལ་བསྐལ་པ་བར་མ་ལྔའི་བར་དུ་དགེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་སོ། །དེའི་ནང་ནས་རྒྱལ་པོ་ཟླ་གདུགས་ཞེས་བྱ་བ་དེ་གཅིག་པུ་དབེན་པར་སོང་ནས་འདི་སྙམ་དུ་སེམས་ཏེ་མཆོད་པ་དེ་བས་གཞན་ཆེས་འཕགས་ཤིང་རྒྱ་ཆེ་བ་ཡོད་དོ་སྙམ་པ་དང་། སངས་རྒྱས་ཀྱི་བྱིན་རླབས་ཀྱིས་བར་སྣང་དེ་ལས་ལྷ་དག་གིས་འདི་སྐད་ཟེར་རོ། །སྐྱེས་བུ་དམ་པ་ཆོས་ཀྱི་མཆོད་པ་ནི་མཆོད་པ་ཐམས་ཅད་ཀྱི་ནང་ནས་མཆོག་གོ། ཞེས་སོགས་ནས། དོན་ལ་རྟོན་གྱི་ཚིག་འབྲུ་ལ་མི་རྟོན་པ། ཡེ་ཤེས་ལ་རྟོན་གྱི་རྣམ་ཤེས་ལ་མི་རྟོན་པ། ངེས་པའི་དོན་གྱི་མདོ་སྡེ་ལ་རྟོན་གྱི་དྲང་བའི་དོན་གྱི་ཀུན་རྫོབ་ལ་མངོན་པར་མ་ཞེན་པ། ཆོས་ཉིད་ལ་རྟོན་གྱི་གང་ཟག་ལ་བལྟ་བ་དམིགས་པར་འཛིན་པ་ལ་མངོན་པར་མ་ཞེན་པ། སངས་རྒྱས་ཀྱི་ཆོས་ཉིད་ཇི་ལྟ་བ་བཞིན་དུ་ཁོང་དུ་ཆུད་པ་འདི་ནི་རིགས་ཀྱི་བུ་བླ་ན་མེད་པའི་ཆོས་ཀྱི་མཆོད་པ་ཞེས་བྱའོ། །ཞེས་དང་། ལྷའི་དབང་པོ་དེའི་ཚེ་དེའི་དུས་ན་རིན་ཆེན་གདུགས་ཞེས་བྱ་བའི་འཁོར་ལོ་སྒྱུར་བ་དེ་གཞན་ཡིན་པ་སྙམ་དུ་འཛིན་ན། ལྷའི་དབང་པོ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རིན་ཆེན་འོད་འཕྲོ་དེ་དེ་བཞིན་གཤེགས་པ་དེའི་ཚེ་དེའི་དུས་ན་རིན་ཆེན་གདུགས་ཞེས་བྱ་བ་འཁོར་ལོ་བསྒྱུར་བའི་རྒྱལ་པོར་གྱུར་ཏོ། །རིན་ཆེན་ཟླ་གདུགས་དེའི་བུ་སྟོང་ཡོད་པ་དེ་དག་ནི་ད་ལྟར་གྱི་བསྐལ་པ་བཟང་པོའི་བྱང་ཆུབ་སེམས་དཔའ་འདི་དག་ཡིན་ཏེ། གང་བསྐལ་པ་བཟང་པོ་འདི་ལ། སངས་རྒྱས་སྟོང་ཚང་བར་འབྱུང་བའོ། །དེ་ལས་བཞི་ནི་སངས་རྒྱས་ལོག་པར་དད་སེལ་ལ་སོགས་པ་སྔོན་དུ་བྱུང་སྟེ་ལྷག་མ་རྣམས་ཀྱང་འབྱུང་བར་འགྱུར་རོ། །འཁོར་བ་འཇིག་ལ་སོགས་པ་སྣང་མཛད་ལ་ཐུག་པའི་བར་དུ་སྟེ་ཐ་མར་དེ་བཞིན་གཤེགས་པ་སྣང་མཛད་ཅེས་བྱ་བ་འབྱུང་ངོ་། །ལྷའི་དབང་པོ་དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་སྨན་གྱི་རྒྱལ་པོ་དེའི་དམ་པའི་ཆོས་ཡོངས་སུ་བཟུང་བ་རྒྱལ་པོ་ཟླ་གདུགས་ཞེས་བྱ་བ་དེ་གཞན་ཡིན་པ་སྙམ་དུ་འཛིན་ན། ཁྱོད་ཀྱིས་དེ་ལྟར་མི་ལྟའོ། །དེ་ཅིའི་ཕྱིར་ཞེ་ན། ལྷའི་དབང་པོ་ང་ཉིད་དེའི་ཚེ་དེའི་དུས་ན་རྒྱལ་པོ་ཟླ་གདུགས་ཞེས་བྱ་བར་གྱུར་ཏོ། །ཞེས་གསུངས་པ་ལྟར་དང་། ཡང་སྙིང་རྗེ་པདྨ་དཀར་པོའི་ལེའུ་གསུམ་པ་ལས། སྔོན་སངས་རྒྱས་ཀྱི་ཞིང་འདིར་བསྐལ་བ་འཛིན་པ་ཞེས་བྱ་བ་ལ་འཁོར་ལོས་བསྒྱུར་བའི་རྒྱལ་པོ་རྩིབས་ཀྱི་མུ་ཁྱུད་ཅེས་པ་དང་། དེའི་བུ་མིག་མི་འཛུམ་སོགས་སྟོང་། ཁམས་ཀྱི་རྒྱལ་ཕྲན་བརྒྱད་ཁྲི་བཞི་སྟོང་། རྒྱལ་པོའི་མདུན་ན་འདོན་བྲམ་ཟེ་རྒྱ་མཚོའི་རྡུལ་ཞེས་བྱ་བར། སྲས་གཅེན་ཁྱེའུ་རྒྱ་མཚོའི་སྙིང་པོ་དང་། གཅུང་ཐུ་བོ་རྒྱ་མཚོའི་དབང་ཕྱུག་ཁྱབ་བདག་ཅེས་བྱ་བ་སོགས་བརྒྱད་ཅུ། བྲམ་ཟེའི་སློབ་མ་བྱེ་བ་ཕྲག་གསུམ་གང་དག་རིག་བྱེད་སློབ་པའི་བྲམ་ཟེའི་བུ་ཐུ་བོ་མང་པོས་བཀུར་བ་ཁྱབ་འཇུག་སོགས་སྟོང་། བསྙེན་བཀུར་བའི་བྲམ་ཟེའི་ཁྱེའུ་ལྔ། བྲམ་ཟེའི་ཁྱེའུ་སྟོབས་ཆེན་ཤུགས་འཆང་རྣམས་ཡོད་པ་ལས། སྲས་རྒྱ་མཚོའི་སྙིང་པོ་རབ་ཏུ་བྱུང་ནས་དེ་བཞིན་གཤེགས་པ་རིན་ཆེན་སྙིང་པོ་ཞེས་བྱ་བར་སངས་རྒྱས་པའི་ཚེ། རིན་ཆེན་སྙིང་པོས། རྒྱལ་པོ་རྩིབས་ཀྱི་མུ་ཁྱུད་སངས་རྒྱས་ཚེ་དཔག་མེད་དང་། སྲས་མིག་མི་འཛུམ་སྤྱན་རས་གཟིགས་སོགས་དང་མཐུ་ཆེན་ཐོབ་པ་ལ་སོགས་པར་ལུང་བསྟན། ཁམས་ཀྱི་རྒྱལ་ཕྲན་བརྒྱད་ཁྲི་བཞི་སྟོང་པོ་དུས་གཅིག་ཏུ་འཇིག་རྟེན་གྱི་ཁམས་གཞན་དག་ཏུ་བྱང་ཆུབ་ཐོབ་པར་ལུང་བསྟན། གཅུང་རྒྱ་མཚོའི་དབང་ཕྱུག་ཁྱབ་བདག་སོགས་བདུན་ཅུ་རྩ་དགུ་པོ་བསྐལ་པ་ཨུཏྤལ་ཡང་དག་ཏོག་ཅེས་བྱ་བ་ལ་སྐྱེ་དགུའི་ཚེ་ལོ་བརྒྱད་ཁྲི་ཐུབ་པ་ན་སངས་རྒྱས་རིན་ཆེན་བརྩེགས་པ་ཞེས་བྱ་བ་དང་། དེའི་རྗེས་སུ་གཅུང་གཞན་རྣམས་ཀྱང་སངས་རྒྱས་བདུན་ཅུ་རྩ་དགུར་ལུང་བསྟན་ཅིང་། བྲམ་ཟེའི་ཁྱེའུ་སྐར་མིག་ཁྱུ་མཆོག་སོགས་སློབ་མ་བྱེ་བ་ཕྲག་གསུམ་པོ་སངས་རྒྱས་ཀྱི་ཞིང་འདིར་བླ་ན་མེད་པའི་སངས་རྒྱས་ཀྱི་གྲངས་སུ་མི་གཏོགས་ཤིང་། ཞེས་དང་། མི་མཇེད་འཇིག་རྟེན་གྱི་ཁམས་ཞེས་གྲགས་པ་འདིར། བྲམ་ཟེའི་ཁྱེའུ་སྐར་མ་སྐྱོང་སྐྱེ་དགུའི་ཚེ་ལོ་བཞི་ཁྲི་ཐུབ་པ་ན་སངས་རྒྱས་ཐོག་མར་འཁོར་བ་འཇིགགཉིས་པར་གཏམ་བུ་རུ་ཞེས་ཚེ་ལོ་སུམ་ཁྲི་པའི་དུས་སུ་གསེར་ཐུབ། ཁྱེའུ་ཀུན་གྱིས་སྲུང་ཞེས་པ་རྩོད་དུས་ཀྱི་མཚན་མ་བྱུང་བ་ན་འོད་སྲུང་། ཁྱེའུ་བཞི་པ་བགྲོད་བྱའི་བུ་དྲི་མ་མེད་པ་ཚེ་ལོ་བརྒྱད་ཁྲི་པའི་དུས་སུ་བྱམས་པ། དེ་བཞིན་རིག་བྱེད་སློབ་པ་སེང་གེ་མཆོག་དགའ་སོགས་བསྐལ་བཟང་གི་སངས་རྒྱས་དགུ་བཅུ་རྩ་དགུའི་བར་ལུང་བསྟན། སངས་རྒྱས་ལ་སོགས་དགེ་སློང་གི་དགེ་འདུན་ལ་དབུལ་བ་མ་མཆིས་པའི་ལོ་ཐང་སྤྱོད་པ་ལ་རིན་པོ་ཆེའི་རྣ་རྒྱན། གཉིས་པ་ཐང་ལ་སྤྱོད་པ་རིན་པོ་ཆེ་སྣ་བདུན་གྱི་རྣ་ཆ། གསུམ་པ་ལ་སྤྱོད་པ་ལ་རིན་ཆེན་བདུན་གྱི་ཁྲི། བཞི་པ་ཤུགས་ཀྱིས་སྤྱོད་པ་ལ་རིན་ཆེན་བདུན་གྱི་མཁར་བ། ལྔ་པ་སྙིང་པོ་སྤྱོད་པ་ལ་གསེར་གྱི་རིལ་བ་:སྒྲིང་ག་ར་༼བྷྲིང་ཀ་ར་༽བྱིན་ནས་སེམས་བསྐྱེད་དུ་བཅུག་པའི་བསྙེན་བཀུར་བ་ལྔ་པོ་དེ་བཞིན་གཤེགས་པ་རྟ་དབྱངས། བདེ་དབང་། བློ་གྲོས། དོན་བཅས་གསུང་དགའ། སེང་གེའི་བཤེས་གཉེན་ཞེས་བྱ་བ་རྣམས་སུ་ལུང་བསྟན་པ་བཅས་བསྐལ་བཟང་གི་སངས་རྒྱས་སྟོང་རྩ་བཞི་དང་། བྱང་ཆུབ་སེམས་དཔའ་གཞན་རྣམས་ཀྱིས་རྩོད་དུས་ཀྱི་གདུལ་བྱ་ཡོངས་སུ་སྤངས་པས། བྲམ་ཟེ་རྒྱ་མཚོའི་རྡུལ་གྱི་སྙིང་པོས་མཆོག་ཏུ་སེམས་བསྐྱེད་དེ་ཤཱཀྱ་ཐུབ་པར་ལུང་བསྟན་པ་དང་བཅས་ཉེར་ལྔ་བྱུང་བ་འདི་རྣམས་ཀྱིས་བསྟན་པས་བཟང་པོའི་བསྐལ་བ་ཕྱེད་སྐྱོང་ཞིང་། དེ་ནས་བྲམ་ཟེའི་ཁྱེའུ་སྟོབས་ཆེན་ཤུགས་འཆང་ཞེས་པས་སངས་རྒྱས་རིན་ཆེན་སྙིང་པོའི་དྲུང་དུ་སེམས་བསྐྱེད་པ་ནི། བཙུན་པ་བཅོམ་ལྡན་འདས་བསྐལ་པ་བཟང་པོ་དེ་ལ་རྒྱལ་བ་ཉི་མ་དག་ཡོངས་སུ་མྱ་ངན་ལས་འདས་པ་དེ་དག་གི་མཐར་བྲམ་ཟེའི་ཁྱེའུ་ཞེས་སྔ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང་དེ་བཞིན་གཤེགས་པ་སེང་གེའི་བཤེས་གཉེན་གཙུག་ཕུད་ཅེས་བགྱི་བ་དེ་སྲིད་དུ་ཡུན་རིང་པོར་བདག་གིས་བརྟུལ་ཞུགས་དང་། དཀའ་ཐུབ་སྤྱོད་པ་དང་། ཞེས་སོགས་དང་། དེ་བཞིན་གཤེགས་པ་སེང་གེའི་བཤེས་གཉེན་གཙུག་ཕུད་བཟང་པོ་ཡོངས་སུ་མྱ་ངན་ལས་འདས་པའི་ཆོས་ནུབ་པ་ན་བླ་ན་མེད་པར་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་གསལ་མཛད་ཅེས་བྱ་བར་འགྱུར་རོ། །ཁྱོད་ཀྱི་ཚེའི་ཚད་ནི་བསྐལ་པ་ཕྱེད་དུ་འགྱུར་རོ། །ཡོངས་སུ་མྱ་ངན་ལས་འདས་ནས་ཀྱང་ཇི་སྲིད་དུ་བསྐལ་བ་ཆེན་པོ་བཟང་པོའི་བསྐལ་བ་ཟད་པར་མ་གྱུར་པ་དེ་སྲིད་དུ་དམ་པའི་ཆོས་ནུབ་པར་མི་འགྱུར་ལ། ཞེས་སོགས་ལུང་བསྟན་པས་བསྐལ་པ་འདིར་ནི་མདོ་འདིའི་ལུགས་ལྟར་ན་སྔོན་ཆད་སངས་རྒྱས་སྟོང་རྩ་བཞི་ལས་བགྲངས་པ་མི་འདུག་ཀྱང་སྟོང་རྩ་དྲུག་ཏུ་འབྱུང་བར་འགྱུར་མོད། གང་ལྟར་ཡང་བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོ་འདི་ཉིད་བསྐལ་བཟང་གི་སངས་རྒྱས་བཞི་པར་བྱོན་པར་མི་མཐུན་པ་མེད་ཅིང་། འདིས་དང་པོར་བྱང་ཆུབ་མཆོག་ཏུ་ཐུགས་བསྐྱེད་ཚུལ་ནི། དེ་བཞིན་གཤེགས་པ་ཤཱཀྱ་ཐུབ་པ་ཆེན་པོ་ལ་གདུགས་གཅིགམཆིལ་ལྷམ་ཟུང་གཅིགརྫའི་བུམ་པ་བྱི་དོར་བྱས་པ་རྣམས་ཕུལ། མགྲོན་བུ་ལྔ་མེ་ཏོག་གི་ཚུལ་དུ་གཏོར་ནས། དེ་བཞིན་གཤེགས་པ་ཁྱེད་སྐུ་ཅི་འདྲ་དང་། ཞེས་སོགས་ཀྱིས་ཐུགས་བསྐྱེད། བར་དུ་བསྐལ་བ་གྲངས་མེད་གསུམ་དུ་ཚོགས་བསགས་པ་ནི་དེ་བཞིན་གཤེགས་པ་ཕུང་པོ་ཆེན་པོ་ནས་སངས་རྒྱས་རིན་ཆེན་གཙུག་ཏོར་ཅན་གྱི་བར་སངས་རྒྱས་བདུན་ཁྲི་ལྔ་སྟོང་ལ་མཆོད་ཅིང་བསྙེན་བཀུར་ནས་གྲངས་མེད་དང་པོའི་ཚོགས་བསགས། སངས་རྒྱས་དཀོན་མཆོག་ཡན་ལག་འཇིག་རྟེན་དུ་བྱོན་པ་ནས། མར་མེ་མཛད་ཀྱི་བར་སངས་རྒྱས་བདུན་ཁྲི་དྲུག་སྟོང་ལ་མཆོད་ཅིང་བསྙེན་བཀུར་ནས་གྲངས་མེད་གཉིས་པའི་ཚོགས་བསགས། སངས་རྒྱས་མར་མེ་མཛད་ནས་རྣམ་གཟིགས་ལ་ཐུག་གི་བར་སངས་རྒྱས་བདུན་ཁྲི་བདུན་སྟོང་ལ་གྲངས་མེད་གསུམ་པའི་ཚོགས་བསགས་ནས་སངས་རྒྱས་དབང་པོའི་ཏོག་ཏུ་སངས་རྒྱས་པ་ཡིན་ཏེ། མཛོད་ལས། རྣམ་གཟིགས་མར་མེ་རིན་ཆེན་གཙུག། གྲངས་མེད་གསུམ་གྱི་ཐ་མར་འབྱུང་། །དང་པོ་ཤཱཀྱ་ཐུབ་པ་ཡིན། །ཞེས་གསུངས་སོ། །