མཐར་རྩིས་བཤད་པའི་ལེའུ་སྟེ་གསུམ་པ།
མཐར་རྩིས་བཤད་པའི་ལེའུ་གསུམ་པ། ནམ་ཞག་གཏན་གྱི་མཐའ་རྩིས་ལ། །གཅེས་པའི་རྡེལ་བཞི་སྒོས་རྡེལ་གཅིག །མེད་དུ་མི་རུང་རྡེའུ་གཉིས། །མི་འགྱུར་ཀླུང་གི་རྡེའུ་ལྔ། །བརྒྱ་འདྲེའི་རྡེའུ་བརྒྱ་ཕྲག་གཅིག །སྟངས་གཅོད་རྡེའུ་ཉི་ཤུ་བཞི། །སྤྱི་བསྡུས་བརྒྱ་དང་སུམ་ཅུ་དྲུག །དེ་ཡང་སྣམ་ཕྱིང་ གཙང 
་མའི་སྟེང་། །མ་ཡེངས་སེམས་ཀྱིས་རྡེའུ་བོར། །ཐོག་མར་གཅེས་པའི་རྡེལ་བཞི་ནི། །རང་སྐྱེས་གནམ་ལོ་རྒྱལ་པོ་དང་། །ཟླ་བ་བློན་པོ་ཞག་དམག་མི། །དུས་ཚོད་མཚོན་ཆའི་རྡེའུ་བཞི། །སྐྱེས་པ་ཡིན་ན་དཀར་པོ་དང་། །བུད་མེད་ལ་ནི་ནག་པོར་བོར། །སྒོས་རྡེལ་ཁམས་དང་ལོ་སྦྱར་བའི། །ཆད་ཆེན་དཀར་གཅིག་ཆད་ཆུང་ནག །དབང་ལོ་དཀར་གསུམ་མ་ལོར་གཉིས། །བུ་ལོར་
ཕྱེད་མ་དགྲ་ལོ་ལ། །དཀར་གཅིག་གྲོགས་ལོར་ནག་གཅིག་སྟེ། །གང་ཡིན་བོར་ལ་སྒོས་རྡེའོ། །མེད་དུ་མི་རུང་རྡེལ་གཉིས་ནི། །ཁ་ཡན་ཁོང་ནོང་རྡེལ་དཀར་དང་། །སེ་ཞིག་འདུན་ཁུར་ནག་པོའོ། །ཁ་རལ་དཀར་ནག་ཕྱེད་མ་སྟེ། །དེ་རྣམས་གང་ཡིན་རྡེལ་གཅིག་དང་། །རྩི་དུས་རྐྱང་རྩིས་དུས་ཚོད་སར། །རྡེལ་དཀར་གཅིག་བཞག་རྡེའུ་གཉིས། །མི་འགྱུར་ཀླུང་གི་རྡེལ་ལྔ་ནི། །ཕ་ཡི་ལོག་མེན་གར་བབས་སར། །རྡེལ་དཀར་གཅིག་བཞག་ཕ་ཀླུང་གཅིག །མ་ཡི་ལོག་མེན་གར་བབས་དང་། །བབ་སྤར་བབ་སྨེ་གང་ཡིན་སྟེང་། །རྡེལ་ནག་རེ་བོར་མ་ཀླུང་གསུམ། །རང་སྐྱེས་ཟླ་བ་གང་ཡིན་ཁར། །རྡེལ་དཀར་གཉིས་བོར་རང་ཀླུང་ཡིན། །བུ་མོ་ཡིན་ན་ཕ་ཡི་ཀླུང་། །དོར་བའི་ཚབ་ཏུ་མ་ལོ་ནས། །དུ་ལོན་གྱེན་དུ་བགྲངས་པ་ཡི། །གར་སླེབས་ས་རུ་རྡེལ་ནག་གཅིག །བོར་བ་མ་ཀླུང་བཞི་རུ་འགྱུར། །དེ་རྣམས་མི་འགྱུར་རྡེལ་ལྔ་སྟེ། །དྲིལ་བས་རྩ་རྡེལ་བཅུ་གཉིས་སོ། །དེ་རྗེས་བརྒྱ་འདྲེའི་རྡེའུ་ནི། །བརྩི་བྱའི་སྲོག་ལུས་དབང་ཀླུང་བཞི། །རང་མ་བུ་གྲོགས་དགྲ་ལྔར་ཕྱེ། །དེ་དག་ལྔ་པོ་རེ་རེས་ཀྱང་། །མི་འགྱུར་ཀླུང་གི་རྡེའུ་ཡི། །ཕ་ལོ་མ་ལོ་ཟླ་ཀླུང་གི། སྲོག་ལུས་དབང་ཐང་ཀླུང་རྟ་ནི། །རང་ཁོ་ན་དང་སྤར་སྨེ་ཡི། །ཁམ་གཉིས་ལ་འཐབས་རྡེའུ་ནི། །མ་གྲོགས་དཀར་ལ་དགྲ་བུ་ནག །ས་ཆུ་ནང་འཕྲད་དཀར་པོ་ལ། །ཤིང་ལྕགས་མེ་གསུམ་ནག་པོར་བོར། །དེ་ལྟར་སྲོག་ལུས་དབང་ཀླུང་བཞི། །རེ་རེར་རྡེའུ་ཉེར་ལྔ་རེ། །དྲིལ་བས་རྡེའུ་བརྒྱ་ཕྲག་གཅིག །སྲོག་ལུས་དབང་ཀླུང་བཞི་པོ་ཡི། །རང་མ་བུ་གྲོགས་དཀར་ན་བཟང་། །དགྲ་རྡེལ་བཞི་པོ་ནག་ན་དཀར། །བུད་མེད་ལུས་ཀྱི་དགྲ་གྲོགས་ལྡོག །དེ་ལྟར་ངེས་པར་བྱས་ནས་ཀྱང་། །རྡེའུ་ཉེར་བཞིས་སྟངས་གཅོད་དོ། །དེ་ཡང་བརྒྱ་འདྲེའི་རྡེའུ་ནི། །དཀར་ནག་སོ་སོར་བགྲངས་བྱས་ལ། །བཟང་ལ་དཀར་གཅིག་ངན་ལ་ནག །རྡེའུ་ཉི་ཤུ་དེ་ཡི་སྟེང་། །སྲོག་ལུས་དབང་ཐང་ཀླུང་རྟ་བཞིའི། །དར་གུད་རིམ་བཞིན་གང་སྐྱེས་ཀྱི། །ལོ་ཟླ་ཞག་དུས་སྟེང་ཕབས་ནས། །བརྩིས་ཏེ་བཟང་དྲུག་རྡེལ་དཀར་རེ། །ངན་དྲུག་ནག་སྟེ་རྡེལ་བཞི་པོ། །སྒོས་རྡེའི་མདུན་དུ་བོར་བར་བྱ། །དེ་ཡིས་སྟངས་གཅོད་ཉེར་བཞིར་འགྱུར། །འདི་ནི་དམར་སྟོན་མཁས་པས་བཞེད། །ཁྱུང་
ནག་ལ་བརྒྱུད་རང་ལུགས་ཏེ། །གསལ་སྒྲོན་རྩ་བའི་དགོངས་པ་ནི། །འཁྲུལ་མེད་ཡིན་ཕྱིར་གཅེས་པར་ཟུངས། །འདི་ལས་གཞན་ཡང་ཁྱུང་ནག་ལ། །ཕྱག་ལེན་མི་འདྲ་རྣམ་གཉིས་ཡོད། །དེ་ཡང་བྱང་སྟོན་པདྨའི་ལུགས། །བརྩི་བྱའི་སྲོག་ལུས་དབང་ཀླུང་གི། རང་མ་བུ་གྲོགས་དགྲ་ལྔ་པོས། །ཀླུང་ལྔའི་སྲོག་སོགས་རང་མ་བུ། །གྲོགས་དགྲར་ནང་འཐབས་རྡེའུ་བརྒྱ། །དེ་ཡི་ཁ་དམར་ཉི་ཤུའི་སྟེང་། །དར་གུད་བརྩིས་ཏེ་དར་གྱུར་ན། །མདུན་ཚུགས་གུད་ན་རྒྱབ་སྟོངས་ཞེས། །གང་ཡིན་རྡེའུ་གཅིག་བོར་ནས། །སྟངས་གཅོད་ཉེར་གཅིག་ཡིན་ཞེས་བཞེད། །གཉིས་པ་འབྲོག་སྟོན་རལ་པའི་ལུགས། །བརྩི་བྱའི་སྲོག་སོགས་རང་བཞི་ཡི། །འཐབ་ཟླ་ཀླུང་ལྔའི་རང་བཞིན་བྱེད། །དེ་བཞིན་མ་བུ་གྲོགས་དགྲ་བཞིས། །ཀླུང་ལྔའི་སྤར་སྨེའི་ཁམས་དང་ནི། །གཞན་གསུམ་དབང་ཐང་གཅིག་པུར་འཐབས། །དེ་ཡི་སྟངས་གཅོད་ཉི་ཤུའི་སྟེང་། །དར་གུད་རྡེའུ་ཉི་ཤུ་ལྔ། །བོར་ལ་དཀར་ནག་བགྲངས་པ་ཡིས། །གང་མང་རྡེའུ་གཅིག་ཏུ་སྡུད། །དེ་ཡིས་སྟངས་གཅོད་ཉེར་གཅིག་གོ །འདི་ཡི་དབང་ཐང་ཇི་ལྟ་བར། །མ་བུ་གྲོགས་དགྲའི་འཐབ་ཟླ་དེ། །ཀླུང་ལྔའི་སྲོག་གིས་བྱེད་པ་ནི། །རྒྱ་རྩིས་རྙིང་མའི་ལུགས་ཡིན་གསུངས། །ཕ་ཀླུང་མ་ཀླུང་བབས་སྤར་དང་། །རང་ཀླུང་མ་ཡི་སྤར་ཁ་སྟེ། །སྨེ་ཀླུང་དང་ནི་ཟླ་ཀླུང་བཅས། །མི་འགྱུར་ཀླུང་ལྔར་བཞེད་པའང་། །ཡོད་མོད་མཁས་པས་དཔྱད་བྱའི་གནས། །དེ་ནས་ཀུན་ལ་རབ་གཅེས་པའི། །དར་གུད་རྡེའུ་ཉེར་ལྔ་བཤད། །བརྩི་བྱ་སྐྱེས་བུའི་སྲོག་ལུས་དང་། །དབང་ཐང་ཀླུང་རྟ་རུས་ཁམས་ལྔ། །རང་མ་བུ་གྲོགས་དགྲ་ལྔར་ཕྱེ། །དེ་དག་འབྱུང་བའི་དར་གུད་རྣམས། །འབེབས་ཚུལ་སྲོག་ཁམས་གནམ་ལོའི་སྟེང་། །དེ་བཞིན་ལུས་རྣམས་ཟླ་བ་དང་། །དབང་ཐང་ཞག་དང་ཀླུང་རྟ་རྣམས། །དུས་ཚོད་སྟེང་ཕབ་རྡེའུ་ནི། །བཟང་དྲུག་དཀར་ཏེ་ངན་དྲུག་ནག །དེ་ལས་སྤྲོས་ཏེ་དར་གུད་རྡེལ། །བརྒྱ་དང་ལྔ་བཅུའི་འབོར་ལུགས་ཀྱང་། །སྔར་གྱི་སྲོག་སོགས་ལྔ་ཚན་ལྔ། །རེ་རེ་ལའང་རང་མ་བུ། །གྲོགས་དགྲ་ལྔ་ལྔར་ཕྱེ་བ་ལ། །དར་གུད་བསྐོར་བས་རྡེའུ་ནི། །བརྒྱ་དང་ཉེར་ལྔ་དེ་དག་སྟེང་། །སྟངས་གཅོད་རྡེའུ་ཉེར་ལྔར་བཅས། །བརྒྱ་དང་ལྔ་བཅུ་ཐམ་པར་འགྱུར། །དེ་ནས་
ལྷ་དཔལ་འདྲེ་བདུད་ནི། །བུ་ཚའི་སྲོག་ལུས་དབང་ཀླུང་བཞིས། །རང་སྐྱེས་སྤར་སྨེ་གཉིས་ལ་འཐབས། །རྡེལ་ཚར་མ་འདྲེས་སོ་སོར་སྒྲིགས། །མ་དང་འཕྲད་ན་ཕ་མ་ལྷ། །བུ་དང་འཕྲད་ན་བུ་ཚ་དཔལ། །གྲོགས་དང་འཕྲད་ན་ཐུབ་པ་འདྲེ། །དགྲ་དང་འཕྲད་ན་མི་ཐུབ་བདུད། །རང་ནང་འཕྲད་པ་མཐུན་པ་ཚེ། །ཡང་གཅིག་དཔལ་བྱུར་ལ་སོགས་བརྟག །བྱིས་པའི་སྲོག་དང་ཀླུང་རྟ་ཡིས། །ཕ་ཡི་སྲོག་ཀླུང་གཉིས་ལ་འཐབས། །དེ་བཞིན་ལུས་དབང་གཉིས་པོ་ཡིས། །མ་ལ་འཐབས་པའི་རྡེའུ་བཞི། །མ་དང་འཕྲད་ན་དཔལ་བབས་ལྔ། །དེ་བཞིན་དགྲ་འཕྲད་བྱུར་བབས་ཏེ། །རང་ནང་འཕྲད་པ་རང་རྐང་ལྔ། །བུ་དང་འཕྲད་ན་མདངས་ཤོར་དང་། །གྲོགས་འཕྲད་ཚེ་ལེན་ལྔ་རུ་འདོད། །གཞན་ཡང་སྦས་པ་མཛུབ་ཚུགས་ལས། །གསུངས་པའི་མན་ངག་བསྟན་པ་ནི། །བརྩི་བྱའི་སྲོག་ལུས་དབང་ཀླུང་བཞིས། །རང་གི་སྲོག་དབང་ཀླུང་གསུམ་ལ། །རང་དོར་ལྷག་གསུམ་གྱིས་འཐབས་པའི། །རྡེའུ་དགུ་བོར་ངོས་འཛིན་བྱ། །སྲོག་ལུས་རླུང་རྟས་དབང་ཐང་ལ། །བཅད་པ་འཁོར་ལོ་རབ་སྟོངས་ཏེ། །ལུས་དབང་ཀླུང་གིས་རང་སྲོག་ལ། །བཅད་ན་ཕེའུ་ཤ་རལ་དང་། །སྐྱོབ་ན་གཤིན་ཆུ་རབ་བསྲུང་ཟེར། །སྲོག་ལུས་དབང་གིས་ཀླུང་རྟ་ལ། །བཅད་པ་བྱ་དམར་མེ་ལེན་ཡིན། །དེ་ནས་གཟའ་བཞིའི་ཀླུང་རྩིས་ནི། །ཕོ་ནི་སྟག་རྟ་ཁྱི་གསུམ་དང་། །ས་ཡི་ལོ་པ་ལི་ཁམ་སྟེང་། །བཙས་དང་བབས་སམ་ཤི་ཡང་རུང་། །སྤེན་པ་སུམ་འདོམ་ཞེས་སུ་གྲགས། །བུད་མེད་ས་ལོ་སྟག་རྟ་ཁྱི། །དྭ་ཟིན་སྤེན་པ་སུམ་འདོམ་ཡིན། །དེ་བཞིན་བྱི་འབྲུག་སྤྲེལ་གསུམ་དང་། །མེ་ཡི་ལོ་པ་ཕོ་དྭ་ཟིན། །མོ་ནི་ལི་ཁམ་དམར་སུམ་འདོམ། །བྱ་གླང་སྦྲུལ་གསུམ་ཤིང་ལོ་པ། །ཕོ་ནི་ཁོན་ཟོན་མོ་གིན་ཁོན། །བཙས་སོགས་ཕུར་བུ་སུམ་འདོམ་གྲགས། །ཕག་ལུག་ཡོས་གསུམ་དབང་ཐང་ཆུ། །ཕོ་ནི་གིན་ཁོན་མོ་ཁེན་ཟོན། །དེ་རྣམས་ལྷག་པ་སུམ་འདོམ་སྟེ། །དེ་དག་མ་ཡི་བབས་སྤར་དང་། །ལོ་འགྲོས་རྐྱང་པ་ཕ་དང་མ། །རང་ལོ་གསུམ་ལ་བརྩི་ཞེས་གསུངས། །ཁྱིམ་གཅིག་འཚོག་པ་ཞེས་བྱ་བ། །ས་ཡི་སྟག་རྟ་ཁྱི་གསུམ་ལྟར། །ཕྱི་གཟའི་ཁམས་བསྟུན་མཐུན་གསུམ་ཡིན། །གཞན་ཡང་ཕྱི་གཟའི་དབང་ཐང་དང་། །བར་གཟའི་སྲོག་དང་ནང་
གཟའི་ཁམས། །ངེས་བྱས་གཅོད་འདྲལ་རྡེལ་དྲུག་བོར། །ཕྱི་གཟས་བར་དང་ནང་ལ་འཐབས། །དེ་བཞིན་བར་གཟས་ཕྱི་དང་ནང་། །ནང་གཟས་ཕྱི་བར་ལ་འཐབས་ཏེ། །བསྐྱེད་དང་གཅོད་པ་བརྟག་པར་བྱ། །འདི་དག་རྩ་བའི་ལྷན་ཐབས་ལུགས། །སྦས་པ་མཛུབ་ཚུགས་སྐོར་ལས་ནི། །མ་ཡི་ལོག་མེན་བར་གཟར་བབས། །དེ་དང་ནང་གཟའ་སྤྲད་པའི་སྟེང་། །བུ་ཆུང་རང་མཐུན་བར་གཟའི་ལོ། །སྐྱེས་ན་གང་ཡིན་གཟའ་སྤུན་གསུམ། །རང་མཐུན་མ་སྐྱེས་མ་གཟའི་སྟེང་། །གཟའ་གཞན་སྐྱེས་ཞེས་ཁ་དམར་གདགས། །དེ་ནས་རྒྱ་མ་ཕ་ཀླུང་ནི། །གྱེན་འཕར་གྱེན་ལྟ་ཐུར་བབས་གསུམ། །ཕ་མེས་ལོ་ཡི་དར་གུད་དེ། །བུ་ཚའི་ལོ་ཐོག་ཕབ་ལ་བསྐོར། །དེ་ཡང་སྲོག་གི་ཁམས་དང་སྦྱོར། །དང་པོ་གྱེན་འཕར་སྐོར་མགོ་ནི། །ཁྲུས་བྱེད་ཚོམས་ལ་བཙས་པ་ལྟེམས། །དར་བ་སྡོད་ལ་ལས་བྱེད་སར། །བབས་པ་རྣམས་ནི་ཁ་རལ་ལོ། །གཉིས་པ་གྱེན་ལྟའི་སྐོར་མགོ་ནི། །དབུགས་ལེན་ཚོམས་ལ་མངལ་གནས་ལྟེམས། །ལུས་རྫོགས་སྡོད་ལ་གུད་ན་རལ། །གསུམ་པ་ཐུར་འབབ་ངན་པ་ནི། །ན་སར་ཚོམས་ལ་ཤི་སར་ལྟེམས། །དུར་སར་ཁ་རལ་དུར་གཤེད་སྡོད། །ཁོན་ཐོག་བུ་ཚ་སྟག་ཡོས་སྐྱེས། །གིན་ལ་བྱ་སྤྲེལ་ཁེན་རྟ་སྦྲུལ། །ཟོན་ཐོག་གཤེད་བཞི་བྱི་ཕག་དྲུག །སྐྱེས་རྣམས་རྒྱ་མའི་འུར་རྡོར་གྲགས། །ཕ་མེས་རྟ་སྦྲུལ་བཞི་སྟུད་ལ། །བུ་ཚ་བྱི་ཕག་བྱུང་བ་ལྟར། །ཕ་མེས་བཞི་སྟུད་སྲོག་དགྲར་བུ། །གྱུར་ན་འཆིང་འགགས་ཚུད་པ་ཟེར། །ལོ་སྨེ་སྤར་ཁའི་ར་རུ་དང་། །བསེ་རུ་འཆོལ་བ་གསུམ་ངེས་པས། །རིམ་བཞིན་མི་གྲངས་ཟུང་དང་ཡ། །ངེས་མེད་འབྱུང་ཞེས་ལུང་བསྟན་བྱ། །ནག་འཐུས་ལྕགས་བཞི་མེ་བརྒྱད་སོགས། །ལོ་ངན་རྣམས་ལ་སྐྱེས་པ་དང་། །སྤར་སྨེའི་བསྡོམས་རྩིས་ལ་སོགས་པ། །ཞིབ་མོའི་བློ་ཡིས་ལེགས་བརྟགས་ནས། །དེ་རྣམས་འབྲས་བུའི་རིམ་པ་ནི། །རྩ་བའི་འགྲེལ་པ་ཉི་ཤུ་དང་། །དམར་ཆུང་སྟག་མགོ་སྒང་སྒྲིལ་སོགས། །མཁས་པའི་གཞུང་ལྟར་ཕྱིས་འབྱུང་བའི། །སྔ་རྟགས་ཚང་གི་མངོན་ཤེས་རྣམས། །འཁྲུལ་པ་མེད་པར་གཏན་ལ་དབབ། །འབྱུང་རྩིས་མན་ངག་ཟླ་བའི་འོད་ཟེར་ལས། །མཐར་རྩིས་བཤད་པའི་ལེའུ་སྟེ་གསུམ་པའོ།། །།