སྐོར་འགོ་སྤྱིའི་རྣམ་བཞག་བསྟན་པའི་ལེའུ་དང་པོ།
ཙནྡྲསྱརསྨིནཱམོདཡསྱགཎིཏོཡདེཤབིཧརཏིསྨ། །
འབྱུང་རྩིས་མན་ངག་ཟླ་བའི་འོད་ཟེར་ཞེས་བྱ་བ་བཞུགས་སོ། །
འབྱུང་རྩིས་མན་ངག་ཟླ་བའི་འོད་ཟེར་ཞེས་བྱ་བ་བཞུགས་སོ། །
འབྱུང་རྩིས་མན་ངག་ཟླ་བའི་འོད་ཟེར་ཞེས་བྱ་བ། བླ་མ་དང་རྗེ་བཙུན་འཇམ་པའི་དབྱངས་ལ་ཕྱག་འཚལ་ལོ། །ཇི་ལྟའི་གནས་ལུགས་མངོན་གཟིགས་ནས། །ཇི་སྙེད་ཐུགས་རྗེའི་གཞན་དབང་གིས། །འགྲོ་ལ་ཕན་བདེའི་ཕྲིན་ལས་ཅན། །གཏེར་ཆེན་བླ་མ་ལ་ཕྱག་འཚལ། །མཁྱེན་བརྩེའི་ཆུ་སྐྱེས་ཀེ་ས་རར། །རབ་སྙན་ལེགས་བཤད་བུང་བའི་དབྱངས། །བསྒྱུར་མཁས་རྒྱལ་སྲས་གཞོན་ནུའི་སྐུ། །འཇམ་པའི་དབྱངས་ལ་ཕྱག་འཚལ་ལོ། །ཞུ་འཕྲུལ་ལེན་འཆང་སྐྱེས་བུ་ནི། །བཞི་ཚན་བཞི་དང་དུ་ཧ་ར། །ལོ་པཎ་དམར་ནག་ཁྲ་གསུམ་དང་། །ཁྱུང་ཕུག་བརྒྱུད་པར་བཅས་ཀུན་རྒྱལ། །བདག་བློའི་ཡོལ་གོ་དཀར་ནག་གི། རྩིས་རིག་བདུད་རྩིས་འགེངས་མཛད་པ། །རྒྱལ་སྲས་མཆོག་དང་ལྡུམ་ཆེན་རྗེ། །རྒྱ་སྟོན་རྣམས་ལའང་དྲིན་ཕྱག་འབུལ། །མང་ཐོས་ཉི་མ་དང་བྲལ་བའི། །འགྲོ་བློའི་མཚན་མུན་བསལ་བའི་ཆེད། །འབྱུང་བ་རྩིས་ཀྱི་མན་ངག་གནད། །གཅེས་བཏུས་ཟླ་བའི་འོད་ཟེར་སྤྲོ། །དེ་ལ་སྤྱི་ཡི་རྣམ་གཞག་དང་། །བྱེ་བྲག་སོ་སོའི་སྐོར་འགོ་སྟེ། །རྣམ་པ་གཉིས་ལས་དང་པོ་ནི། །གཙུག་ལག་འབྱུང་བའི་རྒྱུད་རྣམས་སུ། །སྡོང་པོ་དགུ་འདུས་ལས། ཀྱེ། ཉོན་ཅིག་འདུས་པའི་འཁོར་རྣམས་ཀུན། །རང་བཞིན་གནས་པའི་རུས་སྦལ་དང་། །ཆགས་དང་སྲིད་པའི་རུས་སྦལ་དང་། །དེ་ལས་སྤྲུལ་དང་བཤད་པ་ཡིས། །རུས་སྦལ་རྣམ་པ་ལྔ་རུ་བསྟན། །ཞེས་སོ། །རང་བཞིན་གནས་༡ཆགས་༢སྦལ་སྲིད་༣སྣོད་སྤྲུལ་༤བཅུད་བཤད་༥པ་ཡི། །རུས་སྦལ་རྣམ་པ་ལྔ་
རུ་བཤད། །དེ་ལས་སྣང་ལུགས་ཆགས་སྲིད་དེ། །མཚོན་བྱེད་སྤྲུལ་པའི་རུས་སྦལ་གྱིས། །མཚོན་ལས་སྟོན་པས་གཙུག་ལག་བསྟན། །དེ་ཕྱིར་དགོས་དོན་སྙིང་པོ་ནི། །རྩ་བ་སྲིད་པའི་རུས་སྦལ་དེ། །གན་རྐྱལ་དག་ཏུ་གནས་པ་ཡི། །མགོ་བོ་ལྷོར་བསྟན་མེ་ཡི་ཁམས། །གློ་གཡས་ཤར་བསྟན་ཤིང་གི་ཁམས། །གློ་གཡོན་ནུབ་བསྟན་ལྕགས་ཀྱི་ཁམས། །མཇུག་མ་བྱང་བསྟན་ཆུ་ཡི་ཁམས། །ཡན་ལག་མཚམས་བཞི་ས་ཡི་ཁམས། །དེ་ལ་བརྩི་བྱ་རྩི་བྱེད་ཀྱི། །གཙུག་ལག་ཐམས་ཅད་གྲུབ་པ་ཡིན། །བརྩི་བྱའི་གཞི་ནི་འབྱུང་ལྔ་སྟེ། །ཤིང་མེ་ས་ལྕགས་ཆུ་ལྔ་པོ། །དེ་རྣམས་མ་བུ་དགྲ་གྲོགས་རྩི། །ཤིང་མ་ཆུ་ལ་ཆུ་མ་ལྕགས། །ལྕགས་མ་ས་ལ་ས་མ་མེ། །མེ་ཡི་མ་དེ་ཤིང་ཡིན་ནོ། །ཤིང་བུ་མེ་ལ་མེ་བུ་ས། །ས་བུ་ལྕགས་ལ་ལྕགས་བུ་ཆུ། །ཆུ་ཡི་བུ་དེ་ཤིང་ཡིན་ནོ། །ཤིང་དགྲ་ལྕགས་ལ་ལྕགས་དགྲ་མེ། །མེ་དགྲ་ཆུ་ལ་ཆུ་དགྲ་ས། །ས་ཡི་དགྲ་དེ་ཤིང་ཡིན་ནོ། །ཤིང་གྲོགས་ས་ལ་ས་གྲོགས་ཆུ། །ཆུ་གྲོགས་མེ་ལ་མེ་གྲོགས་ལྕགས། །ལྕགས་ཀྱི་གྲོགས་དེ་ཤིང་ཡིན་ནོ། །དེ་ནི་འབྱུང་བའི་སྐོར་མགོ་སྟེ། །སྐོར་མགོ་ཀུན་གྱི་སྤྱི་རུ་བཞག །འབྱུང་བ་ལའང་ངོ་བོ་དང་། །ངེས་ཚིག་དབྱེ་བ་དེའི་མཚན་ཉིད། །བྱེད་ལས་ལྔ་ལས་དང་པོ་ནི། །བརྟགས་ན་དབེན་ཕྱིར་མ་གྲུབ་སྟེ། །དེ་ལས་རང་བཞིན་འབྱུང་ཕྱིར་ངེས། །དབྱེ་བ་ལྔའམ་དེ་ཡི་སྟེང་། །མཁའ་རླུང་རི་བསྣན་བདུན་བརྒྱད་སྲིད། །ཤིང་སོགས་རིམ་བཞིན་གཡོ་སྲེག་དང་། །སྲ་གཅོད་བརླན་ལྔའི་མཚན་ཉིད་འཛིན། །བྱེད་ལས་མ་འཁྲུགས་བདེ་སྟེར་ཞིང་། །འཁྲུགས་ན་ན་འཆིའི་སྡུག་བསྔལ་བསྐྱེད། །དེ་ཕྱིར་འབྱུང་འདུས་ཕུང་པོ་ལ། །རྣམ་རྟོག་ལས་བསྐྱེད་འདུ་བ་ཡི། །ནད་དང་ཡེ་འདྲོོག་གཤེད་བཞིས་སྤྱོད། །བདེ་སྡུག་མ་ལུས་འབྱུང་བས་བྱེད། །དེ་བསལ་ཕྱིར་ན་རྩིས་འདི་གཅེས། །རྩི་བྱེད་གཙུག་ལག་རྣམ་གཉིས་ཏེ། །རང་བཞིན་གཞི་དང་འཁྲུལ་སྣང་ངོ་། །རང་བཞིན་གཞི་ཡི་གཙུག་ལག་ནི། །སྣང་སྲིད་འབྱུང་བ་ལྔར་སྣང་བ། །ཀུན་ཀྱང་ནམ་མཁའི་ རང་བཞིན་ཏེ། །མཐའ་དབུས་མེད་ཅིང་འདུས་མ་བྱས། །མ་རིག 
་འཁྲུལ་སྣང་གཙུག་ལག་ལ། །བརྩི་བའི་
གཞི་དང་རྩི་ཐབས་གཉིས། །བརྩི་གཞི་ལའང་རྣམ་བཞི་སྟེ། །འབྱུང་བ་རང་རྒྱུད་སྣང་བ་ཡུལ། །སྤྱོད་བྱེད་ཡིད་དང་འཛིན་པ་སེམས། །འབྱུང་བ་ཕྱི་ནང་བར་གསུམ་གྱི། །ནང་གི་ཁམས་ལྔ་ནི། སྙིང་མེ་ཁམས། གློ་བ་ལྕགས་ཁམས། མཆིན་པ་ཤིང་ཁམས། མཚེར་པ་ས་ཁམས། མཁལ་མ་ཆུ་ཁམས། དབྱེ་བས་རང་རྒྱུད་གཏན་ལ་འབེབས། །དབང་ཡུལ་ཅིར་སྣང་འབྱུང་བ་རུ། །ཤེས་པ་དེ་ནི་སྣང་བ་ཡུལ། །དེ་དག་ཕན་ཚུན་འབྱུང་བ་ཡི། །གཅོད་འབྲལ་བསམ་པ་སྤྱོད་བྱེད་ཡིད། །དེ་ཡི་སྐྱོན་དང་ཡོན་ཏན་དག །འཛིན་པ་སེམས་ཀྱི་གབ་རྩེར་གྲགས། །རྩི་ཐབས་བསྡུ་ན་རྣམ་པ་དགུ། །ཁམས་༡ལོ་༢སྨེ་བ་༣སྤར་ཁ་༤དང་། །ཟླ་༥ཞག་༦དུས་ཚོད་༧གཟའ་༨སྐར་༩རོ། །དང་པོ་ཁམས་ནི་ཀེག་ཤིང་དང་། །ཇི་མེ་ཀུང་ས་ཤང་ལྕགས་ཏེ། །འུ་ཆུ་རུས་ཆེན་ལྔ་རུ་གྲགས། །དེ་དག་སོ་སོའི་ངོས་འཛིན་ཡང་། །སྐད་འགགས་གྲེ་བ་འདར་ཀེག་ཤིང་། །སོ་བར་སྒྲ་འདོན་ཇི་མེ་སྟེ། །ལྟེ་ཁུང་དབུགས་སྡུད་ཀུང་ས་དང་། །ཁ་གདངས་ལྕེ་འཕྱར་སྣ་ནས་དབུགས། །འོང་བ་དེ་ནི་ཤང་ལྕགས་ཁམས། །མཆུ་སྡུད་མཆུ་འཛུམ་འུ་ཆུར་བཤད། །ཁམས་ལོ་སྦྱར་བའི་མཐུན་སྡེབས་ནི། །ཤིང་ཁམས་ཀེག་ལ་དཔེར་མཚོན་ན། །སྟག་ཡོས་བྱུང་ན་དབང་ལོ་སྟེ། །བྱི་ཕག་མ་ལ་རྟ་སྦྲུལ་བུ། །ཁྱི་འབྲུག་གྲོགས་ལ་བྱ་སྤྲེལ་དགྲ། །ལུག་ནི་ཆད་ཆེན་ཆད་ཆུང་གླང་། །དབང་གཟའ་ཕུར་བུ་དབང་སྐར་ནི། །ཤར་སྐར་དྲུག་ཡིན་ཀུན་ལ་འགྲེ། །གཉིས་པ་ལོ་འགྲོས་བཅུ་གཉིས་ཏེ། །འབྱུང་རྩིས་ཐོག་མར་གསུངས་པའི་ཚེ། །ཐེ་སེ་བྱང་སྨད་བྱི་བའི་སྟེང་། །གནས་ཕྱིར་བྱི་བ་ལོ་མགོར་བཞག །དེ་ནས་གླང་སྟག་ཡོས་འབྲུག་སྦྲུལ། །རྟ་ལུག་སྤྲེའུ་བྱ་ཁྱི་ཕག །ཕོ་ལོ་མོ་ལོའི་དབྱེ་བ་ནི། །བྱི་སྟག་འབྲུག་རྟ་སྤྲེལ་ཁྱི་ཕོ། །གླང་ཡོས་སྦྲུལ་ལུག་བྱ་ཕག་མོ། །རེ་རེའང་དབང་ཐང་ལྔ་ལྔ་རུ། །ཕྱེ་བས་ལོ་རྒན་དྲུག་ཅུར་འགྱུར། །དེ་རྣམས་གནས་ལུགས་ཕྱོགས་བསྟན་པ། །ཤར་སྟོད་སྟག་ལ་ཤར་སྨད་ཡོས། །ཤར་ལྷོ་མཚམས་ན་འབྲུག་སྡེ་ལྔ། །ལྷོ་སྟོད་སྦྲུལ་ལ་ལྷོ་སྨད་རྟ། །ལྷོ་ནུབ་མཚམས་ན་ལུག་གནས་སོ། །ནུབ་སྟོད་སྤྲེའུ་ནུབ་སྨད་བྱ། །ནུབ་བྱང་ཁྱི་ཡི་གནས་ལུགས་ཡིན། །བྱང་སྟོད་ཕག་ལ་བྱང་སྨད་བྱི། །བྱང་ཤར་མཚམས་ན་གླང་སྡེ་ལྔ། །ཀུན་ལའང་སྲོག་ལུས་དབང་ཀླུང་བཞི། །སྲོག་ནི་གནས་ཕྱོགས་འབྱུང་བ་
སྟེ། །སྟག་ཡོས་སྲོག་ཤིང་རྟ་སྦྲུལ་མེ། །བྱ་སྤྲེལ་ལྕགས་ལ་བྱི་ཕག་ཆུ། །གླང་ལུག་ཁྱི་འབྲུག་བཞི་སྲོག་ས། །སྲོག་གི་མ་ནི་བླ་རུ་གྲགས། །སྲོག་དང་དབང་ཐང་གཅིག་པ་སྟེ། །ཁ་ཡན་ཡིན་ཏེ་དབང་ཐང་ནི། །སྲོག་གི་མར་སོང་ཁོང་ནོང་ལོ། །དབང་ཐང་བུར་གྱུར་སེ་ཤིག་དང་། །དབང་ཐང་གྲོགས་གྱུར་ཁ་རལ་ཏེ། །དབང་ཐང་དགྲ་གྱུར་འདུན་ཁུར་རོ། །དེ་ནས་ལུས་ཀྱི་ལྡེ་མིག་ནི། །སྟག་ཡོས་བྱ་སྤྲེལ་ཁཾ་ནས་ཆུ་རྩི། །གླང་ལུག་རྟ་བྱི་ཟིན་ཤིང་ནས་རྩི། །ཁྱི་འབྲུག་ཕག་སྦྲུལ་དྭ་ནས་ལྕགས་རྩི། །ལྕགས་ཆུ་མེ་ས་ཤིང་དུ་བགྲང་། །དབང་ཐང་ལུས་གཉིས་བབས་ས་བསྟུན། །དེ་ལྟར་ལོ་འགྲོས་དྲུག་ཅུ་ཡི། །ཁྱིམ་མཚེས་སོ་སོ་ལུས་ཀྱི་ཁམས། །གཅིག་ཕྱིར་ཁ་སྲོག་སུམ་ཅུར་གྲགས། །དབང་ཐང་ལྡེ་མིག་བསྟན་པ་ནི། །ཕོ་ལོ་གནམ་ལོར་ཤར་བའི་ཚེ། །གཅིག་བཅུ་རང་ལ་གཉིས་གསུམ་མ། །བཞི་ལྔ་དགྲ་ལ་དྲུག་བདུན་གྲོགས། །བརྒྱད་དགུ་བུ་རུ་ཤེས་པར་བྱ། །མོ་ལོ་གནམ་ལོར་ཤར་བའི་ཚེ། །གཅིག་གཉིས་རང་ལ་གསུམ་བཞི་མ། །ལྔ་དྲུག་དགྲ་ལ་བདུན་བརྒྱད་གྲོགས། །དགུ་དང་བཅུ་ནི་བུ་ཡིན་ཏེ། །ལོ་རྒན་དྲུག་ཅུའི་ཕོ་མོ་གཉིས། །སྦྲགས་མ་རེ་རེ་དབང་ཐང་གཅིག །དེ་ཕྱིར་བུ་འདེད་སུམ་ཅུར་འགྱུར། །དེ་ནས་ཀླུང་རྟའི་ལྡེ་མིག་ནི། །སྟག་རྟ་ཁྱི་གསུམ་ཀླུང་སྤྲེལ་ལྕགས། །བྱི་འབྲུག་སྤྲེལ་གསུམ་ཀླུང་སྟག་ཤིང་། །བྱ་གླང་སྦྲུལ་གསུམ་ཀླུང་ཕག་ཆུ། །ཕག་ལུག་ཡོས་གསུམ་ཀླུང་སྦྲུལ་མེ། །དེ་དག་མཐུན་གསུམ་སྡེབས་པ་སྟེ། །འབྱུང་བ་ས་ཡི་ཀླུང་རྟ་མེད། །དེ་ལྟར་སྲོག་ལུས་དབང་ཀླུང་སྟེང་། །རང་ཀླུང་སྐྱེས་པའི་སྨེ་བ་དང་། །མ་ཀླུང་སྐྱེས་པའི་སྤར་ཁ་བསྣན། །དྲུག་དྲུག་དག་ཏུ་རྩི་བའང་ཡོད། །ལོ་ལའང་དཀྱུས་ལྡོག་རྣམ་པ་གཉིས། །དཀྱུས་མ་ཤིང་བྱི་ཤིང་གླང་དང་། །མེ་སྟག་ལ་སོགས་བུ་འདེད་ཀྱིས། །རིམ་བཞིན་ཆུ་ཕག་བར་དུ་སྦྱར། །ལྡོག་པ་ལོ་ཡི་སྐོར་འགོ་ནི། །སྐྱེས་པ་བུ་ལྔ་སྟག་ནས་སྦུབ། །བུད་མེད་མ་ལྔ་སྤྲེའུ་ནས། །གྱེན་དུ་བཀན་ལ་ལོ་གྲངས་བགྲང་། །དཔེར་ན་ཤིང་ཕོ་བྱི་བ་ལ། །ཕོ་ནི་མེ་སྟག་མོ་ཆུ་སྤྲེལ། །སྐོར་འགོ་བྱས་ནས་གྱེན་ཐུར་རྩི། །གང་བབས་དམིགས་བཟུང་འགྲེལ་པ་ལྟ། །ཕོ་ཁྱི་གནམ་སྒོ་ཕག་ས་སྒོ། །མོ་གནམ་འབྲུག་ལ་ས་སྒོ་སྦྲུལ། །གླང་ལུག་གཉིས་ནི་ཕུང་གྱོད་ལྔ། །བྱ་སྤྲེལ་གཉིས་
ནི་བྱེ་བྲལ་ལྔ། །བྱི་རྟ་གཉིས་ནི་རུ་ཆོད་ལྔ། །སྟག་ཡོས་གཉིས་ནི་འབྱོར་པ་ལྔ། །ཡར་ལྔ་བགྲངས་པ་འཇུ་ཐག་སྟེ། །མར་ལྔ་ས་ཡི་རྟེན་ཕུར་ཡིན། །ཡར་བརྒྱད་བགྲངས་པ་གནམ་བརྒྱངས་ལ། །མར་བརྒྱད་བགྲངས་པ་ས་བརྒྱངས་ཡིན། །རང་གི་ལོག་མེན་སྲོག་དབང་གཉིས། །རང་ལོའི་སྲོག་དབང་གཉིས་ཀ་ཡི། །དགྲ་རུ་གྱུར་ཚེ་ཕོ་ལོ་དང་། །མོ་ལོ་སོ་སོ་ཕན་ཚུན་དུ། །རང་བདུད་ཆད་ཅིང་གཞན་བླ་འཁྱམས། །དཔེར་ན་ལོག་མེན་ཤིང་སྟག་ལ། །ས་ཁྱི་ས་འབྲུག་བདུད་གཅོད་དང་། །ས་ཡི་གླང་ལུག་བླ་འཁྱམ་མོ། །དེ་བཞིན་ལོག་མེན་ཤིང་ཡོས་ཚེ། །ས་གླང་ས་ལུག་བདུད་ཆད་ཅིང་། །ས་ཡི་ཁྱི་འབྲུག་བླ་འཁྱམས་འགྱུར། །དེ་ཡིས་ཀུན་ལ་འགྲེ་བར་བྱ། །ཤིང་གིས་ཕ་ཁུ་མེས་གསུམ་བརྩི། །མེ་ཡིས་བུ་ཚ་མ་སྨད་བརྩི། །ས་ཡིས་ས་ཞིང་ཡུལ་མཁར་བརྩི། །ལྕགས་ཀྱིས་ཞང་ཉེ་ནོར་དང་གྲོགས། །ལྷ་དང་སྲུང་མ་བརྩི་བར་བྱ། །ཆུ་ཡིས་གཉེན་ལམ་མཐའ་བཞི་བརྩི། །དེ་ལས་གཞན་ཡང་བཤད་པར་བྱ། །གཅིག་པ་རང་ཀེག་གཉིས་ནང་དགྲ། །གསུམ་པ་བྱེ་བྲལ་བཞི་བཞི་གཤེད། །ལྔ་པ་ལྔ་མཐུན་དྲུག་དྲུག་འགྲས། །བདུན་པ་བདུན་ཟུར་ཤེས་པར་བྱ། །ཡར་གྱི་བཞི་གཤེད་ན་རེས་དང་། །མར་གྱི་བཞི་གཤེད་འཆི་རེས་ཏེ། །དེ་ལ་ལོ་སྐར་ཆེ་བའང་ཟེར། །དེ་ཡི་བདུན་ཟུར་སྐར་ཆུང་ཡིན། །དཔེར་ན་བྱི་བ་ལོ་པ་ཡི། །གནམ་ལོ་ཡོས་ཤར་སྐར་ཆེན་ཏེ། །བྱ་ཤར་སྐར་ཆུང་གཞན་དུ་ན། །ཕྱི་ཡི་རོ་འདོད་ཆེ་ཆུང་ཟེར། །དེ་ཡིས་ཀུན་ལ་འགྲེ་བར་བྱ། །མེ་དང་ཆུ་ཡི་སྟག་སྦྲུལ་དང་། །ཤིང་ལྕགས་མེ་སྤྲེལ་མེ་ལྕགས་བྱ། །ལྕགས་ཆུ་ཤིང་ཕག་མེའི་བྱི་བ། །དེ་རྣམས་ནག་འཐུས་ལོ་རུ་གྲགས། །སྟག་ནས་བྱའི་བར་མེ་བརྒྱད་དང་། །ཁྱི་ནས་གླང་བར་ལྕགས་བཞིའི་ལོ། །ལྕགས་ཀྱི་བྱ་ཁྱི་ས་གླང་འབྲུག །མེ་སྤྲེལ་ཆུ་སྦྲུལ་སྐར་ཆུང་དྲུག །མེ་ཆུའི་སྟག་དང་ལྕགས་ཆུ་སྦྲུལ། །ཆུ་ཤིང་སྤྲེའུ་ཤིང་ཕག་རྣམས། །གདུག་པ་ཅན་གྱི་ལོ་བདུན་ནོ། །མེ་སྦྲུལ་ཆུ་ཡི་བྱ་ཕག་དང་། །ཤིང་བྱ་ལྕགས་ཀྱི་ཕག་ལུག་སྟེ། །ས་བྱ་བདུན་ནི་ལྟས་ངན་ལོ། །ས་འབྲུག་ལྕགས་ལུག་ས་སྤྲེལ་དང་། །ལྕགས་བྱ་ལྕགས་ཁྱི་མེ་མོ་ཕག །མེ་གླང་ཐན་པ་ལོ་བདུན་ནོ། །མེ་རྟ་ཆུ་བྱིའི་ལོ་གཉིས་ལ། །གནམ་སའི་བྱ་ར་ཞེས་སུ་གྲགས། །ལྕགས་བྱི་ནས་བཟུང་
ལྕགས་༡༢ཕག་བར། །ཐན་སྐྱེས་ལོ་ནི་བཅུ་གཉིས་སོ། །ལྕགས་གླང་ཤིང་ལུག་མེ་ཁྱི་དང་། །ཆུ་འབྲུག་དུར་མི་ནག་པོ་བཞི། །ཆུ་ཡི་སྟག་སྦྲུལ་ལྕགས་སྤྲེལ་གསུམ། །ལྡིང་ནག་བུ་གསུམ་བྱ་བ་ཡིན། །སྨེ་བ་གཉིས་ནག་ལ་སྐྱེས་པའི། །སྟག་སྤྲེལ་ཕག་སྦྲུལ་ལོ་བཞི་ལ། །ལོ་ནག་མཆེ་བ་ཅན་དུ་གྲགས། །ཆུ་ཡི་བྱི་རྟ་བྱ་ཡོས་བཞི། །ས་ཡི་ཕག་འབྲུག་བྱ་དང་ཡོས། །མེ་འབྲུག་མེ་བྱ་ཆུ་གླང་རྣམས། །སྲིན་ཁྱེར་ལོ་ནི་བཅུ་གཅིག་ཡིན། །མེ་རྟ་ཆུ་བྱ་ཤིང་ཡོས་དང་། །ལྕགས་བྱ་ཐེར་འདྲེ་མི་བཞི་ཡིན། །སྨེ་ཕྲེང་དང་པོའི་ཤིང་གླང་དང་། །བར་པའི་ས་སྦྲུལ་ཤིང་ཕོ་ཁྱི། །འོག་མའི་ཆུ་ལུག་སའི་བྱི་ཕག །ཤིང་ལུག་ལྕགས་བྱི་རྣམ་པ་བརྒྱད། །འབྱུང་བ་ལྔ་ལྡན་ལོ་ཡིན་ནོ། །སྨེ་ཕྲེང་དང་པོའི་མེ་ཡོས་དང་། །ཆུ་བྱ་ས་ལུག་ལྕགས་སྤྲེལ་བཞི། །བར་པའི་ཆུ་སྦྲུལ་འོག་མ་ཡི། །མེ་ཡོས་ལྕགས་སྟག་ལྕགས་ཁྱི་གཉིས། །ཆུ་ཡི་བྱི་ཕག་བཅུ་པོ་ནི། །འབྱུང་བ་གཉིས་ལྡན་ལོ་ཡིན་ནོ། །ལྕགས་སྤྲེལ་ལྕགས་ཕག་མེ་འབྲུག་སྦྲུལ། །ས་ལུག་ལྕགས་ཁྱི་ཤིང་སྦྲུལ་དང་། །མེ་བྱ་ཡུགས་ས་ལོ་བརྒྱད་དོ། །ཤིང་སྟག་ལྕགས་སྤྲེལ་མེ་ཕོ་སྟག །ཆུ་ཡི་སྟག་སྦྲུལ་ཕག་སྤྲེལ་བཞི། །ས་ཁྱི་དྭ་ཕྲུག་ལོ་བརྒྱད་དོ། །ཐ་ཆུང་ལོ་བཞི་ར་རུ་དང་། །ར་བ་བཞི་ནི་བསེ་རུ་སྟེ། །འབྲིང་པོ་བཞི་ལ་འཆོལ་བུར་གྲགས། །གསུམ་པ་སྨེ་བ་དགུ་ཡིན་ཏེ། །གཅིག་དཀར་གཉིས་ནག་གསུམ་མཐིང་དང་། །བཞི་ལྗང་ལྔ་སེར་དྲུག་དཀར་དང་། །བདུན་དམར་བརྒྱད་དཀར་དགུ་དམར་ཏེ། །ལྷ་བདུད་བསེན་མོ་ཀླུ་ས་བདག །རྒྱལ་བཙན་ལྷ་དང་མ་མོ་ཡི། །མེ་ལོང་ཞེས་པ་རིམ་བཞིན་སྦྱར། །དཀར་༡གསུམ་༦ལྕགས་༨ལ་ནག་༢མཐིང་༣ཆུ། །བཞི་ལྗང་༤ཤིང་ལ་ལྔ་༥སེར་ས། །དགུ་༩དམར་བདུན་༧དམར་མེ་ཡིན་ནོ། །བརྒྱད་དཀར་གཉིས་ནག་ལྔ་སེར་གསུམ། །སྟག་སྤྲེལ་ཕག་སྦྲུལ་བཞི་ལ་དབང་། །བདུན་དམར་བཞི་ལྗང་གཅིག་དཀར་གསུམ། །བྱི་རྟ་བྱ་ཡོས་བཞི་ལ་དབང་། །དགུ་དམར་དྲུག་དཀར་གསུམ་མཐིང་གསུམ། །གླང་ལུག་ཁྱི་འབྲུག་བཞི་ལ་དབང་། །དེ་ཡང་ལོ་རྒན་དྲུག་ཅུ་ལ། །སྲོག་ལུས་དབང་ཐང་དབྱེ་བ་ཡི། །སྨེ་བ་དྲུག་ཅུ་ཚན་གསུམ་སྟེ། །བརྒྱ་དང་བརྒྱད་ཅུ་ཐམ་པ་འབྱུང་། །དེ་ཕྱིར་བརྒྱད་ཅུ་སྐོར་ཞེས་གྲགས། །སྨེ་ཕྲེང་གོང་མའི་གཅིག་དཀར་
ནས། །དྲུག་ཅུ་གྲངས་ལྡོག་ལྔ་རུ་ཟད། །དེ་ནས་བར་པའི་བཞི་ལ་བགྲོངས། །བརྒྱད་ཟད་འོག་མའི་བདུན་ལ་འཁོར། །དེ་ཡི་ཐ་མ་གཉིས་སུ་ཟད། །སླར་ཡང་སྨེ་ཕྲེང་གོང་མ་ཡི། །ཕོ་བྲང་དང་པོའི་གཅིག་ལ་འཁོར། །དེ་ལྟར་བསྐལ་པའི་བར་དུ་ཡང་། །ཆད་ལྷག་མེད་པར་འཁོར་བ་ཡིན། །དེ་ཡང་ཡར་བཞི་སྲོག་སྨེ་སྟེ། །མར་བཞི་དབང་སྨེ་གང་སྐྱེས་ལུས། །མཐུན་གསུམ་ཀླུང་རྟའི་སྲོག་སྨེར་སྦྱར། །དཔེར་ན་ད་ལྟའི་ཤིང་བྱི་ཡི། །ལུས་སྨེ་གཅིག་དཀར་ལ་བབས་དུས། །ཡར་བཞི་བདུན་དམར་སྲོག་སྨེ་དང་། །མར་བཞི་བཞི་ལྗང་དབང་སྨེ་སྟེ། །ཀླུང་སྨེ་ཤིང་སྟག་སྲོག་སྨེར་སྦྱར། །དེ་དག་གླིང་དགུ་ལས་འཚོལ་ན། །སྐྱེས་པའི་སྨེ་བ་དབུས་བཞག་པས། །སྲོག་ནི་ལྷོ་ནུབ་མཚམས་ན་གནས། །དབང་ཐང་བྱང་ཤར་ལུས་ནི་དབུས། །བསྐོར་སྨེ་ཁྲ་བོ་གླིང་དགུ་སྟེ། །ལྔ་སེར་༥རུས་སྦལ་ལྟོ་ལ་གབ། །ལི་ལ་དགུ་དམར་༩ཁོན་གཉིས་ནག །དྭ་ལ་བདུན་དམར་༧ཁེན་ལ་༦དྲུག །ཁམ་ལ་གཅིག་དང་གིན་བརྒྱད་དཀར༨། །ཟིན་མཐིང་༣ཟོན་ལ་བཞི་ལྗང་༤སྟེ། །གོ་རིམ་ཇི་བཞིན་བྱ་འཕུར་ནི། །དབུས་ནས་གནམ་ལྕགས་རི་བོ་དང་། །མེ་ཆུ་ས་ཤིང་རླུང་ནས་དབུས། །སྐྱེས་སྨེ་དབུས་བྱས་བྱ་འཕུར་ལྟར། །བརྒྱད་བརྒྱད་ཀྱིས་བསྐོར་དགུ་ཚན་དགུ། །གཅིག་བཅུ་བཅུ་དགུ་ཉེར་བརྒྱད་དང་། །སོ་བདུན་ཞེ་དྲུག་ང་ལྔ་སྟེ། །རེ་བཞི་དོན་གསུམ་གྱ་གཉིས་དང་། །གོ་གཅིག་རྣམས་ལ་དབུས་སུ་འཚོག །སྐོར་ལུགས་དབུས་ནས་ཤར་དུ་ཐོན། །ཕོ་ལོ་དྲུག་པོ་གཡོན་སྐོར་དང་། །མོ་དྲུག་གཡས་སྐོར་དུ་ལོན་བགྲང་། །རང་རང་རྒྱབ་ནས་དབུས་སུ་འཇུག །སླར་ཡང་དབུས་ནས་བྱ་འཕུར་གྱིས། །གང་བབས་སྨེ་བ་ངོས་བཟུང་བྱ། །སྐྱེས་སྨེ་བདེ་བླག་འཚོལ་འདོད་ན། །གནམ་ལོའི་སྨེ་བ་དབུས་བཞག་ནས། །བྱ་འཕུར་ཁོ་ནས་སྨེ་བ་རེར། །བཅུ་ཚན་རེ་རེ་བགྲང་བྱ་ཞིང་། །བཅུ་ཁ་མ་ལོངས་རེ་རེ་རྩི། །ཡང་ན་དབུས་འཚོག་ལོ་ལོངས་དང་། །ད་ལྟའི་གནམ་ལོའི་སྨེ་བ་སྤྲད། །དེ་ནས་དབུས་འཚོག་མ་ལོངས་པའི། །ལོ་གྲངས་གནམ་ལོའི་སྨེ་བ་ནས། །བཟུང་སྟེ་ལུགས་འབྱུང་བགྲངས་པའི་གྲངས། །གང་བབས་སྐྱེས་སྨེར་ཐེ་ཚོམ་མེད། །གཞན་ཡང་ར་བསེ་ལ་སོགས་བཤད། །མེ་ལྕགས་ཆུ་གསུམ་ར་རུ་དང་། །ས་ཤིང་གཉིས་པོ་བསེ་རུ་སྟེ། །
ནག་མཐིང་དམར་གཉིས་སྟེང་བབས་ན། །བར་གྱི་རོ་འདོད་ཅེས་སུ་བཤད། །གཅིག་དཀར་ལ་སོགས་རིམ་པ་བཞིན། །བྱིས་༡པ་སྐྱེས་དར་༢ཤར་པོ་དང་༣། །ཡུགས་ས་༤བན་༥བོན་༦བུད་མེད་༧དང་། །ཞང་༨བློན་དང་ནི་བཙད་༩པོ་ལ། །ངན་པས་གཉིས་ནག་ཅེས་སུ་བཏགས། །གནམ་སྒོ་ཕོ་དྲུག་མོའི་གཅིག་དཀར། །ས་སྒོ་ཕོའི་གཉིས་མོའི་བཞི་ལྗང་། །ར་བ་བཞི་པོ་གཅིག་དཀར་ཚེས། །འབྲིང་པོ་བཞི་ལ་བཞི་ལྗང་ཚེས། །ཐ་ཆུང་བཞི་ལ་བདུན་དམར་ཚེས། །རིམ་པར་དེད་པས་ཚེས་ལ་འཁོར། །ཉིན་མཚན་དུས་གཉིས་ཐོག་མ་ལ། །ཚེས་སྨེ་སྦྱར་ནས་དེད་པ་ཡིས། །ཉིན་དགུ་མཚན་དགུ་དུས་ལ་འཆར། །བཞི་པ་སྤར་ཁ་བརྒྱད་ཡིན་ཏེ། །ལྷོ་ནས་གཡས་བསྐོར་རིམ་པ་བཞིན། །ལི་མེ་ཁོན་ས་དྭ་ལྕགས་དང་། །ཁེན་གནམ་ཁམ་ཆུ་གིན་རི་དང་། །ཟིན་ཤིང་ཟོན་རླུང་སྤར་ཁ་བརྒྱད། །མཁའ་རི་རླུང་ཡང་སར་བྱས་པས། །མདོ་དོན་འབྱུང་བ་ལྔ་རུ་འགྱུར། །སྐྱེས་པ་ལི་ནས་ཁོན་ཕྱོགས་བསྐོར། །བུད་མེད་ཁམ་ནས་ཁེན་ཕྱོགས་བསྐོར། །བཅུ་ཁ་མ་ལོངས་རེ་རེ་སྟེ། །བཅུ་ཁ་ལོངས་ནས་ཟུར་ལ་མཆོངས། །སྤར་ཁའི་བཟང་བཞི་ངན་བཞི་ནི། །ལི་ཁམ་གཉིས་དང་ཁེན་ཁོན་གཉིས། །དྭ་གིན་གཉིས་དང་ཟིན་ཟོན་གཉིས། །ཕན་ཚུན་གནམ་སྨན་རབ་ཀྱི་རབ། །ལི་ཟིན་ཁམ་ཟོན་དྭ་ཁེན་དང་། །གིན་ཁོན་གཉིས་གཉིས་ཕན་ཚུན་དུ། །སྲོག་འཚོ་གནས་པ་རབ་ཀྱི་འབྲིང་། །རླུང་མེ་ས་ལྕགས་རི་གནམ་དང་། །ཆུ་ཤིང་ཕན་ཚུན་གཅིག་གིས་གཅིག །བསྐྱེད་པ་དཔལ་བསྐྱེད་རབ་ཀྱི་ཐ། །ཕྱྭ་ལོན་རང་རང་ཕྱོགས་ན་སྟེ། །ཕྱེ་ན་ལྕགས་མེ་གནམ་རི་བཞི། །ཕྱྭ་ལོན་འབྲིང་རབ་ས་ཆུ་དང་། །ཤིང་རླུང་ཕྱྭ་གཡང་འབྲིང་གི་འབྲིང་། །མེ་རི་རླུང་གནམ་ལྕགས་ཆུ་དང་། །ཤིང་ས་གནོད་པ་འབྲིང་གི་ཐ། །ལྕགས་མེ་ས་རླུང་གནམ་ཤིང་དང་། །རི་ཆུ་འདྲེ་ལྔ་ཐ་མའི་རབ། །ལི་ཁེན་དྭ་ཟིན་ཁོན་ཁམ་དང་། །གིན་ཟོན་བདུད་གཅོད་ཐ་མའི་འབྲིང་། །གནམ་ཆུ་མེ་ས་རླུང་ལྕགས་དང་། །ཤིང་རི་ཕན་ཚུན་ལུས་ཆད་པ། །ཐ་མའི་ཐ་སྟེ་ངན་བཞིའོ། །ར་རུ་ཕྱོགས་བཞི་བསེ་རུ་མཚམས། །ཕོ་ལི་མོ་ཁམ་ལ་བབས་ན། །ནང་གི་རོ་འདོད་ཅེས་པར་གྲགས། །བལྟ་བའི་མིག་བཞི་བརྡུང་རྭ་བཞི། །བན་བཞི་བོན་བཞི་ལ་སོགས་པ། །འབྲས་བུའི་སྐབས་
སུ་ཤེས་པར་འགྱུར། །ཁེན་ལ་གནམ་སྒོ་ཁོན་ས་སྒོ། །དེ་ནི་སྤྱི་ཡིན་བྱེ་བྲག་ནི། །བརྩི་བྱའི་སྲོག་གི་མར་གྱུར་པའི། །སྤར་ཁ་ལ་བབས་གནམ་སྒོ་སྟེ། །བུ་ནི་ས་སྒོ་དགྲ་གཤེད་སྒོ། །བྱིས་པའི་སྐྱེས་སྤར་མ་ཀླུང་སྟེ། །དེ་ཉིད་བདེ་བླག་འཚོལ་འདོད་ན། །མ་ལོའི་སྟེང་ནས་བུ་ཡི་ལོས། །འཕྲི་ལྷག་སྟེང་དུ་གཅིག་བསྣན་པའི། །གྲངས་དེར་མ་ཡི་སྤར་ཁ་བསྐོར། །མ་དེ་གར་བབས་སྤར་ཁ་དེ། །བུ་དེ་སྐྱེས་པའི་སྤར་ཁ་ཡིན། །སྟག་རྟ་ཁྱི་གསུམ་ལི་ཡིས་ཚེས། །བྱི་འབྲུག་སྤྲེལ་གསུམ་ཁམ་གྱིས་ཚེས། །བྱ་གླང་སྦྲུལ་གསུམ་དྭ་ཡིས་ཚེས། །ཕག་ལུག་ཡོས་གསུམ་ཟིན་གྱིས་ཚེས། །རིམ་བཞིན་དེད་པས་ཚེས་ལ་འཆར། །གང་ཚེས་ཉིན་མཚན་ཐོག་མ་ནས། །ཉིན་བརྒྱད་མཚན་བརྒྱད་དུས་ལ་སྦྱར། །ལྔ་པ་ཟླ་བ་བཅུ་གཉིས་ཏེ། །དཔྱིད་ཟླ་ར་བ་བཅུ་གཅིག་སྟག །བཅུ་གཉིས་དཔྱིད་འབྲིང་ཡོས་སུ་རྩི། །ཟླ་བ་དང་པོ་དཔྱིད་ཐ་འབྲུག །དེ་བཞིན་དབྱར་ར་གཉིས་པ་སྦྲུལ། །དབྱར་འབྲིང་གསུམ་པ་རྟའི་ཟླ་བ། །བཞི་པ་དབྱར་ཟླ་ཐ་ཆུང་ལུག །ལྔ་པ་སྟོན་ཟླ་ར་བ་སྤྲེལ། །དྲུག་པ་སྟོན་འབྲིང་བྱའི་ཟླ་བ། །བདུན་པ་སྟོན་ཟླ་ཐ་ཆུང་ཁྱི། །བརྒྱད་པ་དགུན་ཟླ་ར་བ་ཕག །དགུན་འབྲིང་དགུ་པ་བྱི་བའོ། །བཅུ་པ་དགུན་ཟླ་གླང་དུ་འདོད། །དགུན་ཉི་དཔྱིད་ར་སྟག་ལ་ལྡོག །མགོ་ཡིས་ཉ་ན་ཟླ་བཤོལ་མེད། །དབྱར་ཉི་སྟོན་ར་སྤྲེའུར་ལྡོག །སྣྲོན་གྱིས་ཉ་ན་ཟླ་བཤོལ་མེད། །ཞིབ་པར་སྒང་བཤོལ་ཚིགས་དང་སྦྱོར། །དྲུག་པ་ཚེས་གྲངས་ཟླ་གཅིག་ལ། །ཞག་ནི་སུམ་ཅུ་ཐམ་པ་ཡོད། །ཕོ་ཟླ་དྲུག་པོ་སྟག་གིས་ཚེས། །མོ་ཟླ་དྲུག་པོ་སྤྲེའུས་ཚེས། །ཚེས་གཅིག་བཅུ་གསུམ་ཉེར་ལྔ་ལ། །གང་ཚེས་དེ་ཡི་ཉི་མ་འཆར། །ཕོ་ཟླ་འབྲུག་ཉ་སྟོང་ལ་ལུག །མོ་ཟླ་ཁྱིས་ཉ་སྟོང་ལ་གླང་། །ཞག་རེ་ལོ་འགྲོས་རེ་རེ་ཞིང་། །རིམ་པར་སྦྱར་བས་ཆད་ལྷག་མེད། །བདུན་པ་དུས་ཚོད་ཞག་རེ་ཞིང་། །ཉིན་དྲུག་མཚན་དྲུག་རྣམ་པར་བཞག །ནམ་ལངས་ཡོས་ལ་ཉི་ཤར་འབྲུག །ཉི་དྲོས་སྦྲུལ་ལ་ཉིན་ཕྱེད་རྟ། །ཕྱེད་ཡོལ་ལུག་ལ་ཉི་མྱུར་སྤྲེལ། །ཉི་ནུབ་བྱ་ལ་ས་སྲོད་ཁྱི། །སྲོད་འཁོར་ཕག་ལ་ནམ་ཕྱེད་བྱི། །ཕྱེད་ཡོལ་གླང་ལ་ཐོ་རངས་སྟག །ལོ་ཟླ་ཞག་དུས་དེ་དག་གི། དབང་ཐང་ལོ་ཟླ་ཉིས་སྦྲག་ལ། །ཞག་དང་དུས་ཚོད་རྐྱང་པར་འདེད། །གནམ་ལོ་མ་ལ་ཟླ་བ་བུ། །
ཟླ་བ་མ་ལ་ཞག་ནི་བུ། །ཞག་ནི་མ་ལ་དུས་ཚོད་བུ། །ཟླ་ཞག་དུས་ཀྱི་དབང་ཐང་རྣམས། །བདེ་བླག་བརྟག་པའི་མན་ངག་ནི། །གནམ་ལོའི་དབང་ཐང་གང་ཡིན་དེའི། །སྟག་ཡོས་བྱི་གླང་བུ་ཡིན་ལ། །འབྲུག་སྦྲུལ་གྲོགས་ལ་རྟ་ལུག་དགྲ། །བྱ་སྤྲེལ་མ་ལ་ཁྱི་ཕག་རང་། །ཟླ་བ་དེ་ཉིད་གཞིར་བྱས་ཏེ། །ཟླ་རེའི་ཞག་པོ་སུམ་ཚན་བཅུའི། །གཅིག་དྲུག་བུ་ལ་གཉིས་བདུན་གྲོགས། །གསུམ་བརྒྱད་དགྲ་ལ་བཞི་དགུ་མ། །ལྔ་བཅུ་རང་ཡིན་ཞག་དེ་ཡི། །དུས་ཚོད་ཡོས་སྤྲེལ་གླང་གསུམ་བུ། །འབྲུག་བྱ་སྟག་གསུམ་གྲོགས་ཡིན་ཏེ། །སྦྲུལ་ཁྱི་དགྲ་ལ་རྟ་ཕག་མ། །ལུག་དང་བྱི་བ་རང་ཡིན་ནོ། །དེ་དག་རྣམས་ཀྱི་སྲོག་ལུས་དང་། །ཀླུང་རྟ་གསུམ་པོ་ལོ་བཞིན་བརྩི། །བརྒྱད་པ་གཟའ་ནི་བརྒྱད་ཡིན་ཏེ། །ཉི་ཟླ་དམར་ལྷག་ཕུར་སངས་སྤེན། །རཱ་ཧུ་ལ་དང་བརྒྱད་དུ་འདོད། །ཉི་མ་མིག་དམར་མེ་ཡིན་ལྷོ། །ཟླ་བ་ལྷག་པ་ཆུ་ཡིན་བྱང་། །ཕུར་ཤིང་ཤར་ཏེ་སངས་ལྕགས་ནུབ། །སྤེན་པ་ས་ཡིན་མཚམས་ལ་དབང་། །རཱ་ཧུ་སྤྱི་ཁྱབ་འབྱུང་ལྔ་ཚང་། །སྟག་རྟ་ཁྱི་གསུམ་སྤེན་པས་ཚེས། །བྱི་འབྲུག་སྤྲེལ་གསུམ་དམར་པོས་ཚེས། །ཕག་ལུག་ཡོས་གསུམ་ཟླ་བས་ཚེས། །བྱ་གླང་སྦྲུལ་གསུམ་ཕུར་བུས་ཚེས། །གང་ཚེས་དེ་དར་བུ་ཡང་དར། །མ་ཞུད་དགྲ་གྱོད་གྲོགས་ནི་གུད། །ཚེས་གཅིག་བརྒྱད་དང་བཅོ་ལྔ་དང་། །ཉེར་གཉིས་ཉེར་དགུར་གང་ཚེས་འཆར། །གཞན་ཡང་བཏགས་པའི་གཟའི་བྱེ་བྲག །ཕྱི་གཟའ་ནང་གཟའ་བར་གཟའ་གསུམ། །ཕྱི་གཟའ་ལོ་རྒན་དྲུག་ཅུ་ཡི། །ས་ལྕགས་ལོ་རྣམས་སྤེན་པ་དང་། །ཤིང་ལོ་ཕུར་བུ་མེ་མིག་དམར། །ཆུ་ལོ་བཅུ་གཉིས་ལྷག་པའོ། །འདི་ལ་དམར་ཆུང་སྟག་མགོ་ལས། །ཕུར་སྤེན་གོ་ལྡོག་སྦྱར་བ་ཡོད། །བར་གཟའ་ལོ་འགྲོས་བཅུ་གཉིས་ཀྱི། །བྱི་འབྲུག་སྤྲེལ་གསུམ་ལོ་མིག་དམར། །བྱ་གླང་སྦྲུལ་གསུམ་ཕུར་བུ་དང་། །སྟག་རྟ་ཁྱི་གསུམ་སྤེན་པ་སྟེ། །ཕག་ལུག་ཡོས་གསུམ་ལྷག་པའོ། །ནང་གཟའ་སྤར་ཁ་བརྒྱད་ཡིན་ཏེ། །ལི་ཁམ་ཕོ་སྤེན་མོའི་མིག་དམར། །དྭ་ཟིན་ཕོའི་དམར་མོའི་སྤེན་པ། །ཁེན་ཟོན་ཕོའི་ཕུར་མོའི་ལྷག་པ། །གིན་ཁོན་ཕོའི་ལྷག་མོའི་ཕུར་བུ། །དགུ་པ་སྐར་མ་ཉི་ཤུ་བརྒྱད། །སྨིན་དྲུག་སྣར་མ་མགོ་དང་ལག །ནབས་སོ་རྒྱལ་ཤར་སྐག་ཤར་ལྷོ། །མཆུ་གྲེ་དབོ་དང་མེ་བཞི་
ནག །ས་རི་ལྷོ་སྐར་ས་ག་ནི། །ལྷོ་ནུབ་ཡིན་ཏེ་ལྷ་མཚམས་སྣྲོན། །སྣྲུབས་དང་ཆུ་སྟོད་ཆུ་སྨད་དང་། །གྲོ་ཞུན་ནུབ་སྐར་བྱི་ཞུན་ནི། །ནུབ་བྱང་མཚམས་ཀྱི་སྐར་མ་ཡིན། །མོན་དྲེ་མོན་གྲུ་ཁྲུམས་སྟོད་སྨད། །ནམ་གྲུ་དབྱུག་གུ་བྱང་སྐར་ཏེ། །བྲ་ཉེ་བྱང་ཤར་མཚམས་སྐར་ཡིན། །ཤར་སྐར་དྲུག་ཤིང་ལྷོ་སྐར་མེ། །ནུབ་ལྕགས་བྱང་ཆུ་མཚམས་སྐར་ས། །སྐར་ཆུང་ཉི་ཤུ་རྩ་བདུན་ཡོད། །མགོ་ལག་བར་ན་སྐར་ཆུང་མེད། །དཔྱིད་ཟླ་ར་བ་ནས་བརྩམས་ཏེ། །མགོ་༡༡རྒྱལ་༡༢མཆུ་༡དབོ་༢ནག་པ་༣དང་། །ས་ག་༤སྣྲོན་༥དང་ཆུ་སྟོད་༦དང་། །གྲོ་ཞུན་༧ཁྲུམས་༨དབྱུག་༩སྨིན་དྲུག་༡༠རྣམས། །ཟླ་བ་བཅུ་གཉིས་ཉ་སྐར་ཏེ། །གང་ཉ་དར་བ་སྟོང་སྐར་གུད། །དེ་རྗེས་དར་གུད་དགུ་དུར་གསུམ། །དང་པོ་འབྱུང་བའི་དར་གུད་ནི། །ར་བ་བཞི་ནས་སྐོར་མགོ་བྱ། །དེ་ཡང་ཤིང་རྣམས་སྟོན་ར་སྤྲེལ། །མེ་རྣམས་དགུན་ཟླ་ར་བ་ཕག །ལྕགས་རྣམས་དཔྱིད་ར་སྟག་ནས་བཟུང་། །ས་ཆུ་དབྱར་ར་སྦྲུལ་ནས་བརྩམས། །དབུགས་ལེན་མངལ་གནས་ལུས་རྫོགས་གསུམ། །བཙས་པ་ཁྲུས་བྱེད་གོས་གྱོན་གསུམ། །ལས་བྱེད་དར་བ་གུད་པ་གསུམ། །ན་བ་ཤི་བ་དུར་ཞུགས་གསུམ། །གཡས་བསྐོར་རིམ་པར་བགྲངས་བྱས་ནས། །ལོ་ཟླ་ཞག་དུས་བཞི་ཡི་སྟེང་། །སྐབས་དང་སྦྱར་ཏེ་བཞག་པར་བྱ། །དར་བ་ལས་བྱེད་བཟང་པོའི་རབ། །ཁྲུས་བྱེད་གོས་གྱོན་བཟང་པོའི་འབྲིང་། །ལུས་རྫོགས་བཙས་པ་བཟང་པོའི་མཐའ། །དབུགས་ལེན་མངལ་གནས་ངན་པའི་རབ། །གུད་པ་ན་བ་ངན་པའི་འབྲིང་། །ཤི་བ་དུར་ཞུགས་ངན་པའི་ཐ། །དེ་དག་རྣམས་ཀྱང་རིམ་པ་བཞིན། །གཏེར་ཆེན་རྙེད་༡དང་རྒྱུན་རིང་བ༢། །བསམ་གྲུབ་༣གསོ་ཐུབ་༤བདེ་བ་ལྡན༥། །ལོངས་སྤྱོད་༦ཆེ་ཐོབ་སྐལ་ཟད་༧དང་། །བྱུར་ངན་༨ལྷུང་དང་བྱེ་བྲལ་༩དང་། །ཕུང་༡༠གྱོད་གཡང་༡༡ཉམས་རྒྱུན་༡༢ཆད་ཅེས། །དེ་ལྟར་བཟང་དྲུག་ངན་དྲུག་པོ། །སྲོག་ལུས་དབང་ཀླུང་ཀུན་ལ་སྦྱོར། །སྟག་ཡོས་ཟིན་དང་རྟ་སྦྲུལ་ལི། །བྱ་སྤྲེལ་དྭ་དང་ས་ཆུ་ཡི། །ལོ་དྲུག་ཁམ་ནས་དབུགས་བླངས་ཏེ། །བསྐོར་བ་སྤར་ཁའི་དར་གུད་ཡིན། །གཉིས་པ་དགུ་མིག་སྐོར་མགོ་ལ། །རྐྱང་སྦྲགས་སྤར་སྨེ་རུས་ཁམས་ལྔ། །དང་པོ་རྐྱང་པའི་དགུ་མིག་ནི། །ཕོ་ནི་རང་ལྔའི་བྱི་བ་དང་། །མོ་ནི་རང་ལྔའི་བྱ་ནས་བཟུང་། །
དགུ་ཚན་གྱེན་བགྲང་གཤེད་བཞིར་སྡོད། །དེ་ཡང་དགུ་དང་བཅོ་བརྒྱད་དང་། །ཉེར་བདུན་སོ་དྲུག་ཞེ་ལྔ་དང་། །ང་བཞི་རེ་གསུམ་བདུན་ཅུ་གཉིས། །གྱ་གཅིག་རྣམས་ལ་དགུ་མིག་འབབ། །ཁྱད་པར་གནམ་ལོའི་མདུན་རྒྱབ་ཏུ། །དགུ་དུར་གཉིས་འཛོམས་རེ་རེ་ཡོད། །དེ་ཡང་སྟག་ཡོས་ལོ་པའི་ཕོ། །བཅོ་བརྒྱད་བུད་མེད་སོ་དྲུག་པ། །རྟ་སྦྲུལ་སྐྱེས་པ་སོ་དྲུག་དང་། །བུད་མེད་བཅོ་བརྒྱད་བྱ་སྤྲེལ་ནི། །ང་བཞི་ཕོ་ལ་དོན་གཉིས་མོ། །གཤེད་བཞི་བྱི་ཕག་བཅས་པ་ལ། །སྐྱེས་པ་དོན་གཉིས་མོ་ང་བཞིར། །དགུ་མིག་དུར་ཐོག་ཕྱིན་པས་ངན། །སྦྲགས་མ་འབྲིང་པོ་བཞི་ནས་བསྐོར། །ས་ཆུ་ལོ་དྲུག་བྱི་བ་ནས། །གྱེན་དུ་བགྲང་པས་འབྲུག་ལ་སྡོད། །དེ་བཞིན་སྟག་ཡོས་ཡོས་ནས་ལུག །རྟ་སྦྲུལ་རྟ་ནས་ཁྱི་ལའོ། །བྱ་སྤྲེལ་བྱ་ནས་གླང་ཐོག་སྡོད། །དེ་དག་གནམ་ལོ་གང་ཤར་དེའི། །མར་གྱི་ལྔ་ཐུན་ལོ་པར་འབྱུང་། །དེ་ཕྱིར་ལོ་དགུ་ཉེར་གཅིག་དང་། །སོ་གསུམ་ཞེ་ལྔ་ལྔ་བཅུ་བདུན། །རེ་དགུ་གྱ་གཅིག་རྣམས་ལ་སྟེ། །དེ་རྣམས་དུར་བཞིའི་ཐོག་ཕྱིན་པས། །གནད་ཀྱི་དགུ་མིག་ཅེས་སུ་གྲགས། །སྤར་ཁ་ཕོ་ལི་མོ་ཁམ་དང་། །སྨེ་བ་སྐྱེས་སྨེར་བབས་པའོ། །རུས་ཁམས་དགུ་མིག་སྐོར་འགོ་ནི། །འུ་དང་ཀུང་གཉིས་བྱི་བ་ནས། །ཀེག་ནི་ཡོས་དང་ཇི་ནི་རྟ། །ཤང་ནི་བྱ་ནས་སྐོར་འགོ་བྱ། །གྱེན་བགྲང་དུར་སྟེང་ཕྱིན་པས་ངན། །དོན་ལ་སྦྲགས་མ་ཁོ་ནའོ། །གསུམ་པ་དུར་མིག་ཕྱི་ལོ་དང་། །ནང་ནི་སྤར་ཁ་དག་ལ་སྦྱོར། །དེ་ཡང་ཤིང་དུར་ལུག་དང་ཁོན། །མེ་དུར་ཁྱི་དང་ཁེན་ལ་ཞུགས། །ལྕགས་དུར་གླང་དང་གིན་ལ་སྟེ། །ས་ཆུ་འབྲུག་དང་ཟོན་ལ་བཏབ། །དུར་གྱི་ཁང་བུ་བརྒྱད་ཅུ་ནི། །བྱི་རྟ་བྱ་ཡོས་བཞི་ནས་བསྐོར། །འབྱེད་པའི་ལྡེ་མིག་བཞི་ཞེས་བྱ། །དེ་ཡང་བརྩི་བྱའི་དབང་མཐུན་གྱི། །ས་ཆུ་བྱི་བ་སྡེ་ལྔ་དང་། །ཤིང་གཉིས་ཡོས་དང་མེ་གཉིས་རྟ། །ལྕགས་གཉིས་བྱ་ལྔ་ནས་བསྐོར་ཕྱིར། །ཡང་དག་སྐོར་འགོ་ཉི་ཤུར་གྲགས། །ཐམས་ཅད་གྱེན་བསྐོར་རང་རང་གི། དབང་ཐུན་དུར་སྟེང་སླེབས་པ་ནི། །རང་དུར་ཆེ་སྟེ་དེའི་བདུན་ཟུར། །དབང་ཐང་མཐུན་པར་རང་དུར་ཆུང་། །རང་རང་དབང་ཐང་དགྲ་ཐོག་གི། དུར་སྟེང་ཕྱིན་པ་གཤེད་དུར་ཆེ། །དེ་ཡི་བདུན་ཟུར་གཤེད་དུར་ཆུང་། །དེ་ཡང་གནམ་ལོ་གང་ཤར་ཡང་། །སྐྱེས་བུའི་
ལོ་གྲངས་ཉེར་གཅིག་དང་། །ང་གཅིག་ཞེ་ལྔ་བཅོ་ལྔའི་སྟེང་། །སླེབས་པ་རང་དུར་ཆེ་དང་ཆུང་། །གཤེད་དུར་ཆེ་ཆུང་རིམ་པར་སྦྱར། །དེ་ལྟར་སྐོར་འགོ་ཉི་ཤུ་ལ། །བཞི་བཞི་སྦྱར་བས་བརྒྱད་ཅུའོ། །དུར་གྱི་ཉི་མ་སོ་དྲུག་ནི། །དྲུག་གསུམ་དུར་གྱི་ཉི་མ་ཞེས། །ཟླ་བ་ཀུན་ལ་གསུམ་གསུམ་ཡོད། །ཕོ་ཟླ་དྲུག་ལ་ལུག་ཉི་དང་། །མོ་དྲུག་གླང་གི་ཉི་མར་ངེས། །ཟླ་བའི་ར་འབྲིང་ཐ་གསུམ་ལ། །རིམ་བཞིན་གནམ་དུར་བར་དུར་དང་། །ས་དུར་ཞེས་པའི་ཐ་སྙད་བཏགས། །འབྱུང་རྩིས་མན་ངག་ཟླ་བའི་འོད་ཟེར་ལས། སྐོར་འགོ་སྤྱིའི་རྣམ་གཞག་བསྟན་པའི་ལེའུ་སྟེ་དང་པོའོ།། །།