འབྲས་བུ་རྣམ་མཁྱེན།

གཉིས་པ་ཚིག་དོན་ཡན་ལག་རྒྱས་བཤད་ལ། ཐོས་བསམ་གྱིས་གཏན་ལ་དབབ་པར་བྱ་བའི་ཡུལ། ཉམས་ལེན་གྱི་སྤྱོད་པ། ཐོབ་བྱའི་འབྲས་བུ་དང་གསུམ། དང་པོ་ལ། འབྲས་བུ་རྣམ་མཁྱེན། རྒྱུ་ལམ་ཤེས། བླང་དོར་བྱ་བའི་ཡུལ་གཞི་ཤེས་སོ། །དང་པོ་ལ། འབྲེལ་བཀོད་པའི་སྒོ་ནས་མཚམས་སྦྱར་བ་དང་། མཚོན་བྱེད་ཀྱི་ཆོས་རྒྱས་པར་བཤད་པ་གཉིས། དང་པོ་ནི། དེ་ལྟར་བསྡུས་པའི་དོན་ཀུན་བསྟན་ནས། ཞེས་སོགས་ཀྱིས་བསྟན། གཉིས་པ་ལ། སེམས་བསྐྱེད་ལ་སོགས་པ་མཚོན་བྱེད་ཀྱི་ཆོས་བཅུ་ཡོད་ཅིང་། འདི་དག་ལ་བསྡུ་བ་སྤྱིར་བསྟན་པ་དང་། དཀའ་བའི་གནས་བྱེ་བྲག་ཏུ་བཤད་པ་གཉིས། དང་པོ་ལ། བསམ་པ་སེམས་བསྐྱེད་པ་དང་། སྦྱོར་བ་ལམ་ལ་འཇུག་པའི་ཚུལ་གཉིས་སུ་འདུས། དང་པོ་ལ། སེམས་བསྐྱེད་ཀྱི་ངོ་བོ་ནི། སེམས་བསྐྱེད་པ་ནི་གཞན་དོན་ཕྱིར། ཞེས་སོགས་རྩ་འགྲེལ་གྱིས་འཆད། དེའི་དམིགས་ཡུལ་གཞན་དོན་དང་བྱང་ཆུབ་ནི། དེ་དང་དེ་ནི། ཞེས་སོགས་རྩ་འགྲེལ་གྱིས་འཆད། མཚོན་བྱེད་ཀྱི་དཔེ། མཚུངས་ལྡན་གྱི་གྲོགས། ཆོས་མཐུན་གྱི་གཏན་ཚིག་གསུམ་གྱི་སྒོ་ནས་ཉེར་གཉིས་སུ་ཡོད་ཚུལ་འཆད་པ་ནི། དེ་ཡང་ས་གསེར་ཞེས་སོགས་རྩ་འགྲེལ་གྱིས་འཆད། དེ་དག་གི་ས་མཚམས་འགྲེལ་པས་ཁ་བསྐང་སྟེ་འཆད་པ་ནི། དེ་ལ་དང་པོ་གསུམ་ནི། ཞེས་སོགས་ཀྱིས་བསྟན། གཉིས་པ་ལ། སྒྲུབ་པའི་ཐབས་སྟོན་པའི་རྒྱུ་གདམས་ངག །འཐོབ་བྱ་སྒྲུབ་པའི་འབྲས་བུ་ངེས་འབྱེད་ཆ་མཐུན། འཇུག་བྱ་སྒྲུབ་པའི་ཡན་ལག་གི་ཆོས་དང་གསུམ། དང་པོ་ལ། གདམས་ངག་བཅུ་སྤྱིར་བསྟན་པ་ནི། སྒྲུབ་དང་ཞེས་སོགས་ཀྱིས་བསྟན། རྟོགས་དཀའ་བ་དགེ་འདུན་དཀོན་མཆོག་བྱེ་བྲག་ཏུ་བཤད་པ་ནི། དབང་པོ་རྟུལ་དང་ཞེས་སོགས་ཀྱིས་བསྟན། གཉིས་པ་ལ། ངོ་བོ་མདོར་བསྟན་པ་དང་། ཁྱད་ཆོས་རྒྱས་པར་བཤད་པ་གཉིས། དང་པོ་ནི། དམིགས་པ་དང་ནི། ཞེས་སོགས་རྩ་འགྲེལ་གྱིས་བསྟན། གཉིས་པ་ལ་གསུམ་ལས། དང་པོ་དམིགས་རྣམ་རྒྱུ་གསུམ་གྱི་ཁྱད་ཆོས་ནི། དམིགས་པ་མི་རྟག་ལ་སོགས་པ། ཞེས་སོགས་ཀྱིས་བསྟན། གཉིས་པ་ལ། གཞི་དང་དེ་ཡི་གཉེན་པོ་ཡིས། །ཞེས་སོགས་ཀྱིས་གཟུང་རྟོག་གཉིས་དང་། རྫས་དང་བཏགས་པའི་རྟེན་ཅན་གྱིས། །ཞེས་སོགས་ཀྱིས་འཛིན་རྟོག་གཉིས་ཏེ། སྤང་བྱ་རྟོགས་པའི་ཁྱད་ཆོས་དང་། གསུམ་པ་ཡོངས་འཛིན་གྱི་ཁྱད་ཆོས་ནི། སེམས་མི་འགོང་བ་ཉིད་ལ་སོགས། །ཞེས་སོགས་ཀྱིས་བསྟན། གསུམ་པ་ལ། སྒྲུབ་པའི་རྟེན་རིགས། དེའི་དམིགས་པ། ཆེད་དུ་བྱ་བ། སྒྲུབ་པ་རང་གི་ངོ་བོ་དང་བཞི། དང་པོ་ལ། རིགས་ཀྱི་དབྱེ་བ་དང་། རྩོད་སྤོང་གཉིས། དང་པོ་ནི། རྟོགས་པ་ཡི་ནི་ཆོས་དྲུག་དང་། ཞེས་སོགས་ཀྱིས་བསྟན། གཉིས་པ་ལ། རྩོད་པ་ནི། ཆོས་ཀྱི་དབྱིངས་ལ་དབྱེར་མེད་ཕྱིར། ཞེས་སོགས་ཀྱིས་བསྟན། ལན་ལ། འཐད་པའི་སྒོ་ནས་ཆོས་དབྱིངས་རིགས་སུ་བསྒྲུབ་པ་དང་། དཔེའི་སྒོ་ནས་རིགས་ལ་དབྱེ་བ་འཐད་ཚུལ་གཉིས་ལས། དང་པོ་ནི། ཇི་ལྟར་ཉན་ཐོས་ཀྱི་ཐེག་པ་ལ་སོགས་པ། ཞེས་སོགས་ཀྱིས་བསྟན། གཉིས་པ་ནི། བརྟེན་པའི་ཆོས་ཀྱི་བྱེ་བྲག་གིས། ཞེས་སོགས་ཀྱིས་བསྟན། གཉིས་པ་ནི། དམིགས་པ་ཆོས་རྣམས་ཐམས་ཅད་དེ། ཞེས་སོགས་ཀྱིས་བསྟན། གསུམ་པ་ནི། སེམས་ཅན་ཀུན་མཆོག་ཅེས་སོགས་ཀྱིས་བསྟན། བཞི་པ་ལ། གོ་ཆའི། འཇུག་པའི། ཚོགས་ཀྱི། ངེས་འབྱུང་གི་སྒྲུབ་པ་བཞི་རིམ་བཞིན། དེ་དག་སོ་སོར། བསམ་གཏན་གཟུགས་མེད། བརྩེ་དང་སྦྱིན་ལ། ཆེད་དུ་བྱ་དང་། ཞེས་སོགས་རྩ་འགྲེལ་གྱིས་བསྟན། དེ་དག་ནི་བཤད་པའི་རིམ་པ་ཡིན་ཅིང་། རྐྱེན་ཐེག་ཆེན་དུ་རིགས་སད་པའི་གང་ཟག་གིས། བསམ་པ་བྱང་ཆུབ་མཆོག་ཏུ་སེམས་བསྐྱེད་ནས། སྦྱོར་བ་དེ་བཞིན་གཤེགས་པ་ལ་ཐེག་ཆེན་གྱི་གདམས་ངག་ཉན་ཏེ། ངེས་འབྱེད་ཆ་མཐུན་གྱི་རྟོགས་པ་རང་རྒྱུད་ལ་སྐྱེད་པར་བྱེད། དེ་ལྟར་བསྐྱེད་པའི་གང་ཟག་དེས། བསམ་པས་གོ་ཆ་གྱོན། སྦྱོར་བས་ལམ་ལ་འཇུག་ཅིང་། ཚོགས་གཉིས་ཀྱི་དཔུང་རྒྱ་ཆེན་པོ་བསགས་ཏེ། འཁོར་བ་སྤངས་པའི་མྱང་འདས་སུ་ངེས་པར་འབྱུང་བའི་སྒྲུབ་པ་དང་བཞིས། དམིགས་པ་བཅུ་གཅིག་ལ་དམིགས་ནས་ཉམས་སུ་བླངས་པས་མཐར་ཐུག་གི་འབྲས་བུ་ཆེད་དུ་བྱ་བ་གསུམ་རང་རྒྱུད་ལ་མངོན་དུ་བྱེད་པ་ནི། ཉམས་ལེན་གྱི་རིམ་པ་ཡིན་ནོ། །

གཉིས་པ་ལ། བསམ་པ་སེམས་བསྐྱེད་པ་དང་། སྦྱོར་བ་སྒྲུབ་པ་ལ་འཇུག་ཚུལ་གཉིས། དང་པོ་ནི། སེམས་བསྐྱེད་པ་ནི་གཞན་དོན་ཕྱིར། ཞེས་པའི་སྐབས་སུ་གཉིས་ཀྱི། དང་པོ་ཐེག་ཆེན་སེམས་བསྐྱེད་ལ། ལུས་རྟེན། བསམ་པའི་རྟེན། བརྟེན་པ་སེམས་བསྐྱེད་དང་གསུམ། དང་པོ་ལ། དངོས་དང་། དོགས་སྤོང་གཉིས། དང་པོ་ནི། འདུ་ཤེས་མེད་པ་པ་དང་། གཟུགས་མེད་ཁམས་པའི་སེམས་ཅན་མ་གཏོགས་འགྲོ་བ་གཞན་རྣམས་ནི་རང་སྟོབས་དང་གཞན་སྟོབས་ཅི་རིགས་པའི་སྒོ་ནས་ཐེག་ཆེན་སེམས་བསྐྱེད་དངོས་སུ་སྐྱེ་བའི་རྟེན་དུ་རུང་བ་ཡིན་ནོ། །དེ་ཡང་དང་པོ་ལ་དངོས་སུ་མི་སྐྱེ་སྟེ། ཡིད་ཀྱི་རྣམ་པར་ཤེས་པ་གསལ་པོ་མངོན་གྱུར་བ་རྒྱུན་ཆགས་སུ་མེད་པའི་ཕྱིར། གཉིས་པ་ལ་དངོས་སུ་མི་སྐྱེ་སྟེ། གཟུགས་མེད་ཁམས་པའི་སེམས་ཅན་ནི་ཕན་ཚུན་གཅིག་གིས་གཅིག་དམིགས་ཡུལ་དུ་མི་འགྱུར་བས། གཞན་སྡུག་བསྔལ་གྱིས་མནར་བ་མཐོང་སྟེ་དེ་དང་བྲལ་འདོད་ཀྱི་བློ་དངོས་སུ་སྐྱེ་བ་མེད་པའི་ཕྱིར། ངན་སོང་གསུམ་གྱི་རྟེན་ལ་དངོས་སུ་སྐྱེ་བ་ཡོད་དེ། དྲིན་ལན་བསབ་པ་ལས། སྟོན་པ་སྔོན་དམྱལ་བའི་ཤིང་རྟ་འདྲེན་པའི་གྱད་དུ་འཁྲུངས་པའི་ཚེ། གྲོགས་ལ་སྙིང་རྗེ་སྐྱེས་ནས་བྱང་ཆུབ་ཏུ་སེམས་བསྐྱེད་པར་བཤད་པ་དང་། ཟ་མ་ཏོག་བཀོད་པའི་མདོ་ལས། འཕགས་པ་འཇིག་རྟེན་དབང་ཕྱུག་གིས་ཡི་དྭགས་མང་པོ་བདེན་པ་མཐོང་བ་ལ་བཀོད་པར་བཤད་པ་དང་། ཀླུའི་རྒྱལ་པོ་རྒྱ་མཚོས་ཞུས་པའི་མདོ་ལས། ཀླུ་ཉི་ཁྲི་ཆིག་སྟོང་གིས་བྱང་ཆུབ་མཆོག་ཏུ་སེམས་བསྐྱེད་པར་བཤད་པའི་ཕྱིར། ལྷ་མིའི་རྟེན་ལ་དངོས་སུ་སྐྱེ་བར་རུང་སྟེ། མདོ་ལས། དེ་ཚེ་ལྷ་མི་སྟོང་ཕྲག་བརྒྱ། །བྱང་ཆུབ་མཆོག་ཏུ་སེམས་བསྐྱེད་དོ། །ཞེས་སོ། །

གཉིས་པ་ནི། ལམ་སྒྲོན་ལས། སོ་སོར་ཐར་པ་རིགས་བདུན་གྱི། །རྟག་ཏུ་སྡོམ་གཞན་ལྡན་པ་ལ། །བྱང་ཆུབ་སེམས་དཔའི་སྡོམ་པ་ཡི། །སྐལ་བ་ཡོད་ཀྱི་གཞན་དུ་མིན། །ཞེས་གསུངས་པས་ངན་འགྲོ་ལ་སོགས་པའི་རྒྱུད་ལ་ཐེག་ཆེན་སེམས་བསྐྱེད་དངོས་སུ་སྐྱེ་བ་མི་འཐད་དོ་ཞེ་ན་སྐྱོན་མེད་དེ། དེ་ནི་རྒྱ་ཆེན་སྤྱོད་པའི་ལུགས་སེམས་ཙམ་ལུགས་སུ་གྲགས་པའི་སེམས་བསྐྱེད་ཀྱི་སྡོམ་པའི་རྟེན་ཙམ་ལ་དགོངས་པའི་ཕྱིར། གཉིས་པ་ནི། རྐྱེན་ཐེག་པ་ཆེན་པོར་རིགས་སད་པའི་སྟོབས་ཀྱིས་སེམས་ཅན་གྱི་སྡུག་བསྔལ་བསལ་འདོད་ཀྱི་སྙིང་རྗེ་དང་། རྒྱལ་བ་སྲས་བཅས་ཀྱི་མཛད་སྤྱོད་ལ་དམིགས་པའི་དད་པ་ནི་བསམ་པའི་རྟེན་དུ་དགོས་ཏེ། དེ་ཡོད་ན་གཞན་དོན་དུ་རྫོགས་པའི་བྱང་ཆུབ་ཐོབ་འདོད་ཀྱི་བློ་ངང་གིས་སྐྱེ་བའི་ཕྱིར། དཀོན་མཆོག་སྒྲོན་མེའི་མདོ་ལས། རྒྱལ་དང་རྒྱལ་བའི་ཆོས་ལ་དད་གྱུར་ཅིང་། །རྒྱལ་སྲས་རྣམས་ཀྱི་སྤྱོད་ལའང་དད་བྱེད་པ། །བྱང་ཆུབ་བླ་ན་མེད་ལ་དད་གྱུར་ན། །སྐྱེས་བུ་དམ་པ་རྣམས་ཀྱི་སེམས་སྐྱེའོ། །ཞེས་དང་། རིན་ཆེན་ཕྲེང་བར། དེ་ཡི་རྩ་བ་བྱང་ཆུབ་སེམས། །རི་དབང་རྒྱལ་པོ་ལྟར་བརྟན་དང་། །ཕྱོགས་མཐས་གཏུགས་པའི་སྙིང་རྗེ་དང་། །གཉིས་ལ་མི་རྟེན་ཡེ་ཤེས་ལགས། །ཞེས་དང་། བརྒྱད་སྟོང་འགྲེལ་ཆེན་ལས། དེ་ལ་དང་པོར་རིགས་ནུས་པས། །སྙིང་རྗེའི་ས་བོན་རབ་སད་ཅིང་། །སྦྱོར་དང་བསམ་པ་ཕུན་ཚོགས་པས། །བྱང་ཆུབ་སེམས་ནི་ཡོངས་སུ་བཟུང་། །ཞེས་སོ། །

གསུམ་པ་ལ། སེམས་བསྐྱེད་ཀྱི་རང་བཞིན། བསླབ་བྱ། ཕན་ཡོན་དང་གསུམ། དང་པོ་ལ། མཚན་གཞི། མཚན་ཉིད། དབྱེ་བ། ས་མཚམས་དང་བཞི། དང་པོ་ནི། ཐོགས་མེད་སྐུ་མཆེད་ཀྱིས་སེམས་བྱུང་ལ་བཞེད་དེ། བྱང་སར། བྱང་ཆུབ་སེམས་དཔའ་རྣམས་ཀྱི་སྨོན་ལམ་གྱི་མཆོག་ནི་སེམས་བསྐྱེད་པའོ། །ཞེས་གསུངས་ཤིང་། སྨོན་ལམ་ཡང་དོན་གཉེར་གྱི་འདུན་པ་མཚུངས་ལྡན་དང་བཅས་པ་ལ་འདོད་དེ། རྒྱན་ལས། བརྟན་པ་རྣམས་ཀྱི་སྨོན་ལམ་ནི། །སེམས་པ་འདུན་དང་བཅས་པ་སྟེ། །ཞེས་དང་། སྤྲོ་བ་ཆེ་དང་རྩོམ་པ་ཆེ། །དོན་ཆེ་བ་དང་འབྱུང་བ་ཆེ། །བྱང་ཆུབ་སེམས་དཔའི་སེམས་པ་སྟེ། །དོན་གཉིས་ལྡན་པའི་སེམས་བྱུང་བ། །ཞེས་པའི་འགྲེལ་བར་དབྱིག་གཉེན་གྱིས། ཡོན་ཏན་གསུམ་དང་གཉིས་ལ་དམིགས་པ་དང་ལྡན་པའི་སེམས་ནི་སེམས་བསྐྱེད་པ་ཞེས་བྱའོ། །ཞེས་སོ། །འཕགས་སེང་གཉིས་ལྟར་ན། སེམས་སེམས་བྱུང་གཉིས་ཀྱི་ནང་ནས་གཙོ་བོ་སེམས། དེ་ལ་ཡང་ཚོགས་བརྒྱད་ཡོད་པའི་ནང་ནས་ཡིད་ཀྱི་རྣམ་པར་ཤེས་པ། དེ་ལ་ཡང་རིགས་དུ་མ་ཡོད་པའི་ནང་ནས་སྟོང་ཉིད་རྟོགས་པའི་ཤེས་རབ་ཀྱིས་ཟིན་ཅིང་། གཞན་དོན་དུ་རྫོགས་པའི་བྱང་ཆུབ་ལ་དམིགས་པའི་ཡིད་ཀྱི་རྣམ་པར་ཤེས་པ་དགེ་བ་ལ་འདོད་དེ། ཉི་སྣང་ལས། སེམས་བསྐྱེད་པ་ཞེས་བྱ་བ་ལ་སེམས་ནི་རྣམ་པར་ཤེས་པ་སྟེ་རྣམ་པར་རིག་པའོ། །རྣམ་པར་ཤེས་པ་གང་ཡིན་ཞེ་ན། ཡིད་ཀྱི་རྣམ་པར་ཤེས་པ་སྟེ་དཀར་པོའི་ཆོས་ཐམས་ཅད་ལ་དམིགས་པ་ནི་དེ་ལ་སྲིད་པའི་ཕྱིར་རོ། །ཞེས་དང་། དོན་གསལ་ལས། བདེན་མོད་ཀྱི་འོན་ཀྱང་། ཞེས་སེམས་བསྐྱེད་ཡིན་ན་སེམས་བྱུང་མ་ཡིན་པས་ཁྱབ་པ་ལ་བདེན་ལན་བཤད་པའི་ཕྱིར། འོན་ཀྱང་སངས་རྒྱས་ཀྱི་སར་ཚོགས་དྲུག་ཀ་སེམས་བསྐྱེད་དུ་འགྱུར་བ་མི་འགལ་ལོ། །རོང་ཊཱིཀ་ཏུ། གཉིས་ཀ་ལ་བཤད་དེ། བྱ་བ་ལ་ལྟོས་ནས་གཙོ་སེམས་དང་། བྱེད་པ་ལ་ལྟོས་ནས་སེམས་བྱུང་ལ་བཞག་པའི་ཕྱིར།

གཉིས་པ་ནི། འདིར་འཕགས་སེང་གཉིས་ལྟར་བཤད་ན། གཞན་དོན་དུ་རྫོགས་པའི་བྱང་ཆུབ་ལ་མྱོང་བ་ཐོན་པའི་ཚུལ་གྱིས་དམིགས་པའི་ཐེག་ཆེན་གྱི་ཐར་ལམ་གྱི་ངོ་བོར་གྱུར་པའི་གཙོ་བོ་རྣམ་རིག །

གསུམ་པ་ལ། མཚན་གཞི། ཕྲ་རགས། ཆོ་ག །སེམས་བསྐྱེད་ཚུལ། དཔེ་གྲོགས། ས་མཚམས་ཀྱི་སྒོ་ནས་དབྱེ་བ་དང་དྲུག །དང་པོ་ལ། སྨོན་འཇུག་གཉིས། དང་པོའི་མཚན་ཉིད། རང་དང་ལྷན་ཅིག་པའི་བྱང་སེམས་ཀྱི་སྡོམ་པས་མ་ཟིན་པའི་ཀུན་རྫོབ་སེམས་བསྐྱེད། མཚན་གཞི་ནི། བྱང་སེམས་ཀྱི་སྡོམ་པ་འབོགས་པའི་ཆོ་ག་སྔོན་དུ་མ་སོང་བར་བྱང་སེམས་ཀྱི་ཚོགས་ལམ་ཐོབ་མ་ཐག་པའི་སེམས་བསྐྱེད་དང་། ཀུན་དཀྲིས་ཆེན་པོས་སྤྱད་པའི་རྩ་ལྟུང་གིས་བྱང་སེམས་ཀྱི་སྡོམ་པ་ལས་ཉམས་པའི་བྱང་སེམས་ཚོགས་ལམ་པའི་སེམས་བསྐྱེད་དོ། །གཉིས་པའི་མཚན་ཉིད། རང་དང་ལྷན་ཅིག་པའི་བྱང་སེམས་ཀྱི་བསླབ་པའི་གྲོགས་ཀྱིས་ཟིན་པའི་ཀུན་རྫོབ་སེམས་བསྐྱེད། མཚན་གཞི་ནི། བྱང་སེམས་ཀྱི་སྡོམ་པ་རྒྱུད་ལ་ལྡན་པའི་བྱང་སེམས་སོ་སྐྱེའི་སེམས་བསྐྱེད་མཐའ་དག་དང་། བྱང་སེམས་འཕགས་པའི་རྗེས་ཐོབ་ཀྱི་ངོ་བོར་གྱུར་པའི་སེམས་བསྐྱེད་རྣམས་སོ། །དེ་ཡང་དང་པོ་སྦྱོར་ལམ་ཡན་ཆད་དུ་འགྲོ་བ་མི་སྲིད་དེ། དེ་ཡན་ཆད་ན་སྡོམ་པས་མ་ཟིན་པའི་སེམས་བསྐྱེད་མེད་པའི་ཕྱིར། གཉིས་པ་ཐེག་ཆེན་འཕགས་པའི་མཉམ་བཞག་གི་གནས་སྐབས་ན་མེད་དེ། དེ་ཀུན་རྫོབ་སེམས་བསྐྱེད་དུ་ངེས་པའི་ཕྱིར། དེས་ན་སྐབས་འདིར་སྨོན་པ་སེམས་བསྐྱེད་ཡིན་ན་བྱང་སྡོམ་གྱིས་མ་ཟིན་པ་དང་། འཇུག་པ་སེམས་བསྐྱེད་ཡིན་ན་བྱང་སྡོམ་གྱིས་ཟིན་པས་ཁྱབ་བོ། །དེ་ལྟར་ཡང་སྤྱོད་འཇུག་ལས། བྱང་ཆུབ་སྨོན་པའི་སེམས་ལས་ནི། །འཁོར་ཚེ་འབྲས་བུ་ཆེ་འབྱུང་ཡང་། །ཇི་ལྟར་འཇུག་པའི་སེམས་བཞིན་དུ། །བསོད་ནམས་རྒྱུན་ཆགས་འབྱུང་བ་མིན། །གང་ནས་བཟུང་སྟེ་སེམས་ཅན་ཁམས། །མཐའ་ཡས་རབ་ཏུ་བསྒྲལ་བའི་ཕྱིར། །མི་ལྡོག་པ་ཡི་སེམས་ཀྱིས་སུ། །སེམས་དེ་ཡང་དག་བླངས་གྱུར་པ། །དེ་ནས་བཟུང་སྟེ་གཉིད་ལོག་གམ། །བག་མེད་གྱུར་ཀྱང་བསོད་ནམས་ཤུགས། །རྒྱུན་མི་ཆད་པ་དུ་མ་ཞིག །ནམ་མཁའ་མཉམ་པར་རབ་ཏུ་བྱུང་། །ཞེས་དང་། ཆོས་བཤེས་ཀྱིས། སྨོན་པ་ནི་སྨོན་པ་ཙམ་སྟེ། སེམས་བསྐྱེད་པའི་ཆོ་ག་ཙམ་ཡང་བླང་བར་མ་བྱས་པའོ། །ཞེས་སོ། །གཉིས་པ་ལ། རགས་པ་བརྡ་ལས་བྱུང་བའི་དང་། ཕྲ་བ་ཆོས་ཉིད་ཀྱིས་ཐོབ་པའི་སེམས་བསྐྱེད་གཉིས། དང་པོ་ཀུན་རྫོབ་སེམས་བསྐྱེད་དང་དོན་གཅིག །གཉིས་པ་དོན་དམ་སེམས་བསྐྱེད་དང་དོན་གཅིག །དང་པོ་ལ། མཚན་ཉིད། མཚན་གཞི། དབྱེ་བ་དང་གསུམ། དང་པོ་ནི། རང་རིག་ལ་ཆོས་ཉིད་མངོན་སུམ་དུ་རྟོགས་པའི་མཉམ་བཞག་ཡེ་ཤེས་མེད་ཅིང་གཞན་དོན་དུ་རྫོགས་པའི་བྱང་ཆུབ་ལ་དམིགས་པའི་ཐེག་ཆེན་སློབ་པའི་སེམས་བསྐྱེད། གཉིས་པ་ནི། ཐེག་ཆེན་ཚོགས་སྦྱོར་བའི་སེམས་བསྐྱེད་མཐའ་དག་དང་། བྱང་འཕགས་ཀྱི་རྗེས་ཐོབ་ཀྱི་ངོ་བོར་གྱུར་པའི་སེམས་བསྐྱེད་རྣམས་སོ། །དེ་ཡང་བྱང་སེམས་ཀྱི་རྗེས་ཐོབ་སེམས་བསྐྱེད་རྣམས་ཀུན་རྫོབ་བདེན་པ་ཙམ་འཛིན་སྟངས་ཀྱི་ཡུལ་དུ་བྱེད་པའི་ཕྱིར་དང་། མཉམ་བཞག་ལ་གནས་པའི་བྱང་སེམས་སོ་སྐྱེའི་སེམས་བསྐྱེད་རྣམས་རྟེན་གྱི་གང་ཟག་གི་སྒོ་ནས་ཀུན་རྫོབ་སེམས་བསྐྱེད་དུ་བཞག་གོ །དེས་ན་དོན་དམ་པའི་བྱང་སེམས་ཡིན་ན་དོན་དམ་སེམས་བསྐྱེད་ཐོབ་པས་ཁྱབ་སྟེ། འཇུག་པར། དེ་ནས་བཟུང་སྟེ་དེ་ནི་དེ་ཐོབ་གྱུར་པ་ཡིས། །བྱང་ཆུབ་སེམས་དཔའ་ཞེས་བྱའི་སྒྲ་ཉིད་ཀྱིས་བསྙད་དོ། །ཞེས་སོ། །གསུམ་པ་ལ། གྲོགས་དགེ་བའི་བཤེས་གཉེན་གྱི་སྟོབས་ལས། རྒྱུ་ཐེག་ཆེན་གྱི་རིགས་སད་པ་ལས། དགེ་བའི་རྩ་བ་རྒྱ་ཆེན་པོ་གོམས་པ་ལས། ཐེག་ཆེན་སེམས་བསྐྱེད་སྟོན་པའི་གསུང་རབ་མང་པོ་ཐོས་པ་ལས། དགེ་བ་ཐེག་ཆེན་སེམས་བསྐྱེད་ཀྱི་དམིགས་པ་གོམས་པ་ལས་ཐོབ་པའི་སེམས་བསྐྱེད་དང་ལྔ། དང་པོ་མི་བརྟན་པའི་སེམས་བསྐྱེད་ཡིན་ཏེ། གྲོགས་གཞན་ལ་རག་ལས་པའི་ཕྱིར། ཕྱི་མ་རྣམས་བརྟན་པའི་སེམས་བསྐྱེད་ཡིན་ཏེ། མི་མཐུན་ཕྱོགས་ཀྱིས་ཉམས་དཀའ་བའི་ཕྱིར། རྒྱན་ལས། གྲོགས་སྟོབས་རྒྱུ་སྟོབས་རྩ་བའི་སྟོབས། །ཐོས་སྟོབས་དགེ་བ་གོམས་པ་ལས། །མི་བརྟན་པ་དང་བརྟན་འབྱུང་བ། །གཞན་གྱིས་བསྟན་པའི་སེམས་བསྐྱེད་བཤད། །ཅེས་སོ། །གཉིས་པ་ལ། མཚན་ཉིད། དབྱེ་བ། སྒྲ་བཤད། ས་མཚམས་དང་བཞི། དང་པོ་ནི། ཆོས་ཉིད་མངོན་སུམ་དུ་རྟོགས་པའི་མཉམ་བཞག་རྣམ་པར་མི་རྟོག་པའི་ངོ་བོར་གྱུར་པའི་སེམས་བསྐྱེད། གཉིས་པ་ལ། འབད་རྩོལ་གྱི་མཚན་མ་དང་བཅས་པ། དེ་མེད་པའི། སྒྲིབ་པ་སྤངས་པའི་དོན་དམ་སེམས་བསྐྱེད་དང་གསུམ། གསུམ་པ་ནི། གྲངས་མེད་གཅིག་ཏུ་སངས་རྒྱས་བརྒྱ་ཡན་ཆད་ལ་བསྙེན་བཀུར་བ་ཡོངས་སུ་འཛིན་པ་དམ་པ། དེ་ཙམ་དུ་ཚོགས་གཉིས་རྒྱ་ཆེན་པོ་གསོག་པ་རྗེས་སུ་སྒྲུབ་པ་དམ་པ། ཆོས་ཀྱི་བདག་མེད་མངོན་སུམ་དུ་རྟོགས་པའི་ཡེ་ཤེས་རྟོགས་པ་དམ་པ་སྟེ་དམ་པ་གསུམ་དང་ལྡན་པས་དེ་སྐད་ཅེས་བྱ་སྟེ། རྒྱན་ལས། རྫོགས་པའི་སངས་རྒྱས་རབ་མཉེས་བྱས། །བསོད་ནམས་ཡེ་ཤེས་ཚོགས་རབ་བསགས། །ཆོས་ལ་མི་རྟོག་ཡེ་ཤེས་ནི། །སྐྱེས་ཕྱིར་དེ་ནི་དམ་པར་འདོད། །ཅེས་སོ། །བཞི་པ་ནི། ས་དང་པོ་ནས་ཐོབ་སྟེ། རྒྱན་ལས། ཆོས་དང་སེམས་ཅན་རྣམས་དང་ནི། །དེ་ཡི་བྱ་བ་སངས་རྒྱས་ཉིད། །མཆོག་ལ་སེམས་མཉམ་རྙེད་པའི་ཕྱིར། །དེ་ཡི་རབ་དགའ་ཁྱད་པར་འཕགས། །ཞེས་སོ། །གསུམ་པ་ལ་སྤྱིར་བསྟན་པ་དང་། ཁྱད་ཆོས་བྱེ་བྲག་ཏུ་བཤད་པ་གཉིས། དང་པོ་ནི། རྗེ་བཙུན་འཇམ་དབྱངས་ནས་ཀླུ་སྒྲུབ་ཡབ་སྲས་སོགས་ལ་བརྒྱུད་པ་བསླབ་བཏུས་དང་སྤྱོད་འཇུག་ཏུ་བཀོད་པའི་ཕྱག་སྲོལ་ཟབ་མོ་ལྟ་བའི་སེམས་བསྐྱེད་དབུ་མ་ལུགས་སུ་གྲགས་པ་དང་། རྗེ་བཙུན་བྱམས་པ་ནས་ཐོགས་མེད་སྐུ་མཆེད་ལ་བརྒྱུད་པ་བྱང་ས་དང་སྡོམ་པ་ཉི་ཤུ་པ་སོགས་སུ་བཀོད་པའི་ཕྱག་སྲོལ་རྒྱ་ཆེན་སྤྱོད་པའི་སེམས་བསྐྱེད་སེམས་ཙམ་ལུགས་སུ་གྲགས་པ་གཉིས་སོ། །གཉིས་པ་ལ། གང་ལ་བླང་བའི་ཡུལ། གང་གིས་ལེན་པའི་གང་ཟག །ཇི་ལྟར་ལེན་པའི་ཆོ་ག །བསླབ་བྱའི་ཁྱད་པར་དང་བཞི། དང་པོ་ནི། སྤྱོད་འཇུག་ལས། རྟག་པར་དགེ་བའི་བཤེས་གཉེན་ནི། །ཐེག་ཆེན་དོན་ལ་མཁས་པ་དང་། །བྱང་ཆུབ་སེམས་དཔའི་བརྟུལ་ཞུགས་མཆོག །སྲོག་གི་ཕྱིར་ཡང་མི་བཏང་ངོ་། །ཞེས་གསུངས་པའི་མཚན་ཉིད་ཅན་གྱི་སློབ་དཔོན་ནམ། རྟེན་གྱི་དྲུང་དུ་བླངས་པས་ཀྱང་སྐྱེ་བར་བཤད་ཅིང་། འོན་ཀྱང་སེམས་ཙམ་ལུགས་ལ་ཉམས་ན་ཕྱིར་གསོ་བའི་ཡུལ་སློབ་དཔོན་རང་ལ་བརྟེན་དགོས་པར་བཤད་དོ། །གཉིས་པ་ནི། དབུ་མ་ལུགས་ཀྱི་སེམས་བསྐྱེད་བྱང་ཆུབ་དོན་གཉེར་གྱི་བསམ་པ་དངོས་སུ་སྐྱེ་རུང་ཐམས་ཅད་ལ་སྐྱེ་ཞིང་། སེམས་ཙམ་ལུགས་ལ་སོ་ཐར་རིགས་བདུན་གང་རུང་སྔོན་དུ་འགྲོ་དགོས་པས་གླིང་གསུམ་གྱི་སྐྱེས་པ་དང་བུད་མེད་མ་གཏོགས་འགྲོ་བ་གཞན་ལ་དངོས་སུ་མི་སྐྱེའོ། །གསུམ་པ་ལ། སྦྱོར་བ། དངོས་གཞི། རྗེས་ཀྱི་ཆོ་གའི་ཁྱད་པར་དང་གསུམ། དང་པོ་ནི། དབུ་མ་ལུགས་ལ་གསོལ་བཏབ་སྔོན་དུ་འགྲོ་བ་ཅན་གྱིས་ཡན་ལག་བདུན་པ་དང་། སེམས་ཙམ་ལུགས་ལ་ཕྱག་མཆོད་ཙམ་གྱིས་ཆོག་པར་བཤད། གཉིས་པ་ལ་དབུ་མའི་ལུགས་ལྟར་ན། གཞན་དོན་དུ་བྱང་ཆུབ་དོན་གཉེར་གྱི་བསམ་པ་ཁྱད་པར་ཅན་དང་ལྡན་པས། བྱང་ཆུབ་སྙིང་པོར་མཆིས་ཀྱི་བར། ཞེས་སོགས་ཀྱིས་སྐྱབས་སུ་འགྲོ་ཞིང་། ཇི་ལྟར་སྔོན་གྱི་སོགས་ལན་གསུམ་གྱིས་སེམས་བསྐྱེད་དོ། །སེམས་ཙམ་ལུགས་ལྟར་ན། འཇམ་དབྱངས་ས་པཎ་གྱིས། དེས་ན་སེམས་ཙམ་པ་ཡི་ལུགས། །གལ་ཏེ་སེམས་བསྐྱེད་དེ་འདོད་ན། །ཐོག་མར་སོ་སོར་ཐར་པ་ལོངས། །བྱང་ཆུབ་སེམས་དཔའི་སྡེ་སྣོད་སློབ། །དད་ཅིང་སྒྲུབ་པར་ནུས་གྱུར་ན། །ཕྱི་ནས་སེམས་བསྐྱེད་སྡོམ་པ་ལོངས། །ཞེས་པ་ལྟར་རོ། །གསུམ་པ་ལ། སེམས་ཙམ་ལུགས་ལ། ཕྱོགས་བཅུའི་སངས་རྒྱས་སྲས་བཅས་ཀྱི་སྤྱན་སྔར་མཁྱེན་པར་གསོལ་བ་ཙམ་བཤད། དབུ་མའི་ལུགས་ལ་རང་དགའ་བ་བསྒོམ་པ་དང་། གཞན་དགའ་བ་བསྒོམ་པ་གཉིས་བཤད། བཞི་པ་ནི། འོག་ཏུ་འཆད་དོ། །བཞི་པ་ལ། རྒྱལ་པོ་ལྟ་བུའི། རྫི་བོ་ལྟ་བུའི། མཉན་པ་ལྟ་བུའི་སེམས་བསྐྱེད་དང་གསུམ། དང་པོ་ནི། ཐོག་མར་རང་ཉིད་སངས་རྒྱས་ནས་དེའི་རྗེས་སུ་སེམས་ཅན་ཐམས་ཅད་སྒྲོལ་འདོད་ཀྱི་སེམས་བསྐྱེད་དོ། །གཉིས་པ་ནི། ཐོག་མར་སེམས་ཅན་ཐམས་ཅད་སངས་རྒྱས་ཀྱི་ས་ལ་བཀོད་ནས་རང་ཉིད་འཚང་རྒྱ་བར་འདོད་པའོ། །གསུམ་པ་ནི། རང་དང་སེམས་ཅན་གཞན་ལྷན་ཅིག་ཏུའོ། །ལྔ་པ་ལ། ཚོགས་ལམ་གྱིས་བསྡུས་པའི་སེམས་བསྐྱེད་གསུམ། སྦྱོར་ལམ་གྱིས་བསྡུས་པ་གཅིག །མཐོང་སྒོམ་གྱིས་བསྡུས་པ་བཅུ། ཁྱད་པར་ལམ་གྱིས་བསྡུས་པ་ལྔ། སངས་རྒྱས་ཀྱི་སས་བསྡུས་པ་གསུམ་སྟེ། ཉེར་གཉིས་སོ། །དང་པོ་ནི། ས་ལྟ་བུས་མཚོན་པའི་འདུན་པ་དང་། མཚུངས་ལྡན་གྱི་སེམས་བསྐྱེད། གསེར་ལྟ་བུས་མཚོན་པའི་བསམ་པ། ཟླ་བ་ཚེས་པ་ལྟ་བུས་མཚོན་པའི་ལྷག་པའི་བསམ་པ་དང་མཚུངས་ལྡན་གྱི་སེམས་བསྐྱེད། གཉིས་པ་ནི། མེ་ལྟ་བུས་མཚོན་པའི་སྦྱོར་བ་དང་། གསུམ་པ་ནི། གཏེར་ཆེན་པོ། རིན་པོ་ཆེའི་འབྱུང་ཁུངས། རྒྱ་མཚོ་ཆེན་པོ། རྡོ་རྗེ། རིའི་རྒྱལ་པོ། སྨན། དགེ་བའི་བཤེས་གཉེན། ཡིད་བཞིན་གྱི་ནོར་བུ། ཉི་མ། ཆོས་ཀྱི་གླུ་དབྱངས་ལྟ་བུ་བཅུས་མཚོན་པའི་ཕ་རོལ་ཏུ་ཕྱིན་པ་བཅུ་དང་མཚུངས་ལྡན་གྱི་སེམས་བསྐྱེད་དོ། །བཞི་པ་ནི། རྒྱལ་པོ་ཆེན་པོ། བང་མཛོད། ལམ་པོ་ཆེ། བཞོན་པ་ བཟང་པོ། བཀོད་མའི་ཆུ ་ལྟ་བུ་ལྔས་མཚོན་པའི། མངོན་ཤེས། ཚོགས་གཉིས། བྱང་ཆུབ་ཕྱོགས་མཐུན། སྙིང་རྗེ་ལྷག་མཐོང་། གཟུངས་སྤོབས་དང་མཚུངས་ལྡན་གྱི་སེམས་བསྐྱེད་དོ། །ལྔ་པ་ནི། སྒྲ་སྙན་པ། ཆུ་བོའི་རྒྱུན། སྤྲིན་ལྟ་བུ་གསུམ་གྱིས་མཚོན་པའི་ཆོས་ཀྱི་དགའ་སྟོན། བགྲོད་པ་གཅིག་པུའི་ལམ། ཆོས་སྐུ་དང་མཚུངས་ལྡན་གྱི་སེམས་བསྐྱེད་དོ། །དྲུག་པ་ལ། མོས་པས་སྤྱོད་པའི། ལྷག་བསམ་རྣམ་དག་གི །རྣམ་པར་སྨིན་པའི། སྒྲིབ་པ་སྤངས་པའི་སེམས་བསྐྱེད་དང་བཞི། ཐེག་ཆེན་སོ་སྐྱེའི་རྒྱུད་ཀྱི་སེམས་བསྐྱེད་རྣམས་ནི་དང་པོའི་མཚན་གཞི་ཡིན་ཏེ། ཆོས་ཀྱི་བདག་མེད་ལ་དོན་སྤྱིའི་ཚུལ་དུ་མོས་པར་བྱེད་པའི་སེམས་བསྐྱེད་ཡིན་པའི་ཕྱིར། མ་དག་པའི་སེམས་བསྐྱེད་རྣམས་ནི་གཉིས་པའི་མཚན་གཞི་ཡིན་ཏེ། འབད་རྩོལ་གྱི་མཚན་མ་དང་བཅས་པའི་སྒོ་ནས་བདག་གཞན་མཉམ་པ་ཉིད་དུ་མངོན་སུམ་དུ་རྟོགས་པའི་སེམས་བསྐྱེད་ཡིན་པའི་ཕྱིར། དག་པའི་སེམས་བསྐྱེད་ནི། གསུམ་པའི་མཚན་གཞི་ཡིན་ཏེ། འབད་རྩོལ་གྱི་མཚན་མ་དང་བྲལ་ཞིང་སྒྲིབ་གཉིས་ཀྱི་བག་ཆགས་མ་སྤངས་པའི་སེམས་བསྐྱེད་ཡིན་པའི་ཕྱིར། སངས་རྒྱས་སའི་སེམས་བསྐྱེད་ནི་བཞི་པ་ཡིན་ཏེ། སྒྲིབ་གཉིས་ཀྱི་བག་ཆགས་ཟད་པར་སྤངས་པའི་སེམས་བསྐྱེད་ཡིན་པའི་ཕྱིར་ཏེ། རྒྱན་ལས། སེམས་བསྐྱེད་དེ་ནི་ས་རྣམས་ལ། །མོས་དང་ལྷག་བསམ་དག་པ་དང་། །རྣམ་པར་སྨིན་པ་གཞན་དུ་འདོད། །དེ་བཞིན་སྒྲིབ་པ་སྤངས་པའོ། །ཞེས་སོ། །

བཞི་པ་ནི། ཐེག་ཆེན་གྱི་ཚོགས་ལམ་ནས་སངས་རྒྱས་ཀྱི་སའི་བར་དུ་ཡོད་དོ། །སེམས་བསྐྱེད་པའི་རབ་ཏུ་དབྱེ་བ་ནི། ལས་དང་པོ་པའི་ས་ནས་བཟུང་སྟེ། སངས་རྒྱས་ཀྱི་སའི་བར་གྱིས་བསྡུས་པ་ཡིན་ནོ། །ཞེས་གསུངས་པའི་ཕྱིར།

གཉིས་པ་བསླབ་བྱ་ལ། མི་ཉམས་པའི་རྒྱུ་བསྟེན་དགོས་པ། ཉམས་པའི་རྒྱུ་ངོས་བཟུང་བ། རྩ་ལྟུང་སྡོམ་པའི་གཏོང་རྒྱུ་ཡིན་མིན་ལ་དཔྱད་པའོ། །དང་པོ་ལ། ཚེ་འདིར་མི་ཉམས་པའི་རྒྱུ་དྲན་པ་གསུམ། ཕྱི་མར་མི་ཉམས་པའི་རྒྱུ་ཐབས་གསུམ། གཉིས་ཀར་མི་ཉམས་པའི་རྒྱུ་འདུན་པ་སོགས་ལྔའོ། །དང་པོ་ནི། སེམས་བསྐྱེད་སྐྱེས་པའི་ཕན་ཡོན། ཉམས་པའི་ཉེས་དམིགས། རྙེད་པར་དཀའ་བ་ཡང་དང་ཡང་དུ་ཡིད་ལ་དྲན་པར་བྱེད་པའོ། །གཉིས་པ་ནི། ཡན་ལག་བདུན་པ་དུས་གསུམ་དུ་བྱེད་པ། རྒྱལ་བ་སྲས་བཅས་ལ་གསོལ་བ་འདེབས་པ། ཆོས་དང་འགལ་བའི་བདུད་ལས་སྤོང་བའོ། །གསུམ་པ་ནི། སེམས་ཅན། ཆོས། བྱང་ཆུབ་ཀྱི་སེམས། དགེ་བའི་བཤེས་གཉེན་ལ་གཅེས་སྤྲས་སུ་འཛིན་པ། སངས་རྒྱས་མྱུར་དུ་ཐོབ་པར་འདོད་པའོ། །གཉིས་པ་ལ། དབུ་མའི་ལུགས་ཀྱི་བསླབ་བྱ་དང་། སེམས་ཙམ་ལུགས་ཀྱི་བསླབ་བྱ་གཉིས། དང་པོ་ནི། ནམ་མཁའི་སྙིང་པོའི་མདོ་ནས་བཤད་པ་ལྟར་རྩ་བའི་ལྟུང་བ་བཅུ་བཞི་ཡོད་ཀྱང་། བསྡུ་ན་ཐབས་ལ་མཁས་པའི་མདོ་ལས་བཤད་པ་ལྟར་བཞིར་འདུ་སྟེ། བསླབ་བཏུས་ལས། བྱང་ཆུབ་སེམས་ནི་ཡོངས་འདོར་དང་། །ཆགས་དང་སེར་སྣ་མི་ཟད་པས། །སློང་ལ་སྦྱིན་པར་མི་བྱེད་དང་། །སྒྲིམས་ཏེ་དགའ་བར་བྱེད་པ་ན། །སེམས་ཅན་ལ་ནི་མི་བཟོད་པར། །ཁྲོས་པས་སེམས་ཅན་རྡེག་པ་དང་། །ཉོན་མོངས་པ་དང་གཞན་མཐུན་པས། །ཆོས་ལྟར་བཅོས་པ་སྟོན་པ་པོ། །ཞེས་སོ། །གཉིས་པ་ནི། སྡོམ་པ་ཉི་ཤུ་པ་ལས། རྙེད་དང་བཀུར་སྟིར་ཆགས་པ་ཡིས། །བདག་བསྟོད་གཞན་ལ་སྨད་པ་དང་། །སྡུག་བསྔལ་མགོན་མེད་གྱུར་པ་ལ། །སེར་སྣས་ཆོས་ནོར་མི་སྟེར་དང་། །གཞན་གྱིས་བཤད་ཀྱང་མི་ཉན་པར། །ཁྲོས་པས་གཞན་ལ་འཚོག་པ་དང་། །ཐེག་པ་ཆེན་པོ་སྤོང་བྱེད་ཅིང་། །དམ་ཆོས་འདྲ་སྣང་སྟོན་པའོ། །ཞེས་པ་ལྟར་རྩ་ལྟུང་བཞི་དང་ཡན་ལག་གི་ལྟུང་བ་ཞེ་ལྔ་སྤོང་བ་ལ་བསླབ་བོ། །གསུམ་པ་ནི། ཀུན་དཀྲིས་ཆེན་པོས་སྤྱད་པའི་རྩ་ལྟུང་འཇུག་སྡོམ་གྱི་གཏོང་རྒྱུ་དང་། གཞན་དོན་དུ་བྱང་ཆུབ་དོན་གཉེར་གྱི་སེམས་འདོར་བ་ཐེག་ཆེན་སེམས་བསྐྱེད་མཐའ་དག་གི་གཏོང་རྒྱུ་ཡིན་ཏེ། སྡུད་པ་ལས། གལ་ཏེ་བསྐལ་པ་བྱེ་བར་དགེ་བའི་ལས་ལམ་བཅུ། །སྤྱོད་ཀྱང་དགྲ་བཅོམ་རང་རྒྱལ་ཉིད་དུ་འདོད་བསྐྱེད་ན། །དེ་ཚེ་ཚུལ་ཁྲིམས་སྐྱོན་བྱུང་ཚུལ་ཁྲིམས་ཉམས་པ་ཡིན། །སེམས་བསྐྱེད་དེ་ནི་ཕས་ཕམ་པས་ཀྱང་ཤིན་ཏུ་ལྕི། །ཞེས་དང་། སྤྱོད་འཇུག་ལས། དེ་ནི་བྱང་ཆུབ་སེམས་དཔའ་ལ། །ལྟུང་བའི་ནང་ནས་ལྕི་བ་སྟེ། །འདི་ལྟར་དེ་ནི་བྱུང་གྱུར་ན། །སེམས་ཅན་ཀུན་གྱི་དོན་ལ་དམན། །ཞེས་དང་། བྱང་ས་ལས། མདོར་བསྡུ་ན་རྒྱུ་གཉིས་ཁོ་ནས་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་བླངས་པ་བཏང་བར་འགྱུར་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་པ་ཡོངས་སུ་བཏང་བ་དང་། ཕམ་པའི་གནས་ལྟ་བུའི་ཆོས་ཀྱི་ཀུན་ནས་དཀྲིས་པ་ཆེན་པོ་ཀུན་ཏུ་སྤྱོད་པའོ། །ཞེས་སོ། །ཀུན་དཀྲིས་ཆེ་འབྲིང་ཆུང་ངུའི་ཁྱད་པར་ནི། རྩ་བའི་ལྟུང་བ་རྒྱུན་དུ་སྤྱོད་པ་དང་། ངོ་ཚ་ཁྲེལ་ཡོད་ཤས་ཆུང་ཞིང་དེ་ལ་དགའ་སྤྲོ་བྱེད་པ་དང་། དེ་ཉིད་ལ་ཡོན་ཏན་ཅན་དུ་ལྟ་བ་སྟེ། ཡན་ལག་གསུམ་ལྡན་ཆེན་པོ། གཉིས་ལྡན་འབྲིང་། གཅིག་ལྡན་ཆུང་ངུ་ཡིན་ནོ། །

གསུམ་པ་ལ། གནས་སྐབས་དང་། མཐར་ཐུག་གི་ཕན་ཡོན་གཉིས། དང་པོ་ནི། སྤྱོད་འཇུག་ལས། སྡིག་པ་ཤིན་ཏུ་མི་བཟད་བྱས་ན་ཡང་། །དཔའ་ལ་བརྟེན་ནས་འཇིགས་པ་ཆེན་པོ་ལྟར། །གང་ལ་བརྟེན་ནས་ཡུད་ཀྱིས་སྒྲོལ་འགྱུར་བ། །དེ་ལ་བག་ཅན་རྣམས་ཀྱིས་ཅིས་མི་བརྟེན། །ཞེས་དང་། དཔལ་སྦྱིན་གྱིས་ཞུས་པའི་མདོ་ལས། བྱང་ཆུབ་སེམས་ཀྱི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་ནས། །དེ་ནི་དེ་བས་ལྷག་པར་འགྱུར། །ཞེས་སོ། །གཉིས་པ་ནི། རྣམ་སྣང་མངོན་བྱང་ལས། རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་ནི་བྱང་ཆུབ་ཀྱི་སེམས་ཀྱི་རྒྱུ་ལས་བྱུང་བ་སྙིང་རྗེའི་རྩ་བ་ཅན་ཐབས་ཀྱི་མཐར་ཕྱིན་པ་ཡིན་ནོ། །ཞེས་སོ། །

ངག་དོན་ནི། རྗེ་བཙུན་བྱམས་མགོན་ཆོས་ཅན། ཁྱོད་ཀྱིས་ཐེག་ཆེན་སེམས་བསྐྱེད་བཤད་པ་ཡིན་ཏེ། ངོ་བོ། དམིགས་ཡུལ། དབྱེ་བ་གསུམ་གྱི་སྒོ་ནས་བཤད་པའི་ཕྱིར།

གཉིས་པ་ལ། སྒྲུབ་པའི་ཐབས་སྟོན་པའི་རྒྱུ་གདམས་ངག །ཐོབ་བྱ་སྒྲུབ་པའི་འབྲས་བུ་ངེས་འབྱེད་ཆ་མཐུན། འཇུག་བྱ་སྒྲུབ་པའི་ཡན་ལག་གི་ཆོས་དང་གསུམ། དང་པོ་ལ། སྤྱིར་བསྟན་པ་དང་། གདམས་ངག་གི་ཡུལ་སོ་སོར་བཤད་པ་གཉིས། དང་པོ་ནི། དབྱེ་བ་ཞར་ལ་བརྗོད། ཅེས་པའི་སྐབས་སུ་གཉིས་ཀྱི། དང་པོ་གདམས་ངག་ལ། གང་ལ་ཉན་པའི་ཡུལ། གང་གིས་ཉན་པའི་གང་ཟག །ནམ་གྱི་ཚེ་ཉན་པའི་དུས། གང་ལ་བརྟེན་ནས་ཉན་པའི་རྒྱུ། ཉན་བྱ་གདམས་ངག་གི་རང་བཞིན་དང་ལྔ། དང་པོ་ནི། སར་གནས་ཀྱི་བྱང་ཆུབ་སེམས་དཔས་ནི་ལོངས་སྐུ་དང་། སོ་སྐྱེས་ལས་དག་པ་དང་། ཐེག་དམན་གྱིས་སྤྲུལ་སྐུ་ལ་ཉན་ཅིང་། ད་ལྟར་གྱི་སྐྱེས་བུ་ཐུན་མོང་བ་རྣམས་ནི་ཁྱད་ཆོས་གསུམ་ལྡན་གྱི་དགེ་བཤེས་ལས་སོ། །འོན་ཀྱང་རྒྱུད་དག་པའི་གདུལ་བྱ་འགའ་ཞིག་ནི་ནམ་མཁའ་དང་ལྗོན་ཤིང་སོགས་ལས་བྱུང་བའི་ཆོས་ཀྱི་སྒྲས་རྒྱུད་སྨིན་པའང་ཡོད་དོ། །

གཉིས་པ་ནི། གདམས་ངག་ལ་དོན་གཉེར་གྱི་འདུན་པ། དེའི་དོན་རྟོགས་པའི་ཤེས་རབ། ང་རྒྱལ་མེད་པའི་གུས་པ་གསུམ་དང་ལྡན་པའི་སྐྱེས་བུ་སྟེ། ས་མཚམས་ལམ་མ་ཞུགས་ནས་རྒྱུན་མཐའི་སྔ་ལོགས་ཀྱི་བར་རོ། །

གསུམ་པ་ནི། གདམས་ངག་ལ་དོན་གཉེར་གྱི་འདུན་པ་དང་ལྡན་ཞིང་། སྤངས་རྟོགས་མཐར་མ་ཐུག་གི་གནས་སྐབས་སུའོ། །

བཞི་པ་ནི། རིགས་སད་པ་ལས་བྱུང་བའི་གདམས་ངག་དོན་གཉེར་གྱི་འདུན་པ་སྤྱིའི་རྒྱུ་དང་། ཆོས་རྒྱུན་གྱི་ཏིང་ངེ་འཛིན་ཐོབ་པ་རྟེན་ཁྱད་པར་ཅན་གྱི་གདམས་ངག་ཁྱད་པར་ཅན་ཉན་པའི་རྒྱུའོ། །རྒྱན་ལས། དེ་ཚེ་ཆོས་ཀྱི་རྒྱུན་ལ་ནི། །སངས་རྒྱས་རྣམས་ལ་ཞི་གནས་དང་། །ཡེ་ཤེས་ཡངས་པ་འཐོབ་བྱའི་ཕྱིར། །གདམས་ངག་རྒྱ་ཆེན་རྙེད་པར་འགྱུར། །ཞེས་སོ། །ཆོས་རྒྱུན་གྱི་ཏིང་ངེ་འཛིན་ནི། བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས་གསུང་རབ་མང་པོའི་ཚིག་དོན་འཛིན་ནུས་ཀྱི་དྲན་པ་ཤེས་རབ་མཚུངས་ལྡན་དང་བཅས་པ་སྟེ། ཚོགས་ལམ་ནས་ཀྱང་ཡོད་པར་འགྲེལ་ཆེན་དུ་བཤད་དོ། །

ལྔ་པ་ལ། མཚན་གཞི། མཚན་ཉིད། དབྱེ་བ། གྲངས་ངེས། གོ་རིམ་དང་ལྔ། དང་པོ་ནི། གདམས་ངག་ཡིན་ན་ངག་ཡིན་དགོས་ཏེ། ཇོ་བོ་རྗེས། གདམས་ངག་རྣམ་པ་བཅུ་ཡིན་ཏེ། །ངོ་བོ་ངག་གི་འཁོར་ལོར་བཞེད། །ཚོགས་ལ་གསུམ་དང་སྦྱོར་ལ་ལྔ། །མཐོང་སྒོམ་ལམ་ལ་རེ་རེའོ། །ཞེས་གསུངས་པའི་ཕྱིར། གཉིས་པ་ནི། རང་གི་གདམ་བྱའི་དོན་གཙོ་བོར་སྟོན་པའི་ལུང་གི་ཆོས། གསུམ་པ་ལ། བརྗོད་བྱ། དགོས་པ། ཡུལ་གྱི་སྒོ་ནས་དབྱེ་བ་དང་གསུམ། དང་པོ་ལ། མངོན་མཐོའི་དང་། ངེས་ལེགས་ཀྱི་གདམས་ངག་གཉིས། དང་པོའི་མཚན་ཉིད། གཙོ་བོར་མངོན་མཐོ་སྒྲུབ་པའི་ཐབས་སྟོན་པའི་ལུང་གི་ཆོས། མཚན་གཞི། འཁོར་བའི་ཕུན་ཚོགས་གཙོ་བོར་སྒྲུབ་པའི་ཕྱིར་དུ་དགེ་བ་བཅུའི་ལས་ལམ་སྟོན་པའི་བསྟན་བཅོས་ལྟ་བུའོ། །གཉིས་པའི་མཚན་ཉིད། བྱང་ཆུབ་སྒྲུབ་པའི་ཐབས་གཙོ་བོར་སྟོན་པའི་ལུང་གི་ཆོས། དབྱེ་ན། ཐེག་པ་ཆེ་ཆུང་གི་གདམས་ངག་གཉིས། དང་པོའི་མཚན་ཉིད། རྫོགས་པའི་བྱང་ཆུབ་སྒྲུབ་པའི་ཐབས་གཙོ་བོར་སྟོན་པའི་ལུང་གི་ཆོས། གཉིས་པའི་མཚན་ཉིད། ཐེག་དམན་གྱི་བྱང་ཆུབ་སྒྲུབ་པའི་ཐབས་གཙོ་བོར་སྟོན་པའི་ལུང་གི་ཆོས། གཉིས་པ་ལ། གདམས་པའི་དང་། རྗེས་བསྟན་གྱི་གདམས་ངག་གཉིས། འདི་དག་ལ་བཤད་ཚུལ་སྤྱིར་བསྟན་པ་དང་། འགལ་མི་འགལ་ལ་དཔྱད་པ་གཉིས། དང་པོ་ལ། འགྲེལ་ཆེན་གཉིས་ལྟར་ན། ཐོབ་ཟིན་གྱི་ཡོན་ཏན་མི་ཉམས་པར་འཕེལ་བའི་ཕྱིར་དུ་འདོམས་པའི་གདམས་ངག་ནི་དང་པོའོ། །དེའི་རྗེས་སུ་སྔར་མ་ཐོབ་པའི་ཡོན་ཏན་གསར་དུ་ཐོབ་ཕྱིར་དུ་འདོམས་པ་ནི་གདམས་ངག་གཉིས་པར་བཞེད་དེ། ཉི་ཁྲི་སྣང་བ་ལས། ཡང་དག་པར་ཐོབ་པའི་ཡོན་ཏན་ཡོངས་སུ་བསྐྱང་བར་བྱ་བའི་ཕྱིར་ཡོངས་སུ་མི་ཉམས་པ་ཉེ་བར་བཟུང་ནས་གདམས་པ་ཡིན་པས་དེའི་རྗེས་སུ་ལམ་ཐོབ་པའི་ཡོན་ཏན་ཐོབ་པ་ཡིན་པའི་ཕྱིར་རྗེས་སུ་གདམས་པ་ཡིན་ནོ། །ཞེས་གསུངས་པའི་ཕྱིར། བརྒྱད་སྟོང་འགྲེལ་ཆེན་ལས་ཀྱང་དེ་དང་མཐུན་པར་གསུངས། དོན་གསལ་འདིར་གོ་རིམ་དེ་ལས་བཟློག་ནས་བསྟན་ཏེ། བྱང་ཆུབ་ཀྱི་སེམས་བསྐྱེད་པ་དང་། དེས་འཕངས་པའི་ཆོས་འགྲུབ་པར་བྱ་བའི་ཕྱིར། ཡོན་ཏན་ཐོབ་པ་ཡོངས་སུ་བསྲུང་བའི་དོན་གྱིས་མངོན་པར་འཕེལ་བར་བྱ་བའི་ཕྱིར་འདོམས་པ་ནི་གདམས་ངག་སྟེ། ཞེས་གསུངས་པའི་ཕྱིར། དེ་ཡང་བྱང་ཆུབ་ཀྱི་སེམས་བསྐྱེད་པ་དང་། དེས་འཕངས་པའི་ཆོས་འགྲུབ་པར་བྱ་བའི་ཕྱིར་འདོམས་པ་ནི་གདམས་ངག་སྟེ། ཞེས་པས་དང་པོ་བསྟན། ཡོན་ཏན་ཐོབ་པ། ཞེས་སོགས་ཀྱིས་གཉིས་པ་བསྟན་པ་ཡིན་ནོ། །དེས་ན། སྔར་མ་ཐོབ་པའི་ཡོན་ཏན་འབའ་ཞིག་ཐོབ་ཕྱིར་དུ་གཙོ་བོར་འདོམས་པའི་གདམས་ངག །དང་པོའི་མཚན་ཉིད། མཚན་གཞི། མངོན་རྟོགས་རྒྱན་གྱི་ཚིག་དོན་མི་ཤེས་པའི་གང་ཟག་ལ་རྒྱན་བཤད་པའི་ཚེ་རྒྱན་ལྟ་བུའོ། །ཐོབ་ཟིན་གྱི་ཡོན་ཏན་མི་ཉམས་ཤིང་འཕེལ་བར་འདོམས་པའི་གདམས་ངག །གཉིས་པའི་མཚན་ཉིད། མཚན་གཞི། རྒྱན་གྱི་ཚིག་དོན་རགས་པ་ཤེས་པའི་གང་ཟག་ལ་རྒྱན་བཤད་པའི་ཚེ་རྒྱན་ལྟ་བུའོ། །འདི་དག་ནི་ཊཱི་ཀ་ལས་བཤད་པའི་ཚུལ་ཡིན་ལ། མཁས་པ་བུ་ན་རེ། དོན་གསལ་ལས། བྱང་ཆུབ་ཀྱི་སེམས་བསྐྱེད་པ་དང་། ཞེས་སོགས་གཞུང་སྔ་མས་རྗེས་བསྟན་དང་། དེས་འཕངས་པའི་ཆོས་འགྲུབ་པར་བྱ་བའི་ཕྱིར། ཞེས་སོགས་ཀྱིས་གདམས་པའི་གདམས་ངག་བསྟན་པས་འགྲེལ་ཆེན་གཉིས་དང་མཐུན་པར་འཆད་པ་ནི་མཁས་པའི་ལེགས་བཤད་དོ། །གཉིས་པ་ནི། དེ་གཉིས་སྤྱིར་མི་འགལ་ཏེ། རྒྱུད་སོ་སོ་ལ་ལྟོས་ནས་དེ་གཉིས་ཀྱི་གཞི་མཐུན་ཡོད་པའི་ཕྱིར། གང་ཟག་གཅིག་ལ་ལྟོས་ན་འགལ་ཏེ། དེ་ལ་ལྟོས་ཏེ་དེ་གཉིས་ཀྱི་གཞི་མཐུན་མེད་པའི་ཕྱིར། གསུམ་པ་ནི། སྒྲུབ་པ་རང་གི་ངོ་བོ་ལ་འདོམས་པའི་གདམས་ངག་སོགས་བཅུ། བཞི་པ་ནི། ཐེག་ཆེན་གྱི་གདམས་ངག་ལ་འདིར་བསྟན་གྱི་གདམས་ངག་བཅུར་གྲངས་ངེས། བཅུ་པོ་འདིས་ཐེག་ཆེན་སྐྱེས་བུའི་བཞེད་དོན་ཕུན་སུམ་ཚོགས་པ་སྒྲུབ་ནུས་ཏེ། འདི་ཙམ་ཁོ་ནས་དོན་ཐམས་ཅད་ཕུན་སུམ་ཚོགས་པར་འགྱུར་བས་གདམས་ངག་ནི་རྣམ་པ་བཅུའོ། །ཞེས་གསུངས་པའི་ཕྱིར། ལྔ་པ་ནི། བྱང་ཆུབ་མཆོག་ཏུ་སེམས་བསྐྱེད་པའི་གང་ཟག་གིས། དེ་བཞིན་གཤེགས་པ་ལ་ཐེག་ཆེན་གྱི་གདམས་ངག་ཉན་ནས་ཐབས་ཁྱད་པར་ཅན་གྱིས་བསྒྲུབས་པས། དམིགས་ཡུལ་བདེན་པ་བཞི་ལ་དམིགས། རྟེན་དཀོན་མཆོག་གསུམ་ལ་བརྟེན་ཏེ། བརྩོན་འགྲུས་རྣམ་པ་གསུམ་གྱིས། བྱ་བ་ངན་པ་ལ་ཞེན་པ། སྒྱིད་ལུག་པ། སེམས་ཞུམ་པའི་ལེ་ལོ་གསུམ་བཅོམ་ནས། གནས་སྐབས་ཀྱི་འབྲས་བུ་ཁྱད་པར་ཅན་སྤྱན་དང་མངོན་ཤེས་མངོན་དུ་བྱས་ཏེ། མཐར་ཐུག་གི་འབྲས་བུ་མཐོང་སྒོམ་གྱི་སྒྲིབ་པ་མཐའ་དག་ལས་གྲོལ་བའི་རྣམ་མཁྱེན་མངོན་དུ་བྱེད་པ་ནི། འདིར་བསྟན་གྱི་གདམས་ངག་བཅུ་ཉམས་སུ་ལེན་པའི་རིམ་པ་ཡིན་ནོ། །ངག་དོན་ནི། ཐེག་ཆེན་སེམས་བསྐྱེད་ཀྱི་འོག་ཏུ་གདམས་ངག་བཤད་པ་ཆོས་ཅན། དགོས་པ་ཡོད་དེ། བྱང་ཆུབ་མཆོག་ཏུ་སེམས་བསྐྱེད་པའི་གང་ཟག་གིས། ཡུལ་དེ་བཞིན་གཤེགས་པ་ལ་གདམས་ངག་ཉན་ནས་ཉམས་སུ་ལེན་དགོས་པར་ཤེས་པའི་ཆེད་ཡོད་པའི་ཕྱིར།

གཉིས་པ་ལ། སྒྲུབ་པ་རང་གི་ངོ་བོ། དམིགས་ཡུལ་བདེན་པ་བཞི། རྟེན་དཀོན་མཆོག་གསུམ། དེའི་ཡོན་ཏན་སྤྱན་དང་མངོན་ཤེས་བཤད་པ་དང་བཞི། དང་པོ་ནི། སྒྲུབ་དང་བདེན་པ་རྣམས་དང་ནི། ཞེས་སོགས་ཀྱི་སྐབས་སུ་གཉིས་ཀྱི། དང་པོ་ལ། ཡུལ་ཅན་སྒྲུབ་པ་རང་གི་ངོ་བོ་ལ་འདོམས་པའི་གདམས་ངག་དང་། ཡུལ་བདེན་གཉིས་བཤད་པ་གཉིས། དང་པོ་ལ། མཚན་ཉིད། དབྱེ་བ། གཞུང་གིས་བསྟན་ཚུལ་དང་གསུམ། དང་པོ་ནི། སྒྲུབ་པ་རང་གི་ངོ་བོ་ཕྱིན་ཅི་མ་ལོག་པར་སྟོན་པའི་ལུང་གི་དམ་ཆོས། དབྱེ་ན་ཐེག་པ་ཆེ་ཆུང་གི་དེ་གཉིས། མཚན་ཉིད་རིམ་བཞིན། ཡུལ་བདེན་པ་གཉིས་ལས་མི་འདའ་བར་ཡུལ་ཅན་ཐབས་ཤེས་ཟུང་འབྲེལ་གྱི་སྒོ་ནས་ཐེག་ཆེན་གྱི་སྒྲུབ་པ་ཉམས་སུ་ལེན་ཚུལ་སྟོན་པའི་ཐེག་ཆེན་གྱི་ལུང་གི་དམ་ཆོས། ཐེག་དམན་རང་ལུགས་ཀྱི་ཐབས་ཤེས་གཉིས་དང་ལྡན་པའི་སྒོ་ནས། ཐེག་དམན་གྱི་སྒྲུབ་པ་ཉམས་སུ་ལེན་ཚུལ་སྟོན་པའི་ཐེག་དམན་གྱི་ལུང་གི་དམ་ཆོས། མཚན་གཞི་རིམ་བཞིན། ཐེག་པ་ཆེ་ཆུང་གང་ཡིན་གྱི་སློབ་ལམ་བཞིར་ཉམས་སུ་ལེན་ཚུལ་སྟོན་པའི་བཀའ་དང་བསྟན་བཅོས་ལྟ་བུ། གསུམ་པ་ནི། སྒྲུབ་དང་། ཞེས་སོགས་ཀྱིས་རྩ་བའི་དངོས་བསྟན་གྱི་གདམས་ངག་ལ་བཀས་ཁྱབ་སྟེ། མངོན་རྟོགས་རྒྱན་ཤེར་ཕྱིན་གྱི་མདོའི་དངོས་ཀྱི་དགོངས་འགྲེལ་ཡིན་པའི་ཕྱིར། བྱང་ཆུབ་ཀྱི་སེམས་ཀྱི་རབ་ཏུ་དབྱེ་བ་ཞེས་སོགས་འགྲེལ་པའི་དངོས་བསྟན་ལ་བསྟན་བཅོས་ཡོད་དེ། དོན་གསལ་ནི་ཤེར་ཕྱིན་གྱི་མདོ་དང་རྒྱན་གཉིས་ཀའི་དངོས་ཀྱི་རྣམ་བཤད་ཡིན་པའི་ཕྱིར། གཉིས་པ་ལ། དབྱེ་གཞི། དབྱེ་ངོ་། ཕྱེ་བའི་དོན། རང་བཞིན། གཏན་ལ་འབེབ་དགོས་པའི་རྒྱུ་མཚན་དང་ལྔ། དང་པོ་ནི། ཤེས་བྱ། རྟེན་འབྲེལ། བདེན་པ་ཙམ་དབྱེ་གཞིའོ། །གཉིས་པ་ལ་སྣང་བ་ཀུན་རྫོབ་ཀྱི་བདེན་པ་དང་། གནས་ལུགས་དོན་དམ་པའི་བདེན་པ་གཉིས་ཏེ། ཡབ་སྲས་མཇལ་བའི་མདོ་ལས། འཇིག་རྟེན་མཁྱེན་པས་གཞན་ལ་མ་གསན་པར། །བདེན་པ་འདི་གཉིས་ཀྱིས་ནི་སྟོན་པར་མཛད། །གང་ཞིག་ཀུན་རྫོབ་དེ་བཞིན་དོན་དམ་སྟེ། །བདེན་པ་གསུམ་པ་ནམ་ཡང་ཡོད་མ་མཆིས། །ཞེས་དང་། རྩ་ཤེས་ལས། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་ལ་ཡང་དག་བརྟེན། །འཇིག་རྟེན་ཀུན་རྫོབ་བདེན་པ་དང་། །དམ་པའི་དོན་གྱི་བདེན་པའོ། །ཞེས་སོ། །གསུམ་པ་ནི། བདེན་པ་གཉིས་པོ་དེ་ངོ་བོ་གཅིག་ལ་ལྡོག་པ་ཐ་དད་ཡིན་ཏེ། ཀུན་རྫོབ་ལས་ངོ་བོ་ཐ་དད་དུ་གྱུར་བའི་དོན་དམ་བདེན་པ་རིགས་པས་དཔྱད་ན་མི་རྙེད་པའི་ཕྱིར་དང་། བློས་མཐོང་ཚུལ་ཐ་དད་དུ་མེད་པའི་ཕྱིར། བྱང་ཆུབ་སེམས་འགྲེལ་ལས། ཀུན་རྫོབ་ལས་ནི་ཐ་དད་པར། །དེ་ཉིད་དམིགས་པ་མ་ཡིན་ཏེ། །ཀུན་རྫོབ་སྟོང་པ་ཉིད་དུ་བཤད། །སྟོང་ཉིད་ཁོ་ན་ཀུན་རྫོབ་ཡིན། །མེད་ན་མི་འབྱུང་ངེས་པའི་ཕྱིར། །བྱས་དང་མི་རྟག་ཇི་བཞིན་ནོ། །ཞེས་སོ། །གནས་ཚུལ་སེམས་པའི་རིགས་ངོར། བདེན་གཉིས་གཅིག་དང་ཐ་དད་གང་རུང་དུ་དཔྱད་པར་བྱ་བ་མ་ཡིན་ཏེ། དེ་དག་ལ་སྐྱོན་བཞི་བཞི་ཡོད་པར་དགོངས་འགྲེལ་དུ་བཤད་པའི་ཕྱིར། དང་པོ་ལ་སྐྱོན་བཞི་ནི། ཀུན་རྫོབ་མཐོང་བས་གཙོ་བོར་དོན་དམ་བདེན་པ་མཐོང་བར་འགྱུར་བ་དང་། ཀུན་རྫོབ་ལ་དམིགས་ནས་ཀུན་ནས་ཉོན་མོངས་འཕེལ་བ་ལྟར། དོན་དམ་ལ་དམིགས་ནས་ཀྱང་དེ་འཕེལ་བར་ཐལ་བ་དང་། ཀུན་རྫོབ་ལས་ལོགས་སུ་དོན་དམ་བཙལ་དུ་མེད་པར་ཐལ་བ་དང་། ཀུན་རྫོབ་བདེན་པ་སྤྲོས་པ་སྣ་ཚོགས་དང་བཅས་པ་བཞིན་དུ་དོན་དམ་ཡང་དེར་འགྱུར་རོ། །ཐ་དད་པའི་སྐྱོན་བཞི་ནི། དོན་དམ་སྣང་བའི་ཆོས་ཉིད་མ་ཡིན་པར་ཐལ་བ་དང་། དོན་དམ་རྟོགས་པས་སྣང་བ་ལ་བདེན་ཞེན་གྱི་སྒྲོ་འདོགས་མི་ཆོད་པར་ཐལ་བ་དང་། ཀུན་རྫོབ་རིགས་པས་མ་རྙེད་པའི་དེ་ཁོ་ན་ཉིད་དོན་དམ་མ་ཡིན་པར་ཐལ་བ་དང་། ཀུན་ནས་ཉོན་མོངས་དང་རྣམ་བྱང་གཅིག་ཏུ་ཐལ་བའོ། །དེའི་དོན་ཡང་། བདེན་གཉིས་ངོ་བོ་ཐ་དད་དུ་རིགས་པས་དཔྱད་པའི་ཚེ་གྲུབ་ན། དོན་དམ་རྟོགས་ཀྱང་ཀུན་རྫོབ་ལ་སྒྲོ་འདོགས་མ་ཆོད་པས་ཀུན་ནས་ཉོན་མོངས་པ་འཕེལ་བ་དང་། དོན་དམ་ལ་དམིགས་ནས་རྣམ་བྱང་འཕེལ་བ་དུས་གཅིག་ཏུ་ཐལ་བའོ། །དགོངས་འགྲེལ་ལས། འདུ་བྱེད་ཁམས་དང་དོན་དམ་མཚན་ཉིད་དེ། །གཅིག་དང་ཐ་དད་བྲལ་བའི་མཚན་ཉིད་ཅན། །གཅིག་དང་ཐ་དད་ཉིད་དུ་གང་སེམས་པ། །དེ་དག་ཚུལ་མིན་ཡིད་བྱེད་ཞུགས་པ་ཡིན། །ཞེས་སོ། །བཞི་པ་ལ། མཚན་ཉིད། སྒྲ་བཤད། དབྱེ་བ། བདེན་གཉིས་ངེས་བྱེད་ཀྱི་ཚད་མ་བཤད་པ་དང་བཞི། དང་པོ་ལ། བྱེ་བྲག་ཏུ་སྨྲ་བ། མདོ་སྡེ་བ། སེམས་ཙམ་པ། དབུ་མ་བའི་འདོད་ཚུལ་ལོ། །དང་པོ་ནི། བཅོམ་པའམ་བཤིག་པ་ན་རང་འཛིན་གྱི་བློ་འདོར་བའི་ཆོས། ཀུན་རྫོབ་ཀྱི་མཚན་ཉིད། དེ་ལ་བཅོམ་པ་ན། རང་འཛིན་བློ་འདོར་བ་དང་། བློས་རྣམ་པར་བཤིག་པ་ན་རང་འཛིན་བློ་འདོར་བ་རྣམ་པ་གཉིས། དང་པོ་ནི། བུམ་པ་ལྟ་བུ། གཉིས་པ་ནི། བུམ་ནང་གི་ཆུ་ལྟ་བུའོ། །བཅོམ་པའི་བློས་བཤིག་པ་ན་རང་འཛིན་གྱི་བློ་མི་འདོར་བ། དོན་དམ་གྱི་མཚན་ཉིད། མཚན་གཞི་རྡུལ་ཕྲན་དང་། ཤེས་པ་ལྟ་བུའོ། །མཛོད་ལས། གང་ལ་བཅོམ་དང་བློ་ཡིས་གཞན། །བསལ་ན་དེ་བློ་མི་འཇུག་པ། །བུམ་ཆུ་བཞིན་དུ་ཀུན་རྫོབ་ཏུ། །ཡོད་དེ་དོན་དམ་ཡོད་གཞན་ནོ། །ཞེས་སོ། །གཉིས་པ་ནི། རྟོག་པས་སྒྲོ་བཏགས་པའི་དོན་བྱེད་མི་ནུས་པའི་ཆོས་དང་། རང་གི་མཚན་ཉིད་ཀྱིས་གྲུབ་པའི་དོན་བྱེད་ནུས་པ་མཚན་ཉིད་དུ་འདོད་ཅིང་། སྤྱི་མཚན་དང་ཀུན་རྫོབ་བདེན་པ་དོན་གཅིག །རང་མཚན་དོན་དམ་བདེན་པ་དངོས་པོ་རྣམས་དོན་གཅིག་ཏུ་འདོད་དེ། རྣམ་འགྲེལ་ལས། དོན་དམ་དོན་བྱེད་ནུས་པ་གང་། །དེ་འདིར་དོན་དམ་ཡོད་པ་ཡིན། །གཞན་ནི་ཀུན་རྫོབ་ཡོད་པ་སྟེ། །དེ་དག་རང་སྤྱིའི་མཚན་ཉིད་བཤད། །ཅེས་སོ། །གསུམ་པ་ནི། རྟོག་པས་སྒྲོ་བཏགས་པ་དང་། གཞན་དབང་གང་རུང་གིས་བསྡུས་པའི་ཆོས་དང་། རིགས་པས་དཔྱད་བཟོད་དུ་གྲུབ་པའི་དེ་ཁོ་ན་ཉིད་རིམ་བཞིན་མཚན་ཉིད་དང་། ཀུན་བཏགས་དང་གཞན་དབང་དང་པོའི་མཚན་གཞི། ཡོངས་གྲུབ་གཉིས་པའི་མཚན་གཞིར་འདོད་དེ། བཞི་པ་ལ། སྤྱིར་བསྟན་པ་དང་། མཚན་ཉིད་བསྡུས་ཏེ་བསྟན་པ་གཉིས། དང་པོ་ནི། ཞི་བ་ལྷས་འཇིག་རྟེན་པའི་བློའི་ཡུལ་དུ་གྱུར་བའི་སྣང་ཙམ་གྱི་ཆོས་ཀུན་རྫོབ་དང་། དེ་ལས་འདས་པའི་དེ་ཁོ་ན་ཉིད་དོན་དམ་བདེན་པར་བཞེད་དེ། སྤྱོད་འཇུག་ལས། ཀུན་རྫོབ་དང་ནི་དོན་དམ་སྟེ། །འདི་ནི་བདེན་པ་གཉིས་སུ་འདོད། །དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་བརྗོད། །ཅེས་སོ། །ཟླ་གྲགས། མཐོང་བ་ཡང་དག་པ་འཕགས་པའི་མཉམ་བཞག་ཡེ་ཤེས་ཀྱི་འཛིན་སྟངས་ཀྱི་ཡུལ་ལ་དོན་དམ་དང་། མཐོང་བ་རྫུན་པ་འཇིག་རྟེན་པའི་བློའི་འཛིན་སྟངས་ཀྱི་ཡུལ་ལ་ཀུན་རྫོབ་བདེན་པར་བཞེད་དེ། འཇུག་པར། དངོས་ཀུན་ཡང་དག་རྫུན་པ་མཐོང་བ་ཡིས། །དངོས་རྙེད་ངོ་བོ་གཉིས་ནི་འཛིན་པར་འགྱུར། །ཡང་དག་མཐོང་ཡུལ་གང་དེ་དེ་ཉིད་དེ། །མཐོང་བ་རྫུན་པ་ཀུན་རྫོབ་བདེན་པར་གསུངས། །ཞེས་སོ། །ཡེ་ཤེས་སྙིང་པོ་ནི། འཇིག་རྟེན་པའི་ཐ་སྙད་ཀྱི་ཡུལ་དུ་གྱུར་པའི་སྣང་ཙམ་གྱི་ཆོས་དང་། དེ་ལས་འདས་པའི་དེ་ཁོ་ན་ཉིད་ལ་བཞེད་དེ། མདོ་ལས། ཀུན་རྫོབ་བདེན་པ་གང་ཞེ་ན། འཇིག་རྟེན་གྱི་ཐ་སྙད་བཏགས་པ་དང་། ཡི་གེ་དང་། སྒྲ་དང་། བརྡས་བསྟན་པ་དག་གོ །དོན་དམ་པའི་བདེན་པ་ནི། གང་ལ་སེམས་ཀྱི་རྒྱུ་བ་ཡང་མེད་ན། ཡི་གེ་རྣམས་ལྟ་སྨོས་ཀྱང་ཅི་དགོས། ཞེས་གསུངས་པ་ལ་བརྟེན་ནས་བདེན་གཉིས་ཀྱི་རྣམ་གཞག་མཛད་པའི་ཕྱིར། གཉིས་པ་ནི། ཐ་སྙད་པའི་ཚད་མའི་ཡུལ་གྱི་གཙོ་བོར་གྱུར་བའི་སྣང་ཙམ་གྱི་ཆོས་དང་། རིགས་ཤེས་ཚད་མའི་ཡུལ་གྱི་གཙོ་བོར་གྱུར་བའི་དེ་ཁོ་ན་ཉིད་རིམ་བཞིན་ཀུན་རྫོབ་བདེན་པ་དང་། དོན་དམ་བདེན་པའི་མཚན་ཉིད་དུ་འཐད་དེ། དབུ་མ་བདེན་གཉིས་ལས། ཇི་ལྟར་སྣང་བ་འདི་ཁོ་ན། །ཀུན་རྫོབ་གཞན་ནི་ཅིག་ཤོས་ཡིན། །ཞེས་སོ། །གཉིས་པ་ལ། ཀུན་རྫོབ་བདེན་པའི་སྒྲ་བཤད་པ་དང་། དོན་དམ་བདེན་པའི་དེ་གཉིས། དང་པོ་ནི། ཀུན་རྫོབ་ནི་ཉོན་མོངས་ཅན་མ་ཡིན་པའི་མ་རིག་པས་བསྡུས་པའི་བདེན་འཛིན་ཡིན་ལ། དེས་བདེན་པར་བཟུང་བའི་དོན་གྱིས་ན་དེ་སྐད་ཅེས་བྱ་སྟེ། འཇུག་པར། གཏི་མུག་རང་བཞིན་སྒྲིབ་ཕྱིར་ཀུན་རྫོབ་སྟེ། །དེས་གང་བཅོས་མ་བདེན་པར་སྣང་དེ་ནི། །ཀུན་རྫོབ་བདེན་ཞེས་ཐུབ་པ་དེས་གསུངས་ཏེ། །བཅོས་མར་གྱུར་པའི་དངོས་ནི་ཀུན་རྫོབ་ཏུའོ། །ཞེས་གསུངས་པའི་ཕྱིར་རོ། །གཉིས་པ་དོན་དམ་ནི། རྟགས་ལ་བརྟེན་པའི་རིག་ཤེས་རྗེས་དཔག་དང་། སྒོམ་བྱུང་གི་མཉམ་བཞག་ཡེ་ཤེས་ཡིན་ལ། དེའི་ཡུལ་དུ་གནས་པ་ལ་རིགས་པ་གཞན་གྱིས་གནོད་པ་མེད་པས་ན་དེ་སྐད་ཅེས་བྱའོ། །ཡང་ན་ཆོས་ཉིད་དེ་བཞིན་ཉིད་དོན་དམ་པ་དང་བདེན་པའི་གཞི་མཐུན་དུ་མཉམ་བཞག་གི་ངོར་སྣང་བས་ན་དེ་སྐད་ཅེས་བྱའོ། །ཚིག་གསལ་ལས། དོན་ཡང་དེ་ཡིན་ལ། དམ་པ་ཡང་དེ་ཡིན་པས་ན་དོན་དམ་པ་ཞེས་བྱའོ། །དེ་ཉིད་བདེན་པ་ཡིན་པས་ན་དོན་དམ་པའི་བདེན་པ་ཞེས་བྱའོ། །ཞེས་སོ། །གསུམ་པ་ལ། ཀུན་རྫོབ་དང་། དོན་དམ་པའི་དབྱེ་བ་གཉིས། དང་པོ་ལ། བཤད་ཚུལ་སྤྱིར་བསྟན་པ་དང་། མཚན་ཉིད་བསྡུས་ཏེ་བསྟན་པའོ། །དང་པོ་ལ། ཐལ་འགྱུར་བ་དང་། རང་རྒྱུད་པའི་བཞེད་ཚུལ་གཉིས། དང་པོ་ལ། ཡུལ་ཅན་ཡང་དག་པ་དང་། ལོག་པའི་ཀུན་རྫོབ་བདེན་པ་དང་། ཡུལ་ཡང་དག་པ་དང་། ལོག་པའི་ཀུན་རྫོབ་བདེན་པའོ། །དང་པོ་ནི། ཤེས་པ་རང་ལ་སྣང་བའི་དོན་སྣང་བ་ལྟར་གྲུབ་པ་ལ་ཐ་སྙད་པའི་ཚད་མས་གནོད་པ་མེད་པའི་མཐོང་བ་རྫུན་པའི་བློ། གཉིས་པ་ནི། ཤེས་པ་རང་ལ་སྣང་བའི་དོན་སྣང་བ་ལྟར་གྲུབ་པ་ལ་ཐ་སྙད་པའི་ཚད་མས་གནོད་པ་འབབ་པའི་མཐོང་བ་རྫུན་པའི་བློར་འདོད་དེ། འཇུག་པ་ལས། མཐོང་བ་རྫུན་པའང་རྣམ་པ་གཉིས་འདོད་དེ། །དབང་པོ་གསལ་དང་དབང་པོ་སྐྱོན་ལྡན་ནོ། །སྐྱོན་ལྡན་དབང་ཅན་རྣམས་ཀྱི་ཤེས་པ་ནི། །དབང་པོ་ལེགས་གྱུར་ཤེས་ལྟོས་ལོག་པར་འདོད། །ཅེས་སོ། །གསུམ་པ་དང་བཞི་པ་ནི། ཤེས་པ་དེ་གཉིས་ཀྱི་འཛིན་སྟངས་ཀྱི་ཡུལ་ལ་འདོད་དེ། འཇུག་པར། གནོད་པ་མེད་པའི་དབང་པོ་དྲུག་རྣམས་ཀྱིས། །བཟུང་བ་གང་ཞིག་འཇིག་རྟེན་གྱིས་རྟོགས་ཏེ། །འཇིག་རྟེན་ཉིད་ལས་བདེན་ཡིན་ལྷག་མ་ནི། །འཇིག་རྟེན་ཉིད་ལས་ལོག་པར་རྣམ་པར་བཞག །ཅེས་སོ། །གཉིས་པ་ནི། སྣང་ཞིང་སྣང་བ་ལྟར་དུ་གྲུབ་པ་ལ་ཚད་མས་གནོད་པ་མེད་པའི་ཀུན་རྫོབ་ནི་ཡང་དག་ཀུན་རྫོབ་ཡིན་ལ། སྣང་ཞིང་སྣང་བ་ལྟར་གྲུབ་པ་ལ་ཚད་མ་གཞན་གྱིས་གནོད་པ་འབབ་པའི་ཀུན་རྫོབ་ནི་ལོག་པའི་ཀུན་རྫོབ་ཏུ་བཞེད་དེ། བདེན་གཉིས་ལས། སྣང་དུ་འདྲ་ཡང་དོན་བྱེད་དག །ནུས་པའི་ཕྱིར་དང་མི་ནུས་ཕྱིར། །ཡང་དག་ཡང་དག་མ་ཡིན་པའི། །ཀུན་རྫོབ་ཀྱི་ནི་དབྱེ་བ་བྱས། །ཞེས་སོ། །གཉིས་པ་ནི། ཡང་ལོག་གཉིས་ཀྱི་ནང་ཚན་གང་ཞིག་ཐ་སྙད་དུ་མི་བསླུ་བའི་ཆོས་ཡང་དག་ཀུན་རྫོབ་ཀྱི་མཚན་ཉིད། དབྱེ་ན། ཡུལ་ཅན་དང་། ཡུལ་ཡང་དག་པའི་ཀུན་རྫོབ་གཉིས། དང་པོ་ནི། དབང་པོ་སྐྱོན་མེད་ལ་བརྟེན་ནས་གཟུགས་སོགས་འཇལ་བའི་ཤེས་པ་དང་། བདག་མེད་རྟོགས་པའི་ཤེས་རབ་ལྟ་བུ། གཉིས་པ་ནི། བློ་དེ་དག་གི་ཡུལ་དུ་གྱུར་པའི་རང་མཚན་ལྟ་བུའོ། །ཡང་ལོག་གཉིས་ཀྱི་ནང་ཚན་གང་ཞིག །ཐ་སྙད་དུའང་རྫུན་པ་བསླུ་བའི་ཆོས་ཅན་དུ་སྣང་བ་ལོག་པའི་ཀུན་རྫོབ་ཀྱི་མཚན་ཉིད། དབྱེ་ན། ཡུལ་ཅན་དང་ཡུལ་ལོག་པའི་ཀུན་རྫོབ་གཉིས། དང་པོ་ནི། དབང་པོ་སྐྱོན་ལྡན་གྱི་ཤེས་པ་དང་། གང་ཟག་གི་བདག་འཛིན་ལྟ་བུའོ། །གཉིས་པ་ནི། དབང་ཤེས་འཁྲུལ་པ་ལ་སྣང་བའི་ཆུ་ནང་གི་ཟླ་བའི་གཟུགས་བརྙན་དང་། བདག་འཛིན་རྟོག་པ་ལ་བདག་ཏུ་སྣང་བ་ལྟ་བུའོ། །བདེན་གཉིས་ལས། ཀུན་རྫོབ་རྣམ་པ་གཉིས་འདོད་དེ། །ལོག་པ་དང་ནི་ཡང་དག་གོ །དང་པོ་གཉིས་ཏེ་ཆུ་ཟླ་དང་། །གྲུབ་མཐའ་ངན་པའི་རྟོག་པའོ། །ཞེས་སོ། །གཉིས་པ་ལ། རྟེན་ཆོས་ཅན་གྱི་དང་། མིང་ཙམ་མཐུན་པའི་སྒོ་ནས་དབྱེ་བ་གཉིས། དང་པོ་ལ། རྒྱས་པར་ཕྱེ་ན། སྟོང་ཉིད་ཉི་ཤུ་དང་། བཅོ་བརྒྱད་དང་། བཅུ་དྲུག་ཏུ་ཡོད་ལ། འབྲིང་དུ་ན། དངོས་པོ་དང་། དངོས་པོ་མེད་པ་དང་། རང་གི་དང་། གཞན་གྱི་ངོ་བོ་སྟོང་པ་ཉིད་དང་བཞི། བསྡུ་ན། གང་ཟག་དང་ཆོས་ཀྱི་བདག་གིས་སྟོང་པའི་སྟོང་ཉིད་གཉིས་ཏེ། འཇུག་པར། བདག་མེད་འདི་ནི་འགྲོ་བ་རྣམ་གྲོལ་ཕྱིར། ཆོས་དང་གང་ཟག་དབྱེ་བས་རྣམ་གཉིས་གསུངས། །དེ་ལྟར་སྟོན་པས་སླར་ཡང་འདི་ཉིད་ནི། །གདུལ་བྱ་རྣམས་ལ་ཕྱེ་སྟེ་རྣམ་མང་གསུམ། །སྤྲོས་དང་བཅས་པར་སྟོང་པ་ཉིད། །བཅུ་དྲུག་བཤད་ནས་མདོར་བསྡུས་ཏེ། །སླར་ཡང་བཞིར་བཤད་དེ་དག་ནི། །ཐེག་ཆེན་དུ་ཡང་བཞེད་པ་ཡིན། །ཞེས་དང་། ནང་དང་ཕྱི་རོལ་རྣམས་དང་ནི། ཞེས་པ་ནས། སྟོང་པ་ཉིད་ནི་ཉི་ཤུར་འདོད། །ཅེས་སོ། །གཉིས་པ་ལ། རྣམ་གྲངས་པའི། རྣམ་གྲངས་པ་མ་ཡིན་པའི་དོན་དམ་བདེན་པ་གཉིས། དང་པོ་ནི། མྱུ་གུ་བདག་ལས་སྐྱེ་བ་མེད་པ་ལྟ་བུ། གཉིས་པ་ནི། ཆོས་ཅན་སོ་སོ་ལ་ཡོད་པའི་རང་བཞིན་རྣམ་དག་གི་ཆོས་ཉིད་ལྟ་བུའོ། །བཞི་པ་ལ། ཀུན་རྫོབ་དང་། དོན་དམ་བདེན་པ་ངེས་བྱེད་ཀྱི་ཚད་མ་གཉིས། དང་པོ་ལ། སྔོན་པོ་སོགས་གཟུགས་ཀྱི་སྐྱེ་མཆེད་འཇལ་བྱེད་ཀྱི་དབང་ཤེས་མ་འཁྲུལ་པ་ལྟ་བུ་གཞི་ལྡོག་དང་། འདུས་བྱས་སྣང་ལ་རང་བཞིན་མེད་རྟོགས་ཀྱི་འཕགས་རྒྱུད་ཀྱི་རྗེས་ཐོབ་ཡེ་ཤེས་ལྟ་བུ་རང་ལྡོག་ངེས་བྱེད་ཀྱི་ཚད་མ་གཉིས་སོ། །གཉིས་པ་ལ། བདེན་པའི་གཅིག་དུ་བྲལ་གྱི་རྟགས་ལས་སྣང་བ་བདེན་མེད་དུ་རྟོགས་པའི་རིགས་ཤེས་རྗེས་དཔག་ལྟ་བུ་གཞི་ལྡོག་དང་། སྤྲོས་བྲལ་སྟོང་ཉིད་རྟོགས་པའི་མཉམ་བཞག་ཡེ་ཤེས་ལྟ་བུ་རང་ལྡོག་གོ །ལྔ་པ་ལ། མ་རྟོགས་པའི་ཉེས་དམིགས་དང་། རྟོགས་པའི་ཕན་ཡོན་གཉིས། དང་པོ་ནི། རྩ་ཤེས་ལས། གང་དག་བདེན་པ་དེ་གཉིས་ཀྱི། །རྣམ་དབྱེ་རྣམ་པར་མི་ཤེས་པ། །དེ་དག་སངས་རྒྱས་བསྟན་པ་ནི། །ཟབ་མོའི་དེ་ཉིད་རྣམ་མི་ཤེས། །ཐ་སྙད་ལ་ནི་མ་བརྟེན་པར། །དམ་པའི་དོན་ནི་བསྟན་མི་ནུས། །དམ་པའི་དོན་ནི་མ་རྟོགས་པར། །མྱ་ངན་འདས་པ་ཐོབ་མི་འགྱུར། །ཞེས་སོ། །གཉིས་པ་ནི། བདེན་གཉིས་ལས། བདེན་གཉིས་རྣམ་དབྱེ་ཤེས་པ་དག །ཐུབ་པའི་བཀའ་ལ་མི་རྨོངས་ཏེ། །དེ་དག་མ་ལུས་ཚོགས་བསགས་ནས། །ཕུན་ཚོགས་ཕ་རོལ་འགྲོ་བར་འགྱུར། །ཞེས་སོ། །ངག་དོན་ནི། སྒྲུབ་པ་རང་གི་ངོ་བོ་ལ་འདོམས་པའི་གདམས་ངག་གསུངས་པ་ཆོས་ཅན། དགོས་པ་ཡོད་དེ། ཡུལ་བདེན་གཉིས་ལས་མི་འདའ་བར་ཡུལ་ཅན་ཐབས་ཤེས་ཟུང་འབྲེལ་དུ་ཉམས་སུ་ལེན་ཚུལ་ཤེས་པའི་ཆེད་ཡོད་པའི་ཕྱིར།

གཉིས་པ་ནི། བདེན་པ་རྣམས་དང་ནི། ཞེས་པའི་སྐབས་སུ་གཉིས་ཀྱི། དང་པོ་བདེན་པ་བཞི་ལ། རང་བཞིན། གྲངས་ངེས། གོ་རིམ། བདེན་བཞི་རྟོགས་པ་ལ་འཇུག་ཚུལ་དང་བཞི། དང་པོ་ལ། དོར་བྱ་སྡུག་ཀུན་དང་། བླང་བྱ་འགོག་ལམ་གྱི་བདེན་པ་གཉིས། དང་པོ་ལ། མཚན་ཉིད། སྒྲ་བཤད། དབྱེ་བ། བཅོམ་པའི་ས་མཚམས་དང་བཞི། དང་པོ་ནི། སྡུག་ཀུན་གཉིས་ཀྱི་ནང་ཚན་གང་ཞིག །རང་རྒྱུ་ལས་ཉོན་གྱི་འབྲས་བུར་གྱུར་པའི་ཟག་བཅས། དེ་གང་ཞིག་ཟག་བཅས་ཀྱི་ལས་དང་ཉོན་མོངས་གང་རུང་གིས་བསྡུས་པ། གཉིས་པ་ནི། སྡུག་ཀུན་གཉིས་བྱིས་པས་བཟུང་བ་ལྟར་མ་གྲུབ་ལ། འཕགས་པས་གཟིགས་པ་ལྟར་གནས་པའི་ཕྱིར་འཕགས་པའི་བདེན་པ་ཞེས་བརྗོད་ལ། དེ་ཡང་བྱིས་པས་སྡུག་བསྔལ་ལ་བདེ་བ་དང་། ཀུན་འབྱུང་དེ་ཁྲིད་བྱེད་དུ་བཟུང་། འཕགས་པས་ཁམས་གསུམ་སྡུག་བསྔལ་གསུམ་གྱི་རང་བཞིན་ཅན་དང་། ལས་ཉོན་གཉིས་དེར་འཁྲིད་བྱེད་དུ་བཟུང་སྟེ། མཛོད་འགྲེལ་ལས། བྱིས་པ་ལག་མཐིལ་འདྲ་བ་ཡིས། །སྡུག་བསྔལ་འདུ་བྱེད་སྤུ་མི་རྟོགས། །འཕགས་པ་མིག་དང་འདྲ་བ་ནི། །དེ་ཡིས་ཤིན་ཏུ་ཡིད་ཀྱང་འབྱུང་། །ཞེས་སོ། །གསུམ་པ་ནི། སྡུག་བདེན་ལ་རྟེན་དང་བརྟེན་པའི་སྒོ་ནས་སྣོད་ཀྱི་འཇིག་རྟེན་དང་། བཅུད་ཀྱི་སེམས་ཅན་གཉིས་ཏེ། ཀུན་བཏུས་ལས། སྡུག་བསྔལ་གྱི་བདེན་པ་གང་ཞེ་ན། དེ་ནི་སེམས་ཅན་སྐྱེ་བ་དང་སྐྱེ་བའི་གནས་ཀྱིས་ཀྱང་རིགས་པར་བྱའོ། །ཞེས་སོ། །འདོད་གཟུགས་ཀྱིས་བསྡུས་པའི་སྣོད་ཀྱི་འཇིག་རྟེན་དང་པོའི་མཚན་གཞི། ཁམས་གསུམ་དུ་ལས་ཉོན་གྱིས་སྐྱེ་བ་བླངས་པའི་གང་ཟག་གཉིས་པའི་མཚན་གཞིའོ། །དེས་ན་བདེ་བ་ཅན་སོགས་དག་པའི་ཞིང་ཁམས་རྣམས་ནི་སྡུག་བསྔལ་གྱི་བདེན་པ་མ་ཡིན་ཏེ། ཀུན་བཏུས་ལས། ཡོངས་སུ་དག་པའི་འཇིག་རྟེན་གྱི་ཁམས་དེ་དག་ནི་སྡུག་བསྔལ་གྱི་བདེན་པ་མ་ཡིན་པ་ལྟ་བུ་སྟེ། དེ་དག་ལས་དང་ཉོན་མོངས་པས་བསྐྱེད་པ་མ་ཡིན། ལས་དང་ཉོན་མོངས་པའི་དབང་གིས་བྱུང་བ་མ་ཡིན་གྱི། སྨོན་ལམ་དང་དགེ་བའི་རྩ་བའི་དབང་གིས་བྱུང་བ་དག་གོ །ཞེས་སོ། །མཚན་གཞིའི་སྒོ་ནས་དབྱེ་ན། ཚོར་བ་སྡུག་བསྔལ་རྒྱུ་དང་བཅས་པ་ལྟ་བུ་སྡུག་བསྔལ་གྱི་སྡུག་བསྔལ། ཟག་བཅས་ཀྱི་ཚོར་བ་བདེ་བ་རྒྱུ་དང་བཅས་པ་ལྟ་བུ་འགྱུར་བའི་སྡུག་བསྔལ། ཟག་བཅས་ཀྱི་ཚོར་བ་བཏང་སྙོམས་རྒྱུར་བཅས་དང་། འཁོར་བས་བསྡུས་པའི་གཟུགས་ཅན་གྱི་དངོས་པོ་ལྟ་བུ་ཁྱབ་པ་འདུ་བྱེད་ཀྱི་སྡུག་བསྔལ་དང་གསུམ་མོ། །ཀུན་འབྱུང་ལ་ཉོན་མོངས་པ་དང་། ལས་ཀྱི་ཀུན་འབྱུང་གཉིས་ཏེ། ཀུན་བཏུས་ལས། ཀུན་འབྱུང་གི་བདེན་པ་གང་ཞེ་ན། ཉོན་མོངས་པ་དང་། ཉོན་མོངས་པའི་དབང་གིས་བྱུང་བའི་ལས་སོ། །ཞེས་སོ། །དབྱེ་གཞི་གང་ཞིག །སེམས་རྒྱུད་རབ་ཏུ་མ་ཞི་བར་བྱེད་པའི་ཉོན་མོངས་པས་བསྡུས་པ་དང་པོའི་མཚན་ཉིད། མཚན་གཞི་རྩ་བ་དང་ཉེ་བའི་ཉོན་མོངས་པ། དེ་དག་དང་མཚུངས་ལྡན་གྱི་སེམས་དང་སེམས་བྱུང་ལྟ་བུའོ། །དེ་གང་ཞིག །རང་རྒྱུ་ཉོན་མོངས་པའི་དབང་གིས་བྱུང་བའི་ཟག་བཅས་ཀྱི་ལས། དབྱེ་ན། ངན་སོང་གསུམ་དུ་འཕེན་པར་བྱེད་པའི་མི་དགེ་བའི་ལས་དང་། བདེ་འགྲོར་འཕེན་པར་བྱེད་པའི་དགེ་ལས་གཉིས་སོ། །བཞི་པ་ལ། ཐེག་དམན་དང་། ཐེག་ཆེན་གྱི་བཅོམ་པའི་ས་མཚམས་གཉིས། དང་པོ་ནི། དགྲ་བཅོམ་ཐོབ་ན་ཉོན་མོངས་པའི་ཀུན་འབྱུང་སྤངས་པས་ཁྱབ། ལས་ཀྱི་ཀུན་འབྱུང་ལྷག་བཅས་མྱང་འདས་སྐབས་སྤངས་མ་སྤང་གཉིས་ཀ་ཡོད། ལྷག་མེད་ཐོབ་ནས་སྡུག་ཀུན་གཉིས་ཀ་སྤངས་པ་ཡིན་ལ། འཁོར་བ་ནི་དགྲ་བཅོམ་པ་མཐའ་དག་གིས་སྤངས་སོ། །དཔེར་ན། ལྷག་བཅས་ལ་གནས་པའི་ཉན་ཐོས་དགྲ་བཅོམ་པའི་གཟུགས་ཕུང་སྡུག་བདེན་ཡིན་ཀྱང་འཁོར་བ་མ་ཡིན་པ་བཞིན་ནོ། །གཉིས་པ་ནི། དམན་ལམ་སྔོན་དུ་སོང་བ་ལ་ཚོགས་ལམ་ནས་ཀྱང་གཉིས་ཀ་སྤངས་པ་ཡོད་ཅིང་། མ་སོང་བ་ལ་ཀུན་འབྱུང་ས་དང་པོ་ནས་སྤངས། སྡུག་བདེན་ས་བརྒྱད་པའི་བར་དུ་འགྲོ་བ་སྲིད་དེ། རྒྱན་ལས། དབང་པོ་ལྔ་རྣམས་གཞན་གྱུར་ན། །དོན་ཀུན་འཇུག་དང་ཐམས་ཅད་ལ། །ཡོན་ཏན་བརྒྱ་ཕྲག་བཅུ་གཉིས་འབྱུང་། །འབྱོར་བ་དམ་པ་ཐོབ་པར་འགྱུར། །ཞེས་སོ། །གཉིས་པ་ལ། མཚན་ཉིད། སྒྲ་བཤད། དབྱེ་བ། ཐོབ་པའི་ས་མཚམས་དང་བཞི། དང་པོ་ནི། དགག་གཞི་སེམས་རྒྱུད་ཀྱི་སྟེང་དུ་འགོག་བྱེད་བར་ཆད་མེད་ལམ་གྱིས་རང་གི་ངོ་སྐལ་གྱི་སྤང་བྱའི་ས་བོན་བཀག་པའི་སྟོབས་ཀྱིས་ཐོབ་པའི་སོ་སོར་བརྟགས་འགོག །བདག་མེད་མངོན་སུམ་དུ་རྟོགས་པའི་ཡེ་ཤེས་ཀྱི་ངོ་བོར་གྱུར་པའི་ཟག་མེད་རྣམ་བྱང་གི་བདེན་པ། གཉིས་པ་ནི། བྱིས་པས་འགོག་བདེན་ལ་གཡང་ས་དང་། ལམ་བདེན་དེར་ཁྲིད་བྱེད་ཀྱི་གཤེད་མ་ལྟ་བུར་བཟུང་ཞིང་། འཕགས་པས་འགོག་བདེན་ལ་བདེ་བ་དང་ལམ་བདེན་དེར་ཁྲིད་བྱེད་དུ་གཟིགས་ལ། དེ་གཉིས་འཕགས་པའི་གཟིགས་ངོ་ལྟར་གྲུབ་པས་འཕགས་པའི་བདེན་པ་ཞེས་བྱའོ། །གསུམ་པ་ལ། འགོག་བདེན་དང་། ལམ་བདེན་གྱི་དབྱེ་བ་གཉིས། དང་པོ་ནི། ཐེག་པའི་སྒོ་ནས་ཉན་རང་བྱང་སེམས་ཀྱི་འགོག་པ་གསུམ། སྤང་བྱའི་སྒོ་ནས་སྒྲིབ་གསུམ་ལས་གྲོལ་བའི་འགོག་པ་གསུམ། དབྱེ་བ་བཏགས་པ་བའི་དབང་དུ་ན། སོ་སྐྱེས་དང་འཕགས་རྒྱུད་ཀྱི་འགོག་པ་ལྟ་བུ་བརྡ་དང་དོན་དམ་པའི། མི་སློབ་པ་དང་སློབ་པའི་འགོག་པ་ལྟ་བུ་ཡོངས་སུ་རྫོགས་པ་དང་མ་རྫོགས་པའི། སྤྱན་དང་མངོན་ཤེས་སོགས་ལྡན་མི་ལྡན་ལྟ་བུ་རྒྱན་བཅས་དང་རྒྱན་མེད་ཀྱི། རང་གི་ངོ་སྐལ་གྱི་སྤང་བྱའི་ས་བོན་ལས་གྲོལ་བ་དང་མ་གྲོལ་བ་ལྟ་བུ་སོ་སོར་བརྟགས་པ་དང་སོ་སོར་བརྟགས་མིན་གྱི་འགོག་པ་རྣམས་སོ། །གཉིས་པ་ལ། ཐེག་པའི་སྒོ་ནས་གསུམ། མཚན་གཞིའི་སྒོ་ནས་མཐོང་སྒོམ་མི་སློབ་ལམ་གསུམ། བཞི་པ་ལ། འགོག་བདེན་དང་། ལམ་བདེན་གྱི་ས་མཚམས་གཉིས། དང་པོ་ནི། ཐེག་དམན་གྱི་མཐོང་ལམ་སྡུག་བསྔལ་ཆོས་བཟོད་ཐོབ་མ་ཐག་པའི་གནས་སྐབས་ན་འགོག་བདེན་མེད་དེ། སྤང་བྱའི་ས་བོན་ཅུང་ཟད་ཀྱང་མ་སྤངས་པའི་ཕྱིར། དེས་ན། ཐེག་དམན་ལ་སྡུག་བསྔལ་ཆོས་ཤེས་ནས་མི་སློབ་ལམ་གྱི་བར། ཐེག་ཆེན་ལ་འཕགས་པ་མཐའ་དག་གི་རྒྱུད་ལ་ཡོད། གཉིས་པ་ནི། ཐེག་པ་ཆེ་ཆུང་གི་འཕགས་པ་མཐའ་དག་གིས་ཐོབ། གཉིས་པ་ནི། ཐར་པ་དོན་གཉེར་གྱི་ཤེས་བྱའི་གཙོ་བོ་ལ་བདེན་བཞི་འཁོར་དང་བཅས་པར་གྲངས་ངེས་ཏེ། དོར་བྱ་རྒྱུ་འབྲས་དང་། བླང་བྱ་རྒྱུ་འབྲས་གཉིས་སུ་ངེས་པའི་ཕྱིར། དེས་ན་ཐར་པ་དོན་གཉེར་གྱི་ཤེས་བྱའི་གཙོ་བོ་ཡིན་ན་བདེན་བཞི་གང་རུང་ཡིན་པས་མ་ཁྱབ་སྟེ། དཔེར་ན་ཤཱཀྱ་ཐུབ་པ་བཞིན་ནོ། །གསུམ་པ་ནི། འདིར་བསྟན་བདེན་པ་བཞིའི་གོ་རིམ་ནི་མངོན་པར་རྟོགས་པའི་རིམ་པ་ཡིན་ཏེ། རྣམ་གྲོལ་དོན་གཉེར་གྱི་གང་ཟག་གིས་ཤེས་བྱ་གཏན་ལ་འབེབས་པའི་ཚེ། དང་པོར་ཁམས་གསུམ་སྡུག་བསྔལ་གྱི་རང་བཞིན་དུ་ཤེས་པར་བྱེད། དེའི་རྗེས་སུ་ཀུན་འབྱུང་སྤོང་འདོད་ཀྱི་བློ་སྐྱེ། དེའི་རྗེས་སུ་སྡུག་ཀུན་སྤངས་པའི་འགོག་པ་ལ་དོན་གཉེར་གྱི་བློ་སྐྱེ། དེའི་རྗེས་སུ་ལམ་ལ་ནན་ཏན་གྱི་སྒོ་ནས་བསླབ་དགོས་པའི་ཕྱིར། རྒྱུད་བླར། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེར་གནས་ཐོབ་བྱ་སྨན་ནི་བསྟེན་པར་བྱ་བ་ལྟར། །སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། །ཤེས་བྱ་སྤང་བྱ་རིག་པར་བྱ་ཞིང་བསྟེན་པར་བྱ། །ཞེས་སོ། །བཞི་པ་ནི། ཚུལ་ཁྲིམས་རྣམ་པར་དག་པ་ལ་གནས་ནས་དམིགས་པ་ལ་སེམས་རྩེ་གཅིག་ཏུ་གནས་པའི་ཏིང་ངེ་འཛིན་གྱི་བསླབ་པ་སྐྱེ། དེ་ལ་བརྟེན་ནས་གནས་ལུགས་ཀྱི་དོན་རྟོགས་པའི་ཤེས་རབ་ཀྱི་བསླབ་པ་སྐྱེ། དེས་སྡུག་བསྔལ་གྱི་རྩ་བ་ཀུན་འབྱུང་གིས་བསྡུས་པའི་བདག་འཛིན་རྩ་བ་ནས་བཅད། སྡུག་ཀུན་སྤངས་པའི་ཐར་པ་མྱང་འདས་མངོན་དུ་བྱེད་པ་ནི་བདེན་བཞི་རྟོགས་པའི་རིམ་པ་ཡིན་ནོ། །ངག་དོན་ནི། བདེན་པ་བཞི་ལ་འདོམས་པའི་གདམས་ངག་གསུངས་པ་ཆོས་ཅན། དགོས་པ་ཡོད་དེ། དོར་བྱ་སྡུག་ཀུན་དང་བླང་བྱ་འགོག་ལམ་གྱི་བླང་དོར་ཕྱིན་ཅི་མ་ལོག་པར་ཤེས་པའི་ཆེད་ཡོད་པའི་ཕྱིར།

གསུམ་པ་ནི། སངས་རྒྱས་ལ་སོགས་དཀོན་མཆོག་གསུམ། ཞེས་སོགས་རྩ་འགྲེལ་ལ་གཉིས་ཀྱི་དང་པོ་ལ། གང་ལ་སྐྱབས་སུ་འགྲོ་བའི་ཡུལ། ཇི་ལྟར་སྐྱབས་སུ་འགྲོ་བའི་ཚུལ། དེ་ལྟར་སྐྱབས་སུ་སོང་བའི་ཕན་ཡོན་དང་གསུམ། དང་པོ་ལ། ཐེག་པ་དམན་པའི། ཐེག་པ་ཐུན་མོང་བའི། ཐེག་པ་ཆེན་པོའི་ལུགས་སོ། །དང་པོ་ནི། སྐྱབས་འགྲོའི་ཡུལ་དཀོན་མཆོག་གསུམ་འགོག་ལམ་ཁོ་ནའི་སྟེང་ནས་འཇོག་སྟེ། རང་རྒྱུད་ལྡན་གྱི་གང་ཟག་གདུལ་བྱ་གཞན་ངོར་སངས་རྒྱས་སུ་མཚོན་པར་བྱེད་པའི་ཐེག་ཆེན་མི་སློབ་པའི་ལམ་བདེན་སངས་རྒྱས་དཀོན་མཆོག །རང་རྒྱུད་ལྡན་གྱི་གང་ཟག་གདུལ་བྱ་གཞན་ངོར་དགེ་འདུན་དུ་མཚོན་པར་བྱེད་པའི་ཐེག་ཆེན་སློབ་པའི་ལམ་བདེན་དང་ཐེག་དམན་མི་སློབ་པའི་ལམ་བདེན་དགེ་འདུན་དཀོན་མཆོག །མྱང་འདས་ཀྱིས་བསྡུས་པའི་འགོག་བདེན། ཆོས་དཀོན་མཆོག་ཏུ་འདོད་པའི་ཕྱིར་ཏེ། མཛོད་ལས། གང་ཞིག་གསུམ་ལ་སྐྱབས་འགྲོ་སྟེ། །སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་འགྲོ། །ཞེས་སོ། །དེས་ན་སྐབས་འདིར་སྐྱབས་འགྲོའི་ཡུལ་དུ་གྱུར་པའི་སངས་རྒྱས་དཀོན་མཆོག་དང་། སངས་རྒྱས་དཀོན་མཆོག་དོན་མི་གཅིག་སྟེ། སངས་རྒྱས་ལ་གཟུགས་སྐུ་དང་ཆོས་སྐུ་གཉིས་ཡོད་པའི་ཕྱིར་ཏེ། མཛོད་ལས། སངས་རྒྱས་ཐམས་ཅད་ཚོགས་དང་ནི། །ཆོས་སྐུ་འགྲོ་བའི་དོན་སྤྱོད་པས། །ཞེས་གསུངས་པའི་ཕྱིར། གཉིས་པ་ནི། སྐུ་གསུམ། མྱང་འདས་རྒྱུ་འབྲས། སྐྱེས་བུ་ཟུང་བཞི། གང་ཟག་ཡ་བརྒྱད། སྐྱབས་ཡུལ་དཀོན་མཆོག་གསུམ་དུ་བཞེད་དེ། སྐྱབས་གསུམ་བདུན་ཅུ་པ་ལས། སངས་རྒྱས་ཆོས་དང་དགེ་འདུན་ནི། །ཐར་པ་འདོད་པ་རྣམས་ཀྱི་སྐྱབས། །ཞེས་དང་། ཐུབ་དབང་གི་ནི་སྐུ་གསུམ་དང་། །མྱ་ངན་འདས་དང་གང་ཟག་བརྒྱད། །ཅེས་སོ། །བྱང་སེམས་འཕགས་པ་ནི། སངས་རྒྱས་དཀོན་མཆོག་གི་ཁོངས་སུ་གཏོགས་པར་བཞེད་དེ། ཤར་རིའི་སྡེ་པའི་ལུང་ལས། ཐེག་དམན་དགྲ་བཅོམ་པས་དེ་ལ་ཕྱག་བྱས་པར་བཤད་པའི་ཕྱིར། ཞེས་བཞེད་དེ། དེ་ཉིད་ལས། ཤར་རིའི་ལུང་ལས་དགྲ་བཅོམ་པས། །བྱང་ཆུབ་སེམས་དཔར་ཕྱག་བྱས་ཉིད། །འདི་དག་དཀོན་མཆོག་གསུམ་གཞན་མིན། །སངས་རྒྱས་ཁོངས་སུ་གཏོགས་པར་འདོད། །ཅེས་སོ། །གསུམ་པ་ལ། སོ་སོའི་རང་བཞིན། གནས་སྐབས་སྐྱབས་གསུམ་དུ་བཞག་ཚུལ། མཐར་ཐུག་སྐྱབས་གཅིག་ཏུ་སྒྲུབ་པ། དཀོན་མཆོག་གི་སྒྲ་དོན་དང་བཞི། དང་པོ་ལ་གསུམ་ལས། དང་པོ་སངས་རྒྱས་དཀོན་མཆོག་ལ། མཚན་ཉིད་ནི། ཡོན་ཏན་དྲུག་དང་ལྡན་པའི་མཐར་ཐུག་གི་སྐྱབས་གནས། མཚན་གཞི། རང་དོན་ཆོས་སྐུ་དང་། གཞན་དོན་གཟུགས་སྐུ་ལྟ་བུའོ། །ཡོན་ཏན་དྲུག་ནི། རང་དོན་ཆོས་སྐུ་ལ་གཙོ་བོར་ལྡན་པའི་ཡོན་ཏན་གསུམ་དང་། གཞན་དོན་གཟུགས་སྐུ་ལ་གཙོ་བོར་ལྡན་པའི་ཡོན་ཏན་གསུམ་སྟེ། རྒྱུད་བླར། འདུས་མ་བྱས་ཤིང་ལྷུན་གྱིས་གྲུབ། །གཞན་གྱི་རྐྱེན་གྱིས་རྟོགས་མིན་པ། །མཁྱེན་དང་བརྩེ་དང་ནུས་པར་ལྡན། །དོན་གཉིས་ལྡན་པའི་སངས་རྒྱས་ཉིད། །ཅེས་སོ། །གཉིས་པ་ཆོས་དཀོན་མཆོག་ལ། མཚན་ཉིད་ནི། འགོག་བདེན་དང་ལམ་བདེན་གང་རུང་དུ་གྱུར་པའི་ཟག་མེད་རྣམ་བྱང་གི་བདེན་པ། དབྱེ་ན། ཐེག་དམན་དང་། ཐེག་ཆེན་གྱི་ཆོས་དཀོན་མཆོག་གཉིས། དང་པོའི་མཚན་ཉིད། ཐེག་དམན་གྱི་རྒྱུད་ཀྱི་འགོག་བདེན་དང་ལམ་བདེན་གང་རུང་དུ་གྱུར་པའི་ཟག་མེད་རྣམ་བྱང་གི་བདེན་པ། གཉིས་པའི་མཚན་ཉིད། ཐེག་ཆེན་འཕགས་པའི་རྒྱུད་ཀྱི་ཡོན་ཏན་དྲུག་དང་ལྡན་པའི་ཟག་མེད་རྣམ་བྱང་གི་བདེན་པ། ཡོན་ཏན་དྲུག་ནི། འགོག་བདེན་ལ་གཙོ་བོར་ལྡན་པའི་ཡོན་ཏན་གསུམ་དང་། ལམ་བདེན་ལ་གཙོ་བོར་ལྡན་པའི་ཡོན་ཏན་གསུམ་སྟེ། རྒྱུད་བླར། བསམ་མེད་གཉིས་མེད་རྟོག་མེད་པ། །དག་གསལ་གཉེན་པོའི་ཕྱོགས་ཉིད་ཀྱིས། །གང་ཞིག་གང་གིས་ཆགས་བྲལ་བ། །བདེན་གཉིས་མཚན་ཉིད་ཅན་དེ་ཆོས། །ཆགས་བྲལ་ཉིད་ནི་འགོག་པ་དང་། །ལམ་གྱི་བདེན་པ་དག་གིས་བསྡུས། །གོ་རིམ་ཇི་བཞིན་དེ་དག་ཀྱང་། །ཡོན་ཏན་གསུམ་གསུམ་གྱིས་རིག་བྱ། །ཞེས་སོ། །གསུམ་པ་དགེ་འདུན་དཀོན་མཆོག་ལ། མཚན་ཉིད་ནི། ཆོས་དཀོན་མཆོག་རྒྱུད་ལ་ལྡན་པའི་སྐྱེས་བུ། དབྱེ་ན། ཐེག་དམན་དང་། ཐེག་ཆེན་གྱི་དགེ་འདུན་དཀོན་མཆོག་གཉིས། དང་པོའི་མཚན་ཉིད། ཆོས་དཀོན་མཆོག་རྒྱུད་ལ་ལྡན་པའི་ཐེག་དམན་གྱི་སྐྱེས་བུ། མཚན་གཞི། ཐེག་དམན་གྱི་མཐོང་སྒོམ་དགྲ་བཅོམ་པ་གསུམ། དབྱེ་ན། རྒྱུན་ཞུགས། ཕྱིར་འོང་། ཕྱིར་མི་འོང་། དགྲ་བཅོམ་རྣམས་ལ་ཞུགས་གནས་གཉིས་གཉིས་ཏེ་བརྒྱད་དོ། །གཉིས་པའི་མཚན་ཉིད། ཆོས་དཀོན་མཆོག་རྒྱུད་ལ་ལྡན་པའི་ཐེག་ཆེན་གྱི་སྐྱེས་བུ། མཚན་གཞི། ཐེག་ཆེན་འཕགས་པ་མཐའ་དག་གོ །རིག་གྲོལ་ཡོན་ཏན་དྲུག་དང་ལྡན་པའི་རྒྱལ་སྲས་འཕགས་པ་སྐབས་འདིར་དངོས་བསྟན་གྱི་དགེ་འདུན་དཀོན་མཆོག་གི་མཚན་ཉིད། ཡོན་ཏན་དྲུག་ནི། རིག་པའི་ཡོན་ཏན་གསུམ་དང་། གྲོལ་བའི་ཡོན་ཏན་གསུམ་སྟེ། རྒྱུད་བླར། ཇི་ལྟ་ཇི་སྙེད་ནང་གི་ནི། །ཡེ་ཤེས་གཟིགས་པ་དག་པའི་ཕྱིར། །བློ་ལྡན་ཕྱིར་མི་ལྡོག་པའི་ཚོགས། །ཞེས་སོ། །གཉིས་པ་ནི། རྒྱུད་བླར། སྟོན་པ་བསྟན་པ་སློབ་དོན་གྱིས། །ཐེག་པ་གསུམ་དང་བྱེད་གསུམ་ལ། །མོས་པ་རྣམས་ཀྱི་དབང་བྱས་ནས། །སྐྱབས་གསུམ་རྣམ་པར་བཞག་པ་ཡིན། །ཞེས་གསུངས་པ་ལྟར་རོ། །གསུམ་པ་ནི། ལུང་གི་ཆོས་རྣམས་ནི་མཐར་ཐུག་གི་སྐྱབས་མ་ཡིན་ཏེ། དེ་ཐོབ་པ་ན་གཟིངས་ལྟར་དུ་དོར་བྱ་ཡིན་པའི་ཕྱིར། ཐེག་དམན་གྱི་སློབ་མི་སློབ་གཉིས་ཀ་དང་། ཐེག་ཆེན་སློབ་པའི་ལམ་བདེན་རྣམས་ཀྱང་མཐར་ཐུག་གི་སྐྱབས་མ་ཡིན་ཏེ། སྤངས་རྟོགས་གོང་ནས་གོང་དུ་འཕེལ་དགོས་པས་བསླུ་བའི་ཆོས་ཅན་ལྟ་བུར་སྣང་བའི་ཕྱིར། དེ་དག་གི་འགོག་བདེན་ཡང་མཐར་ཐུག་གི་སྐྱབས་མ་ཡིན་ཏེ། རང་གི་ངོ་སྐལ་གྱི་སྤང་བྱ་ཅུང་ཟད་མེད་པས་རབ་ཏུ་ཕྱེ་བ་ཙམ་ཡིན་པའི་ཕྱིར། དེ་དག་རྒྱུད་ལྡན་གྱི་དགེ་འདུན་རྣམས་ཀྱང་དེ་མ་ཡིན་ཏེ། སྒྲིབ་གཉིས་ཅི་རིགས་པའི་འཇིགས་པ་དང་བཅས་པའི་ཕྱིར། རྒྱུད་བླར། སྤང་ཕྱིར་བསླུ་བའི་ཆོས་ཅན་ཕྱིར། །མེད་ཕྱིར་འཇིགས་དང་བཅས་པའི་ཕྱིར། །ཆོས་རྣམས་གཉིས་དང་འཕགས་པའི་ཚོགས། །གཏན་གྱི་སྐྱབས་མཆོག་མ་ཡིན་ནོ། །ཞེས་སོ། །དེས་ན་མཐར་ཐུག་གི་སྐྱབས་གནས་ནི་སངས་རྒྱས་དཀོན་མཆོག་ཏུ་ངེས་ཏེ། རྒྱུད་བླར། དམ་པའི་དོན་དུ་འགྲོ་བ་ཡི། །སྐྱབས་ནི་སངས་རྒྱས་ཉག་གཅིག་ཡིན། །ཐུབ་པ་ཆོས་ཀྱི་སྐུ་ཅན་ཕྱིར། །ཚོགས་ཀྱང་དེ་ཡི་མཐར་ཐུག་ཕྱིར། །ཞེས་སོ། །བཞི་པ་ནི། རྒྱུད་བླར། འབྱུང་བ་དཀོན་ཕྱིར་དྲི་མེད་ཕྱིར། །མཐུ་ལྡན་ཕྱིར་དང་འཇིག་རྟེན་གྱི། །རྒྱན་གྱུར་ཕྱིར་དང་མཆོག་ཉིད་ཕྱིར། །འགྱུར་བ་མེད་ཕྱིར་དཀོན་ཅོག་ཉིད། །ཅེས་པ་ལྟར་རོ། །

གཉིས་པ་ལ། ངོ་བོ། དབྱེ་བ། ཁྱད་ཆོས་དང་གསུམ། དང་པོ་ནི། བྱེ་བྲག་ཏུ་སྨྲ་བ་ལྟར་ན། དཀོན་མཆོག་གསུམ་ལ་སྐྱབས་སུ་འགྲོ་བའི་ངག་གི་རིག་བྱེད་ཀུན་སློང་དང་བཅས་པ་ལ་འདོད། ཐེག་ཆེན་གྱི་ལུགས་ལ། དཀོན་མཆོག་གསུམ་ལ་དམིགས་ཏེ་ཡིད་ཆེས་ཀྱི་དད་པ་དང་ལྡན་པའི་སྒོ་ནས་འཇིགས་པ་ལས་སྒྲོལ་བའི་སྐྱབས་གནས་སུ་ཁས་ལེན་པའི་སེམས་པ་མཚུངས་ལྡན་དང་བཅས་པའོ། །གཉིས་པ་ལ། འབྲས་བུ་དང་། དམིགས་ཡུལ་གྱི་སྒོ་ནས་དབྱེ་བ་གཉིས། དང་པོ་ལ། མངོན་མཐོ་དང་། ངེས་ལེགས་གཉིས་ཀྱི། དང་པོ་ནི། འཁོར་བའི་ཕུན་ཚོགས་ཙམ་སྒྲུབ་ཕྱིར་དུ། གཉིས་པ་ནི། འཁོར་བ་སྤངས་པའི་མྱང་འདས་ཐོབ་ཕྱིར་དུ་དཀོན་མཆོག་གསུམ་ལ་སྐྱབས་སུ་འགྲོ་བ་ལྟ་བུའོ། །དེ་ལ་ཡང་ཐེག་དམན་དང་། ཐེག་ཆེན་གྱི་སྐྱབས་འགྲོ་གཉིས། དང་པོ་ནི། རང་དོན་དུ་འཁོར་བ་སྤངས་པའི་མྱང་འདས་ཐོབ་ཕྱིར་དུ། གཉིས་པ་ནི། སེམས་ཅན་ཐམས་ཅད་འཁོར་བ་ལས་བསྒྲལ་འདོད་ཀྱི་བསམ་པས་སྐྱབས་སུ་འགྲོ་བ་ལྟ་བུའོ། །གཉིས་པ་ལ། རྒྱུའི་དང་། འབྲས་བུའི་གཉིས། དང་པོ་ནི། གཞན་རྒྱུད་ལ་གྲུབ་ཟིན་པའི་དཀོན་མཆོག་གསུམ་ལ་དམིགས་ནས། གཉིས་པ་ནི། རང་རྒྱུད་ལ་འབྱུང་རུང་གི་དཀོན་མཆོག་གསུམ་ལ་དམིགས་ནས་སྐྱབས་སུ་འགྲོ་བ་ལྟ་བུའོ། །གསུམ་པ་ལ། ཡུལ། རྒྱུ། དུས། བསླབ་བྱའི་ཁྱད་པར་དང་བཞི། དང་པོ་ནི། རྣམ་གྲོལ་དོན་གཉེར་གྱི་གང་ཟག་རྣམས་ཀྱི་སྐྱབས་སུ་འགྲོ་བའི་ཡུལ་དཀོན་མཆོག་གསུམ་ཡིན་ཏེ། དེས་གནས་སྐབས་འཁོར་བའི་འཇིགས་པ་ལས་སྐྱོབ་ནུས། མཐར་ཐུག་ངེས་ལེགས་ལ་འགོད་ནུས་པའི་ཕྱིར། གཉིས་པ་ནི། དཀོན་མཆོག་ལ་ཡིད་ཆེས་པའི་དད་པ་དང་། འཁོར་བའི་སྡུག་བསྔལ་གྱིས་འཇིགས་པ་ནི་སྤྱིར་སྐྱབས་སུ་འགྲོ་བའི་རྒྱུ་ཡིན་ལ། ཐེག་པ་ཆེན་པོ་པས་དེའི་སྟེང་དུ་གཞན་གྱི་སྡུག་བསྔལ་བྲལ་འདོད་ཀྱི་སྙིང་རྗེ་ལ་བརྟེན་ནས་སྐྱབས་སུ་འགྲོ་སྟེ། རྒྱན་ལས། འདི་ནི་དེ་དངོས་འདོད་པས་ཁས་ལེན་དེ་ཡང་སྙིང་བརྩེ་ལས་རིག་བྱ། །ཞེས་གསུངས་པའི་ཕྱིར། གསུམ་པ་ནི། ཐེག་དམན་ལྟར་ན་ཇི་སྲིད་འཚོའི་བར་དང་། ཐེག་ཆེན་ལྟར་ན་བྱང་ཆུབ་མ་ཐོབ་ཀྱི་བར་དུའོ། །བཞི་པ་ལ། ཐུན་མོང་གི་དང་། སོ་སོའི་བསླབ་བྱ་གཉིས། དང་པོ་ལ། སྐྱེས་བུ་དམ་པ་ལ་བརྟེན་པ། དམ་པའི་ཆོས་ཉན་པ། ཚུལ་བཞིན་ཡིད་ལ་བྱེད་པ། ཆོས་ཀྱི་རྗེས་སུ་མཐུན་པའི་ཆོས་སྒྲུབ་པའོ། །གཉིས་པ་ལ། དགག་པ་དང་། སྒྲུབ་པའི་བསླབ་བྱ་གཉིས། དང་པོ་ནི། སངས་རྒྱས་ལ་སྐྱབས་སུ་སོང་ནས་ཕྱི་རོལ་བའི་ལྷ་ལ་གཏན་གྱི་སྐྱབས་མི་འཆོལ། ཆོས་ལ་སྐྱབས་སུ་སོང་ནས་སེམས་ཅན་ལ་གནོད་འཚེ་སྤོང་། དགེ་འདུན་ལ་སྐྱབས་སུ་སོང་ནས་གྲོགས་མུ་སྟེགས་ཅན་མི་བསྟེན་པ་ལ་བསླབ་སྟེ། མྱང་འདས་ཆེན་པོ་ལས། གང་ཞིག་སངས་རྒྱས་སྐྱབས་འགྲོ་བ། །དེ་ནི་ཡང་དག་དགེ་བསྙེན་ཏེ། །ནམ་དུའང་ལྷ་ནི་གཞན་དག་ལ། །སྐྱབས་སུ་འགྲོ་བ་མ་ཡིན་ནོ། །དམ་པའི་ཆོས་ལ་སྐྱབས་སོང་ནས། །འཚེ་ཞིང་གནོད་པའི་སེམས་དང་བྲལ། །དགེ་འདུན་ལའང་སྐྱབས་སོང་ནས། །མུ་སྟེགས་ཅན་དང་འགྲོགས་མི་བྱ། །ཞེས་སོ། །གཉིས་པ་ནི། སཱཙྪའི་ཆག་དུམ་ཙམ་ལ་སངས་རྒྱས་དངོས་ཀྱི་འདུ་ཤེས་བསྐྱེད། ཡི་གེ་འབྲུ་གཅིག་ཡན་ཆད་ལ་དམ་པའི་ཆོས་དངོས་ཀྱི་འདུ་ཤེས་བསྐྱེད། རབ་བྱུང་གི་རྟགས་ཙམ་འཛིན་པ་ལ་ཡང་དགེ་འདུན་དཀོན་མཆོག་དངོས་ཀྱི་འདུ་ཤེས་བསྐྱེད་ནས་གུས་པར་བྱའོ། །གསུམ་པ་ནི། དཀོན་མཆོག་གསུམ་ལ་སྐྱབས་སུ་སོང་བ་ནི་ཕན་ཡོན་ཆེན་པོ་དང་ལྡན་ཏེ། གནས་སྐབས་ཀྱི་ཉེར་འཚེ་མཐའ་དག་ལས་སྐྱབས་ནུས་པ་དང་། མཐར་ཐུག་གི་ཕུན་སུམ་ཚོགས་པ་ཐམས་ཅད་སྒྲུབ་ནུས་པའི་ཕྱིར་ཏེ། རྒྱན་ལས། འཇིག་རྟེན་ཇི་སྲིད་སེམས་ཅན་གྱི། །གནོད་དང་ཕུན་སུམ་ཚོགས་པ་ཀུན། །བཟློག་ཅིང་འབྱོར་བར་བྱ་བའི་ཕྱིར། །སངས་རྒྱས་སྐྱབས་ཆེན་ཉིད་དུ་འདོད། །ཅེས་གསུངས་པའི་ཕྱིར། ངག་དོན་ནི། དཀོན་མཆོག་གསུམ་ལ་འདོམས་པའི་གདམས་ངག་གསུངས་པ་ཆོས་ཅན། དགོས་པ་ཡོད་དེ། དོན་དམ་པར་དཀོན་མཆོག་གསུམ་སྐྱབས་གནས་ཡིན་ནམ་སྙམ་པའི་ལོག་རྟོག་བཀག་ནས་ཀུན་རྫོབ་ཏུ་སྐྱབས་གནས་སུ་ཤེས་པའི་ཆེད་ཡོད་པའི་ཕྱིར།

བཞི་པ་ནི། ཤའི་དང་རྣམ་པར་སྨིན་པ་ཞེས་སོགས་ཀྱི་སྐབས་སུ་གཉིས་ཀྱི། དང་པོ་སྤྱན་ལྔ་ལ། རྒྱུ། ངོ་བོ། འབྲས་བུ་དང་གསུམ། དང་པོ་ལ། ཐུན་མོང་གི་དང་། སོ་སོའི་རྒྱུ་གཉིས། དང་པོ་ལ། སྤྱིར་སྤྱན་ཙམ་གྱི་དང་། ཐེག་ཆེན་གྱི་དེའི་རྒྱུ་གཉིས། དང་པོ་ནི། བསམ་གཏན་གྱི་དངོས་གཞིའི་སེམས་ལ་བརྟེན་པར་བཤད་ཅིང་། མངོན་ཤེས་ཐོབ་པའི་གང་ཟག་གིས་སྤྱན་ལྔ་སྒྲུབ་དགོས་པའི་ཕྱིར། གཉིས་པ་ནི། ཕ་རོལ་ཏུ་ཕྱིན་པ་དྲུག་ལ་བརྟེན་ནོ། །མདོ་ལས། མིག་ལྔ་ཐོབ་པར་འདོད་པ་དང་སྦྱང་བར་འདོད་པས་ཀྱང་ཕ་རོལ་ཏུ་ཕྱིན་པ་དྲུག་ལ་བསླབ་པར་བྱའོ། །ཞེས་སོ། །གཉིས་པ་ནི། སྤྱན་ལྔའི་རྒྱུ་གོ་རིམ་བཞིན་བསམ་གཏན་གྱིས་སྦྱངས་པའི་དབང་པོ་གཟུགས་ཅན་པ་སྐྱེ་བ་སྔ་མར་མར་མེ་སོགས་ཕུལ་བའི་དགེ་བའི་ལས་ཀྱི་རྣམ་སྨིན་དང་། བསམ་གཏན་གཉིས་ཀའི་སྟོབས་ལས་བྱུང་བའི་དབང་པོ་གཟུགས་ཅན་ལ་ལམ་ཞུགས་སོ་སྐྱེས་མཉམ་བཞག་ཏུ་ཇི་ལྟ་བ་རྩེ་གཅིག་ཏུ་བསྒོམ་པ་དང་། དེས་རྗེས་ཐོབ་ཏུ་ཇི་སྙེད་པ་ཐོས་བསམ་གྱིས་གཏན་ལ་འབེབས་པ་དང་། སློབ་ལམ་དུ་ཚོགས་གཉིས་རྒྱ་ཆེན་པོ་གསོག་པའོ། །གཉིས་པ་ལ། མཚན་ཉིད། དབྱེ་བ། སོ་སོའི་རང་བཞིན། གྲངས་ངེས། ས་མཚམས་དང་ལྔ། དང་པོ་ནི། རང་ཉིད་སྤྱན་དུ་འགྲུབ་བྱེད་ཀྱི་རྒྱུ་ཕུན་ཚོགས་ལ་བརྟེན་ནས་རང་ཡུལ་གྱི་གཙོ་བོ་མངོན་སུམ་དུ་རིག་པའི་ཡུལ་ཅན། དབྱེ་ན། ཤའི། ལྷའི། ཤེས་རབ་ཀྱི། ཆོས་ཀྱི། སངས་རྒྱས་ཀྱི་སྤྱན་ནོ། །གསུམ་པ་ནི། མཚན་ཉིད་རིམ་བཞིན། སྤྱན་ལྔའི་ནང་ཚན་གང་ཞིག །རང་གི་ཐུན་མོང་མ་ཡིན་པའི་བདག་རྐྱེན་བསམ་གཏན་གྱིས་སྦྱངས་པའི་དབང་པོ་གཟུགས་ཅན་པ་ལ་བརྟེན་ནས་དཔག་ཚད་བརྒྱ་ལ་སོགས་པའི་དངོས་པོ་སོ་སོར་རིག་པའི་ཡུལ་ཅན། དབྱེ་ན། ཐེག་དམན་དང་། ཐེག་ཆེན་གྱི་ཤའི་སྤྱན་གཉིས། སྤྱན་ལྔའི་ནང་ཚན་གང་ཞིག །རང་གི་ཐུན་མོང་མ་ཡིན་པའི་བདག་རྐྱེན་སྔོན་གྱི་དགེ་བའི་ལས་ཀྱི་རྣམ་སྨིན་ལས་བྱུང་བའི་དབང་པོ་གཟུགས་ཅན་པ་ལ་བརྟེན་ནས། སེམས་ཅན་རྣམས་ཀྱི་འཆི་འཕོ་བ་དང་སྐྱེ་བ་མངོན་སུམ་དུ་རིག་པའི་ཡུལ་ཅན། དབྱེ་ན། ཐེག་དམན་དང་། ཐེག་ཆེན་གྱི་ལྷའི་སྤྱན་གཉིས། དེ་གང་ཞིག །བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས་བདག་མེད་མངོན་སུམ་དུ་རྟོགས་པའི་ཡེ་ཤེས། དབྱེ་ན། བསམ་གཏན་གྱི་དངོས་ཞི་ཐོབ་པའི་ཐེག་དམན་འཕགས་པའི་མཁྱེན་པ་ལྟ་བུ་གང་ཟག་གི་བདག་མེད་ཙམ་དང་། ཐེག་ཆེན་འཕགས་པའི་མཁྱེན་པ་མཐའ་དག་སྟེ་ཆོས་ཀྱི་བདག་མེད་མངོན་སུམ་དུ་རྟོགས་པའི་ཤེས་རབ་ཀྱི་སྤྱན་གཉིས། དེ་གང་ཞིག །བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས་རང་དང་རྒྱུད་ཚོད་མཉམ་པ་མན་ཆད་ཀྱི་དབང་པོའི་དབྱེ་བ་མངོན་སུམ་དུ་རིག་པའི་ཡུལ་ཅན། དབྱེ་ན། བསམ་གཏན་གྱི་དངོས་གཞི་ཐོབ་པའི་ཐེག་དམན་འཕགས་པའི་རྗེས་ཐོབ་ཡེ་ཤེས་ལྟ་བུ་ཐེག་དམན་དང་། ཐེག་ཆེན་འཕགས་པའི་དེ་ལྟ་བུ་ཐེག་ཆེན་གྱི་ཆོས་ཀྱི་སྤྱན་གཉིས། མིང་ཙམ་མཐུན་པའི་སྒོ་ནས་དབྱེ་ན། གསུང་རབ་དཔག་མེད་ཀྱི་ཚིག་དོན་འཛིན་པར་ནུས་པའི་ཚིག་གཟུངས་དང་དོན་གཟུངས་ལྟ་བུ་ལུང་གི་དང་། འཕགས་རྒྱུད་ཀྱི་གཞན་སེམས་ཤེས་པའི་མངོན་ཤེས་ལྟ་བུ་རྟོགས་པའི་ཆོས་ཀྱི་སྤྱན་གཉིས། ཆོས་ཐམས་ཅད་མངོན་སུམ་དུ་རྟོགས་པ་མཐར་ཐུག་པའི་ཡེ་ཤེས། དབྱེ་ན། སངས་རྒྱས་ཀྱི་སྤྱན་རྗེས་མཐུན་པ་དང་། མཚན་ཉིད་པ་གཉིས་སོ། །བཞི་པ་ནི། ཡུལ་རྟོགས་ཚུལ་གྱི་སྒོ་ནས་སྤྱན་ལ་ལྔར་བཞག་པ་ཡིན་ཏེ། དེ་ལ་ཆོས་ཐམས་ཅད་ཀྱི་ཡུལ་ཅན་དང་། དེ་ལས་གཞན་པ་གཉིས་སུ་ངེས་ལ། དང་པོའི་དབང་དུ་བྱས་ནས་སངས་རྒྱས་ཀྱི་སྤྱན། གཉིས་པ་ལ། ཇི་ལྟ་བ་དང་། ཇི་སྙེད་པའི་ཡུལ་ཅན་གཉིས་སུ་ངེས། དང་པོའི་དབང་དུ་བྱས་ན་ཤེས་རབ་ཀྱི་སྤྱན། གཉིས་པ་ལ། རྟེན་སྣོད་ཀྱི་འཇིག་རྟེན་འཇལ་བའི་དབང་དུ་བྱས་ནས་ཤའི་སྤྱན། བརྟེན་པ་སེམས་ཅན་གྱི་ཁྱད་ཆོས་འཇལ་བའི་དབང་དུ་བྱས་ནས་ལྷའི་སྤྱན། གཞན་རྒྱུད་ཀྱི་དབང་པོའི་རབ་དབྱེ་འཇལ་བའི་དབང་དུ་བྱས་ནས་ཆོས་ཀྱི་སྤྱན་བཞག་པའི་ཕྱིར། ངོ་བོའི་སྒོ་ནས་བསྡུ་ན། དབང་ཤེས་ཀྱི་ངོ་བོ་གྱུར་པའི་སྤྱན་དང་། ཡིད་ཤེས་ཀྱི་ངོ་བོར་གྱུར་པའི་སྤྱན་གཉིས་སུ་འདུས། དེ་ཡང་སྤྱན་དང་པོ་གཉིས་མཐའ་གཅིག་ཏུ་དབང་ཤེས། སློབ་པའི་རྒྱུད་ཀྱི་བར་པ་གཉིས་ཡིད་ཤེས། སངས་རྒྱས་ཀྱི་སྤྱན་ལ་གཉིས་ཀ་ཡོད། དེས་ན་སྤྱན་དང་པོ་གཉིས་མི་འགལ་ཏེ། བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་པའི་བྱང་སེམས་སྦྱོར་ལམ་པའི་མིག་གི་རྣམ་པར་ཤེས་པ་གཅིག་ཉིད་དཔག་ཚད་བརྒྱ་ལ་སོགས་པའི་སྣོད་ཀྱི་འཇིག་རྟེན་རིག་པའི་ཆ་ནས་སྤྱན་དང་པོ་དང་། དེར་གནས་པའི་སེམས་ཅན་རྣམས་ཀྱི་འཆི་འཕོ་བ་དང་སྐྱེ་བ་མངོན་སུམ་དུ་རིག་པའི་ཆ་ནས་གཉིས་པར་བཞག་པའི་ཕྱིར། བར་པ་གཉིས་མི་འགལ་ཏེ། བྱང་འཕགས་ཀྱི་མཁྱེན་པ་འདི་ཆོས་ཀྱི་བདག་མེད་མངོན་སུམ་དུ་རྟོགས་པའི་ཆ་ནས་ཤེས་རབ་ཀྱི་སྤྱན་དང་། གཞན་རྒྱུད་ཀྱི་དབང་པོའི་དབྱེ་བ་མངོན་སུམ་དུ་རིག་པའི་ཆ་ནས་ཆོས་ཀྱི་སྤྱན་དུ་བཞག་པའི་ཕྱིར། སློབ་ལམ་དུ་དང་པོ་གཉིས་དང་བར་པ་གཉིས་འགལ་ཏེ། དང་པོ་གཉིས་དབང་ཤེས་དང་། ཕྱི་མ་གཉིས་ཡིད་ཤེས་སུ་བཞག་པའི་ཕྱིར། སངས་རྒྱས་ཀྱི་སར་ལྔ་ཀ་མི་འགལ་ཏེ། སངས་རྒྱས་འཕགས་པའི་མིག་གི་རྣམ་པར་ཤེས་པ་ལ་སྤྱན་ལྔ་ཀའི་མཚན་ཉིད་ཚང་བའི་ཕྱིར། ལྔ་པ་ལ། གཙོ་ཆེ་བའི་ས་མཚམས་དང་། ཐོབ་པའི་ས་མཚམས་གཉིས། དང་པོ་རིམ་བཞིན། ཚོགས་ལམ། སྦྱོར་ལམ། འཕགས་རྒྱུད་ཀྱི་མཉམ་བཞག །དེའི་རྗེས་ཐོབ། སངས་རྒྱས་ཀྱི་ས་ནའོ། །གཉིས་པ་ནི། དང་པོ་གཉིས་བསམ་གཏན་གྱི་དངོས་གཞི་ཐོབ་པའི་ཚོགས་ལམ་ནས་ཡོད། བར་པ་གཉིས་དེ་ཐོབ་པའི་འཕགས་པ་མཐའ་དག་གི་རྒྱུད་ལ་ཡོད། སངས་རྒྱས་ཀྱི་སྤྱན་རྗེས་མཐུན་པ་ས་བདུན་པ་ནས་ཡོད་དེ། ས་བདུན་པའི་ཡོངས་སྦྱོང་གི་མདོ་ལས། བྱང་ཆུབ་སེམས་དཔའ་སེམས་དཔའ་ཆེན་པོའི་ཐོགས་པ་མེད་པའི་ཡེ་ཤེས་གང་ཞེ་ན། སངས་རྒྱས་ཀྱི་སྤྱན་ནོ། །ཞེས་གསུངས་པའི་ཕྱིར། མཚན་ཉིད་པ་ནི་སངས་རྒྱས་ཀྱི་ས་ཁོ་ནར་ཡོད་དོ། །གསུམ་པ་ལ། གནས་སྐབས་དང་། མཐར་ཐུག་གི་འབྲས་བུ་གཉིས། དང་པོ་ནི། སྤྱན་ལྔའི་སྒོ་ནས་གཞན་དོན་བྱེད་ཚུལ་ཕྱིན་ཅི་མ་ལོག་པར་ཤེས་ཏེ་གདམས་ངག་སྟོན་པ་ལ་གཞན་གྱི་དྲིང་མི་འཇོག་པའོ། །གཉིས་པ་ནི། བླ་ན་མེད་པའི་འབྲས་བུ་འགྲུབ་པར་བྱེད་དེ། མདོ་ལས། མིག་ལྔ་པོ་འདི་དག་ལ་བསླབ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱའོ། །ཞེས་སོ། །ངག་དོན་ནི། སྤྱན་ལྔ་ལ་འདོམས་པའི་གདམས་ངག་གསུངས་པ་ཆོས་ཅན། དགོས་པ་ཡོད་དེ། སྤྱན་ལྔ་ཡུལ་དང་བཅས་པ་བདེན་སྟོང་དུ་ཉམས་སུ་ལེན་པར་ཤེས་པའི་ཆེད་ཡོད་པའི་ཕྱིར།

རྫུ་འཕྲུལ་དང་། ཞེས་སོགས་ཀྱི་སྐབས་སུ་གཉིས་ཀྱི། དང་པོ་མངོན་ཤེས་དྲུག་ལ། རྒྱུ། ངོ་བོ། འབྲས་བུ་དང་གསུམ། དང་པོ་ལ། ལུས་ཀྱི་རྟེན། སེམས་ཀྱི་རྟེན། རྣམ་སྨིན་གྱི་རྒྱུ་དང་གསུམ། དང་པོ་ལ། ཁམས་གང་དུ་ཐོབ་པ་དང་། གང་ཟག་གང་གིས་ཐོབ་པ་གཉིས། དང་པོ་ལ། སྔར་མེད་གསར་དུ་སྒྲུབ་པ་དང་། ཐོབ་ཟིན་གནས་པའི་དབང་དུ་བྱས་པ་གཉིས། དང་པོ་ནི། འདོད་པའི་རྟེན་ལ་བསྒྲུབ་དགོས་ཏེ། གཙོ་བོར་ལུང་གི་མཐུ་ལ་བརྟེན་ནས་སྐྱེ་དགོས་པའི་ཕྱིར། ཟག་ཟད་ཀྱི་མངོན་ཤེས་ནི། གཟུགས་ཀྱི་རྟེན་ལ་ཡང་དངོས་སུ་སྐྱེ་བ་ཡོད། གཉིས་པ་ནི། དང་པོ་ལྔ་འདོད་གཟུགས་གཉིས་ཀའི་རྟེན་ལ་སྐྱེ་བ་ཡོད་ལ། དྲུག་པ་གཟུགས་མེད་ཁམས་ན་ཡང་ཡོད། ཞིབ་ཏུ་ཕྱེ་ན། གཞན་སེམས་ཤེས་པའི་མངོན་ཤེས་དང་། སྔོན་གནས་རྗེས་སུ་དྲན་པའི་མངོན་ཤེས་གཟུགས་མེད་ཀྱི་རྟེན་ལ་ཡང་ཡོད་སྲིད་དེ། གཟུགས་མེད་ཀྱི་རྟེན་ཅན་གྱི་ཉན་ཐོས་འཕགས་པའི་མཁྱེན་པས་གང་ཟག་གཞན་རྒྱུད་ཀྱི་དབང་པོའི་དབྱེ་བ་དང་། རང་གཞན་གྱི་ཚེ་རབས་སྔ་ཕྱི་མངོན་སུམ་དུ་ཤེས་པ་ཡོད་པའི་ཕྱིར་རོ། །གཉིས་པ་ནི། བསམ་གཏན་གྱི་དངོས་གཞི་ཐོབ་པའི་ཕྱི་རོལ་པ་དང་། ལམ་མ་ཞུགས་མཐའ་དག་གི་རྒྱུད་ལ་དངོས་སུ་སྐྱེར་རུང་སྟེ། དེ་ལྟར་དུ་ཀུན་བཏུས་སུ་བཤད་པའི་ཕྱིར། གཉིས་པ་ལ། སྤྱིར་བསྟན་པ་དང་། ཐེག་ཆེན་གྱི་མངོན་པར་ཤེས་པའི་རྟེན་བྱེ་བྲག་ཏུ་བཤད་པ་གཉིས། དང་པོ་ནི། མངོན་ཤེས་དང་པོ་ལྔ་བསམ་གཏན་གྱི་དངོས་གཞི་ཙམ་དང་། དྲུག་པ་བསམ་གཏན་བཞི་པ་ལ་བརྟེན་པར་བཤད་དེ། ཀུན་བཏུས་སུ། ཡོན་ཏན་འདི་རྣམས་ཇི་ལྟར་མངོན་པར་སྒྲུབ་ཅེ་ན། ཕྱི་རོལ་པའམ། ཉན་ཐོས་སམ། བྱང་ཆུབ་སེམས་དཔའ་ཡང་རུང་སྟེ། དག་པའི་བསམ་གཏན་བཞི་ལ་བརྟེན་ནས། ཚད་མེད་པ་རྣམས་མངོན་པར་བསྒྲུབས་སོ། །ཚད་མེད་པ་རྣམས་ཇི་ལྟ་བར་མངོན་པར་ཤེས་པ་ལྔ་ཡང་དེ་བཞིན་ནོ། །ཡོན་ཏན་ལྷག་མ་རྣམས་ནི་ཉན་ཐོས་སམ། བྱང་ཆུབ་སེམས་དཔའ་འམ། དེ་བཞིན་གཤེགས་པ་ཡང་རུང་སྟེ། རབ་ཀྱིས་མཐར་ཕྱིན་པའི་བསམ་གཏན་བཞི་པ་ལ་བརྟེན་ནས་མངོན་པར་བསྒྲུབས་སོ། །ཞེས་སོ། །གཉིས་པ་ནི། བདག་རྐྱེན་བསམ་གཏན་བཞི་པ། གྲོགས་སྟོང་ཉིད་རྟོགས་པའི་ཤེས་རབ། མངོན་ཤེས་ཀྱི་དམིགས་རྣམ་ཇི་ལྟར་གནས་པ་བཞིན་ཡིད་ལ་བྱེད་པའི་ཁྱད་པར་གསུམ་ལ་བརྟེན་པར་བཞེད་དེ། རྒྱན་ལས། བསམ་གཏན་བཞི་པ་ཤིན་ཏུ་དག་ཐོབ་ནས། །མི་རྟོག་ཡེ་ཤེས་ཡོངས་སུ་བཟུང་བ་དང་། །ཇི་ལྟར་རྣམ་གནས་ཡིད་ལ་བྱེད་པ་ལས། །མཐུ་གྲུབ་པ་ཡི་དམ་པ་ཐོབ་པར་འགྱུར། །ཞེས་སོ། །གསུམ་པ་ནི། ལྷམ་དང་བཞོན་པ་སོགས་གཞན་ལ་སྦྱིན་པ། ཡུལ་ཁྱད་པར་ཅན་ལ་རོལ་མོའི་བྱེ་བྲག་འབུལ་བ། གཞན་གྱི་སྐྱོན་མི་བརྗོད་པར་སེམས་བསྲུང་བ། ཆོས་ཀྱི་སྦྱིན་པ་སྟེར་བ། མར་མེའི་ཕྲེང་བ་སོགས་འབུལ་བ། བདག་མེད་ཐོས་བསམ་གྱིས་གཏན་ལ་འབེབས་པ་རྣམས་རིམ་བཞིན་མངོན་ཤེས་དྲུག་གི་རྒྱུ་ཡིན་ནོ། །གཉིས་པ་ལ། མཚན་ཉིད། དབྱེ་བ། སོ་སོའི་རང་བཞིན། ཁྱད་ཆོས་དང་བཞི། དང་པོ་ནི། རང་ཉིད་མངོན་ཤེས་སུ་འགྲུབ་པར་བྱེད་པའི་རྒྱུ་ཕུན་ཚོགས་ལ་བརྟེན་ནས་རང་ཡུལ་གྱི་གཙོ་བོ་མངོན་སུམ་དུ་རིག་པའི་ཡུལ་ཅན། དབྱེ་ན། རྫུ་འཕྲུལ། ལྷའི་རྣ་བ། གཞན་སེམས་ཤེས་པ། སྔོན་གནས་དྲན་པ། ལྷའི་མིག །ཟག་ཟད་ཀྱི་མངོན་ཤེས་སོ། །གསུམ་པ་ལ་དྲུག་ལས། དང་པོའི་མཚན་ཉིད། མངོན་ཤེས་དྲུག་གི་ནང་ཚན་གང་ཞིག །རང་གི་བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས། ས་གཡོ་བ་ལ་སོགས་པ་རྫུ་འཕྲུལ་སྣ་ཚོགས་དངོས་སུ་སྟོན་ནུས་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ། དབྱེ་ན། རྫུ་འཕྲུལ་ཙམ་གྱི་དབྱེ་བ་དང་། མངོན་ཤེས་ཀྱི་དབྱེ་བ་གཉིས། དང་པོ་ནི། འདོད་གཟུགས་ཀྱི་ལྷའི་རྫུ་འཕྲུལ་ལྟ་བུ་སྐྱེས་ཐོབ་ཀྱི། བར་སྲིད་ཀྱི་ལྟ་བུ་ལས་ལས་སྐྱེས་པའི། རིག་སྔགས་ཀྱི་འཕྲུལ་གྱིས་བསྒྲུབས་པ་སྔགས་ལ་བརྟེན་པའི། སྨན་སྦྱོར་གྱིས་བསྒྲུབས་པ་སྨན་ལ། བསམ་གཏན་གྱི་དངོས་གཞི་ལ་བརྟེན་པ་ཏིང་ངེ་འཛིན་ལ་བརྟེན་པའི་རྫུ་འཕྲུལ་དང་ལྔ། དེ་ཡང་དང་པོ་བཞི་རྫུ་འཕྲུལ་ཙམ་དང་། ཕྱི་མ་མངོན་ཤེས་ཀྱང་ཡིན་ནོ། །གཉིས་པ་ནི། ཕྱི་རོལ་པའི་མངོན་ཤེས་ལྟ་བུ་བདག་མེད་རྟོགས་པའི་ཤེས་རབ་ཀྱིས་མ་ཟིན་པ་དང་། ལམ་ཞུགས་སྐྱེས་བུའི་མངོན་ཤེས་ལྟ་བུ་དེས་ཟིན་པའི་མངོན་ཤེས་གཉིས། དབྱེ་བ་འདི་བར་པ་བཞི་ལའང་རིགས་འགྲེ། གཉིས་པའི་མཚན་ཉིད། དེ་གང་ཞིག །རང་གི་ཐུན་མོང་མ་ཡིན་པའི་བདག་རྐྱེན་བསམ་གཏན་གྱིས་སྦྱངས་པའི་རྣ་དབང་གཟུགས་ཅན་པ་ལ་བརྟེན་ནས་འཇིག་རྟེན་གྱི་ཁམས་ཀྱི་སྒྲ་ཕྲ་རགས་ཐོས་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ། དབྱེ་ན། ལྷའི་རྣ་བའི་དང་། མངོན་ཤེས་ཀྱི་དབྱེ་བ་གཉིས། དང་པོ་ནི། འདོད་གཟུགས་ཀྱི་ལྷའི་རྣ་དབང་ལྟ་བུ་སྐྱེས་ཐོབ་ཀྱི། འཁོར་ལོས་སྒྱུར་རྒྱལ་གྱི་རྣ་དབང་ལྟ་བུ་ལས་ལ་སྐྱེས་པའི། བསམ་གཏན་གྱི་དངོས་གཞི་ཐོབ་པའི་རྣ་དབང་ལྟ་བུ་ཏིང་ངེ་འཛིན་ལ་བརྟེན་པའི་འོ། །གསུམ་པའི་མཚན་ཉིད། དེ་གང་ཞིག །རང་གི་བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས་གཞན་རྒྱུད་ཀྱི་སེམས་འདོད་ཆགས་དང་བཅས་པ་ལ་སོགས་པ་མངོན་སུམ་དུ་རིག་པའི་ཏིང་ངེ་འཛིན་མཚུངས་ལྡན་དང་བཅས་པ། དབྱེ་ན། གཞན་སེམས་ཤེས་པ་ཙམ་དང་། མངོན་ཤེས་ཀྱི་དབྱེ་བ་གཉིས། དང་པོ་ནི། ལྷ་ཀླུས་གཞན་རྒྱུད་ཤེས་པ་ལྟ་བུ་སྐྱེས་ཐོབ་ཀྱི། ལུས་ངག་གི་རིག་བྱེད་ལས་ཤེས་པ་ལྟ་བུ་རྟོག་གེའི། སྔགས་བཟླས་པ་ལས་ཤེས་པ་སྔགས་ལ། བསམ་གཏན་གྱི་དངོས་གཞི་ལ་བརྟེན་པ་ཏིང་ངེ་འཛིན་ལ་བརྟེན་པའོ། །ཕྱི་མ་ནི། མངོན་ཤེས་མཚན་ཉིད་པ་ཡང་ཡིན་ནོ། །བཞི་པའི་མཚན་ཉིད། དེ་གང་ཞིག །རང་གི་བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས་རང་གཞན་གྱི་ཚེ་རབས་སྔ་མ་དུ་མ་མངོན་སུམ་དུ་དྲན་པར་ནུས་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ། དབྱེ་ན། འདོད་གཟུགས་ཀྱི་ལྷའི་ལྟ་བུ་སྐྱེས་ཐོབ་ཀྱི། ད་ལྟར་གྱི་མི་འགས་རང་གི་སྐྱེ་བ་སྔ་མ་དྲན་པ་ལྟ་བུ་ལས་ལ་སྐྱེས་པའི། བསམ་གཏན་གྱི་དངོས་གཞི་ལ་བརྟེན་པ་ཏིང་ངེ་འཛིན་ལ་བརྟེན་པའི་འོ། །ལྔ་པའི་མཚན་ཉིད། དེ་གང་ཞིག །རང་གི་ཐུན་མོང་མ་ཡིན་པའི་བདག་རྐྱེན་བསམ་གཏན་གྱིས་སྦྱངས་པའི་མིག་དབང་གཟུགས་ཅན་པ་ལ་བརྟེན་ནས་འཇིག་རྟེན་གྱི་ཁམས་ཀྱི་གཟུགས་ཕྲ་རགས་མངོན་སུམ་དུ་མཐོང་བའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ། དབྱེ་ན། ལྷའི་རྣ་བའི་སྐབས་སུ་བཤད་པ་ལྟར་རོ། །དེ་ཡང་ལྷའི་རྣ་བ་དང་མིག་དབང་གི་མངོན་ཤེས་འདི་དག་ལ་ཁྱད་ཆོས་བཞི་དང་ལྡན་ཏེ། མཛོད་ལས། ལྷ་ཡི་མིག་དང་རྣ་བ་ཡིས། །བསམ་གཏན་ས་པའི་གཟུགས་དྭངས་བ། །རྟག་ཏུ་རྟེན་བཅས་མ་ཚང་མེད། །ཐག་རིང་ཕྲ་སོགས་སྤྱོད་ཡུལ་ཅན། །ཞེས་སོ། །དྲུག་པའི་མཚན་ཉིད། དེ་གང་ཞིག །བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས་ཟག་པ་ཟད་པ་དང་། ཟག་པ་ཟད་པའི་ཐབས་གང་རུང་མངོན་སུམ་དུ་ཤེས་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ། དབྱེ་ན་ཟག་ཟད་རང་གི་ངོ་བོ་ཤེས་པའི་དང་། དེའི་ཐབས་ཤེས་པའི་མངོན་ཤེས་གཉིས། དང་པོ་ནི། བསམ་གཏན་གྱི་དངོས་གཞི་ཐོབ་པའི་ཉན་ཐོས་དགྲ་བཅོམ་པའི་མཁྱེན་པ་ལྟ་བུ་ཉོན་སྒྲིབ་ཀྱི་དང་། རྣམ་མཁྱེན་ལྟ་བུ་ཤེས་སྒྲིབ་ཀྱིའོ། །གཉིས་པ་ནི། བསམ་གཏན་གྱི་དངོས་གཞི་ཐོབ་པའི་ཉན་ཐོས་སློབ་པ་འཕགས་པའི་མཁྱེན་པ་ལྟ་བུ་ཉོན་སྒྲིབ་ཀྱི་དང་། ཐེག་ཆེན་སློབ་པ་འཕགས་པའི་མཁྱེན་པ་ལྟ་བུ་ཤེས་སྒྲིབ་ཀྱིའོ། །བཞི་པ་ལ། བསྡུ་བ། གྲངས་ངེས། ས་མཚམས་དང་གསུམ། དང་པོ་ལ། འཇིག་རྟེན་ལས་འདས་པའི་མངོན་ཤེས་དང་། འཇིག་རྟེན་པའི་དེ་གཉིས། དང་པོའི་དབང་དུ་བྱས་ནས་དྲུག་པ་བཞག །གཉིས་པ་ལ། དབང་ཤེས་ཀྱི་ངོ་བོར་གྱུར་པའི་དབང་དུ་ལྷའི་མིག་དང་རྣ་བའི་མངོན་ཤེས་བཞག །ཡིད་ཤེས་ཀྱི་དབང་དུ་ལྷག་མ་གསུམ་བཞག །མཛོད་ལས། མིག་དང་རྣ་བའི་མངོན་ཤེས་ནི། །ལུང་དུ་མ་བསྟན་ལྷག་རྣམས་དགེ །ཞེས་སོ། །དེ་ཡང་དང་པོ་གཉིས་ལུང་མ་བསྟན་གཙོ་ཆེ་བ་ཡིན་གྱི་མཐའ་གཅིག་ཏུ་མ་ངེས། ཕྱི་མ་གསུམ་ཡིད་ཤེས་སུ་བཤད་པའང་གནས་སྐབས་ལ་དགོངས་སོ། །གཉིས་པ་ནི། གཞན་དོན་ཕུན་ཚོགས་གཙོ་བོར་སྒྲུབ་པའི་དབང་དུ་མངོན་ཤེས་ལ་དྲུག་ཏུ་བཞག་སྟེ། རྒྱན་ལས། གཤེགས་ནས་སྤྱོད་པ་མཁྱེན་མཛད་དེ། །དེ་དག་སྐད་ཀྱིས་སེམས་ཅན་གྱི། །འོང་དང་འགྲོ་དང་ངེས་འབྱུང་ལ། །ལེགས་འདོམས་ཁྱོད་ལ་ཕྱག་འཚལ་ལོ། །ཞེས་སོ། །གསུམ་པ་ནི། དང་པོ་ལྔ་ལམ་མ་ཞུགས་ནའང་ཡོད་དེ། བསམ་གཏན་གྱི་དངོས་གཞི་ཐོབ་པའི་ཕྱི་རོལ་པ་སོགས་ཀྱི་རྒྱུད་ལའང་ཡོད་པའི་ཕྱིར། དྲུག་པ་བསམ་གཏན་གྱི་དངོས་གཞི་ཐོབ་པའི་འཕགས་པ་མཐའ་དག་གི་རྒྱུད་ལ་ཡོད་དོ། །གསུམ་པ་ནི། འཕགས་པའི་གནས་པ་རྣམ་ཐར་སྒོ་གསུམ། ལྷའི་གནས་པ་བསམ་གཏན་གཟུགས་མེད་ཀྱི་སྙོམས་འཇུག །ཚངས་པའི་གནས་པ་ཚད་མེད་བཞི་མངོན་དུ་བྱས་ཏེ། གནས་སྐབས་སུ་སངས་རྒྱས་ཡོད་པའི་ཕྱོགས་སུ་སོང་ནས་དེ་ལ་མཆོད་པ་བྱེད། སེམས་ཅན་ཡོད་པའི་ཕྱོགས་སུ་སོང་ནས་དེའི་དོན་བྱས་ཏེ། མཐར་ཐུག་རྣམ་མཁྱེན་ཐོབ་པར་བྱེད་དོ། །ངག་དོན་ནི། མངོན་ཤེས་དྲུག་ལ་འདོམས་པའི་གདམས་ངག་གསུངས་པ་ཆོས་ཅན། དགོས་པ་ཡོད་དེ། མངོན་ཤེས་དྲུག་ཡུལ་དང་བཅས་པ་བདེན་སྟོང་དུ་ཉམས་སུ་ལེན་པར་ཤེས་པའི་ཆེད་ཡོད་པའི་ཕྱིར།

གཉིས་པ་ནི། དམིགས་པ་དང་ནི་རྣམ་པ་དང་། ཞེས་པའི་སྐབས་སུ་གཉིས་ཀྱི། དང་པོ་སྦྱོར་ལམ་ལ། ལུས་རྟེན། སེམས་རྟེན། བརྟེན་པ་སྦྱོར་ལམ་གྱི་རང་བཞིན་དང་གསུམ། དང་པོ་ནི། ཚོགས་ལམ་ཆེན་པོའི་རྟོགས་པ་ཐོབ་པ་ལ་མ་བཏང་བའི་འདོད་གཟུགས་ཀྱི་རྟེན་ལ་དངོས་སུ་སྐྱེ་བ་ཡོད་ཀྱི། གཟུགས་མེད་ཀྱི་རྟེན་ལ་དངོས་སུ་སྐྱེ་བ་མེད་དོ། །

གཉིས་པ་ལ། སྤྱིར་བསྟན་པ་དང་། ཐེག་ཆེན་གྱི་སྦྱོར་ལམ་གྱི་སེམས་རྟེན་བྱེ་བྲག་ཏུ་བཤད་པ་གཉིས། དང་པོ་ནི། བསམ་གཏན་ས་དྲུག་གང་རུང་ལ་བརྟེན་པར་བཤད་དེ། མཛོད་ལས། ངེས་འབྱེད་ཆ་མཐུན་རྣམ་པ་བཞི། །སྒོམ་བྱུང་མི་ལྕོགས་མེད་པ་དང་། །ཁྱད་པར་བསམ་གཏན་ས་པའོ། །ཞེས་དང་། བསྡུ་བ་ལས། ས་དྲུག་ལ་བརྟེན་པར་བཤད་པའི་ཕྱིར། གཟུགས་མེད་ལ་དངོས་སུ་མི་བརྟེན་ཏེ། དེ་ནི་ལྷག་མཐོང་ཤས་ཆུང་བ་ཞི་ལྷག་ཆ་མི་མཉམ་པའི་སྟོབས་ཀྱིས་ལམ་སྒྲུབ་དཀའ་བའི་ཕྱིར། གཉིས་པ་ཡན་ཆད་ཀྱི་ཉེར་བསྡོགས་ལ་མི་བརྟེན་ཏེ། དང་པོའི་དངོས་གཞི་མ་ཐོབ་པར་དེ་ཐོབ་མི་ནུས་ལ། ལམ་སྒྲུབ་སླ་བ་དངོས་གཞི་ལ་དབང་བཞིན་དུ། སྒྲུབ་དཀའ་བ་ཉེར་བསྡོགས་ལ་བརྟེན་པ་ལ་དགོས་པ་མེད་པའི་ཕྱིར། གཉིས་པ་ནི། བསམ་གཏན་བཞི་པའི་སེམས་ལ་བརྟེན་ནས་ཐེག་ཆེན་གྱི་སྦྱོར་ལམ་གྱི་རྟོགས་པ་དངོས་སུ་སྐྱེ་བ་གཙོ་ཆེ་སྟེ། དེར་བསམ་གཏན་བཞི་པའི་སེམས་ལ་བརྟེན་པར་ནུས་ཤིང་། དེ་ལ་བརྟེན་ནས་ལམ་སྒྲུབ་སླ་བའི་ཕྱིར།

གསུམ་པ་ལ། མཚན་ཉིད་དང་། དབྱེ་བ་གཉིས། དང་པོ་ནི། ཐེག་པ་རང་ལུགས་ཀྱི་ཚོགས་ལམ་རྫོགས་རྗེས་སུ་བྱུང་ཞིང་ཐེག་པ་རང་ལུགས་ཀྱི་མཐོང་ལམ་མ་སྐྱེས་གོང་གི་དོན་མངོན་རྟོགས། དེ་ཡང་སྦྱོར་ལམ། ངེས་འབྱེད་ཆ་མཐུན། ངེས་འབྱེད་ཡན་ལག །དོན་མངོན་རྟོགས་རྣམས་མིང་གི་རྣམ་གྲངས་སོ། །

གཉིས་པ་ལ། ཉན་ཐོས། རང་རྒྱལ། ཐེག་ཆེན་གྱི་དང་གསུམ། དང་པོའི་མཚན་ཉིད། ཉན་ཐོས་ཀྱི་ཚོགས་ལམ་རྫོགས་རྗེས་སུ་བྱུང་ཞིང་ཉན་ཐོས་ཀྱི་མཐོང་ལམ་མ་སྐྱེས་གོང་གི་ཉན་ཐོས་ཀྱི་ངེས་འབྱེད་ཡན་ལག །དབྱེ་ན། དྲོད། རྩེ་མོ། བཟོད་པ། ཆོས་མཆོག་དང་བཞི། གཉིས་པ་ལ། དེས་རིགས་འགྲེ། གསུམ་པ་ལ། མཚན་ཉིད། དབྱེ་བ། སོ་སོའི་རང་བཞིན། གྲངས་ངེས། བློ་རིགས། ཁྱད་ཆོས་དང་དྲུག །དང་པོ་ནི། དམིགས་པ་དང་རྣམ་པ་ལ་སོགས་པ་ཁྱད་ཆོས་ལྔ་ལྡན་གྱི་ཐེག་ཆེན་གྱི་ངེས་འབྱེད་ཡན་ལག །དབྱེ་ན། དྲོད་སོགས་བཞི། གསུམ་པ་ལ། དྲོད་ཀྱི་མཚན་ཉིད། ཐེག་ཆེན་གྱི་སྦྱོར་ལམ་རྩེ་མོ་མ་སྐྱེས་གོང་གི་ངེས་འབྱེད་ཆ་མཐུན་གང་ཞིག །ཀུན་ནས་ཉོན་མོངས་ཀྱི་གཟུང་བ་རང་བཞིན་མེད་པའི་དོན་ལ་གསལ་སྣང་གཙོ་བོར་ཐོབ་པ། དབྱེ་ན། ཆུང་འབྲིང་ཆེ་གསུམ། མཚན་གཞི་རིམ་བཞིན། བྱང་སེམས་སྦྱོར་ལམ་པའི་རྒྱུད་ལ་དང་པོར། བར་དུ། ཐ་མར་སྐྱེས་པའི་དྲོད་དང་གསུམ། རྩེ་མོའི་མཚན་ཉིད། ཐེག་ཆེན་གྱི་སྦྱོར་ལམ་དྲོད་རྫོགས་རྗེས་སུ་བྱུང་ཞིང་། བཟོད་པ་མ་སྐྱེས་གོང་གི་ངེས་འབྱེད་ཆ་མཐུན་གང་ཞིག །རྣམ་བྱང་གི་གཟུང་བ་རང་བཞིན་མེད་པའི་དོན་ལ་གསལ་སྣང་གཙོ་བོར་ཐོབ་པ། བཟོད་པའི་མཚན་ཉིད། ཐེག་ཆེན་གྱི་སྦྱོར་ལམ་རྩེ་མོ་རྫོགས་རྗེས་སུ་བྱུང་ཞིང་། ཆོས་མཆོག་མ་སྐྱེས་གོང་གི་ངེས་འབྱེད་ཆ་མཐུན་གང་ཞིག །གང་ཟག་རྫས་ཡོད་ཀྱི་འཛིན་པ་རང་བཞིན་མེད་པའི་དོན་ལ་གསལ་སྣང་གཙོ་བོར་ཐོབ་པ། ཆོས་མཆོག་གི་མཚན་ཉིད། ཐེག་ཆེན་གྱི་སྦྱོར་ལམ་བཟོད་པ་རྫོགས་རྗེས་སུ་བྱུང་བའི་ངེས་འབྱེད་ཆ་མཐུན་གང་ཞིག །སྐྱེས་བུ་བཏགས་ཡོད་ཀྱི་འཛིན་པ་རང་བཞིན་མེད་པའི་དོན་ལ་གསལ་སྣང་གཙོ་བོར་ཐོབ་པ། དེ་གསུམ་གྱི་དབྱེ་བ་གོང་བཞིན་ནོ། །བཞི་པ་ནི། སྤང་བྱ་རྟོགས་པའི་སྒོ་ནས་བཞིར་ངེས་ཏེ། དྲོད་ཀྱིས་ཀུན་ནས་ཉོན་མོངས་ཀྱི་གཟུང་རྟོག་གཙོ་བོར་འཇོམས་པ་ནས། ཆོས་མཆོག་གིས་བཏགས་འཛིན་རྟོག་པ་གཙོ་བོར་འཇོམས་པའི་ཕྱིར། ལྔ་པ་ནི། ཚོགས་སྦྱོར་མཐའ་དག་རྟོག་པ་ཡིན་ཏེ། ཆོས་ཀྱི་བདག་མེད་དོན་སྤྱིའི་ཚུལ་དུ་འཛིན་པའི་བློ་ཡིན་པའི་ཕྱིར། ཆོས་ཉིད་ཀྱི་དོན་སྤྱི་འཛིན་པ་དང་། མིང་དང་སྤྲོས་པའི་སྒོ་ནས་ཡུལ་འཛིན་པས་རྟོག་པ་སྟེ། ཀུན་ལས་བཏུས་རྩ་འགྲེལ་གཉིས་ཆར་ལས་མིང་དང་སྤྲོས་པའི་སྒོ་ནས་བདེན་བཞི་ལ་བཀྲ་བར་འཛིན་པའི་རྟོག་པར་བཤད་པའི་ཕྱིར། དེས་ན་ཚོགས་སྦྱོར་གྱི་གནས་སྐབས་སུ་གཞན་སེམས་མངོན་སུམ་དུ་ཤེས་པའི་མངོན་ཤེས་སོགས་ཡོན་ཏན་དུ་མ་ཡོད་ཀྱང་ལམ་གྱི་ངོ་བོར་སྐྱེ་བ་མ་ཡིན་ནོ། །དྲུག་པ་ལ། དམིགས་རྣམ་རྒྱུ་གསུམ་གྱི་ཁྱད་ཆོས། སྤང་བྱ་རྟོག་པའི་ཁྱད་ཆོས། ཡོངས་འཛིན་གྱི་ཁྱད་ཆོས་དང་གསུམ། དང་པོ་ལ། དམིགས་རྣམ་དང་། རྒྱུ་བྱེད་ཚུལ་གྱི་ཁྱད་ཆོས་གཉིས། དང་པོ་ནི། ཐེག་དམན་གྱི་སྦྱོར་ལམ་ལས་དམིགས་པ་དམིགས་ཚུལ་དང་། རྣམ་པ་རྟོགས་ཚུལ་གྱི་སྒོ་ནས་ཁྱད་པར་དུ་འཕགས་ཏེ། བདེན་བཞི་མི་རྟག་ལ་སོགས་བཅུ་དྲུག་ལ་དམིགས་ནས་ཆོས་ཀྱི་བདག་མེད་རྟོགས་པའི་རྣམ་པ་ཅན་དུ་ཤེས་པའི་ཕྱིར། གཉིས་པ་ནི། ཐེག་དམན་གྱི་སྦྱོར་ལམ་ལས་རྒྱུ་བྱེད་ཚུལ་གྱི་སྒོ་ནས་ཁྱད་པར་དུ་འཕགས་ཏེ། དེས་ཐེག་པ་གསུམ་གྱི་རྟོགས་རིགས་ཚང་བའི་ཐེག་ཆེན་མཐོང་ལམ་གྱི་རྒྱུ་ལམ་གཞན་གྱིས་བར་མ་ཆོད་པར་བྱེད་ནུས་པའི་ཕྱིར། གཉིས་པ་ནི། ཐེག་དམན་གྱི་སྦྱོར་ལམ་ལས་རྟོག་པ་སྤོང་ཚུལ་གྱི་སྒོ་ནས་ཁྱད་པར་དུ་འཕགས་ཏེ། དེས་གཟུང་འཛིན་རང་བཞིན་མེད་པའི་དོན་ལ་གསལ་སྣང་གཙོ་བོར་ཐོབ་པའི་སྟོབས་ཀྱིས་འདིར་བསྟན་རྟོག་པ་མངོན་གྱུར་དངོས་སུ་སྤོང་ཞིང་། ས་བོན་འགོ་གནོན་པའི་ཕྱིར། གསུམ་པ་ལ། སློབ་དཔོན་ལྟར་ན། ཐེག་དམན་གྱི་སྦྱོར་ལམ་ལས་ཡོངས་སུ་འཛིན་ཚུལ་གྱི་སྒོ་ནས་ཁྱད་པར་དུ་འཕགས་ཏེ། ཁྱད་ཆོས་གསུམ་ལྡན་གྱི་དགེ་བའི་བཤེས་གཉེན་གྱིས་ཐེག་དམན་དུ་མི་ལྟུང་བར་ཐེག་པ་ཆེན་པོར་དངོས་སུ་འཛིན་པའི་ཕྱིར། ཁྱད་ཆོས་གསུམ་ནི། སྟོང་ཉིད་རྟོགས་པའི་ཤེས་རབ་ཀྱི། གཞན་ལ་ཆོས་སྟོན་ནུས་པའི། སེར་སྣ་ལ་སོགས་པ་དང་བྲལ་བ་མི་མཐུན་ཕྱོགས་སྤངས་པའི་ཁྱད་པར་རོ། །དེ་ཡང་། སེམས་མི་འགོང་བ་ཉིད་ལ་སོགས། །ཞེས་པའི་ཚིག་རྐང་དང་པོ་གསུམ་གྱིས་ཁྱད་ཆོས་གསུམ་རིམ་བཞིན་བསྟན། ཚིག་རྐང་བཞི་པས་དེ་ལྡན་ཡོངས་འཛིན་གྱི་ངོ་བོ་བསྟན། འཕགས་གྲོལ་ལྟར་ན། སྦྱོར་ལམ་པ་རང་རྒྱུད་ཀྱི་ཐབས་ཤེས་ཁྱད་པར་ཅན་གཉིས་དང་ལྡན་ཞིང་མི་མཐུན་ཕྱོགས་སེར་སྣ་སོགས་དང་བྲལ་བའི་མཁྱེན་པ་ནི་ནང་གི་ཡོངས་འཛིན་དང་། ཆོས་སྟོན་ཞིང་མི་མཐུན་ཕྱོགས་དང་བྲལ་བའི་དགེ་བཤེས་ཕྱིའི་ཡོངས་འཛིན་དུ་བཞེད། དེ་ཡང་དང་པོ། སེམས་མི་འགོང་བ་ཉིད་ལ་སོགས། །དེ་ཡི་མི་མཐུན་ཕྱོགས་བོར་བ། །རྣམ་པ་ཀུན་ཏུ་ཡོངས་འཛིན་ཡིན། །ཞེས་པས་བསྟན། གཉིས་པ། ངོ་བོ་ཉིད་མེད་སོགས་སྟོན་བྱེད། །ཅེས་སོགས་དཀྱུས་ལྟར་གྱིས་བསྟན། ངག་དོན་ནི། ཐེག་ཆེན་གྱི་སྦྱོར་ལམ་ཆོས་ཅན། ཐེག་དམན་གྱི་སྦྱོར་ལམ་ལས་ཁྱད་པར་དུ་འཕགས་པ་ཡིན་ཏེ། དེ་ལས་དམིགས་པ་དམིགས་ཚུལ། རྣམ་པ་རྟོགས་ཚུལ། རྒྱུ་བྱེད་ཚུལ། ཡོངས་སུ་འཛིན་ཚུལ། སྤང་བྱ་སྤོང་ཚུལ་ཏེ་ཁྱད་ཆོས་ལྔའི་སྒོ་ནས་ཁྱད་པར་དུ་འཕགས་པའི་ཕྱིར།

གསུམ་པ་ལ། སྒྲུབ་པའི་རྟེན་རིགས། སྒྲུབ་པའི་དམིགས་པ། སྒྲུབ་པའི་ཆེད་དུ་བྱ་བ། སྒྲུབ་པ་རང་གི་ངོ་བོ་དང་བཞི། དང་པོ་ནི། ཇི་ལྟར་ཉན་ཐོས་ཀྱི་ཐེག་པ་ལ་སོགས་པ། ཞེས་པའི་སྐབས་སུ་གཉིས་ཀྱི། དང་པོ་སངས་རྒྱས་ཀྱི་རིགས་ལ། དངོས་སྨྲ་བའི་ལུགས་དང་། དབུ་མ་པའི་ལུགས་གཉིས། དང་པོ་ལ། བྱེ་བྲག་ཏུ་སྨྲ་བའི། མདོ་སྡེ་པའི། སེམས་ཙམ་པའི་ལུགས་དང་གསུམ། དང་པོ་ནི། སྲིད་པ་དང་སྲིད་པའི་ཡོ་བྱད་ལ་མ་ཆགས་པའི་སེམས་བྱུང་ཙམ་ལ་འདོད། དབྱེ་ན། ཆོས་གོས། བསོད་སྙོམས། གནས་མལ་ངན་ངོན་ཙམ་གྱིས་ཆོག་ཤེས་པའི་འཕགས་པའི་རིགས། སྤོང་བ་དང་སྒོམ་པ་ལ་རབ་ཏུ་དགའ་བའི་འཕགས་པའི་རིགས་དང་བཞི་ཡོད་དེ། མཛོད་ལས། མ་ཆགས་འཕགས་རིགས་དེ་དག་ལས། །གསུམ་གྱིས་ཚུལ་བསྟན་ཐ་མས་ལས། ཞེས་སོ། །གཉིས་པ་ནི། ཟག་མེད་ཀྱི་ཡེ་ཤེས་འབྱུང་རུང་གི་སེམས་རྒྱུད་ཀྱི་ནུས་པ་ལ་འདོད་དེ། རྒྱལ་པོའི་སྲས་ཀྱིས། མདོ་སྡེ་པ་དག་གི་རིགས་ཞེས་བྱ་བ་ནི་སེམས་ཀྱི་ས་བོན་ནུས་པ་ཡིན་ཏེ། སོ་སོའི་སྐྱེ་བོ་དང་སློབ་པའི་གནས་སྐབས་ན་ཡང་ཡོངས་སུ་ཉམས་པའི་ཆོས་ཅན་གྱི་ས་བོན་ལ་རིགས་ཞེས་བྱའོ། །ཞེས་སོ། །གསུམ་པ་ལ། ཕྱོགས་གླང་དང་། ཐོགས་མེད་ཀྱི་བཞེད་ཚུལ་གཉིས། དང་པོ་ནི། རྒྱུ་དུས་ཀྱི་བརྩེ་བ་དང་། ཤེས་རབ་ཀྱིས་བསྡུས་པའི་དགེ་རྩ་ལ་རིགས་སུ་བཞེད་དེ། དོན་བསྡུས་ལས། འདི་ལྟར་རྣམ་ཤེས་རང་བཞིན་རིགས། །བརྩེ་དང་ཤེས་རབ་བདག་ཉིད་ཡིན། །ཞེས་སོ། །གཉིས་པ་ནི། ཀུན་གཞིའི་སྟེང་གི་ཟག་མེད་ཀྱི་ཡེ་ཤེས་འབྱུང་རུང་གི་ནུས་པ་ལ་བཞེད་དེ། མདོ་ལས། བྱང་ཆུབ་སེམས་དཔའ་རྣམས་ཀྱི་རིགས་དེ་ནི་ཐོག་མ་མེད་པ་ནས་འོངས་པ་ཆོས་ཉིད་ཀྱིས་ཐོབ་པའི་སྐྱེ་མཆེད་དྲུག་གི་ཁྱད་པར་གང་ཡིན་པ་སྟེ། ཞེས་སོ། །རྣམ་གྲངས་ཀྱི་སྒོ་ནས། སྐྱེ་མཆེད་དྲུག་གི་ཁྱད་པར། ཟག་པ་མེད་པའི་ས་བོན། སྒྲིབ་པ་སྤོང་རུང་། ཐོས་པའི་བག་ཆགས་རྣམས་སུ་བཤད། དེ་ལའང་དབྱེ་ན། རང་བཞིན་གནས་རིགས་དང་། རྒྱས་འགྱུར་གྱི་རིགས་གཉིས་སུ་ཡོད།

གཉིས་པ་ལ། ངོ་བོ། དབྱེ་བ། ཁྱད་ཆོས་དང་གསུམ། དང་པོ་ལ། མཚན་གཞི། མཚན་ཉིད། སྒྲ་བཤད་དང་གསུམ། དང་པོ་ནི། སེམས་ཅན་གྱི་རྒྱུད་ཀྱི་ཡིད་ཀྱི་རྣམ་པར་ཤེས་པ་གསལ་རིག །དེའི་ཆོས་ཉིད། བྱང་ཆུབ་དོན་གཉེར་གྱི་བསམ་པས་ཟིན་པའི་དགེ་རྩ་རྣམས་མཚན་གཞི་ཡིན་ནོ། །གཉིས་པ་ནི། སངས་རྒྱས་ཀྱི་རིགས་གང་ཞིག །དྲི་མེད་མངོན་དུ་གྱུར་པ་མཐར་ཐུག་གི་ཚེ་རང་དོན་ཆོས་སྐུར་གསར་དུ་གདག་བྱ། གསུམ་པ་ནི། གུ་ཎ་ཏཱ་ར་ཞེས་པའི་སྒྲ་ལས་ཡོན་ཏན་སྒྲོལ་བའི་དོན་གྱིས་རིགས་ཞེས་བྱ་སྟེ། རྒྱན་ལས། རང་བཞིན་དང་ནི་རྒྱས་པ་དང་། །དེ་ནི་རྟེན་དང་བརྟེན་པ་དང་། །ཡོད་མེད་ཉིད་དང་ཡོན་ཏན་ནི། །སྒྲོལ་བའི་དོན་དུ་ཤེས་པར་བྱ། །ཞེས་སོ། །

གཉིས་པ་ལ། མཚན་གཞིའི། ཐེག་པའི། བྱེད་ལས་ཀྱི་སྒོ་ནས་དབྱེ་བ། བདེ་གཤེགས་སྙིང་པོའི་དབྱེ་བ་བྱེ་བྲག་ཏུ་བཤད་པ་དང་བཞི། དང་པོ་ལ། རང་བཞིན་གནས་རིགས་དང་། རྒྱས་འགྱུར་གྱི་རིགས་གཉིས། དང་པོ་ལ། མཚན་གཞི། མཚན་ཉིད། དབྱེ་བ་གསུམ། དང་པོ་ལ་ཡང་། ཆོས་ཅན་གསལ་རིག་གི་ལྡོག་པ་ནས། ཆོས་ཉིད་སྟོང་པ་ཉིད་ཀྱི་ལྡོག་པ་ནས། ཟུང་འཇུག་ཆོས་དབྱིངས་ཀྱི་ལྡོག་པ་ནས་རང་བཞིན་གནས་རིགས་སུ་བཤད་ཚུལ་གསུམ་ཡོད། དང་པོའི་དབང་དུ། རྒྱུད་བླར། ལུས་ཅན་ལ་ཡོད་ཟག་པའི་ཤེས་པ་སྦྲང་མའི་རྩི་དང་འདྲ། །ཞེས་དང་། བསྟོད་ཚོགས་སུ། བདེ་ལེགས་སེམས་ལ་སངས་རྒྱས་འབྱུང་། །རང་སེམས་དེ་ལ་ཕྱག་འཚལ་ལོ། །ཞེས་དང་། ཉོན་མོངས་ནང་ན་ཡེ་ཤེས་ཀྱང་། །དེ་བཞིན་དྲི་མ་མེད་པར་གནས། །ཞེས་སོ། །གཉིས་པའི་དབང་དུ་དཀོན་བརྩེགས་ལས། གང་ལ་འདུ་བྱེད་ཅུང་ཟད་ཀྱང་མེད་པ་དེ་ནི་འདུས་མ་བྱས་པ་ཡིན་ལ། འདུས་མ་བྱས་པ་གང་ཡིན་པ་དེ་ནི། འཕགས་པ་རྣམས་ཀྱི་རིགས་ཡིན་ཏེ། རིགས་དེ་ནི་ནམ་མཁའ་དང་མཉམ་པས་ཁྱད་པར་མེད་པའོ། །ཞེས་སོ། །གསུམ་པའི་དབང་དུ་ཕལ་ཆེན་ལས། ཀྱེ་རྒྱལ་བའི་སྲས། བྱང་ཆུབ་སེམས་དཔའི་རིགས་ཞེས་བྱ་བ་ནི་ཆོས་ཀྱི་དབྱིངས་ལྷུར་ལེན་པ་ནམ་མཁའ་ལྟར་ཡངས་པ་རང་བཞིན་གྱིས་འོད་གསལ་བ་སྟེ། ཞེས་དང་། རྩ་བར། སྒྲུབ་པ་ཡི་ནི་རྟེན་གྱུར་པ། །ཆོས་ཀྱི་དབྱིངས་ཀྱི་རང་བཞིན་དང་། །ཞེས་སོ། །དེ་ཡང་གསལ་སྟོང་ཟུང་འཇུག་གི་ཆོས་དབྱིངས། བདེ་བར་གཤེགས་པའི་སྙིང་པོ། ཀུན་གཞིའི་ཡེ་ཤེས་རྣམས་མིང་གི་རྣམ་གྲངས་ཡིན་ཅིང་། དེ་དག་ལ། གཞི་དུས། ལམ་དུས། འབྲས་དུས་གསུམ་གསུམ་དུ་ཡོད་དེ། རྒྱན་སྟུག་པོ་བཀོད་པ་ལས། ས་རྣམས་སྣ་ཚོགས་ཀུན་གཞི་སྟེ། །བདེ་གཤེགས་སྙིང་པོ་དགེ་བའང་དེ། །སྙིང་པོ་དེ་ལ་ཀུན་གཞིའི་སྒྲས། །དེ་བཞིན་གཤེགས་པས་སྟོན་པར་མཛད། །སྙིང་པོ་ཀུན་གཞིར་བསྟན་པ་ཡང་། །བློ་ཆུང་རྣམས་ཀྱིས་མི་ཤེས་སོ། །སེམས་ཀྱི་རང་བཞིན་འོད་གསལ་བ། །དེ་བཞིན་གཤེགས་པའི་སྙིང་པོ་དགེ །ཞེས་གསུངས་སོ། །གཉིས་པ་ནི། རང་གི་རིགས་འདྲ་ཐོག་མེད་ནས་གནས་པའི་སངས་རྒྱས་ཀྱི་རིགས་གང་ཞིག །དྲི་མེད་མངོན་དུ་གྱུར་པ་མཐར་ཐུག་གི་ཚེ་རང་དོན་ཆོས་སྐུར་གསར་དུ་གདག་བྱ། གསུམ་པ་ལ། མཚན་གཞི་དང་། བྱེད་ལས་ཀྱི་སྒོ་ནས་དབྱེ་བ་གཉིས། དང་པོ་ལ། འདུས་བྱས་རང་བཞིན་གནས་རིགས་དང་། འདུས་མ་བྱས་རང་བཞིན་གནས་རིགས་གཉིས། དང་པོའི་མཚན་ཉིད། རང་བཞིན་གནས་རིགས་གང་ཞིག །དྲི་མེད་མངོན་དུ་གྱུར་པ་མཐར་ཐུག་གི་ཚེ་རྟོགས་ཡེ་ཆོས་སྐུར་གསར་དུ་གདག་བྱ། མཚན་གཞི། ཚོགས་བརྒྱད་ཀྱི་ནང་ནས་དབང་ཤེས་ལ་མི་འཇོག་སྟེ། དེ་ནི་གཟུགས་མེད་ཁམས་ལ་སོགས་པར་རིགས་འདྲ་རྒྱུན་ཆད་པའི་ཕྱིར། ཉོན་ཡིད་དང་ཀུན་གཞི་ལ་མི་འཇོག་སྟེ། དེ་དག་ནི་རྣམ་མཁྱེན་ཐོབ་པའི་ཚེ་རིགས་འདྲ་རྒྱུན་ཆད་པའི་ཚུལ་གྱིས་སྤང་དགོས་པའི་ཕྱིར། དེས་ན་དྲི་བཅས་ཀྱི་ཡིད་ཀྱི་རྣམ་པར་ཤེས་པ་གསལ་རིག་ཙམ་ལ་འཇོག་སྟེ། རིགས་འདྲ་སེམས་ཅན་ཐམས་ཅད་ལ་ཁྱབ་པ་དང་། མཐར་ཐུག་རྣམ་མཁྱེན་གྱི་རྒྱུ་བྱེད་ནུས་པའི་ཕྱིར། གཉིས་པའི་མཚན་ཉིད། དེ་གང་ཞིག་དྲི་མེད་མངོན་དུ་གྱུར་བར་མཐར་ཐུག་གི་ཚེ་ངོ་བོ་ཉིད་སྐུར་གསར་དུ་གདག་བྱ། མཚན་གཞི། དྲི་མ་དང་བཅས་པའི་ཡིད་ཀྱི་རྣམ་པར་ཤེས་པའི་ཆོས་ཉིད་ལྟ་བུ། གཉིས་པ་ལ། སྒྲུབ་པའི་རྟེན་བྱེད་པ་དང་། མི་བྱེད་པའི་རང་བཞིན་གནས་རིགས་གཉིས། དང་པོའི་མཚན་ཉིད། དེ་གང་ཞིག །རང་གི་རྟེན་ཆོས་སྒྲུབ་པའི་རྟེན་གཞི་བྱེད་པ། དབྱེ་ན། ཐེག་དམན་དང་། ཐེག་ཆེན་གྱི་སྒྲུབ་པའི་རྟེན་རང་བཞིན་གནས་རིགས་གཉིས། མཚན་གཞི། དེ་དག་སོ་སོའི་སློབ་པའི་རྒྱུད་ཀྱི་སེམས་ཀྱི་ཆོས་ཉིད་ལྟ་བུ། འདིར་བསྟན་གྱི་སྒྲུབ་པ་བཅུ་གསུམ་གྱི་རྟེན་བྱེད་པའི་རང་བཞིན་གནས་རིགས་བཅུ་གསུམ་ཡོད། གཉིས་པ་ནི། ལམ་མ་ཞུགས་ཀྱི་དྲི་བཅས་སེམས་ཀྱི་ཆོས་ཉིད་ལྟ་བུ། གཉིས་པ་རྒྱས་འགྱུར་གྱི་རིགས་ཀྱི་མཚན་ཉིད། རང་གི་རིགས་འདྲ་རྐྱེན་གྱིས་གསར་དུ་བླངས་པ་ལས་བྱུང་བའི་རིགས་གང་ཞིག །དྲི་མེད་མངོན་དུ་གྱུར་པ་མཐར་ཐུག་གི་ཚེ་རྟོགས་ཡེ་ཆོས་སྐུར་གསར་དུ་གདག་བྱ། དབྱེ་ན། ལམ་གྱི་ངོ་བོར་གྱུར་པ་དང་། དེ་ལས་གཞན་པའི་རྒྱས་འགྱུར་གྱི་རིགས་གཉིས། དང་པོ་ནི། ཐེག་དམན་དང་། ཐེག་ཆེན་སློབ་པའི་རྒྱུད་ཀྱི་མཁྱེན་པ་ལྟ་བུ། གཉིས་པ་ནི། བྱང་ཆུབ་དོན་གཉེར་གྱི་བསམ་པས་ཟིན་པའི་ལམ་མ་ཞུགས་ཀྱི་དགེ་རྩ་ལྟ་བུ། གཉིས་པ་ལ། ཐེག་ཆེན་དང་། ཐེག་དམན་གྱི་རིགས་གཉིས། མཚན་ཉིད་རིམ་བཞིན། སངས་རྒྱས་ཀྱི་རིགས་གང་ཞིག །རང་གང་ལ་ལྡན་པའི་རྟེན་གྱི་གང་ཟག་ཐེག་ཆེན་གྱི་རིགས་ཅན་དུ་མཚོན་པར་བྱེད་ནུས་ཀྱི་སེམས་ཆོས། དེ་གང་ཞིག །རང་རྒྱུད་ལྡན་གྱི་གང་ཟག་ཐེག་དམན་གྱི་རིགས་ཅན་དུ་མཚོན་པར་བྱེད་ནུས་ཀྱི་སེམས་ཆོས། དབྱེ་ན། ཐེག་པའི་ཆེ་ཆུང་སོ་སོའི་ལམ་ཐོབ་པ་དང་། མ་ཐོབ་པའི་སོ་སོའི་རིགས་གཉིས། གསུམ་པ་ལ། ངེས་པའི་དང་། མ་ངེས་པའི་རིགས་གཉིས། དང་པོའི་མཚན་ཉིད། ཐོག་མ་ཉིད་ནས་རང་གི་འཐོབ་བྱ་བྱང་ཆུབ་ཀྱི་རྒྱུར་ངེས་པའི་སྟོབས་ཀྱིས། གནས་སྐབས་སུ་རྐྱེན་གྱིས་ལམ་གཞན་དུ་དཀྲིར་མི་ཐུབ་པའི་རིགས། དབྱེ་ན་ཐེག་དམན་དང་། ཐེག་ཆེན་དུ་ངེས་པའི་རིགས་གཉིས། གཉིས་པའི་མཚན་ཉིད། སངས་རྒྱས་ཀྱི་རིགས་གང་ཞིག །དགེ་བའི་བཤེས་གཉེན་ལ་སོགས་པའི་རྐྱེན་གྱིས་གནས་སྐབས་ལམ་གཞན་དུ་དཀྲིར་རུང་བ། དབྱེ་ན། ཐེག་དམན་དང་། ཐེག་ཆེན་དུ་མ་ངེས་པའི་རིགས་གཉིས། རྒྱན་ལས། རིགས་ནི་ངེས་དང་མ་ངེས་དང་། །རྐྱེན་རྣམས་ཀྱིས་ནི་མི་འཕྲོག་དང་། །འཕྲོག་པ་ཉིད་དེ་མདོར་ན་རིགས། །དབྱེ་བ་འདི་ནི་རྣམ་པ་བཞི། །ཞེས་སོ། །བཞི་པ་ལ། མིང་ཙམ་མཐུན་པའི་སྒོ་ནས་དབྱེ་བ་དང་། མཚོན་བྱེད་དཔེའི་སྒོ་ནས་དབྱེ་བ་གཉིས། དང་པོ་ལ། གཞི་དུས་ཀྱི། རྒྱུ་དུས་ཀྱི། འབྲས་དུས་ཀྱི་བདེ་གཤེགས་སྙིང་པོ་དང་གསུམ། དང་པོ་ནི། བརྟན་གཡོ་ཀུན་ལ་ཁྱབ་པའི་སྣང་སྟོང་ཟུང་འཇུག་གི་ཆོས་དབྱིངས། གཉིས་པ་ནི། སེམས་ཅན་གྱི་རྒྱུད་ཀྱི་གསལ་སྟོང་ཟུང་འཇུག་གི་ཆོས་དབྱིངས། གསུམ་པ་ནི། དག་པ་གཉིས་ལྡན་གྱི་ཆོས་དབྱིངས་མཐར་ཐུག །གཉིས་པ་ལ། རྩ་བའི་སྒོ་ནས་ཆོས་སྐུ། དེ་བཞིན་ཉིད། རིགས་གསུམ་སྟེ། རྒྱུད་བླར། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་སོ། །ཡན་ལག་གི་སྒོ་ནས། དང་པོ་ལ། ཆོས་དབྱིངས་ཤིན་ཏུ་དྲི་མ་མེད་པའི། ཟབ་པའི། རྒྱ་ཆེ་བའི་ཆོས་སྐུ་དང་གསུམ། གསུམ་པ་ལ། ངོ་བོའི་སྒོ་ནས་རིགས་གཉིས། ནུས་པའི་སྒོ་ནས་སྐུ་གསུམ་སྟེ་ལྔ་ཡོད་དེ། རྒྱུད་བླར། འདི་ཡི་རང་བཞིན་ཆོས་སྐུ་དང་། །དེ་བཞིན་ཉིད་དང་རིགས་ཀྱང་སྟེ། །དེ་ནི་དཔེ་གསུམ་གཅིག་དང་ནི། །ལྔ་རྣམས་ཀྱིས་ནི་ཤེས་པར་བྱ། །ཞེས་དང་། ཆོས་སྐུའི་རྒྱས་བཤད་དུ། ཆོས་སྐུ་རྣམ་གཉིས་ཤེས་བྱ་སྟེ། །ཆོས་དབྱིངས་ཤིན་ཏུ་དྲི་མེད་དང་། །དེ་ཡི་རྒྱུ་མཐུན་ཟབ་པ་དང་། །སྣ་ཚོགས་ཚུལ་ནི་སྟོན་པའོ། །ཞེས་དང་། རིགས་ཀྱི་རྒྱས་བཤད་དུ། གཏེར་དང་འབྲས་བུའི་ཤིང་བཞིན་དུ། །ཞེས་སོགས་གསུངས་པའི་ཕྱིར། དེ་དག་མཚོན་པར་བྱེད་པའི་དཔེ་དེ་ལ་ཡང་དགུ་ཡོད་ཅིང་། དང་པོ་གསུམ་མཚོན་པའི་དཔེ་ནི། པདྨའི་ནང་ན་ཡོད་པའི་སངས་རྒྱས། སྦྲང་མ་ལ་ཡོད་པའི་སྦྲང་རྩི། སྦུན་པ་ལ་ཡོད་པའི་སྙིང་པོ། མི་གཙང་བའི་ནང་ན་ཡོད་པའི་གསེར་ནི། དེ་བཞིན་ཉིད་ཀྱི་དཔེ། ཕྱི་མ་ལྔའི་དཔེ་ནི། ས་འོག་གི་གཏེར། ལྗོན་ཤིང་སྐྱེད་པའི་འབྲས་བུ་ནི། རིགས་གཉིས་ཀྱི་དཔེ། གོས་ཧྲུལ་གྱི་ནང་ན་ཡོད་པའི་སྐུ་གཟུགས། བུད་མེད་ངན་མའི་ལྟོ་བ་ན་ཡོད་པའི་འཁོར་ལོས་སྒྱུར་རྒྱལ། ས་འདམ་གྱི་ནང་ན་ཡོད་པའི་སྐུ་གཟུགས་ནི། སྐུ་གསུམ་གྱི་དཔེ་ཡིན་ཏེ། རྒྱུད་བླར། སངས་རྒྱས་པད་ངན་སྦྲང་རྩི་སྦྲང་མ་ལ། །སྦུན་ལ་སྙིང་པོ་མི་གཙང་ནང་ན་གསེར། །ས་ལ་གཏེར་དང་མྱུག་སོགས་འབྲས་ཆུང་དང་། །གོས་ཧྲུལ་ནང་ན་རྒྱལ་བའི་སྐུ་དང་ནི། །བུད་མེད་ངན་མའི་ལྟོ་ན་མི་བདག་དང་། །ས་ལ་རིན་ཆེན་གཟུགས་ཡོད་ཇི་ལྟ་བར། །གློ་བུར་ཉོན་མོངས་དྲི་མས་བསྒྲིབས་པ་ཡི། །སེམས་ཅན་རྣམས་ལ་དེ་བཞིན་ཁམས་འདི་གནས། །ཞེས་སོ། །

གསུམ་པ་ལ། རིགས་སད་ཚུལ་དང་། རིགས་སུ་འགྱུར་ཚུལ་གཉིས། དང་པོ་ལ། རིགས་སད་པའི་རྟགས། དེའི་གེགས། དེའི་ཕན་ཡོན་དང་གསུམ། དང་པོ་ནི། ལམ་ལ་སྦྱོར་བའི་སྔོན་དུ་བསམ་པའི་ཡོན་ཏན་རང་བཞིན་གྱིས་སྙིང་རྗེ་ཆེ་བ། ཐེག་ཆེན་གྱི་ཆོས་ལ་མོས་པ། སྦྱོར་བའི་ཡོན་ཏན་ཆོས་སྒྲུབ་པའི་དཀའ་སྤྱད་ལ་སྲན་བཟོད་པ། སྦྱིན་སོགས་ཀྱི་དགེ་བ་ཡང་དག་པར་སྤྱོད་པ་སྟེ། རྒྱན་ལས། སྦྱོར་བའི་སྔོན་དུ་སྙིང་རྗེ་དང་། །མོས་པ་དང་ནི་བཟོད་པ་དང་། །དགེ་བ་ཡང་དག་སྤྱོད་པ་ནི། །རིགས་ཀྱི་རྟགས་སུ་ངེས་པར་བཤད། །ཅེས་སོ། །གཉིས་པ་ནི། ཉོན་མོངས་པ་ཤས་ཆེར་གོམས་པ། གྲོགས་ངན་པ་དང་འགྲོགས་པ། ཆོས་སྒྲུབ་པའི་མཐུན་རྐྱེན་གྱིས་ཕོངས་པ། མི་དགེ་བའི་བཤེས་གཉེན་གྱིས་གཞན་གྱི་དབང་དུ་གྱུར་པ་སྟེ། རྒྱན་ལས། ཉོན་མོངས་གོམས་དང་གྲོགས་ངན་དང་། །ཕོངས་དང་གཞན་གྱི་དབང་ཉིད་དང་། །མདོར་ན་རིགས་ཀྱི་ཉེས་དམིགས་ནི། །རྣམ་པ་བཞིར་ནི་ཤེས་པར་བྱ། །ཞེས་སོ། །གསུམ་པ་ནི། ཐེག་ཆེན་གྱི་རིགས་ནི་ཤིང་གི་རྩ་བ་བཟང་པོ་ལྟ་བུ་ཡིན་ཏེ། རྒྱན་ལས། ཡོན་ཏན་ཤིན་ཏུ་རྒྱ་ཆེན་བྱང་ཆུབ་ཤིང་བསྐྱེད་ཕྱིར། །བདེ་དང་སྡུག་བསྔལ་ཆེན་པོ་ཞི་བ་ཐོབ་བྱའི་ཕྱིར། །བདག་དང་གཞན་ལ་ཕན་བདེ་བྱེད་པ་འབྲས་བུའི་ཕྱིར། །རིགས་མཆོག་དེ་ནི་རྩ་བ་བཟང་པོ་ལྟ་བུ་ཡིན། །ཞེས་སོ། །གཉིས་པ་ལ། རྟེན་གྱི་སྒོ་ནས་དང་། དམིགས་པའི་སྒོ་ནས་རིགས་སུ་འགྱུར་ཚུལ་གཉིས། དང་པོ་ནི། དྲི་མ་དང་བཅས་པའི་ཤེས་པའི་ཆོས་ཉིད་རྟེན་གྱི་སྒོ་ནས་རིགས་སུ་འགྱུར་ཏེ། རྩ་བར། འཇུག་པའི་རྟེན་ལ་རིགས་ཞེས་བྱ། ཞེས་དང་། འགྲེལ་པར། སྒྲུབ་པའི་ཆོས་ཀྱི་གནས་སྐབས་ཐ་དད་པའི་བྱེ་བྲག་གིས་བྱང་ཆུབ་སེམས་དཔའ་རྣམ་པ་བཅུ་གསུམ་པོ་ཇི་སྐད་དུ་བཤད་པའི་ཆོས་ཀྱི་གཞིར་གྱུར་པའི་ཆོས་ཀྱི་དབྱིངས་ཀྱི་ངོ་བོ་ཉིད་ཁོ་ན་ལ་རིགས་ཞེས་བསྟན་ཏོ། །ཞེས་སོ། །གཉིས་པ་ནི། དམིགས་པའི་སྒོ་ནས་རིགས་སུ་འགྱུར་ཏེ། ཐེག་ཆེན་གྱི་སྒྲུབ་པས་ཆོས་དབྱིངས་ལ་དམིགས་ཤིང་གོམས་པར་བྱས་པ་ལ་བརྟེན་ནས་དྲི་མ་རྣམས་རིམ་གྱིས་སྦྱང་ནས། ཆོས་ཉིད་རྟོགས་པ་མཐར་ཐུག་པར་འགྱུར་བའི་ཕྱིར། ངག་དོན་ནི། བྱང་སེམས་སྦྱོར་ལམ་པའི་རྒྱུད་ཀྱི་དྲི་མ་དང་བཅས་པའི་ཤེས་པའི་ཆོས་ཉིད་ཆོས་ཅན། སྒྲུབ་པའི་རྟེན་རང་བཞིན་གནས་རིགས་ཡིན་ཏེ། རང་གི་བརྟེན་པ་ཐེག་ཆེན་སྒྲུབ་པའི་རྟེན་གཞིར་གྱུར་པའི་དྲི་བཅས་ཀྱི་ཆོས་ཉིད་ཡིན་པའི་ཕྱིར།

དེའི་འོག་ཏུ། བསམ་པ་ཇི་ལྟ་བ་བཞིན་དུ། ཞེས་པའི་སྐབས་སུ་གཉིས་ཀྱི། དང་པོ་ལ། དྲང་ངེས་ཀྱི་རྣམ་གཞག་སྤྱིར་བསྟན་པ། ལྡེམ་དགོངས་བྱེ་བྲག་ཏུ་བཤད་པ། གདུལ་བྱ་བསྟན་པ་ལ་འཇུག་པའི་རིམ་པ་དང་གསུམ། དང་པོ་ལ། དྲང་ངེས་ངོས་བཟུང་བ། དྲང་ངེས་ཀྱི་དབྱེ་བ། མཚན་ཉིད་དང་གསུམ། དང་པོ་ནི། འཇིག་རྟེན་གྱི་ཐ་སྙད་ཙམ་དུ་གསུངས་པ་ལ་དྲང་དོན་དང་། ཡུལ་གྱི་གནས་ལུགས་མཐར་ཐུག་ལ་ངེས་དོན་ཞེས་བྱ་སྟེ། སྒྲོན་གསལ་ལས། སྐལ་མེད་རྣམས་ལ་རྒྱལ་བ་ཡིས། །སྦས་ཏེ་གསུངས་པ་དྲང་བའི་དོན། །ཞེས་དང་། ཡང་དག་དོན་ནི་རབ་སྟོན་ཕྱིར། །ངེས་པའི་དོན་ཡང་བརྗོད་པར་བྱ། །ཞེས་གསུངས་པའི་ཕྱིར། གཉིས་པ་ལ། རང་གི་བརྗོད་བྱ་སྒྲ་ཇི་བཞིན་པར་ཁས་བླང་དུ་མི་རུང་བ་དང་རུང་བའི་མདོ་ལྟ་བུ་རྗོད་བྱེད་ཀྱི། ཀུན་རྫོབ་གཙོ་བོར་སྟོན་པ་དང་དོན་དམ་གཙོ་བོར་སྟོན་པའི་མདོ་ལྟ་བུ་བརྗོད་བྱའི། གདུལ་བྱ་གང་དག་ལམ་ལ་དང་འབྲས་བུ་ལ་འཇུག་པའི་ཆེད་དུ་གཙོ་བོར་གསུངས་པའི་མདོ་ལྟ་བུ་གདུལ་བྱའི། སྡེ་བ་རང་རང་གི་གྲུབ་མཐའ་དང་མི་མཐུན་པ་དང་མཐུན་པའི་དོན་གཙོ་བོར་སྟོན་པའི་མདོ་ལྟ་བུ་གྲུབ་མཐའི་དབང་དུ་བྱས་པ་དང་བཞི། དེ་ལས་བརྗོད་བྱའི་དབང་དུ་བྱས་པ་དབྱེ་བ་མཚན་ཉིད་པ་དང་། གཞན་གསུམ་བཏགས་པ་བ་ཡིན་ནོ། །དེ་ལྟར་ཡང་དཀོན་བརྩེགས་ལས། མདོ་གང་དག་ཀུན་རྫོབ་སྒྲུབ་པར་བྱེད་པ་དེ་དག་ནི་དྲང་བའི་དོན་ཞེས་བྱའོ། །མདོ་གང་དག་དོན་དམ་སྟོན་པ་དེ་དག་ནི་ངེས་པའི་དོན་ཞེས་བྱའོ། །ཞེས་སོ། །གསུམ་པ་ནི། ཀུན་རྫོབ་བདེན་པ་རང་གི་ཞེན་པའི་བརྗོད་བྱའི་གཙོ་བོར་དངོས་སུ་སྟོན་པའི་མདོ་དང་། དོན་དམ་བདེན་པ་རང་གི་ཞེན་པའི་བརྗོད་བྱའི་གཙོ་བོར་དངོས་སུ་སྟོན་པའི་མདོ། དབྱེ་ན། དྲང་ངེས་སོ་སོ་ལ་ཡང་དྲང་ངེས་ཀྱི་མདོ་གཉིས་གཉིས་ཏེ་བཞི། མཚན་ཉིད། དྲང་ངེས་སོ་སོའི་མཚན་ཉིད་གང་ཞིག །རང་གི་ཚིག་ཟིན་གྱི་བརྗོད་བྱ་སྒྲ་ཇི་བཞིན་དུ་ཁས་བླང་དུ་མི་རུང་བ་དང་། དེ་གང་ཞིག །རང་གི་ཚིག་ཟིན་གྱི་བརྗོད་བྱ་སྒྲ་ཇི་བཞིན་དུ་ཁས་བླང་དུ་རུང་བ།

གཉིས་པ་ལ། དགོངས་པ་ཅན་གྱི་མདོ། ལྡེམ་པོར་དགོངས་པའི་མདོ། དེ་གཉིས་ཀྱི་ཁྱད་པར་བཤད་པ་དང་གསུམ། དང་པོ་ལ། མཉམ་པ་ཉིད། དོན་གཞན། དུས་གཞན། གང་ཟག་གི་བསམ་པ་ལ་དགོངས་པའི་མདོ་དང་བཞི། དང་པོ་ལ། སངས་རྒྱས་ལ་བརྙས་པའི་གཉེན་པོར་མཉམ་པ་ཉིད་གསུམ་ལ་དགོངས་ནས། ང་ཉིད་སངས་རྒྱས་རྣམ་གཟིགས་སོ། །ཞེས་གསུངས་པའི་མདོ་ལྟ་བུ། མཉམ་པ་ཉིད་གསུམ་ནི། རྒྱུ་ཚོགས་གཉིས། འབྲས་བུ་ཆོས་སྐུ། གཞན་དོན་ཕྲིན་ལས་མཉམ་པའོ། །གཉིས་པ་ནི། ཆོས་ལ་བརྙས་པའི་གཉེན་པོར་དོན་གཞན་ལ་དགོངས་ནས། ཕ་དང་མ་ནི་གསད་བྱ་ཞིང་། །རྒྱལ་པོ་གཙང་སྦྲ་ཅན་གཉིས་དང་། །ཡུལ་འཁོར་འཁོར་དང་བཅས་བཅོམ་ན། །མི་དེ་དག་པ་ཉིད་དུ་འགྱུར། །ཞེས་གསུངས་པ་ལྟ་བུ། གསུམ་པ་ནི། ལེ་ལོ་ཅན་འགའ་ཞིག་རྗེས་སུ་བཟུང་བའི་ཕྱིར་བདེ་བ་ཅན་དུ་སྐྱེ་བའི་སྨོན་ལམ་ཚིག་གཅིག་གིས་དེར་སྐྱེ་བར་གསུངས་པའི་མདོ་ལྟ་བུ། བཞི་པ་ནི། མཆོག་འཛིན་བཟློག་པའི་ཕྱིར་དུ་སྦྱིན་པ་ལ་སྨད་ནས་ཚུལ་ཁྲིམས་ཀྱི་བསྔགས་པ་བརྗོད་པའི་མདོ་ལྟ་བུ། རྒྱན་ལས། མཉམ་པ་ཉིད་དང་དོན་གཞན་དང་། །དེ་བཞིན་དུ་ནི་དུས་གཞན་དང་། །གང་ཟག་གི་ནི་བསམ་པ་ལ། །དགོངས་པ་རྣམ་པ་བཞིར་ཤེས་བྱ། །སངས་རྒྱས་ཆོས་ལ་བརྙས་པ་དང་། །ལེ་ལོ་ཅུང་ཟད་ཆོག་འཛིན་དང་། །ང་རྒྱལ་འདོད་ཆགས་སྤྱོད་པ་དང་། །འགྱོད་དང་མ་ངེས་ལྡོག་པ་ནི། །སེམས་ཅན་རྣམས་ཀྱི་སྒྲིབ་པ་སྟེ། །དེ་ཡི་གཉེན་པོར་ཐེག་མཆོག་གསུངས། །ཞེས་སོ། །གཉིས་པ་ལ། གཞུག་པ། མཚན་ཉིད། གཉེན་པོ། བསྒྱུར་བ་ལྡེམ་པོར་དགོངས་པའི་མདོ་དང་བཞི། དང་པོ་ནི། ཉན་ཐོས་པ་ཐེག་ཆེན་གྱི་ལྟ་བ་ལ་ཁ་དྲང་བའི་ཕྱིར་དུ་གཟུགས་སོགས་ཕྱིའི་སྐྱེ་མཆེད་རང་བཞིན་གྱིས་ཡོད་པར་གསུངས་པ་ལྟ་བུ། གཉིས་པ་ནི། སེམས་ཙམ་པ་དབུ་མའི་ལྟ་བ་ལ་ཁ་དྲང་བའི་ཕྱིར་དུ་རིགས་ཆད་གསུངས་པ་ལྟ་བུ། གསུམ་པ་ནི། གོང་དུ་བཤད་པའི་མདོ་བཞི་ལྟ་བུ། བཞི་པ་ནི། སྙིང་པོ་མེད་ལ་སྙིང་པོར་ཤེས། །ཕྱིན་ཅི་ལོག་ལ་ལེགས་པར་གནས། །ཉོན་མོངས་པས་ནི་རབ་ཉོན་མོངས། །བྱང་ཆུབ་དམ་པ་ཐོབ་པར་འགྱུར། །ཞེས་གསུངས་པ་ལྟ་བུ། དེ་ལྟར་ཡང་རྒྱན་ལས། གཞུག་པ་ལྡེམ་པོར་དགོངས་པ་དང་། །མཚན་ཉིད་ལྡེམ་པོར་དགོངས་པ་དང་། །གཉེན་པོ་ལྡེམ་པོར་དགོངས་པ་དང་། །བསྒྱུར་བ་ལྡེམ་པོར་དགོངས་པ་སྟེ། །ཉན་ཐོས་དང་ནི་ངོ་བོ་ཉིད། །དེ་བཞིན་ཉེས་པ་འདུལ་བ་དང་། །བརྗོད་པ་ཟབ་པ་ཉིད་ལ་ནི། །ལྡེམ་པོར་དགོངས་པ་འདི་རྣམ་བཞི། །ཞེས་སོ། །གསུམ་པ་ནི། དགོངས་གཞི་དོན་གཞན་ལ་དགོངས་ནས་གཙོ་བོར་གསུངས་པའི་དྲང་དོན་གྱི་མདོ་ནི་དགོངས་པ་ཅན་གྱི་མདོ་ཡིན་ལ། དགོས་པ་ཁྱད་པར་ཅན་འགའ་ཞིག་གི་ཆེད་དུ་གཙོ་བོར་གསུངས་པའི་དྲང་དོན་གྱི་མདོ་ནི་ལྡེམ་དགོངས་ཀྱི་མདོ་ཡིན་ཞིང་། དེ་གཉིས་འགལ་བ་མ་ཡིན་ཏེ། དགོངས་པ་ཅན་གྱི་མདོ་བཞི་ཀ་ལ་ཡང་གཉེན་པོ་ལྡེམ་པོར་དགོངས་པའི་ཁོངས་སུ་འདུས་པའི་ཕྱིར། མདོ་ཐམས་ཅད་བརྒྱད་པོ་འདིས་བསྡུས་པའང་མ་ཡིན་ཏེ། འདི་དག་དྲང་དོན་གྱི་མདོ་ཙམ་གྱི་དབང་དུ་བྱས་ནས་གསུངས་པའི་ཕྱིར།

གསུམ་པ་ནི། རྟོན་པ་བཞིའི་སྒོ་ནས་གདུལ་བྱ་རྣམས་བསྟན་པ་ལ་འཇུག་སྟེ། གང་ཟག་ལ་མི་རྟོན་ཆོས་ལ་རྟོན། ཚིག་ལ་མི་རྟོན་དོན་ལ་རྟོན། དྲང་དོན་ལ་མི་རྟོན་ངེས་དོན་ལ་རྟོན། རྣམ་ཤེས་ལ་མི་རྟོན་ཡེ་ཤེས་ལ་རྟོན་པའི་ཚུལ་གྱིས་འཇུག །

ངག་དོན་ནི། ས་བཅུ་པའི་ཡེ་ཤེས་ཆོས་ཅན། གཞན་དོན་གོ་རིམ་དུ་བྱེད་པའི་སྒྲུབ་པ་ཡིན་ཏེ། དགོངས་ལྡེམ་དགོངས་བརྒྱད་ཀྱི་སྒོ་ནས་གདུལ་བྱ་རྣམས་ཐེག་པ་གསུམ་གྱི་ལམ་ལ་འགོད་པར་བྱེད་པའི་ས་བཅུ་པའི་ཡེ་ཤེས་ཡིན་པའི་ཕྱིར།

གཉིས་པ་ནི། དམིགས་པ་ཆོས་རྣམས་ཐམས་ཅད་དེ། ཞེས་པའི་སྐབས་སུ་གཉིས་ཀྱི། དང་པོ་ཐེག་ཆེན་སྒྲུབ་པའི་དམིགས་པ་ལ། མཚན་ཉིད། དབྱེ་བ། སོ་སོའི་རང་བཞིན། གོ་རིམ་དང་བཞི། དང་པོ་ནི། ཐེག་ཆེན་སྒྲུབ་པས་སྒྲོ་འདོགས་གཅད་པར་བྱ་བའི་གཞིར་གྱུར་པའོ། །

གཉིས་པ་ལ། དགེ་མི་དགེ་ལུང་མ་བསྟན། འཇིག་རྟེན་དང་འཇིག་རྟེན་ལས་འདས་པའི་ཆོས། ཟག་བཅས་དང་ཟག་མེད། འདུས་བྱས་དང་འདུས་མ་བྱས། ཐུན་མོང་དང་ཐུན་མོང་མ་ཡིན་པའི་ཡོན་ཏན་ཏེ་བཅུ་གཅིག །

གསུམ་པ་ལ། སྤྱིར་བསྟན་གསུམ་དང་། བྱེ་བྲག་ཏུ་བཤད་པ་བརྒྱད། དང་པོ་ལ། དགེ་བ། མི་དགེ་བ། ལུང་མ་བསྟན་གསུམ་ལས། དང་པོའི་མཚན་ཉིད། ལུང་དུ་བསྟན་པ་གང་ཞིག །རང་གི་རྣམ་སྨིན་གྱི་འབྲས་བུ་ཡིད་དུ་འོང་བ་འབྱིན་པའི་རིགས་གནས། དབྱེ་ན་མིང་ཙམ་མཐུན་པའི་སྒོ་ནས། ངོ་བོ་ཉིད་ཀྱི། མཚུངས་ལྡན་གྱི། ཀུན་སློང་གི །དོན་དམ་པའི་དགེ་བ་དང་བཞི། དང་པོ་ནི། དད་སོགས་དགེ་བ་བཅུ་གཅིག་ལྟ་བུ་ཡིན་ཏེ། རང་གི་ངང་གིས་དགེ་བའི་རང་བཞིན་དུ་གནས་པའི་ཕྱིར། གཉིས་པ་ནི། དད་པ་དང་མཚུངས་ལྡན་གྱི་གཙོ་སེམས་དང་། ཀུན་འགྲོ་ལྔ་ལྟ་བུ་སྟེ། མཚུངས་ལྡན་གྲོགས་ཀྱི་སྟོབས་ཀྱིས་དགེ་བའི་ངོ་བོར་སྐྱེས་པའི་ཕྱིར། གསུམ་པ་ནི། དེ་དག་གིས་ཀུན་ནས་བསླངས་པའི་ལུས་ངག་གི་རིག་བྱེད་ལྟ་བུ། བཞི་པ་ནི། ཆོས་ཉིད་དེ་བཞིན་ཉིད་ལྟ་བུ། སྒོ་གསུམ་གྱི་སྒོ་ནས་དབྱེ་ན། མི་དགེ་བ་བཅུའི་འགལ་ཟླར་གྱུར་པའི་དགེ་བའི་ལས་ལམ་བཅུ། གཉིས་པ་མི་དགེ་བའི་མཚན་ཉིད། ལུང་དུ་བསྟན་པ་གང་ཞིག །རང་གི་རྣམ་སྨིན་གྱི་འབྲས་བུ་ཡིད་དུ་མི་འོང་བ་འབྱིན་པའི་རིགས་གནས། དབྱེ་ན། མིང་ཙམ་མཐུན་པའི་སྒོ་ནས། ངོ་བོ་ཉིད་ཀྱི། མཚུངས་ལྡན་གྱི། ཀུན་སློང་གི །དོན་དམ་ལྟར་བརྟགས་པའི། མི་དགེ་བ་དང་བཞི། དང་པོ་གསུམ་གོང་གིས་འགྲེ། བཞི་པ་ནི། འཁོར་བ་ལྟ་བུ། སྒོ་གསུམ་གྱི་སྒོ་ནས། སྲོག་གཅོད་སོགས་མི་དགེ་བ་བཅུ། གསུམ་པ་ལུང་མ་བསྟན་གྱི་མཚན་ཉིད། དགེ་མི་དགེ་གང་རུང་དུ་ལུང་བསྟན་དུ་མེད་པའི་ཆོས། དབྱེ་ན་བཞི་ལས། དང་པོ་ནི། ཀུན་གཞི་དང་ཉོན་ཡིད་ལྟ་བུ། གཉིས་པ་ནི། དེ་དག་དང་མཚུངས་པར་ལྡན་པའི་སེམས་བྱུང་ལྟ་བུ། གསུམ་པ་ནི། དེས་ཀུན་ནས་བསླངས་པའི་ལུས་ངག་གི་རིག་བྱེད་ལྟ་བུ། བཞི་པ་ནི། ནམ་མཁའ་དང་སོ་སོར་བརྟགས་མིན་གྱི་འགོག་པ་ལྟ་བུ། གཉིས་པ་ནི། གཞན་རྣམས་གོ་སླ་ཞིང་། ཟག་བཅས་ཀྱི་མཚན་ཉིད་ཟག་པའི་སྒོ་དྲུག་གང་རུང་གིས་བསྡུས་པ། མཚན་གཞི། འཁོར་བ་ལྟ་བུ། ཟག་མེད་ཀྱི་མཚན་ཉིད། དེས་མ་བསྡུས་པ། མཚན་གཞི། འགོག་བདེན། ལམ་བདེན། འདུས་མ་བྱས་མཐའ་དག་གོ །སྒོ་དྲུག་ནི། ཟག་པའི་བདག་ཉིད། ཟག་པས་བཅིངས་པ། ཟག་པ་དང་འབྲེལ་བ། ཟག་པ་དང་རྗེས་སུ་འབྲེལ་བ། ཟག་པ་དང་རྗེས་སུ་མཐུན་པ། ཟག་པའི་རྒྱུ་ལས་བྱུང་བའོ། །

བཞི་པ་ནི། ཐེག་ཆེན་དུ་རིགས་སད་པའི་གང་ཟག་གིས་དམིགས་པ་ཉམས་སུ་ལེན་པ་ལ་འཇུག་པའི་དབང་དུ་བྱས་ནས་དམིགས་པ་བཅུ་གཅིག་གི་གོ་རིམ་འདི་ལྟར་དུ་བསྟན་པ་ཡིན་ནོ། །དེ་ཡང་དང་པོར་དགེ་སོགས་གསུམ་འཆད་པའི་རྒྱུ་མཚན་ཡོད་དེ། དེས་ཉམས་སུ་ལེན་པའི་ཚེ་བླང་བྱ། དོར་བྱ། བཏང་སྙོམས་སུ་བཞག་བྱ་གསུམ་དུ་ངེས་པའི་ཕྱིར། དེའི་འོག་ཏུ་འཇིག་རྟེན་དང་འཇིག་རྟེན་ལས་འདས་པའི་ཆོས་བཤད་དེ། དགེ་བ་བླང་བྱར་ཤེས་པ་ན། དང་པོར་བླང་བྱའི་དབང་དུ་བྱས་ནས་འཇིག་རྟེན་པའི་ལམ་བཞག །ཕྱི་མ་བླང་བྱའི་དབང་དུ་བྱས་ནས་འཇིག་རྟེན་ལས་འདས་པའི་ལམ་བཞག་པའི་ཕྱིར། དེའི་འོག་ཏུ་ཟག་བཅས་དང་ཟག་མེད་གཉིས་བཤད་དེ། འཇིག་རྟེན་ལས་འདས་པའི་ལམ་གྱི་སྤང་བྱ་དང་ངོ་བོ་ངོ་ཤེས་པའི་ཆེད་ཡོད་པའི་ཕྱིར། དེའི་འོག་ཏུ་འདུས་བྱས་དང་འདུས་མ་བྱས་བཤད་དེ། མཉམ་རྗེས་གཉིས་ཀྱིས་ཀུན་རྫོབ་དང་དོན་དམ་པའི་བདེན་པ་རྟོགས་པར་བྱེད་པའི་ཕྱིར། དེའི་འོག་ཏུ་ཐུན་མོང་དང་ཐུན་མོང་མ་ཡིན་པའི་ཡོན་ཏན་གཉིས་བཤད་དེ། བདེན་པ་གཉིས་རྟོགས་པ་ལ་བརྟེན་ནས་ཡོན་ཏན་དེ་དག་འབྱུང་བའི་ཕྱིར། ངག་དོན་ནི། དགེ་མི་དགེ་ལུང་མ་བསྟན་གསུམ་ཆོས་ཅན། ཐེག་ཆེན་སྒྲུབ་པའི་དམིགས་པ་ཡིན་ཏེ། དེས་སྒྲོ་འདོགས་གཅོད་པའི་གཞིར་གྱུར་པའི་ཆོས་ཡིན་པའི་ཕྱིར།

གསུམ་པ་ནི། སེམས་ཅན་ཀུན་མཆོག་ཉིད་སེམས་དང་། ཞེས་པའི་སྐབས་སུ་གཉིས་ཀྱི། དང་པོ་ཐེག་ཆེན་སྒྲུབ་པའི་ཆེད་དུ་བྱ་བ་ལ། མཚན་ཉིད། དབྱེ་བ། སོ་སོའི་རང་བཞིན། གྲངས་ངེས། གོ་རིམ་དང་ལྔ། དང་པོ་ནི། ཐེག་ཆེན་སྒྲུབ་པའི་ཐོབ་བྱ་མཐར་ཐུག་ཏུ་གྱུར་པའི་བླ་ན་མེད་པའི་བྱང་ཆུབ། དབྱེ་ན། གནས་སྐབས་དང་མཐར་ཐུག་གི་དེ་གཉིས། གསུམ་པ་ལ། དང་པོའི་མཚན་ཉིད། ཐེག་ཆེན་སྒྲུབ་པའི་གནས་སྐབས་ཀྱི་ཐོབ་བྱར་གྱུར་པའི་ཡོན་ཏན། མཚན་གཞི། ཐེག་ཆེན་གྱི་ཚོགས་ལམ་སྐད་ཅིག་གཉིས་པ་ནས་རྒྱུན་མཐའི་བར་གྱི་སྤངས་རྟོགས་ཀྱི་ཡོན་ཏན་ལྟ་བུ། གཉིས་པ་མཐར་ཐུག་ལ། རང་དོན་ཆོས་སྐུ་དང་། གཞན་དོན་གཟུགས་སྐུ་གཉིས། དང་པོ་ལ། སེམས་ཆེན་པོ། སྤོང་བ་ཆེན་པོ། རྟོགས་པ་ཆེན་པོ་དང་གསུམ། དང་པོའི་མཚན་ཉིད། རང་རྒྱུད་ལྡན་གྱི་གང་ཟག་སེམས་ཅན་ཀུན་གྱི་ནང་ནས་མཆོག་ཉིད་དུ་བྱེད་པའི་སངས་རྒྱས་སའི་སེམས་བསྐྱེད། མིང་ཙམ་མཐུན་པའི་སྒོ་ནས། གནས་སྐབས་དང་མཐར་ཐུག་གི་དེ་གཉིས། དང་པོ་ནི། ཐེག་ཆེན་སློབ་པའི་སེམས་བསྐྱེད། གཉིས་པ་ནི། སངས་རྒྱས་སའི་སེམས་བསྐྱེད་མཐའ་དག་གོ །དེ་ལ་དབྱེ་ན། མདོ་ལས། རྡོ་རྗེ་ལྟ་བུའི། རླབས་པོ་ཆེའི། མི་བསྒུལ་པའི། ཕན་བདེའི། དམིགས་པ་མེད་པའི་སེམས་དང་ལྔར་བཤད། གཉིས་པའི་མཚན་ཉིད། རང་རྒྱུད་ལྡན་གྱི་གང་ཟག་སེམས་ཅན་ཀུན་གྱི་ནང་ནས་མཆོག་ཉིད་དུ་བྱེད་པའི་སངས་རྒྱས་སའི་སྤངས་པ། དབྱེ་ན་གོང་ལྟར་གཉིས། མཚན་གཞི་རིམ་བཞིན། བྱང་འཕགས་དང་། སངས་རྒྱས་སའི་འགོག་བདེན་ལྟ་བུ། གསུམ་པའི་མཚན་ཉིད། རང་རྒྱུད་ལྡན་གྱི་གང་ཟག་སེམས་ཅན་ཀུན་གྱི་ནང་ནས་མཆོག་ཉིད་དུ་བྱེད་པའི་སངས་རྒྱས་སའི་རྟོགས་པ། དབྱེ་ན་གོང་ལྟར་གཉིས། མཚན་གཞི་རིམ་བཞིན། བྱང་འཕགས་དང་། སངས་རྒྱས་སའི་མཁྱེན་པ་ལྟ་བུ། དེ་ལ་ཡང་བརྒྱད་སྟོང་པ་ལས། བྱང་ཆུབ་ཀྱི། ཐམས་ཅད་མཁྱེན་པའི། ཟག་པ་མེད་པའི། མཉམ་པ་མེད་པའི། མི་མཉམ་པ་དང་མཉམ་པའི། ཉན་རང་དང་ཐུན་མོང་མ་ཡིན་པའི་སེམས་དང་དྲུག་བཤད། བཞི་པ་ནི། ཐེག་ཆེན་སྒྲུབ་པའི་ཆེད་དུ་བྱ་བ་ལ་སེམས་ཆེན་པོ་ལ་སོགས་པ་གསུམ་དུ་གྲངས་ངེས་པ་མ་ཡིན་ཏེ། གཞན་དོན་གཟུགས་སྐུ་ཡང་དེ་ཡིན་པའི་ཕྱིར། འོན་ཀྱང་འདིར་དངོས་བསྟན་ལ་གསུམ་དུ་འཇོག་པའི་རྒྱུ་མཚན་ཡོད་དེ། དེ་ལ་གཞན་གྱིས་འགྲན་ཟླ་མེད་པར་མཆོག་ཉིད་དུ་བྱེད་པ། སྤང་བྱ་མི་མཐུན་ཕྱོགས་མ་ལུས་པར་བཅོམ་པ། ཐོབ་བྱ་ཡོན་ཏན་རྫོགས་པར་ཐོབ་པ་གསུམ་དུ་ངེས་པའི་ཕྱིར། འགྲེལ་ཆེན་ལས། དེ་ནི་མ་ཕམ་མགོན་པོས་བསྟན་པ་དང་མཐུན་པར་བྱང་ཆུབ་སེམས་དཔའི་སྒྲུབ་པའི་ཆེད་དུ་བྱ་བ་རྣམ་པ་གསུམ་བསྟན་པ་ཡིན་པར་ཤེས་པར་བྱའོ། །ཞེས་སོ། །ལྔ་པ་ནི། སེམས་ཆེན་པོ་ལ་སོགས་པའི་གོ་རིམ་འདི་ལྟར་འཆད་པའི་རྒྱུ་མཚན་ཡོད་དེ། ཐེག་ཆེན་སྒྲུབ་པའི་ཆེད་དུ་བྱ་བའི་གཙོ་བོ་ནི་གཞན་དོན་ཡིན་པས་དང་པོར་སེམས་ཆེན་པོ་བསྟན། དེ་འགྲུབ་པ་ཡང་སྒྲིབ་གཉིས་སྤངས་པ་ལ་རག་ལས་པས་དེའི་འོག་ཏུ་སྤོང་བ་ཆེན་པོ་བསྟན། དེ་ཡང་རྟོགས་པ་ཕུན་ཚོགས་ཐོབ་པ་ལ་རག་ལས་པས་དེའི་འོག་ཏུ་རྟོགས་པ་ཆེན་པོ་བསྟན་པའི་ཕྱིར། ངག་དོན་ནི། སེམས་ཆེན་པོ། སྤོང་བ་ཆེན་པོ། རྟོགས་པ་ཆེན་པོ་གསུམ་ཆོས་ཅན། ཐེག་ཆེན་སྒྲུབ་པའི་ཆེད་དུ་བྱ་བ་ཡིན་ཏེ། ཐེག་ཆེན་སྒྲུབ་པའི་ཐོབ་བྱ་མཐར་ཐུག་ཏུ་གྱུར་པའི་བླ་ན་མེད་པའི་བྱང་ཆུབ་ཡིན་པའི་ཕྱིར།

བཞི་པ་ལ། སྤྱིར་བསྟན་པ་དང་། སྒྲུབ་པ་སོ་སོ་ལ་འཕྲོས་པའི་དོན་གཉིས། དང་པོ་ནི། དེ་ལྟར་ཇི་ལྟ་བ་བཞིན་དུ། ཞེས་པའི་སྐབས་སུ་གཉིས་ཀྱི། དང་པོ་ཐེག་ཆེན་སྒྲུབ་པ་ལ། མཚན་ཉིད། དབྱེ་བ། སོ་སོའི་རང་བཞིན། གྲངས་ངེས། གོ་རིམ་ངེས་པ། ས་མཚམས་དང་དྲུག །དང་པོ་ནི། ཁྱད་པར་བཞི་ལྡན་གྱི་བྱང་སེམས་ཀྱི་ཉམས་ལེན། ཁྱད་པར་བཞི་ནི། རྐྱེན་ཐེག་པ་ཆེན་པོར་རིགས་སད་པ། ཐེག་ཆེན་སེམས་བསྐྱེད་ལ་གནས་པ། རང་གཞན་གྱི་དོན་སྒྲུབ་པ་ལ་བརྩོན་པ། འབྲས་བུ་བྱང་ཆུབ་ཆེན་པོ་འབྱིན་པར་བྱེད་པ་སྟེ། རྒྱན་ལས། གནས་རྩོམ་འབྲས་བུ་འབྱུང་བ་ཆེ་བདག་ཉིད། །རྒྱལ་སྲས་རྣམས་ཀྱི་སྒྲུབ་པ་ཡིན་པར་འདོད། །རྟག་ཏུ་ལེན་པ་ཆེ་དང་བཟོད་པ་སྟེ། །དོན་ཆེན་ཡང་དག་སྒྲུབ་པའི་བྱ་བ་བྱེད། །ཅེས་སོ། །གཉིས་པ་ལ། ཡུལ་དང་ངོ་བོའི་སྒོ་ནས་དབྱེ་བ་གཉིས། དང་པོ་ལ། ཡུལ་མཁྱེན་གསུམ་གྱི་སྒྲུབ་པ་དང་། ཡུལ་ཅན་སྦྱོར་བཞིའི་དེ་གཉིས། དང་པོའི་མཚན་ཉིད། མཁྱེན་གསུམ་ཐོབ་བྱ་ཐོབ་བྱེད་བླང་དོར་བྱ་བའི་ཡན་ལག་ཏུ་ཐོས་བསམ་གྱིས་སྒྲོ་འདོགས་བཅད་དེ་ཉམས་སུ་ལེན་པའི་སེམས་དཔའི་རྣལ་འབྱོར། དབྱེ་ན། རྣམ་མཁྱེན་ཐོབ་བྱའི་འབྲས་བུར། ལམ་ཤེས་ཐོབ་བྱེད་ཀྱི་རྒྱུར། གཞི་ཤེས་བླང་དོར་བྱ་བའི་ཡན་ལག་ཏུ་ཉམས་སུ་ལེན་པའི་སྒྲུབ་པ་དང་གསུམ། གཉིས་པའི་མཚན་ཉིད། སྦྱོར་བཞི་ཕར་ཕྱིན་དྲུག་ལྡན་དུ་ཉམས་སུ་ལེན་པའི་སེམས་དཔའི་རྣལ་འབྱོར། དབྱེ་ན། རྣམ་ཀུན་གྱི་སྦྱོར་བ། ཉམས་སུ་ལེན་པའི་སྒྲུབ་པ་སོགས་བཞི། གཉིས་པ་ལ། གོ་ཆའི། འཇུག་པའི། ཚོགས་ཀྱི། ངེས་འབྱུང་སྒྲུབ་པ་དང་བཞི། གསུམ་པ་ལ་བཞི་ལས། དང་པོ་གོ་སྒྲུབ་ཀྱི་མཚན་ཉིད། ཕར་ཕྱིན་རེ་རེ་ཡང་ཕར་ཕྱིན་དྲུག་ལྡན་དུ་ཉམས་སུ་ལེན་པའི་སེམས་དཔའི་རྣལ་འབྱོར། དབྱེ་ན། ཕར་ཕྱིན་སོ་སོའི་གོ་སྒྲུབ་དྲུག །དང་པོའི་མཚན་ཉིད། སྦྱིན་པའི་ཕར་ཕྱིན་ཕར་ཕྱིན་དྲུག་ལྡན་དུ་ཉམས་སུ་ལེན་པའི་སེམས་དཔའི་རྣལ་འབྱོར། དབྱེ་ན། སྦྱིན་པའི་ཕར་ཕྱིན་གྱི་སྦྱིན་པའི་གོ་སྒྲུབ་སོགས་དྲུག །དང་པོའི་མཚན་ཉིད། སྦྱིན་པའི་གོ་སྒྲུབ་གང་ཞིག །སྦྱིན་པ་ལ་སྤྱོད་པའི་གནས་སྐབས་སུ་སྦྱིན་པ་ཉིད་ཆོས་གསུམ་ལྡན་དུ་ཉམས་སུ་ལེན་པའི་སེམས་དཔའི་རྣལ་འབྱོར། གཉིས་པའི་མཚན་ཉིད། དེ་གང་ཞིག །སྦྱིན་པ་ལ་སྤྱོད་པའི་གནས་སྐབས་སུ་ཚུལ་ཁྲིམས་ཆོས་གསུམ་ལྡན་དུ་ཉམས་སུ་ལེན་པའི་སེམས་དཔའི་རྣལ་འབྱོར། ཆོས་གསུམ་ནི། སྦྱོར་བ་རྣམ་མཁྱེན་ཡིད་བྱེད་དང་ལྡན་པ། དངོས་གཞི་འཁོར་གསུམ་དུ་མི་དམིགས་པ། རྗེས་དགེ་རྩ་བླ་མེད་བྱང་ཆུབ་ཏུ་བསྔོ་བའོ། །དེས་ལྷག་མ་རྣམས་ལ་འགྲེ། གཉིས་པ་འཇུག་སྒྲུབ་ལ། མཚན་ཉིད་དང་དབྱེ་བ་གཉིས། དང་པོ་ནི། རང་གི་འཇུག་ཡུལ་དུ་གྱུར་པའི་ཐེག་ཆེན་གཙོ་བོར་ཉམས་སུ་ལེན་པའི་ཐེག་ཆེན་སྦྱོར་ལམ་དྲོད་ཡན་ཆོད་ཀྱིས་བསྡུས་པའི་སེམས་དཔའི་རྣལ་འབྱོར། མཚན་གཞི། ཐེག་ཆེན་གྱི་སྦྱོར་ལམ་དྲོད་ནས་ས་བཅུ་རྒྱུན་མཐའི་བར་གྱི་མཁྱེན་པ་རྣམས་སོ། །གཉིས་པ་ལ། བསམ་གཏན་གཟུགས་མེད་ལ་འཇུག་པའི་སྒྲུབ་པ། སྦྱིན་སོགས་ལ། ལམ་ལ། བྱམས་སོགས་ཚད་མེད་ལ། དམིགས་པ་མེད་པའི་ཐེག་ཆེན་ལ། འཁོར་གསུམ་རྣམ་དག་གི་ཐེག་ཆེན་ལ། ཆེད་དུ་བྱ་བ་ལ། མངོན་པར་ཤེས་པ་ལ། རྣམ་ཀུན་མཁྱེན་ཉིད་ལ་འཇུག་པའི་སྒྲུབ་པ་དང་དགུའོ། །དང་པོའི་མཚན་ཉིད། འཇུག་སྒྲུབ་གང་ཞིག །བསམ་གཏན་གཟུགས་མེད་ཀྱིས་བསྡུས་པའི་ཐེག་ཆེན་སྦྱོར་བའི་བརྩོན་འགྲུས་དང་ལྡན་པའི་སྒོ་ནས་ཉམས་སུ་ལེན་པའི་སེམས་དཔའི་རྣལ་འབྱོར། ལྷག་མ་རྣམས་ལ་འགྲེ། དེ་ཡང་བསྡུ་ན། འབྲས་བུའི་ཐེག་ཆེན་ཉམས་སུ་ལེན་པའི་སྒྲུབ་པ་དང་། རྒྱུའི་དེ་གཉིས་སུ་འདུས། དང་པོ་ནི། ཆེད་དུ་བྱ་བ་ལ་འཇུག་པའི་སྒྲུབ་པ་དང་། རྣམ་མཁྱེན་ལ་འཇུག་པའི་སྒྲུབ་པ་ལྟ་བུའོ། །གཉིས་པ་ནི། ལྷག་མ་རྣམས་སོ། །གསུམ་པ་ཚོགས་སྒྲུབ་ལ། མཚན་ཉིད་དང་། དབྱེ་བ་གཉིས། དང་པོ་ནི། ཟབ་པ་དང་རྒྱ་ཆེ་བ་ལ་སྤྲོ་བའི་སྒོ་ནས་ཚོགས་གཉིས་ཀྱི་དཔུང་རྒྱ་ཆེན་པོ་གསོག་པར་བྱེད་ཅིང་། རང་གི་དངོས་འབྲས་སུ་གྱུར་པའི་ཐེག་ཆེན་གྱི་འཕགས་ལམ་དངོས་སུ་འབྱིན་པའི་སེམས་དཔའི་རྣལ་འབྱོར། མཚན་གཞི། ཐེག་ཆེན་གྱི་སྦྱོར་ལམ་ཆོས་མཆོག་སྐད་ཅིག་ཐ་མ་ནས་རྒྱུན་མཐའི་བར་གྱི་མཁྱེན་པ་ལྟ་བུ། གཉིས་པ་ལ། སྙིང་རྗེ་ཆེན་པོའི་ཚོགས་སྒྲུབ། སྦྱིན་པ་ནས་ཤེས་རབ་ཀྱི་བར་དྲུག །ཞི་གནས་ཀྱི། ལྷག་མཐོང་གི །ཞི་ལྷག་ཟུང་འབྲེལ་གྱི། ཐབས་ལ་མཁས་པའི། ཡེ་ཤེས་ཀྱི། བསོད་ནམས་ཀྱི། ལམ་གྱི། གཟུངས་ཀྱི། སའི་གཉེན་པོའི་ཚོགས་སྒྲུབ་དང་བཅུ་བདུན། བསྡུ་ན། འདས་ལམ་གྱི་ངོ་བོར་གྱུར་པའི་ཚོགས་སྒྲུབ་དང་། འཇིག་རྟེན་པ་དང་ཐུན་མོང་བའི་དེ་གཉིས་སུ་འདུས། དང་པོ་ནི། ས་དང་། གཉེན་པོའི་ཚོགས་སྒྲུབ་ལྟ་བུ། གཉིས་པ་ནི། དང་པོ་བཅོ་ལྔ་ལྟ་བུ། བཞི་པ་ངེས་འབྱུང་སྒྲུབ་པ་ལ། མཚན་ཉིད་དང་། དབྱེ་བ་གཉིས། དང་པོ་ནི། རང་གི་ངེས་པར་འབྱུང་ས་བརྒྱད་པོ་གང་རུང་དུ་གདོན་མི་ཟ་བར་འབྱིན་པར་བྱེད་པའི་དག་སའི་རྣལ་འབྱོར། མཚན་གཞི་དག་པ་ས་གསུམ་ལྟ་བུ། གཉིས་པ་ལ། ཆེད་དུ་བྱ་བའི། མཉམ་པ་ཉིད་ཀྱི། སེམས་ཅན་དོན་བྱེད་ཀྱི། འབད་མེད་ལྷུན་གྲུབ་ཀྱི། མཐའ་གཉིས་ལས་འདས་པའི། ཐེག་པ་གསུམ་གྱི་དོན་ཐོབ་པའི། རྣམ་ཀུན་མཁྱེན་ཉིད་ཀྱི། ལམ་གྱི་ཡུལ་ཅན་གྱི་ངེས་འབྱུང་སྒྲུབ་པ་དང་བརྒྱད་དོ། །དེ་ཡང་བསྡུ་ན། གནས་གང་དུ་ངེས་པར་འབྱུང་བ་དང་། ཚུལ་ཇི་ལྟར་དུ་ངེས་པར་འབྱུང་བ་གཉིས་སུ་འདུས། དང་པོ་ལ། མི་སློབ་ལམ་མཐར་ཐུག་ཏུ་ངེས་པར་འབྱུང་བའི་དབང་དུ་བྱས་ནས་ཀུན་མཁྱེན་ཉིད་ཀྱི་ངེས་འབྱུང་སྒྲུབ་པ། སློབ་ལམ་མཐར་ཐུག་ཏུ་ངེས་པར་འབྱུང་བའི་དབང་དུ་བྱས་ནས་ལམ་གྱི་ཡུལ་ཅན་གྱི་ངེས་འབྱུང་སྒྲུབ་པ་བཞག །གཉིས་པའི་དབང་དུ་བྱས་ནས་ལྷག་མ་དྲུག་བཞག་པ་ཡིན་ནོ། །དེས་ན་རྣམ་མཁྱེན་ལྟ་བུ་ངེས་པར་འབྱུང་ས་ཡིན་པའི་མུ། ས་བརྒྱད་པ་ནས་རྒྱུན་མཐའི་སྔ་ལོགས་ཀྱི་བར་གྱི་མཁྱེན་པ་ལྟ་བུ་ངེས་འབྱུང་སྒྲུབ་པ་ཡིན་པའི་མུ། རྒྱུན་མཐའི་ཡེ་ཤེས་ལྟ་བུ་གཉིས་ཀ་ཡིན་པའི་མུ། མ་དག་ས་བདུན་ལྟ་བུ་གཉིས་ཀ་མ་ཡིན་པའི་མུ་དང་བཞིའོ། །བཞི་པ་ལ། སྤང་བྱ་སྤོང་བའི་དང་། ཐོབ་བྱ་ཐོབ་པའི་དབང་དུ་བྱས་པའི་གྲངས་ངེས་གཉིས། དང་པོ་ནི། ཐེག་ཆེན་སྒྲུབ་པ་ལ་བཞིར་འཇོག་པའི་རྒྱུ་མཚན་ཡོད་དེ། བྱང་ཆུབ་སེམས་དཔས་སྒྲིབ་གཉིས་སྤོང་བའི་ཕྱིར་དུ་བསམ་པས་གོ་ཆ་གྱོན། སྦྱོར་བས་གཡུལ་དུ་འཇུག །ཚོགས་གཉིས་ཀྱི་དཔུང་བསགས་ཏེ། སྒྲིབ་པ་ཀུན་ལས་རྒྱལ་བའི་ཡོན་ཏན་ལ་དབང་འབྱོར་བར་བྱེད་པའི་ཕྱིར། གཉིས་པ་ནི། ཐེག་ཆེན་སྒྲུབ་པ་ལ་བཞིར་འཇོག་པའི་རྒྱུ་མཚན་ཡོད་དེ། བྱང་ཆུབ་སེམས་དཔས་འབྲས་བུ་ཐོབ་ཕྱིར་དུ་བསམ་པས་གོ་ཆ་གྱོན། ལམ་ཉམས་ལེན་ལ་འཇུག །ཚོགས་གཉིས་རྒྱ་ཆེན་པོ་བསགས་ཏེ། འབྲས་བུ་མངོན་དུ་བྱེད་པའི་ཕྱིར། ལྔ་པ་ནི། རྒྱུ་འབྲས་དོན་གྱི་གོ་རིམ་ཡིན་ཏེ། སྔ་མ་སྔ་མ་ལས་ཕྱི་མ་ཕྱི་མ་འབྱུང་བའི་ཕྱིར། དྲུག་པ་ནི། སྦྱོར་བ་དང་ཞེས་པའི་སྐབས་ནས་བསྟན་པའི་སྦྱོར་བ་ལ། མཐོང་ལམ་ལ་བརྒྱུད་ནས་སྦྱོར་བ་དང་། ཉེ་བར་སྦྱོར་བ། མངོན་སུམ་དུ་སྦྱོར་བ་གསུམ་ཡོད་ལ། དང་པོ་ཚོགས་ལམ་ན་གོ་སྒྲུབ་ཡོད། གཉིས་པ་སྦྱོར་ལམ་ན་འཇུག་སྒྲུབ་ཡོད། གསུམ་པ་ཆོས་མཆོག་ཆེན་པོ་ན་ཚོགས་སྒྲུབ་དང་པོ་བཅོ་ལྔ་ཡོད། ཕྱི་མ་གཉིས་མཐོང་སྒོམ་གྱིས་བསྡུས། ངེས་འབྱུང་སྒྲུབ་པ་དག་ས་གསུམ་ནའོ། །དེ་ལྟར་ཡང་འགྲེལ་ཆེན་ལས། དེ་ལ་འཕགས་པ་ཐོགས་མེད་ཀྱིས་གོ་ཆ་དང་། འཇུག་པའི་སྒྲུབ་པ་ལ་ནི་གོ་རིམ་བཞིན་དུ་གཅིག་ནས་གཅིག་ཏུ་བརྒྱུད་པ་དང་། མངོན་དུ་སྦྱོར་བའི་རང་བཞིན་གྱི་ཚོགས་དང་། མོས་པས་སྤྱོད་པའི་སས་བསྡུས་པ་ཡིན་ནོ། །ཚོགས་ཀྱི་སྒྲུབ་པ་ནི་བརྩེ་བ་ནས་བརྩམས་ཏེ་གཟུངས་ཀྱི་བར་གྱིས་མངོན་སུམ་དུ་སྦྱོར་བའི་ལམ་གྱི་རང་བཞིན་ཆོས་ཀྱི་མཆོག་ཆེན་པོས་བསྡུས་པ་ཡིན་ནོ། །ས་དང་པོ་རབ་ཏུ་དགའ་བའི་རང་བཞིན་མཐོང་བའི་ལམ་གྱི་བདག་ཉིད་ཅན་ནི་ཚོགས་ཀྱི་སྒྲུབ་པ་ཡིན་ནོ། །སྒོམ་པའི་ལམ་གྱི་རང་བཞིན་ས་གཉིས་པ་ལ་སོགས་པའི་རང་གི་ངོ་བོ་གཉེན་པོའི་ཕྱོགས་ཀྱི་བདག་ཉིད་ཅན་ཡང་ཚོགས་ཀྱི་སྒྲུབ་པ་ཡིན་པས་ལམ་གཉིས་ཀའི་སྤྱོད་ཡུལ་ཅན་ཡིན་ནོ། །ངེས་པར་འབྱུང་བའི་སྒྲུབ་པ་ནི་སྒོམ་པའི་ལམ་ལ་བརྟེན་པ་ཡིན་ནོ། །ཞེས་བཤད་དོ། །ཞེས་སོ། །ངག་དོན་ནི། ཤེས་བྱ་ཆོས་ཅན། སྒྲུབ་པ་བཞིའི་ས་མཚམས་སོ་སོར་ངེས་པ་ཡིན་ཏེ། གོ་སྒྲུབ་ཚོགས་ལམ། འཇུག་སྒྲུབ་སྦྱོར་ལམ་དྲོད། ཚོགས་སྒྲུབ་ཆོས་མཆོག་སྐད་ཅིག་ཐ་མ། ངེས་འབྱུང་སྒྲུབ་པ་ས་བརྒྱད་པ་ནས་རྒྱུན་མཐའི་བར་དུ་ཡོད་པའི་ཕྱིར།

གཉིས་པ་ལ། གོ་སྒྲུབ། འཇུག་སྒྲུབ། ཚོགས་སྒྲུབ་ལས་འཕྲོས་པའི་དོན་དང་གསུམ། དང་པོ་ནི། དེ་དག་སོ་སོར་སྦྱིན་ལ་སོགས། ཞེས་པའི་སྐབས་སུ་གཉིས་ཀྱི། དང་པོ། ཡུལ་ཅན་གོ་སྒྲུབ་དང་། ཡུལ་ཕ་རོལ་ཏུ་ཕྱིན་པ་དྲུག་གི་དང་པོ་གོང་དུ་བཤད་ཟིན། གཉིས་པ་ལ། ངོ་བོ། སྒྲ་དོན། གྲངས་ངེས། གོ་རིམ། ཉམས་སུ་བླངས་པའི་འབྲས་བུ་དང་ལྔ། དང་པོ་ལ། རྒྱན་ལས་བཤད་ཚུལ་དང་། སློབ་དཔོན་གྱི་དགོངས་པ་གཉིས། དང་པོ་ནི། ཁྱད་ཆོས་བཞི་ལྡན་གྱི་གཏོང་བའི་སེམས་པ་མཚུངས་ལྡན་དང་བཅས་པ་ནས་རིམ་བཞིན། དེ་ལྡན་གྱི་ཆོས་རབ་ཏུ་རྣམ་འབྱེད་ཀྱི་ཤེས་རབ་མཚུངས་ལྡན་དང་བཅས་པ། ཁྱད་ཆོས་བཞི་ནི། རྒྱན་ལས། སྦྱིན་པ་མི་མཐུན་ཕྱོགས་ཉམས་དང་། །རྣམ་པར་མི་རྟོག་ཡེ་ཤེས་ལྡན། །འདོད་པ་ཐམས་ཅད་ཡོངས་རྫོགས་བྱེད། །སེམས་ཅན་རྣམ་སྨིན་བྱེད་རྣམ་གསུམ། །ཞེས་པས་མཚོན་ནོ། །གཉིས་པ་ནི། དྲུག་ཀའང་སངས་རྒྱས་ཀྱི་ས་ཁོ་ནར་བཞག་སྟེ། མཚན་ཉིད་རིམ་བཞིན་སྲིད་ཞིའི་ཕ་རོལ་ཏུ་སོན་པ་མཐར་ཐུག་པའི་ཞེས་པ་དྲུག་ཀའི་མགོར་སྦྱར་ཏེ། གཏོང་བའི། སྤོང་བའི། མི་འཁྲུགས་པའི་སེམས་པ་མཚུངས་ལྡན་དང་བཅས་པ། དགེ་བ་ལ་སྤྲོ་བའི་བརྩོན་འགྲུས་མཚུངས་ལྡན་དང་བཅས་པ། དམིགས་པ་ལ་སེམས་རྩེ་གཅིག་ཏུ་གནས་པའི་ཏིང་ངེ་འཛིན་མཚུངས་ལྡན་དང་བཅས་པ། ཆོས་རབ་ཏུ་རྣམ་འབྱེད་ཀྱི་ཤེས་རབ་མཚུངས་ལྡན་དང་བཅས་པ། དབྱེ་ན། སྦྱིན་པ་ལ། ཟང་ཟིང་། ཆོས། མི་འཇིགས་པ། བྱམས་པའི་སྦྱིན་པ་དང་བཞི། དེ་བཞིན་དུ། ཚུལ་ཁྲིམས་ལ། དགེ་བ་ཆོས་སྡུད། སེམས་ཅན་དོན་བྱེད། ཉེས་སྤྱོད་སྡོམ་པ་དང་གསུམ། བཟོད་པ་ལ། སྡུག་བསྔལ་དང་ལེན། གནོད་པ་ལ་ཇི་མི་སྙམ་པ། ཆོས་ལ་ངེས་རྟོགས་དང་གསུམ། བརྩོན་འགྲུས་ལ། གོ་ཆ། སྦྱོར་བ། མི་ལྡོག་པ་དང་གསུམ། བསམ་གཏན་ལ། མཐོང་ཆོས་ལ་བདེ་བར་གནས་པའི། ཡོན་ཏན་ཁྱད་པར་ཅན་སྒྲུབ་པའི། སེམས་ཅན་དོན་བྱེད་དང་གསུམ། ཤེས་རབ་ལ། ཐོས་བསམ་སྒོམ་གསུམ་མོ། །གཉིས་པ་ནི། རྒྱན་ལས། དབུལ་བ་འདོར་བར་བྱེད་པ་དང་། །བསིལ་བ་ཐོབ་དང་ཁྲོ་བཟོད་དང་། །མཆོག་སྦྱོར་བ་དང་ཡིད་འཛིན་དང་། །དོན་དམ་ཤེས་པའི་ཕྱིར་བཤད་དོ། །ཞེས་སོ། །གསུམ་པ་ལ། བསྒྲུབ་བྱ་ལ་ལྟོས་པའི། དོན་གཉིས་ལ་ལྟོས་པའི། བསླབ་པ་གསུམ་ལ་ལྟོས་པའི་གྲངས་ངེས་དང་གསུམ། དང་པོ་ནི། བསྒྲུབ་བྱ་མངོན་མཐོ་སྒྲུབ་པའི་དབང་དུ་བྱས་ནས་དང་པོ་གསུམ། ངེས་ལེགས་སྒྲུབ་པའི་དབང་དུ་བྱས་ནས་ཕྱི་མ་གཉིས། དེ་གཉིས་མཐར་ཕྱིན་པའི་དབང་དུ་བྱས་ནས་བརྩོན་འགྲུས་བཞག་སྟེ། རྒྱན་ལས། ལོངས་སྤྱོད་དང་ལུས་ཕུན་སུམ་ཚོགས་པ་དང་། །འཁོར་རྩོམ་ཕུན་སུམ་ཚོགས་པ་མངོན་མཐོ་དང་། །རྟག་ཏུ་ཉོན་མོངས་དབང་ཉིད་མི་འགྲོ་དང་། །བྱ་བ་རྣམས་ལ་ཕྱིན་ཅི་མ་ལོག་པའོ། །ཞེས་སོ། །གཉིས་པ་ནི། དང་པོ་གསུམ་གྱིས་གཞན་དོན་དང་། ཕྱི་མ་གཉིས་ཀྱིས་རང་དོན་གཙོ་བོར་སྒྲུབ། བརྩོན་འགྲུས་ཀྱིས་དེ་གཉིས་མཐར་ཕྱིན་པར་བྱེད་དོ། །རྒྱན་ལས། སེམས་ཅན་དོན་ལ་རབ་བརྩོན་པ། །གཏོང་དང་མི་གནོད་བཟོད་པས་བྱེད། །གནས་དང་གྲོལ་བ་བཞིར་བཅས་པས། །རང་དོན་རྣམ་པ་ཐམས་ཅད་སྤྱོད། །ཅེས་སོ། །གསུམ་པ་ནི། དང་པོ་གསུམ་གྱིས་ཚུལ་ཁྲིམས། བསམ་གཏན་གྱིས་སེམས། ཤེས་རབ་ཀྱིས་ཤེས་རབ་ཀྱི་བསླབ་པ་གཙོ་བོར་སྒྲུབ་ཅིང་། བརྩོན་འགྲུས་གསུམ་ཀའི་གྲོགས་ཡིན་ཏེ། རྒྱན་ལས། བསླབ་གསུམ་དབང་དུ་མཛད་ནས་ནི། །རྒྱལ་བས་ཕ་རོལ་ཕྱིན་པ་དྲུག །ཡང་དག་བཤད་དེ་དང་པོ་གསུམ། །ཐ་མ་གཉིས་ཀྱིས་རྣམ་པ་གཉིས། །གཅིག་ནི་གསུམ་ཆར་ལ་ཡང་གཏོགས། །ཞེས་སོ། །བཞི་པ་ནི། རྒྱན་ལས། སྔ་མ་ལ་བརྟེན་ཕྱི་མ་སྐྱེ། །དམན་དང་མཆོག་ཏུ་གནས་ཕྱིར་དང་། །རགས་པ་དང་ནི་ཕྲ་བའི་ཕྱིར། །དེ་དག་རིམ་པར་བསྟན་པ་ཡིན། །ཞེས་སོ། །ལྔ་པ་ལ། གཉིས་ལས། གནས་སྐབས་ཀྱི་འབྲས་བུ་ནི། རིན་ཆེན་ཕྲེང་བར། སྦྱིན་པས་ལོངས་སྤྱོད་ཁྲིམས་ཀྱིས་བདེ། །བཟོད་པས་མདངས་ལྡན་བརྩོན་པས་བརྗིད། །བསམ་གཏན་གྱིས་ཞི་བློ་ཡིས་གྲོལ། །ཞེས་སོ། །མཐར་ཐུག་གི་འབྲས་བུ་ནི། སྔ་མ་ལས། ཡེ་ཤེས་བསམ་གྱིས་མི་ཁྱབ་ཡུལ། །རྣམ་པ་ཐམས་ཅད་མཁྱེན་ཉིད་ཐོབ། །ཅེས་སོ། །ངག་དོན་ནི། ཐེག་པ་ཆེན་པོའི་ཚོགས་ལམ་ཆོས་ཅན། གོ་སྒྲུབ་ཡིན་ཏེ། སྦྱིན་སོགས་ཕ་རོལ་ཏུ་ཕྱིན་པ་རེ་རེ་ཡང་ཕར་ཕྱིན་དྲུག་ལྡན་དུ་ཉམས་སུ་ལེན་པར་བྱེད་པའི་སེམས་དཔའི་རྣལ་འབྱོར་ཡིན་པའི་ཕྱིར།

གཉིས་པ་ནི། ཚད་མེད་པ་བཞི་དང་ཞེས་པའི་སྐབས་སུ་གཉིས་ཀྱི། དང་པོ་ཚད་མེད་པའི་ཏིང་ངེ་འཛིན་ལ། རྒྱུ། ངོ་བོ། སྒོམ་ཚུལ། བསྒོམས་པའི་འབྲས་བུ་དང་བཞི། དང་པོ་ལ། ལུས་རྟེན་དང་། སེམས་རྟེན་གཉིས། དང་པོ་ལ། གང་ཟག་གང་གིས་སྐྱེད་པ་དང་། ཁམས་གང་དུ་བསྐྱེད་པ་གཉིས། དང་པོ་ནི། བསམ་གཏན་གྱི་དངོས་གཞི་ཐོབ་པའི་ལམ་མ་ཞུགས་དང་། ལམ་ཞུགས་གཉིས་ཀའི་རྟེན་ལ་དངོས་སུ་སྐྱེར་རུང་སྟེ། ཀུན་བཏུས་སུ། འདིའི་ལུས་རྟེན་ལ་ཕྱི་རོལ་པ་དང་། ཉན་ཐོས་དང་། བྱང་སེམས་གསུམ་ཀ་ཡོད་པར་བཤད་པའི་ཕྱིར། གཉིས་པ་ནི། སྔར་མེད་གསར་དུ་སྐྱེ་བ་འདོད་པའི་རྟེན་ལ་སྐྱེ་དགོས་ཏེ། དང་པོར་ཕ་རོལ་པོ་སྡུག་བསྔལ་གྱིས་མནར་བ་སོགས་མཐོང་ནས་དེ་དང་བྲལ་བར་འདོད་པའི་སྒོ་ནས་སྐྱེ་དགོས་པའི་ཕྱིར། ཐོབ་ཟིན་གནས་པ་གཟུགས་ཀྱི་རྟེན་ལའང་ཡོད་ལ། གཟུགས་མེད་ཁམས་ན་མེད་དེ། དེར་ཕ་རོལ་དམིགས་ཡུལ་དུ་བྱས་ནས་སྡུག་བསྔལ་བསལ་འདོད་ཀྱི་བློ་དངོས་སུ་སྐྱེ་མི་ནུས་པའི་ཕྱིར། གཉིས་པ་ནི། བསམ་གཏན་གྱི་དངོས་གཞི་གང་རུང་ལ་བརྟེན་ཏེ། དེ་ལྟར་དུ་ཀུན་བཏུས་སུ་བཤད་པའི་ཕྱིར། གཉིས་པ་ལ། མཚན་ཉིད། སྒྲ་དོན། དབྱེ་བ། གྲངས་ངེས། ས་མཚམས་དང་ལྔ། དང་པོ་ནི། བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས། སེམས་ཅན་ཚད་མེད་པ་ལ་བརྩེ་བའི་བསམ་པ་ཕུན་ཚོགས། གཉིས་པ་ནི། དམིགས་ཡུལ་སེམས་ཅན་ཚད་མེད་པ་ལ་དམིགས་ནས་འབྲས་བུ་ཚོགས་གཉིས་ཚད་མེད་པ་གསོག་པས་ན་ཚད་མེད་པ་ཞེས་བྱའོ། །གསུམ་པ་ལ། བྱམས་པ། སྙིང་རྗེ། དགའ་བ། བཏང་སྙོམས་ཚད་མེད་པའི་ཏིང་ངེ་འཛིན་དང་བཞི། མཚན་ཉིད་རིམ་བཞིན། བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས་སེམས་ཅན་ཚད་མེད་པ། ཞེས་པ་བཞི་ཀའི་མགོར་སྦྱར་ཏེ། བདེ་བ་དང་ཕྲད་པར་འདོད་པའི་ཏིང་ངེ་འཛིན་མཚུངས་ལྡན་དང་བཅས་པ། དེ་བཞིན་དུ། སྡུག་བསྔལ་དང་བྲལ་བར་འདོད་པའི། བདེ་བ་དང་མི་འབྲལ་བར་འདོད་པའི། ཆགས་སྡང་ཉེ་རིང་དང་བྲལ་བར་འདོད་པའི། དེ་ལྟར་ཡང་རྒྱན་ལས། སེམས་ཅན་རྣམས་ལ་བརྩེ་བ་ཅན། །ཕྲད་དང་བྲལ་བའི་དགོངས་པ་ཅན། །མི་འབྲལ་བདེ་བའི་དགོངས་པ་ཅན། །ཕན་དགོངས་ཁྱོད་ལ་ཕྱག་འཚལ་ལོ། །ཞེས་སོ། །རྣམ་པའི་སྒོ་ནས་དེ་རེ་རེ་ལ་ཡང་སེམས་ཅན་ལ། ཆོས་ལ། དམིགས་པ་མེད་པ་ལ་དམིགས་པའི་བྱམས་པ་ཚད་མེད་སོགས་གསུམ་གསུམ་ཡོད། འདི་དག་གི་མཚན་ཉིད། བྱམས་པ་ཚད་མེད་ཀྱི་ཏིང་ངེ་འཛིན་གང་ཞིག །བདེ་བ་དོན་གཉེར་གྱི་སེམས་ཅན་ལ་དམིགས་ནས་བདེ་བ་དང་ཕྲད་པར་འདོད་པའི་ཏིང་ངེ་འཛིན་མཚུངས་ལྡན་དང་བཅས་པ། དེ་གང་ཞིག །གང་ཟག་གི་བདག་མེད་རྟོགས་པའི་སྒོ་ནས་བདག་མེད་ཀྱིས་ཁྱད་པར་དུ་བྱས་པའི་སེམས་ཅན་ལ་དམིགས་ནས། དེ་གང་ཞིག །བདེན་མེད་རྟོགས་པའི་སྒོ་ནས་བདེན་མེད་ཀྱིས་ཁྱད་པར་དུ་བྱས་པའི་སེམས་ཅན་ལ་དམིགས་ནས། དེ་བཞིན་དུ་ཚད་མེད་གཞན་གསུམ་ལ། དབྱེ་གཞི་གང་ཞིག་སྡུག་བསྔལ་གྱིས་ཉམ་ཐག་པའི་སེམས་ཅན་ལ་དམིགས་ནས། དེ་དང་བྲལ་བར་འདོད་པའི། བདེ་བ་དང་ལྡན་པའི་སེམས་ཅན་ལ་དམིགས་ནས་དེ་དང་མི་འབྲལ་བར་འདོད་པའི། ཆགས་སྡང་དང་ལྡན་པའི་སེམས་ཅན་ལ་དམིགས་ནས་དེ་དང་བྲལ་བར་འདོད་པའི། དེས་རིགས་འགྲེའོ། །བཞི་པ་ནི། ཚད་མེད་པའི་ཏིང་ངེ་འཛིན་ལ་བཞིར་འཇོག་པའི་རྒྱུ་མཚན་ཡོད་དེ། དེའི་མི་མཐུན་ཕྱོགས་ལ་གནོད་སེམས། རྣམ་འཚེ། ཡིད་མི་བདེ། ཆགས་སྡང་མངོན་གྱུར་བ་བཞི་ཡོད་ལ། དེ་དག་གི་གཉེན་པོའི་དབང་དུ་བྱས་ནས་ཚད་མེད་བཞི་རིམ་བཞིན་བཞག་པའི་ཕྱིར། མཛོད་ལས། ཚད་མེད་པ་ནི་བཞི་ཡིན་ནོ། །གནོད་སེམས་ལ་སོགས་གཉེན་པོའི་ཕྱིར། ཞེས་སོ། །ལྔ་པ་ནི། སེམས་ཅན་ལ་དམིགས་པའི་ཚད་མེད་བཞི་ལམ་མ་ཞུགས་ནས་ཆོས་ལ་དམིགས་པ་ཉན་ཐོས་ཀྱི་ཚོགས་ལམ་ནས། དམིགས་པ་མེད་པ་ལ་དམིགས་པ་ཐེག་ཆེན་གྱི་ཚོགས་ལམ་ནས་ཡོད་དོ། །གསུམ་པ་ནི། དང་པོར་རང་གི་མཛའ་བཤེས་ལ་བསྒོམ། དེ་ནས་གང་ཟག་གཞན་ལ་བསྒོམ། མཐར་གནོད་བྱེད་ཀྱི་དགྲ་བོ་ལ་དམིགས་ཏེ་བསྒོམ་པས། སེམས་ཅན་ཐམས་ཅད་རྩ་བའི་མ་དང་ཁྱད་མེད་དུ་མ་གྱུར་བར་དུ་འབད་པར་བྱའོ། །བཞི་པ་ལ། སོ་སོའི་འབྲས་བུ་དང་། ཐུན་མོང་གི་དེ་གཉིས། དང་པོ་ནི། མ་དྲོས་པས་ཞུས་པའི་མདོ་ལས། སེམས་ཅན་རྣམས་ལ་བྱམས་པའི་སེམས་མཉམ་པ། །རྟག་ཏུ་ཐམས་ཅད་མཁྱེན་པའི་སེམས་འཛིན་ཞིང། །སྙིང་རྗེས་སེམས་ཅན་རྣམས་ནི་མི་གཏོང་དང་། །དགའ་བས་འཁོར་བ་ན་ནི་སྐྱོ་བ་མེད། །བཏང་སྙོམས་ཆེན་པོས་སྐྱོན་རྣམས་སྤངས་པ་སྟེ། །ཞེས་སོ། །གཉིས་པ་ནི། རྒྱན་ལས། ཚངས་པའི་གནས་ལས་གནས་པ་ཡི། །བློ་ལྡན་རྟག་ཏུ་འདོད་པར་སྐྱེ། །དེས་ནི་ཚོགས་རྣམས་རྫོགས་བྱེད་ཅིང་། །སེམས་ཅན་རྣམས་ཀྱང་རྣམ་སྨིན་བྱེད། །ཀུན་ཏུ་ཚངས་དང་མི་འབྲལ་ལ། །དེ་ཡི་མི་མཐུན་ཕྱོགས་དང་རྒྱལ། །བག་མེད་གྱུར་ཀྱང་དེ་ཡི་རྐྱེན། །མི་བཟད་པས་ཀྱང་མི་འགྱུར་རོ། །ཞེས་སོ། །ངག་དོན་ནི། བྱང་སེམས་སྦྱོར་ལམ་པའི་ཚད་མེད་པའི་ཏིང་ངེ་འཛིན་ཆོས་ཅན། ཁྱོད་ལ་དབྱེ་ན་བཞིར་ཡོད་དེ། བྱམས་སྙིང་རྗེ་དགའ་བ་བཏང་སྙོམས་བཞིར་ཡོད་པའི་ཕྱིར།

གསུམ་པ་ལ། གཟུངས་ཀྱི་ཚོགས། ཡེ་ཤེས་ཀྱི་ཚོགས། སའི་ཚོགས་དང་གསུམ། དང་པོ་ནི། ཚིག་ལ་སོགས་པའི་གཟུངས་དང་། ཞེས་པའི་སྐབས་སུ་གཉིས་ཀྱི། དང་པོ་གཟུངས་ལ། རྒྱུ། ངོ་བོ། ཇི་ལྟར་སྒྲུབ་པའི་ཚུལ་དང་གསུམ། དང་པོ་ནི། བདག་པོའི་རྐྱེན་བསམ་གཏན་གྱི་དངོས་གཞི་ཡིན་ལ། སྔོན་དགེ་བ་རྒྱ་ཆེན་པོ་གོམས་པ། ཚེ་འདིར་གསུང་རབ་མང་དུ་ཐོས་པ་དང་། བདག་མེད་རྟོགས་པའི་ཤེས་རབ་ཀྱིས་ཟིན་པའི་ཏིང་ངེ་འཛིན་རྣམ་པར་དག་པ་ནི་ཉེ་བའི་རྒྱུ་ཡིན་ནོ། །གཉིས་པ་ནི། མཚན་ཉིད། སྒྲ་དོན། སོ་སོའི་རང་བཞིན། བྱེད་ལས། གྲངས་ངེས། ས་མཚམས་དང་དྲུག །དང་པོ་ནི། རང་ཉིད་གཟུངས་སུ་སྒྲུབ་པར་བྱེད་པའི་རྒྱུ་ཕུན་ཚོགས་ལ་བརྟེན་ནས། གསུང་རབ་དཔག་ཏུ་མེད་པའི་ཚིག་དོན་ཅི་རིགས་པ་འཛིན་པར་ནུས་པའི་དྲན་པ་ཤེས་རབ་མཚུངས་ལྡན་དང་བཅས་པ། གཉིས་པ་ནི། ཆོས་རྣམས་ཀྱི་ཚིག་དོན་དང་ལེགས་པའི་ལམ་འཛིན་པས་ན་གཟུངས་ཞེས་བྱའོ། །གསུམ་པ་ལ། ཚིག་གི །དོན་གྱི། བཟོད་པའི། གསང་སྔགས་ཀྱི་གཟུངས་དང་བཞི། མཚན་ཉིད་སོགས་རིམ་བཞིན། གཟུངས་བཞིའི་ནང་ཚན་གང་ཞིག །གསུང་རབ་དཔག་ཏུ་མེད་པའི་ཚིག་མི་བརྗེད་པར་འཛིན་ནུས་པའི་དྲན་པ་ཤེས་རབ་མཚུངས་ལྡན་དང་བཅས་པ། དེ་གང་ཞིག །གསུང་རབ་དཔག་ཏུ་མེད་པའི་དོན་འཛིན་པར་ནུས་པའི་དྲན་པ་སོགས། དེ་དག་ལ་ལུང་གི་ཆོས་ཀྱི་སྤྱན་དང་། ཆོས་རྒྱུན་གྱི་ཏིང་ངེ་འཛིན་གྱི་ཡང་འཇོག་པ་ཡིན་ནོ། །དབྱེ་ན། དགེ་བའི་ལས་ཀྱི་རྣམ་སྨིན་ལ། གསུང་རབ་མང་དུ་ཐོས་པ་ལ། བདེན་མེད་རྟོགས་པའི་ཏིང་ངེ་འཛིན་ལ་བརྟེན་པ་གསུམ། དེ་ཡང་དང་པོ་གཉིས་ལམ་མ་ཞུགས་ནས་ཀྱང་ཡོད་པས་ཆུང་ངུ་ཞེས་བྱ། ཕྱི་མ་ལམ་ཞུགས་ཁོ་ན་ལ་ཡོད་པས་ཆེན་མོའོ། །དེ་ལའང་། རྒྱན་ལས། ཆེན་པོ་དེ་ཡང་རྣམ་པ་གསུམ། །བློ་ལྡན་མ་ཞུགས་ཞུགས་པ་ཡང་། །མ་དག་ས་པ་རྣམས་ཀྱི་ནི། །ཆུང་ངུ་དང་ནི་འབྲིང་པོ་སྟེ། །དག་པའི་ས་བའི་གཟུངས་ཆེན་ཡིན། །ཞེས་གསུམ་དུ་བཤད་དོ། །དེ་གང་ཞིག །སྟོང་ཉིད་ལ་མི་སྐྲག་པའི་དྲན་པ་སོགས། དབྱེ་ན། སྟོང་ཉིད་ལ་མོས་སྤྱོད་དང་། དེ་མངོན་སུམ་དུ་རྟོགས་པ་གཉིས། དེ་གང་ཞིག །བདེན་མེད་རྟོགས་པའི་ཤེས་རབ་ཀྱིས་ཟིན་པའི་སྒོ་ནས་རང་འབྲས་སུ་གྱུར་པའི་སྔགས་ཀྱི་ཚིག་རྣམས་འབྲས་བུ་འབྱིན་ནུས་སུ་བྱིན་གྱིས་རློབ་པར་ནུས་པའི་དྲན་པ་སོགས། དབྱེ་ན། བདེན་མེད་དོན་སྤྱི་དང་། མངོན་སུམ་དུ་རྟོགས་པ་གཉིས། བཞི་པ་ནི། རྒྱན་ལས། བྱང་ཆུབ་སེམས་དཔའ་ཡང་དང་ཡང་། །དེ་ལ་ཡང་དག་བརྟེན་ནས་ནི། །རྟག་ཏུ་དམ་པའི་ཆོས་དག་ཀྱང་། །རབ་ཏུ་སྟོན་ཅིང་འཛིན་པར་བྱེད། །ཅེས་སོ། །ལྔ་པ་ནི། གཟུངས་ཀྱི་དོན་ལ་ཚིག །དོན། ཡུལ་ཅན་ཡེ་ཤེས་གསུམ་དུ་ཡོད་ལ། དང་པོ་གཉིས་འཛིན་པའི་དབང་དུ་ཚིག་གཟུངས་དང་དོན་གཟུངས། གསུམ་པ་ལ་རང་གཞན་གྱི་དོན་སོ་སོ་གཙོ་བོར་སྒྲུབ་པའི་དབང་དུ་ཕྱི་མ་གཉིས་བཞག་གོ །དྲུག་པ་ནི། དང་པོ་གཉིས་ལམ་མ་ཞུགས་ནས་ཀྱང་ཡོད། ཕྱི་མ་གཉིས་ཐེག་ཆེན་གྱི་ཚོགས་ལམ་ནས་ཡོད་དོ། །གསུམ་པ་ནི། དང་པོར་ཡི་གེ་ཨ་ལྟ་བུ་ལ་དམིགས་ནས་མཐར་གྱིས་ཆོས་ཐམས་ཅད་བདེན་མེད་སྤྲོས་བྲལ་དུ་གཏན་ལ་འབེབས་པའོ། །ངག་དོན་ནི། གཟུངས་ཀྱི་ཚོགས་ཆོས་ཅན། ཁྱོད་ལ་བཞིར་ཡོད་དེ། ཚིག་གཟུངས་ལ་སོགས་པ་བཞིར་ཡོད་པའི་ཕྱིར། གཉིས་པ་ནི། དེ་ལ་ཡེ་ཤེས་ཀྱི་ཚོགས་ནི་ཞེས་པའི་སྐབས་སུ་གཉིས་ཀྱི། དང་པོ་ཡེ་ཤེས་ཀྱི་ཚོགས་ལ། མཚན་ཉིད། དབྱེ་བ། ས་མཚམས་དང་གསུམ། དང་པོ་ནི། བདག་མེད་རྟོགས་པའི་ཡེ་ཤེས་སོ། །བྱེ་བྲག་ཏུ། ཐེག་དམན་གྱི་ཡེ་ཤེས་ཀྱི་ཚོགས་ཀྱི་མཚན་ཉིད། ཐེག་དམན་པའི་རྒྱུད་ཀྱི་གང་ཟག་གི་བདག་མེད་རྟོགས་པའི་ཡེ་ཤེས། མཚན་གཞི། ཐེག་དམན་གྱི་ལམ་ལྔ་ལྟ་བུ། ཐེག་ཆེན་གྱི་དེའི་མཚན་ཉིད། ཆོས་ཀྱི་བདག་མེད་རྟོགས་པའི་ཡེ་ཤེས། མཚན་གཞི། ཐེག་ཆེན་གྱི་ལམ་ལྔ་ལྟ་བུ། རང་འབྲས་སུ་གྱུར་པའི་ཐེག་ཆེན་འཕགས་ལམ་གྱི་དངོས་རྒྱུ་བྱེད་པའི་སྟོང་ཉིད་སྒོམ་བྱུང་གི་སྒོ་ནས་གཙོ་བོར་རྟོགས་པའི་ཡེ་ཤེས། སྐབས་འདིར་དངོས་བསྟན་གྱི་ཡེ་ཤེས་ཀྱི་ཚོགས་ཀྱི་མཚན་ཉིད། དེ་དང་ཡེ་ཤེས་ཀྱི་ཚོགས་སྒྲུབ་དོན་གཅིག །གཉིས་པ་ལ། ས་མཚམས་དང་། ཡུལ་གྱི་སྒོ་ནས་དབྱེ་བ་གཉིས། དང་པོ་ལ། སྟོང་ཉིད་ཐོས་བསམ་གྱི་སྒོ་ནས། སྒོམ་བྱུང་གིས་དོན་སྤྱིའི་ཚུལ་དུ། སྒོམ་བྱུང་གིས་མངོན་སུམ་དུ་གསར་དུ་རྟོགས་པའི། མངོན་སུམ་དུ་རྟོགས་ཟིན་སྒོམ་པར་བྱེད་པའི། མངོན་སུམ་དུ་རྟོགས་པ་མཐར་ཐུག་པའི་ཡེ་ཤེས་ཀྱི་ཚོགས་དང་ལྔ། གཉིས་པ་ལ། ནང་། ཕྱི། གཉིས་ཀ་སྟོང་པ། སྟོང་པ་ཉིད་སྟོང་པ། ཆེན་པོ། དོན་དམ་པ། འདུས་བྱས། འདུས་མ་བྱས། མཐའ་ལས་འདས་པ། ཐོག་མ་དང་ཐ་མ་མེད་པ། དོར་བ་མེད་པ། རང་བཞིན། ཆོས་ཐམས་ཅད། རང་གི་མཚན་ཉིད། མི་དམིགས་པ། དངོས་པོ་མེད་པའི་ངོ་བོ་ཉིད། དངོས་པོ། དངོས་པོ་མེད་པ། རང་གི་ངོ་བོ། གཞན་གྱི་ངོ་བོ་སྟོང་པ་ཉིད་རྟོགས་པའི་ཡེ་ཤེས་ཀྱི་ཚོགས་དང་ཉི་ཤུའོ། །གསུམ་པ་ནི། སྟོང་ཉིད་དེ་དང་དེ་ལ་ལོག་ཕྱོགས་སུ་འཛིན་པའི་སྒྲོ་འདོགས་ཆོད་ནས་ངེས་པ་རྙེད་པའི་ས་མཚམས་གཙོ་ཆེ་བའི་དབང་དུ། དང་པོ་གསུམ་མོས་སྤྱོད། བཞི་བ་སྦྱོར་ལམ། ཆེན་པོ་སྟོང་པ་ཉིད་ནས་དོར་བ་མེད་པ་སྟོང་པ་ཉིད་ཀྱི་བར་མ་དག་ས་བདུན། རང་བཞིན་དང་། ཆོས་ཐམས་ཅད་སྟོང་པ་ཉིད་ས་བརྒྱད་པ། དེ་ནས་གཉིས་ས་དགུ་པ། དེ་ནས་གཉིས་ས་བཅུ་པ། ཐ་མ་གསུམ་སངས་རྒྱས་ཀྱི་ས་ན་ཡོད་ཅིང་། སྟོང་ཉིད་ཉི་ཤུ་པོ་ཐམས་ཅད་མངོན་སུམ་དུ་རྟོགས་པའི་ཡེ་ཤེས་ཀྱི་ཚོགས་ཙམ་ས་དང་པོ་ནས་ཀྱང་ཡོད་དོ། །ངག་དོན་ནི། འདིར་བསྟན་ཡེ་ཤེས་ཀྱི་ཚོགས་ཆོས་ཅན། ཁྱོད་ལ་དབྱེ་ན་ཉི་ཤུར་ཡོད་དེ། ཁྱོད་ལ་ནང་སྟོང་པ་ཉིད་སོགས་ཉི་ཤུར་ཡོད་པའི་ཕྱིར། གསུམ་པ་ནི། སའི་ཚོགས་ལ་ས་གང་གིས། ཞེས་པའི་སྐབས་སུ་གཉིས་ཀྱི། དང་པོ་ལ། སའི་རྣམ་གཞག་སྤྱིར་བསྟན་པ་དང་། འདིར་བསྟན་གྱི་ས་བྱེ་བྲག་ཏུ་བཤད་པ་གཉིས། དང་པོ་ལ། འབྱུང་བས་བསྡུས་པའི་ས། སྤང་བྱས་བསྡུས་པའི་ས། ལམ་གྱིས་བསྡུས་པའི་ས་དང་གསུམ། དང་པོ་ནི། སྲ་ཞིང་འཐས་པའི་ས་ལྟ་བུ། གཉིས་པ་ནི། འཁོར་བ་ལྟ་བུ། གསུམ་པ་ལ། ཐེག་དམན་དང་། ཐེག་ཆེན་གྱི་ས་གཉིས། དང་པོ་ནི། ཐེག་དམན་རང་ལུགས་ཀྱི་ཡོན་ཏན་ཁྱད་པར་ཅན་གྱི་རྟེན་བྱེད་པའི་ཐེག་དམན་གྱི་མཁྱེན་པ་ལྟ་བུ། དེ་ལ། རིགས་ཀྱི། བརྒྱད་པའི། མཐོང་བའི། བསྲབས་པའི། འདོད་ཆགས་དང་བྲལ་བའི། བྱས་པ་རྟོགས་པའི། ཉན་ཐོས་ཀྱི། རང་སངས་རྒྱས་ཀྱི་ས་དང་བརྒྱད། མཚན་གཞི་རིམ་བཞིན། གནས་སྐབས་ཐེག་དམན་དུ་རིགས་ངེས་པའི། ཉན་ཐོས་སོ་སྐྱེ། རྒྱུན་ཞུགས་ཞུགས་པ། དེ་འབྲས་གནས། ཕྱིར་འོང་འབྲས་གནས། ཕྱིར་མི་འོང་འབྲས་གནས། དགྲ་བཅོམ་འབྲས་གནས། དེ་གསུམ་གྱི་ཞུགས་པ་གསུམ། རང་རྒྱལ་འཕགས་པའི་མངོན་རྟོགས་ལྟ་བུའོ། །གཉིས་པ་ལ། མོས་སྤྱོད་ཀྱི། བྱང་སེམས་ཀྱི། སངས་རྒྱས་ཀྱི་ས་དང་གསུམ། མཚན་གཞི་རིམ་བཞིན། ཐེག་ཆེན་ཚོགས་སྦྱོར་བའི། བྱང་འཕགས་ཀྱི། སངས་རྒྱས་ཀྱི་མངོན་རྟོགས་ལྟ་བུའོ། །གཉིས་པ་ལ། མཚན་ཉིད། སྒྲ་དོན། དབྱེ་བ། སོ་སོའི་རང་བཞིན། ཁྱད་ཆོས་དང་ལྔ། དང་པོ་ནི། སྤྱན་དང་མངོན་ཤེས་ལ་སོགས་པའི་ཡོན་ཏན་ཁྱད་པར་ཅན་གྱི་རྟེན་བྱེད་པའི་སྟོང་ཉིད་མངོན་སུམ་དུ་རྟོགས་པའི་ཐེག་ཆེན་སློབ་པའི་མངོན་རྟོགས། གཉིས་པ་ནི། རྒྱན་ལས། འབྱུང་པོ་དཔག་མེད་འཇིགས་མེད་ཕྱིར། །དཔག་ཏུ་མེད་པ་དེ་དག་ལ། །ཕྱི་ཕྱིར་གོང་དུ་འགྲོ་ལྡན་ཕྱིར། །དེ་དག་ཉིད་ནི་སར་འདོད་དོ། །ཞེས་སོ། །གསུམ་པ་ནི། རབ་ཏུ་དགའ་བ་ལ་སོགས་པ་བཅུའོ། །བཞི་པ་ལ། ས་དང་པོའི་མཚན་ཉིད་ནི། ཐེག་ཆེན་གྱི་སྦྱོར་ལམ་རྫོགས་རྗེས་སུ་བྱུང་ཞིང་། ས་གཉིས་པའི་ཡེ་ཤེས་མ་སྐྱེས་གོང་གི་མངོན་རྟོགས། དབྱེ་ན་ས་དང་པོའི་བར་ཆད་མེད་ལམ། རྣམ་གྲོལ་ལམ། ཁྱད་པར་གྱི་ལམ་གསུམ། དང་པོའི་མཚན་ཉིད། མཐོང་སྤང་ཤེས་སྒྲིབ་དངོས་སུ་སྤོང་བར་བྱེད་བཞིན་པའི་ཐེག་ཆེན་གྱི་བདེན་པ་མངོན་རྟོགས། མཚན་གཞི། ཐེག་ཆེན་མཐོང་ལམ་པ་དབང་རྟུལ་གྱི་རྒྱུད་ཀྱི་བཟོད་པ་བརྒྱད་ལྟ་བུ། གཉིས་པའི་མཚན་ཉིད། རང་རྒྱུ་བར་ཆད་མེད་ལམ་གྱི་ངོ་སྐལ་གྱི་མཐོང་སྤང་ཤེས་སྒྲིབ་ལས་གྲོལ་བའི་རྟེན་གཉེན་པོས་བསྡུས་པའི་བདེན་པ་མངོན་རྟོགས། མཚན་གཞི། གོང་གི་ཤེས་པ་བརྒྱད་ལྟ་བུ། གསུམ་པའི་མཚན་ཉིད། ཐེག་ཆེན་གྱི་ལམ་རྗེས་ཤེས་རྫོགས་རྗེས་སུ་བྱུང་ཞིང་། མཐོང་ལམ་གྱི་རྟོགས་རིགས་གོང་འཕེལ་དུ་གྱུར་པའི་མཁྱེན་པ། དབྱེ་ན། ས་དང་པོའི་རྗེས་ཐོབ་དང་། མཉམ་བཞག་སེང་གེ་རྣམ་བསྒྱིངས་ལྟ་བུ་རང་སས་བསྡུས་པ་དང་། ས་གཉིས་པ་ཡན་ཆད་ཀྱི་མཁྱེན་པ་ལྟ་བུ་ས་གོང་མས་བསྡུས་པ་གཉིས། དབྱེ་བ་འདི་ས་གཉིས་པ་སོགས་ལའང་ཤེས་པར་བྱའོ། །ས་དང་པོའི་སྒྲ་དོན་ནི། དེ་ལ་རབ་ཏུ་དགའ་བ་ཞེས་བྱ་སྟེ། བླ་ན་མེད་པའི་བྱང་ཆུབ་ལ་རྒྱུའི་ནུས་པ་ཉེ་བ་དང་། སེམས་ཅན་མང་པོའི་དོན་སྒྲུབ་པའི་ནུས་པ་མཐོང་ནས། དགའ་སྤྲོ་རྒྱ་ཆེན་པོ་དང་ལྡན་པའི་ཕྱིར། ས་གཉིས་པའི་མཚན་ཉིད་ནི། ས་དང་པོ་རྫོགས་རྗེས་སུ་བྱུང་ཞིང་། ས་གསུམ་པ་མ་སྐྱེས་གོང་གི་མངོན་རྟོགས། དབྱེ་ན་གསུམ། དང་པོའི་མཚན་ཉིད། རང་གི་ངོ་སྐལ་གྱི་འདོད་པའི་སས་བསྡུས་ཀྱི་སྒོམ་སྤང་ཤེས་སྒྲིབ་ཆེན་པོའི་ས་བོན་དངོས་སུ་སྤོང་བར་བྱེད་བཞིན་པའི་ཐེག་ཆེན་གྱི་རྗེས་ལ་མངོན་རྟོགས། དབྱེ་ན། འདོད་པའི་སས་བསྡུས་ཀྱི་སྒོམ་སྤང་ཤེས་སྒྲིབ་ཆེན་པོའི་ཆེན་པོ། དེའི་འབྲིང་། དེའི་ཆུང་ངུ་དངོས་སུ་སྤོང་བར་བྱེད་པའི་བར་ཆད་མེད་ལམ་གསུམ། གཉིས་པའི་མཚན་ཉིད། རང་རྒྱུ་བར་ཆད་མེད་ལམ་གྱི་ངོ་སྐལ་གྱི་འདོད་པའི་སས་བསྡུས་ཀྱི་སྒོམ་སྤང་ཤེས་སྒྲིབ་ཆེན་པོ་ལས་གྲོལ་བའི་རྟེན་གཉེན་པོས་བསྡུས་པའི་རྗེས་ལ་མངོན་རྟོགས། དབྱེ་ན། གོང་གི་སྒོམ་སྤང་སྐོར་གསུམ་ལས་གྲོལ་བའི་རྣམ་གྲོལ་ལམ་གསུམ། གསུམ་པའི་མཚན་ཉིད་དང་དབྱེ་བ་སྔར་ལྟར་རོ། །སྒྲ་དོན་ནི། དྲི་མ་མེད་པ་ཞེས་བྱ་སྟེ། འཆལ་བའི་ཚུལ་ཁྲིམས་ཀྱི་རྒྱུ་ཉོན་མོངས་པའི་དྲི་མ་དང་བྲལ་བའི་ཕྱིར། ས་ལྷག་མ་རྣམས་ཀྱི་མཚན་ཉིད་དང་དབྱེ་བ་སྔར་ལས་དཔགས་ཏེ་ཤེས་སོ། །སོ་སོའི་སྒྲ་དོན་ནི། ཡེ་ཤེས་ཀྱི་སྣང་བ་རྒྱ་ཆེན་པོ་དང་ལྡན་པས་འོད་བྱེད་པ། བྱང་ཆུབ་ཕྱོགས་མཐུན་རྟོགས་པའི་ཤེས་རབ་ཀྱིས་སྒྲིབ་གཉིས་སྲེག་པས་འོད་འཕྲོ་བ། སེམས་ཅན་སྨིན་པ་དང་རང་གི་སེམས་བསྲུང་བའི་ཡོན་ཏན་གཉིས་དང་ལྡན་པས་སྦྱང་དཀའ་བ། གནས་ལུགས་མངོན་སུམ་དུ་རྟོགས་པའི་ཤེས་རབ་མངོན་གྱུར་དུ་ལྡན་པས་མངོན་དུ་གྱུར་པ། ས་བརྒྱད་པ་དང་དངོས་རྒྱུ་དངོས་འབྲས་སུ་འབྲེལ་བས་མཚན་འཛིན་ལས་རིང་བའི་ཕྱིར་རིང་དུ་སོང་བ། མཚན་འཛིན་དང་རང་དོན་ཡིད་བྱེད་ཀྱིས་བསྐྱོད་མི་ནུས་པས་མི་གཡོ་བ། སོ་སོ་ཡང་དག་པར་རིག་པ་བཞི་རྗེས་མཐུན་བརྙེས་པས་བློ་གྲོས་ཐོགས་པ་མེད་པའི་ཕྱིར་ལེགས་པའི་བློ་གྲོས། གཟུངས་དང་ཏིང་ངེ་འཛིན་གྱིས་སེམས་ལ་ཁྱབ་པས་ཆོས་ཀྱི་སྤྲིན་ཞེས་བྱའོ། །ལྔ་པ་ལ། བསྡུ་བ། གྲངས་ངེས། ཤེས་བྱ་མཁྱེན་ཚུལ། ཡོན་ཏན་གྱི་ཁྱད་པར། རྣམ་སྨིན་གྱི་ལུས་འཛིན་ཚུལ་དང་ལྔ། དང་པོ་ནི། ས་བདུན་པ་མན་ཆད་འབད་རྩོལ་གྱི་མཚན་མས་མ་དག་པ་དང་། བརྒྱད་པ་ནས་དེས་དག་པས་མ་དག་པ་དང་དག་པ་གཉིས་སུ་འདུས་ཤིང་། དང་པོ་དགུ་རྒྱུའི་དང་། བཅུ་པ་འབྲས་བུའི་སར་ཡང་བཤད་དོ། །གཉིས་པ་ལ། བསླབ་པའི། ཉམས་སུ་བླང་བྱའི། སྤང་བྱའི་དབང་དུ་བྱས་པའི་གྲངས་ངེས་དང་གསུམ། དང་པོ་ནི། བསླབ་པ་གསུམ་གྱི་རྒྱུའི་དབང་དུ་བྱས་ནས་ས་དང་པོ། ངོ་བོའི་དབང་དུ་བྱས་ནས་ས་གཉིས་པ་ནས་དྲུག་གི་བར། འབྲས་བུའི་དབང་དུ་བྱས་ནས་ལྷག་མ་བཞི་བཞག་གོ །གཉིས་པ་ནི། ཕར་ཕྱིན་བཅུ་པོ་རེ་རེ་ལ་གཙོ་བོར་སྤྱོད་པའི་དབང་དུ་བྱས་ནས་ས་བཅུ་བཞག་སྟེ། དབུས་མཐའ་ལས། སྦྱིན་པ་ཚུལ་ཁྲིམས་བཟོད་བརྩོན་འགྲུས། །བསམ་གཏན་དང་ནི་ཤེས་རབ་ཐབས། །སྨོན་ལམ་སྟོབས་དང་ཡེ་ཤེས་དང་། །འདི་དག་ཕ་རོལ་ཕྱིན་བཅུའོ། །ཞེས་དང་། ཁྱད་པར་ཅན་དང་ཁྱད་མེད་ནི། །ས་བཅུ་རྣམས་སུ་ཤེས་པར་བྱ། །ཞེས་སོ། །གསུམ་པ་ནི། སྒྲིབ་པ་བཅུའི་གཉེན་པོར་ས་བཅུ་བཞག་སྟེ། སྔ་མ་ལས། ཆོས་ཀྱི་དབྱིངས་ལ་མ་རིག་པ། །ཉོན་མོངས་ཅན་མིན་སྒྲིབ་པ་བཅུ། །ས་བཅུའི་མི་མཐུན་ཕྱོགས་རྣམས་ནི། །གཉེན་པོ་དག་ནི་ས་ཡིན་ནོ། །ཞེས་སོ། །གསུམ་པ་ལ། ཤེས་བྱ་རྟོགས་པའི་རིམ་པ་དང་། ཇི་ལྟར་དུ་རྟོགས་ཚུལ་གཉིས། དང་པོ་ལ། རང་བཞིན་རྣམ་དག་དང་། གློ་བུར་རྣམ་དག་རྟོགས་ཚུལ་གྱི་ལྡོག་ཆ་གཉིས། དང་པོ་ནི། ས་བཅུའི་མཉམ་བཞག་གི་གནས་སྐབས་སུ་རང་བཞིན་རྣམ་དག་གི་ཆོས་ཉིད་མཐོང་ཚུལ་ལ་ཁྱད་པར་མེད་དེ། ཐེག་ཆེན་གྱི་མཐོང་ལམ་སྡུག་བསྔལ་ཆོས་བཟོད་ཀྱིས་སྡུག་བསྔལ་བདེན་པའི་རང་བཞིན་རྣམ་དག་གི་ཆོས་ཉིད་མངོན་སུམ་དུ་མཐོང་བའི་དུས་སུ། ཆོས་ཐམས་ཅད་ཀྱི་རང་བཞིན་རྣམ་དག་གི་ཆོས་ཉིད་མངོན་སུམ་དུ་མཐོང་བའི་ཕྱིར་ཏེ། དེ་ཆོས་ཉིད་ལ་སྒྲུབ་པས་འཇུག་པའི་མངོན་སུམ་གང་ཞིག །རང་བཞིན་རྣམ་དག་གི་ཆོས་ཉིད་ལ་རིགས་མི་འདྲ་བའི་དབྱེ་བ་མེད་པའི་ཕྱིར། འཕགས་པ་ལྷས། གང་གིས་དངོས་གཅིག་དེ་བཞིན་ཉིད་མཐོང་བ། །དེ་ཡིས་དངོས་ཀུན་དེ་བཞིན་ཉིད་དུ་མཐོང་། །ཞེས་སོ། །འོན་ཀྱང་ཆོས་ཅན་སོ་སོ་བ་དང་འབྲེལ་བའི་ཆོས་ཉིད་ལ་ངེས་པ་མི་འདྲ་བ་འདྲེན་ཚུལ་གྱི་ཁྱད་པར་ཡོད་དེ། དབུས་མཐའ་ལས། ཀུན་ཏུ་འགྲོ་དོན་མཆོག་གི་དོན། །རྒྱུ་མཐུན་དོན་གྱི་མཆོག་ཉིད་དང་། །ཡོངས་སུ་འཛིན་པ་མེད་དོན་དང་། །རྒྱུད་རྣམས་ཐ་དད་མེད་དོན་དང་། །ཉོན་མོངས་རྣམ་དག་མེད་དོན་དང་། །ཐ་དད་མེད་པའི་དོན་ཉིད་དང་། །འགྲིབ་མེད་འཕེལ་བ་མེད་དོན་དང་། །དབང་ནི་རྣམ་པ་བཞི་ཡི་གནས། །ཞེས་སོ། །གཉིས་པ་ནི། ས་བཅུའི་མཉམ་བཞག་གི་གནས་སྐབས་སུ་གློ་བུར་རྣམ་དག་གི་ཆོས་ཉིད་མཐོང་ཚུལ་ལ་ཁྱད་པར་ཡོད་དེ། ས་དང་པོར་མཐོང་སྤང་དང་བྲལ་བའི་ཆོས་དབྱིངས་མངོན་དུ་གྱུར་བ་ནས་སངས་རྒྱས་ཀྱི་སར་སྒྲིབ་པ་མ་ལུས་པ་དང་བྲལ་བའི་ཆོས་དབྱིངས་མངོན་དུ་གྱུར་བའི་བར་དུ་ཡོད་པའི་ཕྱིར། མདོ་ལས། སྤྲིན་མཐོང་མཁའ་ལ་ཉི་བཞིན་འདིར་ཁྱོད་ཕྱོགས་གཅིག་བློ་གྲོས་ཅན། །བློ་མིག་དག་པའི་འཕགས་རྣམས་ཀྱིས་ཀྱང་ཐམས་ཅད་མཐོང་མ་ལགས། །བཅོམ་ལྡན་འདས་ཁྱོད་ཆོས་སྐུ་གང་དག་བློ་གྲོས་མཐའ་ཡས་པ། །ཤེས་བྱ་མཐའ་མེད་མཁའ་དབྱིངས་ཁྱབ་པ་དེ་དག་གིས་ཀུན་མཐོང་། །ཞེས་སོ། །གཉིས་པ་ནི། ས་བཅུའི་མཉམ་བཞག་གིས་བདེན་གཉིས་ཟུང་འཇུག་གི་ཚུལ་གྱིས་འཇལ་ཏེ། ལྟ་བས་སྣང་བའི་སྟེང་དུ་སྤྲོས་པ་གཅོད་ཅིང་། སྒོམ་པས་ཀྱང་སྣང་བ་ལ་དམིགས་ནས་རང་བཞིན་མེད་པར་སྒོམ་པའི་ཕྱིར། རྗེས་ཐོབ་ཀྱིས་ཀྱང་བདེན་གཉིས་ཟུང་འཇུག་ཏུ་འཇལ་ཏེ། འདུས་བྱས་ཏེ་ཆོས་འདི་དག་སྣང་ལ་རང་བཞིན་མེད་པར་སྒྱུ་མ་ལྟ་བུར་འཇལ་བའི་ཕྱིར་ཏེ། རྩ་བར། ཡོངས་སུ་བསྔོ་བ་ཁྱད་པར་ཅན། །དེ་ཡི་བྱེད་པ་མཆོག་ཡིན་ནོ། །དེ་ནི་དམིགས་མེད་རྣམ་པ་ཅན། །ཕྱིན་ཅི་མ་ལོག་མཚན་ཉིད་དོ། །ཞེས་གསུངས་པའི་ཕྱིར། འོན་ཀྱང་འཇལ་ཚུལ་ལ་ཁྱད་པར་ཡོད་དེ། མཉམ་བཞག་ཏུ་དོན་དམ་འཛིན་སྟངས་ཀྱི་ཡུལ་དུ་བྱེད་ཅིང་། ཀུན་རྫོབ་དམིགས་ཡུལ་ཙམ་དུ་བྱེད། རྗེས་ཐོབ་ཏུ་ཀུན་རྫོབ་འཛིན་སྟངས་ཀྱི་ཡུལ་དུ་བྱེད་ཅིང་། དོན་དམ་དམིགས་ཡུལ་དུ་བྱེད་པའི་སྒོ་ནས་འཇལ་བའི་ཕྱིར། བཞི་པ་ལ། ས་དང་པོ་ལ་ལྡན་པའི་ཡོན་ཏན་ཞིབ་ཏུ་བཤད་པ་དང་། དེས་ལྷག་མ་རྣམས་མཚོན་ཚུལ་གཉིས། དང་པོ་ནི། ས་བཅུ་པའི་མདོ་ལས་གསུངས་པའི་དོན་འཇུག་པར་ཚིགས་སུ་བཅད་པ། དེ་ཚེ་འདི་ཡིས་སངས་རྒྱས་བརྒྱ་མཐོང་ཞིང་། །དེ་དག་བྱིན་གྱིས་བརླབས་ཀྱང་འདི་ཡིས་རྟོགས། །དེ་ཉིད་ཚེ་ནི་བསྐལ་པ་བརྒྱར་གནས་ཤིང་། །སྔོན་དང་ཕྱི་མའི་མཐར་ཡང་ཡང་དག་འཇུག །བློ་ལྡན་ཏིང་འཛིན་བརྒྱ་ཕྲག་སྙོམས་པར་འཇུག་ཅིང་གཏོང་བྱེད་དེ། །འཇིག་རྟེན་ཁམས་བརྒྱ་འདི་ཡིས་ཀུན་ནས་གཡོ་ཞིང་སྣང་བར་ནུས། །དེ་བཞིན་རྫུ་འཕྲུལ་གྱིས་དེ་སེམས་ཅན་བརྒྱ་ཕྲག་སྨིན་བྱེད་ཅིང་། །བརྒྱ་ཕྲག་གྲངས་དང་རྗེས་འབྲེལ་ཞིང་དག་ཏུའང་འགྲོ་བར་འགྱུར། །དེས་ནི་ཆོས་ཀྱི་སྒོ་རྣམས་ཡང་དག་འབྱེད་བྱེད་ཐུབ་དབང་སྲས། །རང་གི་ལུས་ལ་ལུས་རྣམས་ཀུན་ནས་སྟོན་པར་བྱེད་པའང་ཡིན། །རང་གི་འཁོར་དང་བཅས་པས་མཛེས་འབྱོར་ལུས་ནི་རེ་རེ་ཞིང་། །རྒྱལ་བའི་སྲས་པོ་བརྒྱ་ཕྲག་དག་དང་རྗེས་སུ་འབྲེལ་བའང་སྟོན། །ཞེས་སྐད་ཅིག་མ་རེ་རེ་ལ་ཡོན་ཏན་བརྒྱ་ཕྲག་བཅུ་གཉིས་སྟོན་ནུས་པར་གསུངས་སོ། །གཉིས་པ་ནི། ས་དང་པོའི་ཡོན་ཏན་དེ་ཉིད་གཉིས་པར་སྟོང་འགྱུར། གསུམ་པར་འབུམ་འགྱུར། བཞི་པར་བྱེ་བ་ཕྲག་བརྒྱ། ལྔ་པར་བྱེ་བ་ཕྲག་སྟོང་། དྲུག་པར་བྱེ་བ་ཕྲག་བརྒྱ་སྟོང་། བདུན་པར་བྱེ་བ་ཁྲག་ཁྲིག་བརྒྱ། བརྒྱད་པར་སྟོང་གསུམ་འབུམ་ཕྲག་བཅུའི་རྡུལ་སྙེད། དགུ་པར་སངས་རྒྱས་ཀྱི་ཞིང་གྲངས་མེད་པ་འབུམ་ཕྲག་བཅུའི་རྡུལ་སྙེད། བཅུ་པར་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་སྙེད་ཀྱི་ཡོན་ཏན་ཐོབ་པར་གསུངས་སོ། །ལྔ་བ་ནི། གཙོ་ཆེ་བའི་དབང་དུ་བྱས་ན། ས་བཅུ་པོར་རིམ་བཞིན་འཛམ་གླིང་གི་རྒྱལ་པོ། གླིང་བཞིའི་རྒྱལ་པོ། བརྒྱ་བྱིན། འཐབ་བྲལ། དགའ་ལྡན། འཕྲུལ་དགའ། གཞན་འཕྲུལ་དབང་བྱེད་རྣམས་ཀྱི་རྒྱལ་པོ། སྟོང་གི་བདག་པོ། ཚངས་པ། སྟོང་གསུམ་གྱི་བདག་པོ། ཚངས་ཆེན། འོག་མིན་མན་ཆད་ལ་དབང་བའི་ལྷའི་བུ་དབང་ཕྱུག་ཆེན་པོའི་ཚུལ་བཟུང་ནས་དོན་མཛད་དོ། །ངག་དོན་ནི། ཡོངས་སུ་སྦྱོང་བ་རྣམ་བཅུ་ཡིས། །ཞེས་སོགས་ཀྱི་གཞུང་གསུངས་པ་ཆོས་ཅན། དགོས་པ་ཡོད་དེ། སའི་ཡོངས་སྦྱོང་གི་རབ་དབྱེ་བདེ་བླག་ཏུ་རྟོགས་པའི་ཆེད་ཡོད་པའི་ཕྱིར། སྤྱི་དོན་སྙིང་པོར་དྲིལ་བ་བདུད་རྩིའི་ཉིང་ཁུ་ལས། རྣམ་མཁྱེན་བཤད་པའི་སྐབས་ཏེ་དང་པོའོ།། །།