སྡོམ་གསུམ་རྣམ་ངེས་ལས་འཕྲོས་པ་གཞི་ལམ་འབྲས་བུའི་མན་ངག་ངེས་དོན་གྲུབ་མཐའི་སྙིང་པོ། རྒྱས་སྲས་པདྨ་འགྱུར་མེད་རྡོ་རྗེ།
སྡོམ་གསུམ་རྣམ་ངེས་ལས་འཕྲོས་པ་གཞི་ལམ་འབྲས་བུའི་མན་ངག་ངེས་དོན་གྲུབ་མཐའི་སྙིང་པོ་ཞེས་བྱ་བ་བཞུགས་སོ། །རྒྱས་སྲས་པདྨ་འགྱུར་མེད་རྡོ་རྗེ།
སྡོམ་གསུམ་རྣམ་ངེས་ལས་འཕྲོས་པ་གཞི་ལམ་འབྲས་བུའི་མན་ངག་ངེས་དོན་གྲུབ་མཐའི་སྙིང་པོ་ཞེས་བྱ་བ་བཞུགས་སོ། །
ༀ་སྭསྟི། མི་འགྱུར་དོན་དམ་འཕོ་མེད་འདུས་མ་བྱས། །བརྟན་གཡོ་ཀུན་ལ་ཁྱབ་པའི་ཆོས་ཉིད་གཤིས། །ཟུང་འཇུག་རྡོ་རྗེའི་གནས་ལུགས་ཇི་བཞིན་དུ། །སྟོན་མཛད་གཏེར་ཆེན་བླ་མ་གཙུག་གིས་མཆོད། ༡། ངག་ཚིག་བརྗོད་པའི་མཚན་མ་ལས་འདས་ཤིང་། །འཁོར་འདས་ཀུན་ལ་དབང་སྒྱུར་ཆོས་ཀུན་སྲོག །དཔལ་ལྡན་ཆོས་དབྱིངས་རྟག་བརྟན་གཡུང་དྲུང་དངོས། །མངོན་དུ་སྣང་མཛད་འགྲོ་བའི་བླ་མར་འདུད། ༢། སྦྱང་གཞི་ཆོས་ཉིད་བདེ་གཤེགས་སྙིང་པོའི་ཁམས། །སྦྱང་བྱ་གློ་བུར་དྲི་མས་བཅིངས་པ་གང་། །སྦྱོང་བྱེད་ཐབས་གྲོལ་ལམ་གྱིས་ཉེར་སྦྱངས་པས། །སྦྱངས་འབྲས་རྣམ་གྲོལ་འགྲུབ་ཕྱིར་ཚུལ་འདི་བཤད། ༣ ། འདིར་སྡོམ་གསུམ་རྣམ་པར་ངེས་པའི་བསྟན་བཅོས་ཀྱི་འགྲེལ་པ་ལེགས་བཤད་ངོ་མཚར་དཔག་བསམ་གྱི་སྙེ་མ་ལས་འཕྲོས་པའི་དཀའ་གནས་འགའ་ཞིག་ཟུར་དུ་བཀོལ་བ་ལ་གསུམ། གཞི་བདེ་གཤེགས་སྙིང་པོ་གཏན་ལ་དབབ་པ། ལམ་ལས་འབྲས་བུར་སྦྱོར་ཚུལ་འཕྲོས་དོན་དང་བཅས་པ། ཟུང་འཇུག་འབྲས་བུའི་རྣམ་བཞག་གོ །དང་པོ་ལ་བཞི། བྱེ་བྲག་སྨྲ་བ། མདོ་སྡེ་པ། སེམས་ཙམ་པ། དབུ་མ་པའི་ལུགས་སོ། །དང་པོ་ནི། སྲིད་པ་དང་སྲིད་པའི་ཡོ་བྱད་ལ་མ་ཆགས་པའི་སེམས་བྱུང་ཆོག་ཤེས་པ་ལ་འཕགས་པའི་རིགས་སུ་འདོད། དེ་ཡང་། སྲིད་པའི་ཡོ་བྱད་ལ་ཆགས་པའི་གཉེན་པོར་ཆོས་གོས། བསོད་སྙོམས། གནས་མལ་ངན་ངོན་གྱིས་ཆོག་ཤེས་པ་སྟེ་འཕགས་རིགས་གསུམ། དེའི་སྟེང་དུ། སྲིད་པ་ལ་ཆགས་པའི་གཉེན་པོར་སྤོང་བ་དང་སྒོམ་པ་ལ་ནན་ཏན་དུ་བྱེད་པ་འཕགས་པའི་རིགས་ཏེ་བཞིའོ། །དེ་དག་ལས་
འཕགས་རིགས་དང་པོ་གསུམ་གྱིས་ཚུལ་དང་ཕྱི་མས་ལས་བསྟན་ཏེ། དང་པོ་གསུམ་གྱི་ཚུལ་ལ་གནས་ནས་ཕྱི་མ་ལ་དགའ་བའི་ལས་ཀྱི་མཐུས་འཕགས་པའི་ཆོས་མྱུར་དུ་འགྲུབ་བྱེད་ཡིན་པའི་ཕྱིར། མཛོད་ལས། མ་ཆགས་འཕགས་རིགས་དེ་དག་ལས། །གསུམ་གྱིས་ཚུལ་བསྟན་ཐ་མས་ལས། །སྲེད་པ་སྐྱེ་བའི་གཉེན་པོའི་ཕྱིར། །ཞེས་སོ། །གཉིས་པ་ནི། སེམས་ཀྱི་ས་བོན་ཟག་མེད་ཀྱི་ཡེ་ཤེས་འབྱུང་རུང་གི་ནུས་པ་ལ་འདོད། དེའི་ཤེས་བྱེད། རྒྱལ་སྲས་མ་ལས། མདོ་སྡེ་པ་དག་གི་རིགས་ཞེས་བྱ་བ་ནི་སེམས་ཀྱི་ས་བོན་ནུས་པ་ཡིན་ཏེ། སོ་སོ་སྐྱེ་བོ་དང་སློབ་པའི་གནས་སྐབས་ན་ཡང་ཡོངས་སུ་ཉམས་པའི་ཆོས་ཅན་གྱི་ས་བོན་ལ་རིགས་ཞེས་བྱའོ། །ཞེས་སོ། །གསུམ་པ་ནི། ཐོག་མ་མེད་པ་ནས་སེམས་རྒྱུད་ལ་གནས་པའི་ཟག་མེད་ཀྱི་ཆོས་སྐྱེད་པར་བྱེད་ནུས་པ་ཆོས་ཉིད་ཀྱིས་ཐོབ་པ་ལ་འདོད་དེ། ཤེས་བྱེད། མདོ་ལས། བྱང་ཆུབ་སེམས་དཔའ་རྣམས་ཀྱི་རིགས་དེ་ནི་ཐོག་མ་མེད་པ་ནས་འོངས་པ། ཆོས་ཉིད་ཀྱིས་ཐོབ་པའི་སྐྱེ་མཆེད་དྲུག་གི་ཁྱད་པར་གང་ཡིན་པ་སྟེ། ཞེས་སོ། །དེའི་དོན་ཡང་། བྱང་སའི་འགྲེལ་པ་རྒྱ་མཚོ་སྤྲིན་ལས། སྐྱེ་མཆེད་དྲུག་གི་ཁྱད་པར་ནི། ཀུན་གཞིའི་རྣམ་ཤེས་ལ་གནས་པའི་ས་བོན་ཟག་པ་མེད་པའི་ཆོས་སྐྱེད་པར་བྱེད་པའི་ནུས་པའོ། །ཞེས་སོ། །འདི་ནི་ཐོགས་མེད་ཀྱི་བཞེད་པར་སྣང་ལ། འཕྲོས་དོན་ཕྱོགས་གླང་ནི། རྒྱུ་དུས་ཀྱི་བརྩེ་བ་དང་ཤེས་རབ་ཀྱིས་བསྡུས་པའི་དགེ་རྩ་ལ་རིགས་སུ་བཞེད་དོ། །དེ་ཐམས་ཅད་འདུས་བྱས་ཏེ་དངོས་པོར་སྨྲ་བའི་ལུགས་སོ། །བཞི་པ་ལ། གཞན་ལུགས་འགོད་པ་དང་། རང་ལུགས་བཞག་པ་གཉིས། དང་པོ་ནི། དྲི་བཅས་ཆོས་ཉིད་དེ་བཞིན་ཉིད་ལ་རིགས་སུ་འདོད་པར་ཕལ་ཆེར་མཐུན་ཡང་། ངོས་འཛིན་ལུགས་མ ི་འདྲ་བ་མང་དུ་སྣང་སྟེ། རྔོག་ལོ་ཆེན་པོ་རྗེས་འབྲང་དང་བཅས་པ་སྟོབས་སོགས་ཡོན་ཏན་གྱིས་ཁྱད་པར་དུ་མ་བྱས་པའི་གཞི་ལམ་འབྲས་གསུམ་ཐམས་ཅད་དུ་ཁྱབ་པའི་དབྱིངས་རང་བཞིན་གྱིས་རྣམ་པར་དག་པའི་སྟོང་ཉིད་མེད་དགག་གི་ཆ་ལ་བཞེད། ཆོས་
ཀྱི་རྗེ་ས་སྐྱ་པཎྜི་ཏ་སོགས་སྟོབས་སོགས་ཡོན་ཏན་གྱིས་ཁྱད་པར་དུ་བྱས་པ་ལ་ངོས་བཟུང་ནས་དེ་སེམས་ཅན་ལ་ཡོད་པ་དྲང་དོན་དུ་བཞེད། གངས་ཅན་གྱི་ཀློག་པ་པོ་ཕལ་ཆེ་བ་སྙིང་པོའི་ངོས་འཛིན་རང་བཞིན་རྣམ་དག་རྐྱང་པའི་ཆ་ལ་བཞེད། རྗེ་ཕག་མོ་གྲུབ་པ་སོགས་སྟོབས་སོགས་ཡོན་ཏན་དེ་དག་རྟོགས་པ་ཆོས་སྐུའི་ཡོན་ཏན་གོ་ཆོད་པོར་བཞེད། པཎ་ཆེན་འཇིགས་མེད་གྲགས་པ་སོགས་རང་བཞིན་ཆོས་སྐུའི་ཡོན་ཏན་དུ་བཞེད་དེ། དེ་ལ་སོགས་པ་བཞེད་ཚུལ་མང་ངོ་། །གཉིས་པ་ནི། འདིར་ཀུན་མཁྱེན་ཆོས་ཀྱི་རྒྱལ་པོ་དྲི་མེད་འོད་ཟེར། ཇོ་ནང་ཀུན་མཁྱེན་ཆེན་པོ་རྟོན་པ་བཞི་ལྡན། རང་བྱུང་ཞབས་སོགས་ཀྱི་གསུང་རབ་དང་། མཁས་མཆོག་བུ་སྟོན་རིན་པོ་ཆེའི་ཐུན་མོང་མ་ཡིན་པའི་དགོངས་དོན་རྒྱུད་སྡེ་སྤྱི་རྣམ་ཀྱི་རྒྱུ་རྒྱུད་བཤད་པའི་སྐབས་སོགས་སུ་བཀྲལ་བ་བཞིན། ཐེག་ཆེན་ཐུན་མོང་མ་ཡིན་པའི་ལུགས་ལྟར་བཤད་པ་ལ་གཉིས། དངོས་དང་། འཕྲོས་དོན་རིགས་ཀྱི་ཁྱད་པར་རོ། །དང་པོ་ལ་གསུམ། བདེ་གཤེགས་སྙིང་པོའི་རང་བཞིན་སྤྱིར་བསྟན་པ། དེའི་རྣམ་བཞག་རྒྱས་པར་བཤད་པ། ཞར་བྱུང་སྔགས་ལུགས་ལ་ཇི་ལྟར་འདོད་ཚུལ་ལོ། །དང་པོ་ནི། སེམས་ཉིད་ཡེ་ནས་རང་བཞིན་གྱིས་རྣམ་པར་དག་པ། སྟོང་གསལ་འགག་མེད་ཀུན་ཁྱབ་ཀྱི་ངོ་བོར་འཕོ་འགྱུར་མེད་པར་གནས་པ་ནི་ཁམས་བདེ་བར་གཤེགས་པའི་སྙིང་པོ་སྟེ། ཏིང་འཛིན་རྒྱལ་པོ་ལས། དག་པ་དྭངས་པ་འོད་གསལ་བ། །མི་འཁྲུགས་འདུས་མ་བྱས་པ་ཉིད། །བདེ་བར་གཤེགས་པའི་སྙིང་པོ་སྟེ། །ཡེ་ནས་གནས་པའི་ཆོས་ཉིད་དོ། །ཞེས་སོ། །གཉིས་པ་ལ། དྲི་བཅས་སྙིང་པོའི་མཚན་ཉིད། སྒྲ་དོན། དབྱེ་བ་དང་གསུམ། དང་པོ་ནི། དྲི་མ་དང་བཅས་པའི་དེ་བཞིན་ཉིད་གང་ཞིག །སྣང་སྟོང་ཟུང་འཇུག་གི་སེམས་ཉིད་ཀྱང་ཡིན། རང་གི་ངོ་བོ་ཀུན་ཁྱབ་རང་བཞིན་འགྱུར་མེད་དོ། །གཉིས་པ་ནི། སུ་ག་ཏ་པཱ་རའི་སྒྲ་ལས་དྲངས་ན། ཉེར་བསྒྱུར་སུ་སྔོན་མའི། གམླྀ་འགྲོ་བའི་བྱིངས་ལ། ཀྟ་བྱིན་ར་ལས་དབྱི་བར་བྱ་བ་དག་གོས་མ་ཕྱིས་པས་སུ་ག་ཏ། བདེ་གཤེགས།
པྲྀ་འགྲོ་བའི་བྱིངས་ལ། གྷཉ་བྱིན། རྀའི་འཕེལ་བ། ཨཱར་བྱས་ཏེ་སྦྱར་བས། པཱ་ར་འཕྲོ་བའི་དོན་གྱིས་སྙིང་པོ་སྟེ། བདེ་གཤེགས་སྙིང་པོའོ། །གསུམ་པ་ལ་བཞི། སྙིང་པོའི་རང་བཞིན་བཤད་པ། རྒྱུ་མཚན་གསུམ་གྱིས་སེམས་ཅན་ལ་ཡོད་ཚུལ་བསྟན་པ། རྣམ་གཞག་རྣམ་པ་བཅུས་གཏན་ལ་དབབ་པ། དྲི་མས་བསྒྲིབས་ཚུལ་དཔེས་མཚོན་པའོ། །དང་པོ་ནི། རྒྱུད་བླ་ལས། འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ནས་རྣམ་པར་གྲོལ། །ཞེས་གསུངས་པའི་དོན། སྙིང་པོ་ཆོས་ཅན། དོར་བྱའི་དྲི་མ་ཡེ་ནས་མེད་དེ། རང་གི་ངོ་བོ་རང་བཞིན་གྱིས་རྣམ་པར་དག་པའི་ཕྱིར། དེ་ཆོས་ཅན། སྔར་མེད་ཀྱི་ཡོན་ཏན་གསར་དུ་བསྒྲུབ་ཏུ་མེད་དེ། ཡོན་ཏན་ཐམས་ཅད་གདོད་མ་ནས་ལྷུན་གྱིས་གྲུབ་པའི་ཕྱིར། དེ་ཡང་སྔ་མ་ལས། དག་དང་ཉོན་མོངས་མེད་དག་ཕྱིར། །རྣམ་པར་དབྱེ་བ་མེད་ཆོས་ཕྱིར། །ལྷུན་གྲུབ་རྣམ་པར་མི་རྟོག་ཕྱིར། །ཞེས་བསམ་གྱིས་མི་ཁྱབ་པའི་གནས་བཞིས་བསྟན། དེ་ཉིད་མཚན་མའི་བློ་ཅན་རྣམས་ལ་འགལ་འདུ་ལྟར་སྣང་ཡང་། མི་འགལ་བར་དཔེས་བསྟན་པ་ནི། ཤིན་ཏུ་རྒྱས་པ་སངས་རྒྱས་ཕལ་པོ་ཆེའི་མདོའི་དོན་རྒྱུད་བླའི་འགྲེལ་པ་ལས། དེ་ལ་དྲི་མ་མེད་པའི་སངས་རྒྱས་ཀྱི་ཡོན་ཏན་ནི། གཅིག་ཏུ་ཀུན་ནས་ཉོན་མོངས་པ་སོ་སོ་སྐྱེ་བོའི་ས་ལ་ཡང་རྣམ་པར་དབྱེར་མེད་པའི་ཆོས་ཉིད་སྔ་ཕྱི་ཁྱད་པར་མེད་པར་ཡོད་པའི་ཕྱིར་གནས་འདི་བསམ་གྱིས་མི་ཁྱབ་སྟེ། གང་གི་ཕྱིར་གང་ལ་དེ་བཞིན་གཤེགས་པའི་ཡེ་ཤེས་མཐའ་དག་རྗེས་སུ་མ་ཞུགས་པའི་སེམས་ཅན་གྱི་རིགས་ན་འགའ་ཡང་མེད་དོ། །འོན་ཀྱང་འདུ་ཤེས་ཀྱི་འཛིན་པས་དེ་བཞིན་གཤེགས་པའི་ཡེ་ཤེས་མི་མངོན་ནོ། །འདུ་ཤེས་ཀྱི་འཛིན་པ་དང་བྲལ་བ་ལས་ནི་ཐམས་ཅད་མཁྱེན་པའི་ཡེ་ཤེས། རང་བྱུང་གི་ཡེ་ཤེས་ཐོགས་པ་མེད་པར་རབ་ཏུ་འབྱུང་ངོ་། །ཀྱཻ་རྒྱལ་བའི་སྲས་འདི་ལྟ་སྟེ། དཔེར་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཚད་དང་མཉམ་པའི་དར་ཡུག་ཆེན་པོ་གཅིག་ཡོད་པར་གྱུར་ལ། དར་ཡུག་ཆེན་པོ་དེ་ལ་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་
ཅད་རྫོགས་པར་བྲིས་པར་གྱུར་ཏེ། འདི་ལྟ་སྟེ། འཁོར་ཡུག་ཆེན་པོ་ཚད་དུ་ནི་འཁོར་ཡུག་ཆེན་པོ་བྲིས། ས་ཆེན་པོའི་ཚད་དུ་ནི་ས་ཆེན་པོ་བྲིས། སྟོང་གཉིས་པ་བར་མའི་འཇིག་རྟེན་གྱི་ཚད་དུ་ནི་སྟོང་གཉིས་པའི་འཇིག་རྟེན་གྱི་ཁམས། སྟོང་གི་འཇིག་རྟེན་གྱི་ཁམས་ཀྱི་ཚད་དུ་ནི་སྟོང་གི་འཇིག་རྟེན་གྱི་ཁམས། གླིང་བཞི་པའི་འཇིག་རྟེན་གྱི་ཁམས་ཀྱི་ཚད་དུ་ནི་གླིང་བཞི་པའི་འཇིག་རྟེན་གྱི་ཁམས། རྒྱ་མཚོ་ཆེན་པོའི་ཚད་དུ་ནི་རྒྱ་མཚོ་ཆེན་པོ། འཛམ་བུ་གླིང་གི་ཚད་དུ་ནི་འཛམ་བུ་གླིང་། ཤར་གྱི་ལུས་འཕགས་གླིང་གི་ཚད་དུ་ནི་ཤར་གྱི་ལུས་འཕགས་གླིང་། ནུབ་ཀྱི་བ་ལང་སྤྱོད་ཀྱི་ཚད་དུ་ནི་ནུབ་ཀྱི་བ་ལང་སྤྱོད། བྱང་གི་སྒྲ་མི་སྙན་གྱི་གླིང་གི་ཚད་དུ་ནི་བྱང་གི་སྒྲ་མི་སྙན། རི་རབ་ཀྱི་ཚད་དུ་ནི་རི་རབ། ས་ལ་སྤྱོད་པ་ལྷའི་གཞལ་ཡས་ཁང་གི་ཚད་དུ་ནི་ས་ལ་སྤྱོད་པའི་ལྷའི་གཞལ་ཡས་ཁང་། འདོད་པ་ན་སྤྱོད་པ་ལྷའི་གཞལ་ཡས་ཁང་གི་ཚད་དུ་ནི་འདོད་པ་ན་སྤྱོད་པ་ལྷའི་གཞལ་ཡས་ཁང་། གཟུགས་ན་སྤྱོད་པ་ལྷའི་གཞལ་ཡས་ཁང་གི་ཚད་དུ་ནི་གཟུགས་ན་སྤྱོད་པ་ལྷའི་གཞལ་ཡས་ཁང་བྲིས་སོ། །དར་ཡུག་ཆེན་པོ་དེ་ཡང་ཆུ་ཞེང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཚད་ཙམ་དུ་གྱུར་ལ། དར་ཡུག་ཆེན་པོ་དེ་ཡང་རྡུལ་ཕྲ་རབ་ཀྱི་རྡུལ་གཅིག་ཏུ་བཅུག་པར་གྱུར་ཏོ། །ཇི་ལྟར་རྡུལ་ཕྲ་རབ་ཀྱི་རྡུལ་གཅིག་ཏུ་དར་ཡུག་ཆེན་པོ་བཅུག་པ་དེ་བཞིན་དུ། རྡུལ་ཕྲ་རབ་ཀྱི་རྡུལ་མ་ལུས་པ་རྣམས་སུ་དེའི་ཚད་ཀྱི་དར་ཡུག་ཆེན་པོ་ནང་དུ་བཅུག་པར་གྱུར་ཏོ། །དེ་ནས་མཁས་པ་འཛངས་པ་གསལ་བ་ཡིད་གཞུངས་པ། དེར་ཉེ་བར་ཞུགས་པའི་དཔྱོད་པ་དང་ལྡན་པའི་སྐྱེས་བུ་འགའ་ཞིག་སྐྱེས་ཏེ། དེའི་མིག་ལྷའི་མིག་ཏུ་གྱུར་ཅིང་ཀུན་ཏུ་ཡོངས་སུ་དག་པ་འོད་གསལ་བར་གྱུར་པ་ཞིག་ལ། དེས་ལྷའི་མིག་གིས་རྣམ་པར་བལྟས་ཏེ། འདི་ལྟ་བུར་གྱུར་པའི་དར་ཡུག་ཆེན་པོ་འདི་རྡུལ་ཕྲ་རབ་ཀྱི་རྡུལ་ཆུང་ངུ་འདི་ཉིད་ལ་གནས་ཏེ། སེམས་ཅན་འགའ་ལ་ཡང་ཉེ་བར་མཁོ་བར་མ་གྱུར་ཏོ། །དེ་འདི་སྙམ་དུ་སེམས་ཏེ། ཀྱེ་མ་མ་ལ་གང་བདག་གིས་བརྩོན་པ་ཆེན་པོའི་སྟོབས་དང་མཐུས་རྡུལ་ཕྲ་རབ་ཀྱི་རྡུལ་འདི་ཕྱེ་སྟེ། དར་ཡུག་ཆེན་པོ་འདི་འགྲོ་བ་ཐམས་ཅད་ཀྱི་ཉེ་བར་འཚོ་བར་བྱའོ་སྙམ་པས། དེ་བརྩོན་པ་ཆེན་པོའི་
སྟོབས་ཀྱིས་མཐུ་བསྐྱེད་དེ། རྡོ་རྗེ་ཕྲ་མོས་རྡུལ་ཕྲ་རབ་ཀྱི་རྡུལ་དེ་ཕྱེ་ནས་བསམ་པ་ཇི་ལྟ་བ་བཞིན་དུ། དར་ཡུག་ཆེན་པོ་དེས་འགྲོ་བ་མཐའ་དག་ཉེ་བར་འཚོ་བར་བྱེད་ཅིང་གཅིག་ལས་ཇི་ལྟ་བ་དེ་བཞིན་དུ། རྡུལ་ཕྲ་རབ་ལུས་པ་མེད་པ་མཐའ་དག་ལས་དེ་ཁོ་ན་བཞིན་བྱེད་དོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་ཡེ་ཤེས་ཚད་མེད་པའི་ཡེ་ཤེས་སེམས་ཅན་ཐམས་ཅད་ཉེ་བར་འཚོ་བའི་ཡེ་ཤེས་ཀྱང་། སེམས་ཅན་ཐམས་ཅད་ཀྱི་སེམས་ཀྱི་རྒྱུད་ལ་མ་ཚང་བ་མེད་པར་རྗེས་སུ་ཞུགས་ཏེ། སེམས་ཅན་གྱི་སེམས་ཀྱི་རྒྱུད་དེ་དག་ཀྱང་དེ་བཞིན་གཤེགས་པའི་ཡེ་ཤེས་དང་འདྲ་བར་ཚད་མེད་དོ། །ཞེས་གསུངས་སོ། །གཉིས་པ་ནི། རྒྱུད་བླ་ལས། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་པའི་དོན་ལུས་ཅན་ཀུན་ཆོས་ཅན། ཐོག་མ་མེད་པ་ནས་དུས་རྟག་ཏུ་རྒྱུན་མི་ཆད་པར་དོན་དམ་པའི་སངས་རྒྱས་ཀྱི་སྙིང་པོ་ཅན་ཡིན་ཏེ། རྫོགས་པའི་སངས་རྒྱས་ཀྱི་སྐུ་ནི་ཆོས་ཐམས་ཅད་ལ་འཕྲོ་ཞིང་ཁྱབ་པའི་ཕྱིར་དང་། འཁོར་འདས་ཀྱི་ཆོས་ཉིད་དེ་བཞིན་ཉིད་ལ་རྣམ་པར་དབྱེ་བ་མེད་པའི་ཕྱིར་དང་། དེ་བཞིན་གཤེགས་པའི་རིགས་ཆོས་དབྱིངས་རང་བཞིན་གྱིས་རྣམ་པར་དག་པ་ཉིད་སྒྲིབ་པ་སྦྱང་རུང་དུ་སེམས་ཅན་ཐམས་ཅད་ལ་ཡོད་པའི་ཕྱིར། དེ་བཞིན་གཤེགས་པའི་སྙིང་པོའི་མདོ་ལས་ཀྱང་། རིགས་ཀྱི་བུ་དག་འདི་ནི་ཆོས་རྣམས་ཀྱི་ཆོས་ཉིད་དེ་བཞིན་གཤེགས་པ་རྣམས་བྱུང་ཡང་རུང་། མ་བྱུང་ཡང་རུང་། སེམས་ཅན་འདི་དག་ནི། རྟག་ཏུ་དེ་བཞིན་གཤེགས་པའི་སྙིང་པོ་ཅན་ཡིན་ནོ། །ཞེས་སོགས་ལུང་དུ་མས་སེམས་ཅན་ཐམས་ཅད་བདེ་གཤེགས་སྙིང་པོ་ཅན་དུ་བསྟན་ཏོ། །གསུམ་པ་ལ། བསྟན་བཤད་གཉིས་ལས། དང་པོ་ནི། རྒྱུ་བླ་ལས། ངོ་བོ་རྒྱུ་འབྲས་ལས་ལྡན་འཇུག་པ་དང་། །གནས་སྐབས་དེ་བཞིན་ཀུན་ཏུ་འགྲོ་བའི་དོན། །རྟག་ཏུ་མི་འགྱུར་ཡོན་ཏན་དབྱེར་མེད་ནི། །དོན་དམ་དབྱིངས་ཀྱི་དགོངས་དོན་ཡིན་ཞེས་བྱ། །ཞེས་སོ། །གཉིས་པ་ལ་བཅུ་ལས། དང་པོ་དག་བྱ་ངོ་བོའི་དོན་ནི། སྔ་མ་ལས། རིན་ཆེན་ནམ་མཁའ་
ཆུ་དག་བཞིན། །རྟག་ཏུ་རང་བཞིན་ཉོན་མོངས་མེད། །ཅེས་པའི་དོན། རང་མཚན་གྱི་དབང་དུ་བྱས་ན་དེ་བཞིན་གཤེགས་པའི་ཆོས་སྐུ་ཆོས་ཅན། ཡིད་བཞིན་གྱི་ནོར་བུ་དང་མཚུངས་ཏེ། བསམ་པའི་དོན་ཐམས་ཅད་འགྲུབ་པ་ལ་སོགས་པའི་མཐུ་དང་ལྡན་པའི་ཕྱིར། དེ་བཞིན་ཉིད་ཆོས་ཅན། ནམ་མཁའ་དང་མཚུངས་ཏེ། རང་བཞིན་འགྱུར་བ་མེད་པའི་ཕྱིར། རིགས་ཆོས་ཅན། ཆུ་དང་མཚུངས་ཏེ། སེམས་ཅན་ཐམས་ཅད་ལ་ཁྱབ་པའི་སྙིང་རྗེའི་རླན་དང་འབྲལ་བ་མེད་པའི་ཕྱིར། ཡང་། སྤྱི་མཚན་གྱི་དབང་དུ་བྱས་ན། དོན་གསུམ་དཔེ་གསུམ་ཀས་མཚོན་པ་ཡིན་ཏེ། རང་བཞིན་གྱིས་རྣམ་པར་དག་པར་མཚུངས་པའི་ཕྱིར། གཉིས་པ་དག་བྱེད་རྒྱུའི་དོན་ནི། སྔ་མར། ཆོས་མོས་ལྷག་པའི་ཤེས་རབ་དང་། །ཏིང་འཛིན་སྙིང་རྗེ་ལས་བྱུང་བ། །ཞེས་པའི་དོན། གློ་བུར་གྱི་དྲི་མ་རྣམ་པར་དག་པར་བྱེད་པའི་རྒྱུ་ཆོས་ཅན། ཁྱད་ཆོས་བཞི་དང་ལྡན་ཏེ། ཐེག་ཆེན་གྱི་ཆོས་ལ་མོས་པ་དང་། ཐེག་དམན་ལས་ལྷག་པའི་བདག་མེད་རྟོགས་པའི་ཤེས་རབ་དང་། ཏིང་ངེ་འཛིན་གྱི་བདེ་བ་ཚད་མེད་པ་དང་། སེམས་ཅན་ལ་དམིགས་པའི་བརྩེ་བ་སྙིང་རྗེ་ཆེན་པོ་རྣམས་ལས་བྱུང་བའི་བྱང་ཆུབ་ནི་བྲལ་འབྲས་ཡིན་དགོས་པའི་ཕྱིར། གསུམ་པ་འཐོབ་བྱ་འབྲས་བུའི་དོན་ནི། སྔ་མར། གཙང་བདག་བདེ་དང་རྟག་ཉིད་ཀྱི། །ཡོན་ཏན་ཕ་རོལ་ཕྱིན་པ་འབྲས། །ཞེས་པའི་དོན་ཆོས་མོས་སོགས་བཞིའི་འབྲས་བུ་ཆོས་ཅན། ཁྱད་ཆོས་བཞི་དང་ལྡན་ཏེ། དེ་བཞིན་གཤེགས་པའི་ཆོས་ཀྱི་སྐུ་གཙང་བ་དང་། བདག་དམ་པ་དང་། བདེ་བ་དང་། རྟག་པ་ཉིད་ཀྱི་ཕ་རོལ་ཏུ་ཕྱིན་པ་སྟེ། དོན་དམ་པའི་ཡོན་ཏན་གྱི་ཕ་རོལ་དུ་ཕྱིན་པ་བཞི་དང་ལྡན་པའི་ཕྱིར། དེ་ལ་གཙང་བ་ལ་སོགས་པ་བཞིའི་དོན་ནི། བྲལ་འབྲས་ཆོས་སྐུ་ཆོས་ཅན། གཙང་བའི་ཕ་རོལ་དུ་ཕྱིན་པ་ཡིན་ཏེ། སྤྱིའི་མཚན་ཉིད་གདོད་མ་ནས་རང་བཞིན་གྱིས་རྣམ་པར་དག་པ་གང་ཞིག །ཁྱད་པར་གྱི་མཚན་ཉིད་གློ་བུར་གྱི་དྲི་མ་བག་ཆགས་དང་བཅས་པ་སྤངས་པའི་ཕྱིར། དེ་ཆོས་ཅན། བདག་དམ་པའི་ཕ་རོལ་ཏུ་ཕྱིན་པ་ཡིན་ཏེ། མུ་སྟེགས་ལ་སོགས་པས་བརྟགས་པའི་བདག་འཛིན་གྱི་སྤྲོས་པ་དང་། ཉན་རང་ལ་སོགས་པས་བརྟགས་པའི་བདག་མེད་པར་འཛིན་པའི་སྤྲོས་པ་མཐའ་དག་ཉེ་
བར་ཞི་བའི་ཕྱིར། དེ་ཆོས་ཅན། བདེ་བའི་ཕ་རོལ་དུ་ཕྱིན་པ་ཡིན་ཏེ། སྡུག་བསྔལ་མ་ལུས་པ་འགགས་པས་ཡིད་ཀྱི་རང་བཞིན་གྱི་ཕུང་པོ་དང་། ཀུན་འབྱུང་མཐའ་དག་སྤངས་པས་དེའི་རྒྱུ་མ་རིག་བག་ཆགས་ཀྱི་སའི་ཉོན་མོངས་པ་དང་། ཟག་པ་མེད་པའི་ལས་ཐམས་ཅད་ཀྱང་ཟད་པའི་ཕྱིར། དེ་ཆོས་ཅན། རྟག་པའི་ཕ་རོལ་ཏུ་ཕྱིན་པ་ཡིན་ཏེ། སྲིད་ཞི་རང་བཞིན་མཉམ་ཉིད་དུ་རྟོགས་པས་དོན་གཉིས་རྒྱུན་མི་ཆད་པའི་ཕྱིར། བཞི་པ་འཐོབ་བྱེད་ལས་ཀྱི་དོན་ནི། སྔ་མར། སྡུག་བསྔལ་ཡིད་འབྱུང་ཞི་ཐོབ་པར། །འདུན་དང་སྨོན་པའི་ལས་ཅན་ནོ། །ཞེས་པའི་དོན། འཁོར་འདས་ཀྱི་སྡུག་བདེ་ལ་འདོར་ལེན་གྱི་ཆོས་ཆོས་ཅན། འབྲས་བུ་འཐོབ་བྱེད་ལས་ཀྱི་དོན་ཡིན་ཏེ། འཁོར་བའི་སྡུག་བསྔལ་ལ་ཡིད་འབྱུང་བའི་ལས་ཅན་གང་ཞིག །ཞི་བ་མྱང་འདས་ཀྱི་གོ་འཕང་ལ་འདུན་ཞིང་སྨོན་པའི་ལས་ཅན་གཉིས་ནི་ཁམས་ཡོད་པའི་བྱེད་ལས་ཡིན་པའི་ཕྱིར། དཔལ་ཕྲེང་གི་མདོ་ལས། བཅོམ་ལྡན་འདས། གལ་ཏེ་དེ་བཞིན་གཤེགས་པའི་སྙིང་པོ་མ་མཆིས་ན་སྡུག་བསྔལ་ལ་སྐྱོ་བར་ཡང་མི་འགྱུར་ལ། མྱ་ངན་ལས་འདས་པ་ལ་འདོད་པ་དང་དོན་དུ་གཉེར་བ་དང་སྨོན་པ་ཡང་མེད་པར་འགྱུར་རོ། །ཞེས་དང་། ཀླུ་སྒྲུབ་ཞབས་ཀྱིས་ཀྱང་། ཁམས་ཡོད་ན་ནི་ལས་བྱས་པས། །ས་ལེ་སྦྲམ་དག་མཐོང་བར་འགྱུར། །ཁམས་མེད་པར་ནི་ལས་བྱས་ཀྱང་། །ཉོན་མོངས་འབའ་ཞིག་བསྐྱེད་པར་ཟད། །ཅེས་གསུངས། དེ་དང་མཐུན་པར་སོར་ཕྲེང་གི་མདོ་ལས་ཀྱང་། འཇམ་དཔལ། མི་གསེར་འདོད་པ་རྟོག་པ་དང་ལྡན་པ་བྲག་ལ་རྐོ་ལ་ཅིའི་ཕྱིར་ཤིང་ལ་མི་རྐོ། རྡོ་བ་གསེར་གྱི་ཁམས་ཡོད་པ་ལ་ནི་རྐོ་ཡི་ཤིང་གསེར་མེད་པ་ལ་མི་རྐོའོ། །དེ་བཞིན་དུ་འཇམ་དཔལ། དབྱིངས་ཡོད་པ་ལ་རྟོག་པའི་མི་རྣམས་བདག་སངས་རྒྱས་སུ་འགྱུར་རོ་སྙམ་སྟེ་ཚུལ་ཁྲིམས་བསྲུང་ཞིང་ཚངས་པར་སྤྱོད་དོ། །གཞན་ཡང་འཇམ་དཔལ། དབྱིངས་མེད་ན་ནི་ཚངས་པར་སྤྱད་པ་དོན་མེད་པར་འགྱུར་རོ། །ཞེས་སོ། །ལྔ་པ་ཡོན་ཏན་གྱི་ཚོགས་དང་ལྡན་པའི་དོན་ནི། རྒྱུད་བླར། རྒྱ་མཚོ་ཆེ་བཞིན་དཔག་མེད་པའི། །ཡོན་ཏན་རིན་ཆེན་མི་ཟད་གནས། །དབྱེར་མེད་ཡོན་ཏན་དང་ལྡན་པའི། །ངོ་བོ་ཉིད་ཕྱིར་མར་མེ་བཞིན། །ཞེས་པའི་དོན། ཆོས་ཀྱི་དབྱིངས་
ཆོས་ཅན། རྒྱུའི་ཡོན་ཏན་དང་ལྡན་ཏེ། མོས་པའི་སྣོད་རབ་ཏུ་ཡངས་པར་ཤེས་རབ་དང་ཏིང་ངེ་འཛིན་དཔག་ཏུ་མེད་པའི་ཡོན་ཏན་གྱི་རིན་པོ་ཆེ་དང་ཐུགས་རྗེའི་ཆུ་མི་ཟད་པའི་གནས་སུ་གྱུར་པའི་ཕྱིར། དཔེར་ན་རྒྱ་མཚོ་ཆེན་པོར་རིན་པོ་ཆེ་དང་ཆུ་ཕྲན་དཔག་མེད་འདུ་བ་བཞིན་ནོ། །དེ་ཆོས་ཅན། འབྲས་བུའི་ཡོན་ཏན་དང་ལྡན་ཏེ། མངོན་ཤེས་ལྔ་དང་། ཟག་མེད་ཀྱི་ཡེ་ཤེས་དང་། ཟག་མེད་ཀྱི་སྤངས་པ་རྣམས་རྣམ་པར་དབྱེར་མེད་པའི་ཡོན་ཏན་དང་ལྡན་པའི་ངོ་བོ་ཉིད་ཡིན་པའི་ཕྱིར། དཔེར་ན། མར་མེའི་སྣང་བ་དང་དྲོ་བ་དང་ཁ་དོག་རྣམས་རྣམ་པར་དབྱེ་བ་མེད་པ་བཞིན་ནོ། །མདོ་ལས། ཤཱ་རིའི་བུ། དཔེར་ན། མར་མེ་ནི་འདི་ལྟ་སྟེ། སྣང་བ་དང་། དྲོ་བ་དང་། མདོག་དག་གིས་སམ། ནོར་བུ་སྣང་བ་དང་མདོག་དང་དབྱིབས་དག་གིས་རྣམ་པར་དབྱེར་མེད་པའི་ཆོས་ཅན་ལ་བྲལ་བའི་ཡོན་ཏན་ཅན་ནོ། །ཤཱ་རིའི་བུ། དེ་བཞིན་དུ་དེ་བཞིན་གཤེགས་པས་བསྟན་པའི་ཆོས་ཀྱི་སྐུ་ནི་འདི་ལྟ་སྟེ། གངྒཱའི་རླུང་གི་བྱེ་མ་ལས་འདས་པའི་དེ་བཞིན་གཤེགས་པས་བསྟན་པའི་ཆོས་ཀྱི་སྐུ་ནི་འདི་ལྟ་སྟེ། ཆོས་རྣམས་ཀྱིས་རྣམ་པར་དབྱེར་མེད་པའི་ཆོས་ཅན་མ་བྲལ་བའི་ཡེ་ཤེས་ཀྱི་ཡོན་ཏན་ཅན་ནོ། །ཞེས་སོ། །དྲུག་པ་གང་ཟག་གི་དབྱེ་བས་འཇུག་པའི་དོན་ནི། རྒྱུ་བླར། སོ་སོ་སྐྱེ་འཕགས་རྫོགས་སངས་ཀྱི། །དེ་བཞིན་ཉིད་དབྱེའི་འཇུག་པ་ལས། །དེ་ཉིད་གཟིགས་པས་སེམས་ཅན་ལ། །རྒྱལ་བའི་སྙིང་པོ་འདི་བསྟན་ཏོ། །ཞེས་པའི་དོན། དེ་ཁོ་ན་ཉིད་མངོན་སུམ་དུ་གཟིགས་པའི་རྒྱལ་བ་དེ་བཞིན་གཤེགས་པ་ཆོས་ཅན། ཁྱོད་ཀྱིས་སེམས་ཅན་ཐམས་ཅད་ལ་རྒྱལ་བའི་སྙིང་པོ་འདི་ཡོད་པར་བསྟན་ཏེ། བྱིས་པ་སོ་སོའི་སྐྱེ་བོ་དང་། འཕགས་པ་སློབ་པ་དང་། རྫོགས་པའི་སངས་རྒྱས་ཀྱི་གནས་སྐབས་ཀྱི་དེ་བཞིན་ཉིད་ཀྱི་དབྱེ་བའི་འཇུག་པ་ལས་བརྩམས་ནས་བསྟན་པའི་ཕྱིར། བདུན་པ་གནས་སྐབས་ཙམ་གྱི་དོན་ནི། སྔ་མར། མ་དག་མ་དག་དག་པ་དང་། །ཤིན་ཏུ་རྣམ་དག་གོ་རིམ་བཞིན། །སེམས་ཅན་བྱང་ཆུབ་སེམས་དཔའ་དང་། །དེ་བཞིན་གཤེགས་པ་ཞེས་བརྗོད་དོ། །ཞེས་པའི་དོན། དེ་བཞིན་གཤེགས་པའི་སྙིང་པོ་ཆོས་ཅན། ཁྱོད་ཀྱི་ངོ་བོ་འགྱུར་བ་མེད་ཀྱང་རྟེན་གྱི་གང་ཟག་ལ་ལྟོས་ནས་གནས་སྐབས་ཀྱི་ཐ་
སྙད་གསུམ་དུ་བཏགས་ཏེ། གློ་བུར་གྱི་དྲི་མས་མ་དག་པ་དང་། མ་དག་ལ་དག་པ་དང་། ཤིན་ཏུ་རྣམ་དག་གི་གནས་སྐབས་གསུམ་ལ་ལྟོས་ནས་སེམས་ཅན་སོ་སོ་སྐྱེ་བོ་ཐ་མལ་པ་དང་། བྱང་ཆུབ་སེམས་དཔའ་རྣམས་དང་། དེ་བཞིན་གཤེགས་པ་རྫོགས་པའི་སངས་རྒྱས་ཞེས་བྱ་བར་རིམ་པ་བཞིན་བརྗོད་པའི་ཕྱིར། དེ་ལྟར་ཡང་འཕགས་པ་ཐོགས་མེད་ཀྱིས་རྒྱུད་བླའི་འགྲེལ་པར། གནས་སྐབས་གསུམ་དུ་གོ་རིམ་བཞིན་མིང་གསུམ་བསྟན་པས་བསྟན་པ་རིག་པར་བྱ་སྟེ། འདི་ལྟ་སྟེ། མ་དག་པའི་གནས་སྐབས་སུ་ནི་སེམས་ཅན་གྱི་ཁམས་ཞེས་བྱ་བ་དང་མ་དག་པ་དང་དག་པའི་གནས་སྐབས་སུ་ནི་དེ་བཞིན་གཤེགས་པ་ཞེས་བྱའོ། །ཇི་སྐད་དུ། བཅོམ་ལྡན་འདས་ཀྱིས། ཤཱ་རིའི་བུ། ཆོས་ཀྱི་སྐུ་དེ་ཉིད་ཉོན་མོངས་པའི་སྦུབས་བྱེ་བ་མཐའ་ཡས་པས་བཏུམས་པ་འཁོར་བའི་རྒྱུན་གྱིས་འཁྱེར་བ་ཐོག་མ་དང་ཐ་མ་མེད་པའི་འཁོར་བའི་འགྲོ་བར་འཆི་བ་དང་སྐྱེ་བ་དག་ཏུ་འཁོར་བ་ནི་སེམས་ཅན་གྱི་ཁམས་ཞེས་བརྗོད་དོ། །ཤཱ་རིའི་བུ། ཆོས་ཀྱི་སྐུ་དེ་ཉིད་འཁོར་བའི་རྒྱུན་གྱི་སྡུག་བསྔལ་ལ་སྐྱོ་བར་གྱུར་པ། འདོད་པ་དང་ཡུལ་ཐམས་ཅད་ལ་ཆགས་པ་དང་བྲལ་བ། ཕ་རོལ་དུ་ཕྱིན་པ་བཅུའི་ཁོངས་སུ་གཏོགས་པ་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གིས་བྱང་ཆུབ་ཀྱི་དོན་དུ་སྤྱད་པར་སྤྱོད་པ་ནི་བྱང་ཆུབ་སེམས་དཔའ་ཞེས་བརྗོད་དོ། །ཤཱ་རིའི་བུ། ཆོས་ཀྱི་སྐུ་དེ་ཉིད་ཉོན་མོངས་པའི་སྦུབས་ཐམས་ཅད་ལས་ཡོངས་སུ་གྲོལ་བ། སྡུག་བསྔལ་ཐམས་ཅད་ལས་འདས་པ་ཉེ་བའི་ཉོན་མོངས་པའི་དྲི་མ་མཐའ་དག་དང་བྲལ་བ། དག་པ་རྣམ་པར་དག་པ། མཆོག་ཏུ་ཡོངས་སུ་དག་པའི་ཆོས་ཉིད་ལ་གནས་པ། སེམས་ཅན་ཐམས་ཅད་ཀྱིས་བལྟ་བར་བྱ་བའི་ས་ལ་བཞུགས་པ། ཤེས་བྱའི་ས་མཐའ་དག་ལ་གཉིས་སུ་མེད་པའི་སྐྱེས་བུའི་མཐུ་ཐོབ་པ་སྒྲིབ་པ་མེད་པའི་ཆོས་ཅན། ཆོས་ཐམས་ཅད་ཀྱི་དབང་ཕྱུག་གི་སྟོབས་ཐོགས་པ་མེད་པ་ཐོབ་པ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་བརྗོད་དོ། །ཞེས་དྲངས་ཏེ་གསུངས་སོ། །བརྒྱད་པ་ནམ་མཁའ་ལྟར་ཀུན་ཏུ་འགྲོ་བའི་དོན་ནི། རྒྱུད་བླར། ཇི་ལྟར་རྟོག་མེད་བདག་ཉིད་ཅན། །ནམ་མཁའ་ཀུན་ཏུ་རྗེས་སོང་ལྟར། །སེམས་ཀྱི་རང་བཞིན་
དྲི་མེད་དབྱིངས། །དེ་བཞིན་ཀུན་ཏུ་འགྲོ་བ་ཉིད། །ཅེས་པའི་དོན། སེམས་ཀྱི་རང་བཞིན་འོད་གསལ་དྲི་མ་མེད་པའི་དབྱིངས་བདེ་བར་གཤེགས་པའི་སྙིང་པོ་ཆོས་ཅན། སོ་སྐྱེ་སོགས་གནས་སྐབས་གསུམ་པོ་ཀུན་ཏུ་འགྲོ་བའི་དཔེ་ཡོད་དེ། རྟོག་པ་མེད་ཅིང་སྒྲིབ་པ་མེད་པའི་བདག་ཉིད་ཅན་གྱི་ནམ་མཁའ་གཟུགས་ཀྱི་རྣམ་པ་དམན་འབྲིང་མཆོག་གསུམ་ཐམས་ཅད་ལ་དབྱེར་མེད་པར་ཀུན་ཏུ་རྗེས་སུ་སོང་ཞིང་ཁྱབ་པ་ཇི་ལྟ་བ་དེ་ལྟར་གྱི་ཕྱིར། དེ་ལྟར་ཡང་རྒྱུད་བླར། དེ་སྤྱིའི་མཚན་ཉིད་ཉེས་པ་དང་། །ཡོན་ཏན་མཐར་ཐུག་ཁྱབ་པ་སྟེ། །གཟུགས་ཀྱི་རྣམ་པ་དམན་པ་དང་། །བར་མ་མཆོག་ལ་ནམ་མཁའ་བཞིན། །ཞེས་ཀྱང་གསུངས་ཤིང་། དེའི་འགྲེལ་པར་སྔ་མའི་འཕྲོ་ནས་ལུང་དྲངས་པ། ཤཱ་རིའི་བུ། དེའི་ཕྱིར་ན་སེམས་ཅན་གྱི་ཁམས་གཞན་ལ་ཆོས་ཀྱི་སྐུ་ཡང་གཞན་པ་ནི་མ་ཡིན་ཏེ། སེམས་ཅན་གྱི་ཁམས་ཉིད་ཆོས་ཀྱི་སྐུ། ཆོས་ཀྱི་སྐུ་ཉིད་སེམས་ཅན་གྱི་ཁམས་ཏེ་འདི་ནི་དོན་གྱི་གཉིས་སུ་མེད་དོ། །ཡི་གེ་ཙམ་ཐ་དད་པ་ཡིན་ནོ། །ཞེས་སོ། །དགུ་པ་དུས་རྟག་ཏུ་འགྱུར་བ་མེད་པའི་དོན་ནི། རྒྱུད་བླར། ཉེས་པ་གློ་བུར་དང་ལྡན་དང་། །ཡོན་ཏན་རང་བཞིན་ཉིད་ལྡན་ཕྱིར། །ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་པའི་དོན། ཆོས་ཀྱི་དབྱིངས་བདེ་བར་གཤེགས་པའི་སྙིང་པོ་ཆོས་ཅན། རང་གི་ངོ་བོ་ཇི་ལྟར་སྔར་འཁོར་བའི་གནས་སྐབས་སུ་ཡོད་པ་བཞིན་དུ་ཕྱིས་མྱ་ངན་ལས་འདས་པ་ནའང་རང་བཞིན་འགྱུར་བ་མེད་པའི་ཆོས་ཉིད་ཡིན་ཏེ། མ་དག་པའི་གནས་སྐབས་སུ་ཉོན་མོངས་པ་ལ་སོགས་པ་ཉེས་པ་རྣམས་སྤང་རུང་གློ་བུར་བ་ཉིད་དང་ལྡན་པ་ཡིན་གྱིས་རང་བཞིན་དུ་ཡོད་པ་མ་ཡིན་པའི་ཕྱིར་དང་། དག་པའི་གནས་སྐབས་སུ་སྟོབས་ལ་སོགས་པའི་ཡོན་ཏན་མངོན་དུ་གྱུར་པ་རྣམས་ཀྱང་གདོད་མ་ནས་རང་བཞིན་གྱིས་ལྡན་པ་ལས་གསར་དུ་བསྒྲུབ་ཏུ་མེད་པའི་ཕྱིར། ཀླུ་སྒྲུབ་ཀྱིས་ཆོས་དབྱིངས་བསྟོད་པར། དུས་རྣམས་ཀུན་ཏུ་ཉོན་མོངས་མེད། །ཐོག་མ་བར་མཐའ་དྲི་མ་བྲལ། །ཞེས་དང་གཞན་ཡང་། རང་བཞིན་དག་ནི་བཅོས་མིན་དང་། །གཞན་ལ་ལྟོས་པ་མེད་པ་ཡིན། །རང་བཞིན་གཞན་དུ་འགྱུར་བ་ནི། །ནམ་ཡང་འཐད་པ་མ་ཡིན་ནོ། །ཞེས་དང་། འཕགས་
པ་ཡོངས་སུ་མྱ་ངན་ལས་འདས་པའི་མདོར་ཡང་། གྱད་ཀྱི་ནོར་བུའི་དཔེ་སྔོན་དུ་བཏང་ནས་གསུང་པ། རིགས་ཀྱི་བུ། དེ་ལྟར་དེ་བཞིན་གཤེགས་པས་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པར་གསུངས་པ་ཡང་། ཇི་ལྟར་སྨན་པ་མཁས་པས་གྱད་ཀྱི་རྡོ་རྗེའི་ནོར་བུ་བསྟན་པ་བཞིན་ནོ། །ཞེས་པ་ནས། རིགས་ཀྱི་བུ། སེམས་ཅན་ཐམས་ཅད་ཀྱི་ལུས་ཀྱི་ནང་ན་སྟོབས་བཅུ་དང་། མི་འཇིགས་པ་བཞི་དང་། མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་ཡང་ཡོད་དོ། །ཞེས་སོ། །བཅུ་པ་ཡོན་ཏན་དབྱེར་མེད་ཀྱི་དོན་ནི། རྒྱུད་བླར། གང་ཕྱིར་དེ་ནི་ཆོས་སྐུ་དེ་ནི་དེ་བཞིན་གཤེགས། །དེ་ནི་འཕགས་པའི་བདེན་པ་དོན་དམ་མྱ་ངན་འདས། །དེ་ཕྱིར་ཉི་དང་ཟེར་བཞིན་ཡོན་ཏན་དབྱེར་མེད་པས། །སངས་རྒྱས་ཉིད་ལས་མ་གཏོགས་མྱ་ངན་འདས་པ་མེད། །ཅེས་པའི་དོན་འགྱུར་བ་མེད་པའི་དབྱིངས་ཆོས་ཅན། ཉི་མ་དང་ཉི་མའི་ཟེར་བཞིན་སངས་རྒྱས་ཀྱི་ཡོན་ཏན་ཐམས་ཅད་དབྱེར་མེད་དུ་ལྡན་པས་རྫོགས་པའི་སངས་རྒྱས་ཉིད་མ་གཏོགས་མྱང་འདས་མངོན་དུ་གྱུར་པ་གཞན་མེད་དེ། གང་གི་ཕྱིར་ན་དབྱིངས་རྣམ་པར་དག་པའི་ཆོས་ཉིད་དེ་ནི་རྫོགས་པའི་སངས་རྒྱས་ཀྱི་ཆོས་སྐུ་དང་། དེ་བཞིན་གཤེགས་པ་དང་། འཕགས་པའི་བདེན་པ་དང་། དོན་དམ་པའི་མྱ་ངན་ལས་འདས་པ་ཡང་ཡིན་པས་དེ་རྣམས་མིང་གི་རྣམ་གྲངས་ཙམ་ཡིན་པ་གང་ཞིག །བདེ་གཤེགས་སྙིང་པོ་ལ་དོན་དམ་གྱི་ཡོན་ཏན་ཐམས་ཅད་གདོད་མ་ནས་ལྡན་ཡང་། དེ་རྒྱུད་ལྡན་གྱི་གང་ཟག་སངས་མ་རྒྱས་ཀྱི་བར་དུ་དེའི་ཡོན་ཏན་མི་ཐོབ་པ་དང་། སངས་རྒྱས་ནས་ཡོན་ཏན་མངོན་དུ་གྱུར་པའི་ཚེ་དེ་དག་ཐོབ་པར་འཇོག་དགོས་པའི་ཕྱིར། དེ་ལྟར་ཡང་འཕེལ་འགྲིབ་མེད་པ་བསྟན་པའི་མདོ་ལས། བཅོམ་ལྡན་འདས། དེ་བཞིན་གཤེགས་པའི་སྙིང་པོ་ནི་རྣམ་པར་དབྱེ་བ་མེད་པ། བྲལ་མི་ཤེས་པ། བསམ་གྱིས་མི་ཁྱབ་པའི་སངས་རྒྱས་ཀྱི་ཆོས་གངྒཱའི་ཀླུང་གི་བྱེ་མ་ལས་འདས་པས་མི་སྟོང་པའོ། །རྒྱུད་བླར། མདོར་ན་ཟག་མེད་དབྱིངས་ལ་ནི། །དོན་གྱི་རབ་ཏུ་དབྱེ་བ་བཞིན། །ཆོས་ཀྱི་སྐུ་ལ་སོགས་པ་ཡི། །རྣམ་གྲངས་བཞིར་ནི་རིག་པར་བྱ། །ཞེས་དང་། དེའི་འགྲེལ་པར་ཐོགས་མེད་ཀྱིས། མདོར་བསྡུ་ན། ཟག་པ་
མེད་པའི་དབྱིངས་དེ་བཞིན་གཤེགས་པའི་སྙིང་པོ་ལ་དོན་བཞིའི་དབང་དུ་བྱས་ནས། མིང་གི་རྣམ་གྲངས་བཞིར་རིག་པར་བྱའོ། །ཞེས་དང་། ཀླུ་སྒྲུབ་ཀྱིས་ཆོས་དབྱིངས་བསྟོད་པ་ལས། ཇི་ལྟར་བུམ་ནང་མར་མེ་ནི། །ཕྱི་རོལ་ཀུན་ཏུ་མི་སྣང་ལྟར། །དེ་བཞིན་ཆོས་ཀྱི་དབྱིངས་འདི་ཡང་། །འཁོར་བར་འོད་ནི་གསལ་མ་ཡིན། །བུམ་པ་དེ་ཉིད་བཅག་གྱུར་པ། །ཐམས་ཅད་ཀུན་ཏུ་སྣང་བ་ལྟར། །གང་ཚེ་ཏིང་འཛིན་རྡོ་རྗེ་ཡིས། །སྒྲིབ་པ་ཀུན་ཏུ་བཅོམ་གྱུར་པ། །དེ་ཚེ་ནམ་མཁའི་མཐར་ཐུག་གསལ། །ཞེས་སོ། །དེ་ཡང་ངག་དོན་དུ་སྒྲིལ་ན། འགྱུར་བ་མེད་པའི་དབྱིངས་ཆོས་ཅན། ཡེ་ནས་ཡོན་ཏན་དབྱེར་མེད་ཡིན་ཏེ། དྲི་མས་བསྒྲིབས་མ་བསྒྲིབས་ཙམ་ལས་གཞི་འབྲས་ཀྱི་ངོ་བོ་འགྱུར་མེད་དུ་བསྟན་ཟིན་པ་དེའི་ཕྱིར། རྒྱུ་མཚན་དེས། རྫོགས་པའི་སངས་རྒྱས་མ་གཏོགས་མྱང་འདས་མཚན་ཉིད་པ་གཞན་མེད་ཅེས་གསུངས་ཏེ། དཔེར་ན་ཉི་མའི་དཀྱིལ་འཁོར་དང་ཉི་མའི་འོད་ཟེར་གཉིས་ནམ་དུའང་འབྲལ་མི་ཤེས་པའི་དབྱེར་མེད་ཡིན་པ་ལྟར། གདོད་མ་ནས་དབྱིངས་བདེ་བར་གཤེགས་པའི་སྙིང་པོ་ལ་ཡང་སྟོབས་སོགས་ཡོན་ཏན་ཐམས་ཅད་དབྱེར་མེད་དུ་ཡོད་པར་འདོད་དགོས་ཤིང་། དེའི་གནད་ཀྱིས། དཔེ་ཉི་མའི་དཀྱིལ་འཁོར་དེ་ཡང་སྒྲིབ་བྱེད་ཀྱི་སྤྲིན་དང་མ་བྲལ་བར་འོད་ཟེར་ཇི་ལྟར་ཡོད་པ་སྣང་མི་ནུས་པ་ལྟར། དོན་དབྱིངས་བདེ་བར་གཤེགས་པའི་སྙིང་པོ་དེ་ཡང་། རྒྱུད་ལྡན་གྱི་གང་ཟག་གློ་བུར་གྱི་དྲི་མ་མཐའ་དག་དང་མ་བྲལ་བར་གཞིའི་ཡོན་ཏན་ཇི་ལྟ་བ་སྟོན་པར་མི་ནུས་པས། ཉན་རང་དགྲ་བཅོམ་སོགས་ཀྱང་མྱང་འདས་མཚན་ཉིད་པ་མ་ཡིན་ནོ་ཞེས་བྱ་བའི་དོན་དུ་གསུངས་སོ། །བཞི་པ་དྲི་མས་བསྒྲིབས་ཚུལ་དཔེས་མཚོན་པ་ལ་བཞི། སྙིང་པོ་ཡོད་ཚུལ་དཔེ་དགུའི་སྒོ་ནས་སྤྱིར་བསྟན་པ། དྲི་མ་དང་སྙིང་པོའི་དཔེ་སོ་སོར་ཕྱེ་སྟེ་ཐོག་མ་མེད་ཚུལ་བསྟན་པ། སྒྲིབ་བྱེད་དྲི་མའི་དབྱེ་བ་བྱེ་བྲག་ཏུ་བཤད་པ། དེས་དབྱིངས་ལ་སྒྲིབ་ཚུལ་གཏན་ལ་དབབ་པའོ། །དང་པོ་ནི། རྒྱུད་བླ་མ་ལས། ཉོན་མོངས་སྦུབས་ནང་གནས་པ་དེ། །དཔེ་དག་གིས་ནི་ཤེས་པར་བྱ། །སངས་རྒྱས་པད་ངན་སྦྲང་རྩི་སྦྲང་མ་ལ། །སྦུན་ལ་སྙིང་པོ་མི་གཙང་ནང་
ན་གསེར། །ས་ལ་གཏེར་དང་མྱུག་སོགས་འབྲས་ཆུང་དང་། །གོས་རུལ་ནང་ན་རྒྱལ་བའི་སྐུ་དང་ནི། །བུད་མེད་ངན་མའི་ལྟོ་ན་མི་བདག་དང་། །ས་ལ་རིན་ཆེན་གཟུགས་ཡོད་ཇི་ལྟ་བར། །གློ་བུར་ཉོན་མོངས་དྲི་མས་བསྒྲིབས་པ་ཡིས། །སེམས་ཅན་རྣམས་ལ་དེ་བཞིན་ཁམས་འདི་གནས། །ཞེས་པའི་དོན་ངག་དོན་དུ་སྒྲིལ་ན། ལུས་ཅན་ཀུན་ཆོས་ཅན། ཁྱོད་ཀྱི་རྒྱུད་ལ་ཐོག་མ་མེད་པ་ནས་ཉེ་བར་གནས་ཀྱང་མ་འབྲེལ་བའི་རང་བཞིན་གློ་བུར་གྱི་དྲི་མའི་སྦུབས་བྱེ་བ་མཐའ་ཡས་པའི་ནང་ན་དབྱིངས་བདེ་བར་གཤེགས་པའི་སྙིང་པོ་གདོད་མ་ནས་ཡོན་ཏན་དབྱེར་མེད་དུ་བཞུགས་པའི་དཔེ་ཡོད་དེ། པདྨའི་ནང་ན་སངས་རྒྱས་ལ་སོགས་པ་རྣམ་པ་དགུས་མཚོན་པའི་ཕྱིར། གཉིས་པ་ནི། སྔ་མར། པདྨ་སྲོག་ཆགས་བུང་བ་དང་། །སྦུན་པ་དང་ནི་མི་གཙང་དང་། །འབྲས་ཤུན་གོས་རུལ་བུད་མེད་ཀྱི། །མངལ་དང་ས་ཡི་སྦུབས་ན་ཡང་། །ཞེས་དྲི་མའི་དཔེ་དང་། སངས་རྒྱས་སྦྲང་རྩི་སྙིང་པོ་བཞིན། །གསེར་བཞིན་གཏེར་བཞིན་ལྗོན་པ་བཞིན། །རིན་ཆེན་སྐུ་དང་འཁོར་ལོ་ཡིས། །སྒྱུར་བ་བཞིན་དང་གསེར་གཟུགས་བཞིན། །ཞེས་སྙིང་པོའི་དཔེ་སོ་སོར་ཕྱེ་སྟེ་བཤད་ལ། ཐོག་མ་མེད་ཚུལ་དངོས་ནི། དེ་མ་ཐག་པར་སེམས་ཅན་ཁམས་ཀྱི་ཉོན་མོངས་སྦུབས། མ་འབྲེལ་ཐོག་མ་མེད་པ་ན། །སེམས་ཀྱི་རང་བཞིན་དྲི་མེད་ནི། །ཐོག་མ་མེད་པ་ཡིན་པར་བརྗོད། །ཅེས་པས་སེམས་ཅན་གྱི་ཁམས་ཀྱི་དེ་བཞིན་ཉིད་ལ་སྒྲིབ་བྱེད་ཉོན་མོངས་ལ་སོགས་པའི་དྲི་མའི་སྦུབས་རྣམས་ནི་རང་བཞིན་ལ་མ་འབྲེལ་བས་གློ་བུར་བ་ཡིན་ཡང་། ཆོས་དབྱིངས་དང་ལྷན་ཅིག་ཐོག་མ་མེད་པ་ནས་ཉེ་བར་གནས་ཤིང་། དེ་རྣམས་གང་ན་ཡོད་པ་ན་སེམས་ཀྱི་རང་བཞིན་དྲི་མ་མེད་པའི་དབྱིངས་དེ་ཡང་ཐོག་མ་མེད་པ་ནས་རྒྱུན་མི་ཆད་དུ་བཞུགས་པ་ཡིན་པར་བརྗོད་དོ། །གཞན་ཡང་སེམས་ཅན་ལ་བདེ་གཤེགས་སྙིང་པོ་ཡོད་ཚུལ་དཔེས་མཚོན་པ་ནི། ཀླུ་སྒྲུབ་ཀྱིས་ཆོས་དབྱིངས་བསྟོད་པ་ལས། གང་ཞིག་ཀུན་ཏུ་མ་ཤེས་ན། །སྲིད་པ་གསུམ་དུ་རྣམ་འཁོར་བ། །སེམས་ཅན་ཀུན་ལ་ངེས་གནས་པ། །ཆོས་ཀྱི་དབྱིངས་ལ་ཕྱག་འཚལ་འདུད། །གང་ཞིག་འཁོར་བའི་རྒྱུར་གྱུར་པ། །དེ་ཉིད་སྦྱང་བ་བྱས་པ་ལས། །དག་པ་དེ་ཉིད་མྱ་ངན་འདས། །ཆོས་ཀྱི་སྐུ་ཡང་
དེ་ཉིད་དོ། །ཇི་ལྟར་འོ་མ་དང་འདྲེས་པས། །མར་གྱི་སྙིང་པོ་མི་སྣང་བ། །དེ་བཞིན་ཉོན་མོངས་དང་འདྲེས་པས། །ཆོས་ཀྱི་དབྱིངས་ཀྱང་མི་མཐོང་ངོ་། །ཇི་ལྟར་འོ་མ་རྣམས་སྦྱངས་པས། །མར་གྱི་སྙིང་པོ་དྲི་མེད་འགྱུར། །དེ་བཞིན་ཉོན་མོངས་རྣམས་སྦྱངས་པས། །ཆོས་དབྱིངས་ཤིན་ཏུ་དྲི་མེད་འགྱུར། །ཞེས་དང་། ཇི་ལྟར་རིན་ཆེན་བཻ་ཌཱུཪྻ། །དུས་རྣམས་ཀུན་ཏུ་འོད་གསལ་ཡང་། །རྡོ་ཡི་ནང་ན་གནས་གྱུར་ན། །དེ་ཡི་འོད་ནི་གསལ་མ་ཡིན། །དེ་བཞིན་ཉོན་མོངས་ཀྱིས་བསྒྲིབས་པའི། །ཆོས་དབྱིངས་ཤིན་ཏུ་དྲི་མེད་པའང་། །འཁོར་བར་འོད་ནི་གསལ་མ་ཡིན། །མྱ་ངན་འདས་ན་འོད་གསལ་འགྱུར། །ཞེས་དང་། དྲི་མེད་ཉི་མ་ཟླ་བ་ཡང་། །སྤྲིན་དང་ཁུག་རྣ་དུ་བ་དང་། །སྒྲ་གཅན་གདོང་དང་རྡུལ་ལ་སོགས། །སྒྲིབ་པ་ལྔ་ཡིས་བསྒྲིབས་པར་གྱུར། །དེ་བཞིན་འོད་གསལ་བ་ཡི་སེམས། །འདོད་དང་གནོད་སེམས་མེ་ལོང་དང་། །རྒོད་པ་དང་ནི་ཐེ་ཚོམ་སྟེ། །སྒྲིབ་པ་ལྔ་ཡིས་བསྒྲིབས་པར་གྱུར། །ཅེས་སོགས་དུ་མར་གསུངས་པས་ཀྱང་མཚོན་ནོ། །གསུམ་པ་ནི། རྒྱུད་བླར། ཆགས་དང་སྡང་དང་རྨོངས་དང་དེའི། །ཀུན་ལྡང་དྲག་དང་བག་ཆགས་དང་། །མཐོང་སྒོམ་ལམ་སྤང་མ་དག་པའི། །དག་པའི་ས་ལ་བརྟེན་པ་ཡི། །དྲི་མ་རྣམས་དགུ་པདྨ་ཡི། །སྦུབས་སོགས་དཔེས་ནི་རབ་བསྟན་ཏེ། །ཉེ་བའི་ཉོན་མོངས་སྦུབས་ཀྱི་ནི། །དབྱེ་བ་བྱེ་བ་མཐའ་ལས་འདས། །ཞེས་པས། ཇི་ལྟར་མེ་ཏོག་པདྨ་ནི་གནས་སྐབས་སུ་མཛེས་པས་དགའ་བ་བསྐྱེད་ལ་ཕྱིས་བསྐམས་ཤིང་ཡིད་དུ་མི་འོང་བ་བཞིན་དུ། དེ་དང་མཚུངས་པ་འདོད་ཆགས་བག་ལ་ཉལ་དང་། ཇི་ལྟར་སྲོག་ཆགས་བུང་བ་ནི་གཞན་གྱིས་སྦྲང་རྩི་བླངས་པ་ན་ཞེ་སྡང་དྲག་པོས་མདུང་བརྡེག་པ་བཞིན་དུ། དེ་དང་མཚུངས་པ་ཞེ་སྡང་བག་ལ་ཉལ་དང་། ཇི་ལྟར་འབྲས་ལ་སོགས་པའི་སྙིང་པོ་སྦུན་པ་ལ་སོགས་པས་བསྒྲིབས་ནས་མི་མཐོང་བ་བཞིན་དུ། དེ་དང་མཚུངས་པ་གཏི་མུག་བག་ལ་ཉལ་ཏེ། དེ་ལྟར་ཁམས་གོང་མ་གཉིས་སུ་འཕེན་བྱེད་བག་ལ་ཉལ་གྱི་དྲི་མ་གསུམ་དང་། ཇི་ལྟར་ལྗན་ལྗིན་མི་གཙང་བའི་ཕུང་པོ་ཡིད་དུ་མི་འོང་ཞིང་ཉམ་ང་བའི་བདག་ཉིད་ཅན་ཡིན་པ་བཞིན་དུ། དེ་དང་མཚུངས་པ་འདོད་པའི་ཁམས་སྒྲུབ་བྱེད་དུག་གསུམ་ཀུན་ནས་ལྡང་བ་དྲག་པོ་དང་། ཇི་
ལྟར་ཁྱིམ་གྱི་ས་འོག་ན་ཡོད་པའི་གཏེར་ནི་ས་མང་པོས་བསྒྲིབས་ཤིང་སྦས་པ་ན་ཁྱིམ་བདག་དབུལ་པོས་ངོ་མི་ཤེས་པ་བཞིན་དུ། དེ་དང་མཚུངས་པ་འཕགས་པ་དགྲ་བཅོམ་གྱི་རྒྱུད་ལ་ཡོད་པ་ཡིད་ཀྱི་རང་བཞིན་གྱི་ལུས་སྒྲུབ་བྱེད་མ་རིག་བག་ཆགས་ཀྱི་སས་བསྡུས་པ་དང་། ཇི་ལྟར་ལྗོན་ཤིང་གི་མྱུ་གུ་དང་སྡོང་བུ་སོགས་རིམ་གྱིས་སྐྱེ་བ་ལས་ས་བོན་གྱི་ཤུན་པ་རྣམས་རིམ་གྱིས་གཅོད་པ་བཞིན་དུ། དེ་དང་མཚུངས་པ་ཐེག་དམན་སློབ་པའི་རྒྱུད་ལ་ཡོད་པ་མཐོང་སྤང་གིས་སྤང་བར་བྱ་བ་དང་། ཇི་ལྟར་གོས་རུལ་ནི་རགས་པ་ཟད་པའི་ལྷག་མ་ཡིན་ལ་དྲི་མ་དང་བཅས་པའི་བདག་ཉིད་ཀྱིས་བསྒྲིབས་པ་བཞིན་དུ། ཐེག་དམན་སློབ་པའི་རྒྱུད་ལ་ཡོད་པ་སྒོམ་སྤང་གིས་སྤང་བར་བྱ་བ་དང་། ཇི་ལྟར་བུད་མེད་ཀྱི་མངལ་སྦུབས་ཀྱིས་མཐོང་བྱ་ལ་སྒྲིབ་པ་བཞིན་དུ། དེ་དང་མཚུངས་པ་མ་དག་ས་བདུན་ལ་གནས་པའི་བྱང་སེམས་ཀྱི་རྒྱུད་ཀྱིས་བསྡུས་པ་དང་། ཇི་ལྟར་ས་འདམ་གྱིས་གོས་པའི་གསེར་གྱི་གཟུགས་ནི་ཚེགས་ཆུང་ངུས་དག་པར་བྱེད་ནུས་པ་བཞིན་དུ་དག་པ་ས་གསུམ་ལ་གནས་པའི་བྱང་སེམས་ཀྱི་རྒྱུད་ཀྱིས་བསྡུས་པའི་དྲི་མ་རྣམས་ཏེ། དེ་ལྟར་དྲི་མ་དགུ་པོ་དེ་པདྨའི་སྦུབས་ལ་སོགས་པའི་དཔེ་དགུས་ནི་རབ་ཏུ་བསྟན་ཏེ། དེ་བཞིན་གཤེགས་པའི་སྙིང་པོ་ལ་སྒྲིབ་བྱེད་ཉེ་བའི་ཉོན་མོངས་པའི་སྦུབས་ཀྱི་དབྱེ་བ་བརྒྱད་ཁྲི་བཞི་སྟོང་དང་། དེ་ལས་ཕྱེ་ན་དབྱེ་བ་མཐའ་ལས་འདས་པར་འགྱུར་རོ། །བཞི་པ་ནི། སྔ་མར། དྲི་འདི་དག་གིས་བྱིས་རྣམས་དང་། །དགྲ་བཅོམ་སློབ་པ་བློ་ལྡན་རྣམས། །རིམ་བཞིན་བཞི་དང་གཅིག་དང་ནི། །གཉིས་དང་གཉིས་ཀྱིས་མ་དག་ཉིད། །ཅེས་པས། དེ་ལྟར་འདོད་ཆགས་བག་ལ་ཉལ་སོགས་དྲི་མ་དགུ་པོ་འདི་དག་ལས། དང་པོ་བཞིས་བྱིས་པ་སོ་སོ་སྐྱེ་བོ་རྣམས་དང་། ལྔ་པས་འཕགས་པ་དགྲ་བཅོམ་པ། དྲུག་པ་དང་བདུན་པས་ཐེག་དམན་སློབ་པ། བརྒྱད་པ་དང་དགུ་པས་བློ་ལྡན་ས་བཅུའི་བྱང་ཆུབ་སེམས་དཔའ་རྣམས་ཏེ། དེ་དག་སོ་སོའི་རྒྱུད་ལ་ཡོད་པའི་དབྱིངས་རང་བཞིན་གྱིས་རྣམ་པར་དག་པ་ལ་རིམ་པ་བཞིན་སྒྲིབ་པར་བྱེད་དོ། །དེ་ལྟར་ཡང་འཕགས་པ་ཐོགས་མེད་ཀྱིས་རྒྱུད་བླའི་འགྲེལ་བར། བཅོམ་ལྡན་འདས་ཀྱིས་སེམས་ཅན་ཐམས་ཅད་བྱང་ཆུབ་ཀྱི་
སྙིང་པོ་ཅན་ནོ། །ཞེས་བཀའ་སྩལ་པ་གང་ཡིན་པ་དེ་ལ་སེམས་ཅན་ཐམས་ཅད་ནི། མདོར་བསྡུས་ན་རྣམ་པ་བཞིར་བརྗོད་དེ། འདི་ལྟ་སྟེ། སོ་སོའི་སྐྱེ་བོ་དང་། དགྲ་བཅོམ་པ་དང་། སློབ་པ་དང་། བྱང་ཆུབ་སེམས་དཔའོ། །དེ་ལ་འདི་དག་ནི། ཟག་པ་མེད་པའི་དབྱིངས་སུ་གོ་རིམ་ཇི་ལྟ་བ་བཞིན་བཞི་དང་། གཅིག་དང་། གཉིས་དང་། གཉིས་ཀྱིས་མ་དག་པར་བསྟན་ཏོ། །ཞེས་གསུངས་སོ། །གསུམ་པ་ཞར་བྱུང་སྔགས་ལུགས་ལ་ཇི་ལྟར་འདོད་ཚུལ་ལ། གཞི་རྒྱུད་ཀྱི་མཚན་ཉིད། དེའི་དོན་སྤྱིར་བཤད་པ། མདོ་ལུགས་ལས་འཕགས་ཚུལ། མིང་གི་རྣམ་གྲངས་དང་བཞི། དང་པོ་ནི། དྲི་མ་ཅུང་ཟད་ཀྱང་མ་སྦྱངས་པའི་དེ་བཞིན་ཉིད་གང་ཞིག །བདེ་སྟོང་ཟུང་འཇུག་གི་སེམས་ཉིད། རང་གི་ངོ་བོ་འགྱུར་མེད་སྲིད་ཞི་ཀུན་ཁྱབ་རང་བཞིན། གཉིས་པ་ལ། བསྟན་བཤད་གཉིས་ལས། དང་པོ་ནི། གཞི་རྒྱུད་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ཞེས་གྲགས་ཏེ། མི་འགྱུར་བའི་བདེ་ཆེན་དང་རྣམ་པ་ཀུན་ལྡན་གྱི་སྟོང་ཉིད་དབྱེར་མི་ཕྱེད་པའི་སེམས་ཉིད་ཡེ་ནས་སྐུ་གསུམ་འདུ་འབྲལ་མེད་པའི་དཀྱིལ་འཁོར་ཆེན་པོར་ལྷུན་གྱིས་གྲུབ་ཅིང་ཡོངས་སུ་རྫོགས་པས་ན་རྫོགས་པ་ཆེན་པོ་དང་། དེ་ཉིད་སྲིད་ཞི་ཀུན་ཁྱབ་ཀྱི་ཡེ་ཤེས་ཡིན་པས་ན་ཡེ་ཤེས་ཐམས་ཅད་ཀྱི་སྤྱི་གཟུགས་ཞེས་བྱའོ། །དེ་ལྟར་ཡང་། འཇམ་དཔལ་ཞལ་ལུང་དུ། རྫོགས་པ་ཆེན་པོ་ཡེ་ཤེས་སྤྱི་ཡི་གཟུགས། །ཞེས་སོ། །གཉིས་པ་ལ། དངོས་དང་། ཁྱབ་ཚུལ་གཉིས། དང་པོ་ནི་སྒྱུ་འཕྲུལ་ལས། རང་བྱུང་ཡེ་ཤེས་བྱང་ཆུབ་སེམས། །བྱང་ཆུབ་སྙིང་པོ་འདུས་མ་བྱས། །ཀུན་རྫོབ་ཡོན་ཏན་འབར་བས་བརྒྱན། །ལྷུན་གྲུབ་དཀྱིལ་འཁོར་བླ་མེད་པའོ། །ཞེས་དང་། གསང་བ་སྙིང་པོ་ལས། བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་པས། འཆིང་གྲོལ་མེད་པའི་གནས་ལུགས་རང་རིག་པ་རང་བྱུང་གི །ཡེ་ཤེས་བདེ་ཆེན་བྱང་ཆུབ་སེམས་ཀྱི་ངོ་བོ་ལྷག་པ་བདེན་པ་དབྱེར་མེད་སྤྱོད་ཡུལ་དང་བྲལ་བའི་བདག་ཉིད་ནི། གཞིའི་རྒྱུད་བདེ་བར་གཤེགས་པའི་སྙིང་པོ་ཡིན་ལ། དེ་ནི་དུས་རྟག་ཏུ་འཕོ་འགྱུར་བྲི་གང་མེད་པས་འདུས་མ་བྱས་པ་རྟག་པའི་རང་
བཞིན་ཅན། འབྲས་བུའི་ཡོན་ཏན་ཐམས་ཅད་མ་བཙལ་ལྷུན་གྲུབ་ཏུ་རྫོགས་པས་རྒྱལ་བའི་དཀྱིལ་འཁོར་ཆེན་པོར་ཡེ་གདོད་མ་ནས་བཞུགས་པ་སྟེ། རྒྱས་པ་ལས། རྣམ་རྟོག་ཀུན་གཞི་མ་ཡིན་པ། །རང་བཞིན་མེད་པ་དོན་གྱི་གཞི། །དེ་ནི་ཆོས་ཀྱི་དབྱིངས་ཞེས་བྱ། །དེ་བཞིན་ཉིད་ཀྱི་ཡེ་ཤེས་སོ། །ཞེས་དང་། ཐུགས་ཐིག་ལས། གཞི་གནས་རིག་པ་ངོ་བོ་རང་བཞིན་དང༔ཐུགས་རྗེ་གསུམ་སྟེ་རྒྱལ་བའི་སྙིང་པོ་ལ༔སྐུ་གསུམ་རང་ཆས་བཞུགས་པར་བཤད་པ་ཡིན༔ཞེས་དང་། དུང་ཡིག་ཅན་ལས། གཞི་རྒྱུད་དངོས་པོའི་གནས་ལུགས་ཏེ༔དེ་ཡི་ངོ་བོ་རང་བཞིན་སྟོང༔སངས་རྒྱས་ཐམས་ཅད་སྐྱེད་པའི་ཡུམ༔དབྱེ་བ་རྣམ་པ་གསུམ་ཡིན་ཏེ༔ངོ་བོ་རང་བཞིན་ཐུགས་རྗེའོ༔ཞེས་སོ། །དེ་ཡང་། ཐབས་ཀྱི་རྐྱེན་གྱིས་ཟིན་མ་ཟིན་གྱི་བྱེད་པས་འཁོར་འདས་གཉིས་ཀའི་གཞིར་གྱུར་པས་ན་གཞི་ཞེས་བྱ་སྟེ། རིམ་གསུམ་ལས། ཐ་སྙད་གཉིས་ཀྱི་ཆོས་རྣམས་ཀུན། །མ་ལུས་འབྱུང་ཕྱིར་གཞི་ཞེས་བྱ། །ཞེས་སོ། །དེ་དག་གི་ངག་དོན། འཆིང་གྲོལ་མེད་པའི་གནས་ལུགས་བདེ་གཤེགས་སྙིང་པོ་ཆོས་ཅན། གཞི་རྒྱུད་ཅེས་བྱ་སྟེ། རྟོགས་མ་རྟོགས་ཀྱི་བྱེད་པས་འཁོར་འདས་གཉིས་ཀའི་གཞིར་གྱུར་པ་གང་ཞིག །རང་བཞིན་འགྱུར་བ་མེད་པར་རྒྱུན་ཆགས་པའི་ཕྱིར། གཉིས་པ་ནི། རྒྱ་མཚོ་ལས། ཡེ་ནས་མངོན་རྫོགས་སངས་རྒྱས་ཆོས། །ལུས་ཅན་ཀུན་ལ་གནས་པའི་ཕྱིར། །ལྷུན་གྲུབ་རྒྱལ་བའི་དཀྱིལ་འཁོར་ནི། །ལུས་ཅན་ཀུན་གྱི་ལུས་ལ་གནས། །ཞེས་དང་། དགྱེས་རྡོར་རྒྱུད་དུ། འདི་ཉིད་ཡེ་ཤེས་ཆེན་པོ་སྟེ། །ཐམས་ཅད་ལུས་ལ་རྟག་ཏུ་གནས། །དངོས་དང་དངོས་མེད་བདག་ཉིད་གཙོ། །གཉིས་དང་གཉིས་སུ་མེད་པའི་ཚུལ། །བརྟན་དང་གཡོ་བ་ཁྱབ་ནས་གནས། །ཞེས་པས། དེ་ལྟར་རང་བྱུང་གི་ཡེ་ཤེས་གཞི་རྒྱུད་དེ་བཞིན་གཤེགས་པའི་སྙིང་པོ་དེ་ཉིད་བརྟན་གཡོ་འཁོར་འདས་ཀྱིས་བསྡུས་པའི་ཆོས་ཐམས་ཅད་ལ་དེ་བཞིན་གཤེགས་པའི་སྙིང་པོ་ཏིལ་འབྲུ་ལ་མར་གྱིས་ཁྱབ་པ་བཞིན་དུ་གནས་སོ། །ཞེས་དང་། ནོར་བུ་ཕྲ་བཀོད་ལས། ཏིལ་འབྲུ་འམ་ནི་ཡུངས་འབྲུ་ལ། །མར་ཉིད་ཡེ་ནས་ལྷུན་གྲུབ་བཞིན། །སེམས་ཅན་ལུས་ལྟར་སྣང་བ་ལ། །དེ་བཞིན་གཤེགས་པའི་ས་བོན་ནི། །མཐུན་པའི་འོད་དང་བཅས་
པར་སྣང་། །ཞེས་དང་། ཐལ་འགྱུར་ལས། རང་རིགས་ཡེ་ཤེས་ལུས་ལ་གནས། །ཏིལ་འབྲུ་ལ་ནི་མར་བཞིན་ནོ། །ལུས་ཀྱི་བཀྲག་དང་གཟི་མདངས་ནི། །ཡེ་ཤེས་རླན་གྱིས་ཁྱབ་པར་བྱེད། །ཅེས་དང་། རང་ཤར་ལས། ཡང་དག་སངས་རྒྱས་དགོངས་པ་ནི། །སེམས་ཅན་ཀུན་གྱི་རང་རྒྱུད་ལ། །སྐུ་དང་ཡེ་ཤེས་ཚུལ་དུ་གནས། །ཞེས་སོ། །དེ་དག་གི་ངག་དོན། གཞི་རྒྱུད་ཆོས་ཅན། རིས་མེད་ཀུན་ཁྱབ་ཀྱི་ཡེ་ཤེས་ཡིན་ཏེ། བརྟན་གཡོ་ཀུན་ལ་ཁྱབ་པའི་ཕྱིར། གསུམ་པ་ནི། ནང་རིག་འགྱུར་མེད་ལ་དེ་བཞིན་ཉིད་དུ་བྱས་པ་ཙམ་ནི་སྙིང་པོའི་སྐོར་གྱི་མདོ་སྡེ་རྣམས་དང་། དེའི་དགོངས་འགྲེལ་རྒྱུད་བླ་དང་ཆོས་དབྱིངས་བསྟོད་པ་སོགས་ཀྱིས་བཀྲལ་བ་ལྟར་ཡིན་པས་མདོ་སྔགས་ཐུན་མོང་དུ་བཞེད་པ་ཡིན་མོད། འདིར་སྔགས་ཀྱི་ཐུན་མོང་མ་ཡིན་པའི་ཁྱད་ཆོས་ནི། རྣལ་འབྱོར་བླ་ན་མེད་པའི་རྒྱུད་སྡེ་རྣམས་སུ་སྙིང་པོ་དེ་ཉིད་གཞི་རྒྱུད་དུ་འཇོག་པའི་སྐབས་འདིར། རིག་པ་དེ་ཡང་བདེ་བ་ཆེན་པོའི་རང་བཞིན་ཡིན་པར་བཞེད་པས་ཁྱད་པར་དུ་འཕགས་ཏེ། མདོ་སྡེ་རྣམས་སུ་དེ་ལྟར་མ་གྲགས་པའི་ཕྱིར། དེ་ཡང་ཞུ་བདེ་ཙམ་ལ་འཇོག་པ་མ་ཡིན་གྱི། རང་བཞིན་ལྷན་ཅིག་སྐྱེས་པ་མི་འགྱུར་བའི་བདེ་བ་ཆེན་པོ་ལ་བཞེད་པ་ཡིན་ནོ། །དེ་ལྟར་ཡང་རྡོ་རྗེ་མེ་ལོང་ལས། ལུས་ཅན་སྙིང་ལ་གང་གནས་པ། །རང་བྱུང་ཟག་མེད་ཡེ་ཤེས་གཟུགས། །མི་ཤིགས་ཐིག་ལེ་བདེ་ཆེན་པོ། །ནམ་མཁའ་ལྟ་བུར་ཀུན་ཁྱབ་པ། །མི་གནས་ཆོས་སྐུའི་རང་བཞིན་ཡིན། །ཞེས་དང་། དུས་འཁོར་བསྡུས་རྒྱུད་ལས། སྲིད་གསུམ་ཕྲ་རགས་གཟུགས་མིན་འདིར་ནི་རྣམ་པར་ཤེས་པའོ་དེ་བཞིན་རྣམ་པར་ཤེས་པ་ཉིད་མེད་དེ། །སངས་རྒྱས་ཤེས་རབ་གང་དུའང་གནས་པ་མ་ཡིན་ཞེས་པའི་ཚིག་ནི་སངས་རྒྱས་པ་རྣམས་སྟོན་པར་འགྱུར། །གང་གིས་འགྱུར་མེད་དང་བྲལ་མི་རྣམས་ཀྱིས་ནི་སྟོང་པ་ཉིད་དེ་བཟུང་ནས་སྟོང་པར་ལྟ་བྱེད་པ། །དེས་ན་གཙོ་བོས་གང་ཞིག་འཕོ་མེད་ལྷན་སྐྱེས་ལུས་ཀྱི་བདེ་བ་དག་ནི་སྔགས་ཀྱི་ཐེག་པར་བསྟན། །ཅེས་དང་། དགྱེས་རྡོར་ལས། རང་རིག་བདག་ཉིད་དག་པ་ཉིད། །དག་པ་གཞན་གྱིས་རྣམ་གྲོལ་མིན། །ཞེས་དང་། གྲུབ་ཆེན་མཚོ་སྐྱེས་ཀྱིས་དེའི་འགྲེལ་པར། རང་རིག་པ་བདེ་བ་ཆེན་པོའི་བདག་ཉིད་ཀྱི་དག་
པས་རྣམ་པར་དག་པ་ཡིན་གྱི་གཞན་ཕ་རོལ་དུ་ཕྱིན་པ་ལ་སོགས་པའི་དག་པས་རྣམ་པར་གྲོལ་བ་ནི་མ་ཡིན་ནོ། །ཞེས་སོགས་ཀྱིས་གསལ་བར་གསུངས་སོ། །དེ་དག་གི་ངག་དོན། བདེ་གཤེགས་སྙིང་པོ་ཆོས་ཅན། ཁྱོད་ལ་མདོ་ལུགས་ལས་སྔགས་ལུགས་འཕགས་ཚུལ་ཡོད་དེ། བདེ་བ་ཆེན་པོས་ཁྱད་པར་དུ་བྱས་པའི་ཕྱིར། བཞི་པ་ནི། སྤྱིར་ཐུན་མོང་དུ། འཆིང་གྲོལ་མེད་པའི་དོན་གྱི་གནས་ལུགས། འབྲས་ཆོས་རྣམས་ཡེ་ནས་ཚང་བས་བདེ་གཤེགས་སྙིང་པོ། སེམས་ཀྱི་ཆོས་ཉིད་ཡོན་ཏན་ཐམས་ཅད་དང་ལྡན་ཡང་དྲི་མ་ལས་མ་གྲོལ་བར་མངོན་དུ་སྣང་མི་ནུས་པས་རང་བཞིན་གནས་རིགས་དང་། ཁམས་དང་། དྲི་བཅས་དེ་བཞིན་ཉིད་དྲི་མ་དང་འབྲེལ་ཡང་རང་གི་ངོ་བོ་ལ་གོས་མ་མྱོང་བས་རང་བཞིན་རྣམ་དག་གམ་བྱང་ཆུབ་ལ་སོགས་པའི་ཐ་སྙད་བཏགས་ཤིང་། ཁྱད་པར་སྔགས་ལུགས་ལ་ཕྱི་རྒྱུད་དུ། བདག་གི་དེ་ཁོ་ན་ཉིད་དང་། ཐོག་མཐའ་མེད་པའི་བྱང་ཆུབ་ཀྱི་སེམས་ལ་སོགས་པ་དང་། ནང་རྒྱུད་དུ། མ་ཧཱ་ཡོ་ག་བས་རང་རིག་པ་བྱང་ཆུབ་ཀྱི་སེམས་ལྷག་པ་བདེན་པ་དབྱེར་མེད་སྤྱོད་ཡུལ་དང་བྲལ་བའམ། བདེན་པ་དབྱེར་མེད་ལྷག་པའི་ཆོས་སྐུ་ཆེན་པོ། ཨ་ནུ་ཡོ་ག་བས་དབྱིངས་དང་ཡེ་ཤེས་གཉིས་སུ་མེད་པའི་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར། ཨ་ཏི་ཡོ་ག་བས་འོད་གསལ་བྱང་ཆུབ་ཀྱི་སེམས་སྟོང་གསལ་འགག་མེད་ཀྱི་གནས་ལུགས་ཡེ་ཤེས་གསུམ་ལྡན་དུ་ཡེ་ནས་བཞུགས་པའོ། །དེ་ཡང་བླ་ན་མེད་པའི་རྒྱུད་རྣམས་སུ་ལུས་ཅན་རྣམས་ཀྱི་སྙིང་ག་ཆོས་ཀྱི་ཕོ་བྲང་དུ་རྒྱུ་རྒྱུད་ཀྱི་རྟེན་དྭངས་མ་ལྔའི་དབུས་ན་བརྟེན་པ་སེམས་ཉིད་འོད་གསལ་བའི་ཆོས་སྐུ་བྱང་ཆུབ་ཀྱི་སེམས་བཞུགས་པར་བཤད་ཅིང་། འབྱུང་ལྔ་སེམས་དང་བཅས་པའི་དྭངས་མ་དྲུག་ཀྱང་གཉིས་གཉིས་རོ་གཅིག་ཏུ་འཇུག་པའི་དོན་གྱིས་ཤིན་ཏུ་ཕྲ་བའི་སྒོ་གསུམ་གདོད་མ་ནས་རྡོ་རྗེ་མི་ཤིགས་པ་གསུམ་གྱི་ལྷའི་བདག་ཉིད་དུ་བཞུགས་སོ། །གཉིས་པ་འཕྲོས་དོན་རིགས་ཀྱི་ཁྱད་པར་གཉིས། སྒྲ་དོན་དང་། དེའི་རྣམ་གཞག་གོ ། དང་པོ་ནི། མདོ་སྡེ་རྒྱན་ལས། རང་བཞིན་དང་ནི་རྒྱས་པ་དག །དེ་ནི་རྟེན་དང་བརྟེན་པ་
དང་། །ཡོད་མེད་ཉིད་དང་ཡོན་ཏན་ནི། །སྒྲོལ་བའི་དོན་དུ་ཤེས་པར་བྱ། །ཞེས་པས། གོ་ཏྲའི་སྒྲ་ལས་དྲངས་ན། གོ་ནི་གྷུ་ཎ་འཁྱམས་པའི་བྱིངས། ཀའི་རྐྱེན། བྱིངས་མཐའི་ཨ་བརྗོད་དོན་དང་། རྐྱེན་གྱི་ཀ་ཁྱད་དོན་ཕྱིས་སྲོག་གི་ཨ་བཞག །གྷུ་ཀུན་ཏུ་བསྒྱུར་བས་གུ་ཎ་སྟེ་ཡོན་ཏན། ཏྲཱྀ་རྐྱལ་བ་དང་སྒྲོལ་བའི་བྱིངས་ལ་ཡུ་བྱིན། ཡུ་བྷུ་ཛ་སོགས་ཀྱི་ཡུ་ཨན། རཱྀ་ཡོན་ཏན་ཨར། ར་ཥ་རྀ་སོགས་ཀྱིས་ན་ཎར་བྱས་ཏེ་སྦྱར་བས་ཏ་ར་ཎ་ཞེས་སྒྲོལ་བ་སྟེ། ཡོན་ཏན་ལ་བརྟེན་ནས་འཁོར་བ་ལས་སྒྲོལ་བའི་ཕྱིར་ཡོན་ཏན་སྒྲོལ་བ་ཞེས་བྱ་བར་འགྱུར་རོ། །གཉིས་པ་ནི། སྙིང་པོ་དེའི་དབྱིངས་སྟོང་པ་ཉིད་ཀྱི་ཆ་ནི་ཆོས་སྐུ་ངོ་བོ་ཉིད་སྐུའི་བྲལ་རྒྱུ་སྟེ། རིན་པོ་ཆེའི་གཏེར་དགོས་འདོད་འབྱུང་བའི་གཞིར་གྱུར་པ་ལྟར་སྐུ་དང་ཡེ་ཤེས་འཆར་བའི་གོ་འབྱེད་པས་ན་རང་བཞིན་གནས་རིགས་དང་། དེ་ལས་ཤར་བའི་ཡེ་ཤེས་སྣང་བའི་ཆ་ནི་གཟུགས་སྐུ་གཉིས་ཀྱི་བྲལ་རྒྱུ་སྟེ། འབྲས་བུ་ཅན་གྱི་ལྗོན་ཤིང་གོང་འཕེལ་ལྟར་རྐྱེན་སྒྲིབ་པ་བྲལ་སྟོབས་ཀྱིས་རང་ལ་ཡོད་པའི་ཡོན་ཏན་མངོན་དུ་འགྱུར་ངེས་པས་རྒྱས་འགྱུར་གྱི་རིགས་སོ། །དེ་ལྟར་ཡང་། རྒྱུད་བླར། གཏེར་དང་འབྲས་བུའི་ཤིང་བཞིན་དུ། །རིགས་དེ་རྣམ་གཉིས་ཤེས་བྱ་སྟེ། །ཐོག་མེད་རང་བཞིན་གནས་པ་དང་། །ཡང་དག་བླངས་པ་མཆོག་ཉིད་དོ། །རིགས་འདི་གཉིས་ལས་སངས་རྒྱས་ཀྱི། །སྐུ་གསུམ་ཐོབ་པར་འདོད་པ་ཡིན། །དང་པོས་སྐུ་ནི་དང་པོ་སྟེ། །གཉིས་པ་ཡིས་ནི་ཕྱི་མ་གཉིས། །ཞེས་སོ། །གཉིས་པ་ལམ་ལས་འབྲས་བུར་སྦྱོར་ཚུལ་འཕྲོས་དོན་དང་བཅས་པ་ལ་གཉིས་ཏེ། མཚམས་སྦྱར་བས་མདོར་བསྟན་པ་དང་། དངོས་སོ། །དང་པོ་ནི། སྦྱང་གཞི་ཆོས་ཉིད་ཀྱི་མདངས་འོད་སྦྱང་བྱའི་དྲི་མ་འཁོར་བའི་ཆོས་དང་འཛོམས་པ་ལས་སྦྱོང་བྱེད་ལམ་གྱི་རྣམ་པར་ཤར་ནས་དེས་སྦྱང་བྱའི་དྲི་མ་སྦྱོང་བའི་གཉེན་པོར་འགྲོ་བ་ཡིན་པས། འདིར་མཐར་ཐུག་གི་འབྲས་བུའི་དབང་དུ་བྱས་ཏེ། སྡོམ་པ་གསུམ་གྱི་ལམ་གྱི་སྙིང་པོ་རིག་པ་འཛིན་པ་སྔགས་ཀྱི་ལམ་སྨིན་གྲོལ་གཉིས་ཀྱིས་ཁམས་ཀྱི་དྲི་མ་སྦྱངས་པས་གཞི་ཇི་ལྟ་བ་བཞིན་མངོན་དུ་གྱུར་པ་མཐར་ཐུག་པ་ན་འབྲས་བུའི་མཆོག་མངོན་དུ་གྱུར་པ་ཞེས་བྱའོ། །
གཉིས་པ་ལ་གཉིས། ས་ལམ་གྱི་བགྲོད་ཚུལ་དང་། དམན་ལམ་ལས་ཐེག་ཆེན་དུ་འཇུག་ཚུལ་ལོ། །དང་པོ་ལ་གཉིས། སོ་སྐྱེ་དང་། འཕགས་ལམ་གྱི་ཡེ་ཤེས་སོ། །དང་པོ་ལ་གསུམ། མཚན་ཉིད། དབྱེ་བ། གཏན་ལ་དབབ་པའོ། །དང་པོ་ནི། དྲི་བཅས་དེ་བཞིན་ཉིད་ཀྱི་སྣང་བ་གང་ཞིག །ཞུ་བདེ་དང་མཚུངས་ལྡན་དུ་གྱུར་པའི་ལྷ་སྐུ་སྣང་སྟོང་། གཉིས་པ་ནི། བརྟགས་པ་ལས་བྱུང་བ་བསྐྱེད་རིམ་གྱི་ལྷ་སྐུ་དང་བཅོས་མིན་གྱི་ལྷ་སྐུ་མི་བརྟན་པ་རྒྱུ་དང་། བརྟན་པ་འབྲས་བུའི་རྫོགས་རིམ་མོ། །གསུམ་པ་ལ་ཚོགས་སྦྱོར་གཉིས་ལས། དང་པོ་ཚོགས་ལམ་ལ། ཡེ་ཤེས་ཕེབས་པ་ནི་ཚོགས་ལམ་ཆུང་ངུ་སྟེ། ལུས་དང་། ཚོར་བ་དང་། སེམས་དང་། ཆོས་བཞི་དྲན་པ་རྒྱུན་ཆགས་སུ་སེམས་ལ་ཉེ་བར་བཞག་ནས་སྒོམ་པར་བྱེད་པ་དྲན་པ་ཉེར་བཞག་བཞིའོ། །ཡེ་ཤེས་ལ་ཆོས་དབང་བ་ནི་ཚོགས་ལམ་འབྲིང་པོ་སྟེ། མི་དགེ་བ་སྐྱེས་པ་སྤོང་བ་དང་། མ་སྐྱེས་པ་མི་བསྐྱེད་པ་དང་། དགེ་བ་སྐྱེས་པ་འཕེལ་བ་དང་། མ་སྐྱེས་པ་སྐྱེས་པའི་ཕྱིར་སྒོམ་པ་སྟེ་ཡང་དག་སྤོང་བ་བཞིའོ། །ཚོགས་ལམ་ཆེན་པོར་དེ་ཉིད་སྤྱོད་པས་མཐར་ཕྱིན་ཅིང་ལྟ་སྟངས་རྣམས་ཐོགས་མེད་འགྲུབ་པ་དང་། སངས་རྒྱས་སྤྲུལ་པའི་སྐུ་ལ་མངོན་སུམ་དུ་གདམས་ངག་ཉན་པ་དང་། སྐྱེ་བ་གཅིག་གིས་ཐོགས་པ་ནི་འདུན་པ་དང་། བརྩོན་འགྲུས་དང་། སེམས་དང་། དཔྱོད་པ་སྟེ་རྫུ་འཕྲུལ་གྱི་རྐང་པ་བཞིའོ། །དེ་ལྟར་ཡང་ཀུན་མཁྱེན་ཆེན་པོས་སེམས་ཉིད་ངལ་གསོར། ཁམས་ལྔའི་རིམ་པ་བགྲོད་ལས་གྲོལ་བ་སྟེ། །ཚོགས་ལམ་ཆུང་ངུར་ལུས་ཚོར་སེམས་དང་ཆོས། །དྲན་པ་ཉེར་བར་བཞག་པ་བཞི་སྒོམ་ཞིང་། །འབྲིང་དུ་འདུན་དང་འབད་རྩོལ་བརྩོན་འགྲུས་བཞིས། །དགེ་དང་མི་དགེའི་ཞེན་བཞི་ཡང་དག་སྤོང་། །ཆེན་པོར་འདུན་སེམས་དཔྱོད་དང་དྲན་པ་བཞིས། །རྫུ་འཕྲུལ་རྟེན་སྒྲུབ་རྐང་པ་བཞི་པོ་སྒོམ། །ཞེས་སོ། །གཉིས་པ་སྦྱོར་ལམ་ལ། རྫོགས་རིམ་དངོས་ཀྱི་སེམས་དབེན་ཐོབ་པ་ཞུ་བདེ་མཐར་ཐུག་པ་དབང་པོ་ལྔའི་རང་བཞིན་ནི་དྲོད་དང་རྩེ་མོ་སྟེ་དེ་ལ་དབང་པོ་ལྔ་ནི། དད་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་ཀྱི་དབང་པོ་རྣམས་སོ། །ཡེ་ཤེས་ཀྱི་སྐུ་ནམ་མཁའི་མཛོད་ཐོབ་པ་སྟོབས་ལྔ་དང་ལྡན་པ་ནི་བཟོད་པ་
དང་། ཆོས་མཆོག་སྟེ། དེ་ལ་སྟོབས་ལྔ་ནི། མ་དད་པ་དང་། ལེ་ལོ་དང་། བརྗེད་ངས་དང་། རྣམ་གཡེང་དང་། རྨོངས་པ་རྣམས་ཀྱིས་མི་ཚུགས་ཤིང་འཇོམས་པར་ནུས་པའི་སྟོབས་རྣམས་སོ། །དེ་ཡང་སྔ་མ་ལས། སྦྱོར་ལམ་བཞི་སྟེ་དྲོད་དང་རྩེ་མོ་རུ། །དད་བརྩོན་དྲན་དང་ཏིང་འཛིན་ཤེས་རབ་ཀྱི། །དབང་པོ་ལྔ་དང་བཟོད་པ་ཆོས་མཆོག་ཏུ། །དད་སོགས་སྟོོབས་ལྔ་རབ་ཏུ་སྒོམ་པར་བྱེད། །ཅེས་སོ། །དེ་ལྟར་སྦྱོར་ལམ་བཞི་ལས། ཕྱི་མ་གསུམ་དུ་དག་པའི་ཡེ་ཤེས་ཀྱི་སྐུ་མ་ཐོབ་ཀྱང་། ཉིན་མཚན་གྱི་སྣང་བ་དང་མཉམ་རྗེས་ཀུན་ཏུ་སྣང་སྟོང་སྒྱུ་མ་ལྟ་བུའི་ལྷ་སྐུ་འཁོར་ཡུག་ཏུ་འབྱུང་བས་སྒྱུ་ལུས་རླུང་སེམས་ཙམ་གྱི་སྐུ་མངོན་དུ་མཛད་པ་ཡིན་ཏེ་དེ་དག་ནི་མོས་པས་སྤྱོད་པའི་སའོ། །གཉིས་པ་འཕགས་ལམ་གྱི་ཡེ་ཤེས་ལའང་གསུམ། མཚན་ཉིད། དབྱེ་བ། གཏན་ལ་དབབ་པའོ། །དང་པོ་ནི། འཕགས་རྒྱུད་ཀྱི་ཡེ་ཤེས་གང་ཞིག །ཞུ་བདེ་དང་མཚུངས་ལྡན་དུ་བྱུང་བའི་ལྷ་སྐུ་ཁ་སྦྱོར། གཉིས་པ་ནི། མཐོང་ལམ་དང་། སྒོམ་ལམ་ས་དགུའོ། །གསུམ་པ་ལ་མཐོང་སྒོམ་གཉིས་ལས། དང་པོ་མཐོང་ལམ་ནི། སྦྱོར་ལམ་གྱི་རྒྱུན་མཐར་སྒྱུ་ལུས་རླུང་སེམས་ཀྱི་ལྷ་སྐུ་ཡང་སྤྱོད་པའི་ཉེ་རྒྱུ་ལ་བརྟེན་ནས། མཐོང་ལམ་གྱི་མངོན་བྱང་ལྔས་འོད་གསལ་གྱི་ལྷ་སྐུར་གྲུབ་སྟེ། དོན་དམ་སོ་སོ་རང་རིག་བདེ་སྟོང་རྣམ་པར་མི་རྟོག་པའི་འོད་གསལ་བ་མངོན་སུམ་དུ་མཐོང་བ་ནི་བྱང་ཆུབ་ཡན་ལག་མཐོང་བའི་ལམ་སྟེ། དགའ་བའི་རང་བཞིན་བདེན་པ་བཅུ་དྲུག་གིས་བསྡུས་པ་དང་པོ་རབ་དགའི་སའོ། །ལམ་འདི་ལ་གནས་པ་དེས་དྲན་པ་དང་། ཆོས་རབ་ཏུ་རྣམ་འབྱེད་དང་། བརྩོན་འགྲུས་དང་། དགའ་བ་དང་། ཤིན་ཏུ་སྦྱངས་པ་དང་། ཏིང་ངེ་འཛིན་དང་། བཏང་སྙོམས་ཏེ་བྱང་ཆུབ་ཡན་ལག་བདུན་ཉམས་སུ་ལེན་པར་བྱེད་དེ། སྔ་མར། མཐོང་བའི་ལམ་སྟེ་རབ་ཏུ་དགའ་བའི་སར། །དད་བརྩོན་དྲན་པ་ཏིང་འཛིན་ཤེས་རབ་དགའ། །ཤིན་ཏུ་སྦྱངས་པ་ཡང་དག་བྱང་ཆུབ་ཀྱི། །ཡན་ལག་བདུན་པོ་དག་ནི་ལེགས་བསྒོམ་ཞིང་། །ཞེས་སོ། །ཕར་ཕྱིན་བཅུ་ལས་སྦྱིན་པའི་ཕར་ཕྱིན་ལ་གཙོ་བོར་སྤྱོད། ཐུན་མོང་གི་ཡོན་ཏན་ནི། དུས་སྐད་ཅིག་ལ་སྟོན་ནུས་པའི་ཡོན་ཏན་བརྒྱ་
ཕྲག་བཅུ་གཉིས་དང་སྤྱན་དང་མངོན་ཤེས་དང་། རྫུ་འཕྲུལ་ལ་སོགས་པ་བསམ་གྱིས་མི་ཁྱབ་པ་ཡོད་དོ། །དེ་ལ་ཡོན་ཏན་བརྒྱ་ཕྲག་བཅུ་གཉིས་ནི། སངས་རྒྱས་བརྒྱའི་ཞལ་བལྟ་བ། སངས་རྒྱས་བརྒྱས་བྱིན་གྱིས་བརླབས་པར་ཤེས་པ། སྤྲུལ་པ་བརྒྱ་འགྱེད་པ། བསྐལ་པ་བརྒྱར་སྟོན་པ། སྔོན་དང་ཕྱི་མའི་མཐའ་བརྒྱ་ལ་ཡེ་ཤེས་འཇུག་པ། ཏིང་ངེ་འཛིན་བརྒྱ་ལ་སྙོམས་པར་འཇུག་ཅིང་ལྡང་བ་། སེམས་ཅན་བརྒྱ་སྨིན་པར་བྱེད་པ། ཞིང་བརྒྱ་གཡོ་བར་བྱེད་པ། ཞིང་བརྒྱ་འོད་ཀྱིས་གསལ་བར་བྱེད་པ། ཆོས་ཀྱི་སྒོ་མོ་བརྒྱ་འབྱེད་པ། རང་གི་ལུས་བརྒྱར་སྟོན་པ། ལུས་རེ་རེ་ལ་འཁོར་ཕུན་སུམ་ཚོགས་པ་བརྒྱ་བརྒྱས་བསྐོར་བར་སྟོན་པའོ། །ཁྱད་པར་གྱི་ཡོན་ཏན་ནི། གང་ཟག་དབང་པོ་རྣོ་རྟུལ་གྱི་ཁྱད་པར་ལ་བརྟེན་ནས་ཟག་བཅས་རྣམ་སྨིན་གྱི་ལུས་ཟག་མེད་དུ་སྦྱོང་མ་ནུས་པ་ལྷག་མེད་དམ་རྣམ་སྨིན་རིག་འཛིན་དང་། ཟག་མེད་དྭངས་མའི་འཇའ་ལུས་ཁྱད་པར་ཅན་དུ་བསྒྱུར་ནུས་པ་ཚེ་དབང་རིག་འཛིན་ནོ། །དེ་ལ་དྭངས་མའི་ལུས་ནི། གཟུགས་མི་ཐོགས་པའམ་ཆུང་ངུ་བསྡུས་ནུས་པས་ཕྲ་བ་དང་། རྒྱུ་མཚན་དེས་ན་རེག་པ་ཡང་བ་དང་། གཟུགས་ཆེན་པོའམ་མང་པོས་ཀུན་ལ་ཁྱབ་པ་དང་། གཟུགས་མཛེས་ཤིང་ནད་མེད་པ་སོགས་དང་སེམས་ལ་བདེ་བ་ཡང་དག་པ་ཐོབ་པ་ཉིད་དང་། ལུས་སྒྱུ་མ་ལྟར་སྣང་ཞིང་སེམས་འོད་གསལ་དུ་སྣང་བས་རབ་ཏུ་གསལ་བ་དང་། དེ་གཉིས་ཀ་རབ་ཏུ་བརྟན་པ་དང་། རང་དབང་དུ་གྱུར་པས་དབང་ཕྱུག་ཉིད་དང་། ལུས་གང་འདོད་སྣ་ཚོགས་དང་སེམས་མཉམ་རྗེས་ལ་ཇི་ལྟར་འདོད་པ་བཞིན་དུ་བསྒྱུར་ནུས་པས་འདོད་རྒུར་བསྒྱུར་བ་སྟེ་པྲ་ཕབ་ཀྱི་ཡོན་ཏན་བརྒྱ་ལྡན་ནོ། །དེ་གཉིས་ཀ་རྟེན་གྱི་ཁྱད་པར་མ་གཏོགས་སེམས་དག་པའི་ཡེ་ཤེས་ཀྱི་སྐུ་བདེ་སྟོང་འོད་གསལ་གྱི་ལྷ་སྐུ་རྣམ་པར་མི་རྟོག་པའི་ཡེ་ཤེས་ལ་མཉམ་པར་འཇོག་པར་མཚུངས་སོ། །དེ་དག་ལས། རྣམ་སྨིན་གྱིས་གླིང་བཞི་པའི་འཇིག་རྟེན་ཙམ་དང་། ཚེ་དབང་གིས་མཆོག་གི་སྤྲུལ་སྐུའི་ཞིང་ཁམས་ཙམ་དུ་དུས་གཅིག་ལ་སྐུ་གཅིག་གིས་དོན་བྱེད། སྤྲུལ་པ་སྟོན་ཚུལ་ཡང་། གཙོ་བོར་སྙིང་པོའི་རྩ་རྒྱུད་དུ། མི་དང་ལྷ་དང་ཚངས་པ་ཡི། །སྐྱེ་བ་རྣམ་དག་འཛིན་མོད་ཀྱང་། །ཁྱད་པར་ས་ལ་གནས་གྱུར་ཡིན། །ཞེས་སོ། །གཉིས་
པ་སྒོམ་ལམ་ནི། ས་དང་པོར་བདེན་པ་མཐོང་བའི་དོན་འོད་གསལ་མཉམ་བཞག་ལས་རྗེས་ཐོབ་ཟུང་འཇུག་གི་སྐུར་ལངས་པ་ནི་རྗེས་ལ་མངོན་རྟོགས་ཏེ། དེ་ལ་སྒོམ་ལམ་ས་དགུའོ། །དེ་དག་ནི། ཡང་དག་པའི་ལྟ་བ་དང་། རྟོག་པ་དང་། ངག་དང་། ལས་ཀྱི་མཐའ་དང་། འཚོ་བ་དང་། རྩོལ་བ་དང་། དྲན་པ་དང་། ཏིང་ངེ་འཛིན་ཏེ། འཕགས་ལམ་ཡན་ལག་བརྒྱད་ཉམས་སུ་ལེན་པར་བྱེད་དེ། ངལ་གསོར། སྒོམ་ལམ་ཆུང་འབྲིང་ཆེན་པོ་རེ་རེ་ཞིང་། །ཆུང་ངུའི་ཆུང་ངུ་ཆུང་ངུའི་འབྲིང་དང་ནི། །ཆུང་ངུའི་ཆེ་སོགས་ས་དགུ་རིམ་པ་བཞིན། །དྲི་མ་མེད་དང་འོད་བྱེད་འོད་འཕྲོ་ཅན། །སྦྱང་དཀའ་མངོན་གྱུར་རིང་སོང་མི་གཡོ་བ། །ལེགས་པའི་བློ་གྲོས་ཆོས་ཀྱི་སྤྲིན་རྣམས་སུ། །ཡང་དག་ལྟ་དང་རྟོགས་པ་ངག་དང་ལས། །འཚོ་རྩོལ་དྲན་པ་ཏིང་འཛིན་འཕགས་ལམ་བརྒྱད། །དེ་ལྟར་བྱང་ཆུབ་ཕྱོགས་ཆོས་སུམ་ཅུ་བདུན། །སློབ་པའི་ལམ་བཞིར་སྒོམ་པའི་མཇུག་ཐོགས་སུ། །མི་སློབ་པ་ལ་མི་གནས་མྱ་ངན་འདའ། །ཞེས་སོ། །ཕར་ཕྱིན་བཅུ་ལས་ཚུལ་ཁྲིམས་ནས་ཡེ་ཤེས་ཀྱི་བར་ཕར་ཕྱིན་ཕྱི་མ་དགུ་ལ་གཙོ་བོར་སྤྱོད། ཐུན་མོང་གི་ཡོན་ཏན་ནི། ས་དང་པོའི་ཡོན་ཏན་བརྒྱ་ཕྲག་བཅུ་གཉིས་པོ་དེ་དག །གཉིས་པ་དྲི་མ་མེད་པར་སྐད་ཅིག་རེ་རེ་བཞིན་སྟོང་འགྱུར་མངོན་དུ་བྱེད་དོ། །དེ་བཞིན་དུ། གསུམ་པ་འོད་བྱེད་པར་བརྒྱ་སྟོང་འགྱུར་དང་། བཞི་པ་འོད་འཕྲོ་བར་ཁྲག་ཁྲིག་འགྱུར་དང་། ལྔ་པ་སྦྱང་དཀའ་བར་ཁྲག་ཁྲིག་ཕྲག་སྟོང་དང་། དྲུག་པ་མངོན་དུ་གྱུར་པར་ཁྲག་ཁྲིག་ཕྲག་བརྒྱ་སྟོང་དང་། བདུན་པ་རིང་དུ་སོང་བར་བྱེ་བ་ཁྲག་ཁྲིག་བརྒྱ་སྟོང་དང་། བརྒྱད་པ་མི་གཡོ་བར་སྟོང་གསུམ་བརྒྱ་སྟོང་ཕྲག་བཅུའི་རྡུལ་སྙེད་དང་། དགུ་པ་ལེགས་པའི་བློ་གྲོས་སུ་སངས་རྒྱས་ཀྱི་ཞིང་གྲངས་མེད་པ་བརྒྱ་སྟོང་ཕྲག་བཅུའི་རྡུལ་སྙེད་དང་། བཅུ་པ་ཆོས་ཀྱི་སྤྲིན་དུ་སངས་རྒྱས་ཀྱི་ཞིང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་སྙེད་ཀྱི་གྲངས་དང་མཉམ་པའི་སངས་རྒྱས་ཀྱི་ཞལ་བལྟ་བ་ལ་སོགས་པའི་ཡོན་ཏན་རྣམས་སྟོན་པར་ནུས་པ་ཡིན་ནོ། །ཁྱད་པར་གྱི་ཡོན་ཏན་ནི། ས་གཉིས་པ་ནས་ལྔ་པའི་བར་བཞི་ལ་རྡོ་རྗེའི་རིག་འཛིན་ཞེས་བྱ་སྟེ། རྟོགས་པའི་ཡེ་ཤེས་རྡོ་རྗེ་ལྟ་བུས་རང་སའི་སྒྲིབ་པ་འཇོམས་པའི་ཕྱིར་རོ། །ས་
དྲུག་པར་ཤེར་ཕྱིན་གཙོ་བོར་སྤྱོད་ཅིང་ཆོས་འཁོར་བསྐོར་བའི་ཕྱིར་དང་། ས་བདུན་པའང་ཐབས་མཁས་པ་འཁོར་ལོ་ལྟར་གྱུར་པས་ས་དེ་གཉིས་སུ་འཁོར་ལོའི་རིག་འཛིན་ཞེས་བྱའོ། །བརྒྱད་པར་མི་རྟོག་པའི་ཡེ་ཤེས་ལ་དབང་ཐོབ་པས་རིན་པོ་ཆེའི་རིག་འཛིན་དང་། དགུ་པར་ཆགས་པ་མེད་པས་ཞིང་སྦྱོང་ཞིང་དོན་མཛད་པས་པདྨའི་རིག་འཛིན་དང་། བཅུ་པར་འཕྲིན་ལས་ཕུན་སུམ་ཚོགས་པས་སེམས་ཅན་གྱི་དོན་བྱེད་པའི་ཕྱིར་རལ་གྲིའི་རིག་འཛིན་ཞེས་བྱ་སྟེ། སྒྱུ་འཕྲུལ་ལམ་རིམ་དུ། རང་སེམས་ཕྱག་རྒྱ་ཆེན་པོ་སྟེ། །བསྒོམས་པས་མངོན་དུ་གྱུར་པའི་ལྷ། །ཐུན་མོང་ཆོག་གི་མཚན་དཔེར་ལྡན། །ལོངས་སྤྱོད་གཉིས་པ་ཕྱག་རྒྱའི་རིགས། །རྡོ་རྗེ་འཁོར་ལོ་རིན་ཆེན་དང་། །པདྨ་རལ་གྲིའི་རིག་འཛིན་འགྱུར། །ཞེས་གསུངས་པའི་ཕྱིར། དེ་ལྟར་རིགས་ལྔས་བསྡུས་པ་ནི་ཡེ་ཤེས་སྒྱུ་མའི་སྐུ་ཅན་ཕྱག་ཆེན་རིག་འཛིན་ཏེ། དེས་ནི་ལོངས་སྐུའི་ཞིང་ཁམས་ཙམ་དུ་དུས་གཅིག་ལ་སྐུ་གཅིག་གིས་དོན་བྱེད། སྤྲུལ་པ་སྟོན་ཚུལ་ཡང་། ལམ་རིམ་དུ། རྔོན་དང་སྨད་འཚོང་ལ་སོགས་པ། །སྤྲུལ་པའི་ལུས་ཀྱིས་འདུལ་བར་བྱེད། །ཅེས་པས་གང་འདུལ་གྱི་བཀོད་པ་ངེས་མེད་དུ་སྟོན་ཏོ། །དེ་ཡང་ས་བཅུ་ཙམ་སྒོམ་ལམ་ཕྱག་རྒྱའི་རིག་འཛིན་དུ་བསྡུས་ནས། རྒྱུན་མཐའི་ཡེ་ཤེས་དག་ལས་རྣམ་གྲོལ་ལམ་དང་། ཁྱད་པར་ལམ་ནི་ཐར་ལམ་ལྷུན་གྲུབ་རིག་འཛིན་ཡིན་ལ། འདི་ལ་དབྱེ་ན། ཕར་ཕྱིན་ཐེག་པའི་ལམ་གྱིས་བསྒྲུབ་པའི་སངས་རྒྱས། ཀྲྀ་ཡའི་རིགས་གསུམ། ཡོ་གའི་རིགས་ལྔ། མ་ཧཱའི་སྐུ་ལྔ་ལྷུན་གྲུབ་ཀྱི་རྒྱལ་ཚབ་མཛད་པ་སྟེ་བཞིའོ། །དེ་ལྟར་ཡང་ལམ་རིམ་ལས། བྱ་བ་ལྷུན་གྲུབ་རྣལ་འབྱོར་གྱི། །རིག་འཛིན་ཆེན་པོ་ནང་རིག་འཛིན། །ཞེས་སོ། །འདི་དག་མཐར་ཐུག་གི་འབྲས་བུ་ལ་སྦྱོར་ཚུལ་མཚུངས་པས་སྐལ་བ་མཉམ་པ་ཡིན་མོད་ཀྱི། འོན་ཀྱང་ཕྱི་མ་བླ་མེད་ཀྱི་ལམ་གྱིས་བསྒྲུབས་པས་ཡན་ལག་བདུན་དང་ལྡན་པའི་ཡེ་ཤེས་གོང་མའི་གཞིར་གྱུར་པའོ། །ཡོན་ཏན་གྱི་ཁྱད་པར། ཇི་སྙེད་མཁྱེན་པའི་ཡུལ་རྒྱལ་བ་ཉིད་དང་ཤས་ཆེར་མཚུངས་པས་རྗེས་ཐོབ་ཏུ་སེམས་ཅན་སྒྲོལ་བ་ལ་མཛད་པ་བཅུ་གཉིས་ལ་སོགས་པའི་སྒོ་ནས་འགྲོ་བའི་དོན་མཛད་དེ། སྔ་མར། ལྷུན་གྲུབ་རིག་འཛིན་སར་བཞུགས་ནས། །
ཞིང་ཁམས་ཐུག །པ་མེད་པ་དག །འདུལ་ཕྱིར་སྤྲུལ་སྐུའི་མཛད་པ་སྟོན། །ཅེས་དང་། གསང་བའི་ཏནྟྲ་སྟོན་པ་དང་། །དེ་བཞིན་བསྡུ་བ་མཛད་པ་དང་། །ཞེས་དང་། ཀུན་མཁྱེན་ཡེ་ཤེས་མངའ་བའི་ཕྱིར། །ཡུལ་ཡང་ཚད་མེད་རྒྱལ་བ་ཉིད། །ཇི་ལྟར་མེ་ལོང་ལྟ་བུའི་ཚུལ། །ཞེས་དང་། རྒྱུད་བླ་ལས་ཀྱང་། རྗེས་ཐོབ་དེ་བཞིན་གཤེགས་རྣམས་དང་། །སེམས་ཅན་ཡང་དག་སྒྲོལ་བ་ལ། །འཇིག་རྟེན་ན་ནི་མཉམ་པ་ཉིད། །ཅེས་གསུངས་སོ། །གཉིས་པ་དམན་ལམ་ལས་ཐེག་ཆེན་དུ་འཇུག་ཚུལ་ལ་གསུམ། ལྡོག་བྱའི་ས་མཚམས་དང་། གཞུག་བྱའི་ས་མཚམས་དང་། འཇུག་པའི་ཚུལ་ལོ། །དང་པོ་ནི། ཉན་ཐོས་རང་ལུགས་ལ་དྲོད་རྩེ་གཉིས་ནས་བྱང་ཆུབ་ཏུ་སེམས་བསྐྱེད་དེ་ཐེག་ཆེན་ཏུ་འཇུག་པ་ཡང་ཡོད་པར་འདོད་ཅིང་། རང་རྒྱལ་ནི། བཟོད་པ་འབྲིང་ནས་ཀྱང་འཇུག་པར་འདོད་དེ། མཛོད་ལས། གཉིས་སློབ་རིགས་ལས་བཟློག་ནས་ནི། །སངས་རྒྱས་སུ་འགྱུར་གཞན་གསུམ་ཡང་། །ཞེས་སོ། །སེམས་ཙམ་པ་ནི་ཕུང་པོ་ལྷག་བཅས་མན་ཆད་ནས་འཇུག་པ་ཡོད་པར་འདོད་དེ། རྣམ་པར་གཏན་ལ་དབབ་པར་བསྡུས་པ་ལས་ཉན་ཐོས་བྱང་ཆུབ་ཏུ་ཡོངས་སུ་འགྱུར་པ་ཅི་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ལ་གནས་ཤིང་བླ་ན་མེད་པའི་བྱང་ཆུབ་མངོན་པར་སྒྲུབ་པར་བྱེད་དམ། འོན་ཏེ་ཕུང་པོ་ལྷག་མ་དང་བཅས་པའི་མྱ་ངན་ལས་འདས་པའི་དབྱིངས་ལ་གནས་ཤིང་བྱེད་ཅེ་ན། སྨྲས་པ། ཕུང་པོ་ལྷག་མ་དང་བཅས་པའི་མྱ་ངན་ལས་འདས་པའི་དབྱིངས་ལ་གནས་ཤིང་བྱེད་དེ། འདི་ལྟར་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ལ་གནས་པ་ནི་བརྩོན་པ་ཐམས་ཅད་དང་བྲལ་ཞིང་། འབད་པ་ཐམས་ཅད་རྒྱུན་ཆད་པ་ཡིན་པའི་ཕྱིར། ཅེས་སོ། །དབུ་མ་པ་ནི་ཕུང་པོ་ལྷག་མེད་དུ་ཞུགས་པ་ཡང་ཐེག་ཆེན་དུ་འཇུག་པར་འདོད་དེ། ལང་ཀར་གཤེགས་པ་ལས། ཏིང་ངེ་འཛིན་གྱི་ལུས་ཐོབ་ནས། །བསྐལ་པའི་བར་དུ་མི་སད་དོ། །དཔེར་ན་སྐྱེས་བུ་མྱོས་པ་ནི། །མྱོས་འགྱུར་མེད་ནས་ལྡང་བ་ལྟར། །དེ་ནི་དེ་དག་ང་ཡི་སྐུ། །སངས་རྒྱས་ཆོས་ཤེས་བྱ་བ་ཐོབ། །ཅེས་སོ། །གཉིས་པ་ནི། ཐེག་ཆེན་གྱི་ཚོགས་ལམ་ཉིད་ནས་འཇུག་དགོས་ཏེ། འདུན་ལྡན་གྱི་སེམས་བསྐྱེད་
སྔར་མ་སྐྱེས་ཤིང་གདོད་སྐྱེ་དགོས་པའི་ཕྱིར། དེས་ན་ཚོགས་ལམ་ལ་གནས་པའི་གང་ཟག་ཡིན་ན། སོ་སྐྱེ་ཡིན་པའི་ངེས་པ་མེད་དོ། །གསུམ་པ་ནི། ཉན་རང་སོ་སྐྱེའི་འཇུག་ཚུལ་སྐྱེ་བོ་ལམ་མ་ཞུགས་ཤིག་དང་པོ་ནས་ཐེག་ཆེན་དུ་འཇུག་པ་དང་ཚུལ་འདྲ་ཞིང་། འཕགས་པ་སློབ་པའི་འཇུག་ཚུལ། སེམས་བསྐྱེད་དེ་ཐབས་ལ་མཁས་པའི་མཐུས་འཕགས་པའི་ཟག་མེད་ཀྱི་དགེ་བ་དེ་འཁོར་བར་སྐྱེ་བའི་རྒྱུར་འགྱུར་ནས་སྐྱེ་བ་འཛིན་ཏེ། མདོ་སྡེ་རྒྱན་ལས། དེ་གཉིས་འཕགས་པའི་ལམ་ཐོབ་པ། །སྲིད་པ་དག་ཏུ་བསྒྱུར་བའི་ཕྱིར། །བསམ་གྱིས་མི་ཁྱབ་སྒྱུར་བ་ཡི། །སྐྱེ་བ་དག་ནི་ཡང་དག་ལྡན། །ཞེས་སོ། །སྐྱེ་བ་ལེན་ཚུལ་ཡང་སྔ་མ་ལས། །གཅིག་ནི་སྨོན་ལམ་དབང་གིས་ནི། །སྐྱེ་བ་རབ་ཏུ་སྒྲུབ་པར་བྱེད། །ཅིག་ཤོས་ཕྱིར་མི་འོང་བ་དང་། །ལྡན་ཕྱིར་སྤྲུལ་པས་རབ་ཏུ་སྒྲུབ། །ཅེས་གསུངས་ཤིང་། དེ་དག་ཀྱང་དང་པོ་ཉིད་ནས་ཐེག་ཆེན་ལ་ཞུགས་པ་བས་ལམ་བུལ་བ་ཡིན་ཏེ། སྔ་མར། དེ་གཉིས་ཡང་དང་ཡང་དུ་ནི། །རང་སེམས་ཀུན་ཏུ་འབྱུང་ལྡན་པས། །མྱ་ངན་འདས་ལ་མངོན་དགའི་ཕྱིར། །རྟོགས་པ་བུལ་བ་ཡིན་པར་འདོད། །ཅེས་སོ། །མི་སློབ་པ་འཇུག་ཚུལ་ནི། དགྲ་བཅོམ་ལྷག་བཅས་ཐེག་ཆེན་དུ་འཇུག་པའི་ཚེ། རྩ་བའི་ལུས་དེ་གཞན་གྱིས་མི་མཐོང་བའི་དབེན་པའི་གནས་སུ་བཞུགས་ཏེ། སྤྲུལ་པའི་ལུས་ཀྱིས་འགའ་ཞིག་ལ་མྱ་ངན་ལས་འདས་པར་ཡང་སྟོན་ལ་ཚོགས་རྣམས་ཀྱང་སྒྲུབ་པར་བྱེད་དོ། །བསྡུ་བ་ལས། ཇི་ལྟར་སྐྱེ་བ་གཅིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྒྲུབ་ཏུ་རུང་སྟེ། དགྲ་བཅོམ་པ་ལ་ནི་རེ་ཞིག་སྐྱེ་བ་གཅིག་ཀྱང་མེད་ན་སྐྱེ་བའི་རྒྱུན་ལྟ་སྨོས་ཀྱང་ཅི་དགོས་ཤེ་ན། སྨྲས་པ། ཚེའི་འདུ་བྱེད་བསྲིངས་ནས་མངོན་པར་སྒྲུབ་པར་བྱེད་དོ། །ཞེས་སོ། །ཉན་རང་ཕུང་པོ་ལྷག་མེད་དུ་ཞུགས་ཟིན་ནས་ཐེག་ཆེན་དུ་འཇུག་པའི་ཚེ། སྔར་ཚོགས་ཇི་ཙམ་བསགས་པའི་ཡུན་དེ་ཙམ་གཅིག་ཞི་བའི་དབྱིངས་སུ་བློའི་འཇུག་པ་ཐིམ་ཡང་། དེ་ནས་བདེ་བ་ཅན་ལ་སོགས་པ་དག་པའི་ཞིང་ཁམས་རྣམས་སུ་པདྨའི་སྦུབས་སུ་སྐྱེས་ཏེ། ལོ་བདུན་དུ་པདྨ་ཁ་ཟུམ་སྟེ་གནས་སོ། །དེ་ལ་མ་རིག་བག་ཆགས་ཀྱི་ས་དང་། ཟག་མེད་ཀྱི་ལས་ཀྱི་ས་བོན་ཡོད་པའི་ཕྱིར། ཞིང་དེའི་སངས་རྒྱས་
ཀྱི་གསུང་གི་འོད་ཟེར་བསྒྲགས་ཏེ་ཏིང་ངེ་འཛིན་ལས་སློང་བའི་ཚིགས་སུ་བཅད་པ་འབྱུང་བ་ནི། དམ་པའི་ཆོས་པདྨ་དཀར་པོ་ལས། འདི་ལྟར་མྱ་ངན་འདས་པ་གང་བརྗོད་པ། །འཁོར་བའི་སྡུག་བསྔལ་དག་ལས་ཁྱེད་ཐར་ཡང་། །ཁྱེད་ནི་ད་དུང་མྱ་ངན་ཡོངས་མ་འདས། །སངས་རྒྱས་ཐེག་པ་འདི་ནི་བཙལ་བར་གྱིས། །ཞེས་ཐོས་མ་ཐག་ཏུ། ཐེག་ཆེན་ཏུ་འཇུག་འདོད་ཀྱི་སྤྲོ་བ་སྐྱེས་པས་པདྨ་ཁ་ཕྱེས་ཏེ། དེ་བཞིན་གཤེགས་པ་དེའི་དྲུང་དུ་སེམས་དེ་བསྒོམས་པས་སྐུ་ཚེ་དེ་ཉིད་ལ་ལམ་ལྔ་ས་བཅུ་རིམ་གྱིས་བགྲོད་ནས་བྱང་ཆུབ་མངོན་དུ་མཛད་དོ། །དེ་ལྟར་ཡང་ལང་གཤེགས་ལས། དེ་བཞིན་གཤེགས་པའི་བྱིན་གྱིས་བརླབས་ཀྱིས་སྐྱེ་བ་ལ་རང་དབང་ཐོབ་པའི་སྒོ་ནས་ཚོགས་གཉིས་ཡོངས་སུ་བསགས་ཏེ་སངས་རྒྱས་ཉིད་ཐོབ་པར་འགྱུར་རོ། །ཞེས་སོ། །གསུམ་པ་ཟུང་འཇུག་འབྲས་བུའི་རྣམ་གཞག་ལ་གཉིས། ལྷན་གྲུབ་རིག་འཛིན་ལས་འབྲས་བུར་སྦྱོར་ཚུལ་དང་། གཏན་ལ་དབབ་པ་དངོས་སོ། །དང་པོ་ནི། དེ་ཡང་རྒྱུན་མཐའི་སྔ་ལོགས་ཚུན་ཆད་དུ་ཁུ་རྡུལ་རླུང་གསུམ་གྱི་འགྱུར་བདེ་མྱོང་བའི་ཡིད་དང་བཅས་པའི་གཉིས་སྣང་ཤེས་པ་ཕྲ་ཞིང་ཕྲ་བ་ཞིག་ཡོད་པ་དེ་འདོད་ཆགས་ཆེན་པོའི་ལམ་གྱིས་འབྲས་བུའི་དབང་བསྐུར་བས། གསུམ་པ་དང་བཞི་པའི་རྗེས་ཆགས་ཀྱི་རྐྱེན་གྱིས་རླུང་གི་གཡོ་བ་ཕྲ་མོས་དམར་ཆ་ཕྲ་མོ་འབར་བའི་རང་བཞིན་གྱིས་ཕྲ་ཞིང་ཕྲ་བའི་དཀར་ཆ་བཞུ་བ་ལས། ཁུ་བ་རྣམ་པར་དག་པའི་དགའ་བ་བཅུ་དྲུག་ཡས་བབས་ཀྱི་ཚུལ་དུ་ཤར་བའི་ཡེ་ཤེས་ནི་དང་པོ་སེམས་སོ་སོར་རྟོག་པ་ལས་མངོན་པར་བྱང་ཆུབ་པའོ། །མས་བརྟན་གྱི་ཚེ་དཀར་དམར་རོ་གཅིག་ཏུ་གྱུར་པས་ཁུ་རྡུལ་གཉིས་ཀ་རྣམ་པར་དག་པའི་ཡེ་ཤེས་ལྷན་སྐྱེས་མཐར་ཕྱིན་པ་ཕུང་ལྔ་འབྱུང་བཞིས་ཕྱེ་བའི་ཁམས་ཉི་ཤུ་པོ་ཡེ་ཤེས་ལྔ་ཚད་མེད་བཞིས་ཕྱེ་བའི་ལམ་མཐར་ཐུག་གི་ཡེ་ཤེས་སྟོང་ཉིད་ཉི་ཤུར་དག་པ་ནི་གཉིས་པ་བྱང་ཆུབ་ཀྱི་སེམས་ལས་མངོན་པར་བྱང་ཆུབ་པའོ། །མས་བརྟན་དེ་ཉིད་ཀྱི་མཐར་ཁུ་རྡུལ་སྟེང་འོག་ཏུ་ཐིམ་པའི་སྐད་ཅིག་གཉིས་པར་རླུང་ཡང་འགགས་པའི་ཡེ་ཤེས་སྟོང་ཉིད་མཐར་ཐུག་པ་ནི་གསུམ་པ་བརྟན་པའི་རྡོ་རྗེ་ལས་མངོན་པར་
བྱང་ཆུབ་པའོ། །དེ་ལྟར་ཁུ་རྡུལ་རླུང་གསུམ་འགགས་པས་གསུམ་ཀ་དག་པའི་ཡེ་ཤེས་ཤེས་བྱ་ཀུན་ལ་ཁྱབ་པ་ནི་བཞི་པ་རྡོ་རྗེའི་བདག་ཉིད་ལས་མངོན་པར་བྱང་ཆུབ་པའོ། །དེའི་དུས་ན་འགྱུར་བདེ་མྱོང་བའི་ཤེས་རིག་ཀྱང་རྒྱུན་ཆད་པས་སྒྲིབ་པ་ལས་རྣམ་པར་གྲོལ་བའི་ཡེ་ཤེས་མི་འགྱུར་བའི་བདེ་བ་ཆེན་པོ་མཁའ་ཁྱབ་མངོན་དུ་གྱུར་པ་ནི་དེ་བཞིན་གཤེགས་པ་ཐམས་ཅད་ཀྱི་བདག་ཉིད་ཇི་ལྟ་བ་དེ་ལྟ་ལས་མངོན་པར་བྱང་ཆུབ་པ་སྟེ། དེ་ལྟར་ཉེ་རྒྱུའི་ཏིང་ངེ་འཛིན་ནང་གི་མངོན་བྱང་ལྔ་ལ་བརྟེན་ནས། དཀར་ཆ་དག་པ་སྐུ་རྡོ་རྗེ་དང་མེ་ལོང་ལྟ་བུའི་ཡེ་ཤེས། དམར་ཆ་དག་པ་གསུང་དང་མཉམ་ཉིད། རླུང་དག་པ་ཐུགས་དང་སོར་རྟོག །ཤེས་རིག་དག་པ་ཡེ་ཤེས་རྡོ་རྗེ་དང་ཆོས་དབྱིངས་ཡེ་ཤེས། བྱ་བ་གྲུབ་པའི་འཕྲིན་ལས་དང་བཅས་པ་མཐར་ཕྱིན་ཏེ་གདོད་མའི་གནས་ལུགས་ཇི་ལྟ་བ་བཞིན་མངོན་དུ་གྱུར་པ་མཐར་ཐུག་པའོ། །དེ་སྐད་དུ་ཡང་། སྒྱུ་འཕྲུལ་བླ་མ་ལས། དོན་གྲུབ་དཀའ་ཐུབ་ལུས་ཅན་ལ། །ཕྱོགས་བཅུའི་རྒྱལ་བ་སྤྲིན་བཞིན་དུ། །འདུས་པས་ལོངས་སྤྱོད་དོན་གྱི་ཕྱིར། །སྲོད་དང་ཐོ་རངས་དུས་ཉིད་དུ། །ཉི་ཟླ་ཟ་བའི་དབང་བྱིན་ནས། །རོལ་པའི་ཀ་ར་བསྟན་པ་ཡིས། །དེ་བཞིན་དེ་བཞིན་གཤེགས་པའོ། །ཞེས་སོ། །གཉིས་པ་ལ་གསུམ། མཚན་ཉིད། སྒྲ་དོན། དབྱེ་བའོ། །དང་པོ་ནི། དག་པ་གཉིས་ལྡན་གྱི་ཡེ་ཤེས་མཐར་ཐུག་གང་ཞིག །ཁ་སྦྱོར་ལ་སོགས་པའི་ཡན་ལག་བདུན་ལྡན་ནོ། །དེ་ལ་ཡན་ལག་བདུན་ནི། །ཇི་སྐད་དུ། ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ཡོངས་གང་རྒྱུན་མི་ཆད་དང་འགོག་པ་མེད། །ཅེས་སོ། །གཉིས་པ་ནི། སྙིང་པོའི་ཁོག་གཞུང་ལས། གྲུབ་པ་མཐར་ཕྱིན་འབྲས་བུར་བརྗོད། །ཅེས་པས། བླ་ན་མེད་པ་མཆོག་གི་འབྲས་བུ་མཐར་ཐུག་པ་དོན་དུ་གཉེར་བ་རྣམས་བསམ་པ་ཡོངས་སུ་རྫོགས་པས་འབྲས་བུའོ། །གསུམ་པ་ལ་གཉིས། ཆེན་པོ་གསུམ་གྱིས་མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། དེ་ཡང་སྒྲིབ་གཉིས་བག་ཆགས་དང་བཅས་པ་ཡོངས་སུ་དག་པའི་སྐུ་ནི་
སྤོང་བ་ཆེན་པོ། ཤེས་བྱའི་དཀྱིལ་འཁོར་མ་ལུས་པ་གསལ་ལེར་གཟིགས་པའི་ཡེ་ཤེས་ནི་རྟོགས་པ་ཆེན་པོ། དེའི་མཐུས་འགྲོ་བ་མཐའ་དག་གི་དོན་རྟག་ཁྱབ་ལྷུན་གྲུབ་ཏུ་མཛད་པ་ནི་སེམས་ཆེན་པོ་སྟེ། མངོན་རྟོགས་རྒྱན་ལས། སེམས་ཅན་ཀུན་མཆོག་ཉིད་སེམས་དང་། །སྤངས་དང་རྟོགས་དང་གསུམ་པོ་ལ། །ཆེན་པོ་གསུམ་གྱི་རང་བྱུང་གི །ཆེད་དུ་བྱ་བ་འདི་ཤེས་བྱ། །ཞེས་སོ། །དེའི་དོན་སྦྱོར་ངག་ཏུ་བརྗོད་ན། མཐར་ཐུག་གི་འབྲས་བུ་ཆོས་ཅན། སྤངས་བ་ཆེན་པོ་ཡིན་ཏེ། སྒྲིབ་པ་ཀུན་ལས་རྣམ་པར་གྲོལ་བའི་སྐུ་ཅན་ཡིན་པའི་ཕྱིར། དེ་ཆོས་ཅན། རྟོགས་པ་ཆེན་པོ་ཡིན་ཏེ་ཤེས་བྱ་ཐམས་ཅད་གཟིགས་པ་ཡང་དག་པའི་སྐུ་ཅན་ཡིན་པའི་ཕྱིར། དེ་ཆོས་ཅན། སེམས་ཆེན་པོ་ཡིན་ཏེ། འགྲོ་བའི་དོན་འབད་མེད་ལྷུན་གྲུབ་ཏུ་མཛད་པའི་ཕྱིར། དེ་ཡང་རྒྱུད་བླ་ལས། ཆུ་མཚོ་སོགས་བཞིན་འདོད་ཆགས་སོགས། །གློ་བུར་ཉོན་མོངས་དག་པ་ནི། །མདོར་ན་མི་རྟོག་ཡེ་ཤེས་ཀྱི། །འབྲས་བུ་ཡིན་པར་རབ་ཏུ་བརྗོད། །རྣམ་པ་ཀུན་གྱི་མཆོག་ལྡན་པའི། །སངས་རྒྱས་སྐུ་ནི་ངེས་ཐོབ་པ། །དེ་ནི་རྗེས་ལ་ཐོབ་པ་ཡི། །ཡེ་ཤེས་འབྲས་བུ་ཡིན་པར་བསྟན། །ཅེས་གསུངས་སོ། །དེ་ལྟར་གྱུར་པས་སངས་རྒྱས་ཐམས་ཅད་ཀྱི་སྤྱི་གཟུགས་སྐུ་གསུམ་དང་ཡེ་ཤེས་ལྔ་དབྱེར་མི་ཕྱེད་པའི་བདག་ཉིད་རྡོ་རྗེ་འཆང་ཆེན་པོའོ། །གཉིས་པ་ལ་གཉིས། རང་དོན་གྲུབ་པ་དང་། གཞན་དོན་མཛད་པའོ། །དང་པོ་ལ་གཉིས། སྐུའི་རྣམ་བཞག་དང་། དེ་ལ་མངའ་བའི་ཡོན་ཏན་ནོ། །དང་པོ་ནི། དེ་ལ་རང་སྣང་གི་སྐུ་གསུམ་དུ་དབྱེ་བའི་དབང་དུ་བྱས་ན། ཆོས་ཐམས་ཅད་མཚན་མ་མེད་པར་ཐུགས་སུ་ཆུད་པས་སྤྲོས་པ་ཐམས་ཅད་དང་བྲལ་བའི་ཡེ་ཤེས་རང་བཞིན་རྣམ་དག་མངོན་དུ་གྱུར་པའི་ཆ་ནི་ཆོས་ཀྱི་སྐུ། དེ་གློ་བུར་རྣམ་དག་མཐར་ཐུག་པས་ཁྱད་པར་དུ་བྱས་པ་ན་ཤིན་ཏུ་རྣམ་པར་དག་པའི་ཡེ་ཤེས་ཀྱིས་ཆོས་ཐམས་ཅད་དག་པའི་སྣང་བ་རབ་འབྱམས་སུ་གཟིགས་པའི་ཆ་ནི་ལོངས་སྤྱོད་རྫོགས་པའི་སྐུ། དེ་ལ་མངའ་བའི་ཡོན་ཏན་གདུལ་བྱ་གཞན་སྣང་དུ་སྐུ་དང་མཛད་པའི་རྣམ་རོལ་སྟོན་ནུས་པའི་ཐུགས་རྗེ་དང་ནུས་མཐུའི་ཡེ་ཤེས་ཀྱིི་ཆ་ནི་སྤྲུལ་
པའི་སྐུ་སྟེ། རང་རྒྱུད་ཀྱིས་བསྡུས་པའི་སྐུ་གསུམ་མོ། །དེ་ལྟར་ཡང་གསེར་འོད་དམ་པར། སྐུ་གསུམ་གྱི་ལེའུ་ལས། དེ་བཞིན་དུ་ཆོས་ཀྱི་དབྱིངས་ལ་རྣམ་པར་རྟོག་པ་ཐམས་ཅད་མི་སྐྱེ་བའི་ཕྱིར། རྣམ་པར་དག་པ་ཞེས་བྱ་སྟེ། སངས་རྒྱས་རྣམས་ཀྱི་ཡང་དག་པའི་སྐུ་ནི་མེད་པ་མ་ཡིན་ནོ། །གཞན་ཡང་རིགས་ཀྱི་བུ་ཆོས་ཀྱི་སྐུ་ནི་ཉོན་མོངས་པའི་སྒྲིབ་པ་རྣམ་པར་དག་པས་ལོངས་སྤྱོད་རྫོགས་པའི་སྐུར་སྣང་བར་འགྱུར་རོ། །ལས་ཀྱི་སྒྲིབ་པ་རྣམ་པར་དག་པས་སྤྲུལ་པའི་སྐུར་སྣང་བར་འགྱུར་རོ། །ཡེ་ཤེས་ཀྱི་སྒྲིབ་པ་རྣམ་པར་དག་པས་ཆོས་ཀྱི་སྐུར་སྣང་བར་འགྱུར་རོ། །དཔེར་ན་ནམ་མཁའ་ལ་བརྟེན་ནས་གློག་འབྱུང་བར་འགྱུར་རོ། །གློག་ལ་བརྟེན་ནས་འོད་སྣང་ངོ་། །དེ་བཞིན་དུ་ཆོས་ཀྱི་སྐུ་ལ་བརྟེན་ནས་ལོངས་སྤྱོད་རྫོགས་པའི་སྐུར་སྣང་བར་འགྱུར་རོ། །ལོངས་སྤྱོད་རྫོགས་པའི་སྐུ་ལ་བརྟེན་ནས་སྤྲུལ་པའི་སྐུར་སྣང་བར་འགྱུར་རོ། །དེ་ལ་རང་བཞིན་རྣམ་པར་དག་པའི་ཕྱིར་ཆོས་ཀྱི་སྐུ་སྣང་ངོ་། །ཡེ་ཤེས་རྣམ་པར་དག་པས་ལོངས་སྤྱོད་རྫོགས་པའི་སྐུ་སྣང་ངོ་། །ཏིང་ངེ་འཛིན་རྣམ་པར་དག་པས་སྤྲུལ་པའི་སྐུ་སྣང་ངོ་། །དེ་གསུམ་རྣམ་པར་དག་པ་ནི། ཆོས་ཀྱི་དེ་བཞིན་ཉིད་དང་། གཞན་མ་ཡིན་པའི་དེ་བཞིན་ཉིད་དང་རོ་གཅིག་པའི་དེ་བཞིན་ཉིད་དང་། རྣམ་པར་གྲོལ་བའི་དེ་བཞིན་ཉིད་དང་། མཐའ་ཀླས་པའི་དེ་བཞིན་ཉིད་ཀྱི་ཕྱིར། སངས་རྒྱས་ཐམས་ཅད་ཀྱི་སྐུ་ནི་ཐ་མི་དད་དོ། །རིགས་ཀྱི་བུའམ་རིགས་ཀྱི་བུ་༼མོ༽གང་དེ་བཞིན་གཤེགས་པ་ནི་བདག་གི་སྟོན་པ་ཆེན་པོའོ། །ཞེས་སྨྲ་ཞིང་མོས་པ་དེ་ནི་དེ་བཞིན་གཤེགས་པའི་སྐུ་གཉིས་སུ་མེད་པར་བསམ་པ་ཐག་པས་ཤེས་པ་ཡིན་ནོ། །ཞེས་གསུངས་སོ། །འདི་ལ་སྒྱུ་འཕྲུལ་དུ་སྐུ་གསུམ་པོ་དེ་དག་ངོ་བོ་དབྱེར་མི་ཕྱེད་པའི་ཆ་ནས་རྡོ་རྗེའི་སྐུ་དང་། སྣང་ཆ་མ་འདྲེས་པའི་ཆ་ནས་མངོན་བྱང་སྟེ་སྐུ་ལྔའོ། །ཡང་། གཞན་སྣང་གཙོ་བོའི་དབང་དུ་བྱས་ན། རང་སྣང་སྐུ་གསུམ་ལས་མ་གཡོས་བཞིན་དུ། གདུལ་བྱའི་སེམས་དག་པ་དང་སྨོན་ལམ་གྱི་རྐྱེན་ཉེ་བར་འཛོམས་པ་ལས། གཞན་སྣང་གི་ལོངས་སྤྲུལ་གཉིས་ཆུ་ཟླའི་གཟུགས་བརྙན་ལྟར་འཆར་བ་ཡིན་ཏེ། རྒྱུད་བླར། ཇི་ལྟར་བཻ་ཌཱུར་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། །
དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོའི་སྐུ་ཡི་གཟུགས་བརྙན་འཆར། །ཞེས་སོ། །དེ་ཡང་ས་བཅུའི་བྱང་ཆུབ་སེམས་དཔའ་རྣམས་ལ་མཚན་དཔེའི་སྣང་བརྙན་ངེས་པ་ལྔ་ལྡན་དུ་འཆར་བ་ནི་ལོངས་སྐུ་སྟེ། མངོན་རྟོགས་རྒྱན་ལས། མཚན་ནི་སུམ་ཅུ་རྩ་གཉིས་དང་། །དཔེ་བྱད་བརྒྱད་ཅུའི་བདག་ཉིད་འདི། །ཐེག་ཆེན་ཉེ་བར་ལོངས་སྤྱོད་ཕྱིར། །ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་སོ། །མ་དག་པའི་གདུལ་བྱ་རྣམས་ལ་བཟོ་དང་། སྐྱེ་བ། མཆོག་གི་སྤྲུལ་སྐུ་སོགས་མདོར་ན་བརྟན་གཡོ་སྣ་ཚོགས་པས་བསྡུས་པའི་སྤྲུལ་པ་གང་འདུལ་དུ་འཆར་བ་ནི་སྤྲུལ་པའི་སྐུ་སྟེ། སྔ་མ་ལས། གང་གིས་སྲིད་པ་ཇི་སྲིད་བར། །འགྲོ་ལ་ཕན་པ་སྣ་ཚོགས་དག །མཉམ་དུ་མཛད་པའི་སྐུ་དེ་ནི། །ཐུབ་པའི་སྤྲུལ་སྐུ་རྒྱུན་མི་ཆད། །ཅེས་དང་། མདོ་སྡེ་རྒྱན་ལས། བཟོ་དང་སྐྱེ་བ་བྱང་ཆུབ་ཆེ། །མྱ་ངན་འདས་པ་རྟག་སྟོན་པ། །སངས་རྒྱས་སྤྲུལ་པའི་སྐུ་དེ་ནི། །རྣམ་པར་གྲོལ་བའི་ཐབས་ཆེན་པོ། །ཞེས་སོ། །ཡང་སྐུ་ལྔར་དབྱེ་ཚུལ་གྱི་རྣམ་གྲངས་མི་འདྲ་བ་ལྟར་ན། སློབ་དཔོན་འཇམ་དཔལ་གྲགས་པས། ཆོས་སྐུ་སོགས་གསུམ་གྱི་སྟེང་དུ། ངོ་བོ་ཉིད་སྐུ་དང་། ཡེ་ཤེས་ཀྱི་སྐུ་གཉིས་བསྣན་པའི་ལྔར་གསུངས། ཡང་སྐུ་གསུམ་གྱི་སྟེང་དུ་ངོ་བོ་ཉིད་སྐུ་བསྣན་པས་བཞིའམ། ཤིན་ཏུ་བསྡུ་ན་ཆོས་སྐུ་དང་གཟུགས་སྐུ་གཉིས་སུ་འདུས་ཏེ། དེ་ལྟར་དབྱེ་ཚུལ་མང་ངོ་། །གཉིས་པ་ལ་གཉིས། བརྟེན་པ་ཡེ་ཤེས་ལྔའི་རྣམ་བཞག་དང་། ཡོན་ཏན་དྲུག་ཅུ་རྩ་བཞིའི་དབྱེ་བའོ། །དང་པོ་ནི། ཤིན་ཏུ་རྣམ་པར་དག་པ་སྤྲོས་བྲལ་གྱི་ཡེ་ཤེས་ནི་ཆོས་དབྱིངས་ཡེ་ ཤེས་ཏེ། ལེ་ལག་ལས། རྣམ་རྟོག་ཀུན་གཞི ་མ་ཡིན་ལ། །རང་བཞིན་མེད་པ་དོན་གྱི་གཞི། །འདི་ནི་ཆོས་ཀྱི་དབྱིངས་ཞེས་བྱ། །དེ་བཞིན་ཉིད་ཀྱི་ཡེ་ཤེས་སོ། །ཞེས་སོ། །དེས་ཆོས་ཐམས་ཅད་གསལ་ལ་མི་རྟོག་པར་གཟིགས་པའི་ཆ་ནི་མེ་ལོང་ཡེ་ཤེས་ཏེ། མདོ་སྡེ་རྒྱན་ལས། མེ་ལོང་ཡེ་ཤེས་ང་ཡི་མེད། །ཡོངས་སུ་མ་ཆད་རྟག་ཏུ་ལྡན། །ཤེས་བྱ་ཀུན་ལ་མ་རྨོངས་པ། །རྟག་ཏུ་དེ་ལ་མངོན་ཕྱོགས་མིན། །ཞེས་སོ། །དེ་ལྟར་གཟིགས་པའི་ཆོས་ཐམས་ཅད་མཉམ་པར་གཟིགས་པ་ནི་མཉམ་ཉིད་ཡེ་ཤེས་ཏེ། སྔ་མ་ལས། མི་གནས་ཞི་བར་བཞུགས་པ་ནི། །
མཉམ་ཉིད་ཡེ་ཤེས་ཡིན་པར་བརྗོད། །ཅེས་སོ། །ངོ་བོ་སྟོང་པ་ཉིད་ལས་མ་གཡོས་བཞིན་དུ་ཆོས་ཐམས་ཅད་མ་འདྲེས་པར་མཁྱེན་པ་ནི་སོར་རྟོག་ཡེ་ཤེས་ཏེ། སྔ་མ་ལས། སོ་སོར་རྟོག་པའི་ཡེ་ཤེས་ནི། །ཤེས་བྱ་ཀུན་ལ་རྟག་མི་ཐོགས། །ཞེས་སོ། །སེམས་ཅན་ཐམས་ཅད་ལ་མཉམ་པར་འཇུག་པའི་དམིགས་མེད་ཀྱི་ཐུགས་རྗེ་ཆེན་པོ་ནི་འགྲོ་དོན་མཛད་པ་ལ་ཐོགས་པ་མེད་པའི་ཕྱིར་བྱ་གྲུབ་ཡེ་ཤེས་ཏེ། སྔ་མ་ལས། བྱ་བ་གྲུབ་པའི་ཡེ་ཤེས་ནི། །ཁམས་རྣམས་ཀུན་ཏུ་སྣ་ཚོགས་ཤིང་། །དཔག་མེད་བསམ་ཡས་སྤྲུལ་པ་ཡིས། །སེམས་ཅན་ཀུན་དོན་སྒྲུབ་པ་པོ། །ཞེས་སོ། །གཉིས་པ་ལ་བསྟན་བཤད་གཉིས་ལས། དང་པོ་ནི། རྒྱུད་བླ་མར། དང་པོའི་སྐུ་ནི་སྟོབས་ལ་སོགས། །བྲལ་བའི་ཡོན་ཏན་རྣམས་དང་ལྡན། །གཉིས་པ་སྐྱེས་བུ་ཆེན་པོའི་མཚན། །རྣམ་སྨིན་ཡོན་ཏན་དག་དང་ལྡན། །ཞེས་པའི་དོན། ཆོས་སྐུ་དང་གཟུགས་སྐུ་གཉིས་ཆོས་ཅན། གཙོ་ཆེ་ཆུང་གིས་ཡོན་ཏན་གྱི་རིགས་ཀྱི་དབྱེ་བ་གཉིས་དང་ལྡན་ཏེ། སྟོབས་བཅུ་ལ་སོགས་པ་ཡེ་ཤེས་ཀྱི་ཚོགས་ལས་སྒྲིབ་པ་དང་བྲལ་བ་ཙམ་གྱིས་རབ་ཏུ་ཕྱེ་བའི་ཡོན་ཏན་རྣམས་དང་རྣམ་དབྱེར་མེད་པར་ལྡན་པ་གང་ཞིག །སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ལ་སོགས་པ་བསོད་ནམས་ཀྱི་ཚོགས་ལས་རྣམ་པར་སྨིན་པའི་ཡོན་ཏན་དག་དང་ཡང་ལྡན་པའི་ཕྱིར། གཉིས་པ་ལ་གཉིས། བྲལ་བ་དང་། རྣམ་སྨིན་གྱི་ཡོན་ཏན་ནོ། །དང་པོ་ལ་གསུམ། སྟོབས་དང་། མི་འཇིགས་པ་དང་མ་འདྲེས་པའི་ཡོན་ཏན་ནོ། །དང་པོ་ནི། དེ་བཞིན་གཤེགས་པའི་སྟོབས་བཅུ་སྟེ། གནས་དང་གནས་མ་ཡིན་པ་མཁྱེན་པའི་སྟོབས་དང་། ལས་ཀྱི་རྣམ་པར་སྨིན་པ་དང་། དབང་པོ་མཆོག་དམན་དང་། འཇིག་རྟེན་གྱི་ཁམས་དུ་མ་དང་། མོས་པ་སྣ་ཚོགས་དང་། ཐམས་ཅད་དུ་འགྲོ་བའི་ལམ་དང་། ཉོན་མོངས་རྣམ་བྱང་དང་། སྔོན་གྱི་གནས་དང་། འཆི་འཕོ་སྐྱེ་བ་དང་། ཟག་པ་ཟད་པ་མཁྱེན་པའི་སྟོབས་རྣམས་སོ། །དེ་ལྟར་ཡང་རྒྱུད་བླར། གནས་དང་གནས་མིན་ལས་རྣམས་ཀྱི། །རྣམ་སྨིན་དང་ནི་དབང་པོ་དང་། །ཁམས་རྣམས་དང་ནི་མོས་པ་དང་། །ཀུན་འགྲོའི་ལམ་དང་བསམ་གཏན་སོགས། །ཉོན་མོངས་དྲི་མ་མེད་པ་དང་། །གནས་ནི་རྗེས་སུ་དྲན་པ་དང་། །ལྷ་ཡི་མིག་དང་
ཞི་བ་དག །མཁྱེན་པའི་སྟོབས་ནི་རྣམ་པ་བཅུ། །ཞེས་སོ། །སྦྱོར་ངག་ནི། སྟོབས་བཅུ་ཆོས་ཅན། རྡོ་རྗེ་དང་མཚུངས་ཏེ། རང་རང་གི་མི་མཐུན་ཕྱོགས་འཇོམས་ནུས་པའི་ཕྱིར། གཉིས་པ་ནི། དེ་བཞིན་གཤེགས་པའི་མི་འཇིགས་པ་ནི་རྣམ་པ་བཞི་སྟེ། ཇི་ལྟ་བ་དང་ཇི་སྙེད་པའི་ཆོས་མ་ལུས་པ་མངོན་སུམ་དུ་རྟོགས་པའི་ཚུལ་གྱིས་བདག་ཉིད་མངོན་པར་རྫོགས་པར་སངས་རྒྱས་སོ། །ཞེས་ཞལ་གྱིས་བཞེས་པ་ལ་མི་འཇིགས་པ་དང་། འདོད་ཆགས་ལ་སོགས་པའི་ཉོན་མོངས་པ་རྣམས་ཀྱིས་ཐར་པ་ཐོབ་པ་ལ་སྒྲིབ་པས་འགོག་པར་བྱེད་དགོས་སོ་ཞེས་བར་དུ་གཅོད་པའི་ཆོས་སྟོན་པ་ལ་མི་འཇིགས་པ་དང་། འཁོར་བ་ལས་ངེས་པར་འབྱུང་བའི་ཐེག་པ་གསུམ་གྱི་ལམ་ཐམས་ཅད་སྟོན་པ་ལ་མི་འཇིགས་པ་དང་། སྤང་བྱ་མ་ལུས་པ་ཟད་པའི་འགོག་པ་ཐོབ་ཅེས་ཞལ་གྱིས་བཞེས་པ་ལ་མི་འཇིགས་པ་རྣམས་སོ། །དེ་ཡང་སྔ་མར། ཆོས་ཀུན་རྫོགས་པར་བྱང་ཆུབ་དང་། །གེགས་ནི་འགོག་པར་བྱེད་པ་དང་། །ལམ་སྟོན་པ་དང་འགོག་སྟོན་ལ། །མི་འཇིགས་པ་ནི་རྣམ་པ་བཞི། །ཞེས་སོ། །སྦྱོར་ངག་ནི། མི་འཇིགས་པ་བཞི་ཆོས་ཅན། ཞལ་གྱིས་བཞེས་པ་ལ་འཇིགས་པ་མེད་དེ། གཞན་གྱི་ཆོས་དང་མཐུན་པར་རྒོལ་མི་ནུས་པའི་ཕྱིར། གསུམ་པ་ནི། དེ་བཞིན་གཤེགས་པའི་མ་འདྲེས་པ་བཅོ་བརྒྱད་དེ། དུག་གསུམ་གྱིས་ཀུན་ནས་བསླང་བའི་སྐུའི་སྤྱོད་པ་འཁྲུལ་པ་མི་མངའ་བ་དང་། དེས་ཀུན་ནས་བསླང་བའི་གསུང་གི་སྤྱོད་པ་ཅ་ཅོ་མི་མངའ་བ་དང་། འདས་པའི་དོན་བརྗོད་པའི་དྲན་པ་ཉམས་པ་མི་མངའ་བ་དང་། དུས་རྟག་ཏུ་མཉམ་པར་མ་བཞག་པའི་ཐུགས་མི་མངའ་བ་དང་། འཁོར་འདས་རང་བཞིན་ཐ་དད་དུ་འཛིན་པའི་འདུ་ཤེས་སྣ་ཚོགས་མི་མངའ་བ་དང་། གདུལ་བྱ་དུས་ལ་བབས་ཀྱང་སོ་སོར་མ་བརྟགས་པའི་སྒོ་ནས་ཡལ་བར་འདོར་བའི་བཏང་སྙོམས་མི་མངའ་བས་ཐུགས་ཀྱི་སྤྱོད་པ་བཞི་སྟེ་སྤྱོད་པས་བསྡུས་པ་དྲུག །མཁའ་མཉམ་འགྲོ་བའི་དོན་རྒྱུན་མི་ཆད་དུ་མཛད་པར་བཞེད་པའི་འདུན་པ་དང་། གཞན་དོན་ལ་སྤྲོ་བའི་བརྩོན་འགྲུས་དང་། ཆོས་ཐམས་ཅད་ཇི་ལྟ་བ་བཞིན་གཟིགས་པའི་དྲན་པ་དང་། ཆོས་རྣམ་པར་འབྱེད་པའི་ཤེས་རབ་དང་། སྒྲིབ་པ་དང་བྲལ་བའི་རྣམ་པར་གྲོལ་བ་དང་། ཆོས་ཐམས་ཅད་
ལ་དབང་འབྱོར་པའི་ཤེས་རབ་སྒྲིབ་པ་ལས་རྣམ་པར་གྲོལ་བ་ཉིད་ཀྱི་ཡེ་ཤེས་ཀྱིས་ཤེས་བྱ་ཐམས་ཅད་ལ་གཟིགས་པ་ཉམས་པ་མི་མངའ་བ་རྣམས་ཏེ་རྟོགས་པས་བསྡུས་པ་དྲུག །སྐུ་གསུང་ཐུགས་ཀྱི་འཕྲིན་ལས་རྣམས་ཡེ་ཤེས་སྔོན་དུ་འགྲོ་ཞིང་ཡེ་ཤེས་{ཀྱི་}རྗེས་སུ་འབྲང་བ་སྟེ་མཛད་པས་བསྡུས་པ་གསུམ། དུས་གསུམ་གྱི་ཆོས་ཐམས་ཅད་ལ་མ་ཆགས་མ་ཐོགས་པའི་ཡེ་ཤེས་ཀྱི་གཟིགས་པ་འཇུག་པ་མཁྱེན་པས་བསྡུས་པ་གསུམ་སྟེ་བཅོ་བརྒྱད་དོ། །དེ་ཡང་སྔ་མར། འཁྲུལ་དང་ཅ་ཅོ་མི་མངའ་སྟེ། །སྟོན་ལ་དྲན་པ་ཉམས་མི་མངའ། །མཉམ་པར་མ་བཞག་ཐུགས་མི་མངའ། །འདུ་ཤེས་སྣ་ཚོགས་ཀྱང་མི་མངའ། །མ་བརྟགས་བཏང་སྙོམས་མི་མངའ་སྟེ། །འདུན་པ་བརྩོན་འགྲུས་དྲན་པ་དང་། །ཤེས་རབ་རྣམ་གྲོལ་རྣམ་གྲོལ་གྱི། །ཡེ་ཤེས་གཟིགས་པ་ཉམས་མི་མངའ། །ལས་རྣམས་ཡེ་ཤེས་སྔོན་འགྲོ་དང་། །དུས་ལ་ཡེ་ཤེས་སྒྲིབ་པ་མེད། །དེ་ལྟར་བཅོ་བརྒྱད་འདི་དང་གཞན། །སྟོན་པའི་མ་འདྲེས་ཡོན་ཏན་ཡིན། །ཞེས་སོ། །སྦྱོར་ངག་ནི། མ་འདྲེས་པ་བཅོ་བརྒྱད་ཆོས་ཅན། སྐྱེ་འཕགས་གཞན་དང་མ་འདྲེས་པས་དེ་སྐད་ཅེས་བྱ་སྟེ། སངས་རྒྱས་ཉིད་ཀྱི་ཐུན་མོང་མ་ཡིན་པའི་ཡོན་ཏན་དུ་བཞག་པའི་ཕྱིར། གཉིས་པ་ནི། དེ་བཞིན་གཤེགས་པའི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཏེ། མངོན་རྟོགས་རྒྱན་ལས། ཕྱག་ཞབས་འཁོར་ལོས་མཚན་དང་རུས་སྦལ་ཞབས། །ཕྱག་དང་ཞབས་སོར་དྲ་བས་འབྲེལ་བ་དང་། །ཕྱག་ནི་ཞབས་བཅས་འཇམ་ཞིང་གཞོན་ཤ་ཆགས། །འདི་ཡི་སྐུ་ནི་བདུན་དག་མཐོ་བ་དང་། །སོར་མོ་རིང་དང་རྟིང་ཡངས་སྐུ་ཆེ་དྲང་། །ཞབས་འབུར་མི་མངོན་སྤུ་ནི་གྱེན་དུ་ཕྱོགས། །བྱིན་པ་ཨེ་ཎྱ་ཡའི་འདྲ་ཕྱག་རིང་མཛེས། །འདོམས་ཀྱི་སྦ་བ་སྦུབས་སུ་ནུབ་པའི་མཆོག །པགས་པ་གསེར་མདོག་པགས་པ་སྲབ་པ་དང་། །སྤུ་ནི་རེ་རེ་ནས་ཀྱང་གཡས་ལེགས་འཁྲུངས། །ཞལ་མཛོད་སྤུས་བརྒྱན་རོ་སྟོད་སེང་གེ་འདྲ། །འདི་ཡི་དཔུང་པའི་མགོ་ཟླུམ་ཐལ་གོང་རྒྱས། །འདི་ལ་རོ་མི་ཞིམ་པ་རོ་མཆོག་སྣང་། །སྐུ་ནི་ནྱ་གྲོ་ཏ་ལྟར་ཆུ་ཞེང་གབ། །གཙུག་ཏོར་དབུར་ལྡན་ལྗགས་རིང་མཛེས་པ་དང་། །ཚངས་དབྱངས་འགྲམ་པ་སེང་གེ་འདྲ་དང་ཚེམས། །ཤིན་ཏུ་དཀར་དང་ཚད་མཉམ་ཐགས་བཟང་
དང་། །གྲངས་ནི་བཞི་བཅུ་ཐམ་པ་ཚང་བ་དང་། །སྤྱན་ནི་མཐོན་མཐིང་སྤྱན་རྫི་བ་མཆོག་གི །། འདྲ་བ་འདི་དག་སུམ་ཅུ་གཉིས་མཚན། །ཞེས་སོ། །དེ་རྣམས་ནི་ཡོན་ཏན་དྲུག་ཅུ་རྩ་བཞི་སྟེ། རྒྱུད་བླ་མར་ཁྱད་གཞི་མཚན་སོ་གཉིས་དངོས་སུ་གསུངས་ནས་ཁྱད་ཆོས་དཔེ་བྱད་དོན་ལ་ཚང་བའི་དབང་དུ་མཛད་དེ་མ་སྨོས་ཀྱང་། སྤྲོ་ན། སྔ་མ་ལས། ཐུབ་པའི་སེན་མོ་ཟངས་མདོག་དང་། །མདོག་སྣུམ་མཐོ་དང་སོར་མོ་རྣམས། །ཟླུམ་རྒྱས་བྱིན་གྱིས་ཕྲ་བ་དང་། །རྩ་མི་མངོན་དང་མདུད་པ་མེད། །ལོང་བུ་མི་མངོན་ཞབས་མཉམ་དང་། །སེང་གེ་གླང་ཆེན་བྱ་དང་ནི། །ཁྱུ་མཆོག་སྟབས་གཤེགས་གཡས་ཕྱོགས་དང་། །མཛེས་གཤེགས་དྲང་དང་འཁྲིལ་བག་ཆགས། །བྱི་དོར་བྱས་འདྲ་རིམ་པར་འཚམས། །གཙང་དང་འཇམ་དང་དག་པའི་སྐུ། །མཚན་ནི་ཡོངས་སུ་རྫོགས་པ་དང་། །སྐུ་ཡི་ཁོ་ལག་ཡངས་ཤིང་བཟང་། །གོམ་སྙོམས་པ་དང་སྤྱན་གཉིས་ནི། །དག་དང་གཞོན་ཤ་ཅན་ཉིད་དང་། །སྐུ་ཞུམ་མེད་དང་རྒྱས་པ་དང་། །ཤིན་ཏུ་གྲིམས་པའི་སྐུ་ཉིད་དང་། །ཡན་ལག་ཤིན་ཏུ་རྣམ་འབྱེས་དང་། །གཟིགས་པ་སྒྲིབ་མེད་དག་པ་དང་། །དཀུ་ཟླུམ་སྐབས་ཕྱིན་མ་རྙོངས་དང་། །ཕྱང་ངེ་བ་དང་ལྟེ་བ་ནི། །ཟབ་དང་གཡས་ཕྱོགས་འཁྱིལ་བ་དང་། །ཀུན་ནས་ལྟ་ན་སྡུག་པ་དང་། །ཀུན་སྤྱོད་གཙང་དང་སྐུ་ལ་ནི། །རྨེ་བ་གནག་བག་མེད་པ་དང་། །ཕྱག་ནི་ཤིང་བལ་ལྟར་འཇམ་དང་། །ཕྱག་རིས་མདངས་ཡོད་ཟབ་རིང་དང་། །ཞལ་ནི་ཧ་ཅང་མི་རིང་དང་། །མཆུ་ནི་བིམ་པ་ལྟར་དམར་དང་། །ལྗགས་མཉེན་པ་དང་སྲབ་པ་དང་། །དམར་དང་འབྲུག་གི་སྒྲ་ཉིད་དང་། །གསུང་གཉེན་འཇམ་དང་མཆེ་བ་ཟླུམ། །རྣོ་དང་དཀར་དང་མཉམ་པ་དང་། །བྱིན་གྱིས་ཕྲ་དང་ཤངས་མཐོ་དང་། །མཆོག་ཏུ་དག་པ་དག་དང་ནི། །སྤྱན་ཡངས་པ་དང་རྫི་མ་སྟུག །པདྨའི་འདབ་མ་འདྲ་བ་དང་། །སྨིན་ཚུགས་རིང་དང་འཇམ་པ་དང་། །སྣུམ་དང་སྤུ་ནི་མཉམ་པ་དང་། །ཕྱག་རིང་རྒྱས་དང་སྙན་མཉམ་དང་། །ཉམས་པ་རྣམ་པར་སྤངས་པ་དང་། །དཔྲལ་བ་ལེགས་པར་འབྱེས་པ་དང་། །དབྱེས་ཆེ་བ་དང་དབུ་རྒྱས་དང་། །དབུ་སྐྲ་བུང་བ་ལྟར་གནག་དང་། །སྟུག་དང་འཇམ་དང་མ་འཛིངས་དང་། །མི་ཤོར་དྲི་ཞིམ་སྐྱེས་བུ་ཡི། །ཡིད་ནི་འཕྲོག་པར་བྱེད་པ་དང་། །དཔལ་
གྱི་བེའུ་བཀྲ་ཤིས་ནི། །གཡུང་དྲུང་འཁྱིལ་པས་བརྒྱན་པ་སྟེ། །སངས་རྒྱས་དཔེ་བྱད་བཟང་པོར་བཞེད། །ཅེས་སོ། །སྦྱོར་ངག་ནི། མཚན་བཟང་པོ་ཆོས་ཅན། ཁྱོད་ལ་རྣམ་སྨིན་གྱི་ཡོན་ཏན་ཞེས་བྱ་སྟེ། སྔོན་སློབ་ལམ་དུ་རྒྱུ་སོ་སོ་མཐར་ཕྱིན་པར་བསྒྲུབས་པ་ལས་ཡོན་ཏན་དེ་དག་མངོན་དུ་གྱུར་པའི་ཕྱིར། གཉིས་པ་གཞན་དོན་མཛད་པ་ལ་གཉིས། རང་སྣང་སྐུ་གསུམ་དབྱེར་མེད་དུ་བཞུགས་ཚུལ་དང་། དེ་ལས་འཕྲིན་ལས་འབད་མེད་དུ་འབྱུང་ཚུལ་དངོས་སོ། །དང་པོ་ནི། དེ་བཞིན་གཤེགས་པ་རྣམས་གང་དུ་འཚང་རྒྱ་བའི་ཞིང་ནི་དོན་ལ་སངས་རྒྱས་ཀྱི་ས་ཞེས་བྱ་བ་དེ་ཡིན་པས་ཕྱོགས་དང་རིས་སུ་ཆད་པ་མེད་ཅིང་། བདེ་སྟོང་དབྱེར་མི་ཕྱེད་པའི་བདག་ཉིད་ཀྱི་སྟོང་པའི་གཟུགས་བརྙན་གྱི་སྣང་ཆ་འོག་མིན་ཆེན་པོའི་གནས་མཐའ་དང་དབུས་མེད་པ་སྟེ། སྙིང་པོའི་འགྲེལ་ཆུང་ལས། མཐའ་དབུས་མེད་པ་ཆོས་ཀྱི་དབྱིངས། །དེ་ནི་གནས་ཀྱི་བླ་མར་འདོད། །ཅེས་སོ། །དེ་ལྟ་བུའི་རང་སྣང་གི་ཞིང་ཁམས་ཤིན་ཏུ་རྣམ་པར་དག་པ་དེ་ལ་ནི། །དོན་གྱི་འོག་མིན་དང་། འོག་མིན་ཆེན་པོ་དང་། རྡོ་རྗེ་བཙུན་མོའི་བྷ་ག་ལ་སོགས་པའི་མིང་གིས་བསྙད་པ་གང་ཡིན་པ་སྟེ། དེར་སྤངས་རྟོགས་མངོན་དུ་འགྱུར་པའི་དེ་བཞིན་གཤེགས་པ་ཐམས་ཅད་ཀྱང་། དོན་ལ་ཆོས་སྐུའི་ཡེ་ཤེས་གཅིག་གི་ངོ་བོར་བཞུགས་པས། དེའི་གཟིགས་ངོར་མ་དག་པའི་སྣང་བ་གཏན་མེད་པའི་དག་པ་རབ་འབྱམས་ཀྱི་སྣང་བ་ཞི་ཁྲོ་རྒྱལ་བའི་དཀྱིལ་འཁོར་ཆེན་པོར་རང་སྣང་བའི་ཡེ་ཤེས་ལས་འགྲོ་དོན་མཛད་པའི་བརྩེ་བ་དང་། ནུས་མཐུའི་ཡེ་ཤེས་མངའ་བ་ནི་རང་སྣང་གི་གཟུགས་སྐུ་གཉིས་ཏེ། སྐུ་གསུམ་ངོ་བོ་གཅིག་ལ་ལྡོག་ཆ་མ་འདྲེས་པའི་བདག་ཉིད་ཅན་དུ་བཞུགས་པ་ཡིན་ཏེ། རྒྱུ་མཚན། གདོད་མ་ནས་འཁོར་བའི་གནས་སྐབས་སུའང་རིགས་མི་འགྱུར་:མི་༼བའི༽ཡེ་ཤེས་ལྷག་པ་བདེན་པ་དབྱེར་མེད་ཀྱི་ངོ་བོར་བཞུགས་པ་ཉིད་སྒྲིབ་པ་བྲལ་སྟོབས་ཀྱིས་དེ་ལྟར་སྣང་བའི་ཕྱིར། དེ་ལྟར་ཡང་། སྔ་མ་ལས། སྲིད་གསུམ་འགྲོ་བ་ཐམས་ཅད་ཀྱི། །ཕུང་པོ་ཁམས་དང་སྐྱེ་མཆེད་རྣམས། །བརྗོད་མེད་བརྗོད་ཀྱིས་མི་ལང་བ། །དེ་སྙེད་འཁོར་ལོའི་དཀྱིལ་འཁོར་དུ། །མངོན་
རྫོགས་རྒྱལ་པོར་དེ་ཉིད་ངེས། །གཉིས་མེད་ལྷུན་གྲུབ་དཀྱིལ་འཁོར་ན། །ཐམས་ཅད་བདག་ཉིད་རྟག་པར་བཞུགས། །ཞེས་དང་། བརྟག་གཉིས་ལས། ང་ཡིས་འདི་ཀུན་ཁྱབ་པ་སྟེ། །འགྲོ་བའི་རང་བཞིན་གཞན་མ་མཐོང་། །ཞེས་སོ། །གཉིས་པ་ལ་གཉིས། འབད་མེད་དུ་གཞན་དོན་འབྱུང་ཚུལ་དཔེས་མཚོན་པ་དང་། རྟག་ཁྱབ་ལྷུན་གྱིས་གྲུབ་པའི་སྒོ་ནས་འཕྲིན་ལས་ཇི་ལྟར་མཛད་ཚུལ་ལོ། །དང་པོ་ནི། རྒྱུད་བླར། བརྒྱ་བྱིན་རྔ་སྤྲིན་ཚངས་པ་དང་། །ཉི་མ་ནོར་བུ་རིན་ཆེན་བཞིན། །དེ་བཞིན་གཤེགས་པ་སྒྲ་བརྙན་བཞིན། །ནམ་མཁའ་དང་ནི་ས་བཞིན་ནོ། །ཞེས་པའི་དོན། རང་སྣང་གི་སྐུ་གསུམ་ལས་གཡོས་པ་མེད་བཞིན་དུ་དག་མ་དག་གི་གདུལ་བྱ་རྣམས་ལ་རང་རང་གི་སྐལ་བ་དང་འཚམ་པར་གཞན་དོན་འབད་མེད་དུ་འབྱུང་ཚུལ་ཡོད་དེ། ཇི་ལྟར་བཻ་ཌཱུཪྻའི་ས་གཞི་ལ་ལྷའི་དབང་པོའི་གཟུགས་བརྙན་འཆར་བ་བཞིན་དུ་འགྲོ་སེམས་དག་པ་ལ་ཐུབ་པའི་དབང་པོའི་སྐུའི་གཟུགས་བརྙན་འཆར་བ་དང་། ཇི་ལྟར་ལྷའི་རྔ་བོ་ཆེའི་སྒྲས་ལྷ་རྣམས་བག་མེད་པ་ལས་སློང་བ་བཞིན་དུ་སངས་རྒྱས་ཀྱི་གསུང་དེ་ཡང་འབད་རྩོལ་མེད་པར་གདུལ་བྱའི་སྐལ་བ་བཞིན་དུ་ཆོས་སྟོན་པའི་དབྱངས་དང་ལྡན་པ་དང་། ཇི་ལྟར་དབྱར་གྱི་དུས་ན་སྤྲིན་ལས་ལོ་ཏོག་ཕུན་སུམ་ཚོགས་པའི་རྒྱུ་ཆར་ཆུའི་ཕུང་པོ་འབད་མེད་དུ་འབེབས་པ་བཞིན་དུ་ཐུགས་རྗེའི་སྤྲིན་ལས་དམ་པའི་ཆོས་ཀྱི་ཆར་འགྲོ་བའི་དགེ་བའི་ལོ་ཏོག་མངོན་པར་འཕེལ་བའི་རྒྱུར་འབེབས་པ་དང་། ཇི་ལྟར་ཚངས་པ་རང་གི་གནས་ལས་གཡོས་པ་མེད་པར་འདོད་ཁམས་ཀྱི་ལྷའི་ནང་དུ་སྤྲུལ་པ་འབད་མེད་དུ་འབྱུང་བ་བཞིན་དུ་དེ་བཞིན་གཤེགས་པ་དེ་ཡང་ཆོས་ཀྱི་སྐུ་ལས་མ་གཡོས་བཞིན་དུ་གདུལ་བྱ་སྐལ་ལྡན་རྣམས་ལ་འབད་མེད་དུ་སྣང་བ་དང་། ཇི་ལྟར་ཉི་མའི་དཀྱིལ་འཁོར་རྟོག་པ་མེད་ཀྱང་པདྨ་འབྱེད་ཅིང་ཀུ་མུད་ཟུམ་པ་ལ་སོགས་པ་བྱེད་པ་བཞིན་དུ་དེ་བཞིན་གཤེགས་པ་དེ་ཡང་རྣམ་རྟོག་མེད་པར་གདུལ་བྱའི་སྐྱེ་བོའི་པད་ཚལ་རྒྱས་པར་བྱེད་པ་དང་། ཇི་ལྟར་ཡིད་བཞིན་གྱི་ནོར་བུ་འབད་རྩོལ་མེད་པར་དགོས་འདོད་སྟེར་བ་བཞིན་དུ་རང་སྣང་ལས་གཡོ་བ་མེད་པར་གདུལ་བྱའི་རེ་བ་སྐོང་བ་དང་། ཇི་ལྟར་སྒྲ་སྙན་བྲག་ཆ་
ནི་རྣམ་རྟོག་མེད་ཅིང་སྐྱེ་བ་མེད་ཀྱང་རང་འབྱུང་བ་བཞིན་དུ་དེ་བཞིན་གཤེགས་པའི་གསུང་ཡང་རྐན་དང་ལྕེ་ཕྲད་པ་ལ་སོགས་པའི་བྱེད་རྩོལ་མེད་པར་ཆོས་ཀྱི་སྒྲ་རང་འབྱུང་བ་དང་། ཇི་ལྟར་ནམ་མཁའ་ལ་མཐོ་དམན་གྱི་རྣམ་པ་སོགས་གང་ལྟར་སྣང་ཡང་དེ་ལྟ་མ་ཡིན་པ་བཞིན་དུ་དེ་བཞིན་གཤེགས་པ་དེ་ཡང་གདུལ་བྱའི་སྣང་ངོར་ཇི་ལྟར་སྟོན་ཀྱང་དོན་ལ་སྐྱེ་འགག་ཅན་མ་ཡིན་པ་དང་། ཇི་ལྟར་ས་གཞི་ལ་བརྟེན་ནས་ལྗོན་ཤིང་ལ་སོགས་པ་འཕེལ་ཞིང་རྒྱས་པར་བྱེད་པ་བཞིན་དུ་དེ་བཞིན་གཤེགས་པ་དེ་ཡང་རྣམ་རྟོག་མེད་པར་དེ་ལ་བརྟེན་ནས་འགྲོ་བའི་དགེ་བའི་རྩ་བ་མ་ལུས་པ་སྐྱེད་པར་བྱེད་པ་ཡིན་ཏེ། སྔ་མ་ལས། རིན་ཆེན་ལྷ་དབང་སྣང་ཞིང་སྟོན་པ་སྟེ། །ལེགས་པར་འདོམས་མཛད་ལྷ་ཡི་རྔ་དང་འདྲ། །ཁྱབ་བདག་མཁྱེན་དང་བརྩེ་ཆེན་སྤྲིན་ཚོགས་ནི། །མཐའ་ཡས་འགྲོ་ལ་སྲིད་རྩེའི་བར་དུ་ཁྱབ། །ཚངས་བཞིན་ཟག་མེད་གནས་ལས་མི་བསྐྱོད་པར། །སྤྲུལ་པ་རྣམ་པ་དུ་མ་རབ་ཏུ་སྟོན། །ཉི་བཞིན་ཡེ་ཤེས་སྣང་བ་རབ་སྤྲོ་གང་། །རྣམ་དག་རིན་ཆེན་ཡིད་བཞིན་ནོར་འདྲའི་ཐུགས། །རྒྱལ་བ་རྣམས་ཀྱི་གསུང་དེ་བྲག་ཆ་བཞིན་དུ་ཡི་གེ་མེད། །སྐུ་ནི་ནམ་མཁའ་ལྟ་བུར་ཁྱབ་དང་གཟུགས་མེད་རྟག་པ་ཉིད། །ས་བཞིན་འགྲོ་བའི་དཀར་པོའི་ཆོས་ཀྱི་སྨན་རྣམས་མ་ལུས་པའི། །རྣམ་པ་ཀུན་ཏུ་གཞིར་གྱུར་པ་ནི་སངས་རྒྱས་པ་ཡིན་ནོ། །ཞེས་སོ། །དེ་དག་ཀྱང་དཔེ་ལས་ཁྱད་པར་དུ་འཕགས་ཚུལ་གྱིས་ཕྱོགས་རེ་བ་མ་ཡིན་པར་སྒྲུབ་པ་ཡང་། སྔ་མ་ལས། སངས་རྒྱས་གཟུགས་བརྙན་ལྟ་བུ་སྟེ། །དབྱངས་དང་མི་ལྡན་དེ་འདྲ་མིན། །ལྷ་ཡི་རྔ་བཞིན་ཐམས་ཅད་དུ། །དོན་བྱེད་མིན་པ་དེ་འདྲ་མིན། །སྤྲིན་ཆེན་དང་མཚུངས་དོན་མེད་པའི། །ས་བོན་སྤོང་མིན་དེ་འདྲ་མིན། །ཚངས་ཆེན་བཞིན་དུ་གཏན་དུ་ནི། །སྨིན་པར་བྱེད་མིན་དེ་འདྲ་མིན། །ཉི་མའི་གཟུགས་བཞིན་གཏན་དུ་ནི། །མུན་པ་འཇོམས་མིན་དེ་འདྲ་མིན། །ཡིད་བཞིན་ནོར་འདྲ་འབྱུང་བ་ནི། །རྙེད་པར་མི་དཀའ་དེ་འདྲ་མིན། །སྒྲ་སྙན་བཞིན་ཏེ་རྐྱེན་ལས་ནི། །བྱུང་བ་དེ་དང་འདྲ་བའང་མིན། །ནམ་མཁའ་དང་འདྲ་དགེ་བ་ཡི། །གཞི་མིན་དེ་དང་འདྲ་བའང་མིན། །འཇིག་རྟེན་འཇིག་རྟེན་ལས་འདས་པ། །འགྲོ་བའི་ཕུན་ཚོགས་མ་ལུས་པ། །དེ་གནས་པ་ཡིི་རྟེན་ཡིན་
ཕྱིར། །ས་ཡི་དཀྱིལ་འཁོར་དག་དང་འདྲ། །ཞེས་སོ། །གཉིས་པ་ལ་གསུམ། རྟག་པ། ཁྱབ་པ། ལྷུན་གྱིས་གྲུབ་པའི་འཕྲིན་ལས་སོ། །དང་པོ་ནི། དེ་བཞིན་གཤེགས་པའི་འཕྲིན་ལས་ཆོས་ཅན། རྟག་པ་ཡིན་ཏེ། འཁོར་བ་ཇི་སྲིད་མ་སྟོངས་ཀྱི་བར་དུ་རྒྱུན་ཆད་པ་མེད་པའི་ཕྱིར། མངོན་རྟོགས་རྒྱན་ལས། དེ་བཞིན་འཁོར་བ་ཇི་སྲིད་འདིའི། །ལས་ནི་རྒྱུན་མི་ཆད་པར་འདོད། །ཅེས་དང་། རྒྱུད་བླ་ལས། གཞན་གྱི་དབང་གིས་ངེས་འབྱུང་དང་། །བདག་དང་སེམས་ཅན་མཚུངས་གཟིགས་དང་། །མཛད་པ་ཡོངས་སུ་མ་རྫོགས་ཕྱིར། །འཁོར་བ་སྲིད་དུ་མཛད་མི་ཆད། །ཅེས་སོ། །གཉིས་པ་ནི། ཕྲིན་ལས་ཆོས་ཅན། ཁྱབ་པ་ཡིན་ཏེ། ནམ་མཁའ་ལྟར་གདུལ་བྱའི་ཁམས་ལ་ཕྱོགས་རིས་མེད་པར་ཁྱབ་པའི་ཕྱིར། རྒྱུད་བླ་ལས། དེ་ལྟར་ནམ་མཁའི་མཐའ་ཀླས་ཀྱི། །འགྲོ་ལ་རྟག་ཏུ་ལྷུན་གྲུབ་པར། །ཐོགས་མེད་བློ་ལྡན་དེ་ཡིས་ནི། །སེམས་ཅན་དོན་ནི་ཡང་དག་འཇུག །ཅེས་སོ། །གསུམ་པ་ནི། ཕྲིན་ལས་ཆོས་ཅན། ལྷུན་གྱིས་གྲུབ་པ་ཡིན་ཏེ། གདུལ་བྱ་འདུལ་བའི་དུས་ལ་བབ་པ་ན་འབད་རྩོལ་མེད་པར་ངང་གིས་གྲུབ་པའི་ཕྱིར། མདོ་སྡེ་ལས་བརྒྱ་པ་ལས། རྒྱ་མཚོ་ཆུ་སྲིན་གནས་ཀྱི་རླབས། །དུས་ལས་ཡོལ་བར་འགྱུར་སྲིད་ཀྱི། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་མི་མངའ། །ཞེས་སོ། །དེ་ལྟར་དེ་བཞིན་གཤེགས་པའི་འཕྲིན་ལས་ནི་གདུལ་བྱ་སོ་སོའི་སྐལ་བ་དང་འཚམ་པར་འབད་རྩོལ་མེད་པར་ལྷུན་གྲུབ་ཏུ་འབྱུང་བ་ཡིན་ཏེ། སྒྱུ་འཕྲུལ་རྒྱས་པ་ལས། ཐུགས་རྗེ་ཆེན་པོའི་བྱིན་རླབས་ཀྱིས། །ཕྱོགས་བཅུའི་འཇིག་རྟེན་རྡུལ་སྙེད་དུ། །འགྲོ་བའི་འཕྲིན་ལས་བསམ་མི་ཁྱབ། །སྐུ་གསུང་ཐུགས་དང་ཡོན་ཏན་དང་། །ལྷུན་གྱིས་གྲུབ་པའི་འཕྲིན་ལས་ཀྱིས། །གདུལ་བྱ་རྣམས་ནི་ཆུད་མི་ཟོན། །ངན་སོང་སྦྱོང་ཞིང་བྱང་ཆུབ་ཞིང་། །ཡེ་ཤེས་ཚོགས་རྫོགས་ཀུན་ཏུ་སྟོན། །ཅེས་གསུངས་པའི་ཕྱིར་རོ། །དེ་ལྟར་ལེགས་པར་བཤད་པ་འདི་ནི་དེ་བཞིན་གཤེགས་པའི་སྙིང་པོའི་མདོ་དང་། གསེར་འོད་དམ་པ་ལ་སོགས་པ་རྒྱལ་བའི་བཀའ་དྲི་མ་མེད་པ་རྣམས་དང་། དེའི་དགོངས་འགྲེལ་རྒྱལ་ཚབ་མི་ཕམ་མགོན་པོས་མཛད་པའི་ཐེག་པ་ཆེན་པོ་རྒྱུད་བླ་མའི་བསྟན་བཅོས་ལ་སོགས་པ་གསུང་རབ་
རྣམ་པར་དག་པ་རྣམས་ཀྱི་དགོངས་དོན་བཞིན་དུ་ངེས་པ་དོན་གྱི་ཐམས་ཅད་མཁྱེན་གཟིགས་མཁན་ཆེན་བླ་མ་མཆོག་གི་སྡོམ་གསུམ་རྣམ་པར་ངེས་པའི་བསྟན་བཅོས་ལས་བརྩམས་ཏེ་ལེགས་བཤད་ཀྱི་བཀའ་དྲིན་ནོད་པའི་སྐལ་བཟང་དང་པོར་ཐོབ་པའི་ཚེ། རང་བློས་ཇི་ལྟར་ངེས་པ་རྣམས་གཞིར་བཟུང་། ཀུན་མཁྱེན་རྡོ་རྗེ་གཟི་བརྗིད་སོགས་མཁས་གྲུབ་འགྲན་ཟླ་དང་བྲལ་བ་རྣམས་ཀྱི་གསུང་རབ་རྣམས་ལ་ལེགས་པར་བརྟགས་ཏེ་ཡིད་གཞུངས་པར་བྲིས་པས་རྣམ་པར་དག་པའི་བསྟན་བཅོས་སུ་རློམ་སྟེ། རྒྱུད་བླ་མ་ལས། གང་ཞིག་རྒྱལ་བའི་བསྟན་པ་འབའ་ཞིག་གི །དབང་བྱས་རྣམ་གཡེང་མེད་ཡིད་ཅན་གྱིས་བཤད། །ཐར་པ་ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྤྱི་བོས་བླངས། །ཞེས་གསུངས་པའི་རྒྱུ་མཚན་གྱིས་སོ། །བློ་གྲོས་ཀུན་གསལ་བཞིན་གྱི་ཁྱོན་ཡངས་པོར། །གཞི་ལམ་འབྲས་བུའི་མན་ངག་ཉིན་མོར་བྱེད། །དྲི་མེད་ལེགས་བཤད་འོད་ཟེར་འབུམ་བཀྱེ་བས། །རྣམ་དཔྱོད་པདྨོའི་གེ་སར་འཛུམ་གྱིས་བསུ། ༡། ཕྱོགས་འཛིན་གྲུབ་མཐའི་གནས་ལ་མངོན་ཞེན་པས། །རྩོད་བྲལ་མཁས་གྲུབ་དུ་མའི་བཞེད་གཞུང་ཡང་། །མ་དག་འཁྲུལ་པར་སྒྲུབ་གང་བྱིས་པའི་བློ། །ཡིན་ཕྱིར་གནས་ངན་ལེན་དུ་གཞོལ་བ་ཉིད། ༢། ཟུང་འཇུག་ལམ་གྱི་གནད་དོན་མ་རྟོགས་པར། །ཕྱོགས་རེའི་ལྟ་བ་མཛེས་མའི་བསླུ་བྲིད་ཀྱིས། །སེམས་གླང་འཆོལ་པར་དཔྱོད་ལས་རང་བྱུང་གི །། ཡེ་ཤེས་ཆེན་པོར་རྫོགས་པའི་ལྟ་བས་དབེན། ༣། འཁྲུལ་བྲལ་རྒྱལ་བའི་དགོངས་གསང་ངེས་པའི་དོན། །སྙིང་པོའི་སྡེ་སྣོད་རྗེས་འབྲངས་གྲུབ་མཐའི་བཅུད། །ལེགས་བཤད་སྙིང་པོར་ལོངས་ལས་ཐར་འདོད་ལས། །བདེ་ཆེན་སིམ་པ་སྦྱིན་བྱེད་འདི་རྨད་བྱུང་། ༤། དེ་ཕྱིར་བཀའ་ཡི་འཁོར་ལོ་རྩིབས་སྟོང་ཅན། །རིམ་པ་གསུམ་དུ་འཁོར་བས་བདུད་སྡེའི་དཔུང་། །ཕ་མཐར་བྱས་ཚེ་དོན་དམ་རྣམ་ངེས་སྐོར། །ལེགས་བཤད་དབྱངས་སུ་ལེན་པའི་གར་གྱིས་བྲེལ། ༥། གསེར་མངལ་ཅན་དང་མཆོད་སྦྱིན་བརྒྱ་པ་སོགས། །དཀར་ཕྱོགས་སྐྱོང་བའི་བྱ་བ་བདུད་རྩིའི་རོར། །དཔྱོད་པའི་སྲུང་མ་ནུས་མཐུར་ལྡན་རྣམས་ཀྱང་། །ཅི་ཕྱིར་ཐུབ་བསྟན་
སྤེལ་ལ་བརྩོན་མི་བྱེད། ༦། དེ་ལྟར་བདག་གིས་ངལ་བས་བསྒྲུབས་པའི་འབྲས། །རྒྱལ་བསྟན་སྙིང་པོ་འགྱུར་༵མེད༵་འདོད་འཇོའི་གཏེར། །སྐལ་ལྡན་སྐྱེ་རྒུའི་གདུང་སེལ་བྱེད་པོ་རུ། །མི་ཕྱེད་རྡོ༵་རྗེ༵འི་ངོ་བོར་འགྲུབ་གྱུར་ཅིག །༧། སྡོམ་གསུམ་རྣམ་པར་ངེས་པའི་བསྟན་བཅོས་ཀྱི་འགྲེལ་པ་ལེགས་བཤད་ངོ་མཚར་དཔག་བསམ་གྱི་སྙེ་མ་ལས་འཕྲོས་པའི་དཀའ་གནས་འགའ་ཞིག་ཟུར་དུ་བཀོལ་བ་གཞི་ལམ་འབྲས་བུའི་མན་ངག་ངེས་དོན་གྲུབ་མཐའི་སྙིང་པོ་ཞེས་བྱ་བ་འདི་ཡང་རབ་བྱུང་བཅུ་གཉིས་པ་རྣམ་གྱུར་གྱི་ལོ་དབྱར་ཆོས་ཐོག་མཁན་ཆེན་བླ་མ་མཆོག་གི་ཞབས་དྲུང་དུ་སྡོམ་གསུམ་གྱི་གསུང་བཤད་རྣམ་ཞིབ་མོར་ནོས་པའི་ཚེ་དུས་གསུམ་རྒྱལ་བའི་སྤྱི་གཟུགས་བཀའ་དྲིན་མཉམ་མེད་གཏེར་ཆེན་ཆོས་ཀྱི་རྒྱལ་པོ་ཉིད་ཀྱིས་དབུགས་དབྱུང་གི་བཀའི་གནང་བས་མདུན་བསུས་ཏེ་གསུང་བཤད་རྣམས་བརྗེད་བྱང་དུ་སྤེལ་ན་རང་ཉིད་ཀྱི་དྲན་གསོ་དང་གཞན་དག་ལ་ཡང་ཕན་པར་འགྱུར་ཞེས་ཤིན་ཏུ་དགྱེས་པའི་བཀའ་སྩལ་དད་བརྒྱའི་གཙུག་གིས་གུས་པར་མཆོད་དེ་གང་གི་བཀའ་དྲིན་གྱིས་འཚོ་བའི་སྨྱོས་ཀྱི་དགེ་སློང་པདྨ་འགྱུར་མེད་རྒྱ་མཚོ་མི་ཕམ་རྣམ་རྒྱལ་རྡོ་རྗེས་རང་ལོ་ཉེར་ལྔ་པ་གྲོ་ཞུན་ཟླ་བའི་དམར་ཕྱོགས་ཀྱི་ཚེས་བཅུ་མཁའ་འགྲོ་འདུ་བའི་དུས་དགེ་བར་སྔ་དྲོ་བརྟན་པ་སེང་གེའི་དུས་སྦྱོར་ཐོག་རྫོགས་པར་སྦྱར་བ་སྟེ། འདིས་ཀྱང་འགྲོ་ཀུན་བདེ་གཤེགས་སྙིང་པོ་རྟོགས་པའི་རྒྱུར་གྱུར་ཅིག། །།